മതേതരത്വം സംരക്ഷിക്കപ്പെടണം: തോമസ് ഉണ്ണിയാടന്‍

ഇരിങ്ങാലക്കുട: ഇന്ത്യന്‍ ഭരണഘടന ഉറപ്പു നല്‍കുന്ന മതേതരത്വം നമ്മുടെ രാജ്യത്ത് സംരക്ഷിക്കപ്പെടുകതന്നെ വേണമെന്ന് കേരള കോണ്‍ഗ്രസ് ഡെപ്യൂട്ടി ചെയര്‍മാന്‍ അഡ്വ. തോമസ് ഉണ്ണിയാടന്‍. ഛത്തീസ്ഗസില്‍ കന്യാസ്ത്രീകള്‍ ആക്രമിക്കപ്പെട്ടതിനുപിന്നാലെ ഒഡീഷയിലും കന്യാസ്ത്രീകളും വൈദികരും ആക്രമിക്കപ്പെട്ടതില്‍ പ്രതിഷേധിച്ച് കേരള കോണ്‍ഗ്രസ് സംസ്ഥാനതലത്തില്‍ നടത്തുന്ന പ്രതിഷേധ കൂട്ടായ്മയുടെ ഭാഗമായി കേരള കോണ്‍ഗ്രസ് പ്രവര്‍ത്തകര്‍ അരിപ്പാലത്തു നടത്തിയ പ്രതിഷേധസംഗമം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.

സംസ്ഥാന സ്റ്റിയറിംഗ് കമ്മിറ്റി അംഗം റോക്കി ആളൂക്കാരന്‍ അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി മിനി മോഹന്‍ദാസ് മുഖ്യപ്രഭാഷണം നടത്തി. ഭാരവാഹികളായ സേതുമാധവന്‍ പറയംവളപ്പില്‍, സിജോയ് തോമസ്, പി.ടി. ജോര്‍ജ്, ജോമോന്‍ ജോണ്‍സന്‍ ചേലേക്കാട്ടുപറമ്പില്‍, വിനോദ് ചേലൂക്കാരന്‍, വത്സ ആന്‍റു മാളിയേക്കല്‍, സിജോയിന്‍ ജോസഫ് ചക്കാലമറ്റത്ത്, ജയന്‍ പനോക്കില്‍, സുരേഷ് പനോക്കില്‍, സുരേഷ് പാറപ്പുറത്ത്, റാഫി എരുമക്കാട്ടുപറമ്പില്‍, തുടങ്ങിയവര്‍ പ്രസംഗിച്ചു.

ADVERTISEMENT

ഓണത്തിനൊരുങ്ങി കുത്താമ്പുള്ളി നെയ്ത്തുഗ്രാമം

ശശികുമാർ പകവത്ത് തിരുവില്വാമല: തങ്കനൂലിഴകളിൽ വിസ്മയം നെയ്യുന്ന കുത്താമ്പുള്ളി നെയ് ത്തുഗ്രാമം ഓണത്തിനൊരുങ്ങി. ചിങ്ങമാസം ഇരുപതിനാണ് തിരുവോണമെത്തുന്നതെങ്കിലും തൃശൂർ ജില്ലയിലെ തിരുവില്വാമല പഞ്ചായത്തിൽ നിളയും ഗായത്രിയും കസവുചാർത്തുന്ന പ്രസിദ്ധ കൈത്തറി നെയ്ത്ത് ഗ്രാമമായ കുത്താമ്പുള്ളിയിലെ കസവ് കലവറകളിൽ ഓണത്തിരക്കേറിയിട്ട് ദിവസങ്ങളേറെയായി. പൈതൃകപ്പട്ടികയിൽ ഇടംപിടിച്ച കുത്താമ്പുള്ളി കൈത്തറി വസ്ത്രങ്ങൾ കൊണ്ടാണു മലയാളി ഓണ ത്തിന് ഉടുത്തൊ രുങ്ങുന്നത്. എന്നാൽ കുത്താമ്പു ള്ളിയുടെ പേരിനും പ്രശസ് തിക്കും ഭംഗംവരുത്തുന്ന കാര്യങ്ങളാണ് സോഷ്യൽ മീഡിയയിലൂടെ ചിലർ നടത്തിക്കൊണ്ടിരിക്കുന്നതെന്ന് നെയ്ത്തുകാരും പഴയകാല വ്യാപാരികളും പറയുന്നു. മറ്റു സംസ്ഥാനങ്ങളിൽ ഉണ്ടാ ക്കുന്നതും വിലക്കുറവിൽ കിട്ടുന്നതുമായ പട്ടും കളർ ഡ്രസുകളും ഇവിടെ നിർമിക്കുന്നതാണെന്ന തരത്തിൽ സോഷ്യൽ മീഡിയയിലൂടെയും മറ്റും പ്രചരിപ്പിക്കുന്നതു പാരമ്പര്യത്തിനു കോട്ടമുണ്ടാകാൻ കാരണമാകുമെന്നാണു മൊത്തവ്യാപാരികളുടെയും നെയ്ത്തുകാരുടെയും ആശങ്ക. ഇത്തരം വസ്ത്രങ്ങൾ കുത്താമ്പുള്ളിയിൽ നെയ്യുന്നതായി ഉപഭോക്താക്കൾ തെറ്റിദ്ധരിക്കപ്പെടുന്നു. സോഷ്യൽ മീഡിയയുടെ അതിപ്രസരം ഭാവിയിൽ പരമ്പരാഗതമായുള്ള നെയ്ത്തുകച്ചവടം പ്രതിസന്ധിയിലാക്കുമെന്നും ഇവർ പറയുന്നു. ഇനിയുള്ള ദിവസങ്ങളിൽ ആയിരങ്ങളാണു കസവിന്‍റെ പകിട്ടുതേടി ദേവാംഗസമുദായക്കാർ താമസിക്കുന്ന ഈ കൈത്തറി ഗ്രാമത്തിലേക്ക് എത്തുക. സെറ്റുസാരി, ഡബിൾ, സെറ്റുമുണ്ട്, കൈത്തറി ചുരിദാറുകൾ തുടങ്ങിയ തുണിത്തരങ്ങളുടെ ശേഖരങ്ങളാണ് ഇവിടത്തെ കലവറകളിൽ ഒരുക്കിയിരിക്കുന്നത്. കസവുമാത്രമല്ല പവർലൂം തുണിത്തരങ്ങളും കുത്താമ്പുള്ളിയിലുണ്ട്.കേരളവും മറുനാടൻ മലയാളികളും കേരളത്തനിമയുള്ള ഓണക്കോ ടിയുടുത്തൊരുങ്ങുന്നത് ഇവിടുത്തെ വസ്ത്രങ്ങൾ കൊണ്ടാണ്. കൈത്തറി - കസവ് വസ്ത്രങ്ങൾക്കായാണ് ഇവിടേക്ക് ജനങ്ങൾ കൂടുതലായി എത്തുന്നതെങ്കിലും വിവാഹ ആവശ്യങ്ങൾക്കും മറ്റുസ്ഥലങ്ങളിൽ നിന്ന് നിരവധി പേർ എത്താറുണ്ട്. കേരളത്തിലെമ്പാടുമുള്ള കടകളിലും കുത്താമ്പുള്ളി വസ് ത്രങ്ങളുടെ ശേഖരമുണ്ട്. കസവ് കരയുള്ള സെറ്റ് മുണ്ട്, സാരി, ഡബിൾ എന്നിവയാണ് ഓണക്കാലത്ത് കൂടുതലായി വിറ്റഴിയുന്നത്. ഡിസൈൻ സാരികളിലാണ് കുത്താമ്പുള്ളിയുടെ പെരുമ. മയിൽ, പൂവ്, കൃഷ്ണൻ എന്നിങ്ങനെ ഏതു ഡിസൈനിലും അനായാസം നെയ്തെടുക്കും. വസ്ത്രങ്ങളിൽ പ്രിന്‍റുചെയ്യുന്ന പ്രിന്‍റിംഗ് സ്ഥാപനങ്ങളും കുത്താമ്പുള്ളിയിൽ പ്രവർത്തിക്കുന്നുണ്ട് . അന്യസംസ്ഥാനങ്ങളിൽനിന്ന് കൂടുതലായി തുണിത്തരങ്ങൾ കൊണ്ടുവന്നുവിൽക്കുന്നതുകൊണ്ട് പരമ്പരാഗത നെയ്ത്തുകാർക്ക് തൊഴിൽ നഷ്ടപ്പെടുമെന്നുളള ആശങ്കയുമുണ്ട്്.

കനത്ത മഴയിൽ വീടിന്‍റെ മേൽക്കൂര തകർന്നു; വൃദ്ധദമ്പതികൾക്കു സഹായവുമായി സെറാഫ്‌സ്

കണ്ണാറ: കനത്തമഴയിൽ തകർന്നുവീണ വീടിന്‍റെ മേൽക്കൂര പുനർനിർമിച്ച് നൽകി വൃദ്ധദമ്പതികൾക്കു സഹായമായി സെറാഫ്‌സ് ചാരിറ്റബിൾ സൊസൈറ്റി. കണ്ണാറ മാരാർ റോഡിൽ താമസിക്കുന്ന തൊട്ടിക്കൽ രാജന്‍റെ വീടിന്‍റെ മേൽക്കൂരയാണ് കനത്ത‌മഴയിൽ തകർന്നുവീണത്. നിർധന കുടുംബത്തിന്‍റെ അവസ്ഥ മനസിലാക്കിയ സെറാഫ്‌സ് പ്രവർത്തകർ 1,20,000 രൂപ ചിലവിട്ട് വീട് അറ്റകുറ്റപ്പണികൾ പൂർത്തിയാക്കുകയായിരുന്നു. ഇരുമ്പുപൈപ്പ് ഉപയോഗിച്ചാണ് മേൽക്കൂര നിർമിച്ചത്. കൂടാതെ ജന ലുകളും കതകുകളും വെച്ച് പെയിന്‍റിംഗും നടത്തി വീട് കുടുംബത്തിനു കൈമാറി. സെറാഫ്‌സ് പ്രസിഡന്‍റ് ഫാ. സി.എം. രാജു അധ്യക്ഷത വഹിച്ചു. പാണഞ്ചേരി ഗ്രാമപഞ്ചായത്ത് പ്രസിഡന്‍റ്് പി.പി. രവീന്ദ്രൻ താക്കോൽദാനം നിർവഹിച്ചു. വാർഡ് മെമ്പർമാരായ രേഷ്മ സജീഷ്, ബാബു തോമസ്, സെറാഫ്‌സ് ജനറൽ കൺവീനർ എബ്രഹാം നാഞ്ചിറ, വൈസ് പ്രസിഡന്‍റ് ് ഈശോ ജോയ്, സെക്രട്ടറി ബിനോയ് മേക്കാട്ടിൽ, ജോയിന്‍റ് സെക്രട്ടറി ടി.എസ്. ജോസ്, ഡയറക്ടർ ബോർഡ് അംഗം ടി.വി. ബെന്നി എന്നിവർ പങ്കെടുത്തു.

കുടിവെള്ളംമുടക്കി റോഡുപണി; പ്രതിഷേധിച്ച് നാട്ടുകാർ

എരുമപ്പെട്ടി: റോഡ് നിർമാണപ്രവർത്തനങ്ങൾക്കിടയിൽ എരുമപ്പെട്ടി കോട്ടപ്പുറം ചേങ്ങോട് കുടിവെള്ളപദ്ധതിയുടെ പൈപ്പുകൾ വ്യാപകമായി തകർത്തു. പൊട്ടിയ പൈപ്പുകൾ മാറ്റാൻ തയാറാകാത്ത അധികൃതരുടെ അനാസ്ഥയ്ക്കെതിരെ പ്രതിഷേധവുമായി നാട്ടുകാർ രംഗത്തെത്തി. എരുമപ്പെട്ടി പഞ്ചായത്തിലെ 15-ാം വാർഡിൽ നൂറുകുടുംബങ്ങൾ കുടിവെള്ളത്തിനായി ആശ്രയിക്കുന്ന കോട്ടപ്പുറം ചേങ്ങോട് കുടിവെള്ള പദ്ധതിയുടെ പൈപ്പുകളാണു വ്യാപകമായി തകർത്തിട്ടുള്ളത്. റോഡ് വീതികൂട്ടി നിർമിക്കുന്നതിനുവേണ്ടി നടത്തുന്ന പ്രവർത്തനങ്ങൾക്കിടയിലാണു പൈപ്പുകൾ പൊട്ടിയത്. ഇതിനെ തുടർന്ന് ദിവസങ്ങളോളമായി കുടിവെള്ളവിതരണം മുടങ്ങിയ അവസ്ഥയാണ്. പൊട്ടിയ പൈപ്പുകൾ മാറ്റിസ്ഥാപിക്കുവാനും അറ്റകുറ്റപ്പണികൾ നടത്തുവാനും ഗുണഭോക്താക്കൾ ബന്ധപ്പെട്ട ഗ്രാമപഞ്ചായത്തിലും പൊതുമരാമത്തുവകുപ്പിലും കരാറുകാരനോടും നിരന്തരം അഭ്യർഥന നടത്തുന്നുണ്ടെങ്കിലും ഇത് തങ്ങളുടെ ഉത്തരവാദിത്വമല്ല എന്നുപറഞ്ഞ് ഇവർ കൈ യൊഴിയുകയാണ്. ഗുണഭോക്താക്കൾ പണം ഉപയോഗിച്ച് പൈപ്പുകൾ മാറ്റണമെന്നാണ് അധികൃതർ ആവശ്യപ്പെടുന്നത്. ഇതിന് ഏകദേശം ഒരു ലക്ഷം രൂപ ചെലവുവരുമെന്ന് ഗുണഭോക്താക്കൾ അറിയിച്ചു. കഴിഞ്ഞ നവംബർ മാസം മുതൽ ഇത്തരത്തിൽ പൈപ്പുകൾ പൊട്ടിക്കുന്നതു പതിവായിരിക്കുകയാണ്. ഗുണഭോക്താക്കൾ കൈയിൽനിന്ന് പണമെടുത്താണ് അറ്റകുറ്റപ്പണികൾ നടത്തിയതെന്നും പൊട്ടിയ പൈപ്പുകൾമാറ്റി സ്ഥാപിക്കാൻ പഞ്ചായത്ത് അധികൃതർ ഇടപെടണമെന്നും ഗുണഭോക്താക്കൾ ആവശ്യപ്പെട്ടു. പ്രതിഷേധത്തിനു പ്രസിഡന്‍റ്് വി.ഡി. തോമസ്, സെക്രട്ടറി കെ.എസ്. സുരേഷ്, മെമ്പർ വി.ജെ. ജെയ്സൺ എന്നിവർ നേതൃത്വം നൽകി.

തൊഴിലാളികളോടുള്ള വഞ്ചന കേന്ദ്ര, സംസ്ഥാന സർക്കാരുകൾ അവസാനിപ്പിക്കണം: ഐഎൻടിയുസി

വടക്കാഞ്ചേരി: തൊഴിലാളികളോടുള്ള വഞ്ചനാപരമായ നിലപാടുകൾ കേന്ദ്ര സംസ്ഥാന സർക്കാരുകൾ അവസാനിപ്പിക്കണമെന്ന് ഐഎൻടിയുസി ജില്ലാ പ്രസിഡന്‍റ് സുന്ദരൻ കുന്നത്തുള്ളി. തൊഴിൽ നിയമനങ്ങൾ കാറ്റിൽ പറത്തി രാഷ്ട്രീയ കരാർ നിയമനങ്ങൾ മാത്രം നടത്തുകയും തൊഴിലാളികളെ മറന്നുകൊണ്ട് കോർപറേറ്റ് മാനേജ്മെന്‍റുകൾക്ക് ഒത്താശ ചെയ്യുന്ന കേന്ദ്ര സംസ്ഥാന സർക്കാരുകൾ തൊഴിലാളികളെ വഞ്ചിക്കുകയാണെന്നും അദ്ദേഹംകൂട്ടിചേർത്തു. ഐഎൻടിയുസി വടക്കാഞ്ചേരി റീജിയണൽ കമ്മിറ്റി നേതൃയോഗവും പുതിയ ഭാരവാഹികളുടെ അനുമോദനവും ജയശ്രീ ഹാളിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജില്ലാ വൈസ് പ്രസിഡന്‍റ് കെ.എൻ. നാരായണൻ അധ്യക്ഷത വഹിച്ചു. സി.കെ. ഹരിദാസ്, എ.ടി. ജോസ്, എം.ആർ. രവീന്ദ്രൻ, എൻ.എ. സാബു, എസ്എഎ ആസാദ്, കെ.ടി. ജോയ്, പി.എൻ. വൈശാഖ്, സന്ധ്യ കൊടക്കാടത്ത്, കെ.എൻ. പ്രകാശൻ, ബുഷറ റഷീദ്, സിന്ധു സുബ്രഹ്മണ്യൻ, ഐ.ആര്‍. മണികണ്ഠൻ, കെ. അനുമോദ് തുടങ്ങിയവർ പ്രസംഗിച്ചു. പുതിയ ഭാരവാഹികളായി തെരഞ്ഞെടുത്ത കെ. അനുമോദ്, ടി. പി. ഗിരീശൻ, വി.എ. ഷാജി, ടി.ആര്‍. ജില്‍സണ്‍, കെ.എച്ച്. സിദ്ദിഖ്, എൻ.എം. വിനീഷ്, എം.ആർ. ലോഹിതാക്ഷൻ എന്നിവരെ അനുമോദിച്ചു.

ദേവാലയങ്ങളിൽ തിരുനാൾ

വേലൂപ്പാടം ഊട്ടുതിരുനാളിനു തുടക്കമായി വേലൂപ്പാടം: വിശുദ്ധ യൗസേപ്പിതാവിന്‍റെ തീര്‍ഥാടനകേന്ദ്രത്തിലെ ഊട്ടുതിരുനാളിനു തുടക്കമായി. രാവിലെ നടന്ന ആഘോഷമായ വിശുദ്ധ കുര്‍ബാനയ്ക്ക് തൃശൂര്‍ അതിരൂപത സഹായമെത്രാന്‍ മാര്‍ ടോണി നീലങ്കാവില്‍ മുഖ്യ കാര്‍മികത്വം വഹിച്ചു. ഫാ. സെന്‍ജോ നടുവില്‍പീടിക സഹകാര്‍മികനായി. തുടര്‍ന്ന് പ്രസുദേന്തി വാഴ്ച, കൂടുതുറക്കല്‍, പ്രദക്ഷിണം, രൂപം എഴുന്നള്ളിച്ചു വയ്ക്കല്‍ എന്നിവ നടന്നു. ഇന്നാണു പ്രസിദ്ധമായ ഊട്ടുതിരുനാള്‍. വികാരി ഫാ. ഡേവിസ് ചെറയത്ത്, സഹവികാരി ഫാ. ഷെബിന്‍ പനക്കല്‍, കൈക്കാരന്മാരായ പോള്‍ മഞ്ഞളി, മനോജ് കോഴിക്കുന്നേല്‍, രാജു മൊയലന്‍, റോബി കൊച്ചുപുരക്കല്‍, ജോയിന്‍റ് ജനറല്‍ കണ്‍വീനര്‍മാരായ ജെയിംസ് കുഴിയാനിമറ്റത്തില്‍, ഷിജോ ഞെരിഞ്ഞാമ്പിള്ളി, പിആര്‍ഒ ബൈജു വാഴക്കാല, ജേക്കബ് നടുവില്‍പീടിക തുടങ്ങിയവര്‍ നേതൃത്വം നല്‍കി. ചിറയ്ക്കൽ സെന്‍റ് ആന്‍റണീസ് പള്ളിയിൽ ചിറയ്ക്കൽ: സെന്‍റ് ആന്‍റണീസ് ദേവാലയത്തിൽ പരിശുദ്ധ കന്യകാമറിയത്തിന്‍റെ സ്വർഗാരോപണ തിരുനാൾ കൊടിയേറ്റം വികാരി ഫാ. ജിന്‍റോ പെരേപ്പാടൻ നിർവഹിച്ചു. ഇന്നു രാവിലെ പത്തി ന് ആഘോഷമായ വിശുദ്ധകുർബാന, ലദീഞ്ഞ്, തുടർന്ന് ഊട്ടുനേർച്ച എന്നിവയുണ്ടാകും.

ഗജരാജൻ ഗുരുവായൂർ കേശവന്‍റെ പ്രതിമയുടെ പുനർനിർമാണം തുടങ്ങി

ഗുരുവായൂർ: ക്ഷേത്രം തെക്കേനടയിലെ ശ്രീവത്സം അതിഥി മന്ദിരവളപ്പിലെ ഗജരാജൻ ഗുരുവായൂർ കേശവന്‍റെ പ്രതിമ പുനർനിർമാണ പ്രവർത്തനങ്ങൾക്കു തുടക്കമായി. ശില്പി എളവള്ളി നന്ദന്‍റെ നേതൃത്വത്തിൽ നടക്കുന്ന പുനർനിർമാണത്തിനു ദേവസ്വം ചെയർമാൻ ഡോ. വി.കെ. വിജയൻ ഭദ്രദീപം തെളിയിച്ച് തുടക്കം കുറിച്ചു. സംസ്ഥാന വിവരാവകാശ കമ്മീഷണർ അഡ്വ. ടി.കെ. രാമകൃഷ്ണൻ, ദേവസ്വം ഭരണസമിതി അംഗങ്ങളായ സി. മനോജ്, കെ.പി. വിശ്വനാഥൻ, അഡ്മിനിസ് ട്രേറ്റർ ഒ.ബി. അരുൺകുമാർ, ജീവധനം ഡിഎ എം. രാധ, ദേവസ്വം മരാമത്ത് എൻജിനീയർമാരായ എം.കെ. അശോക്‌കുമാർ, വി.ബി. സാബു, വി. അശ്വതി, അസി. മാനേജർ കെ.കെ. സുഭാഷ് എന്നിവർ പങ്കെടുത്തു. 2022 ൽ പുതുക്കി നിർമിച്ച ഗജ രാജൻ ഗുരുവായൂർ കേശവന്‍റെ പ്രതിമയ്ക്കു കേശവനുമായി രൂപസാദൃശ്യം ഇല്ലെന്ന ഭക്തജനങ്ങളുടെ പരാതിയെത്തുടർന്നാണു പ്രതിമ പുനർമിക്കാൻ ദേവസ്വം തീരുമാനിച്ചത്. ഗുരുവായൂർ ഏകാദശിക്കു മുൻപായി പുനർനിർമാണം പൂർത്തിയാക്കും.

പീച്ചിഡാം റോഡിൽ മരംവീണ് ഗതാഗതം തടസപ്പെട്ടു

കണ്ണാറ: മലയോരഹൈവേയിൽ ഒരപ്പൻപാറയ്ക്കുസമീപം റോഡിൽ മരംവീണ് ഗതാഗതം തടസപ്പെട്ടു. ഇന്നലെ രാവിലെയാണു സംഭവം ഉണ്ടായത്. ചടച്ചി ഇനത്തിൽപ്പെട്ട മരം ഒടിഞ്ഞ് റോഡിലേക്കു വീഴുകയായിരുന്നു. തുടർന്ന് തൃശൂരിൽനിന്നും അഗ്നിരക്ഷാസേന സ്ഥലത്തെത്തി മരം മുറിച്ചുമാറ്റി ഗതാഗതം പുനസ്ഥാപിച്ചു. കണ്ണാറ മുതൽ പായ്ക്കണ്ടം വരെയുള്ള മേഖലയിൽ മറിഞ്ഞുവീഴാറായ നിരവധി മരങ്ങളാണു റോഡരികിൽ നിൽക്കുന്നത്. ഇതുവഴികടന്നുപോകുന്ന യാത്രക്കാർക്കു ഏറെ അപകടഭീഷണിയാണിവ. എന്നാൽ അവ മുറിച്ചുനീക്കാൻവേണ്ട നടപടികൾ അധികൃതർ സ്വീകരിക്കുന്നില്ലെന്നു നാട്ടുകാർ പറഞ്ഞു.

ശ്രീനാഥ് കൊലക്കേസ് പ്രതി 22 വർഷങ്ങൾക്കുശേഷം അറസ്റ്റിൽ

കയ്പമംഗലം: ചാമക്കാല സ്വദേശി ശ്രീനാഥിനെ (22) വെട്ടിക്കൊലപ്പെടുത്തിയ കേസിൽ പ്രതിയെ 22 വർഷങ്ങൾക്ക് ശേഷം അറസ്റ്റ് ചെയ്തു. കയ്പമംഗലം കൂരിക്കുഴി സ്വദേശി പാണ്ടികപറമ്പിൽ വീട്ടിൽ അജയ (അജി - 45) നെയാണ് തൃശൂർ റൂറൽ ജില്ലാ പോലീസ് മേധാവി ബി. കൃഷ്ണകുമാറിന്‍റെ നേതൃത്വത്തിലുള്ള പോലീസ് സംഘം ബംഗളൂരു വിമാനത്താവളത്തിൽ നിന്നും അറസ്റ്റ് ചെയ്തത്. ശ്രീനാഥും സുഹൃത്തും ചേർന്നു റെജിയെ മർദിച്ചെന്നു ആരോപിച്ചാണ് 2003 ഡിസംബർ 19ന് ചാമക്കാല ഹൈസ്കൂൾ പരിസരത്തുവച്ച് ശ്രീനാഥിനെ ആക്രമിക്കുന്നത്. ഏഴംഗ ഗുണ്ടാസംഘം ക്രൂരമായ മർദനത്തിനുശേഷം വടിവാൾ കൊണ്ടു വെട്ടിപ്പരിക്കേൽപിച്ചശേഷം എടുത്തുകൊണ്ട് പോയി സമീപത്തെ തോട്ടിൽ മുക്കിക്കൊല്ലുകയായിരുന്നു. അജയൻ ദുബായിൽ നിന്നും രഹസ്യമായി ബംഗളൂരു കെമ്പഗൗഡ വിമാനത്താളവളത്തിൽ വന്നിറങ്ങിയപ്പോൾ എയർപോർട്ട് അധികൃതർ എൽഒസി പ്രകാരം തടഞ്ഞ് വയ്ക്കുകയായിരുന്നു. തുടർന്ന് വിവരം ജില്ലാ പോലീസ് മേധാവിയെ അറിയിച്ചത് പ്രകാരമാണ് ബംഗളൂരുവിൽ ചെന്ന് തൃശൂർ റൂറൽ ജില്ലാ പൊലീസ് സംഘം അജയനെ അറസ്റ്റ് ചെയ്തത്. മതിലകം സ്റ്റേഷൻ ഇൻസ്പെക്ടർ എം.കെ. ഷാജി, സബ് ഇൻസ്പെക്ടർ പ്രദീപൻ, എഎസ്ഐ വിനയൻ എന്നിവരാണ് അന്വേഷണസംഘത്തിലുണ്ടായിരുന്നത്.

രാസലഹരിയുമായി രണ്ടുപേർ അറസ്റ്റിൽ

ചാലക്കുടി: രാസലഹരിയുമായി രണ്ട് പേർ അറസ്റ്റിൽ. ടൗൺഹാളിന് മുമ്പിലുള്ള ബസ്‌സ്റ്റോപ്പിനുള്ളിൽ നിൽക്കുയായിരുന്ന കൊടകര ചെറുവത്തൂർചിറ കൊല്ലാട്ടിൽ വീട്ടിൽ നിതിൻ (33), പുത്തൂർ പൊന്നൂക്കര ശാസ്താംകുടം വീട്ടിൽ സുമേഷ് (40) എന്നിവരെ പരിശോധിച്ചതിലാണ് 5.170 ഗ്രാം തൂക്കം വരുന്ന എംഡിഎംഎ പിടിച്ചെടുത്തത്. കൊടകരയിലുള്ള നീതിന്‍റെ വീട്ടിൽ പരിശോധന നടത്തിയതിൽ അലമാരയിൽ സൂക്ഷിച്ച 1.145 കിലൊ കഞ്ചാവ് പിടിച്ചെടുത്തു. ഇത് സംബന്ധിച്ച് കൊടകര പോലീസ് കേസെടുത്തു. ചാലക്കുടി തൃശൂർ റൂറൽ ജില്ലാ പോലീസ് മേധാവി ബി. കൃഷ്ണകുമാറിന്‍റെ നേതൃത്വത്തിൽ ചാലക്കുടി പോലീസ് സ്റ്റേഷൻ സബ് ഇൻസ്പെക്ടർമാരായ ടി.വി. ഋഷിപ്രസാദ്, ഇ.ആർ. സിജുമോൻ. എഎസ്ഐ ജിബി ബാലൻ, എസ്‌സിപിഒ ആൻസൻ, സിപിഒമാരായ സന്ദീപ്, വിനോദ്, തൃശൂർ റൂറൽ ഡാൻസാഫ് അംഗങ്ങളായ എസ്ഐമാരായ സതീശൻ മഠപ്പാട്ടിൽ, പി.എം. മൂസ, എഎസ്ഐമാരായ വി.യു. സിൽജോ, എ.യു. റെജി, എം. ജെ. ബിനു, എസ്‌സിപിഒമാരായ ഷിജോ തോമസ്, ഇ.വി. ശ്രീജിത്ത്, കൊടകര പോലീസ് സ്റ്റേഷൻ ഇൻസ്പെക്ടർ പി. കെ. ദാസ്, എസ്ഐമാരായ സുരേഷ്, രാധാകൃഷ്ണൻ, എഎസ്ഐമാരായ ഷീബ, ഗോകുലൻ, ജിഎസ്‌സിപിഒ സജീഷ് കുമാർ എന്നിവരാണ് അന്വേഷണ സംഘത്തിലുണ്ടായിരുന്നത്.

ചേലൂര്‍ പള്ളിയിൽ തിരുനാളും ഊട്ടുനേര്‍ച്ചയും ഇന്ന്

ചേലൂര്‍: ചേലൂര്‍ സെന്‍റ് മേരീസ് പള്ളിയില്‍ പരിശുദ്ധ അമലോത്ഭവ മാതാവിന്‍റെ സ്വര്‍ഗാരോപണ തിരുനാളും ഊട്ടുനേര്‍ച്ചയും ഇന്ന് നടക്കും. വികാരി ഫാ. അഡ്വ. തോമസ് പുതുശേരി തിരുനാള്‍ കൊടിയേറ്റം നിര്‍വഹിച്ചു. തിരുനാള്‍ദിനമായ ഇന്ന് രാവിലെ 6.30 നുള്ള ദിവ്യബലിക്കുശേഷം തിരുനാള്‍ പ്രദക്ഷിണവും ഉണ്ടാകും. 9.30 ന് നേര്‍ച്ച ഊട്ട് വെഞ്ചരിപ്പ്. 10ന് നടക്കുന്ന ആഘോഷമായ തിരുനാള്‍ ദിവ്യബലിക്ക് ഫാ. ഷൈജു പെരുമ്പെട്ടിക്കുന്നേല്‍ മുഖ്യകാര്‍മികത്വം വഹിക്കും. ഫാ. ജോജു കോക്കാട്ട് തിരുനാള്‍ സന്ദേശം നല്‍കും. ഫാ. സീമോന്‍ കാഞ്ഞിത്തറ സഹകാര്‍മികത്വം വഹിക്കും. തിരുനാളിന്‍റെ വിജയത്തിനായി വികാരി ഫാ. അഡ്വ. തോമസ് പുതുശേരി, കണ്‍വീനര്‍ സിബിന്‍ മണാത്ത്, കൈക്കാരന്മാരായ ജോണി കൊടലിപറമ്പില്‍, വര്‍ഗീസ് കുറ്റിക്കാടന്‍, അലക്സ് ചെറുവത്തൂര്‍ എന്നിവര്‍ നേതൃത്വം നല്‍കും.

ജനാധിപത്യം അട്ടിമറിക്കാനുള്ള ശ്രമങ്ങൾ പ്രതിരോധിക്കണം: വി.ഡി. സതീശൻ

കൊടുങ്ങല്ലൂർ: ജനാധിപത്യം, ഭരണഘടന, ജുഡീഷ്യറി എന്നിവയുടെ അട്ടിമറി പ്രതിരോധിക്കാൻ നാം തയ്യാറാകണമെന്ന് പ്രതിപക്ഷ നേതാവ് വി.ഡി. സതീശൻ. ഭരണഘടനയുടെ അടിസ്ഥാനപരമായ മൂല്യങ്ങൾ തകർക്കപ്പെടുകയാണ്. മതേതരത്വത്തിന്‍റെ അർത്ഥം മറന്നു പോകുന്നു. ഏകാധിപതികളുടെ കൈയിൽ അധികാരം കേന്ദ്രീകരിക്കപ്പെടുകയാണ്. ഇത്തരം അവസരത്തിൽ സംജാതമാകുന്ന അരക്ഷിതത്വബോധം സമൂഹത്തിൽ നിന്ന് മാറ്റാൻ ജുഡീഷ്യറി മറക്കരുതെന്ന് പ്രതിപക്ഷനേതാവ് അഭിപ്രായപ്പെട്ടു. എംഇഎസ് ഡയമണ്ട് ജൂബിലി ആഘോഷങ്ങളുടെ ഭാഗമായി കേരളത്തിലെ എല്ലാ ജില്ലകളിലും സംഘടിപ്പിക്കുന്ന സെമിനാറിന്‍റെ ഭാഗമായി എംഇഎസ് അസ്‌മാബി കോളജിൽ "ഇന്ത്യൻ ഭരണ ഘടനയും ജുഡീഷ്യറിയും" എന്ന വിഷയത്തിൽ സംഘടിപ്പിച്ച സെമിനാർ ഉദ്‌ഘാടനം ചെയ്ത് സംസാരിക്കുകയായിരുന്നു അദ്ദേഹം. മോഡറേറ്ററായ എംഇഎസ് സംസ്ഥാന പ്രസിഡന്‍റ് ഡോ. പി.എ. ഫസൽഗഫൂർ ഭരണഘടനയെ സംരക്ഷിക്കേണ്ട ചുമതലയുള്ള ജുഡീഷ്യറി കൂടുതൽ ഉണർന്നുപ്രവർത്തിക്കേണ്ട സഹാചര്യമാണ് നിലവിലുള്ളതെന്ന് അഭിപ്രായപ്പെട്ടു. സെമിനാറിൽ മുതിർന്ന മാധ്യമപ്രവർത്തകൻ മാധവൻകുട്ടി മുഖ്യപ്രഭാഷണം നടത്തി. അസ്മാബികോളജ്‌ മാനേജിംഗ്കമ്മിറ്റി സെക്രട്ടറി ആൻഡ് കറസ്‌പോണ്ടൻഡ് വി.എം. ഷൈൻ, ട്രഷറർ പി.എസ്. മുജീബ് റഹ്മാൻ, പ്രിൻസിപ്പൽ ഡോ. സനന്ദ് സദാനന്ദ്, എംഇഎസ് ജനറൽ സെക്രട്ടറി കെ.കെ. കുഞ്ഞുമൊയ്തീൻ, എംഇഎസ് ഭാരവാഹികളായ കെ.എം. അബ്ദുൽസലാം, കെ.എം. അബ്ദുൽ ജമാൽ, പി.എസ്. മുജീബ് റഹ്മാൻ, സലിം അറയ്ക്കൽ, കെ.കെ. സുൽഫി, അഡ്വ. സക്കീർ ഹുസൈൻ, അബ്ദുള്ള ബാബു, നസീർ കാതിയാളം, ഷഹീം ഷാഹുൽ, ഇ.കെ. ഇബ്രാഹിംകുട്ടി, മുസ്താഖ് മൊയ്തീൻ, എ.എ. മുഹമ്മദ് ഇഖ്ബാൽ, ബഷീർ തോപ്പിൽ, പി.എച്ച്. മൊയ്തീൻ, ഡോക്ടർ കെ.പി. സുമേധൻ എന്നിവർ പ്രസംഗിച്ചു. സെമിനാറിൽ വിദ്യാർഥികൾ, അധ്യാപക- അനധ്യാപക ജീവനക്കാർ, പൂർവ വിദ്യാർഥികൾ, അദ്ധ്യാപക -രക്ഷാകർതൃ സമിതി ഭാരാവാഹികൾ, പൊതുജനങ്ങൾ എന്നിവർ സംബന്ധിച്ചു.

ദേശീയപാത വികസനം: ഗതാഗതക്കുരുക്ക് നിയന്ത്രണാതീതം

കൊരട്ടി: ദേശീയപാത വികസനത്തിന്‍റെ പേരിൽ മുരിങ്ങൂർ, കൊരട്ടി, ചിറങ്ങര മേഖലകളിൽ നടക്കുന്ന നിർമാണപ്രവർത്തനങ്ങളിൽ നരകയാതനയുടെ പാരമ്യത്തിലെത്തി നിൽക്കുകയാണ് പ്രദേശവാസികളും വാഹന യാത്രികരും. ഇന്നലെ വെളുപ്പിന് അങ്കമാലി ദിശയിൽ മുരിങ്ങൂരിൽ തുടങ്ങിയ ഗതാഗതക്കുരുക്ക് നീണ്ടത് പോട്ടയും കടന്ന് കിലോമീറ്ററുകളോളം. ഉച്ചകഴിയും വരെ അക്ഷരാർത്ഥത്തിൽ ജനങ്ങൾ നേരിട്ടത് സമാനതകളില്ലാത്ത ദുരിതം. ഉച്ചതിരിഞ്ഞ് മൂന്നു മണിയോടെ ഇരുദിശകളിലും രൂക്ഷമായ ഗതാഗതസ്തംഭനമാണ് ജനങ്ങൾ അഭിമുഖീകരിക്കുന്നത്. ബദൽ റോഡുകളായി ഉപയോഗിക്കുന്ന പാതകളെല്ലാം കുണ്ടും കുഴിയുമാണ്. ഇതിനിടയിൽ മഴയും എത്തുന്നതോടെ കുരുക്ക് കൂടുകയാണ്. രണ്ടു ദിവസം മഴ മാറിനിന്നാൽ ബദൽ റോഡ് ടാർ ചെയ്ത് സഞ്ചാരയോഗ്യമാക്കുമെന്ന അധികൃതരുടെ ഉറപ്പിന് ചാക്കിന്‍റെ വില പോലുമില്ലെന്നതാണ് യാഥാർഥ്യം. വാഹനങ്ങൾ ഊടുവഴികളിലൂടെ വഴിതിരിച്ചു വിട്ട് കുരുക്കഴിക്കാൻ പോലീസും ഹോം ഗാർഡുകളും കഠിന പ്രയത്നം നടത്തുന്നുണ്ടെങ്കിലും നിയന്ത്രണാതീതമാണ്. മണിക്കൂറുകൾ വൈകിയാണ് കുട്ടികൾ സ്കൂളിലെത്തുന്നതെന്ന് പ്രധാനാധ്യാപകർ സാക്ഷ്യപ്പെടുത്തുന്നു. തിരക്കുകൾക്കിടയിൽ രോഗികളുമായി പോകുന്ന ആംബുലൻസ് ഡ്രൈവർമാരും ബന്ധുക്കളും അനുഭവിക്കുന്ന മാനസിക സംഘർഷം ചെറുതല്ല. ജനങ്ങൾക്ക് അവരുടെ തൊഴിലിടങ്ങളിലേക്കോ ഓഫീസുകളിലേക്കാ സമയത്തിന് എത്താനാകുന്നില്ല. കൊരട്ടി, കാടുകുറ്റി, മേലൂർ പഞ്ചായത്തുകളിലെ ഗ്രാമീണ റോഡുകളുടെ കാര്യം അതിലും ശോചനീയമാണ്. മഴ ഒരു മണിക്കൂർ മാറി നിന്നാൽ അന്തരീക്ഷം പൊടിപടലംകൊണ്ട് നിറയും. കരാർ കമ്പനിക്ക് സമയബന്ധിതമായി നിർമാണം പൂർത്തിയാക്കുന്നതിന് ആവശ്യമായ തൊഴിലാളികൾ ഇല്ലെന്ന വസ്തുത തിരിച്ചറിയാൻ നാഷണൽ ഹൈവേ അഥോറിറ്റിക്ക് കഴിയാത്തതാണോ അറിഞ്ഞിട്ടും മൗനം പാലിക്കുന്നതാണോ എന്ന സംശയം ജനം മുന്നോട്ടുവയ്ക്കുന്നു. കരാർ കമ്പനിയെ നിരീക്ഷിക്കാനും കുറ്റമറ്റരീതിയിൽ നിർമാണം നടത്തിക്കാനും നാഷണൽ ഹൈവേ അഥോറിറ്റിക്കോ ജനങ്ങളെ സാരമായി ബാധിക്കുന്ന ഈ വിഷയത്തിൽ ക്രിയാത്മകമായി ഇടപെട്ട് പരിഹാരം കാണാൻ ജനപ്രതിനിധികൾക്കാേ സാധിക്കുന്നില്ല എന്നതാണ് ഖേദകരം. നാലാഴ്ചക്കാലം ടോൾ പിരിവ് നിർത്തിവച്ച് ഹൈക്കോടതി ഉത്തരവിട്ടപ്പോൾ അതിനുളളിൽ സുഗമസഞ്ചാരം സാധ്യമാക്കുവാനുള്ള ഇടപെടൽ ഹൈവേ അഥോറിറ്റിയും കരാർകമ്പനിയും സ്വീകരിക്കുമെന്നാണ് ജനങ്ങൾ കരുതിയിരുന്നത്. നിർമാണക്കമ്പനിയുടെ മെല്ലെപോക്കിനെതിരെയും പ്രാദേശിക ഭരണകൂടങ്ങളെയും പൊതുജനങ്ങളെയും മാനിക്കാതെയുള്ള ധാർഷ്ട്യത്തിനെതിരെയും എൻഎച്ച് അധികൃതരുടെ അനാസ്ഥക്കെതിരെയും ജനങ്ങൾ പ്രതിഷേധവുമായി രംഗത്തിറങ്ങിയാൽ പോലീസിനെ വിളിച്ച് കേസെടുപ്പിക്കുമോയെന്ന ഉൾഭയമാണ് സാധാരണക്കാരെ സമരത്തിൽ നിന്നകറ്റുന്നത്. ഇത് മുതലെടുക്കുന്ന സമീപനമാണ് അധികൃതർ സ്വീകരിക്കുന്നത്. ജനപ്രതിനിധികളും രാഷ്ട്രീയ നേതൃത്വങ്ങളും പുലർത്തുന്ന മൗനവും അത് ജനങ്ങൾക്കിടയിൽ സൃഷ്ടിക്കുന്ന അസ്വസ്ഥത ചെറുതല്ല. മാനദണ്ഡങ്ങളും സമയക്രമവും പാലിച്ചുള്ള നിർമാണത്തിന് കരാർ കമ്പനി സന്നദ്ധമല്ലെങ്കിൽ അവരെ കരാറിൽ നിന്നും നീക്കി പുതിയ ടെൻഡർ നടപടികൾ സ്വീകരിക്കണമെന്നാണ് നാട്ടുകാർ പറയുന്നത്.

ഇൻഫ്ളുവൻസ പടരുന്നു

സ്വന്തം ലേഖകൻ തൃശൂർ: പടരുന്ന ഇൻഫ്ളുവൻസയും ഉയരുന്ന ആശങ്കയും. പനിക്കിടക്കയിലായ ജില്ലയിൽ ഈ മാസത്തെ റിപ്പോർട്ടുകൾപ്രകാരം ആദ്യ 13 ദിവസത്തിൽ ഇൻഫ്ളുവൻസ ബാധിച്ചത് 182 പേർക്ക്. മൂന്നു മരണവും റിപ്പോർട്ട് ചെയ്തു. എച്ച് 3 എൻ 2 മൂലമാണ് മരണം സംഭവിച്ചിരിക്കുന്നത്. വീരോലിപ്പാടം, മരത്താക്കര, കയ്പമംഗലം എന്നിവിടങ്ങളിലാണ് മരണം റിപ്പോർട്ട് ചെയ്തത്. എലിപ്പനിയിൽ നാലുമരണവും ഡെങ്കിയിൽ ഒരു മരണവും റിപ്പോർട്ട് ചെയ്തിട്ടുണ്ട്. 12,276 പേർക്കു പനിബാധിച്ച് ആശുപത്രിയിൽ ചികിത്സ തേടിയപ്പോൾ 142 പേരെ അഡ്മിറ്റ് ചെയ്തു. കഴിഞ്ഞ നാലിനാണ് കൂടുതൽപേരെ അഡ്മിറ്റ് ചെയ്തത് -1119, കുറവ് മൂന്നിന് - 727പേർ. ഡെങ്കിപ്പനി ലക്ഷണങ്ങളുമായി 95 പേർ ചികിത്സതേടിയപ്പോൾ 42 പേരെ അഡ്മിറ്റ് ചെയ്തു. എലിപ്പനിയിൽ 36 പേർ ചികിത്സതേടിയപ്പോൾ 23 പേരെ അഡ്മിറ്റ് ചെയ്തു. ലക്ഷണങ്ങൾ പനി, ചുമ, തൊണ്ടവേദന, ശരീരവേദന, ക്ഷീണം. ചിലരിൽ ന്യുമോണിയ പോലുള്ള സങ്കീർണതകൾ ഉണ്ടാവാം. ചിലരിൽ വയറുവേദന, വയറിളക്കം എന്നിവയും കണ്ടുവരുന്നു. പകരുന്ന രീതി രോഗബാധയുള്ള വ്യക്തി ചുമയ്ക്കുന്പോഴോ തുമ്മുന്പോഴോ ഉണ്ടാകുന്ന ചെറിയ തുള്ളികളിലൂടെ വായുവിലൂടെ പകരുന്നു. രോഗാണുക്കൾ ഉള്ള പ്രതലങ്ങളിൽ സ്പർശിച്ചശേഷം കണ്ണിലോ മൂക്കിലോ വായിലോ സ്പർശിച്ചാലും രോഗം വരാം. ചികിത്സയും പ്രതിരോധവും വാക്സിനേഷൻ ഇൻഫ്ളുവൻസ തടയാൻ സഹായിക്കും. പതിവായി കൈകൾ കഴുകുക, മാസ്ക് ധരിക്കുക, തിരക്കുള്ള സ്ഥലങ്ങളിൽ പോകുന്നത് ഒഴിവാക്കുക എന്നിവയും പ്രതിരോധത്തിനു പ്രധാനമാണ്. രോഗലക്ഷണങ്ങൾ കണ്ടാൽ വൈദ്യസഹായം തേടുക.

ജില്ലാതല സ്വാതന്ത്ര്യദിനാഘോഷം തേക്കിൻകാട് മൈതാനിയിൽ

തൃശൂർ: തേക്കിൻകാട് മൈതാനിയിൽ നടക്കുന്ന ജില്ലാതല സ്വാതന്ത്ര്യദിനാഘോഷത്തിൽ മന്ത്രി ഡോ. ആർ. ബിന്ദു ദേശീയപതാക ഉയർത്തും. രാവിലെ 8.30നു പരേഡോടെ തുടക്കമാകും. ആംഡ് റിസർവ് പോലീസ്, സിറ്റി ലോക്കൽ മെൻ, റൂറൽ ലോക്കൽ മെൻ, സിറ്റി റൂറൽ ലോക്കൽ വുമൺ, എക്സൈസ്, ഫോറസ്റ്റ്, ഫോറസ്റ്റ് സിവിൽ ഡിഫൻസ്‌, 23 കെഎൻസിസി, 24 കെഎൻസിസി, 7 കെഎൻസിസി, എസ്പിസി സിറ്റി ബോയ്സ്, എസ്പിസി റൂറൽ ബോയ്സ്, എസ്പിസി സിറ്റി ഗേൾസ്, എസ്പിസി റൂറൽ ഗേൾസ് വിഭാഗങ്ങളുടെ പരേഡ് നടക്കും. പരേഡ് ഗ്രൗണ്ടിൽ ജില്ലാ കളക്ടർ അർജുൻ പാണ്ഡ്യന്‍റെ നേതൃത്വത്തിൽ ഉദ്യോഗസ്ഥർ സന്ദർശിച്ച് മുന്നൊരുക്കങ്ങൾ വിലയിരുത്തി.

ഐഎൻടിയുസിയുടെ പരിപാടിയിൽ പങ്കെടുക്കാതെ വി.ഡി. സതീശൻ

തൃശൂർ: ഐഎൻടിയുസിയുടെ ജനറൽ കൗണ്‍സിൽ യോഗം ഉദ്ഘാടനം ചെയ്യാനെത്തിയ പ്രതിപക്ഷ നേതാവ് വി.ഡി. സതീശൻ അവസാനനിമിഷം പരിപാടിയിൽ പങ്കെടുക്കാതെ മടങ്ങി. ടൗണ്‍ഹാളിലെ സമ്മേളനസ്ഥലത്തേക്കുള്ള യാത്രാമധ്യേയാണു മടക്കം. ചടങ്ങിലേക്കു ഡിസിസി പ്രസിഡന്‍റിനെ ക്ഷണിച്ചില്ലെന്നതാണു കാരണമെന്നാണു വിവരം. ഐഎൻടിയുസി സംസ്ഥാനപ്രസിഡന്‍റ് ആർ. ചന്ദ്രശേഖരൻ അധ്യക്ഷത വഹിക്കുന്ന ചടങ്ങ് ബഹിഷ്കരിച്ചതു വരുംദിവസങ്ങളിലും വിവാദമായേക്കും. ഡിസിസി പ്രസിഡന്‍റ് വിലക്കിയതുകൊണ്ടാണു പ്രതിപക്ഷനേതാവ് പരിപാടിയിൽനിന്നു വിട്ടുനിന്നതെന്ന് ഐഎൻടിയുസി ജില്ലാ പ്രസിഡന്‍റ് സുന്ദരൻ കുന്നത്തുള്ളി യോഗത്തിൽ തുറന്നടിച്ചു. ഇത് ഐഎൻടിയുസിയുടെ പരിപാടിയാണ്. മറ്റാളുകളെ കോലംകെട്ടി കൊണ്ടിരുത്തേണ്ട വേദിയല്ല. നാട്ടിലെ ഒരുപാടാളുകളെ വേദിയിലിരുത്തി മാലയിട്ടു സ്വീകരിക്കാൻ സൗകര്യമില്ല. കോണ്‍ഗ്രസിന്‍റെ പരിപാടിയിൽ ഞങ്ങളൊക്കെ സദസിലാണ് ഇരുന്നത്. ഇവിടെയിരിക്കുന്നതു ചുമട്ടുതൊഴിലാളികളാണ്. ഓട്ടോറിക്ഷക്കാരുടെ പരിപാടി അവർക്കു മാത്രമായി നടത്തുന്നതാണ്. ഇതാണു സംഘടനാരീതി. ‌കോണ്‍ഗ്രസിന്‍റെ ഏറ്റവും വലിയ പരിപാടി ഇതേ വേദിയിൽ നടന്നു. അന്നും തനിക്കും മുൻ ഡിസിസി പ്രസിഡന്‍റ് ജോസ് വള്ളൂരിനും ടി.എൻ. പ്രതാപനും വേദിയിൽ സീറ്റു കിട്ടിയില്ല. ഇവിടെയിരിക്കുന്നു എന്നതാണു ഞങ്ങളുടെ മഹത്വം. ഇതെല്ലാം പറഞ്ഞതുകൊണ്ട് എന്‍റെ സംഘടനാപദവികൾ തെറിക്കുമായിരിക്കും. അങ്ങനെ തുമ്മിയാൽ തെറിക്കുന്ന മൂക്ക് തെറിക്കട്ടെ. ജില്ലയിൽ ഐഎൻടിയുസി സംഘടിപ്പിച്ച ചില പരിപാടികളോട് ഡിസിസി പ്രസിഡന്‍റ് നിഷേധാത്മകമായാണു പെരുമാറിയത്. അദ്ദേഹത്തിനു ഫോട്ടോ മാനിയയാണ്. നമ്മുടെ പരാതികൾ കേൾക്കാനെത്തുന്നവരെ മുടക്കുന്നവർ ഈ പാർട്ടിക്ക് എത്ര ഗുണം ചെയ്യുമെന്നുമെന്നു തിരിച്ചറിയണം- സുന്ദരൻ കുന്നത്തുള്ളി പറഞ്ഞു. കഴിഞ്ഞദിവസം ഡിസിസി ഓഫീസിൽ പ്രസിഡന്‍റ് ജോസഫ് ടാജറ്റും സുന്ദരൻ കുന്നത്തുള്ളിയുമായി വാക്കേറ്റമുണ്ടായെന്നും ഇതിന്‍റെ ബാക്കിപത്രമാണ് നടന്നതെന്നുമാണു വിവരം. നടുവേദനയുടെ പേരിൽ ജനകീയസമരങ്ങൾക്കു ടാജറ്റ് നേതൃത്വം നൽകുന്നില്ലെന്നായിരുന്നു കുന്നത്തുള്ളിയുടെ വിമർശനം.

തൊഴിൽ നഷ്ടപ്പെടുന്ന അവസ്ഥയ്ക്കു പരിഹാരമുണ്ടാക്കണം: ആർ. ചന്ദ്രശേഖരൻ

തൃശൂർ: ചുമട്ടുതൊഴിലാളികൾക്കു തൊഴിൽ നഷ്ടപ്പെടുന്ന അവസ്ഥയ്ക്കും വിരമിച്ചവർക്ക് ആനുകൂല്യങ്ങൾ നൽകാനുള്ള കാലതാമസത്തിനും പരിഹാരം കാണണമെന്ന് ഐഎൻടിയുസി സംസ്ഥാന പ്രസിഡന്‍റ് ആർ. ചന്ദ്രശേഖരൻ. ഐഎൻടിയുസി ജില്ലാ ദേശീയ ചുമട്ടുതൊഴിലാളി യൂണിയൻ ജനറൽ കൗൺസിൽ യോഗവും എം. മാധവൻ അനുസ്മരണവും വിദ്യാഭ്യാസ അവാർഡ് വിതരണവും ടൗൺ ഹാളിൽ ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ പ്രസിഡന്‍റ് സുന്ദരൻ കുന്നത്തുള്ളി അധ്യക്ഷത വഹിച്ചു. യുഡിഎഫ് ചെയർമാൻ ടി.വി. ചന്ദ്രമോഹൻ, ജോസ് വള്ളൂർ, ടി.എം. കൃഷ്ണൻ, സോമൻ മുത്രത്തിക്കര, വി.എ. ഷംസുദീൻ, എ.ടി. ജോസ്, കെ.എൻ. നാരായണൻ, സുരേഷ് മമ്പറമ്പിൽ തുടങ്ങിയവർ പ്രസംഗിച്ചു.

മോദി ഭരണഘടനയുടെ ആത്മാവ് തകർത്തു: ബെന്നി ബഹനാൻ എംപി

തൃശൂർ: പൗരവകാശത്തിന്‍റെ രജതരേഖയായ വോട്ടർപട്ടിക ക്രമക്കേടിലൂടെ മോദി ഭരണഘടനയുടെ ആത്മാവ് തകർത്തെന്നു കെപിസിസി രാഷ്ട്രീയകാര്യസമിതി അംഗം ബെന്നി ബഹനാൻ എംപി പറഞ്ഞു. വോട്ടുകൊള്ളയ്ക്കെതിരേ പോരാടുന്ന രാഹുൽ ഗാന്ധിയെ പിന്തുണച്ചു നഗരത്തിൽ നടത്തിയ ഫ്രീഡം ലൈറ്റ് നൈറ്റ് മാർച്ച് ഉദ്ഘാടനം ചെയ്യുകയായിരുന്നു അദ്ദേഹം. ആരോപണങ്ങൾക്കു വസ്തുതാപരമായി മറുപടി പറയാതെ ചട്ടങ്ങൾ പറഞ്ഞു തെറ്റിനെ ന്യായീകരിക്കുകയാണു തെരഞ്ഞെടുപ്പ് കമ്മീഷൻ ചെയ്യുന്നത്. കമ്മീഷന്‍റെ വിശ്വാസ്യത നഷ്ടപ്പെട്ടു. പരാജയത്തിന്‍റെ പേരിലല്ല ജനാധിപത്യത്തിനുവേണ്ടിയാണ് കോൺഗ്രസ് സമരരംഗത്തുള്ളതെന്നും ബെന്നി ബഹനാൻ കൂട്ടിച്ചേർത്തു. ഡിസിസി പ്രസിഡന്‍റ് അഡ്വ. ജോസഫ് ടാജറ്റ് അധ്യക്ഷത വഹിച്ചു. എം.പി. വിൻസെന്‍റ്, ജോസ് വള്ളൂർ, സന്ദീപ് വാര്യർ, അനിൽ അക്കര, ടി.വി. ചന്ദ്രമോഹൻ, ജോസഫ് ചാലിശേരി, സുനിൽ അന്തിക്കാട്, രാജേന്ദ്രൻ അരങ്ങത്ത്, ജോൺ ഡാനിയൽ, എ. പ്രസാദ് തുടങ്ങിയവർ നേതൃത്വം നല്കി. നടുവിലാൽ പരിസരത്തുനിന്ന് ആരംഭിച്ച പന്തംകൊളുത്തി പ്രകടനം കോർപറേഷൻ ഓഫീസിനുമുന്നിൽ സമാപിച്ചു. തുടർന്നു മെഴുകുതിരി കത്തിച്ച് രാഹുൽഗാന്ധിയുടെ പോരാട്ടത്തിന് ഐക്യദാർഢ്യം പ്രഖ്യാപിച്ചു.

ലോറിക്കു തീപിടിച്ച് കിടക്കനിര്‍മാണ സാമഗ്രികള്‍ കത്തിനശിച്ചു

കൊടകര: കൊപ്രക്കളം - കല്ലേറ്റുങ്കര റോഡിലെ പാറേക്കാട്ടുകരയില്‍ ഓടിക്കൊണ്ടിരുന്ന കണ്ടെയ്‌നര്‍ ലോറിക്കു തീപിടിച്ചതു പരിഭ്രാന്തി പരത്തി. പാറേക്കാട്ടുകരയില്‍ പ്രവര്‍ത്തിക്കുന്ന കിടക്കനിര്‍മാണശാലയിലേക്ക് ഈറോഡുനിന്ന് നിര്‍മാണസാമഗ്രികളുമായി വരികയായിരുന്ന ലോറിയിലാണ് തീപിടിത്തമുണ്ടായത്. ഇന്നലെ ഉച്ചയ്ക്ക് 12.30-ഓടെയാണ് സംഭവം. ലോറിയുടെ പിറകുവശത്തു‌നിന്ന് പുക ഉയരുന്നതായി ബൈക്ക് യാത്രക്കാരനാണ് അറിയിച്ചതെന്നു ലോറി ഡ്രൈവര്‍ ഭാഗ്യരാജ് പറഞ്ഞു. തുടര്‍ന്നു വീടുകള്‍ കുറവുള്ള ഭാഗത്തു ലോറി നിര്‍ത്തി. അപ്പോഴേക്കും ലോറിക്കുള്ളിലുള്ള സാമഗ്രികള്‍ക്കു തീപിടിച്ചിരുന്നു. അഗ്നിരക്ഷാസേനയുടെ മൂന്നു യൂണിറ്റ് എത്തിയാണ് തീയണച്ചത്. ആളൂര്‍ പോലീസും സ്ഥലത്തെത്തി. ലോറിയിലുണ്ടായിരുന്ന നിര്‍മാണ സാമഗ്രികള്‍ കത്തിനശിച്ചു. തീപിടിക്കാനുള്ള കാരണം വ്യക്തമായിട്ടില്ല.

കുന്നംകുളം പന്തല്ലൂരിൽ മിന്നൽ ചുഴലി: വൻനാശനഷ്ടം

കുന്നംകുളം: ചൊവ്വന്നൂരിനടുത്ത് പന്തല്ലൂരിൽ ഇന്നലെ രാവിലെ ശക്തമായ മിന്നൽചുഴലി. രാവിലെ ഒമ്പതരയോടെയാണ് ചെറിയ മഴയോടുകൂടിയ ശക്തമായ കാറ്റ് പന്തല്ലൂരിൽ ആഞ്ഞുവീശിയത്. മെയിൻ റോഡിൽ നിന്ന് പന്തല്ലൂർ ക്ഷേത്രത്തിലേക്കു പോകുന്ന വഴിയിലാണ് മിന്നൽചുഴലി ഉണ്ടായത്. ഇലക്ട്രിക് പോസ്റ്റുകൾ ഒടിഞ്ഞുവീഴുകയും പറമ്പുകളിലെ നിരവധി തെങ്ങുകളും മരങ്ങളും വീഴുകയും ചെയ്തിട്ടുണ്ട്. പെട്ടെന്നുണ്ടായ ശക്തമായ കാറ്റ് അഞ്ചുമിനിറ്റോളം നീണ്ടുനിന്നു. ഇതിനിടയിലാണ് നാശനഷ്ടങ്ങൾ ഉണ്ടായത്. പന്തല്ലൂർ സ്വദേശി സൈമൺ എന്നയാളുടെ ഓട്ടോറിക്ഷയുടെ മുകളിലേക്ക് ഇലക്ട്രിക് പോസ്റ്റ് മറിഞ്ഞുവീണു. ഇയാൾ അത്ഭുതകരമായി രക്ഷപ്പെട്ടു. സ്കൂൾ കുട്ടികളും, വാഹനങ്ങളും ഉൾപ്പെടെ നിരവധി ആളുകൾ സഞ്ചരിക്കുന്ന വഴിയാണിത്. സ്കൂൾ വാഹനങ്ങളുടെ സമയത്തിനു ശേഷമാണ് കാറ്റ് ഉണ്ടായതിനാൽ വൻ ദുരന്തമാണ് ഒഴിഞ്ഞത്. സംഭവത്തിൽ ആർക്കും പരിക്കില്ല.

ഹൃദയാഘാതംമൂലം വിദ്യാർഥിനി മരിച്ചു

തോണൂർക്കര: കുറ്റിക്കാട് ഉന്നതി കൃപാനഗറിലെ വാസുദേവന്‍റെ മകൾ രുദ്ര (17) ഹൃദയാഘാതം മൂലം മരിച്ചു. ചേലക്കര എസ്എംടി സ്കൂളിലെ പ്ലസ്ടു വിദ്യാർഥിനിയാണ്. പനിയെ തുടർന്ന് തൃശൂർ മെഡിക്കൽ കോളജ് ആശുപത്രിയിൽ ചികിൽസയിലിരിക്കെയാണ് മരണം. സംസ്കാരം ഇന്നു രാവിലെ. സഹോദരൻ: ശ്രീഹരി

ദേവമാത ഇന്‍റർനാഷണൽ സ്കൂൾ സമാധാന യാത്ര നടത്തി

തങ്ങാലൂർ: ലോകസമാധാനം, സാഹോദര്യം, സാമൂഹിക ഐക്യം എന്നീ സന്ദേശങ്ങളുയർത്തി ദേവമാത സിഎംഐ ഇന്‍റർനാഷണൽ സ്കൂളിന്‍റെ നേതൃത്വത്തിൽ സമാധാനയാത്ര നടത്തി. അമലയിൽനിന്ന് ആരംഭിച്ച പദയാത്ര ദേവമാത പ്രൊവിൻഷ്യൽ ഫാ. ജോസ് നന്തിക്കര സിഎംഐ ഉദ്ഘാടനം ചെയ്തു. ഇന്ത്യൻ ഫുട്ബോൾ ടീം മുൻ ക്യാപ്റ്റൻ സി.വി. പാപ്പച്ചൻ ഫ്ളാഗ് ഓഫ് ചെയ്തു. സമാപനവേദിയായ ദേവമാത സ്കൂൾ പരിസരത്ത് അശോകമരം നട്ട് വേലൂർ പഞ്ചായത്ത് പ്രസിഡന്‍റ് ടി.ആർ. ജോബി ആശംസകൾ നേർന്നു. ദേവമാത വികാർ പ്രൊവിൻഷ്യൽ ഫാ. ഡേവി കാവുങ്കൽ, ദേവമാത പ്രോവിൻസ് എഡ്യുക്കേഷൻ കൗണ്‍സിലർ ഫാ. സന്തോഷ് മുണ്ടൻമാണി, അമല ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസ് ജോയിന്‍റ് ഡയറക്ടർമാരായ ഫാ. ആന്‍റണി മണ്ണുമ്മൽ, ഫാ. ജയ്സണ്‍ മുണ്ടൻമാണി, ഫാ. ഷിബു പുത്തൻപുരയ്ക്കൽ, പ്രോവിൻസ് കൗണ്‍സിലർ ഫാ. ജോർജ് തോട്ടാൻ, അമല ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസ് പ്രിൻസിപ്പൽ ഡോ. ബെറ്റ്സി തോമസ്, മെഡിക്കൽ കോളജ് എസ്ഐ ഷാജി എന്നിവർ സമാധാനയാത്രയിൽ പങ്കെടുത്തു. ദേവമാത ഇന്‍റർനാഷണൽ സ്കൂൾ ഡയറക്ടർ ഫാ. ഷാജു എടമന, ജോയിന്‍റ് ഡയറക്ടർമാരായ ഫാ. ബെന്നി പേങ്ങിപ്പറന്പിൽ, ഫാ. സിന്‍റോ നങ്ങിണി, കോഓർഡിനേറ്റർമാരായ ടെസി ഇഗ്നേഷ്യസ്, അനിത ശ്രീകുമാർ , സി.വി. റീന, ക്രിസ് ലിന്‍റോ, പിടിഎ ഭാരവാഹികളായ ജെയിംസ് നീലങ്കാവിൽ, വിനോത്ത് രംഗരാജ്, ബിനു ചന്ദ്രൻ എന്നിവർ പദയാത്രയ്ക്കു നേതൃത്വം നൽകി.

കർഷക പുരസ്കാരങ്ങളിൽ തൃശൂരിനു മികച്ച നേട്ടം

തൃശൂർ: സംസ്ഥാന കർഷക പുരസ്കാരങ്ങളിൽ മിന്നിത്തിളങ്ങി തൃശൂർ. ഓരോ വർഷവും കാർഷികോത്പാദന മേഖലയിൽ മികച്ച പ്രവർത്തനം കാഴ്ചവയ്ക്കുന്നവർക്കാണ് അവാർഡ്. ജൈവകൃഷി നടത്തുന്ന ആദിവാസി ഊര്/ ക്ലസ്റ്റർ വിഭാഗത്തിൽ വെറ്റിലപ്പാറ അടിച്ചിൽതൊട്ടി ഉന്നതി രണ്ടാംസ്ഥാനം നേടി. കർഷകജ്യോതി വിഭാഗത്തിൽ വെള്ളാങ്ങല്ലൂർ നടുവത്ര എൻ.എസ്. മിഥുൻ, കാർഷികഗവേഷണത്തിനുള്ള എം.എസ്. സ്വാമിനാഥൻ അവാർഡ് കാർഷിക സർവകലാശാലയിലെ കൊക്കോ ഗവേഷണകേന്ദ്രത്തിലെ പ്രഫസറും മേധാവിയുമായ ഡോ. ജെ.എസ്. മിനിമോൾ, കൃഷി അസിസ്റ്റന്‍റ് ഡയറക്ടർക്കുള്ള അവാർഡ് വെള്ളാങ്ങല്ലൂർ കൃഷി അസി. ഡയറക്ടർ എം.കെ. സ്മിത എന്നിവർക്കു ലഭിച്ചു. കൃഷി വകുപ്പുമായി ബന്ധമില്ലാത്ത സ്വകാര്യസ്ഥാപനത്തിനുള്ള അവാർഡ് ഇരിങ്ങാലക്കുട ക്രൈസ്റ്റ് കോളജും സ്വന്തമാക്കി.

കൊയ്ത്തുമെതിയന്ത്ര ഇടപാടിൽ 134.16 കോടിയുടെ തട്ടിപ്പ്

തൃശൂർ: കൊയ്ത്തുമെതിയന്ത്ര ഇടപാടിൽ കർഷകരുടെ വ്യാജരേഖയുണ്ടാക്കി 134.16 കോടി രൂപയുടെ തട്ടിപ്പു നടത്തിയെന്ന പരാതിയിൽ അന്വേഷണത്തിന് ഉത്തരവിട്ട് തൃശൂർ ചീഫ് ജുഡീഷ്യൽ മജിസ്ട്രേറ്റ് കോടതി. അരിന്പൂരിലുള്ള കർഷകക്കൂട്ടായ്മ പോലീസ് കമ്മീഷണർക്കു നല്കിയ പരാതിയിൽ നടപടിയുണ്ടാകാത്തതിനെത്തുടർന്ന് അഡ്വ. സി.ആർ. ജെയ്സണ്‍ മുഖാന്തരം നല്കിയ ഹർജിയിലാണു നടപടി. കൃഷിവകുപ്പ്‌ അസിസ്റ്റന്‍റ് എക്സിക്യൂട്ടീവ് എൻജിനീയർമാരായ പി.ബി. സന്തോഷ്, സുമേഷ് കുമാർ, സൂരജ് കണ്ണൻ എന്നിവർക്കു സമൻസ് അയയ്ക്കാൻ കോടതി ഉത്തരവിട്ടു. 2019 മുതൽ 2024 വരെയുള്ള കാലയളവിൽ 104 കൊയ്ത്തുമെതിയന്ത്രങ്ങളാണ് കൃഷി അസിസ്റ്റന്‍റ് എക്സിക്യൂട്ടീവ് എൻജിനീയറുടെ ഓഫീസ് മുഖാന്തരം വിതരണംചെയ്തത്. ഇതിൽ ഭൂരിപക്ഷവും കർഷകരുടെ വ്യാജരേഖയുണ്ടാക്കി പണംതട്ടിയെടുത്തെന്നാണ് ആരോപണം. 25,80,000 രൂപ വിലയുള്ള യന്ത്രത്തിന്‍റെ മുഴുവൻ തുകയും ഒരുമിച്ചടയ്ക്കുന്പോഴാണ് അന്പതുശതമാനം സബ്സിഡി ലഭിക്കുന്നത്. എന്നാൽ യന്ത്രം വാങ്ങിയതായി രേഖകളിൽ കാണിച്ചിട്ടുള്ള പലരും ദാരിദ്ര്യരേഖയ്ക്കു താഴെയുള്ളവരും സാന്പത്തികമായി പിന്നാക്കംനിൽക്കുന്നവരുമാണ്. ഇതരസംസ്ഥാനലോബികളും ഉദ്യോഗസ്ഥരും രാഷ്ട്രീയകക്ഷികളുടെ സഹായത്തോടെ കർഷകരുടെ വ്യാജരേഖകളും ഒപ്പും സീലുമുണ്ടാക്കി പണം അടച്ചതായി രേഖയുണ്ടാക്കിയാണു തട്ടിപ്പുനടത്തിയതെന്നു കർഷകക്കൂട്ടായ്മ ചൂണ്ടിക്കാട്ടി. രേഖയിൽ കാണിച്ചിട്ടുള്ള പലരുടെയും കൈവശം നിലവിൽ മെതിയന്ത്രങ്ങൾ ഇല്ലെന്നു കണ്ടെത്തിയതായും പറഞ്ഞു. പത്രസമ്മേളനത്തിൽ കർഷകക്കൂട്ടായ്മ അംഗങ്ങളായ പി.വി. നിഥുൻ, സി.എൽ. ജോണ്‍സണ്‍, എം.ഡി. പ്രവീണ്‍, പി.കെ. കേരളകുമാരൻ എന്നിവർ പങ്കെടുത്തു.

കമ്മീഷണർ ഓഫീസിലേക്കു ബിജെപി മാർച്ച്; പോലീസ് ജലപീരങ്കി പ്രയോഗിച്ചു

തൃശൂർ: സിറ്റി പോലീസ് കമ്മീഷണറുടെ ഓഫീസിലേക്കു ബിജെപി നടത്തിയ മാർച്ചിൽ സംഘർഷം. പ്രവർത്തകർക്കുനേരെ പോലീസ് ജലപീരങ്കി പ്രയോഗിച്ചു. സുരേഷ്ഗോപി എംപിയുടെ ഓഫീസിനുനേരേ സിപിഎം നടത്തിയ അതിക്രമത്തിൽ പ്രതിഷേധിച്ച ബിജെപി ജില്ലാ അധ്യക്ഷൻ ഉൾപ്പടെയുള്ളവരെ പോലീസ് മർദിച്ചതിനെതിരേയാണ് കമ്മീഷണർ ഓഫീസിലേക്കു മാർച്ച് നടത്തിയത്. പഴയനടക്കാവിലെ ഓഫീസിൽനിന്നാരംഭിച്ച മാർച്ച് കമ്മീഷണർ ഓഫീസിനുസമീപം പോലീസ് തടഞ്ഞു. വനിതകളടക്കം നിരവധി പ്രവർത്തകർ മാർച്ചിൽ അണിനിരന്നു. അക്രമാസക്തരായ പ്രവർത്തകരെ പിരിച്ചുവിടാൻ പോലീസ് ജലപീരങ്കി പ്രയോഗിക്കുകയായിരുന്നു. ജനങ്ങൾ തൃശൂരിൽ തോല്പിച്ചതിനു സിപിഎമ്മും എൽഡിഎഫും ബിജെപിയുടെ നെഞ്ചത്തുകയറാൻ വന്നാൽ ശക്തമായി പ്രതിരോധിക്കുമെന്നു മാർച്ച് ഉദ്ഘാടനം ചെയ്ത ബിജെപി മുൻ സംസ്ഥാന അധ്യക്ഷൻ കെ. സുരേന്ദ്രൻ പറഞ്ഞു. എംപിയുടെ ഓഫീസിലെ ബോർഡിൽ കരിഓയിലൊഴിച്ച് ചെരിപ്പുമാലയിട്ട നടപടി തൃശൂരിലെ വോട്ടർമാരെ അധിക്ഷേപിക്കുന്നതാണെന്നു ബിജെപി സംസ്ഥാന ജനറൽ സെക്രട്ടറി ശോഭ സുരേന്ദ്രൻ പറഞ്ഞു. തൃശൂർ ജില്ലാ പ്രഭാരിയും സംസ്ഥാനസെക്രട്ടറിയുമായ എം.വി. ഗോപകുമാർ അധ്യക്ഷത വഹിച്ചു. ബിജെപി സംസ്ഥാന വൈസ് പ്രസിഡന്‍റുമാരായ അഡ്വ. കെ.കെ. അനീഷ്കുമാർ, അഡ്വ. ബി. ഗോപാലകൃഷ്ണൻ, മേഖലാ പ്രസിഡന്‍റ് എ. നാഗേഷ്, കോർപറേഷൻ കൗണ്‍സിലർമാർ, ജില്ലാ പ്രസിഡന്‍റുമാർ, സെക്രട്ടറിമാർ എന്നിവർ പങ്കെടുത്തു.

കാട് വെട്ടിത്തെളിക്കും, ചോർച്ച പരിഹരിക്കും

തൃശൂർ: കോർപറേഷൻ ജനറൽ ആശുപതിക്കെട്ടിടം കാടുകയറിയതിലും കെട്ടിടങ്ങളുടെ കോണ്‍ക്രീറ്റ് തകർന്നതിലും അടിയന്തരനടപടിക്കു നിർദേശം നൽകി മേയർ എം.കെ. വർഗീസ്. ദീപിക വാർത്തയുടെ അടിസ്ഥാനത്തിലാണു നടപടി. മഴ മാറിയാൽ ഉടൻ നടപടി സ്വീകരിക്കാനാണു നിർദേശം. 'മേയറേ കാണുന്നുണ്ടോ? ജനറൽ ആശുപത്രി കാടു കയറുന്നു, കോണ്‍ക്രീറ്റുകൾ തകരുന്നു’ എന്ന തലക്കെട്ടിൽ കഴിഞ്ഞ തിങ്കളാഴ്ച ദീപിക വാർത്ത പ്രസിദ്ധീകരിച്ചിരുന്നു. മോർച്ചറി റോഡിലെ ആശുപത്രിക്കെട്ടിടത്തിൽ വ്യാപകമായി പുല്ല് പടർന്നുപിടിച്ചതും കോണ്‍ക്രീറ്റുകൾ തകർന്നതും പൈപ്പുകളിലെ ചോർച്ചയെത്തുടർന്ന് മലിനജലം റോഡിലെ യാത്രക്കാരുടെ ദേഹത്തേക്കു തെറിക്കുന്നുവെന്നുമായിരുന്നു ദീപിക വാർത്ത. ഇതേത്തുടർന്നാണ് മേയർ നടപടി സ്വീകരിച്ചത്.

പ്രതിഷേധമാർച്ചുമായി സിപിഎം

തൃശൂർ: സിപിഎം ജില്ലാ കമ്മിറ്റി ഓഫീസിലേക്കു ബിജെപി നടത്തിയ മാർച്ചിൽ പ്രതിഷേധിച്ച് സിപിഎം കോർപറേഷൻ ഓഫീസിലേക്കു മാർച്ച് നടത്തി. ബിജെപി നടത്തിയ മാർച്ചിനിടെ ജില്ലാ കമ്മിറ്റി ഓഫീസിലേക്കു തീപ്പന്തമെറിഞ്ഞെന്നും രാഷ്ട്രീയപാർട്ടികൾ തമ്മിലുള്ള ജനാധിപത്യധാരണ ലംഘിച്ചെന്നും ആരോപിച്ച് സിപിഎം ജില്ലാ കമ്മിറ്റി ഓഫീസിൽനിന്ന് ആരംഭിച്ച പ്രകടനം കോർപറേഷൻ ഓഫീസ് പരിസരത്തു സമാപിച്ചു. ജില്ലാ സെക്രട്ടറി കെ.വി. അബ്ദുൾഖാദർ ഉദ്ഘാടനംചെയ്തു. ഒല്ലൂർ ഏരിയ സെക്രട്ടറി എൻ.എൻ. ദിവാകരൻ, ജില്ലാ കമ്മിറ്റിയംഗം ഉഷ പ്രഭുകുമാർ, മണ്ണുത്തി ഏരിയ സെക്രട്ടറി എം.എസ്. പ്രദീപ്കുമാർ, തൃശൂർ ഏരിയ സെക്രട്ടറി അനൂപ് ഡേവിസ് കാട എന്നിവർ പ്രസംഗിച്ചു.

യുവാവിനെ ആക്രമിച്ച് കവർച്ച: മൂന്നുപേർ അറസ്റ്റിൽ

പുതുക്കാട്: യുവാവിനെ ആക്രമിച്ച് 20,000 രൂപ വീതം വിലവരുന്ന വാച്ചും മൊബൈൽഫോണും കവർച്ച ചെയ്ത കേസിൽ മൂന്നു യുവാക്കളെ പുതുക്കാട് പോലീസ് അറസ്റ്റ് ചെയ്തു. സ്റ്റേഷൻ റൗഡി ലിസ്റ്റിൽപ്പെട്ട ആനന്ദപുരം ഇടയാട്ടുമുറി സ്വദേശി ഞാറ്റുവെട്ടി അപ്പുട്ടി എന്ന അനുരാജ്, കൊറ്റനെല്ലൂർ പട്ടേപ്പാടം സ്വദേശികളായ തൈപ്പറന്പിൽ നിഖിൽ, വേലാംപറന്പിൽ അബ്ദുൾ ഷാഹിദ് എന്നിവരാണ് അറസ്റ്റിലായത്. ഇടയാട്ടുമുറി കിണർ സ്റ്റോപ്പിനടുത്തുവച്ച് തിങ്കളാഴ്ചയായിരുന്നു സംഭവം. കറുകുറ്റി സ്വദേശി ചക്യത്ത് റോബിൻ കാറിൽ സുഹൃത്തായ യുവതിയെ എടയാറ്റുമുറിയിലുള്ള വീട്ടിലെത്തിക്കാനായി പോകുന്പോൾ പ്രതികൾ കാർ തടഞ്ഞുനിർത്തി ആക്രമിക്കുകയായിരുന്നു . പുതുക്കാട്, ആളൂർ, കാട്ടൂർ പോലീസ് സ്റ്റേഷനുകളിലായി ഒന്പതു ക്രിമിനൽകേസുകളിൽ പ്രതിയാണ് അനുരാജ്. പുതുക്കാട് ഇൻസ്പെക്ടർ ആദംഖാൻ, സബ് ഇൻസ്പെക്ടർമാരായ എൻ. പ്രദീപ്, വൈഷ്ണവ്, ജിഎഎസ്ഐ പി.എം. ജിജോ, സിപിഒമാരായ ഫൈസൽ, നവീൻകുമാർ എന്നിവരാണ് അന്വേഷണസംഘത്തിലുണ്ടായിരുന്നത്.

ടൗൺ പോസ്റ്റ് ഓഫീസ് നിർത്തലാക്കുന്നതിൽ പ്രതിഷേധം

ചാലക്കുടി: രാജഭരണകാലം മുതൽ പാലസ് റോഡിൽ പ്രവർത്തിക്കുന്ന ടൗൺ പോസ്റ്റ്ഓഫീസ് നിർത്തലാക്കുവാനുള്ള നീക്കത്തിനെതിരെ പ്രതിഷേധം. ആർഡി കളക്ഷനിൽ ഒന്നാംസ്ഥാനവും നിരവധി സ്ഥാപനങ്ങളും പൊതുജനങ്ങളും ആശ്രയിക്കുന്ന പോസ്റ്റ് ഓഫീസാണിത്. സ്വന്തമായുള്ള 20 സെന്‍റ് ഭൂമിയിലെ കെട്ടിടത്തിലാണ് വർഷങ്ങൾക്കു മുൻപ് പ്രവർത്തിച്ചിരുന്നത്. എന്നാൽ കാലപഴക്കത്തിൽ കെട്ടിടം നശിച്ചതിനെത്തുടർന്ന് വാടകകെട്ടിടത്തിലാണ് ഇപ്പോൾ പ്രവർത്തിക്കുന്നത്. കെട്ടിടനിർമാണത്തിനായി പണം അനുവദിച്ചെങ്കിലും കെട്ടിടനിർമാണം ആരംഭിച്ചിട്ടില്ല. ചോല ആർട്ട് ഗാലറിയിൽ ചേർന്നയോഗം നഗരസഭ കൗൺസിലർ ആലീസ് ഷിബു ഉദ്ഘാടനം ചെയ്തു. വാർഡ് കൗൺസിലർ വി.ജെ.ജോജി അധ്യക്ഷത വഹിച്ചു. കൗൺസിലർ ദീപുദിനേശ്, വിൽസൻ കല്ലൻ, കെ. മുരാരി, എൻ. ഗോവിന്ദൻകുട്ടി, ശശിധരൻ പയ്യപ്പിള്ളി, ടി. സോമനാഥ് തുടങ്ങിയവർ പ്രസംഗിച്ചു.

പരിശുദ്ധ വെളയനാട്ടമ്മയുടെ പുത്തരിത്തിരുനാളും പുതിയ ദേവാലയ ശിലാസ്ഥാപനവും നാളെ

വെളയനാട്: വെളയനാട് സ്വര്‍ഗാരോപിത മാതാവിന്‍റെ പള്ളിയിൽ പരിശുദ്ധ വെളയനാട്ടമ്മയുടെ പുത്തരി തിരുനാളും പുതിയ ദേവാലയ ശിലാസ്ഥാപനകര്‍മവും നാളെ നടക്കും. കല്പറമ്പ് ഫൊറോന പള്ളി വികാരി ഫാ. പോളി കണ്ണൂക്കാടന്‍ തിരുനാള്‍ കൊടിയേറ്റം നിര്‍വഹിച്ചു. തിരുനാള്‍ദിനമായ നാളെ രാവിലെ ഏഴിന് ദിവ്യബലി, ഒമ്പതിന് ഊട്ടുനേര്‍ച്ച വെഞ്ചരിപ്പ്, ഊട്ടുനേര്‍ച്ച ആരംഭം. 9.15ന് പരിശുദ്ധ വെളയനാട്ടമ്മയുടെ ദേവാലയ ശിലാസ്ഥാപനകര്‍മം ഇരിങ്ങാലക്കുട രൂപത ബിഷപ് മാര്‍ പോളി കണ്ണൂക്കാടന്‍ നിര്‍വഹിക്കും. പത്തിന് ആഘോഷമായ തിരുനാള്‍ ദിവ്യബലി, സന്ദേശം എന്നിവയ്ക്ക് ഇരിങ്ങാലക്കുട രൂപത ബിഷപ് മാര്‍ പോളി കണ്ണൂക്കാടന്‍ കാര്‍മികത്വം വഹിക്കും. വൈകീട്ട് 6.30ന് പുരാതന ദേവാലയത്തില്‍ ദിവ്യബലി. 16ന് രാവിലെ 6.30ന് പരേതര്‍ക്കു വേണ്ടി പുരാതന ദേവാലയത്തില്‍ ദിവ്യബലി, പൊതു ഒപ്പീസ് എന്നിവ ഉണ്ടായിരിക്കും. തിരുനാളിന്‍റെ വിജയത്തിനായി വികാരി ഫാ. ജിനു വെണ്ണാട്ടുപറമ്പില്‍, കേന്ദ്രസമിതി പ്രസിഡന്‍റ് ഷിന്‍റോ ജോണ്‍ വാതുക്കാടന്‍, ജനറല്‍ കണ്‍വീനർ ലിന്‍റോ തേക്കാനത്ത്, കൈക്കാരന്മാരായ ഡേവീസ് പന്തല്ലൂക്കാരന്‍, രാജന്‍ കാനംകുടം, ഡേവീസ് കളപ്പറമ്പത്ത്, ബെന്‍സണ്‍ വടക്കന്‍ എന്നിവരുടെ നേതൃത്വത്തില്‍ വിപുലമായ കമ്മിറ്റി പ്രവര്‍ത്തിച്ചുവരുന്നു.

ദേവാലയങ്ങളിൽ തിരുനാൾ

കടുപ്പശേരി തിരുഹൃദയ പള്ളി കടുപ്പശേരി: തിരുഹൃദയ പള്ളിയിലെ ഇടവക മധ്യസ്ഥനായ ഈശോയുടെ തിരുഹൃദയരൂപ പ്രതിഷ്ഠാദിനത്തിന്‍റെയും പരിശുദ്ധ കന്യകാമറിയത്തിന്‍റെയും സംയുക്ത തിരുന്നാൾ നാളെ ആഘോഷിക്കും. തിരുനാളിനോടനുബന്ധിച്ചുള്ള കൊടിയേറ്റം വികാരി ജനറാൾ മോണ്‍. ജോസ് മാളിയേക്കൽ നിർവഹിച്ചു. നാളെ രാവിലെ 6.30ന് ദിവ്യബലി, 9.45ന് പ്രസുദേന്തി വാഴ്ച, 10ന് തിരുനാൾ ദിവ്യബലിക്കു ഫാ.ജെയിംസ് പള്ളിപ്പാട്ട് കാർമികത്വം വഹിക്കും. ഫാ. ഏലിയാസ് തെക്കേമുണ്ടയ്ക്കപ്പടവിൽ സന്ദേശം നൽകും. തുടർന്നു തെക്കെ കപ്പേളയിലേക്കും വടക്കേ കപ്പേളയിലേക്കും പ്രദക്ഷിണവും ഉണ്ടാകും. വികാരി ഫാ. ജോമിൻ ചെരടായി, കൈക്കാരന്മാരായ ജോബി മാളിയേക്കൽ, ജോസ് കൊടിയൻ, അനിൽ ഇമ്മാനുവേൽ വാലിപറന്പിൽ, ജനറൽ കണ്‍വീനർ സിജോയ് തോമസ് ആളൂക്കാരൻ, കേന്ദ്രസമിതി പ്രസിഡന്‍റ് സാബു വടക്കുഞ്ചേരി എന്നിവരുടെ നേതൃത്വത്തിൽ വിപുലമായ കമ്മിറ്റികൾ ആഘോഷങ്ങൾക്ക് നേതൃത്വം നൽകും. കണ്ണിക്കര കുരിശുപള്ളി താഴേക്കാട്: കണ്ണിക്കര കുരിശുപള്ളിയില്‍ പരിശുദ്ധമാതാവിന്‍റെ സ്വര്‍ഗാരോപണ തിരുനാളിനു കൊടികയറി. തിരുനാളിന്‍റെ കൊടിയേറ്റുകര്‍മം താഴേക്കാട് മേജര്‍ ആര്‍ക്കി എപ്പിസ്‌കോപ്പല്‍ തീര്‍ഥാടന ദേവാലയം അസിസ്റ്റന്‍റ് വികാരി ഫാ. ജോസഫ് തൊഴുത്തിങ്കല്‍ നിര്‍വഹിച്ചു. തിരുനാളിന്‍റെ ഒരുക്കങ്ങള്‍ പൂര്‍ത്തിയായതായി വികാരി ഫാ. ആന്‍റണി മുക്കാട്ടുകരക്കാരന്‍, കൈക്കാരന്‍മാരായ പോള്‍സന്‍ ചാതേലി, ബൈജു നെടുമ്പാക്കാരന്‍, ജനറല്‍ കണ്‍വീനര്‍ ജിജോ ബേബി പൈനാടത്ത്, ജോയിന്‍റ് കണ്‍വീനര്‍ റിജോ ജോസ് ചാതേലി, ഫിനാന്‍സ് കണ്‍വീനര്‍ റോയ് കണ്ണംപുള്ളി എന്നിവര്‍ അറിയിച്ചു. തുമ്പരശേരി പള്ളി മാള: തുമ്പരശേരി സെന്‍റ് മേരീസ് പള്ളിയിൽ സ്വർഗാരോപിത മാതാവിന്‍റെ തിരുനാൾ നാളെ നടക്കും. തിരുനാൾ കൊടികയറ്റം അമ്പഴക്കാട് ഫൊറോന വികാരി ഫാ. ജോസ് അരിക്കാട്ട് നിർവഹിച്ചു. ഇടവക വികാരി ഫാ. ലിജോ മണിമലകുന്നേൽ സഹകാർമികനായിരുന്നു. തിരുനാൾ ദിനത്തിൽ രാവിലെ 9.45ന് ഊട്ടുനേർച്ച വെഞ്ചിരിപ്പ്, 10 ന് തിരുനാൾ പാട്ടുകുർബാനയിൽ ഫാ. ജെജിൻ കല്ലേലി മുഖ്യകാർമികനാകും. ഫാ. ചാൾസ് ചിറ്റാട്ടുകരക്കാരൻ സന്ദേശം നൽകും . ഉച്ചയ്ക്ക് 12.30 മുതൽ ഊട്ടു നേർച്ച വിതരണം. 17ന് ഇടവകയിലെ കേന്ദ്ര സമിതിയുടെ നേതൃത്വത്തിൽ വൈകിട്ട് 5. 30 മുതൽ ഫുഡ് ഫെസ്റ്റിവൽ ഇതോടൊപ്പം കലാസന്ധ്യയും നടക്കും. കാരൂർ റോസറി ദേവാലയം കാരൂർ: ഔവർ ലേഡി ഓഫ് റോസറി ദേവാലയത്തിൽ മാതാവിന്‍റെ സ്വർഗാരോപണ തിരുനാളിനു ഇടവക വികാരി ഫാ. ജെസ്റ്റിൻ വാഴപ്പിള്ളി കൊടി ഉയർത്തി. ഇന്നു വൈകീട്ട് അഞ്ചിന് പ്രസുദേന്തി വാഴ്ച, ദിവ്യബലി, മാതാവിന്‍റെ രൂപം എഴുന്നെള്ളിച്ച് പള്ളിചുറ്റി പ്രദക്ഷിണവും സ്നേഹ ഊട്ടും നടത്തും. തിരുനാൾ ദിനമായ നാളെ രാവിലെ 10 ന് ആഘോഷമായ തിരുനാൾ ദിവ്യബലിക്ക് ഫാ. ജോൺ പാലിയേക്കര സിഎംഐ മുഖ്യകാർമികത്വം വഹിക്കും. ഫാ ആന്‍റോ ആലപ്പാടൻ സന്ദേശം നൽകും. തിരുനാൾ ആഘോഷങ്ങൾക്ക് ജനറൽ കൺവിനർ ജിയോ ജെ. അരിക്കാട്ട് കൈക്കാരൻമാരായ പി.ജെ പോളി, ജിജോ പാറക്കൽ എന്നിവർ നേതൃത്വം വഹിക്കും.

ഉൾനാടൻ മത്സ്യകർഷകർക്കു ചെറുവള്ളം നൽകി കൊരട്ടി ഗ്രാമപഞ്ചായത്ത്

കൊരട്ടി: ഗ്രാമപഞ്ചായത്തിൽ വർഷങ്ങളായി ഉൾനാടൻ മേഖലകളിൽ ഉപജീവനാർഥം മത്സ്യബന്ധനം നടത്തിവരുന്ന മത്സ്യകർഷകർക്ക് ഫൈബർ ചെറുവള്ളങ്ങൾ വാങ്ങി നൽകി കൊരട്ടി ഗ്രാമപഞ്ചായത്ത്. മത്സ്യകർഷകരായ ടി.ഡി. ജോർജ്, ബേബി മുക്രാപ്പിള്ളി, ബൈജു പുളിക്കൻ, ജിമ്മി കരേടൻ, വർഗീസ് പാറേക്കാടൻ എന്നിവർക്കാണ് ഫൈബർ വള്ളങ്ങൾ കൈമാറിയത്. ഫൈബർ വള്ളങ്ങളുടെ വിതരണോദ്ഘാടനം പഞ്ചായത്ത് പ്രസിഡൻ്റ് പി.സി ബിജു നിർവഹിച്ചു. വൈസ് പ്രസിഡന്‍റ് ഷൈനി ഷാജി അധ്യക്ഷത വഹിച്ചു.

കത്തോലിക്ക കോണ്‍ഗ്രസ് "ആദരണീയം 2025' അവാര്‍ഡ് മീറ്റ് നാളെ

ഇരിങ്ങാലക്കുട: ഇരിങ്ങാലക്കുട രൂപത കത്തോലിക്ക കോണ്‍ഗ്രസിന്‍റെ ആഭിമുഖ്യത്തില്‍ എസ്എസ്എല്‍സി, പ്ലസ് ടു പരീക്ഷകളില്‍ ഉന്നതവിജയം നേടിയ 450 വിദ്യാര്‍ഥികള്‍ക്ക് നാളെ വൈകീട്ട് രണ്ടിന് ഇരിങ്ങാലക്കുട സെന്‍റ് ജോസഫ്സ് കോളജ് ഓഡിറ്റോറിയത്തില്‍ ആദരിച്ച് അവാര്‍ഡുകള്‍ വിതരണം ചെയ്യും. സമൂഹത്തിലെ വിവിധ മേഖലകളില്‍ പ്രാഗല്‍ഭ്യം തെളിയിച്ച ക്രൈസ്റ്റ് എന്‍ജിനീയറിംഗ് കോളജ് സ്ഥാപക ഡയറക്ടര്‍ ഫാ. ജോണ്‍ പാലിയേക്കര സിഎംഐക്ക് വിദ്യാമിത്ര അവാര്‍ഡും രൂപതയുടെ ലഹരിമുക്ത പ്രവര്‍ത്തനകേന്ദ്രമായ നവചൈതന്യയുടെ സ്ഥാപക കണ്‍സള്‍ട്ടന്‍റ് ആയ ഡോ. വി.ജെ. പോളിന് വൈദ്യരത്‌ന അവാര്‍ഡും, മുന്‍ പാസ്റ്ററല്‍ കൗണ്‍സില്‍ സെക്രട്ടറി ജോസഫ് ആലേങ്ങാടന് കര്‍മശ്രേഷ്ഠ അവാര്‍ഡും സമ്മാനിക്കും. ബിഷപ് മാര്‍ പോളി കണ്ണൂക്കാടന്‍ സമ്മേളനം ഉദ്ഘാടനം ചെയ്ത് അവാര്‍ഡുകള്‍ വിതരണം ചെയ്യും. രൂപത പ്രസിഡന്‍റ് ഡേവിസ് ഊക്കന്‍ അധ്യക്ഷത വഹിക്കും. വികാരി ജനറാള്‍ മോണ്‍. ജോളി വടക്കന്‍, രൂപതാ ഡയറക്ടര്‍ ഫാ. ലിജു മഞ്ഞപ്രക്കാരന്‍, ജനറല്‍ സെക്രട്ടറി ഡേവിസ് തുളുവത്ത്, ആന്‍റണി തൊമ്മാന, സിസ്റ്റര്‍ ഡോ. ബ്ലെസി സിഎച്ച്എഫ്, പത്രോസ് വടക്കുഞ്ചേരി, റീന ഫ്രാന്‍സിസ്, സാബു കൂനന്‍, ജനറല്‍ കണ്‍വീനര്‍ റെജിന്‍ തോമസ് തുടങ്ങിയവര്‍ പ്രസംഗിക്കും.

മാള പള്ളിപ്പുറം തീർഥാടനകേന്ദ്രം ശതാബ്ദിനിറവിൽ

മാള: മാളപള്ളിപ്പുറം വിശുദ്ധ അന്തോണീസിന്‍റെ തീർഥാടന കേന്ദ്രത്തിന്‍റെ ശതാബ്ദി വിളംബരം നാളെ നടക്കും. രാവിലെ 6.30ന് ദിവ്യബലി, തുടർന്ന് പതാക ഉയർത്തൽ. 3.30ന് തുരുത്തിപ്പുറം സെന്‍റ് ഫ്രാൻസിസ് അസീസി ദേവാലയത്തിൽ ശതാബ്ദി വിളംബര ദീപശിഖ കൈമാറ്റം ഫൊറോന വികാരി ഫാ. ജോസഫ് നിർവഹിക്കും. വചന ഗ്രന്ഥ പ്രയാണത്തിന്‍റെ ഉദ്ഘാടനം ഫാ. ജോയ് സ്രാബിക്കൽ നിർവഹിക്കും. തുടർന്ന് നൂറിലേറെ വാഹനങ്ങളുടെ അകമ്പടിയോടെ ശതാബ്ദി വിളംബരപ്രയാണം ആരംഭിച്ച് മാളപള്ളിപ്പുറം തീർഥാടന കേന്ദ്രത്തിൽ എത്തിച്ചേരും. കോട്ടപ്പുറം രൂപത ബിഷപ് ഡോ. അംബ്രോസ് പുത്തൻവീട്ടിൽ ശതാബ്ദി പ്രയാണങ്ങൾ സ്വീകരിച്ച് സന്ദേശം നൽകും. ശതാബ്ദി ആഘോഷങ്ങളുടെ ഭാഗമായി 2026ലെ തിരുനാൾ പ്രസുദേന്തിമാർ നിർമിച്ചു നൽകുന്ന വീടിന്‍റെ ശില ബിഷപ് കൈമാറും. വൈകീട്ട് 6.30ന് നടക്കുന്ന ദിവ്യബലിയിൽ മോൺ. ഫ്രാൻസിസ്കോ പടമാടൻ മുഖ്യകാർമികനാകും. മോൺ. റോക്കി റോബിൻ കളത്തിൽ വചനപ്രഘോഷണം നടത്തും. തുടർന്ന് നൊവേന, ആരാധന, നേർച്ച ഭക്ഷണ വിതരണം, മ്യൂസിക്കൽ നൈറ്റ് എന്നിവ നടക്കും. തുരുത്തിപ്പുറം ഇടവകയുടെ കീഴിൽ കുരിശുപള്ളിയായിരുന്ന സെന്‍റ് ആന്‍റണീസ് ദേവാലയം 1926 ലാണ് അന്നത്തെ വരാപ്പുഴ ആർച്ച് ബിഷപ്പ് എയ്ഞ്ചൽ മേരി മെത്രാപ്പോലീത്ത സ്വതന്ത്ര ഇടവകയായി പ്രഖ്യാപിച്ചത്. ആഘോഷപരിപാടികൾ വിശദീകരിച്ച പത്രസമ്മേളനത്തിൽ വികാരി ഫാ. പോൾ തോമസ് കളത്തിൽ, കൈക്കാരൻ ബെന്നി ചക്കാലക്കൽ, ജനറൽ കൺവീനർ വിൽഫ്രഡ് പുതുവന, സി.ടി. ഡെന്നി , സി.ജെ. തോമസ്, സി.ഒ. ജോസ് എന്നിവർ പങ്കെടുത്തു.

മരണദൂതുമായി ബസുകള്‍

ഇരിങ്ങാലക്കുട: അശ്രദ്ധമായി ബസോടിച്ചതിന് ഡ്രൈവര്‍ക്കെതിരെ പോലീസ് കേസെടുത്തു. ക്രൈസ്റ്റ് ജംഗ്ഷനില്‍ ഇന്നലെ രാവിലെ പത്ത് മണിയോടെയാണ് അപകടം ഉണ്ടായത്. അപകടത്തില്‍ ബൈക്ക് യാത്രികന്‍ തലനാരിഴയ്ക്കാണ് രക്ഷപ്പെട്ടത്. ക്രൈസ്റ്റ് ജംഗ്ഷനില്‍ എതിര്‍ ദിശയില്‍ കയറി വന്ന മഹാദേവ എന്ന ലിമിറ്റഡ് സ്‌റ്റോപ്പ് ബസാണ് അപകടം ഉണ്ടാക്കിയത്. കൊറ്റനെല്ലൂര്‍ സ്വദേശിയായ യുവാവിന്‍റെ ബൈക്കാണ് അപകടത്തില്‍പ്പെട്ടത്. അപകടത്തെ തുടര്‍ന്ന് നാട്ടുകാര്‍ ബസ് തടഞ്ഞിട്ടു. ഒടുവില്‍ പോലീസെത്തി ബസ് സ്‌റ്റേഷനിലേക്ക് കൊണ്ടുപോകുകയായിരുന്നു. 15000 രൂപയുടെ നഷ്ടം വന്നതായുള്ള പരാതിയുടെ അടിസ്ഥാനത്തില്‍ ബസ് ഡ്രൈവര്‍ക്കെതിരെ ഇരിങ്ങാലക്കുട പോലീസ് കേസ് രജിസ്റ്റര്‍ ചെയ്തു. സംഭവത്തില്‍ ഉള്‍പ്പെട്ട ബസ് പോലീസ് കസ്റ്റഡിയില്‍ എടുത്തു. നടപടിക്രമങ്ങള്‍ക്ക് ശേഷം ബസ് കോടതിയില്‍ ഹാജരാക്കും. ആളൂര്‍ സ്വദേശി കാഞ്ഞിരത്തിങ്കല്‍ വീട്ടില്‍ സലസ്റ്റിന്‍ (33) നെയാണ് അറസ്റ്റ് ചെയ്തത്. ഇയാള്‍ ആളൂര്‍ പോലീസ് സ്റ്റേഷനിലെ റൗഡി ലിസ്റ്റില്‍ പേരുള്ളയാളും, ഇരിങ്ങാലക്കുട പോലീസ് സ്റ്റേഷനില്‍ 2016 ല്‍ 1768 ലിറ്റര്‍ സ്പിരിറ്റ് കടത്തിക്കൊണ്ട് വന്ന കേസിലും, 2021 ല്‍ മാള പോലീസ് സ്റ്റേഷന്‍ പരിധിയിലെ അടിപിടിക്കേസിലും, 2022 ല്‍ ഇരിങ്ങാലക്കുട പോലീസ് സ്റ്റേഷനില്‍ ഒരു വധശ്രമക്കേസിലും പ്രതിയുമാണ്. ഇരിങ്ങാലക്കുട പോലീസ് സ്റ്റേഷന്‍ ഇന്‍സ്‌പെക്ടര്‍ എം.എസ്. ഷാജന്‍, സബ് ഇന്‍സ്‌പെക്ടര്‍ എം.ആര്‍ കൃഷ്ണപ്രസാദ് എന്നിവരാണ് കേസ് അന്വേഷിക്കുന്നത്. ക്രിമിനല്‍ പശ്ചാത്തലമുള്ളവരെ ജീവനക്കാരായി നിയോഗിക്കുന്ന ബസുകള്‍ക്കെതിരെയും ബസ് ഉടമകള്‍ക്കെതിരെയും നിയമപരമായ നടപടികള്‍ സ്വീകരിക്കുമെന്ന് പോലീസ് അറിയിച്ചു. തൃശൂര്‍ കൊടുങ്ങല്ലൂര്‍ റൂട്ടിലെ ലിമിറ്റഡ് സ്റ്റോപ്പ് ബസുകളുടെ ഗതാഗതം നിയമങ്ങള്‍ തെറ്റിച്ചുള്ള യാത്രയും അമിത വേഗതയും ഒരുപാട് അപകടങ്ങള്‍ സൃഷ്ടിക്കുന്നതായി പരാതി ഉയര്‍ന്നുവെങ്കിലും നടപടി കുറവായിരുന്നു. ലിമിറ്റഡ് സ്റ്റോപ്പ് അടക്കമുള്ള ബസുകള്‍ ചീറിപ്പായുമ്പോള്‍, കാല്‍നടയാത്രികരും ചെറുവാഹന യാത്രികരും ഭീതിയിലാണ്. ബൈക്ക് യാത്രക്കാരും ഓട്ടോകളും അപകടങ്ങളില്‍ നിന്നു രക്ഷപ്പെടുന്നത് തലനാരിഴയ്ക്കാണ്. വലിയ വാഹനങ്ങള്‍ ചീറിപ്പായുന്നതാണ് ഭൂരിഭാഗം ചെറു വാഹനങ്ങളും കാല്‍നട യാത്രക്കാരും അപകടത്തില്‍പെടാന്‍ ഇടയാക്കുന്നത്.

സെപ്റ്റിക് ടാങ്കിൽ വീണ പശുവിനെ രക്ഷപ്പെടുത്തി

ഒല്ലൂർ: തൈക്കാട്ടുശേരിയിൽ അയൽവാസിയുടെ വീട്ടിലെ സെപ്റ്റിക് ടാങ്കിൽ വീണ പശുവിനെ അഗ്നിശമന സേന രക്ഷപ്പെടുത്തി. കുറ്റക്കാരൻ മേരിയുടെ 12 അടിയോളം താഴ്ച്ചയുള്ള സെപ്റ്റിക് ടാങ്കിലേക്കാണ് വർഗീസിന്‍റെ ഉടമസ്ഥതയിലുള്ള പശു വീണത്. അഗ്നിശമന‌സേന അസിസ്റ്റന്‍റ് സ്റ്റേഷൻ ഓഫീസർ അനിൽകുമാറിന്‍റെ നേതൃത്വത്തിലുള സംഘമാണ് പശുവിനെ രക്ഷപ്പെടുത്തിയത്. റോപ്പ് ഉപയോഗിച്ചാണ് പശുവിനെ രക്ഷപ്പെടുത്തിയത്. അസി. ഫയർ ഓഫീസർ അനിൽ, റെസ്ക്യൂ ഓഫീസർമാരായ വി. രമേശ്‌, വി.എസ്. സജേഷ്, വി. ഗുരുവായൂരപ്പൻ, കെ. സജീഷ്, ബി. ദിനേശ്, ഐ. ബിജോയ്‌, കെ.എസ്. സുബൈർ, എസ്. ഷജിൻ, ഹോം ഗാർഡ് വിജയൻ എന്നിവർ രക്ഷാപ്രവർത്തനത്തിനു നേതൃത്വം നൽകി.

ദേവാലയങ്ങളിൽ തിരുനാൾ

കൊട്ടേക്കാട് സെന്‍റ് മേരീസ് കൊട്ടേക്കാട്: മരിയൻ തീർഥാടനകേന്ദ്രമായ കൊട്ടേക്കാട് സെന്‍റ് മേരീസ് അസംപ്ഷൻ ഫൊറോന ദേവാലയത്തിലെ സ്വർഗാരോപിതമാതാവിന്‍റെ തിരുനാളിനു കൊടിയേറി. ഫൊറോന വികാരി ഫാ. ഫ്രാങ്കോ കവലക്കാട്ട് കൊടിയേറ്റം നിർവഹിച്ചു. ഇന്നു വൈകീട്ട് 5.30ന് കൂടുതുറക്കൽ, പ്രദക്ഷിണം, പ്രസുദേന്തിവാഴ്ച. നാളെ രാവിലെ 6.30 നും വൈകീട്ട് നാലിനും വിശുദ്ധ കുർബാന. രാവിലെ 9.30ന് ആഘോഷമായ തിരുനാൾ പാട്ടുകുർബാനയ്ക്കു റവ. ഡോ. ബിൽജു വാഴപ്പിള്ളി മുഖ്യകാർമികനാകും. പോളി തൈക്കാട്ടിലാണ് ഇക്കുറി തിരുനാൾ ആഘോഷ പ്രസുദേന്തി. സ്നേഹപുരം സെന്‍റ് ജോസഫ്സ് ചെങ്ങാലൂർ: സ്നേഹപുരം സെന്‍റ് ജോസഫ്സ് ദേവാലയത്തിലെ പരിശുദ്ധ വേളാങ്കണ്ണി മാതാവിന്‍റെ തിരുനാൾ ഇന്നും നാളെയും ആഘോഷിക്കും. ഇന്നു വൈകീട്ട് 6.15 ന് പ്രസുദേന്തിവാഴ്ച, വിശുദ്ധ കുർബാന, ലദീഞ്ഞ്, നൊവേന, കൂടുതുറക്കൽ, പ്രദക്ഷിണം, രൂപം എഴുന്നള്ളിച്ചുവയ്ക്കൽ എന്നീ തിരുക്കർമങ്ങൾക്ക് ഫാ. ഡേവിസ് പുലിക്കോട്ടിൽ മുഖ്യകാർമികത്വം വഹിക്കും. നാളെ രാവിലെ 9.45ന് മഹാപ്രസുദേന്തി വാഴ്ച. 10 ന് നടക്കുന്ന ആഘോഷമായ ദിവ്യബലിക്ക് ഫാ. അജോ വടക്കേട്ട് എംഎസ്ജെ മുഖ്യകാർമികത്വം വഹിക്കും. ഫാ. സെബാസ്റ്റ്യൻ കോയിക്കര എംഎസ്ജെ സന്ദേശം നൽകും. തുടർന്ന് നേർച്ചയൂട്ടും ഉണ്ടായിരിക്കും. കോട്ടപ്പടി സെന്‍റ് ലാസേഴ്സ് ഗുരുവായൂർ: കോട്ടപ്പടി സെന്‍റ് ലാസേഴ്സ് ദേവാലയത്തിൽ മാതാവിന്‍റെ സ്വർഗാരോപണ തിരുനാൾ കൊടിയേറി. നാളെയാണ് തിരുനാളാഘോഷം. വികാരി ഫാ. ഷാജി കൊച്ചുപുരയ്ക്കൽ കൊടിയേറ്റം നിർവഹിച്ചു. ഇന്നു വൈകീട്ട് ആറിന് വിശുദ്ധ കുർബാന, ലദീഞ്ഞ്, നോവേന, തുടർന്ന് കൂട് തുറക്കൽ, പ്രദിക്ഷണം എന്നിവയാണ്. തിരുനാൾ ദിനമായ നാളെ രാവിലെ 5.45നും എഴിനും വിശുദ്ധ കുർബാന, വൈകീട്ട് നാലിന് തിരുനാൾ കുർബാന, ലദീഞ്ഞ്, നൊവേന, പ്രദക്ഷിണം, നേർച്ച ഭക്ഷണം, വർണ മഴ. തുടർന്ന് ബാൻഡ് മേളം. ചടങ്ങുകൾക്ക് സഹ. വികാരി ഫാ. തോമസ് ഊക്കൻ, ട്രസ്റ്റിമാരായ സെബി താണിക്കൽ, കെ.പി.പോളി, വി.കെ. ബാബു, സി.കെ. ഡേവിസ്, പിആർഒ ബിജു അന്തിക്കാട്ട് എന്നിവർ പങ്കെടുത്തു. ഏനാമാക്കൽ പരിശുദ്ധ കർമലമാത ഏനാമാക്കൽ: പരിശുദ്ധ കർമല മാതാവിന്‍റെ ദേവാലയത്തിൽ പരിശുദ്ധ കന്യകാമറിയത്തിന്‍റെ സ്വർഗാരോപണ ദർശനത്തിരുനാളിനു തുടക്കമായി. ഇന്നു രാവിലെ 6.30 ന് വിശുദ്ധ കുർബാന. വൈകിട്ട് ആറിന് തിരിവെഞ്ചരിപ്പ്, വേസ്പര, വിശുദ്ധ കുർബാന, വിശുദ്ധരുടെ തിരുസ്വരൂപം എഴുന്നള്ളിപ്പ്, എന്നിവയ്ക്ക് വികാരി ഫാ. ജയ്സൺ തെക്കുംപുറം മുഖ്യകാർമികത്വം വഹിക്കും. തുടർന്ന് തിരുനാൾ ഊട്ടും ഫാൻസി വെടിക്കെട്ടും ബാൻഡ് മേളവും അരങ്ങേറും. തിരുനാൾ ദിവസമായ നാളെ രാവിലെ 6.30 ന് ദിവ്യബലി, 10 നുള്ള ആഘോഷമായ തിരുനാൾ ഗാന പൂജയ്ക്കും തിരുനാൾ സന്ദേശത്തിനും ഫാ. ഷിൻസ് ആന്‍റണി പോട്ടോക്കാരൻ സിഎംഐ മുഖ്യകാർമികത്വം വഹിക്കും. വൈകീട്ട് 4.30ന് ഫാ. ജോൺ കിടങ്ങന്‍റെ കാർമികത്വത്തിലുള്ള ദിവ്യബലിയെ തുടർന്ന് വാദ്യമേളങ്ങളുടെയും മുത്തുക്കുടകളുടെയും അകമ്പടിയോടെ തിരുനാൾ പ്രദക്ഷിണം. രാത്രി ഏഴിന് സിനിമ പ്രദർശനവും ഉണ്ടായിരിക്കും. ശനിയാഴ്ച രാവിലെ 6.30ന് വിശുദ്ധ കുർബാന തുടർന്ന് ഇടവകയിൽ നിന്നും മരിച്ചുപോയവർക്കുവേണ്ടിയുള്ള വലിയ ഒപ്പീസ്, സെമിത്തേരി സന്ദർശനം എന്നിവയും ഉണ്ടായിരിക്കും.

ബസിന്‍റെ ചില്ലുതകർന്ന് ഡ്രൈവർക്കും രണ്ടു സ്ത്രീകൾക്കും പരിക്ക്

ഗുരുവായൂർ: കോളജ് സിദ്യാർഥികൾ സ്വകാര്യ ബസ് തടഞ്ഞു. ബസിന്‍റെ ചില്ലുതകർന്ന് ഡ്രൈവർക്കും രണ്ടു സ്ത്രീകൾക്കും പരിക്കേറ്റു. തൊഴിയൂർ ഐസിഎ കോളജിന് മുമ്പിൽ ഇന്നലെ വൈകിട്ട് ആറോടെയാണ് സംഭവം. ശുരുവായൂർ - പൊന്നാനി റൂട്ടിൽ ഓടുന്ന ഫർഹാന ബസാണ് തടഞ്ഞത്. ബസിന്‍റെ ഇടതുവശത്തെ ചില്ല് തകർന്നു. ഈ ഭാഗത്തിരുന്ന യാത്രക്കാരിയുടെ മുഖത്ത് ചില്ലുതറച്ച് പരിക്കേറ്റു. മറ്റൊരു യാത്രക്കാരിക്കും ബസ് ഡ്രൈവർ ഷിജുവിനും പരിക്കേറ്റു. സ്റ്റോപ്പിൽ ബസ് നിർത്തുന്നില്ലെന്നായിരുന്നു വിദ്യാർഥികളുടെ ആരോപണം. എന്നാൽ, സ്റ്റോപ്പിൽ നിർത്തിയ സമയത്ത് ഒരു സംഘം വിദ്യാർഥികൾ എത്തുകയായിരുന്നെന്ന് ജീവനക്കാർ പറഞ്ഞു. സംഭവത്തിൽ ഗുരുവായൂർ പോലീസ് കേസെടുത്തു.

കോൾമേഖലയിലെ പ്രശ്നങ്ങൾ: മന്ത്രിതല ചർച്ച നടത്തി

തൃശൂർ: കോൾമേഖലയിലെ നെൽകർഷകരുടെ പ്രശ്നങ്ങളും പ്രതിസന്ധികളും അടിയന്തരമായി പരിഹരിക്കാൻ മന്ത്രിതലചർച്ച നടത്തി. കോൾകർഷകസംഘം പ്രസിഡന്‍റ് മുരളി പെരുനെല്ലി എംഎൽഎ, സെക്രട്ടറി കെ.കെ. കൊച്ചുമുഹമ്മദ്, കെ.കെ. രാജേന്ദ്രബാബു, പി.ആർ. വർഗീസ്, ഗോപിനാഥൻ കൊളങ്ങാട്ട്, എൻ.എസ്. അയൂബ്, അഡ്വ. വി. സുരേഷ് കുമാർ എന്നിവർ പങ്കെടുത്തു. നെല്ലിന്‍റെ സംഭരണവില വർധിപ്പിക്കുക, സംഭരിച്ച നെല്ലിന്‍റെ വില, വിള ഇൻഷ്വറൻസ്, കാലാവസ്ഥാവ്യതിയാന ഇൻഷ്വറൻസ് എന്നിവ ഉടൻ വിതരണംചെയ്യുക, കനാലുകളിലെ നീരൊഴുക്കിനു തടസമാകുന്ന ചണ്ടികളും മറ്റും നീക്കംചെയ്യുക, പന്പിംഗ് സബ്സിഡി വിതരണംചെയ്യുക, കൃഷിയിറക്കുന്നതിനുമുന്പ് കുമ്മായം വിതരണം ചെയ്യുക, റെഗുലേറ്ററുകളുടെ പുനർനിർമാണം ഉടൻ പൂർത്തിയാക്കുക എന്നീ ആവശ്യങ്ങളാണുന്നയിച്ചത്. മന്ത്രിമാരായ കെ. രാജൻ, കെ.എൻ. ബാലഗോപാൽ, ജി.ആർ. അനിൽ, പി. പ്രസാദ്, ഡോ. ആർ. ബിന്ദു, കൃഷി ഡയറക്ടർ ശ്രീറാം വെങ്കിട്ടരാമൻ, തൃശൂർ സബ് കളക്ടർ അഖിൽ വി. മേനോൻ, കൃഷി- ഇറിഗേഷൻ- കെ എസ്ഇബി- കെഎൽഡിസി വകുപ്പുമേധാവികൾ എന്നിവർ പങ്കെടുത്തു.

ചെവ്വൂർ വൈഎംസിഎയ്ക്കു ബെസ്റ്റ് വൈഎംസിഎ ട്രോഫി

തൃശൂർ: വൈഎംസിഎ തൃശൂർ സബ് റീജിയനിൽ റൂറൽ വിഭാഗത്തിൽനിന്നുള്ള മികച്ച വൈഎംസിഎയായി ചെവ്വൂർ വൈഎംസിഎ തെരഞ്ഞെടുക്കപ്പെട്ടു. 2024-25 വർഷത്തെ പ്രവർത്തനമികവാണ് നേട്ടത്തിന് അർഹമാക്കിയത്. തൃശൂർ വൈഎംസിഎ ഹാളിൽ നടന്ന സബ് റീജിയൻ വാർഷിക പൊതുയോഗത്തിൽ വൈഎംസിഎ കേരള റീജിയൻ ചെയർമാൻ പ്രഫ. അലക്സ് തോമസ് ട്രോഫി സമ്മാനിച്ചു. സബ് റീജിയൻ ചെയർമാൻ ജോണ്‍സൻ മാറോക്കി അധ്യക്ഷത വഹിച്ചു. ദേശീയ സെക്രട്ടറി എൻ.വി. എൽദോ മുഖ്യപ്രഭാഷണം നടത്തി. ഹൈസ്കൂൾ വൈഎംസിഎ (ഹൈവൈ) ദേശീയ സെക്രട്ടറിയായി തെരഞ്ഞെടുക്കപ്പെട്ട ചെവ്വൂർ വൈഎംസിഎയിലെ ജെസ് മരിയ ആന്‍റോയെ യോഗം അനുമോദിച്ചു. ഡയാലിസിസ് സഹായപദ്ധതി സംസ്ഥാന കോഓഡിനേറ്റർ സജു ചാക്കോ, ജെസ് മരിയ ആന്‍റോ, സ്പോർട്സ് ആൻഡ് റിക്രിയേഷൻ നാഷണൽ കമ്മിറ്റി ചെയർമാൻ റെജി വി. മാത്യു, സബ് റീജിയൻ കണ്‍വീനർ ജോബിൻസ് പീറ്റർ, പി.ഡി. മാത്യു, സബ് റീജിയൻ വൈസ് ചെയർമാൻ ബേബി വാഴക്കാല എന്നിവർ പ്രസംഗിച്ചു.

ഗുരുവായൂരില്‍ ചിങ്ങമഹോത്സവത്തിനു കൊടിയേറി; 251 പേരുടെ മഞ്ജുളാല്‍ത്തറമേളം 17ന്

ഗുരുവായൂര്‍: പൊന്നിന്‍ ചിങ്ങമാസത്തെ വരവേല്‍ക്കാനായി പുരാതന തറവാട്ടു കൂട്ടായ്മയുടെ നേതൃത്വത്തില്‍ 17ന് നടക്കുന്ന ചിങ്ങമഹോത്സവത്തിനു കൊടിയേറി. മഞ്ജുളാലിനുസമീപം ഗുരുവായൂർ ക്ഷേത്രം ഊരാളൻ മല്ലിശേരി പരമേശ്വരൻ നമ്പൂതിരിപ്പാട് കൊടിയേറ്റം നിർവഹിച്ചു. മേള പ്രമാണി ഗുരുവായൂർ ജയപ്രകാശിന്‍റെ കേളികൊട്ട് അകമ്പടിയായി. തുടര്‍ന്ന് വിവിധ സമുദായാചാര്യന്മാര്‍ ചേര്‍ന്ന് സമുദായ സമന്വയ ദീപസമര്‍പ്പണം നടത്തി.ചിങ്ങമഹോത്സവത്തിന്‍റെ ഭാഗമായി 17ന് ഉച്ചതിരിഞ്ഞ് മൂന്നിന് 251 കലാകാരന്മാര്‍ അണിനിരക്കുന്ന മഞ്ജുളാല്‍ത്തറമേളം നടക്കും. തുടര്‍ന്ന് സന്ധ്യയോടെ മഞ്ജുളാലില്‍നിന്ന് ഗുരുവായൂര്‍ ക്ഷേത്രസന്നിധിയിലേക്കു പഞ്ചവാദ്യത്തിന്‍റെ അകമ്പടിയില്‍ ഭജനഘോഷയാത്രയാണ്. ഘോഷയാത്ര സമാപിച്ചാല്‍ ക്ഷേത്രത്തിനു മുന്നിലെ കിഴക്കേ ദീപസ്തംഭത്തിനു മുന്നില്‍ ഐശ്വര്യ വിളക്ക് സമര്‍പ്പണം നടക്കും. 500 വിളക്കുകളാണ് സമര്‍പ്പിക്കുന്നത്. ഭാരവാഹികളായ കെ.ടി. ശിവരാമന്‍നായര്‍, അനില്‍ കല്ലാറ്റ്, രവി ചങ്കത്ത്, ബാലന്‍ വാറണാട്ട്, ശ്രീധരൻ മാമ്പുഴ എന്നിവര്‍ പത്രസമ്മേളനത്തില്‍ പങ്കെടുത്തു.

ആറിടത്ത് അപകടം

കാര്‍ ഇടിച്ച് വീട്ടുമതില്‍ തകര്‍ന്നു വരന്തരപ്പിള്ളി: നിയന്ത്രണംവിട്ട കാര്‍ ഇടിച്ച് വീട്ടുമതില്‍ തകര്‍ന്നു. അപകടത്തില്‍പ്പെട്ട കാര്‍ കിണറില്‍ വീഴാതിരുന്നതു വലിയ അപകടം ഒഴിവായി. അപകടത്തില്‍ കാര്‍ ഓടിച്ചിരുന്ന കോളജ് വിദ്യാര്‍ഥിയായ കല്ലൂര്‍ സ്വദേശി പരിക്കേല്‍ക്കാതെ രക്ഷപ്പെട്ടു. വരന്തരപ്പിള്ളി റൊട്ടിപ്പടിക്ക് സമീപം ഇന്നലെ രാവിലെയായിരുന്നു അപകടം. പട്ടലപറമ്പില്‍ രുഗ്മണിയുടെ വീട്ടുമതിലാണ് തകര്‍ന്നത്. മതില്‍ ഇടിച്ചുതകര്‍ത്ത കാര്‍ കിണറിന്‍റെ കൈവരിയോടുചേര്‍ന്ന് തടഞ്ഞു‌നില്‍ക്കുകയായിരുന്നു. പഞ്ചായത്തംഗങ്ങളായ ഷൈജു പട്ടിക്കാട്ടുകാരന്‍, ബിന്ദു പ്രിയന്‍ എന്നിവരുടെ നേതൃത്വത്തില്‍ നാട്ടുകാര്‍ ചേര്‍ന്നാണ് രക്ഷാപ്രവര്‍ത്തനം നടത്തിയത്. വടക്കാഞ്ചേരി: നിയന്ത്രണംവിട്ട കാർ മതിൽ തകർത്തു. തൃശൂർ - ഷെർണൂർ സംസ്ഥാന പാതയിൽ പരുത്തിപ്രയിൽവച്ച് ഇന്നലെ ഉച്ചയ്ക്കായിരുന്നു സംഭവം. ഇടവഴിയിൽനിന്നും സംസ്ഥാന പാതയിലേക്കു കയറുന്നതിനിടെയാണ് നിയന്ത്രണംവിട്ട് കാർ സമീപത്തെ ചെമ്പത്തേതിൽ മുഹമ്മദ് ബഷീറിന്‍റെ മതിൽ തകർത്തത്. പരുത്തിപ്ര സ്വദേശി തച്ചടി ഹംസയുടെ മകൾ ഓടിച്ചിരുന്ന കാറാണ് അപകടത്തിൽപ്പെട്ടത്. സമീപത്ത് ഉണ്ടായിരുന്ന ചായക്കടയിൽ ജനങ്ങൾ ഇല്ലാത്തത് വൻ അപകടം ഒഴിവായി. ആർക്കും പരിക്കില്ല. ഇടിയിൽ കാറിന്‍റെ മുൻഭാഗം ഭാഗികമായി തകർന്നു. കാർ ടോറസിലും ബൈക്കിലും ഇടിച്ചു വടക്കാഞ്ചേരി: നിയന്ത്രണം‌വിട്ട കാർ ടോറസ് ലോറിയിലും പിന്നീട് ബൈക്കിലും ഇടിച്ച് അപകടം. വാഴക്കോട് വച്ചായിരുന്നു സംഭവം. അപകടത്തിൽ കാർയാത്രികർക്കും ബൈക്ക് യാത്രികനും നിസാരപരിക്കേറ്റു. ഗുരുവായൂരിൽനിന്നും വരികയായിരുന്ന പാലക്കാട് സ്വദേശികൾ സഞ്ചരിച്ചിരുന്ന കാറാണ് അപകടത്തിൽപ്പെട്ടത്. ക്ഷേത്രദർശനത്തിനു വന്ന ഭക്തരുടെ ഓട്ടോറിക്ഷ തീപിടിച്ചു ഗുരുവായൂർ: ക്ഷേത്രദർശനത്തിന് എത്തിയ ഭക്തരുടെ ഓട്ടോറിക്ഷ തീപിടിച്ചു. മലപ്പുറം ആലത്തിയൂർ തൃപ്പംങ്ങോട്ട് എണ്ണാഴി വീട്ടിൽ പ്രദീപിന്‍റെ ഓട്ടോറിക്ഷയിലാണ് തീപിടിത്തമുണ്ടായത്. ഇന്നലെ രാവിലെ പത്തോടെ ദേവസ്വത്തിന്‍റെ മൾട്ടിലെവൽ പാർക്കിംഗിലാണു സംഭവം. പ്രദീപും കുടുംബവും ഗുരുവായൂരിലെത്തി ഓട്ടോറിക്ഷ പാർക്കുചെയ്ത് ദർശനത്തിനുപോയിരുന്നു. പാർക്ക് ചെയ്ത ഓട്ടോറിക്ഷയിൽനിന്ന് പുക ഉയരുന്നതുകണ്ട പാർക്കിംഗ് കേന്ദ്രത്തിലെ ജീവനക്കാർ ഉടൻതന്നെ തീകെടുത്തുന്ന ഉപകരണം ഉപയോഗിച്ച് തീകെടുത്തി. പിന്നീട് ദർശനത്തിനുപോയ ഓട്ടോയുടെ ഉടമയെ അനൗൺസ് ചെയ്ത് വിളിച്ചുവരുത്തി. ഓട്ടോറിക്ഷയുടെ കത്തിപ്പോയ മോട്ടോർ ശരിയാക്കിയ‌ശേഷം കുടുംബം തിരിച്ചുപോയി. ഷോർട്ട് സർക്യൂട്ടാണ് അപകടകാരണമെന്നാണു നിഗമനം. ടോറസ് ലോറി ഇടിച്ച് ലോട്ടറി വിൽപ്പനക്കാരനു പരിക്ക് ചാവക്കാട്: ടോറസ് ലോറി ഇടിച്ച് സൈക്കിളിൽ ലോട്ടറി വിൽപ്പന നടത്തുന്നയാൾക്ക് ഗുരുതര പരിക്കേറ്റു. തെക്കഞ്ചേരി സ്വദേശി താഴിയകൊമ്പൻകട്ടി അ‌സീസിനാ (62)ണു പരിക്കേറ്റത്. തൃശൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇന്നലെ ഉച്ചയ്ക്ക് ഒന്നരയോടെ ചാവക്കാട് സെന്‍ററിൽ ട്രാഫിക് ഐലന്‍റിനു സമീപമാണ് അപകടം. സൈക്കിളും ലോറിയും ചേറ്റുവ റോഡിൽ‌നിന്നാണ് വന്നിരുന്നത്. സെന്‍ററിൽ എത്തിയ സൈക്കിൾ വടക്കോട്ടും ലോറി പടിഞ്ഞാറോട്ടും തിരിയുന്നതിനിടയിൽ ലോറി സൈക്കിളിൽ ഇടിച്ചു. അസീസും സൈക്കിളും ലോറിക്കടിയിൽ കുടുങ്ങുകയായിരുന്നു. ചാവക്കാട്ടെ സ്വകാര്യ ആ ശുപത്രിയിൽ പ്രവേശിപ്പിച്ച അസീസിനെ പിന്നീട് അമ‌ല ആശുപത്രിയിലേക്കു മാറ്റി. ലോറി പോലീസ് കസ്റ്റഡിയിൽ എടുത്തു. ചാവക്കാട് സെന്‍ററിൽ ഇത്തരത്തിലുള്ള അപകടം പലപ്പോഴും നടന്നിട്ടുണ്ട്. രണ്ടുപേർ മരിച്ചു. ഗതാഗത സംവിധാനത്തിലെ അപാകതയാണ് കാരണമെന്ന് ആരോപണമുണ്ട്. ബസ് പിക്കപ്പ് വാനിൽ ഇടിച്ച് അപകടം; ബസിന്‍റെ പിൻചക്രങ്ങൾ ഊരിത്തെറിച്ചു വാടാനപ്പിള്ളി: പിക്കപ്പ് വാനിൽ ഇടിച്ച സ്വകാര്യ ബസിന്‍റെ ടയറുകൾ ഊരിത്തെറിച്ചു. ബസ് മറിയാതിരുന്നതിനാൽ വൻ അപകടം ഒഴിവായി. വാടാനപ്പിള്ളി ആൽമാവ് വളവിൽ ഇന്നലെ സന്ധ്യക്കായിരുന്നു അപകടം. തട്ടിൽ എന്ന സ്വകാര്യ ബസാണ് എതിരെ വന്നിരുന്ന പിക്കപ്പ് വാനിൽ ഇടിച്ചത്. ഈ സമയം ബസിൽ യാത്രക്കാർ ഇല്ലായിരുന്നു. കാറ്റുപോയ ബസിന്‍റെ ടയർ മാറ്റിയിട്ടശേഷം നിശ്ചിത സമയത്തിന് കാഞ്ഞാണിയിൽ നിന്ന് ട്രിപ്പ് ഓടാൻ അമിത വേഗതയിൽ പോകുമ്പോഴാണ് ബസ് കുപ്പിവെള്ളം നിറച്ചുവന്നിരുന്ന വാനുമായി കൂട്ടിയിടിച്ചത്. വാൻ ബസിന്‍റെ ടയർ ഭാഗത്താണ് ഇടിച്ചത്. ഇതോടെ വീൽ ഒടിഞ്ഞ് ടയർ വാതിലിനു പിന്നിലേക്ക് തള്ളിപ്പോയി. ബസ് മറിയുന്ന നിലയിൽ റോഡിന്‍റെ നടുഭാഗത്ത് ചെരിഞ്ഞുനിൽക്കുകയായിരുന്നു. വാനിന്‍റെ മുൻഭാഗവും തകർന്നു. ആർക്കും പരിക്കില്ല. പൊലീസും ബസ് ജീവനക്കാരും നാട്ടുകാരും ചേർന്നാണു ഗതാഗതം നിയന്ത്രിച്ചത്. ക്രെയിനും എക്സ്കവേറ്ററും കൊണ്ടുവന്നാണ് മണിക്കൂറുകൾക്കുശേഷം ബസ് റോഡിന്‍റെ നടുവിൽനിന്നു മാറ്റിയത്.

കൽപ്പണിക്കാരൻ കുഴഞ്ഞുവീണ് മരിച്ചു

കയ്പമംഗലം : കൂരിക്കുഴിയിൽ കൽപ്പണിക്കാരൻ കുഴഞ്ഞുവീണ് മരിച്ചു. പെരിഞ്ഞനം കുറ്റിലക്കടവ് സ്വദേശി തോട്ടുപറമ്പിൽ ജയചന്ദ്രൻ (57) ആണ് മരിച്ചത്. കഴിഞ്ഞ ദിവസം വൈകീട്ട് ആറോടെയാണ് സംഭവം. കൂരിക്കുഴി പഞ്ഞംപള്ളി ഭാഗത്ത് ജോലിക്ക് എത്തിയതായിരുന്നു ഇദേഹം. ജോലി കഴിഞ്ഞ ശേഷം വീട്ടിൽ പോകാനായി ബ‌സ് സ്റ്റോപ്പിലേക്ക് പോകും വഴിയാണ് കുഴഞ്ഞുവീണത്. ഉടൻ തന്നെ ചെന്ത്രാപ്പിന്നിയിലെ സ്വകാര്യ ആശുപത്രിയിലും പിന്നീട് കൊടുങ്ങല്ലൂരിലെ ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല. പോസ്റ്റ് മോർട്ടം നടപടികൾക്ക് ശേഷം മൃതദേഹം ഇന്ന് സംസ്കരിക്കും.

പനി ബാധിച്ച് യുവതി മരിച്ചു

മതിലകം: പനി ബാധിച്ച് യുവതി മരിച്ചു. സികെ വളവ് ആശുപത്രിയുടെ പടിഞ്ഞാറുവശം താമസിക്കുന്ന മതിലകത്തു വീട്ടിൽ മജീദിന്‍റെ മകളും വടക്കേ അങ്ങാടി തസ്‌ലിന്‍റെ ഭാര്യയുമായ മെഹറുന്നിസ (കുക്കു -28) ആണ് മരിച്ചത്. കൊടുങ്ങല്ലൂർ സ്വകാര്യ ആശുപത്രിയിൽ ചികിത്സയിലായിരുന്നു. മാതാവ്: നാദിറ. കബറടക്കം നടത്തി.

പാമ്പുകടിയേറ്റ് യുവതി മരിച്ചു

കൊടുങ്ങല്ലൂർ: പാമ്പുകടിയേറ്റ് ചികിത്സയിലായിരുന്ന വീട്ടമ്മ മരിച്ചു. വടക്കെനടയിലെ നാസ് കളക്ഷൻസ് ഉടമ ലോകമലേശ്വരം പറപ്പുള്ളി ബസാർ കൊല്ലിയിൽ നിസാറിന്‍റെ ഭാര്യ ജസ്ന (42)യാണ് മരിച്ചത്. കഴിഞ്ഞ ഞായറാഴ്ച രാവിലെയായിരുന്നു സംഭവം. വീട്ടുമുറ്റത്ത് നിന്നിരുന്ന ജസ്നയെ പാമ്പ് കടിക്കുകയായിരുന്നു. കടിയേറ്റ ഉടനെ അടുത്തുള്ള എ.ആർ ആശുപത്രിയിൽ കൊണ്ടുവന്നവെങ്കിലും ഇതിനിടയിൽ ഹൃദയസ്തംഭനം ഉണ്ടായതിനെ തുടർന്ന് ജസ്നയെ എറണാകുളം ആസ്റ്റർ മെഡിസിറ്റിയിലേക്ക് മാറ്റുകയായിരുന്നു. മക്കൾ: നസിം, നഹ് ല ,ജെന.

ഉദ്യോഗാർഥികൾക്ക് എംപ്ലോയ്മെന്‍റ് എക്സ്ചേഞ്ച് പരിശീലനം നൽകും: മന്ത്രി ശിവൻകുട്ടി

തൃശൂർ: തൊഴിൽമേഖലയ്ക്കനുസരിച്ച് ഉദ്യോഗാർഥികൾക്ക് എംപ്ലോയ്മെന്‍റ് എക്സ്ചേഞ്ചുകൾ മുഖേന പരിശീലനം നൽകാൻ പദ്ധതി ആവിഷ്കരിക്കുമെന്നും സ്മാർട്ട് കാർഡ് വിതരണം സമയബന്ധിതമായി പൂർത്തിയാക്കാൻ എംപ്ലോയ്മെന്‍റ് ഡയറക്ടറെ ചുമതലപ്പെടുത്തിയതായും മന്ത്രി വി. ശിവൻകുട്ടി. ജില്ലാ എംപ്ലോയ്മെന്‍റ് എക്സ്ചേഞ്ചിനെ മോഡൽ എംപ്ലോയ്മെന്‍റ് എക്സ്ചേഞ്ചായി പ്രഖ്യാപിച്ചു സംസാരിക്കുകയായിരുന്നു മന്ത്രി. സംസ്ഥാനത്തെ രണ്ടാമത്തെ മോഡൽ ജില്ലാ എംപ്ലോയ്മെന്‍റ് എക്സ്ചേഞ്ചാണു തൃശൂരിലേത്. സംസ്ഥാനത്ത് ആദ്യമായി ജില്ലാ എംപ്ലോയ്മെന്‍റ് എക്സ്ചേഞ്ചുകളിൽ നടപ്പാക്കുന്ന സ്മാർട്ട് കാർഡ് വിതരണോദ്ഘാടനവും മന്ത്രി നിർവഹിച്ചു. രജിസ്ട്രേഷൻ ചെയ്ത എല്ലാവർക്കും സ്മാർട്ട് കാർഡ് നല്കുന്നതാണു പദ്ധതി. സ്മാർട്ട് കാർഡുകളിലെ ക്യുആർ കോഡ് സ്കാൻ ചെയ്താൽ ഉദ്യോഗാർഥികൾക്ക് അവരുടെ പ്രൊഫൈൽ കാണാം. കൂടുതൽ കാലം കേടുകൂടാതെ സൂക്ഷിക്കാനും എളുപ്പത്തിൽ കൈകാര്യം ചെയ്യാനും ഈ കാർഡുകൾ സഹായിക്കും. കൂടാതെ വകുപ്പിന്‍റെ ഓണ്‍ലൈൻ പോർട്ടലിൽനിന്നു നേരിട്ടുവിവരങ്ങൾ പ്രിന്‍റ് ചെയ്യാൻ സാധിക്കുന്നതിനാൽ വിവരങ്ങളുടെ കൃത്യതയും ഉറപ്പാക്കാൻ കഴിയും. എംപ്ലോയ്മെന്‍റ് ഡയറക്ടർ സൂഫിയാൻ അഹമ്മദ് അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ് മുഖ്യപ്രഭാഷണം നടത്തി. കോർപറേഷൻ കൗണ്‍സിലർ റെജി ജോയ്, എംപ്ലോയ്മെന്‍റ് ജോയിന്‍റ് ഡയറക്ടർ പി.കെ. മോഹൻദാസ്, ജില്ലാ എംപ്ലോയ്മെന്‍റ് ഓഫീസർ ആർ. അശോകൻ എന്നിവർ പ്രസംഗിച്ചു.

അറിവുമാത്രം പോരാ, തിരിച്ചറിവും വേണം: മാർ ആൻഡ്രൂസ് താഴത്ത്

തൃശൂർ: അറിവുമാത്രം പോരാ, തിരിച്ചറിവും വേണമെന്നും മൂല്യങ്ങൾ മുറുകെപ്പിടിച്ചാകണം കലാലയത്തിൽനിന്നു പുറത്തിറങ്ങേണ്ടതെന്നും ആർച്ച്ബിഷപ് മാർ ആൻഡ്രൂസ് താഴത്ത്. ഓട്ടോണമസ് പദവി ലഭിച്ച ജ്യോ തി എൻജിനീയറിംഗ് കോളജിലെ ആദ്യ ബാച്ചിലെ വിദ്യാർഥികളുടെ സംഗമത്തിൽ പ്രസംഗിക്കുകയായിരുന്നു അദ്ദേഹം. അതിരൂപത വികാരി ജനറാളും കോളജ് മാനേജരുമായ മോണ്‍. ജോസ് കോനിക്കര, എക്സിക്യൂട്ടീവ് ഡയറക്ടർ ഫാ. ഡേവിസ് നെറ്റിക്കാടൻ, അക്കാദമിക് ഡയറക്ടർ റവ.ഡോ. ജോസ് കണ്ണന്പുഴ, പ്രിൻസിപ്പൽ ഡോ. സോജൻലാൽ, രജിസ്ട്രാർ വി.എം. സേവിയർ, ഡീൻ പ്രഫ.പി. രത്തനൻ, പ്രഫ. രെഞ്ചു ഫ്രാൻസിസ്, വിവിധ വകുപ്പുമേധാവികൾ എന്നിവർ പ്രസംഗിച്ചു. തൃശൂർ പൂരത്തിന്‍റെ കുടമാറ്റത്തിനു റോബോട്ടിക് കുടകൾ നിർമിച്ച അധ്യാപകരെയും വിദ്യാർഥികളെയും മാർ ആൻഡ്രൂസ് താഴത്ത് ആദരിച്ചു.

മുരളീധരനെ തോല്പിച്ചതു പ്രതാപൻ; വള്ളൂരിനെ ബലിയാടാക്കി: പി. യതീന്ദ്രദാസ്

തൃശൂർ: രാഹുൽഗാന്ധി ഉയർത്തിയ വെളിപ്പെടുത്തലിന്‍റെ മറവിൽ ബിജെപി വിജയത്തിന് ഉത്തരവാദികളായ കോണ്‍ഗ്രസ് നേതാക്കൾക്കു രക്ഷപ്പെടാൻ കഴിയില്ലെന്നു ഡിസിസി മുൻ ജനറൽ സെക്രട്ടറി പി. യതീന്ദ്രദാസ്. കോണ്‍ഗ്രസിന്‍റെ മുഖം രക്ഷിക്കുന്നതിനുവേണ്ടിയാണ് വടകരയിലെ ഉറച്ച സീറ്റ് ഉപേക്ഷിച്ച് കെ. മുരളീധരൻ തൃശൂരിലേക്കു മത്സരിക്കാൻ വന്നത്. ആ മുരളീധരൻ പരസ്യമായി തന്നെ കോണ്‍ഗ്രസ് നേതാക്കൾ പരാജയപ്പെടുത്താൻ ശ്രമിച്ചുവെന്നുപറഞ്ഞ് പലരുടെയും പേരുകൾ ചൂണ്ടിക്കാട്ടിയിരുന്നു. കെപിസിസി അന്വേഷണ കമ്മീഷൻ കോണ്‍ഗ്രസ് നേതാക്കളുടെ വീഴ്ച ചൂണ്ടിക്കാട്ടി റിപ്പോർട്ടും നൽകിയിട്ടും ഡിസിസി പ്രസിഡന്‍റ് ആയിരുന്ന ജോസ് വള്ളൂരിനെക്കൊണ്ട് രാജിവയ്പിച്ചതൊഴിവാക്കിയാൽ മറ്റെന്തു നടപടിയാണ് നേതൃത്വം സ്വീകരിച്ചതെന്നു യതീന്ദ്രദാസ് ചോദിച്ചു. കോണ്‍ഗ്രസ് പരാജയത്തിലും ബിജെപി വിജയത്തിലും പ്രധാന ഉത്തരവാദിയായ അന്നത്തെ എംപിക്കെതിരേ നടപടി എടുത്തില്ലെന്നു മാത്രമല്ല, ജില്ലയിലെ കോണ്‍ഗ്രസിനെ മൊത്തം അദൃശ്യമായി നയിക്കുന്ന ചുമതല നൽകിയിരിക്കുകയുമാണ്. മുരളീധരന്‍റെ തോൽവിയിൽ എല്ലാവരും ജോസ് വള്ളൂരിനെ പഴിക്കുന്പോഴും ആ തോൽവിയുടെ പിറകിൽ പ്രതാപനായിരുന്നു. തൃശൂരിലെ ഫ്ലാറ്റുകളും മറ്റും കേന്ദ്രീകരിച്ച് വ്യാജവോട്ടുകൾ ചേർക്കുന്നതായി തെരഞ്ഞെടുപ്പുകാലത്തുതന്നെ ഊഹാപോഹങ്ങൾ ഉയർന്നപ്പോഴും നാട്ടികയിൽ ഇത്തരം വോട്ടുകൾ കൂടുതലായി ചേർക്കുന്നുവെന്നറിഞ്ഞിട്ടും നടപടി സ്വീകരിക്കാൻ നേതൃത്വം തയാറായില്ല. സംഘപരിവാർ സംഘടനകളുമായി പരസ്യമായി ബന്ധപ്പെട്ടു പ്രവർത്തിക്കുന്നവർ പലരും പാർട്ടിയുടെ ഭാരവാഹികളായി തുടരുകയാണ്. തന്‍റെ ഈ പ്രതികരണം സാധാരണക്കാരനായ ഓരോ പാർട്ടിപ്രവർത്തകനുംവേണ്ടിയുള്ളതാണെന്നും യതീന്ദ്രദാസ് പറഞ്ഞു.

ഗുരുവായൂർ ദേവസ്വത്തിന്‍റെ അത്യാധുനിക ആശുപത്രി വരുന്നു

ആർ. ജയകുമാർ ഗുരുവായൂർ: ദീർഘകാലമായി ഗുരുവായൂരിന്‍റെ പ്രധാന ആവശ്യങ്ങളിലൊന്നായ ഗുരുവായൂർ ദേവസ്വം അത്യാധുനിക ആശുപത്രിയെന്ന സ്വപ്നപദ്ധതി ഒടുവിൽ യാഥാർഥ്യത്തിലേക്ക്. ആശുപത്രി നിർമാണത്തിനു കാഞ്ഞങ്ങാട് ദാമോദർ അസോസിയേറ്റ്സ് തയാറാക്കിയ 58 കോ ടിയുടെ എസ്റ്റിമേറ്റ് ദേവസ്വം ഭരണസമിതി അംഗീകരിച്ചു. ദേവസ്വം കമ്മീഷണറുടെ അനുമതി ലഭിച്ചാലുടൻ ടെൻഡർ നടപടികൾ ആരംഭിക്കും. ഇപ്പോൾ ആശുപത്രി സ്ഥിതിചെയ്യുന്നതിനോടു ചേർന്നുള്ള 1.45 ഏക്കറിലാണ് പുതിയ ആശുപത്രി നിർമിക്കുന്നത്. 82,363 ചരുരശ്രഅടിയിൽ ബേസ്മെന്‍റ് ഉൾപ്പടെ അഞ്ചു നിലകളിലായാണു നിർമാണം. ബേസ്മെന്‍റിൽ വാഹന പാർക്കിംഗാണ്. താഴത്തെ നിലയിൽ 21 കിടക്കകളുള്ള അത്യാഹിതവിഭാഗം, 11 കിടക്കകളുള്ള ഡയാലിസിസ് യൂണിറ്റ്, എക്സ്റേ യൂണിറ്റ്, ദന്തരോഗവിഭാഗം തുടങ്ങിയവ പ്രവർത്തിക്കും. ഒന്നാംനിലയിൽ പരിശോധനാമുറികൾ, ലാബ് സൗകര്യം, മെഡിക്കൽ സൂപ്രണ്ടിന്‍റെ മുറികൾ. 21 ബെഡുകളുള്ള സ്ത്രീകളുടെ വാർഡ്, 23 ബെഡുകളുള്ള പുരുഷ വാർഡ്, വിഐപി മുറികൾ ഉൾപ്പെടെ 12 മുറികൾ എന്നിവയാണ് രണ്ടാംനിലയിൽ. മൂന്നാംനിലയിൽ കാത്ത് ലാബ്, മൂന്ന് ഓപ്പറേഷൻ തിയേറ്റർ തുടങ്ങിയവയുണ്ടാകും. ദേവസ്വം മരാമത്ത് വിഭാഗത്തിന്‍റെ മേൽനോട്ടത്തിലാണ് നിർമാണപ്രവൃത്തികൾ നടത്തുക.

സിപിഎം-ബിജെപി ഏറ്റുമുട്ടൽ

തൃശൂർ: വോട്ടർപട്ടിക ക്രമക്കേടിലും കന്യാസ്ത്രീകൾക്കെതിരായ ആക്രമണങ്ങളിലും പ്രതിഷേധിച്ചു സിപിഎം കേന്ദ്രമന്ത്രി സുരേഷ് ഗോപിയുടെ ക്യാന്പ് ഓഫീസിലേക്കു നടത്തിയ പ്രകടനവും പിന്നാലെ ബിജെപി സിപിഎം ഓഫീസിലേക്കു സംഘടിപ്പിച്ച പ്രതിഷേധമാർച്ചിലും നഗരം മുൾമുനയിലായതു മണിക്കൂറുകൾ. പോലീസിന്‍റെ ഇടപെടലിൽ ഒഴിവായതു വൻസംഘർഷം. സുരേഷ് ഗോപിയുടെ ഓഫീസ് ബോർഡിൽ സിപിഎം പ്രവർത്തകൻ കരി ഓയിൽ ഒഴിച്ചതിൽ പ്രതിഷേധിച്ചായിരുന്നു ബിജെപിയുടെ മാർച്ച്. ഇതു തടയാനെത്തിയ സിപിഎം, ഡിവൈഎഫ്ഐ പ്രവർത്തകരും ബിജെപി പ്രവർത്തകരും തമ്മിൽ ഉന്തുംതള്ളുമുണ്ടായി. ഇരുഭാഗത്തുനിന്നും രൂക്ഷമായ കല്ലേറും നടന്നു. പോലീസ് ബലം പ്രയോഗിച്ചാണു സ്ഥിതിഗതികൾ നിയന്ത്രിച്ചത്. ബിജെപി പ്രവർത്തകരെ എംജി റോഡിലേക്കും സിപിഎം പ്രവർത്തകരെ പാർട്ടി ഓഫീസ് വളപ്പിലേക്കും ബലംപ്രയോഗിച്ചു മാറ്റിയതോടെയാണു സംഘർഷത്തിന് അയവു വന്നത്. കല്ലേറിൽ ബിജെപി സിറ്റി ജില്ലാ പ്രസിഡന്‍റ് ജസ്റ്റിൻ ജേക്കബ്, സെക്രട്ടറി പി.കെ. ബാബുവടക്കം നാലുപേർക്കു പരിക്കേറ്റു. വൈകീട്ട് അഞ്ചരയോടെ സിപിഎം തൃശൂർ ഏരിയ കമ്മിറ്റിയുടെ നേതൃത്വത്തിൽ പള്ളിമൂലയിൽനിന്നു നടത്തിയ മാർച്ചിലാണു സംഘർഷം തുടങ്ങിയത്. ഓഫീസ് പരിസരത്തു റോഡിൽ ബാരിക്കേഡ് കെട്ടി മാർച്ച് തടഞ്ഞെങ്കിലും ബോർഡിൽ കരിഓയിൽ ഒഴിച്ചതോടെ സംഘർഷത്തിലേക്കു നീങ്ങി. ബാരിക്കേഡ് തള്ളിമാറ്റാനും പ്രവർത്തകർ ശ്രമിച്ചു. നേതാക്കൾ ഇടപെട്ടാണു പ്രവർത്തകരെ പിന്തിരിപ്പിച്ചത്. തുടർന്നു പ്രവർത്തകർ റോഡിൽ കുത്തിയിരുന്നു. ജലപീരങ്കി ഉൾപ്പെടെ വൻ പോലീസ് സന്നാഹം സ്ഥലത്തു നിലയുറപ്പിച്ചിരുന്നു. ഒരു പ്രവർത്തകനെ പോലീസ് കസ്റ്റഡിയിലെടുത്തെങ്കിലും നേതാക്കൾ ബലപ്രയോഗത്തിലൂടെ മോചിപ്പിച്ചു. മാർച്ച് സിപിഎം ജില്ലാ സെക്രട്ടറി കെ.വി. അബ്ദുൾ ഖാദർ ഉദ്ഘാടനം ചെയ്തു. കരിഓയിൽ ഒഴിച്ചതിൽ പ്രതിഷേധിച്ചു ബിജെപി സിറ്റി ജില്ലാ കമ്മിറ്റിയുടെ നേതൃത്വത്തിൽ സിപിഎം ഓഫീസിലേക്കു നടത്തിയ മാർച്ചിലും വൻസംഘർഷമുണ്ടായി. ബിജെപി ഓഫീസിൽനിന്ന് ആദ്യം പഴയനടക്കാവിലേക്കും അവിടെനിന്ന് തൃശൂർ സ്വരാജ് റൗണ്ട് ചുറ്റി കോർപറേഷനുമുന്നിൽ പ്രതിഷേധം അവസാനിക്കുമെന്നാണ് നേരത്തേ അറിയിച്ചിരുന്നത്. ഇതുപ്രകാരമാണ് പോലീസ് വിന്യാസമുണ്ടായിരുന്നത്. പക്ഷേ, അപ്രതീക്ഷിതമായി ബിജെപി പ്രവർത്തകർ പഴയനടക്കാവിൽനിന്ന് സിപിഎമ്മിന്‍റെ ജില്ലാ കമ്മിറ്റി ഓഫീസിലേക്ക് പ്രതിഷേധമാർച്ചായി എത്തുകയായിരുന്നു. പോലീസ് പത്തു മീറ്റർ അകലെവച്ചു മാർച്ച് തടഞ്ഞെങ്കിലും നഗരത്തിലുണ്ടായിരുന്ന സിപിഎം, ഡിവൈഎഫ്ഐ പ്രവർത്തകർ സംഘടിച്ചെത്തിയതോടെ വൻ സംഘർഷാവസ്ഥയുണ്ടായി. പ്രവർത്തകർ പരസ്പരം മുദ്രാവാക്യം വിളിച്ചതിനു പിന്നാലെ ഉന്തുംതള്ളുമുണ്ടായി. ഇടയ്ക്കു പോലീസിനു ലാത്തിവീശേണ്ടിവന്നു. തെരഞ്ഞെടുപ്പ് പരാജയം അംഗീകരിക്കാൻ ഇടതുമുന്നണിക്കു കഴിയുന്നില്ലെന്നു ബിജെപി മാർച്ച് ഉദ്ഘാടനംചെയ്ത സംസ്ഥാനസമിതിയംഗം ഉല്ലാസ് ബാബു പറഞ്ഞു. ബിജെപി സിറ്റി ജില്ലാ അധ്യക്ഷനുൾപ്പെടെയുള്ളവരെ തല്ലിച്ചതച്ചതിൽ സംസ്ഥാനവ്യാപകമായി പ്രതിഷേധിക്കുമെന്നു ബിജെപി സംസ്ഥാന ഉപാധ്യക്ഷൻ വി. ഉണ്ണിക്കൃഷ്ണൻ പറഞ്ഞു.

കലാമുത്തുകളെ വരവേൽക്കാൻ ഒരുങ്ങി തൃശൂർ

തൃശൂർ: കലയുടെ തങ്കക്കിരീടം ചൂടിയ തൃശൂരിന്‍റെ മണ്ണിലേക്കു വിരുന്നെത്തുന്ന 64-ാമതു സംസ്ഥാന സ്കൂൾ കലോത്സവത്തെ വരവേൽക്കാൻ സാംസ്കാരികനഗരി ഒരുങ്ങി. കഴിഞ്ഞവര്‍ഷം സംസ്ഥാന കലോത്സവത്തില്‍ സ്വർണക്കപ്പ് നേടിയതു തൃശൂരായിരുന്നു. പൂരനഗരിയുടെ താളാവേശത്തോടെ ചെണ്ടമേളവും ചടുലനൃത്തച്ചുവടുകളുമായി സുംബ ഡാൻസും കേരളീയനൃത്തവും നാടൻകലാവതരണങ്ങളും ബാൻഡ് വാദ്യവുമൊരുക്കിയാണ് വിദ്യാർഥികൾ കലോത്സവം സ്വാഗതസംഘം രൂപീകരണയോഗത്തെ വരവേറ്റത്. വിദ്യാഭ്യാസമന്ത്രി വി. ശിവൻകുട്ടി, ജില്ലയിലെ മറ്റു മന്ത്രിമാർ, എംഎൽഎമാർ തുടങ്ങിയ ജനപ്രതിനിധികളടക്കം അധ്യാപകരും സാംസ്കാരികനായകരും ജനപ്രതിനിധികളുമടങ്ങുന്ന ആയിരത്തോളംപേർ കോർപറേഷൻ ഇൻഡോർ സ്റ്റേഡിയത്തിൽ നടന്ന സ്വാഗതസംഘം രൂപീകരണയോഗത്തിൽ പങ്കെടുത്തു. കാൽഡിയൻ സ്കൂൾ വിദ്യാർഥികൾ ഗാർഡ് ഓഫ് ഓണർ നല്കിയാണു യോഗത്തിലേക്കു മന്ത്രിമാരെയും ജനപ്രതിനിധികളെയും സ്വീകരിച്ചത്. ചേർപ്പ് സിഎൻഎൻ സ്കൂൾ വിദ്യാർഥികൾ ചെണ്ടമേളവും കുരിയച്ചിറ സെന്‍റ് ജോസഫ്‌സ് സ്കൂൾ വിദ്യാർഥികൾ കേരളീയനൃത്തവും ബാൻഡ് മേളവും ഹോളിഫാമി സ്കൂൾ വിദ്യാർഥികൾ നാടൻപാട്ടും അവതരിപ്പിച്ചു. മുൻ വിദ്യാഭ്യാസ ഉപഡയറക്ടർ ടി.വി. മദനമോഹനൻ എഴുതിയ വിരുന്നുവന്നൂ വസന്തകാലം വിരുന്നൊരുക്കും കാലം... കലയുടെ വിരുന്നൊരുക്കും കാലം..എന്നു തുടങ്ങുന്ന സ്വാഗതഗാനാലാപനത്തോടെയാണ് ഉദ്ഘാടനച്ചടങ്ങുകൾക്കു തുടക്കമിട്ടത്.

റോഡില്‍ കാര്‍ പാര്‍ക്കുചെയ്ത വൈരാഗ്യത്താല്‍ ആക്രമണം: സ്റ്റേഷന്‍ റൗഡിയും കൂട്ടാളികളും അറസ്റ്റില്‍

കാട്ടൂര്‍: റോഡില്‍ കാര്‍ പാര്‍ക്കുചെയ്ത വൈരാഗ്യത്താലുള്ള ആക്രമണത്തില്‍ സ്റ്റേഷന്‍ റൗഡിയും രണ്ട് കൂട്ടാളികളും അറസ്റ്റില്‍. സ്റ്റേഷന്‍ റൗഡി താണിശേരി സ്വദേശി താണിയത്തുവീട്ടില്‍ ഹിമേഷ്(31), താണിശേരി സ്വദേശികളായ കറപ്പംവീട്ടില്‍ അജ്‌നാസ്(22), മരനയില്‍വീട്ടില്‍ സനില്‍(35) എന്നിവരാണ് അറസ്റ്റിലായത്. കഴിഞ്ഞദിവസം രാത്രി ഒമ്പതുമണിയോടെ താണിശേരിയിലുള്ള സുഹൃത്തിന്‍റെ വീടിനുമുന്നിലെ റോഡില്‍ കാര്‍ പാര്‍ക്ക്ചെയ്ത താണിശേരി സ്വദേശി വന്‍പറമ്പില്‍ വീട്ടില്‍ സോജിയെയാണ് അസഭ്യംപറയുകയും ആക്രമിച്ച് പരിക്കേല്‍പ്പിക്കുകയുംചെയ്തത്. ഇയാളുടെ കാറിന്‍റെ മുന്‍വശത്തെ ചില്ല് കല്ലുകൊണ്ട് കുത്തിപ്പൊട്ടിക്കുകയും ഡോർ കേടുപാടുകള്‍ വരുത്തുകയും സോജിയുടെ സുഹൃത്തായ സുധീറിനെയും ആക്രമിച്ച് പരിക്കേല്‍പ്പിക്കുകയുമായിരുന്നു. ഹിമേഷ് ഏഴ് ക്രിമിനല്‍കേസുകളിലെ പ്രതിയാണ്. അജ്‌നാസ് മയക്കുമരുന്ന് ഉപയോഗിച്ചതിനുള്ള രണ്ട് കേസുകളില്‍ പ്രതിയാണ്. കാട്ടൂര്‍ സിഐ ഇ.എസ്. ബൈജു, എഎസ്ഐ മനോജ്, എസ്‌സിപിഒ സി.ജി. ധനേഷ്, സിപിഒമാരായ വിപിന്‍, രഞ്ജിത്ത് എന്നിവര്‍ ചേര്‍ന്നാണ് പ്രതികളെ അറസ്റ്റ് ചെയ്തത്.

യൂത്തിനെ തോല്‍പ്പിക്കുന്ന ഫാഷന്‍ ഷോയുമായി അപ്പൂപ്പന്മാരും അമ്മൂമ്മമാരും

ഇരിങ്ങാലക്കുട: അപ്പൂപ്പന്മാരേയും അമ്മൂമ്മമാരേയും തോല്‍പ്പിക്കാനാവില്ല മക്കേള...അറുപതുവയസ് പിന്നിട്ട അപ്പുപ്പന്മാരുടെയും അമ്മൂമ്മമാരുടെയും വാക്കുകളാണിത്. പ്രായമെന്നാല്‍ വെറും അക്കങ്ങള്‍ മാത്രമാണെന്ന് വിളിച്ചോതുന്നതായിരുന്നു ഇരിങ്ങാലക്കുട ക്രൈസ്റ്റ് കോളജില്‍ തവനീഷ് സംഘടിപ്പിച്ച നിറം 2025 ഫാഷന്‍ ഷോ. ആത്മവിശ്വാസം സ്ഫുരിക്കുന്ന മുഖഭാവത്തോടെ പേരക്കുട്ടികളുടെ പ്രായമുള്ള വിദ്യാര്‍ഥികളുടെ കൈപിടിച്ച് കാണികളെ അഭിവാദ്യംചെയ്ത് മന്ദം മന്ദം നടന്നുവരുന്ന അപ്പുപ്പന്മാരേയും അമ്മുമ്മമാരേയും കണ്ടപ്പോള്‍ കാമ്പസില്‍ അവേശം അലതല്ലി. റാംപിലെത്തിയ 83 കാരന്‍ രാജന്‍ സദസിന്‍റെ സവിശേഷശ്രദ്ധ പിടിച്ചുപറ്റി. സംഗീതത്തോടൊപ്പം ഇവരില്‍ പലരും തിമിര്‍ത്താടുകയായിരുന്നു. ടെലവിഷന്‍ അവതാരകയും റേഡിയോ ജോക്കിയുമായ ലക്ഷ്മി നക്ഷത്ര പരിപാടി ഉദ്ഘാടനംചെയ്തു. അതിഥികളായി മേക്കപ്പ് ആര്‍ട്ടിസ്റ്റും മോഡലുമായ ജിജോ ജോ, അന്താരാഷ്ട്ര മോഡല്‍ സ്റ്റെഫി മാത്യു എന്നിവര്‍ പങ്കെടുത്തു. പ്രിന്‍സിപ്പല്‍ റവ.ഡോ. ജോളി ആന്‍ഡ്രൂസ് അധ്യക്ഷതവഹിച്ചു. മാനേജര്‍ ഫാ. ജോയ് പീണിക്കപ്പറമ്പില്‍ അനുഗ്രഹപ്രഭാഷണം നടത്തി. ഇരിങ്ങാലക്കുട തഹസില്‍ദാര്‍ സിമീഷ് സാബു മുഖ്യാതിഥിയായി. ജില്ലയിലെ വിവിധ വൃദ്ധമന്ദിരങ്ങളില്‍നിന്നും പൊതുജനങ്ങളില്‍നിന്നുമായി 50 പേര്‍ പങ്കെടുത്തു.

സംസ്ഥാനത്തു പശ്ചാത്തലമേഖലയില്‍ വലിയ കുതിപ്പ്: മന്ത്രി മുഹമ്മദ് റിയാസ്

ഇരിങ്ങാലക്കുട: സംസ്ഥാനത്ത് പശ്ചാത്തലമേഖലയില്‍ വലിയ കുതിപ്പാണ് നടക്കുന്നതെന്ന് മന്ത്രി പി.എ. മുഹമ്മദ് റിയാസ്. ഇരിങ്ങാലക്കുട, പുതുക്കാട് മണ്ഡലങ്ങളിലൂടെ കടന്നുപോകുന്ന മാപ്രാണം - നന്തിക്കര റോഡിന്‍റെ ഉദ്ഘാടനം ഓണ്‍ലൈനായി നിര്‍വഹിച്ച് സംസാരിക്കുകയായിരുന്നു മന്ത്രി. കേരളത്തിലെ പൊതുമരാമത്ത് വകുപ്പിന് കീഴിലുള്ള അറുപതുശതമാനം റോഡുകള്‍ ബിഎം ആന്‍ഡ് ബിസി നിലവാരത്തിലേക്ക് മാറ്റാന്‍ സാധിച്ചതായും മന്ത്രി പറഞ്ഞു. ചടങ്ങില്‍ കെ.കെ. രാമചന്ദ്രന്‍ എംഎല്‍എ മുഖ്യാതിഥിയായി. മാപ്രാണം ജംഗ്ഷനില്‍നടന്ന ചടങ്ങില്‍ മന്ത്രി ആര്‍. ബിന്ദു അധ്യക്ഷതവഹിച്ചു. ‌ ‌ഇരിങ്ങാലക്കുട - പുതുക്കാട് മണ്ഡലങ്ങളിലൂടെ കടന്നുപോകുന്ന റോഡ് 16.63 കോടി രൂപ ചെലവഴിച്ച് നബാര്‍ഡ് ട്രാഞ്ചേ 28ല്‍ ഉള്‍പ്പെടുത്തിയാണ് പുനരുദ്ധാരണം പൂര്‍ത്തീകരിച്ചത്. മാപ്രാണം മുതല്‍ നന്തിക്കരവരെ5.50 മീറ്റര്‍ വീതിയുണ്ടായിരുന്ന റോഡ് ഏഴുമീറ്റര്‍ മുതല്‍ ഒമ്പതുമീറ്റര്‍വരെ വീതികൂട്ടുകയും ആവശ്യമായ സ്ഥലങ്ങളില്‍ ഉയര്‍ത്തിയുമാണ് അത്യാധുനികരീതിയില്‍ ബിഎം ആന്‍ഡ് ബിസി നിലവാരത്തില്‍ പുനര്‍നിര്‍മിച്ചത്. ജില്ലാപഞ്ചായത്ത് വൈസ് പ്രസിഡന്‍റ് ലത ചന്ദ്രന്‍, പറപ്പൂക്കര പഞ്ചായത്ത് പ്രസിഡന്‍റ് ഇ.കെ. അനൂപ്, കാറളം പഞ്ചായത്ത് പ്രസിഡന്‍റ് ബിന്ദു പ്രദീപ്, നഗരസഭ ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ അംബിക പള്ളിപ്പുറത്ത്, തൃശൂര്‍ നിരത്ത് വിഭാഗം എക്‌സിക്യൂട്ടീവ് എന്‍ജിനീയര്‍ സി. രാകേഷ്, ഇരിങ്ങാലക്കുട നിരത്ത് ഉപവിഭാഗം അസിസ്റ്റന്‍റ് എക്‌സിക്യൂട്ടീവ് എന്‍ജിനീയര്‍ പി.പി. റാബിയ എന്നിവര്‍ പങ്കെടുത്തു.

ദേശീയപാത മീഡിയനിലേക്ക് ഇടിച്ചുകയറി കാർ മറിഞ്ഞു; യാത്രക്കാർ രക്ഷപ്പെട്ടു

കൊരട്ടി: ദേശീയപാത കൊരട്ടി പെരുമ്പിയിൽ നിയന്ത്രണംവിട്ട കാർ മീഡിയനിലേക്ക് ഇടിച്ചുകയറി തലകീഴായി മറിഞ്ഞു. കാറിൽ സഞ്ചരിച്ചിരുന്ന മൂന്നു യാത്രികരും അദ്ഭുതകരമായി രക്ഷപ്പെട്ടു. ഇന്നലെ രാവിലെ 11.20 മണിയോടെയായിരുന്നു സംഭവം. പെരുമ്പാവൂരിൽനിന്നു ചാലക്കുടി ഭാഗത്തേക്കുപോകുകയായിരുന്ന കാറിൽ തൊട്ടുപിന്നിലുള്ള ലോറി ഇടിച്ചതിനെതുടർന്നാണ് നിയന്ത്രണംവിട്ട് മീഡിയനിലേക്ക് ഇടിച്ചുകയറി മറിഞ്ഞത്. പെരുമ്പിയിലെ ഈ അപകടവളവിൽ ഒട്ടേറെ അപകടങ്ങൾ നടന്നിട്ടും പരിഹാരനടപടികൾ സ്വീകരിക്കാൻ നാഷണൽ ഹൈവേ അഥോറിറ്റി തയാറായിട്ടില്ലെന്ന് വ്യാപക പരാതികളുണ്ട്.

പെൻഷനേഴ്സ് യൂണിയൻ ധർണ നടത്തി

പള്ളിവളവ്: വിവിധ ആവശ്യങ്ങൾ ഉന്നയിച്ച് സ്റ്റേറ്റ് സർവീസ് പെൻഷനേഴ്സ് യൂണിയൻ മതിലകം ബ്ലോക്ക്‌ കമ്മിറ്റിയുടെ നേതൃത്വത്തിൽ ധർണ നടത്തി. പിഎഫ്, ആർഡിഎ നിയമം പിൻവലിച്ച് സ്റ്റ്യാറ്റ്യൂട്ടറി പെൻഷൻ പുനഃസ്ഥാപിക്കുക, പെൻഷൻ പരിഷ്കരണനടപടികൾ ആരംഭിക്കുക, മെഡിസെപ്പ് പദ്ധതിയിലെ അപാകതകൾ പരിഹരിക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു ധർണ. പെരിഞ്ഞനം സെന്‍ററിൽനടന്ന ധർണ പെരിഞ്ഞനം ഗ്രാമപഞ്ചായത്ത് പ്രസിഡന്‍റ് വിനീത മോഹൻദാസ് ഉദ്ഘാടനംചെയ്തു. കെഎസ്എസ്പിയു ബ്ലോക്ക്‌ കമ്മിറ്റി പ്രസിഡന്‍റ് സി.കെ. ശങ്കു അധ്യക്ഷതവഹിച്ചു. ജില്ലാ കമ്മിറ്റി അംഗം ആന്‍റണി ജോസഫ് മുഖ്യപ്രഭാഷണംനടത്തി. ബ്ലോക്ക്‌ കമ്മിറ്റി ഭാരവാഹികളായ കെ.യു. സുബ്രഹ്മണ്യൻ, എ. പവിഴം, വി.കെ. അശോകൻ, ടി.സി. കലാധരൻ തുടങ്ങിയവർ പ്രസംഗിച്ചു. ചാലക്കുടി: കേരള സ്റ്റേറ്റ് സർവീസ് പെൻഷനേഴ്സ് യൂണിയൻ ബ്ലോക്ക് കമ്മറ്റിയുടെ നേതൃത്വത്തിൽ സബ്ട്രഷറിക്കുമുമ്പിൽ മാർച്ചും ധർണയുംനടത്തി. മുനിസിപ്പൽ ചെയർമാൻ ഷിബു വാലപ്പൻ ഉദ്ഘാടന ചെയ്തു. യൂണിയൻ ബ്ലോക്ക് പ്രസിഡന്‍റ് എം.പി. ജോർജ് അധ്യക്ഷതവഹിച്ചു. ജില്ലാ വൈസ് പ്രസിഡന്‍റ് ടി.എം. യോഹന്നാൻ മുഖ്യപ്രഭാഷണം നടത്തി. ബ്ലോക്ക് സെക്രട്ടറി എം.എ. നാരായണൻ യൂണിയൻ ജില്ലാ കമ്മിറ്റി അംഗം പി.വി. രാധാമണി, ട്രഷറർ പി.എൻ. ജോർജ്, പി.എ. സുബ്രഹ്മണ്യൻ തുടങ്ങിയവർ പ്രസംഗിച്ചു. ചാലക്കുടി സൗത്ത് ജംഗ്ഷനിൽനിന്നു ആരംഭിച്ച മാർച്ചിൽ നൂറുകണക്കിന് സർവീസ് പെൻഷൻകാർ പങ്കെടുത്തു.

കൃഷിയും വ്യവസായവും: സംസ്ഥാനതല കോണ്‍ക്ലേവ് സംഘടിപ്പിച്ചു

മറ്റത്തൂര്‍: കൃഷിയും വ്യവസായവും ഒന്നിച്ചുവളരുന്ന കേരളം എന്ന ആശയത്തെ ആസ്പദമാക്കി മറ്റത്തൂര്‍ ലേബര്‍ കോണ്‍ട്രാക്റ്റ് സഹകരണ സംഘം അഗ്രി ഇന്‍ഡ് സിനര്‍ജി കോണ്‍ക്ലേവ് സംഘടിപ്പിച്ചു. കെ.കെ. രാമചന്ദ്രന്‍ എംഎല്‍എ ഉദ്ഘാടനം നിര്‍വഹിച്ചു. സംസ്ഥാന ഔഷധസസ്യബോര്‍ഡ് ചീഫ് എക്‌സിക്യൂട്ടീവ് ഓഫിസര്‍ ഡോ.ടി.കെ. ഹൃദിക് അധ്യക്ഷതവഹിച്ചു. ഔഷധി ചെയര്‍പേഴ്‌സണും മുന്‍ എംഎല്‍എയുമായ ശോഭന ജോര്‍ജ്, മറ്റത്തൂര്‍ പഞ്ചായത്ത് പ്രസിഡന്‍റ്് അശ്വതി വിബി, ബ്ലോക്ക് പഞ്ചായത്തംഗം എം.ആര്‍. രഞ്ജിത്, മറ്റത്തൂര്‍ ലേബര്‍ സൊസൈറ്റി പ്രസിഡനന്‍റ് ടി.എ. ഉണ്ണികൃഷ്ണന്‍, സെക്രട്ടറി കെ.പി. പ്രശാന്ത് , വൈസ് പ്രസിഡന്‍റ് എ. സുനില്‍കുമാര്‍ എന്നിവര്‍ പ്രസംഗിച്ചു. മുന്‍മന്ത്രിമാരായ പ്രഫ.സി. രവീന്ദ്രനാഥ്, ടി.എം. തോമസ് ഐസക്, ഓള്‍ ഇന്ത്യ മെഡിസിനല്‍ മാനുഫാക്‌ചേഴ്‌സ് ഓര്‍ഗനൈസേഷന്‍ ജനറല്‍ സെക്രട്ടറി ഡോ.ഡി. രാമനാഥന്‍, ഗുരുവായൂര്‍ ദേവസ്വം ബോര്‍ഡ് മുന്‍ ചെയര്‍മാന്‍ കെ.ബി. മോഹന്‍ദാസ്, ഡോ. കൃഷ്ണന്‍മൂസ് തുടങ്ങിയവര്‍ വിവിധ സെഷനുകളില്‍ വിഷയാവതരണം നടത്തി. മുരിയാട് ഗ്രാമപഞ്ചായത്തു പ്രസിഡന്‍റ് ജോസ് ജെ.ചിറ്റിലപ്പിള്ളി , കുടുംബശ്രീ ജില്ലാ മിഷന്‍ കോ -ഓര്‍ഡിനേറ്റര്‍ ഡോ . സലില്‍, പ്രഫ. മിനി രാജ് എന്നിവരും പ്രസംഗിച്ചു.

വടക്കാഞ്ചേരി റെയിൽവേ സ്റ്റേഷൻ സന്ദർശിച്ച്‌ പി.കെ. കൃഷ്ണദാസ്‌

വടക്കാഞ്ചേരി: റെയിൽവേ സ്റ്റേഷൻ സന്ദർശിച്ച്‌ മുൻ പിഎസി ചെയർമാൻ പി .കെ. കൃഷ്ണദാസ്‌. അമൃത്‌ പദ്ധതി ഉൾപ്പെടുത്തി വടക്കാഞ്ചേരി റെയിൽവെ സ്റ്റേഷനിൽ നടക്കുന്ന വികസന പദ്ധതികൾ ഡിസംബറിൽ നാടിനു സമർപ്പിക്കുമെന്ന് കൃഷ്ണദാസ് പറഞ്ഞു. റെയിൽവേ പ്ലാറ്റ്‌ ഫോം, മേൽക്കൂരകളുടെ നീളം വർധിപ്പിക്കൽ, കോവിഡ്‌ കാലത്ത്‌ നിർത്തലാക്കിയ ട്രെയിനുകളുടെ സ്റ്റോപ്പുകൾ പുനഃസ്ഥാപിക്കൽ എന്നിവ മന്ത്രിയുടെ ശ്രദ്ധയിൽപെടുത്തുമെന്നും അദ്ദേഹം പറഞ്ഞു. മേൽപ്പാലങ്ങളുടെ നിർമാണത്തിൽ എൽഡിഎഫ് സർക്കാർ അലംഭാവം കാട്ടുകയാണെന്ന് അദ്ദേഹം കുറ്റപ്പെടുത്തി. ബിജെപി നോർത്ത്‌ ജില്ലാ ജനറൽ സെക്രട്ടറി വിപിൻ കൂടിയേടത്ത്‌, ജില്ലാ സെക്രട്ടറി നിത്യസാഗർ, മണ്ഡലം പ്രസിഡന്‍റ് കെ.കെ. രഞ്ജിത്ത്‌, നേതാക്കളായ കെ.ആർ. ബിനീഷ്‌, എസ്. രാജു, റീന സന്തോഷ്‌ എന്നിവരും കൃഷ്ണദാസിനൊപ്പം ഉണ്ടായിരുന്നു. മാരാത്തുകുന്ന്, മുള്ളൂർക്കര, പൈങ്കുളം റോഡ്‌ എന്നിവിടങ്ങളിലും സംഘം സന്ദർശിച്ചു.

വേലൂപ്പാടം ഊട്ടുതിരുനാള്‍ 14, 15 തീയതികളില്‍

പുതുക്കാട്: വേലൂപ്പാടം വിശുദ്ധ യൗസേപ്പിതാവിന്‍റെ തീര്‍ഥാടനകേന്ദ്രത്തിലെ 55-ാമത് ഊട്ടുതിരുനാള്‍ നാളെയും മറ്റന്നാളും ആഘോഷിക്കുമെന്നു ഭാരവാഹികള്‍ പുതുക്കാട് വാര്‍ത്താസമ്മേളനത്തില്‍ അറിയിച്ചു. നാളെ രാവിലെ കൂടുതുറക്കല്‍, രൂപം എഴുന്നള്ളിപ്പ്, പ്രസുദേന്തിവാഴ്ച, പ്രദക്ഷിണം എന്നിവ നടക്കും. ആഘോഷമായ വിശുദ്ധ കുര്‍ബാനയ്ക്ക് തൃശൂര്‍ അതിരൂപത സഹായമെത്രാന്‍ മാര്‍ ടോണി നീലങ്കാവില്‍ കാര്‍മികത്വം വഹിക്കും. തിരുനാള്‍ദിനത്തില്‍ രാവിലെ നടക്കുന്ന കുര്‍ബാനയ്ക്ക് ജെറുസലേം ധ്യാനകേന്ദ്രം സ്ഥാപക ഡയറക്ടര്‍ ഫാ. ഡേവിസ് പട്ടത്ത് കാര്‍മികത്വം വഹിക്കും. ആഘോഷമായ തിരുനാള്‍ പാട്ടു കുര്‍ബാനയ്ക്ക് തൃശൂര്‍ അതിരൂപത വികാരി ജനറാൾ മോണ്‍. ജോസ് കോനിക്കര മുഖ്യകാര്‍മികത്വം വഹിക്കും. ഫാ. ഫ്രാന്‍സിസ് വാഴപ്പിള്ളി തിരുനാള്‍ സന്ദേശം നല്‍കും. തിരുനാളിനോടനുബന്ധിച്ച് നിര്‍ധനകുടുംബത്തിന് നിര്‍മിച്ചുനല്‍കുന്ന കാരുണ്യഭവനത്തിന്‍റെ കട്ടിള വെഞ്ചരിപ്പ് വെള്ളിയാഴ്ച രാവിലെ ഫാ. ഡേവീസ് പട്ടത്ത് നിര്‍വഹിക്കും. വികാരി ഫാ. ഡേവിസ് ചെറയത്ത്, കൈക്കാരന്‍ പോള്‍ മഞ്ഞളി, പബ്ലിസിറ്റി കണ്‍വീനര്‍ ജേക്കബ് നടുവില്‍പീടിക, പിആര്‍ഒ ബൈജു വാഴക്കാല എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.

തത്‌സ്ഥിതി റിപ്പോർട്ട് ഹാജരാക്കണമെന്നു മനുഷ്യാവകാശ കമ്മീഷൻ

തൃശൂർ: സ്വകാര്യവ്യക്തിയുടെ കുളം മഴക്കാലത്തു നിറയുന്പോൾ അയൽവീടുകളിലേക്കു വെള്ളം കയറുന്നു എന്ന പരാതി പരിഹരിക്കുന്നതിനായി വലപ്പാട് പഞ്ചായത്ത് സ്വീകരിച്ച നടപടികൾ അറിയിക്കണമെന്നു മനുഷ്യാവകാശ കമ്മീഷൻ അംഗം വി. ഗീത. കമ്മീഷൻ ഉത്തരവിന്‍റെ അടിസ്ഥാനത്തിൽ കുളം നിറയുന്പോൾ അധികജലം ഒഴുകിപ്പോകുന്നതിനു പഞ്ചായത്ത് കാന നിർമിച്ചുനൽകിയിട്ടും ഫലമുണ്ടായിട്ടില്ലെന്ന പരാതിയിലാണു നടപടി. കുളത്തിനു ചുറ്റുമതിൽ നിർമിക്കണമെന്നു പരാതിക്കാരനായ വലപ്പാട് സ്വദേശി മനു ആവശ്യപ്പെട്ടു. നാല്പതുവർഷം പഴക്കമുള്ള വീടിന്‍റെ അറ്റകുറ്റപ്പണികൾക്കായി പരാതിക്കാരൻ ധനസഹായം ആവശ്യപ്പെട്ടു നിരവധി അപേക്ഷകൾ നൽകിയിട്ടും പഞ്ചായത്ത് നടപടിയെടുത്തില്ലെന്ന പരാതിയിലും തത്‌സ്ഥിതി റിപ്പോർട്ട് സമർപ്പിക്കണമെന്നു കമ്മീഷൻ ആവശ്യപ്പെട്ടു. 2022- 23 മുതൽ 2025 വരെ അപേക്ഷകൾ നൽകിയതായി പരാതിക്കാരൻ അറിയിച്ചു. എന്നാൽ പഞ്ചായത്ത് സെക്രട്ടറി കമ്മീഷനിൽ സമർപ്പിച്ച റിപ്പോർട്ടിൽ ധനസഹായത്തിനുള്ള അപേക്ഷ പഞ്ചായത്തിൽ കിട്ടിയിട്ടില്ലെന്നു പറയുന്നു. പരാതി പരിഹരിക്കുന്നതിനായി പഞ്ചായത്ത് സ്വീകരിക്കാൻ ഉദ്ദേശിക്കുന്ന നടപടികൾ ഒരുമാസത്തിനകം അറിയിക്കണമെന്നും ഉത്തരവിൽ ആവശ്യപ്പെട്ടു. സെപ്റ്റംബറിൽ കേസ് വീണ്ടും പരിഗണിക്കും.

അരിസ്റ്റോ റോഡ് ഉദ്ഘാടനം ചെയ്തു

തൃശൂർ: കോർപറേഷൻ അരിസ്റ്റോ റോഡിന്‍റെ ഉദ്ഘാടനം മന്ത്രി ആർ. ബിന്ദു നിർവഹിച്ചു. നേരത്തേ ഡെപ്യൂട്ടി മേയർ ഉദ്ഘാടനംചെയ്ത ഫലകം ഇടിച്ചുതകർത്തശേഷമായിരുന്നു ഉദ്ഘാടനം. ഡെപ്യൂട്ടി മേയറുടെ ഉദ്ഘാടനഫലകം നീക്കാൻ എത്തിയ കോർപറേഷൻ ഉദ്യോഗസ്ഥരെ കോണ്‍ഗ്രസ് പ്രവർത്തകർ തടഞ്ഞിരുന്നു. തുടർന്ന് മന്ത്രിക്ക് ഉദ്ഘാടനം ചെയ്യാനുള്ള ഫലകം റോഡിന് മറുവശത്തായി കോർപറേഷൻ സജ്ജീകരിക്കുകയായിരുന്നു. ഇന്നലെ വൈകീട്ട് അഞ്ചിനു കോർപറേഷന്‍റെ വാഹനം ഇടിപ്പിച്ചാണ് ഡെപ്യൂട്ടി മേയർ സ്ഥാപിച്ച ഫലകം തകർത്തതെന്നു ദൃക്സാക്ഷി പറഞ്ഞു. തകർത്ത ഫലകം അതേ വാഹനത്തിൽ കയറ്റി കൊണ്ടുപോകുകയും ചെയ്തതായി ഇയാൾ പറഞ്ഞു. ഡെപ്യൂട്ടി മേയർ എം.എൽ. റോസിയാണ് കോണ്‍ഗ്രസ് കൗണ്‍സിലർമാരുടെ നേതൃത്വത്തിൽ ആദ്യം റോഡ് ഉദ്ഘാടനം ചെയ്തിരുന്നത്. മേയറുടെയും ഭരണസമിതിയുടെയും താത്പര്യത്തിനു വിരുദ്ധമായി ഡെപ്യൂട്ടി മേയർ റോഡ് ഉദ്ഘാടനം ചെയ്തതു വിവാദമായിരുന്നു. ഇന്നലെ നടന്ന ചടങ്ങിൽ എം.എൽ. റോസി വിശിഷ്ടാതിഥിയായാണ് എത്തിയത്.

എടമുട്ടത്ത് ഹോട്ടൽ ജീവനക്കാരെ ആക്രമിച്ച മൂന്നുപേർ അറസ്റ്റിൽ

തൃപ്രയാർ: ഓർഡർ ചെയ്ത ഷവർമ കിട്ടാൻ വൈകിയതിന് എടമുട്ടത്തെ മല്ലൂസ് മക്കാനി ഹോട്ടലിലെ ജീവനക്കാരെ ആക്രമിച്ച കേസിൽ മൂന്നുപേർ അറസ്റ്റിൽ. എടത്തിരുത്തി സ്വദേശി ചിന്ന വീട്ടിൽ നൗഫൽ (25), ചൂലൂർ സ്വദേശി വലിയകത്ത് വീട്ടിൽ ആഷിക് (27), ചെന്ത്രാപ്പിന്നി സ്വദേശി പള്ളിപറമ്പിൽ വീട്ടിൽ ഷാഹിൽ (23) എന്നിവരെയാണ് വലപ്പാട് പോലീസ് അറസ്റ്റ് ചെയ്തത്. തിങ്കളാഴ്ച രാത്രി 10.30 ഓടെ ഹോട്ടലിലെത്തിയ പ്രതികൾ ഷവർമ ഓർഡർ ചെയ്തിരുന്നു. ഓർഡർ ചെയ്ത ഭക്ഷണം കിട്ടാൻ വൈകിയെന്നുപറഞ്ഞ് പ്രതികൾ ഉടമയേയും ഹോട്ടലിലെ മറ്റ് ജീവനക്കാരെയും അസഭ്യം പറയുകയും ഭീഷണിപ്പെടുത്തുകയും ആക്രമിച്ച് പരിക്കേൽപ്പിക്കുകയുമായിരുന്നു. സംഭവത്തിൽ ഉടമ വലപ്പാട് കരയാമുട്ടം സ്വദേശി പൊക്കാക്കില്ലത്ത് വീട്ടിൽ മുഹ്സിൻ നൽകിയ പരാതിയിൽ വലപ്പാട് പോലീസ് രജിസ്റ്റർ ചെയ്ത കേസിലാണ് പ്രതികളെ അറസ്റ്റ് ചെയ്തത്. വലപ്പാട് പോലീസ് സറ്റേഷൻ ഇൻസ്പെക്ടർ അനിൽ കുമാർ, സബ് ഇൻസ്പെക്ടർമാരായ എബിൻ, ആന്‍റണി ജിമ്പിൾ, സിപിഒമാരായ ശ്യാം, സുബൈർ എന്നിവർ ചേർന്നാണ് പ്രതികളെ അറസ്റ്റ് ചെയ്തത്.

പഠനരംഗത്തു വിദ്യാർഥികൾ പിറകോട്ടുപോയാൽ ഉത്തരവാദി അധ്യാപകർ: മന്ത്രി വി. ശിവൻകുട്ടി

വാടാനപ്പള്ളി: സംസ്ഥാന സർക്കാർ അന്താരാഷ്ട്ര നിലവാരമുള്ള നിരവധി സ്കൂളുകൾ നിർമിച്ച് നിലവാരം മെച്ചപ്പെടുത്തുന്ന അവസ്ഥയിൽ പഠനരംഗത്തു കുട്ടികൾ പിന്നോട്ടുപോയാൽ അതിന്‍റെ ഉത്തരവാദി അധ്യാപകർമാത്രമാണെന്ന് മന്ത്രി വി. ശിവൻകുട്ടി പറഞ്ഞു. ചേറ്റുവ ജിഎം യുപി സ്കൂളിൽ അന്താരാഷ്ട്ര നിലവാരത്തിൽ നിർമിച്ച മൂന്നുനിലക്കെ ട്ടിടത്തിന്‍റെ ഉദ്ഘാടനം നിർവഹിക്കുകയായിരുന്നു മന്ത്രി. വിദ്യാർഥികളുടെ സംരക്ഷണം ഉറപ്പാക്കുക എന്ന പ്രധാന ലക്ഷ്യംവച്ചാണ് സംസ്ഥാന സർക്കാർ മുന്നോട്ടു പോയിക്കൊണ്ടിരിക്കുന്നത്. ഇതു മനസിലാക്കിക്കൊണ്ടാണ് ഉന്നതനിലവാരമുള്ള സ്കൂൾകെട്ടിടങ്ങൾ നിർമിച്ചു വരുന്നത്. വിദ്യാർഥികളെ സ്വന്തം മക്കളെപ്പോലെ അധ്യാപകർ സംരക്ഷിച്ച് പരിപാലിക്കണമെന്നും മന്ത്രി പറഞ്ഞു. 5000 കോടി രൂപ ചെലവാക്കി സംസ്ഥാന സർക്കാർ ഇതിനകം പുതിയ കെട്ടിടങ്ങൾ നിർമിച്ചുകഴിഞ്ഞു. 21000 അധ്യാപകരെ നിയമിച്ചു. 47 ലക്ഷം വിദ്യാർഥികളുമുണ്ട്. വിദ്യാഭ്യാസരംഗത്ത് നിരവധി പരിഷ്കാരങ്ങൾ സർക്കാർ ഇതിനകം നടപ്പിലാക്കിക്കഴിഞ്ഞു. ഉച്ചഭക്ഷണ വിതരണം പരിഷ്കരിച്ചത് ഏറ്റവും ഉചിതമായി. വിദ്യാർഥികൾക്കുനേരെ ചില ബസ് ജീവനക്കാർ ചിറ്റമ്മനയം തുടരുന്നതായി ശ്രദ്ധയിൽ പെട്ടിട്ടുണ്ട്. രണ്ടാംതരം നിലപാടാണിത്. ബസ് ജീവനക്കാർക്കെതിരെ പരാതി ലഭിച്ചാൽ ബസുകളുടെ പെർമിറ്റ് റദ്ദാക്കുന്ന നടപടികളിലേക്ക് പോകുമെന്ന് മന്ത്രി പറഞ്ഞു. എൻ.കെ. അക്ബർ എംഎൽഎ അധ്യക്ഷത വഹിച്ചു. മുൻ എംഎൽഎ കെ.വി. അബ്ദുൾ ഖാദർ മുഖ്യാതിഥിയായിരുന്നു. സ്കൂൾ വികസന സമിതി രക്ഷാധികാരി പി.ബി.ഹുസൈൻ ഉപഹാരസമർപ്പണം നടത്തി. രണ്ടരക്കോടി ചെലവഴിച്ചാണ് 10286 ചതുരശ്ര അടി വിസ്തീർണമുള്ള മൂന്നുനില കെട്ടിടം പണി പൂർത്തിയാക്കിയത്.

ലോറിയും സ്വകാര്യബസും കാനയിലേക്ക് താഴ്ന്നു

മുണ്ടൂർ: വരടിയം-കോളങ്ങാട്ടുകര റോഡിൽ സ്വകാര്യബസും മിക്സർ ലോറിയും ഇരു ഭാഗങ്ങളിലും കാനയിൽ താഴ്ന്നതുമൂലം ഇന്നലെ രാവിലെ ഗതാഗതം പൂർണമായി നിലച്ചു. കൊട്ടേക്കാട് റോഡിൽ വരടിയത്തു കട്ടവിരിക്കുന്ന പ്രവൃത്തി നടക്കുന്നതിനാൽ ഗതാഗതതടസമാണ്. ഇതുമൂലം വരടിയത്തുനിന്ന് വാഹനങ്ങൾ കോളങ്ങാട്ടുകരയിലേക്ക് കയറാൻ തിരിച്ചുവിട്ടിരുന്ന വഴിയിൽ ഇന്നലെ രാവിലെ പത്തോടെ എതിർദിശകളിൽ സഞ്ചരിച്ചിരുന്ന ഒരു മിക്സർ ലോറിയും സ്വകാര്യബസും കാനയിൽ താഴുകയും ചെറുവാഹനങ്ങൾക്കുപോലും പോകാൻ സാധിക്കാത്ത രീതിയിൽ ഗതാഗതസ്തംഭനം ഉണ്ടാകുകയും ചെയ്തു. തൃശൂരിലേക്കു പോകുന്ന ചെറുവാഹനങ്ങൾ എല്ലാം മുതുവറ, പുഴയ്ക്കൽ ഭാഗത്തെ ഗതാഗതക്കുരുക്ക് ഒഴിവാക്കാൻ ഈ വഴിയിലൂടെയാണ് കടന്നുപോയിരുന്നത്.

വയോധികനെ പുഴയിൽ മരിച്ചനിലയിൽ കണ്ടെത്തി

പഴയന്നൂർ: വടക്കേത്തറ ചിറയ്ക്കൽ വീട്ടിൽ പി.സി. കുമാരനെ ഭാരതപ്പുഴയിൽ മരിച്ചനിലയിൽ കണ്ടെത്തി. ശനിയാഴ്ച രാവിലെ പ്രഭാത സവാരിക്കിറങ്ങിയ കുമാരൻ വീട്ടിൽ തിരിച്ചെത്താത്തതിനെ തുടർന്ന് മൂന്ന് ദിവസമായി ഫയർഫോഴ്സ് ഉദ്യോഗസ്ഥരുടെ നേതൃത്വത്തിൽ തെരിച്ചിൽ നടത്തുന്നതിനിടെയാണ് കുമാരന്‍റെ മൃതദേഹം കണ്ടെത്തിയത്. ഭാര്യ: പരേതയായ ശാന്ത. മക്കൾ: ബിജേഷ്, ദിനേശ്.

അധ്യാപിക പുഴയിൽ മരിച്ചനിലയിൽ

അതിരപ്പിള്ളി: അധ്യാപികയെ പുഴയിൽ മരിച്ച നിലയിൽ കണ്ടെത്തി. കൊടുങ്ങല്ലൂർ പുല്ലൂറ്റ് ചക്കുങ്ങൽ രാജീവ് കുമാറിന്‍റെ ഭാര്യ ലിപ്‌സി (42) യുടെ മൃതദേഹമാണ് പ്ലാന്‍റേഷൻ ഭാഗത്ത് കണ്ടെത്തിയത്. കഴിഞ്ഞദിവസം വൈകീട്ട് പിള്ളപ്പാറ ഭാഗത്ത്‌ ഒരു യുവതി പുഴയിൽ ചാടുന്നത് നാട്ടുകാർ കണ്ട് പോലീസിൽ അറിയിച്ചിരുന്നു. പോലിസ് പരിശോധനയിൽ പുഴയുടെ തീരത്ത് നിന്ന് യുവതിയുടേതെന്ന് കരുതുന്ന സ്കൂട്ടർ കണ്ടെത്തിയിരുന്നു. തുടർന്ന് പുഴയിൽ നടത്തിയ തെരച്ചിലിലാണ് ഇന്നലെ പ്ലാന്‍റേഷൻ പള്ളിയുടെ ഭാഗത്ത് നിന്നും മൃതദേഹം കണ്ടെത്തിയത്. അഷ്ടമിച്ചിറ മാരേക്കാട് അസാദ് മെമ്മോറിയൽ എൽപി സ്കൂളിലെ അധ്യാപികയാണ് ലിപ്‌സി. മൃതദേഹം പോസ്റ്റുമാർട്ടത്തിനായി തൃശൂർ മെഡിക്കൽ കോളജ് ആശുപത്രിയിലേക്ക് മാറ്റി.

പേറ്റന്‍റുകൾ ആർജിച്ചെടുക്കാൻ കോളജിനു കഴിയണം: മന്ത്രി

തൃശൂർ: ഗവേഷണപ്രവർത്തനങ്ങളിലൂടെ പേറ്റന്‍റുകൾ ആർജിച്ചെടുക്കാനും നൂതന സാങ്കേതികവിദ്യകൾ സൃഷ്ടിക്കാനും കേരളവർമ കോളജിനു കഴിയണമെന്നു മന്ത്രി ആർ. ബിന്ദു. കോളജിൽ പുതുതായി നിർമിച്ച പിജി ബ്ലോക്കിന്‍റെ ഉദ്ഘാടനം നിർവഹിച്ചു പ്രസംഗിക്കുകയായിരുന്നു അവർ. ഗവേഷണത്തിനായി നിരവധി പദ്ധതികൾ സർക്കാർ ആവിഷ്കരിച്ചു. ഗവേഷണം, ഉന്നതവിദ്യാഭ്യാസരംഗത്തെ പരിശീലനം എന്നിവയ്ക്കായി ഏഴു മികവിന്‍റെ കേന്ദ്രങ്ങൾ ആരംഭിച്ചിട്ടുണ്ടെന്നും മന്ത്രി പറഞ്ഞു. സംസ്ഥാനത്തെ മുഴുവൻ കോളജുകളിലും മൂന്നുവർഷം കഴിയുന്പോൾ ബിരുദംനേടി പുറത്തിറങ്ങാനും താത്പര്യമുള്ളവർക്കു നാലാംവർഷം ക്യാപ്സ്റ്റോണ്‍ പ്രോജക്ടുള്ള ഓണേഴ്സ് ബിരുദം നേടാനും ഗവേഷണത്തിൽൽ താൽപര്യമുള്ളവർക്ക് ഓണേഴ്സിനൊപ്പം റിസർച്ച് ബിരുദം നേടാനും കഴിയുന്ന തരത്തിലുള്ള നാലുവർഷപദ്ധതി വിജയകരമായി നടപ്പാക്കി. അധ്യാപനകാലത്തിനുശേഷം സർക്കാരിൽനിന്നു ലഭിച്ച വിരമിക്കൽ ആനുകൂല്യത്തിൽനിന്നു രണ്ടുലക്ഷം രൂപയും കോളജിനു മന്ത്രി കൈമാറി. മന്ത്രിയുടെ പഴ്സണൽ സ്റ്റാഫ് അംഗവും കോളജിലെ പൂർവവിദ്യാർഥിയുമായിരുന്ന സന്ദേശിന്‍റെ സ്മരണാർഥം മികവു പുലർത്തുന്ന വിദ്യാർഥിക്ക് ഈവർഷം മുതൽ സ്റ്റുഡന്‍റ് ഓഫ് ദി ഇയർ പുരസ്കാരം നൽകും. കോളജ് ചെയർപേഴ്സണും കലാകാരിയുമായ ഗോപിക നന്ദനെ ആദ്യ അവാർഡ് ജേതാവായി തെരഞ്ഞെടുത്തു. ചടങ്ങിൽ മന്ത്രി കെ. രാജൻ, പി. ബാലചന്ദ്രൻ എംഎൽഎ എന്നിവർ പങ്കെടുത്തു. 14.3 കോടി ചെലവിട്ടാണു കിഫ്ബി ധനസഹായത്തോടെ കെട്ടിടത്തിന്‍റെ നിർമാണം പൂർത്തിയാക്കിയത്. മൂന്നു നിലകളിലായി വിശാലമായ ക്ലാസ് മുറികൾ, ആധുനികസൗകര്യങ്ങളോടുകൂടിയ ലാബുകൾ തുടങ്ങിയവ പുതിയ ബ്ലോക്കിലുണ്ട്.

തെരഞ്ഞെടുപ്പുജയത്തിന് മതേതരത്വത്തിൽ വിട്ടുവീഴ്ച ചെയ്യില്ല: വി.ഡി. സതീശൻ

തൃശൂർ: ന്യൂനപക്ഷവർഗീയതയും ഭൂരിപക്ഷവർഗീയതയും കോണ്‍ഗ്രസ് പ്രേത്സാഹിപ്പിക്കുന്നില്ലെന്ന് പ്രതിപക്ഷനേതാവ് വി.ഡി. സതീശൻ. എം.എ. ജോണ്‍ സ്മാരകസമിതിയുടെ പ്രഥമ പുരസ്കാരം ഏറ്റുവാങ്ങി പ്രസംഗിക്കുകയായിരുന്നു അദ്ദേഹം. മതങ്ങളെ ചേർത്തുനിർത്തുന്ന മതേതരത്വമാണ് ഇന്ത്യയിലേത്. തെരഞ്ഞെടുപ്പുവിജയത്തിനുവേണ്ടി അതിൽ വിട്ടുവീഴ്ച ചെയ്യില്ല. മതനേതാക്കൾ ഇരിക്കാൻ പറയുന്പോൾ ഇരുന്നുകൊടുത്താൽ മതി. അല്ലാതെ കിടക്കുന്നവരാകരുത്. എന്നാൽ, അവർക്കൊരു സങ്കടം വന്നാൽ ആദ്യം ഓടിയെത്തേണ്ടതും നമ്മളാണ്. രാഷ്ട്രീയത്തിൽ നിരന്തരം ആശയവിനിമയത്തിലൂടെ കൂട്ടായി തീരുമാനങ്ങളെടുക്കണം. സ്വയംനവീകരണത്തിനും സ്വയംപുതുക്കലിനും തയാറാകണം. വളർന്നുവരുന്ന യുവതലമുറയെ വെട്ടിവീഴ്ത്തരുത്. അവർ നമ്മളെയും മറികടന്നുപോകുന്നതു കാണാനാകണം. നേതാക്കന്മാർക്കുവേണ്ടി തെരുവിൽ തല്ലുവാങ്ങുന്നവരായി നമ്മളവരെ വളർത്തരുതെന്നും സതീശൻ പറഞ്ഞു. 25,000 രൂപയും ഫലകവുമടങ്ങുന്ന പുരസ്കാരം മുൻ കെപിസിസി പ്രസിഡന്‍റ് കെ. മുരളീധരൻ പ്രതിപക്ഷനേതാവിനു സമ്മാനിച്ചു. സംഘാടകസമിതി ചെയർമാൻ കെ.വി. ദാസൻ അധ്യക്ഷത വഹിച്ചു. ഡിസിസി പ്രസിഡന്‍റ് അഡ്വ. ജോസഫ് ടാജറ്റ്, ടി.വി. ചന്ദ്രമോഹൻ, മുൻമന്ത്രി ജോസ് തെറ്റയിൽ, അഡ്വ. ജോണ്‍ ജോസഫ്, പി.ടി. അഷറഫ് എന്നിവർ പ്രസംഗിച്ചു. താൻ രാഷ്ട്രീയവനവാസത്തിനു പോകണോയെന്നു തൃശൂർക്കാർ തീരുമാനിക്കട്ടെ: സതീശൻ തൃശൂർ: താൻ രാഷ്ട്രീയവനവാസത്തിനു പോകണോയെന്നു തൃശൂർക്കാർ തീരുമാനിച്ചാൽ മതിയെന്നു പ്രതിപക്ഷനേതാവ് വി.ഡി. സതീശൻ. കഴിഞ്ഞദിവസം എസ്എൻഡിപി യോഗം സെക്രട്ടറി വെള്ളാപ്പള്ളി നടേശനോട് ഉയർത്തിയ വെല്ലുവിളി ഉദ്ധരിച്ച് തൃശൂരിലും വിജയിക്കുമെന്ന ആത്മവിശ്വാസം പ്രകടിപ്പിക്കുകയായിരുന്നു അദ്ദേഹം. തെരഞ്ഞെടുപ്പുവിജയം ഉറപ്പുവരുത്താൻ അടുത്തയാഴ്ചമുതൽ താൻ തൃശൂരിലുണ്ടാകും. കെ. മുരളീധരന്‍റെ പൂർണപിന്തുണയും തനിക്കുണ്ട്. തട്ടിപ്പുനടത്തിയും വോട്ടർപട്ടികയിൽ കള്ളത്തരം കാട്ടിയുമല്ല തെരഞ്ഞെടുപ്പ് ജയിക്കേണ്ടത്. പാർട്ടി പരിപാടികൾ നടത്തുകമാത്രമല്ല, പാർട്ടിയെ തെരഞ്ഞെടുപ്പിൽ വിജയിപ്പിക്കുക എന്നതുമാണ് നേതാക്കൾക്കുണ്ടാകേണ്ട കഴിവെന്നും സതീശൻ പറഞ്ഞു. നിയമസഭാ തെരഞ്ഞെടുപ്പിൽ യുഡിഎഫിനെ മികച്ച ഭൂരിപക്ഷത്തോടെ അധികാരത്തിലെത്തിക്കുമെന്നും സാധിച്ചില്ലെങ്കിൽ താൻ രാഷ്ട്രീയവനവാസത്തിനു പോകുമെന്നും സതീശൻ നേരത്തേ മാധ്യമങ്ങളോടു പറഞ്ഞിരുന്നു.

ത്രിവർണത്തിൽ തിളങ്ങാം... സ്വാതന്ത്ര്യദിനാവേശത്തിൽ

സി.ജി. ജിജാസൽ തൃശൂർ: രാജ്യത്തെല്ലായിടത്തും സ്വാതന്ത്ര്യത്തിന്‍റെ മധുരഗാനം വീണ്ടും മുഴങ്ങുന്ന വേളയിൽ, തൃശൂർ നഗരത്തിലും ഗ്രാമങ്ങളിലും ത്രിവർണം നിറയുകയാണ്. വിപണികൾ ദേശസ്നേഹത്തിന്‍റെ നിറങ്ങളിൽ അലങ്കരിച്ചിരിക്കുന്നു. കൊടികളും തൊപ്പികളും അലങ്കാരവസ്തുക്കളുമായി സജീവമായ വിപണിയിൽ പ്ലാസ്റ്റിക് ഉപയോഗം പരമാവധി കുറയ്ക്കുക എന്ന ലക്ഷ്യത്തോടെ തുണികൊണ്ടുള്ള പലതരത്തിലുള്ള ഉത്പന്നങ്ങളും ഇടംപിടിച്ചിട്ടുണ്ട്. ത്രിവർണമാലകൾ, അരങ്ങുകൾ, കൊടികൾ, ജഴ്സി, ടീ ഷർട്ട്, ഉടുപ്പുകൾ തുടങ്ങി വൈവിധ്യങ്ങളായ വസ്തുക്കൾ കുറഞ്ഞവിലയിൽത്തന്നെ വിപണിയിൽ എത്തിച്ചിട്ടുണ്ടെന്നും ത്രിവർണ ടിഷർട്ടുകൾക്കും ഉടുപ്പുകൾക്കും മറ്റും മികച്ച പ്രതികരണമാണു ലഭിക്കുന്നതെന്നും പുത്തൻപള്ളിക്കു സമീപമുള്ള കേരള ഫാൻസി ഉടമ ആർ.എച്ച്. ജമാൽ പറഞ്ഞു. അഞ്ചുരൂപ മുതലുള്ള കൊടികൾ, 20 രൂപ മുതൽ 150 രൂപ വിലവരുന്ന പതാകകൾ, 265 രൂപ വിലവരുന്ന ഖാദി പതാക, ചക്രമാല (260), ഉണ്ടമാല (290), പടക്കമാല (12 എണ്ണം അടങ്ങുന്നത് 120 രൂപ), ചെണ്ടുമല്ലി മാല (110), അരങ്ങ് (40) എന്നിവയ്ക്ക് ഒപ്പം രണ്ടുരൂപ മുതലുള്ള ഷെയ്ഡ് തൊപ്പികൾ, മൂന്നുരൂപ മുതൽ ബാഡ്ജുകൾ, റിബണുകൾ, 15 രൂപ മുതലുള്ള തൊപ്പികൾ എന്നിവയ്ക്കെല്ലാം ആവശ്യക്കാരേറെയാണ്. 100 മുതൽ 900 രൂപവരെ വിലവരുന്ന വസ്ത്രങ്ങളുടെ കൂട്ടത്തിൽ കുട്ടികൾക്കുള്ള ഉടുപ്പുകൾ, കുട്ടികളുടെയും മുതിർന്നവരുടെയും ടീഷർട്ടുകൾ എന്നിവയും ഇടംപിടിച്ചിട്ടുണ്ട്. 150 രൂപ വിലവരുന്ന ഡോളാണ് ഇത്തവണ വിപണിയിലെ താരമെന്നും കച്ചവടക്കാർ അഭിപ്രായപ്പെട്ടു. കേരളത്തിന് അകത്തുനിന്നും പുറത്തുനിന്നും വരുന്ന ഉത്പന്നങ്ങൾക്കുപുറമെ തദ്ദേശീയമായി ഉത്പാദിപ്പിക്കുന്നവയ്ക്കും ഇത്തവണ ആവശ്യക്കാരേറെയാണ്.

ശ്രീനാരായണപുരം മേഖലയിൽ ക്ഷേത്രങ്ങളിൽ ഭണ്ഡാരം കുത്തിത്തുറന്ന് മോഷണം

ശ്രീനാരായണപുരം: ശ്രീനാരായണപുരം മേഖലയിൽ ക്ഷേത്രത്തിൽ ഭണ്ഡാരം കുത്തിത്തുറന്ന് മോഷണവും മോഷണ ശ്രമവും. കൊച്ചിൻ ദേവസ്വം ബോർഡിന് കീഴിലുള്ള ശ്രീനാരായണപുരം ശ്രീകൃഷ്‌ണസ്വാമി ക്ഷേത്രത്തിലെ ദണ്ഡാരം കുത്തിത്തുറന്നാണ് മോഷണം നടത്തിയത്. എസ്എൻഡിപി യോഗത്തിനു കീഴിലുള്ള അഞ്ചാംപരത്തി ഉമാമഹേശ്വര ക്ഷേത്രത്തിൽ മോഷണശ്രമം നടന്നു. ശ്രീകൃഷ്ണ ക്ഷേത്രത്തിലെ ഭണ്ഡാരത്തിൽനിന്നും ഏഴായിരം രൂപയോളം നഷ്ടപ്പെട്ടതായാണ് ക്ഷേത്രം അധികൃതർ നൽകുന്ന വിവരം. ക്ഷേത്രത്തിനുപുറത്ത് വഴിയരികിൽ ഭണ്ഡാരത്തിൽ സ്ഥാപിച്ചിരുന്ന താഴ് തല്ലിത്തകർത്താണു പണം മോഷ്ടിച്ചത്. ക്ഷേത്രത്തിന് അകത്തുള്ള നാഗ ദൈവങ്ങളുടെ ഭണ്ഡാരവും തുറക്കാൻ ശ്രമം നടത്തിയിട്ടുണ്ട്. ഇന്നലെ രാവിലെയാണ് മോഷണവിവരം അറിയുന്നത്. മതിലകം പോലീസ് സ്ഥലത്തെത്തി അന്വേഷണം ആരംഭിച്ചു. ഉമാമഹേശ്വര ക്ഷേത്രത്തിലെ ഭണ്ടാരങ്ങൾ കഴിഞ്ഞ ദിവസമാണ് തുറന്ന് എണ്ണി തിട്ടപ്പെടുത്തിയത്. ഈ ക്ഷേത്രത്തിൽ മോഷ്ടാവ് കയറുന്നതിന്‍റെ സിസിടിവി ദൃശ്യങ്ങൾ പോലീസിനു ലഭിച്ചിട്ടുണ്ട്. ഇദ്ദേഹം തന്നെയാണു ശ്രീകൃഷ്ണസ്വാമി ക്ഷേത്രത്തിൽ ഭണ്ഡാരം പൊളിച്ച് മോഷണം നടത്തിയതെന്ന നിഗമനത്തിലാണ് പോലീസ്. വിരലടയാള വിദഗ്ധരും ഡോഗ് സ്ക്വാഡും സ്ഥലത്തെത്തി പരിശോധന നടത്തി. കഴിഞ്ഞയാഴ്‌ച പെരിഞ്ഞനം കൊറ്റംകുളം പടിഞ്ഞാറ് വശത്തുള്ള ക്ഷേത്രത്തിലും മോഷണം നടന്നിരുന്നു. ഈ കേസിൽ ഇതുവരെ ആരേയും അറസ്റ്റ് ചെയ്തിട്ടില്ല.

കൊന്നക്കുഴി ദേവാലയത്തിൽ വിശുദ്ധ അന്തോണീസിന്‍റെ തിരുശേഷിപ്പ് പ്രതിഷ്ഠ 15ന്

ചാലക്കുടി: കൊന്നക്കുഴി പാദുവാഗിരി ദേവാലയത്തിലെ ഇടവക മധ്യസ്ഥനായ വിശുദ്ധ അന്തോണീസിന്‍റെ ഊട്ടുതിരുനാൾ വിശുദ്ധന്‍റെ തിരുശേഷിപ്പ് തിരുസ്വരൂപ പ്രതിഷ്ഠയോടെ ആരംഭിക്കും. ഇറ്റലിയിലെ പാദുവായിൽ നിന്നുള്ള തിരുശേഷിപ്പും കല്ലറയിൽവച്ച് ആശീർവദിച്ച തിരുസ്വരൂപവും വിശുദ്ധന്‍റെ 831 -ാം ജന്മദിനമായ ഒാഗസ്റ്റ് 15 ന് ദേവാലയത്തിൽ പ്രതിഷ്ഠിക്കും. 15 ന് 3.30 ന് പൂവത്തിങ്കൽ ജംഗ്ഷനിൽനിന്നും വാഹനങ്ങളുടെ അകമ്പടിയോടെ തിരുശേഷിപ്പ് പ്രയാണം ആരംഭിക്കും. നാലിന് ചക്രപാണി വളവിൽനിന്നും പ്രദക്ഷിണം ആരംഭിക്കും. 4.30 ന് ഒഎഫ്എം പ്രൊവിഷ്യൽ സുപ്പീരിയർ ഫാ. മൈക്കിൾ ഈരാളി തിരു‌ശേഷിപ്പ് പ്രതിഷ്ഠയ്ക്കു കാർമികത്വം വഹിക്കും. കുർബാന, ലദീഞ്ഞ്, നോവേന എന്നിവയുണ്ടാകും. ഫാ. ജെയ്‌സൻ കാളൻ സന്ദേശം നൽകും. 14 ന് 5.30 ന് തിരുനാളിന് വികാരി ഫാ. ജോസഫ് ചെറുവത്തൂർ കൊടി ഉയർത്തും. തുടർന്ന് ആഘോഷമായ ദിവ്യബലി. 16 മുതൽ വൈകീട്ട് 5.30 ന് ദിവ്യബലി, ലദീഞ്ഞ്, നൊവേന. 24 ന് ഊട്ടുതിരുനാൾ. 10 ന് ആഘോഷമായ ദിവ്യബലിക്ക് ഫാ. ജോയ്സൻ കോരേത്ത് കാർമികത്വം വഹിക്കും. ഫാ. ചാൾസ് ചിറ്റാട്ടുകരക്കാരൻ സന്ദേശം നൽകും. പ്രദിക്ഷണം, ഊട്ടുനേർച്ച. ഏഴിന് മഴനിലാവ്. വികാരി ഫാ. ജോസഫ് ചെറുവത്തൂർ, ജനറൽ കൺവീനർ പോളി വെളങ്ങ‌നാടൻ, കൈക്കാരന്മാരായ ജോയ് മേക്കാട്ടുപറമ്പൻ, വിത്സൻ പുതുശേരി, പബ്ലിസിറ്റി കൺവീനർ സണ്ണി കാരക്ക എന്നിവർ പത്രസമ്മേളനത്തിൽ പങ്കെടുത്തു.

മറ്റത്തൂര്‍ പടിഞ്ഞാട്ടുമുറിയിലെ കാമറയില്‍ പുലിയുടേതെന്നു സംശയിക്കുന്ന ദൃശ്യം

കൊടകര: മറ്റത്തൂര്‍ പഞ്ചായത്തിലെ 19-ാം വാര്‍ഡിലുള്ള വീടിനു മുന്നില്‍ പുലിയുടേതെന്നു സംശ യിക്കുന്ന ജീവിയുടെ ദൃശ്യം സിസിടിവി കാമറയില്‍ പതിഞ്ഞതു പ്രദേശവാസികളില്‍ ആശങ്ക സൃഷ്ടിക്കുന്നു. മറ്റത്തൂര്‍ പടിഞ്ഞാട്ടുമുറിയില്‍ കതിരോല റോഡിലുള്ള കോപ്ലി യോഹന്നാന്‍റെ വീട്ടിലെ സിസിടിവി കാമറയിലാണ് ഞായറാഴ്ച സന്ധ്യക്ക് പുലിയുമായി സാദശ്യമുള്ള ജീവിയുടെ ദൃശ്യം പതിഞ്ഞത്. യോഹന്നാനും ഭാര്യയും അമേരിക്കയില്‍ മകന്‍റെ കുടുംബത്തോടൊപ്പമായതിനാല്‍ വീട് അടച്ചിട്ടിരിക്കുകയായിരുന്നു. കാമറദൃശ്യങ്ങള്‍ അമേരിക്കയിലിരുന്ന് മൊബൈലില്‍ നിരീക്ഷിക്കുന്നതിനിടെയാണ് ഞായറാഴ്ച വൈകുന്നേരം 7.48ന് വീട്ടുമുറ്റത്തുകൂടി നടന്നുപോകുന്ന പുലിയേപ്പോലുള്ള ജീവിയുടെ ദൃശ്യം പതിഞ്ഞതായി യോഹന്നാന്‍ കണ്ടത്. മറ്റത്തൂര്‍ പടിഞ്ഞാറ്റു മുറിയില്‍ യോഹന്നാന്‍റെ സമീപവാസിയായ പ്രസാദിനെ വിവരമറിക്കുകയായിരുന്നു.തുടര്‍ന്ന് പ്രസാദ് വനംവകുപ്പധികൃതരെ അറിയിച്ചതിനെ തുടര്‍ന്ന് വെള്ളിക്കുളങ്ങര റേഞ്ച് ഫോറസ്റ്റ് ഓഫീസര്‍ കെ.എസ്. ഷിനോജ്, ഡെപ്യൂട്ടി റേഞ്ച് ഒാഫീസര്‍ പി.എ. അനൂപ് എന്നിവരുടെ നേതൃത്വത്തില്‍ വനപാലകര്‍ സ്ഥലത്തെത്തി പരിശോധന നടത്തി. സെക്‌ഷന്‍ ഫോറസ്റ്റ് ഓഫീസര്‍ രാജേഷ് ജോര്‍ജ്, ബീറ്റ് ഓഫീസര്‍മാരായ എം.എ. രാകേഷ്, പി.എസ്. സനു, കെ.ജെ. ജിന്‍ഷ, ഫോറസ്റ്റ് ഡ്രൈവര്‍ ടി.കെ.അഭിലാഷ് എന്നിവരും സംഘത്തിലുണ്ടായിരുന്നു. യോഹന്നാന്‍റെ വീട്ടുമുറ്റത്തും പറമ്പിലും വനപാലകര്‍ പിരിശോധന നടത്തിയെങ്കിലും കാല്‍പ്പാടുകള്‍ കണ്ടെത്താന്‍ കഴിഞ്ഞില്ല. തിങ്കളാഴ്ച പുലര്‍ച്ചെ ഈ പ്രദേശത്ത് ശക്തമായ മഴ പെയ്തതിനാല്‍ കാല്‍പ്പാടുകള്‍ കാണാന്‍ പ്രയാസമായി. കാമറയില്‍കണ്ട ദൃശ്യങ്ങളുടെ അടിസ്ഥാനത്തില്‍ നാട്ടുകാരുടെ ഭീതി ഒഴിവാക്കുന്നതിനും വന്യജീവിയുടെ സാന്നിധ്യം ഉണ്ടോ എന്നു കണ്ടെത്തുന്നതിനുമായി പ്രദേശത്ത് കാമറകള്‍ സ്ഥാപിക്കുമെന്ന് വെള്ളിക്കുളങ്ങര റേഞ്ച് ഫോറസ്റ്റ് ഓഫിസര്‍ കെ.എസ്.ഷിനോജ് പറഞ്ഞു. നിരീക്ഷണ കാമറയില്‍‌നിന്ന് കിട്ടുന്നവിവരങ്ങളുടെ അടിസ്ഥാനത്തിലും ഉയര്‍ന്ന ഉദ്യോഗസ്ഥരുടെ നിര്‍ദേശങ്ങള്‍ക്കനുസൃതമായും തുടര്‍‌നടപടികള്‍ സ്വീകരിക്കുമെന്നും ജനങ്ങളുടെ ഭയം അകറ്റുന്നതിനായി രാത്രിയില്‍ ഈ പ്രദേശത്ത് പട്രോളിംഗ് ശക്തമാക്കുമെന്നും റേഞ്ച് ഓഫീ സര്‍ അറിയിച്ചു.

നവ്യാനുഭവം പകര്‍ന്ന് ക്രൈസ്റ്റിലെ "തിരനോട്ടം അരങ്ങ് '

ഇരിങ്ങാലക്കുട: കേരളീയരംഗകലകളുടെ പ്രചാരണവും ഉന്നമനവും നിലനില്‍പ്പും ലക്ഷ്യമിട്ട് കഴിഞ്ഞ 18 വര്‍ഷമായി ദുബായിലും കേരളത്തിലും കലാസംസ്‌കാരികപ്രവര്‍ത്തനങ്ങള്‍ നടത്തിവരുന്ന തിരനോട്ടം സംഘടനയുടെ "അരങ്ങ് 2025' ഇരിങ്ങാലക്കുട ക്രൈസ്റ്റ് കോളജ് ഓഡിറ്റോറിയത്തില്‍ അരങ്ങേറി. ഇരിങ്ങാലക്കുട ഡോ.കെ.എന്‍. പിഷാരടി സ്മാരക കഥകളി ക്ലബ്ബി ന്‍റെ സംഘാടനത്തിലായിരുന്നു പരിപാടി. ക്രൈസ്റ്റ് കോളജ് മാനേജര്‍ ഫാ. ജോ യ് പീണിക്കപ്പറമ്പിലും തിരനോട്ടം പ്രതിനിധി പി.എസ്. രാമസ്വാമിയും ചേര്‍ന്ന് കളിവിളക്കു തെളിയിച്ചു. തിരനോട്ടത്തിന്‍റെ പേരിലും കൊടുങ്ങല്ലൂര്‍ കുഞ്ഞിക്കുട്ടിതമ്പുരാട്ടിയുടെ സ്മരണാര്‍ഥവുമായി ഏര്‍പ്പെടുത്തിയിട്ടുള്ള ഗുരുദക്ഷിണ പുരസ്‌കാരങ്ങള്‍ കഥകളി നാട്യാചാര്യന്‍ കലാമണ്ഡലം കെ. ജി. വാസുദേവന്‍, അണിയറശില്പി കോട്ടയ്ക്കല്‍ കുഞ്ഞിരാമന്‍ എന്നിവർക്കു സമ്മാനിച്ചു. ക്ലബ് പ്രസിഡന്‍റ് രമേശന്‍ നമ്പീശന്‍, ശശികുമാര്‍ തോട്ടുപുറം, വിനു വാസുദേവന്‍, കോട്ടയ്ക്കല്‍ ദേവദാസ്, നാരായണന്‍കുട്ടി എന്നിവര്‍ പ്രസംഗിച്ചു. തുടര്‍ന്ന് കീചകവധം കഥകളി സമ്പൂര്‍ണമായി അവതരിപ്പിച്ചു. നാല്പതോളം കലാകാരന്മാര്‍ ചൊല്ലിയാടിയുറപ്പിച്ച, എട്ടുമണിക്കൂറിലധികം ദൈര്‍ഘ്യമേറിയ ഈ അത്യപൂര്‍വ അവതരണത്തില്‍ പ്രധാനകഥാപാത്രമായ കീചകനായി ഡോ. സദനം കൃഷ്ണന്‍കുട്ടി രംഗത്തെത്തി.

കോണ്‍ഗ്രസ് പ്രതിഷേധസായാഹ്നം സംഘടിപ്പിച്ചു

വെള്ളാങ്കല്ലൂര്‍: കന്യാസ്ത്രീകള്‍ക്കും വൈദികര്‍ക്കുമെതിരെ അക്രമം നടന്നതില്‍ പ്രതിഷേധിച്ച് വെള്ളാങ്കല്ലൂര്‍ മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തില്‍ വെള്ളാങ്കല്ലൂര്‍ സെന്‍ററില്‍ പ്രതിഷേധ സായാഹ്നം നടത്തി. കെപിസിസി സെക്രട്ടറി ജോണ്‍ ഡാനിയല്‍ ഉദ്ഘാടനം ചെയ്തു. മണ്ഡലം പ്രസിഡന്‍റ് എ.എ. മുസമ്മില്‍ അധ്യക്ഷത വഹിച്ചു. ബ്ലോക്ക് പ്രസിഡന്‍റ് ഇ.എസ്. സാബു മുഖ്യാതിഥിയായി. സാബു കണ്ടത്തില്‍, എ.ആര്‍. രാമദാസ് എന്നിവര്‍ മുഖ്യപ്രഭാഷണം നടത്തി. ഇ.വി. സജീവ്, ധര്‍മജന്‍ വില്ലാടത്ത്, കെ.എച്ച്. അബ്ദുള്‍നാസര്‍, എ. ചന്ദ്രന്‍, പ്രശോഭ് അശോകന്‍ എന്നിവര്‍ പ്രസംഗിച്ചു.

ക്ഷീരസംഗമവും അനുമോദനവും സംഘടിപ്പിച്ചു

വേലൂർ: ചൊവ്വന്നൂര്‍ ബ്ലോക്ക് ക്ഷീരസംഗമവും അനുമോദനച്ചടങ്ങും സംഘടിപ്പിച്ചു. പുലിയന്നൂര്‍ ക്ഷീരസംഘത്തിന്‍റെ ആതിഥേയത്വത്തില്‍ നടന്ന ചടങ്ങിന്‍റെ ഉദ്ഘാടനം എ.സി. മൊയ്തീൻ എംഎൽഎ നിർവഹിച്ചു. ബ്ലോക്ക് പ്രസിഡന്‍റ് ആന്‍സി വില്യംസ് അധ്യക്ഷതവഹിച്ചു. കുന്നംകുളം നഗരസഭ ചെയര്‍പേഴ്സണ്‍ സീത രവീന്ദ്രന്‍, പഞ്ചായത്ത് പ്രസിഡന്‍റുമാരായ ടി.ആര്‍. ഷോബി, രേഖ സുനില്‍, രേഷ്മ രതീഷ്, മിനി ജയന്‍, ജില്ലാപഞ്ചായത്ത് അംഗങ്ങളായ എ.വി. വല്ലഭന്‍, ജലീല്‍ ആദൂര്‍, ജനപ്രതിനിധികളായ കെ.ജി. പ്രമോദ്, എന്‍.കെ. ഹരിദാസ്, കര്‍മല ജോണ്‍സന്‍ തുടങ്ങിയവര്‍ സംസാരിച്ചു. മികച്ച ക്ഷീരകര്‍ഷകരേയും എസ്എസ്എല്‍സി, പ്ലസ് ടു വിജയികളേയും അനുമോദിച്ചു.

ജനകീയ മത്സ്യക്കൃഷിക്കെതിരേ നാട്ടുകാർ

എരുമപ്പെട്ടി: പഞ്ചായത്തിലെ രണ്ടാംവാർഡ് പതിയാരം കാവാലംചിറയിൽ ആരംഭിച്ച ജനകീയ മത്സ്യക്കൃഷി പദ്ധതിക്കെതിരേ പ്രദേശവാസികളായ ഒരുവിഭാഗം നാട്ടുകാർ പ്രതിഷേധവുമായി രംഗത്തെത്തി. എരുമപ്പെട്ടി, കടങ്ങോട് പഞ്ചായത്തുകളിലെ പതിയാരം, മണ്ടംപറമ്പ് പ്രദേശവാസികളാണ് കാവാലാംചിറ സംരക്ഷണസമിതി രൂപീകരിച്ച് ജനകീയപ്രതിഷേധം നടത്തുന്നത്. സഹസ്ര സരോവരം പദ്ധതിയിൽ ഉൾപ്പെടുത്തി 1.5 കോടി രൂപ ചെലവഴിച്ച് കാവാലംചിറയുടെ പുനർനിർമാണം നടത്തിയതാണ്. പ്രദേശവാസികൾക്ക് കുളിക്കാനും വസ്ത്രങ്ങൾ അലക്കാനും കാർഷിക, കുടിവെള്ള ആവശ്യങ്ങൾക്കും പ്രാദേശിക മത്സ്യബന്ധനത്തിനുമായാണ് ചിറ നവീകരിച്ചത്. എന്നാൽ ഇപ്പോൾ പ്രദേശവാസികളായ നാട്ടുകാർക്ക് ചിറയിലേക്ക് പ്രവേശനം നിഷേധിക്കപ്പെട്ടിരിക്കുകയാണെന്ന് സമിതി പ്രവർത്തകർ ആരോപിക്കുന്നു. ജനകീയ മത്സ്യക്കൃഷിയുടെ പേരിൽ പഞ്ചായത്ത് ഏതാനുംപേർചേർന്ന് രൂപീകരിച്ച ഗ്രൂപ്പ് സഹായസംഘത്തിന് പഞ്ചായത്ത് കുളം വിട്ടുനൽകിയിരിക്കുകയാണ്. ഇതോടെ കുളം പൂർണമായി വലകെട്ടിമറച്ച നിലയിലായി. ആളുകൾക്ക് പേരിനൊരു കുളക്കടവ് തുറന്നിട്ടുണ്ടെങ്കിലും ഇവിടെ എണ്ണ, സോപ്പ് എന്നിവ ഉപയോഗിച്ച് കുളിക്കാൻപാടില്ലെന്നും മത്സ്യമോഷണം തടയാനെന്ന പേരിൽ കുളത്തിനു ചുറ്റും നിരീക്ഷണകാമറകൾ സ്‌ഥാപിക്കാൻ നീക്കംനടക്കുന്നതായും പറയുന്നു. ഇതോടെ സ്ത്രീകളടക്കമുള്ളവർക്ക് ഇവിടെ കുളിക്കുവാനും വസ്ത്രങ്ങൾ കഴുകാനിറങ്ങാനും കഴിയാത്ത സാഹചര്യമുണ്ടാകുമെന്നും സമിതി പ്രവർത്തകർ പറയുന്നു. മുൻ കാലങ്ങളിൽ വർഷം 15,000 രൂപയ്ക്കു മുകളിൽ മത്സ്യം ലേലംചെയ്ത‌ിരുന്ന കുളം ടെന്‌ഡർ നടപടികളില്ലാതെ വെറും 500 രൂപയ്ക്ക് നൽകിയിരിക്കുകയാണെന്നും പദ്ധതി നടപ്പാക്കുന്നതിനുപിന്നിലെ അഴിമതി അന്വേഷിക്കണമെന്നും സമിതി ആവശ്യപ്പെട്ടു. ഫിഷറീസ് വകുപ്പിനും പഞ്ചായത്ത് അധികൃതർക്കും സമിതി പരാതിനൽകിയിട്ടുണ്ട്. മത്സ്യക്കൃഷി ഉദ്ഘാടനച്ചടങ്ങുനടന്ന കാവാലംചിറ പരിസരത്ത് സംരക്ഷണസമിതി പ്രവർത്തകരുടെ നേതൃത്വത്തിൽ പ്രതിധർണ നടത്തി. തുടർന്ന് കുളത്തിൽ ഇറങ്ങി കുളിച്ചും നാട്ടുകാർ പ്രതിഷേധിച്ചു. സമിതിപ്രവർത്തകരായ എം.സി. പ്രദീപ്, എ.വി. വിനീഷ്, തോമസ് വളയത്തിൽ, വി.പി. ബിജു, പ്രബീഷ്, വർഷ പ്രദീപ് എന്നിവർ നേതൃത്വംനൽകി.

കാവാലംചിറ ജനകീയ മത്സ്യകൃഷി ഉദ്ഘാടനം ‌

എരുമപ്പെട്ടി: ഗ്രാമപഞ്ചായത്ത് കവാലംചിറ ജനകീയ മത്സ്യകൃഷിയുടെ ഉദ്ഘാടനം ജില്ലാപഞ്ചായത്ത് മെമ്പർ ജലീൽ ആദൂർ നിർവഹിച്ചു. കേരള സർക്കാർ ഫിഷറീസ് വകുപ്പിന്‍റെ ജനകീയ മത്സ്യകൃഷിപദ്ധതി ഉൾപ്പെടുത്തിയാണ് പതിയാരം കാവാലാംചിറയിൽ മത്സ്യകൃഷി ആരംഭിച്ചത്. കാവാലംചിറ ഗ്രൂപ്പ് സ്വയംസഹായ സംഘമാണ് കൃഷിനടത്തുന്നത്. പഞ്ചായത്ത് പ്രസിഡന്‍റ് എസ്. ബസന്ത്‌ലാൽ അധ്യക്ഷനായി. മെമ്പർമാരായ സുധീഷ് പറമ്പിൽ, എം.കെ. ജോസ്, മാഗി അലോഷ്യസ് എന്നിവർ പങ്കെടുത്തു.

ബജ്‌രംഗ്ദൾ പ്രവർത്തകർ ഗുണ്ടകളെപ്പോലെ പെരുമാറുന്നു: വി.ഡി. സതീശൻ

പാലയ്ക്കൽ: ഒഡീഷയിൽ ആക്രമിക്കപ്പെട്ട വൈദികൻ ഫാ. ജോജോ വൈദ്യക്കാരന്‍റെ പാലയ്ക്കലിലെ വീട് പ്രതിപക്ഷനേതാവ് വി.ഡി. സതീശൻ സന്ദർശിച്ചു. കുടുംബാഗങ്ങളെ ആശ്വസിപ്പിച്ചു. ബജ്‌രംഗ്ദൾ പ്രവർത്തകർ ഗുണ്ടകളെപ്പോലെയാണ് പെരുമാറുന്നത്. സഭാവസ്ത്രംധരിച്ച വൈദികർക്കും കന്യാസ്ത്രീകൾക്കും യാത്രചെയ്യാൻപോലും പറ്റാത്ത അവസ്ഥയാണ് രാജ്യത്തുള്ളതെന്ന് സതീശൻ പറഞ്ഞു. ഡിസിസി പ്രസിഡന്‍റ് അഡ്വ. ജോസഫ് ടാജറ്റ്, ജോസ് വള്ളൂർ, ജോൺ ഡാനിയൽ, കെ.കെ. കൊച്ചുമുഹമ്മദ്, സുനിൽ ലാലൂർ, സുനിൽ അന്തിക്കാട് എന്നിവരും എത്തിയിരുന്നു.

ഗതാഗതക്കുരുക്കില്‍ സ്തംഭിച്ച് ആമ്പല്ലൂര്‍

ആമ്പല്ലൂര്‍: ദേശീയപാതയില്‍ അടിപ്പാതനിര്‍മാണംനടക്കുന്ന ആമ്പല്ലൂര്‍ സെന്‍ററില്‍ ഇന്നലെ രാവിലെ അനുഭവപ്പെട്ടത് അതിരൂക്ഷമായ ഗതാഗതക്കുരുക്ക്. നൂറുകണക്കിന് വാഹനങ്ങളാണ് ഒരുമണിക്കൂറിലേറെ ഗതാഗതക്കുരുക്കില്‍പ്പെട്ടത്. ഇന്നലെ അതിരാവിലെ മുതല്‍തന്നെ നീണ്ട വാഹനനിരയാണ് ആമ്പല്ലൂര്‍ - ചാലക്കുടി പാതയിൽ അനുഭവപ്പെട്ടത്. ആമ്പല്ലൂരിലെ വാഹനനിര ടോള്‍പ്ലാസയും മറികടന്ന് തലോര്‍ ജെറുസലേം ധ്യാനകേന്ദ്രത്തിനു സമീപംവരെയെത്തി. ഇതോടെ വാഹനങ്ങള്‍ പലതും വഴിമാറി സമാന്തരപാതകളെ ആശ്രയിച്ചു. ഇതോടെ ആമ്പല്ലൂര്‍ - കല്ലൂര്‍ മേഖലയില്‍ ഗതാഗതം താറുമാറായി. ആമ്പല്ലൂര്‍ - കല്ലൂര്‍ റോഡില്‍ ശ്രീകൃഷ്ണപുരം ക്ഷേത്രംവരെ ഒരുകിലോമീറ്ററോളം വാഹനങ്ങള്‍ കുടുങ്ങി. വരന്തരപ്പിള്ളി ഭാഗത്തേക്കുള്ള സ്വകാര്യ ബസുകളും കെഎസ്ആർടിസി ദീര്‍ഘദൂരബസുകളും പുലക്കാട്ടുകര - കല്ലൂര്‍ റോഡിനെയും ആശ്രയിച്ചു. ബസുകള്‍ ആമ്പല്ലൂര്‍ ഒഴിവാക്കിയാണ് സര്‍വീസ് നടത്തിയത്. ആംബുലന്‍സുകള്‍ ഏറെനേരം ഗതാഗതക്കുരുക്കില്‍പ്പെട്ടു.

ട്രാഫിക് പരിഷ്കാരത്തിൽ വലഞ്ഞ് യാത്രക്കാർ

തൃശൂർ: തിരക്കേറെയുള്ള സെന്‍റ് തോമസ് കോളജ് റോഡിലെ പോലീസിന്‍റെ പുതിയ ഗതാഗതപരിഷ്കാരം ജനങ്ങളെ വലയ്ക്കുന്നു. ആന്പക്കാടൻ ജംഗ്ഷനിൽ സ്ഥാപിച്ച ഡിവൈഡറാണു യാത്രക്കാരെ ബുദ്ധിമുട്ടിക്കുന്നത്. റോഡിന്‍റെ വീതികുറവും വാഹനപ്പെരുപ്പവും ഇടറോഡുകളിൽനിന്നുള്ള വാഹനങ്ങളുടെ കയറ്റിറക്കവുംമൂലം പൊതുവേ തിരക്കുള്ള ജംഗ്ഷനിൽ പരീക്ഷണാടിസ്ഥാനത്തിൽ സ്ഥാപിച്ച ഡിവൈഡറാണു പുതിയ പ്രശ്നങ്ങൾക്കു വഴിവച്ചത്. അരിയങ്ങാടി ഭാഗത്തുനിന്നു വരുന്നവർക്കു കിഴക്കേകോട്ട ഭാഗത്തേക്കു പോകുന്നതിനും സെന്‍റ് തോമസ് കോളജ് റോഡിൽനിന്നു പള്ളിക്കുളം റോഡിലേക്കോ അരിയങ്ങാടി റോഡിലേക്കോ പോകുന്നതിനും ഇതോടെ കൂടുതൽ ദൂരം സഞ്ചരിച്ച് കറങ്ങിവരേണ്ട അവസ്ഥയാണ്. പലരും പോലീസിന്‍റെ കണ്ണുവെട്ടിച്ച് ജംഗ്ഷനിൽ യുടേണ്‍ എടുക്കുന്നത് അപകടങ്ങൾക്കും ഗതാഗതക്കുരുക്കിനും ഇടയാക്കുന്നുണ്ട്. നേരത്തേ ഒരു ഹോംഗാർഡ് മാത്രം ഗതാഗതം നിയന്ത്രിച്ചിരുന്ന സ്ഥാനത്തു നിലവിൽ മൂന്നു പോലീസ് ഉദ്യോഗസ്ഥരുടെ സേവനമെങ്കിലും വേണമെന്ന അവസ്ഥയാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]