ADVERTISEMENT

ADVERTISEMENT

ഹിരോഷിമ ദിനത്തിൽ സമാധാന സന്ദേശവുമായി വിദ്യാർഥികൾ പേപ്പർ കൊക്കുകളെ നിർമിക്കും

അതിരമ്പുഴ: ആണവായുധ വിരുദ്ധ സന്ദേശവും ലോകശാന്തിയുടെ ആശയവും പകർന്നുകൊണ്ട് ഹിരോഷിമ ദിനമായ ഇന്ന് സെന്‍റ് അലോഷ്യസ് ഹയർ സെക്കൻഡറി സ്കൂളിലെ എൻഎസ്എസ് യൂണിറ്റിന്‍റെ നേതൃത്വത്തിൽ വിദ്യാർഥികളുടെ സജീവ പങ്കാളിത്തത്തോടെ 1000 പേപ്പർ കൊക്കുകൾ നിർമിക്കും.

ഉച്ചകഴിഞ്ഞ് 2.30ന് സ്കൂൾ അഡ്മിനിസ്ട്രേറ്റർ ഫാ. അനീഷ് കാമിച്ചേരി അധ്യക്ഷത വഹിക്കുന്ന യോഗത്തിൽ അതിരമ്പുഴ പഞ്ചായത്ത് പ്രസിഡന്‍റ് ജോസ് അമ്പലക്കുളം ഉദ്ഘാടനം നിർവഹിക്കും. എംജി സർവകലാശാല സ്കൂൾ ഓഫ് ലെറ്റേഴ്സ് അസിസ്റ്റന്‍റ് പ്രഫസർ ഡോ. രാജേഷ് വി. നായർ മുഖ്യസന്ദേശം നൽകും. പ്രിൻസിപ്പൽ ബിനു ജോൺ, ഹെഡ്മിസ്ട്രസ് രോഷ്നി ജേക്കബ്, സ്റ്റാഫ് സെക്രട്ടറി ഡോ. ജിഷാമോൾ അലക്സ് എന്നിവർ പ്രസംഗിക്കും.

എൻഎസ്എസ് പ്രോഗ്രാം ഓഫീസർ ഡോ. ബിജി കെ. സെബാസ്റ്റ്യൻ, മുൻ പ്രോഗ്രാം ഓഫീസർ റെനു ജോസഫ്, എൻഎസ്എസ് ലീഡേഴ്സ് ആൽഫോ മരിയ, അലൻ ഷാജി, സ്വാതി ഷിബു, ശിവകൃഷ്ണൻ എന്നിവർ നേതൃത്വം നൽകും.

ADVERTISEMENT

കൊടിക്കുന്നില്‍ സുരേഷ് എംപി സിസ്റ്റര്‍ എലൈസ ചെറിയാന്‍റെ സഹോദരന്‍റെ വസതി സന്ദര്‍ശിച്ചു

കുറുമ്പനാടം: ഒഡീഷയിലെ ജലേശ്വറില്‍ ബജ്‌രംഗ്ദള്‍ പ്രവര്‍ത്തകരുടെ ആക്രമണത്തിനിരയായ സിസ്റ്റര്‍ എലൈസ ചെറിയാന്‍റെ പെരുമ്പനച്ചിയിലുള്ള സഹോദരന്‍ പുതുപ്പറമ്പില്‍ ചെറിയാന്‍ ജോസഫിന്‍റെ വസതി കൊടിക്കുന്നില്‍ സുരേഷ് എംപി സന്ദര്‍ശിച്ചു. കുടുംബാംഗങ്ങളെ ആശ്വസിപ്പിച്ചു. അക്രമികള്‍ക്കെതിരേ കര്‍ശന നടപടി വേണമെന്ന് ഒഡീഷാ മുഖ്യമന്ത്രിക്കയച്ച കത്തില്‍ ആവശ്യപ്പെട്ടതായി എംപി പറഞ്ഞു. കോണ്‍ഗ്രസ് നേതാക്കളായ ബാബു കുരീത്തറ, ആന്‍റണി കുന്നുംപുറം, പി.എം. മോഹനന്‍പിള്ള തുടങ്ങിയവരും എംപിക്കൊപ്പമുണ്ടായിരുന്നു.

സര്‍ഗക്ഷേത്ര പ്രഭാഷണ പരമ്പര: ഇന്ന് സിബി മലയില്‍

ചങ്ങനാശേരി: ചെത്തിപ്പുഴ സര്‍ഗക്ഷേത്ര പ്രഫഷണല്‍ ഫോറത്തിന്‍റെ ആഭിമുഖ്യത്തിലുള്ള 45-ാമത് എന്‍റെ ജീവിതം പ്രഭാഷണ-സംവാദ പരമ്പരയില്‍ ഇന്ന് വൈകുന്നേരം ആറിന് പ്രശസ്ത സിനിമാ സംവിധായകന്‍ സിബി മലയില്‍ തന്‍റെ ജീവിതാനുഭവങ്ങള്‍ പങ്കുവയ്ക്കും. സര്‍ഗക്ഷേത്ര സീനിയര്‍ സിറ്റിസണ്‍സ് ഫോറം, ഡോ. ജോര്‍ജ് പടനിലം ഫൗണ്ടേഷന്‍ ട്രസ്റ്റ്, സര്‍ഗക്ഷേത്ര 89.6 എഫ്എം റേഡിയോ, ക്രിസ്തുജ്യോതി കോളജ്, എസ്ബി കോളജ് എന്‍എസ്എസ് യൂണിറ്റ് എന്നിവരുടെ പങ്കാളിത്തത്തോടെ നടപ്പാക്കുന്ന സുരക്ഷിതമല്ലാത്തതും വാസയോഗ്യമല്ലാത്തതുമായ വീടുകള്‍ നവീകരിച്ച് ദുര്‍ബല കുടുംബങ്ങളെ സഹായിക്കുന്ന റീബില്‍ഡ് പദ്ധതിയുടെ ലോഗോ പ്രകാശനവും ചടങ്ങില്‍ നടക്കും. സര്‍ഗക്ഷേത്ര രക്ഷധികാരി ഫാ. തോമസ് കല്ലുകളം സിഎംഐ അധ്യക്ഷത വഹിക്കും. ഡയറക്ടര്‍ ഫാ. അലക്‌സ് പ്രായിക്കളം സിഎംഐ, സീനിയര്‍ സിറ്റിസണ്‍സ് ഫോറം പ്രസിഡന്‍റ് ജോസ് ജോസഫ്, പ്രഫഷണല്‍ ഫോറം സെക്രട്ടറി ആന്‍റണി ജേക്കബ്, ഡോ. അഗസ്റ്റിന്‍, ഡോ. ആന്‍റണി തോമസ്, ടി.കെ. തോമസുകുട്ടി എന്നിവര്‍ പ്രസംഗിക്കും.

തുരുത്തിയില്‍ ഓടിക്കൊണ്ടിരുന്ന കാറിനു തീപിടിച്ചു; യാത്രക്കാര്‍ രക്ഷപ്പെട്ടു

ചങ്ങനാശേരി: എന്‍എച്ച് 183 (എംസി റോഡില്‍) തുരുത്തിയില്‍ ഓടിക്കൊണ്ടിരുന്ന കാറിനു തീപിടിച്ചു. കാറിലുണ്ടായിരുന്നവര്‍ രക്ഷപ്പെട്ടു. തുരുത്തി മിഷന്‍ പള്ളിക്കു സമീപം ഇന്നലെ രാത്രി ഏഴിനാണ് സംഭവം. രണ്ടു പേരാണ് കാറിലുണ്ടായിരുന്നത്. തീ പടര്‍ന്നയുടന്‍ തന്നെ കാറില്‍ ഉണ്ടായിരുന്നവര്‍ പുറത്തിറങ്ങിയതിനാല്‍ വന്‍ അപകടം ഒഴിവായി. സമീപത്തെ വീട്ടുകാര്‍ വെള്ളമൊഴിച്ച് തീയണയ്ക്കാന്‍ ശ്രമിച്ചെങ്കിലും തീ കെടുത്താനായില്ല. ചങ്ങനാശേരിയില്‍നിന്നും കോട്ടയത്തുനിന്നും ഫയര്‍ ഫോഴ്‌സും ചങ്ങനാശേരിയില്‍നിന്നും പോലീസും എത്തിയാണ് തീയണച്ചത്. പൂവം സ്വദേശി അനൂപും സുഹൃത്തും കോട്ടയത്തേക്കു പോകുമ്പോഴാണ് അപകടം. സംഭവത്തെത്തുടര്‍ന്ന് റോഡില്‍ അരമണിക്കൂറോളം ഗതാഗതം തടസപ്പെട്ടു. ബാറ്ററിയുടെ ഷോര്‍ട്ട് സര്‍ക്യൂട്ടാണ് തീപിടിത്തത്തിനു കാരണമെന്ന് ഫയര്‍ഫോഴ്‌സ് അധികൃതര്‍ പറഞ്ഞു.

മുസ്‌ലിം ലീഗിന്‍റെ ഊന്നുവടിയില്ലാതെ കേരളത്തിലെ കോണ്‍ഗ്രസിന് നില്‍ക്കാന്‍ പറ്റില്ലെന്ന് വെള്ളാപ്പള്ളി

ചങ്ങനാശേരി: മുസ്‌ലിം ലീഗിന്‍റെ ഊന്നുവടിയില്ലാതെ കേരളത്തിലെ കോണ്‍ഗ്രസിന് നില്‍ക്കാന്‍ പറ്റാത്ത അവസ്ഥയാണെന്ന് എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. എസ്എന്‍ഡിപി യോഗം ചങ്ങനാശേരി യൂണിയന്‍റെ ശാഖാ നേതൃസംഗമം കോണ്ടൂര്‍ ബാക്ക് വാട്ടര്‍ റിസോര്‍ട്ടില്‍ ഉദ്ഘാടനം ചെയ്യുകയായിരുന്നു അദ്ദേഹം. മുസ്‌ലിം ലീഗിനെ എങ്ങനെ മതേതര പാര്‍ട്ടിയെന്നു പറയാനാകുമെന്ന് അദ്ദേഹം ചോദിച്ചു. യോഗം വൈസ് പ്രസിഡന്‍റ് തുഷാര്‍ വെള്ളാപ്പള്ളി സംഘടനാ വിശദീകരണം നടത്തി. യോഗം ദേവസ്വം സെക്രട്ടറി അരയാക്കണ്ടി സന്തോഷ് സംഘടനാ സന്ദേശം നല്‍കി. യൂണിയന്‍ പ്രസിഡന്‍റ് ഗിരീഷ് കോനാട്ട്, സെക്രട്ടറി സുരേഷ് പരമേശ്വരന്‍, വൈസ് പ്രസിഡന്‍റ് പി.എം. ചന്ദ്രന്‍ തുടങ്ങിയവര്‍ പ്രസംഗിച്ചു. ചങ്ങനാശേരി യൂണിയന്‍റെ കീഴിലുള്ള 59 ശാഖകളുടെ ഭാരവാഹികള്‍, കുടുംബയൂണിറ്റ് ഭാരവാഹികള്‍, പോഷകസംഘടനാ ഭാരവാഹികള്‍ ഉള്‍പ്പെടെ 1800ലധികം പേര്‍ പങ്കെടുത്തു.

പോളയും മാലിന്യവും തിങ്ങി എസി കനാല്‍; മരം വീണു തകര്‍ന്ന മതിൽ പുനര്‍നിര്‍മിച്ചുമില്ല

മനയ്ക്കച്ചിറ ടൂറിസം പദ്ധതി നാശോന്മുഖം ചങ്ങനാശേരി: വര്‍ഷങ്ങള്‍ക്കുമുമ്പ് ലക്ഷങ്ങള്‍ മുടക്കി നിര്‍മിച്ച മനയ്ക്കച്ചിറ ടൂറിസം പദ്ധതി ഇപ്പോൾ കണ്ടാല്‍ ആരും മൂക്കത്ത് കൈവയ്ക്കും. കനാലിൽ പോളയുംപായലും തിങ്ങി മാലിന്യകേന്ദ്രമായി. മരംവീണു തകര്‍ന്ന മതിലിന്‍റെ പുനര്‍നിര്‍മാണം നടന്നിട്ടില്ല. സാമൂഹ്യവിരുദ്ധരുടെ വിഹാരകേന്ദ്രമായി മാറിയതോടെ എസി കനാലിന്‍റെ വശങ്ങളില്‍ കുടുംബമായി താമസിക്കുന്നവരുടെ ജീവിതം ദുരിതപൂര്‍ണമായി. വര്‍ഷങ്ങളോളം ഓണക്കാലത്ത് ജലോത്സവം നടന്നിരുന്ന കനാലാണ് ചെളിക്കുളമായി അവശേഷിച്ചിരിക്കുന്നത്. ടൂറിസം പദ്ധതിയുടെ ഭാഗമായി നിര്‍മിച്ച മതിലും വേലിക്കെട്ടും പല ഭാഗത്തും നശിച്ച നിലയിലാണ്. രണ്ടുമാസം മുമ്പുണ്ടായ കാറ്റിലും മഴയിലും മരം കടപുഴകി വീണ് പദ്ധതിയുടെ തുടക്കഭാഗത്ത് അമ്പതു മീറ്ററോളം മതില്‍ തകര്‍ന്നിരുന്നു. ഈ ഭാഗത്തുകൂടി പകലും രാത്രിയും ആളുകള്‍ അതിക്രമിച്ചു കയറുന്നുണ്ട്. ഒരാള്‍ പൊക്കത്തിലാണ് കനാലില്‍ പുല്ലും കാട്ടുചെടികളും വളര്‍ന്നുനില്‍ക്കുന്നത്. കനാലിലെ മാലിന്യത്തില്‍നിന്നുയരുന്ന ദുര്‍ഗന്ധം സമീപവാസികളെ ഏറെ വലയ്ക്കുകയാണ്. വിഷപ്പാമ്പുകളും മറ്റ് ഇഴജന്തുക്കളും ഇവിടെ വിഹരിക്കുകയാണ്. കാമുകീ-കാമുകന്മാരുടെ അഴിഞ്ഞാട്ടവും ലഹരിസംഘങ്ങളുടെ വിഹാരവും സ്വൈര ജീവിതത്തിനു വിഘാതമാകുന്നുവെന്ന് നാട്ടുകാർ പറയുന്നു. കനാല്‍ ആഴം കൂട്ടി വൃത്തിയാക്കുന്നതിനൊപ്പം ഈ ഭാഗങ്ങളില്‍ പോലീസ് പട്രോളിംഗ് ശക്തമാക്കണമെന്ന ആവശ്യവും ഉയര്‍ന്നിട്ടുണ്ട്. എസി കനാല്‍ പള്ളാത്തുരുത്തിയില്‍ തുറന്നാല്‍ കനാലിന്‍റെ ചുറ്റുപാടുകളിലും കുട്ടനാടിന്‍റെ വിവിധ പ്രദേശങ്ങളിലുമുള്ള വെള്ളപ്പൊക്കത്തിനു പരിഹാരം കാണാനാകുമെന്നും കനാല്‍ വികസനസമിതി ചൂണ്ടിക്കാട്ടുന്നു.

ന്യൂനപക്ഷാവകാശങ്ങള്‍ ലംഘിക്കപ്പെടുമ്പോള്‍ ഭരണകൂടങ്ങള്‍ക്ക് നിസംഗത: മോണ്‍. എത്തയ്ക്കാട്ട്

ചങ്ങനാശേരി: രാജ്യത്ത് ന്യൂനപക്ഷാവകാശങ്ങളും ഭരണഘടനയും നിര്‍ബാധം ലംഘിക്കപ്പെടുമ്പോള്‍ ഭരണാധിപന്മാര്‍ നിസംഗത പുലര്‍ത്തുകയാണെന്ന് അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട്. കത്തോലിക്ക കോണ്‍ഗ്രസിന്‍റെ പ്രവര്‍ത്തനങ്ങള്‍ ഉള്‍ക്കൊള്ളുന്ന ദീപകം മാര്‍ഗരേഖ പ്രകാശനം ചെയ്ത് പ്രസംഗിക്കുകയായിരുന്നു അദ്ദേഹം. ഭരണഘടന ഉറപ്പുനല്‍കുന്ന മതസ്വാതന്ത്ര്യവും പൗരസ്വാതന്ത്ര്യവും രാജ്യത്ത് സംരക്ഷിക്കപ്പെടണമെന്ന് അദ്ദേഹം ആവശ്യപ്പെട്ടു. അതിരൂപത അതിരൂപത പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിച്ചു. തിരുവനന്തപുരം ഫൊറോനാ പ്രസിഡന്‍റ് വി.സി. വില്‍സണ്‍ മാര്‍ഗരേഖയുടെ ആദ്യപതിപ്പ് ഏറ്റുവാങ്ങി. ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍, ഗ്ലോബല്‍ ജനറല്‍ സെക്രട്ടറി ഡോ. ജോസ്‌കുട്ടി ജെ. ഒഴുകയില്‍, ഡയറക്ടര്‍ ഫാ. സെബാസ്റ്റ്യന്‍ ചാമക്കാല, ജനറല്‍ സെക്രട്ടറി ബിനു ഡൊമിനിക്, ജോസ് വെങ്ങാന്തറ, ജോര്‍ജ് വര്‍ക്കി, സി.ടി. തോമസ്, ജോര്‍ജുകുട്ടി മുക്കത്ത്, ഷിജി ജോണ്‍സണ്‍, റോസിലിന്‍ കെ. കുരുവിള, രാജേഷ് ജോണ്‍ എന്നിവര്‍ പ്രസംഗിച്ചു.

ബിജെപി അംഗത്തെ അയോഗ്യനാക്കി

കടുത്തുരുത്തി: പഞ്ചായത്ത് അംഗത്തെ തെരഞ്ഞെടുപ്പ് കമ്മീഷൻ അയോഗ്യനാക്കി. മുളക്കുളം പഞ്ചായത്ത് രണ്ടാം വാർഡ് ബിജെപി അംഗം വടുകുന്നപ്പുഴ മരോട്ടിക്കൽ അജിത് കുമാറിനെതിരേയാണ് സംസ്ഥാന തെരഞ്ഞെടുപ്പ് കമ്മീഷൻ അയോഗ്യത പ്രഖ്യാപിച്ചത്. 2023 ലാണ് കേസിനാസ്പദമായ സംഭവം. അജിത്കുമാറിന്‍റെ പേരിലുള്ള ടാക്സിക്കാർ പൊതുമരാമത്ത് വകുപ്പിന് വാടകയ്ക്ക് ഓടി പഞ്ചായത്തിൽനിന്നും ലക്ഷങ്ങൾ കൈപ്പറ്റിയെന്നതാണ് കേസ്. പഞ്ചായത്തിലെ ഒന്നാം വാർഡംഗം സിപിഎം പ്രതിനിധി കെ.ആർ. അരുൺ നൽകിയ പരാതിയെത്തുടർന്നാണ് നടപടി. എന്നാൽ പരാതിക്കാരൻകൂടി ഉൾപ്പെട്ട കമ്മിറ്റിയാണ് തനിക്ക് വണ്ടി ഓടാൻ അനുവാദം നൽകിയതെന്നും, തുടർന്ന് പരാതി വന്നപ്പോൾ കരാർ റദ്ദാക്കുകയും അതിനുശേഷം മാസങ്ങൾ കഴിഞ്ഞാണ് കേസ് നൽകിയതെന്നും അജി വാദിച്ചെങ്കിലും തെരഞ്ഞെടുപ്പ് കമ്മീഷൻ ഇത് തള്ളുകയായിരുന്നു.

കള്ളുചെത്ത് വ്യവസായത്തോടുള്ള വിവേചനം അവസാനിപ്പിക്കണമെന്ന്

വൈക്കം: കള്ളുചെത്ത് വ്യവസായത്തോടുള്ള സർക്കാരിന്‍റെ വിവേചനം അവസാനിപ്പിക്കണമെന്നും വ്യവസായത്തെ തകർച്ചയിൽനിന്ന് രക്ഷിക്കണമെന്നും സിപിഐ ജില്ലാ സമ്മേളനം പ്രമേയത്തിലൂടെ ആവശ്യപ്പെട്ടു. കേരളത്തിലെ പ്രമുഖ പരമ്പരാഗത വ്യവസായ കള്ളുചെത്ത് വ്യവസായം തകർച്ചയെ നേരിടുകയാണ്. ജില്ലയിൽ മാത്രം ആയിരക്കണക്കിന് തൊഴിലാളികളാണ് ഈ രംഗത്ത് പണിയെടുത്തിരുന്നതെന്നും കള്ള് വ്യവസായത്തെ സംരക്ഷിക്കുന്ന പുതിയ മദ്യനയം വേണമെന്നും പ്രമേയം ആവശ്യപ്പെട്ടു. ചെത്തുതൊഴിലാളി ഫെഡറേഷൻ (എഐടിയുസി) സംസ്ഥാന ജനറൽ സെക്രട്ടറി ടി.എൻ. രമേശൻ പ്രമേയം അവതരിപ്പിച്ചു.

മരങ്ങാട്ടുപിള്ളി സെന്‍റ് തോമസ് ഹൈസ്‌കൂള്‍ പ്ലാറ്റിനം ജൂബിലി നിറവില്‍

മരങ്ങാട്ടുപിള്ളി: മരങ്ങാട്ടുപിള്ളി ഗ്രാമത്തിന്‍റെ തിലകക്കുറിയായി വര്‍ത്തിക്കുന്ന സെന്‍റ് തോമസ് ഹൈസ്‌കൂള്‍ പ്ലാറ്റിനം ജൂബിലി നിറവിലേക്ക്. 11ന് ഉച്ചകഴിഞ്ഞ് രണ്ടിന് സെന്‍റ് ഫ്രാന്‍സിസ് അസീസി ഓഡിറ്റോറിയത്തില്‍ നടക്കുന്ന ജൂബിലി ആഘോഷ സമ്മേളനത്തിൽ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍ അധ്യക്ഷത വഹിക്കും. ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. മോന്‍സ് ജോസഫ് എംഎല്‍എ സ്മാര്‍ട്ട് ക്ലാസ് റൂമുകളുടെ ഉദ്ഘാടനം നിര്‍വഹിക്കും. രൂപത കോർപറേറ്റ് സെക്രട്ടറി ഫാ. ജോര്‍ജ് പുല്ലുകാലായില്‍ മുഖ്യപ്രഭാഷണം നടത്തും. മുന്‍ അഡീഷണല്‍ ചീഫ് സെക്രട്ടറി ടി.കെ. ജോസ് ജൂബിലി ലോഗോ പ്രകാശനം ചെയ്യും. ത്രിതല പഞ്ചായത്ത് പ്രതിനിധികൾ, രാഷ്‌ട്രീയ, സാമുദായിക, സാംസ്‌കാരിക നേതാക്കള്‍ തുടങ്ങിയവര്‍ പ്രസംഗിക്കും. 1920ല്‍ ഫാ. വര്‍ഗീസ് പുളിക്കീല്‍ സെന്‍റ് ഫ്രാന്‍സിസ് അസീസി പള്ളി വികാരിയായിരുന്നപ്പോള്‍ ആരംഭിച്ച എല്‍പി സ്‌കൂളാണ് 1948ല്‍ യുപി സ്‌കൂളായും 1951 ഓഗസ്റ്റില്‍ ഹൈസ്‌കൂളായും ഉയര്‍ത്തപ്പെട്ടത്. മരങ്ങാട്ടുപിള്ളി പ്രദേശത്തെ നാനാജാതി മതസ്ഥരായ കുട്ടികള്‍ക്ക് മികവുറ്റ അടിസ്ഥാന വിദ്യാഭ്യാസം നല്‍കുക എന്ന ലക്ഷ്യത്തോടെ ആരംഭിച്ച വെര്‍ണാക്കുലര്‍ മലയാളം സ്‌കൂളാണ് സെന്‍റ് തോമസ് സ്‌കൂളായി മാറിയത്. ഫാ. ഏബ്രഹാം തൊണ്ടിക്കലായിരുന്നു സ്‌കൂളിന്‍റെ ആദ്യത്തെ ഹെഡ്മാസ്റ്റര്‍. സ്‌കൂള്‍ മാനേജര്‍മാരായ ഫാ. സെബാസ്റ്റ്യന്‍ ആലപ്പാട്ടുകുന്നേല്‍, ഫാ. ജോര്‍ജ് വഞ്ചിപ്പുരയ്ക്കല്‍ എന്നിവര്‍ വികസനപ്രവര്‍ത്തനങ്ങള്‍ ഒരുക്കി. ഇപ്പോള്‍ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍, ഹെഡ്മിസ്ട്രസ് ലിന്‍റാ എസ്. പുതിയാപറമ്പില്‍, പിടിഎ പ്രസിഡന്‍റ് റോബിന്‍ കരിപ്പാത്ത് എന്നിവര്‍ നേതൃത്വം നല്‍കുന്നു. സെന്‍റ് തോമസില്‍ പഠിച്ചു പടിയിറങ്ങിയ അനേകം പൂര്‍വവിദ്യാര്‍ഥികള്‍ സമൂഹത്തിലെ വിവിധ മേഖലകളില്‍ പ്രശോഭിക്കുന്നു. പാഠ്യ-പാഠ്യേതര പ്രവര്‍ത്തനങ്ങളില്‍ സ്‌കൂള്‍ മികച്ച നിലവാരം പുലര്‍ത്തി വരുന്നു. വര്‍ഷങ്ങളായി ശാസ്ത്രവിഷയങ്ങളില്‍ ദേശീയ-സംസ്ഥാന-ജില്ലാ തലങ്ങളിലും, കാര്‍ഷിക പ്രവര്‍ത്തനങ്ങളില്‍ സംസ്ഥാന-ജില്ലാ തലങ്ങളിലും, പാലാ രൂപത എഡ്യൂക്കേഷണല്‍ ഏജന്‍സി 2022ല്‍ ഏര്‍പ്പെടുത്തിയ കാര്‍ഷിക സ്‌കൂളിനുള്ള പ്രഥമ അവാര്‍ഡും 2024ലെ അവാര്‍ഡും സ്കൂളിനു ലഭിച്ചു. പത്രസമ്മേളനത്തില്‍ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍, ഹെഡ്മിസ്ട്രസ് ലിന്‍റാ എസ്. പുതിയാപറമ്പില്‍, ജനറല്‍ കണ്‍വീനര്‍ അലക്‌സ് കൊട്ടാരം, പിടിഎ പ്രസിഡന്‍റ് റോബിന്‍ കരിപ്പാത്ത്, ജോണ്‍സണ്‍ പുളിക്കിയില്‍, ജോസുകുട്ടി ഉപ്പാന്തടം, ടി.എസ്. ജയിംസ് എന്നിവര്‍ പങ്കെടുത്തു.

കാലപ്പഴക്കമേറിയ വെട്ടിക്കാട്ടുമുക്ക് പാലത്തിന് സമാന്തരമായി പുതിയ പാലം നിർമിക്കണമെന്ന്

തലയോലപ്പറമ്പ്: തലയോലപ്പറമ്പ് - എറണാകുളം റോഡിലെ വെട്ടിക്കാട്ടുമുക്ക് പാലത്തിന് സമാന്തരമായി പുതിയ പാലം നിർമിക്കണമെന്ന ആവശ്യം ശക്തമാകുന്നു. അരനൂറ്റാണ്ടിലധികം പഴക്കമുള്ള വീതികുറഞ്ഞ പാലം ഗതാഗതക്കുരുക്കിനും അപകടങ്ങൾക്കും ഇടയാക്കുകയാണ്. പ്രതിദിനം ആയിരക്കണക്കിനു വാഹനങ്ങൾ കടന്നുപോകുന്ന വീതി കുറഞ്ഞ പാലത്തിൽ വലിയ വാഹനങ്ങൾ കടന്നുവരുമ്പോൾ ഇരുചക്രവാഹന യാത്രികരും കാൽനടക്കാരും ജീവൻ രക്ഷിച്ചെടുക്കുന്നത് തലനാരിഴയ്ക്കാണ്. സമീപ റോഡിനായി വളരെക്കുറച്ച് സ്ഥലം മാത്രം ഏറ്റെടുക്കേണ്ടിവരും. പാലത്തിലെ അപകടസ്ഥിതി കണക്കിലെടുത്ത് പാലത്തിനിരുവശവും കാൽനടക്കാർക്ക് സുരക്ഷിതമായി സഞ്ചരിക്കാൻ നടപ്പാത തീർക്കണമെന്ന് പ്രദേശവാസികൾ വർഷങ്ങളായി ആവശ്യപ്പെട്ടുവരികയാണെങ്കിലും അധികൃതർ നടപടി സ്വീകരിച്ചില്ല. വെള്ളൂർ പേപ്പർ മിൽ, സ്വകാര്യ സിമന്‍റ് കമ്പനി എന്നിവിടങ്ങളിലേക്ക് രാപകൽ വ്യത്യാസമില്ലാതെ ടൺകണക്കിനു നിർമാണസാമഗ്രികളുമായി ഭാരവണ്ടികൾ ഈ പാലം കടന്നാണ് പോകുന്നത്. തലയോലപ്പറമ്പ് ഡി.ബി. കോളജും പാലത്തിനടുത്താണ് സ്ഥിതിചെയ്യുന്നത്. വാഹനങ്ങൾക്കും കാൽനടക്കാർക്കും സുരക്ഷിതമായി സഞ്ചരിക്കാനാകുന്നതരത്തിൽ വീതികൂട്ടി ഇരുവശങ്ങളിലും നടപ്പാതയോടുകൂടിയ പാലം നിർമ്മിക്കുന്നതിന് അധികൃതർ നടപടി സ്വീകരിക്കണമെന്ന് വെട്ടിക്കാട്ടുമുക്ക്, വടകര നിവാസികൾ ആവശ്യപ്പെട്ടു.

കാൽനൂറ്റാണ്ടിന്‍റെ അനുഭവങ്ങളുമായി അവരെത്തി, പ്രിയ കലാലയത്തിലേക്ക്

കുറവിലങ്ങാട്: ഓർമകളുടെ വേലിയേറ്റമായിരുന്നു ആ മുഖങ്ങളിലെല്ലാം. ആ ഓർമകളിലേക്ക് മുങ്ങിത്താഴാനാണ് വിദേശങ്ങളിൽനിന്നടക്കമുള്ളർ തങ്ങൾ കളിച്ചുവളർന്ന ദേവമാതായുടെ വിളികേട്ട് ഓടിയെത്തിയത്. സഹപാഠികളായ 60 പേരിൽ അകാലത്തിൽ പൊലിഞ്ഞ ഒരാളൊഴികെയുള്ളവരെല്ലാം ഒരുമിച്ചുവെന്നത് സംഘാടക മികവുമായി. കേവലമൊരു സംഗമത്തിനപ്പുറം പ്രിയകലാലയത്തിന്‍റെ കരവലയത്തിൽ ഏറെനേരമിരുന്നും സൗഹൃദം പങ്കിട്ടും ഓർമകൾ പങ്കുവച്ചുമാണ് അവർ പിരിഞ്ഞത്. ഇപ്പോഴത്തെ ജീവിതാന്തസുകളിലേക്ക് അവരെ നയിച്ച കലാലയത്തിന് ഗുരുദക്ഷിണ കണക്കെ ചില ഉപഹാരങ്ങളും അവർ സമ്മാനിച്ചു. കോളജിലെ 1997-2000 ബികോം ബാച്ച് വിദ്യാർഥികളാണ് കുടുംബമായി സംഗമിച്ച് ശ്രദ്ധനേടിയത്. സ്‌നേഹക്കൂട്ടിലേക്ക് പൂർവ അധ്യാപകരും മാനേജരും പ്രിൻസിപ്പലുമടക്കമുള്ളവരും എത്തിയത് വലിയ അംഗീകാരവുമായി. സംഗമം ഗേവ മുൻ ഗവർണർ പി.എസ്. ശ്രീധരൻ പിള്ള ഉദ്ഘാടനം ചെയ്തു. പഴയമയുടെ സൗന്ദര്യത്തിലേക്കുള്ള നടത്തം അനിവാര്യമാണെന്ന് അദ്ദേഹം പറഞ്ഞു. ജയിംസ് പുല്ലാപ്പള്ളി അധ്യക്ഷത വഹിച്ചു. മാനേജർ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, പ്രിൻസിപ്പൽ ഡോ. സുനിൽ സി. മാത്യു, വൈസ് പ്രിൻസിപ്പൽ ഫാ. മാത്യു കവളമ്മാക്കൽ, ബർസാർ ഫാ. ജോസഫ് മണിയഞ്ചിറ, പ്രഫ.ടി.സി. കുര്യാക്കോസ്, ജോർജ് മാത്യു, ഡോ. അനീഷ് തോമസ്, റോബിൻ എണ്ണംപ്രായിൽ, അബിൻ കുര്യൻ, അനീഷ് കുഴികൊമ്പിൽ, അനീഷ് മേൽവെട്ടം എന്നിവർ പ്രസംഗിച്ചു. രേഖ വിനോദ്, ശോഭ ജയിംസ്, ബിസ്മി ശശി, ജോർജ് തോമസ്, വിമൽരാജ്, ബിൻസി സനോജ്, റിന്നി, വിമല അനീഷ്, രാജേഷ് എന്നിവർ നേതൃത്വം നൽകി.

കൃഷിയും പുരയിടങ്ങളും നശിപ്പിച്ച് പന്നിക്കൂട്ടം

ഞീഴൂര്‍: കാഞ്ഞിരംപാറ ഭാഗത്ത് കൃഷിയും പുരയിടങ്ങളും നശിപ്പിച്ച് പന്നിക്കൂട്ടം. ഉടമകളില്ലാത്ത പന്നിക്കൂട്ടം കൃഷിയിടങ്ങള്‍ നശിപ്പിച്ചു തുടങ്ങിയതോടെ നാട്ടുകാരും വീട്ടുകാരും കൃഷിക്കാരുമെല്ലാം ദുരിതത്തിലായി. പഞ്ചായത്തിലെ ഒന്നാം വാര്‍ഡില്‍പ്പെടുന്ന കാഞ്ഞിരംപാറ ഭാഗത്താണ് പന്നികള്‍ കൂട്ടത്തോടെയെത്തി കൃഷിയിടങ്ങളും മറ്റും നശിപ്പിക്കുന്നത്. കുഞ്ഞുങ്ങള്‍ ഉള്‍പ്പെടെയുള്ള പന്നിക്കൂട്ടം കൃഷിയിടത്തിലെത്തി നാശം വരുത്തി മടങ്ങുകയാണ്. ഇവ എങ്ങനെ ഇവിടയെത്തിയെന്ന് ആര്‍ക്കുമറിയില്ല. നാട്ടുകാര്‍ പരാതി നല്‍കിയതിനെത്തുടര്‍ന്ന് അധികൃതര്‍ സ്ഥലത്തെത്തി പരിശോധന നടത്തിയെങ്കിലും ഉടമകളെ കണ്ടെത്താനായില്ല. പന്നികള്‍ നശിപ്പിച്ച കൃഷിയിടങ്ങള്‍ നാട്ടുകാര്‍ പഞ്ചായത്തധികൃതരെ കാണിച്ചുകൊടുത്തു. സമീപവാസികള്‍ വളര്‍ത്തുന്ന പന്നികളാണെന്ന് പരാതി ഉയര്‍ന്നതിനെത്തുടര്‍ന്ന് ഇത്തരത്തില്‍ അന്വേഷിച്ചെങ്കിലും തങ്ങളുടെയല്ല പന്നികളെന്നു വീട്ടുകാര്‍ പറഞ്ഞു. പന്നികളെ പിടികൂടാന്‍ വനംവകുപ്പ് അധികൃതരുടെ സഹായം തേടാനുള്ള നീക്കത്തിലാണ് പഞ്ചായത്ത്. കാഞ്ഞിരംപാറ ഭാഗത്ത് ഏക്കറുകണക്കിന് സ്ഥലം കാടുപിടിച്ചു കിടപ്പുണ്ട്. ഇവിടെയാവും പന്നിക്കൂട്ടങ്ങളുള്ളതെന്നു നാട്ടുകാര്‍ പറയുന്നു. ഞീഴൂര്‍ പഞ്ചായത്ത് പ്രദേശത്ത് കുറക്കന്മാരുടെ ശല്യവും രൂക്ഷമാണെന്നു നാട്ടുകാര്‍ പറയുന്നു.

കടുത്തുരുത്തി റെയില്‍വേ മേല്‍പ്പാലം : സ്ഥലമെടുപ്പ് നടപടികള്‍ 3 മാസത്തിനകം പൂര്‍ത്തിയാക്കും: മോന്‍സ് ജോസഫ്

കടുത്തുരുത്തി: മുട്ടുചിറ-കല്ലറ റോഡില്‍ വാലാച്ചിറ റെയില്‍വേ ഗേറ്റ് ഒഴിവാക്കുന്നതിനുവേണ്ടി ആവിഷ്‌കരിച്ചിരിക്കുന്ന കടുത്തുരുത്തി റെയില്‍വേ മേല്‍പ്പാലത്തിന്‍റെ സ്ഥലമെടുപ്പ് നടപടിക്രമങ്ങള്‍ മൂന്നു മാസത്തിനുള്ളില്‍ പൂര്‍ത്തിയാക്കുമെന്ന് മോന്‍സ് ജോസഫ് എംഎല്‍എ അറിയിച്ചു. ബന്ധപ്പെട്ട ഉദ്യോഗസ്ഥര്‍ പങ്കെടുത്ത യോഗത്തിലാണ് ഇതുസംബന്ധിച്ച തീരുമാനമായത്. റെയില്‍വേ മേല്‍പ്പാലത്തിനുവേണ്ടി സ്ഥലം വിട്ടുതരുന്ന വിസ്തൃതി കണക്കാക്കി വിലനിര്‍ണയം നടത്തുന്നതിനുള്ള അവാര്‍ഡ് എന്‍ക്വയറി തുടങ്ങുന്നതിനു മുന്നോടിയായുള്ള വിവിധ നടപടിക്രമങ്ങള്‍ പൂര്‍ത്തിയാക്കുന്നതിനും യോഗം തീരുമാനിച്ചു. ഇതുപ്രകാരം ഭൂമി ഏറ്റെടുക്കാനുള്ള 19 (1) വിജ്ഞാപനം പുറപ്പെടുവിക്കേണ്ടതുണ്ട്. ഇക്കാര്യത്തില്‍ സര്‍ക്കാര്‍ അനുമതി തേടിക്കൊണ്ടുള്ള ഫയല്‍ റവന്യു വകുപ്പിലെ ഉന്നതോദ്യോഗസ്ഥര്‍ക്ക് കൈമാറിയിട്ടുണ്ട്. അനുമതി ലഭിച്ചതിനുശേഷം 30 ദിവസത്തെ സമയപരിധി പിന്നിട്ടാല്‍ ഭൂമി ഏറ്റെടുക്കല്‍ നടപടികള്‍ ആരംഭിക്കാന്‍ കഴിയും. തുടര്‍ന്ന് റവന്യു വകുപ്പില്‍നിന്നു റെയില്‍വേ മേല്‍പ്പാലം നിര്‍മാണച്ചുമതല നല്‍കിയിട്ടുള്ള പൊതുമരാമത്ത് വകുപ്പിന്‍റെ കീഴില്‍ പ്രവര്‍ത്തിക്കുന്ന റോഡ്സ് ആന്‍ഡ് ബ്രിഡ്ജസ് കോര്‍പറേഷന് ഏറ്റെടുത്തിട്ടുള്ള ഭൂമിയുടെ രേഖകള്‍ കൈമാറും. ഇതിനുശേഷമാണ് റെയില്‍വേ മേല്‍പ്പാലത്തിന്‍റെ ടെണ്ടര്‍ നടപടികള്‍ ആരംഭിക്കാന്‍ കഴിയുകയെന്ന് എംഎല്‍എ അറിയിച്ചു. കടുത്തുരുത്തി റെയില്‍വേ മേല്‍പ്പാലത്തിനുവേണ്ടി ഏറ്റെടുക്കുന്ന സ്ഥലത്ത് വീട് പൂര്‍ണമായും നഷ്ടപ്പെടുന്ന കുടുംബത്തിന് നഷ്ടപരിഹാരം നല്‍കാന്‍ വ്യവസ്ഥ ചെയ്യുന്ന ആര്‍ആര്‍ പാക്കേജിന് ലാന്‍ഡ് റവന്യു കമ്മീഷണര്‍ അംഗീകാരം നല്‍കിയതായും എംഎല്‍എ അറിയിച്ചു. ഇതുപ്രകാരം വീട് പൂര്‍ണമായും നഷ്ടപ്പെടുന്ന കുടുംബത്തിന് 4,60,000 രൂപ അനുവദിച്ചു നല്‍കി. ഇപ്പോള്‍ നടന്നുകൊണ്ടിരിക്കുന്ന റെയില്‍വേ മേല്‍പ്പാല നിര്‍മാണ പ്രവൃത്തിയുടെ മുന്നൊരുക്കമായി ചെയ്യുന്ന കാര്യങ്ങള്‍ പരമാവധി വേഗത്തില്‍ പൂര്‍ത്തിയാക്കാന്‍ എംഎല്‍എ ബന്ധപ്പെട്ട ഉദ്യോഗസ്ഥര്‍ക്ക് നിര്‍ദേശം നല്‍കി. മുട്ടുചിറ-കല്ലറ റോഡില്‍ വാലാച്ചിറ റെയില്‍വേ ഗേറ്റ് ഒഴിവാക്കി കടുത്തുരുത്തി റെയില്‍വേ മേല്‍പ്പാലം നിര്‍മിക്കുന്നതിന് മോന്‍സ് ജോസഫ് എംഎല്‍എ മുന്‍കൈയെടുത്ത് സംസ്ഥാന ബജറ്റില്‍ ഉള്‍പ്പെടുത്തി 2017-18 സാമ്പത്തിക വര്‍ഷത്തില്‍ 30 കോടി രൂപയുടെ ഭരണാനുമതി നേടിയിരുന്നു. മേല്‍പ്പാല നിര്‍മാണത്തിനുവേണ്ടി കിഫ്ബി ബോര്‍ഡ് മീറ്റിംഗ് 19.33 കോടി രൂപയുടെ ഭരണാനുമതിയാണ് പ്രഥമഘട്ടത്തില്‍ നല്‍കിയിരുന്നത്. പുതുക്കിയ എസ്റ്റിമേറ്റിന്‍റെ അടിസ്ഥാനത്തില്‍ സംസ്ഥാന സര്‍ക്കാര്‍ പ്രഖ്യാപിച്ചിരിക്കുന്ന പുതുക്കിയ നിരക്ക് ഇതുപ്രകാരം റിവേഴ്‌സ്ഡ് എസ്റ്റിമേറ്റ് തയാറാക്കി സര്‍ക്കാരിലേക്ക് സമര്‍പ്പിക്കും.

പ്രതി അറസ്റ്റില്‍

പള്ളിക്കത്തോട്: ബാര്‍ ജീവനക്കാരനെ ആക്രമിച്ചു കൊലപ്പെടുത്താന്‍ ശ്രമിച്ച കേസിലെ പ്രതി അറസ്റ്റില്‍. തത്തംപള്ളിക്കുന്ന് കൊച്ചുപറമ്പില്‍ മനോജി(49)നെയാണ് പള്ളിക്കത്തോട് പോലീസ് അറസ്റ്റ് ചെയ്തത്. കഴിഞ്ഞദിവസം കൊടുങ്ങൂർ ഗ്രാൻഡ് അവന്യു ബാര്‍ ഹോട്ടല്‍ അടച്ചതിനുശേഷവും സെക്യൂരിറ്റി കാബിന്‍ ഭാഗത്തുനിന്നു പോകാതിരുന്ന പ്രതി സെക്യൂരിറ്റി ജീവനക്കാരനായ രാജനെ തള്ളി നിലത്തിടുകയും മാരകമായി പരിക്കേല്‍പ്പിക്കുകയുമായിരുന്നു. രാജന്‍ ഇപ്പോള്‍ മെഡിക്കല്‍ കോളജില്‍ ചികിത്സയിലാണ്. പള്ളിക്കത്തോട് പോലീസ് എസ്എച്ച്ഒ പി.എസ്. രാജേഷിന്‍റെ നേതൃത്വത്തില്‍ എസ്‌ഐ പി.എന്‍. ഷാജി, എഎസ്‌ഐ റെജി ജോണ്‍, എസ്‌സിപിഒ സുജീഷ്, സിപിഒ ശ്രീരാജന്‍, സിപിഒമാരായ രാജേഷ്, ജയലാല്‍ എന്നിവര്‍ ചേര്‍ന്നാണ്പ്രതിയെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

ഏറ്റുമാനൂരിൽ ദേശീയ വ്യാപാരി ദിനാചരണം

ഏറ്റുമാനൂർ: കേരള വ്യാപാരി വ്യവസായി ഏകോപന സമിതി ഏറ്റുമാനൂർ യൂണിറ്റായ ഏറ്റുമാനൂർ ചേംബർ ഓഫ് കൊമേഴ്സിന്‍റെ നേതൃത്വത്തിൽ ദേശീയ വ്യാപാരി ദിനാചരണം നടത്തി. വ്യാപാരഭവൻ അങ്കണത്തിൽ പതാക ഉയർത്തി. തുടർന്നു നടത്തിയ സമ്മേളനം പ്രസിഡന്‍റ് എൻ.പി. തോമസ് ഉദ്ഘാടനം ചെയ്തു. ജനറൽ കൺവീനർ ടി.എം. യാക്കൂബ് അധ്യക്ഷത വഹിച്ചു. എൻ.കെ. സുകുമാരൻ നായർ, ജോർജ് തോമസ് മുണ്ടയ്ക്കൽ, എം.എൻ. സജി മുരിങ്ങയിൽ, പി.സി. സുരേഷ്, രാജു താര, ശ്യാം ബഷീർ, വി.എം. മാത്യു, ജോപോൾ ജോർജ് തുടങ്ങിയവർ പ്രസംഗിച്ചു.

വിദേശ ജോലി വാഗ്ദാനം ചെയ്തു തട്ടിപ്പ്: പ്രതി അറസ്റ്റിൽ

ഏറ്റുമാനൂർ: ഓസ്ട്രേലിയയിൽ ജോലി വാഗ്ദാനം ചെയ്തു പണം തട്ടിയെടുത്ത കേസിലെ പ്രതി അറസ്റ്റിൽ. പിറവം തിരുമാറാടി കാക്കൂർ കുഴിവേലിക്കണ്ടത്തിൽ ശരത് ശശി(30) യെയാണ് ഏറ്റുമാനൂർ പോലീസ് അറസ്റ്റ് ചെയ്തത്. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു. പട്ടിത്താനം സ്വദേശിയായ യുവതിയിൽനിന്ന് ഓസ്ട്രേലിയയിൽ ജോലി വാഗ്ദാനം ചെയ്ത് 3,72,000 രൂപ ഇയാൾ വാങ്ങിയെടുത്തശേഷം ജോലി തരപ്പെടുത്തി നൽകാതെ വിശ്വാസവഞ്ചന നടത്തിയെന്നാണ് കേസ്. ഏറ്റുമാനൂർ പോലീസ് സ്റ്റേഷൻ ഇൻസ്പെക്ടർ എ.എസ്. അൻസലിന്‍റെ നേതൃത്വത്തിൽ എസ്ഐമാരായ എ.എസ്. അഖിൽദേവ്, ആ‌ഷ്‌ലി രവി, റെജിമോൻ സി.ടി, സീനിയർ സിവിൽ പോലീസ് ഓഫീസർ സുനിൽ കുര്യൻ, സിവിൽ പോലീസ് ഓഫീസർമാരായ വി.കെ. അനീഷ്, അജിത്ത് എം. വിജയൻ എന്നിവർ ചേർന്ന് മലയാറ്റൂരിൽനിന്നാണ് പ്രതിയെ പിടികൂടിയത്.

കാപ്പ നിയമപ്രകാരം തടവിലാക്കാൻ ഉത്തരവ്

ഏറ്റുമാനൂർ: യുവാവിനെ കാപ്പ നിയമപ്രകാരം കരുതൽ തടങ്കലിൽ അടയ്ക്കാൻ ഉത്തരവ്. കാണക്കാരി ചാത്തമല കുഴിവേലിൽ രാഹുൽ രാജു(24)വിനെയാണ് ജില്ലാ കളക്ടറുടെ ഉത്തരവു പ്രകാരം തടങ്കലിലാക്കുന്നത്. ജില്ലാ പോലീസ് മേധാവി എ. ഷാഹുൽഹമീദിന്‍റെ റിപ്പോർട്ടിന്‍റെ അടിസ്ഥാനത്തിലാണ് നടപടി. കുറവിലങ്ങാട്, ഏറ്റുമാനൂർ പോലീസ് സ്റ്റേഷനുകളിലായി അഞ്ചോളം ക്രിമിനൽ കേസുകളിൽ പ്രതിയാണ് ഇയാൾ.

മാങ്ങാനത്തും പരിസരപ്രദേശത്തും വ്യാപക മോഷണം

കോട്ടയം: മാങ്ങാനത്തും പരിസരപ്രദേശത്തും വ്യാപക മോഷണം. മാങ്ങാനത്ത് പാംസ് വില്ലയിലെ വീട്ടില്‍നിന്ന് അമ്പത് പവന്‍ സ്വര്‍ണം മോഷ്ടിച്ചു. വില്ലയിലെ അടച്ചുകിടന്ന മറ്റു വീടുകളിലും തുരുത്തേല്‍പാലത്തിനു സമീപമുള്ള രണ്ടു വീടുകളിലും മോഷ്ടാക്കളെത്തി. അഞ്ചു പേരടങ്ങുന്ന സംഘത്തിന്‍റെ സിസി ടിവി ദൃശ്യങ്ങള്‍ പോലീസിന് ലഭിച്ചിട്ടുണ്ട്. വെള്ളിയാഴ്ച രാത്രിയാണു മോഷണം അരങ്ങേറിയത്. മാങ്ങാനം പാംസ് വില്ലയിലെ 21-ാം നമ്പര്‍ കോട്ടേജിലാണു മോഷണം നടന്നത്. വില്ലയുടെ വാതില്‍ തകര്‍ത്ത് ഉള്ളില്‍ക്കടന്ന മോഷ്ടാവ് അമ്പത് പവന്‍ സ്വര്‍ണം കവര്‍ന്നു. ഇന്നലെ പുലര്‍ച്ചെ രണ്ടിനും ആറിനും ഇടയിലാണു മോഷണം നടന്നത്. വില്ലയിലെ താമസക്കാരായ അമ്മയും മകളും രോഗബാധയെത്തുടര്‍ന്നു മാങ്ങാനത്തെ സ്വകാര്യ ആശുപത്രിയില്‍ രാത്രിയില്‍ ചികിത്സയ്ക്കായി പോയിരുന്നു. ഇതിനുശേഷം ഇവര്‍ പുലര്‍ച്ചെ തിരികെയെത്തിയപ്പോഴാണു മോഷണം നടന്ന വിവരം അറിഞ്ഞത്. വീടിന്‍റെ മുന്‍വാതില്‍ തകര്‍ത്ത് മോഷ്ടാവ് ഉള്ളില്‍ പ്രവേശിക്കുകയായിരുന്നു. തുടര്‍ന്നു തൊട്ടടുത്ത മുറിയിലെ അലമാരയ്ക്കുള്ളില്‍ സൂക്ഷിച്ചിരുന്ന സ്വര്‍ണമാണു കവര്‍ന്നത്. മോഷണം വിവരം വീട്ടുകാര്‍ കോട്ടയം ഈസ്റ്റ് പോലീസിനെ അറിയിക്കുകയായിരുന്നു. ഈസ്റ്റ് പോലീസ്‌സ്റ്റേഷന്‍ എസ്എച്ച്ഒ ശ്രീജിത്തിന്‍റെ നേതൃത്വത്തിലുള്ള പോലീസ് സംഘം സ്ഥലത്തെത്തി പരിശോധന നടത്തി. മാങ്ങാനം തുരുത്തേല്‍ പാലത്തിനു സമീപമുള്ള ആള്‍ത്താമസമില്ലാത്ത വീട്ടിലും രാത്രി മോഷണശ്രമം നടന്നു. പ്രദേശത്തെ വീടുകളില്‍ കയറുന്ന മോഷ്ടാവിന്‍റെ സിസിടിവി ദൃശ്യം ലഭിച്ചിട്ടുണ്ട്. തുരുത്തേല്‍പ്പാലത്തിനുസമീപം ആളില്ലാത്ത വീട് കുത്തിത്തുറന്ന് ഉള്ളില്‍ കയറാനാണു പ്രതി ശ്രമിച്ചിരിക്കുന്നത്. ഈ വീടിന്‍റെ പുറത്തുനിന്നുള്ള ദൃശ്യമാണ് ലഭിച്ചത്. പോലീസ്, ഫിംഗര്‍ പ്രിന്‍റ് വിദഗ്ധര്‍ സ്ഥലത്തെത്തി പരിശോധന നടത്തി. സിസിടിവി ദൃശ്യത്തിന്‍റെ അടിസ്ഥാനത്തില്‍ പോലീസ് പരിശോധന ആരംഭിച്ചു. പ്രദേശത്ത് മോഷ്ടാക്കളുടെയും സാമൂഹിക വിരുദ്ധരുടെയും ശല്യം രൂക്ഷമാണെന്നും അടിയന്തരമായി പോലീസ് നടപടിയെടുക്കണമെന്നും നഗരസഭാംഗം ജൂലിയസ് ചാക്കോ ആവശ്യപ്പെട്ടു.

ചങ്ങനാശേരി അതിരൂപതയുടെ നേതൃത്വത്തില്‍ ധന്യന്‍ മാര്‍ മാത്യു മാക്കീല്‍ അനുസ്മരണം നാളെ

ചങ്ങനാശേരി: ചങ്ങനാശേരി വികാരിയാത്തിന്‍റെ രണ്ടാമതു മേലധ്യക്ഷനായും പിന്നീട് കോട്ടയം വികാരി അപ്പസ്‌തോലിക്കയായും ചുമതല നിര്‍വഹിച്ച ധന്യന്‍ മാര്‍ മാത്യു മാക്കീലിന്‍റെ അനുസ്മരണവും പ്രാര്‍ഥനാശുശ്രൂഷകളും നാളെ രാവിലെ ഏഴിന് അദ്ദേഹത്തിന്‍റെ കബറിടം സ്ഥിതിചെയ്യുന്ന കോട്ടയം ഇടയ്ക്കാട് സെന്‍റ് ജോര്‍ജ് ക്നാനായ കത്തോലിക്ക ഫൊറോന പള്ളിയില്‍ ചങ്ങനാശേരി അതിരൂപതയുടെ ആഭിമുഖ്യത്തില്‍ നടത്തും. ആര്‍ച്ച്ബിഷപ് മാര്‍ തോമസ് തറയില്‍ വിശുദ്ധകുര്‍ബാനയ്ക്കും കബറിടത്തില്‍ ഒപ്പീസിനും മുഖ്യകാര്‍മികത്വം വഹിക്കും. ചങ്ങനാശേരി അതിരൂപതാ വികാരി ജനറാള്‍മാരായ മോണ്‍. ആന്‍റണി എത്തയ്ക്കാട്ട്, മോണ്‍. മാത്യു ചങ്ങങ്കരി, മോണ്‍. സ്‌കറിയാ കന്യാകോണില്‍, മോണ്‍. ജോണ്‍ തെക്കേക്കര, കോട്ടയം അതിരൂപത വികാരി ജനറാള്‍മാരായ മോണ്‍. തോമസ് ആനിമൂട്ടില്‍, മോണ്‍. മൈക്കിള്‍ വെട്ടിക്കാട്ട്, ഇടയ്ക്കാട് പള്ളി വികാരി ഫാ. സൈമണ്‍ പുല്ലാട്ട്, രണ്ട് അതിരൂപതകളിലെയും വൈദികര്‍, സന്യസ്തര്‍, അല്മായ പ്രതിനിധികള്‍ എന്നിവര്‍ പങ്കുചേരും. 1896 ഓഗസ്റ്റ് 11 നാണ് മാര്‍ മാത്യു മാക്കീല്‍ ചങ്ങനാശേരി വികാരിയാത്തിന്‍റെ വികാരി അപ്പസ്‌തോലിക്കയായി നിയമിതനാകുന്നത്. അദ്ദേഹത്തിന്‍റെ സ്ഥാനാരോഹണത്തിന്‍റെ 130-ാം വാര്‍ഷികാചരണ ആരംഭവും 2025 മേയ് 23ന് മാര്‍ മാക്കീല്‍ ധന്യന്‍ പദവിയിലേക്ക് ഉയര്‍ത്തപ്പെട്ടതിനു ദൈവസന്നിധിയിലുള്ള കൃതജ്ഞതയര്‍പ്പണവും എന്ന നിലയിലാണ് ചങ്ങനാശേരി അതിരൂപത ഈ അനുസ്മരണം നടത്തുന്നത്. ചങ്ങനാശേരി അതിരൂപതാ കൂരിയാംഗങ്ങള്‍, കോട്ടയം ലൂര്‍ദ് ഫൊറോനാപ്പള്ളി വികാരി ഫാ. ജേക്കബ് വട്ടയ്ക്കാട്ട്, താഴത്തങ്ങാടി തിരുഹൃദയപ്പള്ളി വികാരി ഫാ. ജോസ് തെക്കേപ്പുറം, കൈക്കാരന്മാര്‍, പാരീഷ് കൗണ്‍സില്‍ അംഗങ്ങള്‍, സംഘടനാ ഭാരവാഹികള്‍ തുടങ്ങിയവര്‍ നേതൃത്വം നല്‍കുമെന്ന് ചങ്ങനാശേരി അതിരൂപത പബ്ലിക് റിലേഷന്‍സ് വിഭാഗം അറിയിച്ചു.

മെഡി. കോളജിലെ നിർമാണ പ്രവർത്തനങ്ങൾ : സമയബന്ധിതമായി പൂർത്തീകരിക്കാൻ മന്ത്രിതല യോഗത്തിൽ തീരുമാനം

ഏറ്റുമാനൂർ: കോട്ടയം മെഡിക്കൽ കോളജിൽ നിലവിൽ നടന്നുകൊണ്ടിരിക്കുന്ന നിർമാണ പ്രവർത്തനങ്ങൾ സമയബന്ധിതമായി പൂർത്തീകരിക്കാൻ തിരുവനന്തപുരത്ത് ചേർന്ന മന്ത്രിതല യോഗത്തിൽ തീരുമാനം. വിവിധ നിർമാണ പ്രവൃത്തികളുടെ പുരോഗതി വിലയിരുത്തുന്നതിനായി മന്ത്രിമാരായ വി.എൻ. വാസവൻ, വീണാ ജോർജ് എന്നിവർ വിളിച്ച അവലോകന യോഗത്തിലാണ് ഇതുസംബന്ധിച്ച തീരുമാനം കൈക്കൊണ്ടത്. എംബിബിഎസ് വിദ്യാർഥികളുടെ മെൻസ് ഹോസ്റ്റലിന്‍റെ നവീകരണ പ്രവർത്തനങ്ങൾ അടിയന്തരമായി പൂർത്തീകരിക്കാനും തീരുമാനിച്ചു. നിർമാണ പ്രവർത്തനങ്ങൾക്കിടയിൽ നേരിടേണ്ടിവരുന്ന സാങ്കേതിക വിഷയങ്ങൾ വിശദമായി വിലയിരുത്തി അടിയന്തരമായി പരിഹരിക്കും. കെഎസ്ഇബി, പിഡബ്ല്യുഡി (ബിൽഡിംഗ്) ഉൾപ്പെടെയുള്ള വിവിധ വകുപ്പുകളെ ഏകോപിപ്പിച്ചുകൊണ്ട് നിർമാണ പ്രവർത്തനങ്ങൾ ത്വരിതപ്പെടുത്തും. കഴിഞ്ഞ ഒമ്പതു വർഷംകൊണ്ട് ഇടതുപക്ഷ ജനാധിപത്യമുന്നണി സർക്കാർ കോട്ടയം മെഡിക്കൽ കോളജിനായി ചെലവഴിച്ചത് 956.79 കോടി രൂപയാണ്. ഈ സർക്കാർ ഇതുവരെ 746.10 കോടി രൂപയാണ് മെഡിക്കൽ കോളജിനായി നൽകിയിരിക്കുന്നത്. അത്യാധുനിക സംവിധാനങ്ങളോടുകൂടിയ അഞ്ചു ബ്ലോക്കുകൾ പൂർത്തിയാകുമ്പോൾ കോട്ടയം മെ‍ഡിക്കൽ കോളജ് സൂപ്പർ സ്പെഷാലിറ്റി പദവിയിലേക്ക് എത്തിച്ചേരും. നിർമാണം പൂർത്തീകരിച്ച സർജറി ബ്ലോക്കിൽ വിവിധ സർജറി വിഭാഗങ്ങളെ ഏകീകരിപ്പിച്ചുകൊണ്ട് ഒറ്റ ബ്ലോക്കിൽ സർജറി നടത്താൻ സാധിക്കും. റേഡിയോ ഡയഗ്‌നോസിസ്, ഇഎൻടി, അസ്ഥിചികിത്സ, ജനറൽ സർജറി, അനസ്തേഷ്യ വിഭാഗങ്ങളും പതോളജി-മൈക്രോബയോളജി-ബയോകെമിസ്ട്രി ലാബ് വിഭാഗങ്ങളും ഇവിടെ ഏകീകരിക്കപ്പെടും. 257 കോടി രൂപയുടെ പദ്ധതിയിൽ 169 കോടി നിർമാണങ്ങൾക്കും ബാക്കി തുക ഉപകരണങ്ങൾക്കും അനുബന്ധ പ്രവർത്തനങ്ങൾക്കുമാണ്. ബ്ലോക്കിലുള്ള 18 ഓപ്പറേഷൻ തിയറ്ററുകളിൽ രണ്ടു മൈനർ തിയറ്ററുകളും 14 മേജർ തിയറ്ററുകളും രണ്ട് സെപ്റ്റിക് ഓപ്പറേഷൻ തിയറ്ററുകളുമാണുള്ളത്. 22 കിടക്കകൾ വീതമുള്ള രണ്ടു തീവ്രപരിചരണ യൂണിറ്റുകളും 12 കിടക്കകളുള്ള ഐസൊലേഷൻ തീവ്രപരിചരണ മുറികളുമുണ്ട്. 526 കിടക്കകളാണ് ഇവിടെ സജ്ജീകരിച്ചിരിക്കുന്നത്. നിലവിലെ കാർഡിയോളജി-കാർഡിയോ തൊറാസിക് ബ്ലോക്കിന് സമീപത്തായാണ് 36 കോടി രൂപ ചെലവിൽ കാർഡിയോളജി ബ്ലോക്ക് ഒന്നാംഘട്ടത്തിന്‍റെ നിർമാണം നടക്കുന്നത്. അത്യാഹിത വിഭാഗത്തിന് സമീപമാണ് 22 കോടി രൂപ ചെലവിൽ പുതിയ ക്രിട്ടിക്കൽ കെയർ ബ്ലോക്ക് നിർമിക്കുന്നത്. അഞ്ച് നിലകളുള്ള ഈ വിഭാഗത്തിൽ അടിയന്തര സാഹചര്യത്തിലുള്ള ശസ്ത്രക്രിയകൾ അടക്കമുള്ള കാര്യങ്ങൾ പെട്ടെന്ന് ചെയ്യാനാണ് ഉദ്ദേശിക്കുന്നത്. പത്ത് കോടിരൂപ ചെലവിൽ പകർച്ചവ്യാധി നിയന്ത്രണ വിഭാഗത്തിന്‍റെ ബ്ലോക്കും നിർമാണമാരംഭിച്ചിട്ടുണ്ട്. പ്രവർത്തനങ്ങൾ വിലയിരുത്താൻ ചേർന്ന യോഗത്തിൽ മന്ത്രിമാർക്കു പുറമേ വിവിധ വകുപ്പുകളിലെ ഉന്നത ഉദ്യോഗസ്ഥരും പങ്കെടുത്തു.

ദര്‍ശന കാര്‍ട്ടൂണ്‍, ചിത്രരചനാ മത്സരത്തില്‍ കുട്ടികളുടെ വൻ പങ്കാളിത്തം

കോട്ടയം: ദര്‍ശന സാംസ്‌കാരികകേന്ദ്രം ന്യൂഡല്‍ഹി ചില്‍ഡ്രന്‍സ് ബുക്ക് ട്രസ്റ്റുമായി ചേര്‍ന്ന് സംഘടിപ്പിച്ച 28-ാം ദര്‍ശന അഖില കേരള ശങ്കേഴ്‌സ് ചിത്രരചന, കാര്‍ട്ടൂണ്‍ മത്സരത്തില്‍ കേരളത്തിലെ വിവിധ വിദ്യാലയങ്ങളില്‍ നിന്നായി 2200 കുട്ടികള്‍ പങ്കെടുത്തു. മന്ത്രി വി. എന്‍. വാസവന്‍ ഉദ്ഘാടനം ചെയ്തു. ദര്‍ശന സാംസ്‌കാരികകേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍ സിഎംഐ അധ്യക്ഷത വഹിച്ചു. യോഗത്തില്‍ ഡോ. അഞ്ജു മരിയന്‍ സെബാസ്റ്റ്യന്‍ രചിച്ച് കേരള സംസ്ഥാന ബാലസാഹിത്യ ഇന്‍സ്റ്റിറ്റ്യൂട്ട് പ്രസിദ്ധീകരിച്ച "മാമലക്കാട്ടിലെ മിഠായി മരം’ മന്ത്രി വി. എന്‍. വാസവന്‍ പ്രകാശനം ചെയ്തു. ജോഷി മാത്യു, സിജിത അനില്‍, പ്രദീപ് കുമാര്‍, കാര്‍ട്ടൂണിസ്റ്റ് രാജു നായര്‍, പി.കെ. ആനന്ദക്കുട്ടന്‍, ആര്‍ട്ടിസ്റ്റ് അശോകന്‍, ടി.എസ്. ശങ്കര്‍ എന്നിവര്‍ പ്രസംഗിച്ചു. മത്സരത്തില്‍ പങ്കെടുത്ത എല്ലാ കുട്ടികള്‍ക്കും സമ്മാന കിറ്റുകള്‍ നൽകി. പെയിന്‍റിംഗില്‍ പി.ആര്‍. ശ്രീഹരി (കാടാച്ചിറ എച്ച്എസ്എസ്, കണ്ണൂര്‍) ശങ്കര്‍ അവാര്‍ഡ് നേടി. നഴ്‌സറി ഗ്രൂപ്പില്‍ ഒന്നാം സ്ഥാനം എഡ്രീന സാറ എബി (സെന്‍റ് മര്‍സില്‍നാസ് സ്‌കൂള്‍ കോട്ടയം), രണ്ടാം സ്ഥാനം ബെര്‍ണീസ് സൂസന്‍ ബെഞ്ചമിന്‍ (ഗവ.എല്‍പിഎസ്, പൂവന്‍തുരുത്ത് ), മൂന്നാം സ്ഥാനം നിലീന നിസി ലിജുമോന്‍ (സേക്രഡ് ഹാര്‍ട്ട് പബ്ലിക് സ്‌കൂള്‍, കോട്ടയം) എന്നിവർ കരസ്ഥമാക്കി. എ ഗ്രൂപ്പില് (1, 2 ക്ലാസുകള്‍) ഒന്നാം സ്ഥാനം ഓവിയന്‍ ലിബീഷ് (സി . സാവിയോ പബ്ലിക് സ്‌കൂള്‍, കല്ലറ), രണ്ടാം സ്ഥാനം ഋഷികേശ് ആര്‍. നായര്‍ (സേക്രഡ് ഹാര്‍ട്ട് പബ്ലിക് സ്‌കൂള്‍, കോട്ടയം), മൂന്നാം സ്ഥാനം അശ്വിത ആര്‍. (ലൂര്‍ദ് പബ്ലിക് സ്‌കൂള്‍, കോട്ടയം). ബി ഗ്രൂപ്പില്‍ (3, 4 ക്ലാസുകള്‍ ) ഒന്നാം സ്ഥാനം അഭിനന്ദ് ബിനോയ് (ഹോളി ഫാമിലി എല്‍പി സ്‌കൂള്‍ കോട്ടയം, രണ്ടാം സ്ഥാനം ശ്രേയ ആര്‍. (എംഡിഎല്‍പി സ്‌കൂള്‍ പാമ്പാടി ), മൂന്നാം സ്ഥാനം പദ്മശ്രീ ശിവകുമാര്‍ (ലെറ്റര്‍ലാന്‍ഡ് സ്‌കൂള്‍ ആലപ്പുഴ). സി ഗ്രൂപ്പില്‍ (5, 6, 7 ക്ലാസുകള്‍ ) ഒന്നാം സ്ഥാനം ലക്ഷ്മി കൃഷ്ണ ആര്‍. (ചിന്മയ വിദ്യാലയ,കോട്ടയം), രണ്ടാം സ്ഥാനം താര ജിജോ (മാര്‍ ബസേലിയസ് പബ്ലിക് സ്‌കൂള്‍, കോട്ടയം ), മൂന്നാം സ്ഥാനം അവന്തിക പി. നായര്‍ (ശ്രീശങ്കര ഇംഗ്ലീഷ് മീഡിയം സ്‌കൂള്‍ , ചേര്‍ത്തല). ഡി ഗ്രൂപ്പില്‍ (8, 9, 10 ക്ലാസുകള്‍) ഒന്നാം സ്ഥാനം വി.എസ്. അനന്യ (ഗവ. ഗേള്‍സ് എച്ച്എസ് എസ്, വൈക്കം) രണ്ടാം സ്ഥാനം ക്രിസ്റ്റല്‍ മേരി റോയ് (കെഇ സ്‌കൂള്‍ മാന്നാനം), മൂന്നാം സ്ഥാനം ആര്യനന്ദ കെ.എന്‍. (ചിന്മയ വിദ്യാലയ, കോട്ടയം ). ഇ. ഗ്രൂപ്പില്‍ (11, 12 ക്ലാസുകള്‍) ഒന്നാം സ്ഥാനം മാനസമീര (ഗവ. ഗേള്‍സ് എച്ച്എസ് എസ് ഹരിപ്പാട്), രണ്ടാം സ്ഥാനം അഭിജിത് ബിനോയ് (ഹോളി ഫാമിലി എച്ച്എസ്എസ്, കോട്ടയം) മൂന്നാം സ്ഥാനം ഇനിയ എ (സെന്‍റ് ആന്‍സ് ഗേള്‍സ് എച്ച്എസ് എസ്, കോട്ടയം. സ്‌പെഷല്‍ സ്‌കൂളില്‍ ഒന്നാം സ്ഥാനം ആരോമല്‍ ജോസഫ്, (സേവാഗ്രാം സെപ്ഷല്‍ സ്‌കൂള്‍, വെട്ടിമുകള്‍), രണ്ടാം സ്ഥാനം നവമി ഫ്രാന്‍സിസ് (സാന്‍ജോസ് വിദ്യാലയ ഏറ്റുമാനൂര്‍), മൂന്നാം സ്ഥാനം ആല്‍ബിന്‍ ജോര്‍ജ് (ലിലി ലയണ്‍സ് സ്‌പെഷല്‍ സ്‌കൂള്‍, പുലിയൂര്‍). കാര്‍ട്ടൂണ്‍ ഒന്നാം സ്ഥാനം ഇനിയ എ (സെന്‍റ് ആന്‍സ് ഗേള്‍സ് എച്ച്എസ് എസ് കോട്ടയം), രണ്ടാം സ്ഥാനം സൗരവ് ആര്‍. കൃഷ്ണ (ലൂര്‍ദ് പബ്ലിക് സ്‌കൂള്‍ കോട്ടയം), മൂന്നാം സ്ഥാനം സുമയ്യ നൗഷാദ് (സെന്‍റ് ജോസഫ് എച്ച്എസ്എസ്, ആലപ്പുഴ). കാരിക്കേച്ചറില്‍ ഒന്നാം സ്ഥാനം അതുല്‍ എസ്. രാജ്, രണ്ടാം സ്ഥാനം ദീപ എസ്, ഷാജി പി. ഏബ്രഹാം, അന്‍സു മരിയ ജോ എന്നിവര്‍ പങ്കിട്ടു.

അടിമുടി ദുരൂഹത, ചുരുളഴിയാന്‍ കേസുകളേറെ

കോട്ടയം: നാലു സ്ത്രീകളുടെ തിരോധാനക്കേസില്‍ ചോദ്യംചെയ്യലിനോടു സഹകരിക്കാതെ ക്രൈം ബ്രാഞ്ചിനെ പത്തു ദിവസമായി കുഴപ്പിക്കുന്ന ചേര്‍ത്തല പള്ളിപ്പുറം ചെങ്ങുംതറയില്‍ സെബാസ്റ്റ്യ(67)ന്‍റെ മുന്‍കാല ജീവിതത്തില്‍ അടിമുടി ദുരൂഹത. പത്താം ക്ലാസ് തോറ്റ സെബാസ്റ്റ്യന്‍ എസ്എസ്എല്‍സി പാസായതായി തയാറാക്കിയ ബുക്ക് വ്യാജമാണെന്ന് സംശയിക്കുന്നു. ഇതേ വ്യാജ എസ്എസ്എല്‍സി ബുക്ക് വിവിധ ആവശ്യങ്ങള്‍ക്ക് ഇയാള്‍ വിവിധ സ്ഥാപനങ്ങളില്‍ രേഖയായി സമര്‍പ്പിച്ചിട്ടുണ്ട്. എസ്എസ്എല്‍സി തോറ്റശേഷം ടൈപ്പ് റൈറ്റിംഗ് പഠിച്ചു. തുടർന്ന് ചേര്‍ത്തല-അരീക്കുറ്റി റൂട്ടിലെ സ്വകാര്യ ബസിലെ ഡോര്‍ കീപ്പറായും ടാക്‌സി ഡ്രൈവറായും ജോലി ചെയ്തു. പിന്നീട് വാഹന കച്ചവടത്തിലേക്കു തിരിഞ്ഞു. ഒരു അംബാസഡറും സ്വരാജ് മസ്ദ വാനും ഇന്നോവയും ഉള്‍പ്പെടെ പലപ്പോഴായി വന്നുപോയ വാഹനങ്ങളേറെയും കള്ളവണ്ടികളായിരുന്നു. ആര്‍സി ബുക്കുകള്‍ വ്യാജമായി തയാറാക്കിയാണു പലതും വിറ്റിരുന്നത്. ചില വാഹനങ്ങള്‍ക്ക് യാതൊരു രേഖകളും ഉണ്ടായിരുന്നില്ല. പലയിടങ്ങളില്‍ ടാക്‌സി ഡ്രൈവര്‍മാരെ കൊലചെയ്തു കാറുകള്‍ കൈവശപ്പെടുത്തി കേരളത്തെ നടുക്കിയ കേസുകളില്‍ സെബാസ്റ്റ്യന് പങ്കാളിത്തമോ അറിവോ ഉണ്ടായിരുന്നതായി പോലീസ് സംശയിക്കുന്നു. സ്‌കൂള്‍കാലം മുതൽ മോഷണം ചെറുപ്പത്തില്‍ കുഞ്ഞച്ചന്‍ എന്നറിയപ്പെട്ടിരുന്ന ഇയാള്‍ സ്‌കൂള്‍കാലം മുതല്‍ നാട്ടില്‍ പതിവായി ചെറിയ മോഷണങ്ങള്‍ നടത്തിയിരുന്നു. പലരില്‍നിന്നും പണം കടം വാങ്ങുകയും തിരികെ കൊടുക്കാതിരിക്കുകയും ചെയ്തിരുന്നു. അടുത്തകാലം വരെ കടം വാങ്ങിയ പണം ആവശ്യപ്പെട്ട് നിരവധി പേര്‍ ഇയാളുടെ ചേര്‍ത്തലയിലെ വീട്ടില്‍ എത്തിയിരുന്നു. ഇത്തരത്തില്‍ സമ്മര്‍ദം കൂടുമ്പോള്‍ സെബാസ്റ്റ്യന്‍ ഏറ്റുമാനൂര്‍ വെട്ടിമുകളിലുള്ള ഭാര്യവീട്ടിലെത്തി ആഴ്ചകള്‍ താമസിച്ചശേഷം ചേര്‍ത്തലയിലേക്ക് മടങ്ങും. വാഹനത്തട്ടിപ്പുകളും പണമിടപാടും പതിവായിരുന്ന കാലത്ത് പോലീസ് സ്‌റ്റേഷനുകള്‍ കയറിയിറങ്ങേണ്ടിവന്നപ്പോഴൊക്കെ കോഴ കൊടുത്ത് പുറത്തിറങ്ങുകയായിരുന്നു. ചേര്‍ത്തല സ്വദേശി ബിന്ദു പത്മനാഭന്‍, ഐഷ, സിന്ധു എന്നിവരുടെ തിരോധാനത്തില്‍ പോലീസ് ചോദ്യം ചെയ്തപ്പോള്‍ പോലീസിലെ അടുപ്പക്കാരുടെ ഇടപെടലിലാണ് രക്ഷപ്പെട്ടുകൊണ്ടിരുന്നത്. 52-ാം വയസിലാണ് സെബാസ്റ്റ്യന്‍ വിവാഹം കഴിച്ചത്. എന്നാല്‍ സാമ്പത്തിക ഇടപാടുകളില്‍ ഇയാള്‍ക്ക് ഒട്ടേറെ സ്ത്രീകളുമായി അടുപ്പമുണ്ടായിരുന്നതായി പ്രദേശവാസികള്‍ പറയുന്നു. അറുപതാം വയസിലാണ് സെബാസ്റ്റ്യന്‍ സ്ത്രീകളെ വകവരുത്തി തുടങ്ങിയതെന്നു പോലീസ് ഇപ്പോള്‍ കരുതുന്നില്ല. മുന്‍പും സമാനമായ കൃത്യങ്ങള്‍ ചെയ്തിട്ടുണ്ടെന്ന വിശ്വാസത്തിലാണ് അന്വേഷണ സംഘം. എട്ടുവര്‍ഷം മുന്‍പ് ഇയാള്‍ പുതിയ മാരുതി റിറ്റ്‌സ് കാര്‍ വാങ്ങിയിരുന്നു. വെട്ടിമുകളിലുള്ള ഭാര്യവീട്ടില്‍ കിടക്കുന്ന ഈ കാറില്‍നിന്നാണു കഴിഞ്ഞദിവസം കത്തിയും കമ്പിയും ഡീസല്‍ കാനും പോലീസ് കണ്ടെടുത്തത്. ചേര്‍ത്തലയില്‍ രണ്ടേകാല്‍ ഏക്കര്‍ കാടുകയറിയ പുരയിടത്തിലാണു കാലങ്ങളായി സെബാസ്റ്റ്യന്‍ താമസിക്കുന്നത്. ഇവിടെയുള്ള വറ്റാത്ത കിണറില്‍നിന്നു വേനലില്‍ പ്രദേശവാസികള്‍ വെള്ളം കോരുന്നതും വഴി നടക്കുന്നതും സെബാസ്റ്റ്യന്‍ ഇരുപതു വര്‍ഷം മുന്‍പ് തടഞ്ഞിരുന്നു. സഹോദരങ്ങളുമായും അകൽച്ച അന്‍പത് വര്‍ഷം മുന്‍പ് പിതാവ് മരിച്ചപ്പോള്‍ ഈ ഭൂമി ഭാഗം ചെയ്തിരുന്നില്ല. സെബാസ്റ്റ്യനും മൂന്നു സഹോദരിമാരും ഉള്‍പ്പെടെ ആറു മക്കള്‍ക്ക് സ്വത്തില്‍ അവകാശമുണ്ട്. ഒരു സഹോദരന്‍ മരിക്കുകയും മറ്റൊരാള്‍ എക്‌സൈസില്‍ ജോലി നേടി നാടുവിടുകയും ചെയ്തു. സഹോദരിമാരുടെ വിവാഹം കഴിഞ്ഞതോടെ സ്ഥലം സെബാസ്റ്റ്യന്‍റെ കൈവശമായി. സ്വത്ത് അവകാശപ്പെട്ട് സഹോദരങ്ങള്‍ വന്നപ്പോള്‍ ഏറെക്കാലം അവരുമായി വഴക്കും അകല്‍ച്ചയുമായിരുന്നു. അടുത്തിടെ സ്ഥലം ഭാഗിക്കാന്‍ മധ്യസ്ഥര്‍ മുഖേന ധാരണയായപ്പോള്‍ റോഡിനോടു ചേര്‍ന്ന ഭാഗം വേണമെന്ന് സെബാസ്റ്റ്യന്‍ നിബന്ധന വച്ചു. സെബാസ്റ്റ്യന്‍റെ എല്ലാ സാമ്പത്തിക ഇടപാടുകളിലും കൃത്യങ്ങളിലും സഹായിയായിരുന്ന പ്രദേശവാസിയായ യുവാവിന്‍റെ ആത്മഹത്യക്കു പിന്നിലും ദുരൂഹതയുണ്ട്. കാണാതായ സ്ത്രീകളില്‍പ്പെട്ട ബിന്ദു പത്മനാഭന്‍റെ തിരോധാനത്തില്‍ സെബാസ്റ്റ്യന്‍ സംശയത്തില്‍പ്പെട്ടപ്പോള്‍ ഈ യുവാവിനെയും പോലീസ് തുടരെ ചോദ്യം ചെയ്തിരുന്നു. സമ്മര്‍ദം താങ്ങാനാവാതെ ഇയാള്‍ ജീവനൊടുക്കുകയോ അതല്ലെങ്കില്‍ സെബാസ്റ്റ്യന്‍ അപായപ്പെടുത്തുകയോ ആയിരുന്നുവെന്ന് സംശയിക്കുന്നു. കോടികളുടെ സ്വത്തും നിക്ഷേപവും അപഹരിക്കാന്‍ ബിന്ദു പത്മനാഭന്‍റെ പേരിലും സെബാസ്റ്റ്യന്‍ വ്യാജ എസ്എസ്എല്‍സി ബുക്കും വ്യാജ ആധാരവും തയാറാക്കിയിരുന്നു. ജെയ്‌നമ്മയുടെ കൊലപാതകം: മൊബൈല്‍ ഫോണ്‍ നിര്‍ണായക തെളിവ് കോട്ടയം: കൊല്ലപ്പെട്ട അതിരമ്പുഴ കോട്ടമുറി കാക്കനാട്ടുകാലായില്‍ ജെയ്‌നമ്മ (55)യുടെ മൊബൈല്‍ ഫോണ്‍ കണ്ടെത്താന്‍ പോലീസിന്‍റെ ഊര്‍ജിത അന്വേഷണം. ജെയ്‌നമ്മ വധക്കേസില്‍ കസ്റ്റഡിയിലുള്ള പ്രതി ചേര്‍ത്തല ചൊങ്ങുംതറ സെബാസ്റ്റ്യന്‍ (68) കഴിഞ്ഞ മാസം 19 വരെ ഈ ഫോണ്‍ ഉപയോഗിച്ചിരുന്നതായി കണ്ടെത്തിയിട്ടുണ്ട്. കസ്റ്റഡിയില്‍ തുടരെ ചോദ്യം ചെയ്തിട്ടും മൊബൈല്‍ എവിടെയുണ്ടെന്ന് പ്രതി വെളിപ്പെടുത്തുന്നില്ല. വെട്ടിമുകളിലുള്ള ഭാര്യവീട്ടിലും ചേര്‍ത്തലയിലെ വീട്ടിലും പോലീസ് തെരച്ചില്‍ നടത്തിയെങ്കിലും ഫോണ്‍ കണ്ടെത്താനായില്ല. കേസില്‍ നിര്‍ണായക തെളിവായ മൊബൈല്‍ ഫോണിന്‍റെ ടവര്‍ ലൊക്കേഷന്‍ കേന്ദ്രീകരിച്ച് ഇത് റീചാര്‍ജ് ചെയ്ത കടകളിലെല്ലാം പോലീസ് വിവരങ്ങള്‍ തേടിയിരുന്നു. കഴിഞ്ഞ മാസം 19 ന് ഈരാറ്റുപേട്ട നൈനാന്‍പള്ളിക്കു സമീപത്തെ കടയില്‍നിന്ന് ജെയ്നമ്മയുടെ നമ്പരില്‍ 99 രൂപയ്ക്ക് റീചാര്‍ജ് ചെയ്തത് സിസിടിവി ദൃശ്യങ്ങളില്‍ കണ്ടെത്തിയിട്ടുണ്ട്. ഇതിനുശേഷമാണ് ഫോണ്‍ അപ്രത്യക്ഷമായിരിക്കുന്നത്. കഴിഞ്ഞ വര്‍ഷം ഡിസംബര്‍ 24ന് കാണാതായ ഘട്ടത്തില്‍ ജെയ്നമ്മ പള്ളിപ്പുറത്തെ പ്രാഥമികാരോഗ്യകേന്ദ്രത്തില്‍ ചികിത്സതേടിയിരുന്നു. ആ ദിവസങ്ങളില്‍ ജെയ്‌നമ്മയെ കൊലപ്പെടുത്തി പഴ്സും മരുന്നും വാച്ചും സെബാസ്റ്റ്യന്‍ ചേര്‍ത്തലയിലെ വീട്ടില്‍ അടുപ്പില്‍ കത്തിച്ചെന്നാണ് സംശയം. കാണാതാകുമ്പോള്‍ ജെയ്‌നമ്മ 11 പവന്‍ സ്വര്‍ണാഭരണങ്ങള്‍ ധരിച്ചിരുന്നതായാണ് സഹോദരങ്ങള്‍ മൊഴി നല്‍കിയിരിക്കുന്നത്. ഇതില്‍ എട്ടര പവന്‍ ചേര്‍ത്തല പള്ളിപ്പുറത്തെ ധനകാര്യ സ്ഥാപനത്തില്‍ ഓട്ടോഡ്രൈവര്‍ മനോജിന്‍റെ പേരില്‍ പണയം വച്ചതായി വിവരമുണ്ട്. ജെയ്‌നമ്മയെ കൊലപ്പെടുത്തിയശേഷമായിരിക്കും സഹായിയായ മനോജിനെ ഇതിന് നിയോഗിച്ചതെന്ന് സംശയിക്കുന്നു. ചേര്‍ത്തലയിലെ വീട്ടുവളപ്പില്‍ കണ്ടെത്തിയ ശരീരാവശിഷ്ടങ്ങളുടെ ഡിഎന്‍എ ഫലം ലഭിക്കാതെ അന്വേഷണം മുന്നോട്ടുനീങ്ങില്ല. സെബാസ്റ്റ്യനുമായി സാമ്പത്തിക ഇടപാടുണ്ടായിരുന്ന ചേര്‍ത്തല സ്വദേശികളായ ബിന്ദു, ഐഷ, സിന്ധു എന്നിവരുടെ തിരോധാനത്തിലും ഇയാള്‍ സംശയത്തിലാണ്. കണ്ടെത്തിയ ശരീരഭാഗങ്ങള്‍ ഈ മൂന്നു സ്ത്രീകളില്‍ ആരുടേതെങ്കിലുമാണെങ്കില്‍ ജെയ്‌നമ്മയുടെ മൃതദേഹം എവിടെ മറവുചെയ്തുവെന്നത് കണ്ടെത്തേണ്ടിവരും.

എൽഡിഎഫിലെത്തിയത് കേരള കോണ്‍ഗ്രസ്-എമ്മിന്‍റെ നേതാക്കള്‍ മാത്രമെന്ന് സിപിഐ റിപ്പോർട്ട്

വൈക്കം: കേരള കോണ്‍ഗ്രസ്-എമ്മിന്‍റെ നേതാക്കള്‍ മാത്രമാണ് എല്‍ഡിഎഫിലുള്ളതെന്നും അണികള്‍ ഇപ്പോഴും യുഡിഎഫിലാണെന്നും മാണി ഗ്രൂപ്പ് മുന്നണിയിലെത്തിയിട്ടും കാര്യമായ പ്രയോജനം ഇടതു മുന്നണിക്ക് ലഭിച്ചില്ലെന്നും സിപിഐ ജില്ലാ സമ്മേളന റിപ്പോര്‍ട്ട്. ഇന്നലെ രാവിലെ പ്രതിനിധി സമ്മേളനത്തിനുശേഷം ജില്ലാ സെക്രട്ടറി വി.ബി. ബിനു അവതരിപ്പിച്ച റിപ്പോര്‍ട്ടിലാണു കേരള കോണ്‍ഗ്രസ് മാണി വിഭാഗത്തിനെതിരേ ഒളിയമ്പ്. മാണി ഗ്രൂപ്പ് അണികളുടെ മനസും വികാരവും യുഡിഎഫിന് അനുകൂലമാണെന്നും റിപ്പോര്‍ട്ടില്‍ പറയുന്നു. പാലക്കാട് ഭൂഗര്‍ഭജലും ശുദ്ധജലവും ചൂഷണം ചെയ്ത് ബ്രുവറി തുടങ്ങുന്ന സര്‍ക്കാരിനും എക്‌സൈസ് വകുപ്പിനുമെതിരേ റിപ്പോര്‍ട്ടില്‍ വിമര്‍ശനമുണ്ട്. പരമ്പരാഗത കള്ളുചെത്ത് വ്യവസായത്തെ സഹായിക്കാന്‍ ഒരു നടപടിയും സ്വീകരിക്കാത്ത സര്‍ക്കാരും മന്ത്രി എം.ബി. രാജേഷും ബ്രൂവറിക്കു പിന്നാലെയാണെന്നും കുറ്റപ്പെടുത്തുന്നു. സിപിഐയുടെ മന്ത്രിമാരായി കൃഷിമന്ത്രി പി. പ്രസാദും സിവില്‍ സപ്ലൈസ് മന്ത്രി ജി.ആര്‍. അനിലുമുണ്ടായിട്ടും നെല്ലുസംഭരണ കാര്യത്തില്‍ വലിയ പരാജയമാണുണ്ടായിരിക്കുന്നത്.ജനങ്ങളുമായി ഏറ്റവും അടുത്തിടപെടുന്ന കൃഷി, സപ്ലൈകോ വകുപ്പുകള്‍ക്ക് ആവശ്യമായ പണം നല്‍കാത്തത് സര്‍ക്കാരിന്‍റെ കാര്യക്ഷമതയുടെ കുറവാണെന്നും റിപ്പോര്‍ട്ടില്‍ പറയുന്നു. ട്രാവന്‍കൂര്‍ സിമന്‍റ്സ്, കോട്ടയം ടെക്‌സ്റ്റയില്‍സ്, കെപിപിഎല്‍, സപ്ലൈകോ എന്നിവിടങ്ങളില്‍ തൊഴിലാളികള്‍ക്കു ശമ്പളമില്ലാത്ത അവസ്ഥയെന്നു മാത്രമല്ല പ്രസ്ഥാനങ്ങൾ തകര്‍ച്ചയിലുമാണ്. കയര്‍, കക്ക, മത്സ്യ മേഖലകളെയും സര്‍ക്കാര്‍ അവഗണിക്കുകയാണെന്നും പറയുന്നു. ജില്ലാ സെക്രട്ടറിയുടെ റിപ്പോര്‍ട്ടിന്മേല്‍ ഗ്രൂപ്പു ചര്‍ച്ചകള്‍ക്കുശേഷം ഇന്നലെ വൈകുന്നേരത്തോടെ പൊതുചര്‍ച്ച ആരംഭിച്ചു. പൊതു ചര്‍ച്ചയിലും മേല്‍ വിഷയങ്ങളില്‍ പ്രതിനിധികള്‍ രൂക്ഷമായ വിമര്‍ശനമാണ് ഉയര്‍ത്തിയത്. ഇന്നു രാവിലെയും പൊതുചര്‍ച്ച തുടരും. വൈകുന്നേരം നേതാക്കളുടെ മറുപടിക്കുശേഷം പുതിയ ഭാരവാഹികളെ തെരഞ്ഞെടുത്ത് സമ്മേളനം അവസാനിക്കും.

ജനാധിപത്യം അട്ടിമറിച്ച് നരഭോജികള്‍ അധികാരത്തിലെത്തുന്നു: രമേശ് ചെന്നിത്തല

ചരല്‍ക്കുന്ന് (പത്തനംതിട്ട): സാമൂഹിക മാധ്യമങ്ങളിലൂടെ കുപ്രചാരണം നടത്തി ജനാധിപത്യ സംവിധാനത്തെ അട്ടിമറിച്ച് നരഭോജികള്‍ അധികാരത്തിലെത്തുകയാണെന്ന് കോണ്‍ഗ്രസ് പ്രവര്‍ത്തക സമിതിയംഗം രമേശ് ചെന്നിത്തല. കെപിസിസി കലാ സാംസ്‌കാരിക വിഭാഗമായ സംസ്‌കാര സാഹിതിയുടെ സംസ്ഥാന ക്യാന്പ് ഉ്ദഘാടനം ചെയ്തു പ്രസംഗിക്കുകയായിരുന്നു അദ്ദേഹം. തീവ്രവലതുപക്ഷങ്ങളെ മുഖ്യധാരാ മാധ്യമങ്ങള്‍ നിരാകരിക്കുന്നതുകൊണ്ട് സോഷ്യല്‍ മീഡിയയാണ് ഇവരുടെ ഏറ്റവും വലിയ ആയുധം. ഒരു നുണ നൂറുവട്ടം ആവര്‍ത്തിച്ച് സത്യമാക്കുക എന്ന ഗീബല്‍സിയന്‍ തന്ത്രത്തിന്‍റെ പതിനായിരം ഇരട്ടി വലുപ്പമാണ് സോഷ്യല്‍ മീഡിയ സമ്മാനിക്കുന്നതെന്ന് രമേശ്‌ ചെന്നിത്തല പറഞ്ഞു. തെറ്റായ വാര്‍ത്തകളും സത്യമെന്നു തോന്നിപ്പിക്കുന്ന കഥകളും യഥാര്‍ഥ സത്യങ്ങളെ മറച്ചുവച്ചുകൊണ്ടുള്ള ഗോസിപ്പുകളുമാണ് ഇവരുടെ പ്രധാന ആയുധമെന്നും ചെന്നിത്തല പറഞ്ഞു. ചെയര്‍മാന്‍ സി.ആർ. മഹേഷ് അധ്യക്ഷത വഹിച്ചു. വര്‍ക്കിംഗ് ചെയര്‍മാന്‍ എന്‍.വി. പ്രദീപ് കുമാർ, ജനറല്‍ കണ്‍വീനര്‍ ആലപ്പി അഷ്‌റഫ്, സംഘടനാ ചുമതലയുള്ള ജനറല്‍ സെക്രട്ടറി അനി വര്‍ഗീസ് തുടങ്ങിയവര്‍ പ്രസംഗിച്ചു. തുടര്‍ന്ന് എല്ലാ ജില്ലകളില്‍ നിന്നുമുള്ള പ്രതിനിധികളുടെ നേതൃത്വത്തില്‍ സംഘടനാ ചര്‍ച്ച നടത്തി. ജനറല്‍ സെക്രട്ടറി ഷിജു സ്‌കറിയ സംഘടനാ റിപ്പോര്‍ട്ട് അവതരിപ്പിച്ചു. എഴുത്തുകാരന്‍ വിനോയ് തോമസ് വര്‍ത്തമാനകാലം എഴുത്തും ജീവിതവും എന്ന വിഷയത്തില്‍ പ്രഭാഷണം നടത്തി. ക്യാംപില്‍ എല്ലാ ജില്ലകളില്‍ നിന്നുമുള്ള 220 പ്രതിനിധികള്‍ പങ്കെടുക്കുന്നുണ്ട്. വൈകുന്നേരം നടന്ന കലാസന്ധ്യ നടന്‍ ഗിന്നസ് പക്രു ഉദ്ഘാടനം ചെയ്തു. ഇന്ന് രാവിലെ പത്തിനു പ്രതിപക്ഷ നേതാവ് വി.ഡി. സതീശന്‍ ക്യാന്പിനെ അഭിസംബോധന ചെയ്യും. മികച്ച യുവസംരംഭകനുള്ള പുരസ്‌കാരം ബംഗളൂരു ജോസ്‌കോ ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സ് ചെയര്‍മാന്‍ അഡ്വ. സജു ടി. ജോസഫിനു സമ്മാനിക്കും. തുടര്‍ന്നു നടക്കുന്ന സെമിനാറില്‍ നെഹ്‌റുവിയന്‍ ആശയം-കാലിക പ്രസക്തി എന്ന വിഷയത്തില്‍ മഹാത്മാഗാന്ധി യൂണിവേഴ്‌സിറ്റി മുന്‍ വൈസ് ചാന്‍സലര്‍ ഡോ. സിറിയക് തോമസ് സ്റ്റഡി ക്ലാസിന് നേതൃത്വം നല്‍കും. തുടര്‍ന്ന് 11 ന് യുഡിഎഫ് കൺവീനർ അടൂര്‍ പ്രകാശ് എംപി, ആന്‍റോ ആന്‍റണി എംപി എന്നിവര്‍ പ്രസംഗിക്കും.

തേങ്ങാവിലയില്‍ നേരിയ കുറവ്; വെളിച്ചെണ്ണയ്ക്കു കുറവില്ല

കോട്ടയം: കുതിച്ചുകയറിയ തേങ്ങാവില മെല്ലെ കുറഞ്ഞുതുടങ്ങി. 85-93 രൂപ വരെ എത്തിയ തേങ്ങാവില ഒരാഴ്ചയ്ക്കുള്ളില്‍ 70 രൂപയിലെത്തി. അടുത്തയാഴ്ച 65 രൂപയിലേക്ക് താഴുമെന്നാണ് സൂചന. തമിഴ്‌നാട്, കര്‍ണാടക, ആന്ധ്രാ സംസ്ഥാനങ്ങളില്‍നിന്നുള്ള തേങ്ങാവരവ് വര്‍ധിച്ചതാണ് വിലക്കയറ്റത്തിന് നേരിയ ആശ്വാസമായത്. വില നിയന്ത്രിക്കുന്നതില്‍ സര്‍ക്കാര്‍ പിടിപ്പുകേട് തുടര്‍ന്നാല്‍ ഓണത്തിനു വീണ്ടും വില ഉയരാം. അതേസമയം വെളിച്ചെണ്ണവിലയില്‍ കുറവൊന്നുമായില്ല. തേങ്ങയ്ക്കും കൊപ്രയ്ക്കും വില കൂടിയ സമയത്ത് ഉത്പാദിപ്പിച്ച് വില്‍പനയ്‌ക്കെത്തിച്ച പഴയ സ്റ്റോക്കായതിനാല്‍ ലിറ്ററിന് 450 രൂപയ്ക്കു മുകളിലാണ്. അടുത്തയാഴ്ച വെളിച്ചൈണ്ണ വില 400 രൂപയിലേക്ക് താഴുമെന്ന് വ്യാപാരികള്‍ പറഞ്ഞു. തെങ്ങും തേങ്ങയും കുറഞ്ഞതാണ് ഇത്ര വലിയ ക്ഷാമത്തിനും വിലക്കയറ്റത്തിനും കാരണമായത്. തെങ്ങില്‍ ചെല്ലിശല്യം വ്യാപകമായതിനാല്‍ തെങ്ങു നടാന്‍ ആരും താത്പര്യപ്പെടുന്നില്ല. ലഭ്യത കുറഞ്ഞതിനാല്‍ പത്തു വര്‍ഷത്തിനിടെ കിലോയ്ക്ക് 68 രൂപയാണ് തേങ്ങാവിലയില്‍ വര്‍ധനവുണ്ടായത്. 2015ല്‍ ചില്ലറവില 25 രൂപയായിരുന്നത് കഴിഞ്ഞ മാസം 93 രൂപ വരെയെത്തി. കഴിഞ്ഞ വര്‍ഷം 60 രൂപവരെ എത്തിയ നാളികേരവില മാര്‍ച്ചിനുശേഷം കുതിച്ചുകയറുകയായിരുന്നു.

എരുമേലി കെഎസ്ആർടിസി ബസ് സ്റ്റാൻഡ് സ്ഥലം ഒഴിയാൻ കോടതി ഉത്തരവ്

എരുമേലി: കെഎസ്ആർടിസി ബസ് സ്റ്റാൻഡ് ഒഴിയാൻ പാലാ സബ് കോടതി ഉത്തരവിട്ടു. മൂന്നു മാസത്തിനകം സ്ഥലം ഒഴിഞ്ഞുകൊടുക്കണമെന്നാണ് ഉത്തരവ്. ഇതോടെ സ്ഥലത്തിനു വാടക വാങ്ങിക്കൊണ്ടിരുന്ന ദേവസ്വം ബോർഡും സ്ഥലം കൈവശംവച്ചിരിക്കുന്ന കെഎസ്ആർടിസിയും സ്ഥലത്ത് ജനകീയാസൂത്രണ പദ്ധതിയിൽ കെട്ടിടം നിർമിച്ചു കൊടുത്ത എരുമേലി പഞ്ചായത്തും വെട്ടിലായിരിക്കുകയാണ്. 11ന് യോഗം വിഷയം ചർച്ചചെയ്യാൻ 11ന് രാവിലെ പത്തിന് എരുമേലി പഞ്ചായത്ത്‌ കോൺഫറൻസ് ഹാളിൽ യോഗം ചേരുമെന്ന് സെബാസ്റ്റ്യൻ കുളത്തുങ്കൽ എംഎൽഎ അറിയിച്ചു. കോടതി ഉത്തരവ് സ്റ്റേ ചെയ്യാനുള്ള നിയമനടപടികൾ സംബന്ധിച്ച് യോഗം ചർച്ച ചെയ്യും. ഉടമ സ്വകാര്യവ്യക്തി സ്ഥലത്തിന്‍റെ യഥാർഥ ഉടമ എരുമേലി വികസന സമിതി മുൻ പ്രസിഡന്‍റും പരേതനുമായ അഡ്വ. പി.ആർ. രാജഗോപാൽ ആണെന്ന് ഇദ്ദേഹത്തിന്‍റെ ഭാര്യ ഗോപി രാജഗോപാൽ തെളിവുകൾ ഹാജരാക്കി കോടതിയിൽ നൽകിയ ഹർജിയിൽ ദേവസ്വം ബോർഡ്, കെഎസ്ആർടിസി അധികൃതർ എന്നിവരുടെ വാദം കേട്ട ശേഷമാണ് കോടതി ഉത്തരവ് പുറപ്പെടുവിച്ചിരിക്കുന്നത്. മൂന്നു മാസത്തിനകം സ്ഥലം ഒഴിഞ്ഞ് രാജഗോപാലിന്‍റെ ഭാര്യക്ക് വിട്ടുകൊടുക്കാനാണ് ഉത്തരവ്. 1977 ൽ തന്‍റെ ഭർത്താവ് 50 സെന്‍റ് സ്ഥലം കെഎസ്ആർടിസി ക്ക് വാക്കാൽ അനുവദിച്ചതാണെന്നും ഇതിനു രേഖ നൽകിയിട്ടില്ലന്നും എരുമേലിയിൽ ശബരിമല സീസണിലെ തിരക്കു പരിഹരിക്കാൻവേണ്ടി കെഎസ്ആർടിസി ബസുകൾ പാർക്ക് ചെയ്യുന്നതിന് താത്കാലിക സൗകര്യം എന്ന നിലയിലാണ് പൊതു പ്രവർത്തകൻ എന്ന നിലയിൽ അദ്ദേഹം തന്‍റെ സ്ഥലം നൽകിയതെന്നും എന്നാൽ, പല തവണ തിരികെ സ്ഥലം ആവശ്യപ്പെട്ടിട്ടും വിട്ടുകിട്ടിയില്ല എന്നും ഗോപി രാജഗോപാൽ കോടതിയിൽ അറിയിച്ചു. അതേസമയം ഈ സ്ഥലം തങ്ങൾക്കു പാട്ടവാടക ആയി തിരുവിതാംകൂർ ദേവസ്വം ബോർഡാണ് നൽകിയതെന്നും വർഷം തോറും ആയിരം രൂപ വീതം പാട്ടത്തുക നൽകുന്നുണ്ടെന്നും ഇതിന് 2029 വരെ കാലാവധി ഉണ്ടെന്നും കെഎസ്ആർടിസി അധികൃതർ കോടതിയിൽ അറിയിച്ചു. എന്നാൽ, സ്ഥലത്തിന്‍റെ ഉടമസ്ഥാവകാശം തെളിയിക്കുന്ന രേഖകൾ ഹാജരാക്കാൻ ദേവസ്വം ബോർഡിനായിട്ടില്ല. ഇതു മുൻനിർത്തിയാണ് സ്ഥലം വിട്ടുകൊടുക്കാൻ കോടതി ഉത്തരവിട്ടത്. കേരളത്തിലെ ആദ്യ ജനകീയ ഡിപ്പോ സംസ്ഥാനത്ത് ജനങ്ങൾ നിർമിച്ച ആദ്യ കെഎസ്ആർടിസി ഓപ്പറേറ്റിംഗ് സെന്‍റർ ആണ് എരുമേലിയിലേത്. ഇടയ്ക്കു നഷ്ടം മൂലം അധികൃതർ പൂട്ടിയപ്പോൾ ജനങ്ങൾ ഒറ്റക്കെട്ടായി ദിവസങ്ങളോളം സത്യഗ്രഹം നടത്തി സെന്‍റർ തുറന്നുപ്രവർത്തിപ്പിക്കുകയായിരുന്നു. ഏതാനും വർഷം മമ്പും സെന്‍റർ നിർത്താൻ അധികൃതർ ശ്രമിച്ചിരുന്നു. പഞ്ചായത്ത്‌ അംഗങ്ങൾ ചേർന്നാണ് ഈ ശ്രമം തടഞ്ഞത്. തുടക്കം 27 വർഷം മുമ്പ് 1998 നവംബർ 28 നാണ് സെന്‍റർ ആരംഭിച്ചത്. ഇതിനായി നേതൃത്വം നൽകിയ പൊതു പ്രവർത്തകരിൽ ടി.പി. തൊമ്മി, ജോബ്‌കുട്ടി ഡൊമിനിക്, എൻ.ബി. ഉണ്ണികൃഷ്ണൻ, അനന്തൻ, ബഷീർ കറുകഞ്ചേരി എന്നിവർ ഇന്ന് ജീവനോടെയില്ല. ഇവർക്കൊപ്പം പൊതുപ്രവർത്തന രംഗത്ത് സജീവമായിരുന്ന വി.പി. സുഗതൻ, സഖറിയ ഡൊമിനിക് ചെമ്പകത്തുങ്കൽ, പി.എ. സലിം, ജോസ് മടുക്കക്കുഴി, പി.എ. ഇർഷാദ്, വി.എസ്. ഷുക്കൂർ, ജോസ് പഴയതോട്ടം, ജയേഷ് തമ്പാൻ തുടങ്ങിയവർ ചേർന്നാണ് സെന്‍ററിന്‍റെ തുടക്കം യാഥാർഥ്യമാക്കിയത്. ഗതാഗതവകുപ്പിന്‍റെയും ദേവസ്വം ബോർഡിന്‍റെയും മന്ത്രിയായിരുന്ന പി.ആർ. കുറുപ്പാണ് ഉദ്ഘാടനം നിർവഹിച്ചത്. നാട്ടുകാരുടെ സംഭാവനയും ജീവനക്കാരുടെ സംഘടനയായ എംപ്ലോയീസ് അസോസിയേഷന്‍റെ നേതൃത്വത്തിൽ ജില്ലയിലെ ഇതര ഡിപ്പോകളിലെ അംഗങ്ങളിൽനിന്നു കൂപ്പൺ പിരിച്ചു തുക സമാഹരിച്ചും കൂടിയാണ് നിർമാണത്തിന് ഫണ്ട് കണ്ടെത്തിയത്. കോവിഡ് കാലത്തിന് മുൻപ് 29 സർവീസുകൾ വരെ എത്തിയ സ്ഥാനത്ത് ഇപ്പോൾ 24 ഷെഡ്യുളുകൾ ആണ് ഓപ്പറേറ്റ് ചെയ്യുന്നത്. 130 ഓളം ജീവനക്കാരുണ്ട്. ശബരിമല സീസിൽ പമ്പ സ്പെഷ്യൽ സർവീസിൽ മാത്രം ഒന്നരക്കോടി രൂപയോളം ആണ് വരുമാനം നേടിക്കൊണ്ടിരിക്കുന്നത്.

തൊഴിലധിഷ്ഠിത പദ്ധതികൾ വിദ്യാലയങ്ങളിൽ നടപ്പിലാക്കിയ ബ്ലോക്ക് പഞ്ചായത്ത് മാതൃക: ചീഫ് വിപ്പ്

കാഞ്ഞിരപ്പള്ളി: വിദ്യാലയങ്ങൾ കേന്ദ്രീകരിച്ച് വിദ്യാഭ്യാസത്തോടൊപ്പം തൊഴിലധിഷ്ഠിത-സംരംഭകത്വ പദ്ധതികൾ നടപ്പിലാക്കുന്ന കാഞ്ഞിരപ്പള്ളി ബ്ലോക്ക് പഞ്ചായത്ത് കേരളത്തിലെ തദ്ദേശസ്ഥാപനങ്ങൾക്ക് മാതൃകയാണെന്ന് ചീഫ് വിപ്പ് ഡോ. എൻ. ജയരാജ്. കാഞ്ഞിരപ്പള്ളി സെന്‍റ് ഡൊമിനിക്സ് കോളജിൽ നടന്ന ഇഡി ക്ലബ് അംഗങ്ങൾക്കുള്ള നൈപുണ്യ പരിശീലന പദ്ധതിയുടെ ഉദ്ഘാടനം നിർവഹിച്ചു പ്രസംഗിക്കുകയായിരുന്നു അദ്ദേഹം. ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് അധ്യക്ഷത വഹിച്ച യോഗത്തിൽ വൈസ് പ്രസിഡന്‍റ് ജോളി മടുക്കക്കുഴി മുഖ്യപ്രഭാഷണം നടത്തി. പ്രിൻസിപ്പൽ ഡോ. സീമോൻ തോമസ്, ബ്ലോക്ക് പഞ്ചായത്ത് മെംബർമാരായ ടി.ജെ. മോഹനൻ, ഷക്കീല നസീർ, സാജൻ കുന്നത്ത്, മാഗി ജോസഫ്, ജോഷി മംഗലം, ഡാനി ജോസ്, അനു ഷിജു, കോളജ് ബർസാർ റവ.ഡോ. മനോജ് പാലക്കുടി എന്നിവർ പ്രസംഗിച്ചു.

ചിറക്കടവിൽ കേരഗ്രാമം പദ്ധതി

പൊൻകുന്നം: ചിറക്കടവ് പഞ്ചായത്തിലെ കേരഗ്രാമം പദ്ധതി ചീഫ് വിപ്പ് ഡോ. എൻ. ജയരാജ് ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് സി.ആർ. ശ്രീകുമാർ അധ്യക്ഷത വഹിച്ചു. കൃഷി അസിസ്റ്റന്‍റ് ഡയറക്ടർ സിമി ഇബ്രാഹിം പദ്ധതി വിശദീകരണം നടത്തി. ബ്ലോക്ക് പഞ്ചായത്തംഗങ്ങളായ ഷാജി പാമ്പൂരി, ബി. രവീന്ദ്രൻനായർ, മിനി സേതുനാഥ്‌, പഞ്ചായത്ത് വൈസ് പ്രസിഡന്‍റ് സതി സുരേന്ദ്രൻ തുടങ്ങിയവർ പ്രസംഗിച്ചു. തെങ്ങുകളുടെ തടംതുറക്കല്‍, തെങ്ങിൻതോപ്പുകളിൽ ഇടവിള കൃഷി പ്രോത്സാഹനം, ജലസേചന സൗകര്യമൊരുക്കല്‍, തെങ്ങുകയറ്റയന്ത്രം ലഭ്യമാക്കല്‍, രോഗ കീടനിയന്ത്രണം, തെങ്ങിന് മരുന്നുതളിക്കൽ, ജൈവവളം, രാസവളം, രോഗം ബാധിച്ച ഉത്പാദനം കുറഞ്ഞ തെങ്ങ് വെട്ടി മാറ്റുന്നതിനും പുതിയത് വയ്ക്കുന്നതിനും സഹായം തുടങ്ങിയ ആനുകൂല്യങ്ങളാണ് കേര ഗ്രാമം പദ്ധതിയിലൂടെ ലഭിക്കുന്നത്. പഞ്ചായത്തിലെ മുഴുവൻ വാർഡുകളിലും പദ്ധതി വ്യാപിപ്പിക്കുമെന്ന് പഞ്ചായത്ത് പ്രസിഡന്‍റ് പറഞ്ഞു.

ചെറുവള്ളി വയലിൽപ്പടിയിൽ മൂന്നു മണിക്കൂറിനിടെ രണ്ട് അപകടം

പൊൻകുന്നം: പുനലൂർ-മൂവാറ്റുപുഴ സംസ്ഥാനപാതയുടെ ഭാഗമായ പൊൻകുന്നം-മണിമല റോഡിൽ ചെറുവള്ളി വയലിൽപ്പടിയിൽ മൂന്നുമണിക്കൂറിനിടെ രണ്ട് അപകടങ്ങൾ. ആർക്കും പരിക്കില്ല. ഇന്നലെ രാവിലെ അഞ്ചിനായിരുന്നു ആദ്യത്തെ അപകടം. റോഡിൽ ബ്രേക്ക് ചെയ്ത് തെന്നിമാറിയ കാർ റോഡരികിലെ തേക്കുമരത്തിലിടിച്ച് വട്ടം തിരിഞ്ഞ് നിന്നു. കാറിന്‍റെ ഒരുവശം മരത്തിൽ ഇടിച്ചതിനെത്തുടർന്ന് തകർന്നു. മലപ്പുറത്തുനിന്ന് പത്തനംതിട്ടയ്ക്കു പോകുകയായിരുന്നു യാത്രക്കാർ. ഇതേസ്ഥലത്ത് പരിസരവാസികൾ രാവിലത്തെ അപകടത്തിൽ തകർന്ന കാറിനരികിൽ നിൽക്കവേയാണ് ബൊലേറോ റോഡിൽനിന്ന് തെന്നിമാറി അപകടത്തിൽപ്പെട്ടത്. ഈ വാഹനത്തിന്‍റെ മുൻവശം ചെറിയതോതിൽ തകർന്നതൊഴിച്ചാൽ മറ്റ് അപകടമുണ്ടായില്ല. ആൾക്കാർ കൂടിനിൽക്കുന്നിടത്തേക്ക് എത്താതിരുന്നതിനാൽ ദുരന്തമൊഴിവായി. ഇതിലെ യാത്രക്കാർ നെടുമ്പാശേരി എയർപോർട്ടിൽനിന്ന് റാന്നിക്കു പോകുകയായിരുന്നു. രണ്ടാഴ്ച മുൻപും ഇതേ സ്ഥലത്ത് കാർ റോഡിൽനിന്ന് തെന്നിമാറി റോഡരികിലെ ആഴമുള്ള കാനയുടെ മുകളിലൂടെ കടന്ന് പറമ്പിൽക്കയറി മരത്തിലിടിച്ചാണ് നിന്നത്. മഴസമയത്തായിരുന്നു ഇന്നലത്തെ അപകടം. ഇവിടെ റോഡിന്‍റെ ചെരിവ് അപകടങ്ങൾക്ക് കാരണമാകുന്നതായി പരിസരവാസികൾ പറഞ്ഞു. സമീപത്തെ ഓടയുടെ അരികിൽ അപകടസൂചനാ തൂണുകളോ ക്രാഷ്ബാരിയറോ സ്ഥാപിക്കണമെന്നും നാട്ടുകാർ ആവശ്യപ്പെട്ടു.

പാലാ ഗവ. ആശുപത്രി കെട്ടിടങ്ങള്‍ക്ക് അഗ്നിരക്ഷാ വകുപ്പ് എന്‍ഒസി ഇല്ല ;കൗണ്‍സില്‍ യോഗത്തില്‍ പ്രതിപക്ഷ വാക്കൗട്ട്

പാലാ: നഗരസഭയുടെ നിയന്ത്രണത്തിലുള്ള ഗവണ്‍മെന്‍റ് ജനറല്‍ ആശുപത്രിയുടെ കെട്ടിടങ്ങള്‍ക്ക് ഒക്കുപ്പെന്‍സി സര്‍ട്ടിഫിക്കറ്റ് ഇല്ലെന്ന ഗുരുതര വെളിപ്പെടുത്തല്‍ പുറത്ത്. കഴിഞ്ഞ ദിവസം ചേര്‍ന്ന നഗരസഭാ കൗണ്‍സില്‍ യോഗത്തില്‍ പ്രതിപക്ഷ കൗണ്‍സിലറായ സിജി ടോണി രേഖാമൂലം ഉയര്‍ത്തിയ ചോദ്യത്തിനു മറുപടിയായിട്ടാണ് കെട്ടിടങ്ങള്‍ക്ക് പ്രവര്‍ത്തന അനുമതി ലഭിക്കുന്നതിന് ആവശ്യമായ കെട്ടിട നമ്പരോ, ഫയര്‍ എന്‍ഒസിയോ ഇല്ലെന്ന് നഗരസഭ അധികൃതര്‍ വെളിപ്പെടുത്തിയത്. 2019-20 കാലഘട്ടത്തില്‍ ഉപയോഗിച്ചു തുടങ്ങിയ കെട്ടിടത്തിന് കോവിഡ് സാഹചര്യത്തില്‍ അടിയന്തര പ്രവര്‍ത്തന അനുമതി നല്‍കുകയായിരുന്നു എന്ന ന്യായീകരണം നിരത്തിയപ്പോള്‍ കോവിഡിന് ശേഷം മൂന്നുവര്‍ഷം കഴിഞ്ഞിട്ടും ഇതിനുവേണ്ടിയുള്ള നടപടിക്രമങ്ങള്‍ പൂര്‍ത്തിയാക്കാത്ത ഭരണസമിതിയുടെ ഗുരുതര കൃത്യവിലോപമാണെന്ന് പ്രതിപക്ഷ നേതാവ് പ്രഫ. സതീശ് ചൊള്ളാനി ചൂണ്ടിക്കാട്ടി. ഗവ. ആശുപത്രി വിഷയത്തില്‍ കൗണ്‍സിലില്‍ ഭരണപക്ഷം എടുത്ത നിഷേധാത്മക നിലപാടില്‍ പ്രതിഷേധിച്ച് പ്രതിപക്ഷം വാക്കൗട്ട് നടത്തുകയും ചെയ്തു. കൗണ്‍സില്‍ യോഗത്തില്‍ പ്രതിപക്ഷ കൗണ്‍സിലര്‍മാരായ സിജി ടോണി, ജോസ് എടേട്ട്, ജിമ്മി ജോസഫ്, പ്രിന്‍സ് വിസി, ലിസിക്കുട്ടി മാത്യു, ആനി ബിജോയി, മായ രാഹുല്‍ എന്നിവരും പ്രസംഗിച്ചു. ആശുപത്രിയിലെ ഓക്സിജന്‍ സിലിണ്ടറുകള്‍ സൂക്ഷിച്ചിരിക്കുന്നത് ഇലക്ട്രിക്കല്‍ കണ്‍ട്രോള്‍ റൂമുകള്‍ക്കും ബാറ്ററികള്‍ക്കും സമീപം ആയിട്ടാണെന്നും ഇതു ഗുരുതര വീഴ്ചയാണെന്നും അന്വേഷണ റിപ്പോര്‍ട്ടില്‍ കണ്ടെത്തലുകള്‍ ഉണ്ടായിരുന്നു. ഇത്രയും ഗൗരവകരമായ വിഷയങ്ങള്‍ പുറത്തുവന്നിട്ടും തെറ്റുതിരുത്തല്‍ നടപടികള്‍ നഗരസഭയുടെ ഭാഗത്തുനിന്ന് ആരംഭിച്ചിട്ടില്ല എന്നത് പ്രതിഷേധാര്‍ഹമാണെന്ന് യുഡിഎഫ് പാര്‍ലമെന്‍ററി പാര്‍ട്ടി ചൂണ്ടിക്കാട്ടി. വില്ലന്‍ റാമ്പ് ഗവണ്‍മെന്‍റ് ആശുപത്രിക്കെട്ടിടത്തിന് ഫയര്‍ എൻഒസി ലഭിക്കാത്തതിനു കാരണം കെട്ടിടങ്ങള്‍ തമ്മില്‍ ബന്ധിപ്പിക്കുന്ന റാമ്പ് എന്നു സൂചന. ഇവിടുത്തെ ബഹുനില മന്ദിരങ്ങള്‍ തമ്മില്‍ റാമ്പ് ഉപയോഗിച്ച് ബന്ധിപ്പിച്ചിട്ടുണ്ട്. ഡോക്ടര്‍മാര്‍ക്കും നഴ്‌സുമാര്‍ക്കും മറ്റു ജീവനക്കാര്‍ക്കും കെട്ടിടത്തിന് താഴെയിറങ്ങി വീണ്ടും മുകളില്‍ കയറുന്നത് ഒഴിവാക്കാനാണിത്. ഫയര്‍ഫോഴ്‌സ് വാഹനങ്ങള്‍ക്ക് ഇതിനു അടിയിലൂടെ സുഗമമായി പോകുന്നതിന് സാധിക്കുമെങ്കിലും ഫയര്‍ഫോഴ്‌സിന്‍റെ നിബന്ധനയസരിച്ച് നിശ്ചിത അടിയില്‍ കൂടുതല്‍ ഉയരം വേണം. ഇതു പാലിക്കാത്തതാണ് കാരണമെന്നാണ് സൂചന. ഫയര്‍ എന്‍ഒസിക്കു വേണ്ട അപേക്ഷ പലതവണ നല്‍കിയതാണെന്ന് ആശുപത്രി ആര്‍എംഒ ഡോ. രേഷ്മ പറഞ്ഞു. പാലാ ആശുപത്രിയിലെ റാമ്പ് വളരെ ഉയരത്തിലാണ് സ്ഥിതി ചെയ്യുന്നതെന്നും എന്‍ഓസി അനുവദിക്കേണ്ടതാണെന്നും കൗണ്‍സിലര്‍ ബൈജു കൊല്ലംപറമ്പില്‍ പറഞ്ഞു.

കാൽനൂറ്റാണ്ടിന്‍റെ അനുഭവങ്ങളുമായി അവരെത്തി, പ്രിയ കലാലയത്തിലേക്ക്

കുറവിലങ്ങാട്: ഓർമകളുടെ വേലിയേറ്റമായിരുന്നു ആ മുഖങ്ങളിലെല്ലാം. ആ ഓർമകളിലേക്ക് മുങ്ങിത്താഴാനാണ് വിദേശങ്ങളിൽനിന്നടക്കമുള്ളർ തങ്ങൾ കളിച്ചുവളർന്ന ദേവമാതായുടെ വിളികേട്ട് ഓടിയെത്തിയത്. സഹപാഠികളായ 60 പേരിൽ അകാലത്തിൽ പൊലിഞ്ഞ ഒരാളൊഴികെയുള്ളവരെല്ലാം ഒരുമിച്ചുവെന്നത് സംഘാടക മികവുമായി. കേവലമൊരു സംഗമത്തിനപ്പുറം പ്രിയകലാലയത്തിന്‍റെ കരവലയത്തിൽ ഏറെനേരമിരുന്നും സൗഹൃദം പങ്കിട്ടും ഓർമകൾ പങ്കുവച്ചുമാണ് അവർ പിരിഞ്ഞത്. ഇപ്പോഴത്തെ ജീവിതാന്തസുകളിലേക്ക് അവരെ നയിച്ച കലാലയത്തിന് ഗുരുദക്ഷിണ കണക്കെ ചില ഉപഹാരങ്ങളും അവർ സമ്മാനിച്ചു. കോളജിലെ 1997-2000 ബികോം ബാച്ച് വിദ്യാർഥികളാണ് കുടുംബമായി സംഗമിച്ച് ശ്രദ്ധനേടിയത്. സ്‌നേഹക്കൂട്ടിലേക്ക് പൂർവ അധ്യാപകരും മാനേജരും പ്രിൻസിപ്പലുമടക്കമുള്ളവരും എത്തിയത് വലിയ അംഗീകാരവുമായി. സംഗമം ഗേവ മുൻ ഗവർണർ പി.എസ്. ശ്രീധരൻ പിള്ള ഉദ്ഘാടനം ചെയ്തു. പഴമയുടെ സൗന്ദര്യത്തിലേക്കുള്ള നടത്തം അനിവാര്യമാണെന്ന് അദ്ദേഹം പറഞ്ഞു. ജയിംസ് പുല്ലാപ്പള്ളി അധ്യക്ഷത വഹിച്ചു. മാനേജർ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, പ്രിൻസിപ്പൽ ഡോ. സുനിൽ സി. മാത്യു, വൈസ് പ്രിൻസിപ്പൽ ഫാ. മാത്യു കവളമ്മാക്കൽ, ബർസാർ ഫാ. ജോസഫ് മണിയഞ്ചിറ, പ്രഫ.ടി.സി. കുര്യാക്കോസ്, ജോർജ് മാത്യു, ഡോ. അനീഷ് തോമസ്, റോബിൻ എണ്ണംപ്രായിൽ, അബിൻ കുര്യൻ, അനീഷ് കുഴികൊമ്പിൽ, അനീഷ് മേൽവെട്ടം എന്നിവർ പ്രസംഗിച്ചു. രേഖ വിനോദ്, ശോഭ ജയിംസ്, ബിസ്മി ശശി, ജോർജ് തോമസ്, വിമൽരാജ്, ബിൻസി സനോജ്, റിന്നി, വിമല അനീഷ്, രാജേഷ് എന്നിവർ നേതൃത്വം നൽകി.

പാലായുടെ നഷ്ടപ്രതാപം തിരിച്ചുപിടിക്കും: ജോസ് കെ. മാണി എംപി

പാലാ: പാലായ്ക്കു നഷ്ടമായ വികസനപ്രവര്‍ത്തനങ്ങളും പ്രതാപവും തിരിച്ചുപിടിക്കുമെന്നും ഇതിനായി പാലായില്‍ യുവജന മുന്നേറ്റം നടക്കുകയാണെന്നും കേരള കോണ്‍ഗ്രസ്-എം ചെയര്‍മാന്‍ ജോസ് കെ. മാണി എംപി. യൂത്ത് ഫ്രണ്ട് -എമ്മിന്‍റെ നേതൃത്വത്തില്‍ ഇന്നലെ പാലായില്‍ നടത്തിയ യുവജനമാര്‍ച്ചിന്‍റെ സമാപനയോഗത്തില്‍ പ്രസംഗിക്കുകയായിരുന്നു അദ്ദേഹം. പ്രാദേശിക വികസനഫണ്ട് ചെലവഴിച്ചുള്ള വികസനത്തില്‍ മാത്രം ഒതുക്കുന്ന പരിപാടികളല്ല വേണ്ടത്. പുതിയ പദ്ധതികള്‍ ആരംഭിക്കുന്നതിനുള്ള ഇടപെടലുകളാണ് ഉണ്ടാവേണ്ടത്. പാലായുടെ നഷ്ടപ്രതാപം തിരികെക്കൊണ്ടുവരും. പാര്‍ലമെന്‍റ് അംഗം എന്ന നിലയില്‍ പത്തു വര്‍ഷം നടത്തിയ നിരന്തര ഇടപെടലുകളുടെ ഫലമാണ് കോട്ടയം ഇന്ന് ഉന്നത വിദ്യാഭ്യാസ സ്ഥാപനങ്ങള്‍ നിറഞ്ഞ ഒരു എഡ്യൂക്കേഷന്‍ ഹബ്ബാക്കി മാറ്റപ്പെട്ടതെന്നും അദ്ദേഹം പറഞ്ഞു. യൂത്ത്ഫ്രണ്ട് നിയോജക മണ്ഡലം പ്രസിഡന്‍റ് തോമസുകുട്ടി വരിക്കയില്‍ അധ്യക്ഷത വഹിച്ചു. ഗവണ്‍മെന്‍റ് ചീഫ് വിപ്പ് എന്‍. ജയരാജ്, തോമസ് ചാഴികാടന്‍, പ്രമോദ് നാരായണന്‍ എംഎല്‍എ, സെബാസ്റ്റ്യന്‍ കുളത്തുങ്കല്‍ എംഎല്‍എ, സ്റ്റീഫന്‍ ജോര്‍ജ്, സിറിയക് ചാഴികാടന്‍, പ്രഫ. ലോപ്പസ് മാത്യു, സാജന്‍ തൊടുക, ടോബിന്‍ കെ.അലക്‌സ്, ബൈജു പുതിയിടത്തുചാലില്‍, ജയിംസ് പൂവത്തോലി എന്നിവര്‍ പ്രസംഗിച്ചു. നിയോജക മണ്ഡലത്തിലെ 12 പഞ്ചായത്തുകളില്‍നിന്നും പാലാ മുനിസിപ്പാലിറ്റിയില്‍നിന്നുമാണ് യുവജനങ്ങള്‍ പങ്കെടുത്തത്. കിഴതടിയൂര്‍ ബൈപാസില്‍നിന്നു മണ്ഡലം കമ്മിറ്റികളുടെ നേതൃത്വത്തില്‍ ആരംഭിച്ച റാലിയില്‍ പ്രത്യേക യൂണിഫോമില്‍ യുജനങ്ങള്‍ അണിനിരന്നു. കെഎസ്ആര്‍ടിസി സ്റ്റാന്‍ഡിനു മുന്‍വശത്തു കൂടി ളാലം പാലം കടന്ന് കുരിശുപള്ളി കവലയിലേക്ക് എത്തിയ റാലിയില്‍ പാര്‍ട്ടി നേതാക്കളും നൂറുകണക്കിന് യുവജനങ്ങളും പങ്കെടുത്തു. യൂത്ത് ഫ്രണ്ട്-എം പാലാ നിയോജകമണ്ഡലം പ്രസിഡന്‍റ് തോമസുകുട്ടി വരിക്കയില്‍, സംസ്ഥാന സെക്രട്ടറിമാരായ സുനില്‍ പയ്യപ്പള്ളി, സിജോ പ്ലാത്തോട്ടം, ടോബി തൈപ്പറമ്പില്‍, മനു തെക്കേല്‍, അവിരാച്ചന്‍ ചൊവ്വാറ്റുകുന്നേല്‍, സച്ചിന്‍ കളരിക്കല്‍, യൂത്ത് ഫ്രണ്ട് മണ്ഡലം പ്രസിഡന്‍റുമാര്‍ തുടങ്ങിയവര്‍ നേതൃത്വം നല്‍കി.

കുമ്മണ്ണൂരിൽ വനിതാ ഫിറ്റ്നസ് സെന്‍റര്‍

കോട്ടയം: കിടങ്ങൂരിലെ വനിതകള്‍ക്ക് ഇനി ആരോഗ്യത്തോടെ ഫിറ്റായിരിക്കാം, കുമ്മണ്ണൂരില്‍ വനിതാ ഫിറ്റ്നസ് സെന്‍റര്‍ ആരംഭിച്ചു. കുമ്മണ്ണൂരിലെ സാംസ്‌കാരിക നിലയത്തിന് പുറകുവശം വയോജനവിശ്രമകേന്ദ്രത്തിന്‍റെ മുകളിലത്തെ നിലയിലാണ് ഫിറ്റ്നസ് സെന്‍റര്‍ ആരംഭിക്കുന്നത്. പരിശീലകയെയും പഞ്ചായത്ത് നിയമിച്ചിട്ടുണ്ട്. കിടങ്ങൂര്‍ പഞ്ചായത്തിലെ 2024-25 വര്‍ഷത്തെ പദ്ധതിയില്‍ ഉള്‍പ്പെടുത്തി ഒന്‍പത് ലക്ഷം രൂപ ജനറല്‍ പ്ലാന്‍ ഫണ്ട് വിനിയോഗിച്ചാണ് നിര്‍മാണം പൂര്‍ത്തീകരിച്ചിരിക്കുന്നത്.പഞ്ചായത്ത് പ്രസിഡന്‍റ് ഇ.എം.ബിനു സെന്‍റര്‍ ഉദ്ഘാടനം ചെയ്തു. വൈസ് പ്രസിഡന്‍റ് ടീനാ മാളിയേക്കല്‍ അധ്യക്ഷത വഹിച്ചു. ജില്ലാ പഞ്ചായത്തംഗം ജോസ്മോന്‍ മുണ്ടയ്ക്കല്‍ മുഖ്യപ്രഭാഷണം നടത്തി. ഡംബ് ബെല്‍, കെറ്റില്‍ ബെല്‍, വ്യായാമ സൈക്കിള്‍, മെഡിസിന്‍ ബോള്‍, ജിം ബോള്‍, ബാര്‍ ബെല്‍, വെയ്റ്റ് പ്ലേറ്റ്, ജിം റോപ്പ്, സ്റ്റെപ്പര്‍ എന്നീ ഉപകരണങ്ങളാണ് നിലവില്‍ സെന്‍ററിലുള്ളത്. ബ്ലോക്ക് പഞ്ചായത്തംഗം ഡോ. മേഴ്സി ജോണ്‍ മൂലക്കാട്ട്, അശോക് കുമാര്‍ പൂതമന, പഞ്ചായത്തംഗങ്ങളായ കെ.ജി. വിജയന്‍, ലൈസമ്മ ജോര്‍ജ്, തോമസ് മാളിയേയ്ക്കല്‍, കുഞ്ഞുമോള്‍ ടോമി എന്നിവര്‍ പങ്കെടുത്തു.

ഓർമ ഒറേറ്റർ ഓഫ് ദ ഇയർ പുരസ്കാരം സോജു സി. ജോസിന്

പാലാ: ഓർമ ഇന്‍റർനാഷണൽ (ഓവർസീസ് റെസിഡന്‍റ് മലയാളീസ് അസോസിയേഷൻ) ടാലന്‍റ് പ്രമോഷൻ ഫോറം ആഗോളതലത്തിൽ സംഘടിപ്പിച്ച മൂന്നാമത് അന്താരാഷ്ട്ര പ്രസംഗ മത്സരത്തിൽ ഒരു ലക്ഷം രൂപയുടെ ഓർമ ഓറേറ്റർ ഓഫ് ദ ഇയർ പുരസ്കാരം തിരുവനന്തപുരം യൂണിവേഴ്സിറ്റി കോളജിലെ രണ്ടാം വർഷ ബിരുദ വിദ്യാർഥി സോജു സി. ജോസ് നേടി. പ്രസംഗമത്സരം ഗ്രാൻഡ് ഫിനാലെ എഡിജിപി പി.വിജയൻ ഉദ്ഘാടനം ചെയ്തു. ഓർമ പ്രസിഡന്‍റ് സജി സെബാസ്റ്റ്യൻ അധ്യക്ഷത വഹിച്ചു. ജോസ് കെ. മാണി എംപി, മാണി സി. കാപ്പൻ എംഎൽഎ, മുനിസിപ്പൽ ചെയർമാൻ തോമസ് പീറ്റർ, ചലച്ചിത്ര സംവിധായകൻ ഭദ്രൻ മാട്ടേൽ, ചലച്ചിത്ര താരങ്ങളായ വിൻസി അലോഷ്യസ്, സുവർണ മാത്യു, ചലച്ചിത്ര നിർമാതാവ് ലിസി ഫെർണാണ്ടസ്, ജോസ് ആറ്റുപുറം, സജിമോൻ ആന്‍റണി, ജോസ് തോമസ് തുടങ്ങിയവർ പ്രസംഗിച്ചു. സീനിയർ മലയാളം വിഭാഗത്തിൽ മദ്രാസ് കിസ്ത്യൻ കോളജിലെ ബ്ലെസി ബിനു ഒന്നാം സ്ഥാനം നേടി 50,000 രൂപ കരസ്ഥമാക്കി. സീനിയർ ഇംഗ്ലീഷ് വിഭാഗത്തിൽ പാലക്കാട് കാണിക്കമാതാ കോൺവന്‍റ് ഇഎം ഗേൾസ് ഹയർ സെക്കൻഡറി സ്കൂളിലെ ശ്രീയാ സുരേഷ് 50,000 രൂപയുടെ ഒന്നാം സ്ഥാനം കരസ്ഥമാക്കി. ജൂനിയർ വിഭാഗം മലയാളത്തിൽ കോഴിക്കോട് ബാലുശേരി ജിഎച്ച്എസ്എസിലെ ആർ.വി. അർച്ചന 25,000 രൂപയുടെ ഒന്നാം സമ്മാനം നേടി. ജൂനിയർ ഇംഗ്ലീഷ് വിഭാഗത്തിൽ 25,000 രൂപയുടെ ഒന്നാം സ്ഥാനം ചേർപ്പുങ്കൽ ഹോളിക്രോസ് ഹയർ സെക്കൻഡറി സ്കൂളിലെ നിയ മരിയ ജോബിയും കരസ്ഥമാക്കി.

മുള്ളൻപന്നി ഇടിച്ച് ബൈക്ക് മറിഞ്ഞു; യുവാവിന് പരിക്ക്

തലനാട്: ബൈക്ക് യാത്രക്കാരന് മുള്ളൻ പന്നിയുടെ ആക്രമണത്തിൽ പരിക്കേറ്റു. തലനാട് മരുതോലിൽ ഋഷിരാജി (26) നാണ് ബൈക്കിൽനിന്ന് വീണ് പരിക്കേറ്റത്. ബുധനാഴ്ച രാവിലെ 5.30ന് ബാലവാടി ജംഗ്ഷനിലാണ് അപകടം. ക്ഷീരോത്പാദക സംഘത്തിൽ പാൽ കൊടുക്കാനായി പോകുകയായിരുന്നു ഋഷിരാജ്. ചെറിയ ഒരു വളവുതിരിഞ്ഞ് എത്തിയ ഋഷിരാജ് സഞ്ചരിച്ച ബൈക്കിലേക്ക് റോഡിനു കുറുകെയെത്തിയ മുള്ളൻപന്നി ശക്തിയായി ഇടിക്കുകയായിരുന്നു. ബൈക്കിൽനിന്ന് വീണ ഋഷിരാജിന്‍റെ കൈകാലുകൾക്കും തലക്കും സാരമായി പരിക്കേറ്റു.

സ്വാതന്ത്ര്യദിനവും തിരുനാളുകളും ഒരുമിച്ച് ആഘോഷിക്കാൻ കുറവിലങ്ങാട് ഇടവക

കുറവിലങ്ങാട്: രാജ്യത്തിന്‍റെ സ്വാതന്ത്ര്യദിനവും ദൈവമാതാവിന്‍റെ സ്വർഗാരോപണ തിരുനാളും ഇടവക ദേവാലയത്തിന്‍റെ കല്ലിട്ടതിരുനാളും ഒരുമിച്ച് ആഘോഷിക്കാൻ കുറവിലങ്ങാട് ഇടവക. ആദ്യനൂറ്റാണ്ടിൽ തുടങ്ങുന്ന ക്രൈസ്തവ പാരമ്പര്യം പേറുന്ന ഇടവകയിൽ കല്ലുകൊണ്ടുള്ള ദേവാലയം നിർമിച്ചത് പതിനാറാം നൂറ്റാണ്ടിലാണ്. ഉദയംപേരൂർ സൂനഹദോസുമായി ബന്ധപ്പെട്ടെത്തിയ ഗോവ ആർച്ച്ബിഷപ് അലക്‌സിസ് ദേം മേനേസിസാണ് ശിലാസ്ഥാപനം നിർവഹിച്ചത്. മാതൃഭക്തിയുടെ വിളനിലമെന്ന നിലയിൽ ദൈവമാതാവിന്‍റെ സ്വർഗാരോപണത്തിരുനാൾ ഇടവകയുടെ വലിയ ആഘോഷമാണ്. വിശുദ്ധ കുരിശിന്‍റെ തിരുശേഷിപ്പ് സംവഹിക്കുന്ന പ്രദക്ഷിണമെന്നതും ഈ തിരുനാളിന്‍റെ ഭാഗമാണ്. ഇടവകയിലെ സാന്തോം സോണിന്‍റെ നേതൃത്വത്തിലാണ് തിരുനാൾ ആഘോഷം. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സാന്തോം സോൺ ഡയറക്ടർ ഫാ. പോൾ കുന്നുംപുറം, കൂടുംബകൂട്ടായ്മാ ജനറൽ ലീഡർ ബോബിച്ചൻ നിധീരി, സോൺ ലീഡർ ഷൈജു പാവുത്തിയേൽ, സെക്രട്ടറി ജോളി ടോമി എണ്ണംപ്രായിൽ എന്നിവരുടെ നേതൃത്വത്തിലുള്ള വിവിധ കമ്മിറ്റികളാണ് ക്രമീകരണങ്ങൾക്കു നേതൃത്വം നൽകുന്നത്. തിരുനാൾദിനത്തിൽ രാവിലെ 5.20ന് തിരുസ്വരൂപ പ്രതിഷ്ഠ അസി. വികാരി ഫാ. ജോസഫ് ചൂരയ്ക്കലിന്‍റെ മുഖ്യ കാർമികത്വത്തിൽ നടക്കും. തുടർന്ന് 5. 30 ,7.00, 8.45 എന്നീ സമയങ്ങളിൽ വിശുദ്ധ കുർബാന. 2. 45ന് വിശുദ്ധ കുരിശിന്‍റെ തിരുശേഷിപ്പ് പ്രത്യേക പേടകത്തിൽനിന്നു പുറത്തെടുത്ത് പരസ്യവണക്കത്തിന് ദേവാലയത്തിൽ പ്രതിഷ്ഠിക്കും. അസി. വികാരി ഫാ .തോമസ് താന്നിമല കാർമികത്വം വഹിക്കും. 4.30ന് ആർച്ച്പ്രീസ്റ്റ് റവ.ഡോ. തോമസ് മേനാച്ചേരിയുടെ കാർമികത്വത്തിൽ ആഘോഷമായ തിരുനാൾ കുർബാന. പാസ്റ്ററൽ അസിസ്റ്റന്‍റ് ഫാ. ജോസ് കോട്ടയിൽ തിരുനാൾ സന്ദേശം നൽകും. തുടർന്ന് പ്രസുദേന്തി വാഴ്ചയ്ക്ക് അസിസ്റ്റന്‍റ് വികാരി ഫാ. ആന്‍റണി വാഴക്കാലായിൽ കാർമികത്വം വഹിക്കും. ദേവാലയത്തിൽനിന്ന് പള്ളിക്കവലയിലെ ജൂബിലി കപ്പേളയിലേക്ക് പ്രദക്ഷിണം. ജൂബിലി കപ്പേളയിൽ അസി. വികാരി ഫാ. പോൾ കുന്നുംപുറത്തിന്‍റെ കാർമികത്വത്തിൽ ലദീഞ്ഞ്. ഏഴിന് സീനിയർ അസിസ്റ്റന്‍റ് വികാരി ഫാ. ജോസഫ് മണിയഞ്ചിറ സമാപന ആശീർവാദം നൽകും. കുറവിലങ്ങാട് കരക്കാർക്ക് തിരുനാൾദിവസം പരമ്പരാഗതമായി നൽകുന്ന അവകാശങ്ങൾ കരോട്ടേക്കുന്നേൽ കുടുംബ പ്രതിനിധി ആർച്ച്പ്രീസ്റ്റിൽനിന്ന് ഏറ്റുവാങ്ങും. നേർച്ചവിതരണത്തിനു ശേഷം കോഴക്കോട് സങ്കീർത്തനയുടെ നാടകം.

കാഞ്ഞിരപ്പള്ളി സെന്‍റ് ഡൊമിനിക്സ് കത്തീഡ്രല്‍ ദ്വിശതാബ്ദി ആഘോഷങ്ങളുടെ സമാപനം ഇന്ന്

കാഞ്ഞിരപ്പള്ളി: സെന്‍റ് ഡൊമിനിക്സ് കത്തീഡ്രലിന്‍റെ ഒരു വര്‍ഷം നീണ്ടുനിന്ന ദ്വിശതാബ്ദി ആഘോഷങ്ങളുടെ സമാപനം ഇന്ന് നടക്കും. രാവിലെ ഒന്പതിന് നടക്കുന്ന വിശുദ്ധകുർബാനയ്ക്ക് ചങ്ങനാശേരി ആർച്ച്ബിഷപ് മാര്‍ തോമസ് തറയില്‍ കാർമികത്വം വഹിക്കും. തുടര്‍ന്ന് നടക്കുന്ന സമ്മേളനം കാഞ്ഞിരപ്പള്ളി ബിഷപ് മാര്‍ ജോസ് പുളിക്കലിന്‍റെ അധ്യക്ഷതയില്‍ സീറോ മലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ ഉദ്ഘാടനം ചെയ്യും. ബിഷപ് മാര്‍ മാത്യു അറയ്ക്കല്‍ അനുഗ്രഹപ്രഭാഷണം നടത്തും. ഫാ. വര്‍ഗീസ് പരിന്തിരിക്കല്‍, സിസ്റ്റര്‍ മെര്‍ലി സിഎംസി, ഫാ. ബേബി മുല്ലൂര്‍പറമ്പില്‍ എസ്ജെ, ടി.സി. ചാക്കോ വാവലുമാക്കല്‍, മെറിനാ റ്റോമി കാവുങ്കല്‍, ജോസഫ് മാത്യു പതിപ്പള്ളില്‍, ഷോണ്‍ മുണ്ടാട്ടുചുണ്ടയില്‍ എന്നിവർ പ്രസംഗിക്കും. കത്തീഡ്രല്‍ വികാരി റവ.ഡോ. കുര്യന്‍ താമരശേരി സ്വാഗതവും ജനറല്‍ കണ്‍വീനര്‍ സെബാസ്റ്റ്യന്‍ എള്ളൂക്കുന്നേല്‍ നന്ദിയും പറയും. ആഘോഷങ്ങളുടെ ഭാഗമായി ഇന്നലെ വൈദിക-സന്യസ്ത സംഗമം നടന്നു. ഫാ. ഇമ്മാനുവേൽ മടുക്കക്കുഴി വിശുദ്ധകുർബാനയർപ്പിച്ചു. തുടർന്ന് പൊതുസമ്മേളനം നടന്നു. പരിപാടികൾക്ക് കത്തീഡ്രല്‍ വികാരി റവ.ഡോ. കുര്യന്‍ താമരശേരി, ഫാ. ജോസഫ് ആലപ്പാട്ടുകുന്നേല്‍, ഫാ. തോമസ് മുളങ്ങാശേരി, കൈക്കാരന്മാരായ കെ.സി. ഡൊമിനിക് കരിപ്പാപ്പറമ്പില്‍, ഏബ്രഹാം കെ. അലക്സ് കൊല്ലംകുളം, ടി.സി. ചാക്കോ വാവലുമാക്കല്‍, പി.കെ. കുരുവിള പിണമറുകില്‍, ജനറല്‍ കണ്‍വീനര്‍ സെബാസ്റ്റ്യന്‍ എള്ളൂക്കുന്നേല്‍, പബ്ലിസിറ്റി കൺവീനർ ഫിലിപ്പ് പള്ളിവാതുക്കൽ തുടങ്ങിയവർ നേതൃത്വം നല്‍കും.

പാലാ മുണ്ടാങ്കൽ അപകടം: അന്നമോളുടെ സംസ്‌കാരം നാളെ

പാലാ: മുണ്ടാങ്കലില്‍ കഴിഞ്ഞ ദിവസമുണ്ടായ വാഹനാപകടത്തില്‍ പരിക്കേറ്റ് ചികിത്സയില്‍ കഴിയവേ മരണപ്പെട്ട അല്ലപ്പാറ പാലക്കുഴിക്കുന്നേല്‍ സുനിലിന്‍റെ മകള്‍ അന്നമോളു(11)ടെ സംസ്‌കാരം നാളെ ഉച്ചയ്ക്ക് പന്ത്രണ്ടിന് പ്രവിത്താനം സെന്‍റ് അഗസ്റ്റിന്‍സ് ഫൊറോനാ പള്ളിയില്‍ നടത്തും. രാവിലെ 8.30 ന് സെന്‍റ് മേരീസ് സ്‌കൂളില്‍ മൃതദേഹം കൊണ്ടുവരും. സെന്‍റ് മേരീസ് സ്‌കൂളിലെ ആറാം ക്ലാസ് വിദ്യാര്‍ഥിനിയാണ് അന്നമോള്‍. തുടര്‍ന്ന് പ്രവിത്താനം പള്ളി ഹാളില്‍ പൊതുദര്‍ശനം. കഴിഞ്ഞ അഞ്ചിന് മുണ്ടാങ്കലിലായിരുന്നു അപകടം. നിയന്ത്രണം വിട്ട കാര്‍ എതിരേ വന്ന രണ്ടു സ്‌കൂട്ടറുകള്‍ ഇടിച്ചു തെറിപ്പിക്കുകയായിരുന്നു. അന്നമോളുടെ അമ്മ ജോമോള്‍, മേലുകാവുമറ്റം നെല്ലന്‍കുഴിയില്‍ ധന്യ സന്തോഷ് എന്നിവര്‍ സംഭവദിവസം മരണപ്പെട്ടിരുന്നു.

പെരുവന്താനം പഞ്ചായത്ത് പ്രസിഡന്‍റിനെതിരേ ആരോപണവുമായി അംഗങ്ങള്‍ രംഗത്ത്

മുണ്ടക്കയം: കോണ്‍ഗ്രസ് ഭരിക്കുന്ന പെരുവന്താനം പഞ്ചായത്ത് ഭരണസമിതിയില്‍ ഭിന്നത രൂക്ഷം. പഞ്ചായത്ത് പ്രസിഡന്‍റ് നിജനി ഷംസുദീനെതിരേ കടുത്ത ആരോപണങ്ങളുമായി മുന്‍ പഞ്ചായത്ത് വൈസ് പ്രസിഡന്‍റും കോണ്‍ഗ്രസ് മുന്‍ മണ്ഡലം പ്രസിഡന്‍റും നിലവിലെ പഞ്ചായത്ത് അംഗവുമായ ഷാജി പുല്ലാട്ട് രംഗത്തെത്തി. കഴിഞ്ഞ വെള്ളിയാഴ്ച തെക്കേമലയില്‍ നടക്കാനിരുന്ന ഗ്രാമ സംഗമം പരിപാടി അട്ടിമറിച്ചത് പഞ്ചായത്ത് പ്രസിഡന്‍റ് നിജനി ഷംസുദീനാണെന്ന് ഷാജി പുല്ലാട്ട് പത്രസമ്മേളനത്തില്‍ ആരോപിച്ചു. പരിപാടിയുടെ ഉദ്ഘാടകയായി ഇടുക്കി ജില്ലാ കളക്ടറെയാണ് നിശ്ചയിച്ചിരുന്നത്. സംഗമം ഉദ്ഘാടനം ചെയ്യാന്‍ തയാറായിരുന്ന ഇടുക്കി ജില്ലാ കളക്ടറെ അവസാന ദിവസം തെറ്റിധരിപ്പിച്ചാണ് പ്രോഗ്രാമില്‍നിന്നു പിന്തിരിപ്പിച്ചത്. പ്രോഗ്രാമിന്‍റെ അധ്യക്ഷയാകേണ്ട പ്രസിഡന്‍റ് തെക്കേമലയില്‍ നടക്കുന്ന ഗ്രാമ സംഗമവുമായി പെരുവന്താനം പഞ്ചായത്ത് പ്രസിഡന്‍റ് എന്ന നിലയില്‍ തനിക്കോ പഞ്ചായത്തിനോ യാതൊരു ബന്ധവുമില്ലന്ന് ജില്ലാ കളക്ടറുമായി ബന്ധപ്പെട്ട വൃത്തങ്ങളെ വിളിച്ച് അറിയിക്കുകയും ഇതോടെ പരിപാടിയില്‍നിന്നു കളക്ടര്‍ പിന്മാറുകയായിരുന്നെന്നും ഷാജി പുല്ലാട്ട് ആരോപിക്കുന്നു. സംഗമവുമായി ബന്ധപ്പെട്ട ഒരുക്കങ്ങളെല്ലാം പൂര്‍ത്തിയായപ്പോള്‍ തലേദിവസം വൈകുന്നേരം കളക്ടറെ തെറ്റിധരിപ്പിച്ചുളള പഞ്ചായത്ത് പ്രസിഡന്‍റിന്‍റെ നാടകമാണ് പ്രോഗ്രാം അട്ടിമറിച്ചതെന്നും ഷാജി ആരോപിച്ചു. തെക്കേമല ക്രൈസ്തവ ദേവാലയം, വിവിധ കുടുംബശ്രീ യൂണിറ്റുകള്‍, വിവിധ കര്‍ഷകര്‍ എല്ലാവരും പ്രോഗ്രാമിനായി കഠിനാധ്വാനം ചെയ്തു പ്രോഗ്രം വിജയിപ്പിക്കാനാവശ്യമായ നടപടികളുമായി മുന്നോട്ടുപോകുകയായിരുന്നു. വിവധ തലങ്ങളില്‍ മികവുകാട്ടിയ വിദ്യാര്‍ഥികളെയും കര്‍ഷകരെയും ആദരിക്കുന്ന പരിപാടിയില്‍ പങ്കെടുക്കാന്‍ ഇപ്പോള്‍ നാടിനു പുറത്തുപോയിരുന്ന നിരവധിയാളുകള്‍ നാട്ടില്‍ എത്തിച്ചേര്‍ന്നിരുന്നു. പഞ്ചയാത്ത് പ്രസിഡന്‍റ് തെക്കേമല ഗ്രാമത്തോടു കാട്ടിയ വഞ്ചനയാണ് ഇതെന്നും ഷാജി പുല്ലാട്ട് പത്രസമ്മേളനത്തില്‍ കുറ്റപ്പെടുത്തി. കഴിഞ്ഞ വര്‍ഷം പഞ്ചായത്തിലെ യുവ നേതാവിനെതിരായ ചില ആരോപണങ്ങള്‍ക്കു പിന്നിലും മഹിളാ കോണ്‍ഗ്രസ് നേതാവും മുന്‍ പ്രസിഡന്‍റുമായിരുന്ന വനിതയെ അഴിമതിക്കേസില്‍ കുടുക്കാന്‍ മുന്‍കൈ എടുത്തതും നിലവിലെ പഞ്ചായത്ത് പ്രസിഡന്‍റാണെന്ന് ഷാജി ആരോപിച്ചു. പെരുവന്താനം പഞ്ചായത്ത് ഭരണസമിതി അംഗം തന്നെ നിലവിലെ പ്രസിഡന്‍റിനെതിരേ ആരോപണവുമായി രംഗത്ത് എത്തിയതോടെ ഏറെ നാളായി ഭരണസമിതിയില്‍ പുകയുന്ന അസ്വാരസ്യം വരും ദിവസങ്ങളില്‍ മറനീക്കി പുറത്തു വരാനാണ് സാധ്യത.

മുലയൂട്ടല്‍ വാരാചരണം: ബോധവത്കരണ പരിപാടി

ചങ്ങനാശേരി: ലോക മുലയൂട്ടല്‍ വാരാചരണത്തോടനുബന്ധിച്ച് ചങ്ങനാശേരി അസംപ്ഷന്‍ കോളജ് ഹോം സയന്‍സ് വിഭാഗവും മല്ലപ്പള്ളി ഐസിഡിഎസ് പ്രോജക്ട് ഓഫീസും ചേര്‍ന്ന് ആനിക്കാട് പഞ്ചായത്തിലെ പുല്ലുകുത്തി അങ്കണവാടിയില്‍ മുലയൂട്ടല്‍ അവബോധ പരിപാടി സംഘടിപ്പിച്ചു. മുലയൂട്ടലിന്‍റെ പ്രാധാന്യം വ്യക്തമാക്കുന്ന അവബോധ ക്ലാസ്, വിഭവങ്ങളുടെ പ്രദര്‍ശനം, സ്‌കിറ്റ് എന്നിവ പിജി വിദ്യാര്‍ഥികള്‍ അവതരിപ്പിച്ചു. ആനിക്കാട് പഞ്ചായത്ത് പ്രസിഡന്‍റ് സൂസന്‍ ഡാനിയല്‍ ഉദ്ഘാടനം ചെയ്തു. വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ മോളിക്കുട്ടി സിബി അധ്യക്ഷത വഹിച്ചു. കോളജ് വൈസ്പ്രിന്‍സിപ്പല്‍ പ്രഫ. മഞ്ചുലിൻ ജേക്കബ്, ഹോം സയന്‍സ് വിഭാഗം മേധാവി സിസ്റ്റര്‍ എലിസബത്ത് ജോസഫ്, ഡെയ്‌സി വര്‍ഗീസ് എന്നിവര്‍ പ്രസംഗിച്ചു.

മോണ്‍. സിറിയക് കണ്ടങ്കരി ക്വിസ് മത്സര വിജയികള്‍

ചങ്ങനാശേരി: സെന്‍റ് ജോസഫ്സ് ഗേള്‍സ് ഹയര്‍ സെക്കന്‍ഡറി സ്‌കൂളില്‍ നടന്ന 22-ാമത് മോണ്‍. സിറിയക് കണ്ടങ്കരി മെമ്മോറിയല്‍ അഖില കേരള ഹയര്‍ സെക്കന്‍ഡറി സ്‌കൂള്‍ ജനറല്‍ ക്വിസ് മത്സരത്തില്‍ ഒന്നാംസ്ഥാനം ളായിക്കാട് മേരി റാണി പബ്ലിക് സ്‌കൂളിലെ അര്‍ണോള്‍ഡ് സന്തോഷ്, നോയല്‍ ജോസഫ് എന്നിവരും രണ്ടാം സ്ഥാനം അയര്‍ക്കുന്നം സെന്‍റ് സെബാസ്റ്റ്യന്‍സ് ഹയര്‍ സെക്കന്‍ഡറി സ്‌കൂളിലെ ഹരി മുരളി, ജോയല്‍ ജൂഡ് അഗസ്റ്റിന്‍ എന്നിവരും മൂന്നാം സ്ഥാനം ആനക്കല്ല് സെന്‍റ് ആന്‍റണീസ് പബ്ലിക് സ്‌കൂളിലെ റീവ് മാത്യു ഷെറി, അല്‍ഫോന്‍സ് എസ്. വടക്കേല്‍ എന്നിവരും കരസ്ഥമാക്കി. സമാപന സമ്മേളനം ചങ്ങനാശേരി അതിരൂപതാ വികാരി ജനറാള്‍ മോണ്‍. സ്‌കറിയ കന്യാകോണില്‍ ഉദ്ഘാടനം ചെയ്തു. ഹോളി ക്വീന്‍സ് പ്രൊവിന്‍സിലെ എഡ്യൂക്കേഷന്‍ കൗണ്‍സിലര്‍ സിസ്റ്റര്‍ ആനി തോമസ് സിഎംസി അധ്യക്ഷത വഹിച്ചു. പ്രിന്‍സിപ്പല്‍ സിസ്റ്റര്‍ ലില്ലി തെരേസ് സിഎംസി, എസ്ബി കോളജ് റിട്ട. വൈസ് പ്രിന്‍സിപ്പല്‍ ഡോ. ആന്‍റണി മാത്യൂസ്, പിടിഎ പ്രസിഡന്‍റ് വര്‍ഗീസ് ആന്‍റണി, ലിസി സിറിയക്, ജിജി തോമസ് എന്നിവര്‍ പ്രസംഗിച്ചു.

പൂവം പെരുമ്പുഴക്കടവ് പാലം അപ്രോച്ച് റോഡ് നിര്‍മാണം ടെന്‍ഡറായി

പെരുന്ന ഭാഗത്തേക്ക് 45 മീറ്റര്‍, പൂവം ഭാഗത്തേക്ക് 54 മീറ്റര്‍ ലാന്‍ഡ് സ്പാനായി അപ്രോച്ച് റോഡ് ചങ്ങനാശേരി: പെരുമ്പുഴക്കടവ് പാലത്തിന്‍റെ ഇരുവശങ്ങളിലും നിര്‍മിക്കുന്ന അപ്രോച്ച് റോഡിന്‍റെ നിര്‍മാണ പ്രവൃത്തിയുടെ ടെന്‍ഡര്‍ ചെയ്തതായി ജോബ് മൈക്കിള്‍ എംഎല്‍എ അറിയിച്ചു. പെരുമ്പുഴക്കടവ് പാലത്തിന്‍റെ അപ്രോച്ച് റോഡ് നിര്‍മാണ പ്രവൃത്തിക്കായി കഴിഞ്ഞ 17ന് 5.01 കോടി രൂപയ്ക്ക് പുതുക്കിയ ഭരണാനുമതിയും കഴിഞ്ഞദിവസം സാങ്കേതിക അനുമതിയും ലഭിച്ചു. തുടര്‍ന്ന് ടെന്‍ഡര്‍ ക്ഷണിക്കുകയും ഇന്നലെ ടെന്‍ഡര്‍ ചെയ്യുകയും ചെയ്തു. പായിപ്പാട് പഞ്ചായത്തിലെ താഴ്ന്ന പ്രദേശമായ പൂവത്താണ് പെരുമ്പുഴക്കടവ് പാലം സ്ഥിതി പെയ്യുന്നത്. പെരുന്ന ഭാഗത്തേക്ക് 45 മീറ്റര്‍ നീളത്തിലും പൂവം ഭാഗത്തേക്ക് 54 മീറ്റര്‍ നീളത്തിലും ലാന്‍ഡ് സ്പാന്‍ ആയിട്ടാണ് അപ്രോച്ച് റോഡ് നിര്‍മാണത്തിന് അനുമതി ലഭ്യമായിരിക്കുന്നത്. പൈല്‍ ഫൗണ്ടേഷന്‍ നല്‍കിയുള്ള നിര്‍മാണ പ്രവൃത്തിയാണ് ഇതില്‍ ഉള്‍പ്പെടുത്തിയിരിക്കുന്നത്. പൂവം നിവാസികളുടെ യാത്രാക്ലേശത്തിനു പരിഹാരമാകും പെരുമ്പുഴക്കടവ് പാലത്തിന്‍റെ നിര്‍മാണം സാധ്യമാകുന്നതിലൂടെ നിലവില്‍ സ്ഥാപിച്ചിരിക്കുന്ന മുട്ട് നീക്കി കനാലിലെ ഒഴുക്ക് സുഗമമാകുകയും ചെയ്യും. വര്‍ഷങ്ങളായിട്ടുള്ള പൂവം പ്രദേശവാസികളുടെ ബുദ്ധിമുട്ടിനാണ് ഇതോടെ പരിഹാരമാകുന്നത്. അതുപോലെതന്നെ പാടശേഖരങ്ങളില്‍ ചെറിയ മഴയ്ക്ക് പോലും മട വീഴുന്നതുമായി ബന്ധപ്പെട്ട കര്‍ഷകരുടെ പ്രശ്‌നങ്ങള്‍ക്കും ഇതുവഴി പരിഹാരമാകും. ജോബ് മൈക്കിള്‍ എംഎല്‍എ

ആർടിഒ ഓഫീസിൽ വന്ന പെരുന്പനച്ചി സ്വദേശിക്ക് കടിയേറ്റു

റവന്യു ടവര്‍, കോടതി പരിസരങ്ങള്‍ കീഴടക്കി തെരുവുനായ്ക്കൾ ചങ്ങനാശേരി: റവന്യു ടവര്‍, കോടതി, പുഴവാത്, മാര്‍ക്കറ്റ് ഭാഗങ്ങള്‍ കീഴടക്കി തെരുവുനായ്ക്കളുടെ വിഹാരം. ടവര്‍ പരിസരത്ത് വച്ച് ഒരാളെ നായ ആക്രമിച്ചു, നിസംഗരായി അധികാരികള്‍. കഴിഞ്ഞ ഒരു മാസത്തിനിടെ നഗരത്തില്‍ തെരുവുനായ്ക്കളുടെ ആക്രമണത്തില്‍ പരിക്കേറ്റത് ഒരു ഡസനോളം പേര്‍ക്ക്. ജോയിന്‍റ് ആര്‍ടിഒ ഓഫീസില്‍ വാഹനസംബന്ധമായ ആവശ്യത്തിനുവന്ന പെരുമ്പനച്ചി സ്വദേശി ബാബു ആന്‍റണിക്കാണ് കഴിഞ്ഞദിവസം റവന്യു ടവര്‍ പരിസരത്തുവച്ച് തെരുവുനായയുടെ കടിയേറ്റത്. ഇയാള്‍ ജനറല്‍ ആശുപത്രിയില്‍ ചികിത്സതേടി. റവന്യു പരിസരങ്ങളില്‍ ഭക്ഷണ അവശിഷ്ടങ്ങളും മറ്റിതര മാലിന്യങ്ങളും അലക്ഷ്യമായി വലിച്ചെറിയുന്നതാണ് തെരുവുനായ്ക്കള്‍ പെരുകാന്‍ കാരണമായി ചൂണ്ടിക്കാണിക്കപ്പെടുന്നത്. തെരുവുനായ്ക്കളുടെ വിഹാരം റവന്യു ടവറിലെ സര്‍ക്കാര്‍, സ്വകാര്യ ഓഫീസുകളില്‍ എത്തുന്ന ജീവനക്കാര്‍ക്കും ആളുകള്‍ക്കും കടുത്ത ഭീഷണിയാണ്. വിവിധ കോടതികള്‍, പുഴവാത്, മാര്‍ക്കറ്റ്, മുനിസിപ്പല്‍ സ്റ്റേഡിയം, പെരുന്ന, മനയ്ക്കച്ചിറ ഭാഗങ്ങളിലും തെരുവുനായ്ക്കളുടെ ശല്യം ഇരുചക്രവാഹന യാത്രികർക്കും കാല്‍നടയാത്രികര്‍ക്കും ദുരിതമായി മാറിയിരിക്കുകയാണ്. പുലര്‍കാലങ്ങളില്‍ പള്ളികളിലും ക്ഷേത്രങ്ങളിലും പോകുന്ന വിശ്വാസികള്‍ക്കും തെരുവുനായ്ക്കള്‍ ഭീഷണി സൃഷ്ടിക്കുകയാണ്.

പോലീസ് സ്റ്റേഷൻ മാർച്ച് നടത്തി

വൈക്കം: നഗരസഭയിലെ അഴിമതിയിലും കെടുകാര്യസ്ഥതയിലും പ്രതിഷേധിച്ച് സമരം ചെയ്ത ബിജെപി കൗൺസിലർമാരെ പോലീസ് മർദിച്ചതിൽ പ്രതിഷേധിച്ചു ബിജെപി വൈക്കം മണ്ഡലം കമ്മിറ്റിയുടെ നേതൃത്വത്തിൽ പോലീസ് സ്റ്റേഷൻ മാർച്ച്‌ നടത്തി. ജില്ലാ വൈസ് പ്രസിഡന്‍റ് ആന്‍റണി അറയിൽ സമരം ഉദ്ഘാടനം ചെയ്തു, വൈക്കം മണ്ഡലം പ്രസിഡന്‍റ് എം.കെ . മഹേഷ്‌ അധ്യക്ഷത വഹിച്ചു. ജില്ലാ വൈസ് പ്രസിഡന്‍റ് ലേഖ അശോകൻ, ജില്ലാ സെക്രട്ടറിമാരായ രൂപേഷ് ആർ മേനോൻ, പി.ആർ. സുഭാഷ്, വിനൂബ് വിശ്വം, പ്രീജു കെ.ശശി, ശിവരാമകൃഷ്ണൻ നായർ തുടങ്ങിയവർ സംബന്ധിച്ചു.

മരങ്ങാട്ടുപിള്ളി സെന്‍റ് തോമസ് ഹൈസ്‌കൂള്‍ പ്ലാറ്റിനം ജൂബിലി നിറവില്‍

മരങ്ങാട്ടുപിള്ളി: മരങ്ങാട്ടുപിള്ളി ഗ്രാമത്തിന്‍റെ തിലകക്കുറിയായി വര്‍ത്തിക്കുന്ന സെന്‍റ് തോമസ് ഹൈസ്‌കൂള്‍ പ്ലാറ്റിനം ജൂബിലി നിറവിലേക്ക്. 11ന് ഉച്ചകഴിഞ്ഞ് രണ്ടിന് സെന്‍റ് ഫ്രാന്‍സിസ് അസീസി ഓഡിറ്റോറിയത്തില്‍ നടക്കുന്ന ജൂബിലി ആഘോഷ സമ്മേളനത്തിൽ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍ അധ്യക്ഷത വഹിക്കും. ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. മോന്‍സ് ജോസഫ് എംഎല്‍എ സ്മാര്‍ട്ട് ക്ലാസ് റൂമുകളുടെ ഉദ്ഘാടനം നിര്‍വഹിക്കും. രൂപത കോർപറേറ്റ് സെക്രട്ടറി ഫാ. ജോര്‍ജ് പുല്ലുകാലായില്‍ മുഖ്യപ്രഭാഷണം നടത്തും. മുന്‍ അഡീഷണല്‍ ചീഫ് സെക്രട്ടറി ടി.കെ. ജോസ് ജൂബിലി ലോഗോ പ്രകാശനം ചെയ്യും. ത്രിതല പഞ്ചായത്ത് പ്രതിനിധികൾ, രാഷ്‌ട്രീയ, സാമുദായിക, സാംസ്‌കാരിക നേതാക്കള്‍ തുടങ്ങിയവര്‍ പ്രസംഗിക്കും. 1920ല്‍ ഫാ.വര്‍ഗീസ് പുളിക്കീല്‍ സെന്‍റ് ഫ്രാന്‍സിസ് അസീസി പള്ളി വികാരിയായിരുന്നപ്പോള്‍ ആരംഭിച്ച എല്‍പി സ്‌കൂളാണ് 1948ല്‍ യുപി സ്‌കൂളായും 1951 ഓഗസ്റ്റില്‍ ഹൈസ്‌കൂളായും ഉയര്‍ത്തപ്പെട്ടത്. മരങ്ങാട്ടുപിള്ളി പ്രദേശത്തെ നാനാജാതി മതസ്ഥരായ കുട്ടികള്‍ക്ക് മികവുറ്റ അടിസ്ഥാന വിദ്യാഭ്യാസം നല്‍കുക എന്ന ലക്ഷ്യത്തോടെ ആരംഭിച്ച വെര്‍ണാക്കുലര്‍ മലയാളം സ്‌കൂളാണ് സെന്‍റ് തോമസ് സ്‌കൂളായി മാറിയത്. ഫാ. ഏബ്രഹാം തൊണ്ടിക്കലായിരുന്നു സ്‌കൂളിന്‍റെ ആദ്യത്തെ ഹെഡ്മാസ്റ്റര്‍. സ്‌കൂള്‍ മാനേജര്‍മാരായ ഫാ. സെബാസ്റ്റ്യന്‍ ആലപ്പാട്ടുകുന്നേല്‍, ഫാ. ജോര്‍ജ് വഞ്ചിപ്പുരയ്ക്കല്‍ എന്നിവര്‍ വികസനപ്രവര്‍ത്തനങ്ങള്‍ ഒരുക്കി. ഇപ്പോള്‍ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍, ഹെഡ്മിസ്ട്രസ് ലിന്‍റാ എസ്. പുതിയാപറമ്പില്‍, പിടിഎ പ്രസിഡന്‍റ് റോബിന്‍ കരിപ്പാത്ത് എന്നിവര്‍ നേതൃത്വം നല്‍കുന്നു. സെന്‍റ് തോമസില്‍ പഠിച്ചു പടിയിറങ്ങിയ അനേകം പൂര്‍വവിദ്യാര്‍ഥികള്‍ സമൂഹത്തിലെ വിവിധ മേഖലകളില്‍ പ്രശോഭിക്കുന്നു. പാഠ്യ-പാഠ്യേതര പ്രവര്‍ത്തനങ്ങളില്‍ സ്‌കൂള്‍ മികച്ച നിലവാരം പുലര്‍ത്തി വരുന്നു. വര്‍ഷങ്ങളായി ശാസ്ത്രവിഷയങ്ങളില്‍ ദേശീയ-സംസ്ഥാന-ജില്ലാ തലങ്ങളിലും, കാര്‍ഷിക പ്രവര്‍ത്തനങ്ങളില്‍ സംസ്ഥാന-ജില്ലാ തലങ്ങളിലും, പാലാ രൂപത എഡ്യൂക്കേഷണല്‍ ഏജന്‍സി 2022ല്‍ ഏര്‍പ്പെടുത്തിയ കാര്‍ഷിക സ്‌കൂളിനുള്ള പ്രഥമ അവാര്‍ഡും 2024ലെ അവാര്‍ഡും സ്കൂളിനു ലഭിച്ചു. പത്രസമ്മേളനത്തില്‍ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍, ഹെഡ്മിസ്ട്രസ് ലിന്‍റാ എസ്. പുതിയാപറമ്പില്‍, ജനറല്‍ കണ്‍വീനര്‍ അലക്‌സ് കൊട്ടാരം, പിടിഎ പ്രസിഡന്‍റ് റോബിന്‍ കരിപ്പാത്ത്, ജോണ്‍സണ്‍ പുളിക്കിയില്‍, ജോസുകുട്ടി ഉപ്പാന്തടം, ടി.എസ്. ജയിംസ് എന്നിവര്‍ പങ്കെടുത്തു.

ശ്രീനാരായണഗുരു ഓപ്പൺ യൂണിവേഴ്‌സിറ്റി പ്രാദേശികകേന്ദ്രം ദേവമാതാ കോളജിൽ

കുറവിലങ്ങാട്: അനേകായിരങ്ങൾക്ക് ഉന്നതവിദ്യാഭ്യാസത്തിനും തുടർപഠനത്തിനും അവസരം സമ്മാനിക്കുന്ന ശ്രീനാരായണഗുരു ഓപ്പൺ യൂണിവേഴ്‌സിറ്റിയുടെ പ്രാദേശികകേന്ദ്രം ദേവമാതാ കോളജിൽ പ്രവർത്തനം ആരംഭിക്കും. ഇതുസംബന്ധിച്ച അനുമതി ലഭിച്ചതായി കോളജ് മാനേജർ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, പ്രിൻസിപ്പൽ ഡോ. സുനിൽ സി. മാത്യു, വൈസ് പ്രിൻസിപ്പൽ ഫാ. മാത്യു കവളമ്മാക്കൽ ബർസാർ ഫാ. ജോസഫ് മണിയഞ്ചിറ എന്നിവർ വാർത്താസമ്മേളനത്തിൽ അറിയിച്ചു. നാക് അക്രഡിറ്റേഷനിൽ 3.67 ഗ്രേഡ് പോയിന്‍റും എൻഐആർഎഫ്, കെആർഎഫ് നിലവാരത്തിൽ ജില്ലയിൽതന്നെ മുൻനിരയിലുമുള്ള കോളജിന് സംസ്ഥാനത്തെ ആദ്യത്തെ വിദൂരവിദ്യാഭ്യാസ സർവകലാശാലയുടെ കേന്ദ്രമാകാൻ കഴിഞ്ഞത് വലിയ നേട്ടമായിട്ടുണ്ട്. ശ്രീനാരായണഗുരു ഓപ്പൺ സർവകലാശാലയുടെ 32 കോഴ്‌സുകളിൽ 28 കോഴ്‌സുകൾക്കാണ് ദേവമാതാ കോളജിൽ അവസരം ലഭിക്കുക. കോളജിന്‍റെ ലൈബ്രറി, ലബോറട്ടറി സൗകര്യങ്ങളും പുതിയ കോഴ്‌സുകളിലെത്തുന്ന പഠിതാക്കൾക്കായി പ്രയോജനപ്പെടുത്തും. അടുത്ത മാസത്തോടെ പ്രവേശനനടപടികൾ ആരംഭിക്കുമെന്ന് സ്റ്റഡി സെന്‍റർ കോ-ഓർഡിനേറ്റർ റെനീഷ് തോമസ് പറഞ്ഞു. കോളജിന് അനുവദിച്ചിട്ടുള്ള കോഴ്‌സുകൾ ബിഎ മലയാളം, ഇംഗ്ലീഷ്, ഹിന്ദി, അറബിക്, സംസ്‌കൃതം, അഫ്‌സൽ ഉൽ ഉലമ, ഇക്കണോമിക്‌സ്, സോഷ്യോളജി, ഹിസ്റ്ററി, ഫിലോസഫി, പൊളിറ്റിക്കൽ സയൻസ്, സൈക്കോളജി, നാനോ എന്‍റർപ്രണർഷിപ്പ്, ബിസിഎ, ബിബിഎ, ബികോം. എംഎ മലയാളം, ഇംഗ്ലീഷ്, അറബിക്, ഹിന്ദി, സംസ്‌കൃതം, ഇക്കണോമിക്‌സ്, സോഷ്യോളജി, ഹിസ്റ്ററി, ഫിലോസഫി, പൊളിറ്റിക്കൽ സയൻസ്, പബ്ലിക് അഡ്മിനിസ്‌ട്രേഷൻ, എംകോം.

മേമ്മുറി വെറ്ററിനറി ആശുപത്രിയില്‍‍ വെറ്ററിനറി സര്‍ജറി യൂണിറ്റ് പ്രവര്‍ത്തനമാരംഭിച്ചു

കുറുപ്പന്തറ: മേമ്മുറി വെറ്റിനറി ആശുപത്രിയില്‍ മൃഗസംരക്ഷണ വകുപ്പിന്‍റെ മൊബൈല്‍ വെറ്ററിനറി സര്‍ജറി യൂണിറ്റ് (എംഎസ്‌യു) പ്രവര്‍ത്തനമാരംഭിച്ചു. കോട്ടയത്തിന്‍റെ ഉപകേന്ദ്രമായി തെരഞ്ഞെടുക്കപ്പെട്ടാണ് മേമ്മുറിയില്‍ സെന്‍റര്‍ പ്രവര്‍ത്തനമാരംഭിച്ചത്. പദ്ധതിയുടെ പ്രവര്‍ത്തനോദ്ഘാടനം ജില്ലാ മൃഗസംരക്ഷണ വകുപ്പ് അധികാരികളുടെ സാന്നിധ്യത്തില്‍ മാഞ്ഞൂര്‍ പഞ്ചായത്ത് പ്രസിഡന്‍റ് കോമളവല്ലി രവീന്ദ്രന്‍ നിര്‍വഹിച്ചു. യോഗത്തില്‍ വൈസ് പ്രസിഡന്‍റ് ബിജു കൊണ്ടുക്കാല അധ്യക്ഷത വഹിച്ചു. ചീഫ് വെറ്ററിനറി ഓഫീസര്‍ ഡോ. സുജ പദ്ധതിയുടെ വിശദീകരണം നടത്തി. വികസനകാര്യ സ്റ്റാന്‍ഡിംഗ് കമ്മിറ്റിയധ്യക്ഷ സാലിയമ്മ ജോളി, വാര്‍ഡ് മെമ്പര്‍ ആനിയമ്മ ജോസഫ് തുടങ്ങിയവര്‍ പ്രസംഗിച്ചു. മൊബൈല്‍ സര്‍ജറി യൂണിറ്റില്‍ ശസ്ത്രക്രിയകള്‍ നടത്താന്‍ താല്‍പര്യമുള്ളവര്‍ മുന്‍കൂട്ടി രജിസ്റ്റര്‍ ചെയ്യണമെന്ന് വെറ്ററിനറി സര്‍ജന്‍ അറിയിച്ചു.

യൂത്ത് ഫ്രണ്ട്-എം റാലിയും പൊതുസമ്മേളനവും ഇന്ന്

പാലാ: യൂത്ത് ഫ്രണ്ട്-എം യുവജന റാലിയും പൊതുസമ്മേളനവും ഇന്നു വൈകുന്നേരം നാലിന് പാലാ ടൗണില്‍ നടക്കും. യൂത്ത് ഫ്രണ്ട്-എം പാലാ നിയോജകമണ്ഡലം കമ്മിറ്റിയുടെ ആഭിമുഖ്യത്തില്‍ നിയോജക മണ്ഡലത്തിലെ 12 പഞ്ചായത്തുകളില്‍നിന്നും പാലാ മുനിസിപ്പാലിറ്റിയില്‍ നിന്നുമാണ് യുവജനങ്ങള്‍ പങ്കെടുക്കുന്ന മഹാറാലി നടത്തുന്നത്. റാലിക്കു ശേഷം നടക്കുന്ന പൊതുസമ്മേളനം ജോസ് കെ. മാണി എംപി ഉദ്ഘാടനം ചെയ്യും. യൂത്ത് ഫ്രണ്ട്-എം പാലാ നിയോജകമണ്ഡലം പ്രസിഡന്‍റ് തോമസുകുട്ടി വരിക്കയില്‍ അധ്യക്ഷത വഹിക്കും. നിയോജകമണ്ഡലം പ്രസിഡന്‍റ് തോമസുകുട്ടി വരിക്കയില്‍, സംസ്ഥാന സെക്രട്ടറിമാരായ സുനില്‍ പയ്യപ്പള്ളി, സിജോ പ്ലാത്തോട്ടം, ടോബി തൈപ്പറമ്പില്‍, മനു തെക്കേല്‍ തുടങ്ങിയവര്‍ നേതൃത്വം നല്‍കും.

അപകടാവസ്ഥയിലുള്ള വൈദ്യുതി തൂണും ലൈനുകളും മാറ്റിസ്ഥാപിക്കണം

ഞീഴൂര്‍: ഞീഴൂര്‍ പഞ്ചായത്തിലെ 12-ാം വാര്‍ഡ് മഠത്തിപ്പറമ്പ് പാലത്തിനു സമീപം വലിയതോടിന്‍റെ കല്‍ക്കെട്ട് ഇടിഞ്ഞ് വൈദ്യുതി തൂണും 11 കെവി ലൈനും അപകടാവസ്ഥയില്‍. അപകടാവസ്ഥ ഒഴിവാക്കാന്‍ കെഎസ്ഇബി നടപടിയെടുക്കണമെന്ന് നാട്ടുകാര്‍ ആവശ്യപ്പെട്ടു. അപകടം ഒഴിവാക്കണമെന്ന് എല്‍ഡിഎഫ് പഞ്ചായത്ത് കണ്‍വീനറും ജനാധിപത്യ കേരളാ കോണ്‍ഗ്രസ് നിയോജകമണ്ഡലം പ്രസിഡന്‍റുമായ സന്തോഷ് കുഴിവേലിയും കെഎസ്ഇബി അധികാരികളോട് ആവശ്യപ്പെട്ടു. വലിയ തോടിന്‍റെ കല്‍ക്കെട്ട് കഴിഞ്ഞ ദിവസങ്ങളിലുണ്ടായ മഴയത്താണ് രണ്ട് തവണയായി ഇടിഞ്ഞത്. ഇനിയും കെട്ട് ഇടിഞ്ഞാല്‍ വൈദ്യുതി തൂണും ലൈനുകളും നിലംപൊത്തുന്ന അവസ്ഥയിലാണെന്ന് സന്തോഷ് പറയുന്നു. ഇതു വലിയ അപകടത്തിന് വഴി തെളിക്കും. സമീപത്തുള്ള വീടുകള്‍ക്കും അപകടമുണ്ടാകും. പാഴുത്തുരുത്ത്-മഠത്തിപറമ്പ്-തുരുത്തിപള്ളി ട്രാന്‍സ്‌ഫോമറുകളെ ബന്ധിപ്പിക്കുന്ന 11 കെവി ലൈനാണ് അപകടത്തിലുള്ളത്.

ഒഡീഷയിൽ വൈദികരെയും കന്യാസ്ത്രീകളെയും ആക്രമിച്ച സംഭവം : കര്‍ശന നടപടി വേണം: കത്തോലിക്ക കോണ്‍ഗ്രസ്

പാലാ: ഒഡീഷയിലെ ജലേശ്വറില്‍ വൈദികരെയും കന്യാസ്ത്രീകളെയും ആക്രമിച്ചതില്‍ കത്തോലിക്കാ കോണ്‍ഗ്രസ് പാലാ രൂപതാസമിതി പ്രതിഷേധിച്ചു. ന്യൂനപക്ഷങ്ങള്‍ക്കെതിരേ തുടര്‍ച്ചയായി ആക്രമണങ്ങള്‍ ഉണ്ടാകാന്‍ കാരണം കുറ്റക്കാര്‍ക്കെതിരേ നടപടികള്‍ ഉണ്ടാകാത്തതാണെന്ന് സമിതി വിലയിരുത്തി. ആക്രമിക്കപ്പെട്ട മലയാളി വൈദികനായ ഫാ. ലിജോ നിരപ്പേലിന്‍റെ വീട് കത്തോലിക്ക കോണ്‍ഗ്രസ് രൂപത ഡയറക്ടര്‍ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍, പ്രസിഡന്‍റ് ഇമ്മാനുവല്‍ നിധീരി, ജനറല്‍ സെക്രട്ടറി ജോസ് വട്ടുകുളം തുടങ്ങിയവരുടെ നേതൃത്വത്തില്‍ സന്ദര്‍ശിച്ച് ബന്ധുക്കളെ ആശ്വസിപ്പിച്ചു.

വൈക്കം -തവണക്കടവ് ഇനി തടിബോട്ടില്ലാത്ത ഫെറി

വൈക്കം: വൈക്കം-തവണക്കടവ് ഫെറിയിൽ സർവീസ് നടത്താൻ ഇനി തടിബോട്ടില്ല. ഫെറിയിൽ സർവീസ് നടത്തിയിരുന്ന കാലപ്പഴക്കമേറിയ എ.90 നമ്പർ തടി ബോട്ട് സർവീസിന് പര്യാപ്തമല്ലെന്നും ശക്തമായ കാറ്റും മഴയുമുള്ളപ്പോൾ തിരിക്കാൻ ബുദ്ധിമുട്ടുണ്ടെന്നും പരാതി ഉയർന്നതിനെത്തുടർന്ന് ബോട്ട് മാറ്റണമെന്ന് ദീപിക അടക്കമുള്ള മാധ്യമങ്ങൾ റിപ്പോർട്ടു ചെയ്തിരുന്നു. തടിബോട്ട് മാറ്റി ഇപ്പോൾ കറ്റാമറൈൻബോട്ട് വൈക്കം-തവണക്കടവ് ഫെറിയിൽ അധികൃതർ സർവീസിനെത്തിച്ചിരിക്കുകയാണ്. ഇരട്ടഎൻജിനുള്ള കറ്റാമറൈൻ ബോട്ട് കഴിഞ്ഞദിവസമാണ് എറണാകുളത്തുനിന്നു വൈക്കത്ത് എത്തിച്ചത്. യാത്രക്കാർക്ക് സുരക്ഷിത ്വവും സമയലാഭവും ലക്ഷ്യമാക്കി ആധുനികസൗകര്യങ്ങളോടുകൂടിനിർമിച്ചതാണ് കറ്റാമറൈൻ യാത്രാബോട്ട്. ബോട്ടിൽ 75പേർക്ക് യാത്ര ചെയ്യാൻ കഴിയും. രണ്ട് എൻജിൻ ഉള്ളതിനാൽ യാത്രയ്ക്കിടെ ഒരുഎൻജിൻ തകരാറിലായാലും അടുത്ത എൻജിൻ ഉപയോഗിച്ച് ബോട്ട് കരയ്ക്കെത്തിക്കാൻ സാധിക്കും. നിലവിൽ സോളാർ ബോട്ടായ ആദിത്യ ഉൾപ്പെടെ നാല് ബോട്ടുകളാണ് വൈക്കം-തവണക്കടവ് ഫെറിയിൽ സർവീസ് നടത്തുന്നത്. ആലപ്പുഴ,കോട്ടയം ജില്ലകളിൽനിന്നു നിരവധിയാളുകളാണ് വൈക്കം -തവണക്കടവ് ഫെറിയിലൂടെ ദിവസേന കായൽ കടക്കുന്നത്. ആറ് രൂപയാണ് യാത്രാനിരക്ക്.

ബൈക്കും കാറും കൂട്ടിയിടിച്ച് അപകടം

പാമ്പാടി: വട്ടമലപ്പടിയില്‍ ബൈക്കും കാറും കൂട്ടിയിടിച്ചുണ്ടായ അപകടത്തില്‍ ബൈക്ക് യാത്രികനു സാരമായി പരിക്കേറ്റു. ഇന്നലെ ഉച്ചയ്ക്ക് 12.15ന് വട്ടമലപ്പടിക്കു സമീപമായിരുന്നു അപകടം. പാമ്പാടി ഭാഗത്തേക്കു വന്ന ബൈക്ക് ബസിനെ മറികടക്കുന്നതിനിടെ കോട്ടയം ഭാഗത്തേക്കു വന്ന കാറില്‍ ഇടിച്ചുകയറുകയായിരുന്നു. അപകടത്തിൽ ബൈക്ക് യാത്രികനായ മാങ്ങാനം സ്വദേശി ആശിഷിന്‍റെ(21) കൈകാലുകള്‍ക്കു പരിക്കേറ്റു. ആശിഷിനെ പാമ്പാടി താലൂക്ക് ആശുപത്രിയിലെത്തിച്ചു പ്രഥമശുശ്രൂഷ നല്‍കി കോട്ടയം മെഡിക്കല്‍ കോളജിലേക്കു മാറ്റി. പാമ്പാടി എസ്‌ഐ ഉദയകുമാറിന്‍റെ നേതൃത്വത്തിലുള്ള പോലീസ് സംഘം സ്ഥലത്തെത്തി മേല്‍നടപടികള്‍ സ്വീകരിച്ചു.

28-ാമത് അഖിലകേരള ശങ്കേഴ്‌സ് ചിത്രരചന, കാര്‍ട്ടൂണ്‍ മത്സരങ്ങള്‍ ഇന്ന്

കോട്ടയം: ദര്‍ശന സാംസ്‌കാരിക കേന്ദ്രവും ന്യൂഡല്‍ഹി ചില്‍ഡ്രന്‍സ് ബുക്ക് ട്രസ്റ്റും സംയുക്തമായി സംഘടിപ്പിക്കുന്ന 28-ാമത് അഖില കേരള ശങ്കേഴ്‌സ് ചിത്രരചന/കാര്‍ട്ടൂണ്‍ മത്സരങ്ങള്‍ ഇന്നു നടക്കും. രാവിലെ 10ന് മന്ത്രി വി.എന്‍. വാസവന്‍ ഉദ്ഘാടനം ചെയ്യും. കാര്‍ട്ടൂണിസ്റ്റ് ശങ്കറിന്‍റെ സ്മരണയ്ക്കായി ചില്‍ഡ്രന്‍സ് ബുക്‌സ് ട്രസ്റ്റ് നടത്തുന്ന രാജ്യന്തര ചിത്രരചനാ മത്സരങ്ങളുടെ ഭാഗമായിട്ടാണു മത്സരങ്ങള്‍ സംഘടിപ്പിക്കുന്നത്. ഏഴു വിഭാഗങ്ങളിലായിട്ടാണു മത്സരം. രാവിലെ 10ന് നഴ്‌സറി ക്ലാസ് മുതല്‍ നാലാം ക്ലാസ് വരെയുള്ള കുട്ടികളുടെ പെയിന്‍റിംഗ് മത്സരവും സ്‌പെഷല്‍ സ്‌കൂള്‍ വിദ്യാര്‍ഥികള്‍ക്കുമുള്ള പ്രത്യേക കളറിംഗ് മത്സരവും കാര്‍ട്ടൂണ്‍ മത്സരവും നടക്കും. ഉച്ചകഴിഞ്ഞു രണ്ടിന് അഞ്ചാം ക്ലാസ് മുതല്‍ പ്ലസ് ടു വരെയുള്ള കുട്ടികളുടെ പെയിന്‍റിംഗ് മത്സരവും മുതിര്‍ന്നവര്‍ക്കുള്ള കാരിക്കേച്ചര്‍ മത്സരങ്ങളും നടക്കും. മുതിര്‍ന്നവര്‍ക്കായുള്ള കാരിക്കേച്ചര്‍ മത്സരത്തിനു പ്രായപരിധിയില്ല. എല്ലാ വിഭാഗങ്ങളിലും ഒന്നാം സ്ഥാനം ലഭിക്കുന്നവര്‍ക്ക് ന്യൂഡല്‍ഹി ബുക്ക് ട്രസ്റ്റ് വക വെള്ളി മെഡലുകളും കാഷ് അവാര്‍ഡുകളും ലഭിക്കും. മികച്ച പെയിന്‍റിംഗിനും കാര്‍ട്ടൂണിനും ശങ്കേഴ്ര്‍സ് അവാര്‍ഡും (വെള്ളി മെഡല്‍) ദര്‍ശന സാംസ്‌കാരിക കേന്ദ്രവും ഡിസി ബുക്ക്‌സും നല്‍കുന്ന ട്രോഫികളും ഓരോ ഗ്രൂപ്പിലും 25 പ്രോത്സാഹന സമ്മാനങ്ങളും നല്‍കും. മത്സരത്തില്‍ പങ്കുചേരുന്ന എല്ലാ കുട്ടികള്‍ക്കും സമ്മാന പായ്ക്കറ്റുകള്‍ നല്‍കും. കാരിക്കേച്ചര്‍ മത്സരത്തില്‍ ഏറ്റവും നല്ല സൃഷ്ടിക്ക് 1001 രൂപ സമ്മാനമായി ലഭിക്കും. കൂടുതല്‍ വിവരങ്ങള്‍ക്ക് ഫോൺ: 94470 08255, 91885 20400.

അല്‍ഫോന്‍സാ ജന്മഗൃഹത്തില്‍ തിരുനാളിനു നാളെ കൊടിയേറും

കുടമാളൂര്‍: അല്‍ഫോന്‍സാ ജന്മഗൃഹത്തില്‍ വിശുദ്ധ അല്‍ഫോന്‍സാമ്മയുടെ 115-ാമത് ജന്മദിനത്തോടനുബന്ധിച്ചുള്ള തിരുനാളും അല്‍ഫോന്‍സാഭവന്‍റെ സുവര്‍ണ ജൂബിലി ആഘോഷവും നടത്തും. നാളെ മുതല്‍ 19 വരെയാണു തിരുനാള്‍. 31ന് സുവര്‍ണജൂബിലി ആഘോഷം നടക്കും. നാളെ വൈകുന്നേരം നാലിനു കൊടിയേറ്റ്, 4.30നു വിശുദ്ധ കുര്‍ബാന, സന്ദേശം, നൊവേന: ആര്‍ച്ച് പ്രീസ്റ്റ് റവ.ഡോ. ജോര്‍ജ് മംഗലത്തില്‍ മുഖ്യകാര്‍മികത്വം വഹിക്കും. ഫാ. അലോഷ്യസ് വല്ലാത്തറ, ഫാ. ജസ്റ്റിന്‍ വരവുകാലായില്‍, ഫാ. സുനില്‍ ആന്‍റണി എന്നിവര്‍ സഹകാര്‍മികരാകും. 11 മുതല്‍ 19 വരെയുള്ള ദിവസങ്ങളില്‍ വൈകുന്നേരം 4.30നു സായാഹ്ന പ്രാര്‍ഥന, വിശുദ്ധ കുര്‍ബാന, സന്ദേശം, നൊവേന എന്നിവയുണ്ടായിരിക്കും. ഫാ. ടോം കുന്നുംപുറം, ഫാ. ജോസഫ് മുട്ടത്തുപാടം, ഫാ. നിഷാദ്, ഫാ. സിബിച്ചന്‍ കളരിക്കല്‍, ഫാ. ആന്‍റണി ഇളംതോട്ടം, ആര്‍ച്ച്ബിഷപ് മാര്‍ തോമസ് തറയില്‍, മോൺ. ആന്‍റണി എത്തയ്ക്കാട്ട്, ഫാ. തോമസ് കാഞ്ഞിരക്കോണം എന്നിവര്‍ വിവിധദിവസങ്ങളില്‍ ശുശ്രൂഷകള്‍ക്കു നേതൃത്വം നല്കും. 19നു വൈകുന്നേരം വിശുദ്ധ കുര്‍ബാനയ്ക്കുശേഷം കത്തിച്ച മെഴുകുതിരികളുമായി സെന്‍റ് മൈക്കിള്‍സ് ചാപ്പലിലെത്തി തിരിച്ച് അല്‍ഫോന്‍സാ ഭവനിലേക്കു പ്രദക്ഷിണവും നടത്തും. തുടര്‍ന്നു കൊടിയിറക്ക്, നേര്‍ച്ച വിതരണം. 31നു സുവര്‍ണ ജൂബിലിയാഘോഷത്തോടനുബന്ധിച്ചു രാവിലെ 11നു മാര്‍ ജോസഫ് പെരുന്തോട്ടം വിശുദ്ധ കുര്‍ബാനയര്‍പ്പിക്കും. ആര്‍ച്ച്പ്രീസ്റ്റ് റവ.ഡോ. ജോര്‍ജ് മംഗലത്തില്‍, സിസ്റ്റര്‍ ലിറ്റി, സിസ്റ്റര്‍ ബ്രിജി, സിസ്റ്റര്‍ എലൈസ് മേരി, ഫാ. ജസ്റ്റിന്‍ വരവുകാലായില്‍, റോയി സേവ്യര്‍ എന്നിവര്‍ നേതൃത്വം നല്‍കും.

രാജ്യത്തെ മതരാഷ്‌ട്രമാക്കാന്‍ നീക്കം: ഡോ. വർഗീസ് ജോർജ്

കോട്ടയം: മതേതര ഭരണഘടനയില്‍നിന്ന് മതരാഷ്‌ട്രത്തിലേക്ക് രാജ്യം നീങ്ങുന്നതിന്‍റെ പ്രകടമായ തെളിവാണ് ഛത്തീസ്ഗഡിലെ കന്യാസ്ത്രീകള്‍ക്ക് എതിരേയുളള കുറ്റപത്രമെന്ന് ആര്‍ജെഡി ദേശീയ എക്സിക്യുട്ടീവ് അംഗം ഡോ. വര്‍ഗീസ് ജോര്‍ജ്. ഛത്തീസ്ഗഡിലെ കന്യാസ്ത്രീകൾക്കെതിരേയുള്ള വ്യാജകേസിന്‍റെ എഫ്ഐആര്‍ റദ്ദാക്കണമെന്നാവശ്യപ്പെട്ട് ആര്‍ജെഡി ജില്ലാ കമ്മിറ്റി ഗാന്ധി സ്‌ക്വയറില്‍ നടത്തിയ ജനജാഗ്രതാ സദസ് ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ പ്രസിഡന്‍റ് സണ്ണി തോമസ് അധ്യക്ഷത വഹിച്ചു. സംസ്ഥാന കമ്മിറ്റി അംഗങ്ങളായ ബെന്നി കുര്യന്‍, പീറ്റര്‍ പന്തലാനി, ടി.എസ്. റഷീദ്, ജോസ് മടുക്കക്കുഴി, ജോര്‍ജ് മാത്യു, ജോണ്‍ മാത്യു മൂലയില്‍, എന്നിവര്‍ പ്രസംഗിച്ചു.

മണര്‍കാട് വീണ്ടും തെരുവുനായ ആക്രമണം

മണര്‍കാട്: പള്ളിക്കവലയ്ക്കും-കാവുംപടിക്കും ഇടയിൽ അധ്യാപക ബാങ്കിന് മുന്നില്‍വച്ച് ലോട്ടറി തൊഴിലാളിക്ക് തെരുവുനായയുടെ കടിയേറ്റു. കൊങ്ങാണ്ടൂര്‍, പുത്തന്‍പറമ്പില്‍, ടി.എസ്. ശ്രീകാന്തിനാണ് നായയുടെ കടിയേറ്റത്. കാലിന്‍റെ പിന്‍ഭാഗത്തായാണ് നായ കടിച്ചത്. രാവിലെയും വൈകുന്നേരവും സ്‌കൂള്‍ കുട്ടികള്‍ ഉള്‍പ്പെടെയുള്ളവര്‍ നടന്നു പോകുന്ന ഈ ഭാഗത്തെ തെരുവുനായ ശല്യം സംബന്ധിച്ചു പലതവണ പരാതിപ്പെട്ടിട്ടും പഞ്ചായത്തിന്‍റെ ഭാഗത്തുനിന്നും ഇതുവരെ നടപടികള്‍ ഒന്നും ഉണ്ടായിട്ടില്ലെന്നു നാട്ടുകാര്‍ ആരോപിക്കുന്നു.

കൈ പൊക്കിയാൽ കറന്‍റടിക്കും

ചേലയ്ക്കാപ്പള്ളി മോട്ടോർ തറയിലേക്കുള്ള ത്രീ ഫേസ് ലൈൻ അപകടാവസ്ഥയിൽ കുമരകം: ഒരാൾ കൈ അറിയാതെ ഒന്നുയർത്തിയാൽ വൈദ്യുതാഘാതമേൽക്കാൻ പാകത്തിൽ താഴ്ന്ന് കിടക്കുകയാണ് ചേലയ്ക്കാപ്പള്ളി മോട്ടോർ തറയിലേക്കുള്ള ത്രീ ഫേസ് വൈദ്യുതി ലൈൻ. കുമരകം ശ്രീകുമാരമംഗലം ക്ഷേത്രത്തിന്‍റെ ആറാട്ടുകളത്തിന്‍റെ പടിഞ്ഞാറു വശത്താണ് അപകടാവസ്ഥയിലുള്ള വൈദ്യുതിലൈൻ കിടക്കുന്നത്. കാട്ടൂത്ര- വാഴയിൽ റോഡിലെ പോസ്റ്റിൽനിന്നു സമീപത്തെ തോടിനു കുറുകെയാണ് ചേലയ്ക്കാപ്പള്ളി പാടത്തിന്‍റെ പുറംബണ്ടിൽ സ്ഥിതി ചെയ്യുന്ന പോസ്റ്റിലേക്ക് ലൈൻ വലിച്ചിരിക്കുന്നത്. ഈ പോസ്റ്റ് ചെരിഞ്ഞതാണ് ലൈൻ ഇത്രയും അപകടാവസ്ഥയിലാകാൻ കാരണം. അപകടമുണ്ടാകാൻ കാത്തുനില്ക്കാതെ വൈദ്യുതി വകുപ്പ് ലൈൻ ഉയർത്തി സുരക്ഷിതമാക്കണമെന്നാണ് കർഷകരുടേയും സമീപവാസികളുടേയും ആവശ്യം.

സമ്മേളനം ആത്മവിമര്‍ശനത്തിന്‍റെ വേദിയാകും

കോട്ടയം: വൈക്കത്ത് കൊടിയേറിയ സിപിഐ ജില്ലാ സമ്മേളനം ഇന്നും നാളെയും ആത്മവിമര്‍ശനത്തിന്‍റെയും ആശങ്കകളുടെയും വേദിയാകും. ഇതോടകം പൂര്‍ത്തിയായ 11 ജില്ലാസമ്മേളനങ്ങളിലും നിലവിലെ ഭരണം തൃപ്തികരമല്ലെന്നും സിപിഐയുടെ നാലു മന്ത്രിമാരും പരാജയമാണെന്നുമുള്ള വിമര്‍ശനമാണ് പ്രതിനിധി ചര്‍ച്ചകളില്‍ ഉയര്‍ന്നത്. നെല്ല് ഉള്‍പ്പെടെ കാര്‍ഷികമേഖലയിലെ തകര്‍ച്ച സമ്മേളനം നടക്കുന്ന വൈക്കം ഉള്‍പ്പെടെ പ്രദേശങ്ങളില്‍ ജനപിന്തുണ നഷ്ടമാകാന്‍ കാരണമായി. നാല് മാസം മുന്‍പ് നെല്ലു വിറ്റ് പണം കിട്ടാത്തവരും 30 കിലോ നെല്ല് മില്ലുകാര്‍ക്ക് കിഴിവുകൊടുക്കേണ്ടിവന്നവരും സമ്മേളനത്തില്‍ നഷ്ടാനുഭവങ്ങള്‍ നിരത്തുമെന്നാണു സൂചന. സിപിഐ സെക്രട്ടറി ബിനോയ് വിശ്വം പാര്‍ട്ടിയിലും മുന്നണിയിലും പരാജയമാണെന്നുമുള്ള വിമര്‍ശനം സ്വന്തം ജില്ലയിലും ആവര്‍ത്തിക്കാം. സിപിഎം മേധാവിത്വത്തിന് അടിയറവു പറഞ്ഞതിനാല്‍ അര്‍ഹമായ വിഹിതം സിപിഐയുടെ വകുപ്പുകള്‍ക്ക് വാങ്ങിയെടുക്കാന്‍ സാധിക്കുന്നില്ല.പൊതുവിതരണരംഗത്തെ പരാജയം തദ്ദേശ തെരഞ്ഞെടുപ്പില്‍ തിരിച്ചടിയുണ്ടാക്കാമെന്ന വിമര്‍ശനം എല്ലാ ജില്ലകളിലുണ്ടായി. മാവേലി സ്റ്റോറുകള്‍ പൂച്ച പ്രസവിക്കാനുള്ള ഇടങ്ങളായെന്നും അവിടെ പാറ്റകള്‍വരെ പട്ടിണിയിലാണെന്നുമാണ് കൊല്ലം സമ്മേളനത്തില്‍ വിമര്‍ശനം ഉയര്‍ന്നത്. കൊല്ലത്ത് സ്‌കൂളില്‍ കുട്ടി ഷോക്കേറ്റു മരിച്ചത് കുട്ടിയുടെ അശ്രദ്ധ മൂലമാണെന്ന അനവസര പ്രതികരണം വന്നപ്പോഴാണ് ചിഞ്ചുറാണി എന്നൊരു മന്ത്രിയുണ്ടെന്ന് ജനങ്ങള്‍ മനസിലാക്കിയതെന്നു വരെ കൊല്ലത്ത് ആക്ഷേപം ഉയര്‍ന്നു. കേരള കോണ്‍ഗ്രസ്-എമ്മിന് സിപിഎം ജില്ലയില്‍ അധികപരിഗണന നല്‍കുന്നുവെന്നതായിരുന്നു കഴിഞ്ഞ ജില്ലാ സമ്മേളനത്തിലെയും വിമര്‍ശനം. സിപിഐയ്ക്ക് ലഭിച്ചിരുന്ന കാഞ്ഞിരപ്പള്ളി സീറ്റ് (പഴയ വാഴൂര്‍) മാണി വിഭാഗത്തിന നല്‍കിയോടെ വൈക്കത്തു മാത്രമാണ് അരിവാള്‍ നെല്‍ക്കതിര്‍ ശേഷിക്കുന്നത്. വാഴൂരില്‍ പാര്‍ട്ടിക്ക് ഇതോടെ സംവിധാനവും പ്രവര്‍ത്തവും കുറഞ്ഞു. കഴിഞ്ഞ തദ്ദേശ തെരഞ്ഞെടുപ്പിലും സിപിഐക്ക് ജില്ലയില്‍ പരിഗണന ലഭിച്ചില്ല. ലോക്‌സഭാ തെരഞ്ഞെടുപ്പില്‍ തോമസ് ചാഴികാടനുവേണ്ടി സിപിഎം ഉണര്‍ന്നു പ്രവര്‍ത്തിക്കാതെ വന്നതിനാല്‍ അര ലക്ഷം എല്‍ഡിഎഫ് വോട്ടുകള്‍ ചോര്‍ന്നു. അതേസമയം സിപിഐയുടെ ശക്തികേന്ദ്രമായ വൈക്കത്തുമാത്രം ചാഴികാടന് ലീഡ് നേടിക്കൊടുക്കാനായി. റബര്‍ മേഖലയിലെ ആശങ്കകളും പ്രതിനിധികള്‍ ഉന്നയിക്കും.

സിപിഐ ജില്ലാ സമ്മേളനത്തിന് വൈക്കത്ത് തുടക്കമായി

വൈക്കം: സിപിഐ ജില്ലാ സമ്മേളനത്തിന് പി. കൃഷ്ണപിള്ളയുടെ ജന്മനാടായ വൈക്കത്ത് തുടക്കമായി. ഒന്നര പതിറ്റാണ്ടിന് ശേഷമാണ് പാർട്ടി ജില്ലാ സമ്മേളനത്തിന് വൈക്കം വേദിയായത്. ഇന്നലെ വൈകുന്നേരം അഞ്ചിന് വൈക്കം വലിയ കവലയിൽനിന്ന് സമ്മേളനഗരിയിലേക്ക് റെഡ് വോളണ്ടിയർമാരുടെ പരേഡ് നടന്നു. സംഘാടകസമിതി പ്രസിഡന്‍റ് ജോൺ വി.ജോസഫ് പതാക ഉയർത്തി. കാനം രാജേന്ദ്രൻ നഗറിൽ ചേർന്ന പൊതുസമ്മേളനം സംസ്ഥാന സെക്രട്ടറി ബിനോയ് വിശ്വം ഉദ്ഘാടനം ചെയ്തു. അമേരിക്കയുടെ ഇറക്കുമതിതിരുവ വർധനവ് രാജ്യത്തെ പ്രതികൂലമായി ബാധിക്കുമെന്നും ട്രംപിന് അനുകൂലമായി പ്രധാനമന്ത്രി മോദിനില കൊണ്ടിട്ടും രാജ്യത്തിൻ്റെ താൽപര്യങ്ങൾ സംരക്ഷിക്കാനായില്ലെന്നും ഉദ്ഘാടന പ്രസംഗത്തിൽ ബിനോയ് വിശ്വം കുറ്റപ്പെടുത്തി. ജില്ലാ സെക്രട്ടറി വി.ബി. ബിനു അധ്യക്ഷത വഹിച്ചു. ആർ.രാജേന്ദ്രൻ, സി.കെ.ശശിധരൻ, ദേശീയ എക്സിക്യൂട്ടീവ് അംഗം പി. സന്തോഷ്കുമാർ എംപി,ജോൺ വി.ജോസഫ്, കെ.അജിത്ത്, എം.ഡി. ബാബുരാജ് തുടങ്ങിയവർ പ്രസംഗിച്ചു. പ്രതിനിധി സമ്മേളനം ഇന്ന്രാവിലെ 9.30ന് വൈക്കം എൻഎസ്എസ് ഓഡിറ്റോറിയത്തിലെ ആർ. ബിജുനഗറിൽ പ്രതിനിധി സമ്മേളനം ആരംഭിക്കും. ജില്ലയിലെ 11 മണ്ഡലം സമ്മേളനങ്ങളിൽനിന്നു തെരഞ്ഞെടുക്കപ്പെട്ട 325 പ്രതിനിധികളാണ് സമ്മേളനത്തിൽ പങ്കെടുക്കുന്നത്. 10.30 ന് വലിയ കവലയിലെ പ്രത്യേകം തയാറാക്കിയ സ്ക്വയറിലെ രക്തസാക്ഷി മണ്ഡപത്തിൽ പുഷ്പാർച്ചന നടത്തും. മുതിർന്ന നേതാവ് കെ.എസ്. മാധവൻ പതാക ഉയർത്തും. 11ന് സിപിഐ ദേശീയ എക്സിക്യൂട്ടീവ് അംഗം പി. സന്തോഷ്കുമാർ എംപി പ്രതിനിധി സമ്മേളനം ഉദ്ഘാടനം ചെയ്യും.

ക്രമരഹിത നിയമനം ചോദ്യംചെയ്തതിനു കള്ളക്കേസെന്ന്

കോട്ടയം: പ്രമുഖ ബാങ്കില്‍ സ്വീപ്പര്‍ അറ്റന്‍ഡര്‍ തസ്തികയിലേക്ക് ക്രമരഹിതമായി ജീവനക്കാരെ നിയമിച്ചത് ചോദ്യം ചെയ്ത തനിക്കെതിരേ കള്ളക്കേസുകള്‍ നല്‍കിയെന്ന് കാഞ്ഞിരപ്പള്ളി തമ്പലക്കാട് സ്വദേശി കെ. സന്ദീപ്. അനധികൃതമായി നിയമനം ലഭിച്ചവരാണു കള്ളക്കേസുകള്‍ നല്‍കിയത്. 2014ല്‍ പരസ്യം നല്‍കി റിക്രൂട്ട്‌മെന്‍റ് സ്വീപ്പര്‍ അറ്റന്‍ഡര്‍ പോസ്റ്റിലേക്ക് നടത്തിയ നിയമനം അനധികൃതമായിരുന്നു. പത്താം ക്ലാസ് വിജയിച്ചവരും പ്ലസ് ടു തോറ്റവര്‍ക്കുമാണു പ്രവേശനം നല്‍കേണ്ടത്. എന്നാല്‍ പ്ലസ് ടു, ഡിഗ്രി പരീക്ഷകള്‍ പാസായവര്‍ക്ക് പണം വാങ്ങി നിയമനം നല്‍കുകയാണുണ്ടായത്. ഉന്നത ഉദ്യോഗസ്ഥരുടെ സ്വാധീനത്തിലാണ് നിയമനം. പ്രാഥമിക അന്വേഷണത്തില്‍ 75 ലധികം ജീവനക്കാര്‍ അനധികൃതമായി പ്രവേശനം നേടിയെന്നു കണ്ടെത്തിയെന്നും സന്ദീപ് പത്രസമ്മേളനത്തില്‍ ആരോപിച്ചു. പ്രവേശനം നേടിയവര്‍ പ്ലസ് ടു പാസായതായി അന്വേഷണത്തില്‍ കണ്ടെത്തിയിട്ടുണ്ട്. ക്രമക്കേട് സംബന്ധിച്ച് റീജണല്‍ ഓഫീസില്‍ പരാതി നല്‍കുകയും ചെയ്തു. തനിക്കെതിരേ നല്‍കിയ പരാതികള്‍ വ്യാജമാണെന്ന് ഹൈക്കോടതി കണ്ടെത്തി വെറുതേവിട്ടെങ്കിലും ബാങ്ക് ജീവനക്കാരുടെ ഭീഷണി തുടരുകയാണെന്നും സന്ദീപ് പറഞ്ഞു.

ബിന്ദുവിന്‍റെ കുടുംബത്തിന് ധനസഹായം കൈമാറി

കോട്ടയം: മെഡിക്കല്‍ കോളജ് ആശുപത്രിക്കെട്ടിടഭാഗം തകര്‍ന്നുണ്ടായ അപകടത്തില്‍ മരിച്ച തലയോലപ്പറമ്പ് ഉമ്മാംകുന്ന് മേപ്പോത്തുകുന്നേല്‍ ബിന്ദുവിന് സര്‍ക്കാര്‍ പ്രഖ്യാപിച്ച സഹായധനം മന്ത്രി വി.എന്‍. വാസവന്‍ വീട്ടിലെത്തി കൈമാറി. ഇന്നലെ ഉച്ചകഴിഞ്ഞ് രണ്ടിനു വീടു സന്ദര്‍ശിച്ച മന്ത്രി പത്തു ലക്ഷം രൂപയുടെ ചെക്ക് ബിന്ദുവിന്‍റെ ഭര്‍ത്താവ് കെ. വിശ്രുതന്‍, അമ്മ സീതമ്മ, മകന്‍ നവനീത് എന്നിവര്‍ക്ക് കൈമാറി. ബിന്ദുവിന്‍റെ മരണത്തെത്തുടര്‍ന്ന് അടിയന്തര സഹായധനമായി 50,000 രൂപ നേരത്തേ സര്‍ക്കാര്‍ നല്‍കിയിരുന്നു. സി.കെ. ആശ എംഎല്‍എ, ജില്ലാ കളക്ടര്‍ ജോണ്‍ വി. സാമുവല്‍, എഡിഎം എസ്. ശ്രീജിത്ത്, വടയാര്‍ വില്ലേജ് ഓഫീസര്‍ മോളി ഡാനിയേല്‍ എന്നിവര്‍ കൂടെയുണ്ടായിരുന്നു. ബിന്ദുവിന്‍റെ കുടുംബത്തോടൊപ്പം സര്‍ക്കാര്‍ എന്നുമുണ്ടെന്ന് മന്ത്രി വി.എന്‍. വാസവന്‍ പറഞ്ഞു. മകള്‍ നവമിയുടെ ചികിത്സയ്ക്ക് ആവശ്യമായ എല്ലാ സഹായവും സര്‍ക്കാര്‍ നല്‍കി. മകന്‍ നവനീതിന് ദേവസ്വം ബോര്‍ഡില്‍ ജോലി നല്‍കാന്‍ മന്ത്രിസഭയുടെ ശിപാര്‍ശ പ്രകാരം ദേവസ്വം ബോര്‍ഡ് തീരുമാനിച്ചിട്ടുണ്ട്. അപേക്ഷ ലഭിച്ചാലുടന്‍ ജോലിയില്‍ പ്രവേശിപ്പിക്കും. എംജി സര്‍വകലാശാലയ്ക്കു കീഴിലുള്ള കോളജുകളിലെ എന്‍എസ്എസ് യൂണിറ്റുകളുടെ നേതൃത്വത്തില്‍ വീടിന്‍റെ നിര്‍മാണം ഇന്നു തുടങ്ങും. സര്‍ക്കാരിന്‍റെ പിന്തുണയിലും സഹായത്തിലും ഏറെ തൃപ്തിയുണ്ടെന്ന് ഭര്‍ത്താവ് വിശ്രുതനും അമ്മ സീതമ്മയും പറഞ്ഞു.

സിവില്‍ സര്‍വീസ് കായികമേള സെലക്‌ഷന്‍ ട്രയല്‍സ്

കോട്ടയം: സ്പോര്‍ട്സ് കൗണ്‍സിലിന്‍റെ ആഭിമുഖ്യത്തില്‍ സര്‍ക്കാര്‍ ജീവനക്കാര്‍ക്കായി സംഘടിപ്പിക്കുന്ന ജില്ലാതല സിവില്‍ സര്‍വീസ് കായിക മത്സരങ്ങളുടെ സെലക്‌ഷന്‍ ട്രയല്‍സ് 21, 22 തീയതികളില്‍ നടക്കും. അത്‌ലറ്റിക്സ്, ഫുട്‌ബോള്‍, വോളിബോള്‍, ബാസ്‌കറ്റ്ബോള്‍, ഹോക്കി, ഷട്ടില്‍, ഗുസ്തി, ബാഡ്മിന്‍റണ്‍, ബെസ്റ്റ് ഫിസിക്, പവര്‍ ലിഫ്റ്റിംഗ്, വെയ്റ്റ് ലിഫ്റ്റിംഗ്, കബഡി, ഖോ-ഖോ, സ്വിമ്മിംഗ്, ലോണ്‍ ടെന്നീസ് എന്നിവയുടെ സെലക്‌ഷന്‍ ട്രയല്‍സ് 21ന് പാലാ മുനിസിപ്പല്‍ സ്റ്റേഡിയത്തിലും ടേബിള്‍ ടെന്നീസ്, ചെസ്, ക്രിക്കറ്റ്, കാരംസ്, യോഗ എന്നിവയുടെ 22ന് കോട്ടയം ഇന്‍ഡോര്‍ സ്റ്റേഡിയത്തിലും നടക്കും. പങ്കെടുക്കുന്നവര്‍ രാവിലെ ഒന്‍പതിന് റിപ്പോര്‍ട്ട് ചെയ്യണം. ആറു മാസത്തില്‍ കൂടുതല്‍ സര്‍വീസുള്ള സ്ഥിരം ജീവനക്കാര്‍ക്കു പങ്കെടുക്കാം. മേലധികാരി സാക്ഷ്യപ്പെടുത്തിയ ഫോട്ടോ പതിച്ച എലിജിബിലിറ്റി ഫോം, രജിസ്ട്രേഷന്‍ ഫീസ് 200 രൂപ എന്നിവ സഹിതം 18ന് തിങ്കളാഴ്ച വൈകുന്നേരം അഞ്ചിന് മുമ്പായി ജില്ലാ സ്പോര്‍ട് കൗണ്‍സില്‍ ഓഫീസില്‍ ലഭ്യമാക്കണം. ഒന്നില്‍ കൂടുതല്‍ ഇനങ്ങളില്‍ പങ്കെടുക്കുന്നവര്‍ പ്രത്യേകം എലിജിബിലിറ്റി ഫോറത്തിന്‍റെ പകര്‍പ്പുകള്‍ ലഭ്യമാക്കണമെന്നും ജില്ലാ സ്പോര്‍ട്സ് കൗണ്‍സില്‍ സെക്രട്ടറി അറിയിച്ചു. 0481 -2563825, 8547575248.

ജയ്നമ്മയെ അറിയാമെന്ന് സെബാസ്റ്റ്യൻ; അന്വേഷണം വഴിത്തിരിവിലേക്ക്

ഏറ്റുമാനൂർ: അതിരമ്പുഴ കോട്ടമുറി സ്വദേശി ജയ്നമ്മ തിരോധാനക്കേസിലെ അന്വേഷണം വഴിത്തിരിവിലേക്ക്. അന്വേഷണത്തന്‍റെ ആദ്യഘട്ടത്തിൽ ചോദ്യം ചെയ്യലിനോട് സഹകരിക്കാതിരുന്ന പ്രതിയെന്നു കരുതുന്ന സെബാസ്റ്റ്യൻ ചോദ്യം ചെയ്യൽ മുന്നോട്ടു പോകുംതോറും അന്വേഷണ സംഘത്തോട് മനസു തുറന്നു വരുന്നതായാണ് സൂചന. സെബാസ്റ്റ്യന്‍റെ ഭാര്യയുടെ വെട്ടിമുകളിലെ വീട്ടുമുറ്റത്ത് പാർക്ക് ചെയ്തിരുന്ന സെബാസ്റ്റ്യന്‍റെ കാറിൽനിന്ന് ക്രൈംബ്രാഞ്ച് അന്വേഷണ സംഘം കത്തി, ചുറ്റിക, ഡീസലിന്‍റെ ഗന്ധമുള്ള കന്നാസ്, പഴ്സ് എന്നിവ കണ്ടെടുത്തിരുന്നു. 20 ലിറ്ററിന്‍റെ കന്നാസിൽ സെബാസ്റ്റ്യൻ ഡീസൽ വാങ്ങിയതായി സ്ഥിരീകരിച്ചിട്ടുണ്ട്. വ്യാഴാഴ്ച രാത്രി 11 ഓടെയാണ് കോട്ടയം ക്രൈംബ്രാഞ്ച് മിന്നൽ പരിശോധന നടത്തിയത്. കേസിൽ നിർണായകമാകാവുന്ന തെളിവുകൾ ഈ പരിശോധനയിലൂടെ ലഭിച്ചതായാണ് സൂചന. ചോദ്യം ചെയ്യലിന്‍റെ ആദ്യ ഘട്ടത്തിൽ സെബാസ്റ്റ്യൻ അന്വേഷണം വഴിതെറ്റിക്കുന്ന രീതിയിൽ പരസ്പര വിരുദ്ധമായ മൊഴി നൽകിയും തെറ്റായ വിവരങ്ങൾ നൽകിയും അന്വേഷണ സംഘത്തെ വലയ്ക്കുകയായിരുന്നു. എന്നാൽ, പിന്നീട് ജയ്നമ്മയെ പരിചയമുണ്ടെന്ന് ചോദ്യം ചെയ്യലിൽ ഇയാൾ സമ്മതിച്ചു. ഇരുവരും ഒന്നിച്ച് ചേർത്തലയിലെ ധ്യാനകേന്ദ്രം ഉൾപ്പെടെയുള്ള പ്രാർഥനാലയങ്ങളിൽ പോയിട്ടുണ്ടെന്നും പറയുന്നുണ്ട്. പക്ഷേ തിരോധാനക്കേസിലേക്ക് വഴിതുറക്കുന്ന വിവരങ്ങൾ നൽകുന്നില്ല. 10 ദിവസമായി ക്രൈംബ്രാഞ്ചിന്‍റെ കസ്റ്റഡിയിൽ. കസ്റ്റഡി കാലാവധി പൂർത്തിയായതിനെത്തുടർന്ന് വ്യാഴാഴ്ച കോടതിയിൽ ഹാജരാക്കിയ ഇയാളെ എഴുദിവസത്തേക്കുകൂടി ക്രൈംബ്രാഞ്ചിന്‍റെ കസ്റ്റഡിയിൽ വിട്ടു. സെബാസ്റ്റ്യന്‍റെ വീടിനോടു ചേർന്നുള്ള പുരയിടത്തിൽനിന്നു ലഭിച്ച മൃതദേഹാവശിഷ്ടങ്ങളുടെ ശാസ്ത്രീയ പരിശോധനാ ഫലങ്ങളും ഡിഎൻഎ പരിശോധനയുടെ ഫലവും ലഭിക്കുന്നതോടെ അന്വേഷണത്തിന് കൂടുതൽ വ്യക്തത കൈവരും. ജയ്നമ്മയുടെ മൊബൈൽ ഫോൺ കേന്ദ്രീകരിച്ചുള്ള അന്വേഷണമാണ് ക്രൈംബ്രാഞ്ച് അന്വേഷണ സംഘത്തെ സെബാസ്റ്റ്യനിലേക്ക് എത്തിച്ചത്. എന്നാൽ ഈ മൊബൈൽ ഫോൺ കണ്ടെത്താൻ ഇനിയും സാധിച്ചിട്ടില്ല. ജയ്നമ്മ തിരോധാനത്തിനു പിന്നിൽ സെബാസ്റ്റ്യൻ തന്നെയെന്ന് അന്വേഷണ സംഘത്തിന് ഉറപ്പായിട്ടുണ്ട്. കൂടുതൽ തെളിവുകൾ ലഭ്യമാകുന്നതോടെ സെബാസ്റ്റ്യന് കുറ്റം സമ്മതിക്കേണ്ടിവരുമെന്നു തന്നെയാണ് അന്വേഷണ സംഘം കരുതുന്നത്.

ആവേശം, അഭിമാനം കളര്‍ ഇന്ത്യയില്‍ തെളിഞ്ഞ് മാരിവില്ല്

കോട്ടയം: ദീപിക ഉയര്‍ത്തുന്ന സാമൂഹിക പ്രതിബദ്ധതയുടെ പതാകവാഹകരായി പുത്തന്‍ തലമുറയിലെ അനേകായിരം കുട്ടികള്‍ കളര്‍ ഇന്ത്യക്ക് നിറം പകര്‍ന്നു. ലഹരിക്കെതിരേ പോരാടുക, ഭാരതത്തന്‍റെ ഐക്യവും അഖണ്ഡതയും ഊട്ടിയുറപ്പിക്കുക എന്നീ സന്ദേശങ്ങളുമായി ദീപികയും ദീപിക ബാലസഖ്യവും കൈകോര്‍ത്ത് സംഘടിപ്പിച്ച ‘ദീപിക കളര്‍ ഇന്ത്യ’ മത്സരത്തെ സ്‌കൂളുകളും അധ്യാപകരും വിദ്യാര്‍ഥികളും ആവേശത്തോടെ വരവേറ്റു. ജില്ലയില്‍ വിവിധ സ്‌കൂളുകളിലായി ഒരു ലക്ഷത്തിലധികം വിദ്യാര്‍ഥികളാണ് ഒരേസമയം ഈ ചരിത്രയജ്ഞത്തില്‍ പങ്കാളികളായത്. ഭാരത സ്വാതന്ത്ര്യസമര ചരിത്രപാതയില്‍ എക്കാലവും അലയടിക്കുന്ന അഭിമാനപ്രക്ഷോഭമായ ക്വിറ്റ് ഇന്ത്യാ അനുസ്മരണദിനത്തിലാണ് നാളെയുടെ പ്രതീക്ഷകളായ ഇളംതലമുറ ദേശസ്‌നേഹത്തിന്‍റെ നിറക്കൂട്ട് നിറച്ചത്. രാജ്യത്തിന്‍റെ 79-ാമത് സ്വാതന്ത്ര്യദിനാഘോഷത്തിന്‍റെ ഭാഗമായി ദീപിക സംഘടിപ്പിക്കുന്ന കളര്‍ ഇന്ത്യ സീസണ്‍ 4 ജില്ലാതലം കോട്ടയം ലൂര്‍ദ് പബ്ലിക് സ്‌കൂള്‍ ആന്‍ഡ് ജൂണിയര്‍ കോളജില്‍ ചാണ്ടി ഉമ്മന്‍ എംഎല്‍എ ഉദ്ഘാടനം ചെയ്തു. ദീപിക ചീഫ് എഡിറ്റര്‍ റവ.ഡോ. ജോര്‍ജ് കുടിലില്‍ അധ്യക്ഷത വഹിച്ചു. ലൂര്‍ദ് ഫൊറോന പള്ളി വികാരി ഫാ. ജേക്കബ് വട്ടയ്ക്കാട്ട് മുഖ്യപ്രഭാഷണം നടത്തി. കാരിത്താസ് ആശുപത്രി ഡയറക്ടര്‍ റവ.ഡോ. ബിനു കുന്നത്ത്, സ്വാ ഡയമണ്ട്‌സ് ഡയറക്ടര്‍ ഫെലിക്‌സ് ജോണി കുരുവിള, ലൂര്‍ദ് പബ്ലിക് സ്‌കൂള്‍ പ്രിന്‍സിപ്പല്‍ ഫാ. തോമസ് പാറത്താനം എന്നിവര്‍ പ്രസംഗിച്ചു. ദീപിക പിആര്‍ഒ മാത്യു കൊല്ലമലക്കരോട്ട് സ്വാഗതവും ലൂര്‍ദ് സ്‌കൂള്‍ അധ്യാപിക എം.എ. പുഷ്പ കൃതജ്ഞതയും പറഞ്ഞു. വിവിധ സ്‌കൂളുകളില്‍നിന്നുള്ള പ്രമുഖര്‍ ഉദ്ഘാടനങ്ങള്‍ നടത്തി.എല്‍കെജി മുതല്‍ പ്ലസ് ടു വരെയുള്ളവരാണു വിവിധ വിഭാഗങ്ങളിലായി വര്‍ണോത്സവത്തില്‍ മാറ്റുരച്ചത്. മത്സരത്തോടനുബന്ധിച്ചു വിദ്യാര്‍ഥികള്‍ ദേശീയോദ്ഗ്രഥന പ്രതിജ്ഞ ചൊല്ലി.

എരുമേലി കൊച്ചുതോട്ടിൽ രാസമാലിന്യമൊഴുകുന്നു

എരുമേലി: ടൗണിന് സമീപമുള്ള കൊച്ചുതോട്ടിൽ രാസമാലിന്യമൊഴുകുന്നതായി പരാതി. തുരിശ് കലർന്ന നിലയിൽ വെളുപ്പുനിറത്തിൽ വെള്ളം ഒഴുകുന്നത് സമീപത്തെ വ്യാപാരികളുടെ ശ്രദ്ധയിൽപ്പെട്ടതോടെ പഞ്ചായത്ത്‌, ആരോഗ്യ വകുപ്പ് അധികൃതരെ അറിയിക്കുകയായിരുന്നു. ഇന്നലെ ഉച്ചയ്ക്കാണ് വെള്ളത്തിന്‍റെ നിറം മാറിത്തുടങ്ങിയത്. കഴിഞ്ഞ ദിവസം നീലനിറത്തിൽ വെള്ളം ഒഴുകിയിരുന്നു. രണ്ട് സംഭവങ്ങളും പഞ്ചായത്ത്‌, ആരോഗ്യ വകുപ്പ് അധികൃതരെ നാട്ടുകാർ അറിയിച്ചിട്ടും നടപടികൾ ഉണ്ടായിട്ടില്ല. വലിയതോട്ടിലാണ് കൊച്ചുതോട് അവസാനിക്കുന്നത്. മണിമലയാറിലെ കൊരട്ടിയിലാണ് വലിയ തോട് എത്തിച്ചേരുന്നത്. മണിമലയാറ്റിൽ ഒട്ടേറെ കുടിവെള്ള വിതരണ പദ്ധതികൾ പ്രവർത്തിക്കുന്നുണ്ട്. വെള്ളത്തിൽ രാസമാലിന്യമൊഴുകുന്നത് കുടിവെള്ള വിതരണത്തെ അനാരോഗ്യകരമാക്കുമെന്നും അധികൃതർ എത്രയും വേഗം നടപടികൾ സ്വീകരിക്കണമെന്നും നാട്ടുകാർ ആവശ്യപ്പെട്ടു.

നിയോജകമണ്ഡലം കൺവൻഷനും പ്രതിഭകളെ ആദരിക്കലും

മുണ്ടക്കയം: ദളിത് ഫ്രണ്ട്-എം പൂഞ്ഞാർ നിയോജക മണ്ഡലം കൺവൻഷനും വിവിധ രംഗങ്ങളിൽ മികവ് പ്രകടിപ്പിച്ച പ്രതിഭകളെ ആദരിക്കലും നാളെ നടക്കുമെന്ന് കേരള കോൺഗ്രസ്-എം പൂഞ്ഞാർ നിയോജകമണ്ഡലം പ്രസിഡന്‍റ് സാജൻ കുന്നത്ത്, ദളിത് ഫ്രണ്ട്-എം നിയോജകമണ്ഡലം പ്രസിഡന്‍റ് വി.വി. സോമൻ എന്നിവർ പത്രസമ്മേളനത്തിൽ അറിയിച്ചു. ഉച്ചകഴിഞ്ഞ് 2.30ന് മുണ്ടക്കയം സഹകരണ ബാങ്ക് ഓഡിറ്റോറിയത്തിൽ നടക്കുന്ന സമ്മേളനം വി.വി. സോമന്‍റെ അധ്യക്ഷതയിൽ ചീഫ് വിപ്പ് ഡോ. എൻ. ജയരാജ് ഉദ്ഘാടനം ചെയ്യും. സെബാസ്റ്റ്യൻ കുളത്തുങ്കൽ എംഎൽഎ മുഖ്യപ്രഭാഷണം നടത്തും. പുതിയതായി ദളിത് ഫ്രണ്ട്-എമ്മിലേക്ക് കടന്നുവരുന്ന അംഗങ്ങളെ നിയോജകമണ്ഡലം പ്രസിഡന്‍റ് സാജൻ കുന്നത്ത് മെംബർഷിപ്പ് നൽകി സ്വീകരിക്കും. കേരള കോൺഗ്രസ്-എം സംസ്ഥാന ജനറൽ സെക്രട്ടറി ജോർജുകുട്ടി ആഗസ്തി, ദളിത് ഫ്രണ്ട്-എം സംസ്ഥാന പ്രസിഡന്‍റ് ഉഷാലയം ശിവരാജൻ, ജില്ലാ പ്രസിഡന്‍റ് രാമചന്ദ്രൻ അള്ളുംപുറം, സംസ്ഥാന സെക്രട്ടറി രാജു കുഴിവേലിൽ, ജനപ്രതിനിധികളായ ടി.ജെ. മോഹനൻ, കെ.പി. സുജീലൻ, കെ.എസ്. മോഹനൻ, പി.പി. സുകുമാരൻ തുടങ്ങിയവർ പ്രസംഗിക്കും. പത്രസമ്മേളനത്തിൽ സംസ്ഥാന കമ്മിറ്റിയംഗം സണ്ണി കുറ്റിവേലി, നിയോജകമണ്ഡലം വൈസ് പ്രസിഡന്‍റ് പി.ടി. അശോകൻ പതാരിൽ, നിയോജകമണ്ഡലം കമ്മിറ്റിയംഗം ഇ.ടി. രഞ്ജിത്ത് എന്നിവരും പങ്കെടുത്തു.

വീട് കുത്തിത്തുറന്ന് മോഷണം: പ്രതി അറസ്റ്റിൽ

കാഞ്ഞിരപ്പള്ളി: വീട് കുത്തിത്തുറന്ന് മോഷണം നടത്തിയ കേസിലെ പ്രതി അറസ്റ്റിൽ. കൊട്ടാരക്കര കൊല്ലം കരിപ്ര സ്വദേശി അഭിരാജ് (32) ആണ് അറസ്റ്റിലായത്. കഴിഞ്ഞ് 21നായിരുന്നു സംഭവം. കാഞ്ഞിരപ്പള്ളി പാറത്തോട്ടിൽ വാടക വീടിന്‍റെ അടുക്കള ഭാഗത്തുള്ള കതക് ചവിട്ടിത്തുറന്ന് വീടിനുള്ളിൽ കയറി കിടപ്പുമുറിയുടെ അലമാരയിൽ ലോക്കറിനുള്ളിൽ സൂക്ഷിച്ചിരുന്ന 18 ഗ്രാം തൂക്കം വരുന്നതും 1,80,000 രൂപ വില വരുന്നതുമായ സ്വർണമാല മോഷ്ടിക്കുകയായിരുന്നു. ഭാര്യയുടെ ചികിത്സയ്ക്കായി കാഞ്ഞിരപ്പള്ളി ആശുപത്രിയിൽ പോയി തിരികെ വന്നപ്പോഴാണ് മോഷണം നടന്ന വിവരം അറിയുന്നത്. വീടിന്‍റെ അടുക്കള വാതിൽ തകർന്ന നിലയിലും വീടിനുള്ളിലെ മൂന്ന് അലമാരകളും കുത്തിത്തുറന്ന നിലയിലുമായിരുന്നു. പോലീസ് നടത്തിയ ശാസ്ത്രീയമായ അന്വേഷണത്തിൽ അടിമാലി ടൗണിൽ ലോഡ്ജിൽ ഒളിച്ചു താമസിക്കുകയായിരുന്ന പ്രതിയെ അറസ്റ്റ് ചെയ്യുകയായിരുന്നു.

എരുമേലി കൊച്ചുതോട്ടിൽ രാസമാലിന്യമൊഴുകുന്നു

എരുമേലി: ടൗണിന് സമീപമുള്ള കൊച്ചുതോട്ടിൽ രാസമാലിന്യമൊഴുകുന്നതായി പരാതി. തുരിശ് കലർന്ന നിലയിൽ വെളുപ്പുനിറത്തിൽ വെള്ളം ഒഴുകുന്നത് സമീപത്തെ വ്യാപാരികളുടെ ശ്രദ്ധയിൽപ്പെട്ടതോടെ പഞ്ചായത്ത്‌, ആരോഗ്യ വകുപ്പ് അധികൃതരെ അറിയിക്കുകയായിരുന്നു. ഇന്നലെ ഉച്ചയ്ക്കാണ് വെള്ളത്തിന്‍റെ നിറം മാറിത്തുടങ്ങിയത്. കഴിഞ്ഞ ദിവസം നീലനിറത്തിൽ വെള്ളം ഒഴുകിയിരുന്നു. രണ്ട് സംഭവങ്ങളും പഞ്ചായത്ത്‌, ആരോഗ്യ വകുപ്പ് അധികൃതരെ നാട്ടുകാർ അറിയിച്ചിട്ടും നടപടികൾ ഉണ്ടായിട്ടില്ല. വലിയതോട്ടിലാണ് കൊച്ചുതോട് അവസാനിക്കുന്നത്. മണിമലയാറിലെ കൊരട്ടിയിലാണ് വലിയ തോട് എത്തിച്ചേരുന്നത്. മണിമലയാറ്റിൽ ഒട്ടേറെ കുടിവെള്ള വിതരണ പദ്ധതികൾ പ്രവർത്തിക്കുന്നുണ്ട്. വെള്ളത്തിൽ രാസമാലിന്യമൊഴുകുന്നത് കുടിവെള്ള വിതരണത്തെ അനാരോഗ്യകരമാക്കുമെന്നും അധികൃതർ എത്രയും വേഗം നടപടികൾ സ്വീകരിക്കണമെന്നും നാട്ടുകാർ ആവശ്യപ്പെട്ടു.

ദീപിക കളർ ഇന്ത്യ പെയിന്‍റിംഗ് കോന്പറ്റീഷൻ വർണാഭമായി

കാഞ്ഞിരപ്പള്ളി: ദീപിക കളര്‍ ഇന്ത്യ പെയിന്‍റിംഗ് കോന്പറ്റീഷൻ സീസണ്‍-4 കാഞ്ഞിരപ്പള്ളി മേഖലാതല ഉദ്ഘാടനം കുന്നുംഭാഗം സെന്‍റ് ജോസഫ്സ് പബ്ലിക് സ്കൂളിൽ കാഞ്ഞിരപ്പള്ളി രൂപത വികാരി ജനറാൾ ഫാ. ബോബി അലക്സ് മണ്ണംപ്ലാക്കൽ നിർവഹിച്ചു. പ്രിൻസിപ്പൽ സിസ്റ്റർ ലിറ്റിൽ റോസ് എസ്എബിഎസ് അധ്യക്ഷത വഹിച്ച യോഗത്തിൽ രാഷ്‌ട്രദീപിക ലിമിറ്റഡ് ഡയറക്ടർ ഷെവ. വി.സി. സെബാസ്റ്റ്യൻ മുഖ്യപ്രഭാഷണം നടത്തി. ഡിസിഎൽ നാഷണൽ കോ-ഓർഡിനേറ്റർ വർഗീസ് കൊച്ചുകുന്നേൽ, സീനിയർ മാനേജർ ബിജു തോമസ്, സീനിയർ ഏരിയാ മാനേജർ സിജു ജോർജ് എന്നിവർ പ്രസംഗിച്ചു. ചിത്രകാരി മേഘ അജി കാൻവാസിൽ ചിത്രരചന നടത്തിയാണ് മത്സരത്തിന് തുടക്കമിട്ടത്. മേഖലയിലെ 25000ൽപരം കുട്ടികൾ വിവിധ സ്കൂളുകളിലായി മത്സരത്തിൽ പങ്കുചേർന്നു. മുണ്ടക്കയം: ദീപിക കളർ ഇന്ത്യ മുണ്ടക്കയം മേഖലാതല മത്സര ഉദ്ഘാടനം മുണ്ടക്കയം സെന്‍റ് ജോസഫ് സെൻട്രൽ സ്കൂളിൽ രാഷ്‌ട്രദീപിക ലിമിറ്റഡ് ഡയറക്ടർ ഷെവ. അഡ്വ. വി.സി. സെബാസ്റ്റ്യൻ നിർവഹിച്ചു. ഡിസിഎൽ നാഷണൽ കോ-ഓർഡിനേറ്റർ വർഗീസ് കൊച്ചുകുന്നേൽ മുഖ്യപ്രഭാഷണം നടത്തി. പ്രിൻസിപ്പൽ ഫാ. തോമസ് നല്ലന്നാടിയിൽ, സ്കൂൾ മാനേജർ ഫാ. മത്തായി മണ്ണൂർവടക്കേതിൽ, അൻസാഫ് സിയാദ്, എബിൻ സോണി, ശ്രീദേവി ബിജു തുടങ്ങിയവർ പ്രസംഗിച്ചു.

യൂത്ത് ഫ്രണ്ട്-എം റാലിയും പൊതുസമ്മേളനവും ഇന്ന്

പാലാ: യൂത്ത് ഫ്രണ്ട്-എം യുവജന റാലിയും പൊതുസമ്മേളനവും ഇന്നു വൈകുന്നേരം നാലിന് പാലാ ടൗണില്‍ നടക്കും. യൂത്ത് ഫ്രണ്ട്-എം പാലാ നിയോജകമണ്ഡലം കമ്മിറ്റിയുടെ ആഭിമുഖ്യത്തില്‍ നിയോജക മണ്ഡലത്തിലെ 12 പഞ്ചായത്തുകളില്‍നിന്നും പാലാ മുനിസിപ്പാലിറ്റിയില്‍ നിന്നുമാണ് യുവജനങ്ങള്‍ പങ്കെടുക്കുന്ന മഹാറാലി നടത്തുന്നത്. റാലിക്കു ശേഷം നടക്കുന്ന പൊതുസമ്മേളനം ജോസ് കെ. മാണി എംപി ഉദ്ഘാടനം ചെയ്യും. യൂത്ത് ഫ്രണ്ട്-എം പാലാ നിയോജകമണ്ഡലം പ്രസിഡന്‍റ് തോമസുകുട്ടി വരിക്കയില്‍ അധ്യക്ഷത വഹിക്കും. റാലിക്കും പൊതുസമ്മേളനത്തിനും നിയോജകമണ്ഡലം പ്രസിഡന്‍റ് തോമസുകുട്ടി വരിക്കയില്‍, സംസ്ഥാന സെക്രട്ടറിമാരായ സുനില്‍ പയ്യപ്പള്ളി, സിജോ പ്ലാത്തോട്ടം, ടോബി തൈപ്പറമ്പില്‍, മനു തെക്കേല്‍ തുടങ്ങിയവര്‍ നേതൃത്വം നല്‍കും.

ശ്രീനാരായണഗുരു ഓപ്പൺ യൂണിവേഴ്‌സിറ്റി പ്രാദേശികകേന്ദ്രം ദേവമാതാ കോളജിൽ

കുറവിലങ്ങാട്: അനേകായിരങ്ങൾക്ക് ഉന്നതവിദ്യാഭ്യാസത്തിനും തുടർപഠനത്തിനും അവസരം സമ്മാനിക്കുന്ന ശ്രീനാരായണഗുരു ഓപ്പൺ യൂണിവേഴ്‌സിറ്റിയുടെ പ്രാദേശികകേന്ദ്രം ദേവമാതാ കോളജിൽ പ്രവർത്തനം ആരംഭിക്കും. ഇതുസംബന്ധിച്ച അനുമതി ലഭിച്ചതായി കോളജ് മാനേജർ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, പ്രിൻസിപ്പൽ ഡോ. സുനിൽ സി. മാത്യു, വൈസ് പ്രിൻസിപ്പൽ ഫാ. മാത്യു കവളമ്മാക്കൽ ബർസാർ ഫാ. ജോസഫ് മണിയഞ്ചിറ എന്നിവർ വാർത്താസമ്മേളനത്തിൽ അറിയിച്ചു. നാക് അക്രഡിറ്റേഷനിൽ 3.67 ഗ്രേഡ് പോയിന്‍റും എൻഐആർഎഫ്, കെആർഎഫ് നിലവാരത്തിൽ ജില്ലയിൽതന്നെ മുൻനിരയിലുമുള്ള കോളജിന് സംസ്ഥാനത്തെ ആദ്യത്തെ വിദൂരവിദ്യാഭ്യാസ സർവകലാശാലയുടെ കേന്ദ്രമാകാൻ കഴിഞ്ഞത് വലിയ നേട്ടമായിട്ടുണ്ട്. ശ്രീനാരായണഗുരു ഓപ്പൺ സർവകലാശാലയുടെ 32 കോഴ്‌സുകളിൽ 28 കോഴ്‌സുകൾക്കാണ് ദേവമാതാ കോളജിൽ അവസരം ലഭിക്കുക. കോളജിന്‍റെ ലൈബ്രറി, ലബോറട്ടറി സൗകര്യങ്ങളും പുതിയ കോഴ്‌സുകളിലെത്തുന്ന പഠിതാക്കൾക്കായി പ്രയോജനപ്പെടുത്തും. അടുത്ത മാസത്തോടെ പ്രവേശനനടപടികൾ ആരംഭിക്കുമെന്ന് സ്റ്റഡി സെന്‍റർ കോ-ഓർഡിനേറ്റർ റെനീഷ് തോമസ് പറഞ്ഞു. കോളജിന് അനുവദിച്ചിട്ടുള്ള കോഴ്‌സുകൾ ബിഎ മലയാളം, ഇംഗ്ലീഷ്, ഹിന്ദി, അറബിക്, സംസ്‌കൃതം, അഫ്‌സൽ ഉൽ ഉലമ, ഇക്കണോമിക്‌സ്, സോഷ്യോളജി, ഹിസ്റ്ററി, ഫിലോസഫി, പൊളിറ്റിക്കൽ സയൻസ്, സൈക്കോളജി, നാനോ എന്‍റർപ്രണർഷിപ്പ്, ബിസിഎ, ബിബിഎ, ബികോം. എംഎ മലയാളം, ഇംഗ്ലീഷ്, അറബിക്, ഹിന്ദി, സംസ്‌കൃതം, ഇക്കണോമിക്‌സ്, സോഷ്യോളജി, ഹിസ്റ്ററി, ഫിലോസഫി, പൊളിറ്റിക്കൽ സയൻസ്, പബ്ലിക് അഡ്മിനിസ്‌ട്രേഷൻ, എംകോം.

കര്‍ശന നടപടി വേണം: കത്തോലിക്ക കോണ്‍ഗ്രസ്

പാലാ: ഒഡീഷയിലെ ജലേശ്വറില്‍ വൈദികരെയും കന്യാസ്ത്രീകളെയും ആക്രമിച്ചതില്‍ കത്തോലിക്കാ കോണ്‍ഗ്രസ് പാലാ രൂപതാസമിതി പ്രതിഷേധിച്ചു. ന്യൂനപക്ഷങ്ങള്‍ക്കെതിരേ തുടര്‍ച്ചയായി ആക്രമണങ്ങള്‍ ഉണ്ടാകാന്‍ കാരണം കുറ്റക്കാര്‍ക്കെതിരേ അധികാരികളുടെ ഭാഗത്തുനിന്നു നടപടികള്‍ ഉണ്ടാകാത്തതാണെന്ന് സമിതി വിലയിരുത്തി. ആക്രമിക്കപ്പെട്ട മലയാളി വൈദികനായ ഫാ. ലിജോ നിരപ്പേലിന്‍റെ വീട് കത്തോലിക്ക കോണ്‍ഗ്രസ് രൂപത ഡയറക്ടര്‍ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍, പ്രസിഡന്‍റ് ഇമ്മാനുവല്‍ നിധീരി, ജനറല്‍ സെക്രട്ടറി ജോസ് വട്ടുകുളം തുടങ്ങിയവരുടെ നേതൃത്വത്തില്‍ സന്ദര്‍ശിച്ച് ബന്ധുക്കളെ ആശ്വസിപ്പിച്ചു.

മരങ്ങാട്ടുപിള്ളി സെന്‍റ് തോമസ് ഹൈസ്‌കൂള്‍ പ്ലാറ്റിനം ജൂബിലി നിറവില്‍

മരങ്ങാട്ടുപിള്ളി: മരങ്ങാട്ടുപിള്ളി ഗ്രാമത്തിന്‍റെ തിലകക്കുറിയായി വര്‍ത്തിക്കുന്ന സെന്‍റ് തോമസ് ഹൈസ്‌കൂള്‍ പ്ലാറ്റിനം ജൂബിലി നിറവിലേക്ക്. 11ന് ഉച്ചകഴിഞ്ഞ് രണ്ടിന് സെന്‍റ് ഫ്രാന്‍സിസ് അസീസി ഓഡിറ്റോറിയത്തില്‍ നടക്കുന്ന ജൂബിലി ആഘോഷ സമ്മേളനത്തിൽ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍ അധ്യക്ഷത വഹിക്കും. ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. മോന്‍സ് ജോസഫ് എംഎല്‍എ സ്മാര്‍ട്ട് ക്ലാസ് റൂമുകളുടെ ഉദ്ഘാടനം നിര്‍വഹിക്കും. രൂപത കോർപറേറ്റ് സെക്രട്ടറി ഫാ. ജോര്‍ജ് പുല്ലുകാലായില്‍ മുഖ്യപ്രഭാഷണം നടത്തും. മുന്‍ അഡീഷണല്‍ ചീഫ് സെക്രട്ടറി ടി.കെ. ജോസ് ജൂബിലി ലോഗോ പ്രകാശനം ചെയ്യും. ത്രിതല പഞ്ചായത്ത് പ്രതിനിധികൾ, രാഷ്‌ട്രീയ, സാമുദായിക, സാംസ്‌കാരിക നേതാക്കള്‍ തുടങ്ങിയവര്‍ പ്രസംഗിക്കും. 1920ല്‍ ഫാ. വര്‍ഗീസ് പുളിക്കീല്‍ സെന്‍റ് ഫ്രാന്‍സിസ് അസീസി പള്ളി വികാരിയായിരുന്നപ്പോള്‍ ആരംഭിച്ച എല്‍പി സ്‌കൂളാണ് 1948ല്‍ യുപി സ്‌കൂളായും 1951 ഓഗസ്റ്റില്‍ ഹൈസ്‌കൂളായും ഉയര്‍ത്തപ്പെട്ടത്. മരങ്ങാട്ടുപിള്ളി പ്രദേശത്തെ നാനാജാതി മതസ്ഥരായ കുട്ടികള്‍ക്ക് മികവുറ്റ അടിസ്ഥാന വിദ്യാഭ്യാസം നല്‍കുക എന്ന ലക്ഷ്യത്തോടെ ആരംഭിച്ച വെര്‍ണാക്കുലര്‍ മലയാളം സ്‌കൂളാണ് സെന്‍റ് തോമസ് സ്‌കൂളായി മാറിയത്. ഫാ. ഏബ്രഹാം തൊണ്ടിക്കലായിരുന്നു സ്‌കൂളിന്‍റെ ആദ്യത്തെ ഹെഡ്മാസ്റ്റര്‍. സ്‌കൂള്‍ മാനേജര്‍മാരായ ഫാ. സെബാസ്റ്റ്യന്‍ ആലപ്പാട്ടുകുന്നേല്‍, ഫാ. ജോര്‍ജ് വഞ്ചിപ്പുരയ്ക്കല്‍ എന്നിവര്‍ വികസനപ്രവര്‍ത്തനങ്ങള്‍ ഒരുക്കി. ഇപ്പോള്‍ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍, ഹെഡ്മിസ്ട്രസ് ലിന്‍റാ എസ്. പുതിയാപറമ്പില്‍, പിടിഎ പ്രസിഡന്‍റ് റോബിന്‍ കരിപ്പാത്ത് എന്നിവര്‍ നേതൃത്വം നല്‍കുന്നു. സെന്‍റ് തോമസില്‍ പഠിച്ചു പടിയിറങ്ങിയ അനേകം പൂര്‍വവിദ്യാര്‍ഥികള്‍ സമൂഹത്തിലെ വിവിധ മേഖലകളില്‍ പ്രശോഭിക്കുന്നു. പാഠ്യ-പാഠ്യേതര പ്രവര്‍ത്തനങ്ങളില്‍ സ്‌കൂള്‍ മികച്ച നിലവാരം പുലര്‍ത്തി വരുന്നു. വര്‍ഷങ്ങളായി ശാസ്ത്രവിഷയങ്ങളില്‍ ദേശീയ-സംസ്ഥാന-ജില്ലാ തലങ്ങളിലും, കാര്‍ഷിക പ്രവര്‍ത്തനങ്ങളില്‍ സംസ്ഥാന-ജില്ലാ തലങ്ങളിലും, പാലാ രൂപത എഡ്യൂക്കേഷണല്‍ ഏജന്‍സി 2022ല്‍ ഏര്‍പ്പെടുത്തിയ കാര്‍ഷിക സ്‌കൂളിനുള്ള പ്രഥമ അവാര്‍ഡും 2024ലെ അവാര്‍ഡും സ്കൂളിനു ലഭിച്ചു. പത്രസമ്മേളനത്തില്‍ സ്‌കൂള്‍ മാനേജര്‍ ഫാ. ജോസഫ് ഞാറക്കാട്ടില്‍, ഹെഡ്മിസ്ട്രസ് ലിന്‍റാ എസ്. പുതിയാപറമ്പില്‍, ജനറല്‍ കണ്‍വീനര്‍ അലക്‌സ് കൊട്ടാരം, പിടിഎ പ്രസിഡന്‍റ് റോബിന്‍ കരിപ്പാത്ത്, ജോണ്‍സണ്‍ പുളിക്കിയില്‍, ജോസുകുട്ടി ഉപ്പാന്തടം, ടി.എസ്. ജയിംസ് എന്നിവര്‍ പങ്കെടുത്തു.

ഫോട്ടോഗ്രഫി വർക്ക്ഷോപ്പ് സംഘടിപ്പിച്ചു

ചങ്ങനാശേരി: അസംപ്‌ഷൻ കോളജ് കമ്യൂണിക്കേറ്റീവ് ഇംഗ്ലീഷ് വിഭാഗത്തിന്‍റെ നേതൃത്വത്തിൽ ഫോട്ടോഗ്രഫി വർക്ക്ഷോപ്പ് നടത്തി. പ്രഫഷണൽ ഫോട്ടോഗ്രാഫർ ഡീജേഷ് മദനൻ പരിശീലന പരിപാടികൾക്ക് നേതൃത്വം നൽകി. യുവതലമുറയ്ക്ക് ഫോട്ടോഗ്രാഫിയുടെ സാധ്യതകളെ കുറിച്ചു മനസിലാക്കാൻ ഇത്തരത്തിലുള്ള പരിശീലന പരിപാടികൾ സഹായിക്കുമെന്ന് കമ്യൂണിക്കേറ്റീവ് ഇംഗ്ലീഷ് വിഭാഗം മേധാവി ഫാ. ബിജു കാഞ്ചിക്കൽ അഭിപ്രായപ്പെട്ടു. വിവിധ ഡിപ്പാർട്മെന്‍റുകളിൽ നിന്നായി നിരവധി വിദ്യാർഥികൾ വർക്ക്‌ഷോപ്പിൽ പങ്കെടുത്തു.

സാമ്രാജ്യത്തെ വിരുദ്ധ സദസ് സംഘടിപ്പിച്ച് അരുവിത്തുറ കോളജിലെ പൊളിറ്റിക്സ് വിഭാഗം

അരുവിത്തുറ: ക്വിറ്റ് ഇന്ത്യ ദിനത്തിൽ സാമ്രാജ്യത്തെ വിരുദ്ധ പ്രതിജ്ഞയും സദസും സംഘടിപ്പിച്ച് അരുവിത്തുറ സെന്‍റ് ജോർജ് കോളജിലെ പൊളിറ്റിക്സ് വിഭാഗം. ബിഗ് ബോസ് മുൻ താരവും വാഗ്മിയുമായ ഡോ. അഡോണി ടി. ജോൺ വിദ്യാർഥികൾക്ക് പ്രതിജ്ഞ ചൊല്ലിക്കൊടുത്തു. തുടർന്ന് നടന്ന സാമ്രാജ്യത്വ വിരുദ്ധ സദസ് അദ്ദേഹം ഉദ്ഘാടനം ചെയ്തു. നവലിബറൽ സാമ്രാജ്യത്വം രാജ്യത്തിന്‍റെ സമസ്ത മേഖലകളിലും പിടിമുറുക്കിയ സാഹചര്യത്തിൽ ക്വിറ്റ് ഇന്ത്യ ദിനത്തിന്‍റെ സ്മരണകൾ പോലും ഒരു സമരമായി മാറുമെന്ന് അദ്ദേഹം പറഞ്ഞു. ചടങ്ങിൽ കോളജ് ബർസാർ റവ.ഫാ. ബിജു കുന്നയ്ക്കാട്ട്, വൈസ് പ്രിൻസിപ്പൽ ഡോ. ജിലു ആനി ജോൺ, പൊളിറ്റിക്സ് വിഭാഗം മേധാവി ഡോ. തോമസ് പുളിക്കൻ, പൊളിറ്റിക്സ് വിഭാഗം അധ്യാപകനായ സിറിൾ സൈമൺ തുടങ്ങിയവർ സംസാരിച്ചു.

ഭൗതികശാസ്ത്രത്തിലെ ജീവൻ രക്ഷാ ഉപായങ്ങൾ: അരുവിത്തുറ കോളജിൽ പ്രഭാഷണ പരമ്പര

അരുവിത്തുറ: ഭൗതികശാസ്ത്രത്തിലെ ജീവൻ രക്ഷാ ഉപായങ്ങളെക്കുറിച്ചും ആരോഗ്യരംഗത്ത് ഭൗതികശാസ്ത്രത്തിന്‍റെ സ്വാധീനത്തെക്കുറിച്ചും അരുവിത്തുറ സെന്‍റ് ജോർജ് കോളജിൽ പ്രഭാഷണ പരമ്പര സംഘടിപ്പിച്ചു. തൊടുപുഴ ന്യൂമാൻ കോളജിലെ ഭൗതിക ശാസ്ത്ര വിഭാഗം മേധാവി ഡോ. ബിനാ മേരി ജോൺ പ്രഭാഷണ പരമ്പരയുടെയും ഫിസിക്സ് അസോസിയേഷന്‍റെയും ഉദ്ഘാടനം നിർവഹിച്ചു. ഭൗതികശാസ്ത്രം ആരോഗ്യ മേഖലയുടെ അഭിവാജ്യ ഘടകമായി മാറിക്കഴിഞ്ഞു. ഭൗതികശാസ്ത്രത്തിലെ പുതിയ കണ്ടെത്തലുകൾ ആരോഗ്യ മേഖലയിൽ വിപ്ലവകരമായ മാറ്റങ്ങൾ സൃഷ്‌ടിക്കുമെന്നും അവർ പറഞ്ഞു. ഡിപ്പാർട്ട്മെന്‍റ് മേധാവി ഡോ. സന്തോഷ് കുമാർ അധ്യക്ഷത വഹിച്ച ചടങ്ങിൽ വൈസ് പ്രിൻസിപ്പൽ ഡോ. ജിലു ആനി ജോൺ ആശംസകൾ നേർന്നു. ചടങ്ങിൽ വിദ്യാർഥികൾക്കൊപ്പം അധ്യാപകരായ ഡോ. സുമേഷ് ജോർജ്, ബിറ്റി ജോസഫ്, ഡാനാ ജോസ്, മരിയ ജോസ്, നിഷ ജോസഫ് തുടങ്ങിയവർ പങ്കെടുത്തു.

എസ്എൻസിപി യോഗം താലൂക്ക് നേതൃസംഗമം നാളെ

ചങ്ങനാശേരി: എസ്എൻഡിപി യോഗം ചങ്ങനാശേരി യൂണിയന്‍റെ ശാഖാ നേതൃത്വ സംഗമം നാളെ ഉച്ചകഴിഞ്ഞ് രണ്ടിനു കോണ്ടൂർ ബാക്ക് വാട്ടർ റിസോർട്ടിൽ നടത്തും. എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ അധ്യക്ഷത വഹിക്കും. വൈസ് പ്രസിഡന്‍റ് തുഷാർ വെള്ളാപ്പള്ളി സംഘടനാ വിശദീകരണം നടത്തും. എസ്എൻഡിപി യോഗം ദേവസ്വം സെക്രട്ടറി അരയാക്കണ്ടി സന്തോഷ് സംഘടനാ സന്ദേശം നൽകും. ചങ്ങനാശേരി യൂണിയന്‍റെ കീഴിലുള്ള 59 ശാഖകളുടെ ഭാരവാഹികൾ, കുടുംബയൂണിറ്റ് ഭാരവാഹികൾ, പോഷക സംഘടനാ ഭാരവാഹികൾ ഉൾപ്പെടെ 1800ൽ അധികം പേർ പങ്കെടുക്കും. ആനുകാലിക വിഷയങ്ങളെ സംബന്ധിച്ച കാര്യങ്ങൾ സംഗമത്തിൽ ചർച്ച ചെയ്യും. നേതൃത്വ സംഗമത്തിനുള്ള ഒരുക്കങ്ങൾ പൂർത്തിയായതായി യൂണിയൻ പ്രസിഡന്‍റ് ഗിരീഷ് കോനാട്ട്, സെക്രട്ടറി സുരേഷ് പരമേശ്വരൻ, വൈസ് പ്രസിഡന്‍റ് പി.എം. ചന്ദ്രൻ എന്നിവർ അറിയിച്ചു.

അപ്‌സര തിയറ്ററിനു മുമ്പില്‍ റോഡും ഓടയുടെ സ്ലാബും തകര്‍ന്നു

ചങ്ങനാശേരി: റോഡ് നന്നാക്കണേല്‍ വാഴ കുലയ്ക്കണോ... നഗരവാസികളായ ആളുകളുടെ ചോദ്യമാണിത്. ചങ്ങനാശേരി വാഴൂര്‍ റോഡില്‍ അരമനപ്പടിക്കടുത്ത് അപ്‌സര തീയറ്ററിനു മുമ്പില്‍ റോഡിന്‍റെ ഓടയുടെ മുകളിലെ സ്ലാബ് തകര്‍ന്നതിനെ തുടര്‍ന്നാണ് നാട്ടുകാരും ഓട്ടോറിക്ഷ ഡ്രൈവര്‍മാരും ചേര്‍ന്നു വാഴ നട്ടത്. പ്രതിഷേധസൂചകമായാണ് വാഴ നട്ടത്. നഗരസഭാധികൃതരോ പൊതുമരാമത്ത് ഉദ്യോഗസ്ഥരോ റോഡിന്‍റെ ശോച്യാവസ്ഥ പരിഹരിക്കാൻ നടപടിയെടുക്കുമെന്നു കരുതിയായിരുന്നു വാഴ നട്ടത്. എന്നാല്‍, അധികാരികളുടെ ഭാഗത്തുനിന്നു യാതൊരു പ്രതികരണവും ഉണ്ടാകാതെ വന്നതോടെയാണ് റോഡ് നന്നാകണേല്‍ വാഴ കുലയ്ക്കണോയെന്ന് ആളുകള്‍ ചോദിച്ചു തുടങ്ങിയത്.

എസി റോഡിലെ മനയ്ക്കച്ചിറയിൽ വാഹനങ്ങളുടെ കൂട്ടയിടി; ഒരാൾക്കു പരിക്ക്

ചങ്ങനാശേരി: എസി റോഡിൽ മനയ്ക്കച്ചിറ കോണ്ടൂർ റിസോർട്ടിന് സമീപം അമിതവേഗത്തിലെത്തിയ കാർ മറ്റൊരു കാറിലും സ്കൂട്ടറിലും ഇടിച്ച് അപകടം. ഇന്നലെ രാത്രി ഒമ്പതോടെയാണ് സംഭവം. പെരുന്ന ഭാഗത്തുനിന്നു ആലപ്പുഴ ഭാഗത്തേക്ക് പോയ മാരുതി കാറിൽ ആലപ്പുഴ ഭാഗത്തുനിന്ന് അമിത വേഗത്തിൽ വന്ന മറ്റൊരു കാർ ഇടിക്കുകയായിരുന്നു. അപകടശേഷം നിർത്താതെ പോയ ആലപ്പുഴ ഭാഗത്തുനിന്നു വന്ന കാർ ബൈക്കിൽ ഇടിച്ചിട്ടും നിർത്താതെ മുന്നോട്ടുപോയെങ്കിലും 100 മീറ്റർ അകലെ കോണ്ടൂർ റിസോർട്ടിനു മുന്നിൽ തനിയെ നിന്നു പോവുകയായിരുന്നു. ഇടിയുടെ ആഘാതത്തിൽ മാരുതിക്കാർ തലകീഴായി മറിഞ്ഞു. അപകടത്തിൽ ഗുരുതരമായ പരിക്കേറ്റ സ്കൂട്ടർ യാത്രികനെ നാട്ടുകാർ ആശുപത്രിയിൽ പ്രവേശിപ്പിച്ചു. പരിക്കേറ്റ സ്കൂട്ടർ യാത്രികൻ തന്‍റെയൊപ്പം മറ്റൊരാൾ കൂടിയുണ്ടെന്ന് പറഞ്ഞതിനെത്തുടർന്ന് പോലീസും ഫയർഫോഴ്സും എത്തി പ്രദേശത്ത് തെരച്ചിൽ നടത്തി. അപകടത്തിനിടയാക്കിയ എറണാകുളം രജിസ്ട്രേഷനിലുള്ള കാറിലുണ്ടായിരുന്ന രണ്ടുപേർ സംഭവസ്ഥലത്തുനിന്നും അപകട ശേഷം രക്ഷപ്പെട്ടതായി ദൃക്സാക്ഷികൾ പറഞ്ഞു. ഈ കാറിന്‍റെ മുൻവശം പൂർണമായി തകർന്ന് ടയറുകൾ ഇളകിയ നിലയിലാണ്. മാരുതിക്കാറിനും നാശം നേരിട്ടിട്ടുണ്ട്.

തെങ്ങണയില്‍ പരസ്യബോര്‍ഡ് സ്ഥാപിക്കവേ വൈദ്യുതലൈനില്‍ തട്ടി; രണ്ടുപേര്‍ക്കു ഷോക്കേറ്റു

ചങ്ങനാശേരി: പരസ്യ ബോര്‍ഡ് സ്ഥാപിക്കുന്നതിനിടെ‍ ബോര്‍ഡ് ചെരിഞ്ഞ് ട്രാന്‍സ്‌ഫോര്‍മറിലെ 11 കെവി ലൈനിലേക്കുവീണ് രണ്ടു യുവാക്കള്‍ക്ക് ഷോക്കേറ്റു. തിരുവനന്തപുരം സ്വദേശികളായ രാജേഷ്(28), ജിത്തു (26) എന്നിവര്‍ക്കാണ് പരിക്കേറ്റത്. ഇന്നലെ ഉച്ചകഴിഞ്ഞ് 2.45ന് തെങ്ങണ ജംഗ്ഷനിലുള്ള വസ്ത്രവ്യാപാര സ്ഥാപനത്തിന്‍റെ ബോക്‌സ് രൂപത്തിലുള്ള ഫ്‌ളെക്‌സ് ബോര്‍ഡ് ഇരുമ്പുപൈപ്പില്‍ സ്ഥാപിക്കുമ്പോള്‍ ബോര്‍ഡ് സമീപത്തെ ട്രാന്‍സ്‌ഫോര്‍മറിലേക്കുള്ള 11 കെവി ലൈനില്‍ തട്ടുകയായിരുന്നു. വസ്ത്രസ്ഥാപനത്തിനുവേണ്ടി സ്ഥാപിച്ച ട്രാന്‍സ്‌ഫോർമറിലാണ് ബോര്‍ഡ് മുട്ടിയത്. വൈദ്യുതാഘാതമേറ്റ രാജേഷ് ട്രാന്‍സ്‌ഫോര്‍മറിന്‍റെ വേലിക്കെട്ടിനു പുറത്തേക്കും ജിത്തു വേലിക്കെട്ടിനകത്തേക്കും വീണു. അബോധാവസ്ഥയിലായ രാജേഷിന് സംഭവസ്ഥലത്തുണ്ടായിരുന്ന പാമ്പാടി താലൂക്ക് ആശുപത്രിയിലെ ആംബുലന്‍സ് ഡ്രൈവര്‍ തെങ്ങണ നടപ്പുറം അഭിലാഷ് സിപിആര്‍ നല്‍കിയതോടെ ബോധം തിരികെക്കിട്ടി. തുടര്‍ന്ന് രാജേഷിനെ ഓട്ടോറിക്ഷയില്‍ ചങ്ങനാശേരി ജനറല്‍ ആശുപത്രിയില്‍ എത്തിച്ചു. പിന്നാലെ ഇതുവഴി എത്തിയ പാമ്പാടി ഫയര്‍ഫോഴ്‌സ് യൂണിറ്റിന്‍റെ വാഹനം അഭിലാഷ് കൈകാണിച്ചുനിര്‍ത്തി സഹായമഭ്യര്‍ഥിച്ചു. ഫയര്‍ഫോഴ്‌സിന്‍റെയും അപകട വിവരമറിഞ്ഞെത്തിയ കെഎസ്ഇബി തെങ്കണ സെക്ഷനിലെ ജീവനക്കാരുടേയും സഹായത്തോടെ വൈദ്യുതിബന്ധം വിച്ഛേദിച്ചാണ് ട്രാന്‍സ്ഫോർമറിന്‍റെ വേലിക്കെട്ടിനുള്ളില്‍ കുടുങ്ങിയ ജിത്തുവിനെ രക്ഷപ്പെടുത്തി ജനറല്‍ ആശുപത്രിയിലെത്തിച്ചത്. തുടർന്ന് ഇരുവരെയും കോട്ടയം മെഡിക്കല്‍ കോളജ് ആശുപത്രിയിലേക്കു മാറ്റി. രാജേഷിന്‍റെ കൈവെള്ളയ്ക്ക് ഗുരുതരമായി പൊള്ളലേറ്റിട്ടുണ്ട്. ജിത്തുവിന് നിസാര പരിക്കേയുള്ളൂ.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]