ADVERTISEMENT

ADVERTISEMENT

അഖില കേരള കവിതാരചനാ മത്സരം നടത്തി

കോതനല്ലൂര്‍: ഇമ്മാനുവല്‍സ് എച്ച്എസ്എസില്‍ മഹാകവി കോതനല്ലൂര്‍ ജോസഫിന്‍റെ സ്മരണാര്‍ഥം അഖില കേരള കവിതാരചനാ മത്സരം നടത്തി. സ്‌കൂള്‍ മാനേജര്‍ ഫാ. സെബാസ്റ്റ്യന്‍ പടിക്കക്കുഴിപ്പിലിന്‍റെ അധ്യക്ഷതയില്‍ നടന്ന യോഗം റിട്ട. എച്ച്ഒഡി വി.എം. മാത്യു ഉദ്ഘാടനം ചെയ്തു. ഹെഡ്മാസ്റ്റര്‍ പി.എം. വര്‍ഗീസ്, പ്രോഗ്രാം കണ്‍വീനര്‍ ജിനു ജോര്‍ജ് എന്നിവര്‍ പ്രസംഗിച്ചു.

വിവിധ ജില്ലകളില്‍നിന്നുള്ള വിദ്യാര്‍ഥികള്‍ പങ്കെടുത്ത കവിതാരചനാ മത്സരത്തിന്‍റെ ജൂറി അംഗങ്ങളായത് വി.എം. മാത്യു, റോസമ്മ സെബാസ്റ്റ്യന്‍ (റിട്ട. പ്രിന്‍സിപ്പല്‍, മലയാള അധ്യാപിക) എന്നിവരാണ്. ജേതാക്കള്‍ക്കുള്ള സമ്മാനവിതരണം 26ന് കന്തീശങ്ങളുടെ ഓഡിറ്റോറിയത്തില്‍ നടക്കുന്ന മഹാകവി കോതനല്ലൂര്‍ ജോസഫ് സ്മൃതിദിനത്തില്‍ നടക്കും.

ADVERTISEMENT

സിഡിഎസ് വാർഷികം നടത്തി

വൈക്കം: ടിവിപുരം പഞ്ചായത്ത് സിഡിഎസിന്‍റെ 26-ാം വാര്‍ഷികാഘോഷം നടത്തി. പഞ്ചായത്ത് പ്രസിഡന്‍റ് ശ്രീജി ഷാജിയുടെ അധ്യക്ഷതയില്‍ നടന്ന വാര്‍ഷികാഘോഷം സി.കെ. ആശ എംഎല്‍എ ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു മുഖ്യപ്രഭാഷണം നടത്തി. സെക്രട്ടറി കെ.ജെ. മാത്യു റിപ്പോര്‍ട്ട് അവതരിപ്പിച്ചു. മുന്‍ സിഡിഎസ് അംഗങ്ങളെ പഞ്ചായത്ത് വൈസ് പ്രസിഡന്‍റ് വി.കെ. ശ്രീകുമാര്‍ ആദരിച്ചു. ജില്ലാ മിഷന്‍ കോ-ഓര്‍ഡിനേറ്റര്‍ അഭിലാഷ് കെ. ദിവാകര്‍ കുടുംബശ്രീ പദ്ധതി വിശദീകരണം നടത്തി. ബ്ലോക്ക് മെംബര്‍ എം.കെ. റാണിമോള്‍, പഞ്ചായത്ത് അംഗങ്ങളായ സെബാസ്റ്റ്യന്‍ ആന്‍റണി, കവിതാ റെജി, എ.കെ. അഖില്‍, ടി.എ. തങ്കച്ചന്‍, ലേവിച്ചന്‍ കാട്ടേത്ത്, സിനിഷാജി, സിഡിഎസ് ചെയര്‍പേഴ്സണ്‍ ആശ അഭിഷേക് തുടങ്ങിയവര്‍ പ്രസംഗിച്ചു.

തലപ്പാറ-എറണാകുളം റോഡിൽ വൻകുഴി; വാഹനാപകടം പതിവാകുന്നു

തലയോലപ്പറമ്പ്: തലപ്പാറ-എറണാകുളം റോഡിൽ രൂപപ്പെട്ട വൻകുഴി വാഹനാപകടം പതിവാക്കുന്നു. വടകര അമ്മംകുന്ന് വളവിൽ വടകര ജുമാ മസ്ജിദിന് സമീപം രൂപപ്പെട്ട വൻകുഴിയിൽ ചാടി നിയന്ത്രണം വിട്ട് നിരവധി വാഹനങ്ങളാണ് അപകടത്തിൽപ്പെടുന്നത്. ഇന്നലെ വൈകുന്നേരം കറിപൗഡർ കയറ്റിവന്ന ട്രാവലർ കുഴിയിൽ ചാടിയതിനെത്തുടർന്ന് നിയന്ത്രണംവിട്ട് മറിഞ്ഞിരുന്നു. അപകടത്തിൽ വാഹനത്തിന് സാരമായ കേടുപാടുകൾ സംഭവിച്ചെങ്കിലും ഡ്രൈവർ പരിക്കേൽക്കാതെ രക്ഷപ്പെട്ടു.കഴിഞ്ഞ ദിവസം വെട്ടിക്കാട്ടുമുക്ക് സ്വദേശികളായ ദമ്പതികൾ സഞ്ചരിച്ച ബൈക്ക് കുഴിയിൽ ചാടി നിയന്ത്രണംവിട്ട് മറിഞ്ഞിരുന്നു. അമിത വേഗത്തിൽ തുടർച്ചയായി വാഹനങ്ങൾ കടന്നുപോകുന്ന റോഡിൽ ആ സമയം മുന്നിലും പിന്നിലും മറ്റു വാഹനങ്ങൾ ഇല്ലാതിരുന്നതിനാലാണ് താഴെവീണ ദമ്പതികൾ രക്ഷപ്പെട്ടത്. ഒരു വശത്ത് ഇറക്കത്തിലുള്ള റോഡായതിനാൽ ഗർത്തം കാണാൻ കഴിയാതെ ഇരുചക്രവാഹനങ്ങൾ ഉൾപ്പെടെയുള്ള വാഹനങ്ങൾ ഇവിടെ അപകടത്തിൽപ്പെടുന്നത് നിത്യസംഭവമാണെന്നു നാട്ടുകാർ പറയുന്നു. അപകടത്തിൽപ്പെടുന്ന പലരും ഭാഗ്യംകൊണ്ട് മാത്രമാണ് രക്ഷപ്പെടുന്നത്. വെള്ളം ഒഴുകിപ്പോകാനുള്ള കാന ഇല്ലാത്തതും റോഡിലെ കുഴിയും ഒരുപോലെ അപകടഭീഷണിയാണ്. കുഴിമൂടുന്നതിന് അധികൃതർ നടപടി സ്വീകരിക്കണമെന്നു നാട്ടുകാർ ആവശ്യപ്പെട്ടു.

കാണക്കാരി ഗവ. ഹോമിയോ ആശുപത്രിക്ക് ആയുഷ് കായകല്‍പ് പുരസ്‌കാരം

കടുത്തുരുത്തി: പ്രഥമ സംസ്ഥാന ആയുഷ് കായകല്‍പ് പുരസ്‌കാരം കോട്ടയം ജില്ലയില്‍ ഹോമിയോപ്പതി വിഭാഗത്തില്‍ കാണക്കാരി ഗവണ്‍മെന്‍റ് ഹോമിയോ ആശുപത്രിക്ക്. കായകല്‍പ് പുരസ്‌കാരങ്ങള്‍ മന്ത്രി വീണാ ജോര്‍ജ് പ്രഖ്യാപിച്ചപ്പോള്‍ കോട്ടയം ജില്ലയില്‍ ഹോമിയോപ്പതി വിഭാഗത്തില്‍ കാണക്കാരി ഹോമിയോ ആശുപത്രി 93.33 ശതമാനം മാര്‍ക്കോടെയാണ് ഒന്നാം സ്ഥാനം നേടിയത്. ആരോഗ്യസ്ഥാപനങ്ങളിലെ ശുചിത്വം, ഫലപ്രദമായ മാലിന്യസംസ്‌കരണം, അണുബാധ നിയന്ത്രണം എന്നിവ പ്രോത്സാഹിപ്പിക്കുവാന്‍ സര്‍ക്കാര്‍ ആവിഷ്‌കരിച്ചതാണ് കായകല്‍പ് പുരസ്‌കാരം. കാണക്കാരി ഹോമിയോ ഡിസ്പെന്‍സറി നിലവില്‍ എന്‍എബിഎച്ച് എന്‍ട്രി സര്‍ട്ടിഫിക്കേഷനും ആയുഷ് ഹെല്‍ത്ത് ആൻഡ് വെല്‍നസ് സെന്‍ററും ഹോമിയോപ്പതി വകുപ്പിന്‍റെ മോഡല്‍ ഡിസ്പെന്‍സറിയുമാണ്. ആശുപത്രി ജീവനക്കാരുടെ കൂട്ടായ പ്രവര്‍ത്തനമാണ് ജില്ലയില്‍ ഒന്നാം സ്ഥാനം നേടാന്‍ സഹായിച്ചതെന്നു കാണക്കാരി പഞ്ചായത്ത് പ്രസിഡന്‍റ് അംബിക സുകുമാരന്‍, മെഡിക്കല്‍ ഓഫീസര്‍ ഡോ. എസ്.അഭിരാജ് എന്നിവര്‍ പറഞ്ഞു.

ഓര്‍മകളുടെ തീരാവേദനയിൽ ഏഴാണ്ട്

കടുത്തുരുത്തി: തോരാമഴയെത്തുടര്‍ന്നുണ്ടായ വെള്ളപ്പൊക്കം തീര്‍ത്ത നാടിന്‍റെ സങ്കടങ്ങളും ദുരിതങ്ങളുടെ നേര്‍ക്കാഴ്ചകളും പുറംലോകത്തെത്തിക്കുന്നതിനിടെ മുണ്ടാറിലെ എഴുമാംകായലില്‍ വള്ളം മറിഞ്ഞ് മുങ്ങിമരിച്ച സജിയുടെയും ബിബിന്‍റെയും മരിക്കാത്ത ഓര്‍മകള്‍ക്കു മുന്നില്‍ മുണ്ടാറും സമീപ നാടുകളും. മുണ്ടാറിലെ വെള്ളപ്പൊക്കബാധിത പ്രദേശങ്ങിലെ ദുരിതത്തിന്‍റെ വാര്‍ത്ത റിപ്പോര്‍ട്ട് ചെയ്യാന്‍ പോയ മാധ്യമപ്രവകര്‍ത്തകർ യാത്ര ചെയ്ത വള്ളം മറിഞ്ഞു രണ്ടുപേര്‍ മരിച്ചിട്ട് ഇന്ന് ഏഴുവര്‍ഷം. കടുത്തുരുത്തി പൂഴിക്കോല്‍ പട്ടശേരില്‍ സജി (46), ചാനല്‍സംഘവുമായി എത്തിയ കാറിന്‍റെ ഡ്രൈവര്‍ തിരുവല്ല ഓതറ കോഴിമല ഉഴത്തില്‍ കൊച്ചിരാമുറിയില്‍ ബിബിന്‍ (27) എന്നിവരാണ് തോണി മറിഞ്ഞ് മരിച്ചത്. കല്ലറ പഞ്ചായത്തിലെ മുണ്ടാറില്‍ വെള്ളപ്പൊക്കത്തെത്തുടര്‍ന്നുണ്ടായ ദുരിതം റിപ്പോര്‍ട്ട് ചെയ്തശേഷം തിരികെ എഴുമാംകായലിലൂടെ വരുമ്പോഴാണ് 2018 ജൂലൈ 23-ന് ഉച്ചയ്ക്ക് ഒന്നോടെ വള്ളം മറിഞ്ഞത്. തുഴച്ചില്‍കാരന്‍ ഉള്‍പ്പെടെ അഞ്ചുപേരാണ് വള്ളത്തിലുണ്ടായിരുന്നത്. തൃശൂര്‍ കുടപ്പുഴമന കെ.ബി. ശ്രീധരന്‍ (29), ചിറക്കടവ് അടിച്ചുമാക്കല്‍ അഭിലാഷ് (29), വള്ളം നിയന്ത്രിച്ചിരുന്ന നാട്ടുകാരനായ എഴുമാന്തുരുത്ത് അനീഷ്ഭവനില്‍ അഭിലാഷ് (40) എന്നിവരെ നാട്ടുകാര്‍ രക്ഷപ്പെടുത്തി. വെള്ളപ്പൊക്കത്തെത്തുടര്‍ന്ന് ജില്ലയിലെ പടിഞ്ഞാറന്‍ മേഖലയില്‍ വ്യാപക നാശനഷ്ടമാണ് അന്നുണ്ടായത്. വേനല്‍ക്കാലത്തുപോലും വെള്ളക്കെട്ടായ സ്ഥലമാണ് മുണ്ടാര്‍. തീര്‍ത്തും ഒറ്റപ്പെട്ട സ്ഥലമായ മുണ്ടാറിലേക്ക് യാത്രാസൗകര്യങ്ങള്‍ തീരെക്കുറവാണ്. പ്രദേശവാസികള്‍ അവരവരുടെ വള്ളങ്ങളിലും കാല്‍നടയായും ചിലയിടങ്ങളില്‍മാത്രം വാഹനങ്ങളിലുമാണ് യാത്ര ചെയ്യുന്നത്. മഴക്കാലമായാല്‍ കിലോമീറ്ററുകള്‍ ചുറ്റിവേണം ഇവര്‍ക്ക് പുറംലോകത്തെത്താന്‍. ഇവരുടെ തീരാദുരിതം റിപ്പോര്‍ട്ട് ചെയ്യാനാണ് ചാനല്‍സംഘം മുണ്ടാറിലെത്തിയത്. അവിടത്തെ ജനങ്ങളുടെ ദുരിതം നേരില്‍കണ്ടറിഞ്ഞതിനുശേഷം ഇവര്‍ തിരികെ എഴുമാന്തുരുത്തിലേക്ക് വരുമ്പോഴായിരുന്നു അപകടം. കടത്തുരുത്തി പഞ്ചായത്തിലെ കൊല്ലങ്കേരിയും കല്ലറ പഞ്ചായത്തിലെ മുണ്ടാറുമായി ബന്ധപ്പെടുന്നതിന് എഴുമാംകായലിന് കുറുകെ നിര്‍മിക്കുന്ന പാലത്തിന്‍റെ ആദ്യഘട്ടം പൂര്‍ത്തിയായതും താത്കാലിക നടപ്പാലം നിര്‍മിച്ചതും മാത്രമാണ് രണ്ടുപേരുടെ മരണം നടന്ന് ഏഴുവര്‍ഷം പിന്നിടുമ്പോള്‍ ഇവിടെ വന്നിട്ടുള്ള മാറ്റം. ഈ പാലം നിര്‍മാണവും നാളുകളായി മുടങ്ങിയിരിക്കുകയാണ്.

കാഞ്ഞിരത്താനത്ത് കുട്ടികള്‍ ഒരുക്കുന്ന സ്‌കൂള്‍ റേഡിയോ

കടുത്തുരുത്തി: റേഡിയോ അവതാരകരാകുന്നതിന്‍റെ ആവേശത്തിലാണ് കാഞ്ഞിരത്താനം സെന്‍റ് ജോണ്‍സ് ഹൈസ്‌കൂളിലെ വിദ്യാര്‍ഥികള്‍. റേഡിയോ എന്നത് പഴയ തലമുറയുടെ വാര്‍ത്താവിനിമയ-വിനോദോപാധി എന്ന സങ്കല്‍പത്തെ മാറ്റിമറിച്ചു കൊണ്ടാണ് സ്‌കൂള്‍ റേഡിയോയുമായി സ്‌കൂളിലെ ഇംഗ്ലീഷ് ക്ലബ് കടന്നുവരുന്നത്. ഇംഗ്ലീഷ് ഭാഷയിലെ നൈപുണ്യ വികസനമാണ് ലക്ഷ്യംവയ്ക്കുന്നതെങ്കിലും വിദ്യാര്‍ഥികളുടെ വിവിധങ്ങളായ കഴിവുകളും ഇതിലൂടെ പരിപോഷിപ്പിച്ചെടുക്കാനാണ് ലക്ഷ്യമിടുന്നത്. ഓരോ ദിനത്തിനും ഊര്‍ജമേകി രാവിലെ പ്രഭാത ചിന്തകളോടെയാണ് റോഡിയോയുടെ തുടക്കം. ഉച്ചയ്ക്കത് അന്താരാഷ്‌ട്ര വാര്‍ത്തകളും കഥകളും സംഭാഷണങ്ങളും ഗാനങ്ങളുമെല്ലാമായിട്ടാവും റേഡിയോ പരിപാടിയിലൂടെ ക്ലാസ് മുറികളിലെത്തുന്നത്. ദി വൈബ് ലോഞ്ച് എന്നാണ് ഭാവങ്ങളുടെ ഈ തിരയൊഴുക്കിന് കുട്ടിക്കൂട്ടം പേര് നല്‍കിയിരിക്കുന്നത്. റേഡിയോ അവതരണത്തിലൂടെ ലഭിക്കുന്ന ആത്മവിശ്വാസം വലുതാണെന്നാണ് കുട്ടികളുടെ അഭിപ്രായം. സ്‌കൂള്‍ റേഡിയോ കുട്ടികളുടെ ഭാവിയുടെ വേദിയാണെന്ന് പരിപാടിയുടെ ഉദ്ഘാടനം നിര്‍വഹിച്ചുകൊണ്ട് സ്‌കൂള്‍ മാനേജര്‍ ഫാ. ജയിംസ് വയലില്‍ പറഞ്ഞു. വിജയദിനാഘോഷത്തോടും രക്ഷാകര്‍തൃസംഗമത്തോടും അനുബന്ധിച്ചായിരുന്നു റേഡിയോയുടെ ഉദ്ഘാടനം. പാലാ അഡാര്‍ട്ട് ഡയറക്ടര്‍ ഫാ. ജയിംസ് പൊരുന്നോലില്‍ മുഖ്യപ്രഭാഷണം നടത്തി. പഞ്ചായത്തംഗം ലിസി പാളിത്തോട്ടം പ്രസംഗിച്ചു. ഹെഡ്മാസ്റ്റര്‍ ബിജു മാത്യു. അധ്യാപകരായ സിസ്റ്റര്‍ ലിനറ്റ് ജോസ്, അക്ഷയ സി. ജോസ്, വിദ്യാര്‍ഥി പ്രതിനിധി സെരൂഗ് എം. ഷിബു എന്നിവര്‍ നേതൃത്വം നല്‍കി.

കൗതുകക്കാഴ്ചയായി പള്ളിമേടയില്‍ അടയ്ക്കാക്കുരുവിയും കുഞ്ഞുങ്ങളും

കടുത്തുരുത്തി: കൗതുകക്കാഴ്ചയായി പള്ളിമേടയില്‍ അടയ്ക്കാപ്പക്ഷിയും കുഞ്ഞുങ്ങളും. വികാരിയുടെ മുറിയുടെ മുന്‍വശത്ത് ടേബിളില്‍ വച്ചിരിക്കുന്ന ചെടിച്ചട്ടിയിലാണ് കൂടുകൂട്ടി മുട്ടിയിട്ട് വിരിഞ്ഞ് കുഞ്ഞുങ്ങളുമായി അടയ്ക്കാത്. കടുത്തുരുത്തി സെന്‍റ് മേരീസ് ഫൊറോന താഴത്തുപള്ളിയുടെ പള്ളിമേടയില്‍ വികാരി ഫാ. മാത്യു ചന്ദ്രന്‍കുന്നേലിന്‍റെ മുറിയുടെ മുന്‍വശത്തെ വാതിലിനോടു ചേര്‍ന്നുള്ള മേശയിലെ ചെടിയിലാണ് പക്ഷിക്കൂടും കുഞ്ഞുങ്ങളുമുള്ളത്. ദിവസങ്ങളോളം പണിപ്പെട്ടാണ് ഈ ചെറിയ ചെടിയില്‍ ഇണപ്പക്ഷികള്‍ കൂടുതീര്‍ത്തത്. സാധാരണയായി മനുഷ്യരുടെ സമീപത്ത് ഇത്തരം പക്ഷികള്‍ കൂടുകൂട്ടുകയോ, മുട്ടയിടുകയോ ചെയ്യാറില്ല. ചെടിയില്‍ പക്ഷികള്‍ കൂടുകൂട്ടുന്നത് മുതല്‍ ഫാ. മാത്യു ചന്ദ്രന്‍കുന്നേലിന്‍റെ ശ്രദ്ധയില്‍പ്പെട്ടിരുന്നു. പക്ഷികളെ ആരും ശല്യം ചെയ്യാതിരിക്കാന്‍ അദ്ദേഹം ശ്രദ്ധിച്ചിരുന്നു. മുട്ട വിരിഞ്ഞ് മുന്ന് പക്ഷിക്കുഞ്ഞുങ്ങളുമായിട്ടാണ് തള്ളപ്പക്ഷി കൂട്ടില്‍ കഴിയുന്നത്. ഇടയ്ക്ക് പുറത്തുപോയി കുഞ്ഞുങ്ങള്‍ക്ക് തീറ്റ കൊണ്ടുവരും. ആണ്‍പക്ഷിയും തീറ്റയുമായി വരാറുണ്ട്. രണ്ടാം നിലയിലാണ് പക്ഷികളുടെ വാസം. പുറത്തേക്കുള്ള ഭിത്തിക്ക് പകരമുള്ള ഗ്രില്ലിലൂടെയാണ് പക്ഷികള്‍ വന്നുപോകുന്നത്. ഏതായാലും പള്ളിമേടയില്‍ വാസമുറപ്പിച്ചിരിക്കുന്ന അടയ്ക്കാപ്പക്ഷിയും കുടുംബവും കാഴ്ചക്കാരിലും കൗതുകമുണര്‍ത്തുകയാണ്.

വേമ്പനാട്ടുകായലിൽ കക്കലഭ്യത കുറഞ്ഞു : പരമ്പരാഗത കക്കാവാരൽ തൊഴിലാളികൾ പ്രതിസന്ധിയിൽ

വൈക്കം: വേമ്പനാട്ടുകായലിലെ അനധികൃതമായ മല്ലിക്കക്ക ഖനനവും കാലാവസ്ഥാ വ്യതിയാനവുംമൂലം കക്കയുടെ ലഭ്യതയിൽ വൻ കുറവുണ്ടായത് പരമ്പരാഗത കക്കാവാരൽ തൊഴിലാളികളുടെ ജീവിതം കടുത്ത പ്രതിസന്ധിയിലാക്കുന്നു. വലിയ കക്കയുടെ നാലിലൊന്നു വലിപ്പംപോലുമാകുന്നതിനു മുമ്പ് സ്വകാര്യവ്യക്തികൾ തൊഴിലാളികളെ ഉപയോഗിച്ചു കക്ക വാരിക്കടത്തുന്നതും കായൽ മലിനീകരണവുമാണ് കക്കയുടെ ലഭ്യത കുറയ്ക്കുന്നതെന്ന് തൊഴിലാളികളും ആരോപിക്കുന്നു. കക്ക കുറഞ്ഞത് സഹകരണ സംഘങ്ങളെയും അടച്ചുപൂട്ടലിന്‍റെ വക്കിലെത്തിക്കുകയാണ്. ഫിഷറീസ് അധികൃതർക്ക് കായലിലെ അനധികൃത പ്രവർത്തനങ്ങൾ ചെറുക്കാൻ ബോട്ടുകളടക്കം സർക്കാർ ലഭ്യമാക്കിയിട്ടുണ്ടെങ്കിലും പരിശോധന നടക്കുന്നില്ലെന്നും പേരിന് ഏതാനും കുട്ട മല്ലിക്കക്ക വാരി വരുന്നവരെ ഫിഷറീസ് അധികൃതർ പിടികൂടി നടപടിയെടുത്തെന്ന് വരുത്തിത്തീർക്കുകയാണെന്നും തൊഴിലാളികൾ ആരോപിക്കുന്നു. വൈക്കം, ടിവിപുരം, തലയാഴം, വെച്ചൂർ ഭാഗങ്ങളിൽ കക്ക കുറഞ്ഞതോടെ തൊഴിലാളികൾ ആലപ്പുഴ ജില്ലയിലെ മണ്ണഞ്ചേരി, റാണി തുടങ്ങിയ സ്ഥലങ്ങളിലേക്കാണ് പോകുന്നത്. കിലോമീറ്ററുകൾ അകലെ പോകുന്നതിനാൽ യമഹ എഞ്ചിൻ ഘടിപ്പിച്ച വള്ളത്തിൽ ഡീസലിന് പ്രതിദിനം 300 രൂപയോളം മുടക്കേണ്ടി വരുന്നു. പുലർച്ചെ പോയി മണിക്കൂറുകളോളം അധ്വാനിച്ചാലും ആയിരം രൂപപോലും ലഭിക്കുന്നില്ല. വലിപ്പമനുസരിച്ച് ഒരു കിലോ കക്ക ഇറച്ചിക്ക് 130 രൂപ മുതൽ 200 രൂപ വരെയാണ് വില. കക്ക ലഭിക്കുന്നത് കുറവായതോടെ ഇറച്ചി വിറ്റു ദൈനംദിന ജീവിതച്ചെലവുകൾ നടത്തിയിരുന്ന തൊഴിലാളി കുടുംബങ്ങൾക്ക് ഇപ്പോൾ അതിന് കഴിയുന്നില്ല. അനധികൃത കക്ക ഖനനത്തിലേർപ്പെടുന്നവർക്ക് വലിയ തോതിൽ കൂലി ലഭിക്കുന്നതിനാൽ ഒരുപറ്റം തൊഴിലാളികളും ഈ നിയമ ലംഘനത്തിനു കൂട്ടുനിൽക്കുകയാണെന്ന് തൊഴിലാളികൾ കുറ്റപ്പെടുത്തുന്നു. മല്ലിക്കക്ക നിക്ഷേപിക്കൽ പുനരാരംഭിക്കണം വൈക്കം: വൈക്കം കായലിൽ വിവിധ പഞ്ചായത്തുകളുടെ ആഭിമുഖ്യത്തിൽ കക്കലഭ്യത വർധിപ്പിക്കാൻ മല്ലിക്കക്ക നിക്ഷേപിച്ചിരുന്നത് പുനരാരംഭിച്ചില്ലെങ്കിൽ കക്ക വാരൽത്തൊഴിലാളികൾ പട്ടിണിയിലാകും. തുടർച്ചയായി പഞ്ചായത്തുകൾ മല്ലിക്കക്ക നിക്ഷേപിച്ചിരുന്നത് ഏതാനും വർഷങ്ങളായി മുടങ്ങിയിരിക്കുകയാണ്. മല്ലിക്കക്ക നിക്ഷേപിക്കൽ പുനരാരംഭിക്കാൻ പഞ്ചായത്ത് അധികൃതർ നടപടി സ്വീകരിക്കണമെന്ന് കക്കവാരൽ തൊഴിലാളികൾ ആവശ്യപ്പെട്ടു.

കേരള കോണ്‍ഗ്രസ് കുടുംബ സംഗമം

ചങ്ങനാശേരി: ജനവിരുദ്ധ നയങ്ങള്‍ മാത്രം തുടരുന്ന പിണറായി സര്‍ക്കാര്‍ അധികാരത്തില്‍നിന്നും പുറത്തുപോയി യുഡിഎഫ് സര്‍ക്കാര്‍ അധികാരത്തില്‍ വരുമെന്ന് കേരള കോണ്‍ഗ്രസ് ഉന്നതാധികാര സമിതിയംഗം വി.ജെ. ലാലി. കേരള കോണ്‍ഗ്രസ് ചീരഞ്ചിറ മേഖല കുടുംബ സംഗമം ഉദ്ഘാടനം ചെയ്യുകയായിരുന്നു അദ്ദേഹം. യൂത്ത് ഫ്രണ്ട് ജില്ലാ സെക്രട്ടറി അഭിലാഷ് വര്‍ഗീസ് അധ്യക്ഷത വഹിച്ചു. കുവൈറ്റ് ഇന്ത്യന്‍ സ്റ്റാര്‍ വോയിസ് ഗ്രാന്‍ഡ് ഫിനാലേയില്‍ ജേതാവായ ഹെലന്‍ സൂസന്‍ ജോസിന് പഞ്ചായത്ത് പ്രസിഡന്‍റ് മിനി വിജയകുമാര്‍ മെമന്‍റോ സമ്മാനിച്ചു. പുതിയ അംഗങ്ങള്‍ക്കു മെംബര്‍ഷിപ്പ് മണ്ഡലം പ്രസിഡന്‍റ് വിനു മൂലയില്‍ വിതരണം ചെയ്തു. ജസ്റ്റിന്‍ പാലത്തിങ്കല്‍, ലിസി പവ്വക്കര, വിനോദ് കറുകംപള്ളി, ജിത്തു പി. രാജ്, ടോണി സിജോ, ഷീജ കെ. കുരുവിള, ജിജി ജിതിന്‍, മാത്യു പ്രിന്‍സ് എന്നിവര്‍ പ്രസംഗിച്ചു.

കാർത്യായനിയമ്മയെ ആദരിച്ചു

കൂരോപ്പട: കൂരോപ്പട വില്ലേജ് ഓഫീസിനു സൗജന്യമായി സ്ഥലം സംഭാവന ചെയ്ത ആധുനിക കൂരോപ്പടയുടെ ശില്പി ആശാരിപറമ്പിൽ ഗോപാലപിള്ളയുടെ മകൾ കാർത്ത്യായനിയമ്മയെ ചാണ്ടി ഉമ്മൻ എംഎൽഎ, ജില്ലാ കളക്ടർ ജോൺ വി. സാമുവൽ എന്നിവർ പൊന്നാടയണിയിച്ച് ആദരിച്ചു. ജില്ലാ പഞ്ചായത്തംഗം രാധാ വി. നായർ, ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി, പഞ്ചായത്ത് പ്രസിഡന്‍റ് അമ്പിളി മാത്യൂ, ബ്ലോക്ക് പഞ്ചായത്തംഗം ടി.എം. ജോർജ് , പഞ്ചായത്തംഗങ്ങളായ അനിൽ കൂരോപ്പട, കുഞ്ഞൂഞ്ഞമ്മ കുര്യൻ, ബാബു വട്ടുകുന്നേൽ, സന്ധ്യാ സുരേഷ്, ഷീലാ ചെറിയാൻ, വില്ലേജ് ഓഫീസർ വിനു തുടങ്ങിയവർ പങ്കെടുത്തു. വില്ലേജ് ഓഫീസ് കൂടാതെ പഞ്ചായത്ത് ഓഫീസ്, പഞ്ചായത്ത് ഷോപ്പിംഗ് കോംപ്ലക്സ്‌, ചന്ത മൈതാനം, പബ്ലിക് ലൈബ്രറി എന്നിവയ്ക്കും ഇന്നു കോടികൾ വിലമതിക്കുന്ന സ്ഥലം സൗജന്യമായി നൽകിയത് ആശാരിപറമ്പിൽ ഗോപാലപിള്ളയായിരുന്നു.

റോഡുകളുടെ നിര്‍മാണത്തിനു തുടക്കം

കൊല്ലാട്: പനച്ചിക്കാട് പഞ്ചായത്തിലെ വിവിധ റോഡുകളുടെ നിര്‍മാണത്തിനു തുടക്കംകുറിച്ചു. തിരുവഞ്ചൂര്‍ രാധാകൃഷ്ണന്‍ എംഎല്‍എയുടെ നിര്‍ദേശപ്രകാരമാണ് റോഡ് നിര്‍മാണത്തിന് സര്‍ക്കാര്‍ ഫണ്ടില്‍നിന്നും പണം അനുവദിച്ചത്. ഒന്ന്, 23 വാര്‍ഡുകളെ ബന്ധിപ്പിക്കുന്ന ദിവാന്‍കവല-കാലായിക്കവല റോഡിന് 30 ലക്ഷം രൂപയും 23-ാം വാര്‍ഡിലെ മുണ്ടക്കല്‍ തോപ്പിക്കുളം -കാലായിക്കവല-ദിവാന്‍പുരം റോഡിന് 40 ലക്ഷം രൂപയും 20-ാം വാര്‍ഡിലെ പൂവന്തുരുത്ത് ഗവണ്‍മെന്‍റ് എല്‍പിഎസ് -ലക്ഷംവീട്-കടുവാക്കുളം റോഡിന് 20 ലക്ഷം രൂപയും നാലാം വാര്‍ഡിലെ കല്ലുങ്കല്‍ കടവ്-പുവന്തുരുത്ത് കാട്ടാംപാക്ക് റോഡിന് 30 ലക്ഷം രൂപയും അനുവദിച്ചു. റോഡുകളുടെ നിര്‍മാണോദ്ഘാടനം തിരുവഞ്ചൂര്‍ രാധാകൃഷ്ണന്‍ എംഎല്‍എ നിര്‍വഹിച്ചു. ബ്ലോക്ക് പഞ്ചായത്തംഗം സിബി ജോണ്‍ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ആനി മാമ്മന്‍, ജില്ലാ പഞ്ചായത്തംഗം പി.കെ. വൈശാഖ്, പഞ്ചായത്ത് അംഗം മിനി ഇട്ടിക്കുഞ്ഞ്, പി.ജി. അനില്‍കുമാര്‍, ജയന്തി ബിജു, മഞ്ജു രാജേഷ്, ഉദയകുമാര്‍, വത്സല അപ്പുക്കുട്ടന്‍, അജിത മനോജ്, ജയന്‍ ബി. മഠം, കുര്യന്‍ വര്‍ക്കി, ടി.ടി. ബിജു എന്നിവര്‍ പ്രസംഗിച്ചു.

ദൈവംപടി-പാലമറ്റം റോഡ് ഇനി ഹൈടെക്ക്; ₹ 33.09 ലക്ഷം മുടക്കി നിര്‍മാണം പൂര്‍ത്തിയാക്കി

മാടപ്പള്ളി: മാടപ്പള്ളി പഞ്ചായത്തില്‍ വാര്‍ഡ് നാലിൽപ്പെട്ട ദൈവംപടി-പാലമറ്റം റോഡ് മികച്ച രീതിയില്‍ നവീകരിച്ചതിന്‍റെ ഉദ്ഘാടനം അഡ്വ. ജോബ് മൈക്കിള്‍ എംഎല്‍എ നിര്‍വഹിച്ചു. ദീര്‍ഘനാളുകളായി സഞ്ചാരയോഗ്യമല്ലാതെ തകര്‍ന്നുകിടന്നിരുന്ന റോഡ് എംഎല്‍എയുടെ ശ്രദ്ധയില്‍പ്പെടുത്തിയ ഉടന്‍ നവീകരിക്കുന്നതിനുള്ള പ്രവര്‍ത്തനങ്ങള്‍ സ്വീകരിക്കുകയായിരുന്നു. ജില്ലാ പഞ്ചായത്തിന്‍റെ ആസ്തിയിലുള്ള റോഡ് നവീകരിക്കാതെ കിടന്നതിനാല്‍ കാല്‍നടയാത്ര പോലും കഴിയാത്ത സാഹചര്യമായിരുന്നു. തുടർന്ന് എംഎല്‍എ ഫണ്ടനുവദിച്ചാണ് റോഡ് നിര്‍മാണം ടെന്‍ഡര്‍ ചെയ്ത് ആരംഭഘട്ടത്തിലേക്ക് എത്തിയത്. മാടപ്പള്ളി പഞ്ചായത്ത് പ്രസിഡന്‍റ് മണിയമ്മ രാജപ്പന്‍ അധ്യക്ഷത വഹിച്ച യോഗത്തില്‍ ബ്ലോക്ക് പഞ്ചായത്ത് മെംബര്‍ അലക്‌സാണ്ടര്‍ പ്രാക്കുഴി, വാര്‍ഡ് മെംബര്‍ കെ.കെ. മോഹനന്‍, ഷിനു വി., ഷാജി ടി. ജോര്‍ജ്, അനു ഐസക്, ലീലാമ്മ, മല്ലിക തുടങ്ങിയവര്‍ പ്രസംഗിച്ചു.

ഉമ്മൻ ചാണ്ടി ജനഹൃദയങ്ങൾ കീഴടക്കിയ ജനകീയ മുഖ്യമന്ത്രി: തിരുവഞ്ചൂർ

ഏറ്റുമാനൂർ: വികസനത്തോടൊപ്പം കരുതലുമായി ജനഹൃദയങ്ങൾ കീഴടക്കിയ ജനകീയ മുഖ്യമന്ത്രിയായിരുന്നു ഉമ്മൻ ചാണ്ടിയെന്ന് തിരുവഞ്ചൂർ രാധാകൃഷ്ണൻ എംഎൽഎ. കോൺഗ്രസ്‌ ഏറ്റുമാനൂർ മണ്ഡലം കമ്മിറ്റി നടത്തിയ ഉമ്മൻ ചാണ്ടി അനുസ്മരണവും ചികിത്സാ ധനസഹായ വിതരണവും കുടുംബസഹായ ഫണ്ടും വിദ്യാഭ്യാസ അവാർഡ് വിതരണ ചടങ്ങും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മണ്ഡലം പ്രസിഡന്‍റ് പി.വി. ജോയി പൂവംനിൽക്കുന്നതിൽ അധ്യക്ഷത വഹിച്ചു. ഡിസിസി പ്രസിഡന്‍റ് നാട്ടകം സുരേഷ് മുഖ്യപ്രഭാഷണം നടത്തി. ഡിസിസി വൈസ് പ്രസിഡന്‍റ് അഡ്വ. ജി. ഗോപകുമാർ, ഡിസിസി എക്സിക്യൂട്ടീവ് കമ്മിറ്റി മെംബർ കെ.ജി. ഹരിദാസ്, ജയിംസ് തോമസ് പ്ലാക്കിത്തൊട്ടിയിൽ, ലൗലി ജോർജ്, ബിജു കൂമ്പിക്കൻ, വിഷ്ണു ചെമ്മുണ്ടവള്ളി, പ്രിയ സജീവ് എന്നിവർ പ്രസംഗിച്ചു.

സിഎസ്‌ഐ മധ്യകേരള മഹായിടവക ദിനാഘോഷം 25ന് കോട്ടയത്ത്

കോട്ടയം: സിഎസ്‌ഐ മധ്യകേരള മഹായിടവക ദിനാഘോഷം 25ന് കോട്ടയത്ത് മഹായിടവക ആസ്ഥാനത്ത് നടക്കും. രാവിലെ എട്ടിന് മഹായിടവക ആസ്ഥാനത്ത് ബിഷപ് ഡോ: മലയില്‍ സാബു കോശി ചെറിയാന്‍ പതാക ഉയര്‍ത്തും. 10 മുതല്‍ കോട്ടയം സിഎസ്ഐ റിട്രീറ്റ് സെന്‍ററില്‍ നടക്കുന്ന ചരിത്ര സെമിനാര്‍ പദ്മശ്രീ ഡോ.സി.ഐ. ഐസക് ഉദ്ഘാടനം ചെയ്യും. കേരള സമൂഹ നിര്‍മിതിയും സഭയുടെ സാക്ഷ്യവും എന്ന വിഷയത്തില്‍ നടക്കുന്ന സെമിനാറില്‍ ബിഷപ് മാണി തിയോളജിക്കല്‍ ഇന്‍സ്റ്റിറ്റ്യൂട്ട് പ്രിന്‍സിപ്പല്‍ റവ.ഡോ. വിജി വര്‍ഗീസ് ഈപ്പന്‍ മോഡറേറ്ററായിരിക്കും. മൂന്നിനു മഹായിടവകദിന പൊതുസമ്മേളനം ഡോ. ശശി തരൂര്‍ എംപി ഉദ്ഘാടനം ചെയ്യും. ബിഷപ് ഡോ. മലയില്‍ സാബു കോശി ചെറിയാന്‍ അധ്യക്ഷത വഹിക്കും. മന്ത്രി വി.എന്‍. വാസവന്‍ മുഖ്യപ്രഭാഷണം നടത്തും. ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്ക ബാവ അനുഗ്രഹപ്രഭാഷണം നടത്തും. ബിഷപ് തോമസ് സാമുവല്‍, കെ. ഫ്രാന്‍സിസ് ജോര്‍ജ് എംപി, തിരുവഞ്ചൂര്‍ രാധാകൃഷ്ണന്‍ എംഎല്‍എ, മുനിസിപ്പല്‍ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍, മഹായിടവക അല്മായ സെക്രട്ടറി അഡ്വ. സ്റ്റീഫന്‍ ജെ. ഡാനിയേല്‍, വൈദിക സെക്രട്ടറി റവ. അനിയന്‍ കെ. പോള്‍, ട്രഷറര്‍ റവ. ജിജി ജോണ്‍ ജേക്കബ്, രജിസ്ട്രാര്‍ ഷീബ തരകന്‍, ഡോ: ജെസി സാറ കോശി എന്നിവര്‍ പ്രസംഗിക്കും. 1879ല്‍ തിരുവിതാംകൂര്‍-കൊച്ചി ആംഗ്ലിക്കൻ മഹായിടവകയായിട്ടായിരുന്നു രൂപീകരണം. 1947ല്‍ സിഎസ്ഐ സഭയുടെ രൂപീകരണത്തോടെ മധ്യകേരള മഹായിടവകയായി പുനര്‍നാമകരണം ചെയ്യപ്പെട്ടു. 1879 ജൂലൈ 25ന് തിരുവിതാംകൂര്‍-കൊച്ചി ആംഗ്ലിക്കന്‍ മഹായിടവകയുടെ പ്രഥമ ബിഷപ്പായി ജോണ്‍ മാര്‍ട്ടിന്‍ഡ്രല്‍ സ്പീച്ചിലി ലണ്ടനിലെ സെന്‍റ് പോള്‍സ് കത്തീഡ്രലില്‍ സ്ഥാനാരോഹണം ചെയ്യപ്പെട്ട ദിനമാണ് മഹായിടവക ദിനമായി ആചരിക്കുന്നത്.

മെഡി. കോളജ് ആശുപത്രിയിൽ ഇസിജി മുറിയുടെ വാർക്കപ്പാളി അടർന്നുവീണു

ഗാന്ധിനഗർ: മെഡിക്കൽ കോളജ് ആശുപത്രി രണ്ടാം വാർഡിന് സമീപത്തെ ഇസിജി മുറിയിലെ വാർക്കപ്പാളി അടർന്നുവീണു. ഇന്നലെ ഉച്ചയ്ക്ക് മുമ്പാണ് സംഭവം. രണ്ടു ജീവനക്കാരാണ് ഇവിടെയുള്ളത്. ഇവർ വാർഡിൽ രോഗികളുടെ ഇസിജിയെടുക്കാൻ പോയതിനാൽ അപകടമുണ്ടാകാതെ രക്ഷപ്പെട്ടു. വാർക്കപ്പാളി അടർന്നുവീണ ഭാഗത്തെ കമ്പിയെല്ലാം തുരുമ്പിച്ച നിലയിലാണ്. സംഭവത്തെത്തുടർന്ന് ഇസിജി മുറി പുതിയ സർജിക്കൽ ബ്ലോക്കിലേക്ക് മാറ്റി. ഉച്ചകഴിഞ്ഞ് ഇവിടെയുള്ള ചികിത്സാ ഉപകരണങ്ങളെല്ലാം സർജിക്കൽ ബ്ലോക്കിലെ പുതിയ മുറിയിലേക്ക് കൊണ്ടുപോയി.

റവ. ഡോ. സേവ്യര്‍ ജെ. പുത്തന്‍കളം പൗരോഹിത്യ സുവര്‍ണ ജൂബിലി നിറവില്‍

ചങ്ങനാശേരി: റവ. ഡോ. സേവ്യര്‍ ജെ. പുത്തന്‍കളം പൗരോഹിത്യസുവര്‍ണ ജൂബിലി നിറവില്‍. പുത്തന്‍കളം കുടുംബസംഗമവും പൗരോഹിത്യ സുവര്‍ണ ജൂബിലി ആഘോഷവും നാളെ ചങ്ങനാശേരി സെന്‍റ് മേരീസ് മെത്രാപ്പോലീത്തന്‍ പള്ളിയില്‍ നടക്കും. രാവിലെ 9.15ന് ജൂബിലേറിയന്‍റെ മുഖ്യകാര്‍മികത്വത്തില്‍ വിശുദ്ധ കുര്‍ബാന. ആര്‍ച്ച്ബിഷപ് എമെരറ്റസ് മാര്‍ ജോസഫ് പെരുന്തോട്ടം കുര്‍ബാനമധ്യേ സന്ദേശം നല്‍കും. 11ന് പാരിഷ്ഹാളില്‍ നടക്കുന്ന സമ്മേളനം കര്‍ദിനാള്‍ മാര്‍ ജോര്‍ജ് ആലഞ്ചേരി ഉദ്ഘാടനം ചെയ്യും. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. വികാരി ജനറാള്‍ മോണ്‍. ആന്‍റണി എത്തയ്ക്കാട്ട്, ജോബ് മൈക്കിള്‍ എംഎല്‍എ, കുടുംബയോഗം പ്രസിഡന്‍റ് റവ. ഡോ. ടോം പുത്തന്‍കളം, സുപ്പീരിയര്‍ ജനറാള്‍ സിസ്റ്റര്‍ ലിറ്റി എഫ്‌സിസി, മുന്‍ പ്രൊവിന്‍ഷ്യാള്‍ ഡോ. സിസ്റ്റര്‍ പ്രസന്ന സിഎംസി, എന്‍.സി. തോമസ് എന്നിവര്‍ പ്രസംഗിക്കും. 1949 ഓഗസ്റ്റ് 26ന് പുളിങ്കുന്ന് കണ്ണാടി പുത്തന്‍കളം ജോസഫ്-ഏലിയാമ്മ ദമ്പതികളുടെ മകനായാണ് റവ. ഡോ. സേവ്യര്‍ ജെ. പുത്തന്‍കളത്തിന്‍റെ ജനനം. 1975 ഡിസംബര്‍ 17ന് പൗരോഹിത്യം സ്വീകരിച്ചു. ബംഗളൂരു ധര്‍മാരാം, ബെല്‍ജിയം ലുവൈന്‍ കാത്തലിക് സര്‍വകലാശാല എന്നിവിടങ്ങളിലാണ് ഉപരിപഠനം. സീറോ മലബാര്‍ എക്യുമെനിക്കല്‍ കമ്മീഷന്‍ സെക്രട്ടറി, തിയോളജി പ്രഫസര്‍ എന്നീ നിലകളിലും വിവിധ ഇടവകകളില്‍ വികാരിയായും സേവനം അനുഷ്ഠിച്ചു. വിവിധ പുസ്തകങ്ങളുടെ രചയിതാവുമാണ്. ഇത്തിത്താനം സെന്‍റ് ജോസഫ്‌സ് പ്രീസ്റ്റ് ഹോമില്‍ വിശ്രമജീവിതം നയിച്ചുവരികയാണ്.

മെഡി. കോളജ് ആശുപത്രി ഗൈനക്കോളജി വിഭാഗത്തിലെ നടുത്തളം ചോർന്നൊലിക്കുന്നു

ഗാന്ധിനഗർ: മെഡിക്കൽ കോളജ് ആശുപത്രി ഗൈനക്കോളജി വിഭാഗത്തിൽ ചോർച്ച. ഈ വിഭാഗത്തിലെ ഫാർമസി പ്രവർത്തിക്കുന്ന നടുത്തളത്തിന് മുകളിലിട്ടിരിക്കുന്ന പോളി കാർബണേറ്റ് ഷീറ്റ് പൊട്ടിയതാണ് ചോർച്ചയ്ക്ക് കാരണം. ഇതേത്തുടർന്ന് മഴ പെയ്യുമ്പോൾ വലിയ വെള്ളക്കെട്ടാണ് നടുത്തളത്തിൽ ഉണ്ടാകുന്നത്. നടുത്തളത്തിൽ പ്രവർത്തിക്കുന്ന ഫാർമസിയിൽ മരുന്ന് വാങ്ങാനെത്തുന്നവർ വെള്ളത്തിൽ നീന്തണമെന്നതാണ് സ്ഥിതി. തറ ടൈൽ ആയതിനാൽ പലരും തെന്നിവീണതായും രോഗികളുടെ കൂട്ടിരിപ്പുകാർ ചൂണ്ടിക്കാട്ടി. വെള്ളം ഫാർമസിയുടെ മുകളിലേക്കും വീഴുന്നുണ്ട്. ഇതേത്തുടർന്ന് നനഞ്ഞും തണുപ്പടിച്ചും മരുന്നുകൾ കേടാകാതെ സൂക്ഷിക്കാൻ ഫാർമസിയുടെ മുകൾ ഭാഗത്ത് പടുത ഇട്ടിരിക്കുകയാണ്. ദിവസേന നൂറുകണക്കിന് ഗർഭിണികളും മറ്റു രോഗങ്ങൾ ബാധിച്ച സ്ത്രീകളും ഇവിടെ ചികിത്സ തേടുന്നുണ്ട്. തൊട്ടടുത്തനിലയിൽ നിരവധി നവജാത ശിശുക്കളും പ്രസവം കാത്ത് കഴിയുന്ന ഗർഭിണികളുമുണ്ട്. നടുത്തളത്തിൽ മഴവെള്ളം പതിച്ച് വെള്ളക്കെട്ട് രൂപപ്പെടുന്നതിൽ വലിയ പ്രതിഷേധം ഉയർന്നിട്ടുണ്ട്. നടുത്തളത്തിനു മുകളിൽ പുതിയ പോളി കാർബണേറ്റ് ഷീറ്റ് ഇടുന്നതിന് പിഡബ്ല്യുഡി നടപടിക്രമങ്ങളെല്ലാം പൂർത്തീകരിച്ചെന്നും മഴ ശമിച്ചാലുടൻ റൂഫ് മാറ്റുമെന്നും ആശുപത്രി അധികൃതർ പറഞ്ഞു.

എംഎഎച്ച്ആര്‍എം പരീക്ഷാഫലം: മാര്‍ ആഗസ്തീനോസ് കോളജിന് ഒന്നും രണ്ടും റാങ്കുകള്‍

രാമപുരം: എംജി സര്‍വകലാശാലയുടെ എംഎഎച്ച്ആര്‍എം പരീക്ഷാഫലത്തില്‍ രാമപുരം മാര്‍ ആഗസ്തീനോസ് കോളജിന് അഭിമാന നേട്ടം. കോളജിലെ അനുഷ്‌ക ഷൈന്‍ ഒന്നാം റാങ്കും അഞ്ജലി എസ്. മോഹന്‍ രണ്ടാം റാങ്കും നേടി. പൊന്‍കുന്നം ചെറുവള്ളി അക്ഷയയില്‍ വി. ഷൈന്‍റെയും സന്ധ്യയുടെയും മകളായ അനുഷ്‌ക പാലാരിവട്ടം മണ്‍സൂണ്‍ എംപ്രസില്‍ എച്ച്ആര്‍ ട്രെയിനിയായി ജോലി ചെയ്യുന്നു. വലവൂര്‍ വളവില്‍വീട്ടില്‍ ഇ.പി. മോഹനന്‍റെയും ശോഭനകുമാരിയുടെയും മകളായ അഞ്ജലി എച്ച്ആര്‍ എക്സിക്യൂട്ടീവായി ജോലി ചെയ്യുന്നു. നാക് അക്രഡിറ്റേഷനില്‍ ആദ്യ സൈക്കിളില്‍ത്തന്നെ എ ഗ്രേഡ് കരസ്ഥമാക്കുക എന്ന അപൂര്‍വ നേട്ടം കരസ്ഥമാക്കിയ മാര്‍ ആഗസ്തീനോസ് കോളജ് ഇതിനോടകം എംജി സര്‍വകലാശാലയില്‍ 110ലേറെ റാങ്കുകള്‍ കരസ്ഥമാക്കിക്കഴിഞ്ഞു. റാങ്ക് ജേതാക്കളെ കോളജ് മാനേജര്‍ ഫാ. ബെര്‍ക്കുമാന്‍സ് കുന്നുംപുറം, പ്രിന്‍സിപ്പൽ ഡോ. റെജി വര്‍ഗീസ് മേക്കാടന്‍, അധ്യാപകര്‍, അനധ്യാപകര്‍, പിടിഎ പ്രതിനിധികള്‍ തുടങ്ങിയവര്‍ അനുമോദിച്ചു.

20 അടി ഉയരമുള്ള കല്‍ക്കെട്ട് വീടിനു മുകളില്‍ ഇടിഞ്ഞുവീണു; വീട്ടുകാര്‍ രക്ഷപ്പെട്ടത് തലനാരിഴയ്ക്ക്

കടനാട്: വീടിനു ഭീഷണിയായി നിലനിന്നിരുന്ന കൂറ്റൻ മതില്‍ക്കെട്ട് തകര്‍ന്നുവീണു, വീട്ടുകാര്‍ രക്ഷപ്പെട്ടത് തലനാരിഴയ്ക്ക്. കടനാട് ക്ഷേത്രത്തിനു സമീപം താമസിക്കുന്ന വട്ടക്കാനായില്‍ പങ്കജാക്ഷക്കുറുപ്പിന്‍റെ വീടിനു പിന്നിലെ ഇരുപത് അടിയിലേറെ ഉയരമുള്ള മതില്‍ക്കെട്ടാണ് ഇടിഞ്ഞു വീണത്. ഇന്നലെ ഉച്ചകഴിഞ്ഞ് 1.15ഓടെയായിരുന്നു സംഭവം. ഈ സമയം പങ്കജാക്ഷക്കുറുപ്പും മകന്‍റെ ഭാര്യയും രണ്ടു കുട്ടികളുമാണ് വീട്ടിലുണ്ടായിരുന്നത്. വലിയ ശബ്ദത്തോടെ പതിച്ച മതിൽക്കെട്ടിൽനിന്നു മുറ്റത്ത് കളിക്കുകയായിരുന്ന കുട്ടികള്‍ രക്ഷപ്പെട്ടത് തലനാരിഴയ്ക്കാണ്. വിവരമറിഞ്ഞ് വാര്‍ഡ് മെംബര്‍ ഉഷാ രാജു സ്ഥലത്തെത്തി അധികൃതരെ വിവരം അറിയിക്കുകയായിരുന്നു. വീട് അപകട നിലയിലായതിനാല്‍ കുടുംബാഗങ്ങളെ മറ്റൊരു വീട്ടിലേക്ക് മാറ്റിപ്പാര്‍പ്പിച്ചു. മേലുകാവ് പോലീസും സ്ഥലത്തെത്തിയിരുന്നു. സമീപത്തെ കല്‍ക്കെട്ട് അപകടഭീഷണി ഉയര്‍ത്തുന്നതായി കാണിച്ച് 2016 മുതല്‍ വീട്ടുടമ പങ്കജാക്ഷക്കുറുപ്പ് ബന്ധപ്പെട്ട അധികാരികള്‍ക്ക് പരാതി നൽകുന്നതാണ്. അഞ്ചു തവണ അദാലത്തില്‍ പരാതി എടുത്തിരുന്നെങ്കിലും എതിര്‍കക്ഷി ഹാജരാകാത്തതിനാല്‍ നടപടി ഉണ്ടായില്ല.

അല്‍ഫോന്‍സാമ്മ പ്രത്യാശയുടെ പ്രവാചക: മാര്‍ റെമീജിയോസ് ഇഞ്ചനാനിയില്‍

ഭരണങ്ങാനം: പ്രത്യാശയില്ലാത്ത ഒരു സമൂഹത്തില്‍ പ്രത്യാശയുടെ പ്രവാചകയാണ് അല്‍ഫോന്‍സാമ്മയെന്ന് താമരശേരി രൂപത ബിഷപ് മാര്‍ റെമീജിയോസ് ഇഞ്ചനാനിയില്‍ പറഞ്ഞു. വിശുദ്ധ അല്‍ഫോന്‍സാമ്മയുടെ തിരുനാളിന്‍റെ നാലാം ദിനമായ ഇന്നലെ തീര്‍ഥാടന ദേവാലയത്തില്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുകയായിരുന്നു ബിഷപ്. ദൈവത്തിന്‍റെ വചനം പരിപൂര്‍ണമായി അനുസരിക്കുകയും ആഘോഷിക്കുകയും ജീവിക്കുകയും ചെയ്ത പരിശുദ്ധ അമ്മയുടെ മാതൃകയില്‍ തന്‍റെ ജീവിതത്തെ ചിട്ടപ്പെടുത്തിയ മകളാണ് വിശുദ്ധ അല്‍ഫോന്‍സാമ്മയെന്ന് പത്തനംതിട്ട രൂപത ബിഷപ് സാമുവല്‍ മാര്‍ ഐറേനിയസ് വിശുദ്ധ കുര്‍ബാന മധ്യേ നല്‍കിയ സന്ദേശത്തില്‍ പറഞ്ഞു. ഇന്നലെ ഫാ. അലക്‌സ് മൂലക്കുന്നേല്‍, ഫാ. ജോസഫ് കീരഞ്ചിറ, ഫാ. അഗസ്റ്റിന്‍ കൂട്ടിയാനി, ഫാ. മാത്യു കോലത്ത്, ഫാ. സിറിയക് പുത്തേട്ട്, ഫാ. വിന്‍സെന്‍റ് കദളിക്കാട്ടില്‍ പുത്തന്‍പുര, ഫാ. ജോസഫ് വടക്കേക്കുറ്റ് എന്നിവര്‍ വിശുദ്ധ കുര്‍ബാന അര്‍പ്പിച്ചു. ഫാ. കുര്യാക്കോസ് വട്ടമുകളേല്‍ റംശാ പ്രാര്‍ഥനയ്ക്കും ഫാ. ജോസഫ് അട്ടാങ്ങാട്ടില്‍ ജപമാല പ്രദക്ഷിണത്തിനും കാര്‍മികത്വം വഹിച്ചു. ഇന്നത്തെ തിരുക്കർമങ്ങൾ രാവിലെ 5.30, 6.45, 8.30, 10.00, ഉച്ചകഴിഞ്ഞ് 2.30, 3.30, 5.00, രാത്രി 7.00 - വിശുദ്ധ കുര്‍ബാന. രാവിലെ 11.30ന് ഷംഷാബാദ് രൂപത സഹായ മെ ത്രാന്‍ മാര്‍ ജോസഫ് കൊല്ലംപറമ്പില്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കും. വൈകുന്നേരം 4.30ന് റംശാ. 6.15ന് ജപമാല പ്രദക്ഷിണം.

കാർഷിക സെമിനാർ നടത്തി

കാഞ്ഞിരപ്പള്ളി: സെന്‍റ് ഡൊമിനിക്സ് കത്തീഡ്രലിന്‍റെ ദ്വിശതാബ്ദി ആഘോഷത്തിന്‍റെ ഭാഗമായി കാർഷിക സെമിനാർ നടത്തി. ഇൻഫാം ദേശീയ ചെയർമാൻ ഫാ. തോമസ് മറ്റമുണ്ടയിൽ സെമിനാർ ഉദ്ഘാടനം ചെയ്തു. കത്തീഡ്രൽ വികാരിയും ആർച്ച്പ്രീസ്റ്റുമായ റവ.ഡോ. കുര്യൻ താമരശേരി അധ്യക്ഷത വഹിച്ചു. ഇൻഫാം കത്തീഡ്രൽ യൂണിറ്റിന്‍റെ പ്രവർത്തനങ്ങൾക്ക് തുടക്കംകുറിച്ചു. കാർഷിക അടിസ്ഥാന വികസന ഫണ്ടുകളെക്കുറിച്ച് ഫെഡറൽ ബാങ്ക് അസിസ്റ്റന്‍റ് മാനേജർ കെ.ജെ. തോമസ് ക്ലാസ് നയിച്ചു. കത്തീഡ്രൽ അസിസ്റ്റന്‍റ് വികാരിമാരായ ഫാ. തോമസുകുട്ടി ആലപ്പാട്ടുകുന്നേൽ, ഫാ. ടോണി മുളങ്ങാശേരിൽ, റെജി കൈപ്പൻപ്ലാക്കൽ, സെബാസ്റ്റ്യൻ കുരിശുകുന്നേൽ, ജയിംസുകുട്ടി ആശാരിപറമ്പിൽ, മാത്തച്ചൻ മാളിയേക്കൽ, സുനു മുത്തിയപാറയിൽ, ജോസഫ് പണ്ടാരക്കളം, പയസ് കിഴക്കേനെടുങ്കാട്ടിൽ, ജിജി പുതിയിടം, ബോബി കറുകപ്പള്ളിൽ, ഫിലിപ്പ് പള്ളിവാതുക്കൽ എന്നിവർ നേതൃത്വം നൽകി.

ബലിതർപ്പണത്തിന് ക്ഷേത്രങ്ങൾ ഒരുങ്ങി

എരുമേലി: കർക്കടകവാവ് ബലിതർപ്പണത്തിന് ക്ഷേത്രങ്ങൾ ഒരുങ്ങി. എരുമേലി ശ്രീ ധർമശാസ്താ ക്ഷേത്രം, കൊരട്ടി ശ്രീ മഹാദേവ ക്ഷേത്രം, മുക്കൂട്ടുതറ തിരുവമ്പാടി ശ്രീകൃഷ്ണസ്വാമി ക്ഷേത്രം, ഇടകടത്തി ശ്രീ ധർമശാസ്താ ക്ഷേത്രം, കാളകെട്ടി അഴുതക്കടവ് ശ്രീ ശങ്കരനാരായണ ക്ഷേത്രം, മൂക്കൻപെട്ടി ശ്രീനാരായണ ഗുരുദേവ ക്ഷേത്രം എന്നിവിടങ്ങളിൽ ബലിതർപ്പണ ചടങ്ങുകൾ രാവിലെ ആരംഭിക്കും. പിതൃ നമസ്കാരം, കൂട്ട നമസ്കാരം എന്നീ വിശേഷാൽ വഴിപാടുകൾ നടത്തുന്നതിന് ക്ഷേത്രങ്ങളിൽ ക്രമീകരണം ഏർപ്പെടുത്തിയിട്ടുണ്ട്. ഒറ്റനമസ്കാരം, തിലഹവനം എന്നീ വിശേഷാൽ വഴിപാടുകൾ നടത്തുന്നതിനും വിവിധ ക്ഷേത്രങ്ങളിൽ സൗകര്യം ഏർപ്പെടുത്തിയിട്ടുണ്ടെന്ന് ഭാരവാഹികൾ അറിയിച്ചു. ചിറക്കടവ്: മണ്ണംപ്ലാവ് അരുവിക്കല്‍ ശ്രീ ധര്‍മശാസ്താ ക്ഷേത്രത്തില്‍ കര്‍ക്കടകവാവുബലി തര്‍പ്പണം അരുവിക്കല്‍ തീർഥക്കടവില്‍ നാളെ രാവിലെ 5.30 മുതല്‍ ആരംഭിക്കും. തിലഹവനം, നമസ്‌കാര പൂജ, എന്നിവയ്ക്കുള്ള സൗകര്യമുണ്ടായിരിക്കും. ചിറക്കടവ്: മഹാവിഷ്ണു ക്ഷേത്രത്തിൽ കർക്കടകവാവിന് രാവിലെ ഏഴിന് ഭാഗവതപാരായണം, പിതൃനമസ്‌കാരം, തിലഹവനം, 10.30ന് ഭജൻ, സത്സംഗം എന്നിവ നടത്തും. മേൽശാന്തി ബദിരമന എച്ച്.ബി. ഈശ്വരൻ നമ്പൂതിരി, ചെന്തിട്ട ഇല്ലം സി.കെ. നാരായണൻ നമ്പൂതിരി എന്നിവർ കാർമികത്വം വഹിക്കും. ആനിക്കാട്: ശങ്കരനാരായണമൂർത്തി ക്ഷേത്രക്കടവിൽ നാളെ രാവിലെ 4.30 മുതൽ കർക്കടക വാവുബലി നടത്തും. ക്ഷേത്രത്തിൽ രാവിലെ അഞ്ചുമുതൽ തിലഹവനം ഉണ്ടായിരിക്കും. ചിറക്കടവ്: മണക്കാട്ട് ഭദ്രാക്ഷേത്രത്തിൽ നാളെ രാവിലെ അഞ്ചുമുതൽ കർക്കടക വാവുബലി നടത്തും. മേൽശാന്തി കെ.എസ്. രഞ്ജിത്ത്‌ നമ്പൂതിരി കാർമികത്വം വഹിക്കും. ചിറക്കടവ്: പുന്നശേരി ഇല്ലത്ത് നാളെ രാവിലെ അഞ്ചുമുതൽ കർക്കടക വാവുബലി നടത്തും. പുന്നശേരി ഗോപാലകൃഷ്ണൻ നമ്പൂതിരി കാർമികത്വം വഹിക്കും. കാഞ്ഞിരപ്പള്ളി: ശ്രീ ഗണപതിയാർ കോവിൽ നാളെ രാവിലെ അഞ്ചുമുതൽ ബ്രഹ്മശ്രീ ദിലീപ് വാസവന്‍റെ കാർമികത്വത്തിൽ ശ്രാദ്ധബലിതർപ്പണം നടക്കും. കണമല: എസ്എൻഡിപി യോഗം 1743-ാം നമ്പർ മൂക്കൻപെട്ടി ശ്രീനാരായണ ഗുരുദേവ ക്ഷേത്രത്തിൽ കർക്കടക വാവുബലിതർപ്പണം നാളെ രാവിലെ 5.30 മുതൽ ക്ഷേത്ര മേൽശാന്തി രാഹുൽ ശാന്തിയുടെ മുഖ്യകാർമികത്വത്തിൽ നടക്കുമെന്ന് ഭാരവാഹികൾ അറിയിച്ചു. വിശേഷാൽ പിതൃ നമസ്കാരം, കൂട്ടു നമസ്കാരം എന്നിവ നടത്തുന്നതിന് സൗകര്യമുണ്ട്.

മാലിന്യസംസ്കരണരീതി പഠിക്കാൻ എരുമേലിയിൽനിന്ന് ഇൻഡോറിലേക്ക്

എരുമേലി: രാജ്യത്ത് ഏറ്റവും വൃത്തിയുള്ള നഗരമായി തുടർച്ചയായി എട്ടാമതും തെരഞ്ഞെടുക്കപ്പെട്ട ഇൻഡോർ സന്ദർശിച്ച് മാലിന്യ സംസ്കരണരീതി പഠിക്കാൻ എരുമേലി പഞ്ചായത്തംഗങ്ങൾ യാത്ര തിരിച്ചു. പ്രസിഡന്‍റ് ഉൾപ്പെടെ 13 പഞ്ചായത്തംഗങ്ങളും ഉദ്യോഗസ്ഥരുമടക്കം 20 അംഗ സംഘമാണ് കൊച്ചിയിൽനിന്നു വിമാനമാർഗം ഇൻഡോറിലേക്ക് യാത്ര തിരിച്ചത്. ഒരാഴ്ച നീളുന്ന സന്ദർശനത്തിൽ പ്രധാനമായും മാലിന്യസംസ്കരണ പ്രക്രിയകളും സംവിധാനങ്ങളും കണ്ടു പഠിക്കുകയെന്ന ലക്ഷ്യമാണെന്ന് ഭരണസമിതി അംഗങ്ങൾ പറയുന്നു. പ്രസിഡന്‍റ് സുബി സണ്ണി, ഭരണപക്ഷത്തെ സിപിഎം അംഗങ്ങളായ തങ്കമ്മ ജോർജുകുട്ടി, ടി.വി. ഹർഷകുമാർ, ജെസ്‌ന നജീബ്, പി.കെ. തുളസി, സനില രാജൻ, സിപിഐ അംഗം അനിശ്രീ സാബു, പ്രതിപക്ഷത്തെ കോൺഗ്രസ്‌ അംഗങ്ങളായ ജിജിമോൾ സജി, പ്രകാശ് പള്ളിക്കൂടം, ലിസി സജി, മറിയാമ്മ മാത്തുക്കുട്ടി, അനിത സന്തോഷ്‌, സ്വതന്ത്ര അംഗം ബിനോയ്‌ ഇലവുങ്കൽ എന്നിവരാണ് പഠനസംഘത്തിലുള്ള പഞ്ചായത്തംഗങ്ങൾ. ഇതേ ഭരണസമിതിയുടെ തുടക്കത്തിൽ മാലിന്യസംസ്കരണം പഠിക്കാൻ ബംഗളൂരുവിലേക്ക് പഠനയാത്ര നടത്തിയിരുന്നു. ഇതിന് മുമ്പ് 2017 ഓഗസ്റ്റിൽ മുൻ ഭരണസമിതി കുമളി, ചക്കുപള്ളം പഞ്ചായത്തുകളുടെ മാലിന്യസംസ്കരണ സംവിധാനങ്ങൾ സന്ദർശിച്ച് പഠനം നടത്തിയിരുന്നു. ജനങ്ങളും അധികൃതരും ഒരുമിച്ചു മനസുവച്ചാൽ നാട് സുന്ദരമാകുമെന്ന കൃത്യമായ സന്ദേശമാണു മധ്യപ്രദേശിലെ ഇൻഡോർ നഗരം പറയുന്നത്. കേന്ദ്രസർക്കാരിന്‍റെ ശുചിത്വ സർവേയിൽ കഴിഞ്ഞ എട്ടു വർഷമായി ഇൻഡോർ ഒന്നാം സ്ഥാനത്തു തുടരുന്നു. കേന്ദ്രസർക്കാരിന്‍റെ വാർഷിക ശുചിത്വ സർവേ ഫലം സ്വച്ഛ് സർവേക്‌ഷൻ 2024 കഴിഞ്ഞ ദിവസമാണ് പ്രഖ്യാപിച്ചത്. സൂറത്തും നവീ മുംബൈയുമാണ് രണ്ടും മൂന്നും സ്ഥാനങ്ങളിൽ. വിജയവാഡയാണ് നാലാം സ്ഥാനത്ത്.

കൂട്ടിക്കൽ പഞ്ചായത്തിൽ എംസിഎഫിന്‍റെ നിർമാണം പുരോഗമിക്കുന്നു

കൂട്ടിക്കൽ: കൂട്ടിക്കൽ പഞ്ചായത്തിലെ മെറ്റീരിയൽ കളക‌്ഷൻ ഫെസിലിറ്റിയുടെ (എംസിഎഫ്) നിർമാണം പുരോഗമിക്കുന്നു. അജൈവ മാലിന്യങ്ങൾ ശാസ്ത്രീയമായി കൈകാര്യം ചെയ്യുന്നതിലൂടെ പരിസരം മാലിന്യമുക്തമാക്കുക എന്ന ലക്ഷ്യത്തോടെയാണ് എംസിഎഫിന്‍റെ നിർമാണം. പത്താം വാർഡിലെ മാത്തൂമലയിൽ സ്ഥിതി ചെയ്യുന്ന എംസിഎഫ് 1200 ചതുരശ്ര അടിയിൽ രണ്ട് നിലകളിലായാണ് നിർമിച്ചിരിക്കുന്നത്. പഞ്ചായത്തും ശുചിത്വമിഷനും സംയുക്തമായി 34.57 ലക്ഷം രൂപ വിനിയോഗിച്ചാണ് നിർമാണം നടത്തുന്നത്. മാലിന്യ സംസ്കരണശേഷി വർധിപ്പിക്കുന്ന ബെയിലിംഗ് യന്ത്രം, വെയിംഗ് യന്ത്രം, മാലിന്യം തരംതിരിക്കുന്നതിനുള്ള സോർട്ടിംഗ് ടേബിൾ മുതലായവ വാങ്ങിയിട്ടുണ്ട്. ചുറ്റുമതിൽ നിർമാണവും വയറിംഗും പൂർത്തിയാകുന്നതോടെ എംസിഎഫ് പ്രവർത്തന സജ്ജമാകും. നിലവിൽ പ്ലാസ്റ്റിക് ശേഖരണത്തിനുള്ള സംവിധാനം പഞ്ചായത്തിൽ ഇല്ലെന്നും വാർഡ് തലത്തിലുള്ള പ്ലാസ്റ്റിക് ശേഖരണം അഞ്ചാം വാർഡിൽ പ്രവർത്തിക്കുന്ന കെ.ആർ. നാരായണൻ സാംസ്കാരിക നിലയത്തിലാണെന്നും പഞ്ചായത്ത് പ്രസിഡന്‍റ് ബിജോയ് ജോസ് പറഞ്ഞു. സാംസ്കാരിക നിലയത്തിന്‍റെ പ്രവർത്തനത്തെ ഇത് ബാധിക്കുന്നുണ്ടെന്നും എംസിഎഫ് വരുന്നതോടുകൂടി കാര്യക്ഷമമായി അജൈവമാലിന്യങ്ങൾ കൈകാര്യം ചെയ്യാനാകുമെന്നും അദ്ദേഹം പറഞ്ഞു.

അല്‍ഫോന്‍സാമ്മ പ്രത്യാശയുടെ പ്രവാചക: മാര്‍ റെമീജിയോസ് ഇഞ്ചനാനിയില്‍

ഭരണങ്ങാനം: പ്രത്യാശയില്ലാത്ത ഒരു സമൂഹത്തില്‍ പ്രത്യാശയുടെ പ്രവാചകയാണ് അല്‍ഫോന്‍സാമ്മയെന്ന് താമരശേരി രൂപത ബിഷപ് മാര്‍ റെമീജിയോസ് ഇഞ്ചനാനിയില്‍ പറഞ്ഞു. വിശുദ്ധ അല്‍ഫോന്‍സാമ്മയുടെ തിരുനാളിന്‍റെ നാലാം ദിനമായ ഇന്നലെ തീര്‍ഥാടന ദേവാലയത്തില്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുകയായിരുന്നു ബിഷപ്. ഇന്നത്തെ തിരുക്കർമങ്ങൾ രാവിലെ 5.30, 6.45, 8.30, 10.00, ഉച്ചകഴിഞ്ഞ് 2.30, 3.30, 5.00, രാത്രി 7.00 - വിശുദ്ധ കുര്‍ബാന. രാവിലെ 11.30ന് ഷംഷാബാദ് രൂപത സഹായ മെ ത്രാന്‍ മാര്‍ ജോസഫ് കൊല്ലംപറമ്പില്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കും. വൈകുന്നേരം 4.30ന് റംശാ. 6.15ന് ജപമാല പ്രദക്ഷിണം.

തോമസ് എസ്. മുക്കാടൻ ഓർമയായി

കാഞ്ഞിരപ്പള്ളി: കേരള കോൺഗ്രസിന്‍റെ സ്ഥാപക അംഗമായിരുന്ന തോമസ് എസ്. മുക്കാടൻ ഓർമയായി. 1965ൽ ചങ്ങനാശേരി നിയോജകമണ്ഡലം സെക്രട്ടറിയായി പ്രവർത്തനമാരംഭിച്ച ഇദ്ദേഹം പൂഞ്ഞാർ ആസ്ഥാനമായുള്ള മീനച്ചിൽ ഈസ്റ്റ് അർബൻ കോ-ഓപ്പറേറ്റീവ് ബാങ്കിന്‍റെ ബോർഡ് ഡയറക്ടറായി 16 വർഷം സേവനമനുഷ്‌ഠിച്ചു. ഈ കാലയളവിൽ ബാങ്കിന്‍റെ ചെയർമാനായും വൈസ് ചെയർമാനായും ചുമതലകൾ വഹിച്ചു. മുണ്ടക്കയം കൺസ്യൂമർ സൊസൈറ്റി പ്രസിഡന്‍റ്, മുണ്ടക്കയം സർവീസ് കോ-ഓപ്പറേറ്റീവ് ബാങ്ക്, കൂട്ടിക്കൽ സർവീസ് കോ-ഓപ്പറേറ്റീവ് ബാങ്ക് എന്നിവയുടെ ബോർഡ് മെംബറായും കൂട്ടിക്കൽ ത്രിവേണി ലൈബ്രറി പ്രസിഡന്‍റ്, കൂട്ടിക്കൽ പൗരസമിതി പ്രസിഡന്‍റ്, കേരള കോൺഗ്രസ് കൂട്ടിക്കൽ, മുണ്ടക്കയം മണ്ഡലങ്ങളുടെ പ്രസിഡന്‍റ്, ജില്ലാ സെക്രട്ടറി, സ്റ്റേറ്റ് നിർവാഹക സമിതി അംഗം, മുണ്ടക്കയം ഗാർഡൻ മാനർ ക്ലബ്ബിന്‍റെ സ്ഥാപക പ്രസിഡന്‍റ്, മുണ്ടക്കയം വൈസ് മെൻസ് ക്ലബ് പ്രസിഡന്‍റ്, മുണ്ടക്കയം വൈഎംസിഎ ബോർഡ് അംഗം, സെന്‍റ് ജോസഫ് ഇംഗ്ലീഷ് മീഡിയം സ്‌കൂൾ പിടിഎ പ്രസിഡന്‍റ്, വേലനിലം സെന്‍റ് മേരീസ് ചർച്ച് ട്രസ്റ്റി, വിൻസെന്‍റ് ഡി പോൾ സൊസൈറ്റി പ്രസിഡന്‍റ്, മുണ്ടക്കയം ഫൈൻ ആർട്സ് സൊസൈറ്റി സെക്രട്ടറി തുടങ്ങിയ നിലകളിൽ സാമൂഹിക, രാഷ്‌ട്രീയ മണ്ഡലങ്ങളിൽ ദീർഘകാലം പ്രവർത്തിച്ചു. മുക്കാടൻ കുടുംബയോഗത്തിന്‍റെ ദീർഘകാല പ്രസിഡന്‍റും നിലവിൽ രക്ഷാധികാരിയുമായിരുന്നു. വിദ്യാർഥിയായിരിക്കേ ഒരണ സമരത്തിലും വിമോചന സമരത്തിലും പങ്കെടുത്ത് അറസ്റ്റ് വരിച്ചു. റിസർവ് ബാങ്ക് ഓഫ് ഇന്ത്യയുടെ ബോംബെ സെൻട്രൽ ഓഫീസിൽ ജോലി ചെയ്‌തുകൊണ്ടിരുന്ന അദ്ദേഹം കാനഡയിൽ ഭാര്യാസമേതം ജോലി ചെയ്യുകയും പിന്നീട് 1980ൽ കൂട്ടിക്കലിൽ സ്ഥിരതാമസം ആരംഭിക്കുകയും ചെയ്‌തു. ഭാര്യ പരേതയായ അമ്മിണി വായ്പൂര് ചിറക്കര കുടുംബാംഗമാണ്. സംസ്കാരം ഇന്ന് ഉച്ചകഴിഞ്ഞ് മൂന്നിന് വേലനിലം സെന്‍റ് മേരീസ് പള്ളിയിൽ നടക്കും.

ചിറക്കടവ് മാതൃകാ ആർപിഎസിൽ വൻ തീപിടിത്തം

കാഞ്ഞിരപ്പള്ളി: ചിറക്കടവ് മാതൃകാ റബർ ഉത്പാദക സംഘത്തിൽ വൻ തീപിടിത്തം. റബർ ഷീറ്റ്, ഒട്ടുപാൽ, പശ, പ്ലാസ്റ്റിക് തുടങ്ങിയവ കത്തിനശിച്ചു. പ്രാഥമിക കണക്കെടുപ്പിൽ 25 ലക്ഷം രൂപയുടെ നാശനഷ്ടമാണ് കണക്കാക്കുന്നത്. രാവിലെ 5.30ഓടെയാണ് തീപിടിത്തമുണ്ടായത്. തുടർന്ന് കാഞ്ഞിരപ്പള്ളിയിൽനിന്നും ഈരാറ്റുപേട്ടയിൽനിന്നും അഗ്നിശമനസേന എത്തി 7.30ഓടെയാണ് തീ നിയന്ത്രണവിധേയമാക്കിയത്. ആർപിഎസ് കെട്ടിടത്തിനും നാശനഷ്ടമുണ്ടെന്ന് പ്രസിഡന്‍റ് മൈക്കിൾ ജോസഫ്, സെക്രട്ടറി ഷാജിമോൻ ജോസ് എന്നിവർ പറഞ്ഞു. തീപിടിത്തത്തിനു കാരണമെന്തെന്ന് ഇതുവരെ വ്യക്തമായിട്ടില്ല. ഇന്നലെ പുകപ്പുരയിൽനിന്നു പുറത്തെടുക്കാനിരുന്ന റബറിനാണ് തീപിടിച്ചത്. തീപിടിത്തത്തിൽ സമീപത്തുനിന്ന മരങ്ങൾക്കും കേടുപാടുകൾ സംഭവിച്ചിട്ടുണ്ട്.

വെളിച്ചെണ്ണ അഞ്ഞൂറിനു മുകളിലെത്തി; തേങ്ങാക്കാര്യം പറയുകയേ വേണ്ട

കോട്ടയം: ഓണത്തിനു മുന്‍പേ വെളിച്ചെണ്ണ വില തിളച്ചുമറിയുകയാണ്. കേരഫെഡിന്‍റെ കേര ബ്രാന്‍ഡ് വെളിച്ചെണ്ണ ലിറ്ററിന് 529 രൂപയായി ഉയര്‍ത്തി. അതായത് ഒറ്റയടിക്ക് 110 രൂപയുടെ വര്‍ധന. ഇക്കൊല്ലം ജനുവരിക്കു ശേഷം ഒരു ലിറ്ററിനുണ്ടായ വര്‍ധന 329 രൂപ. ഓണത്തിന് എണ്ണവില 600 കടന്നാല്‍ അതിശയം വേണ്ട. മറ്റു മുന്‍നിര ബ്രാന്‍ഡുകളുടെ വെളിച്ചെണ്ണ ലിറ്ററിന് 550 കടന്നു. കൊപ്ര വില വര്‍ധിച്ചതോടെ പിടിച്ചുനില്‍ക്കാന്‍ കഴിയാത്തതിനാലാണ് വെളിച്ചെണ്ണയ്ക്ക് വില കൂട്ടേണ്ടിവന്നതെന്ന് കേരഫെഡ് പറയുന്നു. ഈ വര്‍ഷം ആദ്യം ഒരു ലിറ്റര്‍ വെളിച്ചെണ്ണ വില 200 രൂപയില്‍ താഴെയായിരുന്നു. ഇത്തരത്തില്‍ വെളിച്ചെണ്ണ വില ഉയരുന്നത് നിരവധി സാധനങ്ങളുടെ വില വര്‍ധിക്കുന്നതിനും കാരണമായിട്ടുണ്ട്. കേരളം, തമിഴ്നാട് ഉള്‍പ്പെടെ സംസ്ഥാനങ്ങളില്‍ തേങ്ങ ഉത്പാദനം കുറഞ്ഞതും കേരളത്തില്‍ നാളികേര ഇറക്കുമതിയിലുണ്ടായ ഇടിവും വില വര്‍ധിക്കാന്‍ കാരണമായി. ഈ വര്‍ഷത്തിന്‍റെ തുടക്കത്തില്‍ ഒരു കിലോ തേങ്ങയ്ക്ക് 33 രൂപയായിരുന്നു വില. നിലവില്‍ കിലോയ്ക്ക് വില 90 രൂപ കടന്നു. ഉപ്പേരി വിലയിലും വലിയ വര്‍ധനവാണ് പ്രതീക്ഷിക്കുന്നത്.

പാലാ രൂപത പ്ലാറ്റിനം ജൂബിലി സമാപനം 26ന്

വിശ്വാസികളെ ദൈവത്തിലേക്കും സഭയിലേക്കും വഴിനടത്തിയ ജൂബിലിയാഘോഷം പാലാ: പാലാ രൂപത പ്ലാറ്റിനം ജൂബിലി ആഘോഷങ്ങള്‍ക്ക് സമാപനമാകുന്നു. കഴിഞ്ഞ വര്‍ഷം ജൂലൈ 26നു വിശുദ്ധ അല്‍ഫോന്‍സാമ്മയുടെ കബറിട ദേവാലയത്തില്‍ തിരിതെളിച്ച് ആരംഭിച്ച ജൂബിലി 26നു പാലാ സെന്‍റ് തോമസ് കത്തീഡ്രലില്‍ സമാപിക്കും. ജൂബിലി ആഘോഷത്തിനു നേതൃത്വം നല്‍കുന്ന മുഖ്യവികാരി ജനറാൾ മോണ്‍. ഡോ. ജോസഫ് തടത്തില്‍ ദീപികയോട് സംസാരിക്കുന്നു. ഒരുക്കങ്ങള്‍ പ്ലാറ്റിനം ജൂബിലി വര്‍ഷത്തില്‍ ബാഹ്യമായ ആഘോഷങ്ങള്‍ക്കല്ല പ്രാധാന്യം കൊടുത്തത്. കുടുംബങ്ങളുടെ നവീകരണമായിരുന്നു മുഖ്യം. മൂന്നേകാല്‍ ലക്ഷത്തിലേറെ വിശ്വാസികള്‍ രൂപതയിലുണ്ട്. ഇവരെ ഈശോയിലേക്കും സഭയിലേക്കും കൂടുതല്‍ അടുപ്പിക്കാനായി വിവിധ തരത്തിലുളള ആത്മീയ ഒരുക്കങ്ങള്‍ നടത്തി. ശതാബ്ദിയിലേക്കുള്ള ഒരുക്കമായിട്ടാണു പ്ലാറ്റിനം ജൂബിലി ആഘോഷത്തെ കണ്ടത്. ഒരുമയുടെ കൂട്ടായ്മകള്‍ രൂപതയില്‍ ആത്മീയ മുന്നേറ്റമുണ്ടാക്കുന്നതിനായി എല്ലാവരെയും ഒരുമിച്ചുകൂട്ടാനായി ശ്രമിച്ചു. രൂപതയില്‍നിന്നുള്ള മിഷനറിമാരെ സംഘടിപ്പിച്ച് മിഷന്‍ സംഗമം, ക്രൈസ്തവ സംഗമം, 75 വയസുകാരുടെ സംഗമം, ദേവാലയ ശുശ്രൂഷികളുടെ കൂട്ടായ്മ, ദേവാലയത്തില്‍ വിവിധ ജോലികളില്‍ ഏര്‍പ്പെട്ടിരിക്കുന്നവരുടെ കൂട്ടായ്മ എന്നിവ നടത്തി. കൂടാതെ യുവജനസംഗമം, എകെസിസി കൂട്ടായ്മ, പിതൃ-മാതൃവേദി കൂട്ടായ്മ, സണ്‍ഡേ സ്‌കൂള്‍ അധ്യാപകര്‍, കോര്‍പറേറ്റ് എഡ്യൂക്കേഷന്‍ ഏജന്‍സിക്കു കീഴിലുള്ള അധ്യാപകര്‍, വയോജനങ്ങള്‍, കുഞ്ഞുങ്ങള്‍ എന്നിങ്ങനെ വിവിധ തലങ്ങളിലുള്ളവരെ ഒരുമിച്ചുകൂട്ടി. വിശുദ്ധ കുര്‍ബാന സ്വീകരിച്ച കുട്ടികളുടെ സംഗമം എയ്ഞ്ചൽസ് മീറ്റ് ഫൊറോന തലത്തില്‍ നടത്തി. ഉത്ഥാന എന്ന പേരില്‍ മെഗാ ലിറ്റര്‍ജിക്കല്‍ ക്വിസും നടത്തി. ഹോം മിഷന്‍ ഹോം മിഷന്‍ പ്രോജക്ടിലൂടെ രൂപതാധ്യക്ഷന്‍ മാര്‍ ജോസഫ് കല്ലറങ്ങാട്ടിന്‍റെ സന്ദേശവുമായി മുഴുവന്‍ ഭവനങ്ങളിലും സന്ദര്‍ശനം നടത്തി. സിസ്റ്റർമാരാണ് നേതൃത്വം നല്‍കിയത്. ഓരോ ടീമും ദിവസവും ആറു വീടുകള്‍വീതം സന്ദര്‍ശിച്ച് കുടുംബങ്ങളുടെ പ്രശ്‌നങ്ങള്‍ കേട്ട് അവര്‍ക്ക് സാന്ത്വനമേകി. സന്ദര്‍ശനത്തിലൂടെ ലഭിച്ച വിവരങ്ങള്‍ പിതാവിനെ അറിയിക്കുകയും ചെയ്തു. ജൂബിലി വര്‍ഷം പ്രമാണിച്ച് ഭൂരിഭാഗം ഇടവകകളിലും രൂപതാധ്യക്ഷന്‍ സന്ദര്‍ശനം നടത്തുകയും ഇടവക ജനങ്ങളുമായി സംവദിക്കുകയും ചെയ്തു. അനുഗ്രഹവേള ജൂബിലി വര്‍ഷത്തില്‍ രൂപതയ്ക്ക് നാല്‍പതാമത് ബിഷപ്പിനെയും ലഭിച്ചു. ജലന്ധര്‍ രൂപത ബിഷപ്പായി ചെമ്മലമറ്റം ഇടവകാംഗം റവ. ഡോ. ജോസ് സെബാസ്റ്റ്യന്‍ തെക്കുംചേരിക്കുന്നേല്‍ നിയമിതനായി. ജൂബിലി വര്‍ഷത്തില്‍ 15 നവവൈദികരെ രൂപതയ്ക്ക് ലഭിച്ചു എന്നതും വലിയ ദൈവാനുഗ്രഹമാണ്. ദൈവവിളികളില്‍ സമ്പന്നമാണ് രൂപത. 494 രൂപതാ വൈദികരുണ്ട്. 12000ലേറെ സിസ്റ്റർമാർ കേരളത്തിനകത്തും പുറത്തും വിദേശത്തും സേവനം ചെയ്യുന്നു. 1500 വീടുകള്‍ നിര്‍മിച്ചു കെയര്‍ ഹോം പദ്ധതിപ്രകാരം 1500 വീടുകള്‍ നിര്‍മിച്ചു നല്‍കാനായി. ഭവനരഹിതരായ നിരവധി ആളുകള്‍ക്കുള്ള വീടുകളുടെ നിര്‍മാണം പുരോഗമിക്കുകയാണ്. കര്‍ഷകപക്ഷം രൂപത കാര്‍ഷിക പ്രദേശമാണ്. രൂപതാംഗങ്ങള്‍ കൂടുതലും കര്‍ഷകരുമാണ്. കര്‍ഷകരെ പ്രോത്സാഹിപ്പിക്കാനായി വിവിധ പദ്ധതികളാണ് നടപ്പാക്കിയത്. പ്ലാറ്റിനം ജൂബിലി സ്മാരകമായി സോഷ്യല്‍ വെല്‍ഫെയര്‍ സൊസൈറ്റിയുടെ ആഭിമുഖ്യത്തില്‍ ഫാര്‍മേഴ്‌സ് പ്രൊഡ്യൂസര്‍ കമ്പനി രൂപവത്കരിക്കുകയും മൂല്യവര്‍ധിത ഉത്പന്നങ്ങള്‍ നിര്‍മിക്കുന്നതിനായി സാന്തോം എന്ന പേരില്‍ ഫാക്ടറി സ്ഥാപിക്കുകയും ചെയ്തു. ഇടവക തലങ്ങളില്‍ കൂടുതല്‍ കാര്‍ഷിക മുന്നേറ്റങ്ങളും നടന്നു വരുന്നു. ജൂബിലി സമാപന ദിനത്തില്‍ സമൂഹബലിയും പൊതുസമ്മേളനവും ജൂബിലി ആഘോഷ സമാപനങ്ങളുടെ ഭാഗമായി 26നു രാവിലെ 9.30ന് ബിഷപ് മാര്‍ ജോസഫ് കല്ലറങ്ങാട്ടിനൊപ്പം രൂപതിലെ മുഴുവന്‍ വൈദികരും കത്തീഡ്രലില്‍ വിശുദ്ധ കുര്‍ബാനയര്‍പ്പിക്കും. ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍ മുഖ്യകാര്‍മികത്വം വഹിക്കും. മലങ്കര കത്തോലിക്ക സഭ മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവാ സന്ദേശം നല്‍കും. തുടര്‍ന്ന് 11ന് കത്തീഡ്രല്‍ ഹാളില്‍ ചേരുന്ന സമ്മേളനത്തില്‍ സീറോ മലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍, കര്‍ദിനാള്‍ മാര്‍ ജോര്‍ജ് ആലഞ്ചേരി, കേന്ദ്രമന്ത്രി ജോര്‍ജ് കുര്യന്‍, ശശി തരൂര്‍ എംപി, സണ്ണി ജോസഫ്, മന്ത്രിമാര്‍, എംപിമാര്‍, എംഎല്‍എമാര്‍ എന്നിവര്‍ പങ്കെടുക്കും.

ബ്രൗണ്‍ ഗോള്‍ഡ് കൊക്കോ പ്രൊഡ്യൂസര്‍ കമ്പനി രൂപീകൃതമായി

കോട്ടയം: കൊക്കോ കൃഷി വ്യാപനം, സംഭരണം, സംസ്‌കരണം, വിപണനം എന്നിവയോടൊപ്പം ചോക്ലേറ്റ് ഉള്‍പ്പെടെയുള്ള മൂല്യവര്‍ധിത ഉത്പന്നങ്ങള്‍ ഉത്പാദിപ്പിച്ച് ദേശീയ അന്തര്‍ദേശീയ വിപണികളില്‍ എത്തിക്കുന്നതിനായി മണിമല മൂലേപ്ലാവ് കേന്ദ്രീകരിച്ച് ബ്രൗണ്‍ ഗോള്‍ഡ് കൊക്കോ പ്രൊഡ്യൂസര്‍ കമ്പനി രൂപീകൃതമായി. കര്‍ഷകരെ ഒരു വ്യവസായമാക്കി മാറ്റി മെച്ചപ്പെട്ട വരുമാനം ഉറപ്പാക്കുക എന്നതാണു കമ്പനിയുടെ ലക്ഷ്യം. നബാര്‍ഡിന്‍റെ സാമ്പത്തിക സഹായത്തോടെ കേന്ദ്ര തോട്ടവിള ഗവേഷണ കേന്ദ്രത്തിന്‍റെയും കൃഷിവകുപ്പിന്‍റെയും പിന്തുണയോടെയാണ് കമ്പനി രൂപീകൃതമായത്. കമ്പനിയുടെ ഓതറൈസ്റ്റ് കാപ്പിറ്റലായി മൂന്നു കോടി രൂപയാണ് നിശ്ചയിച്ചിരിക്കുന്നത്. കേരളമൊട്ടാകെയാണ് പ്രവര്‍ത്തന പരിധി. ഷെയര്‍ ഒന്നിന് 2000 രൂപയാണ് വില നിശ്ചയിച്ചിരിക്കുന്നത്. ഇതിനു തത്തുല്യമായി കേന്ദ്ര ഗവണ്‍മെന്‍റ് ഫ്രീയായി 2000 രൂപയുടെ ഷെയറും നല്‍കും. ആദ്യഘട്ടമായി 1000 കര്‍ഷകരെയാണ് അംഗങ്ങളാക്കാന്‍ ഉദ്ദേശിക്കുന്നത്. കമ്പനിയുടെ ബെല്‍മൗണ്ട് മാനുഫാക്ചറിംഗ് യൂണിറ്റിന്‍റെ ആഭിമുഖ്യത്തില്‍ ചോക്ലേറ്റും മൂല്യവര്‍ധിത ഉത്പന്നങ്ങളും ഉത്പാദിപ്പിച്ച് ദേശീയ അന്തര്‍ദേശീയ വിപണികളല്‍വരെ എത്തിക്കുന്നു. കൂടാതെ ഉന്നത നിലവാരമുള്ള കൊക്കോ തൈകളും കമ്പനിയുടെ ആഭിമുഖ്യത്തില്‍ നല്‍കുന്നു. ചെയര്‍മാന്‍ കെ.ജെ. വര്‍ഗീസ്, ചീഫ് എക്സിക്യൂട്ടീവ് ഓഫീസര്‍ ലാലിച്ചന്‍ ഫ്രാന്‍സീസ്, എക്സിക്യൂട്ടീവ് ഡയറക്ടര്‍ ടോം ജോര്‍ജ്, ഡയറക്ടര്‍ കെ.ടി. ചാക്കോ എന്നിവര്‍ പത്രസമ്മേളനത്തില്‍ പങ്കെടുത്തു. കമ്പനിയുടെ ഷെയര്‍ വാങ്ങുന്നതിന് 9188472368, 9961823538 നന്പറുകളിൽ ബന്ധപ്പെടാം.

വിദ്യാർഥി പനി ബാധിച്ചു മരിച്ചു

കോട്ടയം: പനിബാധിച്ചു മെഡിക്കല്‍ കോളജ് ആശുപത്രിയില്‍ ചികിത്സയിലായിരുന്ന സ്‌കൂള്‍ വിദ്യാര്‍ഥി മരിച്ചു. എംഡി സെമിനാരി സ്‌കൂള്‍ എട്ടാം ക്ലാസ് വിദ്യാര്‍ഥി ഒളശ അലക്കുകടവ് പീടികപറമ്പില്‍ പി.കെ. മജീഷിന്‍റെ മകന്‍ ആദിദേവ് (13) ആണു മരിച്ചത്. മെഡിക്കല്‍ കോളജ് ആശുപത്രിയില്‍ വെന്‍റിലേറ്ററിലായിരുന്നു. കഴിഞ്ഞയാഴ്ചയാണ് ആദ്യദേവിന് പനിയെ തുടര്‍ന്നു ചികിത്സ തേടിയത്. രോഗബാധ കുറയാത്തതിനെ തുടര്‍ന്നു കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചപ്പോള്‍ തലച്ചോറിലേക്ക് അണുബാധയുള്ളതായി തിരിച്ചറിഞ്ഞ് വെന്‍റിലേറ്ററില്‍ പ്രവേശിപ്പിച്ചു. സംസ്‌കാരം നടത്തി. അമ്മ: ശ്രീനിമോള്‍ (മണിയാപറമ്പില്‍). സഹോദരന്‍: വാസുദേവ്. (എംഡി സ്‌കൂള്‍ വിദ്യാര്‍ഥി).

ശബരി റെയില്‍വേ: പാര്‍ലമെന്‍റില്‍ എംപിമാര്‍ ചോദ്യങ്ങള്‍ ഉന്നയിക്കും

കോട്ടയം: നിര്‍ദിഷ്ട ശബരി റെയില്‍വേ പദ്ധതിയിലേക്ക് സ്ഥലം ഏറ്റെടുക്കലും നിര്‍മാണ ജോലികളും അനിശ്ചിതമായി നീളുന്ന സാഹചര്യത്തില്‍ കേന്ദ്രസര്‍ക്കാരിന്‍റെ നിലപാടറിയാന്‍ കേരളത്തില്‍ നിന്നുള്ള എംപിമാര്‍ പാര്‍ലമെന്‍റില്‍ റെയില്‍വേ മന്ത്രിയോട് ചോദ്യങ്ങള്‍ ഉന്നയിക്കും. ശബരി പദ്ധതിക്ക് നിര്‍ദേശം നല്‍കാന്‍ റെയില്‍വേ സംഘം നടത്താനിരുന്ന സന്ദര്‍ശനം അനിശ്ചിതമായി നീളുന്ന സാഹചര്യത്തിലാണ് എംപിമാര്‍ ഇടപെടുന്നത്. പദ്ധതിയുടെ ചെലവ് പൂര്‍ണമായി കേന്ദ്രം വഹിക്കുമോ അതല്ലെങ്കില്‍ എത്ര തുക മുടക്കും എന്നതാണ് ഒരു ചോദ്യം. സംസ്ഥാന സര്‍ക്കാരും എംപിമാരും ആവശ്യപ്പെട്ടതനുസരിച്ചാണ് മുന്‍പ് കേന്ദ്രം മരവിപ്പിച്ച അങ്കമാലി-എരുമേലി ശബരി പദ്ധതി നടപ്പാക്കാന്‍ അടുത്തയിടെ തീരുമാനമായത്. ഇതിനുശേഷം നടപടികള്‍ എത്ര മുന്നോട്ടു നീങ്ങി എന്നതാണ് മറ്റൊരു ചോദ്യം. പദ്ധതിയിലേക്ക് 70 കിലോമീറ്റര്‍ ദൂരം സ്ഥലം 2025ല്‍ ഏറ്റെടുത്തിരുന്നു. ഇവിടെ സ്ഥലം ഉടമകള്‍ക്ക് നഷ്ടപരിഹാരം നല്‍കാന്‍ എന്തു നടപടിയെടുക്കും എന്നതാണ് മൂന്നാമത്തെ ചോദ്യം. ബെന്നി ബഹനാന്‍, ഡീന്‍ കുര്യാക്കോസ്, അടൂര്‍ പ്രകാശ്, ആന്‍റോ ആന്‍റണി എന്നിവരാണ് ലോക്‌സഭയില്‍ നാളെ ചോദ്യങ്ങള്‍ ഉന്നയിക്കുക. പെരുമ്പാവൂര്‍, തൊടുപുഴ, പാലാ, എരുമേലി എന്നിവിടങ്ങളിലാണ് അടിയന്തരമായി ഓഫീസുകള്‍ തുറക്കേണ്ടത്.

മെഡി.‍ കോളജില്‍ കാന്‍സര്‍ മരുന്നുകൾക്കു ക്ഷാമം

ഗാന്ധിനഗര്‍: മെഡിക്കല്‍ കോളജ് ആശുപത്രി കാന്‍സര്‍ വിഭാഗത്തിലെ രോഗികള്‍ക്ക് മരുന്നുകള്‍ ലഭിക്കുന്നില്ല. കീമോ കഴിഞ്ഞ രോഗികള്‍ക്ക് നല്‍കുന്ന ടി ഗോയ്‌സ് 20 എന്ന ഗുളികയ്ക്കാണ് കൂടുതലായും ക്ഷാമം നേരിടുന്നത്. ആശുപത്രിയിലെ ഫാര്‍മസിയിലോ ആശുപത്രി വളപ്പില്‍ പ്രവര്‍ത്തിക്കുന്ന കാരുണ്യ, നീതി, ന്യായവില മെഡിക്കല്‍ ഷോപ്പുകളിലോ ഈ മരുന്ന് ലഭ്യമല്ല. എല്ലാ സ്വകാര്യ മെഡിക്കല്‍ ഷോപ്പിലും ഈ മരുന്ന് ലഭ്യമല്ല. ഏഴ് ഗുളികകളുള്ള ഒരു സ്ടിപ്പിന് നീതി മെഡിക്കല്‍ ഷോപ്പില്‍ 2877 രൂപയാണ് വില. സ്വകാര്യ മെഡിക്കല്‍ ഷോപ്പില്‍ വില ഇതിലും കൂടും. ആരോഗ്യ ഇന്‍ഷ്വറന്‍സ് കാര്‍ഡുള്ളവര്‍ക്ക് കാര്‍ഡ് ഉപയോഗിച്ച് ലഭിക്കുന്ന മരുന്നാണിത്. എന്നാല്‍ ആശുപത്രിക്കുള്ളില്‍ പ്രവര്‍ത്തിക്കുന്ന കാരുണ്യ, നീതി, ന്യായവില മെഡിക്കല്‍ ഷോപ്പുകളില്‍ മരുന്നില്ലാത്തതു രോഗികളെ ദോഷകരമായി ബാധിച്ചിരിക്കുകയാണ്. ഇന്‍ഷ്വറന്‍സ് കാര്‍ഡുണ്ടെങ്കിലും മരുന്നില്ലാത്ത സാഹചര്യമാണ്. കീമോ കഴിഞ്ഞ ഒട്ടുമിക്ക രോഗികള്‍ക്കും കഴിക്കാന്‍ ടി ഗോയ്‌സ് 20 എന്ന ഗുളികയാണ് ഡോക്ടര്‍മാര്‍ നിര്‍ദേശിക്കുന്നത്. മരുന്ന് ലഭ്യമല്ലാത്തതിനാല്‍ ദിവസങ്ങളായി മരുന്ന് കഴിക്കാത്ത സ്ഥിതിയാണെന്ന് രോഗികള്‍ പറയുന്നു. വില കൂടിയ മരുന്നായതുകൊണ്ടു സാധാരണക്കാരായ രോഗികള്‍ക്ക് സ്വകാര്യ മെഡിക്കല്‍ ഷോപ്പുകളെ ആശ്രയിക്കാനും കഴിയുന്നില്ല. ദിവസങ്ങളായി മരുന്ന് കഴിക്കാതിരിക്കുന്നത് കാന്‍സര്‍ രോഗികളുടെ ആരോഗ്യനില വഷളാകുന്നതിനും ഇടയാക്കിയിരിക്കുകയാണ്. വിവിധ ജില്ലകളില്‍നിന്നായി നൂറുകണക്കിന് കാന്‍സര്‍ രോഗികളാണു മെഡിക്കല്‍ കോളജ് കാന്‍സര്‍ വിഭാഗത്തില്‍ ചികിത്സയിലുള്ളത്. എന്നാല്‍ ഇവര്‍ക്ക് ആവശ്യമായ മരുന്ന് ലഭ്യമല്ലാത്തത് വലിയ പ്രതിസന്ധിയാണ് സൃഷ്ടിച്ചിരിക്കുന്നത്.

ഈരാറ്റുപേട്ട ബ്ലോക്ക്തല കർഷകസഭ

ഈരാറ്റുപേട്ട: ഈരാറ്റുപേട്ട ബ്ലോക്ക്തല കർഷകസഭ സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്‍റ് മറിയാമ്മ ഫെർണാണ്ടസ് അധ്യക്ഷത വഹിച്ചു. പച്ചക്കറി വികസന പദ്ധതികളുടെ ഉദ്ഘാടനം മാണി സി. കാപ്പൻ എംഎൽഎ നിർവഹിച്ചു. പഞ്ചായത്ത് പ്രസിഡന്‍റുമാരായ ജോസുകുട്ടി ജോസഫ്, സ്കറിയാച്ചൻ പൊട്ടനാനി, ഗീതാ നോബിൾ, ബ്ലോക്ക് മെംബർമാരായ അജിത് കുമാർ, ജെറ്റോ ജോസ്, മിനി സാവിയോ, ആർ. ശ്രീകല, ബിഡിഒ എം. സാജൻ, ആത്മ പ്രോജക്‌ട് കോട്ടയം ഡയറക്ടർ മിനി ജോർജ്, ഈരാറ്റുപേട്ട കൃഷി അസിസ്റ്റന്‍റ് ഡയറക്ടർ ഷിജി മാത്യു എന്നിവരും വിവിധ പഞ്ചായത്തുകളിൽനിന്നുള്ള കർഷകരും പങ്കെടുത്തു.

മെഡിക്കല്‍ ക്യാമ്പും ബോധവത്കരണ സെമിനാറും

പാലാ: ഇലവനാല്‍ ഹെല്‍ത്ത് സെന്‍ററിന്‍റെയും പാലാ റോട്ടറി ക്ലബ്ബിന്‍റെയും ആഭിമുഖ്യത്തില്‍ മെഡിക്കല്‍ സ്‌പെഷാലിറ്റി ക്യാമ്പും ബോധവത്കരണ സെമിനാറും ആഹാര ക്രമീകരണങ്ങളുടെ പ്രദര്‍ശനവും പ്രമേഹം, ചര്‍മം, അസ്ഥിരോഗം, ഇഎന്‍ടി വിഭാഗം ഡോക്ടര്‍മാരുടെ പ്രത്യേക പരിശോധനയും ഇലവനാല്‍ ഹെല്‍ത്ത് സെന്‍ററില്‍ നടത്തി. പാലാ മുനിസിപ്പല്‍ ചെയര്‍മാന്‍ തോമസ് പീറ്റര്‍ ഉദ്ഘാടനം നിര്‍വഹിച്ചു. പാലാ റോട്ടറി ക്ലബ് പ്രസിഡന്‍റ് ജോഷി വെട്ടുകാട്ടില്‍ അധ്യക്ഷത വഹിച്ചു. ഡോ. ജോര്‍ജ് ആന്‍റണി, സെക്രട്ടറി അമല്‍ വര്‍ഗീസ്, മുനിസിപ്പല്‍ വൈസ് ചെയര്‍പേഴ്സൺ ബിജി ജോജോ, സ്റ്റാൻഡിംഗ് കമ്മിറ്റി ചെയര്‍മാന്‍ സാവിയോ കാവുകാട്ട് എന്നിവര്‍ പ്രസംഗിച്ചു. ഡോ. ജി. ഹരീഷ്‌കുമാറിന്‍റെ നേതൃത്വത്തില്‍ പ്രമേഹ പരിശോധനയും ബോധവത്കരണ സെമിനാറും നടത്തി. ഡോ. ജയിംസ് കാരാപ്പള്ളി, ഡോ. സാം സ്‌കറിയ, ഡോ. ദീപക് മോഹന്‍, ഡോ. വി.എന്‍. സുകുമാരന്‍ തുടങ്ങിയവര്‍ നേതൃത്വം നല്‍കി. രോഗികള്‍ക്കു സൗജന്യമായി മരുന്നുകള്‍ നല്‍കി. ഡയറ്റീഷന്‍ സോണിയ ജോസ് ആഹാര ക്രമീകരണങ്ങുളടെ പ്രദര്‍ശനവും കൗണ്‍സലിംഗും നടത്തി.

എസ്എംവൈഎം നേതൃ പരിശീലന ക്യാമ്പ്

പാലാ: പാലാ രൂപത എസ്എംവൈഎം നേതൃ പരിശീലന ക്യാമ്പ് കൂടല്ലൂര്‍ യൂണിറ്റിന്‍റെ ആഭിമുഖ്യത്തില്‍ കൂടല്ലൂര്‍ സെന്‍റ് ജോസഫ് പള്ളിയില്‍ നടന്നു. യൂണിറ്റ് ഡയറക്ടര്‍ ഫാ. തോമസ് കിഴക്കേക്കര ക്യാമ്പ് ഉദ്ഘാടനം ചെയ്തു. കുടുംബം എന്ന വിഷയത്തെ ആസ്പദമാക്കി ചേര്‍പ്പുങ്കല്‍ ബിവിഎം കോളജ് അധ്യാപകന്‍ ബ്രിസ്റ്റോ ക്ലാസ് നയിച്ചു. രൂപത പ്രസിഡന്‍റ് അന്‍വിന്‍ സോണി ഓടച്ചുവട്ടില്‍, സിസ്റ്റര്‍ ആല്‍ഫി, സെക്രട്ടറി ബെനിസണ്‍, ബിയോ ബെന്നി, സെബിന്‍ സിജു, നേഹ മരിയ സണ്ണി തുടങ്ങിയവര്‍ നേതൃത്വം നല്‍കി.

കമ്യൂണിക്കേഷന്‍ സ്‌കില്‍ ഡെവലപ്‌മെന്‍റ് പ്രോഗ്രാം

പാലാ: സെന്‍റ് തോമസ് ഓട്ടോണമസ് കോളജില്‍ നാഷണല്‍ സര്‍വീസ് സ്‌കീമിന്‍റെ ആഭിമുഖ്യത്തില്‍ നേതൃത്വ പരിശീലനം, ആശയവിനിമയശേഷി പരിശീലനം, സംഘബോധം വളര്‍ത്തല്‍ എന്നിവയില്‍ വിദ്യാര്‍ഥികള്‍ക്ക് പരിശീലനം നല്‍കി. ജെസിഐ മുന്‍ നാഷണല്‍ വൈസ് പ്രസിഡന്‍റും ട്രെയിനറും എഴുത്തുകാരനും അധ്യാപകനും പ്രഭാഷകനുമായ ഡോ. നിജോയ് പി. ജോസ് വിദ്യാര്‍ഥികള്‍ക്ക് പരിശീലനം നല്‍കി. മത്സരങ്ങളിലൂടെയും ഒന്നിച്ചും ഒറ്റയ്ക്കുമുള്ള വ്യത്യസ്ത പ്രോഗ്രാമുകളിലൂടെയും പ്രവര്‍ത്തനങ്ങളിലൂടെയും മുന്നേറിയ പരിശീലന പരിപാടി വിദ്യാര്‍ഥികള്‍ക്ക് പാഠപുസ്തകത്തിനപ്പുറമുള്ള അറിവുകളും അനുഭവങ്ങളും അവസരങ്ങളും സമ്മാനിച്ചു. നാഷണല്‍ സര്‍വീസ് സ്‌കീമിന്‍റെ നേതൃത്വത്തില്‍ നടത്തപ്പെട്ട പരിശീലന പരിപാടിക്ക് എന്‍എസ്എസ് പ്രോഗ്രാം ഓഫീസര്‍മാരായ ഡോ. പ്രിന്‍സി ഫിലിപ്പ്, ഡോ. ആന്‍റോ മാത്യു എന്നിവര്‍ നേതൃത്വം നല്‍കി.

കേന്ദ്ര നിര്‍ദേശം ജിലേബിയുടെ മധുരം കുറയ്ക്കുമോ ?

കോട്ടയം: ജിലേബിയുടെയും സമൂസയുടെയും ദോഷവശങ്ങള്‍ വ്യക്തമാക്കുന്ന മുന്നറിയിപ്പ് നല്‍കണമെന്ന കേന്ദ്ര നിര്‍ദേശം ബേക്കറികൾക്കു തിരിച്ചടിയാകുമോ. ഇത്തരം ഭക്ഷ്യവസ്തുക്കളില്‍ അടങ്ങിയിരിക്കുന്ന കൊഴുപ്പ്, മധുരം എന്നിവയുടെ അളവ് രേഖപ്പെടുത്തണമെന്നാണു നിര്‍ദേശം. ആദ്യഘട്ടത്തില്‍ കേന്ദ്രസര്‍ക്കാര്‍ സ്ഥാപനങ്ങളെയാണ് ഉള്‍പ്പെടുത്തിയിരിക്കുന്നതെങ്കിലും രണ്ടാഘട്ടത്തില്‍ നിര്‍ദേശം നിയമമായി എല്ലാ സ്ഥലങ്ങളിലേക്കും വരുമെന്നാണ് ബേക്കറി വ്യാപാരികള്‍ ഉള്‍പ്പെടെയുള്ളവര്‍ കരുതുന്നത്. വടക്കന്‍ ജില്ലകളിലേതുപോലെ ഇല്ലെങ്കിലും ജില്ലയിലെ ബേക്കറികളിലെല്ലാം ജിലേബി വില്‍പ്പന പൊടിപൊടിക്കാറുണ്ട്. പലചരക്ക് കടകളില്‍ ഉള്‍പ്പെടെ പായ്ക്കറ്റ് ജിലേബി വില്‍പ്പനയും നടക്കുന്നുണ്ട്. പത്തിലൊന്നു ബേക്കറികള്‍ പോലും ജിലേബി ഉള്‍പ്പെടെയുള്ള മധുര പലഹാരങ്ങള്‍ സ്വന്തമായി ഉത്പാദിപ്പിക്കുന്നില്ല. വിതരണക്കാരില്‍ നിന്നോ ബോര്‍മയുള്ള ബേക്കറികളില്‍ നിന്നോ വാങ്ങുകയാണ് പതിവ്. ഇവയുടെ ഉത്പാദനം സംബന്ധിച്ചോ, അടങ്ങിയിരിക്കുന്ന മധുരം സംബന്ധിച്ചോ യാതൊരു വിവരവും വില്‍പ്പനക്കാര്‍ക്കില്ലെന്നതാണു വസ്തുത. ജില്ലയില്‍ മിക്കയിടങ്ങളിലും വില്‍ക്കുന്ന ജിലേബി ഉള്‍പ്പെടെയുള്ള മധുര പലഹാരങ്ങള്‍ യാതൊരു മാനദണ്ഡവും പാലിക്കാതെയാണ് ഉത്പാദിപ്പിക്കുന്നതും വിറ്റഴിക്കുന്നതും. ഉഴുന്ന് ഉള്‍പ്പെടെയുള്ള ചേരുവകളാണ് ഉപയോഗിക്കേണ്ടതെങ്കിലും അമിതമായി മൈദാ മാവും പഞ്ചസാരയും കൃത്രിമ നിറവും ചേര്‍ത്തുണ്ടാക്കി വില്‍പ്പന നടത്തുന്നതായാണ് ആക്ഷേപം. സമൂസയുടെ കാര്യവും വ്യത്യസ്തമല്ല. മുമ്പ് ഉരുളക്കിഴങ്ങ് അടങ്ങിയ വെജ് സമൂസ മാത്രമുണ്ടായിരുന്നതെങ്കില്‍ ഇപ്പോള്‍ മീറ്റ്, ചിക്കന്‍, മുട്ട, പനീര്‍ ഉള്‍പ്പെടെയുള്ളവ ഉപയോഗിച്ചുള്ള സമൂസകള്‍ വിപണിയില്‍ ലഭ്യമാണ്. മൈദ കൊണ്ടുണ്ടാക്കിയ ഷീറ്റില്‍ മസാല ചേര്‍ത്തു വേവിച്ച പച്ചക്കറിയോ ഇറച്ചിയോ നിറച്ച് എണ്ണയില്‍ വറുത്താണ് സമൂസയുണ്ടാക്കുന്നത്. രുചികരണമാണെങ്കിലും എണ്ണയുടെ അളവ് ഗുരുതര ആരോഗ്യ പ്രശ്നങ്ങള്‍ക്കു കാരണമാകുമെന്നാണു വിലയിരുത്തല്‍. മുന്നറിയിപ്പ് നിര്‍ദേശം നല്‍കുന്നതിനേക്കാള്‍ ഉത്പാദനത്തിലെ അപാകത പരിഹരിക്കുകയാണ് വേണ്ടതെന്ന് ഒരു വിഭാഗം ബേക്കറി ഉടമകള്‍ പറയുന്നു. ഒരേ സ്ഥലത്തു നിന്നാകും പല ബേക്കറികളിലേക്കും സമൂസയും ജിലേബിയും ഉള്‍പ്പെടെയുള്ള പലഹാരങ്ങള്‍ എത്തുക. ഇവ എങ്ങനെ, എവിടെയുണ്ടാക്കുന്നുവെന്ന് പല ബേക്കറി ഉടമകള്‍ക്കും അറിയില്ല. ഭക്ഷ്യ സുരക്ഷാ വകുപ്പിന്‍റേതുള്‍പ്പെടെയുള്ള പരിശോധനകളുമില്ല. ഉപയോഗിക്കുന്ന മൈദ, ഇറച്ചി, പച്ചക്കറികള്‍, നിറം, പഞ്ചസാര എന്നിവയുടെ ഗുണനിലവാരം സംബന്ധിച്ചും ആര്‍ക്കും വ്യക്തതയില്ല. വില്ലനാകുന്നത് എണ്ണ; നിറം കറുപ്പായാലും മാറില്ല കോട്ടയം: സമൂസയും ജിലേബിയുമൊക്കെ വറുത്തുകോരുന്ന എണ്ണയാണു പ്രധാന വില്ലനെന്നു ഡോക്ടര്‍മാര്‍ ഉള്‍പ്പെടെയുള്ളവര്‍ പറയുന്നു. ചുരുക്കം ചിലയിടങ്ങള്‍ ഒഴിച്ചാല്‍ ഒരേ ചട്ടിയില്‍ ആവര്‍ത്തിച്ച് ഉപയോഗിക്കുന്ന എണ്ണയിലാണ് ഇത്തരം പലഹാരങ്ങള്‍ ഏറെയും ഉത്പാദിപ്പിക്കുന്നത്. പല ബോര്‍മകളിലും അടുക്കളകളിലും എണ്ണപ്പലഹാരമുണ്ടാകുന്ന വലിയ ചീനച്ചട്ടികള്‍ കഴുകാറേയില്ല. എണ്ണയുടെ അളവ് കുറയുന്നതനുസരിച്ച് വീണ്ടും വീണ്ടും ഒഴിച്ചു കൊടുക്കുക മാത്രമാണ് ചെയ്യുക. പലയിടങ്ങളിലെയും എണ്ണ ആവര്‍ത്തിച്ച് ഉപയോഗിച്ച് കരിനിറത്തിലായിരിക്കും. ആവര്‍ത്തിച്ച് ഉപയോഗിക്കുന്ന എണ്ണ കാന്‍സര്‍ ഉള്‍പ്പെടെയുള്ള രോഗങ്ങളിലേക്കു വഴി തുറക്കുമെന്ന് ആരോഗ്യ വിദഗ്ധര്‍ പറയുന്നു. പല തരത്തിലുള്ള പലഹാരമുണ്ടാക്കി ബേക്കറികളിലേക്കും ഹോട്ടലുകളിലേക്കും കൊടുക്കുന്ന അടുക്കളകളില്‍ പലതിലും ഒരേ എണ്ണയിലാണ് വിവിധ തരം പലഹാരങ്ങളുണ്ടാക്കുന്നത്. ഓരോ പലഹാരത്തിന്‍റെയും പൊട്ടും പൊടിയുമെല്ലാം എണ്ണയില്‍ കിടന്നു കരിഞ്ഞ് അടുത്ത ഇനത്തിനൊപ്പം ചേരും. പലഹാര നിര്‍മാണത്തിനായി ഉപയോഗിക്കുന്ന എണ്ണ സംബന്ധിച്ചും ആക്ഷേപങ്ങളേറെ. വെളിച്ചെണ്ണ വില അഞ്ഞൂറിലേക്ക് അടുത്തതോടെ മിക്കയിടങ്ങളിലും പാം ഓയിലും സൂര്യകാന്തി എണ്ണയുമാണ് ഉപയോഗിക്കുന്നത്. മാര്‍ക്കറ്റ് വിലയേക്കാള്‍ താഴ്ന്ന നിരക്കില്‍ ഇത്തരം എണ്ണ വില്‍ക്കുന്ന സ്ഥലങ്ങളില്‍ നിന്നാണ് തട്ടുകടകളില്‍ ഉള്‍പ്പെടെ എണ്ണ വാങ്ങുന്നത്. ഗുണമേന്മ കുറഞ്ഞ മായം കലര്‍ത്തിയ എണ്ണയാണ് ഇത്തരത്തില്‍ കുറഞ്ഞ വിലയ്ക്കു വില്‍ക്കുന്നത്.

കെയർ ഫോർ കെയർഗീവേഴ്സ് പദ്ധതിയുമായി സ്വരുമ പാലിയേറ്റീവ് കെയർ

കാഞ്ഞിരപ്പള്ളി: പാലിയേറ്റീവ് രോഗികൾക്കും ഇവരെ പരിചരിക്കുന്ന കുടുംബാംഗങ്ങൾക്കും കരുതൽ നൽകുന്ന കെയർ ഫോർ കെയർഗീവേഴ്സ് എന്ന പദ്ധതിക്ക് സ്വരുമ പാലിയേറ്റീവ് കെയറിൽ തുടക്കമായി. പദ്ധതി ഉദ്ഘാടനം സ്വരുമയുടെ 11-ാം വാർഷികദിനത്തിൽ രോഗികളെ പരിചരിക്കുന്ന 11 വ്യക്തികളെ ആദരിച്ച് തുടക്കംകുറിച്ചു. സ്വരുമയുടെ വനിതാ വിഭാഗമാണ് ഇതിനു നേതൃത്വം നൽകുന്നത്. ഒരു പതിറ്റാണ്ടിലേറെയായി കിടപ്പിലായ രോഗികളെ പരിചരിക്കുന്ന അടുത്ത ബന്ധുക്കളെയാണ് ഇതിനായി പരിഗണിക്കുന്നത്. അപകടംമൂലം തലയ്ക്കോ നാഡീവ്യൂഹങ്ങൾക്കോ ക്ഷതംപറ്റി കിടപ്പിലായവർ, സെറിബ്രൽ പൾസി, മെന്‍റൽ റിട്ടാർഡേഷൻ, ഓട്ടിസം ബാധിച്ചവർ എന്നിവരെ പരിചരിക്കുന്നവരുടെ സംരക്ഷണം ഇതിൽ ഉൾപ്പെടും. ഈ വിഭാഗം ആളുകൾക്ക് ജീവിതശൈലീ രോഗങ്ങൾ പിടിപെടുന്നതായും ഒരുപക്ഷേ, രോഗികളെക്കാളേറെ മാനസിക പിരിമുറുക്കം ഇവര്‍ അനുഭവിക്കുന്നതായും കഴിഞ്ഞ കാലങ്ങളില്‍ സ്വരുമയുടെ പ്രവർത്തനത്തിൽനിന്ന് മനസിലാക്കാൻ കഴിഞ്ഞു. മാനസിക സമ്മർദം കുറയ്ക്കാനുള്ള കൗൺസലിംഗ്, ഏകദിന വിനോദസഞ്ചാരം, തീർഥാടന കേന്ദ്ര സന്ദർശനം, പരിശീലന ക്ലാസുകൾ തുടങ്ങിയവയാണ് പദ്ധതിയിൽ ഉൾപ്പെടുന്നത്. കാഞ്ഞിരപ്പള്ളി, ചിറക്കടവ്, പാറത്തോട്, എലിക്കുളം എന്നീ പഞ്ചായത്തുകളാണ് ആദ്യ ഘട്ടത്തിൽ ഉൾപ്പെടുന്നത്. ഈ ഗണത്തിലുള്ള രോഗികൾക്കു താത്കാലിക പരിചരണം നൽകുന്നതിനായുള്ള കുടുംബാംഗങ്ങളോ അല്ലാത്തവരുമായോ ഉള്ള വ്യക്തികളെ കണ്ടുപിടിക്കാനുള്ള ശ്രമങ്ങൾ തുടങ്ങി. ജിജി നിക്ലാവോസ് കുന്നത്ത്, മെഹർ ഫിറോസ് കണ്ണമ്പ്ര, സജിത ഷാജി ചെറാടിൽ, ഡാനി ജോസ് കുന്നത്ത് എന്നിവർ പ്രോജക്‌ട് കോ-ഓർഡിനേറ്റേഴ്സായി പ്രവർത്തിക്കുന്നു. ഫോൺ: 8111928361.

കപ്പാട് ഗവൺമെന്‍റ് ഹൈസ്കൂളിലെ അൺഫിറ്റായ കെട്ടിടം പൊളിച്ചുമാറ്റും

കാഞ്ഞിരപ്പള്ളി: കപ്പാട് ഗവൺമെന്‍റ് ഹൈസ്കൂളിലെ അൺഫിറ്റായ കെട്ടിടം ഉടൻ പൊളിച്ചുമാറ്റാൻ ചീഫ് വിപ്പ് ഡോ. എൻ. ജയരാജ് നിർദേശം നൽകി. സ്കൂളിൽ സന്ദർശം നടത്തിയശേഷമായിരുന്നു അദ്ദേഹം ഇക്കാര്യം അറിയിച്ചത്. മൂർഖൻപാമ്പിനെ കണ്ട കാഞ്ഞിരപ്പള്ളി ബിഎഡ് കോളജും അദ്ദേഹം സന്ദർശിച്ചു. കപ്പാട് ഗവൺമെന്‍റ് ഹൈസ്കൂളിലെ അൺഫിറ്റായ കെട്ടിടം പൊളിച്ചുമാറ്റാൻ നടപടിയില്ലെന്ന മാധ്യമ വാർത്തകളുടെ അടിസ്ഥാനത്തിലായിരുന്നു സന്ദർശനം. അൺഫിറ്റായ കെട്ടിടം അദ്ദേഹം നേരിൽ കണ്ടു. കെട്ടിടം പൊളിക്കാനുള്ള എസ്റ്റിമേറ്റ് തയാറാക്കി നൽകാൻ ഉദ്യോഗസ്ഥർക്ക് നിർദേശം നൽകി. ജില്ലാ പഞ്ചായത്തിൽനിന്ന് അനുമതി കിട്ടിയാലുടൻ തന്നെ ടെൻഡർ നൽകും. ഇതിനുശേഷം പുതിയ കെട്ടിടം നിർമിക്കാൻ ഫണ്ട് അനുവദിക്കും. പലയിടത്തായി ചിതറിക്കിടക്കുന്ന ക്ലാസ് മുറികൾ ഇങ്ങോട്ടേക്കു മാറ്റാൻ ലക്ഷ്യമിട്ട് മൂന്നുനില കെട്ടിടമായിരിക്കും നിർമിക്കുകയെന്നും ചീഫ് വിപ്പ് അറിയിച്ചു. കാഞ്ഞിരപ്പള്ളി ബിഎഡ് കോളജ് പരിസരത്ത് മൂർഖൻപാമ്പിനെ കണ്ട സാഹചര്യത്തിൽ ഇവിടെയും എംഎൽഎ സന്ദർശിച്ചു. കോളജിനോട് ചേർന്നുള്ള കരിങ്കൽക്കെട്ടുകളിലെ വിടവ് അടയ്ക്കാൻ നടപടി സ്വീകരിക്കുമെന്ന് അദ്ദേഹം പറഞ്ഞു. ഇതിനായി സി പാസ് എസ്റ്റിമേറ്റ് തയാറാക്കും. തകർന്നുകിടക്കുന്ന ഇൻഡോർ വോളിബോൾ സ്റ്റേഡിയം നീക്കം ചെയ്യാത്തതാണ് പേട്ട സ്കൂൾ പരിസരം കാടുകയറാൻ കാരണം. ഇതുമൂലം പേട്ട സ്കൂളിന് പുതിയ കെട്ടിടം നിർമിക്കാൻ കഴിയാത്ത സാഹചര്യമുണ്ട്. ഇത് പൊളിച്ചുമാറ്റാൻ ജില്ലാ പഞ്ചായത്ത് നടപടി എടുക്കണം. എംപി ഫണ്ട് ഉപയോഗിച്ച് നിർമാണം കഴിപ്പിച്ച പദ്ധതിയാണെന്നിരിക്കേ എംപിയുടെ ഭാഗത്തുനിന്ന് ഇക്കാര്യത്തിൽ നടപടി വേണമെന്നും ഡോ. എൻ. ജയരാജ് ആവശ്യപ്പെട്ടു. സന്നദ്ധസംഘടനകളുടെകൂടി സഹായത്തോടെ സ്കൂൾ പരിസരത്തെ കാടുകൾ വെട്ടിത്തെളിക്കാൻ പദ്ധതി തയാറാക്കി വരികയാണ്. പൊൻകുന്നം ഗവൺമെന്‍റ് ഹൈസ്കൂളിലായിരിക്കും ഇത് ആദ്യം നടപ്പാക്കുക. 26ന് ഇതുമായി ബന്ധപ്പെട്ട യോഗം വിളിച്ചുചേർക്കും. കാഞ്ഞിരപ്പള്ളി നിയോജക മണ്ഡലത്തിലെ വിദ്യാലയങ്ങളിലെല്ലാം നേരിട്ടെത്തി സുരക്ഷ വിലയിരുത്തുമെന്നും ചീഫ് വിപ്പ് പറഞ്ഞു.

കരിപ്പൂത്തട്ട് ഗവ. ഹൈസ്കൂളിന്‍റെ പഴയ കെട്ടിടം നിലംപൊത്താറായ നിലയിൽ

ആർപ്പൂക്കര: വിദ്യാർഥികളുടെയും അധ്യാപകരുടെയും ജീവനു ഭീഷണിയായി കരിപ്പൂത്തട്ട് ഗവൺമെന്‍റ് ഹൈസ്കൂളിന്‍റെ പഴയ കെട്ടിടം ഏതു സമയത്തും നിലംപൊത്താമെന്ന നിലയിൽ. 70ൽ അധികം വർഷം പഴക്കമുള്ള കെട്ടിടമാണിത്. കെട്ടിടം ശോച്യാവസ്ഥയിലായതിനെത്തുടർന്ന് തൊട്ടടുത്തുള്ള കെട്ടിടത്തിലേക്ക് ക്ലാസുകൾ മാറ്റുകയായിരുന്നു. കെട്ടിടത്തിന്‍റെ ഭിത്തികൾക്ക് ബലക്ഷയം സംഭവിച്ചും മേൽക്കൂര ഓടുകൾ തകർന്ന് മഴവെള്ളം ഉള്ളിലേക്കു വീഴുന്ന നിലയിലുമാണ്. ഏതുസമയത്തും നിലംപൊത്താവുന്ന ഈ കെട്ടിടത്തിന്‍റെ അടുത്തുകൂടിയാണ് വിദ്യാർഥികളും അധ്യാപകരും ക്ലാസ് മുറികളിലേക്കു പോകുന്നത്. ഇതിന്‍റെ തൊട്ടടുത്ത് ഓടിക്കളിക്കുന്ന കുട്ടികൾ അധ്യാപകരുടെ കണ്ണുവെട്ടിച്ച് പൊളിഞ്ഞ ജനൽവഴി കെട്ടിടത്തിന്‍റെ ഉള്ളിൽ പ്രവേശിക്കാറുമുണ്ട്. ഇത് വലിയ അപകടങ്ങൾക്ക് വഴിവച്ചേക്കാം. ഒന്നു മുതൽ 10 വരെ ക്ലാസുകളിലായി 70ഓളം കുട്ടികളും അധ്യാപകരും അനധ്യാപകരുമായി 17 ജീവനക്കാരുമുണ്ട്. ഈ കെട്ടിടം പൊളിച്ചുനീക്കണമെന്നാവശ്യപ്പെട്ട് നിരവധി തവണ സ്കൂൾ അധികൃതർ ജില്ലാ പഞ്ചായത്ത് അധികൃതരെ സമീപിച്ചെങ്കിലും നടപടിയായില്ല. 2022 മുതൽ പഴയ കെട്ടിടത്തിൽ ക്ലാസ് നടക്കുന്നില്ല. 24ൽ ആർപ്പൂക്കര പഞ്ചായത്ത് എൻജിനിയർ കെട്ടിടം പ്രവർത്തനയോഗ്യമല്ലെന്നു റിപ്പോർട്ട് നൽകിയിട്ടുള്ളതാണ്. സ്കൂൾ കെട്ടിടത്തിന് പുറകുവശത്ത് കാടുകയറി ഇഴജന്തുക്കളുടെ ശല്യവും രൂക്ഷമാണ്. ഇക്കാര്യം ആർപ്പൂക്കര പഞ്ചായത്ത്-ജില്ലാ പഞ്ചായത്ത് അധികൃതരെയും അറിയിച്ചെങ്കിലും പരിസരം വൃത്തിയാക്കാൻ നടപടിയില്ല. അതേസമയം, കാർത്തികപ്പള്ളിയിൽ കഴിഞ്ഞദിവസം സ്കൂൾ കെട്ടിടം ഇടിഞ്ഞുവീണ് അപകടമുണ്ടായ സാഹചര്യത്തിൽ പഴയ സ്കൂൾ കെട്ടിടം പൊളിച്ചുനീക്കാൻ നടപടിയെടുത്തിട്ടുണ്ടെന്ന് ഇന്നലെ ജില്ലാ പഞ്ചായത്ത് അധികൃതർ അറിയിച്ചെന്ന് പ്രധാനാധ്യാപകൻ ദീപു ജി. പറഞ്ഞു. സ്കൂളിന് ഭീഷണിയായി കൂറ്റൻ തേക്ക് മരം ആർപ്പുക്കര: കരിപ്പൂത്തട്ട് ഗവൺമെന്‍റ് ഹൈസ്കൂളിന് ഭീഷണിയായി കൂറ്റൻ തേക്കുമരവും. സ്കൂൾ കെട്ടിടത്തോട് ചേർന്നാണ് കൂറ്റൻ തേക്കുമരം നിൽക്കുന്നത്. ശക്തമായ കാറ്റിലും മഴയിലും തേക്കുമരം ആടിയുലയുന്നത് വിദ്യാർഥികൾക്കും അധ്യാപകർക്കും സമീപത്തെ വീട്ടുകാർക്കും ഭീഷണിയായിരിക്കുയാണ്. തേക്കിന്‍റെ അടിഭാഗത്ത് വേര് ഇളകുന്ന തരത്തിൽ വലിയ പൊത്ത് രൂപപ്പെട്ടിട്ടുണ്ട്. ഇതിൽ പാമ്പ് കയറി ഇരിക്കുന്നത് കണ്ടിട്ടുണ്ടെന്ന് സമീപവാസി പറഞ്ഞു. തേക്ക് വെട്ടിമാറ്റുന്നതിന് സ്കൂൾ അധികൃതർ പലതവണ ജില്ലാ പഞ്ചായത്ത് അധികൃതരെ സമീപിച്ചിരുന്നു. ഇതിന്‍റെ അടിസ്ഥാനത്തിൽ വനംവകുപ്പ് ഉദ്യോഗസ്ഥരെത്തി മുൻവർഷം തേക്ക് ലേലം ചെയ്യുന്നതിന് വിലയിട്ടിരുന്നു. രണ്ടരലക്ഷം രൂപയാണ് വില നിശ്ചയിച്ചത്. എന്നാൽ ലേലം വിളിക്കാൻ കച്ചവടക്കാരെത്തിയില്ല. തുടർന്ന് കഴിഞ്ഞവർഷം ഒരു ലക്ഷത്തിരണ്ടായിരം രൂപ വില നിശ്ചയിക്കുകയും ഒരു കച്ചവടക്കാരൻ മരം ലേലത്തിൽ പിടിക്കുകയും ചെയ്തിരുന്നു. മറ്റൊരു കച്ചവടക്കാരൻ ഇതിനെതിരേ പരാതി നൽകിയതോടെ മരം മുറി നടന്നില്ല. ഇന്നലെ തേക്കിന്‍റെ കമ്പ് ഇറക്കുന്നതിന് ജില്ലാ പഞ്ചായത്ത് ഫണ്ട് അനുവദിച്ചതായാണ് വിവരം.

ബിസിഎം കോളജ് സ്ത്രീ വിദ്യാഭ്യാസത്തിന്‍റെയും ശക്തീകരണത്തിന്‍റെയും ഉദാത്ത മാതൃക: മന്ത്രി വാസവന്‍

കോട്ടയം: കോട്ടയത്തിന്‍റെ അഭിമാനമായ ബിസിഎം കോളജ് സ്ത്രീ വിദ്യാഭ്യാസത്തിന്‍റെയും ശക്തീകരണത്തിന്‍റെയും ഉദാത്ത മാതൃകയാണെന്ന് മന്ത്രി വി.എന്‍. വാസവന്‍. കോളജിന്‍റെ സപ്തതി ആഘോഷ സമാപന സമ്മേളനം ഉദ്ഘാടനം ചെയ്യുകയായിരുന്നു മന്ത്രി വാസവന്‍. സ്ത്രീകള്‍ വിദ്യാസമ്പന്നരാകുന്നതുവഴി രാജ്യ പുരോഗതി തന്നെയാണ് സാധ്യമാകുന്നതെന്നും മന്ത്രി പറഞ്ഞു. കോട്ടയം ആര്‍ച്ച്ബിഷപ് മാര്‍ മാത്യു മൂലക്കാട്ട് അധ്യക്ഷത വഹിച്ചു. തിരുവഞ്ചൂര്‍ രാധാകൃഷ്ണന്‍ എംഎല്‍എ മുഖ്യപ്രഭാഷണം നടത്തി. കോളജ് മാനേജര്‍ ഫാ. ഏബ്രഹാം പറമ്പേട്ട് അനുഗ്രഹപ്രഭാഷണം നടത്തി. സപ്തതി വര്‍ഷത്തില്‍ കോളജിലെ അധ്യാപകരും വിദ്യാര്‍ഥികളും ചേര്‍ന്നൊരുക്കിയ പുസ്തകത്തിന്‍റെ പ്രകാശനം ആര്‍ച്ച്ബിഷപ് മാര്‍ മാത്യു മൂലക്കാട്ട്, കോളജ് മാനേജര്‍ ഫാ. ഏബ്രഹാം പറമ്പേട്ടിനു നല്‍കി നിര്‍വഹിച്ചു. കൊമേഴ്‌സ്, മാത്തമാറ്റിക്‌സ് റിസര്‍ച്ച് സെന്‍ററുകളുടെ ഉദ്ഘാടനം ആര്‍ച്ച്ബിഷപ് മാർ മാത്യു മൂലക്കാട്ടും സെന്‍റര്‍ ഫോര്‍ വുമണ്‍ എംപവര്‍മെന്‍റ് ആന്‍ഡ് അപ്കില്ലിംഗ് ഉദ്ഘാടനം മന്ത്രി വി.എന്‍. വാസവനും നിര്‍വഹിച്ചു. ബിസിഎം ലീഡ് ഐഎഎസ് അക്കാദമിയുടെ ഉദ്ഘാടനം തിരുവഞ്ചൂര്‍ രാധാകൃഷ്ണനും സെന്‍റര്‍ ഫോര്‍ റോബോട്ടിക് ആന്‍ഡ് എഐയുടെ ഉദ്ഘാടനം തോമസ് ചാഴികാടനും സെന്‍റര്‍ ഫോര്‍ ഫോറിന്‍ ലാംഗ്വേജസ് ഉദ്ഘാടനം ഡോ. ജോസ് ജയിംസും സെന്‍റര്‍ ഫോര്‍ പേഴ്‌സണല്‍ ഡെവലപ്‌മെന്‍റ് ആന്‍ഡ് പ്ലേസ്‌മെന്‍റ് ഉദ്ഘാടനം ഫാ. ഏബ്രഹാം പറമ്പേട്ടും ബിസിഎം ഏവിയേഷന്‍ അക്കാദമിയുടെ ഉദ്ഘാടനം ഷെവലിയാര്‍ ജോയി ജോസഫ് കൊടിയന്തറയും നിര്‍വഹിച്ചു. സെന്‍റർ ഫോര്‍ ഇന്ത്യന്‍ നോളജ് സിസ്റ്റത്തിന്‍റെ ഉദ്ഘാടനം സിസ്റ്റര്‍ കരുണയും സെന്‍റര്‍ ഫോര്‍ ഇന്നൊവേഷന്‍ ഇന്‍കുബേഷന്‍ ആന്‍ഡ് എന്‍റര്‍പ്രണര്‍ഷിപ്പിന്‍റെ ഉദ്ഘാടനം ഡോ. പ്രിയ തോമസും സപ്തതി സ്മാരക സ്‌കോളര്‍ഷിപ്പ് - ബിസിഎം കെയര്‍ ഉദ്ഘാടനം കോളജ് വിദ്യാഭ്യാസ കോര്‍പറേറ്റ് സെക്രട്ടറി ഫാ. ഫില്‍മോന്‍ കളത്രയും നിര്‍വഹിച്ചു. കോളജ് പ്രിന്‍സിപ്പല്‍ പ്രഫ. ഡോ. കെ.വി. തോമസ് സ്വാഗതവും വൈസ് പ്രിന്‍സിപ്പല്‍ ഡോ. അന്നു തോമസ് കൃതജ്ഞതയും പറഞ്ഞു.

പുരയിടത്തിന്‍റെ സംരക്ഷണഭിത്തി ഇടിഞ്ഞുവീണു; അപകടം ഒഴിവായി

കടുവാക്കുളം: സമീപ പുരയിടത്തിന്‍റെ എട്ടടി ഉയരമുള്ള സംരക്ഷണഭിത്തി വീട്ടുമുറ്റത്തേക്ക് ഇടിഞ്ഞുവീണു. പുലര്‍ച്ചെയായതിനാല്‍ വന്‍ അപകടം ഒഴിവായതായി വീട്ടുകാര്‍. കടുവാക്കുളത്തിനു സമീപം ഇടുങ്ങാടി ഭാഗത്ത് തട്ടാംപള്ളില്‍ മുരളിയുടെ വീട്ടുമുറ്റത്തേക്കാണ് കരിങ്കല്ലില്‍ പണിത മതില്‍ ഇടിഞ്ഞുവീണത്. ഇന്നലെ പുലര്‍ച്ചെ അഞ്ചിനാണ് സംഭവം. ഈ സമയം കുടുംബാംഗങ്ങള്‍ വീടിനുള്ളിലായിരുന്നതുകൊണ്ട് അനിഷ്ട സംഭവങ്ങള്‍ ഒഴിവായി. വീടിനോട് അടുത്തുനില്‍ക്കുന്ന മതിലിന്‍റെ അവശിഷ്ടങ്ങള്‍ വീടിന്‍റെ ഭിത്തിയില്‍ വന്ന് ഇടിച്ചനിലയിലായിരുന്നു. സംഭവത്തെത്തുടര്‍ന്ന് കരിങ്കല്ലുകളും മണ്ണും നീക്കം ചെയ്യുന്നതിനുള്ള നടപടികള്‍ തുടങ്ങി.

വനിതാ കമ്മീഷന്‍ അദാലത്തില്‍ 9 പരാതികള്‍ തീര്‍പ്പാക്കി

കോട്ടയം: വനിതാ കമ്മീഷന്‍ ജില്ലാ അദാലത്തില്‍ ഒന്പത് പരാതികള്‍ തീര്‍പ്പാക്കി. വനിതാ കമ്മീഷനംഗം ഇന്ദിര രവീന്ദ്രന്‍റെ നേതൃത്വത്തില്‍ കളക്ടറേറ്റിലെ വിപഞ്ചിക ഹാളില്‍ നടന്ന അദാലത്തില്‍ ആകെ 75 പരാതികളാണ് പരിഗണനയ്ക്കു വന്നത്. ഒരെണ്ണത്തില്‍ ഭൂരേഖ തഹസില്‍ദാരുടെ റിപ്പോര്‍ട്ട് തേടി. 65 പരാതികള്‍ അടുത്ത അദാലത്തിലേക്കു മാറ്റി. ഒരു പുതിയ പരാതി പരിഗണിക്കുകയും ചെയ്തു. സ്വകാര്യ കോളജുകളില്‍ ദീര്‍ഘകാലമായി ജോലി ചെയ്യുന്ന അധ്യാപകരെ അകാരണമായി പിരിച്ചുവിടുന്ന പ്രവണത കമ്മീഷന്‍റെ ശ്രദ്ധയില്‍പ്പെട്ടു. അനധികൃതമായുള്ള പിരിച്ചുവിടലിനെതിരേ ശക്തമായ നിയമം നടപ്പാക്കേണ്ടത് ആവശ്യമാണെന്ന് കമ്മീഷന്‍ വ്യക്തമാക്കി. തൊഴിലിടങ്ങളിലുള്ള പീഡനം തടയുന്നതിനുള്ള നിയമമായ പോഷ് ആക്ട് പ്രകാരം രൂപീകരിച്ചിട്ടുള്ള ഇന്‍റേണല്‍ കമ്മിറ്റി (ഐസി) പരാതികളുടെ അടിസ്ഥാനത്തില്‍ എതിര്‍കക്ഷികള്‍ക്കെതിരേ എടുക്കുന്ന നടപടികള്‍ ശരിയായി പാലിക്കുന്നില്ലെന്ന് കമ്മീഷന്‍ പറഞ്ഞു. പുതിയ ഐസികള്‍ രൂപീകരിക്കേണ്ട‌തിന്‍റെയും നിലവിലുള്ള ഐസികള്‍ ശക്തമായി പ്രവര്‍ത്തിക്കേണ്ടതിന്‍റെയും ആവശ്യകത കമ്മീഷന്‍ ചൂണ്ടിക്കാട്ടി. വസ്തുതര്‍ക്കത്തെച്ചൊല്ലിയുള്ള ഉപദ്രവം, വിവാഹേതര ബന്ധം മുഖാന്തരം അനാഥമാകുന്ന കുട്ടികളുടെ സുരക്ഷിതത്വം എന്നീ വിഷയങ്ങളും കമ്മീഷന്‍ പരിഗണിച്ചു. ഷൈനി ഗോപി, സി.കെ. സുരേന്ദ്രന്‍, സി.എ. ജോസ് എന്നിവര്‍ അദാലത്തില്‍ പങ്കെടുത്തു.

മെഡിക്കൽ കോളജ് ആശുപത്രി കെട്ടിടം തകർന്ന് മരണപ്പെട്ട ബിന്ദുവിന്‍റെ മകൾ ഡിസ്ചാർജായി

ഗാന്ധിനഗർ: കോട്ടയം മെഡിക്കൽ കോളജ് ആശുപത്രിയിൽ കെട്ടിടം തകർന്നുവീണ് മരിച്ച തലയോലപ്പറമ്പ് സ്വദേശിനി ബിന്ദുവിന്‍റെ മകൾ നവമി ശസ്ത്രക്രിയയ്ക്കു ശേഷം ഇന്നലെ ഡിസ്ചാർജായി. സഹോദരൻ നവനീത്, ബിന്ദുവിന്‍റെ സഹോദരി രേണുക, ബന്ധു എന്നിവരോ‌ടൊപ്പമാണ് ഇന്നലെ വൈകുന്നേരം ആശുപത്രിയിൽനിന്ന് നവമി മടങ്ങിയത്. രേണുകയുടെ മകൾ ദിവ്യയുടെ എറണാകുളത്തെ വീട്ടിലാണ് നവമിയെ വിശ്രമത്തിനായി കൊണ്ടുപോയത്. ആംബുലൻസിലായിരുന്നു യാത്ര. ഇനി ഒരു മാസം കഴിഞ്ഞ് വീണ്ടും തുടർപരിശോധനയ്ക്കായി ആശുപത്രിയിൽ എത്തണമെന്ന നിർദേശം ഡോക്ടർമാർ നൽകിയിട്ടുണ്ട്. ശരീരത്തിലുണ്ടായ അണുബാധയെത്തുടർന്ന് കഴിഞ്ഞ ജൂലൈ ഒന്നിനാണ് പിതാവ് വിശ്രുതൻ, അമ്മ ബിന്ദു എന്നിവർ നവമിയെ കോട്ടയം മെഡിക്കൽ കോളജ് ആശുപത്രിയിൽ കൊണ്ടുവന്ന് അഡ്മിറ്റ് ചെയ്തത്. എന്നാൽ, ജൂലൈ മൂന്നിന് ആശുപത്രിക്കെട്ടിടം തകർന്ന് അമ്മ ബിന്ദു മരണപ്പെട്ടതോടെ ചികിത്സ നിർത്തിവച്ച് നവമി വീട്ടിലേക്ക് മടങ്ങിയിരുന്നു. പിന്നീട് സംസ്കാര ചടങ്ങുകൾക്കു ശേഷം ജൂലൈ ഏഴിന് വീണ്ടും കോട്ടയം മെഡിക്കൽ കോളജ് ആശുപത്രിയിൽ അഡ്മിറ്റായി, ഒമ്പതിന് ശസ്ത്രക്രിയ നടത്തി. ഒമ്പത് മണിക്കൂർ നീണ്ടുനിന്ന നവമിയുടെ ശസ്ത്രക്രിയ ന്യൂറോസർജറി വിഭാഗവും അനസ്തേഷ്യവിഭാഗവും ചേർന്നാണ് നടത്തിയത്. ഡിസ്ചാർജ് ചെയ്യുന്ന സമയം മന്ത്രി വി.എൻ. വാസവൻ, ആശുപത്രി സൂപ്രണ്ട് ഡോ. ടി.കെ. ജയകുമാർ, പ്രിൻസിപ്പൽ ഡോ. വർഗീസ് പുന്നൂസ്, ന്യൂറോ സർജറി മേധാവി സതീഷ്‌ ചന്ദ്രൻ തുടങ്ങിയവരും എത്തിയിരുന്നു.

തട്ടിപ്പ് കേസില്‍ പ്രതി പിടിയിലായി

പാമ്പാടി: പെരുമ്പാവൂരുള്ള ക്രഷറില്‍ ഓടിച്ച ലോറിയുടെ സിസി തവണകൾ അടയ്ക്കാമെന്നും ടെസ്റ്റിംഗ് ജോലികളും നടത്തിക്കൊള്ളാമെന്നും പറഞ്ഞു വിശ്വസിപ്പിച്ച് തട്ടിപ്പ് നടത്തിയ കേസില്‍ പ്രതി പിടിയിലായി. തൊടുപുഴ കരിമണ്ണൂര്‍ പരീക്കല്‍ വീട്ടില്‍ സന്തോഷ് കുമാരന്‍ (51) ആണ് പാമ്പാടി പോലീസിന്‍റെ പിടയിലായത്. വാഹനത്തിന്‍റെ മാസത്തവണകള്‍ അടയ്ക്കാതെയും ടെസ്റ്റിംഗ് നടപടികള്‍ ചെയ്യാതെയും വാഹനം തിരികെ നല്‍കാതെയും പരാതിക്കാരനെ തട്ടിപ്പു നടത്തുകയായിരുന്നു. കേരളത്തിലെ വിവിധ സ്റ്റേഷനുകളില്‍ പുരാവസ്തു, വാഹന തട്ടിപ്പുകേസുകള്‍ ഉള്‍പ്പെടെ 14 കേസുകളില്‍ ഇയാള്‍ പ്രതിയാണ്. ഒളിവില്‍ കഴിഞ്ഞുവന്നിരുന്ന പ്രതിയെ പാമ്പാടി പോലീസിന്‍റെ നേതൃത്വത്തില്‍ ഈരാറ്റുപേട്ടയില്‍നിന്നാണ് പിടികൂടിയിത്. പ്രതിയെ കോടതിയില്‍ ഹാജരാക്കി.

മാലിന്യത്തിനും കൂറ്റന്‍ മരങ്ങള്‍ക്കും നടുവില്‍ വീർപ്പുമുട്ടി ചങ്ങനാശേരി ഗവ. എച്ച്എസ്എസ്

ചങ്ങനാശേരി: മാലിന്യത്തിനും കൂറ്റന്‍മരങ്ങള്‍ക്കും നടുവിലാണ് ചങ്ങനാശേരി ഗവൺമെന്‍റ് സ്‌കൂള്‍. എല്‍പി, യുപി, ഹൈസ്‌കൂള്‍, ഹയര്‍ സെക്കന്‍ഡറി വിഭാഗങ്ങളിലായി വിദ്യാര്‍ഥികള്‍ പഠിക്കുന്ന ഈ സ്‌കൂളിന്‍റെ വിവിധ കെട്ടിടങ്ങളിലേക്ക് പടുകൂറ്റന്‍ മരങ്ങള്‍ എപ്പോഴും നിലംപൊത്താവുന്ന നിലയില്‍ ചാഞ്ഞും ചരിഞ്ഞും നില്‍ക്കുകയാണ്. സ്‌കൂള്‍ പരിസരത്തെ ചില മരങ്ങളുടെ ശിഖരങ്ങള്‍ വെട്ടിമാറ്റിയെങ്കിലും പല മരങ്ങളും അപകടാവസ്ഥ യിൽ നില്ക്കുകയാണ്. യുപി, ഹയര്‍സെക്കന്‍ഡറി സ്‌കൂളുകളുടെ ശൗചാലയങ്ങളുടെ മുകളിലേക്കും വന്‍മരങ്ങള്‍ ചാഞ്ഞുനില്‍ക്കുന്നുണ്ട്. ഈ മരങ്ങളുടെ ശിഖരങ്ങള്‍ വെട്ടിമാറ്റി കുട്ടികളുടെ സുരക്ഷ ഉറപ്പാക്കണമെന്നാവശ്യപ്പെട്ട് സ്‌കൂള്‍ അധികൃതര്‍ നഗരസഭാ ഭരണാധികാരികള്‍ക്ക് അറിയിപ്പ് നല്‍കിയിട്ടുണ്ട്. സ്‌കൂളിന്‍റെ പിന്നിലെ മതിൽ നിലംപൊത്താറായ നിലയിലാണ്. സ്‌കൂളിനു പിന്നിലുള്ള കവാടത്തിനു സമീപമുള്ള മാലിന്യക്കൂമ്പാരം വിദ്യാര്‍ഥികള്‍ക്കും അധ്യാപകര്‍ക്കും രോഗഭീഷണിക്കു കാരണമാണ്. സ്‌കൂള്‍ പരിസരങ്ങളില്‍ തെരുവുനായ്ക്കളുടെ ശല്യവും പതിവാണ്.

ഉമ്മന്‍ ചാണ്ടി സമാനതകളില്ലാത്ത ഭരണാധികാരി: വി.ജെ. ലാലി

ചങ്ങനാശേരി: എല്ലാ മനുഷ്യരുടെയും ജീവിതത്തെ ഒരുപോലെ സ്വാധീനിച്ച സമാനതകളില്ലാത്ത ഭരണാധികാരിയായിരുന്ന് ഉമ്മന്‍ ചാണ്ടിയെന്നു കേരള കോണ്‍ഗ്രസ് ഉന്നതാധികാര സമിതി അംഗം വി.ജെ. ലാലി. കേരള എന്‍ജിഒ അസോസിയേഷന്‍ ജില്ലാ കമ്മിറ്റിയുടെ നേതൃത്വത്തില്‍ സംഘടിപ്പിച്ച ഉമ്മന്‍ ചാണ്ടി അനുസ്മരണ സമ്മേളനവും കാരുണ്യപ്രവര്‍ത്തനങ്ങളുടെ ഉദ്ഘാടനവും നിര്‍വഹിച്ചു പ്രസംഗിക്കുകയായിരുന്നു അദ്ദേഹം. എന്‍ജിഒ അസോസിയേഷന്‍ ജില്ലാ പ്രസിഡന്‍റ് സതീഷ് ജോര്‍ജ് അധ്യക്ഷനായിരുന്നു. അസോസിയേഷന്‍ സംസ്ഥാന സെക്രട്ടേറിയറ്റ് അംഗം അഷറഫ് പറപ്പള്ളി, റോജന്‍ മാത്യു, പ്രകാശ് ജേക്കബ്, തോമസ് അക്കര, എന്‍.എസ്. സന്തോഷ്, റോബി ജെ., കെ.സി. പ്രതീഷ്കുമാര്‍, പ്രശാന്ത് സി., സനീഷ് എ., അരവിന്ദാക്ഷന്‍ കെ., ഷാഹുല്‍ ഹമീദ് തുടങ്ങിയവര്‍ പ്രസംഗിച്ചു. ചങ്ങനാശേരി ജനറല്‍ ആശുപത്രിയിലും ആയുര്‍വേദ ആശുപത്രിയിലും രോഗികള്‍ക്കും കൂട്ടിരിപ്പുകാര്‍ക്കും ഉച്ചഭക്ഷണം വിതരണം ചെയ്തു.

ആളുമാറി യുവാവിനെ വെട്ടിയ കേസിൽ രണ്ടുപേർ അറസ്റ്റിൽ

തൃക്കൊടിത്താനം: യുവാവിനെ ആളുമാറി വെട്ടിയ കേസിൽ ഗുണ്ടകൾ അറസ്റ്റിൽ. കൊലപാതകക്കേസുകൾ ഉൾപ്പെടെയുള്ള കേസുകളിൽ പ്രതിയായ കുപ്രസിദ്ധ ഗുണ്ട തൃക്കൊടിത്താനം കൊച്ചുപറമ്പിൽ പ്രമോദ് പ്രസന്നൻ, കൂട്ടാളി പ്രൈസ്മോൻ എന്നിവരെയാണ് തൃക്കൊടിത്താനം പോലീസ് അറസ്റ്റ് ചെയ്തത്. കഴിഞ്ഞദിവസം പായിപ്പാട് വെള്ളാപ്പള്ളി ഭാഗത്ത് ഗുണ്ടകൾ ബഹളമുണ്ടാക്കിയത് ചോദ്യം ചെയ്ത ആൾ എന്നു കരുതി 17ന് രാത്രി 7.30ന് പായിപ്പാട് വെള്ളാപ്പള്ളി ഭാഗത്തുനിന്നും ഓമണ്ണിൽ ഭാഗത്തേക്കുള്ള റോഡിലൂടെ നടന്നുപോയ ഒളപ്പമണ്ണിൽ സാബുവിനെയാണ് നീളമുള്ള കത്തി ഉപയോഗിച്ച് പ്രതികൾ തലയ്ക്ക് വെട്ടിപ്പരിക്കേൽപ്പിച്ചു കൊലപ്പെടുത്താൻ ശ്രമിച്ചത്. ബഹളത്തെത്തുടർന്ന് ആളുകൾ ഓടിക്കൂടിയപ്പോൾ സ്ഥലത്തുനിന്നും രക്ഷപ്പെട്ട പ്രതികൾ ജില്ല വിട്ടുപോവുകയായിരുന്നു. തുടർന്ന് സ്റ്റേഷൻ ഹൗസ് ഓഫീസർ എം.ജെ. അരുൺ, സബ് ഇൻസ്പെക്ർമാരായ ജിജി ലൂക്കോസ്, ഗിരീഷ് കുമാർ എന്നിവരുടെ നേതൃത്വത്തിൽ പോലീസ് ഉദ്യോഗസ്ഥരായ മണികണ്ഠൻ, ബിജു, സജീവ് എന്നിവർ ഉൾപ്പെടുന്ന പോലീസ് സംഘം പ്രതികൾക്കായി അന്വേഷണം നടത്തിവരികയായിരുന്നു. കൃത്യത്തിനുശേഷം ട്രെയിൻ മാർഗം ഒളിവിൽപ്പോയ പ്രമോദ് പ്രസന്നനെയും പ്രൈസിനെയും ഷൊർണൂർ റെയിൽവേ പോലീസ് ഉദ്യോഗസ്ഥരായ ഒ.പി. ബാബു, അബ്ദുൽ സത്താർ, ബിബിൻ മാത്യു എന്നിവരുടെ സഹായത്തോടെ ഷൊർണൂർ റെയിൽവേ പോലീസ് സ്റ്റേഷനിൽ വച്ചു തടഞ്ഞുവച്ചു. തുടർന്ന് തൃക്കൊടിത്താനം പോലീസെത്തി ഇവരെ അറസ്റ്റ് ചെയ്യുകയായിരുന്നു. നേരത്തെ അയൽവാസിയെ വെട്ടിപ്പരിക്കേൽപ്പിക്കാൻ ശ്രമിച്ച ഒരു സ്ത്രീയുടെ നേതൃത്വത്തിലായിയിരുന്നു ആ ക്രമണമെന്നും പോലീസ് പറഞ്ഞു. ഈ സ്ത്രീയുടെ പങ്കിനെക്കുറിച്ച് അന്വേഷിച്ചു വരുന്നതായി എസ്എച്ച്ഒ എം.ജെ. അരുൺ പറഞ്ഞു.

നിയന്ത്രണംവിട്ട് കാറുകളിലിടിച്ച കാര്‍ ഫര്‍ണിച്ചര്‍ കടയിലേക്കിടിച്ചു കയറി

നാലുകോടി: പെരുന്തുരുത്തി ബൈപാസ് റോഡില്‍ നാലുകോടി ജംഗ്ഷനു സമീപം നിയന്ത്രണം നഷ്ടമായ കാര്‍ രണ്ടു കാറുക ളിലിടിച്ച ശേഷം കടയിലേക്ക് പാഞ്ഞുകയറി. ഇന്നലെ ഉച്ചയ്ക്ക് ഒന്നിനാണ് അപകടം. തിരുവല്ല ഭാഗത്തുനിന്നു വന്ന കാര്‍ നിയന്ത്രണംവിട്ട് എതിരേ വന്ന കാറിൽ ആദ്യം ഇടിച്ചു. തുടര്‍ന്ന് സമീപത്ത് പാര്‍ക്ക് ചെയ്ത മറ്റൊരു കാറിലും ഇടിച്ചു, പിന്നാലെ ലൂക്കോസ് മാമ്മന്‍റെ ഉടമസ്ഥതയിലുള്ള ഫര്‍ണിച്ചര്‍ സ്ഥാപനത്തിലേക്ക് ഇടിച്ചുകയറി. അപകടത്തില്‍ ആര്‍ക്കും പരിക്കില്ല. അപകടനേരത്ത് കടയിലും ആളില്ലായിരുന്നു.

കപ്പയും മീന്‍കറിയും വിളമ്പി സീ ഫുഡ് ഫെസ്റ്റിവല്‍

ചങ്ങനാശേരി: കടലില്‍ ലൈബീരിയന്‍ ചരക്കുകപ്പല്‍ മുങ്ങിയതിനെത്തുടര്‍ന്ന് കടല്‍ മത്സ്യം ഭക്ഷ്യയോഗ്യമല്ലെന്ന ചില കേന്ദ്രങ്ങളുടെ പ്രചരണത്തിനെതിരേ മത്സ്യ അനുബന്ധ തൊഴിലാളി യൂണിയന്‍ സിഐടിയു ചങ്ങനാശേരി ഏരിയ കമ്മിറ്റിയുടെ നേതൃത്വത്തില്‍ സീ ഫുഡ് ഫെസ്റ്റിവല്‍ നടത്തി. പാകം ചെയ്ത വിവിധ കടല്‍ മത്സ്യങ്ങളും കപ്പയും വിതരണം ചെയ്തു. കെഎസ്ആര്‍ടിസി ജംഗ്ഷനില്‍ നടന്ന സീ ഫുഡ് ഫെസ്റ്റിവല്‍ ജോബ് മൈക്കിള്‍ എംഎല്‍എ ഉദ്ഘാടനം ചെയ്തു. ഏരിയ പ്രസിഡന്‍റ് അബ്ദുള്‍ സത്താര്‍ അധ്യക്ഷത വഹിച്ചു. നഗരസഭാ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍, എം.എസ്. സാനു, എ. സഫറുള്ള, കെ.ഡി. സുഗതന്‍ എന്നിവര്‍ പ്രസംഗിച്ചു.

വി.എസ് സ്മരണകളിൽ‍ ചങ്ങനാശേരി

ചങ്ങനാശേരി: ചങ്ങനാശേരിക്കുമുണ്ട് വി.എസിനെക്കുറിച്ചുള്ള ജ്വലിക്കുന്ന ഓര്‍മകള്‍. നിരവധി രാഷ്‌ട്രീയ, സമര പരിപാടികള്‍ക്കും തെരഞ്ഞെടുപ്പ് പ്രചാരണങ്ങള്‍ക്കും വി.എസ്. അച്യുതാനന്ദന്‍ ചങ്ങനാശേരിയിലെത്തി ആവേശം പകര്‍ന്നിട്ടുണ്ട്. പി.എ. സെയ്തുമുഹമ്മദ്, വി.ആര്‍. ഭാസ്‌കരന്‍, പി.ജെ. സാമുവേല്‍, പ്രഫ.എം.ടി. ജോസഫ് തുടങ്ങിയ ചങ്ങനാശേരിയിലെ സീനിയര്‍ സിപിഎം നേതാക്കളുമായും അദ്ദേഹം ബന്ധം പുലര്‍ത്തിയിരുന്നു. ചങ്ങനാശേരി നഗസഭ പെരുന്നയില്‍ നിര്‍മിച്ച ബസ് ടെര്‍മിനല്‍ കം ഷോപ്പിംഗ് കോംപ്ലക്‌സിന്‍റെ ഉദ്ഘാടന ചടങ്ങില്‍ അന്നത്തെ പ്രതിപക്ഷ നേതാവായിരുന്ന വി.എസ്. അച്യുതാനന്ദന്‍ മുഖ്യാതിഥിയായി പങ്കെടുത്തിരുന്നു. ഗ്രാമവികസന മന്ത്രിയായിരുന്ന അന്തരിച്ച സി.എഫ്. തോമസായിരുന്നു ഉദ്ഘാടകന്‍. 2005 ജൂലൈ 18നായിരുന്നു ഉദ്ഘാടന ചടങ്ങ്. കൃഷ്ണകുമാരി രാജശേഖരന്‍ ചെയര്‍പേഴ്‌സണും മാത്യൂസ് ജോര്‍ജ് വൈസ് ചെയര്‍മാനുമായ ഇടതു ഭരണസമിതിയുടെ കാലത്താണ് ടെര്‍മിനല്‍ നിര്‍മാണം പൂര്‍ത്തിയാക്കിയത്.

37-ാമത് അല്‍ഫോന്‍സാ തീര്‍ഥാടനം ഓഗസ്റ്റ് രണ്ടിന്; ഒരുക്കങ്ങളാരംഭിച്ചു

ചങ്ങനാശേരി: വിശുദ്ധ അല്‍ഫോന്‍സാമ്മയുടെ ജന്മഗൃഹത്തിലേക്കും കുടമാളൂര്‍ മേജര്‍ ആര്‍ക്കി എപ്പിസ്‌ക്കോപ്പല്‍ തീര്‍ഥാടന കേന്ദ്രത്തിലേക്കും ചങ്ങനാശേരി അതിരൂപതാ ചെറുപുഷ്പ മിഷന്‍ ലീഗിന്‍റെ നേതൃത്വത്തിലുള്ള അല്‍ഫോന്‍സാ തീര്‍ഥാടനം ഓഗസ്റ്റ് രണ്ടിനു നടക്കും. "ഭൂമിയിലെ മാലാഖ' എന്ന പേരില്‍ അല്‍ഫോന്‍സാമ്മയുടെ സൂക്തങ്ങള്‍ മനഃപാഠമാക്കിയും സുകൃതാഭ്യാസങ്ങള്‍ ചെയ്തും ആയിരക്കണക്കിന് കുഞ്ഞുമിഷനറിമാര്‍ തീര്‍ഥാടനത്തിനായി ഒരുങ്ങുകയാണ്. അതിന്‍റെ ഭാഗമായി 24ന് അല്‍ഫോന്‍സാ സെമിനാറും അല്‍ഫോന്‍സാ ക്വിസ് മത്സരം 27ന് ഓണ്‍ലൈനായും നടത്തും. തീര്‍ഥാടനത്തിനു മുന്നോടിയായി വിവിധ മേഖലകളിലും ശാഖകളിലും ദീപശിഖ- ഛായാചിത്ര പ്രയാണങ്ങള്‍, കുട്ടികളുടെ നേതൃത്വത്തില്‍ ഭവന സന്ദര്‍ശനങ്ങള്‍ എന്നിവ നടക്കും. പതിനായിരക്കണക്കിന് വിശ്വാസികള്‍ പങ്കെടുക്കുന്ന തീര്‍ഥാടനം ആത്മീയ അനുഭവമാക്കി മാറ്റാന്‍ വിവിധ പരിപാടികള്‍ അതിരൂപതാ ചെറുപുഷ്പ മിഷന്‍ലീഗ് ഡയറക്ടര്‍ റവ.ഡോ. വര്‍ഗീസ് പുത്തന്‍പുരയ്ക്കല്‍, അസി. ഡയറക്ടര്‍മാരായ ഫാ. സെബാസ്റ്റ്യന്‍ മാമ്പറ, ഫാ. ആന്‍റണി കിഴക്കേത്തലയ്ക്കല്‍, തീര്‍ഥാടന കമ്മിറ്റി കണ്‍വീനര്‍ ജോണ്‍സണ്‍ കാഞ്ഞിരക്കാട്ട്, ജോയിന്‍റ് കണ്‍വീനര്‍ സാലിച്ചന്‍ തുമ്പേക്കളം, അതിരൂപതാ ജോയിന്‍റ് ഡയറക്ടര്‍ സിസ്റ്റര്‍ ജെസ്‌ലിന്‍ ജെഎസ്, സിസ്റ്റര്‍ മേരി റോസ് ഡിഎസ്എഫ്എസ്, ആനിമേറ്റര്‍ ബോബി തോമസ്, അതിരൂപത ഓര്‍ഗനൈസർ പ്രസിഡന്‍റ് ടിന്‍റോ സെബാസ്റ്റ്യന്‍, ജനറല്‍ സെക്രട്ടറി എബിന്‍ ജോസഫ് എന്നിവര്‍ അറിയിച്ചു.

നമ്പർ തിരുത്തി ലോട്ടറിക്കടയിൽ നിന്നു പണം തട്ടിയെടുത്തു

നെടുംകുന്നം: നമ്പർ തിരുത്തിയ ലോട്ടറി ടിക്കറ്റ് നൽകി ലോട്ടറിക്കടയിൽനിന്ന് അയ്യായിരം രൂപ തട്ടിയെടുത്തു. നെടുംകുന്നം കവലയിൽ പ്രവർത്തിക്കുന്ന എസ്.എൽ. മഞ്ജുവിന്‍റെ കടയിൽ നിന്നാണ് കബളിപ്പിച്ച് പണം തട്ടിയെടുത്തത്. ഇന്നലെ ഉച്ചയ്ക്ക് 1.30ഓടെയാണ് സംഭവം. മുണ്ടും ഷർട്ടും ധരിച്ചെത്തിയ പ്രായമായ ആൾ നമ്പർ തിരുത്തിയ ടിക്കറ്റ് കൊടുത്തശേഷം പണം വാങ്ങി മുങ്ങുകയായിരുന്നു. ഒറ്റനോട്ടത്തിൽ നമ്പർ തിരുത്തിയത് മനസിലാകില്ല. സൂക്ഷ്മപരിശോധനയിലാണ് തട്ടിപ്പ് മനസിലായത്. പരാതിയെത്തുടർന്ന് കറുകച്ചാൽ പോലീസ് നിരീക്ഷണ കാമറകൾ കേന്ദ്രീകരിച്ച് തെളിവുകൾ ശേഖരിച്ചു.

മദ്യലഹരിയിൽ ഹൈമാസ്റ്റ് വിളക്കിൽ കയറിയയാളെ പോലീസ് താഴെയിറക്കി

കറുകച്ചാല്‍: മദ്യലഹരിയില്‍ ഹൈമാസ്റ്റ് ലൈറ്റിനു മുകളില്‍ കയറി ജനങ്ങളെയും പോലീസിനെയും വലച്ചയാളെ അനുനയത്തില്‍ പോലീസ് താഴെയിറക്കി. കറുകച്ചാല്‍ സെന്‍ട്രല്‍ ജംഗ്ഷനിലെ ഹൈമാസ്റ്റ് വിളക്കില്‍ മദ്യലഹരിയില്‍ കയറിയ കറുകച്ചാല്‍ കാരയ്ക്കാശേരിയില്‍ കെ.കെ. വേണു (51) വിനെയാണ് ശ്രമപ്പെട്ട് പോലീസ് നിലത്തിറക്കി രക്ഷിച്ചത്. ഇന്നലെ ഉച്ചകഴിഞ്ഞു മൂന്നിന് സെന്‍ട്രല്‍ ജംഗ്ഷനിലെ റൗണ്ടാനയ്ക്ക് സമീപത്തുള്ള ഹൈമാസ്റ്റ് വിളക്കിലാണ് ഇയാള്‍ കയറിയത്. മധ്യഭാഗം വരെ കയറിയ വേണു കേബിളില്‍ പിടിച്ചിരിക്കുകയായിരുന്നു. നാട്ടുകാര്‍ വിവരമറിയിച്ചതോടെ കറുകച്ചാല്‍ പോലീസെത്തി ഇയാളെ അനുനയിപ്പിച്ച് താഴെയിറക്കി. പിന്നീട് വീട്ടുകാര്‍ക്കൊപ്പം പറഞ്ഞയച്ചു.

കുറുപ്പന്തറ മേല്‍പ്പാലത്തിന് അംഗീകാരം കിട്ടിയിട്ട് 10 വര്‍ഷം

കുറുപ്പന്തറ: 2015-ലാണ് മേല്‍പ്പാലം നിര്‍മാണത്തിന് റെയില്‍വേ അംഗീകാരം നല്‍കിയത്. 2018-ലെ സംസ്ഥാന ബജറ്റിൽ പാലം നിര്‍മാണത്തിനുള്ള 30.56 കോടി രൂപ അനുവദിച്ചു. തുടര്‍ന്ന് റെയില്‍വേ ആവശ്യപ്പെട്ട പ്രകാരം ജിഎഡി (ജനറല്‍ അറേഞ്ച്‌മെന്‍റ് ഡ്രോയിംഗ് ഇന്‍ കണ്‍സ്ട്രക്ഷന്‍ ഏരിയ) സമര്‍പ്പിക്കുകയും റെയില്‍വേ പദ്ധതി അംഗീകരിക്കുകയും ചെയ്തിരുന്നു. പൊന്നുംവില നടപടി അനുസരിച്ച് നോട്ടിഫിക്കേഷന്‍ പുറപ്പെടുവിച്ച് സര്‍വേ നടപടികള്‍ പൂര്‍ത്തീകരിച്ചു സ്ഥല വിലയും കെട്ടിട വിലയും നിര്‍ണയം നടത്തി. ഇതിനിടെ രണ്ടുപേര്‍ കോടതിയില്‍ കേസ് നല്‍കിയതോടെയാണ് മേല്‍പ്പാലം നിര്‍മാണത്തിന്‍റെ തുടര്‍നടപടികള്‍ നിലച്ചത്. 2024 ഫെബ്രുവരിയില്‍ പ്രധാനമന്ത്രി നരേന്ദ്ര മോദി നിര്‍മാണോദ്ഘാടനം നിര്‍വഹിച്ച മേല്‍പ്പാലങ്ങളുടെ കൂട്ടത്തില്‍ കുറുപ്പന്തറ റെയില്‍വേ മേല്‍പ്പാലവും ഉള്‍പ്പെട്ടിരുന്നു. പാലത്തിന്‍റെ രൂപരേഖ കുറവിലങ്ങാട്-കല്ലറ റോഡില്‍ കുറുപ്പന്തറ റെയില്‍വേ ഗേറ്റിലാണ് മേല്‍പ്പാലം നിര്‍മിക്കുന്നത്. പാലത്തിന്‍റെ കുറുപ്പന്തറ ജംഗ്ഷനില്‍നിന്നു വരുന്ന ഭാഗത്ത് ഗേറ്റിന് മുമ്പായി 141.08 മീറ്ററും മണ്ണാറപ്പാറയില്‍നിന്നുള്ള ഭാഗത്ത് ഗേറ്റിന് മുമ്പായി 218.75 മീറ്ററും റെയില്‍വേ ലൈന്‍ വരുന്ന ഭാഗത്ത് 33.93 മീറ്ററും ഉള്‍പ്പെടെ 393.76 മീറ്ററാണ് മേല്‍പ്പാലത്തിന്‍റെ ആകെയുള്ള നീളം. 10.15 മീറ്റര്‍ വീതി വരുന്ന പാലത്തിന്‍റെ കാര്യേജ് വേയുടെ വീതി 7.5 മീറ്ററും ഫുട്പാത്തിന്‍റേത് 1.5 മീറ്ററുമാണ്. ഗതാഗതക്കുരുക്ക് റെയില്‍വേ സ്റ്റേഷനു സമീപത്തുതന്നെയാണ് റെയില്‍വേ ഗേറ്റ്. ട്രെയിനുകള്‍ സ്റ്റേഷനില്‍ പിടിച്ചിടുന്ന സമയത്തും ഗേറ്റ് അടഞ്ഞുതന്നെ കിടക്കും. ഇരുവശങ്ങളിലും ഈ സമയം വാഹനങ്ങളുടെ നീണ്ടനിര രൂപപ്പെടുന്നു. ഇതിനു പരിഹാരം വേണമെന്നത് നാട്ടുകാരുടെ ദീര്‍ഘകാല ആവശ്യമാണ്. കുറുപ്പന്തറയില്‍ റെയില്‍വേ മേല്‍പ്പാലം വേണമെന്ന ആവശ്യത്തിന് പതിറ്റാണ്ടുകളുടെ പഴക്കമുണ്ട്. ഇരട്ടപ്പാത പൂര്‍ത്തിയായതോടെ സ്റ്റേഷനോടു ചേര്‍ന്നുള്ള കുറുപ്പന്തറ റെയില്‍വേ ക്രോസില്‍ നാല് ട്രാക്കുകളുണ്ട്. റെയില്‍വേ ക്രോസ് അടയ്ക്കുന്ന സമയത്ത് ഗതാഗതക്കുരുക്കും അപകടങ്ങളും പതിവാണ്. നടപടികള്‍ വേഗത്തിലാക്കാനായി അധികൃതര്‍ ഉണര്‍ന്നു പ്രവര്‍ത്തിക്കണം.

കോൺക്രീറ്റ് റോഡിന് ഓടയില്ല, ഗ്രന്ഥശാലയും വീടുകളും വെള്ളക്കെട്ടിൽ

ടിവിപുരം: തീരദേശത്തിലൂടെ കോടികൾ ചെലവഴിച്ച് നിർമിച്ച കോൺക്രീറ്റ് റോഡിനൊപ്പം ഓട നിർമിക്കാതിരുന്നതിനെത്തുടർന്ന് ഗ്രന്ഥശാലാ പരിസരവും വീടുകളും വെള്ളക്കെട്ടിലമരുന്നു. ടിവിപുരം മൂത്തേടത്തുകാവ് കോട്ടച്ചിറയിലെ പണ്ഡിറ്റ് കെ.പി. കറുപ്പൻ മെമ്മോറിയൽ ഗ്രന്ഥശാലാ പരിസരവും സമീപത്തെ വീടുകളുമാണ് ആഴ്ചകളായി വെള്ളക്കെട്ട് ദുരിതത്തിലായത്. റോഡിനു സമീപം വേമ്പനാട്ടുകായലുമായി ബന്ധപ്പെട്ട് ഒഴുകുന്ന തോടു‌ണ്ടെങ്കിലും റോഡിലെ വെള്ളം കായലിലേക്കോ തോട്ടിലേക്കോ ഒഴുക്കാൻ ഓടയില്ല. കോൺക്രീറ്റ് റോഡ് തീർത്തതോടെ സമീപവീടുകളിലെ പുരയിടങ്ങളും റോഡിനൊപ്പം ഉയർന്നതോടെ പെയ്ത്തുവെള്ളം റോഡിൽ കെട്ടിനിൽക്കുകയാണ്. കെട്ടിനിൽക്കുന്ന വെള്ളത്തിൽ മാലിന്യങ്ങൾ കലർന്നതോടെ ഗുരുതരമായ ആരോഗ്യപ്രശനങ്ങൾക്കിടയാക്കുമെന്ന ആശങ്കയിലാണ് പ്രദേശവാസികൾ. റോഡിലെ വെള്ളത്തിൽ പതിവായി നീന്തിപ്പോകുന്നതിനാൽ വയോജനങ്ങൾക്കും വിദ്യാർഥികൾക്കും കാലിൽ ചൊറിച്ചിലനുഭവപ്പെടുന്നുണ്ട്. ഗ്രന്ഥശാലയിലും അനുബന്ധിച്ചുള്ള വായനശാലയിലും നിരവധി വയോജനങ്ങൾ എത്തുന്നുണ്ട്. വെള്ളം നിറഞ്ഞ റോഡിലൂടെ സഞ്ചരിക്കുന്ന വയോജനങ്ങൾ വീണു പരിക്കേൽക്കുമെന്ന സ്ഥിതിയാണുള്ളതെന്ന് പ്രദേശവാസികൾ കുറ്റപ്പെടുത്തുന്നു. മൂത്തേടത്തുകാവിൽ തുടങ്ങി പഴുതുവള്ളിവരെയുള്ള മൂന്നു കിലോമീറ്ററിലധികം വരുന്ന റോഡിന്‍റെ ഓടയില്ലാത്ത ഭാഗങ്ങളിൽ വെള്ളക്കെട്ടുണ്ടെന്ന് നാട്ടുകാർ ആരോപിക്കുന്നു. റോഡിലെ വെള്ളമൊഴുകാൻ ഓട നിർമിക്കണമെന്ന ആവശ്യം ഉന്നയിച്ചിരുന്നെങ്കിലും ബന്ധപ്പെട്ടവർ അവഗണിച്ചതായി നാട്ടുകാർ ആരോപിക്കുന്നു. റോഡിലെ വെള്ളക്കെട്ട് നീക്കി ഗതാഗതം സുരക്ഷിതമാക്കണമെന്നാണ് നാട്ടുകാരുടെ ആവശ്യം.

തലയോലപ്പറമ്പുകാരുടെ സിഐഡി ഭായ് ഇനി ഓർമച്ചിത്രം

തലയോലപ്പറമ്പ്: തലയോലപ്പറമ്പുകാരുടെ പ്രിയങ്കരനായ സിഐഡി ബാല്‍കിഷന്‍ സിംഗെന്ന ഭായി ഇനി ഓര്‍മച്ചിത്രം. പതിറ്റാണ്ടുകളായി കുട്ടികള്‍ക്കും മുതിര്‍ന്നവര്‍ക്കും പ്രിയങ്കരനായിരുന്ന സുമുഖനായിരുന്ന ഈ പഞ്ചാബി നാലുപതിറ്റാണ്ടായി തലയോലപ്പറമ്പിന്‍റെ രാപകലുകളിലെ സജീവ സാന്നിധ്യമായിരുന്നു. തികച്ചും മാന്യമായി പെരുമാറിയിരുന്ന ഭായിക്ക് നിരവധി കുടുംബങ്ങള്‍ സന്തോഷത്തോടെ ഭക്ഷണം നല്‍കിയിരുന്നു. തലയോലപ്പറമ്പ് കാര്‍ലൈന്‍ സ്റ്റുഡിയോ ഉടമ സന്തോഷിന്‍റെ ഫോട്ടോ ശേഖരത്തില്‍ ഭായിയുടെ മിഴിവുള്ള ചിത്രങ്ങളുണ്ട്. അഴിമതിക്കാരായ ഉദ്യോഗസ്ഥരെ പിടികൂടാന്‍ എത്തിയ സിഐഡിയാണെന്നു ധരിച്ച് ഭയപ്പാടോടെയാണ് ഒരു കാലത്ത് നാട്ടുകാര്‍ നോക്കിക്കണ്ടിരിരുന്നത്. തോര്‍ത്ത് തലയില്‍ കെട്ടി നീട്ടിവളര്‍ത്തിയ താടിയുമായാണ് ഭായി നടന്നിരുന്നത്. ചില സ്ഥാപനങ്ങളുടെ പരസ്യത്തിലെ മോഡലായിവരെ ഭായി മാറിയിരുന്നു. 2021-ല്‍ പനിബാധിച്ചു ചികിത്സയ്ക്കായി എറണാകുളം ജനറല്‍ ആശുപത്രിയില്‍ പ്രവേശിപ്പിച്ചിരുന്ന ഭായി കൊച്ചി വില്ലിംഗ്ടൺ ഐലന്‍ഡില്‍ അലഞ്ഞുതിരിയുന്നുവെന്നറിഞ്ഞ് തലയോലപ്പറമ്പ് സ്വദേശി ഫിറോഷ് മാവുങ്കനും കാര്‍ലൈന്‍ സ്റ്റുഡിയോ ഉടമ ചാര്‍ളിയുമടക്കമുള്ളവര്‍ കൊച്ചിയിലെത്തി ഭായിയെ കണ്ടെത്തി വല്ലകം ജീവനിലയത്തിലെത്തിച്ചു. ഞായറാഴ്ച രാവിലെ 10നാണ് മരണപ്പെട്ടത്. മൃതദേഹം വൈക്കം താലൂക്ക് ആശുപത്രി മോര്‍ച്ചറിയില്‍. നാളെ രാവിലെ 10ന് തലയോലപ്പറമ്പ് ജംഗ്ഷനില്‍ പൊതുദര്‍ശനത്തിനുശേഷം 11ന് വൈക്കം നഗരസഭാ ശ്മശാനത്തില്‍ സംസ്‌കരിക്കും.

കരിക്കിടാൻ കയറിയയാൾ തെങ്ങിനു മുകളിൽവച്ച് മരിച്ചു

തലയോലപ്പറമ്പ്: തലയോലപ്പറമ്പ് വടയാറിൽ കരിക്കിടാൻ തെങ്ങിൽ കയറിയ ഉദയനാപുരം സ്വദേശി തെങ്ങിന് മുകളിൽവച്ച് ബോധരഹിതനായതിനെത്തുടർന്ന് മരിച്ചു. കർക്കടക വാവിന് വില്പന നടത്താനായി കരിക്കിടാൻ കയറിയ ഉദയനാപുരം ഇരുമ്പൂഴിക്കര കൊച്ചുമൂലാംതോട്ടിൽ ഷിബു (51)വാണ് മരിച്ചത്. തലയോലപ്പറമ്പ് വടയാർ തേവലക്കാട്ടിൽ ഇന്നലെ രാവിലെ 10 ഓടെയായിരുന്നു സംഭവം. ഇരുവേലിക്കാട് ബലരാമന്‍റെ ഉടമസ്ഥതയിലുള്ള തെക്കേപുതുശേരിൽ പാടശേഖരത്തിന്‍റെ ബണ്ടിൽ നിൽക്കുന്ന തെങ്ങിൽനിന്നു കരിക്കിടാനായി കയറിയതായിരുന്നു ഇയാൾ. മൂന്നു തെങ്ങിൽനിന്നു കരിക്ക് ഇട്ടശേഷമാണ് ഇയാൾ നാലാമത്തെ തെങ്ങിന്‍റെ മുകളിൽ കയറിയപ്പോഴാണ് ബോധരഹിതനായത്. സമയം കഴിഞ്ഞിട്ടും ഇയാൾ താഴെ ഇറങ്ങി വരാത്തതിനെത്തുടർന്ന് ബലരാമനും നാട്ടുകാരും ചേർന്ന് നോക്കിയപ്പോഴാണ് തെങ്ങിന് മുകളിൽ ഷിബു കുഴഞ്ഞ് വീണ് കിടക്കുന്നതു കണ്ടത്. വൈക്കം ഫയർഫോഴ്സിൽ വിവരമറിയിച്ചതിനെത്തുടർന്ന് ഫയർഫോഴ്സ് യൂണിറ്റ് എത്തി വല ഉപയോഗിച്ച് മൃതദേഹം താഴെ ഇറക്കുകയായിരുന്നു. തലയോലപ്പറമ്പ് പോലീസ് മേൽനടപടി സ്വീകരിച്ചു. പോസ്റ്റ്മോർട്ടം നടപടികൾക്ക് ശേഷം മൃതദേഹം താലൂക്ക് ആശുപത്രി മോർച്ചറിയിൽ. സംസ്കാരം ബുധനാഴ്ച രാവിലെ 10ന് വീട്ടുവളപ്പിൽ. ഷിബുവിന്‍റെ ഭാര്യ: സജിത. മക്കൾ: ജയകൃഷ്ണൻ, ജയലക്ഷ്മി.

കുറപ്പന്തറ റെയില്‍വേ മേല്‍പ്പാലം: രേഖകൾ റോഡ്‌സ് ആന്‍ഡ് ബ്രിഡ്ജസ് കോര്‍പറേഷന് കൈമാറി

കുറപ്പന്തറ: കുറവിലങ്ങാട്-കല്ലറ റോഡില്‍ നിര്‍മിക്കുന്ന കുറപ്പന്തറ റെയില്‍വേ മേല്‍പ്പാലത്തിന്‍റെ നിര്‍മാണത്തിനു മുന്നോടിയായി റവന്യു വകുപ്പ് ഏറ്റെടുത്ത എല്ലാ സ്ഥലങ്ങളും ഭൂമിയുടെ മഹസര്‍ തയാറാക്കിയ രേഖകളും പൊതുമരാമത്ത് വകുപ്പിനു കീഴിലുള്ള റോഡ്‌സ് ആന്‍ഡ് ബ്രിഡ്ജസ് കോര്‍പറേഷന് മോന്‍സ് ജോസഫ് എംഎല്‍എ കൈമാറി. പദ്ധതി ടെന്‍ഡര്‍ ചെയ്യുന്നതിനു മുന്നോടിയായാണ് സ്ഥലവും രേഖകളും കൈമാറിയത്. കുറുപ്പന്തറ ഭാഗത്തുനിന്ന് കല്ലറ ഭാഗത്തേക്ക് നേരിട്ട് എല്ലാ സ്ഥലങ്ങളും പരിശോധിച്ച് റവന്യു വകുപ്പിന്‍റെ കൈവശമുള്ള രേഖകളാണ് റോഡ്‌സ് ആന്‍ഡ് ബ്രിഡ്ജസ് കോര്‍പറേഷന്‍ അധികൃതര്‍ക്ക് കൈമാറിയത്. 2018-ല്‍ കിഫ്ബിയില്‍നിന്ന് സ്ഥലം ഏറ്റെടുക്കുന്നതിനും നിര്‍മാണത്തിനും മോന്‍സ് ജോസഫ് എംഎല്‍എ ഇടപെട്ട് 30.56 കോടി രൂപ അനുവദിച്ചു. തുടര്‍ന്ന് റെയില്‍വേ ആവശ്യപ്പെട്ട പ്രകാരം ജിഎഡി സമര്‍പ്പിക്കുകയും (ജനറല്‍ അറേഞ്ച്‌മെന്‍റ് ഡ്രോയിംഗ് ഇന്‍ കണ്‍സ്ട്രക്‌ഷന്‍ ഏരിയ) റെയില്‍വേ പദ്ധതി അംഗീകരിക്കുകയും ചെയ്തു. കുറവിലങ്ങാട് - ആലപ്പുഴ മിനി ഹൈവേയില്‍ റെയില്‍വേ ക്രോസിംഗ് മൂലമുണ്ടാകുന്ന ഗതാഗതക്കുരുക്ക് പരിഹരിക്കുന്നതിനാണ് മേല്‍പ്പാല ആശയം മുന്നോട്ടുവന്നത്.

കെസിവൈഎല്‍ കോട്ടയം അതിരൂപത യുവജന ദിനാഘോഷം

കല്ലറ: കെസിവൈഎല്‍ കോട്ടയം അതിരൂപത യുവജന ദിനാഘോഷം കല്ലറ സെന്‍റ് തോമസ് ക്‌നാനായ കത്തോലിക്ക പള്ളിയില്‍ നടത്തി. അതിരൂപത പ്രസിഡന്‍റ് ജോണീസ് പി. സ്റ്റീഫന്‍റെ അധ്യക്ഷതയില്‍ കൂടിയ സമ്മേളനം കോട്ടയം ആര്‍ച്ച്ബിഷപ് മാര്‍ മാത്യു മൂലക്കാട്ട് ഉദ്ഘാടനം ചെയ്തു. ചാണ്ടി ഉമ്മന്‍ എംഎല്‍എ മുഖ്യപ്രഭാഷണം നടത്തി. ചലച്ചിത്രതാരവും തിരക്കഥാകൃത്തുമായ രഞ്ജി പണിക്കര്‍ മുഖ്യതിഥിയായിരുന്നു. അതിരൂപത ചാപ്ലയിന്‍ ഫാ. മാത്തുക്കുട്ടി കുളക്കാട്ടുകുടിയില്‍ ആമുഖസന്ദേശം നല്‍കി. കൈപ്പുഴ ഫൊറോന വികാരി ഫാ. സാബു മാലിത്തുരുത്തേല്‍ സമ്മാനദാനം നിര്‍വഹിച്ചു. ഇടവക വികാരി ഫാ. സ്റ്റീഫന്‍ കണ്ടാരപ്പള്ളി, യൂണിറ്റ് ചാപ്ലയിന്‍ ഫാ. ജോബി കാച്ചനോലിക്കല്‍, ഫൊറോന ചാപ്ലയിന്‍ ഫാ. ഫില്‍മോന്‍ കളത്ര, അതിരൂപത സെക്രട്ടറി ചാക്കോ ഷിബു, യൂണിറ്റ് പ്രസിഡന്‍റ് അഭിലാഷ് ടോമി ജോര്‍ജ് എന്നിവര്‍ പ്രസംഗിച്ചു. യുവജനദിനാഘോഷത്തോടനുബന്ധിച്ച് സംഘടിപ്പിച്ച ക്നാനായ പാരമ്പര്യ ആചാര ദൃശ്യാവിഷ്‌കാര മത്സരത്തിന്‍റെ ഉദ്ഘാടനം മന്ത്രി റോഷി അഗസ്റ്റിന്‍ നിര്‍വഹിച്ചു. ദൃശ്യാവിഷ്‌കാര മത്സരത്തില്‍ വിവിധ യൂണിറ്റുകളില്‍നിന്നായി 14 ടീമുകള്‍ പങ്കെടുത്തു. ചുങ്കം, കടുത്തുരുത്തി, കൂടല്ലൂര്‍ യൂണിറ്റുകള്‍ യഥാക്രമം ഒന്നും രണ്ടും മൂന്നും സ്ഥാനങ്ങള്‍ കരസ്ഥമാക്കി. മോനിപ്പള്ളി, പുന്നത്തുറ, ഉഴവൂര്‍, കൈപ്പുഴ, മാറിക എന്നീ യൂണിറ്റുകള്‍ പ്രോത്സാഹന സമ്മാനത്തിനും അര്‍ഹത നേടി. ജില്ലാ-സംസ്ഥാന-ദേശീയ-അന്തര്‍ദേശീയതലത്തില്‍ സമ്മാനങ്ങള്‍ നേടിയ പ്രതിഭകളെ യോഗത്തില്‍ ആദരിച്ചു. അതിരൂപത വികാരി ജനറാള്‍ ഫാ. തോമസ് ആനിമൂട്ടിലിന്‍റെ നേതൃത്വത്തില്‍ വിശുദ്ധ കുര്‍ബാനയോടെ ആരംഭിച്ച അതിരൂപത യുവജനദിനാഘോഷത്തില്‍ അതിരൂപത ഡയറക്ടര്‍ ഷെല്ലി ആലപ്പാട്ട് പതാക ഉയര്‍ത്തി. രണ്ടായിരത്തോളം യുവജനങ്ങള്‍ സമ്മേളനത്തില്‍ പങ്കെടുത്തു.

മാർച്ചും ധർണയും നടത്തി

വല്ലകം: വല്ലകം ക്ഷീരോത്പാദക സഹകരണ സംഘത്തിലെ അഴിമതിക്കും കെടുകാര്യസ്ഥതയ്ക്കുമെതിരേ കേരള കർഷക സംഘം ഉദയനാപുരം ഈസ്റ്റ് മേഖലാ കമ്മിറ്റിയുടെ നേതൃത്വത്തിൽ മാർച്ചും ധർണയും സംഘടിപ്പിച്ചു. മാർച്ചിനു ശേഷം ക്ഷീരസംഘത്തിനു മുന്നിൽ നടന്ന ധർണാസമരം കേരള കർഷകസംഘം ജില്ലാ എക്സിക്യൂട്ടീവ് അംഗം കെ. കുഞ്ഞപ്പൻ ഉദ്ഘാടനം ചെയ്തു. കർഷകസംഘം വൈക്കം ഏരിയാ സെക്രട്ടറി ടി.ടി. സെബാസ്റ്റ്യൻ അധ്യക്ഷതവഹിച്ചു.

നേത്രപരിശോധനാ ക്യാമ്പ് നടത്തി

വൈക്കം: ആശ്രയ സന്നദ്ധസേവന സംഘടനയുടെ ആഭിമുഖ്യത്തിൽ ജില്ലാ ആശുപത്രി മൊബൈൽ ഒഫ്താൽ യൂണിറ്റിന്‍റെയും ദേശീയ അന്ധതാനിയന്ത്രണ സമിതിയുടെയും സഹകരണത്തോടെ സൗജന്യ നേത്രപരിശോധനാ ക്യാമ്പ് നടത്തി. വൈക്കം മടിയത്ര എസ്എൻഡിപി ഹാളിൽ നടന്ന ക്യാമ്പ് താലൂക്ക് ആശുപത്രി സൂപ്രണ്ട് ഡോ. ട്വിങ്കിൾ പ്രഭാകർ ഉദ്ഘാടനം ചെയ്തു. ആശ്രയ ചെയർമാൻ പി.കെ. മണിലാൽ അധ്യക്ഷത വഹിച്ചു. പി.ഡി. ഉണ്ണി, പ്രീത രാജേഷ്, ഇടവട്ടം ജയകുമാർ, ബി. ചന്ദ്രശേഖരൻ, ബി. രാജശേഖരൻ, ജഗദീഷ് അക്ഷര, വി. അനൂപ്, വർഗീസ് പുത്തൻചിറ, രാജശ്രീ വേണുഗോപാൽ, പി.ഡി. ബിജിമോൾ, ടി.ആർ. ശശികുമാർ, വൈക്കം ജയൻ, എം.കെ. മഹേശൻ, സന്ധ്യാ വിനോദ്, രജനി പീതാംബരൻ, പി.വി. ഷാജിഎന്നിവർ പ്രസംഗിച്ചു. ജില്ലാ ആശുപത്രി ഒഫ്താൽമോളജിക് സർജൻ ഡോ. അനുആന്‍റണി ക്യാമ്പിന് നേതൃത്വം നൽകി.

കോട്ടയം സമരവേദികളിലും മുന്‍നിരയില്‍

കോട്ടയം: പാര്‍ട്ടി സെക്രട്ടറി, കര്‍ഷക തൊഴിലാളി യൂണിയന്‍ നേതാവ്, പ്രതിപക്ഷ നേതാവ്, മുഖ്യമന്ത്രി എന്നീ നിലകളില്‍ കോട്ടയം ജില്ലയുമായി നിരന്തരം ബന്ധപ്പെട്ട നേതാവായിരുന്നു വി.എസ്. അച്യുതാനന്ദന്‍. കര്‍ഷക തൊഴിലാളി നേതാവായിരിക്കെ ആര്‍ ബ്ലോക്കിലെയും അപ്പര്‍ കുട്ടനാട്ടിലെയും കര്‍ഷക തൊഴിലാളികളെ സംഘടിപ്പിക്കാനും സമരങ്ങള്‍ക്ക് നേതൃത്വം കൊടുക്കാനും പലതവണ എത്തിയിട്ടുണ്ട്. പാര്‍ട്ടി സെക്രട്ടറിയായിരുന്നപ്പോള്‍ സംഘടനാ പ്രവര്‍ത്തനങ്ങള്‍ക്ക് നേതൃത്വം കൊടുക്കാനും കോട്ടയത്ത് എത്തിയിരുന്നു. കെ.കെ. ജോസഫ്, എം.ജെ. ജേക്കബ്, വി.കെ. ഗോപിനാഥന്‍, തമ്പി പൊടിപാറ, എം.പി. സെബാസ്റ്റ്യന്‍ എന്നിവരായിരുന്നു അടുപ്പമുള്ള സിപിഎം നേതാക്കള്‍. വി.എസ് ഗ്രൂപ്പ് പാര്‍ട്ടിയില്‍ ശക്തിപ്പെട്ടപ്പോള്‍ വി.കെ. ഗോപിനാഥന്‍റെ നേതൃത്വത്തില്‍ കുറെയാളുകള്‍ വി.എസിനൊപ്പം നിലകൊണ്ടു. പ്രതിപക്ഷ നേതാവായിരിക്കെ കിളിരൂരിലെ ശാരിയുടെ മരണവുമായി ബന്ധപ്പെട്ട് ആദ്യംമുതല്‍ വിഎസ് പോരാട്ടത്തിനുണ്ടായിരുന്നു. മൂന്നാര്‍ കൈയേറ്റം ഒഴിപ്പിക്കാന്‍ സമരം നയിച്ചതിനു ശേഷം വേമ്പനാട്ടു കായലിലെ കൈയേറ്റത്തിനെതിരേ സമരത്തിനു നേതൃത്വം കൊടുത്തു. കുമരകം മുതല്‍ തണ്ണീര്‍മുക്കം വരെ ഡിവൈഎഫ്‌ഐ സംഘടിപ്പിച്ച മനുഷ്യച്ചങ്ങലയ്ക്കും വി.എസ് എത്തിയിരുന്നു. മുഖ്യമന്ത്രിയായപ്പോള്‍ ജില്ലയിലെ എല്ലാ നിയോജക മണ്ഡലങ്ങളിലും സര്‍ക്കാര്‍ പരിപാടികളിലും സമ്മേളനങ്ങളിലും എത്തിയിരുന്നു. ഒടുവില്‍ പ്രതിപക്ഷ നേതാവായിരിക്കെ മൂന്നിലവിലെ അനധികൃത ക്വാറി സന്ദര്‍ശിക്കാനും എത്തി. ഔദ്യോഗിക പദവികള്‍ വഹിച്ചിരുന്നപ്പോള്‍ കോട്ടയത്ത് എത്തിയാല്‍ നാട്ടകം ഗസ്റ്റ് ഹൗസിലും കോട്ടയം റസ്റ്റ് ഹൗസിലുമായിരുന്നു താമസം. പതിവു ദിനചര്യകളായ യോഗ, നടത്തം, എണ്ണ തേച്ചുള്ള കുളി, പ്രത്യേക ഭക്ഷണങ്ങള്‍ എന്നിവയെല്ലാം നിര്‍ബന്ധമായിരുന്നു. അനുശോചന പ്രവാഹം കോട്ടയം: മുന്‍ മുഖ്യമന്ത്രി വി.എസ്. അച്യുതാനന്ദന്റെ വിയോഗത്തില്‍ മന്ത്രി വി.എന്‍. വാസവന്‍, ചീഫ് വിപ്പ് ഡോ. എന്‍. ജയരാജ്, എംപിമാരായ ജോസ് കെ. മാണി, ആന്‍റോ ആന്‍റണി, കൊടിക്കുന്നില്‍ സുരേഷ്, ഫ്രാന്‍സിസ് ജോര്‍ജ്, എംഎല്‍എമാരായ സി.കെ. ആശ, ചാണ്ടി ഉമ്മന്‍, ജോബ് മൈക്കിള്‍, തിരുവഞ്ചൂര്‍ രാധാകൃഷ്ണന്‍, സെബാസ്റ്റ്യന്‍ കുളത്തുങ്കല്‍, മാണി സി. കാപ്പന്‍, മോന്‍സ് ജോസഫ്, ബിജെപി നേതാവ് പി.സി. ജോര്‍ജ്, ബിജെപി സംസ്ഥാന വൈസ് പ്രസിഡന്‍റ് ഷോണ്‍ ജോര്‍ജ്, തൃണമൂല്‍ കോണ്‍ഗ്രസ് നേതാവ് സജി മഞ്ഞക്കടമ്പില്‍, ബിജെപി ജില്ലാ പ്രസിഡന്‍റ് ലിജിന്‍ ലാല്‍, വിവിധ രാഷ്ട്രീയ കക്ഷി നേതാക്കളായ വൈക്കം വിശ്വന്‍, വി.ബി. ബിനു, നാട്ടകം സുരേഷ്, ഫിലിപ്പ് ജോസഫ്, ടി.ആര്‍. രഘുനാഥന്‍, കെ.സുരേഷ്‌കുറുപ്പ്, എം.ടി. കുര്യന്‍, ബെന്നി മൈലാടൂര്‍ തുടങ്ങിയവര്‍ അനുശോചിച്ചു. മഹാത്മാ ഗാന്ധി സര്‍വകലാശാലാ വൈസ് ചാന്‍സലര്‍ ഡോ. സി.ടി. അരവിന്ദകുമാര്‍ അനുശോചിച്ചു. ഉന്നത വിദ്യാഭ്യാസ മേഖലയില്‍ ക്രിയാത്മകമായ പല പരിഷ്കാരങ്ങളും അദ്ദേഹത്തിന്‍റെ ഭരണകാലത്ത് നടപ്പാക്കിയിരുന്നതായി വൈസ് ചാന്‍സലര്‍ അനുസ്മരിച്ചു. പൂഞ്ഞാറിലുണ്ട് വി.എസ്. അച്യുതാനന്ദന്‍ റോഡ് കോട്ടയം: പൂഞ്ഞാറില്‍ വി.എസ്. അച്യുതാനന്ദന്‍റെ പേരില്‍ റോഡുണ്ട്. പി.സി. ജോര്‍ജ് മുന്‍കൈയെടുത്ത് വി.എസിന്‍റെ അനുമതിയോടെയാണ് റോഡ് നിര്‍മിച്ചതും പേരിട്ടതും. പൂഞ്ഞാര്‍ തെക്കേക്കര പഞ്ചായത്തില്‍ പെരിങ്ങുളത്തിനുള്ള റോഡില്‍നിന്നു ചള്ളരിക്കുന്നിലേക്കാണ് വി.എസ് റോഡ്. മുഖ്യമന്ത്രിയായിരുന്ന സമയത്ത് വി.എസ് എത്തിയാണ് റോഡ് ഉദ്ഘാടനം ചെയ്തത്.

വിവാദമായ മുണ്ടക്കയം പ്രസംഗം

കോട്ടയം: കേരള കോണ്‍ഗ്രസിലായിരുന്ന കാലത്ത് പി.സി. ജോര്‍ജുമായി വി.എസ്. അച്യുതാനന്ദനു വലിയ അടുപ്പമുണ്ടായിരുന്നു. കിളിരൂര്‍ പെണ്‍വാണിഭ കേസില്‍ ഇരയുടെ നീതിക്കായും മതികെട്ടാന്‍ അഴിമതി, മൂന്നാര്‍ കൈയേറ്റം വിഷയങ്ങളിലും വി.എസിനൊപ്പം പോരാടാന്‍ ജോര്‍ജുണ്ടായിരുന്നു. പി.സി. ജോര്‍ജിന്‍റെ മണ്ഡലമായിരുന്ന പൂഞ്ഞാറില്‍ വി.എസിന്‍റെ ഒളിവുജീവിതത്തിനിടെ പോലീസ് പിടിയിലായപ്പോള്‍ ഇടിയന്‍ വാസുപിള്ളയുടെ നേതൃത്വത്തില്‍ കടുത്ത മര്‍ദനമാണ് വി.എസിനു നേരിടേണ്ടി വന്നത്. അന്ന് തോക്കിന്‍റെ ബയണറ്റുകൊണ്ട് ഉള്ളംകാല്‍ അടിച്ചുപൊട്ടിച്ചിരുന്നു. പി.സി. ജോര്‍ജ് ഒരിക്കല്‍ വി.എസിന്‍റെ അടുത്തെത്തിയപ്പോള്‍ ബയണറ്റ് കുത്തിയിറക്കി കാല്‍ തകര്‍ത്തു എന്നു പറയുന്നത് നേരോ എന്നു ചോദിച്ചു. ഇരിപ്പിടത്തില്‍നിന്നും കാല്‍ മേശപ്പുറത്തേക്ക് കയറ്റിവച്ചു കാലിലെ പാടുകള്‍ വി.എസ് കാണിച്ചുകൊടുത്തതായി പി.സി. ജോര്‍ജ് ഓര്‍മിച്ചു. 2016 ലെ നിയമസഭാ തെരഞ്ഞെടുപ്പില്‍ പി.സി. ജോര്‍ജ് സ്വതന്ത്രനായി പൂഞ്ഞാറില്‍ മത്സരിക്കുമ്പോള്‍ എല്‍ഡിഎഫ് സ്ഥാനാര്‍ഥിയുടെ പ്രചാരണത്തിനെത്തണമെന്ന് വി.എസിനു പാര്‍ട്ടി നിര്‍ദേശം നല്‍കി. ഇതോടെ പി.സി. ജോര്‍ജിനെതിരേ പ്രസംഗിക്കാന്‍ വി.എസിനു വല്ലാത്ത ബുദ്ധിമുട്ട്. വി.എസ് പി.സി. ജോര്‍ജിനെ വിളിച്ച് എവിടെയാടോ പ്രസംഗിക്കേണ്ടത്, എന്താണ് പ്രസംഗിക്കേണ്ടതെന്ന് ചോദിച്ചു. അപ്പോള്‍ ഇഷ്ടമുള്ളത് പ്രസംഗിച്ചോ, വരുന്നതില്‍ സന്തോഷമേയുള്ളൂവെന്ന് ജോര്‍ജ് പറഞ്ഞു. മുണ്ടക്കയത്ത് പ്രസംഗിക്കാനെത്തിയ വി.എസ് പ്രസംഗത്തിനൊടുവില്‍ പി.സിക്ക് വോട്ടു ചെയ്യാന്‍ അഭ്യര്‍ഥിച്ചു. പി.സി. ജോര്‍ജാണോ പി.സി. ജോസഫാണോ എന്നു പ്രവര്‍ത്തകര്‍ ചോദിച്ചപ്പോള്‍ നീട്ടിയും കുറുക്കിയും തനതു ശൈലിയില്‍ അതു നിങ്ങള്‍ക്ക് അറിയാമല്ലോ എന്ന് പറഞ്ഞ് പ്രസംഗം അവസാനിപ്പിച്ചു. വി.എസിന്‍റെ അന്നത്തെ പ്രസംഗം വലിയ വിവാദമായി മാറി. കാലം അടയാളപ്പെടുത്തിയ കോട്ടയം സമ്മേളനം കോട്ടയം: സിപിഎം വിഭാഗീയത അഥവാ പിണറായി-വിഎസ് ചേരിപ്പോര് അതിന്‍റെ മൂര്‍ധന്യതയില്‍ നില്‍ക്കുന്ന കാലത്തായിരുന്നു 2008 ഫെബ്രവരി 14നു കോട്ടയത്ത് പാര്‍ട്ടി സംസ്ഥാനസമ്മേളനം നടന്നത്. വി.എസ് ഗ്രൂപ്പിനെ ഏറെക്കുറെ പൂര്‍ണമായി വെട്ടിനിരത്തി പിണറായി പക്ഷം പാര്‍ട്ടി ആധിപത്യം പിടിച്ച സമ്മേളനത്തിന്‍റെ സമാപനദിവസം നാഗമ്പടത്തുണ്ടായ സംഭവവികാസങ്ങള്‍ കാലം മറന്നിട്ടില്ല. സമ്മേളനവേദിയിലേക്ക് വി.എസ് വൈകിയെത്തിയപ്പോള്‍ അണികളുടെ ആവേശം അതിരുവിട്ടു. വി.എസ് പ്രസംഗിക്കുമ്പോള്‍ ആവേശഭരിതരായ പ്രവര്‍ത്തകരുടെ അച്ചടക്കമില്ലായ്മയെ പിണറായി രൂക്ഷമായി വിമര്‍ശിച്ചു: ‘’ഇത് സിപിഎം സമ്മേളനമാണ്, ഉഷാ ഉതുപ്പിന്‍റെ ഗാനമേളയല്ല’’ എന്ന പറഞ്ഞാണ് പിണറായി അണികളെ ശാസിച്ചത്. പിണറായിയുടെ മുന്നറിയിപ്പിനെത്തുടര്‍ന്നും വി.എസ് അനുകൂല മുദ്രാവാക്യം വിളികളും ബഹളവും തുടര്‍ന്നു. അതോടെ ‘’ഇങ്ങനെയൊരു സമ്മേളനമാകുമ്പോള്‍ പല തരക്കാര്‍ കടന്നുവരും. അവരെ നിയന്ത്രിക്കേണ്ടതു വോളണ്ടിയര്‍മാരാണ്. അണിഞ്ഞിരിക്കുന്ന ഡ്രസിന്‍റെ അന്തസ് വോളണ്ടിയര്‍മാര്‍ കാണിക്കണം’’ എന്ന് പിണറായി നിര്‍ദേശിച്ചു. അതോടെ റെഡ് വോളണ്ടിയര്‍മാര്‍ ഇടപെട്ട് മുദ്രാവാക്യം വിളിച്ചവരെ നിയന്ത്രിച്ചു. വി.എസ് ആരാധകരായ പ്രവര്‍ത്തകരും റെഡ് വോളണ്ടിയര്‍മാരും തമ്മില്‍ സംഘര്‍ഷമുണ്ടായി. സ്വാഗതവും അധ്യക്ഷപ്രസംഗവും ഉദ്ഘാടനപ്രസംഗവും പേരിനുമാത്രം നടന്നു. ബാക്കി പ്രസംഗകര്‍ക്കു സംസാരിക്കാന്‍ അവസരമുണ്ടായില്ല. നന്ദിപ്രകാശനം പോലും ഇല്ലാതെയാണ് സമ്മേളനം അവസാനിച്ചത്.

വാലാനിക്കല്‍ വീട്ടിലെ ഒളിവുജീവിതവും മൂവേലിത്തോട്ടിലെ കുളിയും...

ജിബിന്‍ കുര്യന്‍ കോട്ടയം: പൂഞ്ഞാര്‍ മലകളില്‍നിന്നുള്ള ചെറുചാലുകള്‍ സംഗമിക്കുന്ന മൂവേലിത്തോട്ടിലെ കുളിയും വാലാനിക്കല്‍ വീട്ടിലെ ഒളിവുജീവിതവും ഈരാറ്റുപേട്ടയില്‍നിന്നും പോലീസ് മര്‍ദനമേറ്റ് പാലാ ലോക്കപ്പിലേക്കുള്ള യാത്രയും വി.എസ്. അച്യുതാനന്ദന്‍ പലപ്പോഴും അനുസ്മരിച്ചിട്ടുണ്ട്. പോലീസിന്‍റെ ക്രൂര മര്‍ദനമേറ്റ വിഎസിന് പാലാ ഗവണ്‍മെന്‍റ് ആശുപത്രിയില്‍ ചികിത്സയില്‍ കഴിയേണ്ടിവന്നു. 1946 ഓഗസ്റ്റില്‍ ആലപ്പുഴയില്‍ നടന്ന ട്രേഡ് യൂണിയന്‍ കൗണ്‍സിലുകളുടെ സംയുക്ത സമ്മേളനത്തില്‍ പ്രസംഗിച്ചവര്‍ക്കെതിരേ ദിവാന്‍ സി.പി. രാമസ്വാമി അയ്യരുടെ പോലീസ് അറസ്റ്റ് വാറണ്ട് പുറപ്പെടുവിച്ചു. പുന്നപ്ര-വയലാര്‍ സമരവുമായി ബന്ധപ്പെട്ടു വി.എസ് പോലീസിന്‍റെ കണ്ണുവെട്ടിച്ചാണ് പൂഞ്ഞാറില്‍ ഒളിവു താമസത്തിനെത്തിയത്. കര്‍ഷകനും പാര്‍ട്ടി അനുഭാവിയുമായ വാലാനിക്കല്‍ ഇട്ടിണ്ടാന്‍റെ വീട്ടിലായിരുന്നു ഒളിവില്‍ കഴിഞ്ഞത്. ഇട്ടിണ്ടാന്‍റെ മകന്‍ സഹദേവന്‍ കമ്യൂണിസ്റ്റ് പാര്‍ട്ടി പ്രവര്‍ത്തകനായിരുന്നു. ഇദ്ദേഹവും വിഎസുമായുള്ള ബന്ധമാണ് പൂഞ്ഞാറിലെത്താന്‍ കാരണമായത്. ആലപ്പുഴയില്‍നിന്നു കുമരകംവഴി കോട്ടയത്തെത്തി നടന്നാണ് വാലാനിക്കല്‍ വീട്ടിലെത്തുന്നത്. 20 ദിവസം പൂഞ്ഞാറില്‍ താമസിച്ചു. വൈദ്യനായിരുന്ന ഇട്ടിണ്ടാനെ കാണാന്‍ ധാരാളം പേര്‍ എത്തിയിരുന്ന സാഹചര്യത്തില്‍ അവിടെ സുരക്ഷിതമല്ലെന്നു കണ്ടതോടെ സഹദേവന്‍ ഇട്ടിണ്ടാന്‍റെ സഹോദരി ചള്ളരിക്കുന്ന് കരിമാലിപ്പുഴയിലെ കുഞ്ഞുപെണ്ണിന്‍റെ വീട്ടിലേക്കു വി.എസിനെ മാറ്റി. ഗോപാലന്‍ എന്ന പേരിലായിരുന്നു വി.എസിന്‍റെ ജീവിതം. ഒളിവിലും പതിവ് ദിനചര്യകള്‍ വി.എസ് മുടക്കിയിരുന്നില്ല. ദിവസം രണ്ടു പ്രാവശ്യം പച്ചവെള്ളത്തില്‍ കുളിക്കണമെന്ന് നിര്‍ബന്ധമുണ്ടായിരുന്നു. ഇതു വീട്ടുകാര്‍ തടഞ്ഞെങ്കിലും ഒരു നേരമെങ്കിലും മൂവേലിത്തോട്ടില്‍ പോയി കുളിക്കുമായിരുന്നു. പതിവില്ലാതെ തോട്ടില്‍ ഒരാള്‍ കുളിക്കുന്നതു കണ്ട് അതുവഴി പോയ ഒരു അധ്യാപകനാണ് പോലീസില്‍ വിവരം അറിയിക്കുന്നത്. അങ്ങനെ പോലീസ് ഒരു ദിവസം പുലര്‍ച്ചെ കുളിക്കുന്നതിനിടയില്‍ വി.എസിനെ പിടികൂടുകയായിരുന്നു. ഇടിയന്‍ വാസുപിള്ള എന്ന ഇന്‍സ്പെക്ടറുടെ നേതൃത്വത്തിലായിരുന്നു അറസ്റ്റ്. ഈരാറ്റുപേട്ട സ്റ്റേഷനില്‍ രണ്ടു ദിവസത്തെ മര്‍ദനത്തിനു ശേഷം പാലായിലെ പോലീസ് ലോക്കപ്പിലേക്കു മാറ്റി. മരിച്ചെന്നു കരുതി കാട്ടില്‍ ഉപേക്ഷിക്കാൻ കൊണ്ടുപോകുമ്പോള്‍ ജീവനുണ്ടെന്ന സംശയത്തില്‍ പാലാ ഗവണ്‍മെന്‍റ് ആശുപത്രിയില്‍ പ്രവേശിപ്പിക്കുകയായിരുന്നു. രണ്ടാഴ്ച ചികിത്സയ്ക്കു ശേഷമാണ് വി.എസിനെ പൂജപ്പുര സെന്‍ട്രല്‍ ജയിലിലേക്കു മാറ്റിയത്. മുഖ്യമന്ത്രിയായിരുന്ന സമയത്ത് വി.എസ് വാലാനിക്കല്‍ വീട്ടില്‍ സന്ദര്‍ശനം നടത്തിയിരുന്നു.

കർക്കടക വാവുബലി

ഇളങ്ങുളം: 44-ാം നമ്പർ എസ്എൻഡിപി യോഗം ശാഖയിലെ ശ്രീനാരായണ ഗുരുദേവ ക്ഷേത്രത്തിൽ 24നു രാവിലെ 5.30ന് കർക്കടക വാവുബലി, പിതൃസായൂജ്യപൂജ എന്നിവ നടത്തും. പൊൻകുന്നം: എസ്എൻഡിപി യോഗം 1044-ാം നമ്പർ ശാഖാ ഗുരുദേവക്ഷേത്രാങ്കണത്തിൽ 24ന് രാവിലെ കർക്കിടക വാവുബലി നടക്കും. പാറത്തോട് തൃപ്പാലപ്ര ഭഗവതീ ക്ഷേത്രത്തോടനുബന്ധിച്ചുള്ള തീർഥക്കുളക്കരയിൽ 24ന് രാവിലെ ആറുമുതൽ പിതൃതർപ്പണത്തിനുള്ള സൗകര്യമുണ്ടായിരിക്കും. തിലഹവനം, സായൂജ്യപൂജ തുടങ്ങിയ ചടങ്ങുകളും നടക്കും. ഇളമ്പള്ളി എസ്എൻഡിപിയോഗം 4840-ാം നമ്പർ ശാഖാ ശ്രീനാരായണ ഗുരുദേവ ക്ഷേത്രത്തിൽ കർക്കിടക വാവിന് ബലിതർപ്പണം, പിതൃസായൂജ്യപൂജ എന്നിവയുണ്ടായിരിക്കും. ചേനപ്പാടി ധർമശാസ്താക്ഷേത്ര കടവിൽ 24ന് രാവിലെ 5.30 മുതൽ കർക്കടക വാവുബലി നടത്തും. തിലഹവനം, നമസ്‌കാരം എന്നിവയുമുണ്ട്. ഉരുളികുന്നം ഐശ്വര്യഗന്ധർവസ്വാമി ഭദ്രകാളിക്ഷേത്രത്തിൽ 24ന് രാവിലെ കർക്കടക വാവുബലി നടത്തും. ക്ഷേത്രത്തിന് കിഴക്കേനടയിലെ ചിറയുടെ കടവിലാണ് ബലി. ചെറുവള്ളി ദേവീക്ഷേത്രത്തിൽ 24ന് രാവിലെ അഞ്ചുമുതൽ കർക്കടകവാവുബലി നടത്തും. ചേനപ്പാടി ഇടയാറ്റുകാവ് ക്ഷേത്രത്തിൽ 24ന് രാവിലെ അഞ്ചുമുതൽ കർക്കടക വാവുബലി നടത്തും. മണിമലയാറിന്‍റെ തീരത്ത് മഹാദേവസന്നിധിയിലെ കടവിലാണ് ബലി. മേൽശാന്തി വിഷ്ണുശർമ കാർമികത്വം വഹിക്കും. ചിറക്കടവ് മഹാദേവക്ഷേത്രത്തിൽ കർക്കടകവാവിന് ബലിയിടാൻ സൗകര്യമുണ്ടായിരിക്കും. പടിഞ്ഞാറെ നടയിലെ മൈതാനത്താണ് 24ന് തർപ്പണം നടത്താൻ ക്രമീകരണമൊരുക്കും. കർക്കടകവാവുദിനത്തിൽ ക്ഷേത്രത്തിൽ മീനരി വഴിപാടുണ്ടെന്ന് മഹാദേവസേവാസംഘം ഭാരവാഹികൾ അറിയിച്ചു.

ജനറൽ ആശുപത്രിയിൽ മോഷണം നടത്തിയ പ്രതി അറസ്റ്റിൽ

കാഞ്ഞിരപ്പള്ളി: ജനറൽ ആശുപത്രിയിലെ സ്റ്റോർറൂമിൽ അതിക്രമിച്ചു കയറി മോഷണം നടത്തിയ പ്രതി അറസ്റ്റിൽ. മൂവാറ്റുപുഴ വാഴപ്പള്ളി മുടവൂർ കോരുമല പുത്തൻപുരയിൽ അർജുൻ സുരേഷി(28)നെയാണ് പൊൻകുന്നം പോലീസ് അറസ്റ്റ് ചെയ്തത്. ഞായറാഴ്ച രാവിലെ 9.15 ഓടെ ആശുപത്രിയുടെ സ്റ്റോർമുറിയിൽ കയറിയ പ്രതി 3,000 രൂപയോളം വിലവരുന്ന സാമഗ്രികൾ മോഷ്ടിക്കുകയായിരുന്നു. മോഷണത്തിനുശേഷം രക്ഷപ്പെടാൻ ശ്രമിച്ച പ്രതിയെ ആശുപത്രിയിലെ ഡോക്‌ടറും മറ്റു ജീവനക്കാരും ചേർന്ന് തടഞ്ഞുവച്ചശേഷം പോലീസിൽ അറിയിച്ചു. സ്ഥലത്തെത്തിയ പൊൻകുന്നം പോലീസ് പ്രതിയെ അറസ്റ്റ് ചെയ്ത് കോടതിയിൽ ഹാജരാക്കി. മൂവാറ്റുപുഴ പോലീസ് സ്റ്റേഷൻ റൗഡി ലിസ്റ്റിൽ ഉൾപ്പെട്ട പ്രതി അർജുൻ കോതമംഗലം, പെരുമ്പാവൂർ സ്റ്റേഷനുകളിൽ ഉൾപ്പെടെ വിവിധ കേസുകളിൽ പ്രതിയാണ്.

പൂഞ്ഞാർ മണ്ഡലത്തിലെ മികച്ച പഞ്ചായത്ത് മെംബർമാരെ ആദരിക്കും

തിടനാട്: അധ്വാനവർഗം കൾച്ചറൽ ഫോറത്തിന്‍റെ ആഭിമുഖ്യത്തിൽ പൂഞ്ഞാർ നിയോജകമണ്ഡലത്തിലെ മികച്ച പഞ്ചായത്ത്‌ മെംബറെ കണ്ടെത്തി ആദരിക്കുന്നതിന്‍റെ ഭാഗമായി ഈ മേഖലയിലെ പഞ്ചായത്ത്‌ മെംബർമാരിൽനിന്ന് വിവരങ്ങൾ ശേഖരിക്കുന്നു. താത്പര്യമുള്ള മെംബർമാർ, തങ്ങളുടെ കാലാവധിക്കുള്ളിൽ പൂർത്തീകരിക്കുന്ന അഞ്ച് ബൃഹത്തായ പദ്ധതികളുടെ വിവരങ്ങൾ നൽകണം. ഈ പദ്ധതികളുടെ മെറിറ്റ് വിദഗ്ധസമിതി പരിശോധിച്ച് മികച്ച പഞ്ചായത്ത്‌ മെംബറെ തെരഞ്ഞെടുക്കും. തെരഞ്ഞെടുക്കപ്പെടുന്ന ഗ്രാമ പഞ്ചായത്ത് മെംബർക്ക് 10,000 രൂപ കാഷ് അവാർഡും മംഗളപത്രവും നൽകും. അവാർഡ് നൽകുന്ന തീയതി പിന്നീട് അറിയിക്കും. പങ്കെടുക്കാൻ ആഗ്രഹിക്കുന്നവർ 24നു വൈകുന്നേരം ആറിനു മുമ്പായി, തോമസ് അഴകത്ത്, തിടനാട് എന്ന അഡ്രസിലോ 9847775001 ഫോൺനമ്പറിലോ ബന്ധപ്പെടണം.

വി.എസ് അവകാശബോധം ഉറപ്പിച്ച ജനനായകൻ: ഡോ. എൻ. ജയരാജ്

പൊൻകുന്നം: മണ്ണിലധ്വാനിക്കുന്ന ജനതയുടെ അവകാശബോധം ഉറപ്പിച്ച ഉജ്വല ജനനായകനെയാണ് വി.എസിന്‍റെ അന്ത്യത്തോടെ കേരളത്തിന് നഷ്ടമായതെന്ന് ചീഫ് വിപ്പ് ഡോ. എൻ. ജയരാജ്. സമൂഹത്തിന്‍റെ വളർച്ചയ്ക്കുവേണ്ടി എപ്പോഴും പ്രവർത്തിച്ച, കേരളത്തിന്‍റെ വികസനത്തിന് അടിസ്ഥാനശിലയിടുന്നതിൽ അതുല്യ സംഭാവന നൽകിയ വ്യക്തിയാണ് വി.എസ്. അച്യുതാനന്ദൻ. അദ്ദേഹത്തിന്‍റെ സ്നേഹസ്മരണയ്ക്ക് മുമ്പിൽ ഏറെ ആദരവോടെ പ്രണാമം അർപ്പിക്കുന്നതായി ചീഫ് വിപ്പ് ഡോ. എൻ. ജയരാജ് അനുശോചന സന്ദേശത്തിൽ പറഞ്ഞു. വി.എസിന്‍റെ ജ്വലിക്കുന്ന ഓർമയിൽ കോരുത്തോട് കോരുത്തോട്: മുൻ മുഖ്യമന്ത്രി വി.എസ്. അച്യുതാനന്ദന്‍റെ വിയോഗത്തിൽ അദ്ദേഹത്തിന്‍റെ ജ്വലിക്കുന്ന ഓർമകൾ പങ്കിടുകയാണ് കോരുത്തോട് നിവാസികൾ. 2005ലാണ് മുണ്ടക്കയം പഞ്ചായത്തിൽനിന്നും വേർപെട്ട് കോരുത്തോട് പഞ്ചായത്ത് നിലവിൽ വരുന്നത്. അന്ന് സംസ്ഥാനത്തെ പ്രതിപക്ഷ നേതാവായിരുന്നു വി.എസ്. അച്യുതാനന്ദൻ. ഇടതുപക്ഷത്തിന് ഭൂരിപക്ഷം ലഭിച്ച കോരുത്തോട് പഞ്ചായത്ത് മന്ദിരത്തിന്‍റെ ഉദ്ഘാടനത്തിനായിട്ട് അന്നെത്തിയത് വി.എസ്. അച്യുതാനന്ദനായിരുന്നു. 2005 ഡിസംബർ ആറിനാണ് പഞ്ചായത്തിന്‍റെ ഉദ്ഘാടനത്തിനായി വി.എസ്. അച്യുതാനന്ദൻ കോരുത്തോട്ടിൽ എത്തിയത്. നീട്ടിയും കുറുക്കിയും അണികളെ ആവേശത്തിലാക്കുന്ന വി.എസ്. അച്യുതാനന്ദന്‍റെ പ്രസംഗം ഇപ്പോഴും കോരുത്തോട് നിവാസികളുടെ മനസിലുണ്ട്. തന്‍റെ തീപ്പൊരി പ്രസംഗത്തിലൂടെ കേരളക്കരയെ ഒന്നാകെ കൈയിലെടുത്തിരുന്ന വി.എസ്. അച്യുതാനന്ദന്‍റെ പ്രസംഗം കേൾക്കാൻ അന്ന് കോരുത്തോട്ടിലേക്ക് ആയിരക്കണക്കിന് ആളുകളാണ് എത്തിയത്. തങ്ങളുടെ ആരാധ്യ നേതാവ് വിടപറഞ്ഞതിന്‍റെ വേദനയിലാണ് കോരുത്തോട് ഗ്രാമം.

37-ാമത് അല്‍ഫോന്‍സ തീര്‍ഥാടനം ഓഗസ്റ്റ് രണ്ടിന്; ഒരുക്കങ്ങളാരംഭിച്ചു

ചങ്ങനാശേരി: വിശുദ്ധ അല്‍ഫോന്‍സാമ്മയുടെ ജന്മഗൃഹത്തിലേക്കും കുടമാളൂര്‍ മേജര്‍ ആര്‍ക്കി എപ്പിസ്‌ക്കോപ്പല്‍ തീര്‍ഥാടന കേന്ദ്രത്തിലേക്കും ചങ്ങനാശേരി അതിരൂപത ചെറുപുഷ്പ മിഷന്‍ ലീഗിന്‍റെ നേതൃത്വത്തിലുള്ള അല്‍ഫോന്‍സ തീര്‍ഥാടനം ഓഗസ്റ്റ് രണ്ടിനു നടക്കും. ഭൂമിയിലെ മാലാഖ എന്ന പേരില്‍ അല്‍ഫോന്‍സാമ്മയുടെ സൂക്തങ്ങള്‍ മനഃപാഠമാക്കിയും സുകൃതാഭ്യാസങ്ങള്‍ ചെയ്തും ആയിരക്കണക്കിന് കുഞ്ഞുമിഷനറിമാര്‍ തീര്‍ഥാടനത്തിനായി ഒരുങ്ങുകയാണ്. അതിന്‍റെ ഭാഗമായി 24ന് അല്‍ഫോന്‍സ സെമിനാറും അല്‍ഫോന്‍സ ക്വിസ്മത്സരം 27 നും ഓണ്‍ലൈനായി നടത്തും. തീര്‍ഥാടനത്തിനു മുന്നോടിയായി വിവിധ മേഖലകളിലും ശാഖകളിലും ദീപശിഖ- ഛായാചിത്ര പ്രയാണങ്ങള്‍, കുട്ടികളുടെ നേതൃത്വത്തില്‍ ഭവന സന്ദര്‍ശനങ്ങള്‍ എന്നിവ നടക്കും. പതിനായിരക്കണക്കിന് വിശ്വാസികള്‍ പങ്കെടുക്കുന്ന തീര്‍ഥാടനം ആത്മീയ അനുഭവമാക്കി മാറ്റാന്‍ വിവിധ പരിപാടികള്‍ അതിരൂപത ചെറുപുഷ്പ മിഷന്‍ലീഗ് ഡയറക്ടര്‍ റവ.ഡോ. വര്‍ഗീസ് പുത്തന്‍പുരയ്ക്കല്‍, അസി. ഡയറക്ടര്‍മാരായ ഫാ. സെബാസ്റ്റ്യന്‍ മാമ്പറ, ഫാ. ആന്‍റണി കിഴക്കേത്തലയ്ക്കല്‍, തീര്‍ഥാടന കമ്മിറ്റി കണ്‍വീനര്‍ ജോണ്‍സണ്‍ കാഞ്ഞിരക്കാട്ട്, ജോയിന്‍റ് കണ്‍വീനര്‍ സാലിച്ചന്‍ തുമ്പേക്കളം, അതിരൂപതാ ജോയിന്‍റ് ഡയറക്ടര്‍ സിസ്റ്റര്‍ ജെസ്‌ലിന്‍ ജെഎസ്, സിസ്റ്റര്‍ മേരി റോസ് ഡിഎസ്എഫ്എസ്, ആനിമേറ്റര്‍ ബോബി തോമസ്, അതിരൂപത ഓര്‍ഗനൈസർ പ്രസിഡന്‍റ് ടിന്‍റോ സെബാസ്റ്റ്യന്‍, ജനറല്‍ സെക്രട്ടറി എബിന്‍ ജോസഫ് എന്നിവര്‍ അറിയിച്ചു. പുല്ലാനിത്തകിടി പള്ളിയിൽ പുല്ലാനിത്തകിടി: വിശുദ്ധ റീത്തായുടെ പള്ളിയിൽ വിശുദ്ധ അൽഫോൻസാമ്മയുടെ തിരുനാളിന് തുടക്കമായി. രാവിലെ 6.30ന് വിശുദ്ധ കുർബാന, നൊവേന. 27ന് സൺഡേ സ്കൂളിന്‍റെ നേതൃത്വത്തിൽ ഇടവകക്കാർക്ക് മുഴുവനായി ഭരണങ്ങാനം തീർഥാടനം നടത്തും. 28നു രാവിലെ 6.30ന് വിശുദ്ധ കുർബാന, തുടർന്ന് നേർച്ചവിതരണവും അൽഫോൻസാ നാമധാരികളുടെ സംഗമവും ഉണ്ടായിരിക്കുമെന്ന് വികാരി ഫാ. ജോസുകുട്ടി ഇടത്തിനകം അറിയിച്ചു.

പാറത്തോട്ടിൽ പട്ടാപ്പകൽ രണ്ടര പവൻ മാല കവർന്നു

കാഞ്ഞിരപ്പള്ളി: പാറത്തോട്ടിൽ പട്ടാപ്പകൽ മോഷണം. വീടിന്‍റെ വാതിൽ ചവിട്ടിത്തുറന്ന് അകത്തുകടന്ന മോഷ്ടാവ് അലമാരയിലുണ്ടായിരുന്ന രണ്ടര പവൻ മാല കവർന്നു. ഇടക്കുന്നം റോഡിൽ വാടകയ്ക്ക് താമസിക്കുന്ന കുളപ്പുറം ഒന്നാംമൈൽ മുണ്ടപ്ലാക്കൽ മാത്തുക്കുട്ടിയുടെ വീട്ടിലാണ് മോഷണം നടന്നത്. മാത്തുക്കുട്ടിയും ഭാര്യ മോളി മാത്യുവും ഇരുപത്താറാം മൈലിലെ ആശുപത്രിയിൽ പോയ സമയത്തായിരുന്നു മോഷണം. വീടിന്‍റെ പുറകുവശത്തെ രണ്ടു വാതിലുകൾ ചവിട്ടിത്തുറന്ന മോഷ്ടാവ് അലമാരയിലുണ്ടായിരുന്ന രണ്ടര പവന്‍റെ മാലയും കുരിശും അപഹരിക്കുകയായിരുന്നു. 11.20ഓടെയാണ് ഇവർ ആശുപത്രിയിൽ പോയത്. തിരികെ ഉച്ചയ്ക്ക് 1.15ഓടെ വീട്ടിലെത്തിയപ്പോഴാണ് മോഷണവിവരം അറിയുന്നത്. അലമാരയിലെ വസ്ത്രങ്ങളാകെ വലിച്ചുവാരി നിലത്തിട്ട നിലയിലാണ്. അലമാരയിലുണ്ടായിരുന്ന ഫാൻസി ആഭരണങ്ങളും നഷ്ടപ്പെട്ടു. കാഞ്ഞിരപ്പള്ളി പോലീസ് സ്ഥലത്തെത്തി അന്വേഷണം ആരംഭിച്ചു. സമീപത്തെ വീടുകളിലെ സിസിടിവി ദൃശ്യങ്ങളടക്കം കേന്ദ്രീകരിച്ചാണ് അന്വേഷണം.

കെഎസ്ഇബി ജീവനക്കാർക്ക് മെഡിക്കൽ കിറ്റ് നൽകി മേരിക്വീൻസ് മിഷൻ ആശുപത്രി

കാഞ്ഞിരപ്പള്ളി: നാടിന് പ്രകാശമേകാൻ ഏത് അടിയന്തര സാഹചര്യങ്ങളിലും അഹോരാത്രം സേവനം ചെയ്യുന്ന കെഎസ്ഇബി ജീവനക്കാർക്ക് അത്യാഹിത ഘട്ടങ്ങളിൽ ഉപയോഗിക്കുന്നതിന് ആവശ്യമായ മരുന്നുകൾ ഉൾപ്പെടുന്ന മെഡിക്കൽ കിറ്റ് നൽകി കാഞ്ഞിരപ്പള്ളി മേരിക്വീൻസ് മിഷൻ ആശുപത്രി. കെഎസ്ഇബി പൊൻകുന്നം ഡിവിഷനു കീഴിലുള്ള സബ് ഡിവിഷനുകളിലെ അസിസ്റ്റന്‍റ് എക്സിക്യൂട്ടീവ് എൻജിനിയർമാർ, പാമ്പാടി മുതൽ കൂട്ടിക്കൽവരെയുള്ള വിവിധ വൈദ്യുതി സെക്‌ഷനുകളിലെ അസിസ്റ്റന്‍റ് എൻജിനിയർമാർ തുടങ്ങിയവർ പങ്കെടുത്ത ചടങ്ങിൽ മേരിക്വീൻസിലെ എമർജൻസി ഫിസിഷൻ ഡോ. നവീൻ വടക്കൻ ജീവനക്കാരുടെ സംശയങ്ങൾക്ക് ഉത്തരം നൽകി. ഓരോ സെക്‌ഷനുകൾക്കും ലഭ്യമാക്കിയ മെഡിക്കൽ കിറ്റുകൾ പൊൻകുന്നം വൈദ്യുതി ഡിവിഷൻ എൻജിനിയർ ഡെന്നീസ്‌ ജോസഫിന്‍റെ സാന്നിധ്യത്തിൽ അതാത് സെക്‌ഷനുകളിലെ അസിസ്റ്റന്‍റ് എൻജിനിയർമാർക്ക് മേരിക്വീൻസ് ഫിനാൻഷൽ അഡ്മിനിസ്ട്രേറ്റർ ഫാ. മാർട്ടിൻ മണ്ണനാൽ സിഎംഐ കൈമാറി.

ലോറിയില്‍ കൊണ്ടുവന്ന ഹിറ്റാച്ചി വീട്ടുമുറ്റത്തേക്ക് മറിഞ്ഞു

കടനാട്: ലോറിയില്‍ കൊണ്ടുപോകുകയായിരുന്ന ഹിറ്റാച്ചി റോഡിന്‍റെ തിട്ടയിടിഞ്ഞ് വീട്ടുമുറ്റത്തേക്ക് മറിഞ്ഞു. ഇന്നലെ ഉച്ചയ്ക്ക് കടനാട്-ഐങ്കൊമ്പ് റോഡിനോട് ചേര്‍ന്ന് ചിറ്റേട്ട് സെബാസ്റ്റ്യന്‍ ഫ്രാന്‍സിസിന്‍റെ വീട്ടുമുറ്റത്തേക്കാണ് ഹിറ്റാച്ചി വീണത്. അപകടത്തില്‍പ്പെടാതെ വീട്ടുകാര്‍ അദ്ഭുതകരമായി രക്ഷപ്പെടുകയായിരുന്നു. ലോറി ചരിഞ്ഞെങ്കിലും മറിയാതെനിന്നു. അപകടത്തില്‍ രണ്ട് വൈദ്യുതിപോസ്റ്റുകൾ തകര്‍ന്നു. അഞ്ച് അടി കൂടി മാറിയാണ് അപകടം നടന്നിരുന്നതെങ്കില്‍ ഹിറ്റിച്ചി വീടിനു മുകളില്‍ പതിച്ചേനെ.

പിപി റോഡില്‍ വീണ്ടും അപകടം

പാലാ: പാലാ-പൊന്‍കുന്നം റോഡില്‍ വീണ്ടും അപകടം. പന്ത്രണ്ടാംമൈലില്‍ നിര്‍ത്തിയിട്ടിരുന്ന കാറില്‍ നിയന്ത്രണംവിട്ട മിനിലോറി ഇടിച്ചുകയറി. മിനിലോറി ഇടിച്ച് കാര്‍ മുന്നോട്ടുനീങ്ങി സമീപത്തെ ടെലിഫോണ്‍ പോസ്റ്റിലിടിച്ചു. അപകടത്തിൽ ഹോണ്ട സിറ്റി കാര്‍ തകര്‍ന്നു. എയര്‍ബാഗ് പ്രവര്‍ത്തിച്ചതിനാല്‍ കാറിനുള്ളിലുണ്ടായിരുന്ന സ്ത്രീ പരിക്കേല്‍ക്കാതെ രക്ഷപ്പെട്ടു. മിനിലോറി റോഡില്‍ മറിഞ്ഞെങ്കിലും ഡ്രൈവര്‍ നിസാര പരിക്കുകളോടെ രക്ഷപ്പെട്ടു. ഇന്നലെ ഉച്ചകഴിഞ്ഞ് മൂന്നുമണിയോടെയായിരുന്നു അപകടം. കാഞ്ഞിരപ്പള്ളിയിലെ അറവുശാലയില്‍നിന്നു മൃഗങ്ങളുടെ തോൽ കയറ്റി വന്ന ലോറിയാണ് അപകടത്തില്‍പ്പെട്ടത്. പാലാ പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു. കഴിഞ്ഞ ദിവസം ഇവിടെ ഓട്ടോറിക്ഷകൾ കൂട്ടിയിടിത്ത് ഒരാള്‍ക്ക് പരിക്കേറ്റിരുന്നു.

കായകല്പ അവാർഡിൽ തിളങ്ങി കാണക്കാരി ഹോമിയോ ആശുപത്രി

കുറവിലങ്ങാട്: സംസ്ഥാന ആയുഷ് മിഷന്‍റെ കോട്ടയം ജില്ലാതല അവാർഡിൽ തിളങ്ങി കാണക്കാരി ഗവ. ഹോമിയോ ആശുപത്രി. ജില്ലയിലെ ഒന്നാം സ്ഥാനമാണ് ആശുപത്രി നേടിയിട്ടുള്ളത്. ഹോമിയോപ്പതി വിഭാഗത്തിൽ കാണക്കാരി ഹോമിയോ ആശുപത്രി 93.33 ശതമാനം മാർക്കോടെയാണ് ഒന്നാംസ്ഥാനം നേടിയത്. ശുചിത്വം, ഫലപ്രദമായ മാലിന്യസംസ്‌കരണം, അണുബാധ നിയന്ത്രണം എന്നിവ പ്രോത്സാഹിപ്പിക്കാൻ സർക്കാർ ആവിഷ്‌കരിച്ചതാണ് കായകല്പ പുരസ്‌കാരങ്ങൾ. എൻഎബിഎച്ച് എൻട്രി സർട്ടിഫിക്കേഷനും ആയുഷ് ഹെൽത്ത് ആൻഡ് വെൽനസ് സെന്‍ററും ഹോമിയോപ്പതി വകുപ്പിന്‍റെ മോഡൽ ഡിസ്‌പെൻസറിയുമാണ് കാണക്കാരി ഹോമിയോ ആശുപത്രി. ജീവനക്കാരുടെ കൂട്ടായ പ്രവർത്തനത്തിലൂടെയാണ് ജില്ലയിൽ ഒന്നാം സ്ഥാനം നേടാൻ ഹോമിയോ ആശുപത്രിക്ക് കഴിഞ്ഞതെന്ന് കാണക്കാരി പഞ്ചായത്ത് പ്രസിഡന്‍റ് അംബിക സുകുമാരൻ, വൈസ് പ്രസിഡന്‍റ് ബിജു പഴയപുരയ്ക്കൽ, മെഡിക്കൽ ഓഫീസർ ഡോ. എസ്. അഭിരാജ് എന്നിവർ അറിയിച്ചു.

അരുവിത്തുറ കോളജിൽ ലോക യുവജന നൈപുണ്യ വികസന ദിനാഘോഷവും കൊമേഴ്സ് അസോസിയേഷൻ ഉദ്ഘാടനവും

അരുവിത്തുറ: സെന്‍റ് ജോർജ് കോളജിൽ കെമിസ്ട്രി വിഭാഗം ലോകയുവജന നൈപുണ്യ വികസന ദിനാഘോഷവും കൊമേഴ്സ് അസോസിയേഷൻ ഉദ്ഘാടനവും നടത്തി. പിജി ഡിപ്പാർട്ട്മെന്‍റ് ഓഫ് കെമിസ്ട്രിയുടെയും എയ്ഡഡ് വിഭാഗം കൊമേഴ്സിന്‍റെയും നേതൃത്വത്തിലാണ് പരിപാടികൾ സംഘടിപ്പിച്ചത്. പരിപാടികളുടെ ഉദ്ഘാടനം ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്നോളജി ഇൻക്യുബേഷൻ സെന്‍റർ കോട്ടയം സിഇഒ ടി.ജി. മിട്ടു നിർവഹിച്ചു. കഴിഞ്ഞ വർഷം മികച്ച റാങ്കുകൾ നേടിയ വിദ്യാർഥികളെയും വിവിധ ഇന്‍റർനാഷണൽ സ്ഥാപനങ്ങളിൽ ജോലി നേടിയ വിദ്യാർഥികളെയും ആദരിച്ചു. കെമിസ്ട്രി ബിരുദാനന്തരബിരുദ വിഭാഗത്തിന്‍റെ നേതൃത്വത്തിൽ "ജ്വലിക്കുന്ന യുവത്വം: നൈപുണ്യവികസനവും സാധ്യതകളുടെ കണ്ടെത്തലും' എന്ന വിഷയത്തിൽ സംഘടിപ്പിച്ച ശില്പശാല കോളജിലെ പൂർവവിദ്യാർഥിയും പൂഞ്ഞാർ സെന്‍റ് ആന്‍റണീസ് ഹയർ സെക്കൻഡറി സ്കൂൾ അധ്യാപകനുമായ ജോബിൻ കുരുവിള ഉദ്ഘാടനം ചെയ്തു. ബർസാർ ഫാ. ബിജു കുന്നക്കാട്ട് അധ്യക്ഷത വഹിച്ചു. വൈസ് പ്രിൻസിപ്പൽ ഡോ. ജിലു ആനി ജോൺ, നാക് കോ-ഓർഡിനേറ്റർ ഡോ. മിഥുൻ ജോൺ, കെമിസ്ട്രി വിഭാഗം മേധാവി ഡോ. ഗ്യാബിൾ ജോർജ്, കോട്ടയം ഐഐഐടി ഇൻക്യുബേഷന്‍ സെന്‍റർ മാനേജർ അരവിന്ദ് തുടങ്ങിയവർ പ്രസംഗിച്ചു.

അല്‍ഫോന്‍സ തീര്‍ഥാടനം ഭക്തിസാന്ദ്രമായി

പാലാ: വിശുദ്ധ അല്‍ഫോന്‍സാമ്മയുടെ പുണ്യകുടീരം സ്ഥിതിചെയ്യുന്ന ഭരണങ്ങാനത്തേക്കു പാലാ രൂപത എസ്എംവൈഎം, ജീസസ് യൂത്ത് അംഗങ്ങള്‍ നടത്തിയ തീര്‍ഥാടനം ഭക്തിസാന്ദ്രമായി. നൂറുകണക്കിന് യുവജനങ്ങളാണ് 20 ഫൊറോനകളില്‍നിന്നായി എത്തിച്ചേര്‍ന്നത്. വൈകുന്നേരം 4.30ന് ഭരണങ്ങാനം അല്‍ഫോന്‍സ തീര്‍ഥാടനകേന്ദ്രത്തില്‍ റംശ പ്രാര്‍ഥന എസ്എംവൈഎം പാലാ രൂപത ഡയറക്ടര്‍ ഫാ. മാണി കൊഴുപ്പന്‍കുറ്റി നയിച്ചു. അഞ്ചിന് നടന്ന വിശുദ്ധ കുര്‍ബാനയ്ക്ക് രൂപത വികാരി ജനറാള്‍ മോൺ. സെബാസ്റ്റ്യന്‍ വേത്താനത്ത് നേതൃത്വം നല്‍കി. തുടര്‍ന്ന് ആഘോഷമായ ജപമാല പ്രദക്ഷിണം നടത്തി. ജീസസ് യൂത്ത് ഡയറക്ടര്‍ ഫാ. മാത്യു എണ്ണയ്ക്കാപ്പിള്ളി, എസ്എംവൈഎം പ്രസിഡന്‍റ് അന്‍വിന്‍ സോണി ഓടച്ചുവട്ടില്‍, ആല്‍ബിന‍ കൊട്ടാരം, സിസ്റ്റര്‍ നവീന സിഎംസി, റോബിന്‍ താന്നിമല, ബില്‍ന സിബി, ജോസഫ് തോമസ് തുടങ്ങിയവര്‍ നേതൃത്വം നല്‍കി.

അല്‍ഫോന്‍സാമ്മ സഹനത്തിലൂടെ ദൈവരാജ്യം സ്വന്തമാക്കിയവള്‍: ബിഷപ് ഡോ. ആനാപറമ്പില്‍

ഭരണങ്ങാനം: അല്‍ഫോന്‍സാമ്മ സഹനത്തിലൂടെ ദൈവരാജ്യവിരുന്ന് സ്വന്തമാക്കിയവളാണെന്ന് ആലപ്പുഴ ബിഷപ് ഡോ. ജയിംസ് റാഫേല്‍ ആനാപറമ്പില്‍. അല്‍ഫോന്‍സാ തിരുനാളിന്‍റെ മൂന്നാം ദിനമായ ഇന്നലെ കബറിടത്തിങ്കല്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുകയായിരുന്നു ബിഷപ്. സഹനത്തിന്‍റെ പാതയിലൂടെ അല്‍ഫോന്‍സാമ്മ തന്നെത്തന്നെ സ്വയം ദൈവികമായ യാഗവസ്തുവായി രൂപാന്തരപ്പെടുത്തി ഈശോയുമായി ഗാഢമായ ഐക്യം പ്രാപിച്ചു. ഈ ഗാഢ ഐക്യമാണ് നിത്യജീവിതത്തിലേക്ക് മഹത്വീകൃതയായി പ്രവേശിച്ച് നമുക്ക് സ്വര്‍ഗീയ മധ്യസ്ഥയായി നില്‍ക്കാന്‍ അല്‍ഫോന്‍സാമ്മയെ പ്രാപ്തയാക്കിയതെന്നും ബിഷപ് പറഞ്ഞു. മൂന്നാം ദിനമായ ഇന്നലെ ഫാ. ഏബ്രഹാം കണിയാംപടിക്കല്‍, ഫാ. കുര്യന്‍ മുക്കാംകുഴിയില്‍, ഫാ. സെബാസ്റ്റ്യന്‍ തെക്കെക്കരോട്ട്, ഫാ. ജിജോ പ്ലാത്തോട്ടം, ഫാ. മാത്യു വാഴചാരിക്കല്‍, ഫാ. തോമസ് ചില്ലയ്ക്കല്‍, ഫാ. തോമസ് മേനാച്ചേരി, ഫാ. തോമസ് കൊച്ചോടയ്ക്കല്‍ എന്നിവര്‍ വിശുദ്ധ കുര്‍ബാന അര്‍പ്പിച്ചു. ഫാ. ജോസഫ് കദളിയില്‍ റംശാ പ്രാര്‍ഥനയ്ക്കും ഫാ. ജേക്കബ് കടുതോടില്‍ ജപമാല പ്രദക്ഷിണത്തിനും കാര്‍മികത്വം വഹിച്ചു. ഇന്നത്തെ തിരുക്കർമങ്ങൾ രാവിലെ 5.30, 6.45, 8.30, ഉച്ചകഴിഞ്ഞ് 2.30, 3.30, വൈകുന്നേരം 5.00, രാത്രി 7.00 - വിശുദ്ധ കുര്‍ബാന. രാവിലെ 10ന് വിശുദ്ധ കുര്‍ബാന (മലങ്കര ക്രമം) - പത്തനംതിട്ട രൂപത ബിഷപ് സാമുവല്‍ മാര്‍ ഐറേനിയസ്, 11.30ന് വിശുദ്ധ കുര്‍ബാന - താമരശേരി ബിഷപ് മാര്‍ റെമീജിയോസ് ഇഞ്ചനാനിയില്‍. വൈകുന്നേരം 4.30ന് റംശ, 61.5ന് ജപമാല പ്രദക്ഷിണം.

പാലാ ജനറൽ ആശുപത്രിയിൽ 12 കോടിയുടെ അത്യാധുനിക ഉപകരണങ്ങൾ സ്ഥാപിക്കുന്നതിന് ഭരണാനുമതി

പാലാ: കെ.എം. മാണി മെമ്മോറിയല്‍ ജനറല്‍ ആശുപത്രിയിൽ ആര്‍ജിസിബിയുടെ പദ്ധതിയില്‍ റേഡിയോ ഡയഗ്‌നോസ്റ്റിക് ഉപകരണങ്ങളായ സിടി സ്‌കാനര്‍ കം സിമുലേറ്റര്‍, അള്‍ട്രാസൗണ്ട് സ്‌കാനര്‍ ഉള്‍പ്പെടെ 12 കോടി രൂപയുടെ അത്യാധുനിക ഉപകരങ്ങള്‍ സ്ഥാപിക്കുന്നതിന് സംസ്ഥാന സര്‍ക്കാരില്‍നിന്ന് ഭരണാനുമതി ലഭ്യമായതായി ജോസ് കെ. മാണി എംപി. ഇതു സംബന്ധിച്ച് മന്ത്രി വീണാ ജോര്‍ജുമായും ആര്‍ജിസിബി ഡയറക്ടറുമായും നിരന്തര ചര്‍ച്ചകള്‍ നടത്തിയിരുന്നതായി ജോസ് കെ. മാണി പറഞ്ഞു. കേന്ദ്രസര്‍ക്കാര്‍ സ്ഥാപനമായ രാജീവ് ഗാന്ധി സെന്‍റര്‍ ഫോര്‍ ബയോടെക്നോളജി സംസ്ഥാന സര്‍ക്കാരുമായി സഹകരിച്ചു പാലാ ജനറല്‍ ആശുപത്രിയിൽ സ്ഥാപിച്ചിരിക്കുന്ന സ്പെഷാലിറ്റി ലാബോറട്ടറിയുടെ രണ്ടാംഘട്ടമെന്ന നിലയിലാണ് നൂതന സാങ്കേതിക വിദ്യയോടു കൂടിയുള്ള ഡയഗ്‌നോസ്റ്റിക്സ് ഉപകരണങ്ങള്‍ സ്ഥാപിക്കുന്നത്. സംസ്ഥാനത്തെ ജനറല്‍ ആശുപത്രികളില്‍ ആദ്യമായാണ് സിടി സ്‌കാനര്‍ കം സിമുലേറ്റര്‍ ഉള്‍പ്പെടെയുള്ള സംവിധാനം പാലായില്‍ ഒരുങ്ങുന്നത്. രോഗനിര്‍ണയത്തില്‍ ഏറെ പ്രധാനപ്പെട്ട ഡയഗ്‌നോസ്റ്റിക് പരിധോനകള്‍ ഏറ്റവും ആധുനിക നിലവാരത്തില്‍ സാധാരണ ജനങ്ങള്‍ക്ക് പാലായിലെ രാജീവ് ഗാന്ധി സെന്‍റര്‍ ഫോര്‍ ബയോടെക്‌നോളജി നിലവില്‍ നല്‍കിവരുന്നുണ്ട്. കാന്‍സര്‍ മാര്‍ക്കറുകള്‍, മോളിക്യൂലാര്‍ വൈറോളജി പരിശോധനകള്‍ ഉള്‍പ്പെടെയുള്ള മള്‍ട്ടി സ്പെഷാലിറ്റി പരിശോധനകളാണ് ചെയ്യുന്നത്. വിദഗ്ധ പഠനങ്ങള്‍ അനുസരിച്ച് ഓരോ വര്‍ഷവും കേരളത്തില്‍ 60,000 പുതിയ കാന്‍സര്‍ കേസുകള്‍ റിപ്പോര്‍ട്ട് ചെയ്യുന്നുണ്ട്. രോഗനിര്‍ണയം ആദ്യഘട്ടത്തില്‍ നടത്തിയാല്‍ വിവിധയിനം കാന്‍സറുകള്‍ ചികിത്സിച്ചു ഭേദമാക്കാന്‍ സാധിക്കും. പാലായില്‍ ഡയഗ്‌നോസ്റ്റിക്സ് സൗകര്യം ലഭ്യമാകുന്നതോടെ കോട്ടയം ജില്ല ഉള്‍പ്പെടെയുള്ള മലയോരപ്രദേശങ്ങളിലെ കാന്‍സര്‍ രോഗികള്‍ക്കും മറ്റു രോഗികള്‍ക്കും വളരെ കുറഞ്ഞ നിരക്കില്‍ ചികിത്സ ലഭ്യമാകും.

ഹൈടെക് ഫാമിംഗ് സാധ്യതകളുടെ അനന്ത ലോകം: മാര്‍ കല്ലറങ്ങാട്ട്

പാലാ: ഹൈടെക് ഫാമിംഗ് സാധ്യതകളുടെ അനന്ത ലോകമെന്നു ബിഷപ് മാര്‍ ജോസഫ് കല്ലറങ്ങാട്ട്.കത്തോലിക്ക കോണ്‍ഗ്രസ് പാലാ രൂപതാസമിതി നടത്തുന്ന 11-ാമത് അടുക്കളത്തോട്ട മത്സരത്തിന്‍റെ പാലാ സോണ്‍ വിത്ത് വിതരണം ബിഷപ്സ് ഹൗസില്‍ ഉദ്ഘാടനം ചെയ്തു പ്രസംഗിക്കുകയായിരുന്നു ബിഷപ്. കാര്‍ഷികസംസ്‌കാരമാണ് ഏറ്റവും മികച്ച സംസ്‌കാരമെന്നും ഇന്നത്തെ യുവജനങ്ങള്‍ക്ക് കാര്‍ഷികമേഖലയോട് താത്പര്യം കുറയുന്ന സാഹചര്യത്തിലാണ് കുടുംബകൃഷിയുടെ പ്രാധാന്യമെന്നും മാർ കല്ലറങ്ങാട്ട് പറഞ്ഞു. ഏറ്റവുധികം ആളുകള്‍ പങ്കെടുക്കുന്ന കാര്‍ഷിക മത്സരമാണിത്. വിജയികള്‍ക്ക് ആകര്‍ഷകമായ സമ്മാനങ്ങളാണ് നല്‍കുന്നത്. രൂപത പ്രസിഡന്‍റ് ഇമ്മാനുവല്‍ നിധീരി അധ്യക്ഷത വഹിച്ച യോഗത്തില്‍ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍, ജോസ് വട്ടുകുളം, ജോയി കണിപറമ്പില്‍, ആന്‍സമ്മ സാബു, ജോണ്‍സണ്‍ വീട്ടിയാങ്കല്‍, സി.എം. ജോര്‍ജ്, പയസ് കവളംമാക്കല്‍, ജോണ്‍സണ്‍ ചെറുവള്ളി, ബെന്നി കിണറ്റുകര, എഡ്‌വിന്‍ പാമ്പാറ, രാജേഷ് പാറയില്‍, ജോബിന്‍ പുതിയടത്തുചാലില്‍, സിന്ധു ജെയ്ബു, ബെല്ലാ സിബി, ലിബി മണിമല തുടങ്ങിയവര്‍ സംസാരിച്ചു. ടോമി കണ്ണീറ്റുമാലില്‍ സെമിനാര്‍ നയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]