നക്രാപുതുവലില്‍ 42 കുടുംബങ്ങള്‍ക്കു ശുദ്ധജലം : കുടിവെള്ള ശുദ്ധീകരണ പ്ലാന്‍റ് ഉദ്ഘാടനം 26ന്
1585220
Wednesday, August 20, 2025 7:42 AM IST
ചങ്ങനാശേരി: പായിപ്പാട് പഞ്ചായത്തിലെ നക്രാപുതുവലിലുള്ള 42 കുടുംബങ്ങള്‍ക്ക് വീടുകളിലേക്ക് ശുദ്ധജലം എത്തുന്നു. പായിപ്പാട് ഗ്രാമപഞ്ചായത്തിലെ പതിനഞ്ചാം വാര്‍ഡില്‍ സ്ഥിതിചെയ്യുന്ന കുടിവെള്ള ശുദ്ധീകരണ പ്ലാന്‍റിന്‍റെ ഉദ്ഘാടനം 26ന് നാലുകോടി സെന്‍റ് തോമസ് പള്ളി ഓഡിറ്റോറിയത്തില്‍ ചേരുന്ന സമ്മേളനത്തില്‍ കൊടിക്കുന്നില്‍ സുരേഷ് എംപി ഉദ്ഘാടനം നിര്‍വഹിക്കും.
ജോബ് മൈക്കിള്‍ എംഎല്‍എ അധ്യക്ഷത വഹിക്കും. പായിപ്പാട് പഞ്ചായത്തിന്‍റെ നേതൃത്വത്തില്‍ 23 ലക്ഷം രൂപ വിനിയോഗിച്ച് നിര്‍മിച്ച ഈ പ്ലാന്‍റിലൂടെ 24 മണിക്കൂറും ശുദ്ധജലം ലഭിക്കും. ഭൂജല വകുപ്പിന്‍റെ നേതൃത്വത്തിലാണ് നിര്‍മാണം. കുട്ടനാടിനോട് ചേര്‍ന്നുകിടക്കുന്ന പ്രദേശമായതിനാല്‍ നക്രാപുതുവല്‍ എല്ലാ വശങ്ങളും വെള്ളത്താല്‍ ചുറ്റപ്പെട്ടു കിടക്കുകയാണ്. ശുദ്ധജല ലഭ്യത പ്രതിസന്ധിയാണ്.
പ്രതിദിനം 10,000 ലിറ്റര്‍ കുടിവെള്ളം ശുദ്ധീകരിക്കാനാകും
ശുദ്ധീകരണ പ്ലാന്‍റ് വരുന്നതോടുകൂടി ജനങ്ങള്‍ക്ക് വലിയ ആശ്വാസമാകും. പനയാര്‍ തോട്ടിലെ മലിനജലം ചിരട്ടക്കരിയും മണലുമിട്ട് ശുദ്ധീകരിച്ചാണ് പ്രദേശവാസികള്‍ ഇതുവരെ ഉപയോഗിച്ചുവന്നിരുന്നത്.
പ്ലാന്‍റ് നിര്‍മിക്കുന്നതിനായി ജനങ്ങള്‍ ബണ്ടിനോടു ചേര്‍ന്ന് ഭൂമി വിലയ്ക്ക് വാങ്ങി പഞ്ചായത്തിന് നല്‍കിയിരുന്നു. പ്ലാന്‍റിലൂടെ ശുദ്ധീകരിക്കുന്ന വെള്ളം പൈപ്പ് കണക്‌ഷന്‍ വഴി വീടുകളിലേക്കെത്തും. പ്രതിദിനം 10,000 ലിറ്ററോളം കുടിവെള്ളം ശുദ്ധീകരിക്കാന്‍ പ്ലാന്‍റിലൂടെ കഴിയും.
കെ.ഡി. മോഹനന്‍
പ്രസിഡന്‍റ്,
പായിപ്പാട് പഞ്ചായത്ത്