ADVERTISEMENT

ADVERTISEMENT

കാറ്റിൽ മരം വീണ് ഗതാഗതം തടസപ്പെട്ടു

കോലഞ്ചേരി: ശക്തമായ കാറ്റിലും മഴയിലും മരം വൈദ്യുതി ലൈനിലേക്ക് കടപുഴകി വീണ് ഗതാഗതം തടസപ്പെട്ടു. മഴുവന്നൂർ - മേക്കടമ്പ് റോഡിൽ മഴുവന്നൂർ ഇലഞ്ഞിമലയ്‌ക്ക് സമീപമാണ് മരം വീണത്.

ഇന്നലെ ഉച്ചകഴിഞ്ഞ് മൂന്നോടെയായിരുന്നു സംഭവം. പട്ടിമറ്റം അഗ്നിരക്ഷാ നിലയം സ്റ്റേഷൻ ഓഫീസർ എൻ.എച്ച്. അസൈനാരുടെ നേതൃതത്തിൽ സേനാംഗങ്ങളായ കെ.കെ. ശ്യാംജി, എ.എം. സനൂപ്, വി.ജി. വിജിത്ത്കുമാർ, വി.പി. ഗഫൂർ, വി.പി. മിഥുൻ, അഖിൽ ദേവ് എന്നിവർ ചേർന്ന് മരം മുറിച്ച് നീക്കി.

ADVERTISEMENT

മൂവാറ്റുപുഴയിൽ ദേശീയ, സംസ്ഥാനപാതകളിലെ കുഴികൾ നികത്താൻ എംഎൽഎയുടെ നിർദേശം

മൂവാറ്റുപുഴ: നഗരവികസന പ്രവർത്തികൾക്ക് പുറമേ കാലവർഷം ശക്തമായതോടെ മൂവാറ്റുപുഴയിലെ വിവിധ റോഡുകളിൽ കുഴികളും വെള്ളക്കെട്ടുകളും രൂപപ്പെട്ട് സഞ്ചാരയോഗ്യമല്ലാതായിരിക്കുന്നെന്നും ഇവ പരിഹരിക്കുന്നതിന് അടിയന്തര നടപടികൾ സ്വീകരിക്കണമെന്നും അധികൃതരോട് മാത്യു കുഴൽനാടൻ എംഎൽഎ ആവശ്യപ്പെട്ടു. മൂവാറ്റുപുഴ വെള്ളൂർകുന്നത്ത് ദേശീയപാതയിൽ ഐഒസി, എച്ച്പി പന്പിന്‍റെ സമീപത്തും വെള്ളൂർകുന്നം സിഗ്നലിന് സമീപത്തുമുള്ള കുഴികൾ അടയ്ക്കുന്നതിന് നാഷണൽ ഹൈവേ അഥോറിറ്റിയോട് ആവശ്യപ്പെട്ടു. മൂവാറ്റുപുഴ, കച്ചേരിത്താഴം പാലങ്ങളിലും സമീപത്തും വാഹനങ്ങൾ തിരിച്ചുവിടുന്ന റോഡുകളിലും രൂപപ്പെട്ടിരിക്കുന്ന കുഴികൾ അടയ്ക്കുന്നതിന് കെആർഎസ്ബി ഉദ്യോഗസ്ഥർക്കും നിർദേശം നൽകി. അന്പലംപടി വീട്ടൂർ റോഡിലെ കബറിങ്കൽ മസ്ജിദിന് സമീപത്ത് രൂപപ്പെട്ടിരിക്കുന്ന കുഴികളും ഈ ഭാഗത്തെ വെള്ളക്കെട്ടുകൾ ഒഴിവാക്കാനും നിർദേശം നൽകിയിട്ടുണ്ട്. ഈ റോഡിൽ തന്നെ മറ്റു വിവിധ ഇടങ്ങളിലായി രൂപപ്പെട്ടിരിക്കുന്ന കുഴികളും നികത്തി സഞ്ചാരയോഗ്യമാക്കുന്നതിന് വേണ്ടിയുള്ള നടപടികൾ സ്വീകരിക്കാൻ പിഡബ്ല്യുഡി റോഡ് അറ്റകുറ്റപ്പണി വിഭാഗത്തോടും എംഎൽഎ ആവശ്യപ്പെട്ടു.

പലചരക്ക് കടയിൽ മോഷണം

മൂവാറ്റുപുഴ: പി.ഒ ജംഗ്ഷനിലെ വ്യാപാര സ്ഥാപനത്തിൽ മോഷണം. പി.ഒ ജംഗ്ഷനിൽ ആരക്കുഴ റോഡിൽ പലചരക്ക് കട നടത്തുന്ന പേട്ട ഉസയിൽ മൻസിൽ മുഹമ്മദ് ഗുലാം എന്നയാളുടെ സ്ഥാപനത്തിലാണ് ശനിയാഴ്ച രാവിലെ ഏഴോടെ മോഷണം നടന്നത്. കടയുടെ ഷട്ടർ പകുതി താഴ്ത്തി മുഹമ്മദ് ഗുലാം പുറത്തേക്ക് ഇറങ്ങിയതിനുശേഷം മോഷ്ടാവ് അഞ്ച് ലക്ഷം രൂപ അടങ്ങിയ ബാഗും ക്യൂആർകോഡ് സ്കാനർ, ഒരുകുപ്പി വെള്ളം എന്നിവ കവരുകയായിരുന്നു. ക്യൂആർകോഡ് സ്കാനറും കുപ്പിവെള്ളവും മോഷ്ടാവ് സ്ഥപനത്തിന് സമീപത്തുതന്നെ ഉപേക്ഷിച്ച നിലയിൽ കണ്ടെത്തി. മൂവാറ്റുപുഴ പോലീസിൽ പരാതി നൽകിയതിനെതുടർന്ന് പോലീസ് സ്ഥലത്തെത്തി അന്വേഷണം ആരംഭിച്ചു. 27 വർഷമായി പി.ഒ ജംഗ്ഷനിൽ പലചരക്ക് കട നടത്തിവരുകയാണ് മുഹമ്മദ് ഗുലാം.

മരം വീണ് വീട് തകർന്നു

മൂവാറ്റുപുഴ: ശക്തമായ മഴയിലും കാറ്റിലും മരം വീണ് വീട് തകർന്നു. വെള്ളിയാഴ്ച ഉച്ചകഴിഞ്ഞ് രണ്ടോടെയുണ്ടായ ശക്തമായ കാറ്റിലും മഴയിലുമാണ് ആനിക്കാട് കന്പനിപ്പടിയിൽ കോരപ്പിള്ളിൽ ഉമ്മർ വാടകയ്ക്ക് നൽകിയിരിക്കുന്ന വീടിന്‍റെ മുകളിലേക്ക് രണ്ട് തേക്കും ഒരു തെങ്ങും കടപുഴകിവീണത്. മരം വീണതിനെതുടർന്ന് വീടിന്‍റെ രണ്ട് മുറിയും അടുക്കളയും തകർന്നു. അപകടസമയം വാടകക്കാരായ സുനിലിന്‍റെ രണ്ട് മക്കൾ മാത്രമാണ് വീട്ടിലുണ്ടായിരുന്നത്. മരം വീഴുന്നത് കണ്ട് ഇവർ ഓടിമാറിയതിനാൽ വൻ ദുരന്തം ഒഴിവായി. സുനിലും കുടുംബവും തകർന്ന വീടിന്‍റെ ഒരുമുറിയിലാണ് ഇപ്പോൾ താമസിക്കുന്നത്.

കോതമംഗലം താലൂക്കില്‍ അഞ്ച് വീടുകള്‍ ഭാഗികമായി തകർന്നു, ലക്ഷങ്ങളുടെ കൃഷിനശിച്ചു

കോതമംഗലം: കനത്തമഴയോടൊപ്പം ഉണ്ടായ കാറ്റില്‍ താലൂക്കില്‍ അഞ്ച് വീടുകള്‍ക്ക് ഭാഗികനാശം. ലക്ഷങ്ങളുടെ കൃഷിനാശവും ഉണ്ടായി. തൃക്കാരിയൂര്‍ ഹൈക്കോര്‍ട്ട് കവല ഭാഗത്ത് ചീനിവീട്ടില്‍ രാധയുടെ വീടിന്‍റെ ഒരുഭാഗം കനത്തമഴയില്‍ തകര്‍ന്നുവീണു. നെല്ലിക്കുഴി ചിറപ്പടി പുതിയതൊട്ടിയില്‍ മുത്തുകുഞ്ഞിന്‍റെ വീടിന് മുകളിലേക്ക് മരം കടപുഴകി വീണ് ഓടും ഷീറ്റും മേഞ്ഞ മേല്‍ക്കൂരയും തകര്‍ന്നു. സാധനസാമഗ്രികള്‍ക്കും കേടുപാടുണ്ടായി. വീടിനകം മഴവെള്ളത്തില്‍ നിറഞ്ഞതോടെ വീട്ടുകാര്‍ ബന്ധുവീട്ടിലേക്ക് താമസം മാറി. നെല്ലിക്കുഴി തട്ടുപറമ്പില്‍ ടി.പി. നവാസ് ലൈഫ് പദ്ധതിയില്‍ പണിത വീടിനോട് ചേര്‍ന്ന് നിര്‍മിച്ച് വര്‍ക്ക് ഏരിയ ഭാഗവും മതിലും നിലംപൊത്തി. താഴെയുള്ള മൈലുങ്കല്‍ ജെസി സാബുവിന്‍റെ ശൗചാലയത്തിന് മുകളിലേക്ക് കരിങ്കല്‍ക്കെട്ട് പതിച്ച് ശൗചാലയത്തിനും നാശനഷ്ടം സംഭവിച്ചു. ചെറുവട്ടൂര്‍ മൂലംകുഴിയില്‍ ഷാജിയുടെ വീടിന് മുകളിലേക്ക് റബര്‍ മരം മറിഞ്ഞ് ആസ്ബസ്‌റ്റോസ് ഷീറ്റുകള്‍ക്ക് തകര്‍ന്നു. കോട്ടപ്പടി പാറച്ചാലിപ്പാറ പുത്തന്‍പുരയില്‍ കുട്ടപ്പന്‍റെ വീടീന്‍റെ ഷീറ്റ് മേഞ്ഞ മേല്‍ക്കൂര ഇടിഞ്ഞുവീണു. ചേലാടിന് സമീപം കള്ളാട് പമ്പ്ഹൗസിന് സമീപം ഓട്ടോറിക്ഷയ്‌ക്ക് മീതെ മരം മറിഞ്ഞ വീണു. photo: കനത്തമഴയിൽ നെല്ലിക്കുഴി തട്ടുപറമ്പില്‍ ടി.പി. നവാസ് ലൈഫ് പദ്ധതിയില്‍ പണിത വീടിനോട് ചേര്‍ന്ന് നിര്‍മിച്ച വര്‍ക്ക് ഏരിയ ഭാഗവും മതിലും നിലംപൊത്തിയ നിലയിൽ.

മൂവാറ്റുപുഴയാർ നിറയുന്നു : വെള്ളപ്പൊക്ക ഭീഷണിയിൽ താഴ്ന്ന പ്രദേശങ്ങൾ

മൂവാറ്റുപുഴ: ജില്ലയുടെ കിഴക്കൻ മേഖലയിൽ മഴ കനത്തതോടെ മൂവാറ്റുപുഴയാറ്റിൽ ജലനിരപ്പ് ഉയർന്നു.ഇതോടെ താഴ്ന്ന പ്രദേശങ്ങളിൽ വെള്ളപ്പൊക്ക ഭീഷണിയും. ശനിയാഴ്ച പുലർച്ചെ മുതൽ മഴ ശക്തിയായതോടെ മൂവാറ്റുപുഴയാറിന്‍റെ കൈവഴികളായ കാളിയാർ, തോടുപുഴ, കോതമംഗലം ആറുകളിൽ ജലനിരപ്പ് ഉയർന്നിരുന്നു. മഴ തുടർന്നാൽ മൂവാറ്റുപുഴ നഗരത്തിലെ താഴ്ന്ന പ്രദേശങ്ങൾ അടക്കം വെള്ളത്തി നടിയിലാകും. പുഴക്കര കാവ് കടവു മുതൽ ലതാ പാലം വരെയുള്ള പുഴയോര നടപ്പാതകളും കുളികടവുകളും വെള്ളത്തിൽ മുങ്ങി. മലങ്കര ഡാമിന്‍റെ ആറ് ഷ‌ട്ടറുകൾ ഉയർത്തിയതോടെ തൊടുപുഴയാറിൽ ജലനിരപ്പ് ക്രമാതീതമായി ഉയർന്നു. മേഖലയിലെ ചെറുതോടുകളും പുഴകളും പാടശേഖരങ്ങളും താഴ്ന്ന പ്രദേശങ്ങളിലും വെള്ളം ഉയരുകയാണ്. ഉയർന്ന പ്രദേശങ്ങളിൽ മണ്ണിടിച്ചിൽ ഭീഷണിയും നിലനിൽക്കുന്നുണ്ട്. 2018ലും 19ലും 20ലും ഉണ്ടായ പ്രളയത്തിൽ മൂവാറ്റുപുഴയിൽ വ്യാപക നാശനഷ്ടം സംഭവിച്ചിരുന്നു. വാണിജ്യ മേഖലയിൽ കോടികളുടെ നഷ്ടമാണ് ഉണ്ടായത്. നൂറുകണക്കിന് കുടുംബങ്ങളെ മാറ്റി പാർപ്പിക്കേണ്ടിവന്നു. മഴ കനക്കുമെന്ന് മുന്നറിയിപ്പ് വന്നതോടെ റവന്യൂ വകുപ്പും തദ്ദേശ സ്വംയംഭരണ സ്ഥാപനങ്ങളും കനത്ത ജാഗ്രതയിലാണ്. താലൂക്ക് ഓഫീസിൽ 24 മണിക്കൂറും പ്രവർത്തിക്കുന്ന കൺട്രോൾ റൂം തുറന്നിട്ടുണ്ട്. അഗ്നിശമനസേനയും പോലീസും സന്നദ്ധസംഘടനകളും ഏതു സാഹചര്യവും നേരിടുന്നതിനുള്ള ഒരുക്കങ്ങൾ പൂർത്തിയാക്കിയിട്ടുണ്ട്.

ശക്തമായ മഴ: കോലഞ്ചേരി ടൗണിൽ വെള്ളക്കെട്ട് രൂക്ഷം

കോലഞ്ചേരി: ഇന്നലെ പെയ്ത ശക്തമായ മഴയിൽ കോലഞ്ചേരി ടൗണിൽ വെള്ളക്കെട്ട് രൂപപ്പെട്ടു. കൊച്ചി-ധനുഷ്കോടി ദേശീയപാതയിലെ കോലഞ്ചേരി മെഡിക്കൽ കോളജ് ജംഗ്ഷനിലാണ് വ്യാപാര സ്ഥാപനങ്ങളോട് ചേർന്ന് റോഡിൽ വെള്ളക്കെട്ട് രൂപപ്പെട്ടത്. ദേശീയ പാതയിൽ കോലഞ്ചേരിക്കടുത്തുള്ള കടാതിയിലും കാൽനട, ടൂവീലർ, കാർ യാത്രികർക്ക് ബുദ്ധിമുട്ടുണ്ടാക്കി വെള്ളം റോഡിൽ ഉയർന്നിരുന്നു.

പൂയംകുട്ടി പുഴയിൽ ജലനിരപ്പ് ഉയർന്നു; മണികണ്ഠൻചാൽ ചപ്പാത്ത് മുങ്ങി

കോതമംഗലം: ശക്തമായ മഴയെതുടർന്ന് പൂയംകുട്ടി പുഴയിൽ ജലനിരപ്പ് ഉയർന്ന് മണികണ്ഠൻചാൽ ചപ്പാത്ത് വെള്ളത്തിനടിയിലായി. കുടമുണ്ട പാലവും വെള്ളം മുക്കി. മഴ നാടെങ്ങും ആശങ്ക വിതയ്‌ക്കുകയാണ്. വെള്ളപ്പൊക്കഭീതിയും ഉയരുന്നുണ്ട്. പുഴകളും തോടുകളും കരകവിയാവുന്ന അവസ്ഥയിലാണ്. പുഴകൾക്ക് ചേർന്നുള്ള താഴ്ന്ന പ്രദേശങ്ങളിൽ വെളളം കയറിയി. കുട്ടന്പുഴ പഞ്ചായത്തിലെ മണികണ്ഠൻചാലിലും അട്ടിക്കളത്തും വീടുകൾക്ക് സമീപംവരെ വെള്ളമെത്തി. മഴ ശക്തമായി തുടർന്നാൽ വീടുകളിൽ വെള്ളം കയറും. തങ്കളം ജവഹർ നഗർ ഉൾപ്പടെ വെള്ളം കയറാനുള്ള സാധ്യതയുള്ള പ്രദേശങ്ങൾ അധികൃതർ നിരീഷിക്കുന്നുണ്ട്. ആവശ്യമെങ്കിൽ ദുരിതാശ്വാസ ക്യാന്പുകൾ തുറക്കുമെന്നും തഹസിൽദാർ അറിയിച്ചു. പൂയംകുട്ടി പുഴയിൽ ജലനിരപ്പ് ഉയർന്നതിനാൽ മണികണ്ഠൻചാൽ ചപ്പാത്ത് വെള്ളത്തിനടിയിലായി. ഇതുവഴിയുള്ള യാത്ര മുടങ്ങിയതോടെ ആദിവാസി ഉന്നതികളും മണികണ്ഠൻചാലും ഒറ്റപ്പെട്ടു. ബ്ലാവന കടവിലെ ജങ്കാറും നിർത്തിവച്ചിരിക്കുകയാണ്. കോതമംഗലം പുഴയിലും കുരൂർ തോട്ടിലും ജലനിരപ്പ് ഉയർന്നു. കൃഷിയിടങ്ങളിൽ വെള്ളം കയറിയിട്ടുണ്ട്. കുടമുണ്ട പാലത്തിൽ വെള്ളം കയറിയത് യാത്ര ദുരിതത്തിലാക്കി. കീരന്പാറ പഞ്ചായത്തിലെ പാലമറ്റത്ത് റോഡിലേക്ക് മരം വീണ് ഗതാഗതം തടസപ്പെട്ടു. അഗ്നിരക്ഷാസേനയെത്തിയാണ് മരം നീക്കിയത്. നേര്യമംഗലം വില്ലാഞ്ചിറയിൽ മരം റോഡിലേക്ക് വീണതുമൂലം ഗതാഗത തടസമുണ്ടായി. ഇവിടെ നേരിയ മണ്ണിടിച്ചിലും ഉണ്ടായിട്ടുണ്ട്. നേര്യമംഗലം - അടിമാലി റോഡിലും മരം വീഴ്ചയും മണ്ണിടിച്ചിലും ഉണ്ടായി. ഈ ദിവസങ്ങളിലെ മഴക്കെടുതിയിൽ താലൂക്കിലെ മൂന്ന് വീടുകൾക്ക് ഭാഗമായി നാശനഷ്ടമുണ്ടായെന്ന് തഹസിൽദാർ അറിയിച്ചു. തൃക്കാരിയൂർ, കോട്ടപ്പടി, ഇരമല്ലൂർ വില്ലേജുകളിലാണ് വീടുകൾക്ക് നാശം നേരിട്ടത്.

കെപിഒഎ തെരഞ്ഞെടുപ്പ്; വെല്‍ഫെയര്‍ അസോസിയേഷനു വിജയം

കൊച്ചി: കേരളാ പോലീസ് ഓഫീസേഴ്‌സ് കൊച്ചി സിറ്റി ജില്ലാ കമ്മറ്റിയുടെ 2025 - 2027 വര്‍ഷത്തേക്കുള്ള തെരഞ്ഞെടുപ്പില്‍ ഔദ്യോഗിക പാനലിനെതിരെ മല്‍സരിച്ച കെപിഎ മുന്‍ സംസ്ഥാന നിര്‍വാഹക സമിതിയംഗം സാം തോമസ്, കെപിഎ മുന്‍ ജില്ലാ ട്രഷര്‍ ജോസ് ആന്‍റണി, മുന്‍ ജില്ലാ കമ്മറ്റി അംഗം ആര്‍. വിനോദ് , റെജി മോന്‍ എന്നിവര്‍ക്ക് ജയം. ഡിഎച്ച്ക്യുവില്‍ നാല്, ഹില്‍പാലസ്, ഇന്‍ഫോപാര്‍ക്ക്, കളമശേരി, ക്രൈംബ്രാഞ്ച് എന്നിവിടങ്ങളില്‍ ഓരോ സീറ്റു വീതവും വെല്‍ഫെയര്‍ അസോസിയേഷന്‍ പ്രതിനിധികള്‍ നേടി. എറണാകുളം റൂറല്‍ ജില്ലയില്‍ 23 സീറ്റില്‍ മത്സരമുണ്ടായി. അതില്‍ 14 സീറ്റിലും ഔദ്യോഗിക അസോസിയേഷന്‍ പരാജയപ്പെട്ടു. എഎസ്‌ഐ സതീശന്‍ കെപിഒഎ ജില്ലാ സെക്രട്ടറി ഷാജിമോനെ പരാജയപ്പെടുത്തി. ആലുവ സബ് ഡിവിഷനില്‍ ഔദ്യോഗിക പക്ഷത്തെ പരാജയപ്പെടുത്തി ഭൂരിപക്ഷം സീറ്റിലും വെല്‍ഫയര്‍ അസോസിയേഷന്‍ വിജയിച്ചുവെന്ന് ഭാരവാഹികള്‍ അറിയിച്ചു.

ശ്രീഹരി സുകേഷിന് അന്ത്യാഞ്ജലി

തൃപ്പൂണിത്തുറ: പരിശീലന പറക്കലിനിടെ കാനഡയിൽ വിമാനം തകർന്ന് വീണ് മരിച്ച ശ്രീഹരി സുകേഷിന് അന്ത്യാഞ്ജലി. രാവിലെ നെടുമ്പാശേരി വിമാനത്താവളത്തിലെത്തിച്ച മൃതദേഹം, ഉച്ചയോടെ തൃപ്പൂണിത്തുറ സ്റ്റാച്ച്യു ജംഗ്ഷനടുത്തുള്ള കൃഷ്ണാ എൻക്ലേവിലെ ഫ്ലാറ്റിൽ പൊതുദർശനത്തിന് വച്ചു. പ്രഫ. കെ.വി. തോമസ്, ഹൈബി ഈഡൻ എംപി, നഗരസഭാധ്യക്ഷ രമ സന്തോഷ് തുടങ്ങിയവർ അന്ത്യാഞ്ജലിയർപ്പിച്ചു. വൈകിട്ട് 4.30 ഓടെ മൃതദേഹം വീട്ടിൽ നിന്നും തൃപ്പൂണിത്തുറ പൊതുശ്മശാനത്തിലെത്തിച്ചു. അഞ്ചോടെ സംസ്കാരം നടത്തി. കഴിഞ്ഞ എട്ടിനാണ് കാനഡയിലെ മാനിടോബയിൽ സ്റ്റെൻബാക് സൗത്ത് എയർപോർട്ടിനടുത്ത് വച്ച് സഹപാഠിയുടെ വിമാനവും ശ്രീഹരിയുടെ വിമാനവും കൂട്ടിയിടിച്ചത്.

ടിപ്പർലോറി തോട്ടിലേക്ക് മറിഞ്ഞു

അരൂർ: എരമല്ലൂരിൽ കോൺക്രീറ്റ് കട്ടയുമായി വന്ന ടിപ്പർ ലോറി തോട്ടിലേക്ക് മറിഞ്ഞു. ഇന്നലെ വൈകുന്നേരം മൂന്നോടെ എരമല്ലൂർ പുതുശേരി കോളനി റോഡിൽ കുറുക്കച്ചം പറമ്പ് തോടിന് കുറകെ പൈപ്പ് സ്ഥാപിച്ചു നിർമിച്ച കലുങ്ക് തകർന്നാണ് ലോറി മറിഞ്ഞത്. റോഡിനടിയിലൂടെ മണ്ണൊലിപ്പ് ഉണ്ടായിരുന്നതാണ് അപകടത്തിന് കാരണം. ലോഡുമായെത്തിയ ലോറി മറിഞ്ഞെങ്കിലും ഡ്രൈവർക്ക് പരിക്കേറ്റില്ല.

വൈപ്പിനിൽ കടൽക്ഷോഭം ശക്തമായി

വൈപ്പിൻ : കാറ്റും മഴയും ശക്തമായതിനെ തുടർന്ന് വൈപ്പിൻ തീരത്ത് കടൽക്ഷോഭവും ശക്തമായി. എടവനക്കാട് പഴങ്ങാട് കടപ്പുറത്ത് നിരവധി വീടുകളിൽ വെള്ളം കയറി. പഞ്ചായത്ത് റവന്യൂ അധികൃതരെയും ജില്ലാ കളക്ടറെയും വിവരമറിയിച്ചു. ഉദ്യോഗസ്ഥരും അഗ്നിശമന സേനയും സ്ഥലത്തെത്തി. താത്കാലിക ക്യാമ്പിനായി രണ്ട് സ്കൂളുകൾ സജ്ജമാക്കിയെങ്കിലും ദുരിതബാധിതർ ക്യാമ്പിലേക്ക് വരാൻ സന്നദ്ധരായില്ല. ഇന്നലത്തെ മഴയിലും കാറ്റിലും നായരമ്പലം , എടവനക്കാട്, കുഴുപ്പിള്ളി, പള്ളിപ്പുറം, മേഖലകളിലും കടൽ കയറി. ചെറായി കാറ്റാടി ബീച്ച് ഭാഗത്തും വീടുകളിലും ഹോം സ്റ്റേകളിലും കടൽ കയറി. ഇവിടെ തീരദേശ റോഡ് മണൽ മൂടി ഗതാഗതം തടസപ്പെട്ടു കിടക്കുകയാണ്. തകർന്നു കിടക്കുന്ന കടൽ ഭിത്തിക്ക് ഇടയിലൂടെയാണ് കടൽവെള്ളം അടിച്ചു കയറുന്നത്. തിരകളെ തടുക്കാൻ എടവനക്കാട് നായരമ്പലം ഭാഗങ്ങളിൽ ഈയടുത്ത് ലക്ഷങ്ങൾ ചെലവഴിച്ച് സ്ഥാപിച്ച താത്കാലിക സംവിധാനമായ ജിയോ ബാഗുകൾ പലയിടത്തും ഒലിച്ചുപോയി. ലക്ഷങ്ങൾ മുടക്കി നിർമിച്ച തീരദേശ റോഡിനും പലയിടത്തും കേടുപാടുകൾ സംഭവിച്ചിട്ടുണ്ട്.

ട്വന്‍റി 20യുടെ പ്രതിഷേധ മനുഷ്യച്ചങ്ങല ഇന്ന്

കിഴക്കമ്പലം: കിഴക്കമ്പലം -പോഞ്ഞാശേരി പിബ്ല്യുഡി റോഡ് സഞ്ചാരയോഗ്യമാക്കണമെന്നാവശ്യപ്പെട്ട് ട്വന്‍റി 20 യുടെ നേതൃത്വത്തിൽ ഇന്നു വൈകുന്നേരം നാലിന് തൈക്കാവ് മുതൽ കിഴക്കമ്പലം വരെ പ്രതിഷേധ മനുഷ്യ ചങ്ങല തീർക്കും. പോഞ്ഞാശേരി റോഡ് കുണ്ടും കുഴിയുമായി സഞ്ചാരയോഗ്യമല്ലാതായിട്ട് നാലുവർഷമായതായി പാർട്ടി ആരോപിച്ചു. പിബ്ല്യുഡി യുടെ ഉടമസ്ഥതയിൽ പെട്ട ഈ റോഡിൽ കിഴക്കമ്പലം പഞ്ചായത്തിന് യാതൊരു അധികാരവുമില്ലന്ന വസ്തുത മറച്ചുവെച്ചുകൊണ്ട് ട്വന്‍റി 20 ഭരണം മോശമാണെന്ന് വരുത്തി തീർക്കാനാണ് സ്ഥലം എംഎൽഎയുടെയും സിപിഎമ്മിന്‍റെയും ശ്രമമെന്ന് ട്വന്‍റി 20 ആരോപിച്ചു. കിഴക്കമ്പലം മുതൽ തൈക്കാവ് വരെ മൂന്ന് കിലോമീറ്ററോളമാണ് മനുഷ്യച്ചങ്ങല തീർക്കുന്നത്. സഞ്ചാരയോഗ്യമായ റോഡ് ജനങ്ങളുടെ അവകാശമാണെന്നും ആരുടെയും ഔദാര്യമല്ലെന്നും പാർട്ടി പ്രസിഡന്‍റ് സാബു എം. ജേക്കബ് പ്രസ്താവനയിൽ അറിയിച്ചു. മനുഷ്യച്ചങ്ങലയ്ക്ക് പാർട്ടി സംസ്ഥാന ചെയർമാൻ ബോബി എം. ജേക്കബ്, വൈസ് പ്രസിഡന്‍റ് വി. ഗോപകുമാർ, നേതാക്കളായ അഡ്വ. ചാർളി പോൾ ,ജിബി എബ്രഹാം, ജിന്‍റോ ജോർജ്, ദീപക് രാജൻ, അഗസ്റ്റിൻ ആന്‍റണി തുടങ്ങിയവർ നേതൃത്വം നല്കും. ശോച്യാവസ്ഥയ്ക്കു കാരണം പഞ്ചായത്തെന്ന് എംഎൽഎ കിഴക്കമ്പലം : കഴിഞ്ഞ നാലു വർഷമായി കുണ്ടും കുഴിയുമായി കിടക്കുന്ന കിഴക്കമ്പലം പോഞ്ഞാശേ രി പിഡബ്ല്യു റോഡിന്‍റെ ശോച്യാവസ്‌ഥ തുടരുന്നതിന് കാരണം കിഴക്കമ്പലം ഗ്രാമപഞ്ചായത്ത് ഭരണസമിതിയുടെ ഇടപെടലാണെന്ന് പി.വി. ശ്രീനിജൻ എംഎൽഎ വാർത്താ സമ്മേളനത്തിൽ ആരോപിച്ചു. റോഡുമായി ബന്ധപ്പെട്ട നിർമാണവും ടെൻഡർ നടപടികളും കോടതിയും കേസും റോഡ് നന്നാക്കാനുള്ള അനിശ്ചിതത്വത്തിന് കാരണമായതായും എംഎൽഎ ആരോപിച്ചു.

മണ്ണ് ഇടിഞ്ഞു: തേവക്കലിൽ വീടു തകർന്നു

ആലുവ: മണ്ണ് ഇടിഞ്ഞു വീണ് വീടിന്‍റെ കിടപ്പ് മുറിയും അടുക്കളയും ഭാഗികമായി തകർന്നു. എടത്തല പഞ്ചായത്ത് കൈലാസ നഗറിൽ തിരുവല്ലം റോഡിൽ തേവക്കൽ കാത്താംമ്പുറം വീട്ടിൽ ലൈജുവിന്‍റെ വീട്ടിലേക്കാണ് ഉയരത്തിൽ നിന്ന് മണ്ണ് ഇടിഞ്ഞ് വീണത്. ഇന്നലെ ഉച്ചകഴിഞ്ഞ് 3.30നാണ് സംഭവം. കിടപ്പ് മുറിയിൽ ഉറങ്ങി കിടന്ന ലൈജു ഭാഗ്യം കൊണ്ടാണ് രക്ഷപ്പെട്ടത്. വീടിന്‍റെ ഭിത്തി തകർത്താണ് അകത്തേക്ക് മണ്ണ് ഇടിച്ചു കയറിയത്.

തുതിയൂരിൽ സംരക്ഷണഭിത്തി ഇടിഞ്ഞു വീണ് കാർ തകർന്നു

കാക്കനാട്: കനത്ത മഴയിൽ കാക്കനാട് തുതിയൂരിൽ 12 അടി ഉയരമുള്ള കരിങ്കൽ ഭിത്തി തകർന്ന് വീണ് വീടിനോട് ചേർന്നുള്ള ഷെഡ്പൂർണമായുംതകർന്നു. ഇന്നലെ ഉച്ചയ്ക്ക് ഒന്നോടെയാണ് അപകടം. ആളപായമില്ല. തുതിയൂർ സെന്‍റ് ജൂഡ് റോഡിൽ താമസിക്കുന്ന കണ്ണാടിയിൽ കെ.ടി. മാനുവലിന്‍റെ വീടിന്‍റെ കരിങ്കൽ സംരക്ഷണ ഭിത്തിയാണ് സമീപവാസിയായ വെട്ടിക്കാട്ട് ബെന്നി ജോസഫിന്‍റെ വീടിനോട് ചേർന്നുള്ള ഷെഡിലേക്ക് ഇടിഞ്ഞു വീണത്. ഷെഡിൽ നിർത്തിയിട്ടിരുന്ന കാറിന് മുകളിലേക്കാണ് പാറയും മണ്ണും വീണത്. കാറിന് സാരമായ തകരാർ സംഭവിച്ചിട്ടുണ്ട്. അപകടം നടക്കുമ്പോൾ ബെന്നി ജോസഫും കുടുംബവും വീടിനകത്തായിരുന്നു.

കൊച്ചിയിൽ ബ്രേക്ക്ത്രൂ ഫലം കണ്ടില്ല; വെള്ളക്കെട്ട് തന്നെ

ഫോർട്ടുകൊച്ചി: ശക്തമായ മഴ കൊച്ചി നഗരത്തെ വെള്ളക്കെട്ടിലാക്കി. നഗരത്തിലെ വെള്ളക്കെട്ട് നിവാരണ പ്രവർത്തനങ്ങൾക്ക് വേണ്ടി ബ്രേക്ക് ത്രൂ പദ്ധതിക്ക് പത്തു കോടി രൂപ അനുവദിച്ചിട്ടും ഒന്നും നടന്നില്ലെന്ന് പ്രതിപക്ഷം കുറ്റപെടുത്തി. തേവര-പേരണ്ടൂർ കനാലിന്‍റെ ചെളികോരൽ പോലും പൂർത്തീകരിക്കാൻ കഴിഞ്ഞില്ല. മഴക്കാലത്തിനു മുൻപേ വേനൽക്കാലത്ത് പൂർത്തീകരിക്കാൻ കഴിയുന്ന ജോലികൾ ഒന്നും പൂർത്തീകരിക്കാതെ മഴക്കാലത്ത് വെള്ളക്കെട്ട് ഉണ്ടാകുമ്പോൾ ന്യായീകരണങ്ങൾ നിരത്തി വിഷയത്തിൽ നിന്ന് ഒഴിഞ്ഞു മാറുന്നത് ഭരണകക്ഷിയുടെ ജനവിരുദ്ധ നയമാണെന്നും നഗരത്തിലെ വെള്ളക്കെട്ട് ഒഴിവാക്കുന്നതിന് കോടിക്കണക്കിന് രൂപയുടെ കനാൽ പുനരുദ്ധാരണ പദ്ധതികൾ കടലാസിൽ മാത്രം ഒതുങ്ങുകയാണെന്നും പ്രതിപക്ഷ നേതാവ് അഡ്വ. ആന്‍റണി കുരീത്തറ പറഞ്ഞു. ഈ പദ്ധതിയുമായി ബന്ധപ്പെട്ട് ഒരു സെന്റ് ഭൂമി പോലും എടുക്കുന്നതിനോ കൈയേറ്റങ്ങൾ ഒഴിപ്പിക്കുന്നതിനോ കഴിയാത്തത് ഭരണത്തിന്റെ കെടുകാര്യസ്ഥതയാണെന്നും അദ്ദേഹം അറിയിച്ചു.

റോഡിലെ വെള്ളക്കെട്ടിൽ കുട്ടിയുടെ നീന്തൽ

ആലുവ: തിരക്കേറിയ റോഡിലെ മഴവെള്ളക്കെട്ടിൽ മൂന്ന് വയസുകാരൻ അപകട സാധ്യതയറിയാതെ മീറ്ററുകളോളം നീന്തി. നാട്ടുകാരും യാത്രക്കാരും നിർബന്ധിച്ച് കുട്ടിയെ വീട്ടിൽ എത്തിച്ചു. ഇന്നലെ ദേശീയപാതയിലെ ഗാരേജ് റെയിൽവേ ഗേറ്റിനോട് ചേർന്ന തായിക്കാട്ടുകാര-കാർമ്മൽ റോഡിലാണ് അതിഥി തൊഴിലാളിയുടെ മകൻ സാഹസികത കാണിച്ചത്. ആദ്യ മിനിറ്റുകളിൽ കുട്ടി വെള്ളക്കെട്ടിൽ നീന്തുന്നത് ആരുടേയും ശ്രദ്ധയിൽ പെട്ടില്ല. പിന്നീട് ഇരുചക്ര യാത്രക്കാരാണ് നാട്ടുകാരുടെ സഹായത്തോടെ കുട്ടിയെ വീട്ടിലെത്തിച്ചത്.

കനത്ത മഴയിൽ പലയിടത്തും വെള്ളക്കെട്ട്

കൊച്ചി: കനത്ത മഴയിൽ ജില്ലയിലെ പലയിടങ്ങളിലും വെള്ളക്കെട്ട്. ചിലയിടങ്ങളിൽ റോഡുകളിലും വെള്ളക്കെട്ട് രൂപപ്പെട്ടു. റോഡുകളിൽ വെള്ളം കയറിയതോടെ പലയിടത്തും ഗതാഗതക്കുരുക്കിനും അതു കാരണമായിട്ടുണ്ട്. നെടുമ്പാശേരി: നെടുമ്പാശേരി പഞ്ചായത്തിലെ11-ാം വാർഡിലെ എയർപോർട്ട്-മസ്ജിദ് പഞ്ചായത്ത് റോഡിൽ രൂക്ഷമായ വെള്ളക്കെട്ട് കാരണം കാൽനട യാത്രക്കാരും ഇരുചക്ര വാഹന യാത്രക്കാരും വളരെയധികം ബുദ്ധിമുട്ട് അനുഭവിക്കുന്നു. റോഡിന്‍റെ ഇരുവശവും കാന ഇല്ലാത്തതാണ് രൂക്ഷമായ വെള്ളക്കെട്ടിന് കാരണം. ആയിരക്കണക്കിന് വാഹനങ്ങളാണ് ദിവസവും എയർപോർട്ടിലേക്കും മറ്റു സ്ഥലങ്ങളിലേക്കും ഈ വഴിയിലൂടെ പോകുന്നത്. പറവൂർ: മഴ നിർത്താതെ പെയ്‌തതോടെ നഗരവും സമീപ പ്രദേശങ്ങളും വെള്ളക്കെട്ടിലായി. നഗരത്തിൽ മുനിസിപ്പൽ കവല, ചേന്ദമംഗലം കവല റോഡും കച്ചേരി മൈതാനിയുടെ മുന്നിലുള്ള ഭാഗവും പുഴ പോലെയായി. പുല്ലംകുളം സ്‌കൂളിന് മുന്നിലൂടെയുള്ള ഫോർട്ട് റോഡും വെള്ളത്തിലാണ്. സി. മാധവൻ റോഡിലെ ചില വ്യാപാരസ്‌ഥാപനങ്ങളിൽ വെള്ളം കയറി. ദേശീയപാത നിർമാണം നടക്കുന്ന തെക്കേനാലുവഴി ഉൾപ്പെടെ പല മേഖലകളിലും രൂക്ഷമായ വെള്ളക്കെട്ടാണ്. പഞ്ചായത്തുകളുടെ പ്രദേശങ്ങളിലും ഒട്ടേറെ ഇടറോഡുകൾ വെള്ളത്തിലായി. റോഡിൽ മഴവെള്ളം കെട്ടിക്കിടക്കുന്നതു കാൽനടയാത്രയും വാഹനയാത്രയും ദുഷ്‌കരമാക്കുന്നു. മഴ തുടർന്നാൽ പെയ്ത്ത് വെള്ളം വീടുകളിലേക്ക് കയറാനുള്ള സാധ്യത പലയിടത്തുമുണ്ട്. ആളുകളെ മാറ്റി പാർപ്പിക്കേണ്ട സാഹചര്യമുണ്ടായാൽ ക്യാന്പുകൾ തുറക്കാനുള്ള നിർദേശം അതതു വില്ലേജ് ഓഫീസർമാർക്കു നൽകിയതായി തഹസിൽദാർ പറഞ്ഞു. താലൂക്ക് ഓഫീസിൽ 24 മണിക്കൂറും പ്രവർത്തിക്കുന്ന കൺട്രോൾ റൂം തുറന്നിട്ടുണ്ട്. 0484-2442325, 0484 2972817. തൃപ്പൂണിത്തുറ: കനത്ത മഴയിൽ റോഡ് പുഴയായി. തൃപ്പൂണിത്തുറ കോട്ടയ്ക്കകം-വടക്കേക്കോട്ട റോഡ് ശനിയാഴ്ച ഉച്ചയോടെ ആരംഭിച്ച മഴയോടെ വെള്ളക്കെട്ടിലായി. കോട്ടവാതിൽ മുതൽ വടക്കേക്കോട്ട ജംഗ്ഷൻ വരെയുള്ള റോഡ് പുഴ കണക്കെയാണ് നിറഞ്ഞൊഴുകിയത്. ഒട്ടേറെ ഇരുചക്ര വാഹന യാത്രക്കാർ വെള്ളം കയറി എൻജിൻ നിലച്ചതിനെ തുടർന്ന് വെള്ളത്തിലൂടെ വാഹനം തള്ളിക്കൊണ്ടാണ് ഇവിടം കടന്നത്. ബസുകൾ തുടങ്ങിയ വലിയ വാഹനങ്ങൾ റോഡിലൂടെ കടന്നുപോകുമ്പോൾ റോഡിനിരുവശവുമുള്ള വ്യാപാര സ്ഥാപനങ്ങളിലേയ്ക്കും വീടുകളിലേയ്ക്കും വെള്ളം തിരമാല കണക്കെയാണ് അടിച്ചു കയറിക്കൊണ്ടിരുന്നത്. വൈകിട്ട് വരെ ഇവിടെ വെള്ളക്കെട്ട് തുടർന്നു. സീപോർട്ട് എയർപോർട്ട് റോഡ് കരിങ്ങാച്ചിറ ജംഗ്ഷനിലും വെള്ളക്കെട്ട് രൂക്ഷമായിരുന്നു. ഇവിടെ മുട്ടോളം വെള്ളത്തിലാണ് ബസ് സ്റ്റോപ്പിൽ യാത്രക്കാർ നിന്നത്. തുടർച്ചയായി പെയ്ത മഴയിൽ പള്ളിപ്പറമ്പ്കാവ് കോൺവെന്‍റ് റോഡും വെള്ളത്തിൽ മുങ്ങി. ഇവിടെ കാനയും റോഡും തിരിച്ചറിയാകാനാകാത്ത വിധമാണ് വെള്ളം പൊങ്ങിയത്. എം.കെ.കെ. നായർ നഗറിലെ വീടുകളിലും വെള്ളം കയറി. തെക്കുംഭാഗം, എരൂർ തുടങ്ങിയ സ്ഥലങ്ങളിലെ താഴ്ന്ന പ്രദേശങ്ങളും വെള്ളത്തിലായി. കളമശേരി: രണ്ട് ദിവസമായി ഇടമുറിയാതെ പെയ്യുന്ന മഴയിൽ കളമശേരി മേഖലയിൽ വ്യാപക വെള്ളക്കെട്ടും, ദേശീയപാതയിലടക്കം ഗതാഗതക്കുരുക്കും അനുഭവപ്പെട്ടു. ഇടപ്പള്ളി ടോൾ ജംഗ്ഷൻ ദേശീയപാത , വി.പി. മരക്കാർ റോഡ്, പി.ആർ. തങ്കപ്പൻ റോഡ്‌, മൂലേപ്പാടം, ദേശീയപാതയിലെ ടിവിഎസ് ജംഷൻ എന്നിവിടങ്ങളിൽ വെള്ളക്കെട്ട് രൂപപ്പെട്ടു. ഇടപ്പള്ളി ടോൾ ദേശീയപാതയിലും, എച്ച് എം ടി ജംഷനിലും രാവിലെ മുതൽവാഹന ഗതാഗതക്കുരുക്ക് തുടരുന്നു. പെരുമ്പാവൂർ: പെരുമ്പാവൂരിന്‍റെ വിവിധ മേഖലകളിൽ മഴക്കെടുതിയിൽ മരങ്ങൾ മറിഞ്ഞ് വീണ് ഉണ്ടായ ഗതാഗത തടസങ്ങൾ നീക്കം ചെയ്ത് പെരുമ്പാവൂർ ഫയർഫോഴ്സ്. പട്ടിപ്പാറ, വായ്ക്കര, പറമ്പിപ്പീടിക എന്നിവിടങ്ങളിൽ കെഎസ്ഇബി ലൈനിലും റോഡിലുമായി വീണ മരങ്ങളാണ് ഫയർ ഫോഴ്സ് മുറിച്ചു മാറ്റിയത്. സീനിയർ ഫയർ ആൻഡ് റെസ്ക്യൂ ഓഫീസർ കെ.എ. ഉബാസ്, ഫയർ ആൻഡ് റെസ്ക്യൂ ഓഫീസർമാരായ കെ.എം. ഇബ്രാഹിം, ടി.പി. അരുൺ, സി. ആദർശ്, ഫയർ ആൻഡ് റെസ്ക്യൂ ഓഫീസർ ഡ്രൈവർ പി.എസ്. ഉമേഷ് എന്നിവരാണ് ഫയർഫോഴ്സ് സംഘത്തിലുണ്ടായിരുന്നത്.

ഏഴു ലക്ഷത്തിന്‍റെ അലങ്കാര ലൈറ്റുകള്‍ മോഷ്ടിച്ചവർ‍ പിടിയില്‍

കൊച്ചി: എറണാകുളം ദര്‍ബാര്‍ ഹാള്‍ ഗ്രൗണ്ടിന്‍റെ സൗന്ദര്യവത്കരണത്തിന്‍റെ ഭാഗമായി സ്ഥാപിച്ച ഏഴ് ലക്ഷം വില വരുന്ന ബൊള്ളാര്‍ഡ് ലൈറ്റുകള്‍ മോഷ്ടിച്ച പ്രതികള്‍ പിടിയില്‍. ആലപ്പുഴ പുന്നപ്ര സ്വദേശി നിഹാര്‍ (40), എറണാകുളം കതൃക്കടവ് എ.പി. വര്‍ക്കി നഗര്‍ സ്വദേശി രാഘവന്‍ (34) എന്നിവരെയാണ് എറണാകുളം സെന്‍ട്രല്‍ പോലീസ് അറസ്റ്റ് ചെയ്തത്. ദര്‍ബാര്‍ ഹാള്‍ ഗ്രൗണ്ടിന്‍റെ സൗന്ദര്യവത്കരണ ജോലികളുടെ ഭാഗമായി ലുമന്‍ എന്‍ജിനിയറിംഗ് എന്ന കമ്പനി സ്ഥാപിച്ച 40 ഓളം ബൊള്ളാര്‍ഡ് ലൈറ്റുകളാണ് ഈമാസം 12ന് പുലര്‍ച്ചെ നാലോടെ പ്രതികള്‍ മോഷ്ടിച്ചത്. ‌ തൃശൂര്‍ സ്വദേശിയായ സംഗീത് എന്നയാള്‍ നല്‍കിയ പരാതിയില്‍ ദിവസങ്ങളായി പല സ്ഥലങ്ങളിലെ സിസിടിവി ദൃശ്യങ്ങള്‍ പരിശോധിച്ചും മറ്റു അന്വേഷണങ്ങളിലൂടെയുമാണ് പ്രതികളെ തിരിച്ചറിഞ്ഞത്. തുടര്‍ന്ന് നടത്തിയ അന്വേഷണത്തില്‍ ചളിക്കവട്ടം ഭാഗത്ത് ബൈപ്പാസ് സര്‍വീസ് റോഡില്‍ മുച്ചക്ര വാഹനത്തില്‍ മോഷണമുതലുമായി പോകുമ്പോഴാണ് പ്രതികളെ പോലീസ് പിടികൂടിയത്. എറണാകുളം സെന്‍ട്രല്‍ സ്റ്റേഷന്‍ ഹൗസ് ഓഫീസര്‍ അനീഷ് ജോയിയുടെ നേതൃത്വത്തിലുള്ള പോലീസ് സംഘമാണ് പ്രതികളെ പിടികൂടിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

ടോളിലെ വെള്ളക്കെട്ട് പരിഹരിക്കാൻ പദ്ധതി തയാറാക്കും: മന്ത്രി പി. രാജീവ്

കളമശേരി: ഇടപ്പള്ളി ടോളിലും പരിസരത്തും ശക്തമായ മഴയിൽ രൂപപ്പെടുന്ന വെള്ളക്കെട്ടിന് ശാശ്വത പരിഹാരം കാണാൻ ദേശീയപാത, മെട്രൊ റെയിൽ എന്നിവ ചേർന്ന് പദ്ധതി തയാറാക്കുമെന്ന് മന്ത്രി പി. രാജീവ് പറഞ്ഞു. മന്ത്രിയുടെ നേതൃത്വത്തിൽ ദേശീയപാതാ അതോറിറ്റി, കൊച്ചി മെട്രോ റെയിൽ കോർപ്പറേഷൻ, ഇന്‍റൽ മണി, കളമശേരി നഗരസഭ, ചാക്കോളാസ് പ്രതിനിധികളോടൊത്ത് പ്രദേശം സന്ദർശിക്കുകയായിരുന്നു മന്ത്രി.

ആലുവ ജില്ലാ ആശുപതിയിൽ വൈദ്യുതി മുടങ്ങിയിട്ട് മൂന്നു ദിവസം കഴിഞ്ഞു

ആലുവ: ജില്ലാശുപത്രിയിൽ വൈദ്യുതി മുടങ്ങിയിട്ട് തുടർച്ചയായ മൂന്നാം ദിനവും പ്രശ്ന പരിഹാരമായില്ല. എക്സറെ, ലാബ് അടക്കം നിരവധി സേവനങ്ങളാണ് മുടങ്ങിയിരിക്കുന്നത്. ജനറേറ്ററിലാണ് മറ്റ് പ്രവർത്തനങ്ങൾ നടക്കുന്നത്. ഡയാലിസ് കേന്ദ്രം, ബ്ലഡ് ബാങ്ക്, മോർച്ചറിയടക്കം നിരവധി പ്രവർത്തനങ്ങൾ ജില്ലാശുപത്രിയുടെ കോമ്പൗണ്ടിലാണ് സ്ഥിതി ചെയ്യുന്നത്. ആയിരക്കണക്കിന് രോഗികൾ വരുന്ന ആശുപത്രിയിലെ വൈദ്യുതി മുടങ്ങിയതിൽ ആശുപത്രി വികസന സമിതിയും ഇടപെടുന്നില്ലെന്ന് രോഗികൾ കുറ്റപ്പെടുത്തി. വൈദ്യുതി വിതരണത്തിലെ തകരാറ് ആര് പരിഹരണമെന്ന തർക്കമാണ് പ്രശ്നം നീണ്ടു പോകാൻ കാരണം. വൈദ്യുതി മീറ്റർ വരെയാണ് തങ്ങളുടെ ഉത്തരവാദിത്വം എന്നാണ് കെഎസ്ഇബിയുടെ നിലപാട്. വ്യാഴാഴ്ച രാത്രിയാണ് വൈദ്യുതി നിലച്ചത്. ജില്ലാശുപത്രിയുടെ ചുമതലയുള്ള മൂവാറ്റുപുഴ പി ഡബ്ലിയു ഡി ഇലക്ട്രിക്കൽ സെക്ഷൻ ഉദ്യോഗസ്ഥരും കൈയൊഴിഞ്ഞു. ആശുപത്രി ജില്ലാ പഞ്ചായത്തിന് കീഴിലായതിനാൽ അറ്റകുറ്റപ്പണി എൽഎസ് ജി ഫണ്ട് അനുവദിക്കണമെന്നാണ് ജീവനക്കാർ പറയുന്നത്. തദ്ദേശ സ്വയംഭരണ വകുപ്പും ഇതുവരെ പ്രതികരിച്ചിട്ടില്ല. ഇന്നലെ ലാബ് പരിശോധന നടക്കാത്തതിനാൽ നിരവധി നിർധന രോഗികളാണ് ഡോക്ടറെ കാണാതെ തിരിച്ചു പോയത്. രോഗികളോട് ജീവനക്കാർ മോശമായി പെരുമാറുന്നതായും പരാതി ഉയർന്നിട്ടുണ്ട്.

വിദ്യാർഥിയെ ആക്രമിച്ച യുവാവ് അറസ്റ്റിൽ

ആലുവ: സഹപാഠിയെ ശല്യം ചെയ്തത് തടഞ്ഞ കോളേജ് വിദ്യാർഥിയെ ആക്രമിച്ച് പരിക്കേൽപ്പിച്ച കേസിൽ യുവാവ് അറസ്റ്റിൽ. ആലുവ മില്ലുപടി തോട്ടത്തിൽ ഫവാസ് (27) നെയാണ് ആലുവ ടൗൺ പോലീസ് അറസ്റ്റ് ചെയ്തത്. രണ്ടിനാണ് സംഭവം നടന്നത്. ആലുവയിലെ കോളജിൽക്കയറി പെൺകുട്ടിയെ ശല്യപ്പെടുത്തിയത് ചോദ്യം ചെയ്ത മഞ്ഞപ്പെട്ടി സ്വദേശിയായ വിദ്യാർഥിയെയാണ് ആക്രമിച്ചത്. പട്ടികക്കോലിന് മുഖത്താണ് മർദ്ദനമേറ്റത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

ജോര്‍ജ് ഈഡന്‍റേത് അനുകരണനീയ രാഷ്ട്രീയ ജീവിതം: കെപിസിസി പ്രസിഡന്‍റ്

കൊച്ചി: പുതുതലമുറയ്ക്ക് അനുകരണീയ രാഷ്ട്രീയ ജീവിതത്തിന് ഉടമയായിരുന്നു ജോര്‍ജ് ഈഡനെന്ന് കെപിസിസി പ്രസിഡന്‍റ് അഡ്വ. സണ്ണി ജോസഫ് എംഎല്‍എ. എറണാകുളം ഡിസിസി സംഘടിപ്പിച്ച ജോര്‍ജ് ഈഡന്‍റെ 22-ാം അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ആത്മാര്‍ത്ഥതയും സത്യസന്ധതയും ഉള്ളനേതാവായിരുന്നു അദ്ദേഹം. 22 വര്‍ഷത്തിനിപ്പുറവും ജനമനസില്‍ ജോര്‍ജ് ഈഡന്‍ ജീവിക്കുന്നുവെന്ന് കെപിസിസി പ്രസിഡന്‍റ് പറഞ്ഞു. ഡിസിസി പ്രസിഡന്‍റ് മുഹമ്മദ് ഷിയാസ് അധ്യക്ഷത വഹിച്ചു. എംപിമാരായ ബെന്നി ബെഹനാന്‍, ഹൈബി ഈഡന്‍, ജെബി മേത്തര്‍, എംഎല്‍എമാരായ ടി.ജെ. വിനോദ്, ഉമാ തോമസ്, അന്‍വര്‍ സാദത്ത്, കെപിസിസി ഭാരവാഹികളായ അഡ്വ. എം. ലിജു, വി.ജെ. പൗലോസ്, വി.പി. സജീന്ദ്രന്‍, അബ്ദുള്‍ മുത്തലിബ്, ദീപ്തി മേരി വര്‍ഗീസ്, എന്‍. വേണുഗോപാല്‍, ഡൊമിനിക് പ്രസന്‍റേഷന്‍, അജയ് തറയില്‍, ടി.എം. സക്കീര്‍ ഹുസൈന്‍, കെ.പി. ഹരിദാസ്, ടോണി ചമ്മിണി, തമ്പി സുബ്രഹ്മണ്യം തുടങ്ങിയവര്‍ സംസാരിച്ചു.

ആലുവ മിനി സിവിൽസ്റ്റേഷനിൽ ലിഫ്റ്റ് വീണ്ടും പണിമുടക്കി : ഇത്തവണ കുടുങ്ങിയത് രണ്ടു യുവാക്കൾ

വയോജനങ്ങളും ഭിന്നശേഷിക്കാരും ദുരിതത്തിൽ *ഇതുവരെ കുടുങ്ങിയത് പത്തോളം പേർ ആലുവ: ആലുവ മിനി സിവിൽസ്‌റ്റേഷനിലെ ലിഫ്റ്റിൽ വീണ്ടും സന്ദർശകർ കുടുങ്ങി. ഇത്തവണ മോട്ടോർ വാഹന വകുപ്പ് ഓഫീസിൽ ലേണേഴ്സ് ടെസ്റ്റിന് എത്തിയ യുവാക്കളാണ് അര മണിക്കൂറോളം കുടുങ്ങിയത്. ആലുവ ഫയർഫോഴ്സെത്തി ഇരുവരേയും ഒന്നാം നിലയിൽ നിന്ന് രക്ഷിച്ചു. ആലുവ കുന്നത്തേരി സ്വദേശികളായ പി.എൻ. അസ്‌ലം, ഇ.എ. നിഹാദ് എന്നിവരാണ് കുടുങ്ങിയത്. ലിഫ്റ്റിൽ കുടുങ്ങിയതോടെ ഇവർ കൈയിലുണ്ടായിരുന്ന മൊബൈൽ ഫോണിൽ പൗരാവകാശ സംരക്ഷണ സമിതി സെക്രട്ടറി സാബു പരിയാരത്തിനെ വിളിച്ചു. സാബുവാണ് ഫയർഫോഴ്സിനെ വിളിച്ചറിയിച്ചത്. ഇന്നലെ രാവിലെ എട്ടോടെയാണ് സംഭവം. ലിഫ്റ്റ് വേണ്ട രീതിയിൽ അറ്റകുറ്റപ്പണി നടത്താതിനാൽ കഴിഞ്ഞ പത്ത് വർഷമായി പത്തോളം തവണയാണ് പലരും മണിക്കൂറുകളോളം കുടുങ്ങുന്നത്. വയോധികരും സ്ത്രീകളും ഇതിൽ ഉൾപ്പെടുന്നുണ്ട്. ഭയന്ന് നിലവിളിച്ചവരും ഉണ്ട്. ഇനി ആറു മാസമെങ്കിലും കഴിയും അറ്റകുറ്റപ്പണി നടക്കാൻ. ഗുണനിലവാരം കുറഞ്ഞ ലിഫ്റ്റ് സംവിധാനം മാറ്റി എത്രയും വേഗം നിലവാരമുള്ള ലിഫ്റ്റ് സ്ഥാപിക്കണമെന്ന് ജനങ്ങളുടെ വർഷങ്ങളായുള്ള ആവശ്യമാണ്. ലിഫ്റ്റിനായി 10 ലക്ഷം രൂപ അനുവദിച്ചിട്ടുണ്ടെന്ന് ആലുവ എംഎൽഎ അൻവർ സാദത്തും ഓരോ അപകടത്തിന് ശേഷവും പറയാറുമുണ്ട്. ആലുവ മിനി സിവിൽ സ്റ്റേഷൻ കെട്ടിടത്തിലെ ലിഫ്റ്റ് വീണ്ടും വീണ്ടും തകരാറിലാകുന്നത് കാരണം പ്രായമുള്ളവരും ശാരീരിക പരിമിതിയുള്ളവരുമാണ് ഏറെ ദുരിതത്തിലാകുന്നത്. താലൂക്ക് ഓഫീസടക്കം നിരവധി സ്ഥാപനങ്ങളാണ് മൂന്ന് നില കെട്ടിടത്തിൽ പ്രവർത്തിക്കുന്നത്. ഏറ്റവും കൂടുതൽ പേർ വരുന്ന എംപ്ലോയ്മെന്‍റ് ഓഫീസ്, ജോയിന്‍റ് ആർടി ഓഫീസ് തുടങ്ങിയവയും മൂന്നാം നിലയിലാണ്. നിലവാരം കുറഞ്ഞ ലിഫ്റ്റ് സ്ഥാപിച്ചതാണ് തുടർച്ചയായി കേടാകാൻ കാരണമെന്ന് ജനങ്ങൾ ആരോപിക്കുന്നു. എന്നാൽ സമയബന്ധിതമായി സർവീസ് നടത്താത്തതാണ് ലിഫ്റ്റ് ഇടയ്ക്കിടയ്ക്ക് കേടാകാൻ കാരണമെന്ന് ജീവനക്കാരും പറയുന്നു. ലിഫ്റ്റിന്‍റെ സേവനം വർഷത്തിൽ ഏതാനും മാസങ്ങൾ മാത്രമാണ് സന്ദർശകർക്ക് ലഭിക്കുന്നത്. ഇപ്പോൾ പഴയ മേശ ഉപയോഗിച്ച് ലിഫ്റ്റ് തടസപ്പെടുത്തി വച്ചിരിക്കുകയാണ്.

നാലുകിലോ കഞ്ചാവുമായി രണ്ടുപേര്‍ അറസ്റ്റില്‍

കൊച്ചി: വില്പനയ്‌ക്കെത്തിച്ച 4.099 കിലോ കഞ്ചാവുമായി രണ്ടു പേര്‍ അറസ്റ്റില്‍. കണ്ണൂര്‍ ആലക്കോട് കുമ്പളത്ത് വീട്ടില്‍ അഭിജിത്ത് (26), ബീഹാര്‍ റാണിഗഞ്ച് മുഹമ്മദ് ആലം(32) എന്നിവരെയാണ് കടവന്ത്ര ഇന്‍സ്‌പെക്ടര്‍ പി.എം. രതീഷിന്‍റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. കമ്മട്ടിപ്പാടം ഫ്രണ്ട്‌സ് ലൈനിലെ വീടിന്‍റെ മുകൾനില വാടകയ്‌ക്കെടുത്തായിരുന്നു കഞ്ചാവ് വില്പന. രഹസ്യ വിവരത്തിന്‍റെ അടിസ്ഥാനത്തില്‍ പോലീസ് ഇവിടെ പരിശോധനയ്ക്ക് എത്തുമ്പോള്‍ പ്രതികള്‍ വില്പനയ്ക്കായി ചെറിയ പാക്കറ്റുകളിലേക്ക് കഞ്ചാവ് മാറ്റുകയായിരുന്നു. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.

മോഷണം: നേപ്പാള്‍ സ്വദേശി കുടുങ്ങി‍

കൊച്ചി: പാവക്കുളം ക്ഷേത്രമതില്‍കെട്ടിനകത്ത് കയറി ഹോമപ്പുരയില്‍ സൂക്ഷിച്ചിരുന്ന ഓട്ടുപാത്രങ്ങള്‍ മോഷ്ടിച്ച നേപ്പാള്‍ സ്വദേശി പിടിയില്‍. സരോജ് ശര്‍മ (36) എന്നയാളെയാണ് എറണാകുളം നോര്‍ത്ത് സിഐ ലിജിന്‍ ജോസഫിന്‍റെ നേതൃത്വത്തിൽ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

എംഡിഎംഎയുമായി പിടിയില്‍

കൊച്ചി: വില്‍പ്പനക്കും ഉപയോഗത്തിനുമായി സൂക്ഷിച്ച എംഡിഎംഎയുമായി യുവാവ് പിടിയില്‍. വരാപ്പുഴ കൊങ്ങൂര്‍പിള്ളി രജനി ഭവനില്‍ വി. അനന്ദകൃഷ്ണനെ(27)യാണ് കൊച്ചി സിറ്റി ഡാന്‍സാഫ് ടീം നടത്തിയ പരിശോധനയില്‍ പിടികൂടിയത്. മുളവുകാട് ചൂളക്കല്‍ കോളനി റോജ് ഭാഗത്ത് നടത്തിയ പരിശോധനയിലാണ് 1.27 ഗ്രാം എംഡിഎംഎയുമായി ഇയാള്‍ പിടിയിലായത്.

ബൈക്കിന് തുടര്‍ച്ചയായ‘പണി': നഷ്ടപരിഹാരം നല്‍കണമെന്ന് ഉപഭോക്തൃ കോടതി

കൊച്ചി: എന്‍ജിന്‍ തകരാറിനെ തുടർന്ന് പുതിയതായി വാങ്ങിയ ബൈക്ക് ഉപയോഗിക്കാൻ കഴിയാതെ വന്ന സംഭവത്തില്‍ 30,000 രൂപ നഷ്ടപരിഹാരവും ആറു മാസം എക്സ്റ്റന്‍ഡഡ് വാറന്‍റിയും ഉപഭോക്താവിന് നല്‍കണമെന്ന് ജില്ലാ ഉപഭോക്തൃ തര്‍ക്കപരിഹാര കോടതി. ഹീറോ മോട്ടോ കോർപ് ലിമിറ്റഡ്, തൃപ്പൂണിത്തുറയില്‍ പ്രവര്‍ത്തിക്കുന്ന പാലാല്‍ മോട്ടോഴ്‌സ് എന്നിവര്‍ക്കെതിരെ പെരുമ്പാവൂര്‍ റയണ്‍പുരം സ്വദേശി എ.പി. സോമശേഖരന്‍ നല്‍കിയ പരാതിയിലാണ് കോടതിയുടെ ഉത്തരവ്. 2021 സെപ്റ്റംബറിലാണ് പാലാല്‍ മോട്ടോഴ്‌സില്‍നിന്ന് സോമശേഖരന്‍ ഹീറോ ഗ്ലാമര്‍ ബൈക്ക് വാങ്ങിയത്. അന്നുമുതൽ ആവര്‍ത്തിച്ചുള്ള തകരാറുകള്‍ ബൈക്കിന് ഉണ്ടായിരുന്നു. ഇതു പരിഹരിക്കാന്‍ സര്‍വീസ് സെന്‍ററുകള്‍ക്ക് കഴിഞ്ഞില്ല. എന്‍ജിന്‍ തകരാറുകള്‍ക്ക് കാരണം നിര്‍മാണത്തിലെ പിഴവാണെന്ന് പരാതിയില്‍ പറയുന്നു. കോടതി നിയോഗിച്ച എക്‌സ്‌പെര്‍ട്ടുകളുടെ റിപ്പോര്‍ട്ടും ഇത് ശരിവച്ചു. തുടർന്ന് ആറു മാസത്തെ എക്സ്റ്റന്‍ഡഡ് വാറന്‍റി നല്‍കാനും, കോടതി ചെലവിനത്തില്‍ 30,000 രൂപ നഷ്ടപരിഹാരം 30 ദിവസത്തിനകം നല്‍കുവാനും ഡി.ബി. ബിനു അധ്യക്ഷനും വി. രാമചന്ദ്രന്‍, ടി.എന്‍. ശ്രീവിദ്യ എന്നിവരുടെ ബെഞ്ച് വിധിക്കുകയായിരുന്നു.

അമിതവേഗവും അശ്രദ്ധയും: നിരത്തില്‍ പൊലിഞ്ഞത് 1,631 ജീവനുകള്‍

കൊച്ചി: അമിത വേഗവും അലക്ഷ്യമായ ഡ്രൈവിഗും മൂലമുള്ള അപകടങ്ങള്‍ ജില്ലയില്‍ പെരുകുന്നു. ഇന്നലെ എറണാകുളം നോര്‍ത്തില്‍ ടൗണ്‍ ഹാളിനു സമീപം നടന്ന അപകടത്തിലും അശ്രദ്ധയാണ് വില്ലനായത്. മഴ ആരംഭിച്ചതിനു പിന്നാലെ ജില്ലയില്‍ പത്തോളം പേര്‍ക്കാണ് വിവിധയിടങ്ങളിലായുണ്ടായ വാഹനാപകടങ്ങളില്‍ ജീവന്‍ നഷ്ടമായത്. മദ്യപിച്ച് വാഹനമോടിച്ചുണ്ടാകുന്ന അപകടങ്ങള്‍ക്കും ജില്ലയില്‍ കുറവില്ല. റോഡുകളുടെ ശോച്യാവസ്ഥയും അപകടങ്ങള്‍ക്ക് വഴിയൊരുക്കുന്നുണ്ട്. ഈ വര്‍ഷം ആദ്യ ആറ് മാസത്തിനുള്ളില്‍ 21,277 റോഡ് അപകടങ്ങളാണ് സംസ്ഥാനത്ത് രജിസ്റ്റര്‍ ചെയ്തിട്ടുള്ളത്. ഈ അപകടങ്ങളില്‍ 1,631 പേര്‍ക്ക് ജീവന്‍ നഷ്ടമായപ്പോള്‍ 24,226 പേര്‍ക്ക് പരിക്കേറ്റു. ഈ അപകടങ്ങളില്‍ 25 ശതമാനവും ജില്ലയില്‍ സംഭവിച്ചവയാണ്. കഴിഞ്ഞ വര്‍ഷം സംസ്ഥാനത്ത് ഏറ്റവുമധികം അപകടങ്ങളും, തുടര്‍ന്നുള്ള മരണങ്ങളും റിപ്പോര്‍ട്ട് ചെയ്തത് ജില്ലയിലാണ്. കൊച്ചി സിറ്റിയില്‍ 164 അപകടങ്ങളും റൂറലില്‍ 306 അപകടങ്ങളുമാണ് റിപ്പോര്‍ട്ട് ചെയ്തത്. സിറ്റിയില്‍ 172 പേര്‍ക്കും റൂറലില്‍ നടന്ന അപകടങ്ങളില്‍ 317 പേര്‍ക്കും ജീവന്‍ നഷ്ടമായി. ജില്ലയിലാകെ 5,712 പേര്‍ക്കാണ് ഗുരുതരമായി പരിക്കേറ്റത്. സൈക്കിള്‍ തുടങ്ങി എല്‍പിജി ടാങ്കര്‍ ലോറികള്‍ വരെ അപകടത്തിന് കാരമായിട്ടുണ്ട്. 90 ശതമാനം അപകടങ്ങളും ഇരുചക്ര വാഹനങ്ങളുടെ അശ്രദ്ധ മൂലമാണെന്ന് പോലീസിന്‍റെ കണക്കുകള്‍ വ്യക്തമാക്കുന്നു. മൊബൈല്‍ ഫോണില്‍ സംസാരിച്ച് വാഹനം ഓടിക്കുന്നതും, കാല്‍നട യാത്രക്കാരുടെ അശ്രദ്ധയും, തെരുവു നായ്ക്കളുടെ ആക്രമണം തുടങ്ങിയവയും വാഹനാപകടങ്ങള്‍ക്ക് കാരണമായിട്ടുണ്ട്.

കോടതി പറഞ്ഞിട്ടും രക്ഷയില്ല; സ്വകാര്യ ബസുകള്‍ പറക്കുന്നു

കൊച്ചി: യാത്രക്കാരുടെ ജീവന് വിലകല്‍പ്പിക്കാതെ കൊച്ചിയിലെ സ്വകാര്യ ബസുകള്‍ മത്സരയോട്ടം തുടരുകയാണ്. തിരക്കുള്ള സമയങ്ങളിലടക്കം അമിത വേഗതയിലാണ് ബസുകള്‍ സര്‍വീസ് നടത്തുന്നത്. പ്രതിഷേധം അറിയിച്ചിട്ടും പരാതിപ്പെട്ടിട്ടും വേഗത കുറയ്ക്കാനോ നിയമലംഘനങ്ങള്‍ അവസാനിപ്പിക്കാനോ പല ബസ് ജീവനക്കാരും തയാറാകുന്നില്ല. സമയക്രമം പാലിക്കുന്നതിന്‍റെ ഭാഗമായാണ് വേഗതയില്‍ സര്‍വീസ് നടത്തേണ്ടി വരുന്നതെന്നാണ് ബസ് ഉടമകളുടെ വാദം. എന്നാല്‍ ഇവ പലപ്പോഴും അപകടങ്ങൾക്കു കാരണമാകുന്നു. വേഗത കൂടുന്നതോടെ നിയമലംഘനങ്ങളും വർധിക്കുകയാണ്. ട്രാഫിക് സിഗ്നലുകളില്‍ വാഹനം തിരുകികയറ്റൽ, ബസിന്‍റെ ഡോറില്‍ അടിച്ചും നിറുത്താതെ ഹോണ്‍ മുഴക്കിയും ഭീകരാന്തരീക്ഷം സൃഷ്ടിക്കല്‍ എന്നിവ സ്ഥിരം കാഴ്ചയാണ്. മത്സരയോട്ടം നടത്തുന്നതിനിടെ പലപ്പോഴും സ്റ്റോപ്പില്‍ നിന്ന് മാറിയാണ് ബസുകൾ നിർത്തുന്നത്. യാത്രക്കാർ വാതില്‍പ്പടിയിൽ കാല്‍ വയ്ക്കുന്ന നിമിഷം ബസ് എടുക്കുന്നതും അപകടങ്ങൾ ഉണ്ടാകുന്നതും പതിവാണ്. സ്‌കൂള്‍ വിദ്യാര്‍ഥികള്‍, സ്ത്രീകള്‍, പ്രായമായവര്‍ തുടങ്ങിയവരാണ് അപകടത്തിൽപ്പെടുന്നവരിൽ അധികവും. ജോലിക്കിടെ ലഹരി വസ്തുക്കള്‍ ഉപയോഗിക്കുന്ന ബസ് ജീവനക്കാർ ഉണ്ടെന്നും യാത്രക്കാർ പരാതിപ്പെടുന്നു. സമയക്രമത്തെച്ചൊല്ലി ബസ് ജീവനക്കാര്‍ ഏറ്റുമുട്ടുന്നതും ബസ് ആക്രമിക്കുന്നതും സ്ഥിരം സംഭവമായി മാറിയിരിക്കുകയാണ്. കഴിഞ്ഞ ദിവസം പാലാരിവട്ടം പോലീസ് ഒരാളെ അറസ്റ്റ് ചെയ്തിരുന്നു. ഇതിനു പിന്നാലെ നഗരത്തില്‍ അമിത വേഗതയില്‍ പാഞ്ഞ ബസ് ഡ്രൈവറുടെയും വാതില്‍ അടയ്ക്കാതെ സര്‍വീസ് നടത്തിയ ബസ് ഡ്രൈവറുടെയും ലൈസന്‍സ് സസ്‌പെന്‍ഡ് ചെയ്തിരുന്നു. വാതില്‍ അടയ്ക്കാതെ സര്‍വീസ് നടത്തിയതിനെത്തുടര്‍ന്ന് വാഹനത്തിനുള്ളില്‍ നിന്ന് റോഡിലേക്ക് തെറിച്ചു വീണ് യുവാവിന് ജീവന്‍ നഷ്ടമാകുന്ന സംഭവവും ജില്ലയില്‍ റിപ്പോര്‍ട്ട് ചെയ്തിരുന്നു. കോടതി നിര്‍ദേശത്തിന് പുല്ലുവില നഗര പരിധിയില്‍ സ്വകാര്യ ബസുകള്‍ ഹോണ്‍ മുഴക്കി ഓവര്‍ടേക്ക് ചെയ്യുന്നതിനു ഹൈക്കോടതിയുടെ നിരോധനം ഉണ്ടെങ്കിലും ഇവ പാലിക്കപ്പെടുന്നില്ല. റോഡ് നിറഞ്ഞു ബസുകള്‍ ഓടിക്കുന്നതിനെയും ഹൈക്കോടതി വിമര്‍ശിച്ചിരുന്നു. നിര്‍ബന്ധമായും ഇടതു ഭാഗത്തു കൂടി മാത്രം വാഹനങ്ങള്‍ ഓടിക്കണമെന്നായിരുന്നു കോടതിയുടെ പ്രധാന നിര്‍ദേശം. നഗര പരിധിയില്‍ ഓവര്‍ടേക്കിംഗ് പാടില്ലെന്നും ഹോണ്‍ മുഴക്കരുതെന്നും വ്യക്തമാക്കിയിരുന്നു. എന്നാല്‍ സമയത്തിന്‍റെ പേരില്‍ പോര് തുടരുന്ന സ്വകാര്യ ബസുകളില്‍ പലതും നഗരത്തിലുടനീളം ഹോണ്‍ നീട്ടി മുഴക്കിയാണ് സര്‍വീസ് നടത്തുന്നത്. സിഗ്നലുകളിലടക്കം ഓവര്‍ടേക്കിംഗും സ്ഥിരം കാഴചയണ്. 2022 ജൂണ്‍ ഒന്നിനാണ് ഹൈക്കോടതി ബസുകള്‍ക്ക് നിര്‍ദേശം നല്‍കിയത്.

ബസിനു മുകളിലേക്ക് ‌കൂറ്റൻ മരം വീണു

ഫോർട്ടുകൊച്ചി: റോഡിൽ പാർക്ക് ചെയ്തിരുന്ന സ്വകാര്യ ബസിനു മുകളിലേക്ക് കൂറ്റൻ മരം വീണു. തോപ്പുംപടി രാജീവ് ഗാന്ധി സ്റ്റേഡിയത്തിനു സമീപം പാർക്ക് ചെയ്തിരുന്ന സെന്‍റ് ജോസഫ് എന്ന സ്വകാര്യ ബസിന്‍റെ മുകളിലേക്കാണ് മരം വീണത്. ബസിന്‍റെ മുകൾ ഭാഗം തകർന്നു. വിശ്രമ സമയമായതിനാൽ ബസിൽ യാത്രക്കാരുണ്ടായിരുന്നില്ല. ജീവനക്കാർക്കും പരിക്കില്ല. മട്ടാഞ്ചേരി അഗ്നിരക്ഷാ സേനയെത്തി മരച്ചില്ലകൾ വെട്ടിമാറ്റി.

പേമാരി... കെടുതി

പെരിയാറിലും ചാലക്കുടിപ്പുഴയിലും ജലനിരപ്പ് ഉയര്‍ന്നു കൊച്ചി: ഇന്നലെയുണ്ടായ ശക്തമായ മഴയിലും കാറ്റിലും ജില്ലയില്‍ പലയിടങ്ങളിലും വ്യാപക നാശനഷ്ടം. നഗരമേഖലകളില്‍ വെളക്കെട്ട് രൂക്ഷമായപ്പോള്‍ മലയോരമേഖലകളിലടക്കം മരം ഒടിഞ്ഞുവീണും വൈദ്യുതി കമ്പികള്‍ പൊട്ടിവീണുമൊക്കെയാണ് നാശനഷ്ടങ്ങളുണ്ടായത്. പെരിയാറിലും ചാലക്കുടിപ്പുഴയിലും ജലനിരപ്പ് ഉയര്‍ന്നു. ജില്ലയിലെ ഡാമുകളിലും വെള്ളം നിറയുകയാണ്. തൃപ്പൂണിത്തുറയില്‍ കുരീക്കാട് ഫാക്ടിന്‍റെ പ്രധാന കവാടത്തിനു മുന്നില്‍ മരം റോഡിലേക്ക് ഒടിഞ്ഞുവീണ് വൈദ്യുതി കമ്പികള്‍ പൊട്ടി. ഫാക്ടിന്‍റെ വളപ്പിൽ നിന്ന മരമാണ് ഒടിഞ്ഞുവീണത്. ലൈന്‍കമ്പികള്‍ പൊട്ടിയതോടെ പ്രദേശത്തെ വൈദ്യുതി വിതരണം നിലച്ചു. മണിക്കൂറുകള്‍ നീണ്ട പ്രയത്‌നത്തിനൊടുവിലാണ് മരം നീക്കി മേഖലയിലെ ഗതാഗതം പുനസ്ഥാപിക്കാനായത്. ചെട്ടിക്കോട് പാലത്തിന് സമീപം വൈദ്യുതി ലൈനിന് മുകളിലേക്ക് മരം ഒടിഞ്ഞുവീണു. പറവൂര്‍ താലൂക്കില്‍ പുത്തന്‍വേലിക്കര വില്ലേജില്‍ താഴഞ്ചിറ മാളവന റോഡില്‍ മരം റോഡിലേക്ക് വീണ് ലൈന്‍ കമ്പി പൊട്ടി. നേര്യമംഗലത്ത് ദേശീയപാതയില്‍ റോഡിലേക്ക് മരം വീണ് ഗതാഗതം തടസപ്പെട്ടു. നെല്ലിക്കുഴി, കീരമ്പാറ എന്നിവടങ്ങളിലും റോഡിലേക്ക് മരം വീണു വൈദ്യുത കമ്പികള്‍ പൊട്ടി. പെരുമ്പാവൂരില്‍ രായമംഗലം, തൈക്കാവ്, കീഴിലം മേഖലകളില്‍ വ്യാപകമായി മരങ്ങള്‍ റോഡിലേക്ക് മറിഞ്ഞുവീണു. ഏലൂര്‍ പടിഞ്ഞാറെ കടങ്ങല്ലൂര്‍ റോഡില്‍ മരം വീണ് ട്രാന്‍സ്‌ഫോര്‍മര്‍ തകര്‍ന്നു. പട്ടിമറ്റം മഴുവന്നൂരില്‍ വൈദ്യുത ലൈനിലേക്ക് മരം ഒടിഞ്ഞുവീണു. പിറവം കരുക്കാവില്‍ റോഡിലേക്ക് മരം വീണു ഗതാഗതം തടസപ്പെട്ടു. മുളന്തുരുത്തിയില്‍ പരസ്യബോര്‍ഡ് കാറ്റില്‍ ഇളകി വീണു. ആളപായമില്ല. വൈപ്പിന്‍ എടവനക്കാട് വില്ലേജ് ഓഫീസിനു പിന്നിലുള്ള അണിയല്‍ ബീച്ചില്‍ കടല്‍ക്ഷോഭത്തെ തുടര്‍ന്ന് വീടുകളില്‍ വെള്ളം കയറി. പോലീസും അഗ്നിരക്ഷാ സേനയുമെത്തി ഇവരെ മാറ്റിപ്പാര്‍പ്പിക്കാന്‍ ശ്രമം നടത്തിയെങ്കിലും താമസക്കാര്‍ വീടുവിട്ടുപോകാന്‍ കൂട്ടാക്കിയില്ല. മഴ അല്പമൊന്ന് ശമിച്ചപ്പോള്‍ കടല്‍ പിൻവലിഞ്ഞതോടെയാണ് വീടുകളില്‍ നിന്ന് വെള്ളമിറങ്ങിയത്. കൊച്ചി താലൂക്കില്‍ ഒരു ദുരിതാശ്വാസ ക്യാമ്പ് മാത്രമാണ് ഇപ്പോഴുള്ളത്. ഇവിടെ ഏഴ് കുടുംബങ്ങള്‍ നിലവിലുണ്ട്. 19 വീടുകള്‍ക്ക് നാശനഷ്ടം രണ്ടുദിവസമായി തുടരുന്ന കനത്ത മഴയിയില്‍ ജില്ലയില്‍ 19 വീടുകള്‍ക്ക് ഭാഗികമായി നാശനഷ്ടം സംഭവിച്ചു. ഇന്നലെ പത്ത് വീടുകള്‍ക്കും വെള്ളിയാഴ്ച ഒമ്പത് വീടുകള്‍ക്കുമാണ് നാശനഷ്ടമുണ്ടായത്. ഇതോടെ മേയ് 24ന് ആരംഭിച്ച കാലവര്‍ഷത്തില്‍ ജില്ലയില്‍ ഇതുവരെ 336 വീടുകള്‍ക്ക് നാശനഷ്ടം സംഭവിച്ചു. ഇതില്‍ എട്ടു വീടുകള്‍ പൂര്‍ണമായും 328 വീടുകള്‍ ഭാഗികമായും നശിച്ചു. പുഴകളില്‍ ജലനിരപ്പ് ഉയര്‍ന്നു രണ്ട് ദിവസമായി പെയ്യുന്ന ശക്തമായ മഴയില്‍ പെരിയാറിലും ചാലക്കുടിപ്പുഴയിലും ജലനിരപ്പ് ഉയര്‍ന്നു. കാലടിപ്പുഴയില്‍ 5.270 മീറ്റര്‍ ജലനിരപ്പ് ഉയര്‍ന്നു. ആലുവ പുഴയില്‍ 2.540 മീറ്ററും, മംഗലപ്പുഴയില്‍ 2.630 മീറ്ററും ജലനിരപ്പ് ഉയര്‍ന്നു. ചാലക്കുടി പുഴയില്‍ അപകടനിലയ്ക്ക് തൊട്ടുതാഴെയായി ജലനിരപ്പ്. മലയോര മേഖലകളില്‍ രാത്രി യാത്ര നിരോധിച്ചു മലയോര മേഖലകളിലൂടെയുള്ള രാത്രികാല യാത്രകള്‍ പൂര്‍ണമായും നിരോധിച്ചു. മണ്ണിടിച്ചില്‍, ഉരുള്‍പൊട്ടല്‍, മരംവീഴ്ച, വെളളപ്പൊക്കം എന്നിവയ്ക്ക് സാധ്യതയുള്ള പ്രദേശങ്ങളില്‍ താമസിക്കുന്നവര്‍ ജാഗ്രത പുലര്‍ത്തണമെന്ന് ജില്ലാ ദുരന്തനിവാരണ അഥോറിറ്റി മുന്നറിയിപ്പ് നല്‍കി. വെള്ളക്കെട്ടില്‍ മുങ്ങി നഗരം ഇന്നലെ രാവിലെ മുതല്‍ പെയ്ത ശക്തമായ മഴയില്‍ നഗരം വെള്ളക്കെട്ടിലായി. പതിവ് പോലെ കെഎസ്ആര്‍ടിസി സ്റ്റാന്‍ഡ് രാവിലെ മുതല്‍ വെള്ളക്കെട്ടിലായിരുന്നു. സ്റ്റാന്‍ഡിനുള്ളില്‍ കയറാന്‍ തയാറാകാതെ യാത്രക്കാര്‍ സ്റ്റാന്‍ഡിന് പുറത്തു നിന്നാണ് ബസില്‍ കയറുകയും ഇറങ്ങുകയും ചെയ്തത്. സൗത്ത് റെയില്‍വേ സ്റ്റേഷനിലേക്ക് പ്രവേശിക്കുന്ന ഭാഗത്തും വെള്ളക്കെട്ട് രൂക്ഷമായിരുന്നു. എംജി റോഡില്‍ ജോസ് ജംഗ്ഷന്‍, മഹാരാജാസ് ഗ്രൗണ്ടിന് മുന്‍വശം, എം.ജി റോഡ് മെട്രോ സ്‌റ്റേഷന് മുന്‍വശം എന്നിവിടങ്ങളില്‍ വെള്ളക്കെട്ട് രൂപപ്പെട്ടു. കലാഭവന്‍ റോഡും തമ്മനം-പുല്ലേപ്പടി റോഡില്‍ താഴ്ന്ന ഭാഗങ്ങളിലും വെള്ളത്തിലായി. കലൂര്‍-കടവന്ത്ര റോഡില്‍ കതൃക്കടവ് ഭാഗത്തും കടവന്ത്ര ഭാഗത്തുമൊക്കെ വെള്ളക്കെട്ട് രൂക്ഷമായിരുന്നു. വൈറ്റില ഹബ്ബിലേക്ക് പ്രവേശിക്കുകയും പുറത്തേക്ക് കടക്കുകയും ചെയ്യുന്ന ഭാഗത്ത് വെള്ളംകെട്ടിക്കിടന്ന് യാത്ര ദുര്‍ഘടമാക്കി.

മെഡിസെപ്പിലെ അപാകത പരിഹരിക്കണം: കെജിഎൻഎ

മൂവാറ്റുപുഴ : കേരള സർക്കാർ ജീവനക്കാർക്കും പെൻഷൻകാർക്കും വേണ്ടി നടപ്പാക്കിയ ആരോഗ്യ ഇൻഷുറൻസ് പദ്ധതിയായ മെഡിസെപ്പിലെ അപാകത പരിഹരിയ്ക്കണമെന്ന് കെജിഎൻഎ മൂവാറ്റുപുഴ ഏരിയ സമ്മേളനം ആവശ്യപ്പെട്ടു. കെജിഎൻഎ സംസ്ഥാന കമ്മിറ്റിയംഗം സി.കെ സീമ സമ്മേളനം ഉദ്ഘാടനം ചെയ്തു. ഏരിയ പ്രസിഡന്‍റ് ക്ലീറ്റസ് ജോണ്‍സ് അധ്യക്ഷത വഹിച്ചു. ഉണ്ണി ജോസ്, സ്മിത ബക്കർ, എം.എ മുഹമ്മദലി, കെ.ആർ രാജേഷ്, രോഹിത് കുമാർ, ആർ.ആർ രമ്യ, റിങ്കു പാർവതി, ഷജീന മക്കാർ, ബിനു തങ്കപ്പൻ എന്നിവർ പ്രസംഗിച്ചു. ഭാരവാഹികൾ: എം.എം ലൈല -പ്രസിഡന്‍റ്, വി.എം. റസിയ-സെക്രട്ടറി, ബിന്ദു എം. പിള്ള-ട്രഷറർ.

പിറവം ടൗണിന് നടുവിൽ കക്കൂസ് മാലിന്യം തള്ളി

പിറവം: ടൗണിന്‍റെ നടുവിൽ റോഡ് സൈഡിൽ അർധരാത്രിയിൽ കക്കൂസ് മാലിന്യം തള്ളി. ഇന്നലെ രാവിലെ പുലർന്നപ്പോൾ റോഡ് സൈഡിലും, സമീപത്തെ സ്വകാര്യ വ്യക്തിയുടെ സ്ഥലത്തും മാലിന്യം നിറഞ്ഞു കിടക്കുകയായിരുന്നു. ഇന്നലെ പുലർച്ചെ മഴ പെയ്യാത്തതിനെ തുടർന്ന് മാലിന്യം ഒഴുകിപ്പോകാതെ ഇവിടെ കെട്ടിക്കിടന്നു. മാർക്കറ്റിന് സമീപം തിരക്കേറിയ മുവാറ്റുപുഴ, കൂത്താട്ടുകുളം റോഡ് സൈഡിലാണ് മാലിന്യം തള്ളിയത്. ഇവിടെ പൊളിച്ചു കളഞ്ഞ കെട്ടിടത്തിന്‍റെ തറ ഭാഗത്തേയ്ക്കാണ് പൈപ്പിലൂടെ മാലിന്യം ചൊരിഞ്ഞിരിക്കുന്നത്. മാർക്കറ്റ് ഭാഗത്തെ ഓട്ടോറിക്ഷാ സ്റ്റാൻഡും ഇവിടെയാണ് സ്ഥിതി ചെയ്യുന്നത്. രാവിലെയെത്തിയ ഓട്ടോറിക്ഷാ തൊഴിലാളികളാണ് ഇതാദ്യം കണ്ടത്. ഉടനെ നഗരസഭ അധികൃതരെ അറിയിച്ചതിനെ തുടർന്ന് ഉദ്യോഗസ്ഥരെത്തി. അർധരാത്രിയിൽ മാലിന്യവുമായി എത്തിയ ലോറി, സൈഡിൽ ചേർത്ത് നിർത്തി പുറത്തേയ്ക്ക് തള്ളുകയായിരുന്നുവെന്ന് കരുതുന്നു.

ഗോവിന്ദചാമിയുടെ ജയിൽ ചാട്ടം സർക്കാരിന്‍റെ പിടിപ്പുകേട്: ഷോണ്‍ ജോർജ്

മൂവാറ്റുപുഴ: സംസ്ഥാന സർക്കാരിന്‍റെ പിടിപ്പുകേടാണ് ഗോവിന്ദചാമി ജയിൽ ചാടാൻ ഇടയാക്കിയതെന്ന് ബിജെപി സംസ്ഥാന ഉപാധ്യക്ഷൻ ഷോണ്‍ ജോർജ്. ബിജെപി എറണാകുളം ഈസ്റ്റ് ജില്ലാ നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. കൊടും ക്രിമിനലുകൾക്ക് പോലും ജയിൽചാടാൻ അവസരം ഒരുക്കുന്നത് ജയിൽ അധികൃതർ തന്നെയാണെന്നും അദ്ദേഹം കുട്ടി ചേർത്തു. യോഗത്തിൽ ബിജെപി എറണാകുളം ഈസ്റ്റ് ജില്ലാ പ്രസിഡന്‍റ് പി.പി. സജീവ് അധ്യക്ഷത വഹിച്ചു. ജില്ലാ പ്രഭാരി എ. നാഗേഷ് മുഖ്യപ്രഭാഷണം നടത്തി. മേഖല സംഘടന സെക്രട്ടറി പത്മകുമാർ മാർഗ നിർദേശങ്ങൾ നൽകി. തദ്ദേശസ്വയംഭരണ സ്ഥാപനങ്ങളിലേക്ക് നടക്കുന്ന തെരഞ്ഞെടുപ്പിന് മുന്നോടിയായുള്ള കൗണ്ട് ഡൗണ്‍ ക്ലോക്ക് ജില്ലാ പ്രഭാരി എ. നാഗേഷ് ഉദ്ഘാടനം ചെയ്തു. ഇ.ടി നടരാജൻ, സൂരജ് ജോണ്‍, അരുണ്‍ പി. മോഹൻ, എന്നിവർ പ്രസംഗിച്ചു.

ഫുട്ബോൾ മത്സരത്തിനിടെ ആക്രമണം; നാലു കളിക്കാർക്കെതിരേ കേസ്

വാഴക്കുളം : ഫുട്ബോൾ മത്സരത്തിനിടെ പ്രദേശവാസികളുമായി കളിക്കാരുടെ വാക്കേറ്റവും ആക്രമണവും. നാല് കളിക്കാർക്കെതിരെ പോലീസ് കേസെടുത്തു. വ്യാഴാഴ്ച ഐഇഎൽടിഎസ് വിദ്യാർഥികളുടെ ഫുട്ബോൾ മത്സരത്തിനിടെ കളിക്കാരും പ്രദേശവാസികളായ ഏതാനും കാഴ്ചക്കാരുമായി തർക്കമുണ്ടായി. കളി കഴിഞ്ഞ് നാലുപേർ ആക്രമിച്ചു പരിക്കേൽപ്പിച്ചതായി പ്രദേശവാസികളായ രണ്ടു പേരാണ് വാഴക്കുളം പോലീസ് സ്റ്റേഷനിൽ പരാതി നൽകിയിട്ടുള്ളത്. പരിക്കേറ്റ ഒരു യുവാവിനെ തൊടുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവവുമായി ബന്ധപ്പെട്ട് കണ്ടാലറിയാവുന്ന നാല് പേർക്കെതിരെ വാഴക്കുളം പോലീസ് കേസ് രജിസ്റ്റർ ചെയ്തു.

നേര്യമംഗലം-ഇടുക്കി റോഡ് നിർമാണം : പ്രവേശന കവാടം മുതൽ മണിയൻപാറ വരെ വീണ്ടും അടച്ചു

കോതമംഗലം: ഇടുക്കി റോഡ് നിർമാണത്തിന്‍റെ ഭാഗമായി നേര്യമംഗലത്ത് പ്രവേശന കവാടം മുതൽ മണിയൻപാറ വരെ റോഡ് വീണ്ടും താൽക്കാലികമായി അടച്ചു. വാഹനങ്ങൾ നേര്യമംഗലം- ചെന്പൻകുഴി റോഡ് വഴിയാണു ഇടുക്കി റോഡിൽ പ്രവേശിക്കുന്നത്. ഇടുക്കി റോഡിൽ നേര്യമംഗലം വാരിക്കാട്ട് ക്ഷേത്രത്തിനു സമീപം രണ്ടു മാസം മുന്പ് മലവെള്ളപ്പാച്ചിലിൽ കലുങ്ക് തകർന്നിരുന്നു. റോഡ് അടച്ച് കലുങ്ക് പുനർനിർമിച്ച് അടുത്തിടെ തുറന്നു നൽകിയെങ്കിലും കലുങ്കിനു മുകളിൽ വെള്ളം കെട്ടി റോഡിൽ കുഴി രൂപപ്പെട്ടതു വാഹനങ്ങളെ അപകടത്തിലാക്കി. ഇപ്പോൾ ഈ ഭാഗത്തു കട്ടവിരിക്കാനുള്ള പ്രവൃത്തികൾ തുടങ്ങിയതോടെയാണ് റോഡ് വീണ്ടും അടച്ചത്. കലുങ്കിന് അടിയിലൂടെ വെള്ളം സുഗമായി ഒഴുകാനുള്ള പ്രവൃത്തികളും നടക്കുന്നുണ്ട്.

നടപ്പുറം ബൈപ്പാസിലെ വലിയകുഴി നികത്തി

കൂത്താട്ടുകുളം: നടപ്പുറം ബൈപ്പാസ് റോഡിൽ രൂപപ്പെട്ട വലിയകുഴി നികത്തി. എംസി റോഡിൽ നിന്നു ബൈപ്പാസിലേക്ക് പ്രവേശിക്കുന്ന ഭാഗത്ത് റോഡിൽ ടാർ ഇളകി രൂപപ്പെട്ട വലിയ കുഴിയാണ് നഗരസഭ അധികൃതരുടെ നേതൃത്വത്തിൽ പാറ വേസ്റ്റ് ഉപയോഗിച്ച് നികത്തിയത്. വ്യാഴാഴ്ച വൈകുന്നേരം മണ്ണിട്ട് കുഴിയടയ്ക്കാൻ ശ്രമിച്ചെങ്കിലും മണിക്കൂറുകൾകം മണ്ണിട്ട ഭാഗം ചെളിയായി മാറി. തുടർന്ന് ഇന്നലെ രാവിലെ ചെളിയുടെ മുകളിൽ പാറ വേസ്റ്റ് നിക്ഷേപിച്ച് താൽക്കാലികമായി കുഴി നകത്തുകയായിരുന്നു. എന്നാൽ വെയിൽ തെളിയുന്നതോടെ പ്രദേശം പൊടിമയമാകുമെന്ന ആശങ്കയിലാണ് വ്യാപാരികൾ. ഈ ഭാഗത്തെ ടാർ ഇളകി മാറി കുഴി രൂപപ്പെടുന്നത് പതിവാണെന്ന് നാട്ടുകാർ പറഞ്ഞു. കെഎസ്ആർടിസി, സ്വകാര്യ ബസുകൾ സ്റ്റാൻഡിലേക്ക് പോകുന്നത് ഇതുവഴിയാണ്. ഭാരം കയറ്റി വരുന്ന ടോറസ് ലോറികളും മറ്റ് സ്വകാര്യ വാഹനങ്ങളും ഇതുവഴിയാണ് പോകുന്നത്. ടാറിംഗ് അവശേഷിക്കുന്ന ഭാഗത്തുകൂടി ടൈൽ വിരിച്ചാൽ പ്രശ്നത്തിന് ശാശ്വത പരിഹാരമാകുമെന്ന് വിദഗ്ധർ പറയുന്നു.

കാറ്റിൽ മരം വീണ് ഗതാഗതം തടസപ്പെട്ടു

കോലഞ്ചേരി: മഴയോടൊപ്പമുണ്ടായ ശക്തമായ കാറ്റിൽ മഴുവന്നൂർ-പെരുവുംമുഴി റോഡിൽ തേക്ക് മരം റോഡിലേക്ക് വീണ് ഗതാഗതം തടസപ്പെട്ടു. മഴുവന്നൂർ സ്കൂളിന് സമീപം ഇന്നലെ ഉച്ചകഴിഞ്ഞ് 2.30നായിരുന്നു സംഭവം. പട്ടിമറ്റം അഗ്നിരക്ഷാസേനയിലെ എൻ.എച്ച്. അസൈനാരുടെ നേതൃതത്തിൽ സേനാംഗങ്ങളായ ഇ. സതീഷ് ചന്ദ്രൻ, ആർ.യു. റെജുമോൻ, ജെ.എം. ജയേഷ്, പി.വി. വിജീഷ് , അഖിൽ ദേവ് എന്നിവർ ചേർന്ന് മരം മുറിച്ച് മാറ്റിയാണ് ഗതാഗതം പുനസ്ഥാപിച്ചത്. ‌

മരം മറിഞ്ഞ് വൈദ്യുതിലൈൻ പൊട്ടി, ഗതാഗതം തടസപ്പെട്ടു

മൂവാറ്റുപുഴ : ശക്തമായ മഴയിലും കാറ്റിലും കന്പനിപ്പടിയിൽ മരം മറിഞ്ഞ് വൈദ്യുതി ലൈൻ പൊട്ടിവീണ് ഗതാഗതം തടസപ്പെട്ടു. കന്പനിപ്പടി - രണ്ടാർ റോഡിൽ ഇന്നലെ ഉച്ചകഴിഞ്ഞ് രണ്ടോടെയാണ് സംഭവം. മോളെകുന്നേൽ മാണിയുടെ പുരയിടത്തിലെ തേക്കുമരവും കവുങ്ങും കടപുഴകി വൈദ്യുതി കന്പിയിലേക്കു വീഴുകയായിരുന്നു. റോഡിലേയ്ക്ക് മരം വീണതിനെ തുടർന്ന് മണിക്കൂറോളം ഗതാഗതം തടസപ്പെട്ടു. തുടർന്ന് അഗ്നിശമന രക്ഷാസേനയും കെഎസ്ഇബി ഉദ്യോഗസ്ഥരും സ്ഥലത്തെത്തി മരം മുറിച്ചുനീക്കിയും മറ്റും ചെയ്ത് ഗതാഗതം പുനഃസ്ഥാപിക്കുകയായിരുന്നു. മൂവാറ്റപുഴ നഗരവികസ പ്രവർത്തനങ്ങൾ നടക്കുന്നതിനാൽ ഈ റോഡിലൂടെയാണ് കൂടുതലും വാഹനങ്ങൾ സഞ്ചരിക്കുന്നത്.

വന്യജീവി ആക്രമണം : ഫോറസ്റ്റ് സ്റ്റേഷനിലെ ജനപ്രതിനിധികളുടെ കുത്തിയിരിപ്പ് സമരം അവസാനിപ്പിച്ചു

കോതമംഗലം: രൂക്ഷമായ വന്യജീവി ആക്രമണത്തിന് അടിയന്തര പരിഹാരം ആവശ്യപ്പെട്ട് ജനപ്രതിനിധികൾ പുന്നേക്കാട് ഫോറസ്റ്റ് സ്റ്റേഷനിൽ നടത്തിയ കുത്തിയിരിപ്പ് സമരം കോതമംഗലം ഡിഎഫ്ഒ സൂരജ് ബെൻ നേരിട്ടെത്തി നടത്തിയ ചർച്ചയിൽ രേഖാമൂലം നൽകിയ ഉറപ്പിനെ തുടർന്ന് അവസാനിപ്പിച്ചു. സമരക്കാർ ആവശ്യപ്പെട്ടത് പ്രകാരം 28 മുതൽ മുടങ്ങി കിടക്കുന്ന ഫെൻസിംഗ് പുനരാരംഭിച്ച് മൂന്ന് മാസത്തിനകം പൂർത്തീകരിക്കുമെന്നും, മുഴുവൻ ആർആർടി സേവനം ഉറപ്പാക്കുമെന്നും റോഡിന്‍റെ ഇരുവശമുള്ള അടിക്കാടുകൾ മൂന്നു ദിവസത്തിനകം വെട്ടിത്തെളിക്കുമെന്നും വഴി വിളക്കുകൾ സ്ഥാപിക്കുന്നതിനും ജീവനക്കാരുടെ എണ്ണം വർധിപ്പിക്കുമെന്നും ഉറപ്പ് നൽകി. കാന്തി വെള്ളക്കയ്യൻ, ഗോപി മുട്ടത്ത്, സൽമ പരീത്, ബീന റോജോ, കെ.എ സിബി, എൽദോസ് ബേബി, മാമച്ചൻ ജോസഫ്, ജെസി സാജു, ഇ.സി റോയി, ജോഷി പൊട്ടക്കൽ, ബാബു ഏലിയാസ്, പ്രിൻസ് വർക്കി, ബിനോയ് മഞ്ഞുമേൽക്കുടി, മഞ്ജു സാബു, ബേസിൽ പുത്തയത്ത്, കെ.എസ് സനൂപ്, മേരി കുര്യാക്കോസ്, സി.ജെ എൽദോസ്, എൽദോസ് എൻ. ഡാനിയേൽ എന്നിവർ ചർച്ചയിൽ പങ്കെടുത്തു. photo: രൂക്ഷമായ വന്യജീവി ആക്രമണത്തിന് അടിയന്തര പരിഹാരം ആവശ്യപ്പെട്ട് കുട്ടന്പുഴ, കീരംപാറ പഞ്ചായത്തുകളിലെ ജനപ്രതിനിധികൾ പുന്നേക്കാട് ഫോറസ്റ്റ് സ്റ്റേഷനിൽ നടത്തിയ കുത്തിയിരിപ്പ് സമരം അവസാനിപ്പിക്കാൻ കോതമംഗലം ഡിഎഫ്ഒ സൂരജ് ബെൻ എത്തി ചർച്ച നടത്തുന്നു.

അപകട ഭീഷണിയുയർത്തി പിറവം ആശുപത്രിക്ക് മുന്നിൽ മരങ്ങൾ

പിറവം: താലൂക്ക് ആശുപത്രിക്ക് മുന്നിൽ റോഡരികിലെ തണൽ മരങ്ങൾ അപകട ഭീഷണിയുയർത്തുന്നു. മരത്തിന്‍റെ കൊന്പുകൾക്കിടയിലൂടെയാണ് വൈദ്യുതി ലൈനുകൾ കടന്നു പോകുന്നത്. നടക്കാവ് ഹൈവേയുടെ റോഡരികിലാണ് വഴിയാത്രക്കാർക്കും, ആശുപത്രിയിലെത്തുന്ന രോഗികൾക്കും, വാഹനങ്ങൾക്കും ഒരു പോലെ ഭീഷണിയുയർത്തി രണ്ട് തണൽ മരങ്ങളും. മരങ്ങളുടെ അടിഭാഗം ദ്രവിച്ചയവസ്ഥയിലാണ്. കാറ്റ് വീശുന്പോൾ മരങ്ങൾ ആടിയുലയുന്നത് ഏറെ ഭീതിയുളവാക്കുന്നു. സമീപത്തെ വ്യാപാരികൾ കെഎസ്ഇബി അധികൃതരെ അറിയിച്ചെങ്കിലും, ഇവർ വേണ്ടത്ര ഗൗരവത്തിലെടുത്തിട്ടില്ലെന്നാണ് ആക്ഷേപം. മരങ്ങളുടെ ചുവട്ടിലായി വെയ്റ്റിംഗ് ഷെഡുമുണ്ട്. സമീപത്തു തന്നെയാണ് ഓട്ടോറിക്ഷ സ്റ്റാന്‍റും. ഇതെല്ലാം കണക്കിലെടുത്ത് എത്രയും വേഗം മരങ്ങൾ വെട്ടിമാറ്റണമെന്നാവശ്യപ്പെട്ട് നാട്ടുകാർ റവന്യു, നഗരസഭ അധികൃതർക്ക് പരാതി നൽകിയിട്ടുള്ളതാണെങ്കിലും അധികൃതർ ഈ ഭാഗത്തേയ്ക്ക് തിരിഞ്ഞു നോക്കിയില്ലെന്ന ആക്ഷേപമുണ്ട്.

കടവൂർ ടൗണ്‍ പള്ളിയിൽ തിരുനാൾ 28ന്

കടവൂർ: കടവൂർ ടൗണ്‍ പള്ളിയിൽ വിശുദ്ധ അൽഫോൻസാമ്മയുടെ തിരുനാൾ 28ന് ആഘോഷിക്കും. ഇന്ന് വൈകുന്നേരം നാലിന് ജപമാല, 4.45ന് ലദീഞ്ഞ്, പരിശുദ്ധ കുർബാന, പ്രസംഗം, നൊവേന. നാളെ രാവിലെ ഏഴിന് പരിശുദ്ധ കുർബാന (സെന്‍റ് ജോർജ് പള്ളിയിൽ) വൈകുന്നേരം 4.30ന് കൊടിയേറ്റ്, ലദീഞ്ഞ്, തിരുസ്വരൂപ പ്രതിഷ്ഠ, ആഘോഷമായ തിരുനാൾ കുർബാന, , തുടർന്ന് തിരി പ്രദക്ഷിണം, ജപമാല (മൂഴി തോട് വരെ). പ്രധാന തിരുനാൾ ദിവസമായ 28ന് രാവിലെ 6.30ന് വിശുദ്ധ കുർബാന, വൈകുന്നേരം അഞ്ചിന് ലദീഞ്ഞ്, ആഘോഷകരമായ തിരുനാൾ കുർബാന. തുടർന്ന് സമാപന പ്രാർഥന, പാച്ചോർ നേർച്ച എന്നിവയാണ് തിരുനാൾ തിരുക്കർമങ്ങളെന്ന് വികാരി ഇൻ ചാർജ് ഫാ. മാത്യു വടക്കുംപാടത്ത് അറിയിച്ചു.

ഡോ. എ.പി.ജെ അബ്ദുൽ കലാം നാഷണൽ അവാർഡ് പി.ബി. സലീമിന്

മൂവാറ്റുപുഴ : പശ്ചിമബംഗാൾ സർക്കാർ സെക്രട്ടറിയും പവർ കോർപറേഷൻ സിഎംഡിയും മൂവാറ്റുപുഴ സ്വദേശിയുമായ പി.ബി. സലീമിന് ഡോ. എ.പി.ജെ അബ്ദുൽ കലാം നാഷണൽ അവാർഡ്. നാളെ വൈകുന്നേരം നാലിന് കോൽക്കത്ത ആലിയ സർവകലാശാലയിൽ നടക്കുന്ന ചടങ്ങിൽ വെസ്റ്റ് ബംഗാൾ ഗ്രാമ - നഗര വികസന മന്ത്രി ഫിർഹാദ് ഹക്കീം അവാർഡ് സമ്മാനിക്കും. പശ്ചിമ ബംഗാൾ പവർ കോർപറേഷനെ രാജ്യത്തെ മികച്ച തെർമൽ പവർ പ്ലാന്‍റാക്കി മാറ്റിയത് ഇദ്ദേഹമാണ്. 2019ൽ മൂവാറ്റുപുഴ പേഴയ്ക്കാപ്പിള്ളി പുളളിചാലിൽ പി.ബി. സലിം കോർപറേഷൻ സിഎംഡിയായി ചുമതലയേൽക്കുന്പോൾ സ്ഥാപനം നഷ്ടത്തിലായിരുന്നു. ഒറ്റ വർഷം കൊണ്ട് 102 കോടിയുടെ ലാഭമുണ്ടാക്കി മലയാളി ഉദ്യോഗസ്ഥൻ തന്‍റെ മികവ് തെളിയിച്ചത് ഏറെ ചർച്ചയായിരുന്നു. സർക്കാരിന്‍റെ ഉയർന്ന പദവികളിൽ ഇരിക്കുന്പോൾ തന്നെ സാമൂഹിക ജീവകാരുണ്യ കായിക രംഗത്ത് ഇദ്ദേഹം നടത്തുന്ന ഇടപെടലുകളും ആസൂത്രണം ചെയ്ത് നടപ്പാക്കുന്ന പദ്ധതികളും സംസ്ഥാനത്തിന് മാതൃകയായിരുന്നു. എഴുത്തുകാരിയായ ഭാര്യ ഫാത്തി സലീമിന്‍റെ നേതൃത്വത്തിൽ ഔവർ ഹെറിറ്റേജ് ഫൗണ്ടേഷനും കൽക്കട്ട കേന്ദ്രമാക്കി പ്രവർത്തിക്കുന്നുണ്ട്. മികച്ച പൊതുപ്രവർത്തകനായി തെരഞ്ഞെടുക്കപ്പെട്ട ഡെറക് ഒബ്രിയാൻ എംപിയേയും ചടങ്ങിൽ ആദരിക്കും. എപിജെ അബ്ദുൽ കലാം സ്റ്റഡി സെന്‍റർ ഡയറക്ടർ പൂവച്ചൽ സുധീർ അധ്യക്ഷത വഹിക്കും. ഡോ. അരുണ്‍ ജ്യോതി ഭിക്ഷു, സ്വാമി മഹാരാജ് ദേവഭരതാനന്ദ, ഡോ. സത്നാം സിംഗ് അഹ്ലുവാലിയ, ലോക്സഭാംഗം യൂസഫ് പത്താൻ, വെസ്റ്റ് ബംഗാൾ മൈനോറിറ്റീസ് കമ്മീഷൻ ചെയർമാൻ അഹമ്മദ് ഹസൻ, പ്രഫ. ഡോ. റഫീഖുൾ ഇസ്ലാം, പി.എം ജിഫ്രി കോയതങ്ങൾ എന്നിവർ പ്രസംഗിക്കും.

മരങ്ങൾ ഒടിഞ്ഞുവീണ് ഗതാഗതം തടസപ്പെട്ടു

തിരുമാറാടി: മേഖലയിലുണ്ടായ കനത്ത കാറ്റിലും മഴയിലും മരങ്ങൾ ഒടിഞ്ഞുവീണ് റോഡ് ഗതാഗതം തടസപ്പെട്ടു. പഞ്ചായത്തിൽ നാവോളിമറ്റം - മീൻകുന്നം റോഡിൽ ഇന്നലെ ഉച്ചകഴിഞ്ഞ് വൈദ്യുത ലൈനിന് മുകളിലേക്ക് മരം ഒടിഞ്ഞുവീഴുകയായിരുന്നു. ഒലിയപ്പുറം നടക്കാവ് ഹൈവേയിൽ തിരുമാറാടി സ്കൂളിന് സമീപത്തും വൈദ്യുതി ലൈനിന് മുകളിൽ മരം വീണതിനെ തുടർന്ന് റോഡ് ഗതാഗതം തടസപ്പെട്ടു. കൂത്താട്ടുകുളം അഗ്നിശമന രക്ഷാസേന സ്ഥലത്തെത്തിയാണ് രണ്ടിടത്തെയും മരം മുറിച്ചു നീക്കി ഗതാഗതം പുനഃസ്ഥാപിച്ചത്. വടക്കൻ പാലക്കുഴയിൽ പുതിയാമറ്റത്തിൽ ജോയിയുടെ വീടിന് മുകളിൽ മരം ഒടിഞ്ഞു വീണ മേൽക്കൂര തകർന്നു.

പെറ്റിക്കേസുകളിൽ തട്ടിപ്പ്: വനിതാ സിവിൽ പോലീസ് ഓഫീസറെ അറസ്റ്റ് ചെയ്തേക്കും

മൂവാറ്റുപുഴ : പെറ്റിക്കേസുകളിൽ പിഴയായി ലഭിച്ച തുകയിൽ 16,76,650 രൂപ തട്ടിയെടുത്ത വനിത സിവിൽ പോലീസ് ഉദ്യോഗസ്ഥയെ ഉടൻ അറസ്റ്റ് ചെയ്തേക്കും. കേസിൽ പോലീസ് അന്വേഷണം ഊർജിതമാക്കി. പോലീസ് ഉദ്യോഗസ്ഥ പ്രതിയായി പോലീസിന് നാണക്കേടുണ്ടാക്കിയ കേസിൽ പഴുതടച്ചുള്ള അന്വേഷണമാണ് പ്രത്യേക സംഘം നടത്തുന്നത്. സംഭവുമായി ബന്ധപ്പെട്ട് വാഴക്കുളം പോലീസ് സ്റ്റേഷനിലെ വനിതാ സീനിയർ സിവിൽ പോലീസ് ഉദ്യോഗസ്ഥ ശാന്തി കൃഷ്ണനെ സർവീസിൽ നിന്ന് കഴിഞ്ഞ ദിവസം സസ്പെൻഡ് ചെയ്തിരുന്നു. എന്നാൽ ഇവർ കുറ്റം നിഷേധിക്കുകയും മറ്റ് പോലീസ് ഉദ്യോഗസ്ഥരാണ് തട്ടിപ്പ് നടത്തിയതെന്ന് ആരോപിക്കുകയും ചെയ്തതോടെ ശാസ്ത്രീയ അന്വേഷണമാണ് നടത്തുന്നത്. ഉദ്യോഗസ്ഥയുടെ കൈയക്ഷരം ഉൾപ്പെടെ പരിശോധിക്കും. ഇവർ മൂവാറ്റുപുഴ ട്രാഫിക് സ്റ്റേഷനിൽ റൈറ്റർ ആയിരിക്കെയായിരുന്നു പണം കവർന്നത്. ഗതാഗത നിയമ ലംഘനത്തിന് പിഴയായി അടപ്പിച്ച തുക ബാങ്കിൽ കൃത്യമായി അടയ്ക്കാതെ രേഖകളിൽ കൃത്രിമം കാട്ടി തട്ടിയെടുത്തു എന്നാണ് കേസ്. ശാന്തി കൃഷ്ണൻ മൂവാറ്റുപുഴ ട്രാഫിക് പോലീസ് സ്റ്റേഷനിൽ നിന്ന് മാറി വാഴക്കുളം പോലീസ് സ്റ്റേഷനിൽ ഉദ്യോഗസ്ഥയായി ജോലി ചെയ്യുന്നതിനിടെയാണ് തട്ടിപ്പ് പുറത്തു വന്നത്.

പോലീസ് ഓഫീസേഴ്സ് അസോ.: ഔദ്യോഗിക നേതൃത്വത്തിന് വിജയം

ആലുവ: കേരള പോലീസ് ഓഫീസേഴ്സ് അസോസിയേഷൻ എറണാകുളം റൂറലിൽ യൂണിറ്റു തല തെരഞ്ഞെടുപ്പിൽ ഔദ്യോഗിക നേതൃത്വത്തിന് 61 സീറ്റിൽ വിജയം. 14 സീറ്റിൽ എതിർവിഭാഗം ജയിച്ചു. പത്ത് സീറ്റിൽ വനിതകൾ നേടി. 52 സീറ്റിലും ഔദ്യോഗിക വിഭാഗം പ്രതിനിധികൾ നേരത്തെ എതിരില്ലാതെ വിജയിച്ചിരുന്നു. ജില്ലാ ഭാരവാഹികളുടെ തെരഞ്ഞെടുപ്പ് 30ന് നടക്കും.

അമൃതയിൽ സമാരംഭം-2025

കൊച്ചി: അമൃത സ്കൂൾ ഓഫ് ആർട്സ്, ഹ്യുമാനിറ്റീസ് ആൻഡ് കോമേഴ്‌സിൽ ‌ പുതിയ വിദ്യാർഥികളെ വരവേറ്റു. ബ്രഹ്മസ്ഥാനം കാന്പസിൽ നടന്ന സമാരംഭം 2025 പരിപാടി സംസ്ഥാന കൃഷി വകുപ്പ് പ്രിൻസിപ്പൽ സെക്രട്ടറി, ഡോ. ബി. അശോക് ഉദ്ഘാടനം ചെയ്തു. 700-ഓളം വിദ്യാർഥികളാണ് പുതിയതായി എത്തിയത്. മാതാ അമൃതാനന്ദമയി മഠം ജനറൽ സെക്രട്ടറി സ്വാമി പൂർണാമൃതാനന്ദപുരി അനുഗ്രഹ പ്രഭാഷണം നടത്തി. ഡോ. ശാന്തികുമാർ നായർ ചടങ്ങിൽ അധ്യക്ഷത വഹിച്ചു. ഡോ. യു. കൃഷ്ണകുമാർ, ഡോ. നാരായണൻ മേനോൻ കൊമേരത്ത്, ഡോ. ശരത് മേനോൻ, ഡോ. പി. രാജശേഖർ എന്നിവർ പ്രസംഗിച്ചു.

അമല ഭവൻ: രണ്ടാംഘട്ട നിർമാണോദ്ഘാടനം നടത്തി

അങ്കമാലി: അമല ഫെല്ലോഷിപ്പിന്‍റെ നേതൃത്വത്തിൽ പ്രവർത്തിക്കുന്ന അമലഭവൻ പെയിൻ ആൻഡ് പാലിയേറ്റീവ് കെയർ യൂണിറ്റിന്‍റെ രണ്ടാം ഘട്ട നിർമാണോദ്ഘാടന പൊതുയോഗം റോജി എം. ജോൺ എംഎൽഎ ഉദ്ഘാടനം ചെയ്തു. അമല ഫെല്ലോഷിപ്പ് ദേശീയ പ്രസിഡന്‍റ് ജോർജ് കുര്യൻ പാറയ്ക്കൽ അധ്യക്ഷത വഹിച്ചു. ഏലിയാസ് മാർ അത്താനാസിയോസ് മെത്രാപ്പോലീത്ത മുഖ്യ പ്രഭാഷണം നടത്തി. അമല ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് ജോയിന്‍റ് ഡയറക്ടർ ഫാ. ഷിബു പുത്തൻ പുരയ്ക്കൽ അനുഗ്രഹ പ്രഭാഷണം നടത്തി. രണ്ടാം ഘട്ട നിർമാണത്തിന്‍റെ ശിലാസ്ഥാപനം അഡ്വ. ഷിയോ പോൾ നിർവഹിച്ചു. മുൻ മന്ത്രി അഡ്വ. ജോസ് തെറ്റയിൽ, മുൻ എംഎൽഎ പി.ജെ. ജോയ്, ജോൺ തോമസ് പാറയ്ക്കൽ തുടങ്ങിയവർ സംസാരിച്ചു.

ഹെറോയിനുമായി പിടിയിൽ

ആലുവ: പറവൂർ കെഎസ്ആർടിസി റോഡിൽ കരുമാലൂർ ആശുപത്രിപ്പടിക്ക് സമീപം എട്ടു ലക്ഷം രൂപ വില മതിക്കുന്ന ഹെറോയിനുമായി അതിഥിത്തൊഴിലാളി പിടിയിൽ. അസം നാഗാവോൺ ചില്ലങ്ങാനി സ്വദേശി റഫിക്കുൾ ഇസ്ലാമാണു (28) എക്സൈസിന്‍റെ പിടിയിലായത്. ഇന്നലെ വൈകിട്ടോടെ കരുമാലൂർ ആശുപത്രിപ്പടിക്കു സമീപം വിൽപന നടത്താനുള്ള ശ്രമത്തിനിടെയാണു പറവൂർ എക്സൈസ് സംഘം പിടികൂടിയത്. ഇയാളിൽ നിന്നു 85 ഗ്രാം ഹെറോയിനും ഒന്പതു ഗ്രാം കഞ്ചാവും കണ്ടെത്തി. കൂടുതൽ പേർ സംഭവത്തിൽ ഉൾപ്പെട്ടിട്ടുണ്ടെന്നും അന്വേഷണമാരംഭിച്ചതായും എക്സൈസ് സംഘം പറഞ്ഞു.

കോളജ് അധ്യാപികയെ ആക്രമിക്കാൻ ശ്രമം; ഭർത്താവ് കസ്റ്റഡിയിൽ

ആലുവ: കോളേജധ്യാപികയായ ഭാര്യയെ വീട്ടിൽ കയറി അക്രമിക്കാനൊരുങ്ങിയെന്ന പരാതിയിൽ ഭർത്താവിനെ ബിനാനിപുരം പൊലീസ് കസ്റ്റഡിയിലെടുത്തു. കോട്ടപ്പുറം സ്വദേശി വൈശാഖിനെയാണ് കസ്റ്റഡിയിലെടുത്തത്. അഞ്ചു വർഷം മുമ്പ് അധ്യാപികയും വൈശാഖും തമ്മിൽ പ്രണയത്തിലാകുകയും വിവാഹിതരാകുകയുമായിരുന്നു. ഇവർക്ക് രണ്ട് വയസുള്ള കുട്ടിയുണ്ട്. ലഹരിക്കടിമയായ ഭർത്താവിന്‍റെ ഉപദ്രവം സഹിക്കവയ്യാതെ ഇവർ സ്വന്തം വീട്ടിലേക്ക് താമസം മാറ്റിയിരുന്നു. ഇന്നലെ രാത്രി വൈശാഖ് ഇവരുടെ വീട്ടിലെത്തി വധഭീഷണി മുഴക്കുകയും വീടിനു നേരെ അക്രമം നടത്തിയെന്നുമാണ് പരാതി. അക്രമത്തിന്‍റെ ദൃശ്യം സഹിതം ഇവർ സാമൂഹ്യ മാധ്യമങ്ങളിൽ പ്രചരിപ്പിച്ചതോടെയാണ് പോലീസ് കേസെടുത്തത്. അധ്യാപികയിൽ നിന്നും മൊഴിയെടുത്ത ശേഷമാണ് വൈശാഖിനെ കസ്റ്റഡിയിലെടുത്തത്. കേസ് രജിസ്റ്റർ ചെയ്ത് ഇയാളെ കോടതിയിൽ ഹാജരാക്കും.

യാത്രയയപ്പു നല്‍കി

കൊച്ചി: എറണാകുളം സൗത്ത് റെയില്‍വേസ്‌റ്റേഷന്‍ ഷണ്ടിംഗ് മാസ്റ്ററായി പ്രമോഷന്‍ ലഭിച്ച ഇടപ്പള്ളി റെയില്‍വേ സ്റ്റേഷന്‍ പോയിന്‍റ് മാന്‍ മഹേഷ് മോഹനന് റെയില്‍വേ സ്ഥിരം യാത്രക്കാരുടെ കൂട്ടായ്മയായ ഗുരുവായൂര്‍ പാസഞ്ചര്‍ ഫ്രണ്ട്‌സ് അസോസിയേഷന്‍റെ നേതൃത്വത്തില്‍ യാത്രയയപ്പു നല്‍കി. ഇടപ്പള്ളി റെയില്‍വേ സ്‌റ്റേഷന്‍ സൂപ്രണ്ട് വി.പി പ്രിയന്‍റെ സാന്നിധ്യത്തില്‍ നടന്ന ചടങ്ങില്‍ ഗുരുവായൂര്‍ പാസഞ്ചര്‍ ഫ്രണ്ട്‌സ് അസോസിയേഷന്‍ പ്രസിഡന്‍റ് ജോഫി ജോസ് മഹേഷ് മോഹനന് ഉപഹാരം നല്‍കി. വിനോദ് കുമാര്‍ പൊന്നാട അണിയിച്ചു. അസോസിയേഷന്‍ സെക്രട്ടറി രാജേഷ്, ദിലീപ്, ലിന്‍റോ തുടങ്ങിയവര്‍ സംസാരിച്ചു.

തൃപ്പൂണിത്തുറയിൽ വോട്ടർപട്ടികയിൽ ക്രമക്കേടെന്ന്

തൃപ്പൂണിത്തുറ: അതിർത്തി പുനർ നിർണയത്തിന് ശേഷം, പരാതികൾ കേട്ട് പരിഹരിച്ച് കഴിഞ്ഞ 23ന് പുറത്തിറക്കിയ ഇലക്ഷൻ കമ്മീഷന്‍റെ കരട് വോട്ടർ പട്ടികയിൽ വ്യാപക ക്രമക്കേടെന്ന് ആക്ഷേപം. തൃപ്പൂണിത്തുറ റെയിൽവേ സ്റ്റേഷൻ വാർഡിൽ, പഴയ ചാത്താരി വാർഡിൽ താമസിക്കുന്ന 68 ഓളം പേരെ ഉൾപ്പെടുത്തിയിരിക്കുന്നതായി ആക്ഷേപമുണ്ട്. ഇപ്രകാരം എല്ലാ വാർഡുകളിലും ക്രമക്കേട് നടന്നിട്ടുണ്ടെന്നാണ് ആരോപണം. വോട്ടർ പട്ടികയിൽ ക്രമക്കേട് കാണിക്കുവാൻ അധികാരികൾ കൂട്ട് നിന്നുവെന്നും ഇതിനെതിരെ ചീഫ് ഇലക്ഷൻ കമ്മീഷന് പരാതി നൽകുമെന്നും കോടതിയെ സമീപിക്കുമെന്നും കോൺഗ്രസ് മണ്ഡലം പ്രസിഡന്‍റ് പി.എം. ബോബൻ അറിയിച്ചു.

മയക്കമരുന്നിനെതിരെ ഒരു ലക്ഷം പേരുടെ ഒപ്പ് ശേഖരണത്തിന് തുടക്കമായി

ഫോർട്ടുകൊച്ചി: കൊച്ചിയിൽ മയക്കുമരുന്നിനെതിരെ ഒരു ലക്ഷം പേരുടെ ഒപ്പുശേഖരിക്കുന്ന പരിപാടിക്ക് കൊച്ചി ബിഷപ് ഹൗസിൽ നിന്നും തുടക്കമായി. നമ്മൾ കൊച്ചിക്കാർ എന്ന സംഘടനയുടെ നേതൃത്വത്തിലാണ് ഒപ്പുശേഖരണം നടത്തുന്നത്. പ്രധാന മന്ത്രിക്കും സുപ്രിം കോടതി ജഡ്ജിക്കും കേരള സർക്കാരിനും നിവേദനം സമർപ്പിക്കും. ബിഷപ് ഹൗസിൽ നടന്ന ആദ്യ ഒപ്പുശേഖരണത്തിന് മോൺ. ഷൈജു പാരിയത്തുശേരി, ഫാ. മാക്സൺ കുറ്റികാട് എന്നിവർ തുടക്കം കുറിച്ചു. നമ്മൾ കൊച്ചിക്കാർ ചെയർമാൻ ജബ്ബാർ ഉപ്പാസ് അധ്യക്ഷത വഹിച്ചു. വിൻസി ബൈജു, രേണുക പ്രതീപ്, ഷാഹിത മുഹമ്മദ്‌, ക്ലീറ്റസ്, എച്ച്. സൈനുദ്ദീൻ, ജനി രവീന്ദ്രൻ, ക്ലായ് സ്റ്റീഫൻ, ബുഷ്റ ബാബു, രഹന, പ്രസാദ്, ജോൺസൻ ആന്‍റണി, എഡ്വിൻ ഫെർണാണ്ടസ് എന്നിവർ നേതൃത്വം വഹിച്ചു.

വൈദ്യുതി പോസ്റ്റ് കെഎസ്ഇബി വാഹനത്തിലേക്ക് മറിഞ്ഞു വീണു

ആലുവ: കെഎസ്ഇബി വാഹനത്തിന് മുന്നിലേക്ക് വൈദ്യുതി പോസ്റ്റ് മറിഞ്ഞു വീണു. വാഹനത്തിൽ നാല് ജീവനക്കാർ ഉണ്ടായിരുന്നെങ്കിലും ആർക്കും പരിക്കില്ല. വൈദ്യുതി ലൈനിലെ തകരാറുകൾ പരിഹരിക്കാൻ കീഴ്മാട് എത്തിയ കെഎസ്ഇബി പിക്ക് അപ് വാഹനത്തിന് മുന്നിലാണ് പോസ്റ്റ് മറിഞ്ഞുവീണത്. ഇന്നലെ ഉച്ച കഴിഞ്ഞ് രണ്ടോടെ കീഴ്മാട് ശ്രീനാരായണ ഗിരിയിൽ സേവികാ സമാജത്തിന് മുന്നിലാണ് അപകടം. വൈദ്യുതി കമ്പികളെല്ലാം പൊട്ടിപ്പോയി. ആലുവ ടൗൺ സെക്ഷൻ ഓഫീസിന് കീഴിലുള്ള നാല് കരാർ ജീവനക്കാരാണ് പിക്ക് അപ്പ് വാഹനത്തിൽ ഉണ്ടായിരുന്നത്.

ആലുവ പുറയാർ റെയിൽവേ ഗേറ്റിനുള്ളിൽ റോഡ് നിറയെ കുഴികൾ

ആലുവ: പുറയാർ റെയിൽവേ ഗേറ്റിനുള്ളിലെ ടാറിംഗ് പൊട്ടിപ്പൊളിഞ്ഞതിനാൽ അപകടം വിതച്ച് വലിയ കുഴികൾ രൂപപ്പെട്ടു. റെയിൽവേ ഗേറ്റിനുള്ളിലും പ്രവേശന ഭാഗത്തും ടാറിംഗും മെറ്റലും ഇളകിയാണ് വലിയ കുഴികൾ ഉണ്ടായിരിക്കുന്നത്. പലപ്പോഴും ഇരുചക്രവാഹന യാത്രികർ കുഴിയിൽ തെന്നി വീഴുന്നതായി പരാതിയുണ്ട്. പലരും നിസാര പരിക്കുകളോടെയാണ് രക്ഷപ്പെടുന്നത്. കുഴികൾ മൂലം റെയിൽവേ ഗേറ്റിൽ ഗതാഗതക്കുരുക്കും ഏറിയിട്ടുണ്ട്. ഗതാഗതക്കുരുക്കു മൂലം വാഹനങ്ങളുടെ നീണ്ട നിര രൂപപ്പെടുന്ന ഇവിടെ ഗേറ്റ് മുറിച്ചുകടക്കാൻ നന്നേ പ്രയാസപ്പെടുകയാണ് വാഹന യാത്രികർ. പാളത്തിനിരുവശവുമുള്ള കോൺക്രീറ്റ് സ്ലാബുകളും ഇളകിയാടുന്നതായും പരാതിയുണ്ട്. റെയിൽവേയുടെ പരിധിയിലുള്ള സ്ഥലമായതിനാൽ നാട്ടുകാർക്കും ഒന്നും ചെയ്യാൻ കഴിയാത്ത സ്ഥിതിയാണ്. റെയിൽവേ ഗേറ്റിനുള്ളിലും പ്രവേശന ഭാഗത്തുമുള്ള കുഴികൾ അടച്ച് റീടാറിംഗ് നടത്തി സുരക്ഷയൊരുക്കണമെന്ന് തുരുത്ത് സമന്വയ ഗ്രാമവേദി അധികൃതരോട് ആവശ്യപ്പെട്ടു. photo പുറയാർ റെയിൽവേ ഗേറ്റിനുള്ളിലെ കുഴികൾ.

പെരുന്പാവൂരിൽ സ്മാർട്ട് അങ്കണവാടിക്കെതിരേ വ്യാജ പ്രചാരണമെന്ന് കൗൺസിലർ

പെരുമ്പാവൂർ: ഉദ്ഘാടനത്തിനൊരുങ്ങിയ സ്മാർട്ട് അങ്കണവാടിക്കെതിരെ വ്യാജപ്രചരണമെന്ന് ആരോപണം. പെരുമ്പാവൂർ നഗരസഭാ കെഎസ്ആർടിസി ഭൂമിയിലുള്ള അങ്കണവാടി ആധുനിക സജ്ജീകരണങ്ങളോടെ നിർമാണം പൂർത്തിയാക്കുകയും ഉദ്ഘാടന തീയതി നിശ്ചയിക്കുകയും ചെയ്തതിന് ശേഷമാണ് വ്യാജ പ്രചരണങ്ങളെന്നാണ് ആരോപണം. കെഎസ്ആർടിസിയുടെ ഉടമസ്ഥതയിലുള്ള ഭൂമിയിൽ അങ്കണവാടി സ്ഥാപിക്കാനായുള്ള ശ്രമങ്ങൾക്ക് രാഷ്ട്രീയ സ്വാധീനം മൂലമുള്ള ശക്തമായ എതിർപ്പുകൾ നേരിട്ടിരുന്നു. നിരവധി ഭരണ, നിയമപര നടപടികൾക്കുശേഷമാണ് വലിയ എതിർപ്പുകൾ മറികടന്ന് ആ സ്ഥലം ലാൻഡ് ബാങ്കിൽ നിക്ഷേപിക്കാൻ സാധിച്ചത്. തുടർ പ്രവർത്തനങ്ങൾക്കായി ഹൈക്കോടതിയിൽ വരെ പോയി അനുകൂലമായ വിധി സമ്പാദിക്കേണ്ടിവന്നു. എൽദോസ് കുന്നപ്പിള്ളി എംഎൽഎ ഫണ്ടിൽ നിന്ന് അങ്കണവാടി കെട്ടിടം നിർമിക്കാൻ അനുവദിച്ച 46 ലക്ഷം രൂപക്ക് ജില്ലാ പഞ്ചായത്ത് ടെൻഡർ നടപടികൾ ആരംഭിച്ചെങ്കിലും ആദ്യ ഘട്ടത്തിൽ ആരും പ്രവൃത്തി ഏറ്റെടുക്കാൻ തയാറാകാതിരുന്നതിനാൽ വീണ്ടും തടസം നേരിട്ടു. അന്നത്തെ നഗരസഭ ചെയർമാൻ ബിജു ജോൺ ജേക്കബിന്‍റെയും വാർഡ് കൗൺസിലർ മിനി ജോഷിയുടെയും ഇടപെടലിനെ തുടർന്നാണ് നിർമാണ പ്രവർത്തനങ്ങൾ ആരംഭിച്ചത്. ഇലക്ട്രിക്കൽ വർക്ക് ഉൾപ്പെടെയുള്ള അവസാനഘട്ടങ്ങൾ നഗരസഭാ ചെയർമാൻ പോൾ പാത്തിക്കലിനന്‍റെ സഹകരണത്തോടെ പൂർത്തിയാക്കിയ കെട്ടിടത്തിന് കഴിഞ്ഞ ദിവസമാണ് വൈദ്യുത കണക്ഷനും വാട്ടർ കണക്ഷനും ലഭ്യമായത്. ഓഗസ്റ്റ് ആറിന് ഉദ്ഘാടന തിയതി പ്രഖ്യാപിച്ചതിന് പിന്നാലെയാണ് കെട്ടിടം തുറന്നു കൊടുക്കുന്നില്ല എന്ന ആരോപണവുമായി സിപിഎം നേതൃത്വം രംഗത്ത് എത്തിയിരിക്കുന്നതെന്നാണ് ആരോപണമെന്ന് വാർഡ് കൗൺസിലർ മിനി ജോഷി അറിയിച്ചു.

ഏലൂരിലെ കുടിവെള്ള ടാങ്കിന് തിങ്കളാഴ്ച ശിലയിടും

ഏലൂർ: ഏലൂർ നഗരസഭാ പരിധിയിലെ കുടിവെള്ള പ്രശ്നത്തിന് സമ്പൂർണ പരിഹാരത്തിന് മഞ്ഞുമ്മൽ കോട്ടക്കുന്നിൽ കുടിവെള്ള ഓവർഹെഡ് വാട്ടർ ടാങ്കിന്‍റെ തറക്കല്ലിടൽ ഉദ്ഘാടനം തിങ്കളാഴ്ച രാവിലെ ഒന്പതിന് ജലവിഭവ മന്ത്രി റോഷി അഗസ്റ്റിൻ നിർവഹിക്കും. മന്ത്രി പി. രാജീവ് അധ്യക്ഷത വഹിക്കും. നഗരസഭാ അമൃത് പദ്ധതിയിൽ ഉൾപ്പെടുത്തി 15 ലക്ഷം ലിറ്റർ സംഭരണശേഷിയിൽ എട്ടു കോടി എഴുപത് ലക്ഷം രൂപ ചെലവിട്ടാണ് ടാങ്ക് നിർമിക്കുന്നത്. 18 മാസം കൊണ്ട് ടാങ്കിന്‍റെ നിർമാണം പൂർത്തീകരിക്കാൻ കഴിയുമെന്നാണ് കരുതുന്നത്. ഇതോടെ ഏലൂർ നഗരസഭയിലെ കുടിവെള്ള പ്രശ്നത്തിന് സമ്പൂർണ പരിഹാരം ഉണ്ടാകുമെന്ന് ചെയർമാൻ എ.ഡി. സുജിൽ പറഞ്ഞു.

ഡെങ്കിപ്പനി, ഇൻഫ്ലൂവന്‍സ : മഴയ്ക്ക് പിന്നാലെ പനി പടരുന്നു

കൊച്ചി: മഴ വീണ്ടും കനത്തതോടെ ജില്ലയില്‍ പകര്‍ച്ചവ്യാധികളും പടരുന്നു. കഴിഞ്ഞ അഞ്ച് ദിവസത്തിനിടെ വിവിധ സര്‍ക്കാര്‍ ആശുപത്രികളില്‍ മാത്രം പനിക്ക് ചികിത്സ തേടിയത് 3,770 പേരാണ്. ഇതില്‍ 28 പേര്‍ക്ക് ഡെങ്കിപ്പനി സ്ഥിരീകരിച്ചു. ഈ ദിവസങ്ങളില്‍ 141 പേര്‍ക്ക് ഇന്‍ഫ്ലുവന്‍സയും സ്ഥിരീകരിച്ചിട്ടുണ്ട്. മഴ തുടരുന്ന സാഹചര്യത്തില്‍ പകര്‍ച്ച വ്യാധികള്‍ക്കെതിരായ ജാഗ്രത തുടരണമെന്ന് ആരോഗ്യവകുപ്പ് മുന്നറിയിപ്പ് നല്‍കുന്നു. മൂന്ന് പേര്‍ക്ക് എലിപ്പനി സ്ഥിരീകരിച്ചു. മൂന്ന് എലിപ്പനി മരണങ്ങളും റിപ്പോര്‍ട്ട് ചെയ്തിട്ടുണ്ട്. പെരുമ്പാവൂർ, മഴുവന്നൂര്‍ മേഖലകളിലാണ് മരണം. പനിക്ക് ചികിത്സ തേടിയവരില്‍ 126 പേര്‍ക്ക് ഡെങ്കിപ്പനി രോഗ ലക്ഷണങ്ങളുണ്ട്. ഹെപ്പറ്റൈറ്റിസ്-എ ബാധിച്ച് 34 പേരും, ചിക്കന്‍പോക്‌സ് ബാധിച്ച് 27 പേരും ജില്ലയില്‍ ചികിത്സയിലുണ്ട്. മങ്ങാട്ടുമുക്ക്, മഴുവന്നൂര്‍, മൂലംകുഴി, നെട്ടൂര്‍, പട്ടിമറ്റം, പൊന്നുരുന്നി, പുതുവയ്പ് എന്നിവിടങ്ങളിലാണ് ഡെങ്കു സ്ഥിരീകരിച്ചത്. രോഗ ലക്ഷണങ്ങള്‍ കണ്ടുതുടങ്ങിയാല്‍ സ്വയം ചികിത്സ ഒഴിവാക്കി ആശുപത്രിയില്‍ ഡോക്ടറുടെ സേവനം തേടണമെന്നും ആരോഗ്യവിഭാഗം അറിയിച്ചു. ജില്ലയില്‍ മഴ തുടരുന്നതിനാല്‍ വെള്ളക്കെട്ടുള്ള പ്രദേശങ്ങളില്‍ കൂടുതല്‍ ശ്രദ്ധവേണമെന്ന് ആരോഗ്യവകുപ്പ് അധികൃതര്‍ പറഞ്ഞു. വീടും പരിസരവും വൃത്തിയായി സൂക്ഷിക്കുന്നതിനൊപ്പം വ്യക്തി ശുചിത്വവും പാലിക്കണം. ഡ്രൈഡേ കൃത്യമായി ആചരിക്കുക, ഇന്‍ഡോര്‍ പ്ലാന്‍റുകള്‍ വളര്‍ത്തുന്ന സ്ഥലങ്ങളില്‍ വെള്ളം കെട്ടിനില്‍ക്കുന്നില്ലെന്ന് ഉറപ്പാക്കണം. പനി വ്യാപകമായി റിപ്പോര്‍ട്ട് ചെയ്യപ്പെട്ടുന്ന സാഹചര്യം ഉണ്ടായാല്‍ പ്രത്യേകം പനി ക്ലിനിക്കുകള്‍ തുറക്കാന്‍ പ്രാഥമികാരോഗ്യ കേന്ദ്രങ്ങള്‍ക്ക് ആരോഗ്യവകുപ്പ് നിര്‍ദേശം നല്‍കി. photo: ജില്ലയില്‍ പനി വ്യാപകമായതിന് പിന്നാലെ കളമശേരി മെഡിക്കല്‍ കോളജ് ഒപിയില്‍ ചികിത്സ തേടിയെത്തിയവരുടെ തിരക്ക്.

വാതില്‍ തുറന്നിട്ട് ബസുകളുടെ മരണപ്പാച്ചിൽ : നാല് ഡ്രൈവര്‍മാരുടെ ലൈസന്‍സ് സസ്‌പെന്‍ഡ് ചെയ്തു

കൊച്ചി: നഗരത്തില്‍ മത്സരയോട്ടവും വാതില്‍ അടയ്ക്കാതെയും സര്‍വീസ് നടത്തിയ സ്വകാര്യ ബസ് ഡ്രൈവര്‍മാര്‍ക്കെതിരെ നടപടിയുമായി മോട്ടോര്‍ വാഹനവകുപ്പ്. രവിപുരത്ത് അമിതവേഗത്തില്‍ വാഹനം ഓടിച്ച രണ്ടു സ്വകാര്യ ബസ് ഡ്രൈവര്‍മാരുടെ ലൈസന്‍സ് എറണാകുളം ആര്‍ടിഒ (എന്‍ഫോഴ്‌സ്‌മെന്‍റ്) മൂന്നുമാസത്തേക്ക് സസ്‌പെന്‍ഡ് ചെയ്തു. എറണാകുളം സിറ്റി പോലീസും ഈ ബസുകള്‍ക്കെതിരെ അപകടകരമായ ഡ്രൈവിംഗിന് നടപടി സ്വീകരിച്ചു. ഇതിനുപുറമേ നഗരത്തിൽ വാതില്‍ തുറന്നിട്ട് അപകടകരമായ രീതിയില്‍ വാഹനം ഓടിച്ച രണ്ടു ബസ് ഡ്രൈവര്‍മാരുടെ ലൈസന്‍സും സസ്‌പെന്‍ഡ് ചെയ്തു. ജില്ലയിൽ സ്വകാര്യ ബസുകളുടെ മത്സരയോട്ടവും ജീവനക്കാര്‍ തമ്മിലുള്ള വാക്കേറ്റവും സംബന്ധിച്ച് വകുപ്പ് മന്ത്രിയുടെ ഓഫീസിലും ജില്ലാ ട്രാന്‍സ്‌പോര്‍ട്ട് കമ്മീഷണര്‍ക്കും ലഭിച്ച പരാതിയുടെ അടിസ്ഥാനത്തിലായിരുന്നു നടപടി. സ്വകാര്യ ബസുകളുടെ മത്സരയോട്ടം ഒരു തരത്തിലും അനുവദിക്കുകയില്ലെന്നും ഇതിനെതിരെയുള്ള പരിശോധനകള്‍ തുടരുമെന്നും ആര്‍ടിഒ അറിയിച്ചു.

മത്സര ഓട്ടത്തിനിടെ "ഇടി'; ബസ് ഡ്രൈവര്‍ അറസ്റ്റില്‍

കൊച്ചി: മത്സര ഓട്ടത്തിനിടെ സ്വകാര്യ ബസുകള്‍ കൂട്ടിയിടിച്ച് ഡ്രൈവര്‍ക്ക് പരിക്കേറ്റ സംഭവത്തില്‍ പ്രതി അറസ്റ്റില്‍. എറണാകുളം കണയന്നൂര്‍ തേവയ്ക്കല്‍ സ്വദേശിയും നഗരത്തിലോടുന്ന സെവന്‍സ് ബസിന്‍റെ ഡ്രൈവർ സില്‍വസ്റ്റര്‍ ഹര്‍ഷ്‌ലിയാണ് പാലാരിവട്ടം പോലീസിന്‍റെ പിടിയിലായത്. സമയക്രമത്തെ ചൊല്ലിയുള്ള മത്സര ഓട്ടത്തിനിടെ ഇന്നലെ ആയിരുന്ന സംഭവം. സിവി സണ്‍സ്, സെവന്‍സ് എന്നീ സ്വകാര്യ ബസുകള്‍ പാലാരിവട്ടം ജംഗ്ഷനില്‍ നിന്നും കലൂര്‍ ഭാഗത്തേക്ക് സര്‍വീസ് നടത്തുന്നതിനിടെ സിവി സണ്‍സ് ബസിന്‍റെ മുന്‍വശത്ത് സെവന്‍സ് ബസ് ഇടിപ്പിച്ചതിനെത്തുടര്‍ന്ന് ഡ്രൈവര്‍ സീറ്റിന്‍റെ വശത്തെ ഗ്ലാസ് തകര്‍ന്ന് ഡ്രൈവറുടെ കണ്ണിന് പരിക്കേല്‍ക്കുകയായിരുന്നു. ഇടിയുടെ ആഘാതത്തില്‍ തകര്‍ന്ന ഗ്ലാസ് കഷണം ഡ്രൈവറുടെ കണ്ണില്‍ തറച്ചു. ഡ്രൈവര്‍ക്കും യാത്രക്കാര്‍ക്കും ജീവഹാനി ഉണ്ടായേക്കാവുന്ന അപകടമുണ്ടാക്കിയത് കണക്കിലെടുത്താണ് പാലാരിവട്ടം പോലീസ് കേസ് രജിസ്റ്റര്‍ ചെയ്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

എൻ. അരുണ്‍ സിപിഐ എറണാകുളം ജില്ലാ സെക്രട്ടറി

കോതമംഗലം: സിപിഐ എറണാകുളം ജില്ല സെക്രട്ടറിയായി എൻ. അരുണിനെ(41) തെരഞ്ഞെടുത്തു. കോതമംഗലം കല ഓഡിറ്റോറിയത്തിൽ നടന്ന എറണാകുളം ജില്ലാ സമ്മേളനം സിപിഐ എറണാകുളം ജില്ലാ കൗണ്‍സിൽ അംഗങ്ങളായി 51 പേരെയും 33 സംസ്ഥാന സമ്മേളന പ്രതിനിധികളെയും തെരഞ്ഞെടുത്തു. എഐവൈഎഫ് സംസ്ഥാന പ്രസിഡന്‍റ്, സിപിഐ സംസ്ഥാന കൗണ്‍സിൽ അംഗം, കേരള ചലച്ചിത്രഅക്കാദമി അംഗം എന്നീ നിലകളിൽ പ്രവർത്തിച്ചു വരികയായിരുന്നു അരുൺ. കേരള ലോ അക്കാദമിയിൽ നിന്ന് നിയമ ബിരുദവും ഇന്ദിരാഗാന്ധി യൂണിവേഴ്സിറ്റിയിൽ നിന്ന് മാസ് കമ്യൂണിക്കേഷനിൽ ബിരുദാനന്തര ബിരുദവും കരസ്ഥമാക്കിയിട്ടുണ്ട്. മൂവാറ്റുപുഴ തൃക്കളത്തൂർ പുതുശേരിൽ പി.കെ നീലകണ്ഠൻ നായർ - സുശീല ദന്പതികളുടെ മകനാണ്. അധ്യാപികയായ ശാരിയാണ് അരുണിന്‍റെ ഭാര്യ. മകൻ : അധ്യുത് (വിദ്യാർഥി). എഐഎസ്എഫ് സംസ്ഥാന പ്രസിഡന്‍റ്, ദേശീയ സെക്രട്ടറിയേറ്റംഗം, എഐവൈഎഫ് ജില്ലാ സെക്രട്ടറി, ജില്ലാ പഞ്ചായത്തംഗം എന്നീ നിലകളിലും അരുണ്‍ പ്രവർത്തിച്ചു. 2017ൽ ഇന്ത്യയെ പ്രതിനിധീകരിച്ച് ലോക യുവജനോത്സവത്തിൽ പങ്കെടുത്തു. ഏഴ് ഡോക്യുമെന്‍ററികളും ടെലിഫിലിമുകളും എഴുതി സംവിധാനം ചെയ്തു. നിരവധി അവാർഡുകൾ നേടിയ വിദേശ ചലച്ചിത്രമേളകളിൽ ഉൾപ്പെടെ അംഗീകാരങ്ങൾ നേടിയ ’അവകാശികൾ’ എന്ന സിനിമയുടെ രചയിതാവും സംവിധായകനുമാണ് അരുണ്‍. നിരവധി നാടകങ്ങൾ സംവിധാനം ചെയ്യുകയും എഴുതുകയും ചെയ്തിട്ടുണ്ട്.

ജില്ലയില്‍ വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധി

കൊച്ചി: ശക്തമായ കാറ്റും മഴയും കണക്കിലെടുത്ത് എറണാകുളം ജില്ലയില്‍ ഓറഞ്ച് അലര്‍ട്ട് പ്രഖ്യാപിച്ച സാഹചര്യത്തില്‍ പ്രഫഷണല്‍ കോളജുകള്‍ ഉള്‍പ്പെടെ എല്ലാ വിദ്യാഭ്യാസ സ്ഥാപനങ്ങള്‍ക്കും ഇന്ന് ജില്ലാ കളക്ടര്‍ എന്‍.എസ്.കെ. ഉമേഷ് അവധി പ്രഖ്യാപിച്ചു. അങ്കണവാടികള്‍ക്കും ട്യൂഷന്‍ സെന്‍ററുകള്‍ക്കും അവധി ബാധകമാണ്. മേല്‍ അവധി മൂലം നഷ്ടപ്പെടുന്ന പഠന സമയം ക്രമീകരിക്കുന്നതിന് ബന്ധപ്പെട്ട വിദ്യാഭ്യാസ സ്ഥാപന മേധാവികള്‍ നടപടികള്‍ സ്വീകരിക്കണമെന്നും കളക്ടർ അറിയിച്ചു.

സിപിഐ ജില്ലാ സമ്മേളനത്തിന് ഇന്ന് സമാപനം

കോതമംഗലം: സിപിഐ ജില്ലാ സമ്മേളനത്തിന് ഇന്ന് സമാപനം. വൈകുന്നേരം നാലിന് കോതമംഗലം മാർ ബേസിൽ സ്റ്റേഡിയത്തിൽ നിന്നും ചുവപ്പുസേന പരേഡ്, വനിത റാലി. ചെങ്കൊടികളേന്തിയ ആയിരക്കണക്കിന് പ്രവർത്തകരും ചുമപ്പ് തൊപ്പി ധരിച്ചവരും പ്രകടനത്തിന് അകന്പടിയാകും. നിശ്ചല ദൃശ്യങ്ങൾ, വാദ്യമേളങ്ങൾ എന്നിവ ജാഥയിലുണ്ടാകും. നഗരം ചുറ്റി തങ്കളം ബസ് സ്റ്റാൻഡ് മൈതാനിയിൽ പ്രകടനം എത്തിച്ചേരും. തുടർന്ന് മന്ത്രി കെ. രാജൻ പൊതുസമ്മേളനം ഉദ്ഘാടനം ചെയ്യും. സംസ്ഥാന എക്സീക്യൂട്ടീവംഗങ്ങളായ കമല സദാനന്ദൻ, കെ.കെ അഷറഫ്, സ്വാഗത സംഘം ചെയർമാൻ കെ.എം ദിനകരൻ, ജനറൽ കണ്‍വീനർ ഇ.കെ ശിവൻ, ട്രഷറർ പി.റ്റി ബെന്നി എന്നിവർ പ്രസംഗിക്കും. പൊതുസമ്മേളനത്തിന്‍റെ ഭാഗമായി നൃത്ത ശില്പം, ഫ്ളാഷ് മോബ്, നാടൻ പാട്ട്, നാടോടി നൃത്തം, കൈകൊട്ടിക്കളി എന്നീ കലാപരിപാടികളും നടക്കും. ഇന്നലെ മന്ത്രി ജെ. ചിഞ്ചു റാണി പ്രതിനിധി സമ്മേളനം ഉദ്ഘാടനം ചെയ്തു. സംസ്ഥാന എക്സിക്യൂട്ടീവംഗം കെ.പി. രാജേന്ദ്രൻ, മന്ത്രി കെ. രാജൻ, പി.പി. സുനീർ എംപി, സംസ്ഥാന എക്സിക്യൂട്ടീവ് അംഗങ്ങളായ മുല്ലക്കര രത്നാകരൻ, കെ.ആർ. ചന്ദ്രമോഹൻ, ആർ. രാജേന്ദ്രൻ, സംസ്ഥാന കൗണ്‍സിൽ അംഗങ്ങളായ ടി. രഘുവരൻ, എൻ. അരുണ്‍, പി.കെ. രാജേഷ്, ബാബു പോൾ, ജില്ലാ അസിസ്റ്റന്‍റ് സെക്രട്ടറിമാരായ എൽദോ ഏബ്രഹാം, ശാന്തമ്മ പയസ് എന്നിവർ പ്രസംഗിച്ചു. മത്സ്യമേഖലയെ സംരക്ഷിക്കാൻ പദ്ധതികൾ വേണമെന്ന് സിപിഐ കോതമംഗലം : കേരളത്തിന്‍റെ മത്സ്യമേഖലയെ സംരക്ഷിക്കാൻ പദ്ധതികൾ ആവിഷ്കരിക്കണമെന്ന് സിപിഐ ജില്ലാ സമ്മേളനം പ്രമേയത്തിലൂടെ ആവശ്യപ്പെട്ടു. ഇന്ത്യയുടെ ആകെ വിദേശനാണ്യ ലഭ്യതയുടെ 20 ശതമാനവും കേരളത്തിൽ നിന്നുള്ള സമുദ്രോല്പന്ന കയറ്റുമതിയിൽ നിന്ന് ലഭിക്കുന്നതാണ്. കേന്ദ്രസർക്കാർ നടപ്പാക്കുന്ന ഇക്കണോമിയുടെ ഭാഗമായി കേരളതീരം എന്നന്നേക്കുമായി മത്സ്യത്തൊഴിലാളികൾ അടക്കം തീരദേശവാസികൾക്കും അന്യമാകാൻ പോകുന്നുവെന്ന് സമ്മേളനം ആശങ്ക പ്രകടിപ്പിച്ചു. അതുകൊണ്ടുതന്നെ എല്ലാ ശക്തിയും സംഭരിച്ച് കേരളീയ സമൂഹം ഇതിനെ എതിർത്ത് പരാജയപ്പെടുത്തേണ്ടതുണ്ടെന്നും സിപിഐ എറണാകുളം ജില്ലാ സമ്മേളനം ആവശ്യപ്പെട്ടു.

ട്രോളിംഗ് നിരോധനം കഴിയാൻ ദിവസങ്ങൾ മാത്രം; കടലിലേക്ക് കണ്ണുംനട്ട് യാനങ്ങൾ

ഫോർട്ടുകൊച്ചി: ട്രോളിംഗ് നിരോധനം അവസാനിക്കാൻ ദിവസങ്ങൾ മാത്രം ബാക്കി നിൽക്കേ മത്സ്യബന്ധനത്തിന് കടലിൽ പോകാനുള്ള ഒരുക്കത്തിലാണ് യാനങ്ങൾ. 52 ദിവസം നീണ്ടുനിന്ന നിരോധനം 31ന് അർധരാത്രിയോടെ തീരും. തുടർന്ന് ബോട്ടുകൾക്ക് കടലിൽഇറങ്ങാം. പുത്തൻ പ്രതീക്ഷയോടെയാണ് തൊഴിലാളികൾ ഹാർബറുകളിൽ നിന്ന് മത്സ്യബന്ധനത്തിനായി ഒരുങ്ങുന്നത്. ജില്ലയിൽ 700 ട്രോളിംഗ് ബോട്ടുകൾ, 75 പെർസിൻ, 300 ചൂണ്ട ബോട്ടുകൾ എന്നിവയാണ് കടലിലേക്ക് പോകുന്നത്. അടച്ചിട്ട ഡീസൽ പമ്പുകളും ഐസ് ഫാക്ടറികളും ഉടൻ സജീവമാകും. ട്രോളിംഗ് നിരോധനം തുടങ്ങിയപ്പോൾ അറ്റകുറ്റപ്പണികൾക്കായി കൊണ്ടുപോയ വലകളുടെ പണികള്‍ തീര്‍ത്ത് തിരികെ എത്തിക്കുന്നതിനുള്ള ജോലികളും തകൃതിയായി നടക്കുന്നു. കുളച്ചൽ, തൂത്തൂർ, നാഗപട്ടണം അടക്കമുള്ള സ്ഥലങ്ങളിൽ നിന്നുള്ള തൊഴിലാളികള്‍ക്ക് പുറമേ ഇതര സംസ്ഥാനങ്ങളിൽ നിന്നുള്ള തൊഴിലാളികളും എത്തുന്നതോടെ ഹാർബറുകളിൽ ഉത്സവാന്തരീക്ഷമാകും. മത്സ്യ ചാകര ഉണ്ടാകുമെന്ന പ്രതീക്ഷയയിലാണ് തൊഴിലാളികൾ. ബോട്ടിന്‍റെ അറ്റകുറ്റപ്പണികൾക്കായി ലക്ഷങ്ങളാണ് ബോട്ടുടമകൾ ചെലവഴിച്ചത്. അതേസമയം നിരോധനം 45 ദിവസം പിന്നിട്ടിട്ടും പരമ്പരാഗതക്കാർ കടലമ്മയുടെ കനിവ് ലഭിക്കാത്ത നിരാശയിലാണ്ചെറുതും വലുതുമായ 6000ത്തിലെറെ പരമ്പരാഗത വള്ളങ്ങളാണ് കേരള തീരത്ത് പ്രവർത്തിക്കുന്നതെന്നാണ് കണക്ക്. തീരക്കടലിൽ നിന്ന് മികച്ച മത്സ്യയിനങ്ങൾ അകന്നു മാറിയതായാണ് പരമ്പരാഗത മത്സ്യത്തൊഴിലാളികൾ പറയുന്നത്. മത്സ്യങ്ങളുടെ ഉയർന്ന വിലയിലും കാര്യമായ നേട്ടം കൊയ്യാൻ കഴിയാത്ത സാഹചര്യമാണ് തീരദേശ പരമ്പരാഗത മത്സ്യത്തൊഴിലാളികൾക്കെന്ന് സംഘടനകളും ചൂണ്ടിക്കാട്ടുന്നു.

കളമശേരിയിൽ നിന്ന് ഇരുമ്പുപാളങ്ങള്‍ കടത്തി; നാലു പേര്‍ അറസ്റ്റില്‍

കൊച്ചി: റെയില്‍വേയുടെ പഴയ ഇരുമ്പുപാളങ്ങള്‍ മോഷ്ടിച്ച സംഭവത്തില്‍ നാലുപേരെ ആര്‍പിഎഫ് അറസ്റ്റ് ചെയ്തു. ആലുവ മുപ്പത്തടം സ്വദേശി ആല്‍ത്താഫ് കെ. ആഷ്‌റഫ്, ആക്രി വ്യാപരിയായ കരിമുകള്‍ സ്വദേശി, കോല്‍ക്കത്ത സ്വദേശി ഹൊസൈന്‍ ജാമാദര്‍ (28), പശ്ചിമബംഗാള്‍ മൂര്‍ഷിദാബാദ് സ്വദേശി ഇക്ബാല്‍ ഷേഖ് (33) എന്നിവരാണ് അറസ്റ്റിലായത്. ഹൊസൈന്‍ നേരത്തെയും മോഷണക്കേസുകളില്‍ അറസ്റ്റിലായിട്ടുണ്ട്. കളമശേരി റെയില്‍വേ സ്റ്റേഷന്‍ പരിസരത്ത് നിന്നാണ് ഇളക്കിയിട്ടിരുന്ന പാളങ്ങള്‍ കടത്തിക്കൊണ്ടുപോയത്. കവർച്ചയ്ക്ക് ഉപയോഗിച്ചത് അൽത്താഫിന്‍റെ വാഹനമാണ്. കുപ്പിവെള്ള വിതരണ കമ്പനിയിലെ ജീവനക്കാരനായ ഹൊസൈന്‍ ജോലിക്കിടയില്‍ കണ്ടുവയ്ക്കുന്ന സാധനങ്ങള്‍ രാത്രി ഇക്ബാല്‍ ഷേഖിന്‍റെയും അല്‍ത്താഫിന്‍റെയും സഹായത്തോടെ കടത്തുകയാണ് ചെയ്തിരുന്നത്. കളമശേരി റെയില്‍വേ സ്റ്റേഷന്‍ മാസ്റ്റര്‍ നല്‍കിയ പരാതിയില്‍ ആര്‍പിഎഫ് സംഭവത്തില്‍ കേസെടുത്തിരുന്നു. പരിസരത്തെ സിസി ടിവി കാമറകള്‍ കേന്ദ്രീകരിച്ച് നടത്തിയ അന്വേഷണത്തിലാണ് പ്രതികള്‍ കുടുങ്ങിയത്. മോഷ്ടിച്ച സാധനങ്ങള്‍ അമ്പലമുകള്‍ ഭാഗത്തെ ആക്രിക്കടയില്‍ മറിച്ചു വിറ്റതായി പ്രതികള്‍ മൊഴി നല്‍കി. ഇതേത്തുടര്‍ന്ന് ആര്‍പിഎഫ് സംഘം ഇവിടെയെത്തി സാധനങ്ങള്‍ കസ്റ്റഡിയിലെടുത്തു. ആക്രി വ്യാപാരിക്ക് മോഷണവുമായി നേരിട്ട് പങ്കില്ലെന്നാണ് പ്രാഥമിക നിഗമനം. കോടതിയില്‍ ഹാജരാക്കിയ ഹൊസൈന്‍ ജാമാദര്‍, ഇക്ബാല്‍ ഷേഖ് എന്നിവരെ റിമാന്‍ഡ് ചെയ്തു.

ശ്രീഹരി സുകേഷിന്‍റെ മൃതദേഹം ഇന്ന് നാട്ടിലെത്തും

തൃപ്പൂണിത്തുറ: കാനഡയിൽ പരിശീലന പറക്കലിനിടിടെ വിമാനാപകടത്തിൽ മരിച്ച തൃപ്പൂണിത്തുറ സ്റ്റാച്ച്യു ജംഗ്ഷനടുത്ത് കൃഷ്ണാ എൻക്ലേവിൽ ചന്ദ്രകാന്തത്തിൽ ശ്രീഹരി സുകേഷിന്‍റെ (23) മൃതദേഹം ഇന്നു നാട്ടിലെത്തും. രാവിലെ നെടുന്പാശേരിയിലെത്തുന്ന മൃതദേഹം തൃപ്പൂണിത്തുറയിലെ വസതിയിൽ ഉച്ചയ്ക്ക് 12 മുതൽ വൈകിട്ട് നാലു വരെ പൊതുദർശനത്തിന് വയ്ക്കും. തുടർന്ന് തൃപ്പൂണിത്തുറ പൊതുശ്മശാനത്തിൽ സംസ്കാരം നടത്തും. സെൻട്രൽ ബാങ്ക് ഉദ്യോഗസ്ഥനായ സുകേഷിന്‍റെയും യുഎസ്ടി ഗ്ലോബൽ ഉദ്യോഗസ്ഥ ദീപയുടെയും മകനായ ശ്രീഹരി കഴിഞ്ഞ എട്ടിന് കാനഡയിലെ മാനിടോബയിൽ സ്റ്റെൻബാക് സൗത്ത് എയർപോർട്ടിനടുത്തുണ്ടായ അപകടത്തിലാണ് മരിച്ചത്. പരിശീലനത്തിനിടെ ശ്രീഹരിയുടെ വിമാനവും സഹപാഠിയുടെ വിമാനവും ആകാശത്ത് വച്ച് കൂട്ടിയിടിച്ച് തീപിടിച്ച് തകർന്നു വീഴുകയായിരുന്നു. സ്വകാര്യ പൈലറ്റ് ലൈസൻസ് നേടിയ ശ്രീഹരി കമേഴ്സ്യൽ ലൈസൻസിനുള്ള പരിശീലനത്തിലായിരുന്നു.

ഒന്നാം ക്ലാസ് വിദ്യാർഥിക്ക് മസ്തിഷ്ക ജ്വരം; സ്കൂൾ അടച്ചു

മൂവാറ്റുപുഴ: ഒന്നാം ക്ലാസ് വിദ്യാർഥിക്ക് മസ്തിഷ്ക ജ്വരം സ്ഥിരീകരിച്ചു. മുൻകരുതലിന്‍റെ ഭാഗമായി സ്കൂൾ അടച്ചു. സ്കൂളിൽ ആരോഗ്യ വിഭാഗത്തിന്‍റെ നേതൃത്വത്തിൽ പരിശോധന നടത്തിയെങ്കിലും മറ്റ് കുട്ടികൾക്ക് രോഗബാധയുടെ ലക്ഷണങ്ങൾ കണ്ടെത്താൻ കഴിഞ്ഞിട്ടില്ല. പേഴയ്ക്കാപ്പിള്ളി അറഫ സ്കൂളിലെ വിദ്യാർഥിക്കാണ് രോഗം സ്ഥിരീകരിച്ചത്. തുടർന്നാണ് പായിപ്ര പഞ്ചായത്തിൽ നിന്നുള്ള ആരോഗ്യ വിഭാഗം ഉദ്യോഗസ്ഥർ സ്കൂളിലെത്തി പരിശോധന നടത്തിയത്. മുൻകരുതലിന്‍റെ ഭാഗമായാണ് സ്കൂൾ അടച്ചിടാൻ നിർദേശം നൽകിയത്.

കൂത്താട്ടുകുളം നഗരസഭയിൽ വീണ്ടും അവിശ്വാസ പ്രമേയം

കൂത്താട്ടുകുളം: കൂത്താട്ടുകുളം നഗരസഭയിൽ വീണ്ടും അവിശ്വാസ പ്രമേയം. നഗരസഭാ ചെയർപേഴ്സൺ വിജയാ ശിവൻ, വൈസ് ചെയർമാൻ സണ്ണി കുര്യാക്കോസ് എന്നിവർക്ക് എതിരെയാണ് യുഡിഎഫ് അവിശ്വാസ നേട്ടീസ് നൽകിയത്. ഓഗസ്റ്റ് അഞ്ചിനാണ് പ്രമേയം ചർച്ച ചെയ്യുക. ആറുമാസം മുൻപ് നൽകിയ അവിശ്വാസ പ്രമേയത്തിന്മേൽ ചർച്ച നടക്കാനിരിക്കെ കൗൺസിലർ കലാ രാജുവിനെ തട്ടിക്കൊണ്ടുപോയ സംഭവം വൻ വിവാദമായിരുന്നു. എൽഡിഎഫ് ഭരിക്കുന്ന 12 അംഗ ഭരണസമിതിക്കെതിരെ 13 അംഗങ്ങൾ ഒത്തുചേർന്നതോടെ നഗരസഭാ ഭരണസമിതിയുടെ ഭൂരിപക്ഷം നഷ്ടപ്പെട്ടിരിക്കുകയാണ്. ഭൂരിപക്ഷം നഷ്ടപ്പെട്ട ഭരണസമിതി രാജിവയ്ക്കണമെന്നും നഗരസഭയിൽ നിലനിൽക്കുന്ന ഭരണ സ്തംഭനം അവസാനിപ്പിക്കണമെന്ന് ആവശ്യപ്പെട്ടാണ് യുഡിഎഫ് അംഗങ്ങൾ അവിശ്വാസ നോട്ടീസ് നൽകിയിരിക്കുന്നത്.

വിഎസിനെ അധിക്ഷേപിച്ചെന്ന് യൂത്ത് കോൺഗ്രസ്

കൊച്ചി: അന്തരിച്ച മുന്‍ മുഖ്യമന്ത്രി വി.എസ്. അച്യുതാനന്ദനെ സമൂഹമാധ്യമത്തില്‍ അധിക്ഷേപിച്ചു പോസ്റ്റിട്ട സംഭവത്തില്‍ നടന്‍ വിനായകനെതിരേ യൂത്ത് കോണ്‍ഗ്രസ് ഡിജിപിക്കു പരാതി നല്‍കി. അണികളെ പ്രകോപിപ്പിക്കുന്ന ഇത്തരം പോസ്റ്റുകള്‍ സമൂഹമാധ്യമത്തില്‍ പങ്കുവയ്ക്കുന്നത് ക്രമസമാധാനം തകര്‍ക്കാന്‍ സാധ്യതയുണ്ടെന്നും വിനായകന്‍ വിദ്വേഷം പ്രചരിപ്പിക്കുന്നത് അവസാനിപ്പിക്കാന്‍ നടപടി വേണമെന്നും യൂത്ത് കോണ്‍ഗ്രസ് എറണാകുളം ജില്ലാ പ്രസിഡന്‍റ് സിജോ ജോസഫ് ഡിജിപിക്കു നല്‍കിയ പരാതിയില്‍ ആവശ്യപ്പെട്ടു.

ഫ്ലാറ്റ് പണയ തട്ടിപ്പ് : പ്രധാനിയെ പിടികൂടാനാകാതെ അന്വേഷണസംഘം

കാക്കനാട്: ഉടമകളിൽ നിന്ന് ഫ്ലാറ്റുകൾ വാടകയ്ക്കെടുത്തശേഷം ഇവ പണയത്തിനു മറിച്ചു നൽകി ലക്ഷങ്ങള്‍ തട്ടിയ സംഘത്തിലെ പ്രധാന പ്രതിയെ പിടികൂടാനാകാതെഅന്വേഷണസംഘം. കേസിലെ ഒന്നാം പ്രതി പി.കെ. ആശ (54)യെയാണ് ഇപ്പോഴും അന്വേഷണസംഘം തെരയുന്നത്. രണ്ടാം പ്രതി മിന്‍റു കെ. മാണി (37) ഈ മാസമാദ്യവും മറ്റൊരു പ്രതി സാന്ദ്ര (24) രണ്ടു ദിവസം മുന്പും പിടിയിലായിരുന്നു. ഇവര്‍ക്കെതിരെ നിലവില്‍ വിവിധ പോലീസ് സ്റ്റേഷനുകളിലായി ഇരുപതോളം പരാതികളുണ്ടെന്നാണ് വിവരം. ആശയും സാന്ദ്രയും ചേര്‍ന്ന് വാഴക്കാല കേന്ദ്രീകരിച്ച് നടത്തിയിരുന്ന റിയല്‍ എസ്റ്റേറ്റ് കമ്പനിയുടെ പേരിലാണ് തട്ടിപ്പിന്‍റെ തുടക്കമെന്നാണ് പോലീസ് പറയുന്നത്. വാടകക്കാരെ കണ്ടുപിടിക്കുന്ന ബ്രോക്കറും കൂട്ടാളിയുമാണ് മിന്‍റു. കാക്കനാടും പരിസരപ്രദേശങ്ങളിലുമുള്ള ഫ്‌ളാറ്റുകള്‍ വാടകയ്ക്ക് എടുത്താണ് ആദ്യമായി ഈ സംഘം തട്ടിപ്പിനു തുടക്കമിട്ടത്. പ്രമുഖ റിയല്‍ എസ്റ്റേറ്റ് കമ്പനികളുടെ ഫ്‌ളാറ്റ് സമുച്ചയങ്ങൾ പലതും വാടകയ്ക്കെടുത്തും പ്രതികൾ തട്ടിപ്പ് നടത്തിയിരുന്നു. ഓണ്‍ലൈന്‍ വെബ്‌സൈറ്റുകളിലും സമൂഹമാധ്യമങ്ങളിലും പരസ്യം നല്‍കും. 11 മാസത്തേക്കാണ് പാട്ടക്കാലാവധി. ആവശ്യക്കാരുടെ 'സ്റ്റാറ്റസ്' അനുസരിച്ചാണ് പാട്ടത്തുക തീരുമാനിച്ചിരുന്നത്. ഇവരുടെ വലയിൽപെട്ട് പണം നല്‍കിയ രണ്ടു പേർ കാക്കനാട്ടെ മാണിക്കുളങ്ങര റോഡിലുള്ള ഫ്‌ളാറ്റിലെത്തിയതോടെയാണ് തട്ടിപ്പ് പുറത്തായത്. ലീസിന് എടുക്കാന്‍ ഒരാൾ 6.5 ലക്ഷവും രണ്ടാമത്തെയാൾ എട്ടു ലക്ഷം രൂപയും നല്‍കിയിരുന്നു. ഇവരിൽ ഒരാൾ കുടുംബത്തോടൊപ്പമെത്തിയപ്പോഴാണ് തട്ടിപ്പ് തിരിച്ചറിഞ്ഞത്. മുഖ്യപ്രതിയെ പിടികൂടാനുള്ള നീക്കം പോലീസിന്‍റെ ഭാഗത്തുനിന്ന് ഉണ്ടാകുന്നില്ലെന്നാണ് തടിപ്പിനിരയായവർ പറയുന്നത്.

ചാർജ് ചെയ്യുന്നതിനിടെ ഇലക്‌ട്രിക് സ്കൂട്ടറിന് തീപിടിച്ചു

നെടുമ്പാശേരി: ചാർജ് ചെയ്യുന്നതിനിടെ ഇലക്ട്രിക് സ്കൂട്ടറിന് തീ പിടിച്ചു. സ്കൂട്ടർ പൂർണമായും കത്തി നശിച്ചു. കുന്നുകര പഞ്ചായത്ത് ആറാം വാർഡ് മെമ്പറായ വി.ബി. ഷെഫീക്കിന്‍റെ വീട്ടിൽ ബുധനാഴ്ച്ച രാത്രി പത്തോടെയായിരുന്നു സംഭവം. ഷെഫീക്കിന്‍റെ പിതാവ് തെക്കെ അടുവാശേരി വല്ലേലിൽ ബാവക്കുഞ്ഞിന്‍റെ ഇലക്ട്രിക് സ്കൂട്ടറിനാണ് തീ പിടിച്ചത്. വീടിനോടു ചേർന്ന് കാർ പോർച്ചിലാണ് സ്കൂട്ടർ ചാർജ് ചെയ്യാൻ ഇട്ടിരുന്നത്. രാത്രി ഉറങ്ങാൻ കിടക്കുന്നതിന് മുന്പ് പുറത്തിറങ്ങിയപ്പോഴാണ് സ്കൂട്ടർ കത്തുന്നത് കണ്ടത്. വെള്ളമൊഴിച്ച് തീ കെടുത്താൻ ശ്രമിക്കുന്നതിനിടെ പൂർണമായും കത്തി നശിക്കുകയായിരുന്നു. പെട്ടെന്ന് കണ്ടതിനാൽ വൻ ദുരന്തം ഒഴിവായി. തൊട്ടടുത്ത് രണ്ടു ബൈക്കുകളും പാർക്ക് ചെയ്തിരുന്നു. ഇതിലേക്ക് തീ പടരുന്നതിന് മുന്പ് ശ്രദ്ധയിൽപ്പെട്ടതിനാൽ കൂടുതൽ നാശനഷ്ടങ്ങൾ ഒഴിവാക്കാനായി. ബാറ്ററിയിലെ ഷോർട്ട് സർക്യൂട്ടാണ് അപകടത്തിന് കാരണമെന്നാണ് കരുതുന്നത്.

സിപിഐ ജില്ലാ സമ്മേളനത്തിന് കോതമംഗലത്ത് തുടക്കമായി

കോതമംഗലം: സിപിഐ 25-ാം പാർട്ടി കോണ്‍ഗ്രസിന് മുന്നോടിയായുള്ള എറണാകുളം ജില്ലാ സമ്മേളനത്തിന് കോതമംഗലം കല ഓഡിറ്റോറിയത്തിൽ തുടക്കമായി. ജില്ലാ എക്സിക്യൂട്ടീവംഗമായിരുന്ന സി.എസ്. നാരായണൻ നായരുടെ കുത്തുകുഴിയിലെ സ്മൃതി മണ്ഡപത്തിൽ നിന്നും ആരംഭിച്ച ദീപശിഖ യാത്ര സംസ്ഥാന കൗണ്‍സിലംഗം ടി. രഘുവരൻ ഉദ്ഘാടനം ചെയ്തു. എഐവൈഎഫിന്‍റെയും എഐഎസ്എഫിന്‍റെയും വോളൻഡിയർമാർ ജില്ലാ സമ്മേളന നഗറിലെത്തിച്ച ദീപശിഖ സിപിഐ സംസ്ഥാന എക്സിക്യുട്ടീവംഗം കെ.കെ. അഷറഫ് ഏറ്റുവാങ്ങി ദീപം തെളിച്ചു. സംസ്ഥാന എക്സിക്യൂട്ടീവ് അംഗം കമല സദാനന്ദൻ പതാക ഉയർത്തി. തുടർന്ന് പ്രതിനിധി സമ്മേളനം സിപിഐ സംസ്ഥാന സെക്രട്ടറി ബിനോയ് വിശ്വം ഉദ്ഘാടനം ചെയ്തു. ജില്ലാ അസിസ്റ്റന്‍റ് സെക്രട്ടറി ശാന്തമ്മ പയസ്, ജില്ലാ എക്സിക്യൂട്ടീവംഗം കെ.എൻ സുഗതൻ എന്നിവർ പ്രമേയങ്ങൾ അവതരിപ്പിച്ചു. സംസ്ഥാന കൗണ്‍സിൽ അംഗം എൻ. അരുണ്‍ രാഷ്ട്രീയ റിപ്പോർട്ടും ജില്ലാ സെക്രട്ടറി കെ.എം. ദിനകരൻ പ്രവർത്തന റിപ്പോർട്ടും അവതരിപ്പിച്ചു. ദേശീയ എക്സിക്യൂട്ടീവംഗം കെ.പി. രാജേന്ദ്രൻ, മന്ത്രിമാരായ കെ. രാജൻ, ജെ. ചിഞ്ചുറാണി, അസി. സെക്രട്ടറി പി.പി. സുനീർ എംപി, സംസ്ഥാന എക്സിക്യൂട്ടീവംഗം മുല്ലക്കര രത്നാകരൻ, ജില്ലാ അസിസ്റ്റന്‍റ് സെക്രട്ടറി എൽദോ എബ്രഹാം എന്നിവർ പ്രസംഗിച്ചു. പ്രതിനിധി സമ്മേളനം ഇന്നും തുടരും. നാളെ വൈകുന്നേരം നാലിന് ചുവപ്പുസേന പരേഡും വനിതാ റാലിയും തുടർന്ന് പൊതുസമ്മേളനവും നടക്കും. മുഖ്യമന്ത്രിക്കെതിരേ സിപിഐ കോതമംഗലം: മുഖ്യമന്ത്രി പിണറായി വിജയന്‍ ആഡംബരം കുറയ്ക്കണമെന്ന് സിപിഐ. ഇന്നലെ കോതമംഗലത്ത് ആരംഭിച്ച സിപിഐ ജില്ലാ സമ്മേളനത്തിലാണ് മുഖ്യമന്ത്രിക്കെതിരെ പരാമര്‍ശമുണ്ടായത്. മുഖ്യമന്ത്രിക്ക് ലാളിത്യം വേണമെന്നും സമ്മേളനത്തില്‍ ആവശ്യമുയർന്നു.

വഴിവിളക്കുകള്‍ റെഡി : വെളിച്ചം കാത്ത് കണ്ടെയ്‌നര്‍ റോഡ്

കൊച്ചി: നീണ്ട 14 വര്‍ഷത്തെ കാത്തിരിപ്പിനൊടുവില്‍ കണ്ടെയ്‌നര്‍ ടെര്‍മിനല്‍ റോഡില്‍ രാത്രി വെളിച്ചമെത്തുന്നു. 17.2 കിലോ മീറ്റര്‍ നീളുന്ന റോഡില്‍ വഴി വിളക്കുകള്‍ സ്ഥാപിക്കുന്ന ജോലികള്‍ പൂര്‍ത്തിയായി. 7.78 കോടി രൂപ ചെലവിലാണ് കണ്ടെയ്‌നര്‍ റോഡ് പ്രകാശിക്കാനൊരുങ്ങുന്നത്. നിര്‍മാണം പൂര്‍ത്തിയായതോടെ ദേശീയപാത അഥോറിറ്റി സംസ്ഥാന വൈദ്യുതി ബോര്‍ഡില്‍ നിന്നുള്ള കണക്ഷന്‍ കാത്തിരിക്കുകയാണ്. വരുന്ന 31നകം ലഭിക്കുമെന്നാണ് പ്രതീക്ഷിക്കുന്നത്. വൈദ്യുതി ബോര്‍ഡിന്‍റെ മാനദണ്ഡങ്ങളും, സാങ്കേതിക മാര്‍ഗനിര്‍ദേശക സംവിധാനമായ ഇന്ത്യന്‍ റോഡ്‌സ് കോണ്‍ഗ്രസിന്‍റെ മാനദണ്ഡങ്ങളും പാലിച്ചാണ് തെരുവുവിളക്കുകള്‍ സഥാപിച്ചിട്ടുള്ളതെന്ന് കേന്ദ്രമന്ത്രി നിതിന്‍ ഗഡ്കരി ലോക്‌സഭയില്‍ ഹൈബി ഈഡന്‍ എംപിക്ക് ഇതുസംബന്ധിച്ച് ചോദ്യങ്ങള്‍ക്ക് മറുപടി നല്‍കി. 2011ല്‍ ഉദ്ഘാടനം ചെയ്ത റോഡ് വൈദ്യുതീകരിച്ച് വിളക്കുകള്‍ സ്ഥാപിക്കാത്തത് അപകടങ്ങള്‍ക്കും നിരവധി പേര്‍ക്ക് ജീവന്‍ നഷ്ടമാകുന്നതിനും ഇടയാക്കിയിരുന്നു. മധുര ആസ്ഥാനമായി പ്രവര്‍ത്തിക്കുന്ന ടിഡിആര്‍ കണ്‍സ്ട്രക്ഷനാണ് വഴിവിളക്കുകള്‍ സ്ഥാപിക്കുന്ന കരാര്‍ നല്‍കിയിരുന്നത്. പ്രദേശത്ത് വെളിച്ചം എത്തുന്നതോടെ സുരക്ഷിതയാത്രയും സഞ്ചാരികള്‍ക്ക് പുത്തന്‍ ഉണര്‍വുമാകുമെന്ന് ഹൈബി ഈഡന്‍ എംപി പറഞ്ഞു. കണ്ടെയ്‌നര്‍ റോഡ് നിർമിക്കുന്നതിനുള്ള ആദ്യ ഡീറ്റയില്‍ഡ് പ്രോജക്ട് റിപ്പോര്‍ട്ടില്‍ റോഡില്‍ വൈദ്യുതീകരണത്തിനായുള്ള നിര്‍ദേശം ഉണ്ടായിരുന്നില്ല. കണ്ടെയ്‌നര്‍ ലോറികള്‍ മാത്രം സഞ്ചരിക്കുന്നതിനുള്ള റോഡാണ് വിഭാവനം ചെയ്തിരുന്നത്. കൊച്ചി മെട്രോയുടെ നിര്‍മ്മാണം ആരംഭിച്ചതോടെയാണ് സാധാരണ വാഹനങ്ങളും കണ്ടെയ്‌നര്‍ റോഡിലൂടെ കടത്തിവിടാന്‍ അധികൃതര്‍ തീരുമാനിച്ചത്. ഇതോടെയാണ് റോഡില്‍ വൈദ്യുതീകരണം അത്യാവശ്യമായി വന്നത്. ആറ് വര്‍ഷം; ചെലവിട്ടത് 90.12 കോടി കഴിഞ്ഞ ആറ് വര്‍ഷത്തിനിടെ കണ്ടെയ്‌നര്‍ റോഡിലെ വിവിധ പ്രവൃത്തികള്‍ക്കായി ചെലവിട്ടത് 90.12 കോടി രൂപ. ഇതില്‍ 7.78 കോടി രൂപ വഴി വിളക്കുകള്‍ സ്ഥാപിക്കാന്‍ ചെലവഴിച്ചതാണ്. ഈ റോഡ് പരിപാലിക്കുന്നതിനും മറ്റ് പ്രവര്‍ത്തനങ്ങള്‍ക്കുമായി 18.92 കോടി രൂപയും മുളവുകാട് പഞ്ചായത്തില്‍ സര്‍വീസ് റോഡ് നിര്‍മ്മിക്കുന്നതിനായി 17.43 കോടി രൂപ, റോഡ് ബലപ്പെടുത്തല്‍ പ്രവര്‍ത്തനങ്ങള്‍ക്കായി 45.99 കോടി രൂപയും ചെലവഴിച്ചു. നീളന്‍ പാത കളമശേരിയില്‍ തുടങ്ങി വല്ലാര്‍പാടത്ത് അവസാനിക്കുന്ന 17.2 കിലോമീറ്റര്‍ നീളുന്നതാണ് കണ്ടെയ്‌നര്‍ റോഡ്. കൊച്ചിയുടെ വികസനക്കുതിപ്പിന് വേഗം കൂട്ടാന്‍ കണ്ടെയ്‌നര്‍ റോഡിന് കഴിഞ്ഞെങ്കിലും വെളിച്ചമില്ലാത്തത് ഈ വേഗത കുറച്ചിരുന്നു. നഗരത്തിന് സമാന്തരമായി പാത വന്നതോടെയാണ് യാത്രാക്കാര്‍ കൂടിയത്. കൂടാതെ ആയിരത്തിലേറെ വരുന്ന കണ്ടെയ്‌നര്‍ ലോറികളും ഈ വഴിയില്‍ സഞ്ചാരവും പാര്‍ക്കിംഗും ആരംഭിച്ചതോടെ തിരക്കു വര്‍ധിച്ചു. വെളിച്ചം ഇല്ലാത്തതിനാല്‍ റോഡരികില്‍ നിർത്തിയിട്ടിരിക്കുന്ന വലിയ ലോറികള്‍ക്ക് പിന്നില്‍ ഇടിച്ചും മറ്റും അപകടങ്ങള്‍ സംഭവിക്കുന്നത് നിത്യസംഭവമാണ്. അപകടങ്ങള്‍ക്ക് പേരുകേട്ട വഴി 2011ല്‍ ഗതാഗതത്തിനായി തുറന്നുകൊടുത്ത ശേഷം 25ല്‍ അധികം ആളുകള്‍ക്കാണ് വിവിധ അപകടങ്ങളിലായി ഇവിടെ ജീവന്‍ നഷ്ടമായത്. ഗുരുതരമായി പരിക്കേറ്റ നൂറുകണക്കിനാളുകള്‍ വേറെയും. മരണകാരണമായ അപകടങ്ങളില്‍ ഏറെയും നടന്നത് രാത്രിയിലാണ്. ഇത്രയേറെ അപകടമരണങ്ങളും അപകടങ്ങളുമുണ്ടായിട്ടും റോഡ് വൈദ്യുതീകരിക്കാത്തതില്‍ പ്രതിഷേധം ശക്തമായിരുന്നു. റോഡില്‍ വൈദ്യുതീകരണം ഉള്‍പ്പെടെയുള്ള പ്രാഥമികജോലികള്‍ പൂര്‍ത്തിയാക്കാതെ ടോള്‍ പിരിവ് ആരംഭിച്ചതും പ്രക്ഷോഭങ്ങള്‍ക്ക് വഴിവച്ചിരുന്നു. റോഡ് വൈദ്യുതീകരണത്തിനുള്ള ഉത്തരവാദിത്വം ദേശീയപാത അഥോറിറ്റി ഏറ്റെടുക്കുമെന്ന ഉറപ്പുലഭിച്ചതോടെയാണ് ടോള്‍ പിരിവും സുഗമമായത്. അപകടമരണം പതിവായതോടെ ഹൈക്കോടതി ഇടപെട്ട് പാതയോരത്തെ അനധികൃത ലോറി പാര്‍ക്കിംഗ് അടിയന്തരമായി ഒഴിപ്പിക്കണമെന്ന് നിർദേശിച്ചെങ്കിലും അത് ഇനിയും പാലിക്കപ്പെട്ടിട്ടില്ല.

വന്യമൃഗശല്യം: പുന്നേക്കാട് ഫോറസ്റ്റ് സ്റ്റേഷൻ ഉപരോധിച്ചു

കോതമംഗലം: വന്യമൃഗശല്യത്തിനെതിരെ കീരംപാറ കുട്ടന്പുഴ പഞ്ചായത്തുകളിലെ ജനപ്രതിനിധികളുടെ നേതൃത്വത്തിൽ പുന്നേക്കാട് ഫോറസ്റ്റ് സ്റ്റേഷൻ ഉപരോധിച്ചു. രണ്ട് പഞ്ചായത്തിലുൾപ്പെടുന്ന പുന്നേക്കാട്, തട്ടേക്കാട് റോഡിലും, വിവിധ പ്രദേശങ്ങളിലും നിരന്തരമായ കാട്ടാനകളുൾപ്പെടെയുള്ള വന്യമൃഗശല്യത്തിനെതിരെയായിരുന്നു പ്രതിക്ഷേധം. ആർആർടിയെ മുഴുവൻ സമയവും നിയോഗിക്കുക, ഫെൻസിംഗ് പൂർത്തീകരിക്കുക, പുന്നേക്കാട് - തട്ടേക്കാട് റോഡിൽ വഴിവിളക്കുകൾ സ്ഥാപിക്കുക. അടിക്കാട് വെട്ടുക, പ്ലാന്‍റേഷനിൽ തങ്ങുന്ന കാട്ടാനകളെ പുഴകടത്തി വനത്തിലേക്ക് മാറ്റുക തുടങ്ങിയ ആവശ്യങ്ങൾ ഉന്നയിച്ചാണ് സമരം നടത്തിയത്. കീരന്പാറ പഞ്ചായത്ത് പ്രസിഡന്‍റ് ഗോപി മുട്ടത്ത്, കുട്ടന്പുഴ പഞ്ചായത്തു പ്രസിഡന്‍റ് കാന്തി വെള്ളക്കയ്യൻ, വൈസ് പ്രസിഡന്‍റുമാരായ ബീന റോജോ, സൽമ പരീത്, പഞ്ചായത്ത് സ്ഥിരംസമിതി അധ്യക്ഷരായ കെ.എ. സിബി, ഇ.സി. റോയി, മഞ്ജു സാബു, പഞ്ചായത്തംഗങ്ങളായ മാമച്ചൻ ജോസഫ്, ജോഷി പൊട്ടയ്ക്കൽ, എൽദോസ് ബേബി, കെ.എസ്. സനൂപ്, ബേസിൽ ബേബി എന്നിവരാണ് പുന്നേക്കാട് ഫോറസ്റ്റ് ഓഫീസിനു മുന്പിൽ കുത്തിയിരുപ്പു സമരം നടത്തിയത്.

കച്ചേരിത്താഴത്തെ ബസ് കാത്തിരിപ്പു കേന്ദ്രം അപകടാവസ്ഥയിലെന്ന്

മൂവാറ്റുപുഴ: കച്ചേരിത്താഴത്തെ ബസ് കാത്തിരിപ്പു കേന്ദ്രം അപകടാവസ്ഥയിലെന്ന് പരാതി. നഗരത്തിലെത്തുന്ന നൂറ് കണക്കിന് യാത്രക്കാരുടെ ആശ്രയമായ കച്ചേരിത്താഴത്തെ ബസ് കാത്തിരിപ്പു കേന്ദ്രം നാളുകളായി തുരുന്പെടുത്ത് ഏത് സമയത്തും തകർന്ന് വീഴുന്ന അവസ്ഥയിലാണെന്ന് ചൂണ്ടികാട്ടി പൊതുപ്രവർത്തകനായ വാഴപ്പിള്ളി മുണ്ടയ്ക്കൽ എം.ജെ. ഷാജി ജില്ലാ കളക്ടർക്ക് പരാതി നൽകി. നഗരസഭയ്ക്കാണ് ഇതിന്‍റെ പരിപാലന ചുമതല. ബന്ധപ്പെട്ടവരുടെ അനാസ്ഥയെ ചൂണ്ടികാട്ടി അടിയന്തര ഇടപെടൽ ആവശ്യപ്പെട്ടാണ് ഷാജി ജില്ലാ കളക്ടർക്ക് പരാതി നൽകിയത്.

പുളിന്താനം-വെട്ടിത്തറ റോഡിലെ അപകടകരമായ മരങ്ങള്‍ വെട്ടിമാറ്റണമെന്ന് ആവശ്യം

പോത്താനിക്കാട്: സ്വകാര്യ വ്യക്തിയുടെ പുരയിടത്തില്‍ നിന്ന് റോഡിലേക്ക് ചാഞ്ഞ് അപകടകരമായി നില്‍ക്കുന്ന കൂറ്റന്‍ മരങ്ങള്‍ വെട്ടിമാറ്റാത്തത് അപകട ഭീഷണി ഉയര്‍ത്തുന്നു. പോത്താനിക്കാട് പഞ്ചായത്തിലെ പുളിന്താനം - വെട്ടിത്തറ റോഡില്‍ പുല്‍പ്ര പീടികയ്ക്കു സമീപമാണ് സ്വകാര്യ വ്യക്തിയുടെ പുരയിടത്തിലെ രണ്ടു കൂറ്റന്‍ ആഞ്ഞിലി മരങ്ങള്‍ റോഡിലേക്ക് ഏതു നിമിഷവും നിലംപൊത്താവുന്ന അവസ്ഥയില്‍ നില്‍ക്കുന്നത്. സ്കൂള്‍ ബസുകള്‍ ഉള്‍പ്പെടെ നൂറുകണക്കിന് വാഹനങ്ങളാണ് ഈ റോഡിലൂടെ സഞ്ചരിക്കുന്നത്. മഴ ശക്തമായതോടെ മരങ്ങളുടെ അടിഭാഗത്തെ മണ്ണ് റോഡിലേക്ക് ഇടിഞ്ഞ നിലയിലാണ്. സമീപത്തുകൂടി 11 കെവി ഉള്‍പ്പെടെയുള്ള വൈദ്യുതി ലൈനുകള്‍ കടന്നു പോകുന്നുണ്ട്. മാസങ്ങള്‍ക്ക് മുന്‍പുതന്നെ സമീപവാസികള്‍ പോത്താനിക്കാട് പഞ്ചായത്ത് അധികൃതര്‍ക്കും പൊതുമരാമത്ത് വകുപ്പിനും ഇത് സംബന്ധിച്ച് പരാതി നല്‍കിയിരുന്നു. എന്നാല്‍ പഞ്ചായത്ത് അധികൃതര്‍ ഒരു നടപടിയും ഇതുവരെ സ്വീകരിച്ചിട്ടില്ലെന്നും ആക്ഷേപമുണ്ട്. മരങ്ങള്‍ വെട്ടിനീക്കണമെന്ന് കാണിച്ച് പൊതുമരാമത്ത് വകുപ്പ് സ്ഥലം ഉടമയ്ക്ക് നോട്ടീസ് നല്‍കിയിരുന്നുവെങ്കിലും തുടര്‍ നടപടികളൊന്നും ഉണ്ടാവുകയോ മരങ്ങള്‍ വെട്ടിമാറ്റാന്‍ ഉടമ തയാറാവുകയോ ചെയ്യുന്നില്ലെന്നാണ് നാട്ടുകാരുടെ ആരോപണം.

സ്കൂളിനു മുന്നിൽ അപകട ഭീഷണിയുയർത്തി വൈദ്യുത പോസ്റ്റ്

പോത്താനിക്കാട്: സ്കൂളിനു മുന്നിൽ അപകട ഭീഷണിയായി ഏത് നിമിഷവും വീഴാവുന്ന അവസ്ഥയിൽ വൈദ്യുത പോസ്റ്റ്. പൈങ്ങോട്ടൂര്‍ സെന്‍റ് ജോസഫ്സ് ഹയര്‍ സെക്കന്‍ഡറി സ്കൂളിനു മുന്നിലാണ് നിലംപതിക്കാവുന്ന നിലയിൽ വൈദ്യുത പോസ്റ്റുള്ളത്. സ്കൂളിന്‍റെ മതിലിനോട് ചേര്‍ന്നുനില്‍ക്കുന്ന പോസ്റ്റ്, വൈദ്യുതി ലൈനുകളുടെയും, കേബിളുകളുടെയും ഭാരം മൂലം വളഞ്ഞ നിലയിലാണ്. കൂടാതെ പോസ്റ്റിന് താഴെയായി സ്ഥാപിച്ചിരിക്കുന്ന ഫ്യൂസ് കുട്ടികള്‍ക്കുകൂടി കൈയെത്തുന്ന ഉയരത്തിലാണുള്ളത്. ഇതും വലിയ ഭീഷണിയാണ് ഉയര്‍ത്തുന്നത്. അപകടാവസ്ഥയിലായ കോൺക്രീറ്റ് പോസ്റ്റ് മാറ്റി പകരം ഇരുമ്പ് പോസ്റ്റ് സ്ഥാപിക്കണമെന്നാണ് നാട്ടുകാരുടെ ആവശ്യം.

പിതൃപുണ്യം തേടി ആയിരങ്ങൾ ബലിതർപ്പണം നടത്തി

മൂവാറ്റുപുഴ: കർക്കടകവാവ് ദിനത്തിൽ മൂവാറ്റുപുഴയിലെ വിവിധ ക്ഷേത്രങ്ങളിൽ ഒരുക്കിയ ബലിതറകളിൽ പിതൃപുണ്യം തേടി ആയിരങ്ങൾ ബലിതർപ്പണം നടത്തി. കോരിച്ചൊരിയുന്ന മഴയിലും രാവിലെ മുതൽ ക്ഷേത്രങ്ങളിൽ വൻതിരക്കാണ് അനുഭവപ്പെട്ടത്. ഭക്തജനതിരക്ക് കണക്കിലെടുത്ത് പ്രധാന ക്ഷേത്രങ്ങളിൽ വിപുലമായ ഒരുക്കങ്ങളും നടത്തിയിരുന്നു. ശക്തമായ മഴ വാവുബലിയെ ബാധിക്കുമെന്ന ആശങ്കയുണ്ടായിരുന്നുവെങ്കിലും കിഴക്കൻ മേഖലയിൽ ഇന്നലെ മഴ മാറി നിന്നു. പുഴയും ശാന്തമായിരുന്നു. ആനിക്കാട് തിരുവുംപ്ലാവിൽ മഹാദേവ ക്ഷേത്രത്തിൽ രാവിലെ നാലു മുതൽ തീർഥക്കരയിൽ ആരംഭിച്ച ബലിതർപ്പണ ചടങ്ങുകൾക്ക് നാരായണൻ ഇളയത് മുഖ്യകാർമികത്വം വഹിച്ചു. സ്ത്രീകൾക്കും പുരുഷന്മാർക്കും പ്രത്യേകം തയാറാക്കിയ ബലിത്തറയിൽ ഒരേസമയം 500ഓളം പേർക്ക് ബലിയിടുവാനുള്ള സൗകര്യം ദേവസ്വം ഒരുക്കിയിരുന്നു. വെള്ളൂർക്കുന്നം മഹാദേവ ക്ഷേത്രത്തിനോടനുബന്ധിച്ച് ക്ഷേത്രക്കടവിലും കൈലാസ ഓഡിറ്റോറിയത്തിലുമാണ് ബലിതർപ്പണം നടന്നത്. പുലർച്ചെ 4.30 മുതലാണ് ബലിതർപ്പണം ആരംഭിച്ചത്. ഇളങ്ങവം ശ്രീസുബ്രഹ്മണ്യ സ്വാമിക്ഷേത്രത്തിൽ ആറ് മുതൽ ആരംഭിച്ച ബലി തർപ്പണത്തിന് കരിവേപ്പില്ലത്ത് രാജൻ ഇളയത് കാർമികത്വം വഹിച്ചു. ശ്രീകുമാര ഭജന ദേവസ്വം ക്ഷേത്രം, മാറാടി തൃക്ക മഹാദേവേ ക്ഷേത്രം എന്നിവിടങ്ങളിലായി ആയിരക്കണക്കിന് ആളുകളാണ് പിതൃക്കളുടെ ആത്മശാന്തിക്കായി ബലിതർപ്പണം നടത്തിയത്.

കോതമംഗലം താലൂക്ക് ആശുപത്രിയുടെ ഗേറ്റ് തകർന്നുവീണു

കോതമംഗലം: കോതമംഗലം താലൂക്ക് ആശുപത്രിയുടെ ഒപി ബ്ലോക്കിനു സമീപത്തെ ഗേറ്റ് തകർന്നുവീണു. ഇന്നലെ ഉച്ചയ്ക്കാണ് ഗേറ്റ് നിലംപൊത്തിയത്. സ്ലൈഡിംഗ് ഗേറ്റിന്‍റെ ചക്രം റെയിലിൽ നിന്നും തെന്നിമാറിയതാണ് മറിഞ്ഞുവീഴാൻ കാരണം. ഈ സമയം സമീപത്ത് ആരുമുണ്ടാകാതിരുന്നതിനാൽ അപകടമൊഴിവായി. ഒപി ബ്ലോക്കിലേക്കെത്തുന്ന ആളുകൾക്ക് മാത്രം കടന്നുപോകാൻ കഴിയുന്നവിധം ഭാഗികമായാണ് ഈ ഗേറ്റ് തുറക്കാറുണ്ടായിരുന്നത്. കൃത്യമായി അറ്റകുറ്റപണി നടത്താതിരുന്നതാണ് ഗേറ്റ് തകരാൻ കാരണമെന്ന് യൂത്ത് കോണ്‍ഗ്രസ് പ്രവർത്തകർ ആരോപിച്ചു.

പെറ്റിക്കേസ് തുക തട്ടിപ്പ് : യൂത്ത് കോൺഗ്രസ് സ്റ്റേഷൻ ഉപരോധിച്ചു

മൂവാറ്റുപുഴ: പെറ്റി കേസുകളിൽ കിട്ടുന്ന തുകയിൽ തട്ടിപ്പ് നടത്തിയ പോലീസ് ഉദ്യോഗസ്ഥർക്കെതിരെ കർശന നടപടി ആവശ്യപ്പെട്ട് യൂത്ത് കോണ്‍ഗ്രസ് മൂവാറ്റുപുഴ ടൗണ്‍ മണ്ഡലം കമ്മിറ്റിയുടെ നേതൃത്വത്തിൽ മുവാറ്റുപുഴ പോലീസ് സ്റ്റേഷനിലേക്ക് മാർച്ചും ഉപരോധവും സംഘടിപ്പിച്ചു. ജനവിശ്വാസം പിടിച്ചുനിർത്താൻ പോലീസ് വിഭാഗം ആന്തരിക ശുചിത്വം ഉറപ്പാക്കണമെന്ന് യൂത്ത് കോണ്‍ഗ്രസ് നേതാക്കൾ പറഞ്ഞു. യൂത്ത് കോണ്‍ഗ്രസ് മണ്ഡലം പ്രസിഡന്‍റ് മുഹമ്മദ് സാബിത്ത് അധ്യക്ഷത വഹിച്ചു. യൂത്ത് കോണ്‍ഗ്രസ് സംസ്ഥാന സെക്രട്ടറിമാരായ ജിന്‍റോ ടോമി, മുഹമ്മദ് റഫീക്ക്, ജെറിൻ ജേക്കബ്, സൽമാൻ ഒലിക്കൽ, മാഹിൻ അബൂബക്കർ, അമൽ എൽദോസ്, കെ.എ. അബ്ദുൾ സലാം തുടങ്ങിയവർ നേതൃത്വം നൽകി. പ്രതിഷേധത്തിനിടെ പോലീസും പ്രവർത്തകരും തമ്മിൽ ചെറിയ തോതിൽ സംഘർഷമുണ്ടായി. അനുമതിയില്ലാതെ പ്രതിഷേധം നടത്തിയെന്നുപറഞ്ഞ് പോലീസ് ഇടപെടാൻ ശ്രമിച്ചപ്പോഴാണ് വാക്കേറ്റവും തള്ളിക്കളയറ്റവും ഉണ്ടായത്. മുതിർന്ന കോണ്‍ഗ്രസ് നേതാക്കളും പോലീസ് ഉദ്യോഗസ്ഥരും ഇടപെട്ട് പ്രശ്നം അവസാനിപ്പിച്ചു. തുടർന്ന് മുവാറ്റുപുഴ ഡിവൈഎസ്പി പി.എം. ബൈജുവിന് പരാതി നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]