ADVERTISEMENT

ADVERTISEMENT

ഐആർപിസി വോളന്‍റിയർ സംഗമം നടത്തി

ശ്രീകണ്ഠപുരം: സാന്ത്വന പരിചരണ രംഗത്ത് സജീവമായി പ്രവർത്തിക്കുന്ന ഐആർപിസിയുടെ ശ്രീകണ്ഠപുരം സോൺ വാർഷിക ജനറൽ ബോഡിയും വോളന്‍റിയർ സംഗമവും ശ്രീകണ്ഠപുരം റോയൽ ഓഡിറ്റോറിയത്തിൽ നടന്നു. എകെജി ആശുപത്രി മെഡിക്കൽ ഡയറക്ടറും, ഐആർപിസി ജില്ലാ ഉപദേശക സമിതി അംഗവുമായ ഡോ. കെ.പി. രാഘവ പൊതുവാൾ ഉദ്ഘാടനം ചെയ്തു.

സോണൽ ചെയർമാൻ വി.പി. മോഹൻ അധ്യക്ഷത വഹിച്ചു. കെ.പി. കുമാരൻ പ്രവർത്തന റിപ്പോർട്ടും, എം. ബാബുരാജ് വരവ് ചെലവ് കണക്കും അവതരിപ്പിച്ചു. ഭാരവാഹികളായി വി.പി. മോഹനൻ-ചെയർമാൻ, പി. ജനാർദനൻ, എ.സി. ഷീജ-വൈസ് ചെയർമാൻമാർ, കെ.പി. കുമാരൻ-കൺവീനർ, പി.പി. ലക്ഷ്മണൻ, കെ.പി. രാമകൃഷ്ണൻ-ജോയിന്‍റ് കൺവീനർമാർ, എം. ബാബുരാജ്-ട്രഷറർ എന്നിവരെ തെരഞ്ഞെടുത്തു.

ADVERTISEMENT

രാജ്യസ്നേഹവും മൂല്യബോധവും കുട്ടികളെ കരുത്തരാക്കും: സണ്ണി ജോസഫ് എംഎൽഎ

കണ്ണൂർ: രാജ്യസ്നേഹവും മൂല്യബോധവും ചെറുപ്പം മുതൽ കുട്ടികളിൽ അങ്കുരിക്കാൻ ജവഹർ ബാൽ മഞ്ചിന്‍റെ പ്രവർത്തനങ്ങൾ വഴിതെളിക്കുമെന്നും അത് അവർക്കു കരുത്താകുമെന്നും കെപിസിസി പ്രസിഡന്‍റ് സണ്ണി ജോസഫ് എംഎൽഎ. ജവഹർ ബാൽമഞ്ച് "കൊടി പാറട്ടേ' ചടങ്ങിന്‍റെ സംസ്ഥാനതല പരിപാടി കണ്ണൂരിൽ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ദേശീയ പതാക സണ്ണി ജോസഫ് എംഎൽഎ ജവഹർ ബാൽമഞ്ച് കുട്ടികളുടെ സംസ്ഥാന കമ്മിറ്റിക്ക് കൈമാറി. ജവഹർ ബാൽമഞ്ച് സംസ്ഥാന ചെയർമാൻ സുരേഷ് കെ. കരുൺ അധ്യക്ഷത വഹിച്ചു. ഡിസിസി പ്രസിഡന്‍റ് മാർട്ടിൻ ജോർജ് മുഖ്യപ്രഭാഷണം നടത്തി. ദേശീയ കോ-ഓർഡിനേറ്റർ ഫെൻ‌റസൽ, സംസ്ഥാന പ്രസിഡന്‍റ് ആദി ഹസൻ, സംസ്ഥാന കോ-ഓർഡിനേറ്റർമാരായ സി.വി.എ. ജലീൽ, പി. മഹേഷ്, എസ്. ശ്രീനാഥ്, ജില്ലാ ചെയർപേഴ്സൺ ലിഷ ദീപക്, സംസ്ഥാന ട്രഷറർ മാർട്ടിൻ ജെ. മാത്യു, സംസ്ഥാന ജോയിന്‍റ് സെക്രട്ടറി എസ്. ഇഷാനി, ജില്ലാ പ്രസിഡന്‍റ് മുരളീകൃഷ്ണ, ജില്ലാ കോ-ഓർഡിനേറ്റർമാരായ എം.പി. ഉത്തമൻ, സി.പി. സന്തോഷ് കുമാർ, എ.കെ. ദീപേഷ് എന്നിവർ പ്രസംഗിച്ചു. ചടങ്ങിൽ സണ്ണി ജോസഫ് എംഎൽഎ സംസ്ഥാന ചെയർമാൻ സുരേഷ് കരുണിന് ഉപഹാരം നൽകി. 23 ബ്ലോക്കിലെ കോ-ഓർഡിനേറ്റർമാരും മണ്ഡലം ചെയർമാൻമാരും സത്യപ്രതിജ്ഞയെടുത്ത് ചുമതലയേറ്റു.

മാടായിപ്പാറയിൽ റീൽസ് പരാക്രമം

പഴയങ്ങാടി: മാടായിപ്പാറയിലെ കാക്കപ്പൂവിന്‍റെ മുകളിൽ ഇരുചക്ര വാഹനം കയറ്റി റീൽസ് പകർത്തൽ പ്രദേശവാസികളിലും പരിസ്ഥിതി പ്രവർത്തകരിലും വൻ പ്രതിഷേധത്തിനിടയാക്കി. മാടായിപ്പാറയിലെ ഐടിഐക്ക് സമീപം നിറയെ കാക്കപ്പൂക്കൾ വിരിഞ്ഞുനിൽക്കുന്ന സ്ഥലത്താണ് ബൈക്ക് കയറ്റി മൂന്ന് കൗമാരക്കാർ റീൽസ് എടുത്തത്. പ്രദേശത്തെ സ്ത്രീകൾ ഉൾപ്പെടെ വിലക്കിയിട്ടും ബൈക്കിലെത്തിയ ന്യൂജെൻ സംഘം പിന്തിരിഞ്ഞില്ല. ബൈക്ക് അവിടെനിന്ന് മാറ്റാൻ പോലും തയാറായില്ല. ഒടുവിൽ പ്രദേശവാസികളുടെ ശക്തമായ പ്രതിഷേധത്തെത്തുടർന്ന് ബൈക്ക് എടുത്തുമാറ്റുകയായിരുന്നു. ഇരുചക്ര വാഹനത്തിന്‍റെ മുൻവശം നമ്പർ പ്ലേറ്റ് പോലും ഇല്ലാത്ത നിലയിലായിരുന്നു. വാരം സ്വദേശികളായ യുവാക്കളാണ് റീൽസെടുക്കാനായി അവധി ദിനമായ ഇന്നലെ മാടായിപാറയിലെത്തിയത്. ഇത്തരത്തിൽ മാടായിപ്പാറയിൽ നിരവധി വാഹനങ്ങളാണ് കാക്കപ്പൂവിനു മുകളിലേക്ക് കയറ്റി ഇറക്കുന്നത്. മാടായിപ്പാറയിലെ കാക്കപ്പൂവ് കാണാൻ ദൂരദേശത്തു നിന്നുപോലും ആളുകൾ എത്തുന്നുണ്ട്. ഇതിനിടയിലാണ് ചിലരുടെ നശിപ്പിക്കൽ പരാക്രമം. ഇത്തരക്കാർക്കെതിരെ പോലീസ് ശക്തമായ നടപടി സ്വീകരിക്കണമെന്നാണ് പ്രകൃതിസ്നേഹികളുടെയും പ്രദേശവാസികളുടെയും ആവശ്യം.

പന്നിപ്പനിയോ ? കാട്ടുപന്നികൾ കൂട്ടത്തോടെ ചത്തൊടുങ്ങുന്നു

കേളകം: കേളകം, കൊട്ടിയൂർ, പേരാവൂർ മേഖലകളിൽ കാട്ടുപന്നികൾ കൂട്ടത്തോടെ ചത്തൊടുങ്ങുന്നു. പന്നിപ്പനിയെന്ന് സംശയം. ഒരാഴ്ചയായി ഇരുപതോളം പന്നികളാണ് പ്രദേശത്ത് ചത്തത്. കേളകം പഞ്ചായത്തിൽ 13, കൊട്ടിയൂരിൽ നാല്, പേരാവൂരിൽ -മൂന്ന് എന്നിങ്ങിനെയാണ് ചത്ത പന്നികളുടെ ഔദ്യോഗിക കണക്ക്. എന്നാൽ ഇതിന്‍റെ മൂന്നിരട്ടി പല പ്രദേശങ്ങളിലായി ചത്തതായും പ്രദേശവാസികൾ കുഴിച്ചിട്ടതായും പറയുന്നു. പ്രദേശത്തുനിന്ന് വനംവകുപ്പ് ചത്ത കാട്ടുപന്നികളുടെ സാമ്പിൾ ശേഖരിച്ചെങ്കിലും പരിശോധനാ ഫലങ്ങൾ പുറത്തുവിട്ടിട്ടില്ല. ചത്ത കാട്ടുപന്നികളെ സംസ്കരിക്കുന്നതിലും വനം വകുപ്പ് കടുത്ത അലംഭാവമാണ് കാണിക്കുന്നത്. ലോകാരോഗ്യ സംഘടനയുടെ നിബന്ധനകൾ പാലിക്കാതെയാണ് കാട്ടുപന്നികളെ മറവ് ചെയ്യുന്നത്. രോഗം വളർത്തു മൃഗങ്ങളിലേക്കോ മനുഷ്യരിലേക്കോ പകരുമോയെന്ന ആശങ്കയും പ്രദേശവാസികൾക്കുണ്ട്. മുന്പ് സമാനമായ രീതിയിൽ തൃശൂർ ആതിരപ്പള്ളി പിള്ളപ്പാറയിൽ കാട്ടുപന്നികൾ കൂട്ടത്തോടെ ചത്തൊടുങ്ങിയത് ആന്ധ്രാക്സ് മൂലം ആണെന്ന് സ്ഥിരീകരിച്ചിരുന്നു. തുടർന്ന് മറവ് ചെയ്ത ആളുകൾക്ക് പൊതുജനസമ്പർക്കം പാടില്ലെന്നും പ്രദേശവാസികൾ ജാഗ്രത പാലിക്കണമെന്നും നിർദേശിച്ചിരുന്നു. വളർത്തു മൃഗങ്ങൾക്ക് മൃഗസംരക്ഷണ വകുപ്പ് പ്രതിരോധ വാക്സിൻ എടുക്കുകയും ചെയ്തു. നാട്ടുപന്നികൾക്ക് ഇത്തരത്തിൽ പന്നിപ്പനി ഉണ്ടാകുന്ന സാഹചര്യത്തിൽ ഒരു കിലോമീറ്റർ ചുറ്റളവിൽ പന്നി വളർത്തൽ നിരോധിക്കുകയും വളർത്തുപന്നികളെ ഡബ്ലിയു എച്ച് ഓയുടെ മാനദണ്ഡപ്രകാരം കൊന്നൊടുക്കുകയും മറവു ചെയ്യുകയും ചെയ്തു. എന്നാൽ ഒരു നടപടിയും കാട്ടുപന്നികളുടെ കാര്യത്തിൽ ഉണ്ടാകുന്നില്ലെന്ന് നാട്ടുകാർ ചൂണ്ടിക്കാണിക്കുന്നു. പ്രദേശവാസികളുടെ ആശങ്ക പരിഹരിക്കാൻ വനംവകുപ്പും തദ്ദേശസ്വയംഭരണ വകുപ്പും അടിയന്തര നടപടി സ്വീകരിക്കണമെന്നാണ് നാട്ടുകാരുടെ ആവശ്യം. പകർച്ചവ്യാധിയെന്ന് കിഫ കാട്ടുപന്നികൾ ചത്തൊടുങ്ങുന്നത് പകർച്ചവ്യാധി മൂലമാണെന്ന് സംശയിക്കുന്നതായി കേരള ഇൻഡിപെൻഡന്‍റ് ഫാർമേഴ്സ് അസോസിയേഷൻ (കിഫ) ജില്ലാ പ്രസിഡന്‍റ് പ്രിൻസ് ദേവസ്യ പറഞ്ഞു. കാട്ടുപന്നികൾ ചത്തൊടുങ്ങുന്നത് ആന്ത്രാക്സ് മൂലമോ പന്നിപ്പനി മൂലമോ ആകാം. ആദ്യ സംഭവം നടന്ന് രണ്ടാഴ്ച കഴിഞ്ഞിട്ടും കാരണം കണ്ടുപിടിക്കാത്തതും പ്രതിവിധി നടപ്പാക്കാത്തതും തികഞ്ഞ അനാസ്ഥയാണ്. ചത്ത കാട്ടുപന്നികളെ പോസ്റ്റ്മോർട്ടം ചെയ്യാതെയാണ് കുഴിച്ചിടുന്നത്. ഇത് ജനങ്ങളോടുള്ള വെല്ലുവിളിയുമാണെന്ന് അദ്ദേഹം ആരോപിച്ചു.

ദേശീയപാത അറ്റകുറ്റപ്പണി വൈകും

വൈ.എസ്. ജയകുമാർ കണ്ണൂർ: പുതിയതെരു മുതൽ താഴെചൊവ്വ വരെയുള്ള നിലവിലെ ദേശീയപാതയിലെ അറ്റകുറ്റപ്പണി അനിശ്ചിതമായി നീളും. കുഴിയടയ്ക്കലോ ഓവുചാൽ വൃത്തിയാക്കലോ എൻഎച്ച് 66 ന്‍റെ നിർമാണം തീരുന്നതുവരെ നടക്കില്ല. ജില്ലാ കളക്ടർ വിളിച്ചുചേർത്ത റോഡ് അവലോകന യോഗത്തിലാണ് കേന്ദ്ര സർക്കാരിനു കീഴിലെ ദേശീയപാത ഉദ്യോഗസ്ഥർ ഇക്കാര്യം അറിയിച്ചത്. ദേശീയപാത നിർമാണം നടക്കുന്നതിനാൽ സംസ്ഥാനത്തെ ദേശീയപാതകളെല്ലാം കേന്ദ്ര സർക്കാരിനു കീഴിലെ നാഷണൽ ഹൈവേ അഥോറിറ്റി ഓഫ് ഇന്ത്യക്ക് (എൻഎച്ച് എഐ) വിഭാഗത്തിന് കൈമാറുകയായിരുന്നു. അതിനാൽ സംസ്ഥാന പൊതുമരാമത്ത് വകുപ്പിന് ദേശീയപാതയിലെ അറ്റകുറ്റപ്പണി, ഓവുചാൽ വൃത്തിയാക്കൽ എന്നിവ നടത്താനാകില്ലെന്ന് പൊതുമരാമത്ത് എക്സിക്യുട്ടീവ് എൻജിനിയർ യോഗത്തിൽ വ്യക്തമാക്കി. അതേസമയം റോഡിൽ വെള്ളം കെട്ടിനിൽക്കുന്നതും കുഴികൾ രൂപപ്പെട്ടതും സംബന്ധിച്ച് മുഖ്യമന്ത്രിക്കും പൊതുമരാമത്ത് വകുപ്പിനും ധാരാളം പരാതികൾ ലഭിക്കുന്നുണ്ട്. പരാതികളെല്ലാം സംസ്ഥാന ദേശീയപാത വിഭാഗത്തിന് കൈമാറുന്നതല്ലാതെ ഒരു നടപടിയും സ്വീകരിക്കാൻ കഴിയുന്നില്ലെന്ന് ഉദ്യോഗസ്ഥർ യോഗത്തിൽ വ്യക്തമാക്കി. ഇതേത്തുടർന്നാണ് ദേശീയപാതയുടെ ചുമതലയുള്ള ഉദ്യോഗസ്ഥനോട് ജില്ലാ കളക്ടർ വിശദീകരണം തേടിയത്. പുതിയതെരു മുതൽ താഴെചൊവ്വ വരെയുള്ള റോഡ് നിലവിൽ എൻഎച്ച്എയുടെ കീഴിലാണെന്ന് ബന്ധപ്പെട്ട എൻജിനിയർ അറിയിച്ചു. മഴയും നിർമാണം നടക്കുന്ന റോഡ് ഇടിഞ്ഞതും മൂലം എൻഎച്ച് 66 ന്‍റെ നിർമാണം മിക്കയിടത്തും നിർത്തിവച്ചിരിക്കുകയാണ്. ഇതിന്‍റെ പണി പൂർത്തിയാക്കിയശേഷം പഴയ ദേശീയപാത ബിറ്റുമിനസ് മെക്കാഡം രീതിയിൽ ഉപരിതലം ടാറിംഗ് നടത്തും. അതിനൊപ്പം അരികിലെ മണ്ണ് കോരലും ഓട വൃത്തിയാക്കലും ന‌ടത്തുമെന്നും ദേശീയപാത വിഭാഗം വ്യക്തമാക്കി. വിവിധ റീച്ചുകളിലായി ഇതര സംസ്ഥാനങ്ങളിലെ വൻകിട കന്പനികളാണ് കരാർ ഏറ്റെടുത്തിട്ടുള്ളത്. ദേശീയപാത നിർമാണം പൂർത്തിയാക്കാൻ രണ്ടുവർഷം വേണ്ടിവന്നാൽ അതിനുശേഷമേ ദേശീയപാതയിലെ അറ്റകുറ്റപ്പണി നടത്തുക‍യുള്ളൂവെന്നാണ് ഉദ്യോഗസ്ഥർ നൽകുന്ന വിവരം. കരാറുകാരൻ അറ്റകുറ്റപ്പണി നടത്തുന്നില്ല; പരാതി നൽകേണ്ടത് കേന്ദ്ര സർക്കാരിന് കണ്ണൂർ: ദേശീയപാത നിർമാണം ഇതര സംസ്ഥാനങ്ങളിലെ വൻകിട കന്പനിക്കാർ അഞ്ചു വർഷത്തേക്കാണ് ഏറ്റെടുത്തിട്ടുള്ളത്. കരാറെടുത്ത കാലാവധിക്കുള്ളിൽ നിർമാണം പൂർത്തിയാക്കാൻ കഴിയാറില്ല. കാലവർഷം, മണ്ണിന്‍റെ ലഭ്യതക്കുറവ്, പാലങ്ങളും മേൽപ്പാലങ്ങളും നിർമിക്കുന്നതിലെ കാലതാമസം തുടങ്ങിയവയാണ് പണി വൈകാൻ ഇടയാക്കുന്നത്. അതിനാൽ ഓരോ വർഷം വീതം കരാർ നീട്ടിക്കൊടുക്കും. ഫലത്തിൽ എട്ടുമുതൽ 10 വർഷം വരെ കാലാവധി ഒരു റീച്ചിലെ ദേശീയപാത നിർമാണത്തിന് ലഭിക്കും. നിർമാണം പൂർത്തിയാക്കുന്ന റോഡ് പൊളിക്കുന്നതും പുതിയ അടിപ്പാതയും മേൽപ്പാലവും നിർമിക്കുന്നതും തുടർന്നുകൊണ്ടിരിക്കും. എൻഎച്ച് 66-ൽ കേരളത്തിലെ ആദ്യഘട്ടം പൂർത്തിയാക്കിയത്‌ തിരുവനന്തപുരം ജില്ലയിലെ കഴക്കൂട്ടം- കാരോട് ( കളിയിക്കാവിള) ഭാഗത്തെ 43 കിലോമീറ്റർ നിർമിച്ച് തമിഴ്നാട് അതിർത്തിയിലെത്തിച്ചതാണ്. നിർമാണം പൂർത്തിയാക്കി ഏഴു വർഷമായെങ്കിലും റോഡ് പൊളിച്ച് ഒരിടത്ത് മേൽപ്പാലവും രണ്ടിടത്ത് അടിപ്പാതയും ഇപ്പോഴും നിർമിച്ചുകൊണ്ടിരിക്കുകയാണ്. മാത്രമല്ല റോഡിൽ ഗർത്തങ്ങൾ രൂപംകൊണ്ടിടത്ത് കേന്ദ്ര വിജിലൻസ് പരിശോധനയെ തുടർന്ന് ബിറ്റുമിനും സിമന്‍റ് കോൺ‌ക്രീറ്റും പലയിടത്തും ഇളക്കിമാറ്റി പുനർനിർമാണവും നടക്കുന്നു. അതേപോലെ കണ്ണൂരിലെ ബൈപ്പാസ് നിർമാണവും നീണ്ടുപോകും. ഏറ്റെടുക്കുന്ന ദേശീയപാത‍യിൽ ഓരോ വർഷവും ഓടയിലെ മണ്ണ് നീക്കൽ, പുല്ല് വെട്ടൽ, റോഡിൽ അടിയുന്ന മണ്ണ് നീക്കം ചെയ്യൽ എന്നിവ കരാറെടുത്ത കന്പനികളാണ് ചെയ്യേണ്ടത്. എന്നാൽ ഈ പണികൾ കരാർ കന്പനികൾ ചെയ്യാതെ പണം ലാഭിക്കുകയാണ്. നാട്ടുകാർ നൽകുന്ന പരാതിയിൽ നടപടിയെടുക്കാനാകാതെ സംസ്ഥാന പൊതുമരാമത്ത് ഉദ്യോഗസ്ഥർ നോക്കിയിരിപ്പാണ്. പരാതി ലഭിക്കേണ്ടിടത്ത് കിട്ടാത്തതിനാൽ റോഡ് നിർമാണത്തിലെ പാളിച്ചകളും യാത്രക്കാരുടെ പരാതികളും കേന്ദ്ര സർക്കാരും കേന്ദ്ര ഉപരിതല ഗതാഗത വകുപ്പും അറിയാതെ പോകുന്നു. കണ്ണൂരിൽ താണ ദിനേശ് ഓഡിറ്റോറിയത്തിനടുത്താണ് എൻഎച്ച്എ ഓഫീസ്. റോഡ് സംബന്ധമായ കാര്യങ്ങൾ തിരക്കാനെത്തുന്നവരോട് ഹിന്ദിയിൽ മാത്രമേ സംസാരിക്കൂവെന്ന നിലപാടാണ് എൻജിനിയർമാർ സ്വീകരിക്കുന്നത്. ഇംഗ്ലീഷിൽ പോലും സംസാരിക്കാൻ കൂട്ടാക്കുന്നില്ല. പരാതിക്കാരെ ഒഴിവാക്കി കരാറുകാർക്കൊപ്പം നിൽക്കുകയാണ് ദേശീയപാത എൻജിനിയർമാർ.

സഹോദരങ്ങളുടെ മക്കള്‍ ഒരുമിച്ച് പൗരോഹിത്യ ശുശ്രൂഷയിലേക്ക്

എണ്ണപ്പാറ: ഒരുമിച്ചു കളിച്ചുവളര്‍ന്ന സഹോദരങ്ങളുടെ മക്കള്‍ ഒരുമിച്ച് പൗരോഹിത്യ ശുശ്രൂഷയിലേക്ക്. എണ്ണപ്പാറ സ്വദേശികളായ ഡീക്കന്‍ എബിന്‍ ജോണി പാലനില്‍ക്കുംതൊട്ടിയില്‍, ഡീക്കന്‍ ആല്‍ബിന്‍ മാത്യു ഉണ്ണാണ്ടന്‍പറമ്പില്‍ എന്നിവരാണ് ഇന്നു തിരുപ്പട്ടം സ്വീകരിക്കുന്നത്. ഇന്നു രാവിലെ ഒമ്പതിന് എണ്ണപ്പാറ ഹോളി സ്പിരിറ്റ് പള്ളിയില്‍ തലശേരി ആര്‍ച്ച്ബിഷപ് മാര്‍ ജോസഫ് പാംപ്ലാനിയുടെ കൈവയ്പ് ശുശ്രൂഷ വഴി പൗരോഹിത്യപട്ടം സ്വീകരിക്കും. എബിനും ആല്‍ബിനും സേക്രഡ് ഹാര്‍ട്ട് സന്യാസ സഭാംഗങ്ങളാണ്. ജോണി-മാര്‍ഗരറ്റ് ദമ്പതികളുടെ മകനാണ് എബിന്‍. മാത്യു-ത്രേസ്യാമ്മ ദമ്പതികളുടെ മകനാണ് ആല്‍ബിന്‍. ജോണിയും ത്രേസ്യാമ്മയും സഹോദരങ്ങളാണ്. തിരുപ്പട്ടസ്വീകരണത്തോടൊപ്പം എബിന്‍റെ ജ്യേഷ്ഠന്‍ മെല്‍വിന്‍റെ വിവാഹവും നടക്കും.

കൺവൻഷനും ഭാരവാഹികളുടെ സ്ഥാനാരോഹണവും നടത്തി

കണ്ണൂർ: യംഗ് മൈൻഡ്സ് ഇന്‍റർനാഷണൽ ഇന്ത്യ ഏരിയാ കൺവൻഷനും ഭാരവാഹികളുടെ സ്ഥാനാരോഹണവും കണ്ണൂർ കൃഷ്ണ ബീച്ച് റിസോർട്ടിൽ നടന്നു. ജസ്റ്റീസ് ഡോ. കൗസർ ഇടപ്പകത്ത് ഉദ്ഘാടനം ചെയ്തു. ഇന്ത്യ ഏരിയാ പ്രസിഡന്‍റ് ആന്‍റോ.കെ ആന്‍റണിയുടെ അധ്യക്ഷത വഹിച്ചു. ഇന്‍റർനാഷണൽ പ്രസിഡന്‍റ് ഡോ. കെ.സി. സാമുവൽ ഭാരവാഹികൾക്ക് സത്യവാചകം ചൊല്ലിക്കൊടുത്തു. വിവിധ സംസ്ഥാനങ്ങളിൽ നിന്നായി 500 ഓളം പ്രതിനിധികൾ പങ്കെടുത്തു. സാമൂഹ്യ സാംസ്കാരിക ബിസിനസ് മേഖലകളിലുള്ളവരെ ചടങ്ങിൽ ആദരിച്ചു. യംഗ് മൈൻഡ്സ് ഇന്‍റർനാഷണൽ ഇന്ത്യ ഏരിയ തലത്തിൽ മികച്ചപ്രവർത്തനം നടത്തിയവരെ പൊന്നാട അണിയിച്ച് ആദരിച്ചു.ഗ്രാൻഡ് കൗൺസിൽ മെംബർ ഐസക്ക് പാലത്തിങ്കൽ, നോർത്ത് മലബാർ ചേംബർ ഓഫ് കൊമേഴ്സ് പ്രസിഡന്‍റ് ടി.കെ. രമേഷ് കുമാർ, ഏരിയാ നിയുക്ത പ്രസിഡന്‍റ് ഐ.സി രാജു, ഇന്‍റർനാഷണൽ ട്രഷറർ ആന്‍റണി ജോസഫ്, റീജണൽ ചെയർമാൻമാരായ സുരേഷ് കുമാർ, ജോസ് അൽഫോൺസ്, കെ രഞ്ജിത്ത് കുമാർ, സുബ്രഹ്മണി റജുബേട്ടൻ, നാരായണ റാവു, സിബി അഗസ്റ്റിൻ, ഏരിയ ട്രഷറർ പ്രതീഷ് പോൾ എന്നിവർ പ്രസംഗിച്ചു. കെ.എം. സ്കറിയച്ചൻ സ്വാഗതവും ഇന്ത്യ ഏരിയ സെക്രട്ടറി മൈക്കിൾ കെ മൈക്കിൾ നന്ദിയും പറഞ്ഞു. ഈ വർഷം അഞ്ച് കോടിയുടെ സാമൂഹ്യ സേവന പ്രവർത്തനങ്ങൾ ഇന്ത്യ ഏരിയ തലത്തിൽ നടത്തുമെന്ന് പ്രസിഡന്‍റ് ആന്‍റോ കെ ആന്‍റണി, സെക്രട്ടറി മൈക്കിൾ കെ മൈക്കിൾ എന്നിവർ അറിയിച്ചു. ഭവന രഹിതർക്ക് വീട് വച്ച് നൽകൽ, രോഗികൾക്ക് ചികിത്സാ സഹായം, ഡയാലിസിസ് സെന്‍ററുകൾക്ക് ഡയാലിസിസ് മെഷീനുകൾ നൽകൽ, നിർധനരായ ഡയാലിസിസ് ആവശ്യമായ രോഗികൾക്ക് സൗജന്യ പാസ് നൽകൽ, നിർധനരായ വിദ്യാർഥികൾക്ക് പഠന സൗകര്യം നൽകൽ മുതലായ സാമൂഹ്യ സേവന പ്രവർത്തനങ്ങൾ ഏറ്റെടുക്കും.

പരിയാരം ഗവ. ആയുർവേദ കോളേജ് ലേഡീസ് ഹോസ്റ്റൽ കെട്ടിടം ഉദ്ഘാടനം ഇന്ന്

പരിയാരം: ഗവ. ആയുർവേദ കോളജിലെ ലേഡീസ് ഹോസ്റ്റൽ കെട്ടിടത്തിന്‍റേയും ഓപ്പൺ എയർ സ്റ്റേജിന്‍റെയും ഉദ്ഘാടനം മന്ത്രി വീണാ ജോർജ് ഇന്ന് രാവിലെ എട്ടിന് നിർവഹിക്കും. ചടങ്ങിൽ എം. വിജിൻ എംഎൽഎ അധ്യക്ഷത വഹിക്കും. പുതിയ ലേഡീസ് ഹോസ്റ്റൽ കെട്ടിടത്തിന്‍റെ ഒന്നാം നിലയിലും രണ്ടാം നിലയിലും 19 മുറികൾ വീതവും. ഇരു നിലകളിലും സ്റ്റഡി ഹാളും ഇരുവശത്തായി ടോയിലറ്റ് ബ്ലോക്കുകളും ഉൾപ്പെടെ 771 ചതുരശ്ര മീറ്റർ വിസ്‌തൃതിയിലാണ് ഇരു നിലകളുടെയും പ്രവൃത്തി പൂർത്തീകരിച്ചത്. ഇതിനായി നാലു കോടി രൂപയാണ് സംസ്ഥാന സർക്കാർ അനുവദിച്ചത്. ഏറെക്കാലങ്ങളായി വിദ്യാർഥിനികൾ അനുഭവിച്ചിരുന്ന സ്ഥലപരിമിതിക്ക് ഇതോടെ പരിഹാരമാവും. കണ്ണൂരിന്‍റെ തനിമ എടുത്തു കാണിക്കുന്ന നിലയിലാണ് ഓപ്പൺ എയർ സ്റ്റേജിന്‍റെ പണി പൂർത്തിയായത്. ഇതിനായി പത്തുലക്ഷം രൂപയാണ് അനുവദിച്ചത്. സ്റ്റേജ് വൈവിധ്യമാർന്ന പരിപാടികൾക്ക് വേദിയാവും.

ചെടിക്കുളം കൂവയിൽ വാനരശല്യത്തിൽ വലഞ്ഞു നാട്ടുകാർ

ഇരിട്ടി: ആറളം പഞ്ചായത്തിലെ ചെടിക്കുളം കൂവയിൽ പ്രദേശത്ത് കൂട്ടത്തോടെ വാനരൻമാർ വ്യാപകമായി കൃഷി നശിപ്പിക്കുന്നു. യാതൊരു ഭയവും ഇല്ലാതെ കൃഷിയിടത്തിൽ എത്തുന്ന കുരങ്ങുകൾ തേങ്ങ മുതൽ ഫലവർഗങ്ങൾ വരെ തിന്നും പറിച്ചിട്ടും നശിപ്പിക്കുകയാണ്. പാകമാകാത്ത അടയ്ക്ക ഉൾപ്പെടെ കുരങ്ങുകൾ പറിച്ചു നശിപ്പിക്കുന്നത് നിത്യ സംഭവമാണ്. വാഴ കുല, പേരക്ക, കപ്പളങ്ങ തുടങ്ങി കണ്ണിൽ കാണുന്ന ഫലവർഗങ്ങൾ ഇവ നശിപ്പിക്കുന്നു. നിരന്തരമായി തുടരുന്ന കുരങ്ങ് ശല്യത്തിന് ആരോട് പരാതി പറയും എന്നറിയാത്ത അവസ്ഥയിലാണ് കർഷകർ. ആറളം ഫാമിൽ നിന്ന് കൂട്ടമായി എത്തുന്ന കുരങ്ങുകളെ നിയന്ത്രിക്കാൻ മാർഗമില്ലാതെ വലയുകയാണ് കർഷകർ. തെങ്ങിൽ വെള്ളക്ക പോലും അവശേഷിപ്പിക്കാതെയാണ് വാനരക്കൂട്ടം ജോലി തുടരുന്നത്. തെങ്ങുംതോട്ടത്തിൽ സത്യനാഥൻ, അയൽവാസികളായ വയലുങ്കൽ സിബി, വയലുങ്കൽ ജോണി, തടത്തിൽ ദേവസ്യ, തടത്തിൽ പാപ്പൻ, തടത്തിൽ ടോമി എന്നിവരുടെ കൃഷി ഇടങ്ങളിൽ കുരങ്ങുകൾ കൂട്ടത്തോടെ എത്തി കൃഷികൾ നശിപ്പിച്ചശേഷം മടങ്ങുന്നത് സ്ഥിരം കാഴ്ചയാണ്. കപ്പ ഉൾപ്പെടെയുള്ള കൃഷികൾ പറിച്ചു നശിപ്പിക്കുന്നതും പതിവാണെന്നും പ്രദേശവാസികൾ പറയുന്നു. കുരങ്ങുകളുടെ ആക്രമണം ഭയന്ന് കുട്ടികളെ വീടിന് വെളിയിൽ വിടാറില്ലെന്നും ഇവർ പറയുന്നു.

മുഖ്യാധ്യാപികയുടെ പരാതിക്ക് പുല്ലുവില; കുട്ടികളുടെ ജീവന് വിലകല്പിക്കാതെ കെഎസ്ഇബി

ഇരിട്ടി: പാലത്തുംകടവ് സെന്‍റ് ജോസഫ് എൽപി സ്കൂളിന് സമീപത്തെ അപകടാവസ്ഥയിലായ ട്രാൻസ്‌ഫോർമറിന്‍റെ കാര്യത്തിൽ അടിയന്തര നടപടി ആവശ്യപ്പെട്ട് മുഖ്യാധ്യാപിക നല്കിയ പാരാതി ഗൗനിക്കാതെ കെഎസ്ഇബി. കഴിഞ്ഞ ജൂലൈ18 നാണ് അധ്യാപിക വള്ളിത്തോട് സെക്ഷൻ അസി. എൻജിനിയർക്ക് പരാതി നല്കിയിരുന്നത്. കുട്ടികൾ ട്രാസ്‌ഫോർമാറിന്‍റെ സമീപത്തേക്ക് പോകാതിരിക്കാൻ റിബൺ കെട്ടി സംരക്ഷിച്ചിരിക്കുന്ന വാർത്ത ദീപിക റിപ്പോർട്ട് ചെയ്തിരുന്നു. ട്രാൻസ്ഫോർമറിന് സമീപത്തേക്ക് വിദ്യാർഥികൾ എത്താതിരിക്കാൻ ഗ്രിൽ ഇട്ട് സംരക്ഷിക്കണം എന്നായിരുന്നു പരാതിയിലെ ആവശ്യം. ഇക്കാര്യത്തിൽ കെഎസ്ഇബി കാണിക്കുന്നത് വലിയ വീഴ്ചയാണെന്ന് പ്രദേശവാസികൾ പറയുന്നു. അവഗണന തുടർന്നാൽ രക്ഷിതാക്കളുടെ നേതൃത്വത്തിൽ വള്ളിത്തോട് ഓഫീസിന് മുന്നിൽ സമരപരിപാടികൾ സംഘടിപ്പിക്കുമെന്ന് പഞ്ചായത്തംഗം ബിജോയി പ്ലാത്തോട്ടം പറഞ്ഞു.

കൂട്ടുപുഴയിൽ പരിശോധന ശക്തം

ഇരിട്ടി: ഓണം, ഉത്സവ സീസൺ പ്രമാണിച്ച് നാലുമുതൽ സെപ്റ്റംബർ 10 വരെ എക്‌സൈസിന്‍റെ നേതൃത്വത്തിൽ നടത്തുന്ന ഓണം സ്പെഷൽ ഡ്രൈവ് കൂട്ടുപുഴ ചെക്പോസ്റ്റിലും പരിശോധന ശകത്മാക്കി. കർണാടകയിൽ കൂട്ടുപുഴ അതിർത്തി വഴി കേരളത്തിലേക്ക് എത്തുന്ന ലഹരി വസ്തുക്കൾ കണ്ടെത്തി പിടികൂടാനായുള്ള പരിശോധനകളാണ് ശക്തിപ്പെടുത്തിയത്. 24 മണിക്കൂറും പരിശോധന നടത്തും. കർണാടകയിൽ നിന്ന് കേരളത്തിലേക്ക് എത്തുന്ന സ്വകാര്യ വാഹനങ്ങളും ബസുകളും ഉൾപ്പെടെ പരിശോധനക്ക് ശേഷമാണ് കേരളത്തിലേക്ക് കടത്തി വിടുന്നത്. മദ്യം, മയക്കുമരുന്ന്, നിരോധിത പുകയില ഉത്പന്നങ്ങൾ തുടങ്ങി നിരവധി നിരോധിത സാധനങ്ങളാണ് വിവിധ മാർഗങ്ങളിലൂടെ അതിർത്തി കടത്തി കേരളത്തിൽ എത്തിക്കുന്നത്. ബസുകളിൽ ഉടമസ്ഥൻ ഇല്ലാത്ത നിലയിൽ പുകയില ഉത്പന്നങ്ങൾ കണ്ടെത്തുന്നത് പതിവാണ്. കഞ്ചാവും, എംഡിഎംഎ ഉൾപ്പെടെ രാസലഹരികൾ ഭൂരിഭാഗവും കേരളത്തിലേക്ക് എത്തുന്നത് അതിർത്തികളിലൂടെയാണ്. ഓണം സീസൺ അടുക്കുന്നതോടെ ഡോഗ് സ്‌ക്വാഡ് പരിശോധന, കേരള കർണാടക എക്‌സൈസിന്‍റെ സംയുകത പരിശോധന എന്നിവ സ്പെഷൽ ഡ്രൈവിന്‍റെ ഭാഗമായി നടക്കും. സ്പെഷൽ ഡ്രൈവ് ആരംഭിച്ച ശേഷം രണ്ട് എൻഡിപിഎസ് കേസുകൾ രജിസ്റ്റർ ചെയ്തു.ഒരു ഇൻസ്‌പെക്ടർ ഉൾപ്പെടെ ഏഴ് സ്റ്റാഫുകളാണ് ജോലി ചെയ്യുന്നത്.

മടമ്പം വൈഎംസിഎ ഓഫീസ് വെഞ്ചിരിച്ചു

ശ്രീകണ്ഠപുരം: മടമ്പം വൈഎംസിഎയുടെ പുതിയ ഓഫീസിന്‍റെ വെഞ്ചിരിപ്പും ഒന്നാം വാർഷികാഘോഷത്തോടനുബന്ധിച്ചുള്ള കുടുംബ സംഗമവും കൈവെട്ടിച്ചാലിൽ നടന്നു. ബെഞ്ചിരിപ്പ് കർമം മടമ്പം ഫൊറോന വികാരി ഫാ. സജി മെത്താനത്ത് നിർവഹിച്ചു. കുടുംബ സംഗമവും ഒന്നാംവാർഷിക ആഘോഷവും ശ്രീകണ്ഠപുരം നഗരസഭാധ്യക്ഷ ഡോ. കെ.വി. ഫിലോമിന ഉദ്ഘാടനം ചെയ്തു. വൈഎംസിഎ പ്രസിഡന്‍റ് എം.പി. മനോജ് അധ്യക്ഷത വഹിച്ചു. ബിജു റിപ്പോർട്ട്‌ അവതരിപ്പിച്ചു. കണ്ണൂർ സബ് റീജിയൻ ചെയർമാൻ ബെന്നി ജോൺ മുഖ്യാതിഥി ആയിരുന്നു. ഫാ സജി മേത്താനത്ത്, ഡോ. കെ. എം. തോമസ്, ഷാജിജോസഫ്, കൗൺസിലർ മീന സജി, പി.എ. ബേബി, റെജി. കെ. ജോൺ, ഫിലിപ്പ് രാജ്, കെ. ബിനോയ്‌, പി.ജെ. ജെയിംസ്, കെ.എം.അബ്രഹാം തുടങ്ങിയവർ പ്രസംഗിച്ചു. ഉന്നതവിജയം കൈവരിച്ചവർക്കുള്ള അനുമോദനവും നടത്തി.

മടമ്പം മേരിലാൻഡ് സ്കൂളിൽ ‘എക്വിപ് 'പദ്ധതി തുടങ്ങി

പയ്യാവൂർ: പ്രൈമറി, സെക്കൻഡറി ക്ലാസുകളിൽ പഠനത്തിൽ പിന്നാക്കം നിൽക്കുന്ന വിദ്യാർഥികൾക്കായി സംഘടിപ്പിക്കുന്ന സവിശേഷ പഠന പിന്തുണാപദ്ധതി ‘എക്വിപ് ' (എൻഹാൻസിംഗ് ക്വാളിറ്റി ത്രു ഇന്നവേറ്റീവ് പ്രാക്ടീസസ് 2025) ന് മടമ്പം മേരിലാൻഡ് ഹൈസ്‌കൂളിൽ തുടക്കമായി. ശ്രീകണ്ഠപുരം നഗരസഭ വിദ്യാഭ്യാസ കാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ത്രേസ്യാമ്മ മാത്യു ഉദ്ഘാടനം ചെയ്തു. പിടിഎ പ്രസിഡന്‍റ് സജി കുര്യൻ അധ്യക്ഷത വഹിച്ചു. ഹൈസ്കൂൾ വിഭാഗം എസ്ആർജി കൺവീനർ ഷീജ വാരിയാട്ട് ആമുഖ പ്രഭാഷണം നടത്തി. അക്കാദമിക വർഷത്തെ വിവിധ ക്ലബ് പ്രവർത്തനങ്ങൾ ഉൾപ്പെടുത്തി തയാറാക്കിയ ആക്റ്റിവിറ്റി കലണ്ടർ ശ്രീകണ്ഠപുരം നഗരസഭ കൗൺസിലർ പി. മീന പ്രകാശനം ചെയ്തു. സീനിയർ അസിസ്റ്റന്‍റ് എൻ.എം. ബിജുമോൻ പദ്ധതി വിശദീകരണം നടത്തി. സ്റ്റാഫ് സെക്രട്ടറി റോയ്‌മോൻ ജോസ്, യുപി വിഭാഗം എസ്ആർജി കൺവീനർ സിസ്റ്റർ ഷൈനി എന്നിവർ പ്രസംഗിച്ചു. സ്കൂൾ മുഖ്യാധ്യാപകൻ ഷാജു ജോസഫ്, ലിജോ പുന്നൂസ്, ലിബിൻ കെ.കുര്യൻ എന്നിവർ നേതൃത്വം നൽകി. സമഗ്ര ഗുണമേന്മാ വിദ്യാഭ്യാസ പദ്ധതിയുമായി ബന്ധപ്പെട്ട് അക്കാദമിക നിലവാരം ഉയർത്താനായി നടപ്പാക്കുന്ന പദ്ധതിയാണിത്. സ്കൂൾ പ്രവൃത്തി സമയത്തിന് പുറമെ അധിക സമയം കണ്ടെത്തി ഭാഷ, ഗണിത വിഷയങ്ങൾക്ക് നൂതന സാങ്കേതിക വിദ്യകളുടെ സഹായത്തോടെ പ്രത്യേക പരിശീലനം നൽകാനാണ് പദ്ധതിയിലൂടെ ലക്ഷ്യമിടുന്നത്.

ശ്രീകണ്ഠപുരത്ത് മൂന്നു പേർക്ക് കുറുക്കന്‍റെ കടിയേറ്റു

ശ്രീകണ്ഠപുരം: കുറുക്കന്‍റെ വിളയാട്ടത്തിൽ ശ്രീകണ്ഠപുരം നഗരസഭയിൽ മൂന്നു പേർക്ക് കടിയേറ്റു. കോട്ടൂർ വാസു പീടിക-മടത്തും മൂലഭാഗങ്ങളിലാണ് പേ ഇളകിയതായി സംശയിക്കുന്ന കുറുക്കൻ മൂന്ന് പേരെ കടിച്ചത്. ഇന്നലെ ഉച്ചക്ക് ശേഷം കുടുംബശ്രീ യോഗത്തിന് പോയ ഷീജ ഗംഗാധരനെയും വീട്ടുമുറ്റത്ത് നിൽക്കുകയായിരുന്ന പ്രസന്ന വിനോദ്, ത്രേസ്യാമ്മ കളത്തിപ്പറമ്പിൽ തുടങ്ങിയവരെയുമാണ് കുറുക്കൻ കടിച്ചത്. ത്രേസ്യാമ്മക്കാണ് സാരമായി കടിയേറ്റത്. കടിയേറ്റവർ കൂട്ടു മുഖത്തും ഇരിക്കൂറിലും പ്രാഥമികചികിത്സ തേടി. ഒരു വീട്ടിലെ താറാവിനും പൂച്ചക്കും കുറുക്കന്‍റെ കടിയേറ്റിട്ടുണ്ട്. രണ്ടു പേരെ കടിച്ച് ഒരു മണിക്കൂർ കഴിഞ്ഞാണ് മറ്റൊരു ഭാഗത്തുള്ള സ്ത്രീക്കും കുറുക്കന്‍റെ കടിയേറ്റത്. വിവരമറിഞ്ഞ്കുറുക്കനെ പിടികൂടാൻ വനം വകുപ്പും, നാട്ടുകാരും പ്രദേശത്ത് തിരച്ചിൽ നടത്തി. ജില്ലാപഞ്ചായത്ത് പ്രസിഡന്‍റ് , കെ.കെ രത്നകുമാരിയും, ശ്രീകണ്ഠപുരം നഗരസഭാധ്യക്ഷ ഡോ. കെ.വി. ഫിലോമിനയും സ്ഥലത്ത് എത്തി വീടുകൾ സന്ദർശിച്ചു. ജനങ്ങൾ ജാഗ്രത പാലിക്കണമെന്ന് ഇരുവരും പറഞ്ഞു. വളർത്തുമൃഗങ്ങളെ പരിപാലിക്കുന്നവർ കൂടുതൽ ശ്രദ്ധിക്കാനും നിർദേശമുണ്ട്. കുറുക്കനായി ഇന്നും തിരച്ചിൽ തുടരുമെന്ന് വനം വകുപ്പ് സെക്ഷൻ ഓഫീസർ ബാലൻ പറഞ്ഞു.

ക്വിറ്റ് ഇന്ത്യ, നാഗസാക്കി, ഹിരോഷിമ ദിനാചരണം നടത്തി

വായാട്ടുപറമ്പ്: വായാട്ടുപറമ്പ് സെന്‍റ് ജോസഫ്സ് യുപി സ്കൂളിൽ "പീസ് നോട്ട് വാർ' എന്ന സന്ദേശമുയർത്തി ക്വിറ്റ് ഇന്ത്യ, നാഗസാക്കി-ഹിരോഷിമ ദിനം വിപുലമായ പരിപാടികളോടെ ആചരിച്ചു. സ്കൂൾ അസംബ്ലിയിൽ അധ്യാപകൻ ടിജോ മാത്യു യുദ്ധവിരുദ്ധ സന്ദേശം നൽകി. തുടർന്ന് സ്കൂൾ പാർലമെന്‍റ് യുദ്ധവിരുദ്ധ പ്രമേയം അവതരിപ്പിച്ചു. ദിനാചരണ കവിതയും കഥകളും മറ്റു പരിപാടികളും വിദ്യാർഥികൾ വേദിയിൽ അവതരിപ്പിച്ചു. ലോകസമാധാനത്തിനായി വിദ്യാർഥികൾ യുദ്ധവിരുദ്ധ പ്രതിജ്ഞ ഏറ്റുചൊല്ലി. പ്ലക്കാർഡ് ഉയർത്തിപ്പിടിച്ച് യുദ്ധവിരുദ്ധ മുദ്രാവാക്യങ്ങൾ ഏറ്റുചൊല്ലിക്കൊണ്ട് റാലിയായി നീങ്ങിയ വിദ്യാർഥികൾ സ്കൂൾ ഗ്രൗണ്ടിൽ സമാധാനത്തിന്‍റെ വൻമതിൽ തീർത്തു. ദിനാചരണ സമാപനത്തിൽ കുട്ടികൾ തങ്ങൾ നിർമിച്ച സഡാക്കോ കൊക്കുകളെ പറപ്പിച്ചു. അധ്യാപകരായ ജ്യോത്സ ജോസ്, സോഫിയ സെബാസ്റ്റ്യൻ എന്നിവർ പരിപാടികൾക്കു നേതൃത്വം നൽകി.

ജില്ലാ റൈഫിൾ ഷൂട്ടിംഗ് ചാമ്പ്യൻഷിപ്പ് സംഘടിപ്പിച്ചു

മട്ടന്നൂർ: ജില്ലാ റൈഫിൾ അസോസിയേഷന്‍റെ ആഭിമുഖ്യത്തിൽ ജില്ലാ റൈഫിൾ ഷൂട്ടിംഗ് ചാമ്പ്യൻഷിപ്പ് നടത്തി. യൂണിവേഴ്സൽ കോളേജിലെ റൈഫിൾ റേഞ്ചിൽ നടന്ന പരിപാടി കണ്ണൂർ അസിസ്റ്റന്‍റ് കളക്‌ടർ എഹ്തെദ മുഫസിർ ഉദ്ഘാടനം ചെയ്തു. ജില്ലാ റൈഫിൾ അസോസിയേഷൻ വൈസ് പ്രസിഡന്‍റ് പ്രഫ. പി.കെ. ജഗന്നാഥൻ അധ്യക്ഷത വഹിച്ചു. കേരളാ ഒളിമ്പിക് അസോസിയേഷൻ അംഗം കെ. രാജേഷ്, യൂണിവേഴ്സൽ കോളജ് പ്രിൻസിപ്പൽ സുനിൽകുമാർ, അസോസിയേഷൻ വൈസ് പ്രസിഡന്‍റ് ഷാഹിൻ പള്ളിക്കണ്ടി, കണ്ണൂർ ജില്ലാ റൈഫിൾ അസോസിയേഷൻ സെക്രട്ടറി എം. ലക്ഷ്മീകാന്തൻ എന്നിവർ പ്രസംഗിച്ചു.

പൊട്ടിപ്പൊളിഞ്ഞ് ഏറ്റുപാറ- നെല്ലിക്കുറ്റി റോഡ്

ഏറ്റുപാറ: നെല്ലിക്കുറ്റിയിൽ നിന്ന് ഏറ്റുപാറയിലെത്തുന്ന റോ‍ഡ് പൊട്ടിപ്പൊളിഞ്ഞ നിലയിലായതോടെ യാത്ര ദുസഹമായി. സ്കൂൾ വാഹനങ്ങളും ചെറുവാഹനങ്ങളും ആശ്രയിക്കുന്ന മലയോരത്തെ പ്രധാന റോഡാണിത്. അറ്റകുറ്റപണി നടത്തണമെന്നാണ് നാട്ടുകാരുടെ ആവശ്യം. പയ്യാവൂർ പഞ്ചായത്തിലും ഏരുവേശി പഞ്ചായത്തിലും നീളുന്ന ജില്ലാപഞ്ചായത്ത് വക റോഡാണിത്. പയ്യാവൂർ പരിധിയിൽ ഉൾപ്പെടുന്ന ഭാഗമാണ് തകർന്നു കിടക്കുന്നത്. മഴ കൂടിയായതോടെ നടക്കാൻ പറ്റാതായി. റോഡിന്‍റെ അവസ്ഥ കാരണം ഓട്ടോകളും ട്രിപ്പ് പോകാൻ മടിക്കുകയാണ്. റോഡിന് അരികിലൂടെ ജലനിധി പൈപ്പ് സ്ഥാപിക്കാൻ കുഴിയെടുത്തതും റോഡിന്‍റെ തകർച്ചക്ക് കാരണമായെന്ന് പ്രദേശവാസികൾ പരാതിപ്പെട്ടു. മഴ കഴിഞ്ഞാലുടൻ തകർന്ന ഭാഗത്ത് ടാറിംഗ് നടത്തണമെന്നാണ് പ്രധാന ആവശ്യം.

കുറുന്തോട്ടി കൃഷിയിൽ ശ്രദ്ധ പിടിച്ചുപറ്റിയ കെ.വി. ശാരദ സ്വാതന്ത്ര്യദിന പരേഡിൽ അതിഥിയാകും

തളിപ്പറമ്പ്: കുറുന്തോട്ടി കൃഷിയിൽ ദേശീയ ശ്രദ്ധ പിടിച്ചുപറ്റിയ കെ.വി ശാരദക്ക് സ്വാതന്ത്ര്യ ദിന പരേഡിലേക്ക് അതിഥിയായി ക്ഷണം. പട്ടുവം മുറിയാത്തോടിലെ കെ.വി ശാരദയെയാണ് സ്വാതന്ത്ര്യദിന പരേഡിലേക്ക് കേന്ദ്ര ആയുഷ് മന്ത്രാലയത്തിന്‍റെ പ്രത്യേക അതിഥിയായി ക്ഷണിച്ചത്. ശാരദ നാളെ ഡൽഹിയിലേക്ക് യാത്ര തിരിക്കും. പട്ടുവം പഞ്ചായത്തിലെ അഞ്ചാം വാർഡായ മുറിയാത്തോടിൽ നടപ്പാക്കിയ കുറുന്തോട്ടി കൃഷിയിലൂടെ ശാരദ ദേശീയ ശ്രദ്ധ പിടിച്ചു പറ്റിയിരുന്നു. ഔഷധ ഗ്രാമം പദ്ധതിയിൽ പട്ടുവം കൃഷിഭവൻ നടത്തിയ കുറുന്തോട്ടി കൃഷി വിത്ത് ഉത്പാദനത്തിലാണ് ശാരദ നേട്ടം കൈവരിച്ചത്. പട്ടുവം കുടുംബശ്രീ സിഡിഎസിന്‍റെ കീഴിലെ മുറിയാത്തോട് എഡിഎസിലെ ധനലക്ഷ്മി കുടുബശ്രീ അംഗവും ജെഎൽ.ജി അംഗവുമാണ്.

ലക്ഷങ്ങൾ ചെലവഴിച്ച് നിർമിച്ച അങ്കണവാടി കെട്ടിടം കാടുമൂടി മാലിന്യ സംഭരണ കേന്ദ്രമായി

ആലക്കോട്: ലക്ഷങ്ങൾ ചെലവഴിച്ച് നിർമിച്ച അങ്കണവാടി കെട്ടിടം രണ്ടു വർഷമായി അടഞ്ഞുകിടക്കുന്നു. നടുവിൽ പഞ്ചായത്തിലെ പാത്തൻപാറ നരയൻകല്ല് അങ്കണവാടിക്കാണ് ഈ ഗതി. 2012 ൽ മന്ത്രി കെ.സി ജോസഫാണ് ഉദ്ഘാടനം നിർവഹിച്ചത്. ഏതാനും വർഷങ്ങൾ മാത്രമാണ് അങ്കണവാടി ഇവിടെ പ്രവർത്തിച്ചത്. സമീപത്തെ കരിങ്കൽ ക്വാറിയിലെ സ്ഫോടനങ്ങൾ മൂലം കെട്ടിടം അപകടാവസ്‌ഥയിലായപ്പോൾ രക്ഷിതാക്കൾ കുട്ടികളെ അയക്കാതായി. ഇതോടെ പ്രവർത്തനം വാടക കെട്ടിടത്തിലേക്ക് മാറേണ്ടി വന്നു. തുടർന്ന് കെട്ടിടം അടഞ്ഞു കിടക്കുകയും പ്രദേശം കാടുമൂടുകയും ചെയ്തു. ഇപ്പോൾ അങ്കണവാടി കെട്ടിടത്തിൽ ഹരിത കർമസേന ശേഖരിക്കുന്ന പ്ലാസ്‌റ്റിക് മാലിന്യം സംഭരിച്ചു വച്ചിരിക്കുകയാണ്. മാറ്റി സ്‌ഥാപിച്ച അങ്കണ വാടി വാടക കെട്ടിടത്തിലാണ് പ്രവർത്തിക്കുന്നത്. കർഷക തൊഴിലാളി കുടുംബങ്ങളും, ആദിവാസി ജനവിഭാഗങ്ങളും താമസിക്കുന്ന പ്രദേശമായ നരയൻകല്ല് തട്ടിൽ പുതിയതായി കെട്ടിടം പണിത് അങ്ങോട്ട് മാറ്റണമെന്നാണ് നാട്ടുകാരുടെ ആവശ്യം.

ക്വിറ്റ് ഡ്രഗ്സ് സന്ദേശമുണർത്തി റാലിയും പൊതുസമ്മേളനവും

ശ്രീകണ്ഠപുരം: വർധിച്ചുവരുന്ന ലഹരി വ്യാപനത്തിനെതിരേയുള്ള ബോധവത്കരണത്തിന്‍റെ ഭാഗമായി തലശേരി അതിരൂപത കെസിബിസി മദ്യ- ലഹരി വിരുദ്ധ സമിതിയും മുക്തിശ്രീയും ചേർന്ന് ശ്രീകണ്ഠപുരത്ത് ക്വിറ്റ് ഡ്രഗ്സ് സന്ദേശമുണർത്തി റാലിയും പൊതുസമ്മേളനവും നടത്തി. ശ്രീകണ്ഠപുരം ഉണ്ണിമിശിഹാ പള്ളി അങ്കണത്തിൽ വികാരി ഫാ. ജോസ് മഞ്ചപ്പള്ളിലും ലഹരി വിരുദ്ധ സംഘടനകളുടെ ഫൊറോന ഡയറക്ടർ ഫാ. അനൂപ് സിഎസ്ടിയും ചേർന്ന് അതിരൂപത പ്രസിഡന്‍റുമാരായ ടോമി വെട്ടുക്കാട്ടിലിനും ഷിനോ പാറയ്ക്കലിനും പതാകകൾ കൈമാറി റാലി ഉദ്ഘാടനം ചെയ്തു. വൈദികരും സമർപ്പിതരും അല്മായരും ഉൾപ്പെടെ നൂറുകണക്കിനാളുകൾ പ്ലേ കാർഡുകൾ കൈകളിലേന്തി മുദ്രാവാക്യങ്ങൾ വിളിച്ച് റാലിയിൽ അണിചേർന്നു. ടൗൺ സ്ക്വയറിൽ നടന്ന പൊതുസമ്മേളനം അതിരൂപത ചാൻസലർ റവ.ഡോ. ജോസഫ് മുട്ടത്തു കുന്നേൽ ഉദ്ഘാടനം ചെയ്തു. ലഹരിക്കെതിരേയുള്ള പോരാട്ടം കാലം നമ്മിൽനിന്ന് ആവശ്യപ്പെ ടുന്ന ധർമസമരമാണെന്ന് അദ്ദേഹം പറഞ്ഞു. ടോമി വെട്ടിക്കാട്ടിൽ അധ്യക്ഷത വഹിച്ചു. ഷിനോ പാറയ്ക്കൽ, അതിരൂപത ഡയറക്ടർ ഫാ. ജയ്സൺ കോലക്കുന്നേൽ, ചെമ്പന്തൊട്ടി ഫൊറോന വികാരി ഫാ. ആന്‍റണി മഞ്ഞളാംകുന്നേൽ, ശ്രീകണ്ഠപുരം നഗരസഭ ചെയർപേഴ്സൺ ഡോ. കെ.വി. ഫിലോമിന, ചെന്പേരി സെന്‍റ് മേരീസ് ബസിലിക്ക റെക്ടർ റവ. ഡോ. ജോർജ് കാഞ്ഞിരക്കാട്ട്, റവ. ഡോ. ജോൺ കൊച്ചുപുരയ്ക്കൽ സിഎസ്ടി, ആനിമേറ്റർ സിസ്റ്റർ ജോസ് മരിയ സിഎംസി, ലിനറ്റ്, ടി.ഡി. ദേവസ്യ എന്നിവർ പ്രസംഗിച്ചു. സോളി രാമച്ചനാട്ട് ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. തുടർന്ന് സോയി പുറവക്കാട്ടിന്‍റെ നേതൃത്വത്തിൽ "പരേതന് പറയാനുള്ളത്' എന്ന ലഘു നാടകവും അരങ്ങേറി.

മക്കളുമായി യുവതി കിണറ്റിൽ ചാടിയ സംഭവത്തിൽ ചികിത്സയിലാരുന്ന മകൻ മരിച്ചു

പഴയങ്ങാടി: രണ്ടു മക്കളുമായി കിണറ്റില്‍ ചാടി യുവതി ജീവനൊടുക്കാന്‍ ശ്രമിച്ച സംഭവത്തില്‍ ചികിത്സയിലായിരുന്ന കുട്ടി മരിച്ചു. കണ്ണൂർ ഗവ. മെഡിക്കൽ കോളജിൽ തീവ്രപരിചരണ വിഭാഗത്തിൽ ചികിത്സയിലായിരുന്ന ആറുവയസുകാരൻ ധ്യാൻ കൃഷ്ണയാണ് ഇന്നലെ പുലർച്ചെ മരിച്ചത്. ജൂലൈ 30ന് ഉച്ചയോടെയാണ് കണ്ണപുരം കീഴറ സ്വദേശിനി ധനഞ്ജയ (30) മക്കളായ ധ്യാൻ കൃഷ്ണ (6), ദേവിക (നാല്) എന്നീ രണ്ടു കുട്ടികളുമായി കിണറ്റിൽ ചാടിയത്. ശ്രീസ്ഥയിലെ ഭർത്താവിന്‍റെ വീടിന്‍റെ സമീപത്തെ തറവാട്ട് കിണറ്റിലാണു ചാടിയത്. കുട്ടികളെ കാണാത്തതിനെ തുടർന്ന് നടത്തിയ പരിശോധനയിലാണു യുവതിയും കുട്ടികളും കിണറ്റിൽ ചാടിയതായി മനസിലായത്. പരിയാരം പോലീസും പയ്യന്നൂർ അഗ്നിരക്ഷാസേനയും ചേർന്നാണ് കുട്ടികളെയും യുവതിയേയും കിണറ്റിൽ നിന്നും പുറത്തെടുത്തത്. ധ്യാൻകൃഷ്ണ അത്യാസന്ന നിലയിലായതിനെ തുടർന്ന് തീവ്രപരിചരണ വിഭാഗത്തിൽ പ്രവേശിപ്പിക്കുകയായിരുന്നു. അപകടത്തിൽ പരിക്കേറ്റ ധനഞ്ജയയും മകൾ നാലുവയസുകാരി ദേവികയും പരിയാരം മെഡിക്കൽ കോളജിൽ ഇപ്പോഴും ചികിത്സയിലാണ്. അമ്മ ധനഞ്ജയയുടെ പേരിൽ പരിയാരം പോലീസ് കൊലപാതകത്തിന് കേസെടുത്തിട്ടുണ്ട്. ഭർത്താവിന്‍റെയും അദ്ദേഹത്തിന്‍റെ അമ്മയുടെയും പേരിൽ ഗാർഹിക പീഡനത്തിന് നേരത്തെ ധനഞ്ജയ പരിയാരം പോലീസ് സ്റ്റേഷനിൽ പരാതി നൽകിയിരുന്നു. അതിലും അന്വേഷണം നടക്കുന്നുണ്ട്. ചെറുതാഴം ഹയർ സെക്കൻഡറി സ്കൂളിലെ ഒന്നാം ക്ലാസ് വിദ്യാർഥിയാണ് മരിച്ച ധ്യാൻകൃഷ്ണ. അടുത്തിലക്കാരൻ ധനേഷിന്‍റെ മകനാണ്. ധ്യാൻ കൃഷ്ണയുടെ മൃതദേഹം കണ്ണൂർ ഗവ. മെഡിക്കൽ കോളജിൽ പോസ്റ്റ്മോർട്ടത്തിനുശേഷം ശ്രീസ്ഥ ഗ്രാമീണ വായനശാലയിൽ പൊതുദർശനത്തിന് വച്ചു. തുടർന്ന് കണ്ണപുരം കീഴാറയിലെ സമുദായ ശ്മശാനത്തിൽ സംസ്കരിച്ചു.

കണ്ണൂർ സ്വദേശി ഷാർജയിൽ മരിച്ചു

ഷാര്‍ജ: ഹൃദയാഘാതത്തെ തുടര്‍ന്ന് കണ്ണൂര്‍ സ്വദേശിയായ യുവാവ് ഷാര്‍ജയില്‍ മരിച്ചു. കണ്ണാടിപ്പറമ്പ് മാലോട്ട് സ്വദേശി അജ്‌സല്‍ (27) ആണ് കഴിഞ്ഞ ദിവസം മരിച്ചത്. രണ്ടുമാസം മുന്പാണ് ഇദ്ദേഹം വിസിറ്റിംഗ് വീസയില്‍ ഷാര്‍ജയിലെത്തിയത്. കഴിഞ്ഞ ദിവസം രാവിലെ ഭക്ഷണം കഴിക്കുന്നതിനിടെ ദേഹാസ്വാസ്ഥ്യം അനുഭവപ്പെട്ട അജ്‌സലിനെ ഉടന്‍തന്നെ ഷാര്‍ജയിലെ അല്‍ ഖാസ്മി ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. യാബ് ലീഗല്‍ സര്‍വീസ് സിഇഒ സലാം പാപ്പിനിശേരിയുടെ നേതൃത്വത്തില്‍ മൃതദേഹം നാട്ടിലെത്തിക്കാനുള്ള നിയമപരമായ നടപടികള്‍ പൂര്‍ത്തിയാക്കി. അബൂബക്കർ-കദീജ ദമ്പതികളുടെ മകനാണ്. സഹോദരങ്ങൾ: അജ്‌മൽ, ഇജാസ്, ഫാത്തിമ. മൃതദേഹം ഇന്ന് എയര്‍ ഇന്ത്യ വിമാനത്തില്‍ നാട്ടിലെത്തിച്ച് കബറടക്കും.

കുന്നോത്ത് സ്വദേശി ദുബായ് എയർപോർട്ടിൽ കുഴഞ്ഞുവീണു മരിച്ചു

ഇരിട്ടി: വർഷങ്ങളായി ദുബായിൽ താമസിച്ചുവരുന്ന കുന്നോത്ത് സ്വദേശി നാട്ടിൽവന്ന് തിരിച്ചു പോകുന്നതിനിടെ ദുബായ് എയർപോർട്ടിൽ കുഴഞ്ഞുവീണു മരിച്ചു. കുന്നോത്ത് മൂസാൻപീടികയിലെ നവശ്രീയിൽ ഇ.പി. ബാലകൃഷ്ണൻ (68) ആണ് മരിച്ചത്. ഭാര്യയും മക്കളും മരുമക്കളുമടക്കം വർഷങ്ങളായി ദുബായിലായിരുന്നു താമസം. ഇടയ്ക്കിടെ നാട്ടിൽ വന്നുപോകാറുള്ള ബാലകൃഷ്ണൻ ഒരാഴ്ച മുന്പ് നാട്ടിലെത്തി ശനിയാഴ്ച വൈകുന്നേരം ദുബായിലേക്ക് മടങ്ങി. പുലർച്ചെയോടെ ദുബായ് എയർപോർട്ടിൽ എത്തിയ അദ്ദേഹം കുഴഞ്ഞുവീഴുകയായിരുന്നു. എയർപോർട്ട് അധികൃതർ ഉടൻ തന്നെ ബാലകൃഷ്ണനെ ആശുപത്രിയിൽ എത്തിച്ചെങ്കിലും മരിച്ചു. എയർപോർട്ടിൽ എത്തിയാൽ മകനെ വിളിച്ച് കാറുമായി വരാൻ ആവശ്യപ്പെടാറുള്ള അച്ഛന്‍റെ ഫോണിൽ മകൻ ബന്ധപ്പെട്ടപ്പോഴാണ് വീട്ടുകാർ സംഭവം അറിയുന്നത്. ഭാര്യ: പുഷ്പലത. മക്കൾ: ജിജേഷ്, സനീഷ്. മരുമക്കൾ: വീണ, വൃന്ദ. സഹോദരങ്ങൾ: ചന്ദ്രൻ (മുരിങ്ങോടി), വിശ്വൻ, ഗൗരി, പരേതയായ ഓമന. നടപടികൾ പൂർത്തിയാക്കി മൃതദേഹം നാട്ടിലെത്തിക്കാനുള്ള ശ്രമത്തിലാണ് കുടുംബം.

തെങ്ങിൽനിന്നു വീണു തൊഴിലാളി മരിച്ചു

തളിപ്പറമ്പ്: കുറുമാത്തൂർ മുയ്യത്ത് തേങ്ങ പറിക്കുന്നതിനിടെ തെങ്ങുകയറ്റ തൊഴിലാളി വീണു മരിച്ചു. മുയ്യത്തെ തൈവളപ്പില്‍ ടി.വി. സുനിലാണ് (53) മരിച്ചത്. ഇന്നലെ രാവിലെ 8.45 ഓടെയായിരുന്നു സംഭവം. മുയ്യം യുപി സ്‌കൂളിനു സമീപത്തെ സ്വകാര്യ വ്യക്തിയുടെ പറമ്പില്‍ തേങ്ങ പറിച്ചുകൊണ്ടിരിക്കെ അബദ്ധത്തില്‍ താഴേക്കു വീഴുകയായിരുന്നു. ഗുരുതരമായി പരിക്കേറ്റ സുനിലിനെ പരിയാരത്തെ കണ്ണൂര്‍ ഗവ. മെഡിക്കല്‍ കോളജില്‍ എത്തിച്ചെങ്കിലും ജീവൻ രക്ഷിക്കാനായില്ല. പരേതനായ ബാലന്‍-നളിനി ദമ്പതികളുടെ മകനാണ്. ഭാര്യ: ഗീത. മക്കള്‍: അതുല്‍, അനന്യ.

പുഴയിൽ ചാടിയ പ്രതിക്കായി തെരച്ചിൽ തുടരുന്നു

ഇരിട്ടി: കൂട്ടുപുഴ പോലീസ് ചെക്ക് പോസ്റ്റിൽ വാഹന പരിശോധനയ്ക്കിടയിൽ പുഴയിൽ ചാടി രക്ഷപ്പെടാൻ ശ്രമിച്ച കാപ്പ കേസ് പ്രതിയെ കണ്ടെത്താനുള്ള തെരച്ചിൽ ബാരാപോൾ പുഴയിൽ തുടരുന്നു. തലശേരി പൊതുവാച്ചേരി സ്വദേശി അബ്‌ദുൾ റഹീമാണ് (30) പുഴയിൽ ചാടിയത്. ഇയാൾ ഒഴുക്കിൽപ്പെട്ടെന്ന നിഗമനത്തിൽ പോലീസും അഗ്നിരക്ഷാ സേനയും ബാരാപോൾ പുഴയുടെ ഇരുകരകളിലും നാട്ടുകാരുടെ സഹായത്തോടെ തെരച്ചിൽ നടത്തിയെങ്കിലും കണ്ടെത്താൻ കഴിഞ്ഞില്ല. വെള്ളിയാഴ്ച വൈകുന്നേരം ആറോടെയാണ് റഹീം പുഴയിൽ ചാടിയത്. രാത്രി എട്ടുവരെ തെരച്ചിൽ നടത്തിയിരുന്നു. മോശം കാലാവസ്ഥയും വെളിച്ചക്കുറവും കാരണം നിർത്തിയ തെരച്ചിൽ ഇന്നലെ രാവിലെ ഏഴിനാണ് വീണ്ടും തെരച്ചിൽ ആരംഭിച്ചത്. കൂട്ടുപുഴ മുതൽ ഇരിട്ടി പാലം വരെ പുഴയുടെ ഇരുകരകളിലുമായി തെരച്ചിൽ നടത്തിയെങ്കിലും ഫലമുണ്ടായില്ല. ഇരിട്ടി അഗ്നിരക്ഷാനിലയം സ്റ്റേഷൻ ഓഫീസർ ഉണ്ണികൃഷ്ണന്‍റെ നേതൃത്വത്തിൽ ഇരിട്ടി, പേരാവൂർ, മട്ടന്നൂർ, കൂത്തുപറമ്പ് യൂണിറ്റുകളിലെ അഗ്നിരക്ഷാസേനാംഗങ്ങൾ രണ്ട് ഡിങ്കി ബോട്ടുകളിലായാണു തെരച്ചിൽ നടത്തിയത്. വള്ളിത്തോട് ഒരുമ റെസ്‌ക്യൂ ടീമംഗങ്ങളും ഇവർക്കൊപ്പം സഹായവുമായി എത്തിയിരുന്നു. കുത്തൊഴുക്കും പാറക്കൂട്ടങ്ങളും കയങ്ങളും നിറഞ്ഞ പുഴയിൽ തെരച്ചിൽ നടത്തുക അതീവ ദുഷ്‌കരമാണ്. കുത്തൊഴുക്കുള്ള പുഴയിൽ ഒഴുകിപ്പോയ റഹീമിനെ 100 മീറ്റർ താഴെയുള്ള കച്ചേരിക്കടവ് പാലത്തിനു സമീപം വരെ പ്രദേശവാസികൾ കണ്ടിരുന്നു. പുഴയിൽ ഒഴുക്ക് ശക്തമായതിനാൽ ഏറെദൂരം ഒഴുകാനുളള സാധ്യതയും അധികൃതർ കാണുന്നുണ്ട്. ഇന്നലെ വൈകുന്നേരം നാലോടെ സംഘം തെരച്ചിൽ അവസാനിപ്പിച്ചു. ഇരിട്ടി സിഐ എ. കുട്ടികൃഷ്ണന്‍റെ നേതൃത്വത്തിൽ എസ്‌ഐമാരായ എം.ജെ. ബെന്നി, ജോഷി എന്നിവരുടെ നേതൃത്വത്തിൽ പോലീസും റവന്യൂ അധികൃതരും സ്ഥലത്തെത്തിയിരുന്നു. റഹീമിനൊപ്പം വാഹനത്തിലുണ്ടായിരുന്ന ചെറുവാഞ്ചേരി സ്വദേശി ഹാരിസ്, കോഴിക്കോട് മെഡിക്കൽ കോളജ് സ്വദേശി നിതിൻ എന്നിവരെ പോലീസ് ചോദ്യം ചെയ്ത് വിട്ടയച്ചു. ആവശ്യമുള്ളപ്പോൾ വിളിച്ചാൽ ഹാജരാകണമെന്ന നിബന്ധനയോടെയാണു വിട്ടയച്ചത്. മൂന്നുപേരും ഗോണിക്കൊപ്പയിൽ നിന്ന് കൂട്ടുപുഴയിലേക്ക് എത്തിയ കാർ പോലീസ് കസ്റ്റിയിലെടുത്തു. കാറിൽ വിശദമായ പരിശോധന നടത്തിയിരുന്നെങ്കിലും അസ്വാഭാവികമായി ഒന്നും കണ്ടെത്താൻ കഴിഞ്ഞിരുന്നില്ല. കാറിന്‍റെ ഉടമസ്ഥാവകാശത്തെക്കുറിച്ചുള്ള സംശയം നിലനില്ക്കുന്നതിനാലാണു കാർ പോലീസ് കസ്റ്റഡിയിൽ വച്ചത്. കോഴിക്കോട് സ്വദേശിയായ നിതിൻ ലോറിയിലാണു ഗോണിക്കൊപ്പയിലേക്കു പോയത്. തിരിച്ച് ഇന്നോവ കാറിലാണു മൂവരും കൂട്ടുപുഴ വരെ എത്തിയത്. ഇതിലെ ദുരൂഹത പോലീസ് വിശദമായി അന്വേഷിക്കുകയാണ്. കാർ കർണാടകത്തിൽ നിന്ന് മോഷ്ടിച്ചതാണോയെന്നും പോലീസ് അന്വേഷിച്ചുവരുന്നുണ്ട്. ഇന്നു രാവിലെ വീണ്ടും തെരച്ചിൽ ആരംഭിക്കും. അതിനുശേഷം മറ്റു നടപടികളെക്കുറിച്ച് ആലോചിക്കുമെന്നു പോലീസ് പറഞ്ഞു.

മാല മോഷണം: കാസർഗോഡ് സ്വദേശി അറസ്റ്റിൽ

ന്യൂമാഹി: തലശേരി, കൂത്തുപറമ്പ് ഭാഗങ്ങളിൽ കഴിഞ്ഞദിവസം വ്യാപകമായി സ്ത്രീകളുടെ മാല പൊട്ടിച്ച് കടന്നുകളഞ്ഞ പ്രതിയെ ന്യൂ മാഹി പോലീസ് അറസ്റ്റ് ചെയ്തു. നിരവധി കേസുകളിൽ പ്രതിയായ കാസർഗോഡ് മേൽപ്പറമ്പിലെ മുഹമ്മദ് ഷംനാസിനെയാണ് ഇൻസ്പെക്ടർ പി.എ. ബിനുമോഹന്‍റെ നേതൃത്വത്തിൽ അറസ്റ്റ് ചെയ്‌തത്. കഴിഞ്ഞ മൂന്നിന് മൂന്നുപേരുടെ മാല പൊട്ടിച്ച് പ്രതി രക്ഷപ്പെടുകയായിരുന്നു. കോടിയേരി, കതിരൂർ ഭാഗങ്ങളിൽ നിന്നാണ് മാല പിടിച്ചുപറിച്ചത്. പ്രതിക്കെതിരേ 15 ഓളം കേസുകൾ കാസർഗോഡുണ്ട്. അതിൽ 12 എണ്ണവും പിടിച്ചുപറികേസുകളാണ്. ഭാര്യയുടെ പേരിലുള്ള യമഹ സ്കൂട്ടറിൽ നമ്പർ പ്ലേറ്റ് മാറ്റിയാണ് മോഷണം നടത്തിവന്നത്. രണ്ടു മാസം മുന്പേ നാദാപുരത്തും സമാനമായ മോഷണം നടത്തിയെങ്കിലും കണ്ടുപിടിക്കാൻ കഴിഞ്ഞിരുന്നില്ല. 150ലേറെ സിസി ടിവി ദൃശ്യങ്ങൾ പരിശോധിച്ച് ബേക്കൽ പോലീസിന്‍റെ സഹായത്തോടെയാണ് കാസർഗോഡ് വച്ചു പിടികൂടിയത്. ഇൻസ്‌പെക്ടർ ബിനു മോഹൻ, എസ്ഐ പ്രശോബ്, രവീന്ദ്രൻ, പ്രമോദ്, എഎസ്ഐ പ്രസാദ്, എസ് സിപിഒ ഷോജേഷ്, സിപിഒ ലിബിൻ, കലേഷ്, സായൂജ്, റിജിൽ നാഥ് എന്നിവരും ഉണ്ടായിരുന്നു.

കണ്ണൂർ സർവകലാശാലയുടെ വ്യാജ ബിരുദ സർട്ടിഫിക്കറ്റ്: ഒരാൾക്കെതിരേ കേസ്

കണ്ണൂർ: വ്യാജ ബിടെക് ഡിഗ്രി സർട്ടിഫിക്കറ്റ് ഹാജരാക്കി ജോലി നേടാൻ ശ്രമിച്ചെന്ന പരാതിയിൽ പോലീസ് കേസെടുത്തു. കണ്ണൂർ സർവകലാശാല പരീക്ഷ കൺട്രോളർ പ്രഫ. കെ. ജിതേഷിന്‍റെ പരാതിയിലാണ് മുഹമ്മദ് ഷഖ് സാദിനെതിരെ ടൗൺ പോലീസ് കേസെടുത്ത്. പ്രതിക്ക് ജോലി നേടാൻ ഡാറ്റാഫ്ലോ സർവീസസ് പ്രൈവറ്റ് ലിമിറ്റഡ് കമ്പനിയിൽ ഹാജരാക്കിയ ബിടെക് സർട്ടിഫിക്കറ്റ് വെരിഫിക്കേഷനു വേണ്ടി അയച്ചു കിട്ടിയതിൽ പരിശോധിച്ചതിൽ സർവകലാശാലയുടെ വ്യാജ എംബ്ലവും സീലും ഉപയോഗിച്ച് വ്യാജമായി നിർമിച്ച് ഉപയോഗിച്ചതാണെന്ന് കണ്ടെത്തിയതിന്‍റെ അടിസ്ഥാനത്തിൽ പോലീസിൽ പരാതി നൽകുകയായിരുന്നു. കേസെടുത്ത ടൗൺ പോലീസ് അന്വേഷണം തുടങ്ങി.

ആറളം പുനരധിവാസ മേഖലയിൽ ‘ഗജമുക്തി’ കർമ പദ്ധതിക്ക് നാളെ തുടക്കം

ഇരിട്ടി: ആറളം ഫാമിലും പുനരധിവാസ മേഖലയിലും തന്പടിച്ച കാട്ടാനകളെ വനത്തിലേക്ക് തുരുത്തുന്ന ഗജമുക്തി കർമപദ്ധതിക്ക് നാളെ തുടക്കമാകും. പുനരധിവാസ മേഖലയിലും ഫാമിലും തന്പടിച്ച കാട്ടാനകൾ കടുത്ത ഭീഷണി ഉയർത്തുന്ന സാഹചര്യത്തിലാണ് തുരത്തിൽ പുനരാരംഭിക്കുന്നത്. ആനകളെ സുരക്ഷിതമായി അവയുടെ ആവാസ വ്യവസ്ഥയായ വന്യജീവി സങ്കേതത്തിലേക്ക് തിരിച്ചയക്കുന്നതിനായി വിവിധ വകുപ്പുകളുടെയും പ്രാദേശിക ജനപങ്കാളിത്തത്തോടും കൂടി ആവിഷ്കരിച്ച കർമ പദ്ധതിയാണ് ഓപ്പറേഷൻ ഗജമുക്തി. ഗജമുക്തി പദ്ധതിക്താവശ്യമായ പത്ത് വാഹനങ്ങൾ, ആയുധങ്ങൾ എന്നിവയുൾപ്പടെയുള്ള സംവിധാനങ്ങൾ വനംവകുപ്പും ട്രാക്ടർ ആറളം ഫാമിംഗ് കോർപറേഷനുമാണ് സജ്ജമാക്കും. ഡ്രോണും മറ്റ് സംവിധാനങ്ങളും ഉപയോഗിച്ച് കൂട്ടമായും ഒറ്റയ്ക്കുമുള്ള ആനകളുടെ സ്ഥാനം നിർണയിച്ച ശേഷമാണ് തുരത്തൽ നടത്തുക. ഇന്നു രാവിലെയും വൈകുന്നേരവും പഞ്ചായത്തിന്‍റെ നേതൃത്വത്തിൽ പൊതുജനങ്ങൾക്ക് അറിയിപ്പ് നൽകും. ബ്ലോക്ക് 12 താളിപ്പാറ, ബ്ലോക്ക് ഏഴ് ഓടൻതോട്, ബ്ലോക്ക് ഒന്പത് വളയംചാൽ, പൂക്കുണ്ട്, തളിപ്പാറ എന്നീവിടങ്ങളിൽ അനൗൺസ്‌മെന്‍റ് നടത്തും. റോഡുകൾ ബ്ലോക്ക് ചെയ്യേണ്ട സ്ഥലങ്ങളെക്കുറിച്ചും ജാഗ്രത പാലിക്കേണ്ട പ്രദേശങ്ങളെക്കുറിച്ചും പോലീസിന് വനം വകുപ്പ് നിർദേശങ്ങൾ നൽകും. ഇതിനായി പോലീസ് ആവശ്യമായ വാഹനങ്ങളും സേനയേയും ലഭ്യമാക്കും. വിദ്യാർഥികളുടെ സുരക്ഷ ഉറപ്പാക്കുന്നതിനായി രാവിലെ പത്തു മുതൽ സ്‌കൂൾ പ്രവർത്തനം ആരംഭിച്ച ശേഷമാണ് തുരത്തലുമായി ബന്ധപ്പെട്ട നടപടികൾ ആരംഭിക്കുക. തുരത്തൽ നടക്കുന്ന സമയത്ത് വാട്‌സാപ്പ് ഗ്രൂപ്പുകളിലൂടെയും മറ്റും തെറ്റായ വിവരങ്ങൾ പ്രചരിക്കുന്നത് തടയാൻ നടപടി സ്വീകരിക്കും. ആരോഗ്യ വകുപ്പിന്‍റെ ഒരു ക്യാമ്പ് ഓപറേഷൻ സൈറ്റിൽ സജ്ജീകരിക്കും. ഗജമുക്തിയുടെ പൂർണ ചുമതല വനംവകുപ്പിനാണ്. എല്ലാ ഫീൽഡ് ടീമുകളെയും നയിക്കുകയും ഏകോപിപ്പിക്കുകയും ചെയ്യണം. ആനകളെ ഫാം ഏരിയയിൽനിന്നും പുനരധിവാസ മേഖലയിൽ നിന്നും തുരത്താൻ ആറളം ഫാമിംഗ് കോർപ്പറേഷനും സഹായിക്കണം. 28 വനം വകുപ്പ് ജീവനക്കാരും ഒന്പത് സപ്പോർട്ടിംഗ് സ്റ്റാഫും അടങ്ങുന്ന ടീം ആയിരിക്കും ഓപ്പറേഷന് നേതൃത്വം നൽകുക. പ്രവർത്തനങ്ങൾ ഏകോപിപ്പിക്കുന്നതിനും സുരക്ഷിതത്വം ഉറപ്പാക്കുന്നതിനുമായി തലശേരി സബ് കളക്ടർ ചെയർമാനും ഡിഎഫ്ഒ ജനറൽ കൺവീനറുമായി കമ്മിറ്റി രൂപീകരിച്ചിട്ടുണ്ട്. ആറളം, കൊട്ടിയൂർ വൈൽഡ് ലൈഫ് വാർഡന്മാർ, അസിസ്റ്റന്‍റ് വാർഡൻമാർ, ആറളം ഫാം എംഡി, അഡ്മിനിസ്‌ട്രേറ്റീവ് ഓഫീസർ, സെക്യൂരിറ്റി ഓഫീസർ, ടിആർഡിഎം സൈറ്റ് മാനേജർ എന്നിവരും അംഗങ്ങളാണ്. ആദ്യം തുരത്തുക ഫാമിലെ ആനകളെ ഫാം മേഖലയിലെ ആനകളെയായിരിക്കും ആദ്യം തുരത്തുക. ഇവയെ പുനരധിവാസ മേഖലയിലേക്കാണ് ഒന്നാം ഘട്ടത്തിൽ തുരത്തുക. തുടർന്ന് അടുത്തദിവസം മുതൽ പുനരധിവാസ മേഖലയിലെ ആനകളെ വന്യജീവി സങ്കേതത്തിലേക്ക് തുരത്തും. മനുഷ്യവാസ മേഖലയായതിനാൽ താമസക്കാരുടെ സുരക്ഷയ്ക്ക് രാവും പകലും ക്രമീകരണങ്ങൾ നടത്തിയാണ് തുരത്തൽ നടപടികൾ മുന്നോട്ടു കൊണ്ടുപോകുക. വനത്തിലേക്ക് കയറ്റിയ ആനകൾ തിരികെ പ്രവേശിക്കുന്നത് തടയാൻ ആനമതിൽ ഇല്ലാത്ത ഭാഗങ്ങളിൽ വനം വകുപ്പ് പ്രത്യേക പട്രോളിംഗും നടത്തും.

കായിക വിദ്യാർഥികൾക്ക് കിറ്റ് വിതരണം ചെയ്തു

കണ്ണൂർ: കായിക, യുവജനകാര്യ ഡയറക്ടറേറ്റിന്‍റെ നേതൃത്വത്തിൽ കായിക വിദ്യാർഥികൾക്ക് കിറ്റ് വിതരണം ചെയ്തു. കണ്ണൂർ സ്പോർട്സ് സ്കൂളിൽ മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്തു. കായിക മേഖലയിലെ സമഗ്രമായ കുതിപ്പാണ് സംസ്ഥാന സർക്കാർ ലക്ഷ്യമിടുന്നതെന്നും കായികരംഗത്തിന് വലിയ പ്രാധാന്യമാണ് നൽകുന്നതെന്നും മന്ത്രി പറഞ്ഞു. കായിക യുവജനകാര്യ വകുപ്പ് കോഴിക്കോട് ഡപ്യൂട്ടി ഡയറക്ടർ ടി. അനീഷ് അധ്യക്ഷത വഹിച്ചു. 217 വിദ്യാർഥികൾക്കാണ് കിറ്റ് വിതരണം ചെയ്തത്. സ്പോർട്സ് സ്കൂൾ ഫുട്ബോൾ പരിശീലകൻ കെ.എം. രാജേഷ്, കണ്ണൂർ സ്പോർട്സ് സ്കൂൾ മുഖ്യാധ്യാപിക കെ. ജ്യോതി, കണ്ണൂർ സ്പോർട്സ് സ്കൂൾ പ്രിൻസിപ്പൽ കെ.എം. റിന്ദു എന്നിവർ പ്രസംഗിച്ചു.

ചൂരൽമലയിലേക്കുള്ള സൈക്കിൾ റാലി തുടങ്ങി

കണ്ണൂർ: കണ്ണൂർ ഡിഎസ്‌സി സെന്‍റർ വയനാട് ചൂരൽമലയിലേക്ക് സംഘടിപ്പിച്ച സൈക്കിൾ റാലി കണ്ണൂരിൽ നിന്നുമാരംഭിച്ചു. സ്പർശ് ഔട്ട്‌റീച്ച് പ്രോഗ്രാമിന്‍റെ ‍ഭാഗമായുള്ള റാലി കണ്ണൂർ യുദ്ധ സ്മാരകത്തിന് സമീപം മന്ത്രി കടന്നപ്പള്ളി രാമചന്ദ്രൻ ഫ്ലാഗ് ഓഫ് ചെയ്തു. കോഴിക്കോട്, മലപ്പുറം വഴി റാലി 14ന് ചൂരൽമലയിൽ എത്തും. സ്വാതന്ത്ര്യത്തിന്‍റെ 79ാം വാർഷികത്തോടനുബന്ധിച്ച സൈന്യവും ജനങ്ങളും തമ്മിലുള്ള ബന്ധത്തെ ദൃഢപ്പെടുത്തുന്നതിന്‍റെ ഭാഗമായി നടത്തുന്ന വിവിധങ്ങളായി പരിപാടിയിൽ ഉൾപ്പടുത്തിയാണ് സൈക്കിൾ റാലി സംഘടിപ്പിച്ചത്. ഡിഎസ്‌സി കമാഡൻറും മിലിട്ടറി സ്റ്റേഷൻ കമാൻഡറുമായ കേണൽ പരംവീർ സിംഗ് നാഗ്ര, സിറ്റി പോലീസ് കമ്മീഷണർ പി. നിധിൻരാജ്, റിട്ട. ബ്രിഗേഡിയർ രാജ്കുമാർ, ശൗര്യചക്ര റിട്ട. കേണൽ പി.എ. മാത്യൂസ്, ശൗര്യചക്ര റിട്ട. സുബേദാർ പി.വി. മനീഷ്, സൈനിക ഓഫീസർമാർ, വിമുക്ത ഭടന്മാർ, എൻസിസി കേഡറ്റുകൾ, സ്‌കൂൾ വിദ്യാർഥികൾ സൈനിക വെൽഫെയർ ഓഫീസർ തുടങ്ങിയവർ പങ്കെടുത്തു.

പയ്യാവൂരിന്‍റെ ജനകീയ ഡോക്‌ടർ സന്യസ്ത സുവർണ ജൂബിലി നിറവിൽ

പയ്യാവൂർ: നാടിന്‍റെ ജനകീയ ഡോക്‌ടറായി പയ്യാവൂർ മേഴ്സി ആശുപത്രിയിൽ രണ്ടു പതിറ്റാണ്ടിലേറെക്കാലം സേവനം ചെയ്ത ഗൈനക്കോളജിസ്റ്റ് ഡോ. സിസ്റ്റർ ശാന്തി എസ്‌വിഎം സന്യസ്ത ജീവിതത്തിന്‍റെ സുവർണ ജൂബിലി നിറവിൽ. ഇന്ന് ഉച്ചകഴിഞ്ഞ് മൂന്നിന് തിരൂർ സെന്‍റ് ഫ്രാൻസിസ് അസീസി പള്ളിയിൽ നടക്കുന്ന ജൂബിലി ആഘോഷ തിരുക്കർമങ്ങൾക്കും വിശുദ്ധ കുർബാനയ്ക്കും കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിൽ മുഖ്യകാർമികത്വം വഹിക്കും. ഏഴുവർഷം മുമ്പ് പയ്യാവൂരിൽ നിന്ന് കിടങ്ങൂർ ലിറ്റിൽ ഫ്ളവർ ആശുപത്രിയിലേക്ക് സ്ഥലം മാറിപ്പോയിരുന്നെങ്കിലും പയ്യാവൂരിലെ ജനങ്ങൾക്ക് ഡോക്‌‌ടറെ ഒരിക്കലും മറക്കാനാകില്ലെന്നതാണ് യാഥാർഥ്യം. കുടിയേറ്റ ഗ്രാമത്തിൽ നിന്നുള്ള ആദ്യത്തെ ഡോക്‌ടറായ സിസ്റ്റർ ശാന്തി പയ്യാവൂരിനു സമീപം തിരൂരിൽ കുടിയേറിയ കർഷക കുടുംബാംഗം എളമ്പാശേരിൽ കുര്യൻ-അന്നമ്മ ദമ്പതികളുടെ മകളാണ്. പയ്യാവൂർ സേക്രഡ് ഹാർട്ട് സ്കൂളിലായിരുന്നു പ്രാഥമിക വിദ്യാഭ്യാസം.1974 ൽ പത്താം ക്ലാസിലെ ഉന്നതവിജയത്തിനു ശേഷം സന്യസ്ത ജീവിതം തെരഞ്ഞെടുക്കുകയായിരുന്നു. കോട്ടയം വിസിറ്റേഷൻ സന്യാസ സമൂഹത്തിൽ ചേർന്ന് 1976 ൽ പ്രഥമ വ്രതവാഗ്ദാനം നടത്തി ശാന്തി എന്ന പേര് സ്വീകരിച്ചു. തുടർന്ന് ഉഴവൂർ സെന്‍റ് സ്റ്റീഫൻസ് കോളജിൽ നിന്ന് ബിഎസ്‌സി സുവോളജിയിൽ മികച്ച വിജയം നേടി. ബംഗളൂരു സെന്‍റ് ജോൺസ് മെഡിക്കൽ കോളജിലായിരുന്നു എംബിബിഎസ് പഠനം. 1988 ൽ പഠനം പൂർത്തിയാക്കിയതോടെ പയ്യാവൂർ മേഴ്‌സി ആശുപത്രിയിൽ രണ്ടുവർഷത്തെ ഗ്രാമീണ സേവനം നിർവഹിച്ചു. തുടർന്ന് ഗൈനക്കോളജിയിൽ ഉപരിപഠത്തിനായി വീണ്ടും ബംഗളൂരു സെന്‍റ് ജോൺസിൽ ചേർന്നു. 1993 ൽ ഒന്നാം റാങ്കോടെയാണു വിജയിച്ചത്. പാറ്റ്നയിലെ കുർജി ആശുപത്രിയിൽ സർജിക്കൽ എക്സ്പീരിയൻസിനുശേഷം കുറച്ചുകാലം കിടങ്ങൂർ ലൂർദ് ആശുപത്രിയിലായിരുന്നു സേവനം. 1994 ൽ എംഡി ബിരുദം നേടാനായി മൂന്നാം തവണയും ബംഗളൂരു സെന്‍റ് ജോൺസിലേക്ക്. 1997 ൽ യൂണിവേഴ്സിറ്റി രണ്ടാം റാങ്കോടെ എംഡിയിൽ ഉജ്വല വിജയം. ഇതേതുടർന്നാണ് ഡോ.സിസ്റ്റർ ശാന്തി പയ്യാവൂർ മേഴ്സി ആശുപത്രിയിൽ ഗൈനക്കോളജി ആൻഡ് ജനറൽ പ്രാക്‌ടീഷണറായി സേവനം തുടങ്ങിയത്. ഗൈനക്കോളജിസ്റ്റായിരുന്നെങ്കിലും പ്രായഭേദമില്ലാതെ എല്ലാ വിഭാഗം രോഗികൾക്കും ചികിത്സ നൽകിയിരുന്നു. സ്വന്തം നാട്ടിൽ ബന്ധുജനങ്ങളുടേയും സഹപാഠികളുടേയും സർവോപരി നാട്ടുകാരുടേയും ഇടയിൽ ഒരു ഡോക്‌ടറായി പൊതുജന സേവനം ചെയ്യാൻ അവസരം ലഭിച്ചത് ദൈവഹിതമായി കരുതുന്നതായി സിസ്റ്റർ പറഞ്ഞു. 2025 മേയ് 13 ന് കിടങ്ങൂർ കോൺവെന്‍റ് ചാപ്പലിൽ തുടക്കം കുറിച്ച സുവർണ ജൂബിലി ആഘോഷങ്ങൾക്കാണ് ഇന്ന് തിരൂരിലെ സ്വന്തം ഇടവക പള്ളിയിലെ തിരുക്കർമങ്ങൾക്കുശേഷം പാരീഷ് ഹാളിൽ നടക്കുന്ന അനുമോദന സമ്മേളനത്തോടെ സമാപനമാകുന്നത്.

കർഷകദിനം കണ്ണീർ ദിനമായി ആചരിക്കും: കർഷക കോൺഗ്രസ്

കണ്ണൂർ: കേന്ദ്ര സംസ്ഥാന സർക്കാരുകളുടെ കർഷക ദ്രോഹ നയങ്ങളിൽ പ്രതിഷേധിച്ച് കർഷകദിനമായ ചിങ്ങം ഒന്ന് കർഷക കോൺഗ്രസ് കണ്ണീർ ദിനമായി ആചരിക്കും. അന്നേദിവസം എല്ലാ നിയോജക മണ്ഡലം കമ്മറ്റി ആസ്ഥാനങ്ങളിലും പ്രതിഷേധ യോഗങ്ങൾ നടത്താൻ കണ്ണൂർ ഡിസിസി ഹാളിൽ ചേർന്ന കർഷക കോൺഗ്രസ് നേതൃയോഗം തീരുമാനിച്ചു. രൂക്ഷമായ വന്യമൃഗ ആക്രമങ്ങളിൽ നിന്നും കർഷകരെയും കാർഷിക വിളകളെയും സംരക്ഷിക്കുക, കാർഷിക കടങ്ങൾക്ക് മൊറോട്ടോറിയം പ്രഖ്യാപിക്കുക, പ്രകൃതിക്ഷോഭം മൂലം കൃഷി നാശം സംഭവിച്ച കർഷകർക്ക് അടിയന്തര ധനസഹായം നൽകുക. റബറിന് കിലോയ്ക്ക് 250 രൂപ ആയി വർധിപ്പിച്ച് ഇൻസന്‍റീവും ബോണസും നൽകുക, തേങ്ങയുടെ വില കൂടിയപ്പോൾ സർക്കാർ വ്യവസായികളുമായി ഒത്തുകളിച്ചതിന്‍റെ ഫലമായി വിലയിടിഞ്ഞ സാഹചര്യത്തിൽ കേരകർഷകരെ സഹായിക്കാൻ നടപടി സ്വീകരിക്കുക തുടങ്ങിയ ആവശ്യങ്ങളും യോഗം ഉന്നയിച്ചു. ജില്ലാ പ്രസിഡന്‍റ് ജോസ് പൂമല അധ്യക്ഷത വഹിച്ചു. സംസ്ഥാന ഭാരവാഹികളായ ടോണി ജോസഫ് , എം.ഒ. ചന്ദ്രശേഖരൻ, പി.ഒ. ചന്ദ്രമോഹനൻ, സി.പി. സലിം, എം.വി. പ്രേമരാജൻ, ജോണി മുണ്ടയ്ക്കൽ, എ.ജെ. തോമസ്, കെ.പി. കുമാരൻ എന്നിവർ പ്രസംഗിച്ചു.

ബാങ്കുകളിലെ കരാർവത്കരണം അവസാനിപ്പിക്കണം: ബാങ്ക് റിട്ടയറീസ് ഫോറം

കണ്ണൂർ: രാജ്യത്തെ ബാങ്കുകളിൽ കരാർവത്കരണം അവസാനിപ്പിച്ച് മൂന്നു ലക്ഷത്തോളം ഒഴിവുകളിൽ സ്ഥിരനിയമനം നടത്തണമെന്ന് ഓൾ കേരള ബാങ്ക് റിട്ടയറീസ് ഫോറം (എകെബിആർഎഫ്) ജില്ലാ സമ്മേളനം ആവശ്യപ്പെട്ടു. ബാങ്ക് ജീവനക്കാരുടെ പെൻഷൻ കാലോചിതമായി പരിഷ്കരിക്കുക, യുപിഎസ് നിർത്തലാക്കി എല്ലാവർക്കും പെൻഷൻ പദ്ധതി ബാധകമാക്കുക, വിരമിച്ച ജീവനക്കാരുടെ മെഡിക്കൽ ഇൻഷ്വറൻസ് പ്രീമിയം ബാങ്ക് വഹിക്കുക, കേരള ബാങ്ക് ജീവനക്കാരുടെ പെൻഷൻ പരിഷ്കരിച്ച് കേരളാ ബാങ്കിലൂടെ തന്നെ നൽകുക തുടങ്ങിയ പ്രമേയങ്ങളും സമ്മേളനം അംഗീകരിച്ചു. സമ്മേളനം കെ.വി. സുമേഷ് എംഎൽഎ ഉദ്ഘാടനം ചെയ്തു. പ്രസിഡന്‍റ് കെ. പ്രകാശൻ അധ്യക്ഷത വഹിച്ചു. റിട്ടയറീസ് ഫോറം സംസ്ഥാന വൈസ് പ്രസിഡന്‍റ് കെ.ടി. ബാബു, കേന്ദ്ര സർവീസ് പെൻഷൻകാരുടെ കോ-ഓർഡിനേഷൻ കൺവീനർ കെ. മോഹനൻ, കെ.എം. അച്ചുതൻകുട്ടി, അമൽ രവി, സി.പി. നരേന്ദ്രൻ എം.എൻ. അനിൽകുമാർ എന്നിവർ പ്രസംഗിച്ചു. പുതിയ പ്രസിഡന്‍റായി കെ. പ്രകാശനെയും സെക്രട്ടറിയായി ടി.ആർ. രാജനെയും തെരഞ്ഞെടുത്തു.

യുഡിഎഫ് പ്രതിഷേധ പ്രകടനം നടത്തി

മാതമംഗലം: കടന്നപ്പള്ളി സർക്കാർ ഹയര്‍ സെക്കൻഡറി സ്‌കൂള്‍ വിദ്യാർഥിയായ കെഎസ്‌യു പ്രവര്‍ത്തകനെ ഡിവൈഎഫ്ഐ പ്രവര്‍ത്തകര്‍ ക്രൂരമായി മർദിച്ചതിൽ പ്രതിഷേധിച്ച് യുഡിഎഫ് കടന്നപ്പള്ളി പാണപ്പുഴ മണ്ഡലം കമ്മിറ്റിയുടെ നേതൃത്വത്തിൽ ചന്തപ്പുരയിൽ പ്രതിഷേധ പ്രകടനവും പൊതുയോഗവും നടത്തി. കെപിസിസി അംഗവും യൂത്ത് കോൺഗ്രസ് സംസ്ഥാന ജനറൽ സെക്രട്ടറിയുമായ വി.പി. അബ്ദുൾ റഷീദ് ഉദ്ഘാടനം ചെയ്തു. രാജേഷ് മല്ലപ്പള്ളി അധ്യക്ഷത വഹിച്ചു. യൂത്ത് ലീഗ് നേതാവ് അഫ്സൽ രാമന്തളി മുഖ്യപ്രഭാഷണം നടത്തി. യോഗത്തിൽ കെപിസിസി മെംബർ എം. പി. ഉണ്ണികൃഷ്ണൻ, ഡിസിസി ജനറൽ സെക്രട്ടറി കെ. ബ്രിജേഷ് കുമാര്‍, എസ്.കെ.പി. സക്കറിയ, എന്‍.ജി. സുനില്‍പ്രകാശ്, സുധീഷ് കടന്നപ്പള്ളി, സന്ദീപ് പാണപ്പുഴ, വി. രാജന്‍, എന്‍.വി. മധുസൂദനന്‍, അക്ഷയ് പറവൂര്‍, ഒ.പി. ഉമ്മര്‍കുട്ടി തുടങ്ങിയവര്‍ പ്രസംഗിച്ചു. സംഭവത്തിൽ യുഡിഎഫ് കടന്നപ്പള്ളി പഞ്ചായത്ത് കമ്മിറ്റി പ്രതിഷേധിച്ചു.

മോദി സർക്കാരിനെതിരെ ക്വിറ്റ് ഇന്ത്യാ സമരത്തിന് സമയമായി: മന്ത്രി കടന്നപ്പള്ളി

പയ്യന്നൂര്‍: മോദി സര്‍ക്കാരിനെ താഴെയിറക്കാനായി രാജ്യത്ത് രണ്ടാം ക്വിറ്റ് ഇന്ത്യാ സമരത്തിന് സമയമായയെന്ന് കോണ്‍ഗ്രസ്-എസ് സംസ്ഥാന പ്രസിഡന്‍റും മന്ത്രിയുമായ കടന്നപ്പള്ളി രാമചന്ദ്രൻ. ക്വിറ്റ് ഇന്ത്യാദിനത്തില്‍ യൂത്ത് കോണ്‍ഗ്രസ്-എസ് സംസ്ഥാന കമ്മിറ്റി പയ്യന്നൂരില്‍ സംഘടിപ്പിച്ച യുവ മുന്നേറ്റ റാലി ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. ഇന്ത്യയെ മത വര്‍ഗീയ രാഷ്‌ട്രമാക്കി മാറ്റാനുളള ശ്രമങ്ങളാണ് കേന്ദ്ര ഭരണാധികാരികളില്‍ നിന്ന് ഉണ്ടാകുന്നത്. സമീപകാലത്ത് രാജ്യത്ത് നടന്ന് കൊണ്ടിരിക്കുന്ന സംഭവങ്ങള്‍ ഇതാണ് ചൂണ്ടിക്കാണിക്കപ്പെടുന്നത്. രാജ്യത്ത് എന്തും സംഭവിക്കാവുന്ന അവസ്ഥയാണ്. ഇനി വോട്ടര്‍പ്പട്ടിക തന്നെ ഉണ്ടാകില്ലെന്ന സാഹചര്യമാണ് വരുന്നത്. തങ്ങൾക്ക് എത്രവോട്ടുകൾ വേണമെന്ന് സംഘപരിവാർ തന്നെ തീരുമാനിക്കുന്ന അവസ്ഥയിലേക്കാണ് കാര്യങ്ങൾ പോകുന്നതെന്നും കടന്നപ്പള്ളി പറഞ്ഞു. യൂത്ത് കോണ്‍ഗ്രസ്-എസ് സംസ്ഥാന പ്രസിഡന്‍റ് സന്തോഷ് കാലാ അധ്യക്ഷത വഹിച്ചു. ഡിവൈഎഫ്ഐ സംസ്ഥാന ജോയിന്‍റ് സെക്രട്ടറി എം. വിജിന്‍ എംഎല്‍എ, എഐവൈഎഫ് സംസ്ഥാന വൈസ് പ്രസിഡന്‍റ് കെ. ഷാജഹാന്‍, ഇപിആര്‍ വേശാല, യു. ബാബു ഗോപിനാഥ്, സി.ആര്‍. വത്സന്‍, കെ.കെ. ജയപ്രകാശ്, കെ.വി. മനോജ്കുമാര്‍, എം. ഉണ്ണികൃഷ്ണന്‍, റനീഷ് മാത്യൂ, രാജേഷ് മാത്യു പുതുപ്പറമ്പില്‍ എന്നിവർ പ്രസംഗിച്ചു.

വിദ്യാരംഗം കലാസാഹിത്യ വേദി ഉദ്ഘാടനം

പയ്യാവൂർ: മടമ്പം മേരിലാൻഡ് ഹൈസ്‌കൂളിൽ 2025-26 അധ്യയന വർഷത്തെ വിദ്യാരംഗം കലാസാഹിത്യ വേദി, വിവിധ ക്ലബുകൾ എന്നിവ കോമഡി ഉത്സവം ഫെയിം ഫാ. ജിതിൻ വയലുങ്കൽ ഉദ്ഘാടനം ചെയ്തു. സ്കൂൾ മാനേജർ ഫാ. സജി മെത്താനത്ത് അധ്യക്ഷത വഹിച്ചു. മുഖ്യാധ്യാപകൻ ഷാജു ജോസഫ് ആമുഖപ്രഭാഷണവും ഫാ. സജി മെത്താനത്ത് ഈ വർഷത്തെ സ്കൂൾ കലോത്സവ ലോഗോയുടെ പ്രകാശനവും നടത്തി. ശ്രീകണ്ഠപുരം നഗരസഭ കൗൺസിലർ പി. മീന, സ്കൂൾ പിടിഎ പ്രസിഡന്‍റ് സജി കുര്യൻ, മദർ പിടിഎ പ്രസിഡന്‍റ് മായ, സ്റ്റാഫ്‌ കൗൺസിൽ സെക്രട്ടറി റോയ്‌മോൻ ജോസ്, ജ്വാല മരിയ സിറിയക് എന്നിവർ പ്രസംഗിച്ചു. വിദ്യാർഥികൾ വിവിധ കലാപരിപാടികളും അവതരിപ്പിച്ചു.

ഡിവൈഎഫ്ഐ സമര സംഗമം: കാൽനട ജാഥകളാരംഭിച്ചു

തളിപ്പറമ്പ്: "ഞങ്ങൾക്കുവേണം ജോലി, ഞങ്ങൾക്ക് വേണം മതേതര ഇന്ത്യ' എന്ന മുദ്രാവാക്യം ഉയർത്തി സ്വാതന്ത്ര്യദിനത്തിൽ തളിപ്പറമ്പിൽ ഡിവൈഎഫ്ഐ ബ്ലോക്ക് കമ്മിറ്റിയുടെ നേതൃത്വത്തിൽ സംഘടിപ്പിക്കുന്ന സമര സംഗമത്തിന്‍റെ പഞ്ചായത്ത്-മുനിസിപ്പൽതല കാൽനട പ്രചാരണ ജാഥകളാരംഭിച്ചു. സംസ്ഥാന കമ്മിറ്റി അംഗം പി.പി. അനിഷ ക്യാപ്റ്റനും എം. രജിത്ത് മാനേജറും ഇ. അഞ്ജന വൈസ് ക്യാപ്റ്റനുമായ ആന്തൂർ നഗരസഭ കാൽനട ജാഥ ഇരുമ്പ്കല്ലിൻതട്ടിൽ വി.വി പരമേശ്വരൻ ഉദ്ഘാടനം ചെയ്തു. കെ. നവീൻ അധ്യക്ഷത വഹിച്ചു. ചാലത്തൂരിൽ നിന്നും സി.പി. മുഹാസ് ക്യാപ്റ്റനും കെ. പ്രണവ് മാനേജറും പി.കെ. അനുഷ വൈസ് ക്യാപ്റ്റനുമായ കാൽനടജാഥ സി.എം. കൃഷ്ണൻ ഉദ്ഘാടനം ചെയ്തു. കെ.എം. ലത്തീഫ് അധ്യക്ഷത വഹിച്ചു. പ്രജീഷ് ബാബു ക്യാപ്റ്റനും മനു സേവ്യയർ മാനേജറും മീര ചന്ദ്രൻ വൈസ് ക്യാപ്റ്റനുമായ പരിയാരം പഞ്ചായത്ത് കാൽനട ജാഥ കെ. സന്തോഷ് ഉദ്ഘാടനം ചെയ്തു. സി.എച്ച്. വിജയൻ അധ്യക്ഷത വഹിച്ചു. സി.കെ. ഷോന ക്യാപ്റ്റനും പ്രണവ് വടക്കീൽ മാനേജറും പി. നിജേഷ് വൈസ് ക്യാപ്റ്റനുമായ കുറുമാത്തൂർ പഞ്ചായത്ത് കാൽനട ജാഥ പി.കെ. ശ്യാമള ഉദ്ഘാടനം ചെയ്തു. എ. സുജിത്ത് അധ്യക്ഷത വഹിച്ചു. ടി.പി. അഖില ക്യാപ്റ്റനും ശ്രീകുമാർ അമ്മാനപ്പാറ മാനേജറും കെ. സരിത്ത് വൈസ് ക്യാപ്റ്റനുമായ പട്ടുവം പഞ്ചായത്ത് കാൽനട ജാഥ കയ്യംതടത്തിൽ കെ. ഗണേശൻ ഉദ്ഘാടനം ചെയ്തു. കെ.വി. വിഭ അധ്യക്ഷത വഹിച്ചു.

ഡിവൈഎഫ്ഐയെ കുട്ടൂപിടിച്ചുള്ള എസ്എഫ്ഐ ഗുണ്ടായിസം അവസാനിപ്പിക്കണം: കെഎസ്‌യു

കണ്ണൂർ: എസ്എഫ്ഐയുടെ നിർദേശപ്രകാരം ഡിവൈഎഫ്ഐയുടെ നേതൃത്വത്തിൽ സ്കൂൾ വിദ്യാർഥികളെയടക്കം മർദിക്കുന്ന ഗുണ്ടാപ്രവർത്തനങ്ങൾ അവസാനിപ്പിക്കണമെന്ന് കെഎസ്‌യു ജില്ലാ പ്രസിഡന്‍റ് എം.സി. അതുൽ ആവശ്യപ്പെട്ടു. മാതമംഗലം സ്കൂളിൽ തെരഞ്ഞെടുപ്പ് കൺവൻഷന് പോയ കെഎസ്‌യു നേതാക്കളെ ആക്രമിച്ചതിന് തൊട്ട് പിറ്റേദിവസം തന്നെ കടന്നപ്പള്ളി സ്കൂളിൽ നോമിനേഷൻ കൊടുക്കാൻ നേതൃത്വം കൊടുത്തു എന്നതിന്‍റെ പേരിൽ അസൈനാർ (17) എന്ന വിദ്യാർഥിയെ സംഘടിതമായി ആക്രമിക്കുകയായിരുന്നു. തെരഞ്ഞെടുപ്പ് തോൽവി മുന്നിൽ കണ്ടുള്ള വെപ്രാളത്തിൽ എസ്എഫ്ഐ-ഡിവൈഎഫ്ഐ കൂട്ടുകെട്ട് വ്യാപകമായി അക്രമം അഴിച്ചുവിടുകയാണ്. ഇത്തരം ഗുണ്ടകൾക്കതെിരെ നടപടിയെടുക്കാൻ പോലീസ് തയാറാകണം. അല്ലാത്തപക്ഷം കെഎസ്‌യു അക്രമത്തെ പ്രതിരോധത്തിലൂടെ ചെറുക്കുമെന്നും എം.സി. അതുൽ പറഞ്ഞു.

ശാസ്ത്രപ്രദർശനവും ഫിലിം ഫെസ്റ്റിവലും

തളിപ്പറമ്പ്: ദേശീയ ബഹിരാകാശ ദിനാചരണത്തിന്‍റെ ഭാഗമായി തളിപ്പറന്പ് സർ സയ്യിദ് കോളജ് ഫിസിക്സ് ഡിപ്പാർട്ട്മെന്‍റിന്‍റെ ആഭിമുഖ്യത്തിൽ സ്കൂൾ, കോളജ് വിദ്യാർഥികൾക്കായി ശാസ്ത്രപ്രദർശനവും ഫിലിം ഫെസ്റ്റിവലും "സ്പെയ്സ് സൂത്ര-25' 11, 12 തീയതികളിലായി നടക്കും. നാളെ രാവിലെ 10ന് കണ്ണൂർ യൂണിവേഴ്‌സിറ്റി സ്റ്റുഡന്‍റ് സർവീസ് ഡയറക്ടർ ഡോ. കെ.വി. സുജിത്ത് പരിപാടി ഉദ്ഘാടനം ചെയ്യും. എക്‌സിബിഷൻ ഉദ്ഘാടനം മാനേജർ മഹമൂദും ഫിലിം ഫെസ്റ്റിവെൽ സിഡിഎംഇഎ ജനറൽ സെക്രട്ടറി അള്ളാംകുളം മഹമൂദും ഫുഡ് ഫെസ്റ്റിവൽ പയ്യാമ്പലം ഡിസ്ന‌ി വേവ്സ് മാനേജിംഗ് ഡയറക്ടർ സി.വി. ഫൈസലും നിർവഹിക്കും. തളിപ്പറമ്പിലും പരിസരങ്ങളിലുമുള്ള സ്‌കൂൾ, കോളജ് വിദ്യാർഥികൾക്കും അധ്യാപകർക്കും സൗജന്യമായി പങ്കെടുക്കാം. നക്ഷത്ര നിരീക്ഷണം, ക്വിസ് മത്സരം, പ്രബന്ധരചന, കവിതാരചന, ചെറുകഥാരചന, ഗവേഷണ രചനകൾ പരിചയപ്പെടൽ, മെഹന്തിയിടൽ മത്സരം, റോക്കറ്റ് മോഡൽ നിർമാണം, സുഡോക്കു തുടങ്ങിയവ കോളജിൽ നടത്തിവരുന്നുണ്ട്. ഊർജതന്ത്ര വിഭാഗത്തിലെ ബിരുദ-ബിരുദാനന്ത വിദ്യാർഥികളെ ഉൾക്കൊള്ളിച്ച് വാനനിരീക്ഷണം പഠനയാത്രയും ഇതിന്‍റെ ഭാഗമായി സംഘടിപ്പിക്കും. പത്രസമ്മേളനത്തിൽ ഡോ. കെ.കെ. ഫൈറൂസ്, ഡോ. ടി.പി. നഫീസ ബീവി, ഡോ. പി. ഹാരിസ്, ഷിസ ഖദീജ, റിഫാൻ, നിമ ഫാത്തിൻ എന്നിവർ പങ്കെടുത്തു.

റൺ പാലക്കയംതട്ട് മിനി മാരത്തൺ സെപ്റ്റംബർ 13ന്

നടുവിൽ: ഇരിക്കൂർ നിയോജക മണ്ഡലത്തിലെ ടൂറിസം സാധ്യതകൾ ലോക ശ്രദ്ധയിലേക്ക് കൊണ്ടുവരുന്നതിന്‍റെ ഭാഗമായി മലയോരത്ത് ആദ്യമായി സംഘടിപ്പിക്കുന്ന മിനി മാരത്തൺ സെപ്റ്റംബർ 13ന് നടക്കും. പയ്യാവൂരിൽ നിന്നും പാലക്കയംതട്ടിന്‍റെ താഴ്വാരമായ പുലിക്കുരുന്പയിലേക്കാണ് മാരത്തൺ. കണ്ണൂർ ഡിടിപിസി, ഇരിക്കൂർ ടൂറിസം ഇന്നൊവേഷൻ കൗൺസിൽ എന്നിവ സംയുക്തമായാണ് പരിപാടി സംഘടിപ്പിക്കുന്നത്. വിജയികൾക്ക് ആകർഷകമായ സമ്മാനങ്ങളുണ്ടായിരിക്കുമെന്ന് സജീവ് ജോസഫ് എംഎൽഎ അറിയിച്ചു. സംസ്ഥാനത്തിന് പുറത്തുനിന്നുള്ള പങ്കാളിത്തം കൂടി ഉറപ്പുവരുത്തുന്ന തരത്തിലാണ് മിനി മാരത്തൺ സംഘടിപ്പിക്കുന്നത്. സംഘാടക സമിതി രൂപീകരണ യോഗം മണ്ടളം സെന്‍റ് ജൂഡ് പാരിഷ് ഹാളിൽ നടന്നു. സജീവ് ജോസഫ് എംഎൽഎ ഉദ്ഘാടനം ചെയ്തും. നടുവിൽ പഞ്ചായത്ത് പ്രസിഡന്‍റ് ബേബി ഓടന്പള്ളി അധ്യക്ഷത വഹിച്ചു. ഫാ. മാത്യു വേങ്ങക്കുന്നേൽ, ഇരിക്കൂർ ടൂറിസം ഇന്നൊവേഷൻ കൗൺസിൽ ചെയർമാർ പി.ടി. മാത്യു, മധു തൊട്ടിയിൽ, ബാബു മാത്യു, സിദ്ദിഖ് ഇരിക്കുർ, ഷാജി പാണക്കുഴി, ജോസ് പരത്തിനാൽ, വാഹിദ എന്നിവർ പ്രസംഗിച്ചു. സംഘാടക സമിതി ഭാരവാഹികൾ: സജീവ് ജോസഫ് എംഎൽഎ, കെ. സുധാകരൻ എംപി, ജോൺ ബ്രിട്ടാസ് എംപി, ഫാ. മാത്യു വേങ്ങക്കുന്നേൽ, ഫാ. തോമസ് പയ്യന്പിള്ളി, ശ്രീകണ്ഠപുരം നഗരസഭാധ്യക്ഷ കെ.വി. ഫിലോമിന, പഞ്ചായത്ത് പ്രസിഡന്‍റുമാരായ പി.സി. ഷാജി, സാജു സേവ്യർ, പി. ഫാത്തിമ, പി.പി. മോഹനൻ, മിനി ഷൈബി, ജോജി കന്നിക്കാട്ട്, കെ.എസ്. ചന്ദ്രശേഖരൻ-രക്ഷാധികാരികൾ, ബേബി ഓടന്പള്ളി-ചെയർമാൻ, പി.ടി. മാത്യു-ജനറൽ കൺവീനർ, ബാബു മാത്യു-കോ-ഓർഡിനേറ്റർ, സെബാസ്റ്റ്യൻ മാത്യു-ട്രഷറർ, 101 അംഗ സംഘാടക സമിതിയും രൂപീകരിച്ചു.

ജില്ലാ അത്‌ലറ്റിക്സ് ചാംപ്യന്‍ഷിപ്പ്: കണ്ണൂര്‍ അത്‌ലറ്റിക് അക്കാദമി ജേതാക്കള്‍

തലശേരി: മൂന്നുദിവസമായി നടന്ന ജില്ലാ അത്‌ലറ്റിക്സ് ചാന്പ്യന്‍ഷിപ്പില്‍ കണ്ണൂര്‍ അത്‌ലറ്റിക്ക് അക്കാദമി ജേതാക്കള്‍. കഴിഞ്ഞതവണയും ജേതാക്കളായ കണ്ണൂര്‍ അത്‌ലറ്റിക് അക്കാദമി 182 ഇനങ്ങള്‍ പൂര്‍ത്തിയായപ്പോള്‍ 264 പോയിന്‍റ് നേടിയാണ് കിരീടം സ്വന്തമാക്കിയത്. കണ്ണൂര്‍ വിഎച്ച്എസ്എസ് 190 പോയിന്‍റുമായി രണ്ടാംസ്ഥാനവും 157 പോയിന്‍റുമായി തലശേരി അത്‌ലറ്റിക്‌സ് ക്ലബ് മൂന്നാം സ്ഥാനവും നേടി. തലശേരി വി.ആര്‍. കൃഷ്ണയ്യര്‍ സ്‌റ്റേഡിയത്തിലും ധര്‍മടം സിന്തറ്റിക്ക് ട്രാക്കിലുമാണ് മത്സരങ്ങള്‍ നടന്നത്. എസ്എന്‍ കോളജ് വിദ്യാര്‍ഥിയായ 5000 മീറ്റര്‍ ഓട്ട മത്സരത്തില്‍ പ്രിതുല്‍ മധു ആണ് അവാസാനദിനം റിക്കാർഡിട്ടത്. ആകെ അഞ്ചു റിക്കാർഡുകളാണ് ചാന്പ്യന്‍ഷിപ്പില്‍ പിറന്നത്. സാഫ് ഗയിംസ് മെഡല്‍ ജേതാവ് വി.ടി. ഷിജില വിജയികള്‍ക്ക് ട്രോഫിയും സര്‍ട്ടിഫിക്കറ്റുകളും വിതരണം ചെയ്തു. അത്‌ലറ്റിക്സ് അസോ. ജില്ലാ പ്രസിഡന്‍റ് ജോസ് മാത്യു, ട്രഷറര്‍ കെ.കെ. ഷമിന്‍, വൈസ് പ്രസിഡന്‍റ് പി. മഹിലേഷ്, നിര്‍വാഹക സമിതി അംഗം യു. ബൈജു സംബന്ധിച്ചു.

ആലക്കോട്-കോളി റോഡ് തകർന്നു

ആലക്കോട്: ആലക്കോട് പഞ്ചായത്തിലെ പ്രധാന റോഡുകളിലൊന്നായ ആലക്കോട്-കോളി റോഡ് തകർന്നത് യാത്രാദുരിതത്തിന് കാരണമാകുന്നു. നിരവധി വാഹനങ്ങളും കാൽനടയാത്രക്കാരും സഞ്ചരിക്കുന്ന റോഡിലാണ് ടാറിംഗ് പൊട്ടിപ്പൊളിഞ്ഞ് കുഴി രൂപപ്പെട്ടത്. കോളി പ്രദേശത്തെ ആലക്കോട് ടൗണുമായി ബന്ധിപ്പിച്ചുള്ള റോഡാണിത്. കോളി, പൂവൻചാൽ, ഉന്നതി ഉൾപ്പെടെയുള്ള പ്രദേശങ്ങളെ ബന്ധിപ്പിച്ചുള്ള റോഡിന്‍റെ ശോചനീയാവസ്ഥ പരിഹരിക്കണമെന്നാവശ്യപ്പെട്ട് അധികൃതർക്ക് പരാതി നൽകിയിട്ടും യാതൊരു നടപടിയും ഉണ്ടായിട്ടില്ലന്നാണ് നാട്ടുകാർ പറയുന്നത്. ആലക്കോട്-ഉദയഗിരി പഞ്ചായത്തുകളെ ബന്ധിപ്പിക്കുന്ന റോഡുകൂടിയാണിത്. ബജറ്റിൽ ഒരുകോടിയിലധികം തുക അനുവദിച്ചതായി കാണിച്ച് രാഷ്‌ട്രീയ പാർട്ടികൾ നേരത്തേ ഫ്ലക്സ് സ്ഥാപിച്ചിരുന്നു. അതിന് ശേഷം ഒരു നിർമാണ പ്രവൃത്തിയും ഇവിടെ നടന്നിട്ടില്ല. മഴ കനത്തതോടെ റോഡിന്‍റെ തകർച്ച കൂടുതൽ രൂക്ഷമായ നിലയിലാണ്.

ശുചിത്വ ക്വിസ് മത്സരം നടത്തി

ചപ്പാരപ്പടവ്: സ്വാതന്ത്ര്യദിനാഘോഷവുമായി ബന്ധപ്പെട്ട് സ്വച്ച്ഭാരത് മിഷന്‍റെ ആഭിമുഖ്യത്തിൽ ഹർ ഘർ തിരങ്ക, ഹർ ഘർ സ്വച്ഛത പരിപാടിയുടെ ഭാഗമായി ചപ്പാരപ്പടവ് പഞ്ചായത്ത് ആശാ വർക്കർമാർക്കായി ശുചിത്വ ക്വിസ് മത്സരം സംഘടിപ്പിച്ചു. പഞ്ചായത്ത് പ്രസിഡന്‍റ് സുനിജ ബാലകൃഷ്ണൻ, സെക്രട്ടറി സി.കെ ശ്രീകുമാർ, അംഗങ്ങളായ സി. പദ്മനാഭൻ, ജോസഫ് ഉഴുന്നുപാറ, ആശാ വർക്കർമാർ എന്നിവർ പങ്കെടുത്തു. ഹരിത കേരളം മിഷൻ ആർപി വി. സഹദേവൻ, ശുചിത്വ മിഷൻ ആർപി എം. സുജന എന്നിവർ നേതൃത്വം നൽകി. സജിത സുരേഷ് ഒന്നാം സ്ഥാനവും വിലാസിനി മോഹനൻ രണ്ടാം സ്ഥാനവും കരസ്ഥമാക്കി. വിജയികൾക്ക് സമ്മാനദാനവും നടത്തി.

ഹിരോഷിമ-നാഗസാക്കി ദിനാചരണം

പൈസക്കരി: സമാധാനത്തിന്‍റെ ദൂതുമായി പൈസക്കരി ദേവമാതാ ഹൈസ്കൂളിലെ സാമൂഹിക ശാസ്ത്ര ക്ലബ് അംഗങ്ങൾ ഹിരോഷിമ-നാഗസാക്കി ദിനാചരണം നടത്തി. സമാധാന സന്ദേശമെഴുതിയ ബലൂണുകൾ വാനിലേക്കുയർത്തിയ വിദ്യാർഥികൾ 2025 സഡാക്കോ പക്ഷികളെ നിർമിച്ച് പ്രദർശിപ്പിക്കുകയും യുദ്ധ വിരുദ്ധ മതിലിൽ കൈയൊപ്പ് ചാർത്തുകയും ചെയ്തു. സ്കൂൾ മാനേജർ ഫാ. നോബിൾ ഓണംകുളം പരിപാടി ഉദ്ഘാടനം ചെയ്തു. യുദ്ധം ഒന്നിനും പരിഹാരമല്ലെന്നും ഇന്നത്തെ തലമുറ ലോക സമാധാനത്തിന്‍റെ വാഹകരാകണമെന്നും അദ്ദേഹം ഓർമപ്പെടുത്തി. മുഖ്യാധ്യാപിക ബീന അഗസ്റ്റിൻ, സാമൂഹിക ശാസ്ത്ര ക്ലബ് കൺവീനർ മെൻസി ജോസഫ് എന്നിവർ പ്രസംഗിച്ചു. തുടർന്ന് വിദ്യാർഥികൾ യുദ്ധവിരുദ്ധ കലാപരിപാടികൾ അവതരിപ്പിച്ചു.

വന്യജീവി ആക്രമണം; ജനജാഗ്രതാ സമിതി യോഗങ്ങൾ ചേർന്നു

നടുവിൽ: നടുവിൽ പഞ്ചായത്തിലെ ജനജാഗ്രതാ സമിതി യോഗം പഞ്ചായത്ത് കോൺഫറൻസ് ഹാളിൽ ചേർന്നു. പഞ്ചായത്ത് പ്രസിഡന്‍റ് ബേബി ഓടമ്പള്ളി ഉദ്ഘാടനം ചെയ്തു. സെക്‌ഷൻ ഫോറസ്റ്റ് ഓഫീസർ എം. രഞ്ജിത്ത് അധ്യക്ഷത വഹിച്ചു. വന്യജീവി ആക്രമണം ലഘൂകരിക്കുന്നതിനായി വനം വകുപ്പ് നടപ്പിലാക്കുന്ന 10 ഇന മിഷനുകളെക്കുറിച്ച് റേഞ്ച് ഓഫീസർ വിശദീകരിച്ചു. പഞ്ചായത്ത് അഭിമുഖീകരിക്കുന്ന വന്യജീവി പ്രശ്നങ്ങളെകുറിച്ച് പഞ്ചായത്ത് പ്രസിഡന്‍റ് ബേബി ഓടമ്പള്ളി സംസാരിച്ചു. ഷൂട്ടർമാരെ ഉപയോഗിച്ച് പന്നികളെ ഉന്മൂലനം ചെയ്യുന്ന പദ്ധതി പഞ്ചായത്തിൽ വിജയകരമായി നടപ്പിലാക്കി വരുന്നുണ്ട്. കുടിയാന്മല ഭാഗത്തെ കുരങ്ങ് ശല്യത്തിന് പരിഹാരം കാണണമെന്ന് അദ്ദേഹം ആവശ്യപ്പെട്ടു. വനാതിർത്തി പങ്കിടുന്ന ഏഴാം വാർഡിലെ 4.5 കിലോമീറ്റർ ദൂരത്തിൽ ഫെൻസിംഗ് നിർമിക്കുന്നതിനുള്ള നടപടികൾ സ്വീകരിക്കണമെന്ന് യോഗം ആവശ്യപ്പെട്ടു. ബ്ലോക്ക് പഞ്ചായത്ത് മെംബർ, വാർഡ് മെംബർമാർ, കൃഷി ഓഫീസർ, കർഷകർ എന്നിവർ സംസാരിച്ചു. എരുവേശി പഞ്ചായത്ത് ഹാളിൽ നടന്ന ജനജാഗ്രതാ സമിതി യോഗത്തിൽ വഞ്ചിയം-പുറത്തൊട്ടി വനാതിർത്തിയിൽ സ്ഥാപിച്ച സൗരോർജ തൂക്കുവേലി നല്ല രീതിയിൽ പരിപാലിക്കുന്നതായും അതുവഴി കർണാടക വനത്തിൽ നിന്നുള്ള കാട്ടാന ശല്യത്തിന് ശാശ്വത പരിഹാരമായെന്നും പഞ്ചായത്ത് പ്രസിഡന്‍റ് മിനി ഷൈബി അഭിപ്രായപെട്ടു. കർഷകരുടെ ആശങ്ക അകറ്റാനായി മിഷൻ വൈൽഡ് പിഗിന്‍റെ വിശദാംശങ്ങൾ റേഞ്ച് ഓഫീസർ യോഗത്തിൽ വിശദീകരിച്ചു. വിത്തൂട്ടിന്‍റെ റേഞ്ച്തല ഉദ്ഘാടനം സജീവ് ജോസഫ് എംഎൽ എ നിർവഹിച്ചു. വനത്തിനുള്ളിൽ അനേകം വിത്തുണ്ടകൾ നിക്ഷേപിച്ചതായി യോഗത്തിൽ അറിയിച്ചു. കുരങ്ങു ശല്യം കൂടുതലുള്ള ഭാഗങ്ങളിൽ കർഷകരുടെ അപേക്ഷ പരിഗണിച്ച് കൂടുവച്ച് പിടികൂടണമെന്ന് യോഗം ആവശ്യപ്പെട്ടു. ഷൂട്ടർമാരുടെ ലിസ്റ്റ് തയാറാക്കി കാട്ടുപന്നികളെ നിയമാനുസരണം ഇല്ലായ്മ ചെയ്യുന്നതിനുള്ള നടപടിക്രമങ്ങൾ സ്വീകരിക്കുന്നതിന് തീരുമാനിച്ചു. യോഗത്തിൽ വില്ലേജ് ഓഫീസർ, വാർഡ് മെംബർമാർ, കർഷക പ്രതിനിധികൾ, കൃഷി ഓഫീസർ, ഷൂട്ടർമാർ തുടങ്ങി 30 ഓളം പേർ പങ്കെടുത്തു.

ഏരുവേശിയിലെ സിപിഎം മാർച്ച് രാഷ്‌ട്രീയ നാടകമെന്ന് കോൺഗ്രസ്

ചെമ്പേരി: സിപിഎമ്മിന്‍റെ നേതൃത്വത്തിൽ ഏരുവേശി പഞ്ചായത്ത് ഓഫീസിലേക്ക് ഇന്നലെ നടത്തിയ മാർച്ച് രാഷ്‌ട്രീയ നാടകമാണെന്ന് കോൺഗ്രസ് ഏരുവേശി മണ്ഡലം പ്രസിഡന്‍റ് ജോസ് പരത്തനാൽ ആരോപിച്ചു. പഞ്ചായത്തിലെ അഞ്ച്, ഏഴ് വാർഡുകളെ തമ്മിൽ ബന്ധിപ്പിക്കുന്ന എരുത്ത്കടവിൽ പുഴയിലെ ചപ്പാത്ത് പാലത്തിൽ കഴിഞ്ഞദിവസങ്ങളിൽ സംഭവിച്ച വ്യത്യസ്ത വാഹനാപകടങ്ങളുടെ പേരിലാണ് സിപിഎം പഞ്ചായത്ത് ഓഫീസിലേക്ക് മാർച്ച് സംഘടിപ്പിച്ചത്. 10 വർഷം മുമ്പ് യുഡിഎഫ് സർക്കാരിന്‍റെ കാലത്ത് ഇവിടെ പുതിയപാലം നിർമിക്കാനായി മുന്നൊരുക്കങ്ങൾ നടത്തിയിരുന്നു. പാലം നിർമാണത്തിന് ഇൻവെസ്റ്റിഗേഷന് ആറുലക്ഷം മൈനർ ഇറിഗേഷൻ വകുപ്പ് അനുവദിക്കുകയും ആദ്യഘട്ടം ഇൻവെസ്റ്റിഗേഷൻ പൂർത്തിയാക്കുകയും ചെയ്തു. 15 കോടി ചെലവിൽ വിയർ കം ബ്രിഡ്ജ് നിർമിക്കാനാണ് തീരുമാനിച്ചത്. പ്രാഥമിക കാര്യങ്ങൾ പൂർത്തിയായപ്പോൾ നിയമസഭാ തെരഞ്ഞെടുപ്പ് വന്നു. തുടർന്ന് 10 വർഷമായി എൽഡിഎഫാണ് ഭരിക്കുന്നത്. പലത്തിനായി ഒന്നും ചെയ്യാൻ സാധിക്കാത്തതിന്‍റെ പരാജയം മറച്ചുവയ്ക്കാനാണ് സിപിഎം സമരത്തിനിറങ്ങിയതെന്ന് അദ്ദേഹം ആരോപിച്ചു. കഴിഞ്ഞ ദിവസങ്ങളിലുണ്ടായ അപകടങ്ങളെ തുടർന്ന് പഞ്ചായത്ത് അധികാരികൾ സ്ഥലത്ത് മുന്നറിയിപ്പ് ബോർഡുകൾ സ്ഥാപിക്കാൻ തീരുമാനിച്ചതായി അദ്ദേഹം പറഞ്ഞു.

സൈഡ് വീൽ സ്‌കൂട്ടർ വിതരണം

കണ്ണൂർ: ജില്ലാ പഞ്ചായത്ത് പദ്ധതി പ്രകാരം ഭിന്നശേഷിക്കാർക്ക് സൈഡ് വീലോടു കൂടിയ സ്‌കൂട്ടറുകൾ വിതരണം ചെയ്യുന്നു. അപേക്ഷകർ ആധാർ കാർഡ്, റേഷൻ കാർഡ് എന്നിവയുടെ പകർപ്പ്, വരുമാന സർട്ടിഫിക്കറ്റ്, വൈകല്യം തെളിയിക്കുന്നതിനുള്ള മെഡിക്കൽ ബോർഡ് സർട്ടിഫിക്കറ്റ്, എട്ട് വർഷത്തിനുള്ളിൽ മുച്ചക്ര വാഹനം ലഭിച്ചിട്ടില്ല എന്ന ശിശുവികസന പദ്ധതി ഓഫീസറുടെ സാക്ഷ്യ പത്രം, മുച്ചക്ര വാഹനം ഉപയോഗിക്കാൻ സാധിക്കുമെന്നുള്ള സർക്കാർ ഡോക്ടറുടെ സർട്ടിഫിക്കറ്റ് എന്നീ രേഖകൾ സഹിതം അതാത് ഗ്രാമപഞ്ചായത്തുകളിലാണ് അപേക്ഷ നൽകേണ്ടത്. പഞ്ചായത്ത് ഭരണസമിതി തീരുമാനപ്രകാരം സമർപ്പിക്കപ്പെടുന്ന അപേക്ഷകരിൽ നിന്നാണ് പദ്ധതി ഗുണഭോക്താക്കളെ തെരഞ്ഞെടുക്കുക. ഫോൺ: 0497 2997811, 8281999015.

കലാനിധി ട്രസ്റ്റ് സ്മൃതി പുരസ്കാരം പി.ആർ. നാഥനും ടാഗോർ പുരസ്കാരം സൗമ്യയ്ക്കും

കണ്ണൂർ: കലാനിധി ട്രസ്റ്റ് രബീന്ദ്രനാഥ പ്രഥമ സ്മൃതി പുരസ്കാരം പി.ആർ. നാഥനും സ്മാരക പുരസ്കാരം സൗമ്യ കൃഷ്ണയ്ക്കും ഭക്ഷിണാമൂർത്തി പ്രഥമ സ്മൃതി പുരസ്കാരം പ്രമോദ് കാപ്പാടിനും ഒ.എസ്. ഉണ്ണികൃഷ്ണനും സമ്മാനിക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. ചേംബർ ഹാളിൽ ഇന്ന് ഉച്ചയ്ക്ക്1.30ന് മന്ത്രി കടന്നപ്പള്ളി രാമചന്ദ്രൻ പരിപാടി ഉദ്ഘാടനം ചെയ്യും. ചടങ്ങിൽ രബീന്ദ്രനാഥ സ്മൃതി ടാഗോർ സ്പെഷൽ ജൂറി പുരസ്കരം, മാധ്യമ ശ്രേഷ്ഠ പുരസ്കാരം എന്നിവയും വിതരണം ചെയ്യുമെന്ന് ട്രസ്റ്റ് ചെയർമാൻ കാഞ്ഞങ്ങാട് രാമചന്ദ്രൻ പറഞ്ഞു. പത്രസമ്മേളനത്തിൽ പ്രതീപ് തൃപ്പരപ്പ്, ഗീതാ രാജേന്ദ്രൻ, പ്രമോദ്കുമാർ അതിരകം എന്നിവരും പങ്കെടുത്തു.

ഇന്ത്യക്കെതിരെ അമേരിക്ക ഏര്‍പ്പെടുത്തിയ അധികതീരുവ പിന്‍വലിക്കണം: സിഐടിയു

ധര്‍മശാല: ഇന്ത്യക്കെതിരെ അമേരിക്ക ഏര്‍പ്പെടുത്തിയ അധികതീരുവ പിന്‍വലിക്കണമെന്ന് ടൂറിസം എംപ്ലോയീസ് യൂണിയന്‍-സിഐടിയു ജില്ലാ സമ്മേളനം ആവശ്യപ്പെട്ടു. ഇന്ത്യക്കുള്ള ഇറക്കുമതി തീരുവ 50 ശതമാനം വര്‍ധിപ്പിച്ച അമേരിക്കന്‍ നടപടി കേരളത്തിലെ പരമ്പരാഗത മേഖലക്ക് തിരിച്ചടിയാകും. സമുദ്രോത്പന്നങ്ങള്‍, കശുവണ്ടി, കയര്‍, സുഗന്ധവ്യഞ്ജനങ്ങള്‍ തുടങ്ങിയവയുടെ കയറ്റുമതിക്ക് വലിയ ആഘാതം കേരളത്തിലുണ്ടാകുമെന്ന് സമ്മേളനം ചൂണ്ടിക്കാട്ടി.വിസ്മയപാര്‍ക്ക് ഓഡിറ്റോറിയത്തില്‍ കിസാന്‍സഭ അഖിലേന്ത്യാ കമ്മിറ്റിയംഗം കെ.കെ. രാഗേഷ് ഉദ്ഘാടനം ചെയ്തു. യൂണിയന്‍ ജില്ലാ പ്രസിഡന്‍റ് എം. കരുണാകരന്‍റെ അധ്യക്ഷത വഹിച്ചു. സിഐടിയു ജില്ലാ പ്രസിഡന്‍റ് സി. കൃഷ്ണന്‍, കെ. കരുണാകരന്‍, കെ.പി. മോഹനന്‍ എന്നിവർ പ്രസംഗിച്ചു. എം. രാധാകൃഷ്ണന്‍ രക്തസാക്ഷി പ്രമേയവും കെ. രാജന്‍ അനുശോചനപ്രമേയവും കണ്ടപ്പന്‍ രാജീവന്‍ പ്രവര്‍ത്തന റിപ്പോര്‍ട്ടും അവതരിപ്പിച്ചു. ജില്ലാ സെക്രട്ടറി കെ. രാജീവന്‍ സ്വാഗതം പറഞ്ഞു. ഭാരവാഹികളായി എം. കരുണാകരന്‍-പ്രസിഡന്‍റ്, സി.ഇ. രമേശന്‍, സദാനന്ദന്‍-വൈസ് പ്രസിഡന്‍റുമാർ, കെ. രാജീവന്‍-സെക്രട്ടറി, എന്‍. രാധാകൃഷ്ണന്‍, പി.ജി. പ്രദീപ്-ജോയിന്‍റ് സെക്രട്ടറിമാർ, ടി. ജിതിന്‍-ട്രഷറര്‍ എന്നിവരെ തെരഞ്ഞെടുത്തു.

അത്‌ലറ്റിക്സ് ചാന്പ്യൻഷിപ്പിൽ കണ്ണൂർ അക്കാദമിയുടെ കുതിപ്പ്

തലശേരി: ജില്ലാ അത്‌ലറ്റിക്സ് ചാന്പ്യൻഷിപ്പിൽ 109 ഇനങ്ങൾ പൂർത്തിയായപ്പോൾ നിലവിലെ ചാന്പ്യന്മാരായ കണ്ണൂർ അത്‌ലറ്റിക് അക്കാദമി 132 പോയിന്‍റുമായി ഒന്നാം സ്ഥാനത്ത് തുടരുന്നു. തലശേരി അത്‌ലറ്റിക് ക്ലബ് 102 പോയിന്‍റുമായി രണ്ടാം സ്ഥാനത്തും ഗവ. മുൻസിപ്പൽ വിഎച്ച്എസ്എസ് കണ്ണൂർ 92 പോയിന്‍റുമായി മൂന്നാം സ്ഥാനത്തുമാണ്. കാപ്റ്റൻ അക്കാദമി ചെറുപുഴ മീന്തുള്ളി-70, യുവധാര കതിരൂർ-50, എന്നിങ്ങനെ പോയിന്‍റ് നേടി. രണ്ടാംദിനം രണ്ട് മീറ്റ് റിക്കാർഡുകളാണ് പിറന്നത്. അണ്ടർ 20 വനിതാ വിഭാഗത്തിൽ 3000 മീറ്റർ ഓട്ടത്തിലും അണ്ടർ 60 മീറ്റർ ഓട്ടത്തിലുമാണ് മീറ്റ് റിക്കാർഡുകൾ. ഇരട്ടസ്വര്‍ണവുമായി നിയ ജില്ലാ അതിലറ്റിക്‌സ് ചാന്പ്യന്‍ഷിപ്പില്‍ റിക്കാര്‍ഡോടുകൂടി ഇരട്ട സ്വര്‍ണം നേടി നിയ മോൾ. പരാധീനതക്കിടയിലും ജീവിതാനുഭവങ്ങള്‍ നല്‍കിയ കരുത്താണ് ഈ കൊച്ചുമിടുക്കിക്ക് നേട്ടത്തിലേക്കുള്ള വഴിയായത്. 1500 മീറ്റര്‍ ഓട്ടത്തിലാണ് ആദ്യം സ്വര്‍ണം നേടിയത്. 3000 മീറ്റര്‍ ഓട്ടത്തോടെ അത് ഇരട്ട വിജയമായി. അണ്ടര്‍ 20 വനിതാ വിഭാഗത്തില്‍ 3000 മീറ്ററില്‍ കെ.പി. ശ്രീതുവിന്‍റെ (അമിഗോസ് സ്‌പോര്‍ട്‌സ് ക്ലബ് പ്രാപ്പൊയില്‍) 2022ലെ 13.07.05 റിക്കാര്‍ഡ് തകര്‍ത്താണ് സ്വര്‍ണം നേടിയത്. കോഴിച്ചാല്‍ ജിഎച്ച്എസ്എസില്‍ പ്ലസ്ടു വിദ്യാര്‍ഥിയാണ്. കാപ്റ്റന്‍ അക്കാദമി മീന്തുളിയില്‍ കാപ്റ്റന്‍ സി.കെ. മാത്യുവിന്‍റെ കീഴിലാണ് പരിശീലനം. അമ്മ മധ്യപ്രദേശില്‍ ജോലി ചെയ്യുകയാണ്. അമ്മയുടെ വൃദ്ധരായ മാതാപിതാക്കള്‍ക്കൊപ്പം പുളിങ്ങോത്താണ് നിയ താമസിക്കുന്നത്. പിന്നാക്കം നില്‍ക്കുന്ന നിയയുടെ സാമ്പത്തിക പശ്ചാത്തലം മനസിലാക്കിയ പരിശീലകന്‍ മത്സരങ്ങളുടെ മുഴുവന്‍ ചെലവുകളും വഹിക്കുന്നത് അക്കാദമിയിലൂടെയാണ്.

ആറളം ഫാമിൽ "ഒരു വീട്ടിൽ ഒരു സംരംഭം' പദ്ധതിയുമായി കുടുംബശ്രീ

ഇരിട്ടി: കുടുംബശ്രീ കണ്ണൂർ ജില്ലാ മിഷന്‍റെയും കുടുംബശ്രീ ആറളം സ്പെഷൽ പ്രൊജക്റ്റ്‌ ടീമിന്‍റെയും നേതൃത്വത്തിൽ ആറളം പുനരധിവാസ മേഖലയിലെ ആറ് ബ്ലോക്കുകളിലെയും വീടുകളിൽ സംരംഭങ്ങൾ തുടങ്ങാനുള്ള പദ്ധതിക്ക് തുടക്കമായി. ജില്ലയിലെ പ്രധാനപ്പെട്ട കാർഷിക കേന്ദ്രമായി ആറളത്തെ മാറ്റിയെടുക്കുന്നതിന്‍റെ ഭാഗമായി നിലവിലുള്ള കൃഷിയെ പുത്തൻ സാങ്കേതിക വിദ്യകളും അത്യുത്പാദന ശേഷിയുള്ള വിത്തുകളും നൽകി കൂടുതൽ മേഖലയിലേക്ക് വ്യാപിപ്പിച്ച് കൂടുതൽ പേർക്ക് തൊഴിൽ നൽകാനുള്ള നടപടികളാണ് ആദ്യ ഘട്ടത്തിൽ ന‌ടപ്പാക്കുന്നത്. തുടർന്ന് നെയ്ത്തു പരിശീലനം വഴി 15 പേർക്ക് തൊഴിൽ പരിശീലനവും നെയ്ത്തുപകരണങ്ങൾ വാങ്ങുന്നതിനുള്ള ധനസഹായവും നൽകും. കുടുംബശ്രീ ആറളം ബ്രാൻഡഡ് തേൻ യൂണിറ്റുകൾ, ആദി കുട നിർമാണ യൂണിറ്റുകൾ, പുൽത്തൈലം യൂണിറ്റ്, മൃഗ പരിപാലനം, കേരള ചിക്കൻ ഫാം, ക്ഷീര ഫാം, പലഹാര യൂണിറ്റ്, ആറളം നിവാസികളുടെ തനതു ഭക്ഷ്യ വിഭവങ്ങൾ നിർമിക്കുന്ന ഭക്ഷ്യ യൂണിറ്റ്, കാറ്ററിംഗ് യൂണിറ്റ്, മുട്ടക്കോഴി യൂണിറ്റ്, ചെറുധാന്യ വിഭവങ്ങൾ നിർമിക്കുന്ന ഭക്ഷ്യ യൂണിറ്റ് തുടങ്ങിയ സംരംഭങ്ങൾ ഉൾപ്പെടുത്തി "ഒരു വീട്ടിൽ ഒരു സംരംഭം' എന്ന വിപുലമായ പദ്ധതിക്കാണ് തുടക്കം കുറിച്ചത്. മൂന്ന് വർഷത്തിനുള്ളിൽ പദ്ധതി പൂർണതോതിൽ നടപ്പാക്കുകയാണ് ലക്ഷ്യം. ഇതിന്‍റെ ഭാഗമായി ജില്ലാ മിഷന്‍റെ നേതൃത്വത്തിൽ സംരംഭം തുടങ്ങാൻ ആഗ്രഹിക്കുന്നവർക്ക് പരിശീലനം നൽകും. ആറളം മേഖലയിലെ വന്യജീവി ശല്യത്തിൽ ഉൾപ്പെടെ പ്രതിരോധ നടപടികൾ സ്പെഷൽ പ്രോജക്റ്റ്‌ ടീമും ആറളം കുടുംബശ്രീ പ്രവർത്തകരും ചർച്ച ചെയ്യും. ഇതിനായി റെയിൽ ഫെൻസിംഗ് സംവിധാനം ജനവാസ മേഖലകളിൽ ഒരുക്കുന്നതിനുള്ള ചർച്ചകളും പുരോഗമിക്കുന്നു. നിലവിൽ ആറളം ഫാമിൽ 56 കർഷക ജെഎൽജി ഗ്രൂപ്പുകളും, രണ്ട് ആദി കുട നിർമാണ യൂണിറ്റുകൾ, 13 ബ്രിഡ്ജ് കോഴ്സ് സെന്‍റർ, പുൽത്തൈല നിർമാണ യൂണിറ്റ്, വ്യക്തിഗത സംരംഭങ്ങൾ, കുടുംബശ്രീ എതനിക് കാന്‍റീൻ, കൊക്കോസ് വെളിച്ചെണ്ണ മിൽ എന്നിവ പ്രവർത്തിച്ചു വരുന്നുണ്ട്.

മട്ടന്നൂർ മഹാദേവക്ഷേത്രം എക്സിക്യുട്ടിവ് ഓഫീസറുടെ നിയമനം പുനഃപരിശോധിക്കണം: കോൺഗ്രസ്

മട്ടന്നൂർ: മട്ടന്നൂർ മഹാദേവ ക്ഷേത്രത്തിലെ എക്സിക്യുട്ടീവ് ഓഫീസറുടെ നിയമനത്തിൽ ക്രമക്കേടുണ്ടെന്നും അന്വേഷണം നടത്തണമെന്നും കോൺഗ്രസ് നേതാക്കൾ പത്രസമ്മേളനത്തിൽ ആവശ്യപ്പെട്ടു. മലബാർ ദേവസ്വം ബോർഡിൽ അനർഹരായവരെ പ്രധാന സ്ഥാനങ്ങളിൽ തിരുകിക്കയറ്റുകയാണ്. 10 വർഷത്തെ സർവീസ് ഉള്ളയാൾക്ക് മാത്രമേ ഗ്രേഡ് നാല് എക്സിക്യുട്ടിവ് ഓഫീസറായി സ്ഥാനക്കയറ്റം നൽകാവൂ എന്നിരിക്കെ രണ്ടുവർഷം തികയും മുമ്പാണ് മട്ടന്നൂർ മഹാദേവ ക്ഷേത്രത്തിലെ എക്സിക്യുട്ടിവ് ഓഫീസർക്ക് നിയമനം നൽകിയത്. മുമ്പ് ജോലി ചെയ്ത ക്ഷേത്രത്തിൽ ഇദ്ദേഹം സാമ്പത്തിക ക്രമക്കേട് നടത്തിയതായി കണ്ടെത്തിയതിനെ തുടർന്ന് തുക തിരിച്ചടച്ചതാണ്. ക്ഷേത്രഭൂമികൈമാറ്റം സംബന്ധിച്ച് അന്വേഷണം നേരിടുന്നുണ്ട്. 10 വർഷം മലബാർ ദേവസ്വം ബോർഡിൽ നടന്ന മുഴുവൻ നിയമനങ്ങളും സ്ഥാനക്കയറ്റങ്ങളും ഹൈക്കോടതി ദേവസ്വം ബഞ്ച് പരിശോധിച്ച് അനർഹരായവരെ പിരിച്ചുവിടണമെന്ന് കോൺഗ്രസ് ആവശ്യപ്പെട്ടു. ഡിസിസി സെക്രട്ടറി വി.ആർ. ഭാസ്കരൻ, ബ്ലോക്ക് പ്രസിഡന്‍റ് സുരേഷ് മാവില, ടി.വി. രവീന്ദ്രൻ, ഒ.കെ. പ്രസാദ്, എ.കെ. രാജേഷ്, കെ. മനീഷ് എന്നിവർ പത്രസമ്മേളനത്തിൽ പങ്കെടുത്തു.

ജില്ലാ ആശുപത്രി സൂപ്പർ സ്പെഷാലിറ്റി ബ്ലോക്ക് ഉദ്ഘാടന സജ്ജമായി

കണ്ണൂർ: ജില്ലാ ആശുപത്രിയിലെ സൂപ്പർ സ്പെഷാലിറ്റി ബ്ലോക്ക് ഉദ്ഘാടന സജ്ജമായി. 11ന് രാവിലെ 11.30ന് മുഖ്യമന്ത്രി പിണറായി വിജയൻ സൂപ്പർ സ്‌പെഷാലിറ്റി ബ്ലോക്ക് നാടിന് സമർപ്പിക്കും. അഞ്ചുനില കെട്ടിടത്തിൽ കാർഡിയോളജി, നെഫ്രോളജി, ഓങ്കോളജി ഒപികളുണ്ട്. മൂന്ന് ഓപ്പറേഷൻ തിയറ്റർ, പോസ്റ്റ് ഓപറേറ്റീവ് വാർഡ്, മെഡിക്കൽ ഐസിയുകൾ, സർജിക്കൽ ഐസിയുകൾ, ഡയാലിസിസ് യൂണിറ്റ്, വിവിധ നിലകളിലായി 23 എക്‌സിക്യൂട്ടീവ് പേ വാർഡുകളും പ്രവർത്തന സജ്ജമാണ്. "ആർദ്രം' മിഷനിൽ ജില്ലാ ആശുപത്രി വികസനത്തിന്‍റെ ഒന്നാംഘട്ടത്തിലാണ് പുതിയ സൂപ്പർ സ്‌പെഷാലിറ്റി ബ്ലോക്കിന്‍റെ നിർമാണം ഉൾപ്പെടുത്തിയത്. 61.72 കോടി രൂപ കിഫ്ബി ഫണ്ട് ഉപയോഗിച്ച് അഞ്ച് നിലകളിലാണ് കെട്ടിടം നിർമിച്ചിരിക്കുന്നത്. ശുദ്ധജല ശേഖരണ സംവിധാനം, സീവേജ് ട്രീറ്റ്‌മെന്‍റ് പ്ലാന്‍റ്, ആന്തരിക റോഡുകൾ, കോമ്പൗണ്ട് വാൾ എന്നിവയും നിർമിച്ചു. രണ്ട് ലിഫ്റ്റുകൾ പുതുതായി പ്രവർത്തനമാരംഭിച്ചിട്ടുണ്ട്. ഏറ്റവും താഴത്തെ നിലയിൽ സ്വീകരണ സ്ഥലം, വാഹന പാർക്കിംഗ്, 110 കെവി സബ്‌സ്റ്റേഷൻ എന്നിവയാണ് ഒരുക്കിയിരിക്കുന്നത്. ഒന്നാം നിലയിൽ 150 പേരെ ഉൾക്കൊള്ളാൻ കഴിയുന്ന കാത്തിരിപ്പ് ലോഞ്ചോടുകൂടിയ ഒന്പത് ഒപി കൺസൾട്ടേഷൻ റൂമുകൾ, യുപിഎസ് റൂം, ഫാർമസി, ടോയ്‌ലറ്റുകൾ തുടങ്ങിയവ ഉൾപ്പെടുന്നു. രണ്ടാം നിലയിൽ മൂന്ന് മോഡുലാർ ഓപ്പറേഷൻ തിയറ്ററുകൾ. ഇതിൽ ഒടി, സ്റ്റോർ, നഴ്‌സിംഗ് സ്റ്റേഷൻ, ഡോക്ടറുടെ മുറി, പ്രീ-അനസ്‌തേഷ്യ റൂം എന്നിവയുണ്ടാകും. മെഡിക്കൽ, സർജിക്കൽ ഐസിയുകൾ, കാത്തിരിപ്പ് സ്ഥലം, നഴ്‌സ് റൂം, അനസ്‌തേഷ്യ കൺസൾട്ടേഷൻ റൂം, ടോയ്‌ലറ്റുകൾ എന്നിവയുമുണ്ടാകും. മൂന്നാം നിലയിൽ 30 കിടക്കകൾ വീതമുള്ള ജനറൽ വാർഡ്, 22 മെഷീനുകളോടുകൂടിയ ഡയാലിസിസ് യൂണിറ്റ് എന്നിവയും കാത്തിരിപ്പ് കേന്ദ്രം, പോസ്റ്റ് ഡയാലിസിസ് റൂം, അഞ്ച് പേ വാർഡുകൾ, പെരിറ്റോണിയൽ ഡയാലിസിസ് റൂം, സ്റ്റോർ സംവിധാനങ്ങൾ എന്നിവയും ഉൾപ്പെടുന്നു. നാലാം നിലയിൽ 30 കിടക്കകളുള്ള ജനറൽ വാർഡ്, നഴ്‌സിംഗ് സ്റ്റേഷൻ, ടോയ്‌ലറ്റുകൾ എന്നിവ ഉൾപ്പെടുന്നു. നിലവിൽ പ്രവർത്തിച്ചു വരുന്ന സർജിക്കൽ ബ്ലോക്ക്, ട്രോമ കെയർ, അഡ്മിൻ ബ്ലോക്ക്, അമ്മയും കുഞ്ഞും പരിചരണ ബ്ലോക്ക് എന്നിവയ്ക്കുള്ള സബ് പാനലുകലും പ്രവർത്തന സജ്ജമാണ്. പ്രതിദിനം മൂവായിരത്തിലേറെ രോഗികളാണ് ജില്ലാ ആശുപത്രിയിലെ 16 ഒപികളിലായി എത്തുന്നത്.

വളച്ചാക്ക് വേണ്ട; ഇനി വളച്ചോക്കിന്‍റെ കാലം

ശ്രീജിത് കൃഷ്ണൻ നീലേശ്വരം: ചെടികളുടെയും പച്ചക്കറികളുടെയും വളർച്ചയ്ക്കും പോഷണത്തിനും ആവശ്യമായ 11 മൂലകങ്ങൾ കൃത്യമായ അളവിൽ ഉൾപ്പെടുത്തി കേരള കാർഷിക സർവകലാശാലയുടെ കീഴിലുള്ള പടന്നക്കാട് കാർഷിക കോളജിൽ തയാറാക്കിയ വളച്ചോക്കുകൾ വിപണിയിലേക്ക്. നൈട്രജൻ, ഫോസ്ഫറസ്, പൊട്ടാസ്യം, മാംഗനീസ്, കാത്സ്യം, മഗ്നീഷ്യം, സൾഫർ, ഇരുമ്പ്, സിങ്ക്, ബോറോൺ, കോപ്പർ എന്നീ 11 മൂലകങ്ങൾ ചേർത്താണ് വിവിധ വർണങ്ങളിലുള്ള ചോക്കുകളുടെ രൂപത്തിൽ വളക്കൂട്ടുകൾ തയാറാക്കുന്നത്. ഗ്രോ ബാഗുകളിലും ചട്ടികളിലും വളർത്തുന്ന ചെടികൾക്കാണ് ഇവ കൂടുതൽ പ്രയോജനപ്രദമാകുന്നത്. ഗ്രോ ബാഗിലോ ചട്ടിയിലോ ഒരു ചോക്ക് നിക്ഷേപിച്ചാൽ ചെടിക്ക് വെള്ളം നൽകുന്നതിനൊപ്പം അത് സാവധാനം അലിഞ്ഞ് ചെടിക്ക് പോഷകങ്ങൾ നൽകും. പച്ചക്കറികൾ നടുന്ന സമയം മുതൽ കായ്ക്കുന്നതുവരെ ജലസേചനത്തോടൊപ്പം രണ്ട് ചോക്കുകൾ മാത്രം നിക്ഷേപിച്ചാൽ മതിയെന്നാണ് കാർഷിക സർവകലാശാലയിലെ വിദഗ്ധർ പറയുന്നത്. നടുന്ന സമയത്ത് ഒരു ചോക്കും ഒരു മാസം കഴിഞ്ഞ് അത് അലിഞ്ഞുതീർന്നതിനു ശേഷം രണ്ടാമത്തേതും നിക്ഷേപിക്കാം. രണ്ടെണ്ണത്തിനും കൂടി 10 രൂപ മാത്രമാണ് വില. സമൃദ്ധമായ വിളവ് കിട്ടുന്നതിനുള്ള പോഷകങ്ങൾ ഇതിൽനിന്നുതന്നെ ചെടികൾക്ക് കിട്ടും. വിലപിടിപ്പുള്ള വളങ്ങൾ ചാക്കുകണക്കിന് വാങ്ങേണ്ട ആവശ്യമില്ല. വളച്ചോക്കുകൾ മാത്രം ഉപയോഗിച്ച് ഗ്രോ ബാഗുകളിൽ കൃഷിചെയ്ത പച്ചക്കറികൾക്ക് സാധാരണ കിട്ടുന്ന വിളവിനേക്കാൾ 30 ശതമാനം വരെ കൂടുതൽ കിട്ടിയതായാണ് കോളജിൽ നടത്തിയ പഠനങ്ങളിൽ കണ്ടെത്തിയത്. കാർഷിക കോളജിലെ വില്പനകേന്ദ്രത്തിലൂടെയാണ് ഇപ്പോൾ ഇവ കർഷകരിലേക്കെത്തിക്കുന്നത്. ദൂരസ്ഥലങ്ങളിലുള്ളവർക്ക് കൊറിയർ മുഖേനയും അയയ്ക്കുന്നുണ്ട്. വ്യാവസായികാടിസ്ഥാനത്തിൽ ഇവ വിപണിയിലെത്തിക്കുന്നതിനായി സ്വകാര്യ ഏജൻസികൾക്ക് ലൈസൻസ് അനുവദിക്കുന്നതിനുള്ള നടപടിക്രമങ്ങളും തുടങ്ങിയിട്ടുണ്ട്. കാർഷിക കോളജിലെ സോയിൽ സയൻസ് വിഭാഗത്തിനു കീഴിൽ നടത്തിയ ഗവേഷണപദ്ധതിയുടെ ഭാഗമായാണ് വളച്ചോക്കുകൾ വികസിപ്പിച്ചെടുത്തത്. സോയിൽ സയൻസ് വിഭാഗം മേധാവി ഡോ.എൻ.കെ.ബിനിത, ഡോ.പി.ആർ.സുരേഷ്, ഷമീർ മുഹമ്മദ്, ഡോ.പി.നിധീഷ് എന്നിവരുടെ നേതൃത്വത്തിലായിരുന്നു ഗവേഷണം. കണ്ണൂർ കാർഷിക വിജ്ഞാനകേന്ദ്രത്തിന്‍റെയും വിവിധ കൃഷി ഭവനുകളുടെയും നേതൃത്വത്തിൽ മൂന്നുവർഷത്തോളം വിവിധതരം കൃഷികളിൽ പ്രയോഗിച്ചാണ് ഫലലഭ്യത ഉറപ്പാക്കിയത്.

മാതമംഗലം സ്കൂളിൽ സംഘർഷം

മാതമംഗലം: മാതമംഗലം സി.പി. നാരായണൻ മെമ്മോറിയൽ സർക്കാർ ഹയർ സെക്കൻഡറി സ്കൂളിൽ സംഘർഷം. ഇന്നലെ ഉച്ചയ്ക്കുശേഷം മാതമംഗലം സ്കൂളിൽ യുഡിഎസ്എഫിന്‍റെ കൺവൻഷൻ കഴിഞ്ഞ് പുറത്തേക്കിറങ്ങിയ കെഎസ്‌യു ജില്ലാ സെക്രട്ടറി നവനീത് ഷാജി, പയ്യന്നൂർ കോളജ് കെഎസ്‌യു യൂണിറ്റ് പ്രസിഡന്‍റ് ചാൾസ് സണ്ണി എന്നിവർക്കാണ് പരിക്കേറ്റത്. ഇവരെ പയ്യന്നൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. എസ്എഫ്ഐ പെരിങ്ങോം ഏരിയ സെക്രട്ടറി ഹരികൃഷ്ണൻ, ജോയിന്‍റ് സെക്രട്ടറി ഗോപികൃഷ്ണൻ, വൈസ് പ്രസിഡന്‍റ് ഉണ്ണിക്കണ്ണൻ, മാതമംഗലം സ്കൂൾ യൂണിറ്റ് സെക്രട്ടറി ഹാസിഖ് എന്നിവർക്കും മർദനമേറ്റു. ഇരുന്നൂറോളം വിദ്യാർഥികൾ പങ്കെടുത്ത കൺവൻഷൻ കഴിഞ്ഞ് പുറത്തേക്ക് ഇറങ്ങുമ്പോൾ പുറത്തുനിന്ന് സംഘടിച്ചെത്തിയ എസ്എഫ്ഐ, ഡിവൈഎഫ്ഐ, സിഐടിയു പ്രവർത്തകർ ആയുധങ്ങളുമായി എത്തി ആക്രമണം നടത്തിയതായി കെഎസ്‌യു നേതാക്കൾ ആരോപിച്ചു. സ്കൂൾ അധികാരികളുടെ അനുമതി നേടിയാണ് സ്കൂളിൽ കൺവൻഷൻ നടത്തിയതെന്നും പോലീസിന്‍റെ സംരക്ഷണം ആവശ്യപ്പെട്ടിരുന്നതായും അവർ അറിയിച്ചു. പോലീസിന് ആക്രമണം തടയാൻ കഴിഞ്ഞില്ല. 14 ന് സ്കൂൾ പാർലമെന്‍റ് തെരഞ്ഞെടുപ്പിന് ഇന്നാണ് നോമിനേഷൻ കൊടുക്കേണ്ടത്. അതിനു മുന്നോടിയായി നേതാക്കൾ സ്കൂളിൽ എത്തി കൺവെൻഷൻ വിളിച്ചു ചേർക്കുകയായിരുന്നു. എസ്എഫ്ഐ അല്ലാതെ മറ്റാരും മത്സരിക്കേണ്ടന്നും പ്രവർത്തനങ്ങൾക്കായി വരണ്ടെന്നും പറഞ്ഞാണ് അക്രമം അഴിച്ചുവിട്ടതെന്ന് നേതാക്കൾ ആരോപിച്ചു.

പയ്യന്നൂരിലെ വയോധികയുടെ ദുരൂഹമരണം; ക്രൈംബ്രാഞ്ച് അന്വേഷണമാരംഭിച്ചു

പയ്യന്നൂര്‍: പയ്യന്നൂരില്‍ വയോധികയുടെ മൃതദേഹം കിണറ്റില്‍ കണ്ടെത്തിയ കേസില്‍ ക്രൈംബ്രാഞ്ച് സംഘം അന്വേഷണമാരംഭിച്ചു. പയ്യന്നൂര്‍ കൊറ്റി അങ്കണവാടിക്ക് സമീപത്തെ സുരഭി ഹൗസില്‍ സുലോചന (76) യുടെ മരണവുമായി ബന്ധപ്പെട്ട അന്വേഷണത്തിന്‍റെ ഭാഗമായാണ് സംഭവസ്ഥലത്തെ ത്തിയ ക്രൈംബ്രാഞ്ച് സംഘം മൃതദേഹം കണ്ടെത്തിയ കിണര്‍ പരിശോധിച്ചത്. 2024 ഒക്ടോബര്‍ രണ്ടിന് രാവിലെ പതിനൊന്നരയോടെയാണ് സുലോചനയെ (76) കാണാതായത്. തുടര്‍ന്ന് ബന്ധുക്കളും നാട്ടുകാരും നടത്തിയ തെരച്ചലിലാണ് വീടിനു സമീപത്തെ ഉപയോഗശൂന്യമായ കിണറ്റില്‍ മൃതദേഹം കണ്ടെത്തിയത്. എന്നാല്‍, ഇവര്‍ ധരിച്ചിരുന്ന അഞ്ചുപവനോളം ആഭരണങ്ങള്‍ മൃതദേഹത്തില്‍ കാണാതിരുന്നത് സംശയത്തിനിടയാക്കി. വിരലില്‍ മുറുകിക്കിടന്നിരുന്ന മോതിരം നഷ്ടപ്പെടാതിരുന്നതും സംശയം ഇരട്ടിപ്പിച്ചു. ചെരുപ്പുകള്‍ കിണറ്റിന് സമീപത്ത് നിന്ന് ഇരുപതോളം മീറ്റര്‍ അകലെ വ്യത്യസ്തയിടങ്ങളില്‍ കണ്ടതും ബന്ധുക്കളിലും നാട്ടുകാരിലും കൂടുതല്‍ സംശയമുണ്ടാക്കി. കിണറ്റിലെ വെള്ളം വറ്റിച്ച് പയ്യന്നൂര്‍ പോലീസ് പരിശോധന നടത്തിയിട്ടും ആഭരണങ്ങള്‍ കണ്ടെത്താനായില്ല. കൊലപാതകമാണെന്ന നിഗമനത്തിലെത്തിയിട്ടും ഡോഗ് സ്‌ക്വാഡും ഫോറന്‍സിക് വിദഗ്ധരും സ്ഥലത്തെത്തി പരിശോധന നടത്തിയിട്ടും പലരേയും ചോദ്യം ചെയ്തിട്ടും മരണത്തിലെ ദുരൂഹത നീക്കാനോ ആഭരണങ്ങള്‍ കണ്ടെത്താനോ സാധിച്ചില്ല. ഈ സാഹചര്യത്തിൽ റൂറല്‍ ജില്ലാ പോലീസ് മേധാവി പയ്യന്നൂര്‍ ഡിവൈഎസ്പിയുടെ നേതൃത്വ ത്തില്‍ നിയോഗിച്ച പ്രത്യേക സംഘത്തിനു കേസന്വേഷണം കൈമാറിയിരുന്നു. മാസങ്ങള്‍ കഴിഞ്ഞിട്ടും അന്വേഷണം എങ്ങുമെത്താതെ വന്നതോടെയാണ് കേസ് സ്റ്റേറ്റ് ക്രൈംബ്രാഞ്ചിന് കൈമാറിയത്. ഇതേതുടര്‍ന്നാണ് ക്രൈംബ്രാഞ്ച് എസ്പി പി. ബാലകൃഷ്ണന്‍ നായരുടെ നേതൃത്വത്തില്‍ ഡിവൈഎസ്പി എം.വി. അനില്‍കുമാറും സംഘവും ഇന്നലെ കൊറ്റിയിലെത്തി സംഭവസ്ഥലത്തെ കിണറും പരിസരവും പരിശോധിച്ചത്. കഴിഞ്ഞ ദിവസം സ്ഥലത്തെത്തിയ അന്വേഷണ സംഘം ബന്ധുക്കളെയും മറ്റും കണ്ട് വിവരങ്ങള്‍ ശേഖരിച്ചിരുന്നു. കൂടുതല്‍ വിവരങ്ങള്‍ ക്രൈംബ്രാഞ്ച് സംഘം പുറത്തുവിട്ടിട്ടില്ല.

സമ്മാനപ്പെരുമഴയില്‍ ഇമ്മാനുവല്‍ ഓണം പൊന്നോണം നാളെ മുതല്‍

കണ്ണൂർ: കേരളത്തിലെ പ്രമുഖ ടെക്സ്റ്റൈല്‍ ഗ്രൂപ്പായ ഇമ്മാനുവല്‍ സില്‍ക്‌സില്‍ ഓണാഘോഷങ്ങള്‍ക്ക് നാളെ തുടക്കം. സമ്മാനപ്പെരുമഴയില്‍ ഇമ്മാനുവലോണം പൊന്നോണം എന്ന പേരിലുള്ള ഓണാഘോഷങ്ങള്‍ നാളെ എല്ലാ ഷോറൂമിലും ഉദ്ഘാടനം ചെയ്യും. ഏറ്റവും ട്രെൻഡിയും ട്രെഡീഷണലുമായ ഓണം കളക്ഷനുകള്‍ ഏറ്റവും വേഗത്തില്‍ ഉപഭോക്താക്കള്‍ക്ക് നല്‍കുകയെന്ന ലക്ഷ്യത്തോടെയാണ് ഓണം പൊന്നോണം സംഘടിപ്പിക്കുന്നത്. ദിവസേന നറുക്കെടുപ്പിലൂടെ ടിവി, റഫ്രിജറേറ്റര്‍, വാഷിംഗ് മെഷീന്‍, മൈക്രോവേവ് ഓവന്‍, മിക്‌സി, സ്വർണ നാണയം, ഗിഫ്റ്റ് വൗച്ചറുകള്‍, മൊബൈല്‍ ഫോണ്‍ തുടങ്ങി നിരവധി സമ്മാനങ്ങളും ഉപഭോക്താക്കൾക്കായി ഒരുക്കിയിട്ടുണ്ട്. എല്ലാ ഷോറൂമിലും ദിവസവും നറുക്കെടുപ്പും സമ്മാനവിതരണവും നടക്കും. എല്ലാ പര്‍ച്ചേസിനും സമ്മാന കൂപ്പണ്‍ ലഭ്യമാണ്. വിപുലമായ വസ്ത്രശേഖരവും മറ്റാര്‍ക്കും നല്‍കാനാകാത്ത വിലക്കുറവുമാണ് ഇമ്മാനുവല്‍ സില്‍ക്‌സിന്‍റെ പ്രത്യേകതയെന്നും ഏറ്റവും പുതിയ ഓണം സ്‌പെഷ്യല്‍ കളക്ഷനോടുകൂടിയ ലേഡീസ് വെയര്‍ വിഭാഗവും സാരീ വിഭാഗവും കിഡ്‌സ് വെയര്‍ സെക്ഷനും ജെന്‍റ്സ് വിഭാഗവും ഓരോ ഷോറൂമിലും ഒരുക്കിയതായി മാനേജ്മെന്‍റ് അറിയിച്ചു. ഒരു കുടുംബത്തിനവശ്യമായ മുഴുവന്‍ തുണിത്തരങ്ങളും ഒരു കുടക്കീഴില്‍ ഉപഭോക്താക്കള്‍ക്ക് ലഭ്യമാക്കുകയാണ് ഇമ്മാനുവലിന്‍റെ ലക്ഷ്യം. ആറണി, ബനാറസ്, ധര്‍മാവരം, ചിരാല, കോല്‍ക്കത്ത, സൂറത്ത്, ജയ്പൂര്‍, ഹൈദരാബാദ്, എലംപിള്ളി, ചിന്നാലംപെട്ടി, ചാപ്പ, യെലങ്ക എന്നിവിടങ്ങളിലെ ഏറ്റവും പുതിയ സാരി കളക്ഷനുകളും ഷോറൂമൂകളിൽ ഒരുക്കിയിട്ടുണ്ട്. ഓരോ വധുവിനും വരനും വ്യത്യസ്തവും കമനീയവുമായി അണിഞ്ഞൊരുങ്ങാനുള്ള ബ്രൈഡല്‍ സാരികള്‍, ബ്രൈഡല്‍ ഗൗണുകള്‍, ബ്രൈഡല്‍ ലാച്ചകള്‍, വെഡ്ഡിംഗ് സ്യൂട്ട്, വെഡ്ഡിംഗ് ദോത്തി എന്നിവയുടെ ഏറ്റവും പുതിയ കളക്ഷനുകള്‍ എന്നിവയും സജ്ജമാക്കിയിട്ടുണ്ട്. വിവാഹ പര്‍ച്ചേസിന് പ്രത്യേക ഓഫറുകളും പ്രഖ്യാപിച്ചിട്ടുണ്ട്. സ്‌പെഷ്യല്‍ ഓണം കളക്ഷനുകള്‍ 199 രൂപ മുതൽ ലഭിക്കും. സാരികള്‍, ലേഡീസ് വെയര്‍, ജെന്‍റസ് വെയര്‍, കിഡ്‌സ് വെയര്‍ എല്ലാ വിഭാഗങ്ങളിലും 199 രൂപയില്‍ ആരംഭിക്കുന്ന ഓണം കളക്ഷനുകളുണ്ട്. സമ്മാനപ്പെരുമഴയില്‍ ഇമ്മാനുവലോണം പൊന്നോണം കാഞ്ഞങ്ങാട് ഷോറൂമില്‍ രാജ്‌മോഹന്‍ ഉണ്ണിത്താന്‍ എംപി ഉദ്ഘാടനം ചെയ്യും. കൂപ്പണ്‍ പ്രകാശനം നഗരസഭാ ചെയര്‍പേഴ്‌സണ്‍ കെ.വി.സുജാത നിർവഹിക്കും. കണ്ണൂര്‍ ഷോറൂമിലെ ഉദ്ഘാടനം ജില്ലാ പഞ്ചായത്ത് പ്രസിഡന്‍റ് കെ.കെ.രത്‌നകുമാരിയും ഇരിട്ടി ഷോറൂമില്‍ നഗരസഭാ ചെയര്‍പേഴ്‌സണ്‍ കെ.ശ്രീലതയും ഉദ്ഘാടനം ചെയ്യും. പട്ടാമ്പി ഷോറൂമില്‍ നഗരസഭാ ചെയര്‍പേഴ്‌സണ്‍ ഒ.ലക്ഷ്മിക്കുട്ടി ഉദ്ഘാടനം നിർവഹിക്കും. കുറഞ്ഞ വിലയിൽ ഗുണമേന്മയുള്ള ഉത്പന്നങ്ങൾ ഉപഭോക്താക്കളിലെത്തിക്കുയാണ് ലക്ഷ്യമെന്ന് മാനേജ്മെന്‍റ് അറിയിച്ചു.

കുടുംബശ്രീ ജനഗല്‍സയ്ക്ക് ഇന്നു തുടക്കം

കാസര്‍ഗോഡ്: തദ്ദേശീയ മേഖലയിലെ പാരമ്പര്യ കലാരൂപങ്ങളെ സംരംഭ മാതൃകയില്‍ രൂപീകരിച്ച് തദ്ദേശീയ ജനതയ്ക്ക് മികച്ച ഉപജീവന മാര്‍ഗങ്ങള്‍ ലഭ്യമാക്കുന്നതിന് കുടുംബശ്രീ ആവിഷ്‌കരിച്ച ജനഗല്‍സ പദ്ധതിക്ക് ഇന്നു തുടക്കമാകും. സംസ്ഥാനതല ഉദ്ഘാടനം ഇന്നു രാവിലെ 10ന് കുറ്റിക്കോല്‍ സോപാനം ഓഡിറ്റോറിയത്തില്‍ തദ്ദേശസ്വയംഭരണമന്ത്രി എം.ബി. രാജേഷ് ഓണ്‍ലൈനായി നിർവഹിക്കും. രണ്ടുദിവസങ്ങളിലായ നടക്കുന്ന പരിപാടിയില്‍ പട്ടികവര്‍ഗ ആനിമേറ്റര്‍മാര്‍, ബ്രിഡ്ജ് കോഴ്‌സ് മെന്‍റര്‍മാര്‍ എന്നിവരുടെ മേഖലാതല സംഗമവും സംഘടിപ്പിക്കും. തദ്ദേശീയ മേഖലയിലെ നാനൂറിലേറെ പേര്‍ പങ്കെടുക്കും. വിവിധ ഗോത്രവിഭാഗങ്ങളില്‍ നിന്നായി പത്തിലേറെ കലാരൂപങ്ങള്‍ അവതരിപ്പിക്കും. കണ്ണൂര്‍ ജില്ലയിലെ ആറളം ഫാം കുടുംബശ്രീ കലാസംഘം അവതരിപ്പിക്കുന്ന കൊക്കമാന്തിക്കളി, വയനാട് ജില്ലയിലെ പൂതാടി ഗോത്ര താളം ഫോക് ബാന്‍ഡ് അവതരിപ്പിക്കുന്ന നാടന്‍ കലാരൂപാവതരണം, കോഴിക്കോട് ജില്ലയിലെ നന്മണ്ട, ഐവര്‍ നാടക സംഘത്തിന്‍റെ വട്ടകളി, മലപ്പുറം ജില്ലയിലെ നിലമ്പൂര്‍ മുണ്ടക്കക്കടവ് ആട്ടമക്ക ഗോത്ര കലാസംഘം അവതരിപ്പിക്കുന്ന ഗുഡിമനെ, പാലക്കാട്, മുതലമടയിലെ ഗോത്രകലാ യൂത്ത് ക്ലബ് ഗ്രൂപ്പിന്‍റെ കൊട്ടും കുഴലും, അട്ടപ്പാടി കുടുംബശ്രീ ആദിമ കലാസംഘത്തിന്‍റെ ഇരുള നൃത്തം, ഇടുക്കി കാന്തല്ലൂരിലെ ഗോത്ര കലാസമിതി അവതരിപ്പിക്കുന്ന കൊല്ലവയാട്ടം, കാസര്‍ഗോഡ് ജില്ലയിലെ കുടുംബശ്രീ അംഗങ്ങള്‍ അവതരിപ്പിക്കുന്ന മംഗലംകളി, എരുതുകളി, മലകുടിയാട്ടം, കൊറഗ നൃത്തം എന്നിവ അവതരിപ്പിക്കും. പത്രസമ്മേളനത്തില്‍ പഞ്ചായത്ത് പ്രസിഡന്‍റുമാരായ മുരളി പയങ്ങാനം, എം. ധന്യ, സിഡിഎസ് ചെയര്‍പേഴ്‌സണ്‍ സി .റീന, ജില്ലാ മിഷന്‍ കോ-ഓര്‍ഡിനേറ്റര്‍ കെ. രതീഷ്‌കുമാര്‍, എഡിഎംസി കെ.എം.കിഷോര്‍കുമാര്‍, കെ.അമ്പിളി എന്നിവര്‍ സംബന്ധിച്ചു.

വീസ വാഗ്ദാനം ചെയ്ത് ട്രാവൽ ഏജൻസിയിൽനിന്ന് പണം തട്ടിയ കേസിലെ പ്രതി അറസ്റ്റിൽ

ഇരിട്ടി: വീസ വാഗ്ദാനം ചെയ്ത് ട്രാവൽ ഏജൻസിയിൽനിന്ന് പണം തട്ടിയെടുത്ത് വഞ്ചിച്ചെന്ന കേസിൽ ഒളിവിൽ കഴിയുകയായിരുന്ന പ്രതി അറസ്റ്റിൽ. പായം വട്ട്യറ സ്വദേശി ജോൺ ക്രിസ്റ്റഫറിനെയാണ് (45) കരിക്കോട്ടക്കരി സിഐ കെ.ജെ. വിനോയിയും സംഘവും എറണാകുളത്ത് വച്ച് അറസ്റ്റ് ചെയ്തത്. അങ്ങാടിക്കടവിൽ ട്രാവൽ ഏജൻസി നടത്തിയിരുന്ന വാണിയപ്പാറ സ്വദേശിനിയുടെ പരാതിയിലാണ് അറസ്റ്റ്. വീസ വാഗ്ദാനം ചെയ്ത് പ്രതി 55 ലക്ഷം രൂപ തട്ടിയെടുത്തെന്നാണ് പരാതി. സംസ്ഥാനത്ത് വിവിധ ജില്ലകളിലും ഇയാൾക്കെതിരെ വീസ തട്ടിപ്പ് കേസുകളുണ്ടെന്ന് പോലീസ് പറഞ്ഞു. പ്രതിയുടെ വാക്കുകളിൽ വിശ്വസിച്ച ട്രാവൽ ഏജന്‍റ് വിദേശത്തേക്ക് പോകാൻ താത്പര്യമുള്ളവരിൽ നിന്ന് പണം വാങ്ങി ഇയാൾക്ക് നൽകുകയായിരുന്നു.വീസയോ വാങ്ങിയ പണമോ നൽകാതെ വഞ്ചിച്ചതിനെ തുടർന്നാണ് പോലീസിൽ പരാതി നൽകിയത്. എസ്ഐ മുഹമ്മദ് നജിമി, എഎസ്ഐ പ്രശാന്ത്, സീനിയർ സിവിൽ പോലീസ് ഓഫിസർ സുകേഷ് ഊരത്തൂർ, ഇരിട്ടി ഡിവൈ എസ്പിയുടെ സ്പെഷ്യൽ സ്‌ക്വാഡ് അംഗം എ.എം. ഷിജോയി എന്നിവരും അറസ്റ്റ് ചെയ്ത സംഘത്തിലുണ്ടായിരുന്നു.

മലയാളികൾക്കായി മംഗളൂരുവിൽ മലബാർ ഫുഡ് ഫെസ്റ്റ് തുടങ്ങി

മംഗളൂരു: മംഗളൂരുവിലെ പ്രശസ്തമായ ദി ഓഷ്യൻ പേൾ ഹോട്ടൽ മലയാളികൾക്കായി മലബാർ ഫുഡ് ഫെസ്റ്റ് ഒരുക്കി. വീടിന്‍റെയും നാടിന്‍റേയും രുചി ആസ്വദിക്കാൻ ആഗ്രഹിക്കുന്നവർക്കായി ഒരാഴ്ചക്കാലം മലബാർ ഫുഡ് ഫെസ്റ്റിവൽ തുടരുമെന്ന ഹോട്ടൽ വൈസ് പ്രസിഡന്‍റ് ബി.എൻ. ഗിരീഷ് അറിയിച്ചു. കേരളത്തിന്‍റെ പരമ്പരാഗത പാചക രീതികളെ സ്നേഹിക്കുന്നവർക്കായി രൂപകല്പന ചെയ്തിരിക്കുന്ന ഈ ഉത്സവം കരിമീൻ പൊള്ളിച്ചത്, പോംഫ്രെറ്റ് വറ്റിച്ചത്, മലബാർ മീൻ കറി എന്നിവയ്ക്ക് പുറമെ, കടച്ചക്ക റോസ്റ്റ്, ഇടിയപ്പം, പാലപ്പം, കോഴിക്കോട് മട്ടൻ ബിരിയാണി, തലശേരി ചിക്കൻ ബിരിയാണി, തിരുവനന്തപുരം കോഴി റോസ്റ്റ്, തുടങ്ങി അൻപതിലേറെ വിഭവങ്ങൾ ആണ് ഒരുക്കിയിരിക്കുന്നത്.ചുക്ക് കാപ്പിയുമായി അതിഥികളെ സ്വാഗതം ചെയ്യുന്ന മലബാർ ഫുഡ് ഫെസ്റ്റിവൽ ഉച്ചഭക്ഷണവും അത്താഴ വിരുന്നുമായി ക്രമീകരിച്ചിരിക്കുന്നു. കുടുബത്തോടും കൂട്ടുകാരോടുമൊപ്പം മലബാർ ഫുഡ് ഫെസ്റ്റിവലിൽ പങ്കെടുക്കുന്നവർക്ക് 73534 73474 എന്ന നമ്പറിൽ നേരത്തെ ടേബിളുകൾ റിസർവ് ചെയ്യാം.

ഹയര്‍സെക്കന്‍ഡറി പാഠപുസ്തക പരിഷ്‌കരണം: ജില്ലാതല ശില്പശാല

കണ്ണൂർ: പഠനത്തോടൊപ്പം തൊഴില്‍ നൈപുണ്യവും വികസിപ്പിക്കുന്നതിന് ആവശ്യമായ പാഠ്യപദ്ധതിയായിരിക്കണം ഉണ്ടാവേണ്ടതെന്ന് ഹയര്‍സെക്കന്‍ഡറി പാഠപുസ്തക പരിഷ്‌കരണം സംബന്ധിച്ച ജനകീയ ചര്‍ച്ച ജില്ലാതല ശില്പശാലയില്‍ അഭിപ്രായം. പഠനത്തോടൊപ്പം ജോലിചെയ്യുന്നതിന് അവസരം ഉണ്ടാകും വിധമായിരിക്കണം പാഠ്യപദ്ധതി പരിഷ്‌കരിക്കേണ്ടതെന്നും അഭിപ്രായം ഉയര്‍ന്നു. ജില്ലയിലെ വിവിധ ഹയര്‍ സെക്കന്‍ഡറി സ്‌കൂളുകളിലെ വിദ്യാര്‍ഥികളും അധ്യാപകരും രക്ഷിതാക്കളുമാണ് ശില്പശാലയില്‍ പാഠപുസ്തക പരിഷ്കരണവുമായി ബന്ധപ്പെട്ട ക്രിയാത്മക നിര്‍ദേശങ്ങള്‍ അവതരിപ്പിച്ചത്. പൗരബോധം, മൂല്യബോധം എന്നിവ വളര്‍ത്താന്‍ ഉതകുന്നതാവണം പുതിയ പാഠ്യപദ്ധതി. വിദ്യാര്‍ഥികളില്‍ മാനവികത വളര്‍ത്താന്‍ ഫീല്‍ഡ് സന്ദര്‍ശനം, പരിസ്ഥിതി ബോധം കാര്‍ഷിക സംസ്‌കാരം എന്നിവ പരിപോഷിപ്പിക്കുന്ന വിഷയങ്ങള്‍ ഉള്‍പ്പെടുത്തുക, നിലവിലെ ബോധനരീതിക്ക് കാലികമായ മാറ്റം, സ്വയം ജ്ഞാന സമ്പാദത്തിനുള്ള അവസരം നല്‍കുന്ന പാഠഭാഗങ്ങള്‍, പുതിയ സാങ്കേതിക വിദ്യയുടെ സഹായത്തോടെയുള്ള അഭ്യസനം, വിദ്യാര്‍ഥികളുടെ മാനസിക സംഘര്‍ഷം ലഘൂകരിക്കുന്നതിന് കലാ കായിക പ്രവര്‍ത്തനങ്ങള്‍ക്ക് ഊന്നല്‍, അധ്യാപക -വിദ്യാര്‍ഥി ബന്ധം ഊഷ്മളവും ദൃഢവുമാക്കുക, സ്വയം വായിച്ച് മനസിലാക്കാവുന്ന പാഠങ്ങള്‍ ഉള്‍പ്പെടുക എന്നീ നിര്‍ദേശങ്ങളും ശില്പശാലയില്‍ ഉയര്‍ന്നു. ആംഗ്ലോ ഇന്ത്യന്‍ ഹയര്‍സെക്കൻഡറി സ്‌കൂളില്‍ ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യന്‍ ശില്‍പശാല ഉദ്ഘാടനം ചെയ്തു. വൊക്കേഷണല്‍ ഹയര്‍ സെക്കന്‍ഡറി അഡിഷണല്‍ ഡയറക്ടര്‍ ആര്‍. ഉദയകുമാരി അധ്യക്ഷത വഹിച്ചു. എസ്എസ്കെ ജില്ലാ പ്രോഗ്രാം കോ-ഓര്‍ഡിനേ റ്റര്‍ ഇ.സി. വിനോദ് വിഷയം അവതരിപ്പിച്ചു.

‘ഗുണ്ടകൾക്ക് പ്രോത്സാഹനം കൊടുക്കുന്ന സംഘടനയായി എസ്എഫ്ഐ അധപതിച്ചു’

കണ്ണൂർ: ഗുണ്ടകളെ വളർത്തുകയും അവർക്ക് എല്ലാ പിന്തുണയും നൽകി ക്രിമിനൽ പ്രവർത്തനങ്ങൾക്ക് നേതൃത്വം കൊടുക്കുകയും ചെയ്യുന്ന സംഘടനയായി എസ്എഫ്ഐ അധപതിച്ചുവെന്ന് കെഎസ്‌യു ജില്ലാ പ്രസിഡന്‍റ് എം.സി. അതുൽ. മാതമംഗലം സ്കൂളിലെ തെരഞ്ഞെടുപ്പ് കൺവൻഷൻ കഴിഞ്ഞ് തിരികെ പോവുകയായിരുന്ന കെ‌എസ്‌യു ജില്ലാ സെക്രട്ടറി നവനീത് ഷാജിയെയും കെ‌എസ്‌യു പയ്യന്നൂർ കോളജ് യൂണിറ്റ് പ്രസിഡന്‍റ് ചാൾസ് സണ്ണിയെയും പുറത്തു നിന്നും സംഘടിച്ചെത്തിയ ഡി‌വൈഎഫ് ഐ പ്രവർത്തകർ മാരകായുധങ്ങളും മെഷീൻ കല്ലുകളും ഉപയോഗിച്ച് ആക്രമിക്കുകയായിരുന്നു. സ്കൂൾ പാർലമെന്‍റ് തെരഞ്ഞെടുപ്പിന് നാമനിർദേശ പത്രിക സമർപ്പിക്കേണ്ട അവസാന ദിവസത്തിൽ വിദ്യാർഥികളെ ഭീഷണിപ്പെടുത്തി പിന്തിരിപ്പിക്കാനുള്ള ശ്രമങ്ങൾ പല വിദ്യാലയങ്ങളിലും നടക്കുകയാണ്. ഇത്തരം രീതിയിൽ ജനാധിപത്യത്തെ അട്ടിമറിച്ച് എസ്‌എഫ്ഐ നടത്തുന്ന നീക്കങ്ങൾ തോൽവി സമ്മതിച്ചതിന് തുല്യമാണെന്നും എസ്‌എഫ്ഐയുടെ ആക്രമണത്തെ എന്തു വില കൊടുത്തും ചെറുത്തു തോൽപ്പിക്കുമെന്നും എം.സി. അതുൽ പറഞ്ഞു. പ്രതിഷേധിച്ചു കണ്ണൂര്‍: മാതമംഗലം ഗവ. ഹയര്‍ സെക്കൻഡറി സ്‌കൂളില്‍ കെഎസ്‌യു യൂണിറ്റ് കണ്‍വന്‍ഷനില്‍ പങ്കെടുക്കാനെത്തിയ നേതാക്കളെ എസ്എഫ്ഐക്കാരും പുറമേ നിന്നുള്ള ഡിവൈഎഫ്‌ഐ ക്രിമിനലുകളും ആക്രമിച്ച സംഭവത്തില്‍ ഡിസിസി പ്രസിഡന്‍റ് മാര്‍ട്ടിന്‍ ജോര്‍ജ് പ്രതിഷേധിച്ചു. വിദ്യാലയങ്ങളിലും കലാലയങ്ങളിലും സംഘര്‍ഷം വിളിച്ചുവരുത്തുന്ന നിലപാടില്‍ നിന്ന് എസ്എഫ്ഐ പിന്മാറണം. അക്രമികള്‍ക്കെതിരേ ശക്തമായ നടപടി സ്വീകരിക്കാന്‍ പോലീസ് തയാറാകണമെന്നും മാര്‍ട്ടിന്‍ ജോര്‍ജ് ആവശ്യപ്പെട്ടു.

ജനജാഗ്രത സമിതി യോഗം ചേർന്നു

ഇരിട്ടി: അയ്യൻകുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേലിന്‍റെ അധ്യക്ഷതയിൽ ജനജാഗ്രത സമിതി യോഗം ചേർന്നു. പഞ്ചായത്ത് ഹാളിൽ നടന്ന യോഗത്തിൽ കൊട്ടിയൂർ റേഞ്ചർ നിതിൻരാജ് ജനജാഗ്രതാ സമിതിയുടെ പ്രവർത്തനങ്ങളെക്കുറിച്ചും പിആർടിയുടെ പ്രാധാന്യത്തെക്കുറിച്ചും വിശദീകരിച്ചു. കൃഷികൾ നശിപ്പിക്കുന്ന കാട്ടുപന്നികളെ വെടിവച്ചു കൊല്ലുന്നതിനായി നൽകിയിട്ടുള്ള അധികാരങ്ങളെക്കുറിച്ചും പാലിക്കേണ്ട മാനദണ്ഡങ്ങളെക്കുറിച്ചും യോഗത്തിൽ വിശദീകരിച്ചു. ഉത്തരവു പ്രകാരം പഞ്ചായത്ത് പ്രസിഡന്‍റുമാർ, മുനിസിപ്പൽ ചെയർപേഴ്സൺ, കോർപറേഷൻ മേയർ എന്നിവരെ ഓണററി വൈൽഡ് ലൈഫ് വാർഡൻമാരായും അതാത് ഓഫീസ് സെക്രട്ടറിമാർ എന്നിവർ അധികാരപ്പെടുത്തിയ ഓഫീസർമാരായി പ്രവൃത്തിക്കും. മാനദണ്ഡങ്ങൾ പരിശോധിച്ച് അതാത് ഓഫീസുകൾക്ക് അംഗീകൃത ഷൂട്ടർമാരുടെ സേവനം ലഭ്യമാക്കാവുന്നതാണെന്നും കാട്ടുപന്നികളെ കൊല്ലുമ്പോൾ ഉത്തരവിലെ നടപടിക്രമങ്ങൾ തുടങ്ങിയ യോഗത്തിൽ വിശദീകരിച്ചു. അയ്യൻകുന്ന് പഞ്ചായത്തിലെ വന്യജീവി സംഘർഷം നാശനഷ്‌‌ടങ്ങൾ തുടങ്ങിയ യോഗത്തിൽ ചർച്ച ചെയ്തു. പഞ്ചായത്തിന്‍റെ വനാതിർത്തിയിൽ നിർമിക്കുന്ന സോളാർ തൂക്കുവേലികളുടെ പ്രവൃത്തി എത്രയും പെട്ടെന്ന് പൂർത്തിയാക്കുന്നതിനും കുരങ്ങ്, മയിൽ തുടങ്ങിയ വന്യജീവികൾ കൃഷിയിടത്തിലിറങ്ങി വ്യാപകമായി കൃഷി നശിപ്പിക്കുന്നത് തടയുന്നതിനുള്ള അടിയന്തര നടപടികൾ കൈക്കൊള്ളണമെന്നും യോഗം ആവശ്യപ്പെട്ടു. നിലവിലുള്ള പിആർടിയിൽ കൂടുതൽ ആളുകളെ ഉൾപ്പെടുത്താൻ യോഗം തീരുമാനിച്ചു. പഞ്ചായത്ത് വൈസ് പ്രസിഡന്‍റ് ബീന റോജസ്, സ്റ്റാന്‍റിംഗ് കമ്മിറ്റി ചെയർമാൻമാരായ ഐസക് ജോസഫ്, സീമ സനോജ്, ഇരിട്ടി സെക്ഷൻ ഫോറസ്റ്റ് ഓഫീസർ സുനിൽകുമാർ തുടങ്ങിയവർ പ്രസംഗിച്ചു. കേളകം: ജനവാസ മേഖലയിലിറങ്ങി കൃഷി നശിപ്പിക്കുന്ന കാട്ടുപന്നികളെ നിയന്ത്രിക്കുന്നതിന് അംഗീകൃത ഷൂട്ടർമാരെ ഉപയോഗിച്ച് വെടിവയ്ക്കുന്നതിന് പഞ്ചായത്തിനുള്ള അധികാരം ഫലപ്രദമായി ഉപയോഗിക്കുന്നതിന് കേളകം പഞ്ചായത്ത് ജന ജാഗ്രത സമിതി നിർദേശം നൽകി. വന്യജീവി ആക്രമണങ്ങൾ കുറയ്ക്കുന്നതിന്‍റെ ഭാഗമായി തദ്ദേശ സ്വയംഭരണ വകുപ്പ് ഫണ്ട് ഉപയോഗിച്ച് 3.5 കിലോമീറ്റർ നീളത്തിൽ സോളാർ ഹാങ്ങിംഗ് ഫെൻസിംഗ് നിർമിക്കുന്നതിനുള്ള പ്രവർത്തനങ്ങൾ വേഗത്തിലാക്കാൻ തീരുമാനിച്ചു. കേളകം പഞ്ചായത്ത് പ്രസിഡന്‍റ് സി.ടി. അനീഷ് അധ്യക്ഷത വഹിച്ചു. യോഗത്തിൽ കൊട്ടിയൂർ റേഞ്ച് ഫോറസ്റ്റ് ഓഫീസർ നിതിൻ രാജ് കാര്യങ്ങൾ വിശദീകരിച്ചു.വാർഡ് മെംബർമാർ വന്യജീവി പ്രശ്‌നങ്ങൾ ഉന്നയിച്ചു. വന്യജീവി ശല്യം ലഘൂകരിക്കുന്നതിനായി പഞ്ചായത്ത് നടപ്പാക്കേണ്ട കാര്യങ്ങളെക്കുറിച്ച് കേളകം പഞ്ചായത്ത് പ്രസിഡന്‍റ് മറുപടി നൽകി.യോഗത്തിൽ പഞ്ചായത്ത് സെക്രട്ടറി എം. പൊന്നപ്പൻ, വൈസ് പ്രസിഡന്‍റ് തങ്കമ്മ മേലെകുറ്റ്, മെമ്പർമാരായ ബിനു മാനുവൽ, പ്രീത ഗംഗാധരൻ, ഷാന്‍റി സജി, സജീവൻ പാലുമ്മി, മനോഹരൻ മാരാടി, ലീലാമ്മ ജോണി, പി.ജെ. തോമസ്, ജോണി പാമ്പാടിയിൽ, ബീറ്റ് ഫോറസ്റ്റ് ഓഫീസർമാരായ പി.വി. സജിത്ത്, പ്രജീഷ് കുമാർ എന്നിവർ പങ്കെടുത്തു.

കാട്ടാന കൃഷി നശിപ്പിച്ചു

ഇരിട്ടി: പേരട്ട -തൊട്ടിപാലം കുണ്ടേരി ഉപദേശിക്കുന്നിന് സമീപം ജനവാസ മേഖലയിൽ കാട്ടാന ഇറങ്ങി വ്യാപകമായി കൃഷി നശിപ്പിച്ചു. ബുധനാഴ്ച രാത്രിയോടെയാണ് ആന ജനവാസ മേഖലയിൽ ഇറങ്ങിയത്. കുണ്ടേരിയിലെ സെന്‍റ് ജോസഫ് കോൺവെന്‍റിന് സമീപം യോഹന്നാൻ വൈക്കത്തേതിൽ, സുരേഷ് കണ്ണോത്ത് എന്നിവരുടെ കൃഷിയിടത്തിലും വീടിന്‍റെ മുറ്റത്തുംവരെ ആനയെത്തി . വനാതിർത്തിയിൽ സൗരോർജവേലിയുണ്ടെങ്കിലും തകർത്താണ് ആനകൾ കടന്നു വരുന്നത്. കൃഷിവകുപ്പിന്‍റെ സോളാർ തൂക്കുവേലി ഈ മേഖലയിൽ ഇനിയും യാഥാർഥ്യമായിട്ടില്ലെന്നതും കാട്ടാന ശല്യത്തിന് കാരണമാകുന്നുണ്ട്. കാട്ടാന ശല്യം രൂക്ഷമായതോടെ ഈ മേഖലയിലെ പലരും വീടും സ്ഥലവും ഉപേക്ഷിച്ച് വാടക വീടുകളിലും മറ്റും താമസം മാറിയിരിക്കുകയാണ്.

സ്വാതന്ത്ര്യ ദിനാഘോഷം: മന്ത്രി കടന്നപ്പള്ളി രാമചന്ദ്രൻ അഭിവാദ്യം സ്വീകരിക്കും

കണ്ണൂർ: ജില്ലയിൽ സ്വാതന്ത്ര്യദിനം വിപുലമായ പരിപാടികളോടെ ആഘോഷിക്കും. 15ന് രാവിലെ കളക്ടറേറ്റ് മൈതാനത്ത് നടക്കുന്ന ജില്ലാതല സ്വാതന്ത്ര്യദിന പരേഡിൽ മന്ത്രി കടന്നപ്പള്ളി രാമചന്ദ്രൻ ദേശീയപതാക ഉയർത്തി അഭിവാദ്യം സ്വീകരിക്കും. തുടർന്ന് മന്ത്രി സ്വാതന്ത്ര്യദിന സന്ദേശം നല്കും. പോലീസ്, എക്സൈസ്, വനം-വന്യജീവി വകുപ്പ്, എൻസിസി, സ്‌കൗട്ട് ആൻഡ് ഗൈഡ്സ്, എസ്പിസി, ജൂണിയർ റെഡ് ക്രോസ് തുടങ്ങി 18 ഓളം പ്ലറ്റൂണുകൾ പരേഡിൽ അണിനിരക്കും. ഡിഎസ്‌സി, സെന്‍റ് തെരാസസ് ആംഗ്ലോ ഇന്ത്യൻ ഗേൾസ് സ്‌കൂൾ, ആർമി സ്‌കൂൾ എന്നിവരുടെ ബാൻഡ് സെറ്റ് ഉണ്ടാകും. എആർ കമാൻഡന്‍റിന്‍റെ പൂർണ ചുമതലയിൽ ആയിരിക്കും പരേഡ്. കാണികൾക്ക് പരേഡ് വീക്ഷിക്കുന്നതിന് പ്രത്യേക സൗകര്യം ഒരുക്കിയിട്ടുണ്ട്. 11, 12, 13 തിയതികളിൽ റിഹേഴ്സൽ പരേഡ് നടക്കും. ജില്ലാ കളക്ടർ അരുൺ കെ വിജയന്‍റെ അധ്യക്ഷതയിൽ കളക്ടറേറ്റ് കോൺഫറൻസ് ഹാളിൽ ചേർന്ന അവലോകന യോഗം മുന്നൊരുക്കങ്ങൾ വിലയിരുത്തി. പരേഡിൽ പങ്കെടുക്കുന്ന വിദ്യാർഥികൾക്ക് ട്രാൻസ്‌പോർട്ട് വകുപ്പ് യാത്രാസൗകര്യം ഏർപ്പെടുത്തും. സ്‌കൂൾ ബസുകളാണ് യാത്രയ്ക്ക് ഉപയോഗിക്കേണ്ടത്.

അപകടക്കുഴികൾ കാണാതെ അധികൃതർ

ഇരിട്ടി: ഇരിട്ടി- ഇരിക്കൂർ സംസ്ഥാന പാതയിൽ തന്തോട് കവലയ്ക്കരികിലെ വെള്ളക്കെട്ടും കുഴിയും ഇരുചക്ര വാഹന യാത്രക്കാരേയും കാൽനടയാത്രക്കാരേയും അപകട ഭീഷണിയിലാക്കുന്നു. കാലവർഷം ആരംഭിച്ചതു മുതൽ കുഴിയിലും വെള്ളക്കെട്ടിലും വീണ് നിരവധി അപകടങ്ങളാണ് ഉണ്ടായത്. സ്ഥിരമായി വെള്ളക്കെട്ട് ഉള്ള പ്രദേശമായിട്ടും പരിഹരിക്കാനുള്ള ഒരു നടപടിയും പൊതുമരാമത്ത് വകുപ്പ് സ്വീകരിച്ചിട്ടില്ല. റോഡിന്‍റെ വീതിക്കുറവും ചെറിയ വളവും ഉള്ളപ്പോൾ വെള്ളക്കെട്ട് ഓഴിവാക്കി വാഹനങ്ങൾ നീങ്ങുന്നത് അപകടത്തിന് കാരണമാകുന്നു. തന്തോട് കവലയിൽ ബസ് ഇറങ്ങുന്ന യാത്രക്കാരും വെള്ളക്കെട്ട് കടന്നുവേണം പോകാൻ. വെള്ളക്കെട്ട് കാരണം പലപ്പോഴും റോഡിലെ കുഴി തിരിച്ചറിയാൻ കഴിയാതെ യാത്രക്കാർ ബുദ്ധിമുട്ടുകയാണ്. ഇരിക്കൂർ, ഉളിക്കൽ ഭാഗങ്ങളിൽ നിന്നു വരുന്ന വാഹനങ്ങളാണ് കുഴയിൽ വീണ് അപകടത്തിൽ പെടുന്നത്. കഴിഞ്ഞ കാലവർഷത്തിലും ഇവിടെ രണ്ട് വലിയ കുഴികൾ രൂപപ്പെട്ടിരുന്നു. അപകടം പതിവായതോടെ പൊതുമരാമത്ത് വകുപ്പ് താല്ക്കാലികമായി കുഴിയടച്ച് തടിയൂരിയിരുന്നു. ഇത്തവണ കാലവർഷം ശക്തിയായതോടെ അടച്ചതെല്ലാം പൊളിഞ്ഞുപോകുകയും മുൻവർഷത്തേക്കാൾ വലിയ കുഴി രൂപപ്പെടുകയും ചെയ്തു. റോഡിലെ വെള്ളകെട്ട് ഒഴിവാക്കാൻ ഓവുചാൽ നിർമിച്ചാൽ പ്രശ്‌നത്തിന് പരിഹാരം ഉണ്ടാക്കാനാകും.

കെഎസ്എസ്പിഎ ദ്വിദിന സത്യഗ്രഹം സമാപിച്ചു

കണ്ണൂർ: കേരള സർവീസ് പെൻഷനേഴ്സ് അസോസിയേഷൻ കണ്ണൂർ കളക്ടറേറ്റിനു മുന്നിൽ നടത്തി വന്ന ദ്വിദിന സത്യഗ്രഹം സമാപിച്ചു. രണ്ടാം ദിവസത്തെ ഉദ്ഘാടനം ഡിസിസി പ്രസിഡന്‍റ് മാർട്ടിൻ ജോർജ് ഉദ്ഘാടനം ചെയ്തു. ഒരു കാലത്ത് സമരാവേശ പാർട്ടിയെന്ന അറിയപ്പെട്ടിരുന്ന സിപിഎം അധികാരത്തിലെത്തിയപ്പോൾ സർക്കാർ ജീവനക്കാരുടെയും പെൻഷൻകാരുടെയും അവകാശങ്ങളും ആനുകൂല്യങ്ങളും നിഷേധിക്കുകയും സമരത്തെ അടിച്ചമർത്തുകയുമാണെന്ന് മാർട്ടിൻ ജോർജ് പറഞ്ഞു. കെഎസ്എസ്പിഎ ജില്ലാ വൈസ് പ്രസിഡന്‍റ് പി.ലളിത അധ്യക്ഷത വഹിച്ചു. രണ്ടാം ദിവസമായ ഇന്നലെ വനിതകളെ മുൻനിർത്തിയായിരുന്നു സത്യഗ്രഹം നടത്തിയത്. ശ്രീകണ്ഠപുരം മുനിസിപ്പൽ ചെയർപേഴ്സൺ കെ.വി ഫിലോമിന, മഹിളാ കോൺഗ്രസ് സംസ്ഥാന വൈസ് പ്രസിഡന്‍റ് രജനി രമാനന്ദ്, സംസ്ഥാന കമ്മിറ്റിയംഗങ്ങളായ പി.വി ധനലക്ഷ്മി, തങ്കമ്മ വേലായുധൻ, പി.സി പ്രേമ വല്ലി, ജില്ലാ ജോയിന്‍റെ സെക്രട്ടറി വി. ലളിത, സംസ്ഥാന പ്രസിഡന്‍റ് എം.പി. വേലായുധൻ, ജില്ലാ പ്രസിഡന്‍റ് കെ.മോഹനൻ, സെക്രട്ടറി പി.സുഖദേവൻ പി.കെ രാജേന്ദ്രൻ, ജില്ലാ വൈസ് പ്രസിഡന്‍റ് നാരായണൻ കൊയറ്റി എന്നിവർ പ്രസംഗിച്ചു.

ഹിരോഷിമ-നാഗസാക്കി ദിനമാചരിച്ചു

ചെറുപുഴ: ജോസ്ഗിരി സെന്‍റ് ജോസഫ് യുപി സ്കൂളിൽ ഹിരോഷിമ-നാഗസാക്കി ദിനമാചരിച്ചു. കുട്ടികളെല്ലാവരും സഡാക്കോ കൊക്കുകൾ നിർമിച്ചു കൊണ്ടുവരികയും അതോടൊപ്പം സഡാക്കോ കൊക്കിന്‍റെ ചരിത്രം കുട്ടികൾ അവതരിപ്പിക്കുകയും ചെയ്തു. മുഖ്യാധ്യാപിക ജിബി സെബാസ്റ്റ്യൻ യുദ്ധവിരുദ്ധ സന്ദേശം നൽകി. തുടർന്ന് കുട്ടികളുടെ വിവിധ യുദ്ധവിരുദ്ധ പരിപാടികൾ, പ്രദർശനം എന്നിവ സംഘടിപ്പിച്ചു. അധ്യാപകരായ ജിനു സെബാസ്റ്റ്യൻ, സിസ്റ്റർ ടെസ് മരിയ എന്നിവർ പരിപാടികൾക്കു നേതൃത്വം നൽകി. പയ്യാവൂർ: കണ്ണൂർ ജില്ലാ ശാസ്ത്രവേദിയുടെ സഹകരണത്തോടെ നുച്യാട് ഗവ.യുപി സ്കൂളിൽ ഹിരോഷിമ ദിനാചരണവും ശാസ്ത്ര ബോധവത്കരണ ക്ലാസും സംഘടിപ്പിച്ചു. ഉളിക്കൽ പഞ്ചായത്ത് വൈസ് പ്രസിഡന്‍റ് സമീറ പള്ളിപ്പാത്ത് ഉദ്ഘാടനം ചെയ്തു. എസ്എംസി ചെയർമാൻ അസീസ് നന്ദാനിശേരി അധ്യക്ഷത വഹിച്ചു. സ്കൂൾ മുഖ്യാധ്യാപിക ബി. റഹ്മത്തുന്നിസ, വിദ്യാരംഗം കോ ഓർഡിനേറ്റർ വി.സി. പ്രശാന്തൻ എന്നിവർ പ്രസംഗിച്ചു. സ്കൂളിലെ വിദ്യാരംഗം കലാസാഹിത്യ വേദിയുടെ മാസികകൾ ചടങ്ങിൽ പ്രകാശനം ചെയ്തു. തലശേരി ബ്രണ്ണൻ കോളജ് ഫിസിക്സ് വിഭാഗത്തിലെ ഡോ.സി.എച്ച്. മുഹമ്മദ് അഷ്ഫാസ് ക്ലാസെടുത്തു.

ജില്ലാ അത്‌ലറ്റിക്‌സ് ചാന്പ്യന്‍ഷിപ്പിന് തുടക്കം

തലശേരി: 69- ാമത് ജില്ലാ അത്‌ലറ്റിക്‌സ് ചാന്പ്യന്‍ഷിപ്പിന് തുടക്കം. അണ്ടര്‍ 14,16,18,20 പുരുഷ, വനിതാ, വിഭാഗങ്ങളിലായാണ് തലശേരി സ്റ്റേഡിയത്തിലും ബ്രണ്ണന്‍ കോളജ് സായ് സിന്തറ്റിക് സ്റ്റേഡിയത്തിലും മത്സരങ്ങള്‍ നടക്കുന്നത്. ഒന്നാം ദിനം 56 ഇനങ്ങള്‍ പൂര്‍ത്തിയായപ്പോള്‍ 56 പോയിന്‍റുമായി കണ്ണൂര്‍ അത്‌ലറ്റിക് അക്കാദമി ഒന്നാം സ്ഥാനത്തും 50 പോയിന്‍റുമായി തലശേരി അത്‌ലറ്റിക്‌സ് ക്ലബ് രണ്ടാം സ്ഥാനത്തും 36 പോയിന്‍റുമായി ചെറുപുഴ ക്യാപ്റ്റന്‍ അക്കാദമി മീന്‍തുള്ളി മൂന്നാം സ്ഥാനത്തുമുണ്ട്. അത്‌ലറ്റിക്‌സ് ചാന്പ്യന്‍ഷിപ്പിന്‍റെ ഔദ്യോഗിക ഉദ്ഘാടനം ഇന്നു രാവിലെ 9.30 ന് തലശേരി സബ്കളക്ടര്‍ കാര്‍ത്തിക് പാണിഗ്രഹി നിര്‍വഹിക്കും. ഒന്പതിന് വൈകുന്നേരം 5.30 ന് നടക്കുന്ന സമാപന സമ്മേളനത്തില്‍ സാഫ് ഗയിംസ് മെഡല്‍ ജേതാവ് വി.ടി. ഷിജില മുഖ്യാതിഥിയാവും. ജില്ലയിലെ സ്‌കൂളുകളില്‍ നിന്നും വിവധ ക്ലബുകളില്‍ നിന്നുമായി 700 ഓളം താരങ്ങള്‍ ചാന്പ്യന്‍ഷിപ്പിന്‍റെ ഭാഗമാകും.

‘പയ്യാവൂർ മാംഗല്യം' അപേക്ഷകൾ എത്തിതുടങ്ങി

പയ്യാവൂർ: പണ ചെലവില്ലാതെ ജാതിമതഭേദമന്യേ സ്ത്രീ-പുരുഷന്മാർക്ക് വിവാഹിതരാകാനുള്ള അവസരമൊരുക്കുന്ന പയ്യാവൂർ പഞ്ചായത്തിന്‍റെ 'പയ്യാവൂർ മാംഗല്യം'ത്തിന് അപേക്ഷകൾ എത്തിതുടങ്ങി.അവിവാഹിതരും വിവാഹമോചിതരും ഉൾപ്പെടെയുള്ളവർക്ക് വിവാഹിതരാകാനുള്ള അവസരവും ഒരുക്കിയിട്ടുണ്ട്. സിംഗിൾ വുമൺ വെൽഫെയർ അസോസിയേഷന്‍റെ സഹകരണത്തോടെയാണ് 'പയ്യാവൂർ മാംഗല്യം' സംഘടിപ്പിക്കുന്നത്.ഇതിനായി ആദ്യം അപേക്ഷാഫോം പൂരിപ്പിച്ച് നൽകണം. അപേക്ഷാഫോമിന്‍റെ മാതൃക സാമൂഹ്യ മാധ്യമങ്ങൾ വഴിയും പഞ്ചായത്ത് ഓഫീസ് വഴിയും സിംഗിൾ വുമൺ വെൽഫെയർ അസോസിയേഷൻ പ്രവർത്തകർ വഴിയും ലഭിക്കും. പൂരിപ്പിച്ച അപേക്ഷയ്ക്കൊപ്പം പാസ്പോർട്ട് ഫോട്ടോയും നൽകണമെന്ന്‌ പദ്ധതിക്ക്‌ നേതൃത്വം നൽകുന്നവർ വ്യക്തമാക്കി. സ്ത്രീകളുടെ അപേക്ഷ സിംഗിൾ വുമൺ വെൽഫെയർ അസോസിയേഷൻ ഭാരവാഹികൾക്ക്‌ കൈമാറണം. ജില്ലാ വിധവക്ഷേമ സംഘം, എൻജിഒ യൂണിയൻ ബിൽഡിംഗ്, പഴയ ബസ്‌സ്റ്റാൻഡിന് സമീപം കണ്ണൂർ, 670001 മേൽവിലാസത്തിലും അയക്കാം. പഞ്ചായത്ത് പ്രസിഡന്‍റിന്‍റെ ചേമ്പറിൽ ഒരുക്കിയ പെട്ടിയിലോ പ്രസിഡന്‍റ്, പയ്യാവൂർ പഞ്ചായത്ത്, കണ്ണൂർ ജില്ല, 670633 എന്ന വിലാസത്തിലോ ആണ് പുരുഷന്മാർ അപേക്ഷ നൽകേണ്ടത്.

സ്വാതന്ത്ര്യ ദിനാഘോഷം: മന്ത്രി കടന്നപ്പള്ളി രാമചന്ദ്രൻ അഭിവാദ്യം സ്വീകരിക്കും

കണ്ണൂർ: ജില്ലയിൽ സ്വാതന്ത്ര്യദിനം വിപുലമായ പരിപാടികളോടെ ആഘോഷിക്കും. 15ന് രാവിലെ കളക്ടറേറ്റ് മൈതാനത്ത് നടക്കുന്ന ജില്ലാതല സ്വാതന്ത്ര്യദിന പരേഡിൽ മന്ത്രി കടന്നപ്പള്ളി രാമചന്ദ്രൻ ദേശീയപതാക ഉയർത്തി അഭിവാദ്യം സ്വീകരിക്കും. തുടർന്ന് മന്ത്രി സ്വാതന്ത്ര്യദിന സന്ദേശം നല്കും. പോലീസ്, എക്സൈസ്, വനം-വന്യജീവി വകുപ്പ്, എൻസിസി, സ്‌കൗട്ട് ആൻഡ് ഗൈഡ്സ്, എസ്പിസി, ജൂണിയർ റെഡ് ക്രോസ് തുടങ്ങി 18 ഓളം പ്ലറ്റൂണുകൾ പരേഡിൽ അണിനിരക്കും. ഡിഎസ്‌സി, സെന്‍റ് തെരാസസ് ആംഗ്ലോ ഇന്ത്യൻ ഗേൾസ് സ്‌കൂൾ, ആർമി സ്‌കൂൾ എന്നിവരുടെ ബാൻഡ് സെറ്റ് ഉണ്ടാകും. എആർ കമാൻഡന്‍റിന്‍റെ പൂർണ ചുമതലയിൽ ആയിരിക്കും പരേഡ്. കാണികൾക്ക് പരേഡ് വീക്ഷിക്കുന്നതിന് പ്രത്യേക സൗകര്യം ഒരുക്കിയിട്ടുണ്ട്. 11, 12, 13 തിയതികളിൽ റിഹേഴ്സൽ പരേഡ് നടക്കും. ജില്ലാ കളക്ടർ അരുൺ കെ വിജയന്‍റെ അധ്യക്ഷതയിൽ കളക്ടറേറ്റ് കോൺഫറൻസ് ഹാളിൽ ചേർന്ന അവലോകന യോഗം മുന്നൊരുക്കങ്ങൾ വിലയിരുത്തി. പരേഡിൽ പങ്കെടുക്കുന്ന വിദ്യാർഥികൾക്ക് ട്രാൻസ്‌പോർട്ട് വകുപ്പ് യാത്രാസൗകര്യം ഏർപ്പെടുത്തും. സ്‌കൂൾ ബസുകളാണ് യാത്രയ്ക്ക് ഉപയോഗിക്കേണ്ടത്.

വിദ്യാരംഗം കലാസാഹിത്യവേദി തളിപ്പറമ്പ് ഉപജില്ലാതല ഉദ്ഘാടനം

കരുവഞ്ചാൽ: വിദ്യാരംഗം കലാസാഹിത്യവേദി തളിപ്പറമ്പ് ഉപജില്ലാതല ഉദ്ഘാടനം വെള്ളാട് ജിയുപിഎസിൽ നടുവിൽ പഞ്ചായത്ത് പ്രസിഡന്‍റ് ബേബി ഓടമ്പള്ളി നിർവഹിച്ചു. തളിപ്പറമ്പ് നോർത്ത് എഇഒ കെ. മനോജ് അധ്യക്ഷത വഹിച്ചു. മറത്തുകളി സാഹിത്യവും സംവാദവും എന്ന വിഷയത്തിൽ ഡോ. രാജേഷ് കടന്നപ്പള്ളി ശില്പശാല നയിച്ചു. തളിപ്പറമ്പ് നോർത്ത് ബിപിസി കെ ബിജേഷ് സമ്മാനദാനം നിർവഹിച്ചു. വിദ്യാരംഗം നേതൃനിരയിലുണ്ടായിരുന്ന രവീന്ദ്രൻ തിടിൽ, കെ. കൃഷ്ണൻ, ഗീത, പി.വി. വത്സല എന്നിവരെ ചടങ്ങിൽ ആദരിച്ചു. ഉപജില്ലാ സാഹിത്യ ക്വിസിൽ സമ്മാനർഹരായ കുട്ടികൾക്കുള്ള ഉപഹാരവും നൽകി. വിദ്യാരംഗം സബ്ജില്ലാ കൺവീനർ ജിഷ സി. ചാലിൽ പ്രവർത്തന കലണ്ടർ അവതരിപ്പിച്ചു. പി. ഇബ്രാഹിം, കെ മിനി, എം.എം. ജനാർദനൻ, കെ.വി. മെസ്മർ, കെ.കെ. സിജു, ടി.ജി. പ്രതീഷ്, കാവ്യ ഉമേഷ്, സി. രമ്യ, ബിസിമോൾ, കെ.എൻ. അനൂപ് എന്നിവർ പ്രസംഗിച്ചു.

സ്കൂളിനോട് ചേർന്നുള്ള റോഡിൽ സിഗ്നൽ സംവിധാനങ്ങളില്ല; പരാതി നൽകി

ഉദയഗിരി: നൂറുകണക്കിന് വിദ്യാർഥികൾ പഠിക്കുന്ന ഉദയഗിരി പ്രത്യാശ യുപി സ്കൂളിനോട് ചേർന്നുള്ള റോഡിൽ സിഗ്നൽ സംവിധാനങ്ങളോ മറ്റ് അടിസ്ഥാന സൗകര്യങ്ങളോ ഇല്ല. കുട്ടികളുടെ സുരക്ഷിതത്വം ഉറപ്പുവരുത്താൻ നടപടി സ്വീകരിക്കണമെന്ന് ആവശ്യപ്പെട്ട് സ്കൂൾ പിടിഎയും മാനേജ്മെന്‍റും ജില്ലാ കളക്ടർക്കും പൊതുമരാമത്ത് വകുപ്പിനും പരാതി നൽകി ഒരു വർഷം കഴിഞ്ഞിട്ടും അധികൃതരുടെ ഭാഗത്തുനിന്ന് യാതൊരു നടപടിയും ഉണ്ടായിട്ടില്ല. തുടർന്ന് സജീവ് ജോസഫ് എംഎൽഎക്ക് സ്കൂൾ അധികൃതർ പരാതി നൽകി. റോഡ് നിർമാണം പൂർത്തിയാക്കിയിട്ടും പ്രദേശത്തെ പ്രശ്നങ്ങൾക്ക് ശാശ്വത പരിഹാരം ആയിട്ടില്ല. വീതി കൂട്ടി മെക്കാഡം ടാറിംഗ് നടത്തിയ ഉദയഗിരി - താബോർ - തിരുമേനി റോഡാണിത്. കുത്തനെയുള്ള ഇറക്കവും വളവും കൂടിയ പ്രദേശമാണ് ഇവിടം. ഉദയഗിരി സെന്‍റ് മേരീസ് പള്ളിയിലേക്ക് പ്രായമായവരും കുട്ടികളും അടക്കം നിരവധി ആളുകൾ പ്രവേശിക്കുന്നതും ഇതുവഴിയാണ്. കുട്ടികൾ ഉൾപ്പെടെയുള്ളവരുടെ സുരക്ഷിതത്വം ഉറപ്പുവരുത്തുന്നതിന് ഈ പ്രദേശത്ത് സീബ്രാ ലൈൻ, സിംബോർഡ്, സ്ട്രീറ്റ് ലൈറ്റ് അടക്കമുള്ള സംവിധാനങ്ങൾ സ്ഥാപിക്കേണ്ടതുണ്ട്. സ്കൂൾ പരിസരത്തേക്ക് തെരുവുനായ അടക്കമുള്ളവ പ്രവേശിക്കുന്നതിനാൽ റോഡിനോട് ചേർന്ന് കമ്പിവേലി സ്ഥാപിക്കേണ്ടതുണ്ട്. ഒരു മാസം മുമ്പാണ് പ്രദേശത്ത് സ്കൂളിലേക്കെത്തിയ രണ്ടു കുട്ടികൾക്ക് തെരുവുനായയുടെ കടിയേറ്റത്. അതിന് പേവിഷബാധ ഉണ്ടായിരുന്നതായി പിന്നീട് നടത്തിയ പരിശോധനയിൽ കണ്ടെത്തിയിരുന്നു.

എസ്എഫ്ഐ അട്ടിമറിക്ക് പോലീസ് കൂട്ടുനിന്നു: മാർട്ടിൻ ജോർജ്

കണ്ണൂർ: കണ്ണൂർ സർവകലാശാല യൂണിയൻ തെരഞ്ഞെടുപ്പിൽ എസ്എഫ്ഐയുടെ അട്ടിമറി പ്രവർത്തനങ്ങൾക്ക് പോലീസ് ഒത്താശ ചെയ്തുകൊടുത്തതായി ഡിസിസി പ്രസിഡന്‍റ് മാർട്ടിൻ ജോർജ്. രാവിലെ മുതൽ താവക്കര കാമ്പസ് പരിസരത്ത് എസ്എഫ്ഐ പ്രവർത്തകർ സംഘർഷാവസ്ഥ സൃഷ്ടിക്കുകയായിരുന്നു. വോട്ട് ചെയ്യാൻ എത്തുന്ന യുഡിഎസ്എഫ് പ്രതിനിധികളെ തടയുകയും സ്ഥലത്ത് ഭീകരാന്തരീക്ഷം സൃഷ്ടിക്കുകയും ചെയ്തു. എംഎസ്എഫ് സ്ഥാനാർഥിയുടെ പക്കൽ നിന്ന് ബാലറ്റ് പേപ്പർ തട്ടിപ്പറിച്ച് ഓടിയ എസ്എഫ്ഐ സ്ഥാനാർഥിയെ പോലീസ് പിടികൂടിയെങ്കിലും ഉന്നത ഉദ്യോഗസ്ഥൻ ഇടപെട്ട് മോചിപ്പിക്കുകയായിരുന്നു.പോലീസിനെതിരെയും എസ്എഫ്ഐ പ്രവർത്തകർ ഭീഷണി മുഴക്കുകയുണ്ടായി. എസ്എഫ്ഐ ഭീഷണിക്ക് മുന്നിൽ പോലീസ് കീഴടങ്ങുന്ന കാഴ്ചയായിരുന്നു. യൂത്ത് ലീഗുകാർ ആയുധങ്ങളുമായെത്തി: കെ.കെ.രാഗേഷ്‌‌ കണ്ണൂർ: എസ്എഫ്ഐക്ക് മൃഗീയ ഭൂരിപക്ഷമുള്ള കണ്ണൂർ യൂണിവേഴ്സിറ്റി യൂണിയൻ തെരഞ്ഞെടുപ്പ് അക്രമത്തിലൂടെ പിടിച്ചെടുക്കാൻ യൂത്ത് ലീഗുകാർ വാഹനത്തിൽ ആയുധങ്ങളുമായി എത്തിയെന്ന് സിപിഎം ജില്ലാ സെക്രട്ടറി കെ.കെ.രാഗേഷ്. കള്ളവോട്ടിലൂടെയും അക്രമത്തിലൂടെയും തെരഞ്ഞെടുപ്പ് അട്ടിമറിക്കാനുള്ള ശ്രമം എസ്എഫ്ഐ തടയുകയാണ് ചെയ്തത്. കാന്പസിൽ തന്പടിച്ച് യൂത്ത് ലീഗ് ആക്രമണത്തിന് നേതൃത്വം നൽകുകയായിരുന്നുവെന്നും കെ.കെ.രാഗേഷ് പറഞ്ഞു.

കണ്ണൂർ സർവകലാശാല ആസ്ഥാനത്ത് കലാപം

കണ്ണൂര്‍: യൂണിവേഴ്സിറ്റി യൂണിയൻ തെരഞ്ഞെ‌ടുപ്പുമായി ബന്ധപ്പട്ട് താവക്കരയിലെ കണ്ണൂർ യൂണിവേഴ്സിറ്റി ആസ്ഥാനത്ത് തെരുവ് യുദ്ധം. എസ്എഫ്ഐ- യുഡിഎസ്എഫ് വിദ്യാർഥികൾ തമ്മിൽ സംഘർഷം. പലഘട്ടങ്ങളിലായി നടന്ന ഏറ്റുമുട്ടലിലും കല്ലേറിലും ഇരുവിഭാഗത്തിലുള്ളവർക്കും പോലീസുകാർക്കും പരിക്കേറ്റു. സംഘർഷം ഒഴിവാക്കാൻ പോലീസ് പലതവണ ലാത്തി വീശി. സംഘർഷത്തിൽ എസ്എഫ്ഐ ജില്ലാ വൈസ് പ്രസിഡന്‍റ് അശ്വന്ത്, കണ്ണൂർ ഏരിയാ കമ്മിറ്റി അംഗം വൈഷ്ണവ് പ്രകാശൻ, എംഎസ്എഫ് സംസ്ഥാന ജനറൽ സെക്രട്ടറി സി.കെ. നജാഫ്, യൂത്ത് ലീഗ് നേതാവ് ഷബീർ എടയന്നൂർ, സിവിൽ പോലീസ് ഓഫീസർ രജനി എന്നിവർക്ക് പരിക്കേറ്റു. കാന്പസിൽ നിർത്തിയിട്ട് ബൈക്കുകളിലുണ്ടായിരുന്ന ഹെൽമറ്റും ചെടിച്ചട്ടിയും കല്ലും വടികളുമുൾപ്പടെ കൈയിൽ കിട്ടിയതൊക്കെ എടുത്ത് വിദ്യാർഥികൾ പരസ്പരം എറിഞ്ഞു. ഇന്നലെ രാവിലെ 10ന് യൂണിയന്‍ തെരഞ്ഞെടുപ്പ് നടക്കാനിരിക്കെ ഒന്പതരയോടെയാണ് കാന്പസിനകത്ത് പ്രശ്നങ്ങൾ ആരംഭിച്ചത്. കാസർഗോഡ് എംഐസി ആർട്സ് ആൻഡ് സയൻസ് കോളജിലെ യൂണിവേഴ്സിറ്റി യൂണിയൻ കൗൺസിലറായ സഫ്‌വാനെ എസ്എഫ്ഐ പ്രവർത്തകർ തട്ടിക്കൊണ്ടുപോയതായി യുഡിഎസ്എഫ് ആരോപിച്ചു. ഇതേത്തുടർന്നുണ്ടായ വാക്കേറ്റമാണ് സംഘർഷത്തിന് തുടക്കം കുറിച്ചത്. സംഘർഷം രൂക്ഷമായതോടെ പോലീസ് ലാത്തിവീശി ഇരു വിഭാഗത്തെയും തുരത്തി. ഇതിനിടെ കെഎസ്‌യു, എംഎസ്എഫ് പ്രവർത്തകർ കള്ളവോട്ട് ചെയ്യാൻ ശ്രമിച്ചതായി എസ്എഫ്ഐ ആരോപിച്ചു. തിരിച്ചറിയൽ കാർഡില്ലാതെ പോളിംഗ് സ്റ്റേഷനിലേക്ക് കടത്തിവിടില്ലെന്ന പോലീസിന്‍റെ നിർദേശം ലംഘിച്ച് കെഎസ്‌യു, എംഎസ്എഫ് പ്രവർത്തകർ കടക്കാൻ ശ്രമിച്ചതായും ആരോപണമുണ്ട്. തിരിച്ചറിയിൽ കാർഡില്ലാത്തെ കടത്തിവിടില്ലെന്ന പ്രഖ്യാപിച്ച് എസ്എഫ്ഐ പ്രവർത്തകരും രംഗത്തെത്തിയത് വീണ്ടും സംഘർഷത്തിനിടയാക്കി. കെഎസ്‌യു,എംഎസ്എഫ് സഖ്യമുന്നണിയായ യുഡിഎസ്എഫ് കള്ളവോട്ട് ചെയ്യാൻ ശ്രമിച്ചത് തടഞ്ഞ വിരോധത്തിൽ അക്രമം നടത്തിയെന്നും ടൗൺ എസ്ഐ വി.വി ദീപ്തി പ്രവർത്തകരെ അകാരണമായി മർദിച്ചുവെന്നും എസ്എഫ്ഐ സംസ്ഥാന സെക്രട്ടറി പി.എസ്. സഞ്ജീവ് ആരോപിച്ചു. അതേസമയം തെരഞ്ഞെടുപ്പ് അട്ടിമറിക്കാൻ എസ്എഫ്ഐ മനപൂർവം അക്രമം അഴിച്ചു വിടുകയാണെന്നും പോലീസ് അകാരണമായി പ്രവർത്തകരെ മർദിച്ചെന്നും യുഡിഎസ്എഫും ആരോപിച്ചു. ആദ്യത്തെ സംഘർഷത്തിന് ശേഷം പതിനൊന്നരയോടെയാണ് രണ്ടാമത്തെ സംഘർഷം പൊട്ടിപ്പുറപ്പെട്ടത്.യുഡിഎസ്എഫ് സ്ഥാനാർഥിയുടെ ബാലറ്റ് പേപ്പർ എസ്എഫ്ഐ പ്രവർത്തക തട്ടിപ്പറിച്ചെന്ന ആരോപണത്തെ തുടർന്നാണ് വാക്കേറ്റവും കൈയാങ്കളിയുമുണ്ടായത്. ആരോപണ വിധേയയായ പ്രവർത്തകയെ പോലീസ് പിടിച്ചുവച്ചിരുന്നു. ഇവരെ മോചിപ്പിക്കാൻ എസ്എഫ്ഐ പ്രവർത്തകർ സംഘടിതമായി പോലീസിനെതിരെ തിരിഞ്ഞതോടെ പോലീസും പ്രവർത്തകരും തമ്മിൽ വാക്കേറ്റവും ഉന്തും തള്ളുമുണ്ടായി. എസ്എഫ്ഐക്കാരെ പ്രതിരോധിക്കാൻ യുഡിഎസ്എഫുകാരും എത്തിയതോടെ കൂട്ടത്തല്ലിലും ലാത്തിച്ചാർജിലും കലാശിക്കുകയായിരുന്നു. ഇതിനിടെ പോലീസ് പിടിച്ചുവച്ച പ്രവർത്തകയെ എസ്എഫ്ഐക്കാർ മോചിപ്പിച്ചു സ്ഥലത്തുനിന്ന് മാറ്റി. സംഘർഷം രൂക്ഷമാകുന്ന തരത്തിലേക്ക് നീങ്ങിയതോടെ ഇരുവിഭാഗക്കാരെയും പോലീസ് പോളിംഗ് ബൂത്തിനടുത്ത് നിന്ന് മാറ്റി. ഇതിനു പിന്നാലെ പ്രവര്‍ത്തകരെ മര്‍ദിച്ചവരെ കാന്പസ് വിട്ടുപോകാൻ അനുവദിക്കില്ലെന്ന് പറഞ്ഞ് എസ്എഫ്ഐ രംഗത്തെത്തിയത് വീണ്ടും സംഘർഷത്തിനിടയാക്കി. യുഡിഎസ്എഫിന്‍റെ യുയുസികൾ എത്തിയ ബസിനകത്ത് അക്രമികളുണ്ടെന്ന് പറഞ്ഞ് ബസ് വളഞ്ഞു. ഇതിനിടെ ബസിന്‍റെ കാറ്റഴിച്ചു വിടുകയും ചെയ്തു. ഇതോടെ കാന്പസിൽ പലയിടത്തായിരുന്ന യുഡിഎസ്എഫ് പ്രവർത്തകർ സംഘടിച്ച് ഇവിടെയെത്തുക‍യും ഏറ്റുമുട്ടുകയുമായിരുന്നു. പോലീസ് ലാത്തിച്ചാർജ് നടത്തി വിരട്ടിയോടിച്ചു. ഉച്ചയ്ക്ക് ഒന്നോടെയാണ് മൂന്നാമതും സംഘർഷമുണ്ടായത്. യുഡിഎസ്എഫ് യുയുസി കൗൺസിലറുമായി വന്ന വാഹനം എസ്എഫ്ഐ പ്രവർത്തകർ കാന്പസിൽ തടഞ്ഞതായിരുന്നു കാരണം. സ്ഥലത്തുണ്ടായിരുന്ന നേതാക്കൾ വാഹനം തടഞ്ഞ പ്രവർത്തകരെ പിന്തിരിപ്പിക്കുകയായിരുന്നു. സംഘർഷത്തെ തുടർന്ന് സിറ്റി പോലീസ് കമ്മീഷണർ നിധിൻരാജ്, എസിപി പ്രദീപൻ കണ്ണിപ്പൊയിൽ ഉൾപ്പെടെയുള്ള ഉന്നതോദ്യോഗസ്ഥരുടക്കമുള്ളവരുടെ നേതൃത്വത്തിലുള്ള പോലീസ് സംഘം സ്ഥലത്ത് ക്യാന്പ് ചെയ്താണ് സ്ഥിതിഗതികൾ നിയന്ത്രിച്ചത്. സിപിഎം ജില്ലാ സെക്രട്ടറി കെ.കെ രാഗേഷ്, മുസ്‌ലിം ലീഗ് ജില്ലാ പ്രസിഡന്‍റ് അബ്ദുൾ കരീം ചേലേരി, കോൺഗ്രസ് നേതാവ് പി.അബ്ദുൾ റഷീദ് തുടങ്ങിയവരും സ്ഥലത്തെത്തി.

ബസ് താഴ്ചയിലേക്ക് മറിഞ്ഞ് 10 പേർക്ക് പരിക്ക്

ഇരിട്ടി: പായം പഞ്ചായത്തിലെ വിളമന കരിവണ്ണൂരിൽ ബസ് നിയന്ത്രണംവിട്ട് താഴ്ചയിലേക്ക് മറിഞ്ഞ് 10 പേർക്ക് പരിക്കേറ്റു. മാടത്തിൽ - വിളമന - വള്ളിത്തോട്- ഇരിട്ടി റൂട്ടിൽ ഓടുന്ന അരുൺ ബസാണ് അപകടത്തിൽപ്പെട്ടത്. ആരുടെയും പരിക്ക് ഗുരുതരമല്ല. ഇന്നലെ രാവിലെ 8.15 ഓടെയായിരുന്നു അപകടം. സ്റ്റിയറിംഗിന്‍റെ നിയന്ത്രണം നഷ്ടപ്പെട്ട ബസ് റോഡിന് സമീപത്തെ രണ്ട് മീറ്ററോളം താഴ്ചയുളള വയലിലേക്ക് മറിയുകയായിരുന്നു. പരിക്കേറ്റവരെ ഇരിട്ടിയിലെ സ്വകാര്യ ആശുപത്രിയിൽ പ്രവേശിപ്പിച്ച് പ്രാഥമിക ചികിത്സ നല്കി. പെരുങ്കരി, കുന്നോത്ത് സ്കൂളുകളിലെ വിദ്യാർഥികൾ പതിവായി ഈ ബസിലാണ് യാത്ര ചെയ്തിരുന്നത്. റെഡ് അലേർട്ട് പ്രഖ്യാപിച്ചതോടെ 10 ‍യാത്രക്കാർ മാത്രമാണ് ഇന്നലെ ബസിൽ ഉണ്ടായിരുന്നത്. ഇതുകാരണം വലിയ ദുരന്തമാണ് ഒഴിവാക്കിയതെന്ന് നാട്ടുകാർ പറഞ്ഞു. ഇരിട്ടി അഗ്നിരക്ഷാനിലയത്തിൽ നിന്നുള്ള രണ്ട് യൂണിറ്റും ഇരിട്ടി പോലീസും സ്ഥലത്തെത്തിയാണ് പരിക്കേറ്റവരെ ആശുപത്രിയിൽ എത്തിച്ചത്.

ദേശീയ ഗ്രേപ്ലിംഗിൽ മെഡൽ നേട്ടവുമായി സെന്‍റ് മൈക്കിൾസ് സ്കൂൾ

കണ്ണൂർ: ഛത്തീസ്ഗഢിലെ ബിലാസ്പൂരില്‍ നടന്ന അഞ്ചാമത ദേശീയ ഗ്രേപ്ലിംഗ് ചാമ്പ്യന്‍ഷിപ്പില്‍ കേരളത്തിന് വേണ്ടി മെഡല്‍ നേടിയവരില്‍ സെന്‍റ് മൈക്കിള്‍സ് ആംഗ്ലോ ഇന്ത്യന്‍ ഹയര്‍ സെക്കന്‍ഡറി സ്കൂളിലെ കായികതാരങ്ങളും. ആണ്‍കുട്ടികളുടെ വിത്ത് ഗി, വിത്തൗട്ട് ഗി വിഭാഗങ്ങളിൽ സ്കൂളിലെ ആഷ്‌ലി ജോൺ രണ്ടു സ്വർണം നേടി. അലൻ സി. ജോസ് (ഒരു ഒരു സ്വർണം, ഒരു വെള്ളി) പി. ആദിദേവ് (രണ്ടു വെള്ളി) ടി.കെ.അമേഗ് (ഒരു വെള്ളിയും ഒരു വെങ്കലവും) ആല്‍ഡ്രിന്‍ ജെ. മെന്‍ഡോസ, അലോഷ്യസ് ‍സാല്‍വദോര്‍ മെന്‍ഡോസ,കെസ്റ്റര്‍ തോമസ് കുറിച്ചിയില്‍, ബെസ്റ്റര്‍ ജോസഫ് കുറിച്ചിയില്‍ എന്നിവർ ഓരോ വെങ്കലവും നേടി. മെഡൽ ജേതാക്കൾക്ക് സ്കൂളിൽ സ്വീകരണം നൽകി

കാർ സ്കൂട്ടറിലിടിച്ച് കടയിലേക്കു പാഞ്ഞുകയറി; രണ്ടുപേർക്ക് പരിക്ക്

മട്ടന്നൂർ: കാർ നിയന്ത്രണം വിട്ടു സ്കൂട്ടറിലിടിച്ച് കടയിലേക്കു പാഞ്ഞു കയറി. കാർ യാത്രക്കാരനും സ്കൂട്ടർ യാത്രക്കാരനും പരിക്കേറ്റു. ഇന്നലെ രാവിലെ പതിനൊന്നോടെ മട്ടന്നൂർ-തലശേരി റോഡിൽ കനാലിനു സമീപത്തെ എൻഎസ്എസ് ബിൽഡിംഗിനു മുന്നിലായിരുന്നു അപകടം. തലശേരി ഭാഗത്ത് നിന്ന് മട്ടന്നൂർ ഭാഗത്തേക്കു വരികയായിരുന്നു കാർ നിയന്ത്രണം വിട്ടു മട്ടന്നൂർ ഭാഗത്ത് നിന്ന് കൂത്തുപറമ്പ് ഭാഗത്തേക്കു പോകുകയായിരുന്ന സ്കൂട്ടറിൽ ഇടിച്ചശേഷം സമീപത്തെ സിമന്‍റ് കടയിലേക്കു പാഞ്ഞുകയറുകയായിരുന്നു. അപകടം നടക്കുമ്പോൾ കടയിൽ ആളില്ലാത്തതിനാൽ വൻ ദുരന്തമാണ് ഒഴിവായത്. പരിക്കേറ്റ സ്കൂട്ടറിലെ യാത്രക്കാരനും കാർ യാത്രക്കാരനും മട്ടന്നൂരിലെ സ്വകാര്യ ആശുപത്രിയിൽ ചികിത്സ തേടി.

പോലീസ് പരേഡ് ഗ്രൗണ്ട് സിന്തറ്റിക് ട്രാക്ക് 12ന് മുഖ്യമന്ത്രി നാടിന് സമർപ്പിക്കും

കണ്ണൂർ: കണ്ണൂർ പോലീസ് പോലീസ് പരേഡ് ഗ്രൗണ്ടിലെ സിന്തറ്റിക് ട്രാക്കും മൾട്ടി പർപ്പസ് ഇൻഡോർ കോർട്ടും 12ന് മുഖ്യമന്ത്രി പിണറായി വിജയൻ നാടിന് സമർപ്പിക്കും. കേരള പോലീസ് സ്പോർട്സ് ആൻഡ് യൂത്ത് വെൽഫെയർ സൊസൈറ്റി സ്കീം പ്രകാരം നവീകരിച്ച മൈതാനിയിൽ പുൽത്തകിടിയോടു കൂടിയ ഫുട്ബോൾ ഗ്രൗണ്ടും ഒരുക്കിയിട്ടുണ്ട്. 12ന് ഉച്ചകഴിഞ്ഞ 3.30ന് കണ്ണൂർ ദിനേശ് ഓഡിറ്റോറിയത്തിൽ നടക്കുന്ന ഉദ്ഘാടന പരിപാടിയിൽ മന്ത്രി കടന്നപ്പള്ളി രാമചന്ദ്രൻ അധ്യക്ഷത വഹിക്കും. എംഎൽഎമാരായ എം.വി. ഗോവിന്ദൻ, കെ.വി. സുമേഷ് എന്നിവർ വിശിഷ്ടാതിഥികളാകും. സംസ്ഥാന പോലീസ് മേധാവി രവാഡ ചന്ദ്രശേഖർ, എഡിജിപി എച്ച്. വെങ്കിടേഷ്, നോർത്ത് സോൺ ഐജി രാജ്പാൽ മീണ, കണ്ണൂർ റേഞ്ച് ഡിഐജി ജി. യതീഷ് ചന്ദ്ര, സിറ്റി കമ്മീഷണർ പി. നിധിൻരാജ് എന്നിവർ പങ്കെടുക്കും.

സിപിഎം ഭരണത്തിൽ കേരളം ക്രൈം സ്റ്റേറ്റായി മാറി: മുല്ലപ്പള്ളി രാമചന്ദ്രൻ

കണ്ണൂർ: ഒന്പത് വർഷത്തെ സിപിഎം ഭരണത്തിലൂടെ കേരളം കുറ്റകൃത്യങ്ങളുടെ സംസ്ഥാനമായി മാറിയെന്ന് കെപിസിസി മുൻ പ്രസിഡന്‍റ് മുല്ലപ്പള്ളി രാമചന്ദ്രൻ. പെൻഷൻ പരിഷ്കരണ നടപടി ഉടൻ ആരംഭിക്കുക, ആറു ഗഡു ക്ഷാമാശ്വാസം അനുവദിക്കുക, 2021 ന് ശേഷം വിരമിച്ച ജീവനക്കാരുടെ ശമ്പള പരിഷ്കരണ കുടിശിക ഉടൻ വിതരണം ചെയ്യുക തുടങ്ങിയ ആവശ്യങ്ങളുന്നയിച്ചാണ് കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ സംസ്ഥാന വ്യാപകമായി നടത്തുന്ന സമരത്തിന്‍റെ ഭാഗമായി കണ്ണൂർ കളക്ടറേറ്റിനു മുന്നിൽ ആരംഭിച്ച ദ്വിദിന സത്യഗ്രഹം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പി.വി. കൃഷ്ണൻ അധ്യക്ഷത വഹിച്ചു. സംസ്ഥാന പ്രസിഡന്‍റ് എം.പി. വേലായുധൻ,പി. സുഖ്ദേവൻ, ഡോ.കെ.വി. ഫിലോമിന, ടി.ഒ. ഗംഗാധരൻ ,രവീന്ദ്രൻ കൊയ്യോൻ ,കെ.രാധാകൃഷ്ണൻ ,എ.കെ.സുധാകരൻ, കെ.പി. ഭാസ്കരൻ, കെ.സി രാജൻ, പി.പി ചന്ദ്രാംഗതൻ ,എം.കെ. ജോസ് എന്നിവർ പ്രസംഗിച്ചു.

ആറളത്ത് നൂറ് ഹെക്‌ടറിൽ കേരഗ്രാമം പദ്ധതി

ഇരിട്ടി: നാളികേരത്തിന്‍റെ ഉത്പാദനവും ഉത്പാദന ക്ഷമതയും വർധിപ്പിക്കാൻ ആറളം പഞ്ചായത്തിൽ 100 ഹെക്‌ടറിൽ കേരഗ്രാമം പദ്ധതി നടപ്പിലാക്കും. ശാസ്ത്രീയ രീതിയിലുള്ള പുതുകൃഷിക്കും നിലവിലെ കൃഷി സംരക്ഷിച്ച് ഉത്പാദനം വർധിപ്പിക്കുന്നതിനും കർഷകർക്ക് സബ്‌സിഡി ഉൾപ്പെടെ ലഭ്യമാക്കും. മൂന്നുവർഷത്തേക്ക് വിത്തും വളവും മറ്റ് ആനുകൂല്യങ്ങളും ലഭ്യമാക്കുന്നതിനായി 37.67 ലക്ഷം രൂപയും അനുവദിക്കും. പദ്ധതിക്കായി പേരാവൂർ നിയോജക മണ്ഡലത്തിൽ ആറളം പഞ്ചായത്തിനെയാണ് കൃഷി വകുപ്പ് തെരഞ്ഞെടുത്തിരിക്കുന്നതെന്ന് സണ്ണിജോസഫ് എംഎൽഎ അറിയിച്ചു. പദ്ധതി പ്രകാരം ഒന്നാം വർഷം 25.67 ലക്ഷം രൂപയും രണ്ടാംവർഷം എട്ടുലക്ഷം രൂപയും മൂന്നാം വർഷം നാലുലക്ഷം രൂപയുമാണു ധനസഹായമായി നൽകുന്നത്. ആറളം കൃഷിഭവൻ മുഖേന സബ്‌സിഡി കേര കർഷകർക്ക് കൈമാറും.ആറളം ഫാം ഉൾപ്പെടെ പഞ്ചായത്തിൽ 900 ഹെക്‌ടറിലധികം തെങ്ങ് കൃഷിയുണ്ട്. ഇതിൽ 150 ഹെക്‌ടറിലധികം ആറളം ഫാം ഉൾപ്പെടുന്ന പ്രദേശമാണ്. ഫാമിൽ കാട്ടാന, കുരങ്ങ് ശല്യം മൂലം തേങ്ങയുടെ ഉത്പാദനം അഞ്ചിലൊന്നായി കുറഞ്ഞു. ആയിരത്തോളം തെങ്ങുകൾ കാട്ടാനക്കൂട്ടം കുത്തിവീഴ്ത്തി. വലിയ തോതിലുള്ള ഉത്പാദന തകർച്ചയാണു മേഖലയിൽ ഉണ്ടായിരിക്കുന്നത്. പുനർകൃഷി പോലും നടത്താൻ കഴിയാത്ത സാഹചര്യമാണു ഫാമിനുള്ളിലുള്ളത്. പഞ്ചായത്തിന്‍റെ മറ്റു ഭാഗങ്ങളായ പുതിയങ്ങാടി, കീഴ്പ്പള്ളി, ചെടിക്കുളം, കൊക്കോട്, കക്കുവ, പൂതക്കുണ്ട്, ആറളം, വട്ടപ്പറമ്പ് ഭാഗങ്ങളിലാണു കൂടുതലായും കൃഷി ചെയ്യുന്നത്. ഇവിടങ്ങളിലെ കേര കർഷകർക്കാണു പദ്ധതിയിലൂടെ സബ്‌സിഡിയും മറ്റ് ആനുകൂല്യങ്ങളും ലഭ്യമാക്കുക.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]