സംസ്ഥാന ജൂണിയര്‍ അത്‌ലറ്റിക്‌സ് : അസംപ്ഷന്‍ കോളജിലെ നിത്യക്ക് ട്രിപ്പിള്‍

ചങ്ങനാശേരി: തിരുവനന്തപുരത്ത് നടന്ന സംസ്ഥാന ജൂണിയര്‍ അത്‌ലറ്റിക്‌സ് മത്സരത്തില്‍ ചങ്ങനാശേരി അസംപ്ഷന്‍ കോളജിലെ ഒന്നാംവര്‍ഷ ഇക്കണോമിക്‌സ് ബിരുദ വിദ്യാര്‍ഥിനി സി.ആര്‍. നിത്യ വുമണ്‍ അണ്ടര്‍ 20 വിഭാഗത്തില്‍ 1500 മീറ്റര്‍, 3000 മീറ്റര്‍ സ്റ്റീപ്പിള്‍ ചേസ് 4ഃ400 മീറ്റര്‍ റിലേ എന്നീ ഇങ്ങളില്‍ സ്വര്‍ണം നേടി.

3000 മീറ്റര്‍ സ്റ്റീപ്പിള്‍ ചേസിൽ പഴയ റെക്കോര്‍ഡ് 12:16.20സെക്കൻഡ് 11:45.80 സെക്കൻഡായി തിരുത്തിയാണ് സ്വര്‍ണ മെഡല്‍ നേടിയത്.

നോര്‍ത്ത് പറവൂര്‍ സ്വദേശിയായ നിത്യ ചെറാക്കോണം വീട്ടില്‍ റോബിന്‍സണിന്‍റെയും ജെസിയുടെയും മകളാണ്.

സ്‌പോര്‍ട്‌സ് കൗണ്‍സില്‍ പരിശീലകന്‍ ആര്‍. സൂരജാണ് നിത്യയുടെ പരിശീലകന്‍.

ADVERTISEMENT

അരുവിത്തുറ കോളജിൽ ഫ്യൂച്ചർ സ്റ്റാർസ് അധ്യാപക ശിൽപശാല

അരുവിത്തുറ: സെന്‍റ് ജോർജ് കോളജിൽ ഫ്യൂചർ സ്റ്റാർസ് എഡ്യൂക്കേഷണൽ പ്രോജക്‌ടിന്‍റെ ആഭിമുഖ്യത്തിൽ പൂഞ്ഞാർ നിയോജകമണ്ഡലത്തിലെ സർക്കാർ, എയിഡഡ്, സിബിഎസ്‌സി ഹൈസ്കൂൾ, ഹയർ സെക്കൻഡറി വിഭാഗത്തിൽപ്പെട്ട അധ്യാപകർക്കായി ഏകദിന ശില്പശാല സംഘടിപ്പിച്ചു. അഡ്വ. സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്തു. ഫ്യൂചർ സ്റ്റാർസ് പ്രൊജക്റ്റ്‌ ഡയറക്‌ടർ ഡോ. ആൻസി ജോസഫ് അധ്യക്ഷത വഹിച്ച സമ്മേളനത്തിൽ കോളജ് ബർസാർ റവ.ഫാ. ബിജു കുന്നയ്ക്കാട്ട് മുഖ്യപ്രഭാഷണം നടത്തി. വൈസ് പ്രിൻസിപ്പൽ ഡോ. ജിലു ആനി ജോൺ, ഫ്യൂച്ചർ സ്റ്റാർസ് എക്സിക്യൂട്ടീവ് അംഗം ബിനോയി സി. ജോർജ്, എലിസബത്ത് തോമസ്, പി.പി.എം. നൗഷാദ്, കെ.എസ്. സുനിൽ എന്നിവർ സംസാരിച്ചു. പ്രമുഖ പരിശിലകൻ ജോർജ് കരുണക്കൽ ക്ലാസുകൾ നയിച്ചു. സെമിനാറിൽ 50 അധ്യാപകർ പങ്കെടുത്തു.

വിശ്വാസതീക്ഷ്ണതയില്‍ ആഴപ്പെട്ട് മറ്റുള്ളവര്‍ക്ക് പ്രകാശം പകരണം: ജോഷ്വാ മാര്‍ ഇഗ്നാത്തിയോസ്

തുരുത്തി: വിശ്വാസതീക്ഷ്ണതയില്‍ ആഴപ്പെട്ട് നാം സമൂഹത്തിനു പ്രകാശം നല്‍കുന്നവരാകണമെന്നും ദൈവത്തിലുള്ള വിശ്വാസം ഏതു പ്രതിസന്ധിയിലും ശക്തമായ താങ്ങാകണമെന്നും മാവേലിക്കര രൂപത മുന്‍ ബിഷപ് ജോഷ്വാ മാര്‍ ഇഗ്നാത്തിയോസ്. മര്‍ത്ത് മറിയം ഫൊറോന പള്ളിയില്‍ വിശുദ്ധ ആഗസ്തീനോസിന്‍റെ തിരുനാളിനോടനുബന്ധിച്ച് നടന്ന അഭിഷേകാഗ്‌നി ബൈബിള്‍ കണ്‍വന്‍ഷനില്‍ സമാപന സന്ദേശം നല്‍കുകയായിരുന്നു അദ്ദേഹം. ഫാ. സേവ്യര്‍ ഖാന്‍ വട്ടായിലാണ് അഞ്ചുദിവസത്തെ കണ്‍വന്‍ഷന്‍ നയിച്ചത്. വികാരി ഫാ. ജേക്കബ് ചീരംവേലില്‍ പ്രസംഗിച്ചു.

താലൂക്ക് ലൈബ്രറി കൗണ്‍സില്‍ ആസ്ഥാനമന്ദിരത്തിന് 1.20 കോടി

കറുകച്ചാല്‍: താലൂക്ക് ലൈബ്രറി കൗണ്‍സില്‍ ആസ്ഥാനമന്ദിരത്തിന് 1.20 കോടി രൂപ സംസ്ഥാന സര്‍ക്കാര്‍ ബജറ്റ് വിഹിതമായി വകയിരുത്തിയിട്ടുണ്ടെന്നും നിര്‍മാണ പ്രവര്‍ത്തനങ്ങള്‍ ഉടന്‍ ആരംഭിക്കുമെന്നും ഗവ. ചീഫ് വിപ്പ് ഡോ. എന്‍. ജയരാജ്. താലൂക്ക് ലൈബ്രറി കൗണ്‍സില്‍ സെക്രട്ടറിയായി തെരഞ്ഞെടുക്കപ്പെട്ട ജോസ് ചമ്പക്കരയെ ആദരിക്കുന്നതിനായി ചേര്‍ന്ന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ചമ്പക്കര സുബാഷ് സ്‌കൂളിന് എതിര്‍വശത്ത് ലൈബ്രറി കൗണ്‍സില്‍ ഉടമസ്ഥതയിലുള്ള സ്ഥലത്താണ് ആസ്ഥാന മന്ദിരം നിര്‍മിക്കുന്നത്. കറുകച്ചാലിലെ വൃക്ഷപരിസ്ഥിതി സംരക്ഷണ സമിതി, സുഹൃദ്‌സംഘം എന്നിവര്‍ ചേര്‍ന്നാണ് ജോസ് ചമ്പക്കരയ്ക്ക് ആദരവ് ഒരുക്കിയത്. അജി കാരുവാക്കല്‍ അധ്യക്ഷത വഹിച്ചു. വൃക്ഷ വൈദ്യൻ കെ. ബിനു, രഞ്ജി രവീന്ദ്രന്‍, രാജേഷ് കൈടാച്ചിറ, ബിജു ഏബ്രഹാം, എം. ഇബ്രാഹിം കുട്ടി, ഗീതാമണി രാജേന്ദ്രന്‍, ജോണ്‍സണ്‍ ജോണ്‍, ഡോ. ഗിരീഷ്, ചമ്പക്കര പ്രസന്നകുമാര്‍, മനോജ് പനയ്ക്കവയല്‍ എന്നിവര്‍ പ്രസംഗിച്ചു.

24 മണിക്കൂറും പ്രവര്‍ത്തിക്കുന്ന നീതി മെഡിക്കല്‍ സ്റ്റോര്‍ തുറന്നു

ചങ്ങനാശേരി: കോട്ടയം ജില്ലാ സഹകരണ ആശുപത്രി സംഘം ഡിസിഎച്ചിന്‍റെ നേതൃത്വത്തില്‍ ചങ്ങനാശേരി മുനിസിപ്പല്‍ ജംഗ്ഷനില്‍ 24 മണിക്കൂറും പ്രവര്‍ത്തിക്കുന്ന നീതി മെഡിക്കല്‍ സ്റ്റോറും നീതി ലബോറട്ടറിയും ആരംഭിച്ചു. മന്ത്രി വി.എന്‍. വാസവന്‍ ഉദ്ഘാടനം ചെയ്തു. ചങ്ങനാശേരി ഹെഡ്‌ പോസ്റ്റ്ഓഫീസിന് എതിര്‍വശത്തുള്ള നഗരസഭാ ഷോപ്പിംഗ് കോംപ്ലക്‌സിലാണ് മെഡിക്കല്‍ സ്റ്റോറും ലബോറട്ടറിയും പ്രവര്‍ത്തിക്കുന്നത്. ഡിസിഎച്ച് പ്രസിഡന്‍റ് സി.ജെ. ജോസഫ് അധ്യക്ഷത വഹിച്ചു. മുന്‍സിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍, വൈസ് ചെയര്‍മാന്‍ മാത്യൂസ് ജോര്‍ജ്, കെ.എന്‍. വേണുഗോപാല്‍, കെ.സി. ജോസഫ് തുടങ്ങിയവര്‍ പ്രസംഗിച്ചു.

നക്രാപുതുവലില്‍ 42 കുടുംബങ്ങള്‍ക്കു ശുദ്ധജലം : കുടിവെള്ള ശുദ്ധീകരണ പ്ലാന്‍റ് ഉദ്ഘാടനം 26ന്

ചങ്ങനാശേരി: പായിപ്പാട് പഞ്ചായത്തിലെ നക്രാപുതുവലിലുള്ള 42 കുടുംബങ്ങള്‍ക്ക് വീടുകളിലേക്ക് ശുദ്ധജലം എത്തുന്നു. പായിപ്പാട് ഗ്രാമപഞ്ചായത്തിലെ പതിനഞ്ചാം വാര്‍ഡില്‍ സ്ഥിതിചെയ്യുന്ന കുടിവെള്ള ശുദ്ധീകരണ പ്ലാന്‍റിന്‍റെ ഉദ്ഘാടനം 26ന് നാലുകോടി സെന്‍റ് തോമസ് പള്ളി ഓഡിറ്റോറിയത്തില്‍ ചേരുന്ന സമ്മേളനത്തില്‍ കൊടിക്കുന്നില്‍ സുരേഷ് എംപി ഉദ്ഘാടനം നിര്‍വഹിക്കും. ജോബ് മൈക്കിള്‍ എംഎല്‍എ അധ്യക്ഷത വഹിക്കും. പായിപ്പാട് പഞ്ചായത്തിന്‍റെ നേതൃത്വത്തില്‍ 23 ലക്ഷം രൂപ വിനിയോഗിച്ച് നിര്‍മിച്ച ഈ പ്ലാന്‍റിലൂടെ 24 മണിക്കൂറും ശുദ്ധജലം ലഭിക്കും. ഭൂജല വകുപ്പിന്‍റെ നേതൃത്വത്തിലാണ് നിര്‍മാണം. കുട്ടനാടിനോട് ചേര്‍ന്നുകിടക്കുന്ന പ്രദേശമായതിനാല്‍ നക്രാപുതുവല്‍ എല്ലാ വശങ്ങളും വെള്ളത്താല്‍ ചുറ്റപ്പെട്ടു കിടക്കുകയാണ്. ശുദ്ധജല ലഭ്യത പ്രതിസന്ധിയാണ്. പ്രതിദിനം 10,000 ലിറ്റര്‍ കുടിവെള്ളം ശുദ്ധീകരിക്കാനാകും ശുദ്ധീകരണ പ്ലാന്‍റ് വരുന്നതോടുകൂടി ജനങ്ങള്‍ക്ക് വലിയ ആശ്വാസമാകും. പനയാര്‍ തോട്ടിലെ മലിനജലം ചിരട്ടക്കരിയും മണലുമിട്ട് ശുദ്ധീകരിച്ചാണ് പ്രദേശവാസികള്‍ ഇതുവരെ ഉപയോഗിച്ചുവന്നിരുന്നത്. പ്ലാന്‍റ് നിര്‍മിക്കുന്നതിനായി ജനങ്ങള്‍ ബണ്ടിനോടു ചേര്‍ന്ന് ഭൂമി വിലയ്ക്ക് വാങ്ങി പഞ്ചായത്തിന് നല്‍കിയിരുന്നു. പ്ലാന്‍റിലൂടെ ശുദ്ധീകരിക്കുന്ന വെള്ളം പൈപ്പ് കണക്‌ഷന്‍ വഴി വീടുകളിലേക്കെത്തും. പ്രതിദിനം 10,000 ലിറ്ററോളം കുടിവെള്ളം ശുദ്ധീകരിക്കാന്‍ പ്ലാന്‍റിലൂടെ കഴിയും. കെ.ഡി. മോഹനന്‍ പ്രസിഡന്‍റ്, പായിപ്പാട് പഞ്ചായത്ത്

സുമനസുകളുടെ സഹായത്താൽ തച്ചേകുന്നേല്‍ ശശിക്കും സഹോദരി ഓമനയ്ക്കും വീടായി

കുറുപ്പന്തറ: മാഞ്ഞൂര്‍ പഞ്ചായത്തിലെ അതിദരിദ്ര ലിസ്റ്റില്‍ ഉള്‍പ്പെടുകയും സ്വന്തം പേരില്‍ വസ്തു സംബന്ധിച്ചു റിക്കാര്‍ഡുകളൊന്നുമില്ലാത്തതിനാല്‍ ലൈഫ് മിഷന്‍ പദ്ധതിയില്‍ ഉള്‍പ്പെടുത്താന്‍ സാധിക്കാതെയുംവന്ന 12-ാം വാര്‍ഡിലെ തച്ചേകുന്നേല്‍ ശശിക്കും സഹോദരി ഓമനയ്ക്കും വീടായി. അടച്ചുറുപ്പില്ലാത്ത വീടിനുള്ളിലാണ് ഇരുവരും കഴിയുന്നതെന്ന് മനസിലാക്കിയ വാര്‍ഡ് മെംബര്‍ സുനു ജോര്‍ജിന്‍റെ നേതൃത്വത്തില്‍ സുമനസുകളുടെ സഹായത്തോടെ വീട് നിര്‍മാണം പൂര്‍ത്തിയാക്കി. മേയ് മാസത്തില്‍ നടന്ന ഗ്രാമസഭയില്‍ സുനു ജോര്‍ജ് വിഷയം അവതരിപ്പിക്കുകയും വീട് നിര്‍മാണത്തിനായി പതിനൊന്നംഗ കമ്മിറ്റി രൂപീകരിക്കുകയും ചെയ്തു. അജിത് തെക്കെപുരയില്‍ കണ്‍വീനറായിട്ടാണ് വീടിന്‍റെ പണികള്‍ ആരംഭിച്ചത്. സുനു ജോര്‍ജിന്‍റെ അധ്യക്ഷതയില്‍ നടന്ന യോഗത്തില്‍ മോന്‍സ് ജോസഫ് എംഎല്‍എ വീടിന്‍റെ താക്കോല്‍ദാനം നിര്‍വഹിച്ചു. ബ്ലോക്ക് മെംബര്‍ ലൂക്കോസ് മാക്കില്‍, ജനപ്രതിനിധികളായ ടോമി കാറുകുളം, ബിനോ സക്കറിയ, സാലിയമ്മ ജോളി, ലിസി ജോസഫ്, അജിത് തെക്കെപുരയില്‍, വിഇഒമാരായ പ്രീന്‍ഷാദ്, നിഷ, വിവിധ രാഷ്‌ട്രീയ നേതാക്കള്‍, പൊതു പ്രവര്‍ത്തകര്‍ തുടങ്ങിയവര്‍ പങ്കെടുത്തു.

സംരംഭകർക്ക് കൈത്താങ്ങാകാൻ ഓണച്ചന്തയും ഓണക്കിറ്റുമൊരുക്കി വൈക്കംനഗരസഭാ കുടുംബശ്രീ

വൈക്കം: കുടുംബശ്രീ സംരംഭകരുടെ ഉത്പന്നങ്ങൾ വിറ്റഴിച്ച് സംരംഭകർക്ക് അധികവരുമാനം നേടിക്കൊടുക്കാൻ വൈക്കം നഗരസഭ കുടുംബശ്രീ ജില്ലാ മിഷന്‍റെ സഹകരണത്തോടെ നടത്തുന്ന മാസച്ചന്ത ജനപ്രിയമാകുന്നു. നഗരസഭ കുടുംബശ്രീ നഗരസഭാ കാര്യാലയത്തിനു മുന്നിൽ മാസത്തിൽ മൂന്നു ദിവസമാണ് ചന്ത സംഘടിപ്പിക്കുന്നത്. കുടുംബശ്രീ അംഗങ്ങൾ വീടുകളിൽ തയാറാക്കുന്ന കലർപ്പില്ലാത്ത പല തരം അച്ചാറുകൾ, കറിപ്പൊടികൾ, മസാലക്കൂട്ടുകൾ, വിവിധ തരം ധാന്യങ്ങളുടെ പൊടികൾ, പലഹാരങ്ങൾ, പായസങ്ങൾ എന്നിവയ്ക്ക് പുറമേ നൈറ്റി , തോർത്ത്, റെഡിമെയ്ഡ് വസ്ത്രങ്ങൾ തുടങ്ങിയവയുമായി വിവിധഗ്രൂപ്പുകളടക്കം 20 ഓളം സംരംഭകരാണ് ചന്തയിൽ ഉത്പന്നങ്ങളുമായെത്തുന്നത്. 20 രൂപ മുതൽ 100 രൂപവരെ വിലയുള്ള ഗുണമേന്മയുള്ള ഉത്പന്നങ്ങൾക്ക് ആവശ്യക്കാരുമേറെയാണ്. സംരംഭകർക്ക് പിൻബലമേകാൻ മാസംതോറും മൂന്നു ദിവസം ചന്ത നടത്തുന്നതിനായി പന്തൽ തീർക്കുന്നതിനും അനുബന്ധ ചെലവുകളും കുടുംബശ്രീ ജില്ലാമിഷൻ വഹിക്കും. നഗരസഭ സിഡിഎസ് ചെയർപേഴ്സൺ സൽബി ശിവദാസ്, മെംബർ സെക്രട്ടറി ഷിബു, കുടുംബശ്രീ മൈക്രോ എന്‍റർപ്രൈസ് കൺസൾട്ടന്‍റ് ലതാ ശിവാനന്ദൻ, കുടുംബശ്രീ വൈക്കം ബ്ലോക്ക് കോ-ഓർഡിനേറ്റർ രഞ്ജിതദേവ്, സിഡിഎസ് കൺവീനർ പി.ശാരദ തുടങ്ങിയവരുടെ ഏകോപനത്തോടെയുള്ള പ്രവർത്തനമാണ് മാസച്ചന്ത വൻവിജയമാക്കുന്നത്.

കര്‍ഷകരെ സംരക്ഷിക്കാത്ത വ്യവസ്ഥകള്‍ തകരും

കടുത്തുരുത്തി: പ്രതികൂല കാലാവസ്ഥയും സാമ്പത്തികത്തകര്‍ച്ചയും നേരിടുന്ന കര്‍ഷക സമൂഹത്തെ നിലനിര്‍ത്താന്‍ സര്‍ക്കാര്‍ ജാഗ്രത പുലര്‍ത്തണമെന്ന് കാണക്കാരി പഞ്ചായത്ത് മെംബര്‍ ജോര്‍ജ് ഗര്‍വാസീസ്. കാണക്കാരി അശ്വതി ഡികെഎഫ് കണ്‍വേര്‍ജന്‍സ് സെന്‍ററില്‍ നടന്ന കര്‍ഷകദിനാഘോഷത്തില്‍ പ്രസംഗിക്കുകയായിരുന്നു അദേഹം. ജോര്‍ജ് ഗര്‍വാസിസും രത്‌നഗിരി പബ്ലിക് ലൈബ്രറി പ്രസിഡന്‍റും കര്‍ഷകനുമായ ഫ്രാന്‍സിസ് ജോര്‍ജും സംയുക്തമായി കര്‍ഷകദിനാഘോഷം ഉദ്ഘാടനം ചെയ്തു. ദേശീയ കര്‍ഷക ഫെഡറേഷന്‍ പ്രസിഡന്‍റ് ജോര്‍ജ് മുല്ലക്കര അധ്യക്ഷത വഹിച്ചു. കൃഷി ഓഫീസര്‍ പ്രവീണ്‍ ജോണ്‍, പഞ്ചായത്ത് മെംബര്‍ വി.ജി. അനില്‍കുമാര്‍, വിഎച്ച്എസ്എസ് സ്റ്റാഫ് സെക്രട്ടറി പി.കെ. സജേഷ്, വനിതാ കര്‍ഷക അവാര്‍ഡ് നേടിയ അധ്യാപിക സാലിയമ്മ, ഡികെഎഫ് ജില്ലാ പ്രസിഡന്‍റ് സജി പി. ഏബ്രഹാം എന്നിവര്‍ പ്രസംഗിച്ചു. എന്‍. വെങ്കിടകൃഷ്ണന്‍ പോറ്റി, പി.എസ്. മുരളി എന്നിവര്‍ ക്ലാസുകള്‍ നയിച്ചു.

കാലാവധി തീരും മുമ്പ് പുറത്താക്കിയതായി പരാതി

ഞീഴൂര്‍: പഞ്ചായത്ത് ഭരണസമിതി എന്‍ജിനിയറിംഗ് വിഭാഗത്തില്‍ താത്കാലികമായി നിയമനം നല്‍കിയ സിജി മാത്യുവിനെ ഭരണസമിതിയോ, സെക്രട്ടറിയോ അറിയാതെ അസിസ്റ്റന്‍റ് എന്‍ജിനിയര്‍ കാലാവധി തീരും മുമ്പ് പുറത്താക്കിയതായി പരാതി. താത്കാലിക ജീവനക്കാരിയുടെ സര്‍വീസില്‍ യാതൊരു തെറ്റുകളും ചൂണ്ടിക്കാണിക്കാതെയാണ് എഇയുടെ രാഷ്‌ട്രീയ പ്രേരിതമായ നടപടിയെന്നും ആക്ഷേപമുണ്ട്. വിധവയും സ്വന്തമായി വീട് പോലുമില്ലാതെ മക്കളെ നോക്കി തനിച്ചു കുടുംബം പുലര്‍ത്താന്‍ ജീവിക്കുന്ന സിജിയെ പുറത്താക്കിയ നടപടിയില്‍ യൂഡിഎഫ് ഞീഴൂര്‍ മണ്ഡലം കമ്മിറ്റി പ്രതിഷേധിച്ചു. വിഷയത്തില്‍ അടിയന്തര നടപടി സ്വീകരിച്ചു പുറത്താക്കിയാളെ തിരിച്ചെടുത്തില്ലെങ്കില്‍ എഇക്കെതിരേ മാനസിക പീഡനത്തിനും പഞ്ചായത്ത് സെക്രട്ടറിക്കും ഭരണസമിതിക്കുമെതിരേ നിയമനടപടികളും സ്വീകരിക്കുമെന്ന് യുഡിഎഫ് ഞീഴൂര്‍ മണ്ഡലം കമ്മിറ്റി അറിയിച്ചു. ചെയര്‍മാന്‍ ചെറിയാന്‍ കെ. ജോസ്, ബോബന്‍ മഞ്ഞളാമല, എന്‍. മണിലാല്‍, പഞ്ചായത്തംഗങ്ങളായ ശരത് ശശി, ശ്രീലേഖ മണിലാല്‍, ഷൈനി സ്റ്റീഫന്‍ തുടങ്ങിയവര്‍ പ്രസംഗിച്ചു.

കേബിള്‍ ടിവിയുടെ ഫൈബര്‍ കേബിളുകള്‍ നശിപ്പിക്കുന്നതായി പരാതി

കടുത്തുരുത്തി: കേബിള്‍ ടിവിയുടെ ഒപ്റ്റിക്കല്‍ ഫൈബര്‍ കേബിളുകള്‍ രാത്രിയില്‍ സാമൂഹ്യവിരുദ്ധര്‍ നശിപ്പിക്കുന്നതായി പരാതി. ആപ്പാഞ്ചിറ, ആയാംകുടി, എഴുമാന്തുരുത്ത്, ആദിത്യപുരം മേഖലകളില്‍ പ്രവര്‍ത്തിക്കുന്ന റിയ മരിയ കേബിള്‍ ടിവിയുടെ ഫൈബര്‍ കേബിളുകളാണ് രാത്രിയില്‍ സാമൂഹ്യവിരുദ്ധര്‍ നശിപ്പിക്കുന്നത്. പോസ്റ്റിലൂടെ പോയിരിക്കുന്ന കേബിളുകള്‍ ഗോവണി ഉപയോഗിച്ചു കയറിയാണ് നാശമുണ്ടാക്കിയത്. ഫൈബര്‍ കേബിളുകളുടെ‍ ജോയിന്‍റ് ബോക്സുകള്‍ തല്ലിപ്പൊട്ടിച്ചും ഫൈബര്‍ കേബിളുകള്‍ മടക്കിവച്ച ശേഷം ടൈ ഉപയോഗിച്ചു കെട്ടിവച്ചും പ്ലെയര്‍ ഉപയോഗിച്ചു മുറിച്ചുമാണ് നശിപ്പിച്ചിരിക്കുന്നത്. സംഭവം സംബന്ധിച്ചു കേബിള്‍ ടിവി ഉടമ കടുത്തുരുത്തി പോലീസില്‍ പരാതി നല്‍കിയതിനെത്തുടര്‍ന്ന് ആയാംകുടി സ്വദേശിയായ ഒരാളെ പോലീസ് വിളിച്ചുവരുത്തി ചോദ്യം ചെയ്തിട്ടുണ്ട്. സംഭവം സംബന്ധിച്ചു അന്വേഷണം നടക്കുകയാണ്. കഴിഞ്ഞ നാല് മാസത്തിലേറേയായി സമാനരീതിയില്‍ സാമൂഹ്യവിരുദ്ധര്‍ കേബിളുകള്‍ നശിപ്പിച്ചതിനെത്തുടര്‍ന്ന് പലയിടത്തും കേബിള്‍ ടിവി സര്‍വീസുകള്‍ തടസപ്പെട്ടിട്ടുണ്ട്.

അപകടസ്ഥിതിയിലായ പാലമരവും തകർച്ചയിലായ ബസ് കാത്തിരിപ്പുകേന്ദ്രവും നീക്കണം

തലയോലപ്പറമ്പ്: തലയോലപറമ്പ് സെന്‍ട്രല്‍ ജംഗ്ഷനില്‍ യാത്രക്കാര്‍ക്കും വ്യാപാര സ്ഥാപനങ്ങള്‍ക്കും ഭീഷണിയായി നില്‍ക്കുന്ന കൂറ്റന്‍പാലമരം മുറിക്കുന്നതിനും അപകട സ്ഥിതിയിലായ ബസ്‌കാത്തിരിപ്പു കേന്ദ്രം പൊളിച്ചു നീക്കുന്നതിനും നടപടി സ്വീകരിക്കണമെന്ന ആവശ്യം ശക്തമായി. വേരറ്റു നിലംപൊത്താറായ മരത്തിനടുത്താണ് പൊളിഞ്ഞുവീഴാറായ പതിറ്റാണ്ടുകള്‍ പഴക്കമുള്ള ബസ് കാത്തിരിപ്പ് കേന്ദ്രം. പുതിയ ബസ് സ്റ്റാന്‍ഡ് വരുന്നതിനുമുമ്പ് ഇവിടെയായിരുന്നു ബസുകള്‍ നിര്‍ത്തിയിരുന്നത്. അപകട സ്ഥിതിയിലായ വന്‍മരം മുറിച്ചുനീക്കുന്നതിനും തകര്‍ച്ചാഭീഷണിയിലായ ബസ് കാത്തിരിപ്പുകേന്ദ്രം പൊളിച്ചു മാറ്റുന്നതിനും അധികൃതര്‍ നടപടി സ്വീകരിക്കണമെന്ന് വ്യാപാരികളും നാട്ടുകാരും നിരന്തരം ആവശ്യപ്പെട്ടിട്ടും അധികൃതര്‍ മുഖവിലയ്‌ക്കെടുക്കുന്നില്ലെന്ന് നാട്ടുകാര്‍ ആരോപിക്കുന്നു. പാലമരത്തിന്‍റെ അപകടാവസ്ഥ ചൂണ്ടിക്കാട്ടി 2020ല്‍ പഞ്ചായത്തിനും പിഡബ്ല്യുഡി അസിസ്റ്റന്‍റ് എൻജിനിയര്‍ക്കും വ്യാപാരിയായ എ. രാമചന്ദ്രന്‍ പരാതി നല്‍കിയെങ്കിലും നടപടി ഉണ്ടായില്ല. പതിറ്റാണ്ടുകള്‍ക്ക് മുമ്പ് പോലീസ് ഔട്ട് പോസ്റ്റിനും ബസ്‌ കാത്തിരിപ്പ് കേന്ദ്രത്തിനുംവേണ്ടിയുമാണ് സ്വകാര്യ വ്യക്തി ഈ സ്ഥലം പഞ്ചായത്തിന് വിട്ടു നല്‍കിയത്. സ്വകാര്യവ്യക്തിയും പഞ്ചായത്തും തമ്മിലുണ്ടാക്കിയ ഉടമ്പടിയില്‍ ഈ രണ്ടു കാര്യങ്ങള്‍ക്കല്ലാതെ മറ്റൊന്നിനും ഈ സ്ഥലം ഉപയോഗിക്കാന്‍ പാടില്ലായെന്ന വ്യവസ്ഥയുണ്ട്. വ്യവസ്ഥ ലംഘിച്ചാല്‍ സ്ഥലം വിട്ടുനല്‍കിയവരുടെ കൈവശം തിരിച്ചെത്തുമെന്നായിരുന്നു വ്യവസ്ഥ. അതുകൊണ്ടാണ് മറ്റു പ്രവര്‍ത്തനങ്ങള്‍ക്ക് ഈ സ്ഥലം വിനിയോക്കാന്‍ കഴിയാത്തതെന്ന് പഞ്ചായത്ത് പ്രസിഡന്‍റ് ഷിജി വിന്‍സെന്‍റ് പറഞ്ഞു.

പാക്കില്‍ സംക്രമ വാണിഭത്തിന് തങ്കമ്മ ഇനിയില്ല

ചങ്ങനാശേരി: പാക്കില്‍ സംക്രമ വാണിഭത്തില്‍ തഴപ്പായയും കുട്ടയും മുറവും ചൂലുമായെത്തിയിരുന്ന മാന്നില മുക്കട തങ്കമ്മ (86) ഓര്‍മമായി. അഞ്ചു പതിറ്റാണ്ടായി കര്‍ക്കിടകം ഒന്നിന് പാക്കില്‍ ശ്രീധര്‍മശാസ്താ ക്ഷേത്രമൈതാനത്ത് ആരംഭിക്കുന്ന സംക്രമ വാണിഭത്തിന് പാക്കനാരുടെ തലമുറയില്‍പ്പെട്ട പ്രതിനിധി ക്ഷേത്ര നടയില്‍ തങ്ങള്‍ നിര്‍മിച്ച ഒരു ഉത്പന്നം നടയ്ക്ക് വയ്ക്കുന്നതോടെയാണ് വാണിഭത്തിനു തുടക്കം കുറിക്കുന്നത്. കഴിഞ്ഞ 50 വര്‍ഷമായി മുടങ്ങാതെ ഇതു നിര്‍വഹിച്ചിരുന്ന തങ്കമ്മയാണ് വിടവാങ്ങിയത്. കോവിഡ് മഹാമാരി കാലത്ത് സംക്രമവാണിഭം നടന്നില്ലെങ്കിലും പാക്കനാരുടെ പ്രതിനിധിയായി ചടങ്ങുകള്‍ക്കായി അന്നും തങ്കമ്മ എത്തിയിരുന്നു. ഇത്തവണയും പാക്കില്‍ സംക്രമണത്തിന് തങ്കമ്മയുടെ സാന്നിധ്യമുണ്ടായിരുന്നു. വീട്ടിലിരുത്തി കൊട്ടയും മുറവും പായും ഉള്‍പ്പെടെ ആളുകളെക്കൊണ്ടു നെയ്ത് എടുപ്പിച്ചായിരുന്നു ആദ്യകാലത്ത് തങ്കമ്മ കച്ചവടം നടത്തിയിരുന്നത്. പ്രധാന ദേവാലയങ്ങളിലെ പെരുന്നാളുകളിലും ഉത്സവങ്ങളിലുമെല്ലാം കുട്ടയും മുറവുമായി തങ്കമ്മ എത്തിയിരുന്നു. കിഴക്കന്‍ മേഖലകളില്‍നിന്നും ഈറ്റയും വള്ളികളും എത്തിച്ചാണ് കുട്ടയും മുറവും മറ്റും നെയ്തിരുന്നത്. പാക്കനാരുടെ കഥകള്‍ പുതുതലമുറയ്ക്ക് പകര്‍ന്നു നല്‍കുന്നതിലും തങ്കമ്മ ശ്രദ്ധിച്ചിരുന്നു. മാടപ്പള്ളി പഞ്ചായത്തിലെ മാന്നില പ്രദേശത്ത് പരമ്പരാഗതമായി കൊട്ടയും മുറവും നെയ്തു കച്ചവടം നടത്തിയിരുന്നവരിലെ അവസാന കണ്ണിയാണ് തങ്കമ്മയുടെ വേര്‍പാടോടെ ഓർമയായത്.

തെരുവുനായശല്യം വർധിക്കുന്നു

ളാക്കാട്ടൂര്‍: ളാക്കാട്ടൂര്‍, മഞ്ഞാമറ്റം ഭാഗത്ത് തെരുവുനായ പ്രശ്‌നം രൂക്ഷമാകുന്നു. രണ്ടു സ്‌കൂളുകള്‍, കോണ്‍വെന്‍റ്, പള്ളി എന്നിവ സ്ഥിതി ചെയ്യുന്ന പ്രദേശത്താണ് തെരുവുനായ്ക്കള്‍ വിലസുന്നത്. മഞ്ഞാമറ്റത്തെ ആളൊഴിഞ്ഞ ഭാഗത്ത് രാത്രികാലങ്ങളില്‍ നായ്ക്കുട്ടികളെ വ്യാപകമായി ഉപേക്ഷിക്കുന്നതായി നാട്ടുകാര്‍ പറയുന്നു. ഇവ പെരുകി ഇരുചക്ര യാത്രികര്‍ക്കു ശല്യമാകുകയാണ്. പ്രായമായവരും കുട്ടികള്‍ക്കും ഇത് ഒരേപോലെ ഭീഷണിയാണ്. സ്വൈര്യമായി നടന്നു പോകാന്‍പോലും ബുദ്ധിമുട്ടാണ്. തെരുവുനായ ശല്യം ഒഴിവാക്കാന്‍ പഞ്ചായത്ത് നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

ഇരുമ്പുകമ്പി കയറ്റി വന്ന ലോറി മറിഞ്ഞ് ഗതാഗതം തടസപ്പെട്ടു

ചിങ്ങവനം: ഇരുമ്പുകമ്പി കയറ്റിയ വന്ന നാഷണല്‍ പെര്‍മിറ്റ് ലോറി ഡിവൈഡറിലേക്ക് ഇടിച്ചുകയറി മറിഞ്ഞു. ഇന്നലെ പുലര്‍ച്ചെ മൂന്നിന് ചിങ്ങവനം ഗോമതി കവലയിലാണ് അപകടമുണ്ടായത്. ലോഡുമായി ചിങ്ങവനം ഭാഗത്തേക്ക് വരികയായിരുന്ന ലോറി നിയന്ത്രണം നഷ്ടമായി ഡിവൈഡറില്‍ ഇടിച്ചു കയറി മറിയുകയായിരുന്നു. അപകടത്തെത്തുടര്‍ന്ന് ഇരുമ്പുകമ്പി റോഡിൽ ചിതറിക്കിടന്നു. ഇതോടെ ഏറെനേരം എംസി റോഡില്‍ ഗതാഗത തടസവുമുണ്ടായി. ചിങ്ങവനം പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു. ക്രെയിന്‍ ഉപയോഗിച്ച് സ്ഥലത്തുനിന്ന് ലോറി ഉയര്‍ത്തിമാറ്റിയത്.

ഭവനനിർമാണം തുടങ്ങി

അതിരമ്പുഴ: കോട്ടയ്ക്കുപുറം സെന്‍റ് മാത്യൂസ് പള്ളിയില്‍ സൊസൈറ്റി ഓഫ് സെന്‍റ് വിന്‍സെന്‍റ് ഡി പോള്‍ സെന്‍റ് മാത്യൂസ് കോണ്‍ഫറന്‍സ് തിരുപ്പിറവിയുടെ 2025-ാം വര്‍ഷ ജൂബിലിയും സൊസൈറ്റിയുടെ 85-ാം വാര്‍ഷികവും പ്രമാണിച്ച് ഇടവകയിലെ ഭവനരഹിത കുടുംബത്തിനുവേണ്ടി നിര്‍മിക്കുന്ന 11-ാമത് വിന്‍സെന്‍ഷ്യന്‍ ഭവനത്തിന്‍റെ കല്ലിടീല്‍ വികാരി റവ.ഡോ. സോണി തെക്കുംമുറിയില്‍ നിര്‍വഹിച്ചു. കോണ്‍ഫറന്‍സ് പ്രസിഡന്‍റ് ബെന്നി തടത്തില്‍ അധ്യക്ഷത വഹിച്ചു. പരേതരായ വരകുകാലായില്‍ വി.ഡി. കുര്യനും റോസമ്മ കുര്യനും സൊസൈറ്റിക്ക് സൗജന്യമായി നല്‍കിയ നാല് സെന്‍റ് ഭൂമിയിലാണ് 11 ലക്ഷം രൂപയുടെ വീട് നിര്‍മിക്കുന്നത്. അസിസ്റ്റന്‍റ് വികാരി ഫാ. ജെറിന്‍ കാവനാട്ട്, ബ്രദര്‍ പോള്‍, ബ്രദര്‍ ടില്‍ജോ, ഏരിയ പ്രസിഡന്‍റ് ഏബ്രഹാം കൊറ്റത്തില്‍, മദര്‍ സുപ്പീരിയര്‍ സിസ്റ്റര്‍ പ്രശാന്തി സിഎംസി, സിസ്റ്റര്‍ റോസിലിന്‍, ഭവനനിര്‍മാണ കമ്മിറ്റി കണ്‍വീനര്‍ പി.ടി. ജോസഫ്, സെക്രട്ടറി ഇന്‍ചാര്‍ജ് ജോസ് വേങ്ങത്തടം തുടങ്ങിയവര്‍ പ്രസംഗിച്ചു.

മണര്‍കാട് എട്ടുനോമ്പ്; മന്ത്രി വി.എന്‍. വാസവന്‍റെ നേതൃത്വത്തില്‍ ക്രമീകരണം വിലയിരുത്തി

കോട്ടയം: തീര്‍ഥാടനകേന്ദ്രമായ മണര്‍കാട് സെന്‍റ് മേരീസ് യാക്കോബായ സുറിയാനി കത്തീഡ്രലിലെ എട്ടുനോമ്പ് പെരുന്നാളിനു മുന്നോടിയായി വിവിധ വകുപ്പുകളുടെ ഏകോപനത്തോടെ വിപുലമായ ക്രമീകരണങ്ങള്‍ ഏര്‍പ്പെടുത്തും. സുരക്ഷയുടെ ഭാഗമായി കാഞ്ഞിരപ്പള്ളി ഡിവൈഎസ്പിയുടെ നേതൃത്വത്തില്‍ പ്രത്യേക പോലീസ് സംഘത്തെ നിയോഗിക്കും. സെപ്റ്റംബര്‍ ആറു മുതല്‍ എട്ടുവരെ കൂടുതല്‍ പോലീസിനെ നിയോഗിക്കും. ഷാഡോ പോലീസിനെയും നിയോഗിക്കും. പോലീസ് ഔട്ട് പോസ്റ്റും സ്ഥാപിക്കും. 24 മണിക്കൂറും പോലീസ്, റവന്യു, എക്സൈസ് കണ്‍ട്രോള്‍ റൂമുകള്‍ പ്രവര്‍ത്തിക്കും.എക്സൈസിന്‍റെ നേതൃത്വത്തില്‍ പെരുന്നാള്‍ ആരംഭിക്കുന്നതിനു മുമ്പേതന്നെ പരിശോധനകള്‍ നടത്താന്‍ മന്ത്രി നിര്‍ദേശിച്ചു. പോലീസുമായി ചേര്‍ന്ന് സംയുക്ത പരിശോധനയും നടത്തും. തടസരഹിതമായി വൈദ്യുതി ലഭ്യമാക്കാന്‍ കെഎസ്ഇബി ക്രമീകരണങ്ങള്‍ ഉറപ്പാക്കണം. ആരോഗ്യവകുപ്പിന്‍റെ നേതൃത്വത്തില്‍ മെഡിക്കല്‍ സംഘത്തിന്‍റെ സേവനവും ആംബുലന്‍സ് സേവനവും ലഭ്യമാക്കും. മേഖലയിലെ മാലിന്യനീക്കത്തിനു ശുചിത്വ മിഷനുമായി ചേര്‍ന്ന് നടപടി സ്വീകരിക്കാന്‍ പഞ്ചായത്തിനെ ചുമതലപ്പെടുത്തി. ഭക്ഷണവിതരണ കേന്ദ്രങ്ങളില്‍ പരിശോധനയ്ക്കായി പ്രത്യേക സ്‌ക്വാഡിനെ നിയോഗിക്കാന്‍ ഭക്ഷ്യസുരക്ഷാ വകുപ്പിന് നിര്‍ദേശം നല്‍കി. മുടക്കമില്ലാതെ കുടിവെള്ളം വിതരണം ചെയ്യാന്‍ ജലഅഥോറിറ്റിയെ ചുമതലപ്പെടുത്തി. ഫയര്‍ഫോഴ്സ് യൂണിറ്റിന്‍റെ സേവനം 24 മണിക്കൂറും ലഭ്യമാക്കും. കെഎസ്ആര്‍ടിസി കോട്ടയത്തുനിന്നും മല്ലപ്പള്ളിയില്‍നിന്നും പ്രത്യേകമായി 10 സര്‍വീസുകള്‍ വീതം നടത്തും. കൂടാതെ ആവശ്യമനുസരിച്ച് സ്പെഷല്‍ സര്‍വീസുകളും നടത്തും. വിവിധ വകുപ്പുകളുടെ പ്രവര്‍ത്തനങ്ങള്‍ ഏകോപിപ്പിക്കാന്‍ അഡീഷണല്‍ ജില്ലാ മജിസ്ട്രേറ്റിനെയും സബ് കളക്ടറെയും ചുമതലപ്പെടുത്തി. റോഡുകളുടെ അറ്റകുറ്റപ്പണികള്‍ വേഗത്തില്‍ പൂര്‍ത്തീകരിക്കാന്‍ പൊതുമരാമത്ത് വകുപ്പിനും പഞ്ചായത്തിനും നിര്‍ദേശം നല്‍കി. ഒരാഴ്ചയ്ക്കകം പണികള്‍ പൂര്‍ത്തീകരിക്കാനാണ് നിര്‍ദേശം. സെപ്റ്റംബര്‍ ഒന്നു മുതല്‍ എട്ടുവരെയാണ് പെരുന്നാള്‍. എട്ടുനോമ്പ് പെരുന്നാളിനോടനുബന്ധിച്ചുള്ള മുന്നൊരുക്കം വിലയിരുത്തുന്നതിനായി കളക്‌ടറേറ്റ് കോണ്‍ഫറന്‍സ് ഹാളില്‍ കൂടിയ യോഗത്തില്‍ മന്ത്രി വി.എന്‍. വാസവന്‍ അധ്യക്ഷത വഹിച്ചു. കളക്ടര്‍ ചേതന്‍കുമാര്‍ മീണ, മണര്‍കാട് പഞ്ചായത്ത് പ്രസിഡന്‍റ് കെ.സി. ബിജു, ജില്ലാ പഞ്ചായത്തംഗം റെജി എം. ഫിലിപ്പോസ്, അഡീഷണല്‍ ജില്ലാ മജിസ്ട്രേറ്റ് എസ്. ശ്രീജിത്ത്, സബ് കളക്ടര്‍ ആകാശ് ഗോയല്‍, എക്സൈസ് ഡെപ്യൂട്ടി കമ്മീഷണര്‍ കെ.ആര്‍. അജയ്, കാഞ്ഞിരപ്പള്ളി ഡിവൈഎസ്പി സാജു വര്‍ഗീസ്, ജില്ലാ ഫയര്‍ ഓഫീസര്‍ എസ്.കെ. ബിജുമോന്‍, ജില്ലാ സപ്ലൈ ഓഫീസര്‍ ബി. സജനി, കോട്ടയം തഹസില്‍ദാര്‍ എസ്.എന്‍. അനില്‍കുമാര്‍, കത്തീഡ്രല്‍ സഹവികാരി ഫാ. ലിറ്റു ജേക്കബ്, ട്രസ്റ്റിമാരായ സുരേഷ് കെ. ഏബ്രഹാം, ബെന്നി ടി. ചെറിയാന്‍, ജോര്‍ജ് സക്കറിയ, പള്ളി സെക്രട്ടറി പി.എ. ചെറിയാന്‍, വിവിധ വകുപ്പ് ഉദ്യോഗസ്ഥര്‍ എന്നിവര്‍ പങ്കെടുത്തു.

കഞ്ചാവുമായി യുവാവ് പിടിയിൽ

ഗാന്ധിനഗര്‍: കഞ്ചാവ് വില്പനയ്ക്കായി കൈവശം സൂക്ഷിച്ച യുവാവിനെ ഗാന്ധിനഗര്‍ പോലീസ് പിടികൂടി. ആര്‍പ്പൂക്കര വില്ലൂന്നിയില്‍ ആദിത്യന്‍ (19)ആണ് പിടിയിലായത്. തിങ്കളാഴ്ച രാത്രി 9.30ഓടുകൂടി തൊണ്ണംകുഴി-വില്ലൂന്നി റോഡില്‍ സെന്‍റ് ജോസഫ് സ്‌കൂളിന് സമീപം റോഡിൽനിന്നാണ് ആദിത്യന്‍ പോലീസ് പിടിയിലാകുന്നത്. ഈ സമയം കൈവശം സൂക്ഷിച്ചിരിക്കുന്ന 10 ഗ്രാം കഞ്ചാവ് പോലീസ് പിടിച്ചെടുത്തു. എസ്ഐ ഷൈജു രാഘവന്‍, സിപിഒമാരായ ജസ്റ്റിന്‍ ജോയി, അനൂപ്, ശ്രീനീഷ് തങ്കപ്പന്‍, ലിബിന്‍ മാത്യു എന്നിവരടങ്ങിയ അന്വേഷണസംഘമാണ് പ്രതിയെ പിടികൂടിയത്.

മെഡിക്കൽ കോളജ് ആശുപത്രിയിൽ ‘യുപിഐ പേ’ സംവിധാനം ഏർപ്പെടുത്തണമെന്ന്

ഗാന്ധിനഗര്‍: കോട്ടയം മെഡിക്കല്‍ കോളജ് ആശുപത്രിയുടെ വിവിധ കാഷ് കൗണ്ടറില്‍ “യുപിഐ പേ’’ സംവിധാനം ഏര്‍പ്പെടുത്തണമെന്ന ആവശ്യം ശക്തമാകുന്നു. ലാബുകളിലെ വിവിധ പരിശോധനകള്‍, എംആര്‍ഐ, സിടി സ്‌കാന്‍, എക്‌സ്‌റേ, ഇസിജി തുടങ്ങിയ എല്ലാ പരിശോധനയ്ക്കും രോഗികളില്‍നിന്നു ഫീസ് ഈടാക്കുന്നുണ്ട്. രോഗികളുടെ കൂട്ടിരിപ്പുകാരില്‍ ഭൂരിഭാഗം പേരും യുപിഐ പേ യിലൂടെ പണം അടയ്ക്കാമെന്ന ധാരണയില്‍ വിവിധ പരിശോധനകള്‍ക്കായി മണിക്കൂറുകള്‍ നീണ്ട ക്യൂവില്‍ നില്‍ക്കും. എന്നാല്‍, ഒടുവിൽ കൗണ്ടറില്‍ എത്തുമ്പോഴാണ് യുപിഐ പേ ഇല്ലെന്ന് അറിയുന്നത്. തുടര്‍ന്ന് സമീപത്തുള്ള മെഡിക്കല്‍ സ്റ്റോര്‍ അടക്കമുള്ള വ്യാപാര സ്ഥാപനങ്ങളെ ആശ്രയിക്കുകയാണ് രോഗികളും കൂട്ടിരിപ്പുകാരും ചെയ്യുന്നത്. എന്നാല്‍, എല്ലാ സ്ഥാപനമുടമകളും പണം കൊടുക്കാറില്ല. ആശുപത്രിയില്‍ വിവിധ പരിശോധനകള്‍ക്കായി വരുന്ന രോഗികള്‍ക്ക് യുപിഐ പേ സംവിധാനം അടിയന്തരമായി ഏര്‍പ്പെടുത്തണമെന്നാണ് പൊതുവില്‍ ഉയരുന്ന ആവശ്യം.

ഡോക്ടര്‍മാരില്ല; ചികിത്സ കിട്ടാതെ രോഗികള്‍ മടങ്ങുന്നു

കോട്ടയം: ജില്ലാ ജനറല്‍ ആശുപത്രിയില്‍ എത്തുന്ന രോഗികള്‍ ചികിത്സ കിട്ടാതെ മടങ്ങുന്നു. ഡോക്ടര്‍മാരുടെ കുറവു മൂലമാണ് രോഗികള്‍ ചികിത്സ ലഭിക്കാതെ മടങ്ങുന്നത്. ആശുപത്രിയില്‍ ദിവസവും ചികിത്സയ്‌ക്കെത്തുന്നത് നൂറുകണക്കിന് രോഗികളാണ്. ജനറല്‍ മെഡിസിന്‍, ഓര്‍ത്തോ, സര്‍ജറി, നേത്രരോഗം തുടങ്ങിയ വിഭാഗങ്ങളിലെല്ലാമുള്ള ഡോക്ടര്‍മാരുടെ കുറവ് ആശുപത്രിയുടെ പ്രവര്‍ത്തനത്തെ സാരമായി ബാധിച്ചിട്ടുണ്ട്. നാളുകള്‍ക്കു മുമ്പ് നേത്രരോഗ വിഭാഗത്തില്‍ സീനിയര്‍ കണ്‍സള്‍ട്ടന്‍റ് അടക്കം നാലു പേരാണുണ്ടായിരുന്നത്. എന്നാല്‍ ഇപ്പോഴുള്ളത് രണ്ടു ഡോക്ടര്‍മാര്‍ മാത്രം. ആരോഗ്യവകുപ്പുതന്നെ ഈ ഡോക്ടര്‍മാരെ മെഡിക്കല്‍ ക്യാമ്പുകള്‍ ഉള്‍പ്പെടെയുള്ള മറ്റു ജോലികള്‍ക്കു നിയോഗിച്ചിരിക്കുകയാണ്. ഇതോടെ പല ദിവസങ്ങളിലും ഒപി അടച്ചിടേണ്ട അവസ്ഥയാണ്. ഈ ദിവസങ്ങളില്‍ ഇവിടെയെത്തുന്ന രോഗികള്‍ തിരികെ മടങ്ങുകയാണ്. വൈറല്‍ പനി ഉള്‍പ്പെടെ പടരുമ്പോള്‍ ദിവസവും നാനൂറോളം രോഗികളാണ് ഒപിയില്‍ ചികിത്സ തേടിയെത്തുന്നത്. പല ദിവസങ്ങളിലും ഡോക്ടര്‍മാരുടെ കുറവ് അനുഭവപ്പെട്ടു തുടങ്ങിയതോടെ ചികിത്സയ്‌ക്കെത്തുന്നവരുടെ എണ്ണവും കുറഞ്ഞു. സീനിയര്‍ കണ്‍സള്‍ട്ടന്‍റിന്‍റെ തസ്തിക ഒഴിഞ്ഞുകിടക്കാന്‍ തുടങ്ങിയിട്ട് വര്‍ഷങ്ങളായി. ഈ തസ്തിക ഒഴിവാക്കി കണ്‍സള്‍ട്ടന്‍റിനെ നിയമിക്കണമെന്നാണ് രോഗികള്‍ ആവശ്യപ്പെടുന്നത്. നാല് ഡോക്ടര്‍മാര്‍ ഉണ്ടായിരുന്ന സര്‍ജറി ഒപിയിലും ഇപ്പോഴുള്ളത് രണ്ടുപേര്‍ മാത്രം. രണ്ട് സര്‍ജന്മാര്‍ ഇവിടേക്ക് സ്ഥലം മാറ്റം ആവശ്യപ്പെട്ട് അപേക്ഷ നല്‍കിയിട്ടും അധികൃതര്‍ പരിഗണിക്കുന്നില്ല. ന്യൂറോ ഡോക്ടറുടെ സേവനം ആശുപത്രിയില്‍ ലഭിച്ചിരുന്നതാണ്. സ്‌ട്രോക് ഐസിയു സജ്ജീകരിച്ച് നാലായിരത്തോളം രോഗികള്‍ക്ക് ചികിത്സയും നല്‍കിയിരുന്നു. എന്നാല്‍, 2022ല്‍ ന്യൂറോ ഡോക്ടറെ സ്ഥലം മാറ്റിയതോടെ ന്യൂറോ വിഭാഗത്തിന്‍റെ പ്രവര്‍ത്തനം പൂര്‍ണമായി നിലച്ചു. ആശുപത്രിയിലെ ഒപി സമയം കഴിഞ്ഞാല്‍ പിന്നെ അത്യാഹിത വിഭാഗത്തില്‍ വന്‍ തിരക്കാണ് അനുഭവപ്പെടുന്നത്. ഇവിടെ ഡ്യൂട്ടിയിലുള്ളത് ഒരു ഡോക്ടര്‍ മാത്രമാണ്. ഡോക്‌ടര്‍മാരുടെ കുറവ് കാരണം മിക്ക ദിവസവും എല്ലാ ഒപിയും പ്രവര്‍ത്തിക്കാറില്ല. ഇത് സ്‌പെഷാലിറ്റി വിഭാഗങ്ങളിലെത്തുന്ന രോഗികള്‍ക്കു വലിയ പ്രയാസമാണുണ്ടാക്കുന്നത്. വിവിധ വിഷയങ്ങള്‍ ചൂണ്ടിക്കാട്ടി ആശുപത്രി മാനേജ്‌മെന്‍റ് കമ്മിറ്റി അംഗങ്ങളായ പി.കെ. ആനന്ദക്കുട്ടന്‍, പോള്‍സണ്‍ പീറ്റര്‍, ജോജി കുറത്തിയാട്, ലൂയിസ് കുര്യന്‍, സാല്‍വിന്‍ കൊടിയന്ത്ര എന്നിവര്‍ ചേര്‍ന്ന് ജില്ലാ മെഡിക്കല്‍ ഓഫീസര്‍ക്കു നിവേദനം നല്‍കി. അടിയന്തരമായി ഡോക്ടര്‍മാരുടെ കുറവ് പരിഹരിക്കാനുള്ള നടപടി സ്വീകരിച്ചില്ലെങ്കില്‍ ശക്തമായ പ്രതിഷേധ പരിപാടികള്‍ സംഘടിപ്പിക്കാനുള്ള ഒരുക്കത്തിലാണ് ആശുപത്രി മാനേജ്‌മെന്‍റ് കമ്മിറ്റി.

തദ്ദേശ തെരഞ്ഞെടുപ്പ് സര്‍ക്കാരിനെതിരേയുള്ള ജനവിധിയാകും: സണ്ണി ജോസഫ്

കോട്ടയം: തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിനു മുന്നോടിയായി കോണ്‍ഗ്രസിന്‍റെ നേതൃത്വത്തില്‍ 22, 23, 24 തീയതികളില്‍ വിപുലമായ മണ്ഡലം യോഗങ്ങളും 25, 26, 27 തീയതികളില്‍ വാര്‍ഡ് നേതൃയോഗങ്ങളും നടത്തും. 29, 30, 31 തീയതികളില്‍ കോണ്‍ഗ്രസ് നേതാക്കന്മാരുള്‍പ്പെടെ വാര്‍ഡ് തലത്തില്‍ വിപുലമായ ഭവന സന്ദര്‍ശനവും നടത്തും. ഭവന സന്ദര്‍ശനത്തോടനുബന്ധിച്ച് ഫണ്ട് ശേഖരണവും നടക്കുമെന്ന് ജില്ലയിലെ കോണ്‍ഗ്രസ് മണ്ഡലം പ്രസിഡന്‍റുമാര്‍, ബ്ലോക്ക് പ്രസിഡന്‍റുമാര്‍, ഡിസിസി ഭാരവാഹികള്‍, കെപിസിസി അംഗങ്ങള്‍, പോഷക സംഘടനാ ജില്ലാ പ്രസിഡന്‍റുമാര്‍ എന്നിവരുടെ സംയുക്ത യോഗം ഉദ്ഘാടനം ചെയ്തു കെപിസിസി പ്രസിഡന്‍റ് സണ്ണി ജോസഫ് എംഎല്‍എ പറഞ്ഞു. കോണ്‍ഗ്രസും യുഡിഎഫും തദ്ദേശ തെരഞ്ഞെടുപ്പിന് സജ്ജമായിക്കഴിഞ്ഞുവെന്നും തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് കേരള സര്‍ക്കാരിനെതിരേയുള്ള ജനവിധിയാകുമെന്നും സണ്ണി ജോസഫ് എംഎല്‍എ പറഞ്ഞു. ഡിസിസി പ്രസിഡന്‍റ് നാട്ടകം സുരേഷ് അധ്യക്ഷത വഹിച്ചു. തിരുവഞ്ചൂര്‍ രാധാകൃഷ്ണന്‍ എംഎല്‍എ, കെ.സി. ജോസഫ്, കുര്യന്‍ ജോയ്, ജോസഫ് വാഴയ്ക്കന്‍, ജോസി സെബാസ്റ്റ്യന്‍, പി.എ. സലിം, ടോമി കല്ലാനി, ജോഷി ഫിലിപ്പ്, ഫിലിപ്പ് ജോസഫ്, കുഞ്ഞ് ഇല്ലംപള്ളി, ടി.ഡി. പ്രദീപ്കുമാര്‍, പി.ആര്‍. സോന, എ. സനീഷ്‌കുമാര്‍, മോഹന്‍ കെ. നായര്‍, റോണി കെ. ബേബി എന്നിവര്‍ പ്രസംഗിച്ചു.

കൂടുതല്‍ സ്ത്രീകളെ ലക്ഷ്യമിട്ടതായി വിവരം

സെബാസ്റ്റ്യന്‍റെ ലക്ഷ്യം സ്വത്തും സ്വർണവും ചേർത്തല: മൂന്നു സ്ത്രീകളുടെ തിരോധാനക്കേസില്‍ സംശയനിഴലിലുള്ള സെബാസ്റ്റ്യന്‍ കൂടുതല്‍ സ്ത്രീകളെ ലക്ഷ്യമിട്ടിരുന്നതായി അന്വേഷണ സംഘത്തിനു വിവരം ലഭിച്ചു. സ്വത്തും സ്വര്‍ണവും ലക്ഷ്യമിട്ടാണ് ഇയാള്‍ സ്ത്രീകളെ വശീകരിക്കാന്‍ ശ്രമിച്ചിരുന്നത്. കുത്തിയതോട് സ്വദേശിനിയായ നാല്‍പതുകാരിയെ ഇയാള്‍ ലക്ഷ്യമിട്ടിരുന്നതായി സെബാസ്റ്റ്യന്‍റെ ഫോണ്‍വിളി രേഖകള്‍ പരിശോധിച്ച കോട്ടയം ക്രൈംബ്രാഞ്ച് കണ്ടെത്തി. ഭര്‍ത്താവ് മരിച്ച ഇവര്‍ തനിച്ചാണു താമസിച്ചിരുന്നത്. 2021ല്‍ ധ്യാനകേന്ദ്രത്തില്‍വച്ചു പരിചയപ്പെട്ട ഇവരെ പശുക്കച്ചവടത്തിനായി സെബാസ്റ്റ്യന്‍ സമീപിച്ചിരുന്നു. തുടര്‍ന്ന് അവരെ വലയിലാക്കാന്‍ ശ്രമിച്ചെങ്കിലും വിജയിച്ചില്ല. കഴിഞ്ഞ ദിവസം കോട്ടയം ക്രൈംബ്രാഞ്ച് ഈ സ്ത്രീയില്‍നിന്നു വിവരങ്ങള്‍ ശേഖരിച്ചു. ബിന്ദു കേസിലും കസ്റ്റഡി ചോദിക്കും കടക്കരപ്പള്ളി സ്വദേശി ബിന്ദു പത്മനാഭനെ(52) കാണാതായ കേസിലും സി.എം. സെബാസ്റ്റ്യനെ അറസ്റ്റ് ചെയ്തു കസ്റ്റഡിയില്‍ വാങ്ങാന്‍ കേസ് അന്വേഷിക്കുന്ന ആലപ്പുഴ ക്രൈംബ്രാഞ്ച് യൂണിറ്റ് ആലോചിക്കുന്നു. മറ്റൊരു കേസില്‍ കസ്റ്റഡിയിലുള്ള പ്രതിയുടെ അറസ്റ്റ് രേഖപ്പെടുത്താന്‍ കോടതിയുടെ അനുമതി ആവശ്യമുണ്ട്. ഇതിനായി കേസില്‍ സെബാസ്റ്റ്യനെ പ്രതിസ്ഥാനത്തു നിര്‍ത്താന്‍ കഴിയുന്ന തെളിവുകള്‍ ശേഖരിക്കാനുള്ള ശ്രമത്തിലാണ് ക്രൈംബ്രാഞ്ച്. തെളിവുകള്‍ ശേഖരിച്ച ശേഷം ചേര്‍ത്തല മജിസ്ട്രേട്ട് കോടതിയില്‍ അപേക്ഷ നൽകും. 120 മണിക്കൂർ ചോദ്യം ചെയ്തിട്ടും 14 ദിവസം കസ്റ്റഡിയില്‍ ലഭിച്ച സെബാസ്റ്റ്യനെ 120 മണിക്കൂറോളം അന്വേഷണ സംഘം ചോദ്യം ചെയ്തെങ്കിലും ഇയാള്‍ ഒന്നും വിട്ടുപറഞ്ഞിരുന്നില്ല. ജെയ്നമ്മയ്ക്ക് എന്തുപറ്റിയെന്ന് അറിയില്ലെന്നായിരുന്നു മൊഴി. എന്നാല്‍, സ്വീകരണമുറിയില്‍ കണ്ടെത്തിയ രക്തക്കറ ജെയ്നമ്മയുടേതാണെന്ന ഡിഎന്‍എ പരിശോധനാഫലം കഴിഞ്ഞ ദിവസം വന്നിരുന്നു. കസ്റ്റഡി കാലാവധി അവസാനിച്ചു സെബാസ്റ്റ്യനെ ജയിലില്‍ പ്രവേശിപ്പിച്ച ശേഷമാണു പരിശോധനാ ഫലം ലഭിച്ചത്. സെബാസ്റ്റ്യന്‍റെ കുതന്ത്രങ്ങളില്‍ പോലീസും വീണു കോട്ടയം: സ്ത്രീ ഇരകളെ അപായപ്പെടുത്തുകയോ ക്വട്ടേഷന്‍ കൊടുക്കുകയോ ചെയ്തുവെന്നു കരുതുന്ന ചേര്‍ത്തല പള്ളിപ്പുറം ചൊങ്ങുതറ സി.എം. സെബാസ്റ്റ്യന്‍റെ ആദ്യ ഇരയായിരുന്നു കടക്കരപ്പള്ളി സ്വദേശിനി ബിന്ദു പത്മനാഭനെന്നാണ് പോലീസിന്‍റെ നിഗമനം. വര്‍ഷങ്ങള്‍ക്കു മുന്‍പ് കാണാതായ ബിന്ദു ജീവിച്ചിരിക്കുന്നതായി ഒരു തെളിവുമില്ല. ബിന്ദുവിനെ വകവരുത്തിയ ശേഷം വ്യാജരേഖകളുണ്ടാക്കി സെബാസ്റ്റ്യന്‍ കോടികളുടെ സ്വത്തുവകകള്‍ കൈവശപ്പെടുത്തിയതായാണ് സംശയിക്കുന്നത്. ബിന്ദു പത്മനാഭനെ കാണാനില്ലെന്നും ഇവരുടെ സ്വത്തുക്കള്‍ ആള്‍മാറാട്ടം നടത്തിയും വ്യാജരേഖ ചമച്ചും സ്വന്തമാക്കിയെന്നും കാണിച്ചു വിദേശത്തു കഴിയുന്ന സഹോദരന്‍ പ്രവീണ്‍ കുമാര്‍ നല്‍കിയ പരാതിയുടെ അടിസ്ഥാനത്തില്‍ 2018ല്‍ സെബാസ്റ്റ്യന്‍ അറസ്റ്റിലായിരുന്നു. വ്യാജമൊഴികൾ ചോദ്യം ചെയ്തവേളയില്‍ അപാരമായ ബുദ്ധിയും തന്ത്രങ്ങളും പയറ്റി പോലീസിനെ വരുതിയിലാക്കി രക്ഷപ്പെട്ടു. ബിന്ദു ജീവിച്ചിരിപ്പുണ്ടെന്നു വരുത്താന്‍ അയല്‍ക്കാരായ മൂന്നു സ്ത്രീകളെ സ്വാധീനിച്ച് 2017 സെപ്റ്റംബറിലും ബിന്ദുവിനെ കണ്ടിരുന്നതായി പോലീസില്‍ വ്യാജമൊഴി നല്‍കി. ബിന്ദു അടുത്ത കാലത്തും തന്‍റെ ഓട്ടോയില്‍ യാത്ര ചെയ്തതായി സെബാസ്റ്റ്യന്‍റെ സന്തതസഹചാരിയും കൃത്യങ്ങളില്‍ പങ്കാളിയെന്നു സംശയിക്കുന്നയാളുമായ മനോജ് എന്നയാളും പോലീസിനെ ധരിപ്പിച്ചു. ഇതോടെയാണു ബിന്ദു ജീവിച്ചിരിപ്പുണ്ടാകാമെന്ന നിഗമനത്തിലേക്കു പോലീസ് എത്തിയത്. വിവിധയിടങ്ങളില്‍ സ്ഥലവും ബാങ്ക് നിക്ഷേപവും സ്വര്‍ണവുമുണ്ടായിരുന്ന ബിന്ദുവിനെ വശത്താക്കുകയും സെബാസ്റ്റ്യനും ബിന്ദുവും പലപ്പോഴും ഒരുമിച്ചു കഴിയുകയും ചെയ്തതായി പറയപ്പെടുന്നു. പരാതിയുടെ അടിസ്ഥാനത്തില്‍ 2018 ജൂലൈ ഏഴിനാണ് സെബാസ്റ്റ്യനെ പോലീസ് കസ്റ്റഡിയിലെടുത്തത്. കീഴടങ്ങുന്നതിന് എറണാകുളം മജിസ്‌ട്രേട്ട് കോടതിയില്‍ എത്തിയപ്പോഴായിരുന്ന കൊച്ചി സിറ്റി ഷാഡോ പോലീസ് ഇയാളെ അറസ്റ്റു ചെയ്തത്. ചേര്‍ത്തല പോലീസ് ഏറ്റുവാങ്ങി ചോദ്യം ചെയ്തപ്പോള്‍ ബിന്ദു പത്മനാഭനെ 2017 സെപ്റ്റംബറില്‍ കണ്ടിരുന്നതായി മൊഴി നല്‍കി. മനോജിനെ കൊന്നതോ? ബിന്ദുവിന്‍റെ പേരില്‍ വ്യാജ മുക്ത്യാര്‍, തിരിച്ചറിയല്‍ രേഖകളായി ഡ്രൈവിംഗ് ലൈസന്‍സ്, എസ്എസ്എല്‍സി ബുക്ക് എന്നിവ വ്യാജമായി തയാറാക്കിയാണ് ബിന്ദുവിന്‍റെ സ്ഥലം സെബാസ്റ്റ്യന്‍ വിറ്റത്. വ്യാജരേഖകളുടെ അടിസ്ഥാനത്തില്‍ സെബാസ്റ്റ്യന്‍ ബിന്ദുവിന്‍റെ ബാങ്ക് നിക്ഷേപങ്ങളും പിന്‍വലിച്ചു. സെബാസ്റ്റ്യനെ ചോദ്യം ചെയ്തുകൊണ്ടിരിക്കെ ഒരു ബിഗ് ഷോപ്പര്‍ നിറയെ കറന്‍സി കെട്ടുകളുമായി സഹായിയും ഓട്ടോ ഡ്രൈവറുമായ മനോജ് യാത്ര ചെയ്യുന്ന വിവരം അറിഞ്ഞ് പോലീസ് മനോജിനെ വീണ്ടും ചോദ്യം ചെയ്യാന്‍ വിളിച്ചിരുന്നു. സെബാസ്റ്റ്യനും ബിന്ദുവും പതിവായി യാത്രചെയ്തിരുന്നതു മനോജിന്‍റെ ഓട്ടോയിലായിരുന്നു. പിറ്റേന്നു പുലര്‍ച്ചെ മനോജ് വീട്ടില്‍ ജീവനൊടുക്കി. സെബാസ്റ്റ്യന്‍റെ എല്ലാ വിവരങ്ങളും അറിയാവുന്ന സഹചാരിയായിരുന്ന മനോജിന്‍റേത് കൊലപാതകമായിരുന്നുവെന്നു സംശയിക്കുന്നു.

"കെഎസ്ആര്‍ടിസി ജീവനക്കാരുടെ അവകാശങ്ങൾ സംരക്ഷിക്കും'

കോട്ടയം: കെഎസ്ആര്‍ടിസി ജീവനക്കാരുടെ അവകാശങ്ങളും ആനുകൂല്യങ്ങളും യുഡിഎഫ് സംരക്ഷിക്കുമെന്ന് കെപിസിസി പ്രസിഡന്‍റ് സണ്ണി ജോസഫ് എംഎല്‍എ. ട്രാന്‍സ്പോര്‍ട്ട് ഡെമോക്രാറ്റിക് ഫെഡറേഷന്‍ സംസ്ഥാന സമരപ്രഖ്യാപന കണ്‍വന്‍ഷന്‍ കോട്ടയം ദര്‍ശന ഓഡിറ്റോറിയത്തില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. എം. വിന്‍സെന്‍റ് എംഎല്‍എ അധ്യക്ഷത വഹിച്ചു. തിരുവഞ്ചൂര്‍ രാധാകൃഷ്ണന്‍ എംഎല്‍എ, വി.എസ്. ശിവകുമാര്‍, കെ.സി. ജോസഫ്, ഡിസിസി പ്രസിഡന്‍റ് നാട്ടകം സുരേഷ്, ടിഡിഎഫ് വൈസ് പ്രസിഡന്‍റ് ടി. സോണി, ഡിസിസി വൈസ് പ്രസിഡന്‍റ് ജി.ഗോപകുമാര്‍, പി.എസ്. സിജി തുടങ്ങിയവര്‍ പ്രസംഗിച്ചു. ശമ്പള പരിഷ്‌കരണ നടപടികള്‍ സമയബന്ധിതമായി പൂര്‍ത്തിയാക്കുക, ഡിഎ പൂര്‍ണമായും അനുവദിക്കുക, പുതിയ ബസുകള്‍ നിരത്തിലിറക്കുക, എംപാനല്‍ ജീവനക്കാരുടെ ശമ്പളം യഥാസമയം നല്‍കുക, പിഎസ്‌സി വഴി നിയമനം നടത്തുക എന്നീ ആവശ്യങ്ങള്‍ ഉന്നയിച്ചാണ് കണ്‍വന്‍ഷന്‍ നടത്തുന്നത്. വരുന്ന ആഴ്ചകളില്‍ ഡിപ്പോ, ജില്ലാതല പ്രതിഷേധ പരിപാടികളും തുടര്‍ന്ന് സംസ്ഥാനതല സമരങ്ങളും നടത്തും.

നിര്‍മാണ സാമഗ്രികളുടെ ജിഎസ്ടി അഞ്ച് ശതമാനമാക്കണമെന്നു ഗവ.കോണ്‍ട്രാക്ടേഴ്‌സ് അസോ.

ചങ്ങനാശേരി: നിര്‍മാണ മേഖലയിലെ മാന്ദ്യം പരിഹരിക്കുന്നതിന് നിര്‍മാണ സാമഗ്രികളുടെ ജിഎസ്ടി അഞ്ച് ശതമാനമാക്കണമെന്ന് കേരള ഗവ.കോണ്‍ട്രാക്ടേഴ്‌സ് അസോസിയേഷന്‍. ഭൂമിയുടെ സ്റ്റാമ്പ് ഡ്യൂട്ടി, ബാങ്ക് വായ്പയുടെ പലിശ, ഉയര്‍ന്ന ജിഎസ്ടി നിരക്കുകള്‍ തുടങ്ങിയവ വീടുകള്‍ നിര്‍മിക്കുന്ന ആളുകളുടെ ചെലവ് വര്‍ധിപ്പിക്കുന്നു. സര്‍ക്കാര്‍ പ്രോജക്ടുകളുടെ 18 ശതമാനം ജിഎസ്ടി, നിര്‍മാണ തൊഴിലാളി ക്ഷേമനിധി, ആദായ നികുതി, ഓവര്‍ ഹെഡ്സ്, കരാറുകാരന്‍റെ ലാഭം തുടങ്ങിയ ഇനങ്ങളിലായി 35 ശതമാനത്തോളമാകുന്നു. ഒരു കോടി രൂപയുടെ പദ്ധതിയാണെങ്കില്‍ 65 ലക്ഷം മാത്രമേ പ്രവൃത്തികള്‍ക്കായി ചെലവഴിക്കാന്‍ സാധിക്കുകയുള്ളൂ. ബാക്കിതുക ജിഎസ്ടി ഉള്‍പ്പെടെ മറ്റിനങ്ങളിലായി വിനിയോഗിക്കപ്പെടേണ്ടിവന്നു. സര്‍ക്കാര്‍ പ്രോജക്ടുകളുടെ ജിഎസ്ടി വിഹിതം കരാറുകാരന്‍ കേന്ദ്ര-സംസ്ഥാന സര്‍ക്കാരുകള്‍ക്ക് ഒമ്പതു ശതമാനം വീതം അടയ്ക്കുകയും പണം മുടക്കുന്ന സര്‍ക്കാര്‍ അല്ലെങ്കില്‍ സര്‍ക്കാരുകള്‍ അത് ബില്‍ തുകയോടൊപ്പം കരാറുകാരന് മടക്കി നല്‍കുകയും വേണം. കേന്ദ്രവും സംസ്ഥാനവും തുല്യമായി മുതല്‍മുടക്കുന്ന ജല്‍ജീവന്‍ മിഷന്‍ പോലെയുള്ള പ്രവൃത്തികളില്‍ ജിഎസ്ടി വിഹിതം അവര്‍ തുല്യമായി തിരിച്ചുനല്‍കണം. സങ്കീര്‍ണമായ ഇത്രയും നടപടിക്രമങ്ങള്‍ എന്തിനാണെന്നും കരാറുകാര്‍ ചോദിക്കുന്നു. പ്രവൃത്തികളിന്മേലുള്ള ജിഎസ്ടി ഇപ്പോള്‍ 18ശതമാനമാണ്. സര്‍ക്കാര്‍ പ്രവൃത്തികളിന്മേലുള്ള ജിഎസ്ടി മുഖേന സര്‍ക്കാരിന് ഒരു രൂപയുടെ പോലും അധിക വരുമാനം ലഭിക്കുന്നില്ല. ജിഎസ്ടി കൗണ്‍സില്‍ അംഗങ്ങളായ കേന്ദ്ര - സംസ്ഥാന ധനമന്ത്രിമാര്‍ക്ക് ഈ ആവശ്യമടങ്ങിയ നിവേദനം നല്‍കുമെന്നും കേന്ദ്ര - സംസ്ഥാന ജിഎസ്ടി കമ്മീഷണര്‍മാര്‍ സഹ ചെയര്‍മാന്മാരായ പരാതി പരിഹാരസമിതിയിലും ഇത് ഉന്നയിക്കുമെന്നും കേരള ഗവ.കോണ്‍ട്രാക്ടേഴ്‌സ് അസോസിയേഷന്‍ സംസ്ഥാന പ്രസിഡന്‍റും ജിഎസ്ടി പരാതി പരിഹാര സമിതിയംഗവുമായ വര്‍ഗീസ് കണ്ണമ്പള്ളി പറഞ്ഞു.

ജില്ലാ ക്ഷീരസംഗമം കാഞ്ഞിരപ്പള്ളിയില്‍

കാഞ്ഞിരപ്പള്ളി: ക്ഷീര വികസന വകുപ്പ്, ജില്ലയിലെ ക്ഷീര സഹകരണ സംഘങ്ങള്‍, മില്‍മ, ജില്ല,ബ്ലോക്ക്, ഗ്രാമ പഞ്ചായത്തുകള്‍, കേരള ഫീഡ്സ്, മറ്റ് സഹകരണ സ്ഥാപനങ്ങള്‍ എന്നിവയുടെ സംയുക്താഭിമുഖ്യത്തില്‍ കോട്ടയം ജില്ലാ ക്ഷീരസംഗമം 21, 22, 23 തീയതികളില്‍ തമ്പലക്കാട് സെന്‍റ് തോമസ് ചര്‍ച്ച് ഓഡിറ്റോറിയം, തമ്പലക്കാട് ഗവൺമെന്‍റ് എല്‍പി സ്കൂള്‍, കാഞ്ഞിരപ്പള്ളി എസ്‌സി ബാങ്ക് വക സ്ഥലം എന്നീ മൂന്ന് വേദികളിലായി നടക്കും. കാഞ്ഞിരപ്പളളി ബ്ലോക്ക് പഞ്ചായത്തിന് കീഴില്‍ വരുന്ന തമ്പലക്കാട് നോര്‍ത്ത് ക്ഷീര സംഘത്തിന്‍റെ ആതിഥേയത്വത്തിലാണ് പരിപാടി സംഘടിപ്പിച്ചിരിക്കുന്നത്. കോട്ടയം ജില്ലാ ക്ഷീരകര്‍ഷക സംഗമവും കേരള ക്ഷീരകര്‍ഷക ക്ഷേമനിധി ബോര്‍ഡ് ഓണമധുരം പദ്ധതിയുടെ സംസ്ഥാനതല ഉദ്ഘാടനവും മൃഗസംരക്ഷണ - ക്ഷീര മന്ത്രി ജെ. ചിഞ്ചുറാണി നിര്‍വഹിക്കും. സഹകരണ -തുറമുഖ-ദേവസ്വം മന്ത്രി വി.എന്‍. വാസവന്‍ അധ്യക്ഷത വഹിക്കും. ചീഫ് വിപ്പ് ഡോ.എന്‍. ജയരാജ്, ആന്‍റോ ആന്‍റണി എംപി, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജില്ലയിലെ മുഴുവന്‍ എംഎല്‍എമാര്‍, എംപിമാര്‍, ത്രിതല പഞ്ചായത്ത് ഭാരവാഹികള്‍, ക്ഷീരവികസന വകുപ്പ് മേധാവികള്‍, ക്ഷീര സംഘം ഭാരവാഹികള്‍ തുടങ്ങിയവര്‍ വിവിധ പരിപാടികള്‍ക്ക് നേതൃത്വം നല്‍കും. ജില്ലയിലെ 72 പഞ്ചായത്തുകളിലായി 11 ബ്ലോക്കുപഞ്ചായത്തുകള്‍ക്കു കീഴില്‍ വരുന്ന 272 ക്ഷീര സംഘങ്ങളിലെ ആയിരക്കണക്കിന് ക്ഷീര കര്‍ഷകര്‍ പങ്കെടുക്കുന്ന പരിപാടിയില്‍ വിളംബരവാഹനറാലി, നൂറുകണക്കിന് കന്നുകാലികളുടെ പ്രദര്‍ശന മത്സരം, ക്ഷീര കര്‍ഷകര്‍ക്കുള്ള ശില്‍പശാലകള്‍, ക്ഷീരജാലകം, എക്സിബിഷന്‍, ഗവ്യജാലകം, ക്ഷീരപ്രഭ, കര്‍ഷക സെമിനാര്‍, നാട്ടറിവുകള്‍, ക്ഷീര കര്‍ഷകരുടെ കലാസന്ധ്യ, പൊതുസമ്മേളനം തുടങ്ങിയ വിവിധ പരിപാടികള്‍ നടക്കും. ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, ക്ഷീര വികസന വകുപ്പ് ജില്ലാ ഡയറക്ടര്‍ സി.ആര്‍. ശാരദ, അസിസ്റ്റന്‍റ് ഡയറക്ടര്‍ ബിജി വിശ്വനാഥ്, ക്വാളിറ്റി കണ്‍ട്രോളിംഗ് ഓഫീസര്‍ ജ്വാഗ്ലിന്‍ ഡൊമിനിക്ക്, ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി, ബ്ലോക്ക് ക്ഷീരവികസന ഓഫീസര്‍ ടി.എസ്. ഷിഹാബുദ്ദീന്‍, തമ്പലക്കാട് നോര്‍ത്ത് സംഘം സെക്രട്ടറി സണ്ണി ജേക്കബ് തുടങ്ങിയവര്‍ പത്രസമ്മേളനത്തില്‍ പരിപാടികൾ വിശദീകരിച്ചു.

വഴിയോര വിശ്രമകേന്ദ്രം ഉദ്ഘാടനം ഇന്ന്

എലിക്കുളം: പഞ്ചായത്തിന്‍റെ രണ്ടാമത്തെ വഴിയോര വിശ്രമകേന്ദ്രം ഇന്നു രാവിലെ 11ന് പാമ്പാടി ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി മണിയങ്ങാട്ട് ഉദ്ഘാടനം ചെയ്യും. പഞ്ചായത്ത് പ്രസിഡന്‍റ് ജിമ്മിച്ചൻ ഈറ്റത്തോട്ട് അധ്യക്ഷത വഹിക്കും. ത്രിതല പഞ്ചായത്തംഗങ്ങൾ, സാമൂഹിക, സാംസ്കാരിക രംഗത്തെ പ്രമുഖർ തുടങ്ങിയവർ പങ്കെടുക്കും. പിപി റോഡിൽ ഇളങ്ങുളം ചന്തവളവിൽ നിലവിൽ പഞ്ചായത്തിന് മറ്റൊരു വഴിയോര വിശ്രമകേന്ദ്രമുണ്ട്. കുരുവിക്കൂടിനും ഏഴാംമൈലിനുമിടയിൽ ഞുണ്ടമ്മാക്കൽ വളവിന് സമീപമാണ് പുതിയ വിശ്രമകേന്ദ്രം. 20 ലക്ഷം രൂപ വിനിയോഗിച്ചാണ് നിർമാണം പൂർത്തിയാക്കിയത്.

മുക്കൂട്ടുതറയിൽ കാട്ടുപന്നികളുടെ വിളയാട്ടം

മുക്കൂട്ടുതറ: മുക്കൂട്ടുതറയിൽ കപ്പത്തോട്ടത്തിൽ കാട്ടുപന്നികളുടെ വിളയാട്ടം. നൂറ് മൂട് കപ്പ ചുവടെ പിഴുതു മാറ്റി കിഴങ്ങുകൾ ഇളക്കിയെടുത്തു നശിപ്പിച്ച നിലയിലാണ്. മുക്കൂട്ടുതറ എംഇഎസ് കോളജിന് എതിർവശത്ത് പത്തേക്കർ ഭാഗത്ത്‌ കാവുങ്കൽ എബിയുടെ കപ്പത്തോട്ടത്തിലാണ് നാശനഷ്‌ടം വരുത്തിയത്. ഈ സ്ഥലത്തിന് എതിർവശത്ത് പത്തനംതിട്ട ജില്ലയിൽപ്പെട്ട വെൺകുറിഞ്ഞിയിൽനിന്നും മണിപ്പുഴ ദ്വീപ് ഭാഗത്തുനിന്നുള്ള വനങ്ങളിൽ നിന്നാകാം കാട്ടുപന്നികൾ എത്തിയതെന്നു കരുതുന്നു. ഇന്നലെ പുലർച്ചെയോടെയാണ് പന്നികൾ കൂട്ടത്തോടെ കൃഷിയിടത്തിലെത്തി കപ്പ നശിപ്പിച്ചതെന്ന് എബി പറഞ്ഞു. കഴിഞ്ഞയിടെയായി ഈ മേഖലയിൽ കാട്ടുപന്നികളുടെ ശല്യം കുറഞ്ഞിരുന്നതാണ്. എന്നാൽ, വീണ്ടും കാട്ടുപന്നികൾ എത്തിയത് മേഖലയിലെ കർഷകരിൽ ആശങ്ക സൃഷ്ടിച്ചിട്ടുണ്ട്. ഓണവിപണിയിൽ വിൽക്കാൻ വേണ്ടി ഒട്ടേറെ കാർഷികവിളകൾ പാകമായിക്കൊണ്ടിരിക്കേ വന്യമൃഗങ്ങളുടെ ശല്യം വനംവകുപ്പ് ഇടപെട്ട് ഫലപ്രദമായി തടഞ്ഞില്ലെങ്കിൽ വൻതോതിൽ കൃഷിനാശം സംഭവിക്കുമെന്ന് കർഷകർ പറയുന്നു.

ലഹരിവിരുദ്ധ റാലിയും ഫ്ലാഷ് മോബും

കാഞ്ഞിരപ്പള്ളി: കാഞ്ഞിരപ്പള്ളി ന്യൂനപക്ഷ യുവജന പരിശീലന കേന്ദ്രത്തിന്‍റെ നേതൃത്വത്തിൽ ലഹരിവിരുദ്ധ റാലിയും ഫ്ലാഷ് മോബും സംഘടിപ്പിച്ചു. സംസ്ഥാന ന്യൂനപക്ഷക്ഷേമ വകുപ്പിന്‍റെ നിർദേശപ്രകാരം നടത്തിയ പരിപാടി എക്സൈസ് ഓഫീസർ കെ.എ. നവാസ് ഉദ്ഘാടനം ചെയ്തു. ബോധവത്കരണ ക്ലാസും അദ്ദേഹം നയിച്ചു. പരിശീലന കേന്ദ്രം പ്രിൻസിപ്പൽ ഡോ. പുഷ്പ മരിയൻ അധ്യക്ഷത വഹിച്ചു. ക്ലാസ് ലീഡർ ഫാത്തിമ മൻസൂർ സ്വാഗതം പറഞ്ഞു. പി.എ. ഷിയാദ് ആശംസ നേർന്നു. എം.യു. പൗലോസ് ലഹരിവിരുദ്ധ സന്ദേശം നൽകി. ഷംനാസ് സലാം നന്ദി പറഞ്ഞു. പരിശീലനകേന്ദ്രം വിദ്യാർഥികൾ അവതരിപ്പിച്ച ഫ്ലാഷ് മോബും റാലിയും കാഞ്ഞിരപ്പള്ളി പേട്ടക്കവലയിൽ നടന്നു.

സഹൃദയ വായനശാല വിളിക്കുന്നു, കൂടുതൽ സൗകര്യങ്ങളിലേക്ക്

കാഞ്ഞിരപ്പള്ളി: വായനയുടെയും പുസ്തകങ്ങളുടെയും പുതിയ ലോകമൊരുക്കി ‌കാഞ്ഞിരപ്പള്ളി പഞ്ചായത്ത് സഹൃദയ വായനശാലയുടെ പുതിയ കെട്ടിടത്തിന്‍റെ ഉദ്ഘാടനം നാളെ നടക്കും. വൈകുന്നേരം നാലിനു സാംസ്കാരിക മന്ത്രി സജി ചെറിയാന്‍ ഉദ്ഘാടനം നിർവഹിക്കും. ചീഫ് വിപ്പ് ഡോ. എന്‍. ജയരാജ് അധ്യക്ഷത വഹിക്കും. ആന്‍റോ ആന്‍റണി എംപി മുഖ്യപ്രഭാഷണം നടത്തും. ജില്ലാ പഞ്ചായത്തംഗം ജെസി ഷാജൻ, ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, ബ്ലോക്ക് വൈസ് പ്രസിഡന്‍റ് ജോളി മടുക്കക്കുഴി, പഞ്ചായത്ത് പ്രസിഡന്‍റ് കെ.ആര്‍. തങ്കപ്പന്‍, വൈസ് പ്രസിഡന്‍റ് സുമി ഇസ്മയിൽ, സെക്രട്ടറി വി.ആർ. നിഷ, ബ്ലോക്ക്-ഗ്രാമപഞ്ചായത്തംഗങ്ങൾ, രാഷ്‌ട്രീയപാർട്ടി പ്രതിനിധികൾ തുടങ്ങിയവർ പ്രസംഗിക്കും. ഉദ്ഘാടനത്തോടനുബന്ധിച്ച് ഉച്ചകഴിഞ്ഞ് 1.30ന് പേട്ട ഗവൺമെന്‍റ് ഹൈസ്കൂളിൽനിന്നു കുരിശുങ്കൽ ജംഗ്ഷനിലേക്കു സാംസ്കാരിക ഘോഷയാത്ര നടത്തും. ഇന്ന് ഉച്ചകഴിഞ്ഞ് രണ്ടിന് ലൂര്‍ദ് പാരിഷ് ഹാളില്‍ നടത്തുന്ന സാംസ്‌കാരിക സമ്മേളനം സര്‍വ വിജ്ഞാനകോശം ഡയറക്ടര്‍ ഡോ. മ്യൂസ് മേരി ജോര്‍ജ് ഉദ്ഘാടനം ചെയ്യും. പഞ്ചായത്ത് പ്രസിഡന്‍റ് കെ.ആര്‍. തങ്കപ്പന്‍ അധ്യക്ഷത വഹിക്കും. ചീഫ് വിപ്പ് ഡോ. എൻ. ജയരാജ്, ഷീല തോമസ് ഐഎഎസ് എന്നിവർ പ്രതിഭകളെ ആദരിക്കും. ഡി.സി. രവി മുഖ്യപ്രഭാഷണം നടത്തും. സഹൃദയ വായനശാലയുടെ ചരിത്രം പഞ്ചായത്തംഗം വി.എന്‍. രാജേഷ് അവതരിപ്പിക്കും. ടോണി കരിപ്പാപ്പറന്പിൽ, ബേബിച്ചൻ ഏർത്തയിൽ, ഷമീം അഹമ്മദ്, പി. ജീരാജ്, പഞ്ചായത്തംഗങ്ങളായ റിജോ വാളാന്തറ, മഞ്ജു മാത്യു എന്നിവർ പ്രസംഗിക്കും. 2.57 കോടി പഞ്ചായത്ത് 2.57 കോടി മുടക്കി ഇരുനിലകളിലായാണു പുതിയ കെട്ടിടം നിര്‍മിച്ചത്. ഒരു നിലയുടെ നിര്‍മാണംകൂടി നടത്തും. താഴത്തെ നിലയില്‍ ഷോപ്പിംഗ് കോംപ്ലക്‌സും മുകളിലത്തെ നിലയില്‍ ലൈബ്രറിയും പ്രവര്‍ത്തിക്കും. പത്രസമ്മേളനത്തിൽ പഞ്ചായത്ത് പ്രസിഡന്‍റ് കെ.ആര്‍. തങ്കപ്പന്‍, വൈസ് പ്രസിഡന്‍റ് സുമി ഇസ്മായില്‍, പഞ്ചായത്തംഗങ്ങളായ റിജോ വാളാന്തറ, വി.എന്‍. രാജേഷ്, മഞ്ജു മാത്യു എന്നിവര്‍ പങ്കെടുത്തു. സ്ഥാപക നേതാക്കളെ മറന്നെന്ന് ആരോപണം കാഞ്ഞിരപ്പള്ളി: സഹൃദയ വായനശാലയ്ക്കു പുതിയ കെട്ടിടം നിർമിച്ചപ്പോൾ സൗഹൃദയ വായനശാലയുടെ സ്ഥാപകനായ കെ.ജെ. തോമസ് കരിപ്പാപ്പറമ്പലിനെ അവഗണിച്ചതായി കുടുംബാംഗങ്ങള്‍. പഴയ കെട്ടിടം പൊളിച്ച് പുതിയതു നിര്‍മിച്ചപ്പോള്‍ സ്ഥാപക നേതാക്കളെ മറന്നതായിട്ടാണ് കുടുംബാംഗങ്ങളുടെ ആരോപണം. കരിപ്പാപ്പറമ്പില്‍ കെ.ജെ. തോമസാണ് സഹൃദയ വായനശാല 1936 സെപ്റ്റംബര്‍ 28ന് കാഞ്ഞിരപ്പള്ളി കുരിശുങ്കലിലെ സ്വന്തം കെട്ടിടത്തില്‍ തുടങ്ങിയത്. കലാ-സാംസ്കാരിക പ്രവർത്തകനും പ്ലാന്‍ററും കാഞ്ഞിരപ്പള്ളിയുടെ മുൻ എംഎൽഎയുമായിരുന്നു കെ.ജെ. തോമസ്.1937 ഡിസംബര്‍ 17ന് തിരുക്കൊച്ചി മുഖ്യമന്ത്രിയായ സി. കേശവന്‍ ഗ്രന്ഥശാലയുടെ ഔദ്യോഗിക ഉദ്ഘാടനം നടത്തി. 1930കളിൽ കെ.ജെ. തോമസ് തിരുവനന്തപുരത്തു ബിഎയ്ക്കു പഠിക്കുമ്പോൾ സഹൃദയ സമാജത്തിലും സഹൃദയ മാസികയിലും ആകൃഷ്ടനായി. അന്നു മനസിലുണ്ടായ ആഗ്രഹമാണ് നാട്ടിൽ അതേ പേരിൽ ഒരു വായനശാല. പൊടിമറ്റത്ത് സുഭാഷ് എന്ന പേരുള്ള വീട്ടിലെ (സുഭാഷ് ചന്ദ്രബോസിനോടുള്ള ആദരസൂചകമായി നൽകിയ പേര്) ഒരു മുറിയിൽ വായനശാല തുടങ്ങി. ഇതറിഞ്ഞ പൊൻകുന്നം വർക്കിയും പി.ടി. ചാക്കോയും മറ്റു സുഹൃത്തുക്കളും ഇവിടെയെത്തി പുസ്തകങ്ങൾ എടുക്കാൻ തുടങ്ങി. 1936 സെപ്റ്റംബർ 28ന് കാഞ്ഞിരപ്പള്ളി കുരിശുകവലയ്ക്കു സമീപത്ത് സ്വന്തം കുടുംബവക കെട്ടിടത്തിലെ ഒരു മുറിയിൽ സഹൃദയ വായനശാല തുടങ്ങി. 1937 സെപ്റ്റംബർ 27ന് മാർ ജേക്കബ് കല്ലറയ്ക്കൽ വായനശാലയുടെ ഒന്നാം വാർഷികം ഉദ്ഘാടനം ചെയ്തു. ആയിരം രൂപയും സംഭാവനയായി നൽകി. എം.പി. പോളായിരുന്നു ചടങ്ങിൽ അധ്യക്ഷൻ. 1937 ഡിസംബർ 17ന് പിന്നീട് തിരുക്കൊച്ചി മഖ്യമന്ത്രിയായ സി. കേശവൻ ഗ്രന്ഥശാലയുടെ ഔദ്യോഗിക ഉദ്ഘാടനം നിർവഹിച്ചു. ഡിസി കിഴക്കേമുറി, മാളിയേക്കൽ അപ്പച്ചൻ, രാമനാഥപിള്ള വക്കീൽ, പി.കെ. കോര, പോസ്റ്റ്മാസ്റ്റർ ദാമോദരൻ, കരിമ്പനാൽ തൊമ്മച്ചൻ, അബ്ദുൾ വഹാബ്, പള്ളിവാതുക്കൽ വർക്കിക്കുഞ്ഞ്, കടമപ്പുഴ പാപ്പച്ചി തുടങ്ങിയവർ കെ.ജെ. തോമസിന്‍റെ പിന്നിൽ അണിനിരന്നു. അന്നു സഹൃദയ വായനശാലയുടെ വാർഷിക സമ്മേളനങ്ങൾ സാഹിത്യസദസുകളായിരുന്നു. വള്ളത്തോൾ, ജി. ശങ്കരക്കുറുപ്പ്, ജോസഫ് മുണ്ടശേരി, തകഴി ശിവശങ്കരപ്പിള്ള, ആർ. ശങ്കർ, എൻ. കൃഷ്ണപിള്ള, എസ്. ഗുപ്തൻ നായർ, പുത്തൻകാവ് മാത്തൻ തരകൻ, ലളിതാംബിക അന്തർജനം, പി.ടി. ചാക്കോ, ദീനാമ്മ ഫിലിപ്പോസ്, ആനി ജോസഫ് തുടങ്ങി പിന്നീട് രാഷ്‌ട്രപതിയായ കെ.ആർ. നാരായണന്‍റെ വരെ സാന്നിധ്യംകൊണ്ടു സമ്പന്നമായിരുന്നു അക്കാലത്ത് വായനശാലയുടെ പ്രവർത്തനങ്ങൾ. കലാകായിക മത്സരങ്ങളും സംഘടിപ്പിച്ചു. 1971ൽ വായനശാല പഞ്ചായത്തിനു കൈമാറി.

മികച്ച കൊക്കോ കർഷകൻ: ദേശീയ അവാർഡ് തിളക്കവുമായി കെ.ജെ. വർഗീസ്

മണിമല: കേന്ദ്ര കാർഷിക മന്ത്രാലയത്തിന്‍റെ മികച്ച കൊക്കോ കർഷകനുള്ള ദേശീയ അവാർഡ് മണിമല സ്വദേശി കൊച്ചുമുറിയിൽ കെ.ജെ. വർഗീസിന്. ഇന്നും നാളെയും നടക്കുന്ന ആസാം അഗ്രികൾച്ചറൽ യൂണിവേഴ്സിറ്റിയിലെ ഉച്ചകോടിയിൽ ഉദ്ഘാടന യോഗത്തിൽ അവാർഡ് സമ്മാനിക്കും. തുടർന്ന് വർഗീസ് കൃഷിയെ സംബന്ധിച്ച പ്രബന്ധം അവതരിപ്പിക്കും. മോനായി എന്നു വിളിക്കുന്ന വർഗീസ് 1980ലാണ് കൊക്കോ കൃഷി ആരംഭിക്കുന്നത്. ഉത്പാദനക്ഷമത കൂടിയ തൈകൾ വിതരണം ചെയ്തായിരുന്നു തുടക്കം. പിന്നീട് മൂലേപ്ലാവിൽ ബെൽമൗണ്ട് എന്ന ഫാക്ടറിയും കൊക്കോ നഴ്സറിയും തുടങ്ങി. മണിമലയിൽ 2015ൽ രൂപീകരിച്ച കൊക്കോ ഉത്പാദക സഹകരണ സംഘത്തിന്‍റെ സ്ഥാപകനാണ്. മൂന്നു വർഷം മുന്പ് അമേരിക്കൻ കമ്പനിക്ക് ഒരു ടൺ കൊക്കോക്കുരു കയറ്റുമതി ചെയ്ത് സഹകരണ സംഘം ശ്രദ്ധ നേടി. ചോക്ലേറ്റ്, കൊക്കോ പൗഡർ, വെണ്ണ തുടങ്ങി പത്തോളം ഉത്പന്നങ്ങൾ നിർമിക്കുന്ന ബ്രൗൺ ഗോൾഡ് കൊക്കോ പ്രൊഡ്യൂസർ കമ്പനിയുടെ ചെയർമാനാണ് വർഗീസ്. കേന്ദ്ര തോട്ടവിള ഗവേഷണ കേന്ദ്രത്തിന്‍റെയും നബാർഡിന്‍റെയും പിന്തുണയോടെ ആരംഭിച്ച കേരളത്തിലെ ആദ്യ കൊക്കോ കർഷക കമ്പനിയാണിത്. ഭാര്യ: മേരിയമ്മ വർഗീസ്. മക്കൾ: ജിഫിൻ, നീതു, എബിൻ.

തിരക്കിൽ ദേശീയപാത നവീകരണം; റോഡിൽ കുരുങ്ങി യാത്രക്കാർ

മുണ്ടക്കയം: യാതൊരു മുന്നൊരുക്കങ്ങളുമില്ലാതെ ദേശീയപാതയിൽ നടത്തിയ നവീകരണ പ്രവർത്തനം വലിയ ഗതാഗതക്കുരുക്കിനിടയാക്കി. തിങ്കളാഴ്ച വൈകുന്നേരം മുതലാണ് ദേശീയപാതയിൽ പൈങ്ങനയ്ക്കു സമീപം റോഡിൽ സ്ഥിരമായി കുഴി രൂപപ്പെടുന്ന കൊടും വളവിൽ നവീകരണം ആരംഭിച്ചത്. ഇന്നലെ രാവിലെ സ്കൂൾ സമയത്തടക്കം മണ്ണുമാന്തി യന്ത്രവും ലോറിയും നിരത്തിയുള്ള റോഡിലെ ജോലികൾ വലിയ ഗതാഗതക്കുരുക്കിനാണ് ഇടയാക്കിയത്. ചിറ്റടി മുതൽ മുണ്ടക്കയം എസ്എൻഡിപി ജംഗ്ഷൻ വരെയുള്ള മൂന്നു കിലോമീറ്ററോളം ദൂരത്തിൽ വാഹനങ്ങളുടെ നീണ്ട നിരയായി. വാഹനങ്ങൾ ഗതാഗത കുരുക്കിൽപ്പെട്ടതിനാൽ ഓണപ്പരീക്ഷയ്ക്ക് ഒട്ടുമിക്ക വിദ്യാർഥികൾക്കും സമയത്ത് സ്കൂളുകളിൽ എത്താനും കഴിഞ്ഞില്ല. പൈങ്ങന ബൈപാസ് ജംഗ്ഷനിൽ ഇരുവശത്തുനിന്നും വാഹനങ്ങൾ എത്തിയതോടെ ഗതാഗതക്കുരുക്ക് അതിരൂക്ഷമായി. എന്നാൽ, ഇവിടെ ഗതാഗതം നിയന്ത്രിക്കാൻ അധികൃതർ ആരും ഉണ്ടാകാതെ വന്നതോടെ ബസ് ജീവനക്കാരും നാട്ടുകാരും ചേർന്നു ഗതാഗതം നിയന്ത്രിക്കേണ്ടിയും വന്നു. വലിയ തിരക്കുള്ളസമയത്ത് നടക്കുന്ന നിർമാണ പ്രവർത്തനത്തിനെതിരേ വ്യാപക പ്രതിഷേധമുയർന്നതോടെ പകൽസമയത്തെ നിർമാണ പ്രവർത്തനം നിർത്തിവച്ചു. രാത്രിയിൽ വാഹനങ്ങൾ കുറവുള്ള സമയങ്ങളിൽ ചെയ്യേണ്ട നിർമാണപ്രവർത്തനം യാതൊരു മുൻകരുതലുമില്ലാതെ പകൽസമയത്ത് നടത്തിയതുമൂലം മണിക്കൂറുകളോളം ജനം വലഞ്ഞു.

അരുവിത്തുറ കോളജിൽ പ്ലേസ്മെന്‍റ് സെൽ ഉദ്ഘാടനവും കരിയർ സെമിനാറും

അരുവിത്തുറ: വിദ്യാർഥികൾക്ക് തൊഴിലവസരങ്ങളുടെ അക്ഷയഖനി ഒരുക്കാൻ അരുവിത്തുറ സെന്‍റ് ജോർജ് കോളജിലെ പ്ലേസ്മെന്‍റ് സെല്ലിന്‍റെ പുതിയ അധ്യയന വർഷത്തെ പ്രവർത്തനങ്ങൾക്ക് തിരിതെളിഞ്ഞു. പ്ലേസ്മെന്‍റ് സെല്ലിന്‍റെയും കരിയർ സെമിനാറിന്‍റെയും ഉദ്ഘാടനം വലവൂർ ഐഐഐടിയിലെ ഇലക്‌ട്രോണിക്സ് ആൻഡ് കമ്യൂണിക്കേഷൻ വിഭാഗം പ്രഫസർ ഡോ. മിലിന്ത് തോമസ് നിർവഹിച്ചു. ബിരുദാനന്തര വിദ്യാഭ്യാസവും തൊഴിലവസര സാധ്യതകളും എന്ന വിഷയത്തിൽ അദ്ദേഹം ക്ലാസ് നയിച്ചു. കോളജ് ബർസാർ ഫാ. ബിജു കുന്നക്കാട്ട് അധ്യക്ഷത വഹിച്ചു. വൈസ് പ്രിൻസിപ്പൽ ഡോ. ജിലു ആനി ജോൺ, പ്ലേസ്മെന്‍റ് സെൽ കോ-ഓർഡിനേറ്റർമാരായ ഡോ. ജെമിനി ജോർജ്, ബിനോയ് സി. ജോർജ്, പി.സി. അനീഷ് തുടങ്ങിയവർ പ്രസംഗിച്ചു.

ഫാം ഫെസ്റ്റ്: സംഘാടകസമിതി രൂപീകരിച്ചു

കോട്ടയം: ജില്ലാ പഞ്ചായത്തിന്‍റെ നേതൃത്വത്തില്‍ സെപ്റ്റംബര്‍ 26 മുതല്‍ 30 വരെ കോഴായിലെ ജില്ലാ കൃഷിത്തോട്ടത്തില്‍ നടത്തുന്ന ഫാം ഫെസ്റ്റിന്‍റെ നടത്തിപ്പുമായി ബന്ധപ്പെട്ട് സംഘാടകസമിതി രൂപീകരിച്ചു. എംപിമാരായ ജോസ് കെ. മാണി, ഫ്രാന്‍സിസ് ജോര്‍ജ്, എംഎല്‍എമാരായ സി.കെ. ആശ, മോന്‍സ് ജോസഫ് എന്നിവര്‍ രക്ഷാധികാരികളായും ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ ചെയര്‍പേഴ്‌സണായും ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാല വൈസ് ചെയര്‍മാനായും കോഴാ ജില്ലാ കൃഷിത്തോട്ടം ഫാം സൂപ്രണ്ട് ഹണി ലിസ ചാക്കോ ജനറല്‍ കണ്‍വീനറായുമാണ് സമിതി. പഞ്ചായത്ത് പ്രസിഡന്‍റുമാരായ മിനി മത്തായി, കെ.എം. തങ്കച്ചന്‍, മത്തായി മാത്യു, കോമളവല്ലി രവീന്ദ്രന്‍, സജേഷ് ശശി, അംബിക സുകുമാരന്‍, ബെല്‍ജി ഇമ്മാനുവല്‍, ജില്ലാ പഞ്ചായത്ത് സെക്രട്ടറി പി.എസ്. ഷിനോ, കൃഷി അസിസ്റ്റന്‍റ് ഡയറക്ടര്‍ യമുന ജോസ്, അക്കൗണ്ട്‌സ് ഓഫീസര്‍ പ്രീതി പി. പിള്ള, അഡ്മിനിസ്‌ട്രേറ്റീവ് അസിസ്റ്റന്‍റ് രജി പി. മാത്യു എന്നിവര്‍ കമ്മിറ്റി അംഗങ്ങളാകും. പരിപാടിയുടെ നടത്തിപ്പുമായി ബന്ധപ്പെട്ട് മോണിറ്ററിംഗ് കമ്മിറ്റി, പ്രോഗ്രാം കമ്മിറ്റി, സെമിനാര്‍ കമ്മിറ്റി, എക്‌സിബിഷന്‍ കമ്മിറ്റി എന്നിവയും രൂപീകരിച്ചു.

അധ്യാപക കൂട്ടായ്മയില്‍ അല്‍ഫോന്‍സയില്‍ രണ്ടു പുസ്തകങ്ങള്‍

പാലാ: അധ്യാപകര്‍ സംഘടിച്ച് ഗ്രന്ഥകര്‍ത്താക്കളായതോടെ പാലാ അല്‍ഫോന്‍സ കോളജില്‍ രണ്ടു പുസ്തകങ്ങള്‍ പിറവിയെടുത്തു. കോളജിലെ 25 അധ്യാപകരുടെ കൂട്ടായ്മയിലാണ് ഒരു പുസ്തകം പ്രസിദ്ധീകരിച്ചത്. "ദ എത്തിക്കല്‍ സെല്‍ഫ്: പെര്‍സ്പെക്‌ടീവ് ഓഫ് മൊറാലിറ്റി ഇന്‍ ദ മോഡേണ്‍ വേള്‍ഡ്' എന്ന പുസ്തകമാണ് വായനാലോകത്തിന് ലഭിച്ചത്. ഡോ. ടി.ആര്‍. അമ്പിളി, ഡോ. റോസ് മേരി ഫിലിപ്പ് എന്നിവരാണ് പുസ്തകത്തിന്‍റെ എഡിറ്റിംഗ് നടത്തിയത്. റവ.ഡോ. ഷാജി ജോണ്‍, ഡോ. നവിത എലിസബത്ത് എന്നിവര്‍ ചേര്‍ന്നാണ് മറ്റൊരു പുസ്തകം "ബാറ്റില്‍സ് ഇന്‍ ദ ബാണ്‍യാഡ് ഇന്‍ഫാംസ് ക്രൂസേഡ് ഫോര്‍ കേരള ഫാര്‍മേഴ്സ്' പ്രസിദ്ധീകരിച്ചത്. മൂന്നാം വര്‍ഷ ഇംഗ്ലീഷ് ബിരുദ വിദ്യാര്‍ഥിനി നെഹ്‌മത് ആന്‍ അങ്ങാടിയത്തിന്‍റെ "അണ്‍റ്റെതേഡ്' എന്ന കവിതാ സമാഹാരവും പ്രസിദ്ധീകരിച്ചു. പുസ്തകങ്ങളുടെ പ്രകാശനം ബിഷപ് മാര്‍ ജോസഫ് കല്ലറങ്ങാട്ട് നിര്‍വഹിച്ചു. ആദ്യ കോപ്പി പാലാ രൂപത മുഖ്യവികാരി ജനറാളും കോളജ് മാനേജരുമായ മോണ്‍. ജോസഫ് തടത്തില്‍ ഏറ്റുവാങ്ങി. പ്രിന്‍സിപ്പല്‍ സിസ്റ്റര്‍ ഡോ. മിനിമോള്‍ മാത്യു, ബര്‍സാര്‍ ഫാ. കുര്യാക്കോസ് വെള്ളച്ചാലില്‍, ഡോ. ഷാജി ജോണ്‍, സിസ്റ്റര്‍ ഡോ. മഞ്ജു എലിസബത്ത് കുരുവിള എന്നിവര്‍ പ്രസംഗിച്ചു.

വിദ്യാര്‍ഥികൾക്ക് കാര്‍ഷിക പഠനകളരിയുമായി എകെസിസി ചേർപ്പുങ്കൽ യൂണിറ്റ്

ചേര്‍പ്പുങ്കല്‍: വിദ്യാര്‍ഥികളിൽ കാര്‍ഷികസംസ്‌കാരം വളര്‍ത്താനും കാര്‍ഷികവൃത്തിയോടും കര്‍ഷനോടും ബഹുമാനം സൃഷ്ടിക്കാനും ലക്ഷ്യമിട്ട് എകെസിസി ചേര്‍പ്പുങ്കല്‍ യൂണിറ്റിന്‍റെ നേതൃത്വത്തില്‍ ഹരിതസങ്കീര്‍ത്തനം എന്ന പേരില്‍ വിദ്യാര്‍ഥി കാര്‍ഷിക പഠനകളരി ആരംഭിച്ചു. പദ്ധതിയുടെ ഉദ്ഘാടനം ചേര്‍പ്പുങ്കല്‍ ഹോളിക്രോസ് ഹൈസ്‌കൂളിലെ കുട്ടിക്കര്‍ഷകര്‍ക്ക് വിത്തുകുട്ട കൈമാറി രൂപത ഡയറക്ടര്‍ റവ.ഡോ. ജോര്‍ജ് വര്‍ഗീസ് ഞാറക്കുന്നേല്‍ നിര്‍വഹിച്ചു. യൂണിറ്റ് ഡയറക്ടര്‍ ഫാ. അജിത്ത് പരിയാരത്ത് അധ്യക്ഷത വഹിച്ചു. ഹെഡ്മാസ്റ്റര്‍ ജോജി ഏബ്രഹാം, പിടിഎ പ്രസിഡന്‍റ് സജു കൂടത്തിനാല്‍ എന്നിവര്‍ പ്രസംഗിച്ചു. ആദ്യഘട്ടമായി എല്‍പി, യുപി, ഹൈസ്‌കൂള്‍, ഹയര്‍സെക്കന്‍ഡറി തലങ്ങളില്‍ അടുക്കളത്തോട്ട മത്സരം സംഘടിപ്പിക്കും. എകെസിസി രൂപതാസമിതി നടത്തുന്ന അടുക്കളത്തോട്ട മത്സരവുമായി സഹകരിച്ചു നടത്തുന്ന മത്സരത്തില്‍ യോഗ്യരായവര്‍ക്ക് ഫെറോന-രൂപതാതല മത്സരങ്ങളില്‍ പങ്കെടുക്കാം. ഒന്നാം സമ്മാനമായി 10,000 രൂപയും മറ്റു നിരവധി സമ്മാനങ്ങളുമുണ്ട്. മികച്ച 20 വിദ്യാർഥി കൾക്ക് പ്രോത്സാഹന സമ്മാനവും നൽകും. നവംബര്‍ 17 വരെ നീണ്ടുനില്‍ക്കുന്ന ഒന്നാംഘട്ടത്തില്‍ 180 വിദ്യാര്‍ഥികള്‍ പങ്കെടുക്കും. കാര്‍ഷിക സെമിനാറിന് എകെസിസി രൂപത കര്‍ഷകവേദി ചെയര്‍മാന്‍ ടോമി കണ്ണീറ്റുമ്യാലില്‍ നേതൃത്വം നല്‍കി.

കാർ ഉടൻ ആംബുലൻസായി; ആ ജീവൻ വിട്ടുകൊടുക്കാതെ അനീഷും വിനയനും

കോട്ടയം: കാറിനുള്ളില്‍ ശാരീരിക അവശതകളാല്‍ തളർന്നു വീണു കുടുങ്ങിപ്പോയയാൾക്ക് രക്ഷകരായി മൂന്നംഗ സംഘം. ഇന്നലെ ഉച്ചകഴിഞ്ഞ് 1.45ന് നാഗമ്പടത്തായിരുന്നു സംഭവം. ഡ്യൂട്ടി കഴിഞ്ഞു വീട്ടിലേക്കു മടങ്ങിയ സിപിഒ അനീഷ് സിറിയക്കും ബിഎംഎസ് ജില്ലാ പ്രസിഡന്‍റ് എസ്. വിനയനും മറ്റൊരു യുവാവും നാഗമ്പടം ഭാഗത്തുകൂടി വരുന്നതിനിടെയാണ് റോഡരികില്‍ ഒരു കാര്‍ അസ്വാഭാവിക നിലയില്‍ കണ്ടത്. എന്‍ജിന്‍ ഓഫ് ചെയ്യാതെ നിര്‍ത്തിയിട്ടിരുന്ന കാറിനുള്ളില്‍ നോക്കിയപ്പോൾ ഡ്രൈവിംഗ് സീറ്റിലിരുന്ന വ്യക്തി വായിൽനിന്നു നുരയും പതയും വന്നു തളര്‍ന്നു അവശനിലയിലായതായി കണ്ടു. പറന്നെത്തിയ യുവാവ് മുൻ നഴ്സ് കൂടിയായ സിപിഒ അനീഷ് ഡ്രൈവിംഗ് സീറ്റ് ചരിച്ചിട്ട് ഇദ്ദേഹത്തിനു സിപിആര്‍ നല്‍കാന്‍ തുടങ്ങി. ഇതിനിടെ വിനയന്‍ 108 ആംബുലന്‍സ് വിളിച്ചു. ഗതാഗതക്കുരുക്കില്‍ ആംബുലന്‍സ് ഓടിയെത്താന്‍ വൈകുമെന്നു കണ്ടതോടെ വിനയനും അനീഷും ചേര്‍ന്ന് അസ്വസ്ഥത അനുഭവപ്പെട്ട ആളെ കാറിന്‍റെ പിന്‍സീറ്റിലേക്കു കിടത്തി ആശുപത്രിയിലേക്കു മാറ്റാനായി ശ്രമിച്ചു. ഈ സമയം വഴിയിലൂടെ വന്ന ഒരു യുവാവ് കാറിന്‍റെ ഡ്രൈവിംഗ് സീറ്റിലേക്കു ചാടിക്കയറി ലൈറ്റും ഹോണും മുഴക്കി കണ്‍മുന്നില്‍ പിടയുന്ന ജീവനുംകൊണ്ട് നേരെ കാരിത്താസ് ആശുപത്രിയിലേക്കു വാഹനം പറപ്പിച്ചു! ആശുപത്രിയില്‍ രോഗിയെ പ്രവേശിപ്പിച്ച ശേഷം കാറോടിച്ച യുവാവ് മറ്റൊരു കാറില്‍ കയറി യാത്രയായി. ബഹളത്തിനിടയിൽ യുവാവിന്‍റെ പേരു പോലും ചോദിക്കാൻ കഴിഞ്ഞില്ലെന്ന് അനീഷും വിനയനും പറയുന്നു. ഒപ്പം നിന്നവർ അനീഷും വിനയനും ആശുപത്രിയിൽ കാത്തുനിന്നു. ഇതിനിടയില്‍ ഇരുവരും ചേര്‍ന്നു കാറിൽ നടത്തിയ പരിശോധനയിൽ കാറിനുള്ളില്‍ കുഴഞ്ഞു വീണയാൾ സതീഷ് ധവാന്‍ സ്പേസ് റിസര്‍ച്ച് സെന്‍റര്‍ മുന്‍ ഉദ്യോഗസ്ഥന്‍ ബാബു ജോസഫാണെന്നു തിരിച്ചറിഞ്ഞു. ആശുപത്രി അധികൃതര്‍ ബാബു ജോസഫിന്‍റെ കുടുംബത്തെ വിവരം അറിയിച്ച ശേഷമാണ് ഇരുവരും ആശുപത്രിയില്‍നിന്നു മടങ്ങിയത്. കാരിത്താസില്‍നിന്നു സ്വകാര്യ ബസില്‍ കയറി നാഗമ്പടത്തെത്തി ബൈക്കെടുത്ത ശേഷമാണ് കോട്ടയം ട്രാഫിക് സ്റ്റേഷനിലെ സിപിഒയായ അനീഷ് വീട്ടിലേക്കു മടങ്ങിയത്. മുന്‍ നിശ്ചയിച്ച പ്രകാരം കാരിത്താസ് ആശുപത്രിയിലെ രോഗിക്ക് രക്തം നല്‍കിയ വിനയനും പിന്നീട് ആശുപത്രിയില്‍നിന്നു മടങ്ങി. ബാബു ജോസഫ് ആശുപത്രിയില്‍ ചികിത്സയില്‍ തുടരുകയാണ്. പോലീസ് സേനയുടെ ഭാഗമാകും മുന്‍പ് നഴ്സായി ജോലി ചെയ്തിരുന്ന അനീഷ് തക്കസമയത്ത് സിപിആർ നൽകിയതാണ് ബാബു ജോസഫിന്‍റെ ജീവന്‍ രക്ഷിച്ചത്.

കളരിയാമ്മാക്കൽ പാലം: ഹിയറിംഗ് തുടങ്ങി പ്രതീക്ഷയോടെ നാട്ടുകാര്‍

പാലാ: നഗരസഭാ പ്രദേശത്ത് മീനച്ചിലാറിനു കുറുകേ നിര്‍മിച്ചിരിക്കുന്ന കളരിയാമ്മാക്കല്‍ കടവ് പാലത്തിനു സമീപനപാത നിര്‍മിക്കാനുള്ള നടപടികൾക്ക് ഒടുവിൽ ജീവൻവച്ചു. പ്രഥമ ഘട്ടമായ സാമൂഹിക പ്രത്യാഘാത പഠന വിലയിരുത്തല്‍ റിപ്പോര്‍ട്ട് തയാറാക്കാനുള്ള പൊതുതെളിവെടുപ്പ് തുടങ്ങി. പഠനസംഘം ഇന്നലെ പാലത്തിനു സമീപമുള്ള ജോര്‍ജ് കളരിയാമ്മാക്കലിന്‍റെ വസതിയില്‍ സമ്മേളിച്ച് സമീപവാസികളുടെ പരാതികള്‍ കേട്ടു. പാലം പത്തു വർഷം 2015ലാണ് പാലംപണി പൂര്‍ത്തിയായത്. എന്നാൽ, പത്തു വർഷമായിട്ടും സമീപനപാത നിർമിക്കാൻ കഴിഞ്ഞിട്ടില്ല. സമീപനപാതയ്ക്കായി 2020ല്‍ 13.39 കോടി രൂപ അനുവദിച്ചിരുന്നെങ്കിലും തുടര്‍ നടപടി ഉണ്ടായില്ല. കേന്ദ്ര ചട്ടപ്രകാരം ഭൂമി ഏറ്റെടുക്കല്‍ നടപടിക്കു മുന്നോടിയായുള്ള പഠന റിപ്പോര്‍ട്ടാണ് ഇപ്പോള്‍ തയാറാക്കുന്നത്. ഉചിതവും അര്‍ഹതപ്പെട്ടതുമായ നഷ്ടപരിഹാരം ഉറപ്പാക്കുകയാണ് പഠന റിപ്പോര്‍ട്ടിന്‍റെ ലക്ഷ്യം. ഇതിനായി കളമശേരി രാജഗിരി കോളജ് ഓഫ് സോഷ്യല്‍ സയന്‍സിനെയാണ് ചുമതലപ്പെടുത്തിയിരിക്കുന്നത്. ഭൂമി ഏറ്റെടുക്കും പൂവരണി വില്ലേജിലെ ഒന്‍പത് സര്‍വേ നമ്പറുകളിലായുള്ള 32.919 ആര്‍ സ്ഥലമാണ് സമീപനപാതയ്ക്കായി മാത്രം ഏറ്റെടുക്കുക. സമീപനപാത നിര്‍മാണത്തിന്‍റെ ചുമതല പൊതുമരാമത്ത് വകുപ്പിനാണ്. പൊന്‍കുന്നം റോഡിലെ പന്ത്രണ്ടാംമൈലിൽനിന്നു പാലത്തിനു സമീപം വരെയുള്ള ഭാഗം കേരള റോഡ് ഫണ്ട് ബോര്‍ഡ് മുഖേന കിഫ്ബി വഴിയാണ് നടപ്പാക്കുക. ഇതിനുള്ള നടപടി അവസാന ഘട്ടത്തിലാണെന്നും റിപ്പോര്‍ട്ട് എത്രയും വേഗം സര്‍ക്കാരിനു സമര്‍പ്പിക്കുമെന്നും തുടര്‍ന്ന് ഭൂമി ഏറ്റെടുക്കാനുള്ള വിജ്ഞാപനം പുറപ്പെടുവിക്കുമെന്നും ജോസ് കെ. മാണി എംപി പറഞ്ഞു. ഇന്നലെ നടന്ന ഹിയറിംഗില്‍ പാലാ ഭൂമി ഏറ്റെടുക്കല്‍ സ്‌പെഷല്‍ തഹസില്‍ദാര്‍ ബിനു സെബാസ്റ്റ്യന്‍, പൊതുമരാമത്ത് റോഡ് വിഭാഗം അസിസ്റ്റന്‍റ് എന്‍ജിനിയര്‍ എം.ജെ. ഷൈബി, മീനച്ചില്‍ പഞ്ചായത്ത് പ്രസിഡന്‍റ് സോജന്‍ തൊടുക, മുന്‍ പ്രസിഡന്‍റ് സാജോ പൂവത്താനി എന്നിവരും പങ്കെടുത്തു.

അരുവിത്തുറ കോളജിൽ പ്ലേസ്മെന്‍റ് സെൽ പ്രവർത്തനോദ്ഘാടനവും കരിയർ ഗൈഡൻസ് സെമിനാറും

അരുവിത്തുറ: വിദ്യാർഥികൾക്ക് തൊഴിലവസരങ്ങളുടെ അക്ഷയ ഖനി ഒരുക്കാൻ അരുവിത്തുറ സെന്‍റ് ജോർജസ് കോളജിലെ പ്ലേസ്മെന്‍റ് സെല്ലിന്‍റെ പുതിയ അധ്യയന വർഷത്തെ പ്രവർത്തനങ്ങൾക്ക് തിരിതെളിഞ്ഞു. പ്ലേസ്മെന്‍റ് സെല്ലിന്‍റെയും കരിയർ സെമിനാറിന്‍റെയും ഉദ്ഘാടനം ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്നോളജി വലവൂരിലെ ഇലക്ട്രോണിക്സ് ആൻഡ് കമ്യൂണിക്കേഷൻ വിഭാഗം പ്രഫസർ ഡോ. മിലിന്ത് തോമസ് തേമാലിൽ ഉദ്ഘാടനം ചെയ്തു. ബിരുദാനന്തര വിദ്യാഭ്യാസവും തൊഴിലവസര സാധ്യതകളും എന്ന വിഷയത്തിൽ അദ്ദേഹം ക്ലാസ് നയിച്ചു. കോളജ് ബർസാർ റവ.ഫാ. ബിജു കുന്നയ്ക്കാട്ട് അധ്യക്ഷത വഹിച്ചു. വൈസ് പ്രിൻസിപ്പൽ ഡോ. ജിലു ആനി ജോൺ, പ്ലേസ്മെന്‍റ് സെൽ കോഓർഡിനേറ്റർമാരായ ഡോ. ജെമിനി ജോർജ്, ബിനോയ് സി. ജോർജ്, പി.സി. അനീഷ് തുടങ്ങിയവരും സംസാരിച്ചു. കഴിഞ്ഞവർഷം കലാലയത്തിൽ നിന്നും പ്ലേസ്മെന്‍റ് സെല്ലിലൂടെ നൂറോളം വിദ്യാർഥികൾ വിവിധ അന്താരാഷ്‌ട്ര കമ്പനികളിൽ ഉദ്യോഗം നേടിയിരുന്നു.

നായ ശല്യത്തിൽ പൊറുതിമുട്ടി അതിരമ്പുഴ

അതിരമ്പുഴ: എവിടെ നോക്കിയാലും നായ്ക്കൂട്ടങ്ങൾ. സ്വസ്ഥമായി വഴി നടക്കാനാകുന്നില്ല. വാഹനങ്ങൾക്കു മുന്നിൽ ചാടിയും ഇവ അപകടമുണ്ടാക്കുന്നു. അതിരമ്പുഴയിൽ തെരുവുനായ്ക്കൾ ഇല്ലാത്ത സ്ഥലങ്ങളില്ല. മാർക്കറ്റ്, പള്ളി മൈതാനം, റെയിൽവേ സ്റ്റേഷൻ, ഐടിഐ, മാറാമ്പ്, ശ്രീകണ്ഠമംഗലം, കോട്ടമുറി തുടങ്ങിയ സ്ഥലങ്ങളിലെല്ലാം നായ്ക്കൂട്ടങ്ങൾ വിഹരിക്കുകയാണ്. പത്തിലേറെ നായ്ക്കളുടെ കൂട്ടം മാർക്കറ്റിൽ വെയ്റ്റിംഗ് ഷെഡും കടത്തിണ്ണകളും കൈയേറിയ നിലയിലാണ്. കഴിഞ്ഞദിവസം മാർക്കറ്റിനു സമീപമുള്ള ഒരു വീട്ടിലെ കാർപോർച്ചിൽ തമ്പടിച്ച ഈ നായകൾ വീട്ടുകാർക്കും ഭീഷണിയായി. രാത്രിയിൽ ഇരുചക്ര വാഹനങ്ങൾക്കു മുന്നിലേക്കു നായ്ക്കൂട്ടം ചാടിവീഴുന്നത് അപകടത്തിനിടയാക്കുന്നു. ഭീതിയോടെയാണ് രാത്രിയിൽ യാത്ര ചെയ്യുന്നത്. സന്ധ്യക്കും പുലർച്ചെയും കാൽനട യാത്ര അസാധ്യമാണ്. നായഭീതിയിൽ പ്രഭാത നടത്തംതന്നെ നിർത്തിയവർ ഏറെയാണ്. പള്ളി മൈതാനത്തും പരിസരങ്ങളിലും തമ്പടിച്ചിരിക്കുന്ന നായകൾ നാലു സ്കൂളുകളിലെ മൂവായിരത്തോളം കുട്ടികൾക്കും ഭീഷണിയാണ്. പൊതുസ്ഥലങ്ങളിൽ ഭക്ഷണാവശിഷ്‌ടങ്ങൾ തള്ളുന്നതാണ് നായകൾ കൂട്ടമായി എത്താനുള്ള കാരണം. മാർക്കറ്റിൽ പഞ്ചായത്തു വക സ്ഥലത്ത് വൻതോതിലാണ് മാലിന്യം തള്ളുന്നത്. പഞ്ചായത്തിന്‍റെ ഭാഗത്തുനിന്ന് നടപടി ഉണ്ടാകുന്നില്ല. അതിരമ്പുഴ പള്ളിക്കു തെക്കുവശം മാത്തത്തോട്ടിൽ കലുങ്കിനടിയിലും പള്ളി മൈതാനത്ത് വെയിറ്റിംഗ് ഷെഡിനു സമീപവും റെയിൽവേസ്റ്റേഷനും ഐടിഐക്കും സമീപവും മാലിന്യം വൻതോതിൽ തള്ളുന്നുണ്ട്. പൊതുസ്ഥലങ്ങളിൽ ചിലർ നായ്ക്കൾക്ക് ഭക്ഷണം കൊടുക്കുന്നതാണ് ഒരേസ്ഥലത്ത് നായ്ക്കൾ കൂട്ടമായി തമ്പടിക്കാൻ ഇടയാക്കുന്നത്. നായ സ്നേഹികൾ നായ്ക്കൾക്ക് പൊതുസ്ഥലത്ത് ഭക്ഷണം നൽകുന്നത് നിരോധിക്കണമെന്നാണ് നാട്ടുകാർ ആവശ്യപ്പെടുന്നത്. പൊതുസ്ഥലത്ത് മാലിന്യം തള്ളുന്നവരെയും പൊതുസ്ഥലത്ത് നായ്ക്കൾക്ക് ഭക്ഷണം നൽകുന്നവരെയും ഒരുപോലെ നിയന്ത്രിക്കാൻ പഞ്ചായത്ത് അധികൃതർ തയ്യാറാകണം.

പ്രസാദ് ഇറങ്ങിയാൽ വരാൽ വരാതിരിക്കില്ല

കൈപ്പുഴ: വലയുമായി മാഞ്ഞൂർ മേമ്മുറി സ്വദേശി പ്രസാദ് പാടത്തിറങ്ങിയാൽ വരാൽ ഒാടിവന്നു കയറും. ഉൾനാടൻ മീൻപിടിത്തത്തിൽ രണ്ടു പതിറ്റാണ്ട് പിന്നിടുന്ന മരങ്ങാട്ടുകുന്നേൽ പ്രസാദിനെ തേടി ആളുകൾ പ്രധാനമായും എത്തുന്നത് വരാലിനെ വാങ്ങാനാണ്. വെള്ളം വറ്റിക്കുന്ന പാടങ്ങളിലും തോട്ടിലുമാണ് പ്രധാന മീൻപിടിത്തം. വട്ടവല, കുത്തുവല, വീശുവല ഇവയൊക്കെയുമായിട്ടാണ് പ്രസാദ് ഇറങ്ങുന്നത്. നാടന്‍ വരാല്‍ നാട്ടു മീനുകളിലെ രാജാവാണ്. ഏറ്റവുമധികം ആവശ്യക്കാരുള്ളതും വരാലിനാണ്. സീസണില്‍ കിലോഗ്രാമിന് 500 രൂപ വരെ കിട്ടും. നാടന്‍ വരാലിന്‍റെ ഔഷധ ഗുണം തന്നെയാണ് വിലകൂടാന്‍ കാരണം. ശസ്ത്രക്രിയകള്‍ക്കു ശേഷം മുറിവ് പെട്ടെന്നുണങ്ങാനും പൊട്ടിയ അസ്ഥികള്‍ പെട്ടെന്നു പൂര്‍വസ്ഥിതിയിലാകാനും എണ്ണയോ തേങ്ങയോ ചേര്‍ക്കാതെ വരാല്‍ മീന്‍ പുളിയിട്ട് വറ്റിച്ച കറി ഉത്തമമാണെന്നാണ് പഴമക്കാര്‍ പറയുന്നു. വലിയ വരാല്‍ മീനുകളെ നിക്ഷേപിച്ച വെള്ളം വെട്ടുകല്ല് ഉപയോഗിച്ചു കെട്ടിടങ്ങൾ നിർമിക്കുന്പോൾ ചാന്തിൽ ചേർക്കാൻ ചിലർ ഉപയോഗിച്ചിരുന്നു. സുര്‍ക്കി മിശ്രിതത്തില്‍ ചേര്‍ക്കുന്ന വെള്ളം വരാല്‍ മത്സ്യത്തെ ജീവനോടെ ഇട്ടവെള്ളമാണ്. വലിയ വാര്‍പ്പുകളില്‍ മത്സ്യത്തെ ജീവനോടെ സൂക്ഷിക്കും. വരാലിന്‍റെ ശ്വസന പ്രക്രിയവഴി ഈ വെള്ളം വഴുവഴുപ്പും പശയുള്ളതായും മാറുന്നു. ഭിത്തി നിര്‍മിക്കുമ്പോള്‍ ഈ വെള്ളത്തില്‍ മുക്കിയശേഷം വെട്ടുകല്ലുകള്‍ പാകുന്നു. അത് നല്ല ഉറപ്പുള്ളതായി കാലങ്ങളോളം നിലനില്‍ക്കും. പ്രസാദിന്‍റെ ഇഷ്ടമീനും വരാലാണ്. 20 വര്‍ഷമായി നാടന്‍ മീന്‍ ടൂറിസ്റ്റ് റിസോര്‍ട്ട്, ബാറുകള്‍, ഷാപ്പ് എന്നിവിടങ്ങളില്‍ വിറ്റാണ് പ്രസാദിന്‍റെ ഉപജീവനം. ഈ തൊഴിലില്‍നിന്നു ലഭിച്ച വരുമാനംകൊണ്ട് മൂന്നു പെണ്‍മക്കളെയും പഠിപ്പിച്ചു. നഴ്‌സിംഗ്, ഡിഗ്രി, പ്ലസ് ടു തലങ്ങളില്‍ അവരെത്തി. വരുമാനം കൃത്യമായി പറയാനാവില്ല. ചിലപ്പോള്‍ രണ്ടായിരം രൂപ വരെ കിട്ടിയേക്കാം. ചിലപ്പോള്‍ ഒന്നും കിട്ടില്ല. ഇത്രയും പറഞ്ഞിട്ട് വലയുമായി പ്രസാദ് വരാലിനെ തേടി തോട്ടിലേക്ക് ഇറങ്ങി.

ഹൈമാസ്റ്റ് ലൈറ്റ് തകരാറിൽ: മെഡി. കോളജ് ബസ് സ്റ്റാൻഡ് ഇരുട്ടിൽ

ഗാന്ധിനഗര്‍: മെഡിക്കല്‍ കോളജ് ബസ് സ്റ്റാന്‍ഡ് നാളുകളായി ഇരുട്ടില്‍. സ്റ്റാന്‍ഡിന്‍റെ എതിര്‍വശത്ത് ഹൈമാസ്റ്റ് ലൈറ്റ് സ്ഥാപിച്ചിട്ടുണ്ടെങ്കിലും മാസങ്ങളായി ഇതു പ്രവര്‍ത്തിക്കുന്നില്ല. ഇതേത്തുടര്‍ന്ന് സ്റ്റാന്‍ഡ് രാത്രികാലങ്ങളില്‍ ഇരുട്ടിലാണ്. വിവിധ ജില്ലകളില്‍നിന്ന് ദിവസവും മെഡിക്കല്‍ കോളജ് ആശുപത്രിയിലെത്തുന്ന ആയിരക്കണക്കിന് രോഗികളും ആശുപത്രിയിലെ ജീവനക്കാരും ബസ് കാത്തുനില്‍ക്കുന്ന സ്റ്റാന്‍ഡാണ് മാസങ്ങളായി ഇരുട്ടിലായിരിക്കുന്നത്. കടകളിലെ വെട്ടത്തിലാണ് രാത്രികാലങ്ങളില്‍ യാത്രക്കാര്‍ ബസ് കാത്തുനില്‍ക്കുന്നത്. ഹൈമാസ്റ്റ് ലൈറ്റിന്‍റെ തകരാര്‍ പരിഹരിക്കാത്തതിനാലാണ് സ്റ്റാന്‍ഡ് ഇരുട്ടില്‍ തുടരുന്നത്. ആര്‍പ്പൂക്കര പഞ്ചായത്തിന്‍റെ പരിധിയിലാണ് സ്റ്റാന്‍ഡ്. ഹൈമാസ്റ്റ് ലൈറ്റ് പ്രവര്‍ത്തിപ്പിക്കുന്നതിൽ പഞ്ചായത്ത് അധികാരികള്‍ അനാസ്ഥ തുടരുകയാണെന്ന ആരോപണമുണ്ട്. മെഡിക്കല്‍കോളജ് ആശുപത്രി അത്യാഹിതവിഭാഗം കവാടവും ഇരുട്ടിലാണ്. ഇവിടെയും വഴിവിളക്കില്ല. അടുത്ത കാലത്ത് ഇവിടെ മന്ത്രി വി.എന്‍. വാസവന്‍ അനുവദിച്ച തുകകൊണ്ട് ഹൈമാസ്റ്റ് സ്ഥാപിച്ചെങ്കിലും പ്രവര്‍ത്തനോദ്ഘാടനം നീളുകയാണ്.

ഫാ. എ. തോമസ് വേങ്കടത്തിന്‍റെ സ്ഥാനാരോഹണം 21ന്

കോട്ടയം: മലങ്കര യാക്കോബായ സുറിയാനി സഭ കോട്ടയം ഭദ്രാസനത്തിലെ സീനിയര്‍ വൈദികന്‍ ഫാ. എ. തോമസ് വേങ്കടത്തിന്‍റെ കോര്‍എപ്പിസ്‌കോപ്പ സ്ഥാനാരോഹണം 21ന്. കോട്ടയം സെന്‍റ് ജോസഫ്‌സ് കത്തീഡ്രലില്‍ രാവിലെ 6.15നു വിശുദ്ധ കുര്‍ബാന മധ്യേ ഭദ്രാസന മെത്രാപ്പോലീത്തയും എപ്പിസ്‌കോപ്പല്‍ സുന്നഹദോസ് സെക്രട്ടറിയുമായ ഡോ. തോമസ് മാര്‍ തീമോത്തിയോസ് കോര്‍എപ്പിസ്‌കോപ്പ സ്ഥാനം നല്‍കും. ഭദ്രാസന മെത്രാപ്പോലീത്ത ഡോ. തോമസ് മാര്‍ തിമോത്തിയോസിന്‍റെ ശിപാര്‍ശപ്രകാരം കോര്‍എപ്പിസ്‌കോപ്പ സ്ഥാനം സംബന്ധിച്ച് ആകമാന സുറിയാനി സഭാ പരമാധ്യക്ഷന്‍ പരിശുദ്ധ ഇഗ്നാത്തിയോസ് അപ്രേം ദ്വിതീയന്‍ പാത്രിയര്‍ക്കീസ് ബാവയുടെ കല്പന നേരത്തേ ലഭിച്ചിരുന്നു. തിരുവഞ്ചൂര്‍ മര്‍ത്ത്മറിയം പള്ളി ഇടവകയിൽ വേങ്കടത്ത് ചെറിയാന്‍ അന്ത്രയോസ്-ഏലിയാമ്മ ദമ്പതികളുടെ മകനായി 1960ല്‍ ജനിച്ചു. 1988ഡിസംബര്‍ 11ന് ഡോ. ഗീവര്‍ഗീസ് മാര്‍ ഗ്രീഗോറിയോസ് മെത്രാപ്പോലീത്തയില്‍നിന്നു വൈദികപട്ടം സ്ഥീകരിച്ചു. ഭദ്രാസനത്തിലെ 25 പള്ളികളിലും യുഎസില്‍ നോര്‍ത്ത് കരോളൈനയിലെ ഷാര്‍ലറ്റ് സെന്‍റ് ജോര്‍ജ് പള്ളിയിലും സേവനം ചെയ്തു. സഭാ മാനേജിംഗ് കമ്മിറ്റിയംഗം, അഖില മലങ്കര യൂത്ത് അസോസിയേഷന്‍ വൈസ് പ്രസിഡന്‍റ്, വൈദിക സൊസൈറ്റി സെക്രട്ടറി, വൈദികസംഘം കോട്ടയം ഭദ്രാസന കമ്മിറ്റിയംഗം, ഭദ്രാസന കൗണ്‍സിൽ അംഗം തുടങ്ങിയ സ്ഥാനങ്ങള്‍ വഹിച്ചു. കാലംചെയ്ത യാക്കോബ് മാര്‍ യൂലിയോസ്, ബെന്യാമിന്‍ ജോസഫ് മാര്‍ ഒസ്താത്തിയോസ് മെത്രാപ്പോലീത്താമാരുടെ സെക്രട്ടറിയായിരുന്നു. നിലവില്‍ പാമ്പാടി ഈസ്റ്റ് മര്‍ത്ത്മറിയം ചെറിയ പള്ളി, മീനടം സെന്‍റ് ജോണ്‍സ് പള്ളി എന്നിവിടങ്ങളില്‍ സേവനമനുഷ്ഠിക്കുന്നു. ഭദ്രാസന ശുശ്രൂഷകസംഘം വൈസ്പ്രസിഡന്‍റുമാണ്. ഇവാഞ്ചലിക് അസോസിയേഷന്‍ കമ്മിറ്റിയംഗം, തിരുവഞ്ചൂര്‍ വൈഎംസിഎ രക്ഷാധികാരി, മഞ്ഞിനിക്കര തീര്‍ഥാടകസംഘം വൈസ് പ്രസിഡന്‍റ് എന്നീ നിലകളിലും പ്രവർത്തിക്കുന്നു. മണര്‍കാട് സെന്‍റ് മേരീസ് കോളജ് സുറിയാനി അധ്യാപകനായിരുന്നു. ഭാര്യ: വത്സമ്മ തോമസ്. മക്കള്‍: അലക്‌സ് തോമസ് (ഐടി മാനേജര്‍, ഇന്‍റര്‍ഗ്രോ ബ്രാന്‍ഡ് കൊച്ചി), അഡ്വ. എല്‍സ എലിസബത്ത് തോമസ്. മരുമക്കള്‍: ഷാനി ആന്‍ അലക്‌സ് (അധ്യാപിക, കളമശേരി രാജഗിരി പബ്ലിക് സ്‌കൂള്‍), തോമസ് സാബു (പ്രഫസര്‍, മണര്‍കാട് സെന്‍റ് മേരീസ് കോളജ്).

ത്രിപുര സ്വദേശിയുടെ കളഞ്ഞുപോയ പഴ്സ് കണ്ടെത്തി നല്‍കി യുവാവും ഏറ്റുമാനൂര്‍ പോലീസും

ഏറ്റുമാനൂർ: ഏറ്റുമാനൂർ പോലീസിന്‍റെ അവസരോചിത ഇടപെടലിലും യുവാവിന്‍റെ സത്യസന്ധതയിലും ത്രിപുര സ്വദേശിക്ക് നഷ്ടപ്പെട്ട പണം തിരികെ ലഭിച്ചു. ബസ് യാത്രയ്ക്കിടെ നഷ്ടപ്പെട്ട പഴ്സാണ് ത്രിപുര സ്വദേശിക്ക് തിരികെ ലഭിച്ചത്. ഞായറാഴ്ച രാത്രി പാലായിൽനിന്ന് എം ആൻഡ് എം ബസിൽ യാത്ര ചെയ്ത ത്രിപുര സ്വദേശി ഹൃദയദാസിന്‍റെ 15,000 രൂപ അടങ്ങിയ പഴ്സാണ് നഷ്ടപ്പെട്ടത്. യാത്ര ചെയ്ത ബസ് ഏതാണെന്ന് ഹൃദയ ദാസിന് അറിവുണ്ടായിരുന്നില്ല. ഹൃദയദാസ് ഏറ്റുമാനൂർ പോലീസ് സ്റ്റേഷനിൽ പരാതി നൽകിയതിനെത്തുടർന്ന് നടത്തിയ അന്വേഷണത്തിൽ പാലാ റൂട്ടിൽ സർവീസ് നടത്തുന്ന എം ആൻഡ് എം ബസ് ക്ലീൻ ചെയ്യുമ്പോൾ കാണക്കാരി പള്ളിപ്പടി സ്വദേശി വടക്കേമറ്റപ്പള്ളി വീട്ടിൽ ജോസിന്‍റെ മകൻ എബിന് വണ്ടിയിൽക്കിടന്ന് പഴ്സ് കിട്ടിയതായി വിവരം ലഭിച്ചു. പട്രോളിംഗ് ഡ്യൂട്ടിയിൽ ഉണ്ടായിരുന്ന എസ്ഐ ഉദയൻ കെ., സിവിൽ പോലീസ് ഓഫീസർ പ്രദീപ്‌ എന്നിവർ സ്ഥലത്തെത്തി പഴ്സ് ഹൃദയ് ദാസിന്‍റേതാണെന്ന് തിരിച്ചറിയുകയായിരുന്നു. ഏറ്റുമാനൂർ എസ്ഐ അഖിൽദേവ് എ.എസ്. ഇന്നലെ ഹൃദയ് ദാസിനെയും എബിനെയും സ്റ്റേഷനിൽ വിളിച്ചുവരുത്തി. എസ്എച്ച്ഒ അൻസൽ എ.എസിന്‍റെ സാന്നിധ്യത്തിൽ എബിൻ, ഹൃദയ് ദാസിന് പഴ്സ് കൈമാറി. ഏറ്റുമാനൂരിൽ ഡെവൺ കറി പൗഡർ കമ്പനി ജീവനക്കാരനായ എബിൻ അധിക വരുമാനത്തിനായാണ് ബസ് ക്ലീനിംഗ് ജോലി ചെയ്തു വന്നിരുന്നതെന്ന് പോലീസ് ഉദ്യോഗസ്ഥർ പറഞ്ഞു.

66 ഗ്രാമീണ റോഡുകള്‍ക്ക് നിര്‍മാണ അനുമതി ലഭിച്ചു: ഫ്രാന്‍സിസ് ജോര്‍ജ്

കോട്ടയം: പ്രധാനമന്ത്രി ഗ്രാമീണ സഡക് യോജന (പിഎംജിഎസ്‌വൈ ) പദ്ധതി പ്രകാരം കോട്ടയം ലോക്‌സഭാ മണ്ഡലത്തിലെ 66 ഗ്രാമീണ റോഡുകള്‍ക്കു നിര്‍മാണാനുമതി ലഭിച്ചതായി ഫ്രാന്‍സിസ് ജോര്‍ജ് എംപി. ജനവാസ കേന്ദ്രങ്ങളെ തമ്മില്‍ ബന്ധിപ്പിക്കുന്നതും കുറഞ്ഞത് ആറു മീറ്റര്‍ വീതിയെങ്കിലുമുള്ള മണ്‍റോഡുകളെയാണ് പദ്ധതിയില്‍ ഉള്‍പ്പെടുത്തിയത്. അനുമതി ലഭിച്ച റോഡുകള്‍ ഉന്നത നിലവാരത്തില്‍ നിര്‍മിക്കുന്നതിനുള്ള പ്രോജക്ട് റിപ്പോര്‍ട്ട് ഉടന്‍ തയാറാക്കും. ജില്ലയിലെ വിവിധ നിയോജക മണ്ഡലങ്ങളിലുള്ള 55 റോഡുകളുടെ 112 കിലോമീറ്ററും എറണാകുളം ജില്ലയിലെ പിറവം നിയോജക മണ്ഡത്തിലെ 11 റോഡുകളുടെ 15 കിലോമീറ്റര്‍ ദൂരവുമാണ് പദ്ധതിയില്‍ ഉള്‍പ്പെടുത്തിയിരിക്കുന്നത്. കേന്ദ്രത്തില്‍നിന്ന് അനുമതി ലഭിക്കുന്നതോടെ സര്‍വേ പൂര്‍ത്തിയാക്കി സമര്‍പ്പിച്ചിട്ടുള്ള മറ്റു റോഡുകളെയും പദ്ധതിയില്‍ ഉള്‍പ്പെടുത്തുമെന്ന് ഫ്രാന്‍സിസ് ജോര്‍ജ് പറഞ്ഞു. കേന്ദ്ര സര്‍ക്കാര്‍ 60 ശതമാനം, സംസ്ഥാന സര്‍ക്കാര്‍ 40ശതമാനം തുകകള്‍ മുടക്കിയാണ് പദ്ധതി നടപ്പാക്കുന്നത്. റോഡുകളുടെ അടിഭാഗം ശക്തമായി ബലപ്പെടുത്തിയതിനുശേഷം ഉന്നത നിലവാരത്തില്‍ ടാര്‍ ചെയ്യുകയും ഇരുവശങ്ങളും കോണ്‍ക്രീറ്റ് ചെയ്യുന്ന വിധത്തിലാണ് എസ്റ്റിമേറ്റ് തയാറാക്കുക. ഈ റോഡുകളില്‍ ആവശ്യമായ സ്ഥലങ്ങളില്‍ കലുങ്കുകളും പാലങ്ങളും നിര്‍മിക്കും. അഞ്ചു വര്‍ഷത്തെ റോഡ് പരിപാലനവും ഉള്‍പ്പെടുത്തിയാണ് പ്ലാനും എസ്റ്റിമേറ്റും തയാറാക്കുന്നത്. റോഡുകളുടെ നിര്‍മാണം പൂര്‍ത്തിയാകുന്നതോടെ വികസനരംഗത്ത് വലിയ മുന്നേറ്റമുണ്ടാകുമെന്നും ഫ്രാന്‍സിസ് ജോര്‍ജ് പറഞ്ഞു.

മേൽപാലങ്ങളുടെ അപ്രോച്ച് റോഡുകള്‍ തകര്‍ന്ന് യാത്രാ ദുരിതം

ചങ്ങനാശേരി: റെയില്‍വേ മേല്‍പാലം കടക്കാന്‍ വാഹനങ്ങളുടെ നീണ്ടനിര. മേല്‍പ്പാലത്തിന്‍റെ ഇരുഭാഗത്തും തകര്‍ന്നു കിടക്കുന്ന അപ്രോച്ച് റോഡ് ഭാഗത്തെ കുഴികളില്‍ ചെറുതും വലുതുമായ വാഹനങ്ങള്‍ ഇറങ്ങിക്കയറാന്‍ സമയമെടുക്കുന്നതാണ് പാലത്തില്‍ വാഹനങ്ങള്‍ കുരുങ്ങാന്‍ കാരണം. ഇത് അക്ഷരാര്‍ഥത്തില്‍ വാഴൂര്‍ റോഡില്‍ കുരിശുംമൂടു മുതല്‍ ഒന്നാംനമ്പര്‍ ബസ് സ്റ്റാന്‍ഡ് വരെയും ചങ്ങനാശേരി ബൈപാസിലും വാഹനസഞ്ചാരം കുരുക്കുകയാണ്. റെയിൽവേ ബൈപാസ് ജംഗ്ഷനിലും റോഡ് തകർന്നിട്ടുണ്ട്. കുരുക്കുമുറുകുന്പോൾ റെയിൽവേ ജംഗ്ഷനിലെ സിഗ്നൽ സംവിധാനം ട്രാഫിക് പോലീസ് ഓഫാക്കി കഠിനാധ്വാനം ചെയ്താണ് പരിഹാരമുണ്ടാക്കുന്നത്. മഴ തോരുന്പോഴേ മേല്‍പാലത്തിലെ അപ്രോച്ച് റോഡിന്‍റെ തകര്‍ച്ച പരിഹരിക്കാന്‍ സത്വര നടപടികള്‍ സ്വീകരിക്കണമെന്ന ആവശ്യമാണ് ഉയരുന്നത്. പാറേല്‍ പള്ളി ഭാഗത്തുനിന്നു കവലയിലെത്താന്‍ 25 മിനിറ്റ് പാറേല്‍ പള്ളി ഭാഗത്തുനിന്നു നിരങ്ങിനീങ്ങുന്ന സ്വകാര്യബസുകളടക്കം വാഹനങ്ങള്‍ ചങ്ങനാശേരി കവലയില്‍ എത്താന്‍ 20നും 30നും ഇടയില്‍ മിനിറ്റ് എടുക്കേണ്ടിവരുന്നു. ഇതിനാല്‍, സ്വകാര്യ ബസുകളുടെ സമയക്രമം തെറ്റുന്നു. രാവിലെ സ്‌കൂളുകളിലും കോളജുകളിലുമെത്തേണ്ട വിദ്യാര്‍ഥികള്‍, അധ്യാപകര്‍, സര്‍ക്കാര്‍ സ്ഥാപനങ്ങളിലുള്‍പ്പെടെ വിവിധ സ്ഥാപനങ്ങളിലെ ജീവനക്കാർ തുടങ്ങി ആർക്കും സമയക്ലിപ്തത പാലിക്കാനാവുന്നില്ല. പൈപ്പുകളിടാന്‍ കുഴിച്ച റോഡ് പൂര്‍വസ്ഥിതിയില്‍ എത്തിക്കുന്നതും വൈകുന്നു ജല്‍ജീവന്‍, അമൃത് പദ്ധതികള്‍ക്കായി പാറേല്‍പ്പള്ളി ഭാഗത്ത് വെട്ടിപ്പൊളിച്ച ഫുട്പാത്തുകള്‍ പൂര്‍വസ്ഥിതിയില്‍ ആക്കാത്തതും യാത്രക്കാര്‍ക്കു വലിയ ദുരിതമാണ്. വാഴൂര്‍ റോഡില്‍ പാറേല്‍പ്പള്ളി കിണര്‍ ഭാഗത്തുനിന്നുമാരംഭിച്ച് ഫാത്തിമാപുരത്തെത്തുന്ന റോഡിന്‍റെ ഇരുവശങ്ങളിലും പൈപ്പ് സ്ഥാപിച്ചെങ്കിലും റോഡ് പൂര്‍വസ്ഥിതിയില്‍ എത്തിക്കുന്നത് വൈകുന്നതുമൂലം വാഹനസഞ്ചാരം അതീവ ദുരിതമാണ്. കവിയൂര്‍ റോഡിന്‍റെ ശോച്യാവസ്ഥയും കുരുക്ക് ചങ്ങനാശേരി-കവിയൂര്‍ റോഡിന്‍റെ തകര്‍ച്ച ഈ റോഡിലെയും ഗതാഗതം തടസപ്പെടുത്തുന്നു. പായിപ്പാട്, നാലുകോടി കവലകളിലും ഇരൂപ്പ, ഫാത്തിമാപുരം ഭാഗങ്ങളിലും റോഡ് തകര്‍ന്ന നിലയിലാണ്. ഫാത്തിമാപുരം റെയില്‍വേ മേല്‍പാലത്തിന്‍റെ അപ്രോച്ച് റോഡുകളും തകര്‍ച്ചയിലാണ്. പെരുന്ന-എസ്ബി കോളജ് ഭാഗത്തും തിരക്ക് നിര്‍മാണത്തിലിരിക്കുന്ന കെഎസ്ആര്‍ടിസി സ്റ്റേഷനു മുമ്പില്‍ കോട്ടയം ഭാഗത്തേക്കും മുനിസിപ്പല്‍ ഓഫീസിനു മുമ്പില്‍ തിരുവല്ല ഭാഗത്തേക്കുള്ള കെഎസ്ആര്‍ടിസി ബസുകളും നിര്‍ത്തുന്നത് എന്‍എച്ച് 183 (എംസി)റോഡില്‍ പെരുന്ന മുതല്‍ എസ്ബി കോളജ് ഭാഗം വരേയും ഗതാഗതം കുരുക്കുകയാണ്. ട്രാഫിക് പോലീസും നെട്ടോട്ടം ട്രാഫിക് എന്‍ഫോഴ്‌സ്‌മെന്‍റ് പോലീസ് നഗരത്തിലെ ഗതാഗത പ്രതിസന്ധി പരിഹരിക്കാന്‍ നെട്ടോട്ടമോടുകയാണ്. അടിസ്ഥാനപ്രശ്‌നങ്ങൾ ചര്‍ച്ച ചെയ്തു പരിഹരിക്കാത്തതിനാൽ പോലീസ് സേനയും ബുദ്ധിമുട്ടുകയാണ്. ഗതാഗത ഉപദേശകസമിതി യോഗം ഇനിയും വൈകരുത് നഗരത്തിലെ ഗതാഗതത്തിരക്കിനു പരിഹാരം കാണാന്‍ നഗരസഭാധികൃതര്‍ അടിയന്തരമായി ട്രാഫിക് ഉപദേശക സമിതി യോഗം വിളിച്ചുചേര്‍ക്കണമെന്ന ആവശ്യം ഉയരുകയാണ്. അല്ലാത്ത പക്ഷം ഓണക്കാലമാകുമ്പോള്‍ നഗരം ഗതാഗതക്കുരുക്കില്‍ വീര്‍പ്പുമുട്ടും. ട്രാഫിക് ഉപദേശക സമിതി താഴെപ്പറയുന്ന ആവശ്യങ്ങൾ പരിഗണിക്കണം. •റോഡുകളുടെ തകര്‍ച്ചയ്ക്ക് പരിഹാരം കാണണം. • എന്‍എച്ച്-183(എംസി റോഡില്‍)ല്‍ മതുമൂല മുതല്‍ ളായിക്കാട് വരെയുള്ള ഭാഗങ്ങളില്‍ സിഗ്നലുകളും ഡിവൈഡര്‍ ലൈനുകളും സീബ്ര ക്രോസിംഗുക ളും സ്ഥാപിക്കണം. • മാര്‍ക്കറ്റ് റോഡില്‍ രൂക്ഷമാകുന്ന കുരുക്കഴിക്കാൻ നടപടിവേണം. • വഴിവാണിഭങ്ങളിലെ വര്‍ധന പരിശോധിക്കണം. • പെരുന്ന രാജേശ്വരി ജംഗ്ഷനില്‍ തട്ടുകടകള്‍ക്കു മുമ്പിലെ വാഹനപാര്‍ക്കിംഗ് മറ്റു വാഹനങ്ങള്‍ക്ക് ദുരിതമാകുന്നുണ്ടോയെന്ന് വിലയിരുത്തണം. • എസ്എച്ച് ജംഗ്ഷനില്‍ സുരക്ഷാ ക്രമീകരണങ്ങള്‍ ശക്തമാക്കണം. •ആറുവര്‍ഷം മുമ്പ് നഗരത്തിലെ ഓട്ടോകള്‍ക്ക് നമ്പര്‍ നല്‍കി പാര്‍ക്കിംഗ് ഏരിയാകളും ഏര്‍പ്പെടുത്തിയിരുന്നു. എന്നാലിപ്പോള്‍ നഗരസഭാ നമ്പറില്ലാത്ത നിരവധി ഓട്ടോകള്‍ പാര്‍ക്ക് ചെയ്ത് ഓടുന്നു. ഇതു പരിശോധിച്ച് എണ്ണം നിയന്ത്രിക്കണം. •ഫുട്പാത്തുകളിലൂടെയുള്ള കാല്‍നടയാത്ര സുഗമമാക്കണം. •വൈദ്യുതി തൂണുകളിലും ഫുട്പാത്തുകളിലും സ്ഥാപിച്ചിരിക്കുന്ന ഫ്‌ളെക്‌സ്‌ബോര്‍ഡുകള്‍ നീക്കം ചെയ്യണം. •ഓണക്കാലത്ത് റോഡിലെ കുരുക്ക് ഒഴിവാക്കാൻ നഗരത്തിൽ പാർക്കിംഗ് ക്രമീകരണങ്ങളും ഏർപ്പെടുത്തണം.

കളക്ടറുടെ ഉത്തരവ് അവഗണിച്ചു; മരം വീണ് വീടിനു നാശം

കറുകച്ചാൽ: അയൽവാസിയുടെ പറമ്പിൽനിന്ന കൂറ്റൻ ചാര് മരം വീണ് വീടിനു നാശം നേരിട്ടു. ചമ്പക്കര കുറുപ്പൻകവല മാക്കിപാലം ഭാഗത്ത് തുണ്ടിയിൽ ടി.ടി. മുരുകന്‍റെ വീടിനാണു നാശം സംഭവിച്ചത്. ഇന്നലെ രാവിലെ 7.15 ഓടെയാണ് സംഭവം. കളക്ടറുടെ ഉത്തരവ് ഉണ്ടായിട്ടും വെട്ടിമാറ്റാതിരുന്ന മരമാണ് വീടിന് മുകളിൽ വീണതെന്നു നാട്ടുകാർ പറയുന്നു. നഷ്ടപരിഹാരം നൽകാനും മരം മുറിച്ചുനീക്കാനും സ്ഥലമുടമ വിസമ്മതിച്ചതോടെ പഞ്ചാത്തംഗത്തിന്‍റെ നേതൃത്വത്തിൽ നാട്ടുകാർ റോഡ് ഉപരോധിച്ചു. അപകടവിവരം മുരുകൻ സ്ഥലമുടമയോട് പറഞ്ഞെങ്കിലും നടപടി സ്വീകരിക്കാൻ ഇയാൾ തയ്യാറായില്ല. വിവരമറിഞ്ഞ് വാർഡംഗം കിരൺകുമാറിന്‍റെ നേതൃത്വത്തിൽ വീണ്ടും സ്ഥലമുടമയോടു സംസാരിച്ചെങ്കിലും മരം മുറിക്കില്ലെന്നും നഷ്ടപരിഹാരം കൊടുക്കില്ലെന്നും അറിയിച്ചു. ഇതോടെ വാർഡംഗത്തിന്‍റെ നേതൃത്വത്തിൽ നാട്ടുകാർ റോഡ് ഉപരോധിച്ചു. വിവരമറിഞ്ഞ് കറുകച്ചാൽ പോലീസ്, ചീഫ് വിപ്പ് ഡോ.എൻ. ജയരാജ്, പഞ്ചായത്ത് സെക്രട്ടറി, തഹസിൽദാർ അടക്കമുള്ളവർ സ്ഥലത്തെത്തി. സ്ഥലമുടമ ഒത്തുതീർപ്പിന് തയ്യാറാകാതെ വന്നതോടെ വിഷയം കളക്ടറെ അറിയിച്ചു. കളക്ടറുടെ നിർദേശപ്രകാരം ഇന്നു മരം മുറിച്ചു മാറ്റാൻ പഞ്ചായത്ത് അധികൃതർ തീരുമാനിച്ചു. അപകടാവസ്ഥയിലുള്ള മരം മുറിക്കണമെന്ന് മുരുകൻ പലവട്ടം സ്ഥലമുടമയോട് പറഞ്ഞതാണ്. നടപടിയുണ്ടാകാതെ വന്നപ്പോൾ കറുകച്ചാൽ പഞ്ചായത്തിലും ജില്ലാ കളക്ടർക്കും പരാതി നൽകിയിരുന്നു. കളക്ടറുടെ നിർദേശപ്രകാരം പഞ്ചായത്ത് സെക്രട്ടറി മരം മുറിക്കണമെന്നാവശ്യപ്പെട്ട് നോട്ടീസ് നൽകിയിട്ടും ഉടമ മരം മുറിക്കാൻ തയ്യാറായില്ല. സെക്രട്ടറിക്കെതിരേ ഇയാൾ കേസ് നൽകിയതായി പഞ്ചായത്ത് അധികൃതരും പറയുന്നു.

കല്‍ക്കെട്ട് ഇടിഞ്ഞ് കുംബിക്കപ്പുഴ പാലം അപകടാവസ്ഥയില്‍

നെടുംകുന്നം: പുന്നവേലി റോഡിലെ കുംബിക്കപ്പുഴ പാലം കല്‍ക്കെട്ടിടിഞ്ഞ് അപകടാവസ്ഥയില്‍. മുളയംവേലി - നെടുംകുന്നം പഞ്ചായത്തിലെ 10, 11 വാര്‍ഡുകളെ ബന്ധിപ്പിക്കുന്ന കുംബിക്കപ്പുഴ പാലത്തിന്‍റെ അടിഭാഗത്തെ പ്രധാന കൽക്കെട്ടാണ് ഇടിഞ്ഞ് അപകടാവസ്ഥയിലായത്. നിരവധി വാഹനങ്ങളും യാത്രക്കാരും കടന്നുപോകുന്ന പാലത്തിന്‍റെ അപകടാവസ്ഥ പരിഹരിച്ചു പാലം വേഗം നീക്കി സഞ്ചാരയോഗ്യമാക്കുന്നതിന് അധികാരികള്‍ ഇടപെടണമെന്നാണ് നാട്ടുകാരുടെ ആവശ്യം.

എണ്ണക്കാച്ചിറയിലെ കുടുംബങ്ങള്‍ക്ക് പട്ടയം അനുവദിക്കണം: അപു ജോണ്‍ ജോസഫ്

ചങ്ങനാശേരി: കുറിച്ചി പഞ്ചായത്തിലെ എണ്ണക്കാച്ചിറയോടുള്ള അവഗണന അവസാനിപ്പിക്കണമെന്നും പട്ടയമില്ലാത്ത അമ്പതോളം വരുന്ന കുടുംബങ്ങൾക്ക് ഉടന്‍ പട്ടയം അനുവദിക്കണമെന്നും കേരള കോണ്‍ഗ്രസ് സംസ്ഥാന കോഓര്‍ഡിനേറ്റര്‍ അപു ജോണ്‍ ജോസഫ്. എണ്ണക്കാചിറയില്‍ കേരള കോണ്‍ഗ്രസ് പുനര്‍നിര്‍മിച്ച സമര വീടിന്‍റെ സമര്‍പ്പണം നിര്‍വഹിച്ചു പ്രസംഗിക്കുകയായിരുന്നു അദ്ദേഹം. കുറിച്ചി പഞ്ചായത്തിലെ എണ്ണക്കാച്ചിറ നിവാസികളോട് പഞ്ചായത്ത് അധികൃതര്‍ കാണിക്കുന്ന അവഗണനയില്‍ പ്രതിഷേധിച്ച് ഒരു വിധവയ്ക്കു വീട് നിര്‍മിച്ചാണ് കേരള കോണ്‍ഗ്രസ് സമരം പ്രഖ്യാപിച്ചിരിക്കുന്നത്. കേരള കോണ്‍ഗ്രസ് സംസ്ഥാന സ്റ്റീയറിംഗ് കമ്മിറ്റിയംഗം ഡോ. ജോബിന്‍ എസ്. കൊട്ടാരം അധ്യക്ഷത വഹിച്ചു. പാര്‍ട്ടി വൈസ്‌ചെയര്‍മാന്‍ കെ.എഫ്. വര്‍ഗീസ്, ഉന്നതാധികാര സമിതിയംഗങ്ങളായ വി.ജെ. ലാലി, സി.ഡി വത്സപ്പന്‍, ഏലിയാസ് സഖറിയ, നിയോജകമണ്ഡലം പ്രസിഡന്‍റ് മാത്തുക്കുട്ടി പ്ലാത്താനം, അഡ്വ. ചെറിയാന്‍ ചാക്കോ, ജോര്‍ജുകുട്ടി മാപ്പിളശേരി, ജെയ്സ് വെട്ടിയാര്‍, കുര്യന്‍ തൂമ്പുങ്കല്‍, ജിക്കു കുര്യാക്കോസ്, റോയി ചാണ്ടി, ജോസഫ് ആന്‍റണി എന്നിവര്‍ പ്രസംഗിച്ചു.

പേവിഷബാധയേറ്റ് ചത്ത നായ കടിച്ച നായ്ക്കളേയും പൂച്ചയേയും പിടികൂടി പ്രതിരോധ കുത്തിവയ്പ്പെടുത്തു

വൈക്കം: പേവിഷബാധയേറ്റ് ചത്ത തെരുവുനായ കടിച്ചു പരിക്കേൽപ്പിച്ചതായി സംശയിക്കുന്ന മൂന്ന് തെരുവുനായ്ക്കളേയും ഒരു പൂച്ചയേയും പിടികൂടി പ്രതിരോധ വാക്സിൻ നൽകി. നായ്ക്കളെയും പൂച്ചയേയും കൂട്ടിൽ നിരീക്ഷണത്തിലാക്കി. വൈക്കം നഗരസഭ 17-ാം വാർഡിൽ തോട്ടുവക്കത്ത് കെവി കനാലോരത്ത് കഴിഞ്ഞ ദിവസം പേവിഷബാധയേറ്റ് ചത്ത തെരുവുനായയുടെ കടിയേറ്റ തെരുവുനായെ അവശനിലയിൽ കണ്ടതോടെ നാട്ടുകാർ മുൻനഗരസഭാ ചെയർ പേഴ്സണും വാർഡു കൗൺസിലറുമായ രാധികശ്യാമിനെ അറിയിച്ചതിനെത്തുടർന്ന് തെരുവുനായ്ക്കളെ പിടി കൂടുന്നതിൽ വൈദഗ്ധ്യം നേടിയ ആളെത്തി നായ്ക്കളെയും പൂച്ചയേയും പിടികൂടി കൂട്ടിലാക്കി.തുടർന്ന് വെറ്ററിനറി ഡോക്ടറെത്തി വാക്സിനേഷൻ നടത്തി. കഴിഞ്ഞ ദിവസം പേവിഷബാധയേറ്റു ചത്ത തെരുവുനായ കടിച്ച നാലുപേരിൽ വഴിയോരത്തെ ഷെഡിൽ കഴിയുന്ന വയോധികനേയും വാർഡ്കൗൺസിലർ രാധികശ്യാമും നാട്ടുകാരും ചേർന്ന് വൈക്കം താലൂക്ക് ആശുപത്രിയിലെത്തിച്ചു പ്രതിരോധ കുത്തിവയ്പ്പെടുത്തു. സംഭവമറിഞ്ഞ് നഗരസഭാ ചെയർപേഴ്സൺ പ്രീതാ രാജേഷ്, വികസന സ്റ്റാൻഡിംഗ് കമ്മിറ്റി ചെയർപേഴ്സൺ സിന്ധുസജീവൻ, കൗൺസിലർമാർ തുടങ്ങിയവരും സ്ഥലത്തെത്തി. തോട്ടുവക്കത്തും കെവി കനാലോരത്തും വേമ്പനാട്ട് കായൽക്കരയിലും മുമ്പ് പലതവണ പേവിഷബാധയേറ്റ തെരുവുനായ്ക്കളുടെ ആക്രമണത്തിൽ വയോധികർക്കും സ്ത്രീകൾക്കുമടക്കം നിരവധി പേർക്ക് ഗുരുതരമായി പരിക്കേറ്റിട്ടുണ്ട്. തോട്ടുവക്കത്തും നഗരത്തിലെ പ്രധാന വീഥികളിലും ഉൾപ്രദേശത്തെ വഴികളിലും വിജനമായ പുരയിടങ്ങളിലും ആൾതാമസമില്ലാത്ത വീടുകളിലും തെരുവുനായക്കൂട്ടം കടിപിടികൂടി തമ്പടിക്കുന്നതിനാൽ ജനം ഭീതിയോടെയാണ് നിരത്തിലിറങ്ങുന്നത്.

കൊതവറപാലം പുനർനിർമിക്കും: ഫ്രാൻസിസ് ജോർജ് എംപി

തലയാഴം: ഉല്ലല-കൊതവറ റോഡിലെ കാലപ്പഴക്കത്താൽ അപകടാവസ്ഥയിലായ കൊതവറ പാലവും സമീപ റോഡും പുനർനിർമിക്കുന്നതിനു ശ്രമം നടത്തുമെന്ന് ഫ്രാൻസിസ് ജോർജ് എംപി. അപകട സ്ഥിതിയിലായ പാലവും റോഡും സന്ദർശിച്ച് സ്ഥിതിഗതികൾ വിലയിരുത്തിയ ശേഷമാണ് അദ്ദേഹം ഇക്കാര്യം പറഞ്ഞത്. പൊതുമരാമത്തുവകുപ്പിന്‍റെ കീഴിലുള്ള റോഡായതിനാൽ ചില സാങ്കേതിക തടസങ്ങൾ ഉണ്ടെന്നും അവ പരിഹരിച്ച ശേഷം തുടർ നടപടികളിലേക്ക് കടക്കുമെന്നും എംപി പറഞ്ഞു. യുഡിഎഫ് നിയോജക മണ്ഡലം ചെയർമാൻ പോൾസൺ ജോസഫ്, വി. പോപ്പി, വി.എം. ഷാജി, പഞ്ചായത്തംഗം കെ. ബിനിമോൻ, സേവ്യർ കണ്ടാപറമ്പിൽ, ജെൽജി വർഗീസ്, ജോഷി ജോസഫ്, തങ്കച്ചൻ തുടങ്ങിയവർ എംപിക്കൊപ്പമുണ്ടായിരുന്നു.

കുട്ടിക്കര്‍ഷക പദ്ധതി വിത്തും കൈക്കോട്ടും ഉദ്ഘാടനം ചെയ്തു

കടുത്തുരുത്തി: അര്‍ച്ചന വിമന്‍സ് സെന്‍റര്‍ കടുത്തുരുത്തി റീജിയണിന്‍റെ നേതൃത്വത്തില്‍ കര്‍ഷക ദിനാചരണത്തിന്‍റെ ഭാഗമായി കുട്ടിക്കര്‍ഷക പദ്ധതി വിത്തും കൈക്കോട്ടും ഉദ്ഘാടനം ചെയ്തു. കാര്‍ഷിക സംസ്‌കാരം പുതുതലമുറയില്‍ വളര്‍ത്തിയെടുക്കേണ്ടതിന്‍റെ ആവശ്യകത മനസിലാക്കി അര്‍ച്ചന വിമന്‍സ് സെന്‍റര്‍ കടുത്തുരുത്തി റീജിയണും കടുത്തുരുത്തി ഗവണ്‍മെന്‍റ് വൊക്കേഷണല്‍ ഹയര്‍ സെക്കൻഡറി സ്‌കൂളും സംയുക്തമായി വിത്തും കൈകോട്ടും കുട്ടിക്കര്‍ഷക പദ്ധതിക്ക് തുടക്കം കുറിച്ചു. അര്‍ച്ചന വിമന്‍സ് സെന്‍റര്‍ ഡയറക്ടര്‍ മിസ് ത്രേസ്യാമ്മ മാത്യു അധ്യക്ഷത വഹിച്ച യോഗത്തില്‍ മോന്‍സ് ജോസഫ് എംഎല്‍എ കര്‍ഷക ദിനാചരണവും വിത്തും കൈക്കോട്ടും പദ്ധതി ഉദ്ഘാടനം ചെയ്തു. കര്‍ഷകദിന സന്ദേശവും റീജിയണില്‍ മികച്ച രീതിയില്‍ കൃഷി ചെയ്യുന്ന അംഗങ്ങള്‍ക്ക് വനിത കര്‍ഷകമിത്ര അവാര്‍ഡ് വിതരണവും കൃഷി ഓഫീസര്‍ ആര്‍. സിദ്ധാര്‍ത്ത് നിര്‍വഹിച്ചു. പഞ്ചായത്തംഗം ജാന്‍സി സണ്ണി, അധ്യാപകരായ ലിന്‍സി ചാക്കോ, ഡോ. രാജശ്രീ മോഹനന്‍, പ്രൊജക്‌ട് മാനേജര്‍ പോള്‍സണ്‍ കൊട്ടാരത്തില്‍, സീനിയര്‍ പ്രോഗ്രാം ഓഫീസര്‍ ഷൈനി ജോഷി, റീജിയണ്‍ ലീഡര്‍ റ്റിനു ഫ്രാന്‍സിസ്, യൂണിറ്റ് ഓഫീസര്‍ ഷീജ സജി, സുമ ബാബു, ബിന്‍സി ബിജു, സന്ധ്യ മോഹന്‍, ശ്രീദേവി സുബ്ബരായന്‍, പി.സി. ജഗദമ്മ, അനുജ മനോജ്, ആര്യ പി. അനില്‍കുമാര്‍, അഞ്ചുമോള്‍ കെ. മാത്യു, ലത സരിന്‍, കുമാരി കരുണാകരന്‍, ആശ മോള്‍ ഷിജോയ് തുടങ്ങിയവര്‍ പ്രസംഗിച്ചു. കര്‍ഷക ദിനാചരണത്തോടനുബന്ധിച്ചു കമ്യൂണിറ്റി ആക്‌ഷന്‍ ഗ്രൂപ്പിലെ അംഗങ്ങള്‍ക്ക് പച്ചക്കറി തൈയും ഗ്രോ ബാഗ് വിതരണവും കര്‍ഷകദിന കലാ പരിപാടികളും സമ്മാന ദാനവും നടന്നു.

പഞ്ചായത്ത് കമ്യൂണിറ്റി ഹാളിന്‍റെ ഉദ്ഘാടനം

ഞീഴൂര്‍: മോന്‍സ് ജോസഫ് എംഎല്‍എയുടെ പ്രാദേശിക വികസന ഫണ്ടില്‍നിന്ന് അനുവദിച്ച 25 ലക്ഷം രൂപ ഉപയോഗിച്ച് നവീകരിച്ച ഞീഴൂര്‍ പഞ്ചായത്ത് കമ്യൂണിറ്റി ഹാളിന്‍റെ ഉദ്ഘാടനം മോന്‍സ് ജോസഫ് എംഎല്‍എ നിര്‍വഹിച്ചു. പഞ്ചായത്ത് പ്രസിഡന്‍റ് ശ്രീകലാ ദിലീപ് അധ്യക്ഷത വഹിച്ചു. വൈസ് പ്രസിഡന്‍റ് കെ.പി. ദേവദാസ്, ബ്ലോക്ക് പഞ്ചായത്ത് പ്രസിഡന്‍റ് ജോണ്‍സണ്‍ കൊട്ടുകാപ്പിള്ളി, ജനപ്രതിനിധികൾ തുടങ്ങിയവർ പ്രസംഗിച്ചു.

ക്വിസ് മത്സരം നടത്തി

വൈക്കം: സ്വാതന്ത്ര്യദിനത്തോടനബന്ധിച്ച് വൈക്കം ടൗൺ റോട്ടറി ക്ലബ്ബ് താലൂക്കിലെ ഹൈസ്കൂൾ വിദ്യാർഥികൾക്കായി ക്വിസ് മത്സരം നടത്തി. ക്ലബ്ബ് പ്രസിഡന്‍റ് കെ.എസ്. വിനോദിന്‍റെ അധ്യക്ഷതയിൽ നടന്ന യോഗത്തിൽ വൈക്കം നഗസഭാ ചെയർപേഴ്സൺ പ്രീതാരാജേഷ് ക്വിസ് മത്സരം ഉദ്ഘാടനം ചെയ്തു. ക്വിസ് മത്സരത്തിൽ വടക്കേനട ഗവൺമെന്‍റ് ഗേൾസ് ഹയർ സെക്കൻഡറി സ്കൂൾ ഒന്നാം സമ്മാനവും തെക്കേനട ഗവൺമെന്‍റ് ഹയർ സെക്കൻഡറി സ്കൂൾ രണ്ടാം സ്ഥാനവും വൈക്കം ശ്രീനാരായണ ഹയർ സെക്കൻഡറി സ്കൂൾ, വൈക്കം വെസ്റ്റ് ഗവൺമെന്‍റ് വൊക്കേഷണൽ ഹയർ സെക്കൻഡറി സ്കൂൾ എന്നിവ മൂന്നാം സമ്മാനവും പങ്കിട്ടു. വിജയികൾക്ക് കാഷ് അവാർഡുകളും സർട്ടിഫിക്കറ്റും വിതരണം ചെയ്തു.

വൈക്കം - വെച്ചൂർ റോഡ് ജനകീയ സമിതി യോഗം ചേർന്നു

വൈക്കം: വൈക്കം - വെച്ചൂർ റോഡ് വീതികൂട്ടി ആധുനിക നിലവാരത്തിൽ പുനർനിർമിക്കുന്നതുമായി ബന്ധപ്പെട്ട് രൂപീകരിച്ച ജനകീയസമതിയുടെ യോഗം ഉല്ലല ശിവരഞ്ജിനി ഓഡിറ്റോറിയത്തിൽ നടന്നു . ജനകീയസമിതി പ്രസിഡന്‍റ് പി. സുഗതന്‍ അധ്യക്ഷത വഹിച്ചു. റോഡ് വികസനവുമായി ബന്ധപ്പെട്ട് ഭൂമി ഏറ്റെടുക്കുന്നതിനായി കിഫ്ബിയിൽനിന്ന് അനുവദിച്ച 85.77 കോടി രൂപ കെആർഎഫ്ബി മുഖേന കിഫ്ബിയുടെ ഭൂമി ഏറ്റെടുക്കൽ ഓഫീസിന് കൈമാറിയതായി സി.കെ. ആശ എംഎൽഎ പറഞ്ഞു. ജനകീയ സമിതി കൺവീനർ കെ.കെ. രഞ്ജിത്ത്, തലയാഴം പഞ്ചായത്ത് പ്രസിഡന്‍റ് രമേശ് പി.ദാസ്, കെ.കെ. ഗണേശൻ, എം.ഡി. ബാബുരാജ്, ജനപ്രതിനിധികൾ, വിവിധ രാഷ്‌ട്രീയ കക്ഷി പ്രതിനിധികൾ, കെആർഎഫ്ബി, കിഫ്ബി ഉദ്യോഗസ്ഥർ തുടങ്ങിയവർ പങ്കെടുത്തു.

കുടുംബ സംഗമം നടത്തി

വൈക്കം: താലൂക്ക് ചെത്തുതൊഴിലാളി യൂണിയൻ എഐടിയുസി ഫാമിലി വെൽഫെയർ സൊസൈറ്റിയുടെ ആഭിമുഖ്യത്തിൽ കുടുംബസംഗമവും സ്കോളർഷിപ്പ് വിതരണവും നടത്തി. കുടുംബ സംഗമം മുൻമന്ത്രി മുല്ലക്കര രത്നാകരൻ ഉദ്ഘാടനം ചെയ്തു. വെൽഫെയർ സൊസൈറ്റി പ്രസിഡന്‍റ് ബി. രാജേന്ദ്രൻ അധ്യക്ഷത വഹിച്ചു. യൂണിയൻ പ്രസിഡന്‍റ് വി.ബി. ബിനു സ്കോളർഷിപ്പുകൾ വിതരണം നടത്തി. ടി.എൻ. രമേശൻ, മുൻ എംഎൽഎ കെ. അജിത്, എം.ഡി. ബാബുരാജ് തുടങ്ങിയവർ പ്രസംഗിച്ചു.

ഗവ. വൊക്കേഷണൽ എച്ച്എസ്എസിന് മികച്ച നാഷണൽ സർവീസ് സ്കീമിനുള്ള അവാർഡ്

കുമരകം: ഈ വർഷത്തെ ഏറ്റവും മികച്ച നാഷണൽ സർവീസ് സ്കീമിനുള്ള ജില്ലാ തല അവാർഡ് കുമരകം ഗവൺമെന്‍റ് വൊക്കേഷണൽ ഹയർ സെക്കൻഡറി സ്കൂളിന്. സംസ്ഥാനത്തെ നാഷണൽ സർവീസ് സ്കീം പ്രവർത്തനങ്ങൾ വിലയിരുത്തി ഇതുവരെ നടത്തിയിട്ടുള്ള പ്രവർത്തനങ്ങളുടെ അവലോകനത്തെ അടിസ്ഥാനമാക്കിയാണ് അവാർഡ് പ്രഖ്യാപിച്ചത്. ആതുര സേവന പ്രവർത്തനങ്ങൾ, കുമരകം കമ്യൂണിറ്റി ഹെൽത്ത് സെന്‍ററിൽ രോഗികൾക്കും കൂട്ടിരിപ്പുകാർക്കും ഭക്ഷണവിതരണം, നിരാലംബർക്ക് ധനസഹായവും മരുന്നുവിതരണവും, സാമൂഹ്യ വനവത്കരണ പരിപാടികൾ തുടങ്ങി ഒട്ടനവധി ശ്രദ്ധേയ പ്രവർത്തനങ്ങളാണ് കഴിഞ്ഞ വർഷങ്ങളിൽ ഇവർ നടത്തിവന്നിരുന്നത്. അടുത്തമാസം പകുതിയോടെ തിരുവനന്തപുരത്ത് നടക്കുന്ന ചടങ്ങിൽ വിദ്യാഭ്യാസ മന്ത്രി സ്കൂളിന് അവാർഡ് നൽകും.

ചേര്‍ത്തലയിൽ സ്ത്രീകളുടെ തിരോധാനം; സെബാസ്റ്റ്യനെതിരേ കൂടുതല്‍ തെളിവുകള്‍

കോട്ടയം: ചേര്‍ത്തല കടക്കരപ്പള്ളി സ്വദേശിനി ബിന്ദു പത്മനാഭന്‍, ചേര്‍ത്തല നഗരസഭ ഏഴാം വാര്‍ഡ് നെടുമ്പ്രക്കാട് വെളിയില്‍ ഐഷ എന്നിവരുടെ തിരോധാനത്തില്‍ ക്രൈം ബ്രാഞ്ചിന് നിര്‍ണായകമായ സൂചനകള്‍. ഇരുവരെയും ചേര്‍ത്തല പള്ളിപ്പുറം സ്വദേശി ചെങ്ങുംതറ സെബാസ്റ്റ്യനും കൂട്ടാളികളും ചേര്‍ന്ന് അരുംകൊല ചെയ്തുവെന്നതിന് സാഹചര്യ തെളിവുകള്‍ ലഭിച്ച സാഹചര്യത്തില്‍ സെബാസ്റ്റ്യനെ ആലപ്പുഴ ക്രൈംബ്രാഞ്ച് കസ്റ്റഡിയില്‍ വാങ്ങും. അതിരമ്പുഴ സ്വദേശി ജെയ്‌നമ്മയെ കൊലപ്പെടുത്തി ആഭരണങ്ങള്‍ കവര്‍ന്ന കേസില്‍ സെബാസ്റ്റ്യന്‍ റിമാന്‍ഡിലാണ്. ഈ കേസില്‍ രണ്ടു തവണ ജുഡീഷല്‍ കസ്റ്റഡിയില്‍ ചോദ്യം ചെയ്തിട്ടും പ്രതി മൗനം പാലിക്കുകയാണ്. ബിന്ദുവിനെ സെബാസ്റ്റ്യനും ഫ്രാങ്ക്‌ളിൻ, പൊന്നപ്പന്‍, മനോജ് എന്നീ കൂട്ടാളികള്‍ ചേര്‍ന്ന് സെബാസ്റ്റ്യന്‍റെ വീട്ടില്‍വച്ചു വകവരുത്തിയെന്നാണ് സൂചന. ഫ്രാങ്ക്‌ളിനെ ഉടന്‍ കസ്റ്റഡിയിലെടുക്കും. ഐഷയെ ക്വട്ടേഷന്‍ സംഘത്തെ ഉപയോഗിച്ചു കൊലപ്പെടുത്തിയെന്നും സെബാസ്റ്റ്യന്‍ നേരിട്ട് ഇതില്‍ പങ്കുചേര്‍ന്നില്ലെന്നുമാണ് സൂചന. സെബാസ്റ്റ്യന്‍ പലപ്പോഴായി ഉപയോഗിച്ചിരുന്ന മൂന്നു മൊബൈൽ ഫോണുകളുടെ കോള്‍ ഡേറ്റ പരിശോധിച്ചുള്ള അന്വേഷണത്തിലാണു കൂട്ടാളികളെക്കുറിച്ച് വിവരം ലഭിച്ചത്. ബിന്ദു പത്മനാഭനെ സെബാസ്റ്റ്യനും വസ്തു ഇടനിലക്കാരനായ സുഹൃത്ത് ഫ്രാങ്ക്‌ളിനും ചേര്‍ന്ന് പള്ളിപ്പുറത്തെ വീട്ടില്‍ ശുചിമുറിയില്‍വച്ചു കൊലപ്പെടുത്തിയതായി പ്രദേശവാസിയായ ശശികല നടത്തിയ വെളിപ്പെടുത്തലുകളുടെ അടിസ്ഥാനത്തിലാണ് നിലവില്‍ അന്വേഷണം. സെബാസ്റ്റ്യന്‍റെ സുഹൃത്ത് അയല്‍വാസിയായ റോസമ്മയ്ക്ക് ഇക്കാര്യങ്ങൾ വ്യക്തമായി അറിയാമെന്ന് പോലീസ് കരുതുന്നു. പലതവണ ചോദ്യം ചെയ്തപ്പോഴും ഇവര്‍ പരസ്പരവിരുദ്ധമായ മറുപടിയാണ് നല്‍കുന്നത്. പള്ളിപ്പുറത്തെ വീട്ടുവളപ്പില്‍നിന്നു കണ്ടെടുത്ത അസ്ഥിയുടെ ഡിഎന്‍എ ഫലം അടുത്തദിവസം പുറത്തുവരുമ്പോള്‍ കൊല്ലപ്പെട്ടത് ആരെന്ന് വ്യക്തമാകും. സെബാസ്റ്റ്യന്‍റെ വീട്ടില്‍നിന്ന് കണ്ടെടുത്ത രക്തസാമ്പിളുകള്‍ അതിരമ്പുഴ സ്വദേശി ജെയ്‌നമ്മയുടേതാണെന്ന് ഫോറന്‍സിക് പരിശോധനയില്‍ വ്യക്തമായിട്ടുണ്ട്. ഇതുകൂടാതെ സിന്ധുവിന്‍റെ തിരോധാനത്തിലും സെബാസ്റ്റ്യനു പങ്കുള്ളതായാണ് സംശയിക്കുന്നത്. ചേര്‍ത്തല നഗരസഭ ഏഴാം വാര്‍ഡ് നെടുമ്പ്രക്കാട് വെളിയില്‍ ഐഷയെ അഞ്ച് വര്‍ഷങ്ങള്‍ക്ക് മുന്‍പാണ് കാണാതായത്. സെബാസ്റ്റ്യനുമായി സാമ്പത്തിക ഇടപാട് ഇവര്‍ക്കും ഉണ്ടായിരുന്നു. മനോജിന്‍റെ മരണത്തിലും ദുരൂഹത കോട്ടയം: ബിന്ദു പത്മനാഭന്‍റെ തിരോധാനവുമായി ബന്ധപ്പെട്ടു ചോദ്യം ചെയ്യാനായി പോലീസ് വിളിപ്പിച്ച വേളയിലാണ് സെബാസ്റ്റ്യന്‍റെ വിശ്വസ്തനും ഇടപാടുകളില്‍ സഹായിയുമായ ഓട്ടോറിക്ഷാ ഡ്രൈവര്‍ പള്ളിപ്പുറം തൈക്കൂട്ടത്തില്‍ എസ്. മനോജിനെ (46) 2018 ജൂണ്‍ 28ന് തൂങ്ങിമരിച്ച നിലയില്‍ കണ്ടെത്തിയത്. ബിന്ദുവിന്‍റെ കൊലപാതകം സംബന്ധിച്ച് സെബാസ്റ്റ്യനും താനുള്‍പ്പെടെ കൂട്ടാളികള്‍ക്കുമുള്ള പങ്ക് പറയേണ്ടിവരുമെന്ന ഭീതിയില്‍ ജീവനൊടുക്കിയതായാണ് നാട്ടില്‍ പറയുന്നത്. എന്നാല്‍ മനോജ് സംഭവങ്ങള്‍ പോലീസിനോടു പറയുമോ എന്ന സംശയത്തില്‍ സെബാസ്റ്റ്യന്‍ കൊലപ്പെടുത്തിയെന്നാണ് നിലവിലെ സംശയം. സെബാസ്റ്റ്യനും ബിന്ദുവും പതിവായി യാത്ര ചെയ്തിരുന്നതു മനോജിന്‍റെ ഓട്ടോയിലായിരുന്നു. ബിന്ദു തിരോധാനക്കേസില്‍ മനോജിനെ മുന്‍പും ചോദ്യം ചെയ്തിരുന്നു. എന്നാല്‍ മനോജ് ബിഗ് ഷോപ്പറില്‍ നിറയെ നോട്ടുകളുമായി പോകുന്നതു കണ്ടതായുള്ള വിവരത്തിന്‍റെ അടിസ്ഥാനത്തില്‍ വീണ്ടും ചോദ്യം ചെയ്യാന്‍ പോലീസ് വിളിപ്പിച്ചു. ഇയാളെ ചോദ്യം ചെയ്താല്‍ അക്കാലത്ത് ഒളിവിലായിരുന്ന സെബാസ്റ്റ്യനെ കണ്ടെത്തുന്നതിനൊപ്പം കൂടുതല്‍ വിവരങ്ങളും ലഭിക്കുമെന്നു പോലീസ് പ്രതീക്ഷിച്ചിരുന്നു. ബിഗ് ഷോപ്പറില്‍ കൊണ്ടുപോയത് അമ്മാവനു ലോട്ടറി അടിച്ച പണമാണെന്നാണു സുഹൃത്തുക്കളോട് ഇയാൾ പറഞ്ഞത്. സെബാസ്റ്റ്യന്‍റെ നാട്ടിലെ വിളിപ്പേരാണ് അമ്മാവന്‍. വിവരം ലഭിച്ച പോലീസ് ചോദ്യം ചെയ്യാന്‍ വിളിപ്പിച്ച ദിവസം രാവിലെ വീട്ടില്‍ മനോജ് തൂങ്ങിമരിക്കുകയായിരുന്നു.

റെയില്‍വേ സ്റ്റേഷനിലെ പഴയ നടപ്പാലം പൊളിച്ചുനീക്കാൻ തുടങ്ങി

കോട്ടയം: റെയില്‍വേ സ്റ്റേഷനിലെ പഴയ നടപ്പാലം പൊളിച്ചുനീക്കല്‍ ആരംഭിച്ചു. രണ്ട്, മൂന്ന് നമ്പര്‍ പ്ലാറ്റ്‌ഫോമുകളിലേക്ക് ഈ പാലം വഴിയാണു യാത്രക്കാര്‍ പോയിരുന്നത്. പാലത്തിനടിയിലായി പ്രവര്‍ത്തിച്ചിരുന്ന ഇലക്ട്രിക്കല്‍ സ്റ്റാഫ് ഓഫീസ് മറ്റൊരിടത്തേക്ക് മാറ്റാനും തീരുമാനമുണ്ട്. കഴിഞ്ഞ ദിവസമാരംഭിച്ച പൊളിച്ചുനീക്കല്‍ പ്രവര്‍ത്തനങ്ങള്‍ പുരോഗമിക്കുകയാണ്. ബ്രേക്കര്‍ ഉപയോഗിച്ച് കോണ്‍ക്രീറ്റ് മുറിച്ചുമാറ്റിയാണ് പ്രവര്‍ത്തനം. ഈ പാലത്തിനു പകരം പുതിയത് പണിയാനാണ് തീരുമാനം. പൊളിച്ചുമാറ്റാനുള്ള പ്രാഥമിക നടപടികള്‍ 31ന് അവസാനിക്കും. നടപ്പാലത്തിന് വീതി നന്നേ കുറവാണ്. കാലപ്പഴക്കമുള്ളതിനാല്‍ സഞ്ചാരം പ്രായോഗികമല്ല. അപകടസാധ്യതകൂടി കണക്കിലെടുത്താണ് പാലം പൊളിച്ചു നീക്കുന്നത്. പാലം പൊളിച്ചുമാറ്റല്‍ നടക്കുന്നതിനാല്‍ ട്രെയിന്‍ സര്‍വീസുകള്‍ക്കും നിയന്ത്രണമേര്‍പ്പെടുത്തിയിട്ടുണ്ട്. ഇതിന്‍റെ ഭാഗമായി മംഗളൂരു ജംഗ്ഷന്‍ - തിരുവനന്തപുരം നോര്‍ത്ത് സ്‌പെഷല്‍ ട്രെയിന്‍ 30 മിനിറ്റ് വൈകി ഓടുമെന്നും പുലര്‍ച്ചെ 5.15ന് കോട്ടയത്തുനിന്ന് യാത്ര ആരംഭിക്കുന്ന കോട്ടയം- നിലമ്പൂര്‍ എക്സ്പ്രസ് 17, 19, 23, 29 തീയതികളില്‍ ഏറ്റുമാനൂരില്‍ നിന്നു പുലര്‍ച്ചെ 5.27നാകും യാത്ര ആരംഭിക്കുക.

നിസാർ ഓർമയായി; "അപ്പുവിന്‍റെ ദുഃഖ'ത്തിലൂടെ സംവിധാന രംഗത്തേക്ക്

ബെന്നി ചിറയില്‍ ചങ്ങനാശേരി: അപ്പുവിന്‍റെ ദുഃഖമെന്ന ലഘുചിത്രത്തിലൂടെയായിരുന്നു നിസാര്‍ അബ്ദുല്‍ഖാദര്‍ ചലച്ചിത്ര സംവിധാന രംഗത്തേക്ക് 1984-ൽ കാല്‍വയ്പു നടത്തിയത്. വിദ്യാഭ്യാസ വിഷയങ്ങളായിരുന്നു പ്രമേയം. തുടര്‍ന്ന് 1985 കാലഘട്ടത്തില്‍ നിസാര്‍ എഴുതി സംവിധാനം ചെയ്ത പെരുവഴിയമ്പലം എന്ന നാടകം ഏറെ ശ്രദ്ധനേടിയതായി ഈ നാടകത്തില്‍ തൃക്കോവിലപ്പന്‍റെ വേഷമണിഞ്ഞ ചലച്ചിത്രതാരം ചീരഞ്ചിറ സ്വദേശി ഷാജി സുരേഷ് കണ്ണമ്പള്ളി ദീപികയോടു പറഞ്ഞു. 1994ലാണ് സുദിനം എന്ന ചിത്രം സംവിധാനം ചെയ്തത്. 21 ദിനങ്ങള്‍കൊണ്ടാണ് സുദിനം എന്ന ചലച്ചിത്രം പുറത്തിറക്കിയത്. തുടര്‍ന്ന് പ്രശസ്തമായ ഇരുപത്തഞ്ചിലേറ ചിത്രങ്ങളാണ് നിസാര്‍ സംവിധാനം ചെയ്തത്. പലതും ഹിറ്റായി. ത്രീ മെന്‍ ആര്‍മി, അച്ഛന്‍ രാജാവ് അപ്പന്‍ ജേതാവ്, ഓട്ടോ ബ്രദേഴ്‌സ്, അപരന്‍മാര്‍ നഗരത്തില്‍, ജനനായകന്‍ തുടങ്ങിയ ചിത്രങ്ങള്‍ തിയറ്ററുകളില്‍ കൈയടി നേടിയവയില്‍പ്പെടുന്നു. 2021ല്‍ കളേഴ്‌സ് എന്ന തമിഴ് ചിത്രവും 2023ല്‍ ടൂമെന്‍ ആര്‍മി എന്ന ചിത്രവും അദ്ദേഹം സംവിധാനം ചെയ്തു. സര്‍വകലാശാല കലോത്സവങ്ങള്‍ക്കായി വിവിധ കോളജുകള്‍ക്കായി നിസാര്‍ നിരവധി നാടകങ്ങളും സംവിധാനം ചെയ്തിട്ടുണ്ട്. ചങ്ങനാശേരി വലിയകുളം പാത്തിക്കല്‍മുക്കിലുള്ള മകള്‍ സൗമ്യയുടെ ഐഷ മന്‍സിലില്‍ പൊതുദര്‍ശനത്തിനു വച്ചിരിക്കുന്ന മൃതദേഹത്തില്‍ ചലച്ചിത്ര, രാഷ്ട്രീയ, സാംസ്‌കാരിക രംഗങ്ങളിലെ നിരവധി പ്രമുഖര്‍ ആദരവ് അര്‍പ്പിച്ചു.

കോഴഞ്ചേരിയിൽ അച്ചായന്‍സ് ഗോള്‍ഡ് ഷോറൂം തുടങ്ങി

കോഴഞ്ചേരി: അച്ചായന്‍സ് ഗോള്‍ഡ് 28-ാമത് ഷോറൂം കോഴഞ്ചേരി വണ്‍വേ റോഡില്‍ ജനഡിസ് ആര്‍ക്കേഡില്‍ പ്രവര്‍ത്തനമാരംഭിച്ചു. ചലച്ചിത്രതാരം ഭാവനയും അച്ചായന്‍സ് ഗോള്‍ഡ് എംഡി ടോണി വര്‍ക്കിച്ചനും ചേര്‍ന്ന് ഉദ്ഘാടനം നിര്‍വഹിച്ചു. അച്ചായന്‍സ് ഗോള്‍ഡ് ജനറല്‍ മാനേജര്‍ ഷിനില്‍ കുര്യന്‍, പഞ്ചായത്ത് പ്രസിഡന്‍റ് സാലിം ഫിലിപ്പ് എന്നിവര്‍ പ്രസംഗിച്ചു.

കേര പദ്ധതി നടപ്പാക്കൽ റബർ കർഷക താത്പര്യങ്ങൾക്ക് വിരുദ്ധമെന്ന് ആക്ഷേപം

കോട്ടയം: കേരള കാലാവസ്ഥ അതിജീവന കാര്‍ഷിക മൂല്യവര്‍ധക വിപണന ശൃംഖല നവീകരണ പദ്ധതി (കേര ) പ്രകാരം റബറിന്‍റെ ആവര്‍ത്തന കൃഷിക്ക് അപേക്ഷിക്കുന്ന കര്‍ഷകര്‍ക്ക് (₹ 75,000) റബര്‍ ബോര്‍ഡില്‍നിന്ന് ലഭ്യമാകുന്ന സബ്സിഡി (₹40,000) നിഷേധിക്കുന്ന കേരള സര്‍ക്കാരിന്‍റെ നയം തിരുത്തണമെന്ന് റബര്‍ ഉത്പാദക സംഘങ്ങളുടെ ദേശീയ കൂട്ടായ്മ ജനറല്‍ സെക്രട്ടറി ബാബു ജോസഫ് സംസ്ഥാന സര്‍ക്കാരിനോട് ആവശ്യപ്പെട്ടു. കേര പദ്ധതി അപേക്ഷകർക്ക് റബർബോർഡിന്‍റെ സഹായത്തിന് അപേക്ഷിക്കാൻ കഴിയില്ല. കേരളത്തിൽ മാത്രമുള്ള കേര പദ്ധതിയില്‍ കർഷകർ ചേരുന്നതിലൂടെ ഇവിടെ റബര്‍ ബോര്‍ഡ് സബ്സിഡിക്ക് അപേക്ഷകരില്ലാതാകുകയും റബര്‍ ബോര്‍ഡ് സേവനങ്ങള്‍ കുറയുകയും ചെയ്യും. റബര്‍ ബോര്‍ഡ് ഫീല്‍ഡ് ഓഫീസര്‍മാര്‍ക്ക് പകരം താത്കാലിക നിയമനം ലഭിച്ച കേര ഫീല്‍ഡ് ഓഫീസർമാരാണ് ഈ സ്‌കീം നടപ്പാക്കുന്നത്. ഇവരുടെ പ്രവര്‍ത്തനത്തില്‍ റബര്‍ ബോര്‍ഡ് ഉദ്യോഗസ്ഥര്‍ക്ക് നിയന്ത്രണമില്ല. പക്ഷേ, കേരയിലെ താത്കാലിക ജീവനക്കാര്‍ തയാറാക്കുന്ന റിപ്പോര്‍ട്ട് റബര്‍ ബോര്‍ഡ് സാക്ഷ്യപ്പെടുത്തണം. ഫലത്തിൽ, കേര റബര്‍ ബോര്‍ഡിന്‍റെ സമാന്തര സംവിധാനമാകും. കേവലം അഞ്ച് വര്‍ഷത്തേക്കുള്ള ഈ പദ്ധതി റബര്‍ ബോര്‍ഡിന്‍റെ പ്രവര്‍ത്തങ്ങളുടെ താളം തെറ്റിക്കും. വടക്കുകിഴക്കന്‍ സംസ്ഥാനങ്ങളില്‍ ഇതേപോലെ റബര്‍ വികസന പദ്ധതികളുണ്ട്. അവിടെ 1.5 ലക്ഷം രൂപ വരെ സഹായമുണ്ട്. എന്നാല്‍, പണം റബര്‍ ബോര്‍ഡ് വഴിയാണ് വിതരണം ചെയ്യുന്നത്. കേര പദ്ധതിയില്‍ കേരള സര്‍ക്കാര്‍ നല്‍കാന്‍ ഉദ്ദേശിക്കുന്ന അധിക തുക ( ₹35,000) റബര്‍ ബോര്‍ഡ് വഴി വിതരണം ചെയ്താല്‍ കേരള സര്‍ക്കാരിന്‍റെ ദുര്‍വ്യയങ്ങള്‍ ഇല്ലാതാകുന്നതിനും റബര്‍ ബോര്‍ഡ് പ്രവര്‍ത്തനം ശക്തിപ്പെടുന്നതിനും ഇടയാക്കും. കേന്ദ്ര സര്‍ക്കാര്‍ ഇപ്പോള്‍ത്തന്നെ റബര്‍ ബോര്‍ഡിന്‍റെ കേരളത്തിലെ പ്രവര്‍ത്തനങ്ങള്‍ കുറച്ചുവരികയാണ്. കേരളത്തില്‍ സബ്സിഡി അപേക്ഷകള്‍ കുറഞ്ഞാല്‍ പലരും ഭീതിപ്പെട്ടിരുന്ന റബര്‍ ബോർഡിന്‍റെ കേരളത്തിലെ ജീവനക്കാരുടെ സ്ഥലംമാറ്റം അടക്കം വേഗത്തിലാകുമെന്നും റബർ ബോർഡ് പ്രവർത്തനങ്ങൾ ഇല്ലാതാകുമെന്നും ബാബു ജോസഫ് പറഞ്ഞു.

ആശമാരുടെ പ്രതിഷേധ സംഗമം; പന്തല്‍ പൊളിക്കാനുളള നീക്കം തിരുവഞ്ചൂര്‍ ഇടപെട്ട് തടഞ്ഞു

കോട്ടയം: ആശമാരുടെ പ്രതിഷേധ സംഗമത്തിന്‍റെ പന്തല്‍ പൊളിക്കാനുള്ള നീക്കം തിരുവഞ്ചൂര്‍ രാധാകൃഷ്ണന്‍ എംഎല്‍എ ഇടപെട്ട് തടഞ്ഞു. ആശാ സമരത്തിന്‍റെ അഞ്ചാംഘട്ടമായ പഞ്ചായത്തുകള്‍ കേന്ദ്രീകരിച്ചുള്ള സമരപരിപാടികളുടെ ഭാഗമായി കേരള ആശ ഹെല്‍ത്ത് വര്‍ക്ക് അസോസിയേഷനും ആശാ സമര സഹായ സമിതിയും ഇന്നലെ രാവിലെ കളക്ടറേറ്റിനുമുമ്പില്‍ നടത്തിയ പ്രതിഷേധ സംഗമത്തിനിടയിലാണു പന്തല്‍ പൊളിക്കാന്‍ പോലീസ് ശ്രമിച്ചത്. കളക്ടറേറ്റിനു മുമ്പില്‍ ഇന്നലെ രാവിലെ സമരത്തിനായി പന്തല്‍ കെട്ടിയപ്പോള്‍ത്തന്നെ ഒരു പോലീസുകാരനെത്തി സമരക്കാരോട് പന്തല്‍ കെട്ടുന്നതു നിയമവിരുദ്ധമാണെന്ന് പറഞ്ഞു. എന്നാല്‍ ഇവിടെ സ്ഥിരമായി പന്തല്‍ കെട്ടുന്നതാണെന്നു പറഞ്ഞ് സമരക്കാര്‍ പന്തല്‍കെട്ടി സമരം ആരംഭിച്ചു. തുടര്‍ന്ന് പന്തല്‍ പൊളിക്കുന്നതിനായി ആളുകള്‍ എത്തി. പ്രതിഷേധക്കാര്‍ എതിര്‍ത്തെങ്കിലും പന്തലിന്‍റെ ഷീറ്റുകളും വിരിച്ച തുണികളും മറ്റും അഴിക്കാന്‍ തുടങ്ങി. ഏഴോളം ഷീറ്റുകള്‍ പൊളിക്കാനെത്തിയവര്‍ മാറ്റി. ഈ സമയത്താണ് സമരം ഉദ്ഘാടനം ചെയ്യുന്നതിനായി തിരുവഞ്ചൂര്‍ രാധാകൃഷ്ണന്‍ എംഎല്‍എ എത്തിയത്. എംഎല്‍എ പ്രസംഗിക്കുന്നതിനു മുമ്പില്‍ ഗോവണി വച്ച് ഷീറ്റ് പൊളിക്കാന്‍ ആരംഭിച്ചപ്പോള്‍ ആരാണ് പന്തല്‍ പൊളിക്കുന്നതെന്നും ആരുടെ ഉത്തരവാണെന്നും എംഎല്‍എ ചോദിച്ചു. പോലീസ് നിര്‍ദേശ പ്രകാരമാണെന്നു പൊളിക്കാനെത്തിയവര്‍ പറഞ്ഞപ്പോള്‍ പന്തലിനു സമീപമുള്ള സീനിയര്‍ പോലീസ് ഉദ്യോഗസ്ഥരോട് എത്താന്‍ എംഎല്‍എ ആവശ്യപ്പെട്ടു. പന്തല്‍ പൊളിക്കാനുള്ള ഉത്തരവ് കാണിക്കാന്‍ എംഎല്‍എ ആവശ്യപ്പെട്ടെങ്കിലും ഉത്തരവില്ലെന്നും ജില്ലാ പോലീസ് ചീഫിന്‍റെ നിര്‍ദേശമുണ്ടെന്നുമാണു പോലീസ് ഉദ്യോഗസ്ഥ പറഞ്ഞത്. പൊളിക്കാന്‍ പറ്റില്ലെന്നും പൊളിച്ചാല്‍ കളക്ടറേറ്റിനകത്തു കയറി സമരം നടത്തുമെന്നും താന്‍ സമരക്കാരോടൊപ്പം പന്തലില്‍ ഇരിക്കുകയാണെന്നും എംഎല്‍എ കര്‍ക്കശമായി പോലീസ് ഉദ്യോഗസ്ഥരോടു പറഞ്ഞു. ഇതോടെ സമരക്കാര്‍ പോലീസിനെതിരേ മുദ്രവാക്യം വിളിച്ചു. ഏറെനേരം പോലീസുമായി സമരക്കാര്‍ വാക്കുതര്‍ക്കം നടത്തിയതിനൊടുവില്‍ പൊളിക്കല്‍ ഉപേക്ഷിച്ച് പോലീസ് പിന്‍വാങ്ങി. തുടര്‍ന്ന് ഉച്ചകഴിഞ്ഞ് ഒന്നുവരെ സമരം തുടര്‍ന്നു. യുഡിഎഫ് ജില്ലാ കണ്‍വീനര്‍ ഫില്‍സണ്‍ മാത്യൂസ്, കേരള കോണ്‍ഗ്രസ് നേതാവ് വി.ജെ. ലാലി, ആശാ സമര സഹായ സമിതി സെക്രട്ടറി എം.കെ. ബിജു, കേരള ആശാ ഹെല്‍ത്ത് വര്‍ക്ക് അസോസിയേഷന്‍ സെക്രട്ടറി ആശാ രാജ് എന്നിവര്‍ പ്രസംഗിച്ചു. ആശാ വര്‍ക്കര്‍മാരുടെ സമരം അടിച്ചമര്‍ത്തുന്നതിന്‍റെ ഭാഗമായിട്ടാണ് സമരപ്പന്തല്‍ പൊളിക്കാന്‍ സര്‍ക്കാര്‍ നീക്കം നടത്തിയതെന്ന് സമരസഹായ സമിതി ആരോപിച്ചു.

സമന്വയ മൾട്ടി സെൻസറി പാർക്കിൽ 21 ലക്ഷത്തിന്‍റെ വികസനം

കുറവിലങ്ങാട്: ഉഴവൂർ ബ്ലോക്ക് പഞ്ചായത്തിന്‍റെ നേതൃത്വത്തിൽ പട്ടിത്താനത്ത് പ്രവർത്തിക്കുന്ന മൾട്ടി സെൻസറി പാർക്കിൽ 21 ലക്ഷം രൂപയുടെ വികസന പദ്ധതികൾ നടപ്പിലാക്കും. ജില്ലാ, ബ്ലോക്ക് പഞ്ചായത്തുകളുടെ നേതൃത്വത്തിലാണ് പുതിയ പദ്ധതികൾ നടപ്പിലാക്കുന്നത്. മൾട്ടി സെൻസറി റൂം, പാർക്ക് എന്നിവയ്ക്കായി ബ്ലോക്ക് പഞ്ചായത്ത് 6.6 ലക്ഷം രൂപ വകയിരുത്തിയിട്ടുള്ളതായി ബ്ലോക്ക് പഞ്ചായത്ത് പ്രസിഡന്‍റ് രാജു ജോൺ, വൈസ് പ്രസിഡന്‍റ് ഡോ. സിന്ധുമോൾ ജേക്കബ്, സ്റ്റാൻഡിംഗ് കമ്മിറ്റി അധ്യക്ഷ കൊച്ചുറാണി സെബാസ്റ്റ്യൻ എന്നിവർ അറിയിച്ചു. വിവിധ ഉപകരണങ്ങൾ വാങ്ങാൻ ജില്ലാ പഞ്ചായത്ത് 14.87 ലക്ഷം രൂപ അനുവദിച്ചിട്ടുണ്ട്. സംസാരവൈകല്യമുള്ള കുട്ടികൾക്ക് വിവിധ തെറാപ്പികൾ മൾട്ടി സെൻസറി പാർക്കിൽ ലഭ്യമാക്കിയിട്ടുണ്ട്. ആറ് വയസിനു താഴെയുള്ള കുട്ടികൾക്ക് നിഷ് മുഖേനയും 18 വയസിന് താഴെയുള്ളവർക്ക് എസ്എസ്കെയുടെയും നേതൃത്വത്തിലാണ് പരിചരണം നൽകുന്നത്. സ്പീച്ച് തെറാപ്പി, ഫിസിയോതെറാപ്പി, സ്‌പെഷൽ എഡ്യൂക്കേഷൻ തുടങ്ങിയവ ലഭ്യമാണ്. ഗ്രൂപ്പ് തെറാപ്പി, വ്യക്തിഗത സെഷൻസ്, ഡീറ്റെയിൽഡ് സ്പീച്ച് ആൻഡ് ലാംഗ്വേജ് അസസ്‌മെന്‍റ്, റീഇവാലുവേഷൻ ഓഫ് സ്പീച്ച് ആൻഡ് ലാംഗ്വേജ് സ്‌കിൽസ്, ഡെമോൺസ്‌ട്രേഷൻ തെറാപ്പി, പേരന്‍റൽ കൗൺസലിംഗ് എന്നിവയും ലഭ്യമാക്കിയിട്ടുണ്ട്.

പാലാ - തൊടുപുഴ റോഡ്: ഏഴു വർഷം, 300 അപകടം, 50 മരണം

പാലാ: പാലാ-തൊടുപുഴ റോഡില്‍ ഏഴു വര്‍ഷത്തിനിടെ 300 അപകടങ്ങളും 50ലധികം മരണങ്ങളും ഉണ്ടായിട്ടും പിഡബ്ല്യുഡിക്ക് അനക്കമില്ല. ഇത്രയും അപകടങ്ങൾ ഉണ്ടായിട്ടും ആവശ്യത്തിനു സ്പീഡ് ബ്രേക്കര്‍ സ്ഥാപിക്കാൻപോലും അധികൃതർക്കു കഴിഞ്ഞിട്ടില്ല. റോഡില്‍ രണ്ടിടത്ത് കാമറ സ്ഥാപിച്ചെങ്കിലും പ്രവര്‍ത്തിക്കുന്നില്ല. പ്രവിത്താനം ഭാഗത്തും കരിങ്കുന്നം ഭാഗത്തുമാണ് കാമറകള്‍ ചത്തിരിക്കുന്നത്. അപകടങ്ങള്‍ കൂടുതല്‍ സംഭവിക്കുന്ന സ്ഥലങ്ങളില്‍ വേഗനിയന്ത്രണ സംവിധാനങ്ങള്‍ സ്ഥാപിക്കാൻ പോലീസും മോട്ടോര്‍വാഹന വകുപ്പും തയാറായിട്ടില്ല. പലതവണ ഇതു സംബന്ധിച്ച പരാതികള്‍ നല്‍കിയെങ്കിലും പൊതുമരാമത്ത് വകുപ്പും അനങ്ങുന്നില്ല. ഓവര്‍ ടേക്കിംഗ് അസാധ്യം 25.4 കിലോമീറ്റര്‍ ദൂരമുള്ള കോലാനി-പാലാ റോഡില്‍ 13.1 കിലോമീറ്റര്‍ ദൂരം ഓവര്‍ടേക്ക് ചെയ്യാനാവാത്ത റോഡാണ്. 12.3 കിലോമീറ്റര്‍ മാത്രമാണ് സുരക്ഷിതമായി മറികടക്കാവുന്ന ഭാഗം. സ്‌കൂള്‍ സോണുകള്‍ തുടങ്ങുന്നിടത്തും അവസാനിക്കുന്നിടത്തും മഞ്ഞ റംബിള്‍ സ്ട്രിപ്പുകള്‍, പെഡസ്ട്രിയന്‍ ക്രോസിംഗില്‍ നിര്‍ബന്ധിത വേഗനിയന്ത്രണം എന്നിവ റോഡിൽ ഇല്ല. വാഹനങ്ങൾ പെരുകിയത് അനുസരിച്ചുള്ള സംവിധാനങ്ങളും ഏർപ്പെടുത്തിയിട്ടില്ല. ഇരുട്ടിലായ റോഡ് റോഡില്‍ സ്ഥാപിച്ചിരിക്കുന്ന സോളാര്‍ ലൈറ്റുകള്‍ നശിച്ചിട്ട് നാളുകളായി. ഓരോ 40 മീറ്ററിനും ഒരു സോളാര്‍ ലൈറ്റ് എന്ന രീതിയില്‍ പൊന്‍കുന്നം മുതല്‍ തൊടുപുഴ വരെ 50 കിലോമീറ്ററോളം ദൂരത്തില്‍ നൂറുകണക്കിനു ലൈറ്റുകളാണ് സ്ഥാപിച്ചത്. ഇതില്‍ ഭൂരിഭാഗവും തെളിയുന്നില്ല. അപകടത്തില്‍ വാഹനം ഇടിച്ചു തകരുന്ന സോളാർ‍ ലൈറ്റിന് ഒരു ലക്ഷത്തില്‍പരം രൂപയാണ് കെഎസ്ടിപി നഷ്ടപരിഹാരം ഈടാക്കുന്നത്. നഷ്ടപരിഹാരം കിട്ടിയിട്ടും ലൈറ്റുകള്‍ പുനഃസ്ഥാപിക്കാന്‍ അധികാരികള്‍ തയാറാകുന്നില്ലെന്നു നാട്ടുകാര്‍ പറയുന്നു. ഈ റോഡിലെ സോളാര്‍ ലൈറ്റിലെ ബാറ്ററിയും മറ്റു ഭാഗങ്ങളും മോഷണം പോകുന്നതും പതിവാണ്. നിയമനടപടി സ്വീകരിക്കും പാലാ: റോഡപകടങ്ങള്‍ കുറയ്ക്കാന്‍ സെന്‍റര്‍ ഫോര്‍ കണ്‍സ്യൂമര്‍ എഡ്യൂക്കേഷന്‍ നിയമ നടപടികളിലേക്ക്. പാലാ-തൊടുപുഴ സംസ്ഥാന പാതയില്‍ കഴിഞ്ഞ ദിവസം മുണ്ടാങ്കലിലുണ്ടായ ദാരുണമായ റോഡപകടത്തിന്‍റെ പശ്ചാത്തലത്തിലാണ് നിയമപോരാട്ടം. വിശദമായ പരാതി ചീഫ് സെക്രട്ടറി, പോലീസ് മേധാവി, ഗതാഗത, പൊതുമരാമത്ത്, ആരോഗ്യ സെക്രട്ടറിമാര്‍, ട്രാന്‍സ്പോര്‍ട്ട് കമ്മീഷണര്‍, ഇന്ത്യന്‍ റോഡ് കോണ്‍ഗ്രസ് ഡയറക്ടര്‍ എന്നിവര്‍ക്ക് സെന്‍ററിന്‍റെ മാനേജിംഗ് ട്രസ്റ്റി ജയിംസ് വടക്കന്‍ നല്‍കിക്കഴിഞ്ഞു. കഴിഞ്ഞ ഏഴു വര്‍ഷത്തിനുള്ളില്‍ 50ല്‍പരം മരണങ്ങളുണ്ടായ പാലാ-തൊടുപുഴ ഹൈവേയിലെ ഗതാഗതസുരക്ഷയെക്കുറിച്ച് അടിയന്തര വിദഗ്ധ പരിശോധന ഉണ്ടാവണമെന്നാണ് ആവശ്യം.

വെല്ലുവിളികളെ അവസരങ്ങളാക്കണം: ജ്യോതിസ് മോഹൻ

പാലാ: പഠനമികവിനും സമഗ്രവ്യക്തിത്വ വികാസത്തിനും അനുയോജ്യമായ അവസരങ്ങള്‍ ഉപയോഗപ്പെടുത്തിയും ഓരോ പരിമിതിയിലും ഒളിഞ്ഞിരിക്കുന്ന അവസരങ്ങള്‍ തിരിച്ചറിഞ്ഞും സ്‌കൂള്‍ വിദ്യാഭ്യാസകാലത്തുതന്നെ വിദ്യാര്‍ഥികള്‍ ഉന്നതമായ ലക്ഷ്യങ്ങള്‍ നേടുവാനായി അധ്വാനിച്ചു തുടങ്ങണമെന്ന് ഇന്‍കം ടാക്‌സ് കമ്മീഷണര്‍ ജ്യോതിസ് മോഹന്‍ പറഞ്ഞു. എല്‍എസ്എസ്, യുഎസ്എസ്, എന്‍എംഎംഎസ് വിജയികളായ വിദ്യാര്‍ഥികളെ അനുമോദിക്കാനായി പാലാ സിവില്‍ സര്‍വീസ് ഇന്‍സ്റ്റിറ്റ്യൂട്ടില്‍ നടന്ന സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മുടങ്ങാതെയുള്ള പത്രവായന സിവില്‍ സര്‍വീസ് ഉള്‍പ്പെടെയുളള മത്സരപ്പരീക്ഷകള്‍ വിജയിക്കുന്നതിന് അനിവാര്യമാണെന്ന് ഇക്കഴിഞ്ഞ സിവില്‍ സര്‍വീസ് പരീക്ഷയില്‍ 703-ാം റാങ്ക് നേടിയ നസ്‌റിന്‍ പി. ഫാസിം പറഞ്ഞു. യോഗത്തില്‍ ഇന്‍സ്റ്റിറ്റ്യൂട്ട് മാനേജര്‍ മോണ്‍. സെബാസ്റ്റ്യന്‍ വേത്താനത്ത് അധ്യക്ഷത വഹിച്ചു. പാലാ കോര്‍പറേറ്റ് എഡ്യൂക്കേഷണല്‍ ഏജൻസി സെക്രട്ടറി ഫാ. ജോര്‍ജ് പുല്ലുകാലായില്‍, പ്രിന്‍സിപ്പല്‍ ഡോ. വി.വി. ജോര്‍ജുകുട്ടി ഒട്ടലാങ്കല്‍, വൈസ് പ്രിന്‍സിപ്പല്‍ ഫാ. സെബാസ്റ്റ്യന്‍ ചാമക്കാലായില്‍, സിസ്റ്റര്‍ അമല ജോസ് എഫ്‌സിസി എന്നിവര്‍ പ്രസംഗിച്ചു.

ട്രിപ്പിൾ ഐടി ടു സയൻസ് സിറ്റി പദ്ധതി വരുന്നു

കുറവിലങ്ങാട്: ഉന്നത വിദ്യാഭ്യാസരംഗത്ത് ശ്രദ്ധേയ നേട്ടമായ വലവൂരിലുള്ള ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്നോളജിയുടെയും (ഐഐഐടി) കോഴായിലുള്ള കേരള സയൻസ് സിറ്റിയുടെയും സാധ്യതകൾ സംയുക്തമായി പ്രയോജനപ്പെടുത്താൻ പദ്ധതികൾ ആലോചനയിൽ സജീവമാകുന്നു. ട്രിപ്പിൾ ഐടിയും സയൻസ് സിറ്റിയും യാഥാർഥ്യമാക്കുന്നതിനു നേതൃത്വം നൽകിയ ജോസ് കെ. മാണി എംപിയുടെ പരിശ്രമത്തിലാണ് പുതിയ നീക്കവും സജീവമാകുന്നത്. ഇതുസംബന്ധിച്ച നിർദേശം അധികൃതർക്ക് സമർപ്പിച്ചിട്ടുള്ളതായി ജോസ് കെ. മാണി എംപി അറിയിച്ചു. വിജ്ഞാന സമ്പാദനത്തിനൊപ്പം പ്രായോഗിക പരിശീലനത്തിനും നിർവഹണത്തിനും വേദിയൊരുങ്ങുമെന്നതാണ് പുതിയ പദ്ധതിയുടെ നേട്ടം. ഒരു മാസത്തിനുള്ളിൽ ഗവേഷകരടക്കമുള്ള പതിനായിരത്തോളം പേർ സയൻസ് സിറ്റി സന്ദർശിച്ചുവെന്നത് അനന്തസാധ്യതകളാണ് വിളിച്ചോതുന്നത്. ആദ്യഘട്ടമായ സയൻസ് സെന്‍ററിന് പിന്നാലെ ആംഫി തിയേറ്റർ, ഒബ്സർവേറ്ററി, പ്ലാനറ്റോറിയം, മോഷൻ സിമുലേറ്റർ എന്നിങ്ങനെയുള്ള വികസനം കൂടി യാഥാർഥ്യമാകുമ്പോൾ സന്ദർശകരുടെ എണ്ണത്തിൽ വലിയ വർധനവുണ്ടാകും. രാജ്യത്ത് അഞ്ചിടങ്ങളിൽ മാത്രമുള്ള സൈബർ സെക്യൂരിറ്റി കമാൻഡോ പരിശീലനമടക്കമുള്ള പാഠ്യപദ്ധതിയുൾപ്പെട്ട കോഴ്സുകളാണ് ട്രിപ്പിൾ ഐടി സമ്മാനിക്കുന്നത്. കോട്ടയം ട്രിപ്പിൾ ഐടിയിൽ രണ്ടായിരത്തോളം വിദ്യാർഥികൾ പഠിക്കുന്നുണ്ട്. ട്രിപ്പിൾ ഐടിക്കു സമീപം ഇൻഫോ പാർക്ക് അനുവദിക്കുന്നതിനായി അഞ്ചു കോടി രൂപ സംസ്ഥാന ബജറ്റിൽ അനുവദിച്ചിട്ടുള്ളതും പ്രതീക്ഷയുടെ പുതുനാമ്പായി മാറിയിട്ടുണ്ട്. വലവൂർ ട്രിപ്പിൾ ഐടിയും കോഴായിലെ സയൻസ് സിറ്റിയുമായി 15 കിലോമീറ്ററിന്‍റെ ദൂരം മാത്രമാണുള്ളത്. ശാസ്ത്രവിദ്യാർഥികളുടെ സാന്നിധ്യം സയൻസ് സിറ്റിയിൽ സജീവമാകുന്നതോടെ ഇവിടത്തെ ആക്‌ടിവിറ്റി ഹബ്ബും ഇന്നവേഷൻ സെന്‍ററും പുതിയ ശാസ്ത്രനേട്ടങ്ങളുടെ പിറവിക്കു സാക്ഷ്യം വഹിക്കും.

അപകടക്കെണിയായി മുണ്ടക്കയം നഗരമധ്യത്തിലെ കുഴി

മുണ്ടക്കയം: മുണ്ടക്കയം ടൗണിൽ കൂട്ടിക്കൽ കവലയിൽ റോഡിന്‍റെ മധ്യത്തിൽ രൂപപ്പെട്ടിരിക്കുന്ന കുഴി അപകടങ്ങൾക്കിടയാക്കുന്നു. മുണ്ടക്കയം ടൗണിൽനിന്ന് കൂട്ടിക്കൽ ഭാഗത്തേക്ക് തിരിയുന്ന റോഡിൽ രൂപപ്പെട്ടിരിക്കുന്ന ഗർത്തമാണ് സ്ഥിരം അപകടങ്ങൾക്ക് വേദിയാകുന്നത്. ‌കൂട്ടിക്കൽ റോഡിൽനിന്ന് ഇറക്കമിറങ്ങിവരുന്ന വാഹനയാത്രക്കാരുടെ ശ്രദ്ധയിൽ കുഴി പെടാതെ പോകുകയും അപകടം സംഭവിക്കുകയുമാണ് ചെയ്യുന്നത്. കൂടുതലും ഇരുചക്ര വാഹനങ്ങളാണ് ഇവിടെ അപകടത്തിൽപ്പെടുന്നത്. ദേശീയപാതയിൽനിന്നു കൂട്ടിക്കൽ റോഡിലേക്ക് തിരിയുന്ന വാഹനങ്ങൾ കുഴിയിൽ വീഴാതെ വെട്ടിച്ച് മാറ്റുന്നതും അപകടങ്ങൾക്ക് ഇടയാക്കുന്നുണ്ട്. അപകടം ഇവിടെ പതിവായതോടെ ഓട്ടോറിക്ഷാ തൊഴിലാളികളുടെയും നാട്ടുകാരുടെയും നേതൃത്വത്തിൽ കുഴിയിൽ വാഴനട്ട് പ്രതിഷേധിച്ചിരുന്നു. വലിയ അപകടങ്ങൾക്ക് വഴിവയ്ക്കാതെ റോഡിലെ കുഴി മൂടാൻ അധികാരികൾ നടപടി സ്വീകരിക്കണമെന്ന ആവശ്യമാണ് ഉയരുന്നത്.

പൂഞ്ഞാർ മണ്ഡലത്തെ വന്യജീവി ആക്രമണ വിമുക്തമാക്കും: സെബാസ്റ്റ്യൻ കുളത്തുങ്കൽ എംഎൽഎ

എരുമേലി: പൂഞ്ഞാർ നിയോജകമണ്ഡലത്തെ വന്യജീവി ആക്രമണവിമുക്ത മേഖലയാക്കി മാറ്റുകയാണ് ലക്ഷ്യമെന്ന് സെബാസ്റ്റ്യൻ കുളത്തുങ്കൽ എംഎൽഎ. നിയോജകമണ്ഡലത്തിൽ എരുമേലി ഫോറസ്റ്റ് റേഞ്ചിന് കീഴിൽ നിർമാണം പൂർത്തീകരിച്ച സൗരോർജ തൂക്കുവേലികളുടെ ആദ്യഘട്ട ഉദ്ഘാടനം മൂക്കൻപെട്ടിയിൽ നിർവഹിക്കുകയായിരുന്നു എംഎൽഎ. മനുഷ്യ-വന്യജീവി സംഘർഷം ലഘൂകരിക്കുന്നതിനും മനുഷ്യജീവനും കാർഷിക വിളകളും സംരക്ഷിക്കുന്നതിനുമായി സംസ്ഥാന വനംവകുപ്പിന്‍റെ പ്ലാൻ ഫണ്ട്, കൃഷി വകുപ്പ് മുഖേന ആർകെവിവൈ ഫണ്ട്, നബാർഡ് ഫണ്ട് എന്നീ ഫണ്ടുകൾ സംയോജിപ്പിച്ച് 7.34 കോടി രൂപ അനുവദിച്ചാണ് പൂഞ്ഞാർ നിയോജകമണ്ഡലത്തിലെ 30 കിലോമീറ്ററോളം വരുന്ന വനമേഖല പൂർണമായും പ്രതിരോധ സംവിധാനങ്ങൾ ഒരുക്കി സുരക്ഷിതമാക്കുന്നതെന്ന് എംഎൽഎ പറഞ്ഞു. ഒന്നാംഘട്ടമായി കോയിക്കക്കാവ് മുതൽ പായസപ്പടി വരെ 9.5 കിലോമീറ്ററും മഞ്ഞളരുവി മുതൽ പാക്കാനം വരെ 3.7 കിലോമീറ്ററും തൂക്ക് സൗരവേലുകൾ സ്ഥാപിച്ചു. കിടങ്ങ്, ഹാംഗിംഗ് ഫെൻസിംഗ്, സോളാർ ഫെൻസിംഗ് എന്നിവ സ്ഥാപിച്ച് വന്യജീവി ആക്രമണം പൂർണമായും പ്രതിരോധിക്കുന്ന കേരളത്തിലെ ആദ്യ നിയോജകമണ്ഡലമായി പൂഞ്ഞാറിനെ മാറ്റുമെന്നും എംഎൽഎ പറഞ്ഞു. പഞ്ചായത്ത് പ്രസിഡന്‍റ് മറിയാമ്മ സണ്ണി അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, കോട്ടയം ഡിവിഷണൽ ഫോറസ്റ്റ് ഓഫീസർ പ്രഫുൽ ആഗ്രവാൾ, വനംവകുപ്പ് എരുമേലി റേഞ്ച് ഓഫീസർ കെ. ഹരിലാൽ, കോരുത്തോട് പഞ്ചായത്ത് പ്രസിഡന്‍റ് ജാൻസി സാബു, ജനപ്രതിനിധികൾ, കൃഷി ഓഫീസർമാർ, വിവിധ രാഷ്‌ട്രീയ-സാമൂഹ്യ-സംഘടനാ നേതാക്കൾ തുടങ്ങിയവർ പ്രസംഗിച്ചു.

വിളവെടുപ്പ് ഉത്സവം

മുണ്ടക്കയം: കണ്ണിമല ഫാർമേഴ്സ് ക്ലബ്ബിന്‍റെ നേതൃത്വത്തിൽ കാർഷികവിളകളുടെ വിളവെടുപ്പ് ഉത്സവം നടത്തി. ക്ലബ് പ്രസിഡന്‍റ് പി.ഡി. ജോൺ പവ്വത്ത് ഉദ്ഘാടനം ചെയ്തു. ബേബിച്ചൻ പ്ലാക്കാട്ട് അധ്യക്ഷത വഹിച്ചു. ദിലീഷ് ദിവാകരൻ, സാബു തോമസ്, ടി.പി. ആന്‍റണി, കെ.എൻ. ഷിബു തുടങ്ങിയവർ പ്രസംഗിച്ചു. ക്ലബിന്‍റെ കൃഷി കോ-ഓർഡിനേറ്റർമാരായ ലുയിസ് തോമസ്, ടി.എസ്. മോഹൻദാസ് എന്നിവരുടെ നേതൃത്വത്തിൽ നടത്തിയ വാഴ, ചേന, കപ്പ അടക്കമുള്ള പച്ചക്കറികളുടെ വിളവെടുപ്പാണ് നടത്തിയത്.

എരുമേലി അസംപ്ഷൻ ഫൊറോന പള്ളി സുവർണ ജൂബിലി സമാപിച്ചു

എരുമേലി: ചെറിയ സമൂഹങ്ങളായി ആരംഭിച്ച് വളർന്നുപന്തലിച്ച ഒരു വടുവൃക്ഷമാണ് സഭയെന്നും അതിന്‍റെ ശാഖകളാണ് ഇടവകകളും ഫൊറോനകളുമെന്നും ചങ്ങനാശേരി അതിരൂപത മുൻ മെത്രാപ്പോലീത്ത മാർ ജോസഫ് പെരുന്തോട്ടം. എരുമേലി അസംപ്ഷൻ പള്ളിയെ ഫൊറോനയായി ഉയർത്തിയതിന്‍റെ സുവർണ ജൂബിലി സമാപന സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു മാർ പെരുന്തോട്ടം. ക്രൈസ്തവസഭയുടെ സാന്നിധ്യം ലോകത്ത് എവിടെയെത്തിയാലും ആ പ്രദേശങ്ങൾ ആത്മീയമായും സാമൂഹികമായും വളരുമെന്നും മനുഷ്യന് അന്തസായി ജീവിക്കാനുള്ള ചുറ്റുപാടുകൾ സൃഷ്ടിക്കുകയാണ് ക്രൈസ്തവസഭ ചെയ്യുന്നതെന്നും യോഗത്തിൽ അധ്യക്ഷത വഹിച്ച കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ പറഞ്ഞു. മോൺ. ജോർജ് ആലുങ്കൽ, എരുമേലി പഞ്ചായത്ത് പ്രസിഡന്‍റ് മറിയാമ്മ സണ്ണി, പാസ്റ്ററൽ കൗൺസിൽ സെക്രട്ടറി പ്രഫ. ജൂബി മാത്യു, ഫൊറോന വികാരി ഫാ. വർഗീസ് പുതുപ്പറമ്പിൽ, ഫാ. കുര്യാക്കോസ് വടക്കേടത്ത്, കൈക്കാരൻ സജി ജോർജ് തകടിയേൽ എന്നിവർ പ്രസംഗിച്ചു. ഈ വർഷത്തെ പൊതുപരീക്ഷകളിൽ ഉന്നത വിജയം നേടിയവരെ യോഗത്തിൽ ആദരിച്ചു. 1975ൽ ചങ്ങനാശേരി ആർച്ച്ബിഷപ് മാർ ആന്‍റണി പടിയറയാണ് എരുമേലി അസംപ്ഷൻ പള്ളിയെ ഫൊറോനയായി ഉണർത്തിയത്.

ബിടിസി ഉദ്ഘാടനവും എച്ച്ഡിസി സര്‍ട്ടിഫിക്കറ്റ് വിതരണവും

കാഞ്ഞിരപ്പള്ളി: രൂപത വിശ്വാസജീവിത പരിശീലനകേന്ദ്രം വിശ്വാസജീവിത പരിശീലകര്‍ക്കായി നടത്തുന്ന ത്രിദിന ക്യാമ്പായ ബേസിക് ട്രെയ്‌നിംഗ് കോഴ്‌സ് (ബിടിസി) ഉദ്ഘാടനവും 2024-25 അധ്യയന വര്‍ഷത്തില്‍ എച്ച്ഡിസി കോഴ്‌സ് പൂര്‍ത്തിയാക്കിയവരുടെ സര്‍ട്ടിഫിക്കറ്റ് വിതരണവും പൊടിമറ്റം നിര്‍മല റിന്യൂവല്‍ സെന്‍ററില്‍ നടത്തി. ബിഷപ് മാര്‍ ജോസ് പുളിക്കല്‍ ക്യാമ്പ് ഉദ്ഘാടനം ചെയ്ത് എച്ച്ഡിസി 2024-25 ബാച്ചിന്‍റെ സര്‍ട്ടിഫിക്കറ്റ് വിതരണം നടത്തി. കാഞ്ഞിരപ്പള്ളി രൂപത വിശ്വാസജീവിത പരിശീലന ഡയറക്ടര്‍ ഫാ. തോമസ് വാളന്മനാലിന്‍റെ നേതൃത്വത്തില്‍ വൈദികരും സന്യസ്തരും അല്മായരും അടങ്ങുന്ന റിസോഴ്‌സ് ടീം ക്ലാസുകള്‍ നയിച്ചു. സമാപന സമ്മേളനത്തില്‍ രൂപത പ്രോട്ടോസിഞ്ചെല്ലൂസ് റവ.ഡോ. ജോസഫ് വെള്ളമറ്റം ബിടിസി കോഴ്‌സ് പൂര്‍ത്തിയാക്കിയവര്‍ക്ക് സര്‍ട്ടിഫിക്കറ്റുകള്‍ വിതരണം ചെയ്തു. വികാരി ജനറല്‍ ഫാ. ബോബി അലക്‌സ് മണ്ണംപ്ലാക്കല്‍, ചാന്‍സലര്‍ ഫാ. മാത്യു ശൗര്യാംകുഴിയില്‍, രൂപത പ്രൊക്കുറേറ്റര്‍ ഫാ. ഫിലിപ്പ് തടത്തില്‍ എന്നിവര്‍ പ്രസംഗിച്ചു.

കൂട്ടിക്കലിൽ 11 വീടുകളുടെ താക്കോൽദാനം 21ന്

കോട്ടയം: ഉരുള്‍പൊട്ടല്‍ തകര്‍ത്ത കൂട്ടിക്കലില്‍ സെബാസ്റ്റ്യന്‍ കുളത്തുങ്കല്‍ എംഎല്‍എയുടെ നേതൃത്വത്തില്‍ 11 കുടുംബങ്ങള്‍ക്ക് വീടുകള്‍ നല്‍കും. പൂഞ്ഞാര്‍ എംഎല്‍എ സര്‍വീസ് ആര്‍മി, റോട്ടറി ഇന്‍റര്‍നാഷണല്‍ ഡിസ്ട്രിക്‌ട് 3211, പാലാ റോട്ടറി ക്ലബ് എന്നിവയുടെ സഹകരണത്തോടെ നിര്‍മിച്ച വീടുകളുടെ താക്കോലാണ് 21നു കൈമാറുന്നത്. പൂഞ്ഞാര്‍ മണ്ഡലത്തിലെ വിവിധ ഭാഗങ്ങളിലായി ലക്ഷ്യമിടുന്ന 10 പുതിയ വീടുകളുടെ നിര്‍മാണ ഉദ്ഘാടനവും നടത്തും. 2021ലെ കൂട്ടിക്കല്‍ ഉരുള്‍പൊട്ടലില്‍ ഭൂരഹിതരും ഭവനരഹിതരുമായ മുന്നൂറിലേറെപ്പേര്‍ക്ക് സംസ്ഥാന സര്‍ക്കാരും വിവിധ സ്ഥാപനങ്ങളും സംഘടനകളും‍ വീടുകള്‍ നിര്‍മിച്ച് നല്‍കിയിരുന്നു. വിവിധ മാനദണ്ഡങ്ങള്‍ മൂലം സര്‍ക്കാര്‍തല പദ്ധതിയുടെ നേട്ടം ലഭിക്കാത്തവരില്‍നിന്നു തെരഞ്ഞെടുത്ത 11 പേര്‍ക്കാണ് സെബാസ്റ്റ്യന്‍ കുളത്തുങ്കല്‍ എംഎല്‍എയുടെ നേതൃത്വത്തില്‍ കൂട്ടിക്കല്‍ താളുങ്കലില്‍ വീട് നിര്‍മിച്ചത്. എംഎല്‍എയുടെ അഭ്യര്‍ഥനയെത്തുടര്‍ന്ന് സി.വൈ.എ. റൗഫ് വീടുനിര്‍മാണത്തിന് 60 സെന്‍റ് സ്ഥലം സൗജന്യമായി നല്‍കുകയായിരുന്നു. 21നു രാവിലെ 11നു കൂട്ടിക്കല്‍ സെന്‍റ് മേരീസ് ഓര്‍ത്തഡോക്സ് പള്ളി പാരിഷ് ഹാളില്‍ നടക്കുന്ന വീടുകളുടെ താക്കോല്‍ദാനച്ചടങ്ങ് മന്ത്രി റോഷി അഗസ്റ്റിന്‍ ഉദ്ഘാടനം ചെയ്യും. സെബാസ്റ്റ്യന്‍ കുളത്തുങ്കല്‍ എംഎല്‍എ അധ്യക്ഷത വഹിക്കും. കെ.ജെ. തോമസ് ഗുണഭോക്താക്കള്‍ക്ക് ഉടമസ്ഥാവകാശ രേഖകള്‍ കൈമാറും. ഇതോടെ കൂട്ടിക്കലിലെ പ്രളയപുനരുദ്ധാരണം പൂര്‍ണമാകുമെന്ന് സെബാസ്റ്റ്യന്‍ കുളത്തുങ്കല്‍ എംഎല്‍എ പറഞ്ഞു. വീട് പോയ എല്ലാവര്‍ക്കും വീട് നല്‍കി. സിപിഎം 25 വീടുകളും വിവിധ സന്നദ്ധസംഘടനകളുടേതടക്കം 100ലധികം വീടുകളും നിര്‍മിച്ചു. നശിച്ച റോഡുകളും ഓഫീസുകളും പാലങ്ങളും പുനര്‍നിര്‍മിച്ചു. പത്രസമ്മേളനത്തില്‍ എംഎല്‍എയ്ക്കൊപ്പം കൂട്ടിക്കല്‍ പഞ്ചായത്ത് പ്രസിഡന്‍റ് ബിജോയ് ജോസ് മുണ്ടുപാലം, പാലാ റോട്ടറി ക്ലബ് പ്രസിഡന്‍റ് ജോഷി വെട്ടുകാട്ടില്‍, റോട്ടറി ഡിസ്ട്രിക്‌ട് 3211 അസിസ്റ്റന്‍റ് ഗവര്‍ണര്‍ ആന്‍റണി വൈപ്പന എന്നിവര്‍ പങ്കെടുത്തു.

പോലീസ് വാഹനത്തിനു നേരേ അതിക്രമം; പ്രതി പിടിയില്‍

ഈരാറ്റുപേട്ട: മദ്യപിച്ച് വാഹനമോടിച്ച് പോലീസ് വാഹനത്തിന് കേടുപാടുകള്‍ വരുത്തിയ ആള്‍ തിടനാട് പോലീസിന്‍റെ പിടിയിലായി. അരുവിത്തുറ പുത്തന്‍പുരയ്ക്കല്‍ ഷെഫീഖ് (35) ആണ് പിടിയിലായത്. കഴിഞ്ഞ ദിവസം രാത്രി 11.35ന് കാഞ്ഞിരപ്പള്ളി -ഈരാറ്റുപേട്ട റോഡില്‍ അപകടകരമായ രീതിയില്‍ വാഹനം ഓടിക്കുകയും നൈറ്റ് പട്രോള്‍ ഡ്യൂട്ടിയില്‍ ഉണ്ടായിരുന്ന എസ്ഐ റോബി ജോസ്, സിപിഒ ജിബിന്‍ സിബി എന്നീ പോലീസ് ഉദ്യോഗസ്ഥര്‍ക്ക് നേരേ വാഹനം ഓടിച്ചു കൊണ്ടുവരികയും പോലീസ് വാഹനത്തില്‍ ഇടിപ്പിക്കുകയും കേടുപാടുകള്‍ വരുത്തുകയും ചെയ്തു. സ്റ്റേഷനില്‍ എത്തിച്ച പ്രതി അവിടെയും അക്രമാസക്തനായി. ഇയാള്‍ മദ്യലഹരിയിലായിരുന്നുവെന്നും ഈരാറ്റുപേട്ട, തിടനാട്, മുണ്ടക്കയം, കാഞ്ഞിരപ്പള്ളി സ്റ്റേഷനുകളില്‍ നിരവധി ക്രിമിനല്‍ കേസുകളില്‍ പ്രതിയാണ് ഇയാളെന്നും പോലീസ് പറഞ്ഞു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

കാഞ്ഞിരപ്പള്ളി ബസ് സ്റ്റാൻഡിലേക്കുള്ള പുത്തനങ്ങാടി റോഡ് തകർന്നു തരിപ്പണമായി

കാഞ്ഞിരപ്പള്ളി: ദേശീയപാതയിൽനിന്നു കാഞ്ഞിരപ്പള്ളി ബസ് സ്റ്റാൻഡിലേക്കു പ്രവേശിക്കുന്ന പുത്തനങ്ങാടി റോഡ് തകര്‍ന്നു തരിപ്പണമായി. വീതിക്കുറവു മൂലം ഗതാഗതം ദുഷ്കരമായ ഇവിടെ റോഡ് കൂടി തകർന്നതോടെ കാര്യങ്ങൾ കൂടുതൽ പരിതാപകരമായി. ഇവിടെ നേരത്തേ കോണ്‍ക്രീറ്റ് ചെയ്ത ഭാഗത്തിനു മുകളില്‍ റോഡ് ടാര്‍ ചെയ്തിരുന്നു. ഇപ്പോൾ ഈ ടാറിംഗും അടിയിലെ കോൺക്രീറ്റും തകർന്നു പലേടത്തും വലിയ കുഴികളായിരിക്കുകയാണ്. ബസുകൾ കടന്നുപോകുമ്പോൾ കുഴികളിൽ ചാടിയും ബസിന്‍റെ അടിവശം ഇടിച്ചും റോഡ് കൂടുതൽ തകരുന്ന സ്ഥിതിയാണ്. കണ്ണുതുറക്കൂ പഞ്ചായത്തേ... ദേശീയപാതയിൽനിന്നു സ്റ്റാൻഡിലേക്കു കയറുന്ന ഭാഗത്തു കഷ്ടിച്ച് ഒരു ബസിനു മാത്രം കടന്നുപോകാൻ കഴിയുന്ന വീതിയേ ഉള്ളൂ. ബസ് സ്റ്റാന്‍ഡിലേക്കുള്ള ബസുകള്‍ മാത്രമല്ല, കച്ചവട സ്ഥാപനങ്ങളിലേക്കു ലോഡുമായടക്കം വാഹനങ്ങള്‍ കടന്നുപോകുന്ന പാതയില്‍ ഇപ്പോള്‍ യാത്ര ദുഷ്‌കരമാണ്. പലപ്പോഴും ഇരുചക്ര വാഹനങ്ങള്‍ കുഴികളില്‍ ചാടി നിയന്ത്രണം വിടുന്നതും പതിവാണ്. കഴിഞ്ഞ മാസം ബസ് സ്റ്റാന്‍ഡ് ദേശീയപാതയുമായി ചേരുന്ന ഭാഗത്തു സ്ലാബുകള്‍ ഒടിഞ്ഞ് അപകടാവസ്ഥയിലായതിനെത്തുടർന്ന് അറ്റകുറ്റപ്പണികള്‍ക്കായി സ്റ്റാന്‍ഡ് പത്തു ദിവസം അടച്ചിരുന്നു. അന്നു ടാറിംഗ് തകര്‍ന്ന ഭാഗവും നന്നാക്കണമെന്നു വ്യാപാരികളും ബസ് ഉടമകളും ആവശ്യപ്പെട്ടിരുന്നു. എന്നാല്‍, ഇതു നടന്നില്ല. മഴ ശക്തമാകുകയും ചെറിയ കുഴികള്‍ വലുതാവുകയും ചെയ്തതോടെ യാത്ര സാഹസികമായി. എത്രയും വേഗം റോഡ് നന്നാക്കി അപകടാവസ്ഥ ഒഴിവാക്കണമെന്നാണ് ആവശ്യം.

ചങ്ങനാശേരിയില്‍ 24 മണിക്കൂറും പ്രവര്‍ത്തിക്കുന്ന നീതി മെഡി.‍ സ്റ്റോറും ലബോറട്ടറിയും; ഉദ്ഘാടനം നാളെ

ചങ്ങനാശേരി: കോട്ടയം ജില്ല ആശുപത്രി സഹകരണ സംഘം (ഡിസിഎച്ച്)ന്‍റെ നേതൃത്വത്തില്‍ ചങ്ങനാശേരിയില്‍ 24 മണിക്കൂറും പ്രവര്‍ത്തിക്കുന്ന നീതി മെഡിക്കല്‍ സ്റ്റോറും ലബോറട്ടറിയും പ്രവര്‍ത്തനമാരംഭിക്കുന്നു. നാളെ രാവിലെ 10ന് മന്ത്രി വി.എന്‍. വാസവന്‍ ഉദ്ഘാടനം ചെയ്യും. ചങ്ങനാശേരി ഹെഡ് പോസ്റ്റ് ഓഫീസിന് എതിര്‍വശത്തുള്ള നഗരസഭാ ഷോപ്പിംഗ് കോംപ്ലക്‌സിലാണ് മെഡിക്കല്‍ സ്റ്റോറും ലബോറട്ടറിയും ആരംഭിക്കുന്നത്. എല്ലാ ലാബ് പരിശോധനകളും കുറഞ്ഞ നിരക്കില്‍ ഇവിടെ നടത്താം. ഇതിനു പുറമേ സീനിയര്‍ സിറ്റിസണിന് പത്തുശതമാനം ഡിസ്‌കൗണ്ടും ഡിസിഎച്ചിന്‍റെ ചങ്ങനാശേരി ബ്രാഞ്ചില്‍ ലഭിക്കും. ജോബ് മൈക്കിള്‍ എംഎല്‍എ അധ്യക്ഷത വഹിക്കും. മുനിസിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍, ജില്ല സഹകരണ അര്‍ബന്‍ ബാങ്ക് പ്രസിഡന്‍റ് ടി.ആര്‍. രഘുനാഥന്‍, കാപ്‌കോസ് ചെയര്‍മാന്‍ കെ.എം. രാധാകൃഷ്ണന്‍, ഡിസിഎച്ച് പ്രസിഡന്‍റ് സി.ജെ. ജോസഫ്, വൈസ് പ്രസിഡന്‍റ് കെ.എന്‍. വേണുഗോപാല്‍, കെ.സി. ജോസഫ്, അഡ്മിനിസ്‌ട്രേറ്റീവ് ഓഫീസര്‍ കെ.എം. മോഹനന്‍ എന്നിവര്‍ പ്രസംഗിക്കും.

ചങ്ങനാശേരി ബോട്ട് ക്ലബിന്‍റെ പരിശീലനം പുരോഗമിക്കുന്നു

ചങ്ങനാശേരി: മീഡിയാ വില്ലേജ് നേതൃത്വം കൊടുക്കുന്ന സിബിസിയുടെ നെഹ്‌റു ട്രോഫി മത്സരത്തിനായുള്ള പരിശീലനം കിടങ്ങറയിൽ ആരംഭിച്ചു. അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട് ഫ്‌ളാഗ് ഓഫ് നിര്‍വഹിച്ചു. ചങ്ങനാശേരിയിലെ രാഷ്‌ട്രീയ, വ്യവസായ, സാമൂഹിക രംഗത്തെ പ്രമുഖര്‍ പങ്കെടുത്ത പരിപാടിയില്‍ ബോട്ട് ക്ലബിന്‍റെ ക്യാപ്റ്റന്‍ സണ്ണി ഇടിമണ്ണിക്കല്‍ മുഖ്യപ്രഭാഷണം നടത്തി. കിടങ്ങറ പള്ളി വികാരി ഫാ. സിറിള്‍ ചേപ്പില, ഫാ. ലിബിന്‍ തുണ്ടുകളം, ഷാജി പാലാത്ര, ടോമി അര്‍ക്കാഡിയ, ഗിരീഷ് കോനാട്ട്, അഡ്വ.പി.എസ്. ശ്രീധരന്‍, എച്ച്. മുസമ്മില്‍, ടിന്‍സു മാത്യു, ടോം സി. വാടയില്‍, ടോണി സി. കല്ലുകളം, ഡോ. ജോസഫ് തോമസ്, സി.എം. മാത്യു, ഷാജന്‍ ഓവേലില്‍, സോനു പതാലില്‍, ജോര്‍ജുകുട്ടി കട്ടപ്പുറം, ജോസഫ് ഏബ്രഹാം തെക്കേക്കര എന്നിവര്‍ പ്രസംഗിച്ചു.

ലഹരിക്കെതിരേ യുവാക്കള്‍ മുന്നിട്ടിറിങ്ങണം: ജോബ് മൈക്കിള്‍

ചങ്ങനാശേരി: മാനവരാശിക്ക് ഭീഷണിയായ ലഹരിയെ തുരത്താന്‍ യുവാക്കള്‍ മുന്നിട്ടിറിങ്ങണമെന്ന് ജോബ് മൈക്കിള്‍ എംഎല്‍എ. വിദേശരാജ്യങ്ങളിലെ ഏറ്റവും വലിയ മലയാളി സംഘടനയായ ഫോമയുടെയും ചങ്ങനാശേരി യുവജന വേദിയുടെയും സംയുക്ത ആഭിമുഖ്യത്തില്‍ അന്താരാഷ്‌ട്ര യുവജന വാരാചരണത്തോടനുബന്ധിച്ച് ഫോമാ വൈസ് പ്രസിഡന്‍റ് ശാലു പുന്നൂസ് നേതൃത്വം നല്‍കിയ "രാസലഹരിക്കെതിരേ യുവജന കൂട്ടയോട്ടം' ഉദ്ഘാടനം ചെയ്യുകയായിരുന്നു അദ്ദേഹം. യുവജനവേദി പ്രസിഡന്‍റ് എം.എ. സജാദ് അധ്യക്ഷത വഹിച്ചു. സിനിമാതാരം കൃഷ്ണപ്രസാദ്, ചങ്ങനാശേരി പോലീസ് സബ് ഇന്‍സ്‌പെക്ടര്‍ ആര്‍.പി. ടിനു, ഫോമാ കേരള ഇന്‍ ചാര്‍ജ് പീറ്റര്‍ കുളങ്ങര, വി.ജെ ലാലി, ജോമി ജോസഫ്, ശ്യാം സാംസണ്‍, ലിബിന്‍ പുന്നശേരി, ജൂബിന്‍ ജോണ്‍സണ്‍, അസ്ഹര്‍ മുഹമ്മദ്, സി. രമേശന്‍ തുടങ്ങിയവർ പ്രസംഗിച്ചു.

ചിങ്ങപ്പുലരിയില്‍ കർഷകരെ ആദരിച്ച് നാട്

ചങ്ങനാശേരി: നഗരസഭ, കൃഷി ഭവന്‍ എന്നിവയുടെ സംയുക്താഭിമുഖ്യത്തില്‍ നഗരസഭ ഹാളില്‍ കര്‍ഷകദിനാചരണം നടത്തി. നഗരസഭ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ അധ്യക്ഷത വഹിച്ചു. ജോബ് മൈക്കിള്‍ എംഎല്‍എ ഉദ്ഘാടനം നിര്‍വഹിച്ചു. വൈസ് ചെയര്‍മാന്‍ മാത്യൂസ് ജോര്‍ജ് മികച്ച കര്‍ഷകരെ ആദരിച്ചു. ടെസ വര്‍ഗീസ്, എല്‍സമ്മ ജോബ്, ഉഷ മുഹമ്മദ് ഷാജി, ബീന ജോബി, സന്തോഷ് ആന്‍റണി, റെജി കേളമ്മാട്ട്, കുഞ്ഞുമോള്‍ സാബു എന്നിവര്‍ പ്രസംഗിച്ചു. ചങ്ങനാശേരി: സീനിയര്‍ ചേംബര്‍ ഇന്‍റര്‍നാഷണല്‍ കര്‍ഷകദിനാചരണം നടത്തി. പ്രസിഡന്‍റ് ജയിംസുകുട്ടി ഞാലിയില്‍ അധ്യക്ഷത വഹിച്ചു. നാഷണല്‍ വൈസ് പ്രസിഡന്‍റ് അഡ്വ. ബോബന്‍ തെക്കേല്‍ ഉദ്ഘാടനം ചെയ്തു. ലീജിയന്‍ ഏര്‍പ്പെടുത്തിയ കര്‍ഷകശ്രീ പുരസ്‌കാരങ്ങള്‍ ജോണി കൊല്ലമന, മാത്യു ജോസഫ് എന്നിവര്‍ ഏറ്റുവാങ്ങി. ബിജു നെടിയകാലാപ്പറമ്പില്‍, സോണി ജോസഫ് എന്നിവര്‍ പ്രസംഗിച്ചു.

വേണ്ടത് ഹൃദയ പരിവര്‍ത്തനം: മോണ്‍. ആന്‍റണി എത്തയ്ക്കാട്ട്

തുരുത്തി ബൈബിള്‍ കണ്‍വന്‍ഷന്‍ നാളെ സമാപിക്കും തുരുത്തി: പരസ്പരമുള്ള വെറുപ്പും വിദ്വേഷവും മാറ്റി പുതിയൊരു ഹൃദയം സൃഷ്ടിക്കണമെന്ന് ചങ്ങനാശേരി അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട്. തുരുത്തി മര്‍ത്ത്മറിയം ഫൊറോന പള്ളിയില്‍ ഫാ. സേവ്യര്‍ ഖാന്‍ വട്ടായില്‍ നയിക്കുന്ന അഭിഷേകാഗ്‌നി ബൈബിള്‍ കണ്‍വന്‍ഷന്‍റെ മൂന്നാം ദിവസം വിശുദ്ധ കുര്‍ബാന അര്‍പ്പിച്ചു സന്ദേശം നല്‍കുകയായിരുന്നു അദ്ദേഹം. വികാരി ഫാ. ജേക്കബ് ചീരംവേലില്‍ അധ്യക്ഷത വഹിച്ചു. അട്ടപ്പാടി സെഹിയോന്‍ ധ്യാനകേന്ദ്രം ഡയറക്ടര്‍ ഫാ. സേവ്യര്‍ ഖാന്‍ വട്ടായില്‍, ചെത്തിപ്പുഴ മൗണ്ട് കാര്‍മല്‍ ധ്യാനകേന്ദ്രം ഡയറക്ടര്‍ സിസ്റ്റര്‍ ടെസ്‌ലിന്‍ എന്നിവര്‍ വചനപ്രഘോഷണവും ആരാധനയും നയിച്ചു. ഇന്നു പകല്‍ പൊതുകുമ്പസാരം നടക്കും. മൂന്നരയ്ക്ക് ജപമാല, നാലിനു നടക്കുന്ന വിശുദ്ധ കുര്‍ബാനയ്ക്ക് അതിരൂപത വികാരി ജനറാള്‍ മോണ്‍. സ്‌കറിയ കന്യാകോണില്‍ മുഖ്യകാര്‍മികത്വം വഹിക്കും. ഫാ. സേവ്യര്‍ ഖാന്‍ വട്ടായില്‍ വചനപ്രഘോഷണം നടത്തും. സമാപനദിനമായ നാളെ മൂന്നരയ്ക്ക് ജപമാല, നാലിന് വിശുദ്ധ കുര്‍ബാനയ്ക്ക് തുരുത്തി ഫൊറോനയിലെ വൈദികര്‍ കാര്‍മികത്വം വഹിക്കും. ബിഷപ് ജോഷ്വാ മാര്‍ ഇഗ്‌നാത്തിയോസ് സമാപന സന്ദേശം നല്‍കും. തുടര്‍ന്ന് ഫാ. സേവ്യര്‍ ഖാന്‍ വട്ടായില്‍ വചനപ്രഘോഷണവും ദിവ്യകാരുണ്യ ആരാധനയും നയിക്കും.

പുരപ്പുറം നിറയെ പച്ചക്കറികളുമായി രമാദേവിയുടെ കാർഷിക വിപ്ലവം

ബെന്നി ചിറയില്‍ ചങ്ങനാശേരി: പെരുന്ന ആവണിയില്‍ രമാദേവിയുടെ രണ്ടു വീടുകള്‍ നിറയെ വിളഞ്ഞുനില്‍ക്കുന്ന പച്ചക്കറികള്‍ കണ്‍കുളിര്‍ക്കുന്ന ഹരിതാഭ കാഴ്ചയാണ്. മത്തങ്ങ, വഴുതന, കുലവഴുതന, ഓണാട്ടുവഴുതന, വയലറ്റ് നീളന്‍, മാലാഖ, കോഴിക്കോടന്‍ വെങ്ങരി തുടങ്ങി എട്ടിനങ്ങളിലാണ് വഴുതന വിളഞ്ഞിരിക്കുന്നത്. വെണ്ട ആണെങ്കില്‍ ആനക്കൊമ്പന്‍ (പച്ച, ചുവപ്പ്), അരുണ, കസ്തൂരി തുടങ്ങിയ ഇനങ്ങള്‍. ഉജ്വല, ജ്വാലസഖി, വെള്ളക്കാന്താരി, വയലറ്റ് തുടങ്ങി എരിവ് കൂടിയതും കുറഞ്ഞതുമായ മുളകിനങ്ങള്‍. അരുണ, മയില്‍പ്പീലി, സുന്ദരി, മോഹിനി, പൊന്നാങ്കണി തുടങ്ങി അരഡസന്‍ ചീര ഇനങ്ങള്‍. പെരുന്ന സുബ്രമണ്യംസ്വാമി ക്ഷേത്രം റോഡിന്‍റെ തുടക്കത്തിലാണ് പതിമൂന്നര സെന്‍റിലുള്ള രണ്ടു വീടുകളുടെ മട്ടുപ്പാവുകളിലെ രമാദേവിയുടെ കൃഷിയിടം‍. മംഗള, ലോല, ഗീതിക, അനശ്വര, കാര്‍ക്കൂന്തല്‍ തുടങ്ങിയ പയറിനങ്ങളും ഈ വീട്ടമ്മയുടെ കൃഷിയിടത്തില്‍ തിങ്ങിവിളയുന്നു. പന്തളം സ്വദേശിനിയായ രമാദേവി ബോട്ടണിയില്‍ ബിരുദാനന്ദര ബിരുദം നേടിയിട്ടുണ്ട്. മുത്തശി കാര്‍ത്ത്യായനിയില്‍നിന്നു നേടിയ കൃഷി അറിവാണ് പെരുന്നയിലെ ആവണി വീടിന്‍റെ മട്ടുപ്പാവിനെയും പരിസരങ്ങളെയും കഴിഞ്ഞ കാല്‍ നൂറ്റാണ്ടിലധികമായി കാര്‍ഷിക സമൃദ്ധിയിലേക്കു നയിച്ചത്. മഞ്ഞള്‍, മുരിങ്ങ, അരിനെല്ലി, വിവിധതരം നാരകം, ഓമക്ക, സപ്പോര്‍ട്ട, പേര, ആത്ത, പീനട്ട് ബട്ടര്‍, ചെറി തുടങ്ങിയവയെല്ലാം ഈ പുരപ്പുറത്ത് 365 ദിവസവും വിളയുന്നു. ചാക്ക്, എച്ച്ഡിപി ബാഗ്, പ്ലാസ്റ്റിക് ബേസണ്‍, കണ്ടെയ്‌നറുകള്‍, തെര്‍മോകോള്‍ പെട്ടികള്‍ തുടങ്ങിയവയില്‍ തികച്ചും ശാസ്ത്രീയവും ജൈവ രീതിയിലുമാണ് കൃഷി. പുരപ്പുറത്ത് വിളയുന്ന കാര്‍ഷികോത്പന്നങ്ങള്‍ വില്‍ക്കുന്നതിനൊപ്പം "രമ ടെറസ് ഗാര്‍ഡന്‍’എന്ന ബ്രാന്‍ഡില്‍ ഈ വീട്ടമ്മ വന്‍തോതില്‍ വിത്തിനങ്ങളും വിറ്റുവരുന്നു. രമാസ് ടെറസ് ഗാര്‍ഡന്‍ എന്ന യുട്യൂബ് ചാനലിലൂടെ കാര്‍ഷിക വിഭവങ്ങളും വിത്തിനങ്ങളും വില്‍ക്കുന്നതിനൊപ്പം പുത്തന്‍ കാര്‍ഷിക അറിവുകള്‍ വീട്ടമ്മമാരുള്‍പ്പെടെയുള്ളവര്‍ക്ക് പകരാനും രമാദേവിക്കു കഴിയുന്നു. കാര്‍ഷിക മികവിന് നിരവധി പുരസ്‌കാരങ്ങളും രമാദേവിയെ തേടിയെത്തിയിട്ടുണ്ട്. കഴിഞ്ഞവര്‍ഷം കോട്ടയം ജില്ലയിലെ മികച്ച കര്‍ഷകയായും തെരഞ്ഞെടുക്കപ്പെട്ടിരുന്നു. ഫോണ്‍. 9446468569.

വാഹനാപകട കേസിൽ 65 ലക്ഷം നഷ്ടപരിഹാരം നൽകാൻ വിധി

പാലാ: വാഹനാപകടത്തിൽ മരിച്ച കൂട്ടിക്കൽ സ്വദേശി ഷാജിയുടെ ഭാര്യക്കും മക്കൾക്കും മാതാവിനും നഷ്ടപരിഹാരവും പലിശയും ഉൾപ്പെടെ 65 ലക്ഷം രൂപ നൽകാൻ പാലാ മോട്ടോർ ആക്സിഡന്‍റ്സ് ക്ലെയിം ട്രിബ്യൂണൽ ജഡ്ജ് കെ.പി. പ്രദീപ് ഉത്തരവ് പുറപ്പെടുവിച്ചു. 2019ൽ കൂട്ടിക്കലിൽ ബൈക്കിൽ ലോറി ഇടിച്ചുണ്ടായ അപകടത്തിലാണ് ഷാജി മരിച്ചത്. ന്യൂ ഇന്ത്യ ഇൻഷ്വറൻസ് കമ്പനി ഹർജിക്കാർക്ക് തുക നൽകാനാണ് കോടതി വിധി. ഹർജിക്കാർക്ക് വേണ്ടി അഡ്വക്കറ്റുമാരായ ബിജു ഇളംതുരുത്തിയിൽ, ബിസിമോൻ ചെമ്പൻകുളം, ബിബിൻ മാടപ്പള്ളി, മരിയ തോമസ്എന്നിവർ കോടതിയിൽ ഹാജരായി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]