വാഴൂരിന് കേരളത്തിന്‍റെ യാത്രാമൊഴി
Saturday, August 23, 2025 1:58 AM IST
വണ്ടിപ്പെരിയാർ: ഇടുക്കി ജില്ലയിലെ തോട്ടം തൊഴിലാളികളുടെ ക്ഷേമത്തിനും ഉന്നമനത്തിനുമായി അവസാന ശ്വാസം വരെ പോരാടിയ പീരുമേട് എംഎൽഎ വാഴൂർ സോമന് അന്ത്യാഞ്ജലി.
വ്യാഴാഴ്ച തിരുവനന്തപുരത്ത് റവന്യു അസംബ്ലിയിൽ പങ്കെടുത്തു മടങ്ങവേയാണ് അദ്ദേഹത്തിന് ശാരീരിക അസ്വാസ്ഥ്യമുണ്ടായത്. തുടർന്ന് ശാസ്തമംഗലത്തെ സ്വകാര്യ ആശുപത്രിയിൽ എത്തിച്ചെങ്കിലും മരണം സംഭവിച്ചു. 72 വയസായിരുന്നു.
വ്യാഴാഴ്ച രാത്രിയാണ് വാഴൂർ സോമന്റെ മൃതദേഹം വണ്ടിപ്പെരിയാറിലെത്തിച്ചത്. ഇന്നലെ രാവിലെ 11.30ന് സ്വന്തം വീട്ടിൽനിന്നു ഭൗതിക ശരീരം വണ്ടിപ്പെരിയാർ പഞ്ചായത്ത് കമ്യൂണിറ്റി ഹാളിലെത്തിച്ചു. മന്ത്രി കെ. രാജന്‍റെ നേതൃത്വത്തിലാണ് മൃതദേഹം പൊതുദർശനത്തിനെത്തിച്ചത്. തുടർന്നു സമൂഹത്തിന്‍റെ വിവിധ വിഭാഗങ്ങളിൽനിന്നുള്ളവർ ആദരാഞ്ജലിയർപ്പിച്ചു.
സംസ്ഥാന സർക്കാരിനു വേണ്ടി ജില്ലാ കളക്ടർ ഡോ. ദിനേശൻ ചെറുവാട്ട് ആദരാഞ്ജലി അർപ്പിച്ചു. നിയമസഭാ സ്പീക്കർ എ.എൻ. ഷംസീർ, മന്ത്രിമാരായ റോഷി അഗസ്റ്റിൻ, കെ. രാജൻ, പി. പ്രസാദ്, ജെ. ചിഞ്ചുറാണി, ഡീൻ കുര്യാക്കോസ് എംപി, എംഎൽഎ മാരായ എം.എം. മണി, എ. രാജ, ഡെപ്യൂട്ടി സ്പീക്കർ ചിറ്റയം ഗോപകുമാർ, ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേൽ, മുൻ മന്ത്രിമാരായ കെ. രാജു, കെ.പി. രാജേന്ദ്രൻ, മാത്യു ടി. തോമസ്, മുൻ എംപിമാരായ അഡ്വ. ജോയ്സ് ജോർജ്, ടി.ജെ. ആഞ്ചലോസ്, മുൻ എംഎൽഎമാരായ രാജു ഏബ്രഹാം, ജോസഫ് വാഴയ്ക്കൻ, കെ. പ്രകാശ് ബാബു, ബാബു പോൾ, ഇ.എസ്. ബിജിമോൾ, എഡിഎം ഷൈജു പി. ജേക്കബ്, സബ് കളക്ടർ അനൂപ് ഗാർഗ്, രാഷ്‌ട്രീയ കക്ഷി നേതാക്കളായ ബിനോയ് വിശ്വം, കെ. സലിംകുമാർ, സി.വി. വർഗീസ്, സി.പി. മാത്യു, എൻ. അരുണ്‍, ലതിക സുഭാഷ്, കാഞ്ഞിരപ്പള്ളി രൂപത വികാരി ജനറാൾ ഫാ. ബോബി അലക്സ് മണ്ണംപ്ലാക്കൽ തുടങ്ങി നിരവധി പേർ ആദരാഞ്ജലിയർപ്പിച്ചു.
മന്ത്രി കടന്നപ്പള്ളി രാമചന്ദ്രനു വേണ്ടി സി.എസ്. രാജേന്ദ്രൻ, പി.കെ. വിനോദ് എന്നിവർ റീത്ത് സമർപ്പിച്ചു. ഉച്ചയ്ക്ക് ശേഷം 3.30ന് ഭൗതിക ദേഹം വഹിച്ചുകൊണ്ട് വിലാപയാത്ര ആരംഭിച്ചു. നാലരയ്ക്കു വിലാപയാത്ര പാന്പനാർ സ്മൃതി മണ്ഡപത്തിലെത്തി.
4.45ന് പോലീസ് ഗാർഡ് ഓഫ് ഓണർ നൽകി. തുടർന്ന് ഭൗതികദേഹം സംസ്കരിച്ചു. മന്ത്രിമാരായ റോഷി അഗസ്റ്റിൻ, കെ. രാജൻ, പി. പ്രസാദ്, ജില്ലാ കളക്ടർ ഡോ. ദിനേശൻ ചെറുവാട്ട്, എഡിഎം ഷൈജു പി. ജേക്കബ്, സബ് കളക്ടർ അനൂപ് ഗാർഗ് എന്നിവരും സ്മൃതി മണ്ഡപത്തിലെത്തി.
എംഎൽഎമാരായ എം.എം. മണി, കെ.യു. ജനീഷ് കുമാർ, ആന്‍റണി ജോണ്, സി.കെ. ആശ, സെബാസ്റ്റ്യൻ കുളത്തുങ്കൽ, ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേൽ, വി.എസ്. സുനിൽ കുമാർ, കെ.പി. രാജേന്ദ്രൻ, കെ. സലിംകുമാർ തുടങ്ങിയവരും അന്ത്യാഭിവാദ്യം അർപ്പിച്ചു.