ADVERTISEMENT

ADVERTISEMENT

പ്രീ-സ്‌കൂള്‍ ബ്ലോക്ക് ഉദ്ഘാടനം ചെയ്തു

പാമ്പാടി: ക്രോസ് റോഡ്സ് സ്‌കൂളില്‍ പുതുതായി നിര്‍മിച്ച പ്രീ-സ്‌കൂള്‍ ബ്ലോക്ക് കിളിക്കൂട് നാടിനു സമര്‍പ്പിച്ചു. മന്ത്രി വി.എന്‍. വാസവന്‍ ഉദ്ഘാടനം ചെയ്തു. സ്‌കൂളില്‍ ദീര്‍ഘകാലം സേവനം ചെയ്ത അധ്യാപകര്‍ക്കും അനധ്യാപകര്‍ക്കും യാത്രയയപ്പും നല്‍കി.

സ്‌കൂള്‍ അഡ്മിനിസ്‌ട്രേറ്റര്‍ കുഞ്ഞമ്മ ഗബ്രിയേല്‍, ഡയറക്ടര്‍ ലിസ് ഗബ്രിയേല്‍, പഞ്ചായത്ത് പ്രസിഡന്‍റുമാരായ അമ്പിളി മാത്യു, ഡാലി റോയ്, ബ്ലോക്ക് പഞ്ചായത്തംഗം ടി.എം. ജോര്‍ജ്, പഞ്ചായത്തംഗങ്ങളായ ടി.ജി. മോഹനന്‍, ഷേര്‍ലി തര്യന്‍, അസി. എഡ്യുക്കേഷനല്‍ ഓഫീസര്‍ കെ.എസ്. ബിജുമോന്‍, സ്‌കൂള്‍ രക്ഷാധികാരി ജോസ് പായിക്കാട്, പിടിഎ പ്രസിഡന്‍റ് ടി.ബി. സുഭാഷ്, പ്രിന്‍സിപ്പല്‍ എസ്. അഭിലാഷ്, വൈസ് പ്രിന്‍സിപ്പല്‍ ബി. ശ്രീകുമാരി എന്നിവര്‍ പ്രസംഗിച്ചു. മൂന്നു നിലകളിലായി 12 സ്മാര്‍ട്ട് ക്ലാസ് മുറികളോടുകൂടിയാണ് പുതിയ ബ്ലോക്ക് നിര്‍മിച്ചിരിക്കുന്നത്.

ADVERTISEMENT

ആകാശപ്പാത പണിയുന്നില്ലെങ്കില്‍ പൊളിക്കണം

കോട്ടയം: കോട്ടയം ശീമാട്ടി റൗണ്ടാനയുടെ അടയാളമായി മാറിയ ആകാശപ്പാത ഒന്നുകില്‍ പണിയണം, അതല്ലെങ്കില്‍ പൊളിക്കണം. മഴയും വെയിലും കൊണ്ട് എട്ടു കൊല്ലമായി വായുവില്‍ നില്‍ക്കുന്ന ആകാശപാതയുടെ കമ്പിയും കൊളുത്തും കുഴലും വല്ലാത്ത വേഗത്തില്‍ തുരമ്പെടുക്കുകയാണ്. അസ്ഥിവാരത്തിന് ഇളക്കമുണ്ടോ ഇല്ലയോ എന്നതല്ല അസ്ഥിപഞ്ചരമായി മാറിക്കൊണ്ടിക്കുന്ന ഇരുമ്പുകൂടാരം നിലംപൊത്തിയാല്‍ വൻ ദുരന്തമാകും സംഭവിക്കുക. വഴി മുടക്കി നില്‍ക്കുന്ന ആകാശപാത നോക്കി അയ്യേ എന്നും അയ്യോ എന്നും പറയുന്നവരുണ്ട്. നഗരമധ്യത്തില്‍ അഞ്ച് പ്രധാന പാതകളുടെ സംഗമസ്ഥലത്താണ് ഇത് എങ്ങുമെത്താതെ നില്‍ക്കുന്നത്. കവലയിലെ തിരക്ക് കുറയ്ക്കാനും റോഡ് ഒഴിവാക്കി യാത്രക്കാര്‍ക്ക് അപ്പുറം കടക്കാനുമാണ് പദ്ധതി ആവിഷ്‌കരിച്ചത്. നിര്‍മാണത്തുക, ആവശ്യകത, ബലം എന്നിവയെ ചൊല്ലി ഏറെക്കാലമായി രാഷ്‌ട്രീയ ബലപരീക്ഷണം നടക്കുന്നുണ്ട്. ജനങ്ങളുടെ സുരക്ഷയാണ് സര്‍ക്കാരിനും പ്രതിപക്ഷത്തിനും പ്രധാനപ്പെട്ടതെങ്കില്‍ നിലവില്‍ സ്ഥിതിചെയ്യുന്ന ഇരുമ്പുവട്ടത്തിന്‍റെ കാര്യത്തില്‍ അടിയന്തര തീരുമാനമുണ്ടാണം. ഇടവേളയില്ലാതെ വാഹനങ്ങളും യാത്രക്കാരും കടന്നുപോകുന്ന പാതയ്ക്കു മുകളില്‍ വട്ടത്തിൽനില്‍ക്കുന്ന വന്‍കുഴലുകളുടെ ഏതു ഭാഗം നിലംപൊത്തിയാലും ആള്‍നാശം ഉറപ്പ്.

നവീകരിച്ച കോട്ടയം ശലഭോദ്യാനം സന്ദർശകർക്കായി തുറന്നു

കോട്ടയം: നഗരമധ്യത്തില്‍ ആദ്യത്തെയും കേരളത്തില്‍ ഭരണസിരാകേന്ദ്രത്തില്‍ ആദ്യത്തേതുമായി നവീകരിച്ച കോട്ടയം ശലഭോദ്യാനത്തിന്‍റെ ഉദ്ഘാടനം ജില്ലാ കളക്ടര്‍ ജോണ്‍ സാമുവല്‍ നിര്‍വഹിച്ചു. 2006 - ലാണ് പരിസ്ഥിതി ഗവേഷണ സ്ഥാപനമായ ട്രോപ്പിക്കല്‍ ഇന്‍സ്റ്റിറ്റ്യൂട്ട് ഓഫ് ഇക്കോളജിക്കല്‍ സയന്‍സസ്, അന്നത്തെ കളക്‌ടറിന്‍റെ നിര്‍ദേശ പ്രകാരം, തിരക്കേറിയ നഗരമധ്യത്തില്‍ ശലഭോദ്യാനം നിര്‍മിച്ചത്. സന്ദര്‍ശകര്‍ക്ക് പ്രകൃതിയിലേക്കുള്ള അറിവിന്‍റെ ജാലകംകൂടിയാണ് ശലഭോദ്യാനമെന്ന് ടൈസ് ഡയറക്‌ടര്‍ ഡോ. പുന്നന്‍ കുര്യന്‍ വേങ്കടത്ത് പറഞ്ഞു. നഗരത്തിലെ സ്‌കൂളുകളുടെ പങ്കാളിത്തതോടെ ടൈസാണ് പരിപാലനവും പുനരുദ്ധാരണവും നടത്തുന്നത്. ചിത്രശലഭങ്ങളെ ഉദ്യാനത്തിലേക്ക് ആകര്‍ഷിക്കുന്നതിനാവശ്യമായ രണ്ടിനം ചെടികളാണ് ഉദ്യാനത്തില്‍ വളര്‍ത്തുന്നത്. ചിത്രശലഭങ്ങള്‍ക്ക് മുട്ടയിടാനും പുഴുക്കള്‍ക്ക് ഇല തിന്നാനും ഉപകരിക്കുന്ന ആതിഥേയ ചെടികളായ അരളി, കറിവേപ്പ്, കറുവ ഇവയൊക്കെ ഈ ഗണത്തില്‍പ്പെടും. സമാധിയില്‍നിന്നു പുറത്ത് വരുന്ന ശലഭത്തിന് തേന്‍ കുടിക്കാന്‍ പറ്റുന്ന ചെത്തി, കുഫിയാ, കിലുക്കി ഇവയും ഉദ്യാനത്തിലുണ്ട്. ഉദ്ഘാടന ചടങ്ങില്‍ ടൈസ് ഡയറക്ടര്‍ ഡോ. പുന്നന്‍ കുര്യന്‍ വേങ്കടത്ത് അധ്യക്ഷത വഹിച്ചു. എഡിഎം ശ്രീജിത്, കോര്‍ട്ട് മാനേജര്‍ ഹരി നമ്പൂതിരി, ഫാ. കെ.എം. ജോര്‍ജ്, സെന്‍റ് ജോസഫ് ഗേള്‍സ് സ്‌കൂള്‍ പ്രിന്‍സിപ്പല്‍ സുമിനാമോള്‍ കെ. ജോണ്‍, ശലഭോദ്യാനം കോ-ഓര്‍ഡിനേറ്റര്‍ ജേക്കബ് വര്‍ഗീസ്, ടൈസ് നേച്ചര്‍ എഡ്യൂക്കേഷന്‍ ഓഫീസര്‍ എന്‍.ബി. ശരത് ബാബു, അനൂപ മാത്യൂസ്, പി.പി. ജിജോമോന്‍ എന്നിവര്‍ പങ്കെടുത്തു.

മോഷണക്കേസുകളിൽ രണ്ടു പേർ അറസ്റ്റില്‍

ചിങ്ങവനം: കഴിഞ്ഞ ദിവസം നടന്ന മോഷണക്കേസുകളിൽ രണ്ടു പേർ അറസ്റ്റില്‍. ചങ്ങനാശേരി ചീരഞ്ചിറ പാറച്ചിറ അഭിലാഷ് ഗോപാലന്‍ (44), ചങ്ങനാശേരി ചെത്തിപ്പുഴ പാറച്ചിറ ജോമോന്‍ ജോസഫ് (29) എന്നിവരെയാണ് ചിങ്ങവനം പോലീസ് ഇന്‍സ്‌പെക്ടര്‍ വി.എസ്. അനില്‍ കുമാറിന്‍റെ നേതൃത്വത്തില്‍ അറസ്റ്റുചെയ്തത്. മലകുന്നം, അഞ്ചല്‍ക്കുറ്റി ഭാഗത്തുള്ള കുളത്തുങ്കല്‍ വീടിന്‍റെ ഷെഡില്‍ വച്ചിരുന്ന മോട്ടര്‍സൈക്കിളും കുറച്ചി മലകുന്നം അഞ്ചല്‍കുറ്റി ഭാഗത്തുള്ള കുന്നേപറമ്പില്‍ വീടിന്‍റെ സമീപത്ത് പ്രവര്‍ത്തിച്ചുവരുന്ന ബാബു സ്റ്റോഴ്‌സ് എന്ന സ്റ്റേഷനറി കടയുടെ ഷട്ടറിന്‍റെ പൂട്ട് പൊളിച്ച് കടയക്കുള്ളിലുണ്ടായിരുന്ന സ്റ്റേഷനറി സാധനങ്ങളും മോഷ്ടിച്ചതിലുമാണ് അറസ്റ്റ്. തുരുത്തി മിഷന്‍പള്ളി ഭാഗത്ത് സംശയാസ്പദമായി കാണപ്പെട്ട ജോമോന്‍ ജോസഫിനെ ചോദ്യം ചെയ്തതില്‍ ഇയാള്‍ വാഹന മോഷണം ഉള്‍പ്പെടെ നിരവധി കേസുകളിലെ പ്രതിയാണെന്നു മനസിലാകുകയും മോഷണം നടന്ന വീട്ടിലെ സിസിടിവി കാമറയില്‍ പതിഞ്ഞ ആളുടെ രൂപവുമായി ജോമോന് സാദൃശ്യം തോന്നുകയും ചെയ്തതിനാല്‍ ജോമോനെ സ്റ്റേഷനില്‍ ചോദ്യം ചെയ്തപ്പോള്‍ ഇയാള്‍ കുറ്റം സമ്മതിക്കുകയുമായിരുന്നു. തുടര്‍ന്നു നടത്തിയ അന്വേഷണത്തില്‍ കൂടെയുണ്ടായിരുന്ന ആള്‍ ജോമോന്‍റെ ബന്ധുവും നിരവധി മോഷണക്കേസിലെ പ്രതിയുമായ അഭിലാഷ് ഗോപാലനാണെന്നും മനസിലായി. ഇയാളെ ചീരഞ്ചിറ ഭാഗത്ത് പോലീസ് സംഘം കണ്ടെത്തി അറസ്റ്റ് ചെയ്യുകയായിരുന്നു. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

ഉലയൂതുന്ന ആലകള്‍ വിസ്മൃതിയിലേക്ക്

കോട്ടയം: ഉലയൂതുന്ന ആലകള്‍ വിസ്മൃതിയിലേക്ക്. തീക്കനല്‍ പോലെ ചുട്ടുപഴുത്ത ലോഹത്തില്‍ ഭാരമേറിയ കൂടം മേടുന്ന ശബ്ദം കേരളത്തിലെ ഓരോ നാട്ടിന്‍പുറത്തെയും പ്രഭാതങ്ങളെ മുഖരിതമാക്കിയകാലം ഓര്‍മയാകാന്‍ ഇനി അധികം നാളില്ല. ഇടയാഴം പാഴുശേരിയില്‍ അശോകന്‍റെ വാക്കുകളിങ്ങനെയാണ്. ഇരുമ്പുപണിക്കാര്‍, ഓട്ടുപാത്രം നിര്‍മിക്കുന്നവര്‍, മരപ്പണിക്കാര്‍ അങ്ങനെ പല വിഭാഗങ്ങളായി വിഭജിച്ച വിശ്വകര്‍മജര്‍ ഒരു കാലത്ത് നാടിന്‍റെ അവിഭാ ജ്യഘടകങ്ങളായിരുന്നു. തൂമ്പ മുതല്‍ വീട്ടുപകരണങ്ങള്‍ എല്ലാം നിര്‍മിക്കുന്ന ഇരുമ്പുപണിക്കാരനും അയാളുടെ ആലയില്‍ തൊഴില്‍ ഉപകരണങ്ങളുമായി എത്തുന്ന മനുഷ്യരും ആലകളില്‍ ഇരുമ്പുമേടുന്ന ശബ്ദവും തീക്കനല്‍ പോലെ തിളങ്ങുന്ന ലോഹത്തിന്‍റെ ചീളുകള്‍ മിന്നല്‍പ്പിണരുകള്‍ പോലെ ചിതറുന്നതും നാട്ടുമ്പുറങ്ങളിലെ നിത്യകാഴ്ചയായിരുന്നു. ഇന്ന് എല്ലാ ഉപകരണങ്ങളും വ്യവസായിക അടിസ്ഥാനത്തില്‍ ഫാക്ടറികളില്‍ നിര്‍മിച്ച് മാര്‍ക്കറ്റിലെത്തുമ്പോള്‍, കൈകൊണ്ടു പ്രവര്‍ത്തിച്ചിരുന്ന ഉലയും ഇരുമ്പിന്‍റെ കൂടത്തില്‍ അടിച്ചുപരത്തി ആയുധങ്ങളാക്കുന്ന ആലയിലെ പണിക്കാരനും ഇന്ന് അന്യംനിന്നുപോകുന്ന കാഴ്ചകളായി മാറുന്നു. അശോകന്‍ പറയുന്നു എനിക്ക് രണ്ടു മക്കളാണ്. പാരമ്പര്യമായി കിട്ടിയ ഈ തൊഴില്‍ചെയ്യാന്‍ അവര്‍ തയാറല്ല. എല്ലാവര്‍ക്കും വൈറ്റ് കോളര്‍ ജോലി മതി, അവരെ കുറ്റം പറയാനില്ല കലാത്തിനൊപ്പം ഓടിയില്ലെങ്കില്‍ അവര്‍ പിന്നിലാകും. ആലയില്‍ ഇരുമ്പുപണിയുമായി ഇരുന്നാല്‍ ഇക്കാലത്ത് വിവാഹം കഴിക്കാന്‍ പോലും പാടാണ് - അശോകന്‍റെ വാക്കുകള്‍. ആയുധങ്ങളും തൊഴില്‍ ഉപകരണങ്ങളായി മാറുന്ന ഇരുമ്പിന്‍റെ പതം അറിയണമെങ്കില്‍ അടിച്ചുപരത്തുന്ന ലോഹത്തിനൊപ്പം ആലപണിക്കാരനും വിയര്‍ക്കണം. 80 വര്‍ഷമായി പ്രവര്‍ത്തിക്കുന്നതാണ് അശോകന്‍റെ ആല. എന്‍റെ അമ്മാവന്മാർ മാത്രമാണ് ഞങ്ങളുടെ കുടുംബത്തില്‍ ഇന്ന് ആലപണി ചെയ്യുന്നവര്‍, അടുത്ത തലമുറയോടെ ഈ തൊഴിലും വിസ്മൃതിയിലാകും, അശോകന്‍ പറയുന്നു.

ഒഫ്താല്‍മോളജി ഓപ്പറേഷന്‍ തിയറ്റര്‍, സീവേജ് ട്രീറ്റ്‌മെന്‍റ് പ്ലാന്‍റുകള്‍ തുറക്കുന്നു

ചങ്ങനാശേരി: ജനറല്‍ ആശുപത്രിയില്‍ നിര്‍മാണം പൂര്‍ത്തിയാക്കിയ ഒഫ്താല്‍മോളജി ഓപ്പറേഷന്‍ തിയറ്റര്‍, സീവേജ് ട്രീറ്റ്‌മെന്‍റ് പ്ലാന്‍റ് എന്നിവയുടെ പ്രവര്‍ത്തനോദ്ഘാടനവും കിഫ്ബി ഫണ്ട് വിനിയോഗിച്ച് നിര്‍മിക്കുന്ന ബഹുനില കെട്ടിടങ്ങളുടെ നിര്‍മാണോദ്ഘാടനവും 16ന് രാവിലെ 9.30ന് മന്ത്രി വീണാ ജോര്‍ജ് നിര്‍വഹിക്കുമെന്ന് ആശുപത്രി മാനേജ്‌മെന്‍റ് കമ്മിറ്റി യോഗത്തില്‍ ജോബ് മൈക്കിള്‍ എംഎല്‍എ അറിയിച്ചു. ആശുപത്രിയിലെ ഫാര്‍മസി, ലാബ് എന്നിവിടങ്ങളില്‍ മെഡിസിനോ എന്ന കമ്പനിയുടെ സഹകരണത്തോടെ ഫ്രീ ടോക്കണ്‍ സംവിധാനം ഏര്‍പ്പെടുത്താന്‍ ആശുപത്രി മാനേജ്‌മെന്‍റ് കമ്മിറ്റി തീരുമാനിച്ചു. ആശുപത്രിയില്‍ ഒരു സെക്യൂറിറ്റി ജീവനക്കാരനെക്കൂടി നിയോഗിച്ച് സന്ദര്‍ശകര്‍ക്ക് പാസ് സംവിധാനം ഏര്‍പ്പെടുത്തും. പാസ് നിരക്ക് പത്തുരൂപയായിരിക്കും. യോഗത്തില്‍ മുനിസിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ അധ്യക്ഷത വഹിച്ചു. വൈസ് ചെയര്‍മാന്‍ മാത്യൂസ് ജോര്‍ജ്, വാര്‍ഡ് കൗണ്‍സിലര്‍ ബീന ജോബ്, അംഗങ്ങളായ കെ.സി. ജോസഫ്, കെ.ടി. തോമസ്, മുഹമ്മദ് സിയ, ജോസുകുട്ടി നെടുമുടി, ബെന്നി സി. ചീരംചിറ, ലാലിച്ചന്‍ കുന്നിപ്പറമ്പില്‍, സുധീര്‍ ശങ്കരമംഗലം, ജയിംസ് കാലാവടക്കന്‍, നവാസ് ചുടുകാട് എന്നിവര്‍ ചര്‍ച്ചകളില്‍ പങ്കെടുത്തു.

തെരുവ് നായ്ക്കളുടെ വിഹാരകേന്ദ്രമായി ചങ്ങനാശേരി നഗരം ;നാലുപേര്‍ക്ക് കടിയേറ്റു

ചങ്ങനാശേരി: ചങ്ങനാശേരി നഗരം തെരുവ് നായ്ക്കളുടെ വിഹാരകേന്ദ്രമാകുന്നു. നായ്ക്കളുടെ ആക്രമണം പതിവാകുന്നു. കഴിഞ്ഞദിവസം തെരുവുനായ ആക്രമണത്തില്‍ നാലുപേര്‍ക്ക് പരുക്കേറ്റു. റെയില്‍വേസ്റ്റേഷനു സമീപം ചെറുകരക്കുന്നിലും ഒളശമുക്ക് ഭാഗത്താണുമാണ് ആക്രമണമുണ്ടായത്. ഞായറാഴ്ച രാവിലെ പള്ളിയില്‍ പോകാന്‍ വീട്ടില്‍നിന്നിറങ്ങിയ സൂസമ്മയ്ക്കാണ് (65) ആദ്യം കടിയേറ്റത്. ഒളശമുക്ക് ഭാഗത്തായിരുന്നു ആക്രമണം. സൂസമ്മയുടെ ശരീരത്തിന്‍റെ പലഭാഗത്തും കടിയേൽക്കുകയും നായയുടെ ആക്രമണത്തിൽ വീണ് സാരമായ പരിക്കേൽക്കുകയും ചെയ്തു. നാട്ടുകാരെത്തിയാണ് നായയെ ഓടിച്ച് സൂസമ്മയെ രക്ഷപ്പെടുത്തിയത്. ചെറുകരക്കുന്ന് ഭാഗത്ത് കാല്‍നടയാത്രക്കാരിയായ സ്റ്റെല്ലയ്ക്കും മറ്റു രണ്ടു പേര്‍ക്കും കടിയേറ്റു. പേവിഷബാധയുള്ളതെന്നു സംശിക്കുന്ന തെരുവുനായയെ വാര്‍ഡ് കൗണ്‍സിലര്‍ ടെസ വര്‍ഗീസ് അറിയിച്ചതുപ്രകാരം നഗരസഭാ ജീവനക്കാരും വെറ്ററിനറി വിഭാഗവും ചേര്‍ന്ന് പിടികൂടി. നായയെ പിടികൂടാന്‍ ആദ്യം നഗരസഭയെ സമീപിച്ചെങ്കിലും നടപടിയെടുത്തില്ലെന്ന് പരാതിയുണ്ട്. ജോബ് മൈക്കിള്‍ എംഎല്‍എ ഇടപെട്ടതോടെയാണ് നായയെ പിടികൂടാന്‍ നഗരസഭ നടപടി സ്വീകരിച്ചത്. സമീപത്തുള്ള സ്‌കൂള്‍ വളപ്പിൽ നായ പ്രവേശിക്കാതിരിക്കാന്‍ നാട്ടുകാരായ ടിറ്റി കോട്ടപ്പുറം, ലിയോണ്‍, ടിസണ്‍ എന്നിവരുടെ നേതൃത്വത്തില്‍ നാട്ടുകാര്‍ ശ്രദ്ധിച്ചു. തുടര്‍ന്നാണ് നഗരസഭാ ജീവനക്കാര്‍ എത്തി നായയെ കുടുക്കിയത്. പിടികൂടിയ നായയെ നിരീക്ഷണത്തില്‍ പാര്‍പ്പിച്ചു. കഴിഞ്ഞ ദിവസം സായാഹ്ന സവാരിക്കിടെ വയോധികനായ ആള്‍ക്ക് പെരുന്നയില്‍വച്ച് തെരുവ് നായയുടെ കടിയേറ്റിരുന്നു. ഇയാള്‍ ചികിത്സയിലാണ്. നഗരത്തിലും സമീപ പ്രദേശങ്ങളിലും തെരുവ് നായ്ക്കളുടെ നിയന്ത്രണത്തിന് അധികാകികള്‍ സത്വര നടപടികള്‍ സ്വീകരിക്കണമെന്ന് കഴിഞ്ഞ ദിവസം ചേര്‍ന്ന താലൂക്ക് വികസന സമിതി യോഗത്തില്‍ അഭിപ്രായം ഉയര്‍ന്നിരുന്നു.

നിജോ; പാട്ടുകളെ സ്‌നേഹിച്ച കൂട്ടുകാരന്‍

ചങ്ങനാശേരി: കഴിഞ്ഞദിവസം ബൈക്കും ടൂറിസ്റ്റ്ബസും കൂട്ടിയിടിച്ചു മരിച്ച വടക്കേക്കര പുതുപ്പറമ്പില്‍ നിജോ ദേവസ്യ(ജാക്കി-36)പാട്ടുകളെ സ്‌നേഹിച്ച ഗായക പ്രതിഭയായിരുന്നു. വടക്കേക്കര സെന്‍റ് മേരീസ് പള്ളിയിലെ ഗായകസംഘാംഗമായുന്ന നിജോ വിവിധ വേദികളിലും പാടി ശ്രദ്ധനേടിയിരുന്നു. നിജോയുടെ വിവാഹ കുര്‍ബാനമധ്യേ കുര്‍ബാന സ്വീകരണസമയത്ത് നിജോ പാട്ടുപാടിയത് നാട്ടുകാര്‍ ഓര്‍ക്കുന്നു. ചെത്തിപ്പുഴ സര്‍ഗക്ഷേത്രയുടെ നാടകഗാന മത്സരത്തില്‍ നിജോയ്ക്ക് രണ്ടാം സ്ഥാനം ലഭിച്ചിരുന്നു. ഞായറാഴ്ച രാത്രി 11ന് മോര്‍ക്കുളങ്ങര ഭാഗത്തുവച്ചുണ്ടായ അപകടത്തിലാണ് നിജോ മരിച്ചത്. രണ്ടുവര്‍ഷംമുമ്പാണ് കണ്ണൂര്‍ ചെമ്പേരി കുര്യംതുരുത്ത് ദില്‍നയുമായുള്ള വിവാഹം നടന്നത്. ബയോ മെഡിക്കല്‍ ഉപകരണ വിതരണ കമ്പനിയുടെ ഏരിയ മാനേജരായി ജോലിചെയ്തു വരികയായിരുന്നു. മൃതദേഹം ഇന്ന് രാവിലെ പത്തിന് വീട്ടിലെത്തിക്കും. സംസ്‌കാരം ഉച്ചകഴിഞ്ഞ് മൂന്നിന് വടക്കേക്കര സെന്‍റ് മേരീസ് പള്ളിയില്‍. ഒരുവയസ് പ്രായമുള്ള ഇതള്‍ എന്ന പെണ്‍കുഞ്ഞുണ്ട്. പുതുപ്പറമ്പില്‍ ബേബിച്ചന്‍-കുഞ്ഞുമോള്‍ ദമ്പതികളുടെ മകനാണ്. നിജോയുടെ വേര്‍പാട് ബന്ധുക്കള്‍ക്കും സുഹൃത്തുക്കള്‍ക്കും തീരാവേദനയായി.

ജിഎസ്ടി വകുപ്പിലെ സ്ഥലംമാറ്റത്തില്‍ പ്രതിഷേധം

കോട്ടയം: സംസ്ഥാന ജിഎസ്ടി വകുപ്പില്‍ ഈ വര്‍ഷം ഇറങ്ങിയ പൊതു സ്ഥലംമാറ്റത്തോട് അനുബന്ധിച്ച് മറ്റ് ജില്ലകളില്‍ വര്‍ഷങ്ങളായി ജോലി ചെയ്തുവന്നിരുന്ന എന്‍ജിഒ അസോസിയേഷന്‍ ജീവനക്കാര്‍ക്ക് ജില്ലയിലേക്ക് സ്ഥലംമാറ്റം ലഭിച്ചെങ്കിലും കഴിഞ്ഞ ദിവസം ജോയിന്‍റ് കമ്മീഷണര്‍ ഓഡിറ്റ് വിഭാഗത്തില്‍ ഇറക്കിയ സ്ഥലംമാറ്റ ഉത്തരവിലെ അപാകതകള്‍ പരിഹരിക്കണമെന്ന് ആവശ്യപ്പെട്ട് ജോയിന്‍റ് കമ്മീഷണര്‍ ഓഡിറ്റ് ഓഫീസിന് മുന്‍പില്‍ എന്‍ജിഒ അസോസിയേഷന്‍ ജില്ലാ കമ്മിറ്റിയുടെ നേതൃത്വത്തില്‍ പ്രതിഷേധ സംഗമം നടത്തി. എന്‍ജിഒ അസോസിയേഷന്‍ ജില്ലാ പ്രസിഡന്‍റ് സതീഷ് ജോര്‍ജിന്‍റെ അധ്യക്ഷതയില്‍ പ്രതിഷേധ യോഗം സംസ്ഥാന സെക്രട്ടേറിയറ്റ് അംഗം പി.എസ്. വിനോദ് കുമാര്‍ ഉദ്ഘാടനം ചെയ്തു. സംസ്ഥാന സെക്രട്ടേറിയറ്റ് അംഗം അഷറഫ് പറപ്പള്ളി, സംസ്ഥാന കമ്മിറ്റി അംഗം പ്രകാശ് ജേക്കബ്, ജില്ലാ കമ്മിറ്റിയുടെ സഹ ഭാരവാഹികളായ ജോഷി മാത്യു, ജെ. റോബി, എ. സനീഷ്, റോബി സി. ഐസക്ക്, സിബി ജേക്കബ്, സജിനി ടി. മാത്യു, കെ. അരവിന്ദാഷന്‍, എം.ജി. രേഖ, മുഹമ്മദ് ഷൈന്‍, രാജന്‍, എന്‍.എ. അനീഷ് കുമാര്‍, മന്‍സൂര്‍ നടുകണ്ടിയില്‍, എസ്. ജയശങ്കര്‍, ജിന്‍സ് ജോസഫ് എന്നിവര്‍ പ്രസംഗിച്ചു.

മത്സ്യവിത്ത് നിക്ഷേപിച്ചു

വെള്ളാവൂര്‍: ജില്ലാ പഞ്ചായത്തും ഫിഷറീസ് വകുപ്പും സംയുക്തമായി നടത്തുന്ന 2025 - 26 ജനകീയാസൂത്രണ പദ്ധതി പ്രകാരം പൊതു ജലാശയത്തിൽ മത്സ്യവിത്ത് നിക്ഷേപിച്ചു. വെള്ളാവൂര്‍ പഞ്ചായത്തിലെ ആറാട്ടുക്കടവില്‍ ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ മത്സ്യക്കുഞ്ഞുങ്ങളെ നിക്ഷേപിച്ച് ഉദ്ഘാടനം ചെയ്തു. വെള്ളാവൂര്‍ പഞ്ചായത്ത് പ്രസിഡന്‍റ് പി.ടി. അനൂപ്, ഫിഷറീസ് ഡെപ്യൂട്ടി ഡയറക്ടര്‍ ഇ. മുജീബ് എന്നിവര്‍ പങ്കെടുത്തു.

ചങ്ങനാശേരി സബ് ആർടി ഓഫീസില്‍ ജോയിന്‍റ് ആര്‍ടിഒയും എംവിഐയുമില്ല

ചങ്ങനാശേരി: ചങ്ങനാശേരി മോട്ടോര്‍ വാഹനവകുപ്പ് ഓഫീസില്‍ ജോയിന്‍റ് ആര്‍ടിഒ പ്രമോഷനായി പോയിട്ട് ഒരുമാസം. ഒരു എംവിഐ സ്ഥലം മാറിയിട്ട് മൂന്നാഴ്ചയായിട്ടും പകരം ഉദ്യോഗസ്ഥരെ നിയമിക്കാന്‍ വൈകുന്നു. രണ്ട് എംവി ഐമാരുടെ തസ്തികയാണുള്ളത്. ഇതില്‍ ഒരാള്‍ മാത്രമാണുള്ളത്. ഇയാള്‍ക്കാണ് ജോയിന്‍റ് ആര്‍ടിഒയുടെ ചുമതല. മൂന്ന് എഎംവിഐമാരില്‍ ഒരാള്‍ ഇന്നലെ സ്ഥലം മാറിപ്പോയി. ഈ വിഭാഗത്തില്‍ രണ്ടുപേരില്‍ മാത്രമാണുള്ളത്. ജോയിന്‍റ് ആര്‍ടിഒ, എംവിഐ, എഎംവിഐ എന്നിവരുടെ അഭാവം ഓഫീസ് പ്രവര്‍ത്തനത്തെ ബാധിച്ചതായി വിവിധ ആവശ്യങ്ങള്‍ക്കെത്തുന്ന ഇടപാടുകാര്‍ ചൂണ്ടിക്കാട്ടി.

കന്യാസ്ത്രീമാർക്കെതിരേയുള്ള കേസ് റദ്ദ് ചെയ്യണം: വെരൂര്‍ ഇടവക

വെരൂര്‍: ഛത്തീസ്ഗഡില്‍ അറസ്റ്റിലായി ജാമ്യത്തില്‍ വിട്ടയക്കപ്പെട്ട കന്യാസ്ത്രീമാർക്കെതിരേയുള്ള കേസ് റദ്ദ് ചെയ്യണമെന്ന് വെരൂര്‍ സെന്‍റ് ജോസഫ് ഇവകയില്‍ ചേര്‍ന്ന സമ്മേളനം ആവശ്യപ്പെട്ടു. വികാരി ഫാ. ജോഷി പുത്തന്‍പുരക്കല്‍ ഉദ്ഘാടനം ചെയ്തു. അസി. വികാരി ഫാ. നിതിന്‍ അമ്പലത്തിങ്കല്‍, കൈക്കാരന്മാരായ സിബിച്ചന്‍ തെക്കേക്കര, ബാബു കണിച്ചേരി, റോണി വലിയപറമ്പില്‍ എന്നിവര്‍ പ്രസംഗിച്ചു.

പ്രതിഷേധത്തിനൊടുവില്‍ കാട് വെട്ടിനീക്കി കെഎസ്ഇബി

പെരുവ: പ്രതിഷേധത്തിനൊടുവില്‍ വൈദ്യൂതി ലൈനിലെ കാടും പള്ളയും വെട്ടിനീക്കി കെഎസ്ഇബി. റോഡരികില്‍ അപകടക്കെണിയൊരുക്കി കെഎസ്ഇബിയെന്ന തലക്കെട്ടോടെ ഇന്നലെ ദീപികയില്‍ പ്രസിദ്ധീകരിച്ച വാര്‍ത്തയെത്തുടര്‍ന്നാണ് നടപടി. പെരുവ കെഎസ്ഇബി സബ് സെന്‍ററിന്‍റെ കീഴിലുള്ള കുന്നപ്പള്ളിയില്‍ റോഡിലേക്കു ചെരിഞ്ഞ് അപകടഭീഷിണി ഉയര്‍ത്തി വൈദ്യുതിത്തൂണുകള്‍ നില്‍ക്കുന്നതും കാരിക്കോട്ട് വൈദ്യുതിത്തൂണിലേക്ക് പടര്‍ന്നുകയറി നില്‍ക്കുന്ന വള്ളിപ്പടര്‍പ്പുകളും നാട്ടുകാര്‍ക്ക് ഭീഷണിയാവുന്നതായി ഇന്നലെ ദീപിക വാർത്ത പ്രസിദ്ധീകരിച്ചിരുന്നു. വാര്‍ത്തയെത്തുടര്‍ന്ന് ജീവനക്കാരെത്തി വൈദ്യൂത ലൈനിലെ കാടും പള്ളയും വെട്ടിനീക്കി അപകടമൊഴിവാക്കി. കുന്നപ്പള്ളി ആക്യമാലി ജംഗ്ഷനില്‍നിന്നു മടത്താട്ട് കോളനി റോഡിലുള്ള വൈദ്യുതി ത്തൂണുകള്‍ റോഡിലേക്കു ചെരിഞ്ഞു മറിഞ്ഞുവീഴാറായ നിലയിലാണ്. ഇവ ഈ ദിവസങ്ങളില്‍തന്നെ പറിച്ചുനീക്കാന്‍ നടപടി സ്വീകരിക്കുമെന്നും കെഎസ്ഇബി അറിയിച്ചിട്ടുണ്ട്. ഇതിലൂടെയുള്ള വൈദ്യുത ലൈനുകള്‍ മാറ്റി പുതിയ തൂണുകളിലേക്ക് സ്ഥാപിച്ചെങ്കിലും ചെരിഞ്ഞു നില്‍ക്കുന്ന തൂണുകള്‍ മാറ്റാന്‍ അധികൃതര്‍ നടപടിയെടുത്തിരുന്നില്ല. നിരവധിതവണ അധികൃതരോട് ആവശ്യപ്പെട്ടെങ്കിലും നടപടിയായില്ലെന്ന് നാട്ടുകാര്‍ ആരോപിച്ചിരുന്നു. ദിവസവും നൂറുകണക്കിന് വാഹനങ്ങളും കാല്‍നടയാത്രക്കാരും സഞ്ചരിക്കുന്ന വഴിയാണിത്. ചെരിഞ്ഞു നില്‍ക്കുന്ന നിരവധി തൂണുകള്‍ മാറ്റിസ്ഥാപിച്ച വൈദ്യുത ലൈനിന്‍റെ നടുക്കാണ് സ്ഥിതി ചെയ്യുന്നത്. വൈദ്യുതിത്തൂണുകള്‍ മറിഞ്ഞുവീണാല്‍ വൈദ്യുതി ലൈന്‍ ഉള്‍പ്പെടെ പൊട്ടിവീഴാനുള്ള സാധ്യതയുമുണ്ടെന്ന് നാട്ടുകാര്‍ മുന്നറിയിപ്പു നല്‍കുന്നു.

കുറുന്തുറപ്പുഴയിലെ നീരൊഴുക്കു നിലച്ചു; ജനജീവിതം ദുരിതപൂർണം

തലയോലപ്പറമ്പ്: നാടിനെ ഹരിതാഭമാക്കി കുളങ്ങളിലും കിണറുകളിലും കുളിർജലം നിറച്ച് ഒഴുകിയിരുന്ന കുറുന്തുറപ്പുഴ മാലിന്യം നിറഞ്ഞ് നീരൊഴുക്കു നിലച്ചതോടെ പ്രദേശവാസികളുടെ ജീവിതം ദുരിതപൂർണമാകുന്നു. കെവി കനാലിൽനിന്നാരംഭിച്ച് തലയോലപ്പറമ്പിന്‍റെ പടിഞ്ഞാറൻ മേഖലയായ കോരിക്കൽ ഭാഗത്തുകൂടി ഒഴുകി കെവി കനാലിൽത്തന്നെ സംഗമിക്കുന്ന കുറുന്തുറപ്പുഴയ്ക്കു മൂന്നു കിലോമീറ്ററോളം ദൈർഘ്യം വരും. 45വർഷങ്ങൾക്കു മുമ്പ് പടിഞ്ഞാറൻ മേഖലയിൽനിന്ന് തലയോലപ്പറമ്പ് ചന്തയിലേക്കു കേവുവള്ളങ്ങളിൽ ആളുകൾ സാധനങ്ങളുമായി കുറുന്തുറപ്പുഴയിലൂടെ വരുമായിരുന്നു. മൂവാറ്റുപുഴയാറിലെ ജലനിരപ്പു കെവി കനാലിലേതിനേക്കാൾ താണതോടെ കെവി കനാലിലെ നീരൊഴുക്കു കുറഞ്ഞു. കെവി കനാലുമായി ബന്ധപ്പെട്ട് ഒഴുകുന്ന കുറുന്തുറപ്പുഴയുടെ ശനിദശ അവിടെനിന്നാണ് ആരംഭിച്ചത്. ‌ ജലഗതാഗതത്തിന്‍റെ പ്രാധാന്യം കുറഞ്ഞ് കരമാർഗം ഗതാഗതം വർധിച്ചതോടെ കെആർ ഓഡിറ്റോറിയത്തിനു സമീപം കുറുന്തുറപ്പുഴയ്ക്കു കുറുകെ ഇടുങ്ങിയ പാലം തീർത്തതോടെ കുറുന്തുറുപ്പുഴയുടെ നേരിയ നീരൊഴുക്കിനും തടസം നേരിട്ടു. ഈ പാലത്തിനു താഴെ വൻതോതിൽ ചെളിയും മണ്ണും മാലിന്യങ്ങളും തിങ്ങിയതോടെ പുഴ വെറും വെളളക്കെട്ടായി. കഴിഞ്ഞ 20 വർഷത്തിനിടയിൽ കുറുന്തുപ്പുഴയെ ഒഴുക്കാൻ സർക്കാർ വിനിയോഗിച്ചത് കോടികളാണ്. പുഴയിലെ മാലിന്യം മുട്ടു തീർത്ത് വെള്ളം വറ്റിച്ച് ആഴത്തിൽ കോരിനീക്കാതെയുള്ള വഴിപാടു ശുചീകരണങ്ങൾ പൊതുപണം പാഴാക്കാനെ ഉപകരിച്ചുള്ളൂ. ഏതാനും വർഷം മുമ്പ് ലക്ഷങ്ങൾ ചെലവഴിച്ച് ഹിറ്റാച്ചി ഉപയോഗിച്ച് ആഴം കൂട്ടാൻ ശ്രമം നടത്തിയെങ്കിലും മാലിന്യങ്ങൾ പരമാവധി നീക്കാത്തതിനാൽ ദിവസങ്ങൾ കഴിഞ്ഞപ്പോൾ പൂർവാധികം ശക്തിയായി കനത്തിൽ പുല്ലും പോളവയലും വളർന്നു തിങ്ങി. പുഴയുടെ ഇരുകരകളിലായി എൺപതോളം കുടുംബങ്ങളുണ്ട്. മുമ്പ് കുളിക്കുകയും അലക്കുകയും ചെയ്തിരുന്ന പുഴയിലിപ്പോൾ ഇറങ്ങിയാൽ ദേഹം ചൊറിഞ്ഞു തടിക്കും. മലിനീകരണം മൂലം കൊതുകുശല്യവുമേറി. പുഴയിൽ മാലിന്യം നിറഞ്ഞതോടെ സമീപവാസികളുടെ കുളവും കിണറും ഇടതോടുകളും മലിനമായി. തലയോലപ്പറന്പിന്‍റെ ഹൃദയഭാഗത്തു കൂടി ഒഴുകുന്ന കുറുന്തുറപ്പുഴയെ വീണ്ടെടുക്കാൻ സമഗ്രമായ പദ്ധതി ജനപങ്കാളിത്തതോടെ നടപ്പാക്കാൻ സർക്കാർ നടപടി സ്വീകരിക്കണമെന്നാണ് ജനങ്ങളുടെ ആവശ്യം.

ക്രൈസ്തവ പീഡനത്തിനെതിരേ കടുത്തുരുത്തിയിൽ പ്രതിഷേധം ഇരന്പി

കടുത്തുരുത്തി: ഛത്തീസ്ഗഡില്‍ കന്യാസ്ത്രീമാരെ അകാരണമായി ജയിലിലടച്ച സംഭവത്തില്‍ ഗൂഢാലോചന നടത്തിയവര്‍ക്കെതിരേ ശക്തമായ നടപടികളെടുക്കണമെന്നും ഉത്തരവാദികള്‍ മാപ്പു പറയണമെന്നും ഫാ. മാത്യു ചന്ദ്രന്‍കുന്നേല്‍. കടുത്തുരുത്തി സെന്‍റ് മേരീസ് താഴത്തുപള്ളി ഫൊറോനായുടെ നേതൃത്വത്തില്‍ കടുത്തുരുത്തിയില്‍ നടന്ന യോഗം ഉദ്ഘാടനം ചെയ്യുകയായിരുന്നു അദ്ദേഹം. എഫ്‌ഐആര്‍ റദ്ദാക്കണം. തെറ്റ് ചെയ്ത ഉദ്യോഗസ്ഥര്‍ക്കെതിരേയും ആള്‍ക്കൂട്ടവിചാരണ നടത്തിയവര്‍ക്കെതിരേയും നിയമനടപടികൾ വേണം. യോഗത്തില്‍ മാന്നാര്‍ സെന്‍റ് മേരീസ് പള്ളി വികാരി ഫാ.സിറിയക് കൊച്ചുകൈപ്പെട്ടിയില്‍, താഴത്തുപള്ളി സഹവികാരിമാരായ ഫാ.ജോണ്‍ നടുത്തടം, ഫാ.ഏബ്രഹാം പെരിയപ്പുറം, സിസ്റ്റര്‍ റിന്‍സി എസ്എബിഎസ്, സോണി ജോസഫ് ആദപ്പള്ളില്‍, സന്തോഷ് നടുപ്പറമ്പില്‍ എന്നിവര്‍ പ്രസംഗിച്ചു. മദര്‍ സുപ്പിരീയര്‍ സിസ്റ്റര്‍ ടിന്‍സാ എസ്എബിഎസ് പ്രമേയം അവതരിപ്പിച്ചു. പ്രതിഷേധയോഗത്തിനു മുന്നോടിയായി വായ് മൂടിക്കെട്ടി നടത്തിയ റാലിയില്‍ ആയിരക്കണക്കിനു പേർ പങ്കെടുത്തു. ജോസ് ജയിംസ് നിലപ്പനക്കൊല്ലി, ജോര്‍ജ് ജോസഫ് പാട്ടത്തികുളങ്ങര, മനോജ് ജോസഫ് പുലിയിരിക്കുംതടം, തോമസ് വെട്ടുവഴി, ബെന്നിച്ചന്‍ പുതുകുളത്തില്‍, ടോമി നിലപ്പന, പി.സി. ജോസഫ് പന്തിരുപറ, മറ്റു സംഘടനാ ഭാരവാഹികള്‍, പള്ളികമ്മിറ്റിയംഗങ്ങള്‍ തുടങ്ങിയവര്‍ നേതൃത്വം നല്‍കി.

തലയോലപ്പറന്പ് സെന്‍റ് ജോർജ് പള്ളിയിലെ ഗ്രാന്‍ഡ് പേരന്‍റ്സ് ഡേ നവ്യാനുഭവമായി

തലയോലപ്പറമ്പ്: തലയോലപ്പറമ്പ് സെന്‍റ് ജോർജ് പള്ളിയിൽ നടന്ന ഗ്രാന്‍ഡ് പേരന്‍റ്സ് ദിനാചരണം നവ്യാനുഭവമായി. 700 കൊച്ചുമക്കളും അഞ്ഞൂറോളം അപ്പച്ചന്മാ രും അമ്മച്ചിമാരുമാണ് ഗ്രാൻഡ് പേരന്‍റ്സ് ദിനാചരണത്തിൽ പങ്കെടുത്തത്. വിശുദ്ധ അന്ന, വിശുദ്ധ ജോവാക്കിം എന്നിവരുടെ തിരുനാൾ ഗ്രാൻഡ് പേരന്‍റ്സ് ദിനമായി ആചരിക്കാനുള്ള ഫ്രാൻസിസ് മാർപാപ്പയുടെ ആഹ്വാനത്തെത്തുടർന്നായിരുന്നു ഗ്രാൻഡ് പേരന്‍റ്സ് ദിനാചരണം സംഘടിപ്പിച്ചത്. കുട്ടികൾ ആശംസാ കാർഡുകൾ നൽകിയുംപ്രത്യേകം തയാറാക്കിയ മാല അണിയിച്ചുമാണ് അപ്പച്ചന്മാരെയും അമ്മച്ചിമാ രെയും പള്ളിയിലേക്ക് സ്വീകരിച്ചത്. സൺഡേ സ്കൂൾ വക സമ്മാനങ്ങളും നൽകി. വികാരി റവ.ഡോ. ബെന്നി ജോൺ മാരാംപറമ്പിൽ ദിനാച രണം ഉദ്ഘാടനം ചെയ്തു. സഹവികാരി ഫാ. ആൽജോ കളപ്പുരയ്ക്കൽ, ജോസ്റ്റിൻ ജോസ്, ജോബി കുമരന്തറ, പ്രഫ. ടോമി വലിയവീട്ടിൽ, കെ.സി. ചാക്കോ കാലായിൽ, ഏയ്ഞ്ചൽ മേരി, സിബി കദളിക്കാട്ട് എന്നിവർ പ്രസംഗിച്ചു. തോമസ് സ്കറിയ അമ്പലത്തിൽ, ആനി ജോർജ്പുളിമൂട്ടിൽ, ശില്പ സാജു കരീമഠം എന്നിവർ നേതൃത്വം നൽകി.

തലയോലപ്പറമ്പ് പഞ്ചായത്ത് അവിശ്വാസ നോട്ടീസ് ഇന്ന്

തലയോലപ്പറമ്പ്: തലയോലപ്പറമ്പ് പഞ്ചായത്ത് പ്രസിഡന്‍റിനെതിരേ അഴിമതി ആരോപിച്ച് യുഡിഎഫ് അംഗങ്ങൾ അവിശ്വാസത്തിന് നോട്ടിസ് നൽകി. പഞ്ചായത്ത് 10-ാം വാർഡ് അംഗം ജോസ് വേലിക്കകം, അഞ്ചാം വാർഡ് അംഗം സജിമോൻ വർഗീസ് എന്നിവരാണ് നോട്ടിസ് നൽകിയത്. 2022 -23ലെ സർക്കാർ ഓഡിറ്റ് റിപ്പോർട്ടിലെ ബിഒടി കരാറിലെ ക്രമക്കേട്, തനത് ഫണ്ട് നഷ്ടം എന്നിവ സംബന്ധിച്ചു പ്രസിഡന്‍റ് നടപടി സ്വീകരിച്ചില്ലെന്ന് യുഡിഎഫ് അംഗങ്ങൾ ആരോപിച്ചു. ഇന്നു രാവിലെ11ന് യോഗം ചേർന്ന് അവിശ്വാസ നോട്ടീസിനെക്കുറിച്ച് ചർച്ച നടത്തും. എൽഡിഎഫ് ഭരിക്കുന്ന പഞ്ചായത്ത് ഭരണസമിതിയിൽ യുഡിഎഫിന് ആറ്, എൽഡിഎഫിന് എട്ട്, ഒരു സ്വതന്ത്രൻ എന്നിങ്ങനെയാണ് കക്ഷിനില.

കാടുകയറി ദിശാബോർഡ്

എരുമപ്പെട്ടി: കാടുപിടിച്ച് ദേശീയപാതയോരത്തെ ദിശാബോർഡ്. എരുമപ്പെട്ടിക്കും മണർകാടിനും ഇടയിലുള്ള ഭാഗത്താണ് ദിശാബോർഡിനെ വള്ളിപ്പടർപ്പുകൾ കീഴടക്കിയത്. മണർകാട് എന്നാണ് ബോർഡിലെ സ്ഥലനാമെങ്കിലും കാണാൻ കഴിയുന്നത് കാട് എന്നുമാത്രം. തെളിഞ്ഞുനിൽക്കുന്ന ഭാഗവും കീഴടക്കാനുള്ള ശ്രമത്തിലാണ് വള്ളിപ്പടർപ്പുകൾ. ആംഗലഭാഷയിൽ എഴുത്തുണ്ടെങ്കിലും തിരിച്ചറിയാൻ കഴിയില്ല. നാടിന്‍റെ ആഘോഷമായ മണർകാട് പള്ളിപ്പെരുന്നാളിനു ദിവസങ്ങൾ മാത്രം അവശേഷിക്കുമ്പോഴും ദിശാബോർഡുകൾ വൃത്തിയാക്കുന്ന ജോലികൾ മുടങ്ങിക്കിടക്കുന്നു. ദേശീയപാതയിൽ മിക്കയിടങ്ങളിലും ബോർഡുകൾ മാഞ്ഞ നിലയിലാണ്.

അല്‍ഫോന്‍സാ തീര്‍ഥാടനം: പതിനായിരങ്ങള്‍ക്ക് നേര്‍ച്ചഭക്ഷണം വിതരണം ചെയ്ത് കുടമാളൂര്‍ പള്ളി

കുടമാളൂര്‍: അല്‍ഫോന്‍സാ തീര്‍ഥാടനത്തിനെത്തിയ പതിനായിരങ്ങള്‍ക്ക് നേര്‍ച്ചഭക്ഷണം വിതരണം ചെയ്ത് കുടമാളൂര്‍ സെന്‍റ് മേരീസ് മേജര്‍ ആര്‍ക്കി എപ്പിസ്‌കോപ്പല്‍ തീര്‍ഥാടന ദേവാലയം. ചങ്ങനാശേരി അതിരൂപത ചെറുപുഷ്പ മിഷന്‍ ലീഗിന്‍റെ ആഭിമുഖ്യത്തില്‍ അതിരൂപതയിലെ വിവിധ ഇടവകകളില്‍നിന്നായി അല്‍ഫോന്‍സാ ജന്മഗൃഹത്തിലേക്കും കുടമാളൂര്‍ പള്ളിയിലേക്കും നടത്തപ്പെട്ട തീര്‍ഥാടനത്തില്‍ പതിനായിരങ്ങളാണ് പങ്കുചേര്‍ന്നത്. പങ്കെടുക്കാനെത്തിയവര്‍ക്കെല്ലാം കുടമാളൂര്‍ പള്ളിയില്‍ നേര്‍ച്ച ഭക്ഷണം തയാറാക്കിയിരുന്നു. ആര്‍ച്ച്പ്രീസ്റ്റ് റവ. ഡോ. ജോയി ജോര്‍ജ് മംഗലത്തില്‍, അതിരൂപത ഡയറക്‌ടര്‍ റവ. ഡോ. വര്‍ഗീസ് പുത്തന്‍പുരയ്ക്കല്‍, സിഎംഎല്‍ കുടമാളൂര്‍ മേഖല ഡയറക്‌ടര്‍ ഫാ. ജസ്റ്റിന്‍ വരവുകാലായില്‍ അല്‍ഫോന്‍സാ ഭവന്‍ സുപ്പീരിയര്‍ സിസ്റ്റര്‍ എലൈസ് മേരി എഫ്‌സിസി, ഫാ. അലോഷ്യസ് വല്ലാത്തറ, ഫാ. സുനില്‍ ആന്‍റണി, ജനറല്‍ കണ്‍വീനര്‍ സെബാസ്റ്റ്യന്‍ ജോസഫ്, വിവിധ വിവിധ കമ്മിറ്റി കണ്‍വീനര്‍മാര്‍, കൈക്കാരന്മാരായ സോണി ജോസഫ്, പി. എം. മാത്യു, പ്ലാസിഡ് വര്‍ഗീസ്, എം. ടി. ആന്‍റണി, പാരിഷ് കൗണ്‍സില്‍ സെക്രട്ടറി ഫ്രാങ്ക്‌ളിന്‍ ജോസഫ്, പിആര്‍ഒ ജോര്‍ജ് ജോസഫ്, വിവിധ തീര്‍ഥാടന കമ്മിറ്റി അംഗങ്ങള്‍, സിഎംഎല്‍ ഭാരവാഹികള്‍ എന്നിവര്‍ നേര്‍ച്ച ഭക്ഷണ വിതരണത്തിനും തീര്‍ഥാടകര്‍ക്കുള്ള സ്വീകരണത്തിനും നേതൃത്വം നല്‍കി.

കിടങ്ങൂര്‍ ലിറ്റില്‍ ലൂര്‍ദ്‌സ് മിഷന്‍ ആശുപത്രിയില്‍ അപൂര്‍വ ശസ്ത്രക്രിയ

കിടങ്ങൂര്‍: കിടങ്ങൂര്‍ ലിറ്റില്‍ ലൂര്‍ദ്‌സ് മിഷന്‍ ആശുപത്രിയില്‍ അപൂര്‍വ ശസ്ത്രക്രിയ നടത്തി. കുറവിലങ്ങാട് സ്വദേശിനിയായ 39കാരിയാണ് ഗര്‍ഭാശയത്തിലെ മുഴയെതുടര്‍ന്ന് ഗൈനക്കോളജി വിഭാഗത്തില്‍ ചികിത്സ തേടിയെത്തിയത്. പരിശോധനയില്‍ 15 സെന്‍റിമീറ്റര്‍ ഗര്‍ഭാശയമുഴ സ്ഥിരീകരിച്ചു. കുട്ടികളില്ലാത്ത യുവതിക്കു ഗര്‍ഭാശയം നിലനിര്‍ത്തി കീഹോള്‍ ശസ്ത്രിക്രിയിലുടെ മുഴ നീക്കം ചെയ്തു. മുഴയ്ക്കു ഒരു കിലോ ഭാരമുണ്ടായിരുന്നു. ശസ്ത്രക്രിയയുടെ മൂന്നാം ദിവസം പൂര്‍ണ ആരോഗ്യവതിയായി യുവതി വീട്ടിലേക്കു മടങ്ങി. ഗൈനക്കോളജി വിഭാഗം മേധാവി സിസ്റ്റര്‍ ഡോ. ശാന്തിയുടെ മേല്‍നോട്ടത്തില്‍ സീനിയര്‍ ഗൈനക്കോളജിസ്റ്റും ലാപ്രോസ്‌കോപ്പിക് സര്‍ജനുമായ ഡോ.വൈ.എസ്. സുശാന്താണ് ശസ്ത്രക്രിയ നടത്തിയത്. അനസ്‌തേഷ്യ മേധാവി ഡോ. ബിനു ആന്‍റണി ജോസഫ്, ഗൈനക്കോളജിസ്റ്റുകളായ ഡോ. അനിത ഫ്രാന്‍സിസ്, ഡോ. എയ്ഞ്ചല ബാബു. നഴ്‌സുമാരായ കരോള്‍, സിമി എന്നിവര്‍ ശസ്ത്രിക്രിയയില്‍ പങ്കെടുത്തു.

ബോണ്ടിംഗ് ഫാമിലീസ് പദ്ധതി: കുടുംബ ശക്തീകരണ സെമിനാര്‍

കോട്ടയം: കോട്ടയം അതിരൂപത നടപ്പിലാക്കുന്ന ബോണ്ടിംഗ് ഫാമിലീസ് പദ്ധതിയുടെ ഭാഗമായി കുടുംബ ശക്തീകരണ സെമിനാര്‍ സംഘടിപ്പിച്ചു. തെള്ളകം ചൈതന്യയില്‍ സംഘടിപ്പിച്ച സെമിനാറിന്‍റെ ഉദ്ഘാടനം അതിരമ്പുഴ പഞ്ചായത്ത് പ്രസിഡന്‍റ് ജോസ് ജോസഫ് അമ്പലക്കുളം നിര്‍വഹിച്ചു. ഏറ്റുമാനൂര്‍ മുനിസിപ്പല്‍ ചെയര്‍പേഴ്‌സണ്‍ ലൗലി ജോര്‍ജ് അധ്യക്ഷത വഹിച്ചു. കെഎസ്എസ്എസ് എക്‌സിക്യൂട്ടീവ് ഡയറക്ടര്‍ ഫാ. സുനില്‍ പെരുമാനൂര്‍, അസി. ഡയറക്ടര്‍ ഫാ. ജെഫിന്‍ ഒഴുങ്ങാലില്‍, കോ-ഓര്‍ഡിനേറ്റര്‍മാരായ മേരി ഫിലിപ്പ്, ആനി തോമസ് എന്നിവര്‍ പ്രസംഗിച്ചു.

സ്വാതന്ത്ര്യ ദിനാഘോഷം: യോഗം ചേര്‍ന്നു

കോട്ടയം: സ്വാതന്ത്ര്യ ദിനാഘോഷം സമുചിതമായി നടത്താന്‍ ജില്ലാ കളക്ടര്‍ ജോണ്‍ വി. സാമുവലിന്‍റെ അധ്യക്ഷതയില്‍ ചേര്‍ന്ന യോഗത്തില്‍ തീരുമാനം. 15ന് രാവിലെ പോലീസ് പരേഡ് ഗ്രൗണ്ടില്‍ നടക്കുന്ന പ്രൗഢഗംഭീരമായ സ്വതന്ത്ര്യദിന പരേഡില്‍ യൂണിഫോം സേനകളുടെയും എന്‍സിസി, സ്‌കൗട്ട് ആന്‍ഡ് ഗൈഡ്സ്, എസ്പിസി എന്നിവയുടെയും പ്ലാറ്റൂണുകള്‍ക്കൊപ്പം ബാന്‍ഡ് പ്ലാറ്റൂണുകളും അണിനിരക്കും. 11, 12 ദിവസങ്ങളില്‍ ഉച്ചകഴിഞ്ഞ് പരേഡ് റിഹേഴ്സലും 13ന് ഡ്രസ് റിഹേഴ്സലും നടക്കും. സ്വാതന്ത്ര്യദിനാഘോഷവുമായി ബന്ധപ്പെട്ട് വിദ്യാഭ്യാസവകുപ്പിന്‍റെ ആഭിമുഖ്യത്തില്‍ സ്‌കൂള്‍, കോളജ് വിദ്യാര്‍ഥികള്‍ക്ക് ഉപന്യാസരചന അടക്കമുള്ള മത്സരങ്ങള്‍ സംഘടിപ്പിക്കും. കളക്‌ടറേറ്റ് വിപഞ്ചിക ഹാളില്‍ ചേര്‍ന്ന യോഗത്തില്‍ അഡീഷണല്‍ ജില്ലാ മജിസ്ട്രേറ്റ് എസ്. ശ്രീജിത്ത്, അഡീഷണല്‍ എസ്പി ടി.കെ. വിശ്വനാഥന്‍, ഡിവിഷണല്‍ ഫോറസ്റ്റ് ഓഫീസര്‍ പ്രഫുല്‍ അഗ്രവാള്‍, ജില്ലാ സപ്ലൈ ഓഫീസര്‍ ബി. സജിനി, പൊതുവിദ്യാഭ്യാസവകുപ്പു ഡെപ്യൂട്ടി ഡയറക്ടര്‍ ഹണി ജി. അലക്സാണ്ടര്‍, ജില്ലാ ഇന്‍ഫര്‍മേഷന്‍ ഓഫീസര്‍ എ. അരുണ്‍കുമാര്‍, ജില്ലാ ഫയര്‍ ഓഫീസര്‍ എസ്.കെ. ബിജുമോന്‍, ഡെപ്യൂട്ടി കളക്ടര്‍ ജിനു പുന്നൂസ്, പൊതുമരാമത്ത് വകുപ്പ് ഇലക്‌ട്രോണിക്സ് വിഭാഗം അസി. എക്സിക്യുട്ടീവ് എന്‍ജിനീയര്‍ പി. സിന്ധു, പൊതുമരാമത്ത് വകുപ്പ് ഇലക്‌ട്രോണിക്സ് വിഭാഗം അസി. എന്‍ജിനിയര്‍ എസ്.ആര്‍. ജയചന്ദ്രന്‍ എന്നിവര്‍ പങ്കെടുത്തു.

കില്ലര്‍ സെബാസ്റ്റ്യന്‍: ചോദ്യംചെയ്യൽ തുടരുന്നു ; കൊലപാതകങ്ങളുടെ ചുരുളഴിക്കാന്‍ ക്രൈംബ്രാഞ്ച്

കോട്ടയം: അതിരമ്പുഴ കോട്ടമുറി കാക്കനാട്ടുകാലായില്‍ കെ.എ. മാത്യുവിന്‍റെ ഭാര്യ ജെയ്നമ്മയുടെ തിരോധാനത്തില്‍ അന്വേഷണം തുടങ്ങിയ കോട്ടയം ക്രൈംബ്രാഞ്ച് നിലവില്‍ നാലോ അഞ്ചോ പേരുടെ തിരോധാനം സംബന്ധിച്ച് അന്വേഷിക്കുകയാണ്. ജെയ്‌നമ്മയുടെ ബന്ധുക്കള്‍ നല്‍കിയ പരാതിയുടെയും സൂചനകളുടെയും അടിസ്ഥാനത്തിലാണ് ചേര്‍ത്തല പള്ളിപ്പുറം സ്വദേശി സെബാസ്റ്റ്യനെ ചോദ്യം ചെയ്യാന്‍ കോട്ടയം ക്രൈംബ്രാഞ്ച് കസ്റ്റഡിയിലെടുത്തത്. കോട്ടയം ക്രൈം ബ്രാഞ്ച് മൂന്നു ദിവസം ചോദ്യം ചെയ്തിട്ടും ജെയ്‌നമ്മയെ കൊലപ്പെടുത്തി സ്വര്‍ണാഭരണങ്ങള്‍ കവര്‍ന്നതായി സെബാസ്റ്റ്യന്‍ സമ്മതിച്ചിട്ടില്ല. എന്നാല്‍ സ്വര്‍ണം വിറ്റതായി പോലീസ് തെളിവടക്കം കണ്ടെത്തുകയും ചെയ്തു. ജെയ്‌നമ്മയുടെ ഫോണ്‍ കൈവശം വച്ച് അവര്‍ ജീവിച്ചിരിപ്പുണ്ടെന്ന് തെറ്റിദ്ധരിപ്പിക്കാന്‍ സെബാസ്റ്റ്യന്‍ പലപ്പോഴും ബന്ധുക്കളെ മിസ്ഡ് കോള്‍ ചെയ്തിരുന്നു. തിരികെ വിളിച്ചപ്പോള്‍ മറുപടി ലഭിക്കുകയോ ഫോണ്‍ എടുക്കുകയോ ചെയ്തില്ല. മിസ്ഡ് കോളിനു തൊട്ടുപിന്നാലെ ഫോണ്‍ ഓഫ് ആക്കുന്നതും പതിവായിരുന്നു. മിസ്ഡ് കോള്‍ സംബന്ധിച്ച് ക്രൈംബ്രാഞ്ച് നടത്തിയ ശാസ്ത്രീയ അന്വേഷണമാണ് നാല് ദുരൂഹമരണം ചുരുളഴിയുന്ന സാഹചര്യത്തിലേക്കെത്തിയത്. നാലു സ്ത്രീകള്‍ക്കു പുറമെ കൃത്യങ്ങള്‍ക്ക് കൂട്ടാളികളായിരുന്ന രണ്ട് പുരുഷന്മാരെയും സെബാസ്റ്റ്യന്‍ വക വരുത്തിയതായാണ് സൂചന. സെബാസ്റ്റ്യന്‍റെ വീട്ടുവളപ്പില്‍ കണ്ടെത്തിയ ശരീരാവശിഷ്ടങ്ങള്‍ ജെയ്‌നമ്മയുടേതാണോ എന്നതില്‍ സംശയമുണ്ട്. ജയ്നമ്മയുടെ സഹോദരന്‍ സാവിയോ, സഹോദരി ആന്‍സി എന്നിവരുടെ രക്തസാമ്പിളുകള്‍ ഡിഎന്‍എ പരിശോധനയ്ക്കായി ശേഖരിച്ചിട്ടുണ്ട്. ഡിഎന്‍എ പരിശോധനാഫലം ലഭിച്ചെങ്കില്‍ മാത്രമേ കൊലചെയ്യപ്പെട്ടത് ജയ്നമ്മ തന്നെയാണോ എന്നു സ്ഥിരീകരിക്കാനാകൂ. ക്ലിപ്പിട്ട ഒരു പല്ല് കണ്ടെടുത്തത് ചേര്‍ത്തല സ്വദേശി ഐഷയുടേതാണെന്ന് സംശയിക്കുന്നു. ജെയ്‌നമ്മയുടെ പല്ലിന് ക്ലിപ്പുണ്ടായിരുന്നില്ല. ജെയ്‌നമ്മയെ സെബാസ്റ്റ്യന്‍ കൊലപ്പെടുത്തി എന്നത് പോലീസ് സ്ഥിരീകരിക്കുന്നു. എന്നാല്‍ മൃതദേഹം എവിടെ മറവു ചെയ്തുവെന്ന് സെബാസ്റ്റ്യന്‍ പറയുന്നില്ല. ഒരാഴ്ച തുടരെ ചോദ്യം ചെയ്തിട്ടും രോഗവും ക്ഷീണവും മറവിയും നടിച്ച് സെബാസ്റ്റ്യന്‍ തന്ത്രപരമായി ഒഴിഞ്ഞുമാറുകയാണ്. പ്രതി പ്രമേഹത്തിന് മരുന്ന് കഴിക്കുന്നുണ്ട്. കാലിലെ മുറിവ് ദിവസവും ആശുപത്രിയിലെത്തി ഡ്രസ് ചെയ്യുന്നു. നാലു നേരം കൃത്യമായി ഭക്ഷണം വേണമെന്നും നിര്‍ബന്ധമുണ്ട്. സെബാസ്റ്റ്യനില്‍നിന്ന് വിവരങ്ങള്‍ ലഭിക്കേണ്ടതിനാല്‍ പോലീസ് സംയമനം പുലര്‍ത്തുന്നു. കോട്ടയം ക്രൈംബ്രാഞ്ച് ടീം പൂര്‍ണമായി ചേര്‍ത്തലയില്‍ ക്യാമ്പ് ചെയ്ത് തെരച്ചിലും ചോദ്യം ചെയ്യലും തുടരുകയാണ്. മൊഴികളില്‍ വൈരു‌ധ്യം ജെയ്നമ്മ പള്ളിപ്പുറത്തെ വീട്ടില്‍ച്ചാണ് കൊല്ലപ്പെട്ടതെന്നുറപ്പിച്ചാണ് കോട്ടയം ക്രൈംബ്രാഞ്ചിന്‍റെ നടപടികള്‍ മുന്നോട്ടു പോകുന്നത്. കാണാതായ, 2024 ഡിസംബര്‍ 23-നു തന്നെ ഇവര്‍ കൊല്ലപ്പെട്ടിട്ടുണ്ടെന്നും ശരീരാവശിഷ്ടങ്ങള്‍ പള്ളിപ്പുറത്തെ വീട്ടുവളപ്പില്‍ തന്നെയുണ്ടെന്നുമാണ് കണക്കാക്കുന്നത്. സെബാസ്റ്റ്യന്‍ കുറ്റസമ്മതം നടത്തിയെങ്കിലും ശരീരാവശിഷ്ടങ്ങളുടെ കാര്യത്തില്‍ വ്യക്തത നല്‍കിയിട്ടില്ല. ജെയ്‌നമ്മ ധരിച്ചിരുന്ന സ്വര്‍ണാഭരണങ്ങളടക്കം അപഹരിച്ച് പണയംവെക്കുകയും പിന്നീട് എടുത്ത് വില്‍ക്കുകയുമായിരുന്നു. ഇവ പോലീസ് വീണ്ടെടുത്തിട്ടുണ്ട്. കസ്റ്റഡിയിലുള്ള പ്രതി പരസ്പരവിരുദ്ധമായ മൊഴികളിലൂടെ ഉദ്യോഗസ്ഥരെ വട്ടംകറക്കുകയാണെന്നാണു സൂചന. ലിസ്റ്റില്‍ അവസാനമെത്തിയത് ഐഷ ഐഷയെ 2012 മേയ് 13നാണ് കാണാതായത്. ഫോണ്‍ വന്നതിനെ തുടര്‍ന്ന് ബാങ്കിലേക്കെന്ന് പറഞ്ഞ് വീട്ടില്‍ നിന്നിറങ്ങി. കുടുംബസ്വത്ത് തര്‍ക്കം നിലനിന്നിരുന്ന ഐഷയ്ക്ക് സമീപവാസിയുടെ അഞ്ച് സെന്‍റ് സ്ഥലം വാങ്ങിനല്‍കാന്‍ മുന്‍കൈയെടുത്തത് സെബാസ്റ്റ്യനായിരുന്നു. തിരുവിഴ ക്ഷേത്രത്തിലേക്ക് പോയ സിന്ധുവിനെ 2020 ഒക്ടോബര്‍ 19നാണ് കാണാതായത്. സെബാസ്റ്റ്യനുമായി ബന്ധപ്പെടുത്തുന്ന തെളിവുകള്‍ ലഭിച്ചിട്ടില്ല. ആലപ്പുഴ ജില്ലയില്‍ മാത്രമല്ല, സമീപജില്ലകളിലും സെബാസ്റ്റ്യന്‍ കുറ്റകൃത്യങ്ങള്‍ നടത്തിയതായി ജെയ്‌നമ്മയുടെ തിരോധാനത്തോടെ വ്യക്തമായതിനാല്‍ കോട്ടയം, എറണാകുളം, കൊല്ലം ജില്ലകളില്‍നിന്നു സമീപകാലത്തു കാണാതായ സ്ത്രീകളുടെ വിവരങ്ങളും പോലീസ് ശേഖരിക്കുന്നുണ്ട്. അര്‍ത്തുങ്കല്‍ പൊലീസ് സ്റ്റേഷന്‍ പരിധിയില്‍നിന്നു അഞ്ചു വര്‍ഷം മുന്‍പു കാണാതായ ചേര്‍ത്തല തെക്ക് വള്ളാക്കുന്നത്തുവെളി സിന്ധുവിന്‍റെ കേസ് വീണ്ടും അന്വേഷിക്കാന്‍ പൊലീസ് തീരുമാനിച്ചതും ഈ സാഹചര്യം പരിഗണിച്ചാണ്. കോട്ടയം ക്രൈംബ്രാഞ്ച് എസ്പി ഗിരീഷ് പി. സാരഥി, ക്രൈംബ്രാഞ്ച് ആലപ്പുഴ എസ്പി ഷൗക്കത്ത് അലി, ചേര്‍ത്തല എഎസ്പി ഹരീഷ് ജെയ്ന്‍, ചേര്‍ത്തല തഹസില്‍ദാര്‍ എസ്. ഷീജ, റവന്യൂ വകുപ്പ് ഉദ്യോഗസ്ഥര്‍, അഗ്നിശമനസേന, ഫോറന്‍സിക് വിദഗ്ദര്‍, ഡോഗ് സ്‌ക്വാഡ് തുടങ്ങിയവര്‍ തെളിവെടുപ്പിൽ പങ്കെടുത്തു.

മണ്ണാറശാല വലിയമ്മ സാവിത്രി അന്തർജനം ശതാഭിഷിക്തയാകുന്നു

ഹരിപ്പാട്: മണ്ണാറശാല നാഗരാജക്ഷേത്രത്തിലെ മുഖ്യപൂജാരിണി (മണ്ണാറശാല വലിയമ്മ) സാവിത്രി അന്തർജനത്തിന്‍റെ ശതാഭിഷേകം നാളെ നടക്കും. രാവിലെ 5.30ന് ക്ഷേത്രത്തിൽ വിശേഷാൽ പൂജ, ഹോമം, പ്രത്യക്ഷപശുദാനം, ദശദാനം തുടങ്ങിയ ചടങ്ങുകൾ നടക്കും. 9.30 മുതൽ 12 വരെ സംഗീതസദസ്, 10.30ന് പിറന്നാൾ സദ്യ എന്നിവ നടക്കും. ഇന്ന് വൈകിട്ട് 4ന് തിരുവാതിരകളി, സന്താനഗോപാലം കഥകളി എന്നിവയോടെ ആഘോഷ പരിപാടികൾക്കു തുടക്കമാവും. വലിയമ്മയായിരുന്ന ഉമാദേവി അന്തർജനത്തിന്‍റെ നിര്യാണത്തെത്തുടർന്ന് രണ്ടുവർഷം മുൻപാണ് സാവിത്രി അന്തർജനം വലിയമ്മയായി അഭിഷിക്തയായത്. തുടർന്ന്, ഒരുവർഷത്തോളം പുജാദികർമങ്ങൾ സ്വായത്തമാക്കി. ഇതിനു ശേഷമാണ് വലിയമ്മയുടെ ചുമതല ഏറ്റെടുത്തത്. കോട്ടയം നട്ടാശേരി കാഞ്ഞിരക്കോട്ടില്ലത്ത് ശങ്കരൻ നമ്പൂതിരിയുടെയും ആര്യാദേവി അന്തർജനത്തിന്‍റെയും മകളാണ്. 13-ാം വയസിൽ മണ്ണാറശാല ഇല്ലത്തെ എം.വി. സുബ്രഹ്മണ്യൻ നമ്പൂതിരി വിവാഹം കഴിച്ചുകൊണ്ടുവന്നതാണ്. സുബ്രഹ്മണ്യൻ നമ്പൂതിരി 2016 നവംബർ അഞ്ചിന് അന്തരിച്ചു.

മാധ്യമപ്രവര്‍ത്തനത്തിൽ എംഒയു ഒപ്പിട്ട് രാഷ്‌ട്രദീപികയും ബിസിഎം കോളജും

കോട്ടയം: നഗരത്തിലെ പ്രമുഖ കലാലയമായ ബിസിഎം കോളജും രാഷ്‌ട്രദീപിക ലിമിറ്റഡും മാധ്യമ പ്രവര്‍ത്തനത്തില്‍ മൊമ്മോറാണ്ടം ഓഫ് അണ്ടര്‍സ്റ്റാന്‍ഡിംഗ് ഒപ്പിട്ടു. ഇംഗ്ലീഷ് വിഭാഗവുമായി ചേര്‍ന്നാണ് എംഒയു. ഇതിന്‍റെ ഭാഗമായി ഇംഗ്ലീഷ് വിഭാഗവും എംജി യൂണിവേഴ്‌സിറ്റിയും രാഷ്‌ട്രദീപിക ലിമിറ്റഡും ചേര്‍ന്ന് മാധ്യമ വര്‍ക്ക്ഷോപ്പും സംഘടിപ്പിച്ചു. സമ്മേളനം രാഷ്‌ട്രദീപിക ലിമിറ്റഡ് മാനേജിംഗ് ഡയറക്ടര്‍ ഫാ. മൈക്കിള്‍ വെട്ടിക്കാട്ട് ഉദ്ഘാടനം ചെയ്തു. സത്യം മാത്രം പറയുകയും നിലപാടുകളില്‍ ഉറച്ചുനില്‍ക്കുകയും ചെയ്യുന്ന ദീപിക നിശബ്ദമായി സമൂഹത്തില്‍ വിപ്ലവം സൃഷ്ടിക്കും. ലാഭം നോക്കിയല്ല ദീപികയുടെ പ്രവര്‍ത്തനമെന്നും മൂല്യത്തിലും സത്യത്തിലും നിലപാടിലും ഒരിക്കലും വെള്ളം ചേര്‍ക്കില്ലെന്നും ഫാ. മൈക്കിള്‍ വെട്ടിക്കാട്ട് പറഞ്ഞു. ദീപിക ചീഫ് എഡിറ്റര്‍ റവ.ഡോ. ജോര്‍ജ് കുടിലില്‍ മുഖ്യപ്രഭാഷണം നടത്തി. ഭാവാത്മകമായ മാധ്യമ പ്രവര്‍ത്തനം വാസയോഗ്യമായ ഭവനമാക്കി ലോകത്തെ മാറ്റുന്നതായി റവ.ഡോ. ജോര്‍ജ് കുടിലില്‍ പറഞ്ഞു. മുറിവുകള്‍ സൗഖ്യമാക്കുന്ന പ്രത്യാശയുടെ കഥകള്‍ പറയാന്‍ മാധ്യമ പ്രവര്‍ത്തകര്‍ക്ക് കഴിയണമെന്നും ചീഫ് എഡിറ്റര്‍ കൂട്ടിച്ചേര്‍ത്തു. കോളജ് മാനേജര്‍ ഫാ. ഏബ്രഹാം പറമ്പേട്ട് അധ്യക്ഷത വഹിച്ചു. ആധുനിക ലോകത്ത് മാധ്യമങ്ങളെ തികഞ്ഞ ജാഗ്രതയോടെ കൈകാര്യം ചെയ്യണമെന്ന് ഫാ. ഏബ്രഹാം പറമ്പേട്ട് പറഞ്ഞു. ബര്‍സാര്‍ ഫാ. ഫില്‍മോന്‍ കളത്ര, പ്രിന്‍സിപ്പല്‍ പ്രഫ.ഡോ. കെ.വി. തോമസ്, ദീപിക ചീഫ് ന്യൂസ് എഡിറ്റര്‍ സി.കെ. കുര്യാച്ചന്‍, ഇംഗ്ലീഷ് വിഭാഗം മേധാവി ഡോ. റിയ സൂസന്‍ സ്‌കറിയ, ഫാക്കല്‍റ്റി കോഓര്‍ഡിനേറ്റര്‍ ആന്‍സി സിറിയക് എന്നിവര്‍ പ്രസംഗിച്ചു. കോളജും ദീപികയും തമ്മിലുള്ള ധാരണാപത്രത്തില്‍ മാനേജിംഗ് ഡയറക്ടര്‍ ഫാ. മൈക്കിള്‍ വെട്ടിക്കാട്ടും പ്രിന്‍സിപ്പല്‍ പ്രഫ.ഡോ. കെ.വി. തോമസും ഒപ്പിട്ടു. ഇതുപ്രകാരം മാധ്യമ പഠനവിഭാഗം കുട്ടികള്‍ക്ക് ദീപികയില്‍ ഇന്‍റേണ്‍ഷിപ്പ്, ദീപിക മുഖപ്രസംഗത്തിന്‍റെയും വാര്‍ത്തകളുടെയും ഇംഗ്ലീഷിലുള്ള തര്‍ജമ തുടങ്ങി വിവിധ പഠന പ്രവര്‍ത്തനങ്ങള്‍ നടക്കും. മാധ്യമ വര്‍ക്ക്ഷോപ്പില്‍ സിഎംഎസ് കോളജ് കമ്യൂണിക്കേറ്റീവ് ഇംഗ്ലീഷ് വിഭാഗം അസിസ്റ്റന്‍റ് പ്രഫസര്‍ അഷിഖ സുല്‍ത്താന, എറണാകുളം സെന്‍റ് തെരേസാസ് കോളജ് ഇംഗ്ലീഷ് വിഭാഗം അസിസ്റ്റന്‍റ് പ്രഫസര്‍ സെബ നാസര്‍ എന്നിവര്‍ ക്ലസുകള്‍ നയിച്ചു.

കാലാവസ്ഥാ വ്യതിയാനവും സാമ്പത്തിക പ്രതിസന്ധിയും; വിരിപ്പുകൃഷിയിറക്കാനാകാതെ കർഷകർ

കുമരകം: കാലാവസ്ഥാ വ്യതിയാനം സാമ്പത്തിക പ്രതിസന്ധിയും മൂലം വിരിപ്പു കൃഷിയിറക്കാനാകാതെ കർഷകർ വലയുന്നു. ഈ വർഷം തുടർച്ചയായി ഉണ്ടായ മൂന്നു വെള്ളപ്പൊക്കമാണ് കർഷകരെ പ്രതിസന്ധിയിലാക്കിയത്. പല പാടശേഖരങ്ങളിലെയും കൃഷി മടവീണും പുറംബണ്ട് കവിഞ്ഞുകയറിയും നശിച്ചു. മടയിട്ട് വീണ്ടും വെള്ളം പമ്പുചെയ്ത് കൃഷിയിറക്കാൻ വേണ്ട പണം കണ്ടെത്താൻ വഴിയില്ലാതെ പല കർഷകരും കൃഷി തുടരേണ്ടെന്ന് തീരുമാനിക്കുകയായിരുന്നു. പുഞ്ചകൃഷിയുടെ നെല്ലിന്‍റെ പണം പോലും കിട്ടാത്ത കർഷകർ വീണ്ടും കൃഷിയിറക്കാർ മാർഗമില്ലാതെ അലയുകയാണ്. വളം, കീടനാശിനി, കളനാശിനി തുടങ്ങിയവയുടെ അമിത വിലവർധനയ്ക്കൊപ്പം തൊഴിലാളി ക്ഷാമവും കൃഷി ചെയ്യുന്നതിൽനിന്നു കർഷകരെ നിരുത്സാഹപ്പെടുത്തുകയാണ്. മാത്രവുമല്ല ഏതാനും വർഷങ്ങളായി കൃഷിയെ ദോഷകരമായി ബാധിച്ചുകൊണ്ടിരിക്കുന്ന കളയായ വരിനെല്ല് നശിപ്പിക്കാൻകഴിയുന്ന കളനാശിനി ലഭ്യമല്ലാത്തതും നെൽകൃഷിക്ക് പുതിയ വെല്ലുവിളിയാണ്. നെൽ കൃഷി പ്രോത്സാഹിപ്പിക്കാൻ സർക്കാർ പ്രഖ്യാപിച്ചിരിക്കുന്ന ആനുകൂല്യങ്ങളേറെയും കർഷകന്‍റെ അക്കൗണ്ടുകളിലെത്തുന്നില്ല. കൈകാര്യച്ചെലവ്, വളം സബ്സിഡി, പന്പിംഗ് സബ്സിഡി, ഉത്പാദന ബോണസ് തുടങ്ങിയവയെല്ലാം കുടിശികയാണ്. കുമരകത്ത് കഴിഞ്ഞ വർഷം 550 ഹെക്ടർ നിലത്ത് വിരിപ്പുകൃഷി ചെയ്തിരുന്നു. ഇക്കുറി 340 ഹെക്ടറിലാണ് കൃഷിയിറക്കിയത്. അതിൽ 200 ഹെക്ടർ വരുന്ന മൂലേപ്പാടം തെക്കേ ബ്ലോക്കും മൂലേപ്പാടം വടക്കേ ബ്ലോക്കും മടവീണു കൃഷി നശിച്ചു. ഫലത്തിൽ 140 ഹെക്ടറിലെ കൃഷിയാണ് അവശേഷിക്കുന്നത്. 170 ഹെക്ടറിൽകൂടി കൃഷിയിറക്കാനുള്ള ശ്രമങ്ങൾ നടക്കുന്നുണ്ട്. തിരുവാർപ്പിൽ പുതുക്കാട്ടമ്പത് പാടത്ത് പഞ്ചായത്തിന്‍റെ സഹകരണത്തോടെ യന്ത്രം ഉപയോഗിച്ചു നട്ട നെല്ല് മുങ്ങിനശിച്ചു. വീണ്ടും ഇപ്പോൾ യന്ത്രം എത്തിച്ച് നടീൽ പുനരാരംഭിച്ചിട്ടുണ്ട്. അയ്മനത്തും കഴിഞ്ഞ സീസണിലേതിനേക്കാൾ വിരിപ്പുകൃഷി കുറവാണ്.

കേരള കോണ്‍. പഠനശിബിരം സമാപിച്ചു

കോട്ടയം: കോട്ടയം മെഡിക്കല്‍ കോളജ് ഉള്‍പ്പെടെ വിവിധ സര്‍ക്കാര്‍ ആശുപത്രികളില്‍ ദുര്‍ബല ജന വിഭാഗങ്ങള്‍ക്ക് സൗജന്യ ചികിത്സ ലഭ്യമാക്കാന്‍ കഴിയാത്ത ഇന്നത്തെ ദുരവസ്ഥ പരിഹരിക്കാന്‍ ഇടതുപക്ഷ സര്‍ക്കാര്‍ അടിയന്തര നടപടി സ്വീകരിക്കണമെന്ന് കേരള കോണ്‍ഗ്രസ് എക്‌സിക്യൂട്ടീവ് ചെയര്‍മാന്‍ മോന്‍സ് ജോസഫ് എംഎല്‍എ. കേരള കോണ്‍ഗ്രസ് ജില്ലാ സംഘടന പഠനശിബിരം കോട്ടയത്ത് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കാരുണ്യ ചികിത്സാ പദ്ധതി പുനഃസ്ഥാപിക്കാന്‍ സര്‍ക്കാര്‍ തയാറാകണമെന്ന് ജില്ലാ കമ്മിറ്റി പ്രമേയത്തിലൂടെ ആവശ്യപ്പെട്ടു. പാര്‍ട്ടിയുടെ ഭവന സന്ദര്‍ശനവും ജനസമ്പര്‍ക്ക പരിപാടിയും പ്രവര്‍ത്തന ഫണ്ട് ശേഖരണവും ജില്ലയില്‍ 15 മുതല്‍ 30 വരെ നടത്താന്‍ പഠനശിബിരം തീരുമാനിച്ചു. ജില്ലാ പ്രസിഡന്‍റ് അഡ്വ. ജയ്‌സണ്‍ ജോസഫ് ഒഴുകയില്‍ അധ്യക്ഷത വഹിച്ചു. പാര്‍ട്ടി സംസ്ഥാന സെക്രട്ടറി ജനറല്‍ ജോയ് ഏബ്രഹാം, പാര്‍ട്ടി വൈസ് ചെയര്‍മാന്‍മാരായ ഇ.ജെ. ആഗസ്തി, കെ.എഫ്. വര്‍ഗീസ്, പാര്‍ട്ടി സംസ്ഥാന അഡ്വൈസര്‍ തോമസ് കണ്ണന്തറ, ഉന്നതാധികാര സമിതി അംഗങ്ങളായ പ്രിന്‍സ് ലൂക്കോസ്, വി.ജെ. ലാലി, ജോര്‍ജ് പുളിങ്കാട്, ചെറിയാന്‍ ചാക്കോ, ബിനു ചെങ്ങളം തുടങ്ങിയവര്‍ പ്രസംഗിച്ചു.

സയൻസ് സിറ്റിയിൽ ആദ്യമാസം വിജ്ഞാനം നുകരാനെത്തിയത് പതിനായിരത്തിലേറെപ്പേർ

കുറവിലങ്ങാട്: വിനോദത്തിലൂടെ അറിവിന്‍റെ ലോകം തുറന്നുനൽകുന്ന സയൻസ് സിറ്റിയിൽ ആദ്യമാസം സന്ദർശനം നടത്തിയത് പതിനായിരത്തിലേറെപ്പേർ. അയൽസംസ്ഥാനങ്ങളിൽ നിന്നുൾപ്പെടെ ഗവേഷകരടക്കമെത്തി. തിങ്കളാഴ്ചകളിലൊഴികെ എല്ലാദിവസവും തുറന്നുപ്രവർത്തിക്കുന്ന സയൻസ് സിറ്റിയിലേക്ക് ഒരു ദിവസം മൂന്നൂറിലേറെപ്പേർ എത്തുന്നു. സയൻസ് സിറ്റിയുടെ സമീപസ്ഥലങ്ങളിലെ വ്യാപാരസ്ഥാപനങ്ങൾക്കും ഇതിന്‍റെ നേട്ടമുണ്ടായിട്ടുണ്ട്. പ്രധാനമായും വിദ്യാർഥികളാണ് ആദ്യമാസത്തിൽ സയൻസ് സിറ്റിയിലേക്ക് എത്തിയത്. അധ്യാപകർക്കും വിദ്യാർഥികൾക്കും പ്രവേശനഫീസിൽ പ്രത്യേക ഇളവുണ്ട്. അവധിദിനങ്ങളിൽ കുടുംബസമേതമാണ് പലരും എത്തുന്നത്. മേജർ ആർക്കി എപ്പിസ്‌കോപ്പൽ മർത്ത്മറിയം പള്ളിയിലെത്തുന്ന ചില തീർഥാടക സംഘങ്ങളും സയൻസ് സിറ്റി സന്ദർശിച്ചാണ് മടങ്ങുന്നത്.

സിപിഐ ജില്ലാ സമ്മേളനം എട്ടുമുതല്‍ വൈക്കത്ത്

കോട്ടയം: സിപിഐ ജില്ലാ സമ്മേളനം കമ്യൂണിസ്റ്റ് പാര്‍ട്ടിയുടെ സ്ഥാപക സെക്രട്ടറി പി. കൃഷ്ണപിള്ളയുടെ നാടായ വൈക്കത്ത് എട്ടു മുതല്‍ 10 വരെ നടക്കും. സമ്മേളനത്തിന്‍റെ ഭാഗമായി പതാക, കൊടിമര ജാഥകള്‍, റെഡ് വോളണ്ടിയര്‍ മാര്‍ച്ച്, പൊതുസമ്മേളനം, പ്രതിനിധി സമ്മേളനം, കലാപരിപാടികള്‍ എന്നിവയുണ്ടാകും. എട്ടിനു വൈകുന്നേരം മൂന്നിന് വൈക്കം വലിയ കവലയില്‍നിന്നും ബോട്ടുജെട്ടി മൈതാനത്തേക്ക് റെഡ് വോളണ്ടിയര്‍ മാര്‍ച്ച് നടക്കും. പതാക, കൊടിമര ജാഥകള്‍ മൈതാനത്ത് സംഗമിക്കും. തുടര്‍ന്നു സംഘാടക സമിതി പ്രസിഡന്‍റ് ജോണ്‍ വി. ജോസഫ് പതാക ഉയര്‍ത്തും. പൊതുസമ്മേളനം സിപിഐ സംസ്ഥാന സെക്രട്ടറി ബിനോയി വിശ്വം ഉദ്ഘാടനം ചെയ്യും. മന്ത്രി കെ. രാജന്‍ മുഖ്യപ്രഭാഷണം നടത്തും. പി. വസന്തം, ആര്‍. രാജേന്ദ്രന്‍, കെ.കെ. അഷ്‌റഫ് എന്നിവര്‍ പ്രസംഗിക്കും. ഒമ്പതിനു രാവിലെ 10ന് എന്‍എസ്എസ് ഓഡിറ്റോറിയത്തില്‍ ചേരുന്ന പ്രതിനിധി സമ്മേളനം ദേശീയ എക്‌സിക്യൂട്ടീവ് അംഗം പി. സന്തോഷ്‌കുമാര്‍ ഉദ്ഘാടനം ചെയ്യും. വൈകുന്നേരം 5.30നു ജന്‍മ ശതാബ്ദി സമ്മേളനം മന്ത്രി പി. പ്രസാദ് ഉദ്ഘാടനം ചെയ്യും. ആലങ്കോട് ലീലാകൃഷ്ണന്‍ മുഖ്യപ്രഭാഷണം നടത്തും. 10നും പ്രതിനിധി സമ്മേളനം തുടരും. വൈകുന്നേരം പുതിയ ജില്ലാ കൗണ്‍സിലിനെയും ജില്ലാ സെക്രട്ടറിയെയും തെരഞ്ഞെടുക്കും. പത്രസമ്മേളനത്തില്‍ ജില്ലാ സെക്രട്ടറി വി.ബി. ബിനു, ജോണ്‍ വി. ജോസഫ്, എം.ഡി. ബാബുരാജ്, ഹേമലത പ്രേംസാഗര്‍ എന്നിവര്‍ പങ്കെടുത്തു. സിപിഐയ്ക്ക് ജില്ലയില്‍ മുന്നേറ്റം: വി.ബി. ബിനു കോട്ടയം: മൂന്നു വര്‍ഷത്തിനുള്ളില്‍ ജില്ലയില്‍ സിപിഐയ്ക്ക് അഭിമാനകരമായ വളര്‍ച്ചയുണ്ടായതായും തൊഴില്‍, കാര്‍ഷിക മേഖലകളിലെ പ്രശ്‌നങ്ങളില്‍ ഇടപെടാനായെന്നും ജില്ലാ സെക്രട്ടറി വി.ബി. ബിനു പത്രസമ്മേളനത്തില്‍ പറഞ്ഞു. 11,157 അംഗങ്ങളും 666 ബ്രാഞ്ചുകളുമുള്ള പാര്‍ട്ടിയുടെ പ്രവര്‍ത്തനത്തില്‍ കൂടുതല്‍ അച്ചടക്കവും ചിട്ടയുമുണ്ടായി. ജില്ലാ ഓഫീസ് നവീകരിച്ചു. വൈക്കം സത്യഗ്രഹ വേളയില്‍ മഹാത്മാഗാന്ധിയെ പുറത്തിരുത്തിയ ഇണ്ടംതുരുത്തി മനയില്‍ ഗാന്ധിജിയുടെ ചെറുമകന്‍ തുഷാര്‍ ഗാന്ധിയെ കൊണ്ടുവന്നതും കാനം കനലോര്‍മ അനുസ്മരണവും ശ്രദ്ധേയമായിരുന്നു. ലോക്സഭാ തെരഞ്ഞെടുപ്പില്‍ വൈക്കത്ത് മാത്രമാണ് തോമസ് ചാഴികാടന് ഭൂരിപക്ഷം നേടാനായതെന്നത് സിപിഐയുടെ കരുത്ത് തെളിയിക്കുന്നതായും ബിനു പറഞ്ഞു.

അരുവിത്തുറ കോളജിൽ നാടൻപാട്ടുകളുടെ ശീലുകളുമായി രാഹുൽ കൊച്ചാപ്പി

അരുവിത്തുറ: ആദിവാസി ഗോത്രവർഗ വിഭാഗങ്ങളുടെ തനതു സംഗീതത്തിന്‍റെ സമൃദ്ധിയുമായി നാടൻപാട്ട് കലാകാരനും ഫോക്‌ലോർ അക്കാദമി യുവപ്രതിഭാ പുരസ്കാര ജേതാവുമായ രാഹുൽ കൊച്ചാപ്പി വേദി നിറഞ്ഞാടിയപ്പോൾ ഭാഷയുടെയും സംഗീതത്തിന്‍റെയും രാഷ്‌ട്രീയം വിദ്യാർഥികൾക്ക് നേർക്കാഴ്ചയായി. കോളജിലെ പൊളിറ്റിക്കൽ സയൻസ് അസോസിയേഷന്‍റെ ഉദ്ഘാടനവും അദ്ദേഹം നിർവഹിച്ചു. സിനിമ നിർമിക്കാൻ അധഃസ്ഥിത വിഭാഗങ്ങൾക്കുമാത്രം പരിശീലനം വേണമെന്ന ചിലരുടെ ശാഠ്യം വിവേചനത്തിന്‍റെ ശബ്ദമാണെന്ന് രാഹുൽ കൊച്ചാപ്പി പറഞ്ഞു. വൈസ് പ്രിൻസിപ്പൽ ഡോ. ജിലു ആനി ജോൺ അധ്യക്ഷത വഹിച്ച ചടങ്ങിൽ പൊളിറ്റിക്കൽ സയൻസ് വിഭാഗം മേധാവി ഡോ. തോമസ് പുളിക്കൻ, അധ്യാപകരായ സിറിൾ സൈമൺ, അനിറ്റ് ടോം എന്നിവർ പ്രസംഗിച്ചു.

സൗജന്യ ഡയാലിസിസ് കിറ്റുകള്‍ വിതരണം ചെയ്തു

ചേര്‍പ്പുങ്കല്‍: എകെസിസി ചേർപ്പുങ്കൽ യൂണിറ്റിന്‍റെ സാമൂഹ്യക്ഷേമ പദ്ധതിയായ കരുതല്‍ പദ്ധതിയില്‍ ഉള്‍പ്പെടുത്തി 75 ഡയാലിസിസ് രോഗികള്‍ക്ക് കിറ്റുകള്‍ സൗജന്യമായി വിതരണം ചെയ്തു. പാലാ രൂപത ജൂബിലിയോടനുബന്ധിച്ച് സംഘടിപ്പിച്ച ജൂബിലി പ്രോജക്‌ടിന്‍റെ ഉദ്ഘാടനം മാണി സി. കാപ്പന്‍ എംഎല്‍എ യൂണിറ്റ് ഡയറക്ടര്‍ ഫാ. തോമസ് പരിയാരത്തിന് നല്‍കി നിര്‍വഹിച്ചു. യൂണിറ്റ് പ്രസിഡന്‍റ് മാര്‍ട്ടിന്‍ ജെ. കോലടി, സോജന്‍ വാരപ്പറമ്പില്‍, ഷിബു മറ്റപ്പള്ളി, ടി.ഡി. കുര്യാക്കോസ് തുടങ്ങിയവര്‍ പ്രസംഗിച്ചു.

ഉമ്മൻ ചാണ്ടിയുടെ പിൻഗാമി സ്മാരകസ്ഥാപനങ്ങൾ: ചാണ്ടി ഉമ്മൻ എംഎൽഎ

കുറവിലങ്ങാട്: ഉമ്മൻ ചാണ്ടിയുടെ പിൻഗാമി അദ്ദേഹത്തിന്‍റെ പേരിലുള്ള സ്ഥാപനങ്ങളാണെന്ന് ചാണ്ടി ഉമ്മൻ എംഎൽഎ. കുറവിലങ്ങാട് ഉമ്മൻ ചാണ്ടി പഠന ഗവേഷണകേന്ദ്രത്തിന്‍റെ ഉദ്ഘാടനം നിർവഹിക്കുകയായിരുന്നു അദ്ദേഹം. വിദ്യാഭ്യാസ സഹായപദ്ധതിയുടെ ഉദ്ഘാടനം എംജി സർവകലാശാല മുൻ‌ വൈസ് ചാൻസലർ ഡോ. സിറിയക് തോമസ് നിർവഹിച്ചു. നിർധന രോഗികൾക്കുള്ള ധനസാഹായം ചാണ്ടി ഉമ്മൻ എംഎൽഎ നവജീവൻ ട്രസ്റ്റിന് സമ്മാനിച്ചു. നവജീവൻ ട്രസ്റ്റി പി.യു. തോമസ് ഏറ്റുവാങ്ങി. എംജി സർവകലാശാലയിൽനിന്നു ബികോമിന് ഉന്നതവിജയം നേടിയ ഡോൺ ബിജുവിനെയും കോട്ടയം ജില്ലയിലെ മികച്ച അസിസ്റ്റന്‍റ് കൃഷി ഓഫീസറായ സാബു ജോർജ് ഒറ്റക്കണ്ടത്തിലിനെയും യോഗത്തിൽ ആദരിച്ചു. യോഗത്തിൽ ബേബി തൊണ്ടാംകുഴി അധ്യക്ഷത വഹിച്ചു. കോൺഗ്രസ് ബ്ലോക്ക് പ്രസിഡന്‍റ് ജയിംസ് പുല്ലാപ്പള്ളി, ഗവേഷണകേന്ദ്രം പ്രസിഡന്‍റ് ജോസഫ് സെബാസ്റ്റ്യൻ തെന്നാട്ടിൽ, പഞ്ചായത്ത് പ്രസിഡന്‍റ് മിനി മത്തായി, ഷാജി പുതിയിടം, കെ.ഡി. പ്രകാശൻ, എം.ഡി. തോമസ്, എം.എം. ജോസഫ്, ജോസഫ് പുതിയിടം, കാളികാവ് ശശികുമാർ, വി.യു. ചെറിയാൻ, ജോഷി മാത്യു, സിസിലി സെബാസ്റ്റ്യൻ, ജോയിസ് അലക്സ്, സിബി ഓലിക്കൽ എന്നിവർ പ്രസംഗിച്ചു.

വെള്ളികുളത്ത് വള്ളമെത്തി!

വെള്ളികുളം: വെള്ളികുളത്തെ പള്ളി കുളത്തിൽ ഇറക്കാൻ വള്ളമെത്തിയത് നാട്ടുകാർക്ക് കൗതുകമായി. പള്ളിവക കുളത്തിൽ മീൻ വളർത്തൽ നടന്നുവരികയാണ്. ഗിഫ്റ്റി, തിലോപ്പിയ ഇനത്തിൽപ്പെട്ട മൂയിരത്തിലധികം മീൻ കുഞ്ഞുങ്ങളെയാണ് കുളത്തിൽ നിക്ഷേപിച്ചിരിക്കുന്നത്. ആറു മാസത്തിലൊരിക്കൽ മീൻ വിളവെടുപ്പ് നടത്തുന്നുണ്ട്. മീൻ കാണാൻ നേരത്തെ പലരും എത്തിയിരുന്നു. വള്ളം കൂടി എത്തിയതോടെ കാഴ്ചക്കാർ കൂടുമെന്നാണ് പ്രതീക്ഷ. വാഗമൺ ടൂറിസവുമായി ബന്ധപ്പെടുത്തി കാണാനെത്തുന്നവർക്കു വള്ളത്തിൽ സവാരി കൂടി ഒരുക്കുന്നത് ആലോചിക്കുകയാണ് പള്ളി അധികൃതർ. പ്രകൃതിസൗന്ദര്യം ആസ്വദിക്കാനും സൗകര്യമൊരുക്കി ഒരു ടൂറിസം ഡെസ്റ്റിനേഷൻകൂടിയാക്കി മാറ്റാനാണ് പദ്ധതി. വികാരി ഫാ. സ്കറിയ വേകത്താനം, ജയ്സൺ തോമസ് വാഴയിൽ, ചാക്കോച്ചൻ കാലാപറമ്പിൽ, ബിനോയി ഇലവുങ്കൽ, അമൽ ബാബു ഇഞ്ചയിൽ, സണ്ണി കണിയാംകണ്ടത്തിൽ തുടങ്ങിയവരാണ് നേതൃത്വം നൽകുന്നത്.

ഹരിത കേരളം മിഷന്‍റെ ദേവഹരിതം പദ്ധതിക്ക് ഇന്നു തുടക്കം

പൂഞ്ഞാര്‍: ഹരിത കേരളം മിഷന്‍റെ ആഭിമുഖ്യത്തില്‍ ദേവഹരിതം പദ്ധതിക്ക് പൂഞ്ഞാര്‍ കോയിക്കല്‍ ദേവസ്വം ബോര്‍ഡിനു കീഴിലുള്ള മധുര മീനാക്ഷി ദേവീക്ഷേത്രത്തില്‍ ഇന്നു തുടക്കം കുറിക്കും. രാവിലെ 11.30ന് പൂഞ്ഞാര്‍ പഞ്ചായത്ത് പ്രസിഡന്‍റ് ഗീതാ നോബിളിന്‍റെ അധ്യക്ഷതയില്‍ ചേരുന്ന യോഗത്തില്‍ നവകേരളം കര്‍മപദ്ധതി സംസ്ഥാന കോ-ഓഓര്‍ഡിനേറ്റര്‍ ഡോ. ടി.എന്‍. സീമ പദ്ധതി ഉദ്ഘാടനം ചെയ്യും. കേരളത്തിലെ ആരാധനാലയങ്ങളുടെ പരിസരപ്രദേശങ്ങളുടെ സംരക്ഷണത്തിനും പച്ചപ്പ് വര്‍ധിപ്പിക്കുന്നതിനും വേണ്ടിയുള്ള പദ്ധതിയാണ് ദേവഹരിതം. ഹരിത കേരളം മിഷന്‍റെ നേതൃത്വത്തില്‍ എസ്എംവി ഹയര്‍ സെക്കന്‍ഡറി സ്‌കൂളിന്‍റെയും എടിഎം പബ്ലിക് ലൈബ്രറിയുടെയും സഹകരണത്തോടെയാണ് മധുര മീനാക്ഷി ദേവീക്ഷേത്രത്തില്‍ ദേവഹരിതം പദ്ധതി നടപ്പിലാക്കുന്നത്. ഹരിതകേരളം മിഷന്‍ നടത്തുന്ന പരിസ്ഥിതി പുനഃസ്ഥാപന പ്രവര്‍ത്തനങ്ങളുടെ ഭാഗമാണ് പദ്ധതി. ചന്ദനം, ചെത്തി, തുളസി, മന്ദാരം, പിച്ചകം തുടങ്ങിയ സസ്യങ്ങളാണ് ക്ഷേത്ര പരിസരപ്രദേശങ്ങളില്‍ നട്ടുപിടിപ്പിക്കുന്നത്. കൂടാതെ ചെമ്പരത്തി ഉപയോഗിച്ച് ജൈവവേലിയും നിര്‍മിക്കുന്നുണ്ട്. ഉദ്ഘാടനച്ചടങ്ങില്‍ ഹരിതകേരളം മിഷന്‍ ജില്ലാ കോ-ഓര്‍ഡിനേറ്റര്‍ എന്‍.എസ്. ഷൈന്‍, ഈരാറ്റുപേട്ട ബ്ലോക്ക് പഞ്ചായത്തംഗം രമാ മോഹന്‍, എസ്എംവി ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ എസ്. ജയശ്രീ, ഹെഡ്മിസ്ട്രസ് എ.ആര്‍. അനുജ വര്‍മ, പ്രഫ. സുധാ വര്‍മ, ജില്ലാ ലൈബ്രറി കൗണ്‍സില്‍ അംഗം രമേഷ് ബി. വെട്ടിമറ്റം, എബി ഇമ്മാനുവല്‍, ട്രീ ടാഗ് നോഡല്‍ ഓഫീസര്‍ ഡോ. സണ്ണിച്ചന്‍ വി. ജോര്‍ജ്, ഈരാറ്റുപേട്ട ബ്ലോക്ക് പഞ്ചായത്ത് ഹരിതകേരളം മിഷന്‍ റിസോഴ്‌സ് പേഴ്‌സണ്‍ വിഷ്ണു പ്രസാദ്, എടിഎം പബ്ലിക് ലൈബ്രറി സെക്രട്ടറി വി.കെ. ഗംഗാധരന്‍ എന്നിവര്‍ പങ്കെടുക്കും.

കിടങ്ങൂര്‍ ലിറ്റില്‍ ലൂര്‍ദ്‌ മിഷന്‍ ആശുപത്രിയില്‍ അപൂര്‍വ ശസ്ത്രക്രിയ

കിടങ്ങൂര്‍: ലിറ്റില്‍ ലൂര്‍ദ്‌ മിഷന്‍ ആശുപത്രിയില്‍ അപൂര്‍വ ശസ്ത്രക്രിയ നടത്തി. കുറവിലങ്ങാട് സ്വദേശിനിയായ 39കാരിയാണ് ഗര്‍ഭാശയത്തിലെ മുഴയെത്തുടര്‍ന്ന് ഗൈനക്കോളജി വിഭാഗത്തില്‍ ചികിത്സ തേടിയെത്തിയത്. പരിശോധനയില്‍ 15 സെന്‍റിമീറ്റര്‍ വലിപ്പമുള്ള ഗര്‍ഭാശയമുഴ സ്ഥിരീകരിച്ചു. കുട്ടികളില്ലാത്ത യുവതിക്കു ഗര്‍ഭാശയം നിലനിര്‍ത്തി കീഹോള്‍ ശസ്ത്രിക്രിയയിലൂടെ മുഴ നീക്കം ചെയ്തു. മുഴയ്ക്ക് ഒരു കിലോ ഭാരമുണ്ടായിരുന്നു. ശസ്ത്രക്രിയയുടെ മൂന്നാം ദിവസം പൂര്‍ണ ആരോഗ്യവതിയായി യുവതി വീട്ടിലേക്ക് മടങ്ങി. ഗൈനക്കോളജി വിഭാഗം മേധാവി സിസ്റ്റര്‍ ഡോ. ശാന്തിയുടെ മേല്‍നോട്ടത്തില്‍ സീനിയര്‍ ഗൈനക്കോളജിസ്റ്റും ലാപ്രോസ്‌കോപ്പിക് സര്‍ജനുമായി ഡോ. വൈ.എസ്. സുശാന്താണ് ശസ്ത്രക്രിയ നടത്തിയത്. അനസ്‌തേഷ്യ മേധാവി ഡോ. ബിനു ആന്‍റണി ജോസഫ്, ഗൈനക്കോളജിസ്റ്റുകളായ ഡോ. അനിത ഫ്രാന്‍സിസ്, ഡോ. എയ്ഞ്ചല ബാബു, നഴ്‌സുമാരായ കരോള്‍, സിമി എന്നിവര്‍ ശസ്ത്രക്രിയയില്‍ പങ്കെടുത്തു.

ഒരു ദിവസം ഒരു ലക്ഷം; റിക്കാർഡ് നേട്ടവുമായി കുടുംബശ്രീ പ്രീമിയം കഫേ

കുറവിലങ്ങാട്: വരുമാനത്തിൽ ഒന്നാമതായി ജില്ലയിലെ കുടുംബശ്രീയുടെ പ്രീമിയം കഫേ. സംസ്ഥാനത്ത് ആദ്യമായി ദിവസ വരുമാനം ഒരു ലക്ഷം രൂപ നേട്ടത്തിലെത്തിയിരിക്കുകയാണ് കുറവിലങ്ങാട് കോഴാ കുടുംബശ്രീ പ്രീമിയം കഫേ. ഞായറാഴ്ചയാണ് പ്രതിദിന വില്പന ഒരുലക്ഷം എന്ന നേട്ടത്തില്‍ എത്തിയത്. നിലവില്‍ സംസ്ഥാനത്ത് പത്തു പ്രീമിയം കഫേകളുണ്ട്. ജില്ലയില്‍ ആദ്യത്തേതാണ് കെ.എം. മാണി തണല്‍ വഴിയോര വിശ്രമകേന്ദ്രത്തില്‍ സജ്ജമാക്കിയത്. ഈ വര്‍ഷം ഏപ്രില്‍ എട്ടിനാണ് റസ്റ്ററന്‍റ് ഉദ്ഘാടനം ചെയ്തത്. രണ്ട് ഷിഫ്റ്റുകളിലായി 13 പാചകക്കാരാണ് കഫേയിലുള്ളത്. ഇവരടക്കം 52 കുടുംബശ്രീ വനിതകള്‍ക്ക് തൊഴില്‍ നല്‍കുന്ന സംരംഭമായും പ്രീമിയം കഫേ മാറിയിട്ടുണ്ട്. ഊണും ബിരിയാണിയുമാണ് ഏറ്റവും വില്പനയുള്ളത്. സാധാരണ വിഭവങ്ങള്‍ക്കൊപ്പം പിടിയും കോഴിയും പോലെയുള്ള സ്പെഷല്‍ വിഭവങ്ങളും ചൈനീസ് വിഭവങ്ങളുമുണ്ട്.

പ്രൈവറ്റിനെ വെട്ടി ആനവണ്ടിയായതോടെ രണ്ടും നിന്നു; ജനം പെരുവഴിയിൽ

എരുമേലി: സ്വകാര്യ ബസ് കൃത്യമായി സർവീസ് നടത്തിയിരുന്ന ഗ്രാമീണ റൂട്ടിൽ സ്വകാര്യ ബസിന്‍റെ സമയത്ത് കെഎസ്ആർടിസി ഓടിത്തുടങ്ങിയതോടെ നഷ്ടം മൂലം സ്വകാര്യ ബസ് സർവീസ് നിന്നു. അധികം വൈകാതെ കെഎസ്ആർടിസിയും സർവീസ് നിർത്തി. ഇതോടെ നാട്ടുകാർ ബുദ്ധിമുട്ടിൽ. എരുമേലി ടൗണിൽനിന്നു രാവിലെ 4.30ന് ആരംഭിച്ച് മുക്കൂട്ടുതറ, കണമല, മൂക്കൻപെട്ടി, കുഴിമാവ്, 504 കോളനി, പുഞ്ചവയൽ, മുണ്ടക്കയം, പറത്താനം, ചോലത്തടം, പതാമ്പുഴ, ഈരാറ്റുപേട്ട വഴി എറണാകുളത്തേക്കുള്ള കെഎസ്ആർടിസി സർവീസാണ് നഷ്ടമാണെന്ന് പറഞ്ഞ് നിർത്തിവച്ചിരിക്കുന്നത്. എന്നാൽ ശനി, ഞായർ ദിവസങ്ങളിൽ സർവീസ് നടത്താതെ മറ്റ് ദിവസങ്ങളിലാണ് സർവീസ് നടത്തിയിരുന്നത്. ഇത് മൂലം സ്ഥിരം യാത്രക്കാർ കുറയുകയായിരുന്നു. ഇതോടെയാണ് സർവീസ് നഷ്ടത്തിലായത്. അതേസമയം ഇനി സ്വകാര്യ ബസ് സർവീസ് ഏറ്റെടുത്ത് നടത്താൻ ഒരുക്കമല്ല. സർവീസ് തുടർന്ന് നടത്തിയാൽ പഴയപോലെ കെഎസ്ആർടിസി സർവീസ് നടത്താൻ വരുമെന്നും അപ്പോൾ തങ്ങളും നഷ്ടം മൂലം നിർത്തേണ്ടി വരുമെന്ന് സ്വകാര്യ ബസ് അധികൃതർ പറയുന്നു. കിഴക്കൻ മലയോര മേഖലയിലെ ഗ്രാമീണ പ്രദേശങ്ങളിലൂടെ കടന്നു പോകുന്ന സർവീസ് ഒട്ടേറെ യാത്രക്കാർക്കു പ്രയോജനകരമായിരുന്നു. ഗതാഗതമന്ത്രി ഇടപെട്ട് ബസ് സർവീസ് തുടരുന്നതിന് അടിയന്തര നടപടികൾ സ്വീകരിക്കണമെന്ന് ഡിസിസി ജനറൽ സെക്രട്ടറി പ്രകാശ് പുളിക്കൻ ആവശ്യപ്പെട്ടു. ഇതു സംബന്ധിച്ച് മന്ത്രിക്ക് നിവേദനം നൽകിയെന്ന് പ്രകാശ് അറിയിച്ചു.

നാനോ ടെക്നോളജി കാൻസർ ചികിത്സയിൽ വിപ്ലവമുണ്ടാക്കും: ഡോ. സാബു തോമസ്

പെരുവന്താനം: നാനോ ടെക്നോളജിയും അതിന്‍റെ അനന്തസാധ്യതകളും ഗവേഷണഫലങ്ങളും മാനവരാശിക്ക് പ്രയോജനകരമെന്ന് എംജി യൂണിവേഴ്സിറ്റി മുൻ വൈസ് ചാൻസലർ ഡോ. സാബു തോമസ്. പെരുവന്താനം സെന്‍റ് ആന്‍റണീസ് കോളജിൽ പുതുതായി ആരംഭിക്കുന്ന റോബോട്ടിക് ലാബിന്‍റെയും വിആര്‍ സ്റ്റുഡിയോയുടെയും ഉദ്ഘാടനം നിർവഹിച്ച് പ്രസംഗിക്കുകയായിരുന്നു അദ്ദേഹം. നാനോ ടെക്നോളജിയുടെ ഗവേഷണ ഫലങ്ങൾ അന്താരാഷ്‌ട്രതലത്തിൽ കൃഷിക്കും ആരോഗ്യ പരിപാലനത്തിനും വിദ്യാഭ്യാസ മേഖലയ്ക്കും പ്രതിരോധ മേഖലകൾക്കും ഏറെ പ്രയോജനം ചെയ്യുമെന്നും കാൻസർ പോലുള്ള മാരകരോഗങ്ങളെ ഫലപ്രദമായി ചികിത്സിക്കുന്നതിന് നാനോ മോഡ്യൂൾ വ്യാപകമായി ഉപയോഗിച്ചു തുടങ്ങുന്നതോടെ ചെലവുകുറഞ്ഞ കൃത്യതയുള്ള ചികിത്സ നേടിയെടുക്കാൻ സാധിക്കുമെന്നും അദ്ദേഹം കൂട്ടിച്ചേർത്തു. യോഗത്തിൽ തിരുവനന്തപുരം എൻജിനിയറിംഗ് സയൻസ് ആൻഡ് ടെക്നോളജി റിസര്‍ച്ച് പാര്‍ക്കിന്‍റെ സാറ്റലൈറ്റ് സെന്‍ററും പെരുവന്താനം സെന്‍റ് ആന്‍റണീസ് കോളജിൽ അനുവദിച്ചതായി അദ്ദേഹം പ്രഖ്യാപിച്ചു. കോളജ് ചെയർമാൻ ബെന്നി തോമസ് അധ്യക്ഷത വഹിച്ചു. ഡോ. ആന്‍റണി ജോസഫ്‌ കല്ലമ്പള്ളി, സെക്രട്ടറി റ്റിജോമോന്‍ ജേക്കബ്‌, വൈസ് പ്രിന്‍സിപ്പല്‍മാരായ സുപര്‍ണ രാജു, പി.ആര്‍. രതീഷ്‌, ബോബി കെ. മാത്യു, വകുപ്പ് മേധാവി ജിന്‍റുമോള്‍ ജോൺ, ജിനു തോമസ്, ഫാ. ജോസഫ്‌ വഴപ്പനാടി എന്നിവർ പ്രസംഗിച്ചു. ഗവൺമെന്‍റ് ഓഫ് ഇന്ത്യ സ്റ്റെഡ് കൗൺസിലുമായി ചേർന്ന് റോബോട്ടിക് സയന്‍സില്‍ ഹ്രസ്വകാല കോഴ്സുകളും ആരംഭിക്കുമെന്ന് കോളജ് അധികൃതര്‍ അറിയിച്ചു. കോളജ് വിദ്യാര്‍ഥികള്‍ക്ക് പുറമേ 26 ഹയർ സെക്കൻഡറി സ്കൂളുകളിൽ നിന്നുമായി നിരവധി വിദ്യാർഥികൾ പ്രോഗ്രാമില്‍ പങ്കെടുക്കുകയും ഡോ. സാബു തോമസുമായി സംവാദം നടത്തി.

കൊമ്പുകുത്തിയിൽ ക്ലാസെടുക്കാൻ കാട്ടാന!

മുണ്ടക്കയം: കാർഷിക മേഖലയിൽ വൻ നാശം വിതയ്ക്കുന്നതിനൊപ്പം കാട്ടാനകൾ വിദ്യാഭ്യാസത്തിനും ഭീഷണിയാകുന്നു. ജീവൻ പണയംവച്ചു സ്കൂളിലെത്തേണ്ട ഗതികേടിലാണ് കൊമ്പുകുത്തി ഗവൺമെന്‍റ് ട്രൈബൽ ഹൈസ്കൂളിലെ അധ്യാപകരും വിദ്യാർഥികളും. കോരുത്തോട്, പെരുവന്താനം പഞ്ചായത്തുകളുടെ വനാതിർത്തി മേഖലയായ കൊമ്പുകുത്തിയിൽ കാട്ടാനശല്യം അതിരൂക്ഷമാണ്. വണ്ടിക്കു മുന്നിൽ ആന പ്രദേശത്തെ വിദ്യാർഥികളുടെ ഏക ആശ്രയമാണ് കൊമ്പുകുത്തി സർക്കാർ ഹൈസ്കൂൾ. എന്നാൽ, ഇവിടേക്കുള്ള യാത്ര വിദ്യാർഥികൾക്കും അധ്യാപകർക്കും ഒരുപോലെ ദുരിതമായി മാറിയിരിക്കുകയാണ്. രാവിലെ ഒന്പതിനു മുന്പ് അധ്യാപകർ സ്കൂളിൽ എത്തണമെന്നാണ് സർക്കാർ നിർദേശം. എന്നാൽ, മേഖലയിലേക്കുള്ള ഏക ബസ് മുണ്ടക്കയത്തുനിന്ന് സർവീസ് ആരംഭിക്കുന്നതു രാവിലെ 8.45 നാണ്. സ്കൂളിൽ എത്തിച്ചേരുമ്പോൾ 9.30 കഴിയും. ഇതുകൊണ്ടു സ്വകാര്യ വാഹനങ്ങളെ ആശ്രയിക്കേണ്ട ഗതികേടിലാണ് ഇവിടത്തെ അധ്യാപകർ. ഇതു സാന്പത്തിക ബാധ്യത യുണ്ടാക്കുന്നുവെന്നു മാത്രമല്ല ആനയെ പേടിച്ചുവേണം യാത്ര ചെയ്യാൻ. പെരുവന്താനം പഞ്ചായത്തിലെ ടിആർ ആൻഡ് ടി എസ്റ്റേറ്റിലെ ചെന്നാപ്പാറ, മതമ്പ അടക്കമുള്ള മേഖലയിലെ കുട്ടികളും പഠിക്കുന്നത് കൊമ്പുകുത്തി സ്കൂളിലാണ്. ജീപ്പ്, ഓട്ടോറിക്ഷ അടക്കമുള്ള സ്വകാര്യ വാഹനങ്ങളാണ് ഇവിടത്തെ വിദ്യാർഥികളുടെ ആശ്രയം. ഏതാനും മാസങ്ങൾക്കുമുമ്പ് വിദ്യാർഥികളുമായി സഞ്ചരിച്ചിരുന്ന ജീപ്പിനു മുന്നിൽ കാട്ടാനക്കൂട്ടമെത്തിയിരുന്നു. അന്ന് അദ്ഭുതകരമായിട്ടാണ് വിദ്യാർഥികൾ കാട്ടാനയുടെ ആക്രമണത്തിൽനിന്നു രക്ഷപ്പെട്ടത്. ആനയെടുത്തത് രണ്ടു ജീവൻ കഴിഞ്ഞ അഞ്ചു മാസത്തിനിടെ പെരുവന്താനം, കോരുത്തോട് വനാതിർത്തി പങ്കിടുന്ന മേഖലയിൽ കാട്ടാനയുടെ ആക്രമണത്തിൽ രണ്ടു ജീവനുകളാണ് പൊലിഞ്ഞത്. രണ്ടു പേരെയും കൊലപ്പെടുത്തിയത് ഒരേ ആന തന്നെയാണെന്നാണു നാട്ടുകാർ പറയുന്നത്. അക്രമകാരിയായ ആന ജനവാസമേഖലയിൽ ഇറങ്ങിയതോടെ ആളുകൾ കടുത്ത ഭീതിയിലാണ്. കാട്ടാനക്കൂട്ടത്തിൽനിന്നു മാറിനടക്കുന്ന അക്രമകാരിയായ ആന പതിയിരുന്നാണ് മനുഷ്യരെ ആക്രമിക്കുന്നതെന്നും പറയുന്നു. ആനയുടെ സാന്നിധ്യം മനുഷ്യർ തിരിച്ചറിയുമ്പോഴേക്കും ആക്രമണമുണ്ടായിരിക്കും. രണ്ട് ആളുകളെ കൊലപ്പെടുത്തി ജനവാസമേഖലയിൽ തമ്പടിക്കുന്ന ഈ കാട്ടാനയെ പിടികൂടി ഉൾവനത്തിൽ വിടണമെന്നാണ് നാട്ടുകാരുടെ ആവശ്യം. ചവിട്ടിമെതിച്ച് വിളവെടുപ്പ്! കഴിഞ്ഞ ദിവസം മേഖലയിലെത്തിയ കാട്ടാനക്കൂട്ടം ബിജു ഇളംപുരയിടത്തിൽ, വിശ്വനാഥൻ മഷികല്ലുങ്കൽ, ടി.എൻ. സജി തടത്തിൽ, കെ.സി. സുനീഷ് കോച്ചേരിയിൽ, രാജപ്പൻ തടത്തിൽ, ശാന്തമ്മ മഷികല്ലുങ്കൽ എന്നിവരുടെ കൃഷികൾ വ്യാപകമായി നശിപ്പിച്ചു. കർഷകർ നട്ടുവളർത്തിയ വിളവെടുപ്പിനു പാകമായ 200ൽപരം മൂട് കപ്പയും ഓണത്തിന് വിളവെടുക്കേണ്ടിയിരുന്ന 200ലധികം ഞാലിപ്പൂവൻ വാഴകളും കാട്ടാനക്കൂട്ടം തകർത്തു. കൂടാതെ പ്രദേശത്തെ കർഷകരുടെ കമുക്, കൊക്കോ, കാപ്പി, കുരുമുളക്, റബർ എന്നിവയും കാട്ടാനക്കൂട്ടം ചവിട്ടിമെതിച്ചു തകർത്തു.

ആനക്കല്ല് സെന്‍റ് ആന്‍റണീസിൽ ടെക് ടോക്ക് പരമ്പരയ്ക്കു തുടക്കം

കാഞ്ഞിരപ്പള്ളി: സാങ്കേതികവിദ്യകളിലെ പുത്തന്‍സാധ്യതകളെക്കുറിച്ച് വിദ്യാര്‍ഥികളില്‍ അവബോധം വളര്‍ത്തുകയെന്ന ലക്ഷ്യത്തോടെ ആനക്കല്ല് സെന്‍റ് ആന്‍റണീസ് പബ്ലിക് സ്‌കൂളില്‍ ടെക് ടോക്ക് പരമ്പരയ്ക്കു തുടക്കംകുറിച്ചു. സ്കൂൾ റൂബി ജൂബിലി ആഘോഷങ്ങളുടെ ഭാഗമായാണ് പ്രമുഖ വ്യക്തികള്‍ നയിക്കുന്ന പ്രഭാഷണ പരമ്പര. എംജി സര്‍വകലാശാല മുന്‍ വൈസ് ചാന്‍സലര്‍ ഡോ. സാബു തോമസ് ഉദ്ഘാടനം നിര്‍വഹിച്ചു. നാനോ വൈപ്, ജീന്‍ എഡിറ്റിംഗ്, കെമിക്കല്‍ എന്‍ജിനിയറിംഗ്, എയ്റോ സ്‌പേസ്, മെഡിക്കല്‍ സയന്‍സ് എന്നീ മേഖലകളില്‍ നാനോ ടെക്‌നോളജിയുടെ പ്രാധാന്യംമൂലം ലോകത്തിന് വന്ന മാറ്റങ്ങള്‍, ലോകത്തിന്‍റെ സമ്പദ്‌വ്യവസ്ഥയില്‍ നാനോ ടെക്നോളജിയുടെ പങ്ക് തുടങ്ങി വിവിധ വിഷയങ്ങളെക്കുറിച്ച് അദ്ദേഹം വിദ്യാര്‍ഥികളെ ബോധവത്കരിച്ചു. സമ്മേളനത്തില്‍ മാനേജര്‍ ഫാ. ജോസഫ് പൊങ്ങന്താനത്ത്, പ്രിന്‍സിപ്പല്‍ ഫാ. ആന്‍റണി തോക്കനാട്ട്, വൈസ് പ്രിന്‍സിപ്പല്‍ ഫാ. ഷിജു കണ്ടപ്ലാക്കല്‍, പിടിഎ പ്രസിഡന്‍റ് ജോസ് ആന്‍റണി എന്നിവര്‍ പ്രസംഗിച്ചു. വിദ്യാര്‍ഥികളില്‍ ശാസ്ത്രീയാവബോധം വളര്‍ത്തുക എന്ന ലക്ഷ്യത്തോടെയാണ് പരിപാടികള്‍ സംഘടിപ്പിക്കുന്നതെന്ന് പ്രിന്‍സിപ്പല്‍ അറിയിച്ചു.

രജതജൂബിലി ആഘോഷവും പാലിയേറ്റീവ് കെയർ യൂണിറ്റ് വെഞ്ചരിപ്പും

കോരുത്തോട്: ആതുരശുശ്രൂഷാരംഗത്ത് അരനൂറ്റാണ്ട് പിന്നിട്ട കോരുത്തോട് കരുണാഭവൻ മെഡിക്കൽ സെന്‍റർ പുതിയ കെട്ടിടത്തിൽ പ്രവർത്തനം ആരംഭിച്ചതിന്‍റെ രജതജൂബിലി ആഘോഷങ്ങൾക്ക് ഇന്ന് തുടക്കം. ഒരു വർഷം നീണ്ടുനിൽക്കുന്ന ജൂബിലിയുടെ ഭാഗമായി ആരംഭിക്കുന്ന ആധുനിക സംവിധാനങ്ങളോടുകൂടിയ പാലിയേറ്റീവ് കെയർ യൂണിറ്റിന്‍റെയും നവീകരിച്ച മെഡിക്കൽ ലാബിന്‍റെയും വെഞ്ചരിപ്പും ഇതോടനുബന്ധിച്ച് നടക്കും. ഉച്ചകഴിഞ്ഞ് 2.30ന് മഠം ചാപ്പലിൽ വിശുദ്ധ കുർബാന. തുടർന്നു നടക്കുന്ന സമ്മേളനം കാഞ്ഞിരപ്പള്ളി രൂപത വികാരി ജനറാൾ റവ.ഡോ. സെബാസ്റ്റ്യൻ കൊല്ലംകുന്നേൽ ഉദ്ഘാടനം ചെയ്യും. ആരാധനാ സന്യാസിനീസമൂഹം കാഞ്ഞിരപ്പള്ളി പ്രൊവിൻസ് പ്രൊവിൻഷ്യൽ സുപ്പീരിയർ മദർ സിസ്റ്റർ അമല കിടങ്ങത്താഴെ അധ്യക്ഷത വഹിക്കും. പ്രൊവിൻഷ്യൽ കൗൺസിലർ സിസ്റ്റർ ലിസ്മരിയ, കോരുത്തോട് പഞ്ചായത്ത് പ്രസിഡന്‍റ് ജാൻസി സാബു, സെന്‍റ് ജോർജ് പള്ളി വികാരി ഫാ. സക്കറിയാണ് ഇല്ലിക്കമുറിയിൽ, മുണ്ടക്കയം മെഡിക്കൽ ട്രസ്റ്റ് ആശുപത്രി അഡ്മിനിസ്ട്രേറ്റർ ഫാ. ദീപു പുത്തൻപുരയ്ക്കൽ, കോരുത്തോട് ഗ്രാമപഞ്ചായത്ത് മെംബർ ടോംസ് കുര്യൻ, സിസ്റ്റർ അൻസിൻ മാറുകാട്ടുകുന്നേൽ, കരുണാഭവൻ മെഡിക്കൽ സെന്‍റർ അഡ്മിനിസ്ട്രേറ്റർ സിസ്റ്റർ ക്ലെറിൻ എന്നിവർ പ്രസംഗിക്കും.

സംസ്ഥാന ഷട്ടിൽ ബാഡ്മിന്‍റൺ: മുക്കൂട്ടുതറ അസീസി നഴ്സിംഗ് കോളജിനു രണ്ടാംസ്ഥാനം

മുക്കൂട്ടുതറ: നഴ്സിംഗ് കോളജുകളുടെ സംസ്ഥാന ഷട്ടിൽ ബാഡ്മിന്‍റൺ മത്സരത്തിൽ മുക്കൂട്ടുതറ അസീസി നഴ്സിംഗ് കോളജിന് രണ്ടാം സ്ഥാനം. നഴ്സിംഗ് വിദ്യാർഥികളായ ഇമ്മാനുവൽ, ശ്രീജിത്ത് എന്നിവരാണ് രണ്ടാം സ്ഥാനം നേടിയത്. എരുമേലി പഞ്ചായത്ത്‌ തുമരംപാറ വാർഡ് അംഗം ബിനോയി-റെനി ദന്പതികളുടെ മകനാണ് ഇമ്മാനുവൽ. അടൂർ ഏനാത്ത് തടത്തിൽവിള ശ്രീകുമാർ-ശ്രീദേവി ദമ്പതികളുടെ മകനാണ് ശ്രീജിത്ത്.

ചെക്ക്ഡാമിന് ചെക്ക് വച്ചു നാട്ടുകാർ

കരൂര്‍: പാലാ മുനിസിപ്പാലിറ്റിയിലെ കൊണ്ടാട്ട് കടവ് ചെക്ക്ഡാമിന്‍റെ ഷട്ടറുകള്‍ മഴക്കലമായിട്ടും തുറക്കാത്തതിനാല്‍ ജില്ലയില്‍ ആദ്യം വെള്ളം കയറുന്ന പ്രദേശമായി കരൂര്‍ പള്ളി ഭാഗം. കനത്ത മഴ പെയ്തിട്ടും മീനച്ചലാറും മറ്റു കൈവഴികളും കരകവിഞ്ഞില്ല. എന്നാല്‍, മീനച്ചിലാറിന്‍റെ കൈവഴിയായ ളാലം തോടിന്‍റെ കരൂര്‍ ഭാഗത്തു വെള്ളം കയറി. മഴക്കാലത്തിന് മുമ്പ് ഇതിനു താഴെയുള്ള ചെക്ക്ഡാം തുറന്നു വിടാത്തതാണ് കാരണമെന്നു നാട്ടുകാര്‍ ചൂണ്ടിക്കാട്ടി. അധികൃതർ അറിയുന്നില്ലേ? മുനിസിപ്പല്‍ അധികൃതരുടെ അനാന്ഥയാണ് ഈ അവസ്ഥയ്ക്കു കാരണമെന്നാണ് ആക്ഷേപം. ഇന്നലെ രാവിലെ പാലായില്‍നിന്നു നിലന്പൂരിലേക്കു പോവുകയായിരുന്ന ബസ് കരൂര്‍ ഭാഗത്ത് റോഡില്‍ കയറിയ വെള്ളത്തില്‍ കുടുങ്ങി. തുടര്‍ന്ന് നാട്ടുകാര്‍ ചേര്‍ന്നു ബസ് തള്ളിക്കയറ്റിയതിനാലാണ് അപകടം ഒഴിവായത്. ഈ പ്രദേശത്തു വെള്ളംകയറ്റം സ്ഥിരമായതിനാല്‍ അപകടങ്ങളും നിത്യസംഭവമായി മാറിയിരിക്കുകയാണ്. മീനിച്ചിലാറിന്‍റെ സമീപപ്രദേശങ്ങളിലൊന്നും വെള്ളം കയറാത്ത സാഹചര്യത്തില്‍ ഇവിടെ മാത്രം വെള്ളം കയറുന്നതു തൊട്ടുതാഴെയുള്ള ചെക്ക്ഡാം തുറന്നുവിടാത്തതിലാണെന്നു തൃണമൂൽ കോണ്‍ഗ്രസ് നേതാവ് സജി മഞ്ഞക്കടമ്പില്‍ ആരോപിച്ചു.

ചങ്ങനാശേരി ബൈപാസിലെ പാഴ്മരങ്ങള്‍ വെട്ടിമാറ്റണം

ചങ്ങനാശേരി: ചങ്ങനാശേരി ബൈപാസില്‍ റെയില്‍വേ സ്റ്റേഷന്‍ മുതല്‍ പാലാത്ര ജംഗ്ഷന്‍ വരെയുള്ള ഭാഗത്തെ പൊട്ടവാക പോലെയുള്ള പാഴ്മരങ്ങള്‍ വെട്ടിമാറ്റി യാത്രക്കാര്‍ക്കു സുരക്ഷയൊരുക്കണമെന്നു മുനിസിപ്പല്‍ കൗണ്‍സിലര്‍ എല്‍സമ്മ ജോബ്, വാര്‍ഡ് കണ്‍വീനര്‍ ചാള്‍സ് പാലാത്ര എന്നിവര്‍ കോട്ടയം ജില്ലാ കളക്ടര്‍ക്ക് നല്‍കിയ നിവേദനത്തില്‍ ആവശ്യപ്പെട്ടു. ഇത്തരം നിരവധി മരങ്ങള്‍ അപകടാവസ്ഥയില്‍ നില്‍ക്കുന്നുണ്ടെന്നും അടുത്തിടെ ചില മരങ്ങള്‍ നിലംപൊത്തിയതായും ഇവര്‍ ചൂണ്ടിക്കാട്ടി.

1200 ദിവസം പിന്നിട്ട് സില്‍വര്‍ലൈന്‍വിരുദ്ധ സത്യഗ്രഹസമരം

മാടപ്പള്ളി: കെ-റെയില്‍ സില്‍വര്‍ലൈന്‍ പദ്ധതി പിന്‍വലിച്ച് ഉത്തരവിറക്കണമെന്നാവശ്യപ്പെട്ട് മാടപ്പള്ളി സമരപ്പന്തലില്‍ നടന്നുവരുന്ന സത്യഗ്രഹ സമരം 1200 ദിവസം പിന്നിട്ടു. കേന്ദ്ര സര്‍ക്കാര്‍ നിര്‍ദിഷ്ട പദ്ധതിക്ക് അംഗീകാരം നല്‍കാത്ത സാഹചര്യത്തിലും കേരള ജനത തള്ളിക്കളഞ്ഞ പദ്ധതി കേരള സര്‍ക്കാരിനു നടപ്പാക്കാന്‍ സാധിക്കാത്തതിനാലും പദ്ധതി ഉപേക്ഷിക്കാന്‍ സര്‍ക്കാര്‍ തയാറാകണമെന്നും സര്‍വേ നമ്പര്‍ ഉള്‍പ്പെടുത്തി ഇറക്കിയ വിജ്ഞാപനം പിന്‍വലിക്കണമെന്നും സമരസമിതി ചെയര്‍മാന്‍ ബാബു കുട്ടന്‍ചിറ ആവശ്യപ്പെട്ടു.

മധ്യവേനല്‍ അവധി മാറ്റാനുള്ള ആലോചന ഉപേക്ഷിക്കണം: കത്തോലിക്ക കോണ്‍ഗ്രസ്

ചങ്ങനാശേരി: കുട്ടികള്‍ക്ക് ഏപ്രില്‍, മേയ് മാസങ്ങളിലുള്ള മധ്യവേനല്‍ അവധി ജൂണ്‍, ജൂലൈ മാസങ്ങളിലേക്ക് മാറ്റണമെന്നുള്ള നിർദേശം അപ്രായോഗീകമെന്ന് കത്തോലിക്ക കോണ്‍ഗ്രസ് അതിരൂപത സമിതി. സിബിഎസ്ഇ, ഐസിഎസ്ഇ തുടങ്ങിയ സിലബസില്‍ ബോര്‍ഡ് പരീക്ഷ എഴുതുന്ന കുട്ടികള്‍ക്ക് ഇതു വളരെയേറെ ബുദ്ധിമുട്ടുകള്‍ സൃഷ്ടിക്കും. കൂടാതെ വിവിധ എന്‍ട്രന്‍സ് പരീക്ഷകൾ എഴുതുന്ന കുട്ടികള്‍ക്ക് ഇതു പ്രയാസമുണ്ടാക്കും. കൃത്യമായ തയാറെടുപ്പുകൾക്ക് കഴിയാതെയും വരും. ഏപ്രില്‍, മേയ് മാസങ്ങളിലെ കൊടുംചൂടില്‍ ക്ലാസ് മുറിയിലിരുന്ന് പഠനം നടത്തുന്നത് കൊച്ചുകുട്ടികള്‍ക്ക് ക്ലേശകരമായിരിക്കും. ജലലഭ്യത കുറവുള്ള ഇക്കാലയളവില്‍ സ്‌കൂളുകള്‍ക്ക് ആവശ്യമായ ശുദ്ധജലം ലഭ്യമാകുമോ എന്നതു തീരുമാനമെടുക്കുമ്പോള്‍ മനസിലുണ്ടാകണമെന്ന് കത്തോലിക്ക കോണ്‍ഗ്രസ് ഓര്‍മിപ്പിച്ചു. അതിരൂപത പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിച്ചു. ഡയറക്ടര്‍ ഫാ. സെബാസ്റ്റ്യന്‍ ചാമക്കാല ഉദ്ഘാടനം ചെയ്തു. ജനറല്‍ സെക്രട്ടറി ബിനു ഡൊമിനിക്, ജോസ് വെങ്ങാന്തറ, ജോര്‍ജുകുട്ടി മുക്കത്ത്, രാജേഷ് ജോണ്‍, സെബാസ്റ്റ്യന്‍ വര്‍ഗീസ്, കുഞ്ഞ് കളപ്പുര, ചാക്കപ്പന്‍ ആന്‍റണി, സേവ്യര്‍ കൊണ്ടോടി, ജോബി ചൂരക്കളം, ടോം കയ്യാലകം, ജോസി ഡൊമിനിക്, ഷാജി വര്‍ക്കി, ലിസി ജോസ്, ജെസി ആന്‍റണി എന്നിവര്‍ പ്രസംഗിച്ചു.

നിര്‍മാണോദ്ഘാടനം നടത്തിയിട്ട് ഒന്നരവര്‍ഷം : എങ്ങുമെത്താതെ നാലുകോടി റെയില്‍വേ മേല്‍പാലം

ചങ്ങനാശേരി: പെരുന്തുരുത്തി-ഏറ്റുമാനൂര്‍ ബൈപ്പാസില്‍ നാലുകോടി ലെവല്‍ ക്രോസിന് (ലെവല്‍ ക്രോസ് നമ്പര്‍ 7) പകരം മേല്‍പ്പാലത്തിന്‍റെ നിര്‍മാണോദ്ഘാടനം പ്രധാനമന്ത്രി നരേന്ദ്ര മോദി ഓണ്‍ലൈന്‍ വീഡിയോ കോണ്‍ഫറൻസിലൂടെ നിര്‍വഹിച്ചിട്ട് ഒന്നരവര്‍ഷം പിന്നിട്ടിട്ടും നടപടിയാകാതെ ഇഴയുന്നു. നരേന്ദ്ര മോദിയുടെ നേതൃത്വത്തില്‍ അടുത്ത സര്‍ക്കാര്‍ നിലവില്‍വന്ന് ഒരു വർഷം കഴിഞ്ഞിട്ടും മേല്‍പാലം നിര്‍മാണം സംബന്ധിച്ച് ഒരു നടപടിയും ഉണ്ടായില്ല. ഏറെ തിരക്കുള്ള ഈ ബൈപാസിലെ നാലുകോടി ലെവല്‍ക്രോസ് അടയ്ക്കുമ്പോള്‍ വാഹനതടസം യാത്രക്കാര്‍ക്കു ദുരിതമാകുകയാണ്. കഴിഞ്ഞ പാര്‍ലമെന്‍റ് തെരഞ്ഞെടുപ്പിനു തൊട്ടുമുമ്പ് 2024 ഫെബ്രുവരി 26നാണ് പ്രധാനമന്ത്രി മേല്‍പാലത്തിന്‍റെ നിര്‍മാണ പ്രവര്‍ത്തനങ്ങളുടെ ഉദ്ഘാടനം നിര്‍വഹിച്ചത്. 34.24 കോടി രൂപയാണു നാലുകോടി ലെവല്‍ ക്രോസിനു പകരം നിര്‍മിക്കുന്ന മേല്‍പാല നിര്‍മാണത്തിനു ചെലവ് പ്രതീക്ഷിക്കുന്നത്. ഈ തുക കേന്ദ്ര - സംസ്ഥാന സര്‍ക്കാരുകള്‍ പകുതി വീതം ഏറ്റെടുക്കാനായിരുന്നു പദ്ധതി. സംസ്ഥാന സര്‍ക്കാരിന്‍റെ നിര്‍മാണ ഏജന്‍സിയായ കേരള റോഡ് ബ്രിഡ്ജസ് ഡെവലപ്മെന്‍റ് കോര്‍പറേഷനു നിര്‍മാണ ചുമതല നല്‍കുകയും ചെയ്തു. പാലം നിര്‍മാണത്തിനായുള്ള സ്ഥലമെടുപ്പ് നടപടികളും എങ്ങുമെത്തിയിട്ടില്ല. കോട്ടയം, ഇടുക്കി ജില്ലകളില്‍നിന്നും വരുന്ന യാത്രക്കാര്‍ക്കും പുതുപ്പള്ളി, മണര്‍കാട് ദേവാലയങ്ങളിലേക്കു പോകുന്ന ആയിരക്കണക്കിന് തീര്‍ഥാടകര്‍ക്കും കോട്ടയം, ചങ്ങനാശേരി ടൗണുകളിലെ ഗതാഗതക്കുരുക്കില്‍പ്പെടാതെ എന്‍എച്ച്-183 (എംസി റോഡ്) പെരുന്തുരുത്തിയിലും ഏറ്റുമാനൂരിലും എത്തിച്ചേരാവുന്ന വേഗ ബൈപാസാണിത്. ലോക്സഭാ തെരഞ്ഞെടുപ്പു പ്രഖ്യാപിക്കുന്നതിനു മുന്പായി രാജ്യത്തൊട്ടാകെ 222 മേല്‍പ്പാലങ്ങളും അടിപ്പാതകളുടെയും നിര്‍മാണ പ്രവര്‍ത്തനങ്ങളാണ് പ്രധാനമന്ത്രി നരേന്ദ്ര മോദി വീഡിയോ കോണ്‍ഫറന്‍സിലൂടെ നിര്‍വഹിച്ചത്.

ചങ്ങനാശേരി ഡിപ്പോയുടെ വേളാങ്കണ്ണി സര്‍വീസില്‍ സ്ഥിരം ജീവനക്കാരെ നിയമിക്കണം

ചങ്ങനാശേരി: ചങ്ങനാശേരി കെഎസ്ആര്‍ടിസി ഡിപ്പോയില്‍നിന്നും സര്‍വീസ് നടത്തുന്ന വേളാങ്കണ്ണി ഇന്‍റര്‍‌സ്റ്റേറ്റ് സര്‍വീസില്‍ സ്ഥിരം ജീവനക്കാരെ നിയോഗിച്ചാല്‍ സര്‍വീസ് നിലനിര്‍ത്താനും വരുമാനം മെച്ചപ്പെടുത്താനും ആകുമെന്ന് വിലയിരുത്തല്‍. നിലവില്‍ ചങ്ങനാശേരിയില്‍നിന്നു സ്വിഫ്റ്റ് കോര്‍പറേഷന്‍ ഓപ്പറേറ്റ് ചെയ്യുന്ന വേളാങ്കണ്ണി ബസിന് 10 ഡ്രൈവര്‍ കം കണ്ടക്ടര്‍മാരെയാണ് പോസ്റ്റ് ചെയ്തിരിക്കുന്നത്. ഇവരില്‍ പലരും ജോലയ്ക്ക് കൃത്യമായി ഹാജരാകാത്തതു മൂലം കെഎസ്ആര്‍ടിസിയുടെ ഷെഡ്യുള്‍ ഓപ്പറേറ്റ് ചെയ്യേണ്ട മറ്റു ഡ്രൈവര്‍മാരെയോ അല്ലെങ്കില്‍ ഡിസിമാരായ ജീവനക്കാരെയോ ആണ് സര്‍വീസ് നടത്താന്‍ മിക്ക ദിവസങ്ങളിലും നിയോഗിക്കുന്നത്. ഇതുമൂലം ഡ്രൈവര്‍മാരില്ലാതെ ഡിപ്പോയിലെ മറ്റു പ്രധാനപ്പെട്ട പല ഷെഡ്യൂളുകളും സ്ഥിരമായി മുടങ്ങുന്നു. ഇത് ഡിപ്പോയുടെ വരുമാനത്തെ സാരമായി ബാധിക്കുന്നതോടൊപ്പം പ്രധാന സര്‍വീസ് നിലയ്ക്കാനും കാരണമാകുന്നു. ഇന്‍റര്‍സ്റ്റേറ്റ് സര്‍വീസിന് സ്ഥിരം ജീവനക്കാർ; നിബന്ധന അവഗണിക്കുന്നു സ്ഥിരം ജീവനക്കാരെ മാത്രമേ ഇന്‍റര്‍‌സ്റ്റേറ്റ് സര്‍വീസിന് നിയോഗിക്കാവൂവെന്ന ഉത്തരവ് നിലനില്‍ക്കെയാണ് ചങ്ങനാശേരി ഡിപ്പോയില്‍ ബദലി ഡ്രൈവര്‍മാരെയും ഡ്രൈവര്‍ കം കണ്ടക്ടര്‍മാരേയും സ്ഥിരമായി ഇന്‍റര്‍ സ്റ്റേറ്റ് ഡ്യൂട്ടിക്ക് നിയമിക്കുന്നത്. ഇപ്പോള്‍ സ്വിഫ്റ്റ് കോര്‍പറേഷന്‍ ഓപ്പറേറ്റ് ചെയ്യുന്ന വേളാങ്കണ്ണി സര്‍വീസ് കെഎസ്ആര്‍ടിസി തിരിച്ചെടുത്ത് പഴയ രീതിയില്‍ എക്സ്പ്രസ് ബസായിത്തന്നെ ഓപ്പറേറ്റ് ചെയ്താല്‍ സര്‍വീസിന്‍റെ സുഗമമായ നടത്തിപ്പിനു ചങ്ങനാശേരി ഡിപ്പോയില്‍നിന്നു രണ്ടു ഡ്രൈവര്‍മാരും പാലക്കാട് ഡിപ്പോയില്‍നിന്നും നാലു ഡ്രൈവര്‍മാരും മാത്രം മതിയാകുമെന്നു ചൂണ്ടിക്കാണിക്കപ്പെടുന്നു. പാലക്കാട് ഡിപ്പോയില്‍നിന്നു ഡ്രൈവര്‍ മാറിക്കയറുന്നത് അപകടം കുറയ്ക്കുന്നതോടൊപ്പം അധികമായി വരുന്ന ഡ്രൈവര്‍ കം കണ്ടക്ടര്‍, ഡ്രൈവര്‍ ജീവനക്കാരെ മറ്റു ഷെഡ്യുള്‍ ഡ്യൂട്ടികള്‍ക്ക് നിയോഗിച്ച് ജീവനക്കാരുടെ കുറവ് പരിഹരിക്കാനാകുമെന്നും ഇതിലൂടെ ഡിപ്പോയുടെയും കോര്‍പറേഷന്‍റെയും വരുമാനം വര്‍ധിപ്പിക്കാൻ സാധിക്കുമെന്നും ചൂണ്ടിക്കാണിക്കപ്പെടുന്നു. ഇക്കാര്യം പരീക്ഷണാര്‍ഥമെങ്കിലും പരിശോധിക്കപ്പെടണമെന്ന നിര്‍ദേശം തൊഴിലാളി യൂണിയനുകളുടേയും പാസഞ്ചേഴ്‌സ് അസോസിയേഷന്‍റെയും ഭാഗത്തുനിന്ന് ഉയര്‍ന്നിട്ടുണ്ട്. ചങ്ങനാശേരിയില്‍നിന്നും ഓപ്പറേറ്റ് ചെയ്യുന്ന തിരുനെല്‍വേലി സര്‍വീസിൽ കെഎസ്ആര്‍ടിസി ജീവനക്കാരാണ് ഡ്യൂട്ടി ചെയ്യുന്നത്. രാവിലെയും വൈകുന്നേരവുമായി സര്‍വീസ് നടത്തിയിരുന്ന രണ്ട് പളനി സര്‍വീസുകള്‍ ആറുമാസംമുമ്പ് നിര്‍ത്തലാക്കിയിരുന്നു.

ക്ഷീരസംഗമം

കടുത്തുരുത്തി: ക്ഷീരവികസന വകുപ്പിന്‍റെയും മാഞ്ഞൂര്‍ ക്ഷീരവികസന യൂണിറ്റിലെ ക്ഷീരസംഘങ്ങളുടെയും സംയുക്താഭിമുഖ്യത്തില്‍ ക്ഷീരസംഗമം നടത്തി. ഉഴവൂര്‍ ബ്ലോക്ക് പഞ്ചായത്തിന്‍റെയും കുറവിലങ്ങാട് ഗ്രാമപഞ്ചായത്തിന്‍റെയും മറ്റു സ്ഥാപനങ്ങളുടെയും സഹകരണത്തോടെ കളത്തൂര്‍ ഗവണ്‍മെന്‍റ് യുപി സ്‌കൂളില്‍ നടന്ന ക്ഷീരസംഗമം മോന്‍സ് ജോസഫ് എംഎല്‍എ ഉദ്ഘാടനം ചെയ്തു. ക്ഷീരവികസന വകുപ്പിന്‍റെ ആവശ്യാധിഷ്ഠിത ധനസഹായം പദ്ധതി പ്രകാരം നവീകരിച്ച പാല്‍ ഉത്പന്ന വിതരണ കേന്ദ്രത്തിന്‍റെ ഉദ്ഘാടനവും ക്ഷീരസംഗമത്തില്‍ നടന്നു. ഉഴവൂര്‍ ബ്ലോക്ക് പഞ്ചായത്ത് പ്രസിഡന്‍റ് രാജു ജോൺ അധ്യക്ഷത വഹിച്ചു. കന്നുകാലി പ്രദര്‍ശന മത്സരത്തിന്‍റെ ഉദ്ഘാടനം കുറവിലങ്ങാട് പഞ്ചായത്ത് പ്രസിഡന്‍റ് മിനി മത്തായിയും മുഖാമുഖം പരിപാടി ഉഴവൂര്‍ ബ്ലോക്ക് പഞ്ചായത്ത് പ്രസിഡന്‍റ് രാജു ജോണ്‍ ചിറ്റേത്തും ഉദ്ഘാടനം ചെയ്തു. ഉഴവൂര്‍ ബ്ലോക്ക് തലത്തില്‍ ക്ഷീരമേഖലയില്‍ ത്രിതല പഞ്ചായത്തുകള്‍ നടപ്പിലാക്കുന്ന ജനകീയാസൂത്രണ പദ്ധതികളുടെ ഉദ്ഘാടനം ജില്ലാപഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാലാ നിര്‍വഹിച്ചു. മികച്ച ക്ഷീരകര്‍ഷകരെ കുറവിലങ്ങാട് പഞ്ചായത്ത് പ്രസിഡന്‍റ് മിനി മത്തായി, മാഞ്ഞൂര്‍ പഞ്ചായത്ത് പ്രസിഡന്‍റ് കോമളവല്ലി രവീന്ദ്രന്‍, കാണക്കാരി പഞ്ചായത്ത് പ്രസിഡന്‍റ് അംബിക സുകുമാരന്‍ എന്നിവര്‍ അവാര്‍ഡ് നല്‍കി ആദരിച്ചു. ത്രിതല പഞ്ചായത്ത്, മില്‍മ എന്നിവയുടെ പ്രതിനിധികള്‍, സാങ്കേതിക വിദഗ്ധര്‍, സഹകാരികള്‍, ക്ഷീരകര്‍ഷകര്‍, ക്ഷീരസംഘം ജീവനക്കാര്‍, സാങ്കേതികവിദഗ്ധര്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

നിയന്ത്രണംവിട്ട കാർ മരത്തിലിടിച്ചുണ്ടായ അപകടത്തിൽ മൂന്നുപേർക്ക് ഗുരുതര പരിക്ക്

തലയോലപ്പറമ്പ്: നിയന്ത്രണംവിട്ട കാർ റോഡരികിലെ മരത്തിലിടിച്ചുണ്ടായ അപകടത്തിൽ കാറിൽ സഞ്ചരിച്ചിരുന്ന മൂന്നു പേർക്ക് ഗുരുതര പരിക്ക്. തകർന്ന കാറിൽനിന്നു യാത്രക്കാരെ കാർ വെട്ടിപ്പൊളിച്ചാണ് പുറത്തെടുത്തത്. അരയൻകാവ് തുണ്ടുപറമ്പിൽ മാണി ജോസഫ് (27), തുണ്ടുപറമ്പിൽ ആമോസ് തങ്കച്ചൻ (27), അരയൻകാവ് എറണായിൽ അഭിജിത്ത് സുകുമാരൻ (27) എന്നിവരെ തലയോലപ്പറമ്പ് പൊതിയിലെ സ്വകാര്യ ആശുപത്രിയിൽ പ്രവേശിപ്പിച്ചശേഷം വിദഗ്ധ ചികിത്സയ്ക്കായി പിന്നീട് എറണാകുളം മെഡിക്കൽ ട്രസ്റ്റ് ആശുപത്രിയിലേക്ക് മാറ്റി. ശനിയാഴ്ച രാത്രി 12.30 ഓടെ കാഞ്ഞിരമറ്റം -തലപ്പാറ റോഡിൽ വടകര ജംഗ്ഷന് സമീപത്തെ വളവിലായിരുന്നു അപകടം. അരയൻകാവിൽനിന്നു തലയോലപ്പറമ്പ് ഭാഗത്തേക്ക് വരുന്നതിനിടെ കാർ നിയന്ത്രണംവിട്ട് റോഡരികിലെ മരത്തിലും സ്വകാര്യവ്യക്തിയുടെ മതിലിലും ഇടിച്ചുകയറുകയായിരുന്നു. ഇടിയുടെ ആഘാതത്തിൽ കാറിന്‍റെ എൻജിൻ ഉൾപ്പടെ വേർപെട്ടുപോയി. ഡോർ തുറക്കാൻ കഴിയാത്തവിധം തകർന്ന കാറിനുള്ളിൽ കുടുങ്ങിയവരെ ഫയർഫോഴ്സ് എത്തി കാർ വെട്ടിപ്പോളിച്ചാണ് പുറത്തെടുത്ത് ആശുപത്രിയിൽ എത്തിച്ചത്. ഇടിയുടെ ആഘാതത്തിൽ സ്വകാര്യവ്യക്തിയുടെ മതിൽ തകർന്നുവീണു. വടകര തടത്തിൽ ബിനുവിന്‍റെ വീട്ടുമുറ്റത്ത് കിടന്ന പുതിയ കാറിന്‍റെ ഒരു വശം പൂർണമായി തകർന്നു.

പഴയ ബോട്ടുജെട്ടിയുടെ മേൽക്കൂര പുനർനിർമിച്ചു

വൈക്കം: നൂറ്റാണ്ട് പിന്നിട്ട വൈക്കത്തെ പഴയ ബോട്ടുജെട്ടിക്കെട്ടിടം പുനരുദ്ധരിക്കുന്നതിന്‍റെ ഭാഗമായി മേൽക്കൂരയുടെ നിർമാണം പൂർത്തിയാക്കി. വൈക്കംസത്യഗ്രഹ സമര ചരിത്രത്തിന്‍റെ ഭാഗമായ ബോട്ടുജെട്ടിക്കെട്ടിടം തനിമ നിലനിർത്തി ചരിത്രസ്മാരകമായാണ് പുനർനിർമിക്കുന്നത്. ബോട്ടുജെട്ടിയുടെ നവീകരണത്തിനായി 25 ലക്ഷം രൂപയാണ് എസ്റ്റിമേറ്റ് തുക. ബോട്ടുജെട്ടിക്കെട്ടിടത്തിന്‍റെ പഴയ രൂപത്തിനു മാറ്റംവരുത്താതെയാണ് നിർമാണപ്രവൃത്തികൾ നടന്നുവരുന്നത്. വൈക്കം സത്യഗ്രഹത്തിൽ പങ്കെടുക്കാൻ മഹാത്മജിയടക്കമുള്ള നേതാക്കൾ ബോട്ടുമാർഗമെത്തി വൈക്കം ജെട്ടിയിലാണ് ഇറങ്ങിയത്. നിരവധി ധന്യമുഹൂർത്തങ്ങൾക്ക് സാക്ഷിയായ ബോട്ടുജെട്ടി ചരിത്രസ്മാരകമായി പുനർനിർമിക്കണമെന്ന് ജനങ്ങൾ ഏറെക്കാലമായി ആവശ്യപ്പെട്ടുവരികയായിരുന്നു.

ആരോഗ്യരംഗത്തെ ചൂഷണം കുറയുന്നത് സഹകരണ സ്ഥാപനങ്ങളുള്ളതിനാൽ: മന്ത്രി വാസവൻ

വൈക്കം: ആരോഗ്യ പരിപാലനരംഗത്തെ ചൂഷണത്തെ ഒരു പരിധിവരെ ചെറുക്കാൻ സഹകരണ മേഖലയിൽ പ്രവർത്തിക്കുന്ന സ്ഥാപനങ്ങൾമൂലം കഴിയുന്നുണ്ടെന്ന് സഹകരണ വകുപ്പ് മന്ത്രി വി.എൻ. വാസവൻ. വൈക്കം താലൂക്ക് അർബൻ വെൽഫെയർ കിസ്കോ ഡയഗ്‌നോസ്റ്റിക് സെന്‍ററിന്‍റെ അത്യാധുനിക സംവിധാനങ്ങളോടെ നവീകരിച്ച മെഡിക്കൽ ലാബ് ആൻഡ് ഇമേജിംഗ് സെന്‍റർ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സ്വകാര്യ സ്ഥാപനങ്ങളിൽ സ്കാനിംഗ്, എക്സ്-റേ, രക്തപരിശോധന തുടങ്ങിയവയ്ക്ക് ഈടാക്കുന്നതിനേക്കാൾ കുറഞ്ഞ തുകയ്ക്കാണ് സഹകരണ സ്ഥാപനങ്ങളിൽ രോഗനിർണയം നടത്തുന്നതെന്നും അദ്ദേഹം കൂട്ടിച്ചേർത്തു. നമ്മുടെ ആരോഗ്യത്തെ മുൻനിർത്തി സ്വകാര്യസ്ഥാപനങ്ങൾ വിലപേശാതിരിക്കാൻ സർക്കാർ,സഹകരണ സ്ഥാപനങ്ങളെ മെച്ചപ്പെടുത്തി പിൻബലമേകണമെന്ന് കൃഷിമന്ത്രി പി .പ്രസാദ് അഭിപ്രായപ്പെട്ടു. സംഘം പ്രസിഡന്‍റ് ആർ. ചന്ദ്രശേഖരൻ അധ്യക്ഷത വഹിച്ചു. കിഴതടിയൂർ സഹകരണ ബാങ്ക് പ്രസിഡന്‍റ് എം.എസ്. ശശിധരൻ നായർ റിപ്പോർട്ട് അവതരിപ്പിച്ചു. എംഎൽഎമാരായ സി.കെ. ആശ, മോൻസ് ജോസഫ്, സാഹിത്യസഹകരണ സംഘം പ്രസിഡന്‍റ് പി.കെ. ഹരികുമാർ, നഗരസഭാ ചെയർപേഴ്സൺ പ്രീതാ രാജേഷ്, നഗരസഭാ വൈസ് ചെയർമാൻ പി.ടി. സുഭാഷ്, വാർഡ് കൗൺസിലർ ലേഖ ശ്രീകുമാർ, ജോയിന്‍റ് രജിസ്ട്രാർ പി.പി. സലിം, സർക്കിൾ സഹകരണ യൂണിയൻ ചെയർമാൻ ടി.സി. വിനോദ്, അസിസ്റ്റന്‍റ് രജിസ്ട്രാർ ജനറൽ സി.ആർ. മിനി, അസിസ്റ്റന്‍റ് ഡയറക്ടർ ഓഡിറ്റ് സി.എസ്. പ്രിയ, വിവിധ രാഷ്‌‌ട്രീയ കക്ഷിനേതാക്കൾ തുടങ്ങിയവർ പ്രസംഗിച്ചു.

റോഡരികില്‍ അപകടക്കെണിയൊരുക്കി കെഎസ്ഇബി

പെരുവ: റോഡരികില്‍ അപകടക്കെണിയൊരുക്കി കെഎസ്ഇബി. പെരുവ കെഎസ്ഇബി സബ് സെന്‍ററിന്‍റെ കീഴിലുള്ള കുന്നപ്പള്ളിയില്‍ റോഡിലേക്ക് ചെരിഞ്ഞ് അപകടഭീഷിണി ഉയര്‍ത്തുന്നത് വൈദ്യുതി തൂണുകളാണെങ്കില്‍, കാരിക്കോട്ട് വൈദ്യുതി തൂണിലേക്ക് പടര്‍ന്നുകയറി നില്‍ക്കുന്ന വള്ളിപ്പടര്‍പ്പുകളാണ് നാട്ടുകാര്‍ക്ക് ഭീഷണിയാവുന്നത്. കുന്നപ്പള്ളി ആക്യമാലി ജംഗ്ഷനില്‍നിന്നു മടത്താട്ട് കോളനി റോഡിലുള്ള വൈദ്യുത തൂണുകളാണ് റോഡിലേക്ക് ചെരിഞ്ഞു മറിഞ്ഞുവീഴാറായ നിലയില്‍ സ്ഥിതി ചെയ്യുന്നത്. ഇതിലൂടെയുള്ള വൈദ്യുതി ലൈനുകള്‍ മാറ്റി പുതിയ തൂണുകളിലേക്ക് സ്ഥാപിച്ചെങ്കിലും ചെരിഞ്ഞുനില്‍ക്കുന്ന തൂണുകള്‍ മാറ്റാന്‍ അധികൃതര്‍ നടപടിയെടുത്തില്ല. നിരവധിത്തവണ അധികൃതരോട് ആവശ്യപ്പെട്ടെങ്കിലും നടപടിയായില്ലെന്ന് നാട്ടുകാര്‍ പറയുന്നു. ദിവസവും നൂറുകണക്കിന് വാഹനങ്ങളും കാല്‍നടയാത്രക്കാരും സഞ്ചരിക്കുന്ന വഴിയാണിത്. ചെരിഞ്ഞുനില്‍ക്കുന്ന നിരവധി തൂണുകള്‍ മാറ്റിസ്ഥാപിച്ച വൈദ്യുത ലൈനിന്‍റെ നടുക്കാണ് സ്ഥിതിചെയ്യുന്നത്. വൈദ്യുതി തൂണുകള്‍ മറിഞ്ഞുവീണാല്‍ വൈദ്യുത ലൈന്‍ ഉള്‍പ്പെടെ പൊട്ടിവീഴാനുള്ള സാധ്യതയുമുണ്ടെന്ന് നാട്ടുകാര്‍ മുന്നറിയിപ്പ് നല്‍കുന്നു. മൂര്‍ക്കാട്ടിപ്പടി-വെള്ളൂര്‍ റോഡില്‍ പൈന്താറ്റില്‍ ഭാഗത്തേക്ക് തിരിയുന്നിടത്താണ് വൈദ്യുത തൂണിലും ഇതു വലിച്ചുകെട്ടിയ സ്റ്റേ കമ്പികളിലൂടെയും വൈദ്യുതി ലൈനിലേക്ക് വള്ളിപ്പടര്‍പ്പുകള്‍ കയറിയിരിക്കുന്നത്.

കൈവരിയില്ലാത്ത കലുങ്ക് അപകടഭീഷണിയാകുന്നു

ഉദയനാപുരം: കൈവരിയില്ലാത്ത കലുങ്കുപാലം അപകടഭീഷണിയാകുന്നു. ഉദയനാപുരം ഓർശ്ലേം പള്ളിക്ക് സമീപത്തെ കലുങ്ക് പാലമാണ് കൈവരിയില്ലാത്തതിനാൽ അപകടക്കെണിയാകുന്നത്. നേരേകടവ്, കരിയിൽ, മാടവന, വല്യാറ ഭാഗങ്ങളിലുള്ളവർ ഓർശ്ലേം പള്ളി, ഇംഗ്ലീഷ് മീഡിയം സ്കൂൾ, ആയുർവേദ ആശുപത്രി, വൈക്കം താലൂക്ക് ആശുപത്രി, കോവിലകത്തുംകടവ് മത്സ്യമാർക്കറ്റ് എന്നിവിടങ്ങളിലേക്ക് പോകുന്നതിനുള്ള എളുപ്പമാർഗമാണിത്. വാഹനമിടിച്ച് കൈവരി തകർന്ന പാലത്തിലൂടെ സ്കൂൾ വാഹനങ്ങളടക്കം കടന്നുപോകുന്നുണ്ട്. ആഴമേറിയ തോടിനു കുറുകെയാണ് പാലം. രാത്രികാലങ്ങളിൽ വാഹന യാത്രികർ അപകടപ്പെടാൻ സാധ്യതയേറെയാണ്. പാലത്തിന്‍റെ കൈവരി പുനർനിർമിക്കാൻ അധികൃതർ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

ഇടവേളയ്ക്കുശേഷം അനധികൃത മണ്ണെടുപ്പ് വ്യാപകമാകുന്നു

കടുത്തുരുത്തി: ഇടവേളയ്ക്കുശേഷം അനധികൃത മണ്ണെടുപ്പ് വ്യാപകമാകുന്നു. കടുത്തുരുത്തി, ഞീഴൂര്‍, മുളക്കുളം, വെള്ളൂര്‍ പഞ്ചായത്തുകളിലാണ് അനധികൃത മണ്ണെടുപ്പ് ശക്തമായിരിക്കുന്നത്. കഴിഞ്ഞ 28 വരെ ഖനനപ്രവൃത്തികള്‍ ഒന്നും നടത്താന്‍ പാടില്ലെന്ന കളക്ടറുടെ ഉത്തരവ് ലംഘിച്ചും ഇവിടെ മണ്ണെടുപ്പ് നിര്‍ബാധം തുടരുകയായിരുന്നു. മഴ മാറി ഒരു ദിവസം വെയില്‍ തെളിഞ്ഞതോടെ മണ്ണ് മാഫിയ ഈ പ്രദേശങ്ങളില്‍ പിടിമുറുക്കിയിരിക്കുകയാണ്. മുളക്കുളം പഞ്ചായത്തിലെ ഞാറുകുന്ന് അങ്കണവാടിക്ക് സമീപവും, കുന്നപ്പള്ളി പെരുമാലില്‍ ക്രഷറിന് സമീപവും നിരോധന ഉത്തരവ് നിലനില്‍ക്കേ യാതൊരുവിധ അനുമതിയുമില്ലാതെ മണ്ണെടുപ്പ് തുടരുകയാണ്. വലുതും ചെറുതുമായ ടിപ്പര്‍ ലോറികള്‍ ഓടി ഇവിടത്തെ പ്രാദേശികവഴികള്‍ തകര്‍ന്നുതുടങ്ങി. വെളുപ്പിന് തുടങ്ങുന്ന മണ്ണെടുപ്പ് രാത്രിവരെ നീളും. വെള്ളൂര്‍, ഇറുമ്പയം, ജാതിക്കാമല, ഞീഴൂര്‍, പാറശേരി, കാട്ടാമ്പാക്ക് തുടങ്ങിയ പ്രദേശങ്ങളിലും അനധികൃത മണ്ണെടുപ്പ് വ്യാപകമാണ്. ഇതിനെല്ലാം റവന്യു, പോലീസ് അധികൃതര്‍ കൂട്ടുനില്‍ക്കുന്നതായി നാട്ടുകാര്‍ ആരോപിക്കുന്നു. പരാതി പറഞ്ഞാല്‍ പരിശോധിക്കാന്‍ ഉദ്യോഗസ്ഥര്‍ എത്തുമ്പോഴേക്കും സ്ഥലത്തുനിന്ന് ജെസിബിയും ടിപ്പറുകളും മാറ്റി ഉദ്യോഗസ്ഥരുടെ കണ്ണില്‍പ്പെടാതെ രക്ഷപ്പെടും. അനധികൃത മണ്ണെടുപ്പിന് കൂട്ടുനില്‍ക്കുന്ന പോലീസ്, റവന്യു ഉദ്യോഗസ്ഥര്‍ മണ്ണ് മാഫിയകളെ പരിശോധനയ്ക്ക് വരുന്ന വിവരം നേരത്തേ അറിയിക്കുകയാണന്നും നാട്ടുകാര്‍ ആരോപിക്കുന്നു.

മതേതരത്വത്തിനേറ്റ കളങ്കം: ജില്ലാ പൗരസമിതി

കോട്ടയം: ഛത്തീഗഡില്‍ കന്യാസ്ത്രീകളെ അന്യായമായി ജയിലിലടച്ചതു മതേതരത്വത്തിനേറ്റ കളങ്കമാണെന്ന് കോട്ടയം ജില്ലാ പൗരസമിതി. യോഗത്തില്‍ പ്രസിഡന്‍റ് ഡോ. എം.എം. മാത്യു അധ്യക്ഷത വഹിച്ചു. സെക്രട്ടറി സാല്‍വിന്‍ കൊടിയന്തറ, കോട്ടയം മോഹന്‍ദാസ്, ജോജി മൂലേക്കരി, ആനിക്കാട് ഗോപി എന്നിവര്‍ പ്രസംഗിച്ചു.

ടി.ഡി. ചാക്കോ അനുസ്മരണം

മുടിയൂര്‍ക്കര: മുടിയൂര്‍ക്കര ഗവണ്‍മെന്‍റ് എല്‍പി സ്‌കൂളിലെ പിടിഎ യോഗത്തോടനുബന്ധിച്ച് മാനവികം സോഷ്യല്‍ ഫൗണ്ടേഷന്‍റെ ആഭിമുഖ്യത്തില്‍ ടി.ഡി. ചാക്കോ അനുസ്മരണം നടത്തി. സമ്മേളനം തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്തു. മാനവികം വിദ്യാഭ്യാസ സ്‌കോളര്‍ഷിപ്പുകള്‍ വിതരണം ചെയ്തു. പിടിഎ പ്രസിഡന്‍റ് കെ.സി. സെബാസ്റ്റ്യന്‍ അധ്യക്ഷത വഹിച്ചു. പ്രഫ. ഷാജി ജോസഫ്, കെ.എസ്. മാത്യു, ഹെഡ്മിസ്ട്രസ് കെ. സിന്ധു, രഞ്ജിത എസ്. വാധ്യാര്‍, ഷാലിനി എന്നിവര്‍ പ്രസംഗിച്ചു.

‌മുലയൂട്ടല്‍ വാരാചരണം : ജില്ലാതല ഉദ്ഘാടനവും ബോധവത്കരണ സെമിനാറും നടത്തി

കോട്ടയം: മുലയൂട്ടല്‍ വാരാചരണത്തിന്‍റെ ജില്ലാതല ഉദ്ഘാടനം കോട്ടയം ആരോഗ്യകേരളം കോണ്‍ഫറന്‍സ് ഹാളില്‍ ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ നിര്‍വഹിച്ചു. ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ. എന്‍. പ്രിയ അധ്യക്ഷത വഹിച്ചു. ജില്ലാ ആര്‍സിഎച്ച് ഓഫീസര്‍ ഡോ. കെ.എന്‍. സുരേഷ്, ഐഎപി പ്രതിനിധി ഡോ. മുരാരി, കെഎഫ്ഒജി പ്രതിനിധി ഡോ. ജിന്‍സി, ജില്ലാ ഡെപ്യൂട്ടി എഡ്യുക്കേഷന്‍ മീഡിയ ഓഫീസര്‍ ആർ. ദീപ, കണ്‍സല്‍ട്ടന്‍റ് സി.ആര്‍. വിനീഷ് എന്നിവര്‍ പങ്കെടുത്തു.

കന്യാസ്ത്രീകള്‍ക്കെതിരായ വ്യാജക്കേസ്: എഫ്‌ഐആര്‍ റദ്ദാക്കണമെന്ന്

ചങ്ങനാശേരി: ഛത്തീസ്ഗഡിലെ ബിജെപി സര്‍ക്കാര്‍ വ്യാജ കേസ് ചുമത്തി മലയാളികളായ കന്യാസ്ത്രീകളെ ജയിലിലടച്ച സംഭവം മതേതര ഇന്ത്യക്ക് തീരാക്കളങ്കം വരുത്തിയെന്ന് ആര്‍ജെഡി ജില്ലാ നേതൃയോഗം അഭിപ്രായപ്പെട്ടു. കന്യാസ്ത്രീകള്‍ക്ക് ജാമ്യം ലഭിച്ചതുകൊണ്ടുമാത്രം പ്രശ്നം തീരില്ല. എഫ്‌ഐആര്‍ റദ്ദാക്കുന്നതുവരെ മതേതര വിശ്വാസികള്‍ അതീവ ജാഗ്രത പുലര്‍ത്തണം. എട്ടിന് ഉച്ചകഴിഞ്ഞ് മൂന്നിനു കോട്ടയം ഗാന്ധിസ്‌ക്വയറില്‍ ആര്‍ജെഡി ജില്ലാ കമ്മിറ്റിയുടെ നേതൃത്വത്തില്‍ ജനജാഗ്രതാ സദസ് സംഘടിപ്പിക്കാൻ യോഗം തീരുമാനിച്ചു. ആര്‍ജെഡി നിയോജകമണ്ഡലം പ്രസിഡന്‍റുമാരായി രാജീവ് അലക്സാണ്ടര്‍ (പൂഞ്ഞാര്‍), എ.വി. ജോര്‍ജുകുട്ടി (കടുത്തുരുത്തി) എന്നിവരെ യോഗം നിയമിച്ചു. ജില്ലാ പ്രസിഡന്‍റ് സണ്ണി തോമസിന്‍റെ അധ്യക്ഷതയില്‍ സംസ്ഥാന കമ്മിറ്റി അംഗങ്ങളായ അഡ്വ. ബെന്നി കുര്യന്‍, പീറ്റര്‍ പന്തലാനി, ടി.എസ്. റഷീദ്, ജോസ് മടുക്കക്കുഴി, ജോര്‍ജ് മാത്യു, ജോണ്‍ മാത്യു മൂലയില്‍, ഓമന വിദ്യാധരന്‍, കെ.ഇ. ഷെറീഫ് എന്നിവര്‍ പ്രസംഗിച്ചു.

അനധികൃത മദ്യക്കച്ചവടം: യുവാവ് പിടിയിൽ

ഗാന്ധിനഗർ: മെഡിക്കൽ കോളജിൽ രോഗീപരിചരണത്തിനു വരുന്നവർക്ക് വിളിപ്പുറത്ത് ബൈക്കിൽ മദ്യമെത്തിച്ച് നൽകുന്ന മൊബൈൽ മദ്യവില്പനക്കാരൻ പിടിയിൽ. മുടിയൂർക്കര സ്വദേശി രവിശങ്കറി (35 )നെയാണ് അസിസ്റ്റന്‍റ് എക്സൈസ് ഇൻസ്പെക്ടർ ആനന്ദരാജ് ബി.യുടെ നേതൃത്വത്തിൽ അറസ്റ്റ് ചെയ്തത്. ഓണം സ്പെഷൽ ഡ്രൈവിന്‍റെ മുന്നോടിയായാണ് എക്സൈസ് നടപടി. ഇയാൾക്കെതിരേ നിരവധി പരാതികൾ ഇതോടകം ഉയർന്നിരുന്നു. കഴിഞ്ഞ ഡ്രൈ ഡേ ദിനം രോഗികളുടെ കൂട്ടിരിപ്പുകാർക്ക് ഇരട്ടി വിലയ്ക്ക് മദ്യം കൊടുക്കാൻ ഇയാൾ കറങ്ങി നടക്കുന്നതിനിടെ എക്സൈസ് പിന്തുടരുകയായിരുന്നു. അമ്മഞ്ചേരി കുട്ടികളുടെ ആശുപത്രിക്കു സമീപമുള്ള ഇയാളുടെ വീട്ടിൽനിന്നും സ്കൂട്ടറിൽ മദ്യവുമായെത്തി ഒരാൾക്ക് മദ്യം കൈമാറുമ്പോഴാണ് ഇയാൾ പിടിയിലായത്. നാലു ലിറ്റർ മദ്യവും ഇയാൾ സഞ്ചരിച്ച സ്കൂട്ടറും കസ്റ്റഡിയിലെടുത്തു. മദ്യം വിറ്റ വകയിൽ കണ്ടെടുത്ത 1,200 രൂപയും കോടതിയിൽ ഹാജരാക്കി. പ്രതിയെ കോടതി പതിനാല് ദിവസത്തേക്ക് റിമാൻഡ് ചെയ്തു. റെയ്ഡിൽ കോട്ടയം എക്സൈസ് സർക്കിൾ ഓഫീസിലെ ഉദ്യോഗസ്ഥരായ അസിസ്റ്റന്‍റ് എക്സൈസ് ഇൻസ്പെക്ടർ ബി. സന്തോഷ് കുമാർ, അസിസ്റ്റന്‍റ് എക്സൈസ് ഇൻസ്പെക്ടർ സി. കണ്ണൻ, പ്രിവന്‍റീവ് ഓഫീസർ ഹരികൃഷ്ണൻ, സിവിൽ എക്സൈസ് ഓഫീസർ വി. വിനോദ് കുമാർ, വനിതാ സിവിൽ എക്സൈസ് ഓഫീസർ കെ.ജി. അമ്പിളി, സിവിൽ എക്സൈസ് ഓഫീസർ ഡ്രൈവർ സുരേഷ് ബാബു എന്നിവർ പങ്കെടുത്തു.

സംസ്‌കാര സാഹിതി: ഷിജു സ്‌കറിയ സംസ്ഥാന ജനറല്‍ സെക്രട്ടറി

കോട്ടയം: കെപിസിസി സാംസ്‌കാരിക വിഭാഗമായ സംസ്‌കാര സാഹിതിയുടെ സംസ്ഥാന ജനറല്‍ സെക്രട്ടറിയായും മീഡിയാസെല്‍ കണ്‍വീനറായും ഷിജു സ്‌കറിയയെ സംസ്ഥാന ചെയര്‍മാന്‍ സി.ആര്‍. മഹേഷ് എംഎല്‍എ നിയമിച്ചു. നേരത്തേ ജില്ലാ ചെയര്‍മാനായിരുന്നു. സീനിയര്‍ ജേര്‍ണലിസ്റ്റ് ഫെഡറേഷന്‍ ഓഫ് കേരളയുടെ പത്തനംതിട്ട ജില്ലാ വൈസ് പ്രസിഡന്‍റാണ്. കെയുഡബ്ല്യുജെ ബംഗളൂരു, ചെന്നൈ ഘടകങ്ങളുടെ ഭാരവാഹിയായും പ്രവര്‍ത്തിച്ചു.

വട്ടക്കാട് - ഇരവീശ്വരം പാടശേഖരം റോഡിലെ പുതിയ പാലം തുറന്നു

അയ്മനം: അയ്മനം പഞ്ചായത്ത്‌ അഞ്ചാം വാർഡിൽ വട്ടക്കാട് -ഇരവീശ്വരം പാടശേഖരം റോഡിൽ മോട്ടോർ തറയ്ക്ക് സമീപം തോടിനു കുറുകെ ഇരവീശ്വരം പാടശേഖരത്തേക്കുള്ള പുതിയ പാലം പണി പൂർത്തിയാക്കി ജനങ്ങൾക്കായി തുറന്നു കൊടുത്തു. പഞ്ചായത്ത്‌ പ്രസിഡന്‍റ് വിജി രാജേഷ് നാടമുറിച്ച് പാലം ഉദ്ഘാടനം ചെയ്തു. വാർഡ് മെംബർ ബിജു മാന്താറ്റിൽ അധ്യക്ഷത വഹിച്ചു. തടിയും പലകക്കഷണങ്ങളും ഉപയോഗിച്ച് താത്കാലികമായി നിർമിച്ച നിലവിലെ നടപ്പാലം അപകടാവസ്ഥയി ലായിരുന്നു. കാറുകളുൾപ്പെടെ ചെറിയ വാഹനങ്ങൾക്ക് കടന്നുപോകാവുന്ന വീതിയിൽ ഇരുകരകളിലെയും കൽക്കെട്ടുകൾ കോൺക്രീറ്റ് ഭിത്തികൊണ്ട് ബലപ്പെടുത്തി ഫാബ്രിക്കേറ്റ് ചെയ്ത ഇരുമ്പ് പാലമാണ് പഞ്ചായത്ത്‌ ഫണ്ടുപയോഗിച്ച് നിർമിച്ചത്. തോടിന്‍റെ മറുകരയിൽ വെള്ളപ്പൊക്ക ഭീഷണിയിൽ ഒറ്റപ്പെട്ട രീതിയിൽ താമസിച്ചു വന്നിരുന്ന കുടുംബങ്ങൾ ഇവിടെ പാലമില്ലാതിരുന്നതുകൊണ്ട് വലിയ ദുരിതമാണ് അനുഭവിച്ചിരുന്നത്. നീണ്ടകാലത്തെ കാത്തിരിപ്പിനൊടുവിൽ പാലം യാഥാർഥ്യമായത് ഇവിടെയുള്ള കുടുംബങ്ങൾക്ക് ആശ്വാസമായി. ബ്ലോക്ക്‌ പഞ്ചായത്ത്‌ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ കെ.കെ. ഷാജിമോൻ, മെംബർ പി.വി. സുശീലൻ, അസിസ്റ്റന്‍റ് എൻജിനിയർ പ്രിയ മേരി ഫിലിപ്പ്, അരുൺ എന്നിവർ പ്രസംഗിച്ചു.

ഖാദി ഓണം മേളയ്ക്കു തുടക്കമായി

കോട്ടയം: കേരള ഖാദി ഗ്രാമവ്യവസായ ബോര്‍ഡും അംഗീകൃത ഖാദി സ്ഥാപനങ്ങളും സംയുക്തമായി നടത്തുന്ന ഖാദി ഓണം മേളയുടെ ജില്ലാതല ഉദ്ഘാടനം മന്ത്രി വി.എന്‍. വാസവന്‍ നിര്‍വഹിച്ചു. തിരുവഞ്ചൂര്‍ രാധാകൃഷ്ണന്‍ എംഎല്‍എ അധ്യക്ഷത വഹിച്ചു. ഗ്രാമ വ്യവസായ ഉത്പന്നങ്ങളുടെ ആദ്യവില്‍പ്പന ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗറും ഖാദി ഉത്പന്നങ്ങളുടെ ആദ്യവിൽപ്പന നഗരസഭാധ്യക്ഷ ബിന്‍സി സെബാസ്റ്റ്യനും നിര്‍വഹിച്ചു. ജില്ലാ കളക്ടര്‍ ജോണ്‍ വി. സാമുവല്‍, ഖാദി ഗ്രാമവ്യവസായ ബോര്‍ഡ് അംഗങ്ങളായ കെ.എസ്. രമേഷ് ബാബു, സാജന്‍ തൊടുക, പ്രോജക്ട് ഓഫീസര്‍ ജെസി ജോണ്‍,സംഘടനാ പ്രതിനിധികളായ സതീഷ് ജോര്‍ജ്, വിമല്‍കുമാര്‍ എന്നിവര്‍ പ്രസംഗിച്ചു. സെപ്റ്റംബര്‍ നാലുവരെയാണ് മേള നടക്കുന്നത്. ജില്ലയിലെ വിവിധ സ്ഥലങ്ങളില്‍ സംഘടിപ്പിച്ചിരിക്കുന്ന മേളകളില്‍ ജില്ലയിലെ തനതായ ഉത്‍പന്നങ്ങള്‍ക്ക് പുറമേ രാജ്യത്തിന്‍റെ വിവിധ ഭാഗങ്ങളില്‍ നിന്നുള്ള ഖാദി തുണിത്തരങ്ങളുമുണ്ട്. കോട്ടയം സിഎസ്ഐ കോംപ്ലക്‌സ്, ചങ്ങനാശേരി റവന്യു ടവര്‍, ഏറ്റുമാനൂര്‍ ഏദന്‍സ് ഷോപ്പിംഗ് കോംപ്ലക്‌സ്, വൈക്കം എസ്ബിഐ ബില്‍ഡിംഗ്, ഉദയനാപുരം വില്ലേജ് ഓഫീസിനു സമീപം, കുറവിലങ്ങാട് ഭാരത് മാതാ കോംപ്ലക്‌സ് എന്നിവിടങ്ങളിലെ ഖാദി ഗ്രാമ സൗഭാഗ്യകളിലാണ് ഓണം ഖാദി മേള നടക്കുന്നത്.

കളക്ടറേറ്റിലെ നവീകരിച്ച ശലഭോദ്യാനത്തിന്‍റെ ഉദ്ഘാടനം ഇന്ന്

കോട്ടയം: വിവിധ വര്‍ണങ്ങളില്‍ പാറിപ്പറക്കുന്ന പൂമ്പാറ്റകളെ അടുത്തു കാണാം. പ്രകൃതിയെ അടുത്തറിയാം. നഗരമധ്യത്തില്‍ കളക്‌ടറേറ്റ് വളപ്പിലെ നവീകരിച്ച ശലഭോദ്യാനത്തിന്‍റെ ഉദ്ഘാടനം ഇന്നു നടക്കും. കേരളത്തില്‍ നഗരമധ്യത്തില്‍ ആദ്യത്തേതും ഭരണസിരാകേന്ദ്രത്തില്‍ കോട്ടയത്ത് മാത്രമുള്ളതുമാണ് കളക്‌ടറേറ്റ് വളപ്പിലെ ശലഭോദ്യാനം. 2006-ല്‍ പരിസ്ഥിതി ഗവേഷണ സ്ഥാപനമായ ട്രോപ്പിക്കല്‍ ഇന്‍സ്റ്റിറ്റ്യൂട്ട് ഓഫ് ഇക്കോളജിക്കല്‍ സയന്‍സസ്, അന്നത്തെ കളക്‌ടര്‍ വേണുഗോപാലിന്‍റെ നിര്‍ദേശപ്രകാരമാണ് കളക്‌ടറേറ്റ് വളപ്പില്‍ ശലഭോദ്യാനം നിര്‍മിച്ചത്. വാഹനങ്ങളും ജനത്തിരക്കുമുള്ള ഒരിടത്ത്, ആതിഥേയ ചെടികളും തേന്‍ചെടികളും ഒരുക്കിയപ്പോള്‍ ശലഭങ്ങളെത്തുമോ എന്ന് ആശങ്കപ്പെട്ടിരുന്നുവെങ്കിലും ഏവരേയും അത്ഭുതപ്പെടുത്തി നാല്പതോളം ഇനം ശലഭങ്ങളെ ഇവിടെ കണ്ടുവരുന്നു. തുടക്കത്തില്‍ 18 ഇനം നാടന്‍ ചെടികളാണ് ഉണ്ടായിരുന്നതെങ്കില്‍ ഇപ്പോള്‍ മുപ്പതോളം ചെടികളുണ്ട്. ചിത്രശലഭങ്ങളെയും വിവിധയിനം സസ്യങ്ങളെയും പരിചയപ്പെടുത്തുന്ന ബോര്‍ഡുകളും ശലഭോദ്യാനത്തില്‍ സ്ഥാപിച്ചിട്ടുണ്ട്. സ്‌കൂള്‍, കോളജ് വിദ്യാര്‍ഥികളുടെ പഠനകേന്ദ്രം കൂടിയായ ശലഭോദ്യാനം സന്ദര്‍ശകര്‍ക്ക് കൗതുകക്കാഴ്ച മാത്രമല്ല, പ്രകൃതിയിലേക്കുള്ള അറിവിന്‍റെ ജാലകം കൂടിയാണു പകര്‍ന്നു തരുന്നതെന്ന് ശലഭോദ്യാനം നിര്‍മാണത്തിനു നേതൃത്വം നല്‍കിയ ടൈസ് ഡയറക്‌ടര്‍ ഡോ. പുന്നന്‍ കുര്യന്‍ വേങ്കടത്ത് പറഞ്ഞു. ദക്ഷിണേന്ത്യയില്‍ വിവിധ ഇടങ്ങളിലായി ഇരുപതിലധികം ചിത്രശലഭോദ്യാനങ്ങള്‍ ആവിഷ്‌കരിച്ചിട്ടുള്ള ടൈസ് ആദ്യമായി നിര്‍മിച്ച ശലഭോദ്യാനമാണിത്. നഗരത്തിലെ സ്‌കൂളുകളുടെ പങ്കാളിത്തത്തോടെ ടൈസ് തന്നെയാണ് നവീകരണം നടത്തിയതും തുടര്‍പരിപാലനം നടത്തുന്നതും. നവീകരിച്ച ശലഭോദ്യാനത്തിന്‍റെ ഉദ്ഘാടനം ഇന്നു രാവിലെ 10ന് നടക്കും.

കോട്ടയത്തുമുണ്ടൊരു ഗ്യാപ് റോഡ്

കൈത-റബര്‍ത്തോട്ടങ്ങൾക്കിടയിലൂടെ വളഞ്ഞുപുളഞ്ഞ് 35-ാമൈല്‍-ചോലത്തടം റോഡ് കോട്ടയം: അരിക്കൊമ്പനെ പിടികൂടി കാട്ടിലേക്ക് അയയ്ക്കാനായി ലോറിയില്‍ കൊണ്ടുപോയപ്പോൾ ഒരു റോഡും സമൂഹ മാധ്യമങ്ങളില്‍ ഏറെ വൈറലായിരുന്നു. കൊച്ചി- ധനുഷ്‌കോടി ദേശീയ പാതയുടെ ഭാഗമായ മൂന്നാര്‍ - ബോഡിമെട്ട് റോഡില്‍ മൂന്നാറില്‍ നിന്ന് 13 കിലോമീറ്റര്‍ അകലെ ദേവികുളത്തിനും പെരിയകനാലിനും ഇടയിലുള്ള പ്രദേശമായ മൂന്നാര്‍ ഗ്യാപ് റോഡാണ് വൈറലായ റോഡ്. അടുത്ത നാളില്‍ ഹൈറേഞ്ചിലെ ജീപ്പുകളെല്ലാം റോഡ് ഷോ നടത്തി റോഡിനെ വീണ്ടും വൈറലാക്കി. സംസ്ഥാന പൊതുമരാമത്ത് വകുപ്പിന്‍റെ നേട്ടങ്ങളുടെ റീല്‍സ് കാണിക്കുന്നതും ഈ റോഡാണ്. തേയിലത്തോട്ടങ്ങളും പാറക്കെട്ടുകളും വ്യൂ പോയിന്‍റുകളും നിറഞ്ഞ ഗ്യാപ് റോഡ് സഞ്ചാരികളുടെ ഇഷ്ട ലൊക്കേഷനാണ്. ഇതുപോലെ കാഴ്ചകള്‍ നല്‍കുന്ന ഒരു റോഡ് കോട്ടയം- ഇടുക്കി ജില്ലാ അതിര്‍ത്തിയിലുണ്ട്. തേയിലത്തോട്ടങ്ങള്‍ക്കു പകരമായി കൈതയും റബര്‍ തോട്ടങ്ങളും വളവും പുളവും നിറഞ്ഞവഴികളുമുള്ള ഒരു മിനി ഗ്യാപ് റോഡ്. ദേശീയ പാത 183ല്‍ ഇടുക്കി ജില്ലയിലെ 35-ാംമൈലില്‍ നിന്നും ബോയ്‌സ് എസ്റ്റേറ്റ്, കൊക്കയാര്‍ വഴി കോട്ടയം ജില്ലയിലെ കൂട്ടിക്കല്‍, കാവാലി വഴി ചോലത്തടത്തെത്തുന്നതാണ് റോഡ്. മലയോര ഹൈവേയുടെ ഭാഗമായ റോഡ് അടുത്ത നാളില്‍ ബിഎം ആന്‍ഡ് ബിസി നിലവാരത്തില്‍ ടാര്‍ ചെയ്തതോടെ സഞ്ചാരികളുടെ റൈഡിംഗ് റൂട്ടും ഇഷ്ട ലൊക്കേഷനുമായി മാറിക്കഴിഞ്ഞിരിക്കുകയാണ്. 14 കിലോമീറ്റര്‍ ദൂരമുള്ള റോഡില്‍ കെകെ റോഡിലെ 35-ാം മൈലില്‍നിന്നും പ്രവേശിക്കുമ്പോള്‍ തന്നെ കൈതത്തോട്ടങ്ങളാണ്. കൈതകള്‍ക്കിടയിലൂടെ വളഞ്ഞും പുളഞ്ഞും എത്തി പിന്നെ റബര്‍ എസ്റ്റേറ്റിലേക്കാണ് പ്രവേശിക്കുന്നത്. മേലോരം, പെരുവന്താനം, വെംബ്ലി, ഉറുമ്പിക്കര വെള്ളച്ചാട്ടങ്ങള്‍ കാണാന്‍ ഈ റോഡില്‍നിന്നാണ് വഴി തിരിഞ്ഞു പോകുന്നത്. കൂട്ടിക്കലിലെത്തി കോട്ടയം ജില്ലയില്‍ പ്രവേശിച്ചാല്‍ താളുങ്കല്‍ കാവാലി വഴി ചോലത്തടത്തേക്കുള്ള റോഡില്‍ കാവാലി വ്യൂ പോയിന്‍റ് മനോഹരമായ കാഴ്ചയാണ് സമ്മാനിക്കുന്നത്. ഹെയര്‍പിന്‍ വളവുകളും എസ് വളവുകളും നിറഞ്ഞ റോഡില്‍ ചെറുതും വലുതുമായ നിരവധി വെള്ളച്ചാട്ടങ്ങളുമുണ്ട്. ചോലത്തടത്തുനിന്നും പൂഞ്ഞാര്‍ റോഡില്‍ പാതാമ്പുഴ വരെ കുത്തനെയുള്ള ഇറക്കവും എസ് വളവുകളുമാണ്. അസല്‍ ഹൈറേഞ്ച് വൈബ് സമ്മാനിക്കുന്ന യാത്രയാണ്. ഇടുക്കി ജില്ലയിലെ കുട്ടിക്കാനം ഭാഗത്തുനിന്നും നെടുമ്പാശേരി വിമാനത്താവളത്തിലേക്കും ഈരാറ്റുപേട്ട, പാലാ, തൊടുപുഴ ഭാഗങ്ങളിലേക്കും പോകാനുള്ള എളുപ്പ വഴികൂടിയാണ്. മഴക്കാലമായതോടെ റോഡിലെ കാഴ്ചകള്‍ ആസ്വദിച്ചുള്ള റൈഡിംഗിനായി ധാരാളം പേര്‍ എത്തുന്നുണ്ട്.

സഞ്ചാരികളുടെ മനം നിറച്ച് മലരിക്കല്‍ ആമ്പല്‍പാടം

കോട്ടയം: മലരിക്കലിലെ ആമ്പല്‍പാടം കാണാനും ആസ്വദിക്കാനും ജനം ഒഴുകിയെത്തുന്നു. അവധിദിനമായ ഇന്നലെ അഭൂതപൂര്‍വമായ തിരക്കായിരുന്നു. രാവിലെ 10 കഴിഞ്ഞാല്‍ ആമ്പല്‍ പ്പൂക്കള്‍ വാടിപ്പോകുന്നതിനാല്‍ പുലര്‍ച്ചെ അഞ്ചരയോടെ ആളുകള്‍ എത്തിത്തുടങ്ങും. 1800 ഏക്കറുള്ള ജില്ലയിലെ ഏറ്റവും വലിയ പാടശേഖരമായ ജെ ബ്ലോക്ക് ഒന്‍പതിനായിരം പാടശേഖരത്തിന്‍റെ മലരിക്കല്‍ ഭാഗത്തും 850 ഏക്കറുള്ള തിരുവായിക്കരിയിലുമാണ് ആമ്പല്‍പാടങ്ങളുള്ളത്. ഇപ്പോള്‍ തിരുവായ്ക്കരി പാടശേഖരത്തിലാണ് ആമ്പലുകള്‍ നിറഞ്ഞിരിക്കുന്നത്. ജെ ബ്ലോക്ക് ഒന്‍പതിനായിരം പാടത്തിന്‍റെ ഇരുവശത്തും ഏകദേശം ഒന്നരകിലോമീറ്റര്‍ റോഡിന് ഇരുവശവുമാണ് ആദ്യം കാഴ്ചയില്‍പെടുന്ന പൂപ്പാടം. സൂര്യോദയത്തോടൊപ്പം ആമ്പല്‍പ്പൂക്കൾ കാണാനാണ് ഏറെ ഭംഗി. എല്ലാ വര്‍ഷവും കൊയ്ത്ത് കഴിഞ്ഞു പാടത്ത് വെള്ളം കയറ്റുമ്പോഴാണ് ആമ്പല്‍ കിളിര്‍ത്തുതുടങ്ങുന്നത്. വെള്ളം വറ്റിക്കുന്ന സമയത്ത് ചെളിയില്‍ വീണുകിടക്കുന്ന വിത്താണു പിന്നീട് കിളിര്‍ത്തുവരുന്നത്. വിതയ്ക്ക് പാടം വറ്റിക്കുന്നതുവരെ പാടത്ത് ആമ്പലുകള്‍ നിറഞ്ഞുനില്‍ക്കും. മുന്‍കാലങ്ങളില്‍ ഓഗസ്റ്റ് ആദ്യവാരം ആരംഭിച്ചിരുന്ന ആമ്പല്‍വസന്തം ഇക്കുറി നേരത്തെ എത്തുകയായിരുന്നു. വിവിധ ഡിപ്പോകളില്‍ നിന്നായി കെഎസ്ആര്‍ടിസിയുടെ ഇരുപതോളം ബജറ്റ് ടൂറിസം ഉല്ലാസയാത്രാ വണ്ടികളാണ് ഇന്നലെ മലരിക്കലിലെത്തിയത്. സഞ്ചാരികളെ കാത്ത് വള്ളങ്ങള്‍ കിളിരൂര്‍ പാലം ഇറങ്ങി മലരിക്കലിലോട്ട് കയറുന്ന ഭാഗം മുതല്‍ പാടശേഖരങ്ങളില്‍ കാത്തുകിടക്കുന്നത് നൂറിലേറെ വള്ളങ്ങളാണ്. ഒരേസമയം രണ്ട് മുതല്‍ ഏഴ് പേര്‍ക്കുവരെ യാത്രചെയ്യാവുന്ന വള്ളങ്ങളാണ് ഇവിടെയുള്ളത്. സഞ്ചാരികള്‍ക്ക് പാടത്തിന്‍റെ ഉള്‍ഭാഗത്തേക്ക് യാത്രചെയ്ത് ആമ്പല്‍വസന്തം അടുത്തുകാണാനുള്ള അവസരമാണുള്ളത്. വള്ളത്തില്‍ സഞ്ചരിച്ചാലേ ആമ്പല്‍ക്കാഴ്ചകള്‍ അടുത്ത് ആസ്വദിക്കാന്‍ സാധിക്കൂ. വള്ളത്തില്‍ കയറുന്നവര്‍ക്ക് ലൈഫ് ജാക്കറ്റുമുണ്ട്. എത്തിച്ചേരാന്‍ കോട്ടയത്തുനിന്ന് ഇല്ലിക്കല്‍ കാഞ്ഞിരംകവല വഴി മലരിക്കലില്‍ എത്താന്‍ ഒന്‍പതു കിലോമീറ്റര്‍. കുമരകത്തുനിന്ന് ഇല്ലിക്കല്‍ കാഞ്ഞിരംകവല വഴി മലരിക്കലില്‍ എത്താന്‍ 10 കിലോമീറ്റര്‍. വൈക്കത്തുനിന്ന് ഇല്ലിക്കല്‍ കാഞ്ഞിരംകവല വഴി മലരിക്കലില്‍ എത്താന്‍ 28 കിലോമീറ്റര്‍. പാലാ, ചങ്ങനാശേരി ഭാഗങ്ങളില്‍ നിന്നും വരുന്നവര്‍ കോട്ടയത്ത് എത്തി കാഞ്ഞിരംകവല വഴി മലരിക്കലില്‍ എത്തുന്നതാണ് സൗകര്യം. സഞ്ചാരികളുടെ ശ്രദ്ധയ്ക്ക് പുലര്‍ച്ചെ 5.30 മുതല്‍ ആമ്പല്‍പാടം കാണാന്‍ ആളുകള്‍ എത്തിത്തുടങ്ങും. രാവിലെ ഒമ്പതിനു മുന്‍പ് എത്തിയാലേ വര്‍ണവിസ്മയം പൂര്‍ണമായും ആസ്വദിക്കാന്‍ സാധിക്കൂ. വെയിലുറയ്ക്കുന്നതോടെ പൂക്കള്‍ വാടും. സ്വകാര്യ വാഹനങ്ങളില്‍ എത്തുന്നവര്‍ നിര്‍ദേശിക്കുന്ന സ്ഥലങ്ങളില്‍ മാത്രമേ പാര്‍ക്ക് ചെയ്യാവൂ. ഫീസ് 30 രൂപ. കാഞ്ഞിരം കവലയില്‍നിന്നു വീതി കുറഞ്ഞ റോഡായതിനാല്‍ വാഹനങ്ങള്‍ നിര്‍ത്തി ബ്ലോക്ക് ഉണ്ടാക്കരുത്. ആമ്പല്‍ പാടത്ത് ഇറങ്ങരുത്. വള്ളം തുഴയുന്നവരുടെ നിര്‍ദേശങ്ങള്‍ പാലിക്കുക.ആറു മുതല്‍ എട്ടു പേര്‍ വരെയുള്ള സംഘത്തിനു വള്ളത്തില്‍ സഞ്ചരിക്കുന്നതിനു 1000 രൂപയാണ് ചാര്‍ജ്. ആമ്പല്‍പൂക്കള്‍ ഒരു കെട്ടിനു 30 രൂപ.

കന്യാസ്ത്രീകൾക്കെതിരായ കേസ് റദ്ദാക്കണം: മന്ത്രി റോഷി അഗസ്റ്റിൻ

കാഞ്ഞിരപ്പള്ളി: അവനവന്‍റെ വിശ്വാസം കാപട്യമില്ലാതെ തുറന്നുപറയുകയും അത് ഒരു സംസ്കാരമായി കാണുകയും പ്രവൃത്തിയിലാക്കുകയും ചെയ്യുന്ന വ്യക്തിക്കേ യഥാർഥ മനുഷ്യനാകാൻ സാധിക്കൂവെന്ന് ജലവിഭവമന്ത്രി റോഷി അഗസ്റ്റിൻ. കാഞ്ഞിരപ്പള്ളി സെന്‍റ് ഡൊമിനിക്സ് കത്തീഡ്രൽ ഇടവകയുടെ ദ്വിശതാബ്ദി ആഘോഷങ്ങളുടെ ഭാഗമായി നടന്ന സാംസ്കാരിക സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഭരണഘടനാപരമായ അവകാശങ്ങൾ പലതും ലംഘിച്ചുകൊണ്ടാണ് പലരും അറസ്റ്റ് ചെയ്യപ്പെടുകയും വേട്ടയാടപ്പെടുകയും ജയിലിൽ അടയ്ക്കപ്പെടുകയും ചെയ്യുന്നത്. കന്യാസ്ത്രീകൾക്കെതിരായി എ‌ടുത്തിരിക്കുന്ന കേസ് ഛത്തീസ്ഗഡ് ഗവൺമെന്‍റും കേന്ദ്രഗവൺമെന്‍റും ഇടപെട്ട് റദ്ദാക്കണമെന്നും അദ്ദേഹം കൂട്ടിച്ചേർത്തു. കാഞ്ഞിരപ്പള്ളിയുടെയും ഈ ദേശത്തിന്‍റെയും വളർച്ചയ്ക്കും പുരോഗതിക്കും പിന്നിൽ ഇവിടെ വസിച്ചുവരുന്ന വിശ്വാസിസമൂഹത്തിന്‍റെ കരുതലും കാവലും കർമശേഷിയുമുണ്ടെന്ന് യോഗത്തിൽ അധ്യക്ഷതവഹിച്ച കാഞ്ഞിരപ്പള്ളി രൂപതാ ബിഷപ് മാർ ജോസ് പുളിക്കൽ പറഞ്ഞു. ക്രൈസ്തവസമൂഹം വര്‍ഗീയമായി ചിന്തിക്കുന്നവരല്ല, ഉന്നതമായ മൂല്യങ്ങളിൽ അടിയുറച്ച് ജീവിക്കുന്നവരാണ്. വർഗീയത ഒരു നിർഭാഗ്യകരമായ അവസ്ഥയാണ്. അതിന്‍റെ എപ്പിസോഡുകളാണ് ഇപ്പോൾ നടന്നുകൊണ്ടിരിക്കുന്നത്. സിസ്റ്റർമാർക്ക് ജാമ്യം കിട്ടിയതുകൊണ്ട് കാര്യമില്ല. അടിസ്ഥാനരഹിതമായി അവർക്കെതിരേ എടുത്തിരിക്കുന്ന കേസുകൾ റദ്ദു ചെയ്യപ്പെടണം. മതസാഹോദര്യത്തിന്‍റെ മുഖം നഷ്ടപ്പെടാതെ കാത്തുസൂക്ഷിക്കേണ്ടത് ധാർമികതയുള്ള സമൂഹത്തിന്‍റെ ഉത്തരവാദിത്വമാണ്. നാടിനെ വളർത്തുന്ന പുതിയ സംരംഭങ്ങൾ വളര്‍ത്തിയെടുക്കാന്‍ സാധിക്കണമെന്നും മാർ ജോസ് പുളിക്കൽ കൂട്ടിച്ചേർത്തു. ആന്‍റോ ആന്‍റണി എംപി, ചീഫ് വിപ്പ് ഡോ. എന്‍. ജയരാജ്, പഞ്ചായത്ത് പ്രസിഡന്‍റ് കെ.ആര്‍. തങ്കപ്പന്‍, എസ്എൻഡിപി ഹൈറേഞ്ച് യൂണിയന്‍ സെക്രട്ടറി പി. ജീരാജ്, നൈനാര്‍പള്ളി ചീഫ് ഇമാം ഡോ. അര്‍ഷാദ് മൗലവി, കത്തീഡ്രൽ വികാരി റവ.ഡോ. കുര്യൻ താമരശേരി എന്നിവർ പ്രസംഗിച്ചു. തുടർന്ന് കത്തീഡ്രല്‍ ടീം അവതരിപ്പിച്ച മഞ്ഞുപെയ്യുന്ന മരുഭൂമി എന്ന സാമൂഹിക സംഗീത നാടകവും അരങ്ങേറി. ശതാബ്ദി ആഘോഷങ്ങളുടെ ഭാഗമായി ഉച്ചകഴിഞ്ഞ് നടന്ന വിശുദ്ധ കുർബാനയ്ക്ക് മാർ ജോസ് പുളിക്കൽ കാർമികത്വം വഹിച്ചു. ഇടവകയിൽ സേവനമനുഷ്ഠിച്ച വൈദികർ സഹകാർമികരായിരുന്നു. വിശാല കത്തീഡ്രൽ ഇടവകയുടെ ഭാഗമായിരുന്ന അഞ്ച് ഇടവകകളുടെ സംഗമം ഇന്ന് നടക്കും. വൈകുന്നേരം അഞ്ചിന് നടക്കുന്ന വിശുദ്ധകുർബാനയ്ക്ക് റവ.ഡോ. മാത്യു പായിക്കാട്ട്, ഫാ. മാത്യു പുതുമന, ഫാ. മാർട്ടിൻ വെള്ളിയാംകുളം, ഫാ. ജോസഫ് പൊങ്ങന്താനം, ഫാ. ആന്‍റണി ചെന്നക്കാട്ടുകുന്നേൽ എന്നിവർ കാർമികത്വം വഹിക്കും. വൈകുന്നേരം ആറിന് നടക്കുന്ന പൊതുസമ്മേളനം വികാരി ജനറാൾ റവ.ഡോ. ജോസഫ് വെള്ളമറ്റം ഉദ്ഘാടനം ചെയ്യും. തുടർന്ന് കുന്നന്താനം പ്രോവിഡൻസ് ഹോമിലെ കുട്ടികളുടെ കലാപരിപാടികളും നടക്കും.

ജില്ലയില്‍ അതിതീവ്രമഴ

കോട്ടയം: ജില്ലയില്‍ അതിതീവ്രമഴ. ഇന്നലെ ഉച്ചമുതലാണ് പലയിടത്തും ഒറ്റപ്പെട്ട ശക്തമായ മഴ പെയ്തത്. ഉച്ചകഴിഞ്ഞ് ഒന്നു മുതല്‍ മീനച്ചില്‍ താലൂക്കിലെ വിവിധ ഭാഗങ്ങളിലും മലയോര മേഖലയിലും അതിതീവ്രമഴയാണ് ലഭിച്ചത്. മീനച്ചിലാറ്റിലും മണിമലയാറ്റിലും ജലനിരപ്പ് ഉയര്‍ന്നു. പൂഞ്ഞാര്‍ വെട്ടുകല്ലാംകുഴി, തീക്കോയി ആറ്, അടിവാരം, ളാലം തോട്, അന്ത്യാളം തോട്, ചിറ്റാര്‍ തോട് എന്നീ തോടുകളിലും ജലനിരപ്പ് ഉയര്‍ന്നു. രാത്രിയിലും മഴ തുടരുകയാണ്. ഇന്നും ഓറഞ്ച് അലര്‍ട്ട് പ്രഖ്യാപിച്ചിരിക്കുന്ന ജില്ലയില്‍ വിവിധ ഭാഗങ്ങളില്‍ ഒറ്റപ്പെട്ട കനത്ത മഴയ്ക്കു സാധ്യതയുണ്ട്.

മിനി മാരത്തൺ 15ന് രജിസ്ട്രേഷൻ പുരോഗമിക്കുന്നു

കോട്ടയം: ഹൊറൈസൺ മോട്ടോഴ്സും ദീപികയും സിഎംഎസ് കോളജും വിമുക്തി മിഷനും ചേർന്ന് ലഹരിക്കെതിരേ 15ന് കോട്ടയത്തു നടത്തുന്ന മിനി മാരത്തൺ മൂന്നാം സീസണിലേക്കുള്ള രജിസ്ട്രേഷൻ പുരോഗമിക്കുന്നു. തെള്ളകം കാരിത്താസ് മാതാ ആശുപത്രിക്ക് സമീപത്തുള്ള ഹൊറൈസൺ മോട്ടോഴ്സ് അങ്കണത്തിൽനിന്നു രാവിലെ 6.30ന് ആരംഭിക്കുന്ന മിനി മാരത്തൺ 10 കിലോമീറ്റർ പിന്നിട്ട് സിഎംഎസ് കോളജിലാണ് സമാപിക്കുന്നത്. മാരത്തണിനെത്തുന്ന താരങ്ങൾക്കുള്ള വൈദ്യ സഹായവും ആരോഗ്യ പരിശോധനയും കോട്ടയം കാരിത്താസ് ഹോസ്പിറ്റലിലെ മെഡിക്കൽ സംഘം ലഭ്യമാക്കും. പങ്കെടുക്കുന്നവർക്കുള്ള രജിസ്‌ട്രേഷൻ പുലർച്ചെ 5.30 മുതൽ ഹൊറൈസൺ മോട്ടോഴ്‌സിന്‍റെ തെള്ളകം കാരിത്താസ് ഹോസ്പിറ്റലിന് സമീപമുള്ള മഹീന്ദ്ര സർവീസ് സെന്‍ററിൽ ആരംഭിക്കും. ഒന്നാമതെത്തുന്ന വനിതാ , പുരുഷ വിഭാഗത്തിലുള്ള വിജയിക്ക് 25,000 രൂപ കാഷ് പ്രൈസ് നൽകും. രണ്ടും മൂന്നും സ്ഥാനം നേടുന്ന പുരുഷ, വനിതാ വിഭാഗത്തിലുള്ള അത്‌ലറ്റുകൾക്ക് യാഥാക്രമം 10,000 , 5000 രൂപ വീതം കാഷ് പ്രൈസ് ലഭിക്കും. 50 വയസിനു മുകളിലുള്ള വിഭാഗത്തിൽ പുരുഷ,വനിതാ വിജയികൾക്ക് 5000 രൂപ വീതമാണ് കാഷ് പ്രൈസ്. ഫിനിഷിംഗ് പോയിന്‍റിൽ ഓടി എത്തുന്ന എല്ലാവർക്കും മെഡലുകൾ നൽകും. മുൻ വർഷങ്ങളിലേതുപോലെ തന്നെ മത്സരാർഥികൾക്ക് ടീഷർട്ടും പ്രഭാത ഭക്ഷണവും ക്രമീകരിച്ചിട്ടുണ്ട്. രജിസ്റ്റർ ചെയ്യാൻ: https://cmscollege.ac.in/cms-horizon-marathon-2025 കൂടുതൽ വിവരങ്ങൾക്ക് 9847266166 എന്ന നമ്പറിൽ ബന്ധപ്പെടാം.

ഡിസിസി പ്രസിഡന്‍റുമാറ്റം: ചർച്ച വീണ്ടും സജീവം

കോട്ടയം: ഡിസിസി പ്രസിഡന്‍റുമാറ്റം വീണ്ടും സജീവമായി. ഡിസിസി പ്രസിഡന്‍റുമാരെ മാറ്റുന്നതിനായി എഐസിസി നല്‍കിയ പട്ടികയില്‍ കോട്ടയവുമുണ്ട്. കഴിഞ്ഞയാഴ്ച ഡല്‍ഹിയിലെത്തിയ കെപിസിസി പ്രസിഡന്‍റിനോടും ഭാരവാഹികളോടും മുന്‍ കെപിസിസി പ്രസിഡന്‍റുമാരുമായും ഡിസിസി പ്രസിഡന്‍റുമാരുമായും മുതിര്‍ന്ന നേതാക്കളുമായും ആലോചിച്ച് പുനഃസംഘടന നടത്താനാണ് ദേശീയ നേതൃത്വം പറഞ്ഞത്. ഇതനുസരിച്ച് കെപിസിസി ഭാരവാഹികള്‍ അനൗപചാരിക ചര്‍ച്ചകള്‍ ആരംഭിച്ചുകഴിഞ്ഞു. നിലവിലെ ഡിസിസി പ്രസിഡന്‍റ് നാട്ടകം സുരേഷിന് ഒരു ടേം കൂടി നല്‍കണമെന്ന ആവശ്യം ഉയര്‍ന്നിട്ടുണ്ടെങ്കിലും സാധ്യത കുറവാണ്. തിരുവഞ്ചൂര്‍ രാധാകൃഷ്ണന്‍ നേതൃത്വം നല്‍കുന്ന എ വിഭാഗത്തിന്‍റെ പ്രതിനിധിയായിട്ടാണ് സുരേഷ് ഇപ്പോള്‍ പ്രവര്‍ത്തിക്കുന്നത്. സുരേഷിനെ മാറ്റിയാല്‍ യുഡിഎഫ് ജില്ലാ കണ്‍വീനര്‍ ഫില്‍സണ്‍ മാത്യൂസിനെ പ്രസിഡന്‍റാക്കാനാണ് തിരുവഞ്ചൂര്‍ രാധാകൃഷ്ണന്‍ നേതൃത്വം നല്‍കുന്ന എ ഗ്രൂപ്പിന്‍റെ തീരുമാനം. ചര്‍ച്ചയില്‍ ഫില്‍സണ്‍ മാത്യൂസിന്‍റെ പേരിനാണ് മുന്‍തൂക്കം ലഭിച്ചിരിക്കുന്നത്. കഴിഞ്ഞ തവണയും ഫില്‍സണ്‍ മാത്യൂസിന്‍റെ പേര് അവസാനവട്ടം വരെ പരിഗണിച്ചിരുന്നു. ഏറ്റവും ഒടുവിലാണ് നാട്ടകം സുരേഷ് എത്തുന്നത്. ഇതിനിടയില്‍ സംസ്ഥാന തലത്തില്‍ ഉമ്മന്‍ ചാണ്ടി നേതൃത്വം നല്‍കിയിരുന്ന എ ഗ്രൂപ്പ് പുനരുജ്ജീവിച്ചിട്ടുണ്ട്. പി.സി. വിഷ്ണുനാഥും ചാണ്ടി ഉമ്മനുമാണ് ഇതിനു നേതൃത്വം നല്‍കുന്നത്. കെ.സി. ജോസഫ്, എം.എം. ഹസന്‍, ബെന്നി ബഹന്നാന്‍ എന്നിവരുടെ ആശീര്‍വാദത്തോടെയാണ് ഉമ്മന്‍ ചാണ്ടിയുടെ എ ഗ്രൂപ്പ് എന്ന പേരില്‍ പുതിയ നീക്കം. ഈ ഗ്രൂപ്പ് ചാണ്ടി ഉമ്മനെയാണ് കോട്ടയം ഡിസിസി പ്രസിഡന്‍റ് സ്ഥാനത്തേക്ക് നിര്‍ദേശിക്കുന്നത്. തിരുവഞ്ചൂര്‍ രാധാകൃഷ്ണന്‍ ഉള്‍പ്പെടെയുള്ളവര്‍ ഇതിനോട് യോജിക്കുന്നില്ല. സാമുദായിക പരിഗണനയും നോക്കേണ്ടതുണ്ട്. ക്രിസ്ത്യന്‍ സമുദായത്തിനു മുന്‍തൂക്കമുള്ള ജില്ലയില്‍ ആ സമുദായത്തില്‍നിന്ന് ഒരാള്‍ എന്ന നിര്‍ദേശമാണ് ഇപ്പോള്‍ ഉയര്‍ന്നിരിക്കുന്നത്. കോട്ടയം, ഇടുക്കി ജില്ലകളിലെ പ്രസിഡന്‍റുമാരെ ഇതനുസരിച്ചാകും തീരുമാനിക്കുക. അപ്രതീക്ഷിതമായി ഒരാൾ പ്രസിഡന്‍റു സ്ഥാനത്തേക്ക് എത്താനും സാധ്യതയില്ലായ്കയില്ല. കാലങ്ങളായി എ ഗ്രൂപ്പിന്‍റെ കൈയിലുള്ള സ്ഥാനം ഇത്തവണ വേണമെന്നാണ് ഐ ഗ്രൂപ്പിന്‍റെ ആവശ്യം. കെപിസിസി മുന്‍ വൈസ്പ്രസിഡന്‍റ് വക്താവും എംഎല്‍എയുമായ ജോസഫ് വാഴയ്ക്കന്‍, ഐഎന്‍ടിയുസി ജില്ലാ പ്രസിഡന്‍റ് ഫിലിപ്പ് ജോസഫ് എന്നിവരുടെ പേരുകളാണ് ഐ ഗ്രൂപ്പ് മുന്നോട്ടു വയ്ക്കുന്നത്. ജോസഫ് വാഴയ്ക്കന്‍ അടുത്ത നാളിലായി ജില്ലയില്‍ സജീവമാണ്. ഐഎന്‍ടിയുസി ജില്ലാ പ്രസിഡന്‍റ് എന്ന നിലയില്‍ ഫിലിപ്പ് ജോസഫ് ജില്ലയില്‍ സജീവമായി പ്രവര്‍ത്തിക്കുന്നയാളാണ്. മുമ്പും പലവട്ടം ഫിലിപ്പ് ജോസഫിന്‍റെ പേര് പ്രസിഡന്‍റ് സ്ഥാനത്തേക്ക് പരിഗണിച്ചിരുന്നതാണ്. അടുത്തയാഴ്ച പുതിയ ഡിസിസി പ്രസിഡന്‍റും ജില്ലാ ഭാരവാഹികളുമുണ്ടാകുമെന്നാണ് സൂചന.

വനംമന്ത്രി രാജിവയ്ക്കണമെന്ന്

മുണ്ടക്കയം ഈസ്റ്റ്‌: പെരുവന്താനം പഞ്ചായത്തിൽ നിത്യേന ഉണ്ടാകുന്ന വന്യജീവി ആക്രമണങ്ങളുടെ ഉത്തരവാദിത്വം ഏറ്റെടുത്ത് വനംമന്ത്രി രാജിവയ്ക്കണമെന്ന് ബിജെപി സംസ്ഥാന സെക്രട്ടറി പന്തളം പ്രതാപൻ. വന്യജീവി ആക്രമണത്തിൽ പ്രതിഷേധിച്ച് മുണ്ടക്കയം മുപ്പത്തഞ്ചാംമൈലിലെ ഫോറസ്റ്റ് സ്റ്റേഷനിലേക്ക് ബിജെപി പ്രവർത്തകർ നടത്തിയ പ്രതിഷേധ മാർച്ച് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കഴിഞ്ഞ അഞ്ചു മാസത്തിനിടയിൽ മതമ്പയിൽ രണ്ട് തൊഴിലാളികളാണ് കാട്ടാനയുടെ ആക്രമണത്തിൽ കൊല്ലപ്പെട്ടത്. കഴിഞ്ഞ മാസം തൊട്ടടുത്ത പഞ്ചായത്തായ പീരുമേട്ടിലും ഒരു ആദിവാസി സ്ത്രീയെ കാട്ടാന ചവുട്ടി കൊലപ്പെടുത്തി. ഇത്തരം സംഭവങ്ങളുണ്ടായിട്ടും വകുപ്പ് മേലധികാരികൾ അനങ്ങാപ്പാറ നയമാണ് സ്വീകരിക്കുന്നത്. ജനങ്ങളുടെ സ്വത്തിനും ജീവനും സംരക്ഷണം നൽകണമെന്നും വനം മന്ത്രിയുടെ നിഷ്ക്രിയത്വം ജനജീവിതത്തിന് ഭീഷണിയാണെന്നും അദ്ദേഹം കുറ്റപ്പെടുത്തി. ധർണയിൽ ജില്ലാ പ്രസിഡന്‍റ് വി.സി. വർഗീസ് മുഖ്യപ്രഭാഷണം നടത്തി. മണ്ഡലം വൈസ് പ്രസിഡന്‍റ് ടി.ആർ. രാജേന്ദ്രൻ അധ്യക്ഷത വഹിച്ചു. ജില്ലാ ജനറൽ സെക്രട്ടറി സി. സന്തോഷ് കുമാർ, മണ്ഡലം പ്രസിഡന്‍റ് കെ.ഡി. അനീഷ്, ജില്ലാ സെക്രട്ടറി സന്തോഷ് കൃഷ്ണൻ എന്നിവർ പ്രസംഗിച്ചു.

റവ. ഡോ. നിരപ്പേൽ അവാർഡ് ഫോർ ഇൻസ്പിരേഷണല്‍ ടീച്ചർ പുരസ്കാരം ആർ. ജയശ്രീക്ക് സമ്മാനിച്ചു

പെരുവന്താനം: സെന്‍റ് ആന്‍റണീസ് കോളജിന്‍റെയും റവ.ഡോ. ആന്‍റണി നിരപ്പേൽ ഫൗണ്ടേഷന്‍റെയും സംയുക്താഭിമുഖ്യത്തില്‍ കേരളത്തിലെ ബെസ്റ്റ് ഹയർ സെക്കൻഡറി സ്കൂൾ പ്രിൻസിപ്പൽമാർക്കായി ഏർപ്പെടുത്തിയ റവ.ഡോ. നിരപ്പേൽ അവാർഡ് ഫോർ ഇൻസ്പിരേഷണല്‍ ടീച്ചർ പുരസ്കാരം പൂഞ്ഞാർ എസ്എംവി ഹയർ സെക്കൻഡറി സ്കൂൾ പ്രിൻസിപ്പൽ ആർ. ജയശ്രീക്ക് സമർപ്പിച്ചു. പെരുവന്താനം സെന്‍റ് ആന്‍റണീസ് കോളജ് ഓഡിറ്റോറിയത്തിൽ നടന്ന സമ്മേളനത്തിൽ മോൺ. ജോർജ് ആലുങ്കല്‍ 10,001 രൂപയും പ്രശസ്തി പത്രവും മെമന്‍റോയുമടങ്ങുന്ന പുരസ്കാരം ആർ. ജയശ്രീക്ക് നൽകി. പ്രിൻസിപ്പൽ ഡോ.ആന്‍റണി ജോസഫ് കല്ലമ്പള്ളി അധ്യക്ഷത വഹിച്ചു. കോളജ് ചെയര്‍മാന്‍ ബെന്നി തോമസ് മുഖ്യപ്രഭാഷണം നടത്തി. സെക്രട്ടറി ടിജോമോന്‍ ജേക്കബ്‌, വൈസ് പ്രിന്‍സിപ്പല്‍മാരായ സുപർണ രാജു, ബോബി കെ. മാത്യു, പി.ആർ. രതീഷ്, ഫാ. ജോസഫ്‌ വാഴപ്പനാടി, ജിനു തോമസ്‌ എന്നിവർ പ്രസംഗിച്ചു. തുടർന്ന് പൂഞ്ഞാർ എസ്എംവി സ്കൂളിൽ നിന്നെത്തിയ വിദ്യാർഥികൾ ആർട്ടിഫിഷൽ ഇന്‍റലിജന്‍സ്, റോബോട്ടിക്സ്‌, ഹോട്ടല്‍ മാനേജ്‌മെന്‍റ്, ഫാഷന്‍ ഡിസൈനിംഗ്, ഏവിയേഷന്‍ ഡിപ്പാര്‍ട്ട്മെന്‍റുകള്‍ നടത്തിയ പ്രദർശനങ്ങളില്‍ പങ്കെടുത്തു.

കാടുമൂടിയ റബർത്തോട്ടങ്ങൾ കീഴടക്കി കാട്ടാനക്കൂട്ടം

മുണ്ടക്കയം: കാട്ടാനയുടെ ആക്രമണത്തിൽ രണ്ടു ജീവനുകൾ നഷ്ടമായ പെരുവന്താനം പഞ്ചായത്തിലെ ടിആർ ആൻഡ് ടി എസ്റ്റേറ്റിലെ കാടുമൂടിയ റബർത്തോട്ടങ്ങൾ വന്യജീവകളുടെ വിഹാരകേന്ദ്രമായി മാറുന്നു. ടിആർ ആൻഡ് ടി എസ്റ്റേറ്റിൽ റബർമരങ്ങൾ വെട്ടിമാറ്റിയ നൂറുക്കണക്കിന് ഏക്കർ സ്ഥലമാണ് കാടുമൂടി വെറുതേ കിടക്കുന്നത്. ഈ പ്രദേശങ്ങളിൽ ശബരിമലവനത്തിൽനിന്നു വന്യജീവികൾ കൂട്ടമായെത്തി തമ്പടിക്കുകയാണ്. എസ്റ്റേറ്റിന്‍റെ പല ഭാഗങ്ങളിലും കഴിഞ്ഞ ഏതാനും വർഷങ്ങളായി പുലി, കടുവ, കാട്ടാന, കാട്ടുപോത്ത്, കാട്ടുപന്നി, കുരങ്ങൻ അടക്കമുള്ള വന്യജീവികൾ വിഹരിക്കുകയാണ്. കഴിഞ്ഞ വർഷം മന്ത്രി വി.എൻ. വാസവന്‍റെ നേതൃത്വത്തിൽ മുണ്ടക്കയത്ത് നടത്തിയ ചർച്ചയിൽ എസ്റ്റേറ്റിലെ കാടുമൂടിയ പ്രദേശങ്ങൾ വെട്ടിത്തെളിക്കണമെന്ന് എസ്റ്റേറ്റ് മാനേജ്മെന്‍റിന് നിർദേശം നൽകിയെങ്കിലും ഇതൊന്നും പാലിക്കപ്പെട്ടില്ല. പുതിയതായി റബർ വെട്ടിമാറ്റിയ ഭാഗത്ത് കൈത കൃഷി നടത്തുന്നുണ്ടെങ്കിലും വർഷങ്ങളായി ഉപയോഗിക്കാതെ കിടക്കുന്ന ഭൂമി കാടുമൂടിയ നിലയിലാണ്. ഇവിടെയാണ് വന്യമൃഗങ്ങൾ തമ്പടിക്കുന്നത്. കഴിഞ്ഞ ഫെബ്രുവരിയിൽ ചെന്നാപ്പാറയിൽ എസ്റ്റേറ്റിനോട് ചേർന്ന് താമസിച്ചിരുന്ന സോഫിയ എന്ന വീട്ടമ്മയെ കാട്ടാന ആക്രമിച്ച് കൊന്നിരുന്നു. കഴിഞ്ഞ ദിവസം മതമ്പ കൊണ്ടോടിയിൽ റബർ ടാപ്പിംഗ് തൊഴിലാളിയായ പുരുഷോത്തമനെ കാട്ടാന ആക്രമിച്ച് കൊലപ്പെടുത്തിയിരുന്നു. ആന പുരുഷോത്തമനെ ആക്രമിച്ച ശേഷം ടിആർ ആൻഡ് ടി എസ്റ്റേറ്റിലെ കാടുമൂടിയ മേഖലയിലേക്കാണ് ഓടിപ്പോയതെന്ന് മകൻ രാഹുൽ പറഞ്ഞിരുന്നു. എസ്റ്റേറ്റിലെ തൊഴിലാളികളെയും പ്രദേശത്തെ കുടുംബങ്ങളെയും ദുരിതത്തിലാക്കുന്ന വന്യമൃഗശല്യത്തിന് പ്രധാന കാരണമായ തോട്ടം മേഖലയിലെ കാടുകൾ വെട്ടിമാറ്റി പ്രശ്നത്തിന് പരിഹാരം കാണണമെന്ന് ആവശ്യം ശക്തമാവുകയാണ്.

രാജേന്ദ്ര മൈതാനത്ത് സ്റ്റേജ് ഉദ്ഘാടനവും ജലബജറ്റ് പ്രഖ്യാപനവും

പൊൻകുന്നം: രാജേന്ദ്ര മൈതാനത്ത് ചിറക്കടവ് പഞ്ചായത്ത് ആറുലക്ഷം രൂപ മുടക്കി നിർമിച്ച പുതിയ സ്റ്റേജിന്‍റെ ഉദ്ഘാടനവും ജലബജറ്റ് പ്രഖ്യാപനവും മന്ത്രി റോഷി അഗസ്റ്റിൻ നടത്തി. ചീഫ് വിപ്പ് ഡോ. എൻ. ജയരാജ് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് സി.ആർ. ശ്രീകുമാർ, ജില്ലാ പഞ്ചായത്തംഗം ടി.എൻ. ഗിരീഷ്‌കുമാർ, സതി സുരേന്ദ്രൻ, മിനി സേതുനാഥ്, ബി. രവീന്ദ്രൻനായർ, ഷാജി പാമ്പൂരി, സുമേഷ് ആൻഡ്രൂസ്, ആന്‍റണി മാർട്ടിൻ, എൻ.ടി. ശോഭന, ഗിരീഷ് എസ്. നായർ, വി.ജി. ലാൽ, പി. പ്രജിത്, പി. സതീഷ്ചന്ദ്രൻനായർ, വൈശാഖ് എസ്. നായർ, വിവിധ രാഷ്‌ട്രീയകക്ഷി പ്രതിനിധികൾ തുടങ്ങിയവർ പങ്കെടുത്തു.

ജില്ലാ ക്ഷീരസംഗമം കാഞ്ഞിരപ്പള്ളിയിൽ

കാഞ്ഞിരപ്പള്ളി: കോട്ടയം ജില്ലാ ക്ഷീരസംഗമം 21, 22, 23 തീയതികളില്‍ തമ്പലക്കാട് സെന്‍റ് തോമസ് പള്ളി ഓഡിറ്റോറിയത്തില്‍ ന‌ട‌ക്കും. ക്ഷീരവികസന വകുപ്പ്, ജില്ലയിലെ ക്ഷീരസഹകരണ സംഘങ്ങള്‍, മില്‍മ, ത്രിതല പഞ്ചായത്തുകള്‍, കേരള ഫീഡ്സ്, മറ്റ് സഹകരണ സ്ഥാപനങ്ങള്‍ എന്നിവയുടെ സംയുക്താഭിമുഖ്യത്തില്‍ കാഞ്ഞിരപ്പള്ളി ബ്ലോക്ക് പഞ്ചായത്തിനു കീഴില്‍ വരുന്ന തമ്പലക്കാട് നോര്‍ത്ത് ക്ഷീരസംഘത്തിന്‍റെ ആതിധേയത്വത്തിലാണ് ക്ഷീരസംഗമം‍ സംഘടിപ്പിക്കുന്നത്. പരിപാടിയോടനുബന്ധിച്ചുള്ള സ്വാഗതസംഘ രൂപീകരണയോഗം ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴിയുടെ അധ്യക്ഷതയില്‍ ചീഫ് വിപ്പ് ഡോ. എന്‍. ജയരാജ് ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ മുഖ്യപ്രഭാഷണം നടത്തി. ജില്ലയിലെ 72 പഞ്ചായത്തുകളിലായി 11 ബ്ലോക്ക് പഞ്ചായത്തുകള്‍ക്കു കീഴില്‍ വരുന്ന 272 ക്ഷീരസംഘങ്ങളിലെ ആയിരക്കണക്കിന് ക്ഷീരകര്‍ഷകര്‍ പങ്കെടുക്കുന്ന പരിപാടിയിൽ ക്ഷീരവികസന-മൃഗസംരക്ഷണ മന്ത്രി ചിഞ്ചു റാണി, സഹകരണമന്ത്രി വി.എന്‍. വാസവന്‍, ചീഫ് വിപ്പ് ഡോ. എന്‍. ജയരാജ്, എംഎല്‍എമാര്‍, എംപിമാര്‍, ത്രിതലപഞ്ചായത്ത് പ്രതിനിധികൾ, ക്ഷീരവികസന വകുപ്പ് മേധാവികള്‍, ക്ഷീരസംഘം ഭാരവാഹികള്‍ തുടങ്ങിയവര്‍ പങ്കെടുക്കും. കന്നുകാലി പ്രദര്‍ശനം, ക്ഷീരകര്‍ഷകര്‍ക്കുള്ള ശില്പശാലകള്‍, ക്ഷീരജാലകം, എക്സിബിഷന്‍, ഗവ്യജാലകം, ക്ഷീരപ്രഭ, കര്‍ഷക സെമിനാര്‍, നാട്ടറിവുകള്‍, ക്ഷീരകര്‍ഷകരുടെ കലാസന്ധ്യ, വിളംബരവാഹനറാലി, പൊതുസമ്മേളനം തുടങ്ങിയ വിവിധ പരിപാടികള്‍ നടക്കും. പരിപാടിയുടെ വിജയത്തിനായി ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, ജീല്ലാ പഞ്ചായത്ത് മെംബർ ജെസി ഷാജന്‍, ക്ഷീരവികസന വകുപ്പ് ജില്ലാ ഡയറക്ടര്‍ സി.ആര്‍. ശാരദ, അസിസ്റ്റന്‍റ് ഡയറക്ടര്‍ ബിജി വിശ്വനാഥ്, പഞ്ചായത്ത് പ്രസിഡന്‍റ് കെ.ആര്‍. തങ്കപ്പന്‍, ബ്ലോക്ക് പഞ്ചായത്ത് മെംബർമാരായ ടി.ജെ. മോഹനന്‍, ഷക്കീല നസീര്‍, ടി.എസ്. കൃഷ്ണകുമാര്‍, രത്നമ്മ രവീന്ദ്രന്‍, ഡാനി ജോസ്, അനുഷിജു, പഞ്ചായത്ത് വൈസ് പ്രസിഡന്‍റ് സുമി ഇസ്മയില്‍, മെംബര്‍മാരായ ബേബി വട്ടയ്ക്കാട്ട്, രാജു തേക്കുംതോട്ടം, അമ്പിളി ഉണ്ണിക്കൃഷ്ണന്‍, ബ്ലോക്ക് ക്ഷീരവികസന ഓഫീസര്‍ ടി.എസ്. ഷീഹാബുദ്ദീന്‍, തമ്പലക്കാട് നോര്‍ത്ത് സംഘം സെക്രട്ടറി സണ്ണി ജേക്കബ് തുടങ്ങിയവര്‍ നേത്യത്വം നല്‍കുന്ന വിവിധ കമ്മിറ്റികള്‍ രൂപീകരിച്ചു.

എരുമേലിയില്‍ മേൽപ്പാലം ഒഴിവാക്കി മാസ്റ്റർ പ്ലാൻ നടപ്പാക്കാമെന്ന് എംഎൽഎ

എരുമേലി: എതിർപ്പിനെത്തുടർന്ന് എരുമേലി ടൗണിൽ മസ്ജിദിനും ക്ഷേത്രത്തിനും ഇടയിലായുള്ള മേൽപ്പാലം നിർമാണം ഉപേക്ഷിക്കുകയാണെന്ന് സെബാസ്റ്റ്യൻ കുളത്തുങ്കൽ എംഎൽഎ. മേൽപ്പാലം ഒഴികെ എരുമേലി മാസ്റ്റർ പ്ലാനിലെ മറ്റ് പദ്ധതികൾ നടപ്പിലാക്കുമെന്ന് എംഎൽഎ അറിയിച്ചു. എരുമേലി പഞ്ചായത്ത്‌ ഹാളിൽ വിളിച്ചു ചേർത്ത സർവകക്ഷി യോഗത്തിൽ പ്രസംഗിക്കുകയായിരുന്നു അദ്ദേഹം. 2023ലെ സംസ്ഥാന ബജറ്റിലാണ് പത്തു കോടി അനുവദിച്ച് എരുമേലിക്ക് മാസ്റ്റർ പ്ലാൻ പ്രഖ്യാപിച്ചത്. ഇതു നടപ്പിലാക്കാനുള്ള ചുമതല ദേവസ്വം ബോർഡിനാണ് കൈമാറിയത്. എന്നാൽ കൺസൾട്ടിംഗ് ഏജൻസിയെ തെരഞ്ഞെടുക്കാൻ ബോർഡ് താത്പര്യപത്രം പുറപ്പെടുവിച്ചെങ്കിലും ഏജൻസിയെ ലഭിക്കാൻ കാലതാമസം നേരിട്ടു. തുടർന്ന് രണ്ടു വർഷം പിന്നിട്ട് കഴിഞ്ഞയിടെയാണ് ഏജൻസി എരുമേലിയിലെത്തി പദ്ധതികൾക്ക് പ്ലാനും രൂപരേഖയും തയാറാക്കിയത്. ഇതേത്തുടർന്ന് പ്ലാൻ പ്രകാശനം ചെയ്ത് പദ്ധതികളുടെ വിശദവിവരം പ്രഖ്യാപിച്ചിരുന്നെന്ന് എംഎൽഎ പറഞ്ഞു. തുടർന്നാണ് പ്ലാനിലെ മേൽപ്പാലം പദ്ധതിയോട് ഹൈന്ദവ സംഘടനകൾ വിയോജിപ്പ് അറിയിച്ചത്. മേൽപ്പാലം വന്നാൽ എരുമേലി പേട്ടക്കവലയിൽ ശബരിമല സീസണിൽ വാഹന ഗതാഗതം സ്തംഭിക്കാതെ അയ്യപ്പഭക്തർക്ക് ക്ഷേത്രത്തിലും മുസ്‌ലിം പള്ളിയിലും റോഡ് മുറിച്ച് പ്രവേശിക്കാനും ഇറങ്ങാനും സാധിക്കും. എന്നാൽ വിശുദ്ധപാതയായി പേട്ടതുള്ളൽ പാതയെ പ്രഖ്യാപിച്ച ഭാഗത്ത്‌ ഗതാഗതം ഒഴിവാക്കുകയാണ് വേണ്ടതെന്നാണ് ഹൈന്ദവ സംഘടനകളുടെ അഭിപ്രായമെന്ന് എംഎൽഎ പറഞ്ഞു. ഇത് മുൻനിർത്തി മേൽപ്പാലം നിർമാണം മാസ്റ്റർ പ്ലാനിൽനിന്ന് നീക്കം ചെയുകയാണെന്ന് യോഗത്തിൽ എംഎൽഎ അറിയിച്ചു.

നാലമ്പല വികസനം: കേന്ദ്രപദ്ധതിക്ക് ശ്രമിക്കുമെന്ന് ഫ്രാന്‍സിസ് ജോര്‍ജ് എംപി

രാമപുരം: രാമപുരത്തെ നാലമ്പലങ്ങളുടെ വികസനത്തിനുവേണ്ടി കേന്ദ്രസര്‍ക്കാരിന്‍റെ തീര്‍ഥാടന ടൂറിസം പദ്ധതിയില്‍നിന്നു ഫണ്ട് അനുവദിക്കുന്നതിന് അടിയന്തര ശ്രമങ്ങള്‍ നടത്തുമെന്ന് ഫ്രാന്‍സിസ് ജോര്‍ജ് എംപി പറഞ്ഞു. ഇന്നലെ പ്രവര്‍ത്തകരോടും ജനപ്രതിനിധികളോടുമൊപ്പം നാലമ്പലങ്ങളില്‍ സന്ദര്‍ശനം നടത്തുകയായിരുന്നു. അദ്ദേഹം. രാവിലെ രാമപുരം ശ്രീരാമസ്വാമി ക്ഷേത്രത്തില്‍ എത്തിയ ഫ്രാന്‍സിസ് ജോര്‍ജ് തുടര്‍ന്ന് മറ്റു മൂന്നു ക്ഷേത്രങ്ങളിലും സന്ദര്‍ശനം നടത്തിയാണ് മടങ്ങിയത്. ക്ഷേത്രങ്ങളിലെത്തിയ എംപിയെ ഭാരവാഹികളായ അഡ്വ. എ.ആര്‍. ബുദ്ധന്‍, പ്രാണ്‍ അമനകരമന, പ്രദീപ് നമ്പൂതിരി, ശ്രീകുമാര്‍ കൂടപ്പുലം, ഉണ്ണിക്കൃഷ്ണന്‍, സോമനാഥന്‍ നായര്‍ അക്ഷയ, പി.പി. നിര്‍മലന്‍, സലി പുലിക്കുന്നേല്‍, വിഷ്ണു കൊണ്ടമറുക് ഇല്ലം എന്നിവര്‍ ചേര്‍ന്ന് സ്വീകരിച്ചു. രാമപുരം പഞ്ചായത്ത് പ്രസിഡന്‍റ് ലിസമ്മ മത്തച്ചന്‍ പുതിയിടത്തുചാലില്‍, കെ.കെ. ശാന്താറാം, ജോഷി കുമ്പളത്ത്, തോമസ് ഉഴുന്നാലില്‍, ജോര്‍ജ് പുളിങ്കാട്, മത്തച്ചന്‍ പുതിയിടത്തുചാലില്‍, സി.ജി. വിജയകുമാര്‍ ചിറയ്ക്കല്‍, രാജപ്പന്‍ പുത്തന്‍മ്യാലില്‍, നോയല്‍ ലൂക്ക്, ജോമോന്‍ ശാസ്താംപടവില്‍, മത്തായിച്ചന്‍ വെണ്ണായപ്പിള്ളി, സലിലാല്‍ തോമസ് എന്നിവര്‍ എംപിയോടൊപ്പമുണ്ടായിരുന്നു.

പ്രഫ. എം.എം. ഏബ്രഹാം മാപ്പിളക്കുന്നേലിന് മികച്ച വിശ്വാസപരിശീലകനുള്ള അവാര്‍ഡ്

പാലാ: പാലാ രൂപതയിലെ മികച്ച സണ്‍ഡേ സ്‌കൂള്‍ അധ്യാപകന് കുറവിലങ്ങാട് ആസ്ഥാനമായി പ്രവര്‍ത്തിക്കുന്ന കൊടൈക്കനാല്‍ ബസ് അപകട അനുസ്മരണ സ്മാരക സമിതി ഏര്‍പ്പെടുത്തിയിരിക്കുന്ന പുരസ്‌കാരം പൂവരണി തിരുഹൃദയ സണ്‍ഡേ സ്‌കൂള്‍ അധ്യാപകന്‍ പ്രഫ. എം.എം. ഏബ്രഹാം മാപ്പിളക്കുന്നേലിന് സമ്മാനിച്ചു. അമ്പത് വര്‍ഷത്തിലധികമായി സണ്‍ഡേ സ്‌കൂള്‍ അധ്യാപകനായി സേവനമനുഷ്ഠിക്കുന്ന എം.എം. ഏബ്രഹാമിനെ വികാരി ഫാ. ജോസഫ് മഠത്തിക്കുന്നേല്‍ പൊന്നാടയണിയിച്ച് ആദരിച്ചു. മുന്‍ ദേശീയ വിവരാവകാശ കമ്മീഷണര്‍ ഡോ. കുര്യാസ് കുമ്പളക്കുഴി പ്രശസ്തിപത്രം നല്‍കി. സമിതി ഭാരവാഹികളായ വി.എം. ഇമ്മാനുവല്‍, ജോസ് കൊച്ചുപുരയ്ക്കല്‍ എന്നിവര്‍ ചേര്‍ന്ന് കാഷ് അവാര്‍ഡ് സമ്മാനിച്ചു. ഡയറക്ടര്‍ ഫാ. ആന്‍റണി വില്ലന്താനത്ത്, ഹെഡ്മാസ്റ്റര്‍ മനു കെ. ജോസ് കൂനാനിക്കല്‍, സിസ്റ്റര്‍ ടെസി, പ്രസിഡന്‍റ് ജിബിന്‍ മണിയഞ്ചിറ, സ്റ്റാഫ് സെക്രട്ടറി ജിയ ജിജി, പി.ടി. തോമസ് പാലൂക്കുന്നേല്‍, ഷെറിന്‍ സെബാസ്റ്റ്യന്‍, ആന്‍മരിയ സജി, ജിബിന്‍ കല്ലക്കുളത്ത്, ജിലു ജിജി എന്നിവര്‍ പ്രസംഗിച്ചു.

വനിതകള്‍ നേതൃത്വത്തിലേക്കു കടന്നുവരണം: കത്തോലിക്ക കോണ്‍ഗ്രസ്

പാലാ: വനിതകള്‍ സമൂഹത്തിന്‍റെയും രാഷ്‌ട്രത്തിന്‍റെയും മുന്‍നിരയിലേക്ക് കൂടുതലായി കടന്നുവരണമെന്നും അതിനായി കത്തോലിക്ക കോണ്‍ഗ്രസ് വനിതാ കൗണ്‍സില്‍ കൂടുതല്‍ ശ്രദ്ധിക്കണമെന്നും റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍. കത്തോലിക്ക കോണ്‍ഗ്രസ് പാലാ രൂപത വനിതാ കൗണ്‍സില്‍ നടത്തിയ നേതൃത്വ ശില്പശാല ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പാലാ രൂപതയിലെ യൂണിറ്റുകളില്‍നിന്നു തെരഞ്ഞെടുക്കപ്പെട്ടവര്‍ക്കായി, സ്ത്രീകളെ സമൂഹത്തിന്‍റെ നേതൃനിരയിലേക്ക് എത്തിക്കുന്നതിനായിട്ടായിരുന്നു ഒരു ദിവസത്തെ പരിശീലന പരിപാടി. ഭരണങ്ങാനം മാതൃഭവനില്‍ നടത്തിയ സമ്മേളനത്തില്‍ ഗ്ലോബല്‍ സെക്രട്ടറിയും വനിതാ കോ-ഓര്‍ഡിനേറ്ററുമായ ആന്‍സമ്മ സാബു അധ്യക്ഷത വഹിച്ചു. ഗ്ലോബല്‍ പ്രസിഡന്‍റ് രാജീവ് കൊച്ചുപറമ്പില്‍, രൂപത പ്രസിഡന്‍റ് ഇമ്മാനുവല്‍ നിധീരി, ഗ്ലോബല്‍ വനിതാ കോ-ഓര്‍ഡിനേറ്ററും കത്തോലിക്ക കോണ്‍ഗ്രസ് ചങ്ങനാശേരി വൈസ് പ്രസിഡന്‍റുമായ ഷിജി ജോണ്‍സണ്‍, ജോയിസ് മേരി, ജോസ് വട്ടുകുളം, റൈബി രാജേഷ്, ലിബി മണിമല, ബെല്ല സിബി, അന്നക്കുട്ടി, ലൈസമ്മ ജോര്‍ജ്, സുജ ജോസഫ്, മോളി തോമസ്, ഡാലിയ ഫ്രാന്‍സിസ്, ക്ലിന്‍റ് അരീപ്ലാക്കല്‍ എന്നിവര്‍ പ്രസംഗിച്ചു.

പാലാ സിവില്‍ സ്റ്റേഷന്‍ കോമ്പൗണ്ടിലെ തുറക്കാത്ത ശുചിമുറികള്‍: മനുഷ്യാവകാശ കമ്മീഷന്‍ ഇടപെടുന്നു

പാലാ: നഗരസഭയില്‍ സിവില്‍ സ്റ്റേഷന്‍ കോമ്പൗണ്ടില്‍ നിര്‍മിച്ച ശുചീകരണമുറികള്‍ അടഞ്ഞുകിടക്കുന്നതു സംബന്ധിച്ച പൗരസമിതിയുടെ പരാതിയില്‍ ആക്‌ഷന്‍ ടേക്കണ്‍ റിപ്പോര്‍ട്ട് ആവശ്യപ്പെട്ട് സംസ്ഥാന മനുഷ്യാവകാശ കമ്മീഷന്‍ ഉത്തരവ്. റവന്യു വകുപ്പിന്‍റെയും നഗരസഭയുടെയും അനാസ്ഥയാണ് ശുചിമുറിയുടെ അവസ്ഥയ്ക്ക് കാരണമെന്ന് പൗരസമിതിയുടെ പരാതിയില്‍ പറയുന്നു. അഞ്ചു ലക്ഷം രൂപ ചെലവാക്കി പാലാ നഗരസഭ നിര്‍മിച്ച സിവില്‍ സ്റ്റേഷന്‍ കോമ്പൗണ്ടിലെ ശുചിമുറികള്‍ കാടുകയറി നശിക്കുന്ന അവസ്ഥയിലാണ്. സിവില്‍ സ്റ്റേഷനിലെ ജീവനക്കാരുടെയും നാട്ടുകാരുടെയും നിരന്തരമായ ആവശ്യപ്രകാരം 2019ല്‍ അഞ്ചു ലക്ഷം രൂപ ശുചിത്വ മിഷന്‍ ഫണ്ടില്‍നിന്ന് അനുവദിച്ച് നിര്‍മിച്ചതാണ് അഞ്ചു മുറികളുള്ള കംഫര്‍ട്ട് സ്റ്റേഷന്‍. നഗരസഭ നിര്‍മിച്ചു നല്‍കിയ ശൗചാലയങ്ങളിലേക്ക് ആവശ്യമായ വെള്ളം നല്‍കാനോ വൈദ്യുതി നല്‍കാനോ വൃത്തിയായി സൂക്ഷിക്കുന്നതിന് ആളെ നിയമിക്കാനോ റവന്യു വകുപ്പ് തയാറായില്ല. അതേസമയം സിവില്‍ സ്റ്റേഷന്‍റെ കോമ്പൗണ്ടിലുള്ള ശൗചാലയത്തിലേക്ക് മുനിസിപ്പാലിറ്റിയുടെ പേരില്‍ വെള്ളം നല്‍കാന്‍ ജലവകുപ്പും തയാറായില്ല. ഇതിനിടെ സാമൂഹ്യവിരുദ്ധശല്യവും രൂക്ഷമായി. ശുചിമുറികളിലെ പോസിഡുകളും കതകുകളും തകര്‍ത്ത നിലയിലാണ്. ഇതിനെതിരേ പൗരസമിതി നിരന്തരം പരാതികള്‍ നല്‍കിയിട്ടും അധികൃതര്‍ ചെവിക്കൊണ്ടില്ല. തുടര്‍ന്നാണ് മനുഷ്യാവകാശ കമ്മീഷനെ സമീപിച്ചത്. ജനകീയാസൂത്രണ പദ്ധതിയില്‍പ്പെടുത്തി 2023-24 ല്‍ ശുചിമുറികളുടെ അറ്റപ്പണികള്‍ക്കായി നഗരസഭ ആറു ലക്ഷം രൂപ അനുവദിച്ചിരുന്നു. ഇതില്‍ 1.62 ലക്ഷം രൂപ സിവില്‍ സ്റ്റേഷന്‍ പരിസരത്തെ കംഫർട്ട് സ്റ്റേഷന് നീക്കിവച്ചിരുന്നു. സാങ്കേതികാനുമതിക്ക് കാത്തിരിക്കുകയാണെന്ന്‌ കമ്മീഷന് നഗരസഭ മറുപടിയും നല്‍കിയിരുന്നു. എന്നാല്‍ തുടര്‍ന്ന് പ്രവൃത്തികളൊന്നും നടക്കാത്തതിനാലാണ് പൗരസമിതി വീണ്ടും കമ്മീഷനെ സമീപിച്ചത്. നഗരസഭ സ്വീകരിച്ച നടപടികള്‍ വ്യക്തമാക്കി ഒരു മാസത്തിനകം കമ്മീഷന്‍ മുമ്പാകെ ആക്‌ഷന്‍ ടേക്കണ്‍ റിപ്പോര്‍ട്ട് ഫയല്‍ ചെയ്യണമെന്നാണ് മനുഷ്യാവകാശ കമ്മീഷന്‍ ഉത്തരവിട്ടിരിക്കുന്നത്.

കൊടുങ്കാറ്റിൽ പിടിച്ചുനിൽക്കാനാവാതെ തേക്കുമരങ്ങൾ

കോട്ടയം: ജില്ലയില്‍ കഴിഞ്ഞദിവസങ്ങളിൽ ആഞ്ഞുവീശിയ കൊടുങ്കാറ്റിൽ കടപുഴകിയതേറെയും തേക്കുമരങ്ങൾ. പ്ലാവ്, മാവ്, റബര്‍ എന്നിവയെ തെല്ലും തൊടാതെ നൂറു കണക്കിന് കൂറ്റന്‍ തേക്കുമരങ്ങളാണ് നിലംപൊത്തിയത്. ചിലയിടങ്ങളില്‍ തേക്ക് നടുവെ കീറി ഒടിയുകയും ചെയ്യുന്നു. നിലംപൊത്തിയ തേക്കുകള്‍ പിടിയാവിലയ്ക്ക് വില്‍ക്കാന്‍ കര്‍ഷകര്‍ നിര്‍ബന്ധിതരാകുന്നു. തേക്കുകള്‍ മാത്രം വീഴുകയോ ഒടിയുകയോ ചെയ്യുന്നതില്‍ പല കാരണങ്ങളാണ് പീച്ചി വനഗവേഷണകേന്ദ്രത്തിലെ വിദഗ്ധര്‍ ചൂണ്ടിക്കാട്ടുന്നത്. മൂന്നു മാസമായി പെയ്യുന്ന പെരുമഴയില്‍ മണ്ണ് നന്നായി കുതിര്‍ന്നതും തേക്കുമരങ്ങളില്‍ ഇലഭാരം കൂടിയതും പ്രധാന കാരണമായതായി ഗവേഷണകേന്ദ്രത്തിലെ ഡോ. പി. സുജനപാല്‍ പറഞ്ഞു. ചുഴലിക്കാറ്റില്‍ മരത്തിന്‍റെ ഭാരം താങ്ങാന്‍ മണ്ണിനാകുന്നില്ല. ജില്ലയിടുനീളം തേക്കുകള്‍ വേരോടെ പിഴുതു മറിയുകയായിരുന്നു. ഉറവച്ചാലുകളിലും തോട്, പുഴ എന്നിവയ്ക്കുസമീപവും നില്‍ക്കുന്നവയും അപകടഭീഷണിയിലാണ്. പഴയ കാലത്തുണ്ടായിരുന്ന കല്ലന്‍ തേക്കുകളെക്കാള്‍ പുഴുശല്യം പുതിയ ഇനങ്ങളില്‍ പതിവാണ്. പുഴു കുത്തിയ ഭാഗം ചീകി ബോര്‍ഡോ മിശ്രിതം തേയ്ക്കണം. വേഗം വളരുന്ന ഇനം തേക്കിന്‍ കമ്പുകളും തൈകളും നടുമ്പോള്‍ വേണ്ടത്ര വേരിന് ആഴമുണ്ടാവില്ല. ഇവയ്ക്ക് വേരുകെട്ടല്ലാതെ തായ്‌വേര് ഉണ്ടാകുകയില്ല. മൂന്നു വര്‍ഷം വരെ പുഴു തായ്ത്തടി കുത്തി മരം കേടുവന്നു ദുര്‍ബലമാകാന്‍ സാധ്യതയുണ്ട്. പുഴു കുത്തിയ തേക്ക് വട്ടം ഒടിയുക സ്വാഭാവികം. ചാണകത്തിനും ജൈവവളത്തിനും പകരം രാസവളപ്രയോഗം നടത്തി തോട്ടമായി തേക്ക് വളര്‍ത്തുന്നവരുണ്ട്. വീട്, തൊഴുത്ത് എന്നിവയോടു ചേര്‍ന്ന കുപ്പവളത്തില്‍ തേക്കുകള്‍ക്ക് അതിവേഗ വളര്‍ച്ചയുണ്ടാകും. മഴക്കാലത്തിനു മുന്‍പ് ശിഖരങ്ങള്‍ കോതി ഭാരം കുറച്ചാല്‍ കാറ്റിനെ പ്രതിരോധിക്കാം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]