ADVERTISEMENT

ADVERTISEMENT

മെഡിസെപ്പിലെ അപാകത പരിഹരിക്കണം: കെജിഎൻഎ

മൂവാറ്റുപുഴ : കേരള സർക്കാർ ജീവനക്കാർക്കും പെൻഷൻകാർക്കും വേണ്ടി നടപ്പാക്കിയ ആരോഗ്യ ഇൻഷുറൻസ് പദ്ധതിയായ മെഡിസെപ്പിലെ അപാകത പരിഹരിയ്ക്കണമെന്ന് കെജിഎൻഎ മൂവാറ്റുപുഴ ഏരിയ സമ്മേളനം ആവശ്യപ്പെട്ടു. കെജിഎൻഎ സംസ്ഥാന കമ്മിറ്റിയംഗം സി.കെ സീമ സമ്മേളനം ഉദ്ഘാടനം ചെയ്തു.

ഏരിയ പ്രസിഡന്‍റ് ക്ലീറ്റസ് ജോണ്‍സ് അധ്യക്ഷത വഹിച്ചു. ഉണ്ണി ജോസ്, സ്മിത ബക്കർ, എം.എ മുഹമ്മദലി, കെ.ആർ രാജേഷ്, രോഹിത് കുമാർ, ആർ.ആർ രമ്യ, റിങ്കു പാർവതി, ഷജീന മക്കാർ, ബിനു തങ്കപ്പൻ എന്നിവർ പ്രസംഗിച്ചു. ഭാരവാഹികൾ: എം.എം ലൈല -പ്രസിഡന്‍റ്, വി.എം. റസിയ-സെക്രട്ടറി, ബിന്ദു എം. പിള്ള-ട്രഷറർ.

ADVERTISEMENT

പിറവം ടൗണിന് നടുവിൽ കക്കൂസ് മാലിന്യം തള്ളി

പിറവം: ടൗണിന്‍റെ നടുവിൽ റോഡ് സൈഡിൽ അർധരാത്രിയിൽ കക്കൂസ് മാലിന്യം തള്ളി. ഇന്നലെ രാവിലെ പുലർന്നപ്പോൾ റോഡ് സൈഡിലും, സമീപത്തെ സ്വകാര്യ വ്യക്തിയുടെ സ്ഥലത്തും മാലിന്യം നിറഞ്ഞു കിടക്കുകയായിരുന്നു. ഇന്നലെ പുലർച്ചെ മഴ പെയ്യാത്തതിനെ തുടർന്ന് മാലിന്യം ഒഴുകിപ്പോകാതെ ഇവിടെ കെട്ടിക്കിടന്നു. മാർക്കറ്റിന് സമീപം തിരക്കേറിയ മുവാറ്റുപുഴ, കൂത്താട്ടുകുളം റോഡ് സൈഡിലാണ് മാലിന്യം തള്ളിയത്. ഇവിടെ പൊളിച്ചു കളഞ്ഞ കെട്ടിടത്തിന്‍റെ തറ ഭാഗത്തേയ്ക്കാണ് പൈപ്പിലൂടെ മാലിന്യം ചൊരിഞ്ഞിരിക്കുന്നത്. മാർക്കറ്റ് ഭാഗത്തെ ഓട്ടോറിക്ഷാ സ്റ്റാൻഡും ഇവിടെയാണ് സ്ഥിതി ചെയ്യുന്നത്. രാവിലെയെത്തിയ ഓട്ടോറിക്ഷാ തൊഴിലാളികളാണ് ഇതാദ്യം കണ്ടത്. ഉടനെ നഗരസഭ അധികൃതരെ അറിയിച്ചതിനെ തുടർന്ന് ഉദ്യോഗസ്ഥരെത്തി. അർധരാത്രിയിൽ മാലിന്യവുമായി എത്തിയ ലോറി, സൈഡിൽ ചേർത്ത് നിർത്തി പുറത്തേയ്ക്ക് തള്ളുകയായിരുന്നുവെന്ന് കരുതുന്നു.

ഗോവിന്ദചാമിയുടെ ജയിൽ ചാട്ടം സർക്കാരിന്‍റെ പിടിപ്പുകേട്: ഷോണ്‍ ജോർജ്

മൂവാറ്റുപുഴ: സംസ്ഥാന സർക്കാരിന്‍റെ പിടിപ്പുകേടാണ് ഗോവിന്ദചാമി ജയിൽ ചാടാൻ ഇടയാക്കിയതെന്ന് ബിജെപി സംസ്ഥാന ഉപാധ്യക്ഷൻ ഷോണ്‍ ജോർജ്. ബിജെപി എറണാകുളം ഈസ്റ്റ് ജില്ലാ നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. കൊടും ക്രിമിനലുകൾക്ക് പോലും ജയിൽചാടാൻ അവസരം ഒരുക്കുന്നത് ജയിൽ അധികൃതർ തന്നെയാണെന്നും അദ്ദേഹം കുട്ടി ചേർത്തു. യോഗത്തിൽ ബിജെപി എറണാകുളം ഈസ്റ്റ് ജില്ലാ പ്രസിഡന്‍റ് പി.പി. സജീവ് അധ്യക്ഷത വഹിച്ചു. ജില്ലാ പ്രഭാരി എ. നാഗേഷ് മുഖ്യപ്രഭാഷണം നടത്തി. മേഖല സംഘടന സെക്രട്ടറി പത്മകുമാർ മാർഗ നിർദേശങ്ങൾ നൽകി. തദ്ദേശസ്വയംഭരണ സ്ഥാപനങ്ങളിലേക്ക് നടക്കുന്ന തെരഞ്ഞെടുപ്പിന് മുന്നോടിയായുള്ള കൗണ്ട് ഡൗണ്‍ ക്ലോക്ക് ജില്ലാ പ്രഭാരി എ. നാഗേഷ് ഉദ്ഘാടനം ചെയ്തു. ഇ.ടി നടരാജൻ, സൂരജ് ജോണ്‍, അരുണ്‍ പി. മോഹൻ, എന്നിവർ പ്രസംഗിച്ചു.

ഫുട്ബോൾ മത്സരത്തിനിടെ ആക്രമണം; നാലു കളിക്കാർക്കെതിരേ കേസ്

വാഴക്കുളം : ഫുട്ബോൾ മത്സരത്തിനിടെ പ്രദേശവാസികളുമായി കളിക്കാരുടെ വാക്കേറ്റവും ആക്രമണവും. നാല് കളിക്കാർക്കെതിരെ പോലീസ് കേസെടുത്തു. വ്യാഴാഴ്ച ഐഇഎൽടിഎസ് വിദ്യാർഥികളുടെ ഫുട്ബോൾ മത്സരത്തിനിടെ കളിക്കാരും പ്രദേശവാസികളായ ഏതാനും കാഴ്ചക്കാരുമായി തർക്കമുണ്ടായി. കളി കഴിഞ്ഞ് നാലുപേർ ആക്രമിച്ചു പരിക്കേൽപ്പിച്ചതായി പ്രദേശവാസികളായ രണ്ടു പേരാണ് വാഴക്കുളം പോലീസ് സ്റ്റേഷനിൽ പരാതി നൽകിയിട്ടുള്ളത്. പരിക്കേറ്റ ഒരു യുവാവിനെ തൊടുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവവുമായി ബന്ധപ്പെട്ട് കണ്ടാലറിയാവുന്ന നാല് പേർക്കെതിരെ വാഴക്കുളം പോലീസ് കേസ് രജിസ്റ്റർ ചെയ്തു.

നേര്യമംഗലം-ഇടുക്കി റോഡ് നിർമാണം : പ്രവേശന കവാടം മുതൽ മണിയൻപാറ വരെ വീണ്ടും അടച്ചു

കോതമംഗലം: ഇടുക്കി റോഡ് നിർമാണത്തിന്‍റെ ഭാഗമായി നേര്യമംഗലത്ത് പ്രവേശന കവാടം മുതൽ മണിയൻപാറ വരെ റോഡ് വീണ്ടും താൽക്കാലികമായി അടച്ചു. വാഹനങ്ങൾ നേര്യമംഗലം- ചെന്പൻകുഴി റോഡ് വഴിയാണു ഇടുക്കി റോഡിൽ പ്രവേശിക്കുന്നത്. ഇടുക്കി റോഡിൽ നേര്യമംഗലം വാരിക്കാട്ട് ക്ഷേത്രത്തിനു സമീപം രണ്ടു മാസം മുന്പ് മലവെള്ളപ്പാച്ചിലിൽ കലുങ്ക് തകർന്നിരുന്നു. റോഡ് അടച്ച് കലുങ്ക് പുനർനിർമിച്ച് അടുത്തിടെ തുറന്നു നൽകിയെങ്കിലും കലുങ്കിനു മുകളിൽ വെള്ളം കെട്ടി റോഡിൽ കുഴി രൂപപ്പെട്ടതു വാഹനങ്ങളെ അപകടത്തിലാക്കി. ഇപ്പോൾ ഈ ഭാഗത്തു കട്ടവിരിക്കാനുള്ള പ്രവൃത്തികൾ തുടങ്ങിയതോടെയാണ് റോഡ് വീണ്ടും അടച്ചത്. കലുങ്കിന് അടിയിലൂടെ വെള്ളം സുഗമായി ഒഴുകാനുള്ള പ്രവൃത്തികളും നടക്കുന്നുണ്ട്.

നടപ്പുറം ബൈപ്പാസിലെ വലിയകുഴി നികത്തി

കൂത്താട്ടുകുളം: നടപ്പുറം ബൈപ്പാസ് റോഡിൽ രൂപപ്പെട്ട വലിയകുഴി നികത്തി. എംസി റോഡിൽ നിന്നു ബൈപ്പാസിലേക്ക് പ്രവേശിക്കുന്ന ഭാഗത്ത് റോഡിൽ ടാർ ഇളകി രൂപപ്പെട്ട വലിയ കുഴിയാണ് നഗരസഭ അധികൃതരുടെ നേതൃത്വത്തിൽ പാറ വേസ്റ്റ് ഉപയോഗിച്ച് നികത്തിയത്. വ്യാഴാഴ്ച വൈകുന്നേരം മണ്ണിട്ട് കുഴിയടയ്ക്കാൻ ശ്രമിച്ചെങ്കിലും മണിക്കൂറുകൾകം മണ്ണിട്ട ഭാഗം ചെളിയായി മാറി. തുടർന്ന് ഇന്നലെ രാവിലെ ചെളിയുടെ മുകളിൽ പാറ വേസ്റ്റ് നിക്ഷേപിച്ച് താൽക്കാലികമായി കുഴി നകത്തുകയായിരുന്നു. എന്നാൽ വെയിൽ തെളിയുന്നതോടെ പ്രദേശം പൊടിമയമാകുമെന്ന ആശങ്കയിലാണ് വ്യാപാരികൾ. ഈ ഭാഗത്തെ ടാർ ഇളകി മാറി കുഴി രൂപപ്പെടുന്നത് പതിവാണെന്ന് നാട്ടുകാർ പറഞ്ഞു. കെഎസ്ആർടിസി, സ്വകാര്യ ബസുകൾ സ്റ്റാൻഡിലേക്ക് പോകുന്നത് ഇതുവഴിയാണ്. ഭാരം കയറ്റി വരുന്ന ടോറസ് ലോറികളും മറ്റ് സ്വകാര്യ വാഹനങ്ങളും ഇതുവഴിയാണ് പോകുന്നത്. ടാറിംഗ് അവശേഷിക്കുന്ന ഭാഗത്തുകൂടി ടൈൽ വിരിച്ചാൽ പ്രശ്നത്തിന് ശാശ്വത പരിഹാരമാകുമെന്ന് വിദഗ്ധർ പറയുന്നു.

കാറ്റിൽ മരം വീണ് ഗതാഗതം തടസപ്പെട്ടു

കോലഞ്ചേരി: മഴയോടൊപ്പമുണ്ടായ ശക്തമായ കാറ്റിൽ മഴുവന്നൂർ-പെരുവുംമുഴി റോഡിൽ തേക്ക് മരം റോഡിലേക്ക് വീണ് ഗതാഗതം തടസപ്പെട്ടു. മഴുവന്നൂർ സ്കൂളിന് സമീപം ഇന്നലെ ഉച്ചകഴിഞ്ഞ് 2.30നായിരുന്നു സംഭവം. പട്ടിമറ്റം അഗ്നിരക്ഷാസേനയിലെ എൻ.എച്ച്. അസൈനാരുടെ നേതൃതത്തിൽ സേനാംഗങ്ങളായ ഇ. സതീഷ് ചന്ദ്രൻ, ആർ.യു. റെജുമോൻ, ജെ.എം. ജയേഷ്, പി.വി. വിജീഷ് , അഖിൽ ദേവ് എന്നിവർ ചേർന്ന് മരം മുറിച്ച് മാറ്റിയാണ് ഗതാഗതം പുനസ്ഥാപിച്ചത്. ‌

മരം മറിഞ്ഞ് വൈദ്യുതിലൈൻ പൊട്ടി, ഗതാഗതം തടസപ്പെട്ടു

മൂവാറ്റുപുഴ : ശക്തമായ മഴയിലും കാറ്റിലും കന്പനിപ്പടിയിൽ മരം മറിഞ്ഞ് വൈദ്യുതി ലൈൻ പൊട്ടിവീണ് ഗതാഗതം തടസപ്പെട്ടു. കന്പനിപ്പടി - രണ്ടാർ റോഡിൽ ഇന്നലെ ഉച്ചകഴിഞ്ഞ് രണ്ടോടെയാണ് സംഭവം. മോളെകുന്നേൽ മാണിയുടെ പുരയിടത്തിലെ തേക്കുമരവും കവുങ്ങും കടപുഴകി വൈദ്യുതി കന്പിയിലേക്കു വീഴുകയായിരുന്നു. റോഡിലേയ്ക്ക് മരം വീണതിനെ തുടർന്ന് മണിക്കൂറോളം ഗതാഗതം തടസപ്പെട്ടു. തുടർന്ന് അഗ്നിശമന രക്ഷാസേനയും കെഎസ്ഇബി ഉദ്യോഗസ്ഥരും സ്ഥലത്തെത്തി മരം മുറിച്ചുനീക്കിയും മറ്റും ചെയ്ത് ഗതാഗതം പുനഃസ്ഥാപിക്കുകയായിരുന്നു. മൂവാറ്റപുഴ നഗരവികസ പ്രവർത്തനങ്ങൾ നടക്കുന്നതിനാൽ ഈ റോഡിലൂടെയാണ് കൂടുതലും വാഹനങ്ങൾ സഞ്ചരിക്കുന്നത്.

വന്യജീവി ആക്രമണം : ഫോറസ്റ്റ് സ്റ്റേഷനിലെ ജനപ്രതിനിധികളുടെ കുത്തിയിരിപ്പ് സമരം അവസാനിപ്പിച്ചു

കോതമംഗലം: രൂക്ഷമായ വന്യജീവി ആക്രമണത്തിന് അടിയന്തര പരിഹാരം ആവശ്യപ്പെട്ട് ജനപ്രതിനിധികൾ പുന്നേക്കാട് ഫോറസ്റ്റ് സ്റ്റേഷനിൽ നടത്തിയ കുത്തിയിരിപ്പ് സമരം കോതമംഗലം ഡിഎഫ്ഒ സൂരജ് ബെൻ നേരിട്ടെത്തി നടത്തിയ ചർച്ചയിൽ രേഖാമൂലം നൽകിയ ഉറപ്പിനെ തുടർന്ന് അവസാനിപ്പിച്ചു. സമരക്കാർ ആവശ്യപ്പെട്ടത് പ്രകാരം 28 മുതൽ മുടങ്ങി കിടക്കുന്ന ഫെൻസിംഗ് പുനരാരംഭിച്ച് മൂന്ന് മാസത്തിനകം പൂർത്തീകരിക്കുമെന്നും, മുഴുവൻ ആർആർടി സേവനം ഉറപ്പാക്കുമെന്നും റോഡിന്‍റെ ഇരുവശമുള്ള അടിക്കാടുകൾ മൂന്നു ദിവസത്തിനകം വെട്ടിത്തെളിക്കുമെന്നും വഴി വിളക്കുകൾ സ്ഥാപിക്കുന്നതിനും ജീവനക്കാരുടെ എണ്ണം വർധിപ്പിക്കുമെന്നും ഉറപ്പ് നൽകി. കാന്തി വെള്ളക്കയ്യൻ, ഗോപി മുട്ടത്ത്, സൽമ പരീത്, ബീന റോജോ, കെ.എ സിബി, എൽദോസ് ബേബി, മാമച്ചൻ ജോസഫ്, ജെസി സാജു, ഇ.സി റോയി, ജോഷി പൊട്ടക്കൽ, ബാബു ഏലിയാസ്, പ്രിൻസ് വർക്കി, ബിനോയ് മഞ്ഞുമേൽക്കുടി, മഞ്ജു സാബു, ബേസിൽ പുത്തയത്ത്, കെ.എസ് സനൂപ്, മേരി കുര്യാക്കോസ്, സി.ജെ എൽദോസ്, എൽദോസ് എൻ. ഡാനിയേൽ എന്നിവർ ചർച്ചയിൽ പങ്കെടുത്തു. photo: രൂക്ഷമായ വന്യജീവി ആക്രമണത്തിന് അടിയന്തര പരിഹാരം ആവശ്യപ്പെട്ട് കുട്ടന്പുഴ, കീരംപാറ പഞ്ചായത്തുകളിലെ ജനപ്രതിനിധികൾ പുന്നേക്കാട് ഫോറസ്റ്റ് സ്റ്റേഷനിൽ നടത്തിയ കുത്തിയിരിപ്പ് സമരം അവസാനിപ്പിക്കാൻ കോതമംഗലം ഡിഎഫ്ഒ സൂരജ് ബെൻ എത്തി ചർച്ച നടത്തുന്നു.

അപകട ഭീഷണിയുയർത്തി പിറവം ആശുപത്രിക്ക് മുന്നിൽ മരങ്ങൾ

പിറവം: താലൂക്ക് ആശുപത്രിക്ക് മുന്നിൽ റോഡരികിലെ തണൽ മരങ്ങൾ അപകട ഭീഷണിയുയർത്തുന്നു. മരത്തിന്‍റെ കൊന്പുകൾക്കിടയിലൂടെയാണ് വൈദ്യുതി ലൈനുകൾ കടന്നു പോകുന്നത്. നടക്കാവ് ഹൈവേയുടെ റോഡരികിലാണ് വഴിയാത്രക്കാർക്കും, ആശുപത്രിയിലെത്തുന്ന രോഗികൾക്കും, വാഹനങ്ങൾക്കും ഒരു പോലെ ഭീഷണിയുയർത്തി രണ്ട് തണൽ മരങ്ങളും. മരങ്ങളുടെ അടിഭാഗം ദ്രവിച്ചയവസ്ഥയിലാണ്. കാറ്റ് വീശുന്പോൾ മരങ്ങൾ ആടിയുലയുന്നത് ഏറെ ഭീതിയുളവാക്കുന്നു. സമീപത്തെ വ്യാപാരികൾ കെഎസ്ഇബി അധികൃതരെ അറിയിച്ചെങ്കിലും, ഇവർ വേണ്ടത്ര ഗൗരവത്തിലെടുത്തിട്ടില്ലെന്നാണ് ആക്ഷേപം. മരങ്ങളുടെ ചുവട്ടിലായി വെയ്റ്റിംഗ് ഷെഡുമുണ്ട്. സമീപത്തു തന്നെയാണ് ഓട്ടോറിക്ഷ സ്റ്റാന്‍റും. ഇതെല്ലാം കണക്കിലെടുത്ത് എത്രയും വേഗം മരങ്ങൾ വെട്ടിമാറ്റണമെന്നാവശ്യപ്പെട്ട് നാട്ടുകാർ റവന്യു, നഗരസഭ അധികൃതർക്ക് പരാതി നൽകിയിട്ടുള്ളതാണെങ്കിലും അധികൃതർ ഈ ഭാഗത്തേയ്ക്ക് തിരിഞ്ഞു നോക്കിയില്ലെന്ന ആക്ഷേപമുണ്ട്.

കടവൂർ ടൗണ്‍ പള്ളിയിൽ തിരുനാൾ 28ന്

കടവൂർ: കടവൂർ ടൗണ്‍ പള്ളിയിൽ വിശുദ്ധ അൽഫോൻസാമ്മയുടെ തിരുനാൾ 28ന് ആഘോഷിക്കും. ഇന്ന് വൈകുന്നേരം നാലിന് ജപമാല, 4.45ന് ലദീഞ്ഞ്, പരിശുദ്ധ കുർബാന, പ്രസംഗം, നൊവേന. നാളെ രാവിലെ ഏഴിന് പരിശുദ്ധ കുർബാന (സെന്‍റ് ജോർജ് പള്ളിയിൽ) വൈകുന്നേരം 4.30ന് കൊടിയേറ്റ്, ലദീഞ്ഞ്, തിരുസ്വരൂപ പ്രതിഷ്ഠ, ആഘോഷമായ തിരുനാൾ കുർബാന, , തുടർന്ന് തിരി പ്രദക്ഷിണം, ജപമാല (മൂഴി തോട് വരെ). പ്രധാന തിരുനാൾ ദിവസമായ 28ന് രാവിലെ 6.30ന് വിശുദ്ധ കുർബാന, വൈകുന്നേരം അഞ്ചിന് ലദീഞ്ഞ്, ആഘോഷകരമായ തിരുനാൾ കുർബാന. തുടർന്ന് സമാപന പ്രാർഥന, പാച്ചോർ നേർച്ച എന്നിവയാണ് തിരുനാൾ തിരുക്കർമങ്ങളെന്ന് വികാരി ഇൻ ചാർജ് ഫാ. മാത്യു വടക്കുംപാടത്ത് അറിയിച്ചു.

ഡോ. എ.പി.ജെ അബ്ദുൽ കലാം നാഷണൽ അവാർഡ് പി.ബി. സലീമിന്

മൂവാറ്റുപുഴ : പശ്ചിമബംഗാൾ സർക്കാർ സെക്രട്ടറിയും പവർ കോർപറേഷൻ സിഎംഡിയും മൂവാറ്റുപുഴ സ്വദേശിയുമായ പി.ബി. സലീമിന് ഡോ. എ.പി.ജെ അബ്ദുൽ കലാം നാഷണൽ അവാർഡ്. നാളെ വൈകുന്നേരം നാലിന് കോൽക്കത്ത ആലിയ സർവകലാശാലയിൽ നടക്കുന്ന ചടങ്ങിൽ വെസ്റ്റ് ബംഗാൾ ഗ്രാമ - നഗര വികസന മന്ത്രി ഫിർഹാദ് ഹക്കീം അവാർഡ് സമ്മാനിക്കും. പശ്ചിമ ബംഗാൾ പവർ കോർപറേഷനെ രാജ്യത്തെ മികച്ച തെർമൽ പവർ പ്ലാന്‍റാക്കി മാറ്റിയത് ഇദ്ദേഹമാണ്. 2019ൽ മൂവാറ്റുപുഴ പേഴയ്ക്കാപ്പിള്ളി പുളളിചാലിൽ പി.ബി. സലിം കോർപറേഷൻ സിഎംഡിയായി ചുമതലയേൽക്കുന്പോൾ സ്ഥാപനം നഷ്ടത്തിലായിരുന്നു. ഒറ്റ വർഷം കൊണ്ട് 102 കോടിയുടെ ലാഭമുണ്ടാക്കി മലയാളി ഉദ്യോഗസ്ഥൻ തന്‍റെ മികവ് തെളിയിച്ചത് ഏറെ ചർച്ചയായിരുന്നു. സർക്കാരിന്‍റെ ഉയർന്ന പദവികളിൽ ഇരിക്കുന്പോൾ തന്നെ സാമൂഹിക ജീവകാരുണ്യ കായിക രംഗത്ത് ഇദ്ദേഹം നടത്തുന്ന ഇടപെടലുകളും ആസൂത്രണം ചെയ്ത് നടപ്പാക്കുന്ന പദ്ധതികളും സംസ്ഥാനത്തിന് മാതൃകയായിരുന്നു. എഴുത്തുകാരിയായ ഭാര്യ ഫാത്തി സലീമിന്‍റെ നേതൃത്വത്തിൽ ഔവർ ഹെറിറ്റേജ് ഫൗണ്ടേഷനും കൽക്കട്ട കേന്ദ്രമാക്കി പ്രവർത്തിക്കുന്നുണ്ട്. മികച്ച പൊതുപ്രവർത്തകനായി തെരഞ്ഞെടുക്കപ്പെട്ട ഡെറക് ഒബ്രിയാൻ എംപിയേയും ചടങ്ങിൽ ആദരിക്കും. എപിജെ അബ്ദുൽ കലാം സ്റ്റഡി സെന്‍റർ ഡയറക്ടർ പൂവച്ചൽ സുധീർ അധ്യക്ഷത വഹിക്കും. ഡോ. അരുണ്‍ ജ്യോതി ഭിക്ഷു, സ്വാമി മഹാരാജ് ദേവഭരതാനന്ദ, ഡോ. സത്നാം സിംഗ് അഹ്ലുവാലിയ, ലോക്സഭാംഗം യൂസഫ് പത്താൻ, വെസ്റ്റ് ബംഗാൾ മൈനോറിറ്റീസ് കമ്മീഷൻ ചെയർമാൻ അഹമ്മദ് ഹസൻ, പ്രഫ. ഡോ. റഫീഖുൾ ഇസ്ലാം, പി.എം ജിഫ്രി കോയതങ്ങൾ എന്നിവർ പ്രസംഗിക്കും.

മരങ്ങൾ ഒടിഞ്ഞുവീണ് ഗതാഗതം തടസപ്പെട്ടു

തിരുമാറാടി: മേഖലയിലുണ്ടായ കനത്ത കാറ്റിലും മഴയിലും മരങ്ങൾ ഒടിഞ്ഞുവീണ് റോഡ് ഗതാഗതം തടസപ്പെട്ടു. പഞ്ചായത്തിൽ നാവോളിമറ്റം - മീൻകുന്നം റോഡിൽ ഇന്നലെ ഉച്ചകഴിഞ്ഞ് വൈദ്യുത ലൈനിന് മുകളിലേക്ക് മരം ഒടിഞ്ഞുവീഴുകയായിരുന്നു. ഒലിയപ്പുറം നടക്കാവ് ഹൈവേയിൽ തിരുമാറാടി സ്കൂളിന് സമീപത്തും വൈദ്യുതി ലൈനിന് മുകളിൽ മരം വീണതിനെ തുടർന്ന് റോഡ് ഗതാഗതം തടസപ്പെട്ടു. കൂത്താട്ടുകുളം അഗ്നിശമന രക്ഷാസേന സ്ഥലത്തെത്തിയാണ് രണ്ടിടത്തെയും മരം മുറിച്ചു നീക്കി ഗതാഗതം പുനഃസ്ഥാപിച്ചത്. വടക്കൻ പാലക്കുഴയിൽ പുതിയാമറ്റത്തിൽ ജോയിയുടെ വീടിന് മുകളിൽ മരം ഒടിഞ്ഞു വീണ മേൽക്കൂര തകർന്നു.

പെറ്റിക്കേസുകളിൽ തട്ടിപ്പ്: വനിതാ സിവിൽ പോലീസ് ഓഫീസറെ അറസ്റ്റ് ചെയ്തേക്കും

മൂവാറ്റുപുഴ : പെറ്റിക്കേസുകളിൽ പിഴയായി ലഭിച്ച തുകയിൽ 16,76,650 രൂപ തട്ടിയെടുത്ത വനിത സിവിൽ പോലീസ് ഉദ്യോഗസ്ഥയെ ഉടൻ അറസ്റ്റ് ചെയ്തേക്കും. കേസിൽ പോലീസ് അന്വേഷണം ഊർജിതമാക്കി. പോലീസ് ഉദ്യോഗസ്ഥ പ്രതിയായി പോലീസിന് നാണക്കേടുണ്ടാക്കിയ കേസിൽ പഴുതടച്ചുള്ള അന്വേഷണമാണ് പ്രത്യേക സംഘം നടത്തുന്നത്. സംഭവുമായി ബന്ധപ്പെട്ട് വാഴക്കുളം പോലീസ് സ്റ്റേഷനിലെ വനിതാ സീനിയർ സിവിൽ പോലീസ് ഉദ്യോഗസ്ഥ ശാന്തി കൃഷ്ണനെ സർവീസിൽ നിന്ന് കഴിഞ്ഞ ദിവസം സസ്പെൻഡ് ചെയ്തിരുന്നു. എന്നാൽ ഇവർ കുറ്റം നിഷേധിക്കുകയും മറ്റ് പോലീസ് ഉദ്യോഗസ്ഥരാണ് തട്ടിപ്പ് നടത്തിയതെന്ന് ആരോപിക്കുകയും ചെയ്തതോടെ ശാസ്ത്രീയ അന്വേഷണമാണ് നടത്തുന്നത്. ഉദ്യോഗസ്ഥയുടെ കൈയക്ഷരം ഉൾപ്പെടെ പരിശോധിക്കും. ഇവർ മൂവാറ്റുപുഴ ട്രാഫിക് സ്റ്റേഷനിൽ റൈറ്റർ ആയിരിക്കെയായിരുന്നു പണം കവർന്നത്. ഗതാഗത നിയമ ലംഘനത്തിന് പിഴയായി അടപ്പിച്ച തുക ബാങ്കിൽ കൃത്യമായി അടയ്ക്കാതെ രേഖകളിൽ കൃത്രിമം കാട്ടി തട്ടിയെടുത്തു എന്നാണ് കേസ്. ശാന്തി കൃഷ്ണൻ മൂവാറ്റുപുഴ ട്രാഫിക് പോലീസ് സ്റ്റേഷനിൽ നിന്ന് മാറി വാഴക്കുളം പോലീസ് സ്റ്റേഷനിൽ ഉദ്യോഗസ്ഥയായി ജോലി ചെയ്യുന്നതിനിടെയാണ് തട്ടിപ്പ് പുറത്തു വന്നത്.

പോലീസ് ഓഫീസേഴ്സ് അസോ.: ഔദ്യോഗിക നേതൃത്വത്തിന് വിജയം

ആലുവ: കേരള പോലീസ് ഓഫീസേഴ്സ് അസോസിയേഷൻ എറണാകുളം റൂറലിൽ യൂണിറ്റു തല തെരഞ്ഞെടുപ്പിൽ ഔദ്യോഗിക നേതൃത്വത്തിന് 61 സീറ്റിൽ വിജയം. 14 സീറ്റിൽ എതിർവിഭാഗം ജയിച്ചു. പത്ത് സീറ്റിൽ വനിതകൾ നേടി. 52 സീറ്റിലും ഔദ്യോഗിക വിഭാഗം പ്രതിനിധികൾ നേരത്തെ എതിരില്ലാതെ വിജയിച്ചിരുന്നു. ജില്ലാ ഭാരവാഹികളുടെ തെരഞ്ഞെടുപ്പ് 30ന് നടക്കും.

അമൃതയിൽ സമാരംഭം-2025

കൊച്ചി: അമൃത സ്കൂൾ ഓഫ് ആർട്സ്, ഹ്യുമാനിറ്റീസ് ആൻഡ് കോമേഴ്‌സിൽ ‌ പുതിയ വിദ്യാർഥികളെ വരവേറ്റു. ബ്രഹ്മസ്ഥാനം കാന്പസിൽ നടന്ന സമാരംഭം 2025 പരിപാടി സംസ്ഥാന കൃഷി വകുപ്പ് പ്രിൻസിപ്പൽ സെക്രട്ടറി, ഡോ. ബി. അശോക് ഉദ്ഘാടനം ചെയ്തു. 700-ഓളം വിദ്യാർഥികളാണ് പുതിയതായി എത്തിയത്. മാതാ അമൃതാനന്ദമയി മഠം ജനറൽ സെക്രട്ടറി സ്വാമി പൂർണാമൃതാനന്ദപുരി അനുഗ്രഹ പ്രഭാഷണം നടത്തി. ഡോ. ശാന്തികുമാർ നായർ ചടങ്ങിൽ അധ്യക്ഷത വഹിച്ചു. ഡോ. യു. കൃഷ്ണകുമാർ, ഡോ. നാരായണൻ മേനോൻ കൊമേരത്ത്, ഡോ. ശരത് മേനോൻ, ഡോ. പി. രാജശേഖർ എന്നിവർ പ്രസംഗിച്ചു.

അമല ഭവൻ: രണ്ടാംഘട്ട നിർമാണോദ്ഘാടനം നടത്തി

അങ്കമാലി: അമല ഫെല്ലോഷിപ്പിന്‍റെ നേതൃത്വത്തിൽ പ്രവർത്തിക്കുന്ന അമലഭവൻ പെയിൻ ആൻഡ് പാലിയേറ്റീവ് കെയർ യൂണിറ്റിന്‍റെ രണ്ടാം ഘട്ട നിർമാണോദ്ഘാടന പൊതുയോഗം റോജി എം. ജോൺ എംഎൽഎ ഉദ്ഘാടനം ചെയ്തു. അമല ഫെല്ലോഷിപ്പ് ദേശീയ പ്രസിഡന്‍റ് ജോർജ് കുര്യൻ പാറയ്ക്കൽ അധ്യക്ഷത വഹിച്ചു. ഏലിയാസ് മാർ അത്താനാസിയോസ് മെത്രാപ്പോലീത്ത മുഖ്യ പ്രഭാഷണം നടത്തി. അമല ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് ജോയിന്‍റ് ഡയറക്ടർ ഫാ. ഷിബു പുത്തൻ പുരയ്ക്കൽ അനുഗ്രഹ പ്രഭാഷണം നടത്തി. രണ്ടാം ഘട്ട നിർമാണത്തിന്‍റെ ശിലാസ്ഥാപനം അഡ്വ. ഷിയോ പോൾ നിർവഹിച്ചു. മുൻ മന്ത്രി അഡ്വ. ജോസ് തെറ്റയിൽ, മുൻ എംഎൽഎ പി.ജെ. ജോയ്, ജോൺ തോമസ് പാറയ്ക്കൽ തുടങ്ങിയവർ സംസാരിച്ചു.

ഹെറോയിനുമായി പിടിയിൽ

ആലുവ: പറവൂർ കെഎസ്ആർടിസി റോഡിൽ കരുമാലൂർ ആശുപത്രിപ്പടിക്ക് സമീപം എട്ടു ലക്ഷം രൂപ വില മതിക്കുന്ന ഹെറോയിനുമായി അതിഥിത്തൊഴിലാളി പിടിയിൽ. അസം നാഗാവോൺ ചില്ലങ്ങാനി സ്വദേശി റഫിക്കുൾ ഇസ്ലാമാണു (28) എക്സൈസിന്‍റെ പിടിയിലായത്. ഇന്നലെ വൈകിട്ടോടെ കരുമാലൂർ ആശുപത്രിപ്പടിക്കു സമീപം വിൽപന നടത്താനുള്ള ശ്രമത്തിനിടെയാണു പറവൂർ എക്സൈസ് സംഘം പിടികൂടിയത്. ഇയാളിൽ നിന്നു 85 ഗ്രാം ഹെറോയിനും ഒന്പതു ഗ്രാം കഞ്ചാവും കണ്ടെത്തി. കൂടുതൽ പേർ സംഭവത്തിൽ ഉൾപ്പെട്ടിട്ടുണ്ടെന്നും അന്വേഷണമാരംഭിച്ചതായും എക്സൈസ് സംഘം പറഞ്ഞു.

കോളജ് അധ്യാപികയെ ആക്രമിക്കാൻ ശ്രമം; ഭർത്താവ് കസ്റ്റഡിയിൽ

ആലുവ: കോളേജധ്യാപികയായ ഭാര്യയെ വീട്ടിൽ കയറി അക്രമിക്കാനൊരുങ്ങിയെന്ന പരാതിയിൽ ഭർത്താവിനെ ബിനാനിപുരം പൊലീസ് കസ്റ്റഡിയിലെടുത്തു. കോട്ടപ്പുറം സ്വദേശി വൈശാഖിനെയാണ് കസ്റ്റഡിയിലെടുത്തത്. അഞ്ചു വർഷം മുമ്പ് അധ്യാപികയും വൈശാഖും തമ്മിൽ പ്രണയത്തിലാകുകയും വിവാഹിതരാകുകയുമായിരുന്നു. ഇവർക്ക് രണ്ട് വയസുള്ള കുട്ടിയുണ്ട്. ലഹരിക്കടിമയായ ഭർത്താവിന്‍റെ ഉപദ്രവം സഹിക്കവയ്യാതെ ഇവർ സ്വന്തം വീട്ടിലേക്ക് താമസം മാറ്റിയിരുന്നു. ഇന്നലെ രാത്രി വൈശാഖ് ഇവരുടെ വീട്ടിലെത്തി വധഭീഷണി മുഴക്കുകയും വീടിനു നേരെ അക്രമം നടത്തിയെന്നുമാണ് പരാതി. അക്രമത്തിന്‍റെ ദൃശ്യം സഹിതം ഇവർ സാമൂഹ്യ മാധ്യമങ്ങളിൽ പ്രചരിപ്പിച്ചതോടെയാണ് പോലീസ് കേസെടുത്തത്. അധ്യാപികയിൽ നിന്നും മൊഴിയെടുത്ത ശേഷമാണ് വൈശാഖിനെ കസ്റ്റഡിയിലെടുത്തത്. കേസ് രജിസ്റ്റർ ചെയ്ത് ഇയാളെ കോടതിയിൽ ഹാജരാക്കും.

യാത്രയയപ്പു നല്‍കി

കൊച്ചി: എറണാകുളം സൗത്ത് റെയില്‍വേസ്‌റ്റേഷന്‍ ഷണ്ടിംഗ് മാസ്റ്ററായി പ്രമോഷന്‍ ലഭിച്ച ഇടപ്പള്ളി റെയില്‍വേ സ്റ്റേഷന്‍ പോയിന്‍റ് മാന്‍ മഹേഷ് മോഹനന് റെയില്‍വേ സ്ഥിരം യാത്രക്കാരുടെ കൂട്ടായ്മയായ ഗുരുവായൂര്‍ പാസഞ്ചര്‍ ഫ്രണ്ട്‌സ് അസോസിയേഷന്‍റെ നേതൃത്വത്തില്‍ യാത്രയയപ്പു നല്‍കി. ഇടപ്പള്ളി റെയില്‍വേ സ്‌റ്റേഷന്‍ സൂപ്രണ്ട് വി.പി പ്രിയന്‍റെ സാന്നിധ്യത്തില്‍ നടന്ന ചടങ്ങില്‍ ഗുരുവായൂര്‍ പാസഞ്ചര്‍ ഫ്രണ്ട്‌സ് അസോസിയേഷന്‍ പ്രസിഡന്‍റ് ജോഫി ജോസ് മഹേഷ് മോഹനന് ഉപഹാരം നല്‍കി. വിനോദ് കുമാര്‍ പൊന്നാട അണിയിച്ചു. അസോസിയേഷന്‍ സെക്രട്ടറി രാജേഷ്, ദിലീപ്, ലിന്‍റോ തുടങ്ങിയവര്‍ സംസാരിച്ചു.

തൃപ്പൂണിത്തുറയിൽ വോട്ടർപട്ടികയിൽ ക്രമക്കേടെന്ന്

തൃപ്പൂണിത്തുറ: അതിർത്തി പുനർ നിർണയത്തിന് ശേഷം, പരാതികൾ കേട്ട് പരിഹരിച്ച് കഴിഞ്ഞ 23ന് പുറത്തിറക്കിയ ഇലക്ഷൻ കമ്മീഷന്‍റെ കരട് വോട്ടർ പട്ടികയിൽ വ്യാപക ക്രമക്കേടെന്ന് ആക്ഷേപം. തൃപ്പൂണിത്തുറ റെയിൽവേ സ്റ്റേഷൻ വാർഡിൽ, പഴയ ചാത്താരി വാർഡിൽ താമസിക്കുന്ന 68 ഓളം പേരെ ഉൾപ്പെടുത്തിയിരിക്കുന്നതായി ആക്ഷേപമുണ്ട്. ഇപ്രകാരം എല്ലാ വാർഡുകളിലും ക്രമക്കേട് നടന്നിട്ടുണ്ടെന്നാണ് ആരോപണം. വോട്ടർ പട്ടികയിൽ ക്രമക്കേട് കാണിക്കുവാൻ അധികാരികൾ കൂട്ട് നിന്നുവെന്നും ഇതിനെതിരെ ചീഫ് ഇലക്ഷൻ കമ്മീഷന് പരാതി നൽകുമെന്നും കോടതിയെ സമീപിക്കുമെന്നും കോൺഗ്രസ് മണ്ഡലം പ്രസിഡന്‍റ് പി.എം. ബോബൻ അറിയിച്ചു.

മയക്കമരുന്നിനെതിരെ ഒരു ലക്ഷം പേരുടെ ഒപ്പ് ശേഖരണത്തിന് തുടക്കമായി

ഫോർട്ടുകൊച്ചി: കൊച്ചിയിൽ മയക്കുമരുന്നിനെതിരെ ഒരു ലക്ഷം പേരുടെ ഒപ്പുശേഖരിക്കുന്ന പരിപാടിക്ക് കൊച്ചി ബിഷപ് ഹൗസിൽ നിന്നും തുടക്കമായി. നമ്മൾ കൊച്ചിക്കാർ എന്ന സംഘടനയുടെ നേതൃത്വത്തിലാണ് ഒപ്പുശേഖരണം നടത്തുന്നത്. പ്രധാന മന്ത്രിക്കും സുപ്രിം കോടതി ജഡ്ജിക്കും കേരള സർക്കാരിനും നിവേദനം സമർപ്പിക്കും. ബിഷപ് ഹൗസിൽ നടന്ന ആദ്യ ഒപ്പുശേഖരണത്തിന് മോൺ. ഷൈജു പാരിയത്തുശേരി, ഫാ. മാക്സൺ കുറ്റികാട് എന്നിവർ തുടക്കം കുറിച്ചു. നമ്മൾ കൊച്ചിക്കാർ ചെയർമാൻ ജബ്ബാർ ഉപ്പാസ് അധ്യക്ഷത വഹിച്ചു. വിൻസി ബൈജു, രേണുക പ്രതീപ്, ഷാഹിത മുഹമ്മദ്‌, ക്ലീറ്റസ്, എച്ച്. സൈനുദ്ദീൻ, ജനി രവീന്ദ്രൻ, ക്ലായ് സ്റ്റീഫൻ, ബുഷ്റ ബാബു, രഹന, പ്രസാദ്, ജോൺസൻ ആന്‍റണി, എഡ്വിൻ ഫെർണാണ്ടസ് എന്നിവർ നേതൃത്വം വഹിച്ചു.

വൈദ്യുതി പോസ്റ്റ് കെഎസ്ഇബി വാഹനത്തിലേക്ക് മറിഞ്ഞു വീണു

ആലുവ: കെഎസ്ഇബി വാഹനത്തിന് മുന്നിലേക്ക് വൈദ്യുതി പോസ്റ്റ് മറിഞ്ഞു വീണു. വാഹനത്തിൽ നാല് ജീവനക്കാർ ഉണ്ടായിരുന്നെങ്കിലും ആർക്കും പരിക്കില്ല. വൈദ്യുതി ലൈനിലെ തകരാറുകൾ പരിഹരിക്കാൻ കീഴ്മാട് എത്തിയ കെഎസ്ഇബി പിക്ക് അപ് വാഹനത്തിന് മുന്നിലാണ് പോസ്റ്റ് മറിഞ്ഞുവീണത്. ഇന്നലെ ഉച്ച കഴിഞ്ഞ് രണ്ടോടെ കീഴ്മാട് ശ്രീനാരായണ ഗിരിയിൽ സേവികാ സമാജത്തിന് മുന്നിലാണ് അപകടം. വൈദ്യുതി കമ്പികളെല്ലാം പൊട്ടിപ്പോയി. ആലുവ ടൗൺ സെക്ഷൻ ഓഫീസിന് കീഴിലുള്ള നാല് കരാർ ജീവനക്കാരാണ് പിക്ക് അപ്പ് വാഹനത്തിൽ ഉണ്ടായിരുന്നത്.

ആലുവ പുറയാർ റെയിൽവേ ഗേറ്റിനുള്ളിൽ റോഡ് നിറയെ കുഴികൾ

ആലുവ: പുറയാർ റെയിൽവേ ഗേറ്റിനുള്ളിലെ ടാറിംഗ് പൊട്ടിപ്പൊളിഞ്ഞതിനാൽ അപകടം വിതച്ച് വലിയ കുഴികൾ രൂപപ്പെട്ടു. റെയിൽവേ ഗേറ്റിനുള്ളിലും പ്രവേശന ഭാഗത്തും ടാറിംഗും മെറ്റലും ഇളകിയാണ് വലിയ കുഴികൾ ഉണ്ടായിരിക്കുന്നത്. പലപ്പോഴും ഇരുചക്രവാഹന യാത്രികർ കുഴിയിൽ തെന്നി വീഴുന്നതായി പരാതിയുണ്ട്. പലരും നിസാര പരിക്കുകളോടെയാണ് രക്ഷപ്പെടുന്നത്. കുഴികൾ മൂലം റെയിൽവേ ഗേറ്റിൽ ഗതാഗതക്കുരുക്കും ഏറിയിട്ടുണ്ട്. ഗതാഗതക്കുരുക്കു മൂലം വാഹനങ്ങളുടെ നീണ്ട നിര രൂപപ്പെടുന്ന ഇവിടെ ഗേറ്റ് മുറിച്ചുകടക്കാൻ നന്നേ പ്രയാസപ്പെടുകയാണ് വാഹന യാത്രികർ. പാളത്തിനിരുവശവുമുള്ള കോൺക്രീറ്റ് സ്ലാബുകളും ഇളകിയാടുന്നതായും പരാതിയുണ്ട്. റെയിൽവേയുടെ പരിധിയിലുള്ള സ്ഥലമായതിനാൽ നാട്ടുകാർക്കും ഒന്നും ചെയ്യാൻ കഴിയാത്ത സ്ഥിതിയാണ്. റെയിൽവേ ഗേറ്റിനുള്ളിലും പ്രവേശന ഭാഗത്തുമുള്ള കുഴികൾ അടച്ച് റീടാറിംഗ് നടത്തി സുരക്ഷയൊരുക്കണമെന്ന് തുരുത്ത് സമന്വയ ഗ്രാമവേദി അധികൃതരോട് ആവശ്യപ്പെട്ടു. photo പുറയാർ റെയിൽവേ ഗേറ്റിനുള്ളിലെ കുഴികൾ.

പെരുന്പാവൂരിൽ സ്മാർട്ട് അങ്കണവാടിക്കെതിരേ വ്യാജ പ്രചാരണമെന്ന് കൗൺസിലർ

പെരുമ്പാവൂർ: ഉദ്ഘാടനത്തിനൊരുങ്ങിയ സ്മാർട്ട് അങ്കണവാടിക്കെതിരെ വ്യാജപ്രചരണമെന്ന് ആരോപണം. പെരുമ്പാവൂർ നഗരസഭാ കെഎസ്ആർടിസി ഭൂമിയിലുള്ള അങ്കണവാടി ആധുനിക സജ്ജീകരണങ്ങളോടെ നിർമാണം പൂർത്തിയാക്കുകയും ഉദ്ഘാടന തീയതി നിശ്ചയിക്കുകയും ചെയ്തതിന് ശേഷമാണ് വ്യാജ പ്രചരണങ്ങളെന്നാണ് ആരോപണം. കെഎസ്ആർടിസിയുടെ ഉടമസ്ഥതയിലുള്ള ഭൂമിയിൽ അങ്കണവാടി സ്ഥാപിക്കാനായുള്ള ശ്രമങ്ങൾക്ക് രാഷ്ട്രീയ സ്വാധീനം മൂലമുള്ള ശക്തമായ എതിർപ്പുകൾ നേരിട്ടിരുന്നു. നിരവധി ഭരണ, നിയമപര നടപടികൾക്കുശേഷമാണ് വലിയ എതിർപ്പുകൾ മറികടന്ന് ആ സ്ഥലം ലാൻഡ് ബാങ്കിൽ നിക്ഷേപിക്കാൻ സാധിച്ചത്. തുടർ പ്രവർത്തനങ്ങൾക്കായി ഹൈക്കോടതിയിൽ വരെ പോയി അനുകൂലമായ വിധി സമ്പാദിക്കേണ്ടിവന്നു. എൽദോസ് കുന്നപ്പിള്ളി എംഎൽഎ ഫണ്ടിൽ നിന്ന് അങ്കണവാടി കെട്ടിടം നിർമിക്കാൻ അനുവദിച്ച 46 ലക്ഷം രൂപക്ക് ജില്ലാ പഞ്ചായത്ത് ടെൻഡർ നടപടികൾ ആരംഭിച്ചെങ്കിലും ആദ്യ ഘട്ടത്തിൽ ആരും പ്രവൃത്തി ഏറ്റെടുക്കാൻ തയാറാകാതിരുന്നതിനാൽ വീണ്ടും തടസം നേരിട്ടു. അന്നത്തെ നഗരസഭ ചെയർമാൻ ബിജു ജോൺ ജേക്കബിന്‍റെയും വാർഡ് കൗൺസിലർ മിനി ജോഷിയുടെയും ഇടപെടലിനെ തുടർന്നാണ് നിർമാണ പ്രവർത്തനങ്ങൾ ആരംഭിച്ചത്. ഇലക്ട്രിക്കൽ വർക്ക് ഉൾപ്പെടെയുള്ള അവസാനഘട്ടങ്ങൾ നഗരസഭാ ചെയർമാൻ പോൾ പാത്തിക്കലിനന്‍റെ സഹകരണത്തോടെ പൂർത്തിയാക്കിയ കെട്ടിടത്തിന് കഴിഞ്ഞ ദിവസമാണ് വൈദ്യുത കണക്ഷനും വാട്ടർ കണക്ഷനും ലഭ്യമായത്. ഓഗസ്റ്റ് ആറിന് ഉദ്ഘാടന തിയതി പ്രഖ്യാപിച്ചതിന് പിന്നാലെയാണ് കെട്ടിടം തുറന്നു കൊടുക്കുന്നില്ല എന്ന ആരോപണവുമായി സിപിഎം നേതൃത്വം രംഗത്ത് എത്തിയിരിക്കുന്നതെന്നാണ് ആരോപണമെന്ന് വാർഡ് കൗൺസിലർ മിനി ജോഷി അറിയിച്ചു.

ഏലൂരിലെ കുടിവെള്ള ടാങ്കിന് തിങ്കളാഴ്ച ശിലയിടും

ഏലൂർ: ഏലൂർ നഗരസഭാ പരിധിയിലെ കുടിവെള്ള പ്രശ്നത്തിന് സമ്പൂർണ പരിഹാരത്തിന് മഞ്ഞുമ്മൽ കോട്ടക്കുന്നിൽ കുടിവെള്ള ഓവർഹെഡ് വാട്ടർ ടാങ്കിന്‍റെ തറക്കല്ലിടൽ ഉദ്ഘാടനം തിങ്കളാഴ്ച രാവിലെ ഒന്പതിന് ജലവിഭവ മന്ത്രി റോഷി അഗസ്റ്റിൻ നിർവഹിക്കും. മന്ത്രി പി. രാജീവ് അധ്യക്ഷത വഹിക്കും. നഗരസഭാ അമൃത് പദ്ധതിയിൽ ഉൾപ്പെടുത്തി 15 ലക്ഷം ലിറ്റർ സംഭരണശേഷിയിൽ എട്ടു കോടി എഴുപത് ലക്ഷം രൂപ ചെലവിട്ടാണ് ടാങ്ക് നിർമിക്കുന്നത്. 18 മാസം കൊണ്ട് ടാങ്കിന്‍റെ നിർമാണം പൂർത്തീകരിക്കാൻ കഴിയുമെന്നാണ് കരുതുന്നത്. ഇതോടെ ഏലൂർ നഗരസഭയിലെ കുടിവെള്ള പ്രശ്നത്തിന് സമ്പൂർണ പരിഹാരം ഉണ്ടാകുമെന്ന് ചെയർമാൻ എ.ഡി. സുജിൽ പറഞ്ഞു.

ഡെങ്കിപ്പനി, ഇൻഫ്ലൂവന്‍സ : മഴയ്ക്ക് പിന്നാലെ പനി പടരുന്നു

കൊച്ചി: മഴ വീണ്ടും കനത്തതോടെ ജില്ലയില്‍ പകര്‍ച്ചവ്യാധികളും പടരുന്നു. കഴിഞ്ഞ അഞ്ച് ദിവസത്തിനിടെ വിവിധ സര്‍ക്കാര്‍ ആശുപത്രികളില്‍ മാത്രം പനിക്ക് ചികിത്സ തേടിയത് 3,770 പേരാണ്. ഇതില്‍ 28 പേര്‍ക്ക് ഡെങ്കിപ്പനി സ്ഥിരീകരിച്ചു. ഈ ദിവസങ്ങളില്‍ 141 പേര്‍ക്ക് ഇന്‍ഫ്ലുവന്‍സയും സ്ഥിരീകരിച്ചിട്ടുണ്ട്. മഴ തുടരുന്ന സാഹചര്യത്തില്‍ പകര്‍ച്ച വ്യാധികള്‍ക്കെതിരായ ജാഗ്രത തുടരണമെന്ന് ആരോഗ്യവകുപ്പ് മുന്നറിയിപ്പ് നല്‍കുന്നു. മൂന്ന് പേര്‍ക്ക് എലിപ്പനി സ്ഥിരീകരിച്ചു. മൂന്ന് എലിപ്പനി മരണങ്ങളും റിപ്പോര്‍ട്ട് ചെയ്തിട്ടുണ്ട്. പെരുമ്പാവൂർ, മഴുവന്നൂര്‍ മേഖലകളിലാണ് മരണം. പനിക്ക് ചികിത്സ തേടിയവരില്‍ 126 പേര്‍ക്ക് ഡെങ്കിപ്പനി രോഗ ലക്ഷണങ്ങളുണ്ട്. ഹെപ്പറ്റൈറ്റിസ്-എ ബാധിച്ച് 34 പേരും, ചിക്കന്‍പോക്‌സ് ബാധിച്ച് 27 പേരും ജില്ലയില്‍ ചികിത്സയിലുണ്ട്. മങ്ങാട്ടുമുക്ക്, മഴുവന്നൂര്‍, മൂലംകുഴി, നെട്ടൂര്‍, പട്ടിമറ്റം, പൊന്നുരുന്നി, പുതുവയ്പ് എന്നിവിടങ്ങളിലാണ് ഡെങ്കു സ്ഥിരീകരിച്ചത്. രോഗ ലക്ഷണങ്ങള്‍ കണ്ടുതുടങ്ങിയാല്‍ സ്വയം ചികിത്സ ഒഴിവാക്കി ആശുപത്രിയില്‍ ഡോക്ടറുടെ സേവനം തേടണമെന്നും ആരോഗ്യവിഭാഗം അറിയിച്ചു. ജില്ലയില്‍ മഴ തുടരുന്നതിനാല്‍ വെള്ളക്കെട്ടുള്ള പ്രദേശങ്ങളില്‍ കൂടുതല്‍ ശ്രദ്ധവേണമെന്ന് ആരോഗ്യവകുപ്പ് അധികൃതര്‍ പറഞ്ഞു. വീടും പരിസരവും വൃത്തിയായി സൂക്ഷിക്കുന്നതിനൊപ്പം വ്യക്തി ശുചിത്വവും പാലിക്കണം. ഡ്രൈഡേ കൃത്യമായി ആചരിക്കുക, ഇന്‍ഡോര്‍ പ്ലാന്‍റുകള്‍ വളര്‍ത്തുന്ന സ്ഥലങ്ങളില്‍ വെള്ളം കെട്ടിനില്‍ക്കുന്നില്ലെന്ന് ഉറപ്പാക്കണം. പനി വ്യാപകമായി റിപ്പോര്‍ട്ട് ചെയ്യപ്പെട്ടുന്ന സാഹചര്യം ഉണ്ടായാല്‍ പ്രത്യേകം പനി ക്ലിനിക്കുകള്‍ തുറക്കാന്‍ പ്രാഥമികാരോഗ്യ കേന്ദ്രങ്ങള്‍ക്ക് ആരോഗ്യവകുപ്പ് നിര്‍ദേശം നല്‍കി. photo: ജില്ലയില്‍ പനി വ്യാപകമായതിന് പിന്നാലെ കളമശേരി മെഡിക്കല്‍ കോളജ് ഒപിയില്‍ ചികിത്സ തേടിയെത്തിയവരുടെ തിരക്ക്.

വാതില്‍ തുറന്നിട്ട് ബസുകളുടെ മരണപ്പാച്ചിൽ : നാല് ഡ്രൈവര്‍മാരുടെ ലൈസന്‍സ് സസ്‌പെന്‍ഡ് ചെയ്തു

കൊച്ചി: നഗരത്തില്‍ മത്സരയോട്ടവും വാതില്‍ അടയ്ക്കാതെയും സര്‍വീസ് നടത്തിയ സ്വകാര്യ ബസ് ഡ്രൈവര്‍മാര്‍ക്കെതിരെ നടപടിയുമായി മോട്ടോര്‍ വാഹനവകുപ്പ്. രവിപുരത്ത് അമിതവേഗത്തില്‍ വാഹനം ഓടിച്ച രണ്ടു സ്വകാര്യ ബസ് ഡ്രൈവര്‍മാരുടെ ലൈസന്‍സ് എറണാകുളം ആര്‍ടിഒ (എന്‍ഫോഴ്‌സ്‌മെന്‍റ്) മൂന്നുമാസത്തേക്ക് സസ്‌പെന്‍ഡ് ചെയ്തു. എറണാകുളം സിറ്റി പോലീസും ഈ ബസുകള്‍ക്കെതിരെ അപകടകരമായ ഡ്രൈവിംഗിന് നടപടി സ്വീകരിച്ചു. ഇതിനുപുറമേ നഗരത്തിൽ വാതില്‍ തുറന്നിട്ട് അപകടകരമായ രീതിയില്‍ വാഹനം ഓടിച്ച രണ്ടു ബസ് ഡ്രൈവര്‍മാരുടെ ലൈസന്‍സും സസ്‌പെന്‍ഡ് ചെയ്തു. ജില്ലയിൽ സ്വകാര്യ ബസുകളുടെ മത്സരയോട്ടവും ജീവനക്കാര്‍ തമ്മിലുള്ള വാക്കേറ്റവും സംബന്ധിച്ച് വകുപ്പ് മന്ത്രിയുടെ ഓഫീസിലും ജില്ലാ ട്രാന്‍സ്‌പോര്‍ട്ട് കമ്മീഷണര്‍ക്കും ലഭിച്ച പരാതിയുടെ അടിസ്ഥാനത്തിലായിരുന്നു നടപടി. സ്വകാര്യ ബസുകളുടെ മത്സരയോട്ടം ഒരു തരത്തിലും അനുവദിക്കുകയില്ലെന്നും ഇതിനെതിരെയുള്ള പരിശോധനകള്‍ തുടരുമെന്നും ആര്‍ടിഒ അറിയിച്ചു.

മത്സര ഓട്ടത്തിനിടെ "ഇടി'; ബസ് ഡ്രൈവര്‍ അറസ്റ്റില്‍

കൊച്ചി: മത്സര ഓട്ടത്തിനിടെ സ്വകാര്യ ബസുകള്‍ കൂട്ടിയിടിച്ച് ഡ്രൈവര്‍ക്ക് പരിക്കേറ്റ സംഭവത്തില്‍ പ്രതി അറസ്റ്റില്‍. എറണാകുളം കണയന്നൂര്‍ തേവയ്ക്കല്‍ സ്വദേശിയും നഗരത്തിലോടുന്ന സെവന്‍സ് ബസിന്‍റെ ഡ്രൈവർ സില്‍വസ്റ്റര്‍ ഹര്‍ഷ്‌ലിയാണ് പാലാരിവട്ടം പോലീസിന്‍റെ പിടിയിലായത്. സമയക്രമത്തെ ചൊല്ലിയുള്ള മത്സര ഓട്ടത്തിനിടെ ഇന്നലെ ആയിരുന്ന സംഭവം. സിവി സണ്‍സ്, സെവന്‍സ് എന്നീ സ്വകാര്യ ബസുകള്‍ പാലാരിവട്ടം ജംഗ്ഷനില്‍ നിന്നും കലൂര്‍ ഭാഗത്തേക്ക് സര്‍വീസ് നടത്തുന്നതിനിടെ സിവി സണ്‍സ് ബസിന്‍റെ മുന്‍വശത്ത് സെവന്‍സ് ബസ് ഇടിപ്പിച്ചതിനെത്തുടര്‍ന്ന് ഡ്രൈവര്‍ സീറ്റിന്‍റെ വശത്തെ ഗ്ലാസ് തകര്‍ന്ന് ഡ്രൈവറുടെ കണ്ണിന് പരിക്കേല്‍ക്കുകയായിരുന്നു. ഇടിയുടെ ആഘാതത്തില്‍ തകര്‍ന്ന ഗ്ലാസ് കഷണം ഡ്രൈവറുടെ കണ്ണില്‍ തറച്ചു. ഡ്രൈവര്‍ക്കും യാത്രക്കാര്‍ക്കും ജീവഹാനി ഉണ്ടായേക്കാവുന്ന അപകടമുണ്ടാക്കിയത് കണക്കിലെടുത്താണ് പാലാരിവട്ടം പോലീസ് കേസ് രജിസ്റ്റര്‍ ചെയ്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

എൻ. അരുണ്‍ സിപിഐ എറണാകുളം ജില്ലാ സെക്രട്ടറി

കോതമംഗലം: സിപിഐ എറണാകുളം ജില്ല സെക്രട്ടറിയായി എൻ. അരുണിനെ(41) തെരഞ്ഞെടുത്തു. കോതമംഗലം കല ഓഡിറ്റോറിയത്തിൽ നടന്ന എറണാകുളം ജില്ലാ സമ്മേളനം സിപിഐ എറണാകുളം ജില്ലാ കൗണ്‍സിൽ അംഗങ്ങളായി 51 പേരെയും 33 സംസ്ഥാന സമ്മേളന പ്രതിനിധികളെയും തെരഞ്ഞെടുത്തു. എഐവൈഎഫ് സംസ്ഥാന പ്രസിഡന്‍റ്, സിപിഐ സംസ്ഥാന കൗണ്‍സിൽ അംഗം, കേരള ചലച്ചിത്രഅക്കാദമി അംഗം എന്നീ നിലകളിൽ പ്രവർത്തിച്ചു വരികയായിരുന്നു അരുൺ. കേരള ലോ അക്കാദമിയിൽ നിന്ന് നിയമ ബിരുദവും ഇന്ദിരാഗാന്ധി യൂണിവേഴ്സിറ്റിയിൽ നിന്ന് മാസ് കമ്യൂണിക്കേഷനിൽ ബിരുദാനന്തര ബിരുദവും കരസ്ഥമാക്കിയിട്ടുണ്ട്. മൂവാറ്റുപുഴ തൃക്കളത്തൂർ പുതുശേരിൽ പി.കെ നീലകണ്ഠൻ നായർ - സുശീല ദന്പതികളുടെ മകനാണ്. അധ്യാപികയായ ശാരിയാണ് അരുണിന്‍റെ ഭാര്യ. മകൻ : അധ്യുത് (വിദ്യാർഥി). എഐഎസ്എഫ് സംസ്ഥാന പ്രസിഡന്‍റ്, ദേശീയ സെക്രട്ടറിയേറ്റംഗം, എഐവൈഎഫ് ജില്ലാ സെക്രട്ടറി, ജില്ലാ പഞ്ചായത്തംഗം എന്നീ നിലകളിലും അരുണ്‍ പ്രവർത്തിച്ചു. 2017ൽ ഇന്ത്യയെ പ്രതിനിധീകരിച്ച് ലോക യുവജനോത്സവത്തിൽ പങ്കെടുത്തു. ഏഴ് ഡോക്യുമെന്‍ററികളും ടെലിഫിലിമുകളും എഴുതി സംവിധാനം ചെയ്തു. നിരവധി അവാർഡുകൾ നേടിയ വിദേശ ചലച്ചിത്രമേളകളിൽ ഉൾപ്പെടെ അംഗീകാരങ്ങൾ നേടിയ ’അവകാശികൾ’ എന്ന സിനിമയുടെ രചയിതാവും സംവിധായകനുമാണ് അരുണ്‍. നിരവധി നാടകങ്ങൾ സംവിധാനം ചെയ്യുകയും എഴുതുകയും ചെയ്തിട്ടുണ്ട്.

ജില്ലയില്‍ വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധി

കൊച്ചി: ശക്തമായ കാറ്റും മഴയും കണക്കിലെടുത്ത് എറണാകുളം ജില്ലയില്‍ ഓറഞ്ച് അലര്‍ട്ട് പ്രഖ്യാപിച്ച സാഹചര്യത്തില്‍ പ്രഫഷണല്‍ കോളജുകള്‍ ഉള്‍പ്പെടെ എല്ലാ വിദ്യാഭ്യാസ സ്ഥാപനങ്ങള്‍ക്കും ഇന്ന് ജില്ലാ കളക്ടര്‍ എന്‍.എസ്.കെ. ഉമേഷ് അവധി പ്രഖ്യാപിച്ചു. അങ്കണവാടികള്‍ക്കും ട്യൂഷന്‍ സെന്‍ററുകള്‍ക്കും അവധി ബാധകമാണ്. മേല്‍ അവധി മൂലം നഷ്ടപ്പെടുന്ന പഠന സമയം ക്രമീകരിക്കുന്നതിന് ബന്ധപ്പെട്ട വിദ്യാഭ്യാസ സ്ഥാപന മേധാവികള്‍ നടപടികള്‍ സ്വീകരിക്കണമെന്നും കളക്ടർ അറിയിച്ചു.

സിപിഐ ജില്ലാ സമ്മേളനത്തിന് ഇന്ന് സമാപനം

കോതമംഗലം: സിപിഐ ജില്ലാ സമ്മേളനത്തിന് ഇന്ന് സമാപനം. വൈകുന്നേരം നാലിന് കോതമംഗലം മാർ ബേസിൽ സ്റ്റേഡിയത്തിൽ നിന്നും ചുവപ്പുസേന പരേഡ്, വനിത റാലി. ചെങ്കൊടികളേന്തിയ ആയിരക്കണക്കിന് പ്രവർത്തകരും ചുമപ്പ് തൊപ്പി ധരിച്ചവരും പ്രകടനത്തിന് അകന്പടിയാകും. നിശ്ചല ദൃശ്യങ്ങൾ, വാദ്യമേളങ്ങൾ എന്നിവ ജാഥയിലുണ്ടാകും. നഗരം ചുറ്റി തങ്കളം ബസ് സ്റ്റാൻഡ് മൈതാനിയിൽ പ്രകടനം എത്തിച്ചേരും. തുടർന്ന് മന്ത്രി കെ. രാജൻ പൊതുസമ്മേളനം ഉദ്ഘാടനം ചെയ്യും. സംസ്ഥാന എക്സീക്യൂട്ടീവംഗങ്ങളായ കമല സദാനന്ദൻ, കെ.കെ അഷറഫ്, സ്വാഗത സംഘം ചെയർമാൻ കെ.എം ദിനകരൻ, ജനറൽ കണ്‍വീനർ ഇ.കെ ശിവൻ, ട്രഷറർ പി.റ്റി ബെന്നി എന്നിവർ പ്രസംഗിക്കും. പൊതുസമ്മേളനത്തിന്‍റെ ഭാഗമായി നൃത്ത ശില്പം, ഫ്ളാഷ് മോബ്, നാടൻ പാട്ട്, നാടോടി നൃത്തം, കൈകൊട്ടിക്കളി എന്നീ കലാപരിപാടികളും നടക്കും. ഇന്നലെ മന്ത്രി ജെ. ചിഞ്ചു റാണി പ്രതിനിധി സമ്മേളനം ഉദ്ഘാടനം ചെയ്തു. സംസ്ഥാന എക്സിക്യൂട്ടീവംഗം കെ.പി. രാജേന്ദ്രൻ, മന്ത്രി കെ. രാജൻ, പി.പി. സുനീർ എംപി, സംസ്ഥാന എക്സിക്യൂട്ടീവ് അംഗങ്ങളായ മുല്ലക്കര രത്നാകരൻ, കെ.ആർ. ചന്ദ്രമോഹൻ, ആർ. രാജേന്ദ്രൻ, സംസ്ഥാന കൗണ്‍സിൽ അംഗങ്ങളായ ടി. രഘുവരൻ, എൻ. അരുണ്‍, പി.കെ. രാജേഷ്, ബാബു പോൾ, ജില്ലാ അസിസ്റ്റന്‍റ് സെക്രട്ടറിമാരായ എൽദോ ഏബ്രഹാം, ശാന്തമ്മ പയസ് എന്നിവർ പ്രസംഗിച്ചു. മത്സ്യമേഖലയെ സംരക്ഷിക്കാൻ പദ്ധതികൾ വേണമെന്ന് സിപിഐ കോതമംഗലം : കേരളത്തിന്‍റെ മത്സ്യമേഖലയെ സംരക്ഷിക്കാൻ പദ്ധതികൾ ആവിഷ്കരിക്കണമെന്ന് സിപിഐ ജില്ലാ സമ്മേളനം പ്രമേയത്തിലൂടെ ആവശ്യപ്പെട്ടു. ഇന്ത്യയുടെ ആകെ വിദേശനാണ്യ ലഭ്യതയുടെ 20 ശതമാനവും കേരളത്തിൽ നിന്നുള്ള സമുദ്രോല്പന്ന കയറ്റുമതിയിൽ നിന്ന് ലഭിക്കുന്നതാണ്. കേന്ദ്രസർക്കാർ നടപ്പാക്കുന്ന ഇക്കണോമിയുടെ ഭാഗമായി കേരളതീരം എന്നന്നേക്കുമായി മത്സ്യത്തൊഴിലാളികൾ അടക്കം തീരദേശവാസികൾക്കും അന്യമാകാൻ പോകുന്നുവെന്ന് സമ്മേളനം ആശങ്ക പ്രകടിപ്പിച്ചു. അതുകൊണ്ടുതന്നെ എല്ലാ ശക്തിയും സംഭരിച്ച് കേരളീയ സമൂഹം ഇതിനെ എതിർത്ത് പരാജയപ്പെടുത്തേണ്ടതുണ്ടെന്നും സിപിഐ എറണാകുളം ജില്ലാ സമ്മേളനം ആവശ്യപ്പെട്ടു.

ട്രോളിംഗ് നിരോധനം കഴിയാൻ ദിവസങ്ങൾ മാത്രം; കടലിലേക്ക് കണ്ണുംനട്ട് യാനങ്ങൾ

ഫോർട്ടുകൊച്ചി: ട്രോളിംഗ് നിരോധനം അവസാനിക്കാൻ ദിവസങ്ങൾ മാത്രം ബാക്കി നിൽക്കേ മത്സ്യബന്ധനത്തിന് കടലിൽ പോകാനുള്ള ഒരുക്കത്തിലാണ് യാനങ്ങൾ. 52 ദിവസം നീണ്ടുനിന്ന നിരോധനം 31ന് അർധരാത്രിയോടെ തീരും. തുടർന്ന് ബോട്ടുകൾക്ക് കടലിൽഇറങ്ങാം. പുത്തൻ പ്രതീക്ഷയോടെയാണ് തൊഴിലാളികൾ ഹാർബറുകളിൽ നിന്ന് മത്സ്യബന്ധനത്തിനായി ഒരുങ്ങുന്നത്. ജില്ലയിൽ 700 ട്രോളിംഗ് ബോട്ടുകൾ, 75 പെർസിൻ, 300 ചൂണ്ട ബോട്ടുകൾ എന്നിവയാണ് കടലിലേക്ക് പോകുന്നത്. അടച്ചിട്ട ഡീസൽ പമ്പുകളും ഐസ് ഫാക്ടറികളും ഉടൻ സജീവമാകും. ട്രോളിംഗ് നിരോധനം തുടങ്ങിയപ്പോൾ അറ്റകുറ്റപ്പണികൾക്കായി കൊണ്ടുപോയ വലകളുടെ പണികള്‍ തീര്‍ത്ത് തിരികെ എത്തിക്കുന്നതിനുള്ള ജോലികളും തകൃതിയായി നടക്കുന്നു. കുളച്ചൽ, തൂത്തൂർ, നാഗപട്ടണം അടക്കമുള്ള സ്ഥലങ്ങളിൽ നിന്നുള്ള തൊഴിലാളികള്‍ക്ക് പുറമേ ഇതര സംസ്ഥാനങ്ങളിൽ നിന്നുള്ള തൊഴിലാളികളും എത്തുന്നതോടെ ഹാർബറുകളിൽ ഉത്സവാന്തരീക്ഷമാകും. മത്സ്യ ചാകര ഉണ്ടാകുമെന്ന പ്രതീക്ഷയയിലാണ് തൊഴിലാളികൾ. ബോട്ടിന്‍റെ അറ്റകുറ്റപ്പണികൾക്കായി ലക്ഷങ്ങളാണ് ബോട്ടുടമകൾ ചെലവഴിച്ചത്. അതേസമയം നിരോധനം 45 ദിവസം പിന്നിട്ടിട്ടും പരമ്പരാഗതക്കാർ കടലമ്മയുടെ കനിവ് ലഭിക്കാത്ത നിരാശയിലാണ്ചെറുതും വലുതുമായ 6000ത്തിലെറെ പരമ്പരാഗത വള്ളങ്ങളാണ് കേരള തീരത്ത് പ്രവർത്തിക്കുന്നതെന്നാണ് കണക്ക്. തീരക്കടലിൽ നിന്ന് മികച്ച മത്സ്യയിനങ്ങൾ അകന്നു മാറിയതായാണ് പരമ്പരാഗത മത്സ്യത്തൊഴിലാളികൾ പറയുന്നത്. മത്സ്യങ്ങളുടെ ഉയർന്ന വിലയിലും കാര്യമായ നേട്ടം കൊയ്യാൻ കഴിയാത്ത സാഹചര്യമാണ് തീരദേശ പരമ്പരാഗത മത്സ്യത്തൊഴിലാളികൾക്കെന്ന് സംഘടനകളും ചൂണ്ടിക്കാട്ടുന്നു.

കളമശേരിയിൽ നിന്ന് ഇരുമ്പുപാളങ്ങള്‍ കടത്തി; നാലു പേര്‍ അറസ്റ്റില്‍

കൊച്ചി: റെയില്‍വേയുടെ പഴയ ഇരുമ്പുപാളങ്ങള്‍ മോഷ്ടിച്ച സംഭവത്തില്‍ നാലുപേരെ ആര്‍പിഎഫ് അറസ്റ്റ് ചെയ്തു. ആലുവ മുപ്പത്തടം സ്വദേശി ആല്‍ത്താഫ് കെ. ആഷ്‌റഫ്, ആക്രി വ്യാപരിയായ കരിമുകള്‍ സ്വദേശി, കോല്‍ക്കത്ത സ്വദേശി ഹൊസൈന്‍ ജാമാദര്‍ (28), പശ്ചിമബംഗാള്‍ മൂര്‍ഷിദാബാദ് സ്വദേശി ഇക്ബാല്‍ ഷേഖ് (33) എന്നിവരാണ് അറസ്റ്റിലായത്. ഹൊസൈന്‍ നേരത്തെയും മോഷണക്കേസുകളില്‍ അറസ്റ്റിലായിട്ടുണ്ട്. കളമശേരി റെയില്‍വേ സ്റ്റേഷന്‍ പരിസരത്ത് നിന്നാണ് ഇളക്കിയിട്ടിരുന്ന പാളങ്ങള്‍ കടത്തിക്കൊണ്ടുപോയത്. കവർച്ചയ്ക്ക് ഉപയോഗിച്ചത് അൽത്താഫിന്‍റെ വാഹനമാണ്. കുപ്പിവെള്ള വിതരണ കമ്പനിയിലെ ജീവനക്കാരനായ ഹൊസൈന്‍ ജോലിക്കിടയില്‍ കണ്ടുവയ്ക്കുന്ന സാധനങ്ങള്‍ രാത്രി ഇക്ബാല്‍ ഷേഖിന്‍റെയും അല്‍ത്താഫിന്‍റെയും സഹായത്തോടെ കടത്തുകയാണ് ചെയ്തിരുന്നത്. കളമശേരി റെയില്‍വേ സ്റ്റേഷന്‍ മാസ്റ്റര്‍ നല്‍കിയ പരാതിയില്‍ ആര്‍പിഎഫ് സംഭവത്തില്‍ കേസെടുത്തിരുന്നു. പരിസരത്തെ സിസി ടിവി കാമറകള്‍ കേന്ദ്രീകരിച്ച് നടത്തിയ അന്വേഷണത്തിലാണ് പ്രതികള്‍ കുടുങ്ങിയത്. മോഷ്ടിച്ച സാധനങ്ങള്‍ അമ്പലമുകള്‍ ഭാഗത്തെ ആക്രിക്കടയില്‍ മറിച്ചു വിറ്റതായി പ്രതികള്‍ മൊഴി നല്‍കി. ഇതേത്തുടര്‍ന്ന് ആര്‍പിഎഫ് സംഘം ഇവിടെയെത്തി സാധനങ്ങള്‍ കസ്റ്റഡിയിലെടുത്തു. ആക്രി വ്യാപാരിക്ക് മോഷണവുമായി നേരിട്ട് പങ്കില്ലെന്നാണ് പ്രാഥമിക നിഗമനം. കോടതിയില്‍ ഹാജരാക്കിയ ഹൊസൈന്‍ ജാമാദര്‍, ഇക്ബാല്‍ ഷേഖ് എന്നിവരെ റിമാന്‍ഡ് ചെയ്തു.

ശ്രീഹരി സുകേഷിന്‍റെ മൃതദേഹം ഇന്ന് നാട്ടിലെത്തും

തൃപ്പൂണിത്തുറ: കാനഡയിൽ പരിശീലന പറക്കലിനിടിടെ വിമാനാപകടത്തിൽ മരിച്ച തൃപ്പൂണിത്തുറ സ്റ്റാച്ച്യു ജംഗ്ഷനടുത്ത് കൃഷ്ണാ എൻക്ലേവിൽ ചന്ദ്രകാന്തത്തിൽ ശ്രീഹരി സുകേഷിന്‍റെ (23) മൃതദേഹം ഇന്നു നാട്ടിലെത്തും. രാവിലെ നെടുന്പാശേരിയിലെത്തുന്ന മൃതദേഹം തൃപ്പൂണിത്തുറയിലെ വസതിയിൽ ഉച്ചയ്ക്ക് 12 മുതൽ വൈകിട്ട് നാലു വരെ പൊതുദർശനത്തിന് വയ്ക്കും. തുടർന്ന് തൃപ്പൂണിത്തുറ പൊതുശ്മശാനത്തിൽ സംസ്കാരം നടത്തും. സെൻട്രൽ ബാങ്ക് ഉദ്യോഗസ്ഥനായ സുകേഷിന്‍റെയും യുഎസ്ടി ഗ്ലോബൽ ഉദ്യോഗസ്ഥ ദീപയുടെയും മകനായ ശ്രീഹരി കഴിഞ്ഞ എട്ടിന് കാനഡയിലെ മാനിടോബയിൽ സ്റ്റെൻബാക് സൗത്ത് എയർപോർട്ടിനടുത്തുണ്ടായ അപകടത്തിലാണ് മരിച്ചത്. പരിശീലനത്തിനിടെ ശ്രീഹരിയുടെ വിമാനവും സഹപാഠിയുടെ വിമാനവും ആകാശത്ത് വച്ച് കൂട്ടിയിടിച്ച് തീപിടിച്ച് തകർന്നു വീഴുകയായിരുന്നു. സ്വകാര്യ പൈലറ്റ് ലൈസൻസ് നേടിയ ശ്രീഹരി കമേഴ്സ്യൽ ലൈസൻസിനുള്ള പരിശീലനത്തിലായിരുന്നു.

ഒന്നാം ക്ലാസ് വിദ്യാർഥിക്ക് മസ്തിഷ്ക ജ്വരം; സ്കൂൾ അടച്ചു

മൂവാറ്റുപുഴ: ഒന്നാം ക്ലാസ് വിദ്യാർഥിക്ക് മസ്തിഷ്ക ജ്വരം സ്ഥിരീകരിച്ചു. മുൻകരുതലിന്‍റെ ഭാഗമായി സ്കൂൾ അടച്ചു. സ്കൂളിൽ ആരോഗ്യ വിഭാഗത്തിന്‍റെ നേതൃത്വത്തിൽ പരിശോധന നടത്തിയെങ്കിലും മറ്റ് കുട്ടികൾക്ക് രോഗബാധയുടെ ലക്ഷണങ്ങൾ കണ്ടെത്താൻ കഴിഞ്ഞിട്ടില്ല. പേഴയ്ക്കാപ്പിള്ളി അറഫ സ്കൂളിലെ വിദ്യാർഥിക്കാണ് രോഗം സ്ഥിരീകരിച്ചത്. തുടർന്നാണ് പായിപ്ര പഞ്ചായത്തിൽ നിന്നുള്ള ആരോഗ്യ വിഭാഗം ഉദ്യോഗസ്ഥർ സ്കൂളിലെത്തി പരിശോധന നടത്തിയത്. മുൻകരുതലിന്‍റെ ഭാഗമായാണ് സ്കൂൾ അടച്ചിടാൻ നിർദേശം നൽകിയത്.

കൂത്താട്ടുകുളം നഗരസഭയിൽ വീണ്ടും അവിശ്വാസ പ്രമേയം

കൂത്താട്ടുകുളം: കൂത്താട്ടുകുളം നഗരസഭയിൽ വീണ്ടും അവിശ്വാസ പ്രമേയം. നഗരസഭാ ചെയർപേഴ്സൺ വിജയാ ശിവൻ, വൈസ് ചെയർമാൻ സണ്ണി കുര്യാക്കോസ് എന്നിവർക്ക് എതിരെയാണ് യുഡിഎഫ് അവിശ്വാസ നേട്ടീസ് നൽകിയത്. ഓഗസ്റ്റ് അഞ്ചിനാണ് പ്രമേയം ചർച്ച ചെയ്യുക. ആറുമാസം മുൻപ് നൽകിയ അവിശ്വാസ പ്രമേയത്തിന്മേൽ ചർച്ച നടക്കാനിരിക്കെ കൗൺസിലർ കലാ രാജുവിനെ തട്ടിക്കൊണ്ടുപോയ സംഭവം വൻ വിവാദമായിരുന്നു. എൽഡിഎഫ് ഭരിക്കുന്ന 12 അംഗ ഭരണസമിതിക്കെതിരെ 13 അംഗങ്ങൾ ഒത്തുചേർന്നതോടെ നഗരസഭാ ഭരണസമിതിയുടെ ഭൂരിപക്ഷം നഷ്ടപ്പെട്ടിരിക്കുകയാണ്. ഭൂരിപക്ഷം നഷ്ടപ്പെട്ട ഭരണസമിതി രാജിവയ്ക്കണമെന്നും നഗരസഭയിൽ നിലനിൽക്കുന്ന ഭരണ സ്തംഭനം അവസാനിപ്പിക്കണമെന്ന് ആവശ്യപ്പെട്ടാണ് യുഡിഎഫ് അംഗങ്ങൾ അവിശ്വാസ നോട്ടീസ് നൽകിയിരിക്കുന്നത്.

വിഎസിനെ അധിക്ഷേപിച്ചെന്ന് യൂത്ത് കോൺഗ്രസ്

കൊച്ചി: അന്തരിച്ച മുന്‍ മുഖ്യമന്ത്രി വി.എസ്. അച്യുതാനന്ദനെ സമൂഹമാധ്യമത്തില്‍ അധിക്ഷേപിച്ചു പോസ്റ്റിട്ട സംഭവത്തില്‍ നടന്‍ വിനായകനെതിരേ യൂത്ത് കോണ്‍ഗ്രസ് ഡിജിപിക്കു പരാതി നല്‍കി. അണികളെ പ്രകോപിപ്പിക്കുന്ന ഇത്തരം പോസ്റ്റുകള്‍ സമൂഹമാധ്യമത്തില്‍ പങ്കുവയ്ക്കുന്നത് ക്രമസമാധാനം തകര്‍ക്കാന്‍ സാധ്യതയുണ്ടെന്നും വിനായകന്‍ വിദ്വേഷം പ്രചരിപ്പിക്കുന്നത് അവസാനിപ്പിക്കാന്‍ നടപടി വേണമെന്നും യൂത്ത് കോണ്‍ഗ്രസ് എറണാകുളം ജില്ലാ പ്രസിഡന്‍റ് സിജോ ജോസഫ് ഡിജിപിക്കു നല്‍കിയ പരാതിയില്‍ ആവശ്യപ്പെട്ടു.

ഫ്ലാറ്റ് പണയ തട്ടിപ്പ് : പ്രധാനിയെ പിടികൂടാനാകാതെ അന്വേഷണസംഘം

കാക്കനാട്: ഉടമകളിൽ നിന്ന് ഫ്ലാറ്റുകൾ വാടകയ്ക്കെടുത്തശേഷം ഇവ പണയത്തിനു മറിച്ചു നൽകി ലക്ഷങ്ങള്‍ തട്ടിയ സംഘത്തിലെ പ്രധാന പ്രതിയെ പിടികൂടാനാകാതെഅന്വേഷണസംഘം. കേസിലെ ഒന്നാം പ്രതി പി.കെ. ആശ (54)യെയാണ് ഇപ്പോഴും അന്വേഷണസംഘം തെരയുന്നത്. രണ്ടാം പ്രതി മിന്‍റു കെ. മാണി (37) ഈ മാസമാദ്യവും മറ്റൊരു പ്രതി സാന്ദ്ര (24) രണ്ടു ദിവസം മുന്പും പിടിയിലായിരുന്നു. ഇവര്‍ക്കെതിരെ നിലവില്‍ വിവിധ പോലീസ് സ്റ്റേഷനുകളിലായി ഇരുപതോളം പരാതികളുണ്ടെന്നാണ് വിവരം. ആശയും സാന്ദ്രയും ചേര്‍ന്ന് വാഴക്കാല കേന്ദ്രീകരിച്ച് നടത്തിയിരുന്ന റിയല്‍ എസ്റ്റേറ്റ് കമ്പനിയുടെ പേരിലാണ് തട്ടിപ്പിന്‍റെ തുടക്കമെന്നാണ് പോലീസ് പറയുന്നത്. വാടകക്കാരെ കണ്ടുപിടിക്കുന്ന ബ്രോക്കറും കൂട്ടാളിയുമാണ് മിന്‍റു. കാക്കനാടും പരിസരപ്രദേശങ്ങളിലുമുള്ള ഫ്‌ളാറ്റുകള്‍ വാടകയ്ക്ക് എടുത്താണ് ആദ്യമായി ഈ സംഘം തട്ടിപ്പിനു തുടക്കമിട്ടത്. പ്രമുഖ റിയല്‍ എസ്റ്റേറ്റ് കമ്പനികളുടെ ഫ്‌ളാറ്റ് സമുച്ചയങ്ങൾ പലതും വാടകയ്ക്കെടുത്തും പ്രതികൾ തട്ടിപ്പ് നടത്തിയിരുന്നു. ഓണ്‍ലൈന്‍ വെബ്‌സൈറ്റുകളിലും സമൂഹമാധ്യമങ്ങളിലും പരസ്യം നല്‍കും. 11 മാസത്തേക്കാണ് പാട്ടക്കാലാവധി. ആവശ്യക്കാരുടെ 'സ്റ്റാറ്റസ്' അനുസരിച്ചാണ് പാട്ടത്തുക തീരുമാനിച്ചിരുന്നത്. ഇവരുടെ വലയിൽപെട്ട് പണം നല്‍കിയ രണ്ടു പേർ കാക്കനാട്ടെ മാണിക്കുളങ്ങര റോഡിലുള്ള ഫ്‌ളാറ്റിലെത്തിയതോടെയാണ് തട്ടിപ്പ് പുറത്തായത്. ലീസിന് എടുക്കാന്‍ ഒരാൾ 6.5 ലക്ഷവും രണ്ടാമത്തെയാൾ എട്ടു ലക്ഷം രൂപയും നല്‍കിയിരുന്നു. ഇവരിൽ ഒരാൾ കുടുംബത്തോടൊപ്പമെത്തിയപ്പോഴാണ് തട്ടിപ്പ് തിരിച്ചറിഞ്ഞത്. മുഖ്യപ്രതിയെ പിടികൂടാനുള്ള നീക്കം പോലീസിന്‍റെ ഭാഗത്തുനിന്ന് ഉണ്ടാകുന്നില്ലെന്നാണ് തടിപ്പിനിരയായവർ പറയുന്നത്.

ചാർജ് ചെയ്യുന്നതിനിടെ ഇലക്‌ട്രിക് സ്കൂട്ടറിന് തീപിടിച്ചു

നെടുമ്പാശേരി: ചാർജ് ചെയ്യുന്നതിനിടെ ഇലക്ട്രിക് സ്കൂട്ടറിന് തീ പിടിച്ചു. സ്കൂട്ടർ പൂർണമായും കത്തി നശിച്ചു. കുന്നുകര പഞ്ചായത്ത് ആറാം വാർഡ് മെമ്പറായ വി.ബി. ഷെഫീക്കിന്‍റെ വീട്ടിൽ ബുധനാഴ്ച്ച രാത്രി പത്തോടെയായിരുന്നു സംഭവം. ഷെഫീക്കിന്‍റെ പിതാവ് തെക്കെ അടുവാശേരി വല്ലേലിൽ ബാവക്കുഞ്ഞിന്‍റെ ഇലക്ട്രിക് സ്കൂട്ടറിനാണ് തീ പിടിച്ചത്. വീടിനോടു ചേർന്ന് കാർ പോർച്ചിലാണ് സ്കൂട്ടർ ചാർജ് ചെയ്യാൻ ഇട്ടിരുന്നത്. രാത്രി ഉറങ്ങാൻ കിടക്കുന്നതിന് മുന്പ് പുറത്തിറങ്ങിയപ്പോഴാണ് സ്കൂട്ടർ കത്തുന്നത് കണ്ടത്. വെള്ളമൊഴിച്ച് തീ കെടുത്താൻ ശ്രമിക്കുന്നതിനിടെ പൂർണമായും കത്തി നശിക്കുകയായിരുന്നു. പെട്ടെന്ന് കണ്ടതിനാൽ വൻ ദുരന്തം ഒഴിവായി. തൊട്ടടുത്ത് രണ്ടു ബൈക്കുകളും പാർക്ക് ചെയ്തിരുന്നു. ഇതിലേക്ക് തീ പടരുന്നതിന് മുന്പ് ശ്രദ്ധയിൽപ്പെട്ടതിനാൽ കൂടുതൽ നാശനഷ്ടങ്ങൾ ഒഴിവാക്കാനായി. ബാറ്ററിയിലെ ഷോർട്ട് സർക്യൂട്ടാണ് അപകടത്തിന് കാരണമെന്നാണ് കരുതുന്നത്.

സിപിഐ ജില്ലാ സമ്മേളനത്തിന് കോതമംഗലത്ത് തുടക്കമായി

കോതമംഗലം: സിപിഐ 25-ാം പാർട്ടി കോണ്‍ഗ്രസിന് മുന്നോടിയായുള്ള എറണാകുളം ജില്ലാ സമ്മേളനത്തിന് കോതമംഗലം കല ഓഡിറ്റോറിയത്തിൽ തുടക്കമായി. ജില്ലാ എക്സിക്യൂട്ടീവംഗമായിരുന്ന സി.എസ്. നാരായണൻ നായരുടെ കുത്തുകുഴിയിലെ സ്മൃതി മണ്ഡപത്തിൽ നിന്നും ആരംഭിച്ച ദീപശിഖ യാത്ര സംസ്ഥാന കൗണ്‍സിലംഗം ടി. രഘുവരൻ ഉദ്ഘാടനം ചെയ്തു. എഐവൈഎഫിന്‍റെയും എഐഎസ്എഫിന്‍റെയും വോളൻഡിയർമാർ ജില്ലാ സമ്മേളന നഗറിലെത്തിച്ച ദീപശിഖ സിപിഐ സംസ്ഥാന എക്സിക്യുട്ടീവംഗം കെ.കെ. അഷറഫ് ഏറ്റുവാങ്ങി ദീപം തെളിച്ചു. സംസ്ഥാന എക്സിക്യൂട്ടീവ് അംഗം കമല സദാനന്ദൻ പതാക ഉയർത്തി. തുടർന്ന് പ്രതിനിധി സമ്മേളനം സിപിഐ സംസ്ഥാന സെക്രട്ടറി ബിനോയ് വിശ്വം ഉദ്ഘാടനം ചെയ്തു. ജില്ലാ അസിസ്റ്റന്‍റ് സെക്രട്ടറി ശാന്തമ്മ പയസ്, ജില്ലാ എക്സിക്യൂട്ടീവംഗം കെ.എൻ സുഗതൻ എന്നിവർ പ്രമേയങ്ങൾ അവതരിപ്പിച്ചു. സംസ്ഥാന കൗണ്‍സിൽ അംഗം എൻ. അരുണ്‍ രാഷ്ട്രീയ റിപ്പോർട്ടും ജില്ലാ സെക്രട്ടറി കെ.എം. ദിനകരൻ പ്രവർത്തന റിപ്പോർട്ടും അവതരിപ്പിച്ചു. ദേശീയ എക്സിക്യൂട്ടീവംഗം കെ.പി. രാജേന്ദ്രൻ, മന്ത്രിമാരായ കെ. രാജൻ, ജെ. ചിഞ്ചുറാണി, അസി. സെക്രട്ടറി പി.പി. സുനീർ എംപി, സംസ്ഥാന എക്സിക്യൂട്ടീവംഗം മുല്ലക്കര രത്നാകരൻ, ജില്ലാ അസിസ്റ്റന്‍റ് സെക്രട്ടറി എൽദോ എബ്രഹാം എന്നിവർ പ്രസംഗിച്ചു. പ്രതിനിധി സമ്മേളനം ഇന്നും തുടരും. നാളെ വൈകുന്നേരം നാലിന് ചുവപ്പുസേന പരേഡും വനിതാ റാലിയും തുടർന്ന് പൊതുസമ്മേളനവും നടക്കും. മുഖ്യമന്ത്രിക്കെതിരേ സിപിഐ കോതമംഗലം: മുഖ്യമന്ത്രി പിണറായി വിജയന്‍ ആഡംബരം കുറയ്ക്കണമെന്ന് സിപിഐ. ഇന്നലെ കോതമംഗലത്ത് ആരംഭിച്ച സിപിഐ ജില്ലാ സമ്മേളനത്തിലാണ് മുഖ്യമന്ത്രിക്കെതിരെ പരാമര്‍ശമുണ്ടായത്. മുഖ്യമന്ത്രിക്ക് ലാളിത്യം വേണമെന്നും സമ്മേളനത്തില്‍ ആവശ്യമുയർന്നു.

വഴിവിളക്കുകള്‍ റെഡി : വെളിച്ചം കാത്ത് കണ്ടെയ്‌നര്‍ റോഡ്

കൊച്ചി: നീണ്ട 14 വര്‍ഷത്തെ കാത്തിരിപ്പിനൊടുവില്‍ കണ്ടെയ്‌നര്‍ ടെര്‍മിനല്‍ റോഡില്‍ രാത്രി വെളിച്ചമെത്തുന്നു. 17.2 കിലോ മീറ്റര്‍ നീളുന്ന റോഡില്‍ വഴി വിളക്കുകള്‍ സ്ഥാപിക്കുന്ന ജോലികള്‍ പൂര്‍ത്തിയായി. 7.78 കോടി രൂപ ചെലവിലാണ് കണ്ടെയ്‌നര്‍ റോഡ് പ്രകാശിക്കാനൊരുങ്ങുന്നത്. നിര്‍മാണം പൂര്‍ത്തിയായതോടെ ദേശീയപാത അഥോറിറ്റി സംസ്ഥാന വൈദ്യുതി ബോര്‍ഡില്‍ നിന്നുള്ള കണക്ഷന്‍ കാത്തിരിക്കുകയാണ്. വരുന്ന 31നകം ലഭിക്കുമെന്നാണ് പ്രതീക്ഷിക്കുന്നത്. വൈദ്യുതി ബോര്‍ഡിന്‍റെ മാനദണ്ഡങ്ങളും, സാങ്കേതിക മാര്‍ഗനിര്‍ദേശക സംവിധാനമായ ഇന്ത്യന്‍ റോഡ്‌സ് കോണ്‍ഗ്രസിന്‍റെ മാനദണ്ഡങ്ങളും പാലിച്ചാണ് തെരുവുവിളക്കുകള്‍ സഥാപിച്ചിട്ടുള്ളതെന്ന് കേന്ദ്രമന്ത്രി നിതിന്‍ ഗഡ്കരി ലോക്‌സഭയില്‍ ഹൈബി ഈഡന്‍ എംപിക്ക് ഇതുസംബന്ധിച്ച് ചോദ്യങ്ങള്‍ക്ക് മറുപടി നല്‍കി. 2011ല്‍ ഉദ്ഘാടനം ചെയ്ത റോഡ് വൈദ്യുതീകരിച്ച് വിളക്കുകള്‍ സ്ഥാപിക്കാത്തത് അപകടങ്ങള്‍ക്കും നിരവധി പേര്‍ക്ക് ജീവന്‍ നഷ്ടമാകുന്നതിനും ഇടയാക്കിയിരുന്നു. മധുര ആസ്ഥാനമായി പ്രവര്‍ത്തിക്കുന്ന ടിഡിആര്‍ കണ്‍സ്ട്രക്ഷനാണ് വഴിവിളക്കുകള്‍ സ്ഥാപിക്കുന്ന കരാര്‍ നല്‍കിയിരുന്നത്. പ്രദേശത്ത് വെളിച്ചം എത്തുന്നതോടെ സുരക്ഷിതയാത്രയും സഞ്ചാരികള്‍ക്ക് പുത്തന്‍ ഉണര്‍വുമാകുമെന്ന് ഹൈബി ഈഡന്‍ എംപി പറഞ്ഞു. കണ്ടെയ്‌നര്‍ റോഡ് നിർമിക്കുന്നതിനുള്ള ആദ്യ ഡീറ്റയില്‍ഡ് പ്രോജക്ട് റിപ്പോര്‍ട്ടില്‍ റോഡില്‍ വൈദ്യുതീകരണത്തിനായുള്ള നിര്‍ദേശം ഉണ്ടായിരുന്നില്ല. കണ്ടെയ്‌നര്‍ ലോറികള്‍ മാത്രം സഞ്ചരിക്കുന്നതിനുള്ള റോഡാണ് വിഭാവനം ചെയ്തിരുന്നത്. കൊച്ചി മെട്രോയുടെ നിര്‍മ്മാണം ആരംഭിച്ചതോടെയാണ് സാധാരണ വാഹനങ്ങളും കണ്ടെയ്‌നര്‍ റോഡിലൂടെ കടത്തിവിടാന്‍ അധികൃതര്‍ തീരുമാനിച്ചത്. ഇതോടെയാണ് റോഡില്‍ വൈദ്യുതീകരണം അത്യാവശ്യമായി വന്നത്. ആറ് വര്‍ഷം; ചെലവിട്ടത് 90.12 കോടി കഴിഞ്ഞ ആറ് വര്‍ഷത്തിനിടെ കണ്ടെയ്‌നര്‍ റോഡിലെ വിവിധ പ്രവൃത്തികള്‍ക്കായി ചെലവിട്ടത് 90.12 കോടി രൂപ. ഇതില്‍ 7.78 കോടി രൂപ വഴി വിളക്കുകള്‍ സ്ഥാപിക്കാന്‍ ചെലവഴിച്ചതാണ്. ഈ റോഡ് പരിപാലിക്കുന്നതിനും മറ്റ് പ്രവര്‍ത്തനങ്ങള്‍ക്കുമായി 18.92 കോടി രൂപയും മുളവുകാട് പഞ്ചായത്തില്‍ സര്‍വീസ് റോഡ് നിര്‍മ്മിക്കുന്നതിനായി 17.43 കോടി രൂപ, റോഡ് ബലപ്പെടുത്തല്‍ പ്രവര്‍ത്തനങ്ങള്‍ക്കായി 45.99 കോടി രൂപയും ചെലവഴിച്ചു. നീളന്‍ പാത കളമശേരിയില്‍ തുടങ്ങി വല്ലാര്‍പാടത്ത് അവസാനിക്കുന്ന 17.2 കിലോമീറ്റര്‍ നീളുന്നതാണ് കണ്ടെയ്‌നര്‍ റോഡ്. കൊച്ചിയുടെ വികസനക്കുതിപ്പിന് വേഗം കൂട്ടാന്‍ കണ്ടെയ്‌നര്‍ റോഡിന് കഴിഞ്ഞെങ്കിലും വെളിച്ചമില്ലാത്തത് ഈ വേഗത കുറച്ചിരുന്നു. നഗരത്തിന് സമാന്തരമായി പാത വന്നതോടെയാണ് യാത്രാക്കാര്‍ കൂടിയത്. കൂടാതെ ആയിരത്തിലേറെ വരുന്ന കണ്ടെയ്‌നര്‍ ലോറികളും ഈ വഴിയില്‍ സഞ്ചാരവും പാര്‍ക്കിംഗും ആരംഭിച്ചതോടെ തിരക്കു വര്‍ധിച്ചു. വെളിച്ചം ഇല്ലാത്തതിനാല്‍ റോഡരികില്‍ നിർത്തിയിട്ടിരിക്കുന്ന വലിയ ലോറികള്‍ക്ക് പിന്നില്‍ ഇടിച്ചും മറ്റും അപകടങ്ങള്‍ സംഭവിക്കുന്നത് നിത്യസംഭവമാണ്. അപകടങ്ങള്‍ക്ക് പേരുകേട്ട വഴി 2011ല്‍ ഗതാഗതത്തിനായി തുറന്നുകൊടുത്ത ശേഷം 25ല്‍ അധികം ആളുകള്‍ക്കാണ് വിവിധ അപകടങ്ങളിലായി ഇവിടെ ജീവന്‍ നഷ്ടമായത്. ഗുരുതരമായി പരിക്കേറ്റ നൂറുകണക്കിനാളുകള്‍ വേറെയും. മരണകാരണമായ അപകടങ്ങളില്‍ ഏറെയും നടന്നത് രാത്രിയിലാണ്. ഇത്രയേറെ അപകടമരണങ്ങളും അപകടങ്ങളുമുണ്ടായിട്ടും റോഡ് വൈദ്യുതീകരിക്കാത്തതില്‍ പ്രതിഷേധം ശക്തമായിരുന്നു. റോഡില്‍ വൈദ്യുതീകരണം ഉള്‍പ്പെടെയുള്ള പ്രാഥമികജോലികള്‍ പൂര്‍ത്തിയാക്കാതെ ടോള്‍ പിരിവ് ആരംഭിച്ചതും പ്രക്ഷോഭങ്ങള്‍ക്ക് വഴിവച്ചിരുന്നു. റോഡ് വൈദ്യുതീകരണത്തിനുള്ള ഉത്തരവാദിത്വം ദേശീയപാത അഥോറിറ്റി ഏറ്റെടുക്കുമെന്ന ഉറപ്പുലഭിച്ചതോടെയാണ് ടോള്‍ പിരിവും സുഗമമായത്. അപകടമരണം പതിവായതോടെ ഹൈക്കോടതി ഇടപെട്ട് പാതയോരത്തെ അനധികൃത ലോറി പാര്‍ക്കിംഗ് അടിയന്തരമായി ഒഴിപ്പിക്കണമെന്ന് നിർദേശിച്ചെങ്കിലും അത് ഇനിയും പാലിക്കപ്പെട്ടിട്ടില്ല.

വന്യമൃഗശല്യം: പുന്നേക്കാട് ഫോറസ്റ്റ് സ്റ്റേഷൻ ഉപരോധിച്ചു

കോതമംഗലം: വന്യമൃഗശല്യത്തിനെതിരെ കീരംപാറ കുട്ടന്പുഴ പഞ്ചായത്തുകളിലെ ജനപ്രതിനിധികളുടെ നേതൃത്വത്തിൽ പുന്നേക്കാട് ഫോറസ്റ്റ് സ്റ്റേഷൻ ഉപരോധിച്ചു. രണ്ട് പഞ്ചായത്തിലുൾപ്പെടുന്ന പുന്നേക്കാട്, തട്ടേക്കാട് റോഡിലും, വിവിധ പ്രദേശങ്ങളിലും നിരന്തരമായ കാട്ടാനകളുൾപ്പെടെയുള്ള വന്യമൃഗശല്യത്തിനെതിരെയായിരുന്നു പ്രതിക്ഷേധം. ആർആർടിയെ മുഴുവൻ സമയവും നിയോഗിക്കുക, ഫെൻസിംഗ് പൂർത്തീകരിക്കുക, പുന്നേക്കാട് - തട്ടേക്കാട് റോഡിൽ വഴിവിളക്കുകൾ സ്ഥാപിക്കുക. അടിക്കാട് വെട്ടുക, പ്ലാന്‍റേഷനിൽ തങ്ങുന്ന കാട്ടാനകളെ പുഴകടത്തി വനത്തിലേക്ക് മാറ്റുക തുടങ്ങിയ ആവശ്യങ്ങൾ ഉന്നയിച്ചാണ് സമരം നടത്തിയത്. കീരന്പാറ പഞ്ചായത്ത് പ്രസിഡന്‍റ് ഗോപി മുട്ടത്ത്, കുട്ടന്പുഴ പഞ്ചായത്തു പ്രസിഡന്‍റ് കാന്തി വെള്ളക്കയ്യൻ, വൈസ് പ്രസിഡന്‍റുമാരായ ബീന റോജോ, സൽമ പരീത്, പഞ്ചായത്ത് സ്ഥിരംസമിതി അധ്യക്ഷരായ കെ.എ. സിബി, ഇ.സി. റോയി, മഞ്ജു സാബു, പഞ്ചായത്തംഗങ്ങളായ മാമച്ചൻ ജോസഫ്, ജോഷി പൊട്ടയ്ക്കൽ, എൽദോസ് ബേബി, കെ.എസ്. സനൂപ്, ബേസിൽ ബേബി എന്നിവരാണ് പുന്നേക്കാട് ഫോറസ്റ്റ് ഓഫീസിനു മുന്പിൽ കുത്തിയിരുപ്പു സമരം നടത്തിയത്.

കച്ചേരിത്താഴത്തെ ബസ് കാത്തിരിപ്പു കേന്ദ്രം അപകടാവസ്ഥയിലെന്ന്

മൂവാറ്റുപുഴ: കച്ചേരിത്താഴത്തെ ബസ് കാത്തിരിപ്പു കേന്ദ്രം അപകടാവസ്ഥയിലെന്ന് പരാതി. നഗരത്തിലെത്തുന്ന നൂറ് കണക്കിന് യാത്രക്കാരുടെ ആശ്രയമായ കച്ചേരിത്താഴത്തെ ബസ് കാത്തിരിപ്പു കേന്ദ്രം നാളുകളായി തുരുന്പെടുത്ത് ഏത് സമയത്തും തകർന്ന് വീഴുന്ന അവസ്ഥയിലാണെന്ന് ചൂണ്ടികാട്ടി പൊതുപ്രവർത്തകനായ വാഴപ്പിള്ളി മുണ്ടയ്ക്കൽ എം.ജെ. ഷാജി ജില്ലാ കളക്ടർക്ക് പരാതി നൽകി. നഗരസഭയ്ക്കാണ് ഇതിന്‍റെ പരിപാലന ചുമതല. ബന്ധപ്പെട്ടവരുടെ അനാസ്ഥയെ ചൂണ്ടികാട്ടി അടിയന്തര ഇടപെടൽ ആവശ്യപ്പെട്ടാണ് ഷാജി ജില്ലാ കളക്ടർക്ക് പരാതി നൽകിയത്.

പുളിന്താനം-വെട്ടിത്തറ റോഡിലെ അപകടകരമായ മരങ്ങള്‍ വെട്ടിമാറ്റണമെന്ന് ആവശ്യം

പോത്താനിക്കാട്: സ്വകാര്യ വ്യക്തിയുടെ പുരയിടത്തില്‍ നിന്ന് റോഡിലേക്ക് ചാഞ്ഞ് അപകടകരമായി നില്‍ക്കുന്ന കൂറ്റന്‍ മരങ്ങള്‍ വെട്ടിമാറ്റാത്തത് അപകട ഭീഷണി ഉയര്‍ത്തുന്നു. പോത്താനിക്കാട് പഞ്ചായത്തിലെ പുളിന്താനം - വെട്ടിത്തറ റോഡില്‍ പുല്‍പ്ര പീടികയ്ക്കു സമീപമാണ് സ്വകാര്യ വ്യക്തിയുടെ പുരയിടത്തിലെ രണ്ടു കൂറ്റന്‍ ആഞ്ഞിലി മരങ്ങള്‍ റോഡിലേക്ക് ഏതു നിമിഷവും നിലംപൊത്താവുന്ന അവസ്ഥയില്‍ നില്‍ക്കുന്നത്. സ്കൂള്‍ ബസുകള്‍ ഉള്‍പ്പെടെ നൂറുകണക്കിന് വാഹനങ്ങളാണ് ഈ റോഡിലൂടെ സഞ്ചരിക്കുന്നത്. മഴ ശക്തമായതോടെ മരങ്ങളുടെ അടിഭാഗത്തെ മണ്ണ് റോഡിലേക്ക് ഇടിഞ്ഞ നിലയിലാണ്. സമീപത്തുകൂടി 11 കെവി ഉള്‍പ്പെടെയുള്ള വൈദ്യുതി ലൈനുകള്‍ കടന്നു പോകുന്നുണ്ട്. മാസങ്ങള്‍ക്ക് മുന്‍പുതന്നെ സമീപവാസികള്‍ പോത്താനിക്കാട് പഞ്ചായത്ത് അധികൃതര്‍ക്കും പൊതുമരാമത്ത് വകുപ്പിനും ഇത് സംബന്ധിച്ച് പരാതി നല്‍കിയിരുന്നു. എന്നാല്‍ പഞ്ചായത്ത് അധികൃതര്‍ ഒരു നടപടിയും ഇതുവരെ സ്വീകരിച്ചിട്ടില്ലെന്നും ആക്ഷേപമുണ്ട്. മരങ്ങള്‍ വെട്ടിനീക്കണമെന്ന് കാണിച്ച് പൊതുമരാമത്ത് വകുപ്പ് സ്ഥലം ഉടമയ്ക്ക് നോട്ടീസ് നല്‍കിയിരുന്നുവെങ്കിലും തുടര്‍ നടപടികളൊന്നും ഉണ്ടാവുകയോ മരങ്ങള്‍ വെട്ടിമാറ്റാന്‍ ഉടമ തയാറാവുകയോ ചെയ്യുന്നില്ലെന്നാണ് നാട്ടുകാരുടെ ആരോപണം.

സ്കൂളിനു മുന്നിൽ അപകട ഭീഷണിയുയർത്തി വൈദ്യുത പോസ്റ്റ്

പോത്താനിക്കാട്: സ്കൂളിനു മുന്നിൽ അപകട ഭീഷണിയായി ഏത് നിമിഷവും വീഴാവുന്ന അവസ്ഥയിൽ വൈദ്യുത പോസ്റ്റ്. പൈങ്ങോട്ടൂര്‍ സെന്‍റ് ജോസഫ്സ് ഹയര്‍ സെക്കന്‍ഡറി സ്കൂളിനു മുന്നിലാണ് നിലംപതിക്കാവുന്ന നിലയിൽ വൈദ്യുത പോസ്റ്റുള്ളത്. സ്കൂളിന്‍റെ മതിലിനോട് ചേര്‍ന്നുനില്‍ക്കുന്ന പോസ്റ്റ്, വൈദ്യുതി ലൈനുകളുടെയും, കേബിളുകളുടെയും ഭാരം മൂലം വളഞ്ഞ നിലയിലാണ്. കൂടാതെ പോസ്റ്റിന് താഴെയായി സ്ഥാപിച്ചിരിക്കുന്ന ഫ്യൂസ് കുട്ടികള്‍ക്കുകൂടി കൈയെത്തുന്ന ഉയരത്തിലാണുള്ളത്. ഇതും വലിയ ഭീഷണിയാണ് ഉയര്‍ത്തുന്നത്. അപകടാവസ്ഥയിലായ കോൺക്രീറ്റ് പോസ്റ്റ് മാറ്റി പകരം ഇരുമ്പ് പോസ്റ്റ് സ്ഥാപിക്കണമെന്നാണ് നാട്ടുകാരുടെ ആവശ്യം.

പിതൃപുണ്യം തേടി ആയിരങ്ങൾ ബലിതർപ്പണം നടത്തി

മൂവാറ്റുപുഴ: കർക്കടകവാവ് ദിനത്തിൽ മൂവാറ്റുപുഴയിലെ വിവിധ ക്ഷേത്രങ്ങളിൽ ഒരുക്കിയ ബലിതറകളിൽ പിതൃപുണ്യം തേടി ആയിരങ്ങൾ ബലിതർപ്പണം നടത്തി. കോരിച്ചൊരിയുന്ന മഴയിലും രാവിലെ മുതൽ ക്ഷേത്രങ്ങളിൽ വൻതിരക്കാണ് അനുഭവപ്പെട്ടത്. ഭക്തജനതിരക്ക് കണക്കിലെടുത്ത് പ്രധാന ക്ഷേത്രങ്ങളിൽ വിപുലമായ ഒരുക്കങ്ങളും നടത്തിയിരുന്നു. ശക്തമായ മഴ വാവുബലിയെ ബാധിക്കുമെന്ന ആശങ്കയുണ്ടായിരുന്നുവെങ്കിലും കിഴക്കൻ മേഖലയിൽ ഇന്നലെ മഴ മാറി നിന്നു. പുഴയും ശാന്തമായിരുന്നു. ആനിക്കാട് തിരുവുംപ്ലാവിൽ മഹാദേവ ക്ഷേത്രത്തിൽ രാവിലെ നാലു മുതൽ തീർഥക്കരയിൽ ആരംഭിച്ച ബലിതർപ്പണ ചടങ്ങുകൾക്ക് നാരായണൻ ഇളയത് മുഖ്യകാർമികത്വം വഹിച്ചു. സ്ത്രീകൾക്കും പുരുഷന്മാർക്കും പ്രത്യേകം തയാറാക്കിയ ബലിത്തറയിൽ ഒരേസമയം 500ഓളം പേർക്ക് ബലിയിടുവാനുള്ള സൗകര്യം ദേവസ്വം ഒരുക്കിയിരുന്നു. വെള്ളൂർക്കുന്നം മഹാദേവ ക്ഷേത്രത്തിനോടനുബന്ധിച്ച് ക്ഷേത്രക്കടവിലും കൈലാസ ഓഡിറ്റോറിയത്തിലുമാണ് ബലിതർപ്പണം നടന്നത്. പുലർച്ചെ 4.30 മുതലാണ് ബലിതർപ്പണം ആരംഭിച്ചത്. ഇളങ്ങവം ശ്രീസുബ്രഹ്മണ്യ സ്വാമിക്ഷേത്രത്തിൽ ആറ് മുതൽ ആരംഭിച്ച ബലി തർപ്പണത്തിന് കരിവേപ്പില്ലത്ത് രാജൻ ഇളയത് കാർമികത്വം വഹിച്ചു. ശ്രീകുമാര ഭജന ദേവസ്വം ക്ഷേത്രം, മാറാടി തൃക്ക മഹാദേവേ ക്ഷേത്രം എന്നിവിടങ്ങളിലായി ആയിരക്കണക്കിന് ആളുകളാണ് പിതൃക്കളുടെ ആത്മശാന്തിക്കായി ബലിതർപ്പണം നടത്തിയത്.

കോതമംഗലം താലൂക്ക് ആശുപത്രിയുടെ ഗേറ്റ് തകർന്നുവീണു

കോതമംഗലം: കോതമംഗലം താലൂക്ക് ആശുപത്രിയുടെ ഒപി ബ്ലോക്കിനു സമീപത്തെ ഗേറ്റ് തകർന്നുവീണു. ഇന്നലെ ഉച്ചയ്ക്കാണ് ഗേറ്റ് നിലംപൊത്തിയത്. സ്ലൈഡിംഗ് ഗേറ്റിന്‍റെ ചക്രം റെയിലിൽ നിന്നും തെന്നിമാറിയതാണ് മറിഞ്ഞുവീഴാൻ കാരണം. ഈ സമയം സമീപത്ത് ആരുമുണ്ടാകാതിരുന്നതിനാൽ അപകടമൊഴിവായി. ഒപി ബ്ലോക്കിലേക്കെത്തുന്ന ആളുകൾക്ക് മാത്രം കടന്നുപോകാൻ കഴിയുന്നവിധം ഭാഗികമായാണ് ഈ ഗേറ്റ് തുറക്കാറുണ്ടായിരുന്നത്. കൃത്യമായി അറ്റകുറ്റപണി നടത്താതിരുന്നതാണ് ഗേറ്റ് തകരാൻ കാരണമെന്ന് യൂത്ത് കോണ്‍ഗ്രസ് പ്രവർത്തകർ ആരോപിച്ചു.

പെറ്റിക്കേസ് തുക തട്ടിപ്പ് : യൂത്ത് കോൺഗ്രസ് സ്റ്റേഷൻ ഉപരോധിച്ചു

മൂവാറ്റുപുഴ: പെറ്റി കേസുകളിൽ കിട്ടുന്ന തുകയിൽ തട്ടിപ്പ് നടത്തിയ പോലീസ് ഉദ്യോഗസ്ഥർക്കെതിരെ കർശന നടപടി ആവശ്യപ്പെട്ട് യൂത്ത് കോണ്‍ഗ്രസ് മൂവാറ്റുപുഴ ടൗണ്‍ മണ്ഡലം കമ്മിറ്റിയുടെ നേതൃത്വത്തിൽ മുവാറ്റുപുഴ പോലീസ് സ്റ്റേഷനിലേക്ക് മാർച്ചും ഉപരോധവും സംഘടിപ്പിച്ചു. ജനവിശ്വാസം പിടിച്ചുനിർത്താൻ പോലീസ് വിഭാഗം ആന്തരിക ശുചിത്വം ഉറപ്പാക്കണമെന്ന് യൂത്ത് കോണ്‍ഗ്രസ് നേതാക്കൾ പറഞ്ഞു. യൂത്ത് കോണ്‍ഗ്രസ് മണ്ഡലം പ്രസിഡന്‍റ് മുഹമ്മദ് സാബിത്ത് അധ്യക്ഷത വഹിച്ചു. യൂത്ത് കോണ്‍ഗ്രസ് സംസ്ഥാന സെക്രട്ടറിമാരായ ജിന്‍റോ ടോമി, മുഹമ്മദ് റഫീക്ക്, ജെറിൻ ജേക്കബ്, സൽമാൻ ഒലിക്കൽ, മാഹിൻ അബൂബക്കർ, അമൽ എൽദോസ്, കെ.എ. അബ്ദുൾ സലാം തുടങ്ങിയവർ നേതൃത്വം നൽകി. പ്രതിഷേധത്തിനിടെ പോലീസും പ്രവർത്തകരും തമ്മിൽ ചെറിയ തോതിൽ സംഘർഷമുണ്ടായി. അനുമതിയില്ലാതെ പ്രതിഷേധം നടത്തിയെന്നുപറഞ്ഞ് പോലീസ് ഇടപെടാൻ ശ്രമിച്ചപ്പോഴാണ് വാക്കേറ്റവും തള്ളിക്കളയറ്റവും ഉണ്ടായത്. മുതിർന്ന കോണ്‍ഗ്രസ് നേതാക്കളും പോലീസ് ഉദ്യോഗസ്ഥരും ഇടപെട്ട് പ്രശ്നം അവസാനിപ്പിച്ചു. തുടർന്ന് മുവാറ്റുപുഴ ഡിവൈഎസ്പി പി.എം. ബൈജുവിന് പരാതി നൽകി.

നാഗപ്പുഴ പള്ളിയിൽ എട്ടുനോന്പ് തിരുനാളിനുള്ള ആലോചനാ യോഗം

നാഗപ്പുഴ: സെന്‍റ് മേരീസ് പള്ളിയിൽ എട്ടുനോന്പ് തിരുനാളിനോടനുബന്ധിച്ചുള്ള ആലോചനാ യോഗം വികാരി ഫാ. പോൾ നെടുംപുറത്തിന്‍റെ അധ്യക്ഷതയിൽ ചേർന്നു. അസി. വികാർ ഫാ. ജിനോ കല്ലറയ്ക്കൽ പ്രസംഗിച്ചു. തിരുനാളിന്‍റെ സുഗമമായ നടത്തിപ്പിനായി പാരീഷ് കൗണ്‍സിൽ അംഗങ്ങൾ കണ്‍വീനറായി വിവിധ കമ്മിറ്റികൾക്ക് രൂപം നൽകി. ജൂബിലി വർഷത്തോടനുബന്ധിച്ച് കോതമംഗലം രൂപതയിലെ വിവിധ ഫൊറോനകളുടെ നേതൃത്വത്തിൽ നടക്കുന്ന തീർഥാടനം നാഗപ്പുഴ ഇടവകയിൽ അടുത്തമാസം മുപ്പതിന് വൈകുന്നേരത്തോടെ എത്തിച്ചേരും. തിരുനാളിനോടനുബന്ധിച്ചുള്ള പന്തൽ, ലൈറ്റ് ആൻഡ് സൗണ്ട്, മുതലായവയ്ക്കുള്ള ക്വട്ടേഷനുകൾ 26ന് വൈകുന്നേരത്തോടെ പള്ളി ഓഫീസിൽ എത്തിക്കണം. ഫോണ്‍: 9495023390, 9847117935, 6282940467.

വാഴക്കുളത്ത് വ്യാപാര സ്ഥാപനം കുത്തിത്തുറന്ന് മോഷണം

വാഴക്കുളം: വ്യാപാര സ്ഥാപനം കുത്തിത്തുറന്ന് മോഷണം. വിശ്വജ്യോതി എൻജിനീയറിംഗ് കോളജിനു സമീപം പരീയ്ക്കപ്പീടികയിലുള്ള ഹെവൻസ് സൂപ്പർ മാർക്കറ്റിൽ ബുധനാഴ്ച പുലർച്ചെ 1.45 ഓടെയാണ് മോഷണം നടന്നത്. താഴുതകർത്താണ് മോഷണം നടത്തിയത്. സ്ഥാപനത്തിൽ സൂക്ഷിച്ചിരുന്ന മൂവായിരത്തോളം രൂപയും നാലു പായ്ക്കറ്റ് വെളിച്ചെണ്ണ, വില കൂടിയ ചോക്ലേറ്റുകൾ ഉൾപ്പെടെയുള്ള പലചരക്കു സാധനങ്ങളും മോഷ്ടിക്കപ്പെട്ടതായി സ്ഥാപന ഉടമ സിബി മലേക്കുടിയിൽ പറഞ്ഞു. വാഴക്കുളം ഭാഗത്തുനിന്നെത്തിയ ബൈക്ക് രാത്രി ഒന്നരയോടെ കവലയിലുള്ള ബസ് കാത്തിരിപ്പ് കേന്ദ്രത്തിനു സമീപത്തു നിർത്തിയിട്ട് പിന്നിലുള്ള സ്ഥാപനത്തിലേക്ക് രണ്ടുപേർ നടന്നുവരുന്നത് സിസി ടിവി കാമറയിൽ കാണാം. ഹെൽമറ്റും ജാക്കറ്റും പാന്‍റ്സുമായിരുന്നു മോഷ്ടാക്കളുടെ വേഷം. അഞ്ചു മിനിറ്റോളം കടയുടെ മുൻഭാഗത്തു നിന്ന് പരിസരം വീക്ഷിച്ച ശേഷം ഒരാൾ കടയുടെ മുൻഭാഗത്തുള്ള സിസി ടിവി കാമറ താഴ്ത്തിവയ്ക്കുന്നതും കാണാം. തുടർന്ന് കാമറയിൽ കാണാത്ത ഷട്ടർ തുറന്ന് അകത്തു കയറുകയായിരുന്നു. താഴ് നഷ്ടപ്പെട്ട നിലയിലാണ്. പത്തു മിനിറ്റോളം അകത്ത് ഇവർ പരിശോധന നടത്തി. പണം സൂക്ഷിക്കുന്ന മേശവലിപ്പിലും സമീപത്തുള്ള ബുക്കുകളിലുമായി കരുതിയിരുന്ന മൂവായിരത്തോളം രൂപയാണ് കവർന്നത്. ഇവിടെ സൂക്ഷിച്ചിരുന്ന മറ്റു രേഖകളൊന്നും നഷ്ടമായിട്ടില്ല. വ്യാപാരാവശ്യത്തിനായി സൂക്ഷിച്ചിരുന്ന മറ്റു വസ്തുക്കൾ സുരക്ഷിതമായ നിലയിലുമാണ്.

ക്യംതാ സെമിനാരി കത്തീഡ്രലിൽ ശ്രാദ്ധപ്പെരുന്നാൾ

തൃപ്പൂണിത്തുറ: ക്യംതാ സെമിനാരി കത്തീഡ്രലിൽ മുൻ ഭദ്രാസന മെത്രാപ്പോലീത്ത തോമസ് മാർ ഒസ്താത്തിയോസിന്‍റെയും മുക്കഞ്ചേരിൽ ഗീവർഗീസ് റമ്പാന്‍റെയും ശ്രാദ്ധപ്പെരുന്നാൾ 26, 27 തിയതികളിൽ ആചരിക്കും. നാളെ വൈകിട്ട് 6.30ന് സന്ധ്യ പ്രാർഥന, ഏഴിന് ധൂപ പ്രാർഥന. 27ന് രാവിലെ 8.30ന് ശ്രേഷ്ഠ കാതോലിക്ക ബസേലിയോസ് ജോസഫ് കാതോലിക്ക ബാവയുടെ പ്രധാന കാർമികത്വത്തിൽ മൂന്നിന്മേൽ കുർബാന. മെത്രാപ്പോലീത്തമാരായ ഐസക് മാർ ഒസ്താത്തിയോസ്, മാത്യൂസ് മാർ അപ്രേം എന്നിവർ സഹകാർമികരാകും. 10.30ന് ഗീവർഗീസ് റമ്പാൻ ട്രസ്റ്റിന്‍റെ നേതൃത്വത്തിൽ വിദ്യാർഥികൾക്ക് പഠന സഹായവിതരണം, 11ന് ശ്രാദ്ധ സദ്യ, ഭക്ഷ്യക്കിറ്റ് വിതരണം.

കളഞ്ഞുകിട്ടിയ ഐഫോൺ തിരികെയേൽപ്പിച്ചു

മരട്: കളഞ്ഞുകിട്ടിയ ഐഫോൺ ഉടമയെ കണ്ടെത്തി തിരികെയേൽപ്പിച്ചു. നെട്ടൂരിലെ സ്ക്രാപ്പ് വ്യാപാരി ഷാജിക്കാണ് മരട് കൊട്ടാരം ജംഗ്ഷനിൽ നിന്നും വഴിയിൽ വീണ് കിടന്ന നിലയിൽ ഐഫോൺ 15പ്രൊ കളഞ്ഞു കിട്ടിയത്. തുടർന്ന് നെട്ടൂർ ഐഎൻടിയുസി ജംഗ്ഷനിൽ മൊബൈൽ മാർട്ട് കട നടത്തുന്ന മുജീബിനെ ഏൽപ്പിക്കുകയും പിന്നീട് ഇരുവരും ചേർന്ന് ഉടമ പിറവം സ്വദേശി കെവിനെ കണ്ടെത്തി തിരികെ ഏൽപ്പിക്കുകയായിരുന്നു.

മാധ്യമ പ്രവര്‍ത്തനത്തിൽ ആത്മപരിശോധന വേണം: പ്രതിപക്ഷ നേതാവ്

കൊച്ചി: മാധ്യമ പ്രവര്‍ത്തനത്തിലും ഒരു ആത്മപരിശോധന നടത്തണ്ട സമയമായെന്ന് പ്രതിപക്ഷ നേതാവ് വി.ഡി. സതീശന്‍. പുതിയ മാധ്യമ സംസ്‌കാരം അടിച്ചേല്‍പ്പിക്കാന്‍ ശ്രമിക്കുന്ന ഈ കാലഘട്ടത്തില്‍ അതേക്കുറിച്ചു മാധ്യമ ലോകം ഗൗരവമായി ചര്‍ച്ച ചെയ്യണമെന്നും അദ്ദേഹം പറഞ്ഞു. മാധ്യമ പ്രവര്‍ത്തകനും രാഷ്ട്രീയ നേതാവുമായിരുന്ന പി.എന്‍. പ്രസന്നകുമാറിന്‍റെ പേരില്‍ എറണാകുളം പ്രസ് ക്ലബ് രൂപീകരിച്ച പി.എന്‍. പ്രസന്നകുമാര്‍ ഫൗണ്ടേഷന്‍റെ ഉദ്ഘാടനം നിര്‍വഹിക്കുകയായിരുന്നു അദ്ദേഹം. ആര്‍ട്ടിഫിഷ്യല്‍ ഇന്‍റലിജന്‍സിന്‍റെ ലോകത്ത് മാധ്യമങ്ങള്‍ നമ്മളെയും നമ്മുടെ ചിന്തകളെയും നിയന്ത്രിക്കുകയാണെന്നും അദ്ദേഹം അഭിപ്രായപ്പെട്ടു. എറണാകുളം ബിടിഎച്ചില്‍ നടന്ന ചടങ്ങില്‍ ഫൗണ്ടേഷന്‍റെ ബ്രോഷര്‍ കെ. ബാബു എംഎല്‍എയ്ക്കും മാതൃഭൂമി മുന്‍ ബ്യൂറോ ചീഫ് ജി. ഷഹീദ് എഴുതിയ നെല്‍സണ്‍ മണ്ടേലയും രണ്ട് മലയാളികളും എന്ന പുസ്തകം പി.എന്‍ പ്രസന്നകുമാറിന്‍റെ പത്നി പ്രഫ.വി.കെ. രജനിയ്ക്കും നല്‍കി പ്രതിപക്ഷ നേതാവ് പ്രകാശനം ചെയ്തു. പ്രസ് ക്ലബ് പ്രസിഡന്‍റ് ആര്‍. ഗോപകുമാര്‍ അധ്യക്ഷത വഹിച്ചു. ടി.ജെ. വിനോദ് എംഎല്‍എ, സി.ജി. രാജഗോപാല്‍, ക്ലബ് സെക്രട്ടറി എം. ഷജില്‍ കുമാര്‍ തുടങ്ങിയവര്‍ പ്രസംഗിച്ചു.

പ്രധാനാധ്യാപികയുടെ ആശങ്ക പരിഹരിച്ച് മന്ത്രി പി. രാജീവ്

കളമശേരി: "മന്ത്രിക്കൊപ്പം ഒരു മണിക്കൂർ' വാർഡുതല മുഖാമുഖത്തിൽ ഉയർന്ന പരാതിക്ക് പരിഹാരമായി. കങ്ങരപ്പടി എസ്എൻ യുപി സ്കൂൾ പ്രധാനധ്യാപിക സ്മിത ഗോപിനാഥ് ഉന്നയിച്ച ആശങ്കയാണ് മന്ത്രി ഇടപെട്ട് പരിഹരിച്ചത്. സ്കൂൾ വളപ്പിന് പുറത്തെ റോഡിലൂടെ പോകുന്ന വൈദ്യുതലൈനിന് സ്കൂൾ മതിലിൽനിന്ന് ആവശ്യമായ അകലമില്ലെന്നും കുട്ടികൾ മതിലിൽ കയറി നിന്ന് കമ്പൊ മറ്റൊ കൊണ്ട് സ്പർശിച്ച് അപായമുണ്ടാകാൻ സാധ്യതയുണ്ടെന്നുമായിരുന്നു ടീച്ചറുടെ ആശങ്ക. ഇത് സംബന്ധിച്ച് സ്കൂൾ മാനേജരുടെ നേതൃത്വത്തിൽ മന്ത്രിക്ക് നിവേദനവും നൽകി. വ്യവസായ മന്ത്രി പി. രാജീവ് മണ്ഡലത്തിൽ സംഘടിപ്പിച്ച പബ്ലിക് സ്ക്വയറിന്‍റെ തുടർച്ചയായി കളമശേരി നഗരസഭയിലെ കങ്ങരപ്പടി എസ്എൻ യുപി സ്കൂളിൽ നടന്ന മുഖാമുഖം പരിപാടിയിലായിരുന്നു അധ്യാപിക പ്രശ്നമുന്നയിച്ചത്. ഉടനെ മന്ത്രി ആവശ്യമായ നടപടികൾ സ്വീകരിക്കാൻ വൈദ്യുത ബോർഡ് ഉദ്യോഗസ്ഥർക്ക് നിർദ്ദേശം നൽകി. തുടർന്ന് ബുധനാഴ്ച സ്കൂളിന് സമീപത്തെ എൽടി ലൈനിലെ അഞ്ച് അലുമിനിയം കണ്ടക്ടർ മാറ്റി ഇൻസുലേഷനുള്ള എബിസി കേബിളാക്കി ലൈൻ മാറ്റി. തേവയ്ക്കൽ സെക്ഷന്‍റെ നേതൃത്വത്തിൽ 250 മീറ്ററോളം നീളത്തിലാണ് ലൈൻ മാറ്റിയത്. ഒരു ലക്ഷം രൂപയോളം ചെലവുവരുന്ന പ്രവൃത്തി കെഎസ്ഇബി ചെലവിലാണ് പൂർത്തിയാക്കിയത്. നേരിട്ട് സർശിച്ചാൽ പോലും അപായ സാധ്യതയില്ലാത്തതാണ് എബിസി കേബിൾ.

അയ്യമ്പുഴ ഗിഫ്റ്റ് സിറ്റി പദ്ധതി: പുനർഅംഗീകാരം നൽകണമെന്ന് ബെന്നി ബഹനാൻ

ആലുവ: അങ്കമാലി അയ്യമ്പുഴയിൽ നേരത്തേ പ്രഖ്യാപിച്ചിരുന്ന ഗിഫ്റ്റ് സിറ്റി പദ്ധതിയുടെ കാലാവധി കഴിഞ്ഞതിനാൽ അടിയന്തരമായി പുനർഅംഗീകാരം നൽകണമെന്ന് ബെന്നി ബഹനാൻ എംപി ലോക്സഭയിൽ ആവശ്യപ്പെട്ടു. 2020 ആഗസ്റ്റ് 19ന് പ്രഖ്യാപിച്ച പദ്ധതിയുടെ അംഗീകാരം കാലഹരണപ്പെട്ടിരിക്കുകയാണെന്ന് എംപി പറഞ്ഞു. ഭൂമി ഏറ്റെടുക്കൽ നടപടികൾ നിലവിൽ വൈകിയിരിക്കുകയാണ്. സംസ്ഥാന സർക്കാർ ഇപ്പോൾ അതിന്‍റെ നടപടികൾ തീർച്ചയായും വേഗത്തിലാക്കി പൂർത്തിയാക്കുമെന്നും, കേന്ദ്ര സർക്കാർ പുനർഅംഗീകാരം നൽകിയാൽ പദ്ധതി ഉടൻ നടപ്പാക്കാനാകുമെന്നും ബെന്നി ബഹനാൻ എംപി പറഞ്ഞു. നാഷണൽ ഇൻഡസ്ട്രിയൽ കോറിഡോർ ഡെവലപ്‌മെന്‍റ് ആൻഡ് ഇംപ്ലിമെന്‍റേഷൻ ട്രസ്റ്റ് (എൻഐസി ഡിഐടി ) അടിസ്ഥാനമാക്കി ഏകദേശം 400 ഏക്കറിൽ പരന്നു കിടക്കുന്ന റസിഡൻഷ്യൽ, കൊമേഴ്സ്യൽ, ഇൻഡസ്ട്രിയൽ, ഹെൽത്ത്‌കെയർ, എജുക്കേഷണൽ സോണുകൾ എന്നിവ ഉൾക്കൊള്ളുന്ന ആധുനിക നഗര പദ്ധതിയാണ്. വ്യാപക നിക്ഷേപവും തൊഴിൽ സാദ്ധ്യതയും അടിസ്ഥാന സൗകര്യ വികസനവും പദ്ധതിയിലൂടെ സാധ്യമാകുമെന്ന് എംപി ചൂണ്ടിക്കാട്ടി.

കേരളാ പോലീസ് അസോ. : എറണാകുളം റൂറലിൽ 38 പേർക്ക് എതിരില്ല

ആലുവ: കേരള പോലീസ് അസോസിയേഷൻ എറണാകുളം റൂറൽ യൂണിറ്റുതല തെരഞ്ഞെടുപ്പിൽ ഔദ്യോഗിക പാനലിന് മികച്ച വിജയം. 2025 -2027 വർഷത്തെ ജില്ലാ കമ്മിറ്റിയിലേക്കുളള തെരഞ്ഞെടുപ്പിൽ നാമനിർദേശ പത്രിക സമർപ്പണത്തിന്‍റെ അവസാന ദിനമായ ചൊവ്വാഴ്ച ആകെയുള്ള 61 സീറ്റിൽ 38 സീറ്റിലും ഔദ്യോഗിക വിഭാഗം പ്രതിനിധികൾ എതിരില്ലാതെ വിജയിച്ചു. ബാക്കി 23 സീറ്റുകളിലേക്കുള്ള തെരഞ്ഞെടുപ്പ് 28ന് നടക്കും. അസോസിയേഷൻ സംസ്ഥാന ജോയിന്‍റ് സെക്രട്ടറി എം.എം. അജിത്കുമാർ, ജില്ലാ പ്രസിഡന്‍റ് ഇ.ആർ. ആത്മൻ, ജില്ലാ സെക്രട്ടറി പി.എ. ഷിയാസ്, സംസ്ഥാന നിർവാഹക സമിതിയംഗം ബിബിൽ മോഹൻ, ജില്ലാ ട്രഷറർ പി.സി. സൂരജ്, ജില്ലാ ജോയിന്‍റ് സെക്രട്ടറി സി.ജെ. സെബി, ജില്ലാ വൈസ് പ്രസിഡന്‍റ് കെ.എൻ. ബിജി എന്നിവർ വിവിധ യൂണിറ്റുകളിൽനിന്നും എതിരില്ലാതെ തെരഞ്ഞെടുക്കപ്പെട്ടു. കേരള പോലീസ് ഓഫീസേഴ്സ് അസോസിയേഷൻ എറണാകുളം ജില്ലയിലും ഔദ്യോഗിക വിഭാഗം ഭരണം നിലനിർത്തിയിരുന്നു.

ഫാ. ജോസ് ആലുക്കലിന്‍റെ പൗരോഹിത്യ സുവർണ ജൂബിലി

കാലടി: സിഎംഐ സഭാംഗമായ ഫാ. ജോസ് ആലുക്കലിന്‍റെ പൗരോഹിത്യ സുവർണ ജൂബിലി ആഘോഷങ്ങൾ നാളെ രാവിലെ 10 ന് കാലടി സെന്‍റ് ജോർജ് പള്ളിയിൽ കൃതജ്ഞതാ ബലിയോടെ ആരംഭിക്കും. തുടർന്ന് സെന്‍റ് ജോർജ് പാരീഷ് ഹാളിൽ അനുമോദന യോഗം. പരേതരായ കൊച്ചൗസേപ്പ്-ഏലിയാക്കുട്ടി ദമ്പതികളുടെ മകനാണ് ഫാ. ജോസ് ആലുക്കൽ. അങ്കമാലി വിശ്വജ്യോതി പബ്ലിക് സ്‌കൂളിന്‍റെ സ്ഥാപകനും പ്രിൻസിപ്പലുമായിരുന്ന അദ്ദേഹം രാജഗിരി ഹൈസ്കൂൾ കളമശേരി, എസ്എച്ച് ഹൈസ്കൂൾ തേവര, സെന്‍റ് എഫ്രേം എച്ച്എസ്എസ് മാന്നാനം, ജീവാസ് ആലുവ എന്നീ സ്ഥാപനങ്ങളിൽ സേവനമനുഷ്ഠിച്ചിട്ടുണ്ട്.

എസ്. ഹരിഹരൻ നായർ ഓർമയായി : പ്രളയത്തിൽ നഷ്ടപ്പെട്ട കൃത്രിമകൈ നൽകിയത് മന്ത്രി ശൈലജ ടീച്ചർ

ആലുവ: എസ്. ഹരിഹരൻ നായർ മടങ്ങുന്നത് സമഗ്ര സംഗീത കൃതി പ്രസിദ്ധീകരിക്കണമെന്ന ജീവിതാഭിലാഷം ബാക്കി വച്ച്. 2018 ലെ മഹാപ്രളയത്തിലാണ് മൂന്ന് വോള്യമായി പൂർത്തിയാക്കി പ്രസിദ്ധീകരിക്കാൻ തയാറാക്കിയ സംഗീത സാഗരം എന്ന കൃതിയുടെ 15,000 പേജുകളടങ്ങിയ കൈയെഴുത്ത് പ്രതി നനഞ്ഞ് നശിച്ചുപോയത്. ഒപ്പം വീട്ടിലെ എല്ലാ സംഗീതശേഖരങ്ങളും കൃത്രിക കൈകളും നഷ്ടമായി. എഴുപതാം വയസിലുണ്ടായ ആഘാതം അദ്ദേഹത്തെ വിട്ടു പോയിരുന്നില്ല. സംഭവമറിഞ്ഞ് അന്നത്തെ ആരോഗ്യ മന്ത്രി അദ്ദേഹത്തിന്‍റെ കടുങ്ങല്ലൂരിലെ വീട്ടിൽ ആശ്വസിപ്പിക്കാൻ എത്തിയിരുന്നു. മന്ത്രിക്ക് മുന്നിലും ഹരിഹരൻ മാസ്റ്റർ വിതുമ്പിക്കരഞ്ഞു. ശൈലജ ടീച്ചർ ആണ് പകരം കൃത്രിമ കൈ നൽകിയത്. ഒരായുഷ്‌ക്കാലം കൃത്രിമ കൈ കൊണ്ട് എഴുതിയ സംഗീത സാഗരമെന്ന രചനയാണ് പ്രളയത്തില്‍ നശിച്ചത്. വെള്ളപ്പൊക്കത്തെ തുടർന്ന് തൊട്ടടുത്തുള്ള ബന്ധുവീട്ടിലെ ടെറസില്‍ അഭയം പ്രാപിച്ച ശേഷം മൂന്നാം ദിവസമാണ് ബോട്ടിൽ രക്ഷപ്പെടുന്നത്. 1984 സരിഗ സംഗീതാലയ എന്ന പേരിൽ വീടിനോട് ചേർന്ന് സംഗീത വിദ്യാലയം ആരംഭിച്ചു. ഗാന ഗന്ധർവൻ യേശുദാസാണ് ഉദ്ഘാടനം ചെയ്തത്. കൃത്രികകൈകൾ കൊണ്ട് ഹർമോണിയവും വായിക്കുമായിരുന്നു. 1994 ൽ കേരള സംഗീത അക്കാദമി അവാർഡ് ലഭിച്ചു.

എല്ലാ ഹൈസ്കൂളുകളിലും ഇ-ലൈബ്രറി; ബ്രോഷർ പ്രകാശനം

വൈപ്പിൻ: മണ്ഡലത്തിലെ എല്ലാ ഹൈസ്കൂളുകളിലും ഇ - ലൈബ്രറി എന്ന പദ്ധതിയുടെ ബ്രോഷർ പ്രകാശനം ചെയ്തു. മുനമ്പത്ത് നടന്ന ചടങ്ങിൽ ഗ്ലോബൽ സിഎസ്ആർ എച്ച്സിഎൽ വൈസ് പ്രസിഡന്‍റ് ഡോ. നിധി പുന്ദിർ, സിനിമാതാരം സന്ധ്യ മനോജിന് ബ്രോഷർ കൈമാറിയാണ്പ്രകാശനം ചെയ്തത്. കെ.എൻ. ഉണ്ണിക്കൃഷ്ണൻ എംഎൽഎ സംസാരിച്ചു.

സൂപ്പർ മാർക്കറ്റ് എക്സ്പോ ഒക്ടോബറിൽ അങ്കമാലിയിൽ

ആലുവ: സൂപ്പർ മാർക്കറ്റ് വെൽഫെയർ അസോസിയേഷൻ ഓഫ് കേരള നടത്തുന്ന രണ്ടാമത്തെ ഓൾ കേരള റീട്ടെയിൽ എക്സ്പോ - 2025 ഒക്ടോബർ മാസം 3, 4, 5 തീയതികളിൽ അങ്കമാലി അഡ്‌ലക്‌സ് കൺവെൻഷൻ സെന്‍ററിൽ നടക്കും. കേരളത്തിലും ഇതര സംസ്ഥാനങ്ങളിലും നിന്നുമുള്ള 5,000ത്തോളം സൂപ്പർമാർക്കറ്റ് ഉടമകളും റീട്ടെയ്ൽ മേഖലയിൽ പ്രവർത്തിക്കുന്ന ചെറുതും വലുതുമായ കമ്പനികളും ഇതിൽ പങ്കെടുക്കുമെന്ന് പ്രസിഡന്‍റ് ജോർഫിൻ പെട്ട, ജനറൽ സെക്രട്ടറി കെ.എ. നിയാവുദ്ദീൻ എന്നിവർ അറിയിച്ചു. എക്സ്പോയിൽ പ്രോഡക്റ്റ് ലോഞ്ചിംഗ് ബിസിനസ് മീറ്റ്, മോട്ടിവേഷൻ ക്ലാസ്, സ്റ്റാഫ് ട്രെയിനിംഗ് സെക്ഷൻ, ബിസിനസ് അവാർഡ്, എന്‍റർടൈൻമെന്‍റ് പ്രോഗ്രാം തുടങ്ങിയവയും ഉണ്ടാകും.

പഞ്ചായത്ത് കമ്മിറ്റി യോഗം മൊബൈലിൽ പകർത്തി പ്രദർശിപ്പിച്ചെന്ന് പരാതി

ഉദയംപേരൂർ: പഞ്ചായത്ത് കമ്മിറ്റി യോഗം രഹസ്യമായി മൊബൈലിൽ വീഡിയോ പകർത്തി സോഷ്യൽ മീഡിയയിൽ പ്രദർശിപ്പിച്ചെന്ന് പരാതി. ഉദയംപേരൂർ പഞ്ചായത്തിലെ കോൺഗ്രസ് അംഗം പഞ്ചായത്ത് കമ്മിറ്റിയിലെ ശ്മശാനം സംബന്ധിച്ചുള്ള അജണ്ടയിലെ ചർച്ച മൊബൈലിൽ പകർത്തുകയും കോൺഗ്രസ് അനുഭാവിയായ ഒരാൾ സോഷ്യൽ മീഡിയയിൽ സ്റ്റാറ്റസ് ആയി പ്രദർശിപ്പിച്ചുവെന്നാണ് ആക്ഷേപം. ഇത്തരം പ്രവൃത്തികൾ നടത്തിയവർക്കെതിരെ കർശന നടപടി സ്വീകരിക്കണമെന്നാവശ്യപ്പെട്ട് ഉദയംപേരൂർ പോലീസിലും സംസ്ഥാന ഇലക്ഷൻ കമ്മീഷനും പഞ്ചായത്ത് പ്രിൻസിപ്പൽ ഡയറക്ടർക്കും ഉദയംപേരൂർ പഞ്ചായത്ത് ക്ഷേമകാര്യ സ്ഥിരംസമിതി ചെയർമാൻ ടി.കെ. ജയചന്ദ്രൻ പരാതി നൽകി.

"ഇന്നൊവേഴ്‌സ്' ശാസ്ത്രപ്രദര്‍ശനം സംഘടിപ്പിച്ചു

കൊച്ചി: തേവര സേക്രഡ് ഹാര്‍ട്ട് സിഎംഐ പബ്ലിക് സ്‌കൂള്‍ ഇന്‍റര്‍ സ്‌കൂള്‍ സയന്‍സ് എക്‌സിബിഷന്‍ "ഇന്നൊവേഴ്‌സ് 2025' സംഘടിപ്പിച്ചു ജനിതകശാസ്ത്രത്തിന്‍റെ പിതാവായ ഗ്രിഗര്‍ ജോഹാന്‍ മെന്‍ഡലിന്‍റെ ജന്മദിനാഘോഷത്തിന്‍റെ ഭാഗമായി അദ്ദേഹത്തിന്‍റെ ശാസ്ത്രീയ പൈതൃകത്തെ ആദരിച്ച് സംഘടിപ്പിച്ച ഈ വര്‍ഷത്തെ എക്‌സിബിഷന്‍റെ ഉദ്ഘാടനം സിഎസ്‌ഐആര്‍ –എന്‍ഐഐഎസ്ടിയിലെ മുന്‍ ചീഫ് സയന്‍റിസ്റ്റ് ഡോ. കെ.ജി. രഘു നിര്‍വഹിച്ചു. വിദ്യാര്‍ഥികളില്‍ ശാസ്ത്രീയ മനോഭാവം വളര്‍ത്തുകയും നൂതന ചിന്താഗതികള്‍ക്ക് വഴിയൊരുക്കുകയും ചെയ്യുകയെന്നതാണ് ഇന്നൊവേഴ്‌സിന്‍റെ മുഖ്യലക്ഷ്യം. മൂന്നു വിഭാഗങ്ങളിലായി നടത്തിയ ശാസ്ത്രപ്രദര്‍ശനത്തില്‍ 26 സ്‌കൂളുകളില്‍ നിന്നുള്ള 77 ടീമുകളില്‍പ്പെട്ട ഇരുന്നൂറോളം വിദ്യാര്‍ഥികള്‍ പങ്കെടുത്തു. സ്‌കൂള്‍ പ്രിന്‍സിപ്പല്‍ റവ. ഡോ. വര്‍ഗീസ് കാച്ചപ്പിള്ളി, വൈസ് പ്രിന്‍സിപ്പല്‍ വിനിത മെന്‍ഡസ്, ഹെഡ്മിസ്ട്രസ് സിന്ധു തറയില്‍, കിന്‍ഡര്‍ ഗാര്‍ഡന്‍ ഹെഡ്മിസ്ട്രസ് ബിന്ദു തോമസ് എന്നിവര്‍ പ്രസംഗിച്ചു.

കനത്ത കാറ്റിൽ കൂറ്റൻ ആൽമരം നിലംപൊത്തി

ഫോർട്ടുകൊച്ചി: ശക്തമായ കാറ്റിൽ നൂറ്റാണ്ടിലേറെ പഴക്കമുള്ള ആൽമരം മറിഞ്ഞു വീണു. വാഹനങ്ങൾ തകർന്നു. ആളപായമില്ല അമരാവതി ശ്രീ ഗോപാല കൃഷ്ണ ക്ഷേത്രവളപ്പിലെ ആൽമരമാണ് വ്യാഴാഴ്ച അതിരാവിലെ കാറ്റിൽ റോഡിലേക്ക് മറിഞ്ഞു വീണത്. റോഡിൽ പാർക്ക് ചെയ്ത ഓട്ടോറിക്ഷ പൂർണമായും തകർന്നു. ആൽമരത്തിന്‍റെ ചില്ല വീണതിനെത്തുടർന്ന് വൈദ്യുതി പോസ്റ്റ് മറിഞ്ഞു വീണ് രണ്ടു കാറുകൾക്കും കേടുപറ്റി. 12 ഓളം വൈദ്യുതി പോസ്റ്റുകളും തകർന്നു. മൂന്ന് ലക്ഷം രൂപയുടെ നഷ്ടം കണക്കാക്കുന്നു. മട്ടാഞ്ചേരി അഗ്നിരക്ഷാസേനയെത്തി മരം വെട്ടിമാറ്റി.

ദേവസ്വം ബോർഡ് വാക്ക് പാലിച്ചില്ല : ചെളിയിൽ നിന്ന് ബലികർമങ്ങൾ ചെയ്ത് ഭക്തജനങ്ങൾ

ആലുവ: ആലുവ മണപ്പുറത്ത് എത്തിച്ചേരുന്ന ഭക്തജനങ്ങളുടെ സൗകര്യാർഥം മെറ്റൽ വിരിച്ച് കടവുകളിൽ നിന്ന് ചെളി ഒഴിവാക്കുമെന്ന തിരുവിതാംകൂർ ദേവസ്വം ബോർഡിന്‍റെ ഉറപ്പ് വെറുതെയായി. ആയിരക്കണക്കിന് ഭക്തജനങ്ങൾ ചെളിയിലൂടെ നടന്നും നിന്നുമാണ് മണപ്പുറത്തെ ബലിത്തറയിൽ കർക്കിടവാവു ബലിയിടൽ കർമങ്ങൾ ചെയ്തത്. ബലിത്തറ ലേലം വിളിയിലൂടെ ലക്ഷങ്ങളാണ് ദേവസ്വം ബോർഡിന് വരുമാനം ലഭിച്ചത്. സാധാരണ തുകയായ 75 ൽ നിന്ന് 100 ആയി ഉയർത്തി വരുമാനം വർധിപ്പിച്ചിട്ടും ഭക്തജനങ്ങളോട് ക്രൂരതയാണ് കാണിച്ചതെന്നാണ് ആരോപണം. മാത്രമല്ല നേരിട്ട് കടവിലേക്ക് വരുന്നവരിൽ നിന്ന് കടവ് വൃത്തിയാക്കാനെന്ന പേരിൽ 50 രൂപ ഇടാക്കിത്തുടങ്ങിയിട്ടുണ്ട്. ഇത്രയും വരുമാനം ലഭിച്ചിട്ടും ഭക്തജനങ്ങൾക്ക് സൗകര്യം ഒരുക്കാതിരുന്നതിനെതിരെ ശക്തമായ പ്രതിഷേധം ഉയർന്നിട്ടുണ്ട്. വിട്ടുമാറാത്ത മഴയും എത്തിയതോടെയാണ് മണപ്പുറം ചെളിക്കുളമായത്. മെറ്റലിട്ടെങ്കിലും അവയെല്ലാം വെള്ളത്തിൽ വരച്ച വര പോലെയായി. ബലിതർപ്പണത്തിന് എത്തിയവരെ ചെളിയിൽ നിറുത്തിയ ദേവസ്വം ബോർഡ് നടപടി പ്രതിഷേധാർഹമാണെന്ന് ബിജെപിയും കുറ്റപ്പെടുത്തി. ഇതിനിടയിൽ പെരിയാറിൽ ജലനിരപ്പ് ഉയർന്നതോടെ കടവുകളിലേക്ക് ഇറങ്ങുന്നതിന് പോലീസ് നിയന്ത്രണം ഏർപ്പെടുത്തി. ചരട് കെട്ടി പ്രത്യേക ബാനർ ഉയർത്തിയാണ് മുന്നറിയിപ്പ് നൽകിയത്.

വാഹനാപകടം: ഇതരസംസ്ഥാന തൊഴിലാളി മരിച്ചു

പെരുന്പാവൂർ: പിക്കപ്പ് വാൻ നിയന്ത്രണം വിട്ട് സ്കൂട്ടറിൽ ഇടിച്ച് ഇതരസംസ്ഥാന സ്വദേശി മരിച്ചു. ആസാം സ്വദേശി ജാക്കിർ ഹുസൈൻ (30) ആണ് മരിച്ചത്. ഇന്നലെ രാവിലെ ഏഴിന് ഒക്കൽ കാരിക്കോട് വളവിൽ ആണ് അപകടം. കാലടി ഭാഗത്തുനിന്നും പെരുന്പാവൂരിലേക്ക് വരികയായിരുന്ന വാൻ കാലടി ഭാഗത്തേക്ക് പോവുകയായിരുന്ന ഇറച്ചി കടയിൽ ജോലിക്കാരനായ ജാക്കിർ സഞ്ചരിച്ച സ്കൂട്ടറിൽ ഇടിക്കുകയായിരുന്നു. ഉടൻ ആശുപത്രിയിലെത്തിച്ചെങ്കിലും രക്ഷിക്കാനായില്ല. വെള്ളിയാഴ്ച നാട്ടിലേക്ക് പോകാനിരിക്കുകയായിരുന്നു ജാക്കിർ. പെരുന്പാവൂർ പോലീസ് ഇൻക്വസ്റ്റ് തയാറാക്കി. മൃതദേഹം പെരുന്പാവൂർ താലൂക്കാശുപത്രി മോർച്ചറിയിലേക്ക് മാറ്റി.

മലന്പാന്പിനെ പിടികൂടി

വാഴക്കുളം: ആവോലിയിൽ മലന്പാന്പിനെ പിടികൂടി. വള്ളിക്കട അറയ്ക്കൽ പീടികയ്ക്ക് സമീപം ജനവാസ കേന്ദ്രത്തിൽ നിന്നാണ് മലന്പാന്പിനെ പിടികൂടിയത്. ചൊവ്വാഴ്ച രാത്രി എട്ടോടെ പ്രദേശവാസിയായ സമരന്‍റെ പുരയിടത്തിലാണ് പത്തടി നീളവും 10 കിലോയോളം ഭാരവുമുള്ള പാന്പിനെ കണ്ടത്. പാന്പ് പറന്പിലേക്ക് കയറുന്നത് ശ്രദ്ധയിൽപ്പെട്ട സ്കൂട്ടർ യാത്രക്കാർ അറിയിച്ചതിനെ തുടർന്ന് പുരയിടത്തിൽ തിരച്ചിൽ നടത്തി പാന്പിനെ കണ്ടെത്തുകയായിരുന്നു. രാത്രി ഒന്പതരയോടെ സ്ഥലത്തെത്തിയ വനം വകുപ്പ് അധികൃതർ പാന്പിനെ ഏറ്റെടുത്തു.

ആൽഫാ പാലിയേറ്റീവ് കെയറിനു വാഹനം നൽകി

മൂവാറ്റുപുഴ: സാന്ത്വന പരിചരണ രംഗത്തു പ്രവർത്തിക്കുന്ന ആൽഫാ പാലിയേറ്റിവ് കെയർ മൂവാറ്റുപുഴയ്ക്കു ദന്തൽ ലാബായ ഡെന്‍റ് കെയർ ഡെന്‍റൽ ലാബ് (പ്രൈ) ലിമിറ്റഡ് സൗജന്യമായി വാഹനം നൽകി. അഞ്ച് പേർക്കു സഞ്ചരിക്കാവുന്ന മാരുതി ഇക്കോയുടെ പുതിയ ഹോം കെയർ വാഹനം ഡെന്‍റ് കെയർ സ്ഥാപന മേധാവി ജോണ്‍ കുര്യാക്കോസിൽ നിന്നും ആൽഫ പ്രസിഡന്‍റ് അഷറഫ് മാണിക്യം, സെക്രട്ടറി വിൽസണ്‍ മാത്യു കുരിശിങ്കൽ എന്നിവർ ഏറ്റുവാങ്ങി. ഡെന്‍റ് കെയർ ഹെഡ് ഓഫീസിൽ നടന്ന ചടങ്ങിൽ ഡെന്‍റ് കെയർ ഡയറക്ടർമാരായ ജെസി ജോണ്‍, ബേബി കുര്യാക്കോസ്, സാജു കുര്യാക്കോസ്, ഡെയ്സി ബേബി, സാലി സാജു, എൽദോസ് കെ. വർഗീസ്, സിഇഒ എബിൻ ജോണ്‍സ്, ഡയാൽ കുര്യൻ, കന്പാഷനേറ്റീവ് കേരള ചീഫ് പ്രോജക്ട് കോ-ഓർഡിനേറ്റർ അംജിത് കുമാർ, എറണാകുളം കമ്മിറ്റി വെൽഫെയർ ഓഫീസർ എൽദോസ് കെ. തങ്കച്ചൻ, കോട്ടയം കമ്യൂണിറ്റി ഡെവലപ്മെന്‍റ് ഓഫീസർ അനിൽ, ലിങ്ക് സെന്‍റർ ഭാരവാഹികൾ തുടങ്ങിയവർ പങ്കെടുത്തു.

വി.എസ് അച്യുതാനന്ദന്‍റെ വേർപാടിൽ അനുശോചിച്ചു

മൂവാറ്റുപുഴ : മുൻ മുഖ്യമന്ത്രി വി.എസ് അച്യുതാനന്ദന്‍റെ വേർപാടിൽ സിപിഎം മൂവാറ്റുപുഴ ഏരിയ കമ്മിറ്റിയുടെ നേതൃത്വത്തിൽ മൗനജാഥയും അനുശോചനയോഗവും സംഘടിപ്പിച്ചു. രാഷ്ട്രീയ സാമൂഹ്യ സാംസ്കാരിക രംഗത്തെ പ്രമുഖരും പ്രവർത്തകരും പങ്കെടുത്തു. എസ്തോസ് ഭവന് മുന്നിൽ നിന്ന് തുടങ്ങിയ മൗനജാഥ നെഹൃ പാർക്ക് ചുറ്റി കച്ചേരിത്താഴത്ത് സമാപിച്ചു. തുടർന്ന് ചേർന്ന അനുശോചന യോഗത്തിൽ സിപിഐ മണ്ഡലം സെക്രട്ടറി ജോളി പൊട്ടയ്ക്കൽ അധ്യക്ഷത വഹിച്ചു. സിപിഎം ഏരിയ സെക്രട്ടറി അനീഷ് എം. മാത്യു അനുശോചന പ്രമേയം അവതരിപ്പിച്ചു. സിപിഐ സംസ്ഥാന കൗണ്‍സിൽ അംഗം ബാബു പോൾ, കോണ്‍ഗ്രസ് നിയോജകമണ്ഡലം പ്രസിഡന്‍റ് സാബു ജോണ്‍, മുസ്ലിം ലീഗ് സംസ്ഥാന സെക്രട്ടറിയേറ്റംഗം കെ.എം അബ്ദുൽ മജീദ്, കേരള കോണ്‍ഗ്രസ്-എം മണ്ഡലം പ്രസിഡന്‍റ് ഷൈൻ ജേക്കബ്, സിപിഎം ഏരിയ കമ്മിറ്റിയംഗം സജി ജോർജ് എന്നിവർ പ്രസംഗിച്ചു. പോത്താനിക്കാട്: മുൻമുഖ്യമന്ത്രി വി.എസ്. അച്യുതാനന്ദന്‍റെ നിര്യാണത്തിൽ പൈങ്ങോട്ടുർ പൗരാവലി അനുശോ ചിച്ചു. പൈങ്ങോട്ടൂർ പഞ്ചായത്ത് വൈസ് പ്രസിഡന്‍റ് സാബു മത്തായി അധ്യക്ഷത വഹിച്ചു.

എംഡിഎംഎയുമായി യുവാവ് പിടിയിൽ

പോത്താനിക്കാട്: പല്ലാരിമംഗലത്ത് എക്സൈസ് നടത്തിയ പരിശോധനയിൽ എംഡിഎംഎ യുമായി പുലിക്കുന്നേൽപടി കുന്നത്ത് സദാം എന്ന് വിളിക്കുന്ന ആഷിക്ക്(32) പിടിയിലായി. കോതമംഗലം എക്സൈസ് റെയിഞ്ച് ഇൻസ്പെക്ടർ സിജോ വർഗീസിന്‍റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. നാളുകളായി ഇ‍യാൾ എക്സൈസിന്‍റെ നിരീക്ഷണത്തിലായിരുന്നു. പ്രതിയുടെ ലഹരി ഇടപാടുകളെക്കുറിച്ച് വിശദമായി അന്വേഷണം നടത്തുമെന്ന് എക്സൈസ് സംഘം അറിയിച്ചു. പരിശോധനയിൽ പ്രിവന്‍റീവ് ഓഫീസർമാരായ പി.ബി. ലിബു, എം.ടി. ബാബു, സോബിൻ ജോസ്, സിവിൽ എക്സൈസ് ഓഫീസർമാരായ കെ.എ. റസാക്ക്, ബിലാൽ പി. സുൽഫി, വനിതാ സിവിൽ എക്സൈസ് ഓഫീസർ കെ.എസ്. ബബീന എന്നിവർ പങ്കെടുത്തു.

മൂവാറ്റുപുഴയാറിൽ ചൂണ്ടയിടൽ സജീവം

മൂവാറ്റുപുഴ: കാലവർഷം തകൃതിയായി പെയ്തതോടെ മൂവാറ്റുപുഴയാറിൽ ചൂണ്ടയിടൽ സജീവമായി. ചൂണ്ടയും കുട്ടകളുമായി മീൻപിടിക്കാൻ യുവാക്കൾ മുതൽ വയോധികർവരെ മൂവാറ്റുപുഴയാറിന്‍റെ തീരങ്ങളിൽ സജീവമായിട്ടുണ്ട്. നാടൻ ചൂണ്ടകൾ മുതൽ അത്യാധുനിക സംവിധാനങ്ങളോട് കൂടിയ ചൂണ്ടകൾ വരെ ഉപയോഗിച്ചാണ് പലരും മൂവാറ്റുപുഴയാറിൽ മത്സ്യം പിടിക്കുന്നത്. ഉണക്കചെമ്മീൻ, ചെറുപരലുകൾ, കോഴി വേസ്റ്റുകൾ, മൈദാമാവിൽ മഞ്ഞൾപ്പൊടി ചേർത്ത് ചെറിയ ഗുളിക രൂപത്തിലാക്കിയും ചൂണ്ടയിൽ കോർത്തിടുന്നതാണ് പതിവ്. നിരവധിപേർ ഇതിൽ നിന്നും ജീവിത മാർഗവും കണ്ടെത്താറുണ്ട്. തുടർച്ചയായ പത്താം വർഷവും ബാൻഡ് സെറ്റ് കലാകാരൻ മൂവാറ്റുപുഴ നിർമല കോളജിന് സമീപം താമസിക്കുന്ന കണന്പിള്ളിൽ വിൻസെന്‍റും മീൻ പിടുത്തത്തിൽ സജീവമാണ്. മൂവാറ്റുപുഴയിലെ വിവിധ പുഴയോരങ്ങൾ വിൻസെന്‍റ് മീൻ പിടിക്കുന്നതിനായി തെരഞ്ഞെടുക്കാറുണ്ട്. കട്‌‌‌ല, വഴുത, കൂരി, വാള തുടങ്ങിയ മത്സ്യങ്ങളാണ് കൂടുതലായി ലഭിക്കുന്നതെന്ന് വിൻസെന്‍റ് പറഞ്ഞു. 40 വർഷത്തോളമായി ബാൻഡ് ട്രൂപ്പുകളിൽ അംഗമായിട്ടുള്ള വിൻസെന്‍റ് മൂവാറ്റുപുഴ ഹോളി മാഗി ഫൊറോന പള്ളിയിൽ പൂജ രാജാക്കന്മാരുടെ തിരുനാൾ ദിനങ്ങളിൽ ബാൻഡ് സെറ്റിനൊപ്പം എത്താറുണ്ട്. വലുതും ചെറുതുമായ നിരവധി മീനുകളാണ് ചൂണ്ടയിൽ കുടുങ്ങുന്നത്. ചൂണ്ടയിട്ട് ലഭിക്കുന്ന മീനുകൾ വീട്ടിലെ ആവശ്യത്തിന് ഉപയോഗിക്കുകയും ശേഷിക്കുന്നവ വില്പനയും നടത്താറുണ്ട്.

വീതിയില്ലാ റോഡും മൂടിയില്ലാ ഓടകളും; ഇവിടെ വാഹനയാത്ര അപകടകരം

മൂവാറ്റുപുഴ : കടാതി അന്പലംപടി - ചെക്ക് ഡാം റോഡിലൂടെയുള്ള യാത്ര ദുരിതമാകുന്നതായി പരാതി. 60 വർഷം മുൻപ് നിർമിച്ച റോഡിൽ കൈയേറ്റങ്ങൾ ഉണ്ടാകുന്നതും ടാറിംഗ് നടത്താത്തതുമാണ് യാത്ര കൂടുതൽ ദുഷ്കരമാക്കുന്നത്. വാളകം പഞ്ചായത്തിലെ ഏഴു മുതൽ ഒന്പതുവരെ വാർഡുകളിലൂടെ കടന്നു പോകുന്ന ബൈപ്പാസ് റോഡായി ഉപയോഗിക്കുന്ന അന്പലംപടി - ചെക്ക് ഡാം റോഡിലൂടെ ദിനംപ്രതി ആയിരക്കണക്കിന് വാഹനങ്ങളാണ് കടന്നു പോകുന്നത്. പിറവം, ഈസ്റ്റ് മാറാടി, കോട്ടയം ഭാഗങ്ങളിലേക്ക് പോകേണ്ട വാഹനങ്ങൾ പ്രധാനമായും ആശ്രയിക്കുന്ന ഈ റോഡിന് വീതി കുറവായതിനാൽ ഒരേസമയം ഇരുവശത്തേക്കും വാഹനങ്ങൾ കടന്നു പോകാൻ ബുദ്ധിമുട്ടുകയാണ്. 1970ൽ പൊതുമരാമത്ത് വകുപ്പ് ഏറ്റെടുത്ത ഈ റോഡിലൂടെ മുൻപ് അഞ്ചോളം സ്വകാര്യ ബസുകൾ സർവീസ് നടത്തിയിരുന്നെങ്കിലും ഇപ്പോൾ റോഡിന്‍റെ ശോച്യാവസ്ഥയെ തുടർന്ന് ഒരു ബസ് മാത്രമാണ് പ്രദേശവാസികൾക്ക് ആശ്രയമായിട്ടുള്ളത്. സ്കൂൾ സമയങ്ങളിൽ ഉൾപ്പെടെ വൻ ഗതാഗത തിരക്കാണ് റോഡിൽ അനുഭവപ്പെടുന്നത്. പിഡബ്ല്യുഡി റോഡിൽ അപകടങ്ങൾ പതിവാണെന്നും പരിഹാരം തേടി പരാതിയുമായി എത്തുന്പോൾ അധികൃതർ കടുത്ത അനാസ്ഥയാണ് തുടരുന്നതെന്നും പ്രദേശവാസികൾ പറഞ്ഞു. ഇതിനെല്ലാം പുറമേ റോഡരികിലെ ഓടകൾ സ്ലാബിട്ട് മൂടാതിരിക്കുന്നത് അപകടങ്ങൾ വർധിക്കാൻ കാരണമാകുന്നു. മഴക്കാലങ്ങളിൽ റോഡിൽ വെള്ളം കെട്ടിക്കിടക്കുകകൂടി ചെയ്യുന്നതോടെ വാഹനങ്ങൾ ഓടയിലേക്ക് ചെരിയാൻ സാധ്യതയേറെയാണ്. റോഡിൽ അറ്റകുറ്റപ്പണി നടത്താൻ ഫണ്ടില്ലെന്നാണ് പിഡബ്ല്യുഡി അധികൃതരുടെ വാദം. 10 വർഷത്തോളമായി റോഡിൽ ടാറിംഗ് നടത്തിയിട്ടില്ല. ഓടകൾ സ്ലാബിട്ട് മൂടാതിരിക്കുന്നതും കാടുപിടിച്ച് കിടക്കുന്നതും അപകടങ്ങൾക്കിടയാക്കുകയാണ്. സ്കൂളുകൾ, അങ്കണവാടികൾ, നഴ്സറികൾ, ഹെൽത്ത് സെന്‍ററുകൾ, ആരാധനാലയങ്ങൾ തുടങ്ങി സ്ഥാപനങ്ങളുള്ള റോഡാണ് ഗതാഗതക്കുരുക്കിൽ നിശ്ചലമാകുന്നത്. റോഡിന്‍റെ വശങ്ങളിൽ മണ്ണിടിച്ചിൽ ഭീഷണി നേരിടുന്നതും യാത്രക്കാരെ അപകടക്കെണിയിലാക്കുകയാണ്. എത്രയും വേഗം റോഡിൽ ടാറിംഗ് നടത്തണമെന്നും റോഡരികിലെ കൃഷി ഉൾപ്പെടെയുള്ള കൈയേറ്റങ്ങൾ ഒഴിപ്പിക്കണമെന്നുമാണ് പ്രദേശവാസികളുടെ ആവശ്യം.

ലയണ്‍സ് ക്ലബ് ഭാരവാഹികളുടെ സ്ഥാനാരോഹണം

വഴിത്തല : ലയണ്‍സ് ക്ലബ് ഭാരവാഹികളുടെ സ്ഥാനാരോഹണവും പ്രവർത്തന വർഷത്തെ സേവന പദ്ധതികളുടെ ഉദ്ഘാടനവും ലയണ്‍സ് ക്ലബ് ഓഡിറ്റോറിയത്തിൽ നടന്നു. ഭാരവാഹികളുടെ സ്ഥാനാരോഹണവും അംഗത്വ വിതരണവും ലയണ്‍സ് ഡിസ്ട്രിക്ട് 318സി മുൻ ഗവർണർ രാജേഷ് കൊളാരിക്കൽ നിർവഹിച്ചു. സേവന പദ്ധതികളുടെ ഉദ്ഘാടനം ജില്ലാ പഞ്ചായത്ത് മുൻ പ്രസിഡന്‍റും അംഗവുമായ ഉല്ലാസ് തോമസ് നിർവഹിച്ചു. ഫ്രാൻസിസ് ആൻഡ്രൂസ് -പ്രസിഡന്‍റ്, പി.സി സേതുനാഥ് -സെക്രട്ടറി, സണ്ണി ജോസഫ് -ട്രഷറർ എന്നിവരും മറ്റ് ഭരണസമിതിയംഗങ്ങളും സമ്മേളനത്തിൽ സ്ഥാനമേറ്റു. ഭവനരഹിതർക്കുള്ള സ്നേഹവീട്, ഹൈസ്കൂളുകളിൽ സാനിറ്ററി നാപ്കിൻ ഇൻസിനറേറ്റർ വിതരണം, ഇ-മാലിന്യ ശേഖരണം, കരിയർ മാപ്പിംഗ്, വർധിച്ചുവരുന്ന ലഹരി ഉപയോഗത്തിനെതിരെ ബോധവൽക്കരണം, കുട്ടികളുടെ നേത്ര സംരക്ഷണത്തിനുള്ള ക്യാന്പുകൾ, മെഡിക്കൽ ക്യാന്പുകൾ, വിദ്യാലയങ്ങൾക്കുള്ള ഡിജിറ്റൽ ലൈബ്രറി, ട്രാഫിക് സിഗ്നൽ സ്ഥാപിക്കൽ, കുട്ടികളിലെ കാൻസർ നിർമാർജനം, രോഗികൾക്കുള്ള സഹായം, ദാരിദ്ര്യനിർമാർജനം തുടങ്ങി വിവിധ മേഖലകളിലായി സാമൂഹ്യ സേവന പദ്ധതികൾ ഈ വർഷം നടപ്പാക്കുമെന്ന് ഭാരവാഹികൾ അറിയിച്ചു. പ്രഫ. സാംസണ്‍ തോമസ് ലോഗോ പ്രകാശനം ചെയ്തു. വഴിത്തല ശാന്തിഗിരി കോളജിലും സെന്‍റ് സെബാസ്റ്റ്യൻ ഹൈസ്കൂളിലും സാനിറ്ററി നാപ്കിൻ ഇൻസിനറേറ്റർ സ്ഥാപിക്കുന്നതിന്‍റെ ഉദ്ഘാടനം വിജു വാതക്കാട്ടിൽ നിർവഹിച്ചു.

ഇ-മാലിന്യം ശേഖരിക്കുന്നു

കൂത്താട്ടുകുളം : നഗരസഭ ഹരിത കർമ്മസേന മുഖേന ഇ-മാലിന്യങ്ങൾ ശേഖരിച്ച് ക്ലീൻ കേരള കന്പനിക്ക് കൈമാറുന്നു. ഇ-മാലിന്യങ്ങളായ പഴയ ഉപയോഗശൂന്യമായതുമായ ടെലിവിഷൻ, റെഫ്രിജറേറ്റർ, വാഷിംഗ് മെഷീൻ, കംപ്യൂട്ടർ, ലാപ്ടോപ്പ്, ഇലക്ട്രിക് അയണ്‍ ബോക്സ് തുടങ്ങി എല്ലാവിധ ഇലക്ട്രിക്, ഇലക്ട്രോണിക് ഉപകരണങ്ങളും സർക്കാർ നിശ്ചയിച്ച പ്രകാരമുള്ള വില നൽകിയാണ് ശേഖരിക്കുന്നത്. പരിപാടിയുടെ ഉദ്ഘാടനം നാളെ രാവിലെ 11ന് കൂത്താട്ടുകുളം കേളി ഫൈൻ ആർട്സ് സ്കൂളിൽ നഗരസഭാധ്യക്ഷ വിജയ ശിവൻ നിർവഹിക്കും. മറ്റു വാർഡുകളിലെ കളക്ഷൻ പോയിന്‍റുകൾ പിന്നീട് അറിയിക്കും.

വീട്ടിലുണ്ടായിരുന്ന യുവാവ് ഓടിരക്ഷപ്പെട്ടു : മണീടിൽ മരങ്ങൾ വീണ് വീട് തകർന്നു

പിറവം: മണീടിൽ നാല് മരങ്ങൾ വീണ് വീട് തകർന്നു. ഇതിനുള്ളിലുണ്ടായിരുന്ന യുവാവ് മേൽക്കൂര തകരുന്ന ശബ്ദം കേട്ട് പുറത്തേയ്ക്ക് ഓടി രക്ഷപ്പെട്ടു. ചീരക്കാട്ടുപാറ കോടംകണ്ടത്തിൽ തങ്കച്ചന്‍റെ ഓടിട്ട വീടിന്‍റെ മുകളിലേക്കാണ് നാലു മരങ്ങൾ പതിച്ചത്. ഇന്നലെ ഉച്ചകഴിഞ്ഞ് രണ്ടോടെയാണ് കാറ്റ് വീശിയത്. പ്ലാവാണ് ആദ്യം മറിഞ്ഞത്. ഇതു വീണാണ് തെങ്ങും, അടക്കാമരവും, പൊങ്ങല്ല്യവും വീടിന് മുകളിലേക്കു പതിച്ചത്. ഈ സമയം തങ്കച്ചന്‍റെ ഇളയ മകനായ പ്രകാശാണ് വീട്ടിലുണ്ടായിരുന്നത്. വലിയ ശബ്ദം കേട്ട് പുറത്തേയ്ക്ക് ഓടിയതിനാൽ രക്ഷപ്പെട്ടു. റബർ വെട്ടുകാരനായ തങ്കച്ചനും, ഭാര്യ സരളയും, മറ്റൊരു മകനായ പ്രസാദും ഈ സമയം പുറത്തുപോയിരിക്കുകയായിരുന്നു. സമീപവാസികൾ ചേർന്ന് തകർന്ന മേൽക്കൂരയും മറ്റും നീക്കം ചെയ്ത്, താത്കാലികമായി പ്ലാസ്റ്റിക് ഷീറ്റ് വലിച്ചു കെട്ടിയിട്ടുണ്ട്.

നാടിനാവേശമായ ശ്രീക്കുട്ടിക്ക് ആദരം

കോലഞ്ചേരി: വളയം പിടിക്കുന്ന വളയിട്ട കൈകൾ നാടിനാവേശമാകുന്നു. കോലഞ്ചേരി ആലുവ റൂട്ടിൽ ഓടിക്കൊണ്ടിരിക്കുന്ന സെന്‍റ് തോമസ് ബസിലെ വനിതാ ഡ്രൈവർ 23 കാരിയായ പുളിക്കായത്ത് വീട്ടിൽ ലക്ഷ്മി അനന്തകൃഷ്ണൻ (ശ്രീക്കുട്ടി) ഇന്ന് നാട്ടിലെ യുവാക്കൾക്കിടയിൽ താരമാണ്. കടയിരുപ്പ് ജംഗ്ഷനിൽ വച്ച് യൂത്ത് കോണ്‍ഗ്രസ് ഐക്കരനാട് മണ്ഡലം കമ്മിറ്റിയുടെ ആഭിമുഖത്തിൽ ഇന്നലെ വൈകിട്ട് സ്വീകരണവും അനുമോദനവും സംഘടിപ്പിച്ചു. ഐക്കരനാട് മണ്ഡലം പ്രസിഡന്‍റെ എൽദോസ് മറ്റത്തിൽ അധ്യക്ഷ വഹിച്ച ചടങ്ങിൽ ഡിസിസി ജനറൽ സെക്രട്ടറി സുജിത്ത് പോൾ ശ്രീക്കുട്ടിക്ക് മൊമെന്‍റഓ നൽകി ആദരിച്ചു. മഹിളാ കോണ്‍ഗ്രസ് ബ്ലോക്ക് വൈസ് പ്രസിഡന്‍റ് മേഴ്സി ജോണ്‍ മുഖ്യാതിഥിയായി.

ഈസ്റ്റ് മാറാടി പെരുവംമൂഴി ബൈപ്പാസ് റോഡ് : ദുരിതയാത്ര വർഷങ്ങൾ പിന്നിട്ടിട്ടും അനാസ്ഥ തുടർന്ന് അധികൃതർ

മൂവാറ്റുപുഴ: ഈസ്റ്റ് മാറാടി പെരുവംമൂഴി ബൈപ്പാസ് റോഡിലൂടെയുള്ള യാത്ര ദുരിതമായിമാറി വർഷങ്ങൾ പിന്നിട്ടിട്ടും പിഡബ്ല്യുഡി അധികൃതർ അനാസ്ഥ തുടരുന്നതായി വ്യാപക പരാതി. മാറാടി പഞ്ചായത്തിലെ പ്രധാന റോഡായ മാറാടി ഊരമന പെരുവംമൂഴി ബൈപ്പാസ് റോഡ് ബിഎംബിസി നിലവാരത്തിൽ നിർമിച്ചതിനുശേഷം പിന്നീട് യാതൊരുവിധ അറ്റകുറ്റപ്പണികളും നടത്തിയിട്ടില്ല. പുഴയും റോഡും ഒരേ നിരപ്പിലുള്ള ഈ ഭാഗത്ത് ശാശ്വതമായ സുരക്ഷാ സംവിധാനങ്ങളൊന്നും ഒരുക്കാൻ പിഡബ്ല്യുഡി അധികൃതർ തയാറായിട്ടില്ല. അപകടങ്ങൾ തുടർച്ചയായതിനെ തുടർന്ന് റോഡരികിൽ ചെറിയ പോസ്റ്റുകൾ സ്ഥാപിച്ചിട്ടുള്ളതല്ലാതെ അപകട സാധ്യത കുറയ്ക്കുന്ന സുരക്ഷാ സംവിധാനങ്ങളൊന്നും റോഡിൽ ഇതുവരെയും സ്ഥാപിച്ചിട്ടില്ല. മൂവാറ്റുപുഴ നഗര വികസന പ്രവർത്തനങ്ങൾ നടക്കുന്നതിന്‍റെ ഭാഗമായി ഗതാഗത നിയന്ത്രണം ഏർപ്പെടുത്തിയതോടെ തൊടുപുഴ, കോട്ടയം ഭാഗങ്ങളിൽ നിന്നും എറണാകുളം ഭാഗത്തേക്ക് പോകേണ്ട വാഹനങ്ങൾ ഈസ്റ്റ് മാറാടി പെരുവംമൂഴി റോഡിനെയാണ് ആശ്രയിക്കുന്നത്. അതിനാൽ വലിയ ഭാരവാഹനങ്ങൾ ഉൾപ്പെടെ ആയിരക്കണക്കിന് വാഹനങ്ങൾ ദിനംപ്രതി ഈറോഡിലൂടെയാണ് സഞ്ചരിക്കുന്നത്. റോഡിൽ ശാശ്വതമായ സുരക്ഷാസംവിധാനങ്ങൾ ഒരുക്കണമെന്ന് ആവശ്യപ്പെട്ട് പിഡബ്ല്യുഡി അധികൃതർക്കും, വകുപ്പ് മന്ത്രിക്കും പരാതി നൽകിയിട്ടുണ്ടെങ്കിലും യാതൊരു നടപടിയും സ്വീകരിച്ചില്ലെന്ന് മാറാടി പഞ്ചായത്ത് പ്രസിഡന്‍റ് ഒ.പി. ബേബി ആരോപിച്ചു. റോഡ് ഇടിഞ്ഞും, ടാറിംഗ് പൊളിഞ്ഞും തകർന്ന തരിപ്പണമായി കിടക്കുന്ന റോഡിൽ അറ്റകുറ്റപ്പണികൾ നടത്തിയില്ലെങ്കിൽ മാറാടി പഞ്ചായത്തും രാമമംഗലം പഞ്ചായത്തും സംയുക്തമായി സമരപരിപാടികൾ ആരംഭിക്കുമെന്ന് രാമമംഗലം പഞ്ചായത്ത് പ്രസിഡന്‍റ് പി.വി. സ്റ്റീഫൻ, വൈസ് പ്രസിഡന്‍റ് മേരി എൽദോസ് എന്നിവർ പറഞ്ഞു. റോഡരികുകളിൽ ക്രോസ് ബാർ ഉൾപ്പെടെയുള്ള സുരക്ഷാ സംവിധാനം ഒരുക്കി യാത്ര സുരക്ഷിതമാക്കണമെന്നാണ് ജനങ്ങളുടെ ആവശ്യം.

പോക്സോ കേസ് പ്രതിയെ ശിക്ഷിച്ചു

പറവൂർ: പ്രായപൂർത്തിയാകാത്ത പെൺകുട്ടിയോട് ലൈംഗിക അതിക്രമം നടത്തിയ കേസിലെ പ്രതി വരാപ്പുഴ ദേവസ്വംപാടം അപ്പിച്ചമല്ലംപറമ്പ് വീട്ടിൽ ശരത്തിന് (29) പറവൂർ അതിവേഗ സ്പെഷൽ കോടതി എട്ട് വർഷം കഠിന തടവും 25,000 രൂപ പിഴയും ശിക്ഷ വിധിച്ചു. പിഴത്തുക അതിജീവിതയ്ക്കു നൽകണമെന്നും പിഴ അടച്ചില്ലെങ്കിൽ ഒരു വർഷവും മൂന്ന് മാസവും അധിക തടവ് അനുഭവിക്കണമെന്നും ഉത്തരവിൽ പറയുന്നു. അതിജീവിതയെ ഫേസ്‌ബുക് വഴി പരിചയപ്പെട്ട ശേഷം വീട്ടിൽവച്ചു ലൈംഗികാതിക്രമം നടത്തിയെന്നാണ് കേസ്.

എടവനക്കാട് കോരിച്ചൊരിയുന്ന മഴയത്തും കുടിനീരിനായി നെട്ടോട്ടം

ചെറായി: എടവനക്കാട് പഞ്ചായത്തിലെ ഒന്ന്, 13 എന്നീ തീരദേശ വാർഡുകളിൽ കഴിഞ്ഞ10 ദിവസമായി തുടരുന്ന കുടിവെള്ളക്ഷാമത്തിന് ഇതുവരെ പരിഹാരമായില്ല. കോരിച്ചൊരിയുന്ന മഴയത്തും തീരവാസികൾ കുടിനീരിനായി നെട്ടോട്ടമോടുകയാണ്. ഇതിനിടെ ഇന്നലെ മുതൽ ഇവിടെ കടൽവെള്ളം കയറാൻ തുടങ്ങിയത് തീരവാസികൾക്ക് ഇരട്ട പ്രഹരമായിരിക്കുകയാണ്. തുടർന്ന് ജനകീയ സമരസമിതി നേതാക്കൾ ഇന്നലെ എറണാകുളം വാട്ടർ അഥോറിറ്റി എക്സിക്യൂട്ടീവ് എൻജിനീയറെനേരിൽകണ്ടിരുന്നു. ചെറായി കൊമരന്തി പാലത്തിനടിയിൽ നടന്നുവരുന്ന പൈപ്പ് ലൈൻ അറ്റകുറ്റപ്പണികൾ പൂർത്തിയായാൽ മാത്രമേ കുടിവെള്ളം പൂർണമായും എത്തുവെന്ന് അദ്ദേഹം അറിയിച്ചു. എന്നാൽ കഴിഞ്ഞ 10 ദിവസമായി തുടരുന്ന പണികൾ എന്ന് തീരും എന്നത് അനിശ്ചിതത്തിലാണ്. അതേസമയം ഞാറക്കൽ വാട്ടർ അഥോറിറ്റി അസിസ്റ്റന്‍റ് എൻജിനീയറുടെ റിപ്പോർട്ട് ലഭിച്ചാൽ ഉടൻ കളക്ടറുടെ അനുമതിയോട ടാങ്കറിൽ കുടിവെള്ളം എത്തിക്കാമെന്ന് എക്സിക്യൂട്ടീവ് എൻജിനീയർ ഉറപ്പു നൽകിയതായി ജനകീയ സമരസമിതി കൺവീനർ എസ്.വൈ. സംജാദ് അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]