ADVERTISEMENT

ADVERTISEMENT

മാള കാർമൽ കോളജിൽ ഇന്ത്യൻ നോളജ് സിസ്റ്റം സെന്‍റർ

മാള: കാർമൽ കോളജിൽ ഇന്ത്യൻ നോളജ് സിസ്റ്റം സെന്‍റർ തുടങ്ങി. പ്രഭാഷകനും ഇന്‍റർനാഷണൽ സ്കൂൾ ഫോർ ഫൊണറ്റിക്സ് (കുസാറ്റ് ) എമരിറ്റസ് പ്രഫസറുമായ വിപിഎൻ നമ്പൂതിരി ഉദ് ഘാടനം ചെയ്തു. കാർമൽ കോ ളജ് പ്രിൻസിപ്പൽ സിസ്റ്റർ ഡോ. റിനി റാഫേൽ അധ്യക്ഷത വഹിച്ചു. കാർമൽ കോളജ് സെന്‍റർ ഫോർ ഇന്ത്യൻ നോളജ് സിസ്റ്റം കോ-ഒാർഡിനേറ്ററും ചരിത്ര വിഭാഗം അധ്യാപികയുമായ ടി. കെ. റീന, സ്റ്റാറ്റിസ്റ്റിക്സ് വിഭാഗം അധ്യാപിക ഡോ. മീനു ജോസ്, ജോ യിന്‍റ്് കോ-ഒാർഡിനേറ്റർ ഡോ. മെറിൻ ഫ്രാൻസിസ് എന്നിവർ പ്രസംഗിച്ചു.

ADVERTISEMENT

കേരള കോണ്‍ഗ്രസ് പൊറത്തിശേരി മണ്ഡലം സമ്മേളനം നടത്തി

ഇരിങ്ങാലക്കുട: കേരള കോണ്‍ഗ്രസ് പൊറത്തിശേരി മണ്ഡലം പ്രവര്‍ത്തകസമ്മേളനം നടന്നു. പൊ റത്തിശേരി മണ്ഡലത്തിന്‍റെ വിവിധ ഭാഗങ്ങളില്‍ പ്രവര്‍ത്തന വിപുലീകരണത്തിനായി മേഖലാ കോ-ഓര്‍ഡിനേറ്റര്‍മാരെ തെരഞ്ഞെടുത്തു. പ്രവര്‍ത്തക സമ്മേളനം കേരള കോണ്‍ഗ്രസ് ഡെപ്യൂട്ടി ചെയര്‍മാന്‍ തോമസ് ഉണ്ണിയാടന്‍ ഉദ്ഘാടനം ചെയ്തു. മണ്ഡലം പ്രസിഡന്‍റ്് എ.ഡി. ഫ്രാന്‍സിസ് ആഴ്ച്ചങ്ങാട്ടില്‍ അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി മിനിമോഹന്‍ദാസ്, നിയോജക മണ്ഡലം പ്രസിഡന്‍റ് റോക്കി ആളൂക്കാരന്‍ എന്നിവര്‍ മുഖ്യ പ്രഭാഷണം നടത്തി. ഭാരവാഹികളായ സേതുമാധവന്‍ പറയംവളപ്പില്‍, സിജോയ് തോമസ്, പി.ടി. ജോര്‍ജ്,സതീശ് കാട്ടൂര്‍, പി.വി. നോബിള്‍, യോഹന്നാന്‍ കോമ്പാറക്കാരന്‍, മോഹനന്‍ ചാക്കേരി, സിന്‍റോ മാത്യു പെരുമ്പുള്ളി, ഷോണി. ടി. തെക്കൂടന്‍, കെ.പി. തോമസ് കോരേത്ത,് ഷോബി ടി. തെക്കൂടന്‍, പ്രദീപ്, അല്ലി സ്റ്റാന്‍ലി ചുണ്ടേപ്പറമ്പില്‍, അനിത തോ മസ് ഊടന്‍, ആനി വില്‍സന്‍, ശൈലന്‍ കുന്നത്ത്, ജോണ്‍സന്‍ കാഞ്ഞിരപ്പള്ളന്‍, അരുണ്‍ അരവിന്ദാക്ഷന്‍, ഇബ്രാഹിം‌കുട്ടി കാട്ടുപറമ്പില്‍, മന്‍സൂര്‍ കളക്കാട്ട്, സിദ്ധാര്‍ഥന്‍ തുമാട്ട് എന്നിവര്‍ പ്രസംഗിച്ചു.

ഫാ. ഫ്രാന്‍സിസ് ചിറയത്ത് അനുസ്മരണവും സ്‌കോളര്‍ഷിപ്പ് വിതരണവും നടത്തി

ഇരിങ്ങാലക്കുട: ഫാ. ഫ്രാന്‍സിസ് ചിറയത്ത് അനുസ്മരണവും സ്‌കോളര്‍ഷിപ്പ് വിതരണവും രൂപതാ ഭവനത്തില്‍ നടന്നു. ബിഷപ് മാര്‍ പോളി കണ്ണൂക്കാടന്‍ ഉദ്ഘാടനം നിര്‍വഹിച്ചു. രൂപത വികാരി ജനറാള്‍മാരായ മോണ്‍. ജോസ് മാളിയേക്കല്‍, മോണ്‍. വില്‍സന്‍ ഈരത്തറ, മോണ്‍. ജോളി വടക്കന്‍, ഫാ. ലിജോ കോങ്കോത്ത്, ഫാ. കിരണ്‍ തട്ട്‌ള, ട്രസ്റ്റ് സെക്രട്ടറി ഫാ. ഷാജു ചിറയത്ത് ഫാ. ബിനോയ് നെരേപ്പറമ്പില്‍, ഫാ. ജോര്‍ജി തേലപ്പിളളി എന്നിവര്‍ സന്നിഹിതരായിരുന്നു.

ഇരിങ്ങാലക്കുട റെയില്‍വേ സ്റ്റേഷന്‍ വിഷയം: രാജീവ് ചന്ദ്രശേഖറിനു കത്തുനല്‍കി

ഇരിങ്ങാലക്കുട: കല്ലേറ്റുംകരയിലെ ഇരിങ്ങാലക്കുട റെയില്‍വേ സ്റ്റേഷന്‍ വികസനം ആവശ്യപ്പെട്ട് നടക്കുന്ന ജനകീയ‌സമരത്തെ തൃശൂര്‍ ലോക്സഭാംഗവും കേന്ദ്ര സഹമന്ത്രിയുമായ സുരേഷ് ഗോപി അവഗണിക്കുന്നതിനെതിരെ ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖറിന് സമരസമിതി മുഖ്യസംഘാടകന്‍ വര്‍ഗീസ് തൊടുപറമ്പില്‍ കത്ത് നല്‍കി. സുരേഷ് ഗോപിയെ കണ്ടുചര്‍ച്ച നടത്താന്‍ സമയം ചോദിച്ച് കത്തുനല്‍കി ആറുമാസമായിട്ടും പരിഗണിക്കാത്തത് ജനാധിപത്യ മര്യാദകളുടെ ലംഘനമാണെന്ന് കത്തില്‍ കുറ്റപ്പെടുത്തി. കഴിഞ്ഞ ലോക്സഭ തെരഞ്ഞെടുപ്പിനുമുമ്പ് ബിജെപി പ്രതിനിധിയായ പി.കെ. കൃഷ്ണദാസ് വന്ന് സ്റ്റേഷന്‍ വികസനം അമൃത് പദ്ധതിയില്‍ ഉള്‍പ്പെടുത്തിയെന്നും പത്തു കോടി രൂപ അനുവദിച്ചുവെന്നും അറിയിച്ചിരുന്നു. സ്റ്റേഷന്‍ വികസന വിഷയത്തില്‍ അടിയന്തര നടപടികള്‍ ഉണ്ടാകുമെന്ന് തെരഞ്ഞെടുപ്പ് സമയത്ത് സുരേഷ് ഗോപി ഉള്‍പ്പടെയുള്ള നേതാക്കള്‍ പലവട്ടം ഉറപ്പു നല്‍കി. തെരഞ്ഞെടുക്കപ്പെട്ടശേഷം യാതൊരു നടപടിയും ഉണ്ടായിട്ടില്ല. കോവിഡ് കാലത്ത് സ്റ്റോപ്പ് എടുത്തുകളഞ്ഞ ട്രെയിനുകള്‍ വീണ്ടും ഇവിടെ നിര്‍ത്താനാവശ്യമായ നടപടികള്‍‌പോലും ഉണ്ടായില്ല. ഈ സാഹചര്യത്തില്‍ ജനകീയസമരങ്ങളെ അവഗണിക്കുന്ന നടപടികളില്‍‌നിന്ന് ജനപ്രതിനിധിയായ സുരേഷ് ഗോപിയെ തിരുത്തണമെന്നും രാജീവ് ചന്ദ്രശേഖറിനു നല്‍കിയ കത്തില്‍ ആവശ്യപ്പെട്ടു.

ചാലക്കുടി ട്രങ്ക് റോഡ് ജംഗ്ഷനിൽ അപകടകരമായി മാൻഹോളുകൾ

ചാലക്കുടി: ഏറെ തിരക്കുള്ള ട്രങ്ക് റോഡ് ജംഗ്ഷനിൽ നൂറുകണക്കിനു വാഹനങ്ങൾ കടന്നുപോകുന്ന ഭാഗത്ത് ടെലിഫോൺ വകുപ്പിന്‍റെ മാൻ ഹോളിന്‍റെ മുകൾവശം താഴ്ന്നുപോയത് അപകടഭീക്ഷണി ഉയർത്തുന്നു. സ്കൂൾ കുട്ടികളും കാൽനട യാത്രക്കാരും മാൻ ഹോളിന്‍റെ സൈഡ് ഭാഗത്തോടുകൂടിയാണ് യാത്ര ചെയ്യുന്നത്. മാൻ ഹോളിന്‍റെ തകിട് താഴ്ന്നുനിൽക്കുന്നതിനാൽ പലപ്പോ ഴും അപകടം സംഭവിക്കുന്നു. മാൻഹോൾ ഭാഗത്ത് എത്തുമ്പോൾ മാർക്കറ്റ് റോഡിലേക്കും റെയിൽവേ സ്റ്റേഷൻ റൂട്ടിലേക്കും വാഹനങ്ങൾ തിരിയുമ്പോൾ അപകടസാധ്യത കൂടുതലാണ്. നിലവിൽ ഈ ഭാഗത്ത് റോഡ് അല്പം ചെരിഞ്ഞാണു പോകുന്നത്. താഴ്ന്നുകിടക്കുന്ന മാൻ ഹോളിന്‍റെ തകിടിന്മേൽ വാഹനങ്ങൾ കയറി പോകുമ്പോൾ വലിയൊരു ശബ്ദം ഉണ്ടാവുന്നു. എത്രയും‌വേഗം മാൻഹോൾ ഭാഗത്ത് കൂടുതൽ കട്ടിയുള്ള തകിട് സ്ഥാപിച്ച് കോൺക്രീറ്റ്‌ചെയ്ത് അപകടാവസ്ഥ ഒഴിവാക്കണമെന്ന് ആവശ്യപ്പെട്ടുകൊണ്ട് ടെലികോം അധികാരികളോട് മുനിസിപ്പൽ കൗൺസിലർ തോമസ് മാളിയേക്കൽ ആവശ്യപ്പെട്ടു.

രാജ്യത്തു ഹിന്ദുത്വ അജൻഡകൾ നടപ്പാക്കാനുള്ള ആസൂത്രിതശ്രമത്തിന്‍റെ ഭാഗം: സി.എൻ. ജയദേവൻ

കയ്പമംഗലം: രാജ്യത്ത് ഹിന്ദുത്വ അജൻഡകൾ നടപ്പാക്കുന്നതിനായള്ള ആസൂത്രിത ശ്രമത്തിന്‍റെ ഭാഗമാണ് നിരപരാധികളായ കന്യാസ്ത്രീകളെ ജനാധിപത്യ വിരുദ്ധമായി അറസ്റ്റ് ചെയ്തത് ജയിലിലടച്ച സംഭവമെന്ന് സിപിഐ നേതാവും മുൻ എംപിയുമായ സി.എൻ. ജയദേവൻ പറഞ്ഞു. കള്ളകേസ് ചുമത്തി മലയാളികളായ കന്യാസ്ത്രീകളെ അറസ്റ്റുചെയ്ത് ജയിലിലടച്ച ഛത്തീസ്ഗഡിലെ ബിജെപി സർക്കാരിനെതിരെ എൽഡിഎഫ് കയ്പമംഗലം മണ്ഡലം കമ്മിറ്റിയുടെ നേതൃത്വത്തിൽ ശ്രീനാരായണപുരം മാർക്കറ്റ് ഓഡിറ്റോറിയത്തിൽ സംഘടിപ്പിച്ച പ്രതിഷേധ സദസ് ഉദ്ഘാടനം ചെയ്യുകയായിരുന്നു അദ്ദേഹം. സിപിഐ മണ്ഡലം സെക്രട്ടറി ടി.പി. രഘുനാഥ് അധ്യക്ഷനായി. സിപിഎം ജില്ലാ സെക്രട്ടേറിയറ്റ് അംഗവും എൽഡിഎഫ് ജില്ലാ കൺവീനറുമായ പി.കെ. ചന്ദ്രശേഖരൻ മുഖ്യപ്രഭാഷണം നടത്തി. ഇ.ടി. ടൈസൺ എംഎൽഎ, വിവിധ ഘടകകക്ഷി നേതാക്കളായ കെ.വി. രാജേഷ്, പി.എം. അഹമ്മദ്, കെ.കെ. ആബിദലി (സിപിഎം), കെ.ജേ. തോമസ് (കേരള കോൺഗ്രസ് -എം) റഷീദ് ചളിങ്ങാട് (ഐഎൻഎൽ), കെ.ബി. ഹൈദ്രോസ് (ജനതാദൾ -എസ്) തുടങ്ങിയവർ പ്രസംഗിച്ചു.

"ചങ്ങാതിക്കൊരു തൈ' കാന്പയിൻ ജില്ലാതല ഉദ്ഘാടനം

തൃശൂർ: സൗഹൃദം മഹാവൃക്ഷമായി വരട്ടെ എന്ന ആശയവുമായി ചങ്ങാതിക്കൊരു തൈ കാന്പയിനിലൂടെ സുഹൃത്തുക്കൾക്കു നട്ടുവളർത്താൻ വൃക്ഷത്തൈകൈമാറ്റവുമായി ഹരിതകേരളം മിഷൻ. ചങ്ങാതിക്കൊരു തൈ കാന്പയിൻ ജില്ലാതല ഉദ്ഘാടനം തിരൂർ സെന്‍റ് തോമസ് ഹയർ സെക്കൻഡറി സ്കൂളിൽ ജില്ലാ കളക്ടർ അർജുൻ പാണ്ഡ്യൻ നിർവഹിച്ചു. കുട്ടിക്കർഷകയ്ക്കുള്ള അവാർഡ് നേടിയ വിദ്യാലയത്തിലെ പത്താംക്ലാസ് വിദ്യാർഥിനി പി.ബി. എയ്മിക്കു തൈ കൈമാറിക്കൊണ്ടും വിദ്യാലയാങ്കണത്തിൽ തൈ നട്ടുകൊണ്ടുമാണ് ഉദ്ഘാടനം നിർവഹിച്ചത്. കോലഴി ഗ്രാമപഞ്ചായത്ത് പ്രസിഡന്‍റ് ലക്ഷ്മി വിശ്വംഭരൻ അധ്യക്ഷത വഹിച്ചു. ഒരു കോടി വൃക്ഷത്തൈകൾ നടുക എന്ന ലക്ഷ്യത്തോടെ സംസ്ഥാന ഹരിതകേരള മിഷൻ ലോക പരിസ്ഥിതിദിനമായ അഞ്ചുമുതൽ നടത്തിവരുന്ന ഒരു തൈ നടാം വൃക്ഷവത്കരണ കാമ്പയിന്‍റെ ഭാഗമായാണ് പരിപാടി സംഘടിപ്പിക്കുന്നത്. ജില്ലാ ഭരണകൂടം നടപ്പാക്കുന്ന വാ വായിക്കാം പദ്ധതിയിലേക്കുള്ള പുസ്തകങ്ങൾ പ്രധാനാധ്യാപിക ബിത ഫ്രാൻസിസ് ജില്ലാ കളക്ടർക്കു കൈമാറി. നവകേരളം കർമപദ്ധതി ജില്ലാ കോഓർഡിനേറ്റർ സി. ദിദിക, സ്കൂൾ പ്രധാനാധ്യാപിക ബിത ഫ്രാൻസിസ് തരകൻ, സ്കൂൾമാനേജർ ഫാ. പോൾസണ്‍ പാലത്തിങ്കൽ, വാർഡ് മെന്പർ ടി.കെ. കൃഷ്ണൻകുട്ടി, പിടിഎ പ്രസിഡന്‍റ് വിനീത സാജൻ, പി.ജെ. ജോഫി തുടങ്ങിയവർ പ്രസംഗിച്ചു.

തദ്ദേശതെരഞ്ഞെടുപ്പിലും എൽഡിഎഫിനെതിരേ പ്രചാരണം നടത്തും: മദ്യനിരോധനസമിതി

തൃശൂർ: നിയമസഭാ ഉപതെരഞ്ഞെടുപ്പുകളിലേതുപോലെ തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിലും, മദ്യം വ്യാപകമാക്കിയ ഇടതുപക്ഷ ജനാധിപത്യമുന്നണിക്കെതിരേ ശക്തമായ പ്രചാരണം നടത്തുമെന്നു കേരള മദ്യനിരോധനസമിതി സംസ്ഥാന ജനറൽ സെക്രട്ടറി ഡോ. വിൻസെന്‍റ് മാളിയേക്കൽ. മദ്യനിരോധനസമിതി തൃശൂർ ജില്ലാ കണ്‍വൻഷൻ സെന്‍റ് തോമസ് കോളജ് ഹാളിൽ ഉദ്ഘാടനം ചെയ്യുകയായിരുന്നു അദ്ദേഹം. മദ്യലഭ്യത കുറയ്ക്കുമെന്നു വാഗ്ദാനംനൽകി വോട്ടുനേടിയ എൽഡിഎഫ്, അധികാരം ലഭിച്ചപ്പോൾ ആദ്യംചെയ്തത് തദ്ദേശസ്വയംഭരണ സ്ഥാപനങ്ങൾക്കുണ്ടായിരുന്ന മദ്യനിയന്ത്രണാധികാരം ഓർഡിനൻസിലൂടെ എടുത്തുമാറ്റുകയാണ്. തുടർന്നു വ്യാപകമായി ബാർ ലൈസൻസ് അനുവദിച്ചു. ഒന്പതുവർഷത്തെ ഭരണത്തിനിടെ സംസ്ഥാനത്തു ബാറുകൾ 33 ഇരട്ടിയാക്കി, മദ്യപിക്കുന്ന ശീലമില്ലാത്തവരെയും പ്രലോഭിപ്പിച്ചു കുടിപ്പിച്ചു. നാടെങ്ങും മദ്യമൊഴുക്കി കുടുംബങ്ങൾ തകർത്ത എൽഡിഎഫ്, ആ വഞ്ചനയ്ക്ക് തദ്ദേശതെരഞ്ഞെടുപ്പിലും ഉത്തരംപറയേണ്ടിവരുമെന്നും അദ്ദേഹം കൂട്ടിച്ചേർത്തു. സമിതി ജില്ലാ പ്രസിഡന്‍റ് ആന്‍റണി പന്തല്ലൂക്കാരൻ അധ്യക്ഷത വഹിച്ചു. സംസ്ഥാനസെക്രട്ടറി പി.എം. ഹബീബുള്ള, കെ.കെ. സത്യൻ, കെ.എ. ഗോവിന്ദൻ, മാർട്ടിൻ പേരേക്കാടൻ, എ. മോഹൻദാസ്, ജോണ്‍കുട്ടി ചുങ്കത്ത്, ജോസ് ചെന്പിശേരി എന്നിവർ പ്രസംഗിച്ചു.

ട്രാൻസ്ജെൻഡേഴ്സിനെ സമൂഹം ചേർത്തുപിടിക്കണം: മന്ത്രി ബിന്ദു

തൃശൂർ: മണപ്പുറം ഫൗണ്ടേഷനു കീഴിലുള്ള മണപ്പുറം ഇൻസ്റ്റിറ്റ്യൂട്ട് ഓഫ് സ്കിൽ ഡെവലപ്മെന്‍റിൽ (മാസ്കിൽ) 15 ട്രാൻസ്ജെൻഡർ വ്യക്തികൾക്കു ബ്യൂട്ടി ആൻഡ് വെൽനെസ് സ്കിൽ സൗജന്യപരിശീലനത്തിനു തുടക്കമായി. മണപ്പുറം അക്വാട്ടിക് കോംപ്ലക്സിൽ നടന്ന ചടങ്ങ് ഉന്നതവിദ്യാഭ്യാസമന്ത്രി ആർ. ബിന്ദു ഉദ്ഘാടനം ചെയ്തു. കടുത്ത ആന്തരികസംഘർഷങ്ങളും യാതനകളുമനുഭവിക്കുന്ന ട്രാൻസ്ജെൻഡർമാരെ ചേർത്തുപിടിക്കാനും താങ്ങാകാനും മുന്നോട്ടുവന്ന മണപ്പുറം ഫൗണ്ടേഷനെ മന്ത്രി അഭിനന്ദിച്ചു. പദ്ധതിക്കായുള്ള 2,30,000 രൂപയുടെ ചെക്ക് ചടങ്ങിൽ കൈമാറി. തൃക്കാക്കര ഭാരതമാതാ എക്സ്റ്റൻഷൻ ഫോർ ഓർഗാനിക് റിസർച്ച് ആൻഡ് എൻവയണ്‍മെന്‍റിന്‍റെ (ബിഫോർ) സഹകരണത്തോടെയാണ് പരിശീലനം സംഘടിപ്പിച്ചത്. മണപ്പുറം ഫൗണ്ടേഷൻ ചീഫ് എക്സിക്യൂട്ടീവ് ഓഫീസർ ജോർജ് ഡി. ദാസ് അധ്യക്ഷത വഹിച്ചു. എടത്തിരുത്തി ഗ്രാമപഞ്ചായത്ത് പ്രസിഡന്‍റ് ടി.കെ. ചന്ദ്രഭാനു മുഖ്യപ്രഭാഷണം നടത്തി. ’ബിഫോർ’ ചീഫ് ഓപ്പറേറ്റിംഗ് ഓഫീസർ ഡോ. എൽ. ആര്യ ചന്ദ്രൻ, മാസ്കിൽ ട്രെയ്നർ ട്രാൻസ്‌വുമണ്‍ ഗംഗ നിഹാരിക എന്നിവർ ആശംസനേർന്നു. മണപ്പുറം ഫൗണ്ടേഷൻ സിഎസ്ആർ ഹെഡ് ശില്പ തെരേസ സെബാസ്റ്റ്യൻ സ്വാഗതവും മാസ്കിൽ സെന്‍റർ ഹെഡ് ആർ. ശ്രീനാഥ് നന്ദിയും പറഞ്ഞു.

നെല്ലുസംഭരണം: തൃശൂർ ജില്ലയിൽ 26 കോടി കുടിശിക: മന്ത്രി രാജൻ

തൃശൂർ: നെല്ലുസംഭരണവുമായി ബന്ധപ്പെട്ട പ്രശ്നങ്ങൾ കർഷകരെ ബാധിച്ചെന്നും മേയ് 10 വരെയുള്ള വിലയാണു നൽകാൻ കഴിഞ്ഞതെന്നും റവന്യൂമന്ത്രി കെ. രാജൻ. ഇക്കുറി തൃശൂരിൽമാത്രം 245 കോടിയുടെ നെല്ലു സംഭരിച്ചു. പല തലങ്ങളിൽ 218.76 കോടി വിതരണംചെയ്തു. 3545 കർഷകർക്ക് 26.41 കോടി കുടിശികയുള്ളതു ഗൗരവമായി കാണുന്നതായും മന്ത്രി പറഞ്ഞു. കോൾമേഖലാ കർഷക പ്രതിനിധികളുടെ വാർഷികപൊതുയോഗം തൃശൂർ ടൗണ്‍ഹാളിൽ ഉദ്ഘാടനംചെയ്തു പ്രസംഗിക്കുകയായിരുന്നു അദ്ദേഹം. നെല്ലിന്‍റെ സംഭരണവിലയായ 28.20 രൂപയിൽ 23 രൂപ കേന്ദ്രം നൽകേണ്ടതാണ്. ഈ വർഷം കേന്ദ്രസർക്കാർ 1109 കോടി കുടിശിക വരുത്തി. 206 കോടി ജൂണ്‍-ജൂലൈയിൽ ലഭ്യമാക്കുമെന്ന് അറിയിച്ചിട്ടും നൽകിയിട്ടില്ല. നെൽവിലവർധനയിൽ ഓണത്തിനുമുന്പായി ചർച്ച നടത്തുമെന്നും മന്ത്രി പറഞ്ഞു. 23,973 ഹെക്ടർ സ്ഥലത്താണ് നെൽകൃഷി ചെയ്തത്. ഈ സാന്പത്തികവർഷം നാലുകോടി രൂപയ്ക്കു മുകളിൽ കുമ്മായം വിതരണംചെയ്യാൻ കഴിഞ്ഞു. കഴിഞ്ഞതവണത്തെക്കാൾ ഇരട്ടിയോളം ഭൂമി തരിശുരഹിതമായി. ഓപ്പറേഷൻ ഡബിൾ കോൾ പദ്ധതിയിൽ രണ്ടാംകൃഷിക്കായി 15 ലക്ഷം പ്രാഥമികമായി വകയിരുത്തി. ഇതെല്ലാം ഗുണകരമായി വിനിയോഗിക്കേണ്ടതുണ്ടെന്നും മന്ത്രി പറഞ്ഞു. കോൾ കർഷകസംഘം ജില്ലാ പ്രസിഡന്‍റ് മുരളി പെരുനെല്ലി എംഎൽഎ, ജനറൽ സെക്രട്ടറി കെ.കെ. കൊച്ചുമുഹമ്മദ്, ജില്ലാ കളക്ടർ അർജുൻ പാണ്ഡ്യൻ, സബ് കളക്ടർ അഖിൽ വി. മേനോൻ എന്നിവർ പങ്കെടുത്തു. ഇറിഗേഷൻ ഉപദേശക സമിതി രൂപീകരിച്ചു തൃശൂർ: കോൾപ്പടവ് കർഷകരുടെ പ്രതിനിധിയോഗത്തിൽ 11 അംഗ ഇറിഗേഷൻ ഉപദേശകസമിതി രൂപീകരിച്ചു. ഇറിഗേഷൻ എക്സിക്യുട്ടീവ് എൻജിനീയറാണ് അധ്യക്ഷൻ. സമിതിയുടെ നേതൃത്വത്തിലാണു വിവിധ കോൾപ്പടവുകളിലേക്കുള്ള ജലവിതരണം സംബന്ധിച്ച തീരുമാനമെടുക്കുക. മുരളി പെരുനെല്ലി എംഎൽഎ, തൃശൂർ ജില്ല കോൾ കർഷകസംഘം പ്രസിഡന്‍റ് കെ.കെ. കൊച്ചുമുഹമ്മദ്, എൻ.കെ. സുബ്രഹ്മണ്യൻ, കെ.കെ. രാജേന്ദ്രബാബു, കെ.കെ. ഷൈജു, പി.ആർ. വർഗീസ്, കൊളങ്ങാട്ട് ഗോപിനാഥൻ, എ.ആർ. രാജീവ്, കെ.എസ്. അർജുനൻ, അഡ്വ. വി. സുരേഷ് കുമാർ, സി.എ. പോൾ എന്നിവരാണ് അംഗങ്ങൾ.

ഖാദി ജീവിതശൈലിയുടെ ഭാഗമാകണം: കെ. രാജൻ

തൃശൂർ: ഖാദി കേവലമൊരു ഫാഷനല്ല, മലയാളി ഉയർത്തിപ്പിടിക്കേണ്ട അടിയന്തരവും അനിവാര്യവുമായ സംസ്കാരമാണെന്നു മന്ത്രി കെ. രാജൻ. ഖാദി ഒരു വസ്ത്രംമാത്രമല്ല അതൊരു ജീവിതശൈലിയുടെ ഭാഗമായി മാറേണ്ട മഹത്തരമായിട്ടുള്ള ആശയമാണ്. അതുകൊണ്ടുതന്നെ ഖാദിയെ എല്ലാ വിധത്തിലും പ്രോത്സാഹിപ്പിക്കണമെന്നും അദ്ദേഹം അഭിപ്രായപ്പെട്ടു. കേരള ഖാദി ഗ്രാമവ്യവസായ ബോർഡിന്‍റെ 2025 ഓണം ഖാദി മേളയുടെ ജില്ലാതല ഉദ്ഘാടനം നിർവഹിക്കുകയായിരുന്നു മന്ത്രി. ഒളരിക്കര ഖാദി കോംപ്ലക്സിൽ നടന്ന ചടങ്ങിൽ ഒല്ലൂക്കര ബ്ലോക്ക് പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ സുരേഷ് ബാബു അധ്യക്ഷത വഹിച്ചു. ആദ്യവില്പനയും സമ്മാന കൂപ്പണ്‍ വിതരണവും അധ്യക്ഷൻ സുരേഷ് ബാബുവും പുതിയ ഖാദി ഉത്പന്നങ്ങളായ ബാന്ദ്നി, ഷിബോരി ചുരിദാർ മെറ്റീരിയലുകളുടെ ലോഞ്ചിംഗ് എൽത്തുരുത്ത് ഡിവിഷൻ കൗണ്‍സിലർ സജിത ഷിബുവും നിർവഹിച്ചു. മാള ബ്ലോക്ക് പഞ്ചായത്ത് അംഗം ഒ.സി. രവി, ചേർപ്പ് ഖാദി സൊസൈറ്റി മാനേജർ എൻ.എസ്. വിജിനി, വിവിധ സംഘടനാപ്രതിനിധികളായ എം.ഒ. ഡെയ്സണ്‍, എ.എ. നൗഷാദ്, കമല സദാനന്ദൻ, ധന്യ ദാമോദരൻ എന്നിവർ പ്രസംഗിച്ചു. സെപ്റ്റംബർ നാലുവരെ നീളുന്ന മേളയിൽ നവീന ഫാഷനിലുള്ള ഖാദി റെഡിമെയ്ഡ് ഷർട്ടുകൾ, ചുരിദാറുകൾ, ജുബകൾ, ദോത്തികൾ, കോട്ടണ്‍ സിൽക്ക് സാരികൾ, വെള്ള ഡബിൾമുണ്ടുകൾ, കുപ്പടം മുണ്ടുകൾ, ബെഡുകൾ തുടങ്ങിയ തനത് ഉത്പന്നങ്ങളും ലഭിക്കും.

ജില്ലയിൽ ഇന്ന് റെഡ് അലർട്ട്; നാളെ ഓറഞ്ച്

തൃശൂർ: ജില്ലയിൽ ഇന്ന് അതിതീവ്രമഴയ്ക്ക് മുന്നറിയിപ്പ്. നാളെ അതിശക്തമായ മഴയ്ക്കു സാധ്യത ഉള്ളതിനാൽ ഓറഞ്ച് അലർട്ടും കേന്ദ്ര കാലാവസ്ഥാ വകുപ്പ് പ്രഖ്യാപിച്ചിട്ടുണ്ട്. തുടർന്നു രണ്ടുദിവസം ഒറ്റപ്പെട്ട മഴയ്ക്കും സാധ്യതയുണ്ട്. പൊതുജനങ്ങൾക്കുള്ള പ്രത്യേക നിർദേശങ്ങൾ: * ശക്തമായ മഴ ലഭിച്ചുകൊണ്ടിരിക്കുന്ന മലയോരമേഖലയിൽ മണ്ണിടിച്ചിൽ, ഉരുൾപൊട്ടൽ, മലവെള്ളപ്പാച്ചിൽ സാധ്യതയുള്ള പ്രദേശങ്ങളിലുള്ളവർ സുരക്ഷിതമായ സ്ഥലത്തേക്കു മാറിത്താമസിക്കേണ്ടതാണ്. പകൽസമയത്തുതന്നെ മാറിത്താമസിക്കാൻ ആളുകൾ തയാറാവണം. * സ്ഥിരമായി വെള്ളക്കെട്ട് രൂപപ്പെടാറുള്ള താഴ്ന്ന പ്രദേശങ്ങളിൽ താമസിക്കുന്നവർ സാഹചര്യം വിലയിരുത്തി തയാറാക്കപ്പെടുന്ന ക്യാന്പുകളിലേക്കു മാറണം. * ശക്തമായ കാറ്റിനു സാധ്യതയുള്ളതിനാൽ അടച്ചുറപ്പില്ലാത്ത വീടുകളിൽ താമസിക്കുന്നവരും മേൽക്കൂര ശക്തമല്ലാത്ത വീടുകളിൽ താമസിക്കുന്നവരും പ്രത്യേക ജാഗ്രത പാലിക്കേണ്ടതാണ്. * ശക്തമായ മഴ പെയ്യുന്ന സാഹചര്യത്തിൽ ഒരു കാരണവശാലും നദികൾ മുറിച്ചുകടക്കാനോ, നദികളിലോ മറ്റു ജലാശയങ്ങളിലോ കുളിക്കാനോ, മീൻപിടിക്കാനോ മറ്റ് ആവശ്യങ്ങൾക്കോ ഇറങ്ങാൻ പാടുള്ളതല്ല. * മഴ ശക്തമാകുന്ന അവസരങ്ങളിൽ അത്യാവശ്യമല്ലാത്ത യാത്രകൾ പരമാവധി ഒഴിവാക്കുക. വെള്ളച്ചാട്ടങ്ങൾ, ജലാശയങ്ങൾ, മലയോരമേഖലകൾ എന്നിവിടങ്ങളിലേക്കുള്ള വിനോദയാത്രകൾ മഴ മുന്നറിയിപ്പ് മാറുന്നതുരെ ഒഴിവാക്കേണ്ടതാണ്.

ന്യൂനപക്ഷവേട്ട: കോൺഗ്രസ്-എസ് ഏജീസ് ഓഫീസ് മാർച്ച് നടത്തി

തൃശൂർ: രാജ്യത്തെ ന്യൂനപക്ഷവേട്ടയ്ക്കെതിരേയും ഭരണഘടനാലംഘനങ്ങൾക്കെതിരേയും കോൺഗ്രസ് -എസ് ഏജീസ് ഓഫീസിനുമുന്നിൽ സംഘടിപ്പിച്ച പ്രതിഷേധസമരം ഭരണഘടനയുടെ ആമുഖം വായിച്ചു മെഴുകുതിരി തെളിച്ച് ജില്ലാ പ്രസിഡന്‍റ് സി.ആർ. വത്സൻ ഉദ്ഘാടനം ചെയ്തു‌. സി.ഡി. ജോസ് അധ്യക്ഷത വഹിച്ചു. ഗാന്ധിജിയിലേക്കു മടങ്ങൂ, രാജ്യത്തെ രക്ഷിക്കൂ എന്ന മുദ്രാവാക്യമുയർത്തിയായിരുന്നു സമരം. ജില്ലാ വൈസ് പ്രസിഡന്‍റ് ബാലൻ കണിമംഗലത്ത് സ്വാഗതവും ജില്ലാ ജനറൽ സെക്രട്ടറി കെ. രാജൻ നന്ദിയും പറഞ്ഞു. റഫീക്ക് തങ്ങൾ, അഡ്വ. ഒ.യു. ജോൺ, യൂത്ത് കോൺഗ്രസ് -എസ് ജില്ലാ പ്രസിഡന്‍റ് അനൂപ് പെരുമ്പിലാവിൽ, പി.ഡി. നാരായണൻ, ശിവൻ കാര്യാത്തുപ്പറമ്പിൽ, അഡ്വ. ബേബി പി. ആന്‍റണി, ശിവൻ ഗുരുവായൂർ, പി.കെ. മുഹ്സിൻ, റിസ്‌ന ഗുരുവായൂർ, അമൽ, പി.കെ. സോമൻ, ഒ.സി. ജോൺസൻ എന്നിവർ പ്രസംഗിച്ചു.

ഫാ. തോമസ് വാഴപ്പള്ളി സ്മാരക അധ്യാപക പുരസ്കാരം സമ്മാനിച്ചു

തൃശൂർ: വിദ്യാഭ്യാസ -സാമൂഹികപ്രവർത്തകനും അവിഭക്ത തൃശൂർ രൂപതയിലെ വിദ്യാലയങ്ങളുടെ ആദ്യത്തെ കോർപറേറ്റ് മാനേജരുമായിരുന്ന ഫാ. തോമസ് വാഴപ്പിള്ളിയുടെ ഓർമയ്ക്കായി ഏർപ്പെടുത്തിയ പ്രഥമ തോമസ് വാഴപ്പള്ളി സ്മാരക അധ്യാപക പുരസ്കാരം കോടന്നൂർ സെന്‍റ് ആന്‍റണീസ് യുപി സ്കൂളിലെ കെ.വി. തങ്കമ്മയ്ക്ക് അതിരൂപത മെത്രാപ്പോലീത്ത മാർ ആൻഡ്രൂസ് താഴത്ത് സമ്മാനിച്ചു. 15,000 രൂപയും ഫലകവും പ്രശസ്തിപത്രവും അടങ്ങുന്നതാണു പുരസ്കാരം. തൃശൂർ, ഇരിങ്ങാലക്കുട രൂപതകളിലെ സ്കൂളുകളെ ഒരു കുടക്കീഴിലാക്കാൻ കോർപറേറ്റ് എഡ്യുക്കേഷണൽ ഏജൻസിയെന്ന ആശയം നടപ്പാക്കിയത് ഫാ. തോമസ് വാഴപ്പിള്ളിയായിരുന്നു. തുടർന്നുള്ള വർഷങ്ങളിലും രണ്ടു രൂപതകൾക്കു കീഴിലുള്ള സ്കൂളുകളിലെ മികച്ച അധ്യാപകർക്ക് പുരസ്കാരം നൽകും. കേരള കാത്തലിക് ടീച്ചേഴ്സ് ഗിൽഡിന്‍റെ നേതൃത്വത്തിൽ നടന്ന ചടങ്ങിൽ വികാരി ജനറാൾ ഫാ. ജോസ് കോനിക്കര, കോർപറേറ്റ് മാനേജർ ഫാ. ജോയ് അടന്പുകുളം, ഗിൽഡ് പ്രസിഡന്‍റ് എ.ഡി. സാജു, വി.എസ്. ചാക്കോച്ചൻ, പ്രിൻസിപ്പൽ ഫോറം കണ്‍വീനർ കെ.എഫ്. ബാബു, വൈസ് പ്രസിഡന്‍റ് ബിജു പി. ആന്‍റണി, പുത്തൻപീടിക ഹയർ സെക്കൻഡറി സ്കൂളിലെ പ്രിൻസിപ്പൽ സ്മിത, സിസ്റ്റർ ആഗ്നസ് സിഎംസി, ജനറൽ കണ്‍വീനർ എൻ.പി. ജാക്സണ്‍ എന്നിവർ പ്രസംഗിച്ചു. 2025ലെ പൊതു പരീക്ഷയിൽ മികച്ച വിജയം നേടിയ വിദ്യാലയങ്ങളെയും മുഴുവൻ എ പ്ലസ് നേടിയ വിദ്യാർഥികളെയും ചടങ്ങിൽ ആദരിച്ചു. ഫാ. തോമസ് വാഴപ്പിള്ളിയുടെ ഓർമയ്ക്കായി അദ്ദേഹത്തിന്‍റെ ജൻമനാടായ പുത്തൻവേലിക്കരയിലെ വാഴപ്പിള്ളി കുടുംബാംഗങ്ങളാണു പുരസ്കാരം ഏർപ്പെടുത്തിയത്.

വീടിന്‍റെ മേൽക്കൂര തകർന്നുവീണു; കുടുംബം പരിക്കേൽക്കാതെ രക്ഷപ്പെട്ടു

കാഞ്ഞാണി: കാരമുക്ക് എട്ടുസെന്‍റ് ഉന്നതിറോഡിൽ വീടിന്‍റെ മേൽക്കൂര തകർന്നുവീണു. വീട്ടിലുണ്ടായിരുന്ന കുടുംബം പരിക്കേൽക്കാതെ രക്ഷപ്പെട്ടു. പച്ചാമ്പിള്ളി അർജുനന്‍റെ ഓടിട്ട വീടിന്‍റെ മേൽക്കൂരയാണ് തകർന്നുവീണത്. ഇന്നലെ ഉച്ചയ്ക്കാണ് സംഭവം. ഈ സമയത്ത് അർജുനനും ഭാര്യയും മകനും വീടിനകത്തായിരുന്നു. ശബ്ദംകേട്ട് ഇവർ പുറത്തേക്ക് ഓടിയതിനാൽ വലിയൊരു അപകടമാണ് ഒഴിവായത്. സംഭവമറിഞ്ഞ് മണലൂർ പഞ്ചായത്തംഗം കവിത രാമചന്ദ്രൻ സ്ഥലം സന്ദർശിച്ചു.

തൃശൂർ മൃഗശാലയിൽനിന്നു വീണ്ടും മൃഗങ്ങളെ മാറ്റിത്തുടങ്ങി

പുത്തൂർ: തൃശൂർ മൃഗശാലയിൽനിന്നു സുവോളജിക്കൽ പർക്കിലേക്കു വീണ്ടും മൃഗങ്ങളെ മാറ്റിത്തുടങ്ങി. എട്ടുമാസത്തിനുശേഷമാണ് സുവോളജിക്കൽ പാർക്കിലേക്കു മാറ്റുന്നത്. കേന്ദ്ര സൂ അഥോറിറ്റിയുടെ മേല്‌നോട്ടത്തിലാണ് മൃഗങ്ങളെ മാറ്റുന്നത്. ഇരുപത്തഞ്ചോളം കുറുക്കൻമാരെയും കുരങ്ങുകളെയുംമാറ്റി. അടുത്തയാഴ്ച മുതൽ പുലി, കടുവ, ഹിപ്പോപൊട്ടാമാസ് എന്നിവയെ മാറ്റും. കഴിഞ്ഞ ഒക്ടോബറിലാണ് അവസാനമായി തൃശൂർ മൃഗശാലയിൽനിന്നു പക്ഷിമൃഗാദികളെ മാറ്റിയത്. ഇതിൽ ഏതാനും മാനുകളും പക്ഷികളും ചത്തതിനെത്തുടർന്ന് മൃഗങ്ങളെ മാറ്റുന്നതിന് അനുമതി നിഷേധിച്ചു. തുടർന്ന് സുവോളജിക്കൽ പാർക്ക് ഡയറക്ടർ കേന്ദ്ര സൂ അഥോററ്റിയുമായി നടത്തിയ ഇടപെടലുകളുടെ അടിസ്ഥാനത്തിലാണ് അനുമതിലഭിച്ചത്. കഴിഞ്ഞമാസം തിരുവനന്തപുരം മൃഗശാലയിൽനിന്നു കാട്ടുപോത്തുകളെ സുവോളജിക്കൽ പാർക്കിലെത്തിച്ചിരുന്നു.

വരവൂർ പഞ്ചായത്തിനെതിരേ പ്രതിഷേധവുമായി പഞ്ചായത്തംഗം

എരുമപ്പെട്ടി: വരവൂർ പഞ്ചായത്തിൽ അനധികൃതമായി പ്രവർത്തിക്കുന്ന വിവാഹ മണ്ഡപത്തിനെതിരേ നടപടി സ്വീകരിക്കാത്ത എൽഡിഎഫ് ഭരണസമിതിക്കെതിരേ പ്രതിഷേധവുമായി പഞ്ചായത്ത് മെമ്പർ എം. വീരചന്ദ്രൻ. അങ്കണവാടി ജീവനക്കാരെ നിയമിച്ചതിലും സിപിഎം ഭരണസമിതി രാഷ്ട്രീയവിവേചനം കാണിച്ചെന്നും ആരോപണം. പഞ്ചായത്തിലെ ഒമ്പതാംവാർഡ് കുമരപ്പനാലിൽ മൂന്നുവർഷത്തിലധിക മായി കെട്ടിടനമ്പറും ലൈസൻസുമില്ലാതെ അനധികൃതമായാണ് കല്യാണമണ്ഡപം പ്രവർത്തിക്കുന്നത്. ഈ ആഢംബര മണ്ഡപത്തിൽനിന്ന് ടാക്സ് ഈടാക്കാൻ കഴിയാത്തതിനാൽ പഞ്ചായത്തിന്‍റെ തനതുഫണ്ടിലേക്ക് വരേണ്ട വലിയൊരുതുകയാണ് നഷ്ടപ്പെടുന്നത്. ഇതിനെതിരേ സെക്രട്ടറിക്കും ഭരണസമിതിക്കും പലതവണ പരാതി നൽകിയിട്ടും നടപടിയുണ്ടാകുന്നില്ല. സാധാരണക്കാരെ ടാക്സ് ഇനത്തിൽ ദ്രോഹിക്കുന്ന ഭരണസമിതിയും ഉദ്യോഗസ്ഥരും സമ്പന്നരായ വ്യക്തികളുടെ ടാക്സ്‌ വെട്ടിപ്പിന് കൂട്ടുനിൽക്കുകയാണെന്നും എം. വീരചന്ദ്രൻ എരുമപ്പെട്ടി പ്രസ് ക്ലബിൽനടത്തിയ വാർത്താസമ്മേളനത്തിൽ ആരോപിച്ചു. പഞ്ചായത്തിലെ അങ്കണവാടി ജീവനക്കാരുടെ നിയമനത്തിലും ക്രമക്കേട് നടത്തിയിട്ടുണ്ട്. വർഷങ്ങളായി താത്കാലിക ജീവനക്കാരായി തുടരുന്നവരെ തഴഞ്ഞ് ഇടതുപക്ഷ അനുഭാവികളെയാണ് തെരഞ്ഞെടുത്തത്. സെലക്ഷൻ കമ്മിറ്റിയിൽ സാമൂഹികപ്രവർത്തകരെന്നപേരിൽ ഉൾപ്പെടുത്തിയ അഞ്ചുപേരും എൽഡിഎഫ് നേതാക്കളാണ്. ജനപ്രതിനിധികളെ കമ്മറ്റിയിൽ ഉൾപ്പെടുത്തിയിട്ടില്ല. പാവപ്പെട്ടവരെ ഒഴിവാക്കി, മാനദണ്ഡങ്ങൾപാലിക്കാതെ പാർട്ടി അനുഭാവികളെ ഉൾപ്പെടുത്തിയ നടപടി പ്രതിഷേധാർഹമാണെന്നും സാധാരണക്കാർക്ക് നീതികിട്ടാത്ത ഇടമായി വരവൂർ പഞ്ചായത്ത് മാറിയെന്നും എം. വീരചന്ദ്രൻ കൂട്ടിച്ചേർത്തു.

അമല ഗ്യാസ്ട്രോ സെന്‍റർ ഉദ്ഘാടനം ചെയ്തു

തൃശൂർ: പട്ടിക്കാട് ചെന്പൂത്ര പി.എം. ആർക്കേഡിൽ ആരംഭിച്ച അമല ഗ്യാസ്ട്രോ സെന്‍ററിന്‍റെ ഉദ്ഘാടനം മന്ത്രി കെ. രാജൻ നിർവഹിച്ചു. ബിഷപ് മാർ ജേക്കബ് മനത്തോടത്ത്, വികാർ പ്രൊവിൻഷ്യൽ ഫാ. ഡേവി കാവുങ്കൽ, തൃശൂർ തഹസിൽദാർ ടി. ജയശ്രീ, പാണഞ്ചേരി പഞ്ചായത്ത് പ്രസിഡന്‍റ് പി.പി. രവീന്ദ്രൻ, വൈസ് പ്രസിഡന്‍റ് സാവിത്രി, അമല ഡയറക്ടർ ഫാ. ജൂലിയസ് അറയ്ക്കൽ, ജോയിന്‍റ് ഡയറക്ടർ ഫാ. ഡെൽജോ പുത്തൂർ, പ്രിൻസിപ്പൽ ഡോ. ബെറ്റ്സി തോമസ്, ഗ്യാസ്ട്രോ മേധാവി ഡോ. സോജൻ ജോർജ്, ഡോ. റോബർട്ട് പനയ്ക്കൽ എന്നിവർ പ്രസംഗിച്ചു.

അഭിനവിന്‍റെ വീടുനിർമാണം ആരംഭിച്ചു

പുന്നംപറമ്പ്: തെരുവുവിളക്കിന്‍റെ വെളിച്ചത്തിലിരുന്ന് പഠിച്ചും തൊഴുത്തിൽ കിടന്നുറങ്ങിയും ദുരിതങ്ങളെനേരിട്ട് എസ്എസ്എൽസി പരീക്ഷയിൽ എല്ലാ വിഷയത്തിലും എ പ്ലസ് നേടിയ തെക്കുംകര മലാക്ക ദുബായ് റോഡിൽ താമസിക്കുന്ന അഭിനവിന് തെക്കുംകര മണ്ഡലം കോൺഗ്രസ് കമ്മിറ്റി നൽകുന്ന ഭവനത്തിന്‍റെ നിർമാണ ഉദ്ഘാടനം ജോസ് വള്ളൂർ നിർവഹിച്ചു. തെക്കുംകര മണ്ഡലം കോൺഗ്രസ് കമ്മിറ്റി പ്രസിഡന്‍റ് ജയ്സൺ മാത്യു അധ്യക്ഷതവഹിച്ചു. ബ്ലോക്ക് പ്രസിഡന്‍റ് പി.ജി. ജയദീപ്, മുഖ്യപ്രഭാഷണംനടത്തി. നേതാക്കളായ എൻ.ആർ. സതീശൻ, എസ്.എ.എ. ആസാദ്, കെ.ടി. ജോയ്, സി. പ്രമോദ്, വി.ജി. സുരേഷ്കുമാർ തുടങ്ങിയവർ പങ്കെടുത്തു.

ജയപാലൻ മാഷിന്‍റെ കുടുംബത്തിന് സഹായം

ചാവക്കാട്: അകക്കണ്ണുകൊണ്ട് വിദ്യപകർന്ന് അകാലത്തിൽ വിടപറഞ്ഞ കോമേഴ്സൽ കോളജിലെ പ്രിൻസിപ്പൽ കെ.എം. ജയപാലൻ മാഷിനെ ഓൾ കേരള ട്യൂട്ടോറിയൽ മാനേജ്മെന്‍റ് അസോസിയേഷൻ സംസ്ഥാനസമിതിയുടെ നേതൃത്വത്തിൽ അനുസ്മരിച്ചു. അനുസ്മരണചടങ്ങിൽ രണ്ടുലക്ഷംരൂപയുടെ കുടുംബസഹായഫണ്ട്‌ നഗരസഭ ചെയർപേഴ്സൺ ഷീജ പ്രശാന്ത്, മാഷിന്‍റെ മകൻ ശ്രാവൺ ജ്യോതിസിന് കൈമാറി. സംസ്ഥാന പ്രസിഡന്‍റ് പ്രമോദ് പ്രഭാകർ അധ്യക്ഷനായിരുന്നു. സംസ്ഥാന ജനറൽസെക്രട്ടറി അരുൺകുമാർ കാട്ടാക്കട, സംസ്ഥാന ട്രഷറർ ഷിബു ചിറയിൽ, വൈസ് പ്രസിഡന്‍റ് ഷാജി വീനസ്, കൗൺസിലർ കെ.വി. ഷാനവാസ്‌ എന്നിവർ പ്രസംഗിച്ചു.

രണ്ടാമത് വിയാനി പദയാത്ര നടത്തി

പുത്തൂർ: വൈദികരുടെ മധ്യസ്ഥനായ വിശുദ്ധ ജോൺ മരിയ വിയാനിയുടെ തിരുനാളിനോടനുബന്ധിച്ച് പുത്തൂർ ഫൊറോന കൗൺസിലിന്‍റെ നേതൃത്വത്തിൽ പുത്തൂർ സെന്‍റ് തോമസ് ഫൊറോന പള്ളിയിൽനിന്നു മാന്ദാമംഗലം പള്ളിയിലേക്കുനടന്ന പദയാത്രയിൽ ആയിരങ്ങൾ അണിനിരന്നു. തൃശൂർ അതിരൂപത പാസ്റ്റൽ കൗൺസിൽ സെക്രട്ടറി ജോഷി വടക്കൻ പതാക ഉയർത്തി. ആർച്ച് ബിഷപ് മാർ ആൻഡ്രൂസ് താഴത്ത് പുത്തൂർ സെന്‍റ് തോമസ് ഫൊറോന പള്ളി നടത്തുകൈക്കാരൻ സന്തോഷ് ആട്ടോക്കാരന് പേപ്പൽപതാക കൈമാറി പദയാത്ര ഉദ്ഘാടനം ചെയ്തു. ഫൊറോന വികാരി ഫാ. ജോജു പനയ്ക്കൽ അധ്യക്ഷതവഹിച്ചു. ഫാ. നവീൻ മുരിങ്ങത്തേരി, ഫാ. ജോൺസൻ ചിറ്റിലപ്പിളളി, ഫാ. ബെന്നി കിടങ്ങൻ, ഫാ. ജോൺ പോൾ ചെമ്മണ്ണൂർ, ഫാ. ജിമ്മി കല്ലിങ്കൽ കൂടിയിൽ, ഫാ. ബൈജു കാഞ്ഞിരത്തിങ്കൽ, ഫാ. ജോസഫ് വൈക്കാടൻ, ഫാ. ജോൺ പാവർട്ടിക്കാരൻ, ഫാ. പ്രിൻസ് നായങ്കര, പദയാത്ര കൺവീനർ ഡേവിസ് കണ്ണൂക്കാടൻ തുടങ്ങിയവർ പദയാത്രയ്ക്ക് നേതൃത്വംനൽകി. പുത്തൂർ, കൊഴുക്കുള്ളി, ഇരവിമംഗലം, വലക്കാവ്, തൃക്കൂർ, പൊന്നൂക്കര, ഭരത, വെട്ടുകാട്, ചേരുംകുഴി, മാന്നാമംഗലം, മരോട്ടിച്ചാൽ ഇടവകയിലെ വിശ്വാസികൾ പദയാത്രയിൽ അണിനിരന്നു. സമാപനസമ്മേളനം മാർ ടോണി നീലങ്കാവിൽ ഉദ്ഘാടനംചെയ്തു. തിരുനാളിനോടനുബന്ധിച്ച് മാന്ദാമംഗലം പള്ളിയിൽ ഊട്ടുസദ്യയും ഉണ്ടായിരുന്നു.

കാണാതായ സൈനികൻ തിരിച്ചെത്തി

ഗുരുവായൂർ: യുപിയിലെ ബറേലിയിലേക്ക് പരിശീലനത്തിനുപോയി കാണാതായ ഗുരുവായൂർ സ്വദേശിയായ സൈനികൻ തിരിച്ചെത്തി. താമരയൂർ കൊങ്ങണംവീട്ടിൽ ഫർസീൻ ഗഫൂറാണ്(28) തിരിച്ചെത്തിയത്. ഇയാള്‌ ശനിയാഴ്ച രാത്രി വീട്ടിലെത്തി. തുടര്‌ന്ന് മുതുവട്ടൂരിലെ സ്വകാര്യാശുപത്രിയിൽ ചികിത്സതേടി. ഫർസീൻ തിരിച്ചെത്തിയ വിവരം ഗുരുവായൂർ പോലീസ് യുപി പോലീസിനെ അറിയിച്ചു. ജൂലെെ 10ന് ബാന്ദ്ര റെയിൽവെ സ്റ്റേഷനിൽനിന്ന് റാംനഗർ സൂപ്പർ ഫാസ്റ്റ് എക്സ്പ്രസിൽ യാത്രപോയ ഫർസിൻ രാത്രി പത്തരവരെ ഭാര്യയുമായി ഫോണിൽ സംസാരിച്ചിരുന്നു. പിന്നീട് ഫോണിൽ കിട്ടിയില്ല. പരിശീലനസ്ഥലത്തും എത്തിയിട്ടില്ലന്നറിഞ്ഞതോടെ ബന്ധുക്കൾ ബറേലിയിലെത്തി പോലീസിൽ പരാതിനൽകി അന്വേഷണംനടത്തിവരികയായിരുന്നു. സെെനിക തലത്തിലും അന്വേഷണം നടക്കുകയായിരുന്നു. ഭാര്യ സെറീന ഹൈക്കോടതിയില്‍ ഹേബിയസ് കോര്‍പ്പസ് ഹര്‍ജിയും നല്‍കി. ആര്‍മി പൂനെ റെജിമെന്‍റില്‍ ആംഡ് ഫോഴ്സസ് മെഡിക്കല്‍ കോളജില്‍ ഫാര്‍മസിസ്റ്റാണ് ഫർസിൻ.

സമയത്തെച്ചൊല്ലി തർക്കം; ബസുകൾ കോടതിക്ക് കൈമാറി

വരന്തരപ്പിള്ളി: സമയക്രമത്തെ ചൊല്ലിയുള്ള തർക്കത്തിൽ ബസിൽകയറി കണ്ടക്ടറെ ആക്രമിച്ച കേസിൽ ഉൾപ്പെട്ട ബസുകൾ കോടതിക്ക് കൈമാറി. കേസിൽ മറ്റൊരു പ്രതിക്കുവേണ്ടി പോലീസ് അന്വേഷണം ഊർജിതമാക്കി. മത്സരയോട്ടം നടത്തിയതിനും മനുഷ്യജീവന് അപകടമുണ്ടാക്കുംവിധം ഓടിച്ചതിനുമാണ് ബസുകൾ കസ്റ്റഡിയിലെടുത്തത്. അക്രമത്തെ തുടർന്ന് വരന്തരപ്പിള്ളി പൗണ്ട് പ്രദേശത്ത് ഗതാഗതതടസവുമുണ്ടായിരുന്നു. ബുധനാഴ്ച രാവിലെയായിരുന്നു കേസിനാസ്പദമായ സംഭവം. കോടാലി - തൃശൂർ റൂട്ടിൽ ഓടുന്ന ക്രിസ്റ്റ ബസിലെ കണ്ടക്ടർ വരന്തരപ്പിള്ളി തെക്കുമുറി സ്വദേശി വൈദ്യക്കാരൻ വീട്ടിൽ ആന്‍റണിയെ തൃശൂർ- വരന്തരപ്പിള്ളി - ചിമ്മിനി റൂട്ടിൽ സർവീസ് നടത്തുന്ന യാസിൻ ബസിലെ ക്ലീനർ ചെങ്ങാലൂർ കൈതാരത്ത്‌വീട്ടിൽ സിബി ബസിൽകയറി ആക്രമിക്കുകയായിരുന്നു. ഇയാള്‌ നേരത്തേ അറസ്റ്റിലായി. ഇയാൾ വരന്തരപ്പിള്ളി സ്റ്റേഷൻ റൗഡി ലിസ്റ്റിൽപ്പെട്ടയാളാണ്. സിബിയോടൊപ്പം കാറിലെത്തിയ കണ്ടക്ടർ സുജിത്തും സംഭവത്തിൽ പങ്കാളിയായിരുന്നു. ഇയാളെ പോലീസ് തിരയുകയാണ്. ഇവരെ ഒളിവിൽകഴിയാൻ സഹായിച്ചയാളും ബസിൽ താൽക്കാലിക ഡ്രൈവറായി ജോലി ചെയ്യുന്നയാളാണ്. ഇയാളും നിരവധി ക്രിമിനൽകേസുകളിൽ പ്രതിയാണ്. സ്വകാര്യബസുകൾ പൊതുനിരത്തുകളിലൂടെ അപകടകരമായവിധത്തിൽ ഓടിക്കുന്നവർക്കെതിരെ ശക്തമായ നടപടിയെടുക്കുമെന്നും ക്രിമിനൽ പശ്ചാത്തലമുള്ളവരെ ജീവനക്കാരായി നിയോഗിക്കരുതെന്നും റൂറൽ പോലീസ് മേധാവി ബി. കൃഷ്ണകുമാർ അറിയിച്ചു.

ശതോത്തര സുവര്‍ണജൂബിലി ആഘോഷങ്ങൾ സമാപിച്ചു

വരന്തരപ്പിള്ളി: പള്ളിക്കുന്ന് അസംപ്ഷന്‍ പള്ളി സ്ഥാപിച്ചു 150 വര്‍ഷങ്ങള്‍ പൂര്‍ത്തിയായതിന്‍റെ ആഘോഷസമാപനംനടന്നു. സീറോ മലബാര്‌ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടിലിന്‍റെ കാര്‍മികത്വത്തിലുള്ള ദിവ്യബലിയോടെ ചടങ്ങുകള്‍ ആരംഭിച്ചു. ജൂബിലിയോടുനുബന്ധിച്ച് ഇടവകയിലെ നൂറ്റിയമ്പതോളംപേര്‍ പകര്‍ത്തിയെഴുതിയ ബൈബിള്‍ പുതിയനിയമത്തിന്‍റെ പകര്‍പ്പുകള്‍ ആശിര്‍വദിച്ച് അള്‍ത്താരയില്‍ സമർപ്പിച്ചു. ഇടവകജനങ്ങളുടെ എല്ലാവരുടെയും പങ്കാളിത്തത്തോടെ പകര്‍ത്തിയെഴുതിയ സമ്പൂര്‍ണ ബൈബിള്‍ കേന്ദ്രസമിതി കണ്‍വീനര്‍ ജോയ് ആറ്റുപുറം മേജര്‍ ആര്‍ച്ച്ബിഷപ്പിന് കൈമാറി. ഇടവകയില്‍ സേവനമനുഷ്ഠിച്ചിരുന്ന വൈദികര്‍, പുതുക്കാട് ഫൊറോനയിലെ വൈദികര്‍ തുടങ്ങിയവര്‍ സഹകാർമികരായിരുന്നു. ദിവ്യബലിക്കുശേഷംനടന്ന പൊതുസമ്മേളനം തൃശൂര്‍ അതിരൂപത ആര്‍ച്ച്ബിഷപ് മാര്‍ ആന്‍ഡ്രൂസ് താഴത്ത് ഉദ്ഘാടനംചെയ്തു. പുതുക്കാട് ഫൊറോന വികാരി ഫാ. പോള്‍ തേയ്ക്കാനത്ത് അധ്യക്ഷതവഹിച്ചു. ജില്ലാപഞ്ചായത്ത് പ്രസിഡന്‍റ് വി.എസ്. പ്രിന്‍സ് മുഖ്യാതിഥിയായി. തൃശൂര്‍ അതിരൂപത വികാരി ജനറാള്‍ മോണ്‍. ജെയ്‌സന്‍ കൂനംപ്ലാക്കല്‍, വരന്തരപ്പിള്ളി പഞ്ചായത്ത് പ്രസിഡന്‍റ് കലാപ്രിയ സുരേഷ് തുടങ്ങിയവര്‍ സംസാരിച്ചു. ശതോത്തരജൂബിലിയോടനുബന്ധിച്ച് നിര്‍മിച്ച നാല് കാരുണ്യഭവനങ്ങളുടെ താക്കോല്‍ദാനവും സ്മരണിക പ്രകാശനവും ചടങ്ങില്‍നടന്നു. വികാരി ഫാ. ജോര്‍ജ് എടക്കളത്തൂര്‍, അസിസ്റ്റന്‍റ് വികാരി ഫാ. ജാക്‌സന്‍ തെക്കേക്കര, ഡീക്കന്‍ റോണി പാണേങ്ങാടന്‍, മദര്‍ സുപ്പീരിയര്‍ സിസ്റ്റര്‍ ജെസ്മിന്‍ കുരിയന്‍, കൈക്കാരന്‍ ലിന്‍റോ കൊമ്പന്‍, ശതോത്തര കമ്മിറ്റി കണ്‍വീനര്‍ ഡേവിസ് തെക്കുംപുറം തുടങ്ങിയവര്‍ ജൂബിലി ആഘോഷങ്ങള്‍ക്ക് നേതൃത്വംനൽകി.

ഉന്നതവിദ്യാഭ്യാസം സാധാരണക്കാർക്ക് അപ്രാപ്യം: കെ.സി. വേണുഗോപാൽ

ചാലക്കുടി: ഉന്നത വിദ്യാഭ്യാസം സാധാരണക്കാർക്ക് ഇപ്പോഴും അപ്രാപ്യാമാണെന്ന് കെ.സി. വേ ണുഗോപാൽ എംപി. നിയോജക മണ്ഡലത്തിലെ സാമ്പത്തിക പ്രതിസന്ധി നേരിടുന്ന കുടുബങ്ങളിലെ വിദ്യാർഥികൾക്ക് സനീഷ്കുമാർ ജോസഫ് എം എൽഎ ഏർപ്പെടുത്തിയ ഉമ്മൻ ചാണ്ടി വിദ്യാഭ്യാസ സ്കോളർഷിപ്പ് വിതരണം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സാധാരണക്കാരായ വിദ്യാർഥികൾക്കുവേണ്ടിഎല്ലാ ജില്ലകളിലും മെഡിക്കൽ കോളജുകൾ' സ്ഥാപിച്ച ഒരു മുഖ്യമന്ത്രിയായിരുന്നു ഉമ്മൻ ചാണ്ടിയെന്നും അദേഹത്തിന്‍റെ ഒരു കാരുണ്യസ്പർശം ലഭിക്കാത്തവർ കുറവാണെ ന്നും അദ്ദേഹം തുടർന്നു പറഞ്ഞു. സനീഷ്കുമാർ ജോസഫ് എം എൽഎ അധ്യക്ഷത വഹിച്ചു. ബെന്നി ബെഹനാൻ എംപി മുഖ്യ പ്രഭാഷണം നടത്തി. ചാണ്ടി ഉമ്മൻ എംഎൽഎ, ബി ഷപ് മാർ പോളി കണ്ണൂക്കാടൻ, സ്വാമി ഉദിത് ചൈ തന്യ, ഇമാം ഹാജി ഹുസൈൻ ബാഗവി, നഗരസഭ ചെയർപേഴ് സൻ ഷിബു വാലപ്പൻ, ബ്ലോക്ക് പഞ്ചായത്ത് പ്രസിഡന്‍റ് വേണു കണ്ടരുമഠത്തിൽ, കോടശേരി പഞ്ചായത്ത് പ്രസിഡന്‍റ് കെ.പി. ജെയിംസ്, കൗൺസിലർ ബിന്ദു ശശികുമാർ, സേക്രഡ് ഹാർട്ട് കോളജ് പ്രിൻസിപ്പൽ റവ.ഡോ. സിസ്റ്റർ ഐറിൻ എന്നിവർ പ്രസംഗിച്ചു.

നീഡ്‌സിന്‍റെ വിദ്യാദീപം പദ്ധതി തുടങ്ങി

ഇരിങ്ങാലക്കുട: നീഡ്‌സ് വിദ്യാദീപം പദ്ധതി ഉദ്ഘാടനം പ്രസിഡന്‍റ്് തോമസ് ഉണ്ണിയാടന്‍ നിര്‍വഹിച്ചു. ഗുരുതര രോഗ ബാധിതരായ വിദ്യാര്‍ഥികള്‍ക്ക് തുടര്‍ച്ചയായി പഠന സഹായം നല്‍കുന്ന സാന്ത്വന പദ്ധതിയാണ് വിദ്യാദീപം. എല്ലാ മാസവും നിര്‍ധനരായ രോഗികള്‍ക്ക് സാമ്പത്തിക സഹായം നല്‍കുന്ന നീഡ്‌സിന്‍റെ കരുണയുംകരുതലും പദ്ധതിയുടെ ഭാഗമായി കൂടിയാണ് ഈ പദ്ധതി നടപ്പിലാക്കിയിട്ടുള്ളത്. വിദ്യാദീപം പദ്ധതിയിലൂടെ തെരഞ്ഞെടുക്കപ്പെട്ട കുടുംബങ്ങള്‍ക്ക് ആദ്യഘട്ട സാമ്പത്തിക സഹായം നല്‍കിക്കൊണ്ടാണു പദ്ധതിയുടെ ഉദ്ഘാടനം നടന്നത്. വൈസ് പ്രസിഡന്‍റ് പ്രഫ. ആര്‍. ജയറാം അധ്യക്ഷത വഹിച്ചു. നീഡ്‌സ് ഭാരവാഹികളായ ഗുലാം മുഹമ്മദ് മാസ്റ്റര്‍, ആശാലത ടീച്ചര്‍, എം.എന്‍. തമ്പാന്‍ മാസ്റ്റര്‍, മുഹമ്മദാലി കറുകത്തല, അഡ്വ. ബോസ്‌‌‌‌‌കുമാര്‍, ഷൗക്കത്ത്, പി.ആര്‍. സ്റ്റാന്‍ലി, പി.ടി. ജോര്‍ജ്, ഇ.പി. സഹദേവന്‍, ഷെയ്ക്ക് ദാവൂദ്, എന്‍.സി. വാസു, ഡോ. എന്‍.വി. കൃഷ്ണന്‍, ഉണ്ണികൃഷ്ണന്‍, തോമസ് കരുമാലിക്കല്‍, പി.കെ.ജോണ്‍സന്‍, റിനാസ് താണിക്കപ്പറന്പില്‍ എന്നിവര്‍ പ്രസംഗിച്ചു.

മലക്കപ്പാറ വീരാംകുടി ഉന്നതിയിൽ വീണ്ടും പുലിയെത്തി

മലക്കപ്പാറ: വന്യമൃഗശല്യംമൂലം ദുരിതമനുഭവിക്കുന്ന വീരാംകുടി ഉന്നതിയിലെ കുടുംബങ്ങളെ മാറ്റിപാർപ്പിക്കുന്നതിനുവേണ്ടി റവന്യൂ ഉദ്യോഗസ്ഥർ എത്തിയപ്പോൾ ഉന്നതിയിൽ പുലിയെത്തി. കഴിഞ്ഞ ദിവസം ഉന്നതിയിലെ നാലുവയസുകാരനെ പുലി തട്ടിക്കൊണ്ടുപോകാൻ ശ്രമിച്ച സംഭവത്തെ തുടർന്ന് ചാലക്കുടി തഹസിൽദാരും റവന്യു ഉദ്യോഗസ്ഥരും എത്തി ഇവരെ മാറ്റി താമസിപ്പിക്കാൻ ശ്രമിക്കുന്നതിനിടെയാണ് ഉന്നതിയിൽ പുലി എത്തിയത്. വനപാലകരെ വിവരം അറിയിക്കുകയും വാഴച്ചാലിൽനിന്നും വനപാലകരെത്തിയാണു പുലിയെ തുരത്തിയത്. വീരാം‌കുടി ഭാഗത്ത് കൂട് സ്ഥാപിച്ച് പുലിയെ പിടികൂടണമെന്ന് ഉന്നതിയിലെ കുടുബങ്ങൾ ആവശ്യപ്പെട്ടു. ഇവരെ മലക്കപ്പാറ കമ്യൂണിറ്റി ഹാളിലേക്കു മാറ്റിത്താമസിപ്പിക്കാനാണു തഹസിൽദാർ എത്തിയത്. രണ്ടു കുടുബങ്ങൾ മാത്രമാണു മാറിത്താമസിക്കാൻ തയാറായത്. മാരാ‌ങ്കോട് സർക്കാർ നൽകാമെന്ന് പറഞ്ഞ സ്ഥലം നല്കണമെന്നാണ് ഇവരുടെ ആവശ്യം. മാരാങ്കോട് സ്ഥലം നൽകുന്നതിനെ വനംവകുപ്പ് എതിർത്തതാണ് താസമായത്.

മറ്റത്തൂരില്‍ ഹരിതകര്‍മസേനയെ ആദരിച്ചു

കോടാലി: കേരള ശാസ്ത്ര സാഹിത്യപരിഷത്ത് കോടാലി യൂണിറ്റിന്‍റെ നേതൃത്വത്തില്‍ ഉണര്‍ത്തു ജാഥയും ആദരണയോഗവും സംഘടിപ്പിച്ചു. വലിച്ചെറിയുന്ന പ്ലാസ്റ്റിക് സാമഗ്രികളുടെ ഉപയോഗം കുറച്ചുകൊണ്ടുവരുന്നതിനു ജനങ്ങളില്‍ അവബോധം സൃഷ്ടിക്കാന്‍ ലക്ഷ്യമിട്ടുകൊണ്ടു സംഘടിപ്പിച്ച ഉണർത്തുജാഥ മൂന്നുമുറിയില്‍ നിന്നാരംഭിച്ച് കോടാലിയില്‍ സമാപിച്ചു. തുടര്‍ന്ന് കോടാലി ആല്‍ത്തറക്കല്‍ നടന്ന ആദരണയോഗം മറ്റത്തൂര്‍ പഞ്ചായത്ത് പ്രസിഡന്‍റ്് അശ്വതി വിബി ഉദ്ഘാടനം ചെയ്തു. ശാസ്ത്രസാഹിത്യ പരിഷത്ത് മേഖല സെക്രട്ടറി എ.ടി. ജോസ് അധ്യക്ഷത വഹിച്ചു. പ്ലാസ്റ്റിക് പാഴ്‌വസ്തു ശേഖരണത്തില്‍ അഭിമാനകരമായ നേട്ടം കൈവരിച്ച മറ്റത്തൂര്‍ ഗ്രാമപഞ്ചാ യത്ത് ഹരിതകര്‍മസേനയെ ഐആര്‍ടിസി റീജനല്‍ കോ-ഓഡിനേറ്റര്‍ വി.കെ. ജയ്‌സോമനാഥന്‍ ആദരിച്ചു. ഹരിത‌കര്‍മസേന സെക്രട്ടറി നിബി സുധീഷിന്‍റെ നേതൃത്വത്തിലുള്ള വോളന്‍റിയര്‍മാര്‍ ആദരം ഏറ്റുവാങ്ങി. ഹരിത‌കര്‍മസേനയുടെ നേട്ടങ്ങള്‍ സംക്ഷിപ്തമായി അവതരിപ്പിക്കുന്ന പ്രചാരണനോട്ടീസിന്‍റെ പ്രകാശനം വെള്ളിക്കുളങ്ങര സര്‍വീസ് സഹകരണ‌സംഘം പ്രസിഡന്‍റ് ഐ.ആര്‍. ബാല‌കൃഷ്ണ ന്‍ നിര്‍വഹിച്ചു. പഞ്ചായത്ത് ആരോഗ്യ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ ഷൈബി സജി, കെ.കെ. അനീഷ്‌കുമാര്‍, ആനപ്പാന്തം കാടര്‍ പഠന‌സംഘം കണ്‍വീനര്‍ ജോയ് കാവുങ്ങല്‍, കവി പ്രകാശന്‍ ഇഞ്ചക്കുണ്ട് , ടി.എ. വേലായുധന്‍, കെ.കെ. സോജ, ടി.എം. ശിഖാമണി, ടി.ഡി. സഹജന്‍ എന്നി വര്‍ പ്രസംഗിച്ചു.

കോഴിക്കുളങ്ങരപൂജ ഭക്തിസാന്ദ്രമായി

കൊടുങ്ങല്ലൂർ: കുരുംബ ഭഗവതി ക്ഷേത്രത്തിൽനിന്നും കോഴിക്കുളങ്ങര ക്ഷേത്രത്തിലെത്തി നൂറ്റാണ്ടുകളായി നടന്നുവരുന്ന കോഴിക്കുളങ്ങര പൂജ ഭക്തിപൂർവം നട ന്നു. കർക്കടക മാസത്തിലെ മൂന്നാമത്തെ ഞായറാഴ്ചയായ ഇന്നലെ ഉച്ചപ്പൂജ പതിവിലും നേരത്തെ പൂർത്തിയാക്കി 11ന് നട അടച്ച് കാവിൽക്കടവിൽനിന്നും പരമ്പരാഗത വള്ളത്തിൽ കനോലിക്കനാൽവഴി കരൂപ്പടന്ന പുഴയിലൂടെ കോഴിക്കുളങ്ങരയിലെത്തി. പുഴക്കടവിൽനിന്നു കോഴിക്കുളങ്ങര ക്ഷേത്രത്തിലെ വിശ്വാസികൾ താലമേന്തി ക്ഷേത്രത്തിലേക്കു സ്വീകരിച്ചു. തുടർന്നാണു വിശേഷാൽ പൂജ നടത്തിയത്. ഭഗവതിക്ക് അഭിഷേകം, മലർ നിവേദ്യം എന്നിവയ്ക്കുശേഷം ശർക്കര പന്തീരുനാഴി, വെള്ള പന്തീരുനാഴി, തണ്ണീരാമൃതം എന്നിവ കോഴിക്കുളങ്ങര ഭഗവതിക്കു നിവേദിച്ചു. കൊച്ചിൻ ദേവസ്വം ബോർഡ് കമ്മീഷണർ എസ്.ആർ. ഉദയകുമാർ, സെക്രട്ടറി പി. ബിന്ദു, ഡെപ്യൂട്ടി കമ്മീഷണർ സുനിൽകർത്ത, അസി. കമ്മീഷണർ എം. ആർ. മിനി, ദേവസ്വം മാനേജർ കെ. വിനോദ്, സത്യധർമൻ അടികൾ എന്നിവർ നേതൃത്വം നൽകി. പാച്ചാംമ്പിള്ളി നമ്പൂതിരിയുടെ നേതൃത്തിലാണു പൂജകൾ നടന്നത്.

രാജ്യം ഭരിക്കുന്നത് തെരഞ്ഞെടുപ്പ് വിജയിക്കാൻ എന്തുംചെയ്യുന്നവർ: കെ.സി. വേണുഗോപാൽ

തൃശൂർ: രാജ്യം ഭരിക്കുന്നത് തെരഞ്ഞെടുപ്പുകൾ വിജയിക്കാൻ എന്തും ചെയ്യുന്നവരെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ. 2024 ലോക്സഭാ തെരഞ്ഞെടുപ്പിലെ ഞെട്ടിക്കുന്ന കണക്കുകൾ വരുംദിവസങ്ങളിൽ കോണ്‍ഗ്രസ് പുറത്തുവിടും. തൃശൂർ ജില്ലാ കോണ്‍ഗ്രസ് കമ്മിറ്റി സംഘടിപ്പിച്ച ലീഡേഴ്സ് മീറ്റും വാർഡ് പ്രസിഡന്‍റുമാരുടെ തിരിച്ചറിയൽ കാർഡ് വിതരണവും തൃശൂർ ഇൻഡോർ സ്റ്റേഡിയത്തിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. തൃശൂരിലെ കോണ്‍ഗ്രസ് പ്രവർത്തകരല്ല കുഴപ്പക്കാർ. സ്റ്റേജിലുള്ള ഞാനുൾപ്പെടെയുള്ള നേതാക്കളാണു പ്രശ്നം. പാർട്ടികാര്യങ്ങൾ എതിരാളികൾക്കു ചർച്ച ചെയ്യാനുള്ള അവസരമാക്കിമാറ്റരുത്. പാർട്ടി ഫോറങ്ങളിൽ ചർച്ച ചെയ്യാനുള്ള അവസരം ഡിസിസി പ്രസിഡന്‍റ് ഒരുക്കണം. ഇവിടെ വിമർശിക്കാതെ മാധ്യങ്ങൾക്കുമുന്നിൽ അലക്കാൻ പോകുന്ന നേതാക്കൻമാരെ കോണ്‍ഗ്രസ് പാർട്ടിക്കു വേണ്ട. തെരഞ്ഞെടുപ്പ് അട്ടിമറിക്കുന്നതിൽ ബിജെപിയുടെ നേരവകാശികളായ സിപിഎം കേരളത്തിലെ വോട്ടർപട്ടികയിൽ പല കള്ളത്തരങ്ങളും നടത്തുന്നു. ദേശീയതലത്തിൽ വോട്ടർപട്ടികയിലെ തട്ടിപ്പുകൾക്കെതിരേ കോണ്‍ഗ്രസ് നടത്തുന്ന സമരത്തെ സിപിഎം പിന്തുണയ്ക്കുന്പോഴാണ് ഇതു ചെയ്യുന്നത് എന്നതാണു കഷ്ടം. ഇരകൾക്കൊപ്പം ഓടുകയും വേട്ടപ്പട്ടിക്കൊപ്പം നിൽക്കുകയും ചെയ്യുന്ന നിലപാടാണ് ബിജെപിയുടേത്. ഏറ്റവും ഒടുവിലത്തെ ഉദാഹരണമാണ് ഛത്തീസ്ഗഡിൽ കണ്ടത്. കന്യാസ്ത്രീകളുടെ അറസ്റ്റ് സംബന്ധിച്ച കേസ് എൻഐഎക്ക് നൽകിയതിന്‍റെ കാരണമറിയുന്നത് അമിത്ഷായ്ക്കു മാത്രമാണ്. തങ്ങൾ ഇടപെട്ടാണു കന്യാസ്ത്രീകൾക്കു മോചനം ഒരുക്കിയതെന്ന ബിജെപി വാദത്തിന്‍റെ യുക്തിയും അദ്ദേഹത്തിനു മാത്രമേ അറിയൂ. ഇരട്ടത്താപ്പുകൾക്കെതിരേ അന്തിമപോരാട്ടം നടത്തേണ്ട സമയമാണെന്നും വേണുഗോപാൽ പറഞ്ഞു. ഡിസിസി പ്രസിഡന്‍റ് അഡ്വ. ജോസഫ് ടാജറ്റ്, നേതാക്കളായ എ.പി. അനിൽകുമാർ, പി.സി. വിഷ്ണുനാഥ്, ഷാഫി പറന്പിൽ, ടി. സിദ്ദിഖ്, റോജി എം. ജോണ്‍, തേറന്പിൽ രാമകൃഷ്ണൻ, ടി.എൻ പ്രതാപൻ, ടി.യു. രാധാകൃഷ്ണൻ, ഒ. അബ്ദുറഹ്മാൻകുട്ടി, എം.പി. വിൻസെന്‍റ്, ജോസ് വള്ളൂർ, അനിൽ അക്കര, ടി.വി ചന്ദ്രമോഹൻ, രമ്യ ഹരിദാസ്, കെ.കെ. കൊച്ചുമുഹമ്മദ്, എം.പി. ജാക്സണ്‍, ജോസഫ് ചാലിശേരി, കെ.കെ. ബാബു, അഡ്വ. വി. സുരേഷ് കുമാർ എന്നിവർ പ്രസംഗിച്ചു.

കാറിടിച്ച് കൊലപ്പെടുത്താൻ ശ്രമം; പ്രതി അറസ്റ്റിൽ

ചാലക്കുടി: റോഡിലൂടെ നടന്നുപോകുകയായിരുന്നയാളെ കാറിടിച്ച് കൊലപ്പെടുത്താൻ ശ്രമിച്ച പ്രതി അറസ്റ്റിൽ. ചൗക്ക കാഞ്ഞിരപ്പള്ളിക്കാരൻ ഫാസിലി(44) നെയാണ് പോലീസ് അറസ്റ്റ് ചെയ്തത്. ശനിയാഴ്ചയായിരുന്നു സംഭവം. രാവിലെ ചൗക്ക കെന്‍റ്സ് ഗാർഡൻ റോഡിലൂടെ നടന്നു പോവുകയായിരുന്ന കാഞ്ഞിരപ്പറമ്പിൽ വീട്ടിൽ ഷിയാസി(50 ) നെ ഇന്നോവ കാറിടിപ്പിച്ച് കൊലപ്പെടുത്താൻ ശ്രമിക്കുകയായിരുന്നു. സംഭവത്തിന് ഉപയോഗിച്ച ഇന്നോവ കാർ പിടിച്ചെടുത്ത് കോടതിയിൽ ഹാജരാക്കി. പ്രതിയെ കോടതി റിമാന്‍റ് ചെയ്തു. കുടുംബവഴക്കിനെ തുടർന്നുള്ള വൈരാഗ്യത്തിലാണ് വാഹനമിടിച്ച് കൊലപ്പെടുത്താൻ ശ്രമിച്ചതെന്ന് പറയുന്നു. സംഭവത്തിൽ ഗുരുതര പരിക്കേറ്റ ഷിയാസ് ചാലക്കുടിയിലെ സ്വകാര്യ ആശുപത്രിയിൽ ചികിത്സയിലാണ്. ഫാസിലും ഷിയാസും അയവാസികളാണ്. ചാലക്കുടി പോലീസ് സ്റ്റേഷൻ ഇൻസ്പെക്ടർ അമൃത രംഗൻ, ചാലക്കുടി പോലീസ് സ്റ്റേഷൻ എസ്ഐ മാരായ ഋഷിപ്രസാദ്, കൃഷ്ണൻ, സിപിഒമാരായ പ്രദീപ്, സജിത്ത് എന്നിവരാണ് അന്വേഷണ സംഘത്തിലുണ്ടായിരുന്നത്.

സെന്‍റ് അലോഷ്യസ് കോളജിൽ ഏകദിന ശില്പശാല നടത്തി

എൽത്തുരുത്ത്: സെന്‍റ് അലോഷ്യസ് കോളജിലെ ബോട്ടണി ആൻഡ് കംപ്യൂട്ടേഷണൽ ബയോളജി വിഭാഗത്തിന്‍റെ കണ്‍സൾട്ടൻസി സെല്ലിന്‍റെ നേതൃത്വത്തിൽ മോളിക്ക്യുലാർ ഡോക്കിംഗ് എന്ന വിഷയത്തിൽ ഏകദിന ശാസ്ത്രീയ ശില്പശാല നടത്തി. കാർഷിക സർവകലാശാലയിലെ പ്ലാന്‍റ് ബയോടെക്നോളജി ആൻഡ് മോളിക്യുലാർ ബയോളജി സെന്‍ററിലെ തലവനും പ്രഫസറുമായ ഡോ. ദീപു മാത്യു ശില്പശാല ഉദ്ഘാടനം ചെയ്തു. കോളജ് പ്രിൻസിപ്പൽ ഡോ. ഇ.ഡി. ഡയസ്, മാനേജർ ഫാ. തോമസ് ചക്രമാക്കിൽ, ബോട്ടണി ആൻഡ് കംപ്യൂട്ടേഷണൽ ബയോളജിവിഭാഗം മേധാവി ഡോ. മനു ഫിലിപ്പ്, സുവോളജിവിഭാഗം മേധാവി ജെയിൻ തേറാട്ടിൽ, അഡ്മിനിസ്ട്രേറ്റർ ഫാ. അരുണ്‍ ജോസ്, ലൈബ്രേറിയൻ വിനീത ഡേവിസ്, പ്രോഗ്രാം കോ-ഓർഡിനേറ്റർ ഡോ. എസ്.ഐ. അരുണ എന്നിവർ പ്രസംഗിച്ചു. കംപ്യൂട്ടേഷണൽ ബയോളജി അധ്യാപകരായ ഡോ. എസ്.ഐ. അരുണ, ഡോ. ഷൗമി, പവിത്ര എന്നിവർ ക്ലാസുകൾക്കു നേതൃത്വം നൽകി. 11 കോളജുകളിൽനിന്ന് അന്പതോളംപേർ പങ്കെടുത്തു.

തഹസിൽദാരുടെ വാഹനത്തെ കാട്ടാന ആക്രമിച്ചു

അതിരപ്പിള്ളി: തഹസിൽദാരുടെ വാഹനത്തെ കാട്ടാന ആക്രമിച്ചു . മലക്കപ്പാറയിൽ വീരാൻകുടി ഉന്നതിയിൽ പുലി പിടിച്ചുകൊണ്ടുപോകാൻ ശ്രമിച്ച രാഹുൽ എന്ന കുട്ടിയുടെ കുടുംബം ഉൾപ്പെടെ ഏഴു കുടുംബങ്ങളെ അടിയന്തിരമായി പുനരധിവസിപ്പിക്കുന്നതുമായി ബന്ധപ്പെട്ട് ഇന്നലെ മലക്കപ്പാറയിൽ പോയി മടങ്ങി വരുമ്പോഴാണ് ചാലക്കുടി തഹസിൽദാർ കെ.എ. ജേക്കബും റവന്യു ഉദ്യോഗസ്ഥരും സഞ്ചരിച്ച വാഹനത്തിനു നേരെ കാട്ടാന ആക്രമിച്ചത്. രാത്രി 11 നാണ് തഹസിൽദാരുടെ വാഹനത്തെ കാട്ടാന ആക്രമിച്ചത്. വാഹനം പിന്നിൽനിന്ന് എടുത്ത് ഉയർത്താൻ ശ്രമിക്കുകയും ശരീരം കൊണ്ട് തള്ളാൻ ശ്രമിക്കുകയും ചെയ്ത ശേഷം കാട്ടാന ഓടി മറഞ്ഞു. കുടുംബങ്ങളുടെ പുനരധിവാസം സംബന്ധിച്ച് നടപടികൾക്കായി മലക്കപ്പാറയിൽ പോയ തഹസിൽദാർ അടങ്ങുന്ന ഉദ്യോഗസ്ഥർ പരിശോധനകൾ നടത്തിക്കൊണ്ടിരിക്കുമ്പോൾതന്നെ പ്രദേശത്ത് പുലിയുടെ സാന്നിധ്യം ഉണ്ടായതും ആശങ്ക പടർത്തി.

കൈനിറയെ പദ്ധതികൾ

സ്വന്തം ലേഖകൻ തൃശൂർ: യാത്രാസൗകര്യങ്ങൾ മുതൽ മാലിന്യനിർമാർജനം വരെ തൃശൂർ ജില്ലയുടെ ആധുനീകരണത്തിനുള്ള മുറവിളികൾക്കു വർഷങ്ങളുടെ പഴക്കമുണ്ട്. കെഎസ്ആർടിസി സ്റ്റാൻഡ് വികസനം, പടിഞ്ഞാറേകോട്ട വികസനം, പുത്തൂർ സുവോളജിക്കൽ പാർക്ക്, തേക്കിൻകാട് മൈതാനത്തിന്‍റെ വികസനം, കെ എസ്ആർടിസി- റെയിൽവേ ഓവർബ്രിഡ്ജ്, വിവിധ മേൽപ്പാലങ്ങൾ എന്നിങ്ങനെ ബജറ്റിൽ പ്രഖ്യാപിച്ച പദ്ധതികൾ നടപ്പായിട്ടില്ല. എംജി റോഡ് വികസനത്തിന്‍റെ രണ്ടാംഘട്ടത്തിനെന്ന പേരിൽ 15 കോടിയും ബജറ്റിൽ വകയിരുത്തിയെങ്കിലും എങ്ങുമെത്തിയില്ല. റോഡിന്‍റെ ശോചനീയാവസ്ഥയിൽ നിരവധി ജീവനുകൾ പൊലിഞ്ഞതു മിച്ചം. മാലിന്യപ്രശ്നത്തിനു പരിഹാരമായി കുരിയച്ചിറയിൽ മാലിന്യ പ്ലാന്‍റ് സ്ഥാപിച്ച് മന്ത്രിയെ വിളിച്ച് ഉദ്ഘാടനം ചെയ്തെങ്കിലും പ്രവർത്തനക്ഷമമായിട്ടില്ല. അതേസമയം, വൃത്തിയുടെ കാര്യത്തിൽ തൃശൂരിനു നേട്ടമുണ്ടാക്കാൻ കഴിഞ്ഞിട്ടുണ്ട്. ഇപ്പോൾ സംസ്ഥാന- കോർപറേഷൻ ബജറ്റ് പ്രഖ്യാപനത്തിനു പുറമേ, നവകേരളസദസിൽ 91 കോടിയുടെ പദ്ധതികൾക്കുകൂടി അംഗീകാരം നൽകിയത് പ്രതീക്ഷയോടെ നോക്കിക്കാണുന്നത്. കെ എസ്ആർടിസി സ്റ്റാൻഡ് 48 ദിവസത്തിനകം പൊളിച്ചുമാറ്റാനും പുതിയതിന്‍റെ പ്രവൃത്തികൾ ആരംഭിക്കുമെന്നതും നല്ല തുടക്കമായി വിലയിരുത്താം. ഗതികേട് മാറുന്നു ; സ്റ്റാൻഡ് ‘പൊളി’ക്കും തൃശൂർ: പുതിയ കെ എസ്ആർടിസി സ്റ്റാൻഡ് നിർമിക്കാൻ 28 ലക്ഷത്തിന്‍റെ ടെൻഡർ. പട്ടാന്പിയിലെ പി.കെ. എന്‍റർപ്രൈസസ് ആണു ടെൻഡർ ഏറ്റെടുത്തത്. 45 ദിവസത്തിനകം സ്റ്റാൻഡ് പൊളിക്കും. ഇക്കണ്ടവാരിയർ റോഡിലെ മൈതാനം ഏറ്റെടുത്ത് താത്കാലിക സ്റ്റാൻഡ് ക്രമീകരിക്കാൻ മന്ത്രിമാരായ കെ.ബി. ഗണേഷ് കുമാർ, കെ. രാജൻ, പി. ബാലചന്ദ്രൻ എംഎൽഎ, മേയർ എം.കെ. വർഗീസ്, കെ എസ്ആർടിസി സിഎംഡി പ്രമോജ് ശങ്കർ എന്നിവരുടെ യോഗത്തിൽ തീരുമാനമായി. സ്റ്റാൻഡ് നവീകരണത്തിന്‍റെ ഭാഗമായി റെയിൽവേ സ്റ്റേഷനുമായി ബന്ധിപ്പിക്കുന്ന ആകാശപ്പാതയുടെ നിർമാണം ഏറ്റെടുക്കാമെന്നു മേയർ എം.കെ. വർഗീസ് അറിയിച്ചു. എംഎൽഎയുടെ നവകേരള ഫണ്ടിൽനിന്ന് ഏഴുകോടിയും ആസ്തിവികസനഫണ്ടിൽനിന്ന് രണ്ടരക്കോടിയും ഉപയോഗിച്ചാണു സ്റ്റാൻഡ് നിർമാണം.

വീണ്ടും വികസനപ്രതീക്ഷ; നവകേരള സദസിലൂടെ 91 കോടിയുടെ പദ്ധതികൾ

തൃശൂർ: ജില്ലയുടെ സമഗ്രവികസനം ലക്ഷ്യമിട്ട് നവകേരളസദസിൽ സമർപ്പിച്ച പദ്ധതികളിൽ 91 കോടി രൂപയുടെ വികസനപദ്ധതികൾക്ക് അംഗീകാരം. നവകേരള സദസിൽ ഉയർന്നുവന്ന പദ്ധതികളുടെ അന്തിമപട്ടിക ഭേദഗതികളോടെ സർക്കാർ അംഗീകരിച്ച് ഉത്തരവിറക്കിയിരുന്നു. തദേശസ്വയംഭരണം, ഗതാഗതം, ആരോഗ്യം, പൊതുമരാമത്ത്, വനംവന്യജീവി, സാംസ്കാരികം, റവന്യൂ തുടങ്ങിയ വകുപ്പുകൾക്കു കീഴിൽ വരുന്ന നിരവധി പദ്ധതികളാണ് ഇതിൽ ഉൾപ്പെടുന്നത്. 4 തോന്നൂർക്കര- തോട്ടയ്ക്കാട് റോഡ് പുനരുദ്ധാരണം: 3.50 കോടി രൂപ. 4 ദേശമംഗലം പഞ്ചായത്തിലെ തൃക്കേക്കുളം നവീകരണം 3.50 കോടി രൂപ. 4കടങ്ങോട് ഗ്രാമപഞ്ചായത്ത് വെള്ളറക്കാട് പള്ളിമേപ്പുറം തിപ്പിലശേരി റോഡ് ആധുനികവത്കരണം: 4.50 കോടി രൂപ. 4 വേലൂർ ഗ്രാമപഞ്ചായത്ത് എരുമപ്പെട്ടി -പഴവൂർ റോഡ് ആധുനികവത്കരണം: 2.50 കോടി രൂപ. 4 ചാവക്കാട് നഗരസഭ മുൻസിപ്പൽ ടൗണ്‍ ഹാൾ നിർമാണം: ഏഴുകോടി രൂപ വകയിരുത്തി. 4 മുല്ലശേരി ഗ്രാമപഞ്ചായത്ത് ഓഫീസ് കോന്പൗണ്ടിൽ മിനി സിവിൽ സ്റ്റേഷൻ നിർമാണം: നാല് കോടി രൂപ. 4എളവള്ളി ഗവണ്‍മെന്‍റ് ഹയർ സെക്കൻഡറി സ്കൂൾ പുതിയ കെട്ടിടത്തിനു മുകളിൽ രണ്ട് നിലകളുടെ നിർമാണം: മൂന്നു കോടി രൂപ. 4വടക്കാഞ്ചേരി കൾച്ചറൽ കണ്‍വൻഷൻ സെന്‍റർ നിർമാണം: ഏഴു കോടി രൂപ. 4 പുത്തൂർ ഗ്രാമപഞ്ചായത്തിൽ തോണിപ്പാറ കുരിശുമൂല റോഡ് അഭിവൃദ്ധിപ്പെടുത്തൽ: ഏഴു കോടി രൂപ. 4 തൃശൂർ കെ എസ്ആർടിസി സ്റ്റാൻഡ് വികസനം: ഏഴു കോടി രൂപ. 4 അന്തിക്കാട് കമ്യൂണിറ്റി ഹെൽത്ത് സെന്‍റർ കെട്ടിടനിർമാണം: അഞ്ച് കോടി രൂപ. 4ചേർപ്പ് ബ്ലോക്ക് പഞ്ചായത്ത് കുടുംബാരോഗ്യകേന്ദ്രം നിർമാണം: രണ്ടു കോടി രൂപ. 4ശ്രീനാരായണപുരം ഗ്രാമപഞ്ചായത്തിലുൾപ്പെട്ട റവന്യൂ ടവർ നിർമാണം: മൂന്നു കോടി രൂപ. 4 മൂന്നുപീടിക ജംഗ്ഷനിൽ മാർക്കറ്റ് കെട്ടിടം: നാലു കോടി രൂപ. 4ഇരിങ്ങാലക്കുട കെ എസ്ആർടിസി ഓപ്പറേറ്റിംഗ് യൂണിറ്റിൽ പുതിയ ബസ് ബേയും ഓഡിറ്റോറിയവും നിർമാണം: മൂന്നു കോടി രൂപ. 4 ഇരിങ്ങാലക്കുടയിൽ സാംസ്കാരികസമുച്ചയം: നാലു കോടി രൂപ. 4ഓവുങ്ങൽ- കൊരച്ചാൽ ചെന്പൂച്ചിറ നൂലുവള്ളി റോഡ് ബിഎം ആൻഡ് ബിസി നവീകരണം- ആറ് കോടി രൂപ. 4 ചിമ്മിനി ഇക്കോ ടൂറിസം പദ്ധതി: ഒരു കോടി രൂപ. ശക്തൻ മാർക്കറ്റ്: അബുദാബി മോഡലിൽ തൃശൂർ: അബുദാബി മോഡലിൽ ആയിരം കോടി ചെലവിട്ടു നിർമിക്കുമെന്നു പറയുന്ന ശക്തൻ മാർക്കറ്റ് പദ്ധതി നടപ്പായാൽ നഗരത്തിന്‍റെ മുഖഛായ മാറുമെന്ന് ഉറപ്പ്. ഏതാനും മാസങ്ങൾ മാത്രം ഭരണമുള്ള കോർപറേഷനിൽ ഇതെങ്ങനെ നടപ്പാക്കുമെന്ന ആശങ്ക മാത്രമാണുള്ളത്. മാർക്കറ്റ് നിർമാണത്തിന്‍റെ തറക്കല്ലിടൽ അധികം വൈകാതെ നടക്കുമെന്നാണു മേയർ എം.കെ. വർഗീസ് പറഞ്ഞത്. നാലു നിലകളുള്ള മത്സ്യമാർക്കറ്റ്, പച്ചക്കറി, ഫലവിപണി, പുഷ്പ മാർക്കറ്റ് എന്നിവ സജ്ജമാക്കുന്ന മാർക്കറ്റ്, നഗരത്തിന്‍റെ വ്യാപാരമേഖലയെ മാറ്റിമറിക്കും. ഡിപിആർ തയാറാക്കുമെന്നും കിഫ്ബിയിലൂടെ പദ്ധതിയുടെ ആദ്യഘട്ടം നടപ്പാക്കുമെന്നും മേയർ പറയുന്നു. റോഡിലേക്ക് ഇറങ്ങിയുള്ള കച്ചവടങ്ങൾക്കും ഇതോടെ പരിഹാരമാകും. 4 ചാലക്കുടി കെ എസ്ആർടിസി ടെർമിനൽ നിർമാണം നാല് കോടി രൂപ. 4 കോടശേരി നായരങ്ങാടി ജംഗ്ഷൻ മുതൽ പരിയാരം ഗ്രാമപഞ്ചയത്തിലെ ആനമല പിഡബ്ല്യുഡി. റോഡ് വരെ ബിഎം ആൻഡ് ബിസി നിലവാരത്തിൽ നിർമാണം: മൂന്ന് കോടി രൂപ. 4 കൊടുങ്ങല്ലൂർ താലൂക്ക് ഹെഡ്ക്വാർട്ടേഴ്സ് ആശുപത്രിയുടെ പുതിയ അഞ്ചുനില കെട്ടിടത്തിലേക്ക് ചികിത്സാ സജ്ജീകരിക്കൽ: 2.30 കോടി രൂപ. 4 മാന്പ്ര കൂട്ടാലപ്പാടം, മാന്പ്ര തീരദേശ പൊതുമരാമത്ത് റോഡ് ബിഎം ആൻഡ് ബിസി നിലവാരത്തിൽ പുനരുദ്ധാരണം: 4.70 കോടി രൂപ.

കന്യാസ്ത്രീകളുടെ അറസ്റ്റ്; ഭാരതസംസ്‌കാരത്തിന്‍റെ ഹൃദയത്തിനേറ്റ മുറിവ്: മാര്‍ പോളി കണ്ണൂക്കാടന്‍

ഇരിങ്ങാലക്കുട: കന്യാസ്ത്രീകളുടെ അറസ്റ്റ് ഭാരതസംസ്‌കാരത്തിന്‍റെ ഹൃദയത്തിനേറ്റ മുറിവാണെന്നും ന്യൂനപക്ഷങ്ങളെ ആക്രമിച്ച് ഇല്ലായ്മ ചെയ്യാനാണെങ്കില്‍ അതു ഭാരതത്തിന്‍റെ സംസ്‌കാരത്തെ വലിയ ആപത്തിലേക്ക് എത്തിക്കുമെന്നും ബിഷപ് മാര്‍ പോളി കണ്ണൂക്കാടന്‍. കന്യാസ്ത്രീകളെ പരസ്യവിചാരണ നടത്തി അറസ്റ്റ് ചെയ്തതില്‍ പ്രതിഷേധിച്ച് സെന്‍റ് തോമസ് കത്തീഡ്രല്‍ ഇടവകയുടെ നേതൃത്വത്തില്‍ നടന്ന പ്രതിഷേധസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു ബിഷപ്. മതേതരത്വരാഷ്ട്രമായ ഭാരതത്തില്‍ എന്തുകൊണ്ട് ഇപ്രകാരം സംഭവിക്കുന്നുവെന്നും ഇതിന്‍റെ പിറകിലുള്ള കാരണങ്ങള്‍ എന്താണെന്നും ചിന്തിക്കേണ്ടിയിരിക്കുന്നു. ഇനിമുതല്‍ അങ്ങോട്ട് ഇത്തരം അന്യായമായ അറസ്റ്റുകള്‍ ഉണ്ടാകാന്‍ പാടില്ല. മത രാഷ്ട്രീയ വര്‍ഗീയ ശക്തികള്‍, അത് ഏതു സംഘടനയില്‍ ആയിരുന്നാലും ഇല്ലാതാക്കാന്‍ കേന്ദ്ര, സംസ്ഥാന സര്‍ക്കാരുകള്‍ മുന്നോട്ടുവരണം. കന്യാസ്ത്രീകള്‍ക്കെതിരേ എടുത്ത കേസ് ഇല്ലാതാക്കണം. അവരെ പരസ്യവിചാരണ നടത്തി അന്യായമായി അറസ്റ്റ് ചെയ്യാന്‍ കൂട്ടുനിന്നവരെ ശിക്ഷിക്കുവാനും സര്‍ക്കാരുകള്‍ തയാറാകണം. രക്തസാക്ഷികളുടെ ചുടുരക്തത്താല്‍ വളര്‍ന്നതാണ് സഭയെന്നും ഏതു പ്രതിസന്ധികളും പ്രതിബന്ധങ്ങളും ഉണ്ടായാലും തളരാതെ തകരാതെ മുന്നോട്ടുപോകുന്നവരാണ് ക്രൈസ്തവസമൂഹമെന്നും ബിഷപ് കൂട്ടിച്ചേര്‍ത്തു. പ്രതിഷേധറാലി കിഴക്കേപള്ളിയില്‍ രൂപത വികാരി ജനറാള്‍ മോണ്‍. വില്‍സണ്‍ ഈരത്തറ ഫ്ലാഗ്ഓഫ് ചെയ്തു. ചന്തക്കുന്ന് ഠാണാ വഴി ബസ് സ്റ്റാന്‍ഡിലെത്തി ടൗണ്‍ഹാളില്‍ സമാപിച്ചു. കത്തീഡ്രല്‍ വികാരി റവ.ഡോ. ലാസര്‍ കുറ്റിക്കാടന്‍ അധ്യക്ഷത വഹിച്ചു. ട്രസ്റ്റിമാരായ പി.ടി. ജോര്‍ജ്, സാബു ചെറിയാടന്‍, തോമസ് തൊകലത്ത്, അഡ്വ.എം.എം. ഷാജന്‍, കുടുംബസമ്മേളന കേന്ദ്രസമിതി പ്രസിഡന്‍റ് ജോബി അക്കരക്കാരന്‍, അസിസ്റ്റന്‍റ് വികാരിമാരായ ഫാ. ഓസ്റ്റിന്‍ പാറക്കല്‍, ഫാ. ബെല്‍ഫിന്‍ കോപ്പുള്ളി, ഫാ. ആന്‍റണി നമ്പളം, സിസ്റ്റര്‍ ജോസഫൈന്‍, ടെല്‍സണ്‍ കോട്ടോളി എന്നിവര്‍ പ്രസംഗിച്ചു. സിഎംസി പ്രൊവിന്‍ഷ്യല്‍ സുപ്പീരിയര്‍ സിസ്റ്റര്‍ ധന്യ സിഎംസി പ്രതിജ്ഞ ചൊല്ലിക്കൊടുത്തു. യുവജനപ്രതിനിധി ബെന്‍സണ്‍ തോമസ് പ്രമേയം അവതരിപ്പിച്ചു. മുന്‍ സര്‍ക്കാര്‍ ചീഫ് വിപ്പ് അഡ്വ. തോമസ് ഉണ്ണിയാടന്‍, നഗരസഭ ചെയര്‍പേഴ്‌ണ്‍ മേരിക്കുട്ടി ജോയ് എന്നിവര്‍ സന്നിഹിതരായിരുന്നു. നൂറുകണക്കിനു സിസ്റ്റേഴ്‌സും വൈദികരും വിശ്വാസികളും റാലിയിലും പ്രതിഷേധസംഗമത്തിലും അണിചേര്‍ന്നു. കന്യാസ്ത്രീകളുടെ അന്യായ അറസ്റ്റ്; ഇരിങ്ങാലക്കുട രൂപതയിൽ ഇന്നു പ്രതിഷേധം ഇരിങ്ങാലക്കുട: ഛത്തീസ്ഗഡിലെ ദുർഗിൽ മലയാളികളായ രണ്ടു കന്യാസ്ത്രീകളെ അന്യായമായ കുറ്റങ്ങൾ ആരോപിച്ച് അറസ്റ്റ് ചെയ്തതിൽ ഇരിങ്ങാലക്കുട രൂപതയുടെ പ്രതിഷേധം ഇന്ന്. രൂപതയിലെ മുഴുവൻ ക്രൈസ്തവവിശ്വാസികളും ഇന്നു നടക്കുന്ന ബഹുജനറാലിയിലും പ്രതിഷേധസമ്മേളനത്തിലും പങ്കെടുക്കുമെന്നു ബിഷപ് മാർ പോളി കണ്ണൂക്കാടൻ അറിയിച്ചു. ചാലക്കുടി ഫൊറോന ദേവാലയാങ്കണത്തിൽനിന്ന് ഉച്ചകഴിഞ്ഞു മൂന്നിന് ആരംഭിക്കുന്ന റാലി മുനിസിപ്പൽ ഇൻഡോർ സ്റ്റേഡിയത്തിൽ എത്തും. തുടർന്ന് പ്രതിഷേധസമ്മേളനം. ഇതുസംബന്ധിച്ച് ഇന്നു രൂപതയിലെ പള്ളികളിൽ ദിവ്യബലിയിൽ വായിക്കുന്നതിനായി സർക്കുലർ ഇറക്കി. 2014 മുതൽ ഭാരതത്തിൽ നടന്നുവരുന്ന ആസൂത്രിത ക്രൈസ്തവപീഡനങ്ങളിൽ റിപ്പോർട്ട് ചെയ്യപ്പെട്ട 4694 സംഭവങ്ങളിലെ ഏറ്റവും ഒടുവിലത്തേതാണ് ഛത്തീസ്ഗഡിൽ അന്യായമായി അറസ്റ്റ് ചെയ്യപ്പെട്ട സിസ്റ്റർ വന്ദന ഫ്രാൻസിസ്, സിസ്റ്റർ പ്രീതി മേരി എന്നിവരുടേത്. ജാമ്യം ലഭിച്ചെങ്കിലും തുടർന്നും ഇരുവരും നിയമക്കുരുക്കുകളിലൂടെ മുന്നോട്ടുപോകേണ്ടിവരുന്നതു പ്രതിഷേധാർഹമാണ്. സിബിസിഐ, കെസിബിസി, സീറോ മലബാർസഭ എന്നിവയുടെ തലവന്മാർ ആശങ്ക അറിയിച്ചിട്ടും, പാർലമെന്‍റിനകത്തും പുറത്തും ഉൾപ്പെടെ ശക്തമായ പ്രതിഷേധങ്ങൾ ഉണ്ടായിട്ടും കേന്ദ്ര സർക്കാരോ ഛത്തീസ്ഗഡ് സർക്കാരോ യാതൊരു ഇടപെടലും നടത്തിയില്ല എന്നതു തീർത്തും നിരാശാജനകമാണെന്നു സർക്കുലർ പറയുന്നു.

140-ൽപ്പരം സ്റ്റാളുകളും ഉത്പന്നങ്ങളും; ചേംബർ ഷോപ്പേഴ്സ് കാരവൻ ശ്രദ്ധേയം

തൃശൂർ: സ്ത്രീശക്തിയുടെ തിളക്കത്തോടെ ഓണക്കാലവിപണിയിലെ താരമായി ചേംബർ ഷോപ്പേഴ്സ് കാരവൻ 2025 ശ്രദ്ധേയമായി. ചേംബർ ഓഫ് കൊമേഴ്സിന്‍റെ വിമൻസ് വിംഗിന്‍റെ നേതൃത്വത്തിൽ കാസിനോ കൾച്ചറൽ ഓഡിറ്റോറിയത്തിൽ സംഘടിപ്പിച്ചിരിക്കുന്ന പ്രദർശന വിപണനമേളയിൽ നവീനതയും ഗുണനിലവാരവും കൈപിടിച്ചാണ് 140 ലധികം സ്റ്റാളുകൾ നിറഞ്ഞുനിൽക്കുന്നത്. വനിതാസംരംഭകർക്ക് പ്രോത്സാഹനവും പ്രചോദനവും ലക്ഷ്യമിട്ട് ഒരുക്കിയിരിക്കുന്ന മേളയിൽ വൈവിധ്യങ്ങളുടെ കലവറയുമായി സംരംഭകർ ഒത്തുചേർന്നിരിക്കുന്നു. ബ്രാൻഡഡും അല്ലാത്തതുമായ ഉത്പന്നങ്ങൾക്കു പ്രചാരണം നൽകുന്നതിനോടൊപ്പം ചുരുങ്ങിയ വിലയിൽ മികച്ച ഗുണനിലവാരം ഉറപ്പുവരുത്തി ഒരുക്കിയ സ്റ്റാളുകളിൽ തുണിത്തരങ്ങൾ, ജ്വല്ലറി, കോസ്മെറ്റിക്സ്, ഇലക്ട്രോണിക് ഉത്പന്നങ്ങൾ, ഹോം ഡെക്കർ, ഇൻഡോർ പ്ലാന്‍റ്സ്, ഫാബ്രിക്സ്, ഹോംമെയ്ഡ് ബേക്കറി ഐറ്റങ്ങൾ, ഹെയർ ഫിക്സിംഗ് തുടങ്ങിയവയുണ്ട്. ഒപ്പം, രുചികരമായ വിഭവങ്ങൾ ഒരുക്കിയ ഫുഡ് കോർട്ടും സന്ദർശകരെ ആകർഷിക്കുന്നു. മേളയുടെ ഭാഗമായി നിരവധി മത്സരങ്ങളും സംഘടിപ്പിച്ചിട്ടുണ്ട്. ബേബി കിംഗ് ആൻഡ് ക്വീൻ, കളറിംഗ് ക്രിയേറ്റിവിറ്റി, സ്റ്റോറി റൈറ്റിംഗ് തുടങ്ങിയ മത്സരങ്ങൾക്കു കുട്ടികളും രക്ഷിതാക്കളും ഒപ്പംചേർന്നു വലിയ പ്രതികരണമാണ് നൽകുന്നത്. മന്ത്രി കെ. രാജൻ ഉദ്ഘാടനം ചെയ്ത മേളയിൽ നടി രചന നാരായണൻകുട്ടി ബേബി കിംഗ് ആൻഡ് ക്വീൻ മത്സരം ഉദ്ഘാടനം ചെയ്തു. വിമൻസ് വിംഗ് പ്രസിഡന്‍റ് ഡോ. കനകപ്രതാപ് അധ്യക്ഷത വഹിച്ചു. സെക്രട്ടറി മൃദു നിക്സണ്‍, ട്രഷറർ മായ എസ്. പരമശിവം, ജോയിന്‍റ് സെക്രട്ടറിമാരായ ജെയിൻ മിൽട്ടണ്‍, സബീന മുസ്തഫ, നദീറ എന്നിവർ പ്രസംഗിച്ചു. രാവിലെ 10 മുതൽ രാത്രി ഒന്പതുവരെ നടക്കുന്ന പ്രദർശന വിപണമേള ഇന്നു സമാപിക്കും.

ക്രെഡായ് പ്രോപ്പർട്ടി എക്സ്പോ ഇന്നുകൂടി; സ്പോട്ട് ബുക്കിംഗിന് ഐഫോണ്‍ സമ്മാനം

തൃശൂർ: എംജി റോഡിലെ ശ്രീശങ്കര ഹാളിൽ നടക്കുന്ന ക്രെഡായ് പ്രോപ്പർട്ടി എക്സ്പോ ഇന്നു രാത്രി എട്ടിനു സമാപിക്കും. എക്സ്പോ സന്ദർശിച്ച് വില്ലയോ ഫ്ളാറ്റോ സ്പോട്ടിൽ ബുക്ക് ചെയ്യുന്നവർക്ക് ഐഫോണ്‍ സമ്മാനമായി നേടാൻ ഇന്നുകൂടി അവസരമുണ്ട്. പ്രവേശനം സൗജന്യം. ബജറ്റഡ്, ലക്ഷ്വറി അപ്പാർട്മെന്‍റുകൾ, വില്ലകൾ തുടങ്ങിയ 150-ഓളം പ്രോജക്ടുകളാണ് എക്സ്പോയിലുള്ളത്. പ്രമുഖ ബാങ്കുകളുടെ സ്റ്റാളുകളിൽനിന്ന് ഉപഭോക്താക്കൾക്ക് ഹൗസിംഗ് ലോണ്‍ സംബന്ധിച്ച വിവരങ്ങൾ എളുപ്പത്തിൽ മനസിലാക്കാനും അവസരമുണ്ട്.

സ്റ്റുഡന്‍റ്സ് പോലീസ് കേഡറ്റ് പരേഡും പതാക ഉയർത്തലും

തൃശൂർ: സ്റ്റുഡന്‍റ്സ് പോലീസ് കേഡറ്റ് പദ്ധതിയുടെ 15ാം വാർഷികാഘോഷത്തിന്‍റെ ഭാഗമായി എആർ ക്യാന്പിൽ നടന്ന ചടങ്ങിൽ ജില്ലാ കളക്ടർ അർജുൻ പാണ്ഡ്യൻ സിറ്റി എസ്പിസി പദ്ധതിയുടെ പതാക ഉയർത്തി. തുടർന്ന് തൃശൂർ സിറ്റിയിലെ 11 സ്കൂളുകളിലെ 330 കേഡറ്റുകൾ പങ്കെടുത്ത സെറിമോണിയൽ പരേഡിൽ ജില്ലാ കളക്ടർ സല്യൂട്ട് സ്വീകരിച്ചു . സിറ്റി പോലീസ് കമ്മീഷണർ ആർ. ഇളങ്കോ, എസ്പിസി ജില്ലാ നോഡൽ ഓഫീസറും തൃശൂർ സിറ്റി പോലീസ് അഡീഷണൽ എസ്പിയുമായ ഷീൻ തറയിൽ എന്നിവർ മുഖ്യാതിഥികളായി. ആര്യംപാടം സർവോദയം സ്കൂളിലെ കേഡറ്റ് ഐശ്വര്യ നയിച്ച പരേഡിൽ വടക്കാഞ്ചേരി ഗേൾസ് ഹൈസ്കൂൾ ഒന്നാംസ്ഥാനം നേടി. അസിസ്റ്റന്‍റ് ജില്ലാ നോഡൽ ഓഫീസർ സബ് ഇൻസ്പെക്ടർ ജ്യോതിസ് തോമസ്, സബ് ഇൻസ്പെക്ടർ ടി.എൻ. ജയപ്രകാശ് എന്നിവർ നേതൃത്വം നൽകി.

ജില്ലാ ജൂണിയർ ത്രോബോൾ ചാമ്പ്യൻഷിപ്പ് ജേതാക്കൾ

തൃശൂർ: വികെഎൻ മേനോൻ ഇൻഡോർ സ്റ്റേഡിയത്തിൽ നടന്ന പതിനൊന്നാമതു ജില്ലാ ത്രോബോൾ ചാമ്പ്യൻഷിപ്പിൽ ആൺകുട്ടികളുടെ വിഭാഗത്തിൽ വെട്ടിക്കുഴി നോട്ടർഡാം സ്പോർട്സ് ക്ലബ്ബും പെൺകുട്ടികളുടെ വിഭാഗത്തിൽ എസ്എൻ വിദ്യാഭവൻ ചെന്ത്രാപ്പിന്നിയും ജേതാക്കളായി. ക്ഷത്രിയ സ്പോർട്സ് ക്ലബ് ആൺകുട്ടികളുടെ വിഭാഗത്തിലും നോട്ടർഡാം സ്പോർട്സ് ക്ലബ് പെൺകുട്ടികളുടെ വിഭാഗത്തിലും രണ്ടാംസ്ഥാനം നേടി. ആൺകുട്ടികളുടെ വിഭാഗത്തിൽ എസ്ഡി വിഎച്ച്എസ്എസ് പേരാമംഗലം, പെൺകുട്ടികളുടെ വിഭാഗത്തിൽ പ്ലേ ബോയ്സ് സ്പോർട്സ് ക്ലബ് എന്നിവർക്കാണ് മൂന്നാംസ്ഥാനം. തൃശൂർ ജില്ലാ അസോസിയേഷൻ പ്രസിഡന്‍റ് ചാന്പ്യൻഷിപ്പ് വി.യു. ഉണ്ണികൃഷ്ണൻ ഉദ്ഘാടനം ചെയ്തു. സെക്രട്ടറി എം. ആകാശ്, ഒളിമ്പിക്സ് അസോസിയേഷൻ സെക്രട്ടറി അഖിൽ അനിരുദ്ധൻ എന്നിവർ പ്രസംഗിച്ചു.

ബോട്ടിലെ 26 മത്സ്യത്തൊഴിലാളികളെ രക്ഷിച്ചു ; പ്രോപ്പല്ലറിൽ വല കുരുങ്ങി എൻജിൻ നിലച്ചു

അഴീക്കോട്: ആഴക്കടലിൽവച്ച് പ്രോപ്പല്ലറിൽ വല കുരുങ്ങി എൻജിൻ നിലച്ചതിനെത്തുടർന്ന് കടലിൽ ഒഴുകിനടന്ന ബോട്ടിലെ 26 മത്സ്യത്തൊഴിലാളികളെ രക്ഷിച്ചു. എറണാകുളം കൊച്ചിൻ ഹാർബറിൽ നിന്നു വെള്ളിയാഴ്ച പുലർച്ചെ മത്സ്യബന്ധനത്തിനു പോയ റഹ്മ എന്ന ബോട്ടും അതിലെ തൊഴിലാളികളെയുമാണ് ഫിഷറീസ് വകുപ്പിന്‍റെ ബോട്ട് കരയ്ക്കെത്തിച്ചത്. തൃശൂർ കയ്പമംഗലം കടലിൽ 10 നോട്ടിക്കൽ മൈൽ അകലെ വഞ്ചിപ്പുര വടക്ക്-പടിഞ്ഞാറ് ഭാഗത്തുവച്ചാണ് കൊച്ചി ഈരവേലി സ്വദേശി ഹംസ എന്നയാളുടെ ഉടമസ്ഥതയിലുള്ള ബോട്ടിന്‍റെ എൻജിൻ പ്രവർത്തനം നിലച്ചത്. ബോട്ടിൽ ഉണ്ടായിരുന്ന തൊഴിലാളികളെല്ലാം കൊച്ചി സ്വദേശികളാണ്. രാത്രി 7.35ഓടെ ബോട്ടും തൊഴിലാളികളും കടലിൽ കുടുങ്ങിക്കിടക്കുന്നതായി അഴീക്കോട് ഫിഷറീസ് സ്റ്റേഷനിൽ സന്ദേശം ലഭിച്ചതിനെത്തുടർന്ന് ഫിഷറീസ് അസിസ്റ്റന്‍റ് ഡയറക്ടർ ഡോ. സി. സീമയുടെ നിർദേശാനുസരണം മറൈൻ എൻഫോഴ്സ്മെന്‍റ് ആൻഡ് വിജിലൻസ് വിംഗ് ഓഫീസർമാരായ വി.എം. ഷൈബു, വി.എൻ. പ്രശാന്ത്കുമാർ, ഇ.ആർ. ഷിനിൽകുമാർ, സീ റസ്ക്യൂ ഗാർഡുമാരായ കൃഷ്ണപ്രസാദ്, സുധീഷ്, ബോട്ട് സ്രാങ്ക് ദേവ‌സി മുനന്പം, എൻജിൻ ഡ്രൈവർ ഫെലിക്സ് പള്ളിപ്പുറം എന്നിവരാണ് രക്ഷാപ്രവർത്തനത്തിനു നേതൃത്വം നൽകിയത്. കടലിൽ ഉണ്ടാകുന്ന അപകടങ്ങളിൽ രക്ഷാപ്രവർത്തനത്തിന് 24 മണിക്കൂറും പ്രവർത്തിക്കുന്ന മറൈൻ എൻഫോഴ്സ്മെന്‍റ് യൂണിറ്റ് ഉൾപ്പെടെ ഫിഷറീസ് വകുപ്പിന്‍റെ മുനക്കകടവ്, അഴീക്കോട് ഫിഷറീസ് സ്റ്റേഷനുകൾ സുസജ്ജമാണെന്നും തീർത്തും സൗജന്യമായാണ് സർക്കാർ ഈ സേവനം നൽകുന്നതെന്നും തൃശൂർ ജില്ല ഫിഷറീസ് ഡെപ്യൂട്ടി ഡയറക്ടർ അബ്ദുൽ മജീദ് പോത്തനൂരൻ അറിയിച്ചു.

മാലിന്യസംസ്കരണം; പിഴ ചുമത്തുന്നതിൽ ഒന്നാംസ്ഥാനമടിച്ച് തൃശൂർ

തൃശൂർ: മാലിന്യസംസ്കരണവുമായി ബന്ധപ്പെട്ട നിയമലംഘനത്തിനു പിഴ ചുമത്തുന്നതിൽ ഒന്നാംസ്ഥാനമടിച്ച് തൃശൂർ ജില്ല. ഈ വർഷം ജനുവരി മുതൽ ജൂലൈ വരെയുള്ള മാസങ്ങളിൽ തദ്ദേശസ്വയംഭരണസ്ഥാപനങ്ങൾവഴി തൃശൂർ ജില്ല മാലിന്യസംസ്കരണത്തിലെ നിയമലംഘനത്തിന് ഈടാക്കിയ പിഴ ഒരു കോടിയിലേറെ രൂപയാണ്. 19559 പരിശോധനകളിലായി എൻഫോഴ്സ്മെന്‍റ് സ്ക്വാഡുകളുടെയും ഇന്‍റേണൽ വിജിലൻസ് ഓഫീസർമാരുടെയും നേതൃത്വത്തിൽ 4210 നിയമലംഘനങ്ങൾ കണ്ടെത്തി പിഴ ഈടാക്കി. നിരോധിത പ്ലാസ്റ്റിക് വസ്തുക്കളുടെ സംഭരണം, വിപണനം, ഉപയോഗം, പൊതുസ്ഥലമലിനീകരണം, ജലാശയമലിനീകരണം, മാലിന്യം വലിച്ചെറിയൽ, മാലിന്യം കത്തിക്കൽ, മലിനജലം പൊതുസ്ഥലത്ത് ഒഴുക്കൽ, മാലിന്യസംസ്കരണത്തിന് ആവശ്യമായ നടപടികൾ സ്വീകരിക്കാതിരിക്കാൻ തുടങ്ങിയ നിയമലംഘനങ്ങളിലാണ് പരിശോധനകൾ നടത്തിയത്. മാലിന്യങ്ങൾ പൊതുസ്ഥലങ്ങളിൽ നിക്ഷേപിക്കുന്നവരെ പിടികൂടുന്നതിനായി ആരംഭിച്ച സിംഗിൾ വാട്സ്ആപ്പ് നന്പർ വഴി റിപ്പോർട്ട് ചെയ്ത നിയമലംഘനങ്ങളിൽ 677 പരാതികളിൽ 655 പരാതികളും തീർപ്പാക്കി. ജില്ലയിൽ കൂടുതൽ മാലിന്യം ഉത്പാദിപ്പിക്കുന്ന 1221 സ്ഥാപനങ്ങൾ പരിശോധിക്കുകയും 459 സ്ഥാപനങ്ങൾക്കെതിരേ നടപടികൾ സ്വീകരിക്കുകയും ചെയ്തു. ഇത്തരം സ്ഥാപനങ്ങൾ ഉറവിടമാലിന്യ സംസ്കരണത്തിനു കൂടുതൽ പ്രാധാന്യം നൽകണമെന്നും വരുംദിവസങ്ങളിൽ കൂടുതൽ പരിശോധനകൾ നടത്തുമെന്നും തദ്ദേശസ്വയംഭരണ വകുപ്പ് ജോയിന്‍റ് ഡയറക്ടർ അറിയിച്ചു. നിയമലംഘനങ്ങൾ 9446700800 എന്ന നന്പർവഴി പൊതുജനങ്ങൾക്ക് അധികൃതരെ അറിയിക്കാം.

വടക്കാഞ്ചേരി മണ്ഡലത്തിൽ 663 പട്ടയങ്ങൾ നൽകി

വരടിയം: വടക്കാഞ്ചേരി നിയോജകമണ്ഡലം പട്ടയമേള മന്ത്രി അഡ്വ. കെ. രാജൻ ഉദ്ഘാടനം ചെയ്തു. ചരിത്രത്തിലാദ്യമായി ഒരു സംസ്ഥാനം പട്ടയ മിഷനു തുടക്കംകുറിച്ച് പട്ടയ അസംബ്ലികൾ നടത്തി ഭൂരഹിതരെ കണ്ടെത്തി പട്ടയപ്രശ്നങ്ങൾ പരിഹരിച്ച് ഭൂമിയുടെ ഉടമകളാക്കുകയാണ്. വനഭൂമി പട്ടയങ്ങളുമായി ബന്ധപ്പെട്ട പ്രശ്നങ്ങൾ കേന്ദ്ര വനംവകുപ്പുമായി ചർച്ചചെയ്ത് അതിവേഗം പട്ടയങ്ങൾ ലഭ്യമാക്കുമെന്നു മന്ത്രി അറിയിച്ചു. വരടിയം ജിയുപി സ്കൂളിൽ നടന്ന പട്ടയ‌മേളയിൽ സേവ്യർ ചിറ്റിലപ്പിള്ളി എംഎൽഎ അധ്യക്ഷത വഹിച്ചു. ജില്ലാ കളക്ടർ അർജുൻ പാണ്ഡ്യൻ, തഹസിൽദാർ ടി. ജയശ്രീ എന്നിവർ പ്രസംഗിച്ചു. പട്ടയപ്രശ്നങ്ങൾ പരിഹരിച്ച് പട്ടയവിതരണം സാധ്യമാക്കിയ വിവിധ റവന്യൂ വകുപ്പ് ഉദ്യോഗസ്ഥരെ ആദരിച്ചു. പതിറ്റാണ്ടുകളായി പട്ടയം ലഭിക്കാതിരുന്നവർക്കായി 298 ലാൻഡ് ട്രൈബ്യൂണൽ പട്ടയങ്ങളും 170 ദേവസ്വം ലാൻഡ് ട്രൈബ്യൂണൽ പട്ടയങ്ങളും 120 മിച്ചഭൂമി പട്ടയങ്ങളും 43 വനഭൂമി പട്ടയങ്ങളും 1964 ലെ നിയമപ്രകാരമുള്ള 28 പുറന്പോക്ക് പട്ടയങ്ങളും 1995 ലെ നിയമപ്രകാരം നാലുമുനിസിപ്പൽ പട്ടയങ്ങളും ഉൾപ്പെടെ 663 പട്ടയങ്ങളാണ് മേളയിൽ വിതരണം ചെയ്തത്. പുഴയ്ക്കൽ ബ്ലോക്ക് പഞ്ചായ ത്ത് പ്രസിഡന്‍റ് ലീല രാമകൃഷ് ണൻ, വടക്കാഞ്ചേരി നഗരസഭ ചെയർപേഴ്സണ്‍ പി.എൻ. സുരേന്ദ്രൻ, വിവിധ പഞ്ചായത്ത് പ്രസിഡന്‍റുമാരായ തങ്കമണി ശങ്കുണ്ണി, ലക്ഷ്മി വിശ്വംഭരൻ, കെ.കെ. ഉഷാദേവി, സിമി അജിത് കുമാർ തുടങ്ങിയവർ പങ്കെടുത്തു.

സിഐഐ പിന്തുണയിൽ കളക്ടറേറ്റ് ക്ലോക്ക് ടവർ വീണ്ടും മിടിച്ചുതുടങ്ങി

തൃശൂർ: വർഷങ്ങളായി നിലച്ചിരുന്ന അയ്യന്തോൾ കളക്ടറേറ്റിലെ ചരിത്രപ്രസിദ്ധമായ ക്ലോക്ക് ടവർ വീണ്ടും പ്രവർത്തനക്ഷമമായി. കഴിഞ്ഞ മാർച്ചിലാണ് ജില്ലാ കളക്ടർ അർജുൻ പാണ്ഡ്യന്‍റെ ശ്രദ്ധയിൽ ക്ലോക്ക് ടവറിന്‍റെ ശോച്യാവസ്ഥ ശ്രദ്ധയിൽപ്പെട്ടത്. അഡീഷണൽ ജില്ലാ മജിസ്ട്രേറ്റിനൊപ്പം ക്ലോക്ക് ടവർ സന്ദർശിച്ച കളക്ടർ, തകരാർ പരിഹരിക്കുന്നതിന് ആവശ്യമായ നടപടികൾ അടിയന്തരമായി സ്വീകരിക്കാൻ പൊതുമരാമത്ത് വകുപ്പിനു നിർദേശം നൽകുകയായിരുന്നു. വ്യവസായ വകുപ്പിന്‍റെ മേൽനോട്ടത്തിൽ കോണ്‍ഫെഡറേഷൻ ഓഫ് ഇന്ത്യൻ ഇൻഡസ്ട്രിയുടെ (സിഐഐ) സഹകരണത്തോടെ ക്ലോക്കിന്‍റെ മെക്കാനിക്കൽ തകരാറുകൾ പൂർണമായി പരിഹരിക്കുകയായിരുന്നു. ഇതോടെ ക്ലോക്ക് ടവർ വീണ്ടും മിടിച്ചുതുടങ്ങി. പുനരുദ്ധാരണപ്രവര്‍ത്തനങ്ങള്‍ പൂര്‍ത്തിയായതിന്‍റെ പ്രതീകമായി സിഐഐ തൃശൂര്‍ സോണ്‍ ചെയര്‍മാന്‍ സുരേഷ് ബാബുവും വൈസ് ചെയര്‍മാന്‍ ഡോ. യദു നാരായണന്‍ മൂസും ചേര്‍ന്ന് പുനഃസ്ഥാപിച്ച ക്ലോക്കിന്‍റെ ഫ്രെയിം ചെയ്ത ചിത്രം ജില്ലാ കളക്ടര്‍ക്കു സമ്മാനിച്ചു. ഈ പ്രവര്‍ത്തനം ഏറ്റെടുത്തതിനു സിഐഐ തൃശൂര്‍ മേഖലയെ കളക്ടര്‍ പ്രശംസിച്ചു. ജില്ലാ കളക്ടർ അർജുൻ പാണ്ഡ്യൻ, എഡിഎം ടി. മുരളി, ജില്ലാ വ്യവസായ കേന്ദ്രം ജനറൽ മാനേജർ എസ്. ഷീബ, ജില്ലാ ഇൻഫർമേഷൻ ഓഫീസർ പി.കെ. വേലായുധൻ തുടങ്ങിയവർ ക്ലോക്ക് ടവർ സന്ദർശിച്ചു പ്രവർത്തനം വിലയിരുത്തി. സിവിൽ സ്റ്റേഷനിലെ പൂന്തോട്ടം, കെട്ടിടത്തിലേക്കുള്ള റോഡുകൾ, ക്രഷ്, ചുറ്റുമതിൽ എന്നിവയുടെ നിർമാണ പ്രവർത്തനങ്ങളും ഉടൻ ആരംഭിക്കുമെന്നും കളക്ടർ അറിയിച്ചു.

കോനിക്കര റോഡിലെ കുഴികൾ അപകടക്കെണിയാകുന്നു

തൃക്കൂർ: കുഞ്ഞനംപാറ റോഡിൽ കോനിക്കരയിൽ രൂപപ്പെട്ട കുഴികൾ അപകടക്കെണിയാകുന്നു. ഏറെയും ഇരുചക്രവാഹനങ്ങളാണ് കുഴിയിൽവീണ് അപകടത്തിൽപ്പെടുന്നത്. നിരവധി അപകടങ്ങളാണ് അടുത്തിടെയായി ഇവിടെ സംഭവിച്ചത്. കലുങ്കിനോടുചേർന്ന് രൂപപ്പെട്ട കുഴികൾ അകലെനിന്നുവരുന്ന വാഹനങ്ങൾക്ക് പെട്ടെന്ന് ശ്രദ്ധയിൽപെടാത്തതാണ് അപകടങ്ങൾക്കിടയാക്കുന്നത്. കുഴിയിൽവീഴുന്ന ഇരുചക്രവാഹനങ്ങളിൽനിന്ന് യാത്രക്കാർ തെറിച്ചുവീണാണ് പരിക്കേൽക്കുന്നത്. ഒന്നരമാസത്തിനിടെ ഇരുപതോളം അപകടങ്ങളാണ് ഈ കുഴിയിൽ വീണുണ്ടായത്. കുറച്ചുനാളുകൾക്ക് മുൻപാണ് ഇവിടെ കുഴികൾ രൂപപ്പെട്ടത്. മഴ ശക്തമായതോടെ വെള്ളക്കെട്ടും രൂക്ഷമായി. ഇതോടെ കുഴികൾ തിരിച്ചറിയാൻ കഴിയാത്ത അവസ്ഥയായി. കഴിഞ്ഞദിവസം മാത്രം രണ്ട് അപകടങ്ങളാണ് ഇവിടെ സംഭവിച്ചത്. കല്ലൂർ സ്വദേശിയായ യുവതിക്ക് സ്കൂട്ടർ മറിഞ്ഞും അംഗപരിമിതനായ ലോട്ടറി വിൽപ്പനക്കാരന്‍റെ മുച്ചക്രവാഹനം മറിഞ്ഞും അപകടം സംഭവിച്ചു. തൃക്കൂർ - പുത്തൂർ പഞ്ചായത്തുകളുടെ അതിർത്തിയിലുള്ള കലുങ്കിന്‍റെ സ്ലാബുകളിട്ട ഭാഗത്തെ കുഴികൾമാത്രമാണ് റോഡിന്‍റെ അപാകത. അത്യാധുനികരീതിയിൽ നിർമിച്ച റോഡിൽ രൂപപ്പെട്ട കുഴികൾനികത്തി അപകടങ്ങൾ ഒഴിവാക്കണമെന്നാണ് നാട്ടുകാരുടെ ആവശ്യം.

ചേലക്കരിയിൽ കാട്ടാനയുടെ വിളയാട്ടം: വ്യാപക കൃഷിനാശം

ചേലക്കര: കാട്ടാനയുടെ വിളയാട്ടത്തില്‌ കാർഷകദുരിതം തുടർക്കഥയാവുന്നു. ചേലക്കര തോണൂർക്കരയിൽ ഇന്നലെ പുലർച്ചെ കാടിറങ്ങിയ ഒറ്റയാന്‍റെ ആക്രമണം കർഷകന്‍റെ സ്വപ്നങ്ങൾക്കുമേലുള്ള ഇരുട്ടടിയായി. ഓണവിപണി ലക്ഷ്യമിട്ട് വിളവെടുപ്പിന് പാകമായ ചങ്ങാലിക്കോടൻ വാഴത്തോട്ടം ഒറ്റയാൻ നശിപ്പിച്ചു. പാകമായ 25ലധികം നേന്ത്രവാഴകളും തെങ്ങുകളും റബർ മരങ്ങളും നശിച്ചതോടെ ഏകദേശം 25,000 രൂപയുടെ നഷ്ടമുണ്ടായതായി കർഷകൻ പറയുന്നു. തോന്നൂർക്കര പടിക്കാറ്റുമുറി മാട്ടിങ്ങൽ സ്വദേശി മനപ്പടിക്കൽ അരവിന്ദാക്ഷന്‍റെ വീടിനോട് ചേർന്നുള്ള ഒരേക്കറോളം വരുന്ന പുരയിടത്തിലാണ് കാട്ടാനയുടെ ആക്രമണമുണ്ടായത്. ഇതോടെ പ്രദേശവാസികൾ കടുത്ത ഭീതിയിലാണ്. വന്യജീവി ആക്രമണങ്ങൾ തുടർക്കഥയായിട്ടും അധികാരികൾ ശ്രദ്ധിക്കുന്നില്ലന്ന് പരാതിയുണ്ട്. കുതിരാൻ തുരങ്കം പൂർത്തിയായശേഷം മച്ചാട് മലയടിവാരത്തുള്ള ജനവാസമേഖലയിൽ ആദ്യമായി കാട്ടാന ശല്യം റിപ്പോർട്ട് ചെയ്തത് ഈ പ്രദേശത്താണ്. അതിനുശേഷം വന്യജീവികളുടെ ആക്രമണം ഇവിടെ പതിവാണ്.

പള്ളിക്കുന്ന് അസംപ്ഷന്‍ പള്ളി ശതോത്തര സുവര്‍ണജൂബിലി സമാപനം ഇന്ന്

വരന്തരപ്പിള്ളി: പള്ളിക്കുന്ന് അസംപ്ഷന്‍ പള്ളി സ്ഥാപിതമായി 150 വര്‍ഷങ്ങള്‍ പൂര്‍ത്തിയായതിന്‍റെ സമാപന ആഘോഷങ്ങള്‍ ഇന്നുനടക്കും. വൈകിട്ട് 3.30ന് മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടിലിന്‍റെ കാര്‍മികത്വത്തിലുള്ള ദിവ്യബലിയോടെ ചടങ്ങുകള്‍ ആരംഭിക്കും. ജൂബിലിയോടുനുബന്ധിച്ച് ഇടവകയിലെ നൂറ്റിയമ്പതോളംപേര്‍ പകര്‍ത്തിയെഴുതിയ ബൈബിള്‍ പുതിയ നിയമത്തിന്‍റെ പകര്‍പ്പുകള്‍ ആശിര്‍വദിച്ച് അള്‍ത്താരയില്‍ സമര്‍പ്പിക്കും. കേന്ദ്രസമിതി കണ്‍വീനര്‍ ജോയ് ആറ്റുപുറം സമ്പൂര്‍ണ ബൈബിള്‍ മേജര്‍ ആര്‍ച്ച് ബിഷപ്പിന് കൈമാറും. ഇടവകയില്‍ സേവനമനുഷ്ഠിച്ചിരുന്ന വൈദികര്‍, പുതുക്കാട് ഫൊറോനയിലെ വൈദികര്‍ തുടങ്ങിയവര്‍ സഹകാര്‍മികരാകും. ദിവ്യബലിക്കുശേഷം നടക്കുന്ന പൊതുസമ്മേളനം അതിരൂപത ആര്‍ച്ച്ബിഷപ് മാര്‍ ആന്‍ഡ്രൂസ് താഴത്ത് ഉദ്ഘാടനംചെയ്യും. പുതുക്കാട് ഫൊറോന വികാരി ഫാ. പോള്‍ തേയ്ക്കാനത്ത് അധ്യക്ഷതവഹിക്കും. തൃശൂര്‍ ജില്ലാപഞ്ചായത്ത് പ്രസിഡന്‍റ് വി.എസ്. പ്രിന്‍സ് മുഖ്യാതിഥിയാകും. അതിരൂപത വികാരി ജനറാള്‍ മോണ്‍. ജെയ്‌സന്‍ കൂനംപ്ലാക്കല്‍, വരന്തരപ്പിള്ളി പഞ്ചായത്ത് പ്രസിഡന്‍റ് കലാപ്രിയ സുരേഷ് തുടങ്ങിയവര്‍ സന്നിഹിതരാകും. ശതോത്തരജൂബിലിയോടനുബന്ധിച്ച് നിര്‍മിച്ച നാല് കാരുണ്യഭവനങ്ങളുടെ താക്കോല്‍ദാനവും സ്മരണിക പ്രകാശനവും ചടങ്ങില്‍ നിര്‍വഹിക്കും. വികാരി ഫാ. ജോര്‍ജ് എടക്കളത്തൂര്‍, അസിസ്റ്റന്‍റ് വികാരി ഫാ. ജാക്‌സന്‍ തെക്കേക്കര, ഡീക്കന്‍ റോണി പാണേങ്ങാടന്‍, മദര്‍ സുപ്പീരിയര്‍ സിസ്റ്റര്‍ ജെസ്മിന്‍ കുരിയന്‍, കൈക്കാരന്‍ ലിന്‍റോ കൊമ്പന്‍, കണ്‍വീനര്‍ ഡേവീസ് തെക്കുംപുറം തുടങ്ങിയവര്‍ നേതൃത്വംനല്‍കും.

തുറുങ്കിലടയ്ക്കപ്പെട്ട കന്യാസ്ത്രീകൾക്കു പഴുവിൽ ഫൊറോനയുടെ ഐക്യദാർഢ്യം

തൃപ്രയാർ: ഛത്തീസ്ഗഡിൽ മനുഷ്യക്കടത്ത് ആരോപിച്ച് അന്യായമായി ആൾക്കൂട്ടം വിചാരണനടത്തി അറസ്റ്റ് ചെയ്യപ്പെട്ട സിസ്റ്റർ വന്ദനയെയും സിസ്റ്റർ പ്രീതിയെയും ഉടനേ മോചിപ്പിക്കുക, കന്യാസ്ത്രീകളുടെ പേരിൽ അന്യായമായി എടുത്തിരിക്കുന്ന കേസ് ഉടനടി റദ്ദുചെയ്യുക, ഇന്ത്യൻ ഭരണഘടന അനുശാസിക്കുന്ന മതസ്വാതന്ത്ര്യം അനുവദിക്കുക തുടങ്ങിയ ആവശ്യങ്ങൾ ഉന്നയിച്ചുകൊണ്ട് പഴുവിൽ ഫൊറോനയിൽപ്പെട്ട 16 പള്ളികളിൽനിന്നുള്ള പ്രതിനിധികൾ വികാരിയച്ചൻമാരുടെയും സിസ്റ്റർമാരുടെയും നേതൃത്വത്തിൽ പ്രതിഷേധയോഗം സംഘടിപ്പിച്ചു. തൃപ്രയാർ വിശുദ്ധ യൂദാ തദേവൂസ് ദേവാലയത്തിനു മുൻവശത്തു ചേർന്ന പ്രതിഷേധയോഗം പഴുവിൽ ഫൊറോന വികാരി റവ. ഡോ. വിൻസെന്‍റ് ചെറുവത്തൂർ ഉദ്ഘാടനം ചെയ്തു. പഴുവിൽ ഫൊറോന കൗണ്‍സിൽ സെക്രട്ടറി എ.എ. ആന്‍റണി അധ്യക്ഷനായിരുന്നു. അതിരൂപത പാസ്റ്ററൽ കൗണ്‍സിൽ സെക്രട്ടറി ജോ ഷി വടക്കൻ മുഖ്യപ്രഭാഷണം നടത്തി. ഫാ. സെബാസ്റ്റ്യൻ വെട്ടത്ത്, ഫൊറോന കത്തോലിക്ക കോണ്‍ഗ്രസ് പ്രസിഡന്‍റ് ആന്‍റോ തൊറയൻ, ഫാ. ജെൻസ് തട്ടിൽ, സിസ്റ്റർ കൊച്ചുത്രേസ്യ, സിസ്റ്റർ അനു ജോണ്‍സണ്‍, സിസ്റ്റർ നിഷ, ഫാ. ജോസഫ് മുരിങ്ങാത്തേരി, ഫൊറോന കുടുംബകൂട്ടായ്മ കണ്‍വീനർ പ്രീറ്റ് ജെ. മുരിയാടൻ, ഫാ. സിജോ കാട്ടൂക്കാരൻ, ഫൊറോന മാതൃവേദി പ്രസിഡന്‍റ് ഷാലി ഫ്രാൻസിസ്, ഫൊറോന മദ്യവിരുദ്ധസമിതി പ്രസിഡന്‍റ് ജോസ് ആലപ്പാട്ട് തുടങ്ങിയവർ പ്രസംഗിച്ചു. കൈക്കാരന്മാരായ സി.എ. ജെ യിംസ്, ലിജോ കരിയാട്ടിൽ, സിജോ ചാലക്കൽ, റോബിൻ ചാലക്കൽ, സോബി സി. ആന്‍റണി, കെ.ടി. ഷൈജൻ തുടങ്ങിയവർ നേതൃത്വം നൽകി. യോഗത്തിനുമുന്പ് തൃപ്രയാർ സെന്‍ററിൽനിന്നു പ്രതിഷേധപ്രകടനവും നടത്തി.

രണ്ടാമത് വിയാനി പദയാത്ര ഇന്ന്

പുത്തൂർ: വൈദികരുടെ മധ്യസ്ഥനായ വിശുദ്ധ ജോൺ മരിയ വിയാനിയുടെ തിരുനാളിനോടുനബന്ധിച്ച് പുത്തൂർ ഫൊറോന കൗൺസിലിന്‍റെ നേതൃത്വത്തിൽ രണ്ടാമത് വിയാനി പദയാത്ര ഇന്നു നടത്തും. പുത്തൂർ സെന്‍റ് തോമസ് ഫൊറോന പള്ളിയിൽനിന്നു മാന്നാംമംഗലം പള്ളിയിലേക്കാണ് പദയാത്ര നടത്തുന്നത്. പൂത്തൂർ ഫൊറോന വികാരി ഫാ. ജോജു പനയ്ക്കൽ അധ്യക്ഷതവഹിക്കും. തൃശൂർ അതിരൂപത പാസ്റ്ററൽ കൗൺസിൽ സെക്രട്ടറി ജോഷി വടക്കൻ പതാക ഉയർത്തും. ആർച്ച്ബിഷപ് മാർ ആൻഡ്രൂസ് താഴത്ത് പദയാത്ര ഉദ്ഘാടനംചെയ്യും. മന്ത്രി കെ. രാജൻ മുഖ്യാതിഥിയായി പങ്കെടുക്കും. സമാപനസമ്മേളനം അതിരൂപത സഹായമെത്രാൻ മാർ ടോണി നിലങ്കാവിൽ ഉദ്ഘാടനംചെയ്യും. പുത്തൂർ, കൊഴുക്കുള്ളി, ഇരവിമംഗലം, വലക്കാവ്, തൃക്കൂർ, പൊന്നൂക്കര, ഭരത, വെട്ടുകാട്, ചേരുംകുഴി, മാന്ദാമംഗലം , മരോട്ടിച്ചാൽ തുടങ്ങിയ ഇടവകക ളിലെ കൈക്കാരന്മാർ പതാകവാഹകരായി പദയാത്ര നയിക്കും. ഒല്ലൂരിൽ നടന്ന വാർത്താസമ്മേളനത്തിൽ പുത്തൂർ ഫൊറോന കൗൺസിൽ ഭാരവാഹികളായ ഫാ. ജോജു പനയ്ക്കൽ. ഫാ. പ്രിൻസ് നായങ്കര, അഡ്വ. ഡേവിസ് കണ്ണൂക്കാടൻ എന്നിവർ പങ്കെടുത്തു.

റെയിൽവേ മേൽപ്പാലം ബൈപാസ് റോഡ്: ഉദ്യോഗസ്ഥര്‌ക്കു രൂക്ഷവിമർശനം

വടക്കാഞ്ചേരി: റെയിൽവേ മേൽപ്പാലം ബൈപാസ് റോഡിലെ അപകടാവസ്ഥയില്‌ ഉദ്യോഗസ്ഥരെ രൂക്ഷമായി വിമർശിച്ച് തലപ്പിള്ളി തഹസിൽദാർ. പോലീസ്, ആർടിഒ, പൊതുമരാമത്ത്, നഗരസഭ ഉദ്യോഗസ്ഥരെയാണ് തലപ്പിള്ളി തഹസിൽദാർ രാജേഷ് മാരാത്ത് രൂക്ഷമായിവിമർശിച്ചത്. പ്രദേശത്ത് നോപാർക്കിംഗ് ബോർഡുകൾ സ്ഥാപിക്കണമെന്നും കുന്നിൻമുകളിൽ അപകടാവസ്ഥയിൽനിൽക്കുന്ന മരങ്ങൾ മുറിച്ചുമാറ്റണമെന്നുമുള്ള താലൂക്ക് വികസനസമിതിയോഗ തീരുമാനങ്ങൾ നടപ്പാക്കാത്തതിനെതിരേയാണ് തഹസിൽദാർ രൂക്ഷവിമർശനവുമായി രംഗത്തെത്തിയത്. കുന്നിനുസമീപത്ത് രാത്രിസമയങ്ങളിൽ വാഹന പാർക്കിംഗ് ഒഴിവാക്കാന്‌ കഴിഞ്ഞ താലൂക്ക് വികസനസമിതി യോഗത്തിൽ നിർദേശം നൽകിയിരുന്നു. നിരന്തരമായി വികസനസമിതി യോഗത്തിൽ പങ്കെടുക്കാത്ത ഉദ്യോഗസ്ഥർക്കെതിരേ നടപടി സ്വീകരിക്കാൻ ജില്ലാ കളക്ടർക്ക് റിപ്പോർട്ട് സമർപ്പിക്കാനും യോഗത്തിൽ തീരുമാനമെടുത്തു. യോഗത്തിൽ പങ്കെടുക്കാനെത്തുന്ന ഉദ്യോഗസ്ഥര്‌ വിഷയങ്ങൾ പഠിച്ചുവേണം യോഗങ്ങളിൽ പങ്കെടുക്കാനെന്നും രൂക്ഷമായ ഭാഷയിൽ തഹസിൽദാർ പറഞ്ഞു. യോഗത്തിൽ നഗരസഭ ചെയർമാൻ പി.എൻ. സുരേന്ദ്രൻ അധ്യക്ഷതവഹിച്ചു.

ക്ഷേത്രത്തിൽ മോഷണശ്രമം: ഒരാള്‌ അറസ്റ്റിൽ

വലപ്പാട്: തൃപ്രയാർ എളേടത്ത് പാണ്ടൻകുളങ്ങര ഭഗവതി ക്ഷേത്രചുറ്റമ്പലത്തിനുള്ളിലെ ഭണ്ഡാരം കുത്തിത്തുറന്ന് മോഷണംനടത്താൻ ശ്രമിച്ച കേസിലെ പ്രതി അറസ്റ്റിൽ. പെരിങ്ങോട്ടുകര അറയ്ക്കൽ വീട്ടിൽ ഷിബു(48) വിനെയാണ് വലപ്പാട് പോലീസ് അറസ്റ്റ് ചെയ്തത്. ്രവ്യാഴാഴ്ച രാത്രിയാണ് മോഷണം. ഷിബു വാടാനപ്പള്ളി, വലപ്പാട്, മതിലകം പോലീസ് സ്റ്റേഷനുകളിലായി വധശ്രമക്കേസിലും ആറ് മോഷണക്കേസുകളിലും പോലീസുദ്യോഗസ്ഥരുടെ ഡ്യൂട്ടി തടസപ്പെടുത്തിയ കേസിലും പ്രതിയാണ്. വലപ്പാട് സിഐ എം.കെ. രമേഷ്, സബ് ഇൻസ്പെക്ടർ ആന്‍റണി ജിമ്പിൾ, ജിഎസ്‌സിപിഒമാരായ സന്ദീപ്, സോഷി എന്നിവർ ചേർന്നാണ് പ്രതിയെ അറസ്റ്റ് ചെയ്തത്.

റോഡരികിൽ വൻതോതിൽ അറവുമാലിന്യം തള്ളിയനിലയിൽ

വടക്കാഞ്ചേരി: റോഡരികിൽ വൻതോതിൽ അറവുമാലിന്യംതള്ളിയനിലയിൽ കണ്ടെത്തി. ആര്യാംപാടം പുതുരുത്തി എൽഐസി ബസ് കാത്തിരിപ്പുകേന്ദ്രത്തിനു സമീപം കാനയിലാണ് അറവുമാലിന്യം തള്ളിയനിലയിൽ കണ്ടത്. വിദ്യാർഥികളടക്കം നിരവധിപേർ ബസ് കാത്തുനിൽക്കുന്ന പ്രദേശത്താണ് മാലിന്യംതള്ളിയത്. മാലിന്യം തള്ളിയതോടെ പ്രദേശത്ത് ദുർഗന്ധം വമിക്കുന്നു. കൂടാതെ വെള്ളച്ചാലിൽ അറവുമാലിന്യം തള്ളിയതിനാൽ കാനയിൽനിന്നു വെള്ളമൊഴുകി പ്രദേശത്തെ കിണറുകളിലേക്കെത്തുമോയെന്ന ആശങ്കയും നാട്ടുകാർക്കുണ്ട്. കുറ്റക്കാരെ കണ്ടെത്തി നടപടി സ്വീകരിക്കണമെന്നാണു നാട്ടുകാരുടെ ആവശ്യം.

ചേറ്റുവ മേഖലയിലെ കുടിവെള്ളപ്രശ്നം: പരിശോധനനടത്തി

വാടാനപ്പള്ളി: ഏങ്ങണ്ടിയൂർ ഗ്രാമപഞ്ചായത്തിലെ രണ്ടാംവാർഡിൽ ചേറ്റുവ തീരദേശമേഖലയിൽ കുടിവെള്ളം തടസപ്പെട്ട് കിടക്കുന്നത് പരിശോധിക്കാൻ വാട്ടർ അഥോറിറ്റി ഉദ്യോഗസ്ഥസംഘം സ്ഥലംസന്ദർശിച്ചു. വാട്ടർ അഥോറിറ്റി ഇരിങ്ങാലക്കുട ഡിവിഷൻ എക്സിക്യൂട്ടീവ് എൻജിനീയർ വിന്നി, അസിസ്റ്റന്‍റ് എക്സിക്യൂട്ടീവ് എൻജിനീയർ ലിറ്റി, അസിസ്റ്റന്‍റ് എൻജിനീയർ ഷാലി എന്നിവർ സ്ഥലത്തെത്തി പരാതിക്കാരുമായി കൂടിക്കാഴ്ചനടത്തി. മൂന്നുവർഷത്തോളമായി തീരദേശപ്രദേശത്തും പരിസരപ്രദേശങ്ങളിലും വാട്ടർ അഥോറിറ്റിയുടെ കുടിവെള്ളം തടസപ്പെട്ടത് ചൂണ്ടിക്കാണിച്ചു അഡ്വ.പി.ടി. ഷീജിഷ് മുഖേന സാമൂഹികപ്രവർത്തകൻ ലത്തീഫ് കെട്ടുമ്മൽ ഹൈക്കോടതിയിൽ പൊതുതാൽപര്യഹർജി ഫയൽ ചെയ്തിരുന്നു. കുടിവെള്ളക്ഷാമം പരിഹരിക്കണമെന്ന് ആവശ്യപ്പെട്ട് പലതവണ അധികാരികൾക്ക് മുമ്പിൽ പരാതിനൽകിയിട്ടും പരിഹാരം കാണാത്തതിനെ തുടർന്നാണ് ഹൈക്കോടതിയെ സമീപിച്ചതെന്ന് ലത്തീഫ് കെട്ടുമ്മൽ പറഞ്ഞു.

കുടുബങ്ങളിൽ പരിവർത്തനം വേണം: മാർ റാഫേൽ തട്ടിൽ

ചാലക്കുടി: നിത്യജീവിതത്തിലെ പരിവർത്തനം പോലെത്തന്നെ കുടുബങ്ങളിൽ പരിവർത്തനം വേണമെന്ന് സീറോ മലബാർ സഭ മേജർ ആർച്ച്ബിഷപ് മാർ റാഫേൽ തട്ടിൽ ഉദ്ബോധിപ്പിച്ചു. എലിഞ്ഞിപ്രഫ്രാൻസിസ് അസീസി ദേവാലയത്തിൽ പോർസ്യുങ്കല പൂർണദണ്ഡവിമോചന ദിനത്തിൽ ദിവ്യബലി അർപ്പിച്ചുസംസാരിക്കയായിരുന്നു മേജർ ആർച്ച്ബിഷപ്. കുടുംബങ്ങൾ സഭയുടെ തുടർച്ചയാണ്. നമ്മുടെ കുടുബങ്ങളുടെ ചിട്ടയും താളക്രമങ്ങളും നഷ്ടപ്പെടുന്നുണ്ടെന്നും ഇതുതിരുത്തണമെന്നും കുടുബങ്ങൾ പാലിക്കേണ്ട ക്രൈസ്തവ വിശ്വാസത്തിന്‍റെ ശൈലി കുടുബപ്രാർഥനയാണെന്നും ആർച്ച്ബിഷപ് തുടർന്നു പറഞ്ഞു. മാതാവിന്‍റെ ഗ്രോട്ടോ മാർ റാഫേൽ തട്ടിൽ വെഞ്ചരിച്ചു. പൂർണദണ്ഡവിമോചന ശുശ്രൂഷകൾക്കും ദിവ്യബലിക്കും ഇരിങ്ങാലക്കുട ബിഷപ് മാർ പോളി കണ്ണൂക്കാടനും ഫ്രാൻസിസ് അസീസിയുടെ തിരുശേഷിപ്പ് പ്രതിഷ്ഠക്ക് സെൻ്‍റ്് തോമസ് കപ്പൂച്ചിൻ പ്രൊവിൻഷ്യാൾ ഫാ. ജെയ്സൻ കാളനും കാർമികത്വം വഹിച്ചു.

ഇരിങ്ങാലക്കുട ജനറല്‍ ആശുപത്രി ഡയാലിസിസ് സെന്‍റര്‍ നാടിനു സമര്‍പ്പിച്ചു

ഇരിങ്ങാലക്കുട: ജനറല്‍ ആശുപത്രിയില്‍ നിര്‍മാണം പൂര്‍ത്തീകരിച്ച ഡയാലിസിസ് സെന്‍ററിന്‍റെ ഉദ്ഘാടനം ആരോഗ്യമന്ത്രി വീണാ ജോര്‍ജ് നിര്‍വഹിച്ചു. ഓണ്‍ലൈനായി പൊറത്തിശേരി കുടുംബാരോഗ്യകേന്ദ്രത്തിലെ നവീകരിച്ച ഒപി ബ്ലോക്കിന്‍റെയും കാറളം പഞ്ചായത്തിലെ നവീകരിച്ച വെള്ളാനി സബ്സെന്‍ററിന്‍റെയും ഉദ്ഘാടനം നിര്‍വഹിച്ചു. ഉന്നത വിദ്യാഭ്യാസമന്ത്രി ഡോ. ആര്‍. ബിന്ദു അധ്യക്ഷത വഹിച്ചു. സെന്‍ററിൽ ഒരേസമയം 10 പേര്‍ക്ക് ഡയാലിസിസ് ചെയ്യാന്‍ സാധിക്കും. 2012 മുതല്‍ ജനറല്‍ ആശുപത്രിയായി പ്രവര്‍ത്തിച്ചുവരുന്ന ആശുപത്രിയിലെ ദീര്‍ഘകാല ആവശ്യമായിരുന്നു ഡയാലിസിസ് സെന്‍റര്‍. മൂന്നുകോടി 98 ലക്ഷം രൂപ ചെലവിട്ടാണ് ഇരിങ്ങാലക്കുട ജനറല്‍ ആശുപത്രിയില്‍ ഡയാലിസിസ് കെട്ടിടം നിര്‍മിച്ചത്. ഒരു കോടി 29 ലക്ഷം രൂപ ഉപയോഗിച്ചാണ് ഡയാലിസിസ് സെന്‍ററില്‍ ഡയാലിസിസ് മെഷീനും അനുബന്ധ ഉപകരണങ്ങളും സജ്ജമാക്കിയിരിക്കുന്നത്. ആരോഗ്യവകുപ്പ് ഡയറക്ടര്‍ ഡോ. കെ.കെ. റീന, ജില്ലാ മെഡിക്കല്‍ ഓഫീസര്‍ ഡോ. ടി.പി. ശ്രീദേവി, ജില്ലാ പ്രോഗ്രാം മാനേജര്‍ ഡോ. പി. സജീവ്‌കുമാര്‍ എന്നിവര്‍ മുഖ്യാതിഥികളായി. ഇരിങ്ങാലക്കുട നഗരസഭ ചെയര്‍പേഴ്‌സണ്‍ മേരിക്കുട്ടി ജോയ്, ഇരിങ്ങാലക്കുട ബ്ലോക്ക് പഞ്ചായത്ത് പ്രസിഡന്‍റ് ലളിത ബാലന്‍, കാറളം പഞ്ചായത്ത് പ്രസിഡന്‍റ് ബിന്ദു പ്രദീപ്, വിവിധ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍മാരായ അംബിക പള്ളിപ്പുറത്ത്, ഫെനി എബിന്‍ വെള്ളാനിക്കാരന്‍, സി.സി. ഷിബിന്‍, ജെയ്‌സണ്‍ പാറേക്കാടന്‍, ജില്ലാ പഞ്ചായത്ത് വാര്‍ഡ് മെമ്പര്‍ ഷീല ജയഘോഷ്, വാര്‍ഡ് കൗണ്‍സിലര്‍ പി.ടി. ജോര്‍ജ്, ആശുപത്രി സൂപ്രണ്ട് ഡോ. എം.ജി. ശിവദാസ്, ജനപ്രതിനിധികള്‍, ആരോഗ്യ‌വകുപ്പ് ഉദ്യോഗസ്ഥര്‍, ആശുപത്രി വികസന‌സമിതി അംഗങ്ങള്‍ തുടങ്ങിയവര്‍ പങ്കെടുത്തു.

സെന്‍റ് ജോസഫ്‌സ് കോളജിലെ എന്‍എസ്എസ് സുവര്‍ണജൂബിലി ആഘോഷങ്ങള്‍ തുടങ്ങി

ഇരിങ്ങാലക്കുട: സെന്‍റ് ജോസഫ്‌സ് കോളജിലെ എന്‍എസ്എസ് യൂണിറ്റുകള്‍ സ്ഥാപിതമായി 50 വര്‍ഷം പിന്നിടുന്നതിന്‍റെ ഭാഗമായി സുവര്‍ണപഥം എന്ന പേരില്‍ സുവര്‍ണജൂബിലി ആഘോഷങ്ങള്‍ക്കു തുടക്കം‌കുറിച്ചു. വ്യത്യസ്തമായ 50 കര്‍മപദ്ധതികളാണു സുവര്‍ണജൂബിലി ആഘോഷത്തോടനുബന്ധിച്ചു നടപ്പാക്കുന്നത്. സംസ്ഥാന എന്‍എസ്എസ് ഓഫീസര്‍ ഡോ. ആര്‍.എന്‍. അന്‍സര്‍ ഉദ്ഘാടനം നിര്‍വഹിച്ചു. പ്രിന്‍സിപ്പല്‍ സിസ്റ്റര്‍ ഡോ. ബ്ലെസി അധ്യക്ഷത വഹിച്ചു. തൃശൂര്‍ ജില്ല എന്‍എസ്എസ് കോ-ഓര്‍ഡിനേറ്റര്‍ ഡോ. രഞ്ജിത്ത് വര്‍ഗീസ്, എന്‍എസ്എസ് പ്രോഗ്രാം ഓഫീസര്‍ വീണ സാനി, കോളജിലെ സെല്‍ഫ് ഫിനാന്‍സിംഗ് കോ-ഓര്‍ഡിനേറ്ററും എന്‍എസ്എസിന്‍റെ ആദ്യ ബാച്ച് വിദ്യാര്‍ഥിയുമായ സിസ്റ്റര്‍ ഡോ. റോസ് ബാസ്റ്റിന്‍, എന്‍എസ്എസ് പ്രോഗ്രാം ഓഫീസര്‍ ഡോ. എന്‍. ഉര്‍സുല, അധ്യാപകരായ ഡി. മഞ്ജു, കെ.ഡി. ധന്യ, പ്രമീജ, എന്‍എസ്എസ് വോളന്‍റിയര്‍ അരുണിമ എന്നിവര്‍ പ്രസംഗിച്ചു.

ദേശീയപാതയോരത്തു മാലിന്യം തള്ളിയവരെ കൈയോടെ പിടികൂടി ഹരിതകർമസേന

കൊരട്ടി: ദേശീയപാത പൊങ്ങത്തിനും ചിറങ്ങരയ്ക്കും ഇടയിലുള്ള പാതയോരത്ത് പ്ലാസ്റ്റിക് അടക്കമുള്ള അജൈവമാലിന്യം തള്ളിയവരെ കൈയോടെ പിടികൂടി ഹരിത കർമസേനാംഗങ്ങൾ. അങ്കമാലി പുളിയനം ഭാഗത്തെ ഓൺലൈൻ ബിസിനസ് കേന്ദ്രത്തിലെ തെർമോക്കോൾ, പ്ലാസ്റ്റിക് തുടങ്ങിയ മാലിന്യങ്ങൾ കണ്ടെയ്നറിൽ കൊണ്ടുവന്ന് തള്ളുന്നതിനിടെയാണ് വാർഡ് കേന്ദ്രീകരിച്ച് മാലിന്യം ശേഖരിക്കുന്ന ഹരിതകർമസേനയുടെ ശ്രദ്ധയിൽപ്പെട്ടത്. വാഹനം ഹരിയാന രജിസ്ട്രേഷനിലുള്ളതാണ്. വണ്ടി തടഞ്ഞ ഹരിതകർമസേ നാംഗങ്ങൾ വഴിവക്കിൽ തള്ളിയ മാലിന്യം വാഹനത്തിൽ തിരിച്ചു കയറ്റിയശേഷം പഞ്ചായത്ത് സെ ക്രട്ടറിയെ വിവരം അറിയിച്ചു. സെ ക്രട്ടറി വാഹനനമ്പർ കൊരട്ടി പോലീസിനു നൽകിയതിനെ തു ടർന്ന് കണ്ടെയ്നർ വാഹനത്തിന്‍റെ ഉടമയെ കണ്ടെത്താനായി. ഇതിനിടെ വാഹനവുമായി ചിറങ്ങരയിൽ‌നിന്നും അങ്കമാലി ഭാഗത്തേക്കു യൂ ടേൺ എടുത്തു പോകുന്നതിനിടെ ഹരിതകർമസേനയിലെ സാജു ഗോപൻ, രാജേഷ്, ഡ്രൈവർ നിതിൻ എന്നിവർ അങ്കമാലി പോലീസ് എത്തുന്നതു‌വരെ പിൻതുടർന്നു. തുടർന്ന് അങ്കമാലി പോലീസിന്‍റെ സഹായത്തോടെ കരയാംപറമ്പുനിന്ന് വാഹനം തിരിച്ച് കൊരട്ടി സ്റ്റേഷനിലെത്തിച്ചു. പാതയോരത്ത് മാലിന്യം തളളിയതിന് ചട്ടം അനുശാസിക്കുന്ന തൽസമയ പിഴയായ 5000 രൂപ പഞ്ചായത്ത് ഈടാക്കി. ഹരിത‌കർമസേന കോ-ഒാർഡിനേറ്റർ എം. ആർ. രമ്യയുടെ നേതൃത്വത്തിൽ 19 വാർഡിലും കുറ്റമറ്റ‌രീതിയിൽ മാലിന്യശേഖരണം നടക്കുന്നതിനിടെയാണ് സാമൂഹ്യവിരുദ്ധർ അലക്ഷ്യമായി പാതയോരങ്ങളിൽ മാലിന്യം തള്ളുന്നത്.

മാലിന്യത്തില്‍നിന്ന് വിസ്മയത്തിലേക്ക്; ക്രൈസ്റ്റ് കോളജില്‍ "റിജുവനേറ്റ് 2025'

ഇരിങ്ങാലക്കുട: ക്രൈസ്റ്റ് കോളജ് എന്‍എസ്എസ് യൂണിറ്റ് കരകൗശലപ്രദര്‍ശനം സംഘടിപ്പിച്ചു. മാലിന്യവസ്തുക്കളില്‍നിന്ന് നിര്‍മിച്ച കരകൗശലവസ്തുക്കളാണു പ്രദര്‍ശിപ്പിച്ചിരുന്നത്. പുനരുപയോഗത്തിന്‍റെ പ്രാധാന്യവും പരിസ്ഥിതി ബോധവത്കരണവും മുന്‍നിര്‍ത്തി സംഘ ടിപ്പിച്ച പ്രദര്‍ശനത്തില്‍ പ്ലാസ്റ്റിക് ബോട്ടിലുകള്‍, പഴയ ന്യൂസ് പ്പേപ്പറുകള്‍, പഴയ തുണികള്‍, കാര്‍ഡ്‌ബോര്‍ഡ്, സിഡികള്‍ തുടങ്ങിയവ പുനരുപയോഗിച്ച് എന്‍എസ്എസ് വോളന്‍റിയേഴ്‌സ് നിര്‍മിച്ച വസ്തുക്കള്‍ കാഴ്ചക്കാരില്‍ കൗതുകം നിറച്ചു. കേരള കലാമണ്ഡലം മുന്‍ വൈസ് ചാന്‍സലര്‍ ഡോ. ടി.കെ. നാരായണന്‍ പ്രദര്‍ശനം ഉദ്ഘാടനം ചെയ്തു. സ്റ്റേറ്റ് എന്‍എസ് എസ് പ്രോഗ്രാം ഓഫീസര്‍ ഡോ. ആര്‍.എന്‍. അന്‍സര്‍, ജില്ല എന്‍എസ്എസ് കോ-ഓര്‍ഡിനേറ്റര്‍ രഞ്ജിത്ത്, ക്രൈസ്റ്റ് കോളജ് പ്രിന്‍സിപ്പല്‍ റവ.ഡോ. ജോളി ആന്‍ഡ്രൂസ്, മാനേജര്‍ ഫാ. ജോയ് പീണിക്കപ്പറമ്പില്‍, പ്രോഗ്രാം ഓഫീസര്‍ ഡോ. അനുഷ മാത്യു, അസി. പ്രഫ. വി.പി. ഷിന്‍റോ എന്നിവരുടെ സാന്നിധ്യത്തില്‍ പ്രദര്‍ശനം ആരംഭിച്ചു.

വനിതാ ഫോട്ടോഗ്രാഫര്‍മാരുടെ ഫോട്ടോപ്രദര്‍ശനം ഇന്നുമുതല്‍

മറ്റത്തൂര്‍: ചുങ്കാലില്‍ പ്രവര്‍ത്തിക്കുന്ന ഫോട്ടോമ്യൂസിന്‍റെ ആഭിമുഖ്യത്തില്‍ സംസ്ഥാനത്തെ വിവിധ ഭാഗങ്ങളില്‍ നിന്നുള്ള 17 ഛായഗ്രഹണ കലാകാരികളുടെ സംഗമം എന്ന പേരിലിലുള്ള ഫോട്ടോപ്രദര്‍ശനം ഇന്നു തുടങ്ങും. സമാനതകള്‍ ഇല്ലാത്ത ഛായാഗ്രഹണ വീക്ഷണങ്ങള്‍ ഒത്തുചേരുന്ന പ്രദര്‍ശനത്തില്‍ 38 ഛായാചിത്രങ്ങളുണ്ടാകും. വിവിധ മേഖലകളില്‍ പ്രവര്‍ത്തിക്കുന്ന വനിതകളുടെ ഛാ യാഗ്രഹണ വൈദഗ്ധ്യത്തിനു പ്രാമുഖ്യം നല്‍കുന്നതോടൊപ്പം ലിംഗ സാമൂഹിക സമത്വസന്ദേശവും സംഗമം ഉള്‍ക്കൊള്ളുന്നു. നാളെ വൈകുന്നേരം നാലിന് തദ്ദേശവകുപ്പ് അസി.ഡയറക്ടര്‍ ബിന്ദു പരമേശ്വരന്‍ പ്രദർശനം ഉദ്ഘാടനം ചെയ്യും. മറ്റത്തൂര്‍ പഞ്ചായത്ത് പ്രസിഡന്‍റ് അശ്വതി വിബി, ചിത്രകല അധ്യാപിക പ്രിയ ഷിബു തുടങ്ങി യവര്‍ പങ്കെടുക്കും. ഈ മാസം 31 വരെയാണു പ്രദര്‍ശനം.

അന്യായ ന്യായവിലയില്‍ തിരുത്ത്; കാക്കത്തുരുത്തി നിവാസികള്‍ക്ക് ആശ്വാസം

എടതിരിഞ്ഞി: വില്ലേജിലെ രണ്ട് സര്‍വേ നമ്പറുകളിലെ ഭൂമിയുടെ തിരുത്തിയ ന്യായവിലകള്‍ ഗസറ്റില്‍ പ്രസിദ്ധീകരിച്ചതോടെ കാക്കത്തുരുത്തി നിവാസികള്‍ ആശ്വാസത്തില്‍. സര്‍വേ 462, 463/1 നമ്പറുകളില്‍ 2010 ല്‍ കുറച്ചിരുന്ന വിലകളാണ് പ്രദേശവാസിയായ ആനക്കോട്ട് ഷംസുദ്ദീന്‍ ജില്ല കളക്ടര്‍ക്കും സബ് കളക്ടര്‍ക്കും നല്‍കിയ പരാതികളെത്തുടര്‍ന്ന് 14 വര്‍ഷങ്ങള്‍ക്കു ശേഷം ഗസറ്റില്‍ വിജ്ഞാപനം ചെയ്തുവന്നത്. ന്യായവില നിലവില്‍‌വന്ന 2010 ല്‍തന്നെ വില്ലേജില്‍ പൊതുവേയും ഈ രണ്ടു നമ്പറുകളില്‍ പ്രത്യേകിച്ചും വില ഉയര്‍ന്നതാണെന്ന് പരാതിയുയര്‍ന്നിരുന്നു. പഞ്ചായത്ത് റോഡുള്ള ഭൂമിക്ക് രണ്ടര സെന്‍റിന് (ഒരു ആര്‍) 7.5 ലക്ഷം രൂപയാണ് അന്നു നിശ്ചയിച്ചത്. എന്നാല്‍, അതേവര്‍ഷം‌തന്നെ കുടുംബി എഡ്യൂക്കേഷന്‍ ട്രസ്റ്റ് തൃശൂര്‍ സബ് കളക്ടര്‍ക്ക് അപേക്ഷ നല്‍കുകയും പഞ്ചായത്ത് റോഡുള്ള ഭൂമിക്ക് ഒരു ആറിന് 85000 രൂപയാക്കി വിലകുറച്ച് ഉത്തരവ് നേടുകയും ചെയ്തു. എന്നാല്‍ കുറവു വരുത്തിയ വിലകള്‍ ഗസറ്റില്‍ പ്രസിദ്ധീകരിച്ചില്ല. ട്രസ്റ്റിന്‍റെ രജിസ്‌ട്രേഷനെത്തുന്നവരോട് ഉയര്‍ന്ന ന്യായവിലയുടെ സ്റ്റാമ്പ് ഡ്യൂട്ടി‌തന്നെ അടക്കണമെന്ന് രജിസ്‌ട്രേഷന്‍ ഓഫീസ് നിര്‍ദേശിച്ചു. സര്‍ക്കാര്‍ കാലാകാലങ്ങളില്‍ ന്യായവില ഉയര്‍ത്താന്‍ തുടങ്ങിയതോടെ 7.5 ലക്ഷമെന്നത് 19.80 ലക്ഷം രൂപയായി ഉയര്‍ന്നു. ഇതോ ടെ പ്രദേശത്തെ ജനങ്ങളുടെ ഭൂമി രജിസ്‌ട്രേഷന്‍ ആവശ്യങ്ങള്‍ മുടങ്ങി. രണ്ട് നമ്പറുകളിലുമായി 115 ഏക്കര്‍ 86 സെന്‍റ് ഭൂമിയുണ്ട്. കൈവശക്കാരുടെ എണ്ണം 500ല്‍ അധികവും. വിഷയം ചൂണ്ടിക്കാട്ടി ഷംസുദീന്‍ 2022‌ലെ ജനസമക്ഷം ഫയല്‍ അദാലത്തില്‍ ജില്ലാകളക്ടര്‍ക്ക് അപേക്ഷ നല്‍കി. വിലകള്‍ ഗസറ്റില്‍ പ്രസിദ്ധപ്പെടുത്താന്‍ സബ് കളക്ടര്‍ക്ക് നിര്‍ദേശം നല്‍കിയെങ്കിലും നടന്നി ല്ല. അവസാനം വിഷയത്തിന്‍റെ സങ്കീര്‍ണതയും ജില്ലാകളക്ടറുടെ ഉത്തരവുകളും കാണിച്ച്് കഴിഞ്ഞമാസം തൃശൂര്‍ സബ് കളക്ടര്‍ക്ക് അപേക്ഷ നല്‍കി. വിഷയം ബോധ്യപ്പെട്ട സബ് കളക്ടര്‍ തിരുത്തിയ ന്യായവിലകള്‍ ഗസറ്റില്‍ പ്രസിദ്ധീകരിക്കാന്‍ ഇരിങ്ങാലക്കുട റവന്യൂ ഡിവിഷനല്‍ ഓഫീ സര്‍ക്ക് നിര്‍ദേശം നല്‍കി. ഗസറ്റില്‍ വിജ്ഞാപനം ചെയ്ത ു. പിഡബ്ല്യുഡി റോഡുള്ള ഭൂമികള്‍ക്ക് ഒരു ആറിന് 85000 രൂപ, സ്വകാര്യറോഡുള്ള ഭൂമികള്‍ക്ക് 75000 രൂപ, വഴിയില്ലാത്ത ഭൂമികള്‍ക്ക് 55 000 രൂപ എന്നിങ്ങനെയാണ് വില.

ചാരായവില്പന: ഒരാൾ അറസ്റ്റിൽ

അതിരപ്പിള്ളി: ആദിവാസി ഉന്നതികൾ കേന്ദ്രീകരിച്ച് ചാരായ വിൽപ്പന നടത്തിവന്നിരുന്ന വെറ്റിലപ്പാറ സ്വദേശി കല്ലേലി വീട്ടിൽ വിനീഷിനെ (44) ചാലക്കുടി റേഞ്ച് എക്സൈസ് ഇൻസ്പെക്ടർ യു. ഹരീഷിന്‍റെ നേതൃത്വത്തിലുള്ള സംഘം അറസ്റ്റ് ചെയ്തു. ഉന്നതികളിലേക്കു വില്പനയ് ക്കായി കൊണ്ടുപോകുകയായിരുന്ന ഒന്നര ലിറ്റർ ചാരായവുമായാണ് ഇയാൾ പിടിയിലായത്. ലിറ്ററിന് 1000 രൂപക്കാണ് ഇയാൾ ചാരായം ചില്ലറ വില്പന നടത്തിയിരുന്നത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

പെരിങ്ങൽകുത്ത് ജലനിരപ്പ് താഴ്ത്തണമെന്ന് ആവശ്യപ്പെട്ട് ധർണ നടത്തും

ചാലക്കുടി: പെരിങ്ങൽക്കുത്ത് ഡാമിലെ ജലനിരപ്പ് മഴക്കാലത്ത് 415 മീറ്ററിൽ താഴെ നിർത്തി വെള്ളപ്പൊക്ക നിയന്ത്രണം നടത്തണമെന്നാവശ്യപ്പെട്ട് ചാലക്കുടി റിവർ പ്രൊട്ടക്‌ഷൻ ഫോറവും ജല ജാഗ്രതാസമിതിയുടെയും നേതൃത്വത്തിൽ അഞ്ചിന് 10.30‌ന് കെഎസ്ഇബി ഓഫീസിനു മുൻപിൽ ധർണ നടത്താൻ തീരുമാനിച്ചു. സനീഷ്കുമാർ ജോസഫ് എംഎൽഎ യോഗം ഉദ്ഘാടനം ചെയ്തു. കെ.കെ. ഗോപാലകൃഷ് ണൻ അധ്യക്ഷത വഹിച്ചു. എസ്പി രവി, അഡ്വ. ബിജു എസ്. ചിറയത്ത്, ഡോ. ബി. രാധാരമണൻ, ഡെന്നി മൂത്തേടൻ, എം. മോഹൻദാസ്, ജയൻ ജോസഫ് പട്ടത്ത്, കെ.എം. ഹരി നാരായണൻ, കലാഭവൻ ജയൻ, സുരേഷ് മുട്ടത്തി തുടങ്ങിയവർ പ്രസംഗിച്ചു.

സെക്യൂരിറ്റി ജീവനക്കാരൻ മരിച്ച നിലയിൽ

ആമ്പല്ലൂര്‍: സുരക്ഷാ ജീവനക്കാരൻ ജോലിസ്ഥലത്ത് മരിച്ചനിലയിൽ. ആമ്പല്ലൂർ ദേശീയപാതയ്ക്ക് സമീപം പൈനാടത്ത് ഷോപ്പിംഗ് കോംപ്ലക്സിലെ സെക്യൂരിറ്റി ജീവനക്കാരനായ മരത്താക്കര കുഞ്ഞനംപാറ സ്വദേശി പുഴയ്ക്കല്‍ വീട്ടില്‍ ഭാസ്‌കരനാണ് (64) മരിച്ചത്. ഏതാനും ദിവസങ്ങളായി അസുഖം മൂലം അവധിയിലായിരുന്ന ഭാസ്കരൻ വെള്ളിയാഴ്ചയാണ് ജോലിയില്‍ തിരികെ പ്രവേശിച്ചത്. ശനിയാഴ്ച വെളുപ്പിന് ജോലിക്കെത്തിയ മറ്റൊരു സെക്യൂരിറ്റി ജീവനക്കാരനാണ് ഭാസ്‌കരനെ മരിച്ചനിലയില്‍ കണ്ടത്. ഭാര്യ: അംബിക. മക്കൾ: അനു, ജിനു. മരുമകൻ: ഷൈജു.

ഡെങ്കിപ്പനി ബാധിച്ച് ഇതര സംസഥാന തൊഴിലാളി മരിച്ചു

ഇരിങ്ങാലക്കുട: ഡെങ്കിപ്പനി ബാധിച്ച് ഇതര സംസഥാന തൊഴിലാളി മരിച്ചു. വെസ്റ്റ് ബംഗാള്‍ ജല്‍പൈഗുരി ബസുലൈനില്‍ കാര്‍ത്തിക് മകന്‍ സപാന്‍ കഹാബ് (25) ആണ് മരിച്ചത്. കുടുംബത്തോടൊപ്പം തുമ്പൂരിലായിരുന്നു താമസം. വീട്ടുജോലികള്‍ക്കായി എത്തിയതാണ് സപാനും ഭാര്യ ഭാര്യ കുസുമവും. കഴിഞ്ഞദിവസം പനി വന്നതോടെ വേളൂക്കര പ്രാഥമികാരോഗ്യകേന്ദ്രത്തിലും പിന്നീട് ഇരിങ്ങാലക്കുട ജനറല്‍ ആശുപത്രിയിലും ചികിത്സ തേടിയിരുന്നു. വിദഗ്ദ ചികിത്സയ്ക്കായി തൃശൂര്‍ മെഡിക്കല്‍ കോളജില്‍ പ്രവേശിപ്പിച്ചിരുന്നു. ആശുപത്രിയില്‍ ചികിത്സയില്‍ കഴിയുമ്പോഴാണ് മരണം സംഭവിച്ചത്. മൃതദേഹം ഇന്ന് രാവിലെ നാട്ടിലേക്ക് കൊണ്ടുപോകും.

മറ്റത്തൂര്‍ സെന്‍റ്് ജോസഫ്‌സ് സ്‌കൂളില്‍ മെറിറ്റ് ഡേ ആഘോഷിച്ചു

മറ്റത്തൂര്‍: സെന്‍റ്് ജോസഫ്‌സ് യുപി സ്‌കൂളില്‍ മെറിറ്റ് ഡേ ആഘോഷവും പിടിഎ പൊതുയോഗവും സംഘടിപ്പിച്ചു. സ്‌കൂള്‍ മാനേജര്‍ ഫാ. തോമസ് വെളക്കനാടന്‍ ഉദ്ഘാടനം ചെയ്തു. റിന്‍സി ജോബ് അധ്യക്ഷത വഹിച്ചു. എസ്എസ്എല്‍സി പരീക്ഷയില്‍ ഫുള്‍ എ പ്ലസ് നേടിയ പൂര്‍വവിദ്യാര്‍ഥികളെയും യുഎസ് എസ്, എല്‍എസ്എസ് പരീക്ഷ ജേതാക്കളെയും അനുമോദിച്ചു. പഞ്ചായത്തംഗം എം.എസ്. സുമേഷ്, ഫാ. ജെയ്‌സണ്‍ ചൊവ്വല്ലൂര്‍, ഒഎസ്എ പ്രസിഡന്‍റ്് ബെന്നി തൊണ്ടുങ്ങല്‍, വിദ്യാലയ മാനേജ്‌മെന്‍റ് കമ്മിറ്റി അംഗങ്ങളായ ജസ്റ്റിന്‍ മങ്കുഴി, ലിനോ മൈക്കിള്‍, പ്രധാനാധ്യാപിക ടിസി പി. ആന്‍റണി, ട്രസ്റ്റി തോമസ് വള്ളിയാംതടത്തില്‍, ഉണ്ണിമേരി തോമസ്, തെരേസ് ജോസ്, റിയ തോമസ് എന്നിവര്‍ പ്രസംഗിച്ചു. ‌രക്ഷിതാക്കള്‍ക്കു ഫലവൃക്ഷത്തൈകള്‍ വിതരണം ചെയ്തു.

രോഗങ്ങൾക്കുമുന്നിൽ ഒരാൾപോലും നിസഹായനാകില്ല: മന്ത്രി വീണാ ജോർജ്

മാള: വിവിധങ്ങളായ രോഗങ്ങൾക്കുമുമ്പിൽ ഒരാൾപോലും നിസഹായനായി നിൽക്കേണ്ട അവസ്ഥ കേരളത്തിൽ ഇനി ഉണ്ടാകില്ലെന്ന് ആരോഗ്യമന്ത്രി വീണ ജോർജ്. മാള സാമൂഹ്യ‌ആരോഗ്യകേന്ദ്രത്തെ ബ്ലോക്ക് കുടുംബാരോഗ്യകേന്ദ്രമായി ഉയർത്തുന്നചടങ്ങ് നിർവഹിച്ചു സംസാരിക്കുകയായിരുന്നു മന്ത്രി. ഇതോടൊപ്പം പേരൂർക്കാട് ജനകീയ ആരോഗ്യകേന്ദ്രത്തിന്‍റെ ഉദ്ഘാടനവും മന്ത്രി നിർവഹിച്ചു. ചികിത്സാചെലവുകൾ കുറയ്ക്കുന്ന കാര്യത്തിൽ കേരളം ഏറെ വിജയിച്ചുവെന്ന് മന്ത്രി കൂട്ടിച്ചേർത്തു. വി.ആർ. സുനിൽകുമാർ എം എൽ എ അധ്യക്ഷത വഹിച്ചു. ആരോഗ്യകേരളം ഡയറക്ടർ ഡോ. കെ.ജെ. റീന, ഡിഎംഒ ഡോ. ടി.പി. ശ്രീദേവി, ഡോ. സജീവ്‌കുമാർ, ബ്ലോക്ക് പ്രസിഡന്‍റ് രേഖ ഷാന്‍റി, വിവിധ പഞ്ചായത്ത് പ്രസിഡന്‍റുമാരായ ബിന്ദു ബാബു, കെ.ആർ. ജോജോ, പി.വി. വിനോദ്. ആശുപത്രി സൂപ്രണ്ട് ഡോ. ആശ സേവ്യർ എന്നിവർ പ്രസംഗിച്ചു.

എംഎൽഎയുടെ ഇടപെടൽ; നാഷണൽ ഹൈവയിൽ അണ്ടർപാസിനു സാധ്യതയേറുന്നു

കയ്പമംഗലം: എംഎൽഎയുടെ ഇടപെടൽ; നാഷണൽ ഹൈവയിലെ അണ്ടർപാസിനു സാധ്യതയേറുന്നു. ശ്രീനാരായണപുരം ഗ്രാമപഞ്ചായത്തിലെ സാഹിബിന്‍റെ പള്ളിനടയിൽ നാഷണൽ ഹൈവയുടെ നിർമാണവുമായി ബന്ധപ്പെട്ട് പൊതുജനങ്ങൾക്കുനേരിടേണ്ടിവരുന്ന യാത്രാ ക്ലേശവും വിദ്യാലയത്തിലേക്കും പൊതു‌സ്ഥാപനങ്ങളിലേക്കും പൊതുജനങ്ങൾക്ക് എത്തിപ്പെടാൻ നേരിടുന്ന പ്രയാസങ്ങളെ ചൂണ്ടിക്കാട്ടി ഇ.ടി. ടൈസൺ എം എൽഎക്ക് ഗ്രാമപഞ്ചായത്തിന്‍റെ നേതൃത്വത്തിൽ ഭീമഹർജി നൽകിയതിന്‍റെ അടിസ്ഥാനത്തിലാണ് അണ്ടർപാസ് അനുവദിക്കുവാൻ സാധിക്കുമോ എന്ന ആലോചനയിലേക്ക് സർക്കാർ എത്തിയത്. കഴിഞ്ഞദിവസം മുഖ്യമന്ത്രി ജില്ലയിലെ എംഎൽഎമാരുടെ യോഗം വിളിച്ചുചേർത്തപ്പോഴും ഇ.ടി. ടൈസൺ എംഎൽഎ മുഖ്യമന്ത്രിയുടെ ശ്രദ്ധയിലും ഈ വിഷയം പെടുത്തിയിരുന്നു. ജനപ്രതിനിധികൾ, വിദ്യാർഥികൾ, കുടുംബശ്രീ പ്രവർത്തകർ, വ്യാപാരികൾ പൊതുപ്രവർത്തകർ അങ്ങനെ നിരവധിപേർ ആവശ്യപ്പെട്ടതനുസരിച്ച് നിരന്തരമായി ജില്ലാ വികസന‌സമിതി യോഗങ്ങളിലും എംഎൽഎ ഇക്കാര്യം ആവശ്യപ്പെട്ടിരുന്നു. അതുകൊണ്ടുതന്നെ ഇതിന്‍റെ ആവശ്യകത ഗൗരവപൂർവം പരിഗണിക്കുമെന്നും നാഷണൽ ഹൈവേ അഥോറിറ്റിയുമായും ശിവാലയ കമ്പനിയുമായും കൂടിയാലോചിച്ച് അനുഭാവപൂർവമായ നടപടി സ്വീകരിക്കുമെന്നും ജില്ലാ കളക്ടർ അർജുൻ പാണ്ഡ്യ പറഞ്ഞു. ഇ.ടി. ടൈസൺ എംഎൽഎ, ഗ്രാമപഞ്ചായത്ത് പ്രസിഡന്‍റ് എം. എസ്. മോഹനൻ, ഗ്രാമപഞ്ചായത്ത് വൈസ് പ്രസിഡന്‍റ്് സജിത പ്രദീപ്, സ്റ്റാൻഡിംഗ് കമ്മിറ്റി ചെയർമാൻമാരായ കെ.എ. അയ്യൂബ്, പി.എ. നൗഷാദ്, ജില്ലാ പഞ്ചായത്ത് മെമ്പർ സുഗത ശശിധരൻ, വാർഡ് മെമ്പർമാരായ ഇബ്രാഹിംകുട്ടി, ജയ സുനിൽരാജ്, ഡെപ്യൂട്ടി കളക്ടർ ജി.കെ.പ്രദീപ് , എൽഎ‌എൻഎച്ച് ഡെപ്യൂട്ടി കളക്ടർ കെ. രേവ, കൊടുങ്ങല്ലൂർ തഹസിൽദാർഎം. ശ്രീനിവാസ്, ഡെപ്യൂട്ടി തഹസിൽദാർ കെ.എം. റസിയ, വില്ലേജ് ഓഫീസർ എ.കെ. അബ്ദുൽഖാദർ, എൻഎച്ച് ലെയ്സൺ ഓഫീസർ കെ.ബി. ബാബു തുടങ്ങിയവർ കളക്ടറോടൊപ്പം ഉണ്ടായിരുന്നു.

രോഗനിർമാർജനവും പ്രതിരോധവും സർക്കാരിന്‍റെ പ്രഖ്യാപിതലക്ഷ്യം: മന്ത്രി

കൊരട്ടി: രോഗപ്രതിരോധവും രോഗനിർമാർജനവും സർക്കാരിന്‍റെ പ്രഖ്യാപിത ലക്ഷ്യങ്ങളാണെന്നും അടിസ്ഥാന സൗകര്യവികസനങ്ങൾ അടക്കം ആരോഗ്യമേഖലയിൽ ഫലപ്രദമായി ഇടപെടാൻ സർക്കാരിനു കഴിഞ്ഞതായും ആരോഗ്യമന്ത്രി വീണാ ജോർജ്. ഗോത്രമേഖലയിൽ മരണനിരക്ക് കുറയ്ക്കാൻ കഴിഞ്ഞതും കേരളത്തിൽ ഹൃദയാഘാതം‌മൂലം മരിക്കുന്നവരുടെ എ ണ്ണം 30 ശതമാനത്തിൽനിന്നും നാലു ശതമാനമാക്കി കുറയ്ക്കാൻ കഴിഞ്ഞതും ആരോഗ്യരംഗത്തെ സർക്കാരിന്‍റെ കാര്യക്ഷമമായ ഇടപെടൽ മൂലമാണെന്നും മന്ത്രി പറഞ്ഞു. തിരുമുടിക്കുന്ന് ഗാന്ധിഗ്രാം ത്വക് രോഗാശുപത്രിയിൽ 17 കോടി നബാഡ് ഫണ്ട് വിനിയോഗിച്ച് നിർമിച്ച പുതിയ ഐപി കെട്ടിടത്തിന്‍റെയും 2.5 കോടി എൻഎച്ച്എം ഫണ്ട് ഉപയോഗപ്പെടുത്തി നിർമിച്ച റീജിയണൽ ട്രെയിനിംഗ് സെന്‍റർ ഹോസ്റ്റലിന്‍റെയും ഉദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. മെഡിക്കൽ കോളജുകളിലും റീജിയണൽ കാൻസർ സെന്‍ററുകളിലും മാത്രമാണ് കാൻസർ ചികിത്സ നടത്തിയിരുന്നതെങ്കിൽ ഇന്ന് ജില്ലാ ആശുപത്രികളിലേക്ക് ചികിത്സ വികേന്ദ്രീകരിക്കാനായെന്നും ആർദ്രമിഷൻ നടപ്പിലാക്കിയതുവഴി ഏറ്റവും കൂടുതൽ തസ്തികകൾ ആരോഗ്യ മേഖലയിൽ സൃഷ്ടിക്കാനായെന്നും മന്ത്രി കൂട്ടിച്ചേർത്തു. കാലപ്പഴക്കം‌കൊണ്ട് ജീർണാവസ്ഥയിലായ, ചോർന്നൊലിക്കുന്ന കെട്ടിടങ്ങളിലായിരുന്നു 65 പുരുഷന്മാരും 23 വനിതകളും അടക്കം 88 അന്തേവാസികൾ കഴിഞ്ഞുവന്നിരുന്നത്. ഡോക്ടർമാർക്കുള്ള പരിശോധന മുറി, നഴ്സിംഗ് സ്റ്റേഷൻ, മിനി ഓപ്പറേഷൻ തിയേറ്റർ, ലാബ്, കോൺഫറൻസ് ഹാൾ, കിച്ചൺ, ഡൈനിംഗ് അടക്കം ആധുനിക ക്രമീകരണങ്ങളാണ് രണ്ടു ബ്ലോക്കുകളിലായി നിർമിച്ച ഐപി വിഭാഗത്തിൽ ഒരുക്കിയിരിക്കുന്നത്. റീജണൽ ട്രെയിനിംഗ് സെന്‍റർ ഹോസ്റ്റലിന്‍റെ ഉദ്ഘാടനവും നടന്നു. സനീഷ്‌കുമാർ ജോസഫ് എം എൽഎ അധ്യക്ഷനായി. ബ്ലോക്ക് പഞ്ചായത്ത് പ്രസിഡന്‍റ്് വേണു കണ്ടരുമഠത്തിൽ, ഗ്രാമപഞ്ചായത്ത് പ്രസിഡന്‍റ് പി.സി. ബിജു, ജില്ലാ മെഡിക്കൽ ഓഫീസർ ടി.പി. ശ്രീദേവി, ആരോഗ്യഡയറക്ടർ കെ.ജെ.റീന, അനിതകുമാരി, വാർഡ് മെമ്പർ ലിജോ ജോസ്, എൻഎച്ച്എം ജില്ലാ പ്രോഗ്രാം ഓഫീസർ പി. സജീവ്കുമാർ, വി. അജിത്കുമാർ, ആശുപത്രി സൂപ്രണ്ട് കെ. സ്നേഹജ എന്നിവർ പ്രസംഗിച്ചു.

കന്യാസ്ത്രീകളുടെ അറസ്റ്റ്: പ്രതിഷേധാഗ്നി പടരുന്നു

പുത്തൻവേലിക്കരയിൽ പ്രതിഷേധമിരന്പി പുത്തൻവേലിക്കര: ഛത്തീസ്ഗഡിൽ സിസ്റ്റേഴ്സിനെതിരേ നടക്കുന്ന കള്ളപ്രചാരണങ്ങൾക്കും അറസ്റ്റിനും എതിരേ പുത്തൻവേലിക്കരയിലെയും സമീപപ്രദേശങ്ങളിലെയും പള്ളികളിൽ നിന്നുള്ള വിശ്വാസികൾ അണിനിരന്നുകൊണ്ട് വൻ പ്രതിഷേധ റാലിയും പൊതുസമ്മേളനവും നടന്നു. സ്റ്റേഷൻ കടവുഭാഗത്തുനിന്നും ആരംഭിച്ച് പുത്തൻവേലിക്കര ബസാറിൽ പൊതുസമ്മേളനത്തോടുകൂടി പ്രതിഷേധപരിപാടി സമാപിച്ചു. സ്റ്റേഷൻ കടവിൽനിന്നും ആരംഭിച്ച പ്രതിഷേധ‌റാലി കോട്ടപ്പുറം രൂപത വികാരി ജനറാൾ മോൺ. റോക്കി റോബി കളത്തിൽ ഫ്ലാഗ് ഓഫ് ചെയ്തു. കോട്ടപ്പുറം രൂപതയിലെയും ഇരിങ്ങാലക്കുട രൂപതയിലെയും പുത്തൻവേലിക്കര മേഖലയിലുള്ള എല്ലാ പള്ളികളും ഒരുമിച്ചായിരുന്നു പ്രതിഷേധ സംഗമത്തി ൽ പങ്കെടുത്തത്. പൊതുസമ്മേളനം ഇരിങ്ങാലക്കുട രൂപത വികാരി ജനറാൾ ഫാ. ജോളി വടക്കൻ ഉദ്ഘാടനം ചെയ്തു. ഡിവൈൻ വോയ് സ് ചീഫ് എഡിറ്റർ പി.ജെ. ആന്‍റണി മുഖ്യപ്രഭാഷണം നടത്തി. മാനാഞ്ചേരിക്കുന്ന് സെന്‍റ്് പോൾസ് പള്ളി വികാരി ഫാ. ഷാജു കുരിശിങ്കൽ അധ്യക്ഷത വഹിച്ചു. കീഴൂപ്പാടം പള്ളി വികാരി ഫാ. ജോസഫ് ഒളാട്ടുപുറം,തിരുത്തിപ്പുറം പള്ളി വികാരി ഫാ. ജോയ് സ്രാമ്പിക്കൽ, കുരിശിങ്കൽ പള്ളി വികാരി ഫാ. ബിജു തേങ്ങാപ്പുരക്കൽ, കരോട്ടുകര പള്ളി വികാരി ഫാ. സുഭീഷ് വട്ടപ്പറമ്പിൽ, ജപമാല പള്ളി വികാരി ഫാ. ജോജോ പയ്യപ്പിള്ളി, മാളവന സെന്‍റ്് ജോർജ് പള്ളി വികാരി ഫാ. ജെയിംസ് അതിയുന്തൻ, തിരുത്തൂർ പള്ളി വികാരി ഫാ.ജോഷി മുട്ടിക്കൽ, പുത്തൻവേലിക്കര ഉണ്ണിമിശിഹാ പള്ളി വികാരി ഫാ. കോളിൻ ആട്ടോക്കാരൻ, മടത്തുംപടി ചാരിറ്റി കോൺവന്‍റ്് മദർ സുപ്പീരിയർ സിസ്റ്റർ റോസ് തെരേസ, മേരിവാർഡ് ഇംഗ്ലീഷ് മീഡിയം സ്കൂൾ പ്രിൻസിപ്പൽ സിസ്റ്റർ വിദ്യ, ഉണ്ണിമിശിഹാ പള്ളി കേന്ദ്രസമിതി പ്രസിഡന്‍റ് അബ്രഹാം കണ്ണങ്ങനാട്ടിൽ, കൈക്കാരന്മാർ തുടങ്ങിയവർ പ്രസംഗിച്ചു.

അമലയുടെ ആധുനിക ഗാസ്ട്രോ സെന്‍റർ ഇന്ന് ആരംഭിക്കും

തൃശൂർ: ഉദരരോഗികളുടെ സൗകര്യാർഥം കൂടുതൽ ആധുനികസൗകര്യങ്ങളോടെ അമലയുടെ ഗാസ്ട്രോ സെന്‍റർ പട്ടിക്കാട് ചെന്പൂത്ര പി.എം. ആർക്കേഡിൽ ഇന്നു മുതൽ പ്രവർത്തനം ആരംഭിക്കും. രാവിലെ 9 .30 ന് മന്ത്രി കെ. രാജൻ ഉദ്ഘാടനം ചെയ്യും. ചടങ്ങിൽ ദേവമാതാ വികാർ പ്രൊവിൻഷ്യൽ ഫാ. ഡേവി കാവുങ്കൽ, തൃശൂർ തഹസിൽദാർ ടി. ജയശ്രീ, പാണഞ്ചേരി പഞ്ചായത്ത് പ്രസിഡന്‍റ് പി.പി. രവീന്ദ്രൻ, അമല ഡയറക്ടർ ഫാ. ജൂലിയസ് അറയ്ക്കൽ എന്നിവർ പങ്കെടുക്കും. ഗാസ്ട്രോ എന്‍ററോളജി, ഗാസ്ട്രോ ഇന്‍റസ്റ്റൈനൽ സർജറി ഡോക്ടർമാർ നയിക്കുന്ന ദിവസേനയുള്ള ഒപി, എൻഡോസ്കോപ്പി, കൊളനോസ്കോപ്പി തുടങ്ങിയ രോഗനിർണയസംവിധാനങ്ങളും ഒപ്പം ലാബ്, ഫാർമസി സൗകര്യങ്ങളും സെന്‍ററിൽ ലഭ്യമാണ്. കൂടാതെ മറ്റ് സൂപ്പർസ്പെഷാലിറ്റി വിഭാഗങ്ങളും അൾട്രാസൗണ്ട് സ്കാനിംഗും വൈകാതെതന്നെ സെന്‍ററിൽ ലഭ്യമാകും. ഉദ്ഘാടനത്തിന്‍റെ ഭാഗമായി നാളെ രാവിലെ ഒന്പതുമുതൽ ഇഎൻടി, ത്വക് രോഗം, നേത്രരോഗം, ഗ്യാസ്ട്രോ എന്‍ററോളജി, ജനറൽ സർജറി വിഭാഗങ്ങളെ പങ്കെടുപ്പിച്ചുകൊണ്ട് മെഗാ മെഡിക്കൽ ക്യാന്പും നടക്കും. ക്യാന്പിൽ പങ്കെടുക്കുന്നവർക്കു സൗജന്യ പരിശോധനയും മരുന്നുകളും ലഭ്യമാണ്. ബുക്കിംഗിന് ഫോണ്‍: 9188912579.

കരുണാകരന്‍റെ സമൃതിമണ്ഡപത്തിൽ രാജീവ് ചന്ദ്രശേഖറിന്‍റെ പുഷ്പാർച്ചന

പൂങ്കുന്നം: മുൻമുഖ്യമന്ത്രി കെ.കരുണാകരന്‍റെ സ്മൃതിമണ്ഡപത്തിൽ ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ പുഷ്പാർച്ചന നടത്തി. കരുണാകരന്‍റെ മകൾ പദ്മജ വേണുഗോപാൽ, ബിജെപി നേതാവ് ശോഭ സുരേന്ദ്രൻ എന്നിവരും രാജീവിനൊപ്പമുണ്ടായിരുന്നു. തൃശൂർ കോർപറേഷൻ ഡിവിഷനുകളിലെ വിവിധ രാഷ്ട്രീയപാർട്ടികളിൽനിന്നു രാജിവച്ച നൂറുപേർ ബിജെപിയിൽ അംഗത്വമെടുക്കുന്ന ചടങ്ങും രാജീവ് ചന്ദ്രശേഖർ ഉദ്ഘാടനം ചെയ്തു. തൃശൂർ കോർപറേഷൻ ഭരണം ഇത്തവണ ബിജെപി പിടിച്ചെടുക്കുമെന്നു പദ്മജ വേണുഗോപാൽ പറഞ്ഞു. മനസമാധാനത്തിനുവേണ്ടിയാണ് താൻ ബിജെപിയിൽ ചേർന്നതെന്നും അവർ കൂട്ടിച്ചേർത്തു.

ആരോഗ്യമേഖലയിൽ സമഗ്രമാറ്റങ്ങൾ കൊണ്ടുവന്നു: മന്ത്രി വീണാ ജോർജ്

തൃശൂർ: ആരോഗ്യമേഖലയിൽ അടിസ്ഥാനസൗകര്യ വികസനം നടപ്പാക്കാൻ സംസ്ഥാനസർക്കാരിനു കഴിഞ്ഞെന്നു മന്ത്രി വീണാ ജോർജ്. തൃശൂർ മെഡിക്കൽ കോളജിൽ 23.45 കോടിയുടെ എട്ടു പദ്ധതികളുടെയും മൂന്നു പദ്ധതികളുടെ നിർമാണത്തിന്‍റെയും ഉദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. എല്ലാവർക്കും ആരോഗ്യപരിരക്ഷ നടപ്പാക്കുകയാണ് സർക്കാരിന്‍റെ അടുത്ത ലക്ഷ്യം. തൃശൂർ മെഡിക്കൽ കോളജിൽ 680 കോടിയുടെ വികസന പ്രവർത്തനങ്ങൾ നടപ്പാക്കി. സൂപ്പർ സ്പെഷാലിറ്റി ബ്ലോക്കും അമ്മയും കുഞ്ഞും ബ്ലോക്കും യാഥാർഥ്യമാകുന്പോൾ മെഡിക്കൽ കോളജ് പത്തുലക്ഷം ചതുരശ്രയടി വിസ്തീർണമുള്ളതാകും. അട്ടപ്പാടിയിലെ ശിശുമരണനിരക്ക് കുറയ്ക്കാൻ തൃശൂർ മെഡിക്കൽ കോളജ് വഹിച്ച പങ്ക് വലുതാണെന്നും മന്ത്രി പറഞ്ഞു. മെഡിക്കൽ അക്കാദമിക് രംഗത്തു വലിയ മാറ്റം കൊണ്ടുവരാൻ സർക്കാരിനു കഴിഞ്ഞു. ഒപി രജിസ്ട്രേഷൻ കണക്കനുസരിച്ചു 13.5 കോടി ആളുകൾ മെഡിക്കൽ കോളജിൽ ചികിത്സതേടി. ഇൻ പേഷ്യന്‍റ് വിഭാഗത്തിൽ 2024 ജനുവരി മുതൽ ഡിസംബർവരെ സൗജന്യ ചികിത്സയ്ക്ക് 6.5 ലക്ഷം ആളുകൾ അപേക്ഷിച്ചു. സ്റ്റേറ്റ് ഹെൽത്ത് ഏജൻസി നിലവിൽ വന്ന ശേഷം 30,000 രൂപയുടെ ഇൻഷ്വറൻസ് അഞ്ചുലക്ഷമാക്കിയെന്നും മന്ത്രി പറഞ്ഞു. മെഡിക്കൽ കോളജ് അലുമ്നി ഓഡിറ്റോറിയത്തിൽ നടന്ന ചടങ്ങിൽ സേവ്യർ ചിറ്റിലപ്പിള്ളി എംഎൽഎ, ആരോഗ്യവിദ്യാഭ്യാസ വകുപ്പ് ഡയറക്ടർ ഇൻചാർജ് ഡോ. കെ.വി. വിശ്വനാഥൻ, വടക്കാഞ്ചേരി നഗരസഭ ചെയർമാൻ പി.എൻ. സുരേന്ദ്രൻ, പുഴയ്ക്കൽ ബ്ലോക്ക് പഞ്ചായത്ത് പ്രസിഡന്‍റ് ലീല രാമകൃഷ്ണൻ, അവണൂർ ഗ്രാമപഞ്ചായത്ത് പ്രസിഡന്‍റ് തങ്കമ്മ ശങ്കുണ്ണി, പുഴയ്ക്കൽ ബ്ലോക്ക് പഞ്ചായത്തംഗം പി.വി. ബിജു, വടക്കാഞ്ചേരി നഗരസഭാ കൗണ്‍സിലർ കെ.കെ. ശൈലജ, ആരോഗ്യവകുപ്പ് ഡയറക്ടർ ഡോ. കെ.ജെ. റീന, തൃശൂർ ഗവ. ഡെന്‍റൽ കോളജ് പ്രിൻസിപ്പൽ ഡോ. പി.എം. ഷമീന, ഗവ. നഴ്സിംഗ് കോളജ് പ്രിൻസിപ്പൽ റീന എ. തങ്കരാജ്, ജില്ലാ മെഡിക്കൽ ഓഫീസർ ഡോ. ടി.പി. ശ്രീദേവി, മെഡിക്കൽ കോളജ് വൈസ് പ്രിൻസിപ്പൽ ഡോ. കെ.ബി. സനൽകുമാർ, ഗവ. മെഡിക്കൽ കോളജ് ആശുപത്രി സൂപ്രണ്ട് ഇൻ ചാർജ് ഡോ. എം. രാധിക എന്നിവർ പങ്കെടുത്തു.

ശക്തൻ സ്റ്റാൻഡിൽ സംഘർഷമൊഴിയുന്നില്ല

തൃശൂർ: പാർക്കിംഗ് ഫീസ് വർധനയുടെ പേരിൽ ശക്തൻ സ്റ്റാൻഡിൽ സംഘർഷം തുടരുന്നു. നാലു ബസുകൾ പിടിച്ചെടുത്തെന്നു ബസുടമകൾ ആരോപിക്കുകയും ഇന്നു മുതൽ ശക്തൻ സ്റ്റാൻഡിൽനിന്നു സർവീസ് നടത്തുന്ന ബസുകൾ പണിമുടക്കുമെന്നും ബസുടമകൾ അറിയിച്ചെങ്കിലും പിന്നീടു സമരം വേണ്ടെന്നുവച്ചു. വർധിപ്പിച്ച സ്റ്റാൻഡ് ഫീസ് ഈടാക്കില്ലെന്നു ജില്ലാ ഭരണകൂടം ഉറപ്പുനൽകിയതിനെതുടർന്നാണ് സമരം മാറ്റിവച്ചതെന്നു ബസുടമകൾ അറിയിച്ചു. 25 രൂപയായിരുന്ന പാർക്കിംഗ് ഫീസ് 40 രൂപയാക്കി വർധിപ്പിച്ചതുമായി ബന്ധപ്പെട്ട പ്രശ്നങ്ങളാണു പരിഹാരമില്ലാതെ നീളുന്നത്. ബസുടമ - തൊഴിലാളി സംയുക്തസമിതിയാണ് പണിമുടക്ക് തീരുമാനിച്ചിരുന്നത്. ഇന്നലെ രാവിലെ പത്തോടെയാണ് കോർപറേഷൻ അധികൃതരും പോലീസിന്‍റെ സഹായത്തോടെ എത്തി ബസുകളിൽ നോട്ടീസ് പതിച്ചത്. കരാറുകാരനും ഒപ്പമുണ്ടായിരുന്നു. നാലു ബസുകളിൽ നോട്ടീസ് പതിച്ചെന്നു ബസുടമ കോ-ഓർഡിനേഷൻ കമ്മിറ്റി വൈസ് പ്രസിഡന്‍റ് കെ.ബി. സുരേഷ് പറഞ്ഞു. ഗുണ്ടായിസമാണു കോർപറേഷന്‍റെ ഭാഗത്തുനിന്ന് ഉണ്ടാകുന്നത്. തൃശൂർ കോർപറേഷൻ കൗണ്‍സിലിന്‍റെ 2024 ഡിസംബർ 28-ലെ 78-ാം നന്പർ തീരുമാനപ്രകാരം അംഗീകരിച്ച 2025 ഏപ്രിൽ ഒന്നുമുതലുള്ള പുതുക്കിയ നിരക്കിലുള്ള ബസ് സ്റ്റാൻഡ് ഫീസ് അടയ്ക്കുന്നതിൽ വീഴ്ച വരുത്തിയിട്ടുള്ളതിനാൽ വാഹനം കേരള മുനിസിപ്പൽ ആക്ട് 474 പ്രകാരം കോർപറേഷൻ ഏറ്റെടുത്തിരിക്കുന്നു എന്നാണ് നോട്ടീസിൽ. ഇന്നലെ രാവിലെ കോർപറേഷൻ റവന്യൂ ഉദ്യോഗസ്ഥർ, മോട്ടോർ വാഹനവകുപ്പ്, പോലീസ് ഉദ്യോഗസ്ഥർ, കരാറുകാർ എന്നിവർ ഏപ്രിൽ ഒന്നുമുതലുള്ള കുടിശിക നൽകണമെന്ന് ആവശ്യപ്പെട്ടു ബസുകൾ പിടിച്ചെടുക്കാൻ ശ്രമിച്ചു. ബസുടമകളും തൊഴിലാളികളും എതിർക്കുകയും മിന്നൽപണിമുടക്കിലേക്കു കടക്കുകയും ചെയ്തതോടെ ഇവർ മടങ്ങി. ഉദ്യോഗസ്ഥർ മടങ്ങിയതിനുശേഷമാണു സർവീസ് സാധാരണ നിലയിലേക്കു മടങ്ങിയത്. ഇത്തരം നടപടികൾ ആവർത്തിച്ചാൽ ശക്തൻ സ്റ്റാൻഡിൽനിന്നുള്ള എല്ലാ സർവീസുകളും നിർത്തിവച്ചു പ്രതിഷേധിക്കുമെന്നും ബസുടമകൾ അറിയിച്ചിരുന്നു. കഴിഞ്ഞദിവസം കളക്ടറുമായി ചർച്ച നടത്തുമെന്ന് അറിയിച്ചിരുന്നെങ്കിലും നടന്നില്ല. കോർപറേഷനോടു റിപ്പോർട്ട് നൽകാൻ ജില്ലാ കളക്ടർ ആവശ്യപ്പെട്ടിട്ടുണ്ട്.

ഐടിയു ബാങ്ക് വളരെ സുരക്ഷിതം: പ്രസിഡന്‍റ് എം.പി. ജാക്‌സണ്‍

ഇരിങ്ങാലക്കുട: ഇരിങ്ങാലക്കുട ടൗണ്‍ സഹകരണ ബാങ്ക് (ഐടിയു ബാങ്ക്) സുരക്ഷിതമാണെന്നും നിക്ഷേപകരുടെ താത്പര്യം സംരക്ഷിക്കാനുള്ള നടപടിയാണ് ആര്‍ബിഐ സ്വീകരിച്ചിട്ടുള്ളതെന്നും ക്രമക്കേട് നടന്നതായി പറഞ്ഞിട്ടില്ലെന്നും ബാങ്ക് പ്രസിഡന്‍റ് എം.പി. ജാക്‌സണ്‍ പത്രസമ്മേളനത്തില്‍ പറഞ്ഞു. ജനവിശ്വാസം ആര്‍ജിച്ച് ഇരിങ്ങാലക്കുടയ്ക്ക് ഏറെ അഭിമാനമായി മാറിയ ബാങ്കാണിത്. 1300 കോടിയിലേറെ നിക്ഷേപവുമായി കേരളത്തിലെ ഏറ്റവും കൂടുതല്‍ നിക്ഷേപമുള്ള അര്‍ബന്‍ ബാങ്കായി മാറിയതു ജനങ്ങളുടെ വിശ്വാസം ഒന്നുകൊണ്ടുമാത്രമാണ്. ടയര്‍ ത്രീ വിഭാഗത്തില്‍ ഉള്‍പ്പെടുന്ന ബാങ്കിന് ആര്‍ബിഐ പല മാനദണ്ഡങ്ങളും എര്‍പ്പെടുത്തിയിട്ടുണ്ട്. എന്നാല്‍ ജിഎസ്ടി പരിഷ്‌കരണം, പ്രളയം, കോവിഡ് തുടങ്ങിയ പ്രതികൂലസാഹചര്യങ്ങള്‍മൂലം വായ്പാകുടിശിക വര്‍ധിച്ചുവരികയായിരുന്നു. 2022 മുതല്‍ ബാങ്ക് റിക്കവറി നടപടികള്‍ സജീവമായി സ്വീകരിച്ചുവന്നിട്ടുണ്ട്. ജപ്തി പാടില്ലെന്ന സര്‍ക്കാര്‍നിലപാടും ദോഷമായി മാറിയിട്ടുണ്ട്. 46000 -ത്തിലധികം നിക്ഷേപകരില്‍ 41000 പേര്‍ അഞ്ചുലക്ഷത്തില്‍താഴെ നിക്ഷേപമുള്ളവരാണ്. 5000 പേര്‍ മാത്രമാണ് അഞ്ചുലക്ഷത്തിലധികം രൂപ നിക്ഷേപമുള്ളവര്‍. ഇപ്പോഴത്തെ പ്രതിസന്ധി താത്കാലികപ്രതിഭാസംമാത്രമാണ്. കരുവന്നൂര്‍ ബാങ്കുമായി താരതമ്യംചെയ്യുന്നതില്‍ അര്‍ഥമില്ല. ഏരിയ സെക്രട്ടറിയും ജില്ലാ സെക്രട്ടറിയും പണം കൊണ്ടുപോയ കേസാണ് കരുവന്നൂരിലേത്. അമിതപലിശ വാഗ്ദാനം നല്‍കിയല്ല ഈ ബാങ്കില്‍ നിക്ഷേപം സ്വീകരിച്ചിരിക്കുന്നത്. പലിശ കുറഞ്ഞിട്ടും 1300 കോടിയിലധികം രൂപ നിക്ഷേപം ഉണ്ടായത് ജനങ്ങളുടെ വിശ്വാസംകൊണ്ടുമാത്രമാണ്. ജൂലൈ 30 വൈകീട്ട് അഞ്ചുമണിവരെ നിക്ഷേപകരായ ആര്‍ക്കും യാതൊരുവിധം ബുദ്ധിമുട്ടും ഉണ്ടായിട്ടില്ല. ഇടപാടുകാരുടെ എല്ലാ കാര്യങ്ങളും സാധിച്ചുകൊടുത്തിട്ടുണ്ട്. 107 വര്‍ഷത്തെ ചരിത്രമുള്ള ഈ ബാങ്കില്‍ 1987 ല്‍ വൈസ് പ്രസിഡന്‍റായാണ് ഭരണസാരഥ്യത്തിലേക്കു താന്‍ വന്നത്. മൂന്നുവര്‍ഷക്കാലം വൈസ് പ്രസിഡന്‍റായിരുന്നു. പിന്നീട് ചെയര്‍മാനും പ്രസിഡന്‍റുമായി തുടരുകയായിരുന്നു. ഈ കാലയളവില്‍ ബാങ്കിന്‍റെ വളര്‍ച്ച അതിവേഗമായിരുന്നു. ഫണ്ട് തിരിച്ചുകൊണ്ടുവരുന്നതില്‍ മാത്രമാണ് വീഴ്ച സംഭവിച്ചത്. നിലവിലുള്ള വായ്പാകുടിശിക തിരിച്ചുപിടിക്കല്‍ എത്രയും വേഗം പൂര്‍ത്തിയാക്കി ബാങ്കിന്‍റെ നില മെച്ചപ്പെടുത്തിയാല്‍ നിയന്ത്രണങ്ങള്‍ ആര്‍ബിഐ പിന്‍വലിക്കും. ആര്‍ബിഐ മാനദണ്ഡങ്ങള്‍ പാലിക്കുന്നതുവഴി ഇപ്പോഴത്തെ താത്കാലിക നിയന്ത്രണങ്ങള്‍ നീക്കാന്‍ കഴിയും. നിക്ഷേപകരുടെ പണം നഷ്ടപ്പെടില്ല. ബാങ്കിലേക്കു പ്രതിഷേധജാഥകള്‍ നടത്തുന്നതില്‍ തെറ്റുകാണുന്നില്ല. മുദ്രാവാക്യങ്ങള്‍ വിളിക്കുന്ന നേതാക്കള്‍ പലരും ശിപാര്‍ശയുമായി വരുന്നവരാണ്. ബാങ്കിന്‍റെ സാഹചര്യം മുതലെടുത്ത് നഗരസഭാ ഭരണം പിടിക്കാന്‍ എല്‍ഡിഫിനും ബിജെപിക്കും കഴിയില്ലെന്നും കോൺഗ്രസ് മുൻ ജനറൽസെക്രട്ടറി കൂടിയായഎം.പി. ജാക്‌സന്‍ കൂട്ടിച്ചേര്‍ത്തു. ഭരണസമിതി വൈസ് പ്രസിഡന്‍റ് പ്രഫ. ഇ.ജെ. വിന്‍സെന്‍റ്, മാനേജിംഗ് ഡയറക്ടര്‍ എ.എല്‍. ജോണ്‍ എന്നിവരും പത്രസമ്മേളനത്തില്‍ പങ്കെടുത്തു. ഐടിയു ബാങ്കില്‍ റിസര്‍വ് ബാങ്ക് നിയന്ത്രണം ആറുമാസത്തേക്ക് ഇരിങ്ങാലക്കുട: ടൗണ്‍ കോ ഓപ്പറേറ്റീവ് അര്‍ബന്‍ ബാങ്കില്‍ (ഐടിയു ബാങ്ക്) ആറുമാസത്തേക്കാണ് റിസര്‍വ് ബാങ്ക് നിയന്ത്രണങ്ങള്‍ ഏര്‍പ്പെടുത്തിയിട്ടുള്ളത്. നിക്ഷേപകര്‍ക്ക് ഈ ആറുമാസക്കാലയളവില്‍ 10,000 രൂപമാത്രമേ പിന്‍വലിക്കാന്‍ സാധിക്കൂ. ബാങ്ക് എടിഎം, ഓണ്‍ലൈന്‍ ആപ്പ് എന്നിവയുടെ പ്രവര്‍ത്തനം മരവിപ്പിച്ചു. ആര്‍ബിഐയുടെ അനുമതി ഇല്ലാതെ പുതിയ വായ്പ അനുവദിക്കാനും പുതുക്കാനും പുതിയ നിക്ഷേപം സ്വീകരിക്കാനും പണം കടംവാങ്ങാനും സാധിക്കില്ല. ബാങ്കിന്‍റെ സ്വത്തുക്കളും മറ്റ് ആസ്തികളും വില്‍ക്കാനും കൈമാറ്റംചെയ്യാനും പാടില്ല. ബാങ്ക് നിക്ഷേപങ്ങള്‍ക്കുള്ള ഇന്‍ഷ്വറന്‍സ് പരിരക്ഷ പ്രകാരം അപേക്ഷ നല്‍കുന്ന നിക്ഷേപകര്‍ക്ക് (ഒരാള്‍ക്ക് പരമാവധി അഞ്ചു ലക്ഷം രൂപ) 90 ദിവസത്തിനകം അര്‍ഹമായ തുക ലഭിക്കുമെന്ന് ആര്‍ബിഐ അറിയിച്ചിട്ടുണ്ട്. വായ്പാ കുടിശികയിനത്തില്‍ 195 കോടി രൂപയാണ് ബാങ്കിനു ലഭിക്കാനുള്ളത്. 365 കോടി രൂപയുടെ നിഷ്‌ക്രിയ ആസ്തികളുമുണ്ട്. തിരിച്ചടവു മുടങ്ങിയ വായ്പകളിലെ ജാമ്യവസ്തുക്കളുടെ ലേല ഇടപാടുകളില്‍ വന്ന കാലതാമസമാണ് ആര്‍ബിഐയുടെ നിയന്ത്രണങ്ങള്‍ക്ക് ഇടയാക്കിയത്.

ചേലക്കര റെയിൽവേ മേൽപ്പാലം; സ്ഥലമെടുപ്പിനു ഭരണാനുമതി

തൃശൂർ: ചേലക്കര പൈങ്കുളം ഗേറ്റ് റെയിൽവേ മേൽപ്പാലം നിർമാണത്തിനു ഭൂമി ഏറ്റെടുക്കുന്നതിനു 13.33 കോടി രൂപയുടെ ഭരണാനുമതിയായി. ലെവൽ ക്രോസുകളില്ലാത്ത കേരളമെന്ന പൊതുമരാമത്തു വകുപ്പിന്‍റെ ലക്ഷ്യത്തിന്‍റെ ഭാഗമായി മേൽപ്പാലങ്ങൾ നിർമിക്കുന്നതിന്‍റെ ഭാഗമായാണ് ചേലക്കര പൈങ്കുളം ഗേറ്റിൽ സ്ഥലമേറ്റെടുക്കുന്നത്. കേരള റോഡ് ഡെവലപ്മെന്‍റ് കോർപറേഷനാണ് നിർമാണച്ചുമതല. ഷൊർണൂർ, വള്ളത്തോൾനഗർ റെയിൽവേ സ്റ്റേഷനുകൾക്കിടയിലെ ഒന്നാം നന്പർ ലെവൽ ക്രോസാണിത്. ഇവിടെ മേൽപ്പാലം നിർമിക്കുന്നതിന് ഏറ്റെടുക്കേണ്ടിവരുന്ന സ്ഥലത്തിന്‍റെ വിലയ്ക്കൊപ്പം പ്രസ്തുത ഭൂമിയിലെ സ്ഥാവരവസ്തുക്കൾ, മരങ്ങൾ തുടങ്ങിയവയുടെ മൂല്യംകൂടി കണക്കാക്കിയാണ് വിലയും നഷ്ടപരിഹാരവും നിശ്ചയിച്ചിട്ടുള്ളത്. ഇതിനുള്ള ഭരണാനുമതിയാണ് ഇപ്പോൾ ലഭ്യമാക്കിയിട്ടുള്ളത്. ഭൂമി ഏറ്റെടുക്കൽ നടപടികൾ പൂർത്തിയായാലുടൻ മേൽപ്പാലം നിർമാണം കരാർ നൽകി പണി ആരംഭിക്കുമെന്നു മന്ത്രി പി.എ. മുഹമ്മദ് റിയാസിന്‍റെ ഓഫീസ് അറിയിച്ചു.

കരിങ്കൊടി കാണിക്കാനെന്നു സംശയം: കോൺഗ്രസ് പ്രവർത്തകരെ മുൻകൂർ കസ്റ്റഡിയിലെടുത്തു

ചേർപ്പ്: സാമൂഹികാരോഗ്യകേന്ദ്രം ബ്ലോക്ക് കുടുംബാരോഗ്യകേന്ദ്രമായി ഉയർത്തുന്നതിന്‍റെ ഉദ്ഘാടനത്തിനെത്തുന്ന മന്ത്രി വീണാ ജോർജിനുനേരേ കരിങ്കൊടി കാണിക്കാൻ നിൽക്കുന്നുവെന്ന സംശയത്തിൽ കോൺഗ്രസ് പ്രവർത്തകരെ പോലീസ് മുൻകൂർ കസ്റ്റഡിയിലെടുത്തു. ചേർപ്പ് ബ്ലോക്ക് കോൺഗ്രസ് വൈസ് പ്രസിഡന്‍റ് എം. സുജിത്ത്കുമാർ, കോൺഗ്രസ് അവിണിശേരി മണ്ഡലം പ്രസിഡന്‍റ് പ്രിയൻ രാസ്, ചേർപ്പ് മുൻ പഞ്ചായത്ത് പ്രസിഡന്‍റ് സി.കെ. വിനോദ് എന്നിവരെയാണ് ചേർപ്പ് പോലീസ് കസ്റ്റഡിയിലെടുത്തത്. ഇവർ മൂന്നുപേരും വഴിയിൽ നിൽക്കുമ്പോൾ പോലീസ് ജീപ്പിൽ ബലമായി പിടിച്ചുകയറ്റുകയായിരുന്നു. പിന്നിട് ഇവരെ വിട്ടയച്ചു. പോലീസ് നടപടിക്കെതിരേ കോൺഗ്രസ് ചേർപ്പ് മണ്ഡലം പ്രസിഡന്‍റ് കെ. രാമചന്ദ്രന്‍റെ നേതൃത്വത്തിൽ കോൺഗ്രസ് പ്രവർത്തകർ ചേർപ്പ് പോലീസ് സ്റ്റേഷന് മുന്നിൽ കുത്തിയിരിപ്പുസമരംനടത്തി. മുൻ ഡിസിസി പ്രസിഡന്‍റ് ജോസ് വള്ളൂർ, ബ്ലോക്ക് കോൺഗ്രസ് പ്രസിഡന്‍റ് സിജോ ജോർജ്, ചേർപ്പ് പഞ്ചായത്ത് പ്രസിഡന്‍റ് സുജീഷ കള്ളിയത്ത് എന്നിവർ പങ്കെടുത്തു. രാജീവ് ഗാന്ധി സംഘടൻ നാട്ടിക നിയോജകമണ്ഡലം യോഗത്തിനെത്തിയ കോൺഗ്രസ് തങ്ങളെ യാതൊരു പ്രകോപനവുമില്ലാതെയാണ് അറസ്റ്റ് ചെയ്തതെന്ന് നേതാക്കൾ പറഞ്ഞു.

സംസ്ഥാന സർക്കാർ ആരോഗ്യമേഖലയെ ജനകീയമാക്കി: മന്ത്രി വീണാ ജോർജ്

പഴയന്നൂർ: സൗജന്യചികിത്സയും മികച്ച സേവനങ്ങളുംനൽകി ആരോഗ്യമേഖലയെ ജനകീയമാക്കാൻ സർക്കാരിന് കഴിഞ്ഞതായി ആരോഗ്യമന്ത്രി വീണാ ജോർജ് പറഞ്ഞു. പഴയന്നൂർ കുടുബരോഗ്യകേന്ദ്രത്തിൽ ആർദ്രം മിഷൻവഴി പൂർത്തിയാക്കിയ ലാബിന്‍റെയും വിവിധ പദ്ധതികളുടെയും ഉദ്ഘാടനം നിർവഹിച്ചു സംസാരിക്കുകയായിരുന്നു മന്ത്രി. കാത്ത് ലാബും സൂപ്പർ സ്പെഷാലിറ്റി ചികിത്സയും കൊണ്ടുവരാൻ സർക്കാരിന് കഴിഞ്ഞു. വെറും 13 ആശുപത്രികളിൽ ഉണ്ടായിരുന്ന ഡയാലിസിസ് കേന്ദ്രങ്ങൾ കേരളത്തിൽ 108 ആശുപത്രികളിൽ ഏർപ്പെടുത്തി വിപ്ലവാത്മകമായ മാറ്റംകൊണ്ടുവന്നത് ഈ സർക്കാരാണെന്നും മന്ത്രി വീണാ ജോർജ് പറഞ്ഞു. ചേലക്കര താലൂക്ക് ആശുപത്രിയിൽ കാഷ്വാലിറ്റി ഡോക്ടറടക്കം നാലു പുതിയ തസ്തികകൾ സൃഷ്ടിക്കുമെന്ന മന്ത്രിയുടെ ഉറപ്പ് കരഘോഷത്തോടെ നാട്ടുകാർ സ്വീകരിച്ചു. കോഴിക്കോട് ട്രാൻസ്പ്ലാന്‍റ് ഇൻസ്റ്റിറ്റ്യൂട്ട് നടപ്പിലാക്കും. അമീബിക് മെനഞ്ചൈറ്റിസ് രോഗ മരണനിരക്ക് അമേരിക്കൻ ഐക്യനാടുകളേക്കാള്‌ കുറവാണ് കേരളത്തിൽ. തെറ്റായ പ്രചാരണങ്ങൾകൊണ്ടൊന്നും ആരോഗ്യ പ്രവർത്തകരുടെ ആത്മവീര്യം തകർക്കാൻ കഴിയില്ലെന്നും മന്ത്രി പറഞ്ഞു. പത്തുലക്ഷം രൂപ ചെലവിൽ ആശുപത്രിപരിസര നവീകരണം, ബ്ലോക്ക് പഞ്ചായത്ത് പദ്ധതിവഴി നിര്‌മിച്ച 15 ലക്ഷം രൂപയുടെ ജലസംഭരണി എന്നിവയുടെ ഉദ്ഘാടനവും മന്ത്രി നിർവഹിച്ചു. യു.ആർ. പ്രദീപ് എംഎൽഎ അധ്യക്ഷനായി. ചടങ്ങിൽ ആരോഗ്യവകുപ്പ് ഡയറക്ടർ ഡോ.കെ.ജെ. റീന വിശിഷ്ട സാന്നിധ്യമായി. പഴയന്നൂർ ബ്ലോക്ക് പഞ്ചായത്ത് പ്രസിഡന്‍റ് കെ.എം. അഷറഫ്, ജില്ലാ മെഡിക്കൽ ഓഫീസർ ഡോ.ടി.പി. ശ്രീദേവി, ആരോഗ്യകേരളം ജില്ലാ പ്രോഗ്രാം മാനേജർ ഡോ.പി. സജീവ്കുമാർ, എനിവർ സന്നിഹിതരായി. ഡോ.ശ്രീജിത്ത് എച്ച്.ദാസ്, സ്റ്റാൻഡിംഗ് കമ്മിറ്റി ചെയർമാൻ കെ.പി. ശ്രീജയൻ എന്നിവർ പദ്ധതി വിശദീകരണംനടത്തി. ചടങ്ങിൽ പഴയന്നൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് പി. പ്രശാന്തി, വികസന സ്റ്റാൻഡിംഗ് കമ്മിറ്റി ചെയർപേഴ്സൺ എം.വി. സുചിത്ര, ബ്ലോക്ക് പഞ്ചായത്ത് അംഗങ്ങളായ ആശാദേവി, എസ്. സിന്ധു, ലത സാനു, ഷിജിത ബിനീഷ്, ഗീതാ രാധാകൃഷ്ണൻ, എ.ഇ ഗോവിന്ദൻ, പഞ്ചായത്തംഗം സൗഭാഗ്യവതി. എന്നിവർ പങ്കെടുത്തു. ദേശീയ ആരോഗ്യദൗത്യത്തിന്‍റെ 2022-23 വർഷത്തെ പദ്ധതിവിഹിതമായി ലഭിച്ച 40 ലക്ഷം രൂപ ഉപയോഗിച്ചാണ് പഴയന്നൂർ കുടുംബരോഗ്യകേന്ദ്രത്തിൽ ആർദ്രം മിഷൻ ലാബും ഒപി ബ്ലോക്കും പൂർത്തിയാക്കിയത്. മുഴുവന്‌ ഓട്ടോമാറ്റിക് അനലൈസർ സംവിധാനംവഴി 60ൽപരം പരിശോധനകൾ പുതിയ ലാബിൽ ഒരേസമയം നടത്താൻ കഴിയും. സംസ്ഥാന സർക്കാരിന്‍റെ 2021-22 വർഷത്തെ ആരോഗ്യ ഗ്രാൻഡ് വഴി 22.4 ലക്ഷം രൂപ ചെലവിലാണ് ശീതികരിച്ച കോൺഫറൻസ് ഹാളിന്‍റെയും പബ്ലിക് ഹെൽത്ത് സെന്‍ററിന്‍റെയും നവീകരണം പൂർത്തിയാക്കിയത്.

മട്ടുപ്പാവുകൃഷിയുമായി കോർപറേഷൻ

തൃശൂർ: നഗരസഭകളിൽ കൃഷി വ്യാപിപ്പിക്കുന്നതിന്‍റെ ഭാഗമായി കുടുംബശ്രീ ജില്ലാ മിഷന്‍റെ നേതൃത്വത്തിൽ നടപ്പിലാക്കുന്ന മട്ടുപ്പാവുകൃഷിയുടെ സബ്സിഡിവിതരണവും ഗ്രോ ബാഗ് വിതരണവും മേയർ എം.കെ. വർഗീസ് ഉദ്ഘാടനം ചെയ്തു. 50 കുടുംബശ്രീ അംഗങ്ങൾ അടങ്ങുന്ന മൂന്നു ക്ലസ്റ്റർ രൂപീകരിച്ച് 5,000 രൂപയുടെ പ്രോജക്ടാണ് നടപ്പിലാക്കുന്നത്. ഒരു ഗുണഭോക്താവിനു 3750 രൂപ സബ്സിഡിയായി ലഭിക്കും. ഓണവിപണിയോടനുബന്ധിച്ച് വീടുകളിൽ കൃഷിചെയ്യുന്ന വിഷരഹിത പച്ചക്കറി ജനങ്ങളിലേക്ക് എത്തിക്കുക എന്നതാണ് ക്ലസ്റ്റർ രൂപീകരണത്തിന്‍റെ പ്രധാന ലക്ഷ്യം. ചടങ്ങിൽ സിഡിഎസ് ചെയർപേഴ്സണ്‍മാരായ സത്യഭാമ വിജയൻ, രജുല കൃഷ്ണകുമാർ, മെന്പർ സെക്രട്ടറി വി.എൻ. അജിത തുടങ്ങിയവർ പങ്കെടുത്തു.

ക്രിസ്മസിനു ബിജെപി വിതരണംചെയ്തത് വർഗീയ കേക്ക്: ടി.എൻ. പ്രതാപന്‍

ചാവക്കാട്: കേരളത്തില്‍ ക്രൈസ്തവരെ പ്രീണിപ്പിക്കാന്‍ മധുരമുള്ള കേക്കുനല്‍കിയ ബിജെപിക്കാര്‍ ഉത്തരേന്ത്യയില്‍നല്‍കുന്നത് ജയിലറയാണെന്ന് കെപിസിസി രാഷ്ട്രീയകാര്യസമിതി അംഗം ടി.എൻ. പ്രതാപന്‍. പുന്ന നൗഷാദ് രക്തസാക്ഷിദിനാചരണത്തിന്‍റെ ഭാഗമായി ഗുരുവായൂർ ബ്ലോക്ക് കോൺഗ്രസ് കമ്മിറ്റി ചാവക്കാട് നടത്തിയ അനുസ്മരണസമ്മേളനം ഉദ്ഘാടനംചെയ്യുകയായിരുന്നു പ്രതാപന്‍. ഭൂരിപക്ഷ, ന്യൂനപക്ഷ വര്‍ഗീയതയെ കോണ്‍ഗ്രസ് ഒരുപോലെ എതിർക്കുമെന്നും പ്രതാപന്‍ പറഞ്ഞു. ബ്ലോക്ക് കോണ്‍ഗ്രസ് പ്രസിഡന്‍റ് അരവിന്ദന്‍ പല്ലത്ത് അധ്യക്ഷനായി. യൂത്ത് കോണ്‍ഗ്രസ് സംസ്ഥാന വൈസ് പ്രസിഡന്‍റ് അബിന്‍ വര്‍ക്കി മുഖ്യപ്രഭാഷണംനടത്തി. നേതാക്കളായ അനില്‍ അക്കര, സി.എ. ഗോപപ്രതാപന്‍, സി.സി. ശ്രീകുമാര്‍, ടി.എസ്. അജിത്ത്, എം.വി. ഹൈദരലി എന്നിവര്‍ പ്രസംഗിച്ചു.

ആധുനിക വാതകശ്മശാനം മാലിന്യനിക്ഷേപകേന്ദ്രമായി

വടക്കാഞ്ചേരി: ലക്ഷങ്ങൾ ചെലവഴിച്ച് നിർമിച്ച പൊതുശ്മശാനം കാടുകയറിയും മാലിന്യങ്ങൾ ശേഖരിച്ചും നശിക്കുന്നു. 46 ലക്ഷം രൂപ ചെലവിട്ട് ആധുനിക രീതിയിൽ നിർമിച്ച ഗ്യാസ് ക്രിമറ്റോറിയമാണ് തകരുന്നത്. രാത്രിയിൽ സാമൂഹ്യവിരുദ്ധരുടെ അഴിഞ്ഞാട്ടവും ഇഴജന്തുക്കളുടെ ആവാസകേന്ദ്രവുമായി കെട്ടിടം മാറിക്കഴിഞ്ഞു. കഴിഞ്ഞ യുഡിഎഫ് സർക്കാരിന്‍റെ 20 ലക്ഷം രൂപയും ജില്ലാ പഞ്ചായത്തിന്‍റെ എട്ടുലക്ഷം രൂപയും വടക്കാഞ്ചേരി പഞ്ചായത്ത് 18 ലക്ഷം രൂപയും ചെലവിട്ടാണ് പൊതുശ്മശാനം നിര്‌മിച്ചത്. സിന്ധു സുബ്രഹ്മണ്യന്‍റെ നേതൃത്വത്തിലുള്ള കഴിഞ്ഞ പഞ്ചായത്ത് യുഡി എഫ് ഭരണസമിതിയാണ് നിർമാണം പൂർത്തീകരിച്ചത്. പിന്നീടുനടന്ന തെരഞ്ഞെടുപ്പിൽ വടക്കാഞ്ചേരി, മ ുണ്ടത്തികോട് പഞ്ചായത്തുകൾ കൂട്ടിച്ചേർത്ത് നഗരസഭയാക്കുകയും തെരഞ്ഞെടുപ്പിൽ എൽഡിഎഫ് അധികാരത്തിലെത്തുകയും ചെയ്തതോടെ അങ്ങോട്ട് തിരിഞ്ഞുനോക്കിയിട്ടില്ലെന്ന് പ്രദേശവാസികൾ പറഞ്ഞു. നഗരസഭയുടെ നേതൃത്വത്തിൽ അഞ്ചുലക്ഷം രൂപ ചെലവഴിച്ച് ശ്മശാനത്തിലേക്കുള്ള വഴി ടൈൽസ്‌വിരിച്ച് വൃത്തിയാക്കിയെങ്കിലും പിന്നീട് പൊളിച്ചുനീക്കി. നഗരസഭയിലെ പാവപ്പെട്ടവര്‌ മരണപ്പെടുമ്പോൾ മൃതദേഹം ദൂരെ സ്ഥലങ്ങളിൽ കൊണ്ടുപോകാതെ ഓട്ടുപാറ - വാഴാനി റോഡിലുള്ള എങ്കക്കാട് പൊതുശ്മശാനത്തിലെത്തിച്ച് ചുരുങ്ങിയ നിരക്കിൽ ഗ്യാസ് ക്രിമറ്റോറിയത്തിൽ സംസ്കരിക്കാനാണ് പദ്ധതി നടപ്പാക്കിയത്. വർഷങ്ങൾ പിന്നിട്ടിട്ടും ഇതുവരെ മെഷിനറികൾ കൊണ്ടുവന്ന് ശമ്ശാനത്തിന്‍റെ പ്രവർത്തനം ആരംഭിക്കാൻ നഗരസഭ ഭരണസമിതിക്ക് കഴിഞ്ഞില്ല. അതിനുപകരം നഗരസഭയിലെ 41 ഡിവിഷനുകളിൽനിന്നു ഹരിതകർമസേന ശേഖരിക്കുന്ന മാലിന്യം മുഴുവൻപൊതുശ്മശാനത്തിലാണ് സ്റ്റോക്ക് ചെയ്യുന്നത്. ഇതു മായി ബന്ധപ്പെട്ട് നിരവധിതവണ പരാതികൾ നൽകിയെങ്കിലും ഒരു നടപടിയും ഉണ്ടായിട്ടില്ലെന്നു കോൺഗ്രസ് പറയുന്നു. ഉടൻ മാലിന്യം നീക്കംചെയ്യുകയും ശ്മശാനത്തിന്‍റെ പ്രവർത്തനം ആരംഭിക്കുകയും ചെയ്തില്ലെങ്കിൽ ശക്തമായ സമരപരിപാടികൾക്ക് രൂപംനൽകാനൊരുങ്ങുകയാണ് കോൺഗ്രസ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]