ADVERTISEMENT

ADVERTISEMENT

ഭൂമി രജിസ്ട്രേഷൻ; അമിത ഫീസ് വർധന പിൻവലിക്കണമെന്ന്

ചെറുപുഴ: ഭൂമി രജിസ്ട്രേഷൻ ഫീസിന്‍റെ അമിത വർധന പിൻവലിക്കണമെന്ന് കേരളാ റിയൽ എസ്റ്റേറ്റ് ഏജൻസീസ് അസോസിയേഷൻ ആവശ്യപ്പെട്ടു. കണ്ണൂരിൽ നടന്ന കേരളാ റിയൽ എസ്റ്റേറ്റ് ഏജൻസീസ് അസോസിയേഷൻ ജില്ലാ കമ്മിറ്റി രൂപീകരണ യോഗമാണ് ആവശ്യം ഉന്നയിച്ചത്.

യോഗം സംസ്ഥാന ജനറൽ സെക്രട്ടറി പി. ജനാർദനൻ ഉദ്ഘാടനം ചെയ്തു. ജില്ലാ പ്രസിഡന്‍റ് സിനു അരീക്കൽ അധ്യക്ഷത വഹിച്ചു. കെ.എം. ഗോപി, ടി.എ. ഷിജു, ഡോ. പി.കെ. വേണു, മടപ്പള്ളി മോഹനൻ എന്നിവർ പ്രസംഗിച്ചു. യോഗത്തിൽ ജില്ലാ പ്രസിഡന്‍റ് സിനു അരീക്കലിൽ നിന്നും അംഗത്വ അപേക്ഷ ഫോം ജനറൽ സെക്രട്ടറി പി. ജനാർദനൻ സ്വീകരിച്ചു.

ADVERTISEMENT

യാത്രക്കാരന്‍റെ പഴ്സും ബാഗും മോഷ്ടിച്ച റെയില്‍വേ ജീവനക്കാരന്‍ അറസ്റ്റില്‍

കാസര്‍ഗോഡ്: യാത്രക്കാരന്‍റെ പണവും രേഖകളുമടങ്ങിയ പഴ്സും ബാഗുകളും മോഷ്ടിച്ച റെയില്‍വേ ജീവനക്കാരന്‍ അറസ്റ്റില്‍. ബിഹാര്‍ നാരായണ്‍പൂര്‍ സ്വദേശിയും ട്രാക്ക്മാനുമായ സുബോധ് കുമാറാണ് റെയില്‍വേ പോലീസിന്‍റെ പിടിയിലായത്. നെല്ലിക്കുന്ന് സ്വദേശി അശോക് ഷെട്ടിയുടെ (48) ബാഗുകളും പഴ്സുമാണ് പ്രതി കവര്‍ന്നത്. ഈമാസം 18ന് കാസര്‍ഗോഡ് റെയില്‍വേ സ്റ്റേഷനിലാണ് കവര്‍ച്ച നടന്നത്. ചണ്ഡീഗഡില്‍നിന്നു കൊച്ചുവേളിയിലേക്ക് പോകുന്ന ട്രെയിനിലെ യാത്രക്കാരനായിരുന്നു അശോക്. വെള്ളിയാഴ്ച പുലര്‍ച്ചെ രണ്ടിനു കാസര്‍ഗോഡ് റെയിവേ സ്റ്റേഷനില്‍ ഇറങ്ങിയ ഉടനെയാണ് മോഷണം നടന്നത്. 5900 രൂപയും ആധാറും ഡ്രൈവിംഗ് ലൈസന്‍സുമടങ്ങിയ പഴ്സും 2500 രൂപയുടെ പലവ്യഞ്ജന സാധനങ്ങള്‍ അടങ്ങിയ ബാഗും ഷോള്‍ഡര്‍ ബാഗും പ്ലാറ്റ്‌ഫോമില്‍ വച്ച ഉടനെ ട്രാക്ക് മാന്‍ അവ മോഷ്ടിക്കുകയായിരുന്നു. അപ്പോള്‍ തന്നെ അശോക് കാസര്‍ഗോഡ് റെയില്‍വേ പോലീസില്‍ പരാതി നല്‍കി. പ്ലാറ്റ്ഫോമിലെ സിസിടിവി ദൃശ്യത്തിലൂടെയാണ് പ്രതിയെ തിരിച്ചറിഞ്ഞത്. എസ്എച്ച്ഒ റെജികുമാറിന്‍റെ നേതൃത്വത്തില്‍ എസ്‌ഐ എം.വി. പ്രകാശന്‍, ഇന്‍റലിജന്‍സ് ഉദ്യോഗസ്ഥന്‍ ജ്യോതിഷ്, സിപിഒ അശ്വിന്‍ ഭാസ്‌കര്‍ എന്നിവര്‍ ചേര്‍ന്നാണ് പ്രതിയെ പിടികൂടിയത്.

പാൽച്ചുരത്ത് ഗതാഗതം പുനഃസ്ഥാപിച്ചു

കൊട്ടിയൂർ: ബോയ്സ് ടൗൺ ചുരം പാതയിൽ മണ്ണിടിച്ചിലിനെ തുടർന്നുണ്ടായ ഗതാഗതടസം പുനഃസ്ഥാപിച്ചു. റോഡിലേക്ക് പതിച്ച കല്ലും മണ്ണും നീക്കം ചെയ്താണ് പാത ഗതാഗത യോഗ്യമാക്കിയത്. റോഡ് യാത്രായോഗ്യമാക്കി എന്ന വില്ലേജ് ഓഫീസറുടെ റിപ്പോർട്ടിനെ തുടർന്നാണ് ജില്ലാ കളക്ടർ യാത്രാ വിലക്ക് നീക്കിയത്. എന്നാൽ രാത്രികാല യാത്രാനിരോധനം തുടരും. രണ്ടു ദിവസങ്ങളിലായി ജെസിബികൾ, പാറ പൊട്ടിക്കുന്നതിനുള്ള യന്ത്രങ്ങൾ, ടിപ്പർ ലോറികൾ തുടങ്ങിയവയുടെ സഹായത്തോടെയാണ് മണ്ണും പാറക്കൂട്ടങ്ങളും മരങ്ങളും നീക്കം ചെയ്തത്. പഞ്ചായത്ത് പ്രസിഡന്‍റ് റോയി നമ്പുടാകം, പഞ്ചായത്തംഗങ്ങളായ ഷാജി പൊട്ടയിൽ, ജോണി ആമക്കാട്ട്, പൊതുപ്രവർത്തകൻ റെജി കന്നുകുഴി തുടങ്ങിയവർ പ്രവർത്തികൾക്ക് നേതൃത്വം നല്കി. പാൽച്ചുരം പാത യാത്ര തടസപ്പെട്ടതോടെ ആയിരക്കണക്കിന് യാത്രക്കാരാണ് ബുദ്ധിമുട്ടിലായത്.

ചെറുപുഷ്പ മിഷൻലീഗ് കണ്ണൂർ റീജണൽ വൈസ് ഡയറക്ടേഴ്സ് സംഗമം നടത്തി

കണ്ണൂർ: കോട്ടയം അതിരൂപത ചെറുപുഷ്പ മിഷൻലീഗ് കണ്ണൂർ റീജണൽ വൈസ് ഡയറക്ടേഴ്സ് സംഗമം നടത്തി. ചെറുപുഷ്പ മിഷൻ ലീഗിന്‍റെ ഉപമധ്യസ്ഥയായ വിശുദ്ധ അൽഫോൻസാമ്മയുടെ തിരുനാളിനൊരുക്കമായി നടന്ന സംഗമം കണ്ണൂർ ശ്രീപുരത്ത് ബറുമറിയം പാസ്റ്ററൽ സെന്‍റർ ഡയറക്ടർ ഫാ. ജോയി കട്ടിയാങ്കൽ ഉദ്ഘാടനം ചെയ്തു. റീജണൽ പ്രസിഡന്‍റ് ബിനീത് വിൽസൻ അധ്യക്ഷത വഹിച്ചു. കണ്ണൂർ റീജണൽ ഡയറക്ടർ ഫാ. സിബിൻ കൂട്ടക്കല്ലുങ്കൽ, സിസ്റ്റർ എമിൽഡ എസ്‌വിഎം, സിസ്റ്റർ ജെസ്‌‌ലി എന്നിവർ പ്രസംഗിച്ചു. രാവിലെ 9.30ന് വിശുദ്ധ കുർബാനയോടു കൂടിയാണ് സംഗമം ആരംഭിച്ചത്. സംഗമത്തിൽ ഈ വർഷത്തെ പ്രവർത്തനങ്ങൾ, ഇടവകയിൽ വൈസ് ഡയറക്ടർമാർ പ്രവർത്തിക്കേണ്ട രീതികൾ എന്നിവയെക്കുറിച്ച് ക്ലാസുകളും ചർച്ചകളും നടന്നു. കപ്പൂച്ചിൻ സഭാംഗമായ ഫാ. ക്ലിന്‍റ് ക്ലാസുകൾക്ക് നേതൃത്വം നൽകി. റീജണൽ ഭാരവാഹികളായ സിസ്റ്റർ ക്രിസ്റ്റീന, സോനു ചെട്ടിക്കത്തോട്ടത്തിൽ എന്നിവർ നേതൃത്വം നൽകി.

ആക്രി സാധനങ്ങളിൽ സ്കൂട്ടർ നിർമിച്ച് എട്ടാം ക്ലാസുകാരൻ

ശ്രീകണ്ഠപുരം: കുഞ്ഞിളം മനസിൽ കുന്നോളം മോഹങ്ങൾ കാണും. അവയിൽ ഒളിഞ്ഞിരിക്കുന്നത് പലതും നടക്കില്ലെന്ന് അറിഞ്ഞിട്ടും പിന്തുണയ്ക്കാൻ ആളുണ്ടെങ്കിൽ എൻജിനിയറിംഗ് മികവ് കൈവരിക്കാമെന്ന് തെളിയിച്ചിരിക്കുകയാണ് ശ്രീകണ്ഠപുരം നഗരസഭയിലെ ചെരിക്കോട് അങ്കണവാടിക്ക് സമീപത്തെ ഓട്ടോ ഡ്രൈവറായ തലക്കൽ ഷിബു- ബീന ദമ്പതിമാരുടെ ഇളയമകൻ ഏബൽ.പയ്യാവൂർ സേക്രഡ് ഹാർട്ട് ഹയർ സെക്കൻഡറി സ്കൂളിൽ എട്ടാം ക്ലാസ് വിദ്യാർഥിയാണ് ഏബൽ. എട്ടുവയസുള്ളപ്പോൾ തെങ്ങിന്‍റെ മടലും ചിരട്ടയും ഉപയോഗിച്ച് മണ്ണുമാന്തി യന്ത്രം നിർമിച്ചതോടെ അവന്‍റെ എൻജിനിയറിംഗ് മികവ് ആദ്യം വീട്ടുകാർക്ക് മനസിലായില്ല. പിന്നെ തകരാറിലായ ടോർച്ചും മിക്‌സിയും നിമിഷനേരം കൊണ്ട് ശരിയാക്കിയതോടെ വീട്ടിലെ കൊച്ചു താരമായി. പുതിയ സൈക്കിൾ വാങ്ങിയത് സ്വയം റിപ്പയർ ചെയ്തതറിഞ്ഞ് പരിസരത്തെ കൂട്ടുകാരും സൈക്കിൾ നന്നാക്കാനെത്തിയതും നാട്ടിൽ വൈറലായി. മടമ്പം മേരിലാൻഡ് ഹൈസ്കൂളിൽ പഠിക്കുമ്പോൾ വാഹനങ്ങളോടും വാഹനയന്ത്രഭാഗങ്ങളോടും പ്രത്യേക കമ്പം തോന്നിത്തുടങ്ങി. ഷിബുവിന്‍റെ ബൈക്ക് തകരാറിലായപ്പോൾ മടമ്പത്തെ മെക്കാനിക്ക് എത്തും മുമ്പേ ശരിയാക്കി കാണിച്ചപ്പോൾ അദ്ഭുതമായി. പിന്നീട് ഏബൽ കൊച്ചു കൊച്ചു പരീക്ഷണത്തിലേക്ക് കടന്നു. കഴിഞ്ഞവർഷം മടമ്പത്ത് വച്ച് ഏബലിനെ അനുമോദിച്ചപ്പോൾ അലക്സ് നഗർ ഫൊറോന വികാരി ഫാ. തോമസ് വട്ടക്കാട്ടും മടമ്പം വികാരി ഫാ. സജി മെത്താനത്തും അടുത്ത ആഗ്രഹം എന്താണെന്ന് ചോദിച്ചപ്പോഴാണ് ഒരു കാറ് നിർമിക്കണമെന്ന മോഹം പങ്കുവച്ചത്.ആക്രിക്കാർക്ക് കൊടുക്കാൻ വച്ച സാധനമൊക്കെ മാറ്റിവയ്ക്കുന്ന സ്വഭാവം ഏബലിനുണ്ടായിരുന്നു. ആദ്യം എല്ലാം തമാശയായിക്കണ്ട വീട്ടുകാർ പിന്നീട് മകനെ പ്രോത്സാഹിപ്പിച്ചു. ഇപ്പോൾ പിതാവിന്‍റെ ബൈക്കിന്‍റെ യന്ത്രഭാഗങ്ങൾ അഴിച്ചെടുത്ത് പുതിയ കാറിന് ജന്മം നൽകിയിരിക്കുകയാണ്. ഇതിന് ആവശ്യമായ മറ്റ് സാമഗ്രികൾ ആക്രിക്കടയിൽ ചെന്നാണ് ശേഖരിച്ചത്. പുതിയ കാർ വീട്ടു മുറ്റത്തുകൂടി ഏബൽ തലങ്ങും വിലങ്ങും ഓടിച്ചതോടെ കൂട്ടുകാരും നാട്ടുകാരും സമീപദേശങ്ങളിലുള്ളവരും കാണാനും അഭിനന്ദിക്കാനുമെത്തി. ഗിയർ സൈക്കിളിലും കൈവച്ച് മാറ്റം വരുത്തി. എവിടെയെങ്കിലും പഴയ വണ്ടികളും ആക്രി സാധനങ്ങളും കൊടുക്കാനുണ്ടെന്നറിഞ്ഞാൽ ഏബൽ പിതാവിനെയും കൂട്ടി അവിടെച്ചെന്ന് സ്വന്തമാക്കിയിരിക്കും. പിന്നെ പുതിയൊരു വസ്തു പിറക്കും. തകരാറിലായ ഫാൻ ഉപയോഗിച്ച് ടൈൽ മുറിക്കുന്ന യന്ത്രമുണ്ടാക്കി. തേങ്ങ ചിരകുന്ന ഉപകരണവും ഉണ്ടാക്കിയിട്ടുണ്ട്. ആദ്യമേ എൻജിനുകളിലും മറ്റും വല്ലാത്ത താത്പര്യമുണ്ടായിരുന്നു. പിന്നെ ഗുഗിളിൽ കണ്ടും ഇത്തരം നിർമാണങ്ങളിലേക്ക് എത്തുകയായിരുന്നു. ശാസ്ത്രജ്ഞനാകാനാണ് ഏബലിന് താല്പര്യം. അല്ലെങ്കിൽ എൻജിനിയർ. മാതാപിതാക്കളോടൊപ്പം സഹോദരങ്ങളായ പ്ലസ് ടു കഴിഞ്ഞ സഹോദരി എയ്ഞ്ചലും പത്താം ക്ലാസുകാരൻ അജലും അധ്യാപകരും പിന്തുണയുമായി ഒപ്പമുണ്ട്. സ്കൂൾ സമയം കഴിഞ്ഞാൽ വീട്ടിലെ മുറ്റം നിറയെ കാറോടുകയാണ്. അതിനൊപ്പം കാറിനെ മോടി പിടിപ്പിക്കാനുളള തയാറെടുപ്പിലാണ് കൊച്ചുമിടുക്കൻ.

ബസുകൾ കൂട്ടിയിടിച്ച് 30 പേർക്കു പരിക്ക്

കണ്ണൂർ: കാടാച്ചിറയിൽ കെഎസ്ആർടിസി ബസും സ്വകാര്യ ബസും കൂട്ടിയിടിച്ച് 30 പേർക്കു പരിക്കേറ്റു. കൂത്തുപറന്പിൽ നിന്ന് കണ്ണൂരിലേക്ക് വരികയായിരുന്ന കെഎസ്ആർടി ബസും കണ്ണൂരിൽനിന്ന് തിരുനെല്ലിയിലേക്ക് പോകുകയായിരുന്ന സ്വകാര്യബസുമാണ് കൂട്ടിയിടിച്ചത്. കാടാച്ചിറ ഡോക്ടർ മുക്കിൽ ഇന്നലെ രാവിലെ ആറോടെയായിരുന്നു അപകടം. റോഡിലെ വളവിനോട് ചേർന്ന ഭാഗത്ത് ഇരുബസുകളും നേർക്കുനേർ കൂട്ടിയിടിക്കുകയായിരുന്നു. ഇരുബസിലെയും ഡ്രൈവർമാർക്കും യാത്രക്കാർക്കുമാണ് പരിക്കേറ്റത്. പരിക്കേറ്റവരെ ഓടിക്കൂടിയ നാട്ടുകാർ ഉടൻ തന്നെ കണ്ണൂരിലെ ജില്ലാ ആശുപത്രിയിലും സ്വകാര്യ ആശുപത്രിയിലും എത്തിച്ചു. നരവൂർ സ്വദേശി ഗീത (53), എടക്കാട് സ്വദേശി രവീന്ദ്രൻ (71), പിണറായിലെ പ്രജീഷ് (45), കണ്ണവത്തെ ദിലീപ് (46), കോയ്യോട്ടെ പ്രസീത (54), മാനന്തേരി സ്വദേശികളായ രാജേഷ് (44), ഷാജി (51), പെരളശേരിയിലെ പ്രതിഷ് (50), കൂത്തുപറന്പിലെ മനോഹരൻ (54), മന്പറത്തെ അജയൻ എന്നിവർ ജില്ലാ ആശുപത്രിയിൽ ചികിത്സ തേടി. യാത്രക്കാരായ അബ്ദുറസാഖ്, രമ്യ, മനോഹരൻ, രാജാമണി, ബാബു, ചന്ദ്രൻ, രഞ്ജിത്ത്, അബ്ദുൾ ജബ്ബാർ, വിജീഷ്, സുനിൽകുമാർ, സജീവൻ, ബിപിൻ, സുരേശൻ, രാധാകൃഷ്ണൻ, ലത, ജിതേഷ്, ആദിത്യ, സരസ്വതി, ദാസൻ എന്നിവർ സ്വകാര്യ ആശുപത്രിയിലും ചികിത്സ തേടി. ആരുടെയും പരിക്ക് ഗുരതരമല്ലെന്ന് ആശുപത്രി വൃത്തങ്ങൾ അറിയിച്ചു. പലരെയും പ്രഥമശുശ്രൂഷ നൽകി വിട്ടയച്ചു. പൊതുഅവധിയായതിനാൽ ബസുകളിൽ യാത്രക്കാർ കുറവായിരുന്നത് അപകടത്തിന്‍റെ വ്യാപ്തി കുറച്ചു.

ആറളത്തെ കാട്ടാന ശല്യം തടയാനുള്ള പദ്ധതികൾ; സർക്കാർ ഫണ്ട് അനുവദിക്കണമെന്ന് ഹൈക്കോടതി

ഇരിട്ടി: ആറളം പുനരധിവാസ മേഖലയിൽ കാട്ടാനയാക്രമണത്തിന് അടിയന്തര നടപടികൾ സ്വീകരിക്കാനുള്ള പദ്ധതികൾക്ക് സർക്കാർ ഫണ്ട് അനുവദിക്കണമെന്ന് ഹൈക്കോടതി നിർദേശം. കാട്ടാനയുൾപ്പെടെയുള്ള വന്യമൃഗശല്യത്തിന് പരിഹാരം കാണുന്നതിന് ജില്ലാ കളക്ടറും ഡിഎഫ്ഒയും ഹൈക്കോടതിയിൽ സമർപ്പിച്ച നിർദേശങ്ങൾ അംഗീകരിച്ചാണ് ഹൈക്കോടതി സർക്കാരിന് നിർദേശം നൽകിയത്. വന്യജീവി ആക്രമണവുമായി ബന്ധപ്പെട്ട് വയനാട് സ്വദേശി പോൾ മാത്യു നൽകിയ പൊതുതാത്പര്യ ഹർജിയിന്മേലാണ് നടപടി. കോടതി നിർദേശപ്രകാരം പ്രാദേശികമായി രൂപീകരിച്ച ടാസ്ക് ഫോഴ്‌സ് കോടതിയിൽ നിർദേശങ്ങൾ സമർപ്പിച്ചിരുന്നു. ഇതു പരിശോധിച്ച കോടതി അടിസ്ഥാനത്തിൽ അടിയന്തര സുരക്ഷാ സംവിധാങ്ങൾ ശക്തിപ്പെടുത്തുന്നതുമായി ബന്ധപ്പെട്ട നിർദേശങ്ങൾ നൽകാൻ ജില്ലാ കളക്ടർ, ഡിഎഫ്ഒ എന്നിവരോട് നിർദേശിച്ചു. ഇവർ സമർപ്പിച്ച റിപ്പോർട്ട് ഹൈക്കോടതി അംഗീകരിച്ചു. തുടർന്ന് ഇന്ത്യൻ ഭരണഘടനയുടെ ആർട്ടിക്കിൾ 21 പ്രകാരം പൗരന്മാരുടെ മൗലികാവകാശങ്ങളെ ബാധിക്കുന്ന വിഷയത്തിൽ സർക്കാർ ഉപേക്ഷ കൂടാതെ ഫണ്ട് അനുവദിക്കണം എന്നാണ് കോടതിയുടെ കണ്ടെത്തൽ. ആർആർടി ക്ക് പുതിയ വാഹനം, മൾട്ടി സെൻസർ സർവൈലൻസ് ഡ്രോൺ, 12 ബോർ ഗൺ, ബോഡി പ്രൊട്ടക്ടർ, ഹൈപവർ ലൈറ്റ് തുടങ്ങിയവ വേണ്ടതുണ്ടെന്നാണ് ഡിഎഫ്ഒ കോടതിൽ നൽകിയ റിപ്പോർട്ടിൽ ചൂണ്ടിക്കാണിച്ചത്. കളക്ടറുടെ നിദേശത്തിൽ പൂക്കുണ്ട്, കോട്ടപ്പാറ, ഉപ്പുകുന്ന് തുടങ്ങി ഇപ്പോൾ ആന ഇറങ്ങുന്ന സ്ഥലത്ത് താത്കാലിക വേലി, എട്ടു മാസത്തെ അറ്റകുറ്റപ്പണി, അടിക്കാട് വെട്ടിത്തെളിക്കൽ എന്നിവയുടെ ആവശ്യകതയാണ് പ്രധാനമായും നിർദേശിച്ചത്. ഇവയാണ് കോടതി അംഗീകരിച്ചത്. ഇതു സംബന്ധിച്ച റിപ്പോർട്ട് 30 നുള്ളിൽ കോടതിക്ക് സമർപ്പിക്കാനാണ് ഹൈക്കോടതിയുടെ ഉത്തരവ്. വനം വകുപ്പ് , ചീഫ് സെക്രട്ടറി, ആറളം വൈൽഡ് ലൈഫ് വാർഡൻ , ജില്ലാ കളക്ടർ, കണ്ണൂർ ഡിഎഫ്ഒ , ആറളം പഞ്ചായത്ത് , ആറളം ഫാമിംഗ് കോർപറേഷൻ എന്നിവരും കേസിൽ കക്ഷികളാണ്.

കേരള ക്രിക്കറ്റ് ലീഗിലേക്ക് കണ്ണൂരിന്‍റെ താരങ്ങൾ

കണ്ണൂർ: കണ്ണൂരിൽനിന്ന് ഇത്തവണയും കേരള ക്രിക്കറ്റ് ലീഗിലേക്ക് താരങ്ങൾ. സൽമാൻ നിസാറിനെയും അക്ഷയ് ചന്ദ്രനെയും ടീമുകൾ നിലനിർത്തിയപ്പോൾ വരുൺ നായരെ തൃശൂർ ലേലത്തിലൂടെ സ്വന്തമാക്കി. എം.പി. ശ്രീരൂപ്, മുഹമ്മദ് നാസിൽ, അർജുൻ നന്പ്യാർ എന്നിവരാണ് രണ്ടാം സീസണിൽ കണ്ണൂരിൽ നിന്ന് കെസിഎലിലേക്കുള്ള മറ്റുള്ളവർ. കഴിഞ്ഞ സീസണിൽ കാലിക്കറ്റ് ഗ്ലോബ് സ്റ്റാഴ്സിനെ ഫൈനലിൽ എത്തിക്കുന്നതിൽ മുഖ്യ പങ്കുവഹിച്ച താരമാണ് സൽമാൻ നിസാർ. 12 മത്സരങ്ങളിൽനിന്ന് നാല് അർധസെഞ്ചുറികളടക്കം 455 റൺസുമായി സീസണിലെ ടീമിന്‍റെ ടോപ് സ്കോററായിരുന്നു. തുടർന്നുള്ള രഞ്ജി സീസണിലും മികച്ച ഫോം കാഴ്ചവച്ച സൽമാൻ നിസാറിനെ ചുറ്റിപ്പറ്റിയാണ് ഈ സീസണിലും ടീമിന്‍റെ പ്രതീക്ഷകൾ. അഞ്ചുലക്ഷം രൂപയ്ക്കാണ് സൽമാനെ ടീം നിലനിർത്തിയത്. ജില്ലയിൽനിന്ന് തന്നെയുള്ള അക്ഷയ് ചന്ദ്രനെ ആലപ്പി റിപ്പിൾസ് നിലനിർത്തിയതും അഞ്ചുലക്ഷം രൂപയ്ക്കാണ്. ഒരുപതിറ്റാണ്ടായി കേരള ടീമിലെ സ്ഥിരസാന്നിധ്യമായ അക്ഷയ് ബാറ്റിംഗിനൊപ്പം ഇടംകൈയൻ സ്പിന്നർ എന്ന നിലയിലും ടീമിനു മുതൽക്കൂട്ടാണ്. ആദ്യസീസണിൽ തൃശൂരിനായി മികച്ച പ്രകടനം കാഴ്ചവച്ച താരമാണ് വരുൺ നായനാർ. 3.20 ലക്ഷത്തിനാണ് തൃശൂർ ഇത്തവണയും വരുണിനെ നിലനിർത്തിയത്. അർജുൻ സുരേഷ് നന്പ്യാർ, സി.ടി.കെ. മുഹമ്മദ് നാസിൽ, എം.പി. ശ്രീരൂപ് എന്നിവർക്ക് ഇത് ലീഗിലെ ആദ്യ സീസണാണ്. മൂവരെയും ആലപ്പി റിപ്പിൾസാണ് ഏറ്റെടുത്തത്.

സാന്‍റാ മോണിക്ക ടൂർസ് ആൻഡ് ട്രാവൽസ് മിഡ്‌വേ ട്രാവൽ ഫിയസ്റ്റ കണ്ണൂരിൽ

കണ്ണൂർ: സാന്‍റ മോണിക്ക ടൂർസ് ആൻഡ് ട്രാവൽസിന്‍റെ മിഡ് വേ ട്രാവൽ ഫിയസ്റ്റ-2025 ഈ മാസം 26ന് കണ്ണൂരിൽ നടക്കും. കണ്ണൂർ സൗത്ത് ബസാറിലെ ജി മാളിലെ സാന്‍റാ മോണിക്കയുടെ ഓഫീസിൽ രാവിലെ പത്തുമുതൽ വൈകുന്നേരം ഏഴു വരെയാണ് മിഡ് വേ ട്രാവൽ ഫിയസറ്റ് നടക്കുക. പ്രവേശനം സൗജന്യമാണ്. മികച്ച ഓഫറുകളോടെ ഗ്രൂപ്പ് ടൂറുകളും കസ്റ്റമൈസ്ഡ് ടൂർ പാക്കേജുകളും ഉൾപ്പെടെ 200ലധികം ആഭ്യന്തര-അന്താരാഷ്‌ട്ര പാക്കേജുകൾ ഫിയസ്റ്റയിലൂടെ സ്വന്തമാക്കാം.പ്രീമിയം ടൂർ ഡെസ്റ്റിനേഷനുകളാ ലാറ്റിൻ അമേരിക്ക-അന്റാർട്ടിക്ക, പനാമ, മഡഗാസ്കർ പോലുള്ള നിരവധി പാക്കേജുകളും ട്രാവൽ ഫിയസ്റ്റയുടെ പ്രത്യേകതയാണ്. ഫിയസ്റ്റയിൽ പങ്കെടുത്ത് ടൂർ പാക്കേജുകൾ ബുക്ക് ചെയ്യുന്നവർക്ക് 3,000 രൂപ മുതൽ 50,000 രൂപ വരെയുള്ള കാഷ് ഡിസ്കൗണ്ടുകൾ, ഗിഫ്റ്റ് വൗച്ചറുകൾ, സൗജന്യ കേരള ടൂർ പാക്കേജ് തുടങ്ങിയ മികച്ച ഓഫറുകളും ഒരുക്കിയിട്ടുണ്ട്. കൂടാതെ ഗ്രൂപ്പ് ടൂറുകൾക്കൊപ്പം, സൗകര്യപ്രദമായി യാത്രകൾ കസ്റ്റമൈസ് ചെയ്യാവുന്ന ടൂർ ഓപ്ഷനുകളും ലഭ്യമാണ്. പരിചയ സമ്പന്നരായ ടൂർ മാനേജർമാരുമായി നേരിട്ട് സംസാരിച്ച് യാത്രകൾ സംബന്ധിച്ച എല്ലാവിധ സംശയങ്ങളം പരിഹരിക്കാനുള്ള സൗകര്യവുമുണ്ടായിരിക്കും. ടൂർ ബുക്കിംഗിനൊപ്പം വീസ സേവനം, വിമാന ടിക്കറ്റുകൾ, കറൻസി എക്സ്ചേഞ്ച്, ട്രാവൽ ഇൻഷ്വറൻസ് തുടങ്ങി എല്ലാവിധ യാത്രാ സേവനങ്ങളും ഒരുക്കും. നേരിട്ട് പങ്കെടുക്കാൻ കഴിയാത്തവർക്ക് ഫോൺ വഴിയും ടൂർ പാക്കേജുകൾ ബുക്ക് ചെയ്യാൻ സൗകര്യമൊരുക്കിയിട്ടുണ്ടെന്ന് ഡയറക്ടർ ഐസക് ഫ്രാൻസിസ് അറിയിച്ചു. ഫോൺ: 7306702382, 9778428730. വെബ് സൈറ്റ്: www. san tam onica fly.com

ജീവിതശൈലി രോഗനിർണയ ക്യാമ്പും ബോധവത്കരണ ക്ലാസും നടത്തി

കേളകം: കണ്ണൂർ റൂറൽ ജില്ലാ പോലീസും കേളകം പിഎച്ച്സിയും സംയുക്തമായി ജീവിതശൈലി രോഗനിർണയ ക്യാമ്പും ബോധവത്കരണ ക്ലാസും നടത്തി. വളയഞ്ചാൽ ഉന്നതിയിൽ നടത്തിയ ക്യാമ്പിന് പേരാവൂർ ഡിവൈഎസ്പി എം.പി. ആസാദ്, കേളകം മെഡിക്കൽ ഓഫിസർ ഡോ. ഷബിന നിഷാദ്, ഹെൽത്ത് ഇൻസ്പെകട്ർ ഗോപാലകൃഷ്ണൻ എന്നിവർ നേതൃത്വം നല്കി. കേളകം പോലീസ് ഹൗസ് ഓഫീസർ ഇതിഹാസ് താഹ, പ്രിൻസിപ്പൽ എസ്ഐ വർഗീസ് തോമസ്, എസ്ഐ ഗംഗാധരൻ തുടങ്ങിയവർ പങ്കെടുത്തു. 150 ഓളം ഉന്നതി നിവാസികൾ ക്യാമ്പിൽ പങ്കെടുത്തു. സൗജന്യ മരുന്നുകളും വിതരണം ചെയ്തു.

പുഴയിലേക്ക് ഇടിഞ്ഞ റോഡ് അപകടാവസ്ഥയിൽ

ഇരിട്ടി: തളിപ്പറമ്പ്-ഇരിട്ടി സംസ്‌ഥാന പാതയിൽ കുയിലൂർ പൊതിനിരങ്ങിയ വളവിൽ റോഡ് പുഴയിലേക്ക് ഇടിഞ്ഞ് അപകടാവസ്ഥയിൽ. ഹെയർപിൻ വളവും ഇറക്കവും ചേരുന്ന ഭാഗത്താണ് പുഴയിൽ നിന്ന് റോഡിന്‍റെ അടിവശം മീറ്ററുകളോളം ദൂരത്തിൽ ഇടിഞ്ഞത്. ഇടിഞ്ഞ ഭാഗം കാട് കയറിയതിനാൽ അപകടാവസ്ഥ ആരുടെയും ശ്രദ്ധയിൽപ്പെടില്ല. സുരക്ഷാവരയോട് ചേർന്നു വരെ റോഡ് പുഴിയിലേക്ക് ഇടിഞ്ഞ നിലയിലാണ്. വാഹനങ്ങൾ പരസ്പരം സൈഡ് നൽകുമ്പോഴും കാൽനട യാത്രക്കാരും അപകടത്തിൽപ്പെടാനുള്ള സാധ്യത ഏറെയാണ്. നിരവധി വളവുകളുള്ള റോഡിൽ ഇരുവശത്തും കാട് കയറിമൂടിയതും കൂടുതൽ അപകടത്തിന് കാണമാകുന്നു. റോഡ് പുഴയിലേക്ക് ഇടിഞ്ഞ ഭാഗത്ത് അപകട സൂചനാബോർഡും ബാരിക്കേഡും അധികൃതർ സ്ഥാപിച്ചിട്ടില്ല. അപകടാവസ്ഥയിലായ ഭാഗത്ത് അടിയന്തരമായി സുരക്ഷാ നടപടികൾ സ്വീകരിക്കണമെന്നാണ് പ്രദേശവാസികളുടെ ആവശ്യം.

ഷോപ്പിംഗ് കോംപ്ലക്സ് വായ്പാനുമതി നിഷേധിച്ച നടപടി പുനഃപരിശോധിക്കും

കണ്ണൂർ: തലശേരി മണ്ഡലത്തിലെ മഞ്ഞോടിയില്‍ നഗരസഭ നിര്‍മിക്കുന്ന ഷോപ്പിംഗ് കോംപ്ലക്സിന് കെയുആര്‍ഡിഎഫ്സിയില്‍ നിന്നും വായ്പ എടുക്കുന്നതിന് അനുമതി നിഷേധിച്ച നടപടി സര്‍ക്കാര്‍ പുനഃപരിശോധിക്കും. ഇതു സംബന്ധിച്ച് നിയമസഭാ സ്പീക്കര്‍ എ.എന്‍. ഷംസീറിന്‍റെ അധ്യക്ഷതയില്‍ അദ്ദേഹത്തിന്‍റെ ചേംബറില്‍ ചേര്‍ന്ന യോഗത്തിലാണ് തീരുമാനമുണ്ടായത്. നഗരസഭാ ഭരണസമിതി തീരുമാനത്തിന്‍റെയും വായ്പാനുമതി സംബന്ധിച്ച കെയുആര്‍ഡിഎഫ്സിയില്‍ നിന്നുള്ള ഉത്തരവിന്‍റെ അടിസ്ഥാനത്തിലുമാണ് ഷോപ്പിംഗ് കോംപ്ലക്സ് നിര്‍മാണം ആരംഭിച്ചതെന്നും 80 ശതമാനത്തിലധികം പണി ഇതിനകം പൂര്‍ത്തിയായിട്ടുണ്ടെന്നും നഗരസഭാധികൃതര്‍ അറിയിച്ചു. യോഗതീരുമാനത്തിന്‍റെ അടിസ്ഥാനത്തില്‍ വിശദാംശങ്ങള്‍ ആരാഞ്ഞ് വായ്പാനുമതി നല്കുന്നതിന് അടിയന്തര നടപടി സ്വീകരിക്കുമെന്ന് തദ്ദേശ വകുപ്പ് സ്പെഷല്‍ സെക്രട്ടറി അദീല അബ്ദുള്ള വ്യക്തമാക്കി. തദ്ദേശ സ്വയംഭരണ വകുപ്പ് ഡയറക്ടര്‍ ഡോ. ദിനേശന്‍ ചെറുവാട്ട്, അഡീഷണല്‍ ഡയറക്ടര്‍ പി.സി. ബാലഗോപാല്‍, തലശേരി നഗരസഭാ ചെയര്‍പേഴ്സണ്‍ ജമുനാറാണി, സ്പീക്കറുടെ പ്രൈവറ്റ് സെക്രട്ടറി ടി. മനോഹരന്‍ നായര്‍, അഡീഷണല്‍ പ്രൈവറ്റ് സെക്രട്ടറിമാരായ എസ്. ബിജു, എസ്.കെ. അര്‍ജുന്‍ എന്നിവര്‍ യോഗത്തില്‍ പങ്കെടുത്തു.

ഇരിട്ടി പാലം സിഗ്നലിൽ ജനകീയ സമിതി ബാരിക്കേഡുകൾ സ്ഥാപിക്കും

ഇരിട്ടി: ഇരിട്ടി-കൂട്ടുപുഴ റോഡിൽ ഇരിട്ടി പാലം സിഗ്‌നലിന് സമീപം അപകടങ്ങൾ പതിവായ സ്ഥലത്ത് ജനകീയ സമിതിയുടെ നേതൃത്വത്തിൽ ബാരിക്കേഡുകൾ സ്ഥാപിക്കും. മുന്നറിയിപ്പ് സംവിധാനങ്ങൾ ഇല്ലാത്തതു കാരണം വാഹനങ്ങൾ ഡിവൈഡറിൽ കയറി അപകടം പതിവായതോടെയാണ് പായം പഞ്ചായത്തും ഇരിട്ടി പോലീസും ചേർന്ന് പൊതുമരാമത്ത് വകുപ്പിന്‍റെ അനുമതിയോടെ ബാരിക്കേഡ് സ്ഥാപിക്കുന്നത്. മരിയൻ എൻജിനിയറിംഗ് എന്ന സ്ഥാപനമാണ് ബാരിക്കേഡ് നിർമിച്ചു നൽകുന്നത്. വാഹനങ്ങൾക്ക് ദൂരെ നിന്നുതന്നെ ഡിവൈഡർ തിരിച്ചറിയാൻ ബാരിക്കേഡിന് ഇരുവശവും റിഫ്ലക്ടർ ഉൾപ്പെടെ സ്ഥാപനം നിർമിച്ചു നൽകും. മഴ ആരംഭിച്ചതോടെ മേഖലയിൽ അപകടം പതിവാകുകയും ഡിവൈഡറിനു മുകളിലൂടെ വാഹനം കയറിയുറങ്ങി പൂർണമായും തകരുകയും ചെയ്തിരുന്നു. മാസങ്ങളായി തകർന്നുകിടക്കുന്ന ഡിവൈഡർ നേരെയാക്കാൻ പൊതുമരാമത്ത് വകുപ്പ് യാതൊരു നടപടിയും സ്വീകരിക്കാതെ വന്നതോടെയാണ് ജനകീയമായി ബാരിക്കേഡ് തീർക്കുന്നത്. ഇവിടെ അപകടം പതിവായതോടെ സമീപത്തെ കെട്ടിട ഉടമ പ്രതിഷേധ സൂചകമായി ഡിവൈഡറിന് മുകളിൽ ചെടി നട്ട് പ്രതിഷേധിച്ചിരുന്നു. എന്നിട്ടും, വാഹങ്ങൾക്ക് മുന്നറിയിപ്പ് നല്കാൻ റിബൺ പോലും കെട്ടാതിരുന്നത് പൊതുമരാമത്ത് വകുപ്പിന്‍റെ വീഴ്ചയാണ്. ബാരിക്കേഡ് നിർമിക്കണ്ടേ സ്ഥലം പായം പഞ്ചായത്ത് പ്രസിഡന്‍റ് പി. രജനി, വൈസ് പ്രസിഡന്‍റ് വിനോദ്കുമാർ, പഞ്ചായത്ത് അംഗം പി. ഷാജിത്, ഇരിട്ടി പോലീസ് സ്റ്റേഷൻ എസ്ഐമാരായ എം.ജെ. ബെന്നി, അശോകൻ, എഎസ്ഐമാരായ ഷാജി, ബൈജു ബാരിക്കേഡ് നിർമിച്ച് നൽകുന്ന സ്ഥപന ഉടമ മരിയൻ ജോളി എന്നിവർ പരിശോധിച്ചു. ഒരാഴ്ചക്കുള്ളിൽ ബാരിക്കേഡുകൾ സ്ഥാപിക്കുമെന്നാണ് അധികൃതർ അറിയിച്ചത്.

കർക്കടക ഫൈസ്റ്റും ഇലക്കറി പ്രദർശനവും

കാർത്തികപുരം: ഉദയഗിരി പഞ്ചായത്ത് കുടുംബശ്രീ, സിഡിഎസിന്‍റെ ആഭിമുഖ്യത്തിൽ കർക്കടക ഫൈസ്റ്റും ഇലക്കറി പ്രദർശനവും നടത്തി. പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ ഉദ്ഘാടനം ചെയ്തു. ആരോഗ്യ രക്ഷയുടെ ഭാഗമായി കർക്കടകക്കഞ്ഞി, ഔഷധക്കഞ്ഞി, ലേഹ്യം തുടങ്ങിയവയുടെ വിപണനവും വിവിധ ഇലക്കറികളുടെ പ്രദർശനവുമാണ് നടത്തിയത്. സിഡിഎസ് ചെയർപേഴ്സൺ സൂര്യപ്രകാശ് അധ്യക്ഷത വഹിച്ചു. ബിന്ദു ഷാജു, ഷീജ വിനോദ്, എം.സി. ജനാർദനൻ, എം.എൻ. ബിന്ദു, ആന്‍റണി ഡൊമിനിക്, കെ.സി. സതി, വിജി മണി, വിജയചന്ദ്രൻ, ദീപ വർഗീസ്, ബീന സുരേഷ് എന്നിവർ പ്രസംഗിച്ചു.

മലബാറിന്‍റെ വികസന സ്വപ്നങ്ങൾക്ക് ആയുർവേദ മേഖല അടിത്തറയാകും: നോംടോ ഓപ്പൺ ഫോറം

കണ്ണൂർ: മലബാറിന്‍റെ വികസന സ്വപ്നങ്ങൾ സാക്ഷാത്കരിക്കാൻ ആയുർവേദ മേഖല അടിത്തറയായി മാറുമെന്ന് നോർത്ത് മലബാർ ടൂറിസം ഓർഗനൈസേഷൻ (നോംടോ) ഓപ്പൺ ഫോറം അഭിപ്രായപ്പെട്ടു. ഇടൂഴി വൈദ്യർ ഡോ. ഐ. ഭവദാസൻ നമ്പൂതിരിയുടെ വൈദ്യപൂർണിമ ശതാഭിഷേകത്തിന്‍റെ ഭാഗമായാണ് നോർത്ത് മലബാർ ചേംബർ ‌ഓഫ് കൊമേഴ്സും നോർത്ത് മലബാർ ടൂറിസം ഓർഗനൈസേഷനും സംയുക്തമായി "മലബാറിന്‍റെ ആയുർവേദ സാധ്യതകൾ' എന്ന വിഷയത്തിൽ ചർച്ച സംഘടിപ്പിച്ചത്. ആയുർവേദ മെഡിക്കൽ ടൂറിസം തേടി സഞ്ചാരികൾ കേരളത്തിലേക്ക് ഒഴുകുമ്പോഴും മലബാറിലേക്ക് കൂടുതൽ സഞ്ചാരികൾ എത്താത്തതിനുള്ള പരിഹാര മാർഗങ്ങളും ഓപ്പൺ ഫോറം ചർച്ച ചെയ്തു. കണ്ണൂർ വിമാനത്താവളം യാഥാർഥ്യമായതും ദേശീയപാത നിർമാണം പുരോഗമിക്കുന്നതും ആയൂർവേദ മേഖലയുടെ വളർച്ചക്ക് മുതൽക്കൂട്ടാകുമെന്നും ഓപ്പൺ ഫോറം വിലയിരുത്തി. മേയർ മുസ്‌ലിഹ് മഠത്തിൽ ഉദ്ഘാടനം ചെയ്തു. കെ.വി. സുമേഷ് എംഎൽഎ വിശിഷ്ടാതിഥിയായിരുന്നു. കെ.കെ. മാരാർ, നോർത്ത് മലബാർ ചേംബർ ഓഫ് കൊമേഴ്സ് പ്രസിഡന്‍റ് ടി.കെ. രമേഷ്കുമാർ, കെ. ബാലകൃഷ്ണൻ, സി. അനിൽകുമാർ, ഡോ. പി.എം. മധു, ഡോ. ഇടൂഴി ഉണ്ണികൃഷ്ണൻ നമ്പൂതിരി, ഡോ. പി.പി. അന്ത്രു എന്നിവർ ചർച്ചയിൽ പങ്കെടുത്തു. നോംടോ വൈസ് പ്രസിഡന്‍റ് ടി.വി. മധുകുമാർ മോഡറേറ്ററായിരുന്നു. ഡോ. കെ.എച്ച്. സുബ്രഹ്മണ്യൻ, കെ.കെ പ്രദീപ്കുമാർ എന്നിവർ പ്രസംഗിച്ചു.

വൈസ്മെൻ ക്ലബ് സ്ഥാനാരോഹണം

പയ്യാവൂർ: വൈസ്മെൻ ഇന്‍റർനാഷണൽ ശ്രീകണ്ഠപുരം ക്ലബിന്‍റെ 2025-26 വർഷത്തെ ഭാരവാഹികളുടെ സ്ഥാനാരോഹണം ചെങ്ങളായി നെല്ലൻ റസിഡൻസിയിൽ നടന്നു. വൈസ്മെൻ റീജണൽ മുൻ ഡയറക്‌ടർ കെ.എം. ഷാജി സ്ഥാനാരോഹണ ചടങ്ങ് ഉദ്ഘാടനം ചെയ്തു. ജോൺസൺ ടി. സഖറിയാസ് അധ്യക്ഷത വഹിച്ചു. പ്രോഗ്രാം ഡയറക്‌ടർ റെജി നെല്ലൻകുഴിയിൽ ആമുഖപ്രഭാഷണം നടത്തി. വൈസ്മെൻ ഡിസ്ട്രിക്‌ട് ഗവർണർ ടാജി ടോം സ്ഥാനാരോഹണം നിർവഹിച്ചു. ക്ലബിൽ പുതുതായി ചേർന്ന അംഗങ്ങളെ എൽആർഡി മധു പണിക്കർ സത്യവാചകം ചൊല്ലിക്കൊടുത്ത് സ്വീകരിച്ചു. ചെങ്ങളായി പഞ്ചായത്ത് പരിധിയിലെ മികച്ച കർഷകൻ കെ.ആർ. പ്രസാദിനെ ചടങ്ങിൽ ആദരിച്ചു. എസ്എസ്എൽസി, പ്ലസ് ടു പരീക്ഷകളിൽ മികച്ച വിജയം നേടിയവർക്കുള്ള അക്കാദമിക് എക്സലൻസി അവാർഡുകൾ വൈസ്മെൻ ഡിസ്ട്രിക്‌ട് ട്രഷറർ സണ്ണി മാനാടിയേൽ വിതരണം ചെയ്തു. ലേഖാ പണിക്കർ, ജോർജ് പി. അഗസ്റ്റിൻ, മാത്യു വർഗീസ്, യു.കെ. ഭാനു, മെവിൻ വിൻസെന്‍റ് എന്നിവർ പ്രസംഗിച്ചു. ക്ലബ് അംഗങ്ങൾ വിവിധ കലാപരിപാടികൾ അവതരിപ്പിച്ചു. ഭാരവാഹികൾ: ജോൺസൺ തുടിയൻപ്ലാക്കൽ-പ്രസിഡന്‍റ്, ജോർജ് പി. അഗസ്റ്റിൻ-സെക്രട്ടറി, എ.വി. മനീഷ്-ട്രഷറർ.

സിപിഎം മരണത്തെപ്പോലും രാഷ്‌ട്രീയ പ്രചാരണ ആയുധമാക്കുന്നു : രാഹുല്‍ മാങ്കൂട്ടത്തില്‍

കണ്ണൂര്‍: സ്വന്തം പാര്‍ട്ടിയിലെ നേതാക്കളുടെ മരണം പോലും രാഷ്‌ട്രീയ പ്രചാരണ ആയുധമാക്കുന്ന കഴുകന്‍ കണ്ണുള്ള നേതാക്കളാണ് ഇന്ന് സിപിഎമ്മിലുള്ളതെന്ന് യൂത്ത് കോണ്‍ഗ്രസ് സംസ്ഥാന പ്രസിഡന്‍റ് രാഹുല്‍ മങ്കൂട്ടത്തില്‍ എംഎൽഎ. വി.എസ്. അച്യുതാനന്ദന്‍റെ മൃതശരീരത്തിന് അരികില്‍ കൂടി നില്ക്കുന്ന പ്രവര്‍ത്തകരുടെ ഫോട്ടോ സാമൂഹിക മാധ്യമങ്ങളില്‍ പോസ്റ്റ് ചെയ്തുകൊണ്ട് "പവര്‍' എന്ന് തലക്കെട്ട് കൊടുക്കുന്ന എ.എ. റഹീമിനെ പോലുള്ള രാജ്യസഭ അംഗങ്ങളുടേത് ക്രൂരമായ മാനസികാവസ്ഥയാണെന്നും രാഹുല്‍ കുറ്റപ്പെടുത്തി. യൂത്ത് കോണ്‍ഗ്രസ് കണ്ണൂര്‍ ജില്ലാ കമ്മിറ്റി സംഘടിപ്പിച്ച സത്യ സേവാ സംഘര്‍ഷ് ജില്ലാ നേതൃ യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ബിജെപിയിലെ സി. സദാനന്ദന്‍റെ രാജ്യസഭാംഗത്വത്തേ അക്രമ രാഷ്‌ട്രീയത്തിനെതിരായ നോമിനേഷന്‍ എന്നാണ് ബിജെപി ന്യായീകരിക്കുന്നത്. എന്നാല്‍, എന്‍റെ കാല് പോയില്ലായെങ്കില്‍ സിപിഎമ്മില്‍ കൊലപാതകങ്ങള്‍ കുറഞ്ഞേനെയെന്ന് പറഞ്ഞയാളെയാണ് ബിജെപി നോമിനേറ്റ് ചെയ്തിരിക്കുന്നത്. സിപിഎമ്മും ആര്‍എസ്എസും ഒരു കാലത്ത് അണികളെവച്ച് നടത്തിയ പൊറാട്ട് നാടകത്തിന്‍റെ വക്താവായാണ് സി. സദാനന്ദന്‍ നിലപാടെടുത്തത്. അദ്ദേഹത്തിന്‍റെ നോമിനേഷനെ എങ്ങനെയാണ് ന്യായീകരിക്കാന്‍ കഴിയുക. ഇതിലൂടെ എന്ത് സന്ദേശമാണ് ബിജെപി നല്കുന്നത്, അങ്ങനെയൊരു ഉദ്ദേശമാണ് ബിജെപിക്കുള്ളതെങ്കില്‍ കണ്ണൂരില്‍ ബോംബ് പൊട്ടി കാലു നഷ്ടപെട്ട ഡോ. അസ്നയെ ആയിരുന്നു നോമിനേറ്റ് ചെയ്യേണ്ടതെന്നും അദ്ദേഹം കൂട്ടിച്ചേര്‍ത്തു. സിപിഎമ്മിന്‍റെ നിരവധി പ്രവര്‍ത്തകര്‍ കൊല്ലപ്പെടാന്‍ ഇടയാക്കിയ വ്യക്തി രാജ്യസഭാംഗമാകുമ്പോള്‍ അയാളെ അഭിനന്ദിക്കാന്‍ പോയ ജോണ്‍ ബ്രിട്ടാസ് എംപിയുടെ മാനസികനില എന്താണ്, സഹപ്രവര്‍ത്തകര്‍ക്ക് സിപിഎം എന്തു വിലയാണ് കൊടുക്കുന്നതെന്നും രാഹുല്‍ ചോദിച്ചു. യൂത്ത് കോണ്‍ഗ്രസ് ജില്ലാ പ്രസിഡന്‍റ് വിജില്‍ മോഹനന്‍ അധ്യക്ഷത വഹിച്ചു. ഡിസിസി പ്രസിഡന്‍റ് മാര്‍ട്ടിന്‍ ജോര്‍ജ്, നേതാക്കളായ റിജില്‍ മാക്കുറ്റി, ശ്രീജ മഠത്തില്‍, അബിന്‍ വര്‍ക്കി, വി.കെ. ഷിബിന, ഒ.ജെ. ജനീഷ്, അനുതാജ്, ജോമോന്‍ ജോസ്, മുഹമ്മദ് പാറയില്‍, വി. രാഹുല്‍, വി.പി. അബ്ദുൾ റഷീദ്, നിമിഷ വിപിന്‍ദാസ് തുടങ്ങിയവര്‍ പ്രസംഗിച്ചു.

ജൽജീവൻ പദ്ധതി; കുഴിയെടുത്ത പത്തായക്കുണ്ട്-പള്ളിപ്പടി റോഡ് തകർന്നു

ആലക്കോട്: ആലക്കോട് പഞ്ചായത്തിലെ പത്തായക്കുണ്ട്-പള്ളിപ്പടി റോഡ് തകർന്നു. ജൽജീവൻ പദ്ധതിയുടെ ഭാഗമായി പൈപ്പിടാൻ റോഡരികിൽ ആഴത്തിൽ കുഴിച്ചതാണ് റോഡ് തകരാൻ കാരണം. ടാറിംഗിനോട് ചേർന്നാണ് കുഴിയെടുത്തത്. ചിലയിടങ്ങളിൽ റോഡിനു കുറുകെയും കുഴിച്ചിട്ടുണ്ട്. കുഴികൾ പൈപ്പിട്ട് മുടിയെങ്കിലും ശക്തമായ മഴയിൽ കുഴിയെടുത്ത ഭാഗത്തെ മണ്ണൊലിച്ച് പോയതോടെയാണ് റോഡ് തകർന്നത്. ചിലയിടങ്ങളിൽ റോഡിനോട് ചേർന്ന് വലിയ കുഴികളും രൂപപ്പെട്ടിട്ടുണ്ട്. വീതി കുറഞ്ഞ റോഡിൽ എതിർദിശകളിൽ നിന്നു വരുന്ന വാഹനങ്ങളെ മറികടക്കുമ്പോൾ കുഴികളിൽ താഴ്ന്നു പോകുന്നതും പതിവാണ്. അതിനാൽ, ഓട്ടോ അടക്കമുള്ള ടാക്സി വാഹനങ്ങൾ ഇതുവഴി സർവീസ് നടത്താൻ മടിക്കുകയാണ്. റോഡ് തകർന്നതോടെ സ്കൂൾ കുട്ടികൾക്കും സ്ത്രീകൾക്കും പ്രായമായവർക്കും ഇതുവഴിയുള്ള യാത്ര ദുരിതമാണ്.

കണ്ണൂർ സ്വദേശിനിയായ ഡോക്ടർ അബുദാബിയിൽ മരിച്ച നിലയിൽ

കണ്ണൂർ: കണ്ണൂർ സ്വദേശിയും എഴുത്തുകാരിയുമായ ഡോക്ടറെ അബുദാബിയിലെ താമസസ്ഥലത്ത് മരിച്ച നില‍യിൽ കണ്ടെത്തി. തളാപ്പ് സ്വദേശിനി ഡോ. അരയാക്കണ്ടി ധനലക്ഷ്മിയാണ് (54) മരിച്ചത്. കഴിഞ്ഞ രണ്ടു ദിവസമായി സുഹൃത്തുക്കൾ ഫോണിൽ വിളിച്ചിട്ട് കിട്ടാത്തതിനെത്തുടർന്ന് തിങ്കഴാഴ്ച രാത്രി മുസഫയിലെ താമസസ്ഥലത്തെത്തി അന്വേഷിച്ചപ്പോഴാണ് മരിച്ച നിലയിൽ കണ്ടെത്തിയത്. അബുദാബിയിലെ ലൈഫ് കെയർ ആശുപത്രിയിലെ ദന്ത ഡോക്ടറായിരുന്നു. പത്തു വർഷമായി അബുദാബിയിൽ ജോലി ചെയ്തുവരികയാണ്. അബുദാബി മലയാളി സമാജം അംഗവും പ്രവാസി മലയാളികൾക്കിടയിലെ സാമൂഹിക പ്രവർത്തകയുമാണ്. സമൂഹ മാധ്യമങ്ങളിലും സജീവമായിരുന്നു. നേരത്തെ കണ്ണൂർ ധനലക്ഷ്മി ആശുപത്രിയിലും ജോലി ചെയ്തിരുന്നു. പഴയകാല പ്രമുഖ സ്വകാര്യ ബസ് കന്പനിയായിരുന്ന ആനന്ദകൃഷ്ണ ബസ് സർവീസ് ഉടമ പരേതനായ നാരായണൻ-ചന്ദ്രമതി ദന്പതികളുടെ മകളാണ്. സുജിത്താണ് ഭർത്താവ്. ഇദ്ദേഹം നാട്ടിലാണ്. നിയമനടപടികൾ പൂർത്തിയാക്കിയ ശേഷം മൃതദേഹം നാട്ടിലെത്തിച്ച് സംസ്കരിക്കും. സഹോദരങ്ങൾ: ആനന്ദകൃഷ്‌ണൻ, ശിവറാം, ഡോ.സീതാലക്ഷ്‌മി.

മകനുമായി അമ്മ പുഴയിൽ ചാടിയ സംഭവം; റീമയുടെ അന്ത്യ സംസ്കാരത്തിനു ശേഷം മകൻ കൃഷീവ്‌രാജിന്‍റെ മൃതദേഹം കണ്ടെത്തി

പഴയങ്ങാടി: അമ്മ റീമയുടെ അന്ത്യയാത്രയ്ക്ക് പിന്നാലെ മകൻ മൂന്നുവയസുകാരൻ കൃഷീവ് രാജിന്‍റെ (മൂന്ന്) മൃതദേഹം കണ്ടെത്തി. ഇന്നലെ ഉച്ചകഴിഞ്ഞ് 3:45ന് ചെമ്പല്ലിക്കുണ്ട് പുഴയിലെ റെയിൽവേ പാലത്തിന് സമീപത്തെ കണ്ടൽക്കാടുകൾക്കിടയിൽ നിന്നാണ് കുട്ടിയുടെ മൃതദേഹം കണ്ടെത്തിയത്. ഞായറാഴ്ച പുലർച്ചെ ഒന്നോടെയാണ് റീമ മകനെ അരയിൽ കെട്ടി വെങ്ങര ചെമ്പല്ലിക്കുണ്ട് പുഴയിൽ ചാടിയത്. അമ്മയ്ക്കും കുഞ്ഞിനും വേണ്ടിയുള്ള തെരച്ചിലിനൊടുവിൽ റീമയുടെ മൃതദേഹം അന്ന് തന്നെ കണ്ടെത്തിയിരുന്നു. കുട്ടിക്കായി മൂന്നു ദിവസമായി നടത്തുന്ന തെരച്ചലിന് ഒടുവിലാണ് ഇന്നലെ മൃതദേഹം കണ്ടെത്തിയത്. അമ്മയുടെ മൃതദേഹം കണ്ടെത്തിയ ഇടത്തുനിന്ന് അല്പം മാറിയാണ് കുട്ടിയുടെ മൃതദേഹം കണ്ടെത്തിയത്. മൃതദേഹം പരിയാരത്തെ കണ്ണൂർ ഗവ. മെഡിക്കൽ കോളജ് മോർച്ചറിയിലേക്ക് മാറ്റി. ഇന്നലെ രാവിലെ 11 ഓടെയാണ് അമ്മ റീമയുടെ മൃതദേഹം വൻ ജനാവലിയുടെ സാന്നിധ്യത്തിൽ സംസ്കരിച്ചത്. തെരച്ചലിൽ പയ്യന്നൂർ ഫയർഫോഴ്സും സ്കൂബ ടീമും മത്സ്യത്തൊഴിലാളികളും പങ്കെടുത്തിരുന്നു.

മലബാർ കുടിയേറ്റ ചരിത്ര മ്യൂസിയം ഓഗസ്റ്റ് നാലിന് നാടിന് സമർപ്പിക്കും

ചെമ്പന്തൊട്ടി: തലശേരി അതിരൂപതയുടെ പ്രഥമ ബിഷപ് മാർ സെബാസ്റ്റ്യൻ വള്ളോപ്പിള്ളിയുടെ സ്മാരകമായി ചെമ്പന്തൊട്ടിയിൽ പ്രവർത്തനമാരംഭിക്കുന്ന മലബാർ കുടിയേറ്റ ചരിത്ര മ്യൂസിയം ഓഗസ്റ്റ് നാലിന് തുറന്നു കൊടുക്കും. ഉച്ചകഴിഞ്ഞ് മൂന്നിന് മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്യും. സജീവ് ജോസഫ് എംഎൽഎ അധ്യക്ഷത വഹിക്കും. ഓഗസ്റ്റ് രണ്ടിന് രാവിലെ 9.30 ന് 'പൈതൃകം' ചരിത്ര സെമിനാർ പയ്യാവൂരിൽ നടക്കും. ഓഗസ്റ്റ് മൂന്നിനും നാലിനും മ്യൂസിയം കോമ്പൗണ്ടിൽ കുടിയേറ്റ ചരിത്ര പ്രദർശനവും ഉണ്ടായിരിക്കും. മ്യൂസിയത്തിന്‍റെ മുന്നിൽ സ്ഥാപിക്കാനുള്ള മാർ വള്ളോപ്പിള്ളിയുടെ വെങ്കല പ്രതിമ പ്രശസ്ത ശില്പി ഉണ്ണി കാനായി നിർമിക്കും. ശില്പ നിർമാണത്തിനാവശ്യമായ വെങ്കല വസ്തുക്കളുടെ ശേഖരണം തലശേരി അതിരൂപതയിലെ വിവിധ പള്ളികൾ കേന്ദ്രീകരിച്ച് കത്തോലിക്ക കോൺഗ്രസ് പ്രവർത്തകരുടെ നേതൃത്വത്തിൽ നടത്തിവരികയാണ്. വിവിധ തദ്ദേശ സ്വയംഭരണ സ്ഥാപനങ്ങൾ, സ്കൂളുകൾ, മലബാർ, വെള്ളാട് ദേവസ്വം ബോർഡുകൾ, വിവിധ അമ്പലങ്ങൾ എന്നിവയും ഈ ഉദ്യമത്തിൽ പങ്കാളികളാകും. ഉദ്ഘാടന ചടങ്ങിനായി വിവിധ കമ്മറ്റികൾ രൂപീകരിച്ച് പ്രവർത്തനം പുരോഗമിക്കുന്നു. ജില്ലയുടെ വിവിധ ഭാഗങ്ങളിൽനിന്നായി ആയിരങ്ങൾ ചടങ്ങിൽ പങ്കെടുക്കും. ചെമ്പന്തൊട്ടി സെന്‍റ് ജോർജ് പാരിഷ് ഹാളിൽ ചേർന്ന സംഘാടക സമിതി യോഗത്തിൽ സജീവ് ജോസഫ് എംഎൽഎ അധ്യക്ഷത വഹിച്ചു. ശ്രീകണ്ഠപുരം നഗരസഭാധ്യക്ഷ ഡോ. കെ.വി. ഫിലോമിന, നടുവിൽ ഗ്രാമപഞ്ചായത്ത് പ്രസിഡന്‍റ് ബേബി ഓടംപള്ളിൽ, കേരള ലളിതകലാ അക്കാദമി സെക്രട്ടറി എബി എൻ. ജോസഫ്, ചെമ്പന്തൊട്ടി സെന്‍റ് ജോർജ് ഫൊറോന പള്ളി വികാരി ഫാ. ആന്‍റണി മഞ്ഞളാംകുന്നേൽ, ഫാ. തോമസ് തെങ്ങും പള്ളിൽ, നഗരസഭ പൊതുമരാമത്ത് സ്ഥിരം സമിതി അധ്യക്ഷൻ കെ.സി. ജോസഫ്, കൗൺസിലർ കെ.ജെ. ചാക്കോ കൊന്നയ്ക്കൽ, ഇഗ്‌നേഷ്യസ്, ജോർജ് ആലപ്പാട്ട്, ജിയോ ജേക്കബ്, ബിനു ഇലവുങ്കൽ, സണ്ണി തുണ്ടിയിൽ, ജോയി കൊച്ചുപുരയ്ക്കൽ, ജോർജ് തയ്യിൽ, ഫാ. ബിബിൻ വരമ്പകത്ത് എന്നിവർ പ്രസംഗിച്ചു.

ബിഷപ് മാർ വള്ളോപ്പിള്ളി നവോത്ഥാന നായകൻ: ആർച്ച്ബിഷപ് മാർ പാംപ്ലാനി

കുന്നോത്ത്: ജാതിമത ചിന്തകൾക്കും കക്ഷി രാഷ്‌‌ട്രീയത്തിനും അതീതമായി സഭയോടും സമുദായത്തിനോടുമൊപ്പം സാമൂഹിക പ്രതിബദ്ധത പുലർത്തിയിരുന്ന മലബാറിന്‍റെ മോസസ് ആയിരുന്നു തലശേരി രൂപതയുടെ പ്രഥമ ബിഷപ് മാർ സെബാസ്റ്റ്യൻ വള്ളോപ്പിള്ളിയെന്ന് തലശേരി ആർച്ച്ബിഷപ് മാർ ജോസഫ് പാംപ്ലാനി. കുന്നോത്ത് പാരിഷ് ഹാളിൽ ചെമ്പന്തൊട്ടിയിലെ കുടിയേറ്റ മ്യൂസിയത്തിനു മുന്നിൽ സ്ഥാപിക്കുന്ന മാർ സെബാസ്റ്റ്യൻ വള്ളോപ്പിള്ളിയുടെ വെങ്കല പ്രതിമ നിർമിക്കാനായി പൊതുജനങ്ങളിൽനിന്ന് ശേഖരിക്കുന്ന വെങ്കല വസ്തുക്കൾ കത്തോലിക്ക കോൺഗ്രസ് പ്രവർത്തകർ ഏറ്റുവാങ്ങുന്നതിന്‍റെ അതിരൂപതാതല ഉദ്ഘാടനം നിർവഹിച്ച് പ്രസംഗിക്കുകയായിരുന്നു ആർച്ച്ബിഷപ്. കേരളത്തിന്‍റെ സംസ്കൃതി നിലനിർത്താൻ മാർ വള്ളോപ്പിള്ളി എക്കാലവും ശ്രമിച്ചിട്ടുണ്ടെന്നും അതാണ് സഭ ഇപ്പോഴും പിന്തുടരുന്നതെന്നും മാർ പാംപ്ലാനി വ്യക്തമാക്കി. കത്തോലിക്ക കോൺഗ്രസ് അതിരൂപത പ്രസിഡന്‍റ് ഫിലിപ്പ് വെളിയത്ത് അധ്യക്ഷത വഹിച്ചു. കത്തോലിക്ക കോൺഗ്രസ് ഗ്ലോബൽ ഡയറക്ടർ റവ.ഡോ. ഫിലിപ്പ് കവിയിൽ, കുന്നോത്ത് ഇടവക വികാരി ഫാ. സെബാസ്റ്റ്യൻ മൂക്കിലക്കാട്ട്, കത്തോലിക്ക കോൺഗ്രസ് ഡയറക്ടർ ഫാ. ജോസഫ് തേനമ്മാക്കൽ, ഗ്ലോബൽ ട്രഷറർ ടോണി ജോസഫ് പുഞ്ചക്കുന്നേൽ, അതിരൂപത ജനറൽ സെക്രട്ടറി ജിമ്മി ആയിത്തമറ്റം, ട്രഷറർ സുരേഷ് ജോർജ്, വർക്കിംഗ് കമ്മിറ്റി മെംബർ ബെന്നി പുതിയാംപുറം, സെക്രട്ടറിമാരായ പിയൂസ് പറയിടം, ഷീജ സെബാസ്റ്റ്യൻ, അതിരൂപത വൈസ് പ്രസിഡന്‍റുമാരായ ബെന്നിച്ചൻ മഠത്തിനകം, ഐസി മേരി, ടോമി കണയാങ്കൽ, ഷിനോ പാറയ്ക്കൽ, ജയിംസ് ഇമ്മാനുവൽ, ഷാജു ഇടശേരി, മാത്യു വള്ളോംകോട്ട്, അൽഫോൻസ് കളപ്പുര എന്നിവർ പ്രസംഗിച്ചു.

ആറളം പുനരധിവാസ മേഖലയിൽ കാട്ടാന വീണ്ടും കൃഷി നശിപ്പിച്ചു

ഇരിട്ടി: ഒരു ദിവസം പോലും ഇടതടവില്ലാതെ ആറളം പുനരധിവാസ മേഖലയിൽ കാട്ടാന വിളയാട്ടം. ഇന്നലെ പുലർച്ചെ ഏഴാം ബ്ലോക്കിലാണ് കാട്ടാന കൃഷി നശിപ്പിച്ച് ഭീതി പരത്തിയത്. ഇവിടെ താമസക്കാരനായ ബിനുവിന്‍റെ പറന്പിലെത്തിയ കാട്ടാന വാഴയുൾപ്പടെയുള്ള കൃഷികൾ നശിപ്പിച്ചു. സമീപവാസികളുടെ പലരുടെ യും തെങ്ങും മറ്റ് കാർഷിക വിളകളും നശിപ്പിച്ചിട്ടുണ്ട്. ബിനുവിന്‍റെ പുരയിടത്തിൽ ഇനി ഒരു കൃഷിയും ബാക്കിയാകാത്ത തരത്തിലാണ് നാശം വിതച്ചത്. ധൈര്യമായി വീടിനുള്ളിൽ കിടന്നുറങ്ങാൻ കഴിയാത്ത അവസ്ഥയാണെന്ന് ബിനു പറഞ്ഞു. ഏതു നിമിഷവും വീടിന് നേരെ കാട്ടാനകളുടെ ആക്രമണം ഉണ്ടാകുമെന്ന ഭയത്തിലാണ് ഇവിടുത്തുകാർ. വർഷങ്ങളായി കാട്ടാനകൾ കൃഷികൾ നശിപ്പിക്കുന്നു. ഇതിനൊന്നും യാതൊരു നഷ്ടപരിഹാരവും ലഭിക്കുന്നില്ലെന്ന് താമസക്കാർ പറഞ്ഞു. വയനാടൻ കാടിനോട് ചേർന്നുകിടക്കുന്ന ഇവിടെ ആനഭീഷണി രൂക്ഷമാണ്. രാത്രിയായാൽ വീടിനു പുറത്തിറങ്ങാൻ കഴിയാത്ത അവസ്ഥയാണ്. തുരത്തിയ കാട്ടാനകൾ വനംവകുപ്പ് ജീവനക്കാർ മടങ്ങുന്നതിന് മുന്പേ തിരിച്ചെത്തും. ആദിവാസികളുടെ ദുരിതം സർക്കാർ കാണുന്നില്ലെന്നും പരിഹരിക്കാൻ നടപടികൾ ഉണ്ടാകുന്നില്ലെന്നും താമസക്കാർ പറഞ്ഞു. ഞങ്ങളെങ്ങനെ ജീവിക്കും എന്ന കാര്യത്തിൽ സർക്കാർ മറുപടി പറയണമെന്നും ഇവർ ആവശ്യപ്പട്ടു.

ക്നാനായ കത്തോലിക്ക കോൺഗ്രസ് നേതൃസംഗമം നടത്തി

കള്ളാർ: കോട്ടയം അതിരൂപതയുടെ അല്മായ സംഘടനയായ ക്നാനായ കത്തോലിക്ക കോൺഗ്രസ് രാജപുരം ഫൊറോന സമിതിയുടെ ആഭിമുഖ്യത്തിൽ സമുദായ സംഘടനകളുടെ നേതൃസംഗമം സംഘടിപ്പിച്ചു. കള്ളാർ സെന്‍റ് തോമസ് പാരിഷ് ഹാളിൽ നടന്ന കെസിസി, കെസിഡബ്ല്യുഎ, കെസിവൈഎൽ സംഘടനകളുടെ നേതൃസംഗമം പരിപാടി കോട്ടയം അതിരൂപത വികാരി ജനറാളും ദീപിക മാനേജിംഗ് ഡയറക്ടറുമായ ഫാ. മൈക്കിൾ വെട്ടിക്കാട്ട് ഉദ്ഘാടനം ചെയ്തു. കെസിസി ഫൊറോന പ്രസിഡന്‍റ് ഒ.സി. ജയിംസ് അധ്യക്ഷത വഹിച്ചു. ഫൊറോന വികാരി ഫാ. ജോസ് അരീച്ചിറയിൽ ആമുഖസന്ദേശം നൽകി. കെസിസി റീജണൽ പ്രസിഡന്‍റ് ജോസ് കണിയാംപറമ്പിൽ, കള്ളാർ ഇടവക വികാരി ഫാ. ജോബിൻ പ്ലാച്ചേരിപുറത്ത്, ജിൻസി ജയിംസ്, ടെസ്‌‌ലിൻ തോമസ് എന്നിവർ പ്രസംഗിച്ചു. അംഗങ്ങൾക്കായി ഫാ. മൈക്കിൾ വെട്ടിക്കാട്ട് ക്ലാസെടുത്തു. രാജപുരം ഫൊറോനയിലെ വിവിധ ഇടവകകളിലെ എസ്എസ്എൽസി, പ്ലസ്ടു പരീക്ഷകളിലെ ഉന്നതവിജയികളെ അനുമോദിച്ചു. യൂണിറ്റ് പ്രസിഡന്‍റ് ടോമി വാണിയപുരയിടത്തിൽ സ്വാഗതവും സെക്രട്ടറി സിജു ചാമക്കാലായിൽ നന്ദിയും പറഞ്ഞു.

വീട്ടുമുറ്റത്തു നിർത്തിയിട്ട ഇലക്‌ട്രിക് സ്കൂട്ടറിന് തീപിടിച്ചു

ചെറുപുഴ: വീട്ടുമുറ്റത്തു നിർത്തിയിട്ടിരുന്ന ഇലക്‌ട്രിക് സ്കൂട്ടറിന് തീപിടിച്ചു. പെരിങ്ങാലയിലെ മേച്ചേരി ജെയ്സണിന്‍റെ സ്കൂട്ടറിനാണ് ഇന്നലെ തീപ്പിടിച്ചത്. ചെറുപുഴയിൽ പോയി മടങ്ങി വന്ന് വീട്ടുമുറ്റത്ത് സ്കൂട്ടർ നിർത്തിയിട്ട ശേഷമായിരുന്നു സംഭവം. ജെയ്സൺ ഭക്ഷണം കഴിക്കുന്നതിനിടെ കരിഞ്ഞുമണക്കുന്ന ഗന്ധം വന്നതോടെ പുറത്തിറങ്ങിയപ്പോഴാണ് സ്കൂട്ടറിൽ നിന്നും പുക ഉയരുന്നത് കണ്ടത്. ഉടൻ തന്നെ പെരിങ്ങോം ഫയർഫോഴ്സിനെ വിവരമറിയിച്ചു. ഫയർ ഫോഴ്സ് സംഘമെത്തി സ്കൂട്ടറിൽ നിന്നും ബാറ്ററി അഴിച്ചുമാറ്റുകയായിരുന്നു. കനത്ത മഴയിൽ ബാറ്ററിയിൽ വെള്ളമിറങ്ങി ഷോട്ടായതാണ് അപകടകാരണമെന്ന് കരുതുന്നു. അഞ്ചുവർഷം മുന്പാണ് ജെയ്സൺ സ്കൂട്ടർ വാങ്ങുന്നത്.

കാലവർഷക്കെടുതിയിൽ വീടും കൃഷിയും നഷ്ടപ്പെട്ടവർക്കുള്ള ധനസഹായം നൽകണം: കേരളാ കോൺഗ്രസ്

ചെറുപുഴ: കാലവർഷക്കെടുതിയിൽ വീടും കൃഷിയും നഷ്‌ടപ്പെട്ടവർക്കുള്ള ധനസഹായം നൽകണമെന്ന് കേരളാ കോൺഗ്രസ് ചെറുപുഴ മണ്ഡലം കമ്മിറ്റി ആവശ്യപ്പെട്ടു. സംസ്ഥാന വൈസ് ചെയർമാൻ ജോസഫ് മുള്ളൻമട ഉദ്ഘാടനം ചെയ്തു. പയ്യന്നൂർ നിയോജക മണ്ഡലം പ്രസിഡന്‍റ് ജോയ് ജോസഫ് അധ്യക്ഷത വഹിച്ചു. യൂത്ത് ഫ്രണ്ട് ജില്ലാ പ്രസിഡന്‍റായി തെരഞ്ഞെടുക്കപ്പെട്ട അരുൺ കുഴിപ്പള്ളി, ജില്ലാ സെക്രട്ടറിയായി തെരഞ്ഞെടുത്ത സാബു വെള്ളിമൂഴ എന്നിവരെ യോഗത്തിൽ ആദരിച്ചു. എ.സി. പൗലോസ്, ജോർജ് മുള്ളൻമട, മത്തച്ചൻ മുതുപ്ലാക്കൽ, സുകുമാരൻ തറയിൽ, ജോയ് പഴേപറമ്പിൽ തുടങ്ങിയവർ പ്രസംഗിച്ചു. യൂത്ത് ഫ്രണ്ട് ചെറുപുഴ മണ്ഡലം കമ്മിറ്റി പ്രസിഡന്‍റായി ജോഫിൻ പിണക്കാട്ട്, ജനറൽ സെക്രട്ടറിയായി രഞ്ജിത്ത് പുറത്തെതെറ്റുകുന്നേൽ എന്നിവരെ തെരഞ്ഞെടുത്തു.

ചാന്ദ്രദിനാഘോഷം സംഘടിപ്പിച്ചു

ചെറുപുഴ: ചാന്ദ്രദിനത്തിന്‍റെ ഭാഗമായി ചെറുപുഴ ജെഎം യുപി സ്കൂളിൽ സയൻസ് ക്ലബിന്‍റെ നേതൃത്വത്തിൽ ചാന്ദ്രദിനാഘോഷ പരിപാടികൾ സംഘടിപ്പിച്ചു. ചടങ്ങിൽ ബഹിരാകാശ യാത്രികൻ ശുഭാംശു ശുക്ലയുമായി ആശയവിനിമയം നടത്താൻ അവസരം ലഭിച്ച പൂർവ വിദ്യാർഥി ശ്രീദേവ് ഗോവിന്ദിനെ അനുമോദിച്ചു. ശ്രീദേവ് ഗോവിന്ദ് തന്‍റെ അനുഭവം പങ്കുവച്ചു. കൂടാതെ ചാന്ദ്രദിന ക്വിസ്, പ്രതീകാത്മക ചാന്ദ്ര മനുഷ്യനുമായി അഭിമുഖം, ചാന്ദ്രദിന പ്രദർശനം, അമ്പിളി പാട്ടുകളുടെ നൃത്താവിഷ്കാരം, വീഡിയോ പ്രദർശനം എന്നിവയും നടന്നു. മുഖ്യാധ്യാപകൻ പി.എൻ. ഉണ്ണികൃഷ്ണൻ ഉദ്ഘാടനം ചെയ്തു. അധ്യാപികമാരായ പി. നിഷ, ബിനി ജോർജ്, സി.കെ. ഷീന എന്നിവർ നേതൃത്വം നൽകി.

ഉദയഗിരി പഞ്ചായത്ത് സോളാർ തൂക്കുവേലി നിർമാണം; പഞ്ചായത്ത് ഭരണസമിതിക്കെതിരേ കോൺഗ്രസ് രംഗത്ത്

കാർത്തികപുരം: ഉദയഗിരി പഞ്ചായത്തിലെ സോളാർ തൂക്കുവേലി നിർമാണവുമായി ബന്ധപ്പെട്ട് കോൺഗ്രസിനു നേരെയുള്ള ആരോപണം പഞ്ചായത്തു ഭരണസമിതിയുടെ കഴിവുകേട് മറച്ചുവയ്ക്കാനാണെന്ന് കോൺഗ്രസ് ഉദയഗിരി മണ്ഡലം കമ്മിറ്റി ആരോപിച്ചു. കർണാടക വനാതിർത്തി മേഖലയിൽപ്പെടുന്ന മഞ്ഞപ്പുല്ല് മുതൽ മണ്ണാത്തിക്കുണ്ട് വരെയുള്ള 16.5 കിലോമീറ്റർ ദൂരം സൗരോർജ തൂക്കുവേലി നിർമിക്കുന്നതിനായി ത്രിതല പഞ്ചായത്തുകളും എംഎൽഎയും തുകഅനുവദിച്ചിരുന്നു. നബാർഡ് ഫണ്ട് അടക്കം ഒരുകോടി 35 ലക്ഷം രൂപ വീതം കണ്ടെത്തി എന്നു പറയുന്ന പദ്ധതി മൂന്നുവർഷക്കാലമായിട്ടും പൂർത്തീകരിച്ചിട്ടില്ല. രണ്ടരവർഷം മുമ്പ് പ്രവൃത്തി ഉദ്ഘാടന ചെയ്ത ജില്ലാ പഞ്ചായത്ത് പ്രസിഡന്‍റ് ആറു മാസത്തിനകം പണി പൂർത്തിയാകുമെന്ന് ഉറപ്പു നൽകിയിരുന്നു. ഒന്നര വർഷത്തിനുശേഷം 2025 മാർച്ച് മാസത്തിലാണ് പ്രാരംഭ പ്രവർത്തനങ്ങൾ തുടങ്ങിയത്. എന്നാൽ, പണി പൂർത്തിയായ സ്ഥലങ്ങളിൽ പോലും വേലിക്ക് ചാർജ് ഇല്ലാത്തതിനാൽ പലതവണ ആന ഇറങ്ങി കൃഷിയിടങ്ങൾ നശിപ്പിച്ച സംഭവം ഉണ്ടായിരുന്നു. ഇതോടെ നാട്ടുകാരുടെ വിശ്വാസം നഷ്‌ടപ്പെടുകയും പഞ്ചായത്ത് ഭരണസമിതിയോട് ഇത് കുറ്റമറ്റതാക്കണമെന്ന് ആവശ്യപ്പെടുകയും ചെയ്‌തു. നിർമാണവുമായി ബന്ധപ്പെട്ട കണക്ക് അവതരിപ്പിക്കാൻ യോഗം വിളിച്ചുചേർക്കാൻ പഞ്ചായത്ത് ഭരണസമിതി ഇതവരെ തയാറായിട്ടില്ല. ഇല്ലാത്ത വിജിലൻസ് കേസ് പറഞ്ഞ് കോൺഗ്രസുകാരെ പഴിചാരി സോളാർ വേലി നിർമാണം നടക്കാത്ത പ്രദേശത്തെ ജനങ്ങളുടെ കണ്ണിൽ പൊടിയിടാൻ ശ്രമിക്കുന്നത് ജാള്യത മറക്കാനുള്ള തന്ത്രം മാത്രമാണെന്നാണ് കോൺഗ്രസ് മണ്ഡലം കമ്മിറ്റിയുടെ ആരോപണം. സോളാർ വേലിയുടെ കേബിൾ നശിപ്പിച്ചവർ ആരായാലും അവരെ നിയമത്തിനു മുന്നിൽ കൊണ്ടുവന്ന് ശിക്ഷിക്കണമെന്ന് മണ്ഡലം പ്രസിഡന്‍റ് ജോയിച്ചൻ പള്ളിയാലിൽ ആവശ്യപ്പെട്ടു. നേരത്തെ ഉദയഗിരി പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരനും ഭരണപക്ഷ അംഗങ്ങളും പത്രസമ്മേളനം നടത്തി കോൺഗ്രസിനെതിരേ രംഗത്ത് വന്നിരുന്നു.

നിർത്തിയിട്ട ലോറിക്കു പിന്നിൽ ബസിടിച്ച് അപകടം; 20 പേർക്കു പരിക്ക്

പെരിങ്ങോം: നിർത്തിയിട്ടിരുന്ന ടിപ്പർ ലോറിക്കു പിന്നിൽ സ്വകാര്യ ബസിടിച്ച് 20 പേർക്കു പരിക്ക്. ഇന്നലെ ഉച്ചകഴിഞ്ഞ് മൂന്നോടെ പെരിങ്ങോം പൊന്നമ്പാറയിലായിരുന്നു അപകടം. ചെറുപുഴയിൽ നിന്നും പയ്യന്നൂരിലേയ്ക്ക് പോകുകയായിരുന്ന ശ്രീവിഷ്ണു എന്ന സ്വകാര്യ ബസ് റോഡരികിൽ നിർത്തിയിട്ടിരുന്ന ടിപ്പറിൽ ഇടിക്കുകയായിരുന്നു. ഇടിയുടെ ആഘാതത്തിൽ ടിപ്പർ റോഡിൽ നിന്നും തെന്നിമാറുകയും ബസിന്‍റെ മുൻ ഭാഗം തകരുകയും ചെയ്തു. ബസ് യാത്രികരായ 20 പേർക്കാണ് പരിക്കേറ്റത്. ബസിന്‍റെ മുൻ വശത്തെ ചില്ല് തെറിച്ചും കമ്പികളിലിടിച്ചും മറ്റുമാണ് യാത്രികർക്ക് പരിക്കേറ്റത്. ഇവരെ പെരിങ്ങോം താലൂക്ക് ആശുപത്രിയിൽ പ്രഥമ ശുശ്രൂഷയ്ക്കു ശേഷം പയ്യന്നൂർ ഗവ. ആശുപത്രിയിലേക്കും മാറ്റി. ആരുടേയും പരിക്ക് ഗുരുതരമല്ല. റോഡരികിലെ കാടുകളും മറ്റും നീക്കം ചെയ്യുന്നതിന് കരാറെടുത്ത് പ്രവൃത്തി നടന്നു വരികയാണ്. ഇവ എടുത്തുകൊണ്ട് പോകുന്നതിനായെത്തിയതായിരുന്നു ടിപ്പർ.

ടിഎസ്എസ്എസ് ചെറിയഅരീക്കമല ട്രസ്റ്റ് വാർഷിക സമ്മേളനം

ചെറിയഅരീക്കമല: തലശേരി സോഷ്യൽ സർവീസ് സൊസൈറ്റിയുടെ (ടിഎസ്എസ്എസ്) ആഭിമുഖ്യത്തിലുള്ള ചെറിയഅരീക്കമല ട്രസ്റ്റിന്‍റെ വാർഷിക സമ്മേളനം അതിരൂപത ഡയറക്‌ടർ ഫാ. ബിബിൻ വരമ്പകത്ത് ഉദ്ഘാടനം ചെയ്തു. യൂണിറ്റ് ഡയറക്‌ടർ ഫാ. ജോസഫ് പുതുമന അധ്യക്ഷത വഹിച്ചു. യൂണിറ്റ് പ്രസിഡന്‍റ് ഷിബു മാണി കാവുംപുറത്ത് ആമുഖ പ്രഭാഷണവും ടിഎസ്എസ്എസ് തലശേരി അതിരൂപത പ്രസിഡന്‍റ് ജോഷി കുന്നത്ത് മുഖ്യപ്രഭാഷണവും നടത്തി. ഓഡിറ്റർ റിപ്പോർട്ടും കണക്കും യൂണിറ്റ് സെക്രട്ടറി ജോജോ പുല്ലാട്ട് വാർഷിക റിപ്പോർട്ടും കണക്കും അവതരിപ്പിച്ചു. പ്രോഗ്രാം മാനേജർ ലിസി ജിജി, ഏരുവേശി പഞ്ചായത്തംഗം ഷീജ ഷിബു, മേഖല ഭാരവാഹി ഷീന ചാക്കോ, ആനിമേറ്റർ സിസ്റ്റർ മേരി ആന്‍റോ, ജോർജ് കുന്നുംപുറത്ത്, ആൻസി വെട്ടിക്കുഴി എന്നിവർ പ്രസംഗിച്ചു. ട്രസ്റ്റ് അംഗങ്ങളുടെ മക്കളിൽ എസ്എസ്എൽസി പരീക്ഷയിൽ മുഴുവൻ വിഷയങ്ങളിലും എ പ്ലസ് ഗ്രേഡ് നേടിയ അർപ്പിത അൽഫോൻസ, ആന്‍റണി ജോസഫ്, സ്റ്റെൽന മരിയ ഷിബു എന്നിവരെ ഫാ. ബിബിൻ വരമ്പകത്ത് ഉപഹാരങ്ങൾ നൽകി അനുമോദിച്ചു. യൂണിറ്റിലെ മികച്ച വാർഡുകൾക്കുള്ള ഒന്ന്, രണ്ട്, മൂന്ന് സ്ഥാനങ്ങൾ യഥാക്രമം താരച്ചീത്ത, കുരിശുമല, കുനിയംപുഴ എന്നീ വാർഡുകൾ കരസ്ഥമാക്കി. വാർഡുകളിലെ മികച്ച അടുക്കളത്തോട്ട കൃഷിക്കും മുടങ്ങാതെ നിക്ഷേപം നടത്തിയവർക്കും സമ്മാനങ്ങൾ വിതരണം ചെയ്തു.

കണ്ണവം മേഖലയിലെ വന്യമൃഗ ശല്യം: ഫോറസ്റ്റ് ഓഫീസിലേക്ക് പ്രതിഷേധ മാർച്ച്

കൂത്തുപറമ്പ്: കണ്ണവം മേഖലയിൽ കൃഷിക്കും മനുഷ്യ ജീവനും വെല്ലുവിളി ഉയർത്തുന്ന വന്യമൃഗങ്ങളെ നിയന്ത്രിക്കാനാവശ്യമായ നടപടികൾ സ്വീകരിക്കണമെന്നാവശ്യപ്പെട്ട് കെഎസ്കെടിയു, എകെഎസ് സംഘടനകളുടെ സംയുക്താഭിമുഖ്യത്തിൽ കണ്ണവം ഫോറസ്റ്റ് റേഞ്ച് ഓഫീസിലേക്ക് മാർച്ച് നടത്തി. കണ്ണവം, പൂഴിയോട്, പന്നിയോട്, പറമ്പുക്കാവ്, ചെന്നപ്പൊയിൽ പ്രദേശങ്ങളിൽ സമീപകാലത്തായി കാട്ടാന വ്യാപകമായി കൃഷി നശിപ്പിക്കുകയാണ്. കാട്ടുപോത്തുകളുടെ അക്രമണത്തിൽ രണ്ട് കറവ പശുക്കൾ കൊല്ലപ്പെട്ടു. സംരക്ഷിത വനമേഖലയിൽ നിന്ന് കിലോമീറ്റർ അകലെയുള്ള പ്രദേശങ്ങളിലും വന്യമൃഗ ശല്യം രൂക്ഷമാണ്. കർഷക തൊഴിലാളികൾക്ക് ജോലിയില്ലാത്ത സ്ഥിതിയാണുള്ളത്. ഈ സാഹചര്യത്തിലാണ് പ്രതിഷേധവുമായി പ്രദേശവാസികൾ ഉൾപ്പെടെ രംഗത്ത് എത്തിയത്. കർഷക തൊഴിലാളി യൂണിയൻ ജില്ലാ സെക്രട്ടറി എം. ശ്രീധരൻ ഉദ്ഘാടനം ചെയ്തു. എൻ. ശ്രീധരൻ അധ്യക്ഷത വഹിച്ചു. ആദിവാസി ക്ഷേമ സമിതി ജില്ലാ സെക്രട്ടറി പി. മോഹനൻ, ഷാജി കരിപ്പായി, ടി. ബാലൻ, എൻ.വി ശ്രീജ, സി. ചന്ദ്രൻ എന്നിവർ പ്രസംഗിച്ചു.

കാമ്പസുകളില്‍ ലഹരി ഉപയോഗം തടയാന്‍ കര്‍മപരിപാടിയുമായി ശില്പശാല

കണ്ണൂർ: ജില്ലാ ഭരണകൂടം, കണ്ണൂര്‍ യൂണിവേഴ്സിറ്റി എന്‍എസ്എസ് സെല്‍, ജില്ലാ സാമൂഹ്യനീതി ഓഫീസ് എന്നിവയുടെ സംയുക്താഭിമുഖ്യത്തില്‍ കോളജ് കാമ്പസുകളില്‍ ലഹരി ഉപയോഗം തടയാനുള്ള കര്‍മ പരിപാടികള്‍ ആവിഷ്‌കരിക്കുന്നതിനായി ഏകദിന ശില്പശാല സംഘടിപ്പിച്ചു. കണ്ണൂര്‍ യൂണിവേഴ്സിറ്റി താവക്കര കാമ്പസില്‍ നടന്ന ശില്പശാല ജില്ലാ കളക്‌ടർ അരുണ്‍ കെ. വിജയന്‍ ഉദ്ഘാടനം ചെയ്തു. ചുറ്റുപാടുകളില്‍ ലഹരി ഉപയോഗം ശ്രദ്ധയില്‍പ്പെട്ടാല്‍ അതിനെതിരെ പ്രതികരിക്കാനുള്ള ധൈര്യം വിദ്യാര്‍ഥികള്‍ കാണിക്കണമെന്നും അതിനുള്ള സഹായ സഹകരണങ്ങള്‍ അധ്യാപകര്‍ നല്‍കണമെന്നും കളക്‌ടര്‍ പറഞ്ഞു. ഡയറക്ടര്‍ ഓഫ് സ്റ്റുഡന്‍റ് സര്‍വീസസിന്‍റെ സഹകരണത്തോടെ യൂണിവേഴ്സിറ്റിയിലെ മുഴുവന്‍ കോളജുകളിലെയും ആന്‍റി ഡ്രഗ് കാമ്പസ് പ്രൊട്ടക്ഷന്‍ ആര്‍മി നോഡല്‍ ഓഫീസര്‍മാര്‍, എന്‍എസ്എസ് പ്രോഗ്രാം ഓഫീസര്‍മാര്‍ എന്നിവര്‍ക്കായാണ് ശില്പശാല സംഘടിപ്പിച്ചത്. യൂണിവേഴ്സിറ്റി രജിസ്ട്രാര്‍ ഡോ. ജോബി കെ. ജോസ് അധ്യക്ഷനായി. ജില്ലാ റൂറല്‍ പോലീസ് മേധാവി അനൂജ് പലിവാൾ മുഖ്യപ്രഭാഷണം നടത്തി. മുഖ്യാതിഥിയായ അസി. കളക്‌ടർ എഹ്തെദ മുഫസിര്‍ ഡ്രഗ് ഫ്രീ കാമ്പസ് ലോഗോ പ്രകാശനം ചെയ്തു. കോളജ് കാമ്പസുകളില്‍ ലഹരി ഉപയോഗം തടയാനുള്ള കര്‍മ പരിപാടികള്‍ എന്ന വിഷയത്തില്‍ നടന്ന പാനല്‍ ചര്‍ച്ചയില്‍ ജില്ലാ സാമൂഹ്യനീതി ഓഫീസര്‍ പി. ബിജു മോഡറേറ്ററായി. മാക്സ് മൈന്‍ഡ് കണ്‍സള്‍ട്ടന്‍റ് സൈക്യാട്രിസ്റ്റ് ഡോ. അരുണ്‍ ജോയ്, മുന്‍ ജില്ലാ ഗവ. പ്ലീഡറും പബ്ലിക് പ്രോസിക്യൂട്ടറുമായ അഡ്വ. ബി.പി. ശശീന്ദ്രന്‍, ഡിഎംഎച്ച്പി സൈക്യാട്രിക് സോഷ്യല്‍ വര്‍ക്കര്‍ കെ.വി. നിഖിത വിനോദ് എന്നിവര്‍ ക്ലാസെടുത്തു. അസി. എക്സൈസ് കമ്മീഷണര്‍ സജിത്ത് കുമാര്‍, കണ്ണൂര്‍ യൂണിവേഴ്സിറ്റി സ്റ്റുഡന്‍സ് സര്‍വീസ് ഡയറക്ടര്‍ ഡോ. കെ.വി. സുജിത്ത്, എന്‍എസ്എസ് ജില്ലാ കോ-ഓര്‍ഡിനേറ്റര്‍ ഡോ. കെ.പി. നിധീഷ്, കാസര്‍ഗോഡ് എന്‍എസ്എസ് ജില്ലാ കോ-ഓര്‍ഡിനേറ്റര്‍ ഡോ. കെ.വി. വിനേഷ്, വയനാട് എന്‍എസ് എസ് ജില്ലാ കോ-ഓര്‍ഡിനേറ്റര്‍ എം.എ. ഷെറീന, എന്‍എംബിഎ ജില്ലാ കോ-ഓര്‍ഡിനേറ്റര്‍ ബേബി ജോണ്‍, ആസാദ് സേന ജില്ലാ കോ-ഓര്‍ഡിനേറ്റര്‍ ഡോ. ടി.വി. സുരേഖ, വിമുക്തി മിഷന്‍ ജില്ലാ കോ-ഓര്‍ഡിനേറ്റര്‍ എം. സുജിത്ത്, പിലാത്തറ വചന ജ്യോതി ഡി-അഡിക്ഷന്‍ സെന്‍റർ ഡയറക്ടര്‍ ഫാ. ആന്‍റണി പുതുമന എന്നിവര്‍ പ്രസംഗിച്ചു.

നെല്ലിക്കാംപൊയിൽ സ്കൂൾ ജൂബിലി ആരംഭവും വിദ്യാരംഗം കലാസാഹിത്യവേദി ഉദ്ഘാടനവും

ഉളിക്കൽ: നെല്ലിക്കാംപൊയിൽ സെന്‍റ് സെബാസ്റ്റ്യൻസ് എൽപി സ്കൂൾ പ്ലാറ്റിനം ജൂബിലി വർഷവും വിദ്യാരംഗം കലാസാഹിത്യവേദിയുടെയും വിവിധ ക്ലബുകളുടെയും ഉദ്ഘാടനവും ഉളിക്കൽ പഞ്ചായത്ത് പ്രസിഡന്‍റ് പി.സി. ഷാജി നിർവഹിച്ചു. സ്കൂൾ മാനേജർ ഫാ. ജോസഫ് കാവനാടിയിൽ അധ്യക്ഷത വഹിച്ചു. 75 വർഷം പൂർത്തിയാക്കുന്ന വിദ്യാലയം നിരവധി പ്രതിഭകൾക്ക് ജന്മം നൽകിയ മാതൃവിദ്യാലം കൂടിയാണ്. പ്രധാന അധ്യാപിക സിസ്റ്റർ ലിറ്റിൽ ഫ്ലവർ, ഇടവക കോ-ഓർഡിനേറ്റർ തോമസ് അപ്രേം, പിടിഎ പ്രസിഡന്‍റ് രജീഷ് മന്നത്തൂർ, മദർ പിടിഎ പ്രസിഡന്‍റ് വി.ടി. ജെൻസി, വിദ്യാർഥി പ്രതിനിധി അമൂല്യ സജീഷ്, അധ്യാപക പ്രതിനിധി സിസ്റ്റർ പി.ജെ. സ്മിജ എന്നിവർ പ്രസംഗിച്ചു. കുട്ടികളുടെ വിവിധ കലാപരിപാടികളും അരങ്ങേറി. അധ്യാപകരായ ജിജി മാത്യു, അഖില പ്രകാശ്, നിമിഷ ജോസഫ്, അശ്വിൻ ദേവസ്യ, സിസ്റ്റർ ജീന, ജോബിയ അജിത്ത്, സുനി ജോർജ് എന്നിവരും രക്ഷിതാക്കളും നേതൃത്വം നൽകി.

കത്തോലിക്ക കോൺഗ്രസ്‌ എടൂർ ഫോറോന നേതൃ സമ്മേളനം

ഇരിട്ടി: എടൂർ ഫൊറോനാ കത്തോലിക്ക കോൺഗ്രസ്‌ നേതൃത്വ സമ്മേളനം ഫെറോന വികാരി ഫാ. തോമസ് വടക്കേമുറി ഉദ്ഘാടനം ചെയ്തു. ഫൊറോന ഡയറക്ടർ ഫാ. കുര്യാക്കോസ് കളരിക്കൽ അധ്യക്ഷത വഹിച്ചു. ഗ്ലോബൽ ഡയറക്ടർ റവ. ഡോ. ഫിലിപ്പ് കവിയിൽ മുഖ്യപ്രഭാഷണം നടത്തി. ഫൊറോനാ പ്രസിഡന്‍റ് ജോസ് പുത്തൻപുരയ്ക്കൽ, രൂപത പ്രസിഡന്‍റ്, ഫിലിപ്പ് വെളിയത്ത്, രൂപത സെക്രട്ടറി, ജിമ്മി ഐത്തമറ്റം, വൈസ് പ്രസിഡന്‍റുമാരായ ബെന്നിച്ചൻ മഠത്തിനകം, ടോമി കണിയാങ്കൽ, ഫെറോനാ സെക്രട്ടറി ജയിംസ് പാറേൽ എന്നിവർ പ്രസംഗിച്ചു.

കോളയാട് വിശുദ്ധ അൽഫോൻസ പള്ളിയിൽ തിരുനാളിനു തുടക്കമായി

കോളയാട്: തലശേരി അതിരൂപത തീർഥാടന കേന്ദ്രമായ കോളയാട് വിശുദ്ധ അൽഫോൻസ പള്ളിയിൽ തിരുനാളിന് തുടക്കമായി. അതിരൂപത വികാരി ജനറാൾ മോൺ. സെബാസ്റ്റ്യൻ പാലാക്കുഴി കൊടിയേറ്റി. ഇന്നുമുതൽ 24 വരെ വൈകുന്നേരം 4.30ന് നടക്കുന്ന വിശുദ്ധ കുർബാന, നൊവേന എന്നിവയ്ക്ക് റവ. ഡോ. ലൂക്കോസ് മാടശേരി, ഫാ. ജെറിൻ കുഴിപ്പറന്പിൽ സിഎസ്ടി, ഫാ. ലൂക്കോസ് മറ്റപ്പള്ളിൽ എന്നിവർ കാർമികത്വം വഹിക്കും. 25ന് വൈകുന്നേരം 4.15ന് റാസ കുർബാന, നൊവേന-റവ. ഡോ. ആന്‍റണി തറേക്കടവിൽ, 26ന് രാവിലെ എട്ടിന് വിശുദ്ധ കുർബാന, നൊവേന-ഫാ. ക്രിസ്റ്റോ കാരക്കാട്ട്, വൈകുന്നേരം 4.30ന് വിശുദ്ധ കുർബാന, നൊവേന-മാനന്തവാടി രൂപത സഹായമെത്രാൻ മാർ അലക്സ് താരാമംഗലം. 27ന് രാവിലെ എട്ടിന് വിശുദ്ധകുർബാന, നൊവേന-ഫാ. സെബാൻ ഇടയാടിയിൽ, വൈകുന്നേരം 4.30ന് വിശുദ്ധ കുർബാന, നൊവേന-ചെറുപുഷ്പം മിഷൻ ലീഗ് തലശേരി അതിരൂപത ഡയറക്‌ടർ ഫാ. ജിതിൻ വയലുങ്കൽ. 28ന് നടക്കുന്ന പ്രധാന തിരുനാൾദിനത്തിൽ രാവിലെ ഒന്പതിന് നടക്കുന്ന വിശുദ്ധ കുർബാന, നൊവേന എന്നിവയ്ക്ക് തലശേരി ആർച്ച്ബിഷപ് മാർ ജോസഫ് പാംപ്ലാനി കാർമികത്വം വഹിക്കും. 10.30ന് പ്രദക്ഷിണം, 11ന് പാച്ചോർ നേർച്ച, 11.30ന് സമാപനാശീർവാദം.

അപക‌ടക്കെണിയായി സ്കൂളിനോടു ചേർന്നുള്ള ട്രാൻസ്ഫോർമർ

ഇരിട്ടി: വിദ്യാർഥികൾക്കും പൊതുജനങ്ങളെയും ദുരിതത്തിലാക്കി കരിക്കോട്ടക്കരി സെന്‍റ് തോമസ് യൂപി സ്കൂളിനോടു ചേർന്ന് മലയോര ഹൈവേയിലെ ട്രാൻസ്‌ഫോർമർ. സ്കൂളിൽ നിന്ന് 10 മീറ്റർ വ്യത്യാസത്തിൽ നിൽക്കുന്ന ട്രാൻസ്‌ഫോർമർ മാറ്റി സ്ഥാപിക്കണമെന്ന് ജനങ്ങൾ വർഷങ്ങളായി ആവശ്യപ്പെടുന്നുണ്ടെങ്കിലും അധികൃതർ യാതൊരു നടപടിയും സ്വീകരിക്കുന്നില്ല. നിലവിൽ മലയോര ഹൈവേയുടെ പ്രവൃത്തികൾ നടക്കുമ്പോൾ ട്രാൻസ്ഫോർമർ മാറ്റി സ്ഥാപിക്കണമെന്നാണ് നാട്ടുകാരുടെ ആവശ്യം. സ്കൂളിന്‍റെ മതിലിനോട് ചേർന്ന് നിൽക്കുന്ന ട്രാൻസ്ഫോർമർ എപ്പോഴും അപകട ഭീഷണിയാണ്. കുട്ടികളുടെയും പൊതുജനങ്ങളുടെയും സുരക്ഷ ഉറപ്പുവരുത്തി എവിടെ വേണമെങ്കിലും സ്ഥാപിക്കുന്നതിന് നാട്ടുകാർ എതിരല്ലെന്നും വിഷയത്തിൽ അധികൃതർ അടിയന്തര നടപടി സ്വീകരിക്കണമെന്നും നാട്ടുകാർ ആവശ്യപ്പെട്ടു.

അയ്യൻകുന്ന് പഞ്ചായത്തിൽ ആശാവർക്കർമാരെ ആദരിച്ചു

ഇരിട്ടി: ആരോഗ്യ രംഗത്തെ അടിസ്ഥാന പ്രവർത്തകരായ ആശാവർക്കർമാരെ അയ്യൻകുന്ന് പഞ്ചായത്തിന്‍റെ നേതൃത്വത്തിൽ ആദരിച്ചു. അയ്യൻകുന്ന് പഞ്ചായത്ത് ഹാളിൽ നടന്ന ചടങ്ങിൽ കെപിസിസി പ്രസിഡന്‍റ് സണ്ണി ജോസഫ് എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ അധ്യക്ഷത വഹിച്ചു. ഓസ്‌ട്രേലിയൻ ഇൻസ്റ്റിറ്റ്യൂട്ട് ഓഫ് കമ്യൂണിറ്റി ആൻഡ് മാനേജ്‍മെന്‍റ് ഡയറക്ടർ ജോ തോമസ് മുഖ്യാതിഥിയായി. പഞ്ചായത്തിൽ സേവനം അനുഷ്ഠിക്കുന്ന 16 ആശാവർക്കർമാരെ ആദരിച്ചു. തുടർന്ന് "ആരോഗ്യ രംഗത്തെ മാറ്റവും നവീകരണവും' എന്ന വിഷയത്തിൽ ചർച്ച നടത്തി. ചർച്ചയിൽ സമൂഹത്തിന്‍റെ താഴെത്തട്ടുമുതൽ ആശാവർക്കമാരുടെ സേവനങ്ങൾ ഏറെ വിലപ്പെട്ടതാണെന്ന് വിലയിരുത്തി. കേരളത്തിൽ ആരോഗ്യരംഗം ഒന്നാം സ്ഥാനത്തേക്ക് എത്താൻ പകുതി ദൂരം മാത്രമാണ് പിന്നിട്ടത്. സ്ത്രീകളുടെ ആരോഗ്യ സംരക്ഷണത്തിന് കൂടുതൽ പ്രാധാന്യം നൽകണം. കേരളത്തിലെ റോഡുകളിൽ സുരക്ഷിത ഫുട് പാത്തുകൾ നിർമിക്കണം. ജീവിത ശൈലി രോഗം എന്നത് തെറ്റായ പ്രയോഗം ആണെന്നും ഇത് രോഗികളെ കുറ്റപ്പെടുത്തലാണെന്നും ചർച്ച നയിച്ച ജോ തോമസ് പറഞ്ഞു. സ്റ്റാൻഡിംഗ് കമ്മിറ്റി ചെയർമാൻമാരായ ഐസക് ജോസഫ്, സിന്ധു ബെന്നി, സീമ സനോജ്, പഞ്ചായത്ത് അംഗങ്ങളായ മിനി വിശ്വനാഥൻ, സജി മച്ചിത്താന്നി,ജോസഫ് വട്ടുകുളം, സെലീന ബിനോയി, എൽസമ്മ ചേന്നംകുളം, ഫിലോമിന മാണി, കരിക്കോട്ടക്കരി ഹെൽത്ത് ഇൻസ്‌പെക്ടർ ടി.എ. ജയ്സൺ,വ്യാപാരി വ്യവസായി ഏകോപന സമിതി പ്രസിഡന്‍റ് ഒ.ജെ. ജോർജ്, ജെയിൻസ് മാത്യു എന്നിവർ പ്രസംഗിച്ചു.

ക്ഷേത്രക്കുളത്തിൽ പ്രവാസി മുങ്ങി മരിച്ചു

കണ്ണൂർ: ക്ഷേത്രക്കുളത്തിൽ നീന്തുന്നതിനിടെ പ്രവാസി മുങ്ങി മരിച്ചു. പന്നേൻപാറ മരക്കുളത്തിന് സമീപം കിസാൻ റോഡിലെ കാട്ടാന്പള്ളി സുധാകരനാണ് (73) പള്ളിക്കുന്ന് കുന്നാവ് ക്ഷേത്രക്കുളത്തിൽ മരിച്ചത്. ഇന്നലെ രാവിലെ ഏഴോടെയായിരന്നു സംഭവം. നീന്തുന്നതിനിടെ ദേഹാസ്വാസ്ഥ്യത്തെ തുടർന്നു താഴ്ന്നു പോവുകയായിരുന്നു. കണ്ണൂരിൽ നിന്നുള്ള അഗ്നിരക്ഷാ സേനാംഗങ്ങളെത്തി സ്വകാര്യ ആശുപത്രിയിലെത്തിച്ചെങ്കിലും മരിച്ചു. പരേതരായ കോരൻ-യശോദ ദന്പതികളുടെ മകനാണ്. സംസ്കാരം ഇന്ന് പതിനൊന്നിന് പയ്യാന്പലത്ത്. ഭാര്യ: സരസ്വതി. മകൾ അഭിരാമി.സഹോദരങ്ങൾ: ദിവാകരൻ (റിട്ട. പോലീസ്), സുജ, സതീശൻ , സുനിൽകുമാർ, സുഷിൽകുമാർ (ഇരുവരും കുവൈത്ത്).

മത്സ്യത്തൊഴിലാളി ജോലിക്കിടയില്‍ കുഴഞ്ഞുവീണു മരിച്ചു

പയ്യന്നൂര്‍: മത്സ്യബന്ധനത്തിനിടയില്‍ മത്സ്യത്തൊഴിലാളി കുഴഞ്ഞുവീണു മരിച്ചു. എട്ടിക്കുളം സ്വദേശിയും പാലക്കോട്ടെ താമസക്കാരനുമായ കെ. അബ്‌ദുറഷീദാണ് (44) മരിച്ചത്. കോസ്റ്റല്‍ പോലീസ് ഇന്‍ക്വസ്റ്റ് നടത്തിയ മൃതദേഹം പോസ്റ്റുമോര്‍ട്ടത്തിനായി കണ്ണൂര്‍ മെഡിക്കല്‍ കോളജ് മോര്‍ച്ചറിയില്‍. സംസ്‌കാരം ഇന്ന് ഓലക്കാല്‍ മഖാം കബര്‍സ്ഥാനില്‍. ഇന്നലെ രാവിലെ പത്തരയോടെയാണ് പാലക്കോട് നിന്നും മറ്റു തൊഴിലാളികള്‍ക്കൊപ്പം ഇയാളും മത്സ്യബന്ധനത്തിനായി കടലില്‍ പോയത്. 11.30 ഓടെ ജോലിക്കിടയില്‍ തോണിയില്‍ കുഴഞ്ഞുവീണ ഇയാളെ ഉടന്‍തന്നെ പഴയങ്ങാടിയിലെ സ്വകാര്യ ആശുപത്രിയിലെത്തിച്ചപ്പോഴേക്കും മരിച്ചിരുന്നു. താനൂര്‍ സ്വദേശിയും എട്ടിക്കുളത്തെ താമസക്കാരനുമായ പരേതനായ മുഹമ്മദ് കുഞ്ഞി-ആയിഷ ദന്പതികളുടെ മകനാണ്. ഭാര്യ: കെ. സീനത്ത് (മുട്ടം). മക്കള്‍: റാഷിഫ, റഫാന്‍ (ഇരുവരും വിദ്യാര്‍ഥികള്‍). സഹോദരങ്ങള്‍: സഫിയ, സൈദ, റഷീദ.

ബൈക്കുകള്‍ കൂട്ടിയിടിച്ച് യുവാവ് മരിച്ചു

ബോവിക്കാനം: ബൈക്കുകള്‍ തമ്മില്‍ കൂട്ടിയിടിച്ച് ചെറുകിട കരാറുകാരന്‍ മരിച്ചു. പൊവ്വല്‍ മൂലടുക്കത്തെ ബി.കെ. കബീര്‍ (44) ആണ് മരിച്ചത്. ഇന്നലെ രാവിലെ വീട്ടില്‍നിന്നും ചെര്‍ക്കളയിലേക്ക് പോകവെ പൊവ്വല്‍ റേഷന്‍ ഷോപ്പിന് സമീപമാണ് അപകടമുണ്ടായത്. കബീറിന്‍റെ പുതിയ വീടിന്‍റെ ഗൃഹചടങ്ങ് നടന്നതിന്‍റെ പിറ്റേന്നാണ് അപകടമുണ്ടായത്. പരേതരായ ബികെ. മുഹമ്മദ്കുഞ്ഞിയുടെയും ഖദീജയുടെയും മകനാണ്. ഭാര്യ: സുഹറ. മക്കള്‍: ഫിസാന്‍, ഫായിസ, ഫര്‍സീന്‍. സഹോദരങ്ങള്‍: അബ്ദുള്ള, അബൂബക്കര്‍, ബീഫാത്തിമ, ആയിഷ.

സ്കൂട്ടറുകൾ കൂട്ടിയിടിച്ച് പരിക്കേറ്റയാൾ മരിച്ചു

ഭീമനടി: സ്കൂട്ടറുകൾ കൂട്ടിയിടിച്ച് ഗുരുതരമായി പരിക്കേറ്റ് മംഗളൂരുവിലെ ആശുപത്രിയിൽ ചികിത്സയിലായിരുന്നയാൾ മരിച്ചു. ഭീമനടി കുറുഞ്ചേരിയിലെ ചരുവിള പുത്തൻവീട്ടിൽ സത്യൻ- സുമതി ദമ്പതികളുടെ മകൻ റെജി (49) യാണ് മരിച്ചത്. 19 ന് വൈകുന്നേരം ഭീമനടി ടൗണിൽ വച്ചായിരുന്നു അപകടം. ഭാര്യ:ഗീത. മക്കൾ: സ്നേഹ, അർജുൻ. മരുമകൻ: അംബുജാക്ഷൻ. സഹോദരങ്ങൾ: സുനിൽ, രജനി.

തൂങ്ങിമരിച്ച നിലയിൽ

തളിപ്പറമ്പ്: മധ്യവയസ്‌കനെ വീടിനകത്ത് ഫാനിൽ തൂങ്ങിമരിച്ചനിലയിൽ കണ്ടെത്തി. മൊറാഴ മുണ്ടപ്പുറത്തെ ചേരമ്പത്ത് വീട്ടില്‍ ഭാസ്‌കരന്‍റെ മകന്‍ ബി. ഷിബുനെയാണ് (51) മരിച്ച നിലയില്‍ കണ്ടത്. ഞായറാഴ്ച രാത്രി ഒന്പതിനായിരുന്നു സംഭവം. ഉടൻ കണ്ണൂർ ഗവ. മെഡിക്കൽ കോളജിലെത്തിച്ചെങ്കിലും മരിച്ചു.

സംഘടിത ശക്തികൾക്കു മാത്രമേ നീതി ഉറപ്പാക്കാനാകൂ: ഡോ. ഡെന്നിസ് കുറുപ്പശേരി

കണ്ണൂർ: ലത്തീൻ കത്തോലിക്കരുടെ താത്പര്യങ്ങൾ അവഗണിക്കപ്പെടുന്ന വർത്തമാന കാലഘട്ടത്തിൽ ഒറ്റക്കെട്ടായി പ്രവർത്തിച്ചാൽ മാത്രമേ ആനുകൂല്യങ്ങൾ നേടിയെടുവാൻ സാധിക്കുകയുള്ളുവെന്നും സമുദായ ശാക്തീകരണ ശ്രമങ്ങൾ പരമ പ്രധാനമാണെന്നും കണ്ണൂർ രൂപത സഹായമെത്രാൻ ഡോ. ഡെന്നിസ് കുറുപ്പശേരി. കേരള ലാറ്റിൻ അസോസിയേഷൻ (കെഎൽസിഎ) കണ്ണൂർ രൂപതാതല അംഗത്വ കാന്പയിൻ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ആകെയുള്ള പ്രതീക്ഷ ജെ.ബി. കോശി കമ്മീഷൻ റിപ്പോർട്ടാണ്. എന്നാൽ ആ റിപ്പോർട്ട് യഥാവിധി പുറത്തുവരികയോ നടപ്പാക്കുകയോ ചെയ്തിട്ടില്ല. കുറെ കാര്യങ്ങൾ നടപ്പിലാക്കിയെന്ന് അവകാശപ്പെടുന്ന സർക്കാർ എന്ത് നടപ്പിലാക്കിയെന്ന് പറയുന്ന ധവളപത്രം പുറത്തിറക്കാൻ തയാറാവണം. കെഎൽസിഎ രൂപത പ്രസിഡന്‍റ് ഗോഡ്സൺ ഡിക്രൂസ് അധ്യക്ഷത വഹിച്ചു. രൂപത ഡയറക്ടർ ഫാ. മാർട്ടിൻ രായപ്പൻ, കെഎൽസിഎ സംസ്ഥാന ട്രഷറർ രതീഷ് ആന്‍റണി, മുൻ സംസ്ഥാന പ്രസിഡന്‍റ് ആന്‍റണി നെറോണ, കെഎൽസിഡബ്ല്യുഎ സംസ്ഥാന പ്രസിഡന്‍റ് ഷെർളി സ്റ്റാൻലി, സംസ്ഥാന സെക്രട്ടറി ജോൺ ബാബു, രൂപത ജനറൽ സെക്രട്ടറി ശ്രീജൻ ഫ്രാൻസിസ്, രൂപത ട്രഷറർ ക്രിസ്റ്റഫർ കല്ലറക്കൽ, സിഎൽസി രൂപത പ്രസിഡന്‍റ് ഡിയോൺ ആന്‍റണി, കെഎൽസിഎ രൂപത ഭാരവാഹികളായ എലിസബത്ത് കുന്നോത്ത്, കെ.എച്ച്. ജോൺ, ഫ്രാൻസിസ് അലക്സ്, ബർണാർഡ് താവം, സ്റ്റെഫാൻ ബെഞ്ചമിൻ എന്നിവർ പ്രസംഗിച്ചു.

‘നിശാശലഭ രാത്രി’ നിശാശലഭ പഠന ക്യാമ്പും സർവേയും സംഘിപ്പിച്ചു

ഇരിട്ടി: ദേശീയ നിശാശലഭ വാരത്തിന്‍റെ ഭാഗമായി ആറളം വൈൽഡ് ലൈഫ് ഡിവിഷന്‍റെ നേതൃത്വത്തിൽ ചിത്രശലഭ ഉദ്യാനമായി പ്രഖ്യാപിച്ച ആറളം വന്യജീവി സങ്കേതത്തിൽ "നിശാശലഭ രാത്രി" നിശാശലഭ പഠന ക്യാമ്പും സർവേയും സംഘിപ്പിച്ചു. ആറളം വന്യജീവി സങ്കേതവും "വാക് വിത്ത് വിസി "സംഘടനയും ചേർന്ന് രണ്ടുദിവസമായി നടത്തിയ ക്യാമ്പിൽ ഇരുപതോളം നിശാശലഭ നിരീക്ഷകർ പങ്കെടുത്തു. നിശാശലഭ പഠന ക്യാമ്പും സർവെയും ആറളം വൈൽഡ് ലൈഫ് വാർഡൻ വി. രതീശൻ ഉദ്ഘാടനം നിർവഹിച്ചു. അസി. വൈൽഡ് ലൈഫ് വാർഡൻ രമ്യ രാഘവൻ , ശലഭ നിരീക്ഷകൻ മനോജ് കരിങ്ങാമടത്തിൽ എന്നിവർ പ്രസംഗിച്ചു. തുടർന്ന് നടന്ന സർവേയിൽ അമ്പതോളം ഇനത്തിൽ പെട്ട നിശാശലഭങ്ങളെ രേഖപ്പെടുത്തി.

കോടികൾ മുടക്കി നിർമിച്ച ആറളം മോഡൽ റസിഡൻഷ്യൽ സ്കൂളിന് പൂട്ട് വീഴുമോ ?

ഇരിട്ടി: ആറളത്തേയും സമീപ പ്രദേശങ്ങളിലേയും ആദിവാസി കുട്ടികളുടെ ഉന്നമനത്തിനായി 2021 നിർമാണം പൂർത്തിയാക്കിയ ആറളം മോഡൽ റസിഡൻഷ്യൽ സ്കൂൾ ഇനിയും യാഥാർഥ്യമായില്ല. എന്നാൽ സ്കൂളിന് പകരക്കാരന്‍റെ വേഷം നല്കി അധികൃതരുടെ കണ്ണിൽ പൊടിയിടൽ. വർഷങ്ങളായി കാടുമൂടിക്കിടന്ന എംആർഎസ് സ്കൂൾ കെട്ടിടത്തിൽ ഇനി തിരുനെല്ലി എംആർ സ്കൂൾ താത്കാലികമായി (ആശ്രമം സ്കൂൾ ) പ്രവർത്തിക്കും. തിരുനെല്ലി എംആർഎസിന്‍റെ കെട്ടിടം പുതുക്കി പണിയുന്നതിന്‍റെ ഭാഗമായാണ് സ്കൂളിന്‍റെ പ്രവർ ത്തനം ആറളത്തേക്ക് മാറ്റുന്നത്. ഇതിനായി കാടുപിടിച്ചു കിടന്ന ആറളം എംആർഎസിന്‍റെ കാമ്പസ് വെട്ടിത്തെളിക്കലും കെട്ടിടത്തിന്‍റെ അറ്റകുറ്റപ്പണികളും ആരംഭിച്ചു. ഓണത്തിന് മുന്പായി പകരം സ്കൂൾ ഇവിടെപ്രവർത്തനം ആരംഭിക്കുമെന്നാണ് സൂചന. ഇതോടെ ആശ്രമം സ്കൂളിലെ കുട്ടികൾക്ക് മെച്ചപ്പെട്ട സംവിധാനത്തിൽ പഠിക്കാൻ കഴിയുമെന്നതാണ് നേട്ടം. അടുത്ത ദിവസം തന്നെ മന്ത്രി ഉൾപ്പെടെ ഇവിടം സന്ദർശിച്ചേക്കും. എന്നാൽ ആറളം നിവാസികളുടെ എംആർഎസ് സ്കൂൾ എന്ന സ്വപ്നം എപ്പോൾ പൂർത്തിയാകും എന്നത് ഇപ്പോഴും അവ്യക്തം. ആറളം എംആർഎസ് പട്ടികജാതി വകുപ്പിനു കീഴിൽ ആറളത്തെ എംആർഎസ് സ്കൂൾ കെട്ടിടത്തിന്‍റെ നിർമാണ പ്രവൃത്തി ആരംഭിക്കുന്നത് 2018 നവംബറിലാണ്. കിഫ്ഐബി ഫണ്ടിൽനിന്നും 17,39,23,518 രൂപ ചെലവിൽ 2021 സെപ്റ്റംബറിൽ കെട്ടിട നിർമാണവും പൂർത്തിയായി. 93,967 ചതുരശ്ര അടി വലിപ്പത്തിലുള്ള ആധുനിക സൗകര്യങ്ങളോട് കൂടിയ കെട്ടിടമാണ് ഒരുക്കിയത് . കൂടാതെ ആൺകുട്ടികൾക്കും പെൺകുട്ടികൾക്കുമുള്ള ഹോസ്റ്റൽ സൗകര്യം, സ്റ്റാഫ് ക്വാർട്ടേഴ്‌സ്, കാന്‍റീൻ, വാഹന പാർക്കിംഗ്, കളിക്കളം തുടങ്ങിയ സൗകര്യങ്ങളും ഒരുക്കിയിരുന്നു. എന്നാൽ പ്രവൃത്തി പൂർത്തിയായി നാലു വർഷം കഴിഞ്ഞിട്ടും തുറന്നു കൊടുക്കാതെ വന്നതോടെ കെട്ടിടവും അനുബന്ധ സൗകര്യങ്ങളൂം കാടുകയറി നശിക്കുകയായിരുന്നു. 2024 അധ്യയന വർഷത്തിൽ ആറളം എംആർഎസ് പ്രവർത്തനം തുടങ്ങുമെന്ന് മുഖ്യമന്ത്രി ഉറപ്പ് നല്കിയിരുന്നെങ്കിലും കോടികളുടെ കെട്ടിടവും അനുബന്ധ സൗകര്യങ്ങളും കാട്ടാനകൾക്കും വന്യമൃഗങ്ങൾക്കും താവളമാകാൻ ഭാരണാധികാരികൾ സൗകര്യം ഒരുക്കുകയായിരുന്നു. നിരവധി തവണ കാട്ടാനകൾ സ്കൂളിന്‍റെ മതിൽക്കെട്ട് തകർത്ത സംഭവം ഉണ്ടായിട്ടുണ്ട്. തിരുനെല്ലി എംആർഎസ് (ആശ്രമം സ്കൂൾ ) കെട്ടിടം പുതുക്കിപ്പണിയുന്നതിന്‍റെ ഭാഗമായാണ് തിരുനെല്ലി എംആർഎസിലെ (ആശ്രമം സ്കൂൾ ) . ഒന്നുമുതൽ 10 വരെ ക്ലാസുകളിലെ 261 വിദ്യാർഥികൾ ആറളത്തേക്ക് എത്തുന്നത്. കൂടെ 55 ജീവനക്കാരും ഉണ്ട്. തിരുനെല്ലി സ്കൂളിൽ ഉപയോഗിച്ചിരുന്ന ഫർണിച്ചർ ഉൾപ്പെടെ ആറളത്ത് എത്തിക്കും. ഗ്യാസ് പൈപ്പിംഗ് ജോലികൾ മാത്രമാണ് ഇവിടെ പൂർത്തിയാക്കാനുള്ളത്. സ്കൂളിലേക്ക് എത്താനുള്ള പ്രധാന വഴി ടാറിംഗ് നടത്തുന്നതിന് പഞ്ചായത്തും തുക വകയിരുത്തിയിട്ടുണ്ട്. ഇതോടെ വർഷങ്ങ ളായി പ്രവർത്തന രഹിതമായിക്കിടന്ന ആറളം എംആർഎസ് തിരുനെല്ലി സ്കൂളായി മാറും. എന്നാൽ ആറളം എംആർഎസിന് പൂട്ട് വീഴുമോ എന്നത് കണ്ടുതന്നെ അറിയണം.

ദുരന്ത ഭീതിയിൽ കാർത്തികപുരം ഗവ. വിഎച്ച്എസ്എസ്

ആലക്കോട്: കണ്ടാലും കൊണ്ടാലും അധികൃതർ പഠിക്കില്ലെന്ന് വ്യക്തം. ആലക്കോട് കാർത്തികപുരം ഗവ. വൊക്കേഷണൽ ഹയർ സെക്കൻഡറി സ്കൂളിലെ അവസ്ഥ കണ്ടാൽ ആർക്കും ഇക്കാര്യം വ്യക്തമാകും. 2024 ജൂണിൽ രാത്രിയിലുണ്ടായ കനത്ത മഴയിൽ ഇടിഞ്ഞതാണ് സ്‌കൂളിന്‍റെ മുറ്റം. നിലവിൽ കെട്ടിടം തന്നെ അപകടാവസ്ഥയിലാണ്. കൊല്ലത്ത് മിഥുൻ എന്ന എട്ടാം ക്ലാസുകാരൻ സ്കൂളിൽനിന്ന് ഷോക്കേറ്റു മരിച്ച സംഭവത്തിൽ കേരളം തേങ്ങുമ്പോൾ ഇവിടെ പഠിക്കുന്ന വിദ്യാർഥികളുടെയും രക്ഷിതാക്കളുടെയും ആശങ്കയും ഇരട്ടിക്കു കയാണ്. നിരവധി കാൽനടയാത്രികരും വാഹനങ്ങളും സഞ്ചരിക്കുന്ന റോഡിൽ തന്നെയാണ് ഇപ്പോഴും മുറ്റത്തിന്‍റെ കെട്ടുപൊട്ടിയ കല്ലുകളും മറ്റും കിടക്കുന്നത്. വർഷം ഒന്നു കഴിഞ്ഞിട്ടും അധികൃതർ തിരിഞ്ഞ് നോക്കാതെ വന്നതോടെ ഈ മഴക്കാലത്ത് സ്കൂൾ കെട്ടിടം തന്നെ അപകട ഭീഷണിയിലാണ്. മാധ്യമങ്ങൾ പലതവണ ഇക്കാര്യം റിപ്പോർട്ട് ചെയ്തിട്ടും രക്ഷിതാക്കളും നാട്ടുകാരും പിടിഎയും നിരവധി തവണ ആവശ്യപ്പെട്ടിട്ടും അധികൃതർക്ക് ഒരു കുലുക്കവുമില്ല. ആലക്കോട് കാർത്തികപുരം ഗവ. വെക്കേഷണൽ ഹയർ സെക്കൻഡറി സ്കൂളിലെ നൂറുകണക്കിന് കുട്ടികളുടെയും അധ്യാപകരുടെയും അവസ്ഥ ഏറെ ഭീതിപ്പെടുത്തുന്നതാണ്. കഴിഞ്ഞ വർഷം എട്ടു മീറ്റർ ഉയരമുള്ള സംരക്ഷണ ഭിത്തിയുടെ 40 മീറ്റർ നീളത്തിലായിരുന്നു തകർന്നു വീണത്. ഈ വർഷം മഴ ആരംഭി ച്ചപ്പോൾ കെട്ടിന്‍റെ ബാക്കി ഭാഗവും തകർന്ന് ഏതു നിമിഷവും വീഴാവുന്ന നിലയിലാണ്. കെട്ടിടം അപകടാവസ്ഥയിലായതോടെ കുട്ടികൾ ഓടിക്കളിക്കേണ്ട വിസ്തൃതമായ സ്കൂൾ മുറ്റം ഇന്ന് ആരും പ്രവേശിക്കാതെ തടഞ്ഞിരിക്കുകയാണ്. വെള്ളമിറങ്ങി സ്കൂൾ മുറ്റമിടിഞ്ഞ് കെട്ടിടം അപകട ഭീഷണിയിലാകുമെന്ന് മനസിലായതോടെ സ്കൂൾ അധികാരികൾ മുറ്റം മുഴുവൻ സുരക്ഷ യുടെ പേരിൽ പ്ലാസ്റ്റിക്ക് ഉപയോഗിച്ച് സുരക്ഷാ സിഗ്നൽ സ്ഥാപിച്ചിരിക്കുകയാണ്. കുട്ടികൾ പ്രവേശിക്കാതിരിക്കാൻ പ്ലാസ്റ്റിക് ചരടും കെട്ടിവച്ചിട്ടുണ്ട്. സ്‌കൂൾ പിടിഎയുടെ ഇടപെടലിനെ തുടർന്ന് പുനർനിർമാണത്തിനായി 90 ലക്ഷം അനുവദിച്ചു എന്നു പറയുന്നുണ്ടെങ്കിലും നാളിതുവരെയായിട്ടും നിർമാണ പ്രവൃത്തികൾ തുടങ്ങിയിട്ടില്ല. ഇനിയും ഒരു ദുരന്തത്തിന് കാത്തുനില്ക്കണോ എന്നാണ് നാട്ടുകാർ ചോദിക്കുന്നത്.

കൊട്ടിയൂർ-ബോയ്സ് ടൗൺ ചുരം പാതയിൽ മണ്ണിടിഞ്ഞ് ഗതാഗതം തടസപ്പെട്ടു

കൊട്ടിയൂർ: ബോയ്സ് ടൗൺ ചുരം പാതയിൽ മണ്ണിടിച്ചിലിനെ തുടർന്ന് ഗതാഗതം പൂർണമായും തടസപ്പെട്ടു. ചെകുത്താൻ തോടിന് സമീപമാണ് മണ്ണും പാറക്കൂട്ടങ്ങളും ഇടിഞ്ഞ് ഗതാഗത തടസം ഉണ്ടായിരിക്കുന്നത്. ഇന്നലെ വൈകുന്നേരം നാലോയോടെയായിരുന്നു സംഭവം. ഇതോടെ ബൈക്കുകൾ ഒഴികെ മറ്റു വാഹനങ്ങൾക്കൊന്നും പോകാൻ കഴിയാത്ത സ്ഥിതിയാണ്. തുടർന്ന് നെടുംപൊയിൽ വഴിയാണ് വാഹനങ്ങൾ തിരിച്ചുവിട്ടത്. ഈവർഷം ഇതേ സ്ഥലത്ത് മുന്പും പാറകൾ ഇടിഞ്ഞുവീണ് ഗതാഗതം തടസപ്പെട്ടിരുന്നു.

പ്രകൃതികൃഷി പൊളിക്കാൻ കാർഷിക സർവകലാശാല

സർക്കാർ പ്രോജക്ടുകൾക്കു പച്ചക്കൊടി; കർഷക പ്രോജക്ടുകൾ ഒഴിവാക്കി വൈ.എസ്. ജയകുമാർ കണ്ണൂർ: സംസ്ഥാനത്ത് പുതിയതായി ആരംഭിക്കുന്ന പ്രകൃതികൃഷി പദ്ധതിയിൽ നാടൻ പശു ഉത്പന്നങ്ങൾ ചേർത്തുള്ള വളം നിർമാണം, ഗവേഷണം എന്നീ വിഷയങ്ങളിൽ കേന്ദ്ര സ്ഥാപനമായ ഇന്ത്യൻ കൗൺസിൽ ഓഫ് അഗ്രികൾച്ചറൽ റിസർച്ചിന്‍റെ (ഐസിഎആർ) ഗവേഷണ ഗ്രാന്‍റിനായി കർഷകർ സമർപ്പിച്ച പ്രോജക്ടുകളിൽ സമയത്തിന് കോ- ഇൻവസ്റ്റിഗേറ്റർക്ക് അനുമതി പത്രം നൽകാതെ കാർഷിക സർവകലാശാല അപേക്ഷിക്കാൻ അവസരം മുടക്കി. കാർഷിക അവാർഡ് ജേതാവ് പാലക്കാട്ടെ ഭുവനേശ്വരിയമ്മ, കാസർഗോഡ് ജില്ലയിലെ കാഞ്ഞങ്ങാട് കപില ഗോശാലയിലെ പി.കെ. ലാൽ എന്നിവർ സമർപ്പിച്ച ഗവേഷണ പ്രോജക്ടുകളിലേക്ക് കോ ഇൻവസ്റ്റിഗേറ്ററെ നിശ്ചിത സമയത്തിനു നൽകാതെയാണ് കാർഷിക സർവകലാശാല അപേക്ഷിക്കാനുള്ള അവസരം മുടക്കിയത്. അതേസമയം കാർഷിക സർവകലാശാലയിലെ അധ്യാപകരുടെ രണ്ടു പദ്ധതികൾക്കും കർഷകന്‍റെ ഹൈടെക് ഫാം പദ്ധതിക്കും അനുമതിപത്രം നൽകുകയും ചെയ്തു. ഹൈടെക് ഫാം പദ്ധതി കർഷകരുടെ പറന്പിലെ കൃഷിയെ സഹായിക്കുന്നതല്ല. പോളിഹൗസ് കൃഷിയാണ്. നാടൻ പശു ഉത്പന്നങ്ങളിൽനിന്ന് വളക്കൂട്ടുകൾ നിർമിച്ച് കർഷകരുടെ കൃഷിയിടങ്ങളിൽ പ്രയോഗിച്ച് ഉത്പാദന വർധനയും മണ്ണിന്‍റെ പിഎച്ച് മൂല്യം വർധിക്കുന്നതും വിലയിരുത്തുന്നതാണ് പ്രകൃതി കൃഷി പദ്ധതി. പദ്ധതി നടപ്പാക്കുന്ന കേന്ദ്ര സ്ഥാപനമായ ഇന്ത്യൻ കൗൺസിൽ ഓഫ് അഗ്രികൾച്ചറൽ റിസർച്ചിന്‍റെ (ഐസിഎആർ) സംസ്ഥാനത്തെ ഏക നോഡൽ ഏജൻസി കേരള കാർഷിക സർവകലാശാലയാണ്. കൃഷിയിടങ്ങളിൽ കർഷകൻ പദ്ധതി നടപ്പാക്കുന്പോൾ കാർഷിക സർവകലാശാല അധ്യാപകർ, സർക്കാർ ഗവേഷണ കേന്ദ്രത്തിലെ ശാസ്ത്രജ്ഞർ എന്നിവരിൽ ആരെങ്കിലും പങ്കാളിയായി നേട്ടങ്ങൾ ശാസ്ത്രീയമായി വിലയിരുത്തണം. കാർഷിക സർവകലാശാലയിലും കാർഷിക കോളജുകളിലും കർഷകർ കയറിയിറങ്ങി കോ ഇൻവസ്റ്റിഗേറ്ററെ കണ്ടെത്തിയെങ്കിലും കാർഷിക സർവകലാശാല റിസർച്ച് വിഭാഗം അനുമതിപത്രം അപേക്ഷിക്കാനുള്ള സമയം കഴിഞ്ഞശേഷം കൈമാറിയാണ് കർഷകരെ പദ്ധതിയിൽനിന്ന് ഒഴിവാക്കിയത്. പദ്ധതി ഗ്രാന്‍റിനായി മാനദണ്ഡങ്ങളെല്ലാം പാലിച്ച് തിരുവനന്തപുരം കരമന ഐആർഎസ്, പട്ടാന്പി ഗവേഷണ കേന്ദ്രം എന്നിവിടങ്ങളിലേക്ക് കേരള കാർഷിക സർവകലാശാല അപേക്ഷ സമർപ്പിച്ചതായി കേരള കാർഷിക സർവകലാശാല ഗവേഷണ വിഭാഗം അറിയിച്ചു. രണ്ടു പദ്ധതികളും ഗവേഷണ കേന്ദ്രത്തിൽ നടത്തുന്നതും കർഷകരുടെ പറന്പുകളെ ഒഴിവാക്കിയും അക്കാദമിക് താത്പര്യത്തോടെ നടത്തുന്നതുമായ പദ്ധതികളാണ്. കൃഷി മന്ത്രി പി. പ്രസാദ്, മുൻ ചീഫ് സെക്രട്ടറി എസ്.എം. വിജയാനന്ദ് എന്നിവർ ആന്ധ്രയിലെ പ്രകൃതി കൃഷിയിടങ്ങൾ സന്ദർശിച്ച് വിലയിരുത്തിയശേഷമാണ് പദ്ധതി നടപ്പാക്കാൻ തയാറായത്. പദ്ധതിക്കായി നാടൻ പശുവും ചാണകവും പ്രധാനമായി വേണം. അതിനാൽ ഏതാനും നാടൻ പശുവളർത്തൽ കേന്ദ്രങ്ങൾക്ക് പ്രോജക്ട് ലഭ്യമാക്കി പദ്ധതി വിജയിപ്പിക്കാനായി കോ- ഇൻവസ്റ്റിഗേറ്ററെ ലഭ്യമാക്കാനായി മന്ത്രിയും ഓഫീസും പല തവണ കാർഷിക സർവകലാശാലയിൽ ഇടപെട്ടിരുന്നു. എന്നാൽ കാർഷിക സർവകലാശാല ഉദ്യമം പരാജയപ്പെടുത്തിയതായിരുന്നുവെന്ന് അപേക്ഷകർ ആരോപിച്ചു. കൃഷിവകുപ്പിൽ പദ്ധതി നിർവഹണത്തിൽ പരിചയമില്ലാത്ത ഉദ്യോഗസ്ഥരുടെ അറിവില്ലായ്മയും അവസാന തീയതിക്ക് ഏതാനും നാൾമുന്പ് മാത്രം അപേക്ഷ സമർപ്പിച്ചതുമാണ് ഇത്തരമൊരു സാഹചര്യത്തിനിടയാക്കിയെതെന്ന് കാർഷിക സർവകലാശാല ഗവേഷണ വിഭാഗം മറുപടി നൽകി. സർവകലാശാലയുടെ ആരോപണങ്ങൾ തെറ്റാണെന്നും അപേക്ഷകൾ നേരത്തേ സമർപ്പിച്ചതാണെന്നും പ്രകൃതി കൃഷി നോഡൽ ഓഫീസറും കൃഷി വകുപ്പ് അസിസ്റ്റന്‍റ് ഡയറക്ടറുമായ സിന്ധു അറിയിച്ചു.

കൊളോളത്ത് ഇരുനില കെട്ടിടം തകർന്നു

മട്ടന്നൂർ: ചാലോട് കൊളോളത്ത് ഇരുനില കെട്ടിടം തകർന്നു. കൊളോളം-മയ്യിൽ റോഡിലെ കെട്ടിടത്തിന്‍റെ ഒരു ഭാഗമാണ് മഴയിൽ തകർന്നത്. ഞായറാഴ്ച ഉച്ചയ്ക്കാണ് വർഷങ്ങളായി അപകടാവസ്ഥയിലായിരുന്ന കെട്ടിടം തകർന്നത്. അവധിദിവസം ആളുകൾ കുറവായതിനാൽ വൻ ദുരന്തമാണ് ഒഴിവായത്. മയ്യിൽ ഭാഗത്തേക്ക് പോകേണ്ട വിദ്യാർഥികൾ അടക്കമുള്ളവർ ബസ് കാത്തു നിൽക്കുന്ന സ്ഥലത്തെ കെട്ടിടമാണ് തകർന്നത്. കൂടാളി പഞ്ചായത്ത് ഓഫീസിന് സമീപത്തുള്ള കെട്ടിടത്തിന്‍റെ ഒരു ഭാഗമാണ് തകർന്നത്. കെട്ടിടം അപകടാവസ്ഥയിലാണെന്ന് കാണിച്ച് നിരവധി തവണ പഞ്ചായത്ത് അധികൃതരുടെ ശ്രദ്ധയിൽ പെടുത്തിയിരുന്നുവെങ്കിലും നടപടിയുണ്ടായില്ല.

മാനന്തവാടി-മട്ടന്നൂർ നാലുവരിപ്പാത: കെട്ടിടങ്ങളുടെ കാലപ്പഴക്കം നോക്കാതെ നഷ്ടപരിഹാരം നൽകണം

മാലൂർ: നിർദിഷ്ട മാനന്തവാടി-മട്ടന്നൂർ വിമാനത്താവളം നാലുവരിപ്പാതക്കായി ഏറ്റെടുക്കുന്ന സ്ഥലത്തെ കെട്ടിടങ്ങളുടെ കാലപ്പഴക്കം നോക്കാതെ നഷ്ടപരിഹാരം നൽകണമെന്ന് ശിവപുരം ഹയർ സെക്കൻഡറി സ്കൂളിൽ ചേർന്ന സ്ഥലം വിട്ടുകൊടുക്കുന്നവരുടെ ശിവപുരം, മട്ടന്നൂർ മേഖല യോഗം ആവശ്യപ്പെട്ടു. കൊട്ടിയൂർ റസിഡൻഷ്യൽ അസോസിയേഷൻ സെക്രട്ടറി ജിൽസ് മേയ്ക്കൽ യോഗം ഉദ്ഘാടനം ചെയ്തു. മാലൂർ പഞ്ചായത്ത് അംഗവും ആക്‌ഷൻ കമ്മിറ്റി രക്ഷാധികാരിയുമായ കാഞ്ഞരോളി രാഘവൻ അധ്യക്ഷത വഹിച്ചു. കമ്മിറ്റി ചെയർമാനും കേളകം പഞ്ചായത്ത് അംഗവുമായ ജോണി പാമ്പാട്, സത്യൻ ചെറുവാലി, പി.കെ. ജോസഫ്, ബിജു പേരാവൂർ, പി.വി. പവിത്രൻ, ശിവപുരം മേഖലാ ആക്‌ഷൻ കമ്മിറ്റി കൺവീനർ രാജേന്ദ്രൻ മാലൂർ, വ്യാപാരി വ്യവസായി ഏകോപന സമിതി ജില്ലാ വൈസ് പ്രസിഡന്‍റ് എ. സുധാകരൻ എന്നിവർ പ്രസംഗിച്ചു.

കീഴല്ലൂർ പഞ്ചായത്തിൽ ജനകീയ ശുചീകരണ പ്രവർത്തനം തുടങ്ങി

മട്ടന്നൂർ: കീഴല്ലൂർ പഞ്ചായത്ത്‌ പൊതുവിട ജനകീയ ശുചീകരണ പ്രവർത്തനം തുടങ്ങി. ഇതിന്‍റെ ഭാഗമായി തെരൂർ പാലയോട് ടൗൺ പൊതുജന പങ്കാളിത്തത്തോടെ ശുചീകരിക്കുകയും മാലിന്യം നിക്ഷേപിക്കുന്നതിനായി വേയിസ്റ്റ് ബിൻ സ്ഥാപിക്കുകയും ചെയ്തു. പരിപാടി പഞ്ചായത്ത്‌ പ്രസിഡന്‍റ് കെ.വി. മിനി ഉദ്ഘാടനം ചെയ്തു. സ്റ്റാൻഡിംഗ് കമ്മിറ്റി ചെയർമാൻ കെ. മനോഹരൻ, വാർഡ് മെംബർ പി. ബാബു, ശുചിത്വ മിഷൻ ജില്ലാ റിസോഴ്സ് പേഴ്സൺ പി. സജിത, കെ. സജീഷ്കുമാർ, കെ.എം. രസിത്ത്, ഹെൽത്ത് ഇൻസ്പെക്ടർ എ.എൻ. ദിജിൽ എന്നിവർ പ്രസംഗിച്ചു. ഹരിതകർമ സേനാംഗങ്ങൾ, തൊഴിലുറപ്പ് തൊഴിലാളികൾ, ഓട്ടോ ഡ്രൈവർമാർ, വ്യാപാരികൾ, പൊതുപ്രവർത്തകർ തുടങ്ങിയവർ ശുചീകരണ യജ്ഞത്തിൽ പങ്കാളികളായി.

ഉമ്മൻചാണ്ടി അനുസ്മരണവും ചികിത്സാ സഹായ വിതരണവും

കേളകം: പേരാവൂർ ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ ഉമ്മൻചാണ്ടി അനുസ്മരണവും ഡയാലിസിസ് രോഗികൾക്കുള്ള ചികിത്സാ സഹായ വിതരണം "കാരുണ്യ സ്പർശം' പദ്ധതിയും കെപിസിസി പ്രസിഡന്‍റ് സണ്ണി ജോസഫ് എംഎൽഎ ഉദ്ഘാടനം ചെയ്തു. അധികാരം ജനസേവനത്തിന് എന്ന മുദ്രാവാക്യം തന്‍റെ പ്രവർത്തനങ്ങളിലൂടെ അന്വർഥമാക്കിയ ജനപ്രിയ നേതാവായിരുന്നു ഉമ്മൻചാണ്ടിയെന്ന് അദ്ദേഹം പറഞ്ഞു. ബ്ലോക്ക് കോൺഗ്രസ് പ്രസിഡന്‍റ് ജൂബിലി ചാക്കോ അധ്യക്ഷത വഹിച്ചു. കെപിസിസി അംഗം ലിസി ജോസഫ്, ഡിസിസി സെക്രട്ടറിമാരായ പി.സി. രാമകൃഷ്ണൻ, ബൈജു വർഗീസ്, ബെന്നി തോമസ്, ജോസ് നടപ്പുറം, സിറാജ് പൂക്കോത്ത്, ചാക്കോ തൈക്കുന്നേൽ, സന്തോഷ് ജോസഫ് മണ്ണാർകുളം, ഷഫീർ ചെക്കിയാട്ട്, കെ.പി. നമേഷ് കുമാർ, ബാബു മാങ്കോട്ടിൽ, ബിജു ഓളാട്ടുപുറം, സി. സുഭാഷ് ബാബു, ജയ്ഷ ബിജു, എ. കുഞ്ഞിരാമൻ നമ്പ്യാർ, വി. പ്രകാശൻ, സി.ജെ. മാത്യു തുടങ്ങിയവർ പ്രസംഗിച്ചു.

‘സുന്ദരി’ ഇരിട്ടി പെരുംപറമ്പ് ഇക്കോ പാര്‍ക്ക്

ഇരിട്ടി: സഞ്ചാരികള്‍ക്ക് നവ്യാനുഭവം പകരുന്ന കാഴ്ചകളൊരുക്കി പായം പഞ്ചായത്തിലെ ഇരിട്ടി പെരുംപറമ്പ് ഇക്കോപാര്‍ക്ക്. ഇരിട്ടി-തളിപ്പറമ്പ് റോഡിൽ പെരുംപറമ്പിൽ നിന്ന് 500 മീറ്റർ മാറി പഴിശി ജലാശയത്തോട് ചേർന്നാണ് പാർക്ക് സ്ഥിതി ചെയ്യുന്നത്. പ്രകൃതിയുടെ ശാലീനതയും പുഴയുടെ ദൃശ്യ ഭംഗിയും മരത്തണലുകളും വിരുന്നൊരുക്കുന്ന കൊച്ചു തുരുത്തെന്നു തന്നെ പറയാം ഈ പാർക്കിനെ. മുഖമിനുക്കി എത്തുന്ന പാർക്കിൽ കുട്ടികൾക്കായി കൗതുകങ്ങളായ നിരവധി സംവിധാനങ്ങളുണ്ട്. വിവിധ മൃഗങ്ങളുടെ രൂപങ്ങൾ, പുല്‍ത്തകിടികള്‍, വാച്ച് ടവര്‍, ആംഫി തിയറ്റര്‍, വാക്വേ, ഇരിപ്പിടങ്ങള്‍ തുടങ്ങിയ സൗകര്യങ്ങളോടെയാണ് പാര്‍ക്ക് പ്രവര്‍ത്തിക്കുന്നത്. ടൂറിസം വകുപ്പിന്‍റെ ഡെസ്റ്റിനേഷന്‍ ചലഞ്ച് പദ്ധതിയിലൂടെയാണ് പഴശി ജലസേചന പദ്ധതിയുടെ ഭാഗമായ പെരുംപറമ്പ് പുഴയോരത്ത് നാലര ഏക്കര്‍ ഭൂമിയില്‍ ഇക്കോ പാര്‍ക്ക് സജ്ജമാക്കിയിരിക്കുന്നത്. വിനോദസഞ്ചാര വകുപ്പിന്‍റെ 50 ലക്ഷം രൂപയും പായം പഞ്ചായത്തിന്‍റെ 40 ലക്ഷം രൂപയും ഉപയോഗിച്ച് നിലവിലുണ്ടായിരു ന്ന പാര്‍ക്ക് ആധുനിക രീതിയില്‍ നവീകരിക്കുകയായിരുന്നു. പഴശി ജലസംഭരണ പ്രദേശത്തിന്‍റെ ഭംഗി ആസ്വദിക്കാന്‍ നിരവധിയാളുകള്‍ കുടുംബസമേതം ഇവിടെ എത്തുന്നു. ഇരിട്ടി പുഴയുടെ തീരത്ത് നിര്‍മിച്ച ഈ കേന്ദ്രം പൂര്‍ണമായും പ്രകൃതി സൗഹാദപരമായ രീതിയിലാ ണ് സജ്ജമാക്കിയിട്ടുള്ളത്. പഞ്ചായത്തിന്‍റെ നേതൃത്വത്തില്‍ രൂപീകരിച്ച ഗ്രാമഹരിത സമിതിക്കാണ് പാര്‍ക്കിന്‍റെ നടത്തിപ്പ് ചുമതല. കുട്ടികള്‍ക്ക് 20 രൂപയും മുതിര്‍ന്നവര്‍ക്ക് 35 രൂപയുമാണ് പ്രവേശന ഫീസ്. പാര്‍ക്കില്‍ ഗ്രാമ ഹരിത സമിതിയുടെ ടീ ഷോപ്പും പ്രവര്‍ത്തിക്കുന്നുണ്ട്. എല്ലാ തദ്ദേശസ്വയംഭരണ സ്ഥാപനങ്ങളിലും കുറഞ്ഞത് ഒരു വിനോദസഞ്ചാര കേന്ദ്രമെങ്കിലും വേണമെന്ന ലക്ഷ്യത്തോടെ യാണ് ഡെസ്റ്റിനേഷന്‍ ചലഞ്ച് പദ്ധതി നടപ്പിലാക്കുന്നത്.

കടയ്ക്കുമുന്നിൽ ട്രാസ്‌ഫോർമാർ സ്ഥാപിക്കുന്നതിനെതിരേ പ്രതിഷേധം; കടയുടമയെ പോലീസ് കസ്റ്റഡിയിലെടുത്തു

ഇരിട്ടി: ഇരിട്ടിയിൽ കടയ്ക്കു മുന്നിൽ ട്രാസ്‌ഫോർമർ സ്ഥാപിക്കുന്നതിനെതിരേ പ്രതിഷേധിച്ച കടയുടമയെ പോലീസ് കസ്റ്റഡിയിൽ എടുത്തു. ഇരിട്ടി മേലേ സ്റ്റാൻഡിനു സമീപം തന്‍റെ ബുക്ക് ഷോപ്പിന് മുൻ വശം കെഎസ്ഇബി ട്രാസ്‌ഫോർമർ സ്ഥാപിക്കുന്നതിനെതിരേ ശ്രീ ഏജൻസീസ് ഉടമ രാജുവാണ് പ്രതിഷേധവുമായി രംഗത്തെത്തിയത്. ട്രാൻസ്‌ഫോർമർ സ്ഥാപിക്കൽ പ്രവർത്തി തടസപ്പെടുത്താൻ ശ്രമിച്ച രാജു ഇതിനായി കുഴിച്ച കുഴിയിലെ ചെളിയിൽ ഇരുന്നായിരുന്നു പ്രതിഷേധിച്ചത്‌. ഇതിനിടയിൽ ട്രാസ്‌ഫോർമാർ സ്ഥാപിക്കാനായി സ്ഥാപിച്ച തൂണുകൾക്കു മുകളിൽ തൊഴിലെടുക്കുകയായിരുന്ന തൊഴിലാളികളെ തൂണുമായി ബന്ധിച്ച കയർ അപകടം വരുത്തും വിധം ഇയാൾ പിടിച്ചുവലിച്ചത് പ്രശ്നങ്ങൾക്കിടയാക്കി. കെഎസ്ഇബി അധികൃതർ വിവരമറിയിച്ചതിനെത്തുടർന്ന് എത്തിയ ഇരിട്ടി പോലീസാണ് ഇയാളെ കസ്റ്റഡിയിൽ എടുത്ത് സ്റ്റേഷനിലേക്ക് മാറ്റിയത്. ഇരിട്ടി നഗരസഭയുടെയും പൊതുമരാമത്ത് വകുപ്പിന്‍റെയും അനുമതിയോടെയാണ് ട്രാൻസ്‌ഫോർമർ സ്ഥാപിക്കുന്നതെന്ന് കെഎസ്ഇബി ജീവനക്കാർ പറഞ്ഞു.

വിശുദ്ധ അൽഫോൻസാമ്മയുടെ തിരുനാളാഘോഷങ്ങൾക്കു തുടക്കം

കോളയാട് സെന്‍റ് അൽഫോൻസാ തീർഥാടന പള്ളിയിൽ കോളയാട്: കോളയാട് സെന്‍റ് അൽഫോൻസാ തീർഥാടന പള്ളിയിൽ വിശുദ്ധ അൽഫോൻസാമ്മയുടെ തിരുനാളിന് തുടക്കമായി. ഇടവക വികാരി ഫാ. ജോബി കാരക്കാട്ട് കൊടിയേറ്റി. ഇന്നു വൈകുന്നേരം 4.30ന് നടക്കുന്ന വിശുദ്ധ കുർബാനയ്ക്കും നൊവേനയ്ക്കും ആർച്ച്ബിഷപ് എമരിറ്റസ് മാർ ജോർജ് ഞറളക്കാട്ട് മുഖ്യകാർമികത്വം വഹിക്കും. തുടർന്നുള്ള ദിവസങ്ങളിലെ തിരുനാൾ തിരുകർമങ്ങൾക്ക് ഫാ. ജോസഫ് പൗവ്വത്തിൽ, ഫാ. ലെനിൻ ജോസ്, ഫാ. ജോർജ് ചേലമരം, ഫാ. തോമസ് മേനപ്പാട്ട്പടിക്കൽ, ഫാ. ജോർജ് തുറവയ്ക്കൽ, ഫാ. ജിതിൻ വടക്കയിൽ എന്നിവർ കാർമികത്വം വഹിക്കും. പ്രധാന തിരുനാൾ ദിവസമായ 28ന് രാവിലെ 9.30ന് ആഘോഷമായ വിശുദ്ധ കുർബാന, വചനസന്ദേശം എന്നിവയ്ക്ക് തലശേരി ആർച്ച്ബിഷപ് മാർ ജോസഫ് പാംപ്ലാനി മുഖ്യകാർമികത്വം വഹിക്കും. തുടർന്ന് പാച്ചോർ നേർച്ചയും ഉണ്ടായിരിക്കും. വട്ടിയാംതോട് കുരിശുപള്ളിയിൽ ഉളിക്കൽ: മണിക്കടവ് ഫൊറോനയിലെ തീർഥാടന കേന്ദ്രമായ വട്ടിയാംതോടിൽ വിശുദ്ധ അൽഫോൻസാമ്മയുടെ തിരുനാളിന് ഫൊറോനാ വികാരി ഫാ. പയസ് പടിഞ്ഞാറേമുറിയിൽ കൊടിയേറ്റി. തിരുനാൾ 28ന് സമാപിക്കും. തിരുനാൾ ദിവസങ്ങളിൽ വൈകുന്നേരം 3.30ന് ദിവ്യകാരുണ്യ ആരാധന, ജപമാല, ദിവ്യബലിക്ക് ഫാ. അഗസ്റ്റിൻ ഈറ്റയ്ക്കൽ, ഫാ. ജോസഫ് തകിടിയേൽ, ഫാ. മാർട്ടിൻ കിഴക്കേതലയ്ക്കൽ, ഫാ. ജോസഫ് കളരിക്കൽ, ഫാ. അനിൽ മങ്ങാട്ട്, ഫാ. സെബാസ്റ്റ്യൻ താഴപ്പള്ളിൽ, ഫാ. മാത്യു കായാമ്മാക്കൽ, ഫാ. ജിതിൻ വയലുങ്കൽ, ഫാ. ജോമിറ്റ് മഞ്ഞളാംകുന്നേൽ, ഫാ. നോബിൾ ഓണംകുളം, റവ. ഡോ. ഫിലിപ്പ് കവിയിൽ എന്നിവർ കാർമികത്വം വഹിക്കും. സമാപന ദിവസമായ 28ന് ദിവ്യബലിയ്ക്കു ശേഷം പ്രദക്ഷിണം, സ്‌നേഹവിരുന്ന് എന്നിവ ഉണ്ടായിരിക്കും.

ആറളം പുനരധിവാസ മേഖലയിൽ കാട്ടാന കൃഷി നശിപ്പിച്ചു

ഇരിട്ടി: ആറളം പുനരധിവാസ മേഖലയിൽ ബ്ലോക്ക് 10ൽ കാട്ടാന ഇറങ്ങി തെങ്ങ്, റബർ ഉൾപ്പെടെ കൃഷികൾ നശിപ്പിച്ചു. ഇന്നലെ പുലർച്ചെ ഒന്നിനു ശേഷമാണ് കല്ലേരി കൊമ്പൻ എന്ന കാട്ടാനയും മറ്റൊരാനയും ചേർന്ന് കൃഷി നശിപ്പിച്ചത്. ബ്ലോക്ക് 10ലെ സുജ മോഹനൻ, കരുണാകരൻ എന്നിവരുടെ തെങ്ങുകൾ ആന ചട്ടി മറിച്ചിട്ടു. കായ്ഫലമുള്ള തെങ്ങാണ് ആന നശിപ്പിച്ചത്. നാളികേരത്തിന് നല്ല വില ലഭിക്കുമ്പോഴാണ് ആനകൾ എത്തി വ്യാപകമായി കൃഷി നശിപ്പിക്കുന്നത്. വിധവയായ സുജ തനിച്ചു താമസിക്കുന്ന വീടിന് സമീപം വരെ ആന എത്തിയിരുന്നു. ആന എത്തിയ വിവരം അറിയിച്ചിട്ടും അധികൃതർ എത്താൻ വൈകി എന്നാണ് പ്രദേശവാസികൾ പറയുന്നത്. ഇവിടെ എത്തിയ കൊട്ടിയൂർ റേഞ്ചിലെ രണ്ട് ഉദ്യോഗസ്ഥർ രണ്ടു പടക്കം മാത്രം പൊട്ടിച്ച ശേഷം തിരികെ പോയെന്നും അതിന് ശേഷം വീണ്ടും ഇറങ്ങിയ ആന ആണ് കൃഷികൾ നശിപ്പിച്ചതെന്നും പ്രദേശവാസികൾ പറയുന്നു. വനപാലകർ ആനയെ ഓടിക്കാതെ തിരികെ പോയെന്നാണ് പ്രദേശവാസികൾ ആരോപിക്കുന്നത്. വീണ്ടും ഇത് തുടർന്നാൽ അധികൃതരെ തടഞ്ഞുവയ്ക്കുമെന്നും പ്രദേശവാസികൾ പറയുന്നു. ബ്ലോക്ക് 13ൽ ഗോപാലന്‍റെ ഭൂമിയിലെ 100 ഓളം തെങ്ങുകൾ ഇതുവരെ കാട്ടാനകൾ നശിപ്പിച്ചു കഴിഞ്ഞു. ആനകൾ തെങ്ങുകൾ നശിപ്പിച്ചതോടെ ഗോപാലന്‍റെ പറമ്പ് തരിശുഭൂമി ആയിരിക്കുകയാണ്. ആദിവാസികൾക്ക് ലഭിച്ച ഭൂമിയിലെ കൃഷികൾ ആനയുടെ ആക്രമണത്തിൽ നശിച്ചിരിക്കുകയാണ്. കശുമാവിന്‍റെയും റബറിന്‍റെയും തൊലി ഉൾപ്പെടെ ആന പൊളിച്ചു ഭക്ഷിക്കുകയാണ്. ജീവൻ പോലെത്തന്നെ കർഷകരുടെ ജീവിതോപാധിയും ഇവിടെ നശിപ്പിച്ചുകൊണ്ടിരിക്കുകയാണ്. ആന കൃഷി നശിപ്പിച്ചതോടെ തൊഴിലാളികൾക്ക് കൂലി കൊടുക്കാൻ പോലും കഴിയാത്ത ആറളം ഫാമിന്‍റെ അവസ്ഥ പോലെയാണ് പുനരധിവാസ മേഖലയിലെ താമസക്കാരുടെ സാഹചര്യം. ചക്ക, മാങ്ങ, കശുവണ്ടി, തേങ്ങ, അടയ്ക്ക തുടങ്ങി ഒരു വിഭവങ്ങളും ഇവർക്ക് ശേഖരിക്കാൻ കഴിയുന്നില്ല. പാകമാകുന്നതിന് മുന്പുതന്നെ വന്യമൃഗങ്ങൾ എത്തി നശിപ്പിക്കുകയാണ്.

ഉമ്മൻചാണ്ടി കാരുണ്യ ഭവനത്തിന്‍റെ താക്കോൽ ദാനം നടത്തി

ആലക്കോട്: മുൻ മുഖ്യമന്ത്രി ഉമ്മൻചാണ്ടിയുടെ സ്‌മരണാർഥം യൂത്ത് കോൺഗ്രസ് ഉദയഗിരി മണ്ഡലം കമ്മിറ്റി പുനർനിർമിച്ചു നൽകിയ കാരുണ്യ ഭവനത്തിന്‍റെ താക്കോൽദാനം മുൻ മന്ത്രി കെ.സി. ജോസഫ് നിർവഹിച്ചു. മണക്കടവ് വായിക്കമ്പയിലെ നിർധന കുടുംബത്തിനാണ് കമ്മിറ്റി നേതൃത്വത്തിൽ വീട് പുനർനിർമിച്ച് നൽകിയത്. ജോസഫ് നോബിൾ അധ്യക്ഷത വഹിച്ചു. കെപിസിസി ജനറൽ സെക്രട്ടറി സോണി സെബാസ്‌റ്റ്യൻ, ചന്ദ്രൻ തില്ലങ്കേരി, എം.പി. ഉണ്ണികൃഷ്‌ണൻ, ഡോ. കെ.വി. ഫിലോമിന, ബിജു പുളിയംതൊട്ടി, ജോസ് പറയൻ കുഴി, വിജി മോഹൻ, പ്രിൻസ് ജോർജ്, സരിത ജോസ് എന്നിവർ പ്രസംഗിച്ചു.

പൊട്ടിപ്പൊളിഞ്ഞ് പെരുമ്പടവ്-കല്യാണപുരം റോഡ്

പെരുമ്പടവ്: കാൽനട യാത്രപോലും അസാധ്യമായി പെരുമ്പടവ്-കല്യാണപുരം റോഡ്. വാർഡിൽ ആദ്യം ചപ്പാരപ്പടവ് പഞ്ചായത്ത് ഏറ്റെടുത്തതും ആദ്യം ടാറിംഗ് നടത്തിയ റോഡുമാണിത്. പിന്നീട് പലതവണ അറ്റകുറ്റപ്പണികൾ നടത്തിയെങ്കിലും കുറെ വർഷങ്ങളായി അറ്റകുറ്റപ്പണികൾ നടത്താത്തതിനാൽ ടാറിംഗ് പല സ്ഥലത്തും കാണാൻ പോലും ഇല്ല. റോഡിലൂടെ ഭാരവാഹനങ്ങൾ ഓടുമ്പോൾ കല്ല് തെറിക്കുന്നത് സമീപത്തെ വീടുകളിലേക്കും കാൽനടയാത്രക്കാരുടെ ദേഹത്തേക്കും ആണ്. റോഡിന് ഫണ്ട് അനുവദിച്ചതായും പിഎംആർജിവൈ പദ്ധതിയിൽ ഉൾപ്പെടുത്തിയതായും, കോൺഗ്രസുകാരും എംഎൽഎ ഫണ്ട് അനുവദിച്ചതായി സിപിഎമ്മുകാരും പറയുന്നുണ്ടെങ്കിലും റോഡിൽ യാത്ര ഇപ്പോഴും ദുരിതക്കയത്തിൽ തന്നെയാണ്. കെജി മുതൽ ഹയർ സെക്കൻഡറി വരെയയുള്ള പെരുമ്പടവ് സ്കൂളുകളിലേക്കും, കരിപ്പാൽ, പെരുമ്പടവ് ഓക്സ്ഫോർഡ്, വെള്ളോറ, ഏര്യം, കാര്യപ്പള്ളി സ്കൂളുകളിലെ ബസുകൾ ഉൾപ്പെടെ ഈ റോഡിലൂടെ സർവീസ് നടത്തുന്നുണ്ട്. പെരുമ്പടവിൽ നിന്ന് മേരിഗിരി-ആലക്കോട് ഭാഗത്തേക്കുള്ള എളുപ്പവഴി കൂടിയാണ് ഈ റോഡ്. അതിനാൽ ചെറുതും വലുതുമായ നിരവധി വാഹനങ്ങൾ ഇതുവഴി ദിവസവും കടന്നുപോകുന്നുണ്ട്. മുന്പ് ഈ റോഡ് പൊതുമരാമത്ത് വകുപ്പിന്‍റെ വൺ ടൈം സെറ്റിൽമെന്‍റ് പദ്ധതിയിൽപ്പെടുത്തി അഭിവൃദ്ധിപ്പെടുത്താനുള്ള തയാറെടുപ്പുകൾ നടന്നതാണ്. എന്നാൽ, റോഡിനോട് ചേർന്നുകിടക്കുന്ന പെരുമ്പടവ് കോലാർതൊട്ടി റോഡ് എരമം-കുറ്റൂർ പഞ്ചായത്തിൽ ആയതിനാലും പഞ്ചായത്ത് സമയബന്ധിതമായി ആവശ്യമായ നടപടികൾ സ്വീകരിക്കാത്തതിനാലും പദ്ധതി നടപ്പിലായില്ല. ഏറ്റവും കാലപ്പഴക്കം ചെന്ന റോഡ് ആയിട്ടും ഇവിടെ സുഖമമായ യാത്ര ചെയ്യാൻ സാധിക്കാത്തതിനാൽ നാട്ടുകാർ രോഷാകുലരാണ് ത്രിതല പഞ്ചായത്ത് തെരഞ്ഞെടുപ്പിൽ ഇതിനുള്ള മറുപടി നൽകുമെന്നാണ് പ്രദേശവാസികൾ പറയുന്നത്.

നായ ശല്യം: കളക്ടർ ഇടപെടാത്തതിൽ പ്രതിഷേധം

കരുവഞ്ചാൽ: നടുവിൽ പഞ്ചായത്തിലെ കരുവഞ്ചാൽ ടൗണിന് സമീപം സ്വകാര്യ വ്യക്തി ലൈസൻസോ, കൂടോ, രോഗപ്രതിരോധത്തിനുള്ള കുത്തിവയ്പുകളോ നൽകാതെ നിയമ വിരുദ്ധമായി പത്തിലധികം നായകളെ വളർത്തുന്നത് പ്രദേശത്തെ ജനങ്ങളുടെ സ്വൈരജീവിതത്തിന് ബുദ്ധിമുട്ടുണ്ടാക്കുന്നതായി ആക്ഷേപം. മാർക്കറ്റിൽ നിന്നും മത്സ്യ മാംസ അവശിഷ്ടം നായകൾക്ക് എത്തിച്ചു കൊടുക്കുകയും അതുകഴിച്ച ശേഷം നായകൾ കരുവഞ്ചാൽ ടൗണിലും സമീപപ്രദേശങ്ങളിലെ വീടുകളിലും എത്തുകയും ചെരുപ്പ്, വസ്ത്രങ്ങൾ ഉൾപ്പെടെയുള്ള സാധനങ്ങൾ നശിപ്പിക്കുകയും എടുത്തുകൊണ്ട് പോകുകയുമാണ്. മലയോര ഹൈവേയിലൂടെ പോകുന്ന ബൈക്ക്, സ്കൂട്ടർ യാത്രക്കാർക്ക് ഒപ്പം ഓടി കാലിൽ കടിക്കാൻ ശ്രമിക്കുന്നതിൽ നിരവധി പേർ വീണ് പരിക്കേൽക്കുകയും ചെയ്തു. റോഡിലൂടെ പോകുന്ന കുട്ടികൾ ഉൾപ്പെടെയുള്ളവരെ നിരന്തരം ഓടിക്കുന്ന നായകൾ പ്രദേശത്ത് ജനജീവിതം ദുസഹമാക്കിയിരിക്കുകയാണ്. ഇക്കാര്യത്തിൽ ബിനോയ് തോമസ്, ജോർജ് വെളുത്തേടത്തുകാട്ടിൽ എന്നിവർ നടുവിൽ പഞ്ചായത്ത് സെക്രട്ടറിക്കും, നിയമവിരുദ്ധമായി നായകളെ വളർത്തുന്ന സ്വകാര്യ വ്യക്തിക്കെതിരെ കേസെടുക്കാൻ ആലക്കോട് പോലീസിനും പരാതി നൽകിയെങ്കിലും നടപടിയുണ്ടായില്ല. തുടർന്ന് ജില്ലാ കളക്ടർക്ക് പരാതി കൊടുത്ത് 50 ദിവസം കഴിഞ്ഞിട്ടും കളക്ടറുടെ ഭാഗത്തുനിന്ന് യാതൊരു നടപടിയുമുണ്ടായില്ല. ഇതിനിടയിൽ ഒരുനായ കൂട്ടത്തിൽ നിന്നുമാറി ബിനോയ് തോമസിന്‍റെ വീട്ടുമുറ്റത്ത് താമസമാണ്. വീട്ടിലേക്ക് ആളുകളെ കയറാൻ സമ്മതിക്കാതെ ഈ നായ ഭീഷണി ഉയർത്തുകയാണ്. നായ ശല്യത്തിന് പരിഹാരം തേടി തളിപ്പറമ്പ് താലൂക്ക് ലീഗൽ സർവീസസ് അഥോറിറ്റി ചെയർമാനായ ജില്ലാ ജഡ്ജിക്ക് പരാതി കൊടുത്ത് പരിഹാരത്തിനായി കാത്തിരിക്കുകയാണ് പ്രദേശവാസികൾ. അടുത്തകാലത്ത് അഞ്ചു നായകൾ പ്രസവിച്ചതിൽ ഉണ്ടായ ഇരുപതിലധികം നായകൾകൂടി വളർന്നു വരുമ്പോൾ എന്തു ചെയ്യുമെന്നറിയാതെ ഭീതിയിലാണ് പ്രദേശവാസികൾ. അപകടം ഉണ്ടാകുന്നതിന് മുന്പ് പ്രശ്നത്തിന് പരിഹാരം കാണണമെന്ന് ആക്‌ഷൻ കൗൺസിൽ ചെയർമാൻ ബിനോയ് തോമസ് ആവശ്യപ്പെട്ടു. ജൂലൈ 31 നകം പരിഹാരമുണ്ടായില്ലെങ്കിൽ കളക്ടറുടെ ചേംബറിനു മുൻപിൽ സമരത്തിനൊരുങ്ങുകയാണ് നാട്ടുകാർ.

അമൃത് പദ്ധതി നടപ്പാക്കാത്ത നഗരസഭയ്ക്ക് കാര്യക്ഷമതയില്ല: കേരളാ കോൺഗ്രസ്-എം

പയ്യാവൂർ: ശ്രീകണ്ഠപുരം നഗരസഭയുടെ സമീപ പഞ്ചായത്തുകളിലെല്ലാം ജൽജീവൻ മിഷൻ മുഖേന മുഴുവൻ വീടുകളിലും കുടിവെള്ളം എത്തിക്കാനുളള പദ്ധതി സാധ്യമാക്കിയിട്ടും ശ്രീകണ്ഠപുരം നഗരസഭാപരിധിയിൽ നടപ്പാക്കാത്തത് നഗരസഭാ ഭരണസമിതിക്ക് കാര്യക്ഷമത ഇല്ലാത്തതിനാലാണെന്ന് കേരള കോൺഗ്രസ്-എം. മുൻകാലങ്ങളിൽ മലയോര മേഖലകളിൽ മാത്രം അതിരൂക്ഷമായി അനുഭവപ്പെട്ടിട്ടുള്ള ജലക്ഷാമം ഇനിയുള്ള വേനലുകളിൽ സകല മേഖലകളെയും ബാധിക്കുമെന്ന ഭീതിയിലാണ് ജനങ്ങൾ. ജലസേചന വകുപ്പ് അമൃത് പദ്ധതി പ്രകാരം ഒട്ടുമിക്ക നഗരസഭകളിലും ശുദ്ധജലവിതരണ സംവിധാനങ്ങള്‍ മെച്ചപ്പെടുത്തുന്നതിനുള്ള നടപടികൾ സ്വീകരിച്ചപ്പോൾ ശ്രീകണ്ഠപുരം നഗരസഭ യാതൊന്നും നടപ്പാക്കിയില്ല. അമൃത് പദ്ധതി മുഖേന കേരളത്തിൽ വാട്ടർ അഥോറിറ്റിയെ ചുമതലപ്പെടുത്തി നിരവധി പദ്ധതികളാണ് നടപ്പാക്കിവരുന്നത്. ശ്രീകണ്ഠപുരത്ത് ഈവർഷം തന്നെ അമൃത് പദ്ധതി നടപ്പാക്കാൻ സാധിക്കാത്തത് നഗരസഭാ ഭരണസമിതിക്ക് ദീർഘവീക്ഷണമോ, കാര്യക്ഷമതയോ ഇല്ലാത്തതിനാലാണെന്നാണ് കേരളാ കോൺഗ്രസ്-എം മനസലാക്കുന്നത്. ചെമ്പന്തൊട്ടിയിലെ ഓഫീസിൽ ചേർന്ന യോഗം പാർട്ടി ഉന്നതാധികാര സമിതിയംഗം ജോയിസ് പുത്തൻപുര ഉദ്ഘാടനം ചെയ്തു. ജോയി കൊന്നയ്ക്കൽ അധ്യക്ഷത വഹിച്ചു. സജി കുറ്റ്യാനിമറ്റം മുഖ്യപ്രഭാഷണം നടത്തി. കെ.ടി. സുരേഷ് കുമാർ, ബിനു ഇലവുങ്കൽ, സണ്ണി മുക്കുഴി, ഷാജി കുര്യൻ, ജോർജ് മേലേട്ട്, ഷാജി കുറ്റ്യാത്ത്, കെ.ജെ.ജോയി, ബാബു തയ്യിൽ, ജോണി ഉറുമ്പുകാട്ടിൽ, ക്ലീറ്റസ് അറയ്ക്കപ്പറമ്പിൽ എന്നിവർ പ്രസംഗിച്ചു.

മുതിർന്ന പൗരന്മാർക്കുള്ള റെയിൽവേ യാത്രായിളവുകൾ പുനഃസ്ഥാപിക്കണം

മാതമംഗലം: മുതിർന്ന പൗരന്മാർക്കുള്ള റെയിൽവേ യാത്രായിളവുകൾ പുനഃസ്ഥാപിക്കണമെന്നും തദ്ദേശ ഭരണ സ്ഥാപനങ്ങൾ മുഖേന വായനശാലകളിൽ മുതിർന്ന പൗരന്മാർക്ക് വ്യായാമ ഉപകരണങ്ങൾ സ്ഥാപിക്കണമെന്നും സീനിയർ സിറ്റിസൺ ഫ്രണ്ട് വെൽഫെയർ അസോസിയേഷൻ എരമം വില്ലേജ് കൺവൻഷൻ ആവശ്യപ്പെട്ടു. പുല്ലുപാറയിൽ കെ. കൃഷ്ണൻ സ്മാരക ഹാളിൽ നടന്ന വില്ലേജ് കൺവൻഷൻ ജില്ലാ കമ്മറ്റി അംഗം വി.വി. ജനാർദനൻ ഉദ്ഘാടനം ചെയ്തു. വില്ലേജ് പ്രസിഡന്‍റ് ആർ.പി. ശ്രീധരൻ അധ്യക്ഷത വഹിച്ചു. സെക്രട്ടറി ടി.കെ.രാജൻ പ്രവർത്തന റിപ്പോർട്ട് അവതരിപ്പിച്ചു. എം.പി. ബാലകൃഷ്ണൻ, എം. ദാമോദരൻ, എൻ.വി. കരുണാകരൻ, എം.കെ. ബാലകൃഷ്ണൻ എന്നിവർ പ്രസംഗിച്ചു.

സുവർണ നേട്ടവുമായി സ്‌നോളി ലിറ്റോ

ചന്ദനക്കാംപാറ: ചൈനയിലെ തായ്‌പെയിൽ നടന്ന ലോക മാസ്റ്റേഴ്സ് ഗെയിംസിൽ ഹാമർ ത്രോയിൽ സുവർണ നേട്ടവുമായി എറണാകുളം രാമമംഗലം സ്വദേശിനിയും ചന്ദനക്കാംപാറ ചെറുപുഷ്പ ഹൈസ്കൂളിലെ 2002 എസ്എസ്എൽസി ബാച്ച് വിദ്യാർഥിനിയുമായ സ്‌നോളി ലിറ്റോ. 35 മുതൽ 40 വരെ വയസ് പ്രായമുള്ളവരുടെ വിഭാഗത്തിലാണ് സ്‌നോളിക്ക് സ്വർണ മെഡൽ ലഭിച്ചത്. സ്കൂൾ പഠനകാലത്ത് ഹാമർ ത്രോയിലും മറ്റ് വിവിധ സ്പോർട്സ് ഇനങ്ങളിലും മികച്ച വിജയങ്ങൾ സ്വന്തമാക്കിയിട്ടുള്ള കായിക താരമായിരുന്നു സ്‌നോളി. ചന്ദനക്കാംപാറ സ്വദേശനിയായ സ്‌നോളി വിവാഹത്തിന് ശേഷം ഭർത്താവ് ലിറ്റോ, മക്കളായ നഥാലിയ, ഏലിയാസ്, ചാക്കോ എന്നിവരോടൊപ്പം രാമമംഗലത്ത് സ്‌നോളി ഫിറ്റ്നെസ് എന്ന സ്ഥാപനം നടത്തിവരികയാണ്. വനിതകൾക്കു ബോഡി ഫിറ്റ്നെസ്, യോഗ എന്നിവയിൽ പരിശീലനം നൽകി വരുന്ന സ്‌നോളിയുടെ കഠിനാധ്വാനവും നിശ്ചയദാർഢ്യവുമാണ് സ്വർണമെഡൽ നേട്ടത്തിന് വഴിയൊരുക്കിയത്. 2002 എസ്എസ്എൽസി ബാച്ചിലെ സഹപാഠികൾ ചേർന്ന് സ്നോളി ലിറ്റോയെ പൊന്നാടയണിയിച്ച് മെമന്‍റോയും കാഷ് അവാർഡും നൽകി ആദരിച്ചു.

ഉമ്മൻചാണ്ടി അനുസ്മരണം സംഘടിപ്പിച്ചു

പെരുമ്പടവ്: പെരുമ്പടവ് ടൗൺ കോൺഗ്രസ് കമ്മിറ്റിയുടെ ആഭിമുഖ്യത്തിൽ ഉമ്മൻചാണ്ടി അനുസ്മരണം സംഘടിപ്പിച്ചു. യൂത്ത് കോൺഗ്രസ് ജില്ലാ സെക്രട്ടറി അക്ഷയ് പറവൂർ ഉദ്ഘാടനം ചെയ്തു. കെ.കെ. രാമചന്ദ്രൻ അധ്യക്ഷത വഹിച്ചു. തിരൂർ: കോൺഗ്രസ്‌ കല്യാട് മണ്ഡലം കമ്മിറ്റിയുടെ ആഭിമുഖ്യത്തിൽ സംഘടിപ്പിച്ച ഉമ്മൻചാണ്ടി അനുസ്മരണം തിരൂരിൽ കെപിസിസി മെംബർ മുഹമ്മദ്‌ ബ്ലാത്തൂർ ഉദ്ഘാടനം ചെയ്തു. കോൺഗ്രസ്‌ കല്യാട് മണ്ഡലം പ്രസിഡന്‍റ് പി. അയ്യൂബ് അധ്യക്ഷത വഹിച്ചു. മണ്ഡലം വൈസ് പ്രസിഡന്‍റ് രാജു മാത്യു ആമുഖ പ്രഭാഷണം നടത്തി. തടിക്കടവ്: തടിക്കടവ് മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ ഉമ്മൻചാണ്ടി അനുസ്മരണം എരുവാട്ടി കമ്യൂണിറ്റി ഹാളിൽ അനുസ്മരണ സമ്മേളനം യുഡിഎഫ് ജില്ലാ ചെയർമാൻ പി.ടി മാത്യു ഉദ്ഘാടനം ചെയ്യ്തു. ജില്ലാ ജനറൽ സെക്രട്ടറി എ.ഡി. സാബൂസ് മുഖ്യപ്രഭാഷണം നടത്തി. മണ്ഡലം പ്രസിഡന്‍റ് ജോസഫ് ഉഴുന്നുപാറ അധ്യക്ഷത വഹിച്ചു. മുതിർന്ന കോൺഗ്രസ് പ്രവർത്തകരെ ആദരിച്ചു.

സ്വകാര്യ ബസിടിച്ച് സ്കൂട്ടർ യാത്രികൻ മരിച്ചു

കണ്ണൂർ: താണയിൽ സ്വകാര്യ ബസിടിച്ച് സ്കൂട്ടർ യാത്രികനായ യുവാവിന് ദാരുണാന്ത്യം. കണ്ണോത്തുംചാൽ തുഷാരയിൽ ശ്രീജു-ഷജിന ദന്പതികളുടെ മകൻ ദേവാനന്ദ് (18) ആണ് മരിച്ചത്. ഇന്നലെ രാവിലെ 11.30 ഓടെ താണയിലായിരുന്നു അപകടം. ഗതാഗത തടസത്തെത്തുടർന്ന് കാറിന് പിറകിലായി നിർത്തിയിട്ട ദേവാനന്ദിന്‍റെ സ്കൂട്ടറിൽ കണ്ണൂർ-കൂത്തുപറന്പ് റൂട്ടിലോടുന്ന അശ്വതി ബസിടിച്ചായിരുന്നു അപകടം. ബസിടിച്ച് റോഡിലേക്ക് വീണ ദേവാനന്ദിന്‍റെ ശരീരത്തിൽ പിൻചക്രം കയറിയിറങ്ങുകയായിരുന്നു. പരിക്കേറ്റ ദേവാനന്ദിനെ ഉടൻ കണ്ണൂർ എകെജി ആശുപത്രിയിലെത്തിച്ചെങ്കിലും ഉച്ചയോടെ മരിച്ചു. ടൗൺ പോലീസ് ഇൻക്വസ്റ്റ് നടത്തിയ മൃതദേഹം പോസ്റ്റുമോർട്ടത്തിനായി ജില്ലാ ആശുപത്രി മോർച്ചറിയിലേക്ക് മാറ്റി. ഗൾഫിലുള്ള പിതാവ് നാട്ടിലേക്ക് തിരിച്ചിട്ടുണ്ട്. സല്ലേഷ് ഏക സഹോദരനാണ്.

പള്ളിക്കുന്നിൽ ബിഡിഎസ് വിദ്യാർഥിയായ സുള്ള്യ സ്വദേശി മുങ്ങിമരിച്ചു

കണ്ണൂർ: പള്ളിക്കുന്ന് തയ്യിലെ കുളത്തിൽ കുളിക്കുന്നതിനിടെ ബിഡിഎസ് വിദ്യാർഥി മുങ്ങിമരിച്ചു. കർണാടക സുള്ള്യ സ്വദേശി അഷ്തിക് രാഘവ് (19) ആണ് മുങ്ങിമരിച്ചത്. ഇന്നലെ രാവിലെ കുളത്തിലകപ്പെട്ട അഷ്തികിനെ അഗ്നിരക്ഷാസേനയും സഹപാഠികളും ചേർന്ന് പുറത്തെടുത്ത് കണ്ണൂരിലെ സ്വകാര്യ ആശുപത്രിയിലെത്തിച്ചുവെങ്കിലും മരിച്ചു. മംഗളൂരു ദേരളക്കട്ടെ എ.ബി ഷെട്ടി കോളജിൽ ഒന്നാം വർഷ ബിഡിഎസ് വിദ്യാർഥിയാണ് അഷ്തിക്. കണ്ണൂർ കൊറ്റാളി സ്വദേശിയായ സഹപാഠിയുടെ വീട്ടിൽ കുടുംബസമേതം എത്തിയതായിരുന്നു. ഇന്നലെ രാവിലെ കൂട്ടുകാർക്കൊപ്പം തയ്യിലെ കുളത്തിൽ കുളിക്കാനിറങ്ങിയപ്പോഴായിരുന്നു അപകടം.

നിർമാണത്തിലിരിക്കുന്ന മൂന്ന് വില്ലകൾ തകർന്നുവീണു

കമ്പിൽ: കന്പിലിൽ ഏറക്കാലമായി നിർമാണത്തിലിരിക്കുന്ന മൂന്ന് വില്ലകൾ തകർന്നു വീണു. കൊളച്ചേരി പാട്ടയം സ്കൂളിന് സമീപം മാളിയേക്കൽ റോഡിൽ ഖാദറിന്‍റെ ഉടമസ്ഥതയിലുള്ള സ്ഥലത്തെ പത്തു വില്ലകളിലെ മൂന്ന് എണ്ണമാണ് തകർന്നത്. വെള്ളിയാഴ്ച രാത്രിയായിരുന്നു സംഭവം. കെട്ടിടങ്ങളുടെ കോൺക്രീറ്റ് മേൽക്കുരയും ചുമരുകളും ഉൾപ്പടെയുള്ളവ തകർന്നു വീഴുകയായിരുന്നു. പത്തു വർഷം മുന്പായിരുന്നു വില്ലകളുടെ നിർമാണം ആരംഭിച്ചത്. കെട്ടിടങ്ങൾ തകർന്നത് സമീപത്തെ വീട്ടുകാർക്കും ഭീഷണി ഉയർത്തുന്നുണ്ട്. വർഷങ്ങളായി നിർമാണം നിലച്ച അവസ്ഥയിലുള്ള കെട്ടിടങ്ങൾ പൊളിച്ചു മാറ്റണമെന്ന് പ്രദേശത്തെ താമസക്കാർ ആവശ്യപ്പെട്ടു.

പട്ടുവം വില്ലേജ് ഓഫീസിന് സ്ഥലം ദാനം ചെയ്ത് കണ്ണൂര്‍ രൂപത

കണ്ണൂര്‍: പരിമിതികളിൽ വീര്‍പ്പുമുട്ടുന്ന പട്ടുവം വില്ലേജ് ഓഫീസിന്‍റെ പ്രവര്‍ത്തനം സുഗമമാക്കാന്‍ ആവശ്യമായ സ്ഥലം ദാനംചെയ്ത് കണ്ണൂര്‍ രൂപത. പത്ത് സെന്‍റ് സ്ഥലമാണ് കണ്ണൂര്‍ രൂപത ദാനമായി നല്‍കിയത്. ഒന്നര സെന്‍റ് സ്ഥലത്തെ പഴയ കെട്ടിടത്തിലാണ് നിലവിൽ വില്ലേജ് ഓഫീസ് പ്രവര്‍ത്തിച്ചിരുന്നത്. അതിനാല്‍ റിക്കോര്‍ഡുകള്‍ സൂക്ഷിക്കാന്‍പോലുമിടമില്ലാതെ ഞെരുങ്ങുകയായിരുന്നു ജീവനക്കാര്‍. പരിമിതികള്‍ വിവിധ ആവശ്യങ്ങളുമായി വരുന്ന ജനങ്ങളേയും ബുദ്ധിമുട്ടിച്ചിരുന്നു. വില്ലേജ് ഓഫീസിന് വേറെ സ്ഥലം കിട്ടാത്ത അവസ്ഥ അന്നത്തെ വില്ലേജ് ഓഫീസര്‍ സി.റീജയാണ് കണ്ണൂര്‍ രൂപതയുടെ ശ്രദ്ധയില്‍പ്പെടുത്തിയത്. മുന്‍ ആര്‍ഡിഒ ഇ.പി. മേഴ്‌സിയും ഇക്കാര്യം രൂപത ബിഷപ് ഡോ.അലക്‌സ് വടക്കുംതലയുടെ മുന്നില്‍ അവതരിപ്പിച്ചതോടെ രൂപത അധികൃതര്‍ കൂടിച്ചേര്‍ന്ന് സ്ഥലം ദാനംചെയ്യാനുള്ള തീരുമാനമെടുക്കുകയായിരുന്നു. ബിഷപ് ഡോ. അലക്സ് വടക്കുംതല സ്ഥലത്തില്ലാതിരുന്നിട്ടും തുടര്‍നടപടികള്‍ താമസിക്കാതിരിക്കാൻ കഴിഞ്ഞ ദിവസം തന്നെ കേരള ഗവര്‍ണറുടെ പേരില്‍ പത്ത് സെന്‍റ് സ്ഥലം രജിസ്റ്റര്‍ ചെയ്യുകയായിരുന്നു. കണ്ണൂര്‍ ബിഷപ് ഹൗസില്‍ നടന്ന ചടങ്ങില്‍ സഹായ മെത്രാന്‍ ഡോ. ഡെന്നിസ് കുറുപ്പശേരി കണ്ണൂര്‍ എഡിഎം കലാ ഭാസ്‌കറിന് ആധാരം കൈമാറി. ജനോപകാരപ്രദവും സേവനപരവുമായ ദൗത്യം ക്രൈസ്തവസഭ തുടരുന്നതിന്‍റെ ഭാഗമായാണ് വിലയേറിയ സ്ഥലമായിട്ടും രൂപത ഇത് സര്‍ക്കാരിന് ദാനമായി നല്‍കുന്നതെന്ന് ബിഷപ് പറഞ്ഞു. വികാരി ജനറാൾ മോൺ. ക്ലാരന്‍സ് പാലിയത്ത് അധ്യക്ഷത വഹിച്ചു. തഹസില്‍ദാര്‍ പി. സജീവന്‍, മുന്‍ ആര്‍ഡിഒ ഇ.പി. മേഴ്‌സി, മുന്‍ പട്ടുവം വില്ലേജ് ഓഫീസറും ഡെപ്യൂട്ടി തഹസില്‍ദാറുമായ സി.റീജ, രൂപത പ്രൊക്കുറേറ്റര്‍ ഫാ. ജോര്‍ജ് പൈനാടത്ത്, ഫാ. വിപിന്‍ വില്ല്യം, ഫാ. സുദീപ് മുണ്ടയ്ക്കല്‍, പട്ടുവം വില്ലേജ് അസിസ്റ്റന്‍റ് പി.വി. വിനോദ് കുമാര്‍ എന്നിവര്‍ ചടങ്ങില്‍ പങ്കെടുത്തു.

കോഴി പൊല്ലാപ്പ് ഒടുവിൽ‌ കോടതിയിൽ

പെരിങ്ങോം: ഒരു വർഷം മുന്പുള്ള വിഷുത്തലേന്ന് കോഴിയെ പിടിച്ചതിനെ തുടര്‍ന്നുണ്ടായ പൊല്ലാപ്പുകള്‍ കോടതി കയറുന്നു. തർക്കം അടിപിടിയിൽ കലാശിച്ചതിനെ തുടർന്നാണ് കേസ് കോടതിയിലെത്തിയത്. കഴിഞ്ഞ വിഷുവിന്‍റെ തലേദിവസമായ ഏപ്രില്‍ 13ന് രാവിലെയാണു പെരിങ്ങോം കരിമണല്‍പ്പാറയില്‍ കേസിനാസ്പദമായ സംഭവം. കോഴികളെ വളര്‍ത്തുന്ന അണ്ണാച്ചി ഹൗസില്‍ മുഹമ്മദ് റാഷിദിന്‍റെ കോഴികളെ തമിഴ്‌നാട് സ്വദേശിയും സമീപവാസിയുമായ ദുരൈ പിടിച്ചതിനെ തുടര്‍ന്നാണ് പ്രശ്‌നങ്ങളുണ്ടായത്. കോഴിക്കൂട്ടില്‍നിന്ന് കോഴികളെ പിടിക്കുന്നത് കണ്ട ഉടമ തടയാന്‍ ശ്രമിച്ചപ്പോള്‍ തള്ളിത്താഴെയിട്ട് മേല്‍ച്ചുണ്ടുള്‍പ്പെടെയുള്ള കവിളിന്‍റെ ഭാഗവും മൂക്കിന്‍റെ വലതുഭാഗവും കടിച്ചുപറിച്ചുവെന്ന പരാതിയില്‍ ദുരൈക്കെതിരെ പെരിങ്ങോം പോലീസ് കേസെടുത്തു. സംഭവത്തിന് ശേഷം ഇത്രയും നാൾ താൻ ചികിത്സിയിലായിരുന്നതിനാലാണു പരാതി നല്‍കാന്‍ താമസിച്ചതെന്ന് ചൂണ്ടിക്കാണിച്ച് ജില്ലാ പോലീസ് മേധാവിക്ക് നല്‍കിയ പരാതിയെ തുടര്‍ന്നാണു കേസെടുത്തത്. അതേസമയം കോഴിയെ പിടിച്ചതിനെ തുടര്‍ന്ന് കമ്പിവടികൊണ്ട് അടിച്ചു പരിക്കേല്‍പ്പിച്ചതായുള്ള ദുരൈയുടെ പരാതിയില്‍ പെരിങ്ങോം പോലീസ് നേരത്തെ മുഹമ്മദ് റാഷിദിനെതിരെ കേസെടുത്തിരുന്നു. വിലപറഞ്ഞുറപ്പിച്ച കോഴിയെ ആളില്ലാത്ത സമയത്ത് പിടിച്ചതിനെ തുടര്‍ന്ന് കമ്പിവടികൊണ്ട് അടിച്ചുവെന്ന പരാതിയിലാണു കേസെടുത്തത്. ഇപ്പോള്‍ കോഴിയുടെ ഉടമയുടെ പരാതിയിലും കേസെടുത്തതോടെയാണ് കോഴിവിഷയം കോടതി കയറാന്‍ തുടങ്ങുന്നത്.

പീഡന വാര്‍ത്തയ്ക്ക് ലൈക്കടിച്ചതിന് യുവതിയെ വീട്ടിൽ കയറി മർദിച്ചു

പയ്യന്നൂര്‍: സമൂഹമാധ്യമത്തിൽ വന്ന പീഡന വാര്‍ത്തയ്ക്ക് ലൈക്ക് നൽകിയ വിരോധത്തിൽ പീഡനക്കേസിലെ പ്രതി യുവതിയെ വീട്ടിൽ കയറി മർദിച്ചു. മാട്ടൂൽ സ്വദേശിയായ യുവതിക്കാണ് മർദനമേറ്റത്. യുവതിയുടെ പരാതിയിൽ വിളയാങ്കോട്ടെ രുജിത്തിനെതിരേ പയ്യന്നൂർ പോലീസ് കേസെടുത്തു. കഴിഞ്ഞ വ്യാഴാഴ്ച രാത്രി കോറോം കൊക്കോടാണ് പരാതിക്കാസ്പദമായ സംഭവം. കൊക്കോടുള്ള അമ്മയുടെ വീട്ടിലായിരുന്ന തന്നെ വീട്ടിൽ കയറി അടിക്കുകയും തല ജനലിനിടിച്ച് പരിക്കേൽപ്പിക്കുകയുമായിരുന്നുവെന്നാണ് പരാതി. മർദനം തടയാൻ ശ്രമിച്ച ഭർത്താവിനെയും മർദിച്ചതായും പറയുന്നു. പോലീസ് കേസെടുത്ത് അന്വേഷണം ആരംഭിച്ചു.

സ്വർണവും പണവും നിക്ഷേപമായി സ്വീകരിച്ച് വഞ്ചന: ജ്വല്ലറി ഉടമയ്ക്കെതിരേ കേസ്

കണ്ണൂർ: പണവും സ്വർണവും നിക്ഷേപമായി നൽകിയാൽ ബാങ്ക് നിരക്കിനേക്കാളും പലിശയും ലാഭവും നൽകുമെന്ന് വാഗ്ദാനം ചെയ്ത് നിക്ഷേപം സ്വീകരിച്ചു വഞ്ചിച്ചെന്ന പരാതികളിൽ ജ്വല്ലറി ഉടമയ്ക്കെതിരേ കേസ്. വളപട്ടണം കീരിയാട് സ്വദേശിനി എൻ.വി. ഷാഹിന, ടോൾ ബൂത്ത് സ്വദേശിനി കെ.പി. രസ്ന എന്നിവരുടെ പരാതിയിൽ പാപ്പിനിശേരി ആയിഷ ഗോൾഡ് ഉടമ അഷ്റഫിനെതിരെയാണ് വളപട്ടണം പോലീസ് കേസെടുത്തത്. ഒരുലക്ഷം രൂപ നിക്ഷേപിച്ചാൽ പ്രതിമാസം 900 രൂപ പലിശയും ഒരുപവൻ സ്വർണത്തിന് 100 രൂപ ഡിവിഡന്‍റും നൽകാമെന്നു പറഞ്ഞാണ് നിക്ഷേപം സ്വീകരിച്ചത്. എന്നാൽ പലിശയോ ഡിവിഡന്‍റോ നിക്ഷേപമോ തിരിച്ചുനൽകാതെ വഞ്ചിച്ചുവെന്നാണ് പരാതികൾ. 2019 ജൂലൈ 27 മുതൽ പലതവണകളിലായി നാലുലക്ഷം രൂപയും 102.11 ഗ്രാം സ്വർണവും നിക്ഷേപമായി സ്വീകരിച്ച് വഞ്ചിച്ചതായാണ് ഷാഹിന നൽകിയ പരാതിയിൽ പറയുന്നത്. തന്‍റെ ഉമ്മയിൽ നിന്ന് 2014 നവംബർ 21 മുതൽ പലതവണകളായി മൂന്നു ലക്ഷം രൂപ നിക്ഷേപം സ്വീകരിച്ച് വഞ്ചിച്ചെന്നാണ് കെ.പി. രസ്ന നൽകിയ പരാതിയിൽ പറയുന്നത്.

വീട്ടിൽ അതിക്രമിച്ചു കയറി സ്വർണാഭരണം കവർന്നു

കണ്ണൂർ: തനിച്ചു താമസിക്കുന്ന വയോധികന്‍റെ വീട്ടിൽ അതിക്രമിച്ചു കയറിയ ആൾ കഴുത്തിലുണ്ടായിരുന്ന മൂന്നുപവൻ സ്വർണമാല പൊട്ടിച്ചു കൊണ്ടുപോയതായി പരാതി. തളാപ്പ് ചിന്മയ വിമൻസ് കോളജിനു സമീപത്തെ ആനന്ദിൽ എസ്.എൻ. മൂർത്തിയുടെ (74) പരാതിയിൽ താഹ എന്നയാൾക്കെതിരേയാണ് ടൗൺ പോലീസ് കേസെടുത്ത്. ഇക്കഴിഞ്ഞ മാർച്ച് 27ന് വൈകുന്നേരം നാലിനും 4.15നും ഇടയിലായിരുന്നു സംഭവമെന്ന് പരാതിയിൽ പറയുന്നു. സമാന രീതിയിലുള്ള മറ്റൊരു കവർച്ച കേസിൽ പോലീസ് പ്രതിയെ അറസ്റ്റ് ചെയ്തിരുന്നു. പോലീസ് ചോദ്യം ചെയ്തപ്പോൾ തളാപ്പിലുള്ള വീട്ടിൽ കയറി മാല പൊട്ടിച്ചിരുന്നതായി സമ്മതിച്ചിരുന്നു. ഇതേതുടർന്ന് മൂർത്തി പ്രതിയ തിരിച്ചറിയുകയും തുടർന്ന് പരാതി നൽകുകയുമായിരുന്നു. പ്രതി റിമാൻഡിലാണ്.

സ്‌കൂളിന് സമീപത്തെ ട്രാൻസ്ഫോർമറും വൈദ്യുത ലൈനും മാറ്റി സ്ഥാപിക്കും

ഉളിക്കൽ: പരിക്കളം ശാരദ വിലാസം എയുപി സ്‌കൂളിന് സമീപം അപകടാവസ്‌ഥയിലായ ട്രാൻസ്ഫോർമറും ഹൈ ടെൻഷൻ വൈദ്യുത ലൈനും മാറ്റി സ്‌ഥാപിക്കുന്നതിന് കെഎസ്ഇബി ഉദ്യോഗസ്ഥർ തീരുമാനിച്ചു. പത്രവാർത്തയെ തുടർന്നാണ് നടപടി. അസി. എക്‌സിക്യൂട്ടിവ് എൻജിനിയർ ലിജോ തോമസ്, അസി. എൻജിനിയർ പി.ഇ. ധനേഷ്, സബ് എൻജിനിയർ സന്തോഷ്കുമാർ എന്നിവരുടെ നേതൃത്വത്തിലുള്ള സംഘം സ്‌ഥലം സന്ദർശിച്ച് അപകടാവസ്‌ഥ ബോധ്യപ്പെട്ടതിനെ തുടർന്നായിരുന്നു തീരുമാനം. സ്‌കൂൾ മുറ്റത്തേക്ക് ചരിഞ്ഞ് നിൽക്കുന്ന ഹൈടെൻഷൻ ലൈൻ അടുത്ത ദിവസം മാറ്റി സ്‌ഥാപിക്കും. സ്‌കൂൾ മാനേജ്‌മെന്‍റ് പ്രതിനിധികളുമായി ചർച്ച ചെയ്‌ത്‌ സ്‌ഥലം കണ്ടെത്തിയ ശേഷം എത്രയും പെട്ടന്ന് ട്രാൻസ്ഫോർമറും മാറ്റി സ്ഥാപിക്കുമെന്ന് ഉദ്യോഗസ്‌ഥ സംഘം അറിയിച്ചു. എക്സിക്യൂട്ടീവ് എൻജിനിയറെ യൂത്ത് കോൺ. ഉപരോധിച്ചു യൂത്ത് കോൺഗ്രസ് ഇരിക്കൂർ നിയോജക മണ്ഡലം കമ്മറ്റിയുടെ ആഭിമുഖ്യത്തിൽ ഉളിക്കൽ കെഎസ്ഇബി എക്സിക്യുട്ടീവ് എൻജിനിയറെ ഉപരോധിച്ചു. ശാരദവിലാസം സ്കൂൾ പരിസരത്തെ അപകടകരമായ രീതിയിലുള്ള ട്രാൻസ്ഫോർമറും തൂണും അടിയന്തരമായി മാറ്റി സ്ഥാപിക്കണമെന്ന് ആവശ്യപ്പെട്ടായിരുന്നു ഉപരോധം. ചൊവ്വാഴ്ചക്കുള്ളിൽ തൂണുകൾ മാറ്റി സ്ഥാപിക്കുമെന്ന് ഉറപ്പ് നൽകിയതോടെ ഒന്നരമണിക്കൂർ നീണ്ടുനിന്ന ഉപരോധം അവസാനിപ്പിച്ചു. യൂത്ത് കോൺഗ്രസ് ഇരിക്കൂർ നിയോജക മണ്ഡലം പ്രസിഡന്‍റ് പ്രിൻസ് പി. ജോർജ്, ജനറൽ സെക്രട്ടറി രഞ്ജി അറബി, സെക്രട്ടറിമാരായ അജിത് മുരളി, ആൽവിൻ ജോസഫ്, അക്ഷയ് തങ്കച്ചൻ, അലൻ ജോസഫ്, ലിഞ്ചോ ജോർജ് എന്നിവർ ഉപരോധ സമരത്തിന് നേതൃത്വം നൽകി.

നഷ്ടപ്പെട്ട മൊബൈൽ ഫോണുകൾ വീണ്ടെടുത്ത് ഉടമകൾക്ക് നല്കി പരിയാരം പോലീസ്

പരിയാരം: നഷ്ട‌പ്പെട്ട മൊബൈൽ ഫോണുകൾ അന്വേഷണത്തിലൂടെ വീണ്ടെടുത്ത് ഉടമകൾക്ക് കൈമാറി പരിയാരം പോലീസ്. പരിയാരം സിഐ രാജീവൻ വലിയവളപ്പിലിന്‍റെ നേതൃത്വത്തിലാണ് മൂന്ന് മൊബെൽ ഫോബൈൽ ഫോണുകൾ കണ്ടെടുത്തത്. തുടർന്ന് ഉടമകൾക്ക് ഫോണുകൾ തിരിച്ചുനൽകി. ചെറുതാഴത്തെ രാജീവൻ, പിലാത്തറയിലെ മുഹമ്മദ് റൗഷാനി, മുനീർ എന്നിവർക്കാണ് ഫോണുകൾ തിരിച്ചു നൽകിയത്. ഫോൺ നഷ്‌ടപ്പെട്ടവർ പോലീസിൽ പരാതി നൽകിയതിനെ തുടർന്ന് നടത്തിയ അന്വേഷണത്തിലാണ് ഫോണുകൾ കണ്ടെത്തിയത്. രാജീവന്‍റെ ഫോൺ ഉത്തർപ്രദേശ് സ്വദേശിയായ ഒരാൾക്ക് ലഭിക്കുകയും അയാൾ അത് ഉപയോഗിച്ചുവരികയായിരുന്നു. മുഹമ്മദ് റൗഷാനിയുടെ ഫോൺ ശ്രീകണ്ഠപുരത്തെ ഒരു ഷോപ്പിൽ ആരോ വിറ്റിരുന്നു. അവിടെ നിന്നാണ് അത് കണ്ടെടുത്തത്. മുനീറിന്‍റെ ഫോൺ തളിപ്പറമ്പിലെ ഒരു ഷോപ്പിലാണ് വിറ്റിരുന്നത്. എഎസ്ഐ ജയേഷ്, സീനിയർ സിപിഒ, പി.കെ.ഗിരീഷ് എന്നിവരും അന്വേഷണ സംഘത്തിൽ ഉണ്ടായിരുന്നു.

ബസിന് പിന്നിൽ പിക്കപ്പ് ജീപ്പിടിച്ച് ഡ്രൈവർക്ക് പരിക്ക്

കൊട്ടിയൂർ: കൊട്ടിയൂർ നീണ്ടുനോക്കിയിൽ കെഎസ്ആർടിസി ബസിനു പിന്നിൽ പിക്കപ്പ് ജീപ്പിടിച്ച് അപകടം. മാനന്തവാടിയിൽ നിന്ന് ഇരിട്ടിയിലേക്ക് പോയ കെഎസ്ആർടിസി ബസിന്‍റെ പിന്നിലാണ് ഇന്നലെ വൈകുന്നേരം പിക്കപ്പ് ജീപ്പ് ഇടിച്ചത്. നീണ്ടുനോക്കി ടിപി സ്റ്റോഴ്സിന് എതിർവശം നിർത്തി ആളുകളെ കയറ്റുന്നതിനിടയിൽ ആയിരുന്നു പിക്കപ്പ് ബസിന്‍റെ പിന്നിൽ ഇടിച്ച് അപകടം ഉണ്ടായത്. ജീപ്പ് ഡ്രൈവർ ചപ്പമല സ്വദേശി കരിമ്പനക്കൽ റഷീദിന് പരിക്കേറ്റു. കൊട്ടിയൂർ പ്രാഥമിക ആരോഗ്യ കേന്ദ്രത്തിലെ പ്രാഥമിക ശുശ്രൂഷ ശേഷം മാനന്തവാടി മെഡിക്കൽ കോളജിലേക്ക് കൊണ്ടുപോയി.

സാധാരണക്കാരായ ജനങ്ങളെ ചേർത്തുപിടിക്കണം: ഷാഫി പറമ്പിൽ

ന്യൂമാഹി: സാധാരണക്കാരായ ജനങ്ങളുടെ പ്രശ്നങ്ങളും ദുരിതങ്ങളും മനസിലാക്കി അവരെ ചേർത്തുപിടിക്കാൻ പൊതുപ്രവർത്തകർക്ക് കഴിയണമെന്ന് കെപിസിസി വർക്കിംഗ് പ്രസിഡന്‍റ് ഷാഫി പറമ്പിൽ എംപി. ന്യൂമാഹി പരിമഠത്ത് നവീകരിച്ച കോൺഗ്രസ് ഓഫീസിന്‍റെ ഉദ്ഘാടനം നിർവഹിക്കുകയായിരുന്നു അദ്ദേഹം. കോൺഗ്രസ് ന്യൂമാഹി മണ്ഡലം പ്രസിഡന്‍റ് വി.കെ. അനീഷ് ബാബു അധ്യക്ഷത വഹിച്ചു. രമേശ് പറമ്പത്ത് എംഎൽഎ മുഖ്യാതിഥിയായി. കോൺഗ്രസ് ജില്ലാ പ്രസിഡന്‍റ് മാർട്ടിൻ ജോർജ് മുഖ്യപ്രഭാഷണം നടത്തി.

ലഹരി വിമുക്ത കണ്ണൂര്‍: അധ്യാപകര്‍ക്ക് പരിശീലനം നല്‍കി

കണ്ണൂർ: നശാമുക്ത് ഭാരത് അഭിയാന്‍ ലഹരിമുക്ത കണ്ണൂര്‍ കാമ്പയിന്‍റെ ഭാഗമായി ജില്ലാ ഭരണകൂടം, ജില്ലാ സാമൂഹ്യനീതി ഓഫീസ് എന്നിവയുടെ സംയുക്താഭിമുഖ്യത്തില്‍ വിവിധ വകുപ്പുകളുടെ സഹകരണത്തോടെ ജില്ലയിലെ ഹയര്‍ സെക്കന്‍ഡറി അധ്യാപകര്‍ക്കും സൗഹൃദ കോ-ഓര്‍ഡിനേറ്റര്‍മാര്‍ക്കുമുള്ള ഏകദിന ജില്ലാതല പരിശീലന പരിപാടി സംഘടിപ്പിച്ചു. ജില്ലാ പോലീസ് മേധാവി പി. നിതിന്‍ രാജ് ഉദ്ഘാടനം ചെയ്തു. ജില്ലാ പഞ്ചായത്ത് വീഡിയോ കോണ്‍ഫറന്‍സ് ഹാളില്‍ നടന്ന പരിപാടിയില്‍ ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യന്‍ അധ്യക്ഷത വഹിച്ചു. ജില്ലാ കളക്ടര്‍ അരുണ്‍ കെ. വിജയന്‍, എക്‌സൈസ് ഡപ്യൂട്ടി കമ്മീഷണര്‍ പി.കെ. സതീഷ് കുമാര്‍, ഹയര്‍ സെക്കൻഡറി ജില്ലാ കോ-ഓര്‍ഡിനേറ്റര്‍ വി. സ്വാതി, എന്‍എംബിഎ ജില്ലാ കോ-ഓര്‍ഡിനേറ്റര്‍ കെ. ബേബി ജോണ്‍ എന്നിവർ പ്രസംഗിച്ചു. "മയക്കുമരുന്ന് ദുരുപയോഗവും കൗമാര അതിക്രമവും; നിയമങ്ങളും പ്രായോഗിക സമീപനവും' എന്ന വിഷയത്തില്‍ പാനല്‍ ലോയറും ജെസിഐ ട്രെയിനറുമായ കെ.എ പ്രദീപ്, "ലഹരി ഉപയോഗം; നേരത്തെയുള്ള തിരിച്ചറിയലും ശാസ്ത്രീയ ഇടപെടലും' എന്ന വിഷയത്തില്‍ ഡിഎംഎച്ച്പി സൈക്യാട്രിക് സോഷ്യല്‍ വര്‍ക്കര്‍ കെ.വി. നിഖിത വിനോദ് എന്നിവര്‍ ക്ലാസെടുത്തു. "ഹയര്‍ സെക്കൻഡറി സ്‌കൂളുകളിലെ ലഹരി ഉപയോഗം തടയാനുള്ള കര്‍മ പരിപാടികള്‍' എന്ന വിഷയത്തില്‍ നടന്ന പാനല്‍ ചര്‍ച്ചയില്‍ കെ.എ. പ്രദീപ്, കെ.വി. നിഖിത വിനോദ്, വിമുക്തി മിഷന്‍ ജില്ലാ കോ-ഓര്‍ഡിനേറ്റര്‍ എം. സുജിത്ത്, സിജി ആന്‍ഡ് എസി സെല്‍ ജില്ലാ കോ-ഓര്‍ഡിനേറ്റര്‍ ആര്‍.റീജ എന്നിവര്‍ പങ്കെടുത്തു. ജില്ലാ സാമൂഹ്യനീതി ഓഫീസര്‍ പി. ബിജു മോഡിറേറ്ററായി.

മലയോരത്തിന് മറക്കാനാകാത്ത മണ്ണൂരച്ചൻ ഇനി ഓർമ

കൊട്ടിയൂർ: കുടിയേറ്റ കാലത്തിനുശേഷം നാടിന്‍റെ വികസനത്തിന് പ്രവർത്തിച്ചവരിൽ പ്രമുഖനായിരുന്നു ഇന്നലെ അന്തരിച്ച ഫാ. തോമസ് മണ്ണൂർ. മലയോര വികസനത്തിൽ സുപ്രധാന മുന്നേറ്റമായി കണക്കാക്കുന്ന കൊട്ടിയൂർ ഇമിഗ്രേഷൻ ജൂബിലി മെമ്മോറിയൽ ഹൈസ്കൂൾ (ഐജെഎംഎച്ച്എസ്) 50 വർഷം മുന്പ് സ്ഥാപിച്ചത് മണ്ണൂരച്ചൻ ആയിരുന്നു. കുടിയേറ്റ ജനതയുടെ ഉന്നത പഠനമോഹങ്ങൾക്ക് പ്രതീക്ഷ നൽകി സ്ഥാപിതമായ സ്കൂൾ ഇന്ന് ഹയർ സെക്കൻഡറി സ്കൂളാണ്. മലയോരത്തെ മറ്റൊരു വികസന മുന്നേറ്റമായിരുന്നു കൊട്ടിയൂരിലെ സർക്കാർ സിസ്പെൻസറി. പുളിയമ്മാക്കൽ പി.കെ. ജോസഫ് സൗജന്യമായി നൽകിയ സ്ഥലത്ത് ജനകീയ കമ്മിറ്റിയുടെ നേതൃത്വത്തിൽ കെട്ടിടം നിർമിച്ച് കിടക്കളും ആശുപത്രി ഉപകരണങ്ങളും സഹിതം ഒരുക്കി സർക്കാരിന് കൈമാറിയതാണ്. ആ ജനകീയ കമ്മിറ്റിയുടെ ട്രഷറർ മണ്ണൂരച്ചനായിരുന്നു. ഇന്ന് ആഡിസ്പൻസറി കുടുംബാരോഗ്യ കേന്ദ്രമാണ്. മികച്ച കുടുംബാരോഗ്യ കേന്ദ്രത്തിന് കേന്ദ്ര സർക്കാർ ഏർപ്പെടുത്തിയ അവാർഡും ഈ കുടുംബാരോഗ്യ കേന്ദ്രത്തിന് പിന്നീട് ലഭിച്ചിട്ടുണ്ട്. ഇതിനെല്ലാം പുറമേ കൊട്ടിയൂർ, കേളകം, കണിച്ചാർ പഞ്ചായത്തുകളിലെ പൊതു വികസന പ്രവർത്തനങ്ങളിലെല്ലാം മണ്ണൂരച്ചൻ പങ്കാളിയായിരുന്നു. കൊട്ടിയൂർ സെന്‍റ് സെബാസ്റ്റ്യൻസ് പള്ളിയോട് ചേർന്ന് നടത്തിവന്നിരുന്ന സമാന്തര വിദ്യാഭ്യാസ സ്ഥാപനമായിരുന്ന യുവദീപ്തി കോളജ് വിപുലീകരിച്ചതും മണ്ണൂരച്ചനായിരുന്നു. ആറു വർഷക്കാലം കൊട്ടിയൂർ പള്ളി വികാരിയായി സേവനം ചെയ്തു. മാനന്തവാടി രൂപതയിലെ വൈദികനായിരുന്ന മണ്ണൂരച്ചൻ തമിഴ്നാട്ടിലും വടക്കേ ഇന്ത്യൻ സംസ്ഥാനങ്ങളിലുമുള്ള രൂപതകളിലും സേവനം ചെയ്തിട്ടുണ്ട്.

ഇരിട്ടി പുതിയ ബസ് സ്റ്റാൻഡിലെ കാത്തിരിപ്പു കേന്ദ്രം ബസിടിച്ച് തകർന്നു

ഇരിട്ടി: ഇരിട്ടി പുതിയ ബസ്‌സ്റ്റാൻഡിലെ കാത്തിരിപ്പു കേന്ദ്രം ബസ് ഇടിച്ചു തകർന്നു. ശനിയാഴ്ച രാവിലെ 8.15 ആയിരുന്നു സംഭവം. സ്റ്റാൻഡിൽ എത്തിയ ഹോളിമരിയ ബസ് പിന്നോട്ടെടുക്കുമ്പോൾ ബസ് കാത്തിരിപ്പ് കേന്ദ്രത്തിന്‍റെ തൂണിൽ തട്ടുകയായിരുന്നു. ഇതോടെ ഇരുമ്പു തൂണിൽ നിർമിച്ച ബസ് കാത്തിരിപ്പ് കേന്ദ്രം ഒരു ഭാഗത്തേക്ക് ചെരിഞ്ഞു നിൽക്കുന്ന അവസ്ഥയിലാണ്. ഈസമയം കാത്തിരിപ്പ് കേന്ദ്രത്തിൽ ആരുമുണ്ടായിരുന്നില്ല. വിവരമറിഞ്ഞ് ഇരിട്ടി നഗരസഭ അധികൃതരും പോലീസും സ്ഥലത്തെത്തി. ഏതുനേരത്തും തകർന്നു വീഴാവുന്ന നിലയിൽ ചരിഞ്ഞു നിൽക്കുന്ന കാത്തിരിപ്പ് കേന്ദ്രം അപകട ഭീഷണി ഉയർത്തുകയാണ്.

തപാൽ വകുപ്പിന്‍റെ അവഗണനയ്ക്കെതിരേ ഒറ്റയാൾ സമരം

ഇരിട്ടി: താത്കാലിക ജീവനക്കാരോടുള്ള തപാൽ വകുപ്പിന്‍റെ അവഗണനയ്ക്കെതിരേ വിരമിച്ച താത്കാലിക ജീവനക്കാരൻ കെ.എം. കുര്യൻ ഒറ്റയാൾ സമരം നടത്തി. പിരിഞ്ഞു പോകുന്ന ജീവനക്കാർക്ക് യാതൊരു ആനുകൂല്യവും ലഭിക്കാത്തതിൽ പ്രതിഷേധിച്ചായിരുന്നു സമരം. എടൂർ ബസ്‌സ്റ്റാൻഡിൽ പ്രവർത്തിക്കുന്ന പായം മെയിൻ പോസ്റ്റ് ഓഫിസിന് സമീപത്ത് രാവിലെ 8.30ന് ആരംഭിച്ച സമരം ഉച്ചയ്ക്ക് 2.30ന് അവസാനിച്ചു. ജോസഫ് പാരിക്കാപള്ളി, വിബിൻ തോമസ്, ജോസഫ് ചെമ്പോത്തനാടി, ടോമി തറയിൽ, സിറിയക്ക് പാറയ്ക്കൽ. കെ.കെ. വിനോദ്, ഡെൽവിൻ ടോമി, ബിനോയി പത്തുപള്ളിൽ എന്നിവർ സമരത്തിന് അഭിവാദ്യം അർപ്പിച്ചു.

എകെഎസ്ടിയു കളക്ടറേറ്റ് മാർച്ച് നടത്തി

കണ്ണൂർ: ഓൾ കേരള സ്കൂൾ ടീച്ചേഴ്സ് യൂണിയന്‍റെ (എകെഎസ്ടിയു) നേതൃത്വത്തിൽ കളക്ടറേറ്റ് മാർച്ചും ധർണയും സംഘടിപ്പിച്ചു. ജനറൽ സെക്രട്ടറി ഒ.കെ. ജയകൃഷ്ണൻ ഉദ്ഘാടനം ചെയ്തു. പന്ത്രണ്ടാം ശമ്പള പരിഷ്കരണം ഉടൻ പ്രഖ്യാപിച്ചു നടപ്പിലാക്കുക, പങ്കാളിത്ത പെൻഷൻ പിൻവലിക്കുക, സമഗ്ര ശിക്ഷാ കേരളയെ സംരക്ഷിക്കുക, അധ്യാപിക തസ്തികകൾ അംഗീകരിക്കാൻ സത്വര നടപടികൾ സ്വീകരിക്കുക, എല്ലാ പ്രൈമറി വിദ്യാലയങ്ങളിലും പ്രീപ്രൈമറി ആരംഭിക്കുക, വിദ്യാലയ വർഷം ചേരുന്ന മുഴുവൻ കുട്ടികളുടെയും എണ്ണം അധ്യാപിക തസ്തികകൾക്ക് പരിഗണിക്കുക, മതിയായ എണ്ണം കുട്ടികളില്ലാത്ത പേരിൽ തടഞ്ഞുവച്ച മുഴുവൻ നിയമനങ്ങളും അംഗീകരിക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു സമരം. ജില്ലാ വൈസ് പ്രസിഡന്‍റ് ശൈലജ വരയൽ അധ്യക്ഷത വഹിച്ചു. വി. രാധാകൃഷ്ണൻ, എസ്.എ. ജീവാനന്ദ്, ടി. ലിജിൻ, പി.കെ. സബിത്ത്, റോയ് ജോസഫ്, കെ.കെ. ആദർശ്, എം. മഹേഷ് കുമാർ, എം. സുനിൽകുമാർ, വി.വി. ബിജിത എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]