ADVERTISEMENT

ADVERTISEMENT

മറ്റത്തൂര്‍ സെന്‍റ്് ജോസഫ്‌സ് സ്‌കൂളില്‍ മെറിറ്റ് ഡേ ആഘോഷിച്ചു

മറ്റത്തൂര്‍: സെന്‍റ്് ജോസഫ്‌സ് യുപി സ്‌കൂളില്‍ മെറിറ്റ് ഡേ ആഘോഷവും പിടിഎ പൊതുയോഗവും സംഘടിപ്പിച്ചു. സ്‌കൂള്‍ മാനേജര്‍ ഫാ. തോമസ് വെളക്കനാടന്‍ ഉദ്ഘാടനം ചെയ്തു. റിന്‍സി ജോബ് അധ്യക്ഷത വഹിച്ചു.

എസ്എസ്എല്‍സി പരീക്ഷയില്‍ ഫുള്‍ എ പ്ലസ് നേടിയ പൂര്‍വവിദ്യാര്‍ഥികളെയും യുഎസ് എസ്, എല്‍എസ്എസ് പരീക്ഷ ജേതാക്കളെയും അനുമോദിച്ചു.

പഞ്ചായത്തംഗം എം.എസ്. സുമേഷ്, ഫാ. ജെയ്‌സണ്‍ ചൊവ്വല്ലൂര്‍, ഒഎസ്എ പ്രസിഡന്‍റ്് ബെന്നി തൊണ്ടുങ്ങല്‍, വിദ്യാലയ മാനേജ്‌മെന്‍റ് കമ്മിറ്റി അംഗങ്ങളായ ജസ്റ്റിന്‍ മങ്കുഴി, ലിനോ മൈക്കിള്‍, പ്രധാനാധ്യാപിക ടിസി പി. ആന്‍റണി, ട്രസ്റ്റി തോമസ് വള്ളിയാംതടത്തില്‍, ഉണ്ണിമേരി തോമസ്, തെരേസ് ജോസ്, റിയ തോമസ് എന്നിവര്‍ പ്രസംഗിച്ചു. ‌രക്ഷിതാക്കള്‍ക്കു ഫലവൃക്ഷത്തൈകള്‍ വിതരണം ചെയ്തു.

ADVERTISEMENT

രോഗങ്ങൾക്കുമുന്നിൽ ഒരാൾപോലും നിസഹായനാകില്ല: മന്ത്രി വീണാ ജോർജ്

മാള: വിവിധങ്ങളായ രോഗങ്ങൾക്കുമുമ്പിൽ ഒരാൾപോലും നിസഹായനായി നിൽക്കേണ്ട അവസ്ഥ കേരളത്തിൽ ഇനി ഉണ്ടാകില്ലെന്ന് ആരോഗ്യമന്ത്രി വീണ ജോർജ്. മാള സാമൂഹ്യ‌ആരോഗ്യകേന്ദ്രത്തെ ബ്ലോക്ക് കുടുംബാരോഗ്യകേന്ദ്രമായി ഉയർത്തുന്നചടങ്ങ് നിർവഹിച്ചു സംസാരിക്കുകയായിരുന്നു മന്ത്രി. ഇതോടൊപ്പം പേരൂർക്കാട് ജനകീയ ആരോഗ്യകേന്ദ്രത്തിന്‍റെ ഉദ്ഘാടനവും മന്ത്രി നിർവഹിച്ചു. ചികിത്സാചെലവുകൾ കുറയ്ക്കുന്ന കാര്യത്തിൽ കേരളം ഏറെ വിജയിച്ചുവെന്ന് മന്ത്രി കൂട്ടിച്ചേർത്തു. വി.ആർ. സുനിൽകുമാർ എം എൽ എ അധ്യക്ഷത വഹിച്ചു. ആരോഗ്യകേരളം ഡയറക്ടർ ഡോ. കെ.ജെ. റീന, ഡിഎംഒ ഡോ. ടി.പി. ശ്രീദേവി, ഡോ. സജീവ്‌കുമാർ, ബ്ലോക്ക് പ്രസിഡന്‍റ് രേഖ ഷാന്‍റി, വിവിധ പഞ്ചായത്ത് പ്രസിഡന്‍റുമാരായ ബിന്ദു ബാബു, കെ.ആർ. ജോജോ, പി.വി. വിനോദ്. ആശുപത്രി സൂപ്രണ്ട് ഡോ. ആശ സേവ്യർ എന്നിവർ പ്രസംഗിച്ചു.

എംഎൽഎയുടെ ഇടപെടൽ; നാഷണൽ ഹൈവയിൽ അണ്ടർപാസിനു സാധ്യതയേറുന്നു

കയ്പമംഗലം: എംഎൽഎയുടെ ഇടപെടൽ; നാഷണൽ ഹൈവയിലെ അണ്ടർപാസിനു സാധ്യതയേറുന്നു. ശ്രീനാരായണപുരം ഗ്രാമപഞ്ചായത്തിലെ സാഹിബിന്‍റെ പള്ളിനടയിൽ നാഷണൽ ഹൈവയുടെ നിർമാണവുമായി ബന്ധപ്പെട്ട് പൊതുജനങ്ങൾക്കുനേരിടേണ്ടിവരുന്ന യാത്രാ ക്ലേശവും വിദ്യാലയത്തിലേക്കും പൊതു‌സ്ഥാപനങ്ങളിലേക്കും പൊതുജനങ്ങൾക്ക് എത്തിപ്പെടാൻ നേരിടുന്ന പ്രയാസങ്ങളെ ചൂണ്ടിക്കാട്ടി ഇ.ടി. ടൈസൺ എം എൽഎക്ക് ഗ്രാമപഞ്ചായത്തിന്‍റെ നേതൃത്വത്തിൽ ഭീമഹർജി നൽകിയതിന്‍റെ അടിസ്ഥാനത്തിലാണ് അണ്ടർപാസ് അനുവദിക്കുവാൻ സാധിക്കുമോ എന്ന ആലോചനയിലേക്ക് സർക്കാർ എത്തിയത്. കഴിഞ്ഞദിവസം മുഖ്യമന്ത്രി ജില്ലയിലെ എംഎൽഎമാരുടെ യോഗം വിളിച്ചുചേർത്തപ്പോഴും ഇ.ടി. ടൈസൺ എംഎൽഎ മുഖ്യമന്ത്രിയുടെ ശ്രദ്ധയിലും ഈ വിഷയം പെടുത്തിയിരുന്നു. ജനപ്രതിനിധികൾ, വിദ്യാർഥികൾ, കുടുംബശ്രീ പ്രവർത്തകർ, വ്യാപാരികൾ പൊതുപ്രവർത്തകർ അങ്ങനെ നിരവധിപേർ ആവശ്യപ്പെട്ടതനുസരിച്ച് നിരന്തരമായി ജില്ലാ വികസന‌സമിതി യോഗങ്ങളിലും എംഎൽഎ ഇക്കാര്യം ആവശ്യപ്പെട്ടിരുന്നു. അതുകൊണ്ടുതന്നെ ഇതിന്‍റെ ആവശ്യകത ഗൗരവപൂർവം പരിഗണിക്കുമെന്നും നാഷണൽ ഹൈവേ അഥോറിറ്റിയുമായും ശിവാലയ കമ്പനിയുമായും കൂടിയാലോചിച്ച് അനുഭാവപൂർവമായ നടപടി സ്വീകരിക്കുമെന്നും ജില്ലാ കളക്ടർ അർജുൻ പാണ്ഡ്യ പറഞ്ഞു. ഇ.ടി. ടൈസൺ എംഎൽഎ, ഗ്രാമപഞ്ചായത്ത് പ്രസിഡന്‍റ് എം. എസ്. മോഹനൻ, ഗ്രാമപഞ്ചായത്ത് വൈസ് പ്രസിഡന്‍റ്് സജിത പ്രദീപ്, സ്റ്റാൻഡിംഗ് കമ്മിറ്റി ചെയർമാൻമാരായ കെ.എ. അയ്യൂബ്, പി.എ. നൗഷാദ്, ജില്ലാ പഞ്ചായത്ത് മെമ്പർ സുഗത ശശിധരൻ, വാർഡ് മെമ്പർമാരായ ഇബ്രാഹിംകുട്ടി, ജയ സുനിൽരാജ്, ഡെപ്യൂട്ടി കളക്ടർ ജി.കെ.പ്രദീപ് , എൽഎ‌എൻഎച്ച് ഡെപ്യൂട്ടി കളക്ടർ കെ. രേവ, കൊടുങ്ങല്ലൂർ തഹസിൽദാർഎം. ശ്രീനിവാസ്, ഡെപ്യൂട്ടി തഹസിൽദാർ കെ.എം. റസിയ, വില്ലേജ് ഓഫീസർ എ.കെ. അബ്ദുൽഖാദർ, എൻഎച്ച് ലെയ്സൺ ഓഫീസർ കെ.ബി. ബാബു തുടങ്ങിയവർ കളക്ടറോടൊപ്പം ഉണ്ടായിരുന്നു.

രോഗനിർമാർജനവും പ്രതിരോധവും സർക്കാരിന്‍റെ പ്രഖ്യാപിതലക്ഷ്യം: മന്ത്രി

കൊരട്ടി: രോഗപ്രതിരോധവും രോഗനിർമാർജനവും സർക്കാരിന്‍റെ പ്രഖ്യാപിത ലക്ഷ്യങ്ങളാണെന്നും അടിസ്ഥാന സൗകര്യവികസനങ്ങൾ അടക്കം ആരോഗ്യമേഖലയിൽ ഫലപ്രദമായി ഇടപെടാൻ സർക്കാരിനു കഴിഞ്ഞതായും ആരോഗ്യമന്ത്രി വീണാ ജോർജ്. ഗോത്രമേഖലയിൽ മരണനിരക്ക് കുറയ്ക്കാൻ കഴിഞ്ഞതും കേരളത്തിൽ ഹൃദയാഘാതം‌മൂലം മരിക്കുന്നവരുടെ എ ണ്ണം 30 ശതമാനത്തിൽനിന്നും നാലു ശതമാനമാക്കി കുറയ്ക്കാൻ കഴിഞ്ഞതും ആരോഗ്യരംഗത്തെ സർക്കാരിന്‍റെ കാര്യക്ഷമമായ ഇടപെടൽ മൂലമാണെന്നും മന്ത്രി പറഞ്ഞു. തിരുമുടിക്കുന്ന് ഗാന്ധിഗ്രാം ത്വക് രോഗാശുപത്രിയിൽ 17 കോടി നബാഡ് ഫണ്ട് വിനിയോഗിച്ച് നിർമിച്ച പുതിയ ഐപി കെട്ടിടത്തിന്‍റെയും 2.5 കോടി എൻഎച്ച്എം ഫണ്ട് ഉപയോഗപ്പെടുത്തി നിർമിച്ച റീജിയണൽ ട്രെയിനിംഗ് സെന്‍റർ ഹോസ്റ്റലിന്‍റെയും ഉദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. മെഡിക്കൽ കോളജുകളിലും റീജിയണൽ കാൻസർ സെന്‍ററുകളിലും മാത്രമാണ് കാൻസർ ചികിത്സ നടത്തിയിരുന്നതെങ്കിൽ ഇന്ന് ജില്ലാ ആശുപത്രികളിലേക്ക് ചികിത്സ വികേന്ദ്രീകരിക്കാനായെന്നും ആർദ്രമിഷൻ നടപ്പിലാക്കിയതുവഴി ഏറ്റവും കൂടുതൽ തസ്തികകൾ ആരോഗ്യ മേഖലയിൽ സൃഷ്ടിക്കാനായെന്നും മന്ത്രി കൂട്ടിച്ചേർത്തു. കാലപ്പഴക്കം‌കൊണ്ട് ജീർണാവസ്ഥയിലായ, ചോർന്നൊലിക്കുന്ന കെട്ടിടങ്ങളിലായിരുന്നു 65 പുരുഷന്മാരും 23 വനിതകളും അടക്കം 88 അന്തേവാസികൾ കഴിഞ്ഞുവന്നിരുന്നത്. ഡോക്ടർമാർക്കുള്ള പരിശോധന മുറി, നഴ്സിംഗ് സ്റ്റേഷൻ, മിനി ഓപ്പറേഷൻ തിയേറ്റർ, ലാബ്, കോൺഫറൻസ് ഹാൾ, കിച്ചൺ, ഡൈനിംഗ് അടക്കം ആധുനിക ക്രമീകരണങ്ങളാണ് രണ്ടു ബ്ലോക്കുകളിലായി നിർമിച്ച ഐപി വിഭാഗത്തിൽ ഒരുക്കിയിരിക്കുന്നത്. റീജണൽ ട്രെയിനിംഗ് സെന്‍റർ ഹോസ്റ്റലിന്‍റെ ഉദ്ഘാടനവും നടന്നു. സനീഷ്‌കുമാർ ജോസഫ് എം എൽഎ അധ്യക്ഷനായി. ബ്ലോക്ക് പഞ്ചായത്ത് പ്രസിഡന്‍റ്് വേണു കണ്ടരുമഠത്തിൽ, ഗ്രാമപഞ്ചായത്ത് പ്രസിഡന്‍റ് പി.സി. ബിജു, ജില്ലാ മെഡിക്കൽ ഓഫീസർ ടി.പി. ശ്രീദേവി, ആരോഗ്യഡയറക്ടർ കെ.ജെ.റീന, അനിതകുമാരി, വാർഡ് മെമ്പർ ലിജോ ജോസ്, എൻഎച്ച്എം ജില്ലാ പ്രോഗ്രാം ഓഫീസർ പി. സജീവ്കുമാർ, വി. അജിത്കുമാർ, ആശുപത്രി സൂപ്രണ്ട് കെ. സ്നേഹജ എന്നിവർ പ്രസംഗിച്ചു.

കന്യാസ്ത്രീകളുടെ അറസ്റ്റ്: പ്രതിഷേധാഗ്നി പടരുന്നു

പുത്തൻവേലിക്കരയിൽ പ്രതിഷേധമിരന്പി പുത്തൻവേലിക്കര: ഛത്തീസ്ഗഡിൽ സിസ്റ്റേഴ്സിനെതിരേ നടക്കുന്ന കള്ളപ്രചാരണങ്ങൾക്കും അറസ്റ്റിനും എതിരേ പുത്തൻവേലിക്കരയിലെയും സമീപപ്രദേശങ്ങളിലെയും പള്ളികളിൽ നിന്നുള്ള വിശ്വാസികൾ അണിനിരന്നുകൊണ്ട് വൻ പ്രതിഷേധ റാലിയും പൊതുസമ്മേളനവും നടന്നു. സ്റ്റേഷൻ കടവുഭാഗത്തുനിന്നും ആരംഭിച്ച് പുത്തൻവേലിക്കര ബസാറിൽ പൊതുസമ്മേളനത്തോടുകൂടി പ്രതിഷേധപരിപാടി സമാപിച്ചു. സ്റ്റേഷൻ കടവിൽനിന്നും ആരംഭിച്ച പ്രതിഷേധ‌റാലി കോട്ടപ്പുറം രൂപത വികാരി ജനറാൾ മോൺ. റോക്കി റോബി കളത്തിൽ ഫ്ലാഗ് ഓഫ് ചെയ്തു. കോട്ടപ്പുറം രൂപതയിലെയും ഇരിങ്ങാലക്കുട രൂപതയിലെയും പുത്തൻവേലിക്കര മേഖലയിലുള്ള എല്ലാ പള്ളികളും ഒരുമിച്ചായിരുന്നു പ്രതിഷേധ സംഗമത്തി ൽ പങ്കെടുത്തത്. പൊതുസമ്മേളനം ഇരിങ്ങാലക്കുട രൂപത വികാരി ജനറാൾ ഫാ. ജോളി വടക്കൻ ഉദ്ഘാടനം ചെയ്തു. ഡിവൈൻ വോയ് സ് ചീഫ് എഡിറ്റർ പി.ജെ. ആന്‍റണി മുഖ്യപ്രഭാഷണം നടത്തി. മാനാഞ്ചേരിക്കുന്ന് സെന്‍റ്് പോൾസ് പള്ളി വികാരി ഫാ. ഷാജു കുരിശിങ്കൽ അധ്യക്ഷത വഹിച്ചു. കീഴൂപ്പാടം പള്ളി വികാരി ഫാ. ജോസഫ് ഒളാട്ടുപുറം,തിരുത്തിപ്പുറം പള്ളി വികാരി ഫാ. ജോയ് സ്രാമ്പിക്കൽ, കുരിശിങ്കൽ പള്ളി വികാരി ഫാ. ബിജു തേങ്ങാപ്പുരക്കൽ, കരോട്ടുകര പള്ളി വികാരി ഫാ. സുഭീഷ് വട്ടപ്പറമ്പിൽ, ജപമാല പള്ളി വികാരി ഫാ. ജോജോ പയ്യപ്പിള്ളി, മാളവന സെന്‍റ്് ജോർജ് പള്ളി വികാരി ഫാ. ജെയിംസ് അതിയുന്തൻ, തിരുത്തൂർ പള്ളി വികാരി ഫാ.ജോഷി മുട്ടിക്കൽ, പുത്തൻവേലിക്കര ഉണ്ണിമിശിഹാ പള്ളി വികാരി ഫാ. കോളിൻ ആട്ടോക്കാരൻ, മടത്തുംപടി ചാരിറ്റി കോൺവന്‍റ്് മദർ സുപ്പീരിയർ സിസ്റ്റർ റോസ് തെരേസ, മേരിവാർഡ് ഇംഗ്ലീഷ് മീഡിയം സ്കൂൾ പ്രിൻസിപ്പൽ സിസ്റ്റർ വിദ്യ, ഉണ്ണിമിശിഹാ പള്ളി കേന്ദ്രസമിതി പ്രസിഡന്‍റ് അബ്രഹാം കണ്ണങ്ങനാട്ടിൽ, കൈക്കാരന്മാർ തുടങ്ങിയവർ പ്രസംഗിച്ചു.

അമലയുടെ ആധുനിക ഗാസ്ട്രോ സെന്‍റർ ഇന്ന് ആരംഭിക്കും

തൃശൂർ: ഉദരരോഗികളുടെ സൗകര്യാർഥം കൂടുതൽ ആധുനികസൗകര്യങ്ങളോടെ അമലയുടെ ഗാസ്ട്രോ സെന്‍റർ പട്ടിക്കാട് ചെന്പൂത്ര പി.എം. ആർക്കേഡിൽ ഇന്നു മുതൽ പ്രവർത്തനം ആരംഭിക്കും. രാവിലെ 9 .30 ന് മന്ത്രി കെ. രാജൻ ഉദ്ഘാടനം ചെയ്യും. ചടങ്ങിൽ ദേവമാതാ വികാർ പ്രൊവിൻഷ്യൽ ഫാ. ഡേവി കാവുങ്കൽ, തൃശൂർ തഹസിൽദാർ ടി. ജയശ്രീ, പാണഞ്ചേരി പഞ്ചായത്ത് പ്രസിഡന്‍റ് പി.പി. രവീന്ദ്രൻ, അമല ഡയറക്ടർ ഫാ. ജൂലിയസ് അറയ്ക്കൽ എന്നിവർ പങ്കെടുക്കും. ഗാസ്ട്രോ എന്‍ററോളജി, ഗാസ്ട്രോ ഇന്‍റസ്റ്റൈനൽ സർജറി ഡോക്ടർമാർ നയിക്കുന്ന ദിവസേനയുള്ള ഒപി, എൻഡോസ്കോപ്പി, കൊളനോസ്കോപ്പി തുടങ്ങിയ രോഗനിർണയസംവിധാനങ്ങളും ഒപ്പം ലാബ്, ഫാർമസി സൗകര്യങ്ങളും സെന്‍ററിൽ ലഭ്യമാണ്. കൂടാതെ മറ്റ് സൂപ്പർസ്പെഷാലിറ്റി വിഭാഗങ്ങളും അൾട്രാസൗണ്ട് സ്കാനിംഗും വൈകാതെതന്നെ സെന്‍ററിൽ ലഭ്യമാകും. ഉദ്ഘാടനത്തിന്‍റെ ഭാഗമായി നാളെ രാവിലെ ഒന്പതുമുതൽ ഇഎൻടി, ത്വക് രോഗം, നേത്രരോഗം, ഗ്യാസ്ട്രോ എന്‍ററോളജി, ജനറൽ സർജറി വിഭാഗങ്ങളെ പങ്കെടുപ്പിച്ചുകൊണ്ട് മെഗാ മെഡിക്കൽ ക്യാന്പും നടക്കും. ക്യാന്പിൽ പങ്കെടുക്കുന്നവർക്കു സൗജന്യ പരിശോധനയും മരുന്നുകളും ലഭ്യമാണ്. ബുക്കിംഗിന് ഫോണ്‍: 9188912579.

കരുണാകരന്‍റെ സമൃതിമണ്ഡപത്തിൽ രാജീവ് ചന്ദ്രശേഖറിന്‍റെ പുഷ്പാർച്ചന

പൂങ്കുന്നം: മുൻമുഖ്യമന്ത്രി കെ.കരുണാകരന്‍റെ സ്മൃതിമണ്ഡപത്തിൽ ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ പുഷ്പാർച്ചന നടത്തി. കരുണാകരന്‍റെ മകൾ പദ്മജ വേണുഗോപാൽ, ബിജെപി നേതാവ് ശോഭ സുരേന്ദ്രൻ എന്നിവരും രാജീവിനൊപ്പമുണ്ടായിരുന്നു. തൃശൂർ കോർപറേഷൻ ഡിവിഷനുകളിലെ വിവിധ രാഷ്ട്രീയപാർട്ടികളിൽനിന്നു രാജിവച്ച നൂറുപേർ ബിജെപിയിൽ അംഗത്വമെടുക്കുന്ന ചടങ്ങും രാജീവ് ചന്ദ്രശേഖർ ഉദ്ഘാടനം ചെയ്തു. തൃശൂർ കോർപറേഷൻ ഭരണം ഇത്തവണ ബിജെപി പിടിച്ചെടുക്കുമെന്നു പദ്മജ വേണുഗോപാൽ പറഞ്ഞു. മനസമാധാനത്തിനുവേണ്ടിയാണ് താൻ ബിജെപിയിൽ ചേർന്നതെന്നും അവർ കൂട്ടിച്ചേർത്തു.

ആരോഗ്യമേഖലയിൽ സമഗ്രമാറ്റങ്ങൾ കൊണ്ടുവന്നു: മന്ത്രി വീണാ ജോർജ്

തൃശൂർ: ആരോഗ്യമേഖലയിൽ അടിസ്ഥാനസൗകര്യ വികസനം നടപ്പാക്കാൻ സംസ്ഥാനസർക്കാരിനു കഴിഞ്ഞെന്നു മന്ത്രി വീണാ ജോർജ്. തൃശൂർ മെഡിക്കൽ കോളജിൽ 23.45 കോടിയുടെ എട്ടു പദ്ധതികളുടെയും മൂന്നു പദ്ധതികളുടെ നിർമാണത്തിന്‍റെയും ഉദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. എല്ലാവർക്കും ആരോഗ്യപരിരക്ഷ നടപ്പാക്കുകയാണ് സർക്കാരിന്‍റെ അടുത്ത ലക്ഷ്യം. തൃശൂർ മെഡിക്കൽ കോളജിൽ 680 കോടിയുടെ വികസന പ്രവർത്തനങ്ങൾ നടപ്പാക്കി. സൂപ്പർ സ്പെഷാലിറ്റി ബ്ലോക്കും അമ്മയും കുഞ്ഞും ബ്ലോക്കും യാഥാർഥ്യമാകുന്പോൾ മെഡിക്കൽ കോളജ് പത്തുലക്ഷം ചതുരശ്രയടി വിസ്തീർണമുള്ളതാകും. അട്ടപ്പാടിയിലെ ശിശുമരണനിരക്ക് കുറയ്ക്കാൻ തൃശൂർ മെഡിക്കൽ കോളജ് വഹിച്ച പങ്ക് വലുതാണെന്നും മന്ത്രി പറഞ്ഞു. മെഡിക്കൽ അക്കാദമിക് രംഗത്തു വലിയ മാറ്റം കൊണ്ടുവരാൻ സർക്കാരിനു കഴിഞ്ഞു. ഒപി രജിസ്ട്രേഷൻ കണക്കനുസരിച്ചു 13.5 കോടി ആളുകൾ മെഡിക്കൽ കോളജിൽ ചികിത്സതേടി. ഇൻ പേഷ്യന്‍റ് വിഭാഗത്തിൽ 2024 ജനുവരി മുതൽ ഡിസംബർവരെ സൗജന്യ ചികിത്സയ്ക്ക് 6.5 ലക്ഷം ആളുകൾ അപേക്ഷിച്ചു. സ്റ്റേറ്റ് ഹെൽത്ത് ഏജൻസി നിലവിൽ വന്ന ശേഷം 30,000 രൂപയുടെ ഇൻഷ്വറൻസ് അഞ്ചുലക്ഷമാക്കിയെന്നും മന്ത്രി പറഞ്ഞു. മെഡിക്കൽ കോളജ് അലുമ്നി ഓഡിറ്റോറിയത്തിൽ നടന്ന ചടങ്ങിൽ സേവ്യർ ചിറ്റിലപ്പിള്ളി എംഎൽഎ, ആരോഗ്യവിദ്യാഭ്യാസ വകുപ്പ് ഡയറക്ടർ ഇൻചാർജ് ഡോ. കെ.വി. വിശ്വനാഥൻ, വടക്കാഞ്ചേരി നഗരസഭ ചെയർമാൻ പി.എൻ. സുരേന്ദ്രൻ, പുഴയ്ക്കൽ ബ്ലോക്ക് പഞ്ചായത്ത് പ്രസിഡന്‍റ് ലീല രാമകൃഷ്ണൻ, അവണൂർ ഗ്രാമപഞ്ചായത്ത് പ്രസിഡന്‍റ് തങ്കമ്മ ശങ്കുണ്ണി, പുഴയ്ക്കൽ ബ്ലോക്ക് പഞ്ചായത്തംഗം പി.വി. ബിജു, വടക്കാഞ്ചേരി നഗരസഭാ കൗണ്‍സിലർ കെ.കെ. ശൈലജ, ആരോഗ്യവകുപ്പ് ഡയറക്ടർ ഡോ. കെ.ജെ. റീന, തൃശൂർ ഗവ. ഡെന്‍റൽ കോളജ് പ്രിൻസിപ്പൽ ഡോ. പി.എം. ഷമീന, ഗവ. നഴ്സിംഗ് കോളജ് പ്രിൻസിപ്പൽ റീന എ. തങ്കരാജ്, ജില്ലാ മെഡിക്കൽ ഓഫീസർ ഡോ. ടി.പി. ശ്രീദേവി, മെഡിക്കൽ കോളജ് വൈസ് പ്രിൻസിപ്പൽ ഡോ. കെ.ബി. സനൽകുമാർ, ഗവ. മെഡിക്കൽ കോളജ് ആശുപത്രി സൂപ്രണ്ട് ഇൻ ചാർജ് ഡോ. എം. രാധിക എന്നിവർ പങ്കെടുത്തു.

ശക്തൻ സ്റ്റാൻഡിൽ സംഘർഷമൊഴിയുന്നില്ല

തൃശൂർ: പാർക്കിംഗ് ഫീസ് വർധനയുടെ പേരിൽ ശക്തൻ സ്റ്റാൻഡിൽ സംഘർഷം തുടരുന്നു. നാലു ബസുകൾ പിടിച്ചെടുത്തെന്നു ബസുടമകൾ ആരോപിക്കുകയും ഇന്നു മുതൽ ശക്തൻ സ്റ്റാൻഡിൽനിന്നു സർവീസ് നടത്തുന്ന ബസുകൾ പണിമുടക്കുമെന്നും ബസുടമകൾ അറിയിച്ചെങ്കിലും പിന്നീടു സമരം വേണ്ടെന്നുവച്ചു. വർധിപ്പിച്ച സ്റ്റാൻഡ് ഫീസ് ഈടാക്കില്ലെന്നു ജില്ലാ ഭരണകൂടം ഉറപ്പുനൽകിയതിനെതുടർന്നാണ് സമരം മാറ്റിവച്ചതെന്നു ബസുടമകൾ അറിയിച്ചു. 25 രൂപയായിരുന്ന പാർക്കിംഗ് ഫീസ് 40 രൂപയാക്കി വർധിപ്പിച്ചതുമായി ബന്ധപ്പെട്ട പ്രശ്നങ്ങളാണു പരിഹാരമില്ലാതെ നീളുന്നത്. ബസുടമ - തൊഴിലാളി സംയുക്തസമിതിയാണ് പണിമുടക്ക് തീരുമാനിച്ചിരുന്നത്. ഇന്നലെ രാവിലെ പത്തോടെയാണ് കോർപറേഷൻ അധികൃതരും പോലീസിന്‍റെ സഹായത്തോടെ എത്തി ബസുകളിൽ നോട്ടീസ് പതിച്ചത്. കരാറുകാരനും ഒപ്പമുണ്ടായിരുന്നു. നാലു ബസുകളിൽ നോട്ടീസ് പതിച്ചെന്നു ബസുടമ കോ-ഓർഡിനേഷൻ കമ്മിറ്റി വൈസ് പ്രസിഡന്‍റ് കെ.ബി. സുരേഷ് പറഞ്ഞു. ഗുണ്ടായിസമാണു കോർപറേഷന്‍റെ ഭാഗത്തുനിന്ന് ഉണ്ടാകുന്നത്. തൃശൂർ കോർപറേഷൻ കൗണ്‍സിലിന്‍റെ 2024 ഡിസംബർ 28-ലെ 78-ാം നന്പർ തീരുമാനപ്രകാരം അംഗീകരിച്ച 2025 ഏപ്രിൽ ഒന്നുമുതലുള്ള പുതുക്കിയ നിരക്കിലുള്ള ബസ് സ്റ്റാൻഡ് ഫീസ് അടയ്ക്കുന്നതിൽ വീഴ്ച വരുത്തിയിട്ടുള്ളതിനാൽ വാഹനം കേരള മുനിസിപ്പൽ ആക്ട് 474 പ്രകാരം കോർപറേഷൻ ഏറ്റെടുത്തിരിക്കുന്നു എന്നാണ് നോട്ടീസിൽ. ഇന്നലെ രാവിലെ കോർപറേഷൻ റവന്യൂ ഉദ്യോഗസ്ഥർ, മോട്ടോർ വാഹനവകുപ്പ്, പോലീസ് ഉദ്യോഗസ്ഥർ, കരാറുകാർ എന്നിവർ ഏപ്രിൽ ഒന്നുമുതലുള്ള കുടിശിക നൽകണമെന്ന് ആവശ്യപ്പെട്ടു ബസുകൾ പിടിച്ചെടുക്കാൻ ശ്രമിച്ചു. ബസുടമകളും തൊഴിലാളികളും എതിർക്കുകയും മിന്നൽപണിമുടക്കിലേക്കു കടക്കുകയും ചെയ്തതോടെ ഇവർ മടങ്ങി. ഉദ്യോഗസ്ഥർ മടങ്ങിയതിനുശേഷമാണു സർവീസ് സാധാരണ നിലയിലേക്കു മടങ്ങിയത്. ഇത്തരം നടപടികൾ ആവർത്തിച്ചാൽ ശക്തൻ സ്റ്റാൻഡിൽനിന്നുള്ള എല്ലാ സർവീസുകളും നിർത്തിവച്ചു പ്രതിഷേധിക്കുമെന്നും ബസുടമകൾ അറിയിച്ചിരുന്നു. കഴിഞ്ഞദിവസം കളക്ടറുമായി ചർച്ച നടത്തുമെന്ന് അറിയിച്ചിരുന്നെങ്കിലും നടന്നില്ല. കോർപറേഷനോടു റിപ്പോർട്ട് നൽകാൻ ജില്ലാ കളക്ടർ ആവശ്യപ്പെട്ടിട്ടുണ്ട്.

ഐടിയു ബാങ്ക് വളരെ സുരക്ഷിതം: പ്രസിഡന്‍റ് എം.പി. ജാക്‌സണ്‍

ഇരിങ്ങാലക്കുട: ഇരിങ്ങാലക്കുട ടൗണ്‍ സഹകരണ ബാങ്ക് (ഐടിയു ബാങ്ക്) സുരക്ഷിതമാണെന്നും നിക്ഷേപകരുടെ താത്പര്യം സംരക്ഷിക്കാനുള്ള നടപടിയാണ് ആര്‍ബിഐ സ്വീകരിച്ചിട്ടുള്ളതെന്നും ക്രമക്കേട് നടന്നതായി പറഞ്ഞിട്ടില്ലെന്നും ബാങ്ക് പ്രസിഡന്‍റ് എം.പി. ജാക്‌സണ്‍ പത്രസമ്മേളനത്തില്‍ പറഞ്ഞു. ജനവിശ്വാസം ആര്‍ജിച്ച് ഇരിങ്ങാലക്കുടയ്ക്ക് ഏറെ അഭിമാനമായി മാറിയ ബാങ്കാണിത്. 1300 കോടിയിലേറെ നിക്ഷേപവുമായി കേരളത്തിലെ ഏറ്റവും കൂടുതല്‍ നിക്ഷേപമുള്ള അര്‍ബന്‍ ബാങ്കായി മാറിയതു ജനങ്ങളുടെ വിശ്വാസം ഒന്നുകൊണ്ടുമാത്രമാണ്. ടയര്‍ ത്രീ വിഭാഗത്തില്‍ ഉള്‍പ്പെടുന്ന ബാങ്കിന് ആര്‍ബിഐ പല മാനദണ്ഡങ്ങളും എര്‍പ്പെടുത്തിയിട്ടുണ്ട്. എന്നാല്‍ ജിഎസ്ടി പരിഷ്‌കരണം, പ്രളയം, കോവിഡ് തുടങ്ങിയ പ്രതികൂലസാഹചര്യങ്ങള്‍മൂലം വായ്പാകുടിശിക വര്‍ധിച്ചുവരികയായിരുന്നു. 2022 മുതല്‍ ബാങ്ക് റിക്കവറി നടപടികള്‍ സജീവമായി സ്വീകരിച്ചുവന്നിട്ടുണ്ട്. ജപ്തി പാടില്ലെന്ന സര്‍ക്കാര്‍നിലപാടും ദോഷമായി മാറിയിട്ടുണ്ട്. 46000 -ത്തിലധികം നിക്ഷേപകരില്‍ 41000 പേര്‍ അഞ്ചുലക്ഷത്തില്‍താഴെ നിക്ഷേപമുള്ളവരാണ്. 5000 പേര്‍ മാത്രമാണ് അഞ്ചുലക്ഷത്തിലധികം രൂപ നിക്ഷേപമുള്ളവര്‍. ഇപ്പോഴത്തെ പ്രതിസന്ധി താത്കാലികപ്രതിഭാസംമാത്രമാണ്. കരുവന്നൂര്‍ ബാങ്കുമായി താരതമ്യംചെയ്യുന്നതില്‍ അര്‍ഥമില്ല. ഏരിയ സെക്രട്ടറിയും ജില്ലാ സെക്രട്ടറിയും പണം കൊണ്ടുപോയ കേസാണ് കരുവന്നൂരിലേത്. അമിതപലിശ വാഗ്ദാനം നല്‍കിയല്ല ഈ ബാങ്കില്‍ നിക്ഷേപം സ്വീകരിച്ചിരിക്കുന്നത്. പലിശ കുറഞ്ഞിട്ടും 1300 കോടിയിലധികം രൂപ നിക്ഷേപം ഉണ്ടായത് ജനങ്ങളുടെ വിശ്വാസംകൊണ്ടുമാത്രമാണ്. ജൂലൈ 30 വൈകീട്ട് അഞ്ചുമണിവരെ നിക്ഷേപകരായ ആര്‍ക്കും യാതൊരുവിധം ബുദ്ധിമുട്ടും ഉണ്ടായിട്ടില്ല. ഇടപാടുകാരുടെ എല്ലാ കാര്യങ്ങളും സാധിച്ചുകൊടുത്തിട്ടുണ്ട്. 107 വര്‍ഷത്തെ ചരിത്രമുള്ള ഈ ബാങ്കില്‍ 1987 ല്‍ വൈസ് പ്രസിഡന്‍റായാണ് ഭരണസാരഥ്യത്തിലേക്കു താന്‍ വന്നത്. മൂന്നുവര്‍ഷക്കാലം വൈസ് പ്രസിഡന്‍റായിരുന്നു. പിന്നീട് ചെയര്‍മാനും പ്രസിഡന്‍റുമായി തുടരുകയായിരുന്നു. ഈ കാലയളവില്‍ ബാങ്കിന്‍റെ വളര്‍ച്ച അതിവേഗമായിരുന്നു. ഫണ്ട് തിരിച്ചുകൊണ്ടുവരുന്നതില്‍ മാത്രമാണ് വീഴ്ച സംഭവിച്ചത്. നിലവിലുള്ള വായ്പാകുടിശിക തിരിച്ചുപിടിക്കല്‍ എത്രയും വേഗം പൂര്‍ത്തിയാക്കി ബാങ്കിന്‍റെ നില മെച്ചപ്പെടുത്തിയാല്‍ നിയന്ത്രണങ്ങള്‍ ആര്‍ബിഐ പിന്‍വലിക്കും. ആര്‍ബിഐ മാനദണ്ഡങ്ങള്‍ പാലിക്കുന്നതുവഴി ഇപ്പോഴത്തെ താത്കാലിക നിയന്ത്രണങ്ങള്‍ നീക്കാന്‍ കഴിയും. നിക്ഷേപകരുടെ പണം നഷ്ടപ്പെടില്ല. ബാങ്കിലേക്കു പ്രതിഷേധജാഥകള്‍ നടത്തുന്നതില്‍ തെറ്റുകാണുന്നില്ല. മുദ്രാവാക്യങ്ങള്‍ വിളിക്കുന്ന നേതാക്കള്‍ പലരും ശിപാര്‍ശയുമായി വരുന്നവരാണ്. ബാങ്കിന്‍റെ സാഹചര്യം മുതലെടുത്ത് നഗരസഭാ ഭരണം പിടിക്കാന്‍ എല്‍ഡിഫിനും ബിജെപിക്കും കഴിയില്ലെന്നും കോൺഗ്രസ് മുൻ ജനറൽസെക്രട്ടറി കൂടിയായഎം.പി. ജാക്‌സന്‍ കൂട്ടിച്ചേര്‍ത്തു. ഭരണസമിതി വൈസ് പ്രസിഡന്‍റ് പ്രഫ. ഇ.ജെ. വിന്‍സെന്‍റ്, മാനേജിംഗ് ഡയറക്ടര്‍ എ.എല്‍. ജോണ്‍ എന്നിവരും പത്രസമ്മേളനത്തില്‍ പങ്കെടുത്തു. ഐടിയു ബാങ്കില്‍ റിസര്‍വ് ബാങ്ക് നിയന്ത്രണം ആറുമാസത്തേക്ക് ഇരിങ്ങാലക്കുട: ടൗണ്‍ കോ ഓപ്പറേറ്റീവ് അര്‍ബന്‍ ബാങ്കില്‍ (ഐടിയു ബാങ്ക്) ആറുമാസത്തേക്കാണ് റിസര്‍വ് ബാങ്ക് നിയന്ത്രണങ്ങള്‍ ഏര്‍പ്പെടുത്തിയിട്ടുള്ളത്. നിക്ഷേപകര്‍ക്ക് ഈ ആറുമാസക്കാലയളവില്‍ 10,000 രൂപമാത്രമേ പിന്‍വലിക്കാന്‍ സാധിക്കൂ. ബാങ്ക് എടിഎം, ഓണ്‍ലൈന്‍ ആപ്പ് എന്നിവയുടെ പ്രവര്‍ത്തനം മരവിപ്പിച്ചു. ആര്‍ബിഐയുടെ അനുമതി ഇല്ലാതെ പുതിയ വായ്പ അനുവദിക്കാനും പുതുക്കാനും പുതിയ നിക്ഷേപം സ്വീകരിക്കാനും പണം കടംവാങ്ങാനും സാധിക്കില്ല. ബാങ്കിന്‍റെ സ്വത്തുക്കളും മറ്റ് ആസ്തികളും വില്‍ക്കാനും കൈമാറ്റംചെയ്യാനും പാടില്ല. ബാങ്ക് നിക്ഷേപങ്ങള്‍ക്കുള്ള ഇന്‍ഷ്വറന്‍സ് പരിരക്ഷ പ്രകാരം അപേക്ഷ നല്‍കുന്ന നിക്ഷേപകര്‍ക്ക് (ഒരാള്‍ക്ക് പരമാവധി അഞ്ചു ലക്ഷം രൂപ) 90 ദിവസത്തിനകം അര്‍ഹമായ തുക ലഭിക്കുമെന്ന് ആര്‍ബിഐ അറിയിച്ചിട്ടുണ്ട്. വായ്പാ കുടിശികയിനത്തില്‍ 195 കോടി രൂപയാണ് ബാങ്കിനു ലഭിക്കാനുള്ളത്. 365 കോടി രൂപയുടെ നിഷ്‌ക്രിയ ആസ്തികളുമുണ്ട്. തിരിച്ചടവു മുടങ്ങിയ വായ്പകളിലെ ജാമ്യവസ്തുക്കളുടെ ലേല ഇടപാടുകളില്‍ വന്ന കാലതാമസമാണ് ആര്‍ബിഐയുടെ നിയന്ത്രണങ്ങള്‍ക്ക് ഇടയാക്കിയത്.

ചേലക്കര റെയിൽവേ മേൽപ്പാലം; സ്ഥലമെടുപ്പിനു ഭരണാനുമതി

തൃശൂർ: ചേലക്കര പൈങ്കുളം ഗേറ്റ് റെയിൽവേ മേൽപ്പാലം നിർമാണത്തിനു ഭൂമി ഏറ്റെടുക്കുന്നതിനു 13.33 കോടി രൂപയുടെ ഭരണാനുമതിയായി. ലെവൽ ക്രോസുകളില്ലാത്ത കേരളമെന്ന പൊതുമരാമത്തു വകുപ്പിന്‍റെ ലക്ഷ്യത്തിന്‍റെ ഭാഗമായി മേൽപ്പാലങ്ങൾ നിർമിക്കുന്നതിന്‍റെ ഭാഗമായാണ് ചേലക്കര പൈങ്കുളം ഗേറ്റിൽ സ്ഥലമേറ്റെടുക്കുന്നത്. കേരള റോഡ് ഡെവലപ്മെന്‍റ് കോർപറേഷനാണ് നിർമാണച്ചുമതല. ഷൊർണൂർ, വള്ളത്തോൾനഗർ റെയിൽവേ സ്റ്റേഷനുകൾക്കിടയിലെ ഒന്നാം നന്പർ ലെവൽ ക്രോസാണിത്. ഇവിടെ മേൽപ്പാലം നിർമിക്കുന്നതിന് ഏറ്റെടുക്കേണ്ടിവരുന്ന സ്ഥലത്തിന്‍റെ വിലയ്ക്കൊപ്പം പ്രസ്തുത ഭൂമിയിലെ സ്ഥാവരവസ്തുക്കൾ, മരങ്ങൾ തുടങ്ങിയവയുടെ മൂല്യംകൂടി കണക്കാക്കിയാണ് വിലയും നഷ്ടപരിഹാരവും നിശ്ചയിച്ചിട്ടുള്ളത്. ഇതിനുള്ള ഭരണാനുമതിയാണ് ഇപ്പോൾ ലഭ്യമാക്കിയിട്ടുള്ളത്. ഭൂമി ഏറ്റെടുക്കൽ നടപടികൾ പൂർത്തിയായാലുടൻ മേൽപ്പാലം നിർമാണം കരാർ നൽകി പണി ആരംഭിക്കുമെന്നു മന്ത്രി പി.എ. മുഹമ്മദ് റിയാസിന്‍റെ ഓഫീസ് അറിയിച്ചു.

കരിങ്കൊടി കാണിക്കാനെന്നു സംശയം: കോൺഗ്രസ് പ്രവർത്തകരെ മുൻകൂർ കസ്റ്റഡിയിലെടുത്തു

ചേർപ്പ്: സാമൂഹികാരോഗ്യകേന്ദ്രം ബ്ലോക്ക് കുടുംബാരോഗ്യകേന്ദ്രമായി ഉയർത്തുന്നതിന്‍റെ ഉദ്ഘാടനത്തിനെത്തുന്ന മന്ത്രി വീണാ ജോർജിനുനേരേ കരിങ്കൊടി കാണിക്കാൻ നിൽക്കുന്നുവെന്ന സംശയത്തിൽ കോൺഗ്രസ് പ്രവർത്തകരെ പോലീസ് മുൻകൂർ കസ്റ്റഡിയിലെടുത്തു. ചേർപ്പ് ബ്ലോക്ക് കോൺഗ്രസ് വൈസ് പ്രസിഡന്‍റ് എം. സുജിത്ത്കുമാർ, കോൺഗ്രസ് അവിണിശേരി മണ്ഡലം പ്രസിഡന്‍റ് പ്രിയൻ രാസ്, ചേർപ്പ് മുൻ പഞ്ചായത്ത് പ്രസിഡന്‍റ് സി.കെ. വിനോദ് എന്നിവരെയാണ് ചേർപ്പ് പോലീസ് കസ്റ്റഡിയിലെടുത്തത്. ഇവർ മൂന്നുപേരും വഴിയിൽ നിൽക്കുമ്പോൾ പോലീസ് ജീപ്പിൽ ബലമായി പിടിച്ചുകയറ്റുകയായിരുന്നു. പിന്നിട് ഇവരെ വിട്ടയച്ചു. പോലീസ് നടപടിക്കെതിരേ കോൺഗ്രസ് ചേർപ്പ് മണ്ഡലം പ്രസിഡന്‍റ് കെ. രാമചന്ദ്രന്‍റെ നേതൃത്വത്തിൽ കോൺഗ്രസ് പ്രവർത്തകർ ചേർപ്പ് പോലീസ് സ്റ്റേഷന് മുന്നിൽ കുത്തിയിരിപ്പുസമരംനടത്തി. മുൻ ഡിസിസി പ്രസിഡന്‍റ് ജോസ് വള്ളൂർ, ബ്ലോക്ക് കോൺഗ്രസ് പ്രസിഡന്‍റ് സിജോ ജോർജ്, ചേർപ്പ് പഞ്ചായത്ത് പ്രസിഡന്‍റ് സുജീഷ കള്ളിയത്ത് എന്നിവർ പങ്കെടുത്തു. രാജീവ് ഗാന്ധി സംഘടൻ നാട്ടിക നിയോജകമണ്ഡലം യോഗത്തിനെത്തിയ കോൺഗ്രസ് തങ്ങളെ യാതൊരു പ്രകോപനവുമില്ലാതെയാണ് അറസ്റ്റ് ചെയ്തതെന്ന് നേതാക്കൾ പറഞ്ഞു.

സംസ്ഥാന സർക്കാർ ആരോഗ്യമേഖലയെ ജനകീയമാക്കി: മന്ത്രി വീണാ ജോർജ്

പഴയന്നൂർ: സൗജന്യചികിത്സയും മികച്ച സേവനങ്ങളുംനൽകി ആരോഗ്യമേഖലയെ ജനകീയമാക്കാൻ സർക്കാരിന് കഴിഞ്ഞതായി ആരോഗ്യമന്ത്രി വീണാ ജോർജ് പറഞ്ഞു. പഴയന്നൂർ കുടുബരോഗ്യകേന്ദ്രത്തിൽ ആർദ്രം മിഷൻവഴി പൂർത്തിയാക്കിയ ലാബിന്‍റെയും വിവിധ പദ്ധതികളുടെയും ഉദ്ഘാടനം നിർവഹിച്ചു സംസാരിക്കുകയായിരുന്നു മന്ത്രി. കാത്ത് ലാബും സൂപ്പർ സ്പെഷാലിറ്റി ചികിത്സയും കൊണ്ടുവരാൻ സർക്കാരിന് കഴിഞ്ഞു. വെറും 13 ആശുപത്രികളിൽ ഉണ്ടായിരുന്ന ഡയാലിസിസ് കേന്ദ്രങ്ങൾ കേരളത്തിൽ 108 ആശുപത്രികളിൽ ഏർപ്പെടുത്തി വിപ്ലവാത്മകമായ മാറ്റംകൊണ്ടുവന്നത് ഈ സർക്കാരാണെന്നും മന്ത്രി വീണാ ജോർജ് പറഞ്ഞു. ചേലക്കര താലൂക്ക് ആശുപത്രിയിൽ കാഷ്വാലിറ്റി ഡോക്ടറടക്കം നാലു പുതിയ തസ്തികകൾ സൃഷ്ടിക്കുമെന്ന മന്ത്രിയുടെ ഉറപ്പ് കരഘോഷത്തോടെ നാട്ടുകാർ സ്വീകരിച്ചു. കോഴിക്കോട് ട്രാൻസ്പ്ലാന്‍റ് ഇൻസ്റ്റിറ്റ്യൂട്ട് നടപ്പിലാക്കും. അമീബിക് മെനഞ്ചൈറ്റിസ് രോഗ മരണനിരക്ക് അമേരിക്കൻ ഐക്യനാടുകളേക്കാള്‌ കുറവാണ് കേരളത്തിൽ. തെറ്റായ പ്രചാരണങ്ങൾകൊണ്ടൊന്നും ആരോഗ്യ പ്രവർത്തകരുടെ ആത്മവീര്യം തകർക്കാൻ കഴിയില്ലെന്നും മന്ത്രി പറഞ്ഞു. പത്തുലക്ഷം രൂപ ചെലവിൽ ആശുപത്രിപരിസര നവീകരണം, ബ്ലോക്ക് പഞ്ചായത്ത് പദ്ധതിവഴി നിര്‌മിച്ച 15 ലക്ഷം രൂപയുടെ ജലസംഭരണി എന്നിവയുടെ ഉദ്ഘാടനവും മന്ത്രി നിർവഹിച്ചു. യു.ആർ. പ്രദീപ് എംഎൽഎ അധ്യക്ഷനായി. ചടങ്ങിൽ ആരോഗ്യവകുപ്പ് ഡയറക്ടർ ഡോ.കെ.ജെ. റീന വിശിഷ്ട സാന്നിധ്യമായി. പഴയന്നൂർ ബ്ലോക്ക് പഞ്ചായത്ത് പ്രസിഡന്‍റ് കെ.എം. അഷറഫ്, ജില്ലാ മെഡിക്കൽ ഓഫീസർ ഡോ.ടി.പി. ശ്രീദേവി, ആരോഗ്യകേരളം ജില്ലാ പ്രോഗ്രാം മാനേജർ ഡോ.പി. സജീവ്കുമാർ, എനിവർ സന്നിഹിതരായി. ഡോ.ശ്രീജിത്ത് എച്ച്.ദാസ്, സ്റ്റാൻഡിംഗ് കമ്മിറ്റി ചെയർമാൻ കെ.പി. ശ്രീജയൻ എന്നിവർ പദ്ധതി വിശദീകരണംനടത്തി. ചടങ്ങിൽ പഴയന്നൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് പി. പ്രശാന്തി, വികസന സ്റ്റാൻഡിംഗ് കമ്മിറ്റി ചെയർപേഴ്സൺ എം.വി. സുചിത്ര, ബ്ലോക്ക് പഞ്ചായത്ത് അംഗങ്ങളായ ആശാദേവി, എസ്. സിന്ധു, ലത സാനു, ഷിജിത ബിനീഷ്, ഗീതാ രാധാകൃഷ്ണൻ, എ.ഇ ഗോവിന്ദൻ, പഞ്ചായത്തംഗം സൗഭാഗ്യവതി. എന്നിവർ പങ്കെടുത്തു. ദേശീയ ആരോഗ്യദൗത്യത്തിന്‍റെ 2022-23 വർഷത്തെ പദ്ധതിവിഹിതമായി ലഭിച്ച 40 ലക്ഷം രൂപ ഉപയോഗിച്ചാണ് പഴയന്നൂർ കുടുംബരോഗ്യകേന്ദ്രത്തിൽ ആർദ്രം മിഷൻ ലാബും ഒപി ബ്ലോക്കും പൂർത്തിയാക്കിയത്. മുഴുവന്‌ ഓട്ടോമാറ്റിക് അനലൈസർ സംവിധാനംവഴി 60ൽപരം പരിശോധനകൾ പുതിയ ലാബിൽ ഒരേസമയം നടത്താൻ കഴിയും. സംസ്ഥാന സർക്കാരിന്‍റെ 2021-22 വർഷത്തെ ആരോഗ്യ ഗ്രാൻഡ് വഴി 22.4 ലക്ഷം രൂപ ചെലവിലാണ് ശീതികരിച്ച കോൺഫറൻസ് ഹാളിന്‍റെയും പബ്ലിക് ഹെൽത്ത് സെന്‍ററിന്‍റെയും നവീകരണം പൂർത്തിയാക്കിയത്.

മട്ടുപ്പാവുകൃഷിയുമായി കോർപറേഷൻ

തൃശൂർ: നഗരസഭകളിൽ കൃഷി വ്യാപിപ്പിക്കുന്നതിന്‍റെ ഭാഗമായി കുടുംബശ്രീ ജില്ലാ മിഷന്‍റെ നേതൃത്വത്തിൽ നടപ്പിലാക്കുന്ന മട്ടുപ്പാവുകൃഷിയുടെ സബ്സിഡിവിതരണവും ഗ്രോ ബാഗ് വിതരണവും മേയർ എം.കെ. വർഗീസ് ഉദ്ഘാടനം ചെയ്തു. 50 കുടുംബശ്രീ അംഗങ്ങൾ അടങ്ങുന്ന മൂന്നു ക്ലസ്റ്റർ രൂപീകരിച്ച് 5,000 രൂപയുടെ പ്രോജക്ടാണ് നടപ്പിലാക്കുന്നത്. ഒരു ഗുണഭോക്താവിനു 3750 രൂപ സബ്സിഡിയായി ലഭിക്കും. ഓണവിപണിയോടനുബന്ധിച്ച് വീടുകളിൽ കൃഷിചെയ്യുന്ന വിഷരഹിത പച്ചക്കറി ജനങ്ങളിലേക്ക് എത്തിക്കുക എന്നതാണ് ക്ലസ്റ്റർ രൂപീകരണത്തിന്‍റെ പ്രധാന ലക്ഷ്യം. ചടങ്ങിൽ സിഡിഎസ് ചെയർപേഴ്സണ്‍മാരായ സത്യഭാമ വിജയൻ, രജുല കൃഷ്ണകുമാർ, മെന്പർ സെക്രട്ടറി വി.എൻ. അജിത തുടങ്ങിയവർ പങ്കെടുത്തു.

ക്രിസ്മസിനു ബിജെപി വിതരണംചെയ്തത് വർഗീയ കേക്ക്: ടി.എൻ. പ്രതാപന്‍

ചാവക്കാട്: കേരളത്തില്‍ ക്രൈസ്തവരെ പ്രീണിപ്പിക്കാന്‍ മധുരമുള്ള കേക്കുനല്‍കിയ ബിജെപിക്കാര്‍ ഉത്തരേന്ത്യയില്‍നല്‍കുന്നത് ജയിലറയാണെന്ന് കെപിസിസി രാഷ്ട്രീയകാര്യസമിതി അംഗം ടി.എൻ. പ്രതാപന്‍. പുന്ന നൗഷാദ് രക്തസാക്ഷിദിനാചരണത്തിന്‍റെ ഭാഗമായി ഗുരുവായൂർ ബ്ലോക്ക് കോൺഗ്രസ് കമ്മിറ്റി ചാവക്കാട് നടത്തിയ അനുസ്മരണസമ്മേളനം ഉദ്ഘാടനംചെയ്യുകയായിരുന്നു പ്രതാപന്‍. ഭൂരിപക്ഷ, ന്യൂനപക്ഷ വര്‍ഗീയതയെ കോണ്‍ഗ്രസ് ഒരുപോലെ എതിർക്കുമെന്നും പ്രതാപന്‍ പറഞ്ഞു. ബ്ലോക്ക് കോണ്‍ഗ്രസ് പ്രസിഡന്‍റ് അരവിന്ദന്‍ പല്ലത്ത് അധ്യക്ഷനായി. യൂത്ത് കോണ്‍ഗ്രസ് സംസ്ഥാന വൈസ് പ്രസിഡന്‍റ് അബിന്‍ വര്‍ക്കി മുഖ്യപ്രഭാഷണംനടത്തി. നേതാക്കളായ അനില്‍ അക്കര, സി.എ. ഗോപപ്രതാപന്‍, സി.സി. ശ്രീകുമാര്‍, ടി.എസ്. അജിത്ത്, എം.വി. ഹൈദരലി എന്നിവര്‍ പ്രസംഗിച്ചു.

ആധുനിക വാതകശ്മശാനം മാലിന്യനിക്ഷേപകേന്ദ്രമായി

വടക്കാഞ്ചേരി: ലക്ഷങ്ങൾ ചെലവഴിച്ച് നിർമിച്ച പൊതുശ്മശാനം കാടുകയറിയും മാലിന്യങ്ങൾ ശേഖരിച്ചും നശിക്കുന്നു. 46 ലക്ഷം രൂപ ചെലവിട്ട് ആധുനിക രീതിയിൽ നിർമിച്ച ഗ്യാസ് ക്രിമറ്റോറിയമാണ് തകരുന്നത്. രാത്രിയിൽ സാമൂഹ്യവിരുദ്ധരുടെ അഴിഞ്ഞാട്ടവും ഇഴജന്തുക്കളുടെ ആവാസകേന്ദ്രവുമായി കെട്ടിടം മാറിക്കഴിഞ്ഞു. കഴിഞ്ഞ യുഡിഎഫ് സർക്കാരിന്‍റെ 20 ലക്ഷം രൂപയും ജില്ലാ പഞ്ചായത്തിന്‍റെ എട്ടുലക്ഷം രൂപയും വടക്കാഞ്ചേരി പഞ്ചായത്ത് 18 ലക്ഷം രൂപയും ചെലവിട്ടാണ് പൊതുശ്മശാനം നിര്‌മിച്ചത്. സിന്ധു സുബ്രഹ്മണ്യന്‍റെ നേതൃത്വത്തിലുള്ള കഴിഞ്ഞ പഞ്ചായത്ത് യുഡി എഫ് ഭരണസമിതിയാണ് നിർമാണം പൂർത്തീകരിച്ചത്. പിന്നീടുനടന്ന തെരഞ്ഞെടുപ്പിൽ വടക്കാഞ്ചേരി, മ ുണ്ടത്തികോട് പഞ്ചായത്തുകൾ കൂട്ടിച്ചേർത്ത് നഗരസഭയാക്കുകയും തെരഞ്ഞെടുപ്പിൽ എൽഡിഎഫ് അധികാരത്തിലെത്തുകയും ചെയ്തതോടെ അങ്ങോട്ട് തിരിഞ്ഞുനോക്കിയിട്ടില്ലെന്ന് പ്രദേശവാസികൾ പറഞ്ഞു. നഗരസഭയുടെ നേതൃത്വത്തിൽ അഞ്ചുലക്ഷം രൂപ ചെലവഴിച്ച് ശ്മശാനത്തിലേക്കുള്ള വഴി ടൈൽസ്‌വിരിച്ച് വൃത്തിയാക്കിയെങ്കിലും പിന്നീട് പൊളിച്ചുനീക്കി. നഗരസഭയിലെ പാവപ്പെട്ടവര്‌ മരണപ്പെടുമ്പോൾ മൃതദേഹം ദൂരെ സ്ഥലങ്ങളിൽ കൊണ്ടുപോകാതെ ഓട്ടുപാറ - വാഴാനി റോഡിലുള്ള എങ്കക്കാട് പൊതുശ്മശാനത്തിലെത്തിച്ച് ചുരുങ്ങിയ നിരക്കിൽ ഗ്യാസ് ക്രിമറ്റോറിയത്തിൽ സംസ്കരിക്കാനാണ് പദ്ധതി നടപ്പാക്കിയത്. വർഷങ്ങൾ പിന്നിട്ടിട്ടും ഇതുവരെ മെഷിനറികൾ കൊണ്ടുവന്ന് ശമ്ശാനത്തിന്‍റെ പ്രവർത്തനം ആരംഭിക്കാൻ നഗരസഭ ഭരണസമിതിക്ക് കഴിഞ്ഞില്ല. അതിനുപകരം നഗരസഭയിലെ 41 ഡിവിഷനുകളിൽനിന്നു ഹരിതകർമസേന ശേഖരിക്കുന്ന മാലിന്യം മുഴുവൻപൊതുശ്മശാനത്തിലാണ് സ്റ്റോക്ക് ചെയ്യുന്നത്. ഇതു മായി ബന്ധപ്പെട്ട് നിരവധിതവണ പരാതികൾ നൽകിയെങ്കിലും ഒരു നടപടിയും ഉണ്ടായിട്ടില്ലെന്നു കോൺഗ്രസ് പറയുന്നു. ഉടൻ മാലിന്യം നീക്കംചെയ്യുകയും ശ്മശാനത്തിന്‍റെ പ്രവർത്തനം ആരംഭിക്കുകയും ചെയ്തില്ലെങ്കിൽ ശക്തമായ സമരപരിപാടികൾക്ക് രൂപംനൽകാനൊരുങ്ങുകയാണ് കോൺഗ്രസ്.

കുഴിയിലെ വെള്ളക്കെട്ടിൽ വീണ് നാലു വയസുകാരന് ദാരുണാന്ത്യം

കാടുകുറ്റി: കാടുകുറ്റിയിൽ ഓട്ടുകമ്പനിയുടെ ആവശ്യത്തിനായി മണ്ണെടുത്ത കുഴിയിലെ വെള്ളക്കെട്ടിൽ വീണ് ആസാം സ്വദേശികളായ ദമ്പതികളുടെ നാലു വയസുകാരനായ മകന് ദാരുണാന്ത്യം. ആസാം സ്വദേശി അജിസുർ റഹ്മാന്‍റെ മകൻ സജിദുൾ ഹക്ക് (4) ആണ് മരിച്ചത്. ഇന്നലെ വൈകീട്ട് നാലു മണിയോടെയായിരുന്നു സംഭവം. കളിക്കുന്നതിനിടെയാണ് കുട്ടി തെന്നി കുഴിയിലേക്ക് വീണത്. കുട്ടിയെ കാണാതായതിനെ തുടർന്നുള്ള അന്വേഷത്തിലാണ് കുട്ടിയെ കുഴിയിൽ വീണ നിലയിൽ കണ്ടത്. ഉടൻ കറുകുറ്റിയിലെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. കാടുകുറ്റി അയ്യാരിൽ ഹാഷിമിന്‍റെ ഉടമസ്ഥതയിലുള്ള ഷെഡിലാണ് കുടുംബം താമസിക്കുന്നത്. മാള പോലീസ് സ്ഥലത്തെത്തി മേൽനടപടികൾ സ്വീകരിച്ചു.

കല്ലൂരില്‍ കര്‍ഷകന്‍ കുഴഞ്ഞുവീണ് മരിച്ചു

കല്ലൂര്‍: കര്‍ഷകന്‍ കുഴഞ്ഞുവീണ് മരിച്ചു. നായരങ്ങാടി പാലത്തുപറമ്പ് ചാര്‍ത്താംവളപ്പില്‍ വേലായുധന്‍റെ മകന്‍ മോഹനന്‍ (66) ആണ് മരിച്ചത്. ഇന്നലെ രാവിലെ പതിനൊന്നരയോടെയായിരുന്നു സംഭവം. തോട്ടത്തില്‍ നിന്ന് നേന്ത്രക്കുലകള്‍ ചുമന്നുകൊണ്ടുവരുന്നതിനിടെ കുഴഞ്ഞുവീഴുകയായിരുന്നു. സമീപത്തെ തോട്ടത്തിലെ കര്‍ഷകര്‍ ചേര്‍ന്ന് പുതുക്കാട് താലൂക്ക് ആശുപത്രിയില്‍ എത്തിച്ചെങ്കിലും മരണം സംഭവിച്ചു. ഭാര്യ: ശ്യാമള. മക്കള്‍: ഹിമ, ഷിമ, ഹിമേഷ്. മരുമക്കള്‍: അനിലന്‍ (പരേതന്‍), ഷാജന്‍, സേതുലക്ഷ്മി.

ബൈക്ക് ഇടിച്ച് പരിക്കേറ്റ കാൽനട യാത്രക്കാരൻ മരിച്ചു

പുത്തൻപീടിക: ബൈക്ക് ഇടിച്ച് പരിക്കേറ്റ് ചികിത്സയിലായിരുന്ന കാൽനട യാത്രക്കാരൻ മരിച്ചു. പുത്തൻപീടിക അകായ് റോഡിൽ വള്ളോപ്പുള്ളി ശിവരാമൻ (73) ആണ് മരിച്ചത്. പുത്തൻപീടിക സെന്‍റ് ജോസഫ് പന്തൽ വർക്ക്സിലെ ജീവനക്കാരനാണ്. തിങ്കളാഴ്ച്ച വൈകീട്ട് ഏഴോടെ പാദുവ ആശുപത്രി റോഡ് ജംഗ്ഷനിൽ കൂടി നടന്നു പോകുകയായിരുന്ന ശിവരാമനെ ബൈക്ക് ഇടിച്ച് വീഴ്ത്തുകയായിരുന്നു. ഗുരുതര പരിക്കേറ്റ് മെഡിക്കൽ കോളജ് ആശുപത്രിയിൽ ചികിത്സയിലായിരുന്ന ശിവരാമൻ കഴിഞ്ഞദിവസം രാത്രി മരിച്ചു. ആലപ്പാട് സ്വദേശികൾ സഞ്ചരിച്ചിരുന്ന ബൈക്ക് ഇടിച്ചാണ് അപകടം. സംസ്കാരം നടത്തി.

ഹോം ഗാർഡിനെ മരിച്ചനിലയിൽ കണ്ടെത്തി

ചാലക്കുടി: അഗ്നിരക്ഷാനിലയത്തിലെ ഹോം ഗാർഡ് വീടിനകത്ത് മരിച്ചനിലയിൽ കാണപ്പെട്ടു. കുറ്റിക്കാട് കോമ്പാറക്കാരൻ ജോൺ മകൻ ബാബു (54) ആണ് മരിച്ചത്. ഇന്നലെ രാവിലെ ഏഴോടെയാണ് വീട്ടുകാർ കാണുന്നത്. ഉടനെ താലൂക്ക് ആശുപത്രിയിൽ എത്തിച്ചുവെങ്കിലും മരിച്ചു. ചാലക്കുടിയിൽ ട്രാഫിക് പോലീസിലും സേവനം അനുഷ്ഠിച്ചിട്ടുണ്ട്. സംസ്കാരം ഇന്ന് 10.30 ന് കുറ്റിക്കാട് സെന്‍റ് സെബാസ്റ്റ്യൻസ് ഫോറോന ദേവാലയത്തിൽ. ഭാര്യ മെറ്റിൽഡ(റാണി) പള്ളുരുത്തി ചെട്ടി വേലിക്കകത്ത് കുടുംബാഗം. മക്കൾ അലൻ ജോൺ, ആൽഫി.

മരിച്ച നിലയിൽ കണ്ടെത്തി

പുല്ലൂറ്റ്: ചാപ്പാറ 32 കോളനിയിൽ താമസിക്കുന്ന വല്ലത്തുപടി ഹമീദ് (62) നെ വ്യാഴാഴ്ച രാത്രി വീട്ടിൽ മരിച്ച നിലയിൽ കണ്ടെത്തി. വീട്ടിൽ നിന്നും ദുർഗന്ധം വമിച്ചതിനെ തുടർന്ന് അയൽവാസികൾ നടത്തിയ അന്വേഷണത്തിൽ വീട്ടിലെ കിടപ്പുമുറിയിലാണ് മൃതദേഹം കണ്ടെത്തിയത്. പോലീസ് മേൽനടപടികൾ സ്വീകരിച്ചു. ഭാര്യ: ലൈല. മക്കൾ: ഹാറൂൺ അബി, ആഷിക്ക്. ഖബറടക്കം പുല്ലൂറ്റ് ചാപ്പാറ ഹദ്ദാദ്‌ പള്ളി ഖബർസ്ഥാനിൽ നടത്തി.

മധ്യവയസ്കനെ മരിച്ച നിലയിൽ കണ്ടെത്തി

ഒല്ലൂർ: ചിയ്യാരം തിരത്തൂർ ടെമ്പിൾ റോഡിൽ വാടക വീട്ടിൽ മധ്യവയസ്കനെ മരിച്ച നിലയിൽ കണ്ടെത്തി. ചിയ്യാരം സ്വദേശി കുര തുകുളങ്ങര വീട്ടിൽ മോഹനൻ(60) ആണ് മരിച്ചത്. മൃതദേഹത്തിന് രണ്ട് ദിവസത്തെ പഴക്കമുണ്ട്. വീടിനകത്ത് രക്തം തെളികെട്ട് കിടക്കുന്നുണ്ട്. കമിഴ്ന്ന് കിടക്കുന്ന നിലയിലാണ് മൃതദേഹം കണ്ടെത്തിയത്. വാതിൽ അടച്ചിട്ടില്ല. കഴിഞ്ഞ മൂന്നുവർഷമായി ഇയാൾ ഒറ്റയ്ക്കാണ് താമസം. ഒല്ലൂർ പോലീസ് മേൽ നടപടികൾ സ്വീകരിച്ചു.

കന്യാസ്ത്രീകളുടെ അറസ്റ്റ് : ഇരിങ്ങാലക്കുടയില്‍ പ്രതിഷേധമിരമ്പി

ഇരിങ്ങാലക്കുട: ലോകത്തിലെതന്നെ ഏറ്റവും വലിയ ജനാധിപത്യരാജ്യം എന്ന് അവകാശപ്പെടുന്ന ഭാരതത്തില്‍ ഓരോ ഭാരതീയനും കണ്ണിലെ കൃഷ്ണമണി പോലെ സംരക്ഷിക്കുന്ന ഇന്ത്യന്‍ ഭരണഘടന വിഭാവനംചെയ്യുന്ന മതസ്വാതന്ത്ര്യവും ന്യൂനപക്ഷാവകാശങ്ങളും സംരക്ഷിക്കപ്പെടണമെന്ന് രൂപത വികാരി ജനറാള്‍ മോണ്‍. ജോളി വടക്കന്‍. ഇരിങ്ങാലക്കുട രൂപത കത്തോലിക്ക കോണ്‍ഗ്രസ് സംഘടിപ്പിച്ച പ്രതിഷേധറാലി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഛത്തീസ്ഗഡില്‍ രണ്ടു മലയാളി സന്യാസിനിമാര്‍ക്കുനേരെ ബജ്‌രംഗ്ദള്‍ വര്‍ഗീയതീവ്രവാദികള്‍ ആള്‍ക്കൂട്ടവിചാരണനട ത്തിയിട്ടും സര്‍ക്കാര്‍സംവിധാനങ്ങള്‍ ഉപയോഗിച്ച് അന്യായ അറസ്റ്റ് നടപ്പാക്കിയിട്ടും ഈ വിഷയത്തില്‍ ഭാരതസര്‍ക്കാരും ഛത്തീസ്ഗഡ് സര്‍ക്കാരും തുടരുന്ന സംശയകരമായ നിഷ്‌ക്രിയത്വം ഉപേക്ഷിക്കണം. രാജ്യത്തിന്‍റെ ഭരണഘടനയെയും ഭാരതീയന്‍റെ പൗരാവകാശങ്ങളെയും സംരക്ഷിക്കാനുള്ള സത്വര നടപടികള്‍ സ്വീകരിക്കാതെ തുടരുന്ന നിഷ്‌ക്രിയത്വം കേന്ദ്ര -സംസ്ഥാന സര്‍ക്കാര്‍സംവിധാനങ്ങളെ ഭയത്തോടുകൂടെ മാത്രമേ പൊതുജനത്തിനു പ്രത്യേകിച്ച് ന്യൂനപക്ഷ വിഭാഗത്തിന് മനസിലാക്കാന്‍ കഴിയൂ. വര്‍ഗീയതയെ ആയുധമാക്കി ഭരണഘടനാ വിരുദ്ധപ്രവര്‍ത്തനങ്ങളില്‍ ഏര്‍പ്പെടുന്ന ബജ്‌രംഗ്ദള്‍ ഉള്‍പ്പടെയുള്ള തീവ്രവാദ ഗ്രൂപ്പുകളെ ഭാരതത്തില്‍ നിരോധിക്കണം. ക്രൈസ്തവസമൂഹവും മിഷനറിമാരും ഈ ഭാരതമണ്ണിന് നല്‍കിയ വിലമതിക്കാനാകാത്ത നന്മകളെ ഓര്‍ക്കണമെന്നും അദ്ദേഹം കൂട്ടിച്ചേര്‍ത്തു. ഇരിങ്ങാലക്കുട രൂപത മന്ദിരത്തില്‍ പ്രതിഷേധറാലി രൂപത മുഖ്യവികാരി ജനറാള്‍ മോണ്‍. ജോസ് മാളിയേക്കല്‍ ഫ്ലാഗ് ഓഫ് ചെയ്തു. രൂപത ഡയറക്ടര്‍ ഫാ. ലിജു മഞ്ഞപ്രക്കാരന്‍, കത്തീഡ്രല്‍ വികാരി റവ.ഡോ. ലാസര്‍ കുറ്റിക്കാടന്‍, സിആര്‍ഐ പ്രസിഡന്‍റ് ഫാ. ജോയ് വട്ടോളി, രൂപത കത്തോലിക്ക കോണ്‍ഗ്രസ് പ്രസിഡന്‍റ്് ഡേവിസ് ഊക്കന്‍, സിസ്റ്റര്‍ ധന്യ, സിസ്റ്റര്‍ അനറ്റ് മേരി എന്നിവര്‍ പ്രസംഗിച്ചു. ബിഷപ്‌സ് ഹൗസില്‍നിന്ന് ആരംഭിച്ച പ്രതിഷേധ റാലിയില്‍ സിസ്റ്റേഴ്‌സും വൈദികരും അത്മായരും ഉള്‍പ്പടെ ആയിരത്തിലധികംപേര്‍ പങ്കെടുത്തു. പ്രതിഷേധ മൗനറാലി നഗരം ചുറ്റി ഠാണാവിലൂടെ കത്തീഡ്രല്‍ പള്ളിയില്‍ സമാപിച്ചു. വികാരി ജനറാള്‍ മോണ്‍. വില്‍സന്‍ ഈരത്തറ പ്രതിജ്ഞാവാചകം ചൊല്ലിക്കൊടുത്തു. റാലിക്ക് കത്തോലിക്ക കോണ്‍ഗ്രസ് ജനറല്‍ സെക്രട്ടറി ഡേവിസ് തുളുവത്ത്, ട്രഷറര്‍ ആന്‍റണി എല്‍. തൊമ്മാന, ഗ്ലോബല്‍ സെക്രട്ടറി പത്രോസ് വടക്കുംചേരി, പിആര്‍ഒ ഷോജന്‍ വിതയത്തില്‍, ടെല്‍സണ്‍ കോട്ടോളി, കത്തീഡ്രല്‍ യൂണിറ്റ് പ്രസിഡന്‍റ് സാബു കൂനന്‍, ജോസഫ് തെക്കൂടന്‍, റീന ഫ്രാന്‍സിസ്, സി.ഐ. പോള്‍, ഡേവിസ് തെക്കിനിയത്ത് എന്നിവര്‍ നേതൃത്വം നല്‍കി.

സെന്‍റ് തോമസ് കോളജിനു സോളാർ പവർ പ്ലാന്‍റ് മണപ്പുറത്തിന്‍റെ സംഭാവന

തൃശൂർ: കേരളത്തിലെ ഏറ്റവും മികച്ച കലാലയങ്ങളിലൊന്നായ തൃശൂർ സെന്‍റ് തോമസ് കോളജിന് 50 കിലോവാട്ട് ശേഷിയുള്ള സോളാർ ഓണ്‍ഗ്രിഡ് പവർ പ്ലാന്‍റും 60 കിലോ വാട്ടിന്‍റെ ഇൻവെർട്ടറും സംഭാവനചെയ്ത് മണപ്പുറം ഫൗണ്ടേഷൻ. മണപ്പുറം ഫിനാൻസിന്‍റെ ഇൻഷ്വറൻസ് വിഭാഗമായ മൈബ്രോയുടെ സിഎസ്ആർ ഫണ്ട് ഉപയോഗിച്ചാണ് സോളാർ പവർ പ്ലാന്‍റും ഇൻവെർട്ടറും സ്ഥാപിച്ചത്. കോളജിൽ നടന്ന സമർപ്പണചടങ്ങ് മണപ്പുറം ഫൗണ്ടേഷൻ മാനേജിംഗ് ട്രസ്റ്റി വി.പി. നന്ദകുമാർ ഉദ്ഘാടനം ചെയ്തു. സെന്‍റ് തോമസ് കോളജിലെ പൂർവവിദ്യാർഥി കൂടിയായ വി.പി. നന്ദകുമാർ കലാലയത്തിനു നൽകിവരുന്ന പിന്തുണയ്ക്ക് ചടങ്ങിൽ അധ്യക്ഷത വഹിച്ച കോളജ് മാനേജർകൂടിയായ അതിരൂപത സഹായമെത്രാൻ മാർ ടോണി നീലങ്കാവിൽ നന്ദി അറിയിച്ചു. മണപ്പുറം ഫൗണ്ടേഷൻ സിഇഒ ജോർജ് ഡി. ദാസ് മുഖ്യപ്രഭാഷണം നടത്തി. മൈബ്രോ സിഇഒ ജയപ്രകാശ്, വൈസ് പ്രിൻസിപ്പൽ ഡോ. ഫെബിൻ ബേബി എന്നിവർ ആശംസ നേർന്നു. പ്രിൻസിപ്പൽ റവ.ഡോ. കെ.എ. മാർട്ടിൻ സ്വാഗ തവും ഫാ. ഫിജോ ജോസ് ആലപ്പാടൻ നന്ദിയും പറഞ്ഞു.

കെസിഎല്‍ ട്രോഫി ടൂര്‍ പര്യടനത്തിന് ഊഷ്മളവരവേല്പ്, സമാപനം ഇന്ന്

തൃശൂര്‍: കേരള ക്രിക്കറ്റ് ലീഗ് രണ്ടാം സീസണിനു മുന്നോടിയായുള്ള ട്രോഫി ടൂര്‍ വാഹനപര്യടനത്തിനു ജില്ലയിലെ കേന്ദ്രങ്ങളിൽ ഊഷ്മള വരവേല്പ്. പാവറട്ടി സിഎംഐ പബ്ലിക് സ്‌കൂളില്‍നിന്ന് മൂന്നുദിവസംമുന്പ് ആരംഭിച്ച ജില്ലയിലെ പര്യടനത്തിന് ഇന്നു ചാലക്കുടി ഓട്ടോ സ്റ്റാന്‍ഡില്‍ സമാപനമാകും. പൂവത്തൂര്‍, ഐഇഎസ് എൻജിനീയറിംഗ് കോളജ്, കാഞ്ഞാണി, റോയല്‍ കോളജ്, തേജസ് കോളജ്, വിദ്യ കോളജ്, ശോഭ മാള, ശക്തന്‍ ബസ് സ്റ്റാന്‍ഡ്, കേരളവര്‍മ കോളജ്, ബിനി ഹെറിറ്റേജ് ജംഗ്ഷന്‍, ഹൈലൈറ്റ് മാള്‍ എന്നിവിടങ്ങളിൽ ട്രോഫി ടൂര്‍ പര്യടനം നടത്തി. ഇന്നു ചേതന കോളജ്, ഗവ. എൻജിനീയറിംഗ് കോളജ്, വിമല കോളജുകൾ സന്ദർശിച്ചശേഷമാണു ചാലക്കുടിയിൽ എത്തുക. കെസിഎയുടെ ആഭിമുഖ്യത്തില്‍ കണ്ണൂര്‍ മുതല്‍ തിരുവനന്തപുരംവരെയാണു ട്രോഫി ടൂര്‍ വാഹനപര്യടനം നടത്തുന്നത്. തൃശൂരിന്‍റെ സ്വന്തം ടീമായ ഫിനസ് തൃശൂര്‍ ടൈറ്റന്‍സ് പ്രചാരണപരിപാടികളുടെ ഭാഗമായുണ്ട്. പര്യടനത്തിന്‍റെ ഫ്ലാഗ് ഓഫ് പാവറട്ടി സിഎംഐ പബ്ലിക് സ്‌കൂളില്‍ സ്‌കൂള്‍മാനേജര്‍ ഫാ. ജോസഫ് ആലപ്പാട്ട് സിഎംഐ, ഹെഡ് മാസ്റ്റര്‍ പി.എഫ്. ജോസ്, പാവറട്ടി പഞ്ചായത്ത് പ്രസിഡന്‍റ് എം.എം. റെജീന, കായികാധ്യാപകരായ ജോബി ജോസ്, സജിത്ത് ജോര്‍ജ്, തൃശൂര്‍ ഡിസ്ട്രിക്ട് ക്രിക്കറ്റ് അസോസിയേഷന്‍ എക്‌സിക്യൂട്ടീവ് മെമ്പര്‍ ആനന്ദ്, ഫാ. പ്രവീണ്‍ എന്നിവര്‍ ചേര്‍ന്നാണു നിർവഹിച്ചത്.

വനിതാഡോക്ടറെ കൈയേറ്റംചെയ്ത പ്രതി അറസ്റ്റിൽ

മുളങ്കുന്നത്തുകാവ്: തൃശൂർ ഗവ. മെഡിക്കൽ കോളജ് ആശുപത്രിയിൽ ജൂണിയർ വനിതാ ഡോക്ടറെ കൈയേറ്റംചെയ്തെന്ന പരാതിയിൽ ചികിത്സയിലുള്ള രോഗിയുടെ അറസ്റ്റ് പോലീസ് രേഖപ്പെടുത്തി. തിരുവനന്തപുരം നെടുമങ്ങാട് രതീഷ് നിവാസിൽ രതീഷാണ് (37) അറസ്റ്റിലായത്. കഴിഞ്ഞദിവസം രാവിലെ ചികിത്സതേടിയെത്തിയപ്പോൾ ഇയാൾ ഡോക്ടറെ ഉപദ്രവിച്ചതെന്നാണു പരാതി. ഷൊർണൂരിൽ റെയിൽവേ ഇലക്‌ട്രിക്കൽ ജോലികൾക്കായി എത്തിയ ഇയാൾ താമസസ്ഥലത്തു തറയിൽ വീണു മൂക്കിനു ഗുരുതരപരിക്കേറ്റാണു ചികിത്സയ്ക്കെത്തിയത്. പരിക്ക് ഗുരുതരമായതിനാൽ ട്രോമ കെയർ ഐസിയുവിലേക്കു മാറ്റി. ഇവിടെവച്ചാണു ഡോക്ടറെ കൈയേറ്റംചെയ്യുകയും അസഭ്യം പറയുകയും ചെയ്തത്. ഗുരുതരാവസ്ഥയിൽ ചികിത്സയിലായിരുന്നതിനാൽ പോലീസ് കേസെടുക്കുക മാത്രമാണ് ആദ്യംചെയ്തത്. പിന്നീട് വടക്കാഞ്ചേരി മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. അക്രമത്തിൽ ഡോക്ടർമാർ പ്രതിഷേധിച്ചു.

കന്യാസ്ത്രീകളുടെ അറസ്റ്റ് : പ്രതിഷേധം കത്തുന്നു

കോട്ടപ്പുറം സെന്‍റ്് മൈക്കിൾസ് കത്തീഡ്രലിൽ ജാഥയും പ്രതിഷേധജ്വാലയും കോട്ടപ്പുറം: ഛത്തീസ്ഗഡിൽ കന്യാസ്ത്രീകൾ അറസ്റ്റ് ചെയ്യപ്പെട്ടതിൽ പ്രതിഷേധിച്ച് കോട്ടപ്പുറം സെന്‍റ്് മൈക്കിൾസ് കത്തീഡ്രലിന്‍റെ നേതൃത്വത്തിൽ പ്രതിഷേധജാഥയും പ്രതിഷേധജ്വാലയും സംഘടിപ്പിച്ചു. സെന്‍റ്് മൈക്കിൾസ് കത്തീഡ്രലിന്‍റെ മുഖ്യകവാടത്തിൽനിന്ന് മുസിരിസ് സെന്‍റ് തോമസ് കപ്പേളയിലേക്ക് തിരികൾ തെളിച്ച് നടത്തിയ പ്രതിഷേധ‌റാലിയും ജ്വാലയും കോട്ടപ്പുറം രൂപത വിശ്വാസപരിശീലന ഡയറക്ടർ ഫാ. സിജോ വേലിക്കകത്തോട്ട് ഉദ്ഘാടനം ചെയ്തു. മുസിരിസ് കപ്പേളയിൽ നടന്ന സമ്മേളനത്തിൽ കോട്ടപ്പുറം രൂപത വികാരി ജനറാൾ മോൺ. റോക്കി റോബി കളത്തിൽ, കത്തീഡ്രൽ സഹവികാരിമാരായ ഫാ. ആൽഫിൻ ജൂഡ്സൻ, ഫാ. പീറ്റർ കണ്ണമ്പുഴ, രൂപത ബിസിസി ഡയറക്ടർ റവ.ഡോ. പ്രവീൺ കുരിശിങ്കൽ, സിസ്റ്റർ സ്റ്റൈൻ സിടിസി, സിസ്റ്റർ ഏയ്ഞ്ചൽ സിഎസ്എം , സിസ്റ്റർ ഷൈനി മോൾ ഒഎസ്എച്ച്ജെ, റോബർട്ട് തണ്ണിക്കോട്ട്, ആന്‍റണി പങ്കേത്ത്, ജോൺസൻ വാളൂർ എന്നിവർ പ്രസംഗിച്ചു. നിരവധി വൈദികരും സിസ്റ്റേഴ്സും വിശ്വാസിസമൂഹവും അടക്കം നൂറുകണക്കിന് പേർ പങ്കെടുത്തു. മുട്ടിലിഴഞ്ഞ് പ്രതിഷേധിച്ച് കെസിവൈഎം ചാലക്കുടി: ഛത്തീസ്ഗഡിൽ കന്യാസ്ത്രികളെ അന്യായമായി തടവിലാക്കിയ സംഭവത്തിൽ പ്രതിഷേധിച്ച് ഇരിങ്ങാലക്കുട രൂപത കെസിവൈഎമ്മിന്‍റെ നേതൃത്വത്തിൽ ടൗണിൽ മുട്ടിലിഴഞ്ഞ് പ്രകടനം നടത്തി. സെന്‍റ്് മേരീസ് പള്ളിയങ്കണത്തിൽ നിന്നും ആരംഭിച്ച പ്രതിഷേധപ്രകടനം സൗത്ത് ജംഗ്ഷനിൽ സമാപിച്ചു. തുടർന്നു നടത്തിയ പ്രതിഷേധയോഗത്തിൽ രൂപത ഡയറക്ടർ ഫാ. അജൊ പുളിക്കൻ, ഫാ. വിത്സൻ എലുവത്തിങ്കൽ കൂനൻ, രൂപത ചെയർമാൻ ഫ്ലറ്റിൻ ഫ്രാൻസിസ്, അഡ്വ. ഫെമിൻ ഫ്രാൻസിസ്, ഡയാന ഡേവിസ്, ആനിമേറ്റർ സിസ്റ്റർ ദിവ്യ തെരെസ് സിഎച്ച്എഫ് തുടങ്ങിയവർ പ്രസംഗിച്ചു.

തനിക്കെതിരേയുള്ള അപവാദപ്രചാരണം കഴിവുകേട് മറയ്ക്കാൻ: സനീഷ്കുമാർ എംഎൽഎ

കാടുകുറ്റി: കഴിവുകേടും കെടുകാര്യസ്ഥതയും മറച്ചുവയ്ക്കുവാൻ എൽഡിഎഫ് നേതൃത്വം നൽകുന്ന കാടുകുറ്റി പഞ്ചായത്ത് ഭരണസമിതി തനിക്കെതിരേ അപവാദപ്രചാരണം നടത്തു കയാണെന്ന് സനീഷ്കുമാർ ജോ സഫ് എംഎൽഎ. ഗ്രാമപഞ്ചായത്ത് പ്രസിഡന്‍റ് സിപിഎം ഏരിയാ കമ്മിറ്റിയുടെയും ലോക്കൽ കമ്മിറ്റിയുടെയും കളിപ്പാവയായി മാറിയെന്നും എൽഡിഎഫ് മെമ്പർമാർ തമ്മിലുള്ള പടലപിണക്കവും വിഭാഗീയ‌പ്രവർത്തനങ്ങളുംമൂലം പഞ്ചായത്തുഭരണം നിഷ്ക്രിയമായെ ന്നും എംഎൽഎ ആരോപിച്ചു. കാടുകുറ്റി മണ്ഡലം കമ്മിറ്റിയുടെ നേതൃത്വത്തിൽ പഞ്ചായത്ത് കാര്യാലയത്തിനു മുന്നിൽ സംഘടിപ്പിച്ച പ്രതിഷേധ മാർച്ചും ധർണയും ഉദ്ഘാടനം ചെയ്യുകയായിരുന്നു അദ്ദേഹം. കഴിഞ്ഞ നാലുവർഷക്കാലം ചാലക്കുടി നിയോജകമണ്ഡലത്തിൽ 1482 കോടി രൂപയുടെ വികസന പ്രവർത്തനങ്ങൾക്ക് നേതൃത്വം നൽകാൻ കഴിഞ്ഞതിൽ അഭിമാനമുണ്ടെന്നും അദ്ദേഹം കൂട്ടിച്ചേർത്തു. മണ്ഡലം പ്രസിഡന്‍റ് തോമസ് ഐ. കണ്ണത്ത് അധ്യക്ഷത വഹിച്ചു. പദ്ധതി നിർവഹണത്തിൽ അനാസ്ഥയും പിടിപ്പുകേടുമാണെന്നും പദ്ധതി നടത്തിപ്പിനായി ലഭിച്ച 14 കോടിയിൽ ഏഴു കോടിയും ഗ്രാമീണ റോഡുകളുടെ നിർമാണത്തിനും പരിപാലനത്തിനുമായി ലഭിച്ച ലക്ഷങ്ങളും ചെലവാക്കാതെ നഷ്ടപ്പെടുത്തിയെന്നും യോഗത്തിൽ പ്ര സംഗിച്ചവർ ആരോപിച്ചു. മോളി തോമസ്, ഡെയ്സി ഫ്രാ ൻസിസ്, വേണു കണ്ടരുമഠത്തിൽ, കലാഭവൻ ജോബി, ഷാഹുൽ പണിക്കവീട്ടിൽ, അഡ്വ. സി.ഐ. വർഗീസ്, ലീന ഡേവിസ്, കെ.സി. മനോജ്, ലിജി അനിൽകുമാർ, ടി.പി. പോൾ, ടെഡി സിമേതി, ജോർജ് ഡി. മാളിയേക്കൽ, എം.ആർ. ഡേവിസ്, ബിനോജ് കെ. ജോസ്, സോജൻ മേനാച്ചേരി എന്നിവർ പ്രസംഗിച്ചു.

ഇരിങ്ങാലക്കുട മാര്‍ക്കറ്റില്‍ കെട്ടിടം തകര്‍ന്നുവീണു, ആര്‍ക്കും പരിക്കില്ല

ഇരിങ്ങാലക്കുട: മാര്‍ക്കറ്റില്‍ കെട്ടിടം തകര്‍ന്നുവീണു; ആര്‍ക്കും പരിക്കില്ല. കഴിഞ്ഞ ദിവസം രാത്രിയിലാണ് അപകടം നടന്നത്. മാര്‍ക്കറ്റില്‍ കുരിശങ്ങാടി കപ്പേള റോഡില്‍ സ്വകാര്യവ്യക്തിയുടെ ഉടമസ്ഥതയിലുള്ള രണ്ടു നില കെട്ടിടത്തിന്‍റെ പിറകുവശമാണ് ഇടിഞ്ഞുവീണത്. തൊട്ടുപിറകെ പ്രവര്‍ത്തിക്കുന്ന തട്ടുകടയുടെ സമീപത്തേക്കാണ് കെട്ടിടം തകര്‍ന്നുവീണതെങ്കിലും തട്ടുകടയ്ക്ക് നാശനഷ്ടങ്ങള്‍ ഒന്നുമുണ്ടായില്ല. 90 വര്‍ഷത്തോളം പഴക്കമുള്ളതാണ് ഈ കെട്ടിടം. കെട്ടിടത്തിന്‍റെ ഒരു ഭാഗം മറ്റൊരു വ്യക്തിയുടെ ഉടമസ്ഥതയില്‍ ആയതിനാല്‍ കാലപ്പഴക്കമുള്ള കെട്ടിടം പൊളിച്ചുനീക്കണമെന്ന് ആവശ്യപ്പെട്ട് മറ്റ് ഉടമസ്ഥര്‍ താലൂക്കിലും മറ്റും പരാതി നല്‍കിയിരുന്നു. പരാതിയുടെ അടിസ്ഥാനത്തില്‍ വില്ലേജ് അധികൃതര്‍ കഴിഞ്ഞയാഴ്ച സന്ദര്‍ശനം നടത്തി കെട്ടിടം ബലക്ഷയം ഉള്ളതാണെന്ന് കാണി ച്ച് റിപ്പോര്‍ട്ട് സമര്‍പ്പിച്ചിരുന്നു.

ആനാപ്പുഴ, കൊളത്തൂക്കാവ്, മരത്തോമ്പിള്ളി ക്ഷേത്രങ്ങളിൽ ഇല്ലംനിറ

കൊടുങ്ങല്ലൂർ: ആനാപ്പുഴ ശ്രീകുരുംബ ഭഗവതി ക്ഷേത്രത്തിലെ ഇല്ലംനിറ ക്ഷേത്രംതന്ത്രി ഒറവങ്കര നാരായണൻ നമ്പൂതിരിയുടെ അനുഗ്രഹാശിസുകളോടെ ക്ഷേത്രം മേൽശാന്തി യയാതി ശാന്തിയുടെ കാർമികത്വത്തിൽ നടന്നു. ക്ഷേത്രം പ്രസിഡന്‍റ് പി.ബി. മുരളി മോഹൻ, സെക്രട്ടറി ടി. ആർ. ഉണ്ണികൃഷ്ണൻ, കമ്മറ്റി അംഗങ്ങളായ പി.എ. ദേവദാസ്, പി.വി. സന്തോഷ്കുമാർ, പി.എസ്. ബാബു, യു.കെ. സന്തോഷ്, യു.എച്ച്. രാജീവ്‌ലാൽ, മറ്റു വനിത ഭക്തസമിതി അംഗങ്ങൾ നേതൃത്വം നൽകി. കൊടകര: കൊളത്തൂര്‍ കൊളത്തൂക്കാവ് ശ്രീ മഹാവിഷ്ണു ദേവീക്ഷേത്രത്തില്‍ നടന്ന ഇല്ലംനിറയില്‍ നിരവധി ഭക്തജനങ്ങള്‍ സംബന്ധിച്ചു. കര്‍ക്കടക മാസത്തിലെ അത്തം നക്ഷത്രത്തില്‍ നടത്തിയ ഇല്ലംനിറക്ക് മേല്‍ശാന്തി നടുവത്ത്മന നാരായണന്‍ നമ്പൂതിരി കാര്‍മികത്വം വഹിച്ചു. ക്ഷേത്രം കഴകം രവി നമ്പീശന്‍, ക്ഷേത്രം പ്രസിഡന്‍റ് വടുതല നാരായണന്‍, സെക്രട്ടറി അരുണ്‍കുമാര്‍, ആധ്യാത്മികാചാര്യന്‍ പുരാണശ്രീ കൊളത്തൂര്‍ പുരുഷോത്തമന്‍ എന്നിവര്‍ നേതൃത്വം നല്‍കി. ചാലക്കുടി: മരത്തോമ്പിള്ളി ശ്രീകൃഷ്ണ ക്ഷേത്രത്തിൽ ഇല്ലംനിറ നടന്നു. ക്ഷേത്രം ട്രസ്റ്റി ഐ. സദാനന്ദൻ, ടൗൺ എൻഎസ്എസ് കരയോഗം സെക്രട്ടറി കെ.ബി.മുരളീധരൻ, ദേവസ്വം സെക്രട്ടറി ഇ.ആനന്ദകൃഷ്ണൻ, അച്യുതാനന്ദൻ ഉപ്പത്ത്, മേൽശാന്തി രജീഷ് നാരായണൻ നമ്പൂതിരി തുടങ്ങിയവർ നേതൃത്വം നൽകി.

ബാങ്കില്‍ അതിക്രമം; സ്റ്റേഷന്‍‌റൗഡി അറസ്റ്റില്‍

ആളൂര്‍: കൊമ്പടിഞ്ഞാമക്കലുള്ള താഴേക്കാട് സര്‍വീസ് സഹകരണ ബാങ്കില്‍ അതിക്രമിച്ച് കയറി ജീവനക്കാരെ ഭീഷണിപ്പെടുത്തുകയും ബാങ്കിലെ വാതിലും കസേരയും നശിപ്പിക്കുകയും ചെയ്ത കേസില്‍ പ്രതിയെ ആളൂര്‍ പോലീസ് അറസ്റ്റ് ചെയ്തു. താഴെക്കാട് പറമ്പിറോഡില്‍ കണക്കുംകടവ് വീട്ടില്‍ കുഴിരമേഷ് എന്നു വിളിക്കുന്ന കെ.എസ്. സുരേഷിനെ(44) യാണ് ആളൂര്‍ പോലീസ് അറസ്റ്റ് ചെയ്തത്.

മത്സ്യസമ്പത്ത് വർധനവിനായി അഭിഷേകപ്രാർഥന നടത്തി

ചെട്ടിക്കാട്്: വിശുദ്ധ അന്തോണീസിന്‍റെ തീർഥാടന േന്ദ്രത്തിൽ മത്സ്യമേഖലയിൽ പണിയെടുക്കുന്നവർക്കും മത്സ്യസമ്പത്ത് വർധനവിനുമായി അഭിഷേക പ്രാർഥന നടത്തി. രാവിലെ 6.15 മുതൽ വൈകിട്ട് 6.30 വരെ തുടർച്ചയായി ദിവബലി, നൊവേന, ആരാധ ന പ്രത്യേക അഭിഷേകപ്രാർഥന എന്നിവ നടന്നു. മത്സ്യബന്ധനബോട്ടുകളിലും വള്ളങ്ങളിലും കെട്ടുന്നതിനായി വിശുദ്ധ അന്തോണീസിന്‍റെ ചിത്രം ആലേഖനം ചെയ്ത ആശീർവദിച്ച സംരക്ഷണ പതാക മത്സ്യത്തൊഴിലാളികൾക്കു വിതരണം ചെയ്തു. റെക്ടർ റവ. ഡോ. ബെന്നി വാഴക്കൂട്ടത്തിൽ, ഫാ. വിൻ കുരിശിങ്കൽ, ഫാ. അജയ് ആന്‍റ ണി പുത്തൻപറമ്പിൽ എന്നിവർ നേതൃത്വം നൽകി.

ജൂബിലിയിൽ മെഗാ ഇഎം സോണോയും എക്സാംതലോനും പൂർത്തിയായി

തൃശൂർ: ജൂബിലി മിഷൻ മെഡിക്കൽ കോളജിൽ മെഗാ ഇഎം സോണോ 2025 എന്ന പേരിൽ സംഘടിപ്പിച്ച അൾട്രാസൗണ്ടിലെ ലൈവ് ഹാൻഡ്സ് ഓണ്‍ പരിശീലനം വിജയകരമായി പൂർത്തിയായി. രാജ്യത്തുതന്നെ ഒരേസമയം 100 ഡോക്ടർമാർക്കാണ് ഇതിലൂടെ പരിശീലനം നൽകിയത്. എമർജൻസി മെഡിസിൻ മേഖലയ്ക്കുപുറമെ വിവിധ വിഭാഗങ്ങളിലുള്ള ഡോക്ടർമാർ പങ്കെടുത്ത ശില്പശാല രോഗനിർണയത്തിനുള്ള നിർണായകവും അടിയന്തരവുമായ കഴിവുകൾ മെച്ചപ്പെടുത്തുന്നതിൽ ഏറെ സഹായകമായി. ഡൽഹി എയിംസിലെ എമർജൻസി വിഭാഗം പ്രഫസറും ലോകാരോഗ്യസംഘടനയുടെ കൊളാബ്രേറ്റിംഗ് സെന്‍റർ ഫോർ എമർജൻസി ആൻഡ് ട്രോമയുടെ സൗത്ത് ഈസ്റ്റ് ഏഷ്യ റീജിയന്‍റെ ഡയറക്ടറുമായ ഡോ. സഞ്ജീവ് ഭോയി ശില്പശാല ഉദ്ഘാടനം ചെയ്തു. ആശുപത്രി ഡയറക്ടർ ഫാ. റെന്നി മുണ്ടൻകുരിയൻ, പ്രിൻസിപ്പൽ പ്രഫ. എം.എ. ആൻഡ്രൂസ്, അസിസ്റ്റന്‍റ് ഡയറക്ടർ ഫാ. ടെറിൻ മുള്ളക്കര, ഡോ. പി.സി. രാജീവ്, ഡോ. വിജയ് ചഞ്ചൽ എന്നിവർ പ്രസംഗിച്ചു. ഡോ. ഡിയോ മാത്യുവിന്‍റെ നേതൃത്വത്തിൽ അവസാനവർഷ എംഡി എമർജൻസി മെഡിക്കൽ വിദ്യാർഥികൾക്കായി മെഗാ എക്സാംതലോണ്‍ എന്ന പരീക്ഷാ അനുകരണപരിപാടിയും കേരളത്തിലെ എമർജൻസി മെഡിസിൻ മേഖലയിലുള്ള നാല്പതിലധികം ഡോക്ടർമാർ പങ്കെടുത്ത ആസസേർസ് ട്രെയ്നിംഗ് പ്രോഗ്രാം 2.0 എന്ന ഫാക്കൽട്ടി ഡെവലപ്മെന്‍റ് സെഷനും നടന്നു.

അർണോസ് ഫോറം വാർഷികവും കുടുംബസംഗമവും നടത്തി

തൃശൂർ: അർണോസ് ഫോറത്തിന്‍റെ പത്താംവാർഷികവും കുടുംബസംഗമവും വിവിധ പരിപാടികളോടെ നടന്നു. ഡോ. ജോർജ് തേനാടികുളത്തിന്‍റെ മുഖ്യകാർമികത്വത്തിൽ അനുസ്മരണബലി, ഒപ്പീസ് എന്നിവയോടെ ആരംഭിച്ച പരിപാടിയിൽ റവ.ഡോ. ദേവസി പന്തല്ലൂക്കാരൻ പൊതുയോഗം ഉദ്ഘാടനം ചെയ്തു. റവ. ഡോ. ജോർജ് തേനാടിക്കുളം അധ്യക്ഷത വഹിച്ചു. അർണോസ് പ്രചാരണത്തിനും പഠനത്തിനുംവേണ്ടി മികച്ച സേവനം അർപ്പിച്ച ജോണ്‍ കള്ളിയത്ത്, ഷെവ. സി.എൽ. ജോസ്, ഷെവ. ജോർജ് മേനാച്ചേരി, റവ.ഡോ. മാർട്ടിൻ കൊളന്പ്രത്ത്, ആന്‍റണി പുത്തൂർ, ഡോ. ഇന്ദു ജോണ്‍, ഡോ. കെ.എസ്. ഗ്രേസി, ഫാ. ആന്‍റണി മേച്ചേരി എന്നിവരെ ഉപഹാരവും പൊന്നാടയും നൽകി ആദരിച്ചു. ഡോ. ജോർജ് അലക്സ്, എം.ഡി. റാഫി, ബേബി മൂക്കൻ, അഗസ്റ്റിൻ കുട്ടനെല്ലൂർ, ഫാ. ആന്‍റണി ചില്ലിട്ടശേരി, ഫാ. ജിയോ ചെരടായി, ഫാ. ജോസ് തച്ചിൽ, ജോണ്‍സൻ കാഞ്ഞിരത്തിങ്കൽ എന്നിവർ പ്രസംഗിച്ചു. ചടങ്ങിന്‍റെ ഭാഗമായി നടന്ന സെമിനാറിൽ അർണോസ് പാതിരിയുടെ ജനോവപർവം എന്ന വിഷയത്തെപ്പറ്റി ജോണ്‍ തോമസ് പ്രഭാഷണം നടത്തി. തുടർന്ന് ആന്‍റോ പട്ട്യേക്കാരൻ ആൻഡ് ടീമിന്‍റെ ഒറ്റുകാരൻ എന്ന ബൈബിൾ ലഘുനാടകവും സ്നേഹവിരുന്നുമുണ്ടായിരുന്നു.

ക്രമക്കേട്: സെക്രട്ടറിക്കു സസ്പെന്‍ഷൻ

എരുമപ്പെട്ടി: കർഷകർക്ക് നൽകാനുള്ള പണം സ്വന്തം ആവശ്യങ്ങൾക്കായി ഉപയോഗിച്ച് ക്രമക്കേട് നടത്തിയ എരുമപ്പെട്ടി മങ്ങാട് ക്ഷീരവ്യവസായ സഹകരണ സംഘം സെക്രട്ടറി പി.എ. ജിജേഷിനെ സസ്പെൻഡ് ചെയ്തു. കർഷകർക്ക് നൽകാനുള്ള തുക എത്രയും പെട്ടെന്ന് കൊടുത്തുതീർക്കുവാനും ജിജേഷ് തിരിമറി നടത്തിയ തുക ഇയാളിൽനിന്ന് ഈടാക്കുവാനുള്ള നിയമനടപടി സ്വീകരിക്കുവാനും ക്ഷീരസംഘം ഭരണസമിതി യോഗം തീരുമാനിച്ചതായി പ്രസിഡന്‍റ്് പി.സി. അബാൽ മണി അറിയിച്ചു. വടക്കാഞ്ചേരി ബ്ലോക്ക് ഡയറി എക്സ്റ്റൻഷൻ ഓഫീസറുടെ സാന്നിധ്യത്തിലാണ് യോഗം ചേർന്നത്. സൊസൈറ്റിയിൽ പാൽ അളക്കുന്ന കർഷകർക്കു നൽകേണ്ട ലക്ഷക്കണക്കിന് രൂപയാണ് സെക്രട്ടറി സ്വന്തം ആവശ്യങ്ങൾക്കുവേണ്ടി തിരിമറി നടത്തിയത്. പണം ലഭിക്കാത്തതിനെതുടർന്ന് കർഷകർ സംഘത്തിനുമുന്നിൽ പാൽ ഒഴിച്ച് പ്രതിഷേധിച്ചിരുന്നു.ഇതിനെതുടർന്ന് ചേർന്ന സഹകരണ സംഘത്തിന്‍റെ അടിയന്തരയോഗത്തിൽ കർഷകരുടെ പണം താനാണ് തിരിമറി ചെയ്തതെന്ന് സെക്രട്ടറിയായിരുന്ന പി.എ. ജിജേഷ് സമ്മതിക്കുകയും വാർത്താക്കുറിപ്പ് ഇറക്കുകയും ചെയ്തിരുന്നു.

ഏങ്ങണ്ടിയൂരിൽ മധ്യവയസ്കനെ ആക്രമിച്ച നാലംഗസംഘം അറസ്റ്റിൽ

വാടാനപ്പിള്ളി: മധ്യവയസ്കനെ ആക്രമിച്ച കേസിൽ റൗഡി ഷിഹാബും മൂന്ന് കൂട്ടാളികളും അറസ്റ്റിൽ. ചാവക്കാട് മണത്തല സ്വദേശി തെരുവത്ത് വീട്ടിൽ ഷിഹാബ് (47), ചാവക്കാട് മണത്തല സ്വദേശി ആലുങ്ങൽ വീട്ടിൽ നഹീഷ് (39), ചാവക്കാട് ബ്ലാങ്ങാട് ഇരട്ടപ്പുഴ സ്വദേശി മൂക്കൻ വീട്ടിൽ കപിൽദേവ് ( 37), ചാവക്കാട് ബീച്ച് സ്വദേശി അലുങ്ങൽ വീട്ടിൽ മുഹമ്മദ് അഫ്സൽ ( 40) എന്നിവരെയാണ് വാടാനപ്പിള്ളി പോലീസ് അറസ്റ്റ് ചെയ്തത്. കഴിഞ്ഞദിവസം രാവിലെ ഏഴോടെ ഏങ്ങണ്ടിയൂർ പുളിഞ്ചോട് ക്രിസ്ത്യൻ പള്ളിക്കു സമീപം മില്ലേനിയം റോഡിലൂടെ നടന്നു പോവുകയായിരുന്ന ഏങ്ങണ്ടിയൂർ പുളിഞ്ചോട് സ്വദേശി അറയ്ക്കൽ കുറുപ്പത്ത് വീട്ടിൽ ബഷീറി ( 51)നെയാണ് സംഘം ആക്രമിച്ചത്. ഇയാൾ ഭാര്യയുമായി വേർപിരിഞ്ഞ് കഴിയുകയാണ്. ബഷീറിന്‍റെയും ഭാര്യയുടെയും ഉടമസ്ഥതയിലുള്ള ഫ്ലാറ്റിൽ ബഷീർ പ്രവേശിക്കരുതെന്നു ചാവക്കാട് കോടതിയിൽനിന്നും ബഷീറിന്‍റെ ഭാര്യ പ്രൊട്ടക്‌ഷൻ ഓർഡർ വാങ്ങിയിട്ടുള്ളതുമാണ്. എന്നാൽ ഭാര്യയുടെ വീടിന്‍റെ പരിസരത്തേക്ക് ബഷീർ പോയ വൈരാഗ്യത്തിലാണ് സംഘം അസഭ്യംപറഞ്ഞ് ഭീഷണിപ്പെടുത്തി ആക്രമിച്ച് പരിക്കേൽപ്പിച്ചത്. വാടാനപ്പിള്ളി പോലീസ് സ്റ്റേഷൻ സബ് ഇൻസ്പെക്ടർ മുഹമ്മദ്‌ റാഫി, സിപിഒമാരായ അഖിൽ, രാഗേഷ്, ഉണ്ണിമോൻ, ഫിറോസ് എന്നിവർ ചേർന്നാണ് പ്രതിയെ അറസ്റ്റ് ചെയ്തത്.

പോലീസിനെ ആക്രമിച്ച് രക്ഷപ്പെടാന്‍ ശ്രമിച്ച നാലുപേര്‍ അറസ്റ്റില്‍

പുതുക്കാട്: പൊതുസ്ഥലത്ത് ലഹരി ഉപയോഗിക്കുന്നതറിഞ്ഞെത്തിയ പോലീസ് സംഘത്തെ ആക്രമിക്കുകയും കൃത്യനിര്‍വഹണം തടസപ്പെടുത്തുകയും ചെയ്ത നാലുപേരെ പുതുക്കാട് പോലീസ് പിടികൂടി. കല്ലൂര്‍ നായരങ്ങാടി നൊച്ചിയില്‍ വീട്ടില്‍ അമരീഷ്, വെണ്ടോര്‍ കാട്‌ല വീട്ടില്‍ നിര്‍മല്‍, പാറയ്ക്ക വീട്ടില്‍ സോവിന്‍, കല്ലൂര്‍ അന്തിക്കാട്ടില്‍ വിഷ്ണു എന്നിവരാണ് അറസ്റ്റിലായത്. ചൊവ്വാഴ്ച കല്ലൂര്‍ ഞെള്ളൂര്‍ പാടത്ത് ലഹരി ഉപയോഗിച്ച് നാട്ടുകാര്‍ക്ക് ശല്യമുണ്ടാക്കുന്നുവെന്ന വിവരത്തെ തുടര്‍ന്ന് സ്ഥലത്തെത്തിയ പുതുക്കാട് എസ്ഐ വൈഷ്ണവ്, സിവില്‍ പോലീസ് ഓഫീസര്‍മാരായ ഫൈസല്‍, ബേസില്‍ എന്നിവരെയാണ് പ്രതികള്‍ ആക്രമിച്ചത്. തുടര്‍ന്ന് പ്രതികളെ ബലംപ്രയോഗിച്ച് കീഴ്‌പ്പെടുത്തിയാണ് കസ്റ്റഡിയിലെടുത്തത്. പുതുക്കാട് പോലീസ് എസ്എച്ച്ഒ ആദം ഖാന്‍, സബ് ഇന്‍സ്‌പെക്ടര്‍മാരായ പ്രദീപ്, ലിജു, വൈഷ്ണവ്, സിവില്‍ പോലീസ് ഓഫീസര്‍മാരായ ഫൈസല്‍, ബേസില്‍, ധന്യ എന്നിവരുടെ നേതൃത്വത്തിലാണ് പ്രതികളെ പിടികൂടിയത്.

ചേർപ്പിൽ പരസ്പരം ഏറ്റുമുട്ടിയ യുവാക്കൾ അറസ്റ്റിൽ

ചേർപ്പ്: തായംകുളങ്ങര മഹാത്മാ മൈതാനിയിൽ പരസ്പരം ഏറ്റുമുട്ടിയ സംഘത്തിലെ ആറുപേരെ ചേർപ്പ് പോലീസ് അറസ്റ്റ് ചെയ്തു. ഇരുസംഘങ്ങളിൽനിന്നുമുള്ള ചേർപ്പ് ചെറുചേനം സ്വദേശി കാരണപ്പറമ്പിൽ ഇജാസ് (18), ചേർപ്പ് മുത്തുള്ളിയാൽ സ്വദേശി വെളിയത്ത് വീട്ടിൽ മഹീന്ദ്രനാഥ് (18), ചേർപ്പ് ചെറുചേനം സ്വദേശി ചുള്ളിപറമ്പിൽ വീട്ടിൽ ഷിനാസ് (19), ചേർപ്പ് വലിയ ചേനം സ്വദേശി മാത്തക്കര വീട്ടിൽ മുഹമ്മദ് ഇർഫാൻ (19), ചേർപ്പ് ചേനം സ്വദേശി പണിക്കശ്ശേരി വീട്ടിൽ സാരംഗ് (18), എട്ടുമന ചെറിയപാലം സ്വദേശി പുത്തൻതോപ്പിൽ ബിജൻകൃഷ്ണ (18) എന്നിവരാണ് അറസ്റ്റിലായത്. പ്രായപൂർത്തിയാകാത്ത മൂന്നുപേരെ അപ്രഹന്‍റ് ചെയ്തു. സംഘട്ടനത്തിൽ പരിക്കറ്റ വലിയചേനം സ്വദേശി തെക്കെമഠത്തിൽ ഷിമൽ തൃശൂർ മെഡിക്കൽ കോളജ് ആശുപത്രിയിലും, ചേർപ്പ് തിരുവള്ളക്കാവ് സ്വദേശി ചുള്ളിക്കാട്ടിൽ വീട്ടിൽ വാസുദേവ് കൂർക്കഞ്ചേരി എലൈറ്റ് ആശുപത്രിയിലും ചികിത്സയിലാണ്. കഴിഞ്ഞദിവസം വൈകീട്ട് ആറരയ്ക്കാണ് സംഭവമുണ്ടായത്. അക്രമിസംഘത്തിലെ പ്രായപൂർത്തിയാകാത്ത കുട്ടി അമ്മയുമായി ബൈക്കിൽ പോകുമ്പോൾ എതിർ സംഘത്തിലെ ഒരാൾ കളിയാക്കി ചിരിച്ചതിനെ തുടർന്ന് ഫോണിൽ വിളിച്ച് തർക്കം ഉണ്ടായിരുന്നു. ഇക്കാര്യം പറഞ്ഞ് തീർക്കുന്നതിന് വേണ്ടി ഇരു സംഘവും മൈതാനത്ത് ഒത്തുചേർന്ന് സംസാരിക്കുന്നതിനിടയിലാണ് സംഘട്ടനമുണ്ടായത്.

വൈഎംസിഎ സ്ഥാനാരോഹണം

ഒല്ലൂർ: വൈഎംസിഎ പുതിയ ഭാരവാഹികളുടെ സ്ഥാനരോഹണവും പ്രവർത്തനോദ്ഘാടനവും മാർ ഔഗിൻ കുര്യാക്കോസ് നിർവഹിച്ചു. ഡയാലിസിസ് സഹായ പദ്ധതിയുടെയും ഒല്ലൂർ വൈഎംസിഎ ഓഫീസിന്‍റെ രണ്ടാംഘട്ട നിർമാണവും കേരള റീജിയൻ ചെയർമാൻ പ്രഫ. അലക്സ് തോമസ് ഉദ്ഘാടനം ചെയ്തു. യൂണിറ്റ് പ്രസിഡന്‍റ് ഡേവിസ് കുറ്റിക്കാട്ട് അധ്യക്ഷത വഹിച്ചു. റീജിയൻ സെക്രട്ടറി റെജി വർഗീസ് സ്ഥാനാരോഹണശുശ്രുഷയ്ക്കു നേതൃത്വം നൽകി. നിയുക്ത പ്രസിഡന്‍റ് റാഫി കടവി കർമപരിപാടി വിശദീകരിച്ചു. മികച്ച പ്രവർത്തകനായി തെരഞ്ഞെടുത്ത ബൈജു വാഴക്കാലയെ മെമന്‍റൊ നൽകി ആദരിച്ചു. വിവിധ മേഖലയിൽ ഉന്നതവിജയം നേടിയവരെയും എസ്എസ്എൽസി, പ്ലസ് ടു ഫുൾ എ പ്ലസ് വാങ്ങിയ വിദ്യാർഥികളെയും ആദരിച്ചു. ബൈജു വാഴക്കാല, ജേക്കബ് തട്ടിൽ, ജോസഫ് കാരക്കട, സി.പി. പോളി, എ.സി. ജോസ്, കെ.എ. ഫ്രാൻസീസ്, ടി.ടി. ജോൺസൻ, ടി.ജെ. ടോണി എന്നിവർ പ്രസംഗിച്ചു. തൃശൂർ സബ് റീജിയൻ വൈസ് ചെയർമാൻ ബേബി വാഴക്കാല സ്വാഗതവും ബിനോയ് മേലേടത്ത് നന്ദിയും പറഞ്ഞു.

ചേംബർ ഷോപ്പേഴ്സ് കാരവൻ 2025 പ്രദർശന വിപണനമേള രണ്ടുമുതൽ

തൃശൂർ: ചേംബർ ഓഫ് കോമേഴ്സ് വുമണ്‍സ് വിംഗിന്‍റെ ഓണം സ്പെഷൽ ചേംബർ ഷോപ്പേഴ്സ് കാരവൻ 2025 പ്രദർശന വിപണന മേള ഓഗസ്റ്റ് രണ്ട്, മൂന്ന് തീയതികളിൽ കാസിനോ കൾച്ചറൽ ഓഡിറ്റോറിയത്തിൽ നടത്തും. മേളയുടെ ഭാഗമായി നാളെ വൈകീട്ട് 4.30 നു പാലസ് റോഡിലെ ചേംബർ ഓഫീസ് പരിസരത്തുനിന്ന് ആരംഭിക്കുന്ന വിളംബരജാഥ പോലീസ് അക്കാദമി അസിസ്റ്റന്‍റ് ഡയറക്ടർ വാഹിദ് ഉദ്ഘാടനം ചെയ്യും. വാദ്യമേളങ്ങൾ, നാടൻകലാരൂപങ്ങൾ, പുലികളി എന്നിവ അണിനിരക്കുന്ന ജാഥ സ്വരാജ് റൗണ്ട് ചുറ്റി നടുവിലാൽ പരിസരത്തു സമാപിക്കും. രണ്ടിനു രാവിലെ ഒന്പതിനു മന്ത്രി ഡോ. ആർ. ബിന്ദു പ്രദർശനം ഉദ്ഘാടനം ചെയ്യും. മേയർ എം.കെ. വർഗീസ് സമാപനസമ്മേളനം ഉദ്ഘാടനം ചെയ്യും. ജ്വല്ലറി, ഫർണീച്ചർ, ഇലക്ട്രോണിക്സ്, ഹോം അപ്ലയൻസസ്, തുണിത്തരങ്ങൾ തുടങ്ങി 140 ൽപ്പരം സ്റ്റാളുകളോടെയുള്ള പ്രദർശനം രാവിലെ പത്തുമുതൽ രാത്രി ഒന്പതുവരെയാണ്. പ്രവേശനം സൗജന്യം.

കോണ്‍ഗ്രസിൽ സൈബർ പോര്; വിമർശനമുന്നയിച്ച നേതാവിനെ പുറത്താക്കിയതിൽ അമർഷം

തൃശൂർ: കോണ്‍ഗ്രസ് നേതാവ് പാലോട് രവിയെ പിന്തുണച്ചതിനു തൃശൂർ മുൻ ഡിസിസി ജനറൽ സെക്രട്ടറിയും ഗുരുവായൂർ അർബൻ ബാങ്ക് മുൻ പ്രസിഡന്‍റുമായ പി. യതീന്ദ്രദാസിനെ പാർട്ടിയിൽനിന്നു പുറത്താക്കിയതിനുപിന്നാലെ അമർഷം പുകയുന്നു. അന്പതുവർഷമായി പാർട്ടിയുടെ മുഖമായ പാലോട് രവി പറഞ്ഞ കാര്യങ്ങളിലെ വസ്തുത പരിശോധിക്കാതെ തൽസ്ഥാനത്തുനിന്നു മാറ്റിയതിനെക്കുറിച്ചു സമൂഹമാധ്യമത്തിൽ കുറിപ്പെഴുതിയതിതോടെയാണ് യതീന്ദ്രദാസിനെ പുറത്താക്കിയത്. സത്യവിരുദ്ധമായ പ്രസ്താവനകൾ സമൂഹമാധ്യമങ്ങളിലൂടെ നടത്തിയെന്നു ചൂണ്ടിക്കാട്ടിയാണ് ഡിസിസി പ്രസിഡന്‍റ് അഡ്വ. ജോസഫ് ടാജറ്റ് പുറത്താക്കിയത്. ഇത് ഏകപക്ഷീയനടപടിയാണെന്നു യതീന്ദ്രദാസ് ആരോപിക്കുന്നു. എന്നാൽ, ഈ കത്തിന്‍റെ പകർപ്പിനൊപ്പം പ്രാഥമിക അംഗത്വം പോലുമില്ലാത്ത തന്നെ എങ്ങനെ പുറത്താക്കുമെന്നു ചൂണ്ടിക്കാട്ടി വീണ്ടും സമൂഹമാധ്യമത്തിൽ വിമർശനമുന്നയിച്ചതോടെ പിന്തുണയുമായി നിരവധിപ്പേർ രംഗത്തെത്തി. തങ്ങളുടെ ഭാര്യമാരും മക്കളും സുരേഷ് ഗോപിക്കു വോട്ടുചെയ്തിട്ടില്ലെന്ന് എത്ര ബ്ലോക്ക് പ്രസിഡന്‍റുമാർക്കു പറയാൻ കഴിയുമെന്നും പലരുടെയും പ്രൊഫൈലിൽ മോദിച്ചിത്രമല്ലേയെന്നും അദ്ദേഹം ചാദിച്ചു. സംസ്ഥാനനേതാക്കൾ ബിജെപിയിലേക്കു പോകുന്പോൾമാത്രമാണു വാർത്തയാകുന്നതെന്നും മണ്ഡലം, ബൂത്ത് പ്രവർത്തകർ പോകുന്നതിന്‍റെ കണക്കു കൈയിലുണ്ടോയെന്നും, പാലോട് രവിയെ പുറത്താക്കുന്നതിനുപകരം ബിജെപി 50,000 വോട്ടുകൾ പിടിക്കാൻ സാധ്യതയുള്ള മണ്ഡലങ്ങൾ ഏതൊക്കെയാണെന്നു കണ്ടെത്തുകയാണു വേണ്ടതെന്നും യതീന്ദ്രദാസ് വിമർശനമായി ഉന്നയിച്ചു. ഇതിനു പിന്തുണയുമായി നിരവധി പ്രവർത്തകരും രംഗത്തെത്തി. 2019-നെക്കാൾ ഭൂരിപക്ഷത്തിൽ കേരളത്തിൽ എല്ലായിടത്തും 2024ൽ യുഡിഎഫ് മുന്നേറിയപ്പോൾ തൃശൂരിൽ കെ. മുരളീധരൻ പരാജയപ്പെട്ടതിനുകാരണം പ്രാഥമിക അംഗത്വം പോലുമില്ലാത്തവരാണോ എന്നും ഡിസിസി നേതാവ് പുതുക്കാട് ഭാഗത്തു കെ. മുരളീധരന്‍റെ ഏഴായിരത്തിലധികം പോസ്റ്ററുകൾ പൂഴ്ത്തിയതിനും തെരഞ്ഞെടുപ്പുപരാജയം സംബന്ധിച്ച് പാർട്ടി അന്വേഷണ കമ്മീഷൻ റിപ്പോർട്ടിലും എന്തു നടപടിയെടുത്തെന്നും അദ്ദേഹം ചോദിക്കുന്നു. യതീന്ദ്രദാസിന്‍റെ മകനും യുവനേതാവുമായിരുന്ന അഖിൽദാസും നേതൃത്വത്തിനെതിരേ രംഗത്തുവന്നു. സംഘപരിവാറിനെതിരേ ജില്ലയിലെ കോണ്‍ഗ്രസ് പാർട്ടിയുടെ പ്രവർത്തനങ്ങൾക്കു പുറത്താക്കൽ ഗുണംചെയ്യുമെങ്കിൽ ഈ തീരുമാനത്തെ അഭിമാനത്തോടെ സ്വീകരിക്കുമെന്നും മറ്റെന്തെങ്കിലും ഉദ്ദേശ്യമുണ്ടെങ്കിൽ നടക്കില്ലെന്നുമായിരുന്നു കുറിപ്പ്. സംഘടനയെ ശക്തിപ്പെടുത്താനുള്ള നടപടികളൊന്നും നേതൃത്വത്തിനു ചെയ്യാൻ കഴിയുന്നില്ലെന്നും പ്രാദേശികതെരഞ്ഞെടുപ്പിൽ ജില്ലയിലെ പ്രമുഖനേതാക്കൾക്കു കീഴിലുള്ള പഞ്ചായത്തുകളിൽപോലും വിജയിക്കാൻ കഴിയില്ലെന്ന വിമർശനവും യതീന്ദ്രദാസ് ഉന്നയിക്കുന്നു. കഴിഞ്ഞ ദിവസം ഇരിങ്ങാലക്കുടയിൽ എ ഗ്രൂപ്പ് യോഗം ചേർന്നിരുന്നു. ഇതിനുശേഷം ഡിസിസി പ്രസിഡന്‍റ് ജോഫസ് ടാജറ്റ് ഇല്ലാതിരുന്ന സമയം എം.പി. വിൻസെന്‍റ് മുറിതുറന്ന് ഗ്രൂപ്പിൽപ്പെട്ടവരുമായി ചർച്ചനടത്തിയെന്നും പ്രസിഡന്‍റ് വിലക്കിയതോടെ സഹകരണസംഘം ഹാളിലേക്കു മാറ്റിയെന്നും ആരോപണമുണ്ട്. മുരളീധരന്‍റെ തോൽവിക്കുപിന്നാലെ പാർട്ടിയിലുണ്ടായ കലഹം ഇപ്പോഴും തുടരുകയാണ്. ജില്ലയിലെ സമരങ്ങളുടെ ഉത്തരവാദിത്വം ഒരുപറ്റം കൗണ്‍സിലർമാർക്കുമാത്രമായി മാറിയെന്നും ചില നേതാക്കൾ മനപ്പൂർവം വിട്ടുനിൽക്കുന്നെന്ന പരാതിയും ചിലർ ഉന്നയിക്കുന്നുണ്ട്.

പാന്പുകടിയേറ്റു കുഞ്ഞ് മരിച്ച സംഭവം ഡോക്ടർക്കെതിരേ നടപടിയില്ല; അന്വേഷിക്കാൻ നിർദേശം

മാള: മൂന്നുവയസുകാരി പാന്പുകടിയേറ്റു മരിച്ച സംഭവത്തിൽ ഡോക്ടർക്കെതിരേ നടപടിയെടുക്കാത്ത സംഭവത്തിൽ അന്വേഷണത്തിനു മുഖ്യമന്ത്രിയുടെ ഓഫീസ് ആരോഗ്യവകുപ്പ് ഡയറക്ടർക്കു നിർദേശം നൽകി. കൊടുങ്ങല്ലൂർ താലൂക്ക് ആശുപത്രിയിലെ ഡോക്ടർക്കെതിരേ അന്വേഷണ റിപ്പോർട്ട് ഉണ്ടായിട്ടും നടപടിക്കു മടിക്കുന്നെന്നു ചൂണ്ടിക്കാട്ടി പൊതുപ്രവർത്തകനും ഹൈക്കോടതി അഭിഭാഷകനുമായ അഡ്വ. കുളത്തൂർ ജയ്സിംഗ് നൽകിയ പരാതിയിലാണു നടപടി. 2021 മാർച്ചിൽ ആലമറ്റം കാച്ചപ്പിള്ളിയിൽ ബിനോയ് - ലത ദന്പതികളുടെ മകൾ ആവ്റിനെ പാന്പുകടിയേറ്റു കൊടുങ്ങല്ലൂർ താലൂക്ക് ആശുപത്രിയിൽ എത്തിച്ചു. ഡ്യൂട്ടിയിലുണ്ടായിരുന്ന അസി. സർജൻ ഡോ. ബി.എസ്. ശ്രീലേഖ ആന്‍റിവെനം നൽകുവാൻ മടിച്ചു. കുഞ്ഞു മരിച്ചതു വിവാദമായതോടെ തൃശൂർ ജില്ലാ മെഡിക്കൽ ഓഫീസർ ഡോക്ടർക്കെതിരേ അന്വേഷണ റിപ്പോർട്ട് സമർപ്പിച്ചു. വർഷങ്ങൾ കഴിഞ്ഞിട്ടും ആരോഗ്യവകുപ്പ് ഡോക്ടർക്കെതിരേ നടപടിയെടുത്തില്ല. ഇതു നിയമവിരുദ്ധമെന്നു ചൂണ്ടിക്കാട്ടിയാണ് മുഖ്യമന്ത്രിക്കു പരാതി നൽകിയത്.

ക്രെഡായ് പ്രോപ്പർട്ടി എക്സ്പോ ഓഗസ്റ്റ് രണ്ടുമുതൽ

തൃശൂർ: തൃശൂരിലെ ബിൽഡർമാർ ഒന്നിക്കുന്ന ക്രെഡായ് പ്രോപ്പർട്ടി എക്സ്പോ ഓഗസ്റ്റ് രണ്ട്, മൂന്ന് തീയതികളിൽ ശ്രീങ്കര ഹാളിൽ നടക്കും. വിവിധ ബിൽഡർമാരുടെയും സ്റ്റേറ്റ് ബാങ്ക് ഓഫ് ഇന്ത്യ, യൂണിയൻ ബാങ്ക് ഓഫ് ഇന്ത്യ എന്നിവയുടെ സ്റ്റാളുകളും ഭവനവായ്പ സംബന്ധിച്ച ഉപഭോക്താക്കൾക്കു സംശയനിവാരണത്തിനുള്ള സംവിധാനവുമുണ്ടാകും. കേരള റിയൽ എസ്റ്റേറ്റ് റെഗുലേറ്ററി അഥോറിറ്റിയുടെയും മറ്റ് അനുബന്ധ സർക്കാർ സ്ഥാപനങ്ങളുടെയും കെട്ടിടനിർമാണ നിബന്ധനകൾ പാലിച്ചുകൊണ്ടുള്ള പ്രോജക്ടുകൾ മാത്രമായിരിക്കും എക്സ്പോയിലുണ്ടാകുക. രാവിലെ 10 മുതൽ വൈകീട്ട് എട്ടുവരെയാണു പ്രദർശനം. പ്രവേശനം സൗജന്യം.

പോർസ്യുങ്കുല പൂർണദണ്ഡവിമോചനദിനം എലിഞ്ഞിപ്ര പള്ളിയിൽ രണ്ടിന്

ചാലക്കുടി: വിശുദ്ധ ഫ്രാൻസീസ് അസീസിയുടെ നാമേധയത്തിലുള്ള ഇരിങ്ങാലക്കുട രൂപതയിലെ ഏക ഇടവകദേവാലയമായ എലിഞ്ഞിപ്ര സെന്‍റ് ഫ്രാൻസിസ് അസീസി ദേവാലയത്തിൽ പോർസ്യുങ്കുല പൂർണദണ്ഡവിമോചന ദിനം ഓഗസ്റ്റ് രണ്ടിന് ആചരിക്കും. പൂർണദണ്ഡവിമോചനശുശ്രൂഷകൾക്കും ദിവ്യബലിക്കും വൈകീട്ട് ആറിന് സീറോമലബാർസഭ മേജർ ആർച്ച്ബിഷപ് മാർ റാഫേൽ തട്ടിലും രാവിലെ എട്ടിന് ഇരിങ്ങാലക്കുട ബിഷപ് മാർ പോളി കണ്ണൂക്കാടനും മുഖ്യകാർമികത്വം വഹിക്കും. രാവിലെ ആറിന് സമൂഹബലി, വിശുദ്ധ ഫ്രാൻസീസ് അസിസിയുടെ തിരുശേഷിപ്പ് പ്രതിഷ്ഠ എന്നീ തിരുക്കർമങ്ങൾക്ക് സെന്‍റ് തോമസ് കപ്പൂച്ചിൻ പ്രോവിൻസ് പ്രൊവിൻഷ്യൽ ഫാ. ജെയ്സൻ കാളൻ കാർമികത്വം വഹിക്കും. രാവിലെ ആറുമുതൽ രാത്രി 10 വരെ ദിവ്യകാരുണ്യ ആരാധന, കുമ്പസാരം, തിരുശേഷിപ്പ് വണക്കം, ഫ്രാൻസിസ്കൻ എക്സിബിഷൻ, നേർച്ചക്കഞ്ഞി എന്നിവ ഉണ്ടായിരിക്കും. വികാരി ഫാ. ജെയ്ൻ തെക്കേക്കുന്നേൽ, ജനറൽ കൺവീനർ അനൂപ് വർഗീസ് ചൊവ്വരക്കാരൻ, ട്രസ്റ്റി ഡേവിസ് കിഴക്കൂടൻ, ഷാജു വല്ലത്തുകാരൻ എന്നിവർ പത്രസമ്മേളനത്തിൽ പങ്കെടുത്തു.

ജീവകാരുണ്യപ്രവർത്തനങ്ങൾക്കു ഫണ്ട് സ്വരൂപിക്കാൻ ഭക്ഷ്യമേള

ചാലക്കുടി: കാർമൽ അക്കാദമിയിലെ ഹൈസ്കൂൾ വിഭാഗം വിദ്യാർഥികൾ ജീവകാരുണ്യ പ്രവർത്തനങ്ങൾക്കാവശ്യമായ തുക സമാഹരിക്കുന്നതിനായി കാർമൽ ഫെയർ എന്ന പേരിൽ ഭക്ഷ്യമേള സംഘടിപ്പിച്ചു. മേള സ്കൂൾ മാനേജർ ഫാ. അനൂപ് ആന്‍റോ പുതുശേരി ഉദ്ഘാടനം ചെയ്തു. സ്കൂൾ ഫിനാൻസ് അഡ്മിനിസ്ട്രേറ്റർ ഫാ. ജെയിംസ് ഷെൽബി ആലപ്പാട്ട് പ്രസംഗിച്ചു. കുട്ടികൾ പാകം ചെയ്തുകൊണ്ടുവന്ന വിവിധതരം ലഘുഭക്ഷണസാധനങ്ങൾ, നാടൻ ഭക്ഷ്യവിഭവങ്ങൾ, മധുരപലഹാരങ്ങൾ, ശീതളപാനീയങ്ങൾ, വൈവിധ്യമാർന്ന കേക്കുകൾ, വിദേശരുചിക്കൂട്ടുകൾ തുടങ്ങി നൂറിൽപരം വിഭവങ്ങളാണ് വിവിധ കൗണ്ടറുകളിലായി നിരന്നത്. എല്ലാ ഭക്ഷണസാധനങ്ങൾക്കും 10 രൂപ മാത്രമാണ് ഈടാക്കിയത്. ഭക്ഷ്യമേളയിൽനിന്നും സ്വരൂപിച്ച തുക കാരുണ്യപ്രവർത്തികൾക്കായി ഉപയോഗിക്കും. ഭക്ഷ്യമേളയോടൊപ്പം കുട്ടികൾക്കായി വൈവിധ്യമാർന്ന ഗെയിമുകളും കലാപരിപാടികളും നടത്തി.

ക്രൈസ്റ്റ് കോളജില്‍ ബിരുദദാനം നടത്തി

ഇരിങ്ങാലക്കുട: ക്രൈസ്റ്റ് കോളജില്‍ ബിരുദാനന്തര ബിരുദ വിദ്യാര്‍ത്ഥികളുടെയും ഗവേഷക വിദ്യാര്‍ഥികളുടെയും ബിരുദദാന ചടങ്ങ് സംഘടിപ്പിച്ചു. 2023-25 കാലയളവില്‍ പിജി പഠനം പൂര്‍ത്തിയാക്കിയ 210 വിദ്യാര്‍ഥികളുടെയും 2024-25 വര്‍ഷത്തില്‍ ഗവേഷണം പൂര്‍ത്തിയാക്കിയ 12 ഗവേഷക വിദ്യാര്‍ഥികളുടെയും ബിരുദദാന ചടങ്ങാണ് സംഘടിപ്പിച്ചത്. കോളജ് മാനേജര്‍ ഫാ. ജോയ് പീണിക്കപ്പറമ്പില്‍ അധ്യക്ഷത വഹിച്ചു. കേരള കലാമണ്ഡലം മുന്‍ വൈസ് ചാന്‍സലര്‍ ഡോ. ടി.കെ. നാരായണന്‍ ബിരുദദാനം നിര്‍വഹിച്ചു. സിഎംഐ ദേവമാതാ പ്രൊവിന്‍സ് വിദ്യാഭ്യാസ കൗണ്‍സിലര്‍ റവ.ഡോ. സന്തോഷ് മുണ്ടന്‍മാണി അനുഗ്രഹപ്രഭാഷണം നടത്തി. എക്‌സാമിനേഷന്‍ കണ്‍ട്രോളര്‍ ഡോ. ടോം ചെറിയാന്‍ വിദ്യാര്‍ഥികള്‍ക്ക് പ്രതിജ്ഞാവാചകം ചൊല്ലിക്കൊടുത്തു. പ്രിന്‍സിപ്പൽ റവ.ഡോ. ജോളി ആന്‍ഡ്രൂസ്, കോളജ് വൈസ് പ്രിന്‍സിപ്പല്‍ ഡോ. സേവ്യര്‍ ജോസഫ്, സെല്‍ഫ് ഫിനാന്‍സിംഗ് വിഭാഗം ഡയറക്ടര്‍ ഫാ. ഡോ. വില്‍സണ്‍ തറയില്‍, ജനറല്‍ കണ്‍വീനര്‍ ഡോ. കെ.ജെ. വര്‍ഗീസ് എന്നിവര്‍ പ്രസംഗിച്ചു.

സെന്‍റ് അലോഷ്യസ് കോളജിൽ ശാസ്ത്രമേള നടത്തി

തൃശൂർ: സെന്‍റ് അലോഷ്യസ് കോളേജ് ബോട്ടണി ആൻഡ് കന്പ്യൂട്ടേഷണൽ ബയോളജി ഡിപ്പാർട്ട്മെന്‍റ് സ്കൂൾ കുട്ടികൾക്കായി ബയോരിതം ശാസ്ത്രമേള സംഘടിപ്പിച്ചു. കന്പ്യൂട്ടേഷണൽ ബയോളജി ബോട്ടണിയിൽ എന്ന വിഷയം പരിചയപ്പെടുത്തുന്നതിനു നടത്തിയ മേളയിൽ നൂതനസാങ്കേതികവിദ്യകൾ എങ്ങനെ ശാസ്ത്രവിഷയങ്ങളിൽ പ്രാവർത്തികമാക്കാം എന്നതിനെ ആസ്പദമാക്കിയാണ് പ്രദർശനം നടത്തിയത്. മാനേജർ ഫാ. തോമസ് ചക്രമാക്കിൽ ക്യൂആർ കോഡ് സ്കാൻ ചെയ്ത് ഉദ്ഘാടനം ചെയ്തു. പ്രിൻസിപ്പൽ ഡോ. ഇ.ഡി. ഡയസ്, കോളജ് അഡ്മിനിസ്ട്രേറ്റർ ഫാ. അരുണ്‍ ജോസ്, വകുപ്പുതലമേധാവി ഡോ. മനു ഫിലിപ്പ്, സ്റ്റാഫ് കോഓർഡിനേറ്റർ ഡോ. കെ.എസ്. ഷൗമി, സ്റ്റുഡന്‍റ് കോഓർഡിനേറ്റർ അനന്യ ബിജു എന്നിവർ പ്രസംഗിച്ചു.

വിശുദ്ധ ഇഗ്നേഷ്യസ് ലയോള അനുസ്മരണം നടത്തി

തൃശൂർ: സിഎൽസിയുടെ ആധ്യാത്മിക ആചാര്യനായ വിശുദ്ധ ഇഗ്നേഷ്യസ് ലയോളയുടെ അതിരൂപതാതല അനുസ്മരണം പഴുവിൽ ഫൊറോനയുടെ ആതിഥേയത്വത്തിൽ ചെവ്വൂർ സെന്‍റ് ഫ്രാൻസിസ് സേവ്യേഴ്സ് ദേവാലയത്തിൽ നടന്നു. ആർച്ച്ബിഷപ് മാർ ആൻഡ്രൂസ് താഴത്ത് ഉദ്ഘാടനംചെയ്തു. അതിരൂപത പ്രസിഡന്‍റ് ജെറിൻ ജോസ് അധ്യക്ഷത വഹിച്ചു. വിവിധ ഇടവകകളിലെ എണ്ണൂറോളം യുവജനങ്ങൾ പങ്കെടുത്തു. കഴിഞ്ഞ ഒരുവർഷക്കാലയളവിൽ ഗവൺമെന്‍റ് ജോലി നേടിയവരെയും മതബോധനത്തിൽ അതിരൂപതാതലത്തിൽ റാങ്ക് നേടിയവരെയും യുജി, പിജി റാങ്ക് ജേതാക്കളെയും എസ്എസ്എൽസി, പ്ലസ് ടു പൊതുപരീക്ഷകളിൽ ഫുൾ എ പ്ലസ് നേടിയവരെയും ആദരിച്ചു. പഴുവിൽ ഫൊറോന പ്രമോട്ടർ ഫാ. ജിയോ പള്ളിപ്പുറത്തുകാരൻ പതാക ഉയർത്തി. തുടർന്നു മരിയൻ റാലി ഉണ്ടായിരുന്നു. തൃശൂർ അതിരൂപത സിഎൽസി മരിയോത്സവം, സോക്കർ കപ്പ് എന്നിവയുടെ ലോഗോ പ്രകാശനവും നടന്നു. അടുത്ത വർഷത്തെ വിശുദ്ധ ഇഗ്നേഷ്യസ് ലയോള അനുസ്മരണപതാക ലൂർദ് ഫൊറോന സിഎൽസി ഏറ്റുവാങ്ങി. തൃശൂർ അതിരൂപത സിഎൽസി പ്രമോട്ടർ ഫാ. ഫ്രജോ വാഴപ്പിള്ളി, ചെവ്വൂർ ഇടവകവികാരി ഫാ. പോളി നീലങ്കാവിൽ, അതിരൂപത സിഎൽസി അസിസ്റ്റന്‍റ് ഡയറക്ടർ ഫാ. സന്തോഷ്‌ അന്തിക്കാട്, അതിരൂപത സിഎൽസി സെക്രട്ടറി ഗ്ലോറിൻ ജോയ്, വൈസ് പ്രസിഡന്‍റ് മീട്ടു മനോജ്‌, കൺവീനർ അജിൻ ജോസ്, സീനിയർ സിഎൽസി സെക്രട്ടറി ഡെന്നസ് പല്ലിശേരി, ചെവ്വൂർ സിഎൽസി പ്രസിഡന്‍റ് സെബിൻ ഡെയ്സൺ, കൈക്കാരപ്രതിനിധി ജേക്കബ് എലുവത്തിങ്കൽ എന്നിവർ സന്നിഹിതരായിരുന്നു. കലാപരിപാടികളുമുണ്ടായിരുന്നു.

ആശുപത്രിയിലേക്കുപോയ വയോധിക ബസിൽ കുഴഞ്ഞുവീണുമരിച്ചു

ചേർപ്പ്: തൃശൂർ മെഡിക്കൽ കോളജ് ആശുപത്രിയിലേക്ക് സഹോദരിക്കൊപ്പം പോകവേ വയോധിക ബസിൽ കുഴഞ്ഞുവീണ് മരിച്ചു. ഹെർബർട്ട് കനാൽ മുരിങ്ങത്ത് കൊച്ചമ്മണി(60) ആണ് മരിച്ചത്. ഇന്നലെ രാവിലെ ഹെർബർട്ട് കനാലിൽനിന്നു തൃശൂരിലേക്ക് പോകുന്ന വഴി ചൊവ്വൂരിൽ വച്ചാണ് സംഭവം. ഇവരെ ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം നടത്തി.

കാറിടിച്ച് കാൽനടയാത്രികൻ മരിച്ചു

മണ്ണുത്തി: ദേശീയ പാത ആറാംകല്ലിൽ റോഡ് മുറിച്ചുകടക്കുകയായിരുന്ന കാൽനടയാത്രക്കാരൻ വാഹനമിടിച്ച് മരിച്ചു. മുളയത്ത് വാടകയ്ക്ക് താമസിക്കുന്ന തിരുവനന്തപുരം സ്വദേശി മേലക്കുള വീട്ടിൽ ഷാജികുമാർ(49) ആണ് മരിച്ചത്. പാലക്കാട് ദിശയിലേക്ക് പോകുന്ന വാഹനമാണ് ഇടിച്ചത്. അപകടത്തെ തുടർന്ന് വാഹനം നിർത്താതെ പോയി. ചൊവ്വാഴ്ച രാത്രിയായിരുന്നു സംഭവം. മണ്ണുത്തി പോലീസ് മേൽനടപടികൾ സ്വീകരിച്ചു.

കന്യാസ്ത്രീകളുടെ അറസ്റ്റ്; ഭരണഘടനാവിരുദ്ധം, മനുഷ്യാവകാശലംഘനം

കൊടുങ്ങല്ലൂർ: കന്യാസ്ത്രീകളുടെ അറസ്റ്റിലും ക്രൈസ്തവപീഡനത്തിനുമെതിരേ ചെട്ടിക്കാട് തീർഥാടന കേന്ദ്രത്തിന്‍റെ നേതൃത്വത്തിൽ പ്രതിഷേധപ്രകടനം നടത്തി. അറസ്റ്റും വർധിച്ചുവരുന്ന ക്രൈസ്തവ പീഡനളും ഭാരതത്തിന്‍റെ മതേതര ദർശനങ്ങൾക്കേറ്റ മുറിവും മനുഷ്യാവകാശ ലംഘനവുമാണെന്ന് പ്രതിഷേധം ഉദ്ഘാടനം ചെയ്തു കൊണ്ട് തീർഥാടനകേന്ദ്രം റെക്ടർ റവ.ഡോ. ബെന്നി വാഴക്കൂട്ടത്തിൽ പറഞ്ഞു. കറുത്ത തുണികൊണ്ട് വാമൂടികെട്ടി ഇടവക ജനങ്ങൾ ഒന്നാകെ പ്രതിഷേധത്തിൽ പങ്കെടുത്തു. ഫാ. അജയ് ആന്‍റണി പുത്തൻപറമ്പിൽ, സിസ്റ്റർ ജൂബി എന്നിവർ സംസാരിച്ചു. ഇരിങ്ങാലക്കുട: ഛത്തീസ്ഗഡില്‍ സിസ്റ്റര്‍ പ്രീതി മേരി, സിസ്റ്റര്‍ വന്ദന ഫ്രാന്‍സിസ് എന്നിവരെ കള്ളക്കേസില്‍ കുടുക്കി അറസ്റ്റ് ചെയ്തതില്‍ ഇരിങ്ങാലക്കുട രൂപത ന്യൂനപക്ഷ അവകാശസമിതി പ്രതിഷേധം രേഖപ്പെടുത്തി. അറസ്റ്റുചെയ്ത നടപടി ഭരണഘടനാവിരുദ്ധവും മനുഷ്യാവകാശ ലംഘനവുമാണ്. ഇതിന് കൂട്ടുനിന്ന സര്‍ക്കാര്‍ ഉദ്യോഗസ്ഥരെ ശിക്ഷിക്കണമെന്നും ഇരിങ്ങാലക്കുട രൂപത ന്യൂനപക്ഷ അവകാശസമിതി യോഗം ആവശ്യപ്പെട്ടു. രൂപത വികാരി ജനറാള്‍ മോണ്‍. വില്‍സണ്‍ ഈരത്തറ, ഡയറക്ടര്‍ ഫാ. ജിജോ വാകപ്പറമ്പില്‍, അസിസ്റ്റന്‍റ് ഡയറക്ടര്‍ ഫാ. ജിബിന്‍ നായത്തോടന്‍, അഡ്വ.ഇ.ടി തോമസ് തുടങ്ങിയവര്‍ സംസാരിച്ചു. ഇരിങ്ങാലക്കുട: ഛത്തീസ്ഗഡില്‍ മലയാളി കന്യാസ്ത്രീകളെ ജയിലിലടച്ചതില്‍ ഇരിങ്ങാലക്കുട രൂപത കുടുംബക്കൂട്ടായ്മ കേന്ദ്രസമിതിയുടെ നേതൃത്വത്തില്‍ പ്രതിഷേധം സംഘടിപ്പിച്ചു. രൂപത ഡയറക്ടര്‍ ഫാ. ഫ്രീജോ പാറയ്ക്കല്‍, രൂപത പ്രസിഡന്‍റ് ജോഷി പുത്തിരിക്കല്‍, ജനറല്‍ സെക്രട്ടറി ജോജി പടിഞ്ഞാക്കര, ട്രഷറര്‍ പി.വി. ജോയ്, വൈസ് പ്രസിഡന്‍റുമാരായ സോജന്‍ മേനാച്ചേരി, ജിസ്മി റിന്‍റോ, ജോയിന്‍റ് സെക്രട്ടറിമാരായ എ.ജെ. തോംസണ്‍, വത്സ ഡേവിസ്, ഇരിങ്ങാലക്കുട ഫെറോന പ്രസിഡന്‍റ് ജിക്സന്‍ നാട്ടേക്കാടന്‍, പറപ്പൂക്കര ഫൊറോന പ്രസിഡന്‍റ് ജോണ്‍സണ്‍ എലവത്തുക്കാരന്‍, ചാലക്കുടി ഫൊറോന പ്രസിഡന്‍റ് ജിയോ അരിക്കാട്ട്, എടത്തിരിത്തി ഫൊറോന പ്രസിഡന്‍റ് ജോണ്‍ വെള്ളാനിക്കാരന്‍, അമ്പഴക്കാട് ഫൊറോന പ്രസിഡന്‍റ് ജോളി വടക്കന്‍, കൊടകര ഫൊറോന പ്രസിഡന്‍റ് സിന്‍റോ ചേറു എന്നിവര്‍ പങ്കെടുത്തു. ഇരിങ്ങാലക്കുട: ഛത്തീസ്ഗഡില്‍ കന്യാസ്ത്രീകള്‍ക്കെതിരേ കേസെടുത്ത് അറസ്റ്റ് ചെയ്ത് ജയിലിലടച്ചതില്‍ പ്രതിഷേധിച്ച് കോണ്‍ഗ്രസ് ഇരിങ്ങാലക്കുട ബ്ലോക്ക് കമ്മിറ്റിയുടെ നേതൃത്വത്തില്‍ പ്രതിഷേധപ്രകടനം നടത്തി. ബ്ലോക്ക് കോണ്‍ഗ്രസ് പ്രസിഡന്‍റ് സോമന്‍ ചിറ്റേത്തിന്‍റെ നേതൃത്വത്തില്‍നടന്ന പ്രതിഷേധപ്രകടനം ഡിസിസി ജനറല്‍സെക്രട്ടറി ആന്‍റോ പെരുമ്പിള്ളി ഉദ്ഘാടനംചെയ്തു. മുന്‍ ബ്ലോക്ക് പ്രസിഡന്‍റ് ടി.വി. ചാര്‍ളി, ബ്ലോക്ക് സെക്രട്ടറിമാരായ വി.സി. വര്‍ഗീസ്, സതീഷ് പുളിയത്ത്, മണ്ഡലം കോണ്‍ഗ്രസ് പ്രസിഡന്‍റ് അബ്ദുള്‍ഹഖ്, യൂത്ത് കോണ്‍ഗ്രസ് നിയോജകമണ്ഡലം പ്രസിഡന്‍റ് സനല്‍ കല്ലൂക്കാരന്‍ എന്നിവര്‍ അഭിവാദ്യങ്ങള്‍ അര്‍പ്പിച്ചു. ഇരിങ്ങാലക്കുട: ഛത്തീസ്ഗഡില്‍ മലയാളികളായ കന്യാസ്ത്രീകള്‍ക്കെതിരേനടന്ന അറസ്റ്റില്‍ രൂപത മാതൃവേദി ശക്തമായ പ്രതിഷേധംരേഖപ്പെടുത്തി. ഭരണഘടന വിഭാവനം നല്‍കുന്ന ന്യൂനപക്ഷ അവകാശങ്ങള്‍ക്ക് നേരെയുള്ള കടന്നുകയറ്റമാണെന്നു രൂപത മാതൃവേദി വിലയിരുത്തി. മാതൃവേദി രൂപത ഡയറക്ടര്‍ ഫാ. ആന്‍റോ കരിപ്പായി, രൂപത പ്രസിഡന്‍റ് സിനി ഡേവിസ് കാവുങ്ങല്‍, കല്ലേറ്റുംകര വികാരി ഫാ. സെബാസ്റ്റ്യന്‍ പഞ്ഞിക്കാരന്‍, അസിസ്റ്റന്റ് വികാരി ഫാ. ജിതിന്‍, മാതൃവേദി സെക്രട്ടറി സെലിന്‍ ജെയ്‌സന്‍ എന്നിവര്‍ സംസാരിച്ചു. ചാലക്കുടി: ഛത്തീസ്ഗഡിലെ കന്യാസ്ത്രീ ആക്രമണത്തിനും കള്ളക്കേസ് എടുത്തതിനുമെതിരേ കേരള കോൺഗ്രസ്-എം നിയോജകമണ്ഡലംകമ്മിറ്റിയുടെ നേതൃത്വത്തിൽ സൗത്ത് ജംഗ്ഷനിൽ പ്രതിഷേധദീപം തെളിയിച്ചു. നിയോജകമണ്ഡലം പ്രസിഡന്‍റ് പോളി ഡേവിസ് നേതൃത്വംനൽകി. വി.ജെ. ജോജി, ഡെന്നീസ് കെ. ആന്‍റണി, ജിമ്മി വർഗീസ് എന്നിവർ പ്രസംഗിച്ചു.

നന്മ ചാരിറ്റി ഡ്രൈവ് 2025

കൊടകര: സഹൃദയ ഇന്‍സ്റ്റിറ്റ്യൂട്ട് ഓഫ് മാനേജ്‌മെന്‍റ് സ്റ്റഡീസില്‍ നന്മ ചാരിറ്റി ഡ്രൈവ് 2025 എന്ന പേരില്‍ സാമൂഹികസേവന പരിപാടി സംഘടിപ്പിച്ചു. ഇതിന്‍റെ ഭാഗമായി രക്തദാനം, വസ്ത്രശേഖരണം തുടങ്ങിയ പ്രവര്‍ത്തനങ്ങള്‍നടത്തി. സിംസ് എക്‌സിക്യൂട്ടീവ് ഡയറക്ടര്‍ റവ.ഡോ. ജിനോ ജോണി മാളക്കാരന്‍ ഉദ്ഘാടനം നിര്‍വഹിച്ചു. ഡയറക്ടര്‍ ഡോ. ധന്യ അലക്‌സ്, ജീവനസമൃദ്ധിയുടെ പ്രൊജക്ട് മാനേജര്‍ വിനോദ്കുമാര്‍ എന്നിവര്‍ പ്രസംഗിച്ചു. ചാലക്കുടി സെന്‍റ് ജെയിംസ് ഹോസ്പിറ്റല്‍ ജൂണിയര്‍ റസിഡന്‍റ് ഡോ. ആഗ്‌നല്‍ ബോധവല്‍കരണ ക്ലാസ് നയിച്ചു. വിദ്യാര്‍ഥികളും അധ്യാപകരും രക്തദാനംനടത്തി. ചാലക്കുടി സെന്‍റ് ജെയിംസ് ഹോസ്പിറ്റല്‍, ജീവനസമൃദ്ധി കൊച്ചി എന്നിവയുമായി സഹകരിച്ചാണ് സഹൃദയ ഇന്‍സ്റ്റിറ്റ്യൂട്ട് ചാരിറ്റി ഡ്രൈവ് സംഘടിപ്പിച്ചത്. നന്മ അധ്യാപക കോ-ഓർഡിനേറ്റര്‍ ജോസഫ് ബാസ്റ്റ്യന്‍, സ്റ്റുഡന്‍റ് കോ-ഓര്‍ഡിനേറ്റര്‍മാരായ ബദ്രിനാഥ്, ബര്‍ണാഡ് എന്നിവര്‍ നേതൃത്വംനല്‍കി.

ഠാണാ - ചന്തക്കുന്ന് ജംഗ്ഷന്‍; പ്രാരംഭപ്രവൃത്തികള്‍ ആരംഭിച്ചു

ഇരിങ്ങാലക്കുട: ഏറെനാളായി മുടങ്ങിക്കിടന്നിരുന്ന ഠാണാ - ചന്തക്കുന്ന് ജംഗ്ഷന്‍ വികസനപ്രവൃത്തികളുടെ പ്രാരംഭ നടപടികള്‍ ആരംഭിച്ചു. ഇന്നലെ രാവിലെ പൂതംകുളം ജംഗ്ഷനു സമീപം ഠാണാ ജംഗ്ഷനിലേക്കുള്ള റോഡിന്‍റെ കിഴക്കുവശം ജെസിബി ഉപയോഗിച്ച് നിരപ്പാക്കി. പൂതംകുളം മുതല്‍ ഠാണാ ജംഗ്ഷനില്‍നിന്നു കിഴക്കുവശം ആശുപത്രി കവാടംവരെയുള്ള ഭാഗത്തെ കാനയും ഫുട്പാത്തും നിര്‍മിക്കുന്നതിനുള്ള അലൈമെന്‍റ് മാര്‍ക്ക് ചെയ്തു. ഠാണാ ജംഗ്ഷനില്‍നിന്നു ആശുപത്രി ജംഗ്ഷന്‍ വരെയുള്ള 100 മീറ്റര്‍ ദൂരം പൊതുമരാമത്ത്വകുപ്പിന്‍റെ കീഴിലാണ് പ്രവര്‍ത്തികള്‍. പുതുക്കിയ എസ്റ്റിമേറ്റിന് അനുമതി ലഭ്യമായതോടെയാണ് നിര്‍മാണ പ്രവ‌ൃത്തികള്‍ ആരംഭിക്കുന്നത്. നേരത്തെ യൂട്ടിലിറ്റി ഷിഫ്റ്റിംഗിനുള്ള അനുമതിയും ലഭ്യമായിരുന്നു. കഴിഞ്ഞദിവസം കെഎസ്ടിപി, പൊതുമരാമത്ത്, കെഎസ്ഇബി, ബിഎസ്എന്‍എല്‍ എന്നിവടങ്ങളില്‍നിന്നുള്ള ഉദ്യോഗസ്ഥര്‍ സ്ഥലം സന്ദര്‍ശിച്ച് ആക്ഷന്‍ പ്ലാന്‍ തയാറാക്കിയിരുന്നു. കൊടുങ്ങല്ലൂര്‍ - തൃശൂര്‍ സംസ്ഥാനപാത രണ്ടുവരിയിലാണ് നിലവില്‍ കോണ്‍ക്രീറ്റിടുന്നതെങ്കിലും പൂതംകുളം മുതല്‍ ചന്തക്കുന്ന് സെന്‍റ് ജോസഫ്സ് കോളജ് ഇറക്കംവരെയുള്ള ഭാഗത്ത് 17 മീറ്റര്‍ വീതിയില്‍ നാലുവരിയായിട്ടാണ് റോഡ് നിശ്ചയിച്ചിരിക്കുന്നത്. 1 4 മീറ്റര്‍ വീതിയില്‍ കോണ്‍ക്രീറ്റ് റോഡ് നിര്‍മിക്കും. നിര്‍മാണപ്രവൃത്തികള്‍ക്കായി 11 കോടി രൂപ ചെലവുവരും. സ്ഥലമേറ്റെടുക്കല്‍ പൂര്‍ത്തിയായിട്ടുണ്ടെങ്കിലും നാലുവരിയില്‍ റോഡ് നിര്‍മാണത്തിന് കൂടുതല്‍ ചെലവ് വരുമെന്നുള്ളതിനാല്‍ കെഎസ്ടിപി പുതിയ പദ്ധതി സര്‍ക്കാരിനും ബാങ്കിനും സമര്‍പ്പിക്കുകയായിരുന്നു. ഈ പദ്ധതി അംഗീകരിച്ചാണ് ജര്‍മന്‍ ബാങ്ക് അനുമതി നല്‍കിയിരിക്കുന്നത്. ഠാണാ - ചന്തക്കുന്ന് റോഡില്‍ യൂട്ടിലിറ്റി പ്രവര്‍ത്തികളാണ് ഇപ്പോള്‍ നടക്കുന്നത്. ഇതിന്‍റെ ഭാഗമായി കാനനിര്‍മാണം, ഫുട്പാത്ത് നിര്‍മാണം, വൈദ്യുതകാലുകളും മറ്റും നീക്കംചെയ്യല്‍ എന്നിവ നടക്കും. കരുവന്നൂര്‍ ഭാഗത്തെ റോഡിന്‍റെ കോണ്‍ക്രീറ്റിംഗ് പൂര്‍ത്തിയാകുന്നോടെ ജില്ലാ ഭരണകൂടവുമായി ആലോചിച്ച ശേഷമേ ഠാണാവില്‍ കോണ്‍ക്രീറ്റിംഗ് നടക്കുക.

വെള്ളിക്കുളങ്ങര - ചൊക്കന റോഡരിക് ഇടിഞ്ഞു

വെള്ളിക്കുളങ്ങര: മലയോരത്തെ ചൊക്കന, നായാട്ടുകുണ്ട് പ്രദേശങ്ങളേയും കാരിക്കടവ് ആദിവാസി ഉന്നതിയെയും പുറംലോകവുമായി ബന്ധിപ്പിക്കുന്ന വെള്ളിക്കുളങ്ങര - ചൊക്കന റോഡില്‍ മണ്ണിടിഞ്ഞത് അപകടഭീഷണിയായി. പത്തരക്കുണ്ട് ഭാഗത്താണ് റോഡിന്‍റെ ഒരുവശത്തുനിന്ന് മണ്ണിടിഞ്ഞു വലിയ ഗര്‍ത്തം രൂപപ്പെട്ടത്. ഈ ഭാഗത്ത് റോഡിന്‍റെ ഒരുവശത്ത് താഴ്ചയായതിനാല്‍ അപകട സാധ്യത കൂടുതലാണ്. ഇടിഞ്ഞഭാഗത്ത് കല്ലുകളും മരക്കൊമ്പുകളുംനാട്ടി അപകട മുന്നറിയിപ്പ് ഒരുക്കിയിട്ടുണ്ടെങ്കിലും ഇതുവഴി കടന്നുപോകുന്ന വാഹനങ്ങള്‍ അപകടത്തില്‍പെടാന്‍ സാധ്യതയുണ്ടെന്ന് നാട്ടുകാര്‍പറയുന്നു. സ്വകാര്യ ബസുകളടക്കം നിരവധി വാഹനങ്ങള്‍ ദിനംപ്രതി കടന്നുപോകുന്ന റോഡാണിത്. വരന്തരപ്പിള്ളി, മറ്റത്തൂര്‍ പഞ്ചായത്തുകളെ ബന്ധിപ്പിക്കുന്ന പാലപ്പിള്ളി-വെള്ളിക്കുളങ്ങര റോഡിന്‍റെ ഭാഗമാണ് ചൊക്കന - വെള്ളിക്കുളങ്ങര റോഡ്. നിര്‍ദിഷ്ട മലയോര ഹൈവേ നിര്‍മിക്കാനിരിക്കുന്നതും ഇതവഴിയാണ്. എത്രയും വേഗം റോഡില്‍ മണ്ണിടിച്ചിലുണ്ടായ രണ്ടിടങ്ങളിലും മതിയായ സുരക്ഷാസംവിധാനം ഒരുക്കണമെന്നാണ് ആവശ്യമുയരുന്നത്.

എംഎൽഎ വനംമന്ത്രിക്കു കത്തുനൽകി; നിരീക്ഷണ കാമറകൾ സ്ഥാപിച്ചു

വടക്കാഞ്ചേരി: മച്ചാട് ഫോറസ്റ്റ് റേഞ്ചിൽ അകമല കുഴിയോട് പ്രദേശത്ത് കടുവയുടെ കാല്പാടുകൾ കണ്ടതായി വിവരം ലഭിച്ചതിനെത്തുടർന്ന് അടിയന്തര നടപടികൾ സ്വീകരിക്കണമെന്നാവശ്യപ്പെട്ട് വനംമന്ത്രിക്ക് കത്ത് നൽകിയതായി സേവ്യർ ചിറ്റിലപ്പിള്ളി എംഎൽഎ അറിയിച്ചു. ഏറെക്കാലമായി കാട്ടാനശല്യം നേരിടുന്ന ഈ പ്രദേശങ്ങളിൽ കടുവയുടെ സാന്നിധ്യംകൂടി സംശയിക്കുന്നതോടെ പ്രദേശവാസികൾ ആശങ്കയിലാണ്. ഈ പ്രശ്നം എംഎൽഎ വനം മന്ത്രി എ.കെ. ശശീന്ദ്രന്‍റെ ശ്രദ്ധയിൽപ്പെടുത്തി. ഡിഎഫ്ഒ ഉൾപ്പടെയുള്ള വനംവകുപ്പ് അധികൃതരോടുസംസാരിച്ച് സത്വരനടപടികൾ സ്വീകരിക്കാൻ മന്ത്രി നിർദേശം നൽകി. കടുവയുടെ സാന്നിധ്യം സംശയിക്കുന്ന പ്രദേശങ്ങളിൽ നിരീക്ഷണത്തിന് അടിയന്തരമായി നിരീക്ഷണ കാമറകൾ സ്ഥാപിക്കാൻ ആവശ്യപ്പെട്ടു. ഉച്ചതിരിഞ്ഞ് വനംവകുപ്പ് അധികൃതർ നിരീക്ഷണ കാമറകൾ സ്ഥാപിച്ചു.

വൻമരം മുറിച്ചുമാറ്റണം

പഴയന്നൂർ: വെള്ളാർക്കുളം ജംഗ്ഷനിൽ അപകടം പതിയിരിക്കുന്ന വൻ വാകമരം മുറിച്ചുമാറ്റണമെന്ന് നാട്ടുകാരും കച്ചവടക്കാരും യാത്രക്കാരും ആവശ്യപ്പെട്ടു. കഴിഞ്ഞ ഹൈവേ പണി നടക്കുമ്പോൾ കുന്ന് ഇടിച്ച് റോഡിന് വീതികൂട്ടിയതിനാൽ ഈ വാകമരത്തിന്‍റെ ചുറ്റുമുണ്ടായിരുന്ന കുന്ന് റോഡ് ലെവലായി. ഇതുമൂലം മരം ഏതുസമയത്തും വീഴാറായിരിക്കുകയാണ്. ധാരാളം കടകളും വീടുകളും ഉള്ള തിരക്കുള്ളപ്രദേശമാണ്. ഈ മരം മറിഞ്ഞാൽ വൻദുരന്തത്തിനു കാരണ മാകും. ആയതുകൊണ്ട് ഈ മരം എത്രയും വേഗം മുറിച്ചുമാറ്റണമെന്ന് നാട്ടുകാരും കച്ചവടക്കാരും യാത്രക്കാരും ആവശ്യപ്പെട്ടു.

മാരാത്തുകുന്ന് റെയിൽവേ മേൽപ്പാലം: ഡ്രോയിംഗ് തയാറാക്കാൻ പച്ചക്കൊടി

വടക്കാഞ്ചേരി: മാരാത്തുകുന്ന് റെയിൽവേ മേൽപ്പാലം; ഡ്രോയിംഗ് തയാറാക്കാൻ റെയിൽവേയുടെ ക്ലിയറൻസ്. "ലെവൽ ക്രോസുകൾ ഇല്ലാത്ത കേരളം' പദ്ധതിയുടെ ഭാഗമായി വടക്കാഞ്ചേരി - കരുമത്ര റോഡിൽ മാരാത്തുകുന്ന് ലെവൽക്രോസ് നമ്പർ ഏഴ് റെയിൽവേ മേൽപ്പാലം നിർമിക്കുന്നതിനു ഡ്രോയിംഗ് തയാറാക്കാൻ കെ-റെയിൽ കോർപറേഷന് ദക്ഷിണ റെയിൽവേയുടെ ക്ലിയറൻസ് ലഭിച്ചതായി സേവ്യർ ചിറ്റിലപ്പിള്ളി എംഎൽഎ അറിയിച്ചു. എറണാകുളം - ഷൊർണൂർ സെക്‌ഷനിൽ റെയിൽവേ പുതുതായി നിർമിക്കാൻ ഉദ്ദേശിക്കുന്ന മൂന്നും നാലും ട്രാക്കുകളുടെ അലൈൻമെന്‍റുമായി ബന്ധപ്പെട്ട് മേൽപ്പാലങ്ങളുടെ രൂപരേഖയ് ക്ക് റെയിൽവേയുടെ അംഗീകാരം വൈകുന്ന സ്ഥിതിയുണ്ടായിരുന്നു. എന്നാൽ നിർദിഷ്ട മാരാത്തുകുന്ന് റെയിൽവേ മേൽപ്പാലത്തിന് പുതിയ ട്രാക്കുകളുമായി ബന്ധപ്പെട്ട ക്ലിയറൻസ് നൽകി ജൂലൈ 23ന് ദക്ഷിണ റെയിൽവേ ഉത്തരവായി. മാരാത്തുകുന്ന് റെയിൽവേ മേൽപ്പാലം നിർമാണത്തിന്‍റെ നിർവഹണ ഏജൻസിയായി സംസ്ഥാന സർക്കാരിന്‍റെയും റെയിൽവേയുടെയും സംയുക്ത സംരംഭമായ കേരള റെയിൽ ഡെവലപ്മെന്‍റ് കോർപറേഷനെ (കെ-റെയിൽ) ചുമതലപ്പെടുത്തി മാർച്ചിൽ സംസ്ഥാന സർക്കാർ ഉത്തരവായിരുന്നു. പദ്ധതി നിർവഹണവുമായി ബന്ധപ്പെട്ട് സംസ്ഥാന സർക്കാരും റെയിൽവേ മന്ത്രാലയവും തമ്മിൽ ധാരണാപത്രം ഒപ്പുവയ് ക്കും. കെ-റെയിൽ കോർപറേഷന്‍റെ നേതൃത്വത്തിൽ മേൽപ്പാലത്തിന്‍റെ ജനറൽ അറേഞ്ച്മെന്‍റ് ഡ്രോയിംഗും എസ്റ്റിമേറ്റും തയാറാക്കാനുള്ള പ്രവൃത്തികൾ പുരോഗമിക്കുകയാണ്. ഇതിന്‍റെ ഭാഗമായി ലെവൽ ക്രോസ് പരിസരത്ത് ഇന്നലെ മണ്ണുപരിശോധന ആരംഭിച്ചു. വടക്കാഞ്ചേരി ബൈപ്പാസിന്‍റെ ഡിപിആർ തയാറാക്കുന്ന കെആർഎഫ്ബിയുമായി കൂടിയാലോചിച്ചാണ് മാരാത്തുകുന്ന് റെയിൽവേ മേൽപ്പാലത്തിന്‍റെ ഡ്രോയിംഗ് തയാറാക്കുന്നത്. ഓട്ടുപാറയിൽനിന്നും മേൽപ്പാലത്തിന്‍റെ അപ്രോച്ച് റോഡ് ആരംഭിക്കുന്ന രീതിയിലാണു പ്രാഥമികപഠനങ്ങൾ പുരോഗമിക്കുന്നത്. ഓട്ടുപാറയിൽ എങ്കക്കാട് - വാഴാനി റോഡ് ജംഗ്ഷൻ, കുന്നംകുളം റോഡ് ജംഗ്ഷനുകളുടെ വികസനത്തിന് രണ്ടു ബജറ്റുകളിലായി മൂന്നുകോടി രൂപ എംഎൽഎ എന്ന നിലയിൽ വകയിരുത്തിയിട്ടുണ്ടെന്നും വിശദമായ ചർച്ചകൾക്കുശേഷം മാത്രമേ അലൈൻമെന്‍റ്് അന്തിമമാക്കുകയുള്ളൂവെന്നും സേവ്യർ ചിറ്റിലപ്പിള്ളി എംഎൽഎ പറഞ്ഞു.

ആയിരം കോടിയുടെ അബുദാബി മോഡൽ മാർക്കറ്റ്

തൃശൂർ: നഗരത്തിന്‍റെ ആധുനികവത്കരണത്തിനു തുടക്കമാകുന്ന വലിയ പദ്ധതിയുമായി തൃശൂർ നഗരസഭ. അബുദാബി മോഡലിൽ തയാറാക്കപ്പെടുന്ന പുതിയ മാർക്കറ്റ് സമുച്ചയത്തിനു തറക്കല്ലിടൽ അധികം വൈകാതെ നടക്കുമെന്നു മേയർ എം.കെ. വർഗീസ് അറിയിച്ചു. ആയിരം കോടിയിലധികം രൂപ ചെലവഴിച്ചാണ് മാർക്കറ്റ് സമുച്ചയം നിർമിക്കപ്പെടുന്നത്. നാലു നിലകളുള്ള കെട്ടിടത്തിൽ ഫിഷ് മാർക്കറ്റ്, പച്ചക്കറി, ഫലവിപണി, പുഷ്പ മാർക്കറ്റ് എന്നിവ സജ്ജമാക്കിയാണ് നവീനമായ രീതിയിൽ രൂപകല്പന ചെയ്തിരിക്കുന്ന മാർക്കറ്റ് ഒരുങ്ങുക. പദ്ധതിയുടെ ഡിപിആർ തയാറാക്കുന്നത് എനാർക്ക് രാമകൃഷ്ണനാണെന്നു മേയർ പറഞ്ഞു. മാസ്റ്റർ പ്ലാൻ പദ്ധതി നടപ്പാക്കുന്നതുമായി ബന്ധപ്പെട്ട പ്രശനങ്ങൾ കോടതിയിൽ സമവായത്തിലേക്ക് എത്തിക്കപ്പെട്ടതിന്‍റെ അടിസ്ഥാനത്തിലാണ് മുന്നേറ്റം. കിഫ്‌ബിയിലൂടെയാണ് പദ്ധതിയുടെ ആദ്യഘട്ടം ആരംഭിക്കുന്നത്. പുതിയ മാർക്കറ്റിന്‍റെ പ്രത്യേകതകൾ: • അകത്തു കയറിയാൽ മാത്രമേ എല്ലാ ഭാഗങ്ങളിലും എത്താൻ കഴിയൂ. • പുറമേനിന്ന് ഒന്നും കാണാൻ കഴിയില്ല. • റോഡിലേക്കിറങ്ങിയ കച്ചവടങ്ങൾക്കു പരിഹാരമാകുന്നു. • ജനങ്ങൾക്കു കൂടുതൽ സൗകര്യങ്ങളും സുരക്ഷയും.

ബിജെപി നിലപാടുകൾ ആർഎസ്എസിന്‍റെ ഇംഗിതത്തിനനുസരിച്ച്: കെ.ജി. ശിവാനന്ദന്‍

തൃശൂര്‍: ആര്‍എസ്എസിന്‍റെ ഇംഗിതം പരിഗണിച്ചാണു ബിജെപിയിലെ നേതാക്കള്‍ നിലപാടുകള്‍ കൈക്കൊള്ളുന്നതെന്നു സിപിഐ ജില്ലാ സെക്രട്ടറി കെ.ജി. ശിവാനന്ദന്‍. ഛത്തീസ്ഗഡില്‍ കന്യാസ്ത്രീകളെ അന്യായമായി തടവിലാക്കിയതിനെതിരേ എഐവൈഎഫ് തൃശൂര്‍ ജില്ലാ കമ്മിറ്റി സംഘടിപ്പിച്ച പ്രതിഷേധം ഉദ്ഘാടനംചെയ്യുകയായിരുന്നു അദ്ദേഹം. ഈ സംഭവത്തില്‍പോലും പ്രതികരിക്കാന്‍ കേന്ദ്രസഹമന്ത്രി സുരേഷ് ഗോപിയും ബിജെപി നേതാക്കളും തയാറാകുന്നില്ല. തെരഞ്ഞെടുപ്പുസമയത്ത് മതന്യൂനപക്ഷങ്ങളുടെ സംരക്ഷണം ഉറപ്പുനല്‍കിയിരുന്ന കേന്ദ്രം ഇപ്പോഴതു മറന്നമട്ടാണ്. 125 എപ്പിസോഡുകള്‍ പിന്നിട്ട പ്രധാനമന്ത്രിയുടെ മന്‍ കി ബാത്തില്‍ മണിപ്പുർ ആക്രമണങ്ങളെക്കുറിച്ച് പറയാതിരുന്നത് പ്രധാനമന്ത്രി ആര്‍എസ്എസിന്‍റെ ശക്തമായ സ്വാധീനത്തിലാണെന്നതിനു തെളിവാണെന്നും അദ്ദേഹം അഭിപ്രായപ്പെട്ടു. എഐവൈഎഫ് ജില്ലാ പ്രസിഡന്‍റ് ബിനോയ് ഷബീര്‍ അധ്യക്ഷത വഹിച്ചു. വി.എസ്. സുനില്‍കുമാര്‍, ജില്ലാ പഞ്ചായത്ത്‌ പ്രസിഡന്‍റ് വി.എസ്. പ്രിന്‍സ്, ടി പ്രദീപ്കുമാര്‍ തുടങ്ങിയവർ പങ്കെടുത്തു.

തൃശൂരിൽനിന്നുള്ള കേന്ദ്രമന്ത്രി പ്രതികരിക്കാത്തത് എന്തുകൊണ്ട്: രാഹുൽ മാങ്കൂട്ടത്തിൽ

തൃശൂർ: ക്രിസ്മസിനു കേക്കുമായി വരുന്ന തൃശൂരിൽനിന്നുള്ള കേന്ദ്രമന്ത്രി ഛത്തീസ്ഗഡിൽ കന്യാസ്ത്രീകളെ അറസ്റ്റുചെയ്ത വിഷയത്തിൽ പ്രതികരിക്കാത്തത് എന്തുകൊണ്ടാണെന്നു യൂത്ത് കോൺഗ്രസ് സംസ്ഥാനപ്രസിഡന്‍റ് രാഹുൽ മാങ്കൂട്ടത്തിൽ എംഎൽഎ. ഡിസിസിയിൽ യൂത്ത് കോൺഗ്രസ് ജില്ലാ നേതൃയോഗം ഉദ്ഘാടനംചെയ്യുകയായിരുന്നു അദ്ദേഹം. ജില്ലാ പ്രസിഡന്‍റ് ഹരീഷ് മോഹൻ അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റുമാരായ അരിത ബാബു, അബിൻ വർക്കി, ഒ.ജെ. ജനീഷ്, പി.എസ്. അനുതാജ്, സംസ്ഥാന ജനറൽ സെക്രട്ടറിമാരായ അഡ്വ. സി. പ്രമോദ്, മിഥുൻ മോഹൻ തുടങ്ങിയവർ പങ്കെടുത്തു.

ഒരു വശത്തു പ്രീണനം, മറുവശത്തു വേട്ട: ആർജെഡി

തൃശൂർ: കേരളത്തിൽ അരമനകൾ കേറി പ്രീണിപ്പിക്കാൻ സംഘപരിവാർ ശ്രമിക്കുമ്പോൾ സംസ്ഥാനത്തിനുപുറത്ത് സന്യസ്തർക്കും മിഷനറിമാർക്കും സംഘപരിവാർ കുറ്റപത്രം നല്കിവരികയാണെന്നു രാഷ്ട്രീയ ജനതാദൾ സംസ്ഥാന ജനറൽ സെക്രട്ടറി യൂജിൻ മോറേലി പറഞ്ഞു. ഛത്തീസ്ഗഡിൽ കന്യാസ്ത്രീകളെ ജയിലിലടച്ചതിൽ പ്രതിഷേധിച്ച് ആർജെഡി സാഹിത്യ അക്കാദമിക്കു മുമ്പിൽ നടത്തിയ പ്രതിഷേധകൂട്ടായ്മ ഉദ്ഘാടനംചെയ്യുകയായിരുന്നു അദ്ദേഹം. ഉത്തരേന്ത്യയിൽ ന്യൂനപക്ഷങ്ങൾക്കു മതവസ്ത്രം ധരിച്ചു പുറത്തിറങ്ങാൻ കഴിയാതായി. മണിപ്പുരിൽനിന്നും സ്റ്റാൻസ്വാമിയുടെയും സിസ്റ്റർ റാണിമരിയയുടെയും രക്തസാക്ഷിത്വത്തിൽനിന്നും പാഠങ്ങൾ ഉൾക്കൊള്ളാൻ ക്രൈസ്തവസഭയ്ക്കും കഴിയണമെന്ന് അദ്ദേഹം പറഞ്ഞു. പ്രതിഷേധക്കൂട്ടായ്മയിൽ ജില്ലാ പ്രസിഡന്‍റ് ജെയ്സൺ മാണി അധ്യക്ഷത വഹിച്ചു. സംസ്ഥാന കമ്മിറ്റി അംഗങ്ങളായ കെ.സി. വർഗീസ്, ജോർജ് കെ. തോമസ്, വിൻസന്‍റ് പുത്തൂർ, കാവ്യ പ്രദീപ്, പി.ഐ. സൈമൺ, ജോർജ് കെ. തോമസ്, മോഹനൻ അന്തിക്കാട്, സി.എം. ഷാജി, ബിജു ആട്ടോർ, ആന്‍റോ ഇമ്മട്ടി, ടി.പി. കേശവൻ, സാബു അമ്മനത്ത്, എൻ.വൈ. സിദ്ധിഖ്, കല പി. രാജീവ്, ഷാനി കയ്പമംഗലം എന്നിവർ പ്രസംഗിച്ചു.

സെന്‍റ് തോമസ് കോളജിൽ ശില്പശാല

തൃശൂർ: നാഷണൽ സർവീസ് സ്കീമിന്‍റെയും മേരാ യുവ ഭാരതിന്‍റെയും സംയുക്താഭിമുഖ്യത്തിൽ സെന്‍റ് തോമസ് കോളജിൽ കേന്ദ്ര - സംസ്ഥാന സർക്കാരുകളുടെ വിവിധ സ്കീമുകളെ സംബന്ധിച്ച ശില്പശാല സംഘടിപ്പിച്ചു. വിദ്യാർഥികളിലൂടെയും യുവാക്കളിലൂടെയും പൊതുസമൂഹത്തിലേക്ക് ഉപകാരപ്രദമാകുന്ന വിവിധ സർക്കാർ പദ്ധതികളെത്തിക്കുക എന്നതായിരുന്നു ശില്പശാലയുടെ ലക്ഷ്യം. ജില്ലാ കളക്ടർ അർജുൻ പാണ്ഡ്യൻ ഉദ്ഘാടനം ചെയ്തു. കോളജ് പ്രിൻസിപ്പൽ റവ.ഡോ. മാർട്ടിൻ കൊളന്പ്രത്ത് അധ്യക്ഷത വഹിച്ചു. മേരാ യുവ ഭാരത് ജില്ലാ കോഓർഡിനേറ്റർ സി. ബിൻസി, തൃശൂർ ലീഡ് ബാങ്ക് മാനേജർ ഇ.കെ. അജയ്, കനറാ ബാങ്ക് ട്രെയിനിംഗ് ഇൻസ്റ്റിറ്റ്യൂട്ട് ഡയറക്ടർ ജി. കൃഷ്ണമോഹൻ, വികാസ് ഗോപിനാഥ്, ഡോ. ഡെയ്സൻ പാണേങ്ങാടൻ, ഡോ. റീജ ജോണ്‍സൻ എന്നിവർ പ്രസംഗിച്ചു.

വസ്തുനികുതി വർധിപ്പിച്ചതു കോണ്‍ഗ്രസ് ഭരണകാലത്തെന്നു കണ്ടെത്തി: മേയർ

തൃശൂർ: വസ്തുനികുതിപരിഷ്കരണത്തിന്‍റെ ഭാഗമായി സ്ക്വയര്‍ മീറ്ററിന് എട്ടുരൂപയ്ക്കുപകരം 15 രൂപയായി വര്‍ധിപ്പിച്ചതു 2013ലെ കോണ്‍ഗ്രസ് ഭരണകാലത്താണെന്നു കൗണ്‍സില്‍ യോഗം വിലയിരുത്തിയെന്നു മേയർ എം.കെ. വർഗീസ് പത്രക്കുറിപ്പിൽ അറിയിച്ചു. 198 പേര്‍ക്കു 15 രൂപ വര്‍ധനവിന്‍റെ ഭാഗമായിവരുന്ന അധിക ചാര്‍ജ് അടയ്ക്കേണ്ടതില്ലെന്ന കോടതി ഉത്തരവ് ചര്‍ച്ചചെയ്തപ്പോള്‍ 2013 മേയ് 24നു ചേര്‍ന്ന കൗണ്‍സിലില്‍ സ്ക്വയര്‍ മീറ്ററിനു 15 രൂപയായി നിശ്ചയിച്ചിട്ടുള്ളതായി കണ്ടെത്തി. എന്നാല്‍ സര്‍ക്കാര്‍ ഉത്തരവില്‍ പറഞ്ഞിട്ടുള്ളതു കോര്‍പറേഷന്‍തലത്തില്‍ വസ്തുനികുതി സ്ക്വയര്‍ മീറ്ററിന് എട്ടു മുതല്‍ 15 രൂപവരെ എത്രയാണെന്നത് അതാത് കൗണ്‍സിലിനു തീരുമാനമെടുക്കാമെന്നാണ്. ഈ ഉത്തരവിനെ അടിസ്ഥാനമാക്കിയാണ് 15 രൂപയുടെ വര്‍ധന തീരുമാനിച്ചത്. ഇതിനുശേഷം നിലവില്‍വന്ന എല്‍ഡിഎഫ് കൗണ്‍സില്‍ വസ്തുനികുതിപരിഷ്കരണത്തിന്‍റെ ഭാഗമായോ മറ്റേതെങ്കിലും രീതിയിലോ വര്‍ധന നികുതിയിനത്തില്‍ വരുത്തിയിട്ടില്ലെന്നു കൗണ്‍സിലിനു ബോധ്യപ്പെട്ടു. ഹൈക്കോടതി ഡിവിഷന്‍ ബഞ്ച് വിധിയില്‍ 2013ലെ നികുതിപരിഷ്കരണം നടത്തുമ്പോള്‍ പാലിക്കേണ്ടതായ നടപടിക്രമങ്ങള്‍ പാലിച്ചിട്ടില്ലെന്നു കണ്ടെത്തിയിട്ടുണ്ട്. അതില്‍ ഏറ്റവും പ്രധാനപ്പെട്ടത് 2013ലെ നികുതിപരിഷ്കരണത്തിന്‍റെ ഭാഗമായി വസ്തുനികുതിവര്‍ധനവിന്‍റെ തീരുമാനം അന്തിമമായി കൗണ്‍സില്‍ അംഗീകരിച്ചതു പത്രപ്പരസ്യംവഴി അന്നത്തെ കോര്‍പറേഷന്‍ ഭരണാധികാരികള്‍ പ്രസിദ്ധീകരിച്ചിട്ടില്ലെന്നതാണ്. അതുകൊണ്ട് ഈ തീരുമാനം ഉടന്‍ പ്രസിദ്ധീകരിക്കണമെന്നും പറയുന്നു. ഇതിനെ അടിസ്ഥാനപ്പെടുത്തി 2013ലെ വസ്തുനികുതിപരിഷ്കരണത്തിന്‍റെ കൗണ്‍സില്‍ തീരുമാനം പത്രത്തില്‍ പ്രസിദ്ധീകരിക്കാന്‍ കൗണ്‍സില്‍ തീരുമാനിച്ചു. 2013ലെ പരിഷ്കരണത്തിനുശേഷം 2019ലും പുതിയ പരിഷ്കരണ ഉത്തരവുകള്‍ ഇറങ്ങിയിട്ടുണ്ട്. ഇതിനെയെല്ലാം അടിസ്ഥാനപ്പെടുത്തി ഹൈക്കോടതി ഉത്തരവിനെതിരേ നിയമനടപടികള്‍ സ്വീകരിക്കാന്‍ കോര്‍പറേഷന്‍ സെക്രട്ടറിയെ ചുമതലപ്പെടുത്താനും തീരുമാനിച്ചു. കഴിഞ്ഞ ഒരു മാസക്കാലമായി മുടങ്ങിക്കിടക്കുന്ന തെരുവുവിളക്കുപരിപാലനം പുതിയ കരാറുകാരനെ ഏല്‍പ്പിക്കുക, അക്രമകാരികളായ കാട്ടുപന്നികളെ നിയമപ്രകാരം വെടിവയ്ക്കാൻ രണ്ടു ഷൂട്ടര്‍മാര്‍ക്കുകൂടി അംഗീകാരം നല്‍കുക, ലാലൂരില്‍ പുതിയതായി സ്ഥാപിക്കുന്ന കോര്‍പറേഷന്‍ വൈദ്യുതി വിഭാഗത്തിന്‍റെ 110 കെവി സബ് സ്റ്റേഷനു കെഎസ്ഇബിയില്‍നിന്ന് വൈദ്യുതി കണക്‌ഷന്‍ ലഭ്യമാക്കാന്‍ നാലുകോടി രൂപ അനുവദിക്കുക എന്നിവ ഉള്‍പ്പെടെ 102 അജൻഡകളില്‍ തീരുമാനമെടുത്തതായും മേയർ അറിയിച്ചു.

വസ്തുനികുതിയിൽ കൊന്പുകോർത്ത് ഭരണ പ്രതിപക്ഷ അംഗങ്ങൾ

തൃശൂർ: വസ്തുനികുതിയിൽ കൊന്പുകോർത്ത് ഭരണപ്രതിപക്ഷ അംഗങ്ങൾ. വികാരാധീനനായി പ്രതിപക്ഷനേതാവ് രാജൻ ജെ. പല്ലൻ. ഭരണമുന്നണിയെ പുകഴ്ത്താൻ ശ്രമിച്ച ഭരണമുന്നണി കൗണ്‍സിലറുടെ ഡയലോഗിനു കടുംവെട്ടു വെട്ടി മേയർ. ഇരുകൂട്ടരും ജനങ്ങളുടെ കണ്ണിൽ പൊടിയിടുന്നുവെന്ന് ബിജെപി. ഇന്നലെ നടന്ന കൗണ്‍സിൽ യോഗത്തിൽ പതിവു നാടകീയനിമിഷങ്ങൾ ഇല്ലായിരുന്നെങ്കിലും ആദ്യ അജൻഡയിൽതന്നെ ചർച്ച നീണ്ടതു മണിക്കൂറുകളോളമാണ്. താൻ മേയറായിരിക്കെ നടപ്പാക്കിയ വികസനപ്രവർത്തനങ്ങളിൽ അരിശംപൂണ്ട എൽഡിഎഫ്, ഭരണം മാറിയപ്പോൾ തന്നെ വേട്ടയാടുകയാണെന്നു പ്രതിപക്ഷനേതാവ് രാജൻ ജെ. പല്ലൻ ആരോപിച്ചു. പൂത്തോൾ, കിഴക്കേകോട്ട, പടിഞ്ഞാറേകോട്ട തുടങ്ങിയ വിവിധ വികസനപ്രവർത്തനങ്ങൾ ചൂണ്ടിക്കാട്ടിയായിരുന്നു അദ്ദേഹത്തിന്‍റെ വികാരാധീനമായ പ്രതികരണം. എൽഡിഎഫ് ഭരണസമിതിയുടെ നികുതിക്കൊള്ള പിരിവിനു തന്‍റെ പേര് വലിച്ചിഴയ്ക്കുന്നതും തന്‍റെ വികസനപ്രവർത്തനങ്ങളിൽ ഉള്ള കണ്ണുകടി മൂലമാണ്. നികുതിപരിഷ്കാരം ഹൈക്കോടതി റദ്ദാക്കിയത് അംഗീകരിക്കണമെന്നും സുപ്രീം കോടതിയിൽ വീണ്ടും പോകാനുള്ള ഭരണസമിതിയുടെ നീക്കം എന്തു വിലകൊടുത്തും തടയുമെന്നും രാജൻ പല്ലൻ പറഞ്ഞു. പ്രതിപക്ഷനേതാവിന്‍റെ വാദങ്ങൾക്കു തടയിടാനുള്ള നീക്കങ്ങളുമായി ഭരണസമിതി അംഗങ്ങൾ രംഗത്തുവന്നത്തോടെ, ഇരുകൂട്ടരുടെയും നാടകം അവസാനിപ്പിക്കണമെന്നും ജനങ്ങളുടെ കണ്ണിൽ പൊടിയിടരുതെന്നും ബിജെപി കൗണ്‍സിലർ എൻ. പ്രസാദ് പറഞ്ഞു. ഹൈക്കോടതിവിധിക്കെതിരേ അപ്പീൽ പോകുന്നത്തിൽ അവർ വിയോജിപ്പ് അറിയിച്ചു. യോഗത്തിന്‍റെ തുടക്കത്തിൽതന്നെ വിഷയത്തിൽ പിന്നീട് ചർച്ച നടത്താമെന്നും ആദ്യം അജൻഡ വായനയെന്നും മേയർ അറിയിച്ചതും പ്രതിപക്ഷ പ്രതിഷേധത്തിന് ഇടയാക്കിയിരുന്നു. ഇതിനിടെ എൽഡിഎഫ് ഭരണനേട്ടങ്ങളെ പ്രശംസിച്ചുകൊണ്ടുള്ള ഭരണമുന്നണി കൗണ്‍സിലറുടെ വാക്കുകൾക്കു മേയർ കടുംവെട്ടും വെട്ടി. അജൻഡയിൽ ഉള്ള കാര്യത്തിൽ സംസാരം മതിയെന്നും അല്ലാത്ത കാര്യത്തിൽ സംസാരിക്കേണ്ട എന്നുമായിരുന്നു മേയറുടെ താക്കീത്. ഇതിനിടെ, വിഷയത്തിൽ അന്വേഷണം നടക്കട്ടെയെന്നും സത്യം അറിയാൻ എല്ലാവർക്കും ആഗ്രഹമുണ്ടെന്നും തെറ്റ് ആരുടെ ഭാഗത്തതാണ് ഉണ്ടായതെന്നറിയാമെന്നു ഭരണമുന്നണി കൗണ്‍സിലർ വർഗീസ് കണ്ടംകുളത്തി അഭിപ്രായപ്പെട്ടു. ആർക്കും ബാധ്യത വരാതെ നിയമനടപടികളുമായി മുന്നോട്ടുപോകണമെന്നും അദ്ദേഹം ആവശ്യപ്പെട്ടു. വസ്തുനികുതിപരിഷ്കാരം റദ്ദാക്കിയ ഹൈക്കോടതി പൊതുവിധി അംഗീകരിക്കണമെന്നും എൽഡിഎഫ് ഭരണസമിതിയുടെ നികുതിവേട്ട അവസാനിപ്പിക്കണമെന്നും ആവശ്യപ്പെട്ട് കോർപറേഷൻ കൗണ്‍സിൽ യോഗത്തിൽ പ്ലക്കാർഡുകളുമായിട്ടാണ് കോണ്‍ഗ്രസ് കൗണ്‍സിലർമാർ എത്തിയത്. യോഗത്തിന്‍റെ തുടക്കത്തിൽ വായിച്ച അനുശോചനപ്രമേയത്തിൽ അയ്യന്തോളിലെ അപകടത്തിൽ മരിച്ച ഏബലിന്‍റെ മരണം വാഹനാപകടത്തിൽ എന്നു പറഞ്ഞതിൽ പ്രതിപക്ഷ കൗണ്‍സിലർ ജോണ്‍ ഡാനിയൽ എതിർപ്പു പ്രകടിപ്പിച്ചു. അതൊരു വാഹനാപകടം അല്ല. റോഡിലെ കുഴിമൂലം എന്നുതന്നെ പറയണമെന്നും ആവശ്യപ്പെട്ടു.

കന്യാസ്ത്രീകളെ തടവിലാക്കിയ സംഭവം; താക്കീതായി പ്രതിഷേധം

തൃശൂർ: ഛത്തീസ്ഗഡിൽ കന്യാസ്ത്രീകളെ മതപരിവർത്തന കുറ്റമാരോപിച്ചു തടവിലാക്കിയ സംഭവത്തിൽ അതിരൂപതയുടെ പ്രതിഷേധം ഇരന്പി. പുത്തൻപള്ളിയിൽ അതിരൂപത മെത്രാപ്പോലീത്ത മാർ ആൻഡ്രൂസ് താഴത്തിന്‍റെ കാർമിത്വത്തിൽ നടത്തിയ പ്രാർഥനായജ്ഞത്തിനുശേഷം കോർപറേഷൻ ഓഫീസിനു മുന്നിലേക്കു നടത്തിയ റാലിയിൽ നൂറുകണക്കിന് അൽമായർ പങ്കെടുത്തു. നിങ്ങളെ ആശുപത്രിയിലും സമൂഹത്തിന്‍റെ വിവിധ മേഖലകളിലും പരിചരിച്ച കന്യാസ്ത്രീകളിൽ ആരെങ്കിലും മതംമാറ്റത്തിനു നിർബന്ധിച്ചോ എന്ന ചോദ്യമുയർത്തിയായിരുന്നു പ്രതിഷേധം. നൂറുകണക്കിനു കന്യാസ്ത്രീകളും വൈദികരും സ്ത്രീകളുമടക്കം പ്ലക്കാർഡുകളുമായി മാർച്ചിൽ അണിനിരന്നു. അക്രമം ഞങ്ങളുടെ മാർഗമല്ല, തിരുവസ്ത്രം ഞങ്ങളുടെ അഭിമാനം, മതേതരത്വം സംരക്ഷിക്കാൻ തൃശൂർ അതിരൂപത തുടങ്ങിയ പ്ലക്കാർഡുകളുമേന്തിയായിരുന്നു പ്രതിഷേധം. സമാധാനപരമായ മുദ്രാവാക്യങ്ങളായിരുന്നു പ്രതിഷേധറാലിയിലുടനീളം മുഴങ്ങിയത്. അതിരൂപത മെത്രാപ്പോലീത്ത മാർ ആൻഡ്രൂസ് താഴത്ത്, സഹായമെത്രാൻ മാർ ടോണി നീലങ്കാവിൽ, രാഷ്ട്രീയ സാമൂഹിക സംഘടനാ രംഗങ്ങളിലെ പ്രമുഖർ എന്നിവർ നേതൃത്വം നൽകി. വൈകീട്ടു 4.40നു പുത്തൻപള്ളിയിൽനിന്ന് ആരംഭിച്ച റാലി മുനിസിപ്പൽ ബസ് സ്റ്റാൻഡിലെ രാജാവിന്‍റെ പ്രതിമയെ വലംവച്ച് കോർപറേഷൻ ഗേറ്റിനു മുന്നിൽ സമാപിച്ചു. വാഹനഗതാഗതത്തെ ബാധിക്കാത്ത വിധമായിരുന്നു പ്രതിഷേധം സംഘടിപ്പിച്ചത്.

പനി: വിദ്യാർഥി മരിച്ചു

പുന്നംപറമ്പ്: പനി ബാധിച്ച് വിദ്യാർഥി മരിച്ചു. തെക്കുംകര വീരോലിപ്പാടം കുറ്റിക്കാട് സ്വദേശി വാരിക്കാട്ടിൽ വീട്ടിൽ മനോജ് മകൾ മെറിൻ(16) ആണ് മരിച്ചത്. കഴിഞ്ഞ രണ്ടു ദിവസമായി തൃശൂരിലെ സ്വകാര്യ ആശുപത്രിയിൽ ചികിത്സയിലായിരുന്നു. സംസ്കാരം ഇന്ന് മച്ചാട് സെന്‍റ് ആന്‍റണീസ് പള്ളിയിൽ. അമ്മ: അനീഷ. സഹോദരി: ഹന്ന.

വിലക്കയറ്റം; കഞ്ഞിവച്ച് പ്രതിഷേധിച്ച് മഹിളാമോർച്ച

തൃശൂർ: അനിയന്ത്രിതവിലക്കയറ്റത്തിനെതിരേ മഹിളാമോർച്ച സിറ്റി ജില്ലാ കമ്മിറ്റിയുടെ നേതൃത്വത്തിൽ കോർപറേഷൻ ഓഫീസിനുമുന്പിൽ കഞ്ഞിവച്ചു പ്രതിഷേധിച്ചു. ദേശീയശരാശരിക്കു വിരുദ്ധമായി കേരളത്തിൽ അനിയന്ത്രിതമാകുന്ന വിലക്കയറ്റവും പണപ്പെരുപ്പവും പിടിച്ചുനിർത്താ ൻ സംസ്ഥാനസർക്കാരിനു സാധിക്കുന്നില്ലെന്ന് സമരം ഉദ്ഘാടനംചെയ്ത് ബിജെപി ദേശീയ കൗണ്‍സിൽ അംഗം എം.എസ്. സന്പൂർണ പറഞ്ഞു. കോർപറേഷൻ കൗണ്‍സിലർ കെ.ജി. നിജി അധ്യക്ഷത വഹിച്ചു. ബിജെപി ജില്ലാ വൈസ് പ്രസിഡന്‍റുമാരായ പൂർണിമ സുരേഷ്, സൗമ്യ സലീഷ്, സുധീഷ് മേനോത്തുപറന്പിൽ, ജില്ലാ ട്രഷറർ വിജയൻ മേപ്രത്ത് എന്നിവർ പ്രസംഗിച്ചു.

എന്തു വിധിയിത്... വല്ലാത്ത ചതിയിത്...

തൃശൂർ: കോർപറേഷൻ മൾട്ടിലെവൽ പാർക്കിംഗ് സംവിധാനം വീണ്ടും പണിമുടക്കിയതോടെ കാർ കുടുങ്ങിയത് ഒന്നരമണിക്കൂർ. വില്ലടം സ്വദേശി രാജന്‍റെ കാറാണു കുടുങ്ങിയത്. ഡെത്ത് സർട്ടിഫിക്കറ്റിന്‍റെ ആവശ്യത്തിനായി കോർപറേഷൻ ഓഫീസിൽ എത്തിയ രാജനും മകളും പത്തുമിനിറ്റിനകം മടങ്ങിയെത്തിയെങ്കിലും സ്വന്തം കാർ കിട്ടാൻ ഒന്നരമണിക്കൂറാണു കാത്തുനിൽക്കേണ്ടിവന്നത്. സാങ്കേതികത്തകരാർമൂലമാണു കാർ കുടുങ്ങിയതെന്നു ജീവനക്കാർ പറയുന്നു. പെട്ടെന്നു മടങ്ങേണ്ടതുണ്ടെന്നും താഴെ പാർക്ക് ചെയ്യാമെന്നും അറിയിച്ചിരുന്നെങ്കിലും ജീവനക്കാരുടെ നിർബന്ധത്തിനു വഴങ്ങിയാണു കാർ ഇതിൽ പാർക്ക് ചെയ്തതെന്നു കോർപറേഷൻ പ്രതിപക്ഷം ആരോപിച്ചു. സംഭവത്തിൽ പ്രതിഷേധമറിയിച്ചും കുടുംബത്തിന് ആശ്വാസമേകിയും പ്രതിപക്ഷനേതാവ് രാജൻ ജെ. പല്ലൻ സ്ഥലത്തെത്തിയിരുന്നു. പാർക്കിംഗ് പരിമിതികൾ നേരിട്ടിരുന്ന ഓഫീസ് അങ്കണത്തിൽ ഒരുകോടിയോളം രൂപ ചെലവഴിച്ചു നിർമിച്ച പാർക്കിംഗ് സംവിധാനം കഴിഞ്ഞ ഡിസംബറിലാണ് ഉദ്ഘാടനംചെയ്തത്. മാസങ്ങൾ പിന്നിട്ടിട്ടും തുറന്നുനൽകാതിരുന്ന സംവിധാനം പ്രതിപക്ഷസമരത്തെത്തുടർന്ന് തുറന്നെങ്കിലും അന്നുതന്നെ കന്പികൾപൊട്ടി രണ്ടു കാറുകൾ കുടുങ്ങിയിരുന്നു. ഇതിനുമുൻപും പിൻപുമായി 28 കാറുകൾ കുടുങ്ങിയിട്ടുണ്ടെന്നും പ്രതിപക്ഷം ആരോപിച്ചു.സ്വകാര്യസ്ഥാപനങ്ങളിൽ മൾട്ടിലെവൽപാർക്കിംഗ് സംവിധാനം സുഗമമായി പ്രവർത്തിക്കുന്പോഴും കോർപറേഷനിലെ പാർക്കിംഗ് സംവിധാനം അടിക്കടി പണിമുടക്കുന്നതിൽ വിജിലൻസ് അന്വേഷണം വേണമെന്നും രാജൻ പല്ലൻ ആവശ്യപ്പെട്ടു. ഇന്നു നടക്കുന്ന കൗണ്‍സിൽ യോഗത്തിൽ ഇക്കാര്യം ഉന്നയിക്കും.

കന്യാസ്ത്രീകളെ അപമാനിച്ചവർക്കെതിരെ ശക്തമായ നടപടി വേണം: തോമസ് ഉണ്ണിയാടൻ

ഇരിങ്ങാലക്കുട: ഛത്തീസ്ഗഡിൽകന്യാസ്ത്രീകളെ അപമാനിക്കുകയും കള്ളക്കേസിൽ കുടുക്കുകയുംചെയ്ത ബജ്‌രംഗ്ദൾ തീവ്രവാദികൾക്കെതിരെ ശക്തമായ ശിക്ഷാനടപടി സ്വീകരിക്കണമെന്ന് കേരളകോണ്‍ഗ്രസ് ഡെപ്യൂട്ടി ചെയർമാൻ തോമസ് ഉണ്ണിയാടൻ ആവശ്യപ്പെട്ടു. ഇതിന് കൂട്ടുനിൽക്കുന്ന ഛത്തീസ് ഗഡ് സർക്കാരും പോലീസും കടുത്ത ക്രൂരതയാണ് ചെയ്തിട്ടുള്ളത്. ജയിലിലടയ്ക്കപ്പെട്ട കന്യാസ്ത്രീകളെ ഉടൻ വിട്ടയക്കണമെന്നും ഉണ്ണിയാടൻ ആവശ്യപ്പെട്ടു. കേരള കോണ്‍ഗ്രസിന്‍റെ സംസ്ഥാനതല പ്രതിഷേധ ധർണയുടെ ഭാഗമായി ഇരിങ്ങാലക്കുട നടത്തിയ ധർണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. നിയോജക മണ്ഡലം പ്രസിഡന്‍റ് റോക്കി ആളൂക്കാരൻ അ ധ്യക്ഷത വഹിച്ചു. സംസ്ഥാന ജനറൽ സെക്രട്ടറി മിനിമോഹൻദാസ് മുഖ്യപ്രഭാഷണം നടത്തി. ഭാരവാഹികളായ സേതുമാധവൻ പറയംവളപ്പിൽ, പി.ടി. ജോർജ്, സതീഷ് കാട്ടൂർ, ലിംസി ഡാർവിൻ, എം.എസ്. ശ്രീധരൻ മുതിരപ്പറന്പിൽ, ഫിലിപ്പ് ഓളാട്ടുപുറം, അഷ്റഫ് പാലിയത്താഴത്ത്, എ. ഫാൻസിസ്, നൈജു ജോസഫ് ഊക്കൻ, വിനോദ് ചേലൂക്കാരൻ, യോഹന്നാൻ കോന്പാറക്കാരൻ, ലാസർ കോച്ചേരി, ജോസ് തട്ടിൽ, മോഹനൻ ചാക്കേരി, ആർതർ വിൻസെന്‍റ് ചക്കാലയ്ക്കൽ, ലാലു വിൻസെന്‍റ് പള്ളായി, ബീന വാവച്ചൻ, ലില്ലി തോമസ്, ആന്‍റോണ്‍ പറോക്കാരൻ, റാണി കൃഷ്ണൻ, മണികണ്ഠൻ. സി.ആർ, വാവച്ചൻ അക്കരക്കാരൻ എന്നിവർ പ്രസംഗിച്ചു.

ഇരിങ്ങാലക്കുടയില്‍ വന്‍ പ്രതിഷേധറാലിയും പൊതുസമ്മേളനവും

ഇരിങ്ങാലക്കുട: കാട്ടുമൃഗങ്ങള്‍ക്കുപോലും സ്വതന്ത്ര സഞ്ചാരം നടത്താനുള്ള അവകാശം നിയമപരമായി നല്‍കുന്ന രാജ്യത്ത് മനുഷ്യനായി പിറന്നതിന്‍റെ പേരില്‍, ക്രിസ്ത്യാനിയായതിന്‍റെ പേരില്‍ സ്വതന്ത്ര‌സഞ്ചാരം തടസപ്പെടുത്തുന്ന സംവിധാനങ്ങളെയും തീവ്രസംഘനകളെയും സമൂഹം തിരിച്ചറിയണമെന്ന് കത്തീഡ്രല്‍ വികാരി റവ. ഡോ. ലാസര്‍ കുറ്റിക്കാടന്‍. ഇരിങ്ങാലക്കുട സെന്‍റ് തോമസ് കത്തീഡ്രല്‍ കത്തോലിക്ക കോണ്‍ഗ്രസിന്‍റെ നേതൃത്വത്തില്‍ ഛത്തീ സ്ഗഡില്‍ കന്യാസ്ത്രികള്‍ക്ക് നേരേയുണ്ടായ അതിക്രമത്തില്‍ പ്രതിഷേധിച്ച് നടന്ന റാലിയും പൊതുസമ്മേളനവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഇന്ത്യന്‍ ഭരണഘടന ഉറപ്പുനല്‍കുന്ന മതസ്വാതന്ത്യത്തിന് നേരേയുള്ള അതിക്രമമാണ് കന്യാസ്ത്രികളെ ജയിലില്‍ അടച്ചതിലൂടെ വെളിവാക്കിയത്. ക്രൈസ്ത മിഷിനറിമാര്‍ മനോരോഗികളേയും കുഷ്ഠരോഗികളേയും തെരുവില്‍ അലയുന്നവരേയും ആരോരുമില്ലാത്തവരേയും പരിപാലിക്കുന്ന അതി വിശിഷ്ടമായ പ്രവര്‍ത്തനങ്ങളാണു കാഴ്ചവയ്ക്കുന്നത്. നാടിന്‍റെ വികസനത്തിനും അഭിവൃദ്ധിക്കും ഉന്നമനത്തിനും സമാധാനത്തിനും ജീവന്‍ പോലും മാറ്റിവക്കുന്നരാണ് അവര്‍. അവരെ ഭീഷണിപ്പെടുത്തി മത‌സ്വാതന്ത്യം ഇല്ലാതാക്കാനുള്ള വര്‍ഗീയ സംഘടനകളുടെ ഏതൊരു പ്രവര്‍ത്തിയേയും ചെറുത്തു തോല്‍പ്പിക്കുമെന്നും അദ്ദേഹം കൂട്ടിചേര്‍ത്തു. ഇരിങ്ങലക്കുട കിഴക്കേപള്ളിയില്‍ നിന്നാരംഭിച്ച പ്രതിഷേധറാലി കത്തിഡ്രലില്‍ സമാപിച്ചു. കത്തോലിക്ക കോണ്‍ഗ്രസ് പ്രസിഡന്‍റ്് സാബു കൂനന്‍ അധ്യക്ഷത വഹിച്ചു. അസി. വികാരി ഫാ. ഓസ്റ്റിന്‍ പാറക്കല്‍, ഫാ. ആന്‍റണി നമ്പളം, മദര്‍ സിസ്റ്റര്‍ റോസിലി, ട്രസ്റ്റി തോമസ് തൊകലത്ത്, സെക്രട്ടറി റോബി കാളിയങ്കര, ട്രഷറര്‍ ഡേവിസ് ചക്കാലക്കല്‍, വൈസ് പ്രസിഡന്‍റ്് ഷാജു കണ്ടംകുളത്തി, രൂപത കൗണ്‍സിലര്‍ ടെല്‍സണ്‍ കോട്ടോളി, ജോയിന്‍റ്് സെക്രട്ടറി വര്‍ഗീസ് ജോണ്‍ എന്നിവര്‍ പ്രസംഗിച്ചു.

ന്യൂനപക്ഷവേട്ട; ബിജെപിയുടെ തനിനിറം പുറത്ത്: ജോസഫ് ടാജറ്റ്

തൃശൂർ: ഛത്തീസ്ഗഡിൽ മലയാളികളായ കന്യാസ്ത്രീകൾക്കുനേരെ നടന്ന അതിക്രമത്തിലൂടെയും അറസ്റ്റിലൂടെയും ബിജെപിയുടെ തനിനിറം വ്യക്തമായെന്നു ഡിസിസി പ്രസിഡന്‍റ് അഡ്വ. ജോസഫ് ടാജറ്റ്. ഡിസിസിയുടെ ആഹ്വാനപ്രകാരം തൃശൂർ, അയ്യന്തോൾ ബ്ലോക്ക് കോണ്‍ഗ്രസ് കമ്മിറ്റികളുടെ നേതൃത്വത്തിൽ തെക്കേഗോപുരനടയിൽ സംഘടിപ്പിച്ച പ്രതിഷേധം ഉദ്ഘാടനംചെയ്തു പ്രസംഗിക്കുകയായിരുന്നു അദ്ദേഹം. ക്രിസ്മസ് കേക്കുകളുമായി അരമനകൾതോറും കയറിയിറങ്ങുന്നവരുടെ മനസിൽ ന്യൂനപക്ഷവിരുദ്ധതയാണ്. സമീപകാലത്തായി രാജ്യത്ത് ക്രൈസ്തവസമൂഹത്തിനുനേരെ സംഘടിതമായ ആക്രമണങ്ങളാണു നടക്കുന്നത്. കുറ്റക്കാർക്കെതിരേ നടപടിയില്ല. ഭരണഘടന അനുവദിക്കുന്ന മതസ്വാതന്ത്ര്യത്തെ ഹനിക്കുന്ന പ്രവൃത്തികൾക്കെതിരേ ജനാധിപത്യസമൂഹം ഒറ്റക്കെട്ടായി പ്രതിഷേധിക്കണം. രാജ്യം മുഴുവൻ ഞെട്ടിയ സംഭവമുണ്ടായിട്ടും കേരളത്തിൽനിന്നുള്ള ഏക എംപിയും കേന്ദ്രമന്ത്രിയുമായ സുരേഷ് ഗോപി പ്രതികരിക്കാത്തതു കുറ്റബോധം കൊണ്ടാണെന്നും ജോസഫ് ടാജറ്റ് പറഞ്ഞു. തൃശൂർ ബ്ലോക്ക് പ്രസിഡന്‍റ് ഫ്രാൻസിസ് ചാലിശേരി, എം.പി. വിൻസെന്‍റ്, രാജേന്ദ്രൻ അരങ്ങത്ത്, എ. പ്രസാദ്, ജോണ്‍ ഡാനിയൽ, ഐ.പി. പോൾ, രാജൻ പല്ലൻ, ബൈജു വർഗീസ്, കെ.എച്ച്. ഉസ്മാൻ ഖാൻ, കെ. ഗിരീഷ്കുമാർ, ലാലി ജെയിംസ്, ജയപ്രകാശ് പൂവ്വത്തിങ്കൽ, സിന്ധു ആന്‍റോ ചാക്കോള, സുനിത വിനു, റെജി ജോയ്, വില്ലി ജിജോ, മേഴ്സി അജി, മേഫി ഡെൽസണ്‍ എന്നിവർ നേതൃത്വം നൽകി.

പ്രതിഷേധത്തിനു താത്കാലിക പരിഹാരം

പുതുക്കാട്: ചിമ്മിനി വന്യജീവി സങ്കേതത്തിൽ മരം മുറിക്കുന്നതിനിടെ ഇഡിസി അംഗം മരിച്ചതിനെ തുടർന്ന് ഉണ്ടായ പ്രതിഷേധം കെ.കെ.രാമചന്ദ്രൻ എംഎൽഎയുടെ ഇടപെടലിനെ തുടർന്ന് അവസാനിപ്പിച്ചു. വനം കെഎസ്ഇബി ഉദ്യോഗസ്ഥരെ റോഡിൽ തടഞ്ഞുവെച്ച നാട്ടുകാർ എംഎൽഎയുടെ ഇടപെടലിനെ തുടർന്ന് പ്രതിഷേധം താൽക്കാലികമായി അവസാനിപ്പിക്കുകയായിരുന്നു. തിരുവനന്തപുരത്തുള്ള എംഎൽഎ, ജില്ലാ കളക്ടർ, എഡിഎം, ചാലക്കുടി ഡിവൈഎസ്പി എന്നിവരുമായി ബന്ധപ്പെടുകയും പ്രശ്നപരിഹാരത്തിന് നിർദ്ദേശിക്കുകയുമായിരുന്നു. സ്ഥലത്തെത്തിയ ഇരിങ്ങാലക്കുട തഹസിൽദാർ എംഎൽഎയുടെയും ജില്ലാ ഭരണകൂടത്തിന്‍റെയും അറിയിപ്പ് പ്രതിഷേധക്കാരെ അറിയിച്ചു. പ്രതിഷേധക്കാരുടെ ആവശ്യങ്ങൾ അനുഭവപൂർവ്വം പരിഗണിക്കുമെന്നും പ്രശ്നത്തിൽ ഇടപെടുമെന്നും എംഎൽഎ അറിയിച്ചു. ഇതിനെ തുടർന്ന് രാത്രി ഒമ്പതോടെ പ്രതിഷേധം അവസാനിപ്പിച്ചു.

നേത്രപരിശോധനാ ക്യാന്പ്

തൃശൂർ: നെല്ലിക്കുന്ന് മാർ തിമോഥെയൂസ് പള്ളി വിമൻ യൂത്ത്സ് അസോസിയേഷനും തൃശൂർ ട്രിനിറ്റി സൂപ്പർ സ്പെഷാലിറ്റി കണ്ണാശുപത്രിയും സംയുക്തമായി സൗജന്യ തിമിരനിർണയ - നേത്രപരിശോധനാ ക്യാന്പ് നടത്തി. വികാരി റവ. ജാക്സ് ചാണ്ടി കശീശ ഉദ്ഘാടനം ചെയ്തു. വിമൻ യൂത്ത്സ് സെക്രട്ടറി ബബിത ബിനു, കേന്ദ്ര വിമൻ യൂത്ത്സ് ജനറൽ സെക്രട്ടറി നീതു ലിന്‍റോ, കൈക്കാരൻ തിമത്തി മാളിയേക്കൽ, ഡോ. ചാന്ദിനി, ഹോസ്പിറ്റൽ പിആർഒ ബിജേഷ്, ജോഷ്ന ജോണ്‍സണ്‍ എന്നിവർ പ്രസംഗിച്ചു. മീനു ജെതിൻ, വിമൻ യൂത്ത്സ് കമ്മിറ്റി അംഗങ്ങളായ ലിജ പ്രിൻസ്, ഫേൻസി ജോഷി, ജിഷി ബിജു, പാരിഷ് കൗണ്‍സിൽ അംഗങ്ങൾ തുടങ്ങിയവർ നേതൃത്വം നൽകി.

കൈപ്പറമ്പിൽ ലോറിയും കാറും കൂട്ടിയിടിച്ച് ദമ്പതികൾക്കുപരിക്ക്

കൈപ്പറമ്പ്: തൃശൂർ - കുറ്റിപ്പുറം സംസ്ഥാനപാതയിൽ കൈപ്പറമ്പ് നൈൽ ഹോസ്പിറ്റലിന് സമീപം ഇന്നലെ രാവിലെ നടന്ന വാഹനാപകടത്തിൽ വൻദുരന്തം ഒഴിവായത് തലനാരിഴയ്ക്ക്. ഇന്നലെ രാവിലെ 7.15ന് കുന്നംകുളം ഭാഗത്തുനിന്ന് തൃശൂരിലേക്കുവരികയായിരുന്ന ലോറിയും എതിരേവന്ന കാറും തമ്മിലാണു കൂട്ടിയിടിച്ചത്. അപകടത്തിൽ കാർ പൂർണമായും തകർന്നെങ്കിലും സീറ്റ് ബെൽറ്റ് ധരിച്ചിരുന്നതിനാൽ കോട്ടൂർ സ്വദേശികളായ ദമ്പതികൾ നിസാര പരിക്കുകളോടെ അത്ഭുതകരമായി രക്ഷപ്പെട്ടു.

പിറകോട്ടോടിയ കാർ തോട്ടിൽവീണ് അപകടം; ഡ്രൈവർ അത്ഭുതകരമായി രക്ഷപ്പെട്ടു

കാഞ്ഞാണി: തൃശൂർ - വാടാനപ്പള്ളി സംസ്ഥാന പാതയിൽ എറവിൽ പെരുമ്പുഴ പാടശേഖരത്തിന് സമീപം നിയന്ത്രണംവിട്ട കാർ പിറകോട്ടോടി തോട്ടിലേക്കു വീണു. ഇതുവഴി വന്നിരുന്ന ബൈക്ക് യാത്രക്കാരനെ ഇടിച്ചിട്ട ശേഷമാണ് കാർ വെള്ളം നിറഞ്ഞുകിടന്ന തോ ട്ടിലേക്കു വീണത്. ഇന്നലെ രാവിലെ എട്ടരയ്ക്കാണ് സംഭവം. തൃശൂരിലുള്ള യൂണിയൻ ബാങ്കിലെ ഉദ്യോഗസ്ഥൻ എസ്.എൻ. പുരം സ്വദേശി കോഴിശേരി വീട്ടിൽ അജിത്ത്കുമാറാണ് കാർ ഓടിച്ചിരുന്നത്. ഇദ്ദേഹം ബാങ്കിലേക്കു പോകുകയായിരുന്നു. കാറിന്‍റെ ചില്ലിൽ കിളികൾ കാഷ്ഠിച്ചതു തുടച്ചുമാറ്റാൻ ആണ് അജിത്കുമാർ കാർ റോഡിന് ഒരുവശത്ത് ഒതുക്കിനിർത്തിയത്. ചില്ല് വൃത്തിയാക്കിയശേഷം കാറിൽ തിരികെ കയറിയ ഇദ്ദേഹം, ഓട്ടോമാറ്റിക് ഡ്രൈവിംഗ് സംവിധാനമുള്ള കാറിൽ അബദ്ധത്തിൽ റിവേഴ്സ് മോഡ് ഇട്ട് ആക്സിലേറ്ററിൽ കാൽ കൊടുത്തു. മുന്നോട്ടു പോകേണ്ടതിനുപകരം അതിവേഗത്തിൽ പുറകോട്ടുനീങ്ങിയ കാർ നിയന്ത്രണം നഷ്ടപ്പെട്ട് റോഡിൽ വട്ടം കറങ്ങി അതുവഴി വന്ന ബൈക്ക് യാത്രക്കാരനെ ഇടിച്ച ശേഷം സമീപത്തുള്ള വെള്ളം നിറഞ്ഞുകിടക്കുന്ന തോട്ടിലേക്കു മറിയുകയായിരുന്നു. അജിത് കുമാറിനെ നാട്ടുകാർ ചേർന്ന് കാറിന് പുറത്തെത്തിച്ചു. അദ്ദേഹം അത്ഭുതകരമായാണ് രക്ഷപ്പെട്ടത്. പരിക്കേറ്റ ബൈക്ക് യാത്രക്കാരനെ ആംബുലൻസ് പ്രവർത്തകരും നാട്ടുകാരും ചേർന്ന് തൃശൂരിലുള്ള സ്വകാര്യ ആശുപത്രിയിൽ എത്തിച്ചു.

അകമലയിൽ ആനകൾക്കു പുറമെ കടുവയോ ?

വടക്കാഞ്ചേരി: അകമല കുഴിയോട് കടുവയുടേതിന് സമാനമായ കാൽപ്പാടുകൾ കണ്ടെത്തിയ പ്രദേശത്ത് വനം വകുപ്പ് നിരീക്ഷണ കാമറ സ്ഥാപിച്ചു. രണ്ട് നിരീക്ഷണ ക്യാമറകളാണ് മച്ചാട് റേഞ്ച് ഫോറസ്റ്റ് ഓഫീസർ അജിൽ പി വേണുഗോപാലിന്‍റെ നേതൃത്വത്തിലുള്ള സംഘം സ്ഥാപിച്ചത്. അതേസമയം വിഷയം വടക്കാഞ്ചേരി എംഎൽഎ സേവിയർ ചിറ്റിലപ്പള്ളി വനം മന്ത്രി എ.കെ. ശശീന്ദ്രന്‍റെ ശ്രദ്ധയിൽപെടുത്തിയിട്ടുണ്ട്. നിലവിൽ തിരുവനന്തപുരത്തുള്ള എംഎൽഎ വനം മന്ത്രിയുമായി സംസാരിച്ച് അടിയന്തര ഇടപെടൽ ആവശ്യപ്പെടുകയായിരുന്നു. തുടർന്നാണ് രണ്ട് നിരീക്ഷണ കാമറകൾ സ്ഥാപിക്കാനും മേഖലയിൽ വനപാലകരുടെ നിരീക്ഷണം ശക്തമാക്കാനും നിർദേശം നൽകിയത്. തിങ്കളാഴ്ച ഉച്ചതിരിഞ്ഞ് മൂന്നരയോടെയാണ് ഫോറസ്റ്റ് ഉദ്യോഗസ്ഥർ സ്ഥലത്ത് രണ്ട് നിരീക്ഷണ കാമറ സ്ഥാപിച്ചത്. സെക്‌ഷൻ ഫോറസ്റ്റ് ഓഫീസർമാരായ പി .ബി. ഹരിദാസ്, നോബിൻ ജോസ്, ബിഎഫ്ഒ സ്റ്റാൻലിൻ കെ തോമസ്, ഡ്രൈവർ കെ .എസ്. സനീഷ്, റെസ്ക്യൂവർ രതീഷ് എന്നിവർ ഉൾപ്പെട്ട സംഘമാണ് കാമറ സ്ഥാപിച്ചത്. കാമറ ദൃശ്യങ്ങൾ പരിശോധിച്ചതിനുശേഷം തുടർനടപടികൾ കൈക്കൊള്ളുമെന്ന് റേഞ്ച് ഫോറസ്റ്റ് ഓഫീസർ അറിയിച്ചു. പ്രതിഷേധവുമായി നാട്ടുകാർ വടക്കാഞ്ചേരി: അകമല കുഴിയോട് വനമേഖലയോട് ചേർന്നുള്ള ജനവാസ മേഖലയിൽ കടുവയുടെ സമാനമായ കാൽപ്പാടുകൾ കണ്ടെത്തിയതോടെ ഭീതിയിലായി ജനങ്ങൾ. സ്ഥിരം കാട്ടാന ഇറങ്ങി കൃഷിനാശം വരുത്തുന്ന കുഴിയോട് വെള്ളാംകുണ്ടിൽ ഗോവിന്ദൻകുട്ടിയുടെ കൃഷിയിടത്തിലാണ് തിങ്കളാഴ്ച കടുവയുടെ കാൽപാടുകൾ കണ്ടെത്തിയത്. അതേസമയം മേഖലയിലെ ജനങ്ങൾ ആകെ ഭീതിയിലാണ്. രണ്ടുദിവസം മുമ്പ് പ്രദേശവാസിയുടെ വളർത്തുനായയും കാണാതായതായി പറയുന്നുണ്ട്. മനുഷ്യ വന്യജീവി സംഘർഷം രൂക്ഷമായ സമയത്ത് വാഴാനി ഫോറസ്റ്റ് സ്റ്റേഷനിൽ നിന്നും ഫോറസ്റ്റ് ഉദ്യോഗസ്ഥന്മാരെയും വാച്ചർമാരെയും പിൻവലിച്ച വനംവകുപ്പ് മേധാവികളുടെ നടപടിയിലും നാട്ടുകാരുടെ പ്രതിഷേധം ശക്തമാവുകയാണ്. വന്യമൃഗശല്യത്തിൽ നിന്നും ജനങ്ങളുടെ ജീവനും സ്വത്തിനും സംരക്ഷണം നൽകുവാൻ ഫോറസ്റ്റ് അധികാരികൾ തയ്യാറാകണമെന്ന് നാട്ടുകാർ ആവശ്യപ്പെട്ടു.

മദ്യലഹരിയിൽ ജേ്യഷ്ഠന്‍റെ ഭാര്യയെ ആക്രമിച്ച കേസിലെ പ്രതി അറസ്റ്റിൽ

കയ്പമംഗലം: മദ്യലഹരിയിൽ ജ്യേഷ്ഠന്‍റെ ഭാര്യയെ ആക്രമിച്ച കേസിലെ പ്രതി അറസ്റ്റിൽ. പെരിഞ്ഞനം വില്ലേജ് പനപറമ്പ് സ്വദേശി കിഴക്കേടത്ത് വീട്ടിൽ സതീഷിനെ(37)യാണ് കയ്പമംഗലം പോലീസ് അറസ്റ്റ് ചെയ്തത്. 25ന് ഉച്ചയ്ക്ക് 1.30നായിരുന്നു സംഭവം. പെരിഞ്ഞനം പനപറമ്പ് സ്വദേശി കിഴക്കേടത്ത് വീട്ടിൽ സോമന്‍റെ വീട്ടിൽ മൂത്തമകന്‍റെ ഭാര്യ ശരണ്യ താമസിക്കുന്നത് പ്രതിക്ക് ഇഷ്ടമല്ലായിരുന്നു. ഇതിന്‍റെ വൈരാഗ്യത്താൽ മദ്യലഹരിയിൽ മുറിയിലേക്ക് അതിക്രമിച്ചുകയറി ശരണ്യയെ അരിവാൾകൊണ്ട് ആക്രമിച്ചുപരിക്കേൽപ്പിക്കുകയായിരുന്നു. പെരിഞ്ഞനം കക്കത്തോടൻ കള്ളുഷാപ്പ് പരിസരത്തുനിന്നു പോലീസ് ഇയാളെ പിടികൂടി. സതീഷ് കയ്പമംഗലം പോലീസ് സ്റ്റേഷനിൽ ലഹരിക്കടിമപ്പെട്ട് പൊതുജനങ്ങളെ ശല്യംചെയ്ത കേസിലെ പ്രതിയാണ്. കയ്പമംഗലം പോലീസ് സബ് ഇൻസ്പെക്ടർ ടി. അഭിലാഷ്, സിപിഒമാരായ മുഹമ്മദ് ഫറൂഖ്, റഹീം എന്നിവർ ചേർന്നാണ് പ്രതിയെ അറസ്റ്റ് ചെയ്തത്.

നഗരസഭാ ചെയര്‍പേഴ്‌സന്‍റെ രാജി ആവശ്യപ്പെട്ട് എല്‍ഡിഎഫ് പ്രതിഷേധം

ഇരിങ്ങാലക്കുട: ഠാണാ - ചന്തക്കുന്ന് റോഡ് വികസനവുമായി ബന്ധപ്പെട്ട് നഗരസഭയുടെ വീഴ്ച മറച്ചുവച്ച് കള്ളംപറഞ്ഞ നഗരസഭ ചെയര്‍പേഴ്‌സണ്‍ മേരിക്കുട്ടി ജോയ് രാജിവയ്ക്കണമെന്ന് ആവശ്യപ്പെട്ട് നഗരസഭാമന്ദിരത്തിന് മുന്നില്‍ എല്‍ഡിഎഫ് കൗണ്‍സിലര്‍മാരുടെ പ്രതിഷേധം. റോഡ് നിര്‍മാണത്തിനായി നഗരസഭയുടെ അധീനതയിലുള്ള കെട്ടിടങ്ങള്‍ പൊളിച്ചുനീക്കണമെന്ന് ആവശ്യപ്പെട്ട് കഴിഞ്ഞ നവംബര്‍ മുതല്‍ ജില്ലാ ഭരണകൂടത്തില്‍നിന്നും പൊതുമരാമത്ത് വകുപ്പില്‍നിന്നും ലഭിച്ച കത്തുകള്‍ പൂഴ്ത്തിവച്ച് നഗരസഭ ചെയര്‍പേഴ്‌സണും കൂട്ടാളികളും ജനങ്ങളെ പറ്റിക്കുകയായിരുന്നുവെന്നും വ്യാപാരികളെ തെറ്റിദ്ധരിപ്പിച്ച് സമരം നടത്തിച്ചതായും എല്‍ഡിഎഫ് വിമര്‍ശിച്ചു. സൈക്കിള്‍ യാത്രപോലും നടത്താന്‍കഴിയാത്ത അവസ്ഥയാണ് ബൈപാസ് അടക്കമുള്ള പട്ടണത്തിലെ റോഡുകളെന്നും പ്രതിപക്ഷം ചൂണ്ടിക്കാട്ടി. എല്‍ഡിഎഫ് പാര്‍ലമെന്‍ററി പാര്‍ട്ടി ലീഡര്‍ കെ.ആര്‍. വിജയ പ്രതിഷേധം ഉദ്ഘാടനംചെയ്തു. കൗണ്‍സിലര്‍ അല്‍ഫോണ്‍സ തോമസ് അധ്യക്ഷതവഹിച്ചു. കൗണ്‍സിലര്‍മാരായ സി.സി. ഷിബിന്‍, അഡ്വ. ജിഷ ജോബി, അംബിക പള്ളിപ്പുറത്ത്, ടി.കെ. ജയാനന്ദന്‍ തുടങ്ങിയവര്‍ പ്രസംഗിച്ചു.

കന്യാസ്ത്രീകളെ അറസ്റ്റ് ചെയ്തതിൽ പ്രതിഷേധം ശക്തം

ചാലക്കുടി: ഛത്തീസ്‌ഗഡിൽ കന്യകാസ്ത്രീകളെ അന്യായമായി തുറുങ്കിലടച്ചതിൽ പ്രതിഷേധിച്ച് സെന്‍റ് മേരിസ് ഫൊറോന പള്ളി കുടുംബകൂട്ടായ്മ കേന്ദ്രസമിതിയുടെ നേതൃത്വത്തിൽ ടൗണിൽ പന്തംകൊളുത്തി പ്രകടനംനടത്തി. വികാരി ഫാ. വർഗീസ് പാത്താടൻ, അസിസ്റ്റന്‍റ് വികാരിമാരായ ഫാ. ക്രിസ്റ്റി ചിറ്റക്കര, ഫാ. അഖിൽ തണ്ടിയേക്കൽ, കേന്ദ്ര സമിതി പ്രസിഡന്‍റ് ജോസി കോട്ടേക്കാരൻ, രൂപത കുടുംബസമ്മേളന പ്രസിഡന്‍റ് ജോഷി പുത്തിരിക്കൽ തുടങ്ങിയവർ നേതൃത്വംനൽകി. കന്യാസ്ത്രീകളടക്കം നൂറുകണക്കിന് വിശ്വാസികൾ പന്തംകൊളുത്തി പ്രകടനത്തിൽ പങ്കെടുത്തു. വൈകിട്ട് സെന്‍റ് മേരിസ് ഫൊറോന ദേവാലയത്തിൽനിന്നു ആരംഭിച്ച പ്രകടനം വികാരി ഫാ. വർഗീസ് പത്താടൻ പന്തംകൊളുത്തി ഉദ്ഘാടനംചെയ്തു. ചാലക്കുടി: ഛത്തീസ്ഗഡിൽ രണ്ട് കന്യാസ്ത്രീകളെ അന്യായമായി ജയിലടച്ചതിൽ പ്രതിഷേധിച്ച് ബ്ലോക് കോൺഗ്രസ് കമ്മറ്റിയുടെ നേതൃത്വത്തിൽ സൗത്ത് ജംഗ്ഷനിൽ പ്രതിഷേധജ്വാല തെളിയിച്ചു. ‌ ബ്ലോക്ക് കോൺഗ്രസ് പ്രസിഡന്‍റ് വി.ഒ. പൈലപ്പൻ ഉദ്ഘാടനംചെയ്തു. പരിയാരം ബ്ലോക്ക് പ്രസിഡന്‍റ് എം.ടി. ഡേവിസ്, സിജി ബാലചന്ദ്രൻ, ഷോൺ പല്ലിശേരി, ഫിൻസൊ തങ്കച്ചൻ തുടങിയവർ പ്രസംഗിച്ചു. ഇരിങ്ങാലക്കുട: നിരപരാധികളായ രണ്ടു കന്യാസ്ത്രീകളെ ഛത്തീസ്ഗഡ് പോലീസ് കസ്റ്റഡിയിലെടുത്തതിലൂടെ ഭരണാധികാരികളും പോലീസും ഒത്തുചേർന്ന് ഭരണകൂടഭീകരതയിലൂടെ രാജ്യത്ത് മനുഷ്യാവകാശലംഘനം നടത്തിയിരിക്കുകയാണെന്ന് ഡിഎഫ്സി ഇരിങ്ങാലക്കുട രൂപത പ്രസിഡന്‍റും സംസ്ഥാന വൈസ് പ്രസിഡന്‍റുമായ ജോസഫ് വാസുപുരത്തുകാരൻ പ്രതിഷേധയോഗത്തില്‌ ആരോപിച്ചു. ഇന്ത്യയിൽ പലഭാഗത്തും മതപരിവർത്തന നിയമത്തിന്‍റെ പേരിൽ മതസ്വാതന്ത്ര്യത്തെ നിഷേധിക്കുന്നു. കൂടാതെ ന്യൂനപക്ഷ പീഡനം വ്യാപകമായി നടക്കുന്നു. രാജ്യത്ത് നീതിപൂർവമായ നടപടി സ്വീകരിക്കണമെന്ന് ഡിഎഫ്സി നേതൃത്വം ഭരണകൂടത്തോടും പോലീസിനോടും ആവശ്യപ്പെട്ടു. യോഗത്തിൽ രൂപത ഡയറക്ടർ ഫാ. ജോൺ കവലക്കാട്, വൈസ് പ്രസിഡന്‍റ് പിന്‍റോ ചക്കാലക്കൽ, സെക്രട്ടറി തോമസ് പള്ളിപ്പാട്. ട്രഷറർ അഗസ്റ്റിൻ കലിപ്പായി. ജിജോ വാഴപ്പിള്ളി. പോളി തെക്കിനിയത്ത്. വർഗീസ് പോളി മകരപ്പിള്ളി തുടങ്ങിയവർ സംസാരിച്ചു.

പദ്ധതിവിഹിതത്തെച്ചൊല്ലി കൗൺസിലിൽ ബഹളം

കൊടുങ്ങല്ലൂർ: നഗരസഭയിൽ പദ്ധതിവിഹിതം ചെലവിടുന്നതിൽ ഭരണപക്ഷമായ ഇടതുമുന്നണിയുടെ പക്ഷപാതപരമായ നടപടികളിൽ പ്രതിഷേധിച്ച് പ്രതിപക്ഷത്തെ ബിജെപി അംഗങ്ങൾ കൗൺസിൽ യോഗം തടസപ്പെടുത്തി. പ്രതിപക്ഷനേതാവിന്‍റെ വാർഡിലെ പ്രവൃത്തികൾമാറ്റി ഫണ്ട് വൈസ് ചെയർമാന്‍റെ വാർഡിൽ ചെലവിട്ടതിനെചൊല്ലിയാണ് പ്രതിഷേധമുയർത്തിയത്. ബഹളം ശക്തമായതോടെ അജന്‌ഡകൾ പാസാക്കിയതായി പ്രഖ്യാപിച്ച് യോഗം പിരിച്ചുവിട്ടു. ഇതേസമയം ഒരുമാസമായി ജനകീയപ്രശ്നങ്ങൾ ചർച്ചചെയ്യാതെ ഭരണപക്ഷവും പ്രതിപക്ഷവും ഒരുപോലെ ജനങ്ങളെ വിഢികളാക്കുകയാണെന്നാരോപിച്ച് ഏക കോൺഗ്രസ് അംഗവും 25-ാം വാർഡ് കൗൺസിലറുമായ വി.എം. ജോണി കൗൺസിൽ ഹാളിൽ കിടപ്പുസമരംനടത്തി.

നഗരസഭാധികൃതര്‍ കണ്ണുതുറന്നു; റോഡില്‍ കോണ്‍ക്രീറ്റിട്ടു

ഇരിങ്ങാലക്കുട: മാര്‍ക്കറ്റ് - ഇരട്ടക്കപ്പേള റോഡിലെ തകര്‍ന്നഭാഗം കോണ്‍ക്രീറ്റിടല്‍ പണികള്‍ ആരംഭിച്ചു. വലിയ കുഴികള്‍മൂലം തകര്‍ന്നുതരിപ്പണമായതിനെ തുടര്‍ന്ന് ഗതാഗതം അപകടകരമായ അവസ്ഥയിലായിരുന്നു. തുടര്‍ച്ചയായിപെയ്യുന്ന മഴയില്‍ കുഴിയില്‍ വെള്ളംകെട്ടി നില്‍ക്കുന്നതും അപകടസാധ്യതകൂട്ടി. നിരവധിപേരാണ് ഈ റോഡില്‍ അപകടത്തില്‍പ്പെടുന്നത്. 2023 ഓക്ടോബര്‍ 23ന് മടത്തിക്കര ലൈനില്‍ മുക്കുളംവീട്ടില്‍ മോഹനന്‍റെ മകന്‍ ബിജോയ്(43)എന്ന യുവാവ് ഇവിടത്തെ കുഴിയില്‍ ബൈക്ക് മറിഞ്ഞാണ് മരണപ്പെട്ടത്. കുറച്ചുദിവസം മുമ്പ് മാര്‍ക്കറ്റിലെ വ്യാപാരിക്കും കുഴിയില്‍വീണ് ഗുരുതരമായി പരിക്കുപറ്റിയിരുന്നു. റോഡ് സഞ്ചാരയോഗ്യമല്ലാതായതോടെ ബസ് ജീവനക്കാരുടെ നേതൃത്വത്തില്‍ റോഡിലെ കുഴികള്‍ക്കു സമീപമെത്തി പ്രതിഷേധം നടത്തി. തുടര്‍ന്ന് കുരിശങ്ങാടി കപ്പേള വഴി സ്വകാര്യ ബസുകള്‍ തിരിച്ചുവിടുകയുമുണ്ടായി. കൊടകര, ചാലക്കുടി ആമ്പല്ലൂര്‍ എന്നീ റൂട്ടിലോടുന്ന ബസുകളാണ് ഇതുവഴി കടന്നുപോകുന്നത്. നാട്ടുകാരില്‍നിന്നു ഏറെ പ്രതിഷേധങ്ങള്‍ ഉയര്‍ന്നതോടെ നഗരസഭ അധികൃതര്‍ റോഡ് കോണ്‍ക്രീറ്റിംഗ് നടത്തുകയായിരുന്നു. 1.90 ലക്ഷം രൂപയാണ് നഗരസഭാ പ്രദേശത്തെ തകര്‍ന്ന റോഡുകളുടെ അറ്റകുറ്റപ്പണികള്‍ അടിയന്തരമായി നടത്തുന്നതിന് വകയിരുത്തിയിരിക്കുന്നത്. ആഴമേറിയ കുഴികളുള്ളിടത്ത് കോണ്‍ക്രീറ്റിംഗും മറ്റിടങ്ങളില്‍ ഷെല്‍മാര്‍ക്കുംവച്ച് കുഴികളടക്കും. എന്നാല്‍ ദീര്‍ഘവീക്ഷണം ഇല്ലാതെയും കമ്പിപോലും ഉപയോഗിക്കാതെയാണ് ഇരട്ടക്കപ്പേളയ്ക്കുസമീപത്തെ റോഡില്‍ കോണ്‍ക്രീറ്റിംഗ് നടത്തുന്നതെന്നും പരിസരവാസികള്‍ ഇതിനകം ആരോപണം ഉന്നയിച്ചിട്ടുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]