ശബരി എക്സ്പ്രസ് സൂപ്പർഫാസ്റ്റാകുന്നു
Thursday, July 10, 2025 5:48 AM IST
കൊല്ലം: സെക്കന്ദരാബാദ്-തിരുവനന്തപുരം ശബരി എക്സ്പ്രസ് (17229/ 12730) ട്രെയിൻ സൂപ്പർ ഫാസ്റ്റായി ഉയർത്തുന്നു. ഇതിന്റെ ഭാഗമായി വണ്ടിയുടെ നമ്പരിൽ മാറ്റവും വരുത്തിയിട്ടുണ്ട്. മാറ്റം എന്നുമുതലാണെന്ന് അധികൃതർ വ്യക്തമാക്കിയിട്ടില്ല.
തിരുവനന്തപുരത്തുനിന്ന് രാവിലെ 6.45ന് പുറപ്പെടുന്ന ശബരി സൂപ്പർ ഫാസ്റ്റ് (പുതിയ നമ്പർ -20630) അടുത്ത ദിവസം രാവിലെ 11ന് സെക്കന്ദരാബാദിൽ എത്തുന്നതാണ് പുതിയ സമയക്രമം. സെക്കന്ദരാബാദിൽനിന്ന് ഉച്ചകഴിഞ്ഞ് 2.35ന് പുറപ്പെടുന്ന ശബരി സൂപ്പർ ഫാസ്റ്റ് (20629) അടുത്ത ദിവസം വൈകുന്നേരം 6.20ന് തിരുവനന്തപുരം സെൻട്രലിൽ എത്തും.
നിലവിലെ എക്സ്പ്രസ് ട്രെയിനിന്റെ മുൻകൂർ റിസർവേഷൻ കാലാവധി തീരുന്ന മുറയ്ക്കായിരിക്കും സൂപ്പർ ഫാസ്റ്റിലേക്കുള്ള മാറ്റം പ്രാബല്യത്തിൽ വരിക. തീയതി പ്രഖ്യാപനം ഉടൻ ഉണ്ടാകും.
ടിക്കറ്റ് നിരക്കുകളിലും വർധനയുണ്ട്. എക്സ്പ്രസ് ട്രെയിനുകളിൽ മിനിമം ടിക്കറ്റ് ചാർജ് 30 രൂപയാണ്. സൂപ്പർ ഫാസ്റ്റാകുമ്പോൾ ഇത് 45 രൂപയായി ഉയരും.