ADVERTISEMENT

ADVERTISEMENT

പിഒസിയില്‍ എം.കെ. സാനുവിനെ അനുസ്മരിച്ചു

കൊച്ചി: പാലാരിവട്ടം പിഒസിയില്‍ സംഘടിപ്പിച്ച പ്രഫ. എം.കെ. സാനു അനുസ്മരണം പിഒസി ഡയറക്ടര്‍ ഫാ. തോമസ് തറയില്‍ ഉദ്ഘാടനം ചെയ്തു. പ്രഫ. എം. തോമസ് മാത്യു അനുസ്മരണ പ്രഭാഷണം നടത്തി.

ചാവറ കള്‍ച്ചറല്‍ സെന്‍റര്‍ ഡയറക്ടര്‍ ഫാ. അനില്‍ ഫിലിപ്പ്, ടി.എം. എബ്രഹാം, ഡോ. സീനാ ഹരിദാസ്, സി.ജി. രാജഗോപാല്‍, ഫാ. സെബാസ്റ്റ്യന്‍ മില്‍ട്ടണ്‍, ഡോ. തോമസ് പനക്കളം തുടങ്ങിയവര്‍ പ്രസംഗിച്ചു.

ADVERTISEMENT

ഫ്ലാഷ് മോബുമായി വിദ്യാര്‍ഥികള്‍

മുവാറ്റുപുഴ: യുദ്ധവിരുദ്ധ സന്ദേശവുമായി നഗരത്തില്‍ ഫ്ലാഷ് മോബ് അവതരിപ്പിച്ച് വിദ്യാര്‍ഥികള്‍. രണ്ടാര്‍കര എസ്എബിടിഎം സ്‌കൂളിലെ വിദ്യാര്‍ഥികളാണ് വണ്‍വേ ജംഗ്ഷനില്‍ യുദ്ധവിരുദ്ധ ഫ്ലാഷ് മോബ് അവരിപ്പിച്ചത്. ലോകയുദ്ധങ്ങള്‍ വിതച്ച നാശങ്ങള്‍ സൂചിപ്പിക്കുന്ന പോസ്റ്ററുകള്‍ ഉയര്‍ത്തിയായിരുന്നു ഫ്ലാഷ് മോബ്. എഴുത്തുകാരന്‍ പി.എസ്.എ. ലത്തീഫ് ഉദ്ഘാടനം ചെയ്തു. സ്‌കൂള്‍ മാനേജര്‍ എം.എം. അലിയാര്‍ അധ്യക്ഷത വഹിച്ചു. സ്‌കൂള്‍ അഡ്മിനിസ്‌ട്രേറ്റര്‍ കെ.എം. ഷക്കീര്‍, പ്രധാനാധ്യാപിക എം.എ. ഫൗസിയ, എംഎസ്എം ട്രസ്റ്റ് സെക്രട്ടറി എം.എം. അലി, പിടിഎ പ്രസിഡന്‍റ് ടി.എം. ജാഫര്‍, വൈസ് പ്രസിഡന്‍റ് അബ്ദുൾ സലാം മൗലവി, എംപിടിഎ പ്രസിഡന്‍റ് സലിക്കത്ത് അഫ്‌സല്‍ എന്നിവര്‍ പ്രസംഗിച്ചു.

പട്ടിമറ്റം ജംഗ്ഷനിലെ വെയ്റ്റിംഗ് ഷെഡും പരിസരവും ശുചീകരിച്ചു

കോലഞ്ചേരി: സ്വാതന്ത്ര്യദിന മുന്നൊരുക്കങ്ങളുടെ ഭാഗമായി പട്ടിമറ്റം അഗ്നിരക്ഷാ നിലയത്തിന്‍റെ ആഭിമുഖ്യത്തിൽ സേനാംഗങ്ങളും സിവിൽ ഡിഫൻസ് വോളന്‍റിയർമാരും ചേർന്ന് വെയ്റ്റിംഗ് ഷെഡും, പഞ്ചായത്ത് കോപ്ലക്സും, ഓപ്പൺ സ്റ്റേജും പരിസരവും ശുചികരിച്ചു. പട്ടിമറ്റം അഗ്നിരക്ഷാ നിലയം സ്റ്റേഷൻ ഓഫീസർ എൻ.എച്ച്. അസൈനാർ രാവിലെ 8ന് ഉദ്ഘാടനം നിർവഹിച്ചു. വാർഡംഗം ഇബ്രാഹിം, സിഡിഎസ് ചെയർപേഴ്സൺ റാബിയ സലിം, സിവിൽ ഡിഫൻസ് പോസ്റ്റ് വാർഡൻ എ. അനിൽകുമാർ ഉൾപ്പെടെ 9 സിവിൽ ഡിഫൻസ് വോളന്‍റിയേഴ്സും, എട്ട് സേനംഗങ്ങളും ശുചീകരണത്തിൽ പങ്കാളികളായി.

കോതമംഗലം ബ്ലോക്ക് പഞ്ചായത്തിന്‍റെ ജീപ്പ് കട്ടപ്പുറത്തായിട്ട് ഏഴ് വർഷം

കോതമംഗലം: ബ്ലോക്ക് പഞ്ചായത്തിന്‍റെ ജീപ്പ് അറ്റകുറ്റപ്പണി നടത്താതെ കട്ടപ്പുറത്തായിട്ട് ഏഴ് വര്‍ഷം. വർഷങ്ങൾക്കു മുമ്പ് ഓട്ടത്തിനിടെ തീയുയർന്ന ജീപ്പ് അറ്റകുറ്റപ്പണി നടത്താതെ കണ്ടം ചെയ്യാനായിരുന്നു അന്നത്തെ തീരുമാനം. എന്നാല്‍ പിന്നീട് നടപടിക്രമങ്ങള്‍ പാലിക്കാതെ വന്നതോടെ അതിന് കഴിഞ്ഞില്ല. ലേലം ചെയ്തു വില്‍ക്കാനും ആലോചനയുണ്ടായെങ്കിലും അതും നടന്നില്ല. ഇതോടെ ബ്ലോക്ക് ജീപ്പ് പഞ്ചായത്ത് ഓഫീസ് കോമ്പൗണ്ടില്‍ ആരാലും തിരിഞ്ഞുനോക്കാതെ തുടരുകയായിരുന്നു. 2012 മോഡലായ ജീപ്പ് ആറു വര്‍ഷം മാത്രമാണ് ഉപയോഗിച്ചത്. അറ്റകുറ്റപ്പണി നടത്തിയാല്‍ വീണ്ടും ഓടിക്കാന്‍ കഴിയുമെന്ന് അന്നേ ചൂണ്ടികാണിക്കപ്പെട്ടിരുന്നെങ്കിലും ആ നിർദേശവും അവഗണിക്കപ്പെട്ടു. മുന്‍ ഭരണസമിതിയുടെ കെടുകാര്യസ്ഥതയാണ് ജീപ്പിന്‍റെ ഇപ്പോഴത്തെ അവസ്ഥയ്ക്കു കാരണമെന്ന് പ്രസിഡന്‍റ് പി.എ.എം. ബഷീര്‍ ആരോപിച്ചു.

നാലമ്പല ദർശനത്തിനെത്തിയവരെ സ്വീകരിച്ച് ശ്രേയസ് കുടുംബശ്രീ

മൂവാറ്റുപുഴ: നാലമ്പല ദർശനത്തിനത്തിനായി മേമ്മുറി ശ്രീ ഭരതപ്പിള്ളി സ്വാമി ക്ഷേത്രത്തിലെത്തിയ തീർഥാടകർക്ക് പാമ്പാക്കുട പഞ്ചായത്ത് രണ്ടാം വാർഡിൽ പ്രവർത്തിക്കുന്ന ശ്രേയസ് കുടുംബശ്രീ അംഗങ്ങൾ ലഘുഭക്ഷണം നൽകി സ്വീകരിച്ചു. നെയ്ത്ത്ശാലപ്പടി ജംഗ്‌ഷനിൽ പഞ്ചായത്ത് പ്രസിഡന്‍റ് ശ്രീകാന്ദ് നന്ദനൻ ലഘു ഭക്ഷണത്തിന്‍റെ വിതരണോദ്ഘാടനം നിർവഹിച്ചു. 750ഓളം ഭക്തർക്കാണ് ഇന്നലെ ലഘുഭക്ഷണ വിതരണം നടത്തിയത്. വരും വർഷങ്ങളിൽ രാമായണ മാസാചരണത്തിന്‍റെ ഭാഗമായി എത്തുന്ന തീർഥാടകർക്കായി കൂടുതൽ പ്രവർത്തനങ്ങൾ കുടുംബശ്രീയുടെ നേതൃത്വത്തിൽ പൊതുജന പങ്കാളിത്തത്തോടെ നടപ്പാക്കുമെന്ന് കുടുംബശ്രീ പിആർ കോ-ഓർഡിനേറ്റർ സിബി പൗലോസ് അറിയിച്ചു.

രക്തദാന ക്യാമ്പ് നടത്തി

കോതമംഗലം: നെല്ലിമറ്റം എംബിറ്റ്സ് എൻജിനീയറിംഗ് കോളജിലെ എൻഎസ്എസ് യൂണിറ്റ്, റെഡ് റിബൺ ക്ലബ് എന്നിവയുടെ ആഭിമുഖ്യത്തിൽ രക്തദാന ക്യാമ്പ് നടത്തി. തൊടുപുഴ ഐഎംഎ ബ്ലഡ് ബാങ്കുമായി സഹരിച്ചാണ് ക്യാമ്പ് സംഘടിപ്പിച്ചത്. ക്യാമ്പിന്‍റെ ഭാഗമായി 60 യൂണിറ്റ് രക്തം ദാനം ചെയ്തു. എൻഎസ്എസ് പ്രോഗ്രാം ഓഫീസർമാരായ ഷിജു രാമചന്ദ്രൻ, ജോബിൽ വർഗീസ്, വോളൻഡിയർ സെക്രട്ടറിമാരായ നെഹ്ബിൻ ഷബീർ, അഫിൻ എൽദോ വർഗീസ്, ടിസ ടിജോ, ഡെൽന മരിയ സജി, റെഡ് റിബ്ബൺ ക്ലബ് കോ-ഓർഡിനേറ്റേഴ്സ് ജസ്റ്റിൻ കെ. ചെറിയാൻ, എൽദോ ആന്‍റു, എസ്. അനുഷ്ക, ഷറഫിയ റഷീദ് എന്നിവർ നേതൃത്വം നൽകി. വാഴക്കുളം: നാഗപ്പുഴ നിര്‍മല പബ്ലിക് ലൈബ്രറിയുടെയും തൊടുപുഴ ഐഎംഎയുടെയും സംയുക്താഭിമുഖ്യത്തില്‍ സൗജന്യ രക്തഗ്രൂപ്പ് നിര്‍ണയവും രക്തദാന ക്യാമ്പും നടത്തി. നാഗപ്പുഴ സെന്‍റ് മേരീസ് പാരിഷ് ഹാളില്‍ സംഘടിപ്പിച്ച ക്യാമ്പ് ബ്ലോക്ക് പഞ്ചായത്തംഗം പ്രഫ. ജോസ് അഗസ്റ്റിന്‍ ഉദ്ഘാടനം ചെയ്തു. ലൈബ്രറി കമ്മിറ്റി പ്രസിഡന്‍റ് ജിബിന്‍ ജോര്‍ജ് റാത്തപ്പിള്ളി അധ്യക്ഷത വഹിച്ചു. തൊടുപുഴ ബ്ലഡ് സെന്‍റര്‍ ഇന്‍ ചാര്‍ജ് എന്‍. ജയചന്ദ്രന്‍ ക്ലാസെടുത്തു. ലൈബ്രറി കമ്മിറ്റിയംഗം പ്രഫ. വി.എസ്. റെജി, വിദ്യ പി.നായര്‍, ഷിമി സുധീര്‍, എം.വൈ. ഡേവിഡ്‌സണ്‍ എന്നിവര്‍ നേതൃത്വം നല്‍കി.

മൾട്ടി സ്പെഷാലിറ്റി മെഗാ മെഡിക്കൽ ക്യാമ്പ്

മൂവാറ്റുപുഴ: വിൻസന്‍റ് ഡി പോൾ സൊസൈറ്റിയും എംസിഎസ് ആശുപത്രിയുടെയും മൂവാറ്റുപുഴയും ഡിഡിആർസിയുടെയും സംയുക്ത സഹകരണത്തോടെ സൗജന്യ മൾട്ടി സ്പെഷാലിറ്റി മെഗാ മെഡിക്കൽ ക്യാമ്പ് സംഘടിപ്പിച്ചു.കാരക്കുന്നം സെന്‍റ് മേരിസ് പള്ളിയുടെ പാരിഷ് ഹാളിൽ സംഘടിപ്പിച്ച ക്യാമ്പ് വികാരി ഫാ. ജോർജ് വള്ളോംകുന്നേൽ ഉദ്ഘാടനം ചെയ്തു. എംസിഎസ് ആശുപത്രി ചെയർമാൻ പി.എം. ഇസ്മയിൽ, ഡയറക്ടർ ബോർഡ് അംഗം എം.എ. സഹീർ, അസി. വികാരി ഫാ. അലൻ വെട്ടുകുഴി, വിൻസന്‍റ് ഡി പോൾ പ്രസിഡന്‍റ് സിബി കണ്ണമ്പുഴ, സെക്രട്ടറി ഫ്രാൻസിസ് കാവുംപുറം, കൺവീനർ ജോൺ കണ്ണപ്പള്ളി എന്നിവർ പ്രസംഗിച്ചു.

പിറവത്ത് അടിക്കടി തകർന്ന് കുടിവെള്ള പൈപ്പുകൾ

നട്ടംതിരിഞ്ഞ് ജനം പിറവം: പിറവം മേഖലയില്‍ കുടിവെള്ള പൈപ്പുകള്‍ അടക്കടി പൊട്ടുന്നതില്‍ ദുരിതപ്പെട്ട് നാട്ടുകാര്‍. ടൗണ്‍ ഉള്‍പ്പെടെയുള്ള പ്രദേശങ്ങളില്‍ നിരവധി ഭാഗങ്ങളിലാണ് പൈപ്പുപൊട്ടി വെള്ളം പാഴായിക്കൊണ്ടിരിക്കുന്നത്. ടൗണിലെ ഓടകളുടെ സമീപത്തുകൂടി പോകുന്ന പൈപ്പുകള്‍ മിക്ക ഭാഗത്തും പൊട്ടിക്കിടക്കുകയാണ്. പമ്പിംഗ് ഇല്ലാത്ത സമയത്ത് ഇവയിലൂടെ മലിനജലം പൈപ്പിനുള്ളിലേക്ക് കയറും. പമ്പിംഗ് പുനരാരംഭിക്കുമ്പോള്‍ ഇത് കുടിവെള്ളത്തില്‍ കലരുകയുകയാണെന്നും പരാതിയുണ്ട്. വാട്ടര്‍ അഥോറിറ്റി അധികൃതര്‍ ഒന്നും ചെയ്യുന്നില്ലെന്നാണ് നാട്ടുകാരുടെ ആക്ഷേപം. ഇന്നലെ പിറവം ഹോളി കിംഗ്‌സ് ക്‌നാനായ കത്തോലിക്ക പള്ളിയുടെ മുന്നിലൂടെ പോകുന്ന പൈപ്പുപൊട്ടി കുടിവെള്ളം പുറത്തേക്ക് ഒഴുകുന്ന നിലയായിരുന്നു. നാട്ടുകാര്‍ ഇക്കാര്യം വിളിച്ചറിയിച്ചെങ്കിലും, മണിക്കൂറുകള്‍ക്കു ശേഷമാണ് ജല വിതരണം നിര്‍ത്തിയത്. ഇതോടെ കൊച്ചുപള്ളിപ്പടി ഭാഗത്തെ കുടിവെള്ള വിതരണവും നിലച്ചിരിക്കുകയാണ്. പഴയ പൈപ്പുകള്‍ മാറ്റി സ്ഥാപിക്കണമെന്ന് നിരന്തരം ആവശ്യപ്പെട്ടിട്ടും പരിഹാരമില്ലെന്നും നാട്ടുകാർ ആരോപിക്കുന്നു.

നിർമല കോളജിൽ നാളെ ഇന്ത്യ പെന്‍റ ഫെസ്റ്റ്

മൂവാറ്റുപുഴ: സ്വാതന്ത്ര്യദിനാഘോഷത്തിന്‍റെ ഭാഗമായി മൂവാറ്റുപുഴ നിർമല കോളജിലെ ഇക്കോണമിക്സ് വിഭാഗവും ഹ്യൂമൺ റൈറ്റ്സ് ക്ലബ്ബും സംയുക്തമായി സംഘടിപ്പിക്കുന്ന ഇന്ത്യ പെന്‍റ ഫെസ്റ്റ് നാളെ നടക്കും. ഹയർ സെക്കൻഡറി വിദ്യാർഥികൾക്കായി സംഘടിപ്പിക്കുന്ന ഫെസ്റ്റിൽ വ്യക്തിഗത ഇനങ്ങളായ പെയിന്‍റിംഗ്, ചലചിത്ര നിരൂപണം, റീൽ മേക്കിങ് എന്നീ വ്യക്തിഗത ഇനങ്ങളും, ക്വിസ്, സംവാദം, ദേശഭക്തി ഗാനം എന്നീ ഗ്രൂപ്പ് ഇനങ്ങളും ഉൾപ്പെടുന്നു. വിജയികൾക്ക് ക്യാഷ് അവാർഡുകളും ലഭിക്കും. രജിസ്ട്രേഷനും കൂടുതൽ വിവരങ്ങൾക്കും 7306917585, 7025775513 എന്ന നമ്പറുകളിൽ ബന്ധപെടണം.

ജീവകാരുണ്യ പ്രവർത്തനങ്ങളിലൂടെ ക്രിസ്തുവിനെ മറ്റുള്ളവർക്ക് പകർന്നു നൽകണം: ശ്രേഷ്ഠ ബാവ

കോലഞ്ചേരി: ക്രിസ്തുവിന്‍റെ ഭാവവും മനസും നമ്മിലുണ്ടെങ്കിൽ മാത്രമേ ക്രിസ്തുവിനെപ്പോലെ ജീവിക്കാനും ദൈവസ്നേഹം മറ്റുള്ളവരിലേക്ക് പകരാനും സാധിക്കുകയുള്ളൂവെന്ന് ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവ പറഞ്ഞു. ഇമ്മാനുവേൽ മാർത്തോമ്മാ ഇടവകയുടെ ശതാബ്ദി ആഘോഷങ്ങളുടെ ഭാഗമായി കാൻസർ, വൃക്ക രോഗികൾ, ഭിന്നശേഷിക്കാർ, വയോജനങ്ങൾ എന്നിവർക്കായി ആരംഭിച്ച ആശ്ലേഷം സാന്ത്വന പരിചരണ പദ്ധതി ഉദ്ഘാടനം ചെയ്ത് സംസാരിക്കുകയായിരുന്നു ശ്രേഷ്ഠ ബാവ. ദൈവാശ്രയത്തോടെ ക്രിസ്തു ഭാവം സ്വീകരിച്ച് ജീവകാരുണ്യ പ്രവർത്തനങ്ങളിലൂടെ ക്രിസ്തുവിനെ മറ്റുള്ളവർക്ക് പകർന്നു നൽകാൻ നമുക്ക് സാധിക്കണമെന്ന് ശ്രേഷ്ഠ ബാവ കൂട്ടിച്ചേർത്തു. ചടങ്ങിൽ വികാരി ഫാ.തോമസ് പി. കോശി അധ്യക്ഷത വഹിച്ചു.

പ്രതിഷേധിക്കേണ്ടത് കിഫ്ബി ആസ്ഥാനത്ത്: എൽദോസ് കുന്നപ്പള്ളി എംഎൽഎ

പെരുമ്പാവൂര്‍: കീഴില്ലം മുതല്‍ കുറുപ്പുംപടി വരെയുള്ള റോഡ് നിര്‍മാണം അനിശ്ചിതമായി നീണ്ടു പോകുന്നതിനെതിരെ കോണ്‍ഗ്രസ് നടത്തിയ പ്രതിഷേധങ്ങളോട് ഒപ്പം കൂടാതിരുന്നവര്‍ക്ക് ഇപ്പോഴെങ്കിലും പ്രതിഷേധിക്കാന്‍ തോന്നിയത് നന്നായെന്ന് എല്‍ദോസ് കുന്നപ്പള്ളി എംഎല്‍എ. ഭരണകക്ഷി അംഗങ്ങളുടെ മാര്‍ച്ച് തന്‍റെ നേരെയല്ല വേണ്ടതെന്നും തിരുവനന്തപുരത്തെ കിഫ്ബിയുടെ ആസ്ഥാനത്തേക്കാണ് അതു നടത്തേണ്ടതെന്ന് മറക്കരുതെന്നും അദ്ദേഹം ആക്ഷേപിച്ചു. 2017 ജൂലൈ 10ന് കിഫ്ബിയില്‍ നിന്ന് ഭരണാനുമതി ലഭിച്ച റോഡാണ് പുല്ലുവഴി-പാണിയേലിപ്പോര് റോഡ്. കീഴില്ലം ഷാപ്പുംപടി മുതല്‍ കുറുപ്പുംപടി വരെയുള്ള 6.3 കിലോമീറ്റര്‍ റോഡ് ഫസ്റ്റ് റീച്ചായും കുറുപ്പുംപടി എംജിഎം സ്‌കൂള്‍ മുതല്‍ പാണിയേലി പോരു വരെ രണ്ടാമത്തെ റീച്ചായും ബിഎം ആന്‍ഡ് ബിസി നിലവാരത്തില്‍ പുനരുദ്ധാരണം നടത്തുന്നതിനായി ഉള്‍പ്പെടുത്തിയിരുന്നു. എന്നാല്‍ ഒന്‍പത് വര്‍ഷക്കാലമായി സാങ്കേതിക കാരണങ്ങള്‍ പറഞ്ഞ് വൈകിപ്പിക്കുകയായിരുന്നു. പലതവണ പുതുക്കി നിശ്ചയിക്കപ്പെട്ട എസ്റ്റിമേറ്റ് ഒടുവില്‍ 25.06 കോടി രൂപയ്ക്ക് കിഫ്ബിയില്‍ സമര്‍പ്പിച്ചത് ഇപ്പോഴും പരിശോധനയില്‍ തുടരുകയാണ്. നിരവധി തവണ നിയമസഭയില്‍ സബ്മിഷന്‍ ആയി റോഡിന്‍റെ പ്രശ്‌നം ഉന്നയിച്ചതായും അദ്ദേഹം അറിയിച്ചു. ജനങ്ങളുടെ കണ്ണില്‍ ഇനിയും പൊടിയിടാതെ ഫയലില്‍ ഒപ്പുവയ്ക്കാന്‍ കിഫ്ബി തയാറാകണമെന്നും എംഎൽഎ കൂട്ടിച്ചേര്‍ത്തു.

മദ്യപശല്യവും അനധികൃത പാർക്കിംഗും : കോട്ടപ്പുറത്തെ ബിവറേജ് മാറ്റിസ്ഥാപിക്കണമെന്ന്

ആലങ്ങാട് : ആലുവ-പറവൂർ കെഎസ്ആർടിസി റോഡിൽ കോട്ടപ്പുറത്ത് സ്ഥിതിചെയ്യുന്ന ബിവറേജ് ഔട്ട്ലെറ്റിന്‍റെ സമീപത്തെ ബസ് കാത്തിരിപ്പു കേന്ദ്രത്തിനു ചുറ്റും മദ്യപരുടെ ശല്യമെന്ന് പരിസരവാസികൾ. മദ്യം വാങ്ങാൻ എത്തുന്നവർ അനധികൃതമായി വാഹനങ്ങൾ പാർക്ക് ചെയ്യുന്നതു മൂലം നാട്ടുകാർക്കും യാത്രക്കാർക്കും ബുദ്ധിമുട്ട് സൃഷ്ടിക്കുന്നതായി പരാതി. ആലുവ- പറവൂർ റോഡിൽ കോട്ടപ്പുറം മൃഗാശുപത്രിപ്പടി ബസ് കാത്തിരിപ്പു കേന്ദ്രത്തിനു സമീപമാണു ബിവറേജസ് ഔട്ട്ലറ്റ് സ്ഥിതി ചെയ്യുന്നത്. ഇതിനു സമീപത്തായി ബസ് കാത്തിരിപ്പു കേന്ദ്രങ്ങളും ഒട്ടേറെ വീടുകളും സ്ഥിതി ചെയ്യുന്നുണ്ട്. രാവിലെ മുതൽ രാത്രി വരെ മദ്യം വാങ്ങാനെത്തുന്നവർ വാഹനങ്ങൾ റോഡരികിലും യാത്രക്കാർ ബസ് കാത്തു നിൽക്കുന്ന സ്ഥലത്തും നിർത്തിട്ടാണു മദ്യം വാങ്ങാൻ പോകുന്നത്. ഇതുമൂലം സ്ത്രീകൾക്കും കുട്ടികളുമടക്കമുള്ളവർക്കു ബസ് കാത്തു നിൽക്കാനും കഴിയാത്ത അവസ്ഥയാണെന്നാണു പരാതി. പാർക്കിംഗ് അധികമാകുന്പോൾ മറ്റുള്ള വാഹനങ്ങൾക്കു റോഡിലൂടെ കടന്നുപോകാൻ കഴിയാത്ത സ്ഥിതിയാണ്.പലപ്പോഴും പ്രദേശത്തു വാക്കുതർക്കം ഉണ്ടാകാറുണ്ടെന്നു നാട്ടുകാർ പറഞ്ഞു. ഇതു സമീപവാസികളായ ജനങ്ങളുടെ സൈര്യജീവിതത്തെ ബാധിക്കുന്നതായി പരാതിയുണ്ട്. അനധികൃത പാർക്കിംഗ് മൂലം ഈ ഭാഗത്ത് അപകടങ്ങളും സംഭവിക്കുന്നുണ്ട്. കൂടാതെ രാത്രിയായാൽ സമീപവാസികളായ നാട്ടുകാർക്കു റോഡിലൂടെ നടക്കാനും ബുദ്ധിമുട്ടു നേരിടുന്നതായിപറയുന്നു. കോട്ടപ്പുറം പൗരസമിതി നവകേരള സദസിൽ പരാതി നൽകിയതിന്‍റെ അടിസ്ഥാനത്തിൽ ബിവറേജസ് മാറ്റി സ്ഥാപിക്കാമെന്ന് അറിയിച്ചിരുന്നു. എന്നാൽ നാളിതുവരെയായി യാതൊരു നടപടിയും ഉണ്ടായില്ലെന്നാണ് ആക്ഷേപം.

കായികപ്രതിഭകളെ ആദരിച്ചു

ഫോർട്ടുകൊച്ചി: കായിക മത്സര പരിശീലകനായി 54 വർഷം പൂർത്തിയാക്കിയ കൊച്ചിയുടെ ഫുട്ട്ബോൾ ആചാര്യൻ റൂഫസ് ഡിസൂസയേയും വിവിധ കായികയിനങ്ങളിൽ സംസ്ഥാന-ദേശീയ അന്തർദേശീയ മത്സരങ്ങളിൽ പങ്കെടുത്ത യുവ കായിക പ്രതിഭകളെയും കുമ്പളങ്ങി സർവീസ് സഹകരണ ബാങ്കിന്‍റെ നേതൃത്വത്തിൽ ആദരിച്ചു. ബാങ്ക് പ്രസിഡന്‍റ് നെൽസൻ കോച്ചേരി പ്രതിഭാ സംഗമം ഉദ്ഘാടനം ചെയ്തു. വൈസ് പ്രസിഡന്‍റ് ഉഷ പ്രദീപ് അധ്യക്ഷത വഹിച്ചു. റൂഫസ് ഡിസൂസ മുഖ്യ പ്രഭാഷണവും കായിക യുവപ്രതിഭകളെ ആദരിക്കൽ ചടങ്ങ് ഉദ്ഘാടനവും നടത്തി.

പുഴ കൈയേറി മതില്‍ നിര്‍മിച്ചതായി ആക്ഷേപം

തൃപ്പൂണിത്തുറ: കരിങ്ങാച്ചിറ പുഴ കൈയേറി മതില്‍ നിര്‍മിച്ചതായി ആക്ഷേപം. കരിങ്ങാച്ചിറ ജംഗ്ഷന് തെക്കുഭാഗത്ത് പാലസ് ഗാര്‍ഡന് പിന്നിലാണ് നാല് മീറ്ററോളം വീതിയില്‍ പുഴ കൈയേറിയതെന്നാണ് ആക്ഷേപമുള്ളത്. പുഴയിലേയ്ക്ക് ഇറക്കിയിട്ട കരിങ്കല്ലില്‍ അടിസ്ഥാനം നിര്‍മിച്ച് സിമന്‍റ് കട്ടകളുപയോഗിച്ച് മതില്‍ കെട്ടി തുടങ്ങിയിരിക്കുകയാണ്. കൈയേറിയ ഭാഗം ചെമ്മണ്ണ് ഇട്ട് നിറച്ചിട്ടുമുണ്ട്. അധികൃതരുടെ അലംഭാവമെന്ന് നാട്ടുകാര്‍ ആരോപിച്ചു. എന്നാല്‍ കൈയേറ്റം സംബന്ധിച്ച് ആരും പരാതി നല്‍കിയിട്ടില്ല.

ആകാശപ്പറവകളുടെ കൂട്ടുകാരുടെ സ്ഥാപകദിനം ആചരിച്ചു

മലയാറ്റൂര്‍: ദിവ്യകാരുണ്യ മിഷനറി സഭാംഗം ഫാ. ജോര്‍ജ് കുറ്റിക്കൽ‍ സ്ഥാപിച്ച ആകാശ പറവകളുടെ കൂട്ടുകാരുടെ 33-ാം സ്ഥാപക ദിനവും നവീകരിച്ച ചാപ്പലിന്‍റെ ആശീര്‍വാദവും ഈശോയുടെ രൂപാന്തരീകരണ തിരുനാള്‍ ആഘോഷങ്ങളും നടന്നു. ഫാ. സൈമണ്‍ ചിറമേല്‍ ആശ്രമ ചാപ്പല്‍ ആശീര്‍വദിച്ചു. തുടര്‍ന്ന് നടന്ന പൊതുസമ്മേളനം റോജി എം. ജോണ്‍ എംഎല്‍എ ഉദ്ഘാടനം ചെയ്തു. സജീവന്‍ അധ്യക്ഷത വഹിച്ചു. ഫാ. സെബാസ്റ്റ്യന്‍ ചിറമേല്‍, മലയാറ്റൂര്‍ പള്ളി വികാരി ഫാ. ജോസ് ഒഴലക്കാട്ട്, മലയാറ്റൂര്‍ നീലീശ്വരം പഞ്ചായത്ത് പ്രസിഡന്‍റ് ജോയി അവോക്കാരന്‍, എഫ്ബിഐ ഡയറക്ടര്‍ ഫാ. സുശീല്‍ കിഴക്കേകുന്നേല്‍, അഡ്വ. ജോസ് തെറ്റയില്‍, സെലിന്‍ പോള്‍, സെബി കിടങ്ങേന്‍, ലാലിച്ചന്‍ തഴക്കല്‍, ബിന്ദു സെബാസ്റ്റ്യന്‍, അപ്പച്ചന്‍ കാഞ്ഞിരത്തുകുന്നേല്‍, സേവ്യര്‍ വടക്കുംഞ്ചേരി, ഫാ. ജോസഫ് പീടികപറമ്പില്‍, സാംസനപ്പന്‍ എന്നിവര്‍ പ്രസംഗിച്ചു.

ലോറിയും ബൈക്കും കൂട്ടിയിടിച്ച് രണ്ട് യുവാക്കൾക്ക് പരിക്ക്

മരട്: ലോറിയും ബൈക്കും കൂട്ടിയിടിച്ച് രണ്ട് യുവാക്കള്‍ക്ക് പരിക്ക്. പൊന്നുരുന്നി കാപ്പപ്പിള്ളിപ്പറമ്പ് വീട്ടില്‍ സന്തോഷ് കുമാറിന്‍റെ മകന്‍ അനന്ദു എസ്. കുമാര്‍ (25), വിയ്യാക്കുറുശി തോറ്റിക്കുലായന്‍ വീട്ടില്‍ സജിത്തിന്‍റെ മകന്‍ മുഹമ്മദ് ഷാറൂണ്‍(24) എന്നിവര്‍ക്കാണ് പരിക്കേറ്റത്. ഇന്നലെ ഉച്ചയ്ക്ക് 1.30ന് മാടവന സിഗ്‌നല്‍ ജംഗ്ഷനടുത്തായിരുന്നു അപകടം. ഇരുവരെയും നെട്ടൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു.

കോട്ടയം വഴിയുള്ള യാത്ര ദുരിതം : മെമുവിനായി മുറവിളി

കൊച്ചി: കോട്ടയം വഴിയുള്ള യാത്രാക്ലേശം പരിഹരിക്കുന്നതിന് എറണാകുളത്ത് നിന്നും ഉച്ചക്ക് ശേഷം ഒരു മെമു സര്‍വീസ് വേണമെന്ന ആവശ്യം ശക്തമാകുന്നു. ഉച്ചകഴിഞ്ഞ് മൂന്നിന് ശേഷം തിരുവനന്തപുരം ഭാഗത്തേക്ക് മെമു ട്രെയിന്‍ വേണമെന്ന ആവശ്യവുമായാണ് റെയില്‍ യാത്രക്കാരുടെ കൂട്ടായ്മയായ ഫ്രണ്ട്‌സ് ഓണ്‍ റെയില്‍സ് രംഗത്തെത്തിയിട്ടുള്ളത്. ഉച്ചക്ക് ശേഷം ഒരു മെമു സര്‍വീസ് വേണമെന്നത് കോട്ടയം വഴിയുള്ള യാത്രക്കാരുടെ വര്‍ഷങ്ങളയുള്ള ആവശ്യമാണ്. ചവിട്ടുപടിയിലും ടോയ്‌ലറ്റ് ഇടനാഴിയിലും ശ്വാസം പോലും കിട്ടാതെ തിങ്ങിനിറഞ്ഞാണ് സ്ത്രീകളും വിദ്യാര്‍ഥികളും പ്രതിദിനം എറണാകുളത്ത് നിന്നും തൃപ്പൂണിത്തുറയില്‍ നിന്നും കോട്ടയത്തുനിന്നുമൊക്കെ യാത്ര ചെയ്യുന്നത്. ഉച്ചക്ക് 1.55ന്‍റെ പരശുറാമിന് ശേഷം എറണാകുളം ടൗണില്‍ നിന്നും 2.32ന് വിവേക് എക്‌സ്പ്രസ് ഉണ്ടെങ്കിലും ദീര്‍ഘ ദൂര ട്രെയിനായതിനാല്‍ പതിവായി വൈകിയാണ് എത്തുന്നത്. കൂടാതെ വിവേക് എക്‌സ്പ്രസിന് സ്റ്റോപ്പുകള്‍ വളരെ പരിമിതമായതിനാല്‍ വൈകുന്നേരം അഞ്ചിനുള്ള കേരള എക്‌സ്പ്രസും 5.20നുള്ള വേണാട് എക്‌സ്പ്രസുമാണ് യാത്രക്കാര്‍ കൂടുതല്‍ ആശ്രയിക്കുന്നത്. വലിയ തോതിലുള്ള തിരക്കാണ് ഈ ട്രെയിനുകളില്‍ അനുഭവപ്പെടുന്നത്. പരശുറാം കഴിഞ്ഞാല്‍ വൈകിട്ടുള്ള വേണാടിന് മാത്രമാണ് എറണാകുളം ജില്ലയില്‍ തൊഴില്‍ പരമായ ആവശ്യവുമായെത്തുന്ന യാത്രക്കാര്‍ ഏറെ ആശ്രയിക്കുന്ന തൃപ്പൂണിത്തുറ സ്റ്റേഷനില്‍ സ്റ്റോപ്പുള്ളത്. വേണാടിന് ശേഷം തിരുവനന്തപുരം ഭാഗത്തേക്ക് മറ്റു ട്രെയിനുകള്‍ ഇല്ലാത്തതും തൃപ്പൂണിത്തുറയില്‍ നിന്നും യാത്രക്കാര്‍ അപകടകരമായ സാഹചര്യത്തിലും യാത്ര ചെയ്യാന്‍ നിര്‍ബന്ധിതരായി തീരുന്നു. പരശുറാമിന് ശേഷം കോവിഡിന് മുമ്പ് ഉച്ചക്ക് 2.40 ന് സര്‍വീസ് നടത്തിക്കൊണ്ടിരുന്ന മെമുവിന്‍റെ സമയം മാറ്റിയതാണ് യാത്രാക്ലേശം ഇരട്ടിയാക്കിയത്. എറണാകുളത്ത് നിന്ന് ഉച്ചക്ക് ശേഷം കൊല്ലം ഭാഗത്തേക്ക് ഒരു മെമു സര്‍വീസ് ആരംഭിച്ചാല്‍ മാത്രമേ നിലവിലെ യാത്രാക്ലേശം പരിഹരിക്കാന്‍ സാധിക്കുകയുള്ളുവെന്നും ഫ്രണ്ട്‌സ് ഓണ്‍ റെയില്‍സ് പറയുന്നു.

ലോട്ടറി നന്പർ മാറ്റി വില്പനക്കാരനിൽ നിന്ന് പണം കവർന്നു

ചെറായി: ഫയർഫോഴ്സ് ഉദ്യോഗസ്ഥനെന്ന് സ്വയം പരിചയപ്പെടുത്തി എത്തിയയാൾ നമ്പർ തിരുത്തിയ ലോട്ടറി ടിക്കറ്റ് നൽകി ലോട്ടറി വില്പനക്കാരനിൽ നിന്നും 950 രൂപ കവർന്നു. സംസ്ഥാനപാതയിൽ അയ്യമ്പിള്ളി സെന്‍റ് ജോൺസ് ലൈൻ ഭാഗത്ത് ലോട്ടറി കച്ചവടം നടത്തുന്ന തറവട്ടം പള്ളത്ത് പടി രവീന്ദ്രനാണ് തട്ടിപ്പിനിരയായത്. തുടർന്ന് ഈ തുകയുമായി രവീന്ദ്രൻ ടിക്കറ്റ് എടുക്കുന്ന ഏജൻസി സമീപിച്ചപ്പോഴാണ് തട്ടിപ്പ് മനസിലായത്.

ചെറായിക്ക് ആവേശമായി ആനയൂട്ട്

ചെറായി: നൂറുകണക്കിന് ആനപ്രേമികൾ തിങ്ങിനിറഞ്ഞ ചെറായി ഗരീശ്വര ക്ഷേത്രനടയിൽ കർക്കടക പൂജയോടനുബന്ധിച്ച് ആനയൂട്ട് നടത്തി. ഗജസേന ആനപ്രേമി സംഘത്തിന്‍റെ ആഭിമുഖ്യത്തിൽ നടന്ന ആനയൂട്ടിൽ ഗുരുവായൂർ ബാലകൃഷ്ണൻ, പുതുപ്പള്ളി കേശവൻ, മധുരപ്പുറം കണ്ണൻ, മൂത്തകുന്നം പത്മനാഭൻ, കൊളക്കാടൻ കുട്ടികൃഷ്ണൻ,വേമ്പനാട് വാസുദേവൻ,വള്ളംകുളം നാരായണൻകുട്ടി, വേണാട്ട് മുറ്റം ഗോപാലൻകുട്ടി,വേണാട്ട് മുറ്റം ഉണ്ണിക്കണ്ണൻ, വേണാട്ടുമുറ്റം കല്യാണി, നമ്പ്യാംകാവ് ശ്രീപാർവ്വതി, ഓതറ ശ്രീപാർവതി, തോട്ടക്കാട്ട് കുഞ്ഞിലക്ഷ്മി തുടങ്ങി 12 ആനകളാണ് സംബന്ധിച്ചത്. ചടങ്ങുകൾക്ക്പറവൂർ രാകേഷ് തന്ത്രികൾ, എം.ജി .രാമചന്ദ്രൻ ശാന്തി എന്നിവർ കാർമികരായി.

മുത്തശിയുടെ സുഹൃത്ത് ലഹരി നല്‍കിയിട്ടില്ലെന്ന് കുട്ടി : മൊഴിമാറ്റത്തില്‍ പുലിവാല് പിടിച്ച് പോലീസ്

കൊച്ചി: കത്തി കാട്ടി ഭീഷണിപ്പെടുത്തി മുത്തശിയുടെ സുഹൃത്ത് മദ്യവും കഞ്ചാവും നല്‍കിയെന്ന കേസില്‍ മൊഴി മാറ്റി പതിനാലുകാരന്‍. നേരത്തെ പോലീസിന് നല്‍കിയ മൊഴിയില്‍ പറയുന്ന കാര്യങ്ങളൊന്നും സംഭവിച്ചിട്ടില്ലെന്നാണ് കുട്ടിയുടെ പുതിയ മൊഴി. ഇതോടെ കേസ് പോലീസിനും തലവേദനയായി. അതിനിടെ പരാതിക്ക് പിന്നാലെ ഒളിവില്‍പോയ കേസിലെ ആരോപണ വിധേയനായ തിരുവനന്തപുരം കടയ്ക്കാവൂര്‍ സ്വദേശിയായ പ്രബിനെ(40) എറണാകുളം നോര്‍ത്ത് പോലീസ് ഇന്നലെ കൊച്ചിയില്‍ നിന്ന് പിടികൂടി. കേസുമായി ബന്ധപ്പെട്ട് അഭിഭാഷകനെ കാണാനെത്തിയപ്പോഴാണ് ഇയാള്‍ പോലീസ് പിടിയിലായത്. പിന്നാലെ കുട്ടി മൊഴി മാറ്റിയതോടെ പോലീസ് ഇയാളുടെ അറസ്റ്റ് രേഖപ്പെടുത്തിയില്ല. കുട്ടി മൊഴി മാറ്റാനിടയായ സാഹചര്യം, നേരത്തെ എന്തു കൊണ്ടാണ് അത്തരത്തിലൊരു മൊഴി നല്‍കിയത് തുടങ്ങിയ കാര്യങ്ങള്‍ പോലീസ് വിശദമായി അന്വേഷിക്കും. ഇതിനുശേഷമാകും തുടര്‍നടപടികള്‍ സ്വീകരിക്കുക. മുത്തശിയുടെ സുഹൃത്തായ പ്രബിന്‍ കത്തികാട്ടി ഭീഷണിപ്പെടുത്തി മദ്യവും കഞ്ചാവും നല്‍കിയെന്നായിരുന്നു കുട്ടിയുടെ മൊഴി. സംഭവത്തില്‍ കുട്ടിയുടെ അമ്മയുടെ പരാതിയിലാണ് പോലീസ് കേസെടുത്തത്. മാതാപിതാക്കള്‍ വേര്‍പിരിഞ്ഞ് കഴിയുന്ന കുട്ടി നഗരത്തിലെ ഒരു സ്‌കൂളില്‍ ഒമ്പതാം ക്ലാസ് വിദ്യാര്‍ഥിയാണ്. അമ്മയ്ക്കും മുത്തശിക്കുമൊപ്പം വാടക വീട്ടിലാണ് താമസം. 58കാരിയായ മുത്തശ്ശിയെ പ്രബിന്‍ ഇടയ്ക്കിടെ സന്ദര്‍ശിക്കാറുണ്ടായിരുന്നു. 2024 ഡിസംബര്‍ 24ന് കുട്ടിയുടെ അമ്മ വീട്ടിലില്ലാത്ത സമയത്ത് ഇയാള്‍ അവിടെയെത്തി. കുട്ടിയുടെ മുന്നില്‍ വച്ച് മദ്യം കുടിച്ചശേഷം ബട്ടണ്‍ ഉപയോഗിച്ച് പ്രവര്‍ത്തിക്കുന്ന ചെറിയ കത്തിവച്ച് കുട്ടിയെ ഭീഷണിപ്പെടുത്തുകയും നിര്‍ബന്ധിച്ച് മദ്യം കുടിപ്പിക്കുകയും പിന്നീട് കുട്ടിയുടെ ജന്മദിനമായ കഴിഞ്ഞ ജനുവരി നാലിന് വൈകിട്ടോടെ വീട്ടിലെത്തി അടുക്കളയില്‍ വച്ച് കുട്ടിയുടെ കഴുത്തില്‍ കത്തിവച്ച് ഭീഷണിപ്പെടുത്തി കഞ്ചാവ്ബീഡി വലിപ്പിക്കുകയും ചെയ്തുവെന്നായിരുന്നു മൊഴി. കുട്ടി സ്‌കൂളിലെ സുഹൃത്തിനോട് കാര്യങ്ങള്‍ പറഞ്ഞതിന് പിന്നാലെ സുഹൃത്ത് സ്വന്തം അമ്മയെ വിവരം അറിയിച്ചശേഷം കുട്ടിയുടെ അമ്മയെ വിവരം അറിയിക്കുകയായിരുന്നു. സംഭവത്തില്‍ കുട്ടിക്ക് കൗണ്‍സിലിംഗ് അടക്കം നല്‍കി വരുന്നതിനിടെയാണ് മൊഴിമാറ്റം.

ട്രേഡിംഗില്‍ നഷ്ടം : ആത്മഹത്യയ്ക്ക് ശ്രമിച്ച യുവാവ് ചികിത്സയിലിരിക്കെ മരിച്ചു

കൊച്ചി: ഷെയര്‍ ട്രേഡിംഗില്‍ നേരിട്ട സാമ്പത്തികനഷ്ടത്തില്‍ മനംനൊന്ത് വിഷം കഴിച്ച് ആത്മഹത്യക്ക് ശ്രമിച്ച യുവാവ് ചികിത്സയിലിരിക്കെ മരിച്ചു. കോടനാട് കുറിച്ചിലക്കോട് സ്വദേശി വിജയന്‍റെ മകന്‍ വിഷ്ണു കുമാറാണ് (35) മരിച്ചത്.കൊച്ചിയിലെ സ്വകാര്യആശുപത്രിയില്‍ തീവ്രപരിചരണ വിഭാഗത്തില്‍ ചികിത്സയിലിരിക്കെ ശനിയാഴ്ച രാവിലെയുണ്ടായ ഹൃദയാഘാതത്തെത്തുടര്‍ന്നായിരുന്നു മരണം. ജൂലൈ 30ന് എറണാകുളം കണ്ടെയ്‌നര്‍ റോഡില്‍ കാറിനുള്ളില്‍ വിഷം കഴിച്ചനിലയിലാണ് വിഷ്ണുകുമാറിനെ കണ്ടെത്തിയത്. എംബിഎ ബിരുദധാരിയാണ്. വിദേശത്തുനിന്ന് തിരിച്ചെത്തിയശേഷം ട്രേഡിംഗിലേക്ക് തിരിഞ്ഞ വിഷ്ണുകുമാര്‍ വലിയ നിക്ഷേപം നടത്തിയിരുന്നതായാണ് വിവരം. നഷ്ടം നേരിട്ടതോടെ ആത്മഹത്യാക്കുറിപ്പ് വീട്ടില്‍ എഴുതിവച്ചശേഷം കാറുമായി എറണാകുളത്തേക്ക് പുറപ്പെടുകയായിരുന്നു. തുടര്‍ന്ന് കണ്ടെയ്‌നര്‍ റോഡരികില്‍വച്ച് വിഷം കഴിക്കുകയായിരുന്നു. ആത്മഹത്യാക്കുറിപ്പ് വീട്ടുകാരുടെ ശ്രദ്ധയില്‍പ്പെട്ടതോടെ വിവരം പോലീസിനെ അറിയിച്ചു. തുടര്‍ന്ന് സൈബര്‍ സെല്ലിന്‍റെ സഹായത്തോടെ നടത്തി പരിശോധനയിലാണ് കണ്ടയ്‌നര്‍ റോഡില്‍ മുളവുകാട് ഭാഗത്ത് ഇയാളെ കണ്ടെത്തിയത്. ആദ്യം എറണാകുളം ജനറല്‍ ആശുപത്രിയിലും പിന്നീട് നഗരത്തിലെ സ്വകാര്യ ആശുപത്രിയിലേക്കും മാറ്റുകയായിരുന്നു. അവിവാഹിതനാണ് വിഷ്ണുകുമാര്‍. മാതാവ് ബീന. ഒരു സഹോദരനും രണ്ടു സഹോദരിമാരുമുണ്ട്. സംസ്‌കാരം ഇന്നലെ മുണ്ടങ്ങാമറ്റം ശ്മശാനത്തില്‍ നടന്നു. സംഭവത്തില്‍ വിഷ്ണു സൈബര്‍ തട്ടിപ്പിനിരയായോ എന്ന് പോലീസ് പരിശോധിക്കും.

ജീവനക്കാരനെ കബളിപ്പിച്ച് സ്കൂട്ടറുമായി കടന്നയാൾ അറസ്റ്റിൽ

കാലടി: മൊബൈൽ കടയിലെ ജീവനക്കാരനെ കബളിപ്പിച്ച് ഉടമയുടെ ഇരുചക്ര വാഹനവുമായി കടന്നയാൾ അറസ്റ്റിൽ. മലപ്പുറം എടവണ്ണ സ്വദേശി സുധീഷിനെയാണ്(25) കാലടി പോലീസ് അറസ്റ്റ് ചെയ്തത്. കഴിഞ്ഞ നാലിന് കാലടി ആശ്രമം ജംഗ്ഷൻ ഭാഗത്തുള്ള മൊബൈൽ സർവീസ് സെന്‍ററിന് സമീപം വച്ചിരുന്ന 1,25,000 രൂപ വിലവരുന്ന സ്കൂട്ടറാണ് മോഷണം പോയത്. കടയുടമയും മുടിക്കൽ സ്വദേശിയുമായ യുവാവിന്‍റെ പരിചയക്കാരനാണെന്ന് വിശ്വസിപ്പിച്ച് കടയിലെ ജോലിക്കാരനിൽ നിന്നും വാഹനത്തിന്‍റെ താക്കോൽ കൈക്കലാക്കിയാണ് മോഷണം നടത്തിയത്. അന്വേഷണത്തിൽ തൃശൂർ ഭാഗത്തുള്ള പെട്രോൾ പമ്പിൽ സ്കൂട്ടർ ഉപേക്ഷിക്കപ്പെട്ട നിലയിൽ കണ്ടെത്തു കയായിരുന്നു. പിന്നീട് വാഹന പരിശോധനയ്ക്കിടെയാണ് മോഷ്ടാവ് പിടിയിലായത്. വിവിധ സ്റ്റേഷനുകളിൽ നിരവധി കേസുകളിൽ പ്രതിയാണ് ഇയാൾ.

വിവരാവകാശ നിയമത്തെ ദുര്‍ബലപ്പെടുത്താനുള്ള നീക്കത്തെ എതിര്‍ക്കണം: ആര്‍ടിഐ ഫെഡറേഷന്‍

കൊച്ചി: വിവരാവകാശ നിയമത്തെ ദുര്‍ബലപ്പെടുത്താള്ള ഏല്ലാ നീക്കത്തെയും എതിര്‍ക്കണമെന്ന് ആര്‍ടിഐ കേരള ഫെഡറേഷന്‍ എറണാകുളം ജില്ലാ പ്രവര്‍ത്തക സമ്മേളനം. 10 രൂപയും ഒരു വെള്ളക്കടലാസും വഴി ഏത് കാര്യവും പൗരന് ലഭിക്കുന്ന വിവരാവകാശ നിയമം രാജ്യത്തെ സുതാര്യമായ ഭരണ സംവിധാനത്തിന് സഹായകരമാണെന്നും യോഗം വിലയിരുത്തി. സമ്മേളനത്തില്‍ സംസ്ഥാന ജനറല്‍ സെക്രട്ടറി ജോളി പവേലില്‍ മുഖ്യപ്രഭാഷണം നടത്തി. ജില്ലാ പ്രസിഡന്‍റ് അഡ്വ. ശശി കിഴക്കട അധ്യക്ഷത വഹിച്ചു. വിവരാവകാശ നിയമത്തിന്‍റെ വെല്ലുവിളികള്‍ എന്ന വിഷയത്തില്‍ അഡ്വ. ഷമീം പ്രസംഗിച്ചു.

മലമ്പാമ്പിനെ പിടികൂടി

കൂത്താട്ടുകുളം: മംഗലത്തുതാഴം ചോരക്കുഴി റോഡിൽ ആറുകാക്കൽ ലോറൻസിന്‍റെ വീടിനു സമീപത്തുനിന്ന് മലമ്പാമ്പിനെ പിടികൂടി വനം വകുപ്പിന് കൈമാറി. ശനിയാഴ്‌ച രാത്രി 8.30നോടെയാണ് മലന്പാന്പിനെ കണ്ടത്. പ്രദേശവാസികളുടെ സഹകരണത്തോടെ വാർഡ് കൗൺസിലർ അഡ്വ. ബോബൻ വർഗീസ്, പ്രദേശവാസിയായ മുട്ടപ്പള്ളിയിൽ അനീഷ് സഹദേവൻ എന്നിവരുടെ നേതൃത്വത്തിലാണ് മലമ്പാമ്പിനെ പിടികൂടിയത്. എട്ടര അടി നീളമുള്ള മലമ്പാമ്പിന് 38.5 കിലോ തൂക്കമുണ്ടായിരുന്നു.

മുങ്ങിപ്പോയെന്ന സംശയത്തിൽ തെരച്ചിൽ; ആരെയും കണ്ടെത്താനായില്ല

തൃപ്പൂണിത്തുറ: ക്ഷേത്രക്കുളത്തിൽ ഒരാൾ മുങ്ങിപ്പോയെന്ന സംശയത്തിന്‍റെ അടിസ്ഥാനത്തിൽ തെരച്ചിൽ നടത്തിയെങ്കിലും ആരെയും കണ്ടെത്താനായില്ല. പുതിയകാവ് പടിഞ്ഞാറേ വളവിലെ കളരിക്കൽ ഭഗവതി ക്ഷേത്രത്തിന്‍റെ കുളത്തിലാണ് ഒരാൾ മുങ്ങിപ്പോയെന്ന സംശയമുണ്ടായത്. രാവിലെ ക്ഷേത്രത്തിൽ വിളക്ക് കത്തിക്കാൻ എത്തിയയാൾ കുളത്തിനു സമീപം ചെരിപ്പും തുറക്കാത്ത ഭക്ഷണപ്പൊതിയും 50 രൂപയും കണ്ടതിനെ തുടർന്ന് ക്ഷേത്ര ഭാരവാഹികളെ അറിയിക്കുകയായിരുന്നു. തുടർന്ന് പോലീസിന്‍റെയും അഗ്നിരക്ഷാ സേനയുടെയും നേതൃത്വത്തിൽ നാലു മണിക്കൂറോളം തെരച്ചിൽ നടത്തിയെങ്കിലും ആരെയും കണ്ടെത്താനായില്ല. ഉച്ചയോടെ തെരച്ചിൽ അവസാനിപ്പിച്ചു.

തിരുവോണ മാഹാത്മ്യം കഥകളി അരങ്ങേറി

തൃപ്പൂണിത്തുറ: തൃപ്പൂണിത്തുറ കഥകളി കേന്ദ്രത്തിന്‍റെ ആഭിമുഖ്യത്തിൽ കളിക്കോട്ട പാലസിൽ തിരുവോണ മാഹാത്മ്യം കഥകളി അരങ്ങേറി. ഉണ്ണികൃഷ്ണൻ നമ്പൂതിരിയുടെ രചനയിൽ കേരള കലാമണ്ഡലം ചിട്ടപ്പെടുത്തിയ കഥകളിയിൽ കലാമണ്ഡലം രവികുമാർ, കലാമണ്ഡലം ഷണ്മുഖൻ, അഭിഷേക്, ഗോകുൽ, വിവേക്, ഹരീഷ്, സദനം ശിവദാസ്, വിശ്വാസ, വിനീഷ്, അനീഷ്, നിതിൻ കൃഷ്ണ, ഹരികൃഷ്ണൻ, വേണുഗോപാൽ, ശ്രീജിത്ത്, ഉദയൻ, എന്നീ കലാകാരന്മാർ പങ്കെടുത്തു.

എച്ച്എംടി കവലയിലെ റോഡിൽ മണ്ണിടിച്ചിൽ

കളമശേരി: ദേശീയപാത എച്ച് എംടി കവലയില്‍ എറണാകുളം ഭാഗത്തേക്കുള്ള ബസ് സ്റ്റോപ്പിനോട് ചേര്‍ന്ന് മണ്ണിടിച്ചില്‍. ഇന്നലെ വൈകുന്നേരം പെയ്ത മഴയ്ക്ക് ശേഷം 6.30 ഓടെയാണ് മണ്ണിടിച്ചില്‍ ഉണ്ടായത്. പോളിടെക്‌നിക് ഭാഗത്തു നിന്നു വരുന്ന വെള്ളം താഴത്തെ കാനയിലേക്ക് ഇതുവഴിയാണ് ഒഴുകുന്നത്. മണ്ണ് ഇടിഞ്ഞു വീണതിനൊപ്പം കാനയും ഇടിഞ്ഞു. ഇവിടെ വാര്‍ക്കപ്പണി നടത്താന്‍ മൂന്നോളം കുഴികള്‍ കുഴിച്ചിരുന്നു. മണ്ണ്ഇടിഞ്ഞു വീണതിന്‍റെ അടി ഭാഗത്താണ് കുഴികള്‍ എടുത്തിരുന്നത്. ഇതാണ് വേഗത്തില്‍ ഇടിയാൻ കാരണമായതെന്ന് നാട്ടുകാര്‍ പറഞ്ഞു.

പ്രായപൂര്‍ത്തിയാകാത്ത പെണ്‍കുട്ടി താലൂക്ക് ആശുപത്രിയില്‍ പ്രസവിച്ചു

മട്ടാഞ്ചേരി: ഫോര്‍ട്ട്‌കൊച്ചി താലൂക്കാശുപത്രിയില്‍ പ്രായപൂര്‍ത്തിയാകാത്ത പെണ്‍കുട്ടി പ്രസവിച്ചു. കഴിഞ്ഞ മാസം 23 നാണ് പ്രസവം നടന്നത്. 19 വയസായി എന്നാണ് ബന്ധുക്കള്‍ ആശുപത്രി അധികൃതരോട് പറഞ്ഞത്. എന്നാല്‍ കുട്ടിയുടെ ജനനം രജിസ്റ്റര്‍ ചെയ്യുന്നതുമായി ബന്ധപ്പെട്ട് പെണ്‍കുട്ടിയുടെ ആധാര്‍ രേഖകള്‍ പരിശോധിച്ചപ്പോഴാണ് 18 വയസ് പൂര്‍ത്തിയായിട്ടില്ലെന്ന് ആശുപത്രി അധികൃതര്‍ അറിയുന്നത്. തുടര്‍ന്ന് ഫോര്‍ട്ട്‌കൊച്ചി പോലീസിലും പെണ്‍കുട്ടിയുടെ സ്വദേശമായ പള്ളുരുത്തി പോലീസ് സ്‌റ്റേഷനിലും അറിയിക്കുകയായിരുന്നു. പള്ളുരുത്തി പോലീസ് കേസെടുത്തു.

കുമ്പളങ്ങി, പനങ്ങാട് ആരോഗ്യ കേന്ദ്രങ്ങൾക്ക് ദേശീയാംഗീകാരം

കൊച്ചി: കുമ്പളങ്ങി സാമൂഹികാരോഗ്യ കേന്ദ്രം, പനങ്ങാട് കുടുംബാരോഗ്യ കേന്ദ്രം എന്നിവയ്ക്ക് നാഷണല്‍ ക്വാളിറ്റി അഷ്വറന്‍സ് സ്റ്റാന്‍ഡേര്‍ഡ്‌സ് അംഗീകാരം ലഭിച്ചു. കുമ്പളങ്ങി സാമൂഹികാരോഗ്യ കേന്ദ്രത്തിന് 96.90 ശതമാനവും പനങ്ങാട് കുടുംബാരോഗ്യ കേന്ദ്രത്തിന് 95.83 ശതമാനവും സ്‌കോര്‍ ലഭിച്ചു. രോഗികള്‍ക്കുള്ള സേവനങ്ങള്‍, മരുന്നുകളുടെ ലഭ്യതയും വിതരണവും, ക്ലിനിക്കല്‍ സേവനങ്ങള്‍, പകര്‍ച്ചവ്യാധി പ്രതിരോധപ്രവര്‍ത്തനങ്ങള്‍ തുടങ്ങിയ വിഷയങ്ങളെ അടിസ്ഥാനമാക്കിയാണ് നാഷണല്‍ ക്വാളിറ്റി അഷ്വറന്‍സ് സ്റ്റാന്‍ഡേര്‍ഡിന് പരിഗണിക്കുന്നത്. സംസ്ഥാനത്ത് 251 ആരോഗ്യസ്ഥാപനങ്ങള്‍ ഇതുവരെയായി എന്‍ക്യുഎഎസ് അംഗീകാരം നേടിയിട്ടുണ്ട്.

ജില്ലയിൽ വൻ മയക്കുമരുന്ന് വേട്ട ആറ് ഇതരസംസ്ഥാനക്കാർ പിടിയിൽ

പെരുന്പാവൂരിൽ 30 ലക്ഷത്തിന്‍റെ ഹെറോയിനും ആലുവയിൽ 17 കിലോ കഞ്ചാവും പിടികൂടി പെരുമ്പാവൂർ/ആലുവ: പെരുന്പാവൂരിലും ആലുവയിലുമായി വൻ മയക്കുമരുന്നുവേട്ട. പെരുന്പാവൂരിൽ 30 ലക്ഷം വിലമതിക്കുന്ന ഹെറോയിനും ആലുവയിൽ 17 കിലോഗ്രാം കഞ്ചാവുമാണ് പിടികൂടിയത്. രണ്ടിടങ്ങളിലുമായി ആസാം-ബംഗാൾ സ്വദേശികളായ ആറുപേരാണ് പിടിയിലായത്. പെരുമ്പാവൂരിൽ ഹെറോയിനുമായി മൂന്നുപേരെ അറസ്റ്റ് ചെ‍യ്തു. 30 ലക്ഷത്തോളം വിലമതിക്കുന്ന ഹെറോയിനുമായി പോഞ്ഞാശേരിയിൽ നിന്നും യുവതി ഉൾപ്പെടെ രണ്ട് ആസാം സ്വദേശികളും പെരുമ്പാവൂര്‍ മത്സ്യമാര്‍ക്കറ്റ് ഭാഗത്ത് നടത്തിയ പരിശോധനയിൽ മൂന്നുഗ്രാം ഹെറോയിനുമായി മറ്റൊരു ആസാം സ്വദേശിയേയുമാണ് പിടികൂടിയത്. ആസാം നൗഗാവ് സ്വദേശികളായ നൂർ അമീൻ (29), ഹിബ്ജുൻ നഹാർ (25) എന്നിവരാണ് പോഞ്ഞാശേരിയിൽ കുടുങ്ങിയത്. ആസാമിൽ നിന്ന് ട്രെയിൻ മാർഗം ആലുവയിലെത്തി ഓട്ടോറിക്ഷയിൽ വരികയായിരുന്നു. യുവതി ധരിച്ചിരുന്ന വസ്ത്രത്തിനുള്ളിൽ ഒളിപ്പിച്ച നിലയിലായിരുന്നു ഹെറോയിൻ. 14 സോപ്പുപെട്ടി ബോക്സുകളിലായിരുന്നു കൊണ്ടുവന്നത്. നാഗാലാൻഡിൽ നിന്ന് ഒരു ബോക്സ് 80000 രൂപയ്ക്ക് വാങ്ങി ഇവിടെയെത്തിച്ച് ചെറിയ ബോട്ടിലുകളാക്കിയായിരുന്നു വില്പന. ഒരു ചെറിയ ബോട്ടിൽ ആയിരം രൂപ മുതൽ 2000 രൂപ വരെയാണ് ഈടാക്കിയിരുന്നത്. പെരുമ്പാവൂർ എഎസ്പി ഹാർദിക് മീണ, ഇൻസ്പെക്ടർ ടി.എം. സൂഫി, എസ്ഐ പി.എം. റാസിക്, എഎസ്ഐമാരായ പി.എ. അബ്ദുൽ മനാഫ്, ശ്രീജ, സീനിയർ സിപിഒമാരായവർഗീസ് ടി. വേണാട്ട്, ടി.എ. അഫ്സൽ, ബെന്നി ഐസക്, സിബിൻ സണ്ണി, ജിഷ്ണു, അരുൺ എന്നിവരാണ് അന്വേഷണ സംഘത്തിലുണ്ടായിരുന്നത്. പെരുമ്പാവൂര്‍ മത്സ്യമാര്‍ക്കറ്റ് ഭാഗത്തു നിന്നും മൂന്നുഗ്രാം ഹെറോയിനുമായി ആസാം സ്വദേശി മുഹമ്മദ് അബ്ദുൽ ഗാനിയെ (40) എക്സൈസാണ് പിടികൂടിയത്. അസിസ്റ്റന്‍റ് എക്സൈസ് ഇൻസ്പെക്ടർ സാബു വർഗീസിന്‍റെ നേതൃത്വത്തിലായിരുന്നു പരിശോധന. ഒഡീഷയിൽ നിന്നെത്തിച്ച 17 കിലോഗ്രാം കഞ്ചാവുമായി എത്തിയ വെസ്റ്റ് ബംഗാൾ സ്വദേശികളായ ബുട്ടു മണ്ഡൽ (32), ലാലൻ മണ്ഡൽ (35), അഷറഫ് മണ്ഡൽ (20) എന്നിവരെ ആലുവ പോലീസാണ് പിടികൂടിയത്. രഹസ്യ വിവരത്തെ തുടർന്ന് നടത്തിയ പരിശോധനയിൽ തോട്ടുമുഖം ഭാഗത്ത് എടയപ്പുറം റോഡിലുള്ള കെട്ടിടത്തിൽ നിന്നാണ് പ്രതികളെ കസ്റ്റഡിയിലെടുക്കുകയായിരുന്നു. കിലോയ്ക്ക് 2000 മുതൽ 3000 രൂപ നിരക്കിൽ ഒഡീഷയിൽ നിന്ന് വാങ്ങി 30000 രൂപ നിരക്കിലാണ് വില്പന നടത്തിയിരുന്നത്. പോലീസിന്‍റെ പരിശോധനയിൽ നിന്ന് രക്ഷപ്പെടാൻ അങ്കമാലിയിൽ നിന്ന് എംസി റോഡിലൂടെ മാറമ്പിള്ളി വഴി തോട്ടമുഖത്തെത്തുകയായിരുന്നു. പോലീസ് ഇവരെ പിന്തുടർന്നാണ് പിടികൂടുകയത്. ഒഡീഷയിൽ നിന്ന് മയക്കുമരുന്ന് എത്തിച്ച ശേഷം മടങ്ങുന്ന സംഘത്തിലെ പ്രധാന കണ്ണികളാണ് ഇവരെന്ന് പോലീസ് പറഞ്ഞു. ഇവരുമായി ബന്ധമുള്ളവരെക്കുറിച്ചും പോലീസ് അന്വേഷണമാരംഭിച്ചു. കഴിഞ്ഞ ദിവസം റൂറൽ പോലീസ് കാലടിയിൽ നിന്നും 16 കിലോഗ്രാം കഞ്ചാവുമായി രണ്ട് മൂർഷിദാബാദ് സ്വദേശികൾ പിടിയിലായിരുന്നു.

ടിടിസി വിദ്യാര്‍ഥിനി മരിച്ചനിലയില്‍

കോതമംഗലം: ടിടിസി വിദ്യാര്‍ഥിനിയെ വീടിനുള്ളില്‍ മരിച്ചനിലയില്‍ കണ്ടെത്തി. കറുകടം ഞാഞ്ഞൂള്‍മല നഗറില്‍ കടിഞ്ഞുമ്മേല്‍ പരേതനായ എല്‍ദോസിന്‍റെ മകള്‍ സോനയെ (21) ശനിയാഴ്ച ഉച്ചയ്ക്കാണ് തൂങ്ങിമരിച്ചനിലയില്‍ കണ്ടെത്തിയത്. സംസ്‌കാരം നടത്തി.യുവതിയുടെ ആത്മഹത്യാക്കുറിപ്പ് പോലീസ് കണ്ടെടുത്തിട്ടുണ്ട്. മരണത്തില്‍ ബന്ധുക്കള്‍ ആത്മഹത്യാപ്രേരണ ആരോപിക്കുന്നതായി പോലീസ് പറഞ്ഞു. ഇതുസംബന്ധിച്ച് പോലീസ് അന്വേഷണം നടത്തും. മാതാവ്: ബിന്ദു . സഹോദരന്‍: ബേസില്‍.

ആലുവ ഫുട്ബോൾ അക്കാഡമിയിൽ കിറ്റ് വിതരണം

ആലുവ: ആലുവ ഫുട്ബോൾ അക്കാഡമിയിലേക്ക് പതിനേഴാമത് ബാച്ചിന്‍റെ പ്രവേശനവും കിറ്റ് വിതരണവും നടന്നു. ദേശീയ ഫുട്ബോളിൽ സ്വർണം നേടിയ കേരള ടീമിലെ അംഗം ടി.എൻ. അഫ്നാസിനെ യോഗത്തിൽ പോലീസ് സർക്കിൾ ഇൻസ്പെക്ടർ കെഴ്സൺ വി. മർക്കോസ് ആദരിച്ചു. എം.ഒ. ജോൺ അധ്യക്ഷത വഹിച്ച ചടങ്ങിൽ എയ്‌ലി ഹിൽസ് മാനേജർ ഡോ. കെ.പി. ഉണ്ണികൃഷ്ണൻ, പ്രസിഡന്‍റ് പി.എ. മെഹബൂബ്, പി.ജെ. വർഗീസ്, പി. പൗലോസ്, എം.എം. ജേക്കബ്, ചിന്നൻ ടി. പൈനാടത്ത്, എം.ടി. ഫ്രാൻസിസ് എന്നിവർ സംസാരിച്ചു.

ട്രെയിനിംഗ് നടത്തി

കളമശേരി: മഞ്ഞുമ്മല്‍ സെന്‍റ് ജോസഫ്‌സ് ആശുപത്രിയില്‍ എന്‍എബിഎച്ച് ആറാം പതിപ്പിന്‍റെ ട്രെയിനിംഗ് നടന്നു. ഹോസ്പിറ്റല്‍ ഓഡിറ്റോറിയത്തില്‍ നടന്ന ചടങ്ങില്‍ ആശുപത്രി ഡയറക്ടര്‍ ഫാ. ലാല്‍ജു പോളപ്പറമ്പില്‍ ഉദ്ഘാടനം ചെയ്തു. അസോസിയേറ്റ് ഡയറക്ടര്‍ ഫാ. ജിന്‍സണ്‍ റോഡ്രിഗ്‌സ്, മെഡിക്കല്‍ സൂപ്രണ്ട് ഡോ. എം.എന്‍. വെങ്കിടെശ്വരന്‍, അഡ്മിനിസ്ട്രറ്റര്‍ സെലിന്‍ മാത്യു, അനസ്‌തേഷ്യാ മേധാവി ഡോ. സിജു എ.ജോസഫ്, നഴ്‌സിംഗ് സൂപ്രണ്ട് സിസ്റ്റര്‍ സംഗീത എന്നിവര്‍ പ്രസംഗിച്ചു. 13 ഓളം ആശുപത്രികളില്‍ നിന്നുള്ള ആരോഗ്യപ്രവര്‍ത്തകര്‍ പങ്കെടുത്തു.

കുറുമശേരി ഗവ. യുപി സ്കൂളിന് ബസ് അനുവദിച്ചു

നെടുമ്പാശേരി : പാറക്കടവ് പഞ്ചായത്തിലെ കുറുമശേരി ഗവ. യുപി സ്കൂളിന് എംഎല്‍എ ഫണ്ടില്‍ നിന്നും അനുവദിച്ച ബസിന്‍റെ ഉദ്ഘാടനം സ്കൂള്‍ അങ്കണത്തില്‍ നടന്ന ചടങ്ങിൽ റോജി എം. ജോണ്‍ എംഎല്‍എ നിര്‍വഹിച്ചു. പാറക്കടവ് ഗ്രാമപഞ്ചായത്ത് പ്രസിഡന്‍റ് എസ്.വി. ജയദേവന്‍ അധ്യക്ഷത വഹിച്ചു. ഇരുന്നൂറോളം കുട്ടികള്‍ പഠിക്കുന്ന സ്കൂളിന്‍റെ ദീര്‍ഘനാളത്തെ ആവശ്യമായിരുന്നു സ്വന്തമായി ഒരു സ്കൂള്‍ ബസ് എന്നത്. എംഎല്‍എ യുടെ പ്രത്യേക വികസന ഫണ്ടില്‍ നിന്നും 19.29 ലക്ഷം രൂപ ചിലവഴിച്ചാണ് സ്കൂളിന് പുതിയ ബസ് വാങ്ങി നല്‍കിയത്. ചടങ്ങില്‍ ബ്ലോക്ക് പഞ്ചായത്ത് പ്രസിഡന്‍റ് ടി.വി. പ്രദീഷ്, ജില്ലാ പഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍മാന് എം.ജെ. ജോമി, പഞ്ചായത്ത് വൈസ് പ്രസിഡന്‍റ് ഡെയ്സി ടോമി, പി.പി. ജോയി, ആര്‍.സി നായര്‍, പ്രധാനാധ്യാപിക കെ.കെ. ഷീബ , എസ്.എം.സി ചെയര്‍മാന്‍ എം എസ് ശിവദാസന്‍, എന്നിവര്‍ സന്നിഹിതരായിരുന്നു.

ഫിസാറ്റിൽ സംസ്ഥാന മാത്‌സ് ക്വിസ് നടത്തി ‌‌

കൊച്ചി: അങ്കമാലി ഫിസാറ്റ് എൻജിനിയറിംഗ് കോളജിൽ ഇൻസ്റ്റിറ്റ്യൂഷൻ ഓഫ് ഇന്നോവേഷൻ കൗൺസിലും സയൻസ് ആൻഡ് ഹ്യൂമാനിറ്റീസ് വിഭാഗവും മാത്‍സ് ക്ലബും സംയുക്തമായി സംസ്ഥാനതല മാത്‍സ് ക്വിസ് നടത്തി. 26 കോളജുകളിലെ ടീമുകൾ പങ്കെടുത്തു. കോതമംഗലം എംഎ കോളജിലെ ഫാബ്രിസിയോ ജോസും വർഷ വി. ബാബുവും ഒന്നാം സ്ഥാനം നേടി. മുവാറ്റുപുഴ നിർമല കോളജിലെ അതുൽ സിബിച്ചൻ- എം.ജെ. ഹിഷാം, എറണാകുളം സെൻറ് തെരേസാസ് കോളജിലെ ഗായത്രി വി. മല്ല- എ.പി. അതുല്യദേവി ട‌ീമുകൾ യഥാക്രമം രണ്ടും മുന്നും സ്ഥാനങ്ങൾ സ്വന്തമാക്കി. വിജയികൾക്ക് കാഷ് അവാർഡും ട്രോഫിയും പ്രിൻസിപ്പൽ ഡോ. ജേക്കബ് തോമസ് വിതരണം ചെയ്തു. വൈസ് പ്രിൻസിപ്പൽ ഡോ. പി. ആർ. മിനി, ഡീൻ ഡോ. ജി. ഉണ്ണികർത്ത, സയൻസ് ആൻഡ് ഹ്യൂമാനിറ്റീസ് വിഭാഗം മേധാവി പി .എസ്. ജിഷ, പ്രോഗ്രാം കോ ഓർഡിനേറ്റർമാരായ ടി.ജി. ധന്യ,വി. കാർത്തിക, സ്റ്റുഡന്‍റ് കോ ഓർഡിനേറ്റർമാരായ അൻസാ ആന്‍റു, കാതറിൻ മേരി മാത്യു തുടങ്ങിയവർ പ്രസംഗിച്ചു.

എച്ച്‌എംടി ജംഗ്ഷനിലെ അനധികൃത പാർക്കിംഗ് നിരോധിക്കണമെന്ന്

കളമശേരി : എച്ച്‌എം ടി ജംഷനിലെ അനധികൃത പാർക്കിംഗ് കർശനമായി നിരോധിക്കണമെന്ന് എഐവൈഎഫ്. കളമശേരിയിലെ ഏറ്റവും അധികം തിരക്കേറിയ ജംഗ്ഷനാണ് എച്ച്എംടി കവല. നിരവധി വിദ്യാഭ്യാസ സ്ഥാപനങ്ങളും കച്ചവട സ്ഥാപനങ്ങളും സ്ഥിതി ചെയ്യുന്ന ഈ ജംഗ്ഷനിൽ ഗതാഗതക്കുരുക്ക് രൂക്ഷമാണ്. ഇവിടെയുണ്ടാകുന്ന ഗതാഗതക്കുരുക്കിന് പ്രധാന കാരണം നാഷണൽ ഹൈവേയുടെ ഇരു വശങ്ങളിലും അനധികൃതമായി പാർക്ക് ചെയ്തിരിക്കുന്ന വാഹനങ്ങളാണ്. എന്നാൽ ഇത്തരം വാഹങ്ങൾക്ക് പിഴ ചുമത്താതെ കച്ചവട സ്ഥാപങ്ങളിൽ എത്തുന്ന സാധാരണക്കാരായ ജനങ്ങളെ ഉപദ്രവിക്കുന്ന പോലീസ് നടപടി പ്രതിഷേധാർഹമാണെന്ന് എഐവൈഎഫ് അറിയിച്ചു.

മഹിളാ കോണ്‍ഗ്രസ് കണ്‍വന്‍ഷനും ലിസി ടീച്ചർ അനുസ്മരണവും

അങ്കമാലി: മഹിളാ കോണ്‍ഗ്രസിന്‍റെ പ്രമുഖ നേതാവും അങ്കമാലി നരസഭാ മുന്‍ വൈസ് ചെയര്‍പേഴ്സണുമായിരുന്ന ലിസി ടീച്ചറുടെ മൂന്നാം ചരമ വാര്‍ഷികത്തോടനുബന്ധിച്ച് മഹിളാ കോണ്‍ഗ്രസ് അങ്കമാലി, കാലടി ബ്ലോക്ക് കമ്മിറ്റികളുടെ നേതൃത്വത്തില്‍ നിയോജകമണ്ഡലം മഹിളാ കണ്‍വന്‍ഷനും അനുസ്മരണ സമ്മേളനവും നാളെ രാവിലെ 10.30 ന് ബെന്നി ബെഹനാന്‍ എംപിയുടെ ഓഫീസ് അങ്കണത്തില്‍ നടക്കും. മഹിളാ കോണ്‍ഗ്രസ് മുന്‍ സംസ്ഥാന പ്രസിഡന്‍റും കോണ്‍ഗ്രസ് രാഷ്ട്രീയകാര്യ സമിതി അംഗവുമായ ബിന്ദു കൃഷ്ണ ഉദ്ഘാടനം ചെയ്യും. റോജി എം. ജോണ്‍ എംഎല്‍എ മുഖ്യ പ്രഭാഷണം നടത്തും. അങ്കമാലി നഗരസഭയില്‍ കൗണ്‍സിലറായി കാല്‍ നൂറ്റാണ്ട് കാലത്തെ സുത്യര്‍ഹ സേവനം നടത്തിയ റീത്താ പോളിനെ അനുമോദിക്കും.

3.2 കിലോ കഞ്ചാവുമായി ആലുവ സ്വദേശി പിടിയില്‍

അരൂര്‍: തുറവൂര്‍ മേഖലയിൽ നടത്തിയ പരിശോധനയില്‍ 3.2 കിലോഗ്രാം കഞ്ചാവുമായി ആലുവ സ്വദേശി പിടിയില്‍. കെ.പി. ഗോവര്‍ദ്ധനെയാണ് ചേര്‍ത്തല എക്‌സൈസ് സര്‍ക്കിള്‍ ഓഫീസിലെ സര്‍ക്കിള്‍ ഇന്‍സ്‌പെക്ടര്‍ സി.എസ്. സുനില്‍കുമാറിന്‍റെ നേതൃത്വത്തില്‍ നടത്തിയ പരിശോധനയില്‍ പിടികൂടിയത്. ഇതരസംസ്ഥാന തൊഴിലാളികളില്‍ നിന്ന് കഞ്ചാവ് വന്‍തോതില്‍ വാങ്ങി ചില്ലറ വില്പന നടത്തുന്ന ആളാണ് ഇയാളെന്ന് എക്‌സൈസ് പറഞ്ഞു.

പുല്ലുവഴി ഡബിൾ പാലത്തിലൂടെ ഗതാഗതം പുനരാരംഭിക്കും: എംഎൽഎ

പെരുമ്പാവൂർ : എംസി റോഡിൽ പുല്ലുവഴിയിലുള്ള ഡബിൾ പാലം ഒറ്റപ്പാലമാക്കുന്ന പ്രവൃർത്തി അവസാന ഘട്ടമായതിനാൽ നാളെ മുതൽ ഗതാഗതം ഭാഗികമായി പുനരാരംഭിക്കുമെന്ന് എൽദോസ് കുന്നപ്പിള്ളി എംഎൽഎ അറിയിച്ചു. നിലവിൽ റോഡ് ബലപ്പെടുത്തുന്നതിന്‍റെ ഭാഗമായിട്ടാണ് താത്കാലികമായി ഗതാഗതത്തിന് തുറന്നുകൊടുക്കുന്നത്. മഴ മാറിയാൽ ഫിനിഷിംഗ് ജോലിയായ ബിഎംബിസി ടാറിംഗ് ജോലികൾ കൂടി പൂർത്തിയാക്കുമെന്ന് എൽദോസ് കുന്നപ്പിള്ളി എംഎൽഎ അറിയിച്ചു.

ആലുവയിൽ ഗൂഗിൾ പേ തട്ടിപ്പ്

ആലുവ: വ്യാപാര ശാലകളിലെ ജീവനക്കാരെ ഒരു സംഘം ഗൂഗിൾപേ തട്ടിപ്പിന് ഇരയാക്കുന്നതായി പരാതി. പണം നൽകുന്നതിന് പകരമായി ഗൂഗിൾ പേ ചെയ്തതായി തെറ്റിദ്ധരിപ്പിച്ചാണ് തട്ടിപ്പ് നടത്തുന്നത്. വിശ്വാസം വരാനായി കടയിൽ നിന്ന് ചെറിയ തുകയ്ക്ക് സാധനങ്ങൾ വാങ്ങുകയാണ് ആദ്യം ചെയ്യുക. പിന്നീടാണ് കോഴിക്കോട്ടാണ് വീടെന്നും റെയിൽവേ സ്റ്റേഷനിൽ ഗൂഗിൾപേ ഇല്ലാത്തതിനാൽ 500 രൂപതന്നാൽ ഗൂഗിൾ പേ ചെയ്യാമെന്നും പറഞ്ഞ് തുക ട്രാൻസ്ഫർ ചെയ്ത സന്ദേശം കാണിച്ച് മുങ്ങുന്നത്. ചെറുപ്പക്കാരുടെ ആറംഗ സംഘമാണ് കൃത്യം നടത്തുന്നതെന്ന് പറയുന്നു. ടാസ് റോഡിലെ കടയിൽ തട്ടിപ്പ് നടത്തി മടങ്ങുന്ന ദ്യശ്യം സിസി ടിവിയിൽ പതിഞ്ഞിട്ടുണ്ട്. ഫോൺ നമ്പർ ചേർത്ത് ആലുവ പോലീസിൽ പരാതി നൽകി.

ഫോർട്ടുകൊച്ചിയിൽ വിരമിച്ച അധ്യാപകരെ ആദരിച്ചു

ഫോര്‍ട്ടുകൊച്ചി: കൊച്ചി മണ്ഡലത്തില്‍ കെ.ജെ. മാക്‌സി എംഎല്‍എയുടെ നേതൃത്വത്തില്‍ നടപ്പാക്കിവരുന്ന അക്ഷരദീപം പദ്ധതിയുടെ ഭാഗമായി വിരമിച്ച അധ്യാപകരെ ആദരിക്കുന്ന ചടങ്ങ് ജസ്റ്റിസ് ശോഭ അന്നമ്മ ഈപ്പന്‍ ഉദ്ഘാടനം ചെയ്തു. തോപ്പുംപടിയില്‍ സംഘടിപ്പിച്ച ചടങ്ങില്‍ കെ.ജെ. മാക്‌സി എംഎല്‍എ അധ്യക്ഷത വഹിച്ചു. ഫാറ്റിമ ഹോസ്പിറ്റല്‍ ഡയറക്ടര്‍ ഫാ.സിജു പാലിയത്തറ, കേരള കോണ്‍ഗ്രസ്-എം സംസ്ഥാന ജനറല്‍ സെക്രട്ടറി എം.എം. ഫ്രാന്‍സിസ്, കോര്‍പറേഷന്‍ വിദ്യഭ്യാസ സ്റ്റാൻഡിംഗ് കമ്മിറ്റി ചെയര്‍മാന്‍ വി.എ. ശ്രീജിത്ത്, പള്ളുരുത്തി ബ്ലോക്ക് പഞ്ചായത്ത് പ്രസിഡന്‍റ് ബേബി തമ്പി, ജില്ലാ പഞ്ചായത്ത് അംഗം ദീപു കുഞ്ഞുകുട്ടി, ചെല്ലാനം പഞ്ചായത്ത് പ്രസിഡന്‍റ് കെ.എല്‍. ജോസഫ്, മെട്രോപൊളിറ്റന്‍ കൗണ്‍സില്‍ ചെയര്‍മാന്‍ ബെനഡിക്ട് ഫെര്‍ണാണ്ടസ്, കൗണ്‍സിലര്‍മാരായ ഷീബ ഡുറോം, പി.എം. ഇസ്മുദീന്‍, സി.ആര്‍. സുധീര്‍, കെ.പി. ആന്‍റണി, റെഡിന ആന്‍റണി, സോണി കെ.ഫ്രാന്‍സിസ്, എം.എച്ച്.എം. അഷ്‌റഫ്, ജില്ലാ വിദ്യാഭ്യാസ ഡയറക്ടര്‍ സുബിന്‍ പോള്‍ തുടങ്ങിയവര്‍ ചടങ്ങിൽ പങ്കെടുത്തു.

കടമക്കുടിയുടെ കാഴ്ചകള്‍; ടൂറിസം സെമിനാര്‍ 12,13 തിയതികളില്‍

കൊച്ചി: കടമക്കുടി ദ്വീപ് സമൂഹത്തിന്‍റെ അനന്ത ടൂറിസം വികസന സാധ്യത തിരിച്ചറിയാനും അത് വിപുലമായ തോതില്‍ സാക്ഷാത്കരിക്കാനും ലക്ഷ്യമിട്ട് 12,13 തീയതികളിലായി വിനോദ സഞ്ചാര സെമിനാര്‍ സംഘടിപ്പിക്കുന്നു. "കടമക്കുടി : ഹെവന്‍ ഓഫ് വാലി' എന്ന പേരില്‍ സംഘടിപ്പിക്കുന്ന സെമിനാര്‍ 12ന് മന്ത്രി പി. രാജീവ് ബോള്‍ഗാട്ടി റോ-റോ ജെട്ടിയില്‍ ഉദ്ഘാടനം ചെയ്യും. കലക്ടര്‍ ജി. പ്രിയങ്ക അധ്യക്ഷത വഹിക്കും. ഡിടിപിസി സെക്രട്ടറി ലിജോ ജോസഫ്, സംഘാടക സമിതി ചെയര്‍മാന്‍ കെ.എന്‍. ഉണ്ണിക്കൃഷ്ണന്‍ എംഎല്‍എ തുടങ്ങിയവര്‍ പങ്കെടുക്കും. തുടര്‍ന്ന് ബോട്ടുകളിലായി കടമക്കുടി പ്രയാണം ആരംഭിക്കും. 13 ന് രാവിലെ 10 ന് ടൂറിസം വികസന സെമിനാര്‍ കോതാട് നിഹാര റിസോര്‍ട്ടില്‍ നടക്കും. മേഖലയിലെ പ്രഗത്ഭരും പ്രസിദ്ധരും പങ്കെടുക്കും.

ഇന്ത്യയിൽ ക്രൈസ്തവർ അരക്ഷിതാവസ്ഥയിൽ: എക്യുമെനിസം കമ്മീഷൻ

കൊച്ചി: ഇന്ത്യയിൽ രണ്ടര ശതമാനം മാത്രം ജനസംഖ്യയുള്ള ക്രൈസ്തവർ അരക്ഷിതാവസ്ഥയിലാണ് ജീവിക്കുന്നതെന്ന് വരാപ്പുഴ അതിരൂപത എക്യുമെനിസം ആൻഡ് ഡയലോഗ് കമ്മീഷൻ കുറ്റപ്പെടുത്തി സഭാവസ്ത്രം ധരിച്ച് ബിജെപി ഭരിക്കുന്ന സംസ്ഥാനങ്ങളിൽ കൂടി സഞ്ചരിക്കുവാൻ പോലും ഭയപ്പെടേണ്ട അവസ്ഥയുണ്ട്. ലോകത്തിലെ ഏറ്റവും വലിയ ജനാധിപത്യ രാജ്യത്തിന് ഇത് അപമാനകരമാണ്. ഇത്തരം സംഭവങ്ങൾ ആവർത്തിക്കാതിരിക്കാൻ കേന്ദ്ര സർക്കാർ അടിയന്തര നടപടികൾ കൈക്കൊള്ളണമെന്നും കമ്മീഷൻ ആവശ്യപ്പെട്ടു. ഡയറക്ടർ ഫാ. ജോൺ ക്രിസ്റ്റഫർ യോഗം ഉദ്ഘാടനം ചെയ്തു. സെക്രട്ടറി ഷൈജു കേളന്തറ അധ്യക്ഷത വഹിച്ചു. ജെയിംസ് ഇലഞ്ഞേരിൽ, ലീനസ് സെബാസ്റ്റിൻ,സിസ്റ്റർ ഐറിസ്, ജോബിൻ വർഗീസ് എന്നിവർ പ്രസംഗിച്ചു.

ലഹരിവിരുദ്ധ സന്ദേശവുമായി ഓട്ടന്‍തുള്ളല്‍ അവതരണം

മൂവാറ്റുപുഴ: വിവേകാനന്ദ വിദ്യാലയത്തില്‍ ലഹരിവിരുദ്ധ സന്ദേശവുമായി ഓട്ടന്‍തുള്ളല്‍ അവതരണം നടത്തി. എറണാകുളം അസി. എക്‌സൈസ് ഇന്‍സ്പെക്ടര്‍ വി. ജയരാജ്. ഓട്ടന്‍തുള്ളല്‍ അവതരിപ്പിച്ചു. ഓട്ടന്‍ തുള്ളലിന് ശേഷം ലഹരി വിരുദ്ധ ക്ലാസും നടന്നു. പുതുമയാര്‍ന്ന രൂപത്തില്‍ നടന്ന ക്യാമ്പയിന്‍ എല്ലാവരിലും കൗതുകം ഉണര്‍ത്തി. മൂവാറ്റുപുഴ എക്‌സൈസ് പ്രിവന്‍റ്റീവ് ഓഫീസര്‍ കെ.കെ. വിജു, പ്രധാന അധ്യാപകന്‍ കെ.കെ. രാജീവ് കുമാര്‍, വിദ്യാലയസമിതി പ്രസിഡന്‍റ് കെ.കെ. ദിലീപ് കുമാര്‍, സമിതി അംഗം സുധീഷ് എസ്, പിടിഎ പ്രസിഡന്‍റ് മനു ബ്ലായില്‍ എന്നിവര്‍ പങ്കെടുത്തു.

ഷോക്കേറ്റ് വീണ കാക്കയ്ക്ക് സിപിആറിലൂടെ പുതുജീവൻ

കോതമംഗലം: വൈദ്യുതി ലൈനില്‍നിന്ന് ഷോക്കേറ്റ് വീണ കാക്കയെ സിപിആര്‍ നൽകി രക്ഷിച്ചു. ഇന്നലെ രാവിലെ ആറേകാലോടെ നെല്ലിക്കുഴി കമ്പനിപ്പടിയിലാണ് സംഭവം. പ്രദേശവാസി പരീത് പട്ടമ്മാവുടിയാണ് പക്ഷിക്ക് രക്ഷകനായത്. പള്ളിയില്‍ പോയി മടങ്ങിവന്ന ശേഷം ഹോട്ടലില്‍ പതിവ് ചായകുടിയും രാഷ്ട്രീയ ചര്‍ച്ചയുമായി ഇരിക്കുമ്പോഴാണ് കാക്ക ജീവനോട് മല്ലടിക്കുന്നത് പരീത് കാണുന്നത്. വൈദ്യുതി ലൈനില്‍നിന്ന് ഷോക്കേറ്റ് വീണ കാക്കയെ സിപിആര്‍ ഉള്‍പ്പടെയുള്ള പ്രാഥമിക ശുശ്രൂഷ നൽകി. കോണ്‍ഗ്രസ് കോതമംഗലം ബ്ലോക്ക് ജനറല്‍ സെക്രട്ടറിയാണ് പരീത് പട്ടമ്മാവുടി. ഒപ്പം പാലിയേറ്റീവ് രംഗത്തും പ്രവര്‍ത്തന പരിചയമുണ്ട്. അതുകൊണ്ടാണ് സിപിആര്‍ ചെയ്യാൻ പെട്ടന്നു തന്നെ കഴിഞ്ഞത്.

ചെറായിൽ കൊള്ളപ്പലിശക്കാർക്കെതിരായ റെയ്ഡ്: ആർസി ബുക്കുകൾ പിടിച്ചെടുത്തു

വൈപ്പിൻ: കൊള്ളപ്പലിശക്കാർക്കെതിരെ മുനമ്പം പോലീസ് നടത്തിയ റെയ്ഡിൽ ചെറായി എസ്എം എച്ച്എസ് ഭാഗത്ത് ഒരു വീട്ടിൽ നിന്നും വീട്ടുടമയുടെ സ്വന്തമല്ലാത്ത വാഹനങ്ങളുടെ ആർസി ബുക്കുകൾ പിടിച്ചെടുത്തു. ഉന്നത പോലീസ് അധികാരികളുടെ നിർദേശം ഉള്ളതിനാൽ ആളെക്കുറിച്ച് പ്രാഥമിക അന്വേഷണം നടത്തിയ ശേഷമേ കേസെടുക്കുകയുള്ളൂ എന്നാണ് സൂചന. ആർസി ഉടമകൾക്ക് പരാതികൾ ഉണ്ടോ എന്നുകൂടി അന്വേഷിക്കും. വീടുകൾ കേന്ദ്രീകരിച്ച് കൊള്ളപ്പലിശയ്ക്ക് പണം കൊടുക്കുന്നവരുടെ എണ്ണം വർധിക്കുന്നതായി ജില്ലാ പോലീസ് മേധാവിക്ക് ലഭിച്ച രഹസ്യവിവരത്തെ തുടർന്നായിരുന്നു റെയ്ഡ്.

ലൈഫ് പദ്ധതി : ചൂർണിക്കരയിലെ പുറമ്പോക്ക് ഭൂമി സർവേ പുനരാരംഭിക്കുന്നു

ആലുവ: ചൂർണിക്കര ഗ്രാമപഞ്ചായത്ത് ലൈഫ് പദ്ധതിക്കായി കണ്ടെത്തിയ പുറമ്പോക്ക് ഭൂമിയിൽ സർവേ നടപടികൾ പുനരാരംഭിക്കണമെന്ന് ആലുവ തഹസിൽദാർക്ക് ജില്ലാ കളക്ടർ നിർദേശം നൽകി. നടപടികൾ വേഗത്തിലാക്കാൻ ഡെപ്യൂട്ടി ഡയറക്ടർ ഓഫ് സർവേ ആൻഡ് ലാൻഡ് റിക്കോർഡ്സുമായി ആലുവ താലൂക്ക് വിഭാഗം ബന്ധപ്പെട്ടതായും കക്ഷികൾക്ക് നോട്ടീസ് അയച്ചു തുടങ്ങിയതായും ലൈഫ് ആക്ഷൻ കമ്മിറ്റി ഭാരവാഹികൾ അറിയിച്ചു. ദേശീയ പാതയ്ക്ക് സമീപം കമ്പനിപ്പടി മേഖലയിൽ പ്രവർത്തനം നിലച്ച സ്റ്റാൻഡേർഡ് പോട്ടറീസ് അനുബന്ധ ഭൂമികളിലും കൈവശ ഭൂമികളിലും സർവേനടത്തി പുറമ്പോക്കുകൾ കണ്ടെത്തി അതിരടയാളങ്ങൾ സ്ഥാപിക്കാനാണ് ജില്ലാ കളക്ടറുടെ നിർദ്ദേശം. ഭൂമികളിലെ കാട് വെട്ടിത്തെളിച്ച് ആധുനിക സങ്കേതങ്ങളും ഉപകരണങ്ങളും ഉപയോഗിച്ച് ടോട്ടൽ സ്റ്റേഷൻ-ലേസർ സർവേ നടപടികളിലൂടെ പുറമ്പോക്കുകൾ, പുഴ പുറമ്പോക്കുകൾ തിട്ടപ്പെടുത്താനാണ് റവന്യൂ അധികാരികളോട് നിർദ്ദേശിച്ചിരിക്കുന്നത്. ഭൂരഹിതരായ 600ഓളം കുടുംബങ്ങളാണ് ചൂർണിക്കര പഞ്ചായത്ത് ലൈഫ്‌മിഷൻ പാർപ്പിട പദ്ധതിയിലുള്ളത്. ഇവർക്ക് ഭൂമി ലഭ്യമാക്കുന്നതിനാണ് പുറമ്പോക്ക് ഭൂമി തിരിച്ചുപിടിക്കുന്നത്. കഴിഞ്ഞ വർഷം പുറമ്പോക്കുകൾ കണ്ടെത്തിയിരുന്നെങ്കിലും കാട് വെട്ടിത്തെളിക്കുന്നതിനായി റവന്യൂ അധികാരികളും പഞ്ചായത്തും നടപടി എടുത്തിരുന്നില്ല. റവന്യൂ പുറമ്പോക്ക് ഭൂമിയാണെന്ന് ബോർഡ് സ്ഥാപിച്ച ശേഷം തുടർനടപടികൾ നിർത്തി വയ്ക്കുകയായിരുന്നു.

വോട്ടര്‍പട്ടിയില്‍ പേര് ചേര്‍ക്കുന്നതിൽ ക്രമക്കേടെന്ന് ആരോപണം

മൂവാറ്റുപുഴ: നഗരസഭയിലെ ചില വാര്‍ഡുകളില്‍ വോട്ടര്‍പട്ടിയില്‍ പേര് ചേര്‍ക്കുന്നുമായി ബന്ധപ്പെട്ട് യുഡിഎഫ് ഒരു വിഭാഗം ഉദ്യോഗസ്ഥരുടെ സഹായത്തോടുകൂടി വ്യാപക ക്രമക്കേട് നടത്തുകയാണെന്ന് സിപിഎം ഏരിയ സെക്രട്ടറി അനീഷ് എം. മാത്യു ആരോപിച്ചു. വാര്‍ഡില്‍ താമസമില്ലാത്തവരെയും വര്‍ഷങ്ങള്‍ക്കു മുമ്പ് വിവാഹം കഴിഞ്ഞ് പോയവരെയും വോട്ടുകള്‍ വ്യാജമായി ചേര്‍ത്തെന്ന് അനീഷ് പറഞ്ഞു. നഗരസഭയിലെ എല്ലാ വാര്‍ഡുകളിലും വോട്ട് ചേര്‍ക്കുന്നതായി ബന്ധപ്പെട്ട ഇത്തരം ക്രമക്കേടുകള്‍ പരിശോധിച്ച് നടപടി സ്വീകരിക്കണമെന്ന് ആവശ്യപ്പെട്ട് നഗരസഭ സെക്രട്ടറിക്കും തെരഞ്ഞെടുപ്പ് കമ്മീഷനും സിപിഎമ്മിന്‍റെ നേതൃത്വത്തില്‍ പരാതി നല്‍കി.

രാമമംഗലവും കേരഗ്രാമമായി

പിറവം: കൃഷി വകുപ്പ് വഴി സംസ്ഥാന സർക്കാർ നടപ്പിലാക്കുന്ന കേരഗ്രാമ പദ്ധതിയിൽ രാമമംഗലം പഞ്ചായത്തിനെ ഉൾപ്പെടുത്തി. ജില്ലയിൽ ഇത്തവണ രണ്ടു പഞ്ചായത്തുകളിലായാണ് പദ്ധതി നടപ്പാക്കുന്നത്. ഇതിലൊന്നിലാണ് രാമമംഗലം പഞ്ചായത്തും ഉൾപ്പെട്ടിരിക്കുന്നത്. 100 ഹെക്ടർ സ്ഥലത്ത് 17,500 തെങ്ങുകൾ ഉണ്ടായിരിക്കണമെന്നാണ് ഇതിനുള്ള പ്രാഥമിക വ്യവസ്ഥ. പദ്ധതിയിലൂടെ സർക്കാരിന്‍റെ കൂടുതൽ ആനുകൂല്യങ്ങൾ ലഭിക്കും. തെങ്ങിന്‍റെ തടം എടുക്കുന്നതിനും, മണ്ട നന്നാക്കി മരുന്നു തളിക്കുന്നതിനും വിദഗ്ധരായ തൊഴിലാളികളുടെ സേവനം ലഭ്യമാകും. തെങ്ങിന് ആവശ്യമായ രാസ-ജൈവ വളങ്ങൾ സബ്സിഡി നിരക്കിൽ ലഭിക്കുന്നതാണ്. ജലസേചനത്തിന് മോട്ടോർ, തെങ്ങു കയറുന്നതിനുള്ള യന്ത്രം എന്നിവയും സബ് സീഡി നിരക്കിൽ ലഭിക്കും. പഞ്ചായത്ത് പ്രസിഡന്‍റ് പി.വി. സ്റ്റീഫൻ പദ്ധതി ഉദ്ഘാടനം ചെയ്തു. കേരള ഗ്രാമം പദ്ധതി പ്രസിഡന്‍റ് വി.പി. ഫിലിപ്പോസ് അധ്യക്ഷത വഹിച്ചു. കൃഷി ഓഫീസർ ജിസ്ന ജോർജ് പദ്ധതിയേക്കുറിച്ച് വിശദീകരിച്ചു.

കർഷകദിനം പ്രതിഷേധ കണ്ണീർ ദിനമായി ആചരിക്കും

കോതമംഗലം: സർക്കാരിന്‍റെ കർഷക ദ്രോഹ നടപടികൾക്കെതിരേ കർഷകദിനം പ്രതിഷേധ കണ്ണീർ ദിനമായി കർഷക കോ-ഓർഡിനേഷൻ കമ്മിറ്റി ആചരിക്കുന്നു. നാളെ രാവിലെ 10ന് കോതമംഗലം മുൻസിപ്പൽ ഓഫീസിന് എതിർവശത്ത് ജെ.വി. ഓഡിറ്റോറിയത്തിൽ നടത്തുന്ന സമ്മേളനം യുഡിഎഫ് ജില്ലാ കൺവീനറും കോ- ഓർഡിനേഷൻ കമ്മറ്റി ചെയർമാനുമായ ഷിബു തെക്കുംപുറം ഉദ്ഘാടനം ചെയ്യും. കമ്മറ്റി ജനറൽ കൺവീനർ ജയിംസ് കോറമ്പേൽ അധ്യക്ഷത വഹിക്കും. കോ-ഓർഡിനേറ്റർ പി.സി. ജോർജ്ജ് വിഷയാവതരണം നടത്തും. ചടങ്ങിൽ മികച്ച കർഷകരെ ആദരിക്കും. ജില്ലയിലെ കിഴക്കൻ മേഖലയായ അങ്കമാലി, പെരുമ്പാവൂർ, മൂവാറ്റുപുഴ, കോതമംഗലം എന്നീ മണ്ഡലങ്ങളിൽ ആയിരക്കണക്കിന് കർഷകർക്ക് വിവിധ നഷ്ടപരിഹാരതുകയായി 25 കോടി രൂപയും, കോതമംഗലം നിയോജകമണ്ഡലത്തിൽ പത്തുകോടി രൂപയും ലഭിക്കാനുണ്ട്. എന്നാൽ രണ്ടു കൊല്ലമായി ലഭിക്കാനുള്ള തുക കർഷകരിലേക്ക് എത്താൻ ഒരു നടപടിയും പിണറായി സർക്കാർ സ്വീകരിച്ചിട്ടില്ല. വന്യമൃഗ ശല്യം ഗ്രാമങ്ങളിൽനിന്ന് ടൗണുകളിലേക്കും വ്യാപിച്ചു. എന്നിട്ടും ഒരു നടപടിയുമില്ല. ഈ വിഷയങ്ങളെല്ലാം മുൻനിർത്തിയാണ് കർഷകദിനം കണ്ണീർ ദിനമായി ആചരിക്കുന്നത്. സമ്മേളനത്തിൽ വിവിധ രാഷ്ട്രീയ കക്ഷിനേതാക്കളായ എ.ജി. ജോർജ്ജ്, കെ.പി. ബാബു, പി.പി. ഉതുപ്പാൻ, ഷമീർ പനക്കൽ, ബാബു ഏലിയാസ്, എം.എസ്. എൽദോസ്, എബി അബ്രാഹം, ഇബ്രാഹിം കവലയിൽ, പി.കെ. മൊയ്തു, എ.റ്റി. പൗലോസ്, മാത്യു ജോസഫ്, എ.സി. രാജശേഖരൻ, ആന്‍റണി ഓലിയപുറം, എം.എം. അബ്ദുൾ റഹ്മാൻ, കെ.എം. കാസിം, പി.എം സിദ്ദിഖ്, എം.സി അയ്യപ്പൻ എന്നിവർ പ്രസംഗിക്കും.

സംയുക്ത ആരോഗ്യഗവേഷണ പദ്ധതി; ചർച്ച ഇന്ന് കൂത്താട്ടുകുളത്ത്

കൂത്താട്ടുകുളം: ലോകാരോഗ്യ സംഘടന, ഐസിഎംആർ, ആയുർവേദ നേത്രാശുപത്രി ഗവേഷണ കേന്ദ്രമായ ശ്രീധരീയം എന്നിവയുടെ നേതൃത്വത്തിൽ സംയുക്ത ആരോഗ്യ ഗവേഷണ പദ്ധതി ചർച്ച കൂത്താട്ടുകുളത്ത് ഇന്ന് നടക്കും. ഐസിഎംആർ ഡയറക്ടർ ഡോ. മോനഡഗ്ഗൾ, സംസ്ഥാന ആരോഗ്യ വകുപ്പ് ഡപ്യൂട്ടി ഡയറക്ടർ ഡോ. ബിപിൻ കെ. ഗോപാൽ, ലോകാരോഗ്യ സംഘടന പ്രതിനിധികളായ ഡോ. ഗീത കൃഷ്ണൻ, ഡോ. വിനയ് ഗോയൽ, ഡോ. പവൻ കെ. ഗോദധർ, ഡോ. രാജേശ്വരി സിംഗ് ആയുഷ്, എൻഎച്ച്എം പ്രതിനിധികൾ എന്നിവർ ചർച്ചയിൽ പങ്കെടുക്കും. രാവിലെ ഒമ്പതിന് ശ്രീധരീയം സമുച്ചയത്തിലെത്തുന്ന പ്രതിനിധിസംഘത്തെ ശ്രീധരീയം ചെയർമാൻ എൻ.പി.നാരായണൻ നമ്പൂതിരി, വൈസ്ചെയർമാൻ ഹരി എൻ. നമ്പൂതിരി, ചീഫ് മെഡിക്കൽ ഓഫീസർ ഡോ. ശ്രീകാന്ത് പി. നമ്പൂതിരി, ചീഫ് ഫിസിഷ്യൻ ഡോ. നാരായണൻ നമ്പൂതിരി എന്നിവർ സ്വീകരിക്കും. ശ്രീധരീയം നടത്തുന്ന നേത്രരോഗവും പ്രമേഹചികിത്സയുമായി ബന്ധപ്പെട്ട ഗവേഷണ പ്രവർത്തനങ്ങൾ വിജയകരമാണെന്ന് ബോധ്യപ്പെട്ടതിനെ തുടർന്നാണ് പ്രതിനിധി സംഘമെത്തുന്നതെന്ന് ഡോ. ശ്രീകാന്ത് പി. നമ്പൂതിരി അറിയിച്ചു.

കാവുംപടി റോഡിലെ കുഴി അടയ്ക്കാന്‍ നടപടി

മൂവാറ്റുപുഴ: കാവുംപടി റോഡില്‍ പൈപ്പ് പൊട്ടി രൂപപ്പെട്ട കുഴി അടയ്ക്കാന്‍ നടപടി. സെന്‍റ് മേരിസ് കപ്പേളയ്ക്ക് സമീപമാണ് യാത്രക്കാരുടെ നടുവൊടിക്കും വിധം വലിയ കുഴി രൂപപ്പെട്ടിരുന്നത്. ഇത് ദീപിക വാർത്ത നൽകിയിരുന്നു. ഇതേ തുടര്‍ന്നാണ് കാവുംപടി റോഡില്‍ ഇന്നലെ രാവിലെ ഗതാഗതം നിയന്ത്രിച്ച് ജല അഥോറിറ്റി അറ്റകുറ്റ പണികള്‍ ആരംഭിച്ചത്. ദിനം പ്രതി നൂറ് കണക്കിന് വാഹനങ്ങള്‍ സഞ്ചരിക്കുന്ന റോഡിന്‍റെ നടുവിലായി രൂപപ്പെട്ട വലിയ കുഴിയില്‍ പൈപ്പ് പൊട്ടി വെള്ളം നിറഞ്ഞുകിടക്കുന്ന അവസ്ഥയായിരുന്നു. ഇതോടെ കാല്‍നട- ഇരുചക്ര വാഹന യാത്രക്കാര്‍ ഉള്‍പ്പെടെ ദുരിതത്തിലായിരുന്നു. വാഹനങ്ങളുടെ നാല് ചക്രങ്ങളും ചാടുന്ന വിധം കുഴി വികസിച്ചതോടെ ഗതാഗത കുരുക്കും രൂക്ഷമായി. ഇരുചക്ര വാഹനങ്ങള്‍ കുഴിയില്‍ അകപ്പെടുകയും, കൂടാതെ മഴ പെയ്യുകയും ചെയ്തതോടെയാണ് ശനിയാഴ്ച രാവിലെ മുതല്‍ കാവുംപടി റോഡിലൂടെ വലിയ വാഹനങ്ങള്‍ക്ക് നിയന്ത്രണം ഏര്‍പ്പെടുത്തി ജല അഥോറിറ്റി അറ്റകുറ്റ പണികള്‍ ആരംഭിച്ചിരിക്കുന്നത്.

കോതമംഗലത്തെ സ്വകാര്യ ബസ് സ്റ്റാന്‍ഡിൽ ശങ്കയകറ്റാൻ ഇടമില്ല

കോതമംഗലം: ആയിരക്കണക്കിന് കണക്കിന് യാത്രക്കാര്‍ വന്നുപോകുന്ന കോതമംഗലത്തെ സ്വകാര്യ ബസ് സ്റ്റാന്‍ഡിന് സമീപത്തെ കംഫര്‍ട്ട് സ്റ്റേഷന്‍ അടച്ചിട്ടിട്ടു ദിവസങ്ങളായി. ഇതോടെ പ്രാഥമികാവശ്യങ്ങള്‍ക്കുള്ള സൗകര്യമില്ലാതെ യാത്രക്കാര്‍ വലയുന്നു. വെള്ളമില്ലാത്തതിനാലാണു ശുചിമുറി തുറക്കാത്തത് എന്നാണ് വിശദീകരണം. വാട്ടര്‍ അഥോറിറ്റിയുടെ പൈപ്പ് കണക്ഷനാണ് ഇവിടെ ഉപയോഗിക്കുന്നത്. സ്ത്രീകളടക്കമുള്ള യാത്രക്കാര്‍ പ്രാഥമികാവശ്യങ്ങള്‍ക്കായി ഹോട്ടലുകളേയും ആശുപത്രികളേയും മറ്റും ആശ്രയിക്കേണ്ട അവസ്ഥയാണ്. കംഫര്‍ട്ട് സ്‌റ്റേഷന്‍റെ പ്രവര്‍ത്തനം താളം തെറ്റിയിട്ടും മുനിസിപ്പല്‍ അധികൃതരുടെ ഭാഗത്തുനിന്ന ഇടപെടലുണ്ടായിട്ടില്ല. ടേക്ക് എ ബ്രേക്ക് പദ്ധതി പ്രകാരം പുതിയ കംഫര്‍ട്ട് സ്‌റ്റേഷന്‍റെ നിര്‍മാണം തുടങ്ങിയെങ്കിലും പൂര്‍ത്തീകരണം വൈകുകയാണ്.

ക്രൈസ്തവർക്കെതിരായ അതിക്രമങ്ങള്‍: കേന്ദ്രം ഇടപെടണമെന്നു കത്തോലിക്ക കോണ്‍ഗ്രസ്

കോതമംഗലം: ക്രൈസ്തവര്‍ക്കെതിരേ ആവര്‍ത്തിക്കുന്ന അതിക്രമങ്ങളില്‍ കേന്ദ്രസര്‍ക്കാര്‍ അടിയന്തരമായി ഇടപെടണമെന്നു കത്തോലിക്ക കോണ്‍ഗ്രസ് കോതമംഗലം രൂപത സമിതി ആവശ്യപെട്ടു. ഒഡീഷയിലെ ജലേശ്വറില്‍ മലയാളി വൈദികര്‍ക്കും കന്യാസ്ത്രീകള്‍ക്കും എതിരേ ഉണ്ടായ അതിക്രമത്തില്‍ രൂപത സമിതി പ്രതിഷേധിച്ചു. ക്രൈസ്തവ ന്യൂനപക്ഷങ്ങള്‍ക്കെതിരേ അതിക്രമങ്ങള്‍ നിരന്തരം ആവര്‍ത്തിക്കപ്പെടുമ്പോള്‍ ഒറ്റപ്പെട്ട സംഭവങ്ങള്‍ എന്നുപറഞ്ഞ് നിസാരവത്കരിക്കുന്ന ഭരണാധികാരികളുടെ പൊള്ളത്തരം കൂടുതല്‍ വ്യക്തമാകുകയാണെന്ന് രൂപത പ്രസിഡന്‍റ് സണ്ണി കടൂത്താഴെ, ഡയറക്ടര്‍ ഫാ. മാനുവല്‍ പിച്ചളക്കാട്ട്, ജനറല്‍ സെക്രട്ടറി മത്തച്ചന്‍ കളപ്പുരക്കല്‍, ട്രഷറര്‍ തമ്പി പിട്ടാപ്പിള്ളില്‍ എന്നിവര്‍ പറഞ്ഞു. ക്രൈസ്തവ ന്യൂനപക്ഷങ്ങള്‍ക്കുനേരേ നടക്കുന്ന ആക്രമണങ്ങള്‍ സര്‍ക്കാര്‍ മൗനം പാലിക്കുന്നത് പ്രതിഷേധകരമാണ്. അക്രമികള്‍ക്കുനേരേ ഒരു കേസ് പോലും എടുക്കാതെ നിയമപാലകര്‍ കാണിക്കുന്ന അനാസ്ഥ അവസാനിപ്പിക്കണം. അക്രമങ്ങള്‍ തടയുന്നതിന് കര്‍ശന നടപടി സ്വീകരിക്കാന്‍ ഭരണകര്‍ത്താക്കള്‍ തയാറാകണമെന്നും ഭാരവാഹികള്‍ ആവശ്യപ്പെട്ടു.

നേര്യമംഗലം സ്പാ സെന്‍റർ നിർമാണ അഴിമതി: ഹർജി ഹൈക്കോടതി ഫയലിൽ സ്വീകരിച്ചു

കോതമംഗലം: നേര്യമംഗലത്ത് നിർമാണത്തിലിരിക്കുന്ന കവളങ്ങാട് സഹകരണ ബാങ്കിന്‍റെ സ്പാ സെന്‍റർ (ടൂറിസം തിരുമ്മൽ കേന്ദ്രം) ഇടിഞ്ഞ സംഭവത്തിൽ ഹൈക്കോടതി ഹർജി ഫയലിൽ സ്വീകരിച്ചു. നിർമാണത്തിലെ അഴിമതിയെക്കുറിച്ച് ബാങ്ക് അംഗം അനൂപ് തോമസും പൊതുപ്രവർത്തകനും ബ്ലോക്ക് പഞ്ചായത്ത് മുൻ പ്രസിഡന്‍റുമായിരുന്ന ബാബു പോളും സംസ്ഥാന വിജിലൻസ് ഡയറക്ടർ, സഹകരണ വകുപ്പ് ഡയറക്ടർ, സംസ്ഥാന പോലീസ് മേധാവി, എറണാകുളം മേഖല എൻഫോഴ്സ്മെന്‍റ് ഡയറക്ടർ തുടങ്ങിയവർക്ക് പരാതി നൽകിയിരുന്നു. എല്ലായിടത്തും പരാതി സ്വീകരിച്ചെന്നുള്ള രസീത് നൽകുകയും വിജിലൻസ് ഡയറക്ടർ അന്വേഷണത്തിനായി പരാതി ജില്ലാ ഘടകത്തിലേക്ക് അയക്കുകയും ചെയ്തു. എന്നാൽ നാളിതുവരെ ജില്ലാ ഘടകത്തിന്‍റെ റിപ്പോർട്ട് ഡയറക്ടറേറ്റിൽ സമർപ്പിക്കുകയോ വേണ്ടവിധം അന്വേഷണം നടത്തുകയോ ചെയ്തിട്ടില്ല. ഇതേ തുടർന്നാണ് ഹൈക്കോടതിയിൽ ഹർജി ഫയൽ ചെയ്തത്. വിജിലൻസിനു വേണ്ടി ഗവൺമെന്‍റ് അഭിഭാഷകനും വാദിഭാഗത്തിനായി പി.എം. റഫീഖ് പട്ടവും ഹാജരായി. ജസ്റ്റിസ് എ. ബദറുദ്ദീന്‍റെ ബഞ്ചാണ് ഹർജി ഫയലിൽ സ്വീകരിച്ചത്. കേസ് 14 ന് വീണ്ടും പരിഗണിക്കും. അന്നേ ദിവസം വിജിലൻസ് ഡയറക്ടറോടും സഹകരണ വകുപ്പിനോടും ബാങ്കിനോടും നിലവിലുള്ള രേഖകൾ ഹാജരാക്കാനും ആവശ്യപ്പെട്ടിട്ടുണ്ട്.

കൊച്ചിയിൽ സിംഗപ്പൂര്‍ മോഡൽ കനാലുകള്‍ : 3716 കോടിയുടെ നവീകരണ പദ്ധതിയുമായി കെഎംആര്‍എല്‍

കൊച്ചി: കൊച്ചിയിലെ കനാലുകള്‍ മാലിന്യമുക്തമാക്കി ആഴം വര്‍ധിപ്പിച്ച് തീരങ്ങള്‍ മനോഹരമാക്കി സംരക്ഷിക്കുന്ന കനാല്‍ നവീകരണ പദ്ധതിയുമായി കെഎംആര്‍എല്‍. വെനീസ്, ആംസ്റ്റര്‍ഡാം, സിംഗപ്പൂര്‍ രാജ്യങ്ങളിലേതുപോലെ കനാലുകളുടെ മുഖഛായ മാറ്റുകയാണ് പദ്ധതിയുടെ ലക്ഷ്യമെന്ന് കെഎംആര്‍എല്‍ പറഞ്ഞു. ഇന്‍റഗ്രേറ്റഡ് അര്‍ബന്‍ റീജനെറേഷന്‍ ആന്‍ഡ് വാട്ടര്‍ ട്രാന്‍സ്‌പോര്‍ട്ട് സിസ്റ്റം (ഐയുആര്‍ഡബ്ല്യുടിഎസ്) എന്ന പേരിലുള്ള പദ്ധതി സംസ്ഥാന സര്‍ക്കാരിനുവേണ്ടി കിഫ്ബി ധനസഹായത്തോടെ കൊച്ചി മെട്രോ റെയില്‍ ലിമിറ്റഡും കേരള വാട്ടര്‍ അഥോറിറ്റിയും സംയുക്തമായാണ് നടപ്പാക്കുന്നത്. 3716.10 കോടി രൂപയുടെ പദ്ധതി പൂര്‍ത്തിയാകുന്നതോടെ കാനാലുകളിലൂടെയുള്ള ഗതാഗതം സുഗമമാകും. കനാല്‍ തീരങ്ങളില്‍ വാട്ടര്‍ സ്‌പോര്‍ട്‌സ് ഉള്‍പ്പെടെയുള്ളവ ഏര്‍പ്പെടുത്തും. അതുവഴി കൊച്ചിയുടെ ശാപമായ വെള്ളക്കെട്ടിന് പരിഹാരമാകുമെന്നും അദ്ദേഹം പറഞ്ഞു. നഗരത്തിലെ പ്രധാന കനാലുകളായ പേരണ്ടൂര്‍, ചിലവന്നൂര്‍, ഇടപ്പള്ളി, തേവര, കോന്തുരുത്തി, മാര്‍ക്കറ്റ് കനാല്‍ എന്നിവയാണ് പദ്ധതിയുടെ ഭാഗമായി നവീകരിക്കുന്നത്. മാലിന്യം നീക്കം ചെയ്ത ശേഷം ആഴവും വീതിയും കൂട്ടി ഇരുവശത്തും നടപ്പാതകള്‍ നിര്‍മിച്ച് മനോഹരമാക്കും. ഇടപ്പള്ളി, ചിലവന്നൂര്‍ കനാലുകളില്‍ ബോട്ട് സര്‍വീസ് ആരംഭിക്കാനാകും വിധമാണ് നവീകരണം. ഇടപ്പള്ളി കനാലില്‍ മുട്ടാര്‍ മുതല്‍ ചിത്രപ്പുഴവരെയുള്ള 11.50 കിലോമീറ്റര്‍ ദൂരമാണ് ബോട്ട് സര്‍വീസിനായി ഒരുക്കുന്നത്. വൈറ്റില-തേവര റൂട്ടില്‍ വാട്ടര്‍ മെട്രോ സര്‍വീസ് തുടങ്ങുമ്പോള്‍ ചിലവന്നൂര്‍ കനാലിലൂടെ എളംകുളം മെട്രോയുമായും ബന്ധിപ്പിക്കാനാകും. ചിലവന്നൂര്‍ കനാല്‍ തീരം സൗന്ദര്യവത്കരിച്ച് വാട്ടര്‍സ്‌പോട്‌സ് ഉള്‍പ്പെടെയുള്ളവ ഏര്‍പ്പെടുത്തും. ഇവിടെ മനോഹരമായ നടപ്പാതകള്‍ നിര്‍മിക്കുകയും വിനോദത്തിനുള്ള ഉപാധികളും ഏര്‍പ്പെടുത്തും. തേവര കനാലില്‍ സ്ഥിതി ചെയ്യുന്ന കല്ലുപാലം പുനര്‍നിര്‍മാണം, മംഗളവനത്തിനുള്ളിലെ കനാലിന്‍റെ ഡ്രെഡ്ജിംഗ് എന്നിവയും പദ്ധതിയുടെ ഭാഗമായി നടത്തും.

നിയന്ത്രണംവിട്ട കാർ 15ഓളം വാഹനങ്ങളിലേക്ക് പാഞ്ഞുകയറി

മരട്: കുണ്ടന്നൂർ ജംഗ്ഷനു സമീപം നിയന്ത്രണംവിട്ട കാർ 15 ഓളം ഇരുചക്ര വാഹനങ്ങളിലേക്ക് പാഞ്ഞുകയറി. വെള്ളിയാഴ്ച രാത്രി 11.30 ഓടെയായിരുന്നു അപകടം. കാർ കുണ്ടന്നൂർ ജംഗ്ഷനു സമീപത്തെ അലി കഫേ എന്ന കോഫി ഷോപ്പിനു മുന്നിൽ പാർക്ക് ചെയ്തിരുന്ന ഇരുചക്ര വാഹനങ്ങളിലേക്ക് പാഞ്ഞുകയറുകയായിരുന്നു. കാർ വരുന്നതുകണ്ട് ഓടി മാറിയതിനാലാണ് നിരവധി പേർ പരിക്കേൽക്കാതെ രക്ഷപ്പെട്ടത്. ഒടുവിൽ ഇടിച്ചിട്ട വാഹനങ്ങൾക്ക് മുകളിൽ കയറിയാണ് കാർ നിന്നത്. തിരുവാണിയൂരിൽ വാടകയ്ക്ക് താമസിക്കുന്ന കൊല്ലം അഞ്ചൽ സ്വദേശി മഹേഷും പെൺസുഹൃത്തും സഹോദരിയുമാണ് കാറിൽ സഞ്ചരിച്ചിരുന്നത്. അലക്ഷ്യമായി വാഹനമോടിച്ചതിന് മഹേഷിനെതിരേ മരട് പൊലീസ് കേസെടുത്തു. കസ്റ്റഡിയിലെടുത്ത ഇയാളെ പിന്നീട് ജാമ്യത്തിൽ വിട്ടയച്ചു. അപകടത്തെടുർന്ന് ഇയാൾ കോഫി ഷോപ്പിലുണ്ടായിരുന്നവരോട് തട്ടിക്കയറുകയും ഇവരെ വെല്ലുവിളിക്കുകയും ചെയ്തതോടെ പോലീസിനെ വിളിച്ചുവരുത്തുകയായിരുന്നെന്ന് പറ‍യുന്നു. കാറിനകത്ത് പെൺസുഹൃത്തുമായി വഴക്കുണ്ടാവുകയും തുടർന്ന് വാഹനത്തിന്‍റെ നിയന്ത്രണം തെറ്റുകയായിരുന്നുവെന്നും ആരോപണമുണ്ട്.

എറണാകുളത്ത് പുതിയ ബസ് സ്റ്റാന്‍ഡ് ഉറപ്പുനല്‍കി ഗതാഗത മന്ത്രി

കൊച്ചി: വെള്ളക്കെട്ടും ശോച്യാവസ്ഥയും മൂലം യാത്രക്കാര്‍ വെറുത്ത എറണാകുളം കെഎസ്ആര്‍ടിസി സ്റ്റാന്‍ഡിനെ പുനരുദ്ധരിക്കുമെന്ന വാഗ്ദാനവുമായി ഗതാഗതമന്ത്രി. സംസ്ഥാന ധനവകുപ്പിന്‍റെയും കൊച്ചി മെട്രോയുടെയും സഹായത്തോടെ 20 കോടി മുടക്കി എറണാകുളം കെഎസ്ആര്‍ടിസി ബസ് സ്റ്റാന്‍ഡില്‍ പുതിയ ബസ് സ്റ്റേഷന്‍ നിര്‍മിക്കുമെന്ന് മന്ത്രി കെ.ബി. ഗണേഷ്‌കുമാര്‍ പറഞ്ഞു. കെഎസ്ആര്‍ടിസി മാറ്റത്തിന്‍റെ പാതയിലാണ്. 108 കോടിയോളം രൂപ ചെലവഴിച്ച് 340 ആധുനിക ബസുകള്‍ വാങ്ങുന്നതിനുള്ള ഭരണാനുമതി ധനവകുപ്പില്‍ നിന്ന് ലഭ്യമായിട്ടുണ്ട്. പുതിയ ബസുകള്‍ എത്തുന്നതോടെ കെഎസ്ആര്‍ടിസിയുടെ ഒരു ദിവസത്തെ കളക്ഷന്‍ എട്ടരക്കോടിയോളം രൂപയില്‍ എത്തിക്കാന്‍ കഴിയും. എഐ സാങ്കേതികവിദ്യയുടെ സഹായത്തോടെ കെഎസ്ആര്‍ടിസി ഷെഡ്യൂള്‍ ചെയ്യാന്‍ സാധിക്കുന്ന സോഫ്റ്റ്‌വേര്‍ വാങ്ങുന്നതിനുള്ള നടപടികള്‍ സ്വീകരിക്കുന്നുണ്ട്. കെഎസ്ആര്‍ടിസിയുടെ എല്ലാ പ്രവര്‍ത്തനങ്ങളിലും ഡിജിറ്റലൈസേഷന്‍ നടപ്പിലാക്കും. വിദ്യാര്‍ഥികളുടെ സ്മാര്‍ട്ട് കണ്‍സഷന്‍ കാര്‍ഡുകള്‍ 21 ന് മുഖ്യമന്ത്രി കൈമാറുമെന്നും എറണാകുളം ബോട്ട് ജെട്ടിയില്‍ ജലഗതാഗത വകുപ്പിന്‍റെ പുതിയ റീജണല്‍ ഓഫീസ് കെട്ടിടത്തിന്‍റെ ഉദ്ഘാടനം നിര്‍വഹിക്കവേ മന്ത്രി പറഞ്ഞു. ഹൈബി ഈഡന്‍ എംപി എംഎല്‍എ ആയിരുന്ന കാലത്ത് ആസ്തി വികസന ഫണ്ടില്‍ നിന്ന് അനുവദിച്ച തുകയും ടി.ജെ. വിനോദ് എംഎല്‍എയുടെ ആസ്തി വികസന ഫണ്ടില്‍ നിന്ന് അനുവദിച്ച തുകയും ഉള്‍പ്പടെ 1.6 കോടിയോളം രൂപ ചെലവഴിച്ചാണ് നിര്‍മാണം പൂര്‍ത്തീകരിച്ചത്. ടി.ജെ. വിനോദ് എംഎല്‍എ അധ്യക്ഷത വഹിച്ച ചടങ്ങില്‍ ഹൈബി ഈഡന്‍ എംപി, മേയര്‍ അഡ്വ. എം. അനില്‍കുമാര്‍, സംസ്ഥാന ജലഗതാഗത വകുപ്പ് ഡയറക്ടര്‍ ഷാജി വി. നായര്‍, സംസ്ഥാന ജലഗതാഗത വകുപ്പ് ട്രാഫിക് സൂപ്രണ്ട് എസ്. ഷഹീര്‍, കോര്‍പറേഷന്‍ സ്ഥിരം സമിതി അധ്യക്ഷരായ സി.എ. ഷക്കീര്‍, ടി.കെ. അഷ്‌റഫ്, സീന ഗോകുലന്‍, മാലിനി കുറുപ്പ്, പ്രതിപക്ഷ നേതാവ് അഡ്വ. ആന്‍റണി കുരിത്തറ, കൗണ്‍സിലര്‍ പദ്മജ എസ്. മേനോന്‍ തുടങ്ങിയവര്‍ പങ്കെടുത്തു.

എറണാകുളം ചില്‍ഡ്രന്‍സ് പാര്‍ക്ക് ഇനി ശിശുക്ഷേമ സമിതിക്ക്

കൊച്ചി: കാല്‍ നൂറ്റാണ്ടു കാലമായി സ്വതന്ത്ര സംഘടനയുടെ അധികാരപരിധിയിലായിരുന്ന എറണാകുളം ഇന്ദിര പ്രിയദര്‍ശിനി ചില്‍ഡ്രന്‍സ് പാര്‍ക്കും മറ്റ് അനുബന്ധ സ്ഥാപനങ്ങളും സംസ്ഥാന ശിശുക്ഷേമ സമിതി ഏറ്റെടുത്തു. ഹൈക്കോടതിയുടെ ഉത്തരവ് പ്രകാരമാണ് കൈമാറ്റം. പാര്‍ക്കിന്‍റെ ദൈനംദിന ഭരണ ചുമതല എറണാകളം ജില്ലാ ശിശുക്ഷേമ സമിതിക്കും കൈമാറി. സര്‍ക്കാര്‍ ചെലവില്‍ പാര്‍ക്ക് നവീകരിച്ചിട്ടും ശരിയായ പരിപാലനം നടക്കുന്നില്ലെന്ന് കാട്ടി സംസ്ഥാന ശിശുക്ഷേമ സമിതിയാണ് പാര്‍ക്ക് വീട്ടുകിട്ടണമെന്നാവശ്യപ്പെട്ട് ഹൈക്കോടതിയെ സമീപിച്ചത്. നിയമാവലി പ്രകാരം തെരഞ്ഞെടുത്ത ജില്ലാ ശിശുക്ഷേമ സമിതിക്ക് ഭരണചുമതല കൈമാറണം എന്നതായിരുന്നു ആവശ്യം. ഹൈക്കോടതിയുടെ ഇടക്കാല ഉത്തരവും അഡ്വക്കേറ്റ് ജനറലിന്‍റെ നിയമോപദേശത്തിന്‍റെ അടിസ്ഥാനത്തില്‍ ഭരണചുമതല ശിശുക്ഷേമ സമിതിക്ക് കൈമാറിക്കൊണ്ട് മുൻ ജില്ലാ കളക്ടര്‍ എന്‍.എസ്.കെ. ഉമേഷ് ജൂലൈ 23ന് ഉത്തരവിറക്കിയിരുന്നു. ഇതേ തുടര്‍ന്നാണ് ഇന്നലെ പാര്‍ക്കിന്‍റെ ചുമതല ശിശുക്ഷേമ സമിതിക്ക് കൈമാറിയത്. കൈമാറ്റ ചടങ്ങില്‍ സംസ്ഥാന ശിശുക്ഷേമ സമിതി ജനറല്‍ സെക്രട്ടറി ജി.എല്‍. അരുണ്‍ ഗോപി, സംസ്ഥാന ഭരണസമിതി അംഗം യേശുദാസ് പറപ്പള്ളി, ജില്ലാ ശിശുക്ഷേമ സമിതി സെക്രട്ടറി സുനില്‍ ഹരീന്ദ്രന്‍, വൈസ് പ്രസിഡന്‍റ് കെ.എസ്. അരുണ്‍ കുമാര്‍, ജോയിന്‍റ് സെക്രട്ടറി ടി.വി. അനിത, ട്രഷറര്‍ സനം പി. തോപ്പില്‍, എം.എ. രശ്മി എന്നിവര്‍ പങ്കെടുത്തു. ഒരു മാസത്തിനുള്ളില്‍ ചില്‍ഡ്രന്‍സ് പാര്‍ക്കിനോട് അനുബന്ധിച്ച കുട്ടികളുടെ തിയറ്ററും കുട്ടികളുടെ കെയര്‍ സെന്‍ററും പ്രവര്‍ത്തന സജ്ജമാകുമെന്ന് സംസ്ഥാന ശിശുക്ഷേമ സമിതി ജനറല്‍ സെക്രട്ടറി ജി.എല്‍. അരുണ്‍ ഗോപി അറിയിച്ചു.

പഴയ വാട്ടര്‍ ടാങ്കില്‍ മരപ്പട്ടിയും കുഞ്ഞുങ്ങളും

മൂവാറ്റുപുഴ: കായനാട് ഗവ. എല്‍പി സ്‌കൂളിലെ ഉപയോഗശൂന്യമായ വാട്ടര്‍ ടാങ്കില്‍ കണ്ടെത്തിയ മരപ്പട്ടിയും നാലു കുഞ്ഞുങ്ങളും ഏവർക്കും കൗതുകമായി. കുഞ്ഞുങ്ങള്‍ക്കു ഭക്ഷണവുമായി വാട്ടര്‍ ടാങ്കിലേക്ക് കയറിയ മരപ്പട്ടിയെ പിന്തുടർന്ന സ്കൂൾ അധികൃതരാണ് ഫോറസ്റ്റ് ഉദ്യോഗസ്ഥരെ വിവരം അറിയിച്ചത്. മൂന്നു മാസം പ്രായമായ നാലു മരപ്പട്ടി കുഞ്ഞുങ്ങളും തള്ളയുമാണ് ടാങ്കിൽ ഉണ്ടായിരുന്നത്. ഫോറസ്റ്റ് റെസ്‌ക്യൂ ഓഫീസര്‍ സെവി പൂവന്‍ സ്ഥലത്തെത്തി റെസ്ക്യു പ്രവർത്തനം തുടങ്ങിയതോടെ കുഞ്ഞുങ്ങളെ ഉപേക്ഷിച്ച് തള്ള കടന്നുകളഞ്ഞു. ഏറെ നേരത്തെ പ്രയത്‌നത്തിനൊടുവിലാണ് സെവിക്ക് കുഞ്ഞുങ്ങളെ പിടികൂടാനായത്. കുഞ്ഞുങ്ങളെ കോതമംഗലം ആര്‍ആര്‍ടിക്ക് കൈമാറുമെന്ന് റെസ്‌ക്യൂ ഓഫീസര്‍ പറഞ്ഞു.

മതസ്വാതന്ത്ര്യം ഭരണഘടനയുടെ ആത്മാവ്: ജസ്റ്റീസ് ജെ. ചെലമേശ്വര്‍

കൊച്ചി: സമത്വം, മതസ്വാതന്ത്ര്യം, സാമൂഹ്യനീതി എന്നിവയാണ് ഭരണഘടനയുടെ ആത്മാവ് എന്ന് സുപ്രീം കോടതി മുന്‍ ജഡ്ജി ജസ്റ്റീസ് ജെ. ചെലമേശ്വര്‍. നിയമ വിദ്യാഭ്യാസത്തിന്‍റെ 150-ാം വാര്‍ഷികാഘോഷങ്ങളുടെ ഭാഗമായി ഗവ.ലോ കോളജില്‍ സംഘടിപ്പിച്ച ലോ ലക്ചര്‍ സീരീസ് ഉദ്ഘാടനം ചെയ്യുകയായിരുന്നു അദ്ദേഹം. ഇന്ത്യയിലെ വൈവിധ്യമാര്‍ന്ന മതവിശ്വാസങ്ങളും ആചാരങ്ങളും ഏകീകരിച്ചാണ് ഭരണഘടന രൂപപ്പെടുത്തിയത്. ഇന്ത്യന്‍ ഭരണഘടനയ്ക്ക് വിപുലമായ സാമൂഹ്യസാംസ്‌കാരിക പശ്ചാത്തലമുണ്ട്. മതം, സോഷ്യലിസം എന്നിവയുടെ മുഖ്യ സന്ദേശം ദുര്‍ബലരെ സംരക്ഷിക്കുക, സത്യം സംസാരിക്കുക എന്നിവയാണെന്നും അദ്ദേഹം ഓര്‍മിപ്പിച്ചു. ഭരണഘടനയും മതനിരപേക്ഷതയും സംരക്ഷിക്കേണ്ടത് ജനങ്ങളുടെ കടമയാണെന്ന് ചടങ്ങില്‍ മുഖ്യാതിഥിയായി പങ്കെടുത്തുകൊണ്ട് വ്യവസായ മന്ത്രി പി. രാജീവ് പറഞ്ഞു. ജനങ്ങള്‍ ഒന്നിച്ച് നിന്നാല്‍ മാത്രമേ ഭരണഘടനയെ സംരക്ഷിക്കാന്‍ സാധിക്കുകയുള്ളൂവെന്നും അദ്ദേഹം പറഞ്ഞു. ലോ ലക്ചര്‍ സീരീസ് ചെയര്‍മാന്‍ ജസ്റ്റിസ് കെ.എം. ജോസഫ്, പൂര്‍വ വിദ്യാര്‍ഥി അസോസിയേഷന്‍ സെക്രട്ടറി അഡ്വ. പി. സഞ്ജയ്, ഗവ. ലോ കോളജ് പ്രിന്‍സിപ്പൽ ഡോ. മിനി പോള്‍ തുടങ്ങിയവര്‍ ചടങ്ങില്‍ പങ്കെടുത്തു.

കളക്ടർക്ക് കോർപറേഷന്‍റെ ആദരം : ബ്രഹ്മപുരത്തെ ചിരിയോടെ ഓർത്തെടുത്ത് വിടവാങ്ങൽ

കൊച്ചി: ‘അപ്രതീക്ഷിതമായാണ് താൻ എറണാകുളം കളക്ടറുടെ ചുമതലയിലേക്ക് നിയോഗിക്കപ്പെട്ടത്. അതും ബ്രഹ്മപുരം കത്തി നില്‍ക്കുന്ന പ്രതിസന്ധി ഘട്ടത്തില്‍.’ മുൻ ജില്ലാ കളക്ടർ എൻ.എസ്.കെ. ഉമേഷ് അക്കാലത്തെക്കുറിച്ച് ഇങ്ങനെ പറഞ്ഞു തുടങ്ങി. ‘നിയമനം തന്നെ പെട്ടന്നായിരുന്നു. കോഴ്‌ക്കോട് നിയമനം പ്രതീക്ഷിച്ചിരിക്കെ കിട്ടിയത് എറണാകുളം. ആദ്യമൊന്ന് ഞെട്ടി. ബ്രഹ്മപുരം നിന്നു കത്തുകയായിരുന്നല്ലോ. പിന്നെ ഒന്നിനും സമയമുണ്ടായിരുന്നില്ല. ഭാര്യയോടു പോലും പറയാതെയാണ് എറണാകുളത്തേക്ക് വന്നത്. അതിന്‍റെ പരിഭവം ഭാര്യയ്ക്ക് ഇന്നും ഉണ്ട്.’ ഇങ്ങനെ ബ്രഹ്മപുരത്തെ ചിരിയോടെ ഓർത്തെടുത്ത് നിർത്തുന്പോൾ അദ്ദേഹത്തിന്‍റെ മുഖത്ത് ചെറുപുഞ്ചിരിയും അത്മസംതൃപ്തിയും നിഴലിക്കുന്നുണ്ടായിരുന്നു. കളക്ടറായി നിയമനം ലഭിച്ചതോടെ അടുത്ത ദിവസം തന്നെ ജില്ലയിലെത്തി. മേയറുള്‍പ്പടെയുള്ള ജനപ്രതിനിധികളെ കൂട്ടി ബ്രഹ്മപുരത്തേക്ക് പോയി. ഇക്കാര്യം അറിയിക്കാതിരുന്നതിന് സ്ഥലം എംഎല്‍എയുടെ വക ശകാരം കിട്ടി. അവിടെയും തീര്‍ന്നില്ല. തിരികെ കളക്ടറേറ്റില്‍ എത്താന്‍ അല്പം വൈകി. ബ്രഹ്മപുരം പ്രശ്‌നത്തില്‍ അടിയന്തര മീറ്റിംഗിനായി ജില്ലയിലെ മന്ത്രിമാരും പ്രതിപക്ഷ നേതാവും ജനപ്രതിനിധികളുമെല്ലാം അക്ഷമരായി കാത്തിരിക്കുന്നുണ്ടായിരുന്നു. വൈകി വന്നതിന് മന്ത്രിയുടെ വകയും ലഭിച്ചു കടുത്ത ശകാരം. എന്നാൽ ഇപ്പോള്‍ പുതിയ ചുമതലയുമായി ജില്ലയില്‍നിന്ന് പോകുമ്പോള്‍ തന്നെ ശകാരിച്ചവര്‍ സ്‌നേഹത്തോടെ യാത്ര അയയ്ക്കുന്നതില്‍ അഭിമാനവും സ്‌നേഹവുമുണ്ടെന്നും എന്‍.എസ്.കെ. ഉമേഷ് മറുപടി പ്രസംഗത്തില്‍ പറഞ്ഞു. കൊച്ചി കോര്‍പറേഷന്റെ നേതൃത്വത്തില്‍ കൗണ്‍സില്‍ ഹാളില്‍ നടത്തിയ ആദരിക്കല്‍ ചടങ്ങിലായിരുന്നു എറണാകുളത്തിന്റെ സൗമ്യനായ ജനകീയ കളക്ടറുടെ വികാരനിര്‍ഭരമായ പ്രസംഗം. കൊച്ചി കോര്‍പറേഷന്‍റെ ചരിത്രത്തില്‍ ആദ്യമായാണ് സ്ഥലംമാറി പോകുന്ന കളക്ടര്‍ക്ക് കൗണ്‍സില്‍ ആദരം നല്‍കുന്നത്. എന്‍.എസ്.കെ. ഉമേഷിന് ജില്ലയില്‍ നല്‍കിയ അവസാന ആദരിക്കല്‍ ചടങ്ങ് കൂടിയാണ് ഇന്നലെ കൗണ്‍സില്‍ ഹാളില്‍ നടന്നത്. മേയര്‍ എം. അനില്‍കുമാര്‍ അധ്യക്ഷത വഹിച്ച ചടങ്ങില്‍ ഹൈബി ഈഡന്‍ എംപി, എംഎല്‍എമാരായ ടി.ജെ. വിനോദ്, കെ.ജെ. മാക്‌സി, മറ്റു ജനപ്രതിനിധികൾ തുടങ്ങിയവർ ആശംസകളര്‍പ്പിച്ചു.

14 കാരനെ കത്തികാട്ടി മദ്യവും കഞ്ചാവും നല്‍കിയ പ്രതി ഒളിവില്‍

കൊച്ചി: കത്തികാട്ടി ഭീഷണിപ്പെടുത്തി 14കാരന് മദ്യവും കഞ്ചാവും നല്‍കിയ കേസിലെ പ്രതി ഒളിവില്‍. സംഭവത്തില്‍ എറണാകുളം നോര്‍ത്ത് പോലീസ് കേസ് രജിസ്റ്റര്‍ ചെയ്തതിനു പിന്നാലെ പ്രതി തിരുവനന്തപുരം കടയ്ക്കാവൂര്‍ സ്വദേശി പ്രബിൻ(40) ഒളിവില്‍പ്പോവുകയായിരുന്നു. ഇതോടെ പോലീസ് അന്വേഷണം ഊര്‍ജിതമാക്കി. പ്രതിയെ വൈകാതെ പിടികൂടാനാകുമെന്ന് നോര്‍ത്ത് പോലീസ് പറഞ്ഞു. കുട്ടിയുടെ മുത്തശിയുടെ സുഹൃത്താണ് പ്രതി. സംഭവത്തില്‍ കുട്ടിയുടെ അമ്മയുടെ പരാതിയിലാണ് പോലീസ് കേസെടുത്തിട്ടുള്ളത്. മാതാപിതാക്കള്‍ വേര്‍പിരിഞ്ഞ് കഴിയുന്ന കുട്ടി നഗരത്തിലെ ഒരു സ്‌കൂളില്‍ ഒമ്പതാം ക്ലാസ് വിദ്യാര്‍ഥിയാണ്. കുട്ടിക്ക് കൗണ്‍സലിംഗ് നല്‍കി വരികയാണിപ്പോള്‍.

കാലടിയിൽ 16 കിലോ കഞ്ചാവുമായി രണ്ടു ബംഗാളികൾ പിടിയിൽ

കാലടി: കാലടിയിൽ 16 കിലോ കഞ്ചാവുമായി രണ്ടു പശ്ചിമ ബംഗാൾ സ്വദേശികളെ പോലീസ് സംഘം പിടികൂടി. സഹീദുൾ ഇസ്‌ലാം, അസന്നൂർ ഇസ്‌ലാം എന്നിവരെയാണ് മരോട്ടിച്ചോടിൽ നിന്ന് പെരുമ്പാവൂർ എഎസ്പി ഹർദിക് മീണയുടെ നേതൃത്തിലുള്ള സ്ക്വാഡും, കാലടി പോലീസും ചേർന്ന് പിടികൂടിയത്. ഒഡീഷയിൽ നിന്നുമെത്തിക്കുന്ന കഞ്ചാവ് കാലടിയുടെ വിവിധ ഭാഗങ്ങളിൽ വില്പന നടത്തിവരികയായിരുന്നു സംഘം. രഹസ്യവിവരത്തിന്‍റെ അടിസ്ഥാനത്തിൽ ഇന്നലെ പുലർച്ചെയോടെ പോലീസ് നടത്തിയ പരിശോധനയിലാണ്, അങ്കമാലിയിൽ ട്രെയിൻ ഇറങ്ങിയ ശേഷം ഓട്ടോയിൽ കാലടിക്കുപോകുകയായിരുന്ന ഇവർ കുടുങ്ങിയത്. കിലോയ്ക്ക് 3000 രൂപ നിരക്കിൽ ഒഡീഷയിൽ നിന്നും കഞ്ചാവ് വാങ്ങിയിരുന്ന ഇവർ 25,000 രൂപയ്ക്കാണ് വില്പന നടത്തിയിരുന്നത്. മുന്പും സമാന രീതിയിൽ കഞ്ചാവ് എത്തിച്ചിരുന്നതായി ഇവർ അന്വേഷണ സംഘത്തോട് വെളിപ്പെടുത്തിയിട്ടുണ്ട്.

വിനായകൻ പൊതുശല്യം: മുഹമ്മദ് ഷിയാസ്

കൊച്ചി: നടൻ വിനായകൻ പൊതുശല്യമെന്ന് ഡിസിസി പ്രസിഡന്‍റ് മുഹമ്മദ് ഷിയാസ്.സാംസ്കാരികമായി മുന്നാക്കം നിൽക്കുന്ന നാട്ടിൽ വിനായകൻ വിദ്വേഷം വിതയ്ക്കുകയാണ്. ഇത് തുടർന്നാൽ രഷ്ട്രീയത്തിനതീതമായി ജനങ്ങൾ വിനായകനെ തെരുവിൽ കൈകാര്യം ചെയ്യുന്ന സ്ഥിതിയുണ്ടാകും. എല്ലാ കലാകാരൻമാർക്കും അപമാനമാണ് വിനായകൻ. നാടിന്‍റെ സംസ്‌കാരത്തിന് ചേരാത്ത പെരുമാറ്റമാണ് അയാളിൽ നിന്നുണ്ടാകുന്നത്. ലഹരി ഉപയോഗിക്കുന്ന കലാകാരന്മാർക്ക് ലഭിക്കുന്ന പരിരക്ഷ തെറ്റായ സന്ദേശം നൽകും. സിനിമാമേഖലയിൽ ലഹരി ഉപയോഗം വ്യാപകമാണെന്നും മുഹമ്മദ് ഷിയാസ് ചൂണ്ടിക്കാട്ടി.

14കാരന് മുത്തശിയുടെ സുഹൃത്ത് : കത്തികാട്ടി ഭീഷണിപ്പെടുത്തി മദ്യവും കഞ്ചാവും നൽകി

കൊച്ചി: മുത്തശിയുടെ സുഹൃത്ത് 14 വയസുകാരനെ കത്തികാട്ടി ഭീഷണിപ്പെടുത്തി മദ്യം കഴിക്കാനും കഞ്ചാവ് വലിക്കാനും നിർബന്ധിച്ചതായി പരാതി. സംഭവത്തിൽ കുട്ടിയുടെ അമ്മയുടെ പരാതിയിൽ തിരുവനന്തപുരം കടയ്ക്കാവൂർ സ്വദേശിയായ പ്രബി(40)നെതിരെ എറണാകുളം നോർത്ത് പേലീസ് കേസ് എടുത്ത് അന്വേഷണം ആരംഭിച്ചു. സംഭവത്തെക്കുറിച്ച് പോലീസ് പറയുന്നത്: നഗരത്തിലെ ഒരു സ്‌കൂളിൽ ഒമ്പതാം ക്ലാസ് വിദ്യാർഥിയായ ഇര അമ്മയ്ക്കും മുത്തശിക്കുമൊപ്പം വാടക വീട്ടിലാണ് താമസിക്കുന്നത്. കുട്ടിയുടെ മാതാപിതാക്കൾ ഒരുമിച്ചല്ല താമസിക്കുന്നത്. അമ്മ വടുതല പ്രദേശത്ത് ശുചീകരണ തൊഴിലാളിയാണ്. മുത്തശി നഗരത്തിലെ അപ്പാർട്ടുമെന്‍റുകളിൽ വീട്ടുജോലി ചെയ്ത് വരുന്നു. 58കാരിയായ മുത്തശിയെ, പ്രബിൻ ഇടയ്ക്കിടെ സന്ദർശിക്കാറുണ്ടായിരുന്നു. 2024 ഡിസംബർ 24ന് കുട്ടിയുടെ അമ്മ വീട്ടിലില്ലാത്ത സമയത്ത് ഇയാൾ അവിടെയെത്തി. കുട്ടിയുടെ മുന്നിൽ വച്ച് മദ്യം കുടിച്ച ശേഷം ബട്ടൺ ഉപയോഗിച്ച് പ്രവർത്തിക്കുന്ന ചെറിയ കത്തി വച്ച് കുട്ടിയെ ഭീഷണിപ്പെടുത്തുകയും നിർബന്ധിച്ച് മദ്യം കുടിപ്പിക്കുകയും ചെയ്തു. പിന്നീട് കുട്ടിയുടെ ജന്മദിനമായ കഴിഞ്ഞ ജനുവരി നാലിന് വൈകിട്ടോടെ വീട്ടിലെത്തിയ ഇയാൾ അടുക്കളയിൽ വച്ച് കുട്ടിയുടെ കഴുത്തിൽ കത്തിവച്ച് ഭീഷണിപ്പെടുത്തി കഞ്ചാവ് ബീഡി വലിപ്പിക്കുകയും ചെയ്തു. കഴിഞ്ഞ ദിവസം കുട്ടി സ്കൂളിലെ സുഹൃത്തിനോട് കാര്യങ്ങൾ പറഞ്ഞതോടെയാണ് സംഭവം പുറത്തറിഞ്ഞത്. സുഹൃത്ത് സ്വന്തം അമ്മയെ വിവരം അറിയിച്ചു. ഇവരാണ് കുട്ടിയുടെ അമ്മയെ കണ്ട് വിവരം പറഞ്ഞത്. പ്രബിനോട് ഇക്കാര്യം ചോദിച്ചപ്പോൾ അമ്മയെ ഭീഷണിപ്പെടുത്തി. തുടർന്ന് ഇവർ ആദ്യം വനിതാ പോലീസ് സ്റ്റേഷനിനും പിന്നീട് കൊച്ചി സിറ്റി പോലീസ് കമ്മീഷണർക്കും പരാതി നൽകുകയായിരുന്നു. കുട്ടിക്ക് കൗൺസലിംഗ് നൽകി വരികയാണ് ഇപ്പോൾ.

ദീപിക കളർ ഇന്ത്യ സീസൺ 4 : വർണങ്ങളിൽ ഒന്നായി വിദ്യാലയങ്ങൾ

കൊച്ചി: വൈവിധ്യങ്ങൾക്കിടയിലും മതേതര, ജനാധിപത്യ ഭാരതത്തിൽ നമ്മളെല്ലാവരും ഒന്നാണെന്ന ഐക്യബോധവും അഖണ്ഡതയും ഉദ്ഘോഷിച്ച് ദീപിക കളർ ഇന്ത്യ സീസൺ 4. വരകളും വർണങ്ങളുമായി വിദ്യാലയങ്ങളിൽ ദേശസ്നേഹത്തിന്‍റെ ഉത്സവഛായ പകർന്ന പെയിന്‍റിംഗ് മത്സരത്തിൽ വിദ്യാർഥികൾ ആവേശത്തോടെയാണു പങ്കെടുത്തത്. ഭാരതത്തിന്‍റെ 79-ാം സ്വാതന്ത്യദിനാഘോഷത്തിന്‍റെ ഭാഗമായി ദീപിക നടത്തിയ കളർ ഇന്ത്യ സീസൺ 4ന്‍റെ എറണാകുളം ജില്ലാതല ഉദ്ഘാടനം കൊച്ചി നൈപുണ്യ പബ്ലിക് സ്കൂളിൽ നടന്നു. ഉമ തോമസ് എംഎൽഎ ഉദ്ഘാടനം നിർവഹിച്ചു. രാഷ്ട്രദീപിക ഡയറക്ടറും നൈപുണ്യ എക്സിക്യൂട്ടീവ് ഡയറക്ടറുമായ ഫാ. സൈമൺ പള്ളുപ്പെട്ട അധ്യക്ഷത വഹിച്ചു. ദീപിക ജനറൽ മാനേജർ ഫാ. ജിനോ പുന്നമറ്റത്തിൽ, സ്കൂൾ പ്രിൻസിപ്പൽ ബോബി ജോസഫ്, ദീപിക സർക്കുലേഷൻ മാനേജർ ബിനോ വർഗീസ് എന്നിവർ പ്രസംഗിച്ചു. സ്കൂൾ ജനറൽ‌ ക്യാപ്റ്റൻ ഇഷ ഹക്കിം വിദ്യാർഥികൾക്കു ദേശീയോദ്ഗ്രഥന പ്രതിജ്ഞ ചൊല്ലിക്കൊടുത്തു. എറണാകുളം ജില്ലയിലെ 700 സ്കൂളുകളിലായി എൽകെജി മുതൽ പ്ലസ്ടു വരെയുള്ള 1.20 ലക്ഷത്തോളം വിദ്യാർഥികൾ ദീപിക കളർ ഇന്ത്യ സീസൺ 4ൽ പങ്കെടുത്തു. മത്സരത്തോടനുബന്ധിച്ചു വിവിധ സ്കൂളുകളിൽ ദേശഭക്തിയുണർത്തുന്ന ഗാന, നൃത്ത അവതരണങ്ങൾ ഉണ്ടായിരുന്നു. മാധ്യമരംഗത്തെ മാതൃക: ഉമ തോമസ് എംഎൽഎ വിദ്യാർഥികളിൽ ദേശബോധവും കൂട്ടായ്മയും പ്രോത്സാഹിപ്പിക്കുന്നതിനു ദീപിക നടത്തുന്ന കളർ ഇന്ത്യ മത്സരം, മാധ്യമരംഗത്തെ മാതൃകയാണെന്ന് ഉമ തോമസ് എംഎൽഎ പറഞ്ഞു. രാജ്യത്തെ അധികമായി സ്നേഹിക്കുകയും ഭരണഘടനാ മൂല്യങ്ങൾക്കു മുറിവുകളേൽക്കാതെ സംരക്ഷിക്കപ്പെടുകയും ചെയ്യേണ്ട സവിശേഷ കാലഘട്ടമാണിത്. പത്തു ലക്ഷത്തോളം വിദ്യാർഥികൾ കളർ ഇന്ത്യ മത്സരത്തിൽ പങ്കെടുക്കുന്നത് അഭിമാനം പകരുന്നതാണെന്നും എംഎൽഎ പറഞ്ഞു.

ജില്ലാ അത്‌ലറ്റിക് ചാമ്പ്യന്‍ഷിപ്പ് : മൂക്കന്നൂര്‍ എസ്എച്ച്ഒയും കോതമംഗലം മാർ ബേസിലും ഓവറോൾ ചാമ്പ്യന്മാര്‍

കൊച്ചി: ജില്ലാ അത്‌ലറ്റിക് ചാമ്പ്യന്‍ഷിപ്പില്‍ സീനിയര്‍ വിഭാഗത്തില്‍ അങ്കമാലി മൂക്കന്നൂര്‍ സേക്രഡ് ഹാര്‍ട്ട് ഓര്‍ഫനേജ് ഹൈസ്‌കൂള്‍ (എസ്എച്ച്ഒഎച്ച്എസ്) സ്‌പോര്‍ട്‌സ് അക്കാദമിയും, ജൂണിയര്‍ വിഭാഗത്തില്‍ കോതമംഗലം മാര്‍ബേസില്‍ എച്ച്എസ്എസും ഓവറോ ൾ ചാമ്പ്യന്‍മാരായി. 170 പോയിന്‍റ് നേടിയാണ് സീനിയര്‍ ചാമ്പ്യന്‍ഷിപ്പില്‍ മൂക്കന്നൂര്‍ എഎസ്എച്ച്ഒഎച്ച്എസ് അക്കാദമി കിരീടം സ്വന്തമാക്കിയത്. നിലവിലെ ചാമ്പ്യന്‍മാരായ കോതമംഗലം എംഎ കോളജ് 138 പോയിന്‍റുമായി റണ്ണേഴ്‌സ് അപ്പായി, കോതമംഗലം മാര്‍ബേസില്‍ സ്‌കൂളിനാണ് മൂന്നാം സ്ഥാനം (136). വൈപ്പിന്‍ നായരമ്പലം ഭഗവതി വിലാസം ഹൈസ്‌കൂള്‍ (ബിവിഎച്ച്എസ്എസ്) 67 പോയിന്‍റുമായി നാലാം സ്ഥാനത്തെത്തി. വടുതല ചിന്‍മയ വിദ്യാലയ ടീം 34 പോയിന്‍റോടെ അഞ്ചാം സ്ഥാനത്തുമെത്തി. ജൂണിയര്‍ വിഭാഗത്തില്‍ 464 പോയിന്റുകള്‍ നേടിയാണ് മാര്‍ബേസിലിന്‍റെ നേട്ടം, മൂക്കന്നൂര്‍ എസ്എച്ച്ഒഎച്ച്എസ് അക്കാദമി 445 പോയിന്‍റോടെ രണ്ടാം സ്ഥാനക്കാരായി. കോതമംഗലം എംഎ കോളജിനാണ് മൂന്നാം സ്ഥാനം (222). വിദ്യോദയ സ്‌കൂള്‍ തേവക്കല്‍ (160), വടുതല ചിന്‍മയ വിദ്യാലയ (160) സ്‌കൂളുകള്‍ യഥാക്രമം നാലും അഞ്ചും സ്ഥാനങ്ങള്‍ നേടി. ജൂണിയര്‍ ആണ്‍-പെണ്‍ വിഭാഗങ്ങളില്‍ അണ്ടര്‍ 16, അണ്ടര്‍ 18 കാറ്റഗറികളിലും, സീനിയര്‍ വനിതാ വിഭാഗത്തിലും മാര്‍ബേസില്‍ ചാമ്പ്യന്‍മാരായി. ജൂണിയര്‍ അണ്ടര്‍ 14 പെണ്‍വിഭാഗത്തില്‍ മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി മുന്നിലെത്തി. ജില്ലാ ചാമ്പ്യന്‍ഷിപ്പിലെ ആദ്യ മൂന്ന് സ്ഥാനക്കാര്‍ക്ക് ഈ മാസം 16,17,18 തീയതികളില്‍ തിരുവനന്തപുരത്ത് നടക്കുന്ന സംസ്ഥാന ചാമ്പ്യന്‍ഷിപ്പില്‍ പങ്കെടുക്കാം. വിവിധ വിഭാഗങ്ങളില്‍ ആദ്യസ്ഥാനങ്ങള്‍ നേടിയവര്‍ ആണ്‍കുട്ടികളുടെ വിഭാഗം അണ്ടര്‍ 14: വിദ്യോദയ സ്‌കൂള്‍ തേവക്കല്‍ 62, മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 45. അണ്ടര്‍ 16: കോതമംഗലം മാര്‍ബേസില്‍ എച്ച്എസ്എസ് 48, മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 48, ചിന്മയ വിദ്യാലയ വടുതല 32. അണ്ടര്‍ 18: മാര്‍ബേസില്‍ എച്എസ്എസ് 94, മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 92. അണ്ടര്‍ 20: എം.എ കോളജ് കോതമംഗലം 71, മാര്‍ബേസില്‍ എച്ച്എസ്എസ് കോതമംഗലം 68. പെണ്‍കുട്ടികളുടെ വിഭാഗം അണ്ടര്‍ 14: മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 61, കാക്കനാട് ഭവന്‍സ് ആദര്‍ശ് വിദ്യാലയ 27.5. അണ്ടര്‍ 16: കോതമംഗലം മാര്‍ബേസില്‍ എച്ച്എസ്എസ് 85, മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 59. അണ്ടര്‍ 18: കോതമംഗലം മാര്‍ബേസില്‍ എച്ച്എസ്എസ് 88, മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 66. അണ്ടര്‍ 20: സെന്റ് സേവ്യേഴ്‌സ് കോളജ് ഫോര്‍ വിമണ്‍ ആലുവ 56.5, മാര്‍ബേസില്‍ എച്ച്എസ്എസ് കോതമംഗലം 43. സീനിയര്‍ പുരുഷ വിഭാഗം: എം.എ കോളജ് കോതമംഗലം 87, മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 59. വനിതാവിഭാഗം: മാര്‍ബേസില്‍ എച്ച്എസ്എസ് കോതമംഗലം 122, മൂക്കന്നൂര്‍ എസ്എച്ച്ഒഎച്ച്എസ് സ്‌പോര്‍ട്‌സ് അക്കാദമി 111.

വിശ്വജ്യോതിയില്‍ എംബിഎ ബാച്ച്

വാഴക്കുളം: വിശ്വജ്യോതി സ്‌കൂള്‍ ഓഫ് മാനേജ്‌മെന്‍റ് സ്റ്റഡീസിലെ എംബിഎ ബാച്ച് 2025-27ലെ പുതിയ അധ്യയന വര്‍ഷത്തിന്‍റെ ഉദ്ഘാടനം ജിയോജിത്ത് ഫിനാന്‍ഷ്യല്‍ സര്‍വീസസ് സിഇഒ സി.ജെ. ജോര്‍ജ് നിര്‍വഹിച്ചു. കോളജ് മാനേജര്‍ മോണ്‍. ഡോ. പയസ് മലേക്കണ്ടത്തില്‍, ഡയറക്ടര്‍ റവ. ഡോ. പോള്‍ പാറത്താഴം, പ്രിന്‍സിപ്പല്‍ ഡോ. കെ.കെ. രാജന്‍, വൈസ് പ്രിന്‍സിപ്പല്‍ പ്രഫ. സോമി പി. മാത്യു, ഡിപ്പാര്‍ട്ട്‌മെന്‍റ് കണ്‍സള്‍ട്ടന്‍റ് ഫാ. ജിനോ പുന്നമറ്റത്തില്‍, എംബിഎ വിഭാഗം മേധാവി ഡോ. ഷെല്ലി ജോസ്, ട്രഷറര്‍ കെ.വി. തോമസ്, അധ്യാപകര്‍, പുതിയ ബാച്ചിലെ വിദ്യാര്‍ഥികള്‍, രക്ഷിതാക്കള്‍ എന്നിവര്‍ പങ്കെടുത്തു.

കത്തോലിക്കാ കോണ്‍ഗ്രസ് ഫൊറോന സംഗമം

മൂവാറ്റുപുഴ: കത്തോലിക്കാ കോണ്‍ഗ്രസ് കോതമംഗലം രൂപത മൂവാറ്റുപുഴ ഫൊറോന യൂണിറ്റുകളിലെ ഭാരവാഹികള്‍ ഹോളി മാഗി ഫൊറോന പള്ളി കോണ്‍ഫറന്‍സ് ഹാളില്‍ ഫൊറോന സംഗമം സംഘടിപ്പിച്ചു. രൂപത ഡയറക്ടര്‍ റവ.ഡോ. മാനുവല്‍ പിച്ചളക്കാട്ട് ഉദ്ഘാടനം നിര്‍വഹിച്ചു. ഫൊറോന പ്രസിഡന്‍റ് ജോസ് പറമ്പന്‍ അധ്യക്ഷത വഹിച്ചു. രൂപത പ്രസിഡന്‍റ് സണ്ണി കടൂത്താഴെ മുഖ്യപ്രഭാഷണം നടത്തി. കര്‍ഷക അവഗണന, കാര്‍ഷിക ഉത്പന്നങ്ങളുടെ വില തകര്‍ച്ച, സര്‍ക്കാര്‍ വാഗ്ദാന ലംഘനങ്ങള്‍, സമൂഹത്തില്‍ നടമാടികൊണ്ടിരിക്കുന്ന സാമൂഹ്യ തിന്മകള്‍ തുടങ്ങിയവയ്‌ക്കെതിരേ പ്രതികരിക്കേണ്ടത് കത്തോലിക്ക കോണ്‍ഗ്രസിന്‍റെ കടമയാണെന്ന് യോഗം വിലയിരുത്തി. ഛത്തീസ്ഗഡിലും ഒഡീഷയിലും നടന്ന കന്യാസ്ത്രീകളെയും വൈദികരെയും ആക്രമിച്ച് ആള്‍ക്കൂട്ട വിചാരണ നടത്തിയതിനെതിരേ യോഗം പ്രതിഷേധിച്ചു. രൂപത ജനറല്‍ സെക്രട്ടറി മത്തച്ചന്‍ കളപ്പുരക്കല്‍, സെക്രട്ടറി ആന്‍റണി പുല്ലന്‍, ഗ്ലോബല്‍ ജനറല്‍ സെക്രട്ടറി ഡോ. ജോസ്‌കുട്ടി ഒഴുകയില്‍, ജോയ്‌സ് മേരി ആന്‍റണി, ചാക്കോ വിളയപ്പിള്ളി, ജോസ് തെക്കേക്കൂറ്റ്, ഡോ. ജോണി സ്‌കറിയ, മാത്യൂസ് കുരിക്കൂര്‍, ജോസ് കൊട്ടംപുഴയില്‍, ജിന്‍റോ പൈനാടത്ത്, ജോര്‍ജ് കാക്കനാട്, ജിജി തോട്ടുപുറം, ഷാബു അരയത്തിനാല്‍ എന്നിവര്‍ പ്രസംഗിച്ചു. മൂവാറ്റുപുഴ ഫൊറോന സമിതി നേതൃത്വം നല്‍കി. ചിങ്ങം ഒന്നിന് കര്‍ഷക വഞ്ചന ദിനമായി ആചരിക്കാനും യോഗം തീരുമാനിച്ചു.

മംഗലത്തുതാഴത്ത് കലുങ്ക് പുനർനിർമാണം തുടങ്ങി

കൂത്താട്ടുകുളം: കൂത്താട്ടുകുളം - പാലാ റോഡിൽ മംഗലത്തുതാഴത്ത് തകർന്ന കലുങ്കിന്‍റ പുനർനിർമാണ പ്രവൃത്തികൾ ആരംഭിച്ചു. ഇതിന്‍റെ ഭാഗമായി ഇതുവഴിയുള്ള ഗതാഗതം ഭാഗികമായി നിയന്ത്രിച്ചിരിക്കുകയാണ്. റോഡിന്‍റെ പകുതി വരെയുള്ള ഭാഗത്തെ നിർമാണമാണ് ആദ്യഘട്ടത്തിൽ നടക്കുന്നത്. കലുങ്കിന്‍റെ തകർന്ന സ്ലാബ് ബ്രേക്കറിന്‍റെ സഹായത്തോടെ പൊളിച്ചു നീക്കി. ഈ ഭാഗത്തെ നിർമാണം പൂർത്തിയാകുന്ന മുറയ്ക്ക് മറുഭാഗത്തെ നിർമാണപ്രവൃത്തികൾ ആരംഭിക്കും. 28 ദിവസത്തെ ക്യൂയറിംഗ് കാലാവധിക്ക് ശേഷമാകും നിർമാണം പൂർത്തിയാക്കുന്ന ഭാഗം ഗതാഗതത്തിന് തുറന്നു നല്കുക. നിർമാണത്തിൽ തുടർന്നും വീഴ്ചകൾ ഉണ്ടാകാതിരിക്കാൻ പ്രദേശവാസികളുടെ മേൽനോട്ടവും ഇവിടെയുണ്ട്. പൊളിച്ച ഭാഗത്ത് നടത്തിയ പരിശോധനയിൽ നിലവിലുണ്ടായിരുന്ന കലുങ്കിന്‍റെ സ്ലാബിന് അഞ്ച് ഇഞ്ച് കനം പോലും ഇല്ലായിരുന്നെന്ന് കണ്ടെത്തി. കലുങ്ക് തകർന്ന സാഹചര്യത്തിൽ വ്യാഴാഴ്ച രാവിലെ പ്രദേശത്ത് കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ റോഡ് തടഞ്ഞ് ഉപരോധ സമരം നടത്തിയിരുന്നു. സമരത്തെ തുടർന്ന് പിഡബ്ല്യുഡി ഉദ്യോഗസ്ഥർ സ്ഥലത്തെത്തുകയും കലുങ്ക് പുനർനിർമിക്കുമെന്ന് ഉറപ്പ് നൽകുകയും ചെയ്തു. ഉച്ചയോടെ പ്രദേശത്ത് എൽഡിഎഫിന്‍റെ സൂചനാ സമരവും നടന്നു.

ഹിരോഷിമ നാഗസാക്കി ദിനാചരണം

കോതമംഗലം: കറുകടം മൗണ്ട് കാർമൽ കോളജ് എൻഎസ്എസ് യൂണിറ്റിന്‍റെയും പീസ് ക്ലബിന്‍റെയും സൈക്കോളജി ഡിപ്പാർട്ട്മെന്‍റിന്‍റെയും സംയുക്ത ആഭിമുഖ്യത്തിൽ ഹിരോഷിമ നാഗസാക്കി ദിനാചരണം നടത്തി. വിദ്യാർഥികൾ നടത്തിയ സമാധാന റാലിയുടെ ഫ്ലാഗ് ഓഫ് കോളജ് പ്രിൻസിപ്പൽ ഫാ. ഷാജി മംഗലത്ത് നിർവഹിച്ചു. അമിതാ സജി മുഖ്യ പ്രഭാഷണം നടത്തി.

ന്യൂനപക്ഷ വേട്ട ഭരണഘടനാവിരുദ്ധം: മാത്യു കുഴല്‍നാടന്‍

മൂവാറ്റുപുഴ: ന്യൂനപക്ഷങ്ങളെയും പിന്നോക്ക ജനവിഭാഗങ്ങളെയും ആള്‍ക്കൂട്ട വിചാരണക്ക് ഇരയാക്കുന്നത് ഭരണഘടനാ മൂല്യങ്ങള്‍ക്ക് വിരുദ്ധമാണെന്ന് മാത്യു കുഴല്‍നാടന്‍ എംഎല്‍എ. കോണ്‍ഗ്രസ് പായിപ്ര മണ്ഡലം കമ്മിറ്റി സംഘടിപ്പിച്ച സഹന ജ്വാല ഉദ്ഘാടനം ചെയ്യുകയായിരുന്നു അദേഹം. അപകടകരമായ അവസ്ഥയിലൂടെയാണ് രാജ്യം സഞ്ചരിക്കുന്നത്. കഴിഞ്ഞ ദിവസം ഒഡീഷയില്‍ വൈദികരും കന്യാസ്ത്രീകള്ളും നേരിട്ടതും ഇതേ ആള്‍ക്കൂട്ട വിചാരണയാണ്. പിന്നോക്ക ആദിവാസി ദളിത് സമൂഹങ്ങളും ഈ അവഗണനകള്‍ക്കും പീഡനങ്ങള്‍ക്കും ഇരയാകേണ്ടി വരികയാണ്. പിന്നോക്ക ജനവിഭാഗങ്ങളെ സംരക്ഷിക്കേണ്ട കേന്ദ്ര സര്‍ക്കാര്‍ അക്രമികള്‍ക്ക് എല്ലാവിധ സഹായവും നല്‍കുകയാണെന്നും എംഎല്‍എ ആരോപിച്ചു. പായിപ്ര മണ്ഡലം പ്രസിഡന്‍റ് പി.എം. ഷാന്‍ പ്ലാക്കുടി അധ്യക്ഷത വഹിച്ചു. ജാമിഅ ബദ്‌രിയ അറബിക് കോളജ് പ്രിന്‍സിപ്പല്‍ മുഹമ്മദ് തൗഫീഖ് മൗലവി എംഎഫ്ബി മുഖ്യ പ്രഭാഷണം നടത്തി. തൃക്കളത്തൂര്‍ സെന്‍റ് ജോര്‍ജ് യാക്കോബായ പള്ളി വികാരി ഫാ. ജേക്കബ് കൊച്ചുപറമ്പില്‍, ബ്ലോക്ക് പ്രസിഡന്‍റ് സാബു ജോണ്‍, പായിപ്ര കൃഷ്ണന്‍, കെ.പി. ജോയി, മാത്യൂസ് വര്‍ക്കി, കെ.കെ. ഉമ്മര്‍, പി.സി മത്തായി, മാത്യു ഇട്ടന്‍ എന്നിവര്‍ പ്രസംഗിച്ചു.

രണ്ടാഴ്ച മുന്പ് സ്ഥാപിച്ച ഹൈമാസ്റ്റ് ലൈറ്റ് നശിപ്പിച്ചു

മൂവാറ്റുപുഴ: ഡീന്‍ കുര്യാക്കോസ് എംപിയുടെ പ്രാദേശിക വികസന ഫണ്ട് ഉപയോഗിച്ച് രണ്ടാഴ്ച മുമ്പ് കായനാട് ഗവ. എല്‍പി സ്‌കൂളിന് മുന്‍ വശത്ത് സ്ഥാപിച്ചിരുന്ന ഹൈമാസ്റ്റ് ലൈറ്റ് നശിപ്പിച്ചതായി പരാതി. മദ്യപിച്ചെത്തിയ ഒരു വ്യക്തി ലൈറ്റിന്‍റെ മീറ്റര്‍ പിടിപ്പിച്ചിരുന്ന ഭാഗം പൊളിക്കുകയും ഇതിനോടനുബന്ധിച്ച് സ്ഥാപിച്ചിരുന്ന ശിലാഫലകത്തിന്‍റെ ഇരുമ്പ് ഫ്രെയിം എടുത്തുകൊണ്ട് പോകുകയും ചെയ്തതായാണ് പരാതി ഉയര്‍ന്നിരിക്കുന്നത്. ഇതിനിടെ കായനാട് ഗവ. എല്‍പി സ്‌കൂളിന്‍റെ പ്രധാന ഗേറ്റിന്‍റെ താഴ് പൊളിക്കുകയും ചെയ്തിട്ടുണ്ട്. ഇതു സംബന്ധിച്ച് മാറാടി പഞ്ചായത്ത് സെക്രട്ടറി രാമമംഗലം പോലീസില്‍ പരാതി നല്‍കിയിട്ടുണ്ട്. ഉചിതമായ നടപടി സ്വീകരിച്ചില്ലെങ്കില്‍ ശക്തമായ സമര പരിപാടികള്‍ ആരംഭിക്കുമെന്ന് മാറാടി പഞ്ചായത്ത് പ്രസിഡന്‍റ് ഒ.പി. ബേബി, കോണ്‍ഗ്രസ് മാറാടി മണ്ഡലം പ്രസിഡന്‍റ് പി.പി. ജോളി എന്നിവര്‍ അറിയിച്ചു.

പിറവത്ത് പുതിയ ഗതാഗത പരിഷ്കരണം

പിറവം: പിറവം നഗരസഭയിൽ ഗതാഗത ഉപദേശക സമിതി യോഗം ചേർന്ന് ടൗണിലെ ഗതാഗത സംവിധാനങ്ങൾ പരിഷ്കരിച്ചുള്ള നിർദേശങ്ങൾ നടപ്പിലാക്കും. കിഴക്കൻ മേഖലയിൽനിന്നും വരുന്ന വാഹനങ്ങൾ ടൗണിൽ എംഎൽഎ റോഡിലേക്ക് പ്രവേശിക്കുന്നത് ബോർഡ് സ്ഥാപിച്ച തടയാനും ടൗണിൽ നേരത്തെ സ്ഥാപിച്ച സൈൻ ബോർഡുകൾ പുനസ്ഥാപിക്കാനും തീരുമാനിച്ചു. താലൂക്ക് ആശുപത്രിക്ക് മുന്നിലെ പൊളിഞ്ഞു വീഴാറായ ബസ് കാത്തിരിപ്പ് കേന്ദ്രം നീക്കംചെയ്ത് കുന്നേപ്പള്ളി കുരിശിന് എതിർവശം നിർമിച്ചിരിക്കുന്ന മുന്നിലേക്ക് ബസ് സ്റ്റോപ്പ് മാറ്റും. പ്രൈവറ്റ് സ്റ്റാൻഡിൽനിന്നും ബസുകൾ പുറപ്പെടുന്നതിനു മുമ്പ് സ്റ്റാൻഡിൽ വട്ടം പാർക്ക് ചെയ്യാതെ കടന്നുപോകണമെന്ന് യോഗം നിർദേശിച്ചു. ടൗണിലെ പുതിയ വ്യാപാര സ്ഥാപനങ്ങൾക്ക് മുന്നിലെ പാർക്കിംഗ് പൂർണമായും തടയും. ബന്ധപ്പെട്ട സ്ഥാപനങ്ങൾക്ക് ഇത് സംബന്ധിച്ചു നോട്ടീസ് നൽകാൻ തീരുമാനിച്ചു. നഗരസഭ ചെയർപേഴ്സൺ ജൂലി സാബു, വൈസ് ചെയർമാൻ കെ.പി. സലിം, സെക്രട്ടറി പ്രകാശ് കുമാർ, പോലീസ്, ഗതാഗത, വൈദ്യുതി വകുപ്പ് അധികൃതർ എന്നിവർ പങ്കെടുത്തു.

പിറവം പിഒ ജംഗ്ഷനിൽ അപകടം തുടർക്കഥ

പിറവം: പിറവത്തെ പോസ്റ്റോഫീസ് ജംഗ്ഷൻ അപകട മേഖലയായി മാറുന്നു. കഴിഞ്ഞ ദിവസവും ഇവടെ കാറും ബൈക്കുമായി കൂട്ടിയിടിച്ചു. അപകടത്തിൽ ബൈക്ക് യാത്രികൻ തെറിച്ചു വീണത് പിക്കപ്പ് വാനിന്‍റെ മുന്നിലേക്കാണങ്കിലും അത്ഭുതകരമായി രക്ഷപ്പെടുകയായിരുന്നു. വൺവേ റോഡിൽനിന്നും വന്ന കാർ തിരിഞ്ഞ് പാലത്തിലേക്ക് പ്രവേശിക്കുന്നതിനിടെയാണ് എതിരേ വന്ന ബൈക്കുമായി കൂട്ടിയിടിച്ചത്. ഒരോ അര മണിക്കൂറിലും നൂറുക്കണക്കിന് വാഹനങ്ങൾ കടന്നുപോകുന്ന ഇവിടെ അപകടങ്ങൾ നിത്യ സംഭവമാണ്. നാലു റോഡുകൾ കൂടി ചേരുന്ന പി ഒ ജംഗ്ഷനിൽ ആഴ്ചയിൽ മൂന്നു ദിവസമെങ്കിലും ചെറുതും, വലുതുമായ അപകടങ്ങൾ നടക്കുന്നുണ്ട്. ഭൂരിഭാഗവും ഭാഗ്യം കൊണ്ട് രക്ഷപെടുമ്പോൾ, ചിലർക്ക് സാരമായി പരിക്കേൽക്കാറുണ്ട്. നാലുഭാഗങ്ങളിൽനിന്നും വരുന്ന വാഹന ഡ്രൈവർമാർക്ക് പരസ്പരം കാണാൻ സാധിക്കാതിരിക്കുകയും, സിഗ്നലുകൾ ലഭിക്കാത്തതുമാണ് പ്രധാന അപകട കാരണം. പി ഒ ജംഗ്ഷൻ മുതൽ പള്ളിക്കവലവരെ റോഡിന്‍റെ ഇരു ഭാഗങ്ങളിലും സ്വകാര്യ വാഹനങ്ങളുടെ പാർക്കിംഗും അപകടവും, ഗതാഗത തടസവും സൃഷ്ടിക്കുന്നുണ്ട്.

ദുരിതയാത്ര : നാട്ടുകാരെ കുഴിയിലാക്കാൻ

മൂവാറ്റുപുഴ: ദിനംപ്രതി നൂറുകണത്തിന് വാഹനങ്ങള്‍ സഞ്ചരിക്കുന്ന മൂവാറ്റുപുഴ കാവുംപടി റോഡില്‍ രൂപപ്പെട്ടിരിക്കുന്ന കുഴി യാത്രക്കാര്‍ക്ക് ദുരിതമാകുന്നു. മൂവാറ്റുപുഴ നിര്‍മല ഹയര്‍സെക്കന്‍ഡറി സ്‌കൂളിന് സമീപം സെന്‍റ് മേരീസ് കപ്പേളയോട് ചേര്‍ന്നാണ് യാത്രക്കാരുടെ നടുവൊടിക്കുംവിധമുള്ള വലിയ കുഴി രൂപപ്പെട്ടിരിക്കുന്നത്. നഗരത്തില്‍ ഗതാഗത നിയന്ത്രണം പ്രാബല്യത്തില്‍ ഇരിക്കെ പ്രധാനമായും തൊടുപുഴ ഭാഗത്തേക്ക് ഉൾപ്പെടെ പോകേണ്ട യാത്രക്കാര്‍ ആശ്രയിക്കുന്ന കാവുംപടി റോഡിന്‍റെ നടുവിലായി രൂപപ്പെട്ടിരിക്കുന്ന വലിയ കുഴി യാത്രക്കാര്‍ക്ക് ദുരിതമായി മാറിയിരിക്കുകയാണ്. മഴ പെയ്ത് കുഴിയില്‍ വെള്ളം നിറയുന്നതോടെ വാഹനങ്ങള്‍ അപകടത്തിൽപ്പെടാനുള്ള സാധ്യത ഏറെയാണ്. വെള്ളം നിറഞ്ഞു നില്‍ക്കുമ്പോള്‍ കുഴിയുടെ വ്യാപ്തി അറിയാതെ എത്തുന്ന വാഹനങ്ങള്‍ കുഴിയില്‍ ചാടുന്നത് പതിവായി. ഇരുചക്ര വാഹന യാത്രക്കാരാണ് കൂടുതലായും ദുരിതത്തിലായിരിക്കുന്നത്. വാഹനങ്ങള്‍ കുഴിയില്‍ ചാടുമ്പോള്‍ ദേഹത്തേക്ക് ചെളിവെള്ളം തെറിക്കുന്നത് കാല്‍നട യാത്രക്കാരെയും ബുദ്ധിമുട്ടിലാക്കുന്നുണ്ട്. ടാറിംഗ് ഇളകി മെറ്റിലുകള്‍ റോഡില്‍ ചിതറിക്കിടക്കുന്നതും അപകടം വരുത്തിവയ്ക്കുന്നുണ്ട്. രണ്ട് സ്‌കൂളുകള്‍, പോലീസ് സ്റ്റേഷന്‍, കോടതി സമുച്ചയം, നഗരസഭ കാര്യാലയം തുടങ്ങി നിരവധി സ്ഥാപനങ്ങള്‍ പ്രവര്‍ത്തിക്കുന്ന കാവുംപടി റോഡില്‍ ചെറുതും, വലുതുമായ നിരവധി കുഴികളാണ് രൂപപ്പെട്ടിരിക്കുന്നത്. കുഴി നികത്തി റോഡിലെ അപകടക്കെണിക്ക് പരിഹാരം കാണണമെന്നാണു പ്രദേശവാസികളുടെ ആവശ്യം.

കോടനാട് പ്രദേശത്തെ മഴയളക്കാൻ വിദ്യാർഥികൾ

പെരുമ്പാവൂർ: കോടനാട് പ്രദേശത്ത് പെയ്യുന്ന മഴയുടെ അളവെടുക്കുവാൻ വിദ്യാർഥികൾ രംഗത്തിറങ്ങി. ബസേലിയോസ് പബ്ലിക് സ്കൂളിലെ വിദ്യാർഥികളാണ് 17 മഴ മാപിനികൾ വിവിധ വിദ്യാർഥികളുടെ വീടുകളിൽ സ്ഥാപിച്ചത്. ശാസ്ത്രീയമായി മഴ അളക്കുന്നതിനുള്ള മഴമാപിനികൾ സ്കൂളിലെ നേച്ചർ ക്ലബ്ലിന്‍റെ നേതൃത്വത്തിലാണ് നിർമിച്ചത്. നേച്ചർ ക്ലബ്ബിലെ 50 ഓളം വിദ്യാർഥികൾ റെയിൻ ഗേജ് നിർമാണത്തിൽ പങ്കെടുത്തു. മഴയുടെ അളവ് ഓരോ ദിവസവും അളന്നെടുക്കാനുള്ള ക്രമീകരണം ആണ് ചെയ്തിട്ടുള്ളത്. സ്കൂൾ ഗ്രൗണ്ടിലും മഴമാപിനി സ്ഥാപിച്ചിട്ടുണ്ട്. പ്രിൻസിപ്പൽ വിജി വി. ജോൺ, അധ്യാപകരായ റിയ വർഗീസ്, ഡി. ധന്യ മോൾ എന്നിവർ നേതൃത്വം നൽകി.

ഡ്രൈവറുടെ അശ്രദ്ധ; ഇലവൻ കെവി ലൈനും ട്രാൻസ്ഫോർമറും തകർന്നു

അരൂർ: ഡ്രൈവറുടെ അശ്രദ്ധമൂലം ഇലവൻ കെവി ലൈനും ട്രാൻഫോമറും തകർന്നു. ചന്തിരൂർ കുമർത്തുപടി ക്ഷേത്രത്തിന് മുന്നിൽ പ്രവത്തിക്കുന്ന സ്ഥാപനത്തിലേക്ക് മിറ്റൽ കയറ്റി വന്ന ടോറസ് ആണ് അപകടത്തിൽപ്പെട്ടത്. വെള്ളിയാഴ്ച ഉച്ചയ്ക്ക് പന്ത്രണ്ടോടെയായിരുന്നു സംഭവം. മിറ്റൽ ഇറക്കിയതിന് ശേഷം കാബിൻ താഴ്ത്താൻ ഡ്രൈവർ മറന്നുപോയതാണ് അപകടത്തിന് കാരണം. മുപ്പത് അടി ഉയരമുള്ള പോസ്റ്റിൽ ഇലവൻ കെവിയുടെ കേബിളുകളിൽ ഉയർന്നു നിന്ന കാബിൻ ഉടക്കിയതോടെയാണ് സമീപത്തെ ബെൽ സീഫുഡ് കമ്പനിയിൽ സ്ഥാപിച്ചിരുന്ന ട്രാൻസ്ഫോർ സംരക്ഷണ വേലി ഉൾപ്പെടെ തകർന്ന് താഴെ വീണത്. അപകടത്തിന് പിന്നാലെ ഡ്രൈവർ ഓടിരക്ഷപ്പെട്ടു. ഇവിടെകന്പിക്കു പകരം കേബിളുകൾ ആയതിനാൽ വൻ അപകടം ഒഴിവായി.

കളമശേരിയില്‍ കൗണ്‍സിലര്‍മാരും ട്രാഫിക് പോലീസും തമ്മില്‍ വാക്കേറ്റം

കളമശേരി: റോഡരികില്‍ പാര്‍ക്ക് ചെയ്തിരുന്ന വാഹനങ്ങള്‍ക്ക് പിഴ ചുമത്തിയതുമായി ബന്ധപ്പെട്ട് കളമശേരിയിൽ കൗണ്‍സിലര്‍മാരും ഇടപ്പള്ളി ട്രാഫിക് പോലീസും തമ്മില്‍ വാക്കേറ്റം. എച്ച്എംടി റോഡരികില്‍ വാഹനങ്ങള്‍ പാര്‍ക്ക് ചെയ്തതിന് പോലീസ് പിഴ ചുമത്തുന്നത് വ്യാപാരികളും കൗണ്‍സിലര്‍മാരും ചേര്‍ന്ന് ചോദ്യം ചെയ്തതാണ് വാക്കേറ്റത്തിന് വഴിവച്ചത്. എച്ച്എംടി ജംഗ്ഷന്‍ മുതല്‍ ഐടിഐക്ക് സമീപം വരെ റോഡരികില്‍ നിര്‍ത്തിയിട്ട വാഹനങ്ങള്‍ക്ക് ഇടപ്പള്ളി ട്രാഫിക് സിഐ എം.പി. സാഗറിന്‍റെ നേതൃത്വത്തില്‍ പിഴയിട്ടു വരുന്നതിനിടെയാണ് എതിര്‍പ്പ് തുടങ്ങിയത്. സ്ഥാപനങ്ങളിലും കച്ചവട സ്ഥാപനങ്ങളിലും എത്തുന്നവര്‍ക്ക് വരെ പിഴ ഇടാന്‍ തുടങ്ങിയതോടെ വ്യാപാരികള്‍ ഇക്കാര്യം എച്ച്എംടി കൗണ്‍സിലര്‍ നഷീദ സലാമിനെയും, പൈപ്പ് ലൈന്‍ കൗണ്‍സിലര്‍ ബഷീര്‍ അയ്യമ്പ്രാത്തിനെയും അറിയിക്കുകയായിരുന്നു. തുടര്‍ന്ന് ഇവര്‍ സ്ഥലത്തെത്തി സിഐയുമായി ചര്‍ച്ച നടത്തി. എന്നാല്‍ ട്രാഫിക് സിഐ ക്ഷുഭിതനായി ചര്‍ച്ചയ്ക്ക് തയാറാകാതെ പോയതിനെ തുടര്‍ന്ന് കൗണ്‍സിലന്മാരുടെ നേതൃത്വത്തില്‍ തടയുകയും വാക്കേറ്റമുണ്ടാകുകയുമായിരുന്നു. എതിര്‍പ്പ് ശക്തമായതോടെ പിന്നീട് പോലീസ് മടങ്ങി. എന്നാല്‍ നടപടി തുരുമെന്നാണ് ട്രാഫിക് പോലീസ് പറയുന്നത്. രേഖാമൂലമല്ലാതെ നിരവധി പരാതികള്‍ ലഭിച്ചതിന്‍റെ അടിസ്ഥാനത്തിലാണ് നടപടിയെന്നും പോലീസ് പറഞ്ഞു. കച്ചവട സ്ഥാപനങ്ങളിലേക്കെത്തുന്നവരുടെ വാഹനങ്ങള്‍ക്കും പിഴ ഈടാക്കുന്നതിനാല്‍ ആളുകളുടെ വരവ് കുറഞ്ഞുവെന്ന് വ്യാപാരികള്‍ പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]