ADVERTISEMENT

ADVERTISEMENT

ടിഎസ്എസ്എസ് കോട്ടൂർ ട്രസ്റ്റ് വാർഷിക പൊതുയോഗം

കോട്ടൂർ: തലശേരി സോഷ്യൽ സർവീസ് സൊസൈറ്റിയുടെ (ടിഎസ്എസ്എസ്) ആഭിമുഖ്യത്തിലുള്ള കോട്ടൂർ ട്രസ്റ്റിന്‍റെ വാർഷിക പൊതുയോഗം ടിഎസ്എസ്എസ് അതിരൂപത പ്രസിഡന്‍റ് ജോഷി കുന്നത്ത് ഉദ്ഘാടനം ചെയ്തു. യൂണിറ്റ് ഡയറക്ടർ ഫാ. ജോബി എടത്തനാല്‍ സിഎസ്ടി അധ്യക്ഷത വഹിച്ചു.

യൂണിറ്റ് പ്രസിഡന്‍റ് ഡോ. ഷിജോ ജോസ് മഞ്ചപ്പിള്ളിൽ ആമുഖപ്രഭാഷണവും ടിഎസ്എസ്എസ് പ്രോഗ്രാം മാനേജർ ലിസി ജിജി മുഖ്യപ്രഭാഷണവും നടത്തി. യൂണിറ്റ് സെക്രട്ടറി ലിറ്റ്ന മനോജ് വാർഷിക റിപ്പോർട്ടും കണക്കും അവതരിപ്പിച്ചു. കോട്ടൂർ പാരിഷ് കോ-ഓർഡിനേറ്റർ സൈജോ വട്ടക്കാവുങ്കൽ, വർഗീസ് പുളിയൻപ്ലാവിൽ എന്നിവർ പ്രസംഗിച്ചു.

ADVERTISEMENT

ഒമ്പതാം ക്ലാസുകാരിയെ പീഡിപ്പിച്ച ഓട്ടോ ഡ്രൈവർ പിടിയിൽ

തളിപ്പറമ്പ്: ഒമ്പതാം ക്ലാസുകാരിയെ പീഡിപ്പിച്ച കേസിൽ ഓട്ടോറിക്ഷ ഡ്രൈവർ പിടിയിൽ. മാതമംഗലത്തെ ഓട്ടോ ഡ്രൈവറായ കാനായി സ്വദേശി അനീഷ് (40) ആണ് പോക്സോ കേസിൽ അറസ്റ്റിലായത്. ഇന്നലെ മാതമംഗലത്തുനിന്നാണ് ഇയാളെ പിടികൂടുന്നത്. ജൂൺ നാലിനായിരുന്നു കേസിനാസ്‌പദമായ സംഭവം. അനീഷ് പെൺകുട്ടിയുടെ അമ്മയുമായി സോഷ്യൽമീഡിയ വഴി നേരത്തെ പരിചയത്തിലായിരുന്നുവെന്ന് പറയുന്നു. ഒരു ദിവസം അനീഷും പെൺകുട്ടിയുടെ അമ്മയായ യുവതിയും മൂന്നു മക്കൾക്കൊപ്പം പറശിനിക്കടവിൽ എത്തിയതായിരുന്നു. പ്ലസ്ടു വിദ്യാർഥിനി, ഒമ്പതാം ക്ലാസ് വിദ്യാർഥിനി, ഇളയകുട്ടി എന്നിവർക്കൊപ്പം എത്തിയ യുവതി അനീഷിനൊപ്പം പറശിനിക്കടവിലെ ലോഡ്‌ജിൽ മുറിയെടുത്ത് താമസിച്ചു. പിറ്റേന്ന് പുലർച്ചെ രണ്ടോടെ ഒമ്പതാം ക്ലാസുകാരിയായ പതിനാലുകാരിയെ അനീഷ് പീഡിപ്പിക്കുകയായിരുന്നു. ഇതു മൂത്തകുട്ടി കാണുകയും അമ്മയോട് വിവരം പറയുകയും ചെയ്തു. എന്നാൽ കുട്ടിയുടെ ഭാവിയും കുടുംബത്തിന്‍റെ മാനക്കേടുമോർത്ത് അമ്മ വിവരം മൂടിവയ്ക്കുകയായിരുന്നു. ഒമ്പതാം ക്ലാസുകാരി പിന്നീട് സ്കൂളിലെ അധ്യാപികയോട് സംഭവം പറയുകയും കൗൺസിലിംഗിനു ശേഷം ചൈൽഡ്‌ലൈൻ അധികൃതരെ വിവരം അറിയിക്കുകയുമായിരുന്നു. ചൈൽഡ് ലൈൻ അധികൃതർ നല്കിയ പരാതിയിലാണ് മേൽപ്പറമ്പ് പോലീസ് കേസെടുത്തത്. എന്നാൽ സംഭവം തളിപ്പറമ്പ് പോലീസ് സ്റ്റേഷൻ പരിധിയിലായതിനാൽ കേസ് പിന്നീട് അങ്ങോട്ടേക്ക് മാറ്റുകയായിരുന്നു. ഡിവൈഎസ്പി കെ.ഇ. പ്രേമചന്ദ്രൻ, ഇൻസ്പെക്ടർ ബാബുമോൻ, എസ്ഐ ദിനേശൻ എന്നിവരുടെ നേതൃത്വത്തിലാണ് പ്രതിയെ പിടികൂടുന്നത്.

കൊടുവള്ളി മേൽപ്പാലം 12ന് മുഖ്യമന്ത്രി നാടിന് സമർപ്പിക്കും

കണ്ണൂർ: തലശേരിയെയും ധർമടത്തെയും ബന്ധിപ്പിക്കുന്ന കൊടുവള്ളിയിലെ കുരുക്കഴിച്ചുകൊണ്ട് റെയിൽവേ മേൽപ്പാലം നിർമാണം പൂർത്തിയായി. മേൽപ്പാലം 12 ന് രാവിലെ 11.30 ന് മുഖ്യമന്ത്രി പിണറായി വിജയൻ നാടിന് സമർപ്പിക്കും. നിയമസഭാ സ്പീക്കർ എ.എൻ. ഷംസീർ അധ്യക്ഷത വഹിക്കും. ധനമന്ത്രി കെ.എൻ. ബാലഗോപാൽ മുഖ്യാതിഥിയാകും. കണ്ണൂരിൽനിന്ന് തലശേരി ഭാഗത്തേക്ക് വർഷങ്ങളായുള്ള ഗതാഗതക്കുരുക്കിന് ഇതോടെ ശാശ്വത പരിഹാരമാകുകയാണ്. കിഫ്ബി സഹായത്തോടെ നിർമിക്കുന്ന സംസ്ഥാനത്തെ പത്ത് റെയിൽവേ മേൽപ്പാലങ്ങളിലൊന്നാണ് കൊടുവള്ളിയിലേത്. മേൽപ്പാലത്തിന്‍റെ നിർമാണം ആർബിഡിസികെ മുഖേനയാണ് സർക്കാർ നടപ്പിലാക്കുന്നത്. 314 മീറ്റർ നീളത്തിൽ രണ്ടുവരി പാതയും നടപ്പാതയും ഉൾപ്പെടെ 10.05 മീറ്റർ വീതിയിലാണ് മേൽപ്പാല ത്തിന്‍റെ നിർമാണം. 7.5 മീറ്ററാണ് കാര്യേജ് വേ. മേൽപ്പാലത്തിന് പുറമെ ഇതിന്‍റെ സമീപത്തുള്ള ഭൂവുടമകൾക്ക് പ്രവേശനം നല്കുന്നതിനായി ദേശീയപാതയുടെ വശത്ത് നാല് മീറ്റർ വീതിയിൽ ഡ്രെയിനേജോടുകൂടിയ 210 മീറ്റർ സർവീസ് റോഡും നിർമിച്ചിട്ടുണ്ട്. 27 ഭൂവുടമകളിൽ നിന്നായി 123.6 സെന്‍റ് സ്ഥലമാണ് മേൽപ്പാലം നിർമാണത്തിനായി ഏറ്റെടുത്തത്. പദ്ധതിയുടെ മൊത്തം ചെലവ് 36.37 കോടി രൂപയാണ്.

കാട്ടുപന്നി കുറുകെ ചാടി; ബൈക്ക് യാത്രക്കാരന് പരിക്ക്

പുത്തിഗെ(കാസര്‍ഗോഡ്): കാട്ടുപന്നി റോഡിന് കുറുകെ ചാടിയതിനെ തുടർന്ന് റോഡിൽ തെറിച്ചുവീണ് ബൈക്ക് യാത്രക്കാരന് പരിക്കേറ്റു. ബാഡൂരിലെ മല്ലേശ പൂജാരിക്കാണ് (48) പരിക്കേറ്റത്. ശനിയാഴ്ച രാത്രി വിട്‌ളയിലെ ഭാര്യയുടെ വീട്ടിലേക്ക് ബൈക്കില്‍ സഞ്ചരിക്കുന്നതിനിടെ അതിര്‍ത്തിപ്രദേശമായ കുട്ത്തമൊഗേറിലാണ് അപകടം. റോഡിലേക്ക് തെറിച്ചുവീണ മല്ലേശിന്‍റെ കാലിന് ഗുരുതരമായി പരിക്കേറ്റു. ആദ്യം വിട്‌ളയിലെ ആശുപത്രിയിലും പരിക്ക് ഗുരുതരമായതിനാല്‍ മംഗളൂരുവിലെ സ്വകാര്യാശുപത്രിയിലേക്കും മാറ്റി. കാലിന്‍റെ എല്ലിന് പൊട്ടല്‍ ഉള്ളതിനാല്‍ ശസ്ത്രക്രിയ നടത്തണമെന്ന് ഡോക്ടര്‍മാര്‍ നിര്‍ദേശിച്ചതായി ബന്ധുക്കള്‍ പറഞ്ഞു.

ഫാഷന്‍ ഗോള്‍ഡ് നിക്ഷേപ തട്ടിപ്പ്: കമറുദ്ദീനും തങ്ങള്‍ക്കും എതിരേ കേസ്

കാസര്‍ഗോഡ്: ഫാഷന്‍ ഗോള്‍ഡ് നിക്ഷേപ തട്ടിപ്പുമായി ബന്ധപ്പെട്ട് മുന്‍ എംഎല്‍എ എം.സി. കമറുദ്ദീന്‍, മാനേജിംഗ് ഡയറക്ടര്‍ ടി.കെ. പൂക്കോയ തങ്ങള്‍ എന്നിവര്‍ക്കെതിരെ കാസര്‍ഗോഡ് ടൗണ്‍ പോലീസ് കേസെടുത്തു. തളങ്കര പള്ളിക്കാല്‍ റോഡിലെ കുണ്ടുവളപ്പില്‍ ന്യൂമാന്‍ കുഞ്ഞഹമ്മദ് ഹാജിയുടെ പരാതിയിലാണ് കേസെടുത്തത്. 2017 മെയ് 19നാണ് കുഞ്ഞഹമ്മദ് ഹാജി കാസര്‍ഗോഡ് പുതിയ ബസ് സ്റ്റാന്‍ഡിന് സമീപം പ്രവര്‍ത്തിച്ചിരുന്ന ഫാഷന്‍ഗോള്‍ഡില്‍ 10 ലക്ഷം രൂപ നിക്ഷേപിച്ചത്. പ്രതിമാസം 10 ശതമാനം ലാഭവിഹിതം നല്‍കാമെന്ന് വിശ്വസിപ്പിച്ചാണ് പണം സ്വീകരിച്ചത്. എന്നാല്‍ ലാഭവിഹിതം കിട്ടിയില്ല. നിക്ഷേപിച്ച തുക തിരികെ ആവശ്യപ്പെട്ടപ്പോള്‍ ഇതും നല്‍കിയില്ലെന്നും കുഞ്ഞഹമ്മദ് ഹാജിയുടെ പരാതിയില്‍ പറയുന്നു. സംസ്ഥാനത്തെ വിവിധ ഭാഗങ്ങളിലായി ഫാഷന്‍ ഗോള്‍ഡ് തട്ടിപ്പ് പ്രതികള്‍ക്കെതിരെ 210 കേസുകളുണ്ട്. 700 ഓളം പേരില്‍ നിന്നാണ് നിക്ഷേപം സ്വീകരിച്ചത്. പോലീസിന് പുറമെ ക്രൈംബ്രാഞ്ചും ഈ കേസില്‍ അന്വേഷണം നടത്തിയിരുന്നു.

ഒരു കുട്ടിയുടെ കുറവിൽ രണ്ട് തസ്തികകൾ ഇല്ലാതാകുന്നു

ഇരിട്ടി: ആറളം ഫാം ഗവ. ഹയർ സെക്കൻഡറി സ്കൂളിൽ ഒരു കുട്ടിയുടെ കുറവിൽ രണ്ട് തസ്തികകൾ ഇല്ലാതാകുന്നു. കായികാധ്യാപക തസ്തിക ഉൾപ്പെടെ രണ്ടു തസ്തികയാണ് ഇല്ലാതായത്. ഒന്നു മുതൽ 10 വരെ ക്ലാസുകളിൽ പൂർണമായും ഹയർസെക്കൻഡറി വിഭാഗത്തിൽ 70 ശതമാനവും പട്ടികവർഗ വിദ്യാർഥികൾ‌ പഠിക്കുന്ന സ്കൂളാണിത്. കായികാധ്യാപകന്‍റെ തസ്തിക നഷ്ടപ്പെട്ടാൽ സ്കൂളിന്‍റെ പ്രവർത്തനത്തെ സാരമായി ബാധിക്കുമെന്ന ആശങ്കയാണ് രക്ഷിതാക്കൾ. കായിക പരിശീലനമുള്ളതുകൊണ്ടാണ് പകുതിയിലധികം വിദ്യാർഥികളും സ്കൂളിലെത്തുന്നത്. അതുകൊണ്ടു തന്നെ പ്രത്യേക പരിഗണന നൽകി ആറളം ഫാം ഗവ.ഹയർ സെക്കൻഡറി സ്കൂളിൽ കായികാധ്യാപക തസ്തിക നിലനിർത്തണമെന്നാണ് രക്ഷിതാക്കളുടെ ആവശ്യം. എട്ട്, ഒന്പത് ക്ലാസുകളിൽ അഞ്ച് ഡിവിഷനുകളാണ് കായിക അധ്യാപകർക്ക് വേണ്ടത്. ഇതിൽ ഒരു കുട്ടിയുടെ കുറവ് വന്നതോടെയാണ് ഡിവിഷൻ ഇല്ലാതാകുന്നത്. ഒന്നു മുതൽ 10 വരെ ക്ലാസുകളിൽ 503 പട്ടികവർഗ വിദ്യാർഥികളും ഹയർസെക്കൻഡറി വിഭാഗത്തിൽ 200 കുട്ടികളിൽ 70 ശതമാനവും പട്ടികവർഗ വിഭാഗത്തിൽപ്പെട്ടവരാണ്. എട്ട്, ഒന്പത് ക്ലാസുകളിൽ കായികപരിശീലനത്തിന് പാഠപുസ്തകം നിലവിലുണ്ട്. കായികാധ്യാപക തസ്തിക ഇല്ലാതാകുന്നതോടെ ഈ പാഠപുസ്തകം ആര് കൈകാര്യം ചെയ്യുമെന്ന കാര്യത്തിലും അവ്യക്തതയുണ്ട്. ഡിവിഷൻ നഷ്ടപ്പെട്ടതോടെ ഫിസിക്കൽ സയൻസ് അധ്യാപിക മറ്റൊരു സ്കൂളിലേക്ക് പോകുകയാണെങ്കിൽ സ്കൂളിന്‍റെ പ്രവർത്തനത്തെ കാര്യമായി ബാധിക്കും. ദേശീയതലത്തിൽ വരെ വിവിധ കായികയിനങ്ങളിൽ പങ്കെടുത്ത വിദ്യാർഥികൾ പഠിക്കുന്ന സ്കൂളാണിത്.

സി. സദാനന്ദൻ വധശ്രമക്കേസ് : പ്രതികൾക്ക് വീണ്ടും ജയിൽ

മട്ടന്നൂർ/തലശേരി/ കണ്ണൂർ: രാജ്യസഭാ എംപിയും ബിജെപി സംസ്ഥാന വൈസ് പ്രസിഡന്‍റുമായ സി. സദാനന്ദനെ കാലുകൾ വെട്ടിമാറ്റി കൊലപ്പെടുത്താൻ ശ്രമിച്ചെന്ന കേസിൽ 30 വർഷത്തിനു ശേഷം പ്രതികൾ വീണ്ടും ജയിലിലേക്ക്. നേരത്തെ തലശേരി കോടതി ഏഴു വർഷത്തെ കഠിന തടവിന് വിധിച്ച പ്രതികൾ ആറുമാസത്തെ ത‌ടവിനു ശേഷം ഹൈക്കോടതിയിലും സുപ്രീം കോടതിയിലും അപ്പീൽ നൽകിയതിനെ തുടർന്ന് ജാമ്യത്തിലിറങ്ങിയിരുന്നു. ഹൈക്കോടതി അപ്പീൽ തള്ളിയിതിനു പിന്നാലെ സുപ്രീം കോടതിയെ സമീപിച്ചെങ്കിലും അപ്പീൽ പരിഗണിക്കുകപോലും ചെയ്യാതെ തള്ളിയതോടെ പ്രതികൾ തലശേരി കോടതിയിൽ കീഴടങ്ങുകയും കോടതി കണ്ണൂർ സെൻട്രൽ ജയിലിലേക്ക് അയയ്ക്കുകയുമായിരുന്നു. പ്രതികൾ കോടതിയിൽ കീഴടങ്ങാൻ പോകുന്നതിന് മുന്പായി മട്ടന്നൂർ ഉരുവച്ചാലിൽ പാർട്ടി ഓഫീസിൽ കെ.കെ. ശൈലജ എംഎൽഎ ഉൾപ്പെടെയുള്ള നേതാക്കളുടെ നേതൃത്വത്തിൽ യാത്രയയപ്പും നൽകി. മുദ്രാവാക്യം വിളികളോടെയാണ് പ്രതികളെ നേതാക്കളും പ്രവർത്തകരും കോടതിയിലേക്ക് യാത്രയയച്ചത്. യാത്രയയപ്പ് പരിപാടിയുടെ റീൽസുകളും സമൂഹ മാധ്യമത്തിൽ പ്രചരിക്കുന്നുണ്ട്. സിപിഎം മട്ടന്നൂർ ഏരിയ കമ്മിറ്റി അംഗങ്ങളായ ഉരുവച്ചാൽ സ്വദേശി പി.സുരേഷ്ബാബു, പെരിഞ്ചേരിയിലെ പി.എം. രാജൻ, മുൻ ലോക്കൽ സെക്രട്ടറിയും റിട്ട. അധ്യാപകനുമായ പി. കുഞ്ഞിക്കൃഷ്‌ണൻ, റിട്ട.അധ്യാപകൻ സി.രവീന്ദ്രൻ, മുൻ ചുമട്ടു തൊഴിലാളി സി.രാമചന്ദ്രൻ, കഴിക്കലിലെ കെ. ബാലകൃഷ്ണൻ, എം. നാണു, കെ.ശ്രീധരൻ എന്നിവരാണ് ഇന്നലെ തലശേരി കോടതിയിൽ കീഴടങ്ങിയത്. 12 പേരാണ് പ്രതിപ്പട്ടികയിലുണ്ടായിരുന്നത്. ഇതിൽ നാലു പേരെ വെറുതെ വിട്ടിരുന്നു. 1994 ജനുവരി 25ന് രാത്രി വീട്ടിലേക്ക് പോകുന്നതിനിടെയാണ് സി. സദാനന്ദന്‍ ആക്രമിക്കപ്പെട്ടത്. 2007 ഫെബ്രുവരിയിലാണ് തലശേരി പ്രിന്‍സിപ്പല്‍ അസി. സെഷന്‍സ് കോടതി പ്രതികൾക്ക് ശിക്ഷ വിധിച്ചത്. ഇവര്‍ സദാനന്ദന് 25,000 രൂപ വീതം നല്‍കാനും വിചാരണക്കോടതി വിധിച്ചിരുന്നു. അസി. സെഷൻസ് കോടതി വിധി 2013 ജൂണ്‍ 10ന് തലശേരി സെഷന്‍സ് കോടതിയും ശരിവച്ചു. ഇതോടെ പ്രതികൾ ഹൈക്കോടതിയിൽ അപ്പീൽ നൽകിയപ്പോൾ സദാനന്ദൻ നൽകിയ ക്രിമിനൽ റിവിഷൻ അപ്പീൽ പരിഗണിച്ച കോടതി പിഴത്തുക 50,000 ആയി വര്‍ധിപ്പിച്ചാണ് പ്രതികളുടെ അപ്പീൽ തള്ളിയത്. തലശേരി കോടതിയിൽനിന്നും വൈകുന്നേരത്തോടെ കണ്ണൂർ സെൻട്രൽ ജയിലിലെത്തിച്ച പ്രതികളെ ജയിൽ വളപ്പിൽ സിപിഎം കണ്ണൂർ ജില്ലാ സെക്രട്ടറി കെ.കെ. രാഗേഷിന്‍റെ നേതൃത്വത്തിൽ പാർട്ടി പ്രവർത്തകർ മുദ്രാവാക്യം വിളികളോടെയായിരുന്നു സ്വീകരിച്ചത്. പോലീസ് വാഹനത്തിൽനിന്ന് ഇറങ്ങി പ്രവർത്തകരെ അഭിവാദ്യം ചെയ്താണ് പ്രതികൾ ജയിലിലേക്ക് കയറിയത്.

ഭാര്യയുടെ നിയമനം: പ്രചരിക്കുന്നത് വസ്തുതാവിരുദ്ധമായ കാര്യങ്ങളെന്ന് സ്പീക്കർ

കണ്ണൂര്‍: തന്‍റെ ഭാര്യയുടെ ഗസ്റ്റ് അധ്യാപിക നിയമനവുമായി ബന്ധപ്പെട്ട് വസ്തുതാവിരുദ്ധമായ കാര്യങ്ങളാണ് പ്രചരിപ്പിക്കുന്നതെന്ന് സ്പീക്കര്‍ എ.എൻ. ഷംസീർ. കണ്ണൂരിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം. കുറെക്കാലമായി തനിക്കെതിരെ വ്യക്തിപരമായ കാര്യങ്ങളാണ് ചില മാധ്യമങ്ങള്‍ കൊടുക്കുന്നത്. സ്പീക്കറെ കിട്ടിയെന്ന തരത്തില്‍ വാളെടുത്ത് വീശുമ്പോള്‍ എന്തെങ്കിലും തെറ്റായ കാര്യങ്ങള്‍ നടന്നിട്ടുണ്ടോയെന്ന് കൃത്യമായി പരിശോധിക്കാനും തയാറാകണം. നിലവാരം കുറഞ്ഞ വാര്‍ത്തകളാണ് മാധ്യമങ്ങള്‍ ഇക്കാര്യത്തില്‍ നല്‍കുന്നതെന്നും അദ്ദേഹം പറഞ്ഞു. ടി.പി. ചന്ദ്രശേഖരന്‍ വധക്കേസ് പ്രതികള്‍ മദ്യപിച്ച സംഭവം മാധ്യമങ്ങളിലൂടെയാണ് ശ്രദ്ധയില്‍പ്പെട്ടതെന്നും പിന്നാലെ നടപടി സ്വീകരിച്ചെന്നും ഷംസീര്‍ പറഞ്ഞു. ജയിലിന് പുറത്താണ് മദ്യപാനം നടന്നത്. ജയിലിനകത്ത് നടന്നതായി തന്‍റെ ശ്രദ്ധയില്‍പ്പെട്ടിട്ടില്ല. ഫോണും ജയിലിനുള്ളില്‍ ഉപയോഗിച്ചതായി കണ്ടെത്തിയിട്ടില്ല. സംഭവത്തില്‍ മൂന്ന് പോലീസ് ഉദ്യോഗസ്ഥരെ സസ്പെന്‍ഡ് ചെയ്തുവെന്നും ഷംസീർ പറഞ്ഞു. അടൂരിനെ പോലെ ഒരാളില്‍ നിന്നുണ്ടാകാന്‍ പാടില്ലാത്ത പ്രസ്താവനയാണുണ്ടായതെന്നും അദ്ദേഹം പറഞ്ഞു.

കേളകത്ത് ടാസ്ക് ഫോഴ്സ‌് രൂപീകരിച്ചു

കേളകം: ആറളം പുനരധിവാസ മേഖലയിലെ വന്യമൃഗശല്യം മുൻനിർത്തി മനുഷ്യാവകാശ പ്രവർത്തകനായ പോൾ മാത്യൂസ് ഹൈക്കോടതിയിൽ സമർപ്പിച്ച പൊതുതാത്പര്യ ഹർജിയുടെ ഭാഗമാകുന്നതിനായി കേളകം പഞ്ചായത്തിൽ ജനകീയ ടാസ്ക് ഫോഴ്സ് കമ്മിറ്റി രൂപവത്കരിച്ചു. ഹൈക്കോടതി മാനദണ്ഡപ്രകാരമുള്ള അഞ്ചംഗ കമ്മിറ്റിയാണു രൂപവത്കരിച്ചത്. ജനങ്ങളെ പങ്കെടുപ്പിച്ചുകൊണ്ടുതന്നെ വന്യമൃഗശല്യത്തിൽ പ്രതിവിധികൾ ഉണ്ടാകണമെന്നതും ഇതിനായി പ്രദേശവാസികളുടെ ടാസ്ക് ഫോഴ്സ് കമ്മിറ്റികൾ രൂപവത്കരിക്കണമെന്നതും കേരള ഹൈക്കോടതിയുടെ നിർദേശമായിരുന്നു.ആറളം വന്യജീവി സങ്കേതത്തിനു ചുറ്റും കാട്ടാന ഉൾപ്പെടെയുള്ള വന്യമൃഗങ്ങളുടെ അതിരൂക്ഷമായ ശല്യം മുൻനിർത്തിയാണു ഹൈക്കോടതി ഡിവിഷൻ ബെഞ്ച് എല്ലാ ബുധനാഴ്ചയും പൊതുതാത്പര്യ ഹർജിയിൽ വാദം കേൾക്കുന്നത്. ആറളം പുനരധിവാസ മേഖലയോടൊപ്പം നിലവിൽ വന്യമൃഗശല്യ പ്രശ്‌നങ്ങൾ നേരിടുന്ന മറ്റു സമീപ പ്രദേശങ്ങളുടെയും വിഷയങ്ങൾ ഹൈക്കോടതിയെ ധരിപ്പിക്കുമെന്ന് ഹർജിക്കാരനായ പോൾ മാത്യൂസ് പറഞ്ഞു. എം.ജെ. റോബിൻ, ടോമി ചാത്തൻപാറ, മാത്യു തൈവേലിക്കകത്ത്, പ്രവീൺ താഴത്തെ മുറി, ടോമി കാലായിൽ എന്നിവരാണു ടാസ്ക് ഫോഴ്‌സ് കമ്മിറ്റി അംഗങ്ങൾ.

കോട്ടത്ത് സ്വകാര്യബസും കാറും കൂട്ടിയിടിച്ചു; ബസ് കടയിലേക്ക് പാഞ്ഞുകയറി

കൂത്തുപറമ്പ്: പെരളശേരി കോട്ടത്ത് സ്വകാര്യ ബസും കാറും കൂട്ടിയിടിച്ചു. ഇടിയുടെ ആഘാതത്തിൽ നിയന്ത്രണംവിട്ട ബസ് എതിർവശത്തെ കടയിലേക്കും പാഞ്ഞുകയറി. അപകടത്തിൽ കാർ ഡ്രൈവർക്കു സാരമായി പരിക്കേറ്റു. ഇന്നലെ ഉച്ചകഴിഞ്ഞ് മൂന്നോടെ കോട്ടം ഈസ്റ്റ് എൽപി സ്കൂളിനു സമീപമായിരുന്നു അപകടം. കണ്ണൂർ ഭാഗത്തു നിന്ന് കൂത്തുപറമ്പ് ഭാഗത്തേക്കു വരുന്ന ബസും എതിർദിശയിൽ നിന്ന് വന്ന കാറും കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ ബസ് നിയന്ത്രണം വിട്ട് എതിർവശത്തെ സ്‌റ്റേഷനറി കടയിൽ പാഞ്ഞുകയറുകയും ചെയ്തു. സംഭവ സമയം കട ഉടമ ഭക്ഷണം കഴിക്കാൻ പോയതിനാൽ വലിയ അപകടമാണ് ഒഴിവായത്. അപകടത്തിൽ സാരമായി പരിക്കേറ്റ കാർ ഡ്രൈവറെ സ്വകാര്യ ആശുപത്രിയിൽ പ്രവേശിപ്പിച്ചു. അപകടത്തിൽ കാർ പൂർണമായും ബസിന്‍റെ മുൻഭാഗവും തകർന്നു. കടയ്ക്കും കേടുപാടുകൾ സംഭവിച്ചു.

ആരോഗ്യ ബോധവത്കരണ ക്ലാസ് സംഘടിപ്പിച്ചു

കേളകം: മഞ്ഞളാംപുറം യുപി സ്കൂളിൽ ആരോഗ്യ ബോധവത്കരണ ക്ലാസും കർക്കിടക മാസ മരുന്ന് കഞ്ഞി വിതരണവും നടത്തി. കർക്കിടകത്തിന്‍റെ പ്രാധാന്യവും പ്രസക്തിയും ഉൾപ്പെടുത്തി ഡോ. കെ.എസ്. രാജീവ് ക്ലാസ് നയിച്ചു. പിടിഎ പ്രസിഡന്‍റ് ബഷീർ അധ്യക്ഷത വഹിച്ചു. സ്കൂൾ മുഖ്യാധ്യാപിക എൻ.എസ്. സൂസമ്മ, സീനിയർ അസിസ്റ്റന്‍റ് ഷിജോ മാത്യു എന്നിവർ പ്രസംഗിച്ചു. തുടർന്ന് സ്കൂളിലെ എല്ലാ കുട്ടികൾക്കും കർക്കിടക മരുന്ന് കഞ്ഞി വിതരണവും നടത്തി.

വളയംകോട് -മാഞ്ചുവട്- പള്ളിപ്പാലം റോഡിലെ കലുങ്ക് അപകടാവസ്ഥയിൽ

ഇരിട്ടി: വളയം കോട് - മാഞ്ചുവട് -പള്ളിപ്പാലം പൊതുമരാമത്ത് റോഡിൽ പ്രളയത്തിൽ തകർന്ന മാഞ്ചുവട് പാലത്തിന് സമീപമുള്ള കലുങ്കിന്‍റെ കെട്ടിടിഞ്ഞ് അപകടാവസ്‌ഥയിൽ. റോഡിന്‍റെ അരികിൽ വിള്ളൽ വീണ് റോഡ് ഉൾപ്പെടെ ഏത് നിമിഷവും ഇടിഞ്ഞ് വീണ് ഗതാഗതം ഉൾപ്പെടെ തടസപ്പെട്ടേക്കാം. 2018 ലെ പ്രളയത്തിൽ മാഞ്ചുവട് പാലം തകർന്നതോടെ പ്രദേശം ഒറ്റപ്പെട്ട നിലയിലായിരുന്നു. എടപ്പുഴ-പള്ളിപ്പാലം ചുറ്റി വളഞ്ഞായിരുന്നു വലിയ വാഹനങ്ങൾ സഞ്ചരിച്ചിരുന്നത്. കലുങ്ക് തകർന്നതോടെ അതും നിലയ്ക്കുന്ന സാഹചര്യമാണ്. ഇതുവഴിയായിരുന്നു അഞ്ചോളം സ്കൂളുകളിലേക്കുള്ള ബസ് കടന്ന് പോയിരുന്നത്. കലുങ്ക് അപകടത്തിൽ ആയതോടെ സ്കൂൾ ബസുകൾ വരാതായതോടെ വിദ്യാർഥികൾ ബുദ്ധിമുട്ടിലായി. പഞ്ചായത്തും പൊതുമരാമത്തും യാതൊരു ഇടപെടലും നടത്തിയിട്ടില്ലെന്ന് മാഞ്ചുവട് വാർഡ് കോൺഗ്രസ് കമ്മിറ്റി ആരോപിച്ചു. ജനങ്ങളുടെ യാത്രാക്ലേശം പരിഹരിക്കാൻ പൊതുമരാമത്ത് അടിയന്തരമായി ഇടപെട്ടില്ലെങ്കിൽ സമരപരിപാടികളുമായി മുന്നോട്ട് പോകുമെന്നും പ്രസിഡന്‍റ് രാജു ആലുംപറമ്പിൽ, ബാബു കുന്നേത്തടം, വിൽസൺ പുളിക്കയിൽ, ആശ കാപ്പുങ്കൽ, ബിന്ദു സുകുമാരൻ, റെജി തടത്തിമാക്കൽ എന്നിവർ പറഞ്ഞു.

ലയണ്‍സ് ക്ലബ് ഇരിട്ടി റോയല്‍ ഉദ്ഘാടനം

ഇരിട്ടി: ഇരിട്ടി റോയല്‍ ലയൺസ് ക്ലബിന്‍റെ ഉദ്ഘാടനം ഡിസ്ട്രിക്ട് ഗവര്‍ണര്‍ രവി ഗുപ്ത നിർവഹിച്ചു. ഇരിട്ടി സിറ്റി ലയണ്‍സ് പ്രസിഡന്‍റ് എന്‍.കെ. ബിജു അധ്യക്ഷത വഹിച്ചു. വൈസ് ഡിസ്ട്രിക്ട് ഗവര്‍ണര്‍ പി.എസ്. സൂരജ് പുതിയ ഭാരവാഹികളുടെ സ്ഥാനാരോഹണം നടത്തി. നിര്‍ധരായ രണ്ടു വിദ്യാര്‍ഥികള്‍ക്ക് പിഎസ്‌സി കോച്ചിംഗ് കോഴ്‌സ് പൂര്‍ത്തിയാക്കുന്നത് വരെയുള്ള ധനസഹായത്തിന്‍റെ ആദ്യ ഗഡു റീജ ഗുപ്ത കൈമാറി. എ.കെ. ഹസന്‍, കാബിനറ്റ് സെക്രട്ടറി രാജേഷ് കുഞ്ഞപ്പന്‍, കാബിനറ്റ് ട്രഷറര്‍ പി.എം. ഷാനവാസ്, അംഗങ്ങളായ ദിലീപ് സുകുമാര്‍, എസ്. ബിജോയ്, ബിജിത്ത് കുളങ്ങരത്ത്, പ്രഫ.ഡോ. അനിത ദിലീപ്, ഡോ. മീതു മനോജ്, ഡോ. ജി. ശിവരാമകൃഷ്ണന്‍, എൻ.ജെ. ജോസഫ്, ജിമ്മി തോമസ്, പി.കെ. ആന്‍റണി, വി.എസ്. ജയന്‍ എന്നിവര്‍ പ്രസംഗിച്ചു. ഭാരവാഹികള്‍ : എ.കെ. ഹസൻന-പ്രസിഡന്‍റ്, ഡോ.ജി. ശിവരാമകൃഷ്ണന്‍, പി.കെ. ജോസ്-വൈസ് പ്രസിഡന്‍റുമാർ,വി.എസ്. ജയന്‍ -സെക്രട്ടറി, ജോയ് പടിയൂര്‍ -ജോ. സെക്രട്ടറി, പി.സി. അനില്‍കുമാര്‍ -ട്രഷറര്‍.

നഗരമധ്യത്തിലെ നായ പരിപാലന കേന്ദ്രം ജനങ്ങൾക്ക് ദുരിതമാകുന്നു

കണ്ണൂർ: നഗരമധ്യത്തിൽ പോലീസ് മൈതാനിക്കു മുൻവശം സൊസൈറ്റി ഫോർ ദി പ്രിവൻഷൻ ഓഫ് ക്രൂവൽറ്റി ടു ആനിമൽസ് (എസ്പിസിഎ) കെട്ടിട വളപ്പിലെ നായപരിപാലന കേന്ദ്രം ജനങ്ങൾക്കും ബസ് കാത്തുനിൽക്കുന്നവർക്കും ദുരിതമാകുന്നു. രോഗം ബാധിച്ചതും അല്ലാത്തതുമായ നിരവധി നായകളെയാണ് ഒരു മൃഗസ്നേഹ സംഘടന ഇവിടെ കൂട്ടിലാക്കി പരിചരിക്കുന്നത്. പരിക്കു പറ്റുന്ന തെരുവ് നായകളെ പരിചരിക്കാനായി താത്കാലിക കൂട് സ്ഥാപിക്കാൻ അനുമതി തേടിയെത്തിയ സംഘടനയ്ക്ക് എസ്പിസിഎ അനുമതി നൽകുകയായിരുന്നു. ഇതിനു പിന്നാലെ സംഘടന കൂടുകളുടെ എണ്ണം വർധിപ്പിച്ച് പരിപാലന കേന്ദ്രമാക്കി മാറ്റിയെന്നാണ് ആക്ഷേപം. പഴയങ്ങാടി, തളിപ്പറന്പ്, പയ്യന്നൂർ, കാസർഗോഡ് ഭാഗത്തേക്കുള്ള ബസ് കാത്തിരിപ് കേന്ദ്രം ഇതിന്‍റെ മുന്നിലാണ്. നായകളുടെ വിസർജ്യവും മറ്റും ശരിയായ രീതിയിൽ സംസ്കരിക്കാത്തതിനാൽ കടുത്ത ദുർഗന്ധമാണ്. നായകളുടെ വിസർജ്യവും ഭക്ഷണാവശിഷ്ടങ്ങളും റോഡിലേക്ക് തള്ളുന്നതായും ആരോപണമുണ്ട്. ബസ് കാത്തു നിൽക്കുന്നവർ കടുത്ത ദുർഗന്ധം സഹിച്ചാണ് ഇവിടെ നിൽക്കുന്നുത്. ശരിയായ രീതിയിൽ മാലിന്യ സംസ്കരണം നടത്തുന്നില്ലെന്ന് കാണിച്ച് മലിനീകരണ നിയന്ത്രണ ബോർഡ് സ്ഥലം ഉടമകളായ എസ്പിസിഎക്ക് നോട്ടീസ് നൽകിയിട്ടുണ്ട്. സ്ഥലം ഒഴിയണമെന്ന് ആവശ്യപ്പെട്ടിട്ടും നായപരിപാലന കേന്ദ്രം നടത്തിപ്പുകാർ തയാറാവുന്നില്ലെന്ന് എസ്പിസിഎ അധികൃതർ പറഞ്ഞു. നിയമ നടപടികളിലേക്ക് നീങ്ങാനാണ് എസ്പിസിഎയുടെ തീരുമാനം. ജനങ്ങളെ ബുദ്ധിമുട്ടിലാക്കുന്ന ഈ നായപരിപാലന കേന്ദ്രത്തിനെതിരെ പരാതികൾ ഉയർന്നിട്ടും കോർപറേഷനോ ബന്ധപ്പെട്ട വകുപ്പധികൃതരോ നടപടികൾ സ്വീകരിക്കുന്നില്ലെന്നും പരാതിയുണ്ട്. ഇതൊന്നും കാണാൻ ആളില്ലേ? മൃഗപരിപാലന കേന്ദ്രങ്ങൾ നടത്തുന്പോൾ പാലിക്കേണ്ട നിയമങ്ങളെല്ലാം ഇവിടെ കാറ്റിൽ പറത്തുകയാണ്. കടുത്ത ദുർഗന്ധത്തിനൊപ്പം ഭീതിയിലാണ് ഇവിടെ ബസ് കാത്തു നിൽക്കുന്നത്. രാവിലെ നായകളെ കൂട്ടിൽ നിന്ന് തുറന്നു വിടുന്നത് കാണാറുണ്ട്. ഏതെങ്കിലും സാഹചര്യത്തിൽ ഇവ പുറത്തേക്ക് വന്നാൽ കടി കൊള്ളുമെന്ന കാര്യത്തിൽ സംശയമില്ല. ഇത് ഇവിടെ നിന്ന് ഒഴിവാക്കാൻ ബന്ധപ്പെട്ടവർ നടപടി എടുത്തേ മതിയാകൂ. പരിപാലനമാകാം, ബുദ്ധിമുട്ടിക്കരുത് മൃഗങ്ങളെ പരിപാലിക്കുകയും സംരക്ഷിക്കുകയുമൊക്കെ വേണമെന്നും പക്ഷേ അത് പൊതുജനങ്ങൾക്ക് ദുരിതമാകുന്ന തരത്തിലാകരുതെന്നും വീ‌ട്ടമ്മയായ റീന പറഞ്ഞു. നഗരത്തിലെ ഏറ്റവും പ്രധാന സ്ഥലത്തു തന്നെയുള്ള നായപരിപാലന കേന്ദ്രത്തിൽ നിന്നുള്ള ദുർഗന്ധം കാരണം ഇതിലൂടെ നടന്നു പോകാനോ ബസ് കാത്തു നിൽക്കാനോ കഴിയുന്നില്ലെന്നും അവർ പറഞ്ഞു.

എസ്പിസി ദിനാചരണം സംഘടിപ്പിച്ചു

കുടിയാന്മല: മേരി ക്വീൻസ് ഹൈസ്കൂളിൽ സ്റ്റുഡന്‍റ് പോലീസ് കേഡറ്റിന്‍റെ (എസ്പിസി) പതിനഞ്ചാം ജന്മദിനത്തോടനുബന്ധിച്ച് എസ്പിസി ദിനാചരണം സംഘടിപ്പിച്ചു. സ്കൂൾ മാനേജർ ഫാ. പോൾ വള്ളോപ്പിളളി ഉദ്ഘാടനം ചെയ്തു. കുടിയാന്മല എസ്ഐ പ്രകാശൻ പടിയ്ക്കൽ അധ്യക്ഷത വഹിച്ചു. സ്കൂൾ മുഖ്യാധ്യാപകൻ സുനിൽ ജോസഫ്, ഡ്രിൽ ഇൻസ്ട്രക്‌ടർ പി. ഷഫീഖ് എന്നിവർ പ്രസംഗിച്ചു. അധ്യാപകരായ ഡെസ്റ്റി ദേവസ്യ, ഐറിൻ സോജൻ എന്നിവർ നേതൃത്വം നൽകി. വിദ്യാർഥികൾ വിവിധ കലാപരിപാടികളും അവതരിപ്പിച്ചു. ചെമ്പേരി: നിർമല ഹൈസ്കൂളിൽ വിവിധ പരിപാടികളോടെ സ്റ്റുഡന്‍റ് പോലീസ് കേഡറ്റ് (എസ്പിസി) ദിനം ആചരിച്ചു. സ്കൂൾ മുഖ്യാധ്യാപകൻ ജോഷി ജോൺ പതാക ഉയർത്തി. സീനിയർ കാഡറ്റ് ലീഡർ ജെറോൾ ജോസ് പരേഡിനു നേതൃത്വം നൽകി. എസ്പിസി ഗീതം, പ്രതിജ്ഞ, ഡിക്ലറേഷൻ പ്രസന്‍റേഷൻ എന്നിവയും നടന്നു. സീനിയർ കേഡറ്റ് ഷിലോൺ ഏഞ്ചൽ എസ്പിസി അനുഭവങ്ങൾ പങ്കുവച്ചു. തുടർന്ന് കേഡറ്റുകൾ കുടിയാന്മല പോലീസ് സ്റ്റേഷൻ സന്ദർശിച്ചു. എസ്എച്ച്ഒ എം.എൻ. ബിജോയ് കേഡറ്റുകളെ മധുരം നൽകി സ്വീകരിച്ചു. സ്റ്റേഷനിലെ മുഴുവൻ പോലീസ് ഓഫീസർമാർക്കും കേഡറ്റുകൾ ഉപഹാരങ്ങൾ സമ്മാനിച്ചു. സിപിഒമാരായ ബീന ഫിലിപ്പ്, വിനോദ് അഗസ്റ്റിൻ, ഡ്രിൽ ഇൻസ്ട്രക്‌ടർ ബൈജു എന്നിവർ നേതൃത്വം നൽകി. ചെറുപുഴ: പ്രാപ്പൊയിൽ ഗവ. ഹയർ സെക്കൻഡറി സ്കൂളിലെ എസ്പിസി കേഡറ്റ് പദ്ധതിയുടെ പതിനാറാം ജന്മദിനം ആഘോഷിച്ചു. ചെറുപുഴ പോലീസ് സ്റ്റേഷൻ ഹൗസ് ഓഫീസർ എം.പി. വിനീഷ്കുമാർ പതാക ഉയർത്തി. പിടിഎ പ്രസിഡന്‍റ് കെ.സി. ലക്ഷ്മണൻ അധ്യക്ഷത വഹിച്ചു. സിവിൽ പോലീസ് ഓഫീസർ കെ. അനിത, അജിത്ത്കുമാർ, കെ.വി. ലത എന്നിവർ പ്രസംഗിച്ചു. തുടർന്ന് കാഡറ്റുകൾ ചെറുപുഴ പോലീസ് സ്റ്റേഷൻ സന്ദർശിക്കുകയും ദൈനംദിന പ്രവർത്തനങ്ങൾ മനസിലാക്കുകയും ചെയ്തു.

പാളയാട് പാലം പ്രവൃത്തി പുനരാരംഭിച്ചു

തളിപ്പറമ്പ്: പ്രതിഷേധങ്ങൾക്കൊടുവിൽ പാളയാട് പാലത്തിന്‍റെ പ്രവൃത്തി പുനരാരംഭിച്ചു. പഴയ പാലം പൊളിച്ചിട്ടിട്ട് മാസങ്ങൾ കഴിഞ്ഞെങ്കിലും പ്രവൃത്തി ഇഴഞ്ഞു നീങ്ങുന്നത് കാരണം നാട്ടുകാരുടെ യാത്രാ ദുരിതം വർധിച്ചതാണ് പ്രധിഷേധങ്ങൾക്കിടയാക്കുന്നത്. തളിപ്പറമ്പിൽ നിന്ന് മാന്ധംകുണ്ടി ലേക്കുള്ള പ്രധാന റോഡിൽ പാളയാട് തോടിന് കുറുകെയുള്ള പാലം പൊളിച്ച് പ്രവൃത്തി തുടങ്ങിയിട്ട് മാസങ്ങളായി. ഇരുഭാഗത്തും തൂണുകൾക്ക് പകരമായി കോൺക്രീറ്റ് ഭിത്തി നിർമാണം പൂർത്തിയായിരുന്നു. ആദ്യം ഇതുവഴി കടന്നുപോകുന്ന കുടിവെള്ള പൈപ്പ് മാറ്റി സ്ഥാപിക്കാത്തത് കാരണം പ്രവൃത്തി തുടങ്ങാൻ തന്നെ വൈകിയിരുന്നു. ഒടുവിൽ നാട്ടുകാർ പ്രതിഷേധവുമായി രംഗത്തെത്തി. മാന്ധംകുണ്ട് റസിഡൻസ് അസോസിയേഷൻ ഇക്കാര്യം ആവശ്യപ്പെട്ട് നഗരസഭ ഓഫീസിലേക്ക് മാർച്ചും നടത്തുകയും ചെയ്തു. ഇതിനുശേഷമാണ് വാട്ടർ അഥോറിറ്റി അധികൃതർ പൈപ്പ് മാറ്റി സ്ഥാപിച്ചത്. എം.വി. ഗോവിന്ദൻ എംഎൽഎയുടെ ഫണ്ട് ഉപയോഗിച്ചാണ് പഴയ പാലം പൊളിച്ച് പുതിയത് പണിയാൻ തീരുമാനിച്ചത്. പിന്നീട് മഴയുടെ പേരിലും പ്രവൃത്തി നിലച്ച സ്ഥിതിയായിരുന്നു. തോട്ടിൽ ശക്തമായ ഒഴുക്കും കാരണമായി പറഞ്ഞു. കഴിഞ്ഞ ദിവസം മുതൽ കരാറുകാരൻ വീണ്ടും നിർമാണ സാമഗ്രികൾ ഇറക്കുകയും പ്രവൃത്തി പുനരാരംഭിക്കുകയും ചെയ്തിട്ടുണ്ട്.

ചക്ക ഫെസ്റ്റ് സംഘടിപ്പിച്ചു

പെരിങ്ങോം: പെരിങ്ങോം-വയക്കര പഞ്ചായത്ത് സിഡിഎസിന്‍റെ നേത്യത്വത്തിൽ ചക്ക ഫെസ്റ്റ് സംഘടിപ്പിച്ചു. പെരിങ്ങോം-വയക്കര പഞ്ചായത്ത് പ്രസിഡന്‍റ് വി.എം. ഉണ്ണികൃഷ്ണൻ ഉദ്ഘാടനം ചെയ്തു. സിഡിഎസ് ചെയർപേഴ്‌സൺ സി.വി. സ്മിത അധ്യക്ഷത വഹിച്ചു. വൈസ് പ്രസിഡന്‍റ് ബിന്ദു രാജൻ കുട്ടി, ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയർമാൻ ഫാത്തിമ ബീവി, പഞ്ചായത്തംഗം പുഷ്പമോഹൻ, കെ. രാധാമണി എന്നിവർ പ്രസംഗിച്ചു. ചക്ക കൊണ്ടുണ്ടാക്കിയ അന്പതിൽപ്പരം വിഭവങ്ങളും ഇലക്കറികളും ഫെസ്റ്റിലുണ്ടായിരുന്നു. വിദ്യാർഥികൾ, ജനപ്രതിനിധികൾ, വ്യാപാരികൾ, നാട്ടുകാർ തുടങ്ങി ധാരാളം പേർ പങ്കെടുത്തു.

അലക്സ് നഗർ-ഐച്ചേരി റോഡ് പൊട്ടിത്തകർന്നിട്ട് ഒന്പതു വർഷം

അലക്സ്‌നഗർ: അലക്സ്-നഗർ ഐച്ചേരി റോഡ് പൊട്ടിത്തകർന്ന് കാൽനടയാത്ര പോലും ദുസ്സഹമായി. കഴിഞ്ഞ ഒന്പത് വർഷമായി തങ്ങൾ അനുഭവിക്കുന്ന ദുരിതത്തിന് പരിഹാരം കാണാൻ ഇനിയാരെ സമീപിക്കണമെന്നറിയാതെ വലയുകയാണ് ഇവിടുത്തുകാർ. ഒന്പതു വർഷമായി തകർന്നു കിടക്കുന്ന റോഡ് നവീകരിക്കണമെന്ന് നിരവധി തവണ അപേക്ഷ നൽകിയിട്ടും പൊതുമരാമത്ത് വകുപ്പിന്‍റെ ഭാഗത്ത് നിന്നും നടപട‌ികളുണ്ടായില്ലെന്ന് ഇവിടുത്തുകാർ പറയുന്നു. പൊട്ടിത്തകർന്ന റോഡിൽ ക്വാറി വേസ്റ്റ് ഇട്ട് താത്കാലിക പരിഹാരം ഇടക്കിടെ നടത്തുകയാണ്. മഴ മാറിയിൽ വാഹനങ്ങൾ കടന്നു പോകുന്പോൾ പ്രദേശം പൊടിയിൽ മുങ്ങുന്നതും പതിവാണ്. വർഷങ്ങളായി അറ്റുകുറ്റപ്പണിപോലും നടത്താതെ തകർന്നുകിടക്കുന്ന അലക്സ്‌നഗർ-ഐച്ചേരി റോഡിലൂടെ മാപ്പിനി മുതൽ പാലം വരെയുള്ള ഭാഗമാണ് ഏറ്റവും ശോചനീയമായ അവസ്ഥയിലുള്ളത്. ഒന്നര വർഷം മുമ്പ് തുറന്നുകൊടുത്ത അലക്സ് നഗർ പാലം നിർമാണത്തിന്‍റെ ഉദ്ഘാടനവേളയിൽ റോഡ് നവീകരണം ഉടൻ നടത്തുമെന്ന് മന്ത്രി പി.എ. മുഹമ്മദ് റിയാസ് പ്രഖ്യാപിച്ചിരുന്നുവെങ്കിലും ഒന്നുമായിട്ടില്ല. ആദ്യം 5.50 മീറ്റർ വീതിയിൽ റോഡ് നവീകരിക്കാനായിരുന്നു പദ്ധതി. എന്നാൽ കരാറുകാരന്‍റെ അനാസ്ഥമൂലം പ്രവൃത്തി നീണ്ടു പോകുകയാണ്. ഇതിനിടെ സജീവ് ജോസഫ് എംഎൽഎ ഇടപെടലിനെ തുടർന്ന് ഫണ്ട് പാസായതായി പറയുന്നുണ്ടെങ്കിലും സ്ഥിരീകരണമില്ലെന്നും നാട്ടുകാർ പറഞ്ഞു. ക്വാറി വേസ്റ്റല്ല, റോഡാണ് വേണ്ടത് ബസ് ഓടിയിരുന്ന റോഡാണ് തകർന്നു കിടക്കുന്നത്. മഴ കഴിഞ്ഞാലുടൻ റോഡ് നവീകരണത്തിനുള്ള നടപടികൾ ഉണ്ടാക്കാൻ ബന്ധപ്പെട്ടവർ തയാറാകണം. ഇടയ്ക്കിടെ തകർന്ന റോഡിൽ ക്വാറി വേസ്റ്റ് ഇറക്കിയുള്ള താത്കാലിക പരിഹാരമല്ല വേണ്ടത്. കൃത്യമായ രീതിയിലുള്ള റോഡ് നവീകരണം നടത്തി യാത്രാ ക്ലേശം പരിഹരിക്കണം.

പെരുന്പടവിൽ ഗതാഗതക്കുരുക്ക് രൂക്ഷം

പെരുമ്പടവ്: പെരുന്പടവ് ‌ ടൗണിലെ അനധികൃത പാർക്കിംഗും നിയമം കാറ്റിൽ പറത്തിയുള്ള ടിപ്പറുകളുടെ സർവീസും അപകട ഭീഷണിക്കൊപ്പം ഗതാഗതകുരുക്കിനും ഇടയാക്കുന്നു. ടൗണിലെത്തുന്ന പലരും മറ്റു വാഹനങ്ങൾക്ക് കടന്നു പോകാനുള്ള സൗകര്യമുണ്ടെന്ന കാര്യം പരിഗണിക്കാതെ തോന്നിയതു പോലെയാണ് വാഹനങ്ങൾ നിർത്തിയിടുന്നത്. കൂടാതെ സ്കൂൾ പ്രവർത്തനം ആരംഭിക്കുന്ന സമയത്തും വിടുന്ന സമയത്തും ‌ടിപ്പറുകൾ സർവീസ് നടത്തരുതെന്ന നിയമവും പാലിക്കുന്നില്ല. വീതി കുറഞ്ഞ റോഡിന്‍റെ ഇരുവശങ്ങളിൽ പോലും അലക്ഷ്യമായുള്ള പാർക്കിംഗ് പതിവാണ്. ഇതു കാരണം റോഡിലുടെ വാഹനങ്ങൾക്ക് സുഗമമായി കടന്നു പോകുവാനോ എതിരേ വരുന്ന വാഹനത്തിന് കടന്നു പോകാനോ കഴിയാത്ത അവസ്ഥയുണ്ട്. ‌എട്ടു മീറ്ററിൽ താഴെ മാത്രം വീതിയുള്ള റോഡരികിലെ ഓവുചാലുകൾ സ്ലാബിട്ട് മൂടിയിട്ടുമില്ല. ടൗണിനോട് ചേർന്ന് ബസ് സ്റ്റാൻഡ് ഉണ്ടെങ്കിലും ബസുകൾ പലതും ടൗണിലാണ് നിർത്തിയിടുന്നത്. ഇതുകാരണം മഴയത്ത് ബസ്കയറാൻ വിദ്യാർഥികൾ ഉൾപ്പടെയുള്ളവർ കടവരാന്തയിൽ കാത്തു നിൽക്കേണ്ടിയും വരുന്നുണ്ട്. റോഡിനോട് ചേർന്നുള്ള സ്കൂളുകളിൽ കെ.ജി സ്കൂൾ മുതൽ ഹയർ സെക്കൻഡറി വരെയുള്ള സ്കൂളുകളിലായി ആയിരത്തിലധികം കുട്ടികളുണ്ട്. രാവിലെയും വൈകുന്നേരവും സ്കൂൾ കുട്ടികൾ വാഹനങ്ങൾക്കിടയിലൂടെയാണ് നടന്നു പോകുന്നത് വലിയ അപകട ഭീഷണിയാണ് ഉയർത്തുന്നത്. സെന്‍റ് ജോസഫ് പള്ളി, വിവിധ ബാങ്കുകൾ ആശുപത്രികൾ, വ്യാപാര സ്ഥാപനങ്ങൾ എന്നിവയും റോഡിന്‍റെ വശങ്ങളിലായുണ്ട്. നേരത്തെ ടൗണിൽ ഹോം ഗാർഡിനെ ഡ്യൂട്ടിക്ക് നിയോഗിച്ചിരുന്നപ്പോൾ അനധികൃത പാർക്കിംഗ് തടയാൻ കഴിഞ്ഞിരുന്നു. പിന്നീട് ഡ്യൂട്ടിക്ക് ആരെയും നിയോഗിക്കാഞ്ഞതോടെ തോന്നിയ പോലെയുള്ള പാർക്കിംഗും തിരിച്ചെത്തുകയായിരുന്നു. പോലീസടക്കമുള്ളവരുടെ മുന്നിൽ ഇക്കാര്യങ്ങൾ ശ്രദ്ധയിൽ പെടുത്തിയിട്ടും നടപടി ഉണ്ടാകുന്നില്ലെന്നും ആക്ഷേപമുണ്ട്. റോഡിന് ഇരുവശങ്ങളിലെയും ഓടകൾ സ്ലാബിട്ട് മൂടി നടപ്പാതയാക്കണമെന്ന് ഗ്രാമസഭയിൽ ഉന്നയിച്ചിട്ടും നടപടി ഉണ്ടായില്ലെന്ന് നാട്ടുകാർ പറഞ്ഞു.

സ്കൂട്ടറും ലോറിയും കൂട്ടിയിടിച്ച് യുവാവ് മരിച്ചു

പേരാവൂർ: പേരാവൂർ തെരുവിൽ ടിപ്പറും സ്‌കൂട്ടറും കൂട്ടിയിടിച്ച് സ്കൂട്ടർ യാത്രികനായ യുവാവ് മരിച്ചു. ആര്യപ്പറമ്പ് സ്വദേശി പുത്തൻവീട്ടിൽ മിഥുൻരാജാണ് (34) മരിച്ചത്. ഇന്നലെ രാവിലെ ഏഴരയോടെ ജോലിക്കായി പേരാവൂർ ഭാഗത്തേക്ക് പോകുന്നതിനിടെയാണ് അപകടം നടന്നത്. കൂടെയുണ്ടായിരുന്ന സഹയാത്രികയ്ക്ക് പരിക്കേറ്റു. ഇലക്‌ട്രീഷനായിരുന്നു മിഥുൻരാജ്. രാജൻ- പ്രേമ ദന്പതികളുടെ മകനാണ് മിഥുൻരാജ്. സഹോദരൻ: രാഹുൽ.

വ്യാപാരി കുടുംബസംഗമവും അനുമോദനവും

പയ്യാവൂർ: വ്യാപാരി വ്യവസായി സമിതി പയ്യാവൂർ യൂണിറ്റ് കുടുംബ സംഗമവും ഉന്നത വിജയികൾക്കുള്ള അനുമോദനവും പയ്യാവൂർ വൈഎംസിഎ ഹാളിൽ നടന്നു. സമിതി സംസ്ഥാന കമ്മിറ്റിയംഗം ചാക്കോ മുല്ലപ്പള്ളി ഉദ്ഘാടനം ചെയ്തു. യൂണിറ്റ് പ്രസിഡന്‍റ് വി. സോമരാജൻ അധ്യക്ഷത വഹിച്ചു. സാമൂഹിക പ്രവർത്തകൻ മിനേഷ് മണക്കാട് മുഖ്യപ്രഭാഷണം നടത്തി. ചടങ്ങിൽ എസ്എസ്എൽസി, പ്ലസ് ടു, സ്പോർട്സ് എന്നിവയിൽ ഉന്നത വിജയം കരസ്ഥമാക്കിയവരെയും യുഎസ്എസ് നേടിയവരെയും ഫലകവും കാഷ് അവാർഡും നൽകി അനുമോദിച്ചു. യൂണിറ്റ് സെക്രട്ടറി ഐബീഷ് പി. ബേബി, ജില്ലാ കമ്മിറ്റിയംഗം അജയൻ, കെ. തോമസ്, അജോ ജോസഫ് എന്നിവർ പ്രസംഗിച്ചു. അരവിന്ദാക്ഷൻ കൊതേരി ലഹരിക്കെതിരെയുള്ള ഏകാംഗ നാടകം "മൂക്കുത്തി' അവതരിപ്പിച്ചു.

ലോട്ടറി സ്റ്റാൾ അജ്ഞാതർ താഴിട്ട് പൂട്ടി

തളിപ്പറമ്പ്: രാത്രി ലോട്ടറി സ്റ്റാൾ അടച്ച് ഉടമ പോയതിന് പിന്നാലെ അജ്ഞാതർ സ്റ്റാൾ മറ്റൊരു താഴിട്ട് പൂട്ടി. ധർശാല എൻജിനിയറിംഗ് കോളേജിന് സമീപം ലോട്ടറി വില്പന നടത്തുന്ന ബക്കളം മൈലാട് സ്വദേശി ഷീമയുടെ ലോട്ടറി സ്റ്റാളാണ് പൂട്ടിയത്. ശനിയാഴ്ച രാത്രി സ്റ്റാൾ പൂട്ടിയതിന് ശേഷം ഇന്നലെ രാവിലെ തുറക്കാനെത്തിയപ്പോഴാണ് മറ്റൊരു പൂട്ട് കണ്ടത്. വിവിരമറിഞ്ഞെത്തിയ സിഐടിയു ലോട്ടറി തൊഴിലാളി അസോസിയേഷൻ നേതാക്കളും ചേർന്ന് പൂട്ട് മുറിച്ചു മാറ്റിയാണ് സ്റ്റാൾ തുറന്നത്. ലോട്ടറി വിറ്റ് ഉപജീവനം നടത്തുന്ന സ്ത്രീകൾ ഉൾപ്പടെയുള്ളവരെ ദ്രോഹിക്കുന്ന സമൂഹ്യവിരുദ്ധർക്കെതിരെ ശക്തമായ നടപടി സ്വീകരിക്കണമെന്ന് സിഐടിയു ആവശ്യപ്പെട്ടു. നേരത്തെ ബക്കളത്ത് നടത്തിയിരുന്ന ലോട്ടറി സ്റ്റാൾ ഷീമ ധർമശാലയിലേക്ക് മാറ്റിയതായിരുന്നു. ഷീമയുടെ പരാതിയൽ തളിപ്പറന്പ് പോലീസ് കേസെടുത്തു.

കാറും സ്കൂട്ടറും കൂട്ടിയിടിച്ച് യുവാവിന് പരിക്ക്

നടുവിൽ: കാറും സ്കൂട്ടറും കൂട്ടിയിടിച്ച് യുവാവിന് പരിക്ക്. സ്കൂട്ടർ യാത്രക്കാരനും നടുവിൽ സ്വദേശിയുമായ അബ്ദുള്ളക്കുട്ടിക്കാണ് (25) പരിക്കേറ്റത്. പടിഞ്ഞാറെ കവലയിൽ ശനിയാഴ്ച രാത്രിയാണ് അപകടം. ഇൻഡിക്കേറ്ററിട്ട് റോഡിന്‍റെ മറുഭാഗത്തേക്ക് വരികയായിരുന്ന കാറിൽ സ്കൂട്ടി വന്നിടിക്കുകയായിരുന്നു. പടപ്പേങ്ങാട് സ്വദേശിയുടേതാണ് കാറ്. അബ്ദുള്ളക്കുട്ടിക്ക് കാലുകളിലാണ് പരിക്കേറ്റത്. തളിപ്പറമ്പിലെ ആശുപത്രിയിൽ പ്രവേശിപ്പിച്ചു.

ഛത്തീസ്ഗഡ് സംഭവത്തിൽ പ്രതിഷേധിച്ചു

ശ്രീകണ്ഠപുരം: ഛത്തീസ്ഗഡിൽ കന്യാസ്ത്രീകളുടെ മേൽ ചുമത്തിയ മുഴവൻ കള്ളക്കേസുകളും പിൻവലിക്കുക, ക്രൈസ്തവ പീഡനം അവസാനിപ്പിക്കുക, ഭരണഘടന നൽകുന്ന അവകാശങ്ങൾ സംരക്ഷിക്കുക തുടങ്ങിയ ആവശ്യങ്ങളുന്നയിച്ച ശ്രീകണ്ഠപുരം ഉണ്ണിമിശിഹാ പള്ളി ഇടവക കൂട്ടായ്മ പ്രതിഷേധിച്ചു. ചെമ്പന്തൊട്ടി ഫൊറോന വികാരി ഫാ. ആന്‍റണി മഞ്ഞളാകുന്നേൽ ഉദ്ഘാടനം ചെയ്തു. ഇടവക വികാരി ഫാ. ജോസഫ് മഞ്ചപ്പള്ളി അധ്യക്ഷത വഹിച്ചു. ഉണ്ണിമിശിഹാ പള്ളിയിൽ നിന്നും ആരംഭിച്ച പ്രതിഷേധ ജാഥയിലും പൊതുസമ്മേളനത്തിലും നിരവധിപേർ പങ്കെടുത്തു. ഫാ. മാർട്ടിൻ പാഴുപറമ്പിൽ, ഡോ. മനുജോസഫ് വാഴപ്പിള്ളി, രാജു ചൂരപ്പാടി, റെജി കാര്യാങ്കൽ, ആന്‍റോ ജോസഫ്, ബേബി തൈക്കാനം, ഏബ്രഹാം കുറ്റിക്കാട്ടുകുന്നേൽ, സി.കെ. അലക്സ്, ഫ്രാൻസിസ് തോലമ്പുഴ, റെജി തോമസ്, ഫിലിപ്പ് കുട്ടി, ജോർജ് ജോസഫ്, റോസമ്മ പതുപ്പള്ളിൽ, സിസ്റ്റർ ജോനറ്റ്, സിസ്റ്റർ ജോസ്ന, മേരിക്കുട്ടി ജോൺസൻ എന്നിവർ നേതൃത്വം നല്കി. ആലക്കോട്: കന്യാസ്ത്രീകളെ കള്ളക്കേസിൽ കുടുക്കിയ ബിജെപി സർക്കാരിന്‍റെ ന്യൂനപക്ഷ വേട്ടയിൽ പ്രതിഷേധിച്ചു മൈനോരിറ്റി കോൺഗ്രസ്‌ ഇരിക്കൂർ നിയോജക മണ്ഡലം കമ്മിറ്റിയുടെ നേതൃത്വത്തിൽ ആലക്കോട് ടൗണിൽ പ്രതിഷേധ യോഗം നടത്തി. യുഡിഫ് ജില്ലാ ചെയർമാൻ പി.ടി. മാത്യു ഉദ്ഘാടനം ചെയ്തു. നിയോജക മണ്ഡലം ചെയർമാൻ ജോബി തൊണ്ടംകുളം അധ്യക്ഷത വഹിച്ചു. ടി.എൻ. സക്കീർ ഹുസൈൻ, എൻ.ആർ. മായിൻ, ജോസ് വട്ടമല, ജിൻസ് മാത്യു, സി.എച്ച്. മൊയ്തീൻ കുട്ടി, സനോജ് ചിറമട്ടൽ എന്നിവർ പ്രസംഗിച്ചു.

ആശുപത്രി കവാടത്തിലെ ഇരുന്പ് പൈപ്പ് പാത തകർന്നത് ഭീഷണിയാകുന്നു

തളിപ്പറമ്പ്: കന്നുകാലികൾ ആശുപത്രി വളപ്പിൽ കടക്കാതിരിക്കാനും വാഹനങ്ങൾ കടന്നുപോകുന്നതിനുമായി തളിപ്പറന്പ് താലൂക്ക് ആശുപത്രിയുടെ ഗേറ്റിലെ ഓവുചാലിന് മുകളിലായി സ്ഥാപിച്ച ഇരുന്പു പൈപ്പുകൾ ദ്രവിച്ച് തകർന്നത് അപകടഭീഷണിയുയർത്തുന്നു. നിരത്തി സ്ഥാപിച്ച പൈപ്പകുൾ പലതും പൊട്ടി കൂർത്ത് ഭാഗങ്ങൾ കാൽനടയാത്രക്കാർക്കും കടന്നുപോകുന്ന വാഹനങ്ങൾക്കും ഭീഷണി സൃഷ്ടിക്കുകയാണ്. ചില പൈപ്പുകൾ പൊട്ടിയതു മൂലമുണ്ടായ വലിയ വിടവിൽ ഒരാളുടെ കാൽ താഴ്ന്നു പോയിരുന്നു. അപകട ഭീഷണി ഉയർത്തുന്ന പൈപ്പുകൾ എത്രയും പെട്ടെന്ന് മാറ്റിസ്ഥാപിക്കണമെന്ന ആവശ്യം ശക്തമാണ്.

ഭിന്നശേഷി ജീവനക്കാരുടെ സുപ്രീം കോടതി വിധികൾ ഉടൻ നടപ്പിലാക്കണം: ഡിഎഇഎ

കണ്ണൂർ: സൂപ്പർ ന്യൂമററി തസ്തികയിൽ ജോലി ചെയ്യുന്ന ഭിന്നശേഷി ജീവനക്കാരുടെ തസ്തിക ഏകീകരിച്ചു മറ്റ് സ്ഥിര ജീവനക്കാർക്ക് അനുവദിക്കപ്പെട്ടിട്ടുള്ള സർവീസ് ആനുകൂല്യങ്ങൾ പുനഃസ്ഥാപിക്കണമെന്ന സുപ്രീം കോടതി വിധിയും, പ്രമോഷൻ സംവരണവുമായി ബന്ധപ്പെട്ട സുപ്രീം കോടതി വിധിയും മുഴുവൻ സർക്കാർ ഭിന്നശേഷി ജീവനക്കാർക്കും പ്രയോജനം കിട്ടുന്ന രീതിയിൽ പുറപ്പെടുവിക്കണമെന്നും ഡിഫറന്‍റ്‌ലി ഏബ്ൾഡ് എംപ്ലോയീസ് അസോസിയേഷൻ (ഡിഎഇഎ) സർക്കാരിനോട് ആവശ്യപ്പെട്ടു. ഡിഎഇഎ ജില്ലാ പ്രവർത്തക യോഗം കണ്ണൂർ സ്പോർട്സ് കൗൺസിൽ ഹാളിൽ സംസ്ഥാന വൈസ് പ്രസിഡന്‍റ് കെ.എൻ. ആനന്ദ് നാറാത്ത് ഉദ്ഘാടനം ചെയ്തു. ജില്ലാ പ്രസിഡന്‍റ് ഷാജി പി. മുഴപ്പിലങ്ങാട് അധ്യക്ഷത വഹിച്ചു. കെ. കിഷോർ, പി.പി. തനൂജ, ഇ. സരിത, വി.വി. സുരേന്ദ്രൻ തുടങ്ങിയവർ പ്രസംഗിച്ചു. സംഘടന ഉന്നയിച്ചിട്ടുള്ള വിഷയങ്ങളിൽ സർക്കാർ ഉടനടി തീരുമാനം എടുക്കണമെന്ന് ആവശ്യപ്പെട്ടുകൊണ്ട് മുഖ്യമന്ത്രി, ഗവർണർ, പ്രതിപക്ഷ നേതാവ്, വകുപ്പ് മന്ത്രി, ധനകാര്യ മന്ത്രി, നിയമ മന്ത്രി, ചീഫ് സെക്രട്ടറി എന്നിവർക്ക് സംസ്ഥാന സമിതി നിവേദനം നൽകിയതായും കെ.എൻ. ആനന്ദ് നാറാത്ത് അറിയിച്ചു.

ചെന്പേരിയിൽ അടച്ചിട്ട കടയ്ക്കുള്ളിൽ തീപിടിത്തം; ലക്ഷങ്ങളുടെ നഷ്ടം

ചെമ്പേരി: ചെന്പേരി ടൗണിലെ വ്യാപാര സ്ഥാപനത്തിലുണ്ടായ തീപിടിത്തത്തിൽ ലക്ഷങ്ങളുടെ നഷ്ടം. മൂന്ന് നിലകളിലായുള്ള സാധനങ്ങൾ കത്തിനശിച്ചു. ലിജോ സ്റ്റോഴ്സ് എന്ന കടയിലാണ് ഇന്നലെ വൈകുന്നേരം അഞ്ചോടെ തീപിടിത്തമുണ്ടായത്. ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് കരുതുന്നത്. ഇന്നലെ ഞായാറാഴ്ച കട തുറന്നിരുന്നില്ല. അറ്റകുറ്റിപ്പണിക്കായി കെഎസ്ഇബി അധികൃതർ വൈദ്യത ലൈൻ രാവിലെ ഓഫ് ചെ്യത ശേഷം വൈകുന്നേരമാണ് ഓൺ ചെയ്തത്. ഇതിനു പിന്നാലെയാണ് കടയിൽ തീപിടിത്തമുണ്ടായത്. ലൈനിൽ കുടി അമിത വോൾട്ടേജ് പ്രവഹിച്ചതാകാം കടയിലെ ഉപകരണങ്ങൾ കത്താനിടയാക്കിയതെന്നും സംശയം ഉയരുന്നുണ്ട്. കെട്ടിടത്തിന്‍റെ മുകൾ ഭാഗത്ത് നിന്ന് പുക ഉയരുന്നത് മറ്റൊരു വ്യാപാരിയുടെ ശ്രദ്ധയിൽപ്പെട്ടതോടെയാണ് തീപിടിത്ത വിവരം അറിയുന്നത്. വിവരമറിഞ്ഞെത്തിയവർ കടയിലെ വൈദ്യുതി ബന്ധം വിഛേദിച്ചു. കുടിയാന്മല പോലീസും തളിപ്പറമ്പിൽ നിന്ന് അഗ്നിരക്ഷാസേനയും സ്ഥലത്തെത്തിയിരുന്നു. തീ സമീപത്തെ കടകളിലേക്ക് പടരുന്നതിന് മുന്പ് അണയ്ക്കാനായതിനാലാണ് വൻ ദുരന്തം ഒഴിവായത്. ഇതോടൊപ്പം ടൗണിലെ മറ്റ് ചില വ്യാപാര സ്ഥപനങ്ങളിലും വൈദ്യുതി ഉപകരണങ്ങൾ കത്തി നശിച്ചിട്ടുണ്ട്. റീഗൽ ബേക്കറിയിലെ ഫ്രിഡ്ജ്, മണലുംകുഴി വെജിറ്റബിൾസിലെ ഫ്രീസർ, നീതി ലാബിന്‍റെ ലൈറ്റ് ബോർഡ്, ഭാരത് ഇലക്‌‌ട്രിക്കൽസിലെ വൈദ്യുത മീറ്റർ, സാജു ബ്രദേഴ്സിലെ ലൈറ്റുകൾ എന്നിവ കത്തിനശിച്ചവയിൽ പെടുന്നു.

വിദേശനാണ്യ വിനിമയ ചട്ടലംഘനം: കുണിയ കോളജിനെതിരെ ഇഡി അന്വേഷണം

കാസര്‍ഗോഡ്: രാജ്യത്തിന്‍റെ വിദേശനാണ്യ, വിദേശ സംഭാവന നിയമങ്ങള്‍ ലംഘിച്ചുവെന്നാരോപിച്ച് കുണിയ കോളജ് ഓഫ് ആര്‍ട്സ് ആന്‍ഡ് സയന്‍സസിന്‍റെ നടത്തിപ്പുകാരായ കുഞ്ഞഹമ്മദ് മുസ്‌‌ലിയാര്‍ മെമ്മോറിയല്‍ ട്രസ്റ്റിനിനെതിരെ എന്‍ഫോഴ്സ്മെന്‍റ് ഡയറക്ടറേറ്റ് അന്വേഷണം ആരംഭിച്ചു. ട്രസ്റ്റിന് യുഎഇ ആസ്ഥാനമായുള്ള വ്യവസായി ഇബ്രാഹിം അഹമ്മദ് അലിയില്‍നിന്നു 2021 മുതല്‍ 220 കോടി രൂപ ലഭിച്ചതായി ഏജന്‍സി പുറത്തിറക്കിയ പ്രസ്താവനയില്‍ പറയുന്നു. ട്രസ്റ്റ് 2010 ലെ വിദേശ സംഭാവന നിയന്ത്രണ നിയമപ്രകാരം (എഫ്സിആര്‍എ) രജിസ്റ്റര്‍ ചെയ്തിട്ടില്ല. കൂടാതെ വിദേശത്തുനിന്നു ഫണ്ട് സ്വീകരിക്കുന്നതിന് കേന്ദ്ര ആഭ്യന്തര മന്ത്രാലയത്തിന്‍റെ അനുമതി വാങ്ങുകയോ എഫ്സിആര്‍എ ബാങ്ക് അക്കൗണ്ട് എടുക്കുകയോ ചെയ്തിട്ടില്ല. ട്രസ്റ്റ് പൊതുജനസംഭാവനകള്‍ അഭ്യര്‍ഥിച്ചിട്ടില്ലാത്തതിനാല്‍ എഫ്സിആര്‍എ രജിസ്‌ട്രേഷന്‍ ആവശ്യമില്ലെന്ന് ഒരു ട്രസ്റ്റ് ഡയറക്ടര്‍ പറഞ്ഞു. തന്‍റെ ജന്മനാട്ടില്‍ ലോകോത്തര വിദ്യാഭ്യാസ സ്ഥാപനം നിര്‍മിക്കാന്‍ സഹായിക്കുന്നതിനായി ഇബ്രാഹിം അഹമ്മദ് അലിയുടെ സ്വകാര്യസ്വത്തില്‍നിന്നാണ് പണം ലഭിച്ചതെന്നും അദ്ദേഹം വ്യക്തമാക്കി. എന്നാല്‍ ഈ അവകാശവാദം നിയമപരമായി നിലനില്‍ക്കില്ലെന്ന് ഇഡി വാദിക്കുന്നു. ജൂലൈ 31ന് ഏജന്‍സിയുടെ കൊച്ചി സോണല്‍ ഓഫീസിലെ ഉദ്യോഗസ്ഥര്‍ കാസര്‍ഗോഡുള്ള ട്രസ്റ്റുമായി ബന്ധപ്പെട്ട രണ്ടു സ്ഥലങ്ങളില്‍ റെയ്ഡ് നടത്തി. കഴിഞ്ഞ നാലു വര്‍ഷത്തിനിടെ ട്രസ്റ്റിന് 220 കോടി രൂപ ലഭിച്ചതായി അന്വേഷണ ഉദ്യോഗസ്ഥര്‍ കണ്ടെത്തിയതായി പറയുന്നു. ഫണ്ടുകള്‍ അണ്‍സെക്യുവേര്‍ഡ് ലോണുകള്‍ ആയി രേഖപ്പെടുത്തിയിട്ടുണ്ട്. എന്നിരുന്നാലും വായ്പാ കരാറുകളോ പലിശ നിബന്ധനകളോ തിരിച്ചടവ് ഷെഡ്യൂളുകളോ ഉണ്ടായിരുന്നില്ല. ഇതുവരെ തിരിച്ചടവുകള്‍ നടത്തിയിട്ടില്ല. ഇബ്രാഹിം യുഎഇയില്‍ രജിസ്റ്റര്‍ ചെയ്തിട്ടുള്ള തന്‍റെ സ്ഥാപനമായ യൂണിവേഴ്‌സല്‍ ലൂബ്രിക്കന്‍റ്സ് എല്‍എല്‍സിയില്‍നിന്ന് പണം കൈമാറിയതായും ഇഡി ചൂണ്ടിക്കാട്ടി. കുണിയ സ്വദേശി ഇബ്രാഹിം ഗള്‍ഫിലെ പെട്രോളിയം, ലൂബ്രിക്കന്‍റ് മേഖലയില്‍ വിജയകരമായ ഒരു ബിസിനസ് സാമ്രാജ്യം കെട്ടിപ്പടുത്തിട്ടുണ്ട്. വിദ്യാഭ്യാസത്തില്‍ ശ്രദ്ധ കേന്ദ്രീകരിക്കുന്നതിനായി കുഞ്ഞഹമ്മദ് മുസ്‌ലിയാര്‍ മെമ്മോറിയല്‍ ട്രസ്റ്റ് സ്ഥാപിക്കുകയും 2023 ല്‍ തന്‍റെ ജന്മനാട്ടില്‍ 100 ഏക്കര്‍ കാമ്പസില്‍ കുണിയ കോളജ് ഓഫ് ആര്‍ട്‌സ് ആന്‍ഡ് സയന്‍സസ് ആരംഭിക്കുകയും ചെയ്തു. ജീവകാരുണ്യ ഉദ്ദേശ്യം ഉണ്ടായിരുന്നിട്ടും ധനസഹായം നല്‍കുന്ന രീതി 1999 ലെ ഫോറിന്‍ എക്‌സ്‌ചേഞ്ച് മാനേജ്മെന്‍റ് ആക്റ്റിലെേ (ഫെമ) പ്രധാന വ്യവസ്ഥകളെ ലംഘിക്കുന്നുവെന്ന് ഇഡി ഉദ്യോഗസ്ഥര്‍ പറയുന്നു. വിദേശ ഫണ്ടിന്‍റെ ഒരു ഭാഗം ഇന്ത്യയില്‍ കൃഷിഭൂമി വാങ്ങാന്‍ ഉപയോഗിച്ചതായി ആരോപിക്കപ്പെടുന്നു. ഇതു നിലവിലുള്ള ഫെമ ചട്ടങ്ങള്‍ക്ക് വിരുദ്ധമായ നീക്കമാണെന്ന് ഇഡി പറഞ്ഞു. ഇബ്രാഹിമില്‍നിന്നു ട്രസ്റ്റിന് 2.49 കോടി രൂപ പണമായി ലഭിച്ചതായും ഏജന്‍സി കണ്ടെത്തി. ഇതു ഫെമ വ്യവസ്ഥകളെ കൂടുതല്‍ ലംഘിക്കുന്നുണ്ടെന്നും ഏജന്‍സി പറയുന്നു. എഫ്സിആര്‍എയുടെ സെക്ഷന്‍ 2(1)(എച്ച്) പ്രകാരം പ്രവാസി ഇന്ത്യക്കാര്‍ ഉള്‍പ്പെടെയുള്ള വിദേശ സ്രോതസില്‍ നിന്നുള്ള ഏതൊരു സംഭാവനയും കൈമാറ്റവും കറന്‍സി ഡെലിവറിയും വിദേശ സംഭാവനയായി കണക്കാക്കുന്നു. നിയമത്തിലെ സെക്‌‌ഷന്‍ 11 അനുസരിച്ച്, വിദ്യാഭ്യാസ, സാംസ്‌കാരിക, മത, സാമൂഹിക അല്ലെങ്കില്‍ സാമ്പത്തിക പ്രവര്‍ത്തനങ്ങളില്‍ ഏര്‍പ്പെട്ടിരിക്കുന്ന ഏതൊരു സ്ഥാപനവും വിദേശ ഫണ്ട് സ്വീകരിക്കുന്നതിന് മുമ്പ് എഫ്സിആര്‍എയ്ക്ക് കീഴില്‍ രജിസ്റ്റര്‍ ചെയ്യുകയോ ആഭ്യന്തര മന്ത്രാലയത്തില്‍നിന്ന് മുന്‍കൂര്‍ അനുതി നേടുകയോ വേണം. ട്രസ്റ്റ് രണ്ടും ചെയ്തില്ല. ഫലത്തില്‍ 220 കോടി രൂപയുടെ മുഴുവന്‍ വരവും ഇതോടെ നിയമവിരുദ്ധമായെന്ന് ഇഡി പറഞ്ഞു.

ഷംസീറിന്‍റെ ഭാര്യയുടെ നിയമനം; കോടതിയെ സമീപിക്കുമെന്ന്

കണ്ണൂർ: നാലുവർഷം സേവനം പൂർത്തിയാക്കിയ മറ്റ് ഡിപ്പാർട്ട്മെന്‍റുകളിലെ മുഴുവൻ ഗസ്റ്റ് അധ്യാപകരെയും പിരിച്ചുവിടുകയും നിയമസഭാ സ്പീക്കർ ഷംസീറിന്‍റെ ഭാര്യ ജോലിചെയ്യുന്ന ടീച്ചർ എഡ്യൂക്കേഷൻ സെന്‍ററിലെ ഗസ്റ്റ് അധ്യാപകർക്ക് മാത്രമായി പ്രത്യേക പരിഗണന നൽകുകയും ചെയ്തത് സ്വജനപക്ഷപാതത്തിന്‍റെ ഒടുവിലത്തെ ഉദാഹരണമാണെന്നും എല്ലാവർക്കും ഒരേ നീതി ലഭ്യമാക്കുവാൻ ഉടൻ കോടതിയെ സമീപിക്കുമെന്നും കണ്ണൂർ സർവകലാശാല സെനറ്റേഴ്സ് ഫോറം കൺവീനർ ഡോ.ഷിനോ പി. ജോസ് അറിയിച്ചു. വൈസ് ചാൻസലർ സിൻഡിക്കേറ്റ് അംഗങ്ങളുടെ നീതിയുക്തമല്ലാത്ത നിലപാടിന് ഒപ്പം നിൽക്കുന്നത് ദൗർഭാഗ്യകരമാണ്. വിവാദമായതിന് ഒരിടവേളയ് ക്കുശേഷം നിയമസഭാ സ്പീക്കറുടെ ഭാര്യ ടീച്ചർ എഡ്യുക്കേഷൻ സെന്‍ററിൽ വീണ്ടും ജോലിയിൽ പ്രവേശിച്ചു എന്നത് അക്കാദമിക് സമൂഹത്തെ അധികാര ഗർവ് കാട്ടി ഇടതുപക്ഷം വെല്ലുവിളിക്കുന്നതിന് തുല്യമാണെന്നും സെനറ്റേഴ്സ് ഫോറം ആരോപിച്ചു. അതിനിടയിൽ എല്ലാവർക്കും ഒരേ നീതി ഉറപ്പാക്കണമെന്നും ടീച്ചർ എഡ്യുക്കേഷൻ സെന്‍ററിലെ സ്വജനപക്ഷപാത വിവാദം അന്വേഷിക്കണമെന്നും ആവശ്യപ്പെട്ട് സെനറ്റേഴ്‌സ് ഫോറം നൽകിയ പരാതിക്ക് മറുപടിയായി സർക്കാരിലേക്ക് സിൻഡിക്കേറ്റ് നിർദ്ദേശപ്രകാരം ക്ലാരിഫിക്കേഷൻ ചോദിച്ചിട്ടുണ്ടെന്നും ടീച്ചർ എഡ്യുക്കേഷൻ സെന്‍ററിലെ ഗസ്റ്റ് അധ്യാപകരുടെ കാര്യത്തിൽ തീരുമാനം മറുപടി വന്നതിനു ശേഷം കൈക്കൊള്ളുമെന്നും രജിസ്ട്രാർ ഫോറം കൺവീനറെ അറിയിച്ചു. അഭ്യസ്തവിദ്യരായ നൂറുകണക്കിന് തൊഴിൽ അന്വേഷകരെ മാറ്റിനിർത്തി നിയമസഭാ സ്പീക്കറുടെ ഭാര്യയ്ക്ക് പ്രത്യേക പരിഗണന നൽകിയത് പൊതുസമൂഹത്തിൽ ചർച്ചയാക്കുമെന്നും നിയമ വ്യവസ്ഥ ഉപയോഗിച്ച് ഈ ബന്ധു നിയമനം ചോദ്യം ചെയ്യുമെന്നും സെനറ്റേഴ്സ് ഫോറം അറിയിച്ചു.

ശ്രവണ: നവീകരിച്ച കോഴിക്കോട് യൂണിറ്റ് ഉദ്ഘാടനം ചെയ്തു

കോഴിക്കോട്: കേരളത്തിലെ പ്രമുഖ ശ്രവണ പരിചരണ സ്ഥാപനമായ ശ്രവണ ഹിയറിംഗ് എയ്ഡ് സെന്‍ററിന്‍റെ നവീകരിച്ച കോഴിക്കോട് യൂണിറ്റ് വിപുലമായ സൗകര്യങ്ങളോടെ മാവൂർ റോഡ് വൈഎംഎസിഎ ജംഗ്ഷനിലെ എരോത് സെന്‍റർ ബിൽഡിംഗിൽ പ്രവർത്തനമാരംഭിച്ചു. എം.കെ. രാഘവൻ എംപി ഉദ്ഘാടനം ചെയ്തു. കേൾവിക്കുറവ് നിശബ്ദമായി നമ്മെ ബാധിക്കുന്ന ഒരു പ്രശ്നമാണെന്നും ഇത്തരം സാഹചര്യങ്ങളിലൂടെ കടന്നു പോകുന്നവർക്ക് ശ്രവണ നൽകുന്ന പരിചരണവും കരുതലും വലിയ ആശ്വാസമാണെന്നും എം.കെ. രാഘവൻ എംപി പറഞ്ഞു. സാന്പത്തിക പ്രശ്നങ്ങളാൽ ശ്രവണ സഹായി വാങ്ങാൻ കഴിയാത്ത അഞ്ചു പേർക്ക് ഉദ്ഘാടനത്തോടനുബന്ധിച്ച് ശ്രവണ സഹായികൾ വിതരണം ചെയ്തു. നവീകരിച്ച യൂണിറ്റിന്‍റെ ഉദ്ഘാടനത്തോടനുബന്ധിച്ച് "ഹിയറിംഗ് എയ്ഡ് അപ്ഗ്രേഡ് ആൻഡ് എക്സ്ചേഞ്ച് ഫെസ്റ്റിവൽ’ എന്ന ഓഫറും പ്രഖ്യാപിച്ചിട്ടുണ്ട്. ഈ ഓഫറിലൂടെ ഉപഭോക്താക്കൾക്ക് തങ്ങളുടെ പഴയ ഹിയറിംഗ് എയ്ഡുകൾ നൽകി ആകർഷകമായ വിലക്കിഴിവിൽ പുതിയവ സ്വന്തമാക്കാനാകും. ആധുനിക സാങ്കേതികവിദ്യ, പരിചയസന്പന്നരായ ഓഡിയോളജിസ്റ്റുകൾ, വ്യക്തിഗത പരിചരണം എന്നിവയിലൂടെ ഉപഭോക്താക്കൾക്ക് മികച്ച സേവനം നൽകാനാണ് ശ്രവണ എപ്പോഴും ശ്രമിക്കുന്നതെന്ന് മാനേജിംഗ് ഡയറക്ടർ ശ്രീജിത്ത് പറഞ്ഞു. ഉദ്ഘാടന ചടങ്ങിൽ ഐഎംഎ കോഴിക്കോട് ജില്ലാ പ്രസിഡന്‍റ് ഡോ. ശങ്കർ മാഹാദേവൻ, കോർപറേഷൻ സ്റ്റാൻഡിംഗ് കമ്മിറ്റി ചെയർമാൻ പി. ദിവാകരൻ എന്നിവർ പ്രസംഗിച്ചു. ശ്രവണ ഡയറക്ടറും ചീഫ് ഓഡിയോളജിസ്റ്റുമായ അശ്വതി ശ്രീജിത്ത് സ്വാഗതവും അഡ്മിനിസ്ട്രേറ്റർ ജിന്‍റോ എം. തോമസ് നന്ദിയും പറഞ്ഞു.

വിട പറഞ്ഞത് കണ്ണൂരിന്‍റെ അത്യപൂർവ മനുഷ്യസ്നേഹി ; "രണ്ടു രൂപ ഡോക്‌ടർ'

കണ്ണൂർ: മനുഷ്യസ്നേഹിയായ ആതുരസേവനത്തെപ്പറ്റി വ്യക്തമായ കാഴ്ചപ്പാടുള്ള ഡോക്ടർ ഗോപാലൻ നമ്പ്യാർ തന്‍റെ മക്കൾ ഡോക്ടർമാർ ആയപ്പോൾ അവർക്ക് കൃത്യമായ ഉപദേശം കൊടുത്തു. എങ്ങനെയായിരിക്കണം ഒരു ഡോക്ടർ സമൂഹത്തിലെ രോഗികളോട് പെരുമാറേണ്ടത് എന്നതിന്‍റെ സാക്ഷ്യപത്രങ്ങളായിരുന്നു പിന്നീട് അവരുടെ ഭിഷഗ്വര ജീവിതം. പണം ഉണ്ടാക്കുക എന്ന ആത്യന്തിക ലക്ഷ്യത്തോടെയാണ് നിങ്ങൾ ഡോക്ടർ ആകുന്നതെങ്കിൽ ഇന്നുതന്നെ ഈ പണി ഉപേക്ഷിച്ച് വല്ല ബാങ്ക് കൊള്ളക്കും പൊയ്ക്കോളൂവെന്നാണ് ആ മനുഷ്യസ്നേഹി മക്കളോട് പറഞ്ഞത്. ആ അച്ഛന്‍റെ വാക്കുകൾ ഹൃദയത്തിൽ ഏറ്റുവാങ്ങിക്കൊണ്ട് തന്‍റെ ജീവിതം സമൂഹത്തിലെ പാവപ്പെട്ടവർക്ക് വേണ്ടി ചെലവഴിച്ച മഹനീയ വ്യക്തിത്വത്തിന്‍റെ നേർരൂപമായിരുന്നു അന്തരിച്ച ഡോക്ടർ രൈരു ഗോപാൽ. ഏറെക്കാലം രണ്ടുരൂപയായിരുന്നു അദ്ദേഹത്തിന്‍റെ ഫീസ്. " രണ്ടു രൂപ ഡോക്ടര്‍ ' എന്ന വിളിപ്പേരില്‍ പ്രശസ്തനായിരുന്നു അദ്ദേഹം. മരുന്നും പരിശോധനയുമടക്കം നാല്‍പ്പതോ അമ്പതോ രൂപ മാത്രമാണ് രോഗികളില്‍നിന്നും വാങ്ങുക. പിന്നീട് ഫീസ് 10 രൂപയാക്കി. നിര്‍ധനരോഗികളില്‍നിന്ന് ഈ തുച്ഛമായ ഫീസ് പോലും അദ്ദേഹം വാങ്ങിയിരുന്നില്ല. മാത്രമല്ല, ആവശ്യമായ മരുന്നുകള്‍ സൗജന്യമായി നല്‍കുകയും ചെയ്തിരുന്നു. മൂന്നുദിവസത്തിനു ശേഷവും രോഗം മാറിയില്ലെങ്കില്‍,വീണ്ടുമെത്തുന്ന രോഗികളില്‍നിന്ന് ഫീസ് ഈടാക്കില്ലെന്നു മാത്രമല്ല, മരുന്നുകള്‍ സൗജന്യമായി നല്‍കുകയും ചെയ്തിരുന്നു. കണ്ണൂര്‍ ജില്ലയില്‍ നിന്നു മാത്രമല്ല, അയല്‍ ജില്ലകളില്‍നിന്നു പോലും ഡോക്ടറെ കാണാന്‍ ആളുകളെത്തിയിരുന്നു. രോഗികളുടെ സമയം വില പ്പെട്ടതാണെന്ന് മനസിലാക്കിയായിരുന്നു ഡോ. രൈരു ഗോപാലിന്‍റെ പ്രവര്‍ത്തനം. ജോലിക്കു പോകേണ്ട തൊഴിലാളികള്‍ക്കും കൂലിപ്പണിക്കാര്‍ക്കും വിദ്യാര്‍ഥികള്‍ക്കുമെല്ലാം സൗകര്യപ്രദമാകുന്ന വിധത്തില്‍ പുലര്‍ച്ചയായിരുന്നു പരിശോധന. ചെറുപ്പത്തിൽ പുലര്‍ച്ചെ മൂന്നുമുതല്‍ ഡോക്ടര്‍ പരിശോധന തുടങ്ങിയിരുന്നു. അന്നൊക്കെ മുന്നൂറിലേറെ രോഗികളുണ്ടാകും. പിന്നീട്, പരിശോധന പുലർച്ചെ ആറുമുതലാക്കി. പുലര്‍ച്ചെ 2.15ന് എഴുന്നേല്‍ക്കുന്നതോടെയാണ് ഡോക്‌ടറുടെ ഒരുദിവസം ആരംഭിക്കുന്നത്. നേരെ പശുത്തൊഴുത്തിലേക്ക്. തൊഴുത്ത് വൃത്തിയാക്കി പശുക്കളെ കുളിപ്പിച്ച് പാല്‍ കറന്നെടുക്കും. ശേഷം കുളികഴിഞ്ഞ് പൂജാ മുറിയിലേക്ക്. അഞ്ചരമുതല്‍ പത്രം വായനയും പാല്‍ വിതരണവും. തളാപ്പ് എൽഐസി ഓഫീസിന് സമീപത്തെ വീട്ടിലാണ് 35 വർഷം രോഗികളെ പരിശോധിച്ചത്. ഇവിടെ രാവിലെ ആറുമുതല്‍ രോഗികളെത്തി തുടങ്ങും. എണ്ണം തൊണ്ണൂറും നൂറുമൊക്കെ കടക്കും. രാവിലെ 10 വരെ പരിശോധന നീളും. പിന്നീട്, താണ മാണിക്കക്കാവിനടുത്ത് " ലക്ഷ്മി' വീട്ടിലാണ് 10 വർഷത്തോളമായി രോഗികളെ പരിശോധിച്ചിരുന്നത്. ആരോഗ്യം കുറഞ്ഞതോടെ രോഗികളുടെ എണ്ണവും ക്രമേണ കുറച്ചു. പരിശോധിക്കാന്‍ വയ്യാതായതോടെ പരിശോധന നിർത്തിയതും വാർത്തയായിരുന്നു. 18 ലക്ഷം രോഗികള്‍ക്ക് മരുന്നും സ്‌നേഹവും കുറിച്ചുകൊടുത്താണ് ഡോക്ടര്‍ ജോലിയിൽനിന്ന് വിരമിച്ചത്. എന്‍റെ ജോലി ചെയ്യാനുള്ള ആരോഗ്യം ഇന്നെനിക്കില്ല. അതുകൊണ്ട് രോഗികളെ പരിശോധിക്കുന്നതും മരുന്ന് കൊടുക്കുന്നതും നിര്‍ത്തുകയാണെന്ന ബോര്‍ഡ് ഗേറ്റില്‍ തൂക്കിയാണ് അമ്പത് വര്‍ഷത്തിലേറെ രോഗികള്‍ക്കൊപ്പം ജീവിച്ച ഡോക്ടര്‍ ലളിതമായി ജോലിയില്‍നിന്ന് വിരമിച്ചത്. 2024 മേയ് എട്ടിനായിരുന്നു ഇത്. ഈ കുറിപ്പ് മന്ത്രി മുഹമ്മദ് റിയാസ് ഫേസ്ബുക്കിൽ പങ്കുവച്ചതും ചർച്ചയായിരുന്നു.

എന്നു തീരും നരകയാത്ര

ഇരിട്ടി: മാക്കൂട്ടം ചുരം അന്തർ സംസ്ഥാനപാതയിൽ ദുരിതവഴികൾ താണ്ടി യാത്രക്കാർ. റോഡേത് കുഴിയേത് എന്നു തിരിച്ചറിയാൻ കഴിയാതെ ഇരുചക്ര വാഹനം മുതൽ വലിയ ചരക്കുവാഹങ്ങൾ വരെ നട്ടം തിരിയുകയാണ്. മുന്പ് അരമണിക്കൂറിൽ ചുരം കടക്കാമായിരുന്നു. ഇപ്പോൾ കുറഞ്ഞത് ഒന്നര മണിക്കൂറാണ് യാത്രയ്ക്കു വേണ്ടത്. എത്ര പരിചയസമ്പന്നനായ ഡ്രൈവ റായാലും കുഴിയിൽ വീണ് നടുവൊടിയാതെ യാത്രചെയ്യാൻ കഴിയാത്ത സാഹചര്യമാണ്. കൂട്ടുപുഴ മുതൽ മാക്കൂട്ടം ചെക്ക് പോസ്റ്റ് വരെയുള്ള അഞ്ചു കിലോമീറ്ററും പെരുമ്പാടി മുതൽ നാലു കിലോമീറ്റർ കൂട്ടുപുഴ ഭാഗത്തേക്കുമാണ് റോഡ് പൂർണമായി തകർന്നുകിടക്കുന്നത്. ബാക്കിയുള്ള ദൂരം രണ്ട് റീച്ചുകളിലായി നാലു കിലോമീറ്റർ വീതികൂട്ടിയും പുനർനിർമാണം ന‌ടത്തിയും ബാക്കി അറ്റകുറ്റപ്പണികളും പൂർത്തിയാക്കിയിരുന്നു. ദിനം പ്രതി നൂറുകണക്കിന് യാത്രാവാഹനങ്ങളും അതിൽ കൂടുതൽ ചരക്കു വാഹനങ്ങളും കടന്നുപോകുന്ന ചുരംപാത കർണാടക സംസ്ഥാന പാത 91 ന്‍റെ ഭാഗമാണ്. ചരക്ക്നീക്കം ദുർഘടം; മരങ്ങളും ഭീഷണി ചുരംപാത വഴി ദിനം പ്രതി ആയിരത്തിലധികം യാത്രാവാഹനങ്ങളും അത്രത്തോളം ചരക്ക് വാഹനങ്ങളും കടന്നുപോകുന്നുണ്ട്. ബംഗളൂരുവിൽനിന്ന് 30 ഓളം ടൂറിസ്റ്റ് ബസുകളും അത്രത്തോളം കേരള, കർണാടക ആർടിസി ബസുകളും സ്വകാര്യ ബസുകളും സർവീസ് നടത്തുന്നുണ്ട്. കണ്ണൂർ, കോഴിക്കോട് ഭാഗങ്ങളിലേക്ക് പച്ചക്കറികളും മുട്ടയും കോഴിയും എത്തുന്നത് ചുരംപാത വഴിയാണ്. യാത്രാ സമയത്തിലെ വർധനയും വാഹനങ്ങളുടെ കേടുപാടുകളും വലുതും ചെറുതുമായ ചരക്ക് വാഹനങ്ങൾക്ക് വലിയ പ്രതിസന്ധിയാണ് സൃഷ്ടിക്കുന്നത്. വർഷങ്ങൾക്ക് മുന്പ് നവീകരണം നടത്തിയശേഷം 16 കിലോമീറ്റർ വരുന്ന ചുരം പാതയിൽ പൂർണതോതിലുള്ള നവീകരണം പിന്നീട് ഉണ്ടായിട്ടില്ല. കൂടാതെ മരങ്ങൾ ഒടിഞ്ഞുവീഴുന്നതും ചുവടെ നിലംപൊത്തുന്നതുമാണ് ചുരം പാതയിലെ മറ്റൊരു ഭീഷണി. ഇക്കുറി കാലവർഷം തുടങ്ങിയ ശേഷം അമ്പതിലധികം കൂറ്റൻ മരങ്ങളാണ് പാതയിലേക്ക് നിലംപൊത്തിയത്. വലിയ അപകടങ്ങൾ ഉണ്ടായില്ലെങ്കിലും മണിക്കൂറുകളോളം ഗതാഗതം മുടങ്ങിയ. ഒരു ദിവസം വ്യത്യസ്ത സമയങ്ങളിലായി മൂന്നു മരങ്ങൾ വരെ നിലംപൊത്തി. രാത്രി യാത്രക്കാരാണ് ഇത്തരം സന്ദർഭങ്ങളിൽ മണിക്കൂറുകളോളം പെരുവഴിയിലാകുന്നത്. വിരാജ്പേട്ടയിൽനിന്നോ ഇരിട്ടിയിൽനിന്നോ അഗ്നി രക്ഷാസേന എത്തി വേണം മരം മുറിച്ചുമാറ്റി ഗതാഗത സ്തംഭനം ഒഴിവാക്കാൻ. ചുരം പാതയെ അപകടരഹിത പാതയാക്കണമെന്ന ആവശ്യം പലകോണുകളിൽനിന്നും ഉയരുന്നുണ്ടെങ്കിലും മടിക്കേരി ജില്ലാ ഭരണകൂടത്തിന്‍റെ ഭാഗത്തുനിന്ന് അനുകൂല സമീപനം ഉണ്ടാകുന്നില്ല.

അഖിലേന്ത്യാ ആദിവാസി മഹാസഭ ജില്ലാ പ്രവർത്തക യോഗം

ഇരിട്ടി: അഖിലേന്ത്യാ ആദിവാസി മഹാസഭ ജില്ലാ പ്രവർത്തകയോഗം ചേർന്നു. ആറളം പട്ടികവർഗ പുനരധിവാസ മേഖലയിൽ ഉൾപ്പെടെ കാട്ടാന ശല്യത്തിന് പരിഹാരം കാണണമെന്നും ആറളം പുനരധിവാസ പ്രവർത്തനം ലക്ഷ്യത്തിലെത്തിക്കണമെന്നും പ്രവർത്തകയോഗം ആവശ്യപ്പെട്ടു. ജില്ലയിലെ പട്ടികവർഗ ഉന്നതികളിൽ വിവിധങ്ങളായ പ്രശ്നങ്ങൾക്ക് പരിഹാരം കാണണമെന്ന് ആവശ്യപ്പെട്ട് സെപ്റ്റംബറിൽ പ്രക്ഷോഭം സംഘടിപ്പിക്കാനും പ്രവർത്തകയോഗം തീരുമാനിച്ചു. ഇരിട്ടി വ്യാപാര ഭവൻ ഹാളിൽ ചേർന്ന പ്രവർത്തക യോഗം അഖിലേന്ത്യാ ആദിവാസി മഹാസഭ സംസ്ഥാന സെക്രട്ടറിയും മുൻ എംഎൽഎയുമായ എം. കുമാരൻ ഉദ്ഘാടനം ചെയ്തു. ഇ.സി. അനീഷ് അധ്യക്ഷത വഹിച്ചു. സിപിഐ സംസ്ഥാന കൗൺസിൽ അംഗം സി.എൻ. ചന്ദ്രൻ, നേതാക്കളായ കെ.ടി. ജോസ്, പായം ബാബുരാജ്, പി.കെ. കരുണാകരൻ, കെ.ആർ. ചന്ദ്രകാന്ത് എന്നിവർ പ്രസംഗിച്ചു. ഭാരവാഹികളായി ശ്രീധരൻ-പ്രസിഡന്‍റ്, ഇ.സി. അനീഷ്, സുനിൽ മുഴക്കുന്ന്-വൈസ് പ്രസിഡന്‍റുമാർ, പി.കെ. കരുണാകരൻ-സെക്രട്ടറി, എം.കെ. വിജയൻ, പി.കെ. വാസു-ജോയിന്‍റ് സെക്രട്ടറിമാർ, എ.കെ. ഷീജൻ-ട്രഷറർ എന്നിവരെ തെരഞ്ഞെടുത്തു.

തലശേരിയിൽ ബസ് സർവീസ് സാധാരണ നിലയിൽ; സമരാഹ്വാനം നടത്തിയ വാട്ട്സാപ് ഗ്രൂപ്പിനെതിരേ കേസ്

തലശേരി: ബസ് കണ്ടക്ടറെ മർദിച്ചതിൽ പ്രതിഷേധിച്ച് നാലുനാൾ ജനങ്ങളെ ദുരിതത്തിലാക്കിയ ബസ് സമരത്തിന് വിരാമം. ജനരോഷം ശക്തമായതോടെ ഇന്നലെ ബസ് തൊഴിലാളികൾ സമരം പിൻവലിച്ച് സർവീസ് നടത്തി. പണിമുടക്കിയ ബസുകൾക്കതിരെ ഡിവൈഎഫ്ഐ രംഗത്തെത്തിയും പോലീസ് കർശന നടപടികളിലേക്ക് നീങ്ങിയതുമാണ് ഇന്നലെ ബസ് സർവീസ് ആരംഭിക്കാൻ പ്രേരിപ്പിച്ചത്. ട്രേഡ് യൂണിയനുകളും ബസുടമ സംഘടനകളും സമരത്തെ തള്ളിപറഞ്ഞിരുന്നു. സമരം പിൻവലിച്ചശേഷവും സർവീസ് നടത്താത്ത ബസുകളുടെ നടപടിക്കെതിരെ ഡിവൈഎഫ്ഐ പ്രവർത്തകർ പ്രതിഷേധിച്ചു. എഎസ്പി പിബി കിരൺ ഉൾപ്പെടെയുള്ള പോലീസ് ഉദ്യോഗസ്ഥർ ഇടപെട്ടാണ് പ്രതിഷേധം അവസാനിപ്പിച്ചത്. സർവീസ് നടത്താത്ത ബസുകൾ പരിശോധിച്ച് നടപടിയെടുക്കുമെന്ന് എഎസ്പി ഉറപ്പുനൽകി. ഡിവൈഎഫ്ഐ ജില്ലാ പ്രസിഡന്‍റ് മുഹമ്മദ് അഫ്സൽ, ബ്ലോക്ക് സെക്രട്ടറി പി. സനീഷ്, പി.വി. സച്ചിൻ, മുഹമ്മദ് ഫാസിൽ, ഫിദ പ്രദീപ്, കെ. മർഫാൻ എന്നിവരുടെ നേതൃത്വത്തിലായിരുന്നു പ്രതിഷേധം. കണ്ടക്ടറെ മർദിച്ചതിൽ പ്രതിഷേധിച്ച് ബസ് തൊഴിലാളികൾ ആദ്യ രണ്ടുദിവസം പണിമുടക്കിയത് ജാമ്യമില്ലാവകുപ്പ് പ്രകാരം കേസെടുക്കുകയും രണ്ടുപേരെ അറസ്റ്റുചെയ്ത് ജയിലിലിടക്കുകയും ചെയ്തിരുന്നു. ഇതോടെ ട്രേഡ് യൂണിയനുകൾ സമരത്തിൽ നിന്നും പിൻമാറിയെങ്കിലും ഒരു വിഭാഗം തൊഴിലാളികൾ നവമാധ്യമത്തിലൂടെ സമരം തുടരണമെന്ന് ആഹ്വാനം ചെയ്തതാണ് സമരം നീണ്ടു പോകാൻ ഇടയാക്കിയത്. കെഎൽ-58 പാനൂർ റൈഡർ വാട്സാപ് ഗ്രൂപ്പിലൂടെയായിരുന്നു സമരാഹ്വാനം. ഇതിനെതിരെ പോലീസ് കേസെടുത്തിട്ടുണ്ട്. അഡ്മിൻ അടക്കമുള്ളവർക്കെതിരെയാണ് കേസ്. കലാപശ്രമം, ഗൂഡാലോചന ഉൾപ്പെടെയുള്ള വകുപ്പുകൾ ചുമത്തിയാണ് കേസ് രജിസ്റ്റർ ചെയ്തത്. ഡിവൈഎഫ്ഐ ബ്ലോക്ക് സെക്രട്ടറി പി. സനീഷിന്‍റെ പരാതിയിലാണ് നടപടി. മൊബൈൽ ഫോണുകൾ പിടിച്ചെടുത്ത് പോലീസ് സൈബർ സെല്ലിൽ പരിശോധനക്ക് അയച്ചു. സമരം തുടരാൻ ആഹ്വാന ചെയ്ത വാട്സാപ് ഗ്രൂപ്പ് അഡ്മിൻമാരിൽ മൂന്നുപേർ പ്രവാസികളാണ്. രണ്ടുപേർ ബസ് തൊഴിലാളികളും രണ്ടുപേർ ഓട്ടോ തൊഴിലാളികളുമാണ്. ഇതിനിടെ, മദ്യപിച്ച് ബസ്‌സ്റ്റാൻഡിൽ ബഹളമുണ്ടാക്കിയ സമരാനുകൂലികളായ രണ്ടുപേരെ പോലീസ് അറസ്റ്റുചെയ്തു.

ഛത്തീസ്ഗഡ് സംഭവത്തിൽ പ്രതിഷേധിച്ചു

മാഹി: മാഹി സെന്‍റ് തെരേസാ ബസിലിക്ക പാരിഷ് കൗൺസിലിന്‍റെ നേതൃത്വത്തിൽ പ്രതിഷേധയോഗവും റാലിയും നടത്തി. കന്യാസ്ത്രീകളെ ആൾക്കൂട്ട വിചാരണ നടത്തിയവരെ നിയമപരമായി ശിക്ഷിക്കണമെന്നും ഭരണഘടനയുടെ ആർട്ടിക്കിൾ 25 പ്രകാരമുള്ള മതസ്വാതന്ത്ര്യം സംരക്ഷിക്കണമെന്നും ക്രൈസ്തവർക്കെതിരെയുള്ള ബോധപൂർവമായ ആക്രമണങ്ങൾ തടയണമെന്നും ആവശ്യപ്പെട്ടാണ് റാലി നടത്തിയത്. ബസിലിക്ക റെക്ടർ ഫാ. സെബാസ്റ്റ്യൻ കാരക്കാട്ട്, ഫാ. ബിനോയ് ഏബ്രഹാം, ഫാ. വിപിൻ ബെനറ്റ്, സിസ്റ്റർ നവ്യ, സിസ്റ്റർ അമല, ഷാജു കാനത്തിൽ, വിൻസെന്‍റ് ഫെർണാണ്ടസ്, സ്റ്റാൻലി ഡിസിൽവ എന്നിവർ പ്രസംഗിച്ചു. പിലാത്തറ: പിലാത്തറയിലും പയ്യന്നൂർ പുഞ്ചക്കാടും പ്രതിഷേധ മാർച്ചും ധർണയും നടത്തി. പിലാത്തറ വ്യാകുല മാതാ ഫൊറോന ഇടവകയുടെ നേതൃത്വത്തില്‍ പള്ളി പരിസരത്ത് നിന്നാരംഭിച്ച പ്രതിഷേധ മാര്‍ച്ച് പിലാത്തറ ബസ് സ്റ്റാൻഡ് പരിസരത്ത് സമാപിച്ചു. തുടര്‍ന്ന് നടന്ന ധര്‍ണ ഇടവക വികാരി ഫാ. തോംസണ്‍ കൊറ്റിയത്ത് ഉദ്ഘാടനം ചെയ്തു. അസിസ്റ്റന്‍റ് വികാരി ഫാ. ഷിജു അധ്യക്ഷത വഹിച്ചു. ഫിലിക്‌സ് ജോര്‍ജ്, കെ.ജി. വർഗീസ്, പുഷ്പ ക്രിസ്റ്റി, സിസ്റ്റര്‍ ആശ ജോസ്, സ്റ്റാന്‍ലി പാട്രിക്ക്, ലില്ലി ഫെണ്‍ണാണ്ടസ്, ജോസ് ക്രിസ്റ്റഫര്‍, കെ. വിജയകുമാര്‍ എന്നിവര്‍ പ്രസംഗിച്ചു.

ഭിന്നശേഷി ജീവനക്കാരുടെ സുപ്രീം കോടതി വിധികൾ ഉടൻ നടപ്പിലാക്കണം: ഡിഎഇഎ

കണ്ണൂർ: സൂപ്പർ ന്യൂമററി തസ്തികയിൽ ജോലി ചെയ്യുന്ന ഭിന്നശേഷി ജീവനക്കാരുടെ തസ്തിക ഏകീകരിച്ചു മറ്റ് സ്ഥിര ജീവനക്കാർക്ക് അനുവദിക്കപ്പെട്ടിട്ടുള്ള സർവീസ് ആനുകൂല്യങ്ങൾ പുനഃസ്ഥാപിക്കണമെന്ന സുപ്രീം കോടതി വിധിയും, പ്രമോഷൻ സംവരണവുമായി ബന്ധപ്പെട്ട സുപ്രീം കോടതി വിധിയും മുഴുവൻ സർക്കാർ ഭിന്നശേഷി ജീവനക്കാർക്കും പ്രയോജനം കിട്ടുന്ന രീതിയിൽ പുറപ്പെടുവിക്കണമെന്നും ഡിഫറന്‍റ്‌ലി ഏബ്ൾഡ് എംപ്ലോയീസ് അസോസിയേഷൻ (ഡിഎഇഎ) സർക്കാരിനോട് ആവശ്യപ്പെട്ടു. ഡിഎഇഎ ജില്ലാ പ്രവർത്തക യോഗം കണ്ണൂർ സ്പോർട്സ് കൗൺസിൽ ഹാളിൽ സംസ്ഥാന വൈസ് പ്രസിഡന്‍റ് കെ.എൻ. ആനന്ദ് നാറാത്ത് ഉദ്ഘാടനം ചെയ്തു. ജില്ലാ പ്രസിഡന്‍റ് ഷാജി പി. മുഴപ്പിലങ്ങാട് അധ്യക്ഷത വഹിച്ചു. കെ. കിഷോർ, പി.പി. തനൂജ, ഇ. സരിത, വി.വി. സുരേന്ദ്രൻ തുടങ്ങിയവർ പ്രസംഗിച്ചു. സംഘടന ഉന്നയിച്ചിട്ടുള്ള വിഷയങ്ങളിൽ സർക്കാർ ഉടനടി തീരുമാനം എടുക്കണമെന്ന് ആവശ്യപ്പെട്ടുകൊണ്ട് മുഖ്യമന്ത്രി, ഗവർണർ, പ്രതിപക്ഷ നേതാവ്, വകുപ്പ് മന്ത്രി, ധനകാര്യ മന്ത്രി, നിയമ മന്ത്രി, ചീഫ് സെക്രട്ടറി എന്നിവർക്ക് സംസ്ഥാന സമിതി നിവേദനം നൽകിയതായും കെ.എൻ. ആനന്ദ് നാറാത്ത് അറിയിച്ചു.

ഉമ്മൻചാണ്ടി സ്‌മൃതി കേന്ദ്രം ഉദ്ഘാടനം ചെയ്തു

ഇരിട്ടി: പടിയൂരിൽ ഉമ്മൻചാണ്ടി സ്‌മൃതികേന്ദ്രം കെപിസിസി പ്രസിഡന്‍റ് സണ്ണി ജോസഫ് എംഎൽഎ ഉദ്ഘാടനം ചെയ്തു. ജനശ്രീ മിഷൻ ജില്ലാ ചെയർമാൻ ചന്ദ്രൻ തില്ലങ്കേരി അധ്യക്ഷത വഹിച്ചു. ഇരിട്ടി, തളിപ്പറമ്പ് ബ്ലോക്കുകൾക്ക് സൗജന്യമായി നൽകുന്ന ഫ്രീസർ കൈമാറി. ബ്ലോക്ക് ചെയർമാൻ ബാലൻ, മട്ടന്നൂർ ബ്ലോക്ക് പ്രസിഡന്‍റ് സുരേഷ് മാവില, മോഹനൻ, ഒ.കെ. പ്രസാദ്, റഷീദ്, മണ്ഡലം പ്രസിഡന്‍റ് കെ.പി. ബാബു, നസീമ ഖാദർ, ഉഷ അനിൽ, ജോർജ് വടക്കുംകര, പി. കുഞ്ഞികൃഷ്‌ണൻ, ഷഹന രാജീവൻ, കെ.കെ. വിജയൻ എന്നിവർ പ്രസംഗിച്ചു.

സഹകരണ പെൻഷൻ പരിഷ്കരണം ഉടൻ നടപ്പിലാക്കണം: കെപിസിഎസ്പിഎ

കണ്ണൂർ: കേരളത്തിലെ സഹകരണ പെൻഷൻകാരെ തീർത്തും അവഗണിക്കുന്ന സർക്കാർ നിലപാട് തിരുത്തണമെന്നും പെൻഷൻ പരിഹരണത്തിനായി കോടതി നിർദേശപ്രകാരം രൂപീകൃതമായ ജുഡീഷ്യറി കമ്മിറ്റി റിപ്പോർട്ട് ലഭിച്ച് മാസങ്ങൾ കഴിഞ്ഞിട്ടും സർക്കാർ തീരുമാനം നീട്ടിക്കൊണ്ട് പോകുന്നത് പ്രതിഷേധാർഹമാണെന്നും നിർത്തിവച്ച ഡിഎ പുനഃസ്ഥാപിക്കണമെന്നും പ്രൈമറി കോ-ഓപ്പറേറ്റീവ് സർവീസ് പെൻഷനേഴ്സ് അസോസിയേഷൻ (കെപിസിഎസ്പിഎ) ജില്ലാ സമ്മേളനം സർക്കാരിനോട് ആവശ്യപ്പെട്ടു. സമ്മേളനം ഡിസിസി പ്രസിഡന്‍റ് മാർട്ടിൻ ജോർജ് ഉദ്ഘാടനം ചെയ്തു. ജില്ലാ പ്രസിഡന്‍റ് കെ. രവീന്ദ്രൻ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി എൻ. സ്വാമിനാഥൻ മുഖ്യപ്രഭാഷണം നടത്തി. സംസ്ഥാന വൈസ് പ്രസിഡന്‍റ് വി.ആർ. ഭാസ്കരൻ മുതിർന്ന പെൻഷൻകാരെ ആദരിച്ചു. സംസ്ഥാന ഭാരവാഹികളായ എൻ.കെ. രാമകൃഷ്ണൻ, കെ.ഗോവിന്ദൻ, ജോസ് പൂമല, വി. സുന്ദരൻ, കെ. ഹരീന്ദ്രൻ, കൊപ്പൽ പ്രഭാകരൻ, കോഴിക്കോട് ജില്ലാ പ്രസിഡന്‍റ് കെ. ശ്രീകുമാർ, കാസർഗോഡ് ജില്ലാ പ്രസിഡന്‍റ് ചന്ദ്രശേഖരൻ, കെസിഇഎഫിന്‍റെ മുൻ സംസ്ഥാന പ്രസിഡന്‍റുമാരായ പി.കെ. വിനയകുമാർ, എം. രാജു, താലൂക്ക് പ്രസിഡന്‍റ് ചന്ദ്രൻ കാണിച്ചേരി, പി.കെ. ജനാർദനൻ, പി.സി. സ്കറിയ, ഉണ്ണികൃഷ്ണൻ പയ്യന്നൂർ എന്നിവർ പ്രസംഗിച്ചു. പുതിയ ജില്ലാ കമ്മിറ്റി ഭാരവാഹികൾ: കെ. രവീന്ദ്രൻ-പ്രസിഡന്‍റ്, പി.കെ. ജനാർദനൻ-സെക്രട്ടറി, കെ.എം. ശിവദാസൻ-വൈസ് പ്രസിഡന്‍റ്, പി.പി. ബാലൻ-വൈസ് പ്രസിഡന്‍റ്, ഉണ്ണികൃഷ്ണൻ പയ്യന്നൂർ, വി. ബാലകൃഷ്ണൻ ഇരിട്ടി-ജോയിന്‍റ് സെക്രട്ടറിമാർ, പി.സി. സ്കറിയ-ട്രഷറർ എന്നിവരെ തെരഞ്ഞെടുത്തു.‌

ട്രാൻസ്‌ഫോർമർ ഭീഷണി; ചെവികൊടുക്കാതെ അധികൃതർ

ഇരിട്ടി: ആറളം പഞ്ചായത്തിലെ ചെടിക്കുളം ടൗണിലെ അപകടാവസ്ഥയിലുള്ള ട്രാൻസ്ഫോർമർ മാറ്റി സ്ഥാപിക്കണമെന്നാവശ്യം ഇനിയും നടപ്പായില്ല. ജനപ്രതിനിധികളും നാട്ടുകാരും നിരവധി പരാതി നൽകിയിട്ടും അധികൃതർ ഗൗനിക്കുന്നില്ല. റോഡ് നവീകരിച്ചതോടെ ടൗണിൽ ഒരു തിട്ടയിലാണ് ട്രാൻസ്‌ഫോർമർ നിൽക്കുന്നത്. രണ്ട് കടയുടെ വരാന്തയിലേക്ക് സ്റ്റേ വയർ വലിച്ചുകെട്ടിയ നിലയിലാണ്. ഇതിനു സമീപത്തായി പ്രവർത്തിക്കുന്ന സ്കൂളിൽ നിന്ന് വിദ്യാർഥികൾ സഞ്ചരിക്കുന്നത് ട്രാൻസ്‌ഫോർമറിന് സമീപത്തുകൂടെയാണ്. സ്ഥലപരിമിതിയുള്ള ടൗണിൽ ഓട്ടോകൾ പാർക്ക് ചെയ്യുന്നത് ട്രാൻസ്‌ഫോർമറിന് കീഴെയാണ്. സമീപത്തു തന്നെ ട്രാൻസ്‌ഫോർമർ മാറ്റി സ്ഥാപിക്കാൻ സൗകര്യപ്രദമായ സ്ഥലം ലഭ്യമാണ്. മാറ്റി സ്ഥാപിക്കുന്നതിനുള്ള പണം ആരുനൽകും എന്നതാണ് കെഎസ്ഇബിയുടെ ചോദ്യം. ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധൻ രേഖാമൂലം പരാതി നൽകുകയും താലൂക്ക് വികസന സമിതി യോഗത്തിൽ ഉന്നയിക്കുകയും ചെയ്തിരുന്നു. ഇതൊന്നും തങ്ങൾക്ക് ബാധിക്കില്ല എന്ന നിലപാടിൽ ഉറക്കം നടിക്കുകയാണ് കെഎസ്ഇബി. പാലത്തുംകടവ് എൽപി സ്‌കൂളിന് മുന്നിൽ തുറന്നിട്ട ട്രാൻസ്‌ഫോർമർ അയ്യൻകുന്നിലെ പാലത്തുംകടവ് എൽപി സ്‌കൂളിന് മുന്നിൽ യാതൊരു സുരക്ഷയും ഇല്ലാതെ തുറന്നിട്ട ട്രാൻസ്ഫോർമർ ഉയർന്ന അപകടഭീഷണി അധികൃതർ കണ്ടില്ലെന്ന് നടിക്കുന്നു. സ്‌കൂളിൽ നിന്ന് 50 മീറ്റർ ദൂരത്തിലാണ് ട്രാൻസ്ഫോർമർ സ്ഥിതി ചെയ്യുന്നത്. കഴിഞ്ഞദിവസം വിദ്യാർഥികൾ ട്രാൻസ് ഫോമറിനുളളിലേക്ക് പ്രവേശിക്കുന്നത് ശ്രദ്ധയിൽപ്പെട്ടതോടെ റിബർ കെട്ടി വേലിയുണ്ടാക്കിയിരിക്കുകയാണ്. ട്രാൻസ്ഫോമറിന് ചുറ്റും സുരക്ഷാ വേലി സ്ഥാപിക്കണമെന്നാണ് നിയമം. അപകടാവസ്ഥ ചൂണ്ടിക്കാണിച്ച് നാട്ടുകാർ നിരവധിതവണ പരാതി നൽകിയിട്ടും യാതൊരു നടപടിയും സ്വീകരിക്കുന്നില്ല. അപകടംസംഭവിച്ച ശേഷം മാത്രമേ ഉണരുകയുള്ളൂ എന്നതാണ് അധികൃതരുടെ നിലപാടെന്ന് വാർഡ് അംഗം ബിജോയി പ്ലാത്തോട്ട പറഞ്ഞു. പേരട്ടയിൽ പള്ളിക്കും സ്കൂളിനും സമീപം ട്രാൻസ്‌ഫോർമർ പേരട്ട കല്ലംതോട് പള്ളിക്കും സ്കൂളിനും സമീപത്തെ വളവിൽ സ്ഥാപിച്ചിരിക്കുന്ന ട്രാൻസ്‌ഫോർമർ വാഹനങ്ങൾക്കും യാത്രക്കാർക്കും ഭീഷണിയാകുന്നു. അടിയന്തരമായി മാറ്റിസ്ഥാപിക്കണം എന്നാണ് നാട്ടുകാരുടെ ആവശ്യം. ഇതു സംബന്ധിച്ച് അധികൃതർക്ക് പരാതി നൽകിയിരിക്കുകയാണ് പഞ്ചായത്ത് അംഗം കൂടിയായ ബിജു വെങ്ങലപള്ളി. ട്രാൻസ്ഫോർമറുകൾ വീതികുറഞ്ഞ വഴിയുടെ ഓരങ്ങളിൽ സ്ഥാപിക്കുന്നത് ഭീഷണിയാകുന്നതായി അവർ പറഞ്ഞു. ട്രാൻസ്ഫോർമറുകൾ വഴികളിൽ സ്ഥാപിക്കാതെ സ്വന്തം സ്ഥലത്ത് സ്ഥാപിക്കാനുള്ള നടപടി കെഎസ്ഇബി സ്വീകരിക്കണമെന്ന് അദ്ദേഹം ആവശ്യപ്പെട്ടു. പേരട്ടയിൽ ഇത്തരത്തിൽ നിരവധിസ്ഥലത്ത് വളവുകളിൽ കെഎസ്ഇബി സ്ഥപിച്ചിരിക്കുന്ന ട്രാൻസ്ഫോർമറുകൾ ഭീഷണി തീർക്കുന്നതായും ഇത് മാറ്റനായുള്ള നടപടി സ്വീകരിക്കണമെന്നുമാണ് നാട്ടുകാരുടെ ആവശ്യം.

വാഹനാപകടത്തിൽ പരിക്കേറ്റ് ചികിത്സയിലായിരുന്ന ഗൃഹനാഥ മരിച്ചു

കണ്ണൂർ: താണയിലുണ്ടായ വാഹനാപകടത്തിൽ പരിക്കേറ്റ് ചികിത്സയിലായിരുന്ന ഗൃഹനാഥ മരിച്ചു. തിലാനൂർ ശിശുമന്ദിരം ബസ് സ്റ്റോപ്പിന് സമീപം പി.പി. ശകുന്തള (60) യാണ് മരിച്ചത്. ശനിയാഴ്ച വൈകുന്നേരം 5.30 ഓടെ താണയ്ക്ക് സമീപം വച്ച് അജ്ഞാത വാഹനം ഇടിക്കുകയായിരുന്നു. ചാലയിലെ സ്വകാര്യആശുപത്രിയിൽ ചികിത്സയിലായിരുന്ന ശകുന്തള ഇന്നലെ ഉച്ചയോടെ മരിച്ചു. വാഹനം കണ്ടെത്താൻ പോലീസ് സിസിടിവികൾ പരിശോധിച്ചുവരികയാണ്. ടുബാക്കോ യൂണിയൻ പ്രവർത്തകയും സിഐടിയു കണ്ണൂർ ഏരിയ ജോയിന്‍റ് സെക്രട്ടറിയുമാണ്. ഓട്ടോമൊബൈൽ സഹകരണ സംഘത്തിൽ ഇപ്പോൾ താത്കാലികമായി ജോലി ചെയ്തുവരികയായിരുന്നു. ഭർത്താവ്: പി.പി. മോഹനൻ (വ്യാപാരി). മകൻ: ഷമില്‍ സഹോദരൻ: പരേതനായ കുഞ്ഞിക്കണ്ണൻ. സംസ്കാരം ഇന്ന് രണ്ടിന് പയ്യാമ്പലത്ത് നടക്കും.

ഹൃദയാരാം സിൽവർ ജൂബിലി ആഘോഷത്തിന് സമാപനം

കണ്ണൂർ: തിരുഹൃദയ സന്യാസിനി സമൂഹത്തിന്‍റെ കീഴിലുള്ള ഹൃദയാരാം ഗ്രൂപ്പ് ഓഫ് മെന്‍റൽ ഹെൽത്ത് ഇൻസ്റ്റിറ്റ്യൂഷൻസ് സിൽവർ ജൂബിലി ആഘോഷങ്ങൾക്ക് പ്രൗഢമായ സമാപനം. ധർമശാല ലക്സോട്ടിക്ക ഇന്‍റർനാഷണൽ കൺവൻഷൻ സെന്‍ററിൽ നടന്ന സമാപന ആഘോഷം മന്ത്രി കടന്നപ്പള്ളി രാമചന്ദ്രൻ വിളക്കുകൊളുത്തി ഉദ്ഘാടനം ചെയ്തു. സമർപ്പണ ബോധം സമൂഹത്തിന്‍റെ ആത്മഗീതമായി മാറിയാൽ നാട് രക്ഷപ്പെടുമെന്ന് മന്ത്രി ഉദ്ഘാടന പ്രസംഗത്തിൽ പറഞ്ഞു. മറ്റുള്ളവരുടെ വേദനയും ദുഃഖവും തന്‍റേതു കൂടിയാണെന്ന് ഹൃദയമുള്ളവർക്കു മാത്രമേ കാണാൻ കഴിയൂ. ഹൃദയാരാം ഇതിന് ഉത്തമമാതൃകയാണ്. പദവിയോ, ജാതിയോ, മതമോ നോക്കാതെ ഏത് വിഭാഗത്തിൽപ്പെട്ടവരുടെയും പ്രശ്നങ്ങൾ പരിഹരിക്കാൻ ഹൃദയാരാം ആത്മാർഥമായി ഇടപെട്ടു. ഹൃദയശുദ്ധിയുടെ ആത്മരാഗമാണ് അവിടെ കാണാൻ കഴിഞ്ഞതെന്നും മന്ത്രി പറഞ്ഞു. തലശേരി ആർച്ച്ബിഷപ് മാർ ജോസഫ് പാംപ്ലാനി അധ്യക്ഷത വഹിച്ചു. കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിൽ ജൂബിലി സുവനീർ പ്രകാശനം ചെയ്തു. ഹൃദയംകൊണ്ടുള്ള കേൾവി ഈ നാടിന് അനുഗ്രഹമായി മാറട്ടെയെന്ന് പ്രകാശനം നിർവഹിച്ച് ബിഷപ് ആശംസിച്ചു. കണ്ണൂർ രൂപത സഹായമെത്രാൻ ഡോ. ഡെന്നിസ് കുറുപ്പശേരി അനുഗ്രഹപ്രഭാഷണം നടത്തി. കണ്ണൂരിലേയും സമീപ പ്രദേശങ്ങളിലേയും ജനങ്ങളുടെ ഹൃദയത്തിൽ പരിമളവും ശോഭയും പകർന്നു നല്കാൻ ഹൃദയാരാമിന് ഇതിനകം സാധിച്ചുവെന്ന് ബിഷപ് പറഞ്ഞു. എസ്എച്ച് കോൺഗ്രിഗേഷൻ സുപ്പീരിയർ ജനറൽ സിസ്റ്റർ ഉഷ മരിയ ആമുഖപ്രഭാഷണം നടത്തി. ഹൃദയാരാം കടന്നുവന്ന വഴികളെക്കുറിച്ച് ഹൃദയാരാം ഗ്രൂപ്പ് ഓഫ് ഇൻസ്റ്റിറ്റ്യൂഷന്‍സ് അസിസ്റ്റന്‍റ് ഡയറക്ടർ ഡോ. സിസ്റ്റർ ജാൻസി പോൾ എസ്എച്ച് വിശദീകരിച്ചു. ജൂബിലിയോട‌‌‌‌‌നുബന്ധിച്ച് ആരംഭിക്കുന്ന പുതിയ സംരംഭങ്ങളുടെ ഉദ്ഘാടനവും നടന്നു. പിജിഡിഎൽഡിയുടെ ഉദ്ഘാടനം കണ്ണൂർ സർവകലാശാല വൈസ് ചാൻസലർ കെ.കെ. സാജുവും ലൈഫ് എലൈക്സർ കെ.വി. സുമേഷ് എംഎൽഎയും വിംഗ്സ് കണ്ണൂർ യൂണിവേഴ്സിറ്റി രജിസ്ട്രാർ ഡോ.ജോബി കെ. ജോസും ഉദ്ഘാടനം ചെയ്തു. ഹൃദയാരാം ഫൗണ്ടർ ഡയറക്ടറും എസ്എച്ച് കോൺഗ്രിഗേഷൻ പ്രൊവിൻഷ്യൽ സുപ്പീരിയറുമായ സിസ്റ്റർ ഡോ. ട്രീസ പാലയ്ക്കൽ എസ്എച്ചിനെ ചടങ്ങിൽ ആദരിച്ചു. തലശേരി അതിരൂപത വികാരി ജനറാൾ മോൺ. സെബാസ്റ്റ്യൻ പാലാക്കുഴി, കണ്ണൂർ രൂപത വികാരി ജനറാൾ മോൺ. ക്ലാരൻസ് പാലിയത്ത്, ഡോ. കെ.വി. ലതീഷ്, തളിപ്പറന്പ് സെന്‍റ് മേരീസ് ഫൊറോന വികാരി ഫാ. മാത്യു ആശാരിപറന്പിൽ, ഡോ. സിസ്റ്റർ റിൻസി അഗസ്റ്റിൻ എസ്എച്ച്, സിസ്റ്റർ ഡോ. ജോൺസി മരിയ എസ്എച്ച്, കണ്ണൂർ ഹോളി ഫാമിലി പള്ളി വികാരി ഫാ. മാത്യു നരിക്കുഴി, സിസ്റ്റർ റെജി ജേക്കബ് എസ്എച്ച്, ദീപിക കണ്ണൂർ റസിഡന്‍റ് മാനേജർ ഫാ. ജോബിൻ വലിയപറന്പിൽ, സിസ്റ്റർ ഡോ. റിൻസി അഗസ്റ്റിൻ, സി.എ. അബ്ദുൾ ഗഫൂർ എന്നിവർ പ്രസംഗിച്ചു. തുടർന്ന് കലാപരിപാടികളും അരങ്ങേറി. സോഷ്യൽമീഡിയ രോഗികളുടെ മാനസികാരോഗ്യം വീണ്ടെടുക്കണം: മാർ ജോസഫ് പാംപ്ലാനി വായിൽ തോന്നുന്നതെന്തും വിളിച്ചുപറയുകയും തങ്ങളുടെ വികാര വിക്ഷോഭങ്ങൾ പങ്കുവയ്ക്കുകയും ചെയ്യുന്നവർ സോഷ്യൽ മീഡിയയിൽ അഭിരമിക്കുകയാണെന്ന് തലശേരി ആർച്ച്ബിഷപ് മാർ ജോസഫ് പാംപ്ലാനി. ഇത്തരം സോഷ്യൽ മീഡിയ രോഗികളുടെ മാനസികാരോഗ്യം വീണ്ടെടുക്കുക കാലഘട്ടത്തിന്‍റെ അനിവാര്യതയാണെന്നും ആർച്ച്ബിഷപ് പറഞ്ഞു. ധർമശാല ലക്സോട്ടിക്ക ഇന്‍റർനാഷണൽ കൺവൻഷൻ സെന്‍ററിൽ നടന്ന ഹൃദയാരാം സിൽവർ ജൂബിലി സമാപന സമ്മേളനത്തിൽ അധ്യക്ഷത വഹിച്ചു പ്രസംഗിക്കുകയായിരുന്നു ആർച്ച്ബിഷപ്. മാനസികാരോഗ്യത്തിന് പ്രാധാന്യം നല്കേണ്ടത് ഏറ്റവും പ്രധാനമാണ്. തിരുഹൃദയ സന്യാസിനി സമൂഹത്തെ പോലെ മാനസികാരോഗ്യം വീണ്ടെടുക്കുന്നതിന് സമൂഹത്തിൽ ഇത്രയധികം കഠിനപ്രയത്നം ചെയ്യുന്ന മറ്റൊരു സന്യാസിനി വിഭാഗമില്ല. ജാതി-മത ഭേദമന്യേ ഏത് വിഭാഗത്തിൽപ്പെട്ടവർക്കും സ്നേഹവും സാന്ത്വനവും നല്കി അവരെ നല്ല ജീവിതത്തിലേക്ക് തിരിച്ചുകൊണ്ടുവരാൻ ഇവർക്ക് സാധിച്ചു. ചെറിയ പ്രതിസന്ധിയിൽ പോലും സമൂഹം തളർന്നുപോകുന്ന സാഹചര്യത്തിൽ ഹൃദയാരാം ചെയ്യുന്ന തരത്തിലുള്ള ഇടപെടൽ ആവശ്യമാണെന്നും ആർച്ച്ബിഷപ് പറഞ്ഞു.

കുടിയേറ്റ പൈതൃകം പകർന്ന് ദീപിക സെമിനാർ

കുടിയേറ്റം ചരിത്രം മാറ്റിമറിച്ചു: മാർ ജോസഫ് പാംപ്ലാനി കുടിയേറ്റം എന്നത് സാമൂഹിക പ്രതിഭാസമാണെന്നും കേരളത്തിന്‍റെ ചരിത്രത്തെ മാറ്റിമറിച്ചത് കുടിയേറ്റമാണെന്നും സെമിനാറിന്‍റെ സമാപന സമ്മേളനം ഉദ്ഘാടനം ചെയ്ത തലശേരി ആർച്ച്ബിഷപ് മാർ ജോസഫ് പാംപ്ലാനി പറഞ്ഞു. കുടിയേറ്റ ജനത ഒരിക്കലും കൈയേറ്റക്കാരല്ലെന്ന് ആത്മാഭിമാനത്തോടെ പറയാനാകും. കാടുകൾ വെട്ടിത്തെളിച്ച് മണ്ണിൽ കനകം വിളയിച്ചു. കേരളത്തിന്‍റെ സന്പദ് വ്യവസ്ഥയുടെ 30 ശതമാനം കുടിയേറ്റ ഭൂമിയിൽ നിന്നാണ്. വന്യമൃഗങ്ങളോടും മലന്പനിയോടും പോരാടിയ അതിജീവനമായിരുന്നു കുടിയേറ്റക്കാരുടേത്. മലബാറിന്‍റെ മലമടക്കുകളിൽ റോഡുകൾ, പാലങ്ങൾ എന്നിവ നിർമിച്ചു. സംഘടിതമായിട്ടായിരുന്നു അവർ ഓരോന്നും നിർമിച്ചത്. ഏത് അന്യായത്തെയും എതിർക്കാർ കുടിയേറ്റ ജനതയുണ്ടാകും. വർഗീയതയുടെ പേരിൽ ഇന്ത്യ മുഴുവൻ ഭിന്നിച്ചാലും മലയോര ജനത ഭിന്നിക്കില്ല. കുടിയേറ്റക്കാലത്ത് ഒറ്റക്കെട്ടായ മലയോര ജനത ഇന്നും ഒറ്റക്കെട്ടാണെന്നും മാർ ജോസഫ് പാംപ്ലാനി പറഞ്ഞു. കുടിയേറ്റക്കാർ പ്രതീക്ഷയുടെ മിഷനറിമാർ: മാർ ജോസഫ് പണ്ടാരശേരിൽ നാടിന്‍റെ വികസനത്തിന് ശ്രദ്ധേയമായ നേട്ടങ്ങൾ നല്കിയത് കുടിയേറ്റക്കാരായിരുന്നുവെന്നും അവർ പ്രതീക്ഷയുടെ മിഷനറിമാരായിരുന്നുവെന്നും കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിൽ. കുടിയേറ്റ ചരിത്രസെമിനാർ ഉദ്ഘാടനം ചെയ്തു പ്രസംഗിക്കുകയായിരുന്നു ബിഷപ്.

കുടിയേറ്റക്കാർ കടന്നുവന്ന ചരിത്രവഴികൾ പുതുതലമുറ ഓർക്കേണ്ടതാണ്. എന്നാൽ, പുതിയതലമുറ വിദേശങ്ങളിലേക്ക് കുടിയേറുന്ന പ്രവണതയാണ് കണ്ടുവരുന്നത്. യുവത്വം ഒളിച്ചോടി പോകുവാൻ പാടില്ല. മലബാറിൽ ഇനിയും വികസനസാധ്യതകളുണ്ട്. അതിനാൽ, ഇവിടം ഉപേക്ഷിച്ച് പോകരുത്. നിങ്ങളും കഠിനമായി അധ്വാനിക്കണം. കൃഷി നിലനിൽക്കണം.ടൂറിസം, മെഡിക്കൽ ടൂറിസം, കടൽ സന്പത്ത് തുടങ്ങിയവയിലെല്ലാം കേരളത്തിൽ അനന്ത സാധ്യതകളാണുള്ളത്. കൃഷി വ്യവസായമായി മാറണം. ചെറുപ്പക്കാർ കൃഷിയിലേക്ക് വരണം. സാങ്കേതിക വിദ്യകളും ഐടി സാധ്യതകളും കൃഷിയിൽ പരീക്ഷിക്കണം. പണം മുടക്കി കൃഷി ചെയ്യണം. കൃഷിയിൽനിന്ന് ലഭിക്കുന്ന പണം മറ്റ് മേഖലകളിൽ നിക്ഷേപിക്കണം. അങ്ങനെ, പൂർവ പിതാക്കന്മാരെ പോലെ നിങ്ങളും പ്രതീക്ഷയുടെ മിഷനറിമാരായി മാറണം. കുടിയേറ്റത്തിന്‍റെ സ്ഥാനം മഹത്തരം: സണ്ണി ജോസഫ് എംഎൽഎ ഇന്നത്തെ കേരള ചരിത്രത്തിന്‍റെ സർവമേഖലകളിലും കുടിയേറ്റത്തിന്‍റെ സ്ഥാനം വളരെ മഹത്തരമാണ്. പട്ടിണി മാറ്റാൻ മികച്ച കാർഷിക അവസരങ്ങൾക്കായി പുതിയ മേച്ചിൽപ്പുറം തേടിയാണ് മലബാറിലും മലയോരത്തും കുടിയേറ്റജനത എത്തിയത്. മലമ്പാമ്പിനോടും മലമ്പനിയോടും മല്ലടിച്ചാണ് മലയോരത്തെ മലർവാടിയാക്കിയത്.

അതിന് ത്യാഗത്തിന്‍റെ, കൂട്ടായ്മകളുടെ, ലക്ഷ്യബോധത്തിന്‍റെ ചരിത്ര യാഥാർഥ്യങ്ങൾ ഒട്ടനവധിയാണ്. ഇന്നത്തെ വികസനത്തിന്‍റെ താങ്ങും തണലും കുടിയേറ്റ ജനതയുടെ വിയർപ്പിന്‍റെയും അനുഭവത്തിന്‍റെയും നേർസാക്ഷ്യമാണ് എന്ന കാര്യത്തിൽ ആർക്കും വിസ്മരിക്കാനാവില്ല. കെപിസിസി പ്രസിഡന്‍റായതിന് പിന്നിലെ കരുത്തും വഴികാട്ടിയും കുടിയേറ്റത്തിന്‍റെ മകനായ തനിക്കും അഭിമാനിക്കാനാകും. കുടിയേറ്റ പൈതൃകം കുടുംബങ്ങളും കുട്ടികളും: റവ. ഡോ. ഫിലിപ്പ് കവിയിൽ പൈതൃകമെന്നത് തലമുറകളിലൂടെ ലഭിച്ച സമ്പത്താണ്. അത് സ്വത്ത്, സംസ്കാരം, വിശ്വാസം ഏതുമാകാം. കുടിയേറ്റത്തിന്‍റെ യഥാർഥ പൈതൃകം കുടുംബങ്ങളും കുട്ടികളുമാണ്. പണ്ട് ഒരു കുടുംബത്തിൽ 12 വരെ കുട്ടികളാണ്. ഇന്നത് ഒന്ന് അല്ലെങ്കിൽ രണ്ട്. ചിലപ്പോൾ മൂന്നുവരെ അപൂർവം. 12 പേർ ഉള്ളിടത്ത് പട്ടിണിയുണ്ട്. സമ്പത്തില്ല എങ്കിലും അധ്വാനിക്കും. എന്നാൽ, ഇന്നത്തെ തലമുറ അധ്വാനിക്കുന്നുണ്ടോ എന്ന് ആത്മപരിശോധന നടത്താൻ കുടിയേറ്റസമൂഹം തയാറാകണം. അന്ന് ഒന്നിന്‍റെയും വേലിക്കെട്ടുകളോ വേർതിരിവുകളോ ഇല്ലായിരുന്നു. റോഡ് വെട്ടാൻ പോലും കൂട്ടായ്മ ഉണ്ടായിരുന്നു.മനുഷ്യനെ മനുഷ്യനായി കാണാൻ കഴിഞ്ഞതാണ് മലബാർ കുടിയേറ്റത്തിന്‍റെ പ്രത്യേകതയും മൂല്യവും. പാരന്പര്യം പുതുതലമുറ ഏറ്റെടുക്കണം: സജീവ് ജോസഫ് എംഎൽഎ കുടിയേറ്റത്തിൽ നിന്ന് കുടിയിറക്കത്തിന്‍റെ കാലഘട്ടത്തിലാണ് നാം ജീവിക്കുന്നത്. മലബാർ കുടിയേറ്റത്തിന്‍റെ നൂറ് വർഷത്തെ മാറ്റം, സ്വാധീനം, വെല്ലുവിളികൾ നിറഞ്ഞ ചരിത്രവഴികൾ എന്നിവ ചർച്ചചെയ്യുമ്പോൾ അത് വരും തലമുറയ്ക്ക് പകരാനാകണം. നാടിന്‍റെ ഇന്നത്തെ മാറ്റം കുടിയേറ്റത്തിന്‍റെ യഥാർഥ വിജയം എന്നു പറയുമ്പോൾ തന്നെ കുടിയേറ്റക്കാരെ സ്വീകരിച്ചവരെയും ഒപ്പം നിന്നവരെയും വിസ്മരിക്കരുത്. പൈതൃകവും പാരമ്പര്യവും പുതിയ തലമുറ കൂടി ഏറ്റെടുത്താൽ മാത്രമേ ഇത്തരം സെമിനാറുകൾ അർഥപൂർണമാകുകയുള്ളൂ. മാർ വള്ളോപ്പിള്ളി കുടിയേറ്റക്കാരുടെ കിരീടം വയ്ക്കാത്ത രാജാവ് കുടിയേറ്റ കർഷകരെ ഒന്നിപ്പിക്കുക എന്ന ദൗത്യമായിരുന്നു മാർ സെബാസ്റ്റ്യൻ വള്ളോപ്പിള്ളിയുടേത്. കുടിയേറ്റക്കാരുടെ ആവലാതികൾ കേട്ടു. പരിഹരിക്കാൻ പറ്റുന്നത് പരിഹരിച്ചു. കുടിയേറ്റക്കാരുടെ ഇടയിൽ ആത്മവിശ്വാസം വളർത്തിയതാണ് പിതാവിന്‍റെ ഏറ്റവും വലിയ സംഭാവന. അവർക്ക് നേതാവും മാർഗദർശിയുമായിരുന്നു പിതാവ്. കുടിയേറ്റ മേഖലകളിലൂടെ നിരന്തരമായി യാത്ര ചെയ്തു.

ആഢംബരവും ധൂർത്തും ഒഴിവാക്കി ജീവിച്ച പിതാവ് എല്ലാ മതങ്ങൾക്കും സ്വീകാര്യനായിരുന്നു. കുടിയേറ്റക്കാരുടെ കിരീടം വയ്ക്കാത്ത രാജാവെന്ന് പിതാവിനെ വിശേഷിപ്പിക്കാം. കുടിയിറക്ക് നേരിടേണ്ടി വന്നപ്പോഴും പ്രകൃതി ദുരിതങ്ങൾ വന്നപ്പോഴും കുടിയേറ്റകാർക്കൊപ്പം പിതാവും ഉണ്ടായിരുന്നു. ക്നാനായക്കാർ നടത്തിയത് യഥാർഥ സംഘടിത കുടിയേറ്റം യഥാർഥ സംഘടിത കുടിയേറ്റമാണ് ക്നാനായക്കാർ മലബാറിൽ നടത്തിയത്. കുടിയേറ്റ ചരിത്രത്തെ വളച്ചൊടിക്കാൻ ഒളിഞ്ഞും തെളിഞ്ഞും പല കോണുകളിൽ നിന്നും ശ്രമമുണ്ടായി. പക്ഷേ, രാജപുരം, പനത്തടി, മടമ്പം, റാണിപുരം പ്രദേശങ്ങളിലെ കുടിയേറ്റം ആർക്കും തള്ളിപ്പറയാനാവാത്ത വിജയഗാഥകളാണ്. ഇക്കാര്യത്തിൽ ഓരോ തലമുറയ്ക്കും അവബോധം നൽകാൻ അനിവാര്യമായ കാലഘട്ടമാണ് കടന്നുപോകുന്നത്. എല്ലാ കുടിയേറ്റങ്ങളും കാലാവസ്ഥയും ഭൂപ്രകൃതിയും വന്യജീവികളുടെ ആക്രമണം, രോഗങ്ങളും ആരോഗ്യപ്രശ്നങ്ങളും,ഗതാഗത സൗകര്യങ്ങളുടെ അഭാവം, സാമ്പത്തിക ഞെരുക്കം തുടങ്ങി നിരവധി വിഷയങ്ങളിലൂടെയാണ് കടന്നുപോയിട്ടുള്ളത്. സംഘടിത കുടിയേറ്റത്തിനൊപ്പം അസംഘടിത കുടിയേറ്റം എവിടെയും ചർച്ചയായി വന്നിട്ടില്ലെന്നതും ശ്രദ്ധിക്കേണ്ടതാണ്. കുടിയേറ്റത്തിന്‍റെ ആകെ തുക കാർഷിക സംസ്കാരം മലബാർ കുടിയേറ്റത്തിന്‍റെ ആകെ തുകയാണ് കാർഷിക സംസ്കാരമെന്ന് സാഹിത്യകാരൻ കൽപ്പറ്റ നാരായണൻ. അതിലൂടെ വന്ന മാറ്റങ്ങളാണ് ഇന്നത്തെ കേരളം. കർഷകരെല്ലാം ഉത്പാദകരാണ്. എന്നാൽ, ഇന്നത്തെ പൊതുസമൂഹം ഉപഭോക്താക്കളാണ്. തേങ്ങയ്ക്ക് വില കിട്ടുമ്പോൾ സന്തോഷിക്കുന്ന കർഷകന്‍റെ കൂടെ നാം നിൽക്കുന്നില്ല. മറിച്ച് പ്രതിഷേധിക്കുന്ന ഉപഭോക്താവിന്‍റെ ഭാഗത്തുനിന്നാണ് നാം ചിന്തിക്കുന്നത്. മണ്ണിൽ സ്വർണം വിളയിക്കാനെത്തി ഉത്പാദകരായി മാറിയതാണ് യഥാർഥ മലബാർ കുടിയേറ്റം. വനം വന്യജീവികൾക്കുള്ളതാണെങ്കിൽ അതിന് സാഹചര്യം ഒരുക്കേണ്ടത് സർക്കാരാണ്. വിദ്യാഭ്യാസ മേഖലയിലെ സംഭാവനകൾ അതുല്യം കാർഷിക മേഖലയോടൊപ്പം വിദ്യാഭ്യാസ മേഖലയിലും കുടിയേറ്റക്കാരുടെ സംഭാവന നിസ്തുലമാണ്. മലബാറിലേക്ക് കുടിയേറി വന്നപ്പോൾ യാതൊരു വിദ്യാഭ്യാസ സൗകര്യങ്ങളും ഇല്ലായിരുന്നു. എന്നാൽ, ആരുടെയും സഹായത്തിന് കാത്തുനിൽക്കാതെ കുടിയേറ്റക്കാർ സ്കൂളുകൾ സ്ഥാപിച്ചു. മാസക്കൂട്ടം, ഉത്പന്ന പിരിവ്, ചിട്ടി, പിടിയരി, വീതപ്പിരിവ് എന്നിവ വഴി സ്കൂളുകൾ പണിയുന്നതിനുള്ള പണം സന്പാദിച്ചു. കൃഷി ചെയ്തു കിട്ടുന്ന വരുമാനവും സ്കൂളുകൾക്കായി വിനിയോഗിച്ചു. സ്കൂളില്ലെങ്കിലും എല്ലാ പള്ളികളും കേന്ദ്രീകരിച്ച് സ്കൂൾ കമ്മിറ്റികളും ഉണ്ടായിരുന്നു. ആദിവാസികളെ ഒരിക്കലും കുടിയേറ്റക്കാർ ചൂഷണം ചെയ്തിരുന്നില്ല. കുടിയേറ്റക്കാർ സ്ഥാപിച്ച സ്കൂളുകളിൽ ആദിവാസികൾക്ക് പ്രവേശനം ഉണ്ടായിരുന്നു. മലബാർ മേഖലയിൽ പല വിദ്യാഭ്യാസ സ്ഥാപനങ്ങൾക്കും തുടക്കമിട്ടത് കുടിയേറ്റക്കാരായിരുന്നു. കൃഷിയിൽ നിന്നുള്ള പിന്മാറ്റം പ്രതിസന്ധി സൃഷ്ടിക്കും തലമുറകളുടെ അഭിലാഷങ്ങളിൽ ഉണ്ടായ മാറ്റങ്ങളാണ് കുടിയേറ്റ ജനത ഇന്ന് അനുഭവിക്കുന്ന പ്രതിസന്ധി. കാർഷികവൃത്തിയെ അവജ്ഞയോടെ കാണുന്ന ഒരു തലമുറയാണ് ഇന്നുള്ളത്. വനാതിർത്തി വ്യാപന നിയമം, പരിസ്ഥിതി ദുർബലനിയമം, വന്യമൃഗശല്യം തുടങ്ങിയവ കർഷകർക്ക് നിസാര പ്രശ്നങ്ങളല്ല. ഗുരുതരമായ പ്രശ്നങ്ങളാണ്. ഉത്തരവാദിത്വപ്പെട്ടവർ ഇത് കണക്കിലെടുക്കുന്നില്ല. വികസനപദ്ധതികൾ എന്തുവന്നാലും അത് ബാധിക്കുന്നത് കർഷകരെയാണ്. കുടിയിറക്കമല്ല, പുതിയ തലമുറയുടെ കൃഷിയിൽ നിന്നുള്ള വഴിമാറ്റമാണ് സമകാലിക പ്രതിസന്ധി. ജനസംഖ്യയുടെ കുറവും വലിയൊരു പ്രതിസന്ധിയാണ്. കുടിയേറ്റക്കാർ യഥാർഥ കർഷകർ മലബാറിലെ കുടിയേറ്റക്കാരെല്ലാം കാട് നശിപ്പിച്ച പരിസ്ഥിതി നാശകരാണെന്ന അടിസ്ഥാനരഹിതമായ വാദം ചരിത്രകാലം മുതലേ കേൾക്കുന്നതാണ്. കുടിയേറ്റക്കാർ കൃഷി ചെയ്യാൻ വന്നവരാണ്. കൃഷിയിലൂടെ പട്ടിണി മാറ്റുക എന്നതു മാത്രമായിരുന്നു അവരുടെ ലക്ഷ്യം. യഥാർഥത്തിൽ മലബാറിൽ കാടിന്‍റെ പച്ചപ്പ് ഇല്ലാതാക്കിയത് കുടിയേറ്റക്കാരല്ല. നാട് അടക്കിവാണവരും കാട് ഭരിച്ചവരുമാണ് കാസർഗോട്ടും ആറളത്തുമടക്കം വികസനത്തിന്‍റെ പേരിൽ മരങ്ങൾ വെട്ടി വിറ്റത്. കൂപ്പ് ലേലം കഴിഞ്ഞ് അടിക്കാടുകൾ മാത്രമുള്ള ഭൂമിയാണ് കുടിയേറ്റക്കാർക്ക് ലഭിച്ചത്. കാലഘട്ടത്തെ തെറ്റിദ്ധരിപ്പിച്ച് സർക്കാർ നടത്തിക്കൊണ്ടിരിക്കുന്ന പിൻവാതിൽ കുടിയേറ്റമാണ് അന്ന് നടത്തിയത്. ഗാഡ്ഗിൽ അടക്കമുള്ള കമ്മിറ്റികൾ ഇന്നും കുടിയേറ്റ കർഷകരുടെ കൃഷിരീതികൾ പഠനവിധേയമാക്കിയിട്ടില്ല.

കിടപ്പുരോഗികൾക്ക് സാന്ത്വന സ്പർശവുമായി മാസ്‌

കണ്ണൂർ: കോട്ടയം അതിരൂപതയുടെ സാമൂഹിക സേവന വിഭാഗമായ മലബാർ സോഷ്യൽ സർവീസ് സൊസൈറ്റി അതിരൂപതയിലെ വിവിധ ഇടവകകളിൽ നിന്ന് തെരഞ്ഞെടുത്ത നിർധനരായ കിടപ്പുരോഗികളുടെ ചികിത്സയുമായി ബന്ധപ്പെട്ട് "കാരുണ്യസ്പർശം' എന്ന പേരിൽ നടപ്പിലാക്കുന്ന ചികിത്സാ സഹായപദ്ധതി ഉദ്ഘാടനം ചെയ്തു. കണ്ണൂർ ശ്രീപുരം ബറുമറിയം പാസ്റ്ററൽ സെന്‍ററിൽ നടന്ന ചടങ്ങിൽ കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിൽ ഉദ്ഘാടനം നിർവഹിച്ചു. കണ്ണൂർ ശ്രീപുരം ബറുമറിയം പാസ്റ്ററൽ സെന്‍റർ ഡയറക്‌ടർ ഫാ. ജോയി കട്ടിയാങ്കൽ അധ്യക്ഷത വഹിച്ചു. മലബാർ സോഷ്യൽ സർവീസ് സൊസൈറ്റി സെക്രട്ടറി ഫാ. സിബിൻ കൂട്ടകല്ലുങ്കൽ പദ്ധതി വിശദീകരണം നടത്തി. പ്രോജക്‌ട് ഓഫീസർമാരായ ഷാൻലി തോമസ്, പി.പി. ഷീജ എന്നിവർ പ്രസംഗിച്ചു. പദ്ധതി പ്രകാരം 40 പേർക്ക് പ്രതിമാസം 1,000 രൂപ വീതം നൽകും.

തലശേരിയിൽ ഇന്നലെയും ബസ് ഓടിയില്ല

തലശേരി: പെരിങ്ങത്തൂരിൽ ബസ് കണ്ടക്ടർക്ക് മർദനമേറ്റതിനെ തുടർന്ന് ബസ് തൊഴിലാളികൾ നടത്തുന്ന സമരം ഒത്തുതീർപ്പാക്കി ഇന്നലെ മുതൽ ബസുകൾ സർവീസ് നടത്തുമെന്ന് ഉടമകളും പോലീസും ട്രേഡ് യൂണിയൻ നേതാക്കളും അറിയിച്ചിട്ടും തലശേരിയിൽ ഇന്നലെയും ബസുകൾ സർവീസ് നടത്തിയില്ല. ജനങ്ങളെ ബുദ്ധിമുട്ടിക്കുന്ന സമരം തുടർന്നാൽ സമരം നടത്തുന്ന ജീവനക്കാരെ തെരുവിൽ തടയുമെന്നും ഇന്ന് മുതൽ സർവീസ് നടത്താത്ത ബസുകളെ നിരത്തിലിറക്കാൻ അനുവദിക്കില്ലെന്നും ഡിവൈഎഫ്ഐ മുന്നറിയിപ്പ് നൽകി. ഇക്കാര്യം വിശദീകരിച്ചുള്ള പോസ്റ്ററുകളും നഗരത്തിൽ ഡിവൈഎഫ്ഐ പതിച്ചിട്ടുണ്ട്. ജനങ്ങളെ ദുരിതത്തിലാക്കുന്ന ബസ് ജീവനക്കാരുടെ സമരത്തിനെതിരേ ഡിവൈഎഫ്ഐ നഗരത്തിൽ പ്രകടനവും നടത്തി. കഴിഞ്ഞദിവസം തലശേരി എഎസ്പി ഓഫീസിൽ നടന്ന ചർച്ചയെ തുടർന്നാണ് സമരം നിർത്തിവയ്ക്കാൻ ധാരണയായെന്ന് യൂണിയൻ നേതാക്കളും പോലീസും വെള്ളിയാഴ്ചയായിരുന്നു അറിയിച്ചത്.എന്നാൽ മുഖ്യപ്രതികളെ അറസ്റ്റ് ചെയ്യുന്നതുവരെ സമരം തുടരുമെന്ന പ്രഖ്യാപനവുമായി ഒരുവിഭാഗം ബസ് തൊഴിലാളികൾ രംഗത്തെത്തിയതാണ് ബസ് സർവീസുകൾ ഇന്നലെയും തടസപ്പെടാൻ കാരണമായത്. ചില റൂട്ടുകളിൽ സർവീസ് നടത്താൻ ഇന്നലെ ബസുകൾ എത്തിയിരുന്നെങ്കിലും സമരാനുകൂലികൾ തടയുകയായിരുന്നു. അരാജക സമരങ്ങളോട് യോജിപ്പില്ല: മോട്ടോർ തൊഴിലാളി യൂണിയൻ ബസ് തൊഴിലാളികളെന്ന് അവകാശപ്പെട്ട് അരാജകസംഘങ്ങൾ നടത്തുന്ന മിന്നൽ സമരങ്ങളോട് യോജിക്കാനാകില്ലെന്ന് മോട്ടോർതൊഴിലാളി യൂണിയൻ ജില്ലാ പ്രസിഡന്‍റ് കാരായി രാജൻ പ്രസ്താവനയിൽ പറഞ്ഞു. കണ്ടക്ടറെ മർദിച്ചതിനെതിരെ അതിശക്തമായ പ്രതികരണമാണ് സംയുക്ത ട്രേഡ് യൂണിയന്‍റെ നേതൃത്വത്തിൽ തൊഴിലാളികൾ നടത്തിയത്. ജാമ്യമില്ലാവകുപ്പ് പ്രകാരം പോലീസ് കേസെടുക്കുകയും രണ്ടുപേരെ അറസ്റ്റു ചെയ്ത് ജയിലിലടക്കുകയും ചെയ്തു. രണ്ടു ദിവസത്തിനകം മറ്റു പ്രതികളെയും പിടിക്കുമെന്ന് ചൊക്ലി പോലീസ് ഉറപ്പ് നൽകിയിട്ടുമുണ്ട്. ഈ സാഹചര്യത്തിലാണ് ചൊക്ലി പോലീസ് സ്റ്റേഷനിൽ ചേർന്ന യോഗം സമരം പിൻവലിക്കാൻ തീരുമാനിച്ചത്. ഇതിന് ശേഷവും ഒരു വിഭാഗം വാട്സാപ്പിലൂടെ സമരാഹ്വാനം നടത്തി. തുടർച്ചയായി ദിവസങ്ങളായി ബസ് സർവീസ് നിലയ്ക്കുന്ന അവസ്ഥയുണ്ടായി. വെള്ളിയാഴ്ച എഎസ്പിയുടെ സാന്നിധ്യത്തിൽ ചേർന്ന യോഗ തീരുമാനവും അംഗീകരിക്കാതെ ഒരുവിഭാഗം സമരം തുടരുകയാണ്. ഇത്തരം അരാജകസമരങ്ങളെ ശക്തമായി നേരിടാൻ പോലീസും പൊതുസമൂഹവും തയാറാകണം. ബസ് സർവീസ് അനന്തമായി നിർത്തിയിട്ട് ജനങ്ങളെദ്രോഹിക്കുന്ന അരാജകസംഘങ്ങളുടെ നിലപാടിനോട് യോജിപ്പില്ലെന്നും ബസ് സർവീസ് പുനരാരംഭിച്ച് യാത്രക്കാരുടെ പ്രയാസം പരിഹരിക്കാൻ മുഴുവൻ തൊഴിലാളികളും മുന്നോട്ട് വരണമെന്നും മോട്ടോർ തൊഴിലാളി യൂണിയൻ അഭ്യർഥിച്ചു.

കോളിക്കടവ് തെങ്ങോല പാലത്തിന് സമീപം ചാക്കുകളിൽ മാലിന്യം തള്ളി

ഇരിട്ടി: കോളിക്കടവ് തെങ്ങോല പാലത്തിന് സമീപം സാമൂഹ്യവിരുദ്ധർ ചാക്കുകളിൽ മാലിന്യം തള്ളി. പുഴയോട് ചേർന്ന ഭാഗത്ത് പത്തിലധികം ചാക്കുകളിൽ കെട്ടിയ നിലയിലാണ് മാലിന്യം തള്ളിയത്. ആൾപാർപ്പില്ലാത്ത സ്ഥലത്ത് കുറ്റിക്കാട്ടിലാണ് മാലിന്യം തള്ളിയിരിക്കുന്നത്. ഈ പ്രദേശത്ത് മാലിന്യം തള്ളിയ സംഭവത്തിൽ കഴിഞ്ഞദിവസം കോളിക്കടവ് സ്വദേശിയായ വ്യാപാരിക്കെതിരേ പഞ്ചായത്ത് പിഴ ചുമത്തിയിരുന്നു. പാലത്തിന് സമീപം ദുർഗന്ധം വമിക്കാൻ തുടങ്ങിയതോടെ പ്രദേശവാസികളാണ് മാലിന്യം തള്ളിയത് കണ്ടെത്തിയത്. പഞ്ചായത്ത് അധികൃതരെ വിവരം അറിയിച്ചു.

അപകടാവസ്ഥയിലായ മരങ്ങൾ മുറിച്ചുമാറ്റുന്നതിലുള്ള അനാസ്ഥ അവസാനിപ്പിക്കണം: താലൂക്ക് വികസന സമിതി

ഇരിട്ടി: പൊതു ഇടങ്ങളിലെ അപകടാവസ്ഥയിലായ മരങ്ങൾ മുറിച്ചു മാറ്റുന്നതിലും മുറിച്ചിട്ട മരങ്ങൾ നീക്കം ചെയ്യുന്നതിലും കാണിക്കുന്ന അനാസ്ഥ അവസാനിപ്പിക്കണമെന്ന് ഇരിട്ടി താലൂക്ക് വികസന സമിതി യോഗം ആവശ്യപ്പെട്ടു. തില്ലങ്കേരി പഞ്ചായത്ത് ഓഫിസിന് മുന്നിൽ അഞ്ചുമാസം മുമ്പ് മുറിച്ചിട്ട കൂറ്റൻ മരം ഉണ്ടാക്കുന്ന അപകടഭീഷണി പഞ്ചായത്ത് പ്രസിഡന്‍റ് പി. ശ്രീമതി യോഗത്തിന് മുന്നിൽ ഉന്നയിച്ചു. മരം മാറ്റാൻ പലതവണ ആവശ്യപ്പെട്ടു. 50,000 രൂപയാണ് സാമൂഹ്യ വനവത്കരണ വിഭാഗം കണക്കാക്കിയ വില. പതിനായിരം രൂപക്ക് പോലും മരം എടുക്കാൻ ആളില്ല. ഇത് പഞ്ചായത്തിന്‍റെ അധീനതയിലുള്ള സ്ഥലത്തേക്ക് മാറ്റി സൂക്ഷിക്കണമെന്നാണ് ബന്ധപ്പെട്ടവർ പറയുന്നത്. എന്നാൽ, ഇത് സൂക്ഷിക്കാൻ പറ്റിയ സ്ഥലം പഞ്ചായത്തിന്‍റെ അധീനതയിലില്ല. ഇത് പൊതുജനങ്ങൾക്കുണ്ടാക്കുന്ന അപകടഭീഷണി ചെറുതല്ലെന്നും ശ്രീമതി പറഞ്ഞു. വർഷത്തിൽ ഒന്നോ രണ്ടോ തവണ മാത്രമാണ് ജില്ലാ മരംമുറി സമിതി യോഗം പോലും ചേരുന്നതെന്ന് വിഷയത്തിൽ ഇടപെട്ട് സംസാരിച്ച അധ്യക്ഷൻ ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധൻ പറഞ്ഞു. മുറിച്ചുമാറ്റിയ മാരങ്ങൾ ലേലം ചെയ്യുന്നതിനുള്ള നടപടിക്രമങ്ങൾ സർക്കാർ പുറപ്പെടുവിച്ചിട്ടുണ്ട്. രണ്ടോ മൂന്നോ തവണ ലോലം ചെയ്യുന്നതിന് തടസമില്ല. 1,40000 രൂപ വിലയിട്ട മരം 8000രൂപയ്ക്ക് ലേലം ചെയ്ത കാര്യവും തഹസിൽദാർ യോഗത്തിന്‍റെ ശ്രദ്ധയിൽപ്പെടുത്തി. തില്ലങ്കേരി-കാക്കയങ്ങാട് റോഡിലും കാക്കയങ്ങാട് ടൗണിലും ഉള്ള വെള്ളക്കെട്ട് ഓവുചാൽ വൃത്തിയാക്കി പരിഹരിക്കണമെന്ന് അംഗങ്ങൾ ആവശ്യപ്പെട്ടു. അടുത്ത ഉത്സവ സീസൺ ആരംഭിക്കുന്നതിന് മുമ്പ് മണത്തണ-കൊട്ടിയൂർ റോഡ് 10.5 മീറ്റർ വീതിയിൽ വികസിപ്പിച്ച് ഓവുചാൽ നിർമിക്കണമെന്ന് സിപിഐ അംഗം പായം ബാബുരാജ് ആവശ്യപ്പെട്ടു. ഇതിനുള്ള മാസ്റ്റർ പ്ലാൻ പോലീസ് തയാറാക്കിയതായും ബന്ധപ്പെട്ട യോഗത്തിന്‍റെ അംഗീകാരത്തോടെ ഉടൻ നടപ്പിലാകുമെന്നാണ് പ്രതീക്ഷിക്കുന്നതെന്നും തഹസിൽദാർ സി.വി. പ്രകാശൻ പറഞ്ഞു. ആനമതിൽ നിർമാണം ഉടൻ ആരംഭിക്കണമെന്നും ആറളം ഫാം റോഡിൽ ഏർപ്പെടുത്തിയ ഗതാഗത നിയന്ത്രണം നീക്കണമെന്നും അംഗങ്ങൾ ആവശ്യപ്പെട്ടു. ലഹരി വില്പന തടയാൻ ഇതര സംസ്ഥാന തൊഴിലാളികളുടെ താമസ സ്ഥലങ്ങളിൽ പരിശോധന നടത്തുന്നുണ്ടെന്ന് എക്‌സൈസ് അധികൃതർ യോഗത്തെ അറിയിച്ചു. യോഗത്തിൽ രാഷ്‌ട്രീയ പാർട്ടി പ്രതിനിധികളായ ഇബ്രാഹിം മുണ്ടേരി, കെ. മുഹമ്മദലി, പി.സി. രാമകൃഷ്ണൻ, പി.കെ. ജനാർദ്ദനൻ, തോമസ് തയ്യിൽ, പി.പി. ദിലീപ്കുമാർ, വിപിൻ തോമസ്, കെ.പി. ഷാജി, എംഎൽഎയുടെ പിഎ മുഹമ്മദ് ജസീർ എന്നിവർ പങ്കെടുത്തു. അതേസമയം, വികസന സമിതി യോഗത്തിൽ ഉയരുന്ന പരാതികൾക്ക് കൃത്യമായി മറുപടി പറയാൻ ചുമതലപ്പെട്ട ഉദ്യോഗസ്ഥൻമാർ എത്താത്തത് യോഗത്തിൽ കടുത്ത വിമർശനങ്ങൾക്ക് ഇടയാക്കി. ഇരിട്ടി, മട്ടന്നൂർ നഗരസഭകളിൽ ചെയർമാൻ മാത്രമല്ലല്ലോ വിവിധ വകുപ്പ് മേധാവികളും ഉണ്ടല്ലോയെന്നും ഇവരാരും യോഗത്തിൽ വരാത്തതെന്താണെന്ന് അംഗങ്ങൾ ചോദിച്ചു. അംഗങ്ങളുടെ പല ചോദ്യങ്ങൾക്കും മറുപടി പറയാൻ വകുപ്പുകളിലെ ഉയർന്ന ഉദ്യോഗസ്ഥർ എത്താത്തത് നേരേത്തെയും വിമർശനങ്ങൾക്കിടയാക്കിയിരുന്നു.

അനാഥബാല്യങ്ങൾക്ക് കരുതലിന്‍റെ ഇടമായി ‘വീട് കണ്ണൂർ’ ഒരുങ്ങി

കണ്ണൂർ: ജീവിത സാഹചര്യങ്ങള്‍ ഒറ്റപ്പെടുത്തിയ ബാല്യങ്ങള്‍ക്ക് കരുതലുമായി ജില്ലയില്‍ "വീട് കണ്ണൂർ' എന്ന പേരിൽ ശിശുപരിപാല കേന്ദ്രം പിണറായി പുത്തൻകണ്ടത്ത് സജ്ജമായി. 10 കുട്ടികളുടെ പരിപാലനത്തിനുള്ള സൗകര്യമാണ് ഇവിടെയുള്ളത്. ജില്ലാ ശിശുക്ഷേമ സമിതിയുടെ നേതൃത്വത്തിലാണ് കേന്ദ്രം തയാറായിരിക്കുന്നത്. അമ്മത്തൊട്ടിലുകളില്‍ ഉപേക്ഷിക്കപ്പെടുന്നതുള്‍പ്പെടെ അനാഥാവസ്ഥയില്‍ ഉള്ള കുട്ടികളെ പരിപാലിക്കാന്‍ ജില്ലാ തലങ്ങളില്‍ ശിശുപരിപാലന കേന്ദ്രം ആരംഭിക്കണമെന്ന സംസ്ഥാന സമിതിയുടെ നിർദേശപ്രകാരമാണ് കേന്ദ്രം പ്രവർത്തനമാരംഭിച്ചത്.

"ഞങ്ങൾക്ക് നീതി വാങ്ങിത്തരണം സർ' രാജ്മോഹൻ ഉണ്ണിത്താനു മുന്നിൽ വിങ്ങിപ്പൊട്ടി റീമയുടെ അമ്മ

പഴയങ്ങാടി: "ഞങ്ങളുടെ മകളും പേരക്കുട്ടിയും പോയി, ഞങ്ങൾക്ക് നീതി വാങ്ങിത്തരണം സർ' ഭർത്തൃവീട്ടിലെ പീഡനത്തെ തുടർന്ന് കുഞ്ഞുമായി പുഴയിൽ ചാടി ആത്മഹത്യ ചെയ്ത റീമയുടെ അമ്മ രാജ്മോഹൻ ഉണ്ണിത്താൻ എംപിയുടെ മുന്നിൽ പൊട്ടിക്കരഞ്ഞു കൊണ്ട് ആവശ്യപ്പെട്ടു. റീമയുടെ വീട് സന്ദർശിച്ചപ്പോഴാണ് തങ്ങൾക്ക് പോലീസ് ഉൾപ്പെടെയുള്ള കേന്ദ്രങ്ങളിൽ നിന്ന് സഹായം ലഭിക്കുന്നില്ലെന്ന് പറഞ്ഞ് പൊട്ടിക്കരഞ്ഞത്. റീമയുടെ കുടുംബത്തിന് നീതി ലഭ്യമാക്കുന്നതിന് കൂടെ നിന്ന് പോരാടുമെന്ന് രാജ്മോഹൻ ഉണ്ണിത്താൻ എംപി പറഞ്ഞു. മാടായി മണ്ഡലം കോൺഗ്രസ് പ്രസിഡന്‍റ് മന്ദി പവിത്രൻ, യുഡിഎഫ് കല്യാശേരി നിയോജക മണ്ഡലം ചെയർമാൻ എൻ.ജി. സുനിൽ പ്രകാശ്, കൺവിനർ എസ്.കെ.പി. സക്കറിയ, ഡിസിസി ജനറൽ സെക്രട്ടറി അജിത്ത് മാട്ടൂൽ, ബ്ലോക്ക് പ്രസിഡന്‍റ് വി. രാജൻ, ബി.പി. ഗോകുലൻ, യു. കരുണാകരൻ എന്നിവരും എംപിക്കൊപ്പമുണ്ടായിരുന്നു. പ്രതികളെ അറസ്റ്റ് ചെയ്യാത്തത് ഭരണകൂട അലംഭാവം: രാജ്മോഹൻ ഉണ്ണിത്താൻ കുഞ്ഞുമായി പുഴയിൽചാടി റീമ എന്ന യുവതി ആത്മഹത്യചെയ്തിട്ട് രണ്ടാഴ്ചയായിട്ടും ഭർത്താവ് കമൽജിത്തിനെയും ഭർതൃമാതാവിനെയും അറസ്റ്റ് ചെയ്യാത്ത പോലീസ് നടപടി സ്ത്രീ സുരക്ഷയോട് ഭരണകൂടം കാണിക്കുന്ന അലംഭാവമാണെന്ന് രാജ്മോഹൻ ഉണ്ണിത്താൻ എംപി. റീമയുടെയും കുഞ്ഞിന്‍റെയും മരണത്തിനുത്തവാദികളെ എത്രയും പെട്ടെന്ന് അറസ്റ്റ് ചെയ്ത് നിയമത്തിനു മുന്നിൽ കൊണ്ടുവരണമെന്നും കുടുംബത്തിന് നീതി ലഭ്യമാക്കണമെന്നും രാജ്മോഹൻ ഉണ്ണിത്താൻ എംപി ഉത്തരമേഖല ഡിഐജി യതീഷ് ചന്ദ്രയെ ഫോണിൽ വിളിച്ച് ആവശ്യപ്പെടുകയും ചെയ്തു.

ഗ്രീൻ ഇനീഷ്യേറ്റീവ് പ്രോഗ്രാമിൽ ഇരിട്ടി ഉപജില്ലയെ പ്രതിനിധീകരിച്ച് പേരട്ട ഗവ. എൽപി സ്കൂൾ

ഇരിട്ടി: കണ്ണൂർ ജില്ലാ ആസൂത്രണ ഹാളിൽ നടന്ന ഗ്രീൻ ഇനീഷ്യേറ്റീവ് കണ്ണൂർ പരിപാടിയിൽ ഇരിട്ടി ഉപജില്ലയെ പ്രതിനിധീകരിച്ച് പേരട്ട ഗവ. എൽപി സ്കൂൾ വിദ്യാർഥികൾ നിർമിച്ച ഉത്പന്നം ജില്ലാ കളക്ടർ അരുൺ കെ. വിജയന് കൈമാറി. പായം പഞ്ചായത്തിന്‍റെ ഗ്രീൻ പോലീസ് കേഡറ്റ് പദ്ധതി പ്രകാരം പേപ്പർ മാലിന്യംകൊണ്ടു നിർമിച്ച മാൻ കുട്ടിയെയാണ് കളക്ടർക്ക് സമ്മാനിച്ചത്. പായം പഞ്ചായത്തിനു വേണ്ടി അഡോൺ ഫിലിപ്പ്, എം.എ. ആദിദേവ്, ധാവാൻ വി. ബിജു, തൻഹ ഫാത്തിമ, ഫാത്തിമ മൂസ, പേരട്ട അധ്യാപിക നജ്മ, ജയപ്രകാശ് പന്തക്ക എന്നിവർ പങ്കെടുത്തു. ഇരിട്ടി ബിആർസിക്ക് വേണ്ടി അധ്യാപകരായ അരുൺ, വിനോദ്കുമാർ എന്നിവരും പങ്കെടുത്തു. മാലിന്യസംസ്കരണ രംഗത്ത് ഭാവനാപൂർണമായ പ്രവർത്തനങ്ങൾ നടത്തുന്ന കുട്ടികൾക്ക് ശുചിത്വ മിഷന്‍റെ അഭിനന്ദന സർട്ടിഫിക്കറ്റ് ജില്ലാ കളക്ടർ വിതരണം ചെയ്തു.

അക്ഷരങ്ങളുടെ സർഗാത്മക അനുഭൂതി തൊട്ടറിയണം: മന്ത്രി കടന്നപ്പള്ളി

കണ്ണൂർ: അക്ഷരങ്ങളിലൂടെ ലഭിക്കുന്ന സർഗാത്മക അനുഭൂതിയെ ഓരോ ദിവസവും തൊട്ടറിയണമെന്നും ശാസ്ത്ര സാങ്കേതിക വിദ്യയുടെ അഭൂതപൂർവമായ വളർച്ച മനുഷ്യന്‍റെ സർഗത്മകതയെ ബാധിക്കുന്നതിനെ മറികടക്കാൻ വായനയിലൂടെ സാധിക്കുമെന്നും മന്ത്രി കടന്നപ്പള്ളി രാമചന്ദ്രൻ. ഇൻഫർമേഷൻ ആൻഡ് പബ്ലിക് റിലേഷൻസ് വകുപ്പ്, പൊതുവിദ്യാഭ്യാസ വകുപ്പ്, സമഗ്രശിക്ഷ കേരളം, പി.എൻ. പണിക്കർ ഫൗണ്ടേഷൻ എന്നിവ സംയുക്തമായി സംഘടിപ്പിച്ച വായന മാസാചരണത്തിന്‍റെ സമാപന സമ്മേളനം കളക്ടറേറ്റ് കോൺഫറൻസ് ഹാളിൽ ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. ജില്ലാ പഞ്ചായത്ത് പ്രസിഡന്‍റ്. കെ.കെ. രത്നകുമാരി അധ്യക്ഷത വഹിച്ചു. വായന മാസാചരണത്തോടനുബന്ധിച്ച് നടത്തിയ മത്സരങ്ങളിലെ വിജയികൾക്കുള്ള സമ്മാനങ്ങൾ മന്ത്രി വിതരണം ചെയ്തു. ജില്ലാ ഇൻഫർമേഷൻ ഓഫീസർ പി.പി. വിനീഷ്, സമഗ്രശിക്ഷാ കേരളം ജില്ലാ കോ-ഓർഡിനേറ്റർ ഇ.സി. വിനോദ്, കണ്ണൂർ ഡിഇഒ വി. ദീപ, വിദ്യാകിരണം മിഷൻ ജില്ലാ കോ-ഓർഡിനേറ്റർ കെ.സി. സുധീർ, പി.എൻ. പണിക്കർ ഫൗണ്ടേഷൻ ജനറൽ സെക്രട്ടറി കാരയിൽ സുകുമാരൻ, ജില്ലാ ഇൻഫർമേഷൻ ഓഫീസ് അസി. എഡിറ്റർ സൗമ്യ മത്തായി എന്നിവർ പ്രസംഗിച്ചു.

സ്റ്റാർട്ട് അപ്പ് സെമിനാർ നടത്തി

കണ്ണൂർ: കൂട്ടായ്മയിലൂടെ പുതിയ സംരംഭങ്ങൾ തുടങ്ങി വിജയിക്കാം എന്ന വിഷയത്തിൽ നോർത്ത് മലബാർ ചേംബർ ഓഫ് കൊമേഴ്സ്, മൈസോൺ, ചെറുകിട വ്യവസായ അസോസിയേഷൻ, പോസിറ്റീവ് കമ്യൂൺ എന്നിവയുടെ സംയുക്താഭിമുഖ്യത്തിൽ സെമിനാർ നടത്തി. കണ്ണൂർ സർവകലാശാല വൈസ് ചാൻസിലർ ഡോ. കെ.കെ. സാജു ഉദ്ഘാടനം ചെയ്തു. ചേംബർ പ്രസിഡന്‍റ് ടി.കെ. രമേഷ്കുമാർ അധ്യക്ഷത വഹിച്ചു. ചേംബർ ഡയറക്ടർമാരായ കെ.പി. രവീന്ദ്രൻ, ടി. സന്തോഷ്കുമാർ, മൈസോൺ സിഇഒ ഡോ. എ. മാധവൻ, അഭിലാഷ് കരിച്ചേരി, മുൻ ലോക കേരള സഭാംഗം രൂപക്, കെഎസ്എസ്ഐ സംസ്ഥാന സെക്രട്ടറി ജോസഫ് പൈകട, ജില്ലാ പ്രസിഡന്‍റ് സി. അബ്ദുൾ കരീം, എൻഎംസിസി യംഗ് എന്‍റർപ്രണേഴ്സ് ചെയർമാൻ നിർമൽ നാരായണൻ, മൂസ ഷിഫ, എന്നിവർ പ്രസംഗിച്ചു.

പാലിയേറ്റീവ് കെയർ യൂണിറ്റ്‌ ഉദ്ഘാടനം ചെയ്തു

പേരാവൂർ: തൊണ്ടിയിൽ സർവീസ് സഹകരണ ബാങ്കിന്‍റെ നേതൃത്വത്തിൽ ആരംഭിക്കുന്ന പാലിയേറ്റീവ് കെയർ യൂണിറ്റിന്‍റെ ഉദ്ഘാടനവും ആംബുലൻസ് ആധുനികവത്കരണത്തിനുള്ള ഉപകരണ കൈമാറ്റവും നടത്തി. ബാങ്ക് ഓഡിറ്റോറിയത്തിൽ നടന്ന പരിപാടിയിൽ പാലിയേറ്റീവ് കെയർ യൂണിറ്റ് സണ്ണി ജോസഫ് എംഎൽഎ ഉദ്ഘാടനം ചെയ്തു. ഉപകരണ കൈമാറ്റം ഇരിട്ടി അസി. രജിസ്ട്രാർ പ്രദീഷ് കളത്തിൽ നിർവഹിച്ചു. ബാങ്ക് പ്രസിഡന്‍റ് സണ്ണി സിറിയക് അധ്യക്ഷത വഹിച്ചു. അന്താരാഷ്‌ട്ര ലങ്കാഡി മത്സിരവിജയികളെ ഫാ. മാത്യു തെക്കേമുറി അനുമോദിച്ചു. ജൂബിലി ചാക്കോ, ബൈജു വർഗീസ്, രാജു ജോസഫ്, പി.പി. നൂറുദ്ദീൻ, കെ.വി. ബാബു, കെ. സമീറ, സണ്ണി കെ. സെബാസ്റ്റ്യൻ, മാത്യു ജോസഫ്, വിനോദ് നടുവത്താനിയിൽ എന്നിവർ പങ്കെടുത്തു.

കനത്ത മഴയിൽ റോഡുകളിൽ വെള്ളം കയറി; ഗതാഗതം തടസപ്പെട്ടു

മണക്കടവ്: കുടക് വനാതിർത്തിയോട് ചേർന്നുള്ള പ്രദേശങ്ങളിൽ ഇന്നലെ ഉച്ചയോടെയുണ്ടായ കനത്ത മഴയിൽ വ്യാപക നാശനഷ്ടം. തളിപ്പറമ്പ്-കൂർഗ് ബോർഡർ റോഡിൽ കാർത്തികപുരം മിനി സ്റ്റേഡിയം ഭാഗത്ത് വെള്ളക്കെട്ടുമൂലം വാഹന ഗതാഗതം തടസപ്പെട്ടു. മണക്കടവ് മൂരിക്കടവ് റോഡിൽ കവല ഭാഗം മാമ്പൊയിൽ, മധുവനം ചീക്കാട് മാങ്ങാക്കവല ഭാഗം മണക്കടവ് പാലം പരിസരറോഡ് എന്നിവിടങ്ങളിലുണ്ടായ മലവെള്ളപ്പാച്ചിലിൽ റോഡുകളിൽ വെള്ളക്കെട്ട് രൂപപ്പെട്ടു. രയറോം പുഴ കരകവിഞ്ഞ് ഒഴുകുകയാണ്. പൂവംചാൽ-കാപ്പിമല റോഡിൽ ആനക്കുഴിയിൽ മണ്ണിടിഞ്ഞ് വീണ് ഗതാഗതം തടസപ്പെട്ടു. ഉദയഗിരി പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരന്‍റെ നേതൃത്വത്തിൽ മണ്ണിടിഞ്ഞ പ്രദേശം സന്ദർശിച്ചു.

കന്യാസ്ത്രീകൾക്ക് ജാമ്യം ലഭിച്ചതിൽ ആഹ്ലാദം പ്രകടിപ്പിച്ചു

ശ്രീകണ്ഠപുരം: ഭരണകൂട ഭീകരതയുടെ ഇരകളായ കന്യാസ്ത്രീകൾക്ക് വൈകിയാണെങ്കിലും ജാമ്യം ലഭിച്ചതിൽ അതിയായ സന്തോഷമുണ്ടെന്ന് സജീവ് ജോസഫ് എംഎൽഎ. കന്യാസ്ത്രീകൾക്ക് ജാമ്യം ലഭിച്ചതിനെ തുടർന്ന് പയ്യാവൂരിൽ നടത്തിയ ആഹ്ലാദ കൂട്ടായ്മ ഉദ്ഘാടന ചെയ്തു പ്രസംഗിക്കുകയായിരുന്നു അദ്ദേഹം. നിരപരാധികളായ കന്യാസ്ത്രീകളെക്കെതിരെയുള്ള അന്യായമായ കള്ളക്കേസ് റദ്ദാക്കാതെ നീതി പൂർണമാകില്ല. കേസ് റദ്ദാക്കി കന്യാസ്ത്രീകളെ അപമാനിച്ചവർക്കെതിരേ നിയമനടപടി സ്വീകരിക്കണം. മതപരിവർത്തനമോ മനുഷ്യകടത്തോ നടത്തിയെന്നതിന് യാതൊരു തെളിവും ഇല്ലെന്നതിനാലാണ് കോടതി ജാമ്യം അനുവദിച്ചത്. സ്വന്തം ഇഷ്ടത്തോടെയും മാതാപിതാക്കളുടെ സമ്മതത്തോടെയും ക്രൈസ്തവർ തന്നെയായ യുവതികൾ കന്യാസ്ത്രീകൾക്കൊപ്പം ജോലിക്ക് വേണ്ടി പോയതാണ് യാഥാർഥ്യം എന്നിരിക്കെ ഈ വകുപ്പുകൾ ചുമത്തിയുള്ള ആരോപണം തികച്ചും ദുഷ്ടലാക്കോടയാണെന്ന് തെളിഞ്ഞിരിക്കുകയാണെന്നും സജീവ് ജോസഫ് എംഎൽഎ പറഞ്ഞു. കള്ളക്കേസിൽ കുടുക്കി ഒരാഴ്ചയിലധികം ജയിലിൽ ഇട്ടശേഷം ജാമ്യാപേക്ഷ പോലും എതിർത്തവർ, കോടതി ജാമ്യം അനുവദിച്ചപ്പോൾ എട്ടുകാലി മമ്മൂഞ്ഞ് ചമഞ്ഞ് രംഗത്തിറങ്ങിയത് തീർത്തും അപഹാസ്യമാണ്. ഛത്തീസ്ഗഡിൽ ദിവസങ്ങളോളം കന്യാസ്ത്രീകളുടെ കുടുംബത്തോടൊപ്പം ജാമ്യ അപേക്ഷക്ക് വേണ്ടിയുളള ശ്രമങ്ങളിൽ നേരിട്ട് പങ്കാളിയാകാൻ കഴിഞ്ഞതിൽ ചാരിതാർഥ്യമുണ്ടെന്നും അദ്ദേഹം പറഞ്ഞു. മടമ്പം ഫൊറോന വികാരി ഫാ. സജി മെത്താനത്ത് അധ്യക്ഷത വഹിച്ചു. റവ. ഡോ. തോമസ് തെങ്ങുംപള്ളിൽ, ഫാ. ജോബിൻ വലിയപറന്പിൽ, ഫാ. വിപിൻ അഞ്ചെന്പിൽ, ഫാ. ജോസഫ് ചാത്തനാട്, പി.ടി. മാത്യു, തോമസ് വെക്കത്താനം, തോമസ് വർഗീസ്, ജോർജ് തയ്യിൽ, ജോസ് ലൂക്കോസ് എന്നിവർ പങ്കെടുത്തു.

സർക്കാരുകൾ ജനങ്ങളുടെ കോടതിയിലെ‌ പ്രതിക്കൂട്ടിൽ: സണ്ണി ജോസഫ്

ഉദയഗിരി: കെട്ടിച്ചമച്ച കേസിലൂടെ കന്യാസ്ത്രീകളെ ജയിലിലാക്കിയതിലൂടെ സർക്കാരുകൾ ജനങ്ങളുടെ കോടതിയിലെ പ്രതിക്കൂട്ടിൽ നിൽക്കുകയാണെന്ന് കെപിസിസി പ്രസിഡന്‍റ് സണ്ണി ജോസഫ് എംഎൽഎ. നിയമവാഴ്ചയ്ക്ക് എന്തെങ്കിലും വില സർക്കാർ കൽപ്പിക്കുന്നുണ്ടെങ്കിൽ ആദ്യം അറസ്റ്റ് ചെയ്യേണ്ടിയിരുന്നത് ആൾക്കൂട്ട വിചാരണ നടത്തിയ ബജരംഗ്ദൾ പ്രവർത്തകയായ വനിതയെയായിരുന്നുവെന്നും സണ്ണി ജോസഫ് എംഎൽഎ പറഞ്ഞു. കന്യാസ്ത്രീകളെ മനപൂർവം കെട്ടിച്ചമച്ച കേസിലാണ് ജയിലിലാക്കിയതെന്നം അദ്ദേഹം പറഞ്ഞു. സിസ്റ്റർ വന്ദന ഫ്രാൻസിസിന്‍റെ വീട്ടിലെത്തി ബന്ധുക്കളെ സന്ദർശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. നിയമത്തെ ദുർവ്യാഖ്യാനം ചെയ്ത് ഭരണ സ്വാധിനത്തിൽ നിരപരാധികളെ പീഡിപ്പിക്കുകയാണ്. ഇത് ഒറ്റപ്പെട്ട സംഭവല്ല. ബന്ധപ്പെട്ട അധികൃതർ ഇത്തരം കാര്യങ്ങൾ ആവർത്തിക്കാതിരിക്കാൻ ഉണർന്ന് പ്രവർത്തിക്കണമെന്നും അദ്ദേഹം ആവശ്യപ്പെട്ടു. ടി. സിദ്ദിഖ് എംഎൽഎ, ഡിസിസി പ്രസിഡന്‍റ് മാർട്ടിൻ ജോർജ്, യുഡിഎഫ് ജില്ലാ ചെയർമാൻ പി.ടി. മാത്യു, തോമസ് വെക്കത്താനം, ബിജു പുളിയൻതൊട്ടി, ജോഷി കണ്ടത്തിൽ, ബേബി ഓടംപള്ളിൽ, സുദീപ് ജയിംസ്, ബെന്നി തോമസ്, ജോയിച്ചൻ പള്ളിയാലിൽ, ജോസ് പറയൻകുഴി, രജിത്ത് നാറാത്ത് എന്നിവരും കെപിസിസി പ്രസിഡന്‍റിനൊപ്പമുണ്ടായിരുന്നു.

എട്ടുവയസുകാരിയെ പീഡിപ്പിക്കാൻ ശ്രമിച്ച മദ്രസ അധ്യാപകൻ കോടതിയിൽ കീഴടങ്ങി

തളിപ്പറമ്പ്: എട്ടുവയസുകാരിയായ പെൺകുട്ടിയെ പീഡിപ്പിക്കാൻ ശ്രമിച്ച കേസിലെ പ്രതിയായ മദ്രസ അധ്യാപകൻ തലശേരി കോടതിയിൽ കീഴടങ്ങി. തളിപ്പറമ്പ് സ്റ്റേഷൻ പരിധിയിലെ ഓണപ്പറമ്പ് സിദിഖ് നഗർ സ്വദേശി മുഹമ്മദ് ഷാഹിദ് ആണ് കീഴടങ്ങിയത്. ദിവസങ്ങൾക്കു മുന്പ് മദ്രസ ക്ലാസ് മുറിയിൽ വച്ച് പീഡിപ്പിക്കാൻ ശ്രമിച്ചെന്നാണ് കേസ്. രക്ഷിതാവിന്‍റെ പരാതിയെ തുടർന്ന് പോലീസ് പോക്സോ വകുപ്പ് പ്രകാരം കേസെടുത്ത് അന്വേഷണം നടത്തി വരുന്നതിനിടെയാണ് ഇയാൾ കോടതയിൽ കീഴടങ്ങിയത്.

പയ്യാവൂർ പഞ്ചായത്തിൽ "സീറോ അനീമിക് ഗ്രാമം' പദ്ധതിക്ക് തുടക്കമായി

പയ്യാവൂർ: പയ്യാവൂർ പഞ്ചായത്ത് 2024-25 വർഷത്തിൽ ആസൂത്രണം ചെയ്ത "സീറോ അനീമിക് ഗ്രാമം' പദ്ധതിക്ക് തുടക്കമായി. പയ്യാവൂർ പഞ്ചായത്ത് പരിധിക്കുള്ളിലെ 15 മുതൽ 65 വരെ വയസ് പ്രായമുള്ള കുട്ടികൾ, സ്ത്രീകൾ എന്നിവരുടെ വിളർച്ച പരിശോധിക്കുന്ന പദ്ധതിയാണിത്. എട്ടായിരം ആളുകളെ പരിശോധിക്കാനാണ് ലക്ഷ്യമിടുന്നത്. പരിശോധന റിപ്പോർട്ട് പിഎച്ച്സിയിൽ സൂക്ഷിക്കും. വിളർച്ച അനുഭവപ്പെടുന്ന സ്ത്രീകളിൽ മരുന്നുകഴിക്കുമ്പോൾ ഉണ്ടാകുന്ന മാറ്റങ്ങൾ സംബന്ധിച്ചുള്ള പഠനം ഇതുവഴി സാധ്യമാകും. പയ്യാവൂർ പഞ്ചായത്തിലെ പതിനാറ് വാർഡുകളിലായി എട്ടായിരം ആളുകൾ ഈ പരിശോധനയ്ക്ക് വിധേയമാകേണ്ടതാണ്. ചന്ദനക്കാംപാറയിൽ പഞ്ചായത്ത് പ്രസിഡന്‍റ് സാജു സേവ്യർ പദ്ധതി ഉദ്ഘാടനം ചെയ്തു. വൈസ് പ്രസിഡന്‍റ് പ്രീത സുരേഷ് അധ്യക്ഷത വഹിച്ചു. സ്ഥിരം സമിതി അധ്യക്ഷ ഷീന ജോൺ, വാർഡ് മെംബർമാരായ രജനി സുന്ദരൻ, സിന്ധു ബെന്നി എന്നിവർ പ്രസംഗിച്ചു. മെഡിക്കൽ ഓഫീസർ ഡോ. ധന്യ, ഹെൽത്ത് ഇൻസ്പെക്ടർ രതീഷ് എന്നിവർ ക്ലാസ് നയിച്ചു. അടുത്ത രണ്ട് മാസത്തിനുള്ളിൽ ഈ പരിശോധന പൂർത്തിയാക്കാനാണ് ഉദ്ദേശിക്കുന്നത്. പയ്യാവൂർ പഞ്ചായത്തിൽ രൂപീകൃതമായ നാട്ടുകൂട്ടങ്ങളെ അടിസ്ഥാനപ്പെടുത്തി വിവരങ്ങൾ നൽകി വരുംദിവസങ്ങളിൽ ഓരോ വാർഡുകളിലും ഇതിനായുള്ള കാമ്പയിൻ സംഘടിപ്പിക്കും. പയ്യാവൂർ പഞ്ചായത്തിന്‍റെ നൂറുദിന കർമ പരിപാടികളിൽ ഉൾപ്പെടുത്തിയാണ് ഈ ഉദ്യമം സാക്ഷാത്കരിക്കുന്നത്.

ഛത്തീസ്ഗഡ് സംഭവത്തിൽ പ്രതിഷേധിച്ചു

ചെമ്പേരി: ഛത്തീസ്ഗഡിലെ ബിജെപി സര്‍ക്കാരിന്‍റെ ഭരണഘടനാവിരുദ്ധ നടപടിക്കെതിരേ കെസിവൈഎം ചെമ്പേരി ഫൊറോന സമിതിയുടെ ആഭിമുഖ്യത്തിൽ പൂപ്പറമ്പ് ടൗണിൽ പന്തംകൊളുത്തി പ്രകടനവും പ്രതിഷേധ കൂട്ടായ്മയും നടത്തി. കെസിവൈഎം തലശേരി അതിരൂപത ജനറൽ സെക്രട്ടറി അബിൻ വടക്കേക്കര ഉദ്ഘാടനം ചെയ്തു. കെസിവൈഎം ചെമ്പേരി ഫൊറോന പ്രസിഡന്‍റ് ഡോൺ ഇലവുങ്കൽ അധ്യക്ഷത വഹിച്ചു. ഫൊറോന ആനിമേറ്റർ ടെന്നി വേങ്ങത്താനം, ഫൊറോന മുൻ പ്രസിഡന്‍റ് അശ്വതി കുടിയിരുപ്പിൽ, ഭാരവാഹികളായ ഡെൽവിൻ മുതലക്കുഴിയിൽ, അഖിൽ മാന്തോട്ടത്തിൽ എന്നിവർ നേതൃത്വം നൽകി. പയ്യാവൂർ: കോൺഗ്രസ് പയ്യാവൂർ മണ്ഡലം കമ്മിറ്റിയുടെ ആഭിമുഖ്യത്തിൽ പയ്യാവൂർ ടൗണിൽ പ്രതിഷേധ പ്രകടനം നടത്തി. കോൺഗ്രസ് മണ്ഡലം പ്രസിഡന്‍റ്‌ ഇ.കെ. കുര്യൻ, ജോയ് പുന്നശേരിമലയിൽ, ബേബി മുല്ലക്കരി, കെ.ടി. മൈക്കിൾ, പി.ആർ. രാഘവൻ, ജയിംസ് തുരുത്തേൽ, ജേക്കബ് പനന്താനം, ടി.പി. അഷ്റഫ്, കുര്യാച്ചൻ മുണ്ടയ്ക്കൽ, തോമസ് കൊടിയംകുന്നേൽ, റോസിലി മൈക്കിൾ, സിന്ധു ബെന്നി, ആനീസ് നെട്ടനാനി, സിജി ഒഴാങ്കൽ, സജി അട്ടിയ്ക്കൽ, ജയ്സൺ കാട്ടാങ്കോടൻ, സൈമൺ പെരുവക്കുന്നേൽ, ജോർജ് തറപ്പിൽ, ഷാജി പാട്ടശേരി, ജോസഫ് അറയ്ക്കപ്പറമ്പിൽ, മൈക്കിൾ ചാണ്ടിക്കൊല്ലി, രാജേഷ് രാമ്പേത്ത്, ആൽബിൻ മാത്യു എന്നിവർ നേതൃത്വം നൽകി.

ഖാദി ഓണംമേള നാളെ മുതല്‍

കണ്ണൂർ: കേരള ഖാദി ഗ്രാമ വ്യവസായ ബോര്‍ഡും ഖാദി സ്ഥാപനങ്ങളും സംയുക്തമായി നടത്തുന്ന ഓണംമേള നാളെ മുതല്‍ കണ്ണൂര്‍ ഖാദി ഗ്രാമ സൗഭാഗ്യയില്‍ നടക്കും. ജില്ലാതല ഉദ്ഘാടനം രാവിലെ 11.30ന് സ്പീക്കര്‍ എ.എന്‍. ഷംസീര്‍ നിര്‍വഹിക്കും. മന്ത്രി കടന്നപ്പള്ളി രാമചന്ദ്രന്‍ അധ്യക്ഷനാകും. ഖാദി ബോര്‍ഡ് വൈസ് ചെയര്‍മാന്‍ പി. ജയരാജന്‍ ആദ്യ വില്പന നടത്തും. ഖാദിയുടെ പുതിയ ഉത്പന്നങ്ങളുടെ ലോഞ്ചിംഗ് കണ്ണൂര്‍ കോര്‍പറേഷന്‍ മേയര്‍ മുസ്‌ലിഹ് മഠത്തിലും സമ്മാനക്കൂപ്പണിന്‍റെ വിതരണോദ്ഘാടനം ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരിയും നിര്‍വഹിക്കും. ഓരോ ആയിരം രൂപയുടെ പര്‍ച്ചേസിനും ഒരു സമ്മാനക്കൂപ്പണ്‍ ലഭിക്കും. ഒക്‌ടോബര്‍ ഏഴിന് നടക്കുന്ന നറുക്കെടുപ്പില്‍ മെഗാ സമ്മാനമായി ടാറ്റാ ടിയാഗോ ഇവി കാറും രണ്ടാം സമ്മാനമായി ഓരോ ജില്ലയ്ക്കും ഒന്ന് വീതം ബജാജ് ഇവി സ്‌കൂട്ടറും മൂന്നാം സമ്മാനമായി 50 ഗിഫ്റ്റ് വൗച്ചറുകളും നല്‍കും. ജില്ലയില്‍ ആഴ്ചതോറും നടക്കുന്ന നറുക്കെടുപ്പിലൂടെ 3000 രൂപയുടെ ഗിഫ്റ്റ് വൗച്ചറുകളും ലഭിക്കും. ഉത്പന്നങ്ങള്‍ക്ക് 30 ശതമാനം ഗവ. കിഴിവുമുണ്ട്. ഉദ്ഘാടന പരിപാടിയില്‍ മുഴുവന്‍ സാന്നിധ്യമാകുന്ന ഒരാള്‍ക്ക് നറുക്കെടുപ്പിലൂടെ 1000 രൂപയുടെ ഖാദി തുണിത്തരങ്ങള്‍ സമ്മാനമായി ലഭിക്കും.

പി.ടി. ചാക്കോ, വിഎസ് അനുസ്മ‌രണം നടത്തി

കണ്ണൂർ: ജനാധിപത്യ കേരളാ കോൺഗ്രസ് ജില്ലാ കമ്മിറ്റിയുടെ ആഭിമുഖ്യത്തിൽ പി.ടി. ചാക്കോ, വി.എസ്. അച്യുതാനന്ദൻ എന്നിവരുടെ അനുസ്മ‌രണം നടത്തി. കണ്ണൂർ റെയിൻബോ ടൂറിസ്റ്റ് ഹോം ഓഡിറ്റോറിയത്തിൽ സംഘടിപ്പിച്ച അനുസ്മരണ സമ്മേളനം ജില്ലാ പ്രസിഡന്‍റ് ജോജി ആനിത്തോട്ടം ഉദ്ഘാടനം ചെയ്തു. ജില്ലാ വൈസ് പ്രസിഡന്‍റ് ജോസഫ് പരത്തനാല്‍ അനുസ്മരണ പ്രഭാഷണം നടത്തി. ജില്ലാ ജനറൽ സെക്രട്ടറി കെ.പി. അനിൽകുമാർ, ഭാരവാഹികളായ ബാബു സെബാസ്റ്റ്യൻ, ബാബു അണിയറ, സണ്ണി പരവരാകത്ത്, ബിജു പുളിയ്ക്കൽ, ടോമിച്ചൻ നടുത്തൊട്ടിയിൽ എന്നിവർ പ്രസംഗിച്ചു.

എസ്പിസി കേഡറ്റുകൾ പോലീസ് സ്റ്റേഷൻ സന്ദർശിച്ചു

ചെറുപുഴ: ചെറുപുഴ സെന്‍റ് മേരീസ് ഹൈസ്കൂളിലെ എസ്പിസി യൂണിറ്റിലെ കേഡറ്റുകൾ ചെറുപുഴ പോലീസ് സ്റ്റേഷനിൽ സന്ദർശനം നടത്തി. സ്റ്റേഷന്‍റെ ദൈനംദിന പ്രവർത്തനങ്ങൾ എസ്ഐ സുബിൻ ബിജു വിശദീകരിച്ചു. റൈറ്റർ കെ.പി. രതീഷ്, ഡ്രിൽ ഇൻസ്ട്രക്ടർ എം.വി. പ്രജിത്ത് സിപിഒമാരായ സീമ ജോസ്, സാലി മാത്യു, സീനിയർ കേഡറ്റ് ഇന്ദ്രജ ഇന്ദ്രജിത്ത് എന്നിവർ നേതൃത്വം നൽകി. കേഡറ്റുകൾ പോലീസ് ഉദ്യോഗസ്ഥരെ ആദരിച്ചു.

ജില്ലാ വടംവലി ജേതാക്കൾക്ക്‌ സ്വീകരണം നൽകി

ചെറുപുഴ: ജില്ലാ വടംവലി മത്സരത്തിൽ ചാന്പ്യൻമാരായ പ്രാപ്പൊയിൽ ഗവ. ഹയർ സെക്കൻഡറി സ്കൂളിലെ അണ്ടർ 17 പെൺകുട്ടികളുടെ ടീമിനും രണ്ടാം സ്ഥാനം നേടിയ അണ്ടർ 19 പെൺകുട്ടികളുടെ ടീമിനും മൂന്നാംസ്ഥാനം നേടിയ അണ്ടർ 19 ആൺകുട്ടികളുടെ ടീമിനും സ്കൂളിൽ സ്വീകരണം നൽകി. പ്രിൻസിപ്പൽ കെ.വി. സജി ഉദ്ഘാടനം ചെയ്തു. മുഖ്യാധ്യാപകൻ കെ.വി. രാജൻ അധ്യക്ഷത വഹിച്ചു. വിജയികൾക്ക് ഉപഹാരങ്ങൾ നൽകി. കായികാധ്യാപകൻ സുനീഷ് ജോർജ്, കോച്ചുമാരായ കെ.സി. മുകേഷ്, ഗോഡ് വിൻ ജോസഫ് എന്നിവരെയും ചടങ്ങിൽ അനുമോദിച്ചു.

മുല്ലപ്പള്ളി നാരായണനെ യൂണിയൻ ഭാരവാഹിത്വത്തിൽ നിന്ന് നീക്കി

തളിപ്പറമ്പ്: മലബാർ ദേവസ്വം എംപ്ലോയീസ് സിഐടിയു തളിപ്പറന്പ് ഏരിയാ പ്രസിഡന്‍റ് മുല്ലപ്പള്ളി നാരായണനെ സ്ഥാനത്ത് നിന്നും നീക്കം ചെയ്തതായി യൂണിയൻ അറിയിച്ചു. തൃച്ചംബരം ക്ഷേത്രത്തിലെ ഭണ്ഡാരം തുറന്ന് പണം എണ്ണിത്തിട്ടപ്പെടുത്തുന്നതിനിടെ പണം കവർന്നതുമായി ബന്ധപ്പെട്ട വിഷയത്തിൽ ആരോപണ വിധേയനായ സാഹചര്യത്തിലാണ് നടപടി. ജില്ലാ കമ്മിറ്റിയുടെ അനുവാദത്തോടെ ഇന്നലെ ചേർന്ന ഏരിയാ കമ്മിറ്റിയാണ് മുല്ലപ്പള്ളി നാരായണനെ യൂണിയൻ ഭാരവാഹിത്വത്തിൽ നിന്നും മാറ്റി നിർത്താൻ തീരുമാനിച്ചത്. ടിടികെ ദേവസ്വത്തിലെ ഭണ്ഡാരം എണ്ണുന്നതിലെ ക്രമക്കേട് വിശദമായി അന്വേഷിക്കണമെന്നും യൂണിയൻ ആവശ്യപ്പെട്ടു.

കേരഗ്രാമം; നടുവിൽ പഞ്ചായത്തിനെ തെരഞ്ഞെടുത്തു

നടുവിൽ: 2025-26 വർഷത്തിലെ കേരഗ്രാമം പദ്ധതിയിൽ നടുവിൽ പഞ്ചായത്തിനെ തെരഞ്ഞെടുത്തതായി സജീവ് ജോസഫ് എംഎൽഎ അറിയിച്ചു. മുൻ വർഷങ്ങളിൽ ആലക്കോട്, പയ്യാവൂർ, ഉദയഗിരി, എരുവേശി പഞ്ചായത്തുകളെ കേരഗ്രാമം പദ്ധതിയിൽ ഉൾപ്പെടുത്തിയിരുന്നെന്നും എംഎൽഎ പറഞ്ഞു. സംസ്ഥാനത്തെ തെങ്ങുകൃഷിയിൽ ശാസ്ത്രീയമായ പരിചരണമുറകൾ അവലംബിച്ചു നാളികേരത്തിന്‍റെ ഉത്പാദനവും ഉത്പ്പാദന ക്ഷമതയും വർധിപ്പിക്കുക എന്ന ലക്ഷ്യത്തോടെ ആവിഷ്‌കരിച്ചു നടപ്പാക്കുന്ന പദ്ധതിയാണ് കേരഗ്രാമം. പദ്ധതിയുടെ ഭാഗമായി സംയോജിത പരിചരണമുറകൾ, ജലസേചന സൗകര്യം മെച്ചപ്പെടുത്തൽ, ജൈവവള ഉത്പാദനം തുടങ്ങിയ സഹായങ്ങൾ നടപ്പാക്കുന്നു. 100 ഹെക്ടർ വിസ്തൃതിയിൽ തെങ്ങ് കൃഷിയുള്ള തുടർച്ചയായ ഭൂപ്രദേശമാണ് ഒരു കേരഗ്രാമമായി കണക്കാക്കുന്നത്. 25.67 ലക്ഷം രൂപയാണ് ഒരു കേരഗ്രാമത്തിന് മേൽപ്പറഞ്ഞ ഘടകങ്ങൾക്കായി ഒന്നാംവർഷ അനുകൂല്യമായി കൃഷിവകുപ്പ് അനുവദിക്കുന്നത്. സംയോജിത പരിപാലന മുറകൾ കേരഗ്രാമങ്ങളിൽ രണ്ടാം വർഷം തുടരുന്നതിന് എട്ടു ലക്ഷം രൂപ ഒരു കേരഗ്രാമത്തിന് എന്ന തോതിൽ പദ്ധതി സഹായം ലഭ്യമാണ്. തെങ്ങുകൾക്കു വളപ്രയോഗം മൂന്നാം വർഷവും തുടരുന്നതിന് നാലു ലക്ഷം രൂപയാണ് ലഭിക്കുക.

അക്ഷരങ്ങളുടെ സർഗാത്മക അനുഭൂതി തൊട്ടറിയണം: മന്ത്രി കടന്നപ്പള്ളി

കണ്ണൂർ: അക്ഷരങ്ങളിലൂടെ ലഭിക്കുന്ന സർഗാത്മക അനുഭൂതിയെ ഓരോ ദിവസവും തൊട്ടറിയണമെന്നും ശാസ്ത്ര സാങ്കേതിക വിദ്യയുടെ അഭൂതപൂർവമായ വളർച്ച മനുഷ്യന്‍റെ സർഗത്മകതയെ ബാധിക്കുന്നതിനെ മറികടക്കാൻ വായനയിലൂടെ സാധിക്കുമെന്നും മന്ത്രി കടന്നപ്പള്ളി രാമചന്ദ്രൻ. ഇൻഫർമേഷൻ ആൻഡ് പബ്ലിക് റിലേഷൻസ് വകുപ്പ്, പൊതുവിദ്യാഭ്യാസ വകുപ്പ്, സമഗ്രശിക്ഷ കേരളം, പി.എൻ. പണിക്കർ ഫൗണ്ടേഷൻ എന്നിവ സംയുക്തമായി സംഘടിപ്പിച്ച വായന മാസാചരണത്തിന്‍റെ സമാപന സമ്മേളനം കളക്ടറേറ്റ് കോൺഫറൻസ് ഹാളിൽ ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. ജില്ലാ പഞ്ചായത്ത് പ്രസിഡന്‍റ്. കെ.കെ. രത്നകുമാരി അധ്യക്ഷത വഹിച്ചു. വായന മാസാചരണത്തോടനുബന്ധിച്ച് നടത്തിയ മത്സരങ്ങളിലെ വിജയികൾക്കുള്ള സമ്മാനങ്ങൾ മന്ത്രി വിതരണം ചെയ്തു. ജില്ലാ ഇൻഫർമേഷൻ ഓഫീസർ പി.പി. വിനീഷ്, സമഗ്രശിക്ഷാ കേരളം ജില്ലാ കോ-ഓർഡിനേറ്റർ ഇ.സി. വിനോദ്, കണ്ണൂർ ഡിഇഒ വി. ദീപ, വിദ്യാകിരണം മിഷൻ ജില്ലാ കോ-ഓർഡിനേറ്റർ കെ.സി. സുധീർ, കാരയിൽ സുകുമാരൻ, സൗമ്യ മത്തായി എന്നിവർ പ്രസംഗിച്ചു.

ഇരുചക്രവാഹനമിടിച്ച് പരിക്കേറ്റയാൾ മരിച്ചു

ചേലോറ: ഇരുചക്രവാഹനമിടിച്ച് പരിക്കേറ്റ് ചികിത്സയിലായിരുന്ന കാൽനടയാത്രികൻ മരിച്ചു. പഞ്ചായത്ത് ഓഫീസ് റിട്ട. ജീവനക്കാരൻ ചേലോറയിലെ സി.സി. ബാലകൃഷ്ണനാണ് (72) മരിച്ചത്. ഭാര്യ: കെ.എം. ശൈലജ. മക്കൾ: മിഥുൻ (വെബ് ഡിസൈനർ), മേഘ. മരുമകൻ: സുബിൻ (കാനഡ). സഹോദരങ്ങൾ: പുരുഷോത്തമൻ (തളിപ്പറമ്പ്), രവീന്ദ്രൻ (റിട്ട. മുഖ്യാധ്യാപകൻ, അതിരകം യുപി സ്കൂൾ), ശോഭ ( കൊടോളിപ്രം), ഹരീന്ദ്രൻ (ചേലോറ), ഗീത (കാവിൻമൂല), ദിനേശ് മാവുങ്കാൽ (റിട്ട. അധ്യാപകൻ, ഗവ. ഹയർ സെക്കൻഡറി സ്കൂൾ, രാംനഗർ), പരേതനായ ഗംഗാധരൻ ( റിട്ട. സുബേദാർ മേജർ). സംസ്കാരം ഇന്ന് 10.30ന് പയ്യാമ്പലത്ത് നടക്കും.

സ്കൂളുകളും കോളജുകളും മതപരിവർത്തനത്തിന് വേണ്ടിയല്ല: മാർ ജോസഫ് പണ്ടാരശേരിൽ

കണ്ണൂർ: സ്കൂളുകളിലും കോളജുകളിലും ആതുരശുശ്രൂഷാ രംഗത്തും ഭിന്നശേഷിക്കാർക്കാർക്കിടയിലും ത്യാഗപൂർണമായ പ്രവർത്തനം കാഴ്ചവച്ചവരെയാണ് ഇപ്പോൾ ജയിലിലടച്ചിരിക്കുന്നതെന്ന് കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിൽ. സ്കൂളുകളും കോളജുകളും നടത്തുന്നത് മതപരിവർത്തനത്തിന് വേണ്ടിയല്ല. മറിച്ച് ഗുണപരമായ വിദ്യാഭ്യാസം ക്രിസ്തുവിന്‍റെ അനുയായി എന്ന നിലയിൽ എത്തിക്കാനാണ്. ഈ സ്ഥിതിയല്ല ഛത്തീസ്ഗഡിലുള്ളത്. നിരക്ഷരായവരെ പഠിപ്പിക്കുകയും രോഗികൾക്ക് ആശ്വാസം പകരുകയും മറ്റുമാണ് കന്യാസ്ത്രീകൾ ഛത്തീസ്ഗഡിലും മറ്റും ചെയ്യുന്നത്. അത് മതപരിവർത്തനത്തിന് വേണ്ടിയല്ല. ജനങ്ങൾക്കായി ഇവിടെയെത്തിയ കന്യാസ്ത്രീമാരെ ആൾക്കൂട്ട വിചാരണ നടത്തി ജയിലിലടച്ചത് ഒരിക്കലും അംഗീകരിക്കാനാകില്ല. ഭരണഘടനപ്രകാരം ന്യൂനപക്ഷങ്ങൾക്കും ഇവിടെ ജീവിക്കാനുള്ള അവകാശമുണ്ട്. ആ അവകാശത്തെ ആർക്കും നിഷേധിക്കാൻ സാധിക്കില്ലെന്നും മാർ പണ്ടാരശേരിൽ പറഞ്ഞു.

കണ്ണൂരിൽ പ്രതിഷേധാഗ്നി

കണ്ണൂർ: ഛത്തീസ്ഗഡിൽ കന്യാസ്ത്രീകളെ കള്ളക്കേസിൽ കുടുക്കി ജയിലിലിടച്ചതിലും നീതിനിഷേധിച്ചതിനുമെതിരേ തലശേരി, കണ്ണൂർ, കോട്ടയം രൂപതകളുടെയും മറ്റ് ക്രൈസ്തവ സഭകളുടെയും എകെസിസി, കെഎൽസിഎ, സിആർഎ തുടങ്ങിയ സംഘടനകളുടെയും നേതൃത്വത്തിൽ കണ്ണൂർ നഗരത്തിൽ നടത്തിയ റാലിയും പൊതുയോഗവും പ്രതിഷേധാഗ്നിയായി. വൈദികരും സന്യസ്തരുമുൾപ്പെടെ ആയിരത്തോളം പേർ പങ്കെടുത്തു. തലശേരി ആർച്ച്ബിഷപ് മാർ ജോസഫ് പാംപ്ലാനി പ്രതിഷേധാഗ്നി ഉദ്ഘാടനം ചെയ്തു. കണ്ണൂർ രൂപത സഹായമെത്രാൻ ഡോ. ഡെന്നിസ് കുറുപ്പശേരി അധ്യക്ഷത വഹിച്ചു. കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിൽ മുഖ്യപ്രഭാഷണം നടത്തി. ബർണശേരി സെന്‍റ് തോമസ് ഓർത്തഡോക്സ് സിറിയൻ പള്ളി വികാരി ഫാ. അലക്സാണ്ടർ, സിസ്റ്റർ ഹരിത ഡിഎസ്എസ്, എകെസിസി ഗ്ലോബൽ ഡയറക്ടർ റവ. ഡോ. ഫിലിപ്പ് കവിയിൽ, സിസ്റ്റർ സീന സേവ്യർ എഫ്സിസി, റവ. ജിജോ ആൽബർട്ട്, ഫാ. ജോമോൻ ചെന്പകശേരി, തലശേരി അതിരൂപത പാസ്റ്റൽ കൗൺസിൽ സെക്രട്ടറി ജോർജ് തയ്യിൽ എന്നിവർ പ്രസംഗിച്ചു. കണ്ണൂർ രൂപത പാസ്റ്റൽ കൗൺസിൽ സെക്രട്ടറി ഷിബു ഫെർണാണ്ടസ് പ്രതിജ്ഞ ചൊല്ലിക്കൊടുത്തു. മഹാത്മ മന്ദിരത്തിലെ ഗാന്ധിപ്രതിമയിൽ ശ്രീപുരം പാസ്റ്റർ സെന്‍റർ ഡയറക്ടർ ഫാ. ജോയി കട്ടിയാങ്കൽ ഹാരാർപ്പണം നടത്തിയശേഷമാണ് പ്രകടനമായി സ്റ്റേഡിയം കോർണറിലേക്ക് നീങ്ങിയത്.തലശേരി അതിരൂപത വികാരി ജനറാൾമാരായ മോൺ. ആന്‍റണി മുതുകുന്നേൽ, മോൺ. സെബാസ്റ്റ്യൻ പാലാക്കുഴി, കണ്ണൂർ രൂപത വികാരി ജനറാൾ മോൺ. ക്ലാരൻസ് പാലിയത്ത്, തലശേരി അതിരൂപത ചാൻസിലർ റവ. ഡോ. ബിജു മുട്ടത്തുകുന്നേൽ, കണ്ണൂർ രൂപത ചാൻസിലർ റവ. ഡോ. ആന്‍റണി കുരിശിങ്കൽ, തലശേരി അതിരൂപത പ്രൊക്കുറേറ്റർ റവ. ഡോ. ജോസഫ് കാക്കരമറ്റം, കണ്ണൂർ രൂപത പ്രൊക്കുറേറ്റർ ഫാ. ജോർജ് പൈനാടത്ത്, ഫാ. മാത്യു നരിക്കുഴി, കണ്ണൂർ ക ത്തീഡ്രൽ വികാരി ഫാ. ആൻസിൽ പീറ്റർ, ഫാ. തോമസ് കളപ്പറന്പിൽ, ദീപിക റസിഡന്‍റ മാനേജർ ഫാ. ജോബിൻ വലിയപറന്പിൽ, അസിസ്റ്റന്‍റ് റസിഡന്‍റ് മാനേജർ ഫാ. വിപിൻ വെമ്മേനിക്കട്ടയിൽ, പ്രൊവിൻഷ്യൽ സുപ്പീരിയർമാരായ സിസ്റ്റർ ഡോ. ട്രീസ പാലയ്ക്കൽ എസ്എച്ച്, സിസ്റ്റർ അഞ്ജലി എഫ്സിസി, സിസ്റ്റർ വിനയ പുരയിടത്തിൽ യുഎംഐ, എകെസിസി തലശേരി അതിരൂപത പ്രസിഡന്‍റ് ഫിലിപ്പ് വെളിയത്ത്, കെഎൽസിഎ സംസ്ഥാന ട്രഷറർ രതീഷ് ആന്‍റണി, കെഎൽസിഎ കണ്ണൂർ രൂപത പ്രസിഡന്‍റ് ഗോഡ്സൺ ഡിക്രൂസ് എന്നിവർ നേതൃത്വം നൽകി. അമിത്ഷായുടെ നിർദേശം പോലും ഛത്തീസ്ഗഡ് സർക്കാർ കാറ്റിൽ പറത്തി: മാർ ജോസഫ് പാംപ്ലാനി കണ്ണൂർ: കള്ളക്കേസിൽ കുടുക്കി ജയിലിലടച്ച കന്യാസ്തീകളുടെ മോചനത്തിനായി ഇടപെട്ട കേന്ദ്ര ആഭ്യന്തരമന്ത്രി അമിത്ഷായുടെ നിർദേശം പോലും ഛത്തീസ്ഗഡ് സർക്കാർ കാറ്റിൽ പറത്തിയെന്ന് തലശേരി ആർച്ച്ബിഷപ് മാർ ജോസഫ് പാംപ്ലാനി. കന്യാസ്ത്രീകളെ ജയിലിൽ അടച്ചതിൽ പ്രതിഷേധിച്ച് തലശേരി, കണ്ണൂർ, കോട്ടയം രൂപതകളുടെയും മറ്റ് ക്രൈസ്തവ സഭകളുടെയും സംയുക്താഭിമുഖ്യത്തിൽ കണ്ണൂർ സ്റ്റേഡിയം കോർണറിൽ നടത്തിയ പ്രതിഷേധാഗ്നി ഉദ്ഘാടനം ചെയ്തു പ്രസംഗിക്കുകയായിരുന്നു ആർച്ച്ബിഷപ്. അമിത് ഷാ ഇടപെട്ടതിന് പിന്നാലെ സംസ്ഥാന സർക്കാർ ജാമ്യത്തെ എതിർക്കില്ലെന്നാണ് നേരത്തെ അറിയിച്ചിരുന്നത്. എന്നാൽ, അമിത് ഷായുടെ വാക്കുകൾ കാറ്റിൽ പറത്തിയാണ് ഛത്തീസ്ഗ‍ഡ് സർക്കാർ ജാമ്യാപേക്ഷയെ കോടതിയിൽ എതിർത്തത്. ഇത് ദുഃഖകരമാണ്. കേന്ദ്രസർക്കാർ വിഷയത്തിൽ അടിയന്തരമായി ഇടപെടണം. ജനാധിപത്യ സംവിധാനത്തിൽ ഭരണകൂടത്തെയാണ് സമീപിക്കേണ്ടത്. എന്നാൽ, ഇവിടെ അതുപോലും പറ്റാത്ത സാഹചര്യമാണ്. കാലം മാപ്പ് നല്കാത്ത കിരാതത്വമാണ് ഭരണകൂടം ചെയ്യുന്നത്. അന്യായമായി അറസ്റ്റ് ചെയ്തിട്ടും കന്യാസ്ത്രീകളെ ജയിലിൽനിന്ന് പുറത്തിറക്കാൻ നീതിപീഠത്തിന് കഴിയുന്നില്ല. നീതിനിഷേധം നടന്നാൽ ഇനിയും തെരുവിലിറങ്ങി പ്രതിഷേധിക്കേണ്ടി വരും. ഭരണഘടന ഉറപ്പു നല്കുന്ന മതസ്വാതന്ത്ര്യത്തിന് മേലുള്ള കടന്നുകയറ്റമാണ് മതപരിവർത്തന നിരോധനനിയമം. ഈ നിയമത്തിന്‍റെ ചൂടുപറ്റി തിരുവസ്ത്രം ധരിച്ചവരെയും വൈദികരെയും ഉപദ്രവിക്കാൻ സാമൂഹ്യവിരുദ്ധ സംഘടനകളെ അനുവദിക്കില്ല. കന്യാസ്ത്രീമാർക്ക് ജാമ്യം നല്കണോ വേണ്ടയോ എന്ന് തീരുമാനിക്കുന്നത് ചില സാമൂഹ്യവിരുദ്ധ, തീവ്രവാദ സംഘടനകളാണ്. തീവ്രവാദ സംഘടനകൾക്ക് ന്യൂനപക്ഷങ്ങളെ പീഡിപ്പിക്കാൻ സാഹചര്യം ഒരുക്കുന്ന നിയമങ്ങൾ പിൻവലിക്കണമെന്നും ആർച്ച്ബിഷപ് പറഞ്ഞു. ക്രൈസ്തവർ നിർബന്ധിത മതപരിവർത്തനം നടത്തുന്നുവെന്ന് വിളിച്ചുകൂവിയാൽ അത് സത്യമാകില്ല. നിർബന്ധിച്ച് ആരെയും മതം മാറ്റാൻ പാടില്ലെന്നതിൽ ഉറച്ചുനിൽക്കുന്നവരാണ് ക്രൈസ്തവ സമൂഹം. ക്രൈസ്തവ സമൂഹം മതപരിവർത്തനം നടത്തുന്നുവെങ്കിൽ കേന്ദ്ര സർക്കാർ പുറത്തിറക്കിയ കണക്കിൽ ക്രൈസ്തവർ 2.4 ശതമാനംത്രമായി ചുരുങ്ങില്ലായിരുന്നു. മതപരിവർത്തനം എന്ന പുകമറ സൃഷ്ടിച്ച് ന്യൂനപക്ഷത്തെ വേട്ടയാടുകയാണ്. ചില തീവ്രവാദ സംഘടനകളെ നിലയ്ക്കു നിർത്താൻ സർക്കാരിന് സാധിക്കണം. നിർബന്ധിത മതപരിവർത്തനത്തിന്‍റ ദുർവ്യാഖ്യാനമാണ് നടക്കുന്നത്. ആരാണ് ഈ വ്യാഖ്യാനം നൽകിയത്. ആൾക്കൂട്ട വിചാരണയിലൂടെ ഇത് നടത്തുന്നത് അപകടകരമായ അവസ്ഥയാണ്. ആൾക്കൂട്ടങ്ങൾക്കും തീവ്രവാദ സംഘടനകൾക്കും ന്യൂനപക്ഷങ്ങളെ പീ‍ഡിപ്പിക്കാൻ സാഹചര്യം ഒരുക്കുന്ന നിയമങ്ങൾ പിൻവലിക്കപ്പെടണം. ആരും ഇവിടെ നിർബന്ധിത മതപരിവർത്തനത്തിന്‍റെ വക്താക്കളല്ലെന്നും എല്ലാവരെയും പോലെ ന്യൂനപക്ഷങ്ങൾക്കും ഈ രാജ്യത്ത് സഞ്ചാര സ്വാതന്ത്ര്യമുണ്ടെന്നും ആർച്ച്ബിഷപ് ചൂണ്ടിക്കാട്ടി. രാഷ്‌ട്രീയ പാർട്ടികൾക്ക് വേണ്ടിയല്ല നമ്മൾ തെരുവിലിറങ്ങി പ്രതിഷേധിക്കുന്നത്. നീതിനിഷേധിക്കപ്പെട്ട സഹോദരിമാർക്ക് വേണ്ടിയാണ് സംസാരിക്കുന്നതെന്നത് ഉത്തരവാദിത്വപ്പെട്ടവർ മനസിലാക്കണം. കുട്ടികൾക്ക് വിദ്യചൊല്ലികൊടുക്കുന്നതും രോഗികളെ ചികിത്സിക്കുന്നതും ഈ രാജ്യത്ത് തിരുവസ്ത്രം ധരിച്ച് നടക്കുന്നതും മറ്റുമാണ് കന്യാസ്ത്രീമാരിൽ കണ്ട കുറ്റമെങ്കിൽ ജീവനുള്ളിടത്തോളം കാലം ഈ രാജ്യത്ത് ഞങ്ങളെല്ലാവരും ആ സുവിശേഷത്തിന്‍റെ വക്താക്കളായിരിക്കുമെന്നും മാർ ജോസഫ് പാംപ്ലാനി പറഞ്ഞു.

എംഡിഎംഎയുമായി ശ്രീകണ്ഠപുരം സ്വദേശി പിടിയിൽ

ഇരിട്ടി: കൂട്ടുപുഴ പോലീസ് ചെക്ക്പോസ്റ്റിൽ വാഹന പരിശോധനയ്ക്കിടയിൽ ബൈക്കിൽ ഒളിപ്പിച്ച് കടത്തിയ 18.639 ഗ്രാം എംഡിഎംഎയുമായി ശ്രീകണ്ഠപുരം നിടിയങ്ങാട് സ്വദേശി വി.എസ്. അമൃതിനെ (28) ഇരിട്ടി പോലീസും കണ്ണൂർ റൂറൽ എസ്പിയുടെ ലഹരി വിരുദ്ധ സ്‌ക്വാഡും ചേർന്ന് പിടികൂടി. അതീവ രഹസ്യമായി ബൈക്കിന്‍റെ സീറ്റിനടിയിലെ ഫിൽറ്ററിനുള്ളിൽ എംഡിഎംഎ ഒളിപ്പിച്ചനിലയിലായിരുന്നു. കർണാടകയിൽ നിന്ന് താത്കാലിക രജിസ്‌ട്രേഷൻ ബൈക്കിൽ വരികയായിരുന്ന പ്രതിയുടെ പെരുമാറ്റത്തിൽ സംശയം തോന്നിയ പോലീസ് നടത്തിയ വിശദമായ പരിശോധനയിൽ ഫിൽറ്ററിന്‍റെ സ്ക്രൂ ഇളകിയ നിലയിൽ കണ്ടെത്തിയതും സമീപത്തുതന്നെ സ്ക്രൂ തുറക്കാൻ ഉപയോഗിക്കുന്ന അലൈൻ കീയും കണ്ടെത്തിയതോടെയാണു പോലീസ് ഫിൽറ്റർ ബോക്സ് തുറന്നു പരിശോധിച്ചത്. ബംഗളൂരുവിൽ നിന്നാണ് എംഡിഎംഎ വാങ്ങിയതെന്ന് പ്രതി പോലീസിനു നൽകിയ മൊഴി. പ്രതിയെ കോടതിയിൽ ഹാജരാക്കി. പരിശോധനയിൽ ഇരിട്ടി എസ്ഐ എം.ജെ. ബെന്നി, സിവിൽ പോലീസ് ഓഫീസർമാരായ നിസാമുദീൻ, ആദർശ്, ഡാൻസാഫ് അംഗങ്ങളായ എസ്ഐ ജിജിമോൻ, സീനിയർ സിവിൽ പോലീസ് ഓഫീസർമാരായ നിഷാദ്, ഷൗക്കത്തലി എന്നിവരും ഉണ്ടായിരുന്നു.

കേളൻപീടികയിലെ സ്‌നേഹയുടെ ആത്മഹത്യ; ജാമ്യത്തിൽ ഇറങ്ങിയ ഭർത്താവ് ജിനീഷിനെതിരേ വീണ്ടും കേസ്

ഇരിട്ടി: ഭർതൃ പീഡനം കാരണം ആത്മഹത്യ ചെയ്ത സ്‌നേഹയുടെ (25) ഭർത്താവ് കുഴിവിള വീട്ടിൽ ജിനീഷിനെതിരെ വീണ്ടും ഇരിട്ടി പോലീസ് കേസെടുത്തു. കേസിൽ റിമാൻഡിൽ ആയിരുന്ന പ്രതി ജാമ്യത്തിൽ ഇറങ്ങിയശേഷം വീണ്ടും സമൂഹ മാധ്യമങ്ങളിലൂടെ സ്‌നേഹയുടെ കുടുംബത്തെയും കുട്ടിയേയും അപകീർത്തിപ്പെടുത്തുന്ന രീതിയിൽ വാർത്ത പ്രചരിപ്പിച്ചതിനാണ് വീണ്ടും കേസെടുത്തത്. മരിച്ച സ്‌നേഹയുടെ അമ്മ രമയുടെ പരാതിയിലാണ് കേസ്. സാധാരണ ആത്മഹത്യ എന്ന് ആദ്യം കരുതിയിരുന്ന മരണം സ്‌നേഹയുടെ അമ്മയുടെ സഹോദരി ലീഭയുടെ വെളിപ്പെടുത്തിലോടെയാണ് ഭർതൃപീഡനം ആണെന്ന് പുറംലോകം അറിയുന്നത്. തുടർന്നാണ് അമ്മ രമയും അമ്മയുടെ സഹോദരി ലീഭയും സ്‌നേഹ അനുഭവിച്ച ഞെട്ടിക്കുന്ന പീഡനത്തിന്‍റെ കഥകൾ പുറത്തറിയിക്കുകയായിരുന്നു. തുടർന്ന് പോലീസ് ജിനീഷിനെ അറസ്റ്റ് ചെയ്യുകയും കോടതിയിൽ ഹാജരാക്കി റിമാൻഡ് ചെയ്യുകയും ചെയ്തു. കോടതിൽ നിന്നു ജാമ്യം ലഭിച്ച ശേഷം നാട്ടിലെത്തിയ പ്രതി കുടുംബത്തിനും സ്‌നേഹക്കുമെതിരെ അപവാദ പരാമർശങ്ങൾ നടത്തുകയായിരുന്നു. പോലീസ് അന്വേഷണം ആരംഭിച്ചതോടെ ഒളിവിൽ പോയ പ്രതിയുടെ ജാമ്യം ഉൾപ്പെടെ റദ്ദ് ചെയ്യാമെന്ന സ്ഥിതിയാണുള്ളത്. കേസിന്‍റെ റിപ്പോർട്ട് അടുത്തദിവസം തന്നെ എസ്പിക്ക് സമർപ്പിക്കുമെന്ന് ഇരിട്ടി സിഐ എ. കുട്ടികൃഷ്ണൻ പറഞ്ഞു.

കന്യാസ്ത്രീകളുടെ അറസ്റ്റിൽ പ്രതിഷേധം പരക്കുന്നു

ഇരിട്ടി: ഛത്തീസ്ഗഡിൽ കന്യാസ്ത്രീകളെ അന്യായമായി ജയിലിലടച്ച നടപടിക്കെതിരെ കോൺഗ്രസ് കരിക്കോട്ടക്കരി മണ്ഡലം കമ്മിറ്റിയുടെ ആഭിമുഖ്യത്തിൽ കരിക്കോട്ടക്കരി ടൗണിൽ പ്രതിഷേധ മാർച്ചും കൂട്ടായ്മയും സംഘടിപ്പിച്ചു. ഡിസിസി ജനറൽ സെക്രട്ടറി ജയ്സൺ കാരക്കാട്ട് ഉദ്ഘാടനം ചെയ്തു. കരിക്കോട്ടക്കരി മണ്ഡലം പ്രസിഡന്‍റ് മനോജ് എം. കണ്ടത്തിൽ അധ്യക്ഷത വഹിച്ചു. അയ്യൻകുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ, മുൻ പ്രസിഡന്‍റ് കെ.സി. ചാക്കോ, കോൺഗ്രസ് അയ്യൻകുന്ന് മണ്ഡലം പ്രസിഡന്‍റ് ജയിൻസ് ടി. മാത്യു, പഞ്ചായത്ത് അംഗങ്ങളായ മിനി വിശ്വനാഥൻ, ഐസക് മുണ്ടപ്ലാക്കൽ, സജി മച്ചിത്താന്നി, ജോസഫ് വട്ടുകുളം, റോസിലി വിൽസൺ, ബെന്നി പുതിയാമ്പുറം, ജോയ് വടക്കേടം, ബേബി ചിറ്റേത്ത്, ജിതിൻ തോമസ്, ജോർജ് വടക്കുംകര, സിനോജ് കെ. ജോർജ്, ഷാജു എടശേരി, ബിജു കുന്നുംപുറം, ജാൻസി ചെരിയൻകുന്നേൽ, അജയ് സെബാസ്റ്റ്യൻ എന്നിവർ നേതൃത്വം നൽകി. മഹിളാ കോണ്‍ഗ്രസ് കണ്ണൂർ ജില്ലാ കമ്മിറ്റിയുടെ നേതൃത്വത്തില്‍ ഇരിട്ടിയിൽ വായമൂടിക്കെട്ടി പ്രതിഷേധ പ്രകടനവും സംഗമവും നടത്തി. സംഗമം കെപിസിസിയംഗം ലിസി ജോസഫ് ഉദ്ഘാടനം ചെയ്തു. ജില്ലാ പ്രസിഡന്‍റ് ശ്രീജ മഠത്തിൽ അധ്യക്ഷത വഹിച്ചു. സംസ്ഥാന സെക്രട്ടറി നസീമ ഖാദർ, പി.വി. ധനലക്ഷ്മി, ഉഷ അരവിന്ദ്, മിനി പ്രസാദ്, ലിസമ്മ ജോസഫ് തുടങ്ങിയവർ പ്രസംഗിച്ചു. കേളകം: കേളകം പഞ്ചായത്തിലെ പത്ത് ക്രൈസ്തവ പള്ളികളുടെ സംയുക്താഭിമുഖ്യത്തിൽ പ്രതിഷേധ കൂട്ടായ്മ നടത്തി. സാൻജോസ് പള്ളി വികാരി ഫാ. മാത്യു പെരുമാട്ടിക്കുന്നേൽ ഉദ്ഘാടനം ചെയ്തു. മലങ്കര കത്തോലിക്ക ബത്തേരി ഭദ്രാസനം വികാരി ജനറാൾ മോൺ. കുര്യാക്കോസ് ചെറുപുഴതോട്ടത്തിൽ മുഖ്യപ്രഭാഷണം നടത്തി. ഫാ. വർഗീസ് ചെങ്ങനാമഠത്തിൽ, ഫാ.ജോർജ് ചേലമരം, കെ.സിവൈഎം സംസ്ഥാന സെക്രട്ടറി വിപിൻ ജോസഫ് എന്നിവർ പ്രസംഗിച്ചു. കോളയാട്: കോളയാട് ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധ മാർച്ച് നടത്തി. ബ്ലോക്ക് പ്രസിഡന്‍റ് കാഞ്ഞരോളി രാഘവൻ ഉദ്ഘാടനം ചെയ്തു കോളയാട് മണ്ഡലം പ്രസിഡന്‍റ് സാജൻ ചെറിയാൻ, ബ്ലോക്ക് ജനറൽ സെക്രട്ടറിമാരായ എ.കെ. സുധാകരൻ, പാലക്കണ്ടി വിജയൻ, പി. കുഞ്ഞികൃഷ്ണൻ, ചമ്പാടൻ മോഹനൻ, പി.വി. രമേശൻ, കെ.വി. ജോസഫ്, ഇസ്മായിൽ, യൂസഫ് കണ്ണവം, ഒ.എൻ. സുധീഷ് കുമാർ, കെ.പി. ഉഷ, തങ്കച്ചൻ, മോഹനൻ, പ്രമീള പുരുഷോത്തവൻ, ബിജി ജോജോ എന്നിവർ നേതൃത്വം നൽകി.

റിവർവ്യൂ പോയിന്‍റ് ആക്രമണം: പ്രതികളെ എടക്കാനത്തെത്തിച്ച് തെളിവെടുത്തു

ഇരിട്ടി: എടക്കാനം റിവർവ്യൂ പോയന്‍റിൽ കഴിഞ്ഞ 13ന് നടന്ന ആക്രമണ സംഭവവുമായി ബന്ധപ്പെട്ട് റിമാൻഡിലായ പ്രധാന പ്രതികളെ എടക്കാനത്തെത്തിച്ച് തെളിവെടുത്തു. ഇരിട്ടി പോലീസ് ഇൻസ്പെക്‌ടർ എ. കുട്ടികൃഷ്ണന്‍റെ നേതൃത്വത്തിലുള്ള സംഘമാണു പ്രതികളെ കസ്റ്റഡിയിൽ വാങ്ങി എടക്കാനത്തെ ആക്രമണം നടന്ന പുഴക്കരയിലും പ്രതികൾ രക്ഷപ്പെടുന്നതിനിടെ വാഹനാപകടം നടന്ന സ്ഥലത്തും എത്തിച്ച് തെളിവെടുത്തത്. കേസിലെ രണ്ടാം പ്രതിയും അക്രമികൾ സഞ്ചരിച്ച ഇന്നോവ കാറിന്‍റെ ഉടമയുമായ മുഴക്കുന്ന് നല്ലൂരിൽ ഉരുവച്ചാലിൽ ഹൗസിൽ അട്ടാപ്പി എന്ന ശ്രീലാൽ (29), മൂന്നാം പ്രതി കാക്കയങ്ങാട് പാലപ്പുഴ കൂടലാട് ശ്രുതി നിവാസിൽ ഉണ്ണി എന്ന സുജീഷ് (26), അഞ്ചാം പ്രതിയും സിപിഎം കാക്കയങ്ങാട് ലോക്കൽ കമ്മിറ്റിയംഗവും കാക്കയങ്ങാട് പാലപ്പുഴ കൂടലാട് ബ്രാഞ്ച് സെക്രട്ടറിയുമായ ദേവർ ഹൗസിൽ എ. രഞ്ജിത്ത് (32) എന്നിവരെയാണു കേസന്വേഷണത്തിന്‍റെ ഭാഗമായി കസ്റ്റഡിയിൽ വാങ്ങി സംഭവസ്ഥലത്തെത്തിച്ച് തെളിവെടുത്തത്. പ്രതികൾ സംഭവത്തിനുശേഷം രക്ഷപ്പെടുന്നതിനിടെ കീഴൂർക്കുന്ന്-എടക്കാനം റോഡിൽ പാലാപ്പറമ്പ് വയോജന കേന്ദ്രത്തിനു സമീപം കശുമാവ് തോട്ടത്തിൽ വലിച്ചെറിഞ്ഞ മാരകായുധങ്ങളും പോലീസ് കണ്ടെടുത്തു. തെളിവെടുപ്പ് പൂർത്തിയാക്കി കോടതിയിൽ ഹാജരാക്കിയ പ്രതികളെ വീണ്ടും റിമാൻഡ് ചെയ്തു. ആക്രമണത്തിൽ ഗുരുതരമായി പരിക്കേറ്റ എടക്കാനം സ്വദേശികളുടെ പരാതിയിൽ കണ്ടാലറിയാവുന്ന 12 പേരുൾപ്പെടെ 15 പേർക്കെതിരെയാണ് ഇരിട്ടി പോലീസ് വധശ്രമം ഉൾപ്പെടെ വിവിധ വകുപ്പുകൾ പ്രകാരം കേസെത്തിരുന്നത്. എട്ടു പ്രതികളാണ് ഇതുവരെ പിടിയിലായത്. എടയന്നൂർ ശുഹൈബ് വധക്കേസ് പ്രതിയും കാക്കയങ്ങാട് പാലപ്പുഴ സ്വദേശിയുമായ ദീപ് ചന്ദാണ് (34) എടക്കാനം കേസിലെ ഒന്നാം പ്രതി. ഇയാൾ ഉൾപ്പെടെ മറ്റു പ്രതികൾ ഒളിവിലാണ്. ഇവരെ കണ്ടെത്താനുള്ള അന്വേഷണം ശക്തമാക്കിയതായും പ്രധാന പ്രതിയുൾപ്പെടെ ഉടൻ പിടിയിലാകുമെന്നും അന്വേഷണ ഉദ്യോഗസ്ഥനായ ഇരിട്ടി പോലീസ് ഇൻസ്പെക്‌ടർ എ. കുട്ടിക്കൃഷ്ണൻ പറഞ്ഞു.

തൊഴിൽ മാർഗനിർദേശ പരിപാടി സംഘടിപ്പിച്ചു

കൂത്തുപറമ്പ്: നിർമലഗിരി കോളജ് (ഓട്ടോണമസ്) വുമൺ സെല്ലും ഐക്യുഎസിയും സംയുക്തമായി മൂന്നാംവർഷ ബിരുദ വിദ്യാർഥികൾക്കായി "സ്ട്രാറ്റെജിക് കരിയർ ഗൈഡൻസ്' എന്ന വിഷയത്തിൽ മാർഗനിർദേശ പരിപാടി സംഘടിപ്പിച്ചു. നിർമലഗിരി കോളജ് സുവോളജി വിഭാഗം റിട്ട. പ്രഫസർ ഡോ. ബേബി ജോസഫ് മുഖ്യപ്രഭാഷണം നടത്തി. തൊഴിൽപരമായ ആസൂത്രണം, ലക്ഷ്യങ്ങൾ നിർണയിക്കൽ, ഉപരിപഠനത്തിനും ഗവേഷണത്തിനുമുള്ള അവസരങ്ങൾ എന്നിവയെക്കുറിച്ച് അദ്ദേഹം വിദ്യാർഥികളുമായി സംവദിച്ചു. കൃത്യമായ തീരുമാനങ്ങളെടുക്കാൻ വിദ്യാർഥികളെ പ്രാപ്തരാക്കുക എന്നതായിരുന്നു പരിപാടിയുടെ പ്രധാന ലക്ഷ്യം. ഐക്യുഎസി കോ-ഓർഡിനേറ്റർ റവ. ഡോ. മാർട്ടിൻ ജോസഫ്, മൂന്നാം വർഷ വിദ്യാർഥി ആകാശ് ജെ. പ്രകാശ് എന്നിവർ പ്രസംഗിച്ചു.

തദ്ദേശ തെരഞ്ഞെടുപ്പ്: ഇലക്‌ട്രോണിക് വോട്ടിംഗ് യന്ത്രങ്ങളുടെ ആദ്യഘട്ട പരിശോധന തുടങ്ങി

കണ്ണൂർ: ജില്ലയിലെ തദ്ദേശ സ്വയംഭരണ സ്ഥാപനങ്ങളിലേക്കുള്ള പൊതുതെരഞ്ഞെടുപ്പിനുള്ള ഇലക്‌ട്രോണിക് വോട്ടിംഗ് യന്ത്രങ്ങളുടെ ആദ്യഘട്ട പരിശോധന (എഫ്എൽസി) തുടങ്ങി. ജില്ലാ ഇലക്‌ഷൻ ഓഫീസറായ ജില്ലാ കളക്ടർ അരുൺ കെ. വിജയന്‍റെ നേതൃത്വത്തിലാണ് പ്രത്യേകം പരിശീലനം ലഭിച്ച ഉദ്യോഗസ്ഥർ പരിശോധന നടത്തുന്നത്. ഓഗസ്റ്റ് 23 വരെ കണ്ണൂർ താലൂക്ക് ഓഫീസ് വളപ്പിലെ ഇലക്‌ഷൻ വെയർ ഹൗസിന് സമീപം പ്രത്യേകം സജ്ജീകരിച്ച ഹാളിലും കണ്ണൂർ കോർപറേഷന്‍റെ പുഴാതി സോണൽ ഓഫീസിലെ ഇലക്‌ഷൻ വെയർ ഹൗസിലുമായി പരിശോധന തുടരും. ജില്ലയിൽ 3611 കൺട്രോൾ യൂണിറ്റുകൾ, 9703 ബാലറ്റ് യൂണിറ്റുകൾ എന്നിവയാണ് പരിശോധിക്കാനുള്ളത്. ഇവിഎം നിർമാതാക്കളായ ഹൈദരാബാദിലെ ഇലക്‌ട്രോണിക്‌സ് കോർപറേഷൻ ഓഫ് ഇന്ത്യ ലിമിറ്റഡിന്‍റെ രണ്ട് എൻജിനിയർമാരാണ് സാങ്കേതിക സഹായം നല്കുന്നത്. അംഗീകൃത രാഷ്‌ട്രീയ പാർട്ടി പ്രതിനിധികളുടെ സാന്നിധ്യത്തിലാണ് പരിശോധന. ഹാളിലേക്കുള്ള പ്രവേശനം മെറ്റൽ ഡിറ്റക്ടർ വഴി നിയന്ത്രിച്ചിട്ടുണ്ട്. പരിശോധനകളിൽ ഇലക്‌ഷൻ ഡപ്യൂട്ടി കളക്ടർ കെ.കെ. ബിനി സംബന്ധിച്ചു. ജില്ലാ കളക്ടറുടെ ചുമതലയിൽ നടക്കുന്ന എഫ്എൽസി പ്രവർത്തനം ഏകോപിപ്പിക്കുന്നതിന് തദ്ദേശ വകുപ്പ് അസി. ഡയറക്ടർ ടി.വി. സുഭാഷിനെ ചാർജ് ഓഫീസറായി നിയോഗിച്ചു. 92 ഉദ്യോഗസ്ഥരെ യാണ് പരിശോധനകൾക്കായി നിയോഗിച്ചിട്ടുള്ളത്.

കാർ നിയന്ത്രണം വിട്ട് വൈദ്യുത തൂണിലിടിച്ച് നാലുപേർക്ക് പരിക്ക്

മട്ടന്നൂർ: ഉരുവച്ചാൽ കയനിയിൽ കാർ നിയന്ത്രണം വിട്ടു വൈദ്യുത തൂണിലിടിച്ച് നാലുപേർക്ക് പരിക്കേറ്റു. വ്യാഴാഴ്ച രാത്രി പത്തോടെയായിരുന്നു അപകടം. കാറിലെ യാത്രക്കാരായ ബാവോട്ടുപാറയിലെ സിനാൻ (20), ജാസിം (20) എന്നിവരെ തലശേരിയിലെ സ്വകാര്യ ആശുപത്രിയിലും, ഹിഭാഷ് (19), മുഹ്സിൻ ശഹബാൻ (19) എന്നിവരെ ഉരുവച്ചാൽ ഐഎംസി ആശുപത്രിയിലും പ്രവേശിപ്പിച്ചു. അപകട സമയം റോഡരികിലെ നടന്നുപോകുകയായിരുന്ന യാത്രക്കാരി തലനാരിഴയ്ക്കാണു രക്ഷപ്പെട്ടത്. ഉരുവച്ചാൽ-മണക്കായി റോഡിൽ കയനി പള്ളിക്കു സമീപത്തായിരുന്നു അപകടം. മണക്കായി ഭാഗത്ത് നിന്ന് ഉരുവച്ചാലിലേക്കുവരികയായിരുന്ന കാറാണു നിയന്ത്രണം വിട്ട് വൈദ്യുത തൂണിൽ ഇടിച്ചത്. അപകടത്തിൽ കാറിന്‍റെ മുൻഭാഗം പൂർണമായും തകർന്നു. വൈദ്യുത തൂണും തകർന്നിട്ടുണ്ട്. അപകടത്തിന്‍റെ ശബ്‌ദം കേട്ട് സ്ഥലത്തെത്തിയവർ രക്ഷാപ്രവർത്തനം നടത്തി. അപകടത്തെ തുടർന്ന് റോഡിൽ ഗതാഗത തടസമുണ്ടായി. മട്ടന്നൂർ എസ്ഐ പി.കെ. അക്ബറും സംഘവും സ്ഥലത്തെത്തിയാണ് ഗതാഗതം പുനഃസ്ഥാപിച്ചത്.

മാത്തിൽ ഗുരുദേവ് കോളജിൽ സൈക്കോളജിക്കൽ തെറാപ്പി സംഘടിപ്പിച്ചു

ചെറുപുഴ: കണ്ണൂർ തെറാപ്പി ഹോമുമായി സഹകരിച്ച് മാത്തിൽ ഗുരുദേവ് ആർട്സ് ആൻഡ് സയൻസ് കോളജിൽ സൈക്കോളജിക്കൽ തെറാപ്പി സംഘടിപ്പിച്ചു. വിദ്യാർഥികളുടെ സാമൂഹ്യ പെരുമാറ്റങ്ങളിൽ വരുന്ന അസ്വഭാവിക രീതികൾ കണ്ടെത്താനും പരിഹാരം തേടാനും പറ്റുന്ന വിധത്തിലുള്ള സൈക്കോളജിക്കൽ തെറാപ്പിക്കാണ് കോളജിൽ തുടക്കം കുറിക്കുന്നത്. കോളജ് പ്രിൻസിപ്പൽ റവ. ഡോ. സാമുവൽ പുതുപ്പാടി പരിപാടി ഉദ്ഘാടനം ചെയ്തു. സൈക്കോളജി ഡിപ്പാർട്ട്മെന്‍റിന്‍റെ നേതൃത്വത്തിൽ എ ഗൈഡ് ടു ഡിഫറന്‍റ് സൈക്കോളജിക്കൽ തെറാപ്പി എന്ന വിഷയത്തിൽ ക്ലാസെടുത്തു. സൈക്കോളജി വിഭാഗം അധ്യാപികമാരായ കെ.പി. വീനസ്, കെ. ബേബി രമ്യ എന്നിവർ പ്രസംഗിച്ചു. തുടർന്ന് കണ്ണൂർ തെറാപ്പി ഹോം കൺസൾട്ടന്‍റ് സൈക്കോളജിസ്റ്റ്സ് സഹല അബ്ദുള്ള, രാഹുൽ രാജ് എന്നിവർ ക്ലാസുകൾക്ക് നേതൃത്വം നൽകി. ചടങ്ങിൽ റിസോഴ്സ് പേഴ്സൺസിനു പ്രിൻസിപ്പൽ സർട്ടിഫിക്കറ്റുകൾ സമ്മാനിച്ചു. പ്രാക്ടിക്കൽ സെഷൻസും വിദ്യാർഥികൾക്കായി ഒരുക്കിയിരുന്നു.

മയക്കു മരുന്ന് കേസിൽ ജയിലിൽ നിന്നിറങ്ങിയ യുവാവ് എംഡിഎംഎ കേസിൽ അറസ്റ്റിൽ

ശ്രീകണ്ഠപുരം: നേരത്തെ മയക്കുമരുന്ന് കേസിൽ പിടിയിലായി ജയിലിൽ നിന്നിറങ്ങിയ യുവാവിനെ എംഡിഎംഎയുമായി പോലീസ് അറസ്റ്റ് ചെയ്തു. ശ്രീകണ്ഠപുരം അടുക്കത്തെ ഷബീറിനെയാണ് (42) ശ്രീകണ്ഠപുരം പോലീസും ഡാൻസാഫ് സംഘവും നടത്തിയ പരിശോധനയിൽ 30 ഗ്രാം എംഡിഎംഎയുമായി അറസ്റ്റ് ചെയ്തത്. കഴിഞ്ഞയാഴ്ച കണ്ണൂർ ടൗൺ പോലീസ് എംഡിഎംഎയുമായി പിടികൂടിയ പ്രതിയുടെ മൊഴിയുടെ അടിസ്ഥാനത്തിൽ എസ്ഐ പി.പി. പ്രകാശനും സംഘവും നടത്തിയ അന്വേഷണത്തിലാണ് ഇയാൾ പിടിയിലാകുന്നത്. സാജുവിന്‍റെ ബാങ്ക് അക്കൗണ്ട് ഉപയോഗിച്ച് മയക്കുമരുന്നിന്‍റെ പണമിടപാട് നടത്തിയിരുന്നത്. ജില്ലയിലെ മയക്കുമരുന്ന് വില്പന റാക്കറ്റിലെ പ്രധാന കണ്ണിയാണ് ഇയാളെന്ന് പോലീസ് പറഞ്ഞു. രഹസ്യ വിവരത്തെ തുടർന്ന് പോലീസ് പ്രതിയുടെ വീട്ടിൽ നടത്തിയ പരിശോധനയിൽ കിടപ്പുമുറിയിൽ ഒളിപ്പിച്ചു വച്ച നിലയിലായിരുന്നു എംഡിഎംഎ കണ്ടെത്തിയത്. പരിശോധന നടത്തുന്പോൾ പ്രതി വീട്ടിലുണ്ടായിരുന്നില്ല. ഇന്നലെ പ്രതി വീട്ടിലെത്തിയിട്ടുണ്ടെന്ന വിവരത്തെ തുടർന്ന് നടത്തിയ റെയ്ഡിലാണ് പിടികൂടി അറസ്റ്റ് രേഖപ്പെടുത്തിയത്. ഇതിനു മുന്പും വീട്ടിൽ നിന്നും എംഡിഎംയുമായി തന്നെ പ്രതിയെ അറസ്റ്റ് ചെയ്തിരുന്നു. അന്ന് പോലീസിനെ കണ്ട് ഗേറ്റ് തുറക്കാത്തത്തിനെ തുടർന്ന ഏഴടിയുള്ള മതിൽ ചാടിക്കടന്നായിരുന്നു പോലീസ് പരിശോധന നടത്തിയത്. പോലീസിനെ വെട്ടിച്ച് മതിൽ ചാടി രക്ഷപ്പെടാൻ ശ്രമിച്ച പ്രതിയുടെ തുടയെല്ലിന് പരിക്കേറ്റതിനെ തുടർന്ന് കുറ്റിക്കാട്ടിൽ ഒളിച്ചിരിക്കുന്പോഴായിരുന്നു അന്ന് അറസ്റ്റ് ചെയ്തത്. ഈ കേസിൽ ജയിലിൽ നിന്നിറങ്ങിയതിനു പിന്നാലെയാണ് വീണ്ടും അറസ്റ്റിലായത്. തൃക്കാക്കരയിൽ നിന്നും എംഡിഎംഎയുമായി പിടിയിലായതിനെ തുടർന്ന് എറണാകുളം ജയിലിലുമായിരുന്നു. പറശിനിക്കടവിൽ നടന്ന ഒരു പീഡനക്കേസിലും പ്രതിയാണ്.

കന്യാസ്ത്രീകളുടെ അറസ്റ്റിൽ പ്രതിഷേധം പരക്കുന്നു

ചന്ദനക്കാംപാറ: ഛത്തീസ്ഗഡിൽ അന്യായമായി അറസ്റ്റു ചെയ്ത് ജയിലിൽ അടച്ച കന്യാസ്ത്രീകളെ മോചിപ്പിക്കണമെന്ന് ആവശ്യപ്പെട്ട് ഇടവക സമൂഹം ചന്ദനക്കാംപാറയിൽ പ്രതിഷേധ സംഗമം നടത്തി. ഇടവക വികാരി ഫാ. ജോസഫ് ചാത്തനാട്ട്, സഹവികാരി ഫാ. ജിൻസ് ചൊള്ളമ്പുഴ, പാരീഷ് കോ- ഓർഡിനേറ്റർ തങ്കച്ചൻ വടക്കേക്കര എന്നിവർ നേതൃത്വം നല്കി. അമ്മംകുളം: കെസിവൈഎം അമ്മംകുളം യൂണിറ്റിന്‍റെ നേതൃത്വത്തിൽ പ്രതിഷേധ ജ്വാല നടത്തി. അമ്മംകുളം ഇടവക വികാരി ഫാ. മാത്യു ആനകുത്തിയിൽ ഉദ്ഘാടനം ചെയ്തു. അമൽ ജോയി കൊന്നയ്ക്കൽ, സാവിയോ മാമല, ഡേവിഡ് മുകളേൽ, ബോണി മണലിങ്കൽ, ടോണി തോമസ് എന്നിവർ പ്രസംഗിച്ചു. ചെമ്പന്തൊട്ടി: കേരള കോൺഗ്രസ് മണ്ഡലം കമ്മിറ്റിയുടെ ആഭിമുഖ്യത്തിൽ ചെമ്പന്തൊട്ടിയിൽ സംഘടിപ്പിച്ച പ്രതിഷേധ ജ്വാല ജില്ലാ പ്രസിഡന്‍റ് റോജസ് സെബാസ്റ്റ്യൻ ഉദ്ഘാടനം ചെയ്തു. മണ്ഡലം പ്രസിഡന്‍റ് ജോയി കൊച്ചുപുരയ്ക്കൽ അധ്യക്ഷത വഹിച്ചു. സംസ്ഥാന സെക്രട്ടറി ജയിംസ് പന്ന്യാംമാക്കൽ മുഖ്യ പ്രഭാഷണം നടത്തി. ടെൻസൺ ജോർജ് കണ്ടത്തിൽകര, ജോയി തെക്കേടം, കെ.ജെ. മത്തായി, ജോസ് വണ്ടാക്കുന്നേൽ, ലിസ ടോം, ബേബി മംഗലത്ത്, ഫിലിപ്പ് ഞാളിയത്ത്, വി.എസ്. സെബാസ്റ്റ്യൻ, ബാബു പുതുശേരി, ബെന്നി വയലാമണ്ണിൽ, ചാക്കോ തേക്കുംകാട്ടിൽ എന്നിവർ പ്രസംഗിച്ചു. ശ്രീകണ്ഠപുരം: ശ്രീകണ്ഠപുരം കോൺഗ്രസ് ബ്ലോക്ക്‌ കമ്മിറ്റിയുടെ നേതൃത്വത്തിൽ പ്രതിഷേധ പ്രകടനം നടത്തി. ബ്ലോക്ക് പ്രസിഡന്‍റ് ഇ.വി. രാമകൃഷ്ണൻ, കെപിസിസിയംഗം കെ.വി. ഫിലോമിന, ഡിസിസി സെക്രട്ടറിമാരായ ബിജു പുളിയൻതൊട്ടി, ജോഷി കണ്ടത്തിൽ, എം.ഒ. മാധവൻ, പി.ടി. കുര്യക്കോസ്, ഡോ. വി.എ. അഗസ്റ്റിൻ, ജിയോ ജേക്കബ്, പി.എം. ജോസ്, രവീന്ദ്രൻ, ടി. രാജ്‌കുമാർ, കുഞ്ഞു മൊയ്തീൻ, ഇസ്മായിൽ, പ്രകാശൻ നിടിയേങ്ങ, മേഴ്‌സി ബൈജു, നസീമ ഖാദർ, ജോസഫീന വർഗീസ്, സിജോ മറ്റപ്പള്ളി, മിനി ഷൈബി, ജയശ്രീ ശ്രീധരൻ, എം. ഉഷ, മധു തൊട്ടിയിൽ, മേരി കുഴിക്കാട്ടിൽ, നാരായണൻ മൂത്തേടൻ, റോയി മഴുവഞ്ചേരി,വി.വി. സന്തോഷ്‌, ബാബു ചെറുശേരി, അപ്പച്ചൻ നെടിയകാലയിൽ, ജസീൽ കണിയാർവയൽ എന്നിവർ നേതൃത്വം നൽകി. നെടിയേങ്ങ: കോൺഗ്രസ് നെടിയേങ്ങ മണ്ഡലം കമ്മിറ്റിയുടെ ആഭിമുഖ്യത്തിൽ വായ മൂടിക്കെട്ടി പ്രതിഷേധ സംഗമം നടത്തി. മണ്ഡലം പ്രസിഡന്‍റ് ജിയോ ജേക്കബ് അധ്യക്ഷത വഹിച്ചു. പി.ഐ. മാത്യു, പ്രകാശൻ നെടിയേങ്ങ, ടി.എൻ. പ്രമോദ്, അപ്പു കണ്ണാവിൽ, കെ. ബാബുരാജ്, ജോസ് പന്ന്യാംമാക്കൽ, ആർ. ശശിധരൻ, വർഗീസ് നെടിയകാലായിൽ, ചാക്കോ കൊന്നയ്ക്കൽ, കെ.വി. കുഞ്ഞിരാമൻ, സി.സി. ബാബു, രാജൻ താന്നിക്കാക്കുഴി, ഐസക്ക് കാഞ്ഞിരത്തിങ്കൽ, ഇബ്രാഹിം നെടിയങ്ങ, ജോസഫ് കണ്ടത്തിൻകര, ജോസഫിന വർഗീസ്, മേരി കുഴിക്കാട്ട്, സൂസമ്മ ഒലിക്കര എന്നിവർ പ്രസംഗിച്ചു. ആലക്കോട്: ഇരിക്കൂർ മണ്ഡലം മുസ്‌ലിം ലീഗ് ആലക്കോട് നടത്തിയ പ്രതിഷേധ സംഗമം മുസ്‌ലിം ലീഗ് സംസ്ഥാന വൈസ് പ്രസിഡന്‍റ് അബ്ദുറഹ്മാൻ കല്ലായി ഉദ്ഘാടനം ചെയ്തു. ഇരിക്കൂർ മണ്ഡലം മുസ്‌ലിം ലീഗ് ജനറൽ സെക്രട്ടറി ടി.എൻ.എ. ഖാദർ അധ്യക്ഷത വഹിച്ചു. വി.എ. റഹീം, കെ.പി. ഹംസ, വി.വി. അബ്ദുള്ള, ഇ.എം. നാസർ, എം.എ. ഖലീൽ റഹ്മാൻ, യു.പി.അബ്ദുറഹ്മാൻ, കെ.പി. നൗഷാദ്, പി.കെ.അബൂബക്കർ, പി.എം. മുഹമ്മദ്കുഞ്ഞി, പി.മൊയ്തീൻ, ഇ.എം. മുഹമ്മദ്കുഞ്ഞ് മുസ‌ല്യാർ, പി.കെ. ഹനീഫ, സി.പി. നൗഷാദ് എന്നിവർ പ്രസംഗിച്ചു. പയ്യാവൂർ: ഛത്തീസ്ഗഡിൽ മലയാളി കന്യാസ്ത്രീകളെ അന്യായമായി അറസ്റ്റ്ചെയ്ത് ജയിലിൽ അടച്ചതിനെതിരെ എൽഡിഎഫിന്‍റെ ആഭിമുഖ്യത്തിൽ പയ്യാവൂർ ടൗണിൽ പ്രതിഷേധ പ്രകടനവും പൊതുയോഗവും നടന്നു. സിപിഎം ജില്ലാ കമ്മിറ്റി അംഗം കെ. ജനാർദനൻ യോഗം ഉദ്ഘാടനം ചെയ്തു. ജോസ് മണ്ഡപം അധ്യക്ഷത വഹിച്ചു. എം.സി. നാരായണൻ ആമുഖപ്രഭാഷണം നടത്തി. ടി.എം. ജോഷി, കെ.ടി. അനിൽകുമാർ, ടി.കെ. വത്സൻ, ജോസ് പരത്തനാൽ, എസ്. സുരേഷ് എന്നിവർ പ്രസംഗിച്ചു. തളിപ്പറമ്പ്: തളിപ്പറമ്പ് ബ്ലോക്ക് കോൺഗ്രസ് കമ്മിയുടെ ആഭിമുഖ്യത്തിൽ പ്രകടനവും പ്രതിഷേധ കൂട്ടായ്മയും നടത്തി. തളിപ്പറമ്പ് ടൗൺ സ്ക്വയറിന് സമീപം നടന്ന പരിപാടി ഡിസിസി ജനറൽ സെക്രട്ടറി ടി. ജനാർദനൻ ഉദ്ഘാടനം ചെയ്തു. എം.എൻ. പൂമംഗലം അധ്യക്ഷത വഹിച്ചു. രജനി രമാനന്ദ് മുഖ്യപ്രഭാഷണം നടത്തി. നൗഷാദ് ബ്ലാത്തൂർ, ഇ.ടി. രാജീവൻ, കെ. നഫീസ ബീവി, രാജീവൻ കപ്പച്ചേരി, എം.വി. പ്രേമരാജൻ, സി.വി. സോമനാഥൻ, വി. രാഹുൽ, സജി ഓതറ, കെ. രമേശൻ, പി.ടി. ജോൺ, പി.ജെ. മാത്യു, പ്രമീള രാജൻ, ഐ.വി. കുഞ്ഞിരാമൻ, ബിജു തടിക്കടവ് എന്നിവർ പ്രസംഗിച്ചു.‌ എം. വത്സനാരായണൻ, ദീപ രഞ്ജിത്ത്, വി.പി. ഗോപിനാഥൻ, പി.വി. നാണു, മുരളി പുക്കോത്ത്, കെ. പ്രഭാകരൻ എന്നിവർ നേതൃത്വം നല്കി. പാടിയോട്ടുചാൽ: എൽഡിഎഫിന്‍റെ നേതൃത്വത്തിൽ പാടിയോടുചാലിൽ പ്രതിഷേധ പ്രകടനവും പൊതുയോഗവും നടത്തി. സിപിഎം കണ്ണൂർ ജില്ലാകമ്മിറ്റിയംഗം പി. ശശിധരൻ ഉദ്ഘാടനം ചെയ്തു. പി. നളിനി അധ്യക്ഷത വഹിച്ചു. പി. സജികുമാർ, സി.വി. വിഷ്ണു പ്രസാദ്, കെ. കുഞ്ഞികൃഷ്ണൻ, കെ.വി. പ്രഭാകരൻ, സി. പദ്മനാഭർ, അസിനാർ അരവഞ്ചാൽ എന്നിവർ പ്രസംഗിച്ചു. മഹിള അസോസിയേഷൻ മാത്തിൽ ടൗണിൽ പ്രതിഷേധയോഗം നടത്തി. കെ.വി. ശൈലജ ഉദ്ഘാടനം ചെയ്തു. പി.അനസൂയ അധ്യക്ഷത വഹിച്ചു. എം.ജയ പ്രസംഗിച്ചു.

ജയഗിരി, മണ്ണാത്തിക്കുണ്ട് മേഖലയിൽ കാട്ടാനകളിറങ്ങി; കൃഷി നശിപ്പിച്ചു

ഉദയഗിരി: ഉദയഗിരി പഞ്ചായത്തിലെ ജയഗിരി, മണ്ണാത്തിക്കുണ്ട് പ്രദേശങ്ങളിൽ കാട്ടാനക്കൂട്ടമിറങ്ങി വ്യാപകമായി കൃഷി നശിപ്പിച്ചു. കാരാങ്കൽ ആന്‍റണി, വെന്പള്ളി ഷാജു, ലിബിൻ കാരാങ്കൽ, തടത്തേൽ ജോസഫ്, പന്തപ്ലാക്കൽ ഗിരി, ടോമി മണ്ഡപം, ചാത്തനാട്ട് ഏലിക്കുട്ടി എന്നിവരുടെ വിളകളാണ് നശിപ്പിച്ചത്. ആന്‍റണിയുടെ 200 ഓളം വാഴകളും കായ്ക്കുന്ന തെങ്ങും ഷാജുവിന്‍റെ നിരവധി വാഴകളും നശിപ്പിച്ചു. വാഴത്തോട്ടത്തിൽ വച്ചിരുന്ന നിരവധി ചാക്ക് വളവും കുത്തി കീറി നശിപ്പിച്ചു. കർണാട‌ക വനത്തിൽ നിന്നുമാണ് ആനക്കൂട്ടം എത്തുന്നത്. പ്രദേശത്ത് വൈദ്യുത വേലിയുണ്ടെങ്കിലും സാമൂഹ്യവിരുദ്ധർ കന്പികൾ കൂട്ടിക്കെട്ടി ഷോർട്ട്സർക്യൂട്ട് ഉണ്ടാക്കുന്നതിനാൽ പലയിടത്തും പ്രവർത്തന രഹിതമാണ്. ഇതിലൂടെയാണ് ആനകൾ കൃഷിയിടങ്ങളിലെത്തുന്നത്. ഒരാഴ്ചയായി ഈ മേഖലയിൽ കാട്ടാനക്കൂട്ടം തന്പടിച്ചിരിക്കുകയാണ്. കൃഷിനാശം ഉണ്ടായ സ്ഥലങ്ങൾ വനംവകുപ്പുദ്യോഗസ്ഥർ സന്ദർശിച്ചു.

ഓടിക്കൊണ്ടിരുന്ന കാറിന് തീപിടിച്ചു: ആളപായമില്ല

ചപ്പാരപ്പടവ്: ഓടിക്കൊണ്ടിരുന്ന കാറിന് തീപിടിച്ചു. ഇന്നലെ രാവിലെ 10.15 ഓടെ ചപ്പാരപ്പടവ്-തെറ്റുന്ന റോഡിൽ ശാന്തിഗിരിയിലാണ് സംഭവം. കാര്‍ പൂര്‍ണമായി കത്തിനശിച്ചു. ആര്‍ക്കും പരിക്കില്ല. ചപ്പാരപ്പടവ് പടപ്പേങ്ങാട് സ്വദേശി കെ. ഫജാറും സുഹൃത്തും സഞ്ചരിച്ച കാറാണ് കത്തി നശിച്ചത്. വീട്ടിൽ നിന്ന് തളിപ്പറമ്പിലേക്കുള്ള യാത്രക്കിടെയാണ് അപകടം സംഭവിച്ചത്. തീയും പുകയും ഉയരുന്നത് കണ്ട് യാത്രക്കാർ പുറത്തേക്കിറങ്ങിയതിനാൽ ദുരന്തമൊഴിവായി. തളിപ്പറമ്പില്‍ നിന്ന് അഗ്നിശമനസേന എത്തിയാണ് തീയണച്ചത്. ഈ റൂട്ടിൽ ഏറെനേരം ഗതാഗതം സ്തംഭിച്ചു.

വിദ്യാർഥികൾക്കു സൗജന്യ നീന്തൽ പരിശീലനം തുടങ്ങി

പാടിയോട്ടുചാൽ: പാടിയോട്ടുചാൽ ലയൺസ് ക്ലബ്, ജെസിഐ അരവഞ്ചാൽ, പെരിങ്ങോം അഗ്നിരക്ഷാസേന എന്നിവയുടെ സംയുക്താഭിമുഖ്യത്തിൽ വിദ്യാർഥികൾക്കായി സൗജന്യ നീന്തൽ പരിശീലനം തുടങ്ങി. അരവഞ്ചാൽ ഗവ. യുപി സ്കൂളിലെ വിദ്യാർഥികൾക്കാണ് കാഞ്ഞിരപ്പൊയിൽ പഞ്ചായത്ത് കുളത്തിൽ സൗജന്യ നീന്തൽ പരിശീലനം നൽകുന്നത്. പെരിങ്ങോം-വയക്കര പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ പി. രവീന്ദ്രൻ യോഗം ഉദ്ഘാടനം ചെയ്തു. അരവഞ്ചാൽ ഗവ. യുപി സ്കൂൾ മുഖ്യാധ്യാപകൻ രമേശൻ അധ്യക്ഷത വഹിച്ചു. പെരിങ്ങോം അഗ്നിരക്ഷാസേന സ്റ്റേഷൻ ഓഫീസർ പി.വി. പ്രകാശൻ, ജോർജ് ജോസഫ് കൊങ്ങോല, വി.പി. നിതീഷ്, അരവഞ്ചാൽ ജെസിഐ പ്രസിഡന്‍റ് ഷൈമ ദീപു, ജയപ്രകാശ്, സിന്ധു ജയപ്രകാശ്, പാടിയോട്ടുചാൽ ലയൺസ് ക്ലബ് പ്രസിഡന്‍റ് കെ. സീനു എന്നിവർ പ്രസംഗിച്ചു. 30 കുട്ടികളാണ് നീന്തൽ പരിശീലനത്തിൽ പങ്കെടുക്കുന്നത്. എം. ജയേഷ്കുമാർ, കെ. രതീഷ്, കെ. ജയേഷ്, യു. അഭിനന്ദ് എന്നിവരാണ് പരിശീലകർ.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]