ADVERTISEMENT

ADVERTISEMENT

എസ്‌പിസി കേരളത്തിന്‍റെ നവീന ആശയം: മന്ത്രി പി. രാജീവ്

സ്റ്റുഡന്‍റ്സ് പോലീസ് കേഡറ്റിന് 15-ാം വാർഷികം

ആലുവ: കേരളം രാജ്യത്തിന് സംഭാവന ചെയ്ത നിരവധി നവീന ആശയങ്ങളിൽ ഒന്നാണ് സ്റ്റുഡന്‍റ്സ് പോലീസ് കേഡറ്റ് (എസ്‌പിസി) എന്ന് മന്ത്രി പി രാജീവ്. കീഴ്മാട് മോഡൽ റെസിഡൻഷ്യൽ സ്കൂളിൽ സംഘടിപ്പിച്ച 15-ാമത് എസ്‌പിസി ഡേ ആഘോഷ പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

വിദ്യാർഥികളിൽ നിയമാവബോധം, അച്ചടക്കം, സാമൂഹ്യ പ്രതിബദ്ധത മാനവികത, നീതിബോധം തുടങ്ങിയ മൂല്യങ്ങൾ ശക്തിപ്പെടുത്തുന്നതിൽ എസ്‌പിസിയുടെ പങ്ക് വലുതാണ്. 15-ാം വർഷത്തിലും ദൗത്യം വിജയകരമായി നിർവഹിച്ചുകൊണ്ടിരിക്കുകയാണ് എസ്‌പിസി എന്നും അദ്ദേഹം പറഞ്ഞു. പരിപാടിയിൽ പുതിയതായി എസ്‌പിസി അനുമതി ലഭിച്ച സ്കൂളുകൾക്കുള്ള അനുമതിപത്രം വിതരണം ചെയ്തു.

മികച്ച എസ്‌പിസി പ്ലാറ്റൂൺ ആയി കീഴ്‌മാട് മോഡൽ റസിഡൻഷ്യൽ സ്കൂളിനെ തെരഞ്ഞെടുത്തു. മാർ ഏലിയാസ് ഹയർ സെക്കൻഡറി സ്കൂളിനാണ് രണ്ടാം സ്ഥാനം. പോലീസ് സ്കൂൾ മാസ്റ്റർ അഷ്റഫ് കുട്ടികൾക്ക് ലഹരി വിരുദ്ധ പ്രതിജ്ഞ ചൊല്ലിക്കൊടുത്തു.

എറണാകുളം ഡിസിപി ജുവനപ്പടി മഹേഷ് പതാക ഉയർത്തി. പത്ത് സ്കൂളുകളിൽ നിന്നുള്ള എസ്‌പിസി കേഡറ്റുകളുടെ പരേഡ്, തുറന്ന വാഹനത്തിലെ പരേഡ്, സല്യൂട്ട് സ്വീകരണം എന്നീ പരിപാടികൾ നടന്നു. ആലുവ ഡിവൈഎസ്‌പി ടി.ആർ. രാജേഷ്, എറണാകുളം റൂറൽ പോലീസ് അഡീ. സൂപ്രണ്ട് എം. കൃഷ്ണൻ, കെ.എം. അൻവർ അലി തുടങ്ങിയവർ പങ്കെടുത്തു.

ADVERTISEMENT

കീരംപാറ നെടുംപാറയില്‍ ഇടിമിന്നലില്‍ രണ്ടു വീടിന് നാശനഷ്ടം

കോതമംഗലം: കീരംപാറ പഞ്ചായത്തിലെ നെടുംപാറയില്‍ ശക്തമായ ഇടിമിന്നലില്‍ രണ്ട് വീടുകള്‍ ഭാഗികമായി തകര്‍ന്നു. ആളപായമില്ല. നെടുംപാറ കണിയാംകുടി കുര്യാക്കോസ്, സമീപത്ത് താമസിക്കുന്ന സഹോദരന്‍ മത്തായി എന്നിവരുടെ വീടുകള്‍ക്കാണ് കേടുപാട് ഉണ്ടായത്. വയറിംഗ് കത്തിപ്പോവുകയും ഇലക്ട്രിക് ഉപകരണങ്ങള്‍ക്ക് കേടുപാടുകൾ സംഭവിക്കുകയും ചെ‌യ്തു. ഞായറാഴ്ച വൈകിട്ട് മഴയ്ക്ക് തൊട്ടുമുമ്പായിരുന്നു ഇടിമിന്നലിന്‍റെ വലിയ ശബ്ദം കേട്ടത്. എന്താണ് സംഭവിച്ചതെന്ന് പെട്ടെന്നാര്‍ക്കും മനസിലായില്ല. മിന്നലേറ്റ് കെഎസ്ഇബി ട്രാന്‍സ്‌ഫോര്‍മറും കത്തിപ്പോയി. പ്രദേശത്തെ വൈദ്യുതിയും നിലച്ചിരുന്നു. മിന്നലേറ്റ് കുര്യാക്കോസിന്‍റെ വീട്ടില്‍ രണ്ട് ലക്ഷത്തോളം രൂപയുടെ നാശനഷ്ടം ഉണ്ടായതായി വീട്ടുകാര്‍ പറഞ്ഞു. വീട്ടുകാര്‍ സംഭവ സമയത്ത് സ്ഥലത്തില്ലായിരുന്നു. വയറിംഗ് പൂര്‍ണമായും കത്തി നശിച്ചു. വൈദ്യുതി മീറ്ററും മെയിന്‍സ്വിച്ചും ഫ്യൂസുകളും ബള്‍ബുകളും എല്ലാം തെറിച്ച് പോയി. ടിവി, ഫ്രിഡ്ജ് തുടങ്ങിയവയ്ക്കും കേടുപാടുകളുണ്ട്. വീടിന്‍റെ കോണ്‍ക്രീറ്റ് മേല്‍ക്കൂരയ്ക്കും പൊട്ടലുണ്ടായി. ആസ്ബസ്റ്റോസ് മേഞ്ഞ ഷീറ്റുകള്‍ ഇളകിമാറിയ നിലയിലാണ്. മിന്നലിന്‍റെ ആഘാതത്തില്‍ വീടിന്റെ അടുക്കള ഭാഗത്ത് മുറ്റത്ത് കുഴി രൂപപ്പെടുകയും ചെയ്തിട്ടുണ്ട്. കുര്യാക്കോസും കുടുംബവും എറണാകുളത്തെ ബന്ധുവീട്ടില്‍ പോയിരിക്കുകയായിരുന്നു. പരിസരവാസികള്‍ അറിയിച്ചപ്രകാരം രാത്രിയില്‍ തിരിച്ചെത്തിയപ്പോഴാണ് നാശനഷ്ടത്തിന്‍റെ തീവ്രത മനസിലായത്. സമീപത്ത് താമസിക്കുന്ന സഹോദരന്‍ മത്തായിയുടെ വീട്ടിലെയും വയറിംഗ് കത്തിപ്പോവുകയും ജനാല ചില്ലുകള്‍ പൊട്ടിത്തെറിക്കുകയും ചെയ്തു. ആന്‍റണി ജോണ്‍ എംഎല്‍എ, പഞ്ചായത്ത് പ്രസിഡന്‍റ് ഗോപി മുട്ടത്ത് എന്നിവര്‍ സ്ഥലം സന്ദര്‍ശിച്ച് സ്ഥിതിഗതി വിലയിരുത്തി. റവന്യു വകുപ്പ് നാശനഷ്ടത്തിന്‍റെ കണക്കെടുത്തിട്ടുണ്ട്.

അങ്കണവാടിയിലെ അലമാരയിൽ ഉഗ്രവിഷമുള്ള മൂർഖൻ

കരുമാലൂർ: തടിക്കക്കടവിൽ നെൽപ്പാടങ്ങൾക്കു നടുവിൽ സ്ഥിതി ചെയ്യുന്ന അങ്കണവാടിയുടെ അലമാരയിൽ ഉഗ്രവിഷമുള്ള മൂർഖനെ കണ്ടെത്തി. വെളിയത്തുനാട് ആറ്റിപ്പുഴക്കാവ് അങ്കണവാടിയിൽ ഇന്നലെ രാവിലെ 10.30യോടെയായിരുന്നു സംഭവം. എട്ടോളം വിദ്യാർഥികളായിരുന്നു ഇന്നലെ അങ്കണവാടിയിലെത്തിയത്. പ്രഭാത പ്രാർഥന കഴിഞ്ഞ് ഇവർക്ക് കളിക്കാനായി അധ്യാപിക ഷെൽഫിൽനിന്നു കളിപ്പാട്ടത്തിന്‍റെ പെട്ടി എടുക്കുമ്പോഴാണ് മൂർഖനെ കണ്ടത്. ഭാഗ്യത്തിനാണ് അധ്യാപിക വിഷപ്പാന്പിന്‍റെ കടിയേൽക്കാതെ രക്ഷപ്പെട്ടത്. ഇവർ ബഹളംകൂട്ടിയതോടെ ജീവനക്കാരിയും അകത്തേക്ക് ഓടിവന്നു. ഇരുവരും ചേർന്ന് കുട്ടികളെ സുരക്ഷിതമായി പുറത്തേക്ക് മാറ്റി.നാട്ടുകാരും പഞ്ചായത്ത് അംഗവും സംഭവസ്ഥലത്തെത്തിയതോടെ വനംവകുപ്പിനെ വിവരമറിയിച്ചു. പാമ്പുപിടുത്ത വിദഗ്ധൻ രേഷ്ണുവിന്‍റെ സഹായത്തോടെ പാമ്പിനെ പിടികൂടി. അങ്കണവാടിക്കു ചുറ്റും നെൽപ്പാടങ്ങളാണ്. കെട്ടിടത്തിന്‍റെ ജനൽ ഗ്ലാസ് കഴിഞ്ഞദിവസം ഇളകി പോയിരുന്നു. ഇതിന്‍റെ അറ്റകുറ്റപ്പണി നടത്തിയിരുന്നില്ല. അതിനാൽ ഇതുവഴിയാകാം വിഷപ്പാമ്പ് അകത്തു കയറിയതെന്നാണു നിഗമനം.

ബോട്ടുകൾ തിരികെയെത്തി; കിളിയും കിനാവള്ളിയുമായി

വൈപ്പിൻ: ട്രോളിംഗ് നിരോധനത്തെ തുടർന്ന് 52 ദിവസത്തെ വിശ്രമത്തിനു ശേഷം കടലിൽപോയ മത്സ്യബന്ധന ബോട്ടുകൾ തിരിച്ചെത്തിയത് നിറയെ കിളിമീനും കിനാവള്ളിയുമായി.മുനമ്പം,കാളമുക്ക് ഹാർബറുകളിലായി 60ൽ പരം ബോട്ടുകളാണ് കഴിഞ്ഞ ദിവസം തീരത്തടുത്തത്. ഇവ കൂടാതെ കുറഞ്ഞ തോതിൽ കരിക്കാടി ചെമ്മീനും കൂന്തലും കണവയും ഉണ്ടായിരുന്നു. ആദ്യ ദിവസങ്ങളിലായതിനാൽ മീനിനു നല്ല വില ലഭിച്ചു.പടയപ്പ എന്ന പേരിൽ അറിയപ്പെടുന്ന വലിയ കിളിമീനിന് കിലോവിന് 100 രൂപ മേൽ വിലവീണു. പൊട്ടൻ കിളി എന്നതിൽപ്പെടുന്ന ചെറിയ കിളിക്ക് 50 മുതൽ 80 രൂപ വരെ ഹാർബറിൽ ലേലം വിളി നടന്നു. ഏതാനും ചില ബോട്ടുകൾക്ക് രണ്ട് ലക്ഷത്തിലധികം രൂപയ്ക്കു വരെ മീൻ ലഭിച്ചു. കിളിമീനുമായി ഇന്നും നാളെയുമായി കൂടുതൽ ബോട്ടുകൾ എത്തുമെന്നാണ് പ്രതീക്ഷ.

അഞ്ചുകിലോ കഞ്ചാവുമായി ഒഡീഷ സ്വദേശികൾ പിടിയിൽ

പെരുമ്പാവൂർ: അഞ്ച് കിലോയോളം കഞ്ചാവുമായി രണ്ട് ഒഡീഷ സ്വദേശികൾ പിടിയിൽ. ചന്ദ്രൻ കാന്ത സാഹു(29), കരുണാകർ മാലിക്(30) എന്നിവരെയാണ് പെരുമ്പാവൂർ പോലീസ് പിടികൂടിയത്. രഹസ്യവിവരത്തെ തുടർന്ന് അല്ലപ്ര ഭാഗത്തുനിന്നാണ് ഇവരെ കസ്റ്റഡിയിലെടുത്തത്. പോലീസിനെ കണ്ട് രക്ഷപ്പെടാൻ ശ്രമിച്ച ഇവരെ പിന്തുടർന്നാണ് പിടികൂടുകയായിരുന്നു. ഇതര സംസ്ഥാന തൊഴിലാളികൾക്കിടയിലാണ് ഇവർ കഞ്ചാവ് വില്പന നടത്തിയിരുന്നത്. സിഐ ടി.എം. സൂഫി, എസ്ഐമാരായ റിൻസ് എം. തോമസ്, എസ്.ശിവകുമാർ, എഎസ്ഐ ഷിജ, സീനിയർ സിപിഒ മാരായ രജിത്ത് രാജൻ, ജയന്തി എന്നിവരാണ് അന്വേഷണ സംഘത്തിലുയിരുന്നത്.

ബസിടിച്ച് വീണ ബൈക്ക് യാത്രികൻ അതേ ബസിനടിയിൽപ്പെട്ട് മരിച്ചു

കളമശേരി: സൗത്ത് കളമശേരി മേല്‍പ്പാലത്തിനു സമീപം ബസ് ബൈക്കിലിടിച്ച് തെറിച്ചുവീണ ബൈക്ക് യാത്രികൻ അതേ ബസിനടിയിൽപ്പെട്ട് മരിച്ചു. കൊടുങ്ങല്ലൂര്‍ അഴിക്കോട് കളത്തിപ്പറമ്പില്‍ പരേതനായ അബൂബക്കറിന്‍റെ മകൻ സലിം (42) ആണ് മരിച്ചത്. ഓണ്‍ലൈന്‍ ഫുഡ് ഡെലിവറി ജീവനക്കാരനായിരുന്നു. ഇന്നലെ രാവിലെ ഒന്‍പതിനായിരുന്നു അപടകം. ബൈക്കിൽ ആലുവ ഭാഗത്തേക്ക് പോവുകയായിരുന്നു സലിം. ബസ് ബൈക്കിനെ മറികടക്കുന്നതിനിടെ വാതില്‍ഭാഗം തട്ടി ബൈക്ക് നിയന്ത്രണംവിട്ട് മറിയുകയായിരുന്നു. ബസിനിടിയിലേക്ക് തെറിച്ചുവീണ സലീമിന്‍റെ ശരീരത്തിലൂടെ ബസ് കയറിയിറങ്ങി. പോലീസ് മേൽനടപടികൾ സ്വീകരിച്ചു. മൃതദേഹം മെഡിക്കല്‍ കോളജിൽ പോസ്റ്റുമോർട്ടത്തിനു ശേഷം ഖബറടക്കം നടത്തി. ഭാര്യ: റജുല. മക്കൾ : തൗഫീഖ്, ഷമീല നസ്രിൻ, ഹാജറ നൗറീൻ, റിഫ ഫാത്തിമ. സംഭവത്തിൽ ബസ് ഡ്രൈവർ കൃഷ്ണദാസിനെനെതിരേ കേസെടുത്തു. ഇയാളെ കസ്റ്റഡിയിലെടുത്തിട്ടുണ്ട്.

കസ്റ്റഡിയിൽ നിന്ന് രക്ഷപ്പെട്ട പ്രതി മണിക്കൂറുകൾക്കുള്ളിൽ പിടിയിൽ

ആലുവ: ജില്ലാ ആശുപത്രിയിൽ എത്തിച്ച മോഷണക്കേസ് പ്രതി പോലീസ് കസ്റ്റഡിയിൽ നിന്ന് ഓടി രക്ഷപ്പെട്ടെങ്കിലും മണിക്കൂറുകൾക്കുള്ളിൽ പിടിയിലായി.ആസാം സ്വദേശി സുഖു അലി (26) ആണ് കസ്റ്റഡിയിൽ നിന്ന് ഓടി രക്ഷപ്പെടാൻ ശ്രമിച്ചത്. ഇയാളെ പിന്നീട് രണ്ട് കിലോമീറ്റർ ദൂരെയുള്ള പുളിഞ്ചോട് റെയിൽവേ പാളത്തിന് സമീപത്തുനിന്ന് പിടികൂടി. കാലടി പോലീസ് സ്‌റ്റേഷനിൽ രജിസ്റ്റർ ചെയ്ത മോഷണക്കേസിൽ ആലുവ സബ് ജയിലിൽ റിമാൻഡിലായിരുന്ന പ്രതി ശ്വാസംമുട്ട് അഭിനയിക്കുകയും എയ്ഡ്സ് രോഗമുണ്ടെന്ന് പറയുകയും ചെയ്തതിനെതുടർന്നാണ് ഇന്നലെ രാവിലെ 11ഓടെ ആലുവ ജില്ലാ ആശുപത്രിയിൽ പോലീസ് അകമ്പടിയോടെ വൈദ്യപരിശോധനയ്ക്കെത്തിച്ചത്. അത്യാഹിത വിഭാഗം കെട്ടിടത്തിലെ ശുചിമുറിയിൽ കയറിയ പ്രതി വെന്‍റിലേറ്റർ വഴി പുറത്തേക്കു ചാടിയാണ് ഓടിയത്. പ്രതി തിരിച്ചിറങ്ങാതെ വന്നപ്പോഴാണ് ഇയാൾ രക്ഷപ്പെട്ട വിവരം പോലീസ് അറിയുന്നത്.ഗവ.ആശുപത്രി ജംഗ്ഷനിൽനിന്ന് നസ്രത്ത് റോഡിലൂടെ ഓടി ചീരക്കട ക്ഷേത്രത്തിന് സമീപത്തെ റെയിൽ പാളത്തിലേക്ക് എത്തുകയായിരുന്നു. ആലുവ പോലീസ് ഇൻസ്‌പെക്ടർ വി.എം.കെഴ്‌സന്‍റെ നേതൃത്വത്തിൽ നടത്തിയ തെരച്ചിലിലാണ് രണ്ടു മണിക്കൂറിനുശേഷം പുളിഞ്ചോട് റെയിൽവേ ട്രാക്കിനടുത്ത് പിടികൂടിയത്. പ്രതിയെ വീണ്ടും ജില്ലാ ആശുപത്രിയിലെത്തിച്ച് വൈദ്യപരിശോധന നടത്തി കോടതിയിൽ ഹാജരാക്കി റിമാൻഡ് ചെയ്തു. പ്രതിയെ ആശുപത്രിയിലേക്ക് കൊണ്ടുപോയ പോലീസ് സേനാംഗങ്ങൾക്കെതിരെ വകുപ്പുതല അന്വേഷണം പ്രഖ്യാപിച്ചിട്ടുണ്ട്.രക്ഷപ്പെടാൻ ശ്രമിച്ചതിന് പ്രതിക്കെതിരെ ആലുവ പോലീസ് കേസെടുത്തു.

വീട്ടമ്മ മരിച്ചനിലയിൽ; മകൻ കസ്റ്റഡിയിൽ

മുളന്തുരുത്തി: വീട്ടമ്മയെ മരിച്ചനിലയിൽ കണ്ടെത്തി. ദുരൂഹതയെ തുടർന്ന് മകൻ അഭിജിത്തിനെ പോലീസ് കസ്റ്റഡിയിലെടുത്തു. വെളുത്താംകുന്ന് അരയങ്കാവ് അടയ്ക്കാപറമ്പിൽ അംബുജാക്ഷന്‍റെ ഭാര്യ ചന്ദ്രിക (58) യെയാണ് വീട്ടിലെ കിടപ്പുമുറിയിൽ മരിച്ചനിലയിൽ കണ്ടെത്തിയത്. തിങ്കളാഴ്ച രാവിലെ ആറോടെയാണ് സംഭവം. ഭർത്താവ് നേരത്തെ മരിച്ചിരുന്നു. മകൻ അഭിജിത്തും ചന്ദ്രികയും മാത്രമാണ് വീട്ടിൽ താമസം. ചന്ദ്രികയും മകനും തമ്മിൽ പണത്തിന്‍റെ പേരിൽ വഴക്ക് പതിവായിരുന്നെന്നും ഞായറാഴ്ചയും ഇരുവരും തമ്മിൽ വഴക്കുണ്ടായതായും കസേര കൊണ്ട് അടിച്ചതായും അയൽവാസികൾ പറയുന്നു. ഇതിന് മുമ്പും നിരവധി തവണ മകൻ അമ്മയെ മർദിച്ചിട്ടുള്ളതായും പറയുന്നുണ്ട്. തിങ്കളാഴ്ച രാവിലെ 6.45 ഓടെ സമീപത്തെ വീട്ടിലേക്ക് ഫോൺ വിളിച്ച് മകൻ അഭിജിത്ത്, ചന്ദ്രിക ഫാനിൽ തൂങ്ങിമരിച്ചെന്നും താൻ അഴിച്ച് കട്ടിലിൽ കിടത്തിയെന്നും പറയുകയായിരുന്നു. മകന്‍റെ മദ്യപാനവും ലഹരി ഉപയോഗവും ആഡംബര ജീവിതവും കാരണം വീട്ടിൽ നിരന്തരം വഴക്കുണ്ടാകാറുണ്ടെന്ന് പറയപ്പെടുന്നു. ലഹരി ഉപയോഗം മൂലം മാനസികനില തകരാറിലായതോടെ അമ്മയെ മർദിക്കുകയും മറ്റും ചെയ്തതിനെ തുടർന്ന് അഭിജിത്തിനെ രണ്ടു മാസം മുൻപ് ഡീ അഡിക്ഷൻ സെന്‍ററിലാക്കിയിരുന്നു. ഇവിടെനിന്നും തിരിച്ച് വീട്ടിലെത്തിയിട്ട് ഒരു മാസമേ ആയുള്ളൂ. മുളന്തുരുത്തി പോലീസ് കേസെടുത്ത് അന്വേഷണമാരംഭിച്ചു. മൃതദേഹം ഇൻക്വസ്റ്റ് നടപടികൾക്ക് ശേഷം ആശുപത്രിയിലേക്ക് മാറ്റി. കളമശേരി മെഡിക്കൽ കോളജിൽ പോസ്റ്റ്മോർട്ടത്തിന് ശേഷം ഇന്ന് ഒന്നിന് തോട്ടറ പൊതുശ്മശാനത്തിൽ സംസ്കരിക്കും. മകൾ: അപർണ.

തദ്ദേശ സ്ഥാപനങ്ങളിലെ ഹെല്‍ത്ത് ഗ്രാന്‍റ് പദ്ധതിക്ക് അംഗീകാരം

കൊച്ചി: ജില്ലയിലെ അഞ്ച് തദ്ദേശ സ്ഥാപനങ്ങളിലെ ഹെല്‍ത്ത് ഗ്രാന്‍റ് പദ്ധതിക്ക് അംഗീകാരം. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍റെ അധ്യക്ഷതയില്‍ ചേര്‍ന്ന ജില്ലാ ആസൂത്രണ സമിതി യോഗത്തിലാണ് അംഗീകാരമായത്. കൂവപ്പടി ബ്ലോക്ക് പഞ്ചായത്ത്, മണീട് ഗ്രാമപഞ്ചായത്ത്, ഞാറക്കല്‍ ഗ്രാമപഞ്ചായത്ത്, വേങ്ങൂര്‍ ഗ്രാമപഞ്ചായത്ത്, കളമശേരി നഗരസഭ എന്നീ തദ്ദേശ സ്ഥാപനങ്ങളിലെ ഹെല്‍ത്ത് ഗ്രാന്‍റ് പദ്ധതിക്കാണ് അംഗീകാരം ലഭിച്ചത്. ഇതോടൊപ്പം 2025-26 വാര്‍ഷിക പദ്ധതി ഭേദഗതിക്കായി അംഗീകാരം തേടിയിരുന്ന എട്ട് തദ്ദേശ സ്ഥാപനങ്ങള്‍ക്കും ആസൂത്രണ സമിതി യോഗത്തില്‍ അംഗീകാരം ലഭിച്ചു. കൂവപ്പടി ബ്ലോക്ക് പഞ്ചായത്ത്, മുളന്തുരുത്തി ഗ്രാമപഞ്ചായത്ത്, പൈങ്ങോട്ടൂര്‍ ഗ്രാമപഞ്ചായത്ത്, പോത്താനിക്കാട് ഗ്രാമപഞ്ചായത്ത്, ഏലൂര്‍ നഗരസഭ, കളമശ്ശേരി നഗരസഭ, ആലുവ നഗരസഭ, അങ്കമാലി നഗരസഭ എന്നീ തദ്ദേശസ്ഥാപനങ്ങള്‍ക്കാണ് അംഗീകാരം ലഭിച്ചത്. ജില്ലാ കളക്ടര്‍ എന്‍.എസ്.കെ. ഉമേഷ്, ജില്ലാ പ്ലാനിംഗ് ഓഫീസര്‍ ടി. ജ്യോതിമോള്‍, ജില്ലാ ആസൂത്രണ സമിതി അംഗങ്ങള്‍ വിവിധ തദ്ദേശ സ്വയംഭരണ സ്ഥാപനങ്ങളിലെ പ്രതിനിധികള്‍ എന്നിവര്‍ പങ്കെടുത്തു.

വാറന്‍റി കാലയളവിൽ സൗരോർജ പ്ലാന്‍റ് തകരാറിലായി; നഷ്ടപരിഹാരം 2.5 ലക്ഷം

കൊച്ചി: വാറന്‍റി കാലവിനുള്ളില്‍ തകരാറിലായ സൗരോർജ പ്ലാന്റിന്‍റെ തകരാർ പരിഹരിക്കുന്നതിൽ വീഴ്ചവരുത്തിയതിന് ഉപഭോക്താവിന് സ്ഥാപനം 2.5 ലക്ഷം രൂപ നഷ്ടപരിഹാരം നല്‍കണമെന്ന് എറണാകുളം ജില്ലാ ഉപഭോക്തൃ തര്‍ക്കപരിഹാര കോടതി. എറണാകുളം തേവരയിലെ വിദ്യോദയ സ്‌കൂള്‍ തൃശൂര്‍ ആസ്ഥാനമായി പ്രവര്‍ത്തിക്കുന്ന സൗര നാച്ചുറല്‍ എനര്‍ജി സൊലൂഷന്‍സ് ഇന്ത്യ പ്രൈവറ്റ് എന്ന സ്ഥാപനത്തില്‍ നിന്ന് 2018ല്‍ 13,36,677 രൂപ നല്‍കി 30 കിലോവാട്ട് ശേഷിയുള്ള സൗരോര്‍ജ പ്ലാന്റ് സ്ഥാപിച്ചിരുന്നു. പ്ലാന്റ് കമ്മീഷന്‍ ചെയ്ത 2018 ഒക്ടോബര്‍ മുതല്‍ അഞ്ച് വര്‍ഷത്തെ വാറന്റിയും കമ്പനി നല്‍കിയിരുന്നു. എന്നാല്‍, വാറന്റി അവസാനിക്കുന്നതിന് തൊട്ടുമുമ്പ്, 2023 ഒക്ടോബര്‍ മാസത്തില്‍ പ്ലാന്റിന്‍റെ ഇന്‍വെര്‍ട്ടര്‍ തകരാറിലായി. സ്‌കൂള്‍ അധികൃതര്‍ ഉടന്‍ തന്നെ വിവരം കമ്പനിയെ അറിയിക്കുകയും ചെയ്തു. കമ്പനിയുടെ ടെക്‌നീഷ്യന്‍മാര്‍ തകരാര്‍ സ്ഥിരീകരിച്ചെങ്കിലും ഇന്‍വെര്‍ട്ടര്‍ നന്നാക്കുകയോ മാറ്റി നല്‍കുകയോ ചെയ്തില്ല. പിന്നീട്, നിരന്തര ശ്രമങ്ങളെത്തുടര്‍ന്ന് കമ്പനി ഇന്‍വെര്‍ട്ടര്‍ കൊണ്ടുപോയെങ്കിലും വാറന്റി കാലഹരണപ്പെട്ടു എന്ന് ചൂണ്ടിക്കാട്ടി ശരിയാക്കുന്നതിന് അന്യായമായി പണം ആവശ്യപ്പെടുകയായിരുന്നു. കമ്പനി തങ്ങളുടെ വാറന്റി വ്യവസ്ഥകള്‍ പാലിക്കുന്നതില്‍ പരാജയപ്പെട്ടെന്നും ഇത് സേവനത്തിലെ ഗുരുതരമായ വീഴ്ചയാണെന്നും കോടതി കണ്ടെത്തി. എതിര്‍കക്ഷികള്‍ കരാര്‍ ലംഘിക്കുക മാത്രമല്ല, ഉപഭോക്താവിന്റെ ആവര്‍ത്തിച്ചുള്ള അപേക്ഷകള്‍ അവഗണിക്കുകയും ചെയ്തു എന്ന് ഡിബി ബിനു അധ്യക്ഷനും വി. രാമചന്ദ്രന്‍, ടി.എന്‍. ശ്രീവിദ്യ എന്നിവരുടെ ബെഞ്ച് വിലയിരുത്തി. സേവനത്തിലെ വീഴ്ച, ആധാര്‍മിക വ്യാപാര രീതി, ഉപഭോക്താവിനുണ്ടായ മാനസികാഘാതം, സാമ്പത്തിക നഷ്ടം എന്നിവ പരിഗണിച്ച്, പരാതിക്കാരായ സ്‌കൂളിന് 2,50,000 രൂപ നഷ്ടപരിഹാവും കൂടാതെ, കോടതി ചെലവായി 5,000 രൂപയും 45 ദിവസത്തിനകം നല്‍കണമെന്ന് എതിര്‍കക്ഷികള്‍ക്ക് കോടതി ഉത്തരവിട്ടു. പരാതിക്കാര്‍ക്ക് വേണ്ടി അഡ്വ. ജിയോ പോള്‍ കോടതിയില്‍ ഹാജരായി.

തെരുവുനായ ആക്രമണം: മൂന്നുപേര്‍ക്ക് പരിക്ക്

മൂവാറ്റുപുഴ: മൂവാറ്റുപുയിൽ തെരുവുനായയുടെ ആക്രമണത്തില്‍ മൂന്നുപേര്‍ക്ക് പരിക്ക്. മൂവാറ്റുപുഴ കബനി ബാറിലെ സെക്യൂരിറ്റി ജീവനക്കാരന്‍ ജോസ്, തൃക്കളത്തൂരിൽ താമസിക്കുന്ന ഇതര സംസ്ഥാന തൊഴിലാളി റാഫി മുഹമ്മദ്, മാറാടി സ്വദേശിനി ഇടമനപ്പെട്ടമലയില്‍ ജിന്‍സി എന്നിവര്‍ക്കാണ് ഇന്നലെ പരിക്കേറ്റത്. രാവിലെ കെഎസ്ആര്‍ടിസി ജംഗ്ഷനു സമീപത്തുനിന്ന് ജോസിനെയും, റാഫിയെയും ആക്രമിച്ച തെരുവുനായ പിന്നീട് മാറാടി ഭാഗത്തുവച്ച് ജിന്‍സിയെ ആക്രമിക്കുകയായിരുന്നു. പരിക്കേറ്റ മൂന്നുപേരും മൂവാറ്റുപുഴ ജനറല്‍ ആശുപത്രിയിലെത്തി വാക്‌സിന്‍ എടുത്തു. നഗരത്തില്‍ തെരുവുനായ ശല്യം രൂക്ഷമായതായി പരാതിയുണ്ട്.

46 വില്ലേജുകളിൽ പുതിയ ഓഫീസര്‍മാർ

കാക്കനാട്: ജില്ലയില്‍ 46 വില്ലേജുകളില്‍ പുതിയ ഓഫീസര്‍മാരെ നിയമിച്ചു. ഹുസൈന്‍ പതുവന- വാഴക്കാല, ആര്‍.കലാദേവി-തൃക്കാക്കര നോര്‍ത്ത്, കെ.ആര്‍.ജ്യോതി-തിരുവാങ്കുളം, എം.എന്‍. ബിനോയ്- ഇടപ്പള്ളി സൗത്ത്, പി.സിജു-ആമ്പല്ലൂര്‍, കെ. സരിത- കൈപ്പട്ടൂര്‍, എന്‍.കെ. അനൂപ്- മണകുന്നം, ടി.എസ്. സൂരജ്- മുളവുകാട്,മനു ജോസഫ് ഇമ്മാനുവല്‍ -കടമക്കുടി, കെ.എം.നജ്മ-ഞാറയ്ക്കല്‍, എം.മനോജ്-പുതുവൈപ്പ്, ആര്‍.റോഷ്‌നി-കുഴുപ്പിള്ളി, കെ.ബി.സുജി-എടവനക്കാട്, സി.സന്തോഷ്-തോപ്പുംപടി, എസ്.വിനില്‍ കുമാര്‍- ചെല്ലാനം,സി.എം.മിനി-മഞ്ഞപ്ര,ഡിന്‍റോ എസ്തപ്പാനു-അങ്കമാലി, ജി.മഞ്ജു-ആലുവ വെസ്റ്റ്, ജെ.സജി-ആലുവ ഈസ്റ്റ്, സി.ആര്‍.രാജേഷ്- മറ്റൂര്‍, ആര്‍.രാജീവ്-മൂക്കന്നൂര്‍, എ.അഞ്ജലി-നെടുമ്പാശേരി, വി.ആര്‍.രാഗേഷ്- വടക്കുംഭാഗം,പി.എ.രാജീവ്- പാറക്കടവ്, ജ്യോതിസ് സത്യന്‍-കീഴ്മാട്, പി.കെ.കവിത-ചൊവ്വര,ജി.മഹേഷ്-തുറവൂര്‍, പ്രോമി തിലകന്‍-പട്ടിമറ്റം, എം.എച്ച്.ജയന്‍- തിരുവാണിയൂര്‍,ഡി.അജിത്ത്കുമാര്‍-ഐക്കരനാട് സൗത്ത്,പി.കെ.സന്തോഷ്- ഐരാപുരം,കെ.ആര്‍.ബിബീഷ- വെങ്ങോല, കെ.ബി.അഭിലാഷ്-ഐക്കരനാട് നോര്‍ത്ത്,ഒ.ദീപ്തി-കൊമ്പനാട്,സീന ബാഹുലേയന്‍-കോതമംഗലം, പി.കെ.മഞ്ജു-നേര്യമംഗലം, പ്രിയ സലോമി സാമുവല്‍- കീരംപാറ, സി.എസ്. സന്ധ്യ-പല്ലാരിമംഗലം, എം.പി.മുസ്തഫ-പിണ്ടിമന,സി.അനൂപ്കുമാര്‍-കടുങ്ങല്ലൂര്‍, പി.വി.രഞ്ജിത്ത്കുമാര്‍-പുത്തന്‍വേലിക്കര, പി.ജെ. ആന്‍റണി - മൂത്തകുന്നം, ആര്‍.മിനി-മൂവാറ്റുപുഴ, സിജോ ആന്‍റണി - മേമുറി,എം.ഷഹ്നാസ്- കോടനാട്,എം.പി.ഷാജി- അശമന്നൂര്‍.

സ്‌കൂട്ടര്‍ നിയന്ത്രണംവിട്ട് കനാലിലേക്ക് മറിഞ്ഞു; രണ്ടു പേർക്ക് പരിക്ക്

മൂവാറ്റുപുഴ: നിയന്ത്രണംവിട്ട സ്‌കൂട്ടര്‍ 25 അടിയോളം താഴ്ചയുള്ള കനാലിലേക്ക് മറിഞ്ഞ് സ്കൂട്ടർയാത്രികരായ രണ്ടു പേര്‍ക്ക് പരിക്കേറ്റു. മേക്കടമ്പ് സ്വദേശികളായ മറ്റത്തില്‍ സുകുമാരന്‍ (65), പൂച്ചക്കുഴി വടക്കേക്കര ബിബിന്‍ (37) എന്നിവര്‍ക്കാണ് പരിക്കേറ്റത്. വാളകം മനക്കപ്പീടികയില്‍ ഇന്നലെ ഉച്ചയ്ക്ക് 2.30ഓടെയായിരുന്നു അപകടം. സ്‌കൂട്ടര്‍ റോഡിലെ ചെളിയില്‍പെട്ട് തെന്നി കനാലിലേക്ക് മറിയുകയായിരുന്നു. മൂവാറ്റുപുഴ അഗ്നിശമന സേനയെത്തിയാണ് ഇരുവരെയും കരയ്ക്കെത്തിച്ചത്. തുടർന്ന് ഇരുവരെയും ആശുപത്രിയില്‍ പ്രവേശിപ്പിച്ചു. ഗ്രേഡ് എസ്‌ടിഒ കെ.സി. ബിജുമോന്‍, എസ്എഫ്ആര്‍ഒ അനീഷ് കുമാര്‍, അനിബന്‍ കുര്യാക്കോസ്, ടി.ആര്‍. റെനീഷ്, നിബിന്‍ ബോസ്, ആര്‍. വിഷ്ണു, ജയസിങ് എന്നിവരാണ് രക്ഷാപ്രവര്‍ത്തനം നടത്തിയത്.

കുടിവെള്ളക്ഷാമം : മരടിൽ ചീഫ് എൻജിനീയറുടെ ഓഫീസ് ഉപരോധിച്ചു

മരട്: മരട് നഗരസഭാ പരിധിയിലെ രൂക്ഷമായ കുടിവെള്ള ക്ഷാമത്തെത്തുടർന്ന് നഗരസഭാ ചെയർപേഴ്സൺ ആന്‍റണി ആശാംപറമ്പിലിന്‍റെയും പാർലമെന്‍ററി ലീഡർ സി.ആർ. ഷാനവാസിന്‍റെയും നേതൃത്വത്തിൽ വാട്ടർ അഥോറിറ്റി ചീഫ് എൻജിനീയറുടെ ഓഫീസ് ഉപരോധിച്ചു. ചീഫ് എൻജിനീയറുടെ അഭാവത്തിൽ ഡെപ്യൂട്ടി ചീഫ് എൻജിനീയർ കെ. സുരേഷ്, എക്സി. എൻജിനീയർ രാജേഷ് ലക്ഷ്മൺ എന്നിവരെ ഉപരോധിക്കുകയായിരുന്നു. തിങ്കളാഴ്ച്ച രാവിലെ 10ന് തുടങ്ങിയ സമരം ആറ് മണിക്കൂർ പിന്നിട്ടിട്ടും ഫലമില്ലാതായതോടെ ഡെപ്യൂട്ടി ചീഫ് എൻജിനീയറെ ക്യാമ്പിനകത്ത് പൂട്ടിയിട്ട് സമരക്കാർ പ്രതിഷേധം കടുപ്പിച്ചു. പിന്നീട് വൈകുന്നേരം ആറോടെ സൂപ്രണ്ടിംഗ് എൻജിനീയറും ചീഫ് എൻജിനീയറും ചർച്ച ചെയ്തതിന്‍റെ അടിസ്ഥാനത്തിൽ വരും ദിവസങ്ങളിൽ എല്ലാ ദിവസവും തുടർച്ചയായി പമ്പിംഗ് ചെയ്യാമെന്നും വളന്തകാട് ദ്വീപ്, കുണ്ടന്നൂരിലെ എൻ.എക്സ്. ജോസഫ് റോഡ് എന്നിവിടങ്ങളിലെ മോശമായ പഴകിയ പൈപ്പ് അടിയന്തിരമായി മാറ്റി ഡിവിഷൻ 1, 21, 29, 30, 33 എന്നീ ഡിവിഷനുകളിലെ കുടിവെള്ള പ്രശ്നം അടിയന്തിരമായി പരിഹരിക്കാമെന്നും രേഖാമൂലം ഉറപ്പു നൽകിയതോടെ സമരം അവസാനിപ്പിക്കുകയായിരുന്നു. ഡെപ്യൂട്ടി ചെയർപേഴ്സൺ അഡ്വ. രശ്മി സനിൽ, സ്ഥിരം സമിതി അധ്യക്ഷന്മാർ, കൗൺസിലർമാർ തുടങ്ങിയവർ സമരത്തിൽ പങ്കെടുത്തു. കഴിഞ്ഞ ഒരു മാസത്തിലധികമായി മരട് നഗരസഭാ പരിധിയിൽ വിവിധയിടങ്ങളിലായി കുടിവെള്ളം ലഭിക്കാതിരുന്നതിനെ തുടർന്ന് നടത്തിയ ചർച്ചകളിലും പരിഹാര മാർഗങ്ങളിലും യാതൊരു പ്രയോജനവുമില്ലാതിരുന്നതോടെയാണ് ചീഫ് എൻജിനീയറുടെ ഓഫീസിൽ ജനപ്രതിനിധികൾ ഉപരോധം സംഘടിപ്പിച്ചത്.

കന്യാസ്ത്രീകൾക്കെതിരേയുള്ള കേസ്; പ്രതിഷേധം തുടരുന്നു

പാലാരിവട്ടം: ഛത്തീസ്ഗഡിലെ ദുർഗിൽ സിസ്റ്റർ പ്രീതി മേരിയെയും സിസ്റ്റർ വന്ദന ഫ്രാൻസിനും എതിരെ ചുമത്തപ്പെട്ട കേസുകൾ അടിയന്തരമായി റദ്ദാക്കണമെന്ന് ആവശ്യപ്പെട്ട് പാലാരിവട്ടം സെന്‍റ് ജോൺ ദി ബാപ്റ്റിസ്റ്റ് പള്ളി വികാരി ഫാ. ജോജി കുത്തുകാട്ടിൽ തിരി കത്തിച്ച് വെളിച്ചമേകി അമ്മമാർക്കൊപ്പം ഞങ്ങളും കൂടെയുണ്ട് എന്ന് പ്രഖ്യാപിച്ചു. പ്രതിഷേധ ജ്വാലയിൽ ഫാ. എഡിസൺ, ഫാ. ഷൈജു എന്നിവരും ഇടകളിലെ സന്യാസിനിമാരും ഇടവക ജനങ്ങളും പങ്കുകാരായി. ഫോർട്ടുകൊച്ചി: കന്യാസ്ത്രീകൾക്കെതിരെയുള്ള കേസ് റദ്ദ് ചെയ്യണമെന്നാവശ്യപ്പെട്ട് മാനാശേരി സെന്‍റ് മൈക്കിൾസ് പള്ളിയിൽ പ്രതിഷേധ ധർണ സംഘടിപ്പിച്ചു. കെഎൽസിഎ രൂപത സമിതി അംഗം പി.ജെ. പ്രദീപ് അധ്യക്ഷത വഹിച്ചു. സിസ്റ്റർ ഷിബി, സിസ്റ്റർ സോളി, യൂണിറ്റ് പ്രസിഡന്‍റ് ടി.ജെ.ജേക്കബ് എന്നിവർ സംസാരിച്ചു. അരൂർ: കന്യാസ്ത്രീകളെ അറസ്റ്റ് ചെയ്ത സംഘപരിവാർ ഭീകരതയ്ക്കെതിരെ എൽഡിഎഫ് അരൂർ മണ്ഡലം കമ്മിറ്റി വല്ലേത്തോട്ടിൽ പ്രതിഷേധ സായാഹ്നം സംഘടിപ്പിച്ചു. സിപിഎം സംസ്ഥാന കമ്മിറ്റി അംഗം സി.ബി. ചന്ദ്രബാബു ഉദ്ഘാടനം ചെയ്തു.എം.കെ. ഉത്തമൻ അധ്യക്ഷനായി. പറവൂർ: കന്യാസ്ത്രീകളെ കള്ളക്കേസെടുത്ത് തുറുങ്കിലടച്ചതിൽ പ്രതിഷേധിച്ച് കെഎൽസിഎ ഏഴിക്കര -കടക്കര യൂണിറ്റിന്‍റെ നേതൃത്വത്തിൽ ധർണ നടത്തി. കോട്ടപ്പുറം രൂപത പ്രസിഡന്‍റ് അനിൽ കുന്നത്തൂർ ഉദ്ഘാടനംചെയ്തു. അലക്സ് താളൂപ്പാടത്ത്, ഫാ. മിഥുൻ മെൻഡസ്, ജിജോ കല്ലറയ്ക്കൽ, ജിനു നെടുംപറമ്പിൽ, സോണി കൊടിയന്ത്ര, തോമസ് പാറയ്ക്കൽ എന്നിവർ സംസാരിച്ചു.

കൊച്ചി അഴിമുഖത്ത് അപകട ഭീഷണിയുയർത്തി മത്സ്യബന്ധനയാനങ്ങൾ

ഫോർട്ടുകൊച്ചി: അഴിമുഖത്ത് യാത്രാ ബോട്ടുകൾക്കും ടൂറിസ്റ്റ് ബോട്ടുകൾക്കും അപകട ഭീതിയുണർത്തി വീണ്ടും മത്സ്യബന്ധന യാനങ്ങൾ. ഫോർട്ട്കൊച്ചി കമാലക്കടവിൽ ഇന്ധനം നിറക്കുന്നതിനും തൊഴിലാളികളെ ഇറക്കുന്നതിനുമായി എത്തുന്ന യാനങ്ങളാണ് അപകടത്തിന് കാരണമാകുന്നത്. ഈ യാനങ്ങൾ നിയന്ത്രണം വിടുന്നത് ഇവിടത്തെ ചീനവലകൾക്കും ഭീഷണിയായി മാറുന്ന സാഹചര്യമാണ്. നേരത്തേ നിയന്ത്രണം വിട്ട യാനം ഇടിച്ച് ചീനവല തകർത്തിരുന്നു. അന്ന് ജീവഹാനിയുണ്ടാകാതിരുന്നത് ഭാഗ്യം കൊണ്ട് മാത്രമാണ്. യാനങ്ങൾ നിയന്ത്രണം വിട്ട് ടൂറിസ്റ്റ് ജെട്ടിയിൽ ഇടിച്ച് ജെട്ടി തകർന്നത് രണ്ട് തവണയാണ്. ടൂറിസ്റ്റ് ജെട്ടിക്ക് സമീപം കെട്ടിയിട്ടിരിക്കുന്ന മത്സ്യബന്ധന ബോട്ടുകൾ കെട്ടഴിഞ്ഞ് പോകുന്നതും കൊച്ചി അഴിമുഖത്ത് ടൂറിസ്റ്റ് ബോട്ടുകൾക്ക് അപകട ഭീഷണിയാകുന്നുന്നുണ്ട്. 10 ൽ കൂടുതൽ ബോട്ടുകളാണ് ഒരേ സമയം ടൂറിസ്റ്റ് ബോട്ടുജെട്ടിക്ക് സമീപമുള്ള പെട്രോൾ പമ്പിന് സമീപം നിരന്നു കിടക്കുന്നത്. ഇത് പലപ്പോഴും കയറ് പൊട്ടി അപകടകരമായ അന്തരീഷമുണ്ടാക്കാറുണ്ട്. ഇത് മൂലം വിനോദ സഞ്ചാരികളുടെ ബോട്ടുകൾക്ക് പ്രവേശിക്കാൻ ബുദ്ധിമുട്ടുണ്ടാകുകയും മത്സബന്ധന ബോട്ടുകളുടെ യന്ത്രങ്ങൾ ഒരുമിച്ച് പ്രവർത്തിക്കുന്നത് മൂലമുണ്ടാകുന്ന ഓളങ്ങളിൽ ആടിയുലയുന്ന സാഹചര്യവുമുണ്ട്. സ്കൂളുകളിൽ നിന്ന് വിനോദ സഞ്ചാരത്തിന് വരുന്ന കുട്ടികൾ ഉൾപെടെയുള്ളവരാണ് ടൂറിസ്റ്റ് ബോട്ടുകളിൽ ഉണ്ടാകുന്നത്. ഭീകരാന്തരീഷം തരണം ചെയ്താണ് അവർ ടൂറിസ്റ്റ് ബോട്ട് ജെട്ടിയിൽ ഇറങ്ങുന്നത്. ഈ ഭാഗത്ത് തന്നെയാണ് 2015-ൽ മത്സ്യബന്ധന ബോട്ട് യാത്രാ ബോട്ടിലിടിച്ച് 11 പേരുടെ ജീവനുകൾ നഷ്ടമായത്.

കളമശേരി വനിതാ പോളിടെക്നിക് കെട്ടിട സമുച്ചയങ്ങളുടെ ഉദ്ഘാടനം നടത്തി

കളമശേരി: കളമശേരി വനിതാ പോളിടെക്നിക്കിൽ പുതുതായി നിർമിച്ച കെട്ടിട സമുച്ചയത്തിന്‍റെ ഉദ്ഘാടനം നടത്തി. രാവിലെ നടന്ന ചടങ്ങിൽ ഉന്നത വിദ്യാഭ്യാസ വകുപ്പ് മന്ത്രി ആർ.ബിന്ദു ഉദ്ഘാടനം നിർവഹിച്ചു. വ്യവസായ മന്ത്രി പി.രാജീവ് അധ്യക്ഷനായി. നഗരസഭാ ചെയർപേഴ്സൺ സീമ കണ്ണൻ, സാങ്കേതിക വിദ്യാഭ്യാസ ഡയറക്ടർ ഡോ. പി. ജയപ്രകാശ്, പൊതുമരാമത്ത് സൂപ്രണ്ടിംഗ് എൻജിനീയർ എസ്.ആർ. അനിതാകുമാരി, പ്രിൻസിപ്പൽ രാധിക സജു, വാർഡ് കൗൺസിലർമാരായ നെഷീദ സലാം, ശശി തുടങ്ങിയവരും ഉദ്യോഗസ്ഥരും പങ്കെടുത്തു.

തകർന്ന് തരിപ്പണമായി ഓള്‍ഡ് വല്ലം റോഡ്; തിരിഞ്ഞുനോക്കാതെ അധികൃതർ

പെരുമ്പാവൂര്‍: കോട്ടയം, ഇടുക്കി, പത്തനംതിട്ട ജില്ലകളില്‍ നിന്നും നെടുമ്പാശേരി അന്താരാഷ്ട്ര വിമാനത്താവളത്തിലേയ്ക്ക് വരുന്ന യാത്രക്കാര്‍ക്ക് കാലടിയിലെ ഗതാഗതക്കുരുക്കില്‍ നിന്ന് മോചനം നേടാനും എയര്‍പോര്‍ട്ടിലേക്ക് വേഗത്തില്‍ എത്തിച്ചേരാനും സാധിക്കുന്ന എംസി റോഡില്‍ പെരുമ്പാവൂര്‍ കടുവാളില്‍ നിന്ന് ആരംഭിക്കുന്ന ഓള്‍ഡ് വല്ലം റോഡ് പൊട്ടിപ്പൊളിഞ്ഞ് താറുമാറായിട്ടും അധികൃതർ അനാസ്ഥ കാട്ടുന്നതായി പരാതി. ഈറോഡ് വികസിപ്പിച്ച് ബിഎം ആന്‍ഡ് ബിസി നിലവാരത്തില്‍ ടാര്‍ ചെയ്ത് സഞ്ചാരയോഗ്യമാക്കുമെന്ന് പൊതുമരാമത്ത് മന്ത്രി നിയമസഭയില്‍ എല്‍ദോസ് കുന്നപ്പിള്ളി എംഎല്‍എയ്ക്ക് ഉറപ്പ് നൽകിയിരുന്നു. എന്നാൽ നാളിതുവരെയായിട്ടും ഈ ഉറപ്പ് പാലിക്കപ്പെട്ടിട്ടില്ല. വല്ലംകടവ്-പാറപ്പുറം പാലം യാഥാര്‍ഥ്യയമായതിന് പിന്നാലെയാണ് ഇത് പ്രയോജനപ്പെടുത്തി പുതിയ എയര്‍പോര്‍ട്ട് റോഡ് എന്ന ആവശ്യം ഉയര്‍ന്നുവന്നത്. പെരിയാറിന്‍റെ ഇരു കരകളിലുമുള്ള കാഞ്ഞൂര്‍ സെന്‍റ് മേരീസ് പള്ളി, പുതിയേടം ക്ഷേത്രം, തിരുവൈരാണിക്കുളം ക്ഷേത്രം, ചേലാമറ്റം ക്ഷേത്രം തുടങ്ങിയ തീര്‍ഥാടന കേന്ദ്രങ്ങളിലേക്കുള്ള യാത്രയും റോഡ് നവീകരിക്കുന്നതിലൂടെ സുഗമമാകും. പ്രദേശത്തെ ജനങ്ങളുടെ പ്രതിഷേധത്തെ തുടര്‍ന്ന് കഴിഞ്ഞ ദിവസം രണ്ട് ലോഡ് പാറപ്പൊടി അടിച്ച് വലിയ കുഴികള്‍ മൂടിയത് ഒഴിച്ചാല്‍ പൊതുമരാമത്ത് വകുപ്പ് ഉദ്യോഗസ്ഥര്‍ ഇവിടേയ്ക്ക് തിരിഞ്ഞ് നോക്കിയിട്ടുപോലും ഇല്ലത്രേ. താലൂക്ക് വികസന സമിതിയില്‍ നിരവധി തവണ ഈ ആവശ്യമുന്നയിച്ചിട്ടും പുല്ലുവിലയാണ് ഉദ്യോഗസ്ഥര്‍ നല്‍കുന്നതെന്ന് മുനിസിപ്പല്‍ ചെയര്‍മാന്‍ പോള്‍ പാത്തിക്കല്‍ കുറ്റപ്പെടുത്തി. തകര്‍ന്ന കടുവാള്‍-എയര്‍പോര്‍ട്ട് റോഡ് ഉടന്‍ സഞ്ചാരയോഗ്യമാക്കിയില്ലെങ്കില്‍ ജനങ്ങളെ അണിനിരത്തി പൊതുമരാമത്ത് വകുപ്പ് ഓഫീസിലേയ്ക്ക് ജനകീയ മാര്‍ച്ച് സംഘടിപ്പിക്കുമെന്ന് കോണ്‍ഗ്രസ് നേതാക്കളായ ഷാജി കുന്നത്താന്‍, അബ്ദുല്‍ നിസാര്‍, താരിശ് ഹസന്‍, പി.എസ്. അബൂബക്കര്‍, സാദിഖ് അമ്പാടന്‍ എന്നിവര്‍ അറിയിച്ചു.

കൂത്താട്ടുകുളം നഗരസഭ: അവിശ്വാസപ്രമേയം ജനങ്ങളോടുള്ള വെല്ലുവിളിയെന്ന് എൽഡിഎഫ്

കൂത്താട്ടുകുളം: യുഡിഎഫിന്‍റെ നേതൃത്വത്തിൽ കൂത്താട്ടുകുളം നഗരസഭയിൽ അവതരിപ്പിക്കുന്ന അവിശ്വാസപ്രമേയം ജനങ്ങളോടുള്ള വെല്ലുവിളിയാണെന്ന് എൽഡിഎഫ് നഗരസഭ സമിതി പത്ര സമ്മേളനത്തിൽ അറിയിച്ചു. ഭരണസമിതിയുടെ കാലാവധി തീരാൻ ആഴ്‌ചകൾ മാത്രം ബാക്കിയിരിക്കെ ഭരണ പ്രതിസന്ധി സൃഷ്ടിച്ച് വികസന പ്രവർത്തനങ്ങളെ തടയുക എന്നതാണ് ലക്ഷ്യം. ഈ ഭരണസമിതിയുടെ കാലത്തെ അവസാന സാമ്പത്തിക വർഷം മാത്രം 20 കോടി രൂപയുടെ വികസന പദ്ധതികളാണ് നടപ്പാക്കുന്നത്. ഈ പദ്ധതികളെ ഇല്ലാതാക്കാനാണ് യുഡിഎഫ് ശ്രമിക്കുന്നത്. യുഡിഎഫ് കൗൺസിലർമാർ പോലീസ് സംരക്ഷണം ആവശ്യപ്പെടില്ലെന്നും സംഘടന ശേഷി കൊണ്ട് സംരക്ഷണം ഒരുക്കുമെന്നും എംഎൽഎമാരായ അനൂപ് ജേക്കബ്ബും, മാത്യു കുഴൽ നാടനും പത്ര സമ്മേളനത്തിൽ അറിയിച്ചത്. ഇന്നലെ രാവിലെ ഹൈക്കോടതിയിൽ മാത്യു കുഴലനാടൻ പ്രൊട്ടക്ഷന് ഹർജി നൽകുകയും ചെയ്തു. ഇത്തരം നിലപാടില്ലായ്മയുടെ പ്രതിരൂപമായി യുഡിഎഫ് മാറിയെന്നും സിപിഎം നേതാക്കൾ പറഞ്ഞു. പത്രസമ്മേളനത്തിൽ സിപിഎം ഏരിയ സെക്രട്ടറി പി.ബി.രതീഷ്, സി.എൻ. പ്രഭകുമാർ, സണ്ണി കുര്യാക്കോസ്, കെ. ചന്ദ്രശേഖരൻ, ബിജോ പൗലോസ്, വിജയ ശിവൻ, ഫെബീഷ് ജോർജ്, അരുൺ അശോകൻ എന്നിവർ പങ്കെടുത്തു. സിപിഎം ഏരിയ സെക്രട്ടറി പറഞ്ഞത് വാസ്തവ വിരുദ്ധമെന്ന് കോൺഗ്രസ് കൂത്താട്ടുകുളം: സിപിഎം ഏരിയ സെക്രട്ടറി പത്രസമ്മേളനത്തിൽ മാത്യു കുഴലനാടൻ എംഎൽഎ യുഡിഎഫ് കൗൺസിലർമാർക്ക് വേണ്ടി കോടതിയിൽ ഹാജരായി പോലീസ് പ്രൊട്ടക്ഷൻആവശ്യപ്പെട്ടു എന്ന് പറഞ്ഞത് വാസ്തവ വിരുദ്ധമാണ്. ഹൈക്കോടതിയിൽ പ്രാക്ടീസ് ചെയ്യുന്ന ഒരു വക്കീൽ എന്ന നിലയിൽ അദ്ദേഹം അദ്ദേഹത്തെ സമീപിച്ച ഏതെങ്കിലും വ്യക്തികൾക്ക് വേണ്ടി കോടതിയിൽ ഹാജരായിട്ടുണ്ടാവാം പക്ഷേ അതിൽ ഒരു യുഡിഎഫ് കൗൺസിലറും ഉൾപ്പെടുന്നില്ല എന്ന് യുഡിഎഫ് പാർലമെന്‍ററി പാർട്ടി ലീഡർ പ്രിൻസ് പോൾ ജോൺ പത്രസമ്മേളനത്തിന് മറുപടിയായി അറിയിച്ചു.

നിയന്ത്രണംവിട്ട കാർ ലോറിയിലും മതിലിലും ഇടിച്ചു

വാഴക്കുളം: ലോറിയെ മറികടക്കുന്നതിനിടെ കാർ നിയന്ത്രണം വിട്ട് ലോറിയുടെ മുമ്പിലും സമീപത്തെ വീടിന്‍റെ മതിലിലും ഇടിച്ചു.ആർക്കും പരിക്കില്ല.ആനിക്കാട് തിരുവുംപ്ലാവിൽ ക്ഷേത്രത്തിനു സമീപം ഇന്നലെ രാവിലെ 11.30 ഓടെയായിരുന്നു അപകടം. തൊടുപുഴയിലെ വസ്ത്ര വ്യാപാര സ്ഥാപനത്തിൽ ജീവനക്കാരനായ തൃശൂർ സ്വദേശി സഞ്ചരിച്ചിരുന്ന സ്വിഫ്റ്റ് ഡിസയർ കാർ തൊടുപുഴ ഭാഗത്തേക്ക് ചരക്കെടുക്കാൻ പോവുകയായിരുന്ന ലോറിയെ മറികടക്കാൻ ശ്രമിക്കുന്നതിനിടെയാണ് അപകടമുണ്ടായത്. എതിർദിശയിൽ വന്ന വാഹനത്തിൽ ഇടിക്കാതിരിക്കാൻ വെട്ടിച്ചപ്പോൾ ലോറിയുടെ മുൻഭാഗത്ത് ഇടിക്കുകയായിരുന്നു. ലോറിയിൽ ഇടിച്ച് നിയന്ത്രണം നഷ്ട‌പ്പെട്ട കാർ ആനിക്കാട് നിരപ്പേൽ പ്രദീപിന്‍റെ വീടിന്‍റെ മതിലിലും ഇടിച്ചു. ഇടിയുടെ ആഘാതത്തിൽ കാറിന്‍റെ മുൻഭാഗം തകർന്നു. വീടിനും ഭാഗികമായ നാശനഷ്ടം നേരിട്ടു. മൂവാറ്റുപുഴ പോലീസ് സ്ഥലത്തെത്തി മേൽനടപടികൾ സ്വീകരിച്ചു.

മുണ്ടക്കൈ ചൂരല്‍മല ദുരന്തം : 6 സഹപ്രവര്‍ത്തകര്‍ക്ക് വീടൊരുക്കി വര്‍ക്ക്‌ഷോപ് സംഘടന

മൂവാറ്റുപുഴ: അസോസിയേഷന്‍ ഓഫ് ഓട്ടോമൊബൈല്‍ വര്‍ക്ക്‌ഷോപ് കേരള മുണ്ടക്കൈ ചൂരല്‍മല ദുരന്തത്തില്‍ വീട് നഷ്ടപ്പെട്ട ആറ് സഹപ്രവര്‍ത്തകര്‍ക്ക് വീടൊരുക്കി നല്‍കി. സംസ്ഥാനത്തെ തങ്ങളുടെ എല്ലാ അംഗങ്ങളില്‍ നിന്നും സ്വരൂപിച്ച ഫണ്ട് ഉപയോഗിച്ചാണ് ദുരന്തത്തില്‍ വീട് നഷ്ടപ്പെട്ട ആറ് സഹപ്രവര്‍ത്തകര്‍ക്ക് 30 സെന്‍റ് സ്ഥലം വാങ്ങി വീട് നിര്‍മിച്ചു നല്‍കിയത്. നിര്‍മിച്ച ആറു വീടുകളുടെ താക്കോല്‍ദാനം മന്ത്രി വി.എൻ. വാസവന്‍ നിര്‍വഹിച്ചു. മുട്ടില്‍ പരിയാരം ചെലഞ്ഞിച്ചാലില്‍ അഞ്ച് സെന്‍റില്‍ 850 സ്‌ക്വയര്‍ഫീറ്റ് വിസ്തീര്‍ണത്തിലാണ് വീടുകള്‍ നിര്‍മിച്ചിരിക്കുന്നത്. രണ്ടു കിടപ്പുമുറികള്‍, അടുക്കള, ഹാള്‍, ശുചിമുറി സൗകര്യങ്ങളോടെയുള്ള വീടുകളിലേക്ക് പൊതുകിണര്‍ നിര്‍മിച്ച് കുടിവെള്ള സൗകര്യവും ഉറപ്പാക്കിയിട്ടുണ്ട്. 10 മാസം കൊണ്ടാണ് വീടുകളുടെ നിര്‍മാണം പൂര്‍ത്തിയാക്കിയത്.

രാസമാലിന്യം ഒഴുക്കിയ പ്ലൈവുഡ് കമ്പനിക്ക് നോട്ടീസ്

മൂവാറ്റുപുഴ: പണ്ടപ്പിള്ളിയില്‍ എംവിഐപി കനാലിലേക്ക് രാസമാലിന്യം ഒഴുക്കിയ പ്ലൈവുഡ് കമ്പനിക്ക് മൂവാറ്റുപുഴ വാലി ഇറിഗേഷന്‍ പ്രോജക്ട് (എംവിഐപി) നോട്ടീസ് നല്‍കി. മാലിന്യം ഒഴുക്കിയാല്‍ നിയമനടപടി സ്വീകരിക്കുമെന്നും അറിയിച്ചു. കമ്പനിയില്‍നിന്ന് 50,000 രൂപ പിഴ ഈടാക്കാനും കമ്പനിക്ക് സ്റ്റോപ്പ് മെമ്മോ നല്‍കാനും ആരക്കുഴ പഞ്ചായത്ത് കമ്മിറ്റി തീരുമാനിച്ചിരുന്നു. ഇതനുസരിച്ച് സ്റ്റോപ്പ് മെമ്മോ നല്‍കിയിട്ടുണ്ട്. പ്ലൈവുഡ് കമ്പനി രാസമാലിന്യം ഒഴുക്കിയതുമായി ബന്ധപ്പെട്ട് പരാതി ഉയര്‍ന്നതിനെത്തുടര്‍ന്ന് ആരക്കുഴ പഞ്ചായത്ത് സെക്രട്ടറിയും ആരോഗ്യ വിഭാഗവും നടത്തിയ പരിശോധനയില്‍ കമ്പനിയുടെ വീഴ്ചകള്‍ കണ്ടെത്തിയിരുന്നു. തുടര്‍ന്നാണ് പിഴയീടാക്കാനും സ്റ്റോപ്പ് മെമ്മോ നല്‍കാനും പഞ്ചായത്ത് ഭരണസമിതി അടിയന്തര യോഗം ചേര്‍ന്ന് തീരുമാനിച്ചത്. നൂറുകണക്കിനാളുകളുടെ ജലസ്രോതസാണ് എംവിഐപി പ്രധാന കനാല്‍ ഇതിലേക്കാണ് ചുവന്ന നിറത്തിലുള്ള രാസമാലിന്യം ഒഴുക്കിയത്. കമ്പനിക്ക് പ്രവര്‍ത്തനാനുമതി നല്‍കിയപ്പോള്‍ നിര്‍ദേശിച്ച നിബന്ധനകള്‍ പാലിക്കാതെയാണ് പ്രവര്‍ത്തിക്കുന്നതെന്നും കണ്ടെത്തിയിരുന്നു.

കന്യാസ്ത്രീകള്‍ക്കുനേരേ നടന്ന അതിക്രമങ്ങളില്‍ പ്രതിഷേധിച്ചു

മൂവാറ്റുപുഴ: കന്യാസ്ത്രീകള്‍ക്കുനേരേ നടന്ന അതിക്രമങ്ങളില്‍ പ്രതിഷേധിച്ച് കാരക്കുന്നം സെന്‍റ് മേരീസ് കത്തോലിക്ക പള്ളിയിലെ വിവിധ സംഘടനകളുടെ നേതൃത്വത്തിൽ വായ്മൂടിക്കെട്ടി പ്രതിഷേധ റാലി സംഘടിപ്പിച്ചു. വികാരി ഫാ. ജോർജ് വള്ളോംകുന്നേല്‍ നേതൃത്വം നൽകി. കൂടാതെ അസിസ്റ്റന്‍റ് വികാരി ഫാ. അലന്‍ വെട്ടിക്കുഴി, കൈക്കാരന്മാരായ ജോസ് പുല്ലന്‍പ്ലാവില്‍, ഷിബു ചാത്തന്‍കണ്ടം, രാജു കുഴികണ്ടത്തില്‍, വിവിധ സംഘടനകളുടെ ഭാരവാഹികള്‍ എന്നിവർ നേതൃത്വം നൽകി. പ്രതിഷേധ സംഗമം കോതമംഗലം: മതന്യൂനപക്ഷപീഡനത്തിനും ഭരണഘടന വിരുദ്ധതക്കും എതിരെ ഗ്രീൻവിഷൻ കേരളയുടെ നേതൃത്വത്തിൽ കോതമംഗലം കോഴിപ്പിള്ളി ജംഗഷനിൽ പ്രതിഷേധസംഗമം നടത്തി. കീരംപറ പഞ്ചായത്ത് മുൻ പ്രസിഡന്‍റ് മാമച്ചൻ ജോസഫ് ഉദ്ഘാടനം ചെയ്തു. എകെസിസി രൂപത സെക്രട്ടറിയും ഗ്രീൻവിഷൻ കേരള സംസ്ഥാന ട്രഷറാറുമായ ജിജി പുളിക്കൽ അധ്യക്ഷത വഹിച്ചു. മദ്യവിരുദ്ധ സമിതി മധ്യമേഖല പ്രസിഡന്‍റ് ജെയിംസ് കോറമ്പേൽ മുഖ്യ പ്രഭാഷണം നടത്തി. കല്ലൂർക്കാട്: ഛത്തീസ്ഗഡിൽ കള്ളക്കേസിൽ കുടുക്കി അന്യായമായി കന്യാസ്ത്രീകളെ ജയിലിലടച്ച ഭരണകൂട ഭീകരതക്കെതിരേ കോൺഗ്രസ് കല്ലൂർക്കാട് മണ്ഡലം കമ്മിറ്റി പ്രതിഷേധ കൂട്ടായ്മ സംഘടിപ്പിച്ചു. മാത്യു കുഴൽനാടൻ എംഎൽഎ ഉദ്ഘാടനം ചെയ്തു. മണ്ഡലം പ്രസിഡന്‍റ് ബിജു ജോസഫ് അധ്യക്ഷത വഹിച്ചു. ജോയിസ് മേരി ആന്‍റണി മുഖ്യപ്രഭാഷണം നടത്തി. ജോർജ് ഫ്രാൻസിസ്, ജാൻസി ജോമി, തോമസ് മംഗലാമഠം, കെ.കെ. ദിലീപ്, സണ്ണി സെബാസ്റ്റ്യൻ തുടങ്ങിയവർ പ്രസംഗിച്ചു. കോതമംഗലം: ഭരണഘടന മൂല്യങ്ങൾ സംരക്ഷിക്കുക, ന്യൂനപക്ഷ വേട്ട അവസാനിപ്പിക്കുക എന്നീ ആവശ്യങ്ങൾ ഉന്നയിച്ച് എൽഡിഎഫ് കോതമംഗലം നിയോജക മണ്ഡലമം കമ്മറ്റിയുടെ നേതൃത്വത്തിൽ കോതമംഗലം ചെറിയ പള്ളിത്താഴത്ത് പ്രതിക്ഷേധ സംഗമം നടത്തി. ഛത്തീസ്ഗഡിൽ മലയാളി കന്യാസ്ത്രീകളെ കള്ളക്കേസിൽ കുടുക്കി ജയിലിലടച്ച സംഭവം അപലപനീയമാണെന്നും എൽഡിഎഫ് യോഗം വ്യക്തമാക്കി. ആന്‍റണി ജോൺ എംഎൽഎ പ്രതിഷേധ സംഗമം ഉദ്ഘാടനം ചെയ്തു. നിയോജക മണ്ഡലം ചെയർമാൻ പി.ടി. ബെന്നി അധ്യക്ഷത വഹിച്ചു.

ബൈക്കപകടത്തിൽ യുവാവ് മരിച്ചു

മരട്: കൂട്ടൂകാരന്‍റെ മകന്‍റെ പിറന്നാളാഘോഷം കഴിഞ്ഞ് മടങ്ങുകയായിരുന്ന യുവാവ് ബൈക്കപകടത്തിൽ മരിച്ചു. പാലാരിവട്ടം ലിറ്റിൽ ഫ്ലവർ ലെയ്ൻ വെളുത്തേടത്ത് പരേതനായ സുധീറിന്‍റെയും ജിൻസിയുടെയും മകൻ സിദ്ധാർഥ് (20) ആണ് മരിച്ചത്. ഞായറാഴ്‌ച രാത്രി 11ഓടെ കുണ്ടന്നൂർ മേൽപ്പാലത്തിലായിരുന്നു അപകടം. പാലത്തിന്‍റെ വടക്കേയറ്റത്ത് റോഡുമായി ചേരുന്ന ഭാഗത്തെ അപകടകരമായ കട്ടിംഗ് കണ്ട് പെട്ടെന്ന് ബ്രേക്കിട്ട പിക്കപ്പ് വാനിന്‍റെ പിന്നിൽ ബൈക്ക് ഇടിക്കുകയായിരുന്നെന്ന് പോലീസ് പറഞ്ഞു. ഇടിയുടെ ആഘാതത്തിൽ തെറിച്ചുവീണ സിദ്ധാർഥിനെ ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം നടത്തി.

ബസിടിച്ച് വീണ ബൈക്ക് യാത്രികൻ അതേ ബസിനടിയിൽപ്പെട്ട് മരിച്ചു

കളമശേരി: സൗത്ത് കളമശേരി മേല്‍പ്പാലത്തിനു സമീപം ബസ് ബൈക്കിലിടിച്ച് തെറിച്ചുവീണ ബൈക്ക് യാത്രികൻ അതേ ബസിനടിയിൽപ്പെട്ട് മരിച്ചു. കൊടുങ്ങല്ലൂര്‍ അഴിക്കോട് കളത്തിപ്പറമ്പില്‍ മുഹമ്മദ് സലിം (42) ആണ് മരിച്ചത്. ഓണ്‍ലൈന്‍ ഫുഡ് ഡെലിവറി ജീവനക്കാരനായിരുന്നു. ഇന്നലെ രാവിലെ ഒന്‍പതിനായിരുന്നു അപടകം. ബൈക്കിൽ ആലുവ ഭാഗത്തേക്ക് പോവുകയായിരുന്നു മുഹമ്മദ് സലിം. ബസ് ബൈക്കിനെ മറികടക്കുന്നതിനിടെ വാതില്‍ഭാഗം തട്ടി ബൈക്ക് നിയന്ത്രണംവിട്ട് മറിയുകയായിരുന്നു. ബസിനിടിയിലേക്ക് തെറിച്ചുവീണ മുഹമ്മദ് സലീമിന്‍റെ ശരീരത്തിലൂടെ ബസ് കയറിയിറങ്ങി. പോലീസ് മേൽനടപടികൾ സ്വീകരിച്ചു. മൃതദേഹം മെഡിക്കല്‍ കോളജിലേക്ക് മാറ്റി. സംഭവത്തിൽ ബസ് ഡ്രൈവർ കൃഷ്ണകുമാറിനെതിരേ കേസെടുത്തു.

അജ്ഞാത മൃതദേഹം

ആലുവ: ജൂലൈ 28ന് ആലുവയിൽ ട്രെയിൻതട്ടി മരിച്ച യുവാവിനെ തിരിച്ചറിഞ്ഞിട്ടില്ല. ഏകദേശം 25 വയസ് പ്രായം തോന്നിക്കുന്ന യുവാവിന്‍റെ മൃതദേഹം ആലുവ ജില്ലാ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. എന്തെങ്കിലും വിവരം ലഭിക്കുന്നവർ ആലുവ ഈസ്റ്റ് പോലീസ് സ്റ്റേഷനുമായി ബന്ധപ്പെടണം. ഫോൺ: 0484-2624006.

സ്വകാര്യ ബസ് സമരം ഏഴിന്; അനുരഞ്ജന യോഗം ഇന്ന്

വൈപ്പിൻ: പറവൂർ - വൈപ്പിൻ, മൂത്തകുന്നം - ഇടപ്പള്ളി മേഖലയിലെ സ്വകാര്യ ബസ് ഉടമകളും തൊഴിലാളി യൂണിയനുകളും ചേർന്ന സംയുക്ത സമരസമിതി ഏഴു മുതൽ പ്രഖ്യാപിച്ച സമരം പിൻവലിപ്പിക്കാൻ ഇന്ന് രാവിലെ 11ന് അനുരഞ്ജന യോഗം ചേരും. മുനമ്പം ഡിവൈഎസ്‌പിയുടെ നേതൃത്വത്തിൽ പറവൂർ ഡിവൈഎസ്‌പി ഓഫീസിലാണ് യോഗം. യോഗത്തിൽ സംയുക്ത സമരസമിതി പ്രതിനിധികളും നാഷണൽ ഹൈവേ അഥോറിറ്റി ഉദ്യോഗസ്ഥരും പങ്കെടുക്കും. ഗോശ്രീ സമാന്തര പാലത്തിന്‍റെയും ദേശീയപാതയിൽ മൂത്തകുന്നം മുതൽ ഇടപ്പള്ളി വരെയുമുള്ള റോഡുകളുടെ അറ്റകുറ്റപ്പണികൾ യുദ്ധകാലാടിസ്ഥാനത്തിൽ പൂർത്തീകരിക്കണമെന്ന് സമരസമിതി ആവശ്യപ്പെട്ടു. ഈ ആവശ്യവുമായി കഴിഞ്ഞ ഒന്നിന് സ്വകാര്യ ബസുകൾ പണിമുടക്കിയിരുന്നു. ഏഴു മുതൽ മൂത്തകുന്നം - ഇടപ്പള്ളി മേഖലയിൽ പൂർണമായും, വൈപ്പിൻ-എറണാകുളം മേഖലയിൽ സ്വകാര്യ ബസുകൾ നഗരം ബഹിഷ്കരിച്ചുള്ള സമരവുമാണ് പ്രഖ്യാപിച്ചിരുന്നത്. ഇതിനിടെ എറണാകുളം സിറ്റി പോലീസ് അസിസ്റ്റന്‍റ് കമ്മീഷണർ വിളിച്ചുചേർത്ത യോഗത്തിൽ ഗോശ്രീ പാലത്തിന്‍റെ അറ്റകുറ്റപ്പണികൾ 25 ദിവസത്തിനകം തീർക്കും എന്ന് ഉറപ്പ് ലഭിച്ചിരുന്നു. എന്നാൽ ദേശീയപാതയുടെ കാര്യത്തിൽ ഉറപ്പ് ലഭിച്ചില്ല. ഈ സാഹചര്യത്തിൽ സിറ്റി പോലീസ് അസിസ്റ്റന്‍റ് കമ്മീഷണറുടെ ആവശ്യപ്രകാരമാണ് മുനമ്പം ഡിവൈഎസ്‌പി യോഗം വിളിച്ചത്.

കാര്യമായ ക്യാച്ചിംഗ് ഇല്ലാതെ മത്സ്യബന്ധന ബോട്ടുകൾ തിരിച്ചെത്തിത്തുടങ്ങി

വൈപ്പിൻ: ട്രോളിംഗ് നിരോധനം കഴിഞ്ഞ് കടലിൽ പോയ മത്സ്യബന്ധന ബോട്ടുകൾ പലതും തിരിച്ചെത്തി തുടങ്ങി. പ്രതീക്ഷിച്ച പോലെ കാര്യമായ ക്യാച്ചിംഗ് നടന്നില്ലെന്ന് തൊഴിലാളികൾ പറഞ്ഞു. മുനമ്പത്ത് ഇരുപതോളം ബോട്ടുകളാണ് അടുത്തത്. ഭൂരിഭാഗം ബോട്ടുകളിലും കിളിമീനുകളാണ് ഉള്ളത്. ഇവ ഇന്ന് പുലർച്ചെ ഹാർബറുകളിൽ ഇറക്കി കച്ചവടം നടത്തും. ഇന്നും നാളെയുമായി കൂടുതൽ ബോട്ടുകൾ എത്തുമെന്നാണ് പ്രതീക്ഷ.

23.3 ഗ്രാം എംഡിഎംയുമായി യുവാവ് പിടിയിൽ

പള്ളുരുത്തി: എംഡിഎംഎയുമായി പള്ളുരുത്തി കോണത്ത് റോഡ് കുട്ടത്തറപ്പറമ്പ് റിയാസി(32)നെ പള്ളുരുത്തി പോലീസ് അറസ്റ്റ് ചെയ്തു. പള്ളുരുത്തി കടേഭാഗത്ത് നിന്നാണ് പ്രതിയെ പിടികൂടിയത്. ഇയാളുടെ പക്കൽനിന്ന് 23.3 ഗ്രാം എംഡിഎംഎ കണ്ടെടുത്തു. ആഡംബര വാഹനങ്ങളിൽ സഞ്ചരിച്ചായിരുന്നു കച്ചവടം. പ്രതി സഞ്ചരിച്ചിരുന്ന കാറും പിടിച്ചെടുത്തു. കൂട്ടാളികൾക്കായുള്ള തെരച്ചിൽ ഊർജിതമാക്കി. പ്രതിയെ റിമാൻഡ് ചെയ്തു.

കൊച്ചി മെട്രോ: ടിക്കറ്റ് വെന്‍ഡിംഗ് മെഷീനുകളില്‍ യുപിഐ സൗകര്യവും

കൊച്ചി: യാത്രക്കാര്‍ക്ക് ക്യൂ നില്‍ക്കാതെ ടിക്കറ്റ് എടുക്കാന്‍ മെട്രോ സ്റ്റേഷനുകളില്‍ സജ്ജീകരിച്ച ടിക്കറ്റ് വെന്‍ഡിംഗ് മെഷീനുകളില്‍ ഇനി യുപിഐ സൗകര്യവും. ക്യൂആര്‍ കോഡ് സ്‌കാന്‍ ചെയ്തു പണമടച്ച് ടിക്കറ്റ് ലഭ്യമാക്കുന്ന സേവനം നാളെ മുതല്‍ എല്ലാ മെട്രോ സ്റ്റേഷനുകളിലെയും ടിക്കറ്റ് വെന്‍ഡിംഗ് മെഷീനുകളില്‍ ലഭിക്കും. പദ്ധതിയുടെ ഉദ്ഘാടനം ഇന്ന് ഉച്ചകഴിഞ്ഞ് മൂന്നിന് ജെല്‍എന്‍ സ്റ്റേഡിയത്തില്‍ കെഎംആര്‍എല്‍ എംഡി‍ ലോക്‌നാഥ് ബഹ്‌റ നിര്‍വഹിക്കും. തിരക്കേറിയ സമയങ്ങളില്‍ ക്യൂ നിന്ന് ടിക്കറ്റെടുക്കുക വഴി യാത്രക്കാര്‍ക്കുണ്ടാകുന്ന ബുദ്ധിമുട്ട് ഒഴിവാക്കുന്നതിനാണ് മെട്രോ സ്റ്റേഷനുകളില്‍ ടിക്കറ്റ് വെന്‍ഡിംഗ് മെഷീനുകള്‍ ക്രമീകരിച്ചത്. യുപിഐ സൗകര്യം വരുന്നതോടെ ഗുഗിള്‍ പേ, ഫോണ്‍പേ പോലുള്ള യുപിഐ അപ്പിലെ ക്യൂആര്‍ കോഡ് സൗകര്യം ഉപയോഗപ്പെടുത്തി ടിക്കറ്റ് എടുക്കാനുള്ള സൗകര്യമാണ് കെഎംആര്‍എല്‍ ഒരുക്കുന്നത്. മെഷീനിലെ ടച്ച് സക്രീനില്‍ ആദ്യം ഭാഷ തെരഞ്ഞെടുക്കണം. പിന്നീട് യാത്ര ചെയ്യേണ്ടതായ സ്ഥലം എന്‍റര്‍ ചെയ്യണം. അപ്പോള്‍ സ്‌ക്രീനില്‍ ടിക്കറ്റ് നിരക്ക് തെളിയും. ഒപ്പം ക്യൂആര്‍ കോഡും. മൊബൈല്‍ ഫോണിലെ ക്യുആര്‍ കോഡ് ഓപ്പണ്‍ ചെയ്ത് സ്‌കാന്‍ ചെയ്താല്‍ അക്കൗണ്ടില്‍ നിന്ന് ടിക്കറ്റിനുള്ള പണം നേരിട്ട് ലഭിക്കും. പെയ്‌മെന്‍റ് നടപടികള്‍ പൂര്‍ത്തിയാകുന്നതോടെ ടിക്കറ്റും മെഷീനില്‍ നിന്ന് ലഭിക്കും. നിലവില്‍ പണം നല്‍കിയാണ് മെഷീനില്‍ നിന്ന് ടിക്കറ്റ് ലഭിച്ചിരുന്നത്. പണം വയ്ക്കുന്നതിനുള്ള പ്രത്യേക ഭാഗം മെഷീനിലുണ്ട്. ബാലന്‍സ് പണം ഉണ്ടേല്‍ അതും മെഷീന്‍ തിരികെ നല്‍കും. ടിക്കറ്റ് വെന്‍ഡിംഗ് മെഷീന്‍ കൂടാതെ വാട്‌സ് ആപ്പ്, മെട്രോ കാര്‍ഡ് എന്നിവ ഉപയോഗിച്ചും ടിക്കറ്റ് എടുക്കാനുള്ള സൗകര്യവും മെട്രോ ഒരുക്കിയിട്ടുണ്ട്.

കോട്ടപ്പടിയിൽ കാട്ടാന കിണറ്റിൽ വീണ സംഭവം :പ്രതിഷേധക്കാർക്കെതിരായ കേസ് പിൻവലിക്കാൻ ഉത്തരവായി: എംഎൽഎ

കോതമംഗലം: കോട്ടപ്പടിയിൽ കാട്ടാന കിണറ്റിൽ വീണതിനെ തുടർന്നുണ്ടായ ജനങ്ങളുടെ പ്രതിഷേധത്തിന്‍റെ പേരിൽ കോട്ടപ്പടി പോലീസ് എടുത്ത കേസ് പിൻവലിക്കാൻ സർക്കാർ ഉത്തരവായതായി ആന്‍റണി ജോൺ എംഎൽഎ അറിയിച്ചു. 2024 ഏപ്രിൽ 24ന് പുലർച്ചെ കോട്ടപ്പടി പഞ്ചായത്ത് മൂന്നാം വാർഡിൽ കൂലാത്തി പത്രോസിന്‍റെ പുരയിടത്തിലെ കിണറ്റിൽ കാട്ടാന വീണതിനെ തുടർന്നുണ്ടായ ജനങ്ങളുടെ സ്വാഭാവിക പ്രതിഷേധത്തിനെതിരെ കോട്ടപ്പടി പോലീസ് രജിസ്റ്റർ ചെയ്ത കേസാണ് പിൻവലിക്കാൻ ഉത്തരവായത്. പ്രദേശത്ത് നിരന്തരമായി ഉണ്ടാകുന്ന വന്യമൃഗ ശല്യത്തിനെതിരായി സ്വാഭാവികമായ പ്രതിഷേധം മാത്രം ഉയർത്തിയിട്ടുള്ള പ്രദേശ വാസികൾക്കെതിരെയാണ് കേസെടുത്തിരുന്നത്. കാട്ടാന വീണ കിണർ കുടുംബം മാത്രമല്ല പ്രദേശവാസികളെല്ലാം കുടിവെള്ളത്തിനും മറ്റ് ആവശ്യങ്ങൾക്കുമായി ആശ്രയിച്ചിരുന്നതാണ്. പ്രദേശവാസികളായ ഒന്പതു പേർക്കും കണ്ടാൽ അറിയാവുന്ന പത്തോളം പേർക്ക് എതിരായി ഉണ്ടായിട്ടുള്ള പ്രോസിക്യൂഷൻ നടപടികൾ കോട്ടപ്പടി പോലീസ് സ്റ്റേഷൻ പിൻവലിക്കണമെന്ന് ആവശ്യപ്പെട്ട് മുഖ്യമന്ത്രിക്ക് എംഎൽഎ കത്ത് നൽകിയിരുന്നു. ഈ അപേക്ഷ പരിഗണിച്ചാണ് കേസ് പിൻവലിക്കാൻ അനുമതി നൽകി സർക്കാർ ഉത്തരവിട്ടത്.

തലമുറകളുടെ മാഷിന് വിട

കൊച്ചി: പ്രാസംഗികനായി പലകുറി എത്തിയിരുന്ന എറണാകുളം ടൗണ്‍ ഹാളിലേക്ക് ഇക്കുറി മലയാളത്തിന്‍റെ പ്രിയ സാനുമാഷ് എത്തിയത് നിശ്ചലനായി അന്ത്യയാത്രയ്ക്കായിരുന്നു. ഒപ്പം സമയം ചെലവഴിച്ചവരും പ്രിയപ്പെട്ടവരും ശിഷ്യരുമെല്ലാം മാഷിന്‍റെ അരികില്‍ ഒരിക്കല്‍ക്കൂടി ഒത്തുകൂടിയപ്പോള്‍ തങ്ങളുടെ പ്രിയപ്പെട്ട മാഷ് ഇല്ലെന്ന വേദന മാത്രമാണ് പങ്കുവയ്ക്കാനുണ്ടായിരുന്നത്. മൃതദേഹം പൊതുദര്‍ശനത്തിനായി വീട്ടില്‍ നിന്ന് ടൗണ്‍ ഹാളിലേക്ക് എത്തിക്കുന്നതിന് മുമ്പ് തന്നേ ടൗണ്‍ ഹാളും പരിസരവും തിങ്ങിനിറഞ്ഞു. കര്‍മമേഖലയില്‍ ഊര്‍ജസ്വലനായി നടന്നുനീങ്ങിയ പാതകള്‍ പലതും പിന്നിട്ടത് അറിയാതെ ഒടുവില്‍ ഒരിക്കല്‍കൂടി സാനുമാഷ് ടൗണ്‍ ഹാളില്‍ വന്നുപോയി. പഠിപ്പിച്ചിട്ടില്ലെങ്കിലും ശിഷ്യരായവരെല്ലാം ഗുരുവിനെ ഒരുനോക്ക് കാണാന്‍ ഓടിയെത്തി. വേദിയില്‍ പ്രത്യേകം തയാറാക്കിയ സ്ഥലത്തായിരുന്നു പൊതുദര്‍ശനം. മുഖ്യമന്ത്രി പിണറായി വിജയന്‍, പ്രതിപക്ഷ നേതാവ് വി.ഡി. സതീശന്‍, മന്ത്രിമാരായ റോഷി അഗസ്റ്റിന്‍, എം.ബി. രാജേഷ്, കെ. രാജന്‍, പി. രാജീവ്, വി.എന്‍. വാസവന്‍, ആര്‍. ബിന്ദു, എംപിമാരായ ഹൈബി ഈഡന്‍, ബെന്നി ബഹനാന്‍, എംഎല്‍എമാരായ ടി.ജെ. വിനോദ്, കെ.ജെ. മാക്‌സി, റോജി എം. ജോണ്‍, കെ. ബാബു, ആന്‍റണി ജോണ്‍, ചാണ്ടി ഉമ്മന്‍, ഉമ തോമസ്, എല്‍ദോസ് കുന്നപ്പള്ളി, മേയര്‍ എം. അനില്‍കുമാര്‍, ജില്ലാ കളക്ടര്‍ എന്‍.എസ്.കെ. ഉമേഷ്, സംസ്ഥാന സര്‍ക്കാരിന്‍റെ ഡല്‍ഹി പ്രതിനിധി കെ.വി. തോമസ്, സിപിഎം ജനറല്‍ സെക്രട്ടറി എം.എ. ബേബി, സംസ്ഥാന സെക്രട്ടറി എം.വി. ഗോവിന്ദന്‍, എഐസിസി ജനറല്‍ സെക്രട്ടറി കെ.സി. വേണുഗോപാല്‍ എംപി, വരാപ്പുഴ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍, എഴുത്തുകാരായ സി. രാധാകൃഷ്ണന്‍, എം. തോമസ് മാത്യു, സുനില്‍ പി. ഇളയിടം, കെ.ആര്‍. മീര, രാഷ്ട്രീയ നേതാക്കളായ വി.എം. സുധീരന്‍, വൈക്കം വിശ്വന്‍, എം. സ്വരാജ്, ഡോ. നീലലോഹിത ദാസ് നാടാര്‍, പി.എസ്. ശ്രീധരന്‍പിള്ള, കെ.എസ്. രാധാകൃഷ്ണന്‍, എ.എന്‍. രാധാകൃഷ്ണന്‍, പി.സി. ചാക്കോ, നടന്മാരായ ദേവന്‍, സിദ്ദിഖ്, കൈലാഷ്, സിപിഎം ജില്ലാ സെക്രട്ടറി എസ്. സതീഷ്, സിപിഎം സംസ്ഥാന സെക്രട്ടേറിയറ്റ് അംഗം സി.എന്‍, മോഹനന്‍, ഡിസിസി പ്രസിഡന്‍റ് മുഹമ്മദ് ഷിയാസ്, സംവിധായകരായ അമല്‍നീരദ്, രഞ്ജിത്ത്, തിരക്കഥാകൃത്തും സംവിധായകനുമായ രൺജി പണിക്കര്‍, നടി നവ്യ നായര്‍, സംഗീത സംവിധായകന്‍ ബേണി, ജസ്റ്റീസ് പി. ഷംസുദ്ദീന്‍, ട്രേഡ് യൂണിയന്‍ നേതാവ് തമ്പാന്‍ തോമസ്, കൊച്ചി മെട്രോ എം.ഡി. ലോകനാഥ് ബെഹ്റ, വ്യവസായ വകുപ്പ് പ്രിന്‍സിപ്പല്‍ സെക്രട്ടറി എ.പി.എം. മുഹമ്മദ് ഹനീഷ് തുടങ്ങി വിവിധ മേഖലകളിലെ നിരവധി പേര്‍ പ്രഫ. എം.കെ. സാനുവിന് അന്ത്യാഞ്ജലി അര്‍പ്പിക്കാനെത്തി. മഹാരാജാസ് കോളജ് ഓള്‍ഡ് സ്റ്റുഡന്‍റ്സ് അസോസിയേഷന്‍റെ നേതൃത്വത്തില്‍ പ്രിയ ഗുരുനാഥന് അന്തിമോപചാരം അര്‍പ്പിച്ചു. വൈകുന്നേരം നാലോടെ പൊതുദര്‍ശനം പൂര്‍ത്തിയാക്കി മൃതദേഹം ശ്മശാനത്തിലേക്ക് കൊണ്ടുപോകുന്നതിന് മുമ്പ് എറണാകുളം സെന്‍ട്രല്‍ എസിപി സിബി ടോമിന്‍റെ സാന്നിധ്യത്തില്‍ പോലീസിന്‍റെ ഗാര്‍ഡ് ഒഫ് ഓണര്‍ നല്‍കി. നാലരയോടെ രവിപുരം ശ്മശാനത്തിലേക്ക് കൊണ്ടുവന്നു. തുടര്‍ന്ന് ഔദ്യോഗിക ബഹുമതികളോടെ മൃതദേഹം സംസ്‌കരിച്ചു. മൂത്തമകന്‍ എം.എസ്. രഞ്ജിത്താണ് ചിതയ്ക്ക് തീ കൊളുത്തിയത്. മൗനംപൂണ്ട് "സന്ധ്യാ' മുറ്റം കൊച്ചി: വായനയും എഴുത്തുമായി സജീവമായിരുന്ന സന്ധ്യയുടെ ഇറയത്തേക്ക് അവസാനമായി എം.കെ. സാനു എത്തിയപ്പോള്‍ മുമ്പ് അക്ഷരങ്ങളാല്‍ ശബ്ദമുഖരിതമായിരുന്ന വീട് ഇന്നലെ നിശബ്ദമായിരുന്നു. തലമുറകള്‍ വായിച്ച പല കൃതികളും രചിക്കപ്പെട്ട സന്ധ്യയില്‍ ഇനി സാനു മാഷ് ഇല്ലെന്ന യാഥാര്‍ഥ്യം ഉള്‍ക്കൊണ്ട പോലെ വീടും പരിസരവും മൗനമായിരുന്നു. ശനിയാഴ്ച വൈകുന്നേരം അമൃത ആശുപത്രിയിലെ പൊതുദര്‍ശത്തിനുശേഷം ഇന്നലെ രാവിലെ 8.30ഓടെയാണ് സാനു മാഷിന്‍റെ മൃതദേഹം വീട്ടിലേക്ക് എത്തിച്ചത്. നൂറുകണക്കിന് ആളുകൾ കാരിക്കാമുറി റോഡിലെ സന്ധ്യയിലേക്ക് ഒഴുകിയെത്തി. മന്ത്രി റോഷി അഗസ്റ്റിന്‍, എം. സ്വരാജ് തുടങ്ങിയവര്‍ വീട്ടിലെത്തി ആദരാഞ്ജലികള്‍ അര്‍പ്പിച്ചു.

കർഷക കൂട്ടായ്മക്കു പരിശീലനം

വാഴക്കുളം: മഞ്ഞള്ളൂർ പഞ്ചായത്ത് കൃഷിഭവന്‍റെ ആഭിമുഖ്യത്തിൽ പോഷക സമൃദ്ധി മിഷന്‍റെ ഭാഗമായി കർഷക കൂട്ടായ്മയ്ക്ക് പരിശീലനം നൽകി. ആത്മ പദ്ധതിയുടെ കീഴിൽ 10 ഏക്കറിൽ കൃഷി ചെയ്തുവരുന്ന തെരഞ്ഞെടുത്ത 20 കർഷകരുടെ എസ്‌സി കർഷക കൂട്ടായ്മക്കാണ് പരിശീലനം നൽകിയത്. പച്ചക്കറി, ഫലവൃക്ഷ കൃഷിയും വിളപരിപാലന മുറകളും എന്ന വിഷയത്തിൽ റിട്ട. കൃഷി അസി. ഡയറക്ടർ ബിജുമോൻ സക്കറിയ ക്ലാസ് നയിച്ചു. പദ്ധയിൽ ഉൾപ്പെട്ട കർഷകർക്ക് മുവാറ്റുപുഴ ബ്ലോക്ക് പഞ്ചായത്തിൽ നിന്നുള്ള നടീൽ വസ്തുക്കളും ജൈവ വളവും ഇതോടനുബന്ധിച്ച് വിതരണം ചെയ്‌തു. പഞ്ചായത്ത് പ്രസിഡന്‍റ് ആൻസി ജോസ് വിതരണോദ്ഘാടനം നിർവഹിച്ചു. വൈസ് പ്രസിഡന്‍റ് ടോമി തന്നിട്ടാമാക്കൽ അധ്യക്ഷത വഹിച്ചു. സ്ഥിരംസമിതി അധ്യക്ഷ സെലിൻ ഫ്രാൻസിസ്,പഞ്ചായത്തംഗം കെ.വി. സുനിൽ, സിഡിഎസ് ചെയർപേഴ്‌സൺ കെ.ജി. തങ്കമണി,കൃഷി ഓഫീസർ ടി.കെ. ജിജി, കൃഷി അസിസ്റ്റന്‍റുമാരായ റസീന അസീസ്,പ്രദീപ്,ഫീൽഡ് അസിസ്റ്റന്‍റ് ദിനേഷ് തുടങ്ങിയവർ പങ്കെടുത്തു.

ഉമ്മൻ ചാണ്ടി അനുസ്മരണം

പിറവം: മുൻ മുഖ്യമന്ത്രി ഉമ്മൻ ചാണ്ടിയുടെ രണ്ടാമത് ചരമവാർഷികത്തോടനുബന്ധിച്ച് പിറവത്ത് അനുസ്മരണ സദസ് സംഘടിപ്പിച്ചു. മന്ന ചാരിറ്റബിൾ ട്രസ്റ്റും, അമേരിക്കൻ മലയാളി അസോസിയേഷന്‍റെ മുഖ്യ സംഘടനയായ ഫോമയും ചേർന്നാണ് ചടങ്ങ് സംഘടിപ്പിച്ചത്. കക്കാട് ക്രിസ്തുരാജ പ്രെയർ സെന്‍ററിന്‍റെ അഭയകേന്ദ്രത്തിൽ നടന്ന അനുസ്മരണം മന്ന ചാരിറ്റബിൾ ട്രസ്റ്റ് ഡയറക്ടർ ഡോ. മറിയ ഉമ്മൻ ഉദ്ഘാടനം ചെയ്തു. മുൻ നഗരസഭാ ചെയർമാൻ സാബു കെ. ജേക്കബ് അധ്യക്ഷത വഹിച്ചു. റോട്ടറിയുടെ ഗിഫ്റ്റ് ഓഫ് ലൈഫ് നാഷണൽ കോ-ഓർഡിനേറ്റർ ഡോ. എ.സി. പീറ്റർ, പാമ്പാക്കുട സർവീസ് സഹ. ബാങ്ക് പ്രസിഡന്‍റ് പ്രഫ. എബി എൻ. ഏലിയാസ് എന്നിവർ പ്രസംഗിച്ചു. ചടങ്ങിൽ നിർധനർക്ക് ഭക്ഷ്യധാന്യ കിറ്റുകൾ വിതരണം ചെയ്തു. തമ്പി പുതുവാക്കുന്നേൽ, കുര്യൻ പുളിക്കൽ, പോൾ കൊമ്പനാല്‍, ഏലിയാസ് വെട്ടുകുഴിയിൽ, രവി സ്രാമടത്തിൽ, ബേബിച്ചൻ തോമസ്,സെന്‍റർ ഡയറക്ടർ ബ്രദർ ജയ്സൺ സ്കറിയ, കോമളം ഷാജി തുടങ്ങിയവർ പങ്കെടുത്തു.

ഓലിപ്പാറ കുടിവെള്ള പദ്ധതി: വാട്ടർ ടാങ്കിന്‍റെ നിർമാണം ആരംഭിച്ചു

കോതമംഗലം: നെല്ലിക്കുഴിയിൽ ബ്ലോക്ക് പഞ്ചായത്ത് നിർമിക്കുന്ന ഓലിപ്പാറ കുടിവെള്ള പദ്ധതിയുടെ വാട്ടർ ടാങ്കിന്‍റെ നിർമാണം ആരംഭിച്ചു. ബ്ലോക്ക് പ്രസിഡന്‍റ് പി.എ.എം. ബഷീർ ഉദ്ഘാടനം നിർവഹിച്ചു. നെല്ലിക്കുഴി പഞ്ചായത്തിലെ 21ാം വാർഡിൽ നിലവിൽ മണ്ണ് നിരപ്പിൽ ചെറിയ ടാങ്ക് ആണ് ഉണ്ടായിരുന്നത്. ഇതിൽനിന്നും എല്ലാ കുടുംബങ്ങൾക്കും കുടിവെള്ളം ലഭിക്കാതെ വന്നതോടെയാണ് ബ്ലോക്ക് പഞ്ചായത്ത് 2025 - 26 വാർഷിക പദ്ധതിയിൽ 15 ലക്ഷം രൂപ വകയിരുത്തി നിർമാണം ആരംഭിച്ചത്.ഇവിടെ ഉയരത്തിൽ ടാങ്ക് നിർമിക്കുന്നതിലൂടെ നൂറിൽപരം കുടുംബങ്ങൾക്ക് കുടിവെള്ളം ലഭ്യമാകും. ബ്ലോക്ക് പഞ്ചായത്ത് വൈസ് പ്രസിഡന്‍റ് ഡയാന നോബി അധ്യക്ഷത വഹിച്ചു. ബ്ലോക്ക് പഞ്ചായത്ത് സ്ഥിരംസമിതി അധ്യക്ഷന്മാർ,ബ്ലോക്ക് പഞ്ചായത്തംഗങ്ങൾ തുടങ്ങിയവർ പ്രസംഗിച്ചു.

യൂത്ത് കോൺഗ്രസ് പ്രതിഷേധ ധർണ നടത്തി

കൂത്താട്ടുകുളം :യൂത്ത് കോൺഗ്രസ് കൂത്താട്ടുകുളം മണ്ഡലം കമ്മിറ്റിയുടെ നേതൃത്വത്തിൽ മാരുതി ജംഗ്ഷനിൽ ധർണ നടത്തി.പാലാ റോഡിന്‍റെ ശോചനീയാവസ്ഥ പരിഹരിക്കണമെന്ന് ആവശ്യപ്പെട്ട് നടത്തിയ ധർണ നഗരസഭാ പ്രതിപക്ഷ നേതാവ് പ്രിൻസ് പോൾ ജോൺ ഉദ്ഘാടനം ചെയ്തു. മംഗലത്തുതാഴം മുതൽ രാമപുരം കവല വരെയുള്ള പാലാ - രാമപുരം റോഡ് നിർമാണം പൂർത്തിയായി ഒരാഴ്ചയ്ക്കുള്ളിൽ തകർന്നതായി പ്രിൻസ് പോൾ ജോൺ ചൂണ്ടിക്കാട്ടി. ഇത് സംബന്ധിച്ച് നിരവധി പരാതികൾ വിജിലിൻസിനും സർക്കാരിനും നൽകിയെങ്കിലും തുടർ നടപടികളുണ്ടായില്ലെന്നും അദ്ദേഹം പറഞ്ഞു. യൂത്ത് കോൺഗ്രസ്‌ മണ്ഡലം പ്രസിഡന്‍റ് ജിനിഷ് വൻനിലം അധ്യക്ഷത വഹിച്ചു. കോൺഗ്രസ് മണ്ഡലം പ്രസിഡന്‍റ് റെജി ജോൺ മുഖ്യപ്രഭാഷണം നടത്തി. ബ്ലോക്ക് ഭാരവാഹികളായ കെ.സി. ഷാജി, ജിജോ ടി. ബേബി, റോയ് ഇരട്ടയാനി, മാർക്കോസ് ഉലഹന്നാൻ, ജിൻസ് പൈറ്റക്കുളം, സുമേഷ് ഗോപി, എ.ജെ. കാർത്തിക്, ഗ്രിഗറി ഏബ്രഹാം,അജി തോമസ്, പ്രകാശ് ഭാസ്കർ, വിമൽ രാജ്, രാഫൽ ജോൺ, ലൂക്ക ഇട്ടിയവരെ, ബെൻ മാത്യു തുടങ്ങിവർ പ്രസംഗിച്ചു.

കർഷകദിനം : കണ്ണീർദിനമായി ആചരിക്കുമെന്ന് കോ-ഓർഡിനേഷൻ കമ്മിറ്റി

കോതമംഗലം: വന്യമൃഗ ശല്യവും പ്രകൃതിക്ഷോഭം മൂലവും കൃഷികൾ നശിച്ച് കടക്കെണിയിലായ കർഷകരെ രക്ഷിക്കാൻ കേന്ദ്ര -സംസ്‌ഥാന സർക്കാരുകൾ ഒരു നടപടിയും സ്വീകരിക്കാത്ത സാഹചര്യത്തിൽ കർഷകദിനം കണ്ണീർദിനമായി ആചരിക്കാൻ കർഷക കോ-ഓർഡിനേഷൻ കിഴക്കൻ മേഖലാ നേതൃസംഗമം തീരുമാനിച്ചു. വിവിധ മേഖലകളിൽ മികവ് പുലർത്തിയ കർഷകരെയും, വിവിധ മേഖലകളിൽ വ്യക്തിമുദ്ര പതിപ്പിച്ച പ്രമുഖരെയും കോ-ഓർഡിനേഷൻ സ്വന്തം നിലയിൽ ആദരിക്കും. വന്യമൃഗ ശല്യം, പ്രകൃതിക്ഷോഭം, കർഷക പെൻഷൻ, റബർ സബ്സിഡി, യുവാക്കളുടെ ക്ഷേമനിധി ആനുകൂല്യങ്ങൾ എന്നീ ഇനങ്ങളിൽ കോതമംഗലം, മൂവാറ്റുപുഴ, പെരുമ്പാവൂർ, അങ്കമാലി തുടങ്ങിയ കിഴക്കൻ മേഖലകളിൽ മാത്രം 25 കോടി രൂപയുടെ കുടിശികയാണ് സർക്കാർ നൽകാനുള്ളത്. കോതമംഗലം നിയോജക മണ്ഡലത്തിൽ 10 കോടിയോളം രൂപ ലഭിക്കാനുണ്ട്. ഈ കുടിശിക തുക മുഴുവനായും ഓണത്തിനു മുൻപ് കർഷകരുടെ കൈകളിൽ എത്തിയില്ലെങ്കിൽ ശക്തമായ സമരപരിപാടികൾ സംഘടിപ്പിക്കാനും യോഗം തീരുമാനിച്ചു. നേതൃസംഗമം യുഡിഎഫ് ജില്ലാ കൺവീനറും കോ-ഓർഡിനേഷൻ കമ്മിറ്റി ചെയർമാനുമായ ഷിബു തെക്കുംപുറം ഉദ്ഘാടനം ചെയ്തു. ജനറൽ കൺവീനർ ജെയിംസ് കോറേമ്പേൽ അധ്യക്ഷത വഹിച്ചു. കർഷ കോൺഗ്രസ് സംസ്ഥാന ജനറൽ സെക്രട്ടറി പി.സി. ജോർജ്, കർഷക യൂണിയൻ സംസ്ഥാന ഭാരവാഹികളായ ജോണി പുളിന്തടം, ആന്‍റണി ഓലിയപ്പുറം, സ്വതന്ത്ര കർഷക യൂണിയൻ ജില്ലാ പ്രസിഡന്‍റ് എം.എം. അബ്ദുൾ റഹ്മാൻ, വിവിധ കർഷക സംഘടന നേതാക്കളായ എം.എം. അഷറഫ്, പി.എം. സിദ്ധിഖ്, എം.സി. അയ്യപ്പൻ, സജി തെക്കേക്കര, പി.പി. മത്തായി , ആന്‍റണി കോട്ടപ്പടി, രാജൻ ടി. തോമസ്, പി.എം. സുഗതൻ, പി.എം ഹസൻ , ഷംസുദീൻ മക്കാർ, എം.പി. എസ്തപ്പാനോസ്, ബേബി മൂലയിൽ എന്നിവർ പ്രസംഗിച്ചു.

ഊന്നുകല്ലിൽ കാര്‍ തോട്ടിലേക്ക് ചരിഞ്ഞു; കുഞ്ഞടക്കം യാത്രക്കാര്‍ അദ്ഭുതകരമായി രക്ഷപ്പെട്ടു

കോതമംഗലം: ഊന്നുകല്ലിൽ കനത്ത മഴയില്‍ വെള്ളത്തില്‍ മുങ്ങിയ റോഡിലൂടെ സഞ്ചരിച്ച കാര്‍ റോഡരികിലെ തോട്ടിലേക്ക് ചെരിഞ്ഞു. കുഞ്ഞടക്കം യാത്രക്കാര്‍ അദ്ഭുതകരമായി രക്ഷപ്പെട്ടു. ഊന്നുകല്‍ തേങ്കോട് റോഡില്‍ ഇന്നലെ രാത്രി 8.30 ഓടെയാണ് സംഭവം. പാലക്കാട് വടക്കുംതറ സ്വദേശി ചോണയില്‍ ആഷിഖും ഭാര്യയും കുഞ്ഞും സഞ്ചരിച്ച കാറാണ് അപകടത്തില്‍പ്പെട്ടത്. ബന്ധുവീട്ടില്‍ പോയി മടങ്ങുംവഴിയായിരുന്നു അപകടം. റോഡ് നിറഞ്ഞ് വെള്ളമായതിനാൽ ദിശതെറ്റി കാറിന്‍റെ പിന്‍വശം തോട്ടിലേക്ക് ചരിഞ്ഞു. പെട്ടെന്ന് ഡോര്‍ തുറന്ന് കുട്ടിയെ എടുത്ത് രണ്ടുപേരും പുറത്തേക്ക് ചാടിയിറങ്ങിയതിനാൽ രക്ഷപ്പെട്ടു. കാറിനുള്ളിലേക്ക് വെള്ളം കയറി. സംഭവം അറിഞ്ഞ് ഓടികൂടിയ നാട്ടുകാര്‍ അറിയിച്ചതനുസരിച്ച് പോലീസും അഗ്നി രക്ഷാസേനയും എത്തി ക്രെയിന്‍ സഹായത്തോടെയാണ് കാര്‍ ഉയര്‍ത്തി മാറ്റിയത്.

കോലഞ്ചേരി നഗരത്തിൽ നടപ്പാതകൾ കൈയേറിയുള്ള കച്ചവടം തകൃതി

നട്ടംതിരിഞ്ഞ് കാൽനട യാത്രികർ കോലഞ്ചേരി: കോലഞ്ചേരി നഗരത്തിൽ നടപ്പാതകൾ കൈയേറിയുള്ള വഴിയോര കച്ചവടം പൊടിപൊടിക്കുന്പോൾ നട്ടംതിരിഞ്ഞ് കാൽനട യാത്രികർ. കൊച്ചി-ധനുഷ്കോടി ദേശീയപാതയിലെ കോലഞ്ചേരി ടൗണിന്‍റെ ഹൃദയഭാഗത്തുള്ള നടപ്പാതകളാണ് വഴിയോര കച്ചവടക്കാർ കൈയേറിയത്. കോലഞ്ചേരിയിൽ നിന്ന് മൂവാറ്റുപുഴയിലേക്ക് പോകാനായി നിൽക്കേണ്ട ബസ് കാത്തിരിപ്പു കേന്ദ്രത്തിനു മുന്നിലുള്ള തിരക്കേറിയ സ്ഥലത്താണ് വഴിയോരകച്ചവടക്കാർ കൂട്ടമായി തമ്പടിച്ചിരിക്കുന്നത്. വൈകുന്നേരത്തോടെ വഴിയോര കച്ചവടക്കാരും ചെറു തട്ടുകടകളും തുറന്ന് പ്രവർത്തിക്കുന്നതിനാൽ സ്ഥലത്ത് വൻതിരക്കാണ് അനുഭവപ്പെടുന്നത്. ബസ് കയറാൻ എത്തുന്ന വിദ്യാർഥികൾക്കും സ്ത്രീകളടക്കമുള്ള യാത്രക്കാർക്കും നടപ്പാത വിട്ട് ദേശീയപാത റോഡിലൂടെ വളഞ്ഞുചുറ്റി ബസ് കാത്തിരിപ്പ് സ്ഥലത്ത് എത്തേണ്ട സ്ഥിതിയാണ്. ഇത് അപകടം വരുത്തിവയ്ക്കാനും ഇടവരുത്തും. അടിയന്തിര നടപടി വിഷയത്തിൽ ഉണ്ടാകണമെന്നാണ് യാത്രക്കാർ ആവശ്യപ്പെടുന്നത്.

കുമ്പളങ്ങി പള്ളിയിൽ ധർണ നടത്തി

ഫോർട്ടുകൊച്ചി: കന്യാസ്ത്രീകൾക്ക് ജാമ്യം ലഭിച്ചെങ്കിലും കേസ് റദ്ദ് ചെയ്യണമെന്നാവശ്യപ്പെട്ട് കുമ്പളങ്ങി സെന്‍റ് ജോസഫ്സ് ഇടവകയിൽ പ്രതിഷേധം സംഘടിപ്പിച്ചു. വികാരി ഫാ. ആന്‍റണി നെടുംപറമ്പിൽ പ്രതിഷേധ പരിപാടികൾ ഉദ്ഘാടനം ചെയ്തു. സഹവികാരി ഫാ. എയ്ഡ്രിൻ ഡിസൂസ , മദർ സുപ്പീരിയർ സിസ്റ്റർ റെജീന എന്നിവർ പ്രസംഗിച്ചു. പാസ്റ്ററൽ കൗൺസിൽ സെക്രട്ടറി അഗസ്റ്റിൻ ജോസഫ്, കൺവീനർ ജോബ് വെളിപറമ്പിൽ, സെക്രട്ടറി മെറ്റിൽഡാ മൈക്കിൾ, വി.ജെ. ആന്‍റണി , സൂസൻ ജോസഫ്, ബിജു മാണിയാംപൊഴി, നിഷ ജോബോയ്, മേയ്മി ജോസഫ്, ഷേബസെൻസി എന്നിവർ പ്രതിഷേധ പരിപാടിക്ക് നേതൃത്വം നല്കി

കൈപ്പട്ടൂരിൽ പ്രതിഷേധ ജ്വാല

കാലടി: ഛത്തീസ്ഗഡില്‍ അന്യായമായി കന്യാസ്ത്രീകളെ ജയിലില്‍ അടച്ച കേസില്‍ എഫ്‌ഐആര്‍ റദ്ദ് ചെയ്യണമെന്നാവശ്യപ്പെട്ട് കത്തോലിക്കാ കോണ്‍ഗ്രസ് കൈപ്പട്ടൂര്‍ യൂണിറ്റിന്‍റെ നേതൃത്വത്തില്‍ പ്രതിഷേധ ജ്വാല സംഘടിപ്പിച്ചു. കൈപ്പട്ടൂര്‍ ഇടവക വികാരി ഫാ. മാത്യു മണവാളന്‍ ഉദ്ഘാടനം ചെയ്തു. ഓള്‍ ഇന്ത്യ കാത്തലിക് യൂണിയന്‍ സംസ്ഥാന വര്‍ക്കിംഗ് പ്രസിഡന്‍റ് ജോസ് ആന്‍റണി, എകെസിസി യൂണിറ്റ് പ്രസിഡന്‍റ് ഷാജന്‍ കോച്ചാപ്പിള്ളി, സെക്രട്ടറി മേരി ജോയ്, ട്രഷറര്‍ കെ.കെ. ജോര്‍ജ്, രൂപതാസമിതി അംഗങ്ങളായ ടെന്‍സി അവറാച്ചന്‍, കെ.പി. ജോസ്, എക്‌സിക്യൂട്ടീവ് അംഗം രജിത ജസ്റ്റിന്‍, കൈക്കാരന്‍ എം.വി. ജോയ് തുടങ്ങിയവർ പങ്കെടുത്തു.

കന്യാസ്ത്രീകൾക്കെതിരെയുള്ള കേസുകൾ ഉടൻ റദ്ദാക്കണം: മാർ തോമസ് ചക്യത്ത്

ആലുവ: ഛത്തീസ്ഗഡിലെ ദുർഗിൽ സിസ്റ്റർ പ്രീതി മേരിയെയും സിസ്റ്റർ വന്ദന ഫ്രാൻ‌സിസിനുമെതിരേ ചുമത്തപ്പെട്ട കേസുകൾ അടിയന്തരമായി റദ്ദാക്കണം എന്ന് ബിഷപ് മാർ തോമസ് ചക്യത്ത് ആവശ്യപ്പെട്ടു. ഇനി ഇങ്ങനെ ഒരു സംഭവം ഭാരതത്തിൽ ന്യൂന പക്ഷങ്ങൾക്ക് നേരെ ഉണ്ടാവാതിരിക്കാൻ മുൻകരുതലുകൾ പ്രധാനമന്ത്രി സ്വീകരിക്കണമെന്നും അദ്ദേഹം ആവശ്യപ്പെട്ടു. ആലുവ മേഖലയിലെ വിവിധ ദേവാലയങ്ങളുടെയും സന്യസ്ത സമൂഹങ്ങളുടെയും നേതൃത്വത്തിൽ നടന്ന പ്രതിഷേധ റാലിയും സമ്മേളനവും ഉദ്ഘാടനം ചെയ്തു സംസാരിക്കുകയായിരുന്നു ബിഷപ്. ആലുവ സെന്‍റ് ഡൊമിനിക് പള്ളി വികാരി ഫാ. ജോസഫ് കരുമത്തി അധ്യക്ഷത വഹിച്ചു. എറണാകുളം-അങ്കമാലി അതിരൂപത വൈദിക സമിതി സെക്രട്ടറി ഫാ. കുര്യാക്കോസ് മുണ്ടാടൻ മുഖ്യ പ്രഭാഷണം നടത്തി. ബെന്നി ബെഹനാൻ എംപി, അൻവർ സാദത്ത് എംഎൽഎ, ആലുവ മുനിസിപ്പൽ ചെയർമാൻ എം.ഒ. ജോൺ, എറണാകുളം ഗ്രാൻഡ് മസ്ജിദ് ഇമാം ഫൈസൽ അസ്ഹരി, ഫാ. പോൾ നെടുഞ്ചാലിൽ, സിസ്റ്റർ നവ്യ മരിയ, സിസ്റ്റർ റോസ് അനിത എന്നിവർ സംസാരിച്ചു. ആയിരങ്ങൾ പങ്കെടുത്ത പ്രതിഷേധ റാലി മുൻ അതിരൂപത പ്രൊക്കുറേറ്റർ ഫാ. പോൾ മാടശേരി സെന്‍റ് ഡൊമിനിക് പള്ളിയങ്കണത്തിൽ ഫ്ലാഗ് ഓഫ് ചെയ്തു. ഡൊമിനിക് കാവുങ്കൽ, ജെമി കെ. അഗസ്റ്റിൻ, ബാബു കൊല്ലമാപറമ്പിൽ, ജോളി പടമാട്ടുമ്മേൽ, സജി നെറ്റിക്കാടൻ, ജോർജ് മുട്ടംതോട്ടിൽ, ബാബു കാടപ്പറമ്പിൽ, ഫാ. ജെയിംസ് തൊട്ടിയിൽ, ഫാ. ജെറിൻ കുരിശിങ്കൽ, ഫാ. നിഖിൽ മുളവരിക്കൽ, ഫാ. ജേക്കബ് കോറോത്ത്, ഫാ. സെബാസ്റ്റ്യൻ കളപ്പുരക്കൽ, ഫാ. സെബാസ്റ്റ്യൻ വടക്കുംപാടൻ, ഫാ. ജോസ് ചോലിക്കര, ഫാ. സനീഷ് കോയിക്കര, ഫാ. സാജു ചിറക്കൽ,ഫാ. സജോ പടയാട്ടിൽ,ബേസിൽ ആന്‍റണി , ടോമി വർഗീസ്, ഫാ. സജി തെക്കേകൈതക്കാട്ട്, ഫാ. പോൾ കന്നപ്പിള്ളി എന്നിവർ റാലിക്ക് നേതൃത്വം നൽകി.

തിളക്കം-2025 വിദ്യാഭ്യാസ പദ്ധതിക്കു തുടക്കം

നെടുമ്പാശേരി : നെടുമ്പാശേരി മേഖലാ മർക്കന്‍റയിൽ കോ -ഓപ്പറേറ്റീവ് സൊസൈറ്റിയുടെ നേതൃത്വത്തിൽ വിദ്യാഭ്യാസ രംഗത്ത് നടപ്പിലാക്കുന്ന തിളക്കം -2025 പദ്ധതികൾക്ക് തുടക്കമായി. മർക്കന്‍റെയിൽ കോ-ഓപ്പറേറ്റീവ് സൊസൈറ്റിയുടെ നേതൃത്വത്തിൽ സഹകരണ രംഗത്ത് നടപ്പിലാക്കിയ തിളക്കം പദ്ധതിയുടെ ഉദ്ഘാടനവും പ്രതിഭാ സംഗമവും ആലുവ സർക്കിൾ സഹകരണ യൂണിയൻ ചെയർമാൻ അഡ്വ. വി. സലിം ഉദ്ഘാടനം ചെയ്തു. സംഘം പ്രസിഡന്‍റ് സി.പി. തരിയൻ അധ്യക്ഷനായിരുന്നു. വിവിധ രംഗങ്ങളിൽ അംഗീകാരം നേടിയ വിദ്യാർഥി പ്രതിഭകളെ കേരള വ്യാപാരി വ്യവസായി ഏകോപന സമിതി ജില്ലാ ട്രഷറർ സി.എസ്. അജ്മൽ ആദരിച്ചു. കെ.ബി. സജി, ആർ. സരിത, ഷാജു സെബാസ്റ്റ്യൻ, എ.വി. രാജഗോപാൽ,ടി.എസ്. മുരളി, കെ.ജെ. ഫ്രാൻസിസ്,പി.പി. അശോക് കുമാർ,വി.എ. ഖാലിദ്, കെ.കെ. ബോബി,ബിന്നി തരിയൻ, പി.പി. ബാബുരാജ്, ഷാബു വർഗീസ്, കെ.ജെ. പോൾസൺ, എം.ജെ. പരമേശ്വരൻ നമ്പൂതിരി, ഷാജി മേത്തർ, മായ പ്രകാശൻ, ആനി റപ്പായി, അജിത സഹദേവൻ, ആനി ഫ്രാൻസിസ്, മറിയാമ്മ പൗലോസ്, പ്രിൻസി വിൻസൺ, മഞ്ജു സാബു, റാണി പോൾസൺ, മേരി പൗലോസ് തുടങ്ങിയവർ പ്രസംഗിച്ചു.

കെസിവൈഎം അംഗത്വ മാസാചരണം

ഫോർട്ടുകൊച്ചി: കെസിവൈഎം കൊച്ചി രൂപതയുടെ അംഗത്വമാസാചരണം മന്ത്രി റോഷി അഗസ്റ്റിൻ ഉദ്ഘാടനം ചെയ്തു. സുവർണ ജൂബിലിയുടെ നിറവിലായിരിക്കുന്ന പ്രസ്ഥാനത്തിന് അദ്ദേഹം ആശംസകൾ നേർന്നു. കൊച്ചി രൂപത പ്രസിഡന്‍റ് ഡാനിയ ആന്‍റണിക്ക് അംഗത്വ ഫോം കൈമാറി. കെസിവൈഎം കൊച്ചി രൂപത ഡയറക്ടർ ഫാ. മെൽറ്റസ് ചാക്കോ കൊല്ലശേരി, പ്രഥമ പ്രസിഡന്‍റ് എം.എം. ഫ്രാൻസിസ്, രൂപത യുവജന കമ്മീഷൻ സെക്രട്ടറി കാസി പൂപ്പന, രൂപതാ ട്രഷറർ ജോർജ് ജിക്സൺ, സംസ്ഥാന സിൻഡിക്കേറ്റ് അംഗം അന്ന സിൽഫ സെബാസ്റ്റിൻ, എക്സിക്യൂട്ടീവ് അംഗം അരുൺ പീറ്റർ എന്നിവർ സന്നിഹിതരായിരുന്നു.

ആംഗ്ലോ ഇന്ത്യന്‍ ദിനാചരണം

കൊച്ചി: ആംഗ്ലോ ഇന്ത്യന്‍ എഡ്യുക്കേഷണല്‍ ആന്‍ഡ് ചാരിറ്റബിള്‍ സൊസൈറ്റിയും ഫെഡറേഷന്‍ ഓഫ് ആംഗ്ലോ ഇന്ത്യന്‍ അസോസിയേഷന്‍സ് ഇന്‍ ഇന്ത്യയും ഒരുമിച്ചുള്ള വേള്‍ഡ് ആംഗ്ലോ ഇന്ത്യന്‍ ദിനം എറണാകുളം ഇന്‍ഫന്‍റ് ജീസസ് പാരിഷ് ഹാളില്‍ സൊസൈറ്റി രക്ഷാധികാരി റവ. ഡോ. ഡഗ്ലാസ് പിന്‍ഹീറോ ഉദ്ഘാടനം ചെയ്തു. പ്രസിഡന്‍റ് ഡോ. ചാള്‍സ് ഡയസ് അധ്യക്ഷത വഹിച്ചു. സതേണ്‍ കോളജ് ഓഫ് എന്‍ജിനീയറിംഗ് മാനേജിംഗ് ഡയറക്ടര്‍ ഹെതര്‍ ലൂയിസിന് ബിസിനസ് ലീഡര്‍ഷിപ്പ് എക്‌സലന്‍സ് അവാര്‍ഡ് നല്‍കി ആദരിച്ചു. ഹോക്കി കളിക്ക് നല്‍കിയ സംഭാവനയ്ക്കായി ഗ്ലാഡിനസ് ലെവിസിന് കെവിനും എംഎ പരീക്ഷയില്‍ രണ്ടാം റാങ്ക് നേടിയ കാലിസ്‌റ്റൈന്‍ ലെവീസിനും പുരസ്‌കാരം സമ്മാനിച്ചു. അഡ്വ. മാനുവല്‍ വിവേര, ജെയിംസ് ഗന്ധര്‍, ഓബ്രി റോഡരികസ്, ബെറോ ഡികോത്തോ എന്നിവര്‍ പ്രസംഗിച്ചു.

ഡോക്ടർമാരുടെ ക്ഷാമം രോഗികളെ വലയ്ക്കുന്നു

പറവൂർ: പുത്തൻവേലിക്കര ഗവ. താലൂക്കാശുപത്രിയിൽ പനി രോഗികളുടെ എണ്ണം വർധിച്ചു. പകൽ സമയത്തേക്കാൾ രോഗം മൂർച്ചിച്ച് രാത്രിയിലാണ് രോഗികൾ കൂടുതലായി എത്തുന്നത്. വൈകുന്നേരങ്ങളിൽ എത്തുന്ന നൂറിലധികം രോഗികളെ പരിശോധിച്ച് മരുന്ന് നിശ്ചയിക്കാൻ ഒരു ഡോക്ടർ മാത്രമാണുള്ളത്. പരിശോധനയ്ക്കിടെയെത്തുന്ന അത്യാഹിതങ്ങൾ കൂടി കൈകാര്യം ചെയ്യാൻ ഡോക്ടർ എഴുന്നേറ്റ് പോകുന്നതോടെ ഡോക്ടറെ കാണാൻ ക്യൂവിൽ നിൽക്കുന്നവർ മണിക്കൂറുകളോളം നിന്ന് ക്ലേശിക്കുകയാണ്. പലരും ഡോക്ടറെ കാണാതെ മടങ്ങിപ്പോകുന്ന സ്ഥിതിയുണ്ട്. രാത്രി സമയത്ത് ആശുപത്രിയിൽ ഒരു ഡോക്ടറുടെ കൂടി സേവനം കൂടി ലഭ്യമാക്കണമെന്നാണ് രോഗികളുടെ ആവശ്യം.

കൃത്രിമ കാൽ പദ്ധതിക്കു തുടക്കം

പെരുമ്പാവൂര്‍: റോട്ടറി ക്ലബ് പെരുമ്പാവൂര്‍ സെന്‍ട്രലിന്‍റെയും റോട്ടറി മുവാറ്റുപുഴ റീജിയണിന്‍റെയും സംയുക്താഭിഖ്യത്തില്‍ റോട്ടറി ക്ലബ് തൃശൂര്‍, റോട്ടറി ക്ലബ് വോള്‍വര്‍ ഹാംപ്ടന്‍ (യുകെ) എന്നിവരുടെ ഗ്ലോബല്‍ ഗ്രാന്‍ഡ് വാക് എഗയിന്‍ പദ്ധതിയുടെ ഭാഗമായി കൃത്രിമ കാല്‍ വച്ച് നല്‍കുന്ന പദ്ധതിയുടെ അവസാനഘട്ടം ഉദ്ഘാടനം നടന്നു. പദ്ധതിയുടെ ഉദ്ഘാടനം റോട്ടറി ഡിസ്ട്രിക്ട് ഗവര്‍ണര്‍ ഡോ. ജി.എന്‍. രമേഷ് നിര്‍വഹിച്ചു. റോട്ടറി ക്ലബ് പെരുമ്പാവൂര്‍ സെന്‍ട്രല്‍ പ്രസിഡന്‍റ് രാജന്‍ തോമസ് അധ്യക്ഷത വഹിച്ചു. സാമ്പത്തികമായി പിന്നോക്കം നില്‍ക്കുന്ന അര്‍ഹരായ നൂറോളം പേര്‍ക്ക് സൗജന്യമായാണ് കൃത്രിമ കാല്‍ വച്ച് നല്‍കുന്നത്.

ടീച്ചേഴ്സ് ഗിൽഡിനു പുതിയ ഭാരവാഹികൾ

കൊച്ചി: കേരള കാത്തലിക് ടീച്ചേഴ്സ് ഗിൽഡ് എറണാകുളം-അങ്കമാലി അതിരൂപത ഭാരവാഹികളെ തെരഞ്ഞെടുത്തു. കലൂർ റിന്യൂവൽ സെന്‍ററിൽ നടന്ന യോഗത്തിൽ ഡയറക്ടർ ഫാ. തോമസ് നങ്ങേലിമാലിൽ, അസി. ഡയറക്ടർ റവ. ഡോ. ബെന്നി പാലാട്ടി, പ്രഫ. ഫ്രാൻസീസ് ഇടത്രക്കരി എന്നിവർ പ്രസംഗിച്ചു. പ്രസിഡന്‍റ് - ജീബ പൗലോസ് (കാർഡിനൽ എച്ച്എസ്,തൃക്കാക്കര), ജനറൽ സെക്രട്ടറി- ബിനോയി ജോസഫ് (ഇൻഫന്‍റ് ജീസസ് എച്ച്എസ്, വടയാർ), ട്രഷറർ- ജോസഫ് പാലയ്ക്കാപ്പിള്ളി (സെന്‍റ് മേരീസ് എൽപിഎസ്, തൃപ്പൂണിത്തുറ). വൈസ് പ്രസിഡന്‍റുമാർ- കെ.ജെ. ജോയ്മോൻ (സെന്‍റ് ജെർമൻസ് എൽപിഎസ്, നോർത്ത് പറവൂർ) സിസ്റ്റർ ഷിജി ചിറയത്ത് (സെന്‍റ് ജോസഫ്സ് യുപിഎസ് ചുണങ്ങംവേലി), ജോയിന്‍റ് സെക്രട്ടറിമാർ- അനിത ജോർജ് (സെന്‍റ് തോമസ് എച്ച്എസ്എസ് അയിരൂർ), ഗ്ലോറിയ ലോനപ്പൻ (ജെവൈഎൽപിഎസ് മേലൂർ), എക്സിക്യൂട്ടീവ് മെന്പേഴ്സ്, ലിൻസി ലൂക്കോസ് (സെന്‍റ് മേരീസ് എച്ച്എസ് ആലുവ), സിസ്റ്റർ ജിൻസി ആന്‍റണി (സെന്‍റ് പീറ്റേഴ്സ് യുപിഎസ്, വടക്കേക്കര), ജോസ് പോൾ (സെന്‍റ് ലൂയിസ് യുപിഎസ്, വൈക്കം), സിസ്റ്റർ ജോമിഷ ജോയ് (സെന്‍റ് ഫ്രാൻസിസ് എൽപിഎസ്, പുതിയകാവ്), ആൻമേരി ജോസ് (സെന്‍റ് ജോസഫ്സ് സിജിയുപിഎസ്, തൃപ്പൂണിത്തുറ), അനീഷ് മാത്യു (എൽ എഫ് സിഎച്ച്എസ്, കൊരട്ടി), വിൻസി ആന്‍റണി (എസ്എംയുപിഎസ്, മൂഴിക്കുളം).

ഇന്ത്യൻ ബുക്ക് ഓഫ് റിക്കാർഡ്സ് ജേതാവ് ജോസാക് വരുണിന് ആദരം

വൈപ്പിൻ: ഇന്ത്യൻ ബുക്ക്‌ ഓഫ് റിക്കാർഡിൽ ഇടംനേടി നാടിന്‍റെ അഭിമാനമായ ജൊസാക് വരുണിനെ വൈപ്പിൻ മണ്ഡലത്തിൽ ആദരിച്ചു. മുളവുകാട് നടന്ന അനുമോദന സമ്മേളനത്തിൽ കെ.എൻ. ഉണ്ണികൃഷ്ണൻ എംഎൽഎ ജോസാക്കിനു പുരസ്കാരം സമ്മാനിച്ചു. കുഴുപ്പിള്ളി കൈതാരൻ വരുൺ ജോസ് -മെറിൻ ദമ്പതികളുടെ മകനും കൂനമ്മാവ് ചാവറ ദർശൻ സിഎംഐ പബ്ലിക്‌ സ്കൂൾ വിദ്യാർഥിയുമാണ് ജൊസാക്. ചടങ്ങിൽ മുളവുകാട് പഞ്ചായത്ത് പ്രസിഡന്‍റ് വി.എസ്. അക്ബർ, ജില്ലാ പഞ്ചായത്ത് വൈസ് പ്രസിഡന്‍റ് എൽസി ജോർജ് തുടങ്ങിയവർ സംസാരിച്ചു.

പെൻഷൻ പരിഷ്കരണം ഉടൻ നടപ്പാക്കണം: കെഎസ്എസ്പിഎ

അങ്കമാലി: കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ തുറവൂർ മണ്ഡലം കമ്മറ്റിയുടെ നേതൃത്വത്തിൽ തുറവൂർ ജംഗ്ഷനിൽ ധർണ നടത്തി. വിവിധ ആവശ്യങ്ങൾ ഉന്നയിച്ചു നടത്തിയ ധർണ മുൻ എംഎൽഎ പി.ജെ. ജോയ്‌ ഉദ്ഘാടനം ചെയ്തു. മണ്ഡലം പ്രസിഡന്‍റ് പോൾ ജോസഫ് അധ്യക്ഷത വഹിച്ചു.

മുടക്കുഴയിൽ കാറിന് തീപിടിച്ചു

പെരുമ്പാവൂർ: മുടക്കുഴ തുരുത്തിയിൽ കാറിന് തീ പിടിച്ചു. ബേസിൽ എം. പ്രസാദ് എന്നയാളുടെ കാറിനാണ് തീപിടിച്ചത്. പെരുമ്പാവൂർ ഫയർ ഫോഴ്സ് എത്തി തീ അണച്ചു. സീനിയർ ഫയർ ആൻഡ് റെസ്ക്യൂ ഓഫീസർ കെ.എ. ഉബാസിന്‍റെ നേതൃത്വത്തിൽ എസ്. കണ്ണൻ, ജെയ്സ് ജോയ്, സി. ആദർശ് ,സി.എം. നിഷാദ് എന്നിവരടങ്ങുന്ന സംഘമാണ് തീയണച്ചത്. തീ പിടിച്ചതറിഞ്ഞ ഉടൻ യാത്രക്കാർ കാറിൽനിന്നിറങ്ങിയതിനാൽ വൻ അപകടം ഒഴിവായി.

മിനി ലോറിക്കു തീപിടിച്ചു

നെടുമ്പാശേരി : ദേശീയപാതയിൽ ദേശം കുന്നുംപുറത്ത് മുട്ട മൊത്ത വ്യാപാര കേന്ദ്രത്തിൽ പാർക്ക് ചെയ്തിരുന്ന മിനി ലോറിക്കു തീപിടിച്ചു. ഇന്നലെ ഉച്ചയോടെയായിരുന്നു സംഭവം. വാഹനം കടയുടെ മുന്നിൽ പാർക്ക് ചെയ്തിരിക്കുകയായിരുന്നു. വഴിയാത്രക്കാരാണ് തീയും പുകയും ഉയരുന്നത് കണ്ടത്. അതോടെ നാട്ടുകാരെത്തി തീ നിയന്ത്രിക്കാൻ നോക്കിയെങ്കിലും ഫലമുണ്ടായില്ല. അതോടെ അങ്കമാലി, ആലുവ യൂനിറ്റുകളിൽ നിന്ന് അഗ്നി രക്ഷസേനയെത്തിയാണ് തീ കെടുത്തിയത്. സമീപത്ത് വാഹനങ്ങളില്ലാതിരുന്നതും തീ നിയന്ത്രണ വിധേയമാക്കാൻ സാധിച്ചതുമാണ് വൻ ദുരന്തം ഒഴിവായത്.

കേരളത്തിൽ മൈസ് ടൂറിസത്തിന് സാധ്യതകളേറെ: ശിഖ സുരേന്ദ്രൻ

കൊച്ചി: സമ്മേളനങ്ങൾക്കും പ്രദർശനങ്ങൾക്കും മികച്ച അടിസ്ഥാന സൗകര്യങ്ങളുള്ള കേരളത്തിൽ മൈസ് ടൂറിസത്തിന് വലിയ സാധ്യതകളുണ്ടെന്ന് കേരള ടൂറിസം ഡയറക്ടർ ശിഖ സുരേന്ദ്രൻ. ഇന്ത്യൻ എക്‌സിബിഷൻ ഇൻഡസ്‌ട്രി അസോസിയേഷൻ (ഐഇഐഎ) കേന്ദ്ര ടൂറിസം മന്ത്രാലയവുമായി സഹകരിച്ച് ചെന്നൈ ഐടിസി ഗ്രാൻഡ് ചോളയിൽ സംഘടിപ്പിച്ച സൗത്ത് ഇന്ത്യ തോട്ട് ലീഡേഴ്സ് കോൺഫറൻസിൽ സംസാരിക്കുകയായിരുന്നു അവർ. കൺവൻഷനുകൾ, എക്സിബിഷനുകൾ (എംഐസിഇ-മൈസ്) വ്യവസായത്തിൽ ഇന്ത്യ വലിയ വളർച്ച നേടിയെന്ന് സമ്മേളനം വിലയിരുത്തി. ശക്തമായ സാമ്പത്തിക വളർച്ച, ലോകോത്തര നിലവാരത്തിലുള്ള അടിസ്ഥാന സൗകര്യങ്ങൾ, സർക്കാരിന്‍റെ മികച്ച പിന്തുണ എന്നിവയാണ് മൈസ് വ്യവസായത്തിന്റെ വളർച്ചക്ക് സംഭാവന നൽകുന്നതെന്നും സമ്മേളനം ചുണ്ടിക്കാട്ടി. ഇന്ത്യൻ ടൂറിസം മന്ത്രാലയം അഡീഷണൽ സെക്രട്ടറിയും ഡയറക്ടർ ജനറലുമായ സുമൻ ബില്ല സമ്മേളനം ഉദ്ഘാടനം ചെയ്തു.

രായമംഗലത്ത് എല്‍ഇഡി ബള്‍ബ് പുനരുപയോഗത്തിന് ക്ലിനിക്ക്

പെരുമ്പാവൂര്‍: രായമംഗലം ഗ്രാമപഞ്ചായത്ത് നെറ്റ് സീറോ കാര്‍ബണ്‍ എമിഷന്‍ പദ്ധതിയുടെ ഭാഗമായി എല്‍ഇഡി ബള്‍ബ് പുനരുപയോഗത്തിന്‍റെ സാദ്ധ്യതാ പഠനം തുടങ്ങി. സയന്‍സ് സെന്‍റര്‍ തുരുത്തിക്കരയും പെരുമ്പാവൂര്‍ സെന്‍റര്‍ ഫോര്‍ മൈഗ്രേഷന്‍ ആന്‍ഡ് ഇന്‍ക്ലൂസീവും ചേര്‍ന്നാണ് സാധ്യതാപഠനം നടത്തുന്നത്. ഹരിതകര്‍മ്മസേന വീടുകളില്‍ നിന്നും സ്ഥാപനങ്ങളില്‍ നിന്നും കേടായ എല്‍ഇഡി ബള്‍ബുകള്‍ ശേഖരിക്കും. പരിശീലനം നേടിയ ഹരിതകര്‍മ്മസേനാംഗങ്ങള്‍ ഇവ ചെറിയ തുക ഈടാക്കിയ ശേഷം നന്നാക്കി തിരികെ നല്‍കുന്നതിന്‍റെ സാധ്യതയാണ് പഠിക്കുന്നത്. പഞ്ചായത്ത് പ്രസിഡന്‍റ് എന്‍.പി. അജയകുമാര്‍ ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്‍റ് ദീപ ജോയ്, ഡോ. എന്‍. ഷാജി, പി.എ. തങ്കച്ചന്‍, ഡോ. ബിനോയ് പീറ്റര്‍, മെമ്പര്‍മാരായ കെ.കെ. മാത്തുകുഞ്ഞ്, കെ.എന്‍. ഉഷാദേവി, ലിജു അനസ്, പഞ്ചായത്ത് സെക്രട്ടറി സി.കെ. സുധീഷ്‌കുമാര്‍, ഇ.എന്‍. വിജയന്‍, ലത ഗിരീഷ്, ജമീല എന്നിവര്‍ പങ്കെടുത്തു.

കൂവപ്പടിയിൽ ചെന്പൻചെല്ലി ശല്യം രൂക്ഷം; കേര കർഷകർ പ്രതിസന്ധിയിൽ

പെരുമ്പാവൂർ: നാളികേരത്തിനും വെളിച്ചെണ്ണയ്ക്കും വില വർധിക്കുന്നതിനിടെ കൂവപ്പടിയിലെ കേര കർഷകർക്ക് തിരിച്ചടിയായി തെങ്ങുകളിൽ ചെന്പന്‍ചെല്ലി ശല്യം രൂക്ഷം. തെങ്ങിന്‍റെ കൂമ്പുഭാഗങ്ങളെയും ഇളം ഓലകളെയും തിന്നു നശിപ്പിക്കുന്ന ചുവന്ന നിറത്തിലുള്ള ചെമ്പൻ ചെല്ലികൾ വ്യപകമാകുകയാണ് കൂവപ്പടി പ്രദേശങ്ങളിൽ. തെങ്ങിന്‍റെ വളർച്ചയെ പ്രതികൂലമായി ബാധിച്ച് വിളവു കുറയുന്ന അവസ്ഥയാണ് ഇപ്പോഴുള്ളത്. ഒരു തെങ്ങിൽ നിന്നും ശരാശരി 10 മുതൽ 80 ചെല്ലികളെ വരെ ലഭിക്കാറുണ്ടെന്ന് കർഷകരായ മണി കൈതക്കോടും കെ.കെ. ശാരദക്കുഞ്ഞമ്മയും പറഞ്ഞു. നിലവിലുള്ള നിയന്ത്രണ മാർഗങ്ങളൊന്നും പര്യാപ്തമല്ല എന്നാണ് ഇവരുടെ അഭിപ്രായം. ഇതുമൂലം ചെറുകിട കർഷകർ ബുദ്ധിമുട്ടിലായിരിക്കുകയാണ്. ഈ സീസണിലെ ഇടവിട്ടുള്ള മഴയും ചെല്ലിനിയന്ത്രണ മാർഗങ്ങൾക്ക് തടസമായതായി ഇവർ പറയുന്നു. കർഷകർക്ക്‌ വേണ്ടത്ര ബോധവത്‌കരണ നൽകാൻ കൃഷിവകുപ്പ് തയാറാകണം. സൗജന്യകീടനാശിനികൾ അടിയന്തരമായി വിതരണ ചെയ്തില്ലെങ്കിൽ കേരകർഷകർ കൂടുതൽ പ്രതിസന്ധിയിലാകുമെന്നാണ് വിലയിരുത്തൽ. അതിനിടെ ചെല്ലിയുടെ ആക്രമണമുണ്ടാകാത്ത ഇനം തെങ്ങിൻതൈകൾ എന്ന പേരിൽ വില്പന നടത്തി സ്വകാര്യ അഗ്രികൾച്ചർ നഴ്സറികളിൽ വ്യാപകമായി കച്ചവടചൂഷണവും നടക്കുന്നുണ്ടെന്ന് കർഷകർ ആരോപിക്കുന്നു. ഓലകളുടെ ഇടയിലൂടെ അഗ്രഭാഗം തുറന്നു കയറി വിടരാത്ത കൂമ്പോലകളെയും ചൊട്ടകളേയും തിന്ന് നശിപ്പിക്കുകയാണ് ചെല്ലികൾ ചെയ്യുന്നത്. ആക്രമണ വിധേയമായ ഓലകൾ വിടരുമ്പോൾ അവ അരികിൽനിന്ന് മധ്യഭാഗത്തേയ്ക്ക് നേരെ വെട്ടിമുറിച്ചരീതിയിൽ കാണപ്പെടുന്നതാണ് ഇതിന്‍റെ ലക്ഷണം. ഇളംകൂമ്പിനെ ആക്രമിക്കുന്നതു കാരണം പൂങ്കുലകൾ നശിപ്പിക്കപ്പെടുകയും തേങ്ങയുടെ ഉത്പാദനം കുറയുകയും ചെയ്യുന്നു.

തമിഴ്‌നാട്ടിൽ വാഹനാപകടത്തിൽ മലയാളി നർത്തകി മരിച്ചു

തൃപ്പൂണിത്തുറ: തമിഴ്‌നാട്ടിലുണ്ടായ വാഹനാപകടത്തിൽ നർത്തകിയും നാടൻ പാട്ട് കലാകാരിയുമായ ഗൗരി നന്ദ (20) മരിച്ചു. തൃപ്പൂണിത്തുറ എരൂർ കുന്നറ വീട്ടിൽ കെ.എ. അജേഷിന്‍റെയും ഷീജയുടെയും മകളാണ്. ശനിയാഴ്‌ച വൈകുന്നേരം തമിഴ്‌നാട് ചിദംബരത്തായിരുന്നു അപകടം. ഗൗരി നന്ദയും സംഘവും സഞ്ചരിച്ചിരുന്ന കാർ ചിദംബരം അമ്മപ്പെട്ടെ ബെെപ്പാസിൽ നിയന്ത്രണംവിട്ട് മറിയുകയായിരുന്നു. സംഘത്തിലുള്ള എട്ട് പേർക്ക് പരിക്കേറ്റു.എറണാകുളം സ്വദേശികളായ ഫ്രെഡി (29), അഭിരാമി (20), തൃശൂർ സ്വദേശി വൈശാൽ (27), സുകില (20), അനാമിക (20) തുടങ്ങിയവർക്കാണ് പരുക്കേറ്റത്. ഇവരെ കടലൂർ ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. തമിഴ്‌നാട്ടിൽ ഒരു പ്രോഗ്രാം കഴിഞ്ഞ് മറ്റൊരു സ്ഥലത്തേയ്ക്ക് പ്രോഗ്രാം അവതരിപ്പിക്കാൻ ഇവന്‍റ് ഗ്രൂപ്പിനൊപ്പം പോകവെയാണ് അപകടത്തിൽപ്പെട്ടത്. നൃത്തത്തിലും നാടൻ പാട്ടിലും കഴിവ് തെളിയിച്ച ഗൗരി സ്റ്റേജ് പ്രോഗ്രാമുകളിൽ സജീവമായിരുന്നു. ഗൗരി നന്ദയുടെ സംസ്കാരം ഇന്ന് 10.30ന് തൃപ്പൂണിത്തുറ പൊതുശ്മശാനത്തിൽ.

റോഡ് മുറിച്ചു കടക്കുന്നതിനിടെ കാറിടിച്ച് വയോധികൻ മരിച്ചു

ഉദയംപേരൂർ: റോഡ് മുറിച്ചു കടക്കുന്നതിനിടെ കാറിടിച്ച് വയോധികൻ മരിച്ചു. തെക്കൻ പറവൂർ മഠത്തിൽ രവീന്ദ്രനാ(73)ണ് മരിച്ചത്. ശനിയാഴ്ച രാത്രി 9.15 ഓടെയായിരുന്നു അപകടം. തൃപ്പൂണിത്തുറ കിഴക്കേക്കോട്ടയിലെ വ്യാപാര സ്ഥാപനത്തിൽ ജോലി ചെയ്യുന്ന രവീന്ദ്രൻ ജോലിക്ക് ശേഷം രാത്രി വീട്ടിലേയ്ക്ക് പോകാനായി തെക്കൻ പറവൂരിൽ ബസിറങ്ങി റോഡ് മുറിച്ചു കടക്കുന്നതിനിടെ കാറിടിക്കുകയായിരുന്നു. ഗുരുതര പരിക്കേറ്റ രവീന്ദ്രനെ ഉടൻ തന്നെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം നടത്തി. ഭാര്യ: അമ്മിണി. മക്കൾ: അനൂപ്, അശ്വതി. മരുമക്കൾ: നീനു, കൃഷ്ണനുണ്ണി. തൃപ്പൂണിത്തുറ കിഴക്കേക്കോട്ട വാതിലിനടുത്തുള്ള എം.എൻ.സ്റ്റോഴ്സ് എന്ന സ്ഥാപനത്തിൽ കഴിഞ്ഞ 55 വർഷമായി ജോലി ചെയ്തു വരികയായിരുന്നു രവീന്ദ്രൻ.

പുരസ്കാരങ്ങൾ നൽകി

ആലുവ: ആലുവ നഗരസഭയുടെ വിദ്യാഭ്യാസ അവാർഡുകൾ എറണാകുളം അസി. കളക്ടർ പാർവതി ഗോപകുമാർ വിതരണം ചെയ്തു. മുനിസിപ്പൽ കോൺഫറൻസ് ഹാളിൽ നടന്ന ചടങ്ങിൽ നഗരസഭാ ചെയർപേഴ്സൺ എം.ഒ. ജോൺ അധ്യക്ഷത വഹിച്ചു. എസ്എസ്എൽസി, പ്ലസ്ടു പരീക്ഷകളിൽ എല്ലാ വിഷയങ്ങൾക്കും എ പ്ലസ് കരസ്ഥമാക്കിയതും, ഡിഗ്രി, പിജി പരീക്ഷകളിൽ റാങ്ക് നേടിയവരും ആലുവ നഗരസഭാ പ്രദേശത്ത് സ്ഥിരതാമസമാക്കിയിട്ടുള്ളവരുമായ വിദ്യാർഥികൾക്കാണ് അവാർഡ് നൽകിയത്. എസ്എസ്എൽസിക്ക് 23 പേരും, പ്ലസ്ടുവിൽ 24 പേരും ഡിഗ്രി, പിജിതലത്തിൽ അഞ്ചു പേരുമാണ് അവാർഡിന് അർഹരായത്.

ദേശീയപാത 66 നിർമാണം : തുറവൂർ ജംഗ്ഷനിൽനിന്നും ഉയരപ്പാത നീട്ടൽ; കെ.സി. വേണുഗോപാൽ സ്ഥലം സന്ദർശിച്ചു

അരൂർ: ദേശീയപാത 66 ലെ നിർമാണം പുരോഗമിക്കുന്ന ഉയരപ്പാത തുറവൂർ ജംഗ്ഷനിൽനിന്നും തെക്കോട്ട് നീട്ടുന്നതിന്‍റെ സാദ്ധ്യത തേടി കെ.സി. വേണുഗോപാൽ എംപി സ്ഥലം സന്ദർശിച്ചു. തുറവൂരിലെ ഗതാഗത പ്രശ്‌നം പരിഹരിക്കുന്നതിനായി കവലയില്‍നിന്ന് തെക്കോട്ട് ഉയരപ്പാത നീട്ടുന്നതിനാവശ്യമായ ഇടപെടലിനായി കഴിഞ്ഞ ദിവസം വേണുഗോപാല്‍ കേന്ദ്ര ഉപരിതല ഗതാഗതമന്ത്രി നിതിന്‍ ഗഡ്കരിക്ക് കത്തുനല്‍കിയതിനു പിന്നാലെയാണ് പ്രദേശവാസികളുടെ ആശങ്കൾ മുൻനിർത്തി സ്ഥലം സന്ദർശിച്ചത്. അരൂരിൽ ആരംഭിച്ചു തുറവൂർ ജംഗ്ഷനിൽ അവസാനിക്കുന്നതരത്തിലാണ് ഇപ്പോൾ ഉയരപ്പാതയുടെ നിർമാണം പുരോഗമിക്കുന്നത്. മണ്ഡലകാലത്ത് നിരവധി അയ്യപ്പഭക്തരെത്തുന്ന തുറവൂര്‍ മഹാദേവക്ഷേത്രത്തിലേക്കുള്ള പ്രവേശനവും തുറവൂർ താലൂക്ക് ആശുപത്രി, ഉൾപ്രദേശങ്ങളായ പള്ളിത്തോട്‌, ചെല്ലാനം, കുമ്പളങ്ങി , തൈക്കാട്ടുശേരി എന്നിവടങ്ങളിലേക്കുള്ള ഗതാഗത മാർഗങ്ങളും അടഞ്ഞുപോകുന്ന തരത്തിലാണ് ഇപ്പോൾ നിർമാണം പുരോഗമിക്കുന്നത്. കൂടാതെ ബസ് സർവീസുകളും പ്രാദേശിക വ്യാപാരസ്ഥാപങ്ങളും ഇപ്പോഴത്തെ നിർമാണം തുടർന്നാൽ പ്രതിസന്ധിയിലാകും. ഓട്ടോ-ടാക്‌സി ജീവനക്കാരെയും സ്‌കൂള്‍ ഉള്‍പ്പെടെ സര്‍ക്കാര്‍ ഓഫീസിലെത്തുന്നവരെയും കാര്യമായി ബാധിച്ചിട്ടുണ്ട്. ഈ സാഹചര്യങ്ങൾ ചൂണ്ടിക്കാട്ടി പ്രദേശവാസികളിൽ നിന്നുയരുന്ന പരാതികൾ പരിശോധിക്കാനാണ് എംപി തുറവൂരിലെത്തിയത്. ഉയരപാത തുറവൂരിൽനിന്നും തെക്കോട്ടു നീക്കണമെന്ന ആവശ്യം നേരത്തെ ഉന്നയിക്കുകയും അംഗീകരിക്കുകയും ചെയ്തിരുന്നുവെങ്കിലും ഇപ്പോൾ അതനുസരിച്ചല്ല നിർമാണം മുന്നോട്ട് പോകുന്നത്. ഇതിനകം നിരവധി അപകടങ്ങളിലായി 41 ഓളം മനുഷ്യജീവനുകള്‍ നഷ്ടപ്പെട്ടു. ഈ പ്രശ്‌നങ്ങള്‍ പരിഹരിച്ച് മാത്രമെ ദേശീയപാത നിര്‍മാണം മുന്നോട്ട് പോകാൻ കഴിയൂവെന്ന് വേണുഗോപാല്‍ ഒപ്പമുണ്ടായിരുന്ന ദേശീയപാത അഥോറിറ്റി പ്രോജക്ട് ഡയറക്റ്റർ ഉൾപ്പെടെയുള്ള ഉദ്യോഗസ്ഥർക്കു നിർദേശം നൽകി.

ഗവ. വനിതാ പോളിടെക്നിക് കോളജ് കെട്ടിട സമുച്ചയ ഉദ്ഘാടനം നാളെ

കളമശേരി: വനിതകളുടെ സാങ്കേതിക വിദ്യാഭ്യാസത്തിനായി സർക്കാർ തലത്തിലുള്ള ഗവ. പോളിടെക്നിക്കിലെ പുതിയ കെട്ടിട സമുച്ചയങ്ങളുടെ ഉദ്ഘാടനം നാളെ രാവിലെ 9.30ന് കളമശേരി പോളിടെക്നിക്കിൽ നടക്കും. മന്ത്രി ആർ. ബിന്ദു ഉദ്ഘാടനം നിർവഹിക്കും. മന്ത്രി പി. രാജീവ്, ഹൈബി ഈഡൻ എംപി, നഗരസഭ ചെയർപേഴ്സൺ സീമ കണ്ണൻ തുടങ്ങിയവർ പങ്കെടുക്കും. 2835 ചതുരശ്ര മീറ്ററിൽ 361.22 ലക്ഷം രൂപ ചെലവഴിച്ച് നിർമിച്ച കെട്ടിടത്തിൽ ലാബുകളും ക്ലാസ് മുറികളും സജീകരിക്കും. ഹോസ്റ്റലിനായി 410.10 ലക്ഷം രൂപ ചെലവിൽ 2419ചതുരശ്ര മീറ്ററും ജനറൽ വർക്ക്ഷോപ്പിനായി 112.09 ലക്ഷം രൂപയുടെ 246.34 ചതുരശ്ര മീറ്ററ്റിൽ കെട്ടിടങ്ങളുമാണ് ഡവലപ്പ്മെന്‍റ് ഫണ്ട് ഉപയോഗിച്ച് നിർമിച്ചിട്ടുള്ളത്.

"ചെളിയഭിഷേകം'

ചെളിയിൽ കുളിച്ച് യാത്ര ആലുവ: കീഴ്മാട് - ജിടിഎൻ റോഡിലെ മുതിരക്കാട് മേഖലയിലെ റോഡിലെ വെള്ളക്കെട്ട് ഇല്ലാതാക്കാൻ അടിയന്തിര ഇടപെടൽ ആവശ്യപ്പെട്ട്‌ കാൽനടയാത്രക്കാരും വ്യാപാരികളും. വാഹനങ്ങൾ പോകുന്പോൾ റോടിലെ ചെളിവെള്ളി സമീപത്തെ വീടുകളിലേക്കും വ്യാപാര സ്ഥാപനങ്ങൾ, ബസ് സ്റ്റോപ്പ് എന്നിവിടങ്ങളിൽ നിൽക്കുന്ന ആളുകളുടെ വസ്ത്രങ്ങളിലേക്കും തെറിക്കുന്ന അവസ്ഥയാണ്. മുതിരക്കാട് ബസ് സ്റ്റോപ്പിന് സമീപം ടൈൽ വിരിച്ചതിലെ അപാകതയാണ് വെള്ളക്കെട്ടിന് കാരണമെന്നാണ് ചൂണ്ടിക്കാണിക്കുന്നത്. മുതിരക്കാട് ബസ് റ്റോപ്പിലെ വെള്ളക്കെട്ടിന് പരിഹാരം കാണമെന്ന് ആവശ്യ പെട്ടുകൊണ്ട് കീഴ്മാട് സ്വരുമ റസിഡന്‍റ് അസോസിയേഷൻ ആലുവ പൊതുമത്ത് അസി.എക്സിക്യൂട്ടീവ് എൻജിനീയർക്ക് പരാതി നൽകി. ബസ് സ്റ്റാൻഡിലേക്ക് ചെളിയും വെള്ളവും : ദുരിതത്തിലായി യാത്രക്കാരും കച്ചവടക്കാരും പറവൂർ: പൊതുമരാമത്ത് വകുപ്പിന്‍റെ കാന പണി നടക്കുന്ന സ്ഥലത്തുനിന്നും പറവൂർ സ്വകാര്യ ബസ് സ്റ്റാൻഡിലേക്ക് ചെളിയും വെള്ളവും ഒലിച്ചിറങ്ങുന്നത് യാത്രക്കാർക്കും കച്ചവടക്കാർക്കും പ്രതിസന്ധി തീർക്കുന്നു. ബസ് സ്റ്റാൻഡ് നിറയെ ചെളിവെള്ളം കെട്ടിയതോടെ യാത്രക്കാർക്ക് ബസുകളിൽ കയറാൻ പറ്റാത്ത സ്ഥിതിയാണ്. കച്ചവട സ്ഥാപനങ്ങൾക്കു മുന്നിലും വെള്ളം കെട്ടിക്കിടക്കുകയാണ്. ഇതിനിടെ ചില ബസുകൾ ട്രിപ്പ് മുടക്കി. കഴിഞ്ഞ തിങ്കളാഴ്ച സ്റ്റാൻഡിന്‍റെ കവാടത്തിൽ കാന നിർമിക്കുന്നതിനായി റോഡ് കുത്തിപ്പൊളിച്ചപ്പോൾ വാട്ടർ അഥോറിറ്റിയുടെ 300 എംഎം കുടിവെള്ള പൈപ്പ് പൊട്ടിയിരുന്നു. കഴിഞ്ഞ ദിവസമാണ് ഇത് നന്നാക്കി കുടിവെള്ള വിതരണം പുന:സ്ഥാപിച്ചത്. വർഷങ്ങളായി ചെളിയും വെള്ളവും നിറഞ്ഞു കിടക്കുകയായിരുന്ന പഴയ കാനയിലേക്ക് പുതിയതായി നിർമിച്ച കാനയിൽനിന്നും കണക്ഷൻ നൽകിയതിനെത്തുടർന്നാണ് ചെളിയും വെള്ളവും കുത്തിയൊലിച്ച് ബസ് സ്റ്റാൻഡിൽ എത്തിയത്. മഴ കനത്താൽ സ്ഥിതി കൂടുതൽ ഗുരുതരമാകും.

പെരുന്പാവൂർ ടൗണിലെ ഗതാഗതക്കുരുക്ക് പരിഹരിക്കണം താലൂക്ക് സഭ

പെരുന്പാവൂർ: ഓണം അടുത്തു വരുന്ന സാഹചര്യത്തിൽ നിരന്തരമായി ഉണ്ടാകുന്ന പെരുമ്പാവൂരിലെ ഗതാഗതടസം പരിഹരിക്കണമെന്ന് കുന്നത്തുനാട് താലൂക്ക് സഭ ആവശ്യപ്പെട്ടു. മഴക്കാലമായപ്പോൾ മുൻസിപ്പാലിറ്റി റോഡുകളും പൊതു മരാമത്ത് റോഡുകളും പല സ്ഥലങ്ങളിലും കുണ്ടും കുഴിയുമായി കിടക്കുമ്പോൾ വാഹനങ്ങൾക്ക് പോവാൻ പറ്റാത്ത അവസ്ഥ സംജാതമാകുന്നു. താലൂക്ക് ഗവൺമെന്‍റ് ആശുപത്രിയിലെ ഗൈനക്കോളജിസ്റ്റ് വിഭാഗം ശക്തമാക്കണം. വേങ്ങൂർ, അശമന്നൂർ മുടക്കുഴ പഞ്ചായത്തുകളിലെ ജല അഥോറിറ്റിയുടെ പൈപ്പ് കണക്ഷനുകൾ സുഗമമാക്കണം. ചുരമുടിയിലെ വാട്ടർ ട്രീറ്റ്മെന്‍റ് പ്ലാന്‍റ് പണി എത്രയും വേഗം പൂർത്തീകരിക്കണം. താലൂക്ക്തല അസൈമന്‍റ് കമ്മിറ്റി വില്ലേജുകളിലെ റിപ്പോർട്ടിന്‍റെ അടിസ്ഥാനത്തിൽ ഓഗസ്റ്റ് 25നു മുൻപ് കൂടുമെന്ന് തഹസിൽദാർ അറിയിച്ചു.

കന്യാസ്ത്രീകൾക്കെതിരായ കേസ് : ആലുവയിൽ പ്രതിഷേധറാലിയും പൊതുസമ്മേളനവും നാളെ

ആലുവ: ഛത്തീസ്‌ഗഡിൽ സിസ്റ്റർ പ്രീതി മേരിയെയും സിസ്റ്റർ വന്ദന ഫ്രാൻസിസിനെയും അന്യായമായി തുറുങ്കിലടച്ച സർക്കാരിന്‍റെ ഭരണകൂട ഭീകരതയ്ക്കെതിരേ ആലുവയിൽ ഇന്ന് പ്രതിഷേധറാലിയും പൊതുസമ്മേളനവും നടത്തുമെന്ന് സംഘാടകർ പത്രസമ്മേളനത്തിൽ അറിയിച്ചു. ആലുവ സോണിലെ ക്രൈസ്‌തവ കൂട്ടായ്മയിലെ 16 പള്ളികളുടെയും 50 ഓളം സന്യസ്‌ത സ്ഥാപനങ്ങളുടെയും ആഭിമുഖ്യത്തിലാണ് പ്രതിഷേധപരിപാടി. ഇന്നു വൈകുന്നേരം നാലിന് ഡൊമിനിക് ദേവാലയ അങ്കണത്തിൽനിന്ന് റാലി ആരംഭിക്കും. സെന്‍റ് ആന്‍റണീസ് ആശ്രമ അങ്കണത്തിൽ സമാപിക്കും. തുടർന്നു നടക്കുന്ന പൊതുസമ്മേളനം ബിഷപ് മാർ തോമസ് ചക്യത്ത് ഉദ്ഘാടനം ചെയ്യും. വികാരി ഫാ. ജോസഫ് കരുമത്തി അധ്യക്ഷത വഹിക്കും. മന്ത്രി പി. രാജീവ് മുഖ്യാതിഥിയായിരിക്കും. ഫാ. കുര്യാക്കോസ് മുണ്ടാടൻ മുഖ്യ പ്രഭാഷണം നടത്തും. ബെന്നി ബഹനാൻ എംപി, അൻവർ സാദത്ത് എംഎൽഎ, മുനിസിപ്പല്‍ ചെയര്‍മാന്‍ എം.ഒ. ജോണ്‍, സ്വാമി ധർമ ചൈതന്യ, ഫാ.പോൾ നെടുഞ്ചാലിൽ എന്നിവർ സംസാരിക്കും. സന്യസ്‌തരും അൽമായരും അടക്കം അയ്യായിരത്തോളംപേർ പങ്കെടുക്കുന്ന റാലി ഗതാഗതതടസം ഇല്ലാതെ നടത്താനുള്ള മുൻകരുതൽ ഒരുക്കിയിട്ടുണ്ടെന്ന് ഫാ. ജെറിൻ കുരിശിങ്കൽ, ഫാ. നിഖിൽ മുളവരിക്കൽ എന്നിവർ പത്രസമ്മേളനത്തിൽ അറിയിച്ചു.

"വിളക്കുമരച്ചുവട്ടിൽ - 2025' സംഘടിപ്പിച്ചു

അങ്കമാലി: ലിറ്റിൽ ഫ്ളവർ ആശുപത്രിയിൽ പ്രവർത്തിക്കുന്ന സ്വകാര്യ മേഖലയിൽ രാജ്യത്തെ ആദ്യ നേത്രബാങ്ക് ആയ കേരള നേത്രബാങ്ക് അസോസിയേഷന്‍റെ നേതൃത്വത്തിൽ സംസ്‌ഥാനത്തിന്‍റെ വിവിധ ഭാഗങ്ങളിൽ നേത്രദാന രംഗത്ത് സേവനമനുഷ്‌ഠിക്കുന്ന സന്നദ്ധ പ്രവർത്തകരുടെ സംഗമം "വിളക്കുമരച്ചുവട്ടിൽ - 2025' ഡയറക്ടർ ജേക്കബ് ജി. പാലയ്ക്കാപ്പിള്ളി ഉദ്ഘാടനം ചെയ്‌തു. അസിസ്‌റ്റന്‍റ് ഡയറക്ടർ ഫാ. വർഗീസ് പാലാട്ടി, നേത്രബാങ്ക് മെഡിക്കൽ ഡയറക്ടർ ഡോ. ഹില്‌ഡ നിക്‌സൺ, വൈസ് പ്രസിഡന്‍റ് ടി.ജെ. പോൾ, ഡോ. തോമസ് ചെറിയാൻ, വി.കെ. ആന്‍റണി മാസ്‌റ്റർ എന്നിവർ പ്രസംഗിച്ചു. കാൽ നൂറ്റാണ്ടിലധികമായി ഈ രംഗത്ത് പ്രവർത്തിക്കുന്നവരെ ചടങ്ങിൽ ആദരിച്ചു. നേത്രദാന രംഗത്ത് പ്രവർത്തിക്കുന്നവർ അനുഭവങ്ങൾ പങ്കുവച്ചു. സംശയങ്ങൾക്ക് കോർണിയ വിദഗ്ദ്‌ധർ മറുപടി നൽകി. കണ്ണ് മാറ്റിവയ്ക്കൽ ശസ്ത്രക്രിയയിലൂടെ കാഴ്ച്ച ലഭിച്ചവർ അപൂർവ അനുഭവങ്ങൾ പങ്കുവച്ചു. ഇരുന്നൂറോളം പേർ പങ്കെടുത്തു.

മലയാറ്റൂർ കാരക്കാട് : പാണ്ഡ്യൻചിറയിൽ പശുവിനെയും കിടാരിയെയും കൊന്നത് പുലി

കാലടി: മലയാറ്റൂർ കാരക്കാട് ഫോറസ്റ്റ് ഓഫീസിന് സമീപം യൂക്കാലി പാണ്ഡ്യൻചിറയിൽ കഴിഞ്ഞ ദിവസങ്ങളിൽ രണ്ടു പറമ്പുകളിൽ മേഞ്ഞ് നടന്നിരുന്ന കറവപ്പശുവിനെയും, കിടാരിയെയും കടിച്ച് കൊന്നത് പുലിയെന്ന് സ്ഥീരികരിച്ചതായി കാരക്കാട് ഫോറസ്റ്റ് ഡെപ്യൂട്ടി റെയഞ്ച് ഓഫിസർ കെ അനിൽകുമാർ പറഞ്ഞു. കഴിഞ്ഞ ദിവസം ഇവിടെ സ്ഥാപിച്ച കാമറയിൽ പുലിയുടെ ചിത്രം പതിഞ്ഞതായ് അദ്ദേഹം പറഞ്ഞു. മേൽ നടപടികൾ സ്വീകരിക്കാൻ ആവശ്യപ്പെട്ടുള്ള റിപ്പോർട്ട് ബന്ധപ്പെട്ടവർക്ക് നല്കി. എൻ ടി പി എ കമ്മറ്റിയുടെ നേതൃത്വത്തിലായിരിക്കും കൂടു വെയ്ക്കുന്നതുൾപ്പെടെയുള്ള കാര്യങ്ങളിൽ തീരുമാനമെടുക്കുക. ക്ഷീര കർഷകനായ ചേല ചുവട് ആപ്പിള്ളി വീട്ടിൽ പാപ്പുട്ടന്‍റെ വളർത്ത് പശുവിനെയും നടുവട്ടം പൂണേലി ജോഷിയുടെ പശു കിടാരിയെയുമാണ് പുലി കടിച്ച് കൊന്നത്. പുലിയെന്ന് സ്ഥീരികരണം ലഭിച്ചതിനാൽ ജനങ്ങൾ ജാഗ്രത പാലിക്കണമെന്ന് ഉദ്യോഗസ്ഥർ പറഞ്ഞു. പകലും, രാത്രിയും ഈ മേഖലയിൽ ഒഴിഞ്ഞ പറമ്പുകളിലേക്ക് കന്നുകാലികളെ മേയാൻ വിടരുത്. മുൻകരുതലിന്‍റെ ഭാഗമായി മേഖലയിലെ ജനങ്ങൾക്ക് ജാഗ്രതാ നിർദേശം നല്കി. പകലും, രാത്രിയും ഫോറസ്റ്റ് ഉദ്യോഗസ്ഥരുടെ പട്രോളിംഗ് ആരംഭിച്ചു. ആൾ താമസമില്ലാതെ കിടക്കുന്ന പറമ്പുകളിൽ കാടുപിടിച്ചു കിടക്കുന്ന സ്ഥലങ്ങൾ ഭൂവുടമകൾ വെട്ടിത്തെളിച്ച് മാലിന്യ മുക്തമാക്കണമെന്ന് പഞ്ചായത്ത് പ്രസിഡന്‍റ് ജോയി അവോക്കാരൻ അറിയിച്ചു.

കന്യാസ്ത്രീകളുടെ അറസ്റ്റ് : മൗലികാവകാശങ്ങളിലേക്കുള്ള കടന്നുകയറ്റം: കർഷക യൂണിയൻ

മൂവാറ്റുപുഴ : കന്യാസ്ത്രീകളെ അകാരണമായി അറസ്റ്റ് ചെയ്ത് ജയിലിലാക്കിയ സംഭവം ഭരണഘടന അനുവദിച്ചു നല്‍കുന്ന മൗലികാവകാശങ്ങളിലുള്ള കടന്നുകയറ്റവും ന്യൂനപക്ഷാവകാശ ലംഘനവുമാണെന്ന് കേരള കര്‍ഷക യൂണിയന്‍ ജില്ലാ കമ്മിറ്റി. സാമൂഹിക പുരോഗതിക്കും മനുഷ്യന്‍റെ സമഗ്ര വളര്‍ച്ചയ്ക്കു വേണ്ടിയും രോഗികള്‍ക്കും അശരണര്‍ക്കും ആശ്രയവുമായിട്ടാണ് വിവിധ ക്രൈസ്തവ സഭാ സന്യാസിനിമാരും വൈദികരും സേവനമനുഷ്ടിക്കുന്നത്. കുഷ്ഠരോഗ നിര്‍മാര്‍ജനത്തിലും രോഗീപരിചരണത്തിലും വലിയ സംഭാവനകള്‍ നല്‍കിക്കൊണ്ടിരിക്കുന്ന അസീസി സിസ്റ്റേഴ്‌സ് ഓഫ് മേരി ഇമ്മാക്യൂലേറ്റ് സന്യാസസഭയിലെ ഗ്രീന്‍ ഗാര്‍ഡന്‍സ് അംഗങ്ങളായ സിസ്റ്റര്‍ വന്ദന ഫ്രാന്‍സീസ്, സിസ്റ്റര്‍ പ്രീതി മേരി എന്നിവരെ ആള്‍ക്കൂട്ട വിചാരണയ്ക്ക് വിധേയരാക്കിയത് നിയമ സംവിധാനങ്ങള്‍ പക്ഷപാതപരമായി പെരുമാറുന്നുവെന്നതിന്‍റെ തെളിവാണ്. ബജ്‌റംഗ്ദള്‍ പോലുള്ള തീവ്രവാദ സംഘടനകള്‍ രാജ്യത്തിന്‍റെ ഭരണഘടനാ സംരക്ഷകരാകുന്നത് അപകടകരമാണെന്ന് യോഗം വിലയിരുത്തി. ജില്ലാ പ്രസിഡന്‍റ് വിനോദ് ജോണ്‍ അധ്യക്ഷത വഹിച്ചു. സംസ്ഥാന പ്രസിഡന്‍റ് വര്‍ഗീസ് വെട്ടിയാങ്കല്‍, സംസ്ഥാന സെക്രട്ടറിമാരായ സോജന്‍ പിട്ടാപ്പിള്ളില്‍, ജോണി പുളിന്തടം, ആന്‍റണി ഓലിയപ്പുറം, ടി.ഡി. സ്റ്റീഫന്‍, ജില്ലാ ജനറല്‍ സെക്രട്ടറി സജി തെക്കേക്കര, ജില്ലാ ഭാരവാഹികളായ ബിജു വെട്ടികുഴ, ജോസ് തുടുമ്മേല്‍, ബിനോയ് മെതിപ്പാറ എന്നിവര്‍ പ്രസംഗിച്ചു. മൂവാറ്റുപുഴയിൽ പ്രതിഷേധം ഇരന്പി മൂവാറ്റുപുഴ: കന്യാസ്ത്രീകളെ അന്യായമായി അറസ്റ്റ് ചെയ്തതിനെ നാസ് ഓഡിറ്റോറിയത്തില്‍ ചേര്‍ന്ന സാംസ്‌കാരിക പ്രവര്‍ത്തകരുടെ യോഗം അപലപിച്ചു. ഇന്ത്യയുടെ മതനിരപേക്ഷതയ്ക്കും ബഹുസ്വരതയ്ക്കും കളങ്കമേല്പിക്കുന്ന കാര്യങ്ങളാണ് ഛത്തീസ്ഗഡില്‍ ഉണ്ടായിരിക്കുന്നത്. പി.എസ്.എ. ലത്തീഫ് ഉദ്ഘാടനം ചെയ്തു. നാസ് പ്രസിഡന്‍റ് ഡോ. വിന്‍സെന്‍റ് മാളിയേക്കല്‍ അധ്യക്ഷത വഹിച്ച യോഗത്തിൽ പായിപ്ര കൃഷ്ണന്‍, എം.എന്‍. രാധാകൃഷ്ണന്‍ , ബെന്‍സി മണിത്തോട്ടം, ഒ.എ. ഐസക്ക് എന്നിവര്‍ പ്രസംഗിച്ചു. മൂവാറ്റുപുഴ: എൽഡിഎഫ് മൂവാറ്റുപുഴ മുനിസിപ്പൽ കമ്മിറ്റിയുടെ നേതൃത്വത്തിൽ പ്രതിഷേധ ജ്വല തെളിയിച്ചു. മൂവാറ്റുപുഴ പിഒ ജംഗ്ഷനിൽ നടത്തിയ പ്രതിഷേധ ജ്വാല തെളിയിക്കലും യോഗവും സിപിഎം ഏരിയ സെക്രട്ടറി അനീഷ് എം. മാത്യു ഉദ്ഘാടനം ചെയ്തു. ടി .കെ. അലിക്കുഞ്ഞ് അധ്യക്ഷത വഹിച്ചു. എൽഡിഎഫ് നേതാക്കളായ ജോളി പൊട്ടയ്ക്കൽ, യു.ആർ. ബാബു, കെ.എ. നവാസ്, സജി ജോർജ്, കെ.ജി. അനിൽകുമാർ തുടങ്ങിയവർ പ്രസംഗിച്ചു. മൂവാറ്റുപുഴ: കന്യാസ്ത്രീകളെ ആള്‍ക്കൂട്ട വിചാരണ നടത്തി ജയിലില്‍ അടച്ചതില്‍ പ്രതിഷേധിച്ച് സിപിഐ ആവോലി ലോക്കല്‍ കമ്മിറ്റിയുടെ നേതൃത്വത്തില്‍ പ്രതിഷേധ പ്രകടനവും യോഗവും നടത്തി. പ്രതിഷേധ യോഗം സിപിഐ മണ്ഡലം സെക്രട്ടറി ജോളി പൊട്ടയ്ക്കല്‍ ഉദ്ഘാടനം ചെയ്തു. ലോക്കല്‍ സെക്രട്ടറി എം.കെ. അജി അധ്യക്ഷത വഹിച്ചു. മണ്ഡലം കമ്മിറ്റിയംഗങ്ങളായ കെ.ഇ. ഷാജി, കെ.ബി. നിസാര്‍, ഗോവിന്ദ് എസ്. കുന്നുംപുറം, എല്‍ഡിഎഫ് കണ്‍വീനര്‍ കെ.ഇ. മജീദ്, ബ്ലോക്ക് പഞ്ചായത്തംഗം സിബിള്‍ സാബു, പഞ്ചായത്തംഗം കെ.കെ. ശശി എന്നിവര്‍ പ്രസംഗിച്ചു. കോലഞ്ചേരിയിൽ പ്രതിഷേധകൂട്ടായ്മ കോലഞ്ചേരി: കന്യാസ്ത്രീകളെ അന്യായമായി തുറങ്കലിൽ അടച്ച നടപടിയിൽ പ്രതിഷേധിച്ച് പുത്തൻകുരിശ് മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധ കൂട്ടായ്മ സംഘടിപ്പിച്ചു. പുത്തൻകുരിശ് മണ്ഡലം കോൺഗ്രസ് കമ്മിറ്റി പ്രസിഡന്‍റ് മനോജ് കാരക്കാട്ടിന്‍റെ അധ്യക്ഷതയിൽ കൂടിയ യോഗം മുൻ എംപി രമ്യ ഹരിദാസ് ഉദ്ഘാടനം ചെയ്തു. ഡിസിസി സെക്രട്ടറി സുജിത്ത് പോൾ, കെ.പി. തങ്കപ്പൻ, പുത്തൻകുരിശ് ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് പോൾസൺ പീറ്റർ, മിൽമ ചെയർമാൻ ശ്രീവത്സലൻ പിള്ള, മഹിള കോൺഗ്രസ് ബ്ലോക്ക് പ്രസിഡന്‍റ് ബിന്ദു റെജി, ജില്ലാ പഞ്ചായത്ത് മെമ്പർ ലിസി അലക്സ്, മഹിളാ കോൺഗ്രസ് മണ്ഡലം പ്രസിഡന്‍റ് സിജി എൽദോ, ദളിത് കോൺഗ്രസ് മണ്ഡലം പ്രസിഡന്‍റ് പി.കെ. സുകുമാരൻ, എം.എം. ലത്തീഫ്, ജോർജ് ചാലിൽ, അരുൺ പാലിയത്ത്, എനിൽ ജോയ്, പി.എസ്. ഷൈജു , ഓമന നന്ദകുമാർ, ബിനിത പീറ്റർ, സജിത പ്രദീപ്, റൈമോൾ തുടങ്ങിയവർ പ്രസംഗിച്ചു. ആയവനയിൽ ഐക്യദാര്‍ഢ്യ കൂട്ടായ്മ മൂവാറ്റുപുഴ: ഛത്തീസ്ഗഡില്‍ അറസ്റ്റിലായ കന്യാസ്ത്രീകള്‍ക്ക് ഐക്യദാര്‍ഢ്യം പ്രഖ്യാപിച്ച് കോണ്‍ഗ്രസ് ആയവന മണ്ഡലം കമ്മിറ്റിയുടെ നേതൃത്വത്തില്‍ സായാഹ്ന ഐക്യദാര്‍ഢ്യ കൂട്ടായ്മ സംഘടിപ്പിച്ചു. ബ്ലോക്ക് കോണ്‍ഗ്രസ് കമ്മിറ്റിയുടെ പ്രസിഡന്‍റ് സുഭാഷ് കടയ്‌ക്കോട്ട് ഉദ്ഘാടനം ചെയ്തു. കോണ്‍ഗ്രസ് മണ്ഡലം കമ്മിറ്റി പ്രസിഡന്‍റ് ശ്രീജിമോന്‍ പോള്‍ അധ്യക്ഷത വഹിച്ചു. യോഗത്തില്‍ വൈസ് പ്രസിഡന്‍റുമാരായ രാജേഷ് ജെയിംസ്, ടോമി തന്നിട്ടാമാക്കല്‍, ബ്ലോക്ക് പഞ്ചായത്തങ്ങഗം മേഴ്സി ജോര്‍ജ്, സേവാദള്‍ സംസ്ഥാന കമ്മിറ്റി അംഗം ഭദ്രപ്രസാദ്,ജോര്‍ജ് ആക്കിത്തടത്തില്‍ എന്നിവര്‍ പ്രസംഗിച്ചു.

എസ്പിസി ദിനാഘോഷം

കടയിരുപ്പ് ഹൈസ്കൂളിൽ ബോധവത്കരണ ക്ലാസ് കോലഞ്ചേരി:കടയിരുപ്പ് ഹൈസ്കൂളിലെ സ്റ്റുഡന്‍റ്സ് പോലീസ് കേഡറ്റുകൾക്ക് മുങ്ങിമരണ പ്രതിരോധത്തെക്കുറിച്ചുള്ള പഠനക്ലാസ് നടത്തി. പട്ടിമറ്റം അഗ്നി രക്ഷാനിലയം സ്റ്റേഷൻ ഓഫീസർ എൻ.എച്ച്. അസൈനാർ രാവിലെ 10ന് ക്ലാസ് ഉദ്ഘാടനം ചെയ്തു. സ്റ്റുഡന്‍റ് പോലീസ് കേഡറ്റ് ദിനത്തിന്‍റെ ഭാഗമായിട്ടാണ് ക്ലാസ് സംഘടിപ്പിച്ചത്. സിപിആർ, വിവിധതരം ഫ്ലോട്ടിംഗ് ഉപകരണങ്ങളുടെ ഉപയോഗം,പ്രഥമ ശുശ്രൂഷ, മുങ്ങിമരണ പ്രതിരോധ മാർഗങ്ങൾ എന്നിവയെക്കുറിച്ച് ഫയർ ആൻഡ് റെസ്ക്യൂ ഓഫീസർമാരായ അഖിൽ ദേവ്,പി.പി. ഷിജിൽ എന്നിവർ ക്ലാസ് നയിച്ചു. മൂവാറ്റുപുഴ എസ്എന്‍ഡിപി എച്ച്എസ്എസില്‍ മൂവാറ്റുപുഴ: മൂവാറ്റുപുഴ എസ്എന്‍ഡിപി എച്ച്എസ്എസില്‍ എസ്പിസി ദിനാഘോഷം സംഘടിപ്പിച്ചു. നഗരസഭാധ്യക്ഷന്‍ പി.പി. എല്‍ദോസ് ഉദ്ഘാടനം ചെയ്തു. ഡിവൈഎസ്പി പി.എം. ബൈജു മുഖ്യപ്രഭാഷണം നടത്തി. സ്‌കൂള്‍ മാനേജര്‍ വി.കെ. നാരായണന്‍ അധ്യക്ഷത വഹിച്ചു. നഗരസഭാംഗം ജിനു മടേക്കല്‍, യൂണിയന്‍ സെക്രട്ടറി അനില്‍കുമാര്‍, പിടിഎ പ്രസിഡന്‍റ് എം.കെ. സിബി, പ്രധാനാധ്യാപിക വി.എസ്. ധന്യ, കമ്മ്യൂണിറ്റി പോലീസ് ഓഫീസര്‍ പി.എ. കബീര്‍ എന്നിവര്‍ പ്രസംഗിച്ചു. സീനിയര്‍ സിവില്‍ പോലീസ് ഓഫീസര്‍ കെ.ആര്‍. ശശികുമാര്‍ ക്ലാസ് നയിച്ചു.

ആനിക്കാട് റോഡിൽ നിറയെ കുഴികൾ; യാത്ര ദുരിതം

വാഴക്കുളം: ഏനാനല്ലൂർ കുഴുമ്പിത്താഴത്തിനു സമീപം ആനിക്കാട് റോഡിൽ കോട്ട റോഡിനു മുമ്പുള്ള അര കിലോമീറ്ററോളം ദൂരം തകർന്ന് ഗതാഗതയോഗ്യമല്ലാതായി. ഈ ഭാഗത്ത് റോഡിൽ നിറയെ വൻ കുഴികളാണ്. കാൽനടയാത്രികർക്കും വാഹനയാത്രികർക്കും ഇതുവഴിയുള്ള യാത്ര ദുരിതമായിരിക്കുകയാണ്. മഴവെള്ളം കെട്ടിനിന്ന് റോഡിലെ കുഴിയുടെ ആഴമറിയാതെ ഇരുചക്രവാഹനങ്ങൾ അപകടത്തിൽപ്പെടുന്നത് പതിവാണെന്ന് പ്രദേശവാസികൾ പറഞ്ഞു. മറ്റു ചില വലിയ വാഹനങ്ങൾ റോഡിലെ കുഴിയിൽ താഴ്ന്നു പോകുന്നതും പതിവാണ്. അതിനാൽ ഇപ്പോൾ വലിയ വാഹനങ്ങൾ ഈ റൂട്ട് ഒഴിവാക്കിയാണ് യാത്ര ചെയ്യുന്നത്. റോഡ് ടാറിംഗ് അടിയന്തരമായി നടത്തണമെന്നാവശ്യപ്പെട്ട് പൊതുമരാമത്തുവകുപ്പ് അസി. എക്സിക്യൂട്ടീവ് എൻജിനീയർക്ക് പ്രദേശവാസികൾ പരാതി നൽകിയിട്ടുണ്ട്.

ബാസ്കറ്റ്ബോൾ കിരീടം കാർമൽ സ്കൂളിന്

വാഴക്കുളം: ലൂർദിയൻ ട്രോഫി അഖില കേരള ഇന്‍റർ സ്കൂൾ ബാസ്കറ്റ്ബോൾ കിരീടം കാർമൽ സിഎംഐ പബ്ലിക് സ്കൂളിന്. കോട്ടയം ലൂർദ് പബ്ലിക് സ്കൂൾ സംഘടിപ്പിച്ച ഇരുപതാമത് ലൂർദിയൻ ട്രോഫി അഖില കേരള ഇന്‍റർ സ്കൂൾ ബാസ്കറ്റ്ബോൾ കിരീടമാണ് കാർമൽ സ്കൂളിന് ലഭിച്ചത്. സീനിയർ ആൺകുട്ടികളുടെ ഫൈനൽ മത്സരത്തിൽ ആതിഥേയരായ ലൂർദ് പബ്ലിക് സ്കൂളിനെ 36-21 എന്ന സ്കോറിനാണ് കാർമൽ സ്കൂൾ പരാജയപ്പെടുത്തിയത്. ടൂർണമെന്‍റിലെ എല്ലാ മത്സരങ്ങളിലും മികച്ച പ്രകടനം കാഴ്ചവച്ച കാർമൽ സ്കൂളിലെ നൈജൽ ജേക്കബ് ടൂർണമെന്‍റിലെ ഏറ്റവും മികച്ച കളിക്കാരനുള്ള പുരസ്കാരത്തിന് അർഹത നേടി. കാർമൽ സ്കൂൾ ബാസ്കറ്റ്ബോൾ ടീമംഗങ്ങളെ സ്കൂൾ മാനേജർ ഫാ.തോമസ് മഞ്ഞക്കുന്നേൽ, പ്രിൻസിപ്പൽ ഫാ. ജോൺസൺ വെട്ടിക്കുഴിയിൽ, വൈസ് പ്രിൻസിപ്പൽ ഫാ. ബിഖിൽ അരഞ്ഞാണിയിൽ, അധ്യാപകർ, പിടിഎ പ്രതിനിധികൾ തുടങ്ങിയവർ അഭിനന്ദിച്ചു.

മാറാടിയിൽ പൈനാപ്പിൾ കയറ്റി വന്ന വാഹനം മറിഞ്ഞു; ഡ്രൈവറെ രക്ഷപ്പെടുത്തി

മൂവാറ്റുപുഴ: മാറാടി പഞ്ചായത്തിലെ കായനാട്-ശൂലം റോഡിൽ പൈനാപ്പിൾ കയറ്റി വന്ന വാഹനം മറിഞ്ഞ് കാബിനിൽ കുടുങ്ങിയ ഡ്രൈവറെയും സഹായിയെയും അഗ്നിരക്ഷാ സേന രക്ഷപ്പെടുത്തി. വാഹനത്തിൽ കുടുങ്ങിയതിനെ തുടർന്ന് ഗുരുതരമായി പരിക്കേറ്റ ഒഡീഷ സ്വദേശിയായ തൊഴിലാളിയെ പിന്നീട് ആശുപത്രിയിൽ പ്രവേശിപ്പിച്ചു. ഇന്നലെ രാവിലെ 11 ഓടെയാണ് അപകടം. മാറാടി പഞ്ചായത്തിലെ ഒന്നാം വാർഡിൽ കായനാട് യുപി. സ്കൂൾ-ശൂലം റോഡിൽ ഇറക്കത്തിൽ വച്ച് പിക് അപ്പ് ജീപ്പ് തെന്നി റോഡിന് താഴേക്ക് മറിയുകയായിരുന്നു. താഴെയുണ്ടായിരുന്ന റബർ മരത്തിൽ തങ്ങി നിന്നതിനാൽ വാഹനം പൂർണമായും താഴേക്ക് പോയില്ല. ഡ്രൈവറായ ഈസ്റ്റ് മാറാടി സ്വദേശി കുര്യാക്കോസ് (56), സഹായിയായ ഒഡീഷ സ്വദേശി ടൂണോ (24) എന്നിവർ വാഹനത്തിന്‍റെ കാബിനിൽ കുടുങ്ങി. ഇതിൽ ടൂണോയുടെ കൈ വാഹനത്തിനും റബർ മരത്തിനും ഇടയിൽ കുടുങ്ങുകയായിരുന്നു. വിവരമറിഞ്ഞ് സ്ഥലത്തെത്തിയ മൂവാറ്റുപുഴ അഗ്നിരക്ഷാ സേനാംഗങ്ങൾ വാഹനം കൂടുതൽ മറിയാതിരിക്കാൻ കയറുപയോഗിച്ച് കെട്ടി ഉറപ്പിച്ചു. തുടർന്ന് ചെയിൻ സോ ഉപയോഗിച്ച് റബ്ബർ മരം മുറിച്ചുമാറ്റിയ ശേഷം ഹൈഡ്രോളിക് സ്പ്രെഡർ ഉപയോഗിച്ച് വാഹനത്തിന്‍റെ വാതിൽ വികസിപ്പിച്ചാണ് കുടുങ്ങിയ കൈ പുറത്തെടുത്തത്. രക്ഷാപ്രവർത്തനങ്ങൾക്കൊടുവിൽ ഇരുവരെയും സുരക്ഷിതമായി പുറത്തെത്തിച്ചു. പരിക്കേറ്റ ടൂണോയെ അഗ്നിരക്ഷാ സേനയുടെ ആംബുലൻസിൽ മൂവാറ്റുപുഴ താലൂക്ക് ആശുപത്രിയിൽ പ്രവേശിപ്പിച്ചു.

വൈഎംസിഎ വാർഷികം

പിറവം: രാമമംഗലം വൈഎംസിഎയുടെ വാർഷികവും പുതിയ ഭാരവാഹികളുടെ സ്ഥാനാരോഹണ ചടങ്ങും അനൂപ് ജേക്കബ് എംഎൽഎ ഉദ്ഘാടനം ചെയ്തു. വൈഎംസിഎ പ്രസിഡന്‍റ് സി.സി. ജോൺ അധ്യക്ഷത വഹിച്ചു. ദേശീയ തലത്തിൽ വൈഎംസിഎ നടപ്പാക്കുന്ന ഡയാലിസിസ് യോജന പദ്ധതി ജനറൽ സെക്രട്ടറി എൻ.വി. എൽദോസ് ഉദ്ഘാടനം ചെയ്തു. ആദ്യഘട്ടത്തിൽ 25 വൃക്ക രോഗികൾക്ക് ഇതിലൂടെ സഹായം ലഭിക്കും. പഞ്ചായത്ത് പ്രസിഡന്‍റ് പി.വി. സ്റ്റീഫൻ, ഫാ. പി.സി. മാത്യു, അനിൽ ജോർജ്, ബൈജു കുര്യാക്കോസ്, കെ. വി. രാജു, എൽദോ എബ്രഹാം എന്നിവർ പ്രസംഗിച്ചു.

ഗവ. യുപി. സ്കൂൾ കുറിഞ്ഞിയിൽ "ചങ്ങാതിക്ക് ഒരു തൈ' പദ്ധതി

കോലഞ്ചേരി: ഹരിത കേരള മിഷൻ നടപ്പാക്കുന്ന ജനകീയ വൃക്ഷവത്കരണ പദ്ധതിയായ 'ചങ്ങാതിക്ക് ഒരു തൈ' ഗവൺമെന്‍റ് യുപി സ്കൂൾ കുറിഞ്ഞിയിൽ നടത്തി. പൂതൃക്ക പഞ്ചായത്ത് പ്രസിഡന്‍റ് മാത്യൂസ് കുമ്മണ്ണൂർ ചടങ്ങ് ഉദ്ഘാടനം ചെയ്തു. വാർഡ് മെമ്പർ മോൻസി പോൾ, സ്കൂൾ പ്രധാനാധ്യാപിക സാന്‍റി പോൾ എന്നിവർ സംസാരിച്ചു. ഹരിത കേരളം മിഷൻ കോ-ഓർഡിനേറ്റർ എം.കെ. അജ്ഞലി പദ്ധതി വിശദീകരണം നടത്തി. ശേഷം ഔഷധ ചെടികളുടെ പ്രദർശനം സ്കൂളിൽ നടത്തി.

കീരംപാറയിൽ ആനയെ തുരത്തൽ ദൗത്യം വിജയത്തിലേക്ക്

കോതതമംഗം: കീരംപാറ പഞ്ചായത്തിലെ ആനയെ തുരത്തുന്ന ദൗത്യം ഭാഗികവിജയത്തിലേക്ക്. പഞ്ചായത്തിലെ പ്ലാന്‍റേഷനോട് ചേര്‍ന്ന ജനവാസ മേഖലയ്ക്ക് ഭീഷണിയായി മാറിയ നാല് കാട്ടാനകളെ പ്രത്യേക ദൗത്യ സംഘത്തിന്‍റെ നേതൃത്വത്തില്‍ ഇന്നലെ തുരത്തിയോടിച്ച് പെരിയാര്‍ തീരത്ത് എത്തിച്ചു. പുന്നേക്കാട്-തട്ടേക്കാട് റോഡിലും പരിസരത്തുമായുള്ള ആന സാന്നിധ്യം വലിയ പ്രതിഷേധത്തിന് ഇടയാക്കിയിരുന്നു. കുട്ടമ്പുഴ, കീരംപാറ പഞ്ചായത്ത് പ്രസിഡന്‍റുമാരുടെ നേതൃത്വത്തില്‍ പഞ്ചായത്തംഗങ്ങള്‍ പുന്നേക്കാട് ഫോറസ്റ്റ് ഓഫീസില്‍ നടത്തിയ കുത്തിയിരിപ്പ് സമരത്തിനൊടുവില്‍ ഡിഎഫ്ഒ നല്‍കിയ ഉറപ്പുകളിലൊന്നായിരുന്നു ആനകളെ തുരത്തല്‍. ചേലമല കേന്ദ്രമാക്കി ഏതാനും മാസമായി എട്ട് കൊമ്പന്മാരായിരുന്നു പ്രദേശത്ത് വിളയാടിയിരുന്നത്. ഇതില്‍ നാലെണ്ണത്തിനെ കാണാനില്ല. ഇവ പെരിയാര്‍ കടന്ന് വനത്തിലേക്ക് പോയതായാണ് നിഗമനം. ബാക്കിയുള്ള നാല് കൊമ്പന്മാരാണ് മൂന്നാഴ്ചയോളമായി വീടുകള്‍ക്ക് സമീപവും കൃഷിനാശവുമായി എത്തിയിരുന്നത്. ഇന്നലെ മണിക്കൂറുകളുടെ പരിശ്രമത്തിനൊടുവിലാണ് ഇവയെ പുഴ തീരത്തെത്തിച്ചത്. രാവിലെ 10ന് തുടങ്ങിയ ദൗത്യം അവസാനിച്ചത് ഉച്ചക്ക് രണ്ടിന്. പുന്നേക്കാട് ഓടപ്പനാല്‍ ഭാഗത്ത് നിന്നിരുന്ന കൊമ്പന്മാരെ പടക്കം പൊട്ടിച്ചും തീപ്പന്തം കാട്ടിയും ഒച്ചവച്ചും ആണ് ഓടിച്ചത്. ആനയെ തുരത്തിയോടിക്കുന്ന സമയത്ത് പുന്നേക്കാട് തട്ടേക്കാട് റോഡില്‍ ഗതാഗത നിയന്ത്രണം ഏര്‍പ്പെടുത്തിയിരുന്നു. ഓടപ്പനാലില്‍നിന്ന് ഓടിച്ച ആനകള്‍ ചേലമലയിലേക്കാണ് ഓടിക്കയറിയത്. ഇവിടെ നിന്ന് ഓടിച്ചപ്പോള്‍ പിന്നീട് പുഴ തീരത്തെ സമീപത്തെ പാത്തുമ്മകടവ് ഭാഗത്ത് എത്തിച്ചിരിക്കുകയാണ്. മണിക്കൂറുകളുടെ ഓട്ടത്തില്‍ ആനകൂട്ടത്തില്‍ ഭയന്ന് പുഴ തീരത്ത് തമ്പടിച്ചിരിക്കുകയാണ്. രാത്രിയോടെ ആനകള്‍ പുഴ കടന്ന് വനത്തിലേക്ക് പോകുമെന്ന പ്രതീക്ഷയിലാണ് ദൗത്യ സംഘം. പഞ്ചായത്ത് പ്രസിഡന്‍റ് ഗോപി മുട്ടത്ത്, റേയ്ഞ്ച് ഓഫീസര്‍ ആര്‍. സഞ്ജീവകുമാര്‍, സെക്ഷന്‍ ഫോറസ്റ്റ് ഓഫീസര്‍ ദിവാകരന്‍, പഞ്ചായത്തംഗങ്ങൾ എന്നിവരുടെ നേതൃത്വത്തില്‍ നടത്തിയ ദൗത്യത്തില്‍ കോതമംഗലം, തട്ടേക്കാട് ഫോറസ്റ്റ് സെക്ഷന്‍ ഓഫീസ് വനപാലകരും പങ്കെടുത്തു.

വയനാട് ദുരന്തം: 42 വിദ്യാർഥികളുടെ പഠനച്ചെലവ് തുക സിബിഎസ്ഇ കൈമാറി

കൊച്ചി: ദുരന്തമുഖങ്ങളില്‍ സഹായഹസ്തവുമായി മറ്റെല്ലാം മറന്ന് കൈകോര്‍ക്കുന്നതാണ് കേരളത്തിന്‍റെ യഥാര്‍ഥ സ്പിരിറ്റെന്ന് നിയുക്ത പൊതുവിദ്യാഭ്യാസ വകുപ്പ് ഡയറക്ടര്‍ ജനറലും എറണാകുളം ജില്ലാ കളക്ടറുമായ എന്‍.എസ്.കെ. ഉമേഷ്. 2018 ലും 2019ല്‍ വയനാട് പുത്തുമല മുതല്‍ ചൂരല്‍മല ദുരന്തം വരെയും അക്കാര്യം താന്‍ നേരിട്ടറിഞ്ഞതാണെന്നും അദ്ദേഹം പറഞ്ഞു. വയനാട് ഉരുള്‍പൊട്ടല്‍ ദുരന്തത്തിനിരയായ ചൂരല്‍മലയിലെ 42 വിദ്യാര്‍ഥികളുടെ പഠനച്ചെലവ് കൗണ്‍സില്‍ ഓഫ് സിബിഎസ്ഇ സ്‌കൂള്‍സ് കേരള (സിസിഎസ്‌കെ) കൈമാറുന്ന ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം. മേപ്പാടി മൗണ്ട് താബോര്‍ ഇംഗ്ലീഷ് സ്‌കൂളിലെ ചൂരല്‍മല സ്വദേശികളായ വിദ്യാര്‍ഥികളുടെ പഠനസഹായത്തിനുള്ള പത്തു ലക്ഷം രൂപയുടെ ചെക്ക് സ്‌കൂള്‍ മാനേജര്‍ സിസ്റ്റര്‍ സലോമിക്ക് കളക്ടര്‍ കൈമാറി. ചടങ്ങില്‍ സിസിഎസ്‌കെ പ്രസിഡന്‍റ് ഇ. രാമന്‍കുട്ടി വാര്യര്‍ അധ്യക്ഷത വഹിച്ചു. നാഷണല്‍ കൗണ്‍സില്‍ ഓഫ് സിബിഎസ്ഇ സ്‌കൂള്‍സ് സെക്രട്ടറി ജനറല്‍ ഡോ. ഇന്ദിര രാജന്‍, സിസിഎസ്‌കെ നോര്‍ത്ത് സോണ്‍ പ്രസിഡന്‍റ ഫാ. ജോണി കാഞ്ഞിരത്തിങ്കല്‍, ജനറല്‍ സെക്രട്ടറി സുചിത്ര ഷൈജിന്ത്, ഭാരതീയ വിദ്യാഭവന്‍ കൊച്ചി കേന്ദ്ര ഡെപ്യൂട്ടി ഡയറക്ടര്‍ കെ. സുരേഷ് തുടങ്ങിയവർ പ്രസംഗിച്ചു. ഉരുള്‍പൊട്ടലുണ്ടായ പ്രദേശത്തെ 44 വിദ്യാര്‍ഥികളാണ് മേപ്പാടി മൗണ്ട് ടാബോര്‍ സ്‌കൂളില്‍ പഠിച്ചിരുന്നത്. രണ്ടുപേര്‍ ദുരന്തത്തില്‍ മരിച്ചു. പഠനം അനിശ്ചിതത്വത്തിലായ 42 വിദ്യാര്‍ഥികളുടെ മുഴുവന്‍ പഠനച്ചെലവുമാണ് കൗണ്‍സില്‍ ഏറ്റെടുത്തത്. സ്ഥലവും വീടും നഷ്‌ടപ്പെട്ടവര്‍ക്ക് അഞ്ചു വീടുകളും സിസിഎസ്‌കെ നിര്‍മിച്ചുനല്‍കുമെന്ന് ഡോ. ഇന്ദിര രാജന്‍ പറഞ്ഞു.

യുവാവിനെ വിഷം കൊടുത്ത് കൊന്ന സംഭവം : പ്രതി നയിച്ചിരുന്നത് കുത്തഴിഞ്ഞ ജീവിതം

കോതമംഗലം: കോതമംഗലത്ത് യുവാവിനെ വിഷം കൊടുത്ത് കൊലപ്പെടുത്തിയ കേസിൽ പ്രതി നയിച്ചിരുന്നത് കുത്തഴിഞ്ഞ ജീവിതം.കോതമംഗലം മാതിരപ്പിള്ളി മേലേത്ത്മാലില്‍ അലിയാരുടെ മകൻ അന്‍സിലിനെ (38) ആണ് പെൺസുഹൃത്ത് അഥീന വിഷം നൽകി കൊലപ്പെടുത്തിയത്. സംഭവത്തിൽ പിണ്ടിമന മാലിപ്പാറ ഇടയത്തുകുടി അഥീനയെ (24) ഇന്നലെ കോടതി റിമാൻഡ് ചെയ്തു. മാതാവ് ലിസി കോവിഡ് പിടിപെട്ട് മരിച്ചശേഷമാണ് അഥീന മാലിപ്പാറയിലെ വീട്ടിൽ ഒറ്റയ്ക്ക് താമസമാക്കിയത്. അൻസിലുമായി അടുപ്പത്തിലാകുംമുമ്പേ കോതമംഗലം സ്വദേശിയായ മറ്റൊരു യുവാവുമായി അഥീന പ്രണയത്തിലായിരുന്നു. ഇയാളുടെ സമ്പാദ്യം കൊണ്ട് നേടിയതാണ് മാലിപ്പാറയിലെ വീടും സ്ഥലവുമെന്നാണ് പറയപ്പെടുന്നത്. പഴയ ആൺ സുഹൃത്ത് വഴിയാണ് അൻസിലുമായി അഥീന പരിചയത്തിലാകുന്നതും അടുപ്പം സ്ഥാപിക്കുന്നതും. ആദ്യ ആൺ സുഹൃത്തിൽനിന്ന് സാമ്പത്തിക നേട്ടങ്ങൾ കുറഞ്ഞപ്പോൾ അയാളിൽനിന്ന് മെല്ലെ അകന്നു. പിന്നീട് പഴയ ആൺ സുഹൃത്തിതിെനെതിരെ പീഡനപരാതി നൽകുകയും അയാളെ കോടതി ശിക്ഷിക്കുകയുമുണ്ടായി. ഇതിനിടെ സമ്പാദ്യമെല്ലാം തീർന്ന് പഴയ സുഹൃത്ത് പാപ്പരായിരുന്നു. ശിക്ഷ കഴിഞ്ഞിറങിയ അയാൾ ഒരു മാസം മുമ്പ് വീട്ടില്‍ അതിക്രമിച്ചു കയറി അഥീനയെ മര്‍ദിക്കുകയും വീട്ടുപകരണങ്ങള്‍ നശിപ്പിക്കുകയും ചെയ്തതിന് കേസുണ്ടായിരുന്നു. ഈ കേസില്‍ യുവാവ് അറസ്റ്റിലായിരുന്നു.ഇതിനെ ചൊല്ലിയും അൻസിലും അഥീനയും പരസ്പരം വഴക്കുണ്ടാക്കിയിരുന്നു. ഇത്തരത്തിൽ യുവാക്കളെ അടുപ്പത്തിലാക്കി സാമ്പത്തിക നേട്ടം ഉണ്ടാക്കിയിരുന്ന അഥീനയുടേത് കുത്തഴിഞ്ഞ ജീവിതമായിരുന്നുവെന്ന് നാട്ടുകാർ പറഞ്ഞു. മാതാവിന്‍റെ മരണശേഷം ഒറ്റയ്ക്ക് താമസമാക്കിയ അഥീന അയൽവാസികളും ബന്ധുക്കളുമായും വലിയ അടുപ്പം പുലര്‍ത്തിയിരുന്നില്ല. പ്രതിയെ കസ്റ്റഡിയിൽ വാങ്ങാൻ പോലീസ് റിമാൻഡിൽ കഴിയുന്ന അഥീനയെ കസ്റ്റഡിയിൽ വാങ്ങാൻ പോലീസ് ഇന്ന് കോടതിയിൽ അപേക്ഷ സമർപ്പിക്കും. ഇന്നലെ അറസ്റ്റ് രേഖപ്പെടുത്തി ചോദ്യം ചെയ്തെങ്കിലും അഥീന സഹകരിച്ചില്ല. മുൻകൂട്ടി മെനഞ്ഞ കഥ വിവരിക്കുകയാണുണ്ടായത്. ആൺസുഹൃത്ത് അൻസിൽ സ്വയം വിഷം കഴിച്ചു എന്ന് വരുത്തിതീർക്കാനുള്ള ശ്രമത്തിലായിരുന്നു അഥീന. ഒരാഴ്ച മുമ്പ് ഇരുവരും തമ്മിൽ സാമ്പത്തിക തർക്കം ഉടലെടുക്കുകയും പോലീസിൽ പരാതിപ്പെടുകയും ഒത്തുതീർക്കുകയും ചെയ്തതാണ്. അതിലെ സാമ്പത്തിക ഇടപാടുകൾ പരിഹരിക്കാത്തതിന്‍റെ പകയാണ് അഥീന തീർത്തതെന്നാണ് ബന്ധുക്കളും നാട്ടുകാരും പറയുന്നത്. കസ്റ്റഡിയിൽ വാങ്ങി ചോദ്യം ചെ്ത് തെളിവെടുക്കുന്നേതോടെയേ കൂടുതൽ വ്യക്തത വരൂ. അഥീന വീട്ടിലെ സിസിടിവിയുടെ ഹാർഡ് ഡിസ്ക് നീക്കം ചെയ്തു. സംഭവങ്ങൾ കാമറയിൽ പകർന്നത് പോലീസ് പരിശോധിക്കുമെന്ന് ഉറപ്പ് ഉള്ളതുകൊണ്ടാവാം ഹാർഡ് ഡിസ്ക് നീക്കം ചെയ്തത്. ഇത് പോലീസ് കണ്ടെടുത്താൽ നിർണായക തെളിവുകൾ ലഭ്യമായേക്കും. അൻസിലിന്‍റെ മരണവെപ്രാളം അഥീന മൊബൈലിൽ പകർത്തിയിരുന്നു. അൻസൽ മരണ വെപ്രാളം കൊണ്ട് പിടയുന്നതിനിടെ അയാളുടെ മൊബൈൽ ഫോൺ അഥീന പിടിച്ച് വാങ്ങി ദൂരേക്ക് എറിഞ്ഞ് കളഞ്ഞു. മറ്റാരെയും വിളിച്ച് രക്ഷപ്പെടാതെ മരണം ഉറപ്പ് വരുത്താനും സത്യം പുറത്ത് വരാതിരിക്കാനുമാകാം അത്തരം ഒരു നീക്കം നടത്തിയത്. അഥീനയെ കസ്റ്റഡിയിൽ ലഭിച്ചാൽ കൂടുതൽ ചോദ്യം ചെയ്യുന്നതിനൊപ്പം ഇവരുടെ വീട്ടിലും പരിശോധന നടത്തും. കൂടാതെ സാമ്പത്തിക ഇടപാടുകളും പരിശോധിക്കും.

എറണാകുളത്തിന്‍റെ സ്വന്തം സാനുമാഷ്

കൊച്ചി: ജനനം ആലുപ്പുഴയിലെങ്കിലും സാനുമാഷ് എല്ലാ ആർഥത്തിലും എറണാകുളത്തിന്‍റെ സ്വന്തമായിരുന്നു.മഹാരാജാസ് കോളജിലെ അധ്യാപന കാലം മുതലിങ്ങോട്ട് മാഷ് എറണാകുളത്തിന്‍റേതും എറണാകുളം മാഷിന്‍റേതുമായി. കൊച്ചിയിൽ സാനുമാഷിന് ഏറ്റവുമധികം ഏറ്റവുമധികം വേദികൾ ഒരുങ്ങിയതെവിടെയെന്നു ചോദിച്ചാൽ ഉത്തരം ഒന്നു മാത്രം ചാവറ കൾച്ചറൽ സെന്‍റർ. വീടിനു സമീപത്തെ സാംസ്കാരിക കേന്ദ്രമെന്ന നിലയിൽ മാത്രല്ല, വിശുദ്ധ ചാവറയച്ചന്‍റെ ദർശനധാരകളോടുള്ള ‌ആരാധനയും അദ്ദേഹത്തെ ചാവറ സെന്‍ററിലേക്കടുപ്പിച്ചു. ചാവറയിലെ ഫാ. റോബി കണ്ണഞ്ചിറ, ഫാ. തോമസ് പുതുശേരി, ഫാ. അനിൽ ഫിലിപ്പ് എന്നീ ഡയറക്ടർമാരുമായി അടുത്ത സൗഹൃദം പുലർത്തിയിരുന്ന എം.കെ. സാനു അവിടുത്തെ മിക്ക പരിപാടികളിലും മുഖ്യാതിഥിയായി. സാനുമാഷിന്‍റെ അവസാനത്തെ പൊതുപരിപാടിയും ചാവറയിലായിരുന്നുവെന്നതും നിയോഗമായി. ജൂലൈ 17ന് (കർക്കിടകം ഒന്ന്) രാമായണ മാസാചരണ പരിപാടി ഉദ്ഘാടനം ചെയ്തത് അദ്ദേഹമായിരുന്നു. രാമായണത്തെക്കുറിച്ചും കർക്കിടകത്തെക്കുറിച്ചും അദ്ദേഹം ദീർഘനേരം അന്നു സംസാരിച്ചു. എച്ച്‌ഐവി ബാധിതരായ കുട്ടികളുടെ ക്ഷേമത്തിനും പുനരധിവാസത്തിനുമായി പ്രവര്‍ത്തിക്കുന്ന ചാവറ ഇന്‍സ്പയര്‍ ചാരിറ്റബിള്‍ സൊസൈറ്റിയുടെ നേതൃത്വത്തിലും പ്രവര്‍ത്തനങ്ങളിലും അദ്ദേഹം സജീവമായിരുന്നു. പ്രായാധിക്യത്തിലും നാടിന്റെ പൊതു ആവശ്യങ്ങള്‍ക്കായി രംഗത്തേക്കിറങ്ങാന്‍ സാനുമാഷിന് ഇന്നും എപ്പോഴും ഉത്സാഹമായിരുന്നു. കൊച്ചിയിൽ കാന്‍സര്‍ ഗവേഷണത്തിനും, ചികിത്സക്കുമായി പ്രത്യേക കേന്ദ്രം സജ്ജമാക്കുന്നതിനായി മുന്നിട്ടിറങ്ങിയവരില്‍ സാനുമാഷും ഉണ്ടായിരുന്നു.

മിനിലോറി ഇടിച്ച് ഒരാൾക്ക് പരിക്ക്

കോതമംഗലം: ഊന്നുകല്ലിനു സമീപം നിയന്ത്രണം വിട്ട മിനിലോറി മറ്റ് രണ്ട് വാഹനങ്ങളിൽ ഇടിച്ച് ഒരാൾക്ക് പരിക്ക്. ഇന്നലെ രാവിലെ ഏഴരയോടെയായിരുന്നു അപകടം. പരിക്കേറ്റ ഓമ്നി വാൻ ഡ്രൈവർ നേര്യമംഗലം സ്വദേശി യൂസഫിനെ കളമശേരി മെഡിക്കൽ കോളജിൽ ചികിത്സയിൽ പ്രവേശിപ്പിച്ചു. കോതമംഗലം ഭാഗത്തു നിന്നു വന്ന മിനിലോറി എതിരെ വന്ന ഓമ്നി വാനിലും റോഡരികിൽ പാർക്ക് ചെയ്തിരുന്ന കാറിലും ഇടിക്കുകയായിരുന്നു. പോലീസും നാട്ടുകാരും ഫയർഫോഴ്‌സും ചേർന്ന് രക്ഷാപ്രവർത്തനം നടത്തി.

കോളജിൽ കൂളിംഗ് ഗ്ലാസ് വച്ചതിന് റാഗ് ചെയ്തതായി പരാതി

ആലുവ: കോളജിൽ കൂളിംഗ് ഗ്ലാസ് വച്ചതിന് സീനിയർ വിദ്യാർഥികൾ റാഗ് ചെയ്യുകയും മർദിക്കുകയും ചെയ്തതായി പരാതി. മർദനത്തെത്തുടർന്ന് മാറമ്പള്ളി എംഇഎസ് കോളജിലെ ഒന്നാംവർഷ വിദ്യാർഥിയെ ആശുപത്രിയിൽ പ്രവേശിപ്പിച്ചു. കോളജിലെ എസ്ഡിഎസ്എ വിദ്യാർഥി ആലുവ പുറയാർ അമ്പാട്ടുകൂടി മുഹമ്മദിന്‍റെ മകൻ മുസ്തഫ മുഹമ്മദ്(18)നാണ് മർദനമേറ്റത്.കോളജിൽ കൂളിംഗ് ഗ്ലാസ് കണ്ണട ധരിച്ചുവന്നതിൻെറ പേരിൽ 15ഓളം സീനിയർ വിദ്യാർത്ഥികൾ റാഗിംഗ് ചെയ്യുകയും മർദിക്കുകയുമായിരുന്നെന്ന് പരാതിയിൽ പറയുന്നു. ജൂലൈ31ന് വൈകീട്ട് 5ഓടെയായിരുന്നു സംഭവം. മർദനമേറ്റ് അവശനായ മുസ്തഫ മുഹമ്മദിനെ ഭീഷണിപ്പെടുത്തി സംഘം വീട്ടിലേക്ക് അയച്ചു. വീട്ടിലെത്തിയ വിദ്യാർഥി ദേഹവേദനയെത്തുടർന്ന് ആലുവയിലെ സ്വകാര്യ ആശുപത്രിയിൽ ചികിത്സ തേടുകയായിരുന്നു. പെരുമ്പാവൂർ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. എന്നാൽ മുസ്തഫ മുഹമ്മദ് പറയുന്നതുപോലെ റാഗിംഗ് നടന്നിട്ടില്ലെന്നും സീനിയർ വിദ്യാർഥികൾ നിരപരാധികളാണെന്നും ആരോപണ വിധേയരായ വിദ്യാർഥികളുടെ രക്ഷിതാക്കൾ മാധ്യമങ്ങളോട് പറഞ്ഞു.

വയോധികയുടെ കൊലപാതകം : അയൽവാസിയായ യുവാവ് ബംഗളൂരുവിൽ അറസ്റ്റിൽ

പെരുമ്പാവൂർ: തോട്ടത്തിൽ വയോധിക കൊല്ലപ്പെട്ട നിലയിൽ കണ്ടെത്തിയ കേസിൽ അയൽവാസിയായ യുവാവിനെ ബംഗളൂരുവിൽനിന്ന് പോലീസ് സംഘം പിടികൂടി. ചേരാനല്ലൂർ തോട്ടുവ നെല്ലിപ്പിള്ളി അദ്വൈത് ഷിബു (24)നെയാണ് പ്രത്യേക അന്വേഷണ സംഘം പിടികൂടിയത്. കഴിഞ്ഞ 29ന് രാത്രിയോടെയാണ് തോട്ടുവ മനയ്ക്കപ്പടി ഔസേഫിന്‍റെ ഭാര്യ അന്നം(85)നെ സമീപത്തെ തോട്ടത്തിൽ കൊല്ലപ്പെട്ട നിലയിൽ കണ്ടെത്തിയത്. തലയ്ക്കു പരിക്കേറ്റ് രക്തം വാർന്ന നിലയിൽ കണ്ടെത്തിയ മൃതദേഹത്തിൽ മുഖത്തും കൈയ്ക്കും മുറിവുകളുമുണ്ടായിരുന്നു. അന്നത്തിന്‍റെ രണ്ടു വളകളും കാതിൽ കമ്മലിന്‍റെ അടിയൊഴികെയുള്ള ഭാഗങ്ങളും നഷ്ടപ്പെട്ടിരുന്നു. സംഭവസ്ഥലത്ത് മൽപ്പിടുത്തം നടന്നതിന്‍റെ ലക്ഷണങ്ങളും കണ്ടതോടെ പോലീസ് കൊലപാതകമെന്ന് ഉറപ്പിക്കുകയായിരുന്നു അന്നം ശ്വാസം മുട്ടിയാണ് മരിച്ചതെന്ന് പോസ്റ്റുമോർട്ടം റിപ്പോർട്ടും വ്യക്തമാക്കിയതോടെ സംഭവത്തിൽ ഇതരസംസ്ഥാന തൊഴിലാളികൾ ഉൾപ്പെടെ 40ഓളം പേരെ അന്വേഷണ സംഘം ചോദ്യംചെയ്യുകയും മൊഴി രേഖപ്പെടുത്തുകയും ചെയ്തു. എറണാകുളം റൂറൽ ജില്ലാ പോലീസ് മേധാവി എം. ഹേമലത നേതൃത്വത്തിൽ പ്രത്യേകസംഘം രൂപീകരിച്ച് നടത്തിയ അന്വേഷണത്തിലാണ് ബംഗളൂരു ബമ്മനഹള്ളിയിൽ നിന്ന് പ്രതിയെ പിടികൂടിയത്. അമ്മയെ വഴക്കു പറഞ്ഞതിലുള്ള വൈരാഗ്യവും, സാമ്പത്തിക ബുദ്ധിമുട്ടുമാണ് കൊലയിലേക്ക് നയിച്ചതെന്ന് യുവാവ് സമ്മതിച്ചതായി പോലീസ് പറഞ്ഞു. കൊലപാതകത്തെക്കുറിച്ച് പോലീസ് പറ‍യുന്നതിങ്ങനെ: തോട്ടത്തിന്‍റെ മേൽനോട്ട ചുമതല അന്നത്തിന് ആയിരുന്നു. ഇവരുടെ പറമ്പിലേക്കുള്ള വരവ് നിരീക്ഷിച്ച യുവാവ് പുറകിൽനിന്ന് തേങ്ങകൊണ്ട് ഇവരെ എറിഞ്ഞുവീഴ്ത്തി. ഒച്ചവച്ച അന്നമ്മയുടെ വായും മൂക്കും യുവാവ് പൊത്തിപ്പിടിച്ചു. മരണം ഉറപ്പാക്കിയശേഷം ആഭരണങ്ങൾ ഊരിയെടുത്ത പ്രതി വീട്ടിലെത്തി. അവിടെ നിന്ന് എറണാകുളത്തേക്കും, പിറ്റേന്ന് ബംഗളൂരുവിലേക്കും കടക്കുകയായിരുന്നു. ശാസ്ത്രീയമായി നടത്തിയ അന്വേഷണമാണ് പ്രതിയിലേക്കെത്തിച്ചത്. പെരുമ്പാവൂർ എഎസ്പി ശക്തി സിംഗ് ആര്യ,സിഐമാരായ ജി.പി. മനു‌രാജ്, സാം ജോസ്, എസ്ഐ ടി.ആർ. രാജീവ്, എഎസ്ഐമാരായ പി.എ. അബ്ദുൾ മനാഫ്, വി.പി. ശിവദാസ്, സുനിൽകുമാർ, സീനിയർ സിപിഒമാരായ മനോജ് കുമാർ, വർഗീസ് വേണാട്ട്, ടി.എ. അഫ്‌സൽ, ബെന്നി ഐസക്, വൈശാഖ്, അരുൺ പി. കരുൺ എന്നിവരടങ്ങിയതായിരുന്നു പ്രത്യേക അന്വേഷണ സംഘം.

മാലിപ്പുറത്ത് ഗോഡൗൺ കത്തിനശിച്ചു; 70 ലക്ഷത്തിന്‍റെ നാശനഷ്ടം

വൈപ്പിൻ: മാലിപ്പുറത്ത് വീടിനുമുകളിൽ പ്രവർത്തിച്ചിരുന്ന ഓട്ടോ സ്പെയർ പാർട്സ് ഗോഡൗണിൽ വൻ അഗ്നിബാധ. ഗോഡൗണിൽ സൂക്ഷിച്ചിരുന്ന 70 ലക്ഷം രൂപയിലധികം വില വരുന്ന കാറുകളുടെയും മറ്റും സ്പെയർ പാർട്സുകൾ പൂർണമായും കത്തിനശിച്ചു. വീടിനു മുകളിൽ ഉഷസ് എന്ന പേരിൽ സ്പെയർപാർട്സ് കട നടത്തിയിരുന്നു ഇടമുട്ടത്ത് ഷിജിയുടെ ഗോഡൗണാണ് കത്തിനശിച്ചത്. ഇന്നലെ രാവിലെയായിരുന്നു സംഭവം. ഷോർട്ട് സർക്യൂട്ടാണ് തീപിടിക്കാൻ കാരണമെന്ന് ഉദ്യോഗസ്ഥർ അറിയിച്ചു. സംഭവമറിഞ്ഞ് വൈപ്പിൻ, ക്ലബ് റോഡ്, പറവൂർ എന്നിവിടങ്ങളിൽനിന്ന് അഗ്നിരക്ഷാസേന യൂണിറ്റുകളെത്തി വൈപ്പിൻ സ്റ്റേഷൻ ഓഫീസർ സുധീർലാലിന്‍റെ നേതൃത്വത്തിലാണ് തീയണച്ചത്. ഞാറക്കൽ പോലീസും സ്ഥലത്തെത്തിയിരുന്നു.

ഇരട്ടി വാഗ്ദാനം ചെയ്ത് 1.07 കോടി രൂപ തട്ടിയെടുത്തു

കൊച്ചി: നിക്ഷേപം ഇരട്ടിയാക്കാമെന്ന് വാഗ്ദാനം ചെയ്ത് കൊച്ചിയില്‍ 54കാരനില്‍ നിന്ന് 1.07 കോടി രൂപ തട്ടിയെടുത്തു. എളമക്കര സ്വദേശിയായ പരാതിക്കാരനെ ഓണ്‍ലൈനിലൂടെ പരിചയപ്പെട്ട ശേഷമായിരുന്നു തട്ടിപ്പ്. മുംബൈയിലെ ഒയാസീസ് ടെക്‌നോളജീസ് പ്രൈവറ്റ് ലിമിറ്റഡ് എന്ന് സ്ഥാപനത്തിലെ ഉദ്യോഗസ്ഥരെന്നാണ് വിശ്വസിപ്പിച്ചാണ് ബംഗളൂരു സ്വദേശികളായ പൂര്‍ണ അഗര്‍വാള്‍, വിക്രം മല്‍ഹോത്ര, ബിവായ് റോയ് ചൗധരി എന്നിവര്‍ പരാതിക്കാരനെ സമീപിച്ചത്. നിക്ഷേപിക്കുന്നതിന്‍റെ ഇരട്ടി നിശ്ചിത ദിവസത്തിനകം തിരികെ ലഭിക്കുമെന്നായിരുന്നു വാഗ്ദാനം. ഇതോടെ 10 തവണകളായി 10 ലക്ഷത്തിലധികം രൂപ വീതമാണ് പരാതിക്കാരന്‍ കൈമാറിയത്. കഴിഞ്ഞ മാസം 18 മുതല്‍ 23 വരെയായിരുന്നു സാമ്പത്തിക ഇടപാട്. നിശ്ചിത സമയത്ത് പണം ലഭിക്കാതായതോടെ പ്രതികളെ ഫോണിൽ ബന്ധപ്പെട്ടു. കിട്ടാതായതോടെയാണ് തട്ടിപ്പിനിരയായ കാര്യം ബോധ്യപ്പെട്ടത്. ഇതോടെ പരാതിയുമായി പോലീസിനെ സമീപിക്കുകയായിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]