ADVERTISEMENT

ADVERTISEMENT

ഫ്രാന്‍സിസ് ജോര്‍ജ് എംപിയുടെ ഓഫീസ് ഉദ്ഘാടനം ചെയ്തു

കോട്ടയം: സ്റ്റാര്‍ ജംഗ്ഷനില്‍ പുതിതായി ആരംഭിച്ച കെ. ഫ്രാന്‍സിസ് ജോര്‍ജ് എംപിയുടെ പുതിയ ഓഫീസ് കേരള കോണ്‍ഗ്രസ് ചെയര്‍മാന്‍ പി.ജെ. ജോസഫ് എംഎല്‍എ ഉദ്ഘാടനം ചെയ്തു. തിരുവഞ്ചൂര്‍ രാധാകൃഷ്ണന്‍ എംഎല്‍എ അധ്യക്ഷത വഹിച്ച യോഗത്തില്‍ മോന്‍സ് ജോസഫ് എംഎല്‍എ, പി.സി. തോമസ്, ജോയി ഏബ്രഹാം, യുഡിഎഫ് ജില്ലാ ചെയര്‍മാന്‍ ഇ.ജെ. ആഗസ്തി, കണ്‍വീനര്‍ ഫില്‍സണ്‍ മാത്യൂസ്, കെ.എഫ്. വര്‍ഗീസ്, ഏബ്രഹാം കലമണ്ണില്‍, ജോസ് വള്ളമറ്റം, എം.പി. ജോസഫ്, ജയ്‌സണ്‍ ജോസഫ്, കുസുമാലയം ബാലകൃഷ്ണന്‍, തോമസ് കണ്ണന്തറ, എ.കെ. ജോസഫ്, സന്തോഷ് കാവുകാട്ട്, ജോസ് അമ്പലക്കുളം തുടങ്ങിയവര്‍ പ്രസംഗിച്ചു.

സ്റ്റാര്‍ ജംഗ്ഷനിലുള്ള കേരള കോണ്‍ഗ്രസ് സംസ്ഥാന കമ്മിറ്റി ഓഫീസിനോടു ചേര്‍ന്നാണ് എംപി ഓഫീസ് പ്രവര്‍ത്തിക്കുന്നത്. എംപി ഓഫീസിലെ ഫോണ്‍ നമ്പര്‍: 94474 10002.

ADVERTISEMENT

ഫ്‌ളവറിംഗ് ക്യാമ്പിനു തുടക്കമായി

ഭരണങ്ങാനം: സംസ്ഥാന ന്യൂനപക്ഷ ക്ഷേമവകുപ്പ് ന്യൂനപക്ഷ വിദ്യാര്‍ഥികളുടെ സമഗ്ര വികസനം ലക്ഷ്യമാക്കി നടപ്പിലാക്കുന്ന പാസ്‌വേഡ് 2025-26 ആദ്യ ഘട്ടമായ ട്യൂണിംഗില്‍നിന്നു തെരഞ്ഞെടുക്കപ്പെട്ട കോട്ടയം -ഇടുക്കി ജില്ലകളിലെ ഹയര്‍ സെക്കന്‍ഡറി വിദ്യാര്‍ഥികളെ ഉള്‍പ്പെടുത്തി നടത്തുന്ന ഫ്‌ളവറിംഗ് ക്യാമ്പിനു തുടക്കമായി. ഭരണങ്ങാനം ഓശാന മൗണ്ടില്‍ നടക്കുന്ന സൗജന്യ വ്യക്തിത്വ വികസന കരിയര്‍ ഗൈഡന്‍സ് പരിശീലന ദ്വിദിന സഹവാസ ക്യാമ്പ് പാലാ ആര്‍ഡിഒ കെ.പി. ദീപ ഉദ്ഘാടനം ചെയ്തു. ജില്ലാ പഞ്ചായത്തംഗം രാജേഷ് വാളിപ്ലാക്കല്‍ അധ്യക്ഷത വഹിച്ചു. ഡോ. സിറിയക് തോമസ്, സിസിഎംവൈ കാഞ്ഞിരപ്പള്ളി പ്രിന്‍സിപ്പല്‍ ഡോ. പുഷ്പ മരിയന്‍, കോട്ടയം കളക്ടറേറ്റ് മൈനോരിറ്റി സെല്‍ ജൂണിയര്‍ സൂപ്രണ്ട് ജയശ്രീ, സിസിഎം വൈ തൊടുപുഴ പ്രിന്‍സിപ്പല്‍ ഡോ. വി.എന്‍. ഹസീന എന്നിവര്‍ പ്രസംഗിച്ചു.

ചോദ്യങ്ങളിൽ പതറാതെ സെബാസ്റ്റ്യന്‍; വിട്ടുകൊടുക്കാതെ പോലീസ്

ചേര്‍ത്തല: കടക്കരപ്പള്ളി സ്വദേശിനി ബിന്ദു പത്മനാഭനെ കൊലപ്പെടുത്തിയെന്ന കേസിൽ കസ്റ്റഡിയില്‍ ലഭിച്ച സെബാസ്റ്റ്യനെ ക്രൈംബ്രാഞ്ച് സംഘം വിശദമായി ചോദ്യം ചെയ്തുതുടങ്ങി. ബിന്ദുവിനെ കൊലപ്പെടുത്തിയെന്ന കുറ്റസമ്മതത്തിനപ്പുറം മറ്റു വിവരങ്ങളൊന്നും വെളിപ്പെടുത്താൻ ഇയാൾ കൂട്ടാക്കുന്നില്ല. കൊലപാതകം എവിടെ, എങ്ങനെ,എപ്പോള്‍ എന്നതും മൃതദേഹാവശിഷ്ടങ്ങള്‍ എവിടെയെന്നതുമടക്കം സെബാസ്റ്റ്യനില്‍നിന്ന് അറിഞ്ഞെങ്കിൽ മാത്രമേ കേസ് മുന്നോട്ടുപോകൂ. കോട്ടയം ക്രൈംബ്രാഞ്ചിന്‍റെ 100 മണിക്കൂറും കടന്ന ചോദ്യം ചെയ്യലുകള്‍ക്കു മുന്നിലും പതറാത്ത സെബാസ്റ്റ്യനെ എങ്ങനെ മെരുക്കാമെന്നതിലാണ് സംഘത്തിന്‍റെ വെല്ലുവിളികള്‍. ആദ്യദിന ചോദ്യം ചെയ്യലില്‍ സെബാസ്റ്റ്യന്‍ പതിവു രീതിയില്‍ നിസഹകരണത്തിലാണ്. 2006 വരെ പെൻഷൻ വാങ്ങി 2017ല്‍ പട്ടണക്കാട് പോലീസ് തുടങ്ങിയ അന്വേഷണമാണ് ഇപ്പോള്‍ സംസ്ഥാന ക്രൈംബ്രാഞ്ച് തുടരുന്നത്. പ്രാഥമിക ഘട്ടം മുതല്‍ സെബാസ്റ്റ്യനെ ചുറ്റിപ്പറ്റിയായിരുന്നു അന്വേഷണം. സഹോദരിയെ കാണാനില്ലെന്നു കാട്ടി ബിന്ദു പത്മനാഭന്‍റെ സഹോദരന്‍ പ്രവീണ്‍കുമാര്‍ നല്‍കിയ പരാതിയിലും സെബാസ്റ്റ്യന്‍റെ പങ്കു ചൂണ്ടിക്കാട്ടിയായിരുന്നു. അന്വേഷണത്തില്‍ 2006 പകുതി വരെ അച്ഛന്‍റെ പേരിലുള്ള കുടുംബപെന്‍ഷന്‍ ബിന്ദു ചേര്‍ത്തല ട്രഷറിവഴി കൈപ്പറ്റിയിരുന്നു. ഇതിനു ശേഷമാണ് ബിന്ദു കൊല്ലപ്പെട്ടതെന്ന നിഗമനത്തിലാണ് സംഘം. അച്ഛന്‍റെയും അമ്മയുടെയും മരണത്തെത്തുടര്‍ന്ന് ഒറ്റപ്പെട്ട ബിന്ദു പത്മനാഭന്‍ 2002 മുതല്‍ വസ്തുഇടനിലക്കാരനായ പള്ളിപ്പുറം സ്വദേശി സി.എം. സെബാസ്റ്റ്യനുമായി പരിചയത്തിലായി. പോലീസിന്‍റെ വീഴ്ച ബിന്ദുവിന്‍റെ കോടികള്‍ വിലമതിക്കുന്ന ഭൂമി വിറ്റതിലടക്കം ഇയാളായിരുന്നു ഇടനിലക്കാരന്‍. ബിന്ദു കൊല്ലപ്പെട്ടതായി കരുതുന്ന 2006നു ശേഷവും സെബാസ്റ്റ്യന്‍ ബിന്ദുവിന്‍റെ പേരിലുള്ള വസ്തുക്കള്‍ വ്യാജരേഖകളുണ്ടാക്കി കച്ചവടം നടത്തിയതായി പറയുന്നു. ഏറ്റുമാന്നൂര്‍ സ്വദേശിനി ജയ്‌നമ്മയെ കൊലപ്പെടുത്തിയ കേസിലെ ചോദ്യം ചെയ്യലിനിടെയാണ് സെബാസ്റ്റ്യന്‍ ബിന്ദുവിനെയും കൊലപ്പെടുത്തിയതായി കുറ്റസമ്മതം നടത്തിയത്. 2017ല്‍തന്നെ കാര്യക്ഷമമായ അന്വേഷണം നടന്നിരുന്നെങ്കില്‍ ബിന്ദു പത്മനാഭന്‍ കേസില്‍ സെബാസ്റ്റ്യന്‍ കുടുങ്ങുമായിരുന്നു. എന്നാല്‍, കാര്യമായ പരിശോധനകളോ അന്വേഷണമോ നടത്താതെ ഇയാളെ അന്നത്തെ പോലീസ് സംരക്ഷിച്ചെന്നാണ് ആരോപണം. അന്നു സെബാസ്റ്റ്യനെ കുടുക്കിയിരുന്നെങ്കില്‍ ജയ്‌നമ്മയുടെ ജീവന്‍ നഷ്ടപ്പെടില്ലായിരുന്നു. സെബാസ്റ്റ്യന്‍റെ വീട്ടില്‍ പോലും പേരിനു മാത്രമാണ് പരിശോധന നടത്തിയത്. പ്രാഥമിക അന്വേഷണത്തിലെ തെളിവുകളുടെ അഭാവമാണ് തുടരന്വേഷണം നടത്തിയ ക്രൈംബ്രാഞ്ചിനും വെല്ലുവിളിയായത്.

വികസന സദസിന് ഇന്നു തുടക്കം ; ആദ്യ പരിപാടി അകലക്കുന്നത്ത്

കോട്ടയം: വികസന നേട്ടങ്ങള്‍ ചര്‍ച്ച ചെയ്യുന്നതിനും പുത്തന്‍ ആശയങ്ങള്‍ അവതരിപ്പിക്കുന്നതിനും പൊതുജനങ്ങള്‍ക്ക് അവസരമൊരുക്കുന്ന വികസന സദസിന് ജില്ലയില്‍ ഇന്നു തുടക്കമാകും. ആദ്യ വികസന സദസ് രാവിലെ 10.30ന് അകലക്കുന്നം പഞ്ചായത്തില്‍ നടക്കും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ ഉദ്ഘാടനം നിര്‍വഹിക്കും. പഞ്ചായത്ത് പ്രസിഡന്‍റ് സിന്ധു അനില്‍കുമാര്‍ അധ്യക്ഷത വഹിക്കുന്ന ചടങ്ങില്‍ 2021-25 വര്‍ഷത്തെ പ്രോഗ്രസ് റിപ്പോര്‍ട്ട് ജില്ലാ കളക്ടര്‍ ചേതന്‍ കുമാര്‍ മീണ പ്രകാശനം ചെയ്യും. പാമ്പാടി ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി മുഖ്യപ്രഭാഷണം നടത്തും. ത്രിതല പഞ്ചായത്ത്, ജനപ്രതിനിധികള്‍, ജില്ലയിലെ വിവിധ വകുപ്പ് മേധാവികള്‍ തുടങ്ങിയവര്‍ പങ്കെടുക്കും. തദ്ദേശ സ്വയംഭരണ വകുപ്പും വിവരപൊതുജനസമ്പര്‍ക്ക വകുപ്പും സംയുക്തമായി സംഘടിപ്പിക്കുന്ന വികസന സദസ്, ജില്ലയിലെ എല്ലാ പഞ്ചായത്തുകളിലും മുനിസിപ്പാലിറ്റികളിലും ഒക്ടോബര്‍ 20 വരെ വിവിധ ദിവസങ്ങളില്‍ നടക്കും. വികസന സദസിലെ ചര്‍ച്ചകളുടെ വിശദാംശങ്ങളും അവതരിപ്പിക്കപ്പെടുന്ന പുതിയ ആശയങ്ങളും തദ്ദേശസ്വയംഭരണ വകുപ്പ് മുഖേന സര്‍ക്കാരിന് സമര്‍പ്പിക്കും.

നവംബറില്‍ ഉയരും, തെരഞ്ഞെടുപ്പ് ആരവം

കോട്ടയം: നവംബര്‍ ആദ്യവാരം തുടങ്ങും തദ്ദേശ തെരഞ്ഞെടുപ്പ് ആരവം. അണിയറയില്‍ മൂന്നു മുന്നണികളിലും ചര്‍ച്ചകള്‍ തുടങ്ങി. സ്ഥാനമോഹികള്‍ പൊതുരംഗത്ത് സജീവ സാന്നിധ്യം അറിയിച്ചുതുടങ്ങി. നിലവില്‍ ജില്ലയില്‍ ആകെ 16,23,269 വോട്ടര്‍മാരുണ്ട്. 77,6362 പുരുഷന്മാരും 84,6896 സ്ത്രീകളും ട്രാന്‍സ്ജെന്‍ഡര്‍ വിഭാഗത്തില്‍ 11 പേരുമാണു പട്ടികയിലുള്ളത്. അടുത്ത മാസം പട്ടികയില്‍ നേരിയ വര്‍ധനവുണ്ടാകും. ഒരു ജില്ലാ പഞ്ചായത്തും 72 ഗ്രാമപഞ്ചായത്തുകളും 11 ബ്ലോക്ക് പഞ്ചായത്തുകളും ആറ് നഗരസഭകളുമാണ് ജില്ലയിലുള്ളത്. സ്ഥാനമോഹികള്‍ക്ക് ടെന്‍ഷന്‍ ഓണം ബംപര്‍ ലോട്ടറി നറുക്കെടുപ്പിനെക്കാള്‍ പ്രധാനമാണ് അടുത്ത മാസം നടക്കുന്ന വാര്‍ഡുകളുടെ നറുക്കെടുപ്പ്. നറുക്കെടുപ്പില്‍ വാര്‍ഡ് സംവരണമായാല്‍ സ്ഥാനമോഹികള്‍ക്ക് മത്സരിക്കാന്‍ അഞ്ചു വര്‍ഷം കാത്തിരിക്കണം. അതല്ലെങ്കില്‍ മറ്റൊരു വാര്‍ഡില്‍ സ്ഥാനാര്‍ഥിയാകണം. പട്ടിക ജാതി, വര്‍ഗ വിഭാഗത്തിന് സംവരണത്തിലോ ജനറലിലോ അവര്‍ക്ക് എവിടെയും മത്സരിക്കാം. പട്ടികജാതി, വര്‍ഗ വിഭാഗം സ്ത്രീകള്‍ ഏതു സീറ്റിലും മത്സരിക്കാന്‍ യോഗ്യരാണ്. തദ്ദേശത്തില്‍ പുരുഷന് സംവരണ സീറ്റില്ല. തലനാട് പുതിയ ഡിവിഷന്‍ ജില്ലാ പഞ്ചായത്തില്‍ ഒരു ഡിവിഷന്‍ വര്‍ധിച്ച് 23 ഡിവിഷനുകളുണ്ട്. തലനാട് ഡിവിഷനാണ് പുതിയതായി രൂപീകരിച്ചത്. പഴയ മുണ്ടക്കയം, പൂഞ്ഞാര്‍ ഡിവിഷനുകളില്‍നിന്നുള്ള പ്രദേശങ്ങള്‍ ഉള്‍പ്പെടുന്നതാണ് തലനാട്. പുതിയ ഡിവിഷനില്‍ 67,292 വോട്ടര്‍മാരുണ്ട്. ഈരാറ്റുപേട്ട ബ്ലോക്കില്‍നിന്ന് മേലുകാവ്, മൂന്നിലവ്, തലനാട്, തീക്കോയി, കല്ലേക്കുളം, പാതാമ്പുഴ, കളത്തുക്കടവ് എന്നീ സ്ഥലങ്ങളും കാഞ്ഞിരപ്പള്ളിയില്‍നിന്നു കൂട്ടിക്കലുമാണ് ഡിവിഷനില്‍ പുതിയ ഡിവിഷനില്‍ ചേര്‍ത്തത്. തലനാടിന്‍റെ സമീപ ഡിവിഷനുകള്‍ ഭരണങ്ങാനവും പൂഞ്ഞാറുമാണ്. മറ്റു ഡിവിഷനുകളിലും അതിര്‍ത്തികള്‍ മാറി. എരുമേലി ഡിവിഷനിലായിരിക്കും ഇനി മണിമല പഞ്ചായത്ത്. കൂടാതെ വെള്ളാവൂര്‍ പഞ്ചായത്തിന്‍റെ ഭാഗങ്ങളും ചേര്‍ത്തു.

മാതൃകയായി മണര്‍കാട് കോഴിവളര്‍ത്തല്‍ കേന്ദ്രം

മണര്‍കാട്: പ്രദേശിക കോഴിവളര്‍ത്തല്‍ കേന്ദ്രത്തില്‍ കോഴിക്കുഞ്ഞുങ്ങളും കോഴിയും മുട്ടയും മാത്രമല്ല നല്ല ജൈവ പച്ചക്കറികളും ഇനി ലഭിക്കും. വിഷരഹിത പച്ചക്കറി ഉത്പാദനത്തിനു മാതൃകയായിരിക്കുകയാണ് കോഴിവളര്‍ത്തല്‍ കേന്ദ്രം. കാര്‍ഷിക വികസന കര്‍ഷകക്ഷേമ വകുപ്പ് നടപ്പിലാക്കുന്ന സമഗ്ര പച്ചക്കറി ഉത്പാദന യജ്ഞം സ്ഥാപനങ്ങളിലെ പദ്ധതി അധിഷ്ഠിത പച്ചക്കറി കൃഷിയുടെ ഭാഗമായി കൃഷിവകുപ്പിന്‍റെയും ജില്ലാ പഞ്ചായത്തിന്‍റെയും മേല്‍നോട്ടത്തില്‍ 50 സെന്‍റില്‍ പടവലം, വെണ്ട, തക്കാളി, വഴുതന, പച്ചമുളക് എന്നിവയാണ് കൃഷി ചെയ്യുന്നത്. പച്ചക്കറി കൃഷിയുടെ വിളവെടുപ്പ് പഞ്ചായത്ത് പ്രസിഡന്‍റ് കെ.സി. ബിജു നിര്‍വഹിച്ചു. ജില്ലാ മൃഗസംരക്ഷണ ഓഫീസര്‍ ഡോ. പി.കെ. മനോജ്കുമാര്‍, പഞ്ചായത്ത് കൃഷി ഓഫീസര്‍ എ.ആര്‍. ഗൗരി, പാമ്പാടി വെറ്ററിനറി ഹോസ്പിറ്റല്‍ സീനിയര്‍ സര്‍ജന്‍ ഡോ. ലിനി ചന്ദ്രന്‍, കൃഷിവകുപ്പ് ഉദ്യോഗസ്ഥര്‍, ഫാം ജീവനക്കാര്‍ തുടങ്ങിയവര്‍ പങ്കെടുത്തു.

പച്ചക്കറി ഉത്പാദന യജ്ഞം വിജയത്തിലേക്ക്

ജില്ലയില്‍ ഈ വര്‍ഷം 679 ഹെക്ടറില്‍ക്കൂടി പച്ചക്കറി കൃഷി കോട്ടയം: പച്ചക്കറി ഉത്പാദനത്തില്‍ സ്വയംപര്യാപ്തത ലക്ഷ്യമിട്ടുള്ള പ്രവര്‍ത്തനങ്ങള്‍ ജില്ലയില്‍ വിജയവഴിയില്‍. പദ്ധതിയുടെ ഭാഗമായി ഈ വര്‍ഷം അധികമായി 679 ഹെക്ടര്‍ സ്ഥലത്ത് കൃഷി വ്യാപിപ്പിക്കുന്നതിനുള്ള കാര്‍ഷിക വികസന-കര്‍ഷക ക്ഷേമ വകുപ്പിന്‍റെ നടപടികള്‍ പുരോഗമിക്കുന്നു. അഞ്ചു വര്‍ഷത്തിനുള്ളില്‍ ജില്ലയില്‍ ആവശ്യമുള്ളത്ര പച്ചക്കറികള്‍ ഇവിടെത്തന്നെ ഉത്പാദിപ്പിക്കാന്‍ കഴിയുന്ന നിലയിലേക്ക് എത്തുകയാണ് ലക്ഷ്യം. കഴിഞ്ഞ വര്‍ഷം 6673 ഹെക്ടറിലാണ് പച്ചക്കറിക്കൃഷി ഉണ്ടായിരുന്നത്. കാര്‍ഷിക വികസന, കര്‍ഷകക്ഷേമ വകുപ്പിന്‍റെയും തദ്ദേശ സ്വയംഭരണ വകുപ്പിന്‍റെയും സംയുക്ത നേതൃത്വത്തില്‍ വിവിധ വകുപ്പുകളുടെ സഹകരണത്തോടെയാണ് സമഗ്ര പച്ചക്കറി ഉത്പാദനയജ്ഞം ആരംഭിച്ചത്. ഇതിനായി ജില്ലാ, ബ്ലോക്ക്, പഞ്ചായത്ത് തലങ്ങളില്‍ സമിതികള്‍ പ്രവര്‍ത്തിക്കുന്നുണ്ട്. പ്രദേശത്തിന് അനുയോജ്യമായ വിളകള്‍ തദ്ദേശസ്വയംഭരണ സ്ഥാപനങ്ങള്‍ തയാറാക്കുന്ന ഉത്പാദന പ്ലാനുകളുടെ അടിസ്ഥാനത്തില്‍ ഓരോ പ്രദേശത്തിനും അനുയോജ്യമായ വിളകള്‍ തെരഞ്ഞെടുത്താണു കൃഷി. പദ്ധതി നടത്തിപ്പിനായി ജില്ലയില്‍ കൃഷിവകുപ്പ് 3.8 കോടി രൂപയും തദ്ദേശ സ്വയംഭരണ സ്ഥാപനങ്ങള്‍ 4.1 കോടി രൂപയും അനുവദിച്ചിട്ടുണ്ട്. 51 ക്ലസ്റ്ററുകളിലായി 255 ഹെക്ടര്‍ സ്ഥലത്താണ് കൃഷിവകുപ്പിന്‍റെ നേതൃത്വത്തില്‍ കൃഷിയിറക്കുന്നത്. ക്ലസ്റ്റര്‍ അടിസ്ഥാനത്തിലല്ലാതെ 70 ഹെക്ടറിലും കൃഷി ചെയ്യും. ഇതിനു പുറമേ വിദ്യാഭ്യാസം, മൃഗസംരക്ഷണം വകുപ്പുകള്‍ വഴിയും വിദ്യാഭ്യാസ സ്ഥാപനങ്ങളുടെയും ഓഫീസുകളുടെയും വളപ്പുകളില്‍ കൃഷി ചെയ്യും. വീട്ടുവളപ്പുകളില്‍ ലഭ്യമായ സ്ഥലത്തും കൃഷിവകുപ്പിന്‍റെ ഉടമസ്ഥതയിലുള്ള സര്‍ക്കാര്‍ ഫാമുകളിലും കൃഷി ചെയ്യും. മട്ടുപ്പാവുകളിലും ഫ്‌ളാറ്റുകളിലെ ബാല്‍ക്കണികളിലും ചട്ടികളിലുള്ള പച്ചക്കറികൃഷി പ്രോത്സാഹിപ്പിക്കുകയും ചെയ്യും. പച്ചക്കറിക്കൃഷിക്ക് അനുയോജ്യമായ മുഴുവന്‍ തരിശുഭൂമിയും കണ്ടെത്തി പ്രയോജനപ്പെടുത്തുന്നതിന് തൊഴിലുറപ്പു തൊഴിലാളികളുടെയും കര്‍ഷകഗ്രൂപ്പുകളുടെയും കൃഷിക്കൂട്ടങ്ങളുടെയും സേവനം പ്രയോജനപ്പെടുത്തും. ആറുലക്ഷം പച്ചക്കറിത്തൈകൾ വീട്ടുവളപ്പുകളിലെ കൃഷിക്കായി 100 രൂപ വിലയുള്ള 5000 ഹൈബ്രിഡ് പച്ചക്കറി വിത്തുപാക്കറ്റുകള്‍ വിഎഫ്പിസികെ മുഖേന ഇതിനോടകം സൗജന്യമായി വിതരണം ചെയ്തു. കൃഷിഭവനുകള്‍ വഴി ആറുലക്ഷം പച്ചക്കറിത്തൈകളുടെ വിതരണം പൂര്‍ത്തിയായിവരുന്നു. മട്ടുപ്പാവ് കൃഷിയുടെ ഭാഗമായി ഗ്രോബാഗിനു പകരം എച്ച്ഡിപിഇ ബാഗുകളിലോ ചട്ടികളിലോ പച്ചക്കറികൃഷി ചെയ്യുന്നതിന് യൂണിറ്റിന് (25 എണ്ണം) 3750 രൂപ സബ്‌സിഡി നിരക്കില്‍ ജില്ലയില്‍ 600 യൂണിറ്റുകള്‍ക്കായി 22.5 ലക്ഷം രൂപ നീക്കിവച്ചിട്ടുണ്ട്. തരിശുനിലം കൃഷിയോഗ്യമാക്കുന്നതിന് 12 ഹെക്ടര്‍ സ്ഥലത്തേക്ക് 4.8 ലക്ഷം രൂപ ചെലവിടും. ജില്ലയ്ക്കാവശ്യമായതില്‍ 65 ശതമാനം പച്ചക്കറികളേ നിലവില്‍ ഇവിടെ ഉത്പാദിപ്പിക്കുന്നുള്ളൂ എന്നാണ് കണക്ക്. കുറവ് നികത്താന്‍ ഓരോ വര്‍ഷവും 600 ഹെക്ടറിലെങ്കിലും പുതിയതായി പച്ചക്കറികൃഷി വ്യാപിപ്പിക്കാനാണ് കൃഷി വകുപ്പ് ലക്ഷ്യമിടുന്നതെന്ന് കൃഷി വകുപ്പ് ഡെപ്യൂട്ടി ഡയറക്ടര്‍ റെജിമോള്‍ തോമസ് പറഞ്ഞു.

ബസ് സർവീസ് പുനരാരംഭിച്ചു

കാഞ്ഞിരപ്പള്ളി: എരുമേലി - മാങ്കുളം - വിഴിക്കത്തോട് വഴിയുള്ള കെഎസ്ആർടിസി ബസ് സർവീസ് പുനരാരംഭിച്ചു. ഇതു സംബന്ധിച്ച് കേരള കോൺഗ്രസ് മണ്ഡലം കമ്മിറ്റി നിവേദനം നൽകിയിരുന്നു. കെഎസ്ആർടിസി ബസിന് കല്ലറകാവ് ജംഗ്ഷനിൽ സ്വീകരണം നൽകി. ജോയി മുണ്ടാമ്പള്ളി, ലാൽജി മാടത്താനിക്കുന്നേൽ, വിൽ‌സൺ ജേക്കബ് അമ്പാട്ടുപറമ്പിൽ, ജോസക്കുട്ടി കുറ്റുവേലിൽ, തോമാച്ചൻ ചിറ്റടിയിൽ, ജോബി മടുക്കക്കുഴി, പ്രേംസൺ മണ്ണംപ്ലാക്കൽ, ബെന്നി ചാക്കോ അമ്പാട്ടുപറമ്പിൽ, വിൻസ് വെട്ടിക്കാട്ട് എന്നിവർ പങ്കെടുത്തു.

ജീവിതോത്സവം 2025 - ജില്ലാതല ഉദ്ഘാടനം

കാഞ്ഞിരപ്പള്ളി: പൊതുവിദ്യാഭ്യാസ വകുപ്പിന്‍റെയും ഹയർ സെക്കൻഡറി നാഷണൽ സർവീസ് സ്കീമിന്‍റെയും ആഭിമുഖ്യത്തിൽ നടത്തപ്പെടുന്ന ജീവിതോത്സവം 2025ന്‍റെ ജില്ലാതല ഉദ്ഘാടനം കാഞ്ഞിരപ്പള്ളി സെന്‍റ് ഡൊമിനിക്സ് ഹയർ സെക്കൻഡറി സ്കൂളിൽ നടത്തി. കാഞ്ഞിരപ്പള്ളി പഞ്ചായത്ത് പ്രസിഡന്‍റ് കെ.ആർ. തങ്കപ്പൻ ഉദ്ഘാടനം ചെയ്തു. സ്കൂൾ മാനേജർ റവ.ഡോ. കുര്യൻ താമരശേരി അധ്യക്ഷത വഹിച്ചു. ദക്ഷിണ മേഖല - രണ്ട് റീജിയണൽ കോഓർഡിനേറ്ററും കോട്ടയം ജില്ലാ കൺവീനറുമായ ആർ. രാഹുൽ പദ്ധതി വിശദീകരണം നടത്തി. പ്രിൻസിപ്പൽ മേഴ്സി ജോൺ, കാഞ്ഞിരപ്പള്ളി ക്ലസ്റ്റർ കൺവീനർ ബിനോ കെ. തോമസ്, പിടിഎ പ്രസിഡന്‍റ് റെജി കൊച്ചുകരിപ്പാപറമ്പിൽ, എൻഎസ്എസ് ലീഡർ ജോ മരിയ, എൻഎസ്എസ് പ്രോഗ്രാം ഓഫീസർ ജോബി സെബാസ്റ്റ്യൻ എന്നിവർ പ്രസംഗിച്ചു. പരിപാടിയിൽ കുട്ടികൾ ജീവിതോത്സവം പ്രതിജ്ഞയെടുത്തു.

ജനവാസ കേന്ദ്രത്തില്‍ പാറമട തുടങ്ങാന്‍ ശ്രമം; പ്രതിഷേധവുമായി നാട്ടുകാര്‍

പാറത്തോട്: പഞ്ചായത്തിലെ ഒമ്പത്, 12, 13 വാര്‍ഡുകളിലെ ജനവാസ മേഖലയ്ക്ക് നടുവിലായി പാറമടകള്‍ തുടങ്ങുവാനുള്ള നീക്കത്തിനെതിരേ നാട്ടുകാര്‍ പ്രതിഷേധവുമായി രംഗത്ത്. ഇടക്കുന്നം സിഎസ്‌ഐ ഉന്നതിയിലെ പട്ടികവര്‍ഗക്കാര്‍ ഉള്‍പ്പെടെ നിരവധി ആള്‍ക്കാര്‍ തിങ്ങിപ്പാര്‍ക്കുന്നതിനു സമീപത്താണ് നാലു പാറമടകള്‍ തുടങ്ങാന്‍ നീക്കം നടക്കുന്നത്. പാറമട തുടങ്ങാനുള്ള നീക്കത്തിനെതിരേ ഇടക്കുന്നം സിഎസ്‌ഐ പാരിഷ് ഹാളില്‍ നടന്ന പ്രതിഷേധ യോഗം സെന്‍റ് തോമസ് പള്ളി വികാരി ഫാ. മേബിള്‍ ജോസഫ് ഉദ്ഘാടനം ചെയ്തു. ഇടക്കുന്നം ഊരുകൂട്ടം പ്രസിഡന്‍റ് ബേബി പൗലോസ് വാക്കയില്‍ അധ്യക്ഷത വഹിച്ചു. ഇടക്കുന്നം കുരിപ്പാറ പള്ളി ഇമാം ടി.കെ. സുബൈര്‍ മൗലവി, ഹിദായത്തുല്‍ മുസ്‌ലിം ജമാഅത്ത് ഉസ്താദ് ഹംസ മൗലവി, ബ്ലോക്ക് പഞ്ചായത്ത് മെംബര്‍ ടി.ജെ. മോഹനന്‍, ഐടിഡിപി ഓഫീസര്‍ ജയേഷ്, വാര്‍ഡ് മെംബര്‍മാരായ കെ.യു. അലിയാര്‍, സുമിന അലിയാര്‍, ജോസ്‌ന ജോസ്, ജമാഅത്ത് പ്രസിഡന്‍റ് അബ്ദുള്‍ റഷീദ് തുടങ്ങിയവര്‍ പ്രസംഗിച്ചു. പരിസ്ഥിതി പ്രവര്‍ത്തകന്‍ നോയല്‍ വി. സാമുവേല്‍ ക്ലാസ് നയിച്ചു. തുടര്‍ പ്രവര്‍ത്തനങ്ങള്‍ക്കായി പതിനഞ്ച് അംഗ കമ്മിറ്റിയെ തെരഞ്ഞെടുത്തു.

പുഞ്ചവയൽ സെന്‍റ് സെബാസ്റ്റ്യൻ പള്ളിയുടെ രജത ജൂബിലി സമാപനം 28ന്

പുഞ്ചവയൽ: സെന്‍റ് സെബാസ്റ്റ്യൻ പള്ളിയുടെ രജത ജൂബിലി സമാപനവും സ്നേഹ ഭവനത്തിന്‍റെ വെഞ്ചെരിപ്പും 28ന് നടക്കും. രാവിലെ ഒന്പതിന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ വിശുദ്ധ കുർബാനയർപ്പിക്കും. 11ന് നടക്കുന്ന രജത ജൂബിലി സമ്മേളനം വികാരി ഫാ.സെബാസ്റ്റ്യൻ കിടങ്ങത്താഴത്തിന്‍റെ അധ്യക്ഷതയിൽ മാർ ജോസ് പുളിക്കൽ ഉദ്ഘാടനം ചെയ്യും. ഉച്ചകഴിഞ്ഞ് 2.30ന് ജൂബിലിയുടെ ഭാഗമായി നിർമിച്ചു നൽകുന്ന സ്നേഹ ഭവനത്തിന്‍റെ വെഞ്ചെരിപ്പ് നടക്കും. രാത്രി എഴിന് നാടകം. ഫാ. വർഗീസ് പരിന്തിരിക്കൽ പുഞ്ചവയൽ സെന്‍റ് സെബാസ്റ്റ്യൻ പള്ളിയുടെ വികാരിയായിരിക്കെ 1997 ജൂൺ എട്ടിന് പുഞ്ചവയൽ പുതിയ പള്ളിയുടെ ശിലാസ്ഥാപനം മാർ മാത്യു വട്ടക്കുഴി നിർവഹിച്ചു. 2000 ഒക്ടോബർ ഒന്നിനായിരുന്നു പുതിയ ദേവാലയത്തിന്‍റെ കൂദാശ.

കൊക്കോ കർഷക സെമിനാറും പഠനക്ലാസും

മണിമല: ബ്രൗൺ ഗോൾഡ് കൊക്കൊ പ്രൊഡ്യൂസർ കന്പനി, സിപിസിആർഐ, നബാർഡ്, മണിമല ലയൺസ് ക്ലബ് എന്നിവയുടെ സംയുക്താഭിമുഖ്യത്തിൽ കൊക്കോ കർഷക സെമിനാറും പഠനക്ലാസും നടത്തി. നബാർഡ് കേരള സിജിഎം നാഗേഷ്കുമാർ അനുമല ഉദ്ഘാടനം ചെയ്തു. നബാർഡ് ജില്ലാ മാനേജർ റെജി വർഗീസ് അധ്യക്ഷത വഹിച്ചു. കായംകുളം തോട്ടവിള ഗവേഷണകേന്ദ്രം മേധാവി ഡോ. റെജി ജെ. തോമസ്, എസ്. രാജേഷ് കുമാർ, വി.ജെ. ജോർജ് കുളങ്ങര, ലാലിച്ചൻ ഫ്രാൻസിസ്, ടോം ജോർജ്, പ്രഫ. സണ്ണി സ്കറിയ, ഡോ. കെ.എം. അനസ് തുടങ്ങിയവർ പ്രസംഗിച്ചു. മികച്ച കൊക്കോ കർഷകനുള്ള ദേശീയ അവാർഡ് നേടിയ കെ.ജെ. വർഗീസിനെ യോഗത്തിൽ അനുമോദിച്ചു. ഡോ. എ. ജോസഫ് രാജ്കുമാർ, അജീഷ് പി. ജോസഫ് എന്നിവർ ക്ലാസ് നയിച്ചു.

കനത്ത മഴ; ഓടകൾ നിറഞ്ഞു, ചിറ്റാർപുഴയിൽ ജലനിരപ്പ് ഉയർന്നു

കാഞ്ഞിരപ്പള്ളി: കനത്ത മഴയിൽ കാഞ്ഞിരപ്പള്ളിയിൽ ചിറ്റാർപുഴയിലടക്കം ജലനിരപ്പ് ഉയർന്നു. ഇന്നലെ രാവിലെ 11ാടെ ആരംഭിച്ച മഴ ഉച്ചകഴിഞ്ഞ് 2.30 വരെ നീണ്ടു. മണിക്കൂറോളം പെയ്ത അതിശക്തമായ മഴയിൽ ഓടകൾ നിറഞ്ഞ് വെള്ളം റോഡിലേക്ക് ഒഴുകുകയും കൈത്തോടുകളിലും ചിറ്റാർപുഴയിലും ജലനിരപ്പ് ഉയരുകയും ചെയ്തു. മിറ്റെലുകളും മണ്ണും ചെളിയും റോഡിലേക്ക് ഒഴുകിയെത്തി ചിതറിക്കിടന്നത് ഇരുചക്രയാത്രക്കാരെ ഏറെ ദുരിതത്തിലാക്കി. പഞ്ചായത്ത് ഓഫീസ് വളവിൽ നിന്നടക്കം ഒഴുകിയെത്തിയ വെള്ളം കുരിശുങ്കൽ ജംഗ്ഷനിലെ ടാക്സി സ്റ്റാൻഡിലും കയറുന്ന സ്ഥിതിയുണ്ടായി. വെള്ളക്കെട്ട് കാൽനടയാത്രക്കാരെയും മണിമല ഭാഗത്തേക്ക് ബസ് കാത്തുനിന്ന യാത്രക്കാരെയും ഏറെ ബുദ്ധിമുട്ടിലാക്കി. കനത്ത മഴയിൽ കുരിശുങ്കൽ ജംഗ്ഷനിലെ കംഫർട്ട് സ്റ്റേഷനിലെ സീലിംഗ് അടർന്നു. താലൂക്കിലാകെ ശക്തമായ മഴയാണ് ഇന്നലെ ഉണ്ടായത്.

ഇങ്ങനെ പോയാൽ റോഡ് വീടിനകത്താകും; പ്രതിഷേധവുമായി ഏഴ് കുടുംബങ്ങൾ

കാഞ്ഞിരപ്പള്ളി: കാഞ്ഞിരപ്പള്ളി - മണിമല - കുളത്തൂർമൂഴി കർഷക സൗഹൃദ ലിങ്ക് റോഡ് നിർമാണത്തിനെതിരേ വീട്ടുകാരുടെ പ്രതിഷേധവും പരാതിയും. കാഞ്ഞിരപ്പള്ളി - മണിമല റോഡിൽ മണ്ണാറക്കയം ലക്ഷ്മീനാരായണ ക്ഷേത്രത്തിനു സമീപത്തുനിന്നു മണിമല ഭാഗത്തേക്കുള്ള 360 മീറ്റർ ഭാഗത്തെ റോഡ് നവീകരണത്തിനെതിരെയാണ് ഈ ഭാഗത്തു പുറമ്പോക്കിൽ താമസിക്കുന്ന ഏഴ് വീട്ടുകാർ പ്രതിഷേധമുയർത്തുന്നതും പരാതിയുമായി കോടതിയെ സമീപിച്ചതും. വീടു പോകുമെന്നു പരാതി ഈ ഭാഗത്ത് അശാസ്ത്രീയ അലൈൻമെന്‍റാണ് നിശ്ചയിച്ചിരിക്കുന്നതെന്നും ഇതുപ്രകാരം റോഡിനു വീതി കൂട്ടിയാൽ തങ്ങളുടെ വീടുകളുടെ അകത്തുകൂടി റോഡ് വരുമെന്നുമാണ് ഇവരുടെ ആരോപണം. തങ്ങളുടെ വീടുകൾ സ്ഥിതി ചെയ്യുന്നതിന്‍റെ എതിർഭാഗത്തു റോഡരികിലെ പൊതുമരാമത്ത് പുറമ്പോക്കു സ്ഥലം സ്വകാര്യ വ്യക്തികൾ കൈയേറി വച്ചിരിക്കുകയാണെന്നും ഇതു തിരിച്ചുപിടിച്ച് അവിടെ റോഡിനു വീതി കൂട്ടണമെന്നുമാണ് ഇവരുടെ ആവശ്യം. നിലവിലുള്ള ടാറിംഗിന്‍റെ വീതി വർധിപ്പിച്ചു വശങ്ങളിൽ കോൺക്രീറ്റിംഗും നടത്തിയ ശേഷം ഓട നിർമിക്കണമെങ്കിൽ തങ്ങളുടെ വീടിനകത്തുകൂടി നിർമിക്കേണ്ട സ്ഥിതിയുണ്ടാകുമെന്നും ഇവർ പറയുന്നു. സ്വകാര്യ വ്യക്തികൾക്കുവേണ്ടി കരാറുകാരനും ജനപ്രതിനിധികളും ഒത്തുകളിക്കുകയാണെന്നും ഇവർ ആരോപിച്ചു. ഇത്രയും ഭാഗത്തെ അശാസ്ത്രീയ നവീകരണ പ്രവർത്തനങ്ങളോടു മാത്രമാണ് തങ്ങൾക്ക് എതിർപ്പെന്നും ബാക്കിയുള്ള ഭാഗത്തെ നവീകരണത്തിന് എതിർപ്പില്ലെന്നും ഇവർ പത്രസമ്മേളനത്തിൽ പറഞ്ഞു. കെ.എസ്. വിജയകുമാർ, കെ.എച്ച്. ഹുസൈൻ, വി.പി. ജയകുമാർ, വിഷ്ണു രാമേശ്, വി. ഭാസ്കരൻ ഗോപാലകൃഷ്ണൻ, വി.സി. ജോസ്, പി.കെ. വിജയൻ എന്നിവർ പത്രസമ്മേളനത്തിൽ പങ്കെടുത്തു. ‘വീടുകൾക്ക് നാശനഷ്ടമുണ്ടാകില്ല’ കാഞ്ഞിരപ്പള്ളി - മണിമല - കുളത്തൂർമൂഴി കർഷക സൗഹൃദ ലിങ്ക് റോഡ് നിർമാണത്തിൽ മണ്ണാറക്കയം ഭാഗത്തെ ഏഴ് വീടുകൾക്ക് ഒരു നാശനഷ്ടമുണ്ടാകാതെയാണ് നിർമാണം നടത്തുന്നത്. പ്രദേശവാസികളെ ബുദ്ധിമുട്ടിക്കാത്ത രീതിയിലാണ് ക്രമീകരിച്ചിരിക്കുന്നത്. ഇപ്പോൾ തെറ്റിദ്ധാരണയുടെ പുറത്താണ് ഈ ഏഴു വീട്ടുകാർ പ്രതിഷേധവുമായി രംഗത്തെത്തിയിരിക്കുന്നത്. - ഡോ.എൻ. ജയരാജ് എംഎൽഎ. ‘വീടുകളെ ബാധിക്കും’ നിലവിലെ റോഡ് നിർമാണം ബുദ്ധിമുട്ട് ഉണ്ടാക്കാതെയാണെന്ന് അധികൃതർ പറയുന്നുണ്ടെങ്കിലും ഭാവിയിൽ ഫുട്പാത്ത് നിർമാണം വരുന്പോൾ ഞങ്ങളുടെ വീടുകളെ ബാധിക്കും. മണ്ണാറക്കയം ലക്ഷ്മീനാരായണ ക്ഷേത്രത്തിനു സപം കാഞ്ഞിരപ്പള്ളിയിൽനിന്നു മണിമലയിലേക്കു പോകുന്പോൾ വലത്തുവശത്തുള്ള പുറന്പോക്ക് ഭൂമിയിലേക്കു റോഡ് കയറ്റി നിർമിക്കുകയാണെങ്കിൽ ഈ പ്രശ്നം തീരും. എന്നാൽ, അധികൃതർ അതിനു തയാറാകുന്നില്ല. - അരുൺ ഗോപാലകൃഷ്ണൻ (നാട്ടുകാരൻ).

ജില്ല ഇന്‍റർ സ്കൂൾ ചെസ് ചാമ്പ്യൻഷിപ്പ് ചെമ്മലമറ്റത്ത്

ചെമ്മലമറ്റം: പൊതുവിദ്യാഭ്യാസ വകുപ്പ് നടത്തുന്ന കോട്ടയം റവന്യൂ ജില്ല ഇന്‍റർ സ്കൂൾ ചെസ് ചാമ്പ്യൻഷിപ്പിന് ചെമ്മലമറ്റം ലിറ്റിൽ ഫ്ലവർ ഹൈസ്കൂൾ ആതിഥേയത്വം വഹിക്കും കോട്ടയം ജില്ലയിലെ 13 സബ്ജില്ലകളിൽ നിന്നും തെരഞ്ഞെടുക്കപ്പെട്ട വിദ്യാർഥികളാണ് മാറ്റുരയ്ക്കുന്നത്. സബ്ജൂനിയർ, ജൂനിയർ, സീനിയർ, എന്നീ വിഭാഗങ്ങളിൽ പെൺകുട്ടികൾക്കും ആൺകുട്ടികൾക്കും പ്രത്യേകം മത്സരങ്ങൾ ഉണ്ട്. ആറു വിഭാഗങ്ങളിലും ആദ്യ രണ്ടു സ്ഥാനം നേടുന്നവർ പാലക്കാട്ടു നടക്കുന്ന സംസ്ഥാന ചെസ്റ്റ് ചാമ്പ്യൻഷിപ്പിൽ ജില്ലയെ പ്രതിനിധീകരിക്കും. ഇന്ന് രാവിലെ 8 30ന് രജിസ്ട്രേഷൻ ആരംഭിക്കും. 9 30ന് ഹെഡ്മാസ്റ്റർ ജോബറ്റ് തോമസ്, സ്കൂൾ മാനേജർ സെബാസ്റ്റ്യൻ കൊല്ലംപറമ്പിൽ എന്നിവരുടെ സാന്നിധ്യത്തിൽ മത്സരം ആരംഭി ക്കും. ലോക ഫെഡറേഷൻ, ഓൾ ഇന്ത്യ ചെസ് ഫെഡറേഷൻ എന്നിവയുടെ നിയമാവലി പ്രകാരം ലീഗ് അടിസ്ഥാനത്തിൽ ആയിരിക്കും മത്സരങ്ങൾ നടത്തുന്നത്. അന്താരാഷ്ട്രസ് ആർബിറ്റർ, ചെമ്മലമറ്റം സ്കൂളിലെ ഗണിതശാസ്ത്ര അധ്യാപകനായ ജിസ്മോൻ മാത്യു മത്സരങ്ങൾ നിയന്ത്രിക്കും.

തുടര്‍ച്ചയായി ഹാജരായില്ല; പാലാ നഗരസഭാ കൗണ്‍സിലറെ അയോഗ്യയാക്കി

പാലാ: നഗരസഭ 13 ാം വാര്‍ഡ് കൗണ്‍സിലറും പൊതുമരാമത്ത് സ്റ്റാന്‍ഡിംഗ് കമ്മിറ്റി അധ്യക്ഷയും സിപിഐയുടെ ഏക അംഗവുമായിരുന്ന ആര്‍. സന്ധ്യയെ കൗണ്‍സിലര്‍ സ്ഥാനത്തു നിന്ന് അയോഗ്യയാക്കി. ആര്‍.സന്ധ്യ വ്യക്തിപരമായ ആവശ്യത്തിന് വിദേശത്ത് പോകുന്നതിന് 2024 സെപ്റ്റംബര്‍ മൂന്നിന് മൂന്ന് മാസത്തേക്ക് അവധിക്ക് കൊടുത്ത അപേക്ഷ കൗണ്‍സില്‍ അനുവദിച്ചിരുന്നു. തിരികെ വരുന്നതിന് താമസം നേരിടുന്നതിനാല്‍ 2024 ഫെബ്രുവരി രണ്ട് വരെ അവധി നീട്ടി നല്‍കണമെന്നാവശ്യപ്പെട്ട് നല്‍കിയ അപേക്ഷയും കൗണ്‍സില്‍ അനുവദിച്ചിരുന്നു. 2025 ഫെബ്രുവരി 12 നു നടത്തിയ ഉപാധ്യക്ഷന്‍ തെരഞ്ഞെടുപ്പിലും ഫെബ്രുവരി 14 നു ചെയര്‍മാന്‍ ഷാജു തുരത്തനെതിരേ നടന്ന അവിശ്വാസ പ്രമേയ ചര്‍ച്ചയിലും 17 നു നടത്തിയ അടിയന്തര കൗണ്‍സിലിലും ആര്‍.സന്ധ്യ പങ്കെടുത്തിരുന്നു. നഗര സഭാധ്യക്ഷനായിരുന്ന കേരള കോണ്‍ഗ്രസ്-എമ്മിലെ ഷാജു തുരുത്തനെ പുറത്താക്കാന്‍ വോട്ടു ചെയ്യുന്നതിനാണ് ആര്‍. സന്ധ്യ നാട്ടില്‍ എത്തിയത്. ഷാജു തുരുത്തനെതിരെ വോട്ടു ചെയ്തതോടെ നഗരസഭാധ്യക്ഷന്‍ സ്ഥാനത്തു നിന്ന് ഷാജു പുറത്തായി. തുടര്‍ന്ന് വിദേശത്തേക്ക് പോയ ആര്‍.സന്ധ്യ മൂന്ന് മാസം നഗരസഭ കൗണ്‍സില്‍ യോഗത്തിലും പൊതുമരാമത്ത് സ്റ്റാന്‍ഡിംഗ് കമ്മിറ്റി യോഗങ്ങളിലും ഹാജരായില്ല. മുനിസിപ്പാലിറ്റി ആക്ട് പ്രകാരം കൗണ്‍സിലര്‍ സ്ഥാനത്തു നിന്ന് അയോഗ്യയാക്കിയതായി കാണിച്ച് മേയ് 19 നു കത്തയച്ചു. ഭര്‍ത്താവിന്‍റെ ആകസ്മികമായ വിയോഗവും പ്രത്യേക സാഹചര്യവും പരിഗണിച്ച് കൗണ്‍സിലര്‍ സ്ഥാനത്ത് തുടരാന്‍ അനുവദിക്കണമെന്ന് ആവശ്യപ്പെട്ട് അപേക്ഷ നല്‍കിയതിനാല്‍ മേയ് 30 നു ചേര്‍ന്ന കൗണ്‍സില്‍ തീരുമാന പ്രകാരം വാര്‍ഡ് കൗണ്‍സിലറായി പുനസ്ഥാപിച്ചുവെങ്കിലും മേയ് 30 നു ശേഷവും തുടര്‍ച്ചയായി മൂന്ന് മാസം കൗണ്‍സില്‍ യോഗങ്ങളിലും പൊതുമരാമത്ത് സ്റ്റാന്‍ഡിംഗ് കമ്മിറ്റി യോഗങ്ങളിലും ഹാജരാകാത്തതിനാല്‍ കേരള മുനിസിപ്പാലിറ്റി ആക്ട് 1994 വകുപ്പ് 91 പ്രകാരം ഓഗസ്റ്റ് 31 മുതലാണ് ആര്‍ സന്ധ്യയെ അയോഗ്യയാക്കിയിരിക്കുന്നത്. ആര്‍.സന്ധ്യ വാര്‍ഡിലെ വോട്ടര്‍മാര്‍ തന്നെ തള്ളിക്കളഞ്ഞിട്ടില്ലെന്നും സാഹചര്യങ്ങളാണ് ഇവിടെ എത്തിച്ചതെന്നും ആര്‍.സന്ധ്യ പറഞ്ഞു. തോമസ് പീറ്റര്‍ സന്ധ്യയുടെ നഗരസഭാധ്യക്ഷ സ്ഥാനം നഷ്ടമാകാതിരിക്കാന്‍ ഒട്ടേറ ശ്രമങ്ങള്‍ നടത്തി. നിയമമനുസരിച്ച് തുടര്‍ച്ചയായി ഹാജരാകാതിരുന്നതിനാലാണ് കൗണ്‍സിലർ സ്ഥാനം നഷ്ടമായത്. പാര്‍ട്ടി ഇടപെട്ടാണ് സന്ധ്യ വോട്ടു ചെയ്യാന്‍ നാട്ടിലെത്തിയതെന്നും തനിക്ക് അവസാന ഒരു വര്‍ഷം ചെയര്‍മാന്‍ സ്ഥാനം പാര്‍ട്ടി നേരത്തെ ഉറപ്പു നല്‍കിയിരുന്നതായും നഗരസഭാധ്യക്ഷന്‍ തോമസ് പീറ്റര്‍ പറഞ്ഞു.

അരുവിത്തുറ കോളജിൽ മിന്നൽ വള താളത്തിൽ ജെയ്ക്സ് ബിജോയ്; ചടുല നൃത്തചുവടുകളുമായി റംസാൻ

അരുവിത്തുറ: ഇന്ത്യൻ മ്യൂസിക്കിന് അരുവിത്തുറ നൽകിയ സമ്മാനം ജെയ്ക്സ് ബിജോയിയും മാസ്മരിക നൃത്തങ്ങളുടെ തമ്പുരാൻ റംസാനും സംഗീത യുവപ്രതിഭ ലിൽ പയ്യനും ചേർന്നപ്പോൾ അരുവിത്തുറ സെന്‍റ് ജോർജ് കോളജിൽ യുവത്വത്തിന്‍റെ ആവേശം കൊടുമുടി കയറി. കോളജ് യൂണിയൻ പ്രവർത്തനങ്ങളുടെയും ആർട്സ് ക്ലബിന്‍റെയും ഉദ്ഘാടനങ്ങളോടനുബന്ധിച്ചാണ് മലയാളത്തിന്‍റെ പ്രിയ കലാകാരന്മാർ കാമ്പസിൽ എത്തിയത്. വിവിധ തെന്നിന്ത്യൻ ഭാഷകളിൽ ഒരുപിടി ഹിറ്റുകൾ സമ്മാനിച്ച ജെയ്ക്സ് ബിജോയ് തന്‍റെ മിന്നൽ വള എന്ന ഗാനവുമായാണ് വിദ്യാർഥികളെ കയ്യിലെടുത്തത്. തന്നെ എന്നും മോഹിപ്പിച്ചിട്ടുള്ള കലാലയമാണ് അരുവിത്തുറ കോളജെന്ന് അദ്ദേഹം പറഞ്ഞു. നിരവധി ഡാൻസ് റിയാലിറ്റി ഷോകളിലൂടെയും ബിഗ് ബോസ് റിയാലിറ്റി ഷോയിലൂടെയും മലയാളികൾക്ക് സുപരിചിതനായ ചലച്ചിത്രതാരം റംസാൻ വിദ്യാർഥികൾക്കൊപ്പം വേദിയിൽ നിറഞ്ഞാടി. റാപ്പ് സംഗീതത്തിനൊപ്പം മനോഹരമായ ഗാനങ്ങളും കോർത്തിണക്കി യുവ സംഗീത പ്രതിഭ ലിൽ പയ്യൻ അവതരിപ്പിച്ച സംഗീതവിരുന്നും വിദ്യാർഥികൾക്ക് നവ്യാനുഭവമായി മാറി. കോളജിലെ യൂണിയൻ പ്രവർത്തനങ്ങളുടെ ഉദ്ഘാടനം ജെയ്ക്സ് ബിജോയിയും ആർട്സ് ക്ലബ് പ്രവർത്തനങ്ങളുടെ ഉദ്ഘാടനം റംസാനും നിർവഹിച്ചു. കോളജ് യൂണിയൻ ചെയർമാൻ ആദിൽ ബഷീർ അധ്യക്ഷത വഹിച്ചു. വൈസ് പ്രിൻസിപ്പൽ ഡോ. ജിലു ആനി ജോൺ, യൂണിയൻ ജനറൽ സെക്രട്ടറി ജോൺസൺ ജോണി, വൈസ് ചെയർപേഴ്സൺ എയ്ഞ്ചലീനാ മനോജ്, യൂണിയൻ കോഓർഡിനേറ്റർ ഡോ. തോമസ്പുളിക്കൻ, യൂണിയൻ ഭാരവാഹികൾ തുടങ്ങിയവർ പ്രസംഗിച്ചു.

മാര്‍ സ്ലീവാ മെഡിസിറ്റിയില്‍ ഹൃദയത്തെക്കുറിച്ച് ചോദിക്കാം പ്രോഗാം

പാലാ: ലോക ഹൃദയദിനാഘോഷങ്ങളുടെ ഭാഗമായി മാര്‍ സ്ലീവാ മെഡിസിറ്റിയുടെ നേതൃത്വത്തില്‍ പൊതുജനങ്ങള്‍ക്കു വേണ്ടി ഹൃദയത്തെക്കുറിച്ച് ചോദിക്കാം എന്ന വിഷയത്തില്‍ നടന്ന ചര്‍ച്ചയും ലൈവ് ഫോണ്‍ ഇന്‍ പ്രോഗ്രാമും ശ്രദ്ധേയമായി. ഹൃദയസംബന്ധമായ രോഗങ്ങളെക്കുറിച്ചും ആധുനിക ഹൃദയചികിത്സകളെ കുറിച്ചും വിദഗ്ധ ഡോക്ടര്‍മാര്‍ മറുപടി നല്‍കി. കാര്‍ഡിയാക് സയന്‍സസ് വിഭാഗം മേധാവി ഡോ. എച്ച് . രാംദാസ് നായിക്, സീനിയര്‍ കണ്‍സള്‍ട്ടന്‍റുമാരായ ഡോ. രാജു ജോര്‍ജ്, ഡോ. ജെയിംസ് തോമസ്, ഡോ. ബിബി ചാക്കോ ഒളരി, ഡോ. രാജീവ് എബ്രഹാം, കാര്‍ഡിയാക് തൊറാപിക് ആന്‍ഡ് വാസ്‌കുലാര്‍ സര്‍ജറി വിഭാഗം മേധാവി ഡോ. സി. കൃഷ്ണന്‍ എന്നിവര്‍ ചര്‍ച്ചയ്ക്കും പൊതുജനങ്ങളുടെ സംശയങ്ങള്‍ക്കും മറുപടി നല്‍കി. കാര്‍ഡിയാക് അനസ്‌തേഷ്യ വിഭാഗം സീനിയര്‍ കണ്‍സള്‍ട്ടന്‍റ് ഡോ. പി.എന്‍. നിതീഷ് മോഡറേറ്ററായി.

വയലില്‍ വോളി ഫൈനല്‍: ക്രൈസ്റ്റ് ഇരിങ്ങാലക്കുടയും പാലാ സെന്‍റ് തോമസും ഏറ്റുമുട്ടും

പാലാ: ബിഷപ് വയലില്‍ അഖില കേരള ഇന്‍റര്‍ കോളീജിയറ്റ് വോളിബോള്‍ ടൂര്‍ണമെന്‍റ് ഫൈനലില്‍ ക്രൈസ്റ്റ് ഇരിങ്ങാലക്കുടയും ആതിഥേയരായ പാലാ സെന്‍റ് തോമസ് കോളജും ഏറ്റുമുട്ടും. ഇന്ന് ഉച്ച കഴിഞ്ഞ് മൂന്നിനാണ് മത്സരം. ഇന്നലെ നടന്ന രണ്ടാം സെമി ഫൈനലില്‍ സേക്രട്ട് ഹാര്‍ട്ട് കോളജ് തേവരയെ നേരിട്ടുള്ള സെറ്റുകള്‍ക്ക് തോല്‍പ്പിച്ചാണ് ക്രൈസ്റ്റ് കോളജ് ഫൈനലില്‍ കടന്നത്. സ്‌കോര്‍ 25-22, 25-21, 25-21. ഇന്ന് രാവിലെ ഏഴിന് നടക്കുന്ന വനിതാ വിഭാഗം ഫൈനല്‍ മത്സരത്തില്‍ മുന്‍ വര്‍ഷത്തെ ജേതാക്കളായ സെന്‍റ് ജോസഫ് കോളജ് ഇരിങ്ങാലക്കുട ചങ്ങനാശേരി അസംഷന്‍ കോളജിനെ നേരിടും. ജേതാക്കള്‍ക്ക് കോളജ് മാനേജരും പാലാ രൂപത മുഖ്യ വികാരി ജനറാളുമായ റവ. ഡോ. ജോസഫ് തടത്തില്‍, മഹാത്മാഗാന്ധി സര്‍വകലാശാല സിന്‍ഡിക്കറ്റ് മെംബര്‍മാരായ ഡോ. ജോജി അലക്‌സ്, ഡോ. എ.എസ്. സുമേഷ് എന്നിവര്‍ ട്രോഫികള്‍ സമ്മാനിക്കും.

വിവര്‍ത്തനം വിശ്വബോധവും മാനവികതയും വളര്‍ത്തുന്നു: ഡോ. ആര്‍സു

പാലാ: വിവര്‍ത്തനമാണ് വിശ്വബോധവും മാനവികതയും വളര്‍ത്തുന്നതെന്നും ഭാഷാപരമായ അപരിചിതത്വം മാറ്റി ഉല്‍കൃഷ്ട കൃതികളുടെ വിവര്‍ത്തനം ഭാഷാ ഭിത്തികളെ തകര്‍ത്ത് വീക്ഷണം വിശാലമാക്കുന്നുവെന്നും കാലിക്കറ്റ് യൂണിവേഴ്‌സിറ്റി ഹിന്ദി വിഭാഗം മുന്‍ പ്രഫസറും ഭാഷാ സമന്വയവേദി അധ്യക്ഷനുമായ ഡോ. ആര്‍സു അഭിപ്രായപ്പെട്ടു. പാലാ സെന്‍റ് തോമസ് കോളജിന്‍റെ പ്ലാറ്റിനം ജൂബിലിയുടെ ഭാഗമായി ഭാഷാ സമന്വയ വേദിയുമായി സഹകരിച്ച് വിവര്‍ത്തനം തുറന്നിടുന്ന വാതിലുകള്‍ എന്ന വിഷയത്തില്‍ സംഘടിപ്പിച്ച ഏകദിന സെമിനാറും വിവര്‍ത്തന ശില്‍പശാലയും ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. താരതമ്യ പഠനം, സ്വാധീനതാ പഠനം, പുതിയ സാഹിത്യ ധാരകളുമായി പരിചയപ്പെടല്‍ എന്നിവ സാഹിത്യ വിവര്‍ത്തനത്തിലൂടെ കൈവരുന്ന നേട്ടങ്ങളാണെന്നും വിവര്‍ത്തകര്‍ സാംസ്‌കാരിക അംബാസഡര്‍മാരാണെന്നും ഡോ. ആര്‍സു അഭിപ്രായപ്പെട്ടു. ഇംഗ്ലീഷ്, ഹിന്ദി, മലയാളം വിഭാഗങ്ങളിലെ വിദ്യാര്‍ഥികളും ഫാക്കല്‍ട്ടി അംഗങ്ങളും സെമിനാറില്‍ പങ്കാളികളായി. പ്രിന്‍സിപ്പല്‍ ഡോ. സിബി ജെയിംസ് അധ്യക്ഷത വഹിച്ചു. ജോമോള്‍ ജേക്കബ് രചിച്ച ബദലാവ് കാവ്യ സമാഹാരം പ്രകാശനം ചെയ്തു. ഡോ. ആര്‍സുവില്‍ നിന്ന് പ്രിന്‍സിപ്പല്‍ ആദ്യ പ്രതി ഏറ്റു വാങ്ങി. കോളജിന്‍റെ ജൂബിലി വര്‍ഷത്തില്‍ കോളജിലെ 75 വിദ്യാര്‍ഥികള്‍ ചേര്‍ന്നു ഹിന്ദിയില്‍ നിന്ന് മലയാളത്തിലേക്ക് കഥകള്‍ വിവര്‍ത്തനം ചെയ്ത് പ്രസിദ്ധീകരിക്കുന്ന ചെറുകഥാ സമാഹരത്തിന്‍റെ ഭാഗമായി വിവര്‍ത്തന ശില്‍പശാലയും സംഘടിപ്പിച്ചു. വൈസ് പ്രിന്‍സിപ്പല്‍ ഡോ. സാല്‍വിന്‍ കാപ്പിലിപറമ്പില്‍, കോളജ് ബർസാര്‍ ഫാ. മാത്യു ആലപ്പാട്ടുമേടയില്‍, സെമിനാര്‍ കോഓര്‍ഡിനേറ്റര്‍ ഡോ. അനീഷ് സിറിയക്, ഐക്യൂഎസി കോഓര്‍ഡിനേറ്റര്‍ ഡോ. തോമസ് വി. മാത്യൂ, മലയാളം വിഭാഗം മേധാവി ഡോ. സോജന്‍ പുല്ലാട്ട്, ഇംഗ്ലീഷ് വിഭാഗം മേധാവി ഡോ. ജോബി ജോസഫ്, ഹിന്ദി വിഭാഗം മേധാവി ഡോ. കൊച്ചുറാണി ജോസഫ് തുടങ്ങിയവര്‍ പ്രസംഗിച്ചു.

ഒരുക്കങ്ങളായി; നാട്ടിൽ നാളെമുതൽ കാർഷികാരവം

കുറവിലങ്ങാട്: കോഴാ ജില്ലാ കൃഷിത്തോട്ടം, സംസ്ഥാന സീഡ് ഫാം, ആർഎടിടിസി, ബ്ലോക്ക് പഞ്ചായത്ത് എന്നിവ ആതിഥ്യമരുളുന്ന കോഴാം ഫാം ഫെസ്റ്റിനുള്ള ഒരുക്കങ്ങൾ പൂർത്തിയായതായി ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തൻകാലാ, ബ്ലോക്ക് പഞ്ചായത്ത് പ്രസിഡന്‍റ് രാജു ജോൺ, പഞ്ചായത്ത് പ്രസിഡന്‍റ് മിനി മത്തായി, ജില്ലാ പഞ്ചായത്ത് അംഗങ്ങളായ നിർമല ജിമ്മി, പി.എം. മാത്യു എന്നിവർ പത്രസമ്മേളനത്തിൽ അറിയിച്ചു. കാർഷിക വിജ്ഞാന വിനോദ വിപണന സാധ്യതകൾ കൂടുതലായി ജനങ്ങളിലേക്ക് എത്തിക്കാനാണ് ലക്ഷ്യമിടുന്നതെന്നു ബ്ലോക്ക് പഞ്ചായത്തംഗങ്ങളായ പി.സി. കുര്യൻ, പി.എൻ. രാമചന്ദ്രൻ, ജില്ലാ പ്രിൻസിപ്പൽ കൃഷി ഓഫീസർ സി. ജോ ജോസ്, ഡപ്യൂട്ടി ഡയറക്ടർ ജി.വി. റെജി, ഫാം സൂപ്രണ്ട് ഹണി ലിസ ചാക്കോ, കൃഷി ഓഫീസർ ആഷ്‌ലി മാത്യൂസ് എന്നിവർ പറഞ്ഞു. 30 വരെ ആഘോഷദിനങ്ങൾ നാളെ മുതൽ 30 വരെ തീയതികളിൽ നാടിന് ആഘോഷദിന രാത്രങ്ങളാകും. സെമിനാറുകളും സമ്മേളനങ്ങളും കലാപരിപാടികളും ഉല്ലാസ വിനോദ പരിപാടികളുമായി അരങ്ങു തകർക്കുംവിധമാണ് ക്രമീകരണങ്ങൾ. നാളെ നാലിന് മന്ത്രി വി.എൻ. വാസവൻ ഫെസ്റ്റ് ഉദ്ഘാടനം ചെയ്യും. സമാപന സമ്മേളനം 30ന് നാലിന് മന്ത്രി പി. പ്രസാദ് ഉദ്ഘാടനം ചെയ്യും. സപ്തതി തിളക്കത്തിൽ അണിഞ്ഞൊരുങ്ങി നൂറേക്കർ ജില്ലാ കൃഷിത്തോട്ടം നൂറുകണക്കായ കർഷകർ സംഗമിക്കുന്ന ഹരിതാരവത്തിന് ആതിഥ്യമരുളുന്ന കോഴാ ജില്ലാകൃഷിത്തോട്ടത്തിന് ഇത് സപ്തതി വർഷത്തിന്‍റെ വിളംബര വേളയായി മാറും. 1957ൽ ഇഎംഎസ് മന്ത്രിസഭയുടെ തീരുമാനത്തിലാണ് കോഴായിൽ ജില്ലാ കൃഷിത്തോട്ടത്തിനു തുടക്കമിട്ടത്. 2026-27 ജില്ലാ കൃഷിത്തോട്ടത്തിന് സപ്തതി ആഘോഷങ്ങളുടെ വർഷമാണ്. ഹരിതോത്സവത്തിന് ആതിഥ്യമരുളുന്ന കോഴായിലെ സംസ്ഥാന സീഡ്ഫാം പ്രവർത്തനത്തിന്‍റെ 67-ാം വർഷത്തിലാണെന്നതും പ്രത്യേകതയാണ്. കോഴായിലും സമീപസ്ഥലങ്ങളിലുമുള്ള ഭൂവുടമകളിൽനിന്ന് ഏറ്റെടുത്ത 100 ഏക്കർ സ്ഥലത്താണ് കോഴായിലെ ജില്ലാ കൃഷിത്തോട്ടം പ്രവർത്തനം ആരംഭിച്ചത്. അതിനാൽത്തന്നെ അടുത്ത കാലം വരെ ജില്ലാ കൃഷിത്തോട്ടം നൂറേക്കർ എന്നാണ് അറിയപ്പെട്ടിരുന്നത്. കേരള സയൻസ് സിറ്റി തുടങ്ങാനായി 30 ഏക്കർ സ്ഥലം വിട്ടുനൽകിയതോടെ ഫാമിന്‍റെ വിസ്തൃതി എഴുപതിലേക്കു ചുരുങ്ങി. ഇതോടൊപ്പം കസ്റ്റംഹയറിംഗ് സെന്‍ററിനും സ്ഥലം സമ്മാനിച്ചു. ഇപ്പോൾ കൃഷി നടത്തുന്നത് 60 ഏക്കറോളം സ്ഥലത്താണ്. ഉല്ലാസവഴികൾ ഏറെ പറക്കത്താനം മലയിലേക്കൊരു ട്രക്കിംഗ്. ഇരുവശങ്ങളിലും പൂത്തുലഞ്ഞ ചെടികൾ സമ്മാനിക്കുന്ന മനോഹാരിതയിൽ നിറഞ്ഞ് ഒരു സവാരി. താത്പര്യമെങ്കിൽ ഒരു ഓഫ് റോഡ് യാത്ര. സൂര്യകാന്തിപ്പൂക്കൾക്കിടയിൽ കിടന്നും നിന്നുമൊക്കെ ഒരു ഫോട്ടോ. ചൂണ്ടയിട്ട് മീൻപിടിക്കാനൊരു മത്സരം. ഓർമകളുടെ വേലിയേറ്റത്തിൽ ഒരു ഊഞ്ഞാലാട്ടം. ഇങ്ങനെ ഇല്ലാസത്തിന്‍റെ വഴികൾ ഏറെയാണ് ഫാം ഫെസ്റ്റിൽ കാത്തിരിക്കുന്നത്.

തകര്‍ത്താടി ജെയ്ക്സ് ബിജോയിയും റംസാനും; ആഘോഷത്തിമിർപ്പിൽ അരുവിത്തുറ കോളജ്

അരുവിത്തുറ: സംഗീത ലോകത്തിന് അരുവിത്തുറ നൽകിയ സമ്മാനം ജെയ്ക്സ് ബിജോയിയും മാസ്മരിക നൃത്തവുമായി റംസാനും സംഗീത യുവപ്രതിഭ ലിൽ പയ്യനും ചേർന്നപ്പോൾ അരുവിത്തുറ സെന്‍റ് ജോർജ് കോളജിൽ യുവത്വത്തിന്‍റെ ആവേശം കൊടുമുടി കയറി. കോളജ് യൂണിയൻ പ്രവർത്തനങ്ങളുടെയും ആർട്സ് ക്ലബിന്‍റെയും ഉദ്ഘാടനങ്ങളോട് അനുബന്ധിച്ചാണ് മലയാളത്തിന്‍റെ പ്രിയ കലാകാരന്മാർ കാമ്പസിൽ എത്തിയത്. വിവിധ തെന്നിന്ത്യൻ ഭാഷകളിൽ ഒരുപിടി ഹിറ്റുകൾ സമ്മാനിച്ച ജെയ്ക്സ് ബിജോയി തന്‍റെ മിന്നൽ വള എന്ന ഗാനവുമായാണ് വിദ്യാർഥികളെ കെെയിലെടുത്തത്. തന്നെ എന്നും മോഹിപ്പിച്ചിട്ടുള്ള കലാലയമാണ് അരുവിത്തുറ കോളജ് എന്ന് അദ്ദേഹം പറഞ്ഞു. സിനിമാ താരവും നർത്തകനുമായ റംസാൻ വിദ്യാർഥികൾക്കൊപ്പം വേദിയിൽ നിറഞ്ഞാടി. തന്‍റെ പതിവ് ഫ്ലിപ്പുകളും നൃത്തച്ചുവടുകളുമായി താരം വിദ്യാർഥികളിൽ ആവേശം നിറച്ചു. റാപ്പ് സംഗീതത്തിനൊപ്പം മനോഹരമായ ഗാനങ്ങളും കോർത്തിണക്കി യുവ സംഗീത പ്രതിഭ ലിൽ പയ്യൻ അവതരിപ്പിച്ച സംഗീതവിരുന്നും വിദ്യാർഥികൾക്ക് നവ്യാനുഭവമായി. ഇതോടെ അരുവിത്തുറ സെന്‍റ് ജോർജ് കോളജ് യൂണിയന്‍റെയും ആർട്സ് ക്ലബിന്‍റെയും പ്രവർത്തനങ്ങൾക്ക് തുടക്കമായി.

അരുവിത്തുറ കോളജ് യൂണിയൻ ഉദ്ഘാടനം: ജെയ്ക്സ് ബിജോയി നിർവഹിച്ചു

അരുവിത്തുറ: സെന്‍റ് ജോർജ് കോളജിലെ യൂണിയൻ പ്രവർത്തനങ്ങളുടെ ഉദ്ഘാടനം പ്രശസ്ത സിനിമാ സംഗീത സംവിധായകൻ ജെയ്ക്സ് ബിജോയ് നിർവഹിച്ചു. ചടങ്ങിൽ ആർട്സ് ക്ലബ് പ്രവർത്തനങ്ങളുടെ ഉദ്ഘാടനം സിനിമാ താരവും നർത്തകനുമായ റംസാൻ നിർവഹിച്ചു. യൂണിയൻ ചെയർമാൻ ആദിൽ ബഷീർ അധ്യക്ഷത വഹിച്ചു. വൈസ് പ്രിൻസിപ്പൽ ഡോ. ജിലു ആനി ജോൺ, യൂണിയൻ ജനറൽ സെക്രട്ടറി ജോൺസൺ ജോണി, വൈസ് ചെയർപേഴ്സൺ എയ്ഞ്ചലീനാ മനോജ്, കോഓർഡിനേറ്റർ ഡോ. തോമസ് പുളിക്കൻ, യൂണിയൻ ഭാരവാഹികൾ തുടങ്ങിയവർ സംസാരിച്ചു.

ആര്‍ജെഡി കളക്‌ടറേറ്റ് മാർച്ച് ഇന്ന്

കോട്ടയം: രാജ്യവ്യാപകമായി വോട്ടര്‍ പട്ടിക തീവ്രപരിഷ്‌കരണം നടത്താനുള്ള നീക്കത്തില്‍ നിന്ന് ഇലക്‌ഷന്‍ കമ്മീഷന്‍ പിന്തിരിയണമെന്നാവശ്യപ്പെട്ടു രാഷ്‌ട്രീയ ജനതാദള്‍ (ആര്‍ജെഡി) ജില്ലാ കമ്മിറ്റിയുടെ നേതൃത്വത്തില്‍ ഇന്നു രാവിലെ 10.30ന് കോട്ടയം കളക്‌ടറേറ്റിലെ ഇലക്‌ഷന്‍ കമ്മീഷന്‍ ഓഫീസിലേക്കു മാര്‍ച്ച് നടത്തുമെന്ന് ജില്ലാ പ്രസിഡന്‍റ് സണ്ണി തോമസ് അറിയിച്ചു. ആര്‍ജെഡി സംസ്ഥാന ജനറല്‍ സെക്രട്ടറി യൂജിന്‍ മൊറേലി സമരം ഉദ്ഘാടനം ചെയ്യും. രാവിലെ 10.30ന് ജില്ലാ ആശുപത്രി പരിസരത്തുനിന്നും പ്രകടനമായി പ്രവര്‍ത്തകര്‍ ഇലക്ഷന്‍ കമ്മീഷന്‍ ഓഫീസിലേക്കു നീങ്ങും.

മദ്യ-ലഹരിവിരുദ്ധ സമിതി നേതൃസമ്മേളനം

ചങ്ങനാശേരി: കെസിബിസി ചങ്ങനാശേരി അതിരൂപത മദ്യ-ലഹരിവിരുദ്ധ സമിതി നേതൃസമ്മേളനം അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട് ഉദ്ഘാടനം ചെയ്തു. അതിരൂപത ഡയറക്ടര്‍ ഫാ. ജിന്‍സ് ചോരേട്ട് ചാമക്കാല അധ്യക്ഷത വഹിച്ചു. അതിരൂപത ജനറല്‍ സെക്രട്ടറി തോമസുകുട്ടി മണക്കുന്നേല്‍, ജോസി കല്ലുകളം, ബേബിച്ചന്‍ പുത്തന്‍പറമ്പില്‍, ടി.എം. മാത്യു, ഔസേപ്പച്ചന്‍ ചെറുകാട്, ബിജു കൊച്ചുപുരയ്ക്കല്‍, ഷാജി വാഴേപ്പറമ്പില്‍, ബേബിച്ചന്‍ ഇഞ്ചിപ്പറമ്പില്‍, ജോണ്‍സണ്‍ കൊച്ചുതറ, സിസി അമ്പാട്ട്, ജെമിനി എന്നിവര്‍ പ്രസംഗിച്ചു.

എസ്ബി ഹയർ സെക്കൻഡറിയിൽ റേഞ്ചര്‍ യൂണിറ്റ് ഉദ്ഘാടനം

ചങ്ങനാശേരി: എസ്ബി ഹയര്‍ സെക്കന്‍ഡറി സ്‌കൂളില്‍ പുതിയതായി ആരംഭിച്ച ഭാരത് സ്‌കൗട്സ് ആന്‍ഡ് ഗൈഡ്സ് റേഞ്ചര്‍ യൂണിറ്റിന്‍റെ ഉദ്ഘാടനം അതിരൂപതാ വികാരി ജനറാള്‍ മോണ്‍. ആന്‍റണി എത്തയ്ക്കാട്ട് നിര്‍വഹിച്ചു. സ്‌കൂള്‍ മാനേജര്‍ റവ.ഡോ. സമ്മേളനത്തില്‍ ടോണി ജോസഫ് അധ്യക്ഷത വഹിച്ചു. സ്‌കൂള്‍ പ്രിന്‍സിപ്പല്‍ ഫാ. റോജി വല്ലയില്‍, ആന്‍സി മേരി ജോണ്‍, ജോസഫ് വര്‍ഗീസ്, അഞ്ജന ജെ., അമ്പിളി വി., ട്വിങ്കിള്‍ പി. ജോണ്‍, രഞ്ജിത്ത് മാനുവല്‍, പ്രിന്‍സി ഫിലിപ്പ് എന്നിവര്‍ പ്രസംഗിച്ചു. ലഹരിവിരുദ്ധ സെമിനാര്‍ എക്സൈസ് റേഞ്ച് ഓഫീസ് പ്രിവന്‍റീവ് ഓഫീസര്‍ രാജേഷ് ആര്‍. ക്ലാസ് നയിച്ചു.

ഏഴുകോടിയുടെ പദ്ധതി : പത്തനാട്-ചിറയ്ക്കപ്പാറ റോഡ് നവീകരണം ഇന്നു തുടങ്ങും

പത്തനാട്: പത്തനാട് -താഴത്തുവടകര-ചിറയ്ക്കപ്പാറ റോഡ് നവീകരണം ഇന്നു തുടങ്ങും. ഏഴുകോടി രൂപ മുടക്കിയാണ് റോഡ് നിര്‍മാണം നടത്തുന്നത്. ഇന്നു വൈകുന്നേരം അഞ്ചിന് മുണ്ടത്താനം ജംഗ്ഷനില്‍ ചേരുന്ന സമ്മേളനത്തില്‍ ചീഫ് വിപ്പ് ഡോ.എന്‍. ജയരാജ് നിര്‍മാണ ഉദ്ഘാടനം നിര്‍വഹിക്കും. കങ്ങഴ പഞ്ചായത്ത് പ്രസിഡന്‍റ് റംല ബീഗം, വെള്ളാവൂര്‍ പഞ്ചായത്ത് പ്രസിഡന്‍റ് പി.ടി. അനൂപ് തുടങ്ങിയവര്‍ പ്രസംഗിക്കും. കാലങ്ങളായി തകര്‍ന്നുകിടന്ന ഈ റോഡിലൂടെയുള്ള വാഹനസഞ്ചാരം ഏറെ ദുരിതപൂര്‍ണമായിരുന്നു.

സിനിമ ഡിജിറ്റലൈസ്‌ഡ്‌ ആകുന്നത് പുതുതലമുറയ്ക്കു നല്ലത്: ഷെഹ്‌നാദ് ജലാൽ

ചങ്ങനാശേരി: സിനിമ ഡിജിറ്റലൈസ്‌ഡ്‌ ആയതോടെ ഈ മേഖലയിലേക്കെത്തുന്ന പുതുതലമുറയ്ക്ക് കാര്യങ്ങൾ കുറച്ചുകൂടി എളുപ്പമായെന്നു ഛായാഗ്രാഹകൻ ഷെഹ്‌നാദ് ജലാൽ. മുന്പ് ഫിലിം ഇൻസ്റ്റിറ്റ്യൂകളിൽ പഠിച്ചിരുന്നവർക്ക് മാത്രമാണ് ഇത് സാധ്യമായിരുന്നതെന്നും, ഇത് പലർക്കും മുഖ്യധാരയിലേക്ക് പെട്ടെന്ന് കടന്നുവരുന്നതിനു പ്രതിസന്ധി ആയിരുന്നുവെന്നും സെന്‍റ് ജോസഫ് കോളജ് ഓഫ് കമ്യൂണിക്കേഷനിൽ നടക്കുന്ന ഫിലിം ഫെസ്റ്റിവെല്ലിൽ പങ്കെടുത്തുകൊണ്ട് അദ്ദേഹം പറഞ്ഞു. ഫെസ്റ്റിന്‍റെ രണ്ടാം ദിനമായ ഇന്നലെ ഭ്രമയുഗം പ്രദർശിപ്പിച്ചു. കോമ്പറ്റീഷൻ, സ്റ്റുഡന്‍റ്സ് കോർണർ, ഡിറക്‌ടേഴ്സ് കോർണർ, അലുമ്നി വിഭാഗങ്ങളിലായി ഇന്ന് 13 ചിത്രങ്ങൾ പ്രദർശിപ്പിച്ചു. ഫെസ്റ്റിന്‍റെ അവസാന ദിനമായ നാളെ പ്രസന്ന വിധാനഗേയുടെ "പാരഡൈസ്' പ്രദർശിപ്പിക്കും. തുടർന്ന് നടക്കുന്ന സമാപന ചടങ്ങിൽ വിജയികൾക്ക് പുരസ്‌കാരങ്ങൾ സമ്മാനിക്കും. ചടങ്ങിൽ ശ്രീലങ്കൻ സംവിധായകനും തിരക്കഥാകൃത്തുമായ പ്രസന്ന വിധാനഗേ, സംവിധായിക വിധു വിൻസെന്‍റ്, ഫിപ്രസി-ഇന്ത്യ ജനറൽ സെക്രട്ടറിയും എഫ്എഫ്എസ്ഐ വൈസ് പ്രസിഡന്‍റും ചലച്ചിത്ര നിരൂപകനുമായ പ്രേമേന്ദ്ര മജൂംദാർ എന്നിവർ മുഖ്യാതിഥികളായിരിക്കും.

റോഡില്‍ അറ്റകുറ്റപ്പണികളില്ല, വഴിവിളക്കില്ല, തെരുവുനായശല്യം...

നഗരസഭയ്ക്കു മുന്നിൽ പ്രതിഷേധിച്ച് യുഡിഎഫ് കൗണ്‍സിലര്‍മാര്‍ ചങ്ങനാശേരി: നഗരസഭയില്‍ വികസന പ്രവര്‍ത്തനങ്ങള്‍ നടത്താന്‍ കഴിയാത്തവിധം ഭരണസ്തംഭനം നേരിടുകയാണെന്ന് ആരോപിച്ച് യുഡിഎഫ് ജനപ്രതിനിധികള്‍ നഗരസഭയില്‍ പ്രതിഷേധ ധര്‍ണ നടത്തി. മാസങ്ങളായി വഴിവിളക്കുകള്‍ പ്രകാശിക്കാത്തതുമൂലം നഗരം ഇരുട്ടിലാണ്. തെരുവുനായശല്യം അതിരൂക്ഷമാണ്. നഗരത്തിന്‍റെ വിവിധ പ്രദേശങ്ങളില്‍ മാലിന്യക്കൂമ്പാരം രൂപപ്പെടുന്നു. ഈ വിഷയങ്ങളില്‍ നഗരസഭയ്ക്ക് നിസംഗ നിലപാടാണ്. ഭരണസമിതിയും ചില ഉന്നത ഉദ്യോഗസ്ഥരും നടത്തുന്ന രഹസ്യ ഇടപെടല്‍ വഴി പദ്ധതി വിഹിതം വെട്ടിക്കുറച്ചതു മൂലം വാര്‍ഡ് വികസന പദ്ധതികള്‍ നിലച്ചു. നഗരസഭാ ഓഫീസിനു മുമ്പില്‍ നടന്ന പ്രതിഷേധം നഗരസഭ യുഡിഎഫ് പാര്‍ലമെന്‍ററി പാര്‍ട്ടി ലീഡര്‍ ജോമി ജോസഫ് ഉദ്ഘാടനം ചെയ്തു. ഉപനേതാവ് സന്തോഷ് ആന്‍റണി, സ്ഥിരം സമിതി അധ്യക്ഷരായ കെ.എം. നെജിയ, എല്‍സമ്മ ജോബ്, കൗണ്‍സിലര്‍മാരായ ശ്യാം സാംസണ്‍, റെജി കേളമ്മാട്ട്, ബെന്നി ജോസഫ്, സ്മിത സുരേഷ്, ബീന ജിജന്‍, ലിസി വര്‍ഗീസ്, മോളമ്മ സെബാസ്റ്റ്യന്‍, സുമ ഷൈന്‍ എന്നിവര്‍ പ്രസംഗിച്ചു. പ്രതിഷേധം ശക്തമാക്കും; അടുത്ത ഘട്ട സമരം വാര്‍ഡുകളില്‍ നഗരസഭാ ഭരണസമിതിയുടെ നിഷ്‌ക്രിയ നിലപാടിനെതിരേ സമരം ശക്തമാക്കും. യുഡിഎഫ് കൗണ്‍സിലര്‍മാരെ അവഗണിക്കുന്ന നിലപാടാണ്. ഉത്രാടദിനത്തില്‍ നഗരസഭയുടെ ഓണാഘോഷ പരിപാടികള്‍ ബഹിഷ്‌കരിച്ച് ചൂട്ടു കത്തിച്ച് പ്രതിഷേധിച്ചു. രണ്ടാംഘട്ട സമരമാണ് ഇന്നലെ നടത്തിയത്. അടുത്ത ഘട്ടത്തില്‍ വാര്‍ഡുകളിലേക്കും പ്രതിഷേധം വ്യാപിപ്പിക്കും. ജോമി ജോസഫ്, യുഡിഎഫ് പാര്‍ലമെന്‍ററി പാര്‍ട്ടി ലീഡര്‍, ചങ്ങനാശേരി നഗരസഭ പ്രതിപക്ഷ ആക്ഷേപങ്ങള്‍ അടിസ്ഥാനരഹിതം ചങ്ങനാശേരി: നഗരസഭയിലെ പ്രതിപക്ഷ കൗണ്‍സിലര്‍മാരുടെ വാര്‍ഡുകളിലെ 90 ശതമാനം റോഡുകളും നവീകരിച്ചിട്ടുണ്ട്. വഴിവിളക്കുകളുടെ അറ്റകുറ്റപ്പണികള്‍ നടത്താന്‍ നിയോഗിക്കപ്പെട്ട കരാറുകാരെ ഭീഷണിപ്പെടുത്തി വരുത്താതെയിരിക്കാന്‍ ശ്രമിക്കുന്നു. മറുവശത്ത് സമരം ചെയ്ത് ജനമധ്യത്തില്‍ ശ്രദ്ധ തിരിച്ചുവിടാനാണ് യുഡിഎഫ് ശ്രമം. റോഡ് നവീകരണ പ്രവര്‍ത്തനങ്ങള്‍ നഗരത്തിന്‍റെ വിവിധ വാര്‍ഡുകളില്‍ സജീവമായി നടക്കുന്ന അവസരത്തില്‍ സമരം ചെയ്ത് ജനങ്ങളെ തെറ്റിദ്ധരിപ്പിക്കുന്നു. കൃഷ്ണകുമാരി രാജശേഖരന്‍ ചെയര്‍പേഴ്‌സണ്‍, ചങ്ങനാശേരി നഗരസഭ മാത്യൂസ് ജോര്‍ജ്, വൈസ് ചെയര്‍മാന്‍ , ചങ്ങനാശേരി നഗരസഭ

"നമ്മുടെ സമ്മതിദാനാവകാശം മോഷ്‌ടിക്കാതിരിക്കുക’ കോണ്‍ഗ്രസ് ഒപ്പുശേഖരണം

ചങ്ങനാശേരി: “നമ്മുടെ സമ്മതിദാനാവകാശം മോഷ്ടിക്കാതിരിക്കുക’’ എന്ന മുദ്രാവാക്യവുമായി കോണ്‍ഗ്രസ് ചങ്ങനാശേരി ഈസ്റ്റ് ബ്ലോക്ക് കമ്മിറ്റിയുടെ നേതൃത്വത്തില്‍ ഒപ്പുശേഖരണത്തിന് തുടക്കംകുറിച്ചു. മുന്‍മന്ത്രിയും രാഷ്‌ട്രീയകാര്യ സമിതി അംഗവുമായ കെ.സി. ജോസഫ് ഉദ്ഘാടനം ചെയ്തു. കോണ്‍ഗ്രസ് ഈസ്റ്റ് ബ്ലോക്ക് പ്രസിഡന്‍റ് കെ.എ. ജോസഫ് അധ്യക്ഷത വഹിച്ചു. പി.എച്ച്. നാസര്‍, ആന്‍റണി കുന്നുംപുറം, പി.എന്‍. നൗഷാദ്, ജയശ്രീ പ്രഹ്ലാദന്‍, ബാബു കുരീത്ര, സിയാദ് അബ്ദുൾ റഹ്‌മാന്‍, മോട്ടി മുല്ലശേരി, സിംസണ്‍ വേഷ്ണാല്‍, പി. സുരേഷ്, പി.എ. അബ്ദുൾസലാം, അനൂപ് താഴത്തേതില്‍, ബാബു രാജേന്ദ്രന്‍, സുരേന്ദ്രനാഥ പണിക്കര്‍‍ തുടങ്ങിയവര്‍ പ്രസംഗിച്ചു.

എസ്ബി കോളജില്‍ കുട്ടനാട് സ്റ്റഡീസ് ആൻഡ് റിസര്‍ച്ച് സെന്‍റര്‍ ഇന്നുതുറക്കും

ബെന്നി ചിറയില്‍ ചങ്ങനാശേരി: എസ്ബി കോളജില്‍ കുട്ടനാട് സ്റ്റഡീസ് ആൻഡ് റിസര്‍ച്ച് സെന്‍റര്‍ ഇന്നുതുറക്കും. കുട്ടനാടിന്‍റെ സുസ്ഥിരവികസനം, നിലനില്‍പ്പ്, കാര്‍ഷിക പരിസ്ഥിതി പഠനം, ഗവേഷണം എന്നിവയ്ക്കുവേണ്ടിയാണ് പുതിയ സെന്‍റര്‍ തുറക്കുന്നത്. "കുട്ടനാട് ഇന്നലെ, ഇന്ന്, നാളെ' സെന്‍ററില്‍ തുടര്‍ച്ചയായ വിശകലനം നടത്തും. ഉച്ചകഴിഞ്ഞു രണ്ടിന് കോളജിലെ കര്‍ദിനാള്‍ മാര്‍ പടിയറ സെന്‍ററില്‍ ആലപ്പുഴ ജില്ലാ കളക്ടര്‍ അലക്‌സ് വര്‍ഗീസ് ഉദ്ഘാടനം ചെയ്യും. ആര്‍ച്ച്ബിഷപ് മാര്‍ തോമസ് തറയില്‍ മുഖ്യപ്രഭാഷണം നടത്തും. കോളജ് മാനേജര്‍ മോണ്‍. ആന്‍റണി എത്തയ്ക്കാട്ട്, പ്രിന്‍സിപ്പല്‍ റവ.ഡോ. ടെഡി കാഞ്ഞൂപ്പറമ്പില്‍ എന്നിവര്‍ പ്രസംഗിക്കും. കുട്ടനാടിന്‍റെ ഹൈഡ്രോളജി, കൃഷി, മത്സ്യബന്ധനം വിവിധ ഉപജീവനോപാധികള്‍ തുടങ്ങിയ വിഷയങ്ങള്‍ക്കാണ് പ്രഥമ പരിഗണന. അധ്യാപകരുടെയും വിദ്യാര്‍ഥികളുടെയുമൊപ്പം പൊതുജന പങ്കാളിത്തവും ഗവേഷണ പ്രവര്‍ത്തനങ്ങളില്‍ ഉറപ്പാക്കും. കുട്ടനാടിന് അനുയോജ്യമായ മികച്ച മാതൃകകള്‍ ലോകത്തിന്‍റെ വിവിധ ഭാഗങ്ങളില്‍നിന്നു കണ്ടെത്തി അത് കുട്ടനാടിന് അനുയോജ്യമായ രീതിയില്‍ അനുരൂപപ്പെടുത്തുകയോ പുനരാവിഷ്‌കരിക്കുകയോ ചെയ്യാന്‍ സെന്‍റര്‍ ലക്ഷ്യം വയ്ക്കുന്നു. കുട്ടനാടുമായി ബന്ധപ്പെട്ട വിവരശേഖരം സെന്‍ററില്‍ സജ്ജമാക്കും സെന്‍റ് ബര്‍ക്ക്മാന്‍സ് കോളജിലെ വിശാലമായ ലൈബ്രറിയുടെ ഭാഗമായാണ് "കുട്ടനാട് വിജ്ഞാന കേന്ദ്രം' സ്ഥാപിക്കുന്നത്. കുട്ടനാടുമായി ബന്ധപ്പെട്ട് ലഭ്യമായ എല്ലാ പുസ്തകങ്ങളും ലേഖനങ്ങളും ഇലക്‌ട്രോണിക് സ്രോതസുകളും ലഭ്യമാക്കും. ഈ ലൈബ്രറി കുട്ടനാടുമായി ബന്ധപ്പെട്ട ഗവേഷണ പഠനങ്ങള്‍ വിദ്യാര്‍ഥികള്‍ക്കും ഗവേഷകര്‍ക്കും ഉപയോഗപ്രദമായ രീതിയില്‍ ഏറ്റവും മികച്ച റഫറന്‍സ് കേന്ദ്രമാക്കി മാറ്റും. റവ.ഡോ. ടെഡി കാഞ്ഞൂപ്പറമ്പില്‍ എസ്ബി കോളജ് പ്രിന്‍സിപ്പല്‍ കുട്ടനാട്ടിലെ വിദ്യാര്‍ഥികളെ ഉള്‍പ്പെടുത്തി സ്റ്റുഡന്‍റസ് റിസര്‍ച്ച് ഫോറം രൂപീകരിക്കും കോളജിലെ കുട്ടനാട് പ്രദേശത്തുനിന്നുള്ള വിദ്യാര്‍ഥികളെ ഉള്‍പ്പെടുത്തി കുട്ടനാട് സ്റ്റുഡന്‍റസ് റിസര്‍ച്ച് ഫോറം രൂപീകരിച്ച് സ്ഥിരവും കൃത്യവുമായ ഒരു വിവരശേഖരണം ഉറപ്പാക്കും. ലഭിക്കുന്ന വിവരങ്ങള്‍ കുട്ടനാട് മേഖലയുമായി ബന്ധപ്പെട്ട അധ്യാപകര്‍ ഉള്‍പ്പെടുന്ന ടീച്ചേഴ്‌സ് റിസര്‍ച്ച് ഫോറം പരിഗണിക്കേണ്ട ഗവേഷണവിഷയങ്ങളുടെ ഒരു മുന്‍ഗണനാക്രമം തയാറാക്കും. കോളജിലെ വിവിധ ഡിപ്പാര്‍ട്ട്‌മെന്‍റിലെ അധ്യാപകരുടെ നേതൃത്വത്തില്‍ വിഷയത്തെ ആഴത്തില്‍ പഠിച്ച് രാജ്യത്തിനകത്തും പുറത്തുമുള്ള മികച്ച സ്ഥാപനങ്ങളും ശാസ്ത്രജ്ഞരുമായുള്ള കോളാബറേഷനിലൂടെ നൂതനവും കുട്ടനാടിന്‍റെ സാഹചര്യങ്ങള്‍ക്ക് അനുയോജ്യമായ പരിഹരങ്ങള്‍ നിര്‍ദേശിക്കും. ഡോ. റൂബിന്‍ ഫിലിപ്പ്, കോ-ഓര്‍ഡിനേറ്റര്‍, കുട്ടനാട് സ്റ്റഡീസ് ആൻഡ് റിസര്‍ച്ച് സെന്‍റര്‍ കര്‍ഷകര്‍ക്ക് 12 മാസവും വരുമാനം ലഭിക്കുന്ന "ഒരുനെല്ലും ഒരുമീനും' പദ്ധതി കുട്ടനാട്ടിലെ നെല്‍കര്‍ഷകര്‍ക്ക് 12 മാസവും വരുമാനം ലഭിക്കുന്ന "ഒരുനെല്ലും ഒരുമീനും' പദ്ധതി നടപ്പാക്കണം. വര്‍ഷകാലത്ത് നെല്ലും കൊയ്ത്തിനുശേഷം വേനല്‍ക്കാലത്ത് മത്സ്യകൃഷിയും കര്‍ഷകര്‍ക്ക് ഗുണകരമാണ്. പാടശേഖരങ്ങളുടെയും കായലുകളുടെയും ബണ്ടുകള്‍ ബലപ്പെടുത്തിയാല്‍ ഫാം റോഡുകള്‍ മെച്ചമാകും. ഫാം റോഡ് ടൂറിസം സ്വദേശികളെയും വിദേശികളെയും ആകര്‍ഷിക്കും. ബണ്ടിന്‍റെ വശങ്ങളില്‍ പച്ചക്കറി കൃഷിയിറക്കാനാകും. ഞാന്‍ കാലങ്ങളോളം കൃഷി ചെയ്തിരുന്ന ചിത്തിര കായലില്‍ ഏഴരക്കിലോമീറ്റര്‍ ദൂരത്തില്‍ ഫാം റോഡ് സജ്ജമാണ്. ജോസ് ജോണ്‍ വെങ്ങാന്തറ കുട്ടനാട്ടിലെ മുതിര്‍ന്ന കര്‍ഷകന്‍ കുട്ടനാട്ടുകാര്‍ക്ക് ഇനി കാത്തിരിക്കാന്‍ സമയമില്ല നെല്‍കൃഷിയെ മാത്രം ആശ്രയിച്ചു കഴിയുന്ന കര്‍ഷകരും കര്‍ഷക തൊഴിലാളികളും ജീവിതമത്സരത്തിന്‍റെ എല്ലാ രംഗങ്ങളിലും പിന്നാക്കം പോകുന്നു. അടിസ്ഥാനവിഷയങ്ങള്‍ പഠിക്കാനും ഗവേഷണത്തിലൂടെ രക്ഷാപദ്ധതികള്‍ കരുപ്പിടിപ്പിക്കാനും ആധികാരികതയും വിശ്വാസ്യതയുമുള്ള ഒരു സംവിധാനം അനിവാര്യമാണ്. അതിനാണ് എസ്ബി കോളജില്‍ സെന്‍റര്‍ ഫോര്‍ കുട്ടനാട് സ്റ്റഡീസ് ആൻഡ് റിസര്‍ച്ച് സെന്‍റര്‍ തുടക്കംകുറിക്കുന്നത്. വര്‍ഗീസ് കണ്ണമ്പള്ളി, ഡയറക്ടര്‍ ബോര്‍ഡംഗം, കുട്ടനാട് സ്റ്റഡീസ് ആൻഡ് റിസര്‍ച്ച് സെന്‍റര്‍ (ജിഎസ്ടി സംസ്ഥാനതല പരാതിപരിഹാര സമിതിയംഗം).

പുത്തന്‍പള്ളി സബ് സെന്‍റർ ഉദ്ഘാടനം

കടുത്തുരുത്തി: കല്ലറ കുടുംബരോഗ്യ കേന്ദ്രത്തിനു കീഴിലുള്ള പുത്തന്‍പള്ളി സബ് സെന്‍ററിന്‍റെ ഉദ്ഘാടനം മന്ത്രി വി.എന്‍. വാസവന്‍ നിര്‍വഹിച്ചു. കടുത്തുരുത്തി ബ്ലോക്ക് പഞ്ചായത്ത് പ്രസിഡന്‍റ് ജോണ്‍സണ്‍ കൊട്ടുകാപ്പള്ളി യോഗത്തില്‍ അധ്യക്ഷത വഹിച്ചു. ജില്ല മെഡിക്കല്‍ ഓഫീസര്‍ ഡോ. എന്‍. പ്രിയ മുഖ്യപ്രഭാഷണം നടത്തി. പഞ്ചായത്ത് പ്രസിഡന്‍റ് ജോണി തോട്ടുങ്കല്‍, ബ്ലോക്ക് പഞ്ചായത്തംഗം പി.വി. സുനില്‍, പഞ്ചായത്ത് വൈസ് പ്രസിഡന്‍റ് അമ്പിളി മനോജ്, പഞ്ചായത്ത് സെക്രട്ടറി കെ.പി. യാശോധരന്‍, പഞ്ചായത്തംഗങ്ങളായ ജോയ് കോട്ടയില്‍, വി.കെ. ശശികുമാര്‍, മിനി ജോസ്, ജനപ്രധിനിധികള്‍, മെഡിക്കല്‍ ഓഫീസര്‍ ഡോ ജ്വാല ജാഷ എന്നിവര്‍ പ്രസംഗിച്ചു. 2024-25 സാമ്പത്തിക വര്‍ഷത്തിലെ ഹെല്‍ത്ത് ഗ്രാന്‍റില്‍ ഉള്‍പ്പെടുത്തി 54 ലക്ഷം രൂപ മുടക്കിയാണ് രണ്ടു വര്‍ഷംകൊണ്ട് എല്ലാ ആധുനിക സൗകര്യങ്ങളോടും കൂടിയാണ് കെട്ടിടം നിര്‍മിച്ചതെന്ന് ഭരണസമിതി അംഗങ്ങള്‍ പറഞ്ഞു. സ്റ്റാഫ് നഴ്‌സ്, പാര മെഡിക്കല്‍ സ്റ്റാഫ്, ആശാ വര്‍ക്കര്‍മാര്‍, ജെഎച്ച്‌ഐ, ആഴ്ചയില്‍ ഒരിക്കല്‍ ഡോക്ടറുടെ സേവനം എന്നിവ സബ്സെന്‍ററില്‍ ഉണ്ടായിരിക്കും. കല്ലറ പഞ്ചായത്തിലെ ഒന്ന്, രണ്ട്, മൂന്ന്, അഞ്ച് വാര്‍ഡുകളിലെ ജനങ്ങള്‍ക്ക് സബ്സെന്‍ററിന്‍റെ പ്രയോജനം ലഭിക്കും.

ഇവന്‍റ് മാനേജമെന്‍റുകാരനു മർദനമേറ്റതിലും ആരോപണവിധേയന് പങ്കെന്ന്

വൈക്കം: പോലീസുകാരന്‍റെയും വധുവിന്‍റെയും വിവാഹ ഫോട്ടോഗ്രഫിയും സ്റ്റേജും തയാറാക്കിയ ഇവന്‍റ് മാനേജമെന്‍റുകാരന് വൈക്കം പോലീസ് സ്റ്റേഷനിൽ മർദനമേറ്റ സംഭവത്തിലും ഇന്നലെ കെഎസ്ആർടിസി ബസ് ഡ്രൈവറെ മർദിച്ചതിൽ ആരോപണവിധേയനായ ഗ്രേഡ് എസ്ഐക്ക് പങ്കെന്ന് ആരോപണം. നടപടിയെടുക്കാതെ പോലീസ്. ചേർത്തല തൈക്കാട്ടുശേരി പുതുവീട്ടിൽ മുകേഷി( 33)നെ കഴിഞ്ഞ ജൂലൈ 21ന് ഗ്രേഡ് എസ്ഐ ജോർജ് ഉൾപ്പെട്ട പോലീസ് സംഘം മർദിച്ചെന്നായിരുന്നു പരാതി. നെഞ്ചിലും വയറിലും മർദനമേറ്റു വൈക്കം താലൂക്കാശുപത്രിയിൽ ചികിത്സ തേടിയ മുകേഷിന്‍റെ ഹൃദയമിടിപ്പിൽ വ്യതിയാനം കണ്ടിരുന്നു. ‌വൈക്കം പോലീസ് പി ആർഒയുടെ മുറിയിൽ വച്ച് മർദനമേറ്റെന്ന പരാതി സ്വീകരിച്ച വൈക്കം ഡിവൈഎസ്പി, പക്ഷേ നടപടിയെടുക്കാൻ തയാറായില്ലെന്ന് മുകേഷ് ആരോപിക്കുന്നു. വൈക്കം സ്റ്റേഷനിലെ സിവിൽ പോലീസ് ഓഫീസറായ പോളശേരി സ്വദേശിയുടെ ഒന്നരവർഷം മുമ്പു നടന്ന വിവാഹത്തിന്‍റെ ഫോട്ടോഗ്രഫിയും സ്റ്റേജ്‌വർക്കും നേരേകടവിലെ വധുവിന്‍റെ വീട്ടുകാർ മുഖേന മുകേഷാണ് ചെയ്തത്. എന്നാൽ, വധുവിന്‍റെ കുടുംബം നൽകാമെന്നേറ്റ തുകയുടെ ബാക്കിയായ 28,000 രൂപ നൽകില്ലെന്നു പറഞ്ഞതിനാൽ ആൽബം കൊടുത്തിരുന്നില്ല. പണം കിട്ടാൻ സഹായിക്കണമെന്ന് മുകേഷ് വരനായ പോലീസുകാരനോട് ആവശ്യപ്പെട്ടിരുന്നു. എന്നാൽ, ആൽബം നൽകാത്തതിൽ പരാതിയുണ്ടെന്നു പറഞ്ഞ് പിന്നീട് വൈക്കം സ്റ്റേഷനിൽ വിളിച്ചുവരുത്തിയപ്പോൾ മർദനമേറ്റെന്നാണ് മുകേഷിന്‍റെ പരാതി. സ്റ്റേഷനിലുണ്ടായിരുന്ന ഒരു എസ്ഐ അസഭ്യം പറഞ്ഞതു ചോദ്യം ചെയ്തപ്പോഴാണ് പിആർഒയുടെ മുറിയിൽവച്ച് മർദനമേറ്റതെന്നു മുകേഷ് പറയുന്നു.

ഹാൾ തകർച്ച: ഭരണസമിതി ഉത്തരവാദികളല്ലെന്ന് പഞ്ചായത്ത്

കടുത്തുരുത്തി: എംഎല്‍എഫണ്ടായി ലഭിച്ച 25 ലക്ഷം രൂപ ഉപയോഗിച്ചു നവീകരിച്ച ഞീഴൂര്‍ പഞ്ചായത്ത് കമ്യൂണിറ്റി ഹാളിന്‍റെ നിര്‍മാണ അപാകതകള്‍ക്കും തകര്‍ച്ചയ്ക്കും പഞ്ചായത്ത് ഭരണസമിതി ഉത്തരവാദികളല്ലെന്നു പഞ്ചായത്ത് അധികൃതര്‍ പത്രസമ്മേളനത്തില്‍ പറഞ്ഞു. എല്‍എസ്ജിഡി എന്‍ജിനിയര്‍മാരുടെ മേല്‍നോട്ടത്തില്‍ നിർമിച്ച സീലിംഗ് അടക്കമുള്ളവ കഴിഞ്ഞ 17, 20 തീയതികളില്‍ മഴയത്ത് തകര്‍ന്നുവീണ സംഭവത്തെ രാഷ്‌ട്രീയമായി കണ്ടു വിമര്‍ശിക്കുന്നത് ശരിയല്ലെന്നും പ്രസിഡന്‍റ് ഉള്‍പ്പെടെയുള്ള പഞ്ചായത്തംഗങ്ങള്‍ പറയുന്നു. ‌ നിര്‍മാണ അപാകതമൂലം ഉണ്ടായിരിക്കുന്ന അപകടത്തിനും നാശനഷ്ടങ്ങള്‍ക്കും കാരണക്കാരായവര്‍ക്കെതിരേ നടപടി സ്വീകരിക്കണമെന്നു മന്ത്രിയോടും സ്ഥലം എംഎല്‍എ മോന്‍സ് ജോസഫ്, ജില്ലാ കളക്ടര്‍, എല്‍എസ്ജി ജോയിന്‍റ് ഡയറക്ടര്‍ എന്നിവരോടും ആവശ്യപ്പെട്ടു, ഇക്കാര്യങ്ങള്‍ ഉന്നയിച്ചു പഞ്ചായത്ത് കമ്മിറ്റി പ്രമേയം പാസാക്കി. ഇത് രേഖാമൂലം അധികൃതര്‍ക്കെല്ലാം നല്‍കിയതായും ഭരണസമിതിയംഗങ്ങള്‍ പറഞ്ഞു. നിര്‍മാണ കരാറുകാരനു ബില്ല് മാറി നല്‍കിയിട്ടില്ലെന്നും നിര്‍മാണപ്രവര്‍ത്തനവുമായി ബന്ധപ്പെട്ടു ടെന്‍ഡര്‍ നടപടിയും നിര്‍മാണ മേല്‍നോട്ടവുമെല്ലാം നടത്തിയത് ജില്ലാ, ബ്ലോക്ക് എന്‍ജിനിയറിംഗ് വിഭാഗമാണെന്നും ഈ വിഷയത്തില്‍ രാഷ്‌ട്രീയ നേട്ടങ്ങള്‍ക്കായി ബിജെപിയും യുഡിഎഫും നടത്തുന്ന കുപ്രചാരണങ്ങള്‍ അടിസ്ഥാനരഹിതമാണെന്നും ഇവര്‍ പറഞ്ഞു. നിയമവിധേയമല്ലാത്ത ഒരു നടപടിയും തീരുമാനങ്ങളും ഒരു വിഷയത്തിലും പഞ്ചായത്ത് സ്വീകരിച്ചിട്ടില്ലന്നും ഭരണസമിതിയംഗങ്ങള്‍ പറഞ്ഞു. കടുത്തുരുത്തി പ്രസ് ക്ലബ്ബില്‍ നടന്ന വാര്‍ത്താസമ്മേളനത്തില്‍ പഞ്ചായത്ത് പ്രസിഡന്‍റ് ശ്രീകല ദിലീപ്, വൈസ് പ്രസിഡന്‍റ് കെ.പി. ദേവദാസ്, പഞ്ചായത്തംഗങ്ങളായ തോമസ് പനയ്ക്കല്‍, ജോമോന്‍ മറ്റം, പി.ആര്‍. സുഷമ, ലില്ലി മാത്യു, ബീന ഷിബു തുടങ്ങിയവര്‍ പങ്കെടുത്തു.

കെഎസ്ആർടിസി ബസ് ഡ്രൈവറെ നാട്ടുകാർ നോക്കിനിൽക്കെ മർദിച്ചതായി പരാതി

വൈക്കം: റോഡിലെ വൻ കുഴിയിൽ ചാടി മൂന്നോട്ടുവന്ന കെഎസ്ആർടിസി ബസിന്‍റെ പിൻഭാഗം പോലീസ് ജീപ്പിന്‍റെ കണ്ണാടിയിൽ ഉരസിയതിനെത്തുടർന്ന് അഡീഷണൽ എസ്ഐ കെഎസ്ആർടിസി ബസ് ഡ്രൈവറെ നാട്ടുകാർ നോക്കിനിൽക്കെ മർദിച്ചതായി പരാതി. മർദനത്തെത്തുടർന്ന് കവിളിലും കണ്ണിലും വേദന അനുഭവപ്പെട്ട മൂന്നാർ കെഎസ്ആർടിസി ഡിപ്പോയിലെ ഡ്രൈവർ കെ.പി. വേലായുധനെ (48) വൈക്കം താലൂക്ക് ആശുപത്രിയിൽ പ്രവേശിപ്പിച്ചു. മൂന്നാർ-വൈക്കം-ആലപ്പുഴയായി സർവീസ് നടത്തുന്ന ബസ് ഇന്നലെ ഉച്ചയ്ക്ക് 11.40ന് തലയാഴം കൃഷിഭവനു മുന്നിലെ വൻകുഴി മറികടക്കുമ്പോഴായിരുന്നു സംഭവം. റോഡിലെ കുഴികളിൽവീണ് ആളപായവും നിരവധിപേർക്ക് പരിക്കും ഉണ്ടായതിനെത്തുടർന്ന് കോൺഗ്രസ് തലയാഴം മണ്ഡലം കമ്മിറ്റിയുടെ നേതൃത്വത്തിൽ കൃഷിഭവനു സമീപം റോഡ് ഉപരോധം നടന്നതിനാൽ പോലീസ് സ്ഥലത്തുണ്ടായിരുന്നു. അപകടത്തെത്തുടർന്ന് നിർത്തിയ ബസിലെ ഡ്രൈവറെ പിടിച്ചിറക്കി അടിച്ചശേഷം പോലീസ് വാഹനത്തിന്‍റെ പിന്നിലെത്തിച്ചും മർദനം തുടർന്നെന്ന് ബസ് ഡ്രൈവർ കെ.പി. വേലായുധൻ ആരോപിച്ചു. ബസിൽ 29 യാത്രക്കാർ ഉണ്ടായിരുന്നു. ഇതിൽ 21 പേരും വടക്കേ ഇന്ത്യയിൽനിന്നുള്ളവരായിരുന്നു. പിന്നാലെ വന്ന ആലപ്പുഴ ബസിൽ യാത്രക്കാരെ കയറ്റിവിട്ടു. ബസിൽ യാത്ര ചെയ്തിരുന്ന ചേർത്തല സ്വദേശി തണ്ണീർമുക്കം പുത്തനങ്ങാടിയിലെ വീട്ടിൽനിന്നു കാർ വരുത്തി, ബസ് കണ്ടക്ടർ അനൂപിന്‍റെയും മറ്റും സഹായത്തോടെയാണ് വേലായുധനെ ആശുപത്രിയിലാക്കിയത്. കെഎസ്ആർടിസി വൈക്കം എടിഒ കെഎസ്ആർടിസി സിഎംഡിയേയും മന്ത്രിയുടെ ഓഫീസിനേയും വിവരംധരിപ്പിച്ചു. കെഎസ്ആർടി‌സി അധികൃതർ ആരോപണവിധേയനായ വൈക്കം ഗ്രേഡ് എസ്ഐ ജോർജിനെതിരേ നടപടി ആവശ്യപ്പെട്ട് പരാതി നൽകുമെന്നറിയിച്ചു. മർദനത്തിനിരയായ ഡ്രൈവർ വേലായുധൻ വിദഗ്ധ ചികിത്സയ്ക്കായി തൃശൂർ മെഡിക്കൽ കോളജ് ആശുപത്രിയിലേക്ക് ഇന്നലെ വൈകുന്നേരത്തോടെ പോയി.

വൈക്കം-വെച്ചൂർ റോഡ് ഗതാഗതയോഗ്യമാക്കണം

വൈക്കം: അപകടങ്ങൾ പതിവാകുന്ന വൈക്കം -വെച്ചൂർ റോഡ് ഉടൻ ഗതാഗത യോഗ്യമാക്കണമെന്നാവശ്യപ്പെട്ട് ബിജെപി സമരത്തിനൊരുങ്ങുന്നു. തോട്ടുവക്കം പാലം മുതൽ ബണ്ട് റോഡ് ജംഗ്ഷൻ വരെയുള്ള റോഡ് വലിയ ഗർത്തങ്ങൾ രൂപപ്പെട്ടതോടെ ഗതാഗതയോഗ്യമല്ലാതായി. റോഡിലെ വലിയ കുഴികളിൽ അകപ്പെട്ട് വാഹനങ്ങൾക്ക് കേടുപാടുകൾ സംഭവിക്കുന്നതും പതിവായി. വലിയ കുഴികളിൽ മഴവെള്ളം നിറഞ്ഞുകിടക്കുന്നതുകൊണ്ട് കുഴികളുടെ ആഴം അറിയാതെ ഇരുചക്ര വാഹനങ്ങളും കുഴിയിൽ വീണ് അപകടമുണ്ടാകുന്നു. റോഡ് എത്രയും വേഗം ഗതാഗതയോഗ്യമാക്കിയില്ലെങ്കിൽ ബിജെപി ശക്തമായ സമരപരിപാടികൾ ആരംഭിക്കും. അറ്റകുറ്റപ്പണികൾ ഉടൻ ആരംഭിക്കുമെന്ന് സി.കെ. ആശ വൈക്കം: വൈക്കം - വെച്ചൂർ റോഡിലെ അറ്റകുറ്റപ്പണികൾ അടുത്തദിവസം ആരംഭിക്കുമെന്ന് സി.കെ. ആശ എംഎൽഎ അറിയിച്ചു. റോഡിലെ കുഴികളടച്ച് സഞ്ചാരയോഗ്യമാക്കുന്നതിന് ജൂലൈ മാസത്തിൽ 25 ലക്ഷം രൂപ അനുവദിച്ചിരുന്നു. തുടർന്ന് തിരുവല്ല കേരള റോഡ് ഫണ്ട് ബോർഡ് ഓഫീസിൽനിന്ന് ഈ പ്രവൃത്തി ടെൻഡർ ചെയ്യുകയും തുടർന്ന് ഒരു കോൺട്രാക്ടർ പ്രവൃത്തി ഏറ്റെടുക്കുകയും ചെയ്തിരുന്നു. എന്നാൽ, ടെൻഡറുമായി ബന്ധപ്പെട്ടുണ്ടായ സാങ്കേതിക പ്രശ്നങ്ങളെത്തുടർന്ന് ഈ ടെൻഡർ റദ്ദാക്കി പ്രവൃത്തി റീടെണ്ടർ ചെയ്തിരുന്നു. തുടർന്ന് പ്രവൃത്തി ഏറ്റെടുത്ത കോൺട്രാക്ടറും കേരള റോഡ് ഫണ്ട് ബോർഡുമായി എഗ്രിമന്‍റ് നടപടികൾ നടന്നുവരുകയാണ്. നടപടികൾ പൂർത്തിയാക്കി രണ്ടു ദിവസത്തിനകം നിർമാണപ്രവൃത്തികൾ ആരംഭിക്കാൻ കഴിയുമെന്ന് സി.കെ. ആശ എംഎൽഎ പറഞ്ഞു. കോൺഗ്രസ് റോഡ് ഉപരോധിച്ചു വൈക്കം: ആഴമേറിയ വൻ കുഴികൾ രൂപപ്പെട്ട് ആളപായവും നിരവധിപേർക്ക് അപകടങ്ങളിൽ പരിക്കും സംഭവിച്ചതിനെത്തുടർന്ന് കോൺഗ്രസ് തലയാഴം മണ്ഡലം കമ്മിറ്റിയുടെ നേതൃത്വത്തിൽ വൈക്കം - വെച്ചൂർ റോഡ് ഉപരോധിച്ചു. ‌ തലയാഴം കൃഷിഭവനു മുന്നിലെ ചെളിവെള്ളം നിറഞ്ഞ വലിയ ഗർത്തത്തിൽ ചെറുവള്ളമിറക്കിയും കടലാസുവഞ്ചികൾ ഒഴുക്കിയുമാണ് കോൺഗ്രസ് പ്രവർത്തകർ ഉപരോധ സമരം നടത്തിയത്. മണ്ഡലം പ്രസിഡന്‍റ് വി. പോപ്പിയുടെ അധ്യക്ഷതയിൽ നടന്ന സമരം കെപിസിസി അംഗം മോഹൻ ഡി. ബാബു ഉദ്ഘാടനം ചെയ്തു. റോഡ് അടിയന്തരമായി സഞ്ചാരയോഗ്യമാക്കിയില്ലെങ്കിൽ എംഎൽഎയെ ഉപരോധിക്കുന്നടക്കമുള്ള സമരപരിപാടികൾ ആരംഭിക്കുമെന്ന് ഉദ്ഘാടന പ്രസംഗത്തിൽ അദ്ദേഹം പറഞ്ഞു. യുഡിഎഫ് കൺവീനർ ബി. അനിൽകുമാർ, ഡിസിസി സെക്രട്ടറി അബ്ദുൽ സലാം റാവുത്തർ, ബ്ലോക്ക്‌ഭാര വാഹികളായ യു. ബേബി, എം. ഗോപാലകൃഷ്ണൻ, ജി. രാജീവ്, ടി.എ. മനോജ്, ടി.എൻ. അനിൽകുമാർ, ബിനിമോൻ, ജെൽജിവ൪ഗീസ്, ബി.എൽ. സെബാസ്റ്റ്യൻ, പി.വി. വിവേക്, മണ്ഡലം വൈസ് പ്രസിഡന്‍റ് തങ്കച്ചൻ പൗവത്തിൽ, വിബിമോൻ, ഷോളി ബിജു, പഞ്ചായത്ത്‌ വൈസ് പ്രസിഡന്‍റ് ജെൽസി സോണി, മെംബമാരായ ഷീജ ഹരിദാസ്, കൊച്ചുറാണി, ഇ.വി. അജയകുമാർ തുടങ്ങിയവ൪ പ്രസംഗിച്ചു. പ്രകടനത്തിൽ നൂറുകണക്കിന് പ്രവർത്തകർ പങ്കെടുത്തു.

അപകടത്തിൽ പരിക്കേറ്റ് ചികിത്സയിലിരുന്ന യുവാവ് മരിച്ചു

വൈക്കം: റോഡിലെകുഴികൾ നിറഞ്ഞ ഭാഗത്ത് നിയന്ത്രണംവിട്ട സ്കൂട്ടറുകൾ ഇടിച്ചുണ്ടായ അപകടത്തിൽ ഗുരുതരമായി പരിക്കേറ്റ് കോട്ടയം മെഡിക്കൽ കോളജ് ആശുപത്രിയിൽ ചികിത്സയിലിരുന്ന യുവാവ് മരിച്ചു. ടിവി പുരം മൂത്തേടത്തുകാവ് നടുവിലെ പുത്തൻതറ വീട്ടിൽ വിജയന്‍റെ മകൻ വിഷ്ണു (28) വാണ് മരിച്ചത്. ചൊവ്വാഴ്ച രാത്രി 11.30ന് വൈക്കം -വെച്ചൂർ റോഡിലെ മാരാംവീടിനു സമീപമായിരുന്നു അപകടം. ജോലി കഴിഞ്ഞ് സുഹൃത്തുക്കൾ രണ്ടു സ്കൂട്ടറുകളിലായി വീട്ടിലേക്കു മടങ്ങുന്നതിനിടെയായിരുന്നു അപകടം. റോഡിൽ തെറിച്ചുവീണ് ഗുരുതരമായി പരിക്കേറ്റ വിഷ്ണു, സ്കൂട്ടർ യാത്രികരായ അഭിജിത്ത്, പ്രിയങ്കൻ, അഭിജിത്ത് എന്നിവരെ നാട്ടുകാർ ഉടൻ കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിക്കുകയായിരുന്നു. ചികിത്സയിലിരിക്കെ ഇന്നലെ രാവിലെ ഏഴോടെയാണ് വിഷ്ണു മരിച്ചത്. മാതാവ്: വത്സല .സഹോദരി: വിദ്യ. മൃതദേഹം പോസ്റ്റുമോർട്ടത്തിനുശേഷം വീട്ടുവളപ്പിൽ സംസ്കരിച്ചു. പോലീസ് മേൽനടപടികൾ സ്വീകരിച്ചു.

ലാറ്റക്‌സ് ഫാക്ടറിക്ക് അരലക്ഷം പിഴ : നടപടിയുമായി കടുത്തുരുത്തി പഞ്ചായത്ത്

കടുത്തുരുത്തി: നീരാക്കല്‍ ലാറ്റക്‌സ് ഫാക്ടറിക്ക് 50,000 രൂപ പിഴ ചുമത്തി കടുത്തുരുത്തി പഞ്ചായത്ത്. നീരാക്കല്‍ ലാറ്റക്‌സ് പ്രൈവറ്റ് ലിമിറ്റഡ് എന്ന സ്ഥാപനം ഫാക്ടറിയുടെ സമീപത്തെ ഓടയിലേക്ക് രാസവസ്തുക്കള്‍ കലര്‍ന്ന മലിനജലം ഒഴുക്കുന്നതു മൂലം സമീപപ്രദേശത്തെ തോട് മാലിനപ്പെടുന്നതായി പരാതി ലഭിച്ചതിന്‍റെ അടിസ്ഥാനത്തിലാണ് പഞ്ചായത്ത് പിഴ ചുമത്തിയതെന്നു പ്രസിഡന്‍റ് എന്‍.ബി. സ്മിത അറിയിച്ചു. ചട്ടം ലംഘിച്ചു പരിസരവാസികളുടെയും സമരസമിതിയുടെയും പരാതിയെത്തുടര്‍ന്ന് നടത്തിയ അന്വേഷണത്തിലാണ് സ്ഥാപനം മലിനീകരണ ചട്ടങ്ങള്‍ ലംഘിച്ചതായി കണ്ടെത്തിയതെന്നും പ്രസിഡന്‍റ് പറഞ്ഞു. പഞ്ചായത്തിലെ എട്ടാം വാര്‍ഡില്‍ സ്ഥിതിചെയ്യുന്ന ഫാക്ടറിയില്‍നിന്നുള്ള രാസവസ്തുക്കള്‍ കലര്‍ന്ന മലിനജലം സമീപത്തെ കിണറുകളിലെയും ജലസ്രോതസുകളിലെയും വെള്ളം മലിനമാക്കുകയും രൂക്ഷമായ ദുര്‍ഗന്ധം പരത്തുകയും ചെയ്യുന്നതായി നാട്ടുകാര്‍ പഞ്ചായത്തില്‍ പരാതി നല്‍കിയിരുന്നു. ‌ ഈ പരാതിയുടെ അടിസ്ഥാനത്തില്‍ കമ്പനിക്ക് സ്റ്റോപ്പ് മെമ്മോ നല്‍കി. 2025-26 വര്‍ഷത്തില്‍ ഫാക്ടറിക്ക് ലൈസന്‍സ് പുതുക്കി നല്‍കിയിരുന്നുമില്ല. ഫാക്ടറി സന്ദർശിച്ചു മലിനീകരണ നിയന്ത്രണ ബോര്‍ഡിന്‍റെയും വ്യവസായ വകുപ്പിന്‍റെയും അനുമതിയോടെ പഞ്ചായത്തിന്‍റെ അനുമതിയില്ലാതെ സ്ഥാപനം പ്രവര്‍ത്തിച്ചുവരികയായിരുന്നുവെന്നും പഞ്ചായത്ത് പ്രസിഡന്‍റ് പറഞ്ഞു. ഈ വിഷയത്തില്‍ വീണ്ടും പരാതി ലഭിച്ചതിനെത്തുടര്‍ന്ന് സെപ്റ്റംബര്‍ മൂന്നിന് പഞ്ചായത്ത് ഭരണസമിതി യോഗം ചേര്‍ന്ന് ഫാക്ടറി സന്ദര്‍ശിച്ചു സ്ഥിതിഗതികള്‍ നേരിട്ടു വിലയിരുത്തി. പരിശോധനയില്‍ ഫാക്ടറിയില്‍നിന്നുള്ള രാസമാലിന്യങ്ങള്‍ സമീപത്തെ ഓടയിലേക്ക് ഒഴുക്കിവിടുന്നതായും ഇതു സമീപത്തെ തോട്ടിലേക്കു വ്യാപിക്കുന്നതായും കണ്ടെത്തി. ഇതേത്തുടര്‍ന്ന് പരിസരത്തെ കിണറുകളിലെ വെള്ളം മലിനമാകുന്നതായും രൂക്ഷമായ ഗന്ധം അനുഭവപ്പെടുന്നതായും ബോധ്യപ്പെട്ടതിന്‍റെ അടിസ്ഥാനത്തിലാണ് ഫാക്ടറിക്ക് പിഴ ചുമത്താന്‍ ഭരണസമിതി തീരുമാനിച്ചതെന്നും പഞ്ചായത്തധികൃതര്‍ അറിയിച്ചു. പൊലൂഷന്‍ കണ്‍ട്രോള്‍ ബോര്‍ഡ് നല്‍കിയിരിക്കുന്ന അനുമതി സെപ്റ്റംബറില്‍ എട്ടിന് റദ്ദ് ചെയ്തിട്ടുണ്ടെന്നും പ്രസിഡന്‍റ് അറിയിച്ചു. വ്യവസായവകുപ്പ് നല്‍കിയ ഡ്രീംഡ് ലൈസന്‍സ് റദ്ദ് ചെയ്യണമെന്ന് ആവശ്യപ്പെട്ട് ജില്ലാ കളക്ടറെ നേരിട്ടു കണ്ട് അപേക്ഷ നല്‍കിയതായും പഞ്ചായത്തില്‍ പിഴ അടയ്ക്കാത്തപക്ഷം സ്ഥാപനത്തിനെതിരേ പ്രോസിക്യൂഷന്‍ ഉള്‍പ്പെടെയുള്ള നിയമനടപടി സ്വീകരിക്കുമെന്നും പ്രസിഡന്‍റ് എന്‍.ബി. സ്മിത അറിയിച്ചു. മലിനജലം പുറത്തേക്ക് ഒഴുക്കുന്നില്ല: ഫാക്ടറി അധികൃതര്‍ മുട്ടുചിറ: ഫാക്ടറിയില്‍നിന്നുള്ള മലിനജലം പുറത്തേക്ക് ഒഴുക്കുന്നില്ലെന്ന് ഫാക്ടറി അധികൃതര്‍. ഫാക്ടറി ഇരിക്കുന്ന സ്ഥലം ഉയര്‍ന്ന പ്രദേശമാണ്. ഇവിടെനിന്ന് ഉറവയായി വെള്ളം പുറത്തേക്കു പോകുന്നുണ്ട്. ഇതു പരിഹരിക്കാന്‍ പൊലൂഷന്‍ കണ്‍ട്രോള്‍ ബോര്‍ഡ് നിര്‍ദേശിച്ചതനുസരിച്ച് ഇടിപി പ്ലാന്‍റ് പൂര്‍ത്തിയാക്കിയിട്ടുണ്ട്. ഇതിന്‍റെ പ്രവര്‍ത്തനം നടക്കുന്നുണ്ട്. പഞ്ചായത്ത് സ്റ്റോപ്പ് മെമ്മോ നല്‍കിയത് മുതല്‍ ഫാക്ടറി പ്രവര്‍ത്തിക്കുന്നില്ലെന്നും നീരാക്കല്‍ ലാറ്റക്‌സ് ഡയറക്ടര്‍ ടിനോ ജയിംസ് പറഞ്ഞു.

അമലഗിരി ബികെ കോളജിൽ എൻഎസ്എസ് വാരാഘോഷം

അതിരമ്പുഴ: അമലഗിരി ബികെ കോളജ് എൻഎസ്എസ് യൂണിറ്റിൽ എൻഎസ്എസ് വാരാഘോഷം ആരംഭിച്ചു. അതിരമ്പുഴയിലെ വൃദ്ധമന്ദിരമായ അബ്രോ ഭവൻ സന്ദർശിച്ച് ആവശ്യമായ മരുന്നുകളും വസ്ത്രങ്ങളും എൻഎസ്എസ് വോളന്‍റിയേഴ്സ് സമ്മാനിച്ചു. വയോജനങ്ങൾക്ക് കൊടുക്കേണ്ട ബഹുമാനവും പരിഗണനയും എത്രത്തോളമുണ്ടാകണമെന്ന് പുതുതലമുറയ്ക്ക് പഠിക്കാനുള്ള അവസരമാണിതെന്ന് ബികെ കോളേജ് പ്രിൻസിപ്പൽ ഡോ. മിനി തോമസ് പറഞ്ഞു. പ്രോഗ്രാം ഓഫീസർമാരായ മെൽബി ജേക്കബ്, ഡോ. പ്രിൻസി പി. ജയിംസ്, ഡോ. സിസ്റ്റർ ദീപാ കെ. തോമസ് എന്നിവർ പ്രസംഗിച്ചു.

വള്ളംകളി ഉത്സവമാക്കാൻ ‌അടിപൊളി പരിപാടികൾ

കോട്ടയം: വള്ളംകളിയോടനുബന്ധിച്ചു നാളെ വൈകുന്നേരം 3.30ന് സ്‌കൂള്‍-കോളജ് വിദ്യാര്‍ഥികള്‍ അവതരിപ്പിക്കുന്ന ലഹരിവിരുദ്ധ ബോധവല്‍കരണ പരിപാടികള്‍, കുടുംബശ്രീ യൂണിറ്റുകള്‍, ക്ലബ് അംഗങ്ങള്‍, സാമൂഹ്യ-രാഷ്ട്രീയ നേതാക്കള്‍, കോട്ടയം ഹോട്ട് വീല്‍സ് റോളര്‍ സ്‌കേറ്റിംഗ് ടീം അവതരിപ്പിക്കുന്ന റോഡ്‌ഷോ ഉള്‍പ്പെടെയുള്ള സാംസ്‌കാരിക വിളംബര ഘോഷയാത വാദ്യമേളങ്ങളോടെ താഴത്തങ്ങാടി അറവുപുഴ ജംഗ്ഷനില്‍നിന്ന് ജില്ലാ കളക്ടര്‍ ചേതന്‍കുമാര്‍ മീണ ഫ്‌ളാഗ് ഓഫ് ചെയ്യും. ഘോഷയാത്ര കുളപ്പുര മെയിന്‍ പവലിയന്‍ വരെ ചെന്നു മടങ്ങി താഴത്തങ്ങാടി മാര്‍ ബസേലിയോസ് - മാര്‍ ഗ്രിഗോറിയോസ് പള്ളി അങ്കണത്തില്‍ സമാപിക്കും. സമാപന സമ്മേളനത്തില്‍ തിരുവഞ്ചൂര്‍ രാധാകൃഷ്ണന്‍ അധ്യക്ഷതവഹിക്കും. ജില്ലാ പോലീസ് ചീഫ് എ. ഷാഹുല്‍ ഹമീദ് സമാപന സന്ദേശം നല്‍കും. വഞ്ചിപ്പാട്ട് മത്സരം രാത്രി ഏഴു മുതല്‍ കുട്ടനാട്, ആലപ്പുഴ, കോട്ടയം പ്രദേശങ്ങളില്‍ നിന്നുള്ള പുരുഷ-വനിതാ വഞ്ചിപ്പാട്ട് ടീമുകള്‍ പങ്കെടുക്കും. ആറിന്‍റെ നടുവില്‍ വൈദ്യുതി ദീപാലങ്കാരങ്ങളാല്‍ പ്രശോഭിക്കുന്ന ബാര്‍ജില്‍ ക്രമീകരിച്ചിരിക്കുന്ന സ്റ്റേജിലാണ് മത്സരങ്ങള്‍ ക്രമീകരിച്ചിരിക്കുന്നത്. വഞ്ചിപ്പാട്ട് മത്സരത്തില്‍ പങ്കെടുക്കുന്ന ടീമുകള്‍: കലാക്ഷേത്ര സംഘം, നടുഭാഗം, നവഭാവന സംഘം, കൈനകരി‌, നടുഭാഗം സംഘം, നടുഭാഗം, ഉതൃട്ടാതി സംഘം, കുമാരനല്ലൂര്‍, അര്‍ജുന്‍ അബി ആന്‍ഡ് ടീം, കുമരകം വാഹന പാര്‍ക്കിംഗ് മത്സര വള്ളംകളി ദിനമായ 27ന് അറവുപുഴ (സ്റ്റാര്‍ട്ടിംഗ് പോയിന്‍റ്) മുതല്‍ കുളപ്പുര (ഫിനിഷിംഗ് പോയിന്‍റ്) വരെ റോഡരികിലെ വാഹന പാര്‍ക്കിംഗ് പോലീസ് അധികാരികള്‍ നിരോധിക്കും. ടൗണില്‍ നിന്നുവരുന്ന വാഹനങ്ങള്‍ ഉപ്പൂട്ടിക്കവലയില്‍ നിന്ന് വലത്തോട്ടു തിരിഞ്ഞ് വല്യങ്ങാടി വഴി കുളപ്പുര വരെയുള്ള റോഡിന്‍റെ ഒരുഭാഗത്തും, ഉപ്പൂട്ടിക്കവല മുതല്‍ ആലുംമൂട് വരെയുള്ള റോഡിന്‍റെ ഒരുഭാഗത്തുമായി പാര്‍ക്ക് ചെയ്യാം. കുമരകം ഭാഗത്തുനിന്നു വരുന്ന വാഹനങ്ങള്‍ ഇല്ലിക്കല്‍ മുതല്‍ അറവുപുഴ വരെ റോഡിന്‍റെ ഒരു ഭാഗത്ത് മാത്രം പാര്‍ക്ക് ചെയ്യാം.

മികച്ച 2% ശാസ്ത്രജ്ഞരുടെ പട്ടികയില്‍ ഡോ. സാബു തോമസ്

കോട്ടയം: സ്റ്റാന്‍ഫോർഡ് സര്‍വകലാശാലയുടെ ലോകത്തിലെ മികച്ച രണ്ടു ശതമാനം ശാസ്ത്രഞ്ജരുടെ പട്ടികയില്‍ എംജി സര്‍വകലാശാല മുന്‍ വൈസ് ചാന്‍സലര്‍ ഡോ. സാബു തോമസ് സ്ഥാനം പിടിച്ചു. ഉന്നതവിദ്യാഭ്യാസ വകുപ്പിന്‍റെ അഭിമാന സ്ഥാപനമായ ട്രിവാന്‍ഡ്രം എന്‍ജിനിയറിംഗ് സയന്‍സ് ആന്‍ഡ് റിസര്‍ച്ച് പാര്‍ക്ക് (ട്രെസ് പാര്‍ക്ക്) ചെയര്‍മാന്‍ കൂടിയായ ഡോ. സാബു തോമസിന് ലഭിച്ച സാര്‍വദേശീയ അംഗീകാരം കേരളീയ ഉന്നത വിദ്യാഭ്യാസ മേഖലയുടെ യശസ്സുയര്‍ത്തിയിരിക്കുകയാണെന്ന് ഉന്നത വിദ്യാഭ്യാസ മന്ത്രി ഡോ. ആര്‍. ബിന്ദു പറഞ്ഞു. പോളിമര്‍ സയന്‍സിലും നാനോ ടെക്‌നോളജിയിലും മെറ്റീരിയല്‍സ് എന്‍ജിനിയറിംഗിലും നല്‍കുന്ന മികവാര്‍ന്ന സംഭാവനകള്‍ക്കാണ് ഡോ. സാബു തോമസ് ലോകത്തെ മികച്ച ശാസ്ത്രജ്ഞരുടെ പട്ടികയില്‍ ഉള്‍പ്പെട്ടിരിക്കുന്നത്.

കെഎസ്ആര്‍ടിസി സ്റ്റാന്‍ഡും പരിസരവും സാമൂഹ്യവിരുദ്ധരുടെ വിഹാരകേന്ദ്രം

കോട്ടയം: പോക്കറ്റടിക്കാരും സാമൂഹ്യവിരുദ്ധരും യാചകരും കോട്ടയം കെഎസ്ആര്‍ടിസി സ്റ്റാന്‍ഡിലും പരിസര പ്രദേശങ്ങളിലും വിഹരിക്കുന്നു. കഴിഞ്ഞ ഏതാനും ദിവസങ്ങളായി സ്റ്റാന്‍ഡിലെത്തി ബസിറങ്ങിയ പലർക്കും പോക്കറ്റടിച്ചു പണം നഷ്ടപ്പെട്ടു. പണം നഷ്ടമായ പലരും സ്റ്റാന്‍ഡിലെ പോലീസ് എയ്ഡ് പോസ്റ്റില്‍ എത്തി വിവരമറിയിച്ചിരുന്നു. എന്നാല്‍ കോട്ടയം വെസ്റ്റ് പോലീസ് സ്റ്റേഷനിലെത്തി പരാതി നല്കാനാണ് ഇവർക്ക് പോലീസ് നല്കുന്ന നിര്‍ദേശം. നിരവധി സ്ത്രീകളുടെ ഹാന്‍ഡ് ബാഗുകളില്‍നിന്നു പഴ്‌സും മൊബൈല്‍ ഫോണുകളും നഷ്‌ടമായിട്ടുണ്ട്. സ്റ്റാന്‍ഡിനുള്ളിലെ ഇരിപ്പിടങ്ങളില്‍ വിശ്രമിക്കുന്നവരുടെ ബാഗുകളും മൊബൈല്‍ ഫോണുകളും മോഷ്ടിക്കുന്ന സ്ത്രീകള്‍ ഉള്‍പ്പെടുന്ന സംഘവും സജീവമാണ്. കഴിഞ്ഞദിവസം ഇരിപ്പിടത്തില്‍ വിശ്രമിക്കുകയായിരുന്ന യാത്രക്കാരന്‍റെ ബാഗ് മോഷ്ടിക്കാൻ ശ്രമിച്ചയാളെ മറ്റൊരു യാത്രക്കാരന്‍ കാണുകയും തുടര്‍ന്നു മറ്റു യാത്രക്കാരെയും കെഎസ്ആര്‍ടിസി ജീവനക്കാരെയും കൂട്ടി പോലീസില്‍ വിവരമറിയിച്ചിരുന്നു. തുടര്‍ന്നു പോലീസ് സ്ഥലത്തെത്തി ഇയാളെ സ്റ്റേഷനിലേക്കു കൊണ്ടുപോയി. വെള്ളി, ശനി ദിവസങ്ങളിലും പൊതുഅവധി ദിവസങ്ങള്‍ക്കു മുമ്പുള്ള ദിവസങ്ങളിലും വൈകുന്നേരങ്ങളില്‍ വന്‍തിരക്കാണ് സ്റ്റാന്‍ഡില്‍ അനുഭവപ്പെടുന്നത്. ഈ സമയങ്ങളിലാണു പോക്കറ്റടി കൂടുതലായും നടക്കുന്നത്. സന്ധ്യ കഴിഞ്ഞാല്‍ കെഎസ്ആര്‍ടിസി സ്റ്റാന്‍ഡിലെ ഇരുചക്ര പാര്‍ക്കിംഗ് ഭാഗത്തും ശുചിമുറി ഭാഗത്തും സാമൂഹ്യവിരുദ്ധരുടെ ശല്യം രൂക്ഷമാണ്. സന്ധ്യാസമയങ്ങളില്‍ തിയറ്റര്‍ റോഡിലും വലിയ തോതില്‍ സാമൂഹ്യവിരുദ്ധരും ലഹരി മാഫിയ സംഘങ്ങളും അനാശാസ്യ പ്രവര്‍ത്തകരും തമ്പടിക്കുന്നുണ്ട്. പലപ്പോഴും ഇവിടങ്ങളില്‍ മദ്യപാനികള്‍ തമ്മില്‍ത്തല്ലുന്നതും സംഘര്‍ഷമുണ്ടാക്കുന്നതും പതിവാണ്. യാത്രക്കാര്‍ വിവരമറിയിച്ചു പോലീസ് സ്ഥലത്തെത്തുമ്പോഴേക്കും ഇവര്‍ രക്ഷപ്പെടുകയും ചെയ്യും. സന്ധ്യാസമയത്ത് സ്റ്റാന്‍ഡില്‍ പോലീസിന്‍റെ സാന്നിധ്യമുണ്ടെങ്കിലും സാമൂഹ്യവിരുദ്ധരെയും പോക്കറ്റടിക്കാരെയും കണ്ടില്ലെന്നു നടിക്കുകയാണെന്നും പരാതിയുണ്ട്. വൈകുന്നേരങ്ങളിൽ സാമൂഹ്യവിരുദ്ധരും മദ്യപാനികളും സ്റ്റാന്‍ഡിനുള്ളില്‍ സൃഷ്ടിക്കുന്ന പ്രശ്‌നങ്ങള്‍ ചില്ലറയല്ല. പോക്കറ്റടിക്കാരെയും സാമൂഹിക വിരുദ്ധരെയും അമര്‍ച്ച ചെയ്യാന്‍ പോലീസ് അടിയന്തര നടപടി സ്വീകരിക്കമെന്ന് നാട്ടുകാര്‍ ആവശ്യപ്പെട്ടു.

ഭക്ഷണ വിതരണത്തിനിടെ ഓട്ടോയിൽനിന്നു പഴ്സ് മോഷണം പോയി

ഗാന്ധിനഗർ: കോട്ടയം മെഡിക്കൽ കോളജ് ആശുപത്രി കാൻസർ വിഭാഗത്തിലെ രോഗികൾക്കും കൂട്ടിരിപ്പുകാർക്കും ഓട്ടോയുടെ പിന്നിൽനിന്ന് ഭക്ഷണം വിതരണം നടത്തിക്കൊണ്ടിരുന്നപ്പോൾ മുന്നിലെ ഡാഷിൽനിന്നും ഓട്ടോ ഡ്രൈവറുടെ പഴ്സ് മോഷ്ടിച്ചു. നവജീവൻ ട്രസ്റ്റ് ദിവസേന വൈകുന്നേരം ബിരിയാണിയാണ് കാൻസർ വിഭാഗത്തിൽ വിതരണം ചെയ്യുന്നത്. ആർപ്പൂക്കര കൊച്ചുപറമ്പിൽ അജീഷാണ് തന്‍റെ ഓട്ടോയിൽ ബിരിയാണി കൊണ്ടുവരുന്നത്. അജീഷ് തന്നെയാണ് വിതരണം ചെയ്യുന്നതും. ഇന്നലെ വൈകുന്നേരം അഞ്ചിന് ഓട്ടോയിൽ ഭക്ഷണപ്പൊതിയുമായെത്തിയ അജീഷ് വാഹനം സൈഡിലേക്ക് മാറ്റി നിർത്തിയ ശേഷം ഇറങ്ങി ഭക്ഷണപ്പൊതി വിതരണം തുടങ്ങി. വിതരണം ശേഷം ഡ്രൈവർ സീറ്റിലെത്തി ഡാഷ് തുറന്നപ്പോഴാണ് പഴ്സ് നഷ്ടപ്പെട്ട വിവരമറിയുന്നത്. പേഴ്സിൽ 4300 രൂപ, എടിഎം, ആധാർ, പാൻ കാർഡുകളും ലൈസൻസും ഉണ്ടായിരുന്നു. പഴ്സ് നഷ്ടപ്പെട്ടതിനെത്തുടർന്ന് ഗാന്ധിനഗർ പോലീസിൽ പരാതി നൽകി. കഴിഞ്ഞദിവസം ഒരു രോഗിയുടെ കൂട്ടിരിപ്പുകാരന്‍റെ വലിയ തുക മോഷ്ടിക്കപ്പെട്ടിരുന്നു.

ജില്ലാ, ഗ്രാമ പഞ്ചായത്തുകള്‍ കൈകോര്‍ത്തു : കൂടല്ലൂര്‍ സിഎച്ച്സിയില്‍ ഈവനിംഗ് ഒപി റെഡി

കിടങ്ങൂര്‍: വര്‍ഷങ്ങളായി അടഞ്ഞുകിടന്ന കൂടല്ലൂര്‍ കമ്യൂണിറ്റി ഹെല്‍ത്ത് സെന്‍ററിലെ ഈവനിംഗ് ഒപിയും കിടത്തി ചികിത്സാ സൗകര്യവും പുനരാരംഭിക്കുന്നു. ജില്ലാ പഞ്ചായത്തും കിടങ്ങൂര്‍ പഞ്ചായത്തും സംയുക്തമായി ഫണ്ട് അനുവദിച്ചതോടെയാണ് ഇതിനു വഴിതെളിഞ്ഞത്. പാമ്പാടി ബ്ലോക്കിലെ കൂടല്ലൂര്‍ സാമൂഹ്യാരോഗ്യകേന്ദ്രത്തില്‍ ഡോക്ടറെയും നഴ്സിനെയും നിയമിച്ച് ഈവനിംഗ് ഒപി ആരംഭിക്കുന്നതിനുള്ള നടപടികളാണ് പൂര്‍ത്തിയായത്. ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ അനുവദിച്ച നാലു ലക്ഷം രൂപയും കിടങ്ങൂര്‍ പഞ്ചായത്തിന്‍റെ വാര്‍ഷിക പദ്ധതിയില്‍ ഉള്‍പ്പെടുത്തി അനുവദിച്ച നാലു ലക്ഷം രൂപയും ചേര്‍ത്ത് എട്ടു ലക്ഷം രൂപയ്ക്കാണ് പദ്ധതി നടപ്പിലാക്കുന്നത്. കൂടല്ലൂര്‍ ആശുപത്രിയില്‍ 25 രോഗികള്‍ക്ക് ഐപി സൗകര്യവും ഉച്ചകഴിഞ്ഞ് രണ്ടു മുതല്‍ വൈകുന്നേരം നാലു വരെ ഈവനിംഗ് ഒപിയും മുമ്പ് ഉണ്ടായിരുന്നതാണ്. ഡോക്ടര്‍മാരുടെ എണ്ണം കുറഞ്ഞതോടെ കിടത്തി ചികിത്സയും ഈവനിംഗ് ഒപിയും നിര്‍ത്തലാക്കി. കിടങ്ങൂര്‍, കടപ്ലാമറ്റം, കാണക്കാരി പഞ്ചായത്തുകളിലെ നൂറുകണക്കിനാളുകള്‍ക്കാണ് ഈ സൗകര്യം പ്രയോജനപ്പെട്ടിരുന്നത്. ഈവനിംഗ് ഒപിയും കിടത്തി ചികിത്സയും പുനരാരംഭിക്കണമെന്നുള്ള നാട്ടുകാരുടെ വര്‍ഷങ്ങളായുള്ള ആഗ്രഹമാണ് ഇപ്പോള്‍ പൂവണിയുന്നത്. ഞായര്‍ ഒഴികെയുള്ള എല്ലാ ദിവസങ്ങളിലും ഉച്ചകഴിഞ്ഞ് മൂന്നു മുതല്‍ രാത്രി ഒന്പത് വരെ ഡോക്ടര്‍മാര്‍ ഉണ്ടാകും. ഈ സമയത്ത് ഒപി സൗകര്യം ഉണ്ടായിരിക്കും. കൂടാതെ കിടത്തി ചികിത്സ പുനരാരംഭിക്കുകയും ചെയ്യും. 50,000 രൂപ ഡോക്ടര്‍ക്കും ഇരുപതിനായിരം രൂപ നഴ്സിനും വേതനമായി പ്രോജക്ടില്‍ ഉള്‍പ്പെടുത്തി ജില്ലാ-ഗ്രാമ പഞ്ചായത്തുകള്‍ നല്കും. ഒരു വര്‍ഷത്തേക്കുള്ള തുകയാണ് ഇപ്പോള്‍ പ്രോജക്ടില്‍ ഉള്‍പ്പെടുത്തിയിരിക്കുന്നത്. സ്ഥിരമായി ഗ്രാമ-ബ്ലോക്ക്-ജില്ലാ പഞ്ചായത്തുകള്‍ സംയുക്തമായി ഈ പ്രോജക്ട് കൂടല്ലൂര്‍ സാമൂഹ്യ ആരോഗ്യകേന്ദ്രത്തില്‍ നടപ്പിലാക്കും. സംയുക്ത പദ്ധതി ജില്ലയിലെ എല്ലാ സാമൂഹ്യ ആരോഗ്യകേന്ദ്രങ്ങളിലും കുടുംബാരോഗ്യകേന്ദ്രങ്ങളിലും ത്രിതല പഞ്ചായത്തുകളുടെ സംയുക്ത പദ്ധതിയായി ഇത്തരം പ്രോജക്ട് ഏറ്റെടുത്ത് നടപ്പിലാക്കിയാല്‍ നിരവധി രോഗികള്‍ക്ക് പ്രയോജനം ലഭ്യമാകും. ജോസ്മോന്‍ മുണ്ടയ്ക്കല്‍ ജില്ലാ പഞ്ചായത്തംഗം ഉദ്ഘാടനം ഇന്ന് കൂടല്ലൂര്‍ സിഎച്ച്‌സിലെ പുതിയതായി ആരംഭിക്കുന്ന ഈവനിംഗ് ഒപിയുടെ ഉദ്ഘാടനം ഇന്ന് രാവിലെ 10നു നടത്തും. പഞ്ചായത്ത് പ്രസിഡന്‍റ് ഇ.എം. ബിനുവിന്‍റെ അധ്യക്ഷതയില്‍ കൂടുന്ന യോഗത്തില്‍ ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ ഉദ്ഘാടനം നിര്‍വഹിക്കും. ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി സമ്മേളനം ഉദ്ഘാടനം ചെയ്യും. ബ്ലോക്ക് പഞ്ചായത്ത് മെംബര്‍മാരായ പ്രഫ.ഡോ. മേഴ്സി ജോണ്‍, അശോക് കുമാര്‍ പൂതമന, പഞ്ചായത്ത് വൈസ് പ്രസിഡന്‍റ് റ്റീന മാളിയേക്കല്‍, മറ്റു ജനപ്രതിനിധികള്‍, ആശുപത്രി വികസന സമിതിയംഗങ്ങള്‍ എന്നിവര്‍ പങ്കെടുക്കും.

ഒരുമാസത്തിനിടെ മയക്കുമരുന്നു കേസില്‍ അറസ്റ്റിലായത് 68 പേര്‍

നാര്‍ക്കോ കോ-ഓര്‍ഡിനേഷന്‍ ജില്ലാതല യോഗം കോട്ടയം: ഓണത്തോടനുബന്ധിച്ചു നടത്തിയ പ്രത്യേക പരിശോധനയില്‍ ജില്ലയില്‍നിന്നും 68 പേര്‍ മയക്കുമരുന്നു കേസുകളില്‍ അറസ്റ്റിലായതായി എക്‌സൈസ് വകുപ്പ്. ഓഗസ്റ്റ് 27 മുതല്‍ സെപ്റ്റംബര്‍ 22 വരെയുള്ള കണക്കാണിത്. ഈ കാലയളവില്‍ 71 എന്‍ഡിപിഎസ് കേസുകളാണ് എടുത്തിട്ടുള്ളത്. രണ്ടു വാഹനങ്ങള്‍ പിടിച്ചെടുത്തതായും നാര്‍ക്കോ കോ-ഓര്‍ഡിനേഷന്‍ ജില്ലാതല യോഗത്തില്‍ വകുപ്പ് ഉദ്യോഗസ്ഥര്‍ വ്യക്തമാക്കി. മയക്കുമരുന്നിനെതിരേയുള്ള ഫീല്‍ഡ് തല പ്രവര്‍ത്തനങ്ങള്‍ വിലയിരുത്തുന്നതിനും വകുപ്പുകള്‍ തമ്മിലുള്ള ഏകോപനം ഉറപ്പാക്കുന്നതിനുമാണ് ജില്ലാ കളക്ടര്‍ ചേതന്‍ കുമാര്‍ മീണയുടെ അധ്യക്ഷതയില്‍ നാര്‍ക്കോ കോ-ഓര്‍ഡിനേഷന്‍ കമ്മിറ്റി ജില്ലാതല യോഗം ചേര്‍ന്നത്. ഈ കാലയളവില്‍ 885 റെയ്ഡുകള്‍ സംഘടിപ്പിച്ചു. 176 അബ്കാരി കേസുകളിലായി 172 പേര്‍ അറസ്റ്റിലായി. പുകയില ഉത്പന്നങ്ങളുടെ വില്പനയുമായി ബന്ധപ്പെട്ട് 411 കേസില്‍ 411 പേര്‍ പ്രതികളായി. പിഴയിനത്തില്‍ 82,220 രൂപ ഈടാക്കി. 88.590 കിലോഗ്രാം പുകയില ഉത്പന്നങ്ങള്‍ പിടിച്ചെടുത്തു. 407.750 ലിറ്റര്‍ ഇന്ത്യന്‍ നിര്‍മിത വിദേശമദ്യവും 44.205 ലിറ്റര്‍ ബിയറും രണ്ടു ലിറ്റര്‍ കള്ളും 6.48 ലിറ്റര്‍ അനധികൃത മദ്യവും പിടിച്ചെടുത്തു. 18.050 കിലോ കഞ്ചാവും 135 ഗ്രാം കഞ്ചാവ് ചോക്ലേറ്റും നാലു കഞ്ചാവ് ചെടികളും 4.409 ഗ്രാം എംഡിഎംഎയും പിടിച്ചെടുത്തിട്ടുണ്ട്. സ്‌കൂളുകളിലും കോളജുകളിലും നിലവിലുള്ള പ്രൊട്ടക്‌ഷന്‍ ഗ്രൂപ്പ് ശക്തിപ്പെടുത്തുന്നതും വിമുക്തി ഡീ അഡിക്‌ഷന്‍ സെന്‍ററുകളുടെ പ്രവര്‍ത്തനം വ്യാപിപ്പിക്കുന്നതും യോഗം ചര്‍ച്ച ചെയ്തു. തദ്ദേശ സ്വയം ഭരണ സ്ഥാപനങ്ങളുടേതുള്‍പ്പെടെയുള്ള മയക്കുമരുന്ന് വിരുദ്ധ പദ്ധതികള്‍ ഏകോപിപ്പിച്ച് ജില്ലയ്ക്കായി പദ്ധതി രൂപീകരിക്കണമെന്ന് കളക്ടര്‍ ചേതന്‍ കുമാര്‍ മീണ നിര്‍ദേശിച്ചു. ഡീ അഡിക്‌ഷന്‍ സെന്‍ററുകളില്‍ ലഹരിമോചിതരായവരുടെയും ബന്ധുക്കളുടെയും അനുഭവങ്ങള്‍ പങ്കുവയ്ക്കുന്ന പദ്ധതി വിപുലമാക്കും. ജില്ലാ കളക്ടറുടെ ചേംബറില്‍ ചേര്‍ന്ന യോഗത്തില്‍ ജില്ലാ പോലീസ് ചീഫ് എ. ഷാഹുല്‍ ഹമീദ്, എഡിഎം എസ്. ശ്രീജിത്ത്, ഡെപ്യൂട്ടി എക്‌സൈസ് കമ്മീഷണര്‍ കെ.ആര്‍. അജയ്, പാലാ ആര്‍ഡിഒ കെ.പി. ദീപ, പൊതുവിദ്യാഭ്യാസ വകുപ്പ് ഡെപ്യൂട്ടി ഡയറക്ടര്‍ ഹണി എച്ച്. അലക്‌സാണ്ടര്‍, നാര്‍ക്കോട്ടിക് സെല്‍ ഡിവൈഎസ്പി എ.ജെ. തോമസ്, ഡ്രഗ്‌സ് ഇന്‍സ്‌പെക്ടര്‍ താര എസ്. പിള്ള, ജില്ലാ ട്രാന്‍സ്‌പോര്‍ട്ട് ഓഫീസര്‍ എസ്. രമേഷ്, ജില്ലാ വനിതാ സംരക്ഷണ ഓഫീസര്‍ വി.എസ്. ലൈജു, ശിശുസംരക്ഷണ ഓഫീസര്‍ സി.ജെ. ബീന എന്നിവര്‍ പങ്കെടുത്തു.

നിവേദനം നൽകി ചങ്ങനാശേരി അതിരൂപത

ചമ്പക്കുളം: ചങ്ങനാശേരി അതിരൂപതയുടെ സംഘം കുട്ടനാട് സന്ദർശിച്ച കേന്ദ്രകൃഷിസംഘത്തെ കണ്ടു നിവേദനം നൽകി. മുഖ്യ വികാരി ജനറല്‍ ഫാ.ആന്‍റണി ഏത്തയ്ക്കാട്ട് കുട്ടനാടന്‍ കര്‍ഷകര്‍ നേരിടുന്ന പ്രധാന പ്രശ്‌നങ്ങള്‍ സംഘം മുന്‍പാകെ അവതരിപ്പിച്ചു. സമയബന്ധിതമായി നെല്ല് വില ലഭ്യമാക്കുക, ഉത്പാദനച്ചെലവ് അടിസ്ഥാനമാക്കി താങ്ങുവില നിശ്ചയിക്കുക, ഇന്‍ഷ്വറന്‍സ് പദ്ധതികള്‍ കര്‍ഷകര്‍ക്കു ഗുണകരമാകുന്ന രീതിയില്‍ ക്രമീകരിക്കുക, റാംസര്‍ സൈറ്റിന്‍റെ ആനുകൂല്യം കുട്ടനാടന്‍ കര്‍ഷകര്‍ക്ക് ലഭ്യമാക്കുക, വിത്ത് വളം കീടനാശിനികള്‍ മുതലായവയുടെ വില നിയന്ത്രിക്കുക, കുട്ടനാട്ടിലെ വെള്ളക്കെട്ട് ഒഴിവാക്കാൻ നടപടി സ്വീകരിക്കുക തുടങ്ങി ആവശ്യങ്ങൾ നിവേദനത്തിൽ ഉണ്ട്. ക്രിസ് ഡയറക്ടര്‍ ഫാ. തോമസ് താന്നിയത്ത്, ഫാ. മോഹന്‍ മുടന്താഞ്ഞിലില്‍, എകെസിസി അതിരൂപത ഡയറക്ടര്‍ സാവിയോ മാനാട്ട്, കര്‍ഷക പ്രമുഖന്‍ ജോസ് ജോണ്‍ വെങ്ങാന്തറ എന്നിവരും സംഘത്തിലുണ്ടായിരുന്നു.

കാർഷികമേളയ്ക്കു കോഴാ ഒരുങ്ങി

കോട്ടയം: കുറവിലങ്ങാട് കോഴായില്‍ പ്രവര്‍ത്തിക്കുന്ന സംസ്ഥാന വിത്തുത്പാദന കേന്ദ്രവും ജില്ലാ കൃഷിത്തോട്ടവും സപ്തതി വര്‍ഷത്തിലേക്ക് കടക്കുന്നതിന്‍റെ ഭാഗമായി സംഘടിപ്പിക്കുന്ന കാർഷികമേളയ്ക്കു കോഴാ ഒരുങ്ങി. ജില്ലാ പഞ്ചായത്തും സംസ്ഥാന കൃഷിവകുപ്പും ചേര്‍ന്ന് ജില്ലാ കൃഷിത്തോട്ടം, സംസ്ഥാന വിത്തുത്പാദന കേന്ദ്രം, പ്രാദേശിക കാര്‍ഷിക പരിശീലന കേന്ദ്രം, ഉഴവൂര്‍ ബ്ലോക്ക് പഞ്ചായത്ത് ഓപ്പണ്‍ ഓഡിറ്റോറിയം എന്നിവിടങ്ങളിലാണ് 27 മുതല്‍ 30 വരെ ഹരിതാരവം 2കെ25 എന്ന പേരില്‍ ഫാം ഫെസ്റ്റ് നടത്തുന്നത്. പ്രദര്‍ശന സ്റ്റാളുകള്‍, ഘോഷയാത്ര, സമ്മേളനം, സൗഹൃദസദസുകള്‍, ഭക്ഷ്യമേള, കലാസന്ധ്യ, പെറ്റ് ഷോ എന്നിവ സന്ദര്‍ശകര്‍ക്കായി സജ്ജമാക്കിയിട്ടുണ്ട്. മത്സരങ്ങള്‍, നെല്ല്, തെങ്ങ്, പച്ചക്കറി വിഷയങ്ങളിലുള്ള സെമിനാറുകള്‍, രുചിക്കൂട്ട് സംഗമം, കലാവിരുന്നുകള്‍ എന്നിവ നടക്കും. ഫെസ്റ്റ് 27ന് വൈകുന്നേരം നാലിന് മന്ത്രി വി.എന്‍. വാസവന്‍ ഉദ്ഘാടനം ചെയ്യും. സമാപനസമ്മേളനം 30നു വൈകുന്നേരം നാലിന് മന്ത്രി പി. പ്രസാദ് ഉദ്ഘാടനം ചെയ്യും. 28ന് ഉച്ചകഴിഞ്ഞു രണ്ടിന് ഉഴവൂര്‍ ബ്ലോക്ക് ഓപ്പണ്‍ ഓഡിറ്റോറിയത്തില്‍ ഫാം തൊഴിലാളി-ഫാം ഓഫീസര്‍ സംഗമം ജോസ് കെ. മാണി എംപി ഉദ്ഘാടനം ചെയ്യും. പത്രസമ്മേളനത്തില്‍ ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, അംഗങ്ങളായ മഞ്ജു സുജിത്, നിര്‍മല ജിമ്മി, പ്രിന്‍സിപ്പല്‍ കൃഷി ഓഫീസര്‍ സി. ജോ ജോസ്, കൃഷി ഡെപ്യൂട്ടി ഡയറക്ടര്‍ ജി.വി. റെജി, ജില്ലാ കൃഷിത്തോട്ടം സൂപ്രണ്ട് ഹണി ലിസ ചാക്കോ, കൃഷി ഡെപ്യൂട്ടി ഡയറക്ടര്‍ സീന ജോര്‍ജ് എന്നിവര്‍ പങ്കെടുത്തു.

പമ്പയിലെ കാട്ടുപന്നികളെ കോരുത്തോട്ടിലെത്തിച്ചു...?

മുണ്ടക്കയം: ആഗോള അയ്യപ്പസംഗമം അടിപൊളിയാക്കാന്‍ പമ്പയിലെ കാട്ടുപന്നികളെ വനംവകുപ്പ് കോരുത്തോട് വനമേഖലയില്‍ തുറന്നുവിട്ടതായി പരക്കെ സംശയം. ഒരാഴ്ചയായി കോരുത്തോട് ടൗണിലൂടെ കാട്ടുപന്നികള്‍ കൂട്ടമായി വിലസുകയാണ്. കൃഷികള്‍ കുത്തിമറിച്ചും വീട്ടുമുറ്റങ്ങളിലേക്ക് കയറിച്ചെന്നും പന്നികള്‍ നിത്യശല്യമായി. മുന്പ് പമ്പയില്‍നിന്നു വനപാലകര്‍ നൂറിലേറെ പന്നികളെ മതമ്പയിലും നിലയ്ക്കലിലും ഇറക്കിവിട്ടിരുന്നു. മതമ്പയില്‍ എസ്റ്റേറ്റ് ലയങ്ങളില്‍ പന്നികള്‍ ഒരു വര്‍ഷമായി ശല്യം തുടരുന്നതിനിടെയാണ് കോരുത്തോട്ടിലും കടുംകൈ ചെയ്തത്. മുന്പ് വനാതിര്‍ത്തി മേഖലയില്‍ മാത്രമുണ്ടായിരുന്ന കാട്ടുപന്നിശല്യം ഇപ്പോള്‍ കോരുത്തോട് ടൗണ്‍ മേഖലയിലും വ്യാപകമായിരിക്കുകയാണ്. കഴിഞ്ഞദിവസം കൂട്ടമായെത്തിയ കാട്ടുപന്നികള്‍ കര്‍ഷകരുടെ കൃഷികള്‍ വ്യാപകമായി നശിപ്പിച്ചു. കോരുത്തോട് ടൗണില്‍ ബസ് സ്റ്റാന്‍ഡ് നിര്‍മിക്കാന്‍ വാങ്ങിയ സ്ഥലത്ത് ശബരിമല തീര്‍ഥാടകര്‍ക്കായി വിശ്രമകേന്ദ്രം പണിതിരുന്നു. അവിടവും നിലവില്‍ കാട്ടുപന്നികളുടെ താവളമായി മാറിയിരിക്കുകയാണ്. പ്രളയത്തില്‍ അഴുതയാറ്റില്‍ വന്നടിഞ്ഞ മണ്ണും ഈ ഭാഗത്താണ് വാരിക്കൂട്ടിയിരിക്കുന്നത്. ഇവിടവും സമീപത്തെ കര്‍ഷകരുടെ കൃഷികളുമാണ് കാട്ടുപന്നികള്‍ നശിപ്പിക്കുന്നത്. ഇതോടെ കര്‍ഷകര്‍ രാത്രി കാവലിരുന്നു കൃഷി സംരക്ഷിക്കേണ്ട ഗതികേടിലാണ്. മുന്‍ വര്‍ഷങ്ങളില്‍ ശബരിമല സീസണ്‍ ആരംഭിക്കുന്നതിന് മുമ്പായി പമ്പയില്‍നിന്നു കാട്ടുപന്നികളെ പിടികൂടി വനംവകുപ്പ് ഉദ്യോഗസ്ഥര്‍ ജനവാസമേഖലയില്‍ ഇറക്കിവിടുന്നതായി വ്യാപക പരാതി ഉയര്‍ന്നിട്ടുണ്ട്. കപ്പയും വാഴയും നടാതിരുന്നാല്‍ വന്യമൃഗങ്ങള്‍ വരില്ലെന്ന്...! ഉപദേശവുമായി വനപാലകൻ മുണ്ടക്കയം: കപ്പയും വാഴയും പ്ലാവും വനാതിര്‍ത്തിയില്‍ നടാതിരുന്നാല്‍ വന്യമൃഗങ്ങള്‍ വരില്ലെന്ന് വനപാലകന്‍റെ വിദഗ്ധ ഉപദേശം. മനുഷ്യരെപ്പോലെ ആനയ്ക്കും കുരങ്ങനും മ്ലാവിനുമൊക്കെ വിശപ്പുണ്ടെന്നും തീറ്റ തേടി അവ നാട്ടിലേക്കിറങ്ങുക സ്വാഭാവിമാണെന്നും എരുമേലി വനമേഖലയിലെ ഒരു ഫോറസ്റ്റ് ബീറ്റ് ഓഫീസര്‍ ഫോണില്‍ നല്‍കുന്ന ഉപദേശം ഇന്നലെ മലയോരമേഖലയില്‍ വ്യാപക ചര്‍ച്ചയായി. മുണ്ടക്കയം, കോരുത്തോട്, പെരുവന്താനം, എരുമേലി പഞ്ചായത്തുകളുടെ വനയോരങ്ങളില്‍ വിളവെടുക്കാറായ കപ്പയും വാഴയും അടുത്തയിടെയായി കാട്ടുപന്നി കുത്തിമറിക്കുകയാണ്. വാരത്തിനെടുത്തും കൂലിക്കാരെ നിറുത്തിയും വളര്‍ത്തിയവ അപ്പാടെ നഷ്ടമായ വേദനയില്‍ മനം നൊന്തുകഴിയുമ്പോഴാണ് ഫോറസ്റ്റ് ഓഫീസറുടെ ആക്ഷേപ ഉപദേശം. കപ്പയും വാഴയും ചേനയും ചേമ്പും നടാതെ കര്‍ഷകര്‍ എന്തു ഭക്ഷിക്കുമെന്നാണ് ജനങ്ങളുടെ ചോദ്യം. ഉദ്യോഗസ്ഥരെപ്പോലെ ബര്‍ഗറും പിസ്തയുമൊന്നും വാങ്ങിക്കഴിക്കാന്‍ കര്‍ഷകര്‍ക്ക് പണമില്ലെന്നും കപ്പയും ചക്കയും ചേനയും ചേമ്പുമൊക്കെയാണ് കര്‍ഷകരുടെ ഭക്ഷണമെന്നും വിശദീകരിക്കുന്ന വീഡിയോയും ഇന്നലെ വ്യാപകമായി പ്രചരിച്ചു. റബര്‍ നട്ടാല്‍ കേഴയും പന്നിയും കുത്തിമറിക്കുന്ന സാഹചര്യത്തില്‍ വേറെ എന്തു കൃഷി എന്നതാണ് ചോദ്യം. വനാതിര്‍ത്തിയില്‍ കൃഷി ഒഴിവാക്കിയാല്‍ അവിടെ കാടുവളര്‍ന്ന് മൃഗങ്ങള്‍ സ്ഥിരവാസമുറപ്പിക്കും. വന്യമൃഗങ്ങള്‍ നശിപ്പിക്കാത്തതും മനുഷ്യര്‍ക്ക് ഭക്ഷിക്കാന്‍ പറ്റുന്നതുമായ വിഭവങ്ങള്‍ ഉണ്ടെങ്കില്‍ വനംവകുപ്പ് ലിസ്റ്റ് തരണമെന്നാണ് കര്‍ഷകര്‍ പറയുന്നത്. കപ്പ പന്നി കുത്തിമറിക്കുന്ന സാഹചര്യത്തില്‍ ഏറെപ്പേര്‍ ജാതി നട്ടുവളര്‍ത്തിയപ്പോള്‍ ജാതിക്ക വേഴാമ്പലും ഉപ്പനും കുരങ്ങും നശിപ്പിക്കുകയാണ്. കാന്താരി കൃഷി ചെയ്തപ്പോള്‍ മയില്‍ തിന്നു നശിപ്പിക്കുന്നു. കൂവയും ഇഞ്ചിയും മാത്രമാണ് അല്‍പം ആശ്വാസം. പക്ഷേ ഇതുകൊണ്ട് വിശപ്പടക്കാനാവില്ലല്ലോ എന്നതാണ് ന്യായമായ ചോദ്യം. കര്‍ഷകരെ പ്രകോപിപ്പിക്കുന്നതും അധിക്ഷേപിക്കുന്നതുമായ വിശദീകരണങ്ങള്‍ വനപാലകര്‍ ഇനി നടത്തരുതെന്നാണ് കര്‍ഷകര്‍ക്കു പറയാനുള്ളത്.

താഴത്തങ്ങാടി വള്ളംകളി

കോട്ടയം: സംസ്ഥാന ടൂറിസംവകുപ്പ് സംഘടിപ്പിക്കുന്ന ഒമ്പതു ചുണ്ടന്‍ വള്ളങ്ങള്‍ പങ്കെടുക്കുന്ന ചാമ്പ്യന്‍സ് ബോട്ട് ലീഗും വിവിധ ഗ്രേഡുകളിലുള്ള ചെറു കളിവള്ളങ്ങൾ പങ്കെടുക്കുന്ന 124-ാമത് ഗെയില്‍ കോട്ടയം ബോട്ട് റേസും സംയുക്തമായി താഴത്തങ്ങാടി ആറ്റില്‍ 27നു ഉച്ചകഴിഞ്ഞ് രണ്ടു മുതല്‍ അരങ്ങേറും. മുഖ്യസംഘാടകരായ കോട്ടയം വെസ്റ്റ് ക്ലബ്, ടൂറിസം വകുപ്പ്, കോട്ടയം നഗരസഭ, തിരുവാര്‍പ്പ് പഞ്ചായത്ത് എന്നിവരുടെ നേതൃത്വത്തിൽ ഒരുക്കങ്ങൾ അവസാന ഘട്ടത്തിൽ. ഫിനിഷിംഗ് പോയിന്‍റിലുള്ള മുഖ്യപവലിയനില്‍ വിശിഷ്ടാതിഥികള്‍, ടൂറിസ്റ്റുകള്‍ ഉള്‍പ്പെടെ 350 പേര്‍ക്ക് വള്ളംകളി കാണാൻ സൗകര്യമുണ്ട്. സ്റ്റിൽ സ്റ്റാർട്ട് സംവിധാനം മത്സരങ്ങള്‍ക്ക് കൃത്യത ഉറപ്പാക്കാനുള്ള സ്റ്റില്‍സ്റ്റാര്‍ട്ട് സംവിധാനം, മൂന്ന് ട്രാക്കുകള്‍, ഫോട്ടോഫിനിഷ് സംവിധാനം എന്നിവ സിബിഎല്‍ ടീം ക്രമീകരിക്കും. ഉച്ചകഴിഞ്ഞ് രണ്ടിനു ജില്ലാ കളക്ടര്‍ ചേതന്‍കുമാര്‍ മീണ പതാക ഉയര്‍ത്തുന്നതോടെ ഉദ്ഘാടന സമ്മേളനം ആരംഭിക്കും. തിരുവഞ്ചൂര്‍ രാധാകൃഷ്ണന്‍ എംഎല്‍എ അധ്യക്ഷതവഹിക്കും. മന്ത്രി വി.എന്‍. വാസവന്‍ ഉദ്ഘാടനം ചെയ്യും. ഫ്രാന്‍സിസ് ജോര്‍ജ് എംപി, ചാണ്ടി ഉമ്മന്‍ എംഎല്‍എ, സുരേഷ് കുറുപ്പ്, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ടൂറിസം അഡീഷണല്‍ ഡയറക്ടര്‍ ശ്രീധന്യ സുരേഷ് തുടങ്ങിയവര്‍ പ്രസംഗിക്കും. 124-ാമത് കോട്ടയം മത്സര വള്ളംകളിയുടെ സുവനീര്‍ പ്രകാശനവും നടത്തും. 2.15നു ചുണ്ടന്‍ വള്ളങ്ങളുടെ മാസ് ഡ്രില്ലും 2.45ന് ഹീറ്റ്‌സ് മത്സരങ്ങളും തുടര്‍ന്ന് ചെറുവള്ളങ്ങളുടെ ഹീറ്റ്‌സും നടത്തും. നാലിനു ചെറുവള്ളങ്ങളുടെയും തുടര്‍ന്നു ചുണ്ടന്‍ വള്ളങ്ങളുടെയും ഫൈനല്‍ മത്സരങ്ങള്‍ അരങ്ങേറും. അഞ്ചിന് ജില്ലാ കളക്ടര്‍ സമ്മാനദാനം നിര്‍വഹിക്കും.

മേലോരം പോകണേൽ കുളങ്ങൾ താണ്ടണം!

മുണ്ടക്കയം ഈസ്റ്റ്‌: കൊക്കയാർ പഞ്ചായത്തിന്‍റെ കാർഷിക മേഖലയായ മേലോരത്തേക്കുള്ള റോഡ് തകർന്നിട്ട് വർഷങ്ങൾ. നൂറുകണക്കിനു കുടുംബങ്ങൾ അധിവസിക്കുന്ന മേഖലയിലേക്കുള്ള ഏക റോഡാണ് നാളുകളായി കുണ്ടുംകുഴിയും നിറഞ്ഞു യാത്രായോഗ്യമല്ലാതായി തീർന്നിരിക്കുന്നത്. 35-ാംമൈൽ-നെടുമ്പാശേരി റോഡിൽനിന്നു മേലോരത്തേക്കു തിരിയുന്ന നെടുമൺപുരം കവല മുതൽ മേലോരം വരെയുള്ള ഏഴു കിലോമീറ്ററിൽ അധികം വരുന്ന റോഡിന്‍റെ അഞ്ചു കിലോമീറ്റർ ദൂരവും പൂർണമായും തകർന്ന നിലയിലാണ്. മഴക്കാലത്തു കുഴികളിൽ വെള്ളം നിറയുന്നതോടെ റോഡിന്‍റെ പല ഭാഗവും കുളത്തിനു സമാനമാണ്. ബസ് മുടക്കം പതിവ് 35-ാംമൈലിൽനിന്ന് ആരംഭിച്ച് നെടുമൺപുരം കവലയിൽനിന്നു തിരിഞ്ഞ് മേലോരം-അഴങ്ങാട്-ആനചാരി വഴി പെരുവന്താനത്തെത്താവുന്ന റോഡാണിത്. നിലവിൽ ഒരു കെഎസ്ആർടിസി ബസ് മാത്രമാണ് ഇതുവഴി സർവീസ് നടത്തുന്നത്. തകർന്ന റോഡിലൂടെയുള്ള യാത്ര മൂലം പല ദിവസങ്ങളിലും സർവീസ് മുടങ്ങും. ഇതോടെ സ്കൂൾ, കോളജ് വിദ്യാർഥികളടക്കമുള്ളവരുടെ യാത്ര ദുരിതത്തിലാകും. ടാക്സി വാഹനങ്ങൾപോലും ഇതുവഴി വരാൻ മടിക്കുകയാണെന്നു നാട്ടുകാർ പറയുന്നു. ടൂറിസം സാധ്യത വാഗമൺ മലനിരകളുടെ മടിത്തട്ടിലുള്ള പ്രകൃതിരമണീയമായ സ്ഥലമാണ് മേലോരം, അഴങ്ങാട് പ്രദേശങ്ങൾ. അതിമനോഹരമായി പണിതിട്ടുള്ള പ്രകൃതിഭംഗി നിറഞ്ഞ മുണ്ടക്കയത്തിന്‍റെ ഗ്യാപ് റോഡ് എന്നറിയപ്പെടുന്ന 35-ാംമൈൽ-കൊക്കയാർ റോഡിൽനിന്നു വേണം മേലോരത്തേക്കു പോകാൻ. യാത്രയിൽ ചെറുതും വലുതുമായ നിരവധി വെള്ളച്ചാട്ടങ്ങളും ആസ്വദിക്കാം. നിരവധി ആളുകളാണ് ഗ്യാപ് റോഡിന്‍റെ ഭംഗി ആസ്വദിക്കാനായി എത്തുന്നത്. ഇവർക്കു മേലോരം വഴിയുള്ള യാത്ര നവ്യാനുഭവമാകും സമ്മാനിക്കുക. കൊക്കയാർ പഞ്ചായത്തിലെ ടൂറിസത്തിന്‍റെ അനന്തസാധ്യതകളെ പ്രയോജനപ്പെടുത്തിയാൽ മലയോരത്തിന്‍റെ വികസനത്തിനും വലിയ മുതൽക്കൂട്ടാകും.

വിദ്യാഭ്യാസ പരിവർത്തന സന്ദേശയാത്രയ്ക്ക് സ്വീകരണം

കാഞ്ഞിരപ്പള്ളി: വിവിധ ആവശ്യങ്ങൾ ഉന്നയിച്ച് കേരള പ്രദേശ് സ്കൂൾ ടീച്ചേഴ്സ് അസോസിയേഷൻ സംസ്ഥാന വ്യാപകമായി നടത്തിവരുന്ന സന്ദേശയാത്രയ്ക്ക് പേട്ടക്കവലയിൽ സ്വീകരണം നൽകി. കെപിസിസി ജനറൽ സെക്രട്ടറി പി.എ. സലീം സ്വീകരണയോഗം ഉദ്ഘാടനം ചെയ്തു. ജില്ലാ ട്രഷറർ ടോമി ജേക്കബ് അധ്യക്ഷത വഹിച്ചു. ഡിസിസി ജനറൽ സെക്രട്ടറി പി.എ. ഷെമീർ മുഖ്യപ്രഭാഷണം നടത്തി. ഡിസിസി ജനറൽ സെക്രട്ടറി പ്രഫ. റോണി കെ. ബേബി ആമുഖപ്രഭാഷണം നടത്തി. ‌കെപിഎസ്ടിഎ സംസ്ഥാന പ്രസിഡന്‍റ് അബ്ദുൾ മജീദ്, ജില്ലാ പ്രസിഡന്‍റ് ആർ. രാജേഷ്, യോഗേഷ് ജോസഫ്, മനോജ് വി. പോൾ, മുൻ സംസ്ഥാന വൈസ് പ്രസിഡന്‍റ് പി.വി. ഷാജിമോൻ, ബ്ലോക്ക് പഞ്ചായത്ത് മെംബർ ഡാനി ജോസ്, സന്തോഷ് കുമാർ, നാസർ മുണ്ടക്കയം എന്നിവർ പ്രസംഗിച്ചു. വികലമായ വിദ്യാഭ്യാസ പരിഷ്കരണങ്ങൾ അവസാനിപ്പിക്കുക, ശമ്പള പരിഷ്കരണ കുടിശിക ഉടൻ അനുവദിക്കുക, പുതിയ ശമ്പള പരിഷ്കരണ കമ്മീഷനെ നിയമിക്കുക, ഉച്ചഭക്ഷണത്തുകയിലെ അപര്യാപ്തത പരിഹരിക്കുക, വിദ്യാഭ്യാസരംഗത്തെ പരീക്ഷണ പരിഷ്കരണങ്ങൾ അവസാനിപ്പിക്കുക എന്നീ ആവശ്യങ്ങൾ ഉന്നയിച്ചാണ് സന്ദേശയാത്ര നടത്തിയത്.

മുൻ മെംബറും കുടുംബവും വീട് ഒഴിയണമെന്ന് പഞ്ചായത്തും വനംവകുപ്പും

എരുമേലി: പാക്കാനം വാർഡ് മുൻ മെംബർ ജോമോൻ തോമസ് വാഴപ്പനാടി, ഭാര്യ ജീന, മക്കൾ എന്നിവർ ഉൾപ്പെട്ട കുടുംബം പാക്കാനം ടൗണിലുള്ള വീട്ടിൽനിന്ന് ഒരാഴ്ചയ്ക്കകം ഒഴിയണമെന്ന് പഞ്ചായത്ത്‌ സെക്രട്ടറി നോട്ടീസ് നൽകി. വനംവകുപ്പിന്‍റെ അധീനതയിലുള്ള തോട് കൈവശപ്പെടുത്തിയാണ് ജോമോൻ വീടും അതിനോടു ചേർന്ന് കടയും നിർമിച്ചതെന്നുകാട്ടി ഒഴിപ്പിക്കാൻ വനംവകുപ്പും നടപടികളിലേക്ക്. അതേസമയം തന്‍റെ സ്വന്തം സ്ഥലമാണിതെന്നും അനധികൃത നിർമാണമെന്ന് ആരോപിച്ച് രാഷ്‌ട്രീയ വിരോധം തീർക്കുകയാണെന്നും ജോമോൻ പറയുന്നു. കോൺഗ്രസ്‌ നേതാവായ ജോമോൻ മുൻ ഭരണസമിതിയിൽ മെംബറായിരുന്നു. കഴിഞ്ഞ തെരഞ്ഞെടുപ്പിൽ വാർഡ് വനിതാ സംവരണമായതോടെ ജോമോന്‍റെ ഭാര്യ കോൺഗ്രസ്‌ സ്ഥാനാർഥിയായി മത്സരിച്ചെങ്കിലും പരാജയപ്പെട്ടു. സിപിഎമ്മിലെ ചിലർ വ്യാജ പരാതി നൽകി തന്‍റെ വീടും കടയും ഒഴിപ്പിക്കാൻ ശ്രമിക്കുകയാണെന്ന് ജോമോൻ പറഞ്ഞു. ജോമോന്‍റെ വീടും കടയും അനധികൃത നിർമാണമാണെന്ന് ആരോപിച്ച് ചിലർ ഹൈക്കോടതിയിൽ നൽകിയ ഹർജിയെത്തുടർന്നാണ് ഇപ്പോൾ ഒഴിപ്പിക്കൽ ഉത്തരവ് നോട്ടീസ് നൽകിയതെന്ന് പഞ്ചായത്ത്‌ അധികൃതർ പറയുന്നു. നാലുവർഷം മുമ്പ് പ്രളയത്തിൽ വീടിനും കടയ്ക്കും നാശനഷ്‌ടങ്ങൾ സംഭവിച്ചതിനെത്തുടർന്ന് ഇത് ബലപ്പെടുത്താൻ നടത്തിയ നിർമാണമാണ് അനധികൃതമാണെന്ന് ചിലർ ആരോപിക്കുന്നതെന്നും ഇതിന് പിന്നിൽ രാഷ്‌ട്രീയവിരോധമാണെന്നും ജോമോൻ പറഞ്ഞു. എന്നാൽ, നിർമാണം നടത്തിയത് റോഡിന്‍റെയും തോടിന്‍റെയും സ്ഥലം കൈവശപ്പെടുത്തിയാണെന്നും ഇതിനെതിരേ അന്ന് പഞ്ചായത്ത്‌, പോലീസ് എന്നിവിടങ്ങളിൽ പരാതികൾ നൽകിയെങ്കിലും നടപടികൾ സ്വീകരിക്കാത്തതിനെത്തുടർന്നാണ് കോടതിയെ സമീപിച്ചതെന്ന് ഹർജി നൽകിയ ടി.ജി. രാജു തെക്കേമേലേതിൽ, ജിജി ഉറുമ്പിൽ, ബൈജു പടിഞ്ഞാറെപറമ്പിൽ എന്നിവർ പറഞ്ഞു. സംഭവത്തിൽ കോൺഗ്രസ്‌ യോഗം ചേർന്ന് പ്രതിഷേധിച്ചു. കോൺഗ്രസ്‌ ബ്ലോക്ക്‌ പ്രസിഡന്‍റ് ബിനു മറ്റക്കര ഉദ്ഘാടനം ചെയ്തു. സി.പി. രാജപ്പൻ അധ്യക്ഷത വഹിച്ചു. ജോയ് പാലമുറി, പി.കെ. വിശ്വംഭരൻ, സജീവ് വലിയപറമ്പിൽ, തങ്കച്ചൻ വെട്ടിക്കൽ തുടങ്ങിയവർ പ്രസംഗിച്ചു.

എലിക്കുളം പഞ്ചായത്തിൽ ജില്ലാ പഞ്ചായത്തിന്‍റെ 16 ഉയരവിളക്കുകൾ

പൈക: ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ അനുവദിച്ച 20 ലക്ഷം രൂപ ഉപയോഗിച്ച് എലിക്കുളം പഞ്ചായത്തിലെ 16 കേന്ദ്രങ്ങളില്‍ സ്ഥാപിച്ച മിനി മാസ്റ്റ് ലൈറ്റുകളുടെ ഉദ്ഘാടനം 25, 26, 27 തീയതികളില്‍ വിവിധ കേന്ദ്രങ്ങളില്‍ നടത്തും. ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ ലൈറ്റുകളുടെ സ്വിച്ച്ഓണ്‍ കര്‍മം നടത്തും. പഞ്ചായത്ത് പ്രസിഡന്‍റ് ജിമ്മിച്ചന്‍ ഈറ്റത്തോട്ട് അധ്യക്ഷത വഹിക്കും. ഇന്നു വൈകുന്നേരം 5.30ന് പൈക ആശുപത്രി കോമ്പൗണ്ട്, ആറിന് പൈക തിയറ്റര്‍പടി, 6.15ന് ഏഴാം മൈല്‍ ടേക്ക് എ ബ്രേക്ക്, 6.30ന് മടുക്കകുന്ന് പള്ളി ജംഗ്ഷന്‍, 6.45ന് അഞ്ചാംമൈല്‍, ഏഴിന് വഞ്ചിമല കവല, നാളെ വൈകുന്നേരം 5.30ന് പനമറ്റം കവല, ആറിന് ഇളങ്ങുളം ചന്തക്കവല, 6.15ന് ചെങ്ങളത്തുപറമ്പില്‍ ജംഗ്ഷന്‍, 6.30ന് ഇല്ലിക്കോണ്‍, 6.45ന് താഷ്‌കന്‍റ് കവല, 27നു വൈകുന്നേരം 5.30ന് മല്ലികശേരി പള്ളി ജംഗ്ഷന്‍, ആറിന് മല്ലികശേരി എസ്എന്‍ഡിപി ജംഗ്ഷന്‍, 6.15ന് അമ്പലവയല്‍, 6.30ന് പനച്ചിക്കല്‍ കവല, ഏഴിന് സെറിനിറ്റി ഹോം എന്നിവിടങ്ങളിൽ മിനി മാസ്റ്റ് ലൈറ്റുകളുടെ സ്വിച്ച്ഓണ്‍ കര്‍മം നടത്തും. വിവിധ യോഗങ്ങളില്‍ പഞ്ചായത്ത് വൈസ് പ്രസിഡന്‍റ് സൂര്യാമോള്‍, മെംബര്‍മാരായ ജയിംസ് ജീരകത്ത്, മാത്യൂസ് പെരുമനങ്ങാട്, യമുന പ്രസാദ്, സിനി ജോയി, ആശാമോള്‍ റോയി എന്നിവര്‍ പങ്കെടുക്കും.

മുട്ടപ്പള്ളിയിൽ കാട്ടുപന്നിക്കൂട്ടം തകർത്തതു അബ്ദുൾ കരീമിന്‍റെ ഉപജീവന പ്രതീക്ഷകൾ

മുക്കൂട്ടുതറ: മുട്ടപ്പള്ളിയിൽ കാട്ടുപന്നിക്കൂട്ടം തകർത്തതു വയോധികനായ അബ്ദുൾ കരീമിന്‍റെ ഉപജീവന പ്രതീക്ഷകളെ. രണ്ടു മാസം കഴിഞ്ഞാൽ വിളവെടുക്കാൻ കഴിയുന്ന 200 മൂട് കപ്പയാണ് ഏതാനും സമയംകൊണ്ട് പന്നികൾ കുത്തിമറിച്ചു തകർത്തത്. കഴിഞ്ഞ ദിവസം അർധരാത്രി രണ്ടിനാണ് പറമ്പിനു ചുറ്റുമുള്ള വല തകർത്തു കാട്ടുപന്നികൾ ഇരച്ചുകയറിയത്. വീടിനടുത്തുള്ള ഈ കൃഷിയിടത്തിൽ അതിനു തൊട്ടു മുമ്പുവരെ കാവലിരുന്ന ശേഷം ഉറങ്ങാൻ കിടന്നു കഴിഞ്ഞപ്പോഴാണ് പന്നികൾ എത്തിയതെന്നു വിഷമത്തോടെ അബ്ദുൾ കരീം പറയുന്നു. അയൽവാസികളിൽ പലരുടെയും കൃഷികൾക്കും നാശമുണ്ട്. മുട്ടപ്പള്ളി ഗവൺമെന്‍റ് എൽപി സ്കൂളിന്‍റെ പുറകിലുള്ള കൊല്ലംതുണ്ടിപ്പറമ്പിൽ അബ്ദുൾ കരീമിന്‍റെ അര ഏക്കർ സ്ഥലത്ത് ആറു മാസം മുമ്പാണ് 800 മൂട് കപ്പ നട്ടത്. കൂലി നൽകി ബാക്കി ജോലികളും ചെയ്തുവരികയായിരുന്നു. രണ്ടു മാസംകൂടി കഴിഞ്ഞാൽ പൂർണമായും വിളവെടുപ്പ് നടത്താവുന്ന നിലയിൽ ആയപ്പോഴാണ് 200ഓളം മൂട് കപ്പ പന്നികൾ നശിപ്പിച്ചത്. പൊതുപ്രവർത്തകൻ കാവുങ്കൽ എബി, പഞ്ചായത്ത്‌ പ്രസിഡന്‍റ് സുബി സണ്ണി, ഫോറസ്റ്റ് റേഞ്ച് ഓഫീസർ ഹരിലാൽ കൃഷ്ണൻ എന്നിവരെ ഫോണിൽ വിവരം അറിയിച്ചു. ഇതേത്തുടർന്നു പന്നികളെ വെടിവച്ചു കൊല്ലാൻ അനുമതി നൽകിയെന്നു പ്രസിഡന്‍റും റേഞ്ച് ഓഫീസറും അറിയിച്ചു. അടുത്ത ദിവസങ്ങളിൽ ഇനിയും പന്നികളുടെ വരവ് ഉണ്ടാകുമെന്ന ആശങ്കയിലാണ് നാട്ടുകാർ.

ലഹരിവിരുദ്ധ ബോധവത്കരണവുമായി മമ്മൂട്ടി ഫൗണ്ടേഷന്‍റെ ‘വഴികാട്ടി’ പദ്ധതി

പാലാ: ചലച്ചിത്രതാരം മമ്മൂട്ടി നേതൃത്വം നല്‍കുന്ന ജീവകാരുണ്യ സംഘടനയായ കെയര്‍ ആന്‍ഡ് ഷെയര്‍ ഇന്‍റര്‍നാഷണല്‍ ഫൗണ്ടേഷന്‍റെ ‘വഴികാട്ടി’ പദ്ധതിയുടെ ഭാഗമായി മുത്തോലി സെന്‍റ് ആന്‍റണീസ് ഹയര്‍ സെക്കന്‍ഡറി സ്‌കൂളില്‍ ലഹരിവിരുദ്ധ ബോധവത്കരണ പരിപാടി സംഘടിപ്പിച്ചു. ഡോ. സിറിയക് തോമസ് ഉദ്ഘാടനം നിര്‍വഹിച്ചു. സ്‌കൂള്‍ മാനേജര്‍ റവ. ഡോ. മാത്യു ആനത്താരക്കല്‍ സിഎംഐ അധ്യക്ഷത വഹിച്ചു. കെയര്‍ ആന്‍ഡ് ഷെയര്‍ ഇന്‍റര്‍നാഷണല്‍ ഫൗണ്ടേഷന്‍ മാനേജിംഗ് ഡയറക്ടര്‍ ഫാ. തോമസ് കുര്യന്‍ മരോട്ടിപ്പുഴ, ശ്രീരാമകൃഷ്ണ മഠം മേധാവി വീധസംഗാനന്ദ, പ്രിന്‍സിപ്പല്‍ മിനി മാത്യു, ഹെഡ്മിസ്ട്രസ് ട്രീസാ പി.ജെ. മേരി, ഡോ. റൂബിള്‍ രാജ് എന്നിവര്‍ പ്രസംഗിച്ചു. വഴികാട്ടിയുടെ കീഴിലുള്ള ടോക്ക് ടു മമ്മൂക്ക എന്ന പദ്ധതിയിലൂടെ ലഹരിയുമായി ബന്ധപ്പെട്ട വിവരങ്ങളും കൗണ്‍സലിംഗ് പോലെയുള്ള ആവശ്യങ്ങളും ഒരു ഹെല്‍പ്പ് ലൈനിലൂടെ അറിയിക്കാം. വിവിധ പദ്ധതികളിലൂടെ കുട്ടികള്‍ക്കായുള്ള സൗജന്യ റോബോട്ടിക് സര്‍ജറി, സൗജന്യ ഹൃദയ വാല്‍വ് സര്‍ജറി, സൗജന്യ വൃക്ക ട്രാന്‍സ്പ്ലാന്‍റേഷന്‍, വിവിധങ്ങളായ ആദിവാസി ക്ഷേമ പ്രവര്‍ത്തനങ്ങള്‍ എന്നിങ്ങനെ ഒട്ടേറെ കാര്യങ്ങള്‍ ഫൗണ്ടേഷന്‍ നടത്തുന്നു.

വയലില്‍ വോളി: പാലാ സെന്‍റ് തോമസ് ഫൈനലില്‍

പാലാ: സെന്‍റ് തോമസ് കോളജില്‍ നടന്നുവരുന്ന 44-ാമത് ബിഷപ് വയലില്‍ അഖില കേരള ഇന്‍റര്‍ കൊളീജിയറ്റ് വോളിബോള്‍ ടൂര്‍ണമെന്‍റില്‍ ആതിഥേയരായ പാലാ സെന്‍റ് തോമസ് കോളജ് ഫൈനലില്‍ പ്രവേശിച്ചു. അങ്കമാലി ഡി പോള്‍ കോളജ് ഓഫ് സയന്‍സ് ആന്‍ഡ് ടെക്‌നോളജിയെ രണ്ടിനെതിരേ മൂന്നു സെറ്റുകള്‍ക്ക് കീഴടക്കിയാണ് സെന്‍റ് തോമസ് ഫൈനലില്‍ പ്രവേശിച്ചത്. (സ്‌കോര്‍: 22-25, 25-21, 25-18, 21-25, 15-11). ഇന്നലെ രാവിലെ നടന്ന മറ്റൊരു മത്സരത്തില്‍ അരുവിത്തുറ സെന്‍റ് ജോര്‍ജ് കോളജിനെ രണ്ടിനെതിരേ മൂന്നു സെറ്റുകള്‍ക്ക് തേവര സേക്രഡ് ഹാര്‍ട്ട് കോളജ് തോൽപ്പിച്ചു. സ്‌കോര്‍: 25-19, 19-25, 25-23, 23-25, 17-15. ഇന്ന് ഉച്ചകഴിഞ്ഞ് മൂന്നിന് നടക്കുന്ന പുരുഷവിഭാഗം രണ്ടാം സെമിഫൈനലില്‍ ഇരിങ്ങാലക്കുട ക്രൈസ്റ്റ് കോളജ് തേവര കോളജിനെ നേരിടും. വനിതാവിഭാഗം ഫൈനല്‍ നാളെ രാവിലെ ഏഴിനും പുരുഷ വിഭാഗം ഫൈനല്‍ നാളെ ഉച്ചകഴിഞ്ഞ് മൂന്നിനും ആരംഭിക്കും.

കടനാട് പഞ്ചായത്ത് അനധികൃതമായി ചെലവഴിച്ച തുക ബന്ധപ്പെട്ട ഉദ്യോഗസ്ഥനില്‍നിന്ന് ഈടാക്കാന്‍ ഉത്തരവ്

കടനാട്: കടനാട് പഞ്ചായത്തില്‍ ലൈബ്രറി വികസനമെന്ന പേരില്‍ ചെലവാക്കിയ 1,20,000 രൂപ പഞ്ചായത്തില്‍ ആ കാലയളവില്‍ സേവനം അനുഷ്ഠിച്ചിരുന്ന ബന്ധപ്പെട്ട ഉദ്യോഗസ്ഥനില്‍നിന്ന് ഈടാക്കാന്‍ ഹൈക്കോടതി ഉത്തരവ്. മാത്യു ചന്ദ്രന്‍കുന്നേലിന്‍റെ പേരിലുള്ള മൂന്ന് സെന്‍റ് സ്ഥലം നീലൂര്‍ നാഷണല്‍ ലൈബ്രറി ആന്‍ഡ് റീഡിംഗ് റൂമിന് താത്കാലികാടിസ്ഥാനത്തില്‍ പ്രവര്‍ത്തിക്കാന്‍ വിട്ടുനല്‍കിയിരുന്നു. 2008ല്‍ സംസ്ഥാന ലൈബ്രറി കൗണ്‍സിലിന്‍റെ മുന്‍കൂര്‍ അനുവാദം വാങ്ങണമെന്ന നിബന്ധനയ്ക്കു വിരുദ്ധമായി ലൈബ്രറി കെട്ടിടവും സ്ഥലവും കടനാട് പഞ്ചായത്തിന് വിട്ടുകൊടുക്കാന്‍ ലൈബ്രറി ഭരണസമിതി തീരുമാനിച്ചു. തുടര്‍ന്ന് പഞ്ചായത്ത് ഈ കെട്ടിടം 1.20 ലക്ഷം രൂപ മുടക്കി നവീകരിക്കുകയും ചെയ്തു. ഇതിനിടെ, തന്‍റെ പിതാവിന്‍റെ പേരിലുള്ള വസ്തു തിരികെ കിട്ടണമെന്ന് ആവശ്യപ്പെട്ട് മകൻ സേവ്യര്‍ മാത്യു സര്‍ക്കാരിനെ സമീപിച്ചു. തുടര്‍ന്ന് തദ്ദേശ സ്വയംഭരണ വകുപ്പ് സെക്രട്ടറി ലൈബ്രറി സ്ഥിതി ചെയ്യുന്ന വസ്തു അതിന്‍റെ ഉടമയ്ക്ക് തിരികെ നല്‍കാനും കെട്ടിടം നവീകരിക്കാന്‍ ചെലവാക്കിയ 1.20 ലക്ഷം രൂപ ആ കാലയളവില്‍ സേവനം അനുഷ്ഠിച്ചിരുന്ന ഉദ്യോഗസ്ഥനില്‍നിന്ന് ഈടാക്കിയെടുക്കുന്നതിനും ഉത്തരവിട്ടു. സര്‍ക്കാര്‍ ഉത്തരവിനെതിരേ കടനാട് പഞ്ചായത്ത് ഹൈക്കോടതിയെ സമീപിച്ചെങ്കിലും വസ്തു ഹര്‍ജിക്കാരന് വിട്ടുനല്‍കാൻ ഉത്തരവായി. ഹര്‍ജിക്കാരനു വേണ്ടി അഡ്വ. സെര്‍ജി ജോസഫ് തോമസ് ഹാജരായി.

എലിക്കുളം പഞ്ചായത്തിൽ 16 ഉയരവിളക്കുകൾ

പൈക: ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ അനുവദിച്ച 20 ലക്ഷം രൂപ ഉപയോഗിച്ച് എലിക്കുളം പഞ്ചായത്തിലെ 16 കേന്ദ്രങ്ങളില്‍ സ്ഥാപിച്ച മിനി മാസ്റ്റ് ലൈറ്റുകളുടെ ഉദ്ഘാടനം 25, 26, 27 തീയതികളില്‍ വിവിധ കേന്ദ്രങ്ങളില്‍ നടത്തും. ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ ലൈറ്റുകളുടെ സ്വിച്ച്ഓണ്‍ കര്‍മം നടത്തും. പഞ്ചായത്ത് പ്രസിഡന്‍റ് ജിമ്മിച്ചന്‍ ഈറ്റത്തോട്ട് അധ്യക്ഷത വഹിക്കും. ഇന്നു വൈകുന്നേരം 5.30ന് പൈക ആശുപത്രി കോമ്പൗണ്ട്, ആറിന് പൈക തിയറ്റര്‍പടി, 6.15ന് ഏഴാം മൈല്‍ ടേക്ക് എ ബ്രേക്ക്, 6.30ന് മടുക്കകുന്ന് പള്ളി ജംഗ്ഷന്‍, 6.45ന് അഞ്ചാംമൈല്‍, ഏഴിന് വഞ്ചിമല കവല, നാളെ വൈകുന്നേരം 5.30ന് പനമറ്റം കവല, ആറിന് ഇളങ്ങുളം ചന്തക്കവല, 6.15ന് ചെങ്ങളത്തുപറമ്പില്‍ ജംഗ്ഷന്‍, 6.30ന് ഇല്ലിക്കോണ്‍, 6.45ന് താഷ്‌കന്‍റ് കവല, 27നു വൈകുന്നേരം 5.30ന് മല്ലികശേരി പള്ളി ജംഗ്ഷന്‍, ആറിന് മല്ലികശേരി എസ്എന്‍ഡിപി ജംഗ്ഷന്‍, 6.15ന് അമ്പലവയല്‍, 6.30ന് പനച്ചിക്കല്‍ കവല, ഏഴിന് സെറിനിറ്റി ഹോം എന്നിവിടങ്ങളിൽ മിനി മാസ്റ്റ് ലൈറ്റുകളുടെ സ്വിച്ച്ഓണ്‍ കര്‍മം നടത്തും. വിവിധ യോഗങ്ങളില്‍ പഞ്ചായത്ത് വൈസ് പ്രസിഡന്‍റ് സൂര്യാമോള്‍, മെംബര്‍മാരായ ജയിംസ് ജീരകത്ത്, മാത്യൂസ് പെരുമനങ്ങാട്, യമുന പ്രസാദ്, സിനി ജോയി, ആശാമോള്‍ റോയി എന്നിവര്‍ പങ്കെടുക്കും.

തേന്‍ സംഭരണകേന്ദ്രം നിർമാണോദ്ഘാടനം

പാലാ: പ്രാദേശികമായി കര്‍ഷകരുടെ കൂട്ടായ്മയില്‍ രൂപീകൃതമാകുന്ന കര്‍ഷക ഉത്പാദക കമ്പനികളുടെ കാര്‍ഷിക സംരംഭങ്ങള്‍ക്ക് സാമ്പത്തിക, സാങ്കേതിക സഹായങ്ങള്‍ ലഭ്യമാക്കുമെന്ന് നബാര്‍ഡ് ചീഫ് ജനറല്‍ മാനേജര്‍ നാഗേഷ് കുമാര്‍ അനുമാല. നബാര്‍ഡിന്‍റെ അംഗീകാരത്തോടെ പാലാ സോഷ്യല്‍ വെല്‍ഫെയര്‍ സൊസൈറ്റിയുടെ ആഭിമുഖ്യത്തില്‍ രൂപീകൃതമായ പാലാ ഹരിതം ഫാര്‍മേഴ്‌സ് പ്രൊഡ്യൂസര്‍ കമ്പനി അന്തീനാട് ഹണി ലാൻഡില്‍ ആരംഭിക്കുന്ന തേന്‍ സംസ്‌കരണ കേന്ദ്രത്തിന്‍റെ നിര്‍മാണോദ്ഘാടനം നിര്‍വഹിച്ചു പ്രസംഗിക്കുകയായിരുന്നു അദ്ദേഹം. കെട്ടിടത്തിന്‍റെ ശിലാസ്ഥാപനകര്‍മം വികാരി ജനറാള്‍ മോണ്‍. സെബാസ്റ്റ്യന്‍ വേത്താനത്ത് നിര്‍വഹിച്ചു. നബാര്‍ഡ് ജില്ലാ മാനേജര്‍ റെജി വര്‍ഗീസ് ഓഹരി ഉടമകള്‍ക്കുള്ള ഷെയര്‍ സര്‍ട്ടിഫിക്കറ്റുകള്‍ വിതരണം ചെയ്തു. ജില്ലാ പഞ്ചായത്തംഗം രാജേഷ് വാളിപ്ലാക്കല്‍, പഞ്ചായത്തംഗങ്ങളായ സ്മിത ഗോപാലകൃഷ്ണന്‍, ലിസമ്മ തോമസ്, പിഎസ്ഡബ്ല്യുഎസ് അസിസ്റ്റന്‍റ് ഡയറക്ടര്‍മാരായ ഫാ. ജോസഫ് താഴത്തുവരിക്കയില്‍, ഫാ. ഫ്രാന്‍സിസ് ഇടത്തിനാല്‍, എഫ്പിഒ ഡിവിഷന്‍ മാനേജര്‍ ഡാന്‍റീസ് കൂനാനിക്കല്‍, പാലാ ഹരിതം കര്‍ഷക കമ്പനി ചെയര്‍മാന്‍ തോമസ് മാത്യു, വൈസ് ചെയര്‍മാന്‍ ജിമ്മി ജോസഫ്, ചീഫ് എക്‌സിക്യൂട്ടീവ് ഓഫീസര്‍ മനു മാനുവല്‍ എന്നിവര്‍ പ്രസംഗിച്ചു. തേന്‍ സംസ്‌കരണകേന്ദ്രത്തിനു സ്ഥലം വിട്ടുനല്‍കിയ ലില്ലിക്കുട്ടി ജോണ്‍ കാഞ്ഞിരത്തുങ്കലിനെ ചടങ്ങില്‍ ആദരിച്ചു. സംസ്‌കരണ കേന്ദ്രത്തിന് ആദ്യഘട്ടത്തില്‍ 75 ലക്ഷം രൂപയാണ് ചെലവ് പ്രതീക്ഷിക്കുന്നത്.

കാര്‍ഷികമേഖലയ്ക്ക് ഉണര്‍വായി മൈക്രോ ഇറിഗേഷന്‍ പദ്ധതി

കുറവിലങ്ങാട്: കാര്‍ഷിക മേഖലയില്‍ പുത്തന്‍ ഉണര്‍വിനായി ജലസേചനവകുപ്പ് നടപ്പാക്കുന്ന മൈക്രോ ഇറിഗേഷന്‍ പദ്ധതിക്കു ജില്ലയില്‍ നാളെ തുടക്കമാകും. മൈനര്‍ ഇറിഗേഷന്‍ വകുപ്പുവഴി 2.15 കോടി രൂപ ചെലവിട്ടു കുറവിലങ്ങാട് പഞ്ചായത്തിലെ ജയ്ഗിരി വാര്‍ഡിലാണ് പദ്ധതി നടപ്പാക്കുന്നത്. കെ.എം. മാണി കമ്യൂണിറ്റി മൈക്രോ ഇറിഗേഷന്‍ എന്നു പേരിട്ട പദ്ധതിയുടെ നിര്‍മാണോദ്ഘാടനം നാളെ ഉച്ചകഴിഞ്ഞു രണ്ടിനു കുറവിലങ്ങാട് കാളിയാര്‍തോട്ടം ജംഗ്ഷനില്‍ നടക്കുന്ന ചടങ്ങില്‍ മന്ത്രി റോഷി അഗസ്റ്റിന്‍ നിര്‍വഹിക്കും. മോന്‍സ് ജോസഫ് എംഎല്‍എ അധ്യക്ഷത വഹിക്കും. കൃത്യമായ അളവിലുള്ള വെള്ളവും വളവും നിശ്ചിത ഇടവേളകളില്‍ ചെടിയുടെ ചുവട്ടില്‍ എത്തിക്കുന്ന ജലസേചന രീതിയാണ് മൈക്രോ (ഡ്രിപ്) ഇറിഗേഷന്‍. കുറവിലങ്ങാട് കാളിയാര്‍തോട്ടം മേഖലയിലെ 47 കുടുംബങ്ങളുടെ ഉടമസ്ഥതയിലുള്ള 50 ഏക്കര്‍ കൃഷിഭൂമിയിലെ സമ്മിശ്ര വിളകള്‍ക്കാണ് തുടക്കത്തില്‍ സൂക്ഷ്മ ജലസേചനസൗകര്യം ലഭ്യമാക്കുന്നത്. ‌ചിറത്തടം പഞ്ചായത്ത് കുളത്തില്‍നിന്ന് പമ്പ് ചെയ്യുന്ന വെള്ളം കാളിയാര്‍തോട്ടം ഭാഗത്ത് സ്ഥാപിക്കുന്ന രണ്ടു ലക്ഷം ലിറ്റര്‍ സംഭരണശേഷിയുള്ള ടാങ്കില്‍ എത്തിച്ച് അവിടെനിന്ന് കൃഷിയിടങ്ങളിലേക്ക് എത്തിക്കും. വേനല്‍ക്കാലത്ത് ചിറത്തടം കുളത്തിലെ വെള്ളം കുറയുകയാണെങ്കില്‍ എംവിഐപി കനാല്‍ വിളയംകോട് ഡിസ്ട്രിബ്യൂട്ടറിയുടെ ജയ്ഗിരി ഭാഗത്തുനിന്നു തുറന്നുവിടുന്ന ജലം ഇവിടേക്ക് എത്തിക്കാനും പദ്ധതിയുണ്ട്. ത്രിതല പഞ്ചായത്ത് ജനപ്രതിനിധികളും വകുപ്പുദ്യോഗസ്ഥരും ഗുണഭോക്താക്കളും ബഹുജനങ്ങളും പങ്കെടുക്കുമെന്ന് ഗുണഭോക്തൃ സമിതി പ്രസിഡന്‍റും ബ്ലോക്ക് ഡിവിഷൻ അംഗവുമായ പി.സി കുര്യൻ, പഞ്ചായത്തംഗം വിനു കുര്യൻ എന്നിവർ പറഞ്ഞു.

ഒടുവിൽ കൂടല്ലൂർ ആശുപത്രിക്ക് ജീവൻ വയ്ക്കുന്നു

കിടങ്ങൂര്‍: വര്‍ഷങ്ങളായി അടഞ്ഞുകിടന്ന കൂടല്ലൂര്‍ കമ്യൂണിറ്റി ഹെല്‍ത്ത് സെന്‍ററിലെ ഈവനിംഗ് ഒപിയും കിടത്തി ചികിത്സാ സൗകര്യവും പുനരാരംഭിക്കുന്നു. ജില്ലാ പഞ്ചായത്തും കിടങ്ങൂര്‍ പഞ്ചായത്തും സംയുക്തമായി ഫണ്ട് അനുവദിച്ചതോടെയാണ് ഇതിനു വഴിതെളിഞ്ഞത്. പാമ്പാടി ബ്ലോക്കിലെ കൂടല്ലൂര്‍ സാമൂഹ്യാരോഗ്യകേന്ദ്രത്തില്‍ ഡോക്ടറെയും നഴ്സിനെയും നിയമിച്ച് ഈവനിംഗ് ഒപി ആരംഭിക്കാനുള്ള നടപടികളാണ് പൂര്‍ത്തിയായത്. എട്ടു ലക്ഷത്തിന്‍റെ പദ്ധതി ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ അനുവദിച്ച നാലു ലക്ഷം രൂപയും കിടങ്ങൂര്‍ പഞ്ചായത്തിന്‍റെ വാര്‍ഷിക പദ്ധതിയില്‍ ഉള്‍പ്പെടുത്തി അനുവദിച്ച നാലു ലക്ഷം രൂപയും ചേര്‍ത്ത് എട്ടു ലക്ഷം രൂപയ്ക്കാണ് പദ്ധതി നടപ്പിലാക്കുന്നത്. കൂടല്ലൂര്‍ ആശുപത്രിയില്‍ 25 രോഗികള്‍ക്ക് ഐപി സൗകര്യവും ഉച്ചകഴിഞ്ഞ് രണ്ടു മുതല്‍ വൈകുന്നേരം നാലു വരെ ഈവനിംഗ് ഒപിയും മുമ്പ് ഉണ്ടായിരുന്നു. ഡോക്ടര്‍മാരുടെ എണ്ണം കുറഞ്ഞതോടെ കിടത്തി ചികിത്സയും ഈവനിംഗ് ഒപിയും നിര്‍ത്തലാക്കി. കിടങ്ങൂര്‍, കടപ്ലാമറ്റം, കാണക്കാരി പഞ്ചായത്തുകളിലെ നൂറു കണക്കിനാളുകള്‍ക്കാണ് ഈ സൗകര്യം പ്രയോജനപ്പെട്ടിരുന്നത്. കിടത്തി ചികിത്സ ഈവനിംഗ് ഒപിയും കിടത്തിചികിത്സയും പുനരാരംഭിക്കണമെന്നുള്ള നാട്ടുകാരുടെ വര്‍ഷങ്ങളായുള്ള ആഗ്രഹമാണ് ഇപ്പോള്‍ പൂവണിയുന്നത്. ഞായര്‍ ഒഴികെയുള്ള എല്ലാ ദിവസങ്ങളിലും ഉച്ചകഴിഞ്ഞ് മൂന്നു മുതല്‍ രാത്രി ഒന്പതു വരെ ഡോക്ടര്‍മാര്‍ ഉണ്ടാകും. ഈ സമയത്ത് ഒപി സൗകര്യം ഉണ്ടായിരിക്കും. കൂടാതെ കിടത്തി ചികിത്സ പുനരാരംഭിക്കുകയും ചെയ്യും. 50,000 രൂപ ഡോക്ടര്‍ക്കും ഇരുപതിനായിരം രൂപ നഴ്സിനും വേതനമായി പ്രോജക്‌ടില്‍ ഉള്‍പ്പെടുത്തി ജില്ലാ-ഗ്രാമ പഞ്ചായത്തുകള്‍ നൽകും. ഒരു വര്‍ഷത്തേക്കുള്ള തുകയാണ് ഇപ്പോള്‍ പ്രോജക്‌ടില്‍ ഉള്‍പ്പെടുത്തിയിരിക്കുന്നത്. സ്ഥിരമായി ഗ്രാമ-ബ്ലോക്ക്-ജില്ലാ പഞ്ചായത്തുകള്‍ സംയുക്തമായി ഈ പ്രോജക്‌ട് കൂടല്ലൂര്‍ സാമൂഹ്യ ആരോഗ്യകേന്ദ്രത്തില്‍ നടപ്പിലാക്കും. ഉദ്ഘാടനം ഇന്ന് കൂടല്ലൂര്‍ സിഎച്ച്‌സിലെ പുതിയതായി ആരംഭിക്കുന്ന ഈവനിംഗ് ഒപിയുടെ ഉദ്ഘാടനം ഇന്നു രാവിലെ 10നു നടത്തും. പഞ്ചായത്ത് പ്രസിഡന്‍റ് ഇ.എം. ബിനുവിന്‍റെ അധ്യക്ഷതയില്‍ കൂടുന്ന യോഗത്തില്‍ ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ ഉദ്ഘാടനം നിര്‍വഹിക്കും. ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി സമ്മേളനം ഉദ്ഘാടനം ചെയ്യും. ബ്ലോക്ക് പഞ്ചായത്ത് മെംബര്‍മാരായ പ്രഫ.ഡോ. മേഴ്സി ജോണ്‍, അശോക് കുമാര്‍ പൂതമന, പഞ്ചായത്ത് വൈസ് പ്രസിഡന്‍റ് റ്റീന മാളിയേക്കല്‍, മറ്റു ജനപ്രതിനിധികള്‍, ആശുപത്രി വികസന സമിതിയംഗങ്ങള്‍ എന്നിവര്‍ പങ്കെടുക്കും.

പത്തനാട്-മൂലേപ്പീടിക-ഇടയിരിക്കപ്പുഴ റോഡ് വികസനജോലികള്‍ അന്തിമഘട്ടത്തില്‍

കങ്ങഴ: പത്തനാട് - മൂലേപ്പീടിക-ഇടയിരിക്കപ്പുഴ റോഡ് നിര്‍മാണ ജോലികള്‍ അന്തിമഘട്ടത്തില്‍. പത്തനാട് ജംഗ്ഷനു സമീപം കങ്ങഴ പഞ്ചായത്ത് ഓഫീസ് ജംഗ്ഷനില്‍ ആരംഭിച്ച് കങ്ങഴ ക്ഷേത്രം ഭാഗത്തുകൂടി മൂലേപ്പീടിക ഭാഗത്ത് വാഴൂര്‍ റോഡില്‍ പ്രവേശിച്ച് തുടര്‍ന്ന് കാഞ്ഞിരപ്പാറയില്‍ നിന്നു തിരിഞ്ഞ് ചേറ്റേടം, കൊന്നക്കല്‍, പഴുക്കാകളം വഴി മണിമല റോഡില്‍ ഇടയിരിക്കപ്പുഴ ജംഗ്ഷനില്‍ എത്തിച്ചേരുന്ന റോഡാണിത്. കങ്ങഴപഞ്ചായത്തിന്‍റെ കീഴിലുള്ള ഈ റോഡ് കിഫ്ബി ഏറ്റെടുത്ത് 36 കോടി രൂപ മുടക്കിയാണ് നവീകരിക്കുന്നത്. ഇതിനോടകം കലുങ്കുകളും പാലങ്ങളും ഓട നിർമാണവും പൂര്‍ത്തിയാക്കി. വികസനത്തിന്‍റെ ഭാഗമായി പഞ്ചായത്തിന്‍റെ രണ്ടാംവാര്‍ഡിലുള്ള ചൂളപ്പടിയിലുള്ള സാംസ്‌കാരിക വകുപ്പിന്‍റെ അഞ്ച് ഏക്കര്‍ സ്ഥലത്തില്‍ അഞ്ചര സെന്‍റ് സ്ഥലം കൂടി ഏറ്റെടുത്തു. തികച്ചും ഗ്രാമീണ മേഖലയിലുള്ള റോഡാണെങ്കിലും ചങ്ങനാശേരി-വാഴൂര്‍, കറുകച്ചാല്‍-മണിമല പരമ്പരാഗത ശബരിപാത എന്നിവ തമ്മില്‍ ബന്ധിപ്പിക്കുന്ന പ്രധാന റോഡായതിനാലാണ് ഈ പദ്ധതിക്ക് നിര്‍ദേശം നല്‍കിയതും അനുമതി ലഭിച്ചതും. ഈ ഭാഗത്തുള്ള മതില്‍ പൊളിക്കുന്നതിനും സ്ഥലം ഏറ്റെടുക്കുന്നതുമായ പ്രവൃത്തിയുടെ ഉദ്ഘാടനം ചീഫ് വിപ്പ് ഡോ.എന്‍. ജയരാജ് നിര്‍വഹിച്ചു. ഒമ്പത് കിലോമീറ്റർ റോഡാണ് ആധുനിക നിലവാരത്തില്‍ നിര്‍മിക്കുന്നത് പത്തനാട്-മൂലേപ്പീടിക-കാഞ്ഞിരപ്പാറ-കൊന്നയ്ക്കല്‍-ഇടയിരിക്കപ്പുഴ വരെയുള്ള ഒമ്പതു കിലോമീറ്റര്‍ ദൂരമാണ് ആധുനിക നിലവാരത്തില്‍ പൂര്‍ത്തിയാക്കുന്നത്. 7.5 മീറ്റര്‍ ടാറിംഗ് വീതിവരുന്ന ഈ റോഡില്‍ ഉടനീളം രണ്ടു വശത്തുകൂടിയും നടപ്പാത, പൈപ്പ്‌ലൈനുകള്‍, ഓടകള്‍ എന്നിവ പൂര്‍ത്തിയാക്കി. വീതി കൂട്ടുന്നതിന് ആവശ്യമായ സ്ഥലം റോഡരികിലെ സ്ഥലമുടമകള്‍ സര്‍ക്കാരിനു സൗജന്യമായി വിട്ടുനല്‍കിയിരുന്നു. ഈ ഭാഗത്തെ നിര്‍മാണം ഭൂരിഭാഗവും പൂര്‍ത്തിയാക്കി. സാംസ്‌കാരിക വകുപ്പിന്‍റെ ഉടമസ്ഥതയിലുള്ള സ്ഥലം സൗജന്യമായി വിട്ടുനല്‍കുന്നതിനുള്ള നടപടിക്രമങ്ങള്‍ പൂര്‍ത്തിയാക്കിയാണ് ആ സ്ഥലം കൂടി പദ്ധതിക്കായി ഏറ്റെടുത്തത്. മൂലേപ്പീടികയില്‍ നടന്ന ചടങ്ങില്‍ കങ്ങഴ ഗ്രാമപഞ്ചായത്ത് അംഗങ്ങളായ എ.എം. മാത്യൂ, മുഹമ്മദ് ഷിയാസ്, വിവിധ രാഷ്‌ട്രീയ പാര്‍ട്ടി പ്രതിനിധികളായ സി.കെ. ജോസഫ്, കെ.എസ്. സെബാസ്റ്റ്യന്‍, ഫൈസല്‍ കാരമല എന്നിവര്‍ പങ്കെടുത്തു. റോഡിന്‍റെ പ്രാധാന്യം പരിഗണിച്ച് വികസനത്തിന് അനുമതി ലഭിച്ചത് തികച്ചും ഗ്രാമീണ മേഖലയിലുള്ള റോഡാണെങ്കിലും കറുകച്ചാല്‍-മണിമല, ചങ്ങനാശേരി-വാഴൂര്‍ പരമ്പരാഗത ശബരിപാത എന്നിവ തമ്മില്‍ ബന്ധിപ്പിക്കുന്ന പ്രധാന റോഡായതിനാലാണ് ഈ പദ്ധതിക്ക് നിര്‍ദേശം നല്‍കിയത്. അതിന്‍റെ ഫലമായാണ് പദ്ധതി കിഫ്ബി ഏറ്റെടുത്ത് പണം അനുവദിച്ചത്. അതിനാലാണ് സാംസ്‌കാരിക വകുപ്പിന്‍റെ സ്ഥലം ഏറ്റെടുത്തത്. നിര്‍മാണ ജോലികള്‍ അതിവേഗത്തിലാണ്. കങ്ങഴ പഞ്ചായത്തിലെ വിവിധ വാര്‍ഡുകളുടെ വികസനം സാധ്യമാക്കാന്‍ ഈ റോഡ് വികസനത്തിലൂടെ കഴിയും. ഡോ.എന്‍. ജയരാജ് ഗവ.ചീഫ് വിപ്പ് റോഡ് വികസനം കങ്ങഴയുടെ മുഖച്ഛായ മാറ്റും പത്തനാട് - ഇടയിരിക്കപ്പുഴ റോഡ് നിര്‍മാണജോലികള്‍ പൂര്‍ത്തിയാകുമ്പോള്‍ നാടിന്‍റെ വികസനത്തിന് ഏറെ ഉപകരിക്കും. യാത്രാസൗകര്യങ്ങള്‍ മെച്ചപ്പെടും. ഒമ്പതു കിലോമീറ്റര്‍ ദൂരമാണ് ആധുനിക നിലവാരത്തില്‍ പൂര്‍ത്തിയാക്കുന്നത്. എ.എം. മാത്യു നിയോജകമണ്ഡലം പ്രസിഡന്‍റ് കേരള കോണ്‍ഗ്രസ്-എം കങ്ങഴ പഞ്ചായത്തംഗം റോഡ് നിര്‍മാണം പൂര്‍ത്തിയാകുമ്പോള്‍ ബസ് സര്‍വീസ് പുനരാരംഭിക്കണം പത്തനാട് - മൂലേപ്പീടിക-ഇടയിരിക്കപ്പുഴ കാലങ്ങളായി തകര്‍ന്നുകിടന്ന റോഡാണ്. റോഡ് നിര്‍മാണം പൂര്‍ത്തിയാകുന്നത് നൂറുകണക്കിനാളുകള്‍ക്കു ഗുണകരമാകും. നേരത്തേയുണ്ടായിരുന്ന സ്വകാര്യ ബസ് സര്‍വീസ് നിര്‍ത്തിയതുമൂലം വിദ്യാര്‍ഥികളടക്കം യാത്രക്കാര്‍ ദുരിതത്തിലാണ്. റോഡ് നിര്‍മാണം പൂര്‍ത്തിയാകുമ്പോള്‍ പത്തനാട്, പഴുക്കാകുളം, ചേറ്റേടം, കാഞ്ഞിരപ്പാറ പ്രദേശങ്ങളെ ബന്ധിപ്പിച്ച് കോട്ടയം-കുളത്തൂര്‍മൂഴി റൂട്ടില്‍ ബസ് സര്‍വീസ് ആരംഭിക്കണം. ബിനോയി വര്‍ഗീസ് കോണ്‍ഗ്രസ് ബ്ലോക്ക് കമ്മിറ്റിയംഗം വാഴൂര്‍ ബ്ലോക്ക് പഞ്ചായത്ത് മുന്‍ അംഗം അയ്യപ്പഭക്തര്‍ക്ക് ശബരിമല യാത്ര എളുപ്പമാകും പത്തനാട്-മൂലേപ്പീടിക-കാഞ്ഞിരപ്പാറ-ഇടയിരിക്കപ്പുഴ റോഡ് പൂര്‍ത്തിയാകുമ്പോള്‍ അയ്യപ്പ ഭക്തര്‍ക്ക് കോട്ടയത്തുനിന്നും പാമ്പാടി, കങ്ങഴ, പത്തനാട്, മണിമലവഴി എരുമേലിയിലും നിര്‍ദിഷ്ട എരുമേലി എയര്‍പോര്‍ട്ടിലേക്കും യാത്രയ്ക്ക് വേഗത ലഭിക്കും. കങ്ങഴ പഞ്ചായത്തിന്‍റെ വികസനത്തിന് മാറ്റുകൂടും. അഡ്വ.സി.കെ. ജോസഫ് മുന്‍ പ്രസിഡന്‍റ്, കങ്ങഴ പഞ്ചായത്ത്

നെല്‍കര്‍ഷകരുടെ പ്രശ്‌നങ്ങള്‍ സര്‍ക്കാര്‍ കണ്ടില്ലെന്നു നടിക്കരുത്: എന്‍കെഎസ്എസ് സമ്മേളനം

ചങ്ങനാശേരി: മങ്കൊമ്പില്‍ നടക്കുന്ന നെല്‍കര്‍ഷക സംരക്ഷണ സമിതി സംസ്ഥാന സമ്മേളത്തിനു മുന്നോടിയായി ചങ്ങനാശേരി മുനിസിപ്പല്‍ ടൗണ്‍ ഹാളില്‍ ചങ്ങനാശേരി നിയോജകമണ്ഡലം കണ്‍വന്‍ഷന്‍ ചേര്‍ന്നു. സംസ്ഥാന രക്ഷാധികാരി വി.ജെ. ലാലി ഉദ്ഘാടനം ചെയ്തു. അന്നമൂട്ടുന്നവന്‍റെ അന്നം മുട്ടിക്കുകയാണ് കേരള സര്‍ക്കാരെന്നും നെല്ല് ഉത്പാദിപ്പിക്കുന്ന കര്‍ഷകരെ ദ്രോഹിക്കുന്ന നയമാണ് സര്‍ക്കാര്‍ സ്വീകരിക്കുന്നതെന്നും അദ്ദേഹം പറഞ്ഞു. സംസ്ഥാന വൈസ് പ്രസിഡന്‍റ് സന്തോഷ് പറമ്പിശേരി അധ്യക്ഷനായിരുന്നു. കുട്ടനാട്ടിലെത്തുന്ന കേന്ദ്ര കൃഷിമന്ത്രിക്കു സമര്‍പ്പിക്കുന്ന നിവേദനത്തിലെ ആവശ്യങ്ങള്‍ സംസ്ഥാന വര്‍ക്കിംഗ് പ്രസിഡന്‍റ് പി.ഡി. സതീശന്‍ അവതരിപ്പിച്ചു. സംസ്ഥാന വൈസ് പ്രസിഡന്‍റുമാരായ കെ.ബി. മോഹനന്‍, ലാലിച്ചന്‍ പള്ളിവാതുക്കല്‍, സണ്ണി തോമസ്, ജി. സൂരജ്, ശര്‍മ വാലടി, ജയന്‍ തൊട്ടാശേരി, അനിയന്‍കുഞ്ഞ്, ജിക്കു കുര്യാക്കോസ്, സോണി കളരിക്കല്‍, വിനോദ് കോവൂര്‍, ബൈജു സെബാസ്റ്റ്യന്‍, കെ.എ. സെബാസ്റ്റ്യന്‍ എന്നിവര്‍ പ്രസംഗിച്ചു.

റോഡരികില്‍ മണ്ണും മാലിന്യങ്ങളും തള്ളി യാത്രക്കാരെ കുരുക്കുന്നു

സുരക്ഷ കര്‍ശനമാക്കേണ്ട പൊതുമരാമത്ത് ചങ്ങനാശേരി: റോഡില്‍ വാഹനങ്ങള്‍ക്കും യാത്രക്കാര്‍ക്കും കര്‍ശന സുരക്ഷയൊരുക്കേണ്ട പൊതുമരാമത്ത് അധികൃതര്‍ റോഡിന്‍റെ വശങ്ങളില്‍ മണ്ണും മാലിന്യങ്ങളും തള്ളി അപകടക്കെണികള്‍ സൃഷ്ടിക്കുന്നു. ദേശീയപാതയുടെ പ്രാധാന്യവും തിരക്കുമുള്ള ചങ്ങനാശേരി- വാഴൂര്‍ റോഡിന്‍റെ വശങ്ങളിലാണ് മാലിന്യം ലോറികളില്‍ എത്തിച്ചുതള്ളുന്നത്. പെരുമ്പനച്ചി മുതല്‍ മാമ്മൂടു വരെയുള്ള റോഡിന്‍റെ ഇരുവശങ്ങളും നിര്‍മാണ അവശിഷ്ടങ്ങള്‍ തള്ളി നിറച്ചിരിക്കുകയാണ്. ഇരുചക്രവാഹന സഞ്ചാരികള്‍ക്കെന്നപോലെ കാല്‍നടയാത്രക്കാര്‍ക്കും ഇത് അപകടക്കെണിയാണ്. ഇതര റോഡുകളുടെ നിര്‍മാണം നടക്കുന്ന സ്ഥലങ്ങളില്‍നിന്നു നീക്കുന്ന മണ്ണ്, കോണ്‍ക്രീറ്റ്, തടി അവശിഷ്ടങ്ങള്‍ തുടങ്ങിയവയാണ് റോഡിന്‍റെ വശങ്ങളില്‍ കുന്നുകൂടുന്നത്. റോഡരികില്‍നിന്നു വെട്ടിമാറ്റിയതും കടപുഴകിയതുമായ മരങ്ങളുടെ അവശിഷ്ടങ്ങളും കാലങ്ങളായി റോഡിന്‍റെ വശങ്ങളില്‍ ഉപേക്ഷിച്ച നിലയിലാണ്. മാമ്മൂട് മുതല്‍ കറുകച്ചാല്‍ വരെയുള്ള റോഡിന്‍റെ വശങ്ങൾ പുല്ലും കാട്ടുചെടികളും വളര്‍ന്ന് വാഹനം ഓടിക്കുന്നവരുടെ കാഴ്ച മറയ്ക്കുന്ന അവസ്ഥയിലാണ്. കൂത്രപ്പള്ളിക്കും എന്‍എസ്എസ് ജംഗ്ഷനുമിടയിലും റോഡിന്‍റെ വശത്ത് മണ്ണും നിര്‍മാണ സാമഗ്രികളുടെ അവശിഷ്ടങ്ങളും തള്ളിയിട്ടുണ്ട്. ഇതുസംബന്ധിച്ച് പൊതുപ്രവര്‍ത്തകരും റെസിഡന്‍റ്സ് അസോസിയേഷനുകളും പൊതുമരാമത്തു വകുപ്പിനെതിരേ പരാതിയുമായി രംഗത്തെത്തിയിട്ടുണ്ട്. തെങ്ങണ മുതല്‍ കണ്ണവട്ട വരെയുള്ള ഭാഗത്ത് റോഡരികിൽ അനധികൃത കയ്യേറ്റങ്ങളും വഴിവാണിഭങ്ങളും പെരുകിയിട്ടും അധികൃതര്‍ നടപടി സ്വീകരിച്ചിട്ടില്ല.

ഞീഴൂര്‍ പഞ്ചായത്തിലേക്ക് ബിജെപി ജനകീയ മാര്‍ച്ചും ധര്‍ണയും നടത്തി

ഞീഴൂര്‍: ഞീഴൂര്‍ പഞ്ചായത്തിലേക്ക് ബിജെപിയുടെ നേതൃത്വത്തില്‍ ജനകീയ മാര്‍ച്ചും ധര്‍ണയും നടത്തി. അനധികൃതമായി പ്രവര്‍ത്തിക്കുന്ന പന്നിഫാം ഉടന്‍ അടച്ചുപൂട്ടണമെന്നും 25 ലക്ഷം രൂപ മുടക്കി നവീകരിച്ച കമ്യൂണിറ്റി ഹാള്‍ തകര്‍ന്നു വീണതിന്‍റെ ഉത്തരവാദിത്വം ഏറ്റെടുത്ത് പഞ്ചായത്ത് ഭരണസമിതി രാജിവയ്ക്കണമെന്നും ആവശ്യപ്പെട്ടാണ് ബിജെപി ധര്‍ണ നടത്തിയത്. ബിജെപി ഞീഴൂര്‍ പഞ്ചായത്ത് പ്രസിഡന്‍റ് ജോസ് പ്രകാശിന്‍റെ അധ്യക്ഷതയില്‍ നടന്ന സമരം കോട്ടയം വെസ്റ്റ് ജില്ലാ പ്രസിഡന്‍റ് ലിജിന്‍ ലാല്‍ ഉദ്ഘാടനം ചെയ്തു. കുറവിലങ്ങാട് മണ്ഡലം പ്രസിഡന്‍റ് ഷിജോ സെബാസ്റ്റ്യന്‍, ജയചന്ദ്രന്‍ കൊക്കാലിങ്കല്‍, ജോയ് തോമസ് മണലേല്‍, സുനേഷ് കാട്ടാന്പാക്ക്, സുരേഷ് കൊച്ചുപുരയ്ക്കല്‍, രഞ്ചിത്ത് രാധാകൃഷ്ണന്‍ എന്നിവര്‍ പ്രസംഗിച്ചു.

രാഷ്‌ട്രീയത്തിനൊപ്പം കായികകരുത്തിലും മുന്നേറാന്‍ ഫുട്ബോള്‍ മത്സരവുമായി യൂത്ത്ഫ്രണ്ട്-എം നിയോജകമണ്ഡലം കമ്മിറ്റി

കടുത്തുരുത്തി: രാഷ്‌ട്രീയത്തിനൊപ്പം കായികകരുത്തിലും മുന്നേറാന്‍ ഫുട്ബോള്‍ മത്സരവുമായി യൂത്ത്ഫ്രണ്ട്-എം നിയോജക മണ്ഡലം കമ്മിറ്റി. കെ.എം. മാണിയുടെ സ്മരണാര്‍ഥമാണ് മത്സരങ്ങള്‍ സംഘടിപ്പിച്ചതെന്നു യൂത്ത്ഫ്രണ്ട്-എം നിയോജകമണ്ഡലം പ്രസിഡന്‍റ് ബിബിന്‍ വെട്ടിയാനിയില്‍ പറഞ്ഞു. കടുത്തുരുത്തി നിയോജകമണ്ഡലത്തിലെ 12 മണ്ഡലം കമ്മിറ്റികളാണ് മത്സരത്തില്‍ മാറ്റുരച്ചത്. ഫൈനല്‍ മത്സരം 26ന് വൈകുന്നേരം 6.30 ന് മാഞ്ഞൂര്‍ ബീസാ ക്ലബ്ബില്‍ നടക്കും. ജോസ് കെ. മാണി എംപി സമ്മാനങ്ങള്‍ വിതരണം ചെയ്യും. സെമിഫൈനലില്‍ മാഞ്ഞൂര്‍, കുറവിലങ്ങാട് മണ്ഡലം കമ്മിറ്റികള്‍ തമ്മിലാണ് ആദ്യമത്സരം. രണ്ടാം മത്സരത്തില്‍ മരങ്ങാട്ടുപിള്ളി, ഉഴവൂര്‍ മണ്ഡലം കമ്മിറ്റിയെ നേരിടും. മത്സരങ്ങളുടെ ഉദ്ഘാടനം സംസ്ഥാന ജനറല്‍ സെക്രട്ടറി സ്റ്റീഫന്‍ ജോര്‍ജും നിയോജകമണ്ഡലം പ്രസിഡന്‍റ് തോമസ് ടി. കീപ്പുറവും തമ്മില്‍ പന്തുതട്ടി ഉദ്ഘാടനം ചെയ്തു.

മൊബൈൽ മോഷ്ടാവ് പിടിയിൽ

ഗാന്ധിനഗർ: മെഡിക്കൽ കോളജ് പരിസരത്ത് സ്ഥിരമായി മൊബൈൽ മോഷണം നടത്തിവന്ന മള്ളൂശേരി പാറയ്ക്കൽ പെരുമ്പായിക്കാട് സലിം പി.എ. എന്നയാളെ ഗാന്ധിനഗർ പോലീസ് അറസ്റ്റ് ചെയ്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. കോട്ടയം ഈസ്റ്റ്, വെസ്റ്റ്, ഗാന്ധിനഗർ പോലീസ് സ്റ്റേഷനുകളിൽ നിരവധി മോഷണക്കേസുകളിൽ പ്രതിയായ ഇയാൾ കോടതിയിൽ വിചാരണ നേരിട്ടുവരികയാണ്. കൂടുതൽ കേസുകളിൽ ഇയാൾ ഉൾപ്പെട്ടിട്ടുണ്ടോയെന്നറിയാൻ കസ്റ്റഡിയിൽ വാങ്ങി ചോദ്യം ചെയ്യും. ഗാന്ധിനഗർ പോലീസ്‌സ്റ്റേഷൻ എസ്എച്ച്ഒ ടി. ശ്രീജിത്ത്, എസ്ഐ ജയപ്രകാശ് എൻ., എസ്‌സി പിഒമാരായ രഞ്ജിത് ടി.ആർ., സുനു ഗോപി, ശ്രീനിഷ് തങ്കപ്പൻ, ശ്രീജിത്ത്, രാജീവ് എന്നിവരടങ്ങിയ പോലീസ് സംഘമാണ് പ്രതിയെ അറസ്റ്റ് ചെയ്തത്.

അയ്യർകുളങ്ങരയിലെ പഴയ കുടിവെള്ള പദ്ധതിയുടെ കിണർ ഇടിഞ്ഞുതാണു

വൈക്കം: വൈക്കം അയ്യർകുളങ്ങരയിൽ വാട്ടർ അഥോറിട്ടിയുടെ പഴയ കുടിവെള്ള പദ്ധതിയുമായി ബന്ധപ്പെട്ട കിണറുകളിലൊന്ന് ചെരിഞ്ഞ് താഴേയ്ക്കിരുന്നു. കുളത്തിനോടു ചേർന്നുള്ള രണ്ടു കിണറുകളിൽ തെക്കുഭാഗത്തുള്ള കിണറാണ് ഇന്നലെ രാവിലെ വടക്കുഭാഗത്തേക്ക് ചെരിഞ്ഞ് താഴേക്ക് ഇടിഞ്ഞിരുന്നത്. 45 വർഷം മുമ്പ് വൈക്കം നഗരത്തിലാകെ കുടിവെള്ളം വിതരണം ചെയ്തിരുന്നത് അയ്യർകുളങ്ങര കുടിവെള്ള പദ്ധതി മുഖേനയായിരുന്നു. മൂവാറ്റുപുഴയാറിൽനിന്ന് വെള്ളമെടുത്ത് വെള്ളൂരിലെ ശുദ്ധീകരണ പ്ലാന്‍റുവഴി വിതരണം ചെയ്തു വന്നതോടെ അയ്യർകുളങ്ങര കുടിവെള്ള പദ്ധതിയുടെ പ്രവർത്തനം നിലയ്ക്കുകയായിരുന്നു. റോഡരികിലെ കിണറിനു സമീപം ആളുകൾ വിശ്രമിച്ചിരുന്നതാണ്. വാട്ടർ അഥോറിട്ടി അധികൃതരെത്തി കിണറിനു സമീപത്തുണ്ടായിരുന്ന പൈപ്പുകളും മറ്റും നീക്കി. താഴേക്ക് ഇടിയുന്ന ആഴമേറിയ കിണറിന്‍റെ സമീപത്ത് പോയി ആളപായമുണ്ടാകാതിരിക്കാൻ അധികൃതർ സുരക്ഷാ സംവിധാനമൊരുക്കണമെന്നു നാട്ടുകാർ ആവശ്യപ്പെട്ടു.

ഇരുചക്ര വാഹനങ്ങൾ വിതരണം ചെയ്തു

വെച്ചൂർ: വെച്ചൂർ പഞ്ചായത്ത് 2025- 2026 വാർഷിക പദ്ധതിയിൽ ഉൾപ്പെടുത്തി വനിതകൾക്ക് സ്വയംതൊഴിലിനായി പഞ്ചായത്തിലെ 26 ഡ്രൈവിംഗ് ലൈസൻസുള്ള വനിതകൾക്ക് ഇരുചക്രവാഹനം നൽകി .പദ്ധതിയുടെ ഉദ്ഘാടനം പഞ്ചായത്ത് പ്രസിഡന്‍റ് കെ.ആർ. ഷൈലകുമാർ കീർത്തിക്ക് ഇരുചക്ര വാഹനത്തിന്‍റെ താക്കോൽ കൈമാറി നിർവഹിച്ചു. വൈസ് പ്രസിഡന്‍റ് ബിൻസി ജോസഫ് അധ്യക്ഷത വഹിച്ചു. പഞ്ചായത്ത് അംഗങ്ങളായ സോജി ജോർജ്, പി.കെ. മണിലാൽ, സ്വപ്ന മനോജ്, ബിന്ദു, ആൻസി, ശാന്തിനി, സെക്രട്ടറി അജയകുമാർ, വിഇഒ അരുൺ, കുടുംബശ്രീ പ്രവർത്തകർ, ഹരിതകർമസേനാംഗങ്ങൾ, ജീവനക്കാർ തുടങ്ങിയവർ സംബന്ധിച്ചു.

ആപ്പുഴ സാംസ്‌കാരികകേന്ദ്രവും അങ്കണവാടിയും ഉദ്ഘാടനം ചെയ്തു

കടുത്തുരുത്തി: മാതൃ, ശിശുക്ഷേമ പ്രവര്‍ത്തനങ്ങളിലെ അവിഭാജ്യഘടകമായ അങ്കണവാടികള്‍വഴി കുട്ടികള്‍ക്കും അമ്മമാര്‍ക്കും വേണ്ട പോഷകാഹാരങ്ങള്‍ നല്‍കാന്‍ സര്‍ക്കാര്‍ മുന്‍കൈയെടുക്കുന്നുണ്ടെന്നു മന്ത്രി വി.എന്‍. വാസവന്‍. കടുത്തുരുത്തി പഞ്ചായത്തിലെ ആപ്പുഴ സാംസ്‌കാരികകേന്ദ്രത്തിന്‍റെയും അങ്കണവാടിയുടെയും ഉദ്ഘാടനം നിര്‍വഹിച്ചു പ്രസംഗിക്കുകയായിരുന്നു മന്ത്രി. കടുത്തുരുത്തി ബ്ലോക്ക് പഞ്ചായത്ത് പ്രസിഡന്‍റ് ജോണ്‍സണ്‍ കൊട്ടുകാപ്പള്ളി അധ്യക്ഷത വഹിച്ചു. പഞ്ചായത്ത് പ്രസിഡന്‍റ് എന്‍.ബി. സ്മിത, ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാലാ, പഞ്ചായത്തംഗങ്ങളായ സെലീനാമ്മ ജോര്‍ജ്, സ്‌കറിയ വര്‍ക്കി, ശ്രുതി ദാസ്, ബ്ലോക്ക് പഞ്ചായത്തംഗങ്ങളായ പി.വി. സുനില്‍, നയനാ ബിജു, കൈലാസ് നാഥ്, നളിനി രാധാകൃഷ്ണന്‍ തുടങ്ങിയവര്‍ പ്രസംഗിച്ചു.

ആംബുലന്‍സ് അപകടത്തില്‍പ്പെട്ടു

കുറുപ്പന്തറ: രോഗിയുമായിപ്പോയ ആംബുലന്‍സ് അപകടത്തില്‍പ്പെട്ടു. കോട്ടയം - എറണാകുളം റോഡില്‍ കുറുപ്പന്തറ മാര്‍ക്കറ്റിന് സമീപം ഇന്നലെ പുലര്‍ച്ചെ മൂന്നോടെയാണ് അപകടം. കളമശേരി മെഡിക്കല്‍ കോളജില്‍നിന്നും കോട്ടയം മെഡിക്കല്‍ കോളജിലേക്ക് രോഗിയുമായി പോകുന്പോഴാണ് അപകടമുണ്ടായത്. നിയന്ത്രണംവിട്ട ആംബുലന്‍സ് റോഡില്‍ വട്ടം കറങ്ങി വൈദ്യുതി പോസ്റ്റിലും സമീപത്തെ കെട്ടിടത്തിന്‍റെ തൂണിലും ഇടിക്കുകയായിരുന്നു. അപകടത്തില്‍ ആര്‍ക്കും പരിക്കില്ല. രോഗിയെ മറ്റൊരു ആംബുലന്‍ലില്‍ മെഡിക്കല്‍ കോളജ് ആശുപത്രിയിലെത്തിച്ചു. കടത്തുരുത്തി പോലീസ് അപകട സ്ഥലത്തെത്തി മേല്‍നടപടികള്‍ സ്വീകരിച്ചു. കഴിഞ്ഞ ദിവസം ഏറ്റുമാനൂരില്‍ ആംബുലന്‍സ് കാറിലിടിച്ച് മെയില്‍ നഴ്‌സിന് ജീവന്‍ നഷ്ടപ്പെട്ട സഭംവമുണ്ടായിരുന്നു.

പുഞ്ചക്കൃഷിക്കായി നിലമൊരുങ്ങുന്നു : തിരിച്ചടിയായി നീരൊഴുക്ക് നിലച്ച തോടുകൾ

തലയോലപ്പറമ്പ്: തലയോലപ്പറമ്പ് പഞ്ചായത്തിലെ പാടശേഖരങ്ങൾ പുഞ്ചക്കൃഷിക്കായി ഒരുങ്ങുന്പോൾ തിരിച്ചടിയായി നീരൊഴുക്കു നിലച്ച തോടുകൾ. വൈക്കത്ത് കൃഷിനിലം പൂർണമായി വിനിയോഗിക്കുന്ന പഞ്ചായത്താണ് തലയോലപ്പറമ്പ്. അരയേക്കറും ഒരേക്കറുമൊക്കെ നിലമുള്ളവരാണ് കർഷകരിൽ ഭൂരിഭാഗവും. തലയോലപ്പറമ്പിലെ 17 പാടശേഖരങ്ങളിലായി 1,800 ഏക്കറിലാണ് നെൽക്കൃഷി. ഇതിൽ 124 ഏക്കർ വിസ്തൃതിയുള്ള പൊന്നുരുക്കും പാറ, സമീപ പാടശേഖരങ്ങളായ 180 ഏക്കർ വരുന്ന വടേക്കേപ്പുതുശേരി, 125ഏക്കർ വരുന്ന നടുക്കരി, 95 ഏക്കർ വരുന്ന തെക്കേക്കരി, ആലങ്കേരി,മനയ്ക്കകരി തുടങ്ങിയ പാടശേഖരങ്ങളിലെല്ലാം നിലമൊരുക്കൽ പുരോഗമിക്കുകയാണ്. ഇതിനിടെ, തോടുകൾ പായലും പോളയും പുല്ലും വളർന്നു തിങ്ങി നീരൊഴുക്ക് നിലച്ചതു കാർഷിക മേഖലയ്ക്കു തിരിച്ചടിയാവുകയാണ്. തലയോലപ്പറമ്പിന്‍റെ പടിഞ്ഞാറൻ മേഖലയിൽ പൊന്നുരുക്കുംപാറ, വടക്കേ പുതുശേരി, തെക്കേപുതുശേരി എന്നീ പാടശേഖരങ്ങളിലേക്ക് വെള്ളമെത്തിക്കുന്ന ഇടക്കേരി - പൊന്നുരുക്കുംപാറ തോടാണ് പോളയും പുല്ലും വളർന്നു നീരൊഴുക്കു നിലച്ചത്. മൂവറ്റുപുഴയാറിൽനിന്നാരംഭിക്കുന്ന ഈ തോട് കരിയാറിലാണ് സംഗമിക്കുന്നത്. ഈ മൂന്നു പാടശേഖരങ്ങളിലേക്കും ഇപ്പോൾ വെള്ളം എത്തിക്കാനാവുന്നില്ല. തോട്ടിലെ തടസം നീക്കാൻ അധികൃതർ ഇതുവരെ നടപടിയെടുത്തിട്ടില്ല. തോടുകളിലെ മാലിന്യങ്ങൾ നീക്കി ആഴം കൂട്ടി നീരൊഴുക്ക് ശക്തമാക്കണമെന്നാണ് കർഷകരുടെ ആവശ്യം. തോട് ഉടൻ ആഴം കൂട്ടും കുട്ടനാട് പാക്കേജിൽ ഉൾപ്പെടുത്തി തോടുകളിലെ മാലിന്യം നീക്കി നീരൊഴുക്ക് സാധ്യമാക്കാനും പുറം ബണ്ട് ഉയർത്താനുമായി 50 ലക്ഷം രൂപ അനുവദിച്ചിട്ടുണ്ട്. പണികൾ ഉടൻ തുടങ്ങും. നടുക്കരി പാടശേഖരത്തിന്‍റെ സാഹചര്യം മെച്ചപ്പെടുത്താനും പാടശേഖരങ്ങളുമായി ബന്ധപ്പെട്ട തോട് കരിയാർ വരെ തെളിക്കാനും ഒരു കോടി രൂപയുടെ പദ്ധതിയും നടപടിക്രമം പൂർത്തിയാക്കി വൈകാതെ തുടങ്ങും. വി.കെ. രവി മുൻപഞ്ചായത്ത് അംഗം തലയോലപ്പറമ്പ്

തൃണമൂല്‍ കോണ്‍ഗ്രസ് മധ്യമേഖല ഓഫീസ് ഉദ്ഘാടനം

കോട്ടയം: തൃണമൂല്‍ കോണ്‍ഗ്രസ് മധ്യമേഖല ഓഫീസ് കോട്ടയം ലോഗോസ് ജംഗ്ഷനില്‍ തൃണമൂല്‍ കോണ്‍ഗ്രസ് സംസ്ഥാന കണ്‍വീനര്‍ പി.വി. അന്‍വര്‍ ഉദ്ഘാടനം ചെയ്തു. സംസ്ഥാന ചീഫ് കോ-ഓര്‍ഡിനേറ്റര്‍ സജി മഞ്ഞക്കടമ്പില്‍ അധ്യക്ഷത വഹിച്ചു. ചീഫ് കോ-ഓര്‍ഡിനേറ്റര്‍ ഹംസ പാറക്കാട്, ജില്ലാ പ്രസിഡന്‍റ് ഗണേഷ് ഏറ്റുമാനൂര്‍, ജനറല്‍ സെക്രട്ടറി എം.എം. ഖാലിദ്, സംസ്ഥാന കമ്മിറ്റി അംഗങ്ങളായ ബാലു ജി. വെള്ളിക്കര, അന്‍സാരി ഈരാറ്റുപേട്ട, അഡ്വ. സെബാസ്റ്റ്യന്‍ മണിമല, അഡ്വ. ഷൈജു കോശി, ലൗജിന്‍ മാളിയേക്കല്‍, നോബി ജോസ് പനന്താനത്ത്, രാജേഷ് ഉമ്മന്‍ കോശി തുടങ്ങിയവര്‍ പ്രസംഗിച്ചു.

ആടുജീവിതത്തിനു വേണ്ടത്ര പരിഗണന ലഭിച്ചോ? കിട്ടിയതെല്ലാം വലിയ നേട്ടങ്ങളെന്നു പ്രശസ്ത സംവിധായകന്‍ ബ്ലെസി

ചങ്ങനാശേരി: ചെറിയ ഒരു ഗ്രാമത്തില്‍നിന്നും മലയാള സിനിമയിലേക്ക് എത്തിയ തനിക്കിതുവരെ കിട്ടിയ അംഗീകാരങ്ങള്‍ത്തന്നെ വലുതാണെന്ന് സംവിധായകന്‍ ബ്ലെസി. ദേശീയ ചലച്ചിത്ര പുരസ്‌കാരത്തില്‍ ആടുജീവിതത്തിനു വേണ്ടത്ര പരിഗണന കിട്ടാതെ പോയോ എന്ന ചോദ്യത്തിനു മറുപടിയായിട്ടായിരുന്നു ബ്ലെസി ഇക്കാര്യം പറഞ്ഞത്. ഇതിനുത്തരം നിങ്ങള്‍ തന്നെ പറയൂവെന്ന് സദസിനോട് പറഞ്ഞപ്പോള്‍ നിറഞ്ഞ കയ്യടിയായിരുന്നു സദസില്‍. സെന്‍റ് ജോസഫ് കോളജ് ഓഫ് കമ്യൂണിക്കേഷനില്‍ മൂന്നു ദിവസങ്ങളിലായി നടക്കുന്ന ഫിലിം ഫെസ്റ്റ് ഉദ്ഘാടനം ചെയ്തശേഷം വിദ്യാര്‍ഥികളോടു സംവദിക്കുകയായിരുന്നു ബ്ലെസി. ചടങ്ങില്‍ എസ്ജെസിസി പ്രിന്‍സിപ്പല്‍ റവ.ഡോ. മാത്യു മുരിയങ്കരി ആമുഖപ്രസംഗം നടത്തി. പ്രശസ്ത എഡിറ്ററും സംവിധായകനുമായ ബി. ലെനിന്‍, പ്രശസ്ത ഛായാഗ്രാഹകനും എസ്ജെസിസി ഓഫ് മീഡിയ സ്റ്റഡീസ് വിഭാഗം ഡീനുമായ സണ്ണി ജോസഫ്, കോളജ് ഡയറക്ടര്‍ ഫാ. ജോഫി പുതുപ്പറമ്പ്, വൈസ്പ്രിന്‍സിപ്പല്‍ ജോസഫ് തോമസ്, കെആര്‍എന്‍എന്‍ഐവിഎസ്എ ഡയറക്ടര്‍ പി.ആര്‍. ജിജോ, പ്രശസ്ത നിരൂപകനും അധ്യാപകനുമായ അജു കെ. നാരായണന്‍, മീഡിയ സ്റ്റഡീസ് എച്ച്ഒഡി നിസ സൂസന്‍ മാത്യു എന്നിവര്‍ പ്രസംഗിച്ചു. ഫെസ്റ്റിവലിന്‍റെ ആദ്യ ദിനമായ ഇന്നലെ ബ്ലെസിയുടെ ആട് ജീവിതം പ്രദര്‍ശിപ്പിച്ചു. കോമ്പറ്റീഷന്‍, സ്റ്റുഡന്‍റ്സ് കോര്‍ണര്‍, ഡിറക്‌ടേഴ്സ് കോര്‍ണര്‍, അലുംമ്നി വിഭാഗങ്ങളിലായി 12 ചിത്രങ്ങളും പ്രദര്‍ശിപ്പിച്ചു. തുടര്‍ന്ന് സംഗീത നിശയും അരങ്ങേറി. ഫെസ്റ്റിവലിന്‍റെ രണ്ടാം ദിനമായ ഇന്നു രാഹുല്‍ സദാശിവന്‍റെ ബ്രഹ്മയുഗം പ്രദര്‍ശിപ്പിക്കും. ഫെസ്റ്റിവല്‍ നാളെ സമാപിക്കും.

നാട്ടകത്ത് വസ്തുകച്ചവടത്തിന്‍റെ പേരില്‍ പണം തട്ടിയയാൾ അറസ്റ്റിൽ

നാട്ടകം: വസ്തു കച്ചവടത്തിന്‍റെ പേരില്‍ വിവിധ പ്രദേശങ്ങളില്‍ പലരില്‍നിന്നായി പണം തട്ടിയെടുത്തയാളെ ചിങ്ങവനം പോലീസ് അറസ്റ്റ് ചെയ്തു. ഇന്നലെ ഉച്ചയോടെ തട്ടിപ്പ് വെളിച്ചത്തായതിനെത്തുടര്‍ന്ന് നാട്ടുകാര്‍ നാട്ടകം വില്ലേജ് ഓഫീസിന് സമീപമുള്ള കടയില്‍ ഇയാളെ പൂട്ടിയിട്ട് പോലീസിനെ വിവരമറിയിക്കുകയായിരുന്നു. ആലപ്പുഴ സ്വദേശി പ്രകാശ് (54) ആണ് അറസ്റ്റിലായത്. ഇയാളെ ഇന്നു കോടതിയില്‍ ഹാജരാക്കുമെന്ന് ചിങ്ങവനം പോലീസ് അറിയിച്ചു.

വിദേശ ജോലി വാഗ്ദാനം ചെയ്ത് തട്ടിപ്പ്: പ്രതി അറസ്റ്റിൽ

ഏറ്റുമാനൂർ: വിദേശ ജോലി വാഗ്ദാനം ചെയ്തു പണം തട്ടിയ കേസിലെ പ്രതിയെ പോലീസ് പിടികൂടി. കൊല്ലം പത്തനാപുരം വലിയനെത്ത് ജോൺ പ്രിൻസ് ഇടിക്കുള (39)യെയാണ് ഏറ്റുമാനൂർ പോലീസ് അറസ്റ്റ് ചെയ്തത്. 2024ൽ ആണ് കേസിനാസ്പദമായ സംഭവം നടക്കുന്നത്. ജോജോ അസോസിയേറ്റ്സ് ആൻഡ് റിക്രൂട്ട്മെന്‍റ് കൺസൾട്ടൻസി പ്രൈവറ്റ് ലിമിറ്റഡ് എന്ന സ്ഥാപനം വഴി ന്യൂസിലാൻഡിൽ കെയർ അസിസ്റ്റന്‍റ് ആയി ജോലി വാങ്ങി നൽകാമെന്നു പറഞ്ഞു വിശ്വസിപ്പിച്ച് ഏറ്റുമാനൂർ സ്വദേശിനിയിൽ നിന്നു രണ്ടു ലക്ഷം രൂപ തട്ടിയെടുത്തു എന്നായിരുന്നു പരാതി. ബാങ്ക് അക്കൗണ്ട് വഴി പണം കൊടുത്ത് ദീർഘകാലമായിട്ടും ജോലിയോ പണമോ തിരികെ കിട്ടാതെ വന്നതിനെത്തുടർന്ന് ഏറ്റുമാനൂർ സ്റ്റേഷനിൽ പരാതി നൽകുകയായിരുന്നു. എസ്എച്ച്ഒ ഇൻസ്പെക്ടർ എ.എസ്. അൻസൽ, എസ്ഐമാരായ അഖിൽദേവ്, സുനിൽകുമാർ, എഎസ്ഐമാരായ രാജേഷ് ഖന്ന, ജിഷ പി.എസ്, സിപിഒമാരായ വി.കെ. അനീഷ്, ഡെന്നി പി. ജോയ് എന്നിവരടങ്ങിയ പോലീസ് സംഘം തിങ്കളാഴ്ചയാണ് പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു. ഇയാൾക്കെതിരേ പത്തനാപുരം സ്റ്റേഷനിൽ രണ്ടും കോട്ടയം വെസ്റ്റ് സ്റ്റേഷനിൽ ഒന്നും സമാന കേസുകൾ നിലവിലുണ്ടെന്ന് പോലീസ് പറഞ്ഞു.

കൈപ്പുഴയിൽ ബൈക്ക് ബസിനടിയിൽപ്പെട്ടു

കൈപ്പുഴ: കൈപ്പുഴയിൽ ബൈക്ക് തെന്നി മറിഞ്ഞു സ്വകാര്യ ബസിനടിയിൽപ്പെട്ടു. കല്ലറ-കൈതക്കനാൽ റോഡിലെ കൈപ്പുഴ ഇല്ലിച്ചോട് ജംഗഷ്നിൽ ഇന്നലെ രാവിലെ ഒമ്പതരയോടെയാണ് സംഭവം. കല്ലറ സ്വദേശിയായ സേതു മാധവൻ ബൈക്കിൽ കോട്ടയത്തേക്ക് പോകുമ്പോൾ തെന്നി മറിഞ്ഞ് എതിരേ വന്ന സ്വകാര്യ ബസിനടിയിലകപ്പെടുകയായിരുന്നു. സേതുമാധവൻ എതിർവശത്തേക്ക് വീണതിനാൽ ശരീരത്തിലൂടെ ബസ് കയറാതെ തലനാരിഴയ്ക്കു രക്ഷപ്പെട്ടു.

ശുചിത്വോത്സവം 2025ന് മികച്ച പ്രതികരണം

കോട്ടയം: ഗാന്ധിജയന്തിയോടനുബന്ധിച്ച് നഗര, ഗ്രാമീണ മേഖലകളിലെ ശുചിത്വ പ്രവര്‍ത്തനങ്ങള്‍ ഏകോപിപ്പിക്കുന്നിതിനായി കേന്ദ്രസര്‍ക്കാര്‍ ആവിഷ്‌കരിച്ച ‘സ്വച്ഛതാ ഹി സേവ കാമ്പയിന്‍ ശുചിത്വോത്സവം 2025’ന് ജില്ലയില്‍ മികച്ച പ്രതികരണം. ഇതുവരെ 1980 കേന്ദ്രങ്ങള്‍ മാലിന്യനിര്‍മാര്‍ജന പ്രവര്‍ത്തനങ്ങള്‍ക്കായി രജിസ്റ്റര്‍ ചെയ്തിട്ടുണ്ട്. സ്‌കൂളുകള്‍, ആശുപത്രികള്‍ തുടങ്ങിയ പൊതുസ്ഥാപനങ്ങളിലെ മാലിന്യനിര്‍മാര്‍ജന പ്രവര്‍ത്തനം ഊര്‍ജിതമാക്കും. തദ്ദേശ സ്വയംഭരണ സ്ഥാപനങ്ങളുടെ പരിധികളില്‍പ്പെടുന്ന അനധികൃത മാലിന്യ നിക്ഷേപമുള്ള സ്ഥലങ്ങള്‍ കണ്ടെത്തി സന്നദ്ധ സംഘടനകളുടെ പിന്തുണയോടെ ശുചീകരിക്കും. ജൈവ, അജൈവ മാലിന്യങ്ങള്‍ തരംതിരിച്ച് നിക്ഷേപിക്കുന്നതിനുള്ള നീല, പച്ച നിറങ്ങളിലുള്ള ബിന്നുകള്‍ ഇവിടങ്ങളില്‍ സ്ഥാപിക്കും. സമ്പൂര്‍ണ മാലിന്യ മുക്തമാക്കിയ പ്രദേശങ്ങളില്‍ സീറോ വേസ്റ്റ് ആഘോഷങ്ങള്‍, വെളിയിട വിസര്‍ജനമുക്ത മോഡല്‍ (ഒഡിഎഫ് പ്ലസ്). ശുചിത്വമുള്ള നല്ല ഗ്രാമം പ്രഖ്യാപനങ്ങള്‍, പാഴ്‌വസ്തുക്കള്‍ കൊണ്ടുള്ള നിര്‍മിതികള്‍, ക്ലീന്‍ സ്ട്രീറ്റ് ഫുഡ്, ദേശീയ പ്ലാസ്റ്റിക് മാലിന്യം കുറയ്ക്കല്‍ പ്രചാരണം തുടങ്ങിയവയും സംഘടിപ്പിക്കും. സ്വച്ഛതാ പ്രവര്‍ത്തകര്‍ക്കുള്ള ആരോഗ്യ പരിശോധനാ ക്യാമ്പുകളും ആരോഗ്യസുരക്ഷാ പദ്ധതി വിവരങ്ങളും നല്‍കുന്നതിനായി ഏകജാലക ക്യാമ്പുകള്‍ ഇതിന്‍റെ ഭാഗമായി നടത്തും. മാലിന്യത്തിന്‍റെ ഉറവിടത്തിലുള്ള തരംതിരിവ് ഹരിതചട്ടപാലനം എന്നീ വിഷയങ്ങളിലുള്ള സന്ദേശങ്ങള്‍ പ്രദര്‍ശിപ്പിക്കും. ശുചിത്വോത്സവത്തിന്‍റെ ഭാഗമായി നാളെ ഒരു ദിവസം ഒരു മണിക്കൂര്‍, നൂറുശതമാനം പങ്കാളിത്തം എന്ന ഒരു മണിക്കൂര്‍ നീളുന്ന ശുചീകരണ പ്രവര്‍ത്തനങ്ങള്‍ പൊതുജന പങ്കാളിത്തത്തോടെ നടത്തും.

ജില്ലയിലെ വികസന സദസിന് 26-ന് അകലക്കുന്നത്ത് തുടക്കം

അകലക്കുന്നം: സംസ്ഥാന സർക്കാരിന്‍റെ കഴിഞ്ഞ അഞ്ചു വർഷകാലത്തെ വികസന പ്രവർത്തനങ്ങളുടെ പ്രോഗ്രസ് റിപ്പോർട്ട്‌ അവതരിപ്പിക്കുന്നതിനും ജനാഭിപ്രായം സ്വരൂപിക്കുന്നതിനുമായി നടത്തുന്ന വികസന സദസ് ജില്ലയിൽ അകലക്കുന്നം പഞ്ചായത്തിൽ ആരംഭിക്കും. 26ന് രാവിലെ 10.30 നു പഞ്ചായത്ത്‌ കമ്യൂണിറ്റി ഹാളിൽ നടക്കുന്ന സദസ് ജില്ലാ പഞ്ചായത്ത്‌ പ്രസിഡന്‍റ് ഹേമലത പ്രേംസാഗർ ഉദ്ഘാടനം ചെയ്യും. പ്രോഗ്രസ് റിപ്പോർട്ട്‌ പ്രകാശനം ജില്ലാ കളക്ടർ ചേതൻ കുമാർ മീണ നിർവഹിക്കും.

ഭിന്നശേഷി കുട്ടികളുടെ കലാമേള

ആർപ്പൂക്കര: ആർപ്പൂക്കര പഞ്ചായത്ത് 2025-26 വാർഷിക പദ്ധതി ഉൾപ്പെടുത്തി ഭിന്നശേഷി കലാമേള ഉയരെ-2025 നടത്തി. ജ്ഞാനോദയം സ്പെഷൽ സ്കൂൾ ഓഡിറ്റോറിയത്തിൽ നടത്തപ്പെട്ട കലാമേള പഞ്ചായത്ത് പ്രസിഡന്‍റ് ദീപ ജോസ് ഉദ്ഘാടനം ചെയ്തു. വൈസ് പ്രസിഡന്‍റ് അരുൺ ഫിലിപ്പ് അധ്യക്ഷത വഹിച്ചു. ബ്ലോക്ക് പഞ്ചായത്ത് അംഗങ്ങളായ അന്നമ്മ മാണി, എസ്‌സി കെ. തോമസ്, സബിത ജോമോൻ, സ്ഥിരം സമിതി അംഗങ്ങളായ വിഷ്ണു വിജയൻ, സുനിത ബിനു, ഓമന സണ്ണി, പഞ്ചായത്ത് അംഗങ്ങളായ റോയി പുതുശേരി, ജസ്റ്റിൻ ജോസഫ്, റോസിലി ടോമിച്ചൻ, ലൂക്കോസ് ഫിലിപ്പ് എന്നിവർ പ്രസംഗിച്ചു.

ദേശീയ ആയുര്‍വേദ ദിനാചരണം

കോട്ടയം: പത്താമത് ദേശീയ ആയുര്‍വേദ ദിനാചരണ പരിപാടികൾക്കു തുടക്കമായി. കോട്ടയം നാഗമ്പടം ബസ്‌സ്റ്റാന്‍ഡില്‍ ‘ആയൂര്‍വേദം മാനവരാശിക്കും ഭൂമിക്കും’ എന്ന ആയുർ‍വേദദിന സന്ദേശത്തെ ആസ്പദമാക്കി ഫ്‌ളാഷ് മോബും നടത്തി. ഇന്നു രാവിലെ 9.15നു വിളംബര ജാഥ കോട്ടയം കളക്ടറേറ്റില്‍ ജില്ലാ കളക്ടര്‍ ചേതന്‍ കുമാര്‍ മീണ ഫ്‌ളാഗ് ഓഫ് ചെയ്യും. ഐഎംഎ ഹാളിൽ 10.30ന് മന്ത്രി വി.എന്‍. വാസവന്‍ ആയുര്‍വേദദിനം ഉദ്ഘാടനം ചെയ്യും. വിവിധ വിഷയങ്ങള്‍ പ്രതിപാദിച്ച് സയന്‍റിഫിക്ക് സെഷനുകള്‍ ഉണ്ടായിരിക്കും. ഒരാഴ്ച നീണ്ടുനില്‍ക്കുന്ന വിവിധ പരിപാടികള്‍ ഭാരതീയ ചികിത്സാ വകുപ്പിന് കീഴിലുള്ള ജില്ലയിലെ 80 സ്ഥാപനങ്ങളിലായി നടക്കും. ആയുർ‍വേദത്തെ ജനകീയമാക്കുന്നതിന്‍റെ ഭാഗമായി ബോധവത്കരണ ക്ലാസുകള്‍, ആയുര്‍വേദ മെഡിക്കല്‍ ക്യാമ്പുകള്‍, ആയുര്‍വേദ എക്സിബിഷന്‍ തുടങ്ങി വിവിധ പരിപാടികള്‍ നടക്കും. പത്രസമ്മേളനത്തില്‍ കോട്ടയം ആയുര്‍വേദ മെഡിക്കല്‍ ഓഫീസര്‍ ഡോ. അജിത, ഐടിഎന്‍എഎം ജില്ലാ പ്രോഗ്രാം മാനേജര്‍ ഡോ. ശരണ്യ, കെഎസ്ജിഎഎംഒഎ ജില്ലാ വൈസ്പ്രസിഡന്‍റ് ഡോ. ജുവല്‍ ജോസ്, മീഡിയ കമ്മിറ്റി കണ്‍വീനര്‍മാരായ ഡോ. അഞ്ജു ആര്‍. നായര്‍, ഡോ. രാമകൃഷ്ണന്‍ എന്നിവര്‍ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]