സാന്ദ്ര ആന്‍ ലിറ്റോയ്ക്ക് കനേഡിയന്‍ ഫെലോഷിപ്പ്

ചങ്ങനാശേരി: ജീവകോശങ്ങളുടെ ജനിതക നിയന്ത്രണം എന്ന വിഷയത്തില്‍ നാലു വര്‍ഷത്തെ ഡോക്ടറേറ്റ് ഗവേഷണത്തിനുള്ള കനേഡിയന്‍ ഫെലോഷിപ്പ് മലയാളി വിദ്യാര്‍ഥിനി സാന്ദ്ര ആന്‍ ലിറ്റോയ്ക്ക് ലഭിച്ചു. മോണ്‍ട്രിയോളിലുള്ള പ്രശസ്തമായ മക്ഗില്‍ സര്‍വകലാശാലയുടെ 2025ലെ ജീവശാസ്ത്ര ഗവേഷണ ഫെലോഷിപ്പ് ആണ് ലഭിച്ചത്. 2029 സെപ്റ്റംബര്‍ വരെ രണ്ടു ലക്ഷം ഡോളറി (ഏകദേശം 1.3 കോടി രൂപ) ന്‍റെ ഫെലോഷിപ്പാണ് ഗവേഷണ പ്രവര്‍ത്തനങ്ങള്‍ക്കും മറ്റു ചെലവുകള്‍ക്കുമായി ലഭിക്കുന്നത്.

ജീവകോശങ്ങളുടെ ന്യൂക്ലിയസുകളിലുള്ള ഡിഎന്‍എയുടെ സ്വയം പകര്‍പ്പുണ്ടാക്കലിനും ഈ പ്രക്രിയയ്ക്കിടെ സംഭവിക്കുന്ന തന്മാത്രകളിലെ ഘടനാ വ്യത്യാസങ്ങളുടെ സ്വയം തിരുത്തലുകള്‍ക്കും അടിസ്ഥാനമായി പ്രവര്‍ത്തിക്കുന്ന ജനിതക നിയന്ത്രണങ്ങളെ സംബന്ധിച്ച പഠനങ്ങളിലാണ് ഗവേഷണം നടത്തുന്നത്. കഴിഞ്ഞമാസം മധ്യത്തോടെ മക്ഗില്‍ സര്‍വകലാശാലയില്‍ ഗവേഷണം ആരംഭിച്ചു.

ചങ്ങനാശേരി നാലുകോടി സ്വദേശിനിയാണ് സാന്ദ്ര. തിരുവനന്തപുരത്തുള്ള ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സയന്‍സ് എഡ്യൂക്കേഷന്‍ ആന്‍ഡ് റിസര്‍ച്ചില്‍നിന്നും ജീവശാസ്ത്രത്തിലുള്ള അഞ്ചു വര്‍ഷത്തെ ഇന്‍റഗ്രേറ്റഡ് ബിരുദാനന്തര പഠനത്തിനു ശേഷമാണ് അന്താരാഷ്‌ട്ര ഗവേഷണത്തിന് തെരഞ്ഞെടുക്കപ്പെട്ടത്.

നാലുകോടി കാഞ്ഞൂപ്പറമ്പില്‍ ലിറ്റോ കെ. തോമസിന്‍റെയും (അസിസ്റ്റന്‍റ് ജനറല്‍ മാനേജര്‍, ബിഎസ്എന്‍എല്‍, തിരുവല്ല) ഡോ. അനു മേരി ഫിലിപ്പിന്‍റെയും (ജില്ലാ മണ്ണ് സംരക്ഷണ ഓഫീസര്‍, കോട്ടയം) മകളാണ് സാന്ദ്ര.

ADVERTISEMENT

ഓണവിഭവങ്ങളുമായി അകമ്പടിത്തോണി യാത്ര തുടങ്ങി

കോട്ടയം: തിരുവോണത്തോണിയുടെ അകമ്പടിത്തോണിയായി ചുരുളന്‍ വള്ളത്തിലേറി അനൂപ് നാരായണ ഭട്ടതിരി യാത്ര പുറപ്പെട്ടു. തിരുവാറന്മുളയപ്പനു തിരുവോണനാളിലേക്കുള്ള വിഭവങ്ങളുമായി ഉത്രാടസന്ധ്യക്കു കാട്ടൂര്‍ ക്ഷേത്രക്കടവില്‍നിന്നും തിരുവോണത്തോണിയേറുന്നതിന് മുന്നോടിയായ യാത്രയ്ക്ക് ഇതോടെ തുടക്കമായി. ഇന്നലെ ഉച്ചയ്ക്ക് 12നു കുമാരനല്ലൂര്‍ മാങ്ങാട്ടില്ലക്കടവില്‍നിന്നും ഭക്തിയും പാരമ്പര്യവും ഇഴചേര്‍ന്ന അന്തരീക്ഷത്തിലായിരുന്നു യാത്ര. തിരുവാറന്മുളയപ്പന്‍റെ സന്നിധിയിലേക്ക് വള്ളം തുഴഞ്ഞു തുടങ്ങുമ്പോള്‍ വായ്ക്കുരവ ഉയര്‍ന്നു. യാത്രയ്ക്കു മുന്നോടിയായി രാവിലെ അനൂപ് നാരായണ ഭട്ടതിരി കുമാരനല്ലൂര്‍ ക്ഷേത്രദര്‍ശനം നടത്തി ചതുശതം പായസനിവേദ്യം കഴിച്ചു. തുടര്‍ന്ന് യാത്രയ്ക്ക് അമ്മയുടെ അനുജ്ഞ നേടി ഇല്ലത്തേക്ക് എത്തി. ഭഗവത് സന്നിധിയില്‍ തൊഴുത് പ്രാര്‍ഥിച്ചു. വിദ്യാസാഗര്‍ വൈലോപ്പള്ളി, വിനു എം. നായര്‍, സുധീഷ് ആര്‍. നായര്‍ എന്നീ തുഴച്ചില്‍ക്കാരോടൊപ്പമാണ് ഭട്ടതിരിയുടെ ആറന്മുളയാത്ര. ഉത്രാടദിവസമായ നാളെ അദ്ദേഹം കാട്ടൂരിലെത്തും. കാട്ടൂര്‍ മഹാവിഷ്ണുക്ഷേത്രത്തില്‍ വൈകുന്നേരത്തെ പൂജ കഴിഞ്ഞ് ഭദ്രദീപവും കരക്കാര്‍ ഒരുക്കുന്ന ഓണവിഭവങ്ങളുമായി രാത്രി തിരുവോണത്തോണിയില്‍ ആറന്മുളയിലേക്ക് തിരിക്കും. കാട്ടൂരില്‍നിന്നും 18 ദേശവഴിക്കാരുടെ പള്ളിയോടങ്ങള്‍ അകമ്പടിയാകും. നെല്ലുകുത്തിയെടുത്ത പുന്നെല്ലരി ഉള്‍പ്പെടെയുള്ളവയാണ് തോണിയില്‍ കയറ്റുക. തിരുവോണനാളില്‍ പുലര്‍ച്ചെ ആറന്മുള ക്ഷേത്രക്കടവില്‍ തോണിയെത്തും. ഭട്ടതിരി ഓണവിഭവങ്ങള്‍ ഭഗവാന് സമര്‍പ്പിക്കും. തിരുവോണ ദിവസം ആറന്മുള ക്ഷേത്രത്തില്‍ നടക്കുന്ന എല്ലാ ചടങ്ങുകളിലും പങ്കെടുത്ത് അത്താഴപൂജ കഴിഞ്ഞ് ചെലവുമിച്ചം പണക്കിഴി ഭണ്ഡാരത്തില്‍ നിക്ഷേപിച്ച് നിയോഗം പൂര്‍ത്തിയാക്കി കുമാരനല്ലൂരിലേക്ക് മടങ്ങും.

മറുനാടൻ തൂശനില തയാർ

കോട്ടയം: ഓണസദ്യ അടുക്കളയില്‍ തയാറാക്കിയാലും വിളമ്പാന്‍ തൂശനിലയില്ലാത്തവര്‍ നഗരങ്ങളിലും വാടകവീടുകളിലും ഫ്ലാറ്റുകളിലും ഏറെപ്പേരാണ്. ഉത്രാടത്തിനും പൊന്നോണത്തിനും തൂശനില വാങ്ങാന്‍ മാത്രം മാര്‍ക്കറ്റില്‍ എത്തുന്നവരുണ്ട്. അടയുണ്ടാക്കാനും ഇലയ്ക്ക് ആവശ്യക്കാര്‍ ഏറെപ്പേരാണ്. ഉപ്പേരി, ശര്‍ക്കരവരട്ടി, അച്ചാര്‍, കാളന്‍, മധുക്കറി, തോരന്‍, അവിയല്‍, ഓലന്‍, പരിപ്പ്, സാമ്പൂര്‍, പുളിശേരി, പഴം, പായസം എന്നിങ്ങനെ നീളുന്നതാണ് ഓണസദ്യ. ഓണസദ്യ രുചികളുടെ വൈവിധ്യമാണെന്നിരിക്കെ തൂശനിലയില്‍ ഉപ്പു മുതല്‍ വിളമ്പിയാല്‍ വിഭവങ്ങളുടെ രുചിയും ഗുണവും ഒന്നു വേറെതന്നെ. വാഴയിലകളില്‍ ഞാലിപ്പൂവന്‍ ഇലയാണ് ഏറ്റവും കേമം. ഇത്തവണയും സദ്യവട്ടത്തിലെ വിഭവങ്ങള്‍ക്കൊപ്പം ഓണത്തിന് ഇലയും അതിര്‍ത്തി കടന്നുവരികയാണ്. കോയമ്പത്തൂര്‍, തൂത്തുക്കുടി, തഞ്ചാവൂര്‍, തെങ്കാശി, കമ്പം, തേനി, തിരുനെല്‍വേലി എന്നിവിടങ്ങളില്‍നിന്നാണു വാഴയില എത്തുന്നത്. ഇന്നലെയും രണ്ടു ലോഡ് വാഴയില കോട്ടയം മാര്‍ക്കറ്റിലെത്തി. വാഴയിലയ്ക്കുമുണ്ട് മൊത്തവ്യാപാരികളും ചില്ലറവ്യാപാരികളും. പാലക്കാട്, മണ്ണാര്‍ക്കാട്, തൃശൂര്‍ എന്നിവിടങ്ങളില്‍നിന്ന് പരിമിതമായി മാത്രം നാടന്‍ വാഴയില എത്തുന്നുണ്ട്. ഇവിടങ്ങളില്‍ ഇല വില്‍പന മാത്രം ഉദ്ദേശിച്ച വാഴ നട്ടു വളര്‍ത്തുന്നവര്‍ പലരാണ്. നിലവില്‍ 100 ഇലയുള്ള (മുഴുവനായി) ഒരു കെട്ടിനു 3,000- 4000 രൂപ വരെയാണു വില. ഓണവാരം വന്നതോടെ കഴിഞ്ഞ ദിവസങ്ങളില്‍ വില കുതിച്ചുകയറി. ഒരു മുഴുവന്‍ ഇലയില്‍നിന്ന് ഒരു തൂശന്‍ മാത്രമേ മുറിച്ചെടുക്കാനാവുകയുള്ളൂ. ഇത്തരത്തില്‍ ഒരു കെട്ടില്‍നിന്നു 80 വരെ തൂശനിലയാണ് കിട്ടുക. ഇന്നലെ മുതല്‍ ഒരു ഇലയ്ക്ക് മാര്‍ക്കറ്റില്‍ 10-12 രൂപയാണ് നിരക്ക്. ഇല വില്‍ക്കാന്‍ മാത്രമായി തമിഴ്‌നാട്ടില്‍ നാട്ടുവാഴ, ചക്കവാഴ എന്നീ ഇനങ്ങള്‍ കൃഷി ചെയ്യുന്നുണ്ട്. ഇത്തരം വാഴയിലെ കുലകള്‍ക്ക് ഡിമാന്‍ഡില്ല. അവിയല്‍, സാമ്പാര്‍ എന്നിവയ്ക്ക് കറിക്കായ ആയാണ് ഇത് കൂടുതലായും ഉപയോഗിക്കുന്നത്. നാലു ദിവസത്തോളം വാടിതിരിക്കുമെന്നു മാത്രമല്ല പെട്ടന്ന് കീറുകയുമില്ല.

ഊഞ്ഞാൽ കണ്ടിട്ടില്ലെന്നു കുട്ടികൾ; ഊഞ്ഞാൽ കെട്ടി മണിമല പള്ളി

മണിമല: ജീവിതത്തിൽ ഇന്നേവരെ ഒാണഊഞ്ഞാൽ കണ്ടിട്ടില്ലെന്നു കുട്ടികൾ പറഞ്ഞപ്പോൾ വൈദികർ അന്പരന്നുപോയി. എങ്കിൽ പള്ളി മുറ്റത്തുതന്നെ കുട്ടികൾക്ക് ഈ ഒാണക്കാലത്ത് ഊഞ്ഞാൽ കെട്ടിക്കൊടുക്കാൻ അവർ തീരുമാനിച്ചു. മണിമല ഹോളിമാഗി പള്ളിയിലാണ് കുട്ടികൾക്കായി ഊഞ്ഞാൽ കെട്ടി നൽകിയത്. ഊഞ്ഞാൽ കണ്ടിട്ടേയില്ലെന്നു ചില കുട്ടികൾ പറഞ്ഞതു മനസിൽ സ്പർശിച്ചതുകൊണ്ടാണ് വികാരി ഫാ. എബ്രാഹം തയ്യിൽ നെടുംപറമ്പിലും അസിസ്റ്റന്‍റ് വികാരി ഫാ. വർഗീസ് ചിറയിലും ഊഞ്ഞാൽ കെട്ടാൻ തീരുമാനിച്ചത്. തുടർന്നു ദേവാലയ ശുശ്രൂഷി ജോസുകുട്ടി ആലപ്പാട്ടിന്‍റെ നേതൃത്വത്തിൽ പള്ളിമുറ്റത്ത് ഊഞ്ഞാൽ കെട്ടുകയായിരുന്നു. തിരുബാലസഖ്യം കുട്ടികളും സൺഡേ സ്കൂൾ കുട്ടികളും അധ്യാപകരും ഊ ഞ്ഞാലാട്ടം ആസ്വദിച്ചു. മാതാപിതാക്കൾ കൊച്ചുകുട്ടികളെ കൊണ്ടുവന്ന് ഊഞ്ഞാലിലിരുത്തി. ഓണാഘോഷത്തിന്‍റെ ഭാഗമായി സൺഡേ സ്കൂൾ അധ്യാപകർ തയാറാക്കിയ സദ്യയും വേറിട്ടതായിരുന്നു. ഓരോ വിഭവങ്ങളും ഓരോ അധ്യാപകരാണ് തയാറാക്കി കൊണ്ടുവന്നത്. യുവജനങ്ങൾ പള്ളിമുറ്റത്ത് എത്തിച്ചേർന്ന എല്ലാവർക്കും വിവിധ മത്സരങ്ങൾ നടത്തി സമ്മാനവും വിതരണം ചെയ്തു. വൈദികരെ കൂടാതെ ഹെഡ്മിസ്ട്രസ് ഡെയ്സമ്മ ചാക്കോ, അധ്യാപകരായ ബെന്നി തോമസ്, അനീഷ് കെ. തോമസ്, ബിനോയി വർഗീസ് തുടങ്ങിയവർ പരിപാടികൾക്കു നേതൃത്വം നൽകി.

ദീപിക കോട്ടയം ഓഫീസില്‍ ഓണാഘോഷം

കോട്ടയം: ദീപിക കോട്ടയം ഓഫീസില്‍ ഓണാഘോഷവും ദീപിക വാര്‍ഷിക പതിപ്പിന്‍റെ പ്രകാശനവും നടന്നു. തിരുവഞ്ചൂര്‍ രാധാകൃഷ്ണന്‍ എംഎല്‍എയുടെ അധ്യക്ഷതയില്‍ ഓണക്കൂട്ടായ്മ വിജയപുരം രൂപത സഹായ മെത്രാന്‍ ഡോ. ജസ്റ്റിന്‍ മഠത്തിൽപ്പറമ്പില്‍ ഉദ്ഘാടനം ചെയ്തു. രാഷ്‌ട്രദീപിക ലിമിറ്റഡ് മാനേജിംഗ് ഡയറക്ടര്‍ ഫാ. മൈക്കിള്‍ വെട്ടിക്കാട്ട് ആമുഖ സന്ദേശം നല്‍കി. കെ. ഫ്രാന്‍സിസ് ജോര്‍ജ് എംപി, കോട്ടയം മുനിസിപ്പല്‍ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍, നവജീവന്‍ ട്രസ്റ്റി പി.യു. തോമസ്, അതിരമ്പുഴ സെന്‍റ് മേരീസ് ഫൊറോനാ വികാരി ഫാ. മാത്യു പടിഞ്ഞാറേക്കുറ്റ് എന്നിവര്‍ ഓണാശംസകള്‍ നേര്‍ന്നു. ദീപിക വാര്‍ഷിക പതിപ്പിന്‍റെ പ്രകാശനം ബിഷപ് ഡോ. ജസ്റ്റിന്‍ മഠത്തിൽപ്പറമ്പില്‍, ഫാ. ജോസുകുട്ടി പടിഞ്ഞാറേപീടിക സിഎംഐയ്ക്ക് നല്‍കി നിര്‍വഹിച്ചു. ദീപിക ചീഫ് എഡിറ്റര്‍ റവ. ഡോ. ജോര്‍ജ് കുടിലില്‍ വാര്‍ഷിക പതിപ്പിന്‍റെ അവതരണം നടത്തി. ഓണപ്പകര്‍ച്ച എന്ന പേരില്‍ ദീപിക കുടുംബാംഗങ്ങള്‍ സമാഹരിച്ച തുക നവജീവന്‍ ട്രസ്റ്റി പി.യു. തോമസിന് ഫാ. മൈക്കിള്‍ വെട്ടിക്കാട്ട് കൈമാറി. ജനറല്‍ മാനേജര്‍ (അഡ്മനിസ്‌ട്രേഷന്‍) ഫാ. രഞ്ജിത് ആലുങ്കല്‍ കൃതജ്ഞത പറഞ്ഞു. ദീപിക ജനറല്‍ മാനേജര്‍ (സര്‍ക്കുലേഷന്‍) ഫാ. ജിനോ പുന്നമറ്റത്തില്‍ മത്സരങ്ങള്‍ക്ക് നേതൃത്വം നല്‍കി. വിവിധ മത്സരങ്ങളും കലാപരിപാടികളും ഓണസദ്യയുമുണ്ടായിരുന്നു.

ഇസ്രയേലില്‍ മരിച്ച നഴ്‌സിന്‍റെ സംസ്‌കാരം നാളെ

പാലാ: ഇസ്രയേലില്‍ വാഹനാപകടത്തില്‍ മരിച്ച മലയാളി ഹോംനഴ്‌സ് വെളിയന്നൂര്‍ പുതുവേലി പുതുശേരില്‍ രൂപ രാജേഷിന്‍റെ (41) മൃതദേഹം ഇന്ന് നാട്ടില്‍ എത്തിക്കും. രാത്രി എട്ടിന് നെടുമ്പാശേരി വിമാനത്താവളത്തില്‍ എത്തിക്കുന്ന മൃതദേഹം സ്വകാര്യ ആശുപത്രി മോര്‍ച്ചറിയില്‍ സൂക്ഷിക്കും. നാളെ രാവിലെ എട്ടിന് ഭവനത്തില്‍ എത്തിക്കും. സംസ്‌കാരം ഉച്ചകഴിഞ്ഞ് രണ്ടിന് വീട്ടുവളപ്പില്‍. ഇസ്രേലി സ്വദേശിയുടെ വീട്ടില്‍ രോഗീപരിചരണ ജോലി ചെയ്തിരുന്ന രൂപ കഴിഞ്ഞ ഓഗസ്റ്റ് 19ന് രോഗിയുമായി ആശുപത്രിയിലേക്കു പോകും വഴി അഷ്ഗാമില്‍ ഉണ്ടായ അപകടത്തിലാണ് മരിച്ചത്. രാമപുരം ചക്കാമ്പുഴ മഞ്ഞപ്പിള്ളില്‍ രാമന്‍-രുഗ്മിണി ദമ്പതികളുടെ മകളാണ്. ഭര്‍ത്താവ്: രാജേഷ്. മക്കള്‍: പാര്‍വതി(ജര്‍മനി), ധനുഷ്(പ്ലസ് വണ്‍ വിദ്യാര്‍ഥി കൂത്താട്ടുകുളം).

വഴിയോര വസ്ത്രവിപണി സജീവം

കോട്ടയം: വന്‍കിട മാളുകളിലും സൂപ്പര്‍മാര്‍ക്കറ്റുകളിലും മാത്രമല്ല ഓണത്തിരക്ക്. ഓണവിഭവങ്ങളും ഉടയാടകളും മിതമായ നിരക്കില്‍ വാങ്ങാന്‍ സാധാരണക്കാരും പാവങ്ങളും വഴിയോര വിപണിയെ ആശ്രയിക്കുന്നു. പട്ടുപാവാടയും ബ്ലൗസും വാങ്ങാന്‍ ആവശ്യക്കാര്‍ ഏറെയാണ്. കസവുസാരിയും കസവുമുണ്ടും വെള്ളിനൂല്‍ കെട്ടിയ മുണ്ടും കൈലിയും ലുങ്കിയും തോര്‍ത്തും ഷര്‍ട്ടും വില്‍ക്കാന്‍ ഒട്ടേറെ വ്യാപാരികളാണ് നിരത്തുകളിലുള്ളത്. ബാലരാമപുരം, കുത്താമ്പുള്ളി ഉള്‍പ്പെടെ നെയ്ത്ത് ഗ്രാമങ്ങളില്‍നിന്ന് നേരിട്ടു വില്‍പനയ്ക്ക് വന്നവരുമുണ്ട്. ഈറോഡ്, തിരുപ്പൂര്‍, ഡല്‍ഹി എന്നിവിടങ്ങളില്‍നിന്നു വന്‍തോതില്‍ റെഡിമെഡ് വസ്ത്രങ്ങള്‍ വാങ്ങി വില്‍ക്കുന്നവരും ഏറെപ്പേരാണ്. ഡല്‍ഹിയില്‍നിന്നു ചെരിപ്പ്, ഷൂ, ബാഗ് എന്നിവ വാങ്ങി വില്‍ക്കുന്ന കച്ചവടക്കാര്‍ പലരാണ്. ഡല്‍ഹിയില്‍നിന്ന് ഇത്തരം സാധനങ്ങള്‍ വാങ്ങി ഇവിടെ ഇരട്ടി വിലയ്ക്കാണ് വില്‍പനയെങ്കിലും വന്‍കിട ബ്രാന്‍ഡുകളുടെ വില വരില്ല. മോശമല്ലാത്ത ഓണവ്യാപാരം നടക്കുന്ന വേളയിലാണ് മഴ പ്രശ്‌നമാകുമോ എന്ന ആശങ്ക. ഇന്നും നാളെയുമാണ് വഴിയോരവ്യാപാരം പൊടിപൊടിക്കുന്നത്. മഴ വന്നാല്‍ വില്‍പന നടക്കില്ല. ഓണം കഴിഞ്ഞാല്‍ വില്‍പന നടക്കുകയുമില്ല. വാനുകളിലും വഴിയോരത്തും വില്‍ക്കുന്ന പച്ചക്കറിക്ക് താരതമ്യേന വിലക്കുറവുണ്ട്. വെളുത്തുള്ളിയും ചുവന്നുള്ളിയും സവോളയുമായി തമിഴ് വ്യാപാരികള്‍ വാനില്‍ നാടു ചുറ്റുന്നു. ഓണപ്പപ്പടം വില്‍ക്കാന്‍ വഴിയോരത്തും മാര്‍ക്കറ്റുകളിലും നിരവധി പേര്‍. ഇതിനൊപ്പമാണ് കുടുംബശ്രീയും ചെറുകിട സംരംഭകരും പൊടികളും അച്ചാറുകളും പായസക്കിറ്റും കൊണ്ടാട്ടവുമൊക്കെയായി കടകള്‍ തുറന്നിരിക്കുന്നത്. ചില ഹോട്ടലുകളില്‍ പായസക്കച്ചവടവും സജീവമാണ്. ഇതിനൊപ്പമാണ് തമിഴ്‌നാട്ടില്‍നിന്ന് പൂക്കച്ചവടക്കാര്‍ നഗരങ്ങളില്‍ തമ്പടിച്ചിരിക്കുന്നത്. നാടന്‍ ഇഞ്ചിയും ചേനയും ചേമ്പും വാഴക്കുലയും വിളവെടുത്ത് നേരിട്ടു വില്‍ക്കുന്നവരും കുറവല്ല.

കുടുംബശ്രീയുടെ ഓണവിപണി ഹിറ്റ്

കോട്ടയം: ജില്ലയിലെ കുടുംബശ്രീയുടെ ഓണവിപണന പ്രവര്‍ത്തനങ്ങള്‍ വന്‍ വിജയത്തിലേക്ക്. നാടിന്‍റെ രുചിയും വീട്ടമ്മമാരുടെ കൈപ്പുണ്യവും നിറഞ്ഞ കുടുംബശ്രീ ഉത്പന്നങ്ങള്‍ ജനങ്ങള്‍ ആവേശത്തോടെ സ്വീകരിച്ചു. സിഡിഎസുകളുടെ നേതൃത്വത്തില്‍ കുടുംബശ്രീയുടെ വൈവിധ്യമാര്‍ന്ന ഉത്പന്നങ്ങള്‍ ഉള്‍പ്പെടുത്തി ഗിഫ്റ്റ് ഹാംപറുകളും ഒരുക്കിയിട്ടുണ്ട്. ഇവ ഓണച്ചന്തകളിലും വിപണനമേളകളിലും ലഭ്യമാണ്. കുടുംബശ്രീയുടെ പോക്കറ്റ് മാര്‍ട്ട് ഓണ്‍ലൈന്‍ ആപ്പിലൂടെയും ഉത്പന്നങ്ങള്‍ നേരിട്ട് ഓര്‍ഡര്‍ ചെയ്യാം. ഇതിനകം 5,335 ഓണകിറ്റുകള്‍ വിതരണം ചെയ്തു. ഓണസദ്യക്ക് 2,520 ഓര്‍ഡറുകളും ലഭിച്ചിട്ടുണ്ട്. ഉത്രാടം വരെ ഓര്‍ഡറുകള്‍ സ്വീകരിക്കുന്നതിനാല്‍ വരുമാനം ഇനിയും ഉയരുമെന്ന് പ്രതീക്ഷയിലാണ്. ജില്ലാതലത്തില്‍ നടക്കുന്ന പ്രധാന വിപണനമേളകള്‍ക്ക് പുറമേ, എല്ലാ സിഡിഎസുകളിലും രണ്ടുവീതം ഓണച്ചന്തകള്‍ സംഘടിപ്പിച്ചിട്ടുണ്ട്. കുടുംബശ്രീ സംഘകൃഷി ഗ്രൂപ്പുകളില്‍നിന്നുള്ള സംരംഭകരുടെ പച്ചക്കറികള്‍, പൂക്കള്‍, മറ്റ് ഉത്പന്നങ്ങള്‍ എന്നിവയും ഓണച്ചന്തകളില്‍ ലഭ്യമാണ്. ഓണത്തിന്‍റെ സന്തോഷവും നാട്ടിന്‍റെ തനിമയും കുടുംബശ്രീയുടെ കൈപ്പുണ്യവും ഒരുമിച്ചെത്തിക്കുന്ന ഓണച്ചന്തകളും വിപണനമേളകളും ജനപ്രീതിയോടെ മുന്നേറുകയാണ്.

ഓണവിപണിയില്‍ കര്‍ഷകന്‍ കൊള്ളയടിക്കപ്പെടുന്നു

കോട്ടയം: ഓണവിപണി മുന്നില്‍ക്കണ്ട് ഒരു വര്‍ഷത്തെ അധ്വാനത്തില്‍ കർഷകർ വിളയിച്ച കാര്‍ഷികോത്പന്നങ്ങളുടെ സാമ്പത്തികനേട്ടം ഇടനിലക്കാര്‍ക്കും വ്യാപാരികള്‍ക്കും. ചേന, ചേമ്പ്, കാച്ചില്‍, വാഴക്കുല തുടങ്ങി എല്ലാ വിഭവങ്ങളും വില്‍പനവിലയേക്കാള്‍ ഇരുപതും മുപ്പതും രൂപ താഴ്ത്തിയാണ് കര്‍ഷകരില്‍നിന്ന് വ്യാപാരികള്‍ വാങ്ങുന്നത്. ചില വ്യാപാരികള്‍ക്ക് നാടന്‍ വാഴക്കുല ഉള്‍പ്പെടെ വിഭവങ്ങളോടു താത്പര്യമില്ല. വിലക്കുറവില്‍ ലഭിക്കുന്ന ഗുണനിലവാരം കുറഞ്ഞ ഇതര സംസ്ഥാന സാധനങ്ങളാണ് ഇവര്‍ വില്‍ക്കാന്‍ താത്പര്യപ്പെടുന്നത്. കോവിഡ് കാലത്ത് നിലച്ചുപോയ കര്‍ഷകരുടെ ചന്തകളുടെ പ്രവര്‍ത്തനം പുനരാരംഭിക്കാത്തതിനാല്‍ സാധനങ്ങള്‍ വില്‍ക്കാന്‍ പ്രാദേശിക കച്ചവടക്കാരെ ആശ്രയിക്കണം. മാര്‍ക്കറ്റില്‍ കിലോ 80 രൂപയ്ക്ക് ചേന വില്‍ക്കുമ്പോള്‍ കര്‍ഷകര്‍ക്ക് ലഭിക്കുന്നത് 40-50 രൂപ മാത്രം. ശീമച്ചേമ്പിനും കണ്ണന്‍ചേമ്പിനും സ്ഥിതി ഇതുതന്നെ. പച്ച ഏത്തക്കായയ്ക്ക് കര്‍ഷകര്‍ക്ക് ലഭിക്കുന്നത് 35 രൂപയാണ്. വില്‍പന അന്‍പതു രൂപയ്ക്കും. പച്ചക്കപ്പ കൊടുത്താല്‍ പത്തു കിലോയ്ക്ക് ഒരു കിലോ അധികം വ്യാപാരികള്‍ക്ക് നല്‍കണം. അതാത് ദിവസം വിറ്റുപോകുന്ന കപ്പയ്ക്ക് തൂക്കക്കൂലി എന്ന പേരിലാണ് ഒരു കിലോ അധികം പറ്റുന്നത്. ഒരു കിലോ കപ്പ വില്‍ക്കുമ്പോള്‍ കര്‍ഷകന് ലഭിക്കുന്നത് 25-30 രൂപ. വില്‍പന വിലയാവട്ടേ 40 രൂപ. പതിനൊന്ന് കിലോ കപ്പ വില്‍ക്കുന്നമ്പോള്‍ കച്ചവടക്കാരന് ലഭിക്കുന്ന ലാഭം 150 രൂപ. കപ്പ നട്ട് പത്ത് മാസം വളര്‍ത്തി കഠിനാധ്വാനത്തില്‍ പറിച്ചു വില്‍ക്കുന്ന കര്‍ഷകര്‍ക്ക് ലഭിക്കുന്ന തുകയുടെ നേര്‍പ്പകുതി ലാഭം കച്ചവടക്കാരന്‍ അവകാശമാക്കുന്നു. വാഴക്കുലയ്ക്കും പച്ചക്കറികള്‍ക്കും ഇതു തന്നെയാണ് സാഹചര്യം. ഒരു വാഴ നട്ടുവളര്‍ത്തി കുല വില്‍ക്കുന്നതുവരെ കുറഞ്ഞത് 150 രൂപയുടെ ചെലവുണ്ട്. ഇക്കൊല്ലത്തെ കാറ്റിലും മഴയിലും വാഴകള്‍ വന്‍തോതില്‍ നശിക്കുകയും ചെയ്തു. ഇതിന് പുറമേ മലയോരമേഖലയില്‍ വന്യമൃഗങ്ങളും കൃഷി കവര്‍ന്നു.

ഇതര സംസ്ഥാന തൊഴിലാളി കണക്കെടുപ്പ് നിലച്ചു ; കേരളത്തിൽ വന്നുപോകുന്നത് ലഹരിത്തൊഴിലാളികള്‍

കോട്ടയം: കോട്ടയം ജില്ലയില്‍ എത്രയുണ്ട് ഇതര സംസ്ഥാന തൊഴിലാളികള്‍. തൊഴിലാളികളെ എത്തിക്കുന്ന കരാറുകാര്‍ പോലീസ് സ്റ്റേഷനുകളില്‍ നല്‍കിയ കണക്കിന് വര്‍ഷങ്ങളുടെ പഴക്കമുണ്ട്. സ്‌റ്റേഷന്‍ രജിസ്റ്ററില്‍ പേരും ഫോട്ടോയും വിലാസവുമുള്ള നല്ലൊരു ശതമാനം തൊഴിലാളികളും നാട്ടിലേക്ക് മടങ്ങിയിട്ട് കാലമേറെയായി. നിലവില്‍ പുതിയ തൊഴിലാളികളെ എത്തിക്കുന്ന ഏറെ കാരാറുകാരും അവരുടെ സംരക്ഷണയിലുള്ള ഫോട്ടോ, തിരിച്ചറിയല്‍ രേഖകളൊന്നും സ്‌റ്റേഷനുകളില്‍ ഹാജാരാക്കാറില്ല. കേരളത്തില്‍ കാലങ്ങളായി ജോലി ചെയ്യുന്ന ഇതര സംസ്ഥാനത്തൊഴിലാളികള്‍ നാട്ടില്‍ പോയി വരുമ്പോള്‍ പരിചിതരും ബന്ധുക്കളും അയല്‍വാസികളുമായ ഒരു പറ്റെത്തെ കൂട്ടിക്കൊണ്ടുവരികയാണു പതിവ്. ഇവരെ എത്തിക്കുന്നതിന് കമ്മീഷനും ലഭിക്കാറുണ്ട്. നാട്ടില്‍ ഇതര സംസ്ഥാന തൊഴിലാളികൾ പ്രതിയായ കുറ്റകൃത്യങ്ങള്‍ പെരുകുമ്പോഴും പോലീസ് ഇത് അന്വേഷിക്കുന്നുമില്ല. കരാറുകാരില്ലാതെ ജോലി അന്വേഷിച്ച് നേരിട്ടെത്തുന്ന ആയിരക്കണക്കിന് തൊഴിലാളികളുണ്ട്. ഇവര്‍ വിവിധ തൊഴിലിടങ്ങളില്‍ പോലീസിന്‍റെ അറിവില്ലാതെ ജോലി ചെയ്യുന്നുണ്ട്. ഇതിന്‍റെ മറവിലാണ് കഞ്ചാവും മയക്കുമരുന്നും വന്‍തോതില്‍ ജില്ലയിലെത്തുന്നത്. ഒഡീഷ, ആസാം, ജാര്‍ഖണ്ഡ്, ബിഹാര്‍, പശ്ചിമ ബംഗാള്‍ സംസ്ഥാനങ്ങളില്‍നിന്ന് ജില്ലയില്‍ ദിവസേന ഇരുപത് കിലോ കഞ്ചാവ് എത്തുന്നുണ്ടെന്നാണ് എക്‌സൈസ് പറയുന്നത്. ഇവ എറണാകുളം, ഏറ്റുമാനൂര്‍, കോട്ടയം തുടങ്ങി വിവിധയിടങ്ങളില്‍ കൈമറിഞ്ഞാണ് ലഹരിമാഫിയയുടെ കൈകളില്‍ എത്തുന്നത്. കഞ്ചാവ് നിശ്ചിത സ്ഥലത്ത് എത്തിച്ച് അന്നുതന്നെ നാട്ടിലേക്ക് മടങ്ങുന്ന മാഫിയ സംഘങ്ങളില്‍ സ്ത്രീകളും കണ്ണികളാണ്. ജില്ലയിലെ ലേബര്‍ ക്യാമ്പുകളില്‍ പോലീസും എക്‌സൈസും പരിശോധന നടത്തിയിട്ട് വര്‍ഷങ്ങളായി. കഞ്ചാവ് ഉപയോഗിക്കുന്നവരും വിപണനം നടത്തുന്നവരുമായ ഒട്ടേറെ തൊഴിലാളികള്‍ ജില്ലയിലുണ്ടെന്നാണ് സൂചന. ഇക്കൊല്ലം മാത്രം ജില്ലയില്‍ ഇതരസംസ്ഥാന തൊഴിലാളികളെന്ന് വ്യാജേനയെത്തിയ 12 പേരെയാണ് കഞ്ചാവ് കടത്തിന് അറസ്റ്റ് ചെയ്തത്. മാമ്മൂട്ടില്‍ ഇതരസംസ്ഥാന തൊഴിലാളികളുടെ ക്യാമ്പില്‍നിന്ന് ഒരു മീറ്റര്‍ ഉയരമുള്ള കഞ്ചാവ് ചെടി കണ്ടെത്തിയതും ഇക്കൊല്ലമാണ്. കഴിഞ്ഞ ഏപ്രിലില്‍ ഒഡിഷ സ്വദേശിയായ ഇതരസംസ്ഥാന തൊഴിലാളിയെ 6.1 കിലോ കഞ്ചാവുമായി പിടികൂടിയിരുന്നു. വീട്ടില്‍ പോയി മടങ്ങിവരുന്ന തൊഴിലാളികളില്‍ ചിലര്‍ ട്രെയിനിലാണ് കഞ്ചാവ് കൊണ്ടുവരുന്നത്. എറണാകുളം ജില്ലയില്‍നിന്നു വടക്കേ ഇന്ത്യയിലേക്കും വടക്കുകിഴക്കന്‍ സംസ്ഥാനങ്ങളിലേക്കും സര്‍വീസ് നടത്തുന്ന ടൂറിസ്റ്റ് ബസുകള്‍ വഴിയും ലഹരി വസ്തുക്കള്‍ എത്തുന്നതായി എക്‌സൈസ് പറയുന്നു. ‌ കഞ്ചാവിനു പുറമെ രാസലഹരികളായ എംഡിഎംഎ, ബ്രൗണ്‍ഷുഗര്‍, ഹഷീഷ് ഓയില്‍ എന്നിവ ടൂറിസ്റ്റ് ബസുകളില്‍ കേരളത്തിലേക്ക് യാത്ര ചെയ്യുന്ന ഇതരസംസ്ഥാന തൊഴിലാളികളുടെ പക്കല്‍ ഏല്‍പ്പിക്കുന്ന സംഘങ്ങളുണ്ട്. മയക്കുമരുന്ന് കാരിയര്‍മാര്‍ക്ക് യാത്ര സൗജന്യമാണ്. ട്രെയിനുകളില്‍ പരിശോധന കര്‍ശനമായതോടെയാണ് ടൂറിസ്റ്റ് ബസുകള്‍ ലഹരി കടത്തിന് ഉപയോഗിച്ചു തുടങ്ങിയതെന്ന് പറയുന്നു. ഇതരസംസ്ഥാന തൊഴിലാളികള്‍ക്കായുള്ള ഞായര്‍ മാര്‍ക്കറ്റുകളിലും കഞ്ചാവ് വില്‍പന വ്യാപകമാണ്.

വഞ്ചനക്കേസ്: പ്രതി അറസ്റ്റില്‍

പാലാ: രോഗാവസ്ഥയിലുള്ള അമ്മയുടെ ചികിത്സയ്ക്കെന്നു പറഞ്ഞുവിശ്വസിപ്പിച്ച് എട്ടു പവന്‍ ആഭരണങ്ങളും 1500 രൂപയും തട്ടിയെടുത്ത കേസിലെ പ്രതിയെ അറസ്റ്റു ചെയ്തു. കുടക്കച്ചിറയിലുള്ള ഡിവൈന്‍ മേഴ്‌സി റിട്ടയര്‍മെന്‍റ് ഹോമിലെ വയോധികയാണ് തട്ടിപ്പിനിരയായത്. കെ.എസ്. ശ്രീജിത്ത് (35) ആണ് അറസ്റ്റിലായത്. പാലാ എസ്എച്ച്ഒ പ്രിന്‍സ് ജോസഫിന്‍റെ നേതൃത്വത്തില്‍ എഎസ്ഐ സുബാഷ് വാസു, സിവില്‍ പോലീസ് ഓഫീസര്‍മാരായ ജോബി, അനീഷ് എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.

പാലാ രൂപത എപ്പാര്‍ക്കിയല്‍ യൂത്ത് അസംബ്ലി സമാപിച്ചു

പാലാ: എസ്എംവൈഎം പാലാ രൂപതയുടെ അഭിമുഖ്യത്തില്‍ നടത്തിയ എപ്പാര്‍ക്കിയല്‍ യൂത്ത് അസംബ്ലി സമാപിച്ചു. പാലാ അല്‍ഫോന്‍സിയന്‍ പാസ്റ്ററല്‍ ഇന്‍സ്റ്റിറ്റ്യൂട്ടില്‍ മൂന്നു ദിവസങ്ങളിലായി നടന്ന എപ്പാര്‍ക്കിയല്‍ യൂത്ത് അസംബ്ലിയില്‍ യുവജനങ്ങള്‍ നേരിടുന്ന പ്രശ്‌നങ്ങള്‍ വിശദമായി ചര്‍ച്ച ചെയ്തു. സഭ, സംഘടന, രാഷ്‌ട്രീയം, സംരംഭകത്വം, കുടുംബം, സാങ്കേതികവിദ്യ എന്നീ വിഷയങ്ങള്‍ വിശദമായി ചര്‍ച്ച ചെയ്തു. ഇരുപത് ഫൊറോനകളില്‍നിന്നായി നൂറ്റമ്പതില്‍പരം യുവജനങ്ങള്‍ പങ്കെടുത്തു. സമാപന ദിവസം നടന്ന വിവിധ സെഷനുകളില്‍ രൂപത വികാരി ജനറാള്‍മാരായ മോണ്‍. സെബാസ്റ്റ്യന്‍ വേത്താനത്ത്, മോൺ. ജോസഫ് കണിയോടിക്കല്‍, നീതൂസ് അക്കാഡമി മാനേജിംഗ് ഡയറക്ടര്‍ നീതു ബോബന്‍ എന്നിവര്‍ യുവജനങ്ങളുമായി സംവദിച്ചു. എസ്എംവൈഎം രൂപത ഡയറക്ടര്‍ ഫാ. മാണി കൊഴുപ്പന്‍കുറ്റി, പ്രസിഡന്‍റ് അന്‍വിന്‍ സോണി ഓടച്ചുവട്ടില്‍, ജനറല്‍ സെക്രട്ടറി റോബിന്‍ ടി. ജോസ് താന്നിമല, സിസ്റ്റര്‍ നവീന സിഎംസി, ജോസഫ് വടക്കേല്‍, ബെനിസണ്‍ സണ്ണി, എഡ്വിന്‍ ജെയ്‌സ് എന്നിവര്‍ പ്രസംഗിച്ചു.

വിശാല കുറവിലങ്ങാട് മാതൃഭക്തിയുടെ വിളനിലം: റവ.ഡോ. ജോർജ് വർഗീസ് ഞാറക്കുന്നേൽ

കുറവിലങ്ങാട്: വിശാല കുറവിലങ്ങാട് മാതൃഭക്തിയുടെ വിളനിലമാണെന്ന് കത്തോലിക്ക കോൺഗ്രസ്, വിശ്വാസപരിശീലനകേന്ദ്രം രൂപത ഡയറക്ടർ റവ.ഡോ. ജോർജ് വർഗീസ് ഞാറക്കുന്നേൽ പറഞ്ഞു. കുറവിലങ്ങാട് മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന കേന്ദ്രത്തിൽ എട്ടുനോമ്പാചരണത്തോടനുബന്ധിച്ച് വിശുദ്ധ കുർബാനയർപ്പിച്ച് സന്ദേശം നൽകുകയായിരുന്നു അദ്ദേഹം. പരിശുദ്ധ ദൈവമാതാവ് സുവിശേഷം ജീവിച്ച വ്യക്തിയാണെന്നും അദ്ദേഹം പറഞ്ഞു. നാളെ വാഹനവെഞ്ചരിപ്പ് ദിനമാണ്. കാളികാവ് സെന്‍റ് സെബാസ്റ്റ്യൻസ് ഇടവകയിൽനിന്നുള്ള തീർഥാടനം നടക്കും. മുട്ടുചിറയിൽനിന്ന് തീർഥാടന പദയാത്ര കുറവിലങ്ങാട്: മുട്ടുചിറയിൽനിന്ന് മുത്തിയമ്മയ്ക്കരികിലേക്ക് തീർഥാടക പദയാത്രയെത്തി. മുട്ടുചിറ ഫൊറോനയിലെ കാഞ്ഞിരത്താനം, വാലാച്ചിറ, ജയ്ഗിരി, അൽഫോൻസാപുരം, ഫാത്തിമാപുരം, മലപ്പുറം ഇടവകകളിൽനിന്നുള്ള തീർഥാടകരാണ് ഫൊറോനാതലത്തിൽ സംഗമിച്ചെത്തിയത്. പനങ്കുഴയ്ക്കൽ വല്യച്ചൻ സ്മാരക പാർക്കിൽ നടന്ന ആരംഭപ്രാർഥനകൾക്ക് കാഞ്ഞിരത്താനം പള്ളി വികാരി ഫാ. ജയിംസ് വയലിൽ കാർമികത്വം വഹിച്ചു. ജയ്ഗിരി ക്രിസ്തുരാജ് പള്ളി വികാരി ഫാ. തോമസ് മലയിൽപുത്തൻപുരയിൽ വിശുദ്ധ കുർബാനയർപ്പിച്ചു. മുട്ടുചിറ ഫൊറോന അസി. വികാരി ഫാ. ആന്‍റണി ഞരളക്കാട്ട് സന്ദേശം നൽകി. ഫൊറോന വികാരി ഫാ. ഏബ്രഹാം കൊല്ലിത്താനത്തുമലയിൽ, അസി. വികാരി ഫാ. മാത്യു വാഴചാരിക്കൽ, കൈക്കാരന്മാർ എന്നിവർ നേതൃത്വം നൽകി. തീർഥാടക സംഘത്തെ കുറവിലങ്ങാട് മുത്തിയമ്മയുടെ തിരുസ്വരൂപം നൽകി ആർച്ച്പ്രീസ്റ്റ് റവ.ഡോ. തോമസ് മേനാച്ചേരി സ്വീകരിച്ചു. രാമപുരത്തുനിന്ന് ഇന്ന് കുറവിലങ്ങാട്: എട്ടുനോമ്പിലെ മൂന്നാംദിനമായ ഇന്ന് രാമപുരം സെന്‍റ് അഗസ്റ്റിൻസ് ഫൊറോന ഇടവകയിൽ നിന്നുള്ള തീർഥാടകർ മുത്തിയമ്മയ്ക്കരികിലെത്തും. ഇന്ന് 10.30നാണ് തീർഥാടനം. തുടർന്ന് രാമപുരം ഫൊറോന വികാരി ഫാ. ബെർക്കുമാൻസ് കുന്നുംപുറം വിശുദ്ധ കുർബാനയർപ്പിച്ച് സന്ദേശം നൽകും. ഉച്ചകഴിഞ്ഞ് 3.15ന് ഇടവകയിലെ വിവിധ സംഘടനകളിലെ അംഗങ്ങൾ ജൂബിലി കപ്പേളയിൽ സംഗമിച്ച് തീർഥാടനമായി പള്ളിയിലെത്തും. അഞ്ചിന് ഭരണങ്ങാനം വിശുദ്ധ അൽഫോൻസാ തീർഥാടനകേന്ദ്രം റെക്ടർ റവ.ഡോ. അഗസ്റ്റിൻ പാലയ്ക്കപ്പറമ്പിൽ വിശുദ്ധ കുർബാനയർപ്പിച്ച് സന്ദേശം നൽകും.

ഓണക്കച്ചവടം പൊടിപൊടിക്കുന്നു; എങ്ങും ആഘോഷ മേളങ്ങൾ

കാഞ്ഞിരപ്പള്ളി: ഓണം പടിവാതിൽക്കൽ എത്തിയതോടെ ടൗണിൽ ഓണവിപണി സജീവമായി. ഓണക്കോടിയെടുക്കാനും സാധനങ്ങള്‍ വാങ്ങാനും ആളുകളുടെ തിരക്കേറി. ഇലക്‌ട്രോണിക് ഉത്പന്നങ്ങള്‍, ഗൃഹോപകരണങ്ങള്‍ എന്നിവ വില്‍ക്കുന്ന കടകളിലും വസ്ത്രവ്യാപാര ശാലകളിലും നല്ല തിരക്കാണ്. ഡിസ്‌കൗണ്ട് ഉള്‍പ്പെടെ ആകര്‍ഷകമായ ഓഫറുകളും ആനുകൂല്യങ്ങളുമാണ് ഉപഭോക്താക്കള്‍ക്കായി കമ്പനികളും വ്യാപാര സ്ഥാപനങ്ങളും പ്രഖ്യാപിച്ചിട്ടുള്ളത്. വില കുതിച്ചിട്ടും ഉപ്പേരി ഓണവിപണിയിൽ ഇത്തവണയും താരം ഉപ്പേരി തന്നെ. വെളിച്ചെണ്ണ വില ഉയർന്നതോടെ ഉപ്പേരിക്ക് ഇക്കുറി വില കൂടി. 440 രൂപയാണ് ഉപ്പേരി വില. വിലയിൽ കൂടിയെങ്കിലും കച്ചവടം കുറഞ്ഞിട്ടില്ല. കഴിഞ്ഞ വർഷം 380 രൂപയുണ്ടായിരുന്ന ഉപ്പേരിയുടെയും ശർക്കരവരട്ടിയുടെയും വില ഇത്തവണ 440ലെത്തി. വെളിച്ചെണ്ണയുടെ വിലയിൽ കുത്തനേയുണ്ടായ വർധനയാണ് ഉപ്പേരി വിലയിലും കാര്യമായി പ്രതിഫലിച്ചത്. 200 രൂപയുണ്ടായിരുന്ന വെളിച്ചെണ്ണയുടെ വില ഇത്തവണ 460 രൂപയായാണ് ഉയർന്നത്. ഏത്തയ്ക്ക വിലയിൽ മാത്രമാണ് അല്പം ആശ്വാസം. 45 രൂപയാണ് പച്ച ഏത്തയ്ക്കാക്ക് കിലോയ്ക്ക് വില. പാലക്കാടിനു പുറമേ മേട്ടുപ്പാളയത്തുനിന്നു കൂടിയാണ് ഉപ്പേരിക്കായുള്ള എത്തയ്ക്ക കൂടുതലായും എത്തുന്നത്. ഉപ്പേരിക്കും ശർക്കരവരട്ടിക്കും വില ഉയർന്നിട്ടുണ്ടെങ്കിലും കച്ചവടത്തെ ബാധിച്ചിട്ടില്ല. പാമോയിലിനേക്കാൾ രുചി കൂടുതലാണ് എന്നതിനാൽ ശുദ്ധമായ വെളിച്ചെണ്ണയില്‍ തയാറാക്കുന്ന ഉപ്പേരിക്കാണ് എല്ലാ വർഷവും ഡിമാൻഡ്. ആവശ്യക്കാരുടെ മുന്നിൽ ഉടൻ വറത്തു നൽകുന്ന കടകളിലാണ് ഓണത്തോടടുക്കുമ്പോൾ ഉപ്പേരിക്കും ശർക്കരവരട്ടിക്കും തിരക്ക്. ജമന്തി 500, വാടാമുല്ല 350 ഓണമെത്തിയതോടെ പൂവിപണിയിൽ തകർപ്പൻ കച്ചവടം. അത്തപ്പൂക്കളം ഒരുക്കാനും മറ്റുമായി പൂക്കള്‍ക്കു നല്ല ഓര്‍ഡറുകളാണ് ലഭിക്കുന്നതെന്നു കച്ചവടക്കാര്‍ പറയുന്നു. ബന്ദി, ജമന്തി, വാടാമുല്ല, അരളി തുടങ്ങിയവയാണ് പ്രധാന പൂക്കള്‍. ജമന്തി-500 (ഒരു കിലോ), ബന്ദി - 220 (ഒരു കിലോ), വാടാമുല്ല - 350, മുല്ല - 150 (ഒരു മീറ്റർ), അരളി - 500, വെള്ള ജമന്തി-700, റെഡ് റോസ് - 600, പിങ്ക് റോസ് - 400, താമര പൂവ് - 50 (ഒരണ്ണം), പച്ചയില - 120 എന്നിങ്ങനെയാണ് പൂക്കളുടെ വില. തമിഴ്നാട്, ബംഗളൂരു എന്നിവിടങ്ങളില്‍നിന്നാണ് പൂക്കള്‍ എത്തുന്നത്. ഓണത്തിനു ദിവസങ്ങൾ മാത്രം ബാക്കിനിൽക്കേ പൂക്കളുടെ വില ഇനിയും ഉയരാന്‍ സാധ്യതയുണ്ട്.

ഓണവിപണികൾ ഉണർന്നു

കാഞ്ഞിരപ്പള്ളി: കാഞ്ഞിരപ്പള്ളി സര്‍വീസ് കോ-ഓപ്പറേറ്റീവ് ബാങ്കിന്‍റെ ആഭിമുഖ്യത്തില്‍ നടന്ന ഓണവിപണിയുടെ ഉദ്ഘാടനം ബാങ്ക് പ്രസിഡന്‍റ് സ്റ്റനിസ്ലാവോസ് വെട്ടിക്കാട്ട് നിര്‍വഹിച്ചു. ബാങ്ക് ഭരണസമിതിയംഗങ്ങളായ തോമസുകുട്ടി ഞള്ളത്തുവയലില്‍, റ്റോജി വെട്ടിയാങ്കല്‍, സെക്രട്ടറി ഷൈജു ഫ്രാന്‍സിസ്‌ കുളക്കുടി എന്നിവര്‍ പ്രസംഗിച്ചു. കേരള സര്‍ക്കാരിന്‍റെ ആഭിമുഖ്യത്തില്‍ കണ്‍സ്യൂമര്‍ ഫെഡറേഷൻ വഴി ലഭിച്ച സബ്സിഡി പലചരക്ക് സാമഗ്രികള്‍ ബാങ്കിന്‍റെ വിഴിക്കിത്തോട്, കാളകെട്ടി, തമ്പലക്കാട്, ആനക്കല്ല് ശാഖകൾ വഴി വിതരണം ചെയ്യും. ഭരണസമിതിയംഗങ്ങളായ എം.ജി. സാബു മുതുകാട്ടുവയലില്‍, ബ്ലെസി ബിനോയ്‌ വട്ടവയലില്‍, രാജു തെക്കുംതോട്ടം, ദിലീപ് ചന്ദ്രന്‍ പറപ്പള്ളില്‍, ബിജു ശൗര്യാംകുഴി തുടങ്ങിയവര്‍ നേതൃത്വം നല്‍കി. കാഞ്ഞിരപ്പള്ളി കൃഷിഭവനും പഞ്ചായത്തും ചേർന്ന് നടത്തുന്ന ഓണവിപണി മിനി സിവില്‍ സ്റ്റേഷന് എതിര്‍ വശത്തുള്ള പഞ്ചായത്ത് വക കെട്ടിടത്തിൽ ആരംഭിച്ചു. കടകളിലെ വില‍യേക്കാൾ താഴ്ന്ന വിലയ്ക്ക് പച്ചക്കറികൾ, നാടൻ നാടന്‍ ഏത്തക്കുലകള്‍ എന്നിവ ലഭിക്കും. നാട്ടിലെ കര്‍ഷകരുടെ ഉത്പന്നങ്ങള്‍ ന്യായവില നല്‍കി വിഷരഹിത ഉത്പന്നങ്ങളാണ് വിപണനം നടത്തുന്നത്. കൂടാതെ സംസ്ഥാന ഹോര്‍ട്ടികോര്‍പ്പില്‍നിന്നു പച്ചക്കറികള്‍ എത്തുന്നുണ്ട്. കാഞ്ഞിരപ്പള്ളി ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി ഓണസമൃദ്ധിയുടെ ഉദ്ഘാടനവും ഓണ വിപണിയുടെ ഉദ്ഘാടനം പഞ്ചായത്ത് പ്രസിഡന്‍റ് കെ.ആര്‍. തങ്കപ്പനും നിർവഹിച്ചു. പഞ്ചായത്ത് വൈസ് പ്രസിഡന്‍റ് സുമി ഇസ്മയില്‍ അധ്യക്ഷത വഹിച്ചു. ബ്ലോക്ക് പഞ്ചായത്തംഗങ്ങളായ ഷക്കീലാ നസീര്‍, ഡാനി ജോസ്, കൃഷി ഓഫീസര്‍ ഡോ. എ.കെ. അര്‍ച്ചന, കൃഷി അസിസ്റ്റന്‍റമാരായ ജെ. ഷൈന്‍, രാജിത കെ. സുകുമാരന്‍ തുടങ്ങിയവര്‍ പ്രസംഗിച്ചു. പാറത്തോട് പഞ്ചായത്ത് കൃഷി ഭവന്‍റെ നേതൃത്വത്തിൽ കൃഷിഭവന്‍റെ മുന്നിലുള്ള ഓപ്പൺ മാർക്കറ്റിൽ ഓണവിപണി ആരംഭിച്ചു. പാറത്തോട് പഞ്ചായത്ത് പ്രസിഡന്‍റ് കെ.കെ. ശശികുമാർ വിപണി ഉദ്ഘാടനം ചെയ്തു. വൈസ് പ്രസിഡന്‍റ് സോഫി ജോസഫ് അധ്യക്ഷത വഹിച്ചു. കർഷകരിൽനിന്നു പച്ചക്കറികൾ വിപണി വിലയേക്കാൾ 10 ശതമാനം അധികം വില നൽകി സംഭരിച്ച് 30 ശതമാനം വരെ വിലക്കുറവിലാണ് വിൽക്കുന്നത്.

ഓണാഘോഷം

പാലമ്പ്ര: ഗദ്സമെനി ഇടവകയിൽ സീനിയർ യൂത്തിന്‍റെ ആഭിമുഖ്യത്തിൽ ഓണാഘോഷം - ആരവം - സംഘടിപ്പിച്ചു. വികാരി റവ.ഡോ. ജിയോ കണ്ണംകുളം സിഎംഐ ഉദ്ഘാടനം ചെയ്തു. സിസ്റ്റർ ഗ്ലാഡിസ് സിഎംസി, ബ്രദർ അൽഫോന്‌സ് പുത്തൻപുരയ്ക്കൽ, വിപിൻ കൊല്ലിയിൽ, സെബാസ്റ്റ്യൻ വട്ടക്കുന്നേൽ, മജു പാറടിയിൽ എന്നിവർ പ്രസംഗിച്ചു. വിവിധ മത്സരങ്ങൾ സംഘടിപ്പിച്ചു. സമ്മാനക്കൂപ്പൺ വിജയികൾക്ക് സമ്മാനങ്ങൾ വിതരണം ചെയ്തു. പൊന്‍കുന്നം: നിര്‍മാണത്തൊഴിലാളി യൂണിയന്‍ (സിഐടിയു) ചിറക്കടവ് പഞ്ചായത്ത് കമ്മിറ്റി ഓണാഘോഷവും ബോണസ് വിതരണവും നടത്തി. യൂണിയന്‍ സെക്രട്ടറി വി.ഡി. രജികുമാര്‍ ബോണസ് വിതരണം ഉദ്ഘാടനം ചെയ്തു. കണ്‍വീനര്‍ കെ.കെ. കൃഷ്ണന്‍കുട്ടി അധ്യക്ഷത വഹിച്ചു. ജില്ലാ ജോയിന്‍റ് സെക്രട്ടറി കെ.എന്‍. ചന്ദ്രദാസ് ഓണസന്ദേശം നല്‍കി. ഗോപാലകൃഷ്ണന്‍ മന്ദിരം, ജഗദീഷ് ചിറക്കടവ്, സന്തോഷ് ശാന്തിഗ്രാം, ഫൈസല്‍ പൊന്‍കുന്നം, ശരണ്‍ കോയിപ്പള്ളി തുടങ്ങിയവര്‍ പ്രസംഗിച്ചു. പൊന്‍കുന്നം: കേരള സ്കൂൾ ടീച്ചേഴ്സ് അസോസിയേഷൻ കാഞ്ഞിരപ്പള്ളി സബ് ജില്ലയുടെ ഓണാഘോഷം ചലച്ചിത്ര ശബ്ദ ലേഖകൻ അനിൽ രാധാകൃഷ്ണൻ ഉദ്ഘാടനം ചെയ്തു. സബ് ജില്ലാ പ്രസിഡന്‍റ് എം.ആർ. പ്രവീൺ അധ്യക്ഷത വഹിച്ചു. ജില്ലാ പ്രസിഡന്‍റ് പി.എ. ജാസ്മിൻ, ജില്ലാ വൈസ് പ്രസിഡന്‍റ് പി.ആർ. പ്രവീൺ, മുൻ സംസ്ഥാന കമ്മിറ്റിയംഗം ബി. ശ്രീകുമാർ, ജില്ലാ എക്സിക്യൂട്ടീവ് കമ്മിറ്റി അംഗം ആർ. രാഹുൽ, സബ് ജില്ലാ എക്സിക്യൂട്ടീവ് കമ്മിറ്റിയംഗം ബി. ജയസൂര്യ എന്നിവർ പ്രസംഗിച്ചു. വിവിധ മത്സരങ്ങളും കലാപരിപാടികളും നടത്തി.

യാത്രക്കാർക്ക് ഓണസമ്മാനവുമായി സ്വകാര്യ ബസുകൾ

പൊൻകുന്നം: ബസിലെ യാത്രക്കാർക്ക് ഉപ്പേരി വിതരണം ചെയ്ത് സ്വകാര്യ ബസ് ജീവനക്കാർ. കോട്ടയം-എരുമേലി റൂട്ടിൽ സർവീസ് നടത്തുന്ന അമീൻ, ബോയിംഗ്, ലക്ഷ്മി എന്നീ ബസുകളിലാണ് ഇന്നലെ വേറിട്ട ഓണാഘോഷം നടന്നത്. ഉപ്പേരിയും ശർക്കരവരട്ടിയും അടങ്ങിയ ചെറിയ പായ്ക്കറ്റുകളാണ് യാത്രക്കാർക്ക് ബസ് ജീവനക്കാർ നൽകിയത്. എല്ലാ യാത്രക്കാർക്കും ഹൃദയം നിറഞ്ഞ ഓണാശംസകൾ മാനേജ്‌മെന്‍റ് ആൻഡ് സ്റ്റാഫ് അമീൻ, ബോയിംഗ്, ലക്ഷ്മി എന്ന് രേഖപ്പെടുത്തിയ കവറിലാണ് ഉപ്പേരി വിതരണം ചെയ്തത്. എല്ലാ വർഷവും ഓണത്തിന് ഉപ്പേരിയും ക്രിസ്മസിന് കേക്കും സ്ഥിരം യാത്രക്കാർക്ക് വിതരണം ചെയ്യാറുണ്ടെന്ന് അമീൻ ബസുടമ യൂസഫ് ചിറക്കുഴി പറഞ്ഞു. ഇതിനു പുറമേ ബസിൽ യാത്ര ചെയ്യുന്ന സ്ഥിരം യാത്രക്കാരിൽ ആരെങ്കിലും അവർ ജോലി ചെയ്യുന്ന സ്ഥലത്തുനിന്നു സ്ഥലം മാറിപ്പോവുകയോ പെൻഷനാവുകയോ ചെയ്താൽ അവർക്ക് ഗിഫ്റ്റ് നൽകാറുണ്ടെന്നും യൂസഫ് പറഞ്ഞു. ഇതിന് പുറമേ ബസിൽ സ്ഥിരം യാത്രക്കാരുടെ വാട്‌സ്ആപ്പ് ഗ്രൂപ്പുമുണ്ട്.

വല്യമ്മയുടെ കളഞ്ഞുപോയ കിറ്റിന് പകരമായി എരുമേലി പോലീസിന്‍റെ നന്മയോണം

എരുമേലി: കടം മേടിച്ച 500 രൂപ കൊണ്ട് വാങ്ങിയ അരിയും സാധനങ്ങളുമായി എരുമേലി പ്രൈവറ്റ് ബസ് സ്റ്റാൻഡിൽ കഴിഞ്ഞ ദിവസം ബസ് കാത്തിരുന്ന വയോധിക ബസ് വന്നപ്പോൾ അരികിൽ ആ കിറ്റില്ല. കാണാതായ കിറ്റ് കിട്ടാൻ വേണ്ടി മണിക്കൂറോളം സ്റ്റാൻഡിൽ ഇരുന്ന് ഒടുവിൽ നിരാശയോടെ കണ്ണിമലയിലെ തന്‍റെ വീട്ടിൽ എത്തി ഒരു ദിവസം പിന്നിട്ടപ്പോൾ പോലീസിന്‍റെ വിളി, അമ്മേ സ്റ്റേഷൻ വരെ ഒന്ന് വരാവോ, കാണാതായ കിറ്റ് തരാം. തന്‍റെ സങ്കടം എങ്ങനെ പോലീസ് അറിഞ്ഞെന്ന അദ്‌ഭുതത്തിലായിരുന്നു ആ അമ്മ. സ്റ്റേഷനിൽ എത്തിയപ്പോൾ പോലീസ് നൽകിയ കിറ്റ് തന്‍റേതല്ലെന്ന് അമ്മ പറഞ്ഞു. സാരമില്ല, ഇത് സ്വന്തം കിറ്റായി കരുതി കൊണ്ടുപോയി ഓണം ആഘോഷിക്കണമെന്ന് പോലീസ് നിർബന്ധപൂർവം പറഞ്ഞതോടെ അമ്മ അത് വാങ്ങി വീട്ടിലേക്ക് സന്തോഷത്തോടെ മടങ്ങി. എരുമേലി പ്രൈവറ്റ് ബസ് സ്റ്റാൻഡിൽ അഞ്ച് കിലോഗ്രാം അരിയും പലവ്യഞ്ജന സാധനങ്ങളും ഒരു കുടയും ഉൾപ്പടെയാണ് വല്യമ്മയ്ക്ക് കിറ്റിൽ നഷ്‌ടപ്പെട്ടത്. പോലീസ് നൽകിയ കിറ്റിലാകട്ടെ അതിലേറെ സാധനങ്ങളും പുത്തൻ കുടയും ഉണ്ടായിരുന്നു. തന്‍റെ കിറ്റും സാധനങ്ങളും നഷ്‌ടപ്പെട്ടപ്പോൾ സ്റ്റാൻഡിലെ കച്ചവടക്കാരോട് അമ്മ വിവരം പറയുകയും ഇവരെല്ലാം ചേർന്ന് തെരച്ചിൽ നടത്തുകയും ചെയ്തിരുന്നു. വ്യാപാരികളിൽനിന്നാണ് ഈ വിവരം എരുമേലി പോലീസ് അറിഞ്ഞത്. ഏതോ ഒരു സ്ത്രീ വല്യമ്മയുടെ കിറ്റ് അറിയാതെ എടുത്തു കൊണ്ടുപോയെന്നാണ് പോലീസ് അന്വേഷണത്തിൽ മനസിലായെങ്കിലും സ്ത്രീയെ കണ്ടെത്താനായില്ല. ഇതോടെയാണ് വല്യമ്മയ്ക്ക് നഷ്ടപ്പെട്ട സാധനങ്ങൾ വാങ്ങി നൽകാൻ പോലീസുകാർ തീരുമാനിച്ചത്.

കാഞ്ഞിരപ്പള്ളി പഴയപള്ളിയിൽ ഭക്തജനത്തിരക്കേറി

കാഞ്ഞിരപ്പള്ളി: സീറോമലബാർ മേജർ ആർക്കി എപ്പിസ്കോപ്പൽ തീർഥാടനകേന്ദ്രമായ കാഞ്ഞിരപ്പള്ളി പഴയപള്ളിയിൽ എട്ടുനോമ്പാചരണത്തിനും പരിശുദ്ധ മാതാവിന്‍റെ പിറവിത്തിരുനാളിനും പങ്കെടുക്കാൻ വിശ്വാസികളുടെ തിരക്ക്. കിഴക്കന്‍ പ്രദേശത്തെ പുരാതന മരിയന്‍ തീർഥാടനകേന്ദ്രമാണ് പഴയപള്ളി. നാടിന്‍റെ നാനാഭാഗത്തുനിന്നും ആയിരക്കണക്കിനു വിശ്വാസികളാണ് തിരുക്കർമങ്ങളിൽ പങ്കെടുക്കാനും നേർച്ചകാഴ്ചകൾ അർപ്പിക്കാനും അക്കരയമ്മയുടെ സവിധത്തിലേക്ക് ഒഴുകിയെത്തുന്നത്. രാവിലെ പത്തുമുതൽ വിതരണം ചെയ്യുന്ന നേർച്ചക്കഞ്ഞി കഴിക്കാനും നാനാജാതി മതസ്ഥർ എത്തുന്നുണ്ട്. എല്ലാ ദിവസവും വൈകുന്നേരം 6.15ന് നടക്കുന്ന ജപമാല പ്രദക്ഷിണത്തിലും നിരവധി വിശ്വാസികളാണ് പങ്കെടുക്കുന്നത്. തിരുനാളിന്‍റെ സുഗമമായ നടത്തിപ്പിന് കത്തീഡ്രൽ വികാരിയും ആർച്ച്പ്രീസ്റ്റുമായ റവ.ഡോ. കുര്യൻ താമരശേരി, ഫാ. ജോസഫ് ആലപ്പാട്ടുകുന്നേൽ, ഫാ. തോമസ് മുളങ്ങാശേരി, ഫാ. തോമസ് നല്ലൂർകാലായിപ്പറമ്പിൽ, കൈക്കാരന്മാരായ കെ.സി. ഡൊമിനിക് കരിപ്പാപ്പറമ്പിൽ, ഏബ്രഹാം കെ. അലക്സ് കൊല്ലംകുളം, പി.കെ. കുരുവിള പിണമറുകിൽ, ടി.സി. ചാക്കോ വാവലുമാക്കൽ, ജനറൽ കൺവീനർ മാത്തച്ചൻ മാളിയേക്കൽ, പബ്ലിസിറ്റി കൺവീനർ ബിജു പത്യാല എന്നിവരുടെ നേതൃത്വത്തിലുള്ള വിവിധ കമ്മിറ്റികൾ പ്രവർത്തിച്ചുവരുന്നു. രൂപത എസ്എംവൈഎമ്മിന്‍റെയും മാതൃവേദിയുടെയും നേതൃത്വത്തില്‍ ഇന്ന് മരിയൻ തീർഥാടനം നടത്തും. രാവിലെ 9.30ന് രൂപതയിലെ വിവിധ ഇടവകയിൽനിന്നുള്ള മാതാക്കളും യുവജനങ്ങളുമൊരുമിച്ച് സെന്‍റ് ഡൊമിനിക്സ് കത്തീഡ്രൽ പള്ളിയിൽ ദിവ്യകാരുണ്യാരാധനയിൽ പങ്കുചേരും. തുടർന്ന് പഴയപള്ളിയിലേക്ക് കാഞ്ഞിരപ്പള്ളി ടൗൺ ചുറ്റി പരിശുദ്ധ അമ്മയുടെ 30 പ്രത്യക്ഷീകരണങ്ങൾ ഉൾച്ചേർത്തുകൊണ്ട് ജപമാല പ്രദക്ഷിണം നടത്തും. പഴയപള്ളിയിൽ ഇന്ന് രാവിലെ അഞ്ചിന് വിശുദ്ധ കുർബാന, 6.30ന് വിശുദ്ധ കുർബാന - ഫാ. ബോബി അലക്സ് മണ്ണംപ്ലാക്കൽ, 8.15ന് വിശുദ്ധ കുർബാന - ഫാ. പയസ് കൊച്ചുപറന്പിൽ, 10ന് വിശുദ്ധ കുർബാന - ഫാ. തോമസ് ഉറുന്പിത്തടത്തിൽ, 11.30ന് മരിയൻ തീർഥാടനം - മാർ ജോസ് പുളിക്കൽ, 12ന് വിശുദ്ധ കുർബാന - ഫാ. മാത്യു ഓലിക്കൽ, ഫാ. തോമസ് നരിപ്പാറയിൽ, രണ്ടിന് വിശുദ്ധ കുർബാന - ഫാ. ജയിംസ് വടക്കേകരിക്കാട്ടിൽ, വൈകുന്നേരം 4.30ന് വിശുദ്ധ കുർബാന - ഫാ. സെബാസ്റ്റ്യൻ പാലംമൂട്ടിൽ, 6.15ന് ജപമാല പ്രദക്ഷിണം, രാത്രി ഏഴിന് വിശുദ്ധ കുർബാന.

നന്ദിയുടെ നല്ല വാക്കുകളുമായെത്തി മാര്‍ സെബാസ്റ്റ്യന്‍ വാണിയപ്പുരയ്ക്കല്‍

കാഞ്ഞിരപ്പള്ളി: നിയുക്ത കല്യാണ്‍ ആര്‍ച്ച്ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കല്‍ ഇന്നലെ മാതൃരൂപതയായ കാഞ്ഞിരപ്പള്ളിയിലെത്തി ധന്യമായ പഴയ ഓര്‍മകള്‍ നന്ദിയോടെ അനുസ്മരിച്ചു. വാണിയപ്പുരയ്ക്കല്‍ കുടുംബവും മാതാപിതാക്കളും സഹോദരങ്ങളും തനിക്ക് പ്രഥമ ഭവനവും കാഞ്ഞിരപ്പള്ളി രൂപത രണ്ടാമത്തെ വിശാലമായ കുടുംബവുമാണെന്ന് അദ്ദേഹം പറഞ്ഞു. മേരിമാതാ മൈനര്‍ സെമിനാരി പരിശീലനം മുതല്‍ ഇന്നേവരെയുള്ള പ്രയാണത്തില്‍ കാഞ്ഞിരപ്പള്ളി രൂപതാ കുടുംബം നല്‍കിയ കരുതലും മാര്‍ ജോസഫ് പവ്വത്തില്‍, മാര്‍ മാത്യു വട്ടക്കുഴി, മാര്‍ മാത്യു അറയ്ക്കല്‍, മാര്‍ ജോസ് പുളിക്കല്‍ എന്നീ പിതാക്കന്മാരും വൈദികഗണവും സന്യസ്തരും വിശ്വാസികളും നല്‍കിയ കരുതലും പ്രാര്‍ഥനകളും വലിയ ബലം പകര്‍ന്നു. രൂപതയില്‍ വിവിധ ചുമതലകളില്‍ ലഭിച്ച അവസരങ്ങളും പ്രോത്സാഹനങ്ങളും അവിസ്മരണീയമായി സൂക്ഷിക്കുന്നു. യുവദീപ്തി ഡയറക്ടര്‍ ശുശ്രൂഷയ്ക്കുശേഷം റോമില്‍ ഉപരിപഠനത്തിനു പോയി മടങ്ങിയെത്തിയപ്പോള്‍ മാര്‍ മാത്യു അറയ്ക്കല്‍ ജുഡീഷല്‍ വികാരിയായി നിയമിച്ചു. ജനങ്ങളോടൊപ്പം കഴിയാനുള്ള ആഗ്രഹത്തില്‍ ഏതെങ്കിലുമൊരു ചെറിയ പള്ളിയില്‍ അസിസ്റ്റന്‍റ് വികാരി സ്ഥാനംകൂടി തരുമോ എന്നു ചോദിച്ചപ്പോള്‍ അറയ്ക്കല്‍ പിതാവ് വികാരിസ്ഥാനംതന്നെയാണ് ഏല്‍പ്പിച്ചത്. തുടര്‍ന്ന് പൂമറ്റം, ചെന്നാക്കുന്ന്, മുളംകുന്ന് പള്ളികളില്‍ വികാരിയായി. നല്ല ബന്ധങ്ങള്‍ വളര്‍ത്തുക മാത്രമല്ല എല്ലാവരെയും തുറവിയോടെ കേള്‍ക്കുക എന്നത് ഒരുപാട് അറിവും അനുഭവവും പകര്‍ന്നുകിട്ടാന്‍ ഇടയായി. രൂപതയിലും പുറത്തും അനേകരുമായി സ്ഥാപിച്ച ആത്മബന്ധമാണ് ജീവിതത്തിലെ ഏറ്റവും വലിയ കരുതല്‍. രൂപതയില്‍ ഇപ്പോള്‍ വലിയ ചുമതലകള്‍ വഹിക്കുന്ന വൈദികരേറെയും മൈനര്‍ സെമിനാരി പഠനം മുതല്‍ സഹപാഠികളും സഹപ്രവര്‍ത്തകരും ആത്മസ്‌നേഹിതരുമാണെന്നത് വലിയൊരു ബലമായി മാറി. മാര്‍ ജോസ് പുളിക്കല്‍ പിതാവുമായി മൈനര്‍ സെമിനാരിയില്‍ തുടങ്ങിയ സഹോദരബന്ധം ഇന്നും എന്നും ഊഷ്മളമായി സൂക്ഷിക്കുന്നു. മാര്‍ സെബാസ്റ്റ്യന്‍ വാണിയപ്പുരയ്ക്കല്‍ കാഞ്ഞിരപ്പള്ളി പ്രീസ്റ്റ് ഹോമില്‍ കഴിയുന്ന മുന്‍ മൈനര്‍ സെമിനാരി റെക്ടര്‍ ഫാ. മാത്യു ഏറത്തേടത്തെ സന്ദര്‍ശിച്ച് ഇന്നലെ അനുഗ്രഹം തേടി. പാസ്റ്ററല്‍ സെന്‍ററില്‍ ഒരുക്കിയ സ്വീകരണത്തിനുശേഷം മേജർ ആർക്കി എപ്പിസ്കോപ്പൽ മരിയൻ തീർഥാടന കേന്ദ്രമായ പഴയപള്ളിയില്‍ എട്ടുനോമ്പു തിരുനാള്‍ പ്രമാണിച്ച് വിശുദ്ധ കുര്‍ബാന അര്‍പ്പിച്ച ശേഷമാണു മടങ്ങിയത്. പാസ്റ്ററൽ ആനിമേഷൻ ഡയറക്ടർ ഫാ. സ്റ്റാൻലി പുള്ളോലിക്കൽ, പ്രൊക്കുറേറ്റര്‍ ഫാ. ഫിലിപ്പ് തടത്തില്‍, സിബിസിഐ ലെയ്റ്റി കൗൺസിൽ സെക്രട്ടറി ഷെവ. അഡ്വ. വി.സി. സെബാസ്റ്റ്യൻ, രൂപതാ പാസ്റ്ററല്‍ കൗണ്‍സില്‍ സെക്രട്ടറി ഡോ. ജൂബി മാത്യു എന്നിവര്‍ ക്രമീകരണങ്ങള്‍ക്കു നേതൃത്വം നല്‍കി.

മണര്‍കാട് കത്തീഡ്രലിൽ എട്ടുനോമ്പ് പെരുന്നാളിനു കൊടിയേറി

മണര്‍കാട്: ആഗോള മരിയന്‍ തീര്‍ഥാടന കേന്ദ്രമായ മണര്‍കാട് സെന്‍റ് മേരീസ് യാക്കോബായ സുറിയാനി കത്തീഡ്രലിലെ എട്ടുനോമ്പ് പെരുന്നാളിനു കൊടിയേറി. യാക്കോബായ സുറിയാനി സഭയുടെ സുന്നഹദോസ് സെക്രട്ടറിയും കോട്ടയം ഭദ്രാസനാധിപനുമായ ഡോ. തോമസ് മാര്‍ തീമോത്തിയോസ് മെത്രാപ്പോലീത്തായുടെ മുഖ്യകാര്‍മികത്വത്തില്‍ പ്രാര്‍ഥനയ്ക്കുശേഷമാണ് കൊടിമരം ഉയര്‍ത്തിയത്. കുറിയാക്കോസ് കോര്‍എപ്പിസ്‌കോപ്പ കറുകയില്‍, മാത്യു കോര്‍എപ്പിസ്‌കോപ്പ മണവത്ത്, ഫാ.എം.ഐ. തോമസ് മറ്റത്തില്‍, ഫാ. ഗീവര്‍ഗീസ് നടുമുറിയല്‍, ഫാ. കുര്യന്‍ വടക്കേപറമ്പില്‍, ഫാ. സനോജ് കരോട്ടെക്കുറ്റ്, ഫാ. ലിറ്റു തണ്ടാശേരില്‍ എന്നിവര്‍ സഹകാര്‍മികത്വം വഹിച്ചു. അരീപ്പറമ്പ് പാതയില്‍ പി.എ. കുരുവിളയുടെ ഭവനാങ്കണത്തില്‍നിന്നു നിലംതൊടാതെ വെട്ടിയെടുത്ത കൊടിമരം വാദ്യമേളങ്ങളുടെ അകമ്പടിയോടെ കത്തീഡ്രലില്‍ എത്തിച്ചു. ആര്‍പ്പുവിളികളോടെ കരോട്ടെ പള്ളിക്ക് ചുറ്റും ഒരുതവണയും കത്തീഡ്രല്‍ പള്ളിക്ക് ചുറ്റും മൂന്നുതവണയും വിശ്വാസസമൂഹം കൊടിമരവുമായി വലംവച്ചശേഷം കല്‍ക്കുരിശിനു സമീപം എത്തിച്ചു. കൊടിമരം ചെത്തിമിനുക്കി പച്ചിലകള്‍കൊണ്ടും കൊടിതോരണങ്ങള്‍കൊണ്ടും അലങ്കരിച്ചു. ഇടവകയിലെ മുതിര്‍ന്ന അംഗം സി.എം. ജേക്കബ് ചെമ്മാത്ത് കൊടിമരത്തില്‍ കൊടി കെട്ടി. മെത്രാപ്പോലീത്തായുടെയും വൈദികരുടെയും നേതൃത്വത്തില്‍ പ്രാര്‍ഥനകള്‍ക്കുശേഷം കൊടിമരം ഉയര്‍ത്തി. തുടര്‍ന്ന് കരോട്ടെ പള്ളിയിലെ കൊടിമരത്തിലും കൊടി ഉയര്‍ത്തി.

നൂറുമേനി ഗ്രാൻഡ് ഫിനാലെ മഹാസംഗമം 12, 13 തീയതികളില്‍

ചങ്ങനാശേരി: അതിരൂപത ബൈബിള്‍ അപ്പൊസ്തലേറ്റിന്‍റെ ആഭിമുഖ്യത്തില്‍ അതിരൂപതയിലെ 250 ഇടവകകളില്‍ നടത്തിയ നൂറുമേനി വചന പഠന മത്സരങ്ങളുടെ ഗ്രാൻഡ് ഫിനാലെയും മഹാസംഗമവും 12, 13 തീയതികളില്‍ എസ്ബി കോളജ് കാവുകാട്ട് ഹാളില്‍ നടത്തും. ഇടവക, ഫൊറോന, അതിരൂപത തലങ്ങളില്‍ വിജയികളായ നാലായിരത്തോളം പേര്‍ സംഗമത്തില്‍ പങ്കെടുക്കും. സെപ്റ്റംബര്‍ 12ന് നടക്കുന്ന ഗ്രാൻഡ് ഫിനാലെ മത്സരത്തില്‍ വിവിധ റീജണുകളില്‍നിന്ന് മാത്യു തോമസ്, മേരിക്കുട്ടി തോമസ്, മെര്‍ലി ആന്‍ മാത്യു (കുട്ടനാട് റീജണ്‍), ജയിംസ് കെ. ജേക്കബ്, ഷൈനി സെബാസ്റ്റ്യന്‍ (ചങ്ങനാശേരി റീജണ്‍), സോജി ചാക്കോ-മരിയ മാത്യു (നെടുംകുന്നം റീജൺ), ഡോ. സുജിത്ത് ജോ മാത്യു, ഡോ. അനു വര്‍ഗീസ്, മരിയ റോസ് ജോ (കോട്ടയം), ഡോ. അഭിലാഷ് കെ. തോമസ്, ഡോ. റോണ ജോസഫ്, സെബാസ്റ്റ്യൻ തോമസ് കുഴിക്കാട്ടിൽ (തിരുവനന്തപുരം) എന്നീ കുടുംബങ്ങള്‍ പങ്കെടുക്കും. 13ന് രാവിലെ 8.30ന് കാവുകാട്ട് ഹാളില്‍ നടക്കുന്ന മഹാസംഗമം സീറോമലങ്കര മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ബസേലിയോസ് ക്ലീമിസ് കതോലിക്കാബാവ ഉദ്ഘാടനം ചെയ്യും. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. നൂറുമേനി ഗ്രാൻഡ് ഫിനാലെ മെഗാഷോ മത്സരം ആര്‍ച്ച്ബിഷപ് എമെരറ്റസ് മാര്‍ ജോസഫ് പെരുന്തോട്ടം ഉദ്ഘാടനം ചെയ്യും. സമ്മേളനത്തില്‍ എന്‍റെ സ്വന്തം ബൈബിള്‍ പദ്ധതി പ്രഖ്യാപനവും നടത്തപ്പെടും. ഇതോടനുബന്ധിച്ച് മാര്‍ത്തോമ വിദ്യാനികേതന്‍ ഹാളില്‍ നടന്ന നേതൃസമ്മേളനം ഡയറക്ടര്‍ ഫാ. ജോര്‍ജ് മാന്തുരുത്തില്‍ ഉദ്ഘാടനം ചെയ്തു. പരിപാടികളുടെ വിജയത്തിനായി 201 അംഗ കമ്മിറ്റികള്‍ രൂപീകരിച്ചു. ബൈബിള്‍ അപ്പൊസ്തലേറ്റ് പ്രസിഡന്‍റ് ഡോ. റൂബിള്‍ രാജ്, ജനറല്‍ കണ്‍വീനര്‍ ജോസി കടന്തോട്, ജോസുകുട്ടി കുട്ടംപേരൂര്‍, പ്രഫ. ജോസഫ് ടിറ്റോ, മറിയം പൊട്ടംകുളം, ടോമിച്ചന്‍ കൈതപ്പറമ്പില്‍, ജോബി തൂമ്പുങ്കല്‍, ആന്‍റണി മലയില്‍, അഡ്വ. ഡെന്നീസ് ജോസഫ്, ലാലി ഇളപ്പുങ്കല്‍, ബീനാ തൂമ്പുങ്കല്‍, റോയി വേലിക്കെട്ടില്‍, ജോഷി കൊല്ലാപുരം, ജോസ് സെബാസ്റ്റ്യന്‍, ലാലപ്പന്‍, ഇ.ജെ. ജോസഫ്, സിബി മുക്കാടന്‍, ജോര്‍ജി ജോസഫ് എന്നിവര്‍ പ്രസംഗിച്ചു.

വീടുകളില്‍നിന്ന് കുട്ടികള്‍ക്ക് ആത്മവിശ്വാസം പകരണം: മാര്‍ തോമസ് തറയില്‍

തൃക്കൊടിത്താനം: വീടുകളില്‍ കുട്ടികള്‍ക്ക് ആത്മവിശ്വാസം പകരണമെന്നും മാതാപിതാക്കള്‍ ഇക്കാര്യത്തില്‍ ശ്രദ്ധിക്കണമെന്നും ആര്‍ച്ച്ബിഷപ് മാര്‍ തോമസ് തറയില്‍. സമൂഹത്തിന്‍റെ ഉത്തരവാദിത്തമുള്ള പൗരന്മാരായി വളരാന്‍ മാതാപിതാക്കള്‍ മക്കളെ പ്രോത്സാഹിപ്പിക്കണമെന്നും ആര്‍ച്ച് ബിഷപ് ചൂണ്ടിക്കാട്ടി. സഭ തൊഴില്‍ നല്‍കുന്ന സ്ഥാപനം അല്ല, സേവനമേഖലയും മാതൃകയുമാണ്. വിശ്വാസവും വിദ്യാഭ്യാസവും ആരോഗ്യപരമായ സൗകര്യങ്ങളും ഒരുക്കി മക്കളുടെ സമഗ്ര വളര്‍ച്ചയ്ക്ക് വഴിതെളിയിക്കുന്നതാണ് സഭയുടെ ദൗത്യമെന്നും ആര്‍ച്ച്ബിഷപ് കൂട്ടിച്ചേര്‍ത്തു. ഇടവക കലോത്സവത്തിന്‍റെ ലോഗോ പ്രകാശനകര്‍മം അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട് നിര്‍വഹിച്ചു. വികാരി ഫാ. സെബാസ്റ്റ്യന്‍ പുന്നശേരി, മോളി പ്ലാപ്പറമ്പില്‍ എന്നിവര്‍ പ്രസംഗിച്ചു.

നെഹ്റു ട്രോഫിക്കും ബിഫി പുല്ലുകാടിനും ഇന്ന് ചങ്ങനാശേരിയിൽ വരവേല്പ്

ചങ്ങനാശേരി: ചങ്ങനാശേരി സ്വദേശി ബിഫി പുല്ലുകാട് ക്യാപ്റ്റനായ വിബിസി കൈനകരിക്കു ലഭിച്ച നെഹ്റു ട്രോഫി ഇന്നു രാവിലെ 11ന് ചങ്ങനാശേരിയിൽ എത്തും. ചങ്ങനാശേരി ക്ലബ്ബിൽ നടക്കുന്ന സമ്മേളനം ജോബ് മൈക്കിൾ എംഎൽഎ ഉദ്ഘാനം ചെയ്യും. തുടർന്നാരംഭിക്കുന്ന റോഡ് ഷോ വിവിധ സ്ഥാപനങ്ങളുടെ സ്വീകരണം ഏറ്റുവാങ്ങി പാലത്ര ബൈപാസ് വഴി, കവല, പെരുന്ന അഞ്ചുവിളക്ക്, ചങ്ങനാശേരി മാർക്കറ്റ് ചുറ്റി കുരിശുംമൂട് സർഗക്ഷേത്രയിൽ സമാപിക്കും.

കവിയൂര്‍ റോഡിന്‍റെ ശോച്യാവസ്ഥ: കേരള കോണ്‍ഗ്രസ് ധര്‍ണ നടത്തി

ചങ്ങനാശേരി: ചങ്ങനാശേരി -കവിയൂര്‍ റോഡിന്‍റെ നിര്‍മാണത്തിന് സര്‍ക്കാര്‍ അടിയന്തരമായി ഇടപെടണമെന്ന് കേരള കോണ്‍ഗ്രസ് വൈസ്‌ചെയര്‍മാന്‍ ജോസഫ് എം. പുതുശേരി. കാര്യക്ഷമമായി നടപ്പിലാക്കേണ്ട ജല്‍ ജീവന്‍ പദ്ധതി കെടുകാര്യസ്ഥതകൊണ്ട് ഇല്ലാതായെന്നും അദ്ദേഹം പറഞ്ഞു. ചങ്ങനാശേരി -കവിയൂര്‍ റോഡ് പുനര്‍നിര്‍മിക്കുക, ജല്‍ ജീവന്‍ പൈപ്പുകള്‍ സ്ഥാപിക്കാന്‍ കുത്തിപ്പൊളിച്ച റോഡുകള്‍ പുനര്‍നിര്‍മിക്കുക തുടങ്ങിയ ആവശ്യങ്ങളുന്നയിച്ച് കേരള കോണ്‍ഗ്രസ് പായിപ്പാട് മണ്ഡലം കമ്മിറ്റി നാലുകോടി കവലയില്‍ നടത്തിയ ജനകീയ ധര്‍ണ ഉദ്ഘാടനം ചെയ്യുകയായിരുന്നു അദ്ദേഹം. മണ്ഡലം പ്രസിഡന്‍റ് ജോഷി സെബാസ്റ്റ്യന്‍റെ അധ്യക്ഷതയില്‍ നിയോജകമണ്ഡലം പ്രസിഡന്‍റ് മാത്തുക്കുട്ടി പ്ലാത്താനം ആമുഖപ്രസംഗവും ഉന്നതാധികാര സമിതിയംഗം വി.ജെ. ലാലി മുഖ്യപ്രസംഗവും നടത്തി. ജോര്‍ജ്കുട്ടി മാപ്പിളശേരി, സിബി ചാമക്കാല, സെബാസ്റ്റ്യന്‍ സ്രാങ്കന്‍, ടോജി കളത്തിപ്പറമ്പില്‍, ജയിംസുകുട്ടി കിഴക്കേപറമ്പില്‍ എന്നിവര്‍ പ്രസംഗിച്ചു.

ഓണക്കാലത്ത് ചങ്ങനാശേരി ഡിപ്പോ പ്രവര്‍ത്തനം ദുരിതത്തില്‍

ചങ്ങനാശേരി: കണ്ടക്ടറുടേയും ഡ്രൈവര്‍മാരുടേയും കുറവ്. ഓണസീസണില്‍ കെഎസ്ആര്‍ടിസി ചങ്ങനാശേരി ഡിപ്പോയുടെ പ്രവര്‍ത്തനം ദുരിതത്തില്‍. 102 കണ്ടക്ടര്‍മാരും 102 ഡ്രൈവറുമാണ് ഈ ഡിപ്പോയില്‍ വേണ്ടത്. എന്നാല്‍, രണ്ടു വിഭാഗങ്ങളിലും പത്തു പേരുടെ വീതം കുറവാണുള്ളത്. മൂന്നുമാസംമുമ്പ് ബദലി വിഭാഗത്തില്‍പ്പെട്ട ആറു കണ്ടക്ടര്‍മാരെയും നാലു ഡ്രൈവര്‍മാരേയും വര്‍ക്ക് അറേഞ്ച്‌മെന്‍റിന്‍റെ പേരില്‍ കോതമംഗലം ഡിപ്പോയിലേക്കു മാറ്റിയിരുന്നു. ഇവരെ ഇതുവരെ ചങ്ങനാശേരിയിലേക്കു തിരിച്ചയച്ചിട്ടില്ല. ജീവനക്കാരുടെ കുറവുമൂലം സര്‍വീസുകള്‍ ഓപ്പറേറ്റ് ചെയ്യാന്‍ ഡിപ്പോ അധികൃതര്‍ ഏറെ ദുരിതപ്പെടുകയാണ്. 48 ഷെഡ്യൂളുകള്‍ ഓപ്പറേറ്റു ചെയ്യാന്‍ 45 ബസുകളാണുള്ളത്.

ഗ്രാമസമൃദ്ധി 2025ന് തുടക്കം

മണര്‍കാട്: മണര്‍കാട് പ്രാദേശിക കോഴിവളര്‍ത്തല്‍ കേന്ദ്രത്തില്‍ കൂടുതല്‍ കോഴികളെ വളര്‍ത്തുന്നതിന് സൗകര്യമൊരുക്കുമെന്ന് മന്ത്രി ജെ. ചിഞ്ചുറാണി. ശാസ്ത്രീയ രീതിയില്‍ വളര്‍ത്തിയ മുട്ടക്കോഴിക്കുഞ്ഞുങ്ങളുടെ വിതരണം നടപ്പാക്കുന്ന ഗ്രാമസമൃദ്ധി പദ്ധതിയുടെ ഉദ്ഘാടനവും ജൈവ സുരക്ഷ ശക്തിപ്പെടുത്തുന്നതിന്‍റെ ഭാഗമായി ജില്ലാ പഞ്ചായത്തില്‍നിന്നു 25 ലക്ഷം രൂപ വിനിയോഗിച്ചു നടപ്പാക്കിയ വിവിധ പദ്ധതികളുടെ ഉദ്ഘാടനവും നിര്‍വഹിക്കുകയായിരുന്നു മന്ത്രി. കഴിഞ്ഞവര്‍ഷമുണ്ടായ പക്ഷിപ്പനിയെത്തുടര്‍ന്ന് കര്‍ഷകര്‍ക്കുണ്ടായ നഷ്ടം നികത്താന്‍ സര്‍ക്കാര്‍ അവരുടെ ഒപ്പം നിന്നുവെന്നു മന്ത്രി പറഞ്ഞു. തെരുവുനായ്ക്കള്‍ പെരുകുന്നത് തടയാന്‍ മുഴുവന്‍ ബ്ലോക്ക് പഞ്ചായത്തുകളിലും മൊബൈല്‍ എബിസി യൂണിറ്റുകള്‍ തുടങ്ങുമെന്നും മന്ത്രി പറഞ്ഞു. മണര്‍കാട് പ്രാദേശിക കോഴിവളര്‍ത്തല്‍ കേന്ദ്രത്തില്‍ നടന്ന ചടങ്ങില്‍ ചാണ്ടി ഉമ്മന്‍ എംഎല്‍എ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, വൈസ് പ്രസിഡന്‍റ് ജോസ് പുത്തന്‍കാല, ജില്ലാ പഞ്ചായത്തംഗങ്ങളായ മഞ്ജു സുജിത്ത്, പി.എം. മാത്യു, റെജി എം. ഫിലിപ്പോസ്, നിബു ജോണ്‍, മണര്‍കാട് പഞ്ചായത്ത് പ്രസിഡന്‍റ് കെ.സി. ബിജു, ബ്ലോക്ക് പഞ്ചായത്തംഗം പ്രേമ, പഞ്ചായത്തംഗം രജിത അനീഷ് തുടങ്ങിയവർ പ്രസംഗിച്ചു.

വാഴപ്പള്ളി പഞ്ചായത്തില്‍ ഓണസമൃദ്ധി കര്‍ഷകചന്ത

ചങ്ങനാശേരി: വാഴപ്പള്ളി പഞ്ചായത്ത് കൃഷിഭവന്‍റെ ഓണസമൃദ്ധി കര്‍ഷകച്ചന്ത പഞ്ചായത്ത് വൈസ് പ്രസിഡന്‍റ് സഷിന്‍ തലക്കുളത്തിന്‍റെ അധ്യക്ഷതയില്‍ പഞ്ചായത്ത് പ്രസിഡന്‍റ് മിനി വിജയകുമാര്‍ ഉദ്ഘാടനം ചെയ്യുന്നു. സ്റ്റാൻഡിംഗ് കമ്മിറ്റി ചെയര്‍പേഴ്സണ്‍ ലാലിമ്മ ടോമി, വാര്‍ഡ് മെംബര്‍ ഷാജഹാന്‍ എന്നിവര്‍ പ്രസംഗിച്ചു. കൃഷി ഓഫീസര്‍ ബോണി സിറിയക്ക്, കൃഷി അസിസ്റ്റന്‍റുമാരായ പാര്‍വതി സി., രതീഷ് എസ്., ശശികല എസ്.വി., ലിബിമോള്‍ ഏബ്രഹാം എന്നിവര്‍ പ്രസംഗിച്ചു.

ആരോഗ്യകരമായ ജീവിതശൈലിക്ക് പ്രാധാന്യം നല്‍കി ഡോക്‌ടേഴ്‌സ് ടോക്ക്

ചങ്ങനാശേരി: ദഹനസംബന്ധമായ ആരോഗ്യപ്രശ്‌നങ്ങളെക്കുറിച്ചും ശരിയായ ജീവിതശൈലിയെക്കുറിച്ചും അവബോധം നല്‍കുന്നതിനായി സര്‍ഗക്ഷേത്ര പ്രഫഷണല്‍ ഫോറം സംഘടിപ്പിച്ച ഡോക്‌ടേഴ്‌സ് ടോക്ക്. സര്‍ഗക്ഷേത്ര ജെകെവി ഹാളില്‍ നടന്ന ചടങ്ങില്‍ പ്രമുഖ ഗാസ്‌ട്രോ എന്‍ററോളജിസ്റ്റ് ഡോ. പ്രകാശ് സഖറിയാസ് മുഖ്യപ്രഭാഷണം നടത്തി. ആരോഗ്യപരമായ ജീവിതത്തിന് ദഹനസംബന്ധമായ പ്രശ്‌നങ്ങളെ എങ്ങനെ സമീപിക്കാമെന്നും ശരിയായ ഭക്ഷണക്രമം പാലിക്കേണ്ടതിന്‍റെ ആവശ്യകതയെക്കുറിച്ചും അദ്ദേഹം വിശദീകരിച്ചു. സര്‍ഗക്ഷേത്ര ഡയറക്ടര്‍ ഫാ. അലക്‌സ് പ്രായിക്കളം സിഎംഐ, പ്രഫഷണല്‍ ഫോറം പ്രസിഡന്‍റ് ഡോ. ആന്‍റണി തോമസ്, ജോര്‍ജ് വര്‍ക്കി, ആന്‍റണി ജേക്കബ് എന്നിവര്‍ പ്രസംഗിച്ചു.

വില്ലേജ് ഓഫീസിലെ മോഷണം: പ്രതി പിടിയിൽ

ഏറ്റുമാനൂർ: അതിരമ്പുഴ വില്ലേജ് ഓഫീസിൽ മോഷണം നടത്തിയ കേസിലെ പ്രതി പിടിയിൽ. അതിരമ്പുഴ കോട്ടമുറി അമൃതപറമ്പിൽ രതീഷിനെ (45)യാണ് ഏറ്റുമാനൂർ പോലീസ് അറസ്റ്റ് ചെയ്തത്. കഴിഞ്ഞ 23ന് വൈകുന്നേരം ആറിന് അടച്ച വില്ലേജ് ഓഫീസ് 25നു രാവിലെ 9.45ന് തുറക്കുമ്പോഴാണ് മോഷണവിവരം അറിയുന്നത്. ഓഫീസിന്‍റെ മുൻവാതിലിന്‍റെ പൂട്ടു പൊളിച്ച് അകത്തു കയറിയ പ്രതി ഓഫീസിലെ രണ്ടു മേശകളിൽ നിന്നായി 2650 രൂപ മോഷ്ടിച്ചു. ഏറ്റുമാനൂർ പോലീസ് നടത്തിയ തെരച്ചിലിൽ പേരൂർ പള്ളിക്കൂടം ഭാഗത്ത് വച്ചാണ് പ്രതിയെ പിടികൂടിയത്. ഇയാൾക്കെതിരേ ഏറ്റുമാനൂർ പോലീസ് സ്റ്റേഷനിൽ അഞ്ചു കേസുകളുണ്ട്. കോട്ടയം ജില്ലയിൽ കോട്ടയം ഈസ്റ്റ്, കോട്ടയം വെസ്റ്റ്, ഗാന്ധിനഗർ, കണ്ണൂർ ജില്ലയിൽ തലശേരി, കോഴിക്കോട് ജില്ലയിൽ വളയം, എറണാകുളം ജില്ലയിൽ മുളന്തുരുത്തി പോലീസ് സ്റ്റേഷനുകളിലും ഇയാൾക്കെതിരേ കേസുകൾ നിലവിലുണ്ട്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ബാങ്കുകള്‍ വ്യവസായസൗഹൃദ സമീപനം സ്വീകരിക്കണം: ഫ്രാന്‍സിസ് ജോര്‍ജ്

കോട്ടയം: വ്യവസായങ്ങള്‍ക്ക് ലോണ്‍ അനുവദിക്കുന്ന കാര്യത്തിലും അവരുടെ പ്രവര്‍ത്തനങ്ങളിലും ബാങ്കുകള്‍ സൗഹൃദ സമീപനം സ്വീകരിക്കണമെന്ന് ഫ്രാന്‍സിസ് ജോര്‍ജ് എംപി. കോട്ടയം ജില്ലാ വ്യവസായ കേന്ദ്രത്തിന്‍റെ ആഭിമുഖ്യത്തില്‍ ജില്ലാതല ബാങ്കേഴ്‌സ് മീറ്റ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പലപ്പോഴും ബാങ്കുകളുടെ ഇടപെടലുകള്‍ വ്യവസായികള്‍ക്ക് ബുദ്ധിമുട്ട് ഉണ്ടാക്കുന്നുണ്ട്. പെട്ടെന്നുണ്ടാകുന്ന എന്തെങ്കിലും പ്രതിസന്ധിയുടെ പശ്ചാത്തലത്തില്‍ തിരിച്ചടവ് മുടങ്ങിയാല്‍ ബാങ്ക് പ്രതികാര മനോഭാവത്തോടെ ഇടപെടുന്ന ഒറ്റപ്പെട്ട സംഭവങ്ങളുമുണ്ടെന്നും ഫ്രാന്‍സിസ് ജോര്‍ജ് പറഞ്ഞു. ജില്ലാ വ്യവസായ കേന്ദ്രം ജനറല്‍ മാനേജര്‍ വി.ആര്‍. രാഗേഷ് അധ്യക്ഷത വഹിച്ചു. ലീഡ് ഡിസ്ട്രിക്ട് മാനേജര്‍ രാജു ഫിലിപ്പ് മുഖ്യപ്രഭാഷണം നടത്തി. എസ്ബിഐ എജിഎം വിവേക് പി. നായര്‍, സുരേഷ് കുമാര്‍, അലക്‌സാണ്ടര്‍ ഹരീഷ് മുത്തെത്ത് എന്നിവര്‍ പ്രസംഗിച്ചു.

‘ചിങ്ങനിലാവ് 2025’ ജില്ലാതല ഓണാഘോഷത്തിന് നാളെ തുടക്കം

കോട്ടയം: ജില്ലാതല ഓണാഘോഷ പരിപാടി ചിങ്ങനിലാവ് നാളെ തുടക്കമാകും. ജില്ലാ ഭരണകൂടവും ജില്ലാ ടൂറിസം പ്രൊമോഷന്‍ കൗണ്‍സിലും കോട്ടയം നഗരസഭയും സംയുക്തമായി എട്ടു വരെ തിരുനക്കര മൈതാനത്താണ് ഓണാഘോഷം സംഘടിപ്പിക്കുന്നത്. നാളെ വൈകുന്നേരം ആറിന് നടക്കുന്ന ചടങ്ങില്‍ മന്ത്രി വി.എന്‍. വാസവന്‍ ഉദ്ഘാടനം നിര്‍വഹിക്കും. തിരുവഞ്ചൂര്‍ രാധാകൃഷ്ണന്‍ എംഎല്‍എ അധ്യക്ഷത വഹിക്കും. ഗവണ്‍മെന്‍റ് ചീഫ് വിപ് ഡോ.എന്‍. ജയരാജ് ഓണസന്ദേശം നല്‍കും. എംപിമാരായ ഫ്രാന്‍സിസ് ജോര്‍ജ്, ജോസ് കെ. മാണി, കൊടിക്കുന്നില്‍ സുരേഷ്, ആന്‍റോ ആന്‍റണി എന്നിവര്‍ മുഖ്യാതിഥികളാകും. എംഎല്‍എമാരായ മോന്‍സ് ജോസഫ്, സി.കെ. ആശ, മാണി സി. കാപ്പന്‍, ജോബ് മൈക്കിള്‍, സെബാസ്റ്റ്യന്‍ കുളത്തുങ്കല്‍, ചാണ്ടി ഉമ്മന്‍, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജില്ലാ കളക്ടര്‍ ചേതന്‍കുമാര്‍ മീണ, നഗരസഭാധ്യക്ഷ ബിന്‍സി സെബാസ്റ്റ്യന്‍, ജില്ലാ പോലീസ് മേധാവി എ. ഷാഹുല്‍ ഹമീദ് തുടങ്ങിയവര്‍ പങ്കെടുക്കും. ഉദ്ഘാടന പരിപാടിക്കു ശേഷം ജാസി ഗിഫ്റ്റിന്‍റെ സംഗീത പരിപാടി നടക്കും. രാവിലെ ഒന്പതു മുതല്‍ കോട്ടയം വൈഎംസിഎ ഹാളില്‍ അത്തപ്പൂക്കള മത്സവും പത്തുമുതല്‍ സിഎംഎസ് കോളേജ് മൈതാനിയില്‍ സൗഹൃദ ക്രിക്കറ്റ് മത്സരവും സംഘടിപ്പിച്ചിട്ടുണ്ട്. നാലു മുതല്‍ ഏഴു വരെ ദിവസങ്ങളില്‍ വൈകുന്നേരം യഥാക്രമം വൈക്കം മാളവികയുടെ നാടകം ജീവിതത്തിന് ഒരു ആമുഖം, കോട്ടയം മഴവില്‍ മെലഡീസ് അവതരിപ്പിക്കുന്ന ഗാനമേള, ഇടുക്കി കനല്‍ നാടന്‍ കലാസംഘം അവതരിപ്പിക്കുന്ന നാടന്‍പാട്ടും ദൃശ്യാവിഷ്‌കാരവും പ്രോജക്ട് ജി.എസ്. ബാന്‍ഡിന്‍റെ സംഗീതപരിപാടി എന്നിവ അരങ്ങേറും. വിവിധ സര്‍ക്കാര്‍ വകുപ്പുകളുടെ നേതൃത്വത്തിലുള്ള കലാപരിപാടികളും വിവിധ ദിവസങ്ങളില്‍ സംഘടിപ്പിച്ചിട്ടുണ്ട്. എട്ടിന് സമാപനച്ചടങ്ങിനു മുന്നോടിയായി വൈകുന്നേരം നാലിന് പോലീസ് പരേഡ് ഗ്രൗണ്ടില്‍നിന്നു തിരുനക്കര മൈതാനത്തേക്കു സാംസ്‌കാരിക ഘോഷയാത്ര സംഘടിപ്പിക്കും. 5.30ന് തിരുനക്കര മൈതാനത്ത് നടക്കുന്ന സമാപന സമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്യും. ദേശീയ ചലച്ചിത്ര പുരസ്‌കാരജേതാവ് നടന്‍ വിജയരാഘവനെ ചടങ്ങില്‍ ആദരിക്കും.

ലാറ്റക്‌സ് ഫാക്ടറിക്കെതിരേ നാട്ടുകാര്‍ സമരരംഗത്ത്

കടുത്തുരുത്തി: കടുത്തുരുത്തി പഞ്ചായത്ത് എട്ടാം വാര്‍ഡില്‍ പ്രവര്‍ത്തിക്കുന്ന ലാറ്റക്‌സ് ഫാക്ടറിക്കെചതിരേ നാട്ടുകാര്‍ സമരരംഗത്ത്. പറമ്പ്രം പരിസ്ഥിതി സംരക്ഷണ സമിതിയുടെ നേതൃത്വത്തില്‍ ഫാക്ടറിയുടെ പ്രവര്‍ത്തനങ്ങള്‍ അവസാനിപ്പിക്കണമെന്നും പ്രദേശവാസികളെ സ്വന്തം സ്ഥലത്ത് ജീവിക്കാന്‍ അനുവദിക്കണമെന്നും ആവശ്യപ്പെട്ട് നാട്ടുകാര്‍ ഇന്നലെ രാവിലെ കടുത്തുരുത്തി പഞ്ചായത്ത് ഓഫീസിലേക്ക് അവകാശ സംരക്ഷണ പദയാത്രയും തുടര്‍ന്ന് ധര്‍ണയും നടത്തി. പദയാത്ര എന്‍എപിഎം സംസ്ഥാന കോ-ഓര്‍ഡിനേറ്റര്‍ അഡ്വ. അനീഷ് ലൂക്കോസ് ഉദ്ഘാടനം ചെയ്തു. പഞ്ചായത്ത് ഓഫീസിനു മുന്നില്‍ നടന്ന ധര്‍ണ എന്‍എപിഎം ദേശീയ നിര്‍വാഹക സമിതിയംഗം ജോണ്‍ പെരുവന്താനം ഉദ്ഘാടനം ചെയ്തു. ജോര്‍ജ് മുല്ലക്കര, സി.ജെ. തങ്കച്ചന്‍, അരുണിമ റോയി, ദിലീപ് കൈതക്കല്‍, സവിത ചാത്തന്‍കുന്ന്, അഡ്വ. റോയി ജോര്‍ജ്, ബിജു കലയന്താനം, വിന്‍സന്‍റ് ചിറയില്‍, ടോമി മഠത്തിക്കുന്നേല്‍ തുടങ്ങിയവര്‍ പ്രസംഗിച്ചു. പഞ്ചായത്ത് പ്രസിഡന്‍റ് എന്‍.ബി. സ്മിതയ്ക്കു സമരക്കാര്‍ ഒപ്പിട്ട നിവേദനം കൈമാറി. 20 വര്‍ഷം മുമ്പാണ് മുട്ടുചിറ പറമ്പ്രം പ്രദേശത്ത് 13 ഏക്കറില്‍ ലാറ്റക്സ് ഫാക്ടറി (റബറും വെള്ളവും തമ്മില്‍ വേര്‍തിരിക്കുന്ന) സ്ഥാപിച്ചത്. ഇവിടെ മതിയായ മലിനീകരണ നിയന്ത്രണ സംവിധാനങ്ങള്‍ സ്ഥാപിക്കാത്തതാണ് ജലമലിനീകരണത്തിനും വായൂ മലിനീകരണത്തിനും കാരണമാകുന്നതെന്നാണ് പ്രദേശവാസികള്‍ പറയുന്നത്. ഫാക്ടറി സ്ഥാപിച്ചിരിക്കുന്ന പുരയിടത്തില്‍ കെട്ടിനിര്‍ത്തുന്ന മലിനജലം മൂലം സമീപപ്രദേശങ്ങളിലെ കിണറുകള്‍ ഉള്‍പ്പെടെയുള്ള ജലസ്രോതസുകള്‍ മലിനമാകുന്നതായും ഈ വെള്ളം കാലങ്ങളായി ഉപയോഗിച്ചു പ്രദേശവാസികളായവര്‍ പലരും രോഗികളായെന്നും നാട്ടുകാര്‍ പറയുന്നു.

ഓണാഘോഷവും കുടുംബമേളയും

കടുത്തുരുത്തി: കാണക്കാരി മൈത്രി നഗര്‍ റസിഡന്‍റ്സ് അസോസിയേഷന്‍റെ ഓണാഘോഷവും കുടുംബമേളയും നടത്തി. മന്ത്രി വി.എന്‍. വാസവന്‍ ഉദ്ഘാടനം ചെയ്തു. അസോസിയേഷന്‍ പ്രസിഡന്‍റ് കാണക്കാരി അരവിന്ദാക്ഷന്‍ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് അംബിക സുകുമാരന്‍, മെമ്പര്‍മാരായ ത്രേസ്യാമ്മ സെബാസ്റ്റ്യന്‍, അനില്‍കുമാര്‍, സിനിമാതാരം ചാലി പാലാ, കോര്‍വ വനിതാ ജില്ലാ പ്രസിഡന്‍റ് സൂസന്‍ തോമസ്, സഹകരണ ബാങ്ക് പ്രസിഡന്‍റ് ബേബി ജോസഫ്, തോമസ് മാത്യു, എം.എസ്. മനോജ്, ബിജു ജോര്‍ജ്, റെജി ജോസഫ്, ബീന ആന്‍ഡ്രൂസ് തുടങ്ങിയവര്‍ പ്രസംഗിച്ചു. സംസ്ഥാന മന്ത്രിസഭയിലെ മികച്ച ജനകീയ മന്ത്രിക്കുള്ള അസോസിയേഷന്‍റെ പുരസ്‌കാരം വി.എന്‍. വാസവന് പ്രസിഡന്‍റ് സമ്മാനിച്ചു. ലഹരിക്കെതിരേ ഓട്ടന്‍തുള്ളല്‍ നടത്തിയ എക്‌സൈസ് ഇന്‍സ്പെക്ടര്‍ വി. ജയരാജനും ചലച്ചിത്ര നടന്‍ ചാലി പാലായിക്കും ഉന്നത വിജയം നേടിയ വിദ്യാര്‍ഥികള്‍ക്കും കലാ, കായിക മത്സരങ്ങളില്‍ വിജയിച്ചവര്‍ക്കും മന്ത്രി പുരസ്‌കാരങ്ങള്‍ സമ്മാനിച്ചു. അസോസിയേഷന്‍ സെക്രട്ടറി ആന്‍ഡ്രൂസ് ജോണ്‍, വേണുകുമാര്‍ എന്നിവര്‍ പ്രസംഗിച്ചു.

കുടവെച്ചൂർ പള്ളിയിൽ പരിശുദ്ധ കന്യകമറിയത്തിന്‍റെ പിറവിത്തിരുനാളിന് കൊടിയേറി

വെച്ചൂർ: കുടവെച്ചൂർ സെന്‍റ് മേരീസ് പള്ളിയിൽ പരിശുദ്ധ കന്യകമറിയത്തിന്‍റെ പിറവിത്തിരുനാളിന് കൊടിയേറി. ഇന്നലെ വൈകുന്നേരം 6.15ന് ഫരീദാബാദ് അതിരൂപത മെത്രാപ്പോലീത്ത മാർ കുര്യാക്കോസ് ഭരണികുളങ്ങരയുടെ മുഖ്യകാർമികത്വത്തിലാണ് തിരുനാളിന് കൊടിയേറ്റിയത്. വികാരി ഫാ. പോൾ ആത്തപ്പിള്ളി, സഹവികാരി ഫാ. ആന്‍റണി കളത്തിൽ, ഡീക്കൻ ജിന്‍റോ ആലപ്പാട്ട് തുടങ്ങിയവർ സഹകാർമികത്വം വഹിച്ചു. എട്ടിനാണ് തിരുനാൾ. കൈക്കാരൻമാരായ വക്കച്ചൻ മണ്ണത്താലിൽ, ഏബ്രഹാം റോജിഭവൻ, പ്രസുദേന്തി ജോബ് അനുഗ്രഹ, വൈസ് ചെയർമാൻ സേവ്യർ മീനപ്പള്ളി, ജനറൽ സെക്രട്ടറി ബിജു മിത്രംപള്ളി, പാരീഷ് കൗൺസിൽ സെക്രട്ടറി റോബിൻ മണ്ണത്താലിൽ തുടങ്ങിയവർ നേതൃത്വം നൽകി.

ഇരുവൃക്കയും തകരാറിലായ യുവാവിന്‍റെ ചികിത്സയ്ക്കായി ധനസമാഹരണം

വൈക്കം: ഇരുവൃക്കയും തകരാറിലായതിനെ ത്തുടർന്നു ജീവൻ അപകടസ്ഥിതിയിലായ നിർധന യുവാവ് വൃക്ക മാറ്റിവയ്ക്കൽ ശസ്ത്രക്രിയയ്ക്ക് ധനസമാഹരണത്തിന് നാടൊരുമിക്കുന്നു. ടിവിപുരം പഞ്ചായത്ത് 14-ാം വാർഡിൽ പള്ളിപ്രത്തുശേരിയിൽ മുണ്ടുമാഴത്തുതറ അരുൺ കൃഷ്‌ണന്‍റെ (30) ജീവൻ രക്ഷിക്കാനാണ് ജനപ്രതിനിധികളും രാഷ്ട്രീയ, സാമുദായിക നേതാക്കളും ഒരുമിച്ചിറങ്ങി ധനസമാരണം നടത്തുന്നത്. ആഴ്ചയിൽ മൂന്നു തവണ ഡയാലിസിസ് ചെയ്താണ് അരുണിന്‍റെ ജീവൻ നിലനിർത്തുന്നത്. നിർധന കുടുംബത്തിന്‍റെ ആശ്രയമായ യുവാവിന്‍റെ ജീവൻ രക്ഷിക്കാൻ 35 ലക്ഷം രൂപ വൃക്കമാറ്റിവയ്ക്കൽ ശസ്ത്രക്രിയയ്ക്കും തുടർചികിൽസയ്ക്കും ആവശ്യമാണെന്ന് ചികിൽസാ സഹായനിധി ചെയർമാനും പഞ്ചായത്ത് അംഗവുമായ സെബാസ്റ്റ്യൻ ആന്‍റണി, ജനറൽ കൺവീനർ സത്യൻ രാഘവൻ കുളത്തുങ്കൽ എന്നിവർ അറിയിച്ചു. ധനസമാഹരണത്തിനായി ടിവി പുരം എസ്ബിഎെയിൽ അക്കൗണ്ട് ഓപ്പൺ ചെയ്തു. നന്പർ:‌ 44367493263. IFSC Code: SBIN0070479. GPay No. 9645432430

വൈക്കം കോടതിയിൽ ഓണാഘോഷം

വൈക്കം: വൈക്കം കോടതിയിൽ ബാർ അസോസിയേഷന്‍റെ ആഭിമുഖ്യത്തിൽ നടത്തിയ ഓണാഘോഷം വർണാഭമായി. ബാർ ോസിയേഷൻ പ്രസിഡന്‍റ് അഡ്വ. കെ. അനിൽകുമാറിന്‍റെ അധ്യക്ഷതയിൽ നടന്ന യോഗത്തിൽ ഓണാഘോഷം വൈക്കം മജിസ്ട്രേറ്റ് അർച്ചന ബാബു ഉദ്ഘാടനം ചെയ്തു. തുടർന്ന് വൈക്കം മുൻസിഫ് അബിനമോൾ രാജേന്ദ്രൻ, വൈക്കം ന്യായാധികാരി കെ.എം. ദേവിക ,ബാർ അസോസിയേഷൻ സെക്രട്ടറി അഡ്വ. ജോർജ് ജോസഫ്, ക്ലർക്ക് അസോ. പ്രസിഡന്‍റ് വി.വി. മായ, ക്ലർക്ക് അസോ. പ്രതിനിധി കെ.എൻ. അശോക് കുമാർ, കെ.എസ്. ചൈതന്യ തുടങ്ങിയവർ പ്രസംഗിച്ചു. കോടതി അങ്കണത്തിൽ പൂക്കളവും തീർത്തു. ഓണസദ്യയും നടത്തി. തുടർന്ന് അഭിഭാഷകരും കോടതി ജീവനക്കാരും ചേർന്ന് ഗാനാലാപനം, ഗാനമേള, നാടകം തുടങ്ങി വിവിധ പരിപാടികളും ഉണ്ടായിരുന്നു.

താലൂക്ക് എൻഎസ്എസ് യൂണിയൻ ഓണവിപണന മേള

വൈക്കം: വൈക്കം താലൂക്ക് എൻഎസ്എസ് യൂണിയന്‍റെ നേതൃത്വത്തിൽ മന്നം സോഷ്യൽ സർവീസ് സൊസൈറ്റി, വനിതാ യൂണിയൻ എന്നിവയുടെ സഹകരണത്തോടെ നടത്തുന്ന ഓണം വിപണന മേള ആരംഭിച്ചു. യൂണിയൻ ചെയർമാൻ പി.ജി.എം. നായർ കാരിക്കോട് ഉദ്ഘാ ടനം നിർവഹിച്ചു. വൈസ് പ്രസിഡന്‍റ് പി. വേണുഗോപാൽ അധ്യക്ഷത വഹിച്ച യോഗത്തിൽ യൂണിയൻ സെക്രട്ടറി അഖിൽ ആർ. നായർ, പി.എസ്. വേണുഗോപാൽ തുടങ്ങി യവർ പ്രസംഗിച്ചു. താലൂക്കിലെ വനിതാ സമാജങ്ങളും സ്വാശ്രയ സംഘങ്ങളും തയാറാക്കിയിട്ടുള്ള പ്രകൃതിദത്ത ഉത്പന്നങ്ങളുടെ വിപുലമായ ശേഖരം മേളയിൽ തയാറാക്കിയിട്ടുണ്ട് . രാവിലെ 10 മുതൽ രാത്രി എട്ടുവരെയാണ് മേളയുടെ പ്രവർത്തനം. മേള നാലിന് സമാപിക്കും.

വൈക്കം വലിയകവല സൗന്ദര്യവത്കരിച്ച് ലയൺസ് ക്ലബ്

വൈക്കം: വൈക്കം വലിയ കവലയിലെ സ്റ്റ്യാച്യു ജംഗ്ഷൻ സൗന്ദര്യവത്കരിച്ച് വൈക്കം ലയൺസ് ക്ലബ്. സ്റ്റ്യാച്യു ജംഗ്ഷനിലെ ഗതാഗതം തിരിച്ചുവിടുന്നതിനായി കോൺക്രീറ്റ് ചെയ്ത് തിരിച്ചിരിക്കുന്ന ഭാഗത്ത് പ്ലാസ്റ്റിക് പുല്ലുവിരിച്ച് കമനീയമാക്കിയശേഷം "ഐ ലവ് വൈക്കം' എന്ന സൈൻ ബോർഡും സ്ഥാപിച്ചു. സൗന്ദര്യവത്കരിച്ച കവലയിൽ പ്രദേശവാസികളും വാഹനയാത്രക്കാരും എത്തി.

ബന്ദിപ്പൂ വിളവെടുപ്പ് ഉദ്ഘാടനം

കുമരകം: കുമരകം പഞ്ചായത്തിൽ നടത്തിയ ബന്ദികൃഷിയുടെ വിളവെടുപ്പ് ഉദ്ഘാടനം നടത്തി. 11-ാം വാർഡിൽ നവമി ജെഎൽജെ ഗ്രൂപ്പ് നടത്തിയ ബന്ദിപ്പൂ കൃഷിയുടെ വിളവെടുപ്പിന്‍റെ ഉദ്ഘാടന പഞ്ചായത്ത് പ്രസിഡന്‍റ് ധന്യ സാബു നിർവഹിച്ചു. കൃഷി ഓഫീസർ ആൻ സ്നേഹ ബേബി, പഞ്ചായത്ത് അംഗങ്ങളായ സ്മിത, അനീഷ്, മായ സുരേഷ്, ജെഎൽ ജിഗ്രൂപ്പ് അംഗങ്ങളായ മഞ്ജുഷ, ഗീത, ഷൈജ എന്നിവർ വിളവെടുപ്പിൽ പങ്കാളികളായി.

കാണക്കാരി ‌ഹോമിയോ ആശുപത്രി‌ മികവിന്‍റെ നിറവില്‍

കോട്ടയം: പ്രഥമ ആയുഷ് കായകല്‍പ പുരസ്‌കാരം ഹോമിയോപ്പതി ജില്ലാ വിഭാഗത്തില്‍ 93.33 ശതമാനം മാര്‍ക്കോടെ ഒന്നാം സ്ഥാനം നേടി കാണക്കാരി ഗവണ്‍മെന്‍റ് ഹോമിയോ ആശുപതി. തിരുവനന്തപുരത്തു നടന്ന ചടങ്ങില്‍ മന്ത്രി വീണാ ജോര്‍ജില്‍നിന്ന് കാണക്കാരി പഞ്ചായത്ത് പ്രസിഡന്‍റ് അംബിക സുകുമാരന്‍, പഞ്ചായത്തംഗങ്ങളായ ലൗലിമോള്‍ വര്‍ഗീസ്, കാണക്കാരി അരവിന്ദാക്ഷന്‍, വി.ജി. അനില്‍കുമാര്‍ എന്നിവര്‍ ചേര്‍ന്ന് ഏറ്റുവാങ്ങി. ആരോഗ്യസ്ഥാപനങ്ങളിലെ ശുചിത്വം, ഫലപ്രദമായ മാലിന്യസംസ്‌കരണം, അണുബാധ നിയന്ത്രണം എന്നിവ പ്രോത്സാഹിപ്പിക്കാന്‍ സര്‍ക്കാര്‍ ആവിഷ്‌കരിച്ചതാണ് കായകല്‍പ പുരസ്‌കാരങ്ങള്‍. ജില്ലയില്‍ കാണക്കാരി ഹോമിയോ ഡിസ്‌പെന്‍സറി നിലവില്‍ എന്‍എബിഎച്ച് എന്‍ട്രി സര്‍ട്ടിഫിക്കേഷനും ആയുഷ് ഹെല്‍ത്ത് ആന്‍ഡ് വെല്‍നസ് സെന്‍ററും ഹോമിയോപ്പതി വകുപ്പിന്‍റെ മോഡല്‍ ഡിസ്‌പെന്‍സറിയുമാണ് അവാര്‍ഡിനര്‍ഹമായത്.

ഏറ്റുമാനൂർ സഹകരണ ബാങ്ക് എക്സലൻസ് അവാർഡ് വിതരണം നാളെ

ഏറ്റുമാനൂർ: ഏറ്റുമാനൂർ സർവീസ് സഹകരണ ബാങ്ക് എക്സലൻസ് അവാർഡ് വിതരണം നാളെ നടക്കും. വൈകുന്നേരം അഞ്ചിന് വ്യാപാര ഭവൻ ഓഡിറ്റോറിയത്തിൽ പ്രതിപക്ഷ നേതാവ് വി.ഡി . സതീശൻ ഉദ്ഘാടനം ചെയ്യും. ബാങ്ക് പ്രസിഡന്‍റ് ബിജു കുമ്പിക്കൻ അധ്യക്ഷത വഹിക്കും. വിദ്യാഭ്യാസ-കല-കായികരംഗത്ത് മികവ് തെളിയിച്ച ബാങ്ക് അംഗങ്ങളുടെയും ജീവനക്കാരുടെയും മക്കൾക്കും നഗരസഭാ പരിധിയിൽപ്പെട്ട എല്ലാ സ്കൂളുകളിലെയും നാല്, ഏഴ് ക്ലാസുകളിൽ ഉയർന്ന മാർക്ക് വാങ്ങിയ കുട്ടികൾക്കുള്ള അവാർഡുകളും എൻഡോവ്മെന്‍റുകളും സമ്മാനിക്കും. ഏറ്റുമാനൂർ സർവീസ് സഹകരണ ബാങ്ക്, കോഴിക്കോട് എംവിആർ കാൻസർ സെന്‍റർ ആൻഡ് റിസർച്ച് ഇൻസ്റ്റിറ്റ്യൂട്ടും കാലിക്കറ്റ് സിറ്റി സർവീസ് സഹകരണ ബാങ്കും ചേർന്നു നടപ്പിലാക്കിയിട്ടുള്ള സൗജന്യ കാൻസർ ചികിത്സാ പദ്ധതിയായ മാസ് കെയറിന്‍റെ ഭാഗമാകുന്നതിന്‍റെ ധാരണാപത്രം എംവിആർ കാൻസർ സെന്‍റർ ആൻഡ് റിസർച്ച് ഇൻസ്റ്റിറ്റ്യൂട്ട് ചെയർമാൻ സി.എൻ. വിജയകൃഷ്ണന് ബാങ്ക് പ്രസിഡന്‍റ് ബിജു കുമ്പിക്കൻ കൈമാറും. ബാങ്ക് അംഗവും ഇന്ത്യൻ ഇൻസ്റ്റിറ്റ്യൂട്ട് ഓഫ് സ്പേസ് സയൻസ് ആൻഡ് ടെക്നോളജി പ്രൊ വൈസ് ചാൻസലറുമായ പ്രഫ. കുരുവിള ജോസഫ് പെരിങ്ങാട്ടിനെ യോഗത്തിൽ ആദരിക്കും. നഗരസഭാ ചെയർപേഴ്സൺ ലൗലി ജോർജ്, സർക്കിൾ സഹകരണ യൂണിയൻ ചെയർമാൻ കെ.എം. രാധാകൃഷ്ണൻ, ഫിൽസൺ മാത്യൂസ്, പി.പി. സലിം തുടങ്ങിയവർ പ്രസംഗിക്കും.

ജില്ലയിലെ സര്‍ക്കാര്‍ ആശുപത്രികളില്‍ ഇ-ഹെല്‍ത്ത് നടപ്പാക്കി

കോട്ടയം: സര്‍ക്കാര്‍ ആശുപത്രികളില്‍ കാത്തു നില്‍ക്കേണ്ടിവരുന്ന നാളുകള്‍ പഴങ്കഥയാകുന്നു. ചീട്ടെടുക്കുന്നതുമുതല്‍ ആശുപത്രി വിടുന്നതുവരെയുള്ള സേവനങ്ങള്‍ ക്യൂ ഒഴിവാക്കി വേഗത്തിലാക്കാന്‍ സഹായിക്കുന്ന ഇ-ഹെല്‍ത്ത് സംവിധാനം ജില്ലയിലെ പകുതിയിലേറെ സര്‍ക്കാര്‍ ആശുപത്രികളില്‍ നടപ്പാക്കി. മെഡിക്കല്‍ കോളജ് മുതല്‍ പ്രാഥമികാരോഗ്യകേന്ദ്രങ്ങള്‍ വരെയുള്ള ജില്ലയിലെ 88 ആശുപത്രികളില്‍ 45 കേന്ദ്രങ്ങളില്‍ ഇ- ഹെല്‍ത്ത് സേവനം ലഭ്യമാണ്. ഈ വര്‍ഷം ഒന്‍പതിടത്തുകൂടി നടപ്പാക്കും. 38 ആശുപത്രികള്‍ കടലാസു രഹിതമായി. സവിശേഷ ആരോഗ്യ തിരിച്ചറിയല്‍ നമ്പര്‍ (യുഎച്ച്‌ഐഡി ) മാത്രം ഉപയോഗിച്ച് ഒപി ചീട്ട്, ഡോക്ടറെ കാണല്‍, മരുന്ന്, നഴ്‌സിംഗ് -ലാബ് സേവനങ്ങള്‍ രോഗവിവരങ്ങള്‍ നല്‍കല്‍ എല്ലാം ഡിജിറ്റലാണ്. ഡോക്ടറുടെ കുറിപ്പും രോഗിക്ക് ഫോണില്‍ കിട്ടും. ബില്ലുകള്‍ ഇപോസ് മെഷീന്‍ വഴി അടയ്ക്കാനുള്ള സംവിധാനം 27 ഇടങ്ങളില്‍ നടപ്പാക്കിത്തുടങ്ങി. ജില്ലയില്‍ ഇ ഹെല്‍ത്ത് സംവിധാനം വഴി ഇതുവരെ 1.13 കോടി രോഗീസന്ദര്‍ശനങ്ങള്‍ നടന്നു. 16,48,744 പേര്‍ക്ക് യുഎച്ച്‌ഐഡിയുണ്ട്. 2018 ജൂലൈയില്‍ കോട്ടയം മെഡിക്കല്‍ കോളജിലാണ് ജില്ലയില്‍ ഇ-ഹെല്‍ത്ത് സംവിധാനത്തിന് തുടക്കമിട്ടത്. ഏഴു വര്‍ഷം പൂര്‍ത്തിയാകുമ്പോള്‍ സംസ്ഥാനതല ഇഹെല്‍ത്ത് റാങ്കില്‍ ജില്ല എട്ടാമതാണ്. 60 കുടുംബാരോഗ്യകേന്ദ്രങ്ങളില്‍ പകുതിയിലും പദ്ധതി നടപ്പാക്കി ജില്ലയിലെ മുഴുവന്‍ ആശുപത്രികളിലും സമയബന്ധിതമായി ഇ-ഹെല്‍ത്ത് നടപ്പാക്കുമെന്ന് ജില്ലാ മെഡിക്കല്‍ ഓഫീസര്‍ ഡോ. എന്‍. പ്രിയ പറഞ്ഞു. അഞ്ചുവര്‍ഷംമുന്‍പ് ഇഹെല്‍ത്ത് ജില്ലയില്‍ ആദ്യം നടപ്പാക്കിയ വാഴൂര്‍, മീനച്ചില്‍, കുറവിലങ്ങാട് കുടുംബാരോഗ്യകേന്ദ്രങ്ങള്‍ സംസ്ഥാന തല റാങ്കിംഗില്‍ യഥാക്രമം ആദ്യ മൂന്നു സ്ഥാനങ്ങളിലാണ്. ജില്ലയിലെ തന്നെ മൂന്നിലവ് കുടുംബാരോഗ്യകേന്ദ്രം രണ്ടാം സ്ഥാനവും ബ്രഹ്മമംഗലം, കുറുപ്പുന്തറ കുടുംബാരോഗ്യകേന്ദ്രങ്ങള്‍ മൂന്നാം സ്ഥാനവും പങ്കിടുന്നു. കുട്ടികളുടെ ആശുപത്രി, കോട്ടയം, കാഞ്ഞിരപ്പള്ളി, പാലാ ജനറല്‍ ആശുപത്രികള്‍, പാമ്പാടി താലൂക്ക് ആസ്ഥാന ആശുപത്രി എന്നിവിടങ്ങളിലും ഇ ഹെല്‍ത്ത് സംവിധാനമായി. കുറവിലങ്ങാട്, വൈക്കം താലൂക്ക് ആസ്ഥാന ആശുപത്രികളില്‍ പ്രാഥമിക ഘട്ടത്തിലാണ്. മണിമല, തലനാട്, അയ്മനം, ഓണംതുരുത്ത്, വിഴിക്കത്തോട്, പൂഞ്ഞാര്‍ ജി.വി. രാജ കുടുംബാരോഗ്യകേന്ദ്രങ്ങള്‍, അറുന്നൂറ്റിമംഗലം, എരുമേലി സാമൂഹികരോഗ്യകേന്ദ്രങ്ങള്‍, ജില്ലാ ടിബി സെന്‍റര്‍ എന്നിവിടങ്ങളില്‍ ഈ ഹെല്‍ത്ത് നടപ്പാക്കുന്നതിനുള്ള നടപടികള്‍ അന്തിമ ഘട്ടത്തിലാണ്. സംസ്ഥാനത്തെ ഏത് ആശുപത്രിയിലും ചികിത്സ തേടാന്‍ ഈ സംവിധാനത്തില്‍ ബുക്ക് ചെയ്യാം. കൗണ്ടറില്‍ ക്യൂ നില്‍ക്കാതെ ഒ പി ടിക്കറ്റെടുക്കാം. കുടുംബാരോഗ്യ കേന്ദ്രങ്ങളിലെയോ മറ്റ് സര്‍ക്കാര്‍ ആശുപത്രികളിലെയോ ഡോക്ടറുടെ റഫറല്‍ കത്തുണ്ടെങ്കില്‍, യുഎച്ച്‌ഐഡി ഉപയോഗിച്ച് സംസ്ഥാനത്തെ മെഡിക്കല്‍ കോളജുകളിലെ എല്ലാ വിഭാഗങ്ങളിലേക്കും ഒപി ടിക്കറ്റ് ബുക്ക് ചെയ്യാം. തദ്ദേശ സ്ഥാപനങ്ങള്‍ ഫണ്ട് വകയിരുത്തും പ്രാഥമികാരോഗ്യകേന്ദ്ര തലത്തില്‍ ഇ- ഹെല്‍ത്ത് സംവിധാനം ഒരുക്കാന്‍ 10 ലക്ഷം രൂപയാണ് ചെലവ് കണക്കാക്കുന്നത്. നിലവില്‍ സംസ്ഥാന സര്‍ക്കാര്‍ ഫണ്ട് വിനിയോഗിച്ചാണ് ഇ ഹെല്‍ത്ത് നടപ്പാക്കുന്നത്. തദ്ദേശ സ്ഥാപനങ്ങളുടെ ഫണ്ടുപയോഗിച്ച് പദ്ധതി വിപുലീകരിക്കാനും അറ്റകുറ്റപ്പണികള്‍ ഉള്‍പ്പെടെയുള്ള തുടര്‍പ്രവര്‍ത്തനങ്ങള്‍ക്കുള്ള തുക വകയിരുത്താനും നിര്‍ദേശമുണ്ട്. നിലവില്‍ മേജര്‍ ആശുപത്രികളില്‍ ഇ ഹെല്‍ത്തിന്‍റെ എല്ലാ മൊഡ്യൂളുകളുമുണ്ട്. വിവിധ ചികിത്സാ വിഭാഗങ്ങള്‍ ബന്ധിപ്പിച്ചുള്ള ഡിജിറ്റലൈസേഷന് വിപുലമായ അടിസ്ഥാനസൗകര്യവികസനം ആവശ്യമാണ്. അടുത്ത ഘട്ടത്തില്‍ പൂര്‍ണതോതില്‍ നടപ്പാകുന്നതോടെ ജില്ലയിലെ മുഴുവന്‍ ആതുരാലയങ്ങളും ഇ ഹെല്‍ത്തില്‍ സജ്ജമാകുമെന്നാണു പ്രതീക്ഷിക്കുന്നത്.

പായസവിപണി ഉണര്‍ന്നു

കോട്ടയം: ഓണവിപണി ഉണര്‍ന്നതോടെ നാടെങ്ങും പായസമേളകള്‍ക്കും തുടക്കമായി. ബേക്കറികളിലും ഹോട്ടലുകളിലും വിവിധ കുടുംബശ്രീ യൂണിറ്റുകളിലും പായസമേളകള്‍ ആരംഭിച്ചു കഴിഞ്ഞു. വിവിധ സ്ഥാപനങ്ങളും റെസിഡന്‍സ് അസോസിയേഷനുകളും ക്ലബ്ബുകളും ഓണാഘോഷങ്ങള്‍ തുടങ്ങിയതോടെ വിവിധ തരത്തിലുള്ള പായസങ്ങള്‍ക്കും ഡിമാന്‍ഡ് വര്‍ധിച്ചു. അടപ്രഥമനും പാല്‍പായസത്തിനും ആവശ്യക്കാരേറെയാണ്. ഓണമെത്തിയതോടെ വഴിയോരത്ത് കടകളിലാകെ പായസത്തിനു മാത്രമായി പ്രത്യേക സ്റ്റാളുകള്‍ ഒരുങ്ങിക്കഴിഞ്ഞു. ഇഷ്ടപ്പെട്ടവ തിരഞ്ഞുവാങ്ങി വീട്ടില്‍ കൊണ്ടുപോകാം. ഓരോ കടയിലും പായസത്തിന്‍റെ വിലയും പലതാണ്. വലിയ ഹോട്ടലുകളില്‍നിന്നുള്ള പായസം ഓണ്‍ലൈനില്‍ വാങ്ങാം. അര ലിറ്ററിന് 270 രൂപമുതലാണു വിലയീടാക്കുന്നത്. കടകളില്‍ ലഭിക്കുന്ന പായസം മിക്‌സുകള്‍ക്കും ആവശ്യക്കാര്‍ വര്‍ധിച്ചിട്ടുണ്ട്. വിവിധ ബ്രാന്‍ഡുകള്‍ക്കനുസരിച്ചു വിലയും വ്യത്യസ്തമാണ്. മുന്‍കാലങ്ങളില്‍ സേമിയയും പാലടയും അടപ്രഥമനും മാത്രമായിരുന്നു പായസം മിക്‌സുകള്‍. എന്നാല്‍ ഇപ്പോള്‍ പരിപ്പ് പ്രഥമനും വിപണിയില്‍ ലഭ്യമാണ്. ഇവയ്ക്ക് പുറമേ ഇളനീര്‍ പായസം, പഞ്ചാമൃതപായസം, അവില്‍ പായസം, പഞ്ചരത്‌നപായസം, ചക്ക പായസം, കടല പായസം, പഴം പായസം, മാമ്പഴ പായസം എന്നിങ്ങനെ നീളുന്നു ഇക്കുറി ഓണത്തിനൊരുങ്ങുന്ന വെറൈറ്റി പായസങ്ങളുടെ നിര. പാല്‍ പായസത്തിനൊപ്പം ഇപ്പോള്‍ ബോളിയും താരമായിട്ടുണ്ട്. പായസത്തിനു പുറമേ ബേക്കറികളില്‍ ഉപ്പേരി, ശര്‍ക്കരവരട്ടി വില്പനയും പൊടിപൊടിക്കുകയാണ്. ഓണക്കാലത്ത് വലിയ തോതില്‍ ചെലവാകുന്നഉപ്പേരിയും ശര്‍ക്കരവരട്ടിയും ബേക്കറികളിലും കുടുംബശ്രീയുടെ ശാഖകളിലും പ്രത്യേക സ്റ്റാളുകളിൽ വിപണനം ആരംഭിച്ചിട്ടുണ്ട്. പരിശോധന കാര്യക്ഷമമാക്കണമെന്ന് ഓണവിപണി ലക്ഷ്യമിട്ട് എത്തിയിരിക്കുന്ന ഉപ്പേരിയിലും ശര്‍ക്കരവരട്ടിയിലും വ്യാജന്മാരുമുണ്ട്. വിപണിയില്‍ ഉപ്പരിക്ക് 430 രൂപ മുതല്‍ 480 രൂപ വരെയാണു വിലയീടാ ക്കുന്നത്. ശര്‍ക്കരവരട്ടിക്ക് 250 രൂപയാണ് വിവിധ കടകളില്‍ വിലയീടാക്കുന്നത്. എന്നാല്‍ വ്യാജ വെളിച്ചെണ്ണയില്‍ തയാറാക്കുന്ന ആരോഗ്യത്തിനു ഹാനികരമായ ഉപ്പേരിയും ശര്‍ക്കരവരട്ടിയും കടകളില്‍ എത്തിയിട്ടുണ്ട്. ഓണക്കാലത്ത് ഭക്ഷ്യവകുപ്പ് മായം കലര്‍ന്ന സാധനങ്ങള്‍ കണ്ടെത്തുന്നതിനായി റെയ്ഡും പരിശോധനകളും നടത്തുന്നുണ്ടെങ്കിലും വ്യാജന്‍മാര്‍ വിപണിയില്‍ സുലഭമാണെന്നു പരാതിയുണ്ട്. കടകളില്‍ പരിശോധകള്‍ നടക്കുന്നുണ്ടെങ്കിലും പാതയോരങ്ങളില്‍ വില്പന നടത്തുന്ന സ്ഥലങ്ങളില്‍ പരിശോധനകളില്ലെന്നാണു പരാതി. നിലവില്‍ ലഭിക്കുന്നതിനേക്കാള്‍ വില കുറച്ചാണ് ഗുണമേന്മയില്ലാത്തവ വിപണിയില്‍ വില്‍ക്കപ്പെടുന്നത്. ഗുണനിലവാരത്തേക്കാള്‍ വിലക്കുറവാണ് പൊതുജനങ്ങളെ ആകൃഷ്ടരാക്കുന്നത്. പലപ്പോഴും ശുദ്ധമായ വെളിച്ചെണ്ണയില്‍ നിര്‍മിച്ചതെന്ന് കാണിച്ചാണ് വിപണനം. ഭക്ഷ്യസുരക്ഷാ വകുപ്പ് മാനദണ്ഡങ്ങളും ലൈസന്‍സ് ഇല്ലാതെയും പ്രവർത്തിക്കുന്നവയാണ്. ഭൂരിഭാഗവും പ്രവര്‍ത്തിക്കുന്നത്. ഇത്തരം സംഘങ്ങള്‍ മായം കലര്‍ന്ന ശര്‍ക്കരയാണ് ശര്‍ക്കരവരട്ടിക്ക് ഉപയോഗിക്കുന്നത്. ഏത്തക്കായ്ക്കു പുറമേ റോബസ്റ്റയും ചിപ്സ് നിര്‍മിക്കാന്‍ ഉപയോഗിക്കുന്നുണ്ടെന്നും പരാതിയുണ്ട്.

ബസ് സ്റ്റാൻഡില്‍ മരിച്ച നിലയില്‍

പാലാ: കൊട്ടാരമറ്റം ബസ് സ്റ്റാൻഡില്‍ വയോധികനെ മരിച്ചനിലയില്‍ കണ്ടെത്തി. പിഴക് സ്വദേശി തൈമുറിയില്‍ ടി.എം. സെബാസ്റ്റ്യനെ (ബേബി -72) യാണ് മരിച്ചനിലയില്‍ കണ്ടെത്തിയത്. നിരവധി വ്യാപാര സ്ഥാപനങ്ങള്‍ പ്രവര്‍ത്തിക്കുന്ന ഭാഗത്ത് ബസ് കാത്തിരിക്കുന്നതിനുള്ള ഇരിപ്പിടത്തില്‍ കമഴ്ന്നു കിടക്കുന്ന നിലയിലാണ് മൃതദേഹം. കാക്കി ഷര്‍ട്ടും നീല കള്ളിമുണ്ടുമാണ് വേഷം. തൊട്ടടുത്ത് ചോറു പൊതിയുമുണ്ടായിരുന്നു. ചോറിന്‍റെ ചൂട് മാറിയിട്ടില്ലായിരുന്നുവെന്ന് ദൃക്‌സാക്ഷികള്‍ പറഞ്ഞു. പിഴകില്‍നിന്നു പുലര്‍ച്ചെ ജോലിക്ക് പോകാനായി എത്തിയതായിരുന്നു സെബാസ്റ്റ്യന്‍. പാലായിലും പ്രദേശത്തും പിക്കപ്പ്, ജീപ്പ് ഡ്രൈവറായി പ്രവര്‍ത്തിക്കുകയായിരുന്നു. മൃതദേഹം പോസ്റ്റ്മാര്‍ട്ടത്തിന് ബന്ധുക്കള്‍ക്കു വിട്ടുകൊടുത്തു. ഹൃദയാഘാതമാണ് മരണകാരണമെന്നാണ് നിഗമനം. സംസ്‌കാരം ഇന്ന് ചൊവ്വാഴ്ച ഉച്ചകഴിഞ്ഞ് 2.30 പിഴക് സെന്‍റ് ജോണ്‍സ് ദി ബാപ്റ്റിസ്റ്റ് പള്ളിയില്‍. ഭാര്യ: ലാലി. മക്കള്‍: ലിബിന്‍, ലിബിയ.

പത്തനംതിട്ട നഗരസഭ ഹാപ്പിനസ് പാർക്ക് ഉദ്ഘാടനം നാളെ

പത്തനംതിട്ട: നഗരസഭയുടെ ഓണസമ്മാനമായി ഹാപ്പിനസ് പാർക്ക് നാളെ നഗരസഭാ ചെയർമാൻ ടി. സക്കീർ ഹുസൈൻ നാടിന് സമർപ്പിക്കും. മുനിസിപ്പൽ ബസ് സ്റ്റാൻഡിന്‍റെ തെക്കുഭാഗത്തെ പ്രവേശന കവാടത്തോടു ചേർന്നാണ് പാർക്കും അനുബന്ധസൗകര്യങ്ങളും ഒരുക്കിയിരിക്കുന്നത്. വിശ്രമത്തിനും വിനോദത്തിനും ഒപ്പം ആസ്വാദ്യകരമായ നൈറ്റ് ലൈഫിനും സൗകര്യമൊരുക്കുക എന്ന ലക്ഷ്യത്തോടെ നഗരസഭ വിഭാവനം ചെയ്ത സാമൂഹ്യ ഇടങ്ങളിൽ ഒന്നു കൂടി പൂർത്തിയാവുകയാണ്. മുന്പ് പൂർത്തിയായ ടൗൺ സ്ക്വയർ നഗരത്തിന്‍റെ മുഖച്ഛായയിൽ മാറ്റമുണ്ടാക്കി. നാളെ വൈകുന്നേരം നാലിന് ടൗൺ സ്ക്വയറിൽ നടക്കുന്ന സമ്മേളനത്തിൽ ഹാപ്പിനസ് പാർക്ക് ഉദ്ഘാടനം ചെയ്യും. നിർമാണം പൂർത്തിയാക്കിയിരിക്കുന്ന പാർക്കിൽ കുട്ടികൾക്കായി വിവിധ കളി ഉപകരണങ്ങളും ഇരിപ്പിടങ്ങളും ഒരുക്കിയിട്ടുണ്ട്. ടേക്ക് എ ബ്രേക്ക്, കഫറ്റീരിയ എന്നീ അനുബന്ധസൗകര്യങ്ങളും നഗരസഭ ഇതോടൊപ്പം ഉറപ്പാക്കിയിട്ടുണ്ട്. നടപ്പാതയിൽ പൂച്ചെടികൾ പിടിപ്പിച്ചും മനോഹരമാക്കിയിട്ടുണ്ട്. ബസ് സ്റ്റാൻഡിനോടു ചേർന്ന് നഗരസഭ ഏറ്റെടുത്ത ട്രാവലേഴ്സ് ലോഞ്ചിൽ കുടുംബശ്രീയുടെ പ്രീമിയം കഫെ ഉടൻ പ്രവർത്തനം ആരംഭിക്കും നഗരസഭ ബസ്് സ്റ്റാൻഡിൽ സ്പെഷൽ അസിസ്റ്റൻസ് പദ്ധതി പ്രകാരം ആരംഭിച്ച അഞ്ച് കോടി രൂപയുടെ നവീകരണ പ്രവർത്തനങ്ങൾ അവസാന ഘട്ടത്തിലാണ്. പദ്ധതിയുടെ ആദ്യഘട്ടമായി ബസ് സ്റ്റാൻഡിന്‍റെ പുനർനിർമാണം ശാസ്ത്രീയമായി പൂർത്തീകരിച്ചിരുന്നു. കാടുപിടിച്ചും മാലിന്യം നിറഞ്ഞു കിടന്ന ബസ് സ്റ്റാൻഡിന്റെ പിൻഭാഗം വൃത്തിയാക്കി പൂച്ചെടികൾ വച്ചുപിടിപ്പിച്ച് മനോഹരമാക്കിയിട്ടുണ്ട്. രണ്ടാം ഘട്ടത്തിൽ ഡ്രൈവ് വേ, നടപ്പാത എന്നിവയുടെ നിർമാണം അതിവേഗം പുരോഗമിക്കുകയാണ്. ബസ് സ്റ്റാൻഡ് ഭൂമിയുടെ ചുറ്റുമതിൽ നിർമാണത്തിന് ടെൻഡർ നടപടികളിലേക്ക് നഗരസഭ കടന്നിട്ടുണ്ട്. ഇത് പൂർത്തിയാകുന്നതോടെ ഡ്രൈവ് വേയുടെയും നടപ്പാതയുടെയും അവസാന ഘട്ടം പൂർത്തീകരിക്കാനാകും. അര കിലോമീറ്ററോളം നീളത്തിലാണ് ബസ് സ്റ്റാൻഡിനോടു ചേർന്നുള്ള നടപ്പാത ഒരുങ്ങുന്നത്. പ്രഭാത സായാഹ്ന സവാരി നടത്തുന്നവർക്ക് ഈ സൗകര്യം വളരെയേറെ പ്രയോജനപ്രദമാണ്. പരിമിതമായ പൊതു ഇടങ്ങൾ മാത്രം ഉണ്ടായിരുന്ന നഗരത്തിൽ കൂടുതൽ സാമൂഹ്യ സാംസ്കാരിക ഇടവും വിനോദത്തിനും വിശ്രമത്തിനുമായി കൂടുതൽ സൗകര്യങ്ങളും ഒരുക്കി മെച്ചപ്പെട്ടതും സുരക്ഷിതവുമായ സാമൂഹ്യ അന്തരീക്ഷത്തിൽ നഗര ജീവിതത്തിന പുതിയ മാനം നൽകുക എന്ന ഭരണസമിതിയുടെ ലക്ഷ്യമാണ് ഈ പ്രവർത്തനങ്ങളിലൂടെ സാക്ഷാത്കരിക്കപ്പെടുന്നതെന്ന് നഗരസഭ ചെയർമാൻ ടി. സക്കീർ ഹുസൈൻ പറഞ്ഞു.

മന്ത്രി വാക്കു പാലിച്ചില്ല; ഓണത്തിനും കിട്ടില്ല നെല്ലുവില

കോട്ടയം: നെല്ലിന്‍റെ വില ഓണത്തിന് മുന്‍പ് കര്‍ഷകര്‍ക്കു വിതരണം ചെയ്യുമെന്ന് കൃഷിമന്ത്രി നല്‍കിയ ഉറപ്പ് പാഴ്‌വാക്കായി. ഇക്കൊല്ലം ഫെബ്രുവരി മുതല്‍ മേയ് വരെ സപ്ലൈകോ വഴി മില്ലുകള്‍ക്ക് കൈമാറിയ നെല്ലിന്‍റെ വിലയാണ് ആറു മാസം കഴിഞ്ഞിട്ടും കര്‍ഷകരുടെ അക്കൊണ്ടുകളില്‍ ലഭിക്കാത്തത്. മില്ലുകാര്‍ കുത്തി തിരികെ കൊടുക്കും എന്ന പേരില്‍ വാങ്ങിയ നെല്ല് വിവിധ അരി കമ്പനികള്‍ അവരുടെ ബ്രാന്‍ഡില്‍ വിപണിയില്‍ വില്‍ക്കുന്നുണ്ട്. കിലോയ്ക്ക് 28.20 രൂപ നിരക്കില്‍ വിറ്റ നെല്ല് കിലോയ്ക്ക് 55 രൂപ നിരക്കില്‍ അരിയായി വാങ്ങി ഓണം ഉണ്ണേണ്ട ഗതികേടിലാണ് കര്‍ഷകര്‍. സ്റ്റേറ്റ് ബാങ്കും കാനറ ബാങ്കുമാണ് പണം വിതരണം ചെയ്യാനുള്ള കണ്‍സോര്‍ഷ്യത്തിലുള്ളത്. സര്‍ക്കാര്‍ അനുവദിക്കുന്ന തുച്ഛമായ ഫണ്ടില്‍നിന്ന് കര്‍ഷകര്‍ക്ക് പണം നല്‍കാനാവില്ലെന്നാണ് ബാങ്കുകാര്‍ പറയുന്നത്. ആറും മാസം മുന്‍പ് സപ്ലൈകോ നല്‍കിയ പാഡി രസീത് ബാങ്കുകളെ ഏല്‍പ്പിച്ച കര്‍ഷകര്‍ പണത്തിനായി കാത്തിരിപ്പു തുടരുകയാണ്. നിലവിലെ സാഹചര്യത്തില്‍ കര്‍ഷകര്‍ക്ക് ഓണത്തിന് നെല്ലുവില ലഭിക്കില്ല.

ഞാലിപ്പൂവന്‍ 100 തൊടുന്നു; പച്ചക്കറി വിലയും കയറി

കോട്ടയം: ഓണത്തിന് ഞാലിപ്പൂവന്‍ പഴം തിന്നണമെങ്കില്‍ കാശ് നന്നായി മുടക്കണം. കഴിഞ്ഞ വര്‍ഷം ഓണത്തിന് ഏത്തക്കായ വിലയാണ് നൂറിനോട് അടുത്തെങ്കില്‍ ഇക്കൊല്ലം ഞാലിപ്പൂവനാണ് താരം. 90-100 രൂപയിലേക്ക് കുതിച്ചിരിക്കുന്നു ഞാലിപ്പൂവന്‍ പഴം. ഏത്തയ്ക്ക പച്ചയ്ക്ക് 50, പഴം 60. റോബസ്റ്റ കിലോയ്ക്ക് 40-45 രൂപയായി. പാളയംകോടന്‍ 30ല്‍ തുടരുന്നു. ഓണം അടുത്തതോടെ പച്ചക്കറി വില ഇന്നലെ മുതല്‍ ഉയരുകയാണ്. നാളെയും ഉത്രാടത്തിനും പച്ചക്കറി ഇനങ്ങളുടെ വില കുതിച്ചു കയറും. അച്ചിങ്ങ, മാങ്ങ, കോവയ്ക്ക വിലയിലാണ് വില കയറ്റം. അവിയല്‍ കിറ്റ് വിലയിലും വര്‍ധനയുണ്ട്. ചേന, ചേമ്പ്, കാച്ചില്‍ വിലയും കൂടി. നാളികേരം, വെളിച്ചെണ്ണ വില ഓണനാളുകളില്‍ പിടിച്ചു നിറുത്തുമെന്ന കൃഷിമന്ത്രിയുടെ പ്രഖ്യാപനം പ്രയോജനപ്പെട്ടില്ല. നാളികേരം വില വീണ്ടും 80 കടന്നു. വെളിച്ചെണ്ണ ചില്ലറ വില 450 ല്‍ തുടരുന്നു. തമിഴ്നാട്ടില്‍നിന്നു വലിയ തോതിലാണ് പച്ചക്കറി, പഴം ഇനങ്ങള്‍ ഇന്നലെ മുതല്‍ വന്നുകൊണ്ടിരിക്കുന്നത്. തേനി, മേട്ടുപ്പാളയം, കമ്പം എന്നിവിടങ്ങളില്‍നിന്നാണ് ലോറികളുടെ വരവ്.

ജില്ലയിൽ കുട്ടികള്‍ പനിച്ചുവിറയ്ക്കുന്നു

കോട്ടയം: ജില്ലയിലെ കുട്ടികള്‍ പനിച്ചു വിറയ്ക്കുന്നു. കഴിഞ്ഞ ഏതാനും ദിവസങ്ങളായി ജില്ലയുടെ വിവിധ ഭാഗങ്ങളില്‍ നിരവധി കുട്ടികളാണ് പനി ബാധിച്ചു സര്‍ക്കാര്‍, സ്വകാര്യ ആശുപത്രികളില്‍ ചികിത്സ തേടിയെത്തിയത്. ശക്തമായ പനിക്കൊപ്പം തളര്‍ച്ചയും അനുഭവപ്പെടുന്നുണ്ട്. ജില്ലയില്‍ ഇന്‍ഫ്‌ളുവന്‍സ എ, തക്കാളിപ്പനി, പനിക്കൊപ്പം ഛര്‍ദിയും വയറിളക്കവുമാണ് കൂടുതലായി കണ്ടുവരുന്നത്. ചികിത്സതേടി എത്തുന്ന കുട്ടികളില്‍ കൂടുതലായി കണ്ടെത്തിയത് ഇന്‍ഫ്‌ളുവന്‍സ എ എന്ന വൈറല്‍ പനിയാണ്. ആദ്യരണ്ടു ദിവസങ്ങളില്‍ അതിശക്തമായ പനി, കണ്ണുകളും ചുണ്ടും ചുവന്നു വരുക, ശരീരവേദന, ഛര്‍ദി, വയറുവേദന, ആഹാരത്തോടു താത്പര്യമില്ലായ്മ, ആഹാരത്തിന്‍റെ രുചിയറിയാനുള്ള ശേഷി കുറയുക എന്നിവയാണിതിന്‍റെ പ്രധാന ലക്ഷണങ്ങള്‍. ഇന്‍ഫ്ലുവന്‍സ കാര്‍ഡ് ടെസ്റ്റ് ചെയ്താല്‍ ഈ രോഗം തിരിച്ചറിയാനാകും. ആന്‍റിബയോട്ടിക്കുകളുടെ ആവശ്യമില്ല. ആന്‍റിവൈറല്‍ മരുന്നുകള്‍ നല്‍കിയാല്‍ രോഗം ഭേദമാകുമെന്ന് ഡോക്ടര്‍മാര്‍ പറയുന്നു. കുട്ടികളില്‍ ഛര്‍ദിയില്‍ തുടങ്ങി പനി, വയറിളക്കം എന്നിവയിലേക്ക് എത്തിയാല്‍ ഛര്‍ദി നിര്‍ത്തുന്നതിനുള്ള മരുന്നുകള്‍, ഒആര്‍എസ് ലായനി, ഉപ്പിട്ട കഞ്ഞിവെള്ളം, കരിക്കിന്‍വെള്ളം, തിളപ്പിച്ചാറിച്ച വെള്ളം എന്നിവ നല്‍കാം. പനിയുള്ളപ്പോള്‍ പാരസെറ്റമോളും നല്‍കാം. ചിലരില്‍ പനി കൂടാതെ ന്യൂമോണിയയും കണ്ടു വരുന്നുണ്ട്. ഒന്നോ രണ്ടോ ആഴ്ച തുടരെ നീണ്ടുനില്‍ക്കുന്ന ചുമ, അതിനുശേഷം പനിയും കാണുന്നു. നെഞ്ചില്‍ കഫക്കെട്ട് ഉണ്ടെന്നു മനസിലാക്കിയാല്‍ എക്‌സ്‌റേ പരിശോധനയും രക്തപരിശോധനയും വേണ്ടി വരും. പുറമേ ലക്ഷണങ്ങളില്ലെങ്കിലും ചില കുട്ടികളില്‍ ന്യൂമോണിയ കാണാറുണ്ട്. കഴിഞ്ഞ ഏതാനും ആഴ്ചകളായി തക്കാളിപ്പനി എന്ന ഹാന്‍ഡ് ഫൂട്ട് മൗത്ത് ഡിസീസും കുട്ടികളില്‍ കാണുന്നുണ്ട്. കോക്‌സാക്കി വൈറസാണു രോഗകാരി. ഉള്ളംകൈ, ഉള്ളംകാല്‍, കൈമുട്ട്, കാല്‍മുട്ട്, നിതംബഭാഗം, ചുണ്ടുകള്‍ക്കു ചുറ്റുമുള്ള ഭാഗം, വായ എന്നിവിടങ്ങളില്‍ കുരുക്കളായാണ് ഇതു പ്രകടമാകുന്നത്. വായ്ക്കുള്ളില്‍ അള്‍സര്‍ രൂപപ്പെടുന്നു. ശക്തമായ പനി, കുരുക്കളുള്ള ഭാഗത്തു ചൊറിച്ചില്‍, ശരീരവേദന എന്നിവ പ്രധാനലക്ഷണങ്ങളാണ്. ഇതിനു പാരസെറ്റമോള്‍ നല്‍കിയാല്‍ മതിയാകും. ശരീരത്തിലെ ചൊറിച്ചിലിനു കലാമിന്‍ ലോഷന്‍ പുരട്ടാം. കുട്ടികളുടെ ശീരത്തില്‍ ചൂട് തുടങ്ങിയാല്‍ രണ്ടു ദിവസം പാരസെറ്റമോള്‍ നല്‍കി കുട്ടിയെ വിശ്രമിപ്പിക്കണം. നിര്‍ജലീകരണത്തിന്‍റെ ഭാഗമായി കുട്ടിയുടെ നാവ് ഉണങ്ങും. വെള്ളം കുടിക്കാന്‍ പ്രയാസം, ക്ഷീണം, മയക്കം, മൂത്രത്തിന്‍റെ അളവു കുറയുക എന്നിവയും ശ്രദ്ധിക്കേണ്ട ലക്ഷണങ്ങളാണ്. പാരസെറ്റമോള്‍ കഴിക്കുമ്പോള്‍ പനിയുടെ ചൂടു കുറയുന്നുണ്ടെങ്കില്‍ 48 മണിക്കൂര്‍ വരെ കുട്ടിയെ നിരീക്ഷിക്കണം. ഡോക്ടര്‍മാരുടെ നിര്‍ദേശങ്ങള്‍ കുട്ടികളില്‍ പനിച്ചൂട് ഉയരാതെ ശ്രദ്ധിക്കണം. ഇപ്പോള്‍ പടരുന്ന പനികള്‍ക്കെല്ലാം ആദ്യദിവസം ഉയര്‍ന്ന ചൂടായിരിക്കും. ഡോക്ടറുടെ നിര്‍ദേശപ്രകാരം പാരസെറ്റമോള്‍ നാലു മുതല്‍ ആറു മണിക്കൂര്‍ ഇടവേളയില്‍ നല്‍കണം. ശരീരം ഇളംചൂടുവെള്ളത്തില്‍ തുണി മുക്കിപ്പിഴിഞ്ഞു നന്നായി തുടച്ചു കൊടുക്കുക. ഡോക്ടറുടെ നിര്‍ദേശപ്രകാരം മാത്രമേ വളരെ ഉയര്‍ന്ന പനിക്കുള്ള മരുന്നുകള്‍ നല്‍കാവൂ. ശരീരോഷ്മാവ് കൂടിയാല്‍ ആറുമാസം മുതല്‍ അഞ്ചു വയസു വരെയുള്ള കുട്ടികളില്‍ ഫിറ്റ്സ് പോലെ വരാം. ഇതു പ്രത്യേകശ്രദ്ധ നല്‍കേണ്ട ഘട്ടമാണ്. ഫിറ്റ്‌സ് വന്നിട്ടുള്ള കുട്ടികളാണെങ്കില്‍ അടുത്ത പനിയിലും അത് ആവര്‍ത്തിക്കാനിടയുണ്ട്. അതു വരാതെ തടയുന്നതിനുള്ള മരുന്ന് ഡോക്ടറുടെ നിര്‍ദേശപ്രകാരം നല്‍കിയിരിക്കണം. വിവരങ്ങള്‍ക്കു കടപ്പാട് ഡോ. ജിസ് തോമസ് പാലുക്കുന്നേല്‍ ശിശുരോഗ വിഭാഗം തലവന്‍ മാര്‍ സ്ലീവാ മെഡിസിറ്റി, പാലാ

പൂവത്തോട് പള്ളി കൂദാശ ഏഴിന്

പൂവത്തോട്: പുനര്‍നിര്‍മിച്ച പൂവത്തോട് സെന്‍റ് തോമസ് പള്ളിയുടെ കൂദാശ ഏഴിന് ഉച്ചകഴിഞ്ഞ് രണ്ടിനു നടക്കും. മാര്‍ ജോസഫ് കല്ലറങ്ങാട്ട് കൂദാശാ കര്‍മം നിര്‍വഹിക്കും. മാര്‍ ജോസഫ് പള്ളിക്കാപറമ്പില്‍, മാര്‍ ജേക്കബ് അങ്ങാടിയത്ത് തുടങ്ങിയവര്‍ പങ്കെടുക്കും. 1887ലാണ് ഇവിടെ വിശുദ്ധ തോമാ ശ്ലീഹായുടെ നാമത്തില്‍ കുരിശുപള്ളി സ്ഥാപിതമായത്. 1909 ജൂലൈ 19ന് ഇടവക പള്ളിയായി ഉയര്‍ത്തി. 2023 ജൂലൈ മൂന്നിന് മാര്‍ ജോസഫ് കല്ലറങ്ങാട്ട് പുതിയ പള്ളിയുടെ ശിലാസ്ഥാപനം നിര്‍വഹിച്ചു. വികാരി ഫാ. ജേക്കബ് പുതിയാപറമ്പില്‍, കൈക്കാരന്മാരായ ജോസ് ജോസഫ് ഞായര്‍കുളം, കെ.സി. മാത്യു കുറ്റിയാനിക്കല്‍, പ്രസാദ് ദേവസ്യ പേരേക്കാട്ട്, പി.ജെ. സെബാസ്റ്റ്യന്‍ പെരുവാച്ചിറ, ജോജോ ജോസഫ് കാക്കാനിയില്‍ തുടങ്ങിയവരുടെ നേതൃത്വത്തിലാണ് പള്ളിപണി പൂര്‍ത്തീകരിച്ചത്.

കുടുംബങ്ങള്‌ പ്രാർഥനാലയങ്ങളാകണം: ഫാ. കൊല്ലിത്താനത്തുമലയിൽ

കുറവിലങ്ങാട്: ദൈവത്താൽ പ്രത്യേകം തെരഞ്ഞെടുക്കപ്പെട്ട സ്ഥലമാണ് കുറവിലങ്ങാടെന്ന് മുട്ടുചിറ റൂഹാദ്ക്കുദിശ ഫൊറോനാ വികാരിയും പാലാ രൂപതാ മുൻ വികാരി ജനറാളുമായ ഫാ. ഏബ്രഹാം കൊല്ലിത്താനത്തുമലയിൽ പറഞ്ഞു. കുറവിലങ്ങാട് ബൈബിൾ കൺവൻഷന്‍റെ സമാപനദിനത്തിൽ വിശുദ്ധ കുർബാനയർപ്പിച്ച് സന്ദേശം നൽകുകയായിരുന്നു അദ്ദേഹം. കുടുംബങ്ങൾ പ്രാർഥനാലയങ്ങളായി മാറണം. അപരന്‍റെ ആവശ്യങ്ങൾ തിരിച്ചറിഞ്ഞ് സഹായിക്കുന്നതാണ് ക്രൈസ്തവ കൂട്ടായ്മകളുടെ ചൈതന്യമെന്നും ഫാ. ഏബ്രാഹം കൊല്ലിത്താനത്തുമലയിൽ പറഞ്ഞു.

പാലായിലെ യുവജനങ്ങളിൽ വലിയ പ്രതീക്ഷ: മാര്‍ ജോസഫ് കല്ലറങ്ങാട്ട്

പാലാ: പാലായിലെ യുവജനങ്ങള്‍ കരുത്തന്മാരാണെന്നും അവരില്‍ വലിയ പ്രത്യാശയുണ്ടെന്നും ബിഷപ് മാര്‍ ജോസഫ് കല്ലറങ്ങാട്ട്. പാലാ രൂപത എപ്പാര്‍ക്കിയല്‍ യൂത്ത് അസംബ്ലിയുടെ രണ്ടാം ദിനത്തില്‍ യുവജനങ്ങളെ അഭിസംബോധന ചെയ്ത് പ്രസംഗിക്കുകയായിരുന്നു അദേഹം. പാലാ രൂപത മുഖ്യ വികാരി ജനറാള്‍ മോൺ. ഡോ. ജോസഫ് തടത്തില്‍, രൂപതയിലെ വിവിധ ഡിപ്പാര്‍ട്ട്‌മെന്‍റ് ഡയറക്ടര്‍മാര്‍, വിവിധ ക്രൈസ്തവ യുവജന സംഘടനാ പ്രതിനിധികള്‍ എന്നിവര്‍ യുവജനങ്ങളുമായി സംവദിച്ചു. രൂപതാ ഡയറക്ടര്‍ ഫാ. മാണി കൊഴുപ്പന്‍കുറ്റി, പ്രസിഡന്‍റ് അന്‍വിന്‍ സോണി ഓടച്ചുവട്ടില്‍, ജനറല്‍ സെക്രട്ടറി റോബിന്‍ ടി. ജോസ് താന്നിമല, ജോസഫ് വടക്കേല്‍ എന്നിവര്‍ നേതൃത്വം നല്‍കി. സമാപനദിനമായ ഇന്നു വിവിധ സെഷനുകളിലായി പാലാ രൂപതാ വികാരി ജനറാള്‍മാരായ റവ. ഡോ. സെബാസ്റ്റ്യന്‍ വേത്താനത്ത്, റവ. ഡോ. ജോസഫ് കണിയോടിക്കല്‍ എന്നിവര്‍ പങ്കെടുക്കും.

നുഴഞ്ഞുകയറാൻ ശ്രമം; ലോറി വീണ്ടും കുടുങ്ങി

പാലാ: റിവര്‍ വ്യൂ റോഡില്‍ വലിയ പാലത്തിനു താഴ്ഭാഗത്തുകൂടി അനുവദനീയമായതിലും കൂടുതല്‍ ഉയരത്തില്‍ ലോഡുമായെത്തുന്ന വാഹനങ്ങള്‍ ഗതാഗതക്കുരുക്കിനിടയാക്കുന്നു. പാലത്തിനടിയില്‍ നിരവധി തവണ വാഹനങ്ങള്‍ കുടുങ്ങിയിട്ടുണ്ട്. കഴിഞ്ഞ ദിവസം രാവിലെ അമിത ലോഡുമായി എത്തിയ ഇതര സംസ്ഥാന ലോറിക്കു പാലത്തിനടിയിലൂടെ കടന്നുപോകാന്‍ കഴിയാതിരുന്നത് ഗതാഗതം സ്തംഭിപ്പിച്ചു. പാലത്തിനടിയിലൂടെ കടന്നുപോകാവുന്ന വാഹനങ്ങളുടെ നിശ്ചിത ഉയരം മുന്നറിയിപ്പായി രേഖപ്പെടുത്തിയിട്ടുണ്ടെങ്കിലും ഡ്രൈവര്‍മാര്‍ മുന്നറിയിപ്പ് അവഗണിക്കുന്നതാണ് പ്രശ്‌നങ്ങള്‍ക്കിടയാക്കുന്നത്. മുന്നറിയിപ്പിനായി വച്ചിരിക്കുന്ന ഇരുമ്പ് പൈപ്പിന്‍റെ അടിയിലൂടെ ഭാരവണ്ടികള്‍ കടന്നുപോകുമെങ്കിലും വലിയ പാലത്തിന് അടിഭാഗത്ത് എത്തുമ്പോള്‍ വാഹനങ്ങള്‍ കടന്നുപോകാന്‍ കഴിയില്ല. ഇതു റിവര്‍ വ്യൂ റോഡില്‍ ഗതാഗതക്കുരുക്ക് ഉണ്ടാക്കുന്നുണ്ട്. പാലത്തിനു കീഴിലെ തടസത്തെക്കുറിച്ച് കൃത്യമായ മുന്നറിയിപ്പ് നല്‍കണമെന്ന ആവശ്യമുയരുന്നുണ്ട്. രാത്രിയില്‍ വലിയ ഭാരവണ്ടികള്‍ പാലത്തില്‍ തട്ടി വാഹനത്തിനു കേടുപാടുകള്‍ സംഭവിക്കുന്നുണ്ട്.

വലിയ വാഹനങ്ങള്‍ കുരുങ്ങുന്നു; വലിയകാവുംപുറം ഞെരുങ്ങുന്നു

പാലാ: റോഡിനേക്കാള്‍ വീതിയുള്ള വാഹനങ്ങള്‍ കുടുങ്ങുമ്പോള്‍ വലിയകാവുംപുറം ജംഗ്ഷന്‍ മണിക്കൂറുകളോളം സ്തംഭിക്കുന്നു. ഭരണങ്ങാനം, തലപ്പുലം പഞ്ചായത്തുകളുടെ അതിര്‍ത്തി പ്രദേശത്തുള്ള പ്ലൈവുഡ് ഫാക്ടറിയിലെത്തുന്ന ഭാരവാഹനങ്ങൾ ഇവിടെ കുടുങ്ങിക്കിടക്കുന്നത് പതിവായിരിക്കുകയാണ്. ബസുകളും സ്‌കൂള്‍ വാഹനങ്ങളും മണിക്കൂറുകളോളം വൈകുന്ന സാഹചര്യമാണുള്ളത്. പാലാ-ഉള്ളനാട്-പ്ലാശനാല്‍ - ഈരാറ്റുപേട്ട റോഡിലെ വലിയകാവുംപുറത്താണ് സംഭവം. കയ്യൂര്‍ റോഡില്‍നിന്ന് പാലാ-പ്ലാശനാല്‍-ഈരാറ്റുപേട്ട റോഡിലേക്ക് പ്രവേശിക്കുന്ന ഭാഗത്തു വാഹനങ്ങള്‍ തിരിക്കുമ്പോഴാണ് കുരുങ്ങുന്നത്. ഇവിടത്തെ കയറ്റമുള്ള ഭാഗത്തും ഭാരം കയറ്റിയ വാഹനങ്ങള്‍ നിന്നുപോകാറുണ്ട്. വിഷയത്തിൽ അധികൃതര്‍ ഇടപെട്ടു നടപടിയെടുക്കണമെന്നു തലപ്പുലം പഞ്ചായത്തംഗം കെ.ജെ. സെബാസ്റ്റ്യന്‍ ആവശ്യപ്പെട്ടു.

കുറവിലങ്ങാട് പള്ളിയിൽ ദൈവമാതാവിന്‍റെ പിറവിത്തിരുനാളിന് കൊടിയേറി

കുറവിലങ്ങാട്: ആഗോള മരിയൻ തീർഥാടനകേന്ദ്രമായ മേജർ ആർക്കി എപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന കേന്ദ്രത്തിൽ പരിശുദ്ധ ദൈവമാതാവിന്‍റെ പിറവിത്തിരുനാളിന് തുടക്കമായി. ആർച്ച്പ്രീസ്റ്റ് റവ. ഡോ. തോമസ് മേനാച്ചേരി തിരുനാൾ കൊടിയേറ്റി. ഫാ. ജോസഫ് മണിയഞ്ചിറ, ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലായിൽ, ഫാ. തോമസ് താന്നിമലയിൽ, ഫാ. ജോസ് കോട്ടയിൽ, ഫാ. പോൾ മഠത്തിക്കുന്നേൽ, ഫാ. മാത്യു കവളമ്മാക്കൽ എന്നിവർ തിരുക്കർമങ്ങളിൽ സഹകാർമികരായി. നോമ്പിന്‍റെ ആദ്യദിനം ജൂബിലി കപ്പേളയിലേക്ക് നടന്ന പ്രദക്ഷിണത്തിൽ ആയിരങ്ങൾ പങ്കെടുത്തു. മുട്ടുചിറ റൂഹാദ്ക്കുദിശ ഫൊറോന വികാരി ഫാ. ഏബ്രഹാം കൊല്ലിത്താനത്തുമലയിൽ വിശുദ്ധ കുർബാനയർപ്പിച്ച് സന്ദേശം നൽകി. കുറവിലങ്ങാട് നസ്രാണി മഹാസംഗമ വാർഷികാഘോഷത്തിന്‍റെ ഭാഗമായി ആർച്ച്പ്രീസ്റ്റ് റവ. ഡോ. തോമസ് മേനാച്ചേരി ദീപം തെളിച്ചു. നോമ്പിന്‍റെ രണ്ടാം ദിനമായ ഇന്നു മുട്ടുചിറ ഫൊറോന തീർഥാടനവും കത്തോലിക്കാ കോൺഗ്രസ് രൂപതാ കമ്മിറ്റിയുടെ തീർഥാടനവും ദേവാലയത്തിലെത്തും. പുണ്യശ്ലോകൻ പനങ്കുഴയ്ക്കൽ വല്യച്ചൻ സ്മാരക പാർക്കിൽനിന്നാണ് തീർഥാടനങ്ങൾ ആരംഭിക്കുന്നത്. ഇന്നു വൈകുന്നേരം അഞ്ചിന് എംഎസ്ടി ഡയറക്ടർ ജനറൽ റവ. ഡോ. വിൻസെന്‍റ് കദളിക്കാട്ടിൽ പുത്തൻപുരയിലും നാളെ അഞ്ചിന് ഭരണങ്ങാനം വിശുദ്ധ അൽഫോൻസാ തീർഥാടന കേന്ദ്രം റെക്ടർ റവ. ഡോ. അഗസ്റ്റിൻ പാലയ്ക്കപ്പറമ്പിലും വിശുദ്ധ കുർബാനയർപ്പിച്ച് സന്ദേശം നൽകും. ഇന്നു വയോജനദിനാചരണവും നാളെ സംഘടനാദിനാചരണവും നടത്തും.

കുറവിലങ്ങാട് നസ്രാണി മഹാസംഗമത്തിന് ആറു വയസ്

കുറവിലങ്ങാട്: ഓർമകൾക്ക് സഭൈക്യത്തിന്‍റെ സുഗന്ധം സമ്മാനിച്ച് കുറവിലങ്ങാട്ട് ആറു വർഷങ്ങൾക്കു മുമ്പ് ഇടവക ആതിഥ്യമരുളിയ നസ്രാണി മഹാസംഗമം സമസ്ത മേഖലകളിലും ഇന്നും ആവേശത്തിനു വകസമ്മാനിക്കുന്നു. വിവിധ ക്രൈസ്തവ സഭാതലവന്മാരടക്കം പങ്കെടുത്ത സമ്മേളനത്തിൽ ജന്മവും കർമവും വഴി കുറവിലങ്ങാടിന്‍റെ ഭാഗമായ വ്യക്തികളാണ് പങ്കെടുത്തത്. പതിനെണ്ണായിരത്തോളം പേർ പങ്കെടുത്ത സംഗമത്തിന്‍റെ ഭാഗമായി മരിയൻ സിമ്പോസിയവും നടത്തിയിരുന്നു. ഇപ്പോഴത്തെ പാലാ രൂപതാ വികാരി ജനറാൾ മോൺ. ഡോ. ജോസഫ് തടത്തിൽ വികാരിയായിരിക്കേയാണ് സംഗമം നടത്തിയത്. സംഗമത്തിന്‍റെ വാർഷികദിനത്തിൽ ആർച്ച്പ്രീസ്റ്റ് റവ. ഡോ. തോമസ് മേനാച്ചേരി ദീപം തെളിച്ചു. വൈദികരും യോഗപ്രതിനിധികളും കുടുംബക്കൂട്ടായ്മാ ഭാരവാഹികളും പങ്കെടുത്തു. നസ്രാണി മഹാസംഗമസ്മാരകമായി പള്ളിയോഗശാലയിൽ സ്ഥാപിച്ചിരിക്കുന്ന സ്മാരകദാരുശില്പത്തിന് സമീപമാണ് ദീപം തെളിച്ചത്.

അരുവിത്തുറ ഓണവിപണി നാളെ മുതൽ

അരുവിത്തുറ: പാലാ രൂപത സോഷ്യല്‍ വെൽഫെയര്‍ സൊസൈറ്റി, അരുവിത്തുറ സോണല്‍ കര്‍ഷക ദളങ്ങള്‍, കര്‍ഷക മാര്‍ക്കറ്റ്, ഇന്‍ഫാം, പിതൃവേദി എന്നിവയുടെ സംയുക്താഭിമുഖ്യത്തില്‍ അരുവിത്തുറ ഓണവിപണി നാളെ മുതല്‍ അഞ്ചുവരെ അരുവിത്തുറ പള്ളി മൈതാനിയില്‍ നടക്കും. മൂന്നിന് വൈകുന്നേരം അഞ്ചിന് അരുവിത്തുറ പള്ളി അസിസ്റ്റന്‍റ് വികാരി ഫാ .ജോസഫ് ചെങ്ങഴശേരില്‍ ഓണവിപണി ഉദ്ഘാടനം ചെയ്യും. കര്‍ഷകദള സോണല്‍ പ്രൊമോട്ടര്‍ ജോജോ പ്ലാത്തോട്ടം അധ്യക്ഷത വഹിക്കും. പിഎസ്ഡബ്ല്യുഎസ് രൂപതാ ഡയറക്ടര്‍ ഫാ. തോമസ് കിഴക്കേല്‍ മുഖ്യപ്രഭാഷണം നടത്തും. ഇന്‍ഫാം രൂപതാ ഡയറക്ടര്‍ ഫാ. ജോസ് തറപ്പേല്‍, ജില്ലാ പഞ്ചായത്ത് മെംബര്‍ ഷോണ്‍ ജോര്‍ജ്, ബ്ലോക്ക് പഞ്ചായത്ത് മെംബര്‍ മേഴ്സി മാത്യു, മുനിസിപ്പല്‍ കൗണ്‍സിലര്‍ ലീനാ ജയിംസ്, തലപ്പലം പഞ്ചായത്ത് പ്രസിഡന്‍റ് ആനന്ദ് പുതിയാപറമ്പില്‍, തിടനാട് പഞ്ചായത്ത് അംഗം ജോഷി ജോര്‍ജ് പ്ലാത്തോട്ടം എന്നിവര്‍ പ്രസംഗിക്കും. ഓണാഘോഷം കരിമ്പാനി: കരിമ്പാനി ദിവ്യകാരുണ്യ പള്ളിയില്‍ എകെസിസിയുടെ ആഭിമുഖ്യത്തില്‍ ഏഴിന് ഓണാഘോഷം സംഘടിപ്പിക്കും. ഉച്ചകഴിഞ്ഞു 1.30ന് പൂക്കള മത്സരം, വടംവലി മത്സരം, കലാകായിക മത്സരം, പൊതുസമ്മേളനം തുടങ്ങിയവ സംഘടിപ്പിക്കുമെന്ന് വികാരി ഫാ. ജയിംസ് കരിമാക്കല്‍ അറിയിച്ചു. പാലാ: നഗരസഭയില്‍ ഓണാഘോഷ പരിപാടികള്‍ ഇന്ന് ഉച്ചയ്ക്ക് ഓഫീസ് ഹാളില്‍ ചെയര്‍മാന്‍ തോമസ് പീറ്റര്‍ ഉദ്ഘാടനം ചെയ്യും. പാലാ ഡിവൈഎസ്പി കെ. സദന്‍ മുഖ്യാതിഥിയായിരിക്കും. പാലാ: കേരള സോളിഡ് വേസ്റ്റ് മാനേജ്‌മെന്‍റ് പദ്ധതിയുടെ ഐഇസി പ്രവര്‍ത്തനങ്ങളുടെ ഭാഗമായി ഹരിത കര്‍മസേനയുടെ കൂട്ടായ്മയും ഓണാഘോഷവും നടത്തി. പ്രവര്‍ത്തനങ്ങളുടെ നഗരസഭാതല ഉദ്ഘാടനം ചെയര്‍മാന്‍ തോമസ് പീറ്റര്‍ നിര്‍വഹിച്ചു. വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ സാവിയോ കാവുകാട്ട് അധ്യക്ഷത വഹിച്ചു. നഗരസഭാ ക്ലീന്‍സിറ്റി മാനേജര്‍ ആറ്റ്‌‌ലി പി. ജോണ്‍, വൈസ് ചെയര്‍പേഴ്‌സണ്‍ ബിജി ജോജോ, കൗണ്‍സിലര്‍മാര്‍, നഗരസഭാ ആരോഗ്യവിഭാഗം ഉദ്യോഗസ്ഥരായ പി.ജി. ഉമേഷിത, രഞ്ജിത്ത് ആര്‍. ചന്ദ്രന്‍, കെഎസ്ഡബ്ല്യുഎംപി ഡെപ്യൂട്ടി ജില്ലാ കോ-ഓർഡിനേറ്റര്‍ റീനു ചെറിയാന്‍ തുടങ്ങിയവര്‍ പ്രസംഗിച്ചു. കർഷകച്ചന്ത തീക്കോയി: തിരുവോണത്തോടനുബന്ധിച്ച് തീക്കോയി പഞ്ചായത്ത് കൃഷിഭവന്‍റെ ആഭിമുഖ്യത്തിൽ ഇക്കോ ഷോപ്പിൽ ഓണസമൃദ്ധി 2025 കർഷകച്ചന്ത ആരംഭിച്ചു. പഞ്ചായത്ത് പ്രസിഡന്‍റ് കെ.സി ജയിംസ് ഉദ്ഘാടനം നിർവഹിച്ചു.

നന്ദിയുടെ നല്ല വാക്കുകളുമായെത്തി മാര്‍ സെബാസ്റ്റ്യന്‍ വാണിയപ്പുരയ്ക്കല്‍

കാഞ്ഞിരപ്പള്ളി: നിയുക്ത കല്യാണ്‍ ആര്‍ച്ച്ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കല്‍ ഇന്നലെ മാതൃരൂപതയായ കാഞ്ഞിരപ്പള്ളിയിലെത്തി ധന്യമായ പഴയ ഓര്‍മകള്‍ നന്ദിയോടെ അനുസ്മരിച്ചു. വാണിയപ്പുരയ്ക്കല്‍ കുടുംബവും മാതാപിതാക്കളും സഹോദരങ്ങളും തനിക്ക് പ്രഥമ ഭവനവും കാഞ്ഞിരപ്പള്ളി രൂപത രണ്ടാമത്തെ വിശാലമായ കുടുംബവുമാണെന്ന് അദ്ദേഹം പറഞ്ഞു. മേരിമാതാ മൈനര്‍ സെമിനാരി പരിശീലനം മുതല്‍ ഇന്നേവരെയുള്ള പ്രയാണത്തില്‍ കാഞ്ഞിരപ്പള്ളി രൂപതാ കുടുംബം നല്‍കിയ കരുതലും മാര്‍ ജോസഫ് പവ്വത്തില്‍, മാര്‍ മാത്യു വട്ടക്കുഴി, മാര്‍ മാത്യു അറയ്ക്കല്‍, മാര്‍ ജോസ് പുളിക്കല്‍ എന്നീ പിതാക്കന്മാരും വൈദികഗണവും സന്യസ്തരും വിശ്വാസികളും നല്‍കിയ കരുതലും പ്രാര്‍ഥനകളും വലിയ ബലംപകര്‍ന്നു. രൂപതയില്‍ വിവിധ ചുമതലകളില്‍ ലഭിച്ച അവസരങ്ങളും പ്രോത്സാഹനങ്ങളും അവിസ്മരണീയമായി സൂക്ഷിക്കുന്നു. യുവദീപ്തി ഡയറക്ടര്‍ ശുശ്രൂഷയ്ക്കുശേഷം റോമില്‍ ഉപരിപഠനത്തിനു പോയി മടങ്ങിയെത്തിയപ്പോള്‍ മാര്‍ മാത്യു അറയ്ക്കല്‍ ജുഡീഷല്‍ വികാരിയായി നിയമിച്ചു. ജനങ്ങളോടൊപ്പം കഴിയാനുള്ള ആഗ്രഹത്തില്‍ ഏതെങ്കിലുമൊരു ചെറിയ പള്ളിയില്‍ അസിസ്റ്റന്‍റ് വികാരി സ്ഥാനംകൂടി തരുമോ എന്നു ചോദിച്ചപ്പോള്‍ അറയ്ക്കല്‍ പിതാവ് വികാരിസ്ഥാനംതന്നെയാണ് ഏല്‍പ്പിച്ചത്. തുടര്‍ന്ന് പൂമറ്റം, ചെന്നാക്കുന്ന്, മുളംകുന്ന് പള്ളികളില്‍ വികാരിയായി. നല്ല ബന്ധങ്ങള്‍ വളര്‍ത്തുക മാത്രമല്ല എല്ലാവരെയും തുറവിയോടെ കേള്‍ക്കുക എന്നത് ഒരുപാട് അറിവും അനുഭവവും പകര്‍ന്നുകിട്ടാന്‍ ഇടയായി. രൂപതയിലും പുറത്തും അനേകരുമായി സ്ഥാപിച്ച ആത്മബന്ധമാണ് ജീവിതത്തിലെ ഏറ്റവും വലിയ കരുതല്‍. രൂപതയില്‍ ഇപ്പോള്‍ വലിയ ചുമതലകള്‍ വഹിക്കുന്ന വൈദികരേറെയും മൈനര്‍ സെമിനാരി പഠനം മുതല്‍ സഹപാഠികളും സഹപ്രവര്‍ത്തകരും ആത്മസ്‌നേഹിതരുമാണെന്നത് വലിയൊരു ബലമായി മാറി. മാര്‍ ജോസ് പുളിക്കല്‍ പിതാവുമായി മൈനര്‍ സെമിനാരിയില്‍ തുടങ്ങിയ സഹോദരബന്ധം ഇന്നും എന്നും ഊഷ്മളമായി സൂക്ഷിക്കുന്നു. മാര്‍ സെബാസ്റ്റ്യന്‍ വാണിയപ്പുരയ്ക്കല്‍ കാഞ്ഞിരപ്പള്ളി പ്രീസ്റ്റ് ഹോമില്‍ കഴിയുന്ന മുന്‍ മൈനര്‍ സെമിനാരി റെക്ടര്‍ ഫാ. മാത്യു ഏറത്തേടത്തെ സന്ദര്‍ശിച്ച് ഇന്നലെ അനുഗ്രഹം തേടി. പാസ്റ്ററല്‍ സെന്‍ററില്‍ ഒരുക്കിയ സ്വീകരണത്തിനുശേഷം മേജർ ആർക്കി എപ്പിസ്കോപ്പൽ മരിയൻ തീർഥാടന കേന്ദ്രമായ പഴയപള്ളിയില്‍ എട്ടുനോമ്പു തിരുനാള്‍ പ്രമാണിച്ച് വിശുദ്ധ കുര്‍ബാന അര്‍പ്പിച്ച ശേഷമാണു മടങ്ങിയത്. പാസ്റ്ററൽ ആനിമേഷൻ ഡയറക്ടർ ഫാ. സ്റ്റാൻലി പുള്ളോലിക്കൽ, പ്രൊക്കുറേറ്റര്‍ ഫാ. ഫിലിപ്പ് തടത്തില്‍, സിബിസിഐ ലെയ്റ്റി കൗൺസിൽ സെക്രട്ടറി ഷെവ. അഡ്വ. വി.സി. സെബാസ്റ്റ്യൻ, രൂപതാ പാസ്റ്ററല്‍ കൗണ്‍സില്‍ സെക്രട്ടറി ഡോ. ജൂബി മാത്യു എന്നിവര്‍ ക്രമീകരണങ്ങള്‍ക്കു നേതൃത്വം നല്‍കി.

സഹകരണ ഓണവിപണി ഉദ്ഘാടനം

കാഞ്ഞിരപ്പള്ളി: കാഞ്ഞിരപ്പള്ളി സഹകരണ കാർഷിക ഗ്രാമവികസന ബാങ്കിന്‍റെ ആഭിമുഖ്യത്തിൽ കൺസ്യൂമർഫെഡിന്‍റെ 12 ഇനം സബ്സിഡി സാധനങ്ങൾ അടങ്ങിയ ഓണക്കിറ്റ് വിതരണോദ്ഘാടനം ജില്ലാ പഞ്ചായത്തംഗം ജെസി ഷാജൻ നിർവഹിച്ചു. ബാങ്ക് പ്രസിഡന്‍റ് സാജൻ തൊടുക, വൈസ് പ്രസിഡന്‍റ് സാജൻ കുന്നത്ത്, ഭരണസമിതി അംഗങ്ങളായ സണ്ണിക്കുട്ടി അഴകമ്പ്രയിൽ, പി.സി. ജേക്കബ് പനയ്ക്കൽ, പി.പി. സുകുമാരൻ, കെ.എൻ. ദാമോദരൻ, സെലിൻ സിജോ, സെക്രട്ടറി കെ. അജേഷ്കുമാർ എന്നിവർ പ്രസംഗിച്ചു. രാവിലെ 10 മുതൽ ഹെഡ് ഓഫീസ് കാഞ്ഞിരപ്പള്ളി, മുണ്ടക്കയം, എരുമേലി ബ്രാഞ്ചുകളിലും കിറ്റ് വിതരണം നടത്തും. അവശ്യമുള്ളവർ റേഷൻ കാർഡ് കോപ്പിയുമായി വരേണ്ടതാണ്.

ഓണവിപണി ആരംഭിച്ചു

കാഞ്ഞിരപ്പള്ളി: സാധാരണക്കാർക്കും സഹകാരികൾക്കും ഓണക്കാലത്ത് ആശ്വാസം നൽകുന്നതിന്‍റെ ഭാഗമായി കാഞ്ഞിരപ്പള്ളി സെൻട്രൽ സർവീസ് സഹകരണ ബാങ്ക് സബ്സിഡി നിരക്കിലുള്ള പല വ്യഞ്ജനക്കിറ്റും പച്ചക്കറി വിഭവങ്ങളും അടങ്ങുന്ന വിപണി ഇന്നു മുതൽ ഒരാഴ്ചത്തേക്ക് പേട്ടക്കവലയിൽ ആരംഭിച്ചു. ബാങ്ക് പ്രസിഡന്‍റ് സുനിൽ തേനംമാക്കൽ ഉദ്ഘാടനം ചെയ്തു. ഡയറക്ടർ ബോർഡ് അംഗം നെസീമ ഹാരിസ് അധ്യക്ഷത വഹിച്ചു. ലീഗൽ അഡ്വൈസർ പി. ജീരാജ് ആദ്യവില്പന നടത്തി. സെക്രട്ടറി പി.കെ. സൗദ, മുൻ ബാങ്ക് പ്രസിഡന്‍റ് സക്കീർ കട്ടുപ്പാറ, ഡയറക്ടർ ബോർഡ് അംഗങ്ങളായ നിബു ഷൗക്കത്ത്, അൻവർഷാ കോന്നാട്ടുപറമ്പിൽ, നായിഫ് ഫൈസി, എം.പി. രാജു, അജുമൽ പാറക്കൽ, അൻഷുമോൻ, സിജാ സക്കീർ, സിൻഷാ അഷറഫ്, ഷിഹാർ കണ്ടത്തിൽ, ഒ.എം. ഷാജി, റഹ്മത്തുള്ള കോട്ടവാതുക്കൽ, നൗഷാദ് ഹസൻ, പി.ആർ. സിമി, എം.എസ്. ഇസ്മായിൽ, ഹരി, ടി.എ. ഷഹാസ് സജി തുടങ്ങിയവർ പ്രസംഗിച്ചു.

എസ്എംവൈഎം, മാതൃവേദി മരിയൻ തീർഥാടനം നാളെ

കാഞ്ഞിരപ്പള്ളി: ഈശോയുടെ മനുഷ്യാവതാരത്തിന്‍റെ ജൂബിലിയോടു ചേർന്നും കാഞ്ഞിരപ്പള്ളി രൂപതയുടെ സുവർണ ജൂബിലിക്കൊരുക്കമായും രൂപതയിൽ മാതൃവേദി ഔദ്യോഗികമായി ഉദ്ഘാടനം ചെയ്തതിന്‍റെ 30ാം വാർഷികത്തോടനുബന്ധിച്ചും നാളെ രൂപതാ എസ്എംവൈഎമ്മും മാതൃവേദിയും സംയുക്തമായി മരിയൻ തീർഥാടനം നടത്തും. രാവിലെ 9.30ന് രൂപതയിലെ വിവിധ ഇടവകയിൽ നിന്നുള്ള മാതാക്കളും യുവജനങ്ങളുമൊരുമിച്ച് സെന്‍റ് ഡൊമിനിക്സ് കത്തീഡ്രൽ പള്ളിയിൽ ദിവ്യകാരുണ്യാരാധനയിൽ പങ്കുചേരും. തുടർന്ന് പഴയപള്ളിയിലേക്ക് കാഞ്ഞിരപ്പള്ളി ടൗൺ ചുറ്റി പരിശുദ്ധ അമ്മയുടെ 30 പ്രത്യക്ഷീകരണങ്ങൾ ഉൾച്ചേർത്തുകൊണ്ട് ജപമാല പ്രദക്ഷിണം നടത്തും. പ്രദക്ഷിണം പള്ളിയിലെത്തുമ്പോൾ രൂപതാധ്യക്ഷൻ മാർ ജോസ് പുളിക്കൽ മരിയൻ സന്ദേശം നൽകും. തുടർന്ന് എസ്എംവൈഎം രൂപതാ ഡയറക്‌ടർ ഫാ. തോമസ് നരിപ്പാറ, മാതൃവേദി രൂപതാ ഡയറക്ട‌ർ ഫാ. മാത്യു ഓലിക്കൽ എന്നിവരുടെ കാർമികത്വത്തിൽ വിശുദ്ധ കുർബാനയർപ്പിക്കും. സമ്പൂർണ ബൈബിൾ പകർത്തിയെഴുതിയ കുടുംബങ്ങളെയും മാർ ജോസ് പുളിക്കൽ അനുമോദിക്കും. മാതൃവേദി, എസ്എംവൈഎം സംഘടനകളുടെ രൂപത, ഫൊറോന ഭാരവാഹികൾ മരിയൻ തീർഥാടനത്തിനു നേതൃത്വം നൽകും. പത്രസമ്മേളനത്തിൽ എസ്എംവൈഎം രൂപതാ ഡയറക്‌ടർ ഫാ. തോമസ് നരിപ്പാറ, മാതൃവേദി രൂപതാ ഡയറക്ടർ ഫാ. മാത്യു ഓലിക്കൽ, മാതൃവേദി, എസ്എംവൈഎം രൂപതാ അനിമേറ്റേഴ്സ് സിസ്റ്റർ റോസ്‌മി എസ്എബിഎസ്, സിസ്റ്റർ ബ്രിജിറ്റ് എസ്എബിഎസ്, എസ്എംവൈഎം രൂപതാ വൈസ് പ്രസിഡന്‍റ് സീനാ ജോയി, ഡെപ്യൂട്ടി പ്രസിഡന്‍റ് ഡിജു കൈപ്പൻപ്ലാക്കൽ, മാതൃവേദി ജോയിന്‍റ് സെക്രട്ടറി ടെസി മുട്ടത്ത്, എക്സിക്യൂട്ടീവ് അംഗം ജൂബി വേഴന്പശേരിയിൽ എന്നിവർ പങ്കെടുത്തു.

തേയിലത്തൈകൾ നട്ട് സെന്‍റ് ആന്‍റണീസിലെ നേച്ചർ ക്യാമ്പ്

പെരുവന്താനം: സെന്‍റ് ആന്‍റണീസ് കോളജിലെ നേച്ചർ ക്യാമ്പ് അംഗങ്ങളും ബികോം പ്രൊഫഷണൽ രണ്ടാം വർഷ വിദ്യാർഥികളും ചേർന്ന് കാമ്പസിലെ ആറേക്കർ സ്ഥലത്ത് തേയിലത്തൈകൾ നട്ടു. ഓണം ഹരിതാഭമാണെന്നും മനുഷ്യനും പ്രകൃതിയും തമ്മിലുള്ള ബന്ധമാണ് ഓണത്തിന്‍റെ കാതലെന്നും തിരിച്ചറിഞ്ഞാണ് ഒരുപറ്റം വിദ്യാർഥികൾ ഒത്തുചേർന്ന് 500 ഓളം തേയിലത്തൈകൾ നട്ടത്. മനുഷ്യനും പ്രകൃതിയുമായുള്ള ബന്ധവും ഒരു ജൈവ മനുഷ്യനിലേക്കുള്ള വളർച്ചയും ലക്ഷ്യമിട്ടാണ് ഈ പദ്ധതി ആരംഭിച്ചിരിക്കുന്നത്. ഈ തൈകളുടെ തുടർന്നുള്ള പരിപാലനവും ഈ വിദ്യാർഥികൾതന്നെ നിർവഹിക്കും. അടുത്ത മാസത്തെ വിദ്യാരംഭത്തിൽ രണ്ടാം ഘട്ടമായുള്ള 500 തേയിലത്തൈകളും ഇതര ഫലവൃക്ഷങ്ങളും നട്ടുപിടിപ്പിക്കുമെന്ന് കോളജ് ചെയര്‍മാന്‍ ബെന്നി തോമസും പ്രിൻസിപ്പൽ ഡോ. ആന്‍റണി ജോസഫ് കല്ലമ്പള്ളിയും പറഞ്ഞു. ഡോ. ഷിജിമോൾ തോമസ്, ജോസ് ആന്‍റണി, നാൻസി ഡിക്രൂസ്, നെജി നാസർ തുടങ്ങിയവർ പരിപാടികൾ ഏകോപിപ്പിച്ചു.

ഇതാ ദേശീയ കുഴിപാത!

മുണ്ടക്കയം: ദിവസേന ആയിരക്കണക്കിനു വാഹനങ്ങൾ കടന്നുപോകുന്ന കൊട്ടാരക്കര - ദിണ്ഡിഗൽ ദേശീയപാതയിൽ മുണ്ടക്കയത്തിനും 31ാം മൈലിനുമിടയിൽ നടക്കുന്ന നവീകരണം ഫലപ്രദമായ രീതിയിലല്ലെന്ന് ആക്ഷേപം. കഴിഞ്ഞ ഒരു വർഷത്തിനിടെ നാലു തവണ നവീകരണം നടന്ന സ്ഥലമാണ് പൈങ്ങനായിലെ കൊടും വളവ്. പതിവായി അപകടം നടക്കാറുള്ള ഇവിടെ റോഡിൽ രൂപപ്പെടുന്ന കുഴി ദേശീയപാത വിഭാഗമെത്തി നികത്തി ഒരു മാസം തികയും മുമ്പ് വീണ്ടും ഇവിടെ കുഴി രൂപപ്പെടും. ഇതു പതിവായതോടെ കഴിഞ്ഞയാഴ്ച സിമന്‍റ് ലോക്ക് കട്ടകൾ നിരത്തി നവീകരണം നടത്തി. എന്നാൽ, നിർമാണം നടന്ന് ഒരാഴ്ച പിന്നീടും മുമ്പ് ഇപ്പോൾ പഴയതിലും വലിയ കുഴിയാണ് റോഡിന്‍റെ രണ്ടു ഭാഗത്തും രൂപപ്പെട്ടിരിക്കുന്നത്. സിമന്‍റ് ലോക്ക് കട്ടകൾ ടാറിംഗിനോടു ചേരുന്ന ഭാഗം കോൺക്രീറ്റ് ചെയ്യാത്തതു മൂലമാണ് റോഡിന്‍റെ രണ്ട് ഇടങ്ങളിലും വലിയ കുഴി രൂപപ്പെട്ടിരിക്കുന്നത്. ഇരുചക്ര വാഹനങ്ങളടക്കം കുഴിയിൽ വീണ് അപകടങ്ങളും സംഭവിച്ചുതുടങ്ങി. അതുപോലെതന്നെ പോസ്റ്റോഫീസ് ജംഗ്ഷനു സമീപം ഓടയുടെയും കലുങ്കിന്‍റെയും നിർമാണം നടത്തിയിട്ടുണ്ട്. കലുങ്ക് നിർമാണം പൂർത്തിയായി ദിവസങ്ങൾ കഴിഞ്ഞിട്ടും ഇതിനോടനുബന്ധിച്ചുള്ള റോഡ് നവീകരിക്കാൻ നടപടിയായിട്ടില്ല. അതിനാൽ കലുങ്കിന്‍റെ ഒരു വശത്ത് ഇപ്പോൾ വെള്ളക്കെട്ടും കുഴിയും രൂപപ്പെട്ടു. ഇതും അപകട സാധ്യതയായി മാറിയിരിക്കുകയാണ്. ദേശീയപാതയിലെ നവീകരണമായിട്ടും പോലും വേണ്ടത്ര ഗൗരവത്തോടെയല്ല ഉദ്യോഗസ്ഥരും പണി നടത്തുന്നവരും സമീപിക്കുന്നതെന്നാണ് നാട്ടുകാരുടെ പരാതി. ‌യാതൊരു മുൻകരുതലുമില്ലാതെ പകൽ സമയത്തു റോഡ് നിർമാണം നടന്നതു മൂലം ദേശീയപാതയിൽ വലിയ ഗതാഗതക്കുരുക്ക് ഉണ്ടായത് വിവാദമായിരുന്നു. സ്കൂൾ സമയത്തടക്കം നിർമാണം നടന്നതോടെ കിലോമീറ്ററോളം ദൂരം വാഹനങ്ങളുടെ നീണ്ടനിര പ്രത്യക്ഷപ്പെട്ടു. വ്യാപക പ്രതിഷേധം ഉയർന്നതോടെ പിന്നീട് നിർമാണം രാത്രിയിലേക്കു മാറ്റുകയായിരുന്നു.

ഓണം സാഹോദര്യത്തിന്‍റെ പ്രതീകം: ചേതന്‍കുമാര്‍ മീണ

ചങ്ങനാശേരി: ഓണാഘോഷം മലയാളികളുടെ സാഹോദര്യത്തിന്‍റെ പ്രതീകമാണെന്ന് കോട്ടയം ജില്ലാ കളക്ടര്‍ ചേതന്‍കുമാര്‍ മീണ. ഇവിടത്തെ ആഘോഷങ്ങളും ആചാരങ്ങളും ഒരുപാട് ഹൃദയസ്പര്‍ശിയാണെന്നും അദ്ദേഹം കൂട്ടിച്ചേര്‍ത്തു. ചങ്ങനാശേരി നഗരസഭ 14-ാം വാര്‍ഡ് സഭയുടെയും കുടുംബശ്രീയുടെയും ആഭിമുഖ്യത്തില്‍ നടന്ന ഓണാഘോഷവും ഓണക്കിറ്റ് വിതരണവും ഉദ്ഘാടനം ചെയ്യുകയായിരുന്നു ജില്ലാ കളക്ടര്‍. നഗരസഭാ വികസനകാര്യ സ്ഥിരം സമിതി അധ്യക്ഷ നെജിയ നൗഷാദ് അധ്യക്ഷത വഹിച്ചു. എന്‍.എം. നൗഷാദ്, നഗരസഭ കൗണ്‍സിലര്‍മാരായ ജോമി ജോസഫ്, ബീനാ ജിജന്‍, ലിസി വര്‍ഗീസ്, എച്ച്. മുസമ്മില്‍ ഹാജി, പി.എസ്. രജിറാം, ടി.പി. അനില്‍കുമാര്‍എന്നിവര്‍ പ്രസംഗിച്ചു.

മാമ്മൂട്-വെളിയം റോഡിന്‍റെ ദുരിതം നീങ്ങുന്നു; നവീകരണത്തിന് ആറു കോടിയുടെ പദ്ധതി

ചങ്ങനാശേരി: മാമ്മൂട്-വെളിയം-ശാന്തീപുരം റോഡിന്‍റെ ദുരിതം നീങ്ങുന്നു. നവീകരണത്തിന് നവകേരള സദസ് പദ്ധതിയില്‍പ്പെടുത്തി ആറു കോടി രൂപ അനുവദിച്ചു. മൂന്നു കിലോമീറ്റര്‍ ദൂരം വരുന്ന ഈ റോഡ് തകര്‍ന്ന് തരിപ്പണമായിട്ട് വര്‍ഷങ്ങള്‍ പിന്നിട്ടിരുന്നു. കഴിഞ്ഞ വര്‍ഷം മുഖ്യമന്ത്രിയുടെ നേതൃത്വത്തില്‍ നടത്തിയ നവകേരള സദസില്‍ ജോബ് മൈക്കിള്‍ എംഎല്‍എ നല്‍കിയ നിവേദനത്തിന്‍റെ അടിസ്ഥാനത്തിലാണ് പദ്ധതിക്ക് തുക അനുവദിച്ചത്. ചങ്ങനാശേരി നിയോജകണ്ഡലത്തില്‍പ്പെട്ട മാമ്മൂട് മുതല്‍ വെളിയം വരയുള്ള ഭാഗത്തെ റോഡ് നവീകരണത്തിനാണ് പണം അനുവദിച്ചിരിക്കുന്നത്. വെളിയം മുതല്‍ ശാന്തീപുരം വരെയുള്ള ഭാഗം കാഞ്ഞിരപ്പള്ളി നിയോജകമണ്ഡലത്തില്‍പ്പെട്ടതാണ്. ചങ്ങനാശേരി വാഴൂര്‍ റോഡില്‍ മാമ്മൂട്ടില്‍ ആരംഭിച്ച് വെളിയം-ശാന്തീപുരം-നെടങ്ങാടപ്പള്ളിവഴി മല്ലപ്പള്ളി, ശാന്തീപുരത്തുനിന്നു തിരിഞ്ഞ് കൂത്രപ്പള്ളി, കോട്ടയം-കോഴഞ്ചേരി റോഡില്‍ കൊച്ചുപറമ്പ് റോഡുകളിലും എഴിങ്കാലവഴി മുക്കൂര്‍, കുന്നന്താനം റൂട്ടിലും വെങ്കോട്ടയിലും എത്തിച്ചേരാവുന്ന പ്രധാനപ്പെട്ട ഈ റോഡ് വര്‍ഷങ്ങളായി തകര്‍ന്ന് അപകടാവസ്ഥയിലായിരുന്നു. മാമ്മൂട് ലൂര്‍ദ്മാതാ പള്ളി, സെന്‍റ് ഷന്താള്‍സ്, സെന്‍റ് സെബാസ്റ്റ്യന്‍സ് സ്‌കൂളുകള്‍, മാമുണ്ട ക്ഷേത്രം, നെടുങ്ങാടപ്പള്ളി സിഎസ്ഐ പള്ളി തുടങ്ങിയ സ്ഥാപനങ്ങളിലേക്കുള്ള ഏക റോഡും ഇതാണ്. പല സ്ഥലങ്ങളിലും റോഡ് ഒഴുകിപ്പോയനിലയിലാണ്. മാമ്മൂട് പള്ളി ജംഗ്ഷന്‍, മാമുണ്ട ഷാപ്പ് ജംഗ്ഷന്‍ ഭാഗങ്ങളില്‍ റോഡ് അപകടാവസ്ഥയിലാണ്. ഈ ഭാഗങ്ങളില്‍ ഇരുചക്രവാഹന സഞ്ചാരികള്‍ അപകടത്തില്‍പ്പെടുന്നത് പതിവാണ്. റോഡിന്‍റെ ശോച്യാവസ്ഥയ്ക്ക് പരിഹാരം കാണണമെന്ന നാളുകളായി ആവശ്യം ഉയര്‍ന്നിരുന്നു. നവകേരള സദസില്‍ രണ്ടു റോഡുകള്‍ക്ക് ഏഴുകോടി രൂപ നവകേരള സദസില്‍ സമര്‍പ്പിച്ച മാമ്മൂട് ശാന്തിപുരം റോഡില്‍ വെളിയം ഭാഗം വരെ ബിഎം ആൻഡ് ബിസി നിലവാരത്തില്‍ റോഡ് നവീകരിക്കുന്നതിനായി ആറു കോടി രൂപയും ചങ്ങനാശേരി മുനിസിപ്പാലിറ്റിയില്‍ പെരുന്ന മുതല്‍ പായിപ്പാട് ഗ്രാമപഞ്ചായത്തിലെ പൂവം വരെ ഉള്ള റോഡ് നവീകരണത്തിനായി ഒരു കോടി രൂപയും ലഭിച്ചു. നടപടികള്‍ പൂര്‍ത്തിയാക്കി വേഗത്തില്‍ നിര്‍മാണ പ്രവൃത്തികള്‍ ആരംഭിക്കും.

ചങ്ങനാശേരി റെയില്‍വേ സ്റ്റേഷനില്‍ ലിഫ്റ്റുകളുടെ നിര്‍മാണം പുരോഗമിക്കുന്നു

ചങ്ങനാശേരി: റെയില്‍വേ സ്റ്റേഷനില്‍ യാത്രക്കാര്‍ ഏറെ നാളായി ആവശ്യപ്പെട്ടിരുന്ന ലിഫ്റ്റ് സംവിധാനത്തിന്‍റെ നിര്‍മാണം പൂര്‍ത്തിയാകുന്നു. അമൃത് ഭാരത് പദ്ധതിയില്‍ ഉള്‍പ്പെടുത്തി നടപ്പിലാക്കുന്ന സ്റ്റേഷന്‍ നവീകരണ പ്രവര്‍ത്തനങ്ങളുടെ ഭാഗമായി നിരവധി നിര്‍മാണ പ്രവര്‍ത്തനങ്ങള്‍ നടത്തിയിരുന്നെങ്കിലും യാത്രക്കാര്‍ക്ക് സൗകര്യപ്രദമായ രീതിയില്‍ പ്ലാറ്റ്‌ഫോമുകളിലേക്ക് എത്തിച്ചേരുവാന്‍ ആവശ്യമായ രണ്ടാമത്തെ ഫുട്ട് ഓവര്‍ ബ്രിഡ്ജ്, ലിഫ്റ്റ് സൗകര്യം എന്നിവ ഉണ്ടായിരുന്നില്ല. ട്രെയിനുകള്‍ നിര്‍ത്തുന്ന രണ്ടും മൂന്നും നമ്പര്‍ പ്ലാറ്റ്‌ഫോമിലേക്കെത്താൻ ഭാരമുള്ള ലഗേജുമായി വരുന്ന യാത്രക്കാര്‍ക്കും പ്രത്യേകിച്ച് മുതിര്‍ന്ന പൗരന്മാര്‍ക്കും വലിയ ബുദ്ധിമുട്ടുകള്‍ നേരിടേണ്ടി വന്നിരുന്നു. ഈ സാഹചര്യം പരിഗണിച്ച് കൊടിക്കുന്നില്‍ സുരേഷ് എംപി നടത്തിയ ഇടപെടലിന്‍റെ ഫലമായി ഡിവിഷന്‍ ഫണ്ടില്‍ നിന്നാണ് രണ്ടാമത്തെ ഫുട്ട് ഓവര്‍ ബ്രിഡ്ജിനോടു ചേര്‍ന്നുള്ള ഹെവി ഡ്യൂട്ടി വ്യാവസായിക ലിഫ്റ്റിന്‍റെ നിര്‍മാണം നടത്തുന്നത്. 14 യാത്രക്കാര്‍ക്ക് ഒരേസമയം കയറാവുന്ന രീതിയില്‍ രൂപകല്പന ചെയ്തിരിക്കുന്ന ഈ ലിഫ്റ്റ് പ്രവര്‍ത്തനമാരംഭിക്കുന്നതോടെ സ്റ്റേഷനിലെ യാത്രാസൗകര്യം ഗണ്യമായി മെച്ചപ്പെടും. യാത്രക്കാരുടെ സുരക്ഷയും സൗകര്യവും ഉറപ്പാക്കുക എന്നതാണ് പ്രധാന ലക്ഷ്യം. പ്രത്യേകിച്ച് മുതിര്‍ന്ന പൗരന്മാര്‍, രോഗികള്‍, ഭാരമുള്ള ലഗേജുമായി യാത്ര ചെയ്യുന്നവര്‍ എന്നിവര്‍ക്ക് പ്ലാറ്റ്‌ഫോമുകളില്‍ എളുപ്പത്തില്‍ എത്തിച്ചേരാന്‍ കഴിയുന്ന വിധത്തിലാണ് പുതിയ സംവിധാനം ഒരുക്കിയിരിക്കുന്നത്. പുതിയ ടെര്‍മിനലിനോട് ചേര്‍ന്ന് ഒന്നാംപ്ലാറ്റ്‌ഫോമില്‍ നിന്നു രണ്ടാം പ്ലാറ്റ്‌ഫോമിലേക്ക് ഫുട്ട് ഓവര്‍ബ്രിഡ്ജ് നിര്‍മാണം പൂര്‍ത്തിയാവുകയും യാത്രക്കാര്‍ ഉപയോഗിച്ചു തുടങ്ങുകയും ചെയ്തിട്ടുണ്ട്. മൂന്നുമാസത്തിനകം ലിഫ്റ്റ് പ്രവര്‍ത്തനനിരതമാകും ലിഫ്റ്റിന്‍റെ കമ്മീഷനിംഗ് ഉള്‍പ്പെടെയുള്ള എല്ലാ നടപടികളും പൂര്‍ത്തിയാക്കി മൂന്നു മാസത്തിനകം യാത്രക്കാര്‍ക്ക് ഉപയോഗത്തിനു തുറന്നുകൊടുക്കും. കൊടിക്കുന്നില്‍ സുരേഷ് എംപി മാവേലിക്കര പാര്‍മെന്‍റംഗം

കുറവിലങ്ങാട് രാജ്യമാകെ ആധ്യാത്മിക നേതൃത്വം നൽകിയ പള്ളി: മാർ ജോസഫ് കൊല്ലംപറമ്പിൽ

കുറവിലങ്ങാട്: രാജ്യമാകെ ആധ്യാത്മിക നേതൃത്വം നൽകാൻ കഴിഞ്ഞ തീർഥാടന ദേവാലയമാണ് കുറവിലങ്ങാടെന്ന് ഷംഷാബാദ് അതിരൂപത സഹായമെത്രാൻ മാർ ജോസഫ് കൊല്ലംപറമ്പിൽ. കുറവിലങ്ങാട് ബൈബിൾ കൺവൻഷന്‍റെ നാലാം ദിനത്തിൽ വിശുദ്ധ കുർബാന അർപ്പിച്ച് സന്ദേശം നൽകുകയായിരുന്നു ബിഷപ്. പതിറ്റാണ്ടുകൾ രാജ്യമാകെ നേതൃത്വം നൽകിയ അർക്കദിയാക്കോന്മാരുടെ പിൻതലമുറയാണ് കുറവിലങ്ങാട്ടുള്ളത്. ക്രൈസ്തവരോളംതന്നെ പഴക്കമുള്ള നാടാണ് കുറവിലങ്ങാട്. നോമ്പും ഉപവാസവും വചനശ്രവണവും വഴി ദൈവത്തോട് കൂടുതൽ ചേർന്നുനിൽക്കാൻ കഴിയും. വചനശ്രവണം പരിശുദ്ധാത്മാഭിഷേകത്തിന്‍റെ വേളകളാണെന്നും മാർ ജോസഫ് കൊല്ലംപറമ്പിൽ പറഞ്ഞു. അസി. വികാരിമാരായ ഫാ. പോൾ കുന്നുംപുറത്ത്, ഫാ. തോമസ് താന്നിമലയിൽ എന്നിവർ വിശുദ്ധ കുർബാനയിൽ സഹകാർമികരായി. കൺവൻഷൻ ഇന്നു സമാപിക്കും പതിനായിരങ്ങളിലേക്ക് പുത്തൻ ആത്മീയത സമ്മാനിച്ച് കുറവിലങ്ങാട് ബൈബിൾ കൺവൻഷന് ഇന്ന് സമാപനം. സമാപനദിനമായ ഇന്ന് 3.45ന് ജപമാലപ്രദക്ഷിണം. തുടർന്ന് മുട്ടുചിറ പരിശുദ്ധ റൂഹാദ്ക്കുദിശ ഫൊറോന വികാരി ഫാ. ഏബ്രഹാം കൊല്ലിത്താനത്തുമലയിൽ വിശുദ്ധ കുർബാന അർപ്പിച്ച് സന്ദേശം നൽകും. ഫാ. സേവ്യർഖാൻ വട്ടായിൽ, ഫാ. ബിനോയി കരിമരുതുങ്കൽ എന്നിവർ വചനപ്രഘോഷണത്തിന് നേതൃത്വം നൽകും. തിരുനാളിന് ഇന്നു കൊടിയേറും നോമ്പിന്‍റെ ആദ്യദിനമായ ഇന്ന് രാവിലെ 7.30ന് ദൈവമാതാവിന്‍റെ ജനനത്തിരുനാളിന് കൊടിയേറും. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി തിരുനാൾ കൊടിയേറ്റും. തുടർന്ന് വിശുദ്ധ കുർബാന.

കാർഷിക ഗ്രാമോത്സവം സമാപിച്ചു

തലയോലപ്പറമ്പ്: സെന്‍റ് ജോർജ്പള്ളി ഫാമിലി യൂണിയന്‍റെ നേതൃത്വത്തിൽ സഹൃദയ വെൽഫെയർ സർവീസസ് എറണാകുളത്തിന്‍റെയും തലയോലപ്പറമ്പ് പൗരാവലിയുടെയും സഹകരണത്തോടെ സംഘടിപ്പിച്ച കാർഷിക ഗ്രാമോത്സവം സമാപിച്ചു. ഫാ. ജോസ് കൊളുത്തു വള്ളിലിന്‍റെ അധ്യക്ഷതയിൽ നടന്ന യോഗത്തിൽ ബിഷപ് മാർ തോമസ് ചക്യത്ത് മികച്ച കർഷകരെ ആദരിച്ചു.ക്ഷീരകർഷകരായ സോണി സോമൻ, വി.ആർ.അനൂപ്കുമാർ, ആൽവിൻ അരയത്തേൽ, ആഷ്‌ലി ജോൺ പത്തിൽ എന്നിവരെയടക്കം 34 കർഷകരെയാണ് ആദരിച്ചത്. ഹരിതകർമ സേനാംഗങ്ങളെ ഡോ.ജോസ്പുഞ്ചക്കോട്ടിൽ ആദരിച്ചു. സി.കെ.ആശ എംഎൽഎ മുഖ്യാതിഥിയായിരുന്നു. വൈകുന്നേരം സഹ വികാരി ഫാ. ആൽജോ കളപ്പുരയ്‌ക്കലിന്‍റെ അധ്യക്ഷതയിൽ നടന്ന സമാപന സമ്മേളനത്തിൽ കെ.ഫ്രാൻസിസ് ജോർജ് എംപി ആരോഗ്യപ്രവർത്തകരെ ആദരിച്ചു. വികാരി റവ.ഡോ. ബെന്നിജോൺ മാരാംപറമ്പിൽ, ഫാ.ജോസ് കൊളുത്തുവള്ളിൽ, ഫാ. ആൽജോ കളപ്പുരയ്ക്കൽ തുടങ്ങിയവർ നേതൃത്വം നൽകി.

പാലാ രൂപത യൂത്ത് അസംബ്ലിക്ക് പ്രൗഢോജ്വല തുടക്കം

പാലാ: രൂപതയുടെ എപ്പാര്‍ക്കിയല്‍ യൂത്ത് അസംബ്ലിക്ക് പ്രഡോജ്വല തുടക്കം. അല്‍ഫോന്‍സിയന്‍ പാസ്റ്ററല്‍ ഇന്‍സ്റ്റിറ്റ്യൂട്ടില്‍ നടത്തുന്ന യൂത്ത് അസംബ്ലിക്ക് എസ്എംവൈഎം രൂപത പ്രസിഡന്‍റ് അന്‍വിന്‍ സോണി ഓടച്ചുവട്ടില്‍ പതാക ഉയര്‍ത്തി. രാഷ്‌ട്രീയ ചിന്തയും പങ്കാളിത്തവും എന്ന വിഷയത്തില്‍ പാനല്‍ ചര്‍ച്ച നടന്നു. രാഷ്‌ട്രീയപ്രവര്‍ത്തകരായ ഡോ. ജിന്‍റോ ജോണ്‍, റോണി മാത്യു, ഷോണ്‍ ജോര്‍ജ് എന്നിവര്‍ മാധ്യമപ്രവര്‍ത്തകന്‍ ടോം കുര്യാക്കോസിനൊപ്പം ചര്‍ച്ചയില്‍ പങ്കെടുത്തു. ഇന്നു നടക്കുന്ന അസംബ്ലിയില്‍ വിവിധ സെഷനുകളിലായി മാര്‍ ജോസഫ് കല്ലറങ്ങാട്ട്, മുഖ്യ വികാരി ജനറാള്‍ മോണ്‍. ജോസഫ് തടത്തില്‍ എന്നിവര്‍ യുവജനങ്ങളുമായി സംവദിക്കും. രൂപതയിലെ വിവിധ ഡിപ്പാര്‍ട്ട്‌മെന്‍റ് ഡയറക്ടര്‍മാരും അസംബ്ലിയില്‍ പങ്കെടുക്കും. വികാരി ജനറാള്‍ മോണ്‍. സെബാസ്റ്റ്യന്‍ വേത്താനത്ത്, എസ് എംവൈഎം രൂപത ഡയറക്ടര്‍ ഫാ. മാണി കൊഴുപ്പന്‍കുറ്റി, പ്രസിഡന്‍റ് അന്‍വിന്‍ സോണി ഓടച്ചുവട്ടില്‍, ജനറല്‍ സെക്രട്ടറി റോബിന്‍ ടി. ജോസ് താന്നിമല, ബില്‍ന സിബി, ജോസഫ് വടക്കേല്‍ തുടങ്ങിയവര്‍ നേതൃത്വം നല്‍കുന്ന അസംബ്ലി നാളെ ഉച്ചയ്ക്ക് ഒന്നിന് അവസാനിക്കും.

വൈക്കം-വെച്ചൂർ റോഡ് ഗതാഗതയോഗ്യമാക്കണം

വൈക്കം: ഗതാഗതം ദുരിതപൂർണമായ വൈക്കം-വെച്ചൂർ റോഡ് സഞ്ചാരയോഗ്യമാക്കുന്നതിന് സർക്കാർ നടപടി സ്വീകരിക്കണമെന്ന് കേരള കോൺഗ്രസ് വെച്ചൂർ മണ്ഡലം കമ്മിറ്റി ആവശ്യപ്പെട്ടു. ദിനംപ്രതി നൂറു കണക്കിനുവാഹനങ്ങൾ കടന്നുപോകുന്ന റോഡിൽ വൻകുഴികൾ രൂപപ്പെട്ടതോടെ ഗതാഗതക്കുരുക്കും രൂക്ഷമായി. ഓണക്കാലവും വെച്ചൂർപള്ളി പെരുന്നാളും നടക്കുന്ന സമയമായതിനാൽ ഇതുവഴിയുള്ള ഗതാഗതത്തിരക്കേറിയതിനാൽ അപകടങ്ങളും പതിവാകുകയാണ്. പി.എൻ.ശിവൻകുട്ടിയുടെ അധ്യക്ഷത ചേർന്ന യോഗം കേരള കോൺഗ്രസ് വൈക്കം നിയോജക മണ്ഡലം പ്രസിഡന്‍റ് പോൾസൺ ജോസഫ് ഉദ്ഘാടനം ചെയ്തു. കോട്ടയം ജില്ലാ സെക്രട്ടറിയായി ചുമതലയേറ്റ പി.എൻ. ശിവൻകുട്ടി സ്ഥാനമൊഴിഞ്ഞതിനെത്തുടർന്ന് പുതിയ വെച്ചൂർ മണ്ഡലം പ്രസിഡന്‍റായി വർഗീസ് പുതുപ്പള്ളിയെ തെരഞ്ഞെടുത്തു. വെച്ചൂർ പഞ്ചായത്ത് വൈസ് പ്രസിഡന്‍റ് ബിൻസി ജോസഫ്, വർഗീസ് പുളപ്പള്ളി, ടോമി, ബെന്നി മിത്രംപള്ളി, ബിട്ടോ പേരയിൽ,സിറിയക് പൊന്നയ്ക്കനേഴത്ത്, ജോയി പേരയിൽ തുടങ്ങിയവർ പ്രസംഗിച്ചു.

ഓണാഘോഷം കളറാക്കി ഗിന്നസ് പക്രു

തലയോലപ്പറമ്പ്: തലയോലപ്പറമ്പ് സെന്‍റ് ജോർജ് സ്കൂളിലെ ഓണാഘോഷം കളറാക്കി ഗിന്നസ് പക്രു. കുട്ടികളുമായി ആടിയും പാടിയും ഫോട്ടോയെടുത്തും ഓണാഘോഷം അവിസ്മരണീയമാക്കി. സ്കൂൾ മാനേജർ റവ. ഡോ. ബെന്നിജോൺ മാരാംപറമ്പിൽ അധ്യക്ഷത വഹിച്ച യോഗത്തിൽ കൈക്കാരൻ തങ്കച്ചൻ കളമ്പുകാട്ട്, പിടിഎ പ്രസിഡന്‍റ് സാബു ജോസഫ്, പ്രിൻസിപ്പൽ ആഷാ ജോസഫ്, സ്റ്റാഫ്‌ സെക്രട്ടറി രമ്യ ജോർജ് എന്നിവർ പ്രസംഗിച്ചു.പിടിഎ യുടെ നേതൃത്വത്തിൽ ഓണസദ്യയും നടത്തി.

ലാറ്റക്‌സ് ഫാക്ടറിക്കെതിരേ സമരവുമായി നാട്ടുകാര്‍

മ ുട്ടുചിറ: കടുത്തുരുത്തി പഞ്ചായത്ത് എട്ടാം വാര്‍ഡില്‍ പ്രവര്‍ത്തിക്കുന്ന ലാറ്റക്‌സ് ഫാക്ടറിക്കെതിരേ സമരവുമായി നാട്ടുകാര്‍. ഫാക്ടറിയുടെ മലിനീകരണ പ്രവര്‍ത്തനങ്ങള്‍ അവസാനിപ്പിക്കണമെന്നും പ്രദേശവാസികളെ സ്വന്തം സ്ഥലത്ത് ജീവിക്കാന്‍ അനുവദിക്കണമെന്നും ആവശ്യപ്പെട്ടാണ് നാട്ടുകാര്‍ ഇന്നു രാവിലെ പഞ്ചായത്ത് ഓഫീസിലേക്ക് പദയാത്ര സംഘടിപ്പിക്കുന്നത്. രാവിലെ പത്തിന് മുട്ടുചിറയില്‍നിന്ന് ആരംഭിക്കുന്ന പദയാത്രയ്ക്കു ‘ശുദ്ധവായു, ശുദ്ധജലം, പരിസ്ഥിതി അവകാശ സംരക്ഷണ പദയാത്ര’ എന്നാണു പേരിട്ടിരിക്കുന്നത്. മുട്ടുചിറയില്‍നിന്ന് ആരംഭിക്കുന്ന പദയാത്ര അനീഷ് ലൂക്കോസ് ഉദ്ഘാടനം ചെയ്യും. ഫാക്ടറിയുടെ മലിനീകരണ പ്രവര്‍ത്തനങ്ങള്‍ക്കെതിരേ നാട്ടുകാര്‍ മുമ്പ് പലതവണ പരാതികള്‍ നല്‍കിയിരുന്നെങ്കിലും നടപടിയൊന്നുമുണ്ടായിരുന്നില്ലെന്നാണ് ആക്ഷേപം. നാട്ടുകാരുടെ നേതൃത്വത്തില്‍ പരിസിഥിതി സംരക്ഷണ സമിതി രൂപീകരിച്ചാണ് ഇപ്പോള്‍ ഫാക്ടറിയുടെ മലിനീകരണ പ്രവര്‍ത്തികള്‍ക്കെതിരേ രംഗത്തു വന്നിരിക്കുന്നത്. ഫാക്ടറിയില്‍നിന്നുള്ള മലിനജലവും ആസിഡ് കലര്‍ന്ന ജലവും തോട്ടിലേക്കും പുരിയിടങ്ങളിലേക്കും ഒഴുക്കുന്നു എന്നാണ് നാട്ടുകാരുടെ പരാതി. പുരയിടത്തില്‍ കെട്ടിനിൽക്കുന്ന മലിനജലം മൂലം സമീപപ്രദേശങ്ങളിലെ കിണറുകള്‍ ഉള്‍പ്പെടെയുള്ള ജലസ്രോതസുകള്‍ മലിനമാകുന്നതായും ഈ വെള്ളം ഉപയോഗിച്ച പ്രദേശവാസികളിൽ‍ പലരും രോഗികളായെന്നും ഇതുമൂലം പ്രദേശത്ത് താമസിക്കാന്‍ പറ്റാത്ത സാഹചര്യമാണുള്ളതെന്നും നാട്ടുകാര്‍ പറയുന്നു. കടുത്തുരുത്തി പഞ്ചായത്ത് പടിക്കല്‍ നടക്കുന്ന സമാപന സമ്മേളനത്തില്‍ വിവിധ പരിസ്ഥിതി പ്രവര്‍ത്തകരും ജനപ്രതിനിധികളും പങ്കെടുക്കും. ഇതേസമയം പഞ്ചായത്തിന് ഫാക്ടറിയുടെ പ്രവര്‍ത്തനം സംബന്ധിച്ചു മലിനീകരണ പ്രശ്‌നങ്ങള്‍ ഉണ്ടെന്ന് ബോധ്യപ്പെട്ടതായും പ്രവര്‍ത്തന ലൈസന്‍സ് പുതുക്കി നല്‍കിയിട്ടില്ലെന്നും ഫാക്ടറിക്ക് സ്റ്റോപ്പ് മെമ്മോ നല്‍കിയിട്ടുണ്ടെന്നും പഞ്ചായത്ത് പ്രസിഡന്‍റ് എന്‍.ബി. സ്മിത പറഞ്ഞു. ഫാക്ടറി ഉടമകള്‍ കേസും നിയമനടപടികളുമായി പോയിരിക്കുകയണെന്നും പഞ്ചായത്തിന് ഇക്കാര്യത്തില്‍ ഇനിയൊന്നും ചെയ്യാനില്ലെന്നുമാണ് പ്രസിഡന്‍റ് പറയുന്നത്.

വോട്ടിംഗ് യന്ത്രങ്ങള്‍ സൂക്ഷിക്കാൻ വെയർഹൗസ് നിർമാണം ഉ‌ടൻ: മുഖ്യ തെരഞ്ഞെടുപ്പ് ഓഫീസർ

കോട്ടയം: കോട്ടയത്ത് ഇലക്‌ട്രോണിക് വോട്ടിംഗ് യന്ത്രങ്ങള്‍ സൂക്ഷിക്കുന്നതിനുള്ള വെയര്‍ഹൗസിന്‍റെ നിര്‍മാണം സമയബന്ധിതമായി പൂര്‍ത്തീകരിക്കുമെന്ന് മുഖ്യ തെരഞ്ഞെടുപ്പ് ഓഫീസര്‍ ഡോ. രത്തന്‍ യു. ഖേല്‍ക്കര്‍. നിയമസഭാ തെരഞ്ഞെടുപ്പുമായി ബന്ധപ്പെട്ട വോട്ടര്‍പട്ടിക പരിഷ്‌കരണ പ്രവര്‍ത്തനങ്ങള്‍ വിലയിരുത്താന്‍ എത്തിയതായിരുന്നു അദ്ദേഹം. വെയര്‍ഹൗസ് നിര്‍മാണത്തിനായി മുട്ടമ്പലത്ത് കണ്ടെത്തിയിട്ടുള്ള റവന്യു വകുപ്പിന്‍റെ ഉടമസ്ഥതയിലുള്ള സ്ഥലവും അദ്ദേഹം‍ സന്ദര്‍ശിച്ചു. സംസ്ഥാനത്ത് തെരഞ്ഞെടുപ്പ് വിഭാഗത്തിന് സ്വന്തമായി വെയര്‍ഹൗസില്ലാത്ത ഏകജില്ലയാണു കോട്ടയം. നഗരസഭയുടെ ഉടമസ്ഥതയില്‍ തിരുവാതുക്കലിലുള്ള എപിജെ അബ്ദുല്‍ കലാം ഓഡിറ്റോറിയമാണ് നിലവില്‍ വോട്ടിംഗ് യന്ത്രങ്ങള്‍ സൂക്ഷിക്കാന്‍ ഉപയോഗിക്കുന്നത്. വോട്ടര്‍ പട്ടിക പരിഷ്‌കരണവുമായി ബന്ധപ്പെട്ട അപേക്ഷകളില്‍ തീര്‍പ്പുകല്‍പ്പിക്കുന്നതില്‍ ജില്ല ഗണ്യമായ പുരോഗതി കൈവരിച്ചതായി അദ്ദേഹം പറഞ്ഞു. പുതിയതായി പേരു ചേര്‍ക്കുന്നതിനും തിരുത്തലുകള്‍ വരുത്തുന്നതിനും സ്ഥലം മാറ്റുന്നതിനും ഉള്‍പ്പെടെയുള്ള ലഭിച്ചിട്ടുള്ള അപേക്ഷകളില്‍ 31നു മുന്‍പ് നടപടി സ്വീകരിക്കണമെന്നാണ് കേന്ദ്ര തെരഞ്ഞെടുപ്പ് കമ്മീഷന്‍റെ നിര്‍ദേശം. ഇതനുസരിച്ച് പ്രവര്‍ത്തനം ഊര്‍ജ്ജിതമാക്കണമെന്ന് ഡോ. രത്തന്‍ ഖേല്‍ക്കര്‍ തെരഞ്ഞെടുപ്പ് ഉദ്യോഗസ്ഥര്‍ക്ക് നിര്‍ദേശം നല്‍കി. യോഗത്തില്‍ ജില്ലാ കളക്ടര്‍ ചേതന്‍കുമാര്‍ മീണ, തെരഞ്ഞെടുപ്പ് ഡെപ്യൂട്ടി കളക്ടര്‍ ഷീബ മാത്യു, ഇലക്ടറല്‍ രജിസ്ട്രേഷന്‍ ഓഫീസര്‍മാരായ ഡെപ്യൂട്ടി കളക്ടര്‍മാര്‍ എന്നിവര്‍ പങ്കെടുത്തു.

അതിരമ്പുഴ, കുടമാളൂർ പള്ളികളിൽ എട്ടുനോമ്പാചരണം

അതിരമ്പുഴ: സെന്‍റ് മേരീസ് ഫൊറോനാ പള്ളിയിൽ എട്ടുനോമ്പാചരണം ഇന്ന് ആരംഭിക്കും. അഞ്ച്, ഏഴ് തീയതികളിൽ ഒഴികെ എല്ലാ ദിവസവും രാവിലെ ആറിനും ഏഴിനും വിശുദ്ധ കുർബാന. വൈകുന്നേരം 4.30ന് മധ്യസ്ഥ പ്രാർഥന, ലദീഞ്ഞ്, വിശുദ്ധ കുർബാന, വചന സന്ദേശം, ജപമാല പ്രദക്ഷിണം എന്നിവ നടക്കും. അഞ്ചിനു രാവിലെ ആറിന് വിശുദ്ധ കുർബാന, മധ്യസ്ഥ പ്രാർഥന, ഏഴിന് വിശുദ്ധ കുർബാന, 10ന് തിരുവചന പ്രഘോഷണം, ഉച്ചക്ക് 12ന് വിശുദ്ധ കുർബാന, മധ്യസ്ഥ പ്രാർഥന, വൈകുന്നേരം 4.30ന് മധ്യസ്ഥ പ്രാർഥന, ലദീഞ്ഞ്, വിശുദ്ധ കുർബാന, വചന സന്ദേശം, ജപമാല പ്രദക്ഷിണം. ഏഴിന് രാവിലെ 5.15ന് ചെറിയ പള്ളിയിലും ആറിനും 7.45നും വലിയ പള്ളിയിലും 9.45ന് ചെറിയപള്ളിയിലും വലിയപള്ളിയിലും വിശുദ്ധ കുർബാന. വൈകുന്നേരം 4.15ന് മധ്യസ്ഥ പ്രാർഥന, ലദീഞ്ഞ്, വിശുദ്ധ കുർബാന, വചനസന്ദേശം, ജപമാല പ്രദക്ഷിണം, 6.30ന് വിശുദ്ധ കുർബാന. ഇന്നു മുതൽ എട്ടുവരെ വൈകുന്നേരങ്ങളിലെ തിരുക്കർമങ്ങളിൽ ഫാ. ജോസഫ് ചാലച്ചിറ ഒസിഡി, ഫാ. സേവ്യർ ഇലവുംമൂട്ടിൽ, ഫാ. ഇമ്മാനുവൽ നെല്ലുവേലി, ഫാ. ജെറിൻ കാവനാട്ട്, ഫാ. ജോർജ് വള്ളിയാംതടത്തിൽ എംസിബിഎസ്, ഫാ. തോമസ് കുത്തുകല്ലുങ്കൽ, റവ.ഡോ. ജോർജ് മംഗലത്ത്, ഫാ. ജയിംസ് മാളേയ്ക്കൽ എന്നിവർ കാർമികത്വം വഹിക്കും. വികാരി ഫാ. മാത്യു പടിഞ്ഞാറേക്കുറ്റ്, അസിസ്റ്റന്‍റ് വികാരിമാരായ ഫാ. ഏബഹാം കാടാത്തുകുളം, ഫാ. ടോണി മണക്കുന്നേൽ, ഫാ. അലൻ മാലിത്തറ, ഫാ. അനീഷ് കാമിച്ചേരി എന്നിവർ നേതൃത്വം നൽകും. കുടമാളൂര്‍: കുടമാളൂര്‍ സെന്‍റ് മേരീസ് മേജര്‍ ആര്‍ക്കി എപ്പിസ്‌കോപ്പല്‍ തീര്‍ഥാടന ദേവാലയത്തില്‍ മാതാവിന്‍റെ ജനനത്തിരുനാളിനൊരുക്കമായി എട്ടുനോമ്പാചരണവും വ്യാകുലമാതാവിന്‍റെ തിരുനാളും ഇന്ന് ആരംഭിക്കും. ഇന്നുമുതല്‍ എട്ടുവരെ എല്ലാ ദിവസവും രാവിലെ ഏഴിനും 11നും വിശുദ്ധ കുര്‍ബാന, വൈകുന്നേരം ആറിന് ജപമാല, വിശുദ്ധ കുര്‍ബാന, വചന സന്ദേശം, എട്ടു നോമ്പിന്‍റെ പ്രാര്‍ഥനകള്‍, നേര്‍ച്ച വിതരണം. വ്യാകുലമാതാവിന്‍റെ തിരുനാള്‍ ആചരണത്തിന്‍റെ ഭാഗമായി ഇന്നു മുതല്‍ 30 വരെ എല്ലാ ദിവസങ്ങളിലും രാവിലെ 5:30ന്‍റെ വിശുദ്ധ കുര്‍ബാനയെത്തുടർന്ന് ലദീഞ്ഞ്. ആര്‍ച്ച്പ്രീസ്റ്റ് റവ. ഡോ. ജോര്‍ജ് മംഗലത്തില്‍, ഫാ. അലോഷ്യസ് വല്ലാത്തറ, ഫാ. ജസ്റ്റിന്‍ വരവുകാലായില്‍, ഫാ. സുനില്‍ ആന്‍റണി എന്നിവര്‍ തിരുക്കര്‍മങ്ങള്‍ക്ക് നേതൃത്വം നല്‍കും.

മെഡിക്കൽ കോളജ് ആശുപത്രികവാടം നിർമാണം അവസാന ഘട്ടത്തിൽ

ഗാന്ധിനഗർ: മെഡിക്കൽ കോളജ് ആശുപത്രി പ്രവേശന കവാടത്തിന്‍റെ നിർമാണം അവസാന ഘട്ടത്തിൽ . അത്യാഹിതം, ഒപി എന്നിവിടങ്ങളിലേക്കുള്ള റോഡിന്‍റെ പ്രവേശന ഭാഗത്താണ് പുതിയ കവാടം. കഴിഞ്ഞദിവ സം ഗവ. മെഡിക്കൽ കോളജ് കോട്ടയം എന്ന് കവാടത്തിൽ രേഖപ്പെടുത്തി. 99 ലക്ഷം രൂപ ചിലവഴിച്ചാണ് കവാടം നിർമിക്കുന്നത്. ഈ മാസം നിർമാണം പൂർത്തിയാകുമെന്നാണ് പ്രതീഷിക്കുന്നത്. കോഴിക്കോട് കേന്ദ്രീകരിച്ചുള്ള സ്വകാര്യ കൺസ്ട്രക് ഷൻ കമ്പനിയാണ് നിർമാണം നടത്തുന്നത്. സൗന്ദര്യവത്കരണത്തിന്‍റെ ഭാഗമായി പുല്ലുകൾ വച്ചുപിടിപ്പിക്കണം.

അൽഫോൻസാഭവൻ ഏറ്റെടുത്തിട്ട് 50 വർഷം : ജൂബിലി ആഘോഷങ്ങൾക്കു തുടക്കം

കോട്ടയം: കുടമാളൂരിലെ വിശുദ്ധ അല്‍ഫോന്‍സാമ്മയുടെ ജന്മഗൃഹം ഫ്രാന്‍സിസ്‌കന്‍ ക്ലാരസഭ ഏറ്റെടുത്ത് 50 വര്‍ഷങ്ങള്‍ പൂര്‍ത്തിയായതിന്‍റെ ജൂബിലി ആഘോഷങ്ങളുടെ ഭാഗമായി നടന്ന പൊതുസമ്മേളനം ആര്‍ച്ച്ബിഷപ് മാര്‍ ജോസഫ് പെരുന്തോട്ടം ഉദ്ഘാടനം ചെയ്തു. എഫ്‌സിസി സുപ്പീരിയര്‍ ജനറല്‍ സിസ്റ്റര്‍ ലിറ്റി എഫ്‌സിസി അധ്യക്ഷത വഹിച്ചു. കുടമാളൂര്‍ സെന്‍റ് മേരീസ് മേജര്‍ ആര്‍ക്കി എപ്പിസ്‌കോപ്പല്‍ തീര്‍ഥാടന കേന്ദ്രം ആര്‍ച്ച്പ്രീസ്റ്റ് ഫാ. ജോയി മംഗലത്തില്‍ അനുഗ്രഹപ്രഭാഷണം നടത്തി. മാന്നാനം ആശ്രമം പ്രിയോര്‍ റവ.ഡോ. കുര്യന്‍ ചാലങ്ങാടി സിഎംഐ, ആര്‍പ്പൂക്കര പഞ്ചായത്ത് പ്രസിഡന്‍റ് ദീപ ജോസ്, സെന്‍റ് മൈക്കിള്‍സ് വാര്‍ഡ് പ്രസിഡന്‍റ് റോയി സേവ്യര്‍, അല്‍ഫോന്‍സാ ഭവന്‍ സുപ്പീരിയര്‍ സിസ്റ്റര്‍ എലൈസ് മേരി എഫ്‌സിസി, ചങ്ങനാശേരി പ്രൊവിന്‍ഷ്യല്‍ സുപ്പീരിയര്‍ സിസ്റ്റര്‍ ബ്രിജി എഫ്‌സിസി എന്നിവര്‍ പ്രസംഗിച്ചു. ചങ്ങനാശേരി സെന്‍റ് ആന്‍സ് ഹൈസ്‌കൂള്‍ വിദ്യാര്‍ഥിനികളുടെ നൃത്തശില്പവും ഉണ്ടായിരുന്നു. സമ്മേളനത്തിനു മുന്നോടിയായി കൃതജ്ഞതാബലിയും ഉണ്ടായിരുന്നു.

മണർകാട് പെരുന്നാളിനു തുടക്കം

മണര്‍കാട്: സെന്‍റ് മേരീസ് യാക്കോബായ സുറിയാനി കത്തീഡ്രലില്‍ വിശുദ്ധ കന്യകമറിയത്തിന്‍റെ ജനനപ്പെരുന്നാളിന്‍റെ ഭാഗമായുള്ള എട്ടുനോമ്പാചരണത്തിനു തുടക്കമായി. കോട്ടയം ഭദ്രാസനാധിപന്‍ തോമസ് മാര്‍ തിമോത്തിയോസ് പ്രധാന കാര്‍മികത്വത്തില്‍ ഇന്നലെ വൈകുന്നേരം നടന്ന സന്ധ്യാപ്രാര്‍ഥനയോടെയാണ് നോമ്പ് ആചരണത്തിനു തുടക്കമായത്. സന്ധ്യാപ്രാര്‍ഥനയെത്തുടര്‍ന്ന് തോമസ് മാര്‍ തിമോത്തിയോസിന്‍റെയും വൈദികരുടെയും കത്തീഡ്രല്‍ ഭാരവാഹികളുടെയും മാനേജിംഗ് കമ്മിറ്റി അംഗങ്ങളുടെയും നേതൃത്വത്തില്‍ കല്‍ക്കുരിശില്‍ ചുറ്റിവിളക്ക് തെളിച്ചു. നേര്‍ച്ചക്കഞ്ഞി, വില്പന കാന്‍റീന്‍, മാനേജ്‌മെന്‍റ് കാന്‍റീന്‍ എന്നിവിടങ്ങളിലേക്ക് വൈദികര്‍ കല്‍ക്കുരിശില്‍നിന്ന് ദീപം പകര്‍ന്നു നല്‍കി. തുടര്‍ന്ന് പെരുന്നാളിനോടനുബന്ധിച്ച് ആരംഭിച്ച വിവിധ കൗണ്ടറുകളുടെ കൂദാശ വൈദികര്‍ നിര്‍വഹിച്ചു. വൈദ്യുത ദീപാലങ്കാരത്തിന്‍റെ സ്വിച്ച് ഓണ്‍ കര്‍മവും പോലീസ് കണ്‍ട്രോള്‍ റൂമിന്‍റെ ഉദ്ഘാടനവും കോട്ടയം ജില്ലാ പോലീസ് മേധാവി ഷാഹുല്‍ ഹമീദ് നിര്‍വഹിച്ചു. മണര്‍കാട് ദേശത്തിന് ഇനിയുള്ള എട്ടു ദിനരാത്രങ്ങള്‍ വ്രതശുദ്ധിയുടെ പുണ്യദിനങ്ങളാണ്. പള്ളിയില്‍ ഭജനയിരുന്നു നോമ്പുനോറ്റും ഉപവാസമെടുത്തും പള്ളിയില്‍ കഴിയാന്‍ നാനാജാതി മതസ്ഥരായ വിശ്വാസികള്‍ നാടിന്‍റെ വിവിധ ഭാഗങ്ങളില്‍ എത്തിത്തുടങ്ങി. ഇനിയുള്ള എട്ടുദിനങ്ങളിലും മാതാവിനോടുള്ള പ്രാര്‍ഥനകളും അപേക്ഷകളും ലുത്തിനിയകളും വേദവായനകളും മുഴങ്ങുന്ന ആത്മീയാനുഭൂതിയുടെ അന്തരീക്ഷമായിരിക്കും പള്ളിയിലും പരിസരങ്ങളിലും. പ്രാര്‍ഥനാപൂര്‍വം വന്നെത്തുന്നവര്‍ക്കായി ഒരുനാട് ഒന്നടങ്കം കാത്തിരിക്കുന്ന അപൂര്‍വകാഴ്ചയാണു മണര്‍കാട് എട്ടുനോമ്പ് പെരുന്നാളിനെ വ്യത്യസ്തമാക്കുന്നത്. കൊടിയേറ്റ് ഇന്ന് എട്ടുനോമ്പ് പെരുന്നാളിനോടനുബന്ധിച്ചുള്ള കൊടിയേറ്റ് ഇന്നു നടക്കും. ഉച്ചകഴിഞ്ഞ് രണ്ടിനു കൊടിമര ഘോഷയാത്രയ്ക്കായി പള്ളിയില്‍നിന്ന് പുറപ്പെടും. അരീപ്പറമ്പ് കരയില്‍ പാതയില്‍ പി.എ. കുരുവിളയുടെ ഭവനാങ്കണത്തില്‍നിന്നു വെട്ടിയെടുക്കുന്ന കൊടിമരം വാദ്യമേളങ്ങളുടെ അകമ്പടിയോടെ കത്തീഡ്രലില്‍ എത്തിക്കും. വൈകുന്നേരം 4.30ന് സുന്നഹദോസ് സെക്രട്ടറിയും കോട്ടയം ഭദ്രാസനാധിപനുമായ തോമസ് മാര്‍ തീമോത്തിയോസ് മെത്രാപ്പോലീത്തായുടെ നേതൃത്വത്തില്‍ പ്രാര്‍ഥനയ്ക്കുശേഷം കൊടിമരം ഉയര്‍ത്തും. തുടര്‍ന്ന് കരോട്ടെപള്ളിയിലെ കൊടിമരത്തിലും കൊടി ഉയര്‍ത്തും. ചടങ്ങുകൾ തത്സമയം കത്തീഡ്രലിന്‍റെ ഔദ്യോഗിക ഫേസ്ബുക്ക് പേജിലും (https: //facebook.com/manarcadpallyofficial/) യൂട്യൂബ് ചാനലിലും (https://www.youtube.com/c/manarcadstmarys) വെബ്സൈറ്റിലും (https://manarcadpally. com) പെരുന്നാളിന്‍റെ പ്രധാന ചടങ്ങുകള്‍ തത്സമയം സംപ്രേക്ഷണം ചെയ്യും. എട്ടുനോമ്പ് പെരുന്നാളിന്‍റെ പ്രധാന ചടങ്ങുകള്‍ എസിവി, ഗ്രീന്‍ ചാനല്‍ മണര്‍കാട് എന്നീ ടെലിവിഷന്‍ ചാനലുകളിലും ലഭ്യമാണ്. വഴിപാടുകള്‍ ഓണ്‍ലൈനായി നേര്‍ച്ച-വഴിപാടുകള്‍, പെരുന്നാള്‍ ഓഹരി എന്നിവയ്ക്ക് ഓണ്‍ലൈനിലൂടെ പണം അടയ്ക്കാം. വിശ്വാസികളുടെ പ്രാര്‍ഥനാ ആവശ്യങ്ങള്‍ കത്തീഡ്രലിന്‍റെ ഇ-മെയില്‍ വിലാസത്തിലോ (manarcad stmaryschurch @gmail.com). മണര്‍കാട് പള്ളിയില്‍ ഇന്ന് രാവിലെ ആറിന് വിശുദ്ധ കുര്‍ബാന (കരോട്ടെ പള്ളിയില്‍): തോമസ് മാര്‍ അലക്‌സന്ത്രയോസ്, 7.30ന് പ്രഭാത നമനസ്‌കാരം (താഴത്തെ പള്ളിയില്‍), 8.30ന് വിശുദ്ധ മൂന്നിന്‍മേല്‍ കുര്‍ബാന: ഡോ. തോമസ് മാര്‍ തീമോത്തിയോസ്, 11ന് പ്രസംഗം -തോമസ് മാര്‍ അലക്‌സന്ത്രയോസ് മെത്രാപ്പോലീത്ത, 12ന് ഉച്ചനമസ്‌കാരം, ഉച്ചകഴിഞ്ഞ് രണ്ടിന് കൊടിമരഘോഷയാത്രയ്ക്കായി പള്ളിയില്‍നിന്നും പുറപ്പെടുന്നു, 2.30ന് പ്രസംഗം: ഫാ. ജോണ്‍സ് കോട്ടയില്‍, വൈകുന്നേരം 4.30ന് കൊടിമരം ഉയര്‍ത്തല്‍: ഡോ. തോമസ് മാര്‍ തീമോത്തിയോസ്, അഞ്ചിന് സന്ധ്യാനമസ്‌കാരം, 6.30ന് ധ്യാന പ്രസംഗം: ഫാ. ജെ. മാത്യൂസ് മണവത്ത്‌

മെഡി. കോളജ് ആശുപത്രിയിലെ ഓണാഘോഷം : ശുചീകരണ തൊഴിലാളികളെ മാറ്റിനിർത്തിയെന്ന്

ഗാന്ധിനഗർ: മെഡിക്കൽ കോളജ് ആശുപത്രിയിൽ നടന്ന ജീവനക്കാരുടെ ഓണാഘോഷത്തിൽ നിന്നും കുടുംബശ്രീ ജീവനക്കാരെ മാറ്റി നിർത്തിയതായി ആക്ഷേപം. കഴിഞ്ഞദിവസമാണ് മെഡിക്കൽ കോളജ് ആശുപത്രിയിൽ ഓണാഘോഷം നടന്നത്. എന്നാൽ കുടുംബശ്രീയിൽപ്പെട്ട ആ‍യിരത്തിൽ അധികം ശുചീകരണ തൊഴിലാളികളെ ഓണാഘോഷ പരിപാടികളിൽ പങ്കെടുപ്പിച്ചില്ല. ആർപ്പൂക്കര, അതിരമ്പുഴ, നീണ്ടൂർ പഞ്ചായത്തുകളിൽനിന്നും കോട്ടയം നഗരസഭയുടെ കുമാരനല്ലൂർ ഡിവിഷനിൽനിന്നുമുള്ള കുടുംബശ്രീയിൽപ്പെട്ട സ്ത്രീ തൊഴിലാളികളും ഇതിനു പുറമേ പുരുഷ തൊഴിലാളികളുമാണ് ശുചീകരണ വിഭാഗത്തിലുള്ളത്. ആശുപത്രിയിലെ വാർഡും കോമ്പൗണ്ടും വൃത്തിയാക്കുന്നത് ഈ തൊഴിലാളികളാണ്. ഇവർ ഒരു ദിവസം പണിമുടക്കിയാൽ ആശുപത്രി വൃത്തിഹീനമാകും. ആശുപത്രി അധികൃതരും മറ്റു ജീവനക്കാരുടെ സംഘടനകളും മനസുവച്ചാൽ ശുചീകരണ തൊഴിലാളികളേയും ഓണാഘോഷ പരിപാടിയിൽ പങ്കെടുപ്പിക്കാമായിരുന്നു. അതേസമയം ആശുപത്രിയിൽ നടന്ന ഓണാഘോഷ പരിപാടികളിൽനിന്നു ഇവരെ മാറ്റി നിർത്തിയതിൽ വലിയ പ്രതിഷേധം ഉയർന്നിരിക്കുകയാണ്.

കാഞ്ഞിരമറ്റത്ത് കർഷകസംഗമം

കാഞ്ഞിരമറ്റം: എകെസിസി കാഞ്ഞിരമറ്റം യൂണിറ്റിന്‍റെ ആഭിമുഖ്യത്തിൽ ഇടവകയിലെ മുഴുവൻ കർഷകരെയും പങ്കെടുപ്പിച്ച് സംഗമം സംഘടിപ്പിച്ചു. കർഷകസംഗമത്തിന്‍റെ ഉദ്ഘാടനം എകെസിസി രൂപത ഡയറക്ടർ റവ. ജോർജ് വർഗീസ് ഞാറക്കുന്നേൽ നിർവഹിച്ചു. വികാരി ഫാ. ജോസഫ് മണ്ണനാൽ അധ്യക്ഷത വഹിച്ചു. ഫാ. ജോസഫ് മഠത്തിപ്പറമ്പിൽ, യൂണിറ്റ് പ്രസിഡന്‍റ് മാത്തുക്കുട്ടി ഞായർകുളം, അനിൽ സെബാസ്റ്റ്യൻ, ജയ്മോൻ പുത്തൻപുരയ്ക്കൽ എന്നിവർ പ്രസംഗിച്ചു. റിട്ടയേർഡ് കൃഷി അസിസ്റ്റന്‍റ് ഡയറക്ടർ ബിജുമോൻ സക്കറിയ, കൃഷി അസിസ്റ്റന്‍റ് രാജേഷ് കുമാർ, കാഞ്ഞിരമറ്റം അഗ്രോ പ്രൊഡ്യൂസർ കമ്പനി സിഇഒ ടോം ജേക്കബ്, ജൈവകൃഷി വിദഗ്ധൻ ജോയി ജോർജ് എന്നിവർ കർഷകർക്ക് ക്ലാസെടുത്തു. മികച്ച കർഷകരായ ജയിംസ് എം. ജേക്കബ്, കെ.എസ്. മാത്യു, റോബിൻ ഏബ്രഹാം, മാത്യു തോമസ് എന്നിവരെ ആദരിച്ചു. കർഷകർക്ക് വിവിധയിനം തൈകൾ, പച്ചക്കറിവിത്ത്, ജൈവ കീടനാശിനികൾ എന്നിവ വിതരണം ചെയ്തു.

ജയ്ഹിന്ദ് ലൈബ്രറി നവീകരിച്ച കെട്ടിടോദ്ഘാടനം

പിഴക്: കടനാട് പഞ്ചായത്തിലെ പിഴക് ജയ്ഹിന്ദ് ലൈബ്രറിയുടെ നവീകരിച്ച കെട്ടിടം ഉദ്ഘാടനം ചെയ്തു. ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ അനുവദിച്ച ഏഴു ലക്ഷം രൂപ വിനിയോഗിച്ചാണ് കെട്ടിടത്തിന്‍റെ നവീകരണ പ്രവര്‍ത്തനങ്ങള്‍ പൂര്‍ത്തീകരിച്ചത്. മീനച്ചില്‍ താലൂക്കിലെ ഏറ്റവും പഴക്കമേറിയ ലൈബ്രറികളില്‍ ഒന്നായ പിഴക് ജയ്ഹിന്ദ് ലൈബ്രറി 1952ലാണ് സ്ഥാപിച്ചത്. ‌ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ നവീകരിച്ച ലൈബ്രറിയുടെ ഉദ്ഘാടനം നിര്‍വഹിച്ചു. ലൈബ്രറി പ്രസിഡന്‍റ് ഷിലു കൊടൂര്‍ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ജിജി തമ്പി, മെംബര്‍മാരായ സെബാസ്റ്റ്യന്‍ കട്ടക്കല്‍, ബിജു പറത്താനം, ബെന്നി ഈരൂരിക്കല്‍, ലൈബ്രറി ഭാരവാഹികളായ ജിനു ജോസഫ്, വി.ഡി. ജോസഫ്, ജിജു ജോസഫ്, ആന്‍റണി ഞാവള്ളില്‍, സോജന്‍ നടുവത്തേട്ട്, ബേബി ചീങ്കല്ലേല്‍, രജനി രാജന്‍, റൂപിന്‍ കാവാലം തുടങ്ങിയവര്‍ പ്രസംഗിച്ചു.

പാലാ രൂപത യൂത്ത് അസംബ്ലിക്ക് പ്രൗഢോജ്വല തുടക്കം

പാലാ: രൂപതയുടെ എപ്പാര്‍ക്കിയല്‍ യൂത്ത് അസംബ്ലിക്ക് പ്രൗഢോജ്വലമായ തുടക്കം. അല്‍ഫോന്‍സിയന്‍ പാസ്റ്ററല്‍ ഇന്‍സ്റ്റിറ്റ്യൂട്ടില്‍ നടക്കുന്ന യൂത്ത് അസംബ്ലിക്ക് എസ്എംവൈഎം രൂപത പ്രസിഡന്‍റ് അന്‍വിന്‍ സോണി ഓടച്ചുവട്ടില്‍ പതാക ഉയര്‍ത്തി. രാഷ്‌ട്രീയചിന്തയും പങ്കാളിത്തവും എന്ന വിഷയത്തില്‍ പാനല്‍ചര്‍ച്ച നടന്നു. രാഷ്‌ട്രീയപ്രവര്‍ത്തകരായ ഡോ. ജിന്‍റോ ജോണ്‍, റോണി മാത്യു, ഷോണ്‍ ജോര്‍ജ് എന്നിവര്‍ മാധ്യമപ്രവര്‍ത്തകന്‍ ടോം കുര്യാക്കോസിനൊപ്പം ചര്‍ച്ചയില്‍ പങ്കെടുത്തു. ഇന്നു നടക്കുന്ന അസംബ്ലിയില്‍ വിവിധ സെഷനുകളിലായി മാര്‍ ജോസഫ് കല്ലറങ്ങാട്ട്, രൂപത മുഖ്യ വികാരി ജനറാള്‍ മോണ്‍. ജോസഫ് തടത്തില്‍ എന്നിവര്‍ യുവജനങ്ങളുമായി സംവദിക്കും. രൂപതയിലെ വിവിധ ഡിപ്പാര്‍ട്ട്‌മെന്‍റ് ഡയറക്ടര്‍മാരും അസംബ്ലിയില്‍ പങ്കെടുക്കും. രൂപത വികാരി ജനറാള്‍ മോണ്‍. സെബാസ്റ്റ്യന്‍ വേത്താനത്ത്, എസ്എംവൈഎം പാലാ രൂപത ഡയറക്ടര്‍ ഫാ. മാണി കൊഴുപ്പന്‍കുറ്റി, പ്രസിഡന്‍റ് അന്‍വിന്‍ സോണി ഓടച്ചുവട്ടില്‍, ജനറല്‍ സെക്രട്ടറി റോബിന്‍ ടി. ജോസ് താന്നിമല, ബില്‍ന സിബി, ജോസഫ് വടക്കേല്‍ തുടങ്ങിയവര്‍ നേതൃത്വം നല്‍കുന്ന അസംബ്ലി നാളെ ഉച്ചകഴിഞ്ഞ് ഒന്നോടെ അവസാനിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]