വിശുദ്ധ എവുപ്രാസ്യമ്മയുടെ തിരുനാൾ ഇന്ന്
Friday, August 29, 2025 1:14 AM IST
ഒല്ലൂർ (തൃശൂർ): ഭക്തിസാന്ദ്രമായ കൂടുതുറക്കൽ ചടങ്ങോടെ വിശുദ്ധ എവുപ്രാസ്യമ്മയുടെ തിരുനാളാഘോഷത്തിനു തുടക്കമായി.
കൂടുതുറക്കൽ കർമത്തിനു തൃശൂർ മേരിമാതാ മേജർ സെമിനാരി റെക്ടർ ഫാ. സെബാസ്റ്റ്യൻ ചാലയ്ക്കൽ മുഖ്യകാർമികത്വം വഹിച്ചു. ആയിരത്തിൽപ്പരം വിശ്വാസികൾ പ്രദക്ഷിണത്തിൽ പങ്കെടുത്തു. തീർഥകേന്ദ്രം റെക്ടർ ഫാ. ജോയ് ചിറ്റിലപ്പിള്ളി, തിരുനാൾ ജനറൽ കണ്‍വീനർ ടാജ് ആന്‍റണി, കൺവീനർമാരായ ഡേവിസ് കൊള്ളന്നൂർ, പോളി ജോസ്, ജോസ് ഉക്രാൻ തുടങ്ങിയവർ പ്രദക്ഷിണത്തിനു നേതൃത്വം നൽകി.
കൂടുതുറക്കലിനു മുന്നോടിയായി നടന്ന തിരുനാൾ തിരുക്കർമങ്ങളിൽ ഫാ. ജിക്സൺ താഴത്ത്, ഫാ. ടൈസൺ മണ്ടുംപാൽ എന്നിവർ സഹകാർമികരായി.
തിരുനാൾദിനമായ ഇന്നു രാവിലെ ഏഴിനു നടക്കുന്ന ദിവ്യബലിക്ക് തീർഥകേന്ദ്രം മുൻ റെക്ടർ ഫാ. റാഫേൽ വടക്കൻ മുഖ്യകാർമികത്വം വഹിക്കും. തുടർന്ന് ഊട്ടുനേർച്ച വെഞ്ചരിപ്പ്. രാവിലെ എട്ടുമുതൽ വൈകിട്ട് അഞ്ചുവരെ ഊട്ടുനേർച്ച വിതരണം ചെയ്യും.
രാവിലെ 10നു നടക്കുന്ന ആഘോഷമായ ദിവ്യബലിക്കു അതിരൂപത വികാരി ജനറാൾ മോണ്. ജോസ് കോനിക്കര മുഖ്യകാർമികത്വം വഹിക്കും. ഫാ. സനൽ മാളിയേക്കൽ സന്ദേശം നൽകും. ഫാ. ബ്രിൽവിൻ ഒലക്കേങ്കിൽ സഹകാർമികനാകും. ഉച്ചയ്ക്ക് 12നു തീർഥകേന്ദ്രത്തിൽനിന്ന് ഒല്ലൂർ മേരിമാതാ പള്ളിയിലേക്കു ജപമാലപ്രദക്ഷിണം നടക്കും. ഉച്ചകഴിഞ്ഞു മൂന്നിനു വിശുദ്ധ കുർബാനയ്ക്കു ഫാ. പ്രകാശ് പുത്തൂർ മുഖ്യകാർമികനാകും.
വൈകിട്ട് അഞ്ചിനു നടക്കുന്ന ദിവ്യബലിക്കു രാമനാഥപുരം ബിഷപ് മാർ പോൾ ആലപ്പാട്ട് മുഖ്യകാർമികത്വം വഹിക്കും. ഫാ. ജിയോ വേലൂക്കാരൻ, ഫാ. ഗോഡ്‌വിൻ കിഴക്കൂടൻ എന്നിവർ സഹകാർമികരാകും.