സെന്‍റ് തെരേസാസില്‍ രജതജൂബിലി കവാടം സമര്‍പ്പണം ഇന്ന്

ചങ്ങനാശേരി: വാഴപ്പള്ളി സെന്‍റ് തെരേസാസ് ഹയര്‍ സെക്കന്‍ഡറി സ്‌കൂളിന്‍റെ രജതജൂബിലി കവാടം ഇന്നു രാവിലെ 9.30ന് ആര്‍ച്ച്ബിഷപ് എമെരിറ്റസ് മാര്‍ ജോസഫ് പെരുന്തോട്ടം ആശീര്‍വാദവും ഉദ്ഘാടനവും നിര്‍വഹിക്കും.

പ്രൊവിന്‍ഷ്യല്‍ സുപ്പീരിയര്‍ മദര്‍ ലില്ലി റോസ് അധ്യക്ഷത വഹിക്കും. പിടിഎ പ്രസിഡന്‍റ് ജീന്‍ സോജന്‍, പ്രിന്‍സിപ്പല്‍ ഷിജി വര്‍ഗീസ് എന്നിവര്‍ പ്രസംഗിക്കും.

നെഹ്‌റു ട്രോഫി നേടിയ വിബിസി ക്യാപ്റ്റന്‍ ബിഫി വര്‍ഗീസിനും ട്രോഫിക്കും സമ്മേളനത്തില്‍ സ്വീകരണം നല്‍കും.

ADVERTISEMENT

ഓണാഘോഷം അതിരുകടന്നു; ചങ്ങനാശേരി കെഎസ്ആര്‍ടിസി സ്‌റ്റേഷന്‍ മാസ്റ്റര്‍ക്ക് മര്‍ദനം

ചങ്ങനാശേരി: ചങ്ങനാശേരി കെഎസ്ആര്‍ടിസി ഡിപ്പോയിലെ ഓണാഘോഷ പരിപാടികള്‍ അതിരുകടന്നു. നിശ്ചയിക്കപ്പെട്ട സമയം കഴിഞ്ഞപ്പോള്‍ മൈക്ക് ഓഫ് ചെയ്ത് പരിപാടി അവസാനിപ്പിക്കണമെന്ന് സ്‌റ്റേഷന്‍ മാസ്റ്റര്‍ നിര്‍ദേശിച്ചു. രണ്ടു പാട്ടുകള്‍ പാടാന്‍ അവസരം നല്‍കണമെന്ന് ജീവനക്കാര്‍ ആവശ്യപ്പെട്ടു. അതുകഴിഞ്ഞപ്പോള്‍ പരിപാടി നിര്‍ത്തണമെന്ന് ആവശ്യപ്പെട്ടപ്പോള്‍ മദ്യലഹരിയിലായിരുന്ന ഒരുവിഭാഗം ജീവനക്കാര്‍ സ്‌റ്റേഷന്‍ മാസ്റ്ററെ ചവിട്ടിവീഴ്ത്തി. തുടര്‍ന്ന് ആഘോഷം സംഘര്‍ഷത്തില്‍ കലാശിച്ചു. സ്‌റ്റേഷന്‍ മാസ്റ്റര്‍ വി.ജെ. വിനു ചങ്ങനാശേരി ജനറല്‍ ആശുപത്രിയില്‍ ചികിത്സതേടി. തുടര്‍ന്ന് എടിഒയ്ക്ക് പരാതി നല്‍കി. പരാതിയിൽ പ്രത്യേക സ്‌ക്വാഡ് അന്വേഷണം നടത്തി. ഡിപ്പോയിലെ ഉയര്‍ന്ന ഉദ്യോഗസ്ഥരടക്കം പത്തോളംപേരില്‍നിന്നു മൊഴിയെടുത്ത് റിപ്പോര്‍ട്ട് തിരുവനന്തപുരത്തുള്ള കേന്ദ്രഓഫീസിലേക്ക് കൈമാറി. ഇതുസംബന്ധിച്ച് ചങ്ങനാശേരി പോലീസും കേസെടുത്ത് അന്വേഷിക്കുന്നുണ്ട്. കഴിഞ്ഞ രണ്ടിനായിരുന്നു ഓണാഘോഷം. രാവിലെ എട്ടിനാരംഭിച്ച ഓണാഘോഷപരിപാടികള്‍ വൈകുന്നേരം ആറുകഴിഞ്ഞും തുടര്‍ന്നു. മൈക്ക് പ്രവര്‍ത്തനവും കലാപരിപാടികളും തുടര്‍ന്നപ്പോള്‍ എന്‍ക്വയറി ഫോണിന്‍റെയും ഓഫീസിന്‍റെയും പ്രവര്‍ത്തനത്തെ ബാധിക്കുന്നതായും മൈക്ക് നിര്‍ത്തണമെന്നും സ്റ്റേഷന്‍ മാസ്റ്റര്‍ ആവശ്യപ്പെട്ടു. ഓണലഹരിയിലായിരുന്ന ഒരുസംഘം ജീവനക്കാര്‍ ഇതില്‍ കുപിതരായി സ്റ്റേഷന്‍ മാസ്റ്ററെ ചീത്തവിളിക്കുകയും ഇദ്ദേഹത്തെ ചവിട്ടി വീഴ്ത്തുകയും ചെയ്തതായാണ് ചങ്ങനാശേരി എടിഒയ്ക്കും പോലീസിലും പരാതി നല്‍കിയിരിക്കുന്നത്. സംഭവവുമായി ബന്ധപ്പെട്ട് ചീഫ് ഓഫീസിലെ വിജിലന്‍സ് വിഭാഗത്തില്‍ നിന്നുള്ള ഉത്തരവുപ്രകാരം താല്കാലിക ബദലി ജീവനക്കാരനായ ഡ്രൈവര്‍ ദുര്‍ഗപ്രസാദിനെ ഡ്യൂട്ടിയില്‍നിന്ന് ഒഴിവാക്കിയിട്ടുണ്ട്. ചീഫ് ഓഫീസിലെ വിജിലന്‍സ് ഇതുസംബന്ധിച്ച് വിശദമായ അന്വേഷണം നടത്തിവരികയാണ്.

വിദ്യാര്‍ഥിക്ക് റെയില്‍വേയുടെ ഇലക്‌ട്രിക് ലൈനില്‍നിന്നു വൈദ്യുതാഘാതമേറ്റു

കടുത്തുരുത്തി: റെയില്‍വേ സ്റ്റേഷനില്‍ പിടിച്ചിട്ടിരുന്ന ഗുഡ്സ് ട്രെയിനിനു മുകളിലൂടെ പാളം മുറിച്ചുകടക്കാന്‍ ശ്രമിച്ച പോളിടെക്നിക്ക് വിദ്യാര്‍ഥിക്ക് റെയില്‍വേയുടെ ഇലക്‌ട്രിക് ലൈനില്‍നിന്നു വൈദ്യുതാഘാതമേറ്റു. ഗുരുതരമായി പരിക്കേറ്റ വിദ്യാര്‍ഥിയെ മുട്ടുചിറ എച്ച്ജിഎം ആശുപത്രിയിലും തുടര്‍ന്ന് കോട്ടയം മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു. ഇന്നലെ വൈകുന്നേരം 4.30 ഓടെ ആപ്പാഞ്ചിറയിലെ വൈക്കം റോഡ് റെയില്‍വേ സ്റ്റേഷനിലാണ് അപകടം. കടുത്തുരുത്തി ഗവ. പോളിടെക്നിക്കിലെ രണ്ടാം വര്‍ഷ കംപ്യൂട്ടര്‍ എന്‍ജിനിയറിംഗ് വിദ്യാര്‍ഥി എറണാകുളം കുമ്പളം ശ്രീനിലയം വീട്ടില്‍ രതീഷ് കുമാറിന്‍റെ മകന്‍ എസ്.ആര്‍. അദ്വൈതി (20) നാണ് പൊള്ളലേറ്റത്. ക്ലാസ് കഴിഞ്ഞ് വീട്ടിലക്ക് പോകുമ്പോഴാണ് സംഭവം. റെയില്‍വേ സ്റ്റേഷനിലെത്തിയ അദ്വൈത് ട്രാക്കില്‍ കിടന്ന് ഗുഡ്സ് ട്രെയിനിന് മുകളിലൂടെ പാളം മുറിച്ചുകടക്കാന്‍ ശ്രമിക്കുമ്പോളാണ് അപകടം. ഗുരുതരമായി പൊള്ളലേറ്റ വിദ്യാര്‍ഥിയുടെ ശരീരത്തിലും വസ്ത്രത്തിലും തീപിടിച്ചതോടെ നാട്ടുകാര്‍ ചേര്‍ന്ന് തീ തല്ലിക്കെടുത്തുകയായിരുന്നു. സുഹൃത്തുക്കള്‍ക്കൊപ്പം റെയില്‍വേ പാലത്തിനു താഴെയുള്ള വഴിയിലൂടെ ട്രാക്ക് മുറിച്ച് കടക്കുന്നിടത്ത് നിര്‍ത്തിയിട്ട ഗുഡ്‌സ് ട്രെയിനിന് മുകളിലൂടെ മറുസൈഡിലേക്ക് ഇറങ്ങാന്‍ ശ്രമിക്കുന്നതിനിടെയിലാണ് ഷോക്കേറ്റതെന്ന് സുഹൃത്തുക്കള്‍ പറഞ്ഞു. പെട്രോള്‍ കയറ്റിവന്ന ഗുഡ്‌സ് ട്രെയിനിന്‍റെ മുകളില്‍ കയറുന്നതിനിടെ 25,000 കിലോ വോള്‍ട്ട് കടന്നുപോകുന്ന ലൈനില്‍നിന്നുമാണ് വൈദ്യുതാഘാതമേറ്റത്. ഷോക്കേറ്റ് താഴെ വീണ അദ്വൈതിനെ റെയില്‍വേ ജീവനക്കാരും യാത്രക്കാരും ചേര്‍ന്ന് മുട്ടുചിറ എച്ച്ജിഎം ആശുപത്രിയില്‍ എത്തിക്കുകയായിരുന്നു. പിന്നീട് വിദഗ്ധ ചികിത്സയ്ക്കായി കോട്ടയം മെഡിക്കല്‍ കോളജിലേക്ക് മാറ്റി. ദേഹത്ത് ധരിച്ചിരുന്ന വസ്ത്രങ്ങള്‍ കരിഞ്ഞുപോയി. ഈ ഭാഗത്ത് റെയില്‍വേ ട്രാക്കിലൂടെയാണ് ആളുകള്‍ സ്റ്റേഷനിലേക്കെത്തുന്നത്. കുറെ ദിവസങ്ങളായി ഈ ഭാഗത്തെ ട്രാക്കില്‍ ട്രെയിനുകള്‍ പിടിച്ചിടുന്നതിനാല്‍ സ്റ്റേഷനിലേക്കെത്തുന്ന യാത്രക്കാര്‍ ചുറ്റിക്കറങ്ങി വരേണ്ട സ്ഥിതിയായിരുന്നു.

പ്രിൻസ് ലൂക്കോസിന് നാടിന്‍റെ അന്ത്യാഞ്ജലി

ഏറ്റുമാനൂർ: കേരള കോൺഗ്രസ് ഉന്നതാധികാര സമിതി അംഗം പ്രിൻസ് ലൂക്കോസിന് നാടിന്‍റെ അന്ത്യാഞ്ജലി. 2021ൽ തെരഞ്ഞെടുപ്പ് പ്രചാരണത്തിനായി വാഹന ഘോഷയാത്രയായി നീങ്ങിയ വഴികളിലൂടെ അനേകം വാഹനങ്ങളുടെ അകമ്പടിയോടെ പ്രിൻസ് ലൂക്കോസിന്‍റെ മൃതദേഹവുമായി വിലാപയാത്ര കടന്നുപോയി. വഴികളിലുടനീളം നൂറുകണക്കിന് ആളുകൾ പ്രിയനേതാവിന് ആദരാഞ്ജലികൾ അർപ്പിച്ചു. തെള്ളകത്തെ സ്വകാര്യ ആശുപത്രി മോർച്ചറിയിൽ സൂക്ഷിച്ചിരുന്ന മൃതദേഹം അവിടെനിന്നു വിലാപയാത്രയായി ആദ്യം ഏറ്റുമാനൂരിലാണ് എത്തിച്ചത്. ഒട്ടേറെ രാഷ്‌ട്രീയ സമ്മേളനങ്ങളിൽ പ്രസംഗിച്ചിട്ടുള്ള പ്രൈവറ്റ് ബസ് സ്റ്റാൻഡ് മൈതാനിയിൽ പ്രത്യേകം തയാറാക്കിയ പന്തലിൽ പൊതുദർശനം. ഏറ്റുമാനൂർ ക്രിസ്തുരാജ പള്ളി വികാരി ഫാ. തോമസ് കുത്തുകല്ലുങ്കൽ, സഹവികാരി ഫാ. ജേക്കബ് ചക്കാത്ര എന്നിവർ പ്രാർഥനകൾക്ക് നേതൃത്വം നൽകി. മന്ത്രി വി.എൻ. വാസവൻ, മോൻസ് ജോസഫ് എംഎൽഎ, ചാണ്ടി ഉമ്മൻ എംഎൽഎ, ഡിസിസി പ്രസിഡന്‍റ് നാട്ടകം സുരേഷ്, പി.സി. തോമസ്, ജോയി ഏബ്രഹാം, അപു ജോൺ ജോസഫ്, സ്റ്റീഫൻ ജോർജ്, ജോണി നെല്ലൂർ, വിവിധ രാഷ്‌ട്രീയ പാർട്ടി നേതാക്കൾ, സാമൂഹ്യ, സാംസ്കാരിക നായകർ ഉൾപ്പെടെ വൻ ജനാവലി അന്തിമോപചാരമർപ്പിച്ചു. അതിരമ്പുഴ പഞ്ചായത്ത് ഓഫീസ് പടിക്കലും സഹകരണ ബാങ്കിനു മുന്നിലും മൃതദേഹം വഹിച്ച വാഹനം നിർത്തി അന്തിമോപചാരമർപ്പിച്ചു. മാർക്കറ്റ് ജംഗ്ഷനിൽ അതിരമ്പുഴ പൗരാവലി ആദരവർപ്പിച്ചു. യൂണിവേഴ്സിറ്റി ജംഗ്ഷൻ, ഗാന്ധിനഗർ, മെഡിക്കൽ കോളജ്, പനമ്പാലം, ചുങ്കം, ദീപിക എന്നിവിടങ്ങളിൽ അന്തിമോപചാരം അർപ്പിച്ച ശേഷം മൃതദേഹം ലോഗോസ് സെന്‍ററിൽ പ്രിൻസിന്‍റെ ഓഫീസിൽ എത്തിച്ചു. തുടർന്ന് കോട്ടയം ബാർ അസോസിയേഷൻ ഹാളിൽ പൊതുദർശനം. ജില്ലാ ആശുപത്രി ജംഗ്ഷനിലും അന്ത്യാഞ്ജലി അർപ്പിച്ച ശേഷം കേരള കോൺഗ്രസ് സംസ്ഥാന കമ്മിറ്റി ഓഫീസിൽ എത്തിയപ്പോൾ പാർട്ടി നേതാക്കളും പ്രവർത്തകരുമടക്കം നൂറു കണക്കിന് ആളുകളാണ് ആദരാഞ്ജലി അർപ്പിച്ചത്. കുമാരനല്ലൂർ, സംക്രാന്തി ജംഗ്ഷനുകളിലും ജനസഞ്ചയം കാത്തുനിന്നിരുന്നു. തുടർന്ന് മൃതദേഹം പാറമ്പുഴ മാമൂട് ജംഗ്ഷനു സമീപമുള്ള ഭവനത്തിൽ എത്തിച്ചു.

തൊഴില്‍ കോഡുകള്‍ തൊഴിലാളിവിരുദ്ധം: മന്ത്രി വി.എന്‍. വാസവന്‍

കോട്ടയം: രാജ്യത്ത് നടപ്പാക്കുന്ന തൊഴില്‍ നിയമഭേദഗതി തൊഴിലാളി വിരുദ്ധമെന്ന് മന്ത്രി വി.എന്‍. വാസവന്‍. വര്‍ഷങ്ങളായി രാജ്യത്തുണ്ടായിരുന്ന തൊഴില്‍നിയമങ്ങള്‍ മാറ്റി തൊഴില്‍ കോഡുകളുടെ രൂപത്തില്‍ വന്നത് തൊഴിലാളികളുടെ ഇടയില്‍ അസന്തുലിതാവസ്ഥ ഉണ്ടാക്കുന്നുവെന്നും അദ്ദേഹം പറഞ്ഞു. കേരള ന്യൂസ് പേപ്പര്‍ എംപ്ലോയീസ് ഫെഡറേഷന്‍ സംസ്ഥാന സമ്മേളനത്തോടനുബന്ധിച്ചു നടന്ന ട്രേഡ് യൂണിയന്‍ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കെഎന്‍ഇഎഫ് സംസ്ഥാന പ്രസിഡന്‍റ് വി.എസ്. ജോണ്‍സണ്‍ അധ്യക്ഷതവഹിച്ചു. എഐടിയുസി സംസ്ഥാന സെക്രട്ടറി ആര്‍. സജിലാല്‍, ബിഎംഎസ് സെന്‍ട്രല്‍ കമ്മിറ്റിയംഗം ഉണ്ണികൃഷ്ണന്‍ ഉണ്ണിത്താന്‍, ബാങ്ക് എംപ്ലോയീസ് ഫെഡറേഷന്‍ ഓഫ് ഇന്ത്യ സംസ്ഥാന പ്രസിഡന്‍റ് എന്‍. സനില്‍ ബാബു എന്നിവര്‍ പ്രസംഗിച്ചു. കെഎന്‍ഇഎഫ് ജനറല്‍ സെക്രട്ടറി ജയിസണ്‍ മാത്യു സ്വാഗതവും ജനറല്‍ കണ്‍വീനര്‍ ജയകുമാര്‍ തിരുനക്കര നന്ദിയും പറഞ്ഞു. സമ്മേളനത്തിനു മുന്നോടിയായി നടന്ന വിളംബര റാലി മുനിസിപ്പല്‍ ചെയര്‍പേഴ്സണ്‍ ബിന്‍സി സെബാസ്റ്റ്യന്‍ ഫ്ലാഗ് ഓഫ് ചെയ്തു. വിവിധ ജില്ലകളിലെ പത്രസ്ഥാപനങ്ങളില്‍ നിന്നെത്തിയ നൂറുകണക്കിനു പ്രവര്‍ത്തകര്‍ റാലിയില്‍ അണിനിരുന്നു. വാദ്യമേളങ്ങളും കലാരൂപങ്ങളും റാലിയെ വര്‍ണാഭമാക്കി. ഇന്ന് രാവിലെ 9.30ന് കെപിഎസ് മേനോന്‍ ഹാളില്‍ പ്രതിനിധിസമ്മേളനം മോന്‍സ് ജോസഫ് എംഎല്‍എ ഉദ്ഘാടനം ചെയ്യും. ദേശാഭിമാനി ജനറല്‍ മാനേജര്‍ കെ.ജെ. തോമസ് മുഖ്യപ്രഭാഷണം നടത്തും. 11ന് പൊതുസമ്മേളനം നിയമസഭാ സ്പീക്കര്‍ എ.എന്‍. ഷംസീര്‍ ഉദ്ഘാടനം ചെയ്യും. സംസ്ഥാന പ്രസിഡന്‍റ് വി.എസ്. ജോണ്‍സണ്‍ അധ്യക്ഷത വഹിക്കും. ഫ്രാന്‍സിസ് ജോര്‍ജ് എംപി, തിരുവഞ്ചൂര്‍ രാധാകൃഷ്ണന്‍ എംഎല്‍എ, സ്വാഗതസംഘം ചെയര്‍മാന്‍ ടി.ആര്‍. രഘുനാഥന്‍, ജനറല്‍ സെക്രട്ടറി ജയിസണ്‍ മാത്യു, എഐഎന്‍ഇഎഫ് ജനറല്‍ സെക്രട്ടറി വി. ബാലഗോപാല്‍, പത്രപ്രവര്‍ത്തക യൂണിയന്‍ സംസ്ഥാന പ്രസിഡന്‍റ് കെ.പി. റെജി, എന്‍ജെപിയു സംസ്ഥാന പ്രസിഡന്‍റ് കെ.എന്‍. ലതാനാഥന്‍, സീനിയര്‍ നോണ്‍ ജേര്‍ണലിസ്റ്റ് അസോസിയേഷന്‍ പ്രസിഡന്‍റ് വര്‍ഗീസ് ചെമ്പോല, സംസ്ഥാന ട്രഷറര്‍ ജമാല്‍ ഫൈറൂസ്, ജയകുമാര്‍ തിരുനക്കര, കോര സി. കുന്നുംപുറം, സിജി ഏബ്രഹാം, ബിജു ആര്‍. തുടങ്ങിയവര്‍ പ്രസംഗിക്കും.

സ്കൂട്ടറിനു പിന്നിൽ ജീപ്പിടിച്ച് വയോധികൻ മരിച്ചു

പാലാ: സ്കൂട്ടറിനു പിന്നിൽ ബൊലേറോ ജീപ്പിടിച്ച് വയോധികൻ മരിച്ചു. വലവൂർ കൊച്ചുവേലിക്കകത്ത് കെ.കെ. നാരായണൻ (73- ബ്ലൂമൂൺ പാലാ) ആണ് മരിച്ചത്. ചൊവ്വാഴ്ച രാവിലെ 10.30 ഓടെ പാലാ കിഴതടിയൂർ ബൈപാസ് ജംഗ്ഷനിലായിരുന്നു അപകടം. തലയ്ക്ക് ഗുരുതരമായി പരിക്കേറ്റ നാരായണനെ പാലാ ജനറൽ ആശുപത്രിയിലും തുടർന്ന് തെള്ളകത്തെ സ്വകാര്യ ആശുപത്രിയിലും എത്തിച്ചെങ്കിലും വൈകിട്ട് മൂന്നുമണിയോടെ മരിക്കുകയായിരുന്നു. മൃതദേഹം തെള്ളകത്തെ ആശുപത്രി മോർച്ചറിയിൽ. ഇന്നു രാവിലെ പോസ്റ്റ്മോട്ടത്തിനുശേഷം മൃതദേഹം ബന്ധുക്കൾക്ക് വിട്ടുകൊടുക്കും. ഉച്ചകഴിഞ്ഞ് വലവൂരിലെ വീട്ടിൽ കൊണ്ടുവരും. സംസ്കാരകർമങ്ങൾ നാളെ രാവിലെ 10-ന് വീട്ടിൽ ആരംഭിച്ച് 11-ന് പാലാ മുനിസിപ്പൽ ശ്മശാനത്തിൽ. ഭാര്യ പരേതയായ ഓമന നാരായണൻ ( തിടനാട് പുന്നശേരിയിൽ കുടുംബാംഗം). മക്കൾ: വിനോദ് നാരായണൻ (ചോയിസ് പാലാ), ബാബു നാരായണൻ (ബിസിനസ്), നിഷ നാരായണൻ (യുഎഇ). മരുമക്കൾ: പ്രീതി വിനോദ്, സ്വപ്ന ബാബു, സുജിത്ത് (യുഎഇ)

കൗമാരക്കാരന്‍റെ കട്ടിലിനടിയിൽനിന്ന് 15 കിലോ കഞ്ചാവ് പിടികൂടി

കടുത്തുരുത്തി: ഓണത്തോടനുബന്ധിച്ചു വില്‍പന നടത്താനെത്തിച്ച 15 ലക്ഷത്തോളം രൂപ വിലവരുന്ന 15.200 കിലോഗ്രാം കഞ്ചാവ് കോട്ടയം എക്‌സൈസ് എന്‍ഫോഴ്സ്മെന്‍റ് ആന്‍ഡ് ആന്‍റി നര്‍ക്കോട്ടിക് സ്‌പെഷല്‍ സ്‌ക്വാഡ് പിടികൂടി. പ്രതിയെ പിടികൂടാന്‍ കഴിഞ്ഞിട്ടില്ല. എക്‌സൈസ് ഇന്‍സ്‌പെക്ടര്‍ പി.ജി. രാജേഷിന്‍റെ നേതൃത്വത്തിലുള്ള സംഘമാണ് കഞ്ചാവ് പിടികൂടിയത്. ആപ്പാഞ്ചിറയിലെ വൈക്കം റോഡ് റെയില്‍വേ സ്റ്റേഷന് സമീപത്തെ വീട്ടില്‍ താമസിക്കുന്ന പ്രായപൂര്‍ത്തിയാകാത്തയാള്‍ കഞ്ചാവ് കച്ചവടം നടത്തുന്നുണ്ടെന്നറിഞ്ഞാണ് കോട്ടയം എക്‌സൈസിന്‍റെ സ്‌പെഷല്‍ സ്‌ക്വാഡ് പരിശോധന നടത്തിയത്. സിവില്‍ എക്‌സൈസ് ഓഫീസര്‍മാരായ അജു ജോസഫ്, അരുണ്‍ ലാല്‍, ദീപക് സോമന്‍, ശ്യാം ശശിധരന്‍ എന്നിവര്‍ നടത്തിയ രഹസ്യ നിരീക്ഷണത്തെത്തുടര്‍ന്നാണ് കഞ്ചാവ് പിടികൂടിയത്. തിങ്കളാഴ്ച കഞ്ചാവിന്‍റെ ഇടപാട് നടക്കാന്‍ സാധ്യതയുണ്ടെന്ന വിവരം ലഭിച്ചതിനെത്തുടര്‍ന്ന് വൈക്കം റെയില്‍വേ സ്റ്റേഷന്‍ ഭാഗത്ത് എക്‌സൈസ് സംഘമെത്തി നിരീക്ഷണം നടത്തി. തുടര്‍ന്ന് സ്പെഷല്‍ സ്‌ക്വാഡ് ഇന്‍സ്‌പെക്ടര്‍ പി.ജി. രാജേഷിന്‍റെ നേതൃത്വത്തില്‍ കൗമാരക്കാരന്‍റെ വീട്ടിലെത്തി മുറി തുറന്നു പരിശോധിച്ചാണ് കട്ടിലിന്‍റെ അടിയില്‍നിന്നു രണ്ട് ചാക്കുകളിലായി ഒളിപ്പിച്ചനിലയില്‍ 15 കിലോയിലധികം കഞ്ചാവ് കണ്ടെടുത്തത്. ഓണത്തോടനുബന്ധിച്ച് എന്‍ഫോഴ്‌സുമെന്‍റ് പ്രവര്‍ത്തനങ്ങള്‍ എക്‌സൈസ് ശക്തിപ്പെടുത്തിയിരുന്നു. നിരവധി കേസുകളില്‍ പ്രതിയാണ് കൗമാരക്കാരനെന്നും എക്‌സൈസ് അറിയിച്ചു.

ഭക്തിയും ആവേശവും നിറച്ച് ഉത്തൃട്ടാതി ഊരുചുറ്റ് വള്ളംകളി

കോട്ടയം: ദേശവഴികളില്‍ ഭക്തിയും ആവേശവും ഒരുപോലെ നിറച്ച് ഉത്തൃട്ടാതി ഊരുചുറ്റ് വള്ളംകളി. ഇന്നലെ രാവിലെ എട്ടിന് ദേവീ ചൈതന്യം സിംഹവാഹനത്തില്‍ ആവാഹിച്ച് കുമാരനല്ലൂര്‍ ക്ഷേത്രനടയില്‍നിന്നു വാദ്യ മേളത്തിന്‍റെയും കരവഞ്ചിയുടെയും അകമ്പടിയോടെ ആറാട്ട്കടവായ പുത്തന്‍കടവിലെത്തി. തുടര്‍ന്ന് സിംഹവാഹനം ക്ഷേത്രത്തില്‍നിന്നു കരവഞ്ചിയായി വഞ്ചിപ്പാട്ടിന്‍റെ അകമ്പടിയോടെ ആറാട്ടുകടവിലെത്തി ചുണ്ടന്‍വള്ളത്തില്‍ പ്രതിഷ്ഠിച്ചു. സിംഹവാഹനവുമായി യാത്രതിരിച്ച പള്ളിയോടം മീനച്ചിലാറിന്‍റെ ഇരുകരകളിലെയും കടവുകളിൽ ഭക്തര്‍ ഒരുക്കിയ പറ വഴിപാട് സ്വീകരിച്ചു വൈകുന്നേരത്തോടെ ആറാട്ടുകടവില്‍ തിരിച്ചെത്തി. തുടര്‍ന്ന് കരവഞ്ചിയോടെ ക്ഷേത്രസന്നിധിയിലെത്തി സിംഹവാഹനം തിരികെ സമര്‍പ്പിച്ചതോടെ ഊരുചുറ്റു വള്ളംകളി സമാപിച്ചു. ശ്രീവിനായക ചുണ്ടനിലായിരുന്നു ഇത്തവണ സിംഹവാഹനം വഹിച്ചത്. കരയോഗങ്ങളുടെ നിരവധി ഓടിവള്ളങ്ങളും ചെറുബോട്ടുകളും ചുണ്ടന്‍വള്ളത്തിനു അകമ്പടി സേവിച്ചു.

ജില്ലയില്‍ വ്യാപക റെയ്ഡ്; ഒമ്പതു കേസുകള്‍ രജിസ്റ്റര്‍ ചെയ്തു

കോട്ടയം: അനധികൃത പണമിടപാടുകരെ പിടികൂടുന്നതിനായി ജില്ലയില്‍ വ്യാപക റെയ്ഡില്‍ ഒമ്പതു കേസുകള്‍ രജിസ്റ്റര്‍ ചെയ്തു. രേഖകളും പണവും പോലീസ് പിടികൂടി. ഗവ. അംഗീകൃത ലൈസന്‍സോ അധികാര പത്രമോ ഇല്ലാതെ പണം അമിതപലിശയ്ക്ക് കൊടുക്കുന്ന അനധികൃത പണം ഇടപാടുകാരെ ലക്ഷ്യമിട്ട് എറണാകുളം റേഞ്ച് ഡിഐജി സതീഷ് ബിനോയുടെ നിര്‍ദേശപ്രകാരം ജില്ലാ പോലീസ് മേധാവി ഷാഹുല്‍ ഹമീദിന്‍റെ നേതൃത്വത്തിലാണ് റെയ്ഡ് നടത്തിയത്. ഗാന്ധിനഗര്‍, കാഞ്ഞിരപ്പള്ളി, തലയോലപ്പറമ്പ്, കിടങ്ങൂര്‍, പാലാ, കോട്ടയം വെസ്റ്റ്, അയര്‍ക്കുന്നം, ചങ്ങനാശേരി, ചിങ്ങവനം സ്റ്റേഷനുകളിലായി നടത്തിയ റെയ്ഡില്‍ നിരവധി തീറാധാരം, ബ്ലാങ്ക് ചെക്കുകള്‍, കാഷ് ചെക്കുകള്‍, ആര്‍സി ബുക്കുകള്‍, വാഹനങ്ങളുടെ സെയിൽ ലെറ്ററുകള്‍, മുദ്രപത്രങ്ങള്‍, റവന്യു സ്റ്റാമ്പ് പതിപ്പിച്ച എഗ്രിമെന്‍റുകള്‍, പാസ്‌പോര്‍ട്ടുകള്‍, വാഹനങ്ങള്‍ എന്നിങ്ങനെ അനധികൃതമായി കൈവശം വച്ചിരുന്ന രേഖകളും ആസ്തികളും പിടിച്ചെടുത്തിട്ടുണ്ട്. ഗാന്ധിനഗര്‍ സ്റ്റേഷന്‍ പരിധിയില്‍ അങ്ങാടിപ്പള്ളി ഓടങ്കല്‍ വീട്ടില്‍ എ. കമാലിന്‍റെ (50) വീട്ടില്‍നിന്നു മാത്രമായി അനധികൃത ഇടപാടുകള്‍ക്കായി സൂക്ഷിച്ച 20,07,400 രൂപയും നിരവധി രേഖകളും ഒരു ഇന്നോവ കാറും നാല് ടൂവീലറുകളും ഗാന്ധിനഗര്‍ പോലീസ് പിടിച്ചെടുത്തു. പന ന്പാലത്ത് തട്ടുകട നടത്തിവന്നിരുന്ന കമാല്‍ ഇതിന്‍റെ മറവിലാണ് പണമിടപാടുകള്‍ നടത്തിയി രുന്നത്. കാഞ്ഞിരപ്പള്ളിയില്‍ വേങ്ങന്താനം കണ്ണാമുണ്ടയില്‍ സജിമോന്‍ തോമസിന്‍റെ വീട്ടില്‍നിന്ന് അനധികൃത ഇടപാടുകള്‍ക്കായി സൂക്ഷിച്ച 93,500 രൂപയും നിരവധി അനധികൃത പണയരേഖകളും കാഞ്ഞിരപ്പള്ളി പോലീസ് പിടിച്ചെടുത്തു. പ്രതികളെ കോടതിയില്‍ ഹാജരാക്കി.

ആടുമാടുകള്‍ക്കും നല്‍കാം, പേവിഷ പ്രതിരോധ കുത്തിവയ്പ്

കോട്ടയം: പേവിഷ ബാധ വരാതിരിക്കാന്‍ പശു, ആട്, എരുമ, പോത്ത് തുടങ്ങിയവയ്ക്കും പ്രതിരോധ വാക്‌സിന്‍ നല്‍കാമെന്നിരിക്കേ തദ്ദേശസ്ഥാപനങ്ങളും മൃഗസംരക്ഷണ വകുപ്പും ജില്ലയില്‍ നടപടിയെടുക്കുന്നില്ല. ജില്ലയില്‍ ഇതോടകം അന്‍പതിലേറെ ആടുമാടുകള്‍ പേ വിഷബാധയില്‍ വിവിധയിടങ്ങളിലായി ചത്തൊടുങ്ങിട്ടുണ്ട്. റബര്‍ത്തോട്ടങ്ങളിലും വനാതിര്‍ത്തിയിലും മേയാന്‍ കെട്ടുകയോ അഴിച്ചുവിടുകയോ ചെയ്യുന്ന ആടുമാടുകളെ നരിയും കുറുക്കനും കടിച്ചാണ് ഏറെയിടങ്ങളിലും പേവിഷ ബാധയുണ്ടായത്. തൊഴുത്തില്‍ ഒന്നിലേറെ ആടുമാടുകളുണ്ടെങ്കില്‍ അവയ്ക്കും വൈറസ് ബാധിക്കാനുള്ള സാധ്യത കൂടുതലാണ്. ഇവയെ പരിപാലിക്കുന്നവര്‍ക്കും പേവിഷ ബാധ സാധ്യത തള്ളിക്കളയാനാവില്ല. പാലക്കാട്, തൃശൂര്‍ ജില്ലകളില്‍ കാലികള്‍ പേ ഇളകി ചത്ത സാഹചര്യത്തില്‍ വിവിധ പഞ്ചായത്തുകളില്‍ മുഴുവന്‍ ആടുമാടുകള്‍ക്കും പ്രതിരോധ വാക്‌സിന്‍ കുത്തിവച്ചിരുന്നു. മേയാന്‍ അഴിച്ചുവിടുന്ന പശുക്കള്‍ക്കും കുത്തിവയ്പ് നല്‍കി. റബര്‍ മേഖലയില്‍ ഒട്ടേറെ തോട്ടങ്ങള്‍ കാടു കയറിയും ടാപ്പിംഗ് മുടങ്ങിയും കിടക്കുന്നതിനാല്‍ ജില്ലയില്‍ നരിയും കുറുക്കനും പെരുകി വളരുകയാണ്. പേവിഷ ബാധ വൈറസുള്ള നരിയും കുറുക്കനും നാട്ടില്‍ വളര്‍ത്തുന്നതും അലഞ്ഞു തിരിയുന്നതുമായ നായകളെ കടിക്കുന്നത് പതിവാണ്. പേയിളകിയാല്‍ നായയും നരിയും നാല്‍പതു കിലോമീറ്റര്‍വരെ ഓടി മനുഷ്യരെയും മൃഗങ്ങളെയും കടിക്കാറുണ്ട്. കേരളത്തില്‍ വിവിധയിടങ്ങളില്‍ നാട്ടാനകള്‍ ചരിഞ്ഞപ്പോള്‍ പോസ്റ്റ്‌മോര്‍ട്ടം പരിശോധനയില്‍ റാബിസ് കണ്ടെത്തിയ അപൂര്‍വം സംഭവവുമുണ്ട്. മരങ്ങളില്‍ തളയ്ക്കുന്ന ആനയെ രാത്രി നായോ നരിയോ കടിച്ചാണ് റാബിസ് ബാധയുണ്ടായത്. പലയിടങ്ങളിലും മാര്‍ക്കറ്റുകളിലേക്കും വഴിയോരങ്ങളിലേക്കും മേയാന്‍ പശുക്കളെയും ആടുകളെയും ഉടമകള്‍ അഴിച്ചുവിടാറുണ്ട്. കുറുനരികള്‍ക്ക് പ്രതിരോധ ശേഷി കൂടുതലായതിനാല്‍ പേ ബാധിച്ചാലും ഉടനെ ചത്തുവീഴില്ല. ഇങ്ങനെയുള്ളവയാണ് റാബിസ് വൈറസിന്‍റെ പ്രധാന വാഹകര്‍. നായയും നരിയും മൃഗങ്ങളെ മാത്രമല്ല മനുഷ്യരെയും പൂച്ച, കോഴി, മുയല്‍ തുടങ്ങിയവയെയും ആക്രമിക്കാറുണ്ട്. നെടുങ്കുന്നം, കടുത്തുരുത്തി, വെള്ളാവൂര്‍, തലയോലപ്പറമ്പ്, വൈക്കം പഞ്ചായത്തുകളില്‍ അടുത്തയിടെ പേയിളകി പശുക്കള്‍ ചത്തൊടുങ്ങിയതോടെ കര്‍ഷകര്‍ വലിയ ആശങ്കയിലാണ്. പാല്‍, മാസം എന്നിവ തിളപ്പിച്ച് ഉപയോഗിച്ചാല്‍ പ്രശ്‌നമില്ലെങ്കിലും ഇവയെ കറന്നെടുക്കാനും കശാപ്പുചെയ്യാനും ഭയപ്പെടേണ്ട സാഹചര്യമുണ്ട്. അറവുശാലകളില്‍ എത്തിക്കുന്ന മാടുകള്‍ക്ക് രോഗബാധയുണ്ടോ എന്നറിയാല്‍ നിലവില്‍ സംവിധാനമില്ല. പശു, എരുമ എന്നിവ ചത്താല്‍ അവയെ മറവു ചെയ്യാൻ കഷ്ടപ്പാടും ചെലവും ഏറെയാണ്.

‍മാലിന്യംതള്ളൽ: കാലുകുത്താനാവാതെ മണ്ണാറക്കയം-കറിപ്ലാവ്-പട്ടിമറ്റം റോഡ്

കാഞ്ഞിരപ്പള്ളി: മണ്ണാറക്കയം-പട്ടിമറ്റം റോഡില്‍ മാലിന്യംതള്ളൽ രൂക്ഷമായതായി പരാതി. മണ്ണാറക്കയം-കറിപ്ലാവ്-പട്ടിമറ്റം റോഡില്‍ കറിപ്ലാവ് ഭാഗത്ത് പാതയോരത്താണ് ചാക്കില്‍കെട്ടി മാലിന്യങ്ങള്‍ തള്ളിയിരിക്കുന്നത്. റോഡിന്‍റെ ഇരുവശങ്ങളിലുമായി മാലിന്യങ്ങള്‍ തള്ളിയ നിലയിലാണ്. നിരവധി വാഹനങ്ങളും കാല്‍നടയാത്രക്കാരും കടന്നുപോകുന്ന റോഡില്‍ മാലിന്യങ്ങള്‍ കിടക്കുന്നത് യാത്രക്കാര്‍ക്കും ബുദ്ധിമുട്ട് സൃഷ്ടിക്കുന്നു. മാലിന്യങ്ങളുടെ ദുർഗന്ധം മൂലം കാൽനടയാത്രക്കാർ മൂക്കുംപൊത്തി നടക്കേണ്ട സ്ഥിതിയാണുള്ളത്. മുമ്പും ഈ റോഡിൽ മാലിന്യംതള്ളൽ രൂക്ഷമായിരുന്നു. രാത്രികാലങ്ങളിൽ വാഹനങ്ങളിൽ വന്നാണ് മാലിന്യം തള്ളുന്നതെന്ന് നാട്ടുകാർ ആരോപിച്ചു. കാഞ്ഞിരപ്പള്ളി ടൗണില്‍ ഗതാഗതക്കുരുക്കുണ്ടാകുമ്പോള്‍ എരുമേലി റോഡില്‍ പ്രവേശിക്കുന്നതിനായി ബൈപാസായി ഉപയോഗിക്കുന്ന റോഡാണിത്. മുന്പ് ഇവിടെ മാലിന്യംതള്ളലിനെതിരേ പഞ്ചായത്ത് നടപടി സ്വീകരിച്ചിരുന്നതായി പഞ്ചായത്ത് പ്രസിഡന്‍റ് കെ.ആര്‍. തങ്കപ്പന്‍ പറഞ്ഞു. മാലിന്യം നീക്കി ശുചിയാക്കി മാലിന്യം തള്ളുന്നവര്‍ക്കെതിരേ താക്കീത് നല്‍കിയിരുന്നതാണ്. നിലവിലുള്ള മാലിന്യങ്ങള്‍ പഞ്ചായത്ത് നീക്കം ചെയ്ത് മാലിന്യം ഇടരുതെന്ന് കാണിച്ച് ബോര്‍ഡ് സ്ഥാപിക്കുമെന്നും കെ.ആര്‍. തങ്കപ്പന്‍ പറഞ്ഞു. മാലിന്യംതള്ളുന്നവർക്കെതിരേ കടുത്ത നടപടി സ്വീകരിക്കണമെന്നും അല്ലാത്തപക്ഷം മാലിന്യങ്ങൾ തള്ളുന്നത് ഇനിയും വ്യാപകമാകുമെന്നും നാട്ടുകാർ പറഞ്ഞു. ഇത്തരം സ്ഥലങ്ങളില്‍ നിരീക്ഷണ കാമറകള്‍ സ്ഥാപിച്ച് കുറ്റക്കാരെ കണ്ടെത്തി നടപടി സ്വീകരിക്കണമെന്ന ആവശ്യവും ഇതോടൊപ്പം ശക്തമായിരിക്കുകയാണ്.

അങ്കണവാടികളിൽ ബിരിയാണി വിതരണം

പൊൻകുന്നം: അങ്കണവാടികളിലെ ഉച്ചഭക്ഷണം പുനഃക്രമീകരിക്കുന്നതിന്‍റെ ഭാഗമായി കുട്ടികൾക്ക് ബിരിയാണി വിതരണം ചെയ്തു തുടങ്ങി. ചിറക്കടവ് പഞ്ചായത്തുതല ഉദ്ഘാടനം പ്രസിഡന്‍റ് സി.ആർ. ശ്രീകുമാർ നടത്തി. വൈസ് പ്രസിഡന്‍റ് സതി സുരേന്ദ്രൻ, സ്ഥിരംസമിതി അധ്യക്ഷരായ സുമേഷ് ആൻഡ്രൂസ്, എൻ.ടി. ശോഭന, ഐസിഡിഎസ് സൂപ്പർവൈസർ കെ. അശ്വതി, ജോയി വയലുങ്കൽ തുടങ്ങിയവർ പങ്കെടുത്തു. എലിക്കുളം പഞ്ചായത്തിലെ അങ്കണവാടികളിലും ബിരിയാണി വിതരണം തുടങ്ങി. പനമറ്റം അങ്കണവാടിയിൽ പഞ്ചായത്തംഗം എസ്. ഷാജി ബിരിയാണി വിതരണം ഉദ്ഘാടനം ചെയ്തു. മുണ്ടക്കയം: അങ്കണവാടി കുട്ടികൾക്ക് ബിരിയാണി ഒരുക്കി മുണ്ടക്കയം പഞ്ചായത്ത്. പഞ്ചായത്തിലെ മുഴുവൻ അങ്കണവാടികളിലും ചൊവ്വ, വ്യാഴം ദിവസങ്ങളിലാണ് കുട്ടികൾക്ക് ബിരിയാണി വിതരണം ചെയ്യുന്നത്. ‌പഞ്ചായത്തുതല ഉദ്ഘാടനം കുളമാക്കൽ അങ്കണവാടിയിൽ പ്രസിഡന്‍റ് രേഖാ ദാസ് നിർവഹിച്ചു. വൈസ് പ്രസിഡന്‍റ് ഷീലമ്മ ഡൊമിനിക്, സ്റ്റാൻഡിംഗ് കമ്മിറ്റി ചെയർമാൻ സി.വി. അനിൽകുമാർ, പഞ്ചായത്തംഗം ദിലീഷ് ദിവാകരൻ, അങ്കണവാടി ജീവനക്കാരായ ലീലാമ്മ, അജിമോൾ എന്നിവർ പ്രസംഗിച്ചു.

ജൂബിലി നിറവിൽ അവർ ഒന്നുചേർന്നു

കാഞ്ഞിരപ്പള്ളി: കാഞ്ഞിരപ്പള്ളി രൂപത ഫാമിലി അപ്പൊസ്തലേറ്റിന്‍റെ നേതൃത്വത്തില്‍ വിവാഹത്തിന്‍റെ സുവര്‍ണ ജൂബിലി ആഘോഷിക്കുന്നവരുടെ സംഗമം തണല്‍ 2k25 വേറിട്ട അനുഭവമായി. സംഗമത്തോടനുബന്ധിച്ച് പൊടിമറ്റം സെന്‍റ് മേരീസ് പള്ളിയില്‍ രൂപത സിഞ്ചെല്ലൂസ് റവ.ഡോ. സെബാസ്റ്റ്യന്‍ കൊല്ലംകുന്നേല്‍ വിശുദ്ധ കുര്‍ബാന അര്‍പ്പിച്ചു. തുടര്‍ന്നു നടന്ന പൊതുസമ്മേളനം ബിഷപ് മാർ ജോസ് പുളിക്കൽ ഉദ്ഘാടനം ചെയ്തു. വാര്‍ധക്യം അനുഗ്രഹമാണെന്നും സ്വര്‍ഗത്തിനായി സുകൃതങ്ങള്‍ ശേഖരിക്കാനുള്ള അവസരമായി അതിനെ അംഗീകരിക്കണമെന്നും അദ്ദേഹം ഉദ്‌ബോധിപ്പിച്ചു. മാതൃവേദി രൂപത പ്രസിഡന്‍റ് ജിജി ജേക്കബ് പുളിയംകുന്നേല്‍ അധ്യക്ഷത വഹിച്ചു. ഫാ. തോമസ് കപ്പിയാങ്കല്‍, സിസ്റ്റർ അന്ന മരിയ സിഎംസി എന്നിവര്‍ പ്രസംഗിച്ചു. മണിമലക്കുന്നേല്‍ ഫിലിപ്പ്-റോസമ്മ ദമ്പതികള്‍ അനുഭവങ്ങള്‍ പങ്കുവച്ചു. ജൂബിലി ആഘോഷിക്കുന്നവർക്ക് മെമന്‍റോയും സമ്മാനങ്ങളും നല്‍കി. ഫാമിലി അപ്പൊസ്തലേറ്റ് ഡയറക്ടര്‍ ഫാ. മാത്യു ഓലിക്കല്‍, അനിമേറ്റര്‍ സിസ്റ്റർ റോസ്മി എസ്എബിഎസ്‌, ബ്രദര്‍ കെവിന്‍, മാതൃവേദി ഭാരവാഹികള്‍ തുടങ്ങിയവർ നേതൃത്വം നല്‍കി.

മികച്ച അധ്യാപകനായി വി.പി. സജിമോൻ

കോരുത്തോട്: സംസ്ഥാനത്തെ മികച്ച അധ്യാപകനെന്ന നേട്ടം കൈവരിച്ച് കോരുത്തോട് സികെഎം ഹയർ സെക്കൻഡറി സ്കൂളിലെ വി.പി. സജിമോൻ. സംസ്ഥാനത്തെ അഞ്ച് മികച്ച യുപി സ്കൂൾ അധ്യാപകരിൽ ഒരാളായാണ് വി.പി. സജിമോനെ തെരഞ്ഞെടുത്തത്. ഇടുക്കി ഉപ്പുതോട് വീരൻമലയിൽ പീതാംബരന്‍റെയും സുമതിയുടെയും മകനായ സജിമോൻ കഴിഞ്ഞ 21 വർഷമായി കോരുത്തോട് സികെഎം ഹയർ സെക്കൻഡറി സ്കൂളിലെ കായികാധ്യാപകനാണ്. ഒളിംപിക്സിൽ പങ്കെടുത്ത അനിൽഡാ തോമസ്, ഏഷ്യൻ ഗെയിംസിന്‍റെ ഭാഗമായ ജെനിമോൾ ജോയി തുടങ്ങി നിരവധി പേർ ഇദ്ദേഹത്തിന്‍റെ ശിഷ്യരാണ്. 2017 വരെ കോരുത്തോട് സികെഎം ഹയർ സെക്കൻഡറി സ്കൂളിനെ കോട്ടയം ജില്ലാ ചാന്പ്യന്മാരായി നിലനിർത്തിയത് ഇദ്ദേഹത്തിന്‍റെ പരിശ്രമ ഫലമായാണ്.

ജൂബിലി തീർഥാടനം

പൊൻകുന്നം: 2025 ജൂബിലി വർഷത്തോടനുബന്ധിച്ച് സീറോമലബാർ മേജർ ആർക്കി എപ്പിസ്കോപ്പൽ തീർഥാടന കേന്ദ്രമായ കാഞ്ഞിരപ്പള്ളി പഴയപള്ളിയിലേക്ക് പൊൻകുന്നം തിരുക്കുടുംബ ഫൊറോന പള്ളിയിൽനിന്ന് മിശിഹായുടെ മനുഷ്യാവതാര ജൂബിലി തീർഥാടനം നടത്തി. വികാരി ഫാ. തോമസ് പൂവത്താനിക്കുന്നേൽ, അസിസ്റ്റന്‍റ് വികാരി ഫാ. തോമസ് ചേനപ്പുരയ്ക്കൽ എന്നിവരുടെ നേതൃത്വത്തിൽ കുടുംബ കൂട്ടായ്‌മ ലീഡേഴ്സ‌്, സിവൈഎംഎ, പിതൃവേദി, മാതൃവേദി എന്നീ ഭക്തസംഘടനകളുടെ സഹകരണത്തോടെയാണ് തീർഥാടനം നടത്തിയത്. ഇടവകയിൽനിന്ന് ആയിരത്തിൽപരം വിശ്വാസികൾ പങ്കെടുത്തു. പഴയപള്ളിയിൽ അവസാനിച്ച തീർഥാടന യാത്രയിൽ രൂപതാധ്യക്ഷൻ മാർ ജോസ് പുളിക്കൽ സമാപന സന്ദേശവും ആശീർവാദവും നൽകി.

ഒടുവിൽ നടപ്പാലം നടപ്പാകുന്നു

മുക്കൂട്ടുതറ: പ്രളയത്തിന്‍റെ കെടുതികളിൽ മറുകരയെത്താനാവാതെ ദിവസങ്ങളോളം നാട്ടുകാർ വിഷമിച്ച ഇടകടത്തിയിലെ അറയാഞ്ഞിലിമണ്ണിലും തൊട്ടടുത്ത കുരുമ്പൻമൂഴിയിലും ഇനി ആശ്രയമായി നടപ്പാലമുണ്ടാകും. പാലങ്ങളുടെ നിർമാണോദ്ഘാടനം നാളെ ഉച്ചകഴിഞ്ഞ് മൂന്നിനു പട്ടികജാതി-പട്ടികവർഗ വികസനമന്ത്രി ഒ.ആർ. കേളു നിർവഹിക്കും. സ്റ്റീൽ പാലങ്ങൾ സ്റ്റീൽ പാലങ്ങളാണ് രണ്ടിടത്തും നിർമിക്കുക. 2.68 കോടി രൂപയാണ് അറയാഞ്ഞിലിമണ്ണിലേക്കുള്ള പാലത്തിനു ചെലവഴിക്കുക. കേരള സ്റ്റേറ്റ് കൺസ്ട്രക്‌ഷൻ കോർപറേഷനാണ് നിർമാണച്ചുമതല. 3.97കോടി രൂപ ചെലവഴിച്ചു നിർമിക്കുന്ന കുരുമ്പൻമൂഴി പാലത്തിന്‍റെ നിർമാണം പൊതുമേഖലാ സ്ഥാപനമായ സ്റ്റീൽ ഇൻഡസ്ട്രീസ് ലിമിറ്റഡ് കേരളയാണ് ഏറ്റെടുത്തിരിക്കുന്നത്. എട്ടു മാസത്തിനുള്ളിൽ ഇരു പാലങ്ങളുടെയും നിർമാണം ഒരുപോലെ പൂർത്തീകരിക്കാൻ സാധിക്കുമെന്നാണ് ഉദ്യോഗസ്ഥർ അറിയിച്ചിരിക്കുന്നതെന്ന് പ്രമോദ് നാരായൺ എംഎൽഎ പറഞ്ഞു. വെള്ളത്തിൽ മുങ്ങുന്ന കോസ്‌വേ അറയാഞ്ഞിലിമണ്ണിലും കുരുമ്പൻമൂഴിയിലും പതിറ്റാണ്ടുകൾക്ക് മുമ്പ് ജനകീയ പങ്കാളിത്തത്തോടെ നിർമിച്ച ഉയരം കുറഞ്ഞ ഇടുങ്ങിയ കോസ്‌വേ പാലം മാത്രമാണ് ഈ പ്രദേശത്തേക്കുള്ള ഗതാഗത മാർഗം. അറയാഞ്ഞിലിമണ്ണിൽ പഴയ തൂക്കുപാലം വെള്ളപ്പൊക്കത്തിൽ തകർന്നുപോയ ശേഷം ജില്ലാ പഞ്ചായത്ത്‌ നിർമിച്ച നടപ്പാലം 2018ലെ മഹാപ്രളയത്തിൽ ഒലിച്ചുപോയിരുന്നു. പ്രളയത്തിനു ശേഷം കോസ്‌വേ പാലങ്ങളും ദുർബലമായി. പ്രളയത്തിൽ വൻ തോതിൽ മണൽ അടിഞ്ഞതു മൂലം മഴ പെയ്താൽ കുരുമ്പൻമൂഴിയിലെ കോസ്‌വേ പാലം വെള്ളത്തിൽ മുങ്ങുന്ന സ്ഥിതിയായിരുന്നു. ഇഴഞ്ഞിഴഞ്ഞ് യാത്ര വഴിമുട്ടിയതോടെ നാട്ടുകാർ പിരിവെടുത്ത് അറയാഞ്ഞിലിമണ്ണിൽ നടപ്പാലം നിർമിക്കാനൊരുങ്ങി. ഇതിനിടെ, സർക്കാർതന്നെ പാലം നിർമിക്കാൻ പദ്ധതിയിട്ടു. ഇതോടെ നാട്ടുകാർ പാലം നിർമാണം ഉപേക്ഷിച്ചു. എന്നാൽ, സർക്കാർ പദ്ധതി അനിശ്ചിതമായി നീണ്ടു. വീണ്ടും ജനരോഷമുയർന്നു. അനുമതികൾ വേഗത്തിലാക്കി നിർമാണത്തിലേക്ക് എത്തുകയായിരുന്നു. സ്റ്റീൽ നിർമിത പാലങ്ങൾ പൂർത്തിയാകുന്നതോടെ പ്രദേശങ്ങൾക്ക് വലിയ ആശ്വാസമാകും.

അസീസി ധ്യാനകേന്ദ്രം സുവര്‍ണ ജൂബിലി നിറവില്‍

പാലാ: ദൈവദാസന്‍ ഫാ. ആര്‍മണ്ട് മാധവത്തിനാല്‍ സ്ഥാപിതമായി, 1976 സെപ്റ്റംബര്‍ അഞ്ചിന് മലയാളത്തില്‍ ധ്യാനം നടന്ന ഭരണങ്ങാനം അസീസി ധ്യാനകേന്ദ്രം അമ്പതാം വര്‍ഷത്തിലേക്കു പ്രവേശിക്കുന്നു. ഒരു വര്‍ഷം നീണ്ടുനില്‍ക്കുന്ന സുവര്‍ണ ജൂബിലി ആഘോഷങ്ങളുടെ ഉദ്ഘാടനം സെന്‍റ് ജോസഫ്‌സ് പ്രൊവിന്‍സ് പ്രൊവിന്‍ഷ്യല്‍ ഫാ. ജോര്‍ജ് ആന്‍റണി കപ്പൂച്ചിന്‍ നിർവഹിച്ചു. ധ്യാനകേന്ദ്രം ഡയറക്ടര്‍ ഫാ. തോമസ് കാഞ്ഞിരക്കോണം, മുന്‍ ഡയറക്ടര്‍മാര്‍, സഹശുശ്രൂഷകര്‍ എന്നിവര്‍ പങ്കെടുത്തു.

വൈദ്യുതി ചാര്‍ജിംഗ് സ്റ്റേഷന്‍ കാടുകയറി

പാലാ: പാലാ-തൊടുപുഴ റോഡില്‍ മുണ്ടാങ്കല്‍ ജംഗ്ഷന് സമീപം പാലാ നഗരസഭാ അതിര്‍ത്തിയിലുള്ള വൈദ്യുതി പോസ്റ്റില്‍ സ്ഥാപിച്ചിരിക്കുന്ന ചാര്‍ജിംഗ് സ്റ്റേഷൻ കാടുകയറിയ നിലയിൽ. ഇതിന്‍റെ പരിസരവും കാടുകയറിക്കിടക്കുകയാണ്. വാഹനങ്ങള്‍ ചാര്‍ജ് ചെയ്യാന്‍ പറ്റാത്ത സാഹചര്യമാണ് ഇപ്പോഴുള്ളത്. ഇലക്‌ട്രിക് വാഹനം ഉപയോഗിക്കുന്നവരുടെ എണ്ണം വര്‍ധിച്ചതോടെ പൊതു ചാര്‍ജിംഗ് സ്റ്റേഷനുകളുടെ കുറവ് പരിഹരിക്കുന്നതിനുവേണ്ടിയാണ് കെഎസ്ഇബി ചാര്‍ജിംഗ് പോയിന്‍റ് സ്ഥാപിച്ചത്. കാട് വെട്ടിത്തെളിച്ച് ചാര്‍ജിംഗ് പോയിന്‍റ് ജനങ്ങള്‍ക്ക് ഉപകരിക്കുന്ന വിധത്തില്‍ ക്രമീകരിക്കാനുള്ള നടപടികള്‍ അധികൃതരുടെ ഭാഗത്തുനിന്നുണ്ടാവണമെന്നാണ് ആവശ്യമുയരുന്നത്.

മാവടിയിൽ റോഡ് ഇടിഞ്ഞു; വാഹനങ്ങൾക്കു ഭീഷണി

തീക്കോയി: ഈരാറ്റുപേട്ട-വാഗമൺ റോഡിലെ മാവടിയിൽ സംരക്ഷണഭിത്തി ഇടിഞ്ഞ് റോഡ് അപകടാവസ്ഥയിൽ. മാവടി ബസ് കാത്തിരിപ്പുകേന്ദ്രത്തിനു സമീപത്തെ വളവിലെ സംരക്ഷണഭിത്തിയാണ് ഇടിഞ്ഞത്. റോഡിന്‍റെ ടാറിംഗിനോടു ചേർന്നുവരെ ഇടിഞ്ഞതോടെ വാഹനങ്ങൾ അപകടത്തിൽപ്പെടാൻ സാധ്യതയേറെയാണ്. ശ്രദ്ധ അല്പം പാളിയാൽ കാൽനടയാത്രക്കാരും ഇരുചക്ര വാഹനയാത്രക്കാരും 20 അടിയോളം താഴ്ചയിലേക്കു വീഴും. വളവിലെ അപകടം റോഡ് നവീകരണം നടത്തിയപ്പോൾ സംരക്ഷണഭിത്തി സുരക്ഷിതമാക്കാത്തതാണ് ഇപ്പോഴത്തെ സ്ഥിതിക്കു കാരണമെന്നു നാട്ടുകാർ പറയുന്നു. കഴിഞ്ഞ കാലവർഷത്തിലുണ്ടായ ശക്തമായ വെള്ളമൊഴുക്കിൽ സംരക്ഷണഭിത്തി കൂടുതൽ ദുർബലമായി. വളവിനോടു ചേർന്നാണ് സംരക്ഷഭിത്തി ഇടിഞ്ഞത് അപകടസാധ്യത കൂട്ടുന്നു. ഈ അപകടാവസ്ഥയിലും ഭാരവാഹനങ്ങൾ അടക്കം ഇതുവഴി കടന്നുപോകുന്നുണ്ട്. ഓണക്കാലത്ത് വാഗമണിലേക്ക് ആയിരക്കണക്കിനു വാഹനങ്ങളാണ് എത്തിയത്. മിക്കവരും സ്ഥലപരിചയമില്ലാത്ത ഡൈവർമാരാണെങ്കിലും അപകടങ്ങൾ ഒന്നും ഉണ്ടായില്ലെന്ന ആശ്വാസത്തിലാണ് നാട്ടുകാർ. അടിയന്തരമായി മുന്നറിയിപ്പ് ബോർഡെങ്കിലും സ്ഥാപിക്കാൻ അധികാരികൾ തയാറാകണം. തീക്കോയി പഞ്ചായത്തംഗം പി.എസ്. രതീഷിന്‍റെ നിർദേശപ്രകാരം ഈരാറ്റുപേട്ട പൊതുമരാമത്ത് വകുപ്പ് റോഡ് വിഭാഗം എഇ വി.കെ. രാഗേഷ് സ്ഥലം സന്ദർശിച്ചു. അടുത്ത ദിവസം തന്നെ സൂചനാ ബോർഡും താത്കാലിക സുരക്ഷാവേലിയും നിർമിക്കുമെന്നും തുടർന്നു നടപടിക്രമം പൂർത്തിയാക്കി സ്ഥിരം സംവിധാനം ഒരുക്കമെന്നും എഇ പറഞ്ഞു.

പാലാ സെന്‍റ് തോമസ് ഓട്ടോണമസ് കോളജില്‍ മൂന്നു പുതിയ ലാബുകള്‍

പാലാ: സെന്‍റ് തോമസ് ഓട്ടോണമസ് കോളജില്‍ പുതിയ മൂന്ന് ലാബുകള്‍ പ്രവര്‍ത്തനം ആരംഭിച്ചു. സൈക്കോളജി, ഫുഡ് സയന്‍സ്, കംപ്യൂട്ടര്‍ എന്നീ ലാബുകളാണ് പുതിയതായി പണികഴിപ്പിച്ചത്. അറുപത് കംപ്യൂട്ടറുകള്‍ ഉള്‍ക്കൊള്ളുന്നതും പൂര്‍ണമായി ശീതീകരിച്ചതുമായ ലാബ് 45 ലക്ഷത്തോളം രൂപ ചെലവഴിച്ചാണ് പൂര്‍ത്തിയാക്കിയത്. ലാബുകളുടെ ഉദ്ഘാടനവും വെഞ്ചരിപ്പുകര്‍മവും ബിഷപ് മാര്‍ ജോസഫ് കല്ലറങ്ങാട്ട് നിര്‍വഹിച്ചു. ഓട്ടോണമസ് പദവി കരസ്ഥമാക്കിയതിനു ശേഷമുള്ള കോളജിന്‍റെ വളര്‍ച്ചയുടെ ശ്രദ്ധേയമായ ചുവടുവയ്പുകളിലൊന്നാണ് ഈ സംരംഭമെന്ന് ബിഷപ് പറഞ്ഞു. കോളജ് മാനേജരും പാലാ രൂപത മുഖ്യ വികാരി ജനറാളുമായ മോണ്‍. ജോസഫ് തടത്തില്‍, പ്രിന്‍സിപ്പല്‍ ഡോ. സിബി ജയിംസ്, വൈസ് പ്രിന്‍സിപ്പല്‍ റവ. ഡോ. സാല്‍വിന്‍ തോമസ് കാപ്പിലിപ്പറമ്പില്‍, ബര്‍സാര്‍ ഫാ. മാത്യു ആലപ്പാട്ടുമേടയില്‍, അക്കാഡമിക് ഡീന്‍ ഡോ. കെ.സി. ബിജു, പരീക്ഷാ കണ്‍ട്രോളര്‍ ഡോ. റ്റോജി തോമസ്, ഐക്യുഎസി കോ-ഓര്‍ഡിനേറ്റര്‍ ഡോ. തോമസ് വി. മാത്യു എന്നിവര്‍ പ്രസംഗിച്ചു.

അശാസ്ത്രീയതയുടെ എസി റോഡ്

ചമ്പക്കുളം: ആലപ്പുഴയിലെ കളർകോടുനിന്ന് ആരംഭിച്ച് ചങ്ങനാശേരി-പെരുന്നയിൽ അവസാനിക്കുന്ന, ദേശീയ പാതയെയും എംസി റോഡിനെയും ബന്ധിപ്പിക്കുന്ന എസി റോഡ് അതിന്‍റെ പുനർനിർമാണ സമയത്ത് ഏറെ വിവാദത്തിലായിരുന്നു. റോഡ് നിർമാണ ശൈലിക്കെതിരേ ജനരോഷവും ഇരമ്പിയിരുന്നു. എന്നാൽ, അവയെല്ലാം ബധിരകർണങ്ങളിലാണ് പതിച്ചത്. കുട്ടനാടിന്‍റെ ഭൂപ്രകൃതിക്ക് ഒട്ടും അനുയോജ്യമല്ലാത്ത നിർമാണ രീതിയാണ് ഇവിടെ അവലംബിച്ചതെന്ന പരാതി അരക്കിട്ട് ഉറപ്പിക്കുന്നതാണ് എസി റോഡിന്‍റെ നിലവിലെ സ്ഥിതി. പാർക്കിംഗ്? റോഡ് നിർമാണം ഏകദേശം പൂർത്തിയായിരിക്കുമ്പോൾ റോഡിന്‍റെ പാർശ്വങ്ങളിൽ പാർക്കിംഗ് സൗകര്യങ്ങൾ തീരെയില്ലാത്തത് അനധികൃത പാർക്കിംഗിന് വഴിവയ്ക്കുകയും അതുവഴി നിരവധി അപകടങ്ങൾ ദിവസേന സംഭവിക്കുന്നതിനു കാരണമാകുന്നു. റോഡ് പുനർനിർമിക്കുന്നതിനു മുന്പ് റോഡിന്‍റെ ഇരുവശങ്ങളിലും ആവശ്യത്തിനു പാർക്കിംഗ് സൗകര്യം ഉണ്ടായിരുന്നത് റോഡ് നിർമാണത്തോടെ ഇല്ലാതായി. റോഡിന്‍റെ ഇരുവശങ്ങളിലും റോഡിനേക്കാൾ ഉയരത്തിൽ ഓടയും നടപ്പാതയും നിർമിച്ചതാണ് പാർക്കിംഗ് ഇത്ര ദുഷ്കരമാക്കിയത്. ഇത് പലപ്പോഴും റോഡിൽത്തന്നെ വാഹനങ്ങൾ പാർക്ക് ചെയ്യാൻ ആളുകളെ നിർബന്ധിതരാക്കുന്നു. റോഡിന്‍റെ വശത്തുള്ള വീടുകളിലും ഓഡിറ്റോറിയങ്ങളിലും മരണം, വിവാഹം തുടങ്ങിയ എന്തെങ്കിലും വിശേഷങ്ങൾ ഉണ്ടായാൽ വാഹനങ്ങളുടെ നീണ്ടനിര തന്നെയാണ് റോഡിൽ കാണാനാകുക. പാർക്കിംഗ് കൂടി റോഡിലാക്കാൻ സാധിച്ചുവെന്നതാണ് പുതിയ റോഡ് നിർമാണം കൊണ്ട് സാധിതമായത്. ഓടകൾ നോക്കുകുത്തി റോഡിന് വശത്ത് എസി കനാൽ ഉണ്ടെങ്കിലും ഇരുവശത്തും റോഡിനേക്കാൾ ഉയരത്തിൽ നടപ്പാതയും ഓടയും നിർമിച്ചിട്ടുണ്ട്. എന്നാൽ, മഴ പെയ്താൽ വെള്ളം ഒഴുകിപ്പോകാതെ മിക്കയിടത്തും റോഡിൽത്തന്നെ കെട്ടിക്കിടക്കുന്നത് ഇരുചക്രവാഹനക്കാർക്കും കാൽനടക്കാർക്കും ദുരിതം വിതയ്ക്കുന്നു. വാഹനങ്ങൾ പോകുമ്പോൾ കാൽനടയാത്രക്കാരുടെമേൽ വെള്ളം തെറിക്കുന്നതിനും ഇതു കാരണമാകുന്നുണ്ട്. അപ്രതീക്ഷിതമായി വെള്ളത്തിൽ ഇറങ്ങുന്ന ഇരുചക്ര വാഹനങ്ങൾ പലപ്പോഴും അപകടത്തിൽപ്പെടാറുമുണ്ട്. റോഡിൽനിന്നു വെള്ളമൊഴുകി ഓടയിലേക്കു പോകാൻ നിർമിച്ചിരിക്കുന്ന വശങ്ങളിൽ സ്ഥാപിച്ച ദ്വാരങ്ങൾ പലതും റോഡിനെക്കാൾ ഉയർന്നാണ് നില്ക്കുന്നത്. അതിനാൽ മഴ പെയ്താൽ മണിക്കൂറുകളോളം (ചിലപ്പോൾ ദിവസങ്ങൾ) റോഡിൽനിന്ന് വെള്ളം ഒഴുകി മാറാറില്ല. കരാർ കമ്പനിയുടെ തൊഴിലാളികൾ പല ദിവസങ്ങളിലും ഓടയിലേക്ക് വെള്ളം ഒഴുക്കിവിടുന്ന ജോലിയിൽ ഏർപ്പെടുന്നത് ഈ റോഡിലെ സ്ഥിരം കാഴ്ചയാണ്. ഇത്ര വിശാലമായ കനാൽ റോഡിനോടു ചേർന്നുള്ളപ്പോൾ റോഡിന്‍റെ ഇരുവശങ്ങളും ഉയർത്തി ഓട നിർമിച്ചതിന്‍റെ സാങ്കേതികത ഓർത്ത് അദ്ഭുതപ്പെടുകയാണ് നാട്ടുകാർ. വഴിയോര കച്ചവടക്കാരുടെ കൈയേറ്റം റോഡിന്‍റെ വശങ്ങളിൽ നിർമിച്ചിരിക്കുന്ന നടപ്പാത മിക്കയിടത്തും വഴിയോരക്കച്ചവടക്കാർ കൈയടക്കിയിരിക്കുന്നതിനാൽ കാൽനടക്കാർ റോഡിലിറങ്ങി നടക്കുന്നു. ഇതുമൂലമുണ്ടായ അപകടങ്ങളും ഈ റോഡിൽ നിരവധിയാണ്. കിടങ്ങറ, മാമ്പുഴക്കരി, രാമങ്കരി, മങ്കൊമ്പ്, പൊങ്ങ, നെടുമുടി, പള്ളാത്തുരുത്തി തുടങ്ങിയ സ്ഥലങ്ങളിൽ നടപ്പാതയും കനാലും കൈയേറി നടത്തുന്ന കച്ചവടം യാത്രക്കാരെയും അതോടൊപ്പം ഇന്നാട്ടിലെ അംഗീകൃത കച്ചവടക്കാരെയും ദോഷകരമായി ബാധിക്കുന്നു. ഇക്കാര്യത്തിൽ നടപടിയെടുക്കേണ്ട സർക്കാർ വകുപ്പുകളുടെ നിസംഗത കൈയേറ്റങ്ങൾ അനുദിനം വർധിക്കാൻ കാരണമാകുകയും അപകടങ്ങൾ വർധിപ്പിക്കുകയും ചെയ്യുന്നു. വാഹന യാത്രക്കാർക്കും കാൽനട യാത്രക്കാർക്കും ഇത് വലിയ ഉപദ്രവമായി മാറിയിട്ടുണ്ട്. പൈപ്പുകൊണ്ട് ബാരിക്കേഡ് ആലപ്പുഴ-ചങ്ങനാശേരി റോഡിന്‍റെ തെക്കുവശത്തു റോഡിനു മുകളിൽ കനാലിനോടു ചേർന്ന് സ്ഥാപിച്ചുകൊണ്ടിരിക്കുന്ന വലിയ ജലവിതരണ പൈപ്പുകൾ റോഡും കനാലും തമ്മിൽ വേർതിരിക്കുന്ന ബാരിക്കേഡായി നിലകൊള്ളുന്നു. കേരളത്തിൽ ഒരു സ്ഥലത്തും ഇത്ര അശാസ്ത്രീയമായ രീതിയിൽ ജലവിതരണ പൈപ്പുകൾ സ്ഥാപിച്ചു കാണില്ലെന്നാണ് നാട്ടുകാർ പറയുന്നത്. എസി റോഡിൽനിന്നു കനാലിലേക്ക് ഇറങ്ങാനുള്ള എല്ലാ സൗകര്യങ്ങളും തടസപ്പെടുന്ന തരത്തിൽ സ്ഥാപിച്ച പൈപ്പുകൾ കനാലിന്‍റെയും റോഡിന്‍റെയും എല്ലാ പ്രകൃതിദത്ത സൗന്ദര്യത്തെയും നശിപ്പിച്ചു കളഞ്ഞിരിക്കുന്നു. വ്യക്തമായ രൂപരേഖ ഇല്ലാതെ റോഡ് നിർമിച്ചതിന്‍റെ ബാക്കിപത്രമാണ് ഈ ബാരിക്കേഡ്. കൊട്ടിഘോഷം മാത്രം കുട്ടനാട്ടിൽ എത്ര വലിയ പ്രളയം വന്നാലും എസി റോഡ് ഉയർന്നു നില്ക്കുമെന്ന് കൊട്ടിഘോഷിച്ച് നിർമാണമാരംഭിച്ച കുട്ടനാടിന് അനുയോജ്യമല്ലാത്ത ഈ റോഡ് വെള്ളപ്പൊക്ക കാലത്തും കുട്ടനാട്ടുകാർക്ക് പ്രയോജനപ്പെടുന്നില്ലെന്നതാണ് യാഥാർഥ്യം. ഇക്കഴിഞ്ഞ രണ്ടു വർഷങ്ങളിലും ഉണ്ടായ വെള്ളപ്പൊക്കത്തിൽ റോഡിന്‍റെ പല ഭാഗത്തും കനാലിൽനിന്നു വെള്ളം കയറിയിരുന്നു. ഓരോ വർഷവും നിശ്ചിത അളവു താഴ്ന്നു കൊണ്ടിരിക്കുന്ന റോഡ് വെള്ളപ്പൊക്ക കാലത്ത് കുട്ടനാടിന് പ്രയോജനപ്പെടുമെന്ന പ്രതീക്ഷയും നാട്ടുകാർക്കു നഷ്ടപ്പെട്ടിരിക്കുന്നു. ദീർഘവീക്ഷണമില്ലാത്ത കുട്ടനാടൻ പദ്ധതികളിൽ മറ്റൊന്നായി ആലപ്പുഴ-ചങ്ങനാശേരി റോഡിന്‍റെ ഈ പുനർനിർമാണവും ചരിത്രത്തിൽ സ്ഥാനംപിടിക്കുമെന്ന കാര്യത്തിൽ സംശയമില്ല.

മേരി മൗണ്ട് ഇടവകയില്‍ സിനഡാത്മക കോണ്‍ക്ലേവ്

ചങ്ങനാശേരി: വിജയപുരം രൂപതാ ശതാബ്ദിയാഘോഷങ്ങളുടെ മുന്നൊരുക്കമായി നടക്കുന്ന രൂപതാ സിനഡാത്മക കോണ്‍ക്ലേവില്‍ സമര്‍പ്പിക്കുന്നതിനുള്ള വിശ്വാസ, സഭ, സാമൂഹ്യ ജീവിത ന വീകരണത്തിനുള്ള സമഗ്ര മാര്‍ഗരേഖയ്ക്ക് മേരി മൗണ്ട് റോമന്‍ കത്തോലിക്കാ ഇടവക കോണ്‍ക്ലേവ് അംഗീകാരം നല്‍കി . വികാരി ഫാ. മാത്യു ഒഴത്തിലിന്‍റെ അധ്യക്ഷതയില്‍ നടന്ന കോണ്‍ക്ലേവ് ഫൊറോനാ വികാരി ഫാ. സ്റ്റീഫന്‍ പുത്തന്‍പറമ്പില്‍ ഉദ്ഘാടനം ചെയ്തു. രൂപത ലിറ്റര്‍ജി കമ്മീഷന്‍ ഡയറക്ടര്‍ ഫാ. ടോം ജോസ് മുഖ്യപ്രഭാഷണം നടത്തി. ഫാ. തോമസ് തോപ്പില്‍, ഫാ. ഫിലിപ്പ് കുരിശുംമൂട്ടില്‍, സിസ്റ്റര്‍ ഹരിത, സിസ്റ്റര്‍ ജ്യോതിസ്, ഷിബു ആന്‍റണി, ഇടവക സമിതി സെക്രട്ടറി ഫ്രാന്‍സിസ് സാവിയോ, എന്നിവര്‍ പ്രസംഗിച്ചു. ജസ്റ്റിന്‍ ബ്രൂസ്, തോമസ് മെയ്ന്‍, ഷേര്‍ളി തോമസ്, ഷിജിന്‍ നൊറോണ, ജസ്റ്റിന്‍ ഫെര്‍ണാണ്ടസ്, സഞ്ജയ് പോള്‍ എന്നിവര്‍ വിവിധ സെഷനുകളുടെ പഠന റിപ്പോര്‍ട്ട് അവതരിപ്പിച്ചു.

ചങ്ങനാശേരി നഗരത്തില്‍ വഴിവിളക്കുകള്‍ തെളിയുന്നില്ല

താലൂക്ക് വികസനസമിതിയില്‍ വിമര്‍ശനം ചങ്ങനാശേരി: നഗരത്തില്‍ വഴിവിളക്കുകള്‍ തെളിയാത്തതിലും തെരുവുനായ്ക്കളെ നിയന്ത്രിക്കാന്‍ സര്‍ക്കാര്‍ നിര്‍ദേശിച്ച ആനിമല്‍ ബര്‍ത്ത് കണ്‍ട്രോള്‍ (എബിസി) പ്രോജക്റ്റ് നടപ്പാക്കാത്തതിലും നഗരസഭയ്‌ക്കെതിരേ വിമര്‍ശനം ഉയര്‍ന്നു. ഈ വിഷയങ്ങളില്‍ എംഎല്‍എയടക്കം നിരന്തരം നിര്‍ദേശിച്ചിട്ടും നഗരസഭ നടപടി സ്വീകരിക്കുന്നില്ലെന്ന് അംഗങ്ങള്‍ ആക്ഷേപം ഉന്നയിച്ചു. വഴിവിളക്കില്ലാത്തതിനാല്‍ ചങ്ങനാശേരി ബൈപാസില്‍ രാത്രികാലങ്ങളില്‍ ക്രമിനില്‍, സാമൂഹ്യവിരുദ്ധസംഘങ്ങളുടെ ശല്യം വ്യാപകമാണെന്നും ഇതു യാത്രക്കാര്‍ക്ക് ഭീഷണിയാണെന്നും അഭിപ്രായം ഉയര്‍ന്നു. ചങ്ങനാശേരി ഡിപ്പോയില്‍നിന്നു രാത്രി 9.40ന് മണിമലയ്ക്ക് നടത്തിയിരുന്ന കെഎസ്ആര്‍ടിസി ബസ് സര്‍വീസ് പുനരാരംഭിക്കണം. എസ്ബി ഹൈസ്‌കൂളിന് സമീപം വെയ്റ്റിംഗ് ഷെഡ് സ്ഥാപിക്കാന്‍ പിഡബ്ല്യൂഡി നടപടികള്‍ സ്വീകരിക്കണം. സെന്‍റ് ആന്‍സ് സ്‌കൂളിനു മുമ്പില്‍ റോഡിലെ വെള്ളക്കെട്ട് പരിഹരിക്കണം തുടങ്ങിയ ആവശ്യങ്ങളും യോഗത്തില്‍ ഉന്നയിക്കപ്പെട്ടു. ജോസി കല്ലുകളം അധ്യക്ഷത വഹിച്ചു. വനിതാ ജീവനക്കാര്‍ക്കു ജൗളി വ്യാപാര സ്ഥാപനങ്ങളില്‍ വേണ്ടത്ര സൗകര്യങ്ങളുണ്ടോയെന്ന കാര്യം ലേബര്‍ ഡിപ്പാര്‍ട്ട്‌മെന്‍റ് ഉറപ്പുവരുത്തണമെന്നു യോഗത്തിൽ ആവശ്യമുയർന്നു. പാചകവാതക സിലിണ്ടര്‍ വീടുകളിലെത്തിക്കുമ്പോള്‍ നിബന്ധനകള്‍ മറികടന്ന് കൂടുതല്‍ വാഹനക്കൂലി ഈടാക്കുന്നതായും അംഗങ്ങള്‍ അഭിപ്രായപ്പെട്ടു. സ്‌കൂള്‍ പരിസരങ്ങളിലും ബസുകളിലും ലഹരിവസ്തുക്കളുടെ വിതരണം നടക്കുന്നുണ്ടോയെന്ന് എക്‌സൈസ്, പോലീസ് വിഭാഗങ്ങള്‍ പരിശോധിക്കണം. കുരിശുംമൂട് ജംഗ്ഷനില്‍ പൈപ്പ് പൊട്ടുന്നതിനു ശാശ്വതപരിഹാരം വേണം തുടങ്ങിയ നിര്‍ദേശങ്ങളും യോഗത്തിലുയര്‍ന്നു. താലൂക്ക് സഭാംഗങ്ങളായ ലിനു ജോബ്, സബീഷ് നെടുമ്പറമ്പില്‍, ജോണ്‍ മാത്യു, പി.എന്‍. കബീര്‍, മന്‍സൂര്‍ പുതുവീട്, കെ.എസ്. സോമനാഥ് എന്നിവര്‍ പ്രസംഗിച്ചു. വിവിധ വകുപ്പ് ഉദ്യോഗസ്ഥര്‍ പങ്കെടുത്തു.

മാടപ്പള്ളി ബ്ലോക്ക് പഞ്ചായത്തിലെ വിവിധ പദ്ധതികളുടെ സമര്‍പ്പണം നാളെ

മാടപ്പള്ളി: മാടപ്പള്ളി ബ്ലോക്ക് പഞ്ചായത്തിൽ പൂര്‍ത്തീകരിച്ച വിവിധ പദ്ധതികളുടെ ഉദ്ഘാടനം നാളെ വൈകുന്നേരം നാലിന് പട്ടികജാതി-പട്ടികവര്‍ഗ-പിന്നാക്കവിഭാഗ വികസന മന്ത്രി ഒ.ആര്‍. കേളു നിര്‍വഹിക്കും. ബ്ലോക്ക് പഞ്ചായത്ത് ഹാളില്‍ നടക്കുന്ന പരിപാടിയില്‍ ജോബ് മൈക്കിള്‍ എംഎല്‍എ അധ്യക്ഷനാകും. കൊടിക്കുന്നില്‍ സുരേഷ് എംപി മുഖ്യപ്രഭാഷണം നടത്തും. 2024-25, 2025-26 വാര്‍ഷിക പദ്ധതിയില്‍ ഉള്‍പ്പെടുത്തി നിര്‍മാണം പൂര്‍ത്തീകരിച്ച ഡോ. ബി.ആര്‍. അംബേദ്കര്‍ സ്മാരക ഹാള്‍, ചെമ്പുംപുറം കമ്യൂണിറ്റി ഹാള്‍, സൗഹൃദം വയോജന പാര്‍ക്ക് എന്നീ പദ്ധതികളുടെ ഉദ്ഘാടനമാണ് നടക്കുന്നത്. ഡോ. അംബേദ്കര്‍ സ്മാരക ഹാള്‍ പട്ടികജാതി വിഭാഗത്തിലെ യുവതീ-യുവാക്കള്‍ക്കായി തൊഴില്‍ പരിശീലന പരിപാടികളടക്കം നടത്തുന്നതിനായി 32 ലക്ഷം ചെലവിട്ടു നവീകരിച്ചു. ശീതീകരിച്ച ഹാളില്‍ 250 പേര്‍ക്കുള്ള സൗകര്യം ഉണ്ട്. ചെമ്പുംപുറം കമ്യൂണിറ്റി ഹാള്‍ 24 ലക്ഷം രൂപ വിനിയോഗിച്ചാണ് നവീകരിച്ചത്. 1800 ചതുരശ്രയടി വിസ്തീര്‍ണ്ണം ഉണ്ട്. വയോജന പാര്‍ക്ക് പ്രദേശത്തെ വയോജനങ്ങളുടെ ശാരീരിക -മാനസിക ഉല്ലാസത്തിനുള്ള സൗകര്യം ഉറപ്പാക്കാന്‍ 10 ലക്ഷം രൂപ ചെലവിട്ടു നിര്‍മിച്ചു. കലാപരിപാടികള്‍ അവതരിപ്പിക്കാനുള്ള വേദി ഉള്‍പ്പെടെയുണ്ട്. എല്ലാ ദിവസവും വൈകുന്നേരം അഞ്ചു മുതല്‍ എട്ടുവരെ പ്രവര്‍ത്തിക്കും. പ്രവര്‍ത്തനത്തിനായി 15 അംഗ പ്രാദേശിക സമിതി രൂപീകരിച്ചു.

വാഴപ്പള്ളി സെന്‍റ് തെരേസാസില്‍ ബൈബിളിന്‍റെ കൈയെഴുത്തുപ്രതി തയാറായി

ചങ്ങനാശേരി: വാഴപ്പള്ളി സെന്‍റ് തെരേസാസ് സ്‌കൂള്‍ ഹയര്‍ സെക്കന്‍ഡറി വിഭാഗത്തിന്‍റെ രജത ജൂബിലിയുടെ ഭാഗമായി അധ്യാപക-അനധ്യാപകരും വിദ്യാര്‍ഥികളും ചേര്‍ന്ന് സമ്പൂര്‍ണ ബൈബിളിന്‍റെ കൈയെഴുത്തുപ്രതി പൂര്‍ത്തിയാക്കി. ആര്‍ച്ച്ബിഷപ് എമെരിറ്റസ് മാര്‍ ജോസഫ് പെരുന്തോട്ടം ബൈബിള്‍ ഏറ്റുവാങ്ങി. വചനം ഹൃദയത്തില്‍ സ്വീകരിക്കുമ്പോള്‍ നമ്മള്‍ കൂടുതല്‍ നന്മയുള്ളവരാകുമെന്ന് ആര്‍ച്ച്ബിഷപ് ഓര്‍മിപ്പിച്ചു. സ്‌കൂളിന്‍റെ ഹയര്‍ സെക്കന്‍ഡറി വിഭാഗം രജത ജൂബിലി സ്മാരകമായി സ്ഥാപിച്ച സ്‌കൂള്‍ കവാടത്തിന്‍റെ ആശീര്‍വാദവും മാര്‍ പെരുന്തോട്ടം നിര്‍വഹിച്ചു. നെഹ്‌റുട്രോഫി നേടിയ വിബിസി കൈനകരിക്കും ക്യാപ്റ്റന്‍ ബിഫി പുല്ലുകാടിനും യോഗത്തില്‍ സ്വീകരണം നല്‍കി. മദര്‍ പ്രൊവിന്‍ഷ്യല്‍ സിസ്റ്റര്‍ ലില്ലി റോസ് കരോട്ട് വെമ്പേനിക്കല്‍ അധ്യക്ഷത വഹിച്ചു. വികാര്‍ പ്രൊവിന്‍ഷ്യാള്‍ സിസ്റ്റര്‍ ടിസ പടിഞ്ഞാറേക്കര, മാനേജര്‍ സിസ്റ്റര്‍ ലിന്‍സി വലിയപ്ലാക്കല്‍, പ്രിന്‍സിപ്പല്‍ ഷിജി വര്‍ഗീസ്, ജീന്‍ സോജന്‍ വടക്കുമുറി, സിസ്റ്റര്‍ ആന്‍മേരി, വി.എ. ലാലു, ആശ ആന്‍റണി എന്നിവര്‍ പ്രസംഗിച്ചു.

പ്രിന്‍സ് ലൂക്കോസിന്‍റെ നിര്യാണത്തില്‍ അനുശോചനം

ചങ്ങനാശേരി: കേരള കോണ്‍ഗ്രസ് ഉന്നതാധികാര സമിതിയംഗം അഡ്വ. പ്രിന്‍സ് ലൂക്കോസിന്‍റെ നിര്യാണത്തില്‍ കേരള കോണ്‍ഗ്രസ് ചങ്ങനാശേരി നിയോജകമണ്ഡലം കമ്മിറ്റി അനുശോചനം രേഖപ്പെടുത്തി. പ്രസിഡന്‍റ് മാത്തുക്കുട്ടി പ്ലാത്താനം അധ്യക്ഷത വഹിച്ചു. ജനറല്‍ സെക്രട്ടറി കുര്യന്‍ തൂമ്പുങ്കല്‍ അനുശോചന പ്രമേയം അവതരിപ്പിച്ചു. സംസ്ഥാന വൈസ് ചെയര്‍മാന്‍ കെ.എഫ്. വര്‍ഗീസ്, വി.ജെ. ലാലി, സി.ഡി. വത്സപ്പന്‍, ചെറിയാന്‍ ചാക്കോ, ജോര്‍ജുകുട്ടി മാപ്പിളശേരി, ആര്‍. ശശിധരന്‍ നായര്‍, സിബി ചാമക്കാല, കെ.എ. തോമസ്, ജോബിന്‍ എസ്. കൊട്ടാരം, വര്‍ഗീസ് വാരിക്കാട്ട് എന്നിവര്‍ പ്രസംഗിച്ചു. ഔദ്യോഗിക ദുഃഖാചരണം പാര്‍ട്ടി ചെയര്‍മാന്‍ പ്രഖ്യാപിച്ചതനുസരിച്ച് 14വരെയുള്ള നിയോജക മണ്ഡലത്തിലെ പരിപാടികള്‍ മാറ്റിവച്ചതായി നിയോജകമണ്ഡലം സെക്രട്ടറി അറിയിച്ചു.

പെരുന്ന ബസ് സ്റ്റാന്‍ഡിലെ ടേക്ക് എ ബ്രേക്ക് തുറന്നു; യാത്രക്കാര്‍ക്ക് ആശ്വാസം

ചങ്ങനാശേരി: പെരുന്ന ബസ് സ്റ്റാന്‍ഡിലെ ടേക്ക് എ ബ്രേക്ക് തുറന്നത് യാത്രക്കാര്‍ക്ക് ആശ്വാസമായി. മാസങ്ങളായി അറ്റകുറ്റപ്പണികള്‍ക്കായി അടച്ചിട്ടിരുന്ന ടേക്ക് എ ബ്രേക്ക് കഴിഞ്ഞയാഴ്ചയാണ് തുറന്നത്. ടേക്ക് എ ബ്രേക്ക് തുറന്ന് യാത്രക്കാരുടെയും ബസ് ജീവനക്കാരുടെയും ബുദ്ധിമുട്ടിനു പരിഹാരം കാണണമെന്ന് ദീപിക പല തവണ റിപ്പോര്‍ട്ട് ചെയ്തിരുന്നു. ടേക്ക് എ ബ്രേക്കിനു മുമ്പിലെ മാലിന്യം നഗരസഭയിലെ ആരോഗ്യവിഭാഗം ജീവനക്കാര്‍ തരംതിരിച്ചു നീക്കിയിരുന്നു. ഇതിനു പിന്നാലെ ഓണാവധി ദിനങ്ങളില്‍ ഇവിടെ വീണ്ടും മാലിന്യം തള്ളിയതിനെതിരേ പരാതി ഉയര്‍ന്നിട്ടുണ്ട്. പൊതുസ്ഥലങ്ങളില്‍ മാലിന്യം തള്ളുന്നവരെ പിടികൂടി പിഴയുള്‍പ്പെടെ ശിക്ഷാനടപടികള്‍ സ്വീകരിക്കുമെന്ന് നഗരസഭ പ്രഖ്യാപിച്ചിട്ടുണ്ടെങ്കിലും ഇവിടെ മാലിന്യം തള്ളുന്നവരെ പിടികൂടുന്നില്ലെന്ന പരാതിയുണ്ട്. ഇവിടെ മാലിന്യം തള്ളുന്നവര്‍ക്കെതിരേ കര്‍ശന നടപടി വേണമെന്ന ആവശ്യം ശക്തമാണ്.

മരങ്ങാട്ടുപിള്ളിയുടെ കലവറ നിറഞ്ഞു; ഇനി കർഷകകരുത്തിന്‍റെ രാപകലുകൾ

മരങ്ങാട്ടുപിള്ളി: കാർഷികമേഖലയുടെ ജനകീയ ആഘോഷമായ കാർഷികോത്സവത്തിനുള്ള കലവറ നിറഞ്ഞു. നാടറിഞ്ഞുള്ള വിഭവ സമാഹരണം പൂർത്തീകരിച്ചതോടെ ഇനി ഉത്സവത്തിന്‍റെ നാളുകൾ തുടരുകയായി. 11 വരെയുള്ള തീയതികളിൽ ഇനി അറിവും അനുഭവവും ഉല്ലാസവും മത്സരവുമായി കാർഷികമേഖല അരങ്ങുതകർക്കും. കർഷകരും വ്യാപാരികളും സമ്മാനിച്ച വിഭവങ്ങൾ സംഘാടക സമിതിക്കായി പഞ്ചായത്ത് പ്രസിഡന്‍റ് ബെൽജി ഇമ്മാനുവൽ ഏറ്റുവാങ്ങി. പഞ്ചായത്തിലെ 14 വാർഡുകളുടെയും പങ്കാളിത്തം വിഭവസമാഹരണത്തിൽ വ്യക്തമായിരുന്നു. 10, 11 തീയതികളിലെത്തുന്നവർക്കെല്ലാം ഭക്ഷണം നൽകുന്നതിനായാണ് ഈ വിഭവങ്ങൾ പ്രയോജനപ്പെടുത്തുന്നത്. കർഷകരും കർഷകതൊഴിലാളികളുമടക്കമുള്ളവരുടെ നേതൃത്വം വിഭവസമാഹരണത്തിൽ ജനപ്രതിനിധികൾക്കൊപ്പമുണ്ടായിരുന്നുവെന്നത് ശ്രദ്ധേയമായി. വിവിധ സർക്കാർ വകുപ്പുകളിൽനിന്നുള്ള ഉദ്യോഗസ്ഥരും പങ്കാളികളായി. പഞ്ചായത്തിന്‍റെ നേതൃത്വത്തിൽ കൃഷിഭവൻ, മൃഗസംരക്ഷണവകുപ്പ്, മരങ്ങാട്ടുപിള്ളി സഹരണബാങ്ക്, കാർഷിക വികസന സമിതി, ക്ഷീര വികസന വകുപ്പ്, കുടുംബശ്രീ, വായനശാലകൾ, ആർപിഎസുകൾ എന്നിവയുടെ സഹകരണത്തോടെയാണ് കാർഷികോത്സവം സംഘടിപ്പിച്ചിരിക്കുന്നതെന്ന് പഞ്ചായത്ത് പ്രസിഡന്‍റ് ബെൽജി ഇമ്മാനുവലും വൈസ് പ്രസിഡന്‍റ് ഉഷ രാജുവും പറഞ്ഞു. ഇന്ന് പഞ്ചായത്ത് കമ്യൂണിറ്റി ഹാളിൽ വിവിധ കലാമത്സരങ്ങൾ നടക്കും. 11ന് 5.30ന് സംസ്ഥാന ആസൂത്രണ ബോർഡംഗം സന്തോഷ് ജോർജ് കുളങ്ങര സമാപനസമ്മേളനത്തിൽ മുഖ്യപ്രഭാഷണം നടത്തും.

ഓണപ്പാട്ടുമായി കൃഷിവകുപ്പ് ഉദ്യോഗസ്ഥൻ മെയ്സൺ മുരളി

വൈക്കം: ഓണപ്പുടവയും ഓണക്കളികളും ഓണസദ്യയും മിഴിവേകുന്ന ഓണാഘോഷവേളയിൽ ഗൃഹാതുരത്വമുണർത്തുന്ന ഓണപ്പാട്ടുമായി കൃഷിവകുപ്പ് ഉദ്യോഗസ്ഥൻ. ഓണാഘോഷം കളറാക്കാൻ വൈക്കം നഗരസഭ കൃഷി ഭവനിലെ കൃഷി ഓഫീസർ ഇൻ-ചാർജ് മെയ്സൺ മുരളിയാണ് ഓണപ്പാട്ടിലൂടെ ശ്രദ്ധേയനായത്. മെയ്സൺ മുരളി എഴുതി ഈണമിട്ട് ചലച്ചിത്ര പിന്നണി ഗായകൻ വി. ദേവാനന്ദ് ആലപിച്ച "ഈ നാടിൻ തുടിതാളം' എന്ന ഓണപ്പാട്ട് ഇതിനകം ആസ്വാദക മനസിൽ ഇടംപിടിച്ചുകഴിഞ്ഞു. ഓണപ്പാട്ടിന്‍റെ പ്രകാശനം വൈക്കം നഗരസഭ അങ്കണത്തിൽ നടന്ന യോഗത്തിൽ നഗരസഭാ ചെയർപേഴ്സൺ പ്രീതാ രാജേഷ്, വൈസ് ചെയർമാൻ പി.ടി. സുഭാഷ് എന്നിവർ ചേർന്ന് നിർവഹിച്ചു. ചലച്ചിത്രപിന്നണിഗായകൻ വി. ദേവാനന്ദ്, ഗാനരചയിതാവ് മെയ്സൺ മുരളി, നഗരസഭാ കൗൺസിലർമാർ, കൃഷി വകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു.

മമ്മൂട്ടിയുടെ പിറന്നാൾ ആഘോഷിച്ചു

വൈക്കം: മലയാളത്തിന്‍റെ മഹാനടൻ പത്മശ്രീ മമ്മൂട്ടിയുടെ 74-ാം പിറന്നാൾ ചെമ്പിലരയൻ ബോട്ട് ക്ലബ്ബിന്‍റെ നേതൃത്വത്തിൽ ജന്മനാട്ടിൽ ആഘോഷിച്ചു.ബോട്ട് ക്ലബ് പ്രസിഡന്‍റ് അഡ്വ. എസ്.ഡി. സുരേഷ് ബാബു അധ്യക്ഷത വഹിച്ചു. ലിറ്റററി ഫോട്ടോഗ്രാഫർ ഡി. മനോജ് ഉദ്ഘാടനം ചെയ്തു. ചെമ്പ് പഞ്ചായത്ത് വൈസ് പ്രസിഡന്‍റും ക്ലബ് സെക്രട്ടറിയുമായ കെ.കെ. രമേശൻ, ട്രഷറർ കെ.എസ്. രത്നാകരൻ, ചലച്ചിത്രനടൻ ഹാരിസ് മണ്ണഞ്ചേരിൽ, പി.എ. രാജപ്പൻ, എം.എ. അബ്ദുൾ ജലീൽ, ഫിലിം അസോസിയേറ്റ് ഡയറക്ടർ രജനീ കൃഷ്ണ, കവിയത്രി ഇന്ദിരാദേവി, കഥാകൃത്ത് കുമാരി എൻ. കൊട്ടാരം, അഡ്വ. കൃഷ്ണ ബിജു എന്നിവർ പ്രസംഗിച്ചു.

നായശല്യത്തിനെതിരേ പരാതി പറഞ്ഞ ഗൃഹനാഥനെയും കുടുംബത്തെയും ആക്രമിച്ചു

ചിങ്ങവനം: അയല്‍വാസിയുടെ നായ്ക്കളുടെ ശല്യം സഹിക്കവയ്യാതെ വന്നതോടെ ഉടമയോടു പരാതി പറഞ്ഞ ഗൃഹനാഥനെയും കുടുംബത്തെയും വീട്ടില്‍ക്കയറി മൃഗീയമായി മര്‍ദിച്ച കേസില്‍ ഈസ്റ്റ് പോലീസ് ആറുപേരെ അറസ്റ്റ് ചെയ്തു. പൂവന്‍തുരുത്ത് കിഴക്ക് ഭാഗത്ത് ഇഞ്ചിപ്പറമ്പില്‍ മനീഷ്, ഭാര്യ ശാരി, പതിമൂന്നുകാരനായ മകന്‍, ബന്ധുക്കളായ രണ്ടു പേര്‍ എന്നിവരാണ് ക്രൂരമര്‍ദനത്തിന് ഇരയായത്. അയല്‍പക്കത്തു വാടകയ്ക്കു താമസിക്കുന്ന അനിലിന്‍റെ നായ്ക്കളുടെയും പൂച്ചകളുടെയും മതില്‍ ചാടിക്കടന്നുള്ള ശല്യം പതിവായതോടെ മനീഷ്, അനിലിന്‍റെ ഭാര്യയോട് പരാതി പറഞ്ഞതാണ് ആക്രമണത്തിനു കാരണമായതെന്ന് ഈസ്റ്റ് പോലീസ് പറഞ്ഞു. പരാതി പറഞ്ഞതിനെത്തുടര്‍ന്ന് വാഹനങ്ങളില്‍ എത്തിയ ഗുണ്ടാസംഘം ആക്രമണം അഴിച്ചുവിടുകയായിരുന്നുവെന്ന് ദൃക്‌സാക്ഷികള്‍ പറയുന്നു. മനീഷിന്‍റെ തലയ്‌ക്കേറ്റ പരിക്കില്‍ ആറു തുന്നലുകള്‍ ഉണ്ട്. നാട്ടുകാര്‍ വിളിച്ചറിയിച്ചതിനെത്തുടര്‍ന്ന് സ്ഥലത്തെത്തിയ പോലീസ് ആറുപേരെ അറസ്റ്റ് ചെയ്തു. കോടതിയില്‍ ഹാജരാക്കിയ പ്രതികളെ റിമാൻഡ് ചെയ്തു.

സമുദായ ശക്തീകരണത്തിനായി പ്രാർഥിക്കണം: മാർ ജോസഫ് കല്ലറങ്ങാട്ട്

കുറവിലങ്ങാട്: സഭയുടെ ഐക്യത്തിനും സമുദായ ശക്തീകരണത്തിനുമായി പ്രാർഥിക്കാൻ ആഹ്വാനം ചെയ്ത് പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ട്. മേജർ ആർക്കി എപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന കേന്ദ്രത്തിൽ ദൈവമാതാവിന്‍റെ ജനനത്തിരുനാളിൽ വിശുദ്ധ കുർബാനയർപ്പിച്ച് സന്ദേശം നൽകുകയായിരുന്നു ബിഷപ്. സഭയും സമുദായവും പ്രതിസന്ധികളെ തരണം ചെയ്യണം. എല്ലാവരും ഉത്തരവാദിത്വത്തോടെ പ്രവർത്തിക്കണം. എവിടെയാണ് തളരുന്നതെന്നതിന്‍റെ കാരണവും പരിഹാരങ്ങളും പരിശോധിക്കണം. എട്ടുനോമ്പിൽ നസ്രാണിത്തനിമ നിറഞ്ഞുനിൽക്കുന്നു. നസ്രാണിത്വം ഉറഞ്ഞുകൂടിയിരിക്കുന്ന ആചരണമാണിത്. സഭയുടെ മനഃസാക്ഷി അന്വേഷിച്ചുപോകുന്ന തിരുനാളാണിത്. ഭാരതീയതയും പ്രാദേശിക സ്വഭാവവും ഈ നോമ്പിൽ നിഴലിച്ചു നിൽക്കുന്നു. യുവജനങ്ങളുടെ കൃത്യസമയത്തുള്ള വിവാഹം, സന്താനഭാഗ്യം, തലമുറകളുടെ സമൃദ്ധി, സഭയുടെ വളർച്ച, മക്കൾ പരിശുദ്ധിയിൽ വളർന്ന് വിവാഹത്തിലേക്ക് പ്രവേശിക്കുന്നത് എന്നിവ എട്ടുനോമ്പ് ഓർമപ്പെടുത്തുന്നുവെന്ന് മാർ ജോസഫ് കല്ലറങ്ങാട്ട് പറഞ്ഞു. വിശുദ്ധ കുർബാനയിൽ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, ഫാ. ജോസ് കോട്ടയിൽ, ഫാ. തോമസ് തയ്യിൽ, ഫാ. സെബാസ്റ്റ്യൻ പേണ്ടാനത്ത് എന്നിവർ സഹകാർമികരായി.

കുറവിലങ്ങാട്ടെ മരിയൻ പ്രത്യക്ഷീകരണങ്ങൾ നേരിൽക്കണ്ട് ആയിരങ്ങൾ

കുറവിലങ്ങാട്: ദ്യശ്യവിസ്മയങ്ങളുടെ നേരനുഭവും വിശ്വാസത്തിന്‍റെ തീവ്രതയും മാതൃഭക്തിയുടെ നേർക്കാഴ്ചയും ചേർത്തൊരുക്കിയ വിരുന്ന് വിളമ്പി എസ്എംവൈഎം യൂണിറ്റ്. എട്ടുനോമ്പാചരണത്തോടനുബന്ധിച്ചാണ് എസ്എംവൈഎം യൂണിറ്റ് കുറവിലങ്ങാട്ടെ മരിയൻ പ്രത്യക്ഷീകരണങ്ങളുടെ ദ്യശ്യാവതരണം നടത്തിയത്. കല്ലുകൾ അപ്പമാക്കിയും തെളിനീർ തെളിച്ചുനൽകിയും കൽക്കുരിശ് ഉയർത്തിനാട്ടിയുമൊക്കെയുള്ള മാതൃപ്രത്യക്ഷീകരണങ്ങളെ മികവുറ്റ രീതിയിൽ അവതരിപ്പിക്കാൻ സംഘാടകർക്ക് കഴിഞ്ഞു. കാട്ടിലകപ്പെട്ട വൈദികന് വഴികാട്ടിയായും വിശ്വാസം ഏറ്റുപറയാൻ അക്രൈസ്തവനോട് നിർദേശിച്ചും ദേവാലയ അഭിവൃദ്ധിക്കായി പലതവണ നിർദേശം നൽകിയുമൊക്കെയുള്ള മരിയൻ പ്രത്യക്ഷീകരണങ്ങൾ മരിയഭക്തിയുടെ ആഴങ്ങളിലേക്ക് പ്രേക്ഷകനെ കൂട്ടിക്കൊണ്ടുപോയതിനൊപ്പം സാങ്കേതിക ക്രമീകരണങ്ങളിലും വേറിട്ടുനിന്നു. സംഘാടകരെ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, എസ്എംവൈഎം ഡയറക്ടർ ഫാ. ജോസഫ് ചൂരയ്ക്കൽ എന്നിവർ അഭിനന്ദിച്ചു. ഭാരവാഹികളായ സെബാസ്റ്റ്യൻ പൊയ്യാനി, അമല ആൻ ബെന്നി, എബിൻ സജി, നേഹ ലിജു തുടങ്ങിയവർ നേതൃത്വം നൽകി.

എട്ടുനോമ്പാചരണത്തിനു സമാപനം : ഭക്തിനിർഭരമായി കന്യകമറിയത്തിന്‍റെ പിറവിത്തിരുനാൾ

വെച്ചൂർ: കുടവെച്ചൂർ സെന്‍റ് മേരീസ് പള്ളിയിൽ പരിശുദ്ധ കന്യകമറിയത്തിന്‍റെ പിറവിത്തിരുനാൾ ആഘോഷം ഭക്തിനിർഭരമായി. തിരുനാൾ ദിനമായ ഇന്നലെ രാവിലെ അഞ്ചു മുതൽ ഒൻപതുവരെ തുടർച്ചയായി നടന്ന വിശുദ്ധ കുർബാനയ്ക്ക് ഫാ. പോൾ ആത്തപ്പിള്ളി, ഫാ. ആന്‍റണി കളത്തിൽ, ഫാ. സെബാസ്റ്റ്യൻ മാണിക്കത്താൻ, ഫാ. ജോർജ് തേലേക്കാട്ട്, ഫാ. ജോസ് വല്ലയിൽ തുടങ്ങിയവർ കാർമികത്വം വഹിച്ചു. പത്തിനു നടന്ന തിരുനാൾ കുർബാനയ്ക്ക് ഫാ. വിപിൻ കുരിശുതറ മുഖ്യകാർമികത്വം വഹിച്ചു. ഫാ. സച്ചിൻ മാമ്പുഴയ്ക്കൽ, ഫാ. ജോസഫ് മേച്ചേരി എന്നിവർ സഹകാർമികത്വം വഹിച്ചു. ഉച്ചകഴിഞ്ഞ് രണ്ടിനും മൂന്നിനും നടന്ന വിശുദ്ധ കുർബാനയിൽ ഫാ. ജോസഫ് മാക്കോതക്കാട്ട്, ഫാ. ജിത്ത് പള്ളിപ്പാട്ട് എന്നിവർ കാർമികത്വം വഹിച്ചു. തുടർന്ന് പള്ളിയിൽനിന്നു വേമ്പനാട്ട് കായലോരത്തെ കുരിശടിയിലേക്ക് നടന്ന തിരുനാൾ പ്രദക്ഷിണത്തിൽ ആയിരങ്ങൾ പ്രാർഥനാനിരതരായി. വെച്ചൂർ മുത്തിയുടെ കൃപാവരത്തിനായി മുത്തിയമ്മയുടെ തിരുസ്വരൂപത്തിൽ വെറ്റിലയെറിഞ്ഞ് വിശ്വാസികൾ ഉള്ളുരുകി പ്രാർഥിച്ചു. പ്രദക്ഷിണം പള്ളിയിൽ സമാപിച്ചതിനെത്തുടർന്ന് നടന്ന വിശുദ്ധ കുർബാനയ്ക്ക് ഫാ.സുരേഷ് മൽപ്പാൻ കാർമികത്വം വഹിച്ചു. ഇന്നു മരിച്ചവരുടെ ഓർമദിനം. രാവിലെ ആറിനും 9.30നും വിശുദ്ധ കുർബാന ഫാ.സനീഷ് കാഞ്ഞിരക്കാട്ടുകരി, വൈകുന്നേരം അഞ്ചിന് വിശുദ്ധ കുർബാന- ഫാ. ജിനു പള്ളിപ്പാട്ട്. 15ന് എട്ടാമിടം തിരുനാളോടെ ആഘോഷങ്ങൾക്കു സമാപനമാകും. തിരുനാൾ പരിപാടികൾക്ക് വികാരി ഫാ. പോൾ ആത്തപ്പിള്ളി, സഹവികാരി ഫാ. ആന്‍റണി കളത്തിൽ, കൈക്കാരൻ വക്കച്ചൻ മണ്ണത്താലിൽ, ഏബ്രഹാം റോജിഭവൻ, വൈസ് ചെയർമാൻ സേവ്യർ മീനപ്പള്ളി, പ്രസുദേന്തി ജോബ് അനുഗ്രഹ, ജനറൽ സെക്രട്ടറി ബിജു മിത്രംപള്ളി, പാരീഷ് കൗൺസിൽ സെക്രട്ടറി റോബിൻ മണ്ണത്താലിൽ തുടങ്ങിയവർ നേതൃത്വം നൽകി. താഴത്തുപള്ളിയിൽ കടുത്തുരുത്തി: സെന്‍റ് മേരീസ് ഫൊറോനാ താഴത്തുപള്ളിയില്‍ പരിശുദ്ധ കന്യകമറിയത്തിന്‍റെ പിറവിത്തിരുനാളും എട്ടുനോമ്പാചരണവും നടത്തി. തിരുനാളിനോടനുബനധിച്ച് എട്ടു ദിവസങ്ങളിലും ജപമാലയും വിശുദ്ധ കുര്‍ബാനയും ലദീഞ്ഞും ഉണ്ടായിരുന്നു. തിരുനാളിന്‍റെ സമാപനദിനമായ ഇന്നലെ പെരുന്തുരുത്ത് സെന്‍റ് മാത്യൂസ് പള്ളി വികാരി ഫാ. ഇമ്മാനുവേല്‍ കാഞ്ഞിരത്തുങ്കല്‍ പാട്ടുകുര്‍ബാനയര്‍പ്പിച്ചു സന്ദേശം നല്‍കി. തുടര്‍ന്ന് ദൈവമാതാവിന്‍റെ തിരുസ്വരൂപവും വഹിച്ചുകൊണ്ടുള്ള പ്രദക്ഷിണവും നേര്‍ച്ച വിതരണവും നടന്നു. നൂറുകണക്കിനു വിശ്വാസികള്‍ തിരുക്കര്‍മങ്ങളിലും പ്രദക്ഷിണത്തിലും പങ്കെടുത്തു. വികാരി ഫാ. മാത്യു ചന്ദ്രന്‍കുന്നേല്‍, സഹവികാരിമാരായ ഫാ. ജോണ്‍ നടുത്തടം, ഫാ. ഏബ്രഹാം പെരിയപ്പുറം എന്നിവര്‍ തിരുക്കർമങ്ങൾക്കു നേതൃത്വം നല്‍കി. വലിയ പള്ളിയില്‍ കടുത്തുരുത്തി: വലിയ പള്ളിയില്‍ പരിശുദ്ധ കന്യകമറിയത്തിന്‍റെ ജനനത്തിരുനാളും പള്ളിയുടെ കല്ലിട്ട തിരുനാളും ആഘോഷിച്ചു. തിരുനാളിനോടനുന്ധിച്ചു ജപമാലയും വിശുദ്ധ കുര്‍ബാനയും പ്രദക്ഷിണവും നടന്നു. ഫാ. ബോബി കൊച്ചുപറമ്പില്‍ വിശുദ്ധ കുര്‍ബാനയര്‍പ്പിച്ചു സന്ദേശം നല്‍കി. തിരുനാളിനോടനുബന്ധിച്ച് എട്ട് ദിവസമായി നടന്ന നോന്പാചാരണവും സമാപിച്ചു. അഞ്ചാം നൂറ്റാണ്ടില്‍ ആരംഭിച്ച ഇടവക ദേവാലയത്തിന്‍റെ കല്ലിട്ട തിരുനാളും ഇതോടുനുബന്ധിച്ച് അനുസ്മരിച്ചു. വികാരി.ഫാ. ജോണ്‍സണ്‍ നീലനിരപ്പേല്‍ തിരുനാളിനു നേതൃത്വം നല്‍കി.

ലോട്ടറിയുടെ ജിഎസ്ടി വര്‍ധന: ടിക്കറ്റ് വില കൂട്ടാനോ, സമ്മാനം കുറയ്ക്കാനോ അനുവദിക്കില്ലെന്ന്

കോട്ടയം: ലോട്ടറിയുടെ ജിഎസ്ടി 28 ശതമാനത്തില്‍നിന്നും 40 ശതമാനമായി വര്‍ധിപ്പിക്കാനുള്ള തീരുമാനംമൂലം കേരള ലോട്ടറി ടിക്കറ്റിന്‍റെ വില കൂട്ടാനോ പൊതുജനങ്ങള്‍ക്ക് നല്‍കുന്ന സമ്മാനങ്ങളുടെ എണ്ണം കുറയ്ക്കാനോ തീരുമാനിച്ചാല്‍ ലോട്ടറി ബന്ദ് ഉള്‍പ്പെടെ അനിശ്ചിതകാല സമരം ആരംഭിക്കുമെന്ന് ഓള്‍ കേരള ലോട്ടറി ഏജന്‍റ് ആന്‍ഡ് സെല്ലേഴ്‌സ് കോണ്‍ഗ്രസ് ഐഎന്‍ടിയുസി സംസ്ഥാന കമ്മിറ്റി അറിയിച്ചു. ജിഎസ്ടിയുടെ പകുതി സംസ്ഥാന സര്‍ക്കാരിനും പകുതി കേന്ദ്ര സര്‍ക്കാരിനും ലഭിക്കുമെന്നതിനാല്‍ രണ്ട് സര്‍ക്കാരുകളും ഒത്തുകളിച്ചാണ് ലോട്ടറിക്ക് രാജ്യത്തെ ഉയര്‍ന്ന നികുതി ഏര്‍പ്പെടുത്തിയത്. സംസ്ഥാന സര്‍ക്കാരിന് പ്രതിവര്‍ഷം പതിനയ്യായിരം കോടി വരുമാനവും മൂവായിരം കോടി ലാഭവും ലോട്ടറിയില്‍നിന്നു ലഭിക്കുന്നതിനു പുറമേ സമ്മാനാര്‍ഹരുടെ നികുതിയും സമ്മാനാര്‍ഹര്‍ വാങ്ങാത്ത സമ്മാനത്തുകയും ഇപ്പോള്‍ ലഭിക്കുന്നുണ്ട്. വർധിപ്പിക്കുന്ന ജിഎസ്ടി തുകയും സര്‍ക്കാരിനുതന്നെ ലഭിക്കുന്നതിനാല്‍ വര്‍ധനയിലൂടെ ലഭിക്കുന്ന തുക സബ്സിഡിയായി ലോട്ടറി മേഖലയ്ക്ക് നല്‍കണം. ഭിന്നശേഷിക്കാരും രോഗബാധിതരുമായവര്‍ക്ക് ഒരു തൊഴിലും വരുമാനവുമെന്ന് പ്രഖ്യാപിച്ചു കേരള സര്‍ക്കാര്‍ ആരംഭിച്ച ലോട്ടറി, സര്‍ക്കാര്‍ കൊള്ളലാഭം ഉണ്ടാക്കുന്നതുവഴി വലിയ തകര്‍ച്ച നേരിടുകയാണ്. ഇടതുസര്‍ക്കാര്‍ ടിക്കറ്റുവില 30ല്‍നിന്ന് 50 രൂപ ആക്കിയതും 5,000 രൂപ ഉള്‍പ്പെടെ നിരവധി സമ്മാനങ്ങളുടെ എണ്ണം കുറച്ചതും മൂലം ലോട്ടറിത്തൊഴിലാളികള്‍ക്ക് മുമ്പു വിറ്റിരുന്നതിന്‍റെ മൂന്നിലൊന്നു ടിക്കറ്റാണ് വിറ്റഴിക്കാനാകുന്നത്. മുന്‍കൂര്‍ പണമടച്ച് വാങ്ങുന്ന ടിക്കറ്റുകള്‍ മിച്ചം വന്നും വരുമാനം കുറഞ്ഞും വലിയ പ്രതിസന്ധി നേരിടുന്ന ലോട്ടറി വില്പന മേഖലയ്ക്ക് കനത്ത തിരിച്ചടിയാണ് സര്‍ക്കാരിന്‍റെ പുതിയ തീരുമാനം ഉണ്ടാക്കുന്നത്. ലോട്ടറി നിരോധിത സംസ്ഥാനങ്ങളില്‍ കരിഞ്ചന്തയില്‍ വില്പന നടത്താന്‍ ഇതരസംസ്ഥാന ലോട്ടറി മാഫിയകള്‍ക്ക് സംസ്ഥാന സര്‍ക്കാര്‍ ഒത്താശ ചെയ്യുന്നതിനാല്‍ ടിക്കറ്റ് വില്പന ഇടിയില്ലെന്ന കണക്കാണ് അധികൃതര്‍ ബോധ്യപ്പെടുത്തുന്നത്. ദിവസേന അച്ചടിക്കുന്ന ഒരു കോടി എട്ടു ലക്ഷം ടിക്കറ്റുകളില്‍ കേരളത്തില്‍ വില്‍ക്കുന്നത് 70 ശതമാനത്തില്‍ താഴെ മാത്രമാണ്. കേരള ഖജനാവിനു വലിയ വരുമാനവും മൂന്നു ലക്ഷം ലോട്ടറി വില്പനത്തൊഴിലാളികളുടെ ജീവിതമാര്‍ഗവുമായ കേരള ലോട്ടറി സംരക്ഷിക്കാന്‍ സര്‍ക്കാര്‍ അടിയന്തര നടപടി സ്വീകരിക്കണമെന്നാവശ്യപ്പെട്ട് ലോട്ടറി മേഖലയിലെ മറ്റു സംഘടനകളുമായി ചേര്‍ന്നു സമരമാരംഭിക്കുന്നതിനും തീരുമാനിച്ചതായി ഓള്‍ കേരള ലോട്ടറി ഏജന്‍റ്സ് ആന്‍ഡ് സെല്ലേഴ്‌സ് കോണ്‍ഗ്രസ് ഐഎന്‍ടിയുസി സംസ്ഥാന പ്രസിഡന്‍റ് ഫിലിപ്പ് ജോസഫ് അറിയിച്ചു.

കുമാരനല്ലൂര്‍ ഊരുചുറ്റ് ജലോത്സവം ഇന്ന്

കോട്ടയം: കുമാരനല്ലൂര്‍ ദേശവഴികളിലൂടെ ഓണക്കാലത്ത് നടത്തുന്ന ഉത്തൃട്ടാതി ഊരുചുറ്റ് ജലോത്സവം ഇന്നു നടക്കും. ഭക്തിയും ആവേശവും ഒരുപോലെ സംഗമിക്കുന്ന വള്ളംകളി ക്ഷേത്രാചാരങ്ങളോടെയാണ് നടത്തുന്നത്. എന്‍എസ്എസ് കരയോഗങ്ങള്‍ക്കു പുറമേ ഭക്തജനങ്ങളുടെയും സഹകരണത്തോടെയാണ് ജലോത്സവം നടത്തുന്നത്. ഉത്തൃട്ടാതി നാളില്‍ ഭഗവതി പള്ളിയോടത്തിലേറി ദേശവഴികളിലെ ഭക്തരെ അനുഗ്രഹിക്കുന്നതിനായി ഊരുചുറ്റുന്നുവെന്നാണ് ഊരുചുറ്റ് വള്ളംകളിയുടെ ഐതിഹ്യം. രാവിലെ എട്ടിന് ദേവീചൈതന്യം സിംഹവാഹനത്തില്‍ ആവാഹിച്ച് ക്ഷേത്രനടയില്‍നിന്നു വാദ്യമേളത്തിന്‍റെയും കരവഞ്ചിയുടെയും അകമ്പടിയോടെ ആറാട്ടുകടവായ പുത്തന്‍കടവിലെത്തി ചുണ്ടന്‍ വള്ളത്തില്‍ പ്രതിഷ്ഠിക്കും. സിംഹവാഹനവുമായി യാത്രതിരിക്കുന്ന പള്ളിയോടം മീനച്ചിലാറിന്‍റെ ഇരുകരകളിലെയും കടവുകളിൽ ഭക്തരൊരുക്കുന്ന പറവഴിപാട് സ്വീകരിച്ചു വൈകുന്നേരത്തോടെ ആറാട്ടുകടവില്‍ തിരിച്ചെത്തും. തുടര്‍ന്ന് കരവഞ്ചിയോടെ ക്ഷേത്രസന്നിധിയിലെത്തി സിംഹവാഹനം തിരികെ സമര്‍പ്പിക്കുന്നതോടെ ഊരുചുറ്റ് വള്ളംകളി സമാപിക്കും. ശ്രീവിനായക ചുണ്ടനിലാണ് ഇത്തവണ സിംഹവാഹനം വഹിക്കുന്നത്. കരയോഗങ്ങളുടെ ഓടിവള്ളങ്ങള്‍ അകമ്പടി സേവിക്കും. കുമാരനല്ലൂര്‍ ദേവീക്ഷേത്രം, ആറാട്ടുകടവ് (പുത്തന്‍കടവ്), ചെമ്മങ്ങാട്ട് ശ്രീകൃഷ്ണസ്വാമിക്ഷേത്രം, കോന്തുകടവ്, നീലിമംഗലം കടവ്, ശ്രീനിലയം കടവ്, ഇളയിടത്തുകടവ്, മാലിമേല്‍ കടവ്, പാലക്കാട്ടു കടവ്, പൂവത്തുമാലി കടവ്, അമ്പാട്ടു ക്ഷേത്രം, ചെറുനാരകം പാലം, സൂര്യകാലടി മന, എന്‍എസ്എസ് കരയോഗം നമ്പര്‍ 1535, നട്ടാശേരി പാലക്കാടി കടവ്, ചുങ്കം പാലം, പനയക്കഴിപ്പ്, ഗോവിന്ദപുരം കടവ്, തിരുവാറ്റാ ശ്രീകൃഷ്ണസ്വാമി ക്ഷേത്രം, ശാസ്താക്ഷേത്രം മര്യാതുരുത്ത്, പ്രാപ്പുഴ കടവ്, പുലിക്കുട്ടിശേരി ചാമത്തറ കടവ്, എറത്തേടത്തു കടവ്, കളപ്പുരയ്ക്കല്‍ കടവ്, കുറ്റിക്കല്‍ കടവ്, പാലൂര്‍ കടവ്, കുമാരനല്ലൂര്‍ വടക്കേനട പാലം, ചന്ദ്രത്തില്‍ കടവ് എന്നിങ്ങനെയാണ് ഊരുചുറ്റ് വള്ളംകളിയുടെ യാത്ര.

പരിശുദ്ധ മറിയത്തെപ്പോലെ ക്രിസ്തുവിനെ ഉള്‍ക്കൊള്ളണം: മാത്യൂസ് മാര്‍ അപ്രേം

മണര്‍കാട്: പരിശുദ്ധ മറിയം യേശുക്രിസ്തുവിനെ ഉള്‍ക്കൊണ്ടതുപോലെ ക്രിസ്തുവിനെ ജീവിതത്തില്‍ ഉള്‍ക്കൊണ്ട് ദൈവശക്തിയില്‍ നിറയാന്‍ സാധിക്കണമെന്ന് മാത്യൂസ് മാര്‍ അപ്രേം മെത്രാപ്പോലീത്ത. മണര്‍കാട് സെന്‍റ് മേരീസ് യാക്കോബായ സുറിയാനി കത്തീഡ്രലിലെ എട്ടുനോമ്പ് പെരുന്നാളിന്‍റെ പ്രധാനദിനമായ ഇന്നലെ കത്തീഡ്രലില്‍ വിശുദ്ധ മൂന്നിന്മേല്‍ കുര്‍ബാനയര്‍പ്പിച്ചശേഷം വചനസന്ദേശം നല്‍കുകയായിരുന്നു അദ്ദേഹം. കുര്‍ബാനയ്ക്കുശേഷം നമസ്‌കാരമേശയില്‍ കാണിക്ക സമര്‍പ്പിക്കാനുള്ള തളിക വച്ചു. ആദ്യ കാണിക്ക മാത്യൂസ് മാര്‍ അപ്രേം സമര്‍പ്പിച്ചു. തുടര്‍ന്ന് വൈദികരും വിശ്വാസികളും കാണിക്ക സമര്‍പ്പിച്ചു. ഉച്ചകഴിഞ്ഞു രണ്ടിന് പെരുന്നാളിന് സമാപനം കുറിച്ചു കരോട്ടെ പള്ളിയിലേക്കുള്ള റാസ നടന്നു. ഫാ. ഗീവര്‍ഗീസ് നടുമുറിയില്‍, ഫാ. കുര്യന്‍ മാത്യു വടക്കേപ്പറമ്പില്‍, ഫാ. ഏബ്രഹാം കരിമ്പന്നൂര്‍ എന്നിവര്‍ കാര്‍മികത്വം വഹിച്ചു. റാസയ്ക്കുശേഷം ആശീര്‍വാദവും നേര്‍ച്ച വിളമ്പും നടന്നു. തുടര്‍ന്ന് പൂര്‍വിക പാരമ്പര്യമനുസരിച്ച് പള്ളിക്ക് ചുറ്റുമുള്ള വട്ടപ്പാട്ടും തളിക എടുക്കലും നടന്നു.

നായശല്യത്തിനെതിരേ പരാതി പറഞ്ഞ ഗൃഹനാഥനെയും കുടുംബത്തെയും ആക്രമിച്ചു

ചിങ്ങവനം: അയല്‍വാസിയുടെ നായ്ക്കളുടെ ശല്യം സഹിക്കവയ്യാതെ വന്നതോടെ ഉടമയോടു പരാതി പറഞ്ഞ ഗൃഹനാഥനെയും കുടുംബത്തെയും വീട്ടില്‍ക്കയറി മൃഗീയമായി മര്‍ദിച്ച കേസില്‍ ഈസ്റ്റ് പോലീസ് ആറുപേരെ അറസ്റ്റ് ചെയ്തു. പൂവന്‍തുരുത്ത് കിഴക്ക് ഭാഗത്ത് ഇഞ്ചിപ്പറമ്പില്‍ മനീഷ്, ഭാര്യ ശാരി, പതിമൂന്നുകാരനായ മകന്‍, ബന്ധുക്കളായ രണ്ടു പേര്‍ എന്നിവരാണ് ക്രൂരമര്‍ദനത്തിന് ഇരയായത്. അയല്‍പക്കത്തു വാടകയ്ക്കു താമസിക്കുന്ന അനിലിന്‍റെ നായ്ക്കളുടെയും പൂച്ചകളുടെയും മതില്‍ച്ചാടിക്കടന്നുള്ള ശല്യം പതിവായതോടെ മനീഷ്, അനിലിന്‍റെ ഭാര്യയോട് പരാതി പറഞ്ഞതാണ് ആക്രമണത്തിനു കാരണമായതെന്ന് ഈസ്റ്റ് പോലീസ് പറഞ്ഞു. പരാതി പറഞ്ഞതിനെത്തുടര്‍ന്ന് വാഹനങ്ങളില്‍ എത്തിയ ഗുണ്ടാസംഘം ആക്രമണം അഴിച്ചുവിടുകയായിരുന്നുവെന്ന് ദൃക്‌സാക്ഷികള്‍ പറയുന്നു. മനീഷിന്‍റെ തലയ്‌ക്കേറ്റ പരിക്കില്‍ ആറു തുന്നലുകള്‍ ഉണ്ട്. നാട്ടുകാര്‍ വിളിച്ചറിയിച്ചതിനെത്തുടര്‍ന്ന് സ്ഥലത്തെത്തിയ പോലീസ് ആറുപേരെ അറസ്റ്റ് ചെയ്തു. കോടതിയില്‍ ഹാജരാക്കിയ പ്രതികളെ റിമാൻഡ് ചെയ്തു.

പരാതിരഹിത ഓണം: സഹകരണമേഖലയ്ക്ക് പ്രധാന പങ്കെന്ന് മന്ത്രി വാസവന്‍

സഹകരണ അംഗ സമാശ്വാസപദ്ധതി സഹായവിതരണം കോട്ടയം: ഈ വര്‍ഷം പരാതിരഹിതമായി ഓണം ആഘോഷിക്കാന്‍ അവസരമൊരുക്കുന്നതില്‍ സഹകരണമേഖല പ്രധാന പങ്കുവഹിച്ചെന്ന് മന്ത്രി വി.എന്‍. വാസവന്‍. സഹകരണ അംഗ സമാശ്വാസ പദ്ധതിയുടെ ജില്ലാതല സഹായവിതരണം ഉദ്ഘാടനം ചെയ്തു പ്രസംഗിക്കുയായിരുന്നു അദ്ദേഹം. സംസ്ഥാനത്തെ 1,800 സഹകരണ സംഘങ്ങള്‍വഴി ഉത്പന്നങ്ങള്‍ സമാഹരിച്ച് വിപണിയില്‍ സജീവമായി ഇടപെടാന്‍ സഹകരണ മേഖലയ്ക്ക് സാധിച്ചു. അംഗ സമാശ്വാസ പദ്ധതി വേറിട്ട മാതൃകയാണെന്നും അദ്ദേഹം പറഞ്ഞു. പ്രവര്‍ത്തന മികവിന് സംസ്ഥാനതല പുരസ്‌കാരം നേടിയ പാമ്പാടി സര്‍വീസ് സഹകരണ ബാങ്ക്, പനച്ചിക്കാട് റീജണല്‍ സര്‍വീസ് സഹകരണ ബാങ്ക്, കോട്ടയം ജില്ലാ സഹകരണ ആശുപത്രി സംഘം എന്നിവയ്ക്കുള്ള പുരസ്‌കാരങ്ങളും മന്ത്രി വിതരണം ചെയ്തു. സംസ്ഥാന സഹകരണ യൂണിയന്‍ ഡയറക്ടര്‍ കെ.എം. രാധാകൃഷ്ണന്‍ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ മുഖ്യപ്രഭാഷണം നടത്തി. സര്‍ക്കിള്‍ സഹകരണ യൂണിയന്‍ അധ്യക്ഷരായ പി. സതീഷ്ചന്ദ്രന്‍ നായര്‍, ജോണ്‍സണ്‍ പുളിക്കീല്‍, ടി.സി. വിനോദ്, ജയിംസ് വര്‍ഗീസ്, ജോയിന്‍റ് രജിസ്ട്രാര്‍ പി.പി. സലിം, എന്നിവര്‍ പങ്കെടുത്തു.

നടന്‍ വിജയരാഘവന് നാടിന്‍റെ ആദരം

ജില്ലാതല ഓണാഘോഷത്തിനു സമാപനം കോട്ടയം: ജില്ലാ ഭരണകൂടവും ജില്ലാ ടൂറിസം പ്രൊമോഷന്‍ കൗണ്‍സിലും കോട്ടയം നഗരസഭയും സംയുക്തമായി സംഘടിപ്പിച്ച ഓണാഘോഷപരിപാടി- ചിങ്ങനിലാവ് 2025ന് സമാപിച്ചു. തിരുനക്കര മൈതാനത്ത് നടന്ന സമാപന സമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്തു. പരാതിരഹിതമായി ഓണം ആഘോഷിക്കുന്നതിന് സര്‍ക്കാര്‍ എല്ലാ ക്രമീകരണങ്ങളും ഏര്‍പ്പെടുത്തിയിരുന്നതായി അദ്ദേഹം പറഞ്ഞു. ദേശീയ ചലച്ചിത്ര പുരസ്‌കാരജേതാവ് നടന്‍ വിജയരാഘവനെ മന്ത്രി പൊന്നാടയണിയിച്ച് ആദരിച്ചു. തിരുവഞ്ചൂര്‍ രാധാകൃഷ്ണന്‍ എംഎല്‍എ അധ്യക്ഷത വഹിച്ചു. ചീഫ് വിപ്പ് ഡോ. എന്‍. ജയരാജ്, എംഎല്‍എമാരായ സെബാസ്റ്റ്യന്‍ കുളത്തുങ്കല്‍, മോന്‍സ് ജോസഫ്, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജില്ലാ കളക്ടര്‍ ചേതന്‍കുമാര്‍ മീണ, നഗരസഭാധ്യക്ഷ ബിന്‍സി സെബാസ്റ്റ്യന്‍, നഗരസഭാംഗങ്ങളായ ഷീജ അനില്‍, ജയമോള്‍ ജോസഫ് എന്നിവര്‍ പ്രസംഗിച്ചു. ഓണാഘോഷത്തോടനുബന്ധിച്ചു നടത്തിയ വിവിധ മത്സരങ്ങളിലെ വിജയികള്‍ക്ക് ചടങ്ങില്‍ സമ്മാനങ്ങള്‍ വിതരണം ചെയ്തു. തുടര്‍ന്ന് പ്രസീത ചാലക്കുടിയുടെ നാടന്‍പാട്ടു മേള നടന്നു. ഉദ്ഘാടനസമ്മേളനത്തിനു മുന്നോടിയായി പോലീസ് പരേഡ് ഗ്രൗണ്ടില്‍ ആരംഭിച്ച സാംസ്‌കാരിക ഘോഷയാത്ര തിരുനക്കര മൈതാനത്ത് സമാപിച്ചു.

മണര്‍കാട് പള്ളിയിൽ വൻ ഭക്തജനത്തിരക്ക്

മണര്‍കാട്: മരിയന്‍ തീര്‍ഥാടന കേന്ദ്രമായ സെന്‍റ് മേരീസ് യാക്കോബായ സുറിയാനി കത്തീഡ്രലില്‍ ഭക്തജന തിരക്ക്. എട്ടുനോമ്പ് പെരുന്നാളിന്‍റെ പ്രധാന പെരുന്നാള്‍ ദിനമായ ഇന്നലെ കത്തീഡ്രലില്‍ അത്യപൂര്‍വമായ ഭക്തജനതിരക്കായിരുന്നു അനുഭവപ്പെട്ടത്. പെരുന്നാളിനോടനുബന്ധിച്ചു വര്‍ഷത്തിലൊരിക്കല്‍ മാത്രം വിശ്വാസികള്‍ക്ക് ദര്‍ശനത്തിനായി തുറക്കുന്ന വിശുദ്ധ ദൈവമാതാവിന്‍റെയും ഉണ്ണിയേശുവിന്‍റെയും ഛായാചിത്രം ദര്‍ശിക്കുന്നതിനു നാനാജാതിമതസ്ഥരായ വിശ്വാസികള്‍ നാടിന്‍റെ നാനാഭാഗങ്ങളില്‍നിന്ന് എത്തിയിരുന്നു. രാത്രി വൈകിയും പള്ളിയിലേക്ക് ഭക്തജനങ്ങളുടെ പ്രവാഹമായിരുന്നു. സ്ലീബാ പെരുന്നാള്‍ ദിനമായ 14 വരെ വിശ്വാസികള്‍ക്ക് ദൈവമാതാവിന്‍റെയും ഉണ്ണിയേശുവിന്‍റെയും ഛായാചിത്രം ദര്‍ശിക്കുന്നതിനു അവസരമുണ്ടായിരിക്കും. 14ന് സന്ധ്യാപ്രാര്‍ഥനയെത്തുടര്‍ന്നാണ് നട അടയ്ക്കല്‍ ശുശ്രൂഷ നടക്കും. 14 വരെ വിശുദ്ധ കുര്‍ബാനയ്ക്ക് സഭയിലെ വിവിധ മെത്രാപ്പോലീത്തമാര്‍ മുഖ്യകാര്‍മികത്വം വഹിക്കും. ഇന്ന് രാവിലെ 7.30ന് യാക്കോബ് മാര്‍ അന്തോണിയോസും നാളെ രാവിലെ 7.30ന് കുര്യാക്കോസ് മാര്‍ ഗ്രീഗോറിയോസും 11ന് രാവിലെ 7.30ന് മാത്യൂസ് മാര്‍ അന്തീമോസും 12ന് രാവിലെ 7.30ന് ഏലിയാസ് മാര്‍ യൂലിയോസും 13ന് രാവിലെ 7.30ന് ഗീവര്‍ഗീസ് മാര്‍ സ്‌തേഫാനോസും വിശുദ്ധ കുര്‍ബാനയ്ക്ക് പ്രധാന കാര്‍മികത്വം വഹിക്കും. സ്ലീബാ പെരുന്നാള്‍ ദിനമായ 14ന് രാവിലെ 7.30ന് പ്രഭാത പ്രാര്‍ഥന. 8.30ന് വിശുദ്ധ മൂന്നിന്മേല്‍ കുര്‍ബാനയ്ക്ക് കുര്യാക്കോസ് മാര്‍ ക്ലീമീസ് മുഖ്യകാര്‍മികത്വം വഹിക്കും. വൈകുന്നേരം അഞ്ചിന് സന്ധ്യാപ്രാര്‍ഥനയ്ക്കും തുടര്‍ന്നുള്ള നടയടയ്ക്കല്‍ ശുശ്രൂഷയ്ക്കും സുന്നഹദോസ് സെക്രട്ടറി തോമസ് മാര്‍ തീമോത്തിയോസ് മുഖ്യകാര്‍മികത്വം വഹിക്കും. എട്ടുനോമ്പ് പെരുന്നാളിനോടനുബന്ധിച്ചുള്ള വൈദ്യുത ദീപാലങ്കാരങ്ങള്‍ 14 വരെ ഉണ്ടായിരിക്കും.

ശുചിമുറിവെള്ളം ഒഴുക്കിവിടുന്നതായി പരാതി

കോട്ടയം: ഹോട്ടലില്‍നിന്ന് ഇരുട്ടിന്‍റെ മറവില്‍ ശുചിമുറി വെള്ളം ഒഴുക്കിവിടുന്നതായി പരാതി. തിരുനക്കര ക്ഷേത്രത്തിന് എതിര്‍വശത്തു പ്രവര്‍ത്തിക്കുന്ന ഹോട്ടലില്‍നിന്നുമാണ് വെള്ളം പുറത്തേക്കൊഴുക്കുന്നതെന്ന് ആക്ഷേപമുയര്‍ന്നിരിക്കുന്നത്. ഒഴുകിയെത്തുന്ന മലിനജലം വ്യാപാരസ്ഥാപനങ്ങള്‍ക്കു മുന്നില്‍ കെട്ടിക്കിടക്കുകയാണ്. ഇതു വഴിയാത്രക്കാർക്കും വ്യാപാരികൾക്കും സമീപത്തെ ഓട്ടോത്തൊഴിലാളികൾക്കും ബുദ്ധിമുട്ടാകുന്നതായാണ് പരാതി. ഈ വെള്ളം തിരുനക്കര അമ്പലത്തിന്‍റെ കല്‍വിളക്കിനു സമീപത്തേക്കും ഒഴുകിയെത്തുന്നുണ്ട്. അവിടെനിന്നാണ് ഓട്ടോ സ്റ്റാന്‍ഡിലേക്കു വെള്ളമെത്തുന്നത്. വെള്ളം കെട്ടിനിന്നു പ്രദേശമാകെ മലിനമാണ്. ഇതുമൂലം യാത്രക്കാര്‍ ഓട്ടം വിളിക്കാന്‍ വരുന്നില്ലെന്ന് ഓട്ടോറിക്ഷാ ഡ്രൈവർമാർ പറയുന്നു. ഓട്ടോയിലേക്ക് കയറണമെങ്കില്‍ ഈ വെള്ളത്തില്‍ ചവിട്ടി വേണമെന്നുള്ളതാണ് നിലവിലെ സ്ഥിതി. തിരുവോണനാളിലും തുടർന്നുള്ള ദിവസങ്ങളിലും ഓട്ടംപോകാന്‍ ഈ തൊഴിലാളികള്‍ക്കു സാധിച്ചിട്ടില്ല. വെള്ളം കെട്ടിക്കിടന്ന് കൊതുകും പെറ്റുപെരുകുകയാണ്. നഗരസഭയിലും ആരോഗ്യവകുപ്പിലും പരാതി നല്‍കിയിട്ട് ആഴ്ചകള്‍ പിന്നിട്ടെങ്കിലും അധികൃതര്‍ അറിഞ്ഞമട്ടില്ല. ഹോട്ടലുടമയോട് ഓട്ടോറിക്ഷാ തൊഴിലാളികളും നാട്ടുകാരും പ്രശ്‌നത്തെപ്പറ്റിസംസാരിച്ചപ്പോള്‍ തങ്ങളുടെ വെള്ളമല്ലെന്നാണ് മറുപടി നല്‍കിയത്. നഗരസഭയുടെ മൂക്കിന്‍തുമ്പിലാണ് ഇരുട്ടിന്‍റെ മറവില്‍ ശുചിമുറി വെള്ളം ഒഴുക്കിവിടുന്നതെന്നിരിക്കെ ചെയര്‍പേഴ്‌സണോ ബന്ധപ്പെട്ട വകുപ്പധികൃതരോ പ്രശ്‌നം കണ്ട ഭാവം കാണിക്കുന്നില്ലെന്ന് ആക്ഷേപമുണ്ട്.

തീരാനഷ്ടമെന്ന് പി.ജെ. ജോസഫ്

തൊടുപുഴ: കേരള കോണ്‍ഗ്രസ് ഉന്നതാധികാര സമിതിയംഗമായിരുന്ന അഡ്വ. പ്രിൻസ് ലൂക്കോസിന്‍റെ അകാലവേർപാട് പാർട്ടിക്കും മണ്ഡലത്തിനും തീരാനഷ്ടമാണെന്ന് ചെയർമാൻ പി.ജെ. ജോസഫ് എംഎൽഎ. പ്രഗത്ഭനായ നേതാവിനെയാണ് കേരള കോണ്‍ഗ്രസിന് നഷ്ടമായിരിക്കുന്നത്. ഒ. വി. ലൂക്കോസിന്‍റെ പുത്രനായ പ്രിൻസ് കളങ്കമില്ലാത്ത രാഷ‌്ട്രീയ പ്രവർത്തകനായിരുന്നു. എപ്പോഴും സുസ്മേരവദനനായി സൗമ്യമായി ഇടപെട്ടിരുന്ന അദ്ദേഹം ഏവർക്കും പ്രിയപ്പെട്ടവനായിരുന്നു. പ്രിൻസിന്‍റെ വേർപാട് നികത്താനാകാത്ത നഷ്ടമാണ് സൃഷ്ടിച്ചിരിക്കുന്നതെന്നും ജോസഫ് പറഞ്ഞു. രാഷ്‌ട്രീയരംഗത്തെ മാതൃകാവ്യക്തിത്വം: മോൻസ് ജോസഫ് കോട്ടയം: രാഷ്‌ട്രീയരംഗത്തെ മാതൃകാവ്യക്തിത്വമായിരുന്നു പ്രിൻസ് ലൂക്കോസെന്ന് കേരള കോൺഗ്രസ് എക്സിക്യൂട്ടീവ് ചെയർമാൻ മോൻസ് ജോസഫ് എംഎൽഎ. രാഷ്‌ട്രീയരംഗത്ത് അഴിമതികറ പുരളാത്ത സത്യസന്ധതയുടെ മുഖമായിരുന്നു പ്രിൻസ് ലൂക്കോസ്. അദ്ദേഹത്തിന്‍റെ വേർപാട് കേരളരാഷ്‌ട്രീയത്തിനും പ്രത്യേകിച്ച് കേരള കോൺഗ്രസിനും കനത്ത നഷ്ടമാണ്. മോൻസ് ജോസഫ് എംഎൽഎ പറഞ്ഞു.

അകാലത്തിൽ വിടപറഞ്ഞ നേതാക്കൾ

കോട്ടയം: അകാലത്തില്‍ കോട്ടയത്തിന് നഷ്ടമായ നേതാക്കള്‍ പലരാണ്. കോണ്‍ഗ്രസ് നേതാവും മുന്‍ ആഭ്യന്തരമന്ത്രിയുമായിരുന്ന പി.ടി. ചാക്കോ 49-ാം വയസിലാണ് ഹൃദയാഘാതത്തെത്തുടര്‍ന്ന് അന്തരിച്ചത്. കേരള കോണ്‍ഗ്രസ് നേതാവ് പ്രിന്‍സ് ലൂക്കോസ് ഇന്നലെ പുലര്‍ച്ചെ അന്തരിച്ചത് 53-ാം വയസില്‍. പ്രിന്‍സിന്‍റെ പിതാവ് ഒ.വി. ലൂക്കോസും 55 വയസിനു മുന്‍പ് വിട പറഞ്ഞു. യൂത്ത് ഫ്രണ്ട്-എം പ്രസിഡന്‍റ് ബാബു ചാഴികാടന്‍ ഏറ്റുമാനൂരില്‍ യുഡിഎഫ് സ്ഥാനാര്‍ഥിയായി പ്രചാരണത്തിനിടെ ഇടിമിന്നലേറ്റ് മരിച്ചത് 33-ാം വയസിലാണ്. കോണ്‍ഗ്രസ് നേതാക്കളായിരുന്ന സി.കെ. ജീവന്‍, ജോമോന്‍ തോമസ്, എ.എസ്. ഹരിശ്ചന്ദ്രന്‍, ജോബോയ് ജോര്‍ജ്, കേരള കോണ്‍ഗ്രസ് നേതാക്കളായിരുന്ന ഈപ്പന്‍ ജേക്കബ്, ബിജോയ് വാതല്ലൂര്‍ എന്നിവരുടെ വിയോഗവും അന്‍പത് വയസിനു മുന്‍പായിരുന്നു. കോണ്‍ഗ്രസ് ജനകീയ പ്രതിഷേധ സദസ് മാറ്റിവച്ചു കോട്ടയം: നാളെ ജില്ലയിലെ 31 പോലീസ് സ്റ്റേഷനുകള്‍ക്ക് മുന്നിലും കോണ്‍ഗ്രസ് നടത്താനിരുന്ന ജനകീയ പ്രതിഷേധ സദസ് കേരള കോണ്‍ഗ്രസിന്‍റെയും യുഡിഎഫിന്‍റെയും നേതാവായിരുന്ന പ്രിന്‍സ് ലൂക്കോസിന്‍റെ നിര്യാണത്തെത്തുടര്‍ന്ന് മാറ്റിവച്ചതായി ഡിസിസി പ്രസിഡന്‍റ് നാട്ടകം സുരേഷ് അറിയിച്ചു.

നിസ്വാര്‍ഥ സേവനത്തിന്‍റെ മാതൃക

ചങ്ങനാശേരി: ശാന്തതയോടെയും സൗമ്യതയോടെയും അഭിഭാഷകവൃത്തിയിലും പൊതുപ്രവര്‍ത്തനത്തിലും ഏര്‍പ്പെട്ടിരുന്ന അഡ്വ. പ്രിന്‍സ് ലൂക്കോസ് നിസ്വാര്‍ഥ സേവനത്തിന്‍റെ മാതൃകയായിരുന്നു. ക്രിസ്തീയ വിശ്വാസവും മൂല്യങ്ങളും മുറുകെപ്പിടിച്ചിരുന്ന അദ്ദേഹം സഭയോടും ചങ്ങനാശേരി അതിരൂപതയോടും ചേര്‍ന്നു പ്രവര്‍ത്തിച്ചിരുന്നു. സഭാ സംഘടനകളായ മിഷന്‍ലീഗ്, യുവദീപ്തി എന്നിവയിലൂടെ സംഘാടകപാടവം നേടിയെടുത്ത അദ്ദേഹം യുവദീപ്തിയുടെ അതിരമ്പുഴ ഫൊറോന പ്രസിഡന്‍റായിരുന്നു. നിലവിൽ അതിരൂപത പാസ്റ്ററല്‍ കൗണ്‍സിലിലും അംഗമാണ്. രാഷ്‌ട്രീയരംഗത്തെ ഒരു പ്രഗത്ഭവ്യക്തിത്വത്തെയാണ് നമുക്ക് നഷ്ടമായിരിക്കുന്നത്. അദ്ദേഹത്തിന്‍റെ ആകസ്മിക വേര്‍പാടില്‍ ദുഃഖം രേഖപ്പെടുത്തുന്നതോടൊപ്പം കുടുംബത്തെ അനുശോചനമറിയിക്കുകയും ചെയ്യുന്നു. മാര്‍ തോമസ് തറയില്‍ ചങ്ങനാശേരി ആര്‍ച്ച്ബിഷപ് സ്‌നേഹവും സൗഹൃദവും സ്മരിക്കുന്നു കോട്ടയം: കേരള കോണ്‍ഗ്രസ് നേതാവായിരുന്ന പ്രിന്‍സ് ലൂക്കോസന്‍റെ അപ്രതീക്ഷിത വേര്‍പാടില്‍ ദുഃഖവും അനുശോചനവും രേഖപ്പെടുത്തുന്നു. ശാന്തനും സൗമ്യനുമായിരുന്ന പ്രിന്‍സിന്‍റെ സ്‌നേഹവും സൗഹൃദവും സ്മരിക്കുന്നു. കുടുംബത്തിനുണ്ടായ ദുഃഖത്തില്‍ പങ്കുചേരുന്നു. കുടുംബത്തെ ദൈവം ആശ്വസിപ്പിക്കുകയും ശക്തിപ്പെടുത്തുകയും ചെയ്യട്ടെ. മാര്‍ തോമസ് പാടിയത്ത് ഷംഷാബാദ് സഹായമെത്രാന്‍

പ്രിന്‍സ് ലൂക്കോസ് പൊതുപ്രവര്‍ത്തനരംഗത്തെ സൗമ്യസാന്നിധ്യം

കോട്ടയം: തൂവെള്ള വസ്ത്രത്തില്‍ സദാ പുഞ്ചിരിയോടെ കോട്ടയത്തെ പൊതുപ്രവര്‍ത്തന രംഗത്തെ നിറസാന്നിധ്യമായിരുന്നു ഇന്നലെ പുലര്‍ച്ചെ അന്തരിച്ച പ്രിന്‍സ് ലൂക്കോസ്. കെഎസ്‌സിയില്‍ കെ.എം. മാണിയുടെ തണലില്‍ രാഷ്‌ട്രീയത്തിനു തുടക്കമിട്ട പ്രിന്‍സ് പില്‍ക്കാലത്ത് കെഎസ്‌സി-എം, യൂത്ത് ഫ്രണ്ട് -എം സംസ്ഥാന പ്രസിഡന്‍റായി പ്രവർത്തിച്ചു. പാര്‍ട്ടിയിലുണ്ടായ ഭിന്നതയെത്തുടര്‍ന്ന് ആറു വര്‍ഷം മുന്‍പ് ജോസഫ് വിഭാഗത്തിലെത്തി. പിതാവ് ഒ.വി. ലൂക്കോസിന്‍റെ വഴിയേ വിദ്യാര്‍ഥിരാഷ്‌ട്രീയത്തിലൂടെയാണ് പ്രിന്‍സ് പൊതുപ്രവര്‍ത്തനത്തില്‍ എത്തുന്നത്. പാറമ്പുഴ ഹോളി ഫാമിലി സ്‌കൂളിലെ പഠനത്തിനുശേഷം കോട്ടയം സിഎംഎസ് കോളജില്‍നിന്ന് പ്രീഡിഗ്രിയും മാന്നാനം കെഇ കോളജില്‍നിന്ന് ഡിഗ്രിയും തിരുവനന്തപുരം ലോഅക്കാദമിയില്‍നിന്ന് എല്‍എല്‍ബിയും എല്‍എല്‍എമ്മും പാസായി. കോട്ടയം ടൗണിലെ ഓട്ടോറിക്ഷ, ലോട്ടറി തൊഴിലാളികളെ സംഘടിപ്പിച്ച് കെടിയുസി യൂണിയനുണ്ടാക്കി. കേരള കോണ്‍ഗ്രസ് ജോസഫ് വിഭാഗം ഉന്നതാധികാര സമിതിയംഗമായി പ്രവര്‍ത്തിച്ചു വരികയായിരുന്നു. കഴിഞ്ഞ നിയമസഭാ തെരഞ്ഞെടുപ്പില്‍ ഏറ്റുമാനൂരില്‍ വി.എന്‍. വാസവനെതിരേ യുഡിഎഫ് സ്ഥാനാര്‍ഥിയായി മത്സരിച്ചപ്പോള്‍ മികച്ച പ്രകടനമാണു കാഴ്ചവച്ചത്. മഹിളാ കോണ്‍ഗ്രസ് നേതാവായിരുന്ന ലതികാ സുഭാഷിനെയാണ് കോണ്‍ഗ്രസ് സ്ഥാനാര്‍ഥിയായി പരിഹണിച്ചിരുന്നത്. സീറ്റ് കേരള കോണ്‍ഗ്രസിന് നല്‍കിയപ്പോള്‍ പ്രിന്‍സിന് നിയോഗം ലഭിക്കുകയായിരുന്നു. തെരഞ്ഞെടുപ്പ് ചിഹ്നമായിരുന്ന ട്രാക്ടര്‍ ഓടിച്ചും പ്രചാരണ യാത്ര നടത്തിയിരുന്നു. വി.എന്‍. വാസവന് 58,289 വോട്ടും പ്രിന്‍സിന് 43,986 വോട്ടും സ്വതന്ത്രയായി മത്സരിച്ച ലതിക സുഭാഷിന് 7,624 വോട്ടും ബിജെപിയുടെ പി.എന്‍. ഹരികുമാറിന് 13,746 വോട്ടും ലഭിച്ചു. നെല്‍കര്‍ഷക പ്രശ്‌നങ്ങള്‍ ഉയര്‍ത്തി കേരള കോണ്‍ഗ്രസും കര്‍ഷക യൂണിയനും നടത്തിയ സമരങ്ങളില്‍ സജീവ സാന്നിധ്യമായിരുന്നു. ചിങ്ങം ഒന്നിന് കര്‍ഷകദിനത്തില്‍ ചങ്ങനാശേരി അതിരൂപതയുടെയും എകെസിസിയുടെയും നേതൃത്വത്തില്‍ മങ്കൊമ്പില്‍ ആര്‍ച്ച്ബിഷപ് മാര്‍ തോമസ് തറയില്‍ നടത്തിയ സമരത്തിലും സജീവമായിരുന്നു. കെ-റെയില്‍ വിരുദ്ധ സമിതിയുടെ നേതൃത്വത്തില്‍ പാറമ്പുഴയ്ക്കു സമീപം കുഴിയാലിപ്പടിയില്‍ നടത്തിയ കെ-റെയില്‍കുറ്റി പിഴുതെറിയല്‍ സമരം സംസ്ഥാന ശ്രദ്ധ പിടിച്ചുപറ്റി. യുവദീപ്തി-കെസിവൈഎം ഫൊറോന പ്രസിഡന്‍റായി പ്രവര്‍ത്തിച്ച പ്രിന്‍സ് നിലവില്‍ ചങ്ങനാശേരി അതിരൂപത പാസ്റ്ററല്‍ കൗണ്‍സില്‍ അംഗമാണ്. കോവിഡ് കാലം മുതല്‍ സബര്‍മതി ചാരിറ്റബിള്‍ ട്രസ്റ്റ് രൂപീകരിച്ചു കോട്ടയം മെഡിക്കല്‍ കോളജില്‍ ഭക്ഷണ വിതരണം നടത്തിവന്നിരുന്നു. ജില്ലാ ആശുപത്രി വികസന സമിതിയംഗവുമാണ്. കോട്ടയം ബാര്‍ അസോസിയേഷന്‍റെ ഓണാഘോഷത്തില്‍ പങ്കെടുത്ത ശേഷമാണ് കുടുംബസമേതം പ്രിന്‍സ് ശനിയാഴ്ച വേളാങ്കണ്ണിക്കു പോയത്. ചതയദിന ആശംസകള്‍ നേര്‍ന്ന് ഫേസ്ബുക്കില്‍ പോസ്റ്റ് ചെയ്തിരുന്നു. ഏറ്റുമാനൂരിലും കോട്ടയത്തും പൊതുദർശനം കോട്ടയം: പ്രിന്‍സ് ലൂക്കോസിന്‍റെ നിര്യാണത്തില്‍ ദുഃഖസൂചകമായി അനുശോചനം രേഖപ്പെടുത്തി ഒരാഴ്ചത്തേക്ക് പാർട്ടിയുടെ എല്ലാ പൊതുപരിപാടികളും മാറ്റിവച്ചു ദുഃഖാചരണം പ്രഖ്യാപിച്ചതായി കേരള കോണ്‍ഗ്രസ് ചെയര്‍മാന്‍ പി.ജെ. ജോസഫ് എംഎല്‍എ അറിയിച്ചു. ആദരസൂചകമായി ഇന്ന് ഉച്ചകഴിഞ്ഞു രണ്ടിനു കാരിത്താസ് ആശുപത്രിയില്‍നിന്നു നിരവധി വാഹനങ്ങളുടെ അകമ്പടിയോടുകൂടി വിലാപയാത്ര ആരംഭിച്ച് ഏറ്റുമാനൂര്‍ പ്രൈവറ്റ് ബസ് സ്റ്റാന്‍ഡിനോട് ചേര്‍ന്നു പ്രത്യേകം സജ്ജമാക്കുന്ന പന്തലില്‍ പൊതുദര്‍ശനവും നടക്കും. തുടര്‍ന്ന് അതിരമ്പുഴ-യൂണിവേഴ്‌സിറ്റി-മെഡിക്കല്‍ കോളജ്-പനമ്പാലം-ബേക്കര്‍ ജംഗ്ഷന്‍-ശാസ്ത്രി റോഡ് വഴി എത്തി കേരള കോണ്‍ഗ്രസ് സംസ്ഥാന കമ്മിറ്റി ഓഫീസിലും പൊതുദര്‍ശനത്തിനു വയ്ക്കും. തുടര്‍ന്ന് വിലാപയാത്രയായി ആറിനു പാറന്പുഴയിലുള്ള വസതിയില്‍ ഭൗതികശരീരം എത്തിക്കും. തെങ്കാശിയില്‍നിന്നു മൃതദേഹം കാരിത്താസ് ആശുപത്രിയില്‍ എത്തിച്ചപ്പോള്‍ ആശുപത്രി ഡയറക്ടര്‍ റവ.ഡോ. ബിനു കുന്നത്ത്, പാറമ്പുഴ പള്ളി വികാരി ഫാ. മാത്യു ചൂരവടി, റവ.ഡോ. ജയിംസ് മുല്ലശേരി എന്നിവരുടെ നേതൃത്വത്തില്‍ പ്രാര്‍ഥന നടത്തി. എംഎല്‍എമാരായ തിരുവഞ്ചൂര്‍ രാധാകൃഷ്ണന്‍, മോന്‍സ് ജോസഫ്, ചാണ്ടി ഉമ്മന്‍, നേതാക്കളായ സുരേഷ് കുറുപ്പ്, ജോയി ഏബ്രഹാം, ഡിസിസി പ്രസിഡന്‍റ് നാട്ടകം സുരേഷ്, ഫില്‍സണ്‍ മാത്യൂസ്, അപു ജോണ്‍ ജോസഫ്, കേരള കോണ്‍ഗ്രസ് ജില്ലാ പ്രസിഡന്‍റ് ജയ്‌സണ്‍ ജോസഫ്, ബിനു ചെങ്ങളം, എ.കെ. ജോസഫ് എന്നിവര്‍ കാരിത്താസ് ആശുപത്രിയില്‍ എത്തി അന്തിമോപചാരം അറിയിച്ചു.

രൂപതാധ്യക്ഷനൊപ്പം മരിയകീർത്തനം പാടി 2213 മേരിമാർ കുറവിലങ്ങാട് മുത്തിയമ്മയ്ക്കരികിൽ

കുറവിലങ്ങാട്: 2213 മേരിമാർ മുത്തിയമ്മയ്ക്കരുകിൽ ഒരുമിച്ച് മരിയ കീർത്തനം പാടി. മേരിമാർക്കായി പ്രാർഥിച്ചും ആശംസകൾ നേർന്നും രൂപതാധ്യക്ഷനും വൈദികരും എത്തിയതോടെ സംഗമത്തിന് ആത്മീയതയുടെ കരുത്തുമായി. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന കേന്ദ്രത്തിൽ പരിശുദ്ധ ദൈവമാതാവിന്‍റെ പിറവിത്തിരുനാളിനോട് ചേർന്നാണ് മേരിമാരുടെ സംഗമം നടത്തിയത്. മുത്തിയമ്മയ്ക്കരികിൽ 21 കള്ളപ്പം വീതം സമർപ്പിച്ചാണ് മേരിമാർ സംഗമത്തിന്‍റെ ഭാഗമായത്. മുഴുവൻ മേരിമാർക്കും ഇടവക പ്രത്യേക ഉപഹാരങ്ങളും നൽകി. ദൈവമാതാവ് പ്രത്യക്ഷപ്പെട്ട് ഉയർത്തിനാട്ടിയ ഒറ്റക്കൽകുരിശിൻ ചുവട്ടിലാണ് മേരിമാർ മരിയ കീർത്തനമായ ‘ബറ് മറിയം’ എന്ന സുറിയാനി ഗീതം ആലപിച്ചത്. മേരി, മറിയം, നിർമല, വിമല, അമല എന്നിങ്ങനെ ദൈവമാതാവിന്‍റെ പേരുകൾ മാമ്മോദീസായിലൂടെയും പ്രത്യേക നിയോഗാർഥവും സ്വീകരിച്ചവരാണ് സംഗമത്തിനെത്തിയത്. പാലാ ബിഷപ് മാർ ജോസഫ് കല്ലറങ്ങാട്ട്, ആർച്ച്പ്രീസ്റ്റ് റവ. ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, പാസ്റ്ററൽ അസിസ്റ്റന്‍റുമാരായ ഫാ. ജോസ് കോട്ടയിൽ, ഫാ. പോൾ മഠത്തിക്കുന്നേൽ, ദേവമാതാ കോളജ് വൈസ് പ്രിൻസിപ്പൽ ഫാ. മാത്യു കവളമ്മാക്കൽ എന്നിവർ പ്രാർഥനാ ശുശ്രൂഷകളിൽ സഹകാർമികരായി. മുഴുവൻ മേരിമാരെയും പരിശുദ്ധ ദൈവമാതാവിന്‍റെ ദാസരായി പ്രഖ്യാപിച്ചാണ് സംഗമം അവസാനിച്ചത്. നോമ്പ് വീടലിന്‍റെ ഭാഗമായി കത്തോലിക്കാ കോൺഗ്രസ് യൂണിറ്റിന്‍റെ നേതൃത്വത്തിൽ സ്‌നേഹവിരുന്നും നടത്തി. മേരിമാർ എത്തിച്ച നേർച്ചയപ്പമാണ് വിളമ്പി നൽകിയത്.

കെഎന്‍ഇഎഫ് സംസ്ഥാന സമ്മേളനത്തിന് തുടക്കമായി

കോട്ടയം: രാജ്യത്തെ മാധ്യമ പ്രവര്‍ത്തകര്‍ വലിയ വെല്ലുവിളികള്‍ നേരിടുന്നുവെന്ന് ചാണ്ടി ഉമ്മന്‍ എംഎല്‍എ. കെഎന്‍ഇഎഫ് സംസ്ഥാന സമ്മേളനത്തോടനുബന്ധിച്ചുള്ള മാധ്യമ സെമിനാര്‍ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. സമകാലിക മാധ്യമങ്ങളും മാറുന്ന കേരളവും എന്ന വിഷയത്തില്‍ നടന്ന സെമിനാറില്‍ മുതിര്‍ന്ന മാധ്യമ പ്രവര്‍ത്തകന്‍ ചെറുകര സണ്ണി ലൂക്കോസ് മോഡറേറ്ററായിരുന്നു. ദീപിക ഡെപ്യൂട്ടി എഡിറ്റര്‍ എസ്. ജയകൃഷ്ണന്‍, മലയാള മനോരമ എഡിറ്റോറിയല്‍ ഡയറക്ടര്‍ ജോസ് പനച്ചിപ്പുറം, മാതൃഭൂമി ഡെപ്യൂട്ടി എഡിറ്റര്‍ പി.പി. ശശീന്ദ്രന്‍, ദേശാഭിമാനി അസോസിയേറ്റ് എഡിറ്റര്‍ മധു നീലകണ്ഠന്‍, കേരള കൗമുദി ന്യൂസ് എഡിറ്റര്‍ വി. ജയകുമാര്‍, ജന്മഭൂമി ന്യൂസ് എഡിറ്റര്‍ കെ.ഡി. ഹരികുമാര്‍, മാധ്യമം ജോയിന്‍റ് എഡിറ്റര്‍ പി.ഐ. നൗഷാദ്, ജനയുഗം ബ്യൂറോ ചീഫ് സരിതാ കൃഷ്ണന്‍, കെഎന്‍ഇഎഫ് സംസ്ഥാന പ്രസിഡന്‍റ് വി.എസ്. ജോണ്‍സണ്‍, ജനറല്‍ സെക്രട്ടി ജയ്സണ്‍ മാത്യു എന്നിവര്‍ പ്രസംഗിച്ചു. ഇന്ന് വൈകുന്നേരം അഞ്ചിന് കളക്ടറേറ്റ് ജംഗ്ഷനില്‍നിന്ന് ആരംഭിക്കുന്ന വിളംബരയാത്ര നഗരസഭാധ്യക്ഷ ബിന്‍സി സെബാസ്റ്റ്യന്‍ ഫ്ലാഗ്ഓഫ് ചെയ്യും. ആറിന് തിരുനക്കരയില്‍ നടക്കുന്ന ട്രേഡ് യൂണിയന്‍ സമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്യും.

അച്ചായന്‍സ് ഗോള്‍ഡിന് പുതിയ ഷോറൂം വാഗമണ്ണില്‍

വാഗമണ്‍: അച്ചായന്‍സ് ഗോള്‍ഡിന്‍റെ 29-ാമത് ഷോറൂം വാഗമണ്ണില്‍ പ്രവര്‍ത്തനം ആരംഭിച്ചു. നടിയും എഎംഎംഎ (അമ്മ) പ്രസിഡന്‍റുമായ ശ്വേത മേനോനും അച്ചായന്‍സ് ഗോള്‍ഡ് എംഡി ടോണി വര്‍ക്കിച്ചനും ചേര്‍ന്ന് ഉദ്ഘാടനം നിര്‍വഹിച്ചു. ജനറല്‍ മാനേജര്‍ ഷിനില്‍ കുര്യന്‍ അധ്യക്ഷതവഹിച്ചു. ഉദ്ഘാടനത്തില്‍ പങ്കെടുത്ത 10 ഭാഗ്യശാലികള്‍ക്ക് നറുക്കെടുപ്പിലൂടെ കാഷ് പ്രൈസ് സമ്മാനമായി നല്‍കി. കലാകാരന്‍ വിഷ്ണു വിന്‍റെ ഫ്യൂഷനും നടത്തി.

സമുദായ ശക്തീകരണത്തിനായി പ്രാർഥിക്കണം: മാർ ജോസഫ് കല്ലറങ്ങാട്ട്

കുറവിലങ്ങാട്: സഭയുടെ ഐക്യത്തിനും സമുദായ ശക്തീകരണത്തിനുമായി പ്രാർഥിക്കാൻ ആഹ്വാനം ചെയ്ത് പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ട്. മേജർ ആർക്കി എപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന കേന്ദ്രത്തിൽ ദൈവമാതാവിന്‍റെ ജനനത്തിരുനാളിൽ വിശുദ്ധ കുർബാനയർപ്പിച്ച് സന്ദേശം നൽകുകയായിരുന്നു ബിഷപ്. സഭയും സമുദായവും പ്രതിസന്ധികളെ തരണം ചെയ്യണം. എല്ലാവരും ഉത്തരവാദിത്വത്തോടെ പ്രവർത്തിക്കണം. എവിടെയാണ് തളരുന്നതെന്നതിന്‍റെ കാരണവും പരിഹാരങ്ങളും പരിശോധിക്കണമെന്നും ബിഷപ് പറഞ്ഞു. എട്ടുനോമ്പിൽ നസ്രാണിത്തനിമ നിറഞ്ഞുനിൽക്കുന്നു. നസ്രാണിത്വം ഉറഞ്ഞുകൂടിയിരിക്കുന്ന ആചരണമാണിത്. സഭയുടെ മനഃസാക്ഷി അന്വേഷിച്ചുപോകുന്ന തിരുനാളാണിത്. ഭാരതീയതയും പ്രാദേശിക സ്വഭാവവും ഈ നോമ്പിൽ നിഴലിച്ചു നിൽക്കുന്നു. യുവജനങ്ങളുടെ കൃത്യസമയത്തുള്ള വിവാഹം, സന്താനഭാഗ്യം, തലമുറകളുടെ സമൃദ്ധി, സഭയുടെ വളർച്ച, മക്കൾ പരിശുദ്ധിയിൽ വളർന്ന് വിവാഹത്തിലേക്ക് പ്രവേശിക്കുന്നത് എന്നിവ എട്ടുനോമ്പ് ഓർമപ്പെടുത്തുന്നുവെന്ന് മാർ ജോസഫ് കല്ലറങ്ങാട്ട് പറഞ്ഞു. വിശുദ്ധ കുർബാനയിൽ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, ഫാ. ജോസ് കോട്ടയിൽ, ഫാ. തോമസ് തയ്യിൽ, ഫാ. സെബാസ്റ്റ്യൻ പേണ്ടാനത്ത് എന്നിവർ സഹകാർമികരായി.

മരങ്ങാട്ടുപിള്ളിയുടെ കലവറ നിറഞ്ഞു; ഇനി കർഷകകരുത്തിന്‍റെ രാപകലുകൾ

മരങ്ങാട്ടുപിള്ളി: കാർഷികമേഖലയുടെ ജനകീയ ആഘോഷമായ കാർഷികോത്സവത്തിനുള്ള കലവറ നിറഞ്ഞു. നാടറിഞ്ഞുള്ള വിഭവ സമാഹരണം പൂർത്തീകരിച്ചതോടെ ഇനി ഉത്സവത്തിന്‍റെ നാളുകൾ തുടരുകയായി. 11 വരെയുള്ള തീയതികളിൽ അറിവും അനുഭവവും ഉല്ലാസവും മത്സരവുമായി കാർഷികമേഖല അരങ്ങുതകർക്കും. കർഷകരും വ്യാപാരികളും സമ്മാനിച്ച വിഭവങ്ങൾ സംഘാടക സമിതിക്കായി പഞ്ചായത്ത് പ്രസിഡന്‍റ് ബെൽജി ഇമ്മാനുവൽ ഏറ്റുവാങ്ങി. പഞ്ചായത്തിലെ 14 വാർഡുകളുടെയും പങ്കാളിത്തം വിഭവസമാഹരണത്തിൽ വ്യക്തമായിരുന്നു. 10, 11 തീയതികളിലെത്തുന്നവർക്കെല്ലാം ഭക്ഷണം നൽകുന്നതിനായാണ് ഈ വിഭവങ്ങൾ പ്രയോജനപ്പെടുത്തുന്നത്. കർഷകരും കർഷകതൊഴിലാളികളുമടക്കമുള്ളവരുടെ നേതൃത്വം വിഭവസമാഹരണത്തിൽ ജനപ്രതിനിധികൾക്കൊപ്പമുണ്ടായിരുന്നുവെന്നത് ശ്രദ്ധേയമായി. വിവിധ സർക്കാർ വകുപ്പുകളിൽനിന്നുള്ള ഉദ്യോഗസ്ഥരും പങ്കാളികളായി. പഞ്ചായത്തിന്‍റെ നേതൃത്വത്തിൽ കൃഷിഭവൻ, മൃഗസംരക്ഷണവകുപ്പ്, മരങ്ങാട്ടുപിള്ളി സഹരണബാങ്ക്, കാർഷിക വികസന സമിതി, ക്ഷീര വികസന വകുപ്പ്, കുടുംബശ്രീ, വായനശാലകൾ, ആർപിഎസുകൾ എന്നിവയുടെ സഹകരണത്തോടെയാണ് കാർഷികോത്സവം സംഘടിപ്പിച്ചിരിക്കുന്നതെന്ന് പഞ്ചായത്ത് പ്രസിഡന്‍റ് ബെൽജി ഇമ്മാനുവലും വൈസ് പ്രസിഡന്‍റ് ഉഷ രാജുവും പറഞ്ഞു. ഇന്ന് പഞ്ചായത്ത് കമ്യൂണിറ്റി ഹാളിൽ വിവിധ കലാമത്സരങ്ങൾ നടക്കും. 11ന് 5.30ന് സംസ്ഥാന ആസൂത്രണ ബോർഡംഗം സന്തോഷ് ജോർജ് കുളങ്ങര സമാപനസമ്മേളനത്തിൽ മുഖ്യപ്രഭാഷണം നടത്തും.

ടെറ്റ് സുപ്രീംകോടതി വിധി: കേന്ദ്രനിയമം ഭേദഗതി ചെയ്യണമെന്ന് കേരള സ്റ്റേറ്റ് സ്‌കൂള്‍ ടീച്ചേഴ്‌സ് ഫ്രണ്ട്

പാലാ: അധ്യാപക യോഗ്യതാ പരീക്ഷ (ടെറ്റ്) നേടാത്തവര്‍ക്ക് രണ്ടുവര്‍ഷം കഴിഞ്ഞാല്‍ നിര്‍ബന്ധിത വിരമിക്കല്‍ നല്‍കണമെന്ന സുപ്രീംകോടതി വിധിക്കെതിരേ കേന്ദ്ര-സംസ്ഥാന ഗവണ്‍മെന്‍റുകള്‍ അടിയന്തരമായി ഇടപെടണമെന്നും ടെറ്റുമായി ബന്ധപ്പെട്ട കേന്ദ്രനിയമത്തില്‍ ഭേദഗതി കൊണ്ടുവരണമെന്നും കെഎസ്എസ്ടിഎഫ് സംസ്ഥാന പ്രസിഡന്‍റ് ടോബിന്‍ കെ. അലക്‌സ് ആവശ്യപ്പെട്ടു. അധ്യാപകരുടെ യോഗ്യതാ പരീക്ഷയായ ടെറ്റുമായി ബന്ധപ്പെട്ട് സുപ്രീംകോടതിയില്‍ കക്ഷി ചേരുന്നതിനും സംഘടന തീരുമാനിച്ചു. ഈ വിധി കേരളത്തിലെ വിദ്യാഭ്യാസരംഗത്ത് അരക്ഷിതാവസ്ഥ സൃഷ്ടിക്കുമെന്നും സുപ്രീംകോടതി വിധിയില്‍ കേരളം നിയമനടപടിക്ക് തയാറാകണമെന്നും സംഘടന ആവശ്യപ്പെട്ടു. 50,000ത്തിലധികം അധ്യാപകരെ ബാധിക്കുന്ന ഈ കോടതിവിധിയുമായി ബന്ധപ്പെട്ട് മുഖ്യമന്ത്രിക്കും പൊതുവിദ്യാഭ്യാസ മന്ത്രിക്കും നിവേദനം നല്‍കുമെന്നും ടോബിന്‍ കെ. അലക്‌സ് പറഞ്ഞു.

അധ്യാപകദിനാചരണം

സാന്തോം ആക്‌ടിവിറ്റി കൊളീജിയം പാലാ: സെന്‍റ് തോമസ് ഹൈസ്‌കൂളില്‍ പാഠ്യേതര വിഷയങ്ങളുടെ ഭാഗമായി സാന്തോം ആക്‌ടിവിറ്റി കൊളീജിയം പദ്ധതി ആരംഭിച്ചു. പൂര്‍വവിദ്യാര്‍ഥിയും കായികാധ്യാപകനുമായ വി.സി. ജയിംസ് പദ്ധതി ഉദ്ഘാടനം ചെയ്തു. യോഗ, കരാട്ടെ, സ്‌കേറ്റിംഗ്, ഫുട്‌ബോള്‍, വോളിബോള്‍, നെറ്റ്‌ബോള്‍, ചിത്രരചന, സംഗീതം, ബ്രേക്ക് ഡാന്‍സ്, ലാംഗ്വേജ് ലാബ് തുടങ്ങിയ വിവിധങ്ങളായ പ്രവര്‍ത്തനങ്ങളാണ് ഉള്‍പ്പെടുത്തിയിരിക്കുന്നത്. പദ്ധതിയുടെ ഉദ്ഘാടനത്തോടൊപ്പം അധ്യാപക ദിനാചരണവും നടത്തി. അധ്യാപകര്‍ക്ക് കുട്ടികള്‍ ആദരമര്‍പ്പിക്കുകയും പൂക്കള്‍ സമ്മാനിക്കുകയും ചെയ്തു. സീനിയര്‍ അധ്യാപികയായ ബിന്ദുമോള്‍ സിറിയക്കിനെ പൊന്നാടയണിയിച്ച് ആദരിച്ചു. സമ്മേളനത്തില്‍ സീനിയര്‍ അസിസ്റ്റന്‍റ് ജൂലി ജോസഫ്, ഹെഡ് മാസ്റ്റര്‍ ഫാ. റെജി തെങ്ങുംപള്ളി, സ്‌കൂള്‍ ഹെഡ്‌ബോയ് സിറിയക് ഡയസ്, ജോസഫ് ഫെലിക്‌സ് ജിന്നി, ജോബി വര്‍ഗീസ് കുളത്തറ എന്നിവര്‍ പ്രസംഗിച്ചു. പെരിങ്ങുളം: പെരിങ്ങുളം സെന്‍റ് അഗസ്റ്റിൻസ് സ്കൂളിൽനിന്നു വിരമിച്ച ഏറ്റവും മുതിർന്ന അധ്യാപകൻ ഇടയോടിയിൽ ഏബ്രഹാം (അവിരാ) സാറിനെ ആദരിച്ചു. സ്കൂൾ അസിസ്റ്റന്‍റ് മാനേജർ ഫാ. സജി അമ്മോട്ടുകുന്നേൽ, ഹെഡ്മാസ്റ്റർ ജോസുകുട്ടി ജേക്കബ്, അധ്യാപകർ, വിദ്യാർഥി പ്രതിനിധികൾ എന്നിവർ ചേർന്ന് അദ്ദേഹത്തിന്‍റെ ഭവനത്തിലെത്തി ആദരവർപ്പിക്കുകയും പൊന്നാടയണിയിക്കുകയും ചെയ്തു. ചെമ്മലമറ്റം: പൂർവ അധ്യാപികയ്ക്ക് ആദരവ് നൽകി ചെമ്മലമറ്റം ലിറ്റിൽ ഫ്‌ളവർ ഹൈസ്കൂൾ. സ്കൂളിലെ പൂർവ അധ്യാപികസിസ്റ്റർ ഏയ്ഞ്ചലീസ് ഈറ്റത്തോട്ടിനെയാണ് ഹെഡ്മാസ്റ്റർ ജോബെറ്റ് തോമസിന്‍റെ നേതൃത്വത്തിൽ അധ്യാപകരും വിദ്യാർഥികളും ചേർന്ന് ആദരിച്ചത്.

കുറവിലങ്ങാട്ടെ മരിയൻ പ്രത്യക്ഷീകരണങ്ങൾ നേരിൽക്കണ്ട് ആയിരങ്ങൾ

കുറവിലങ്ങാട്: ദ്യശ്യവിസ്മയങ്ങളുടെ നേരനുഭവും വിശ്വാസത്തിന്‍റെ തീവ്രതയും മാതൃഭക്തിയുടെ നേർക്കാഴ്ചയും ചേർത്തൊരുക്കിയ വിരുന്ന് വിളമ്പി എസ്എംവൈഎം യൂണിറ്റ്. എട്ടുനോമ്പാചരണത്തോടനുബന്ധിച്ചാണ് എസ്എംവൈഎം യൂണിറ്റ് കുറവിലങ്ങാട്ടെ മരിയൻ പ്രത്യക്ഷീകരണങ്ങളുടെ ദ്യശ്യാവതരണം നടത്തിയത്. കല്ലുകൾ അപ്പമാക്കിയും തെളിനീർ തെളിച്ചുനൽകിയും കൽക്കുരിശ് ഉയർത്തിനാട്ടിയുമൊക്കെയുള്ള മാതൃപ്രത്യക്ഷീകരണങ്ങളെ മികവുറ്റ രീതിയിൽ അവതരിപ്പിക്കാൻ സംഘാടകർക്ക് കഴിഞ്ഞു. കാട്ടിലകപ്പെട്ട വൈദികന് വഴികാട്ടിയായും വിശ്വാസം ഏറ്റുപറയാൻ അക്രൈസ്തവനോട് നിർദേശിച്ചും ദേവാലയ അഭിവൃദ്ധിക്കായി പലതവണ നിർദേശം നൽകിയുമൊക്കെയുള്ള മരിയൻ പ്രത്യക്ഷീകരണങ്ങൾ മരിയഭക്തിയുടെ ആഴങ്ങളിലേക്ക് പ്രേക്ഷകനെ കൂട്ടിക്കൊണ്ടുപോയതിനൊപ്പം സാങ്കേതിക ക്രമീകരണങ്ങളിലും വേറിട്ടുനിന്നു. സംഘാടകരെ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, എസ്എംവൈഎം ഡയറക്ടർ ഫാ. ജോസഫ് ചൂരയ്ക്കൽ എന്നിവർ അഭിനന്ദിച്ചു. ഭാരവാഹികളായ സെബാസ്റ്റ്യൻ പൊയ്യാനി, അമല ആൻ ബെന്നി, എബിൻ സജി, നേഹ ലിജു തുടങ്ങിയവർ നേതൃത്വം നൽകി.

പരിശുദ്ധ അമ്മയോടുള്ള ഭക്തി ഏറെ പ്രാധാന്യമുള്ളത്: മാർ ജോസ് പുളിക്കൽ

കാഞ്ഞിരപ്പള്ളി: പരിശുദ്ധ അമ്മയോടുള്ള ഭക്തി വിശ്വാസ ജീവിതത്തിന്‍റെ ഭാഗമായി ഏറെ പ്രാധാന്യമുള്ളതാണെന്ന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. സീറോ മലബാർ മേജർ ആർക്കി എപ്പിസ്കോപ്പൽ തീർഥാടന കേന്ദ്രമായ കാഞ്ഞിരപ്പള്ളി പഴയപള്ളിയിൽ എട്ടുനോന്പ് തിരുനാളിന്‍റെ സമാപനദിവസമായ ഇന്നലെ വിശുദ്ധ കുർബാന അർപ്പിച്ച് സന്ദേശം നൽകുകയായിരുന്നു ബിഷപ്. വിശുദ്ധിയുടെ തികവിൽ ജീവിച്ചവളാണ് പരിശുദ്ധ കന്യകമറിയം. വിശുദ്ധിയിൽ വളരാനും സുവിശേഷത്തിന്‍റെ സാക്ഷികളാകാനും വിളിക്കപ്പെട്ടവരാണ് നാമെല്ലാവരും. നാം ജീവിക്കുന്ന ജീവിതപരിസരങ്ങളിലാണ് സുവിശേഷത്തിന്‍റെ സാക്ഷികളായി മാറേണ്ടത്. ചെറിയവരെയും വേദനിക്കുന്നവരെയും ചേർത്തുപിടിക്കാൻ സാധിക്കുന്ന സുവിശേഷസാക്ഷ്യമായി നമ്മുടെ ജീവിതം മാറണം. വിശുദ്ധിയിൽ വ്യാപരിച്ചുകൊണ്ട് ഈ കാലഘട്ടത്തിൽ സുവിശേഷത്തിന്‍റെ സാക്ഷ്യമായി നമ്മുക്ക് ജീവിക്കാൻ കഴിയണമെന്നും മാർ ജോസ് പുളിക്കൽ കൂട്ടിച്ചേർത്തു. തിരുനാളിന്‍റെ അവസാന ദിവസമായ ഇന്നലെ രാവിലെ മുതൽ രാത്രിവരെ പഴയപള്ളിയിൽ വിശ്വാസികളുടെ പ്രവാഹമായിരുന്നു. രാവിലെ മുതൽ വിശ്വാസികൾക്ക് നേർച്ചക്കഞ്ഞിയും വിതരണവും ചെയ്തു. വൈകുന്നേരം കുരിശിടിയിലേക്കു നടന്ന പ്രദക്ഷിണത്തിൽ ആയിരക്കണക്കിന് വിശ്വാസികൾ പങ്കെടുത്തു. കത്തീഡ്രൽ വികാരിയും ആർച്ച്പ്രീസ്റ്റുമായ റവ.ഡോ. കുര്യൻ താമരശേരി, അസിസ്റ്റന്‍റ് വികാരിമാരായ ഫാ. ജോസഫ് ആലപ്പാട്ടുകുന്നേൽ, ഫാ. തോമസ് മുളങ്ങാശേരി, പഴയപള്ളി റെക്ടർ ഫാ. തോമസ് നല്ലൂർകാലായിപറമ്പിൽ എന്നിവർ നേതൃത്വം നൽകി.

കുരിശുകവലയിലെ കുഴി കാല്‍നട യാത്രക്കാര്‍ക്ക് ഭീഷണിയാകുന്നു

കാഞ്ഞിരപ്പള്ളി: കുരിശുകവലയിലെ കുഴി കാല്‍നടയാത്രക്കാര്‍ക്ക് അപകടഭീഷണിയാകുന്നു. ദേശീയപാത 183ല്‍ കുരിശുങ്കലിന് സമീപം ഇലക്‌ട്രോണിക്സ് ഉപകരണങ്ങള്‍ വില്‍ക്കുന്ന കടകള്‍ക്ക് മുന്പിലെ നടപ്പാതയിലെ ഓടയുടെ മുകളിലെ സ്ലാബ് തകര്‍ന്നാണ് കുഴി രൂപപ്പെട്ടത്. ഒരാഴ്ചയിലധികമായി അപകടാവസ്ഥയില്‍ സ്ലാബ് തകര്‍ന്നുകിടക്കാന്‍ തുടങ്ങിയിട്ട്. അപകടമുണ്ടാകാതിരിക്കാന്‍ കമ്പ് നാട്ടിവയ്ക്കുകയും പിന്നീട് ബോര്‍ഡ് എടുത്ത് കുഴി മറച്ചുവച്ചിരിക്കുകയുമാണ്. ഈ ഭാഗത്ത് നിരവധി സ്ഥാപനങ്ങള്‍ സ്ഥിതി ചെയ്യുന്നതിനാല്‍ കാല്‍നടയായും വാഹനങ്ങളിലും നിരവധി ആളുകളെത്തുന്നുണ്ട്. രാത്രികാലങ്ങളിലടക്കം കാല്‍നാടയായി യാത്രക്കാരും സ്ഥാപനങ്ങളിലെ ജീവനക്കാരും കടന്നുപോകുന്ന ഭാഗമാണിത്. അപകടമുണ്ടാകുന്നതിന് മുന്പ് സ്ലാബ് മാറ്റി സ്ഥാപിക്കാന്‍ നടപടി വേണമെന്നാണ് ആവശ്യമുയരുന്നത്.

നെടുങ്ങാട്-മാളിയേക്കല്‍ റോഡ് നാടിനു സമർപ്പിച്ചു

കാഞ്ഞിരപ്പള്ളി: മുപ്പതു വര്‍ഷമായി ഗതാഗതയോഗ്യമല്ലാതായി കിടന്നിരുന്ന റോഡ് കോൺക്രീറ്റ് ചെയ്ത് നാട്ടുകാര്‍ക്കായി തുറന്നുനല്‍കി. പഞ്ചായത്ത് 19-ാം വാര്‍ഡിലെ മാളിയേക്കല്‍ ഭാഗത്തെ നാല്‍പ്പതോളം കുടുംബങ്ങളുടെ ഏക ആശ്രയമായ നെടുങ്ങാട്-മാളിയേക്കല്‍ റോഡാണ് ഗതാഗതയോഗ്യമാക്കിയത്. പഞ്ചായത്ത് ഫണ്ടില്‍നിന്ന് 9.25 ലക്ഷം രൂപ ചെലവഴിച്ചാണ് നവീകരണ പ്രവര്‍ത്തനങ്ങള്‍ നടത്തിയത്. പഞ്ചായത്ത് വികസനകാര്യ സ്ഥിരംസമിതി അധ്യക്ഷന്‍ റിജോ വാളാന്തറ റോഡിന്‍റെ ഉദ്ഘാടനം നിർവഹിച്ചു. തെരഞ്ഞെടുപ്പുകാലത്ത് നല്‍കിയ വാഗ്ദാനമായിരുന്നു റോഡ് നവീകരണവും കുടിവെള്ളമെത്തിക്കലുമെന്നതും ഇവ രണ്ടും പൂര്‍ത്തിയാക്കിയതായും റിജോ വാളാന്തറ പറഞ്ഞു. ബ്ലോക്ക് പഞ്ചായത്തംഗം ടി.ജെ. മോഹനന്‍, പഞ്ചായത്തംഗം വി.പി. രാജന്‍, അജു പനയ്ക്കല്‍, ജോസി കത്തിലാങ്കല്‍, സിജോ കളരിക്കല്‍, ജോര്‍ജുകുട്ടി പുല്‍പ്പേല്‍, സിഡിഎസ് അംഗം സ്മിത രവി തുടങ്ങിയവര്‍ പ്രസംഗിച്ചു.

വിരമിച്ച കായികാധ്യാപകരുടെ ഒത്തുചേരൽ

കാഞ്ഞിരപ്പള്ളി: സ്കൂൾ കായികരംഗത്ത് കോട്ടയം ജില്ലയ്ക്ക് വൻ നേട്ടങ്ങൾ കരസ്ഥമാക്കുന്നതിനു നേതൃത്വം നൽകിയ കാഞ്ഞിരപ്പള്ളി വിദ്യാഭ്യാസജില്ലയിലെ വിരമിച്ച കായികാധ്യാപകരുടെ ഒത്തുചേരൽ 13നു രാവിലെ 11ന് കാഞ്ഞിരപ്പള്ളി ഹോട്ടൽ ഹിൽടോപ്പ് ഓഡിറ്റോറിയത്തിൽ നടക്കും. സർവീസിൽനിന്നു വിരമിച്ച് 25 വർഷം പൂർത്തിയാക്കിയ ദ്രോണാചാര്യ കെ.പി. തോമസ്, ഇ.സി. ജോൺ, വി.എൻ. കൃഷ്ണപിള്ള, എം.ഡി. ജോർജ്, അബ്ദുൾ അസീസ്, എം.എ. ജോൺ, പി.എം. ബെനഡി, എം.എ. ജോസഫ്, ഏലിയാമ്മ തോമസ്, എം.എൻ. വിജയപ്പൻ എന്നിവരെ യോഗത്തിൽ ആദരിക്കും. വിവിധ രംഗങ്ങളിൽ നേട്ടങ്ങൾ നേടിയവരെയും വിവാഹ ജൂബിലികൾ ആഘോഷിക്കുന്നവരെയും യോഗത്തിൽ അനുമോദിക്കും. പരിപാടികൾക്ക് മുൻ ദേശീയ അധ്യാപക അവാർഡ് ജേതാവ് കെ.വി. ദേവസ്യ, വോളിബോൾ അസോസിയേഷൻ മുൻ സംസ്ഥാന പ്രസിഡന്‍റ് ചാർലി ജേക്കബ്, സംസ്ഥാന അധ്യാപക അവാർഡ് ജേതാക്കളായ ജോസഫ് ജെ. പേമല, ജോസിറ്റ് ജോൺ, എം.ജെ. ജോസ്, എം.എം. മാത്യു തുടങ്ങിയവർ നേതൃത്വം നൽകും.

കേരള കോൺഗ്രസ്-എം എന്നും കർഷകർക്കൊപ്പം: ചീഫ് വിപ്പ് ഡോ. എൻ. ജയരാജ്

ചെറുവള്ളി: കർഷകരുടെയും സാധാരണ ജനവിഭാഗങ്ങളുടെയും പുരോഗതിക്കുവേണ്ടി എന്നും നിലകൊണ്ട പാർട്ടിയാണ് കേരള കോൺഗ്രസ്-എമ്മെന്ന് ചീഫ് വിപ്പ് ഡോ. എൻ. ജയരാജ്. പാർട്ടി ചിറക്കടവ് മണ്ഡലം സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. മണ്ഡലം പ്രസിഡന്‍റ് ഷാജി നല്ലേപ്പറമ്പിൽ അധ്യക്ഷത വഹിച്ചു. നിയോജകമണ്ഡലം പ്രസിഡന്‍റ് എ.എം. മാത്യു ആനിത്തോട്ടം, സംസ്ഥാന കമ്മിറ്റി അംഗങ്ങളായ ഷാജി പാമ്പൂരി, സുമേഷ് ആൻഡ്രൂസ്, കെടിയുസി-എം നിയോജകമണ്ഡലം പ്രസിഡന്‍റ് റെജി പോത്തൻ, ആന്‍റണി മാർട്ടിൻ, ഫിനോ പുതുപ്പറമ്പിൽ, കെ.എ. ഏബ്രഹാം, ചെറിയാൻ ജോസഫ്, രാഹുൽ ബി. പിള്ള, ജയിംസ് കെ. ഈപ്പൻ, സുനിൽ കുന്നപ്പള്ളി, ഷാജി നഗരൂർ, മാത്തുക്കുട്ടി തൊമ്മിത്താഴെ, ചിന്നമ്മ ചെറിയാൻ, ഷൈല ജോൺ, ഷിജോ കൊട്ടാരം, റിച്ചു സുരേഷ്, ഒ.ടി. തോമസ് തുടങ്ങിയവർ പ്രസംഗിച്ചു. സംസ്ഥാന സർക്കാരിന്‍റെ ഭിന്നശേഷി പുരസ്‌കാരം നേടിയ കെ-ഡിസ്‌ക് എക്‌സിക്യൂട്ടീവ് ഡയറക്ടർ റോബിൻ കെ. ടോമി, പ്രധാൻമന്ത്രി ജൻ ആരോഗ്യയോജനയുടെ ആയുഷ്മാൻ ഭാരത് അവാർഡ് ജേതാവും മെന്‍റലിസ്റ്റുമായ ഡോ. സജീവ് പള്ളത്ത്, ആദ്യകാല പാർട്ടി പ്രവർത്തകർ എന്നിവരെ യോഗത്തിൽ ആദരിച്ചു.

ആറന്മുള ക്ഷേത്രത്തിൽ ചേനപ്പാടി പാളത്തൈര് സമർപ്പണം 13ന്

പൊൻകുന്നം: ആറന്മുള പാർഥസാരഥി ക്ഷേത്രത്തിലെ അഷ്ടമിരോഹണി വള്ളസദ്യക്കുള്ള ചേനപ്പാടി കരക്കാരുടെ പാളത്തൈര് സമർപ്പണം 13ന് നടത്തുമെന്ന് രക്ഷാധികാരി സ്വാമി ഗരുഡധ്വജാനന്ദ തീർഥപാദർ പത്രസമ്മേളനത്തിൽ അറിയിച്ചു. 14ന് അഷ്ടമിരോഹിണി വള്ളസദ്യയിൽ വിളമ്പുന്നതിനാണ് ചേനപ്പാടി തൈര്. 12ന് ഉച്ചകഴിഞ്ഞ് മൂന്നിന് വാഴൂർ തീർഥപാദാശ്രമത്തിൽ തൈര് തയാറാക്കും. ആശ്രമത്തിലെ ഗോശാലയിലെ പാൽ ഉപയോഗിച്ചാണ് തൈര് ഉണ്ടാക്കുന്നത്. മഠാധിപതി സ്വാമി പ്രജ്ഞാനാനന്ദ തീർഥപാദർ, കാര്യദർശി സ്വാമി ഗരുഡധ്വജാനന്ദ തീർഥപാദർ എന്നിവർ കാർമികത്വം വഹിക്കും. 1500 ലിറ്റർ തൈരാണ് ആറന്മുളയിലേക്ക് കൊണ്ടുപോകുന്നത്. ആശ്രമത്തിൽ തയാറാക്കുന്ന തൈര് കൂടാതെ ചേനപ്പാടിയിലെ ഭക്തർ വഴിപാടായി സമർപ്പിക്കുന്ന തൈരും ഉപയോഗിക്കും. നൂറ്റാണ്ട് മുന്പ് പൂർവികർ പാളപ്പാത്രത്തിൽ തൈര് തയാറാക്കി കൊണ്ടുപോയിരുന്നതിനാലാണ് പാളത്തൈര് എന്ന പേര് വന്നത്. അന്നത്തെ രീതി അനുസ്മരിച്ച് ഏതാനും പാളപ്പാത്രങ്ങളിലും തൈര് ആറന്മുള ക്ഷേത്രത്തിൽ സമർപ്പിക്കും. 13ന് ഘോഷയാത്രയായാണ് ആറന്മുളയിലേക്ക് ഭക്തർ പുറപ്പെടുന്നത്. ചേനപ്പാടി എസ്എൻഡിപി യോഗം ശാഖ, പരുന്തന്മല ശ്രീദേവി വിലാസം ഭജനസമിതി, വിഴിക്കിത്തോട് ഭജനസമിതി എന്നിവയുടെ സഹകരണത്തോടെ പ്രത്യേകം അലങ്കരിച്ച് തയാറാക്കിയ വാഹനത്തിൽ തീർഥപാദാശ്രമത്തിൽനിന്ന് തൈര് ചേനപ്പാടി കിഴക്കേക്കര ഭഗവതിക്ഷേത്ര സന്നിധിയിലെത്തിക്കും. തുടർന്നു രാവിലെ ഒന്പതിന് ഇവിടെനിന്ന് നാമസങ്കീർത്തന ഘോഷയാത്രയായി ആറന്മുള ക്ഷേത്രത്തിലേക്ക് പുറപ്പെടും. എരുമേലി പോലീസ് എസ്എച്ച്ഒ ഇ.ഡി. ബിജു ഘോഷയാത്ര ഉദ്ഘാടനം ചെയ്യും. രാവിലെ 11ന് പാർഥസാരഥി ക്ഷേത്രനടയിൽ തൈര് സമർപ്പണം നടത്തും. ഘോഷയാത്രയ്ക്ക് റാന്നിയിൽ തോട്ടമൺകാവ് ഭഗവതി ക്ഷേത്ര ഭരണസമിതി, അവിട്ടം ജലോത്സവസമിതി എന്നിവർ സ്വകരണം നൽകും. പാർഥസാരഥി ക്ഷേത്രത്തിലെത്തുന്ന തൈര് സമർപ്പണ ഘോഷയാത്രയെ പാർഥസാരഥി പള്ളിയോട സമിതിയുടെ നേതൃത്വത്തിൽ വഞ്ചിപ്പാട്ട് പാടി സ്വീകരിക്കും. പൂർവകാലത്ത് ഗോക്കളാൽ സമൃദ്ധമായിരുന്ന ചേനപ്പാടി ഗ്രാമത്തിൽനിന്നു ചെറിയ മഠത്തിൽ കേളുച്ചാർ രാമച്ചാരുടെ നേതൃത്വത്തിൽ കമുകിൻപാള കൊണ്ടു നിർമിച്ച പാത്രങ്ങളിലാണ് തൈര് തയാറാക്കി എത്തിച്ചിരുന്നത്. ഇടക്കാലത്ത് മുടങ്ങിപ്പോയ ആചാരം 15 വർഷം മുന്പ് ചരിത്രം തിരിച്ചറിഞ്ഞ് ആറന്മുള കരക്കാരും ചേനപ്പാടി കരക്കാരും ചേർന്ന് പുനരാരംഭിക്കുകയായിരുന്നു. പത്രസമ്മേളനത്തിൽ പ്രസിഡന്‍റ് രാജപ്പൻനായർ കോയിക്കൽ, സെക്രട്ടറി കെ.എസ്. ജയകൃഷ്ണൻ കുറ്റിക്കാട്ട്, വൈസ് പ്രസിഡന്‍റ് സുരേഷ് നാഗമറ്റത്തിൽ, ജോയിന്‍റ് സെക്രട്ടറി പി.പി. വിജയകുമാർ, ട്രഷറർ അഭിലാഷ് പടത്തിയാനിക്കൽ, എ.കെ. സോമൻ, സുനിൽകുമാർ പഴുക്കാപ്പറമ്പിൽ, ലതാ ബിജു മൂലമ്പുഴ, ബിന്ദുമോൾ ചൂരപ്പാടി, അമ്പിളി അശോകൻ, വിജയപ്പൻനായർ തുടങ്ങിയവർ പങ്കെടുത്തു.

പാറേമാക്കല്‍ മാര്‍ തോമ്മാ കത്തനാരുടെ 290-ാം ജന്മദിനാഘോഷം നാളെ

കടനാട്: മലങ്കരയിലെ മാര്‍ത്തോമ്മാ നസ്രാണി സമുദായത്തിന്‍റെ ഐക്യത്തിനും സ്വാതന്ത്ര്യത്തിനും വേണ്ടി അക്ഷീണം യത്‌നിക്കുകയും യാത്രാവിവരണ ഗ്രന്ഥമായ വര്‍ത്തമാന പുസ്തകത്തിന്‍റെ രചനയിലൂടെ മലയാളഭാഷയ്ക്കും സാഹിത്യത്തിനും അതുല്യ സംഭാവനകള്‍ നല്‍കുകയും ചെയ്ത ഗോവര്‍ണദോര്‍ പാറേമാക്കല്‍ മാര്‍ തോമ്മാ കത്തനാരുടെ 290-ാം ജന്മദിനാഘോഷം ജന്മസ്ഥലമായ കടനാട്ടില്‍ നടത്തും. നാളെ വൈകുന്നേരം അഞ്ചിനു നടക്കുന്ന പൊതുസമ്മേളനത്തില്‍ സീറോമലബാര്‍ എക്യുമെനിക്കല്‍ കമ്മീഷന്‍ ചെയര്‍മാന്‍ മാര്‍ ജോസഫ് കല്ലറങ്ങാട്ട്, കേരള കൗണ്‍സില്‍ ഓഫ് ചര്‍ച്ചസ് ചെയര്‍മാന്‍ അലക്‌സിയോസ് മാര്‍ യൗസേബിയൂസ് എന്നിവര്‍ അനുഗ്രഹപ്രഭാഷണം നടത്തും. വികാരി ജനറാൾ മോണ്‍. ജോസഫ് മലേപ്പറമ്പില്‍, കടനാട് ഫൊറോന പള്ളി വികാരി ഫാ. ജോസഫ് പാനാന്പുഴ, രാമപുരം ഫൊറോന പള്ളി വികാരി ഫാ. ബെര്‍ക്കുമാന്‍സ് കുന്നുംപുറം, ടോമി കല്ലാനി, ഷെവ. ഉമ്മച്ചന്‍ വേങ്കടത്ത് തുടങ്ങിയവര്‍ പ്രസംഗിക്കും. 1736 സെപ്റ്റംബര്‍ 10ന് കടനാട്ടില്‍ ജനിച്ച മാര്‍ തോമ്മാ കത്തനാരുടെ പതിനെട്ടാം നൂറ്റാണ്ടിന്‍റെ ഉത്തരാര്‍ധത്തിലുള്ള എട്ടു വര്‍ഷം നീണ്ട ക്ലേശകരമായ റോമാ, പോര്‍ച്ചുഗല്‍ യാത്രയും മടങ്ങിവന്നതിനുശേഷമുള്ള സഭാ സമുദായ നേതൃത്വവും ടിപ്പുസുല്‍ത്താന്‍റെ പടയോട്ടക്കാലത്തെ സാഹസിക നേതൃത്വവും യാത്രാവിവരണ ഗ്രന്ഥമായ വര്‍ത്തമാന പുസ്തകത്തിന്‍റെ രചനയും അദ്ദേഹത്തെ പ്രശസ്തനാക്കി. സഭാചരിത്രത്തിന്‍റെ അറിവും ശ്രേഷ്ഠതയും അയവിറക്കാനും പുതിയ തലമുറയിലേക്ക് പകരാനുമാണ് പാറേമ്മാക്കല്‍ ജയന്തി ആഘോഷംകൊണ്ട് ഉദ്ദേശിക്കുന്നതെന്ന് പത്രസമ്മേളനത്തില്‍ പങ്കെടുത്ത വികാരി ജനറാള്‍ മോണ്‍. ജോസഫ് മലേപ്പറമ്പില്‍, ഫാ. സിറിള്‍ തയ്യില്‍, സെന്നിച്ചന്‍ കുര്യന്‍, ബിനു വള്ളോംപുരയിടം, ബെന്നി ഈന്തനാക്കുന്നേല്‍, തോമസ് കാവുംപുറം എന്നിവര്‍ പറഞ്ഞു.

പുഞ്ചവയലിൽ വെട്ടേറ്റ സ്ത്രീകൾ അപകടനില തരണംചെയ്തു

മുണ്ടക്കയം: ഭാര്യയെയും ഭാര്യാമാതാവിനെയും വെട്ടി പരിക്കേൽപ്പിച്ച ശേഷം യുവാവ് ആത്മഹത്യ ചെയ്ത സംഭവത്തിൽ വെട്ടേറ്റ സ്ത്രീകൾ അപകടനില തരണം ചെയ്തു. ഞായറാഴ്ച രാവിലെ 11.45ന് മുണ്ടക്കയം പുഞ്ചവയലിലായിരുന്നു നാടിനെ നടുക്കിയ സംഭവം നടന്നത്. മുണ്ടക്കയം കരിനിലം കുഴിപ്പറമ്പിൽ പ്രദീപ് (49) ഭാര്യയെയും ഭാര്യാമാതാവിനെയും ഇവർ താമസിക്കുന്ന പുഞ്ചവയലിലെ വാടക വീട്ടിലെത്തി വെട്ടിപ്പരിക്കേൽപ്പിച്ച ശേഷം ആത്മഹത്യ ചെയ്യുകയായിരുന്നു. പ്രദീപിന്‍റെ ഭാര്യ ചേരിത്തോട്ടത്തിൽ സൗമ്യ (33), ഭാര്യാമാതാവ് ബീന നന്ദൻ (64) എന്നിവർക്കണ് പ്രദീപിന്‍റെ ആക്രമണത്തിൽ ഗുരുതരമായി പരിക്കേറ്റത്. കോട്ടയം മെഡിക്കൽ കോളജിൽ ചികിത്സയിൽ കഴിയുന്ന ഇരുവരും അപകടനില തരണം ചെയ്തതായി പോലീസ് അറിയിച്ചു. ഏറെ നാളായി പ്രദീപും കുടുംബവും മക്കളായ പൂജ, പുണ്യ എന്നിവരടക്കം വിശാഖപട്ടണത്താണ് താമസിച്ചിരുന്നത്. കുടുംബ വഴക്കിനെത്തുടർന്ന് ഭാര്യ സൗമ്യ നാട്ടിലേക്ക് മടങ്ങി. പിന്നീട് അഞ്ചു മാസങ്ങൾക്ക് മുമ്പ് സൗമ്യ ഇളയ മകളെയും കൂട്ടി അമ്മ ബീനയ്ക്കൊപ്പം പുഞ്ചവയലിൽ വാടകയ്ക്ക് വീടെടുത്ത് താമസിക്കുകയായിരുന്നു. ഓണാവധിക്ക് ഇളയ മകളെ തിരികെ കൂട്ടിക്കൊണ്ട് പോകുവാനായാണ് പ്രദീപ് നാട്ടിലെത്തിയത്. എന്നാൽ ഇതുസംബന്ധിച്ച് തർക്കമുണ്ടാകുകയും മുണ്ടക്കയം പോലീസ് സ്റ്റേഷനിൽ എത്തുകയും ചെയ്തു. ഇവിടെ വച്ച് ഇളയ കുട്ടി അമ്മയോടൊപ്പം പോയാൽ മതിയെന്ന് പറഞ്ഞതാണ് പ്രകോപനത്തിന് ഇടയാക്കിയതെന്നും പറയപ്പെടുന്നു. വിശാഖപട്ടണത്തുള്ള മലയാളി അസോസിയേഷന്‍റെ നേതൃത്വത്തിൽ മൂത്ത മകൾ പൂജയെ നാട്ടിൽ എത്തിച്ചു. പ്രദീപിന്‍റെ സംസ്കാരം ഇന്നലെ വീട്ടുവളപ്പിൽ നടത്തി.

ദേശീയപാതയിലെ സീബ്രാലൈനുകൾ മാഞ്ഞു

മുണ്ടക്കയം: ദേശീയപാത 183ല്‍ കാഞ്ഞിരപ്പള്ളിക്കും മുണ്ടക്കയത്തിനുമിടയിൽ സീബ്രാലൈനുകളും ഡിവൈഡർ ലൈനുകളും മാഞ്ഞു. അന്തർ സംസ്ഥാന ദേശീയപാതകളിൽ പ്രധാനപ്പെട്ട റോഡാണ് കൊട്ടാരക്കര -ദിണ്ടിഗൽ ദേശീയപാത. എന്നാൽ, ഇന്ന് റോഡിന്‍റെ അവസ്ഥ പല ഭാഗങ്ങളിലും പഞ്ചായത്ത് റോഡിനേക്കാൾ ശോചനീയമാണ്. സംസ്ഥാനപാതകൾ പോലും ദേശീയ നിലവാരത്തിൽ നവീകരിക്കുമ്പോഴാണ് അവഗണനയുടെ നടുവിൽ കൊട്ടാരക്കര-ദിണ്ടിഗൽ ദേശീയപാതയുള്ളത്. ദിവസേന ആയിരക്കണക്കിന് വാഹനങ്ങൾ കടന്നുപോകുന്ന ദേശീയപാതയിൽ കാഞ്ഞിരപ്പള്ളിക്കും മുണ്ടക്കയത്തിനുമിടയിൽ പലഭാഗത്തും ഡിവൈഡർ ലൈനുകളും സീബ്രാലൈനുകളും മാഞ്ഞിട്ട് നാളുകൾ പിന്നിട്ടു. ചിറ്റടി അട്ടിവളവ്, എസ്എൻഡിപി വളവ്, 31-ാംമൈൽ വേബ്രിഡ്ജ് വളവ്, പൈങ്ങനയിലെ പതിവ് അപകട സ്ഥലങ്ങളായ കൊടുംവളവുകളിലൊന്നും ഡിവൈഡർ ലൈനുകളില്ല. കാലപ്പഴക്കത്താൽ വരകൾ മാഞ്ഞതോടെ അപകടങ്ങളും വർധിക്കുകയാണ്. സീബ്രാലൈനുകളുടെ അഭാവത്തിൽ രാത്രികാലങ്ങളിൽ മൂടൽമഞ്ഞുകൂടി ഇറങ്ങുന്നതോടെ വാഹനയാത്രക്കാർക്ക് വലിയ ബുദ്ധിമുട്ടാകും സൃഷ്ടിക്കുക. ഇത് അപകടങ്ങൾ പെരുകാനിടയാക്കും. മുണ്ടക്കയം ടൗണിലെ പ്രധാന ജംഗ്ഷനുകളിലും സീബ്രാലൈനുകൾ പൂർണമായും മാഞ്ഞു. ഇതോടെ കാൽനട യാത്രക്കാർ റോഡ് മുറിച്ചുകിടക്കുന്നത് ജീവൻ പണയംവച്ചാണ്.

അയ്യൻകാളി നവോത്ഥാന നായകന്‍: പി.എസ്. പ്രശാന്ത്

ചങ്ങനാശേരി: സാമൂഹിക വ്യവസ്ഥിതിയില്‍ ഇന്നു ലോകത്തിനു തന്നെ മാതൃകയായി കേരളം മാറാനുള്ള കാരണം അയ്യൻകാളിയാണെന്ന് തിരുവിതാംകൂര്‍ ദേവസ്വം ബോര്‍ഡ് പ്രസിഡന്‍റ് പി.എസ്. പ്രശാന്ത്. കെപിഎംഎസ് ചങ്ങനാശേരി യൂണിയന്‍റെ നേതൃത്വത്തില്‍ അയ്യൻകാളി ജയന്തിയുടെ ഭാഗമായി നടത്തിയ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. യൂണിയന്‍ പ്രസിഡന്‍റ് സന്തോഷ് കുമാര്‍ പായിപ്പാട് അധ്യക്ഷത വഹിച്ചു. സെക്രട്ടറി ടി.കെ. കരുണാകരന്‍, അഖില കേരള ഹിന്ദു സാംബവ മഹാസഭ ജനറല്‍ സെക്രട്ടറി എം.ടി. സനേഷ്, തൃക്കൊടിത്താനം സെന്‍റ് സേവ്യേഴ്‌സ് ഫൊറോന പള്ളി വികാരി ഫാ. സെബാസ്റ്റ്യന്‍ പുന്നശേരി, പുതൂര്‍പ്പള്ളി ജുമാമസ്ജിദ് പ്രസിഡന്‍റ് ടി.പി. അബ്ദുല്‍ ഹമീദ്, തു‌ടങ്ങിയവര്‍ പ്രസംഗിച്ചു.

കളഞ്ഞുകിട്ടിയ മൊബൈല്‍ ഫോണ്‍ ഉടമയെ കണ്ടെത്തി തിരിച്ചുനല്‍കി യുവാവ്

തൃക്കൊടിത്താനം: തിരുവോണനാളില്‍ വഴിയില്‍നിന്നു കളഞ്ഞുകിട്ടിയ മൊബൈല്‍ ഫോണ്‍ ഉടമയെ കണ്ടെത്തി തിരിച്ചുനല്‍കി യുവാവ് മാതൃകയായി. തിരുവോണ നാളില്‍ വിവിധ സേവന പ്രവര്‍ത്തനങ്ങള്‍ക്കുവേണ്ടി പണം കണ്ടെത്തുന്നതിനായി നടത്തിയ പായസ വിതരണം കഴിഞ്ഞ് വീട്ടിലേക്കു പോകുമ്പോഴാണ് റോഡില്‍ കിടന്ന് വിലയേറിയ മൊബൈല്‍ ഫോണും വീടിന്‍റെ താക്കോലും സുമീഷ് കുമാറിന് ലഭിക്കുന്നത്. ഫോണിലേക്കു വന്ന ആദ്യത്തെ കോള്‍ അറ്റന്‍ഡ് ചെയ്ത് ഉടമയ്ക്ക് മൊബൈല്‍ ഫോണും താക്കോലും കൈമാറുകയായിരുന്നു. ദീപിക ദിനപത്രത്തിന്‍റെ ഏജന്‍റ് കൂടിയാണ് സുമീഷ് കുമാര്‍. മുമ്പു വഴിയില്‍നിന്നു ലഭിച്ച പണമടങ്ങിയ ബാഗ് ഉടമയ്ക്കു തിരിച്ചു നല്‍കി സുമീഷ് കുമാര്‍ നാടിന് മാതൃകയായിരുന്നു.

ക്രിസ്തുവിനെ ലക്ഷ്യംവയ്ക്കുന്നവനാകണം ക്രൈസ്തവൻ: റവ.ഡോ. അഗസ്റ്റിൻ കൂട്ടിയാനിയിൽ

കുറവിലങ്ങാട്: ആൾക്കൂട്ടത്തിന്‍റെ നിലപാടുകൾക്കപ്പുറം ക്രിസ്തുവിനെ ലക്ഷ്യംവയ്ക്കുന്നവനാകണം ക്രൈസ്തവനെന്ന് പാലാ മാർ സ്ലീവാ മെഡിസിറ്റി സിഇഒ റവ.ഡോ. അഗസ്റ്റിൻ കൂട്ടിയാനിയിൽ. മേജർ ആർക്കി എപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടനകേന്ദ്രത്തിൽ എട്ടുനോമ്പാചരണത്തിന്‍റെ ഏഴാം ദിനം വിശുദ്ധ കുർബാന അർപ്പിച്ച് സന്ദേശം നൽകുകയായിരുന്നു അദ്ദേഹം.

ജനാധിപത്യത്തിന്‍റെ സ്വാദ് പിന്നാക്ക സമുദായത്തിന് ലഭിച്ചിട്ടില്ല: വെള്ളാപ്പള്ളി നടേശൻ

എരുമേലി: മതാധിപത്യത്തിന്‍റെ കടന്നുകയറ്റം മൂലം ജനാധിപത്യത്തിന്‍റ യഥാർഥ സ്വാദ് അനുഭവിക്കാൻ പിന്നാക്ക സമുദായത്തിന് ഇന്നും സാധിച്ചിട്ടില്ലെന്ന് എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ. എരുമേലിയിൽ ചതയ ദിനാഘോഷ പൊതുസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജാതിമത വിവേചനത്തിന്‍റെ യാതനകൾ ഏറെ സഹിച്ച പിന്നാക്ക സമുദായത്തിന് ജനാധിപത്യം വന്ന് കാലമേറെയായിട്ടും ഈ വിവേചനങ്ങളിൽനിന്ന് മോചനം സാധ്യമായിട്ടില്ല. സാമുദായിക ശക്തിസമാഹരണത്തിലൂടെ മാത്രമേ വിവേചനങ്ങളിൽനിന്ന് മോചനവും സാമൂഹികനീതിയും ലഭിക്കുകയുള്ളൂവെന്ന് അദ്ദേഹം പറഞ്ഞു. മന്ത്രി വീണാ ജോർജ് വിശിഷ്‌ടാതിഥിയായി പങ്കെടുത്തു. യൂണിയൻ ഏർപ്പെടുത്തിയ വിദ്യാഭ്യാസ എൻഡോവ്മെന്‍റ് അവാർഡുകൾ സെബാസ്റ്റ്യൻ കുളത്തുങ്കൽ എംഎൽഎ വിതരണം ചെയ്തു. എരുമേലി യൂണിയൻ ചെയർമാൻ കെ. പദ്മകുമാർ അധ്യക്ഷത വഹിച്ചു. യൂണിയൻ ഭാരവാഹികൾ ജനറൽ സെക്രട്ടറി വെള്ളാപ്പള്ളി നടേശനെ ആദരിച്ചു.

കുറവിലങ്ങാട് പള്ളിയിൽ മാതാവിന്‍റെ പിറവിത്തിരുനാൾ

കുറവിലങ്ങാട്: 180 മണിക്കൂറുകൾ ഇടമുറിയാതെ നടത്തിയ പ്രാർഥനയുടെ കരുത്തിലാണ് കുറവിലങ്ങാട്ടെ വിശ്വാസസമൂഹം ഇന്ന് ദൈവമാതാവിന്‍റെ പിറവിത്തിരുനാളിന്‍റെ ഭാഗമാകുന്നത്. നോമ്പിന്‍റെ വിശുദ്ധിക്കൊപ്പം പദയാത്രകളും തീർഥാടനങ്ങളുമായി ആയിരങ്ങളാണ് ഓരോദിവസവും മുത്തിയമ്മയ്ക്കരികിലേക്ക് എത്തിയത്. ഇന്നു രാവിലെ പത്തിന് പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ട് വിശുദ്ധ കുർബാന അർപ്പിച്ച് സന്ദേശം നൽകും. തുടർന്ന് മേരിനാമധാരീ സംഗമവും ജപമാല പ്രദക്ഷിണവും സ്‌നേഹവിരുന്നും നടക്കും. മുത്തിയമ്മ ഇന്നലെ നഗരത്തിലൂടെ പ്രദക്ഷിണം നടത്തിയത് വ്യാപാരിമക്കളുടെ തോളിലേറി. ടൗണിലെയും സമീപസ്ഥലങ്ങളിലെയും വ്യാപാരികളാണ് ഇന്നലെ ജപമാലപ്രദക്ഷിണത്തിൽ മുത്തിയമ്മയുടെ തിരുസ്വരൂപം സംവഹിച്ചത്. ദൈവമാതാവിന്‍റെ പിറവിതിരുനാളിൽ സഹപ്രസുദേന്തിമാരായും വ്യാപാരികൾ തിരുനാളിനോട് ചേർന്ന് നിൽക്കുന്നുണ്ട്. രണ്ടായിരത്തോളം വിദ്യാർഥികൾ മുത്തിയമ്മയ്ക്കരികിൽ കുറവിലങ്ങാട്: ജീവിക്കുന്ന വിശ്വാസം പരസ്യമായി പ്രഖ്യാപിച്ച് രണ്ടായിരത്തോളം കുട്ടികൾ മുത്തിയമ്മയ്ക്കരികിൽ. മർത്ത്മറിയം സെൻട്രൽ സൺഡേ സ്‌കൂൾ, നസ്രത്ത്ഹിൽ തിരുക്കുടുംബം സൺഡേ സ്‌കൂൾ, കുര്യനാട് സെന്‍റ് ആൻസ് സൺഡേ സ്‌കൂൾ എന്നിവിടങ്ങളിലെ ഇടവകാംഗങ്ങളായ രണ്ടായിരത്തോളം വിദ്യാർഥികളാണ് നിധീരിക്കൽ മാണിക്കത്തനാർ നഗറിൽ സംഗമിച്ച് മുത്തിയമ്മയ്ക്കരികിലേക്ക് ജപമാല ചൊല്ലി എത്തിയത്. അസിസ്റ്റന്‍റ് വികാരിമാരും വിശ്വാസപരിശീലന കേന്ദ്രങ്ങളുടെ ഡയറക്ടർമാരുമായ ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, ഹെഡ്മാസ്റ്റർമാരായ ഡോ. റെന്നി എ. ജോർജ്, പ്രകാശ് നെടിയാനി, ജോസ് വട്ടംകുഴി എന്നിവരും വിശ്വാസപരിശീലകരും നേതൃത്വം നൽകി. വിദ്യാർഥികൾക്ക് ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, എസ്എംവൈഎം പാലാ രൂപത ഡയറക്ടർ ഫാ. മാണി കൊഴുപ്പൻകുറ്റി, അസി. വികാരി ഫാ. പോൾ കുന്നുംപുറത്ത് എന്നിവർ അനുഗ്രഹാശംസകൾ നേർന്നു. ഫാ. കുര്യാക്കോസ് വട്ടമുകളേൽ വിശുദ്ധ കുർബാന അർപ്പിച്ച് സന്ദേശം നൽകി.

മാലിന്യശേഖരണ ബൂത്തുകൾ നോക്കുകുത്തി : ജനം ദുരിതത്തിൽ

തലയോലപ്പറമ്പ്: മറവൻതുരുത്ത് പഞ്ചായത്തിന്‍റെ വിവിധ ഭാഗങ്ങളിൽ സ്ഥാപിച്ചിട്ടുള്ള മാലിന്യശേഖരണ ബൂത്തുകളിൽ ചിലത് പ്രധാന കവലകളിൽ മാലിന്യം നിറഞ്ഞ് ദുർഗന്ധം പരത്തുന്നതായി പരാതി. പ്ലാസ്റ്റിക് കുപ്പികളും മറ്റും നിക്ഷേപിക്കാൻ സ്ഥാപിച്ച ബോട്ടിൽ ബൂത്തുകളിൽ ചിലത് കാടുകയറി ഉപയോഗശൂന്യമായി. ഇത്തരം കേന്ദ്രങ്ങളുടെ തുടർപ്രവർത്തനങ്ങളിൽ ഉദ്യോഗസ്ഥരും ജനപ്രതിനിധികളും ശ്രദ്ധ പതിപ്പിക്കാത്തതു മൂലമാണ് ലക്ഷങ്ങൾ മുടക്കി നടപ്പാക്കിയ പദ്ധതികൾ ലക്ഷ്യം കാണാതെ പോകുന്നതെന്ന് നാട്ടുകാർ ആരോപിക്കുന്നു. പാലാംകടവിലെ ബസ് കാത്തിരിപ്പു കേന്ദ്രത്തിൽ മാലിന്യക്കൂമ്പാരം എറണാകുളം, വൈക്കം തുടങ്ങിയ സ്ഥലങ്ങളിലേക്ക് സ്വകാര്യ ബസുകൾ സർവീസ് ആരംഭിക്കുന്ന മറവൻതുരുത്ത് പാലംകടവിലെ ബസ് കാത്തിരിപ്പുകേന്ദ്രത്തോടു ചേർന്നാണ് വേസ്റ്റ്ബിൻ സ്ഥാപിച്ചിരിക്കുന്നത്. നൂറുകണക്കിന് യാത്രക്കാർ എത്തുന്ന ബസ് കാത്തിരിപ്പ് കേന്ദ്രത്തിലെ വേസ്റ്റ് ബിന്നിൽ പേപ്പർ മാത്രമാണ് ഇടേണ്ടതെങ്കിലും രാത്രിയുടെ മറവിൽ സ്നഗിയും ഡയപ്പറും അടക്കമുള്ള മാലിന്യങ്ങളും ജൈവ-അജൈവ മാലിന്യങ്ങളും പ്ലാസ്റ്റിക് കൂടുകളിൽ കെട്ടി ഇവിടെ നിക്ഷേപിക്കുകയാണ്. ചിലരെയൊക്കെ കൈയോടെ പിടികൂടി മാലിന്യം തിരിച്ചേൽപ്പിച്ചു വിട്ടിട്ടുണ്ടെന്ന് ഓട്ടോറിക്ഷാ ഡ്രൈവറർമാർ പറയുന്നു. മാലിന്യം ചീഞ്ഞളിഞ്ഞ് ദുർഗന്ധം അസഹ്യമാകുന്നത് യാത്രക്കാരെയും വീർപ്പുമുട്ടിക്കുന്നു. ഇവിടെ സിസിടിവി സ്ഥാപിക്കുന്നതിനോ വേസ്റ്റ്ബിൻ നീക്കുന്നതിനോ പഞ്ചായത്ത് അധികൃതർ നടപടി സ്വീകരിക്കണമെന്നാണ് യാത്രക്കാരുടെയും ഓട്ടോറിക്ഷാ തൊഴിലാളികളുടേയും ആവശ്യം. കാടുപിടിച്ച് ബോട്ടിൽ ബൂത്ത് മറവൻതുരുത്തു പഞ്ചായത്തിലെ ടോൾ ജംഗ്ഷനിലെ ബസ് സ്റ്റോപ്പും ഓട്ടോറിക്ഷാ സ്റ്റാൻഡും പിന്നിട്ട് വിജനമായ പുതുക്കുളങ്ങര ഭാഗത്ത് സ്ഥാപിച്ച ബോട്ടിൽ ബൂത്ത് കാടുകയറിയ നിലയിലാണ് .ഇഴജന്തുക്കളെ ഭയന്ന് ഒരാളും ഈഭാഗത്തേക്ക് പോകുന്നില്ല.ബോട്ടിൽ ബൂത്ത് ജനങ്ങൾ വന്നുപോകുന്നിടത്തേക്ക് മാറ്റി സ്ഥാപിക്കണമെന്ന് പ്രദേശവാസികളും ഏറെ കാലമായി ആവശ്യപ്പെട്ടുവരികയാണ്. 2024- 25 സാമ്പത്തിക വർഷത്തിൽ ശുചിത്വമിഷന്‍റെ ഫണ്ടും പദ്ധതിപ്പണവും ഉപയോഗിച്ചാണ് 25 ബോട്ടിൽ ബൂത്തുകളും 26 വേസ്റ്റ് ബിന്നും പഞ്ചായത്തിലെ വിവിധ വാർഡുളിൽ സ്ഥാപിച്ചത്. ഡയപ്പറും ഭക്ഷണാവശിഷ്ടങ്ങളും ഇതിനുള്ളിൽ കെട്ടിവയ്ക്കുന്നതിനെത്തുടർന്ന് ഹരിതകർമസേനാംഗങ്ങളെക്കൊണ്ട് മാലിന്യം നീക്കാൻ കഴിയാത്തതുമൂലം പുറത്തുനിന്നു രണ്ടുപേരെ നിയോഗിച്ചാണ് ഒരുതവണ മാലിന്യങ്ങൾ പഞ്ചായത്ത് നീക്കം ചെയ്തത്. നിലവിലുണ്ടായിട്ടുള്ള മാലിന്യങ്ങൾ പഞ്ചായത്ത് പണം മുടക്കി നീക്കം ചെയ്യും. തുടർന്ന് വേസ്റ്റ് ബിന്നുകൾ പൊതുസ്ഥലങ്ങളിൽ സ്ഥാപിക്കാതെ സ്കൂളുകളിലും അങ്കണവാടികളിലും വ്യാപാരസ്ഥാപനങ്ങളിലും വീടുകളിലും നൽകാനാണ് തീരുമാനിച്ചിട്ടുള്ളത്. പി. പ്രീതി, പ്രസിഡന്‍റ്, മറവൻതുരുത്ത് പഞ്ചായത്ത്

ത്രേസ്യാമ്മ മാത്യുവിനെ ആദരിച്ചു

കടുത്തുരുത്തി: സീറോ മലബാര്‍ സഭയുടെ മികച്ച സാമൂഹിക പ്രവര്‍ത്തകയ്ക്കുള്ള അവാര്‍ഡ് ലഭിച്ച മിസ് ത്രേസ്യാമ്മ മാത്യുവിനെ ആദരിച്ചു.കടുത്തുരുത്തി റീജണിന്‍റെ നേതൃത്വത്തില്‍ കടപ്പൂരാന്‍ ഓഡിറ്റോറിയത്തില്‍ നടന്ന യോഗത്തില്‍ മോന്‍സ് ജോസഫ് എംഎല്‍എ പൊന്നാട അണിയിച്ച് ആദരിച്ചു. പ്രോജക്റ്റ് മനേജര്‍ പോള്‍സണ്‍ കൊട്ടാരത്തില്‍ അധ്യക്ഷത വഹിച്ചു. കൃഷി ഓഫീസര്‍ ആര്‍. സിദ്ധാര്‍ഥ്, പഞ്ചായത്തംഗംങ്ങളായ ജാന്‍സി സണ്ണി, ഷീജ സജി, സീനിയര്‍ പ്രോഗ്രാം ഓഫീസര്‍ ഷൈനി ജോഷി, റീജണല്‍ ലീഡര്‍ റ്റീനു ഫ്രാന്‍സിസ്, യൂണിറ്റ് ഓഫീസര്‍മാരായ ബിന്‍സി ബിജു, സുമ ബാബു ത ുടങ്ങിയവര്‍ പ്രസംഗിച്ചു.

കുടവെച്ചൂർ പള്ളിയിൽ തിരുനാൾ ഇന്ന്

കുടവെച്ചൂർ: കുടവെച്ചൂർ സെന്‍റ് മേരീസ് പള്ളിയിൽ പരിശുദ്ധ കന്യകാമറിയത്തിന്‍റെ പിറവിത്തിരുനാൾ ഇന്ന് ആഘോഷിക്കും. രാവിലെ ആറിന് വിശുദ്ധകുർബാന: ഫാ. ആന്‍റണി കളത്തിൽ, ഏഴിന് വിശുദ്ധ കുർബാന: ഫാ. സെബാസ്റ്റ്യൻ മാണിക്കത്താൻ, എട്ടിന് വിശുദ്ധ കുർബാന: ഫാ.ജോർജ് തേലേക്കാട്ട്, ഒൻപതിന് വിശുദ്ധ കുർബാന: ഫാ.ജോസ് വല്ലയിൽ,10ന് തിരുനാൾ കുർബാന: ഫാ. വിപിൻ കുരിശുതറ മുഖ്യകാർമികത്വം വഹിക്കും. ഫാ. സച്ചിൻ മാമ്പുഴക്കൽ , ഫാ. ജോസഫ് മേച്ചേരി എന്നിവർ സഹകാർമികരാകും. ഉച്ചകഴിഞ്ഞ് രണ്ടിന് വിശുദ്ധ കുർബാന:: ഫാ. ജോസഫ് മാക്കോതക്കാട്ട്, മൂന്നിന് വിശുദ്ധ കുർബാന: ഫാ.ജിത്ത് പള്ളിപ്പാട്ട്, തിരുനാൾ പ്രദക്ഷിണം. തുടർന്ന് വിശുദ്ധ കുർബാന: ഫാ.സുരേഷ് മൽപ്പാൻ. നാളെ മരിച്ചവരുടെ ഓർമദിനം. രാവിലെ ആറിനും 9.30നും വിശുദ്ധ കുർബാന: ഫാ.സനീഷ് കാഞ്ഞിരക്കാട്ടുകരി, വൈകുന്നേരം അഞ്ചിന് വിശുദ്ധ കുർബാന: ഫാ.ജിനുപള്ളിപ്പാട്ട്.15ന് എട്ടാമിടം തിരുനാളോടെആഘോഷങ്ങൾക്ക് സമാപനമാകും. വൈക്കം, കോട്ടയം, ആലപ്പുഴ, ചേർത്തല എന്നിവിടങ്ങളിൽ നിന്ന് എത്തുന്ന തീർത്ഥാടകർക്കായി യാത്രാസൗകര്യങ്ങൾ ഒരുക്കിയിട്ടുണ്ട്.

ശ്രീനാരായണ ജയന്തി ഘോഷയാത്ര വർണാഭമായി

തലയോലപ്പറമ്പ്: ശ്രീനാരായണഗുരുവിന്‍റെ 171-ാമത് ജയന്തി ആഘോഷത്തോടനുബന്ധിച്ച് എസ്എൻഡിപി യോഗം 3457-ാം നമ്പർ വടകര ശാഖ, വനിതാ സംഘം, യൂത്ത് മൂവ്മെന്‍റ്, കുടുംബയൂണിറ്റുകൾ എന്നിവയുടെ സംയുക്താഭിമുഖ്യത്തിൽ നടത്തിയ ജയന്തി ഘോഷയാത്ര വർണാഭമായി. ശാഖാ പ്രസിഡന്‍റ് വി.വി. വേണപ്പൻ, വൈസ് പ്രസിഡന്‍റ് എം.കെ. അനിൽകുമാർ സെക്രട്ടറി ഡി.സജീവ് നിരപ്പത്ത്, വത്സ മോഹൻ, സന്തോഷ് മാവുങ്കൽ,കെ.എസ് ശ്രീനിവാസൻ, പി.ടി ജോഷി തുടങ്ങിയവർ നേതൃത്വം നൽകി. തലയോലപ്പറമ്പ്: കെ.ആര്‍. നാരായണന്‍ സ്മാരക തലയോലപ്പറമ്പ് എസ്എന്‍ഡിപി യൂണിയന്‍റെ ആഭിമുഖ്യത്തില്‍ ശ്രീനാരായണഗുരുവിന്‍റെ 171-ാമത് ജയന്തി ആഘോഷിച്ചു. ആഘോഷങ്ങളുടെ ഭാഗമായി തലപ്പാറ ഗുരുദേവ പ്രാര്‍ഥനാലയത്തിനു മുന്നില്‍നിന്ന് ആരംഭിച്ച ഘോഷയാത്രയ്ക്ക് യൂണിയന്‍ പ്രസിഡന്‍റ് ഇ.ഡി. പ്രകാശന്‍,യൂണിയന്‍ സെക്രട്ടറി എസ്.ഡി. സുരേഷ്ബാബു,വൈസ് പ്രസിഡന്‍റ് രഞ്ജിത് രാജപ്പന്‍തുടങ്ങിയവര്‍ നേതൃത്വം നല്‍കി. ഗുരു ജയന്തി സമ്മേളനം ഇ. ഡി.പ്രകാശന്‍ ഉദ്ഘാടനം ചെയ്തു. എസ്.ഡി. സുരേഷ്ബാബു അധ്യക്ഷത വഹിച്ചു. രഞ്ജിത് രാജപ്പന്‍, പി.കെ.വേണുഗോപാല്‍, കെ. എസ്.വിനോദ്, യു.എസ്. പ്രസന്നന്‍ തുടങ്ങിയവര്‍ പ്രസംഗിച്ചു.തുടർന്നു നടന്ന സംയുക്ത വാഹനറാലി യൂത്ത് മൂവ്മെന്‍റ് യൂണിയൻ പ്രസിഡന്‍റ് ഗൗതം സുരേഷ് ബാബു ഫ്ലാഗ് ഓഫ്‌ ചെയ്തു.

വീട്ടിൽ കയറി അതിക്രമം: യുവാവ് പിടിയിൽ

ഗാന്ധിനഗർ: വീട്ടുമുറ്റത്ത് ഗൃഹനാഥനെയും സഹോദരനെയും മർദിച്ച യുവാവ് പിടിയിൽ. പെരുമ്പായിക്കാട് മാമ്മൂട് വട്ടമുകൾ ഫെബിൻ കുഞ്ഞുമോൻ (18) ആണ് ഗാന്ധിനഗർ പോലീസിന്‍റെ പിടിയിലായത്. പെരുമ്പായിക്കാട് കുമാരനല്ലൂർ മങ്ങാട്ടുകടവ് ഭാഗത്ത് പാളയെപ്പള്ളി വീടിന്‍റെ മുറ്റത്ത് ഗൃഹനാഥയെയും സഹോദരനെയും ആക്രമിച്ച കേസിലാണ് ഗാന്ധിനഗർ പോലീസ് ഫെബിനെ അറസ്റ്റ് ചെയ്തത്. കോട്ടയം ജുഡീഷൽ ഒന്നാം ക്ലാസ് മജിസ്‌ട്രേറ്റ് കോടതി മുമ്പാകെ ഹാജരാക്കിയ പ്രതിയെ റിമാൻഡ് ചെയ്തു.

അധോലോകത്തെ മലർത്തിയടിച്ച് പവർഫുൾ ഗേൾസ്

ശ്രീകണ്ഠമംഗലത്ത് വനിതാ വടംവലിമത്സരം ആവേശമായി അതിരമ്പുഴ: അധോലോകത്തെ തറപറ്റിച്ച് പവർഫുൾ ഗേൾസ്. ഓണാഘോഷത്തോടനുബന്ധിച്ച് അതിരമ്പുഴ ശ്രീകണ്ഠമംഗലം കുറ്റിയേൽ കവലയിൽ നടന്ന വനിതാ വടംവലി മത്സരം ആവേശമായി. നാഷണൽ ആർട്സ് ആൻഡ് സ്പോർട്സ് ക്ലബ്ബിന്‍റെ നേതൃത്വത്തിൽ അവിട്ടം നാളിൽ നടത്തിയ ഓണാഘോഷങ്ങളുടെ ഭാഗമായാണ് വടംവലി മത്സരം നടന്നത്. ഞങ്ങളും വടംവലിക്കട്ടെ എന്നു ചോദിച്ച് വനിതകൾ എത്തുകയായിരുന്നു. വനിതകൾ ഗൗരവത്തിലാണെന്നു മനസിലാക്കിയ സംഘാടകർ സമ്മതിച്ചു. അതിവേഗം ടീമുകൾ റെഡിയായി - അധോലോകവും പവർഫുൾ ഗേൾസും. വനിതകളുടെ വടംവലി മത്സരം നടക്കുന്നുവെന്ന അനൗൺസ്മെന്‍റ് കേട്ടതോടെ നാട്ടുകാർ ഒഴുകിയെത്തി. അവരുടെ പ്രോത്സാഹനംകൂടി ആയതോടെ മത്സരം കടുത്തു. പൊരിഞ്ഞ പോരാട്ടത്തിൽ അധോലോകത്തിനു മേൽ പവർഫുൾ ഗേൾസിന് ജയം. ജയശ്രീ കുറ്റിയേൽ നയിച്ച പവർഫുൾ ഗേൾസ് ടീമിൽ അശ്വതി കുറ്റിയേൽ, രമ്യ ചിറ്റേട്ട്, ആദിത്യ ഉള്ളാട്ടുപറമ്പിൽ, ധന്യ രാജ് തോട്ടുങ്കൽപറമ്പിൽ, അമല സാജൻ, പ്രതീക്ഷ നടക്കൽ എന്നിവരും രാജമ്മ കുറ്റിയേൽ നയിച്ച അധോലോകം ടീമിൽ ശാരി ഗോപൻ, ലൂസി തോമസ്, പൊന്നി ജോസ്, രമ ഉത്തമൻ, രാജി, അസിൻ സാബു എന്നിവരുമാണ് അങ്കത്തിനിറങ്ങിയത്. പഞ്ചായത്ത് മെംബർ കെ.എ. അശ്വതിമോൾ ഉദ്ഘാടനം ചെയ്ത പൊതുസമ്മേളനത്തിൽ ലിസ്യു പള്ളി വികാരി ഫാ. മാർട്ടിൻ ഇലയ്ക്കാട്ടു നാലുപറയിൽ സമ്മാനദാനം നിർവഹിച്ചു. ക്ലബ്ബ് സെക്രട്ടറി പി.ജി. അനിൽകുമാർ അധ്യക്ഷത വഹിച്ചു.

ട്രെയിനുകൾക്ക് ഏറ്റുമാനൂരിൽ സ്റ്റോപ്പ്: നിവേദനം കൊടുത്തെന്ന് എംപി

ഏറ്റുമാനൂർ: ഏറ്റുമാനൂരിൽ കൂടുതൽ ട്രെയിനുകൾക്ക് സ്റ്റോപ്പ് അനുവദിക്കുന്നതിനും ബാംഗ്ലൂർ-എറണാകുളം ഇന്‍റർസിറ്റി എക്സ്പ്രസ് ട്രെയിൻ കോട്ടയത്തേക്ക് നീട്ടുന്നതും സംബന്ധിച്ച് റെയിൽവേ മന്ത്രിക്ക് നിവേദനം കൊടുത്തതായും തുടർ ചർച്ചകൾ നടക്കുന്നതായും ഫ്രാൻസിസ് ജോർജ് എംപി. കോട്ടയം, ഏറ്റുമാനൂർ റെയിൽവേ സ്റ്റേഷനുകളുടെ വികസനവും കോട്ടയം ബൈപ്പാസ് റോഡിന്‍റെ നിർമാണവും സാധ്യമാകുമെന്നു പ്രതീക്ഷിക്കുന്നതായും എംപി പറഞ്ഞു. ഏറ്റുമാനൂർ ജനകീയ വികസന സമിതി ഓണാഘോഷ പരിപാടിയുടെ ഭാഗമായി സംഘടിപ്പിച്ച സാംസ്കാരിക സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സമ്മേളനത്തിൽ സമിതി പ്രസിഡന്‍റ് ബി. രാജീവ് അധ്യക്ഷത വഹിച്ചു. വേൾഡ് പീസ് മിഷൻ ഡയറക്ടർ ബോർഡ് അംഗം ഫിലിപ്പ് ജോസഫ് മണിയാലിൽ, കേരള സീനിയർ സിറ്റിസൺ സംസ്ഥാന പ്രസിഡന്‍റ് എൻ. അരവിന്ദാക്ഷൻ നായർ, ജോയ് പൂവംനിൽക്കുന്നതിൽ, പ്രഫ. പി.എസ്. ശങ്കരൻ നായർ, വിമല എം. നായർ, മോഹൻകുമാർ മംഗലത്ത്, ബെന്നി ഫിലിപ് തുടങ്ങിയവർ പ്രസംഗിച്ചു. മികവു തെളിയിച്ച മാധ്യമ പ്രവർത്തകരെ ഫ്രാൻസിസ് ജോർജ് എംപി ആദരിച്ചു. ഓണാഘോഷങ്ങളുടെ ഭാഗമായി തിരുവാതിരകളിയും കുട്ടികളുടെ വിവിധ കലാപരിപാടികളും അരങ്ങേറി.

മണർകാട് പെരുന്നാൾ: കറിനേർച്ച വിതരണം ആരംഭിച്ചു

മണര്‍കാട്: മണര്‍കാട് സെന്‍റ് മേരീസ് യാക്കോബായ സുറിയാനി കത്തീഡ്രലിലെ പ്രധാന പെരുന്നാള്‍ ഇന്ന് ആഘോഷിക്കും. കറിനേര്‍ച്ച തയാറാക്കുന്നതിനുള്ള പന്തിരുനാഴി ഘോഷയാത്ര ഇന്നലെ ഉച്ചയ്ക്കു നടന്നു. പാച്ചോര്‍ നേര്‍ച്ചയുടെ കൂപ്പണെടുത്തവര്‍ക്ക് ഇന്നു പുലര്‍ച്ചെ 12ന് നേര്‍ച്ചവിതരണമാരംഭിച്ചു. പാച്ചോര്‍ കമ്മിറ്റി ജോയിന്‍റ് കണ്‍വീനര്‍ രഞ്ജിത്ത് കെ. ഏബ്രഹാം കാരയ്ക്കാട്ടിന്‍റെ കൈയ്യില്‍ നെയ് നിറച്ച വിളഞ്ഞ തേങ്ങമുറിയിലെ തിരിയില്‍ പ്രധാന ത്രോണോസിലെ മെഴുകുതിരിയില്‍നിന്ന് കത്തീഡ്രല്‍ സഹവികാരി ജെ. മാത്യു കോര്‍എപ്പിസ്‌കോപ്പ മണവത്ത് തീപകര്‍ന്നു. തുടർന്ന് പള്ളിമേടയിലെത്തി വൈദികരുടെ നേതൃത്വത്തില്‍ പ്രാര്‍ഥനകള്‍ നടത്തിയ ശേഷം പന്തിരുനാഴി കൈകളിലേന്തി വാദ്യമേളങ്ങളുടെ അകമ്പടിയോടെ ആഘോഷപൂര്‍വം പുറപ്പെട്ടു. പള്ളിക്ക് ചുറ്റും മൂന്നു പ്രാവശ്യം വലംവച്ച ശേഷം കറിനേര്‍ച്ച തയാറാക്കുന്ന സെന്‍റ് മേരീസ് ഇംഗ്ലീഷ് മീഡിയം സ്‌കൂളില്‍ പന്തിരുനാഴി എത്തിച്ചു. ഫാ. ലിറ്റു തണ്ടാശേരിലിന്‍റെ നേതൃത്വത്തില്‍ പ്രാര്‍ഥനകള്‍ക്കു ശേഷം പാച്ചോര്‍ കമ്മിറ്റി ജോയിന്‍റ് കണ്‍വീനര്‍ തേങ്ങാമുറിയിലെ തിരിയില്‍നിന്ന് അടുപ്പിലേക്ക് തീ പകര്‍ന്നു. പന്തിരുനാഴി അടുപ്പില്‍ വച്ചശേഷം ജെ. മാത്യു മണവത്തും ‍ ട്രസ്റ്റിമാരും സെക്രട്ടറിയും നെയ്യും ആദ്യഅരിയും ഇട്ടു കറിനേര്‍ച്ച തയാറാക്കലിനു തുടക്കംകുറിച്ചു. വൈകുന്നേരം അഞ്ചിന് സന്ധ്യാപ്രാര്‍ഥനയെത്തുടര്‍ന്ന് നാടകശാലയില്‍ നടവിളക്ക് തെളിച്ചു. കോട്ടയം ഭദ്രാസനാധിപന്‍ തോമസ് മാര്‍ തീമോത്തിയോസ്, സഹവികാരിമാരായ ജെ. മാത്യു കോര്‍എപ്പിസ്‌കോപ്പ മണവത്ത്, ഫാ. കുറിയാക്കോസ് കാലായില്‍, ഫാ. എം.ഐ. തോമസ് മറ്റത്തില്‍, ഫാ. കുര്യന്‍ മാത്യു വടക്കേപറമ്പില്‍, ഫാ. ഗീവര്‍ഗീസ് നടുമുറിയില്‍, ഫാ.ലിറ്റു തണ്ടാശേരില്‍, കത്തീഡ്രല്‍ ട്രസ്റ്റിമാരായ സുരേഷ് കെ. എബ്രഹാം കണിയാംപറമ്പില്‍, ബെന്നി ടി. ചെറിയാന്‍ താഴത്തേടത്ത്, ജോര്‍ജ് സഖറിയ ചെമ്പോല, കത്തീഡ്രല്‍ സെക്രട്ടറി പി.എ. ചെറിയാന്‍ പാണാപറമ്പില്‍ എന്നിവര്‍ നടവിളക്ക് തെളിച്ചു. 7.30ന് കരോട്ടെ പള്ളി ചുറ്റിയുള്ള പ്രദക്ഷിണവും ആശീര്‍വാദവും നടന്നു. തുടര്‍ന്ന് ആകാശവിസ്മയവും മാര്‍ഗംകളിയും പരിചമുട്ടുകളിയും നടത്തി.

കുമരകം ജലോത്സവം: തുരുത്തിത്തറയ്ക്ക് ജയം

കുമരകം: വാശിയേറിയ പോരാട്ടത്തില്‍ ഇഞ്ചുകളുടെ വ്യത്യാസത്തില്‍ പി.ജി കര്‍ണ്ണനെ തുരത്തി തുരുത്തിത്തറ 122-ാമത് ശ്രീനാരായണ ജയന്തി ട്രോഫി സ്വന്തമാക്കി. ഇക്കുറി കളിവള്ളങ്ങളുടെ സാന്നിധ്യം കുറവായിരുന്നെങ്കിലും ഫൈനല്‍ മത്സരങ്ങള്‍ എല്ലാംതന്നെ ഒന്നിനൊന്ന് ആവേശം ജനിപ്പിക്കുന്നവയായിരുന്നു. ട്രോഫി നേടിയ തുരുത്തിത്തറ വള്ളം തുഴഞ്ഞത് കുമരകം സൗത്ത് ബോട്ട് ക്ലബാണ്. കുമരകം യുവശക്തി ബോട്ട് ക്ലബിന്‍റെ പി.ജി. കര്‍ണനാണ് രണ്ടാം സ്ഥാനം. രണ്ടാം തരം ഇരുട്ടുകുത്തി വിഭാഗത്തില്‍ സെന്‍റ് ജോസഫിനെ പരാജയപ്പെടുത്തി എബിസി അറുപറയുടെ ശ്രീഗുരുവായൂരപ്പന്‍ ജേതാക്കളായി. ചുരുളന്‍ ഒന്നാം തരത്തില്‍ കോടിമതയും മുഴിയും കാഴ്ചവച്ചത് കാണികളെ ത്രസിപ്പിക്കുന്ന മത്സരമായിരുന്നു. കവണാര്‍ സിറ്റിയുടെ കോടിമതയെ വിജയികളായി പ്രഖ്യാപിച്ചു. ചുരുളന്‍ രണ്ടാം തരത്തില്‍ ആര്‍പ്പുക്കര ബോട്ട് ക്ലബിന്‍റെ തോട്ടില്‍ ഡായി നമ്പര്‍-2 വിനെ തോല്പിച്ചു. മത്സരത്തില്‍ പങ്കെടുത്ത കളിവള്ളങ്ങളില്‍ ശ്രീമുത്തപ്പന്‍ ഒഴികെയുള്ള എല്ലാ കളിവള്ളങ്ങള്‍ക്കും ഫൈനലില്‍ മത്സരിക്കാന്‍ അവസരം നല്‍കിയെന്നത് സംഘാടക മികവായിരുന്നു. ഇന്നലെ ഉച്ചയ്ക്ക് രണ്ടിന് ശ്രീകുമാരമംഗലം ക്ഷേത്രക്കടവില്‍നിന്നാരംഭിച്ച വര്‍ണ്ണാഭമായ ജലഘോഷയാത്രയില്‍ ഒട്ടനവധി കേരളീയ കലാരൂപങ്ങള്‍ അണിനിരന്നിരുന്നു. നാല് എസ്എന്‍ഡിപി അംഗ ശാഖകളും അലങ്കരിച്ച തട്ടിന്‍ വള്ളത്തില്‍ ശ്രീനാരായണ ഗുരുവിന്‍റെ ഛായ ചിത്രവും വഹിച്ച കൊണ്ടുള്ള ഹംസരഥത്തിനു പിന്നില്‍ അണിചേര്‍ന്നിരുന്നു. ജലഘോഷായാത്ര കോട്ടത്തോട്ടില്‍ എത്തിയതോടെ വള്ളംകളിയുടെ ഉദ്ഘാടന സമ്മേളനം ആരംഭിച്ചു. ക്ലബ് പ്രസിഡന്‍റ് വി.പി.അശോകന്‍റെ അധ്യക്ഷതയില്‍ മന്ത്രി വി.എന്‍ വാസവന്‍ ഉദ്ഘാടനം നിര്‍വഹിച്ചു. ഫ്രാന്‍സിസ് ജോര്‍ജ് എംപി. ജില്ലാ പഞ്ചായത്തംഗം കെ.വി. ബിന്ദു, കുമരകം പഞ്ചായത്ത് പ്രസിഡന്‍റ് ധന്യാ സാബു, വി. എസ്. മനുലാല്‍, ആര്‍ഷാ ബൈജു തുടങ്ങിയവര്‍ പ്രസംഗിച്ചു. യോഗത്തില്‍ കുമരകം സ്വദേശികളായ ഒരുമ്പെട്ടവന്‍ ഫെയിം ബാലനടി കാശ്മീര സുജീഷിനെയും കേരള ക്രിക്കറ്റ് ലീഗ് രണ്ടാം സീസണില്‍ ആലപ്പി ടീം അംഗമായ യുവക്രിക്കറ്റര്‍ ആദിത്യ ബൈജുവിനെയും മന്ത്രി ആദരിച്ചു. മത്സരാനന്തരം എസ്കെഎം ദേവസ്വം മൈതാനിയില്‍ സാല്‍വിന്‍ കൊടിയന്ത്രയുടെ അധ്യക്ഷതയില്‍ ചേര്‍ന്ന യോഗത്തില്‍ ജില്ലാ പഞ്ചായത്തംഗം കെ.വി. ബിന്ദു വിജയികള്‍ക്ക് ട്രോഫികള്‍ സമ്മാനിച്ചു. കെ.പി. ആനന്ദക്കുട്ടന്‍, പി.ജി. ചന്ദ്രന്‍, വി.എസ്. കലാധരന്‍, പി.എന്‍. സാബു ശാന്തി തുടങ്ങിയവര്‍ പ്രസംഗിച്ചു.

ചങ്ങനാശേരി അതിരൂപതയില്‍ ഈശോയുടെ മനുഷ്യാവതാര ജൂബിലി സമാപനം

പ്രത്യാശാജ്യോതി പ്രയാണം 14 മുതല്‍ ചങ്ങനാശേരി: ചങ്ങനാശേരി അതിരൂപതയില്‍ ഈശോയുടെ മനുഷ്യാവതാര ജൂബിലി സമാപന കര്‍മ പദ്ധതികള്‍ സെപ്റ്റംബര്‍ 14 മുതല്‍ ഡിസംബര്‍ 24 വരെ നടക്കും. പരിപാടിയുടെ ആദ്യഘട്ടമായി ഈ മാസം 14 മുതല്‍ നവംബര്‍ 29 വരെ തീയതികളിലായി അതിരൂപതയിലെ എണ്‍പതിനായിരം കുടുംബങ്ങളിലൂടെ പ്രത്യാശാ ജ്യോതി പ്രയാണം നടത്തും. സമ്പൂര്‍ണ ബൈബിള്‍, മാര്‍ത്തോമ്മ സ്ലീവ, വിളക്ക്, തിരുക്കുടുംബത്തിന്‍റെ ഛായാചിത്രം എന്നിവ മുത്തുക്കുടയുടെ അകമ്പടിയോടെ എത്തിക്കും. വീടുകളില്‍ പ്രത്യാശാ ജ്യോതി എത്തുന്നതോടെ പ്രത്യേക പ്രാര്‍ഥനകള്‍ നടക്കും. ഈശോ നല്‍കുന്ന പ്രത്യാശയില്‍ അതിരൂപതയിലെ കുടുംബങ്ങള്‍ നിറഞ്ഞ് വിശ്വാസ ദീപ്തിയില്‍ നിറയുക എന്നതാണ് പ്രത്യാശാജ്യോതി പ്രയാണത്തിന്‍റെ ലക്ഷ്യം. ഒക്‌ടോബര്‍, നവംബര്‍ മാസങ്ങളില്‍ വിവിധ പ്രത്യാശാ സായാഹ്ന കണ്‍വന്‍ഷനുകളും സംഘടിപ്പിക്കും. പാറേല്‍ മരിയന്‍തീര്‍ഥാടന കേന്ദ്രത്തിലേക്ക് ഡിസംബര്‍ ഒന്നുമുതല്‍ 21 വരെ തീര്‍ഥാടനവും സംഘടിപ്പിച്ചിട്ടുണ്ട്. 2025-ാം വര്‍ഷത്തില്‍ ഫ്രാന്‍സിസ് പാപ്പ തുടക്കമിട്ട പ്രത്യാശയുടെ തീര്‍ഥാടകര്‍ എന്ന ജൂബിലിവര്‍ഷം 2026 ജനുവരി ആറിനാണ്‌ സമാപിക്കുന്നത്. പാറേല്‍പള്ളി അതിരൂപതയുടെ ജൂബിലി തീര്‍ഥാടനകേന്ദ്രം ജൂബിലിയിലൂടെ പൂര്‍ണ ദണ്ഡവിമോചനം ലഭ്യമാക്കുന്നതിന് ഓരോ രൂപതയിലും തീര്‍ഥാടന കേന്ദ്രങ്ങള്‍ പ്രഖ്യാപിക്കാന്‍ മാര്‍പാപ്പ ചുമതലപ്പെടുത്തിയതുപ്രകാരം പാറേല്‍ സെന്‍റ് മേരീസ് പള്ളിയെ അതിരൂപതയുടെ ജൂബിലി തീര്‍ഥാടന കേന്ദ്രമായി ആര്‍ച്ച്ബിഷപ് മാര്‍ തോമസ് തറയില്‍ പ്രഖ്യാപിച്ചു. വിശ്വാസത്തോടെ ജൂബിലി കവാടത്തിലൂടെ പ്രവേശിക്കുകയും അനുരഞ്ജന കൂദാശയും വിശുദ്ധ കുര്‍ബാനയുടെ സ്വീകരിക്കുകയും മാര്‍പാപ്പയ്ക്കുവേണ്ടി പ്രാര്‍ഥിക്കുകയും ചെയ്യുന്ന വിശ്വാസികള്‍ക്കു പൂര്‍ണ ദണ്ഡവിമോചനം ലഭിക്കുന്നതാണ്. പാറേല്‍ തീര്‍ഥാടന കേന്ദ്രത്തിലേക്ക് തീര്‍ഥാടനം നടത്താന്‍ സാധിക്കാത്തവര്‍ക്ക് തീര്‍ഥാടനത്തോട് ആത്മീയമായി ഐക്യപ്പെട്ടും കൂദാശകള്‍ സ്വീകരിച്ചും പൂര്‍ണദണ്ഡവിമോചനം പ്രാപിക്കാവുന്നതാണ്. ഡിസംബര്‍ ഒന്നുമുതല്‍ 21വരെ പാറേല്‍പ്പള്ളിയില്‍ തീര്‍ഥാടകര്‍ക്കായി പ്രത്യേക ക്രമീകരണങ്ങളുണ്ടാകും. ഈ ദിവസങ്ങളില്‍ വിവിധ ഫൊറോനകള്‍ റീജണുകളായി തിരിഞ്ഞ് പാറേല്‍പള്ളിയിലേക്കു തീര്‍ഥാടനം നടത്തും. ഡിസംബര്‍ ഒന്നു മുതല്‍ എഴുവരെ: (ചങ്ങനാശേരി, തുരുത്തി, തൃക്കൊടിത്താനം, ചെങ്ങന്നൂര്‍ ഫൊറോനകള്‍) ചങ്ങനാശേരി റീജണ്‍. ഡിസംബര്‍ ഒമ്പത്-12: (മണിമല, നെടുംകുന്നം, കുറുമ്പനാടം ഫൊറോനകള്‍) നെടുംകുന്നം റീജണ്‍. ഡിസംബര്‍ 13: (മുഹമ്മ, ചമ്പക്കുളം, എടത്വ, പുളിങ്കുന്ന്, ആലപ്പുഴ ഫൊറോനകള്‍) ആലപ്പുഴ, കുട്ടനാട് റീജണ്‍. ഡിസംബര്‍ 15-21: (കോട്ടയം, കുടമാളൂര്‍, അതിരമ്പുഴ ഫൊറോനകള്‍) കോട്ടയം റീജണ്‍. (തിരുവനന്തപുരം, കൊല്ലം-ആയൂര്‍, അമ്പൂരി ഫൊറോനകള്‍)തിരുവനന്തപുരം റീജണ്‍. കുടുംബങ്ങൾ ജൂബിലി ചൈതന്യത്തിൽ നിറയണം: മാര്‍ തോമസ് തറയില്‍ കുടുംബങ്ങളും വ്യക്തികളും ഇടവകകളും ജൂബിലി ചൈതന്യത്തില്‍ നിറയുകയാണ് ഈശോയുടെ മനുഷ്യാവതാര ജൂബിലി സമാപന കര്‍മ പദ്ധതികളിലൂടെ ലക്ഷ്യം വയ്ക്കുന്നതെന്ന് ആര്‍ച്ച്ബിഷപ് മാര്‍ തോമസ് തറയില്‍ ഇടയലേഖനത്തില്‍ ചൂണ്ടിക്കാട്ടി. ഇന്നലെ അതിരൂപതയിലെ ഇടവകകളില്‍ ഇടയലേഖനം വായിച്ചു.

ജില്ലാതല ഓണാഘോഷത്തിന് ഇന്നു സമാപനം

കോട്ടയം: ജില്ലാതല ഓണാഘോഷപരിപാടി ചിങ്ങനിലാവ് 2025ന് ഇന്നു സമാപനം. വൈകുന്നേരം നാലിന് പോലീസ് പരേഡ് ഗ്രൗണ്ടില്‍നിന്ന് ആരംഭിക്കുന്ന സാംസ്‌കാരിക ഘോഷയാത്ര തിരുനക്കര മൈതാനത്ത് സമാപിക്കും. തുടര്‍ന്ന് 5.30ന് തിരുനക്കര മൈതാനത്ത് നടക്കുന്ന സമാപന സമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്യും. തിരുവഞ്ചൂര്‍ രാധാകൃഷ്ണന്‍ എംഎല്‍എ അധ്യക്ഷത വഹിക്കും. ദേശീയ ചലച്ചിത്ര പുരസ്‌കാരജേതാവ് നടന്‍ വിജയരാഘവനെ ചടങ്ങില്‍ ആദരിക്കും. ചീഫ് വിപ്പ് ഡോ. എന്‍. ജയരാജ്, എംപിമാരായ കെ. ഫ്രാന്‍സിസ് ജോര്‍ജ്, ജോസ് കെ. മാണി, കൊടിക്കുന്നില്‍ സുരേഷ്, ആന്‍റോ ആന്‍റണി, എംഎല്‍എമാരായ മോന്‍സ് ജോസഫ്, സി.കെ. ആശ, മാണി സി. കാപ്പന്‍, ജോബ് മൈക്കിള്‍, സെബാസ്റ്റ്യന്‍ കുളത്തുങ്കല്‍, ചാണ്ടി ഉമ്മന്‍, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജില്ലാ കളക്ടര്‍ ചേതന്‍കുമാര്‍ മീണ, നഗരസഭാധ്യക്ഷ ബിന്‍സി സെബാസ്റ്റ്യന്‍, ജില്ലാ പോലീസ് മേധാവി എ. ഷാഹുല്‍ ഹമീദ്, അഡീഷണല്‍ ജില്ലാ മജിസ്ട്രേറ്റ് എസ്. ശ്രീജിത്ത്, നഗരസഭാംഗങ്ങളായ അഡ്വ. ഷീജ അനില്‍, ജയമോള്‍ ജോസഫ്, വിനോദസഞ്ചാര വകുപ്പ് ഡെപ്യൂട്ടി ഡയറക്ടര്‍ റൂബി ജേക്കബ്, സ്‌പോര്‍ട്‌സ് കൗണ്‍സില്‍ പ്രസിഡന്‍റ് ഡോ. ബൈജു വര്‍ഗീസ് ഗുരുക്കള്‍ എന്നിവര്‍ പങ്കെടുക്കും. സമാപന സമ്മേളനത്തിനു ശേഷം പ്രസീത ചാലക്കുടിയുടെ നാടന്‍പാട്ടു മേള നടക്കും. ജില്ലാ ഭരണകൂടവും ജില്ലാ ടൂറിസം പ്രൊമോഷന്‍ കൗണ്‍സിലും കോട്ടയം നഗരസഭയും ചേര്‍ന്നാണു തിരുനക്കര മൈതാനത്ത് ഓണാഘോഷം സംഘടിപ്പിച്ചത്. തിരുവാതിര മത്സരം കോട്ടയം: ജില്ലാതല ഓണാഘോഷ പരിപാടി -ചിങ്ങനിലാവ് 2025നോടനുബന്ധിച്ച് ദര്‍ശന സാംസ്‌കാരിക കേന്ദ്രം നടത്തിയ തിരുവാതിര മത്സരത്തില്‍ നട്ടാശേരി ശ്രീരുദ്ര തിരുവാതിര സംഘം ഒന്നാം സ്ഥാനം നേടി. ഓണംതുരുത്ത് ശിവപാര്‍വതി തിരുവാതിര സംഘത്തിനാണ് രണ്ടാം സ്ഥാനം. സമ്മാനങ്ങള്‍ സമാപന സമ്മേളനത്തില്‍ വിതരണം ചെയ്യും.

മെഡിക്കൽ കോളജിൽ ഓണം അടിപൊളി

കോട്ടയം: തിരുവോണദിനത്തില്‍ കോട്ടയം മെഡിക്കല്‍ കോളജ് ആശുപത്രിയിലുള്ളവരുടെ വയറും മനസും നിറച്ചു നവജീവന്‍ ട്രസ്റ്റും സന്നദ്ധ സംഘടനകളും. രാവിലെ 10നു കാന്‍സര്‍ വാര്‍ഡില്‍ ഉള്‍പ്പെടെയുള്ള രോഗികള്‍ക്കും കൂട്ടിരിപ്പുകാര്‍ക്കും നവജീവന്‍റെ നേതൃത്വത്തില്‍ ചിക്കന്‍ ബിരിയാണി വിതരണം ചെയ്തു. തുടര്‍ന്നു രാവിലെ 11ന് എന്‍റെ ഗ്രാമം പദ്ധതിയുടെ ഭാഗമായി സന്നദ്ധ സംഘടന രോഗികള്‍ക്കും കൂട്ടിരിപ്പുകാര്‍ക്കും ഓണസദ്യ നല്കി. ഉച്ചയ്ക്കു ഡിവൈഎഫ്‌ഐയുടെ നേതൃത്വത്തില്‍ പൊതിച്ചോര്‍ വിതരണം നടത്തി. വൈകുന്നേരം നാലിനും നവജീവന്‍റെ നേതൃത്വത്തില്‍ ചികിത്സയില്‍ കഴിയുന്ന എല്ലാ രോഗികള്‍ക്കും അവരുടെ കൂട്ടിരിപ്പുകാര്‍ക്കും വിഭവസമൃദ്ധമായ ഓണസദ്യ നല്കി. കോട്ടയം, എറണാകുളം, ഇടുക്കി പത്തനംതിട്ട, ആലപ്പുഴ ജില്ലകളില്‍നിന്നുള്ള നൂറുകണക്കിനു രോഗികളും കൂട്ടിരിപ്പുകാരുമാണ് മെഡിക്കല്‍ കോളജ് ആശുപത്രിയിലെ വിവിധ വാര്‍ഡുകളിലായി ചികിത്സയില്‍ കഴിയുന്നത്. തിരുവോണ ദിനത്തില്‍ രോഗികള്‍ക്കും കൂട്ടിരിപ്പുകാര്‍ക്കും മറക്കാന്‍ സാധിക്കാത്ത രീതിയിലുള്ള ദിവസമാണ് നവജീവന്‍റെയും മറ്റു സന്നദ്ധ സംഘടനകളുടെയും നേതൃത്വത്തില്‍ സമ്മാനിച്ചത്. വിവിധ രോഗങ്ങള്‍ നിമിത്തം വീടുകളില്‍ ഓണം ആഘോഷിക്കാന്‍ സാധിക്കാത്തവരാണ് മെഡിക്കല്‍ കോളജില്‍ കഴിയുന്ന രോഗികളും കൂട്ടിരിപ്പുകാരും. രോഗികളുടെയും കൂട്ടിരിപ്പുകാരുടെയും മാനസിക പ്രയാസം മുന്നിൽക്കണ്ടാണു നവജീവന്‍ ട്രസ്റ്റി പി.യു. തോമസ് എല്ലാവര്‍ക്കും ഓണസദ്യ നല്കാന്‍ തീരുമാനിച്ചത്. വര്‍ഷങ്ങള്‍ക്കു മുമ്പ് ചികിത്സയില്‍ കഴിയുന്ന രോഗികളുടെ ദുരവസ്ഥ മനസിലാക്കി ഭക്ഷണം വിതരണം ചെയ്ത പുണ്യപ്രവൃത്തിയില്‍നിന്നു പ്രചോദനമുള്‍ക്കൊണ്ടു നിരവധി സംഘടനകള്‍ ഈ മാതൃക പിന്‍തുടരുന്നതില്‍ ഏറെ സന്തോഷമുണ്ടെന്ന് പി.യു. തോമസ് പറഞ്ഞു.

ജെയ്‌നമ്മ കൊലക്കേസ്: പ്രതി സെബാസ്റ്റ്യനെ വിയ്യൂര്‍ ജയിലിലേക്ക് മാറ്റി

കോട്ടയം: അതിരമ്പുഴ കോട്ടമുറി കാക്കനാട്ടുകാലായില്‍ ജെയ്‌നമ്മ (55)യുടെ കൊലപാതക കേസില്‍ റിമാന്‍ഡില്‍ കഴിയുന്ന ചേര്‍ത്തല പള്ളിപ്പുറം ചൊങ്ങുതറ സെബാസ്റ്റ്യ(67)നെ കോട്ടയം ജില്ലാ ജയിലില്‍നിന്ന് വിയ്യൂര്‍ സെന്‍ട്രല്‍ ജയിലിലേക്ക് മാറ്റി. സെബാസ്റ്റ്യന് പ്രമേഹം ഉള്‍പ്പെടെ ആരോഗ്യപ്രശ്‌നങ്ങള്‍ ഉള്ളതിനാലും ചേര്‍ത്തലയില്‍ ഇയാളുടെ വീട്ടുവളപ്പില്‍നിന്ന് കണ്ടെടുത്ത സ്ത്രീയുടെ ശരീരഭാഗങ്ങളുടെ ഡിഎന്‍എ ഫലം വൈകുന്നതിനാലുമാണ് വിയ്യൂരിലേക്ക് മാറ്റിയത്. കോട്ടയം ജില്ലാ ജയിലില്‍ ആഴ്ചയിലൊരിക്കല്‍ മാത്രമാണ് ഡോക്ടറുടെ സേവനമുള്ളത്. വിയ്യൂരില്‍ സ്ഥിരം ഡോക്ടറും ജയിലില്‍ ചികിത്സാ സൗകര്യവുമുണ്ട്. ജെയ്‌നമ്മ കൊലക്കേസില്‍ നിര്‍ണായകമായ ഡിഎന്‍എ ഫലം വരുമ്പോള്‍ സെബാസ്റ്റിയനെ വിയ്യൂര്‍ ജയിലില്‍നിന്ന് ക്രൈം ബ്രാഞ്ച് കോട്ടയത്തേക്ക് കൊണ്ടുവരും. കഴിഞ്ഞ ഡിസംബര്‍ 23നാണ് ജെയ്‌നമ്മയെ കാണാതായത്. സെബാസ്റ്റ്യനുമായി മുന്‍പരിചയമുണ്ടായിരുന്ന ജെയ്‌നമ്മ ചേര്‍ത്തലയില്‍ സെബാസ്റ്റ്യന്‍റെ വീട്ടിലെത്തുകയോ വിളിച്ചുവരുത്തുകയോ ചെയ്തുവെന്നും അന്നു വൈകുന്നേരത്തോടെ കൊലപ്പെടുത്തിയെന്നുമാണ് സാഹചര്യത്തെളിവുകള്‍. ജെയ്‌നമ്മയെ കഴുത്തു ഞെരിച്ച് കൊലചെയ്ത് ശരീരം കഷ്ണങ്ങളാക്കി കത്തിച്ചതായാണ് സൂചനകള്‍. ഒന്നിലേറെ തവണ പലപ്പോഴായി അസ്ഥിഭാഗങ്ങള്‍ ചാമ്പലാക്കിയ സാഹചര്യത്തിലാണ് ഡിഎന്‍എ പരിശോധന വൈകുന്നതെന്ന് പോലീസ് പറഞ്ഞു. ജെയ്‌നമ്മയ്ക്കു സമാനമായി സെബാസ്റ്റ്യനുമായി അടുപ്പവും സാമ്പത്തിക ഇടപാടുകളുമുണ്ടായിരുന്ന ചേര്‍ത്തല സ്വദേശികളായ ബിന്ദു, ഐഷ, സിന്ധു എന്നിവരുടെ തിരോധാനത്തിലും കാലങ്ങളായി ദുരൂഹത തുടരുകയാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]