ADVERTISEMENT

ADVERTISEMENT

മെറിറ്റ് ഡേ ആഘോഷിച്ചു

കോതമംഗലം: ഊന്നുകൽ ഹൈറേഞ്ച് പബ്ലിക് സ്കൂളിൽ 2024-25 അധ്യാന വർഷത്തെ മെറിറ്റ് ഡേ ആഘോഷിച്ചു. പഠന പ്രവർത്തനങ്ങളിൽ മികവു കാട്ടിയ കുട്ടിളെ അവാർഡുകൾ നൽകി ആദരിച്ചു. സ്കൂ‌ൾ പ്രിൻസിപ്പൽ ഫാ. സി.ജെ. ജിപ്സൺ അധ്യക്ഷത വഹിച്ചു.

എംസിബിഎസ് കലാസദൻ ഡയറക്ടർ ഫാ. ജോൺപോൾ തെക്കുംചേരിക്കുന്നേൽ അവാർഡ് നൽകി. സ്‌കൂൾ മാനേജർ ഫാ. ജിപ്‌സൺ കോളാട്ടുകുടി മുഖ്യ പ്രഭാഷണം നടത്തി. കുട്ടികളുടെ വിവിധ കലാപരിപാടികളും അരങ്ങേറി.

ADVERTISEMENT

പരിസ്ഥിതി സൗഹൃദ പ്രദർശന വിപണന മേള സംഘടിപ്പിച്ചു

കോതമംഗലം: മാർ അത്തനേഷ്യസ് കോളജിലെ കോമേഴ്സ്‌ വിഭാഗത്തിന്‍റെ ആഭിമുഖ്യത്തിൽ വന്യം- രണ്ടാംപതിപ്പ് പരിസ്ഥിതി സൗഹൃദ പ്രദർശന വിപണന മേള നടത്തി. കോളജ് ഇൻഡോർ സ്റ്റേഡിയത്തിൽ നടത്തിയ പരിപാടി കോളജ് പ്രിൻസിപ്പൽ ഡോ. മഞ്ജു കുര്യൻ ഉദ്ഘാടനം ചെയ്‌തു. കോമേഴ്സ് വിഭാഗം മേധാവി ഡോ. ഡയാന ആൻ ഐസക്, അഡ്മ‌ിനിസ്‌ട്രേറ്റീവ് ഡീൻ ഡോ.സ്മിത തങ്കച്ചൻ, അക്കാദമിക് ഡീൻ ഡോ. ബിനു വർഗീസ്, കോമേഴ്സ‌് അസോസിയേഷൻ ടീച്ചർ ഇൻ ചാർജ് ഡോ. ജിനി തോമസ് എന്നിവർ പങ്കെടുത്തു. വിദ്യാർഥികൾ വിവിധ പരിസ്ഥിതി-സൗഹൃദ ഉത്പന്നങ്ങളുടെ സ്റ്റാളുകൾ ഒരുക്കിയിരുന്നു. മുളകൊണ്ടുള്ള വിവിധ ഉത്പന്നങ്ങൾ, കുത്താംപിള്ളി കൈത്തറി വസ്ത്രങ്ങൾ, ആഭരണങ്ങൾ, മൺ പാത്രങ്ങൾ, ധാന്യ പൊടികൾ , നാണയങ്ങൾ, പുരാവസ്തുക്കളുടെ പ്രദർശനം, വിദ്യാർത്ഥികൾ തയാറാക്കിയ നാടൻ ലഘുഭക്ഷണ ങ്ങളും, പാനിയങ്ങളും ഉൾപ്പെടുന്നതായിരുന്നു സ്‌റ്റോളുകൾ.

പുത്തൻകുരിശ് സബ് രജിസ്ട്രാർ ഓഫീസ് വളപ്പിലെ മരങ്ങൾ അപകടാവസ്ഥയിൽ

കോലഞ്ചേരി: പുത്തൻകുരിശ് സബ് രജിസ്ട്രാർ ഓഫീസ് വളപ്പിലെ മരങ്ങൾ അപകടാവസ്ഥയിൽ നിൽക്കുന്നതായി പരാതി. നൂറ് കണക്കിനാളുകൾ ദിവസേന വന്നുപോകുന്ന സർക്കാർ ഓഫീസ് വളപ്പിലാണ് രണ്ട് വൻ മരങ്ങൾ ഉണങ്ങി വീഴാറായി നിൽക്കുന്നത്. രജിസ്ട്രാർ ഓഫീസിൽ വരുന്നയാളുകളുടെ വാഹനങ്ങൾ ഇതിനടിയിലാണ് പാർക്ക് ചെയ്ത് വരുന്നത്. ടോക്കൺ സമ്പ്രദായത്തിൽ ആയതിനാലും മഴക്കാലമായതിനാലും പലപ്പോഴും ഓഫീസിൽ വരുന്നയാളുകൾ സ്വന്തം വാഹനത്തിൽ വിശ്രമിക്കുന്നത് ഇവിടെ പതിവാണ്.

ആദരവും സാംസ്കാരിക സമ്മേളനവും സംഘടിപ്പിച്ചു

കോതമംഗലം: വിവിധ കായിക വിഭാഗത്തിൽ ഒന്നും, രണ്ടും, മൂന്നും സ്ഥാനങ്ങളിൽ എത്തുന്നവരെ ഉന്നത മത്സരങ്ങളിൽ വിജയം വരിക്കാൻ എല്ലാതലത്തിലും പ്രോത്സാഹനം നൽകുമെന്ന് യുഡിഎഫ് ജില്ലാ കൺവീനർ ഷിബു തെക്കുംപുറം. 40 വയസിനു മുകളിലും 100 കിലോ തൂക്കത്തിന് താഴെയുമുള്ള പുരുഷന്മാർക്കായി തൃശൂരിൽ നടത്തിയ ദേശീയ പഞ്ചഗുസ്തി മത്സരത്തിൽ മൂന്നാംസ്ഥാനം കരസ്ഥമാക്കിയ കീരംപാറ പഞ്ചായത്തിലെ ചെങ്കര സ്വദേശി തൊണ്ടുങ്കൽ സിജു ഏലിയാസിന് യുഡിഎഫ് ചെങ്കര മേഖല കമ്മറ്റി നൽകിയ ആദരവും സാംസ്കാരിക സമ്മേളനവും ഉദ്ഘാടനം ചെയ്യുകയായിരുന്നു. ദേശീയതലത്തിൽ മൂന്നാംസ്ഥാനം നേടിയ സിജു ഏലിയാസ് ഏഷ്യൻ ലെവൽ മത്സരത്തിൽ പങ്കെടുക്കാൻ യോഗ്യത നേടിയിട്ടുണ്ട്. വാർഡ് മെന്പർ ബേസിൽ ബേബി അധ്യക്ഷനായി. കർഷക കോൺഗ്രസ് സംസ്ഥാന ജനറൽ സെക്രട്ടറി പി.സി. ജോർജ്, പഞ്ചായത്ത് പ്രസിഡന്‍റ് ഗോപി മുട്ടത്ത്, വൈസ് പ്രസിഡന്‍റ് റീന റോജോ, പഞ്ചായത്ത് മുൻ പ്രസിഡന്‍റ് മാമച്ചൻ ജോസഫ്, യുഡിഎഫ് മണ്ഡലം ചെയർമാൻ രാജു പള്ളിത്താഴത്ത്, കൺവീനർ ബിനോയി സി. പുല്ലൻ, സെക്രട്ടറി ജോജി മുക്കാലി വീട്ടിൽ റീന ജോഷി, പി.റ്റി.സിബി, വി.ജെ. മത്തായിക്കുഞ്ഞ്, റോയി ഓടക്കൽ, മത്തൻ കരിയിലപ്പാറ, ഏലിയാസ് തൊണ്ടുങ്കൽ, തങ്കച്ചൻ പുള്ളമംഗലം, പൗലോസ് തൊണ്ടുങ്കൽ, റീജ സിജു എന്നിവർ പ്രസംഗിച്ചു.

കാല്‍നാട്ടുകര്‍മം നടത്തി

നാകപ്പുഴ: നാകപ്പുഴ സെന്‍റ് മേരീസ് പള്ളിയില്‍ എട്ടുനോമ്പ് തിരുനാളിനോടനുബന്ധിച്ചുള്ള പന്തലിന്‍റെ കാല്‍നാട്ടുകര്‍മം വികാരി ഫാ. പോള്‍ നെടുംപുറത്ത് നിര്‍വഹിച്ചു. അസിസ്റ്റന്‍റ് വികാരി ഫാ. ജെയിംസ് കല്ലറക്കല്‍, കൈക്കാരന്മാരായ ബിജു കൊമ്പനാത്തോട്ടം, ബെന്നി കളപ്പുര, സിസ്റ്റേഴ്‌സ്, വിവിധ കമ്മിറ്റിയംഗങ്ങള്‍, ഇടവകാംഗങ്ങള്‍ തുടങ്ങിയവര്‍ പങ്കെടുത്തു. വിവിധ കമ്മിറ്റികളുടെ നേതൃത്വത്തില്‍ തിരുനാളിന്‍റെ ഒരുക്കങ്ങള്‍ ആരംഭിച്ചു. ജൂബിലി വര്‍ഷത്തോടനുബന്ധിച്ച് കോതമംഗലം രൂപതയിലെ എല്ലാ ഫൊറോനാകളുടെയും നേതൃത്വത്തില്‍ നാഗപ്പുഴ ഇടവകയിലേക്ക് നടത്തുന്ന തീര്‍ഥാടനം 30ന് വൈകുന്നേരം നാലോടെ പള്ളി അങ്കണത്തില്‍ എത്തിച്ചേരും. തുടര്‍ന്ന് കോതമംഗലം രൂപതാധ്യക്ഷന്‍ മാര്‍ ജോര്‍ജ് മഠത്തിക്കണ്ടത്തില്‍ ദിവ്യബലി അര്‍പ്പിച്ച് സന്ദേശം നല്‍കും.

വോട്ടര്‍ പട്ടികയില്‍ പേര് ചേര്‍ക്കല്‍: ഇല്ലാത്ത നിബന്ധനകൾ പറഞ്ഞ് ആളുകളെ തിരിച്ചയക്കുന്നുവെന്ന് ആരോപണം

മൂവാറ്റുപുഴ: വോട്ടര്‍ പട്ടികയില്‍ പേര് ചേര്‍ക്കുന്നതുമായി ബന്ധപ്പെട്ട് നഗരസഭയില്‍ നടന്ന ഹിയറിംഗില്‍ ഇല്ലാത്ത നിബന്ധനകള്‍ അടിച്ചേല്‍പ്പിക്കുകയാണെന്ന് ആരോപിച്ച് വോട്ടു ചേര്‍ക്കാന്‍ എത്തിയവര്‍ തിരികെ പോയതായി പരാതി. സ്ത്രീകളും കോളജ് വിദ്യാര്‍ഥികളും അടക്കമുള്ളവര്‍ ജോലിയും ക്ലാസും ഒഴിവാക്കി എത്തിയിട്ടും നിബന്ധനകള്‍ പറഞ്ഞ് ഇവരെ തിരിച്ചയച്ചുവെന്നാണ് സിപിഎം ആരോപിക്കുന്നത്. നഗരസഭയില്‍ നിലവിലുള്ള 28 വാര്‍ഡുകള്‍ വിഭജിച്ച് രണ്ട് വാര്‍ഡ് കൂടി വര്‍ധിപ്പിച്ച് 30 വാര്‍ഡുകള്‍ ആക്കിയിട്ടുണ്ട്. പലരെയും വോട്ടര്‍ പട്ടികയില്‍ ഉള്‍പ്പെടുത്തിയിരിക്കുന്നത് അവരുടേതല്ലാത്ത വാര്‍ഡുകളിലാണ്. വാര്‍ഡുകളുടെ അതിര്‍ത്തി പുനര്‍ നിര്‍ണയിച്ചപ്പോള്‍ മറ്റൊരു വാര്‍ഡിലേക്ക് മാറ്റിയെങ്കിലും വോട്ട് പഴയ വാര്‍ഡില്‍ തന്നെ ഉള്‍പ്പെടുത്തിയിരിക്കുന്നതായാണ് പരാതി. സമാനമായ രീതിയില്‍ ചിലരുടെ വോട്ട് തെറ്റായ രീതിയില്‍ പുതിയ വാര്‍ഡുകളിലേക്ക് ഉള്‍പ്പെടുത്തിയതായും പരാതി ഉണ്ട്. ഇത്തരം പരാതികള്‍ക്കു കൂടി പരിഹാരം തേടി എത്തിയവര്‍ക്കും ഹിയറിംഗില്‍ പങ്കെടുക്കാന്‍ കഴിഞ്ഞില്ലെന്നു സിപിഎം ഏരിയ കമ്മിറ്റി അംഗം സജി ജോര്‍ജ് ആരോപിച്ചു. ഹിയറിംഗിനു വരുന്നവരുടെ ഓണ്‍ലൈന്‍ അപേക്ഷയുടെ ഫോട്ടോ പതിച്ച ഫോറത്തിന്‍റെ പ്രിന്‍റ് എടുത്ത് ഹാജരാക്കിയാല്‍ മാത്രമാണ് ഹിയറിംഗ് നടത്തുകയുള്ളൂവെന്ന നഗരസഭാ അധികാരികളുടെ നിലപാട് ഹിയറിംഗിന് എത്തിയവരെ കുഴപ്പിത്തിലാക്കി. സാധാരണ ഹിയറിംഗിന് നോട്ടിസും വയസും അഡ്രസും തെളിയിക്കുന്ന രേഖയും ആണ് ഹാജരാക്കേണ്ടത്. ഫോട്ടോ പതിച്ച ഫോറം ഹിയറിംഗിന് ഉദ്യോഗസ്ഥരാണ് പ്രിന്‍റ് എടുത്ത് ആ ഫോറത്തില്‍ വോട്ടര്‍മാരുടെ ഒപ്പ് വാങ്ങിക്കേണ്ടത്. ഇതേ കുറിച്ചു ചോദിച്ചപ്പോള്‍ നഗരസഭയിലെ പ്രിന്‍റര്‍ തകരാറില്‍ ആയതുകൊണ്ടാണ് ഇത്തരത്തില്‍ വോട്ടര്‍മാരെ കൊണ്ട് പകര്‍പ്പ് എടുക്കുന്നത് എന്നാണു ഉദ്യോഗസ്ഥരുടെ വിശദീകരണം. ആധാര്‍ കാര്‍ഡ് എല്ലായിടത്തും ആധികാരിക രേഖയായി ഉപയോഗിക്കുമ്പോള്‍ മൂവാറ്റുപുഴ നഗരസഭയില്‍ മാത്രം വയസ്സ് തെളിയിക്കുന്ന രേഖയായി ആധാര്‍ എടുക്കാന്‍ കഴിയില്ല എന്ന നിലപാടു സ്വീകരിക്കുന്നതായും സിപിഎം ആരോപിക്കുന്നു.

ഉമ്മൻ ചാണ്ടിയെ ഇടതുപക്ഷം ഇപ്പോഴും ഭയപ്പെടുന്നു: ചാണ്ടി ഉമ്മൻ

പിറവം: അന്തരിച്ച ഉമ്മൻചാണ്ടിയെ ഇടതുപക്ഷം ഇന്നും ഭയപ്പെടുന്നുവെന്നതിനാലാണ് മരണമടഞ്ഞു രണ്ടുവർഷം പിന്നിട്ടിട്ടും ഇപ്പോഴും അദ്ദേഹത്തെ വേട്ടയാടുന്നതെന്ന് ചാണ്ടി ഉമ്മൻ എംഎൽഎ. കഴിഞ്ഞ ഒന്പതു വർഷത്തെ പിണറായി ഭരണം കേരള രാഷ്ട്രീയ ചരിത്രത്തിലെ ഇരുണ്ട അധ്യായമാണ്. കേരളത്തിൽ സാധാരണക്കാരായ ജനങ്ങൾക്ക് ജീവിക്കാൻ കഴിയാനാകാത്ത അവസ്ഥയാണ് നിലവിലുള്ളത്. ജനങ്ങളെ ബാധിക്കുന്ന പ്രശ്നങ്ങൾക്ക് മേൽ ഒരു ചെറുവിരലനക്കുവാൻ പോലും സർക്കാരിന് കഴിയുന്നില്ലയെന്നും അദ്ദേഹം കൂട്ടിച്ചേർത്തു. പിറവത്ത് ഉമ്മൻ ചാണ്ടി സ്മൃതി ജനസമ്പർക്കയാത്രയെന്ന പേരിൽ നടക്കുന്ന ഭവന സന്ദർശന പരിപാടി ഉദ്ഘാടനം ചെയ്യുകയായിരുന്നു അദ്ദേഹം. പിറവം മണ്ഡലത്തിൽ മഹാത്മാ ഗാന്ധി കുടുംബസംഗമങ്ങളുടെ സമാപനം ഡിസിസി പ്രസിഡന്‍റ് മുഹമ്മദ്‌ ഷിയാസ് ഉദ്ഘാടനം ചെയ്തു. എഐസിസി അംഗം അഡ്വ. ജെയ്സൺ ജോസഫ് മുഖ്യപ്രഭാഷണം നടത്തി. മണ്ഡലം പ്രസിഡന്‍റ് അരുൺ കല്ലറയ്ക്കൽ അധ്യക്ഷത വഹിച്ചു. ഡിസിസി ഭാരവാഹികളായ കെ.ആർ. പ്രദീപ്‌കുമാർ, വിൽസൺ കെ. ജോൺ, ഉല്ലാസ് തോമസ്, ജോസഫ് ആന്‍റണി, തുടങ്ങിയവർ പ്രസംഗിച്ചു. പിറവം നഗരസഭയിലെ ഇടതുപക്ഷ മുന്നണിയുടെ നേതൃത്വത്തിലുള്ള ഭരണസമിതിയുടെ കഴിഞ്ഞ നാലര വർഷത്തെ വികസനവിരുദ്ധ നയങ്ങൾക്കെതിരെയുള്ള കുറ്റപത്രവുമായി പിറവം മണ്ഡലം കോൺഗ്രസ്‌ കമ്മിറ്റിയുടെ പ്രസിഡന്‍റ് അരുൺ കല്ലറയ്ക്കലിന്‍റെ നേതൃത്വത്തിൽ നഗരസഭയിലെ 28 വാർഡുകളിലൂടെ ഒരു മാസക്കാലം നീണ്ടു നിൽക്കുന്ന പരിപാടിയാണ് ഉമ്മൻ ചാണ്ടി സ്മൃതി ജനസമ്പർക്കയാത്ര.

അനീതിക്കെതിരേ പ്രതിഷേധ സാഗരം

തൊടുപുഴ: ഭാരതമണ്ണിൽ അക്ഷരദീപം തെളിച്ച മിഷനറിമാരുടെ പിൻഗാമികളായ കന്യാസ്ത്രീകളെ ജയിലിൽ അടച്ച ക്രൂരതയ്ക്കു മാപ്പില്ല, മനുഷ്യകടത്തിനല്ല, മാനവമോചന കർമപഥങ്ങളിൽ സേവനമാണ് ഞങ്ങളുടെ ലക്ഷ്യം, നാളേറെയായി ക്രൈസ്തവർ നേരിടുന്ന അനീതിക്കെതിരായി ഇരന്പും തിരമാല പോൽ ഞങ്ങളിതാ വരുന്നു... തുടങ്ങിയ മുദ്രാവാക്യങ്ങൾ മുഴക്കിയും ജപമാല കൈയിലേന്തിയും കരുണക്കൊന്ത ചൊല്ലിയും നടന്നു നീങ്ങിയ വിശ്വാസിസമൂഹം ജയിലിൽ അടയ്ക്കപ്പെട്ട നിരപരാധികളോടുള്ള ഐക്യദാർഢ്യത്തിന്‍റെ നേർസാക്ഷ്യമായി. ജയിലിൽ അടയ്ക്കപ്പെട്ട കന്യാസ്ത്രീമാരുടെ മൗനനൊന്പരങ്ങൾ ചിത്രീകരിക്കുന്ന ടാബ്ലോയും ശ്രദ്ധേയമായി. ഏറ്റവും മുന്നിൽ ബിഷപ് മാർ ജോർജ് മഠത്തിക്കണ്ടത്തിലും വികാരി ജനറാൾമാരായ മോണ്‍.പയസ് മലേക്കണ്ടത്തിൽ, മോണ്‍.വിൻസെന്‍റ് നെടുങ്ങാട്ട് എന്നിവർക്കൊപ്പം കറുത്തതുണി ഉപയോഗിച്ച് വായ മൂടിക്കെട്ടിയ സന്യാസിനിമാരും അണിനിരന്നു. ഇതിനു പിന്നിലായി വൈദികർ, ഭക്തസംഘടനാഭാരവാഹികൾ, വിവിധ ഫൊറോനകളിൽനിന്നുള്ള വിശ്വാസികൾ എന്നിവർ അണിനിരന്നു. റാലിയുടെ മുൻ നിര ടൗണ്‍പള്ളി പരിസരത്ത് എത്തിയപ്പോഴും പിൻനിര മുനിസിപ്പൽ മൈതാനിയിൽനിന്നു പുറപ്പെട്ടിരുന്നില്ല. തുടർന്നു നടന്ന യോഗത്തിൽ സിസ്റ്റർ അഡ്വ.ജോസിയ എസ്ഡി, ഡിസിഎൽ കൊച്ചേട്ടൻ ഫാ.റോയി കണ്ണൻചിറ സിഎംഐ എന്നിവർ പ്രസംഗിച്ചു. സംഘാടക സമിതി ചെയർമാനും ടൗണ്‍പള്ളി വികാരിയുമായ ഫാ.ജോസ് പൊതൂർ, രൂപത ചാൻസലർ ഫാ. ജോസ് കുളത്തൂർ, പ്രോക്യൂറേറ്റർ ഫാ.ജോസ് പുൽപ്പറന്പിൽ, വിവിധ സന്യാസ സഭകളുടെ പ്രൊവിൻഷ്യൽമാരായ ഫാ. ജെയിംസ് നിരവത്ത് ഒസിഡി, ഫാ.മാത്യു മഞ്ഞക്കുന്നേൽ സിഎംഐ, സിസ്റ്റർ മെറീന സിഎംസി, സിസ്റ്റർ ലിസി തെക്കേക്കുറ്റ് സിഎംസി, സിസ്റ്റർ അഭയ എംഎസ്ജെ, സിസ്റ്റർ കൊച്ചുറാണി എസ്ഡി, സിസ്റ്റർ ടാൻസി എസ്എംഎസ്, സിസ്റ്റർ ലിൻസി സിഎസ്എൻ, സിസ്റ്റർ മെർലി തെങ്ങുംപള്ളി എസ്എബിഎസ്, സിസ്റ്റർ മെർലിൻ എഫ്സിസി, സിസ്റ്റർ മാഗി എഎസ്എംഐ, രൂപത കോർപ്പറേറ്റ് എഡ്യൂക്കേഷൻ സെക്രട്ടറി ഫാ.മാത്യു എം.മുണ്ടയ്ക്കൽ, വിവിധ സംഘടനകളുടെ രൂപത ഡയറക്ടർമാരായ റവ.ഡോ.മാനുവൽ പിച്ചളക്കാട്ട്, ഫാ.ആന്‍റണി പുത്തൻകുളം, ഫാ.ജോസഫ് കല്ലറയ്ക്കൽ, ഫാ. സെബാസ്റ്റ്യൻ വള്ളോപ്പിള്ളിൽ, ഫാ.മാത്യു രാമനാട്ട്, ഫാ. ആന്‍റണി വിളയപ്പള്ളി, ഫാ.ജോസഫ് കൊച്ചുപറന്പിൽ, വിവിധ സംഘടനകളുടെ രൂപത പ്രസിഡന്‍റുമാരായ സണ്ണി കടൂത്താഴെ, ഡിഗോൾ കെ.ജോർജ്, സജിൽ കല്ലന്പള്ളിൽ, സാവിയോ ജിജി, വിവിധ ഫൊറോന വികാരിമാർ, ടൗണ്‍പള്ളി കൈക്കാരൻമാരായ ജോണ്‍ ടി.എ.തയ്യിൽ, കെ.വി.ആന്‍റണി കൂനംപാറയിൽ തുടങ്ങിയവർ നേതൃത്വം നൽകി.

ബാലാമണിയമ്മ സ്മൃതിയും കവിയരങ്ങും

കൊച്ചി:പ്രിയദര്‍ശിനി പബ്ലിക്കേഷന്‍ സൊസൈറ്റിയുടെ ആഭിമുഖ്യത്തില്‍ ബാലാമണിയമ്മ സ്മൃതിയും കവിയരങ്ങും സംഘടിപ്പിച്ചു.എഴുത്തുകാരി സിസ്റ്റര്‍ ഡോ. തെരേസ ആലഞ്ചേരി ഉദ്ഘാടനം ചെയ്തു. മാതൃസ്‌നേഹത്തിന്‍റെ കവിതകള്‍ ലളിതമായ ഭാഷയിലൂടെ മലയാള മനസ്സിലേക്ക് സന്നിവേശിപ്പിച്ച ബാലാമണിയമ്മ മലയാളഭാഷയുടെ അമ്മയാണെന്ന് അവർ പറഞ്ഞു. പ്രിയദര്‍ശിനി പബ്ലിക്കേഷന്‍ സൊസൈറ്റി ജില്ലാ കോ-ഓര്‍ഡിനേറ്റര്‍ ഷൈജു കേളന്തറ അധ്യക്ഷത വഹിച്ചു. സെന്‍ജോ ജോര്‍ജ്, രമ്യവ്യാസ്, ഡോ. ബിജു എരൂര്‍ എന്നിവര്‍ പ്രസംഗിച്ചു. കവിയരങ്ങില്‍ ഷാജു കുളത്തുവയല്‍, അക്ബര്‍ ഇടപ്പള്ളി, ഷീജ പടിപ്പുരക്കല്‍, നൂറുല്‍ അമീന്‍, ഷാലന്‍ വള്ളുവശേരി, ശിവന്‍ വട്ടേക്കുന്നം, പത്മകുമാര്‍ സലിം റഹ്മാന്‍, നോര്‍ബര്‍ട്ട് അടിമുറി എന്നിവര്‍ കവിതകള്‍ അവതരിപ്പിച്ചു.

പറവൂർ ബിജെപിയിൽ തമ്മിലടി

പറവൂർ: പറവൂരിൽ ബിജെപി നേതൃത്വത്തിലെ തമ്മിലടി സമീപ പഞ്ചായത്തുകളിലേക്കും വ്യാപിക്കുന്നു. വടക്കേക്കര മണ്ഡലം പ്രസിഡന്‍റ് സിമി തിലകനെതിരെ വടക്കേക്കര പഞ്ചായത്തിലെ നേതാക്കളും പ്രവർത്തകരും രംഗത്തെത്തിയത് നേതൃത്വത്തിന് തലവേദനയായി. ഇവരെ പ്രസിഡന്‍റ് സ്ഥാനത്തുനിന്ന് നീക്കം ചെയ്യണമെന്നാവശ്യപ്പെട്ട് വാവക്കാട് എസ്എൻഡിപി ഹാളിൽ പ്രവർത്തക കൺവൻഷൻ സംഘടിപ്പിച്ചു. കഴിഞ്ഞ സംഘടന തെരഞ്ഞെടുപ്പിനു ശേഷം നടന്ന പുനസംഘടനയിൽ ചേന്ദമംഗലം സ്വദേശിയായ മായ ഹരിദാസാണ് മണ്ഡലം പ്രസിഡന്‍റായത്. എന്നാൽ പുതിയ ജില്ലാ കമ്മിറ്റികൾ നിലവിൽ വന്നതിനെ തുടർന്ന് മായ ഹരിദാസിനെ പ്രസിഡന്‍റിന്‍റെ ചുമതലയിൽ നിന്ന് മാറ്റിയതിനെ തുടർന്നുണ്ടായ തർക്കമാണ് ഇപ്പോൾ രൂക്ഷമായത്. രാഷ്ട്രീയ പക്വതയില്ലാത്ത സിമി തിലകനെ നിലനിർത്തിയാൽ സംഘടന ദുർബലമാകുമെന്നും വരുന്ന തെരഞ്ഞെടുപ്പുകളിൽ തിരച്ചടി നേരിടുമെന്നുമാണ് പ്രധാന ആക്ഷേപം. ജില്ലാ നേതൃത്വത്തെ കബളിപ്പിക്കുന്ന രീതിയിലുള്ള പ്രവർത്തനമാണ് സിമിയുടേതെന്നും കഴിഞ്ഞ തെരഞ്ഞെടുപ്പുമായി ബന്ധപ്പെട്ട് നടന്ന സാമ്പത്തിക ക്രമക്കേടുകൾ ചൂണ്ടിക്കാട്ടി സംസ്ഥാന - ജില്ലാ പ്രസിഡന്‍റുമാർക്ക് പല തവണ പരാതി നൽകിയിട്ടും നടപടികൾ ഉണ്ടായില്ലെന്നും ആക്ഷേപമുണ്ട്. പരാതിയിൽ പലവട്ടം ജില്ലാ നേതൃത്വം ചർച്ച നടത്തിയിട്ടും പരിഹാരമാകാത്തതിൽ പ്രതിഷേധിച്ചാണ് പ്രവർത്തകർ കൺവെൻഷൻ വിളിച്ചു ചേർത്തത്. ഇരുചക്രവാഹനങ്ങൾ പകുതി വിലക്ക് നൽകാമെന്ന് വാഗ്ദാനം ചെയ്ത സംഘടനയുടെ പഞ്ചായത്ത് കോർഡിനേറ്ററാണ് സിമി തിലകൻ. വടക്കേക്കര മണ്ഡലം കമ്മിറ്റിക്കു കീഴിലുള്ള ചിറ്റാറ്റുകര, ചേന്ദമംഗലം കമ്മിറ്റികളിലും തർക്കം രൂക്ഷമാണ്. സിമിയെ മാറ്റി നിർത്തുന്നത് ഉൾപ്പടെയുള്ള പ്രശ്നങ്ങൾക്ക് പരിഹാരം ഉണ്ടായില്ലെങ്കിൽ വിമത സ്ഥാനാർഥികളെ മത്സരിപ്പിക്കാനും കൺവൻഷൻ തീരുമാനിച്ചു. കൺവൻഷനിൽ പ്രദീപ് പുല്ലാർക്കാട് അധ്യക്ഷനായി.തമ്പി കല്ലുപ്പുറം, ജോഷി കൊട്ടുവള്ളിക്കാട്, രമേശ് ചെട്ടിക്കാട്, ഷെല്ലി ദേവസി, പി.ജെ. മദനൻ,ബിനീഷ് മാല്യങ്കര എന്നിവർ സംസാരിച്ചു.

പെരിയാര്‍ ലയണ്‍സ് ക്ലബ് പ്രവര്‍ത്തനോദ്ഘാടനം

പെരുമ്പാവൂര്‍: ഒക്കല്‍ പെരിയാര്‍ ലയണ്‍സ് ക്ലബ്ബിന്‍റെ 2025-26 വര്‍ഷത്തെ സേവന പ്രവര്‍ത്തനങ്ങളുടെ ഉദ്ഘാടനവും ചുമതലയേൽക്കലും നടന്നു. സ്ത്രീ ശാക്തീകരണത്തിന്‍റെ ഭാഗമായി ഗേൾസ് സ്‌കൂളുകളില്‍ സാനിറ്ററി നാപ്കിന്‍ ഡിസ്‌പോസല്‍ മെഷീന്‍ സ്ഥാപിക്കുക, നേത്ര പരിശോധനാ, മെഡിക്കല്‍ ക്യാമ്പുകൾ നടത്തുക, അനാഥാലയങ്ങളിൽ ഭക്ഷണം നല്‍കുക, നിര്‍ധന കുടുംബങ്ങള്‍ക്ക് കിറ്റുകൾ, ഡയാലിസിസ് കൂപ്പണ്‍ വിതരണം,കാന്‍സര്‍ രോഗികള്‍ക്ക് ധനസഹായം നല്‍കുക എന്നിവയാണ് സേവനങ്ങൾ. ഡിസ്ട്രിക്ട് സെക്കന്‍ഡ് വൈസ് പ്രസിഡന്‍റ് കെ.പി. പീറ്റര്‍ ഉദ്ഘാടനം ചെയ്തു. ലയണ്‍സ് ക്ലബ് പ്രസിഡന്‍റ് വര്‍ഗീസ് മൂലന്‍ അധ്യക്ഷത വഹിച്ചു. പുതിയതായി മെല്‍വിന്‍ ജോണ്‍സ് ഫെല്ലോഷിപ്പ് എടുത്ത അംഗങ്ങളെ ബ്ലസന്‍ ആന്‍റണി ആദരിച്ചു. ഉന്നത വിജയം നേടിയ കുട്ടികള്‍ക്കുള്ള അവാര്‍ഡുകള്‍ റീജിയന്‍ ചെയര്‍പേഴ്‌സണ്‍ ടോമി സെബാസ്റ്റ്യന്‍ വിതരണം ചെയ്തു. സോണല്‍ ചെയര്‍പേഴ്‌സണ്‍ രാജീവ് കുമാര്‍, സെബാസ്റ്റ്യന്‍, വില്യംസ്, വര്‍ഗീസ് ചെട്ടിയാകുടി, ഇമ്മാനുവല്‍ ജോസഫ്, പോള്‍ വെട്ടിക്കനാകുടി,ഷൈന്‍ തോമസ്, രഞ്ജി പെട്ടയില്‍, ബോബിന്‍ പാപ്പച്ചന്‍, ഷിജു തോപ്പിലാന്‍, ജോബിസ് ആട്ടുകാരന്‍, സി.വി. മത്തായി, സി.പി.യോഹന്നാന്‍, എം.സി. ജോമോന്‍, സജി ജോസഫ്, ഡോ. ബിനു വര്‍ഗീസ്, റോസ്‌മേരി, ജാന്‍സി പോള്‍, റൈനി വര്‍ഗീസ്, റോസി ഷൈന്‍, ആലീസ് ഇമ്മാനുവല്‍ എന്നിവര്‍ പ്രസംഗിച്ചു.

കന്യാസ്ത്രീകളുടെ അറസ്റ്റ് : ഉദയംപേരൂരിൽ കോൺഗ്രസ് പ്രതിഷേധം

ഉദയംപേരൂർ: ഛത്തീസ്ഗഡിൽ കത്തോലിക്കാ സഭയിലെ കന്യാസ്ത്രീകളെ കള്ളക്കേസ് ചുമത്തി അറസ്റ്റ് ചെയ്ത് ജയിലിലടച്ചതിൽ പ്രതിഷേധിച്ച് കോൺഗ്രസ് ഉദയംപേരൂർ സൗത്ത് മണ്ഡലം കമ്മറ്റിയുടെ നേതൃത്വത്തിൽ തെക്കൻ പറവൂർ അങ്ങാടിയിൽ പ്രതിഷേധ ജനകീയ സദസ് നടത്തി. ഡിസിസി ജനറൽ സെക്രട്ടറി ഷെറിൻ വർഗീസ് ഉദ്ഘാടനം ചെയ്തു. മണ്ഡലം പ്രസിഡന്‍റ് കമൽ അധ്യക്ഷത വഹിച്ചു. ജോഷി പരിങ്ങനത്ത്, ജോൺ ജേക്കബ്, ജൂബൻ ജോൺ, എം.എൽ. സുരേഷ്, സാജു പൊങ്ങലായി, ടി.വി.ഗോപിദാസ്, ഇ.എസ്.ജയകുമാർ, കെ.മനോജ്‌, ബാരിഷ് വിശ്വനാഥ് തുടങ്ങിയവർ പ്രസംഗിച്ചു.

എളങ്കുന്നപ്പുഴ സ്കൂളിൽ‘കോലുമിഠായി’

വൈപ്പിൻ: ജില്ലാ പഞ്ചായത്ത് നടപ്പാക്കുന്ന ‘കോലുമിഠായി’ പദ്ധതിയുടെ ഭാഗമായി എളങ്കുന്നപ്പുഴ ഗവ. ഹയർ സെക്കൻഡറി സ്കൂളിൽ സ്ഥാപിച്ച കിയോസ്കിന്‍റെ ഉദ്ഘാടനം ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ നിർവഹിച്ചു. കുടുംബശ്രീയുടെ മേൽനോട്ടത്തിൽ നടത്തുന്ന കിയോസ്കിൽ നിന്നും കുട്ടികൾക്കാവശ്യമായ പഠനോപകരണങ്ങളും മധുര പലഹാരങ്ങളും പാനീയങ്ങളും ലഭിക്കും. ജില്ലാ പഞ്ചായത്ത് ക്ഷേമകാര്യ സ്ഥിരംസമിതി അധ്യക്ഷൻ കെ.ജി. ഡോണോ, പഞ്ചായത്ത് പ്രസിഡന്‍റ് രസികല, എം.ബി. ഷൈനി, ലിഗേഷ് സേവ്യർ, സമ്പത്ത് കുമാർ, ഇസൻഷ്യ, പ്രിൻസിപ്പൽ ദേവി കെ. എസ്, പ്രധാനാധ്യാപിക എം.കെ. സീന, സുഗദ എന്നിവർ പ്രസംഗിച്ചു.

ചോറ്റാനിക്കര മേൽശാന്തിമാർ

ചോറ്റാനിക്കര: ചോറ്റാനിക്കര ക്ഷേത്രത്തിലെ പുതിയ മേൽശാന്തിമാരായി നമ്പ്യാങ്കാവ് ക്ഷേത്രത്തിലെ തൃശൂർ നെല്ലായി നന്തിക്കര നടുവത്തുമന എൻ.വി. കൃഷ്‌ണൻ നമ്പൂതിരിയെയും, പുതിയേടം ശ്രീകൃഷ്‌ണ ക്ഷേത്രത്തിലെ കാഞ്ഞൂർ ചേലപ്പറമ്പത്തുമന സി.എൽ. സതീഷ് നമ്പൂതിരിയെയും നറുക്കെടുപ്പിലൂടെ തെരഞ്ഞെടുത്തു. ഇവർ ഓരോ മാസവും ഇടവിട്ട് മേൽശാന്തിയായും,കീഴ്ശാന്തിയായും പുറപ്പെടാ ശാന്തിമാരായി പ്രവർത്തിക്കും. കീഴ്ക്കാവ് ക്ഷേത്രത്തിൽ എൻ.വി.കൃഷ്‌ണദാസ്, ശിവക്ഷേത്രത്തിൽ കെ. വിജയരാജ്, ശാസ്‌താ ക്ഷേത്രത്തിൽ എ.എസ്. പ്രവീൺ എന്നിവരെയും തെരഞ്ഞെടുത്തു. തന്ത്രി പുലിയന്നൂർ ദിലീപൻ നമ്പൂതിരിപ്പാട് നറുക്കെടുപ്പിന് നേതൃത്വം നൽകി. ചിങ്ങം ഒന്നിന് പുതിയ ശാന്തിമാർ ചുമതലയേൽക്കും.

പെരുന്പാവൂരിലെ വയോധികയുടെ മരണം; അന്വേഷണം ഊർജിതം

പെരുമ്പാവൂർ: വയോധികയെ തോട്ടത്തിൽ മരിച്ചനിലയിൽ കണ്ടെത്തിയ സംഭവത്തിൽ അന്വേഷണം ഊർജിതമാക്കി പോലീസ്. ഇന്നലെ റൂറൽ എസ്പിയുടെ നേതൃത്വത്തിലുള്ള പോലീസ് സംഘം സ്ഥലം സന്ദർശിച്ച് സ്ഥിതിഗതികൾ വിലയിരുത്തി. കോടനാട്, കോട്ടപ്പടി സിഐമാർ ഉൾപ്പെടുന്ന പ്രത്യേക സംഘത്തിനാണ് അന്വേഷണ ചുമതല. തോട്ടുവ മനയ്ക്കപ്പടി വീട്ടിൽ ഔസേഫ് ഭാര്യ അന്നം (85) ആണ് കഴിഞ്ഞ ചൊവ്വാഴ്ച്ച രാത്രിയോടെ സമീപത്തെ തോട്ടത്തിൽ മരിച്ച നിലയിൽ കാണപ്പെട്ടത്. തലയ്ക്ക് പരിക്കേറ്റ് രക്തം വാർന്ന നിലയിൽ കണ്ടെത്തിയ മൃതദേഹത്തിൽ മുഖത്തും കൈയ്ക്കും മുറിവുകളുമുണ്ടായിരുന്നു. ശ്വാസം മുട്ടിയാണ് മരിച്ചതെന്നാണ് പ്രാഥമിക നിഗമനം. സംഭവത്തിൽ ഇതരസംസ്ഥാന തൊഴിലാളികൾ ഉൾപ്പെടെയുള്ള നാൽപ്പതോളം പേരെ അന്വേഷണ സംഘം ചോദ്യം ചെയ്യുകയും മൊഴി രേഖപ്പെടുത്തുകയും ചെയ്തു. സമീപത്തെ കോഴി ഫാമിലെ മൂന്ന് ഇതരസംസ്ഥാന തൊഴിലാളികൾ പോലീസ് നിരീക്ഷണത്തിലാണ്. ചൊവ്വാഴ്ച്ച ഉച്ചയ്ക്ക് രണ്ടോടെ മരണം സംഭവിച്ചുവെന്നാണ് പോസ്റ്റുമോർട്ടം റിപ്പോർട്ടിൽ പറയുന്നത്. സംഭവസ്ഥലത്ത് മൽപ്പിടുത്തം നടന്നതായി സൂചനയുണ്ട്. വയോധികയു‌ടെ രണ്ട് വളകളും കാതിൽ കമ്മിലിന്‍റെ അടിയൊഴികെയുള്ള ഭാഗങ്ങളും നഷ്ടപ്പെട്ടിട്ടുണ്ട്.

കളമശേരി രാജഗിരിയിലേക്ക് മെട്രോ ഫീഡർ സർവീസ് ആരംഭിച്ചു

കളമശേരി: കളമശേരി രാജഗിരി കോളജ് ഓഫ് സോഷ്യൽ സയൻസസ് കാന്പസിലേക്ക് ഫീഡർ സർവീസ് ആരംഭിച്ച് കൊച്ചി മെട്രോ. കൊച്ചിയിലെ എസ്എച്ച്സിഎംഐ പ്രൊവിൻസിന്‍റെ പ്രൊവിൻഷ്യാളും മാനേജരുമായ ഫാ.ബെന്നി നൽക്കര ഫ്ലാഗ് ഓഫ് നിർവഹിച്ചു. രാജഗിരി വിദ്യാർഥികളെയും സ്റ്റാഫിനെയും വഹിച്ചുകൊണ്ട് ഇന്നലെ രാവിലെ 8.40 നാണ് കാമ്പസിലേക്ക് ഫീഡർ ബസ് എത്തിയത്. കെഎംആർഎൽ ഇലക്ട്രിക് ഫീഡർ ബസുകൾ ഉപയോഗിച്ച് യാത്ര ചെയ്യുന്ന വിദ്യാർഥികളെ പിന്തുണയ്ക്കുന്നതിനായി രാജഗിരി പബ്ലിക് ട്രാൻസ്പോർട്ട് സ്കോളർഷിപ്പ് പദ്ധതിയും അവതരിപ്പിച്ചു. ഇതുപ്രകാരം യാത്രാതുകയുടെ 50 ശതമാനം ചെലവും രാജഗിരി കോളജ് വഹിക്കും. കന്നിയാത്രക്കാർക്കായി രാജഗിരി ഒരുക്കിയ ഭാഗ്യസമ്മാനത്തിന് സ്റ്റാഫ് അംഗം മുഹമ്മദ്, വിദ്യാർഥിയായ മാധവ് അനിൽ എന്നിവർ അർഹരായി. രാജഗിരിയിലെ എംബഡഡ് ക്രൂ ഫ്ലാഷ് മോബ് നടത്തി. ചടങ്ങിൽ ആർസിഎസ്എസ് കോളജ് പ്രിൻസിപ്പൽ പ്രഫ.ഡോ.എം.ഡി.സാജു, അസോസിയേറ്റ് ഡയറക്ടർ ഡോ. ബിനോയ് ജോസഫ്, അസി. ഡയറക്ടർ റവ. ഡോ. ഷിൻഡോ ജോസഫ്, അഡ്മിനിസ്ട്രേറ്റർ ഫാ.റിന്‍റിൽ മാത്യു,ഡീൻ ഓഫ് സ്റ്റുഡന്‍റ്സ് അഫയേഴ്സ് ഡോ. ആൻ ബേബി എന്നിവർ സംസാരിച്ചു.

ഗോശ്രീ സമാന്തര പാലത്തിന്‍റെ പണികൾ : 25 ദിവസത്തിനുള്ളിൽ തീർക്കും

വൈപ്പിൻ: ഒന്നര മാസത്തോളമായി അറ്റകുറ്റപ്പണികൾക്കായി അടച്ചിട്ടിരിക്കുന്ന ഗോശ്രീ സമാന്തര പാലത്തിന്‍റെ പണികൾ 25 ദിവസത്തിനുള്ളിൽ തീർത്ത് ഗതാഗതത്തിനായി തുറന്നുകൊടുക്കുമെന്ന് നാഷണൽ ഹൈവേ അഥോറിറ്റി അധികൃതർ ഉറപ്പുനൽകി. അറ്റകുറ്റപ്പണികൾ അനന്തമായി നീളുന്നതിനെ തുടർന്ന് ഇവിടെ ഗതാഗതക്കുരുക്ക് രൂക്ഷമാണ്. ഈ സാഹചര്യത്തിൽ കഴിഞ്ഞദിവസം റസിഡൻസ് അസോസിയേഷൻ അപക്സ് സംഘടനയായ ഫ്രാഗ് നടത്തിയ സമരത്തെ തുടർന്ന് ഇന്നലെ കൊച്ചി സിറ്റി അസി. പോലീസ് കമ്മീഷണർ വിളിച്ചുചേർത്ത യോഗത്തിലാണ് ഉറപ്പ് ലഭിച്ചത്. പാലത്തിന്‍റെ സ്പാന്‍ ജോയിന്‍റുകളിലടക്കം റിപ്പയര്‍ ആവശ്യമായതിനാലാണ് ഇത്രയും ദിവസം വേണ്ടിവരുന്നതെന്ന് ഉദ്യോഗസ്ഥര്‍ വിശദികരിച്ചു. പാലം പണി പൂര്‍ത്തിയാവുന്നതുവരെ രാവിലെയും വൈകുന്നേരവും തിരക്കുള്ള സമയങ്ങളിൽ ഇരുവശത്തേക്കുമുള്ള കണ്ടെയ്‌നര്‍ ലോറി ഗതാഗതം നിയന്ത്രിക്കും.

അങ്കമാലി-മാഞ്ഞാലി റോഡ് നവീകരിക്കണമെന്ന്

നെടുമ്പാശേരി: അങ്കമാലി- മാഞ്ഞാലി റോഡ് ആധുനിക നിലവാരത്തിൽ നിർമിച്ച് പുനരുദ്ധരിയ്ക്കണമെന്നാവശ്യപ്പെട്ട് നെടുമ്പാശേരി പഞ്ചായത്ത് പ്രസിഡന്‍റ് എ.വി.സുനിൽ പൊതുമരാമത്ത് മന്ത്രി പി.എ. മുഹമ്മദ് റിയാസിന് നിവേദനം നൽകി. ആലുവ, അങ്കമാലി നിയോജക മണ്ഡലങ്ങളിലായി കടന്നുപോകുന്ന റോഡിൽ നെടുമ്പാശേരി പഞ്ചായത്തിന്‍റെയും, അങ്കമാലി മുനിസിപ്പാലിറ്റിയുടെയും അതിർത്തിയായ കൊച്ചപ്പൻ കവലയിൽ വെള്ളക്കെട്ട് മൂലം ഈ റോഡിലൂടെയുള്ള യാത്ര ദുഷ്കരമായിരിയ്ക്കുകയാണ്. പൊതുമരാമത്ത് വകുപ്പിന്‍റെ അങ്കമാലി സെക്ഷന് കീഴിൽ വരുന്ന ഈ റോഡ് ബിഎംബിസി നിലവാരത്തിൽ പുതുക്കി നിർമിച്ച് ആവശ്യമായ സ്ഥലങ്ങളിൽ വെള്ളം ഒഴുകിപ്പോകുന്നതിനുള്ള കാന നിർമാണം നടത്തിയും റോഡിലൂടെയുള്ള യാത്ര സുഗമമാക്കാൻ നടപടി സ്വീകരിക്കണമെന്ന് മന്ത്രിയോട് ആവശ്യപ്പെട്ടതായി പഞ്ചായത്ത് പ്രസിഡന്‍റ് അറിയിച്ചു.

കഞ്ചാവുമായി യുവാവ് അറസ്റ്റിൽ

പെരുമ്പാവൂർ : കഞ്ചാവുമായി യുവാവിനെ എക്സൈസ് പിടികൂടി. ആസാം സ്വദേശി വഹാബൂർ റഹ്മാൻ (25) ആണ് പിടിയിലായത്. പെരുന്പാവൂർ മത്സ്യമാർക്കറ്റിന് സമീപം നടത്തിയ പരിശോധനയിലാണ് 10 ഗ്രാം കഞ്ചാവുമായി ഇയാൾ പിടിയിലായത്. അസി. എക്സൈസ് ഇൻസ്പെക്ടർ (ഗ്രേഡ്) ടി.വി.ജോൺസൺ, പ്രിവന്‍റീവ് ഓഫീസർ (ഗ്രേഡ്) ജസ്റ്റിൻ ചർച്ചിൽ, അൻവർ എന്നിവരുടെ നേതൃത്വത്തിലായിരുന്നു പരിശോധന.

പറവൂർ-വൈപ്പിൻ മേഖലയിൽ സ്വകാര്യ ബസുകൾ പണിമുടക്കി; ജനം വലഞ്ഞു

പറവൂർ: പറവൂർ-വൈപ്പിൻ മേഖലയിലെ സ്വകാര്യ ബസുകൾ ഇന്നലെ നടത്തിയ സൂചനാ പണിമുടക്കിൽ ജനം വലഞ്ഞു. തകർന്ന ദേശീയപാത നന്നാക്കാത്തതിൽ പ്രതിഷേധിച്ചും ഗോശ്രീ മൂന്നാം പാലം തുറന്നു കിട്ടണമെന്ന് ആവശ്യപ്പെട്ടുമായിരുന്നു സമരം. 250 ഓളം ഓർഡിനറി ബസുകൾ ഓടിയില്ല. രാവിലെ ഏതാനും സ്വകാര്യ ലിമിറ്റഡ് ബസുകൾ ഓടിയിരുന്നു. കെഎസ്ആർടിസി ബസുകളിൽ തിരക്ക് അനുഭവപ്പെട്ടു. ദേശീയപാത നന്നാക്കാൻ നടപടി ഉണ്ടായില്ലെങ്കിൽ ഏഴു മുതൽ മൂത്തകുന്നം പറവൂർ ഇടപ്പള്ളി റൂട്ടിൽ അനിശ്ചിതകാല സമരം ആരംഭിക്കാനാണ് തീരുമാനം. സമരം ഒഴിവാക്കാൻ സിറ്റി പോലീസ് അസിസ്റ്റന്‍റ് കമ്മീഷണർ സമരക്കാ രോട് ആവശ്യപ്പെട്ടിട്ടുണ്ട്.

ആലുവ കേന്ദ്രീകരിച്ച് ആരാധനാലയങ്ങളിൽ മോഷണം; ഇരുട്ടിൽ തപ്പി പോലീസ്

ആലുവ: കാലവർഷം ആരംഭിച്ചതോടെ രാവും പകലും എന്നില്ലാതെ ആരാധനാലയങ്ങൾ കേന്ദ്രീകരിച്ച് മോഷണം നടത്തുന്ന സംഘങ്ങൾ ആലുവയിൽ വ്യാപകം. ചെറുതും വലുതുമായ നിരവധി മോഷണങ്ങളാണ് ആരാധനാലയങ്ങളിൽ നടക്കുന്നത്. കഴിഞ്ഞ രണ്ട് മാസമായി നേർച്ചക്കുറ്റികളും ഭണ്ഡാരങ്ങളും തല്ലി പൊളിച്ചാണ് ഭക്തജനങ്ങൾ നിക്ഷേപിക്കുന്ന പണം കൈക്കലാക്കുന്നത്. ആലുവ ടൗൺ പോലീസ് സ്റ്റേഷനു മുന്നിലെ ആരാധനാലയങ്ങൾ പോലും സുരക്ഷിതമല്ലാതായെന്ന് പ്രദേശവാസികൾ ചൂണ്ടിക്കാണിക്കുന്നു. ജൂണിൽ സ്റ്റേഷനു നേരെ എതിരെയുള്ള ആലുവ തൃക്കുന്നത്ത് സെമിനാരിയിൽ നേർച്ചപ്പെട്ടികൾ പൊളിച്ച് എണ്ണായിരം രൂപയോളമാണ് കവർന്നത്. കനത്ത മഴയുള്ള സമയം നോക്കി അർധരാത്രിയിൽ ആലുവ സെൻ്റ് ഡൊമിനിക്സ് പള്ളിയുടെ മുൻവശത്തുള്ള കപ്പേളയുടെ പൂട്ട് തകർത്ത് ആറായിരം രൂപയോളമാണ് കവർന്നത്. മുഖംമൂടി വന്ന മോഷ്ടാവ് പള്ളിയുടെ ഒരു വശത്തെ വലിയവാതിൽ പൊളിച്ച് അകത്തുകടന്നും മോഷണശ്രമം നടത്തി. ഇടവകയുടെ പരിധിയിലുള്ള നസ്രത്ത്, ദേശം മേഖലകളിലെ കപ്പേളകളെയും മോഷ്ടാക്കൾ വെറുതെ വിടുന്നില്ല. കഴിഞ്ഞ ദിവസം ഉച്ചക്ക് ഒന്നോടെ പള്ളിയിൽ നമസ്കാരം നടക്കുന്ന സമയത്താണ് ആലുവ ബാങ്ക് ജംഗ്ഷനിലെ സേട്ടു ജുമാ മസ്ജിദിൽ നിന്നും ഭണ്ഡാരപ്പെട്ടി കവർന്നത്. ഒരു യുവാവ് പള്ളിയിലേക്ക് എത്തി അയാളുടെ കൈയിൽ ബാഗിൽ കരുതിയിരുന്ന ചാക്കിലേക്ക് വലിയ ഭണ്ഡാര പെട്ടി നിറച്ച ശേഷം ഇയാൾ അതിവേഗത്തിൽ പുറത്തേക്ക് രക്ഷപ്പെടുകയായിരുന്നു. ഏതാണ്ട് പതിനായിരത്തോളം രൂപ പെട്ടിയിൽ ഉണ്ടാകുമെന്നാണ് വിലയിരുത്തൽ. ഏതാനും ദിവസം മുമ്പ് ആലുവയിലെ സെൻട്രൽ ജുമാ മസ്ജിദിലും ഇത്തരത്തിൽ മോഷണം നടന്നിരുന്നു. ഇവിടുത്തെയും സിസി ടിവി ദൃശ്യങ്ങൾ അടക്കം പോലീസിനെ നൽകിയെങ്കിലും പ്രതികളെ പിടികൂടാൻ ഇതുവരെയും കഴിഞ്ഞിട്ടില്ല.

ഗതാഗത നിയമ ലംഘനം : മൂന്ന് മാസത്തിനിടെ പിഴ 1.3 കോടി

കൊച്ചി: നഗരത്തില്‍ ഗതാഗത നിയമലംഘനങ്ങള്‍ പെരുകുന്ന സാഹചര്യത്തിൽ മോട്ടോര്‍ വാഹന വകുപ്പ് നിയമനടപടികള്‍ കടുപ്പിച്ചു. ഏപ്രില്‍ ഒന്ന് മുതല്‍ ജൂണ്‍ 30 വരെയുള്ള കാലയളവിൽ പിഴ ഇനത്തില്‍ മാത്രം 1.31 കോടി രൂപ ഈടാക്കി. ഈ കാലയളവിൽ 1.24 ലക്ഷം പെറ്റി കേസുകളും മോട്ടോര്‍ വാഹന വകുപ്പ് രജിസ്റ്റര്‍ ചെയ്തു. പിഴയും നിയമനടപടികളും കര്‍ശനമാക്കിയിട്ടും ഗതാഗതനിയമ ലംഘനങ്ങള്‍ക്ക് കുറവില്ലെന്ന് ചൂണ്ടിക്കാണിക്കുന്നതാണ് കഴിഞ്ഞ ദിവസത്തെ പരിശോധനാ കണക്കുകള്‍. കഴിഞ്ഞ 28ന് ജില്ലയുടെ വിവിധയിടങ്ങളില്‍ നടത്തിയ പരിശോധനയില്‍ സ്വകാര്യ ബസുകളുടെ 233 നിയമലംഘനങ്ങളാണ് കണ്ടെത്തിയത്. 55 സ്വകാര്യ ബസ് ഡ്രൈവര്‍മാര്‍ക്കെതിരെ നടപടിയും സ്വീകരിച്ചു. ഇവരുടെ ലൈസന്‍സിനെതിരെയുള്ള നിയമനടപടി മോര്‍ട്ടോര്‍ വാഹന വകുപ്പ് ആരംഭിച്ചു. കൊച്ചിയില്‍ നടപടി നേരിട്ടവയില്‍ ഭൂരിഭാഗവും വാതില്‍ തുറന്നിട്ട് സര്‍വീസ് നടത്തിയ ബസുകളാണ്. കഴിഞ്ഞ ഏഴ് മാസത്തിനിടെ സംസ്ഥാനത്ത് 930 ഡ്രൈവര്‍മാരുടെ ലൈസന്‍സ് എംവിഡി റദ്ദാക്കി. ജീവഹാനി ഉണ്ടായ അപകടങ്ങള്‍, മദ്യപിച്ച് ഡ്രൈവിംഗ്, കാല്‍നട യാത്രക്കാര്‍ക്കും മറ്റ് വാഹനങ്ങള്‍ക്കും അപകട ഭീഷണി ഉയർത്തി വാഹനം ഓടിച്ചതുൾപ്പെടെയുള്ള കാരണങ്ങളുടെ പേരിലാണ് നടപടി. ലൈസന്‍സ് റദ്ദാക്കപ്പെടുന്നവര്‍ക്ക് തിരികെ ലഭിക്കുന്നതിന് മുമ്പ് തിരുത്തല്‍ പരിശീലനം നല്‍കും. ഗുരുതര അപകടത്തില്‍പെട്ട് ലൈസന്‍സ് നഷ്ടപ്പെട്ടവര്‍ക്ക് സസ്‌പെന്‍ഷന്‍ കാലാവധിക്ക് ശേഷം അഞ്ച് ദിവസത്തെ നിര്‍ബന്ധിത പരിശീലനമാണ് നല്‍കുന്നത്. ഇന്‍സ്റ്റിറ്റ്യൂട്ട് ഓഫ് ഡ്രൈവിംഗ് ട്രെയ്‌നിംഗ് ആന്‍ഡ് റിസര്‍ച്ചിലാണ് (ഐഡിടിആര്‍) പരിശീലനം നല്‍കുന്നത്.

കുടുംബശ്രീ ഹോംഷോപ്പിന് 15 വയസ് : സംസ്ഥാനതല സംഗമം കളമശേരിയില്‍

കൊച്ചി: കുടുംബശ്രീ സംരംഭകരുടെ ഉത്പന്നങ്ങള്‍ക്ക് സാമൂഹ്യാധിഷ്ഠിത വിപണനവിതരണ സംവിധാനം ഒരുക്കുന്നതിനായി ആരംഭിച്ച കുടുംബശ്രീ ഹോംഷോപ്പ് പദ്ധതി 15 വര്‍ഷം പൂര്‍ത്തിയാക്കി. സംരംഭകര്‍, ഹോംഷോപ്പ് ഓണേഴ്‌സ്, മാനേജ്‌മെന്‍റ് ടീം എന്നിങ്ങനെ മൂന്നു ഘടകങ്ങളിലായി പ്രവര്‍ത്തിക്കുന്ന ഹോംഷോപ്പ് കമ്യൂണിറ്റി മാര്‍ക്കറ്റിംഗ് നെറ്റ്‌വര്‍ക്കാണ്. സംരംഭകരില്‍ നിന്ന് ഉത്പന്നങ്ങള്‍ ശേഖരിച്ച് കുടുംബശ്രീ അംഗങ്ങളായ ഹോംഷോപ്പ് ഓണേഴ്‌സുകള്‍ ഉപഭോക്താക്കളിലെത്തിക്കുകയാണ് ചെയ്യുന്നത്. വിപണനവും ഭരണവും മാനേജ്‌മെന്‍റ് ടീം മുഖേനയാണ് നടക്കുന്നത്. നിലവില്‍ 51 മാനേജ്‌മെന്‍റ് ടീമുകള്‍ക്ക് കീഴില്‍ 7000ല്‍ കൂടുതല്‍ ഹോംഷോപ്പ് ഓണേഴ്‌സുകളും 1000-ല്‍പരം സംരംഭകരും പ്രവര്‍ത്തിക്കുന്നു. പദ്ധതിയുടെ 15ാം വാര്‍ഷികത്തിന്‍റെ ഭാഗമായി സംസ്ഥാനതല സംഗമം 2025 ഓഗസ്റ്റ് നാലിന് രാവിലെ 10 മണിക്ക് കളമശേരി സമ്രാ കണ്‍വെന്‍ഷന്‍ സെന്‍ററില്‍ നടക്കും. മന്ത്രി എം.ബി. രാജേഷ് ഉദ്ഘാടനം ചെയ്യും. മന്ത്രി പി. രാജീവ് അധ്യക്ഷത വഹിക്കും.കുടുംബശ്രീ എക്‌സിക്യൂട്ടീവ് ഡയറക്ടര്‍ എച്ച്. ദിനേശന്‍. ഹൈബി ഈഡന്‍ എംപി. ജില്ലാപഞ്ചായത്ത് പ്രസിഡന്‍റ് മനോജ് മൂത്തേടന്‍ തുടങ്ങിയവര്‍ പങ്കെടുക്കും. കുടുംബശ്രീ ഉല്‍പ്പങ്ങള്‍ ഓണ്‍ലൈനിലൂടെ ലഭ്യമാകുന്ന പോക്കറ്റ് മാര്‍ട്ട് എന്ന മൊബൈല്‍ ആപ്പിലൂടെയുള്ള ആദ്യ വിപണന ഉദ്ഘാടനവും ഓണം ഗിഫ്റ്റ് ഹാമ്പര്‍ വിതരണവും ചടങ്ങില്‍ നടക്കും.

വിവാഹ വാഗ്ദാനം നല്‍കി പീഡിപ്പിച്ചെന്ന് പരാതി

കൊച്ചി: വിവാഹ വാഗ്ദാനം നല്‍കി ലൈംഗികമായി പീഡിപ്പിച്ചെന്ന യുവതിയുടെ പരാതിയില്‍ യുവാവിനെതിരെ കേസെടുത്തു. തിരുവനന്തപുരം സ്വദേശിയായ യുവാവിനെതിരേ 35കാരിയായ ആലപ്പുഴ സ്വദേശിനിയാണ് എറണാകുളം സൗത്ത് പോലീസിൽ പരാതി നല്‍കിയത്. വിവാഹ വാഗ്ദാനം നല്‍കി ലൈംഗികമായി പീഡിപ്പിക്കുകയും ആറര ലക്ഷം രൂപ കൈക്കലാക്കുകയും ചെയ്‌തെന്നാണ് പരാതി. ഇവര്‍ നേരത്തെ ആലപ്പുഴ പോലീസ് സ്റ്റേഷനില്‍ നേരിട്ടെത്തി പരാതി നല്‍കുകയും ഇവിടെ കേസെടുക്കുകയും ചെയ്തിരുന്നു. പീഡനം നടന്നത് എറണാകുളത്തായതിനാല്‍ എഫ്ഐആര്‍ സൗത്ത് പോലീസിന് കൈമാറുകയായിരുന്നു. തുടര്‍ന്നാണ് പുതിയ എഫ്‌ഐആര്‍ രജിസ്റ്റര്‍ ചെയ്തത്. 2024 ഡിസംബറിലാണ് 35കാരിയും യുവാവും തമ്മിലുള്ള വിവാഹം ഉറപ്പിക്കുന്നത്. ഇതിനു ശേഷം പ്രതി പലപ്പോഴായി ഒന്നര ലക്ഷം രൂപ ഓണ്‍ലൈനായും അഞ്ച് ലക്ഷം രൂപ പണമായും കൈക്കലാക്കി. ഇതിന് ശേഷം പ്രതി വിവാഹത്തില്‍നിന്നും പിന്മാറിയതോടെയാണ് പരാതിയുമായി യുവതി പോലീസിനെ സമീപിച്ചത്. കഴിഞ്ഞ മാര്‍ച്ച്, ഏപ്രില്‍ മാസങ്ങളില്‍ യുവതിയെ എറണാകുളത്ത് എത്തിച്ച് പീഡനത്തിന് ഇരയാക്കിയെന്നാണ് പരാതി.

എടവനക്കാട് പഞ്ചായത്തിലെ കടല്‍ഭിത്തി നിര്‍മാണം : കളക്ടര്‍ സംയുക്തയോഗം വിളിച്ച് പരിഹാരം കാണണമെന്ന് ഹൈക്കോടതി

കൊച്ചി: വൈപ്പിനിലെ എടവനക്കാട് പഞ്ചായത്തിലെ വിവിധ ഭാഗങ്ങളില്‍ കടല്‍ഭിത്തി നിര്‍മാണവും അറ്റകുറ്റപ്പണികളുമായി ബന്ധപ്പെട്ട് ജില്ലാ കളക്ടര്‍ സംയുക്ത യോഗം വിളിച്ച് പരിഹാരം കാണണമെന്ന് ഹൈക്കോടതി. കേടുവന്ന കടല്‍ഭിത്തികള്‍ ബലപ്പെടുത്തണമെന്നും ടെട്രാ പോഡ് ഉപയോഗിച്ചുള്ള കടല്‍ഭിത്തി നിര്‍മാണം ആരംഭിക്കണമെന്നും ആവശ്യപ്പെട്ട് എടവനക്കാട് പഞ്ചായത്തിലെ ഒന്ന്, ഒമ്പത്, 13 വാര്‍ഡുകളിലെ താമസക്കാരായ ഇ.കെ. സലിഹരന്‍, എസ്.വൈ. സംജാദ്, എം.ആര്‍. ജോസഫ് ബേസില്‍ എന്നിവരടക്കം നല്‍കിയ ഹര്‍ജിയാണ് കോടതി പരിഗണിച്ചത്. ഇതുമായി ബന്ധപ്പെട്ട ജോലികളില്‍ പങ്കാളികളാകാനും ഏകോപിപ്പിക്കാനും ചുമതലപ്പെട്ട ജലസേചന-ധനകാര്യ വകുപ്പ് പ്രതിനിധികള്‍, എടവനക്കാട് പഞ്ചായത്ത് സെക്രട്ടറി, കൊച്ചിന്‍ പോര്‍ട്ട്, ഗോശ്രീ ഐലൻഡ് അധികൃതര്‍ തുടങ്ങിയവരടക്കമുള്ളവരെ ഉള്‍പ്പെടുത്തി യോഗം വിളിക്കാനാണ് ചീഫ് ജസ്റ്റീസ് നിതിന്‍ ജാംദാര്‍, ജസ്റ്റീസ് ബസന്ത് ബാലാജി എന്നിവരടങ്ങുന്ന ഡിവിഷന്‍ബെഞ്ചിന്‍റെ ഉത്തരവ്. പ്രദേശവാസികള്‍ കടല്‍ഭിത്തിയില്ലാത്തതിനാല്‍ ഏറെ ബുദ്ധിമുട്ടുന്നതായി ചൂണ്ടിക്കാട്ടിയാണ് ഹര്‍ജി നല്‍കിയത്. 2004 ലെ സുനാമിക്ക് ഇരയായവരാണ് ഇവിടെയുള്ളത്. വേലിയേറ്റമുണ്ടായാല്‍പ്പോലും വെള്ളത്തിലാകുന്ന സ്ഥിതയാണ്. എടവനക്കാട് താത്കാലിക കടല്‍ഭിത്തി നിര്‍മാണത്തിന് 35 കോടി അനുവദിച്ചതായി ഗോശ്രീ ദീപ് വികസനസമിതി (ജിഡ) അറിയിച്ചെങ്കിലും ബന്ധപ്പെട്ട ജോലികള്‍ ചുവപ്പുനാടയില്‍ കുടുങ്ങി ആരംഭിക്കാനായിട്ടില്ല. ശേഷിക്കുന്ന തുക ഇതുവരെ അനുവദിച്ചിട്ടുമില്ല. നിലവിലെ കടല്‍ ഭിത്തി ബലപ്പെടുത്തി സംരക്ഷിക്കുകയും ഇല്ലാത്തിടത്ത് നിര്‍മിക്കുകയും വേണമെന്നാണ് ഹര്‍ജിയിലെ ആവശ്യം. മുഴുവന്‍ തുകയും അനുവദിക്കാന്‍ ഉത്തരവിടണമെന്നും ആവശ്യപ്പെടുന്നു. കളക്ടറുടെ നേതൃത്വത്തില്‍ യോഗം ചേര്‍ന്ന ശേഷം തീരുമാനം അറിയിക്കണമെന്ന് കോടതി നിര്‍ദേശിച്ചു. ചെയ്യാനുദ്ദേശിക്കുന്ന കാര്യങ്ങള്‍ യോഗത്തിന്‍റെ മിനിറ്റ്‌സ് പകര്‍പ്പ് സഹിതം സമര്‍പ്പിക്കണം. ഹര്‍ജിക്കാര്‍ക്കും പരിഹാര നിര്‍ദേശങ്ങള്‍ കളക്ടര്‍ക്ക് സമര്‍പ്പിക്കാമെന്നും കോടതി നിര്‍ദേശിച്ചു. തുടര്‍ന്ന് ഹര്‍ജി വീണ്ടും എട്ടിന് പരിഗണിക്കാന്‍ മാറ്റി.

വേടനെതിരായ പീഡന പരാതി : സുഹൃത്തുക്കളെ ചോദ്യംചെയ്യും

കൊച്ചി: റാപ്പര്‍ വേടന്‍ പ്രതിയായ ലൈംഗിക പീഡനക്കേസില്‍ പരാതിയിലെ വസ്തുതകളില്‍ പരിശോധിക്കാനൊരുങ്ങി പോലീസ്. പരാതിയില്‍ പരാമര്‍ശിച്ചിട്ടുള്ള വേടന്‍റെ സുഹൃത്തുക്കളുടെയടക്കം മൊഴി രേഖപ്പെടുത്താനാണ് പോലീസ് നീക്കം. ഇവരെ വൈകാതെ വിളിച്ചു വരുത്തും. കേസില്‍ പരമാവധി തെളിവുശേഖരണത്തിനാണ് പോലീസ് തയാറെടുക്കുന്നത്. അന്വേഷണത്തിന്‍റെ ആദ്യപടിയായി യുവ ഡോക്ടറുടെ രഹസ്യമൊഴി കഴിഞ്ഞ ദിവസം എറണാകുളം മജിസ്‌ട്രേറ്റ് കോടതിയില്‍ രേഖപ്പെടുത്തി. ആശുപത്രിയില്‍ എത്തിച്ച് വൈദ്യ പരിശോധനയും പൂര്‍ത്തിയാക്കി. പ്രാഥമിക അന്വേഷണങ്ങള്‍ക്കും തെളിവ് ശേഖരണത്തിനും ശേഷം വേടനെ ചോദ്യം ചെയ്യാന്‍ വിളിപ്പിക്കാനാണ് നീക്കം. വേടനുമായുള്ള സാമ്പത്തിക ഇടപാടുകളുടെ വിവരങ്ങള്‍ യുവതി പോലീസിന് കൈമാറിയിട്ടുണ്ട്. 2021 മുതല്‍ ഓഗസ്റ്റ് മുതല്‍ 2023 മാര്‍ച്ച് വരെയുള്ള കാലയളവില്‍ കോഴിക്കോടും കൊച്ചിയിലുമടക്കം അഞ്ചിടങ്ങളിലെത്തിച്ച് പീഡിപ്പിച്ചെന്നും പിന്നീട് വിവാഹം കഴിക്കാതെ ഒഴിവാക്കിയെന്നുമാണ് കോട്ടയം സ്വദേശിനിയായ യുവതിയുടെ പരാതി. വേടന്‍ തന്നെ ശാരീരികമായും സാമ്പത്തികമായും പീഡിപ്പിച്ചതായും പരാതിയില്‍ ആരോപിച്ചിട്ടുണ്ട്. 2019ല്‍ കോഴിക്കോട് മെഡിക്കല്‍ കോളജില്‍ പിജി ചെയ്യുന്ന സമയത്താണ് യുവതി വേടനുമായി പരിചയത്തിലാകുന്നത്. വേടന്‍റെ പാട്ടുകളിലും അഭിമുഖങ്ങളിലും ആകൃഷ്ടയായി ഇന്‍സ്റ്റഗ്രാമിലൂടെയാണ് സൗഹൃദം സ്ഥാപിച്ചത്. പിന്നീട് തന്നെ വിവാഹം കഴിക്കാന്‍ ആഗ്രഹമുണ്ടെന്ന് വേടന്‍ അറിയിച്ചിരുന്നു. ഇതുപ്രകാരം മുന്നോട്ടുപോകുന്നതിനിടെയാണ് വിവിധ സ്ഥലങ്ങളില്‍ വച്ച് പീഡിപ്പിച്ചത്. വിവാഹത്തില്‍ നിന്ന് വേടന്‍ പിന്മാറിയതോടെ താന്‍ വിഷാദ രോഗത്തിന് അടിമയായെന്നും ചികിത്സ തേടേണ്ട സാഹചര്യവുമുണ്ടായെന്നുമാണ് യുവതി പരാതിയില്‍ പറയുന്നത്. മുന്‍കൂര്‍ ജാമ്യഹര്‍ജി നല്‍കി കൊച്ചി: വിവാഹ വാഗ്ദാനം നല്‍കി യുവഡോക്ടറെ ലൈംഗീകമായി പീഡിപ്പിച്ചെന്ന കേസില്‍ റാപ്പര്‍ വേടന്‍ എന്ന ഹിരണ്‍ ദാസ് മുരളി ഹൈക്കോടതിയില്‍ മുന്‍കൂര്‍ ജാമ്യ ഹര്‍ജി നല്‍കി. തൃക്കാക്കര പോലീസില്‍ യുവതി നല്‍കിയ പരാതിയില്‍ കേസ് രജിസ്റ്റര്‍ ചെയ്ത സാഹചര്യത്തില്‍ അറസ്റ്റ് തടയണമെന്നാണ് ഹര്‍ജിയിലെ ആവശ്യം. താന്‍ നിരപരാധിയാണെന്നും കസ്റ്റഡിയില്‍ ചോദ്യം ചെയ്യേണ്ട ആവശ്യമില്ലെന്നും അന്വേഷണവുമായി സഹകരിക്കാന്‍ തയാറാണെന്നും ഹര്‍ജിയില്‍ ചൂണ്ടിക്കാട്ടി. ആരാധികയെന്ന നിലയില്‍ വേടനെ പരിചയപ്പെട്ട താനുമായി ബന്ധം വളര്‍ത്തുകയും വിവാഹ വാഗ്ദാനം നല്‍കി പലവട്ടം പീഡിപ്പിച്ചെന്നുമാണ് യുവതിയുടെ പരാതി. കോഴിക്കോട്ടെ തന്‍റെ വീട്ടില്‍ വച്ചും പിന്നീട് എറണാകുളത്ത് ഹോട്ടലില്‍ വച്ചും 2021നും 2023നുമിടയില്‍ പീഡിപ്പിച്ചു. വിവാഹ വാഗ്ദാനത്തില്‍ നിന്ന് പിന്‍മാറിയതിനെ തുടര്‍ന്നാണ് യുവതി പരാതി നല്‍കിയത്. ഭാരതീയ ന്യായ് സംഹിത വരുന്നതിന് മുമ്പ് നടന്ന സംഭവമായതിനാല്‍ ഇന്ത്യന്‍ ശിക്ഷ നിയമ പ്രകാരമാണ് കേസ് എടുത്തിട്ടുള്ളത്. സ്വമേധയാ ആണ് താനുമായി ബന്ധം സ്ഥാപിച്ചതെന്ന് യുവതി തന്നെ പരാതിയില്‍ പറയുന്നതായി ഹര്‍ജിയില്‍ ചൂണ്ടിക്കാട്ടുന്നു. ദീര്‍ഘകാലം അത് തുടരുകയും സാമ്പത്തിക ഇടപാടുകള്‍ നടത്തുകയും ചെയ്‌തെന്നും പറയുന്നു. ആരോപണങ്ങള്‍ അംഗീകരിച്ചാല്‍ പോലും തനിക്കെതിരായ കുറ്റം നിലനില്‍ക്കുന്നില്ലെന്നും വിവാഹ വാഗ്ദാനം നല്‍കി ലൈംഗീക ബന്ധത്തിന് സമ്മതിക്കുന്നത് ബലാത്സംഗമായി കണക്കാക്കാനാകില്ലെന്ന് സുപ്രീംകോടതി വ്യക്തമാക്കിയിട്ടുണ്ട്. ഗായകനെന്ന നിലയിലുള്ള തന്‍റെ ഖ്യാതി തകര്‍ക്കാനുള്ള ശ്രമമാണ് പരാതിക്ക് പിന്നില്‍. പരാതി നല്‍കുമെന്ന് ഭീഷണിപ്പെടുത്തി ഒട്ടേറെ ഫോണ്‍ കോളുകള്‍ തനിക്ക് ലഭിച്ചിരുന്നു. ഇതിന് വേണ്ടി പ്രവര്‍ത്തിക്കുന്ന സംഘമുണ്ടെന്നാണ് മനസിലാകുന്നതെന്നും ഹര്‍ജിയില്‍ പറയുന്നു.

സ്വകാര്യവ്യക്തി കൈവശം വെച്ചിരുന്ന പുറമ്പോക്ക് ഭൂമി സർക്കാരിലേക്ക് തിരിച്ചെടുത്ത് കോടതി

പറവൂർ: സ്വകാര്യ വ്യക്തിയും കുടുംബവും അനധികൃതമായി വർഷങ്ങളോളം കൈവശം വച്ചിരുന്ന സർക്കാർ പുറമ്പോക്ക് ഭൂമി സർക്കാരിലേക്ക് തിരിച്ചെടുത്ത് പറവൂർ അഡീഷണൽ ജില്ലാ കോടതി ജഡ്ജി എം.പി. ജയരാജ് ഉത്തരവിട്ടു. കുന്നത്തുനാട് താലൂക്ക് കൊമ്പനാട് വില്ലേജിൽ കോട്ടപ്പാറയിൽ 40 ഏക്കർ 77 സെന്‍റ് 84 ചതുരശ്ര മീറ്റർ ഭൂമിയാണ് സർക്കാർ തിരിച്ചുപിടിച്ചത്. മഴുവന്നൂർ മാടപ്പറമ്പിൽ മാത്യു തരകനും കുടുംബവും ഭൂമി അനധികൃതമായി കൈവശം വച്ച് ഉപയോഗിക്കുകയും ആദായമെടുക്കുകയുമായിരുന്നു. ഇതിനെതിരെ കേരള സർക്കാർ സമർപ്പിച്ച അപ്പീലിലാണ് കോടതിയുടെ ഉത്തരവ്. സർക്കാരിനു വേണ്ടി അഡീഷണൽ ഗവ. പ്ലീഡർ എൻ.കെ. ഹരി ഹാജരായി.

അമ്മയെയും മകനെയും വെട്ടിപ്പരിക്കേല്പിച്ചു; നാലുപേർ അറസ്റ്റിൽ

അരൂർ:അരൂരിൽ വീട്ടിൽകയറി അമ്മയെയും മകനെയും വെട്ടിപ്പരിക്കേൽപ്പിച്ച നാലു പേരെ അരൂർ പോലീസ് അറസ്റ്റ് ചെയ്തു.അരൂർ പഞ്ചായത്ത് ഇരുപത്തിയൊന്നാം വാർഡിൽ കിഴക്കേ വേലിക്കകത്ത് വീട്ടിൽ രവീന്ദ്രൻ ഭാര്യ രമണി(62) മകൻ രാകേഷ് (34)എന്നിവരെയാണ് ഇന്നലെ വൈകിട്ട് ആറരയോടെ വെട്ടിപ്പരിക്കേൽപ്പിച്ചത്.ഇരുവരെയും എറണാകുളം ജനറൽ ആശുപത്രിയിൽ പ്രവേശിപ്പിച്ചു. അരൂർ കറുകപ്പള്ളി റോബിൻ ജെയിംസ്(18) കാവലിങ്കൽ വിവേക്(26) പോളാട്ട് നികർത്തിൽ ആഷിക് മധു (22), കുമരകം പഞ്ചായത്ത് പതിമൂന്നാം വാർഡിൽ വെണ്ണലശേരി കളത്തിൽ ജീവൻ (23)എന്നിവരെ സബ് ഇൻസ്‌പെക്ടർ എസ്.ഗീതു മോളിന്‍റെ നേതൃത്വത്തിൽ അറസ്റ്റ്ചെ‌‌‌യ്തു. കഴിഞ്ഞ മാസം 20ന് പ്രതിയായ റോബിൻ ജെയിംസിനെ രാകേഷും കൂട്ടുകാരും ചേർന്ന് അരൂർ ശ്മശാനം റോഡിൽ വച്ച് മർദിച്ചിരുന്നു. ഈ വിഷയത്തിൽ അരൂർ പോലീസ് കേസ് രജിസ്റ്റർ ചെയ്ത് അന്വേഷണം നടത്തിവരവെയാണ് റോബിനും കൂട്ടുകാരും ചേർന്ന് വീടുകയറി ആക്രമണം നടത്തിയത്. കേസിൽ രണ്ടു പേരെകൂടി പിടികൂടാനുണ്ടെന്ന് പോലീസ് അറിയിച്ചു. അറസ്റ്റിലായ പ്രതികളെ ഇന്ന് കോടതിയിൽ ഹാജരാക്കും.

ജാമ്യം പോരാ, അന്യായമായ കുറ്റപത്രവും പിൻവലിക്കണം: മാർ മഠത്തിക്കണ്ടത്തിൽ

കോതമംഗലത്ത്‌ ആയിരങ്ങളുടെ പ്രതിഷേധത്തിര കോതമംഗലം: ഇന്ത്യൻ ഭരണഘടന വിഭാവനം ചെയ്യുന്ന മൗലിക അവകാശങ്ങളും ജനാധിപത്യ അവകാശങ്ങളും കാറ്റിൽപറത്തി ആൾക്കൂട്ട വിചാരണയിലൂടെ ചെയ്യാത്ത തെറ്റ് ആരോപിച്ച് രണ്ടു കന്യാസ്ത്രീമാരെ ജയിലിൽ അടച്ച സംഭവത്തിനെതിരേ കോതമംഗലം രൂപത തൊടുപുഴയിൽ നടത്തിയ പ്രതിഷേധ സംഗമത്തിലും പ്രാർഥനാ റാലിയിലും അണിനിരന്നത് ആയിരങ്ങൾ. മുനിസിപ്പൽ മൈതാനിയിൽനിന്ന് ആരംഭിച്ച ജപമാല റാലി ടൗണ്‍ പള്ളിയങ്കണത്തിൽ സമാപിച്ചു. സമ്മേളനം കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ ഉദ്ഘാടനം ചെയ്തു. അന്യായമായി അറസ്റ്റ് ചെയ്തു ജയിലിൽ അടയ്ക്കപ്പെട്ട കന്യാസ്ത്രീമാർക്കു ജാമ്യം നൽകിയാൽ മാത്രം പോരെന്നും കുറ്റപത്രം പിൻവലിച്ചു നിരുപാധികം വിട്ടയയ്ക്കണമെന്നും ബിഷപ് ആവശ്യപ്പെട്ടു. കോതമംഗലം രൂപതയിലെ സിആർഐ സന്യാസ സമൂഹത്തിന്‍റെയും രൂപതയിലെ വിവിധ സംഘടനകളുടെയും സംയുക്താഭിമുഖ്യത്തിലായിരുന്നു പ്രതിഷേധം. ക്രൈസ്തവ വിശ്വാസികൾക്കുനേരേ ആക്രമണങ്ങൾ ഉണ്ടാകുന്പോൾ ചർച്ചകൾ നടത്തി താത്കാലിക പരിഹാരമല്ല ഉണ്ടാകേണ്ടത്. മറിച്ച് വർഗീയ പ്രവണതകളും മൗലിക അവകാശത്തിൻമേലുള്ള അടിച്ചമർത്തലുകളും എന്നേക്കുമായി ഇല്ലാതാക്കണം. മതപരിവർത്തനമാണ് സഭ ചെയ്തിരുന്നതെങ്കിൽ രാജ്യം മുഴുവൻ കത്തോലിക്കരായി മാറുമായിരുന്നെന്നും ബിഷപ് ചൂണ്ടിക്കാട്ടി. ഫാ. റോയി കണ്ണൻചിറ സിഎംഐ, സിസ്റ്റർ ജോസിയാ എസ്ഡി എന്നിവർ പ്രസംഗിച്ചു.

കോതമംഗലത്ത് യുവാവിനെ വിഷം കൊടുത്ത് കൊലപ്പെടുത്തി; പെൺസുഹൃത്ത് അറസ്റ്റിൽ

പെൺസുഹൃത്ത് വിഷം നല്‍കിയെന്ന് മരണത്തിന് മുമ്പേ യുവാവ് ബന്ധുവിനോട് സൂചിപ്പിച്ചു കോതമംഗലം:കോതമംഗലത്ത് യുവാവിനെ വിഷം കൊടുത്ത് കൊലപ്പെടുത്തി.പെൺസുഹൃത്ത് അറസ്റ്റിൽ.മാതിരപ്പിള്ളി മേലേത്ത്മാലില്‍ അലിയാരുടെ മകൻ അന്‍സില്‍ (38)ആണ് കൊല്ലപ്പെട്ടത്.അന്‍സിലിന്‍റെ പെൺസുഹൃത്തായ പിണ്ടിമന മാലിപ്പാറ ഇടയത്തുകുടി അഥീന (24) ആണ് അറസ്റ്റിലായത്. വ്യാഴാഴ്ച രാത്രി 7.30 ഓടെയാണ് അൻസിൽ മരിച്ചത്. ഇന്നലെ വൈകുന്നേരമാണ് അറസ്റ്റ് രേഖപ്പെടുത്തിയത്.വിഷം ഉള്ളിൽ ചെന്ന് ഗുരുതരാവസ്ഥയിലായ അന്‍സില്‍ ആലുവയിലെ ആശുപത്രിയില്‍ ചികിത്സയിലിരിക്കെയാണ് മരിച്ചത്. അഥീന വിഷം നല്‍കിയെന്ന് മരണത്തിന് മുമ്പേ അന്‍സില്‍ ബന്ധുവിനോട് സൂചിപ്പിച്ചിരുന്നു.ഇതാണ് അന്വേഷണത്തില്‍ നിര്‍ണായകമായത്.ആദ്യം വധശ്രമത്തിന് പോലീസ് കേസെടുത്തിരുന്നു.അന്‍സിലിന്‍റെ മരണം സംഭവിച്ചതോടെ അഥീനയ്ക്കെതിരെ കൊലക്കുറ്റം ചുമത്തി അറസ്റ്റ് ചെയ്യുകയാണുണ്ടായത്. ബുധനാഴ്ച പുലർച്ചെ നാലോടെ അഥീനയുടെ വീട്ടില്‍വച്ചാണ് സംഭവം. അഥീന ഒറ്റയ്ക്ക് താമസിക്കുന്ന വീടാണിത്. വിഷം അകത്തുചെന്നശേഷം അന്‍സില്‍ അവശനായതോടെ അഥീനയാണ് കോതമംഗലം പോലീസിനെ ആദ്യം വിവരം അറിയിച്ചത്. വീടിനടുത്ത് ഒരാള്‍ വിഷം കഴിച്ച് കിടക്കുന്നു എന്നായിരുന്നു അഥീന നല്‍കിയ വിവരം.ഇതിനിടെ അന്‍സിലും പോലീസിന്‍റെ കണ്‍ട്രോള്‍ റൂമിലേക്ക് ഫോണ്‍ ചെയ്ത് വിവരം അറിയിച്ചിരുന്നു. ഉടന്‍ സ്ഥലത്തെത്തിയ പോലീസ് അന്‍സിലിന്‍റെ ബന്ധുക്കളെ അറിയിക്കുകയും ആംബുലന്‍സ് വരുത്തി അന്‍സിലിനെ ആശുപത്രിയിലെത്തിക്കുകയുമായിരുന്നു.ആംബുലന്‍സില്‍വച്ചാണ് അഥീനയാണ് വിഷം നല്‍കിയതെന്ന് അന്‍സില്‍ ബന്ധുവിനോട് പറഞ്ഞത്.ടിപ്പര്‍ ഡ്രൈവറാണ് അന്‍സില്‍. ഒരു വര്‍ഷം മുമ്പ് അന്‍സിലിനെതിരെ അഥീന പോലീസില്‍ പരാതി നല്‍കിയിരുന്നു.തന്നെ മര്‍ദിച്ചുവെന്നായിരുന്നു പരാതി.പോലീസ് കേസെടുത്തെങ്കിലും പിന്നീട് അഥീന പരാതി പിന്‍വലിച്ചു. ഒത്തുതീര്‍പ്പ് വ്യവസ്ഥപ്രകാരം നല്‍കേണ്ട പണം അന്‍സില്‍ നല്‍കാതിരുന്നത് അഥീനയെ പ്രകോപിപ്പിച്ചതായാണ് സംശയം. ഇതും മറ്റ് ചില പ്രശ്നങ്ങളുമാണ് കൊലപാതകത്തില്‍ കലാശിച്ചതെന്നാണ് ചോദ്യം ചെയ്യലില്‍ പോലീസിന് ലഭിച്ചിട്ടുള്ള വിവരം. ഏത് വിധത്തിൽ വിഷം കൊടുത്തു എന്നതുൾപ്പെടെയുള്ള വിവരങ്ങൾ വ്യക്തമാകുന്നതേയുള്ളൂ. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. അന്‍സിലിന്‍റെ മൃതദേഹം കളമശേരി മെഡിക്കല്‍ കോളജില്‍ പോസ്റ്റുമോര്‍ട്ടം നടത്തി.ബന്ധുക്കള്‍ ഏറ്റുവാങ്ങിയ മൃതദേഹം വീട്ടിലെ പൊതുദര്‍ശനത്തിനുശേഷം സംസ്കരിച്ചു. ഭാര്യ:സഫ്ന. മക്കൾ: മുഹമ്മദ് റാബിഹ്, റാബി. ഗ്രീഷ്മയുടെ ക്രൂരകൃത്യത്തെ അനുസ്മരിപ്പിച്ച് അഥീനയും കോതമംഗലം: തിരുവനന്തപുരം പാറശാലയില്‍ ഗ്രീഷ്മ ആണ്‍സുഹൃത്തിനെ ജൂസിൽ വിഷം കലർത്തി കൊലപ്പെടുത്തിയ മാതൃകയാണ് അഥീനയും സ്വീകരിച്ചത്.കൊലപാതകത്തിന് ഉപയോഗിച്ച കളനാശിനി പോലും ഒരേ കമ്പനിയുടേതായിരുന്നു. ദിവസങ്ങള്‍ക്കു മുമ്പ് തന്നെ ആസൂത്രണം ചെയ്താണ് അഥീന കൊലപാതകം നടപ്പാക്കിയത്. കളനാശിനി ഏറെ ദിവസങ്ങള്‍ക്ക് മുമ്പുതന്നെ വാങ്ങിവച്ചിരുന്നു.ബുധനാഴ്ച രാത്രി വീട്ടിലെത്തിയപ്പോഴാണ് അഥീന,അന്‍സിലിന് വിഷം നല്‍കിയത്.അഥീനയുടെ വീട്ടില്‍വച്ച് ഇരുവരും തമ്മില്‍ വഴക്കുണ്ടായതായും സൂചനയുണ്ട്.പോലീസിന്‍റെ പല ചോദ്യങ്ങൾക്കുും വ്യക്തമായ മറുപടി നല്‍കാന്‍ അഥീന തയാറായില്ലെന്നാണ് വിവരം.റിമാൻഡ് ചെയ്ത ശേഷം വീണ്ടും കസ്റ്റഡിയില്‍ വാങ്ങി വിശദമായി ചോദ്യം ചെയ്യാനാണ് പോലീസ് നീക്കം. അയല്‍വാസികളുമായി ബന്ധമില്ലാതെയാണ് അഥീന കഴിഞ്ഞിരുന്നത്.ഇത്തരമൊരു ക്രൂരത അവിടെ അരങ്ങേറിയത് അയല്‍വാസികള്‍ അറിഞ്ഞത് പോലീസും അന്‍സലിന്‍റെ ബന്ധുക്കളും വീട്ടിലെത്തിയപ്പോഴാണ്. ഒരു മാസംമുമ്പ് മറ്റൊരു യുവാവ് വീട്ടില്‍ അതിക്രമിച്ചു കയറി അഥീനയെ മര്‍ദിക്കുകയും വീട്ടുപകരണങ്ങള്‍ നശിപ്പിക്കുകയും ചെയ്തതിന് കേസുണ്ടായിരുന്നു. ഈ കേസില്‍ യുവാവ് അറസ്റ്റിലായിരുന്നു.ഇതിനെച്ചൊല്ലിയും അൽസിലും അഥീനയും പരസ്പരം വഴക്കുണ്ടാക്കിയിരുന്നു. അൻസിൽ സ്വയം ജീവനൊടുക്കാൻ ശ്രമിച്ചതായാണ് അഥീനപോലീസിനെ തെറ്റിദ്ധരിപ്പിക്കാൻ ശ്രമിച്ചത്. അഥീനയുടെ മാതാവ് ലിസി കോവിഡ് പിടിപെട്ടാണ് മരിച്ചത്.അതിന് ശേഷമാണ് അഥീന മാലിപ്പാറയിലെ വീട്ടില്‍ താമസമാക്കിയത്.മറ്റ് ബന്ധുക്കളുമായും അഥീന വലിയ അടുപ്പം പുലര്‍ത്തിയിരുന്നില്ലെന്നാണ് വിവരം.പോലീസ് ഇന്‍സ്പെക്ടര്‍ പി.ടി.ബിജോയിയുടെ നേതൃത്വത്തിലാണ് അന്വേഷണവും അറസ്റ്റും.

ലൈഫ് ഫ്ലാറ്റ് സമുച്ചയത്തിന്‍റെ ശിലാസ്ഥാപനം

കോതമംഗലം: നെല്ലിക്കുഴി പഞ്ചായത്തിലെ ഭൂരഹിത ഭവനരഹിതർക്കായി സംസ്ഥാന സർക്കാരിന്‍റെ മനസോടെ ഇത്തിരി മണ്ണ് പദ്ധതിയുടെ ഭാഗമായി പ്രവാസി വ്യവസായിയും നെല്ലിക്കുഴി സ്വദേശിയുമായ സമീർ പൂക്കുഴി നിർമിച്ച് നൽകുന്ന ലൈഫ് ഫ്ലാറ്റ് സമുച്ചയത്തിന്‍റെ ശിലാസ്ഥാപനം ആന്‍റണി ജോണ്‍ എംഎൽഎ നിർവഹിച്ചു. ചെറുവട്ടൂർ ആശാൻപടിയിൽ വാങ്ങി നൽകിയ 42 സെന്‍റ് സ്ഥലത്താണ് പഞ്ചായത്തിലെ ഭൂരഹിതരായ കുടുംബങ്ങൾക്ക് സമീർ പൂക്കുഴി സൗജന്യമായി ഫ്ലാറ്റ് നിർമിച്ചു നൽകുന്നത്. പഞ്ചായത്ത് പ്രസിഡന്‍റ് പി.എം. മജീദ് അധ്യക്ഷത വഹിച്ചു. ജില്ലാ കളക്ടർ എൻ.എസ്.കെ. ഉമേഷ്, സമീർ പൂക്കുഴി എന്നിവർ മുഖ്യാതിഥികളായിരുന്നു. എഫ്ഐടി ചെയർമാൻ ആർ. അനിൽകുമാർ, എംപിഐ ചെയർമാൻ ഇ.കെ. ശിവൻ, ജില്ലാ പഞ്ചായത്തംഗം റഷീദ സലീം, പഞ്ചായത്ത് സ്ഥിരം സമിതി അധ്യക്ഷരായ എം.എം. അലി, എൻ.ബി. ജമാൽ, ഏണസ്റ്റ് ലൈഫ് കോ-ഓർഡിനേറ്റർ എസ്. അൻവർ ഹുസൈൻ, വാർഡ് മെന്പർമാരായ ടി.എം. അബ്ദുൾ അസീസ്, കെ.കെ. നാസർ, അരുണ്‍ സി ഗോവിന്ദൻ,മുൻ ജില്ലാ പഞ്ചായത്ത് അംഗം കെ എം പരീത്, സഹീർ കോട്ടപറന്പിൽ, പി.കെ. രാജേഷ് എന്നിവർ പങ്കെടുത്തു.

ആടിപ്പാടി വയോജനങ്ങൾ : ശ്രദ്ധേയമായി ബ്ലോക്ക് പഞ്ചായത്ത് വയോജനകലാമേള

കോതമംഗലം: ആദിവാസിനൃത്തവും ഒപ്പനയും മാർഗംകളിയും നൃത്തവും നാടൻപാട്ടുകളും കഥാപ്രസംഗവുമൊക്കെയായി 70 പിന്നിട്ട വയോജനങ്ങൾ വേദി കൈയടക്കി. ബ്ലോക്ക് പഞ്ചായത്ത് സംഘടിപ്പിച്ച വയോജന കലാമേള- വർണച്ചിറകിലാണ് പത്തുപഞ്ചായത്തുകളിൽ നിന്നായി എത്തിയ അഞ്ഞൂറിൽപരം വരുന്ന വയോജനങ്ങളുടെ ശ്രദ്ധേയ പ്രകടനം. 85 ടീമുകളാണ് പരിപാടിയുമായി രംഗത്തെത്തിയത്. ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ ഉദ്ഘാടനം ചെയ്തു. വൈസ് പ്രസിഡന്‍റ് ഡയാന നോബി അധ്യക്ഷയായി. പഞ്ചായത്ത് പ്രസിഡന്‍റുമാരായ ജെസി സാജു, കാന്തി വെള്ളക്കയ്യൻ, ജിജി ഷിജു, പഞ്ചായത്ത് വൈസ് പ്രസിഡന്‍റുമാരായ ബിന്ദു ശശി, ആശ ജിമ്മി, ബ്ലോക്ക് പഞ്ചായത്ത് സ്ഥിരം സമിതി അധ്യക്ഷരായ ജോമി തെക്കേക്കര, സാലി ഐപ്പ്, ജെയിംസ് കോറന്പേൽ, ബ്ലോക്ക് പഞ്ചായത്തംഗങ്ങളായ നിസമോൾ ഇസ്മായിൽ, ആനിസ് ഫ്രാൻസിസ്, പി.എം കണ്ണൻ, റ്റി.കെ കുഞ്ഞുമോൻ, ലിസി ജോസഫ് തുടങ്ങിയവർ പ്രസംഗിച്ചു.

മൂവാറ്റുപുഴ നിര്‍മലയില്‍ മെറിറ്റ് ദിനാഘോഷം

മൂവാറ്റുപുഴ: നിര്‍മല കോളജില്‍ 2022- 2025 അധ്യയന വര്‍ഷത്തില്‍ ഡിഗ്രിയും,2023-2025 വര്‍ഷത്തില്‍ പിജി പഠനവും പൂര്‍ത്തിയാക്കി റാങ്ക് നേടിയ വിദ്യാര്‍ഥികളെ ആദരിച്ചു.കോളജ് ഓഡിറ്റോറിയത്തില്‍ നടത്തിയ മെറിറ്റ് ദിനാഘോഷത്തില്‍ ഗാനരചയിതാവും, കവിയുമായ വയലാര്‍ ശരത്ചന്ദ്ര വര്‍മ മുഖ്യാതിഥിയായി. ചടങ്ങില്‍ റാങ്ക് ജേതാക്കള്‍, വിവിധ വിഭാഗങ്ങളില്‍ നിന്നായി പാഠ്യ-പാഠ്യേതര പ്രവര്‍ത്തനങ്ങളില്‍ മികവ് തെളിയിച്ച വിദ്യാര്‍ഥികള്‍, എന്‍എസ്എസ്, എന്‍സിസി പുരസ്‌കാര ജേതാക്കള്‍ ഉള്‍പ്പെടെ 180 വിദ്യാര്‍ഥികളെയാണ് കോളജ് ആദരിച്ചത്. 2025 അധ്യയന വര്‍ഷത്തില്‍ യുജി വിഭാഗത്തില്‍ 46റാങ്കും, പിജി വിഭാഗത്തില്‍ 22റാങ്കുകളുമാണ് കോളജ് നേടിയത്. മെറിറ്റ് ദിനാഘോഷത്തില്‍ കോളജ് ഓട്ടോണോമസ് ഡയറക്ടര്‍ ഡോ.കെ.വി. തോമസ് അധ്യക്ഷത വഹിച്ചു. കോളജ് പ്രിന്‍സിപ്പല്‍ റവ. ഡോ. ജസ്റ്റിന്‍ കെ. കുര്യാക്കോസ്, ബര്‍സാര്‍ ഫാ. പോള്‍ കളത്തൂര്‍, വൈസ് പ്രിന്‍സിപ്പല്‍മാരായ ഡോ. സോണി കുര്യാക്കോസ്, ഡോ. ജിജി കെ. ജോസഫ്, പ്രോഗ്രാം കണ്‍വീനര്‍ സി. എമി ടോമി എന്നിവര്‍ പ്രസംഗിച്ചു.

യുവതലമുറയെ ലൈബ്രറികളിലേക്ക് ആകർഷിക്കാൻ പദ്ധതികൾ വേണമെന്ന് സ്പീക്കർ

വാഴക്കുളം: ആധുനിക കാലത്ത് യുവതലമുറയെ ലൈബ്രറികളിലേക്ക് ആകർഷിക്കാൻ സാധിക്കുന്ന പദ്ധതികൾ നടപ്പാക്കണമെന്ന് നിയമ സഭാ സ്പീക്കർ എ.എൻ. ഷംസീർ. കദളിക്കാട് നാഷണൽ റീഡിംഗ് ക്ലബ് ആൻഡ് പബ്ലിക് ലൈബ്രറി പ്ലാറ്റിനം ജൂബിലി ആഘോഷങ്ങളുടെ സമാപനവും പ്ലാറ്റിനം ജൂബിലി സ്മാരക ഹാൾ ഉദ്ഘാടനവും നിർവഹിക്കുകയായിരുന്നു സ്പീക്കർ. കാണാത്ത ലോകങ്ങളുടെ വിശാലമായ വാതായനം തുറന്നു നൽകാൻ പുസ്തകങ്ങൾക്കു കഴിയുമെന്നും അദ്ദേഹം പറഞ്ഞു. വിരൽത്തുന്പിൽ പുസ്തകങ്ങൾ ലഭ്യമാക്കുന്ന തരത്തിൽ ലൈബ്രറികൾ ഡിജിറ്റലൈസ് ചെയ്യേണ്ടത് കാലഘട്ടത്തിന്‍റെ ആവശ്യമാണ്. എല്ലാ വിഭാഗം ആളുകളെയും ഉൾക്കൊള്ളുന്ന നമ്മുടെ നാട്ടിൽ മതസ്വാതന്ത്ര്യത്തിന്മേലുള്ള ഏതുതരത്തിലുള്ള കടന്നുകയറ്റവും അപലപനീയമാണെന്നും സ്പീക്കർ പറഞ്ഞു. മാത്യു കുഴൽനാടൻ എംഎൽഎ അധ്യക്ഷനായി. മഞ്ഞള്ളൂർ പഞ്ചായത്ത് പ്രസിഡന്‍റ് ആൻസി ജോസ് റാങ്ക് ജേതാക്കളെ ആദരിച്ചു. ജില്ലാ പഞ്ചായത്തംഗം ഉല്ലാസ് തോമസ് എൽസിഡി പ്രോജക്ട് സമർപ്പണവും ബ്ലോക്ക് പഞ്ചായത്ത് വൈസ് പ്രസിഡന്‍റ് ജോസി ജോളി വാനനിരീക്ഷണ ഉപകരണ സമർപ്പണവും നടത്തി. ജില്ല ലൈബ്രറി കൗണ്‍സിൽ സെക്രട്ടറി എം.ആർ. സുരേന്ദ്രൻ ആദ്യകാല അംഗങ്ങളെ ആദരിച്ചു. താലൂക്ക് ലൈബ്രറി കൗണ്‍സിൽ സെക്രട്ടറി സി.കെ. ഉണ്ണി ഹരിതഗ്രന്ഥശാല പ്രഖ്യാപനം നടത്തി. കദളിക്കാട് വിമലമാതാ പള്ളി വികാരി റവ. ഡോ. തോമസ് പോത്തനാമുഴി, മഞ്ഞള്ളൂർ പഞ്ചായത്തംഗങ്ങളായ ജാസ്മിൻ റെജി, അനിത റെജി, ക്ലബ് പ്രസിഡന്‍റ് ജയാജോർജ് നന്പ്യാപറന്പിൽ, സെക്രട്ടറി ഇ.കെ. സുരേഷ് ഇരുപൂളുംകാട്ടിൽ എന്നിവർ പ്രസംഗിച്ചു.

കന്യാസ്ത്രീകളുടെ അറസ്റ്റ്: പ്രതിഷേധമിരന്പി

മൂവാറ്റുപുഴ: ഛത്തീസ്ഗഡിൽ കന്യാസ്ത്രീകളെ ജാമ്യമില്ല വകുപ്പുകൾ ചുമത്തി ജയിലിൽ അടച്ച സംഭവത്തിൽ പ്രതിഷേധം വ്യാപിക്കുന്നു. മൂവാറ്റുപുഴ മേഖലയിൽ വിവിധ സംഘടനകളുടെ നേതൃത്വത്തിൽ പ്രതിഷേധ സദസുകളും പ്രകടനങ്ങളും വായ്മൂടിക്കെട്ടി പ്രതിഷേധവും ധർണകളും നടന്നു. സിപിഐ മൂവാറ്റുപുഴ മണ്ഡലം കമ്മറ്റിയുടെ ആഭിമുഖ്യത്തിൽ മൂവാറ്റുപുഴ നെഹ്റു പാർക്കിൽ നെഹ്റുവിന്‍റെ പ്രതിമയ്ക്ക് മുന്നിൽ പ്രതിഷേധയോഗം നടത്തി. സിപിഐ സംസ്ഥാന കമ്മറ്റി അംഗം ബാബു പോൾ ഉദ്ഘാടനം ചെയ്തു. സിപിഐ മണ്ഡലം സെക്രട്ടറി ജോളി പൊട്ടയ്ക്കൽ അധ്യക്ഷത വഹിച്ചു. സിപിഐ ജില്ലാകമ്മറ്റി അംഗങ്ങളായ എൽദോ ഏബ്രഹാം, കെ.എ. നവാസ് എന്നിവർ പ്രസംഗിച്ചു. കൊച്ചി: ഛത്തീസ്ഗഡില്‍ നിരപരാധികളായ രണ്ടു കന്യാസ്ത്രീകളെ കള്ളക്കേസില്‍ കുടുക്കി ജയിലില്‍ അടച്ചതിനെതിരെ കേരള കോണ്‍ഗ്രസ് ജില്ലാ കമ്മിറ്റി പ്രതിഷേധ സംഗമം സംഘടിപ്പിച്ചു. പാര്‍ട്ടി വര്‍ക്കിംഗ് ചെയര്‍മാന്‍ പി.സി.തോമസ് ഉദ്ഘാടനം ചെയ്തു. ജില്ലാ പ്രസിഡന്‍റ് ഷിബു തെക്കുംപുറം അധ്യക്ഷത വഹിച്ചു. യോഗത്തില്‍ എം.പി. ജോസഫ്, ജോണി അരീക്കാട്ടില്‍, ബേബി വി. മുണ്ടാടന്‍ തുടങ്ങിയവര്‍ പ്രസംഗിച്ചു. വാഴക്കുളം: മഞ്ഞളൂർ ബ്ലോക്ക് കോണ്‍ഗ്രസ് കമ്മിറ്റിയുടെ ആഭിമുഖ്യത്തിൽ വാഴക്കുളത്ത് പ്രതിഷേധ സദസ് നടത്തി. ഡിസിസി ജനറൽ സെക്രട്ടറി പി.പി എൽദോസ് ഉദ്ഘാടനം നിർവഹിച്ചു. മഞ്ഞള്ളൂർ ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് സുഭാഷ് കടയ്ക്കോട്ട് അധ്യക്ഷത വഹിച്ചു. മാത്യു കുഴൽനാടൻ എംഎൽഎ, ഡിസിസി ജനറൽ സെക്രട്ടറി ഉല്ലാസ് തോമസ്, മുൻ ബ്ലോക്ക് പ്രസിഡന്‍റ് ജോസ് പെരുന്പളിക്കുനേൽ, ടോമി തന്നിട്ടമാക്കൽ, സെന്‍റ് ജോർജ് ഫൊറോന പള്ളി വികാരി ഫാ. ജോർജ് പൊട്ടക്കൽ, മഞ്ഞള്ളൂർ പഞ്ചായത്തിലെ വിവിധ കോണ്‍വെന്‍റുകളിൽ നിന്നുള്ള കന്യാസ്ത്രീകൾ തുടങ്ങിയവർ പ്രസംഗിച്ചു. ആം ആംദ്മി പാർട്ടി മൂവാറ്റുപുഴ നിയോജമണ്ഡലം കമ്മിറ്റിയുടെ നേതൃത്വത്തിൽ വാഴക്കുളം ടൗണിൽ പ്രതിഷേധ പ്രകടനവും പൊതുയോഗവും നടത്തി. ജില്ലാ ജോയിന്‍റ് സെക്രട്ടറി ഐസക് പോൾ ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് ജിബിൻ റാത്തപ്പിള്ളിൽ അധ്യക്ഷത വഹിച്ചു. കോതമംഗലം: ഛത്തീസ്ഗഡിൽ അറസ്റ്റ് ചെയ്ത് തുറങ്കിലടച്ച മലയാളി കന്യാസ്ത്രീകളെ കുറ്റ വിമുക്തരാക്കണമെന്ന് കോണ്‍ഗ്രസ്-എസ് കോതമംഗലം ബ്ലോക്ക് കമ്മിറ്റി ആവശ്യപ്പെട്ടു. ബ്ലോക്ക് പ്രസിഡന്‍റ് സാജൻ അന്പാട്ട് അധ്യക്ഷത വഹിച്ചു. ബെന്നി ഐക്കരക്കുടി, സുനി മാത്യു, ബിനു പുളിമൂട്ടിൽ എന്നിവർ പ്രസംഗിച്ചു. സിപിഐ കോതമംഗലം മണ്ഡലം കമ്മറ്റിയുടെ നേതൃത്വത്തിൽ പ്രതിഷേധ സായാഹ്ന ധർണ നടത്തി. സിപിഐ സംസ്ഥാന കൗണ്‍സിൽ അംഗം ഇ.കെ. ശിവൻ ഉദ്ഘാടനം ചെയ്തു. മണ്ഡലം സെക്രട്ടറി പി.റ്റി ബെന്നി അധ്യക്ഷത വഹിച്ചു. പോത്താനിക്കാട്: ഛത്തീസ്ഗഡില്‍ കന്യാസ്ത്രീമാരെ അകാരണമായി കല്‍ത്തുറുങ്കിലടച്ച ഭരണകൂട ഭീകരതക്കെതിരെ പോത്താനിക്കാട് സെന്‍റ് സേവ്യേഴ്സ് പള്ളി ഇടവക സമൂഹത്തിന്‍റെ നേതൃത്വത്തില്‍ കറുത്ത റിബണ്‍ ഉപയോഗിച്ച് വായ് മൂടിക്കെട്ടി പ്രകടനവും ടൗണില്‍ പ്രതിഷേധ സംഗമവും നടത്തി. വികാരി ഫാ. ജോര്‍ജ് കുരിശുംമൂട്ടില്‍ ഉദ്ഘാടനം ചെയ്തു. പള്ളി ട്രസ്റ്റി സെബാസ്റ്റ്യന്‍ പെരിങ്ങാരപ്പിള്ളില്‍ അധ്യക്ഷത വഹിച്ചു. പോത്താനിക്കാട് പഞ്ചായത്ത് പ്രസിഡന്‍റ് സജി കെ. വര്‍ഗീസ്, വൈസ് പ്രസിഡന്‍റ് ആശ ജിമ്മി, ഡിഎഫ്സി സംസ്ഥാന പ്രസിഡന്‍റ് ലോറന്‍സ് ഏബ്രഹാം, സെന്‍റ് തോമസ് ഹോസ്പിറ്റല്‍ അഡ്മിനിസ്ട്രേറ്റര്‍ സിസ്റ്റര്‍ ഹിമ , ബ്ലോക്ക് പഞ്ചായത്തംഗം സാലി ഐപ്പ്, പഞ്ചായത്തംഗം വിന്‍സന്‍ ഇല്ലിക്കല്‍, ട്രസ്റ്റി ബിനീഷ് നമ്പ്യാപറമ്പില്‍ എന്നിവര്‍ പ്രസംഗിച്ചു. കോണ്‍ഗ്രസ് പൈങ്ങോട്ടൂര്‍ മണ്ഡലം കമ്മിറ്റിയുടെ നേതൃത്വത്തില്‍ കടവൂരില്‍ നടത്തിയ പ്രതിഷേധജ്വാലയും, വിശദീകരണയോഗവും കടവൂര്‍ സെന്‍റ്ജോര്‍ജ് പള്ളി വികാരി ഫാ. മാത്യു വടക്കുംപാടം ഉദ്ഘാടനം ചെയ്തു. കോണ്‍ഗ്രസ് മണ്ഡലം പ്രസിഡന്‍റ് റോബിന്‍ ഏബ്രഹാം അധ്യക്ഷനായി. സിസ്റ്റര്‍ തെരേസ ജോര്‍ജ്, മാണി പിട്ടാപ്പിള്ളില്‍, ഷെജി ജേക്കബ്, ഇബ്രാഹിം ലൂഷാദ്, കെ.എം. ചാക്കോ, സിജോ ജോണ്‍, തുടങ്ങിയവർ പ്രസംഗിച്ചു. കോതമംഗലം രൂപത പ്രതിഷേധ ധർണയും ജപമാല റാലിയും ഇന്ന് തൊടുപുഴ: ഛത്തീസ്ഗഡിൽ എട്ടുദിവസമായി ജയിലിൽ കഴിയുന്ന രണ്ടു മലയാളി കന്യാസ്ത്രീകളുടെ ജയിൽമോചനം സാധ്യമാക്കുന്നതിനു കേന്ദ്ര സർക്കാർ അടിയന്തരമായി ഇടപെടണമെന്നാവശ്യപ്പെട്ട് കോതമംഗലം രൂപതയുടെ നേതൃത്വത്തിൽ ഇന്നു വൈകുന്നേരം അഞ്ചിന് തൊടുപുഴയിൽ പ്രതിഷേധ ധർണയും ജപമാല റാലിയും നടത്തും. മതപരിവർത്തനം, മനുഷ്യക്കടത്ത് എന്നീ വ്യാജ ആരോപണങ്ങൾ ഉന്നയിച്ചാണ് കന്യാസ്ത്രീകളെ അറസ്റ്റ് ചെയ്യുകയും ജയിലിൽ അടയ്ക്കുകയും ചെയ്തിരിക്കുന്നത്. രാജ്യത്ത് വിദ്യാഭ്യാസ മേഖലയിലും ആതുര ശുശ്രൂഷാരംഗത്തും ജീവകാരുണ്യ പ്രവർത്തനങ്ങളിലും അമൂല്യമായ സംഭാവനകളാണ് ക്രൈസ്തവ സഭയും മിഷനറിമാരും നടത്തുന്നത്. രൂപതയിലെ തൊടുപുഴ, മുതലക്കോടം, മാറിക, മൈലക്കൊന്പ്, കരിമണ്ണൂർ, മൂവാറ്റുപുഴ, വാഴക്കുളം, ആരക്കുഴ എന്നീ എട്ടു ഫൊറോനകളിലെ 64 ഇടവകകളിൽ നിന്നുള്ള വിശ്വാസികൾ, വൈദികർ, സമർപ്പിതർ, ജനപ്രതിനിധികൾ, സാമൂഹ്യ, സാംസ്കാരിക, വിദ്യാഭ്യാസ മേഖലയിലുള്ളവർ തുടങ്ങി നൂറുകണക്കിനാളുകൾ പ്രതിഷേധ റാലിയിൽ പങ്കെടുക്കും. തൊടുപുഴ ഗാന്ധിസ്ക്വയറിൽ നിന്നും ആരംഭിക്കുന്ന ജപമാല റാലി ടൗണ്‍ ഫൊറോന പള്ളിയങ്കണത്തിൽ സമാപിക്കും. തുടർന്നു നടക്കുന്ന സമാപന സമ്മേളനം കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ ഉദ്ഘാടനം ചെയ്യും. രൂപത വികാരി ജനറാൾമാർ, വിവിധ ഭക്തസംഘടനാ ഭാരവാഹികൾ തുടങ്ങിയവർ നേതൃത്വം നൽകുമെന്ന് ടൗണ്‍ പള്ളി വികാരിയും സംഘാടക സമിതി ചെയർമാനുമായ ഫാ. ജോസ് പൊതൂർ അറിയിച്ചു. വിവിധ ഇടവകകളിൽ നിന്നും എത്തുന്ന വാഹനങ്ങൾ ഗാന്ധിസ്ക്വയറിൽ നിർത്തി ആളുകളെ ഇറക്കിയ ശേഷം തെനംകുന്ന് ബൈപ്പാസ് റോഡിൽ പ്രവേശിച്ച് ഹൈസ്കൂൾ ഗ്രൗണ്ട്, തെനംകുന്ന് പള്ളി ഗ്രൗണ്ട് എന്നിവിടങ്ങളിൽ പാർക്ക് ചെയ്യണമെന്നും അറിയിച്ചിട്ടുണ്ട്.

റോഡുകളുടെ ശോചനീയാവസ്ഥ; അടിയന്തര യോഗം ചേര്‍ന്നു

കൊച്ചി: കൊച്ചി കോര്‍പറേഷന്‍ പരിധിയിലുള്ളതും വിവിധ വകുപ്പുകളുടെ അധീനിതയിലുള്ളതുമായ റോഡുകളുടെ ശോചനീയാവസ്ഥ പരിഹരിക്കുന്നതിന് ആവശ്യമായ നടപടികള്‍ സ്വീകരിക്കുന്നതിനായി ജില്ലാ കളക്ടര്‍ എന്‍.എസ്.കെ. ഉമേഷ്, കൊച്ചി മേയര്‍ എം. അനില്‍കുമാര്‍ എന്നിവരുടെ നേതൃത്വത്തില്‍ യോഗം ചേര്‍ന്നു. തമ്മനം-പുല്ലേപ്പടി റോഡ്, ഹൈക്കോര്‍ട്ട് റോഡ്, ഗോശ്രീ, ബിഒടി എന്നീ പാലങ്ങളിലെയും കുഴികള്‍ അടയ്ക്കുന്നതിനുള്ള നടപടികള്‍ അടിയന്തരമായി സ്വീകരിക്കുന്നതിന് കോര്‍പറേഷന്‍, പൊതുമരാമത്ത്, ജിഡ, ജിസിഡിഎ ഉദ്യോഗസ്ഥര്‍ക്ക് യോഗത്തില്‍ നിര്‍ദേശം നല്‍കി. ജല്‍ ജീവന്‍ പദ്ധതിയുടെ ഭാഗമായി കുഴിച്ച റോഡുകളുടെ അറ്റകുറ്റപ്പണികള്‍ വേഗത്തില്‍ പൂർത്തിയാക്കാനും ജല അഥോറിറ്റി ഉദ്യോഗസ്ഥരോട് യോഗം ആവശ്യപ്പെട്ടു. ജില്ലാ കളക്ടറുടെ ക്യാമ്പ് ഓഫീസില്‍ ചേര്‍ന്ന യോഗത്തില്‍ ജിഡ, ജിസിഡിഎ, എന്‍എച്ച്എഐ, മോട്ടോര്‍ വാഹന വകുപ്പ്, പോലീസ് എന്നിവരുടെ പ്രതിനിധികള്‍ പങ്കെടുത്തു.

അഭിഭാഷകര്‍ പ്രതിഷേധിച്ചു

കൊച്ചി: ഛത്തീസ്ഗഡില്‍ മലയാളി കന്യാസ്ത്രീമാരെ അറസ്റ്റ് ചെയ്തതതിനെതിരെ അഭിഭാഷകര്‍ എറണാകുളം ജില്ലാ കോടതിയില്‍ പ്രതിഷേധിച്ചു. ഓള്‍ ഇന്ത്യ ലോയേഴ്‌സ് യൂണിയന്‍ എറണാകുളം യൂണിറ്റ് കമ്മിറ്റി സംഘടിപ്പിച്ച പ്രതിഷേധ യോഗം ജില്ലാ പ്രസിഡന്‍റ് ടി.പി. രമേശ് ഉദ്ഘാടനം ചെയ്തു. ദിനേശ് മാത്യു മുരിക്കന്‍ അധ്യക്ഷത വഹിച്ചു. മനു റോയ്, മായാ കൃഷ്ണന്‍, ടി. സുജ എന്നിവര്‍ പ്രസംഗിച്ചു.

തെരുവുനായ ആക്രമണം: പരിക്കേറ്റ വനിതകൾ ചികിത്സതേടി

കളമശേരി: കങ്ങരപ്പടിയിൽ തെരുവുനായ് ആക്രണത്തിൽ പരിക്കേറ്റ രണ്ടു വനിതകൾ കളമശേരി മെഡിക്കൽ കോളജിൽ ചികിത്സതേടി. ഒരു വീട്ടമ്മയ്ക്കും വിദ്യാർഥിനിക്കുമാണ് കടിയേറ്റത്. ഇന്നലെ വൈകുന്നേരത്തോടെയായിരുന്നു സംഭവം. വീട്ടമ്മയെ മെഡിക്കൽ കോളജ് റോഡിൽ വച്ചും, വിദ്യാർഥിനിയെ അടുത്തുള്ള യുണിറ്റി ലൈനിൽ വച്ചുമാണ് ഇതേ നായ ആക്രമിച്ചത്. വീട്ടമ്മ രണ്ട് കുട്ടികളുമായി കടയിലേക്ക് പോയ സമയം പട്ടി കുട്ടികളെ പിന്തുടരുകയായിരുന്നു. ഇതുകണ്ട് വീട്ടമ്മ പട്ടിയെ ഓടിക്കാൻ ശ്രമിക്കവെ ഇവരെ ആക്രമിക്കുകയായിരുന്നു. ഇവർക്ക് തുടയിൽ ആഴത്തിലുള്ള മുറിവുണ്ട്. സ്കൂൾ വിട്ട സമയത്താണ് വിദ്യാർഥിനിയെ പട്ടി ഓടിച്ചിട്ട് കടിച്ചത്. ഇതുവഴി വന്ന മറ്റ് കുട്ടികളയും പട്ടി ഓടിച്ചെങ്കിലും അവർ ഓടി രക്ഷപ്പെട്ടു. പെൺകുട്ടിക്ക് കാലിലാണ് നായയുടെ കടിയേറ്റത്. മേഖലയിൽ അലഞ്ഞുതിരിയുന്ന തെരുവ് നായ്ക്കളുടെ എണ്ണം അധികമാണ്. വീടുകളിൽ രാത്രികാലങ്ങളിലെത്തി വസ്ത്രങ്ങൾ, ചെരിപ്പുകൾ തുടങ്ങിയവ കടിച്ചുകീറി നശിപ്പിക്കുന്നത് സ്ഥിര സംഭവമാണെന്നും നാട്ടുകാർ ചൂണ്ടിക്കാട്ടുന്നു. അടിയന്തര നടപടി വേണമെന്നാണ് നാട്ടുകാർ നഗരസഭയോട്ആവശ്യപ്പെടുന്നത്.

കൊച്ചി മെട്രോ വിമാനത്താവളത്തിലേക്ക് നീട്ടണം: ബെന്നി ബഹനാൻ എംപി

കൊച്ചി: കൊച്ചി മെട്രോ സർവീസ് നെടുന്പാശേരി വിമാനത്താവളത്തിലേക്കും അങ്കമാലിയിലേക്കും നീട്ടണമെന്ന് ബെന്നി ബഹാനൻ എംപി ലോക്സഭയിൽ ആവശ്യപ്പെട്ടു. ആലുവ മുതൽ അങ്കമാലിയിലൂടെ വിമാനത്താവളത്തിലെത്തുന്ന മെട്രോ പാത കൊച്ചി നഗരത്തിന്‍റെ ഗതാഗത ഭാരം കുറയ്ക്കും. രാജ്യാന്തര നിലവാരമുള്ള യാത്രാ സൗകര്യമാണ് ഇതിലൂടെ സാധ്യമാകുന്നത്. ഇതിലൂടെ വിമാനം, റെയിൽ, മെട്രോ, ഹൈവേ എന്നിവയുടെ സംയുക്ത കണക്ടിവിറ്റി കേരളത്തിലെ ഗതാഗതരംഗത്ത് വിപ്ലവം സൃഷ്ടിക്കും. കേന്ദ്രസർക്കാരും നഗരവികസന മന്ത്രാലയവും പദ്ധതിയുടെ സാധ്യതാ പഠനം ഉടൻ ആരംഭിക്കണമെന്നും പദ്ധതിക്ക് തുടക്കം കുറിക്കണമെന്നും എംപി ആവശ്യപ്പെട്ടു.

മുളവുകാട് മൂന്നു ബോട്ടുജെട്ടികളുടെ ഉദ്ഘാടനം നാളെ

വൈപ്പിൻ: മുളവുകാട് പഞ്ചായത്തിൽ നിർമാണം പൂർത്തിയായ മൂന്നു ബോട്ടുജെട്ടികളുടെ ഉദ്ഘാടനം നാളെ വൈകിട്ട് മൂന്നിന് മന്ത്രി റോഷി അഗസ്റ്റിൻ ഉദ്ഘാടനം ചെയ്യുമെന്ന് കെ.എൻ. ഉണ്ണിക്കൃഷ്ണൻ എംഎൽഎ അറിയിച്ചു. സിസിലി ബോട്ടുജെട്ടി, പോഞ്ഞിക്കര വടക്ക് ബോട്ടുജെട്ടി, ആശുപത്രി ബോട്ടുജെട്ടി എന്നിവയാണ് നാളെ നാടിനു സമർപ്പിക്കുക. ആകെ 123 കോടി രൂപയാണ് നിർമാണത്തിനായി ചെലവായത്. ആശുപത്രി ജെട്ടിക്കു സമീപം നടക്കുന്ന ചടങ്ങിൽ കെ. എൻ. ഉണ്ണിക്കൃഷ്ണൻ എംഎൽഎ അധ്യക്ഷനാകും.

ചെറായി ബീച്ച് വികസനത്തിന് 15ഓളം പദ്ധതികൾ അവതരിപ്പിച്ചു

ചെറായി: ചെറായി ബീച്ചിന്‍റെ സമഗ്രമായ വികസനത്തിന് ചെറായി ബീച്ച് ഹോട്ടൽസ് ആൻഡ് റിസോർട്സ് ഡവലപ്പ്മെന്‍റ് ഫോറം വാർഷിക യോഗത്തിൽ 15ഓളം പദ്ധതികൾ പ്രഖ്യാപിച്ചു. ഭക്ഷ്യ ടൂറിസം, ചെറായി അംബാസിഡർ പ്രോഗ്രാം, ‘വോയ്സ് ഓഫ് ചെറായി' ടൂറിസം മാസിക, ചെറായിയെ വൃത്തിയോടും ഹരിതാഭമായും സംരക്ഷിക്കുന്ന ചെറായി ഗ്രീൻ മിഷൻ തുടങ്ങിയവയാണ് പദ്ധതികൾ. കൂടാതെ സഞ്ചാരികൾക്കായി പ്രത്യേകം രൂപകല്പന ചെയ്ത 30 പുതിയ ടൂറിസം പാക്കേജുകളും അവതരിപ്പിച്ചു. യോഗത്തിൽ മുസരിസ് ഹെറിട്ടേജ് പ്രോജക്ട് എംഡി ഷാരോൺ, കേരള ട്രാവൽ മാർട്ട് പ്രസിഡന്‍റ് ജോസ് പ്രദീപ്, സെക്രട്ടറി സ്വാമിനാഥൻ എന്നിവർ മുഖ്യാതിഥികളായിരുന്നു. ബ്രൈറ്റ് മാത്യു-പ്രസിഡന്‍റ്, ഷാജു ആൻറണി - സെക്രട്ടറി, ജോൺ പോൾ-ട്രഷറർ എന്നിവരെ പുതിയ ഭാരവാഹികളെ തിരഞ്ഞെടുത്തു.

സ്റ്റുഡന്‍റ്സ് പോലീസ് പദ്ധതിയുടെ വാർഷികാഘോഷം നാളെ

ആലുവ: സ്റ്റുഡന്‍റ്സ് പോലീസ് കേഡറ്റ് പദ്ധതിയുടെ 15-ാം വാർഷികം എറണാകുളം റൂറൽ ജില്ലയിൽ വിപുലമായി നടത്തും. നാളെ രാവിലെ 8ന് ആലുവ കീഴ്മാട് മോഡൽ റസിഡൻഷൽ സ്കൂളിൽ മന്ത്രി പി. രാജീവ് ഉദ്ഘാടനം ചെയ്യും. പോലീസിലെയും വിവിധ വകുപ്പുകളിലെയും മേലധികാരികളും ചടങ്ങിൽ സംബന്ധിക്കും. നിലവിൽ 52 സ്കൂളുകളിൽ പദ്ധതി വിജയകരമായി നടന്നുവരുന്നുണ്ട്. ഓരോ സ്കൂളിലും രണ്ട് കമ്യൂണിറ്റി പോലീസ് ഓഫീസർമാരും, പരേഡ് പരിശീലിപ്പിക്കുന്ന രണ്ടുപേരും ഉൾപ്പെടെ 104 പേരാണ് ഉള്ളത്. അഡീഷണൽ ജില്ലാ പോലീസ് സൂപ്രണ്ടാണ് പദ്ധതിയുടെ ജില്ലാ നോഡൽ ഓഫീസർ.

കുടിവെള്ള പൈപ്പ് മാറ്റി സ്ഥാപിക്കാൻ 5.2 ലക്ഷം അനുവദിച്ചു

വൈപ്പിൻ: ഞാറക്കൽ പോലീസ് സ്റ്റേഷനു മുൻവശം മുതൽ അപ്പങ്ങാട് തോടുവരെയുള്ള വെള്ളക്കെട്ടിന് പരിഹാരം കാണാൻ ഈ ഭാഗത്തെ കുടിവെള്ള പൈപ്പുകൾ മാറ്റി സ്ഥാപിക്കും. ഇതിനാന്‍റെ ഭാഗമായി എംഎൽഎയുടെ പ്രത്യേക വികസന ഫണ്ടിൽ നിന്നും 5.20 ലക്ഷം രൂപ അനുവദിച്ചതായി കെ.എൻ. ഉണ്ണികൃഷ്ണൻ എംഎൽഎ അറിയിച്ചു.

തൃപ്പൂണിത്തുറയിൽ കൂറ്റൻ മരത്തിന്‍റെ ശിഖരങ്ങൾ മുറിച്ചുതുടങ്ങി

തൃപ്പൂണിത്തുറ: തൃപ്പൂണിത്തുറ മിനി സിവിൽ സ്റ്റേഷൻ വളപ്പിലെ കൂറ്റൻ മരത്തിന്‍റെ റോഡിലേക്ക് പതിക്കാവുന്ന രീതിയിൽ നിന്നിരുന്ന ശിഖരങ്ങൾ മുറിച്ചുനീക്കിത്തുടങ്ങി. ഇവിടെയുള്ള വ്യാപാരികളും യാത്രക്കാരും മരത്തിന്‍റെ ശിഖരങ്ങളെ ഭീതിയോടെയാണ് കണ്ടിരുന്നത്. മിനി സിവിൽ സ്റ്റേഷനിലേക്കും തൊട്ടടുത്ത വളപ്പിലുള്ള ഗേൾസ് ഹയർ സെക്കൻഡറി സ്കൂളിലേക്കുമുള്ള വിദ്യാർഥികളുമുൾപ്പെടെ ദിനംപ്രതി ഒട്ടേറെ യാത്രക്കാരാണ് ഇതിനടിയിലൂടെ കടന്നുപോയിരുന്നത്. ഇന്നലെ രാവിലെ മുതലാണ് മരം മുറിക്കുവാൻ തുടങ്ങിയത്. മരത്തിന്‍റെ അപകടാവസ്ഥയെക്കുറിച്ച് ദീപിക നിരവധി വാർത്തകൾ പ്രസിദ്ധീകരിച്ചിരുന്നു. മരം മുറിക്കുന്നതിന്‍റെ ഭാഗമായി ഇവിടെ ഗതാഗതത്തിനും വൈദ്യുതി വിതരണത്തിലും നിയന്ത്രണങ്ങളുണ്ട്. മരം മുറിക്കൽ ഇന്നും തുടരും. റോഡിന് മുകളിലുള്ള ശിഖരങ്ങൾ കഴിഞ്ഞ ദിവസം മുറിച്ചു നീക്കിയതിനാൽ ഇന്ന് കാര്യമായ ഗതാഗത നിയന്ത്രണമുണ്ടാകില്ല.

പ്രത്യാശ മാതാവിന്‍റെ പള്ളി ചരിത്ര സ്മാരകമാകും

വൈപ്പിൻ: പോർച്ചുഗീസ് ചരിത്ര സ്മരണകൾ ഉറങ്ങുന്ന ഫോർട്ട് വൈപ്പിനിലെ പ്രത്യാശ മാതാവിന്‍റെ പള്ളി ഉടൻ ചരിത്രസ്മാരകമായി സർക്കാർ പ്രഖ്യാപിക്കുമെന്ന് കെ.എൻ. ഉണ്ണികൃഷ്ണൻ എംഎൽഎ അറിയിച്ചു. 1605ൽ പോർച്ചുഗീസുകാർ സ്ഥാപിച്ച പള്ളിയാണിത്. പള്ളിയിലെ പല ആരാധന വസ്തുക്കളും പോർച്ചുഗീസ് കാലത്തുള്ളവയാണ്. ഇവയിൽ സുപ്രധാനമായ ഒന്നാണ് ‘എച്ചേ ഹോമോ’ എന്ന് അറിയപ്പെടുന്ന പീഡിതനായ ക്രിസ്തുവിന്‍റെ ശില്പം. പോർച്ചുഗീസ് ഭാഷാ ബന്ധമുള്ള ‘പോർച്ചുഗീസ് ക്രിയോൾ' പാട്ടുകളായും പ്രാർഥനകളായും നിലനിൽക്കുന്ന പൈതൃക സമൂഹം ഫോർട്ടു വൈപ്പിനിൽ ഇപ്പോഴുമുണ്ട്. ഇതെല്ലാം പരിഗണിച്ച് പള്ളിയെ ചരിത്രസ്മാരകമാക്കണമെന്നാവശ്യപ്പെട്ട് പുരാവസ്തു വകുപ്പിന് നിവേദനം നൽകിയിരുന്നതായി എംഎൽഎ അറിയിച്ചു.

പറവൂർ, വൈപ്പിൻ മേഖലയിൽ ഇന്ന് സ്വകാര്യ ബസുകൾ പണിമുടക്കും

പറവൂർ: പറവൂർ, വൈപ്പിൻ മേഖലയിലെ സ്വകാര്യ ബസുകൾ ഇന്ന് സൂചനാ പണിമുടക്ക് നടത്തും. തകർന്ന ദേശീയപാത നന്നാക്കാത്തതിൽ പ്രതിഷേധിച്ചും, ഗോശ്രീ മൂന്നാം പാലം തുറന്നുകിട്ടണമെന്ന് ആവശ്യപ്പെട്ടുമാണ് സമരം. പറവൂരിൽ നിന്നു വൈപ്പിൻ, എറണാകുളം, കൊടുങ്ങല്ലൂർ, വരാപ്പുഴ, ഇടപ്പള്ളി മേഖലകളിലേക്കുള്ള സ്വകാര്യ ബസ് സർവീസുകൾ ഉണ്ടാകില്ല. ദേശീയപാത നന്നാക്കാൻ നടപടിയുണ്ടായില്ലെങ്കിൽ ഏഴ് മുതൽ മൂത്തകുന്നം - പറവൂർ - ഇടപ്പള്ളി റൂട്ടിൽ അനിശ്ചിതകാല സമരം ആരംഭിക്കാനാണ് തീരുമാനം. ഗോശ്രീ മൂന്നാം പാലം ഉടൻ തുറന്നില്ലെങ്കിൽ ഹൈക്കോടതിയിലേക്കുള്ള ബസുകൾ വൈപ്പിൻ ജെട്ടിയിൽ സർവീസ് അവസാനിപ്പിക്കുമെന്നു സമരസമിതി നേതാവ് പി.കെ. ലെനിൻ പറഞ്ഞു. ദേശീയപാതയുടെ ദുരവസ്ഥ പരിഹരിക്കാത്തതിൽ പ്രതിഷേധിച്ച് കഴിഞ്ഞ 16ന് പറവൂർ-കൊടുങ്ങല്ലൂർ റൂട്ടിലെ സ്വകാര്യ ബസുകൾ മിന്നൽ പണിമുടക്ക് നടത്തിയിരുന്നു. ഇതിനിടെ റോഡ് തീർത്തും ശോചനീയാവസ്ഥയിലായിരുന്ന മുനമ്പം കവലയിൽ കുഴികളടച്ച് ടാറിംഗ് നടത്തിയത് യാത്രക്കാർക്ക് ആശ്വാസമായി.

കന്യാസ്ത്രീകൾക്കായി കൈകോർത്ത് ആ‍യിരങ്ങൾ

ജനമനസുണർത്തി എറണാകുളം-അങ്കമാലി അതിരൂപതയുടെ പ്രതിഷേധാഗ്നി അങ്കമാലി: ഛത്തീസ്ഗഡില്‍ അന്യായമായി അറസ്റ്റിലായി ജയിലിലടയ്ക്കപ്പെട്ട മലയാളി കന്യാസ്ത്രീമാരായ സിസ്റ്റര്‍ പ്രീതി, സിസ്റ്റര്‍ വന്ദന എന്നിവരോട് ഐക്യദാർഢ്യമറിയിച്ചും,രാജ്യത്തു ക്രൈസ്തവ ന്യൂനപക്ഷങ്ങൾക്കെതിരെ നടക്കുന്ന അതിക്രമങ്ങൾക്കെതിരെയും ജനമനസുണർത്തി എറണാകുളം-അങ്കമാലി അതിരൂപതയുടെ പ്രതിഷേധാഗ്നിയിൽ ആയിരങ്ങൾ അണിനിരന്നു. അങ്കമാലി അടുത്ത കാലത്തൊന്നും കാണാത്ത വൻജനാവലിയാണ് പ്രതിഷേധ റാലിയിലും സമ്മേളനത്തിലും പങ്കെടുത്തത്. ഇന്നലെ വൈകുന്നേരം അഞ്ചിന് അങ്കമാലി കിഴക്കേ പള്ളിയില്‍ നിന്ന് ആരംഭിച്ച റാലി വികാരി ജനറാൾ റവ. ഡോ. ജോസ് പുതിയേ‌ടത്ത് ഫ്ളാഗ് ഓഫ് ചെയ്തു. കിഴക്കേ കപ്പേള വഴി ടൗണിലൂടെ അങ്കമാലി സെന്റ് ജോസഫ് സ്‌കൂള്‍ മൈതാനത്ത് റാലി സമാപിച്ചു. അതിരൂപതയിലെ വൈദികരും സമർപ്പിതരും ഇടവകകളിൽ നിന്നു വിശ്വാസികളും റാലിയിൽ മുദ്രാവാക്യങ്ങളുമായി അണിചേർന്നു. അങ്കമാലി, കൊരട്ടി, കറുകുറ്റി, മൂഴിക്കുളം, മൂക്കന്നൂര്‍, മഞ്ഞപ്ര, വല്ലം, കാഞ്ഞൂര്‍ ഫൊറോനകളിലെ വിശ്വാസികളാണ് പ്രതിഷേധത്തില്‍ പങ്കെടുത്തത്. സെന്‍റ് ജോസഫ് ഹൈസ്കൂൾ ഗ്രൗണ്ടിൽ നടന്ന പൊതുസമ്മേളനത്തിൽ അങ്കമാലി ബസിലിക്ക റെക്ടർ ഫാ.ലൂക്കോസ് കുന്നത്തൂര്‍ അധ്യക്ഷത വഹിച്ചു. അതിരൂപത വികാരി ജനറാൾ റവ.ഡോ. ജിമ്മി പൂച്ചക്കാട്ട്, റവ. ഡോ. കുര്യാക്കോസ് മുണ്ടാടൻ, സിഎംസി പ്രൊവിൻഷ്യൽ കൗൺസിലർ സിസ്റ്റർ അഡ്വ. മെറിൻ, എഎസ്എംഐ പ്രൊവിൻഷ്യൽ കൗൺസിലർ സിസ്റ്റർ ധന്യ ഫ്രാൻസിസ്, സിസ്റ്റർ പ്രീതി മേരിയുടെ കുടുംബാംഗം മഞ്ജു ബൈജു തുടങ്ങിയവർ പ്രസംഗിച്ചു. ഐക്യദാര്‍ഢ്യ പ്രതിജ്ഞ ചൊല്ലി നെടുമ്പാശേരി: കരിപ്പാശേരി സെന്‍റ് അഗസ്റ്റിൻസ് പള്ളിയുടെ നേതൃത്വത്തില്‍ പ്രതിഷേധ റാലിയും ഐക്യദാര്‍ഢ്യ പ്രതിജ്ഞയും സംഘടിപ്പിച്ചു. വികാരി ഫാ. ജോർജ് മാണിക്കത്താൻ റാലി ഫ്ലാഗ് ഓഫ് ചെയ്തു. വട്ടപ്പറമ്പ് കവലയിൽ എത്തിച്ചേർന്ന റാലിയിൽ പള്ളി ട്രസ്റ്റിമാരായ കെ.എ. ജോസ്, ജോൺസൺ കടേപ്പറമ്പിൽ, വൈസ് ചെയർമാൻ നൈജോ ഏബ്രഹാം, മദർ സുപ്പീരിയർ മരിയ ജോസഫ്, എന്നിവർ പ്രസംഗിച്ചു. പ്രാർഥനാ ജ്വാല തെളിച്ചു പറവൂർ: ഗോതുരുത്ത് സെന്‍റ് സെബാസ്റ്റ്യൻസ് പള്ളി അങ്കണത്തിൽ പ്രാർഥന ജ്വാല തെളിച്ചു. ഗോതുരുത്ത് ഫൊറോന വികാരി ഫാ. ജാക്സൺ വലിയപറമ്പിൽ ഉദ്ഘാടനം ചെയ്തു. സഹവികാരി ഫാ. നിവിൻ കളരിത്തറ, സെന്‍റ് ജോസഫ്സ് കോൺവന്‍റ് സുപ്പീരിയർ സിസ്റ്റർ വിനീത, പാരീഷ് കൗൺസിൽ സെക്രട്ടറി സേവി വലിയമരത്തിങ്കൽ, ജോർജ് വർഗീസ്, തോമസ് കളത്തിൽ എന്നിവർ പ്രസംഗിച്ചു. പ്രതിഷേധ സദസും റാലിയും അങ്കമാലി: ഛത്തീസ്ഗഡിൽ മലയാളി കന്യാസ്ത്രീകളെ അറസ്റ്റ് ചെയ്ത സർക്കാർ നടപടിക്കെതിരെ കെസിവൈഎം എറണാകുളം - അങ്കമാലി അതിരൂപത സമിതിയുടെ നേതൃത്വത്തിൽ പ്രതിഷേധ സായാഹ്ന സദസും റാലിയും നടത്തി. അങ്കമാലി കരയാംപറമ്പ് സിഗ്നൽ ജംഗ്ഷനിൽ നടന്ന പ്രതിഷേധ സദസ് കെസിവൈഎം അതിരൂപത അസി. ഡയറക്ടർ ഫാ. എബിൻ ചിറക്കൽ ഉദ്ഘാടനം ചെയ്തു. കെസിവൈഎം അതിരൂപത വൈസ് പ്രസിഡന്‍റ് മെൽവിൻ വിൽ‌സൺ അധ്യക്ഷത വഹിച്ചു. മുൻ പ്രസിഡന്‍റ് സൂരജ് ജോൺസ് പൗലോസ് മുഖ്യപ്രഭാഷണം നടത്തി. കറുകുറ്റി ഫൊറോന വികാരി ഫാ സേവ്യർ ആവള്ളിൽ, കറുകുറ്റി പഞ്ചായത്തംഗം റോയി ഗോപുരത്തിങ്കൽ, കെസിവൈഎം അതിരൂപത മുൻ പ്രസിഡന്‍റ് ജിസ്‌മോൻ ജോൺ, ജനറൽ സെക്രട്ടറി ജോസഫ് സാജു, കറുകുറ്റി ഫൊറോന പ്രസിഡന്‍റ് ഡിനോ പോൾ എന്നിവർ പ്രസംഗിച്ചു. പ്രതിഷേധ ജ്വാല തീർത്തു ഫോർട്ടുകൊച്ചി: കുമ്പളങ്ങി സേക്രഡ് ഹാർട്ട് ഇടവകയുടെ നേതൃത്വത്തിൽ പ്രതിഷേധ ജ്വാല റാലി നടത്തി. വികാരി ഫാ. ആന്‍റണി അഞ്ചുകണ്ടത്തിൽ, പാസ്റ്റർ കൗൺസിൽ സെക്രട്ടറി ജോണി പുളിക്കിൽ, ഇടവക കൺവീനർ ടെനി തോമസ്, പീറ്റർ പുളിക്കിൽ, ജോർജ് മട്ടമ്മൽ, ശോഭാ ജോസഫ് കട്ടിക്കാട്ട് എന്നിവർ നേതൃത്വം നൽകി. എംഎൽഎയുടെ ഏകദിന ഉപവാസം ഇന്ന് ആലുവ: ഛത്തീസ്ഗഡിൽ കന്യാസ്ത്രീകളുടെ അറസ്റ്റിൽ പ്രതിഷേധിച്ചും ജയിൽ വാസമനുഭവിക്കുന്നവർക്ക് ഐക്യദാർഢ്യം പ്രഖാപിച്ചും അൻവർ സാദത്ത് എംഎൽഎ ഇന്ന് രാവിലെ 9 മുതൽ വൈകീട്ട് 5 വരെ ആലുവ എംജി ടൗൺ ഹാളിനു സമീപമുള്ള ഗാന്ധി സ്‌ക്വയറിൽ ഉപവാസം അനുഷ്ടിക്കും. തിരികത്തിച്ച് പ്രതിഷേധിച്ചു കാലടി: ചുള്ളി സെന്‍റ് ജോർജ് പള്ളിയിൽ നടന്ന തിരികത്തിച്ച് പ്രതിഷേധം വികാരി ഫാ. ഷനു മൂഞ്ഞേലി ഉദ്ഘാടനം ചെയ്തു. കൈക്കാരൻമാരായ രാജു മറ്റത്തി, മനോജ് കാഞ്ഞൂക്കാരൻ, വൈസ് ചെയർമാൻ രാജു ചിറമേൽ, മദർ സുപ്പീരിയർ അഞ്ജന എന്നിവർ നേതൃത്വം നൽകി. പ്രത്യേക പ്രാർത്ഥനയും സംഘടിപ്പിച്ചു.

എംഡിഎംഎയുമായി മൂന്നു പേര്‍ പിടിയില്‍

കൊച്ചി: നഗരത്തില്‍ നടത്തിയ പരിശോധനയില്‍ എംഡിഎംഎയുമായി മൂന്നു പേരെ പോലീസ് പിടികൂടി. പള്ളുരുത്തി ചിറക്കല്‍ പാലത്തിന് സമീപം ആഷ്‌നാ മന്‍സിലില്‍ പി.എം. ഷമീര്‍ (49), കലൂര്‍ ചീനിപ്പറമ്പില്‍ വീട്ടില്‍ സോണി ജിന്നസ് (24), കലൂര്‍ വാതിയാര്‍പറമ്പില്‍ വീട്ടില്‍ വി.ബി. സനല്‍ എന്നിവരെയാണ് കൊച്ചി സിറ്റി ഡാന്‍സാഫ് ടീം പിടികൂടിയത്. ഷമീറിനെ തൃക്കാക്കര വാഴക്കാല ഭാഗത്ത് നിന്നാണ് പിടികൂടിയത്. ഇയാളുടെ പക്കല്‍ നിന്ന് 22.71 ഗ്രാം എംഡിഎംഎയും 92,500 രൂപയും പോലീസ് കണ്ടെടുത്തു. ഇയാള്‍ക്കെതിരെ വേറെ മൂന്നു മയക്കുമരുന്ന് കേസുകള്‍ നിലവിലുണ്ട്. എറണാകുളം കെഎസ്ആര്‍ടിസി ബ്‌സ് സ്റ്റാൻഡിന് സമീപത്തെ ലോഡ്ജില്‍ നിന്നാണ് സോണിയെയും സനലിനെയും കസ്റ്റഡിയിലെടുത്തത്. ഇവരുടെ പക്കല്‍ നിന്ന് 2.57 ഗ്രാം എംഡിഎംഎ പിടിച്ചെടുത്തു.

മാലാ പാര്‍വതിയുടെ ചിത്രങ്ങള്‍ മോര്‍ഫ് ചെയ്ത് പ്രചരിപ്പിച്ചെന്ന്

കൊച്ചി: നടി മാലാ പാര്‍വതിയുടെ ചിത്രങ്ങള്‍ മോര്‍ഫ് ചെയ്ത് പ്രചരിപ്പിച്ചെന്ന പരാതിയില്‍ സൈബര്‍ പോലീസ് കേസെടുത്തു. മനീഷ് എം എന്ന് പേരുള്ള ഫേസ്ബുക്ക് അക്കൗണ്ട് വഴിയാണ് ചിത്രങ്ങള്‍ മോര്‍ഫ് ചെയ്ത് പ്രചരിപ്പിച്ചത്. നടിയുടെ പരാതിയില്‍ കൊച്ചി സൈബര്‍ പോലീസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു. മാലാ പാര്‍വതിയുടെ പേരില്‍ പതിനായിരത്തിലധികം അംഗങ്ങളുള്ള ഫേസ്ബുക്ക് പേജിലാണ് മോര്‍ഫ് ചെയ്ത ചിത്രങ്ങള്‍ പ്രചരിപ്പിച്ചത്. നടിയുടെ ഫേസ്ബുക്ക് പേജ് പിന്തുടര്‍ന്ന ശേഷം ഇവര്‍ സമൂഹമാധ്യമങ്ങളില്‍ പങ്കുവയ്ക്കുന്ന ചിത്രങ്ങള്‍ കൈവശപ്പെടുത്തിയാണ് മോര്‍ഫ് ചെയ്ത് അശ്ലീലകരമായി പ്രചരിപ്പിച്ചിരുന്നത്. ഐടി ആക്ട് പ്രകാരവും സ്ത്രീത്വത്തെ അപമാനിച്ചതിന്‍റെ പേരിലുമാണ് കേസ് രജിസ്റ്റര്‍ ചെയ്തിട്ടുള്ളത്. ഫേസ്ബുക്ക് പേജിന്‍റെ അഡ്മിനെ കണ്ടെത്തുന്നതടക്കമുള്ള നടപടികള്‍ പോലീസ് ആരംഭിച്ചു. ശ്രദ്ധയില്‍പ്പെടുത്തിയത് മാനേജര്‍: മാലാ പാര്‍വതി മോര്‍ഫ് ചെയ്ത തന്‍റെ ചിത്രങ്ങൾ പ്രചരിക്കുന്ന സംഭവം ശ്രദ്ധിയില്‍പ്പെടുത്തിയത് മാനേജരാണ്. ഉടന്‍ തന്നെ സൈബര്‍ പോലീസില്‍ പരാതി നല്‍കുകയായിരുന്നു. ചിത്രങ്ങള്‍ പ്രചരിപ്പിച്ചിരുന്ന ഗ്രൂപ്പില്‍ അംഗങ്ങളായവര്‍ക്ക് മോര്‍ഫ് ചെയ്ത ചിത്രങ്ങള്‍ മെസജര്‍ വഴി അയച്ചുകൊടുക്കുന്നതായും ശ്രദ്ധയില്‍പ്പെട്ടിട്ടുണ്ടെന്നും മാലാ പാര്‍വതി പറഞ്ഞു.

കാർബോറാണ്ടം സ്ഫോടനം: നഷ്ടപരിഹാര ചർച്ച അഞ്ചിന്

കളമശേരി: 2024 ജൂണിൽ കളമശേരി വട്ടേക്കുന്നം കാർബോറാണ്ടം യൂണിവേഴ്സൽ കമ്പനിയിലുണ്ടായ സ്ഫോടനവുമായി ബന്ധപ്പെട്ട് വ്യവസായ മന്ത്രി പി. രാജീവിന്‍റെ അധ്യക്ഷതയിൽ അഞ്ചിന് നഷ്ടപരിഹാര ചർച്ച നടക്കും. പത്തടിപ്പാടം പിഡബ്ല്യുഡി റസ്റ്റ് ഹൗസിൽ രാവിലെ 9.30ന് നടക്കുന്ന യോഗത്തിൽ ജില്ലാ കളക്ടർ, നഗരസഭാ അധ്യക്ഷ, സെക്രട്ടറി, പൊതുമരാമത്ത് വിഭാഗം എക്സിക്യൂട്ടീവ് എൻജിനീയർ, റവന്യു ഉദ്യോഗസ്ഥർ, കമ്പനി പ്രതിനിധികൾ തുടങ്ങിയവർ പങ്കെടുക്കും. സ്ഫോടനത്തിൽ നിരവധി വീടുകൾക്ക് നാശനഷ്ടമുണ്ടായിരുന്നു.

റോണി മാത്യുവിനെതിരെ നടപടി വേണമെന്നു കേരള കോൺ-എം ജില്ലാ കമ്മിറ്റി

കൊച്ചി: കേരള കോൺഗ്രസ്-എം സംസ്ഥാന സെക്രട്ടറി ബാബു ജോസഫിനെതിരെ തെറ്റായ വാർത്തകൾ പ്രചരിപ്പിക്കുകയും പാർട്ടി അച്ചടക്കലംഘനം നടത്തുകയും ചെയ്ത സംസ്ഥാന സ്റ്റിയറിംഗ് കമ്മിറ്റി അംഗം റോണി മാത്യുവിനെതിരെ നടപടി വേണമെന്നു ജില്ലാ നേതൃയോഗത്തിൽ ആവശ്യം. റോണിയെ ഒരു വർഷത്തേക്ക് പാർട്ടിയിൽ നിന്നു സസ്പെൻഡ് ചെയ്യണമെന്നും അദ്ദേഹത്തിനു നൽകിയിട്ടുള്ള എല്ലാ സ്ഥാനങ്ങളിൽ നിന്നും നീക്കം ചെയ്യണമെന്നും യോഗത്തിൽ പങ്കെടുത്തവർ ഐകകണ്ഠ്യേന ആവശ്യപ്പെട്ടതായി ജില്ലാ പ്രസിഡന്‍റ് ടോമി ജോസഫ് പറഞ്ഞു. യോഗത്തിന്‍റെ ആവശ്യം സംസ്ഥാന കമ്മിറ്റിക്ക് സമർപ്പിച്ചതായും അദ്ദേഹം അറിയിച്ചു. ബാബു ജോസഫിനെതിരെ ജില്ലയിൽ ഒരു വിഭാഗം റോണി മാത്യുവിന്‍റെ നേതൃത്വത്തിൽ പ്രവർത്തിക്കുന്നുണ്ടെന്ന് ആക്ഷേപമുണ്ടായിരുന്നു. പെരുന്പാവൂരിൽ കഴിഞ്ഞ തവണ പാർട്ടിയുടെ സ്ഥാനാർഥിയായി നിയമസഭയിലേക്കു മത്സരിച്ച ബാബുവിനോടു, സിപിഎമ്മിന് കടുത്ത എതിർപ്പാണെന്നും അടുത്ത തെരഞ്ഞെടുപ്പിൽ വിജയ സാധ്യതയില്ലെന്നും റോണി മാത്യുവിനെ ഈ സീറ്റിൽ മത്സരിപ്പിക്കണമെന്നുമുള്ള പ്രചാരണം ചില വാർത്താചാനലുകളിലും വന്നു. ഇതിനെല്ലാം പിന്നിൽ പ്രവർത്തിച്ചത് റോണി മാത്യുവാണെന്നു കളമശേരിയിൽ ചേർന്ന ജില്ലാ സ്റ്റിയറിംഗ് കമ്മിറ്റി യോഗം വിലയിരുത്തി. ജില്ലാ പ്രസിഡന്‍റ് ടോമി ജോസഫിന്‍റെ അധ്യക്ഷതയിൽ കൂടിയ യോഗത്തിൽ, സംസ്ഥാന സെക്രട്ടറി ബാബു ജോസഫ്, ടി.എ.ഡേവിസ്, വി.വി.ജോഷി, വർഗീസ് ജോർജ് പൈനാടത്ത്, ജോയി നടുക്കുടി, വിൽസൺ പൗലോസ്, കെ.പി. ബാബു, ജയൻ കല്ലുകുളങ്ങര, ജോർജ് കോട്ടൂർ, സജിമോൻ കോട്ടയ്ക്കൽ തുടങ്ങിയവർ പ്രസംഗിച്ചു. അതേസമയം തന്‍റെ പേരിൽ ഉയർന്ന ആരോപണത്തിൽ പാർട്ടി വിശദീകരണം ആവശ്യപ്പെട്ടിട്ടില്ലെന്നു റോണി മാത്യു പറഞ്ഞു. തനിക്കെതിരെ അച്ചടക്ക നടപടിയെടുത്തു എന്നതിന് യാതൊരു അടിസ്ഥാനവുമില്ലെന്നും അദ്ദേഹം പറഞ്ഞു.

ബയോമൈനിംഗ്: മേയര്‍ക്ക് കത്ത് നല്‍കി യുഡിഎഫ്

കൊച്ചി: ബ്രഹ്മപുരം ബയോ മൈനിംഗ് കരാര്‍ കമ്പനിക്ക് കാലാവധി നീട്ടി നല്‍കുമ്പോള്‍ ഉയര്‍ന്ന തുകയില്‍ ആനുപാതികമായ ഇളവ് വരുത്തണമെന്ന് ആവശ്യപ്പെട്ട് യുഡിഎഫ് കൗണ്‍സില്‍മാര്‍ മേയര്‍ക്കും സെക്രട്ടറിക്കും കത്ത് നല്‍കി. പ്രതിപക്ഷം ഉള്‍പ്പെടെ ഉന്നയിച്ച ആശങ്കകള്‍ പരിഗണിക്കാതെ കരാര്‍ നല്‍കിയതിനാലാണ് 9.48 കോടിയുടെ അധികച്ചെലവുണ്ടായത്. 16 മാസം എന്നത് കരാര്‍ നല്‍കുന്ന ഘട്ടത്തില്‍ തന്നെ 28 മാസമായി നിശ്ചയിച്ചിരുന്നുവെങ്കില്‍ ഇപ്പോള്‍ കാലാവധി നീട്ടി നല്‍കുമ്പോള്‍ ഉണ്ടാകുന്ന സാമ്പത്തിക നഷ്ടം ഒഴിവാക്കാനാകുമായിരുന്നുവെന്നും പ്രതിപക്ഷ നേതാവ് അഡ്വ. ആന്‍റണി കുരീത്തറ കത്തില്‍ പറയുന്നു.

വയോധിക മരിച്ചത് ശ്വാസം മുട്ടി; മൂന്ന് ഇതരസംസ്ഥാന തൊഴിലാളികൾ നിരീക്ഷണത്തിൽ

പെരുമ്പാവൂർ: വയോധികയെ തോട്ടത്തിൽ മരിച്ചനിലയിൽ കണ്ടെത്തിയ കേസിൽ നാൽപ്പതോളം പേരെ പോലീസ് ചോദ്യം ചെയ്തു. തോട്ടുവ മനയ്ക്കപ്പടി വീട്ടിൽ ഔസേഫിന്‍റെ ഭാര്യ അന്നത്തി(85)നെ കഴിഞ്ഞ ചൊവ്വാഴ്ച രാത്രിയോടെയാണ് സമീപത്തെ തോട്ടത്തിൽ മരിച്ചനിലയിൽ കണ്ടെത്തിയത്. തലയ്ക്ക് പരിക്കേറ്റ് രക്തം വാർന്ന നിലയിൽ കണ്ടെത്തിയ മൃതദേഹത്തിൽ മുഖത്തും കൈയിലും മുറിവുകളുമുണ്ടായിരുന്നു. അന്നം ശ്വാസം മുട്ടിയാണ് മരിച്ചതെന്നായിരുന്നു പോസ്റ്റുമോർട്ടം റിപ്പോർട്ട്. സംഭവത്തിൽ ഇതരസംസ്ഥാന തൊഴിലാളികൾ ഉൾപ്പെടെയുള്ള നാൽപ്പതോളം പേരെ അന്വേഷണ സംഘം ചോദ്യം ചെയ്യുകയും മൊഴി രേഖപ്പെടുത്തുകയും. സമീപത്തെ കോഴി ഫാമിലെ മൂന്നു ഇതരസംസ്ഥാന തൊഴിലാളികൾ പോലീസിന്‍റെ നിരീക്ഷണത്തിലാണ്. ചൊവ്വാഴ്ച്ച ഉച്ചകഴിഞ്ഞ് രണ്ടോടെയാണ് മരണം സംഭവിച്ചതെന്നാണ് പോസ്റ്റുമോർട്ടം റിപ്പോർട്ട്. സംഭവസ്ഥലത്ത് മൽപ്പിടുത്തം നടന്നതിന്‍റെ ലക്ഷണങ്ങളും ഉണ്ടായിരുന്നു. അന്നത്തിന്‍റെ രണ്ട് വളകളും കമ്മിലിന്‍റെ അടിയൊഴികെയുള്ള ഭാഗങ്ങളും കാണാതായിട്ടുണ്ട്. തോട്ടത്തിന്‍റെ മേൽനോട്ട ചുമതല അന്നത്തിന് ആയിരുന്നു. തോട്ടം ഉടമ മദ്രാസിലാണ്. ഇന്നലെ റൂറൽ എസ്പിയുടെ നേതൃത്വത്തിലുള്ള പോലീസ് സംഘം സ്ഥലം സന്ദർശിച്ച് സ്ഥിതിഗതികൾ വിലയിരുത്തി. കോടനാട് സിഐ, കോട്ടപ്പടി സിഐ ഉൾപ്പെടുന്ന പ്രത്യേക സംഘത്തിനാണ് അന്വേഷണ ചുമതല.

എച്ച 1 എന്‍ 1 : കുസാറ്റ് അടച്ചു

കളമശേരി: വിദ്യാര്‍ഥികള്‍ക്ക് എച്ച് 1 എന്‍ 1 ബാധിച്ചതിനെ തുടര്‍ന്ന് കൊച്ചി ശാസ്ത്ര സാങ്കേതിക സര്‍വകലാശാല (കുസാറ്റ്) അടച്ചു. ഇന്ന് മുതല്‍ അഞ്ചു വരെ ഓണ്‍ലൈനായി ക്ലാസുകള്‍ നടക്കും. വിദ്യാര്‍ഥികളില്‍ ചിലര്‍ക്ക് എച്ച്1 എന്‍1 ഉം ചിക്കന്‍പോക്‌സും ബാധിച്ചതിനെ തുടര്‍ന്നാണ് കുസാറ്റ് അടച്ചത്. ഹോസ്റ്റലുകളും അടച്ചിടും. ആറ് മുതല്‍ റെഗുലര്‍ ക്ലാസുകള്‍ നടക്കുമെന്ന് രജിസ്ട്രാര്‍ അറിയിച്ചു.

ടോറസ് ലോറി തലയിലൂടെ കയറിയിറങ്ങി സ്‌കൂട്ടര്‍ യാത്രികന് ദാരുണാന്ത്യം

മൂവാറ്റുപുഴ: കരിങ്കല്ല് കയറ്റിവന്ന ടോറസ് ലോറി തലയിലൂടെ കയറിയിറങ്ങി സ്‌കൂട്ടര്‍ യാത്രികന് ദാരുണാന്ത്യം. വെള്ളൂര്‍ക്കുന്നം തൃക്ക മാരിയില്‍ കെ.എന്‍. ജയനാ(റിട്ട. സബ് രജിസ്ട്രാര്‍-67)ണ് അപകടത്തില്‍ മരിച്ചത്. ഇന്നലെ ഉച്ചകഴിഞ്ഞ് മൂന്നോടെ മൂവാറ്റുപുഴ നെഹ്‌റു പാര്‍ക്കിന് സമീപമായിരുന്നു അപകടം. കച്ചേരിത്താഴത്ത് നിന്ന് വെള്ളൂര്‍ക്കുന്നത്തേക്ക് പോവുകയായിരുന്നു ജയന്‍. പിന്നാലെ എത്തിയ ടോറസ് ലോറി സ്‌കൂട്ടറിനെ മറികടക്കുന്നതിനിടെ ഹാൻഡിലില്‍ തട്ടി സ്‌കൂട്ടര്‍ മറിയുകയും ലോറിക്ക് അടിയില്‍പ്പെട്ട ജയന്‍റെ തലയിലൂടെ പിന്‍ചക്രം കയറിയിറങ്ങുകയായിരുന്നു. ജയന്‍ തത്ക്ഷണം മരിച്ചു. മൂവാറ്റുപുഴ ജനറല്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം പോസ്റ്റ്‌മോര്‍ട്ടത്തിന് ശേഷം ഇന്ന് ബന്ധുക്കള്‍ക്ക് വിട്ടു നല്‍കും. സംസ്‌കാരം പിന്നീട്. ഭാര്യ: എന്‍. ഹേമ (മൂവാറ്റുപുഴ ജനറല്‍ അശുപത്രി മുന്‍ ജീവനക്കാരി). മക്കള്‍: യമുന, വിജയ് (ഇരുവരും കാനഡ), അഞ്ജന (ഡല്‍ഹി).

ബസ് ഇടിച്ച് വിദ്യാര്‍ഥി മരിച്ച സംഭവം : കളക്ടര്‍ യോഗം വിളിക്കണമെന്ന് മനുഷ്യാവകാശ കമ്മീഷന്‍

കൊച്ചി: സ്വകാര്യബസുകളുടെ അമിതവേഗതയും അശ്രദ്ധമായ ഡ്രൈവിംഗും തടയുന്നതിന് അടിയന്തര നടപടികള്‍ സ്വീകരിക്കുന്നതിനായി ജില്ലാ പോലീസ് മേധാവി (സിറ്റി), ആര്‍ടിഒ, റോഡ് സുരക്ഷാ വിഭാഗം ജില്ലാ മേധാവി, നഗരസഭാ സെക്രട്ടറി എന്നിവരുടെ യോഗം ജില്ലാ കളക്ടര്‍ ഉടന്‍ വിളിക്കണമെന്ന് മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റീസ് അലക്‌സാണ്ടര്‍ തോമസ് ഉത്തരവിട്ടു. കാറിനെ മറികടക്കാന്‍ ശ്രമിച്ച സ്വകാര്യ ബസ് പിന്നില്‍ നിന്നും ഇടിച്ചു വീഴ്ത്തിയ കോളജ് വിദ്യാര്‍ഥി മരിച്ച സംഭവത്തില്‍ പത്രവാര്‍ത്തയുടെ അടിസ്ഥാനത്തില്‍ കമ്മീഷന്‍ സ്വമേധയാ രജിസ്റ്റര്‍ ചെയ്ത കേസിലാണ് നടപടി. യോഗത്തിന്‍റെ അടിസ്ഥാനത്തില്‍ സ്വീകരിച്ച നടപടികള്‍ ജില്ലാ കളക്ടര്‍ നാലാഴ്ചയ്ക്കകം കമ്മീഷനെ അറിയിക്കണം. ടിഡി റോഡ് സ്വദേശി ഗോവിന്ദ് എന്‍.ഷേണായി വാഹനാപകടത്തില്‍ മരിച്ച സംഭവത്തിന്‍റെ കാരണങ്ങള്‍ ജില്ലാ പോലീസ് മേധാവി (സിറ്റി) അന്വേഷിക്കണമന്നും ഉത്തരവില്‍ പറഞ്ഞു. അപകടമുണ്ടാക്കിയ ബസിന്‍റെ, കഴിഞ്ഞ ഒരു വര്‍ഷത്തിനിടെയുള്ള അമിതവേഗതയും അപകടവും ഉള്‍പ്പെടെയുള്ള നിയമലംഘനങ്ങള്‍, രജിസ്റ്റര്‍ ചെയ്ത കേസുകളുടെ വിവരങ്ങള്‍, അപകടങ്ങളും നിയമലംഘനങ്ങളും തടയുന്നതിന് സ്വീകരിച്ച നടപടികള്‍ എന്നിവ ജില്ലാ പോലീസ് മേധാവി നാലാഴ്ചയ്ക്കകം സമര്‍പ്പിക്കണം. ആര്‍ടിഒയും പ്രത്യേകം റിപ്പോര്‍ട്ട് സമര്‍പ്പിക്കണം. സെപ്റ്റംബര്‍ ഒന്നിന് രാവിലെ 10 ന് പത്തടിപ്പാലം പൊതുമരാമത്ത് റസ്റ്റ് ഹൗസില്‍ നടക്കുന്ന സിറ്റിംഗില്‍ കളക്ടറെ പ്രതിനിധീകരിച്ച് ആര്‍ഡിഒ, ജില്ലാ പോലീസ് മേധാവി, ആര്‍ടിഒ എന്നിവരുടെ പ്രതിനിധികള്‍ നേരിട്ട് പങ്കെടുത്ത് വസ്തുതകള്‍ ധരിപ്പിക്കണമെന്ന് ജസ്റ്റീസ് അലക്‌സാണ്ടര്‍ തോമസ് ആവശ്യപ്പെട്ടു.

സ്വകാര്യ ബസുകളുടെ മത്സരയോട്ടം: 55 ഡ്രൈവര്‍മാര്‍ക്കെതിരെ നടപടി

കൊച്ചി: എറണാകുളം ജില്ലയിലെ സ്വകാര്യ ബസുകളുടെ മത്സരയോട്ടവും അപകടകരമായ രീതിയില്‍ വാഹനം ഓടിക്കലുമായി ബന്ധപ്പെട്ട് മോട്ടോർ വാഹന വകുപ്പ് നടത്തിയ പരിശോധനയില്‍ 233 സ്വകാര്യ ബസുകളുടെ നിയമലംഘനം കണ്ടെത്തി. 55 ബസ് ഡ്രൈവര്‍മാരുടെ ഡ്രൈവിംഗ് ലൈസന്‍സിനെതിരെ നിയമ നടപടി ആരംഭിച്ചു. സിറ്റി ബസുകള്‍ ഡോര്‍ തുറന്നിട്ട്, അപകടകരമായി ഓടിച്ചതാണ് പ്രധാനമായും പരിശോധിച്ചത്. ഗതാഗത മന്ത്രിക്കും ട്രാന്‍സ്‌പോര്‍ട്ട് കമ്മീഷണര്‍ക്കും പരാതികള്‍ ലഭിച്ചതിനെ തുടര്‍ന്നാണ് പരിശോധന ശക്തമാക്കിയത്. പരിശോധന വരുംദിവസങ്ങളിലും തുടരും. ഇതു കൂടാതെ റഡാര്‍ എന്‍ഫോഴ്‌സ്‌മെന്‍റ് സംവിധാനമുള്ള വാഹനം ജില്ലയില്‍ പരിശോധന നടത്തുമെന്നും എറണാകുളം മധ്യമേഖല ഡെപ്യൂട്ടി ട്രാന്‍സ്‌പോര്‍ട്ട് കമ്മീഷണര്‍ അറിയിച്ചു.

പാര്‍ട്ടി വിരുദ്ധ പ്രവര്‍ത്തനം : വനിതാ കൗണ്‍സിലറെ പുറത്താക്കി കോണ്‍ഗ്രസ്

കൊച്ചി: പാര്‍ട്ടി വിരുദ്ധ പ്രവര്‍ത്തനം ആരോപിച്ച് കോണ്‍ഗ്രസ് കൗണ്‍സിറെ പാര്‍ട്ടിയില്‍ നിന്ന് പുറത്താക്കി. കൊച്ചി കോർപറേഷൻ തോപ്പുംപടി ഡിവിഷൻ കൗണ്‍സിലർ ഷീബ ഡുറോമിനെതിരെയാണ് നടപടി. തെരഞ്ഞെടുപ്പ് മുന്നൊരുക്ക പ്രവര്‍ത്തനങ്ങളില്‍ സിപിഎമ്മുമായി സഹകരിച്ച് പ്രവര്‍ത്തിക്കുന്നു എന്നതാണ് ഷീബയ്‌ക്കെതിരായ ആരോപണം. താക്കീത് ചെയ്തും കത്ത് മുഖേനയും നല്‍കിയ മുന്നറിയിപ്പുകള്‍ അവഗണിച്ച് നിരന്തരം പാര്‍ട്ടി വിരുദ്ധ പ്രവര്‍ത്തനങ്ങള്‍ ചെയ്തുവരുന്നതായി ബോധ്യപ്പെട്ടതിനാലാണ് കടുത്ത നടപടി സ്വീകരിക്കേണ്ടി വന്നതെന്ന് ഡിസിസി പ്രസിഡന്‍റ് മുഹമ്മദ് ഷിയാസ് പറഞ്ഞു. കോര്‍പറേഷന്‍ വിദ്യാഭ്യാസ സ്ഥിരം സമിതിയിലേക്ക് നടന്ന തെരഞ്ഞെടുപ്പുമായി ബന്ധപ്പെട്ട് വിപ്പ് ലംഘിച്ചതിന്‍റെ പേരില്‍ മുന്‍പ് ഷീബ സസ്‌പെന്‍ഷന്‍ നേരിട്ടിരുന്നു. വോട്ടെടുപ്പ് ഘട്ടത്തില്‍ പേരെഴുതാതെ ബാലറ്റ് പേപ്പര്‍ തിരികെ നല്‍കി വോട്ട് അസാധുവാക്കി എന്നതായിരുന്നു ഷീബയ്‌ക്കെതിരായ കുറ്റം. അന്ന് സസ്‌പെൻഡ് ചെയ്തിരുന്നെങ്കിലും ആറു മാസത്തിനുശേഷം പാര്‍ട്ടിയില്‍ തിരികെ എടുത്തിരുന്നു. കഴിഞ്ഞ തദ്ദേശ തെരഞ്ഞെടുപ്പില്‍ സിപിഎമ്മിലേക്ക് കുറുമാറിയ മുതിര്‍ന്ന കോണ്‍ഗ്രസ് നേതാവിന്‍റെ നോമിനിയായി കോണ്‍ഗ്രസിന്‍റെ സ്ഥാനാര്‍ഥി പട്ടികയില്‍ ഇടം നേടിയ ആളാണ് ഷീബ ഡുറോം. പാര്‍ട്ടി വിരുദ്ധ പ്രവര്‍ത്തനം നടത്തിയിട്ടില്ലെന്ന് ഷീബ ഡുറോം കൊച്ചി: പാര്‍ട്ടി വിരുദ്ധ പ്രവര്‍ത്തനം നടത്തിയിട്ടില്ലെന്നും ആരുടെയോ ഗൂഢതാല്‍പര്യങ്ങള്‍ സംരക്ഷിക്കാനാണ് തന്നെ പുറത്താക്കിയതെന്നും ഷീബ ഡുറോം. ഒടുവില്‍ നടന്ന മെട്രോ പൊളിറ്റന്‍ ആസൂത്രണ സമിതി തെരഞ്ഞെടുപ്പിലും പാര്‍ടി സ്ഥാനാര്‍ഥിക്കായി വോട്ട് ചെയ്ത താന്‍ എന്ത് പാര്‍ട്ടിവിരുദ്ധ പ്രവര്‍ത്തനമാണ് നടത്തിയതെന്ന് ബോധ്യമായിട്ടില്ല. പരിപാടികള്‍ മന:പൂര്‍വം തന്നെ അറിയിച്ചില്ല. അറിയിക്കണമെന്ന് മണ്ഡലം ഭാരവാഹികളോട് നിര്‍ദേശിക്കണമെന്ന് ഡിസിസി പ്രസിഡന്‍റിനോട് അഭ്യര്‍ഥിച്ചിരുന്നു. എന്നാല്‍ സ്ത്രീയെന്ന പരിഗണന നല്‍കാതെ ഇല്ലാത്ത കാര്യങ്ങള്‍ പറഞ്ഞ് പൊതുസമൂഹത്തില്‍ ആക്ഷേപിക്കുന്ന നടപടികളാണ് സ്വീകരിച്ചതെന്നും ഷീബ പറഞ്ഞു.

യുവ മെക്കാനിക്കൽ എൻജിനീയർ ഒഡീഷയിൽ അപകടത്തിൽ മരിച്ചു

ആരക്കുന്നം: പുളിയ്ക്കമാലി പുത്തൻപുരയിൽ കെ.പി. രാജുവിന്‍റെ മകൻ ആൽബിൻ രാജു (29) ഒഡീഷയിലുണ്ടായ അപകടത്തിൽ മരിച്ചു. സ്റ്റീൽ പ്ലാന്‍റ് കന്പനിയായ ഏരീസ് ഗ്രൂപ്പ് ഓഫ് കന്പനീസിലെ മെക്കാനിക്കൽ എൻജിനീയറായിരുന്നു. കന്പനിയുടെ ഗുജറാത്ത് പ്ലാന്‍റിൽനിന്നും കഴിഞ്ഞ തിങ്കളാഴ്ചയാണ് സ്ഥലം മാറ്റം ലഭിച്ച് ഒഡീഷയിലെ പ്ലാന്‍റിലെ ക്വാർട്ടേഴ്സിൽ എത്തിയത്. മുകൾ നിലയിൽനിന്നും ചൊവ്വാഴ്ച വെളുപ്പിന് 1.30ന് താഴെ വീഴുകയും തത്ക്ഷണം മരിക്കുകയുമായിരുന്നു. മൃതദേഹം പോലീസ് നടപടികൾക്കുശേഷം ഇന്ന് രാവിലെ എട്ടിന് പുളിയ്ക്കമാലിയിലെ വസതിയിൽ കൊണ്ടുവരും. സംസ്കാരം ഇന്ന് ഒന്നിന് പാന്പ്ര സെന്‍റ് ജോർജ് സിറിയൻ സിംഹാസന പള്ളിയിൽ. മാതാവ്: മിനി പാന്പ്ര കറുകയിൽ കുടുംബാംഗം. സഹോദരി: അബിയ രാജു (യുഎസ്). സഹോദരി ഭർത്താവ്: റിനോയ് (യുഎസ്).

ലോറിയും സ്കൂട്ടറും കൂട്ടിയിടിച്ച് സ്കൂട്ടർ യാത്രികൻ മരിച്ചു

കാലടി: എംസി റോഡിൽ കാലടിക്ക് സമീപം മറ്റൂരിൽ ലോറിയും സ്കൂട്ടറും കൂട്ടിയിടിച്ച് സ്കൂട്ടർ യാത്രികൻ മരിച്ചു. കാഞ്ഞൂർ തെക്കേ അങ്ങാടി പുതിയേടം കാച്ചപ്പിള്ളി മാത്യുവിന്‍റെ മകൻ (ഞാറയ്ക്കൽക്കാരൻ) ഔസേഫ് (72) ആണ് മരിച്ചത്. സാധനങ്ങൾ വാങ്ങുന്നതിനായി കാഞ്ഞൂരിൽനിന്നും മറ്റൂരിലേക്ക് വരുന്ന വഴി ഇന്നലെ രാവിലെ ഒന്പതിനായിരുന്നു അപകടം. ഉടൻ അങ്കമാലിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം ഇന്ന് ഉച്ചകഴിഞ്ഞ് 3.30ന് കാഞ്ഞൂർ സെന്‍റ് മേരീസ് ഫൊറോന പള്ളിയിൽ. ഭാര്യ: കറുകുറ്റി പൈനാടത്ത് ഫിലോമന. മക്കൾ: സെഫിൽ (ഇലക്ട്രിസിറ്റി ബോർഡ്, കാഞ്ഞൂർ), ജെഫിൽ (സൗദി അറേബ്യ). മരുമക്കൾ: മീതു, മെൽബ (സൗദി).

അജ്ഞാതപുരുഷന്‍റെ മൃതദേഹം പുഴയിൽ

പിറവം: പാഴൂരിൽ തൂക്കുപാലത്തിന് സമീപം പുഴയിൽ പുരുഷന്‍റെ മൃതദേഹം കണ്ടെത്തി. മൃതദേഹത്തിന്‍റെ പോക്കറ്റിൽ നിന്ന് ഡ്രൈവിംഗ് ലൈസെൻസും ആധാർ കാർഡും ലഭിച്ചിട്ടുണ്ട്. അതിൽ കെ. പ്രമോദ് (58) ഉണ്ണികൃഷ്ണ റെസ്റ്റ് ഹൗസ്, ചോറ്റാനിക്കര എന്ന വിലാസമാണ്. ഇങ്ങനെ ഒരാൾ സ്ഥാപനത്തിൽ ഇല്ലെന്ന് പോലീസ് അറിയിച്ചിട്ടുണ്ട്. റെസ്റ്റ് ഹൗസിൽ നേരത്തെ ജോലി ചെയ്തിരുന്ന പ്രമോദ് അക്കാലത്ത് എടുത്തതാണ് ഈ രേഖകളെന്ന് കരുതുന്നു. അതിനാൽ എവിടുത്തുകാരനാണെന്ന് കണ്ടെത്താനായില്ല. പാഴൂരിൽ ഹോട്ടലിൽ എത്തിയവരാണ് പുഴയിലൂടെ മൃതദേഹം ഒഴുകുന്നത് കണ്ടത്. പോലീസും അഗ്നി രക്ഷാസേനയുമെത്തിയാണ് മൃതദേഹം കരയ്ക്കെടുത്തത്. പിറവം പോലീസ് മേൽനടപടി സ്വീകരിച്ചു. മൃതദേഹം പിറവം താലൂക്ക് ആശുപത്രി മോർച്ചറിയിലേക്ക് മാറ്റി.

ഇൻഫോപാർക്കിലെ വനിതാ ടോയ്‌ലറ്റിൽ ഒളിക്കാമറ; പ്രതി ഒളിവിൽ

കാക്കനാട്: ഇൻഫോപാർക്കിലെ കോമൺ ടോയ്‌ലറ്റ് ഏരിയയിലെ വനിതകളുടെ ശുചിമുറിയിൽ ഒളിക്കാമറവച്ച് ദൃശ്യങ്ങൾ പകർത്തിയ യുവാവിനെതിരെ ഇൻഫോപാർക്ക് പോലീസ് കേസെടുത്തു. ഇയാൾ ഒളിവിലായതിനാൽ പിടികൂടാനായിട്ടില്ല. പബ്ലിക് ടോയ്‌ലറ്റിലാണ് ഒളിക്കാമറ കണ്ടെത്തിയതെന്നും ഐടി കമ്പനികളിലൊന്നിന്‍റെ ശുചിമുറിയിലാണ് കാമറ കണ്ടെത്തിയതെന്ന നിലയിൽ പ്രചരിക്കുന്ന വാർത്തകൾ ശരിയല്ലെന്നും ഇൻഫോപാർക്ക് സിഐ സജീവ്കുമാർ പറഞ്ഞു. പ്രതി ഇത്തരത്തിൽ ദൃശ്യങ്ങൾ പകർത്തിത്തുടങ്ങിയിട്ട് എത്ര നാളായി എന്നതടക്കം പരിശോധിക്കുമെന്നും സിഐ അറിയിച്ചു.

നവകേരള സദസ്; ജില്ലയില്‍ 98 കോടിയുടെ പദ്ധതികള്‍ക്ക് അംഗീകാരം

കൊച്ചി: നവകേരള സദസിലൂടെ ലഭിച്ച നിര്‍ദ്ദേശങ്ങള്‍ നടപ്പാക്കുന്നതിനായി ജില്ലയില്‍ 98 കോടിയുടെ വികസന പദ്ധതികള്‍ക്ക് അംഗീകാരം. വിവിധ മണ്ഡലങ്ങളിലായി 24 പദ്ധതികളാണ് നടപ്പിലാക്കുന്നത്. ഓരോ മണ്ഡലത്തിലും പരമാവധി ഏഴു കോടിയുടെ വികസന പദ്ധതികള്‍ക്കാണ് അംഗീകാരം നല്‍കിയത്. മണ്ഡലം, പദ്ധതി, തുക- പെരുമ്പാവൂര്‍: ഓണങ്കുളം ഊട്ടിമറ്റം റോഡ് (നാല് കോടി), അങ്കമാലി: കറുകുറ്റി-മുഴിക്കുളം റോഡ് (മൂന്ന് കോടി). ആലുവ: ഗവ. ബോയ്‌സ് ഹയര്‍ സെക്കൻഡറി സ്‌കൂളില്‍ ഓഡിറ്റോറിയം (3.5 കോടി), തോട്ടുമുഖം തടിയിട്ടപറമ്പ് റോഡ് പുനരുദ്ധാരണം (70 ലക്ഷം). കളമശേരി: കാരിപ്പുഴ പാലം പുനര്‍നിര്‍മാണം (ആറ് കോടി). ഓഞ്ഞിതോട്ടിലെ എക്കലും പായലും നീക്കം ചെയ്യല്‍ (ഒരു കോടി). പറവൂര്‍: കച്ചേരി മൈതാനത്തിനം റോഡ് നവീകരണം (രണ്ടുകോടി), താലൂക്ക് ആശുപത്രിക്ക് പുതിയ കെട്ടിടം (അഞ്ചു കോടി). വൈപ്പിന്‍: കടമക്കുടി ആയുര്‍വേദ ആശുപത്രിക്ക് മൂന്നു നില കെട്ടിട നിര്‍മാണം (3.71 കോടി) ആര്‍എംപി തോട് പാര്‍ശ്വഭിത്തി നിര്‍മാണം (2.29). കൊച്ചി: അഗസ്റ്റിന്‍ ജോസഫ് ഭാഗവതര്‍ റോഡ് നവീകരണം (94 ലക്ഷം), വാലുമ്മേല്‍ കോണ്‍വെന്‍റ് റോഡ് നവീകരണം (6.06 കോടി). തൃപ്പൂണിത്തുറ: മരട് മാങ്കായില്‍ ഗവ. ഹയര്‍ സെക്കൻഡറി സ്‌കൂളിന് പുതിയ കെട്ടിടം (ഏഴു കോടി). എറണാകുളം: ഇടപ്പള്ളി-അമൃത ഹോസ്പിറ്റല്‍ റോഡ് കാന നിര്‍മാണം (ഒരു കോടി). ചിറ്റൂര്‍ ഡിവിഷനില്‍ ഓവര്‍ ഹെഡ് വാട്ടര്‍ ടാങ്ക് നിര്‍മ്മാണം (ആറുകോടി). തൃക്കാക്കര: ഗവ ടിടിഐ ഇടപ്പള്ളി പുതിയ കെട്ടിട നിര്‍മാണം (മൂന്നു കോടി). ഇടപ്പള്ളി-അര്‍ക്കകടവ് റോഡ് നവീകരണം (നാലുകോടി). കുന്നത്തുനാട്: തിരുവാണിയൂര്‍ പഞ്ചായത്ത് മിനി സിവില്‍സ്റ്റേഷന്‍ നിര്‍മാണം (3.50 കോടി), കടമ്പ്രയാര്‍ പ്രോജക്ട് (3.50 കോടി). പിറവം: ആനമുന്തി മിന്‍പാറ റോഡ്, പാമ്പാക്കുട കീഴ്മുറി റോഡ് നിര്‍മാണം (5.50 കോടി), പുളിക്കമാലി ഗവ. ഹൈസ്‌ക്കൂളിന് പുതിയ കെട്ടിടം (1.50 കോടി). മൂവാറ്റുപുഴ: നീറമ്പുഴ കലൂര്‍ റോഡില്‍ ചെയിനേജ് മുതല്‍ റോഡ് നിര്‍മാണം (6.50 കോടി), അടുപ്പറമ്പ് കിഴക്കേക്കര റോഡിലെ വെള്ളക്കെട്ട് പരിഹാരം (50 ലക്ഷം). കോതമംഗലം: മുനിസിപ്പല്‍ ടൗണ്‍ഹാള്‍ നിര്‍മാണം (ഏഴ് കോടി).

സബ്‌സിഡി മാത്രം ലക്ഷ്യമിടുന്നവർ കാര്‍ഷിക മേഖലയുടെ ശാപം: സലിംകുമാര്‍

ജില്ലാ കാര്‍ഷിക മേളയ്ക്കു തുടക്കമായി കൊച്ചി: സബ്‌സിഡി മാത്രം ലക്ഷ്യമിട്ട് കൃഷിയിലേക്ക് തിരിഞ്ഞവരാണ് സംസ്ഥാനത്തെ കാര്‍ഷിക മേഖലയുടെ ശാപമെന്ന് നടന്‍ സലിംകുമാര്‍. ലാഭത്തിനപ്പുറം കൃഷി തരുന്ന ആത്മസംതൃപ്തിയായിരിക്കണം ഓരോ കര്‍ഷകനും ലക്ഷ്യമാക്കേണ്ടതെന്നും ജില്ലാ കാര്‍ഷിക മേളയുടെ ഉദ്ഘാടനം നിര്‍വഹിച്ചുകൊണ്ട് അദ്ദേഹം പറഞ്ഞു. ജില്ലാ പഞ്ചായത്തിന്‍റെ വാര്‍ഷിക പദ്ധതിയുടെ ഭാഗമായി സംഘടിപ്പിക്കുന്ന ജില്ലാ കാര്‍ഷികമേളയില്‍ സെമിനാറുകള്‍, പ്രദര്‍ശന വിപണ മേളകള്‍, കലാപരിപാടികള്‍, ഫുഡ് കോര്‍ട്ട് എന്നിവയും ഒരുക്കിയിട്ടുണ്ട്. വിപണന മേളയില്‍ പച്ചക്കറി തൈകള്‍, ഫലവൃക്ഷ തൈകള്‍, ജൈവവളങ്ങള്‍, വിവിധ കാര്‍ഷികോത്പ്പന്നങ്ങള്‍ എന്നിവ വാങ്ങാനുള്ള സൗകര്യമുണ്ട്. ജില്ലാ പഞ്ചായത്ത് ഹാളില്‍ നടന്ന ചടങ്ങില്‍ പ്രസിഡന്‍റ് മനോജ് മൂത്തേടന്‍ അധ്യക്ഷത വഹിച്ചു. സംസ്ഥാന കര്‍ഷക അവാര്‍ഡ് ജേതാവ് പി.എസ്. സുജിത്ത് മുഖ്യാതിഥിയായിരുന്നു. ജില്ലാ പഞ്ചായത്ത് വൈസ് പ്രസിഡന്‍റ് എല്‍സി ജോര്‍ജ്, കൃഷി വകുപ്പ് ഡെപ്യൂട്ടി ഡയറക്ടര്‍ വി.പി. സിന്ധു, ആരോഗ്യ വിദ്യാഭ്യാസ സ്ഥിരംസമിതി അധ്യക്ഷൻ എം.ജെ. സോമി, മുന്‍ ജില്ലാ പഞ്ചായത്ത് പ്രസിഡന്‍റ് ഉല്ലാസ് തോമസ് തുടങ്ങിയവര്‍ പങ്കെടുത്തു. നാളെ നടക്കുന്ന സമാപന സമ്മേളനം മന്ത്രി പി. പ്രസാദ് ഉദ്ഘാടനം ചെയ്യും. ഉമാ തോമസ് എംഎല്‍എ അധ്യക്ഷത വഹിക്കും. സമാപന സമ്മേളനത്തില്‍ കര്‍ഷകര്‍ക്കുള്ള ജില്ലാ പഞ്ചായത്ത് അവാര്‍ഡ് വിതരണവും നടക്കും.

വൃദ്ധയുടെ മരണം : മോഷണശ്രമം ചെറുക്കവെ, കൊല്ലപ്പെട്ടതെന്ന് സംശയം

പെരുമ്പാവൂർ: വൃദ്ധയെ തോട്ടത്തിൽ മരിച്ചനിലയിൽ കണ്ടെത്തിയ സംഭവം, മോഷണശ്രമത്തിനിടെ നടന്ന കൊലപാതകമെന്ന നിഗമനത്തിൽ അന്വേഷണം ഊർജിതമാക്കി പോലീസ്. സംഭവത്തിൽ നാല് ഇതരസംസ്ഥാനക്കാരെ കസ്റ്റഡിയിലെടുത്തിട്ടുണ്ട്. തോട്ടുവ മനയ്ക്കപ്പടി വീട്ടിൽ ഔസേഫ് ഭാര്യ അന്നം (85)ആണ് ചൊവ്വാഴ്ച രാത്രിയോടെ സമീപത്തെ തോട്ടത്തിൽ മരിച്ച നിലയിൽ കാണപ്പെട്ടത്. തലയ്ക്ക് അടിയേറ്റ് രക്തം വാർന്ന നിലയിലായിരുന്നു മൃതദേഹം. തോട്ടത്തിന്‍റെ നോട്ടക്കാരിയായിരുന്നു അന്നം. ദിവസവും രാവിലെ 11.30 ഓടെ തോട്ടത്തിലേക്ക് പോകുന്ന അന്നം വൈകിട്ട് അഞ്ചോടെ വീട്ടിൽ തിരിച്ചെത്താറുണ്ട്. മരണദിവസവും രാവിലെ തോട്ടത്തിലേക്ക് പോയ ഇവരെ രാത്രിയായിട്ടും കാണാത്തതിനെ തുടർന്ന് നടത്തിയ അന്വേഷണത്തിലാണ് മൃതദേഹം കണ്ടെത്തിയത്. കൈയിൽ ധരിച്ചിരുന്ന അഞ്ചു സ്വർണ വളകളിൽ രണ്ടെണ്ണം നഷ്ടപ്പെട്ടിട്ടുണ്ട്. കൈയ്ക്കും മുഖത്തും പരിക്കുകളുമുണ്ട്. മാല വീട്ടിൽ ഊരിവച്ചിട്ടാണ് തോട്ടത്തിലേക്ക് പോകാറുള്ളത്. എന്നാൽ കൈയിലെ വള ഊരാറില്ലായിരുന്നു. മൃതദേഹത്തിന് സമീപം തോട്ടത്തിൽ നിന്നു പെറുക്കിയ ജാതിക്കയും അന്നം കൊണ്ടുപോയ വളത്തിന്‍റെ കവറും കണ്ടെത്തി. വിരലയടയാള വിദഗ്ധർ, ഡോഗ് സ്‌ക്വാഡ് എന്നിവർ സ്ഥലത്ത് എത്തി. മൃതദേഹം പോസ്റ്റ്‌മോർട്ടത്തിനുശേഷം ബന്ധുക്കൾക്ക് വിട്ടുനൽകി. സമീപവീടുകളിലെ സിസിടിവി ദൃശ്യങ്ങൾ പോലീസ് പരിശോധിച്ചുവരികയാണ്. ചെന്നൈ സ്വദേശിയുടെ ഉടമസ്ഥതയിലുള്ളതാണ് തോട്ടം. അഞ്ചു മക്കളുള്ള അന്നം, ഇളയ മകൻ ജോണിയോടൊപ്പമാണ് താമസിച്ചിരുന്നത്. പോസ്റ്റുമോർട്ടം റിപ്പോർട്ട് വന്നാലേ കൂടുതൽ വിവരങ്ങൾ ലഭ്യമാകൂ. മറ്റു മക്കൾ: മേരി, റോസിലി, ജോസ്, സ്റ്റീഫൻ. സംസ്‌കാരം ഇന്ന് രാവിലെ 10ന് തോട്ടുവ സെന്‍റ് ജോസഫ് പള്ളിയിൽ നടക്കും.

ബസ് എപ്പോള്‍ വരും? കെഎസ്ആര്‍ടിസിയില്‍ വിളിക്കാന്‍ ഇനി മൊബൈൽ‍ നമ്പര്‍

കൊച്ചി: കെഎസ്ആര്‍ടിസി ബസുകളുടെ സമയവും, വരവും പോക്കുമടക്കമുള്ള വിവരങ്ങള്‍ അറിയാന്‍ ഇനിമുതല്‍ പുതിയ ബൊബൈല്‍ നമ്പര്‍. ഉപഭോക്തൃ സൗഹൃദ സേവനം ശക്തമാക്കുന്നതിനും യാത്രക്കാര്‍ക്ക് സൗകര്യപ്രദമായി വിവരങ്ങള്‍ ലഭ്യമാക്കുന്നതിനുമാണ് കെഎസ്ആര്‍ടിസിയുടെ പുതിയ സജ്ജീകരണം. ഇതിന്‍റെ ഭാഗമായി ജില്ലയിലെ കെഎസ്ആര്‍ടിസിയുടെ എല്ലാ സ്റ്റേഷന്‍ ഓഫീസുകളിലും പൊതു ജനങ്ങള്‍ക്കും യാത്രക്കാര്‍ക്കും നേരിട്ട് ബന്ധപ്പെടാന്‍ സാധിക്കുന്ന തരത്തില്‍ പ്രത്യേക മൊബൈല്‍ നമ്പര്‍ സംവിധാനം നിലവില്‍ വന്നു. നിലവിലെ ലാന്‍ഡ് ഫോണ്‍ സംവിധാനം പല സ്ഥലങ്ങളിലും തകരാറിലായതോടെ അന്വേഷണങ്ങള്‍ക്ക് ഡിപ്പോകളില്‍ നേരിട്ട് എത്തേണ്ട അവസ്ഥയായിരുന്നു. ലാന്‍ഡ് ഫോണ്‍ സംവിധാനത്തിലൂടെ കൃത്യമായ മറുപടി ലഭിക്കുന്നില്ലെന്ന പരാതികളും വ്യാപകമായിരുന്നു. ഇതോടെയാണ് മൊബൈല്‍ സംവിധാനത്തിലേക്കുള്ള കെഎസ്ആര്‍ടിസിയുടെ ചുവടുമാറ്റം. പുതിയ സംവിധാനത്തിലൂടെ യാത്രാവേളയിലെ സംശയങ്ങള്‍, ടിക്കറ്റ് ബുക്കിംഗ്, ബസ് സമയക്രമം, യാത്രാ രീതികള്‍, അടിയന്തര സാഹചര്യങ്ങള്‍ എന്നിവയെപ്പറ്റിയും വിവരങ്ങൾ തേടാം. ജില്ലയിലെ കെഎസ്ആര്‍ടിസി സ്റ്റേഷനുകളിലെ മൊബൈല്‍ നമ്പറുകള്‍ ആലുവ 9188933776 അങ്കമാലി 9188933778 എറണാകുളം 9188933779 എറണാകുളം ബോട്ട്‌ജെട്ടി 9188933780 വൈറ്റില 9188933781 കൂത്താട്ടുകുളം 9188933782 കോതമംഗലം 9188933783 കോതമംഗലം മുനി.‍ സ്റ്റാന്‍ഡ് 9188933784 മൂവാറ്റുപുഴ 9188933785 നോര്‍ത്ത് പറവൂര്‍ 9188933787 പെരുമ്പാവൂര്‍ 9188933788 പിറവം 9188933790

ട്രെയിന്‍ ഇറങ്ങി വിമാനം കയറാം : നെടുമ്പാശേരി റെയില്‍വേ സ്റ്റേഷന്‍ നിര്‍മാണം ഡിസംബറില്‍

കൊച്ചി: നെടുമ്പാശേരി വിമാനത്താവളത്തിന് സമീപം റെയില്‍വേ സ്റ്റേഷന്‍ യാഥാര്‍ഥ്യമാകുന്നു. സ്റ്റേഷന്‍ നിര്‍മാണം ഡിസംബറില്‍ ആരംഭിക്കും. സോളാര്‍ പാടത്തിന് സമീപത്തായാണ് പുതിയ റെയില്‍വേ സ്റ്റേഷന്‍. റെയില്‍വേ സ്റ്റേഷന്‍റെ പണി പൂര്‍ത്തിയാകുന്നതോടെ ട്രെയിനില്‍ എത്തുന്നവര്‍ക്കു ടാക്‌സികളെ ആശ്രയിക്കേണ്ടെന്ന പ്രത്യേകതയും ഉണ്ട്. ആഭ്യന്തര, രാജ്യാന്തര ടൂറിസ്റ്റുകള്‍ക്കു ചെലവു കുറഞ്ഞ യാത്രാസൗകര്യമായി റെയില്‍വേ മാറും. വിമാനത്താവളം കേന്ദ്രീകരിച്ച് തൊഴില്‍- ബിസിനസ് അവസരങ്ങള്‍ക്കും റെയില്‍വേ സ്റ്റേഷന്‍ അവസരമൊരുക്കും. സ്റ്റേഷന്‍ കെട്ടിടവും മുഴുനീള ഹൈ ലെവല്‍ പ്ലാറ്റ്‌ഫോം, ഫുട്ട്ഓവര്‍ബ്രിഡ്ജ്, പ്ലാറ്റ്‌ഫോമുകളിലേക്ക് ലിഫ്റ്റ് കണക്റ്റിവിറ്റി ഉള്‍പ്പെടെയുള്ള സൗകര്യങ്ങളോടു കൂടിയ റെയില്‍വേ സ്റ്റേഷന്‍ ആയിരിക്കും നിർമിക്കുക എന്ന് സതേണ്‍ റെയില്‍വേ ജനറല്‍ മാനേജര്‍ ആര്‍.എന്‍. സിംഗ് ബെന്നി ബഹനാന്‍ എംപിയെ രേഖാമൂലം അറിയിച്ചു. വിമാനത്താവളത്തിലെ പുതിയ കാര്‍ഗോ വില്ലേജ് നിര്‍ദിഷ്ട റെയില്‍വേ സ്റ്റേഷന് സമീപത്താണ്. റെയില്‍വേ സ്റ്റേഷന്‍ യാഥാര്‍ഥ്യമാകുന്നതോടെ കേരളത്തില്‍ നിന്നും അയല്‍ സംസ്ഥാനങ്ങളില്‍ നിന്നുമുള്ള കാര്‍ഗോ റെയില്‍ മാര്‍ഗം കുറഞ്ഞ ചെലവില്‍ എത്തിച്ചു വിമാനങ്ങളില്‍ കയറ്റി അയയ്ക്കാമെന്നതു കയറ്റിറക്കുമതിക്കാര്‍ക്ക് ഏറെ ഗുണം ചെയ്യും. വിമാനത്താവളത്തിലെ കാര്‍ഗോ കയറ്റുമതി വര്‍ധിക്കുന്നതോടെ പ്രത്യേക കാര്‍ഗോ വിമാനങ്ങള്‍ വരെ എത്തിച്ചേരാനുള്ള സാധ്യതകളാണൂ തുറക്കുന്നത്. 2010 ല്‍ കരിയാട്–മറ്റൂര്‍ റോഡിലെ അകപ്പറമ്പ് റെയില്‍വേ ഗേറ്റിനോടു ചേര്‍ന്നുള്ള സ്ഥലമാണ് ആദ്യം പരിഗണിച്ചത്. നിലവില്‍ അതില്‍ നിന്നു 500 മീറ്ററോളം ആലുവ ഭാഗത്തേയ്ക്കു മാറിയുള്ള സ്ഥലമാണ് പിന്നീട് പരിഗണിച്ചത്. ഇവിടെയാകും പുതിയ റെയില്‍വേ സ്റ്റേഷന്‍ ഉയരുക. 2010ല്‍ ഇതിനുള്ള പദ്ധതി തയാറാക്കി നിര്‍മാണത്തിന് അനുമതി ലഭിച്ചതാണ്. ശിലാസ്ഥാപനവും നടത്തിയെങ്കിലും റെയില്‍വേ പദ്ധതി ഉപേക്ഷിക്കുകയായിരുന്നു. കഴിഞ്ഞ ഫെബ്രുവരിയില്‍ ദക്ഷിണ റെയില്‍വേ വിഭാഗം പദ്ധതി പ്രദേശം സന്ദര്‍ശിച്ചിരുന്നു. ഒരു വര്‍ഷത്തിനുള്ളില്‍ നിര്‍മാണം പൂര്‍ത്തിയാക്കുമെന്നാണ് അന്ന് അധികൃതര്‍ വ്യക്തമാക്കിയത്. പ്രീമിയം ട്രെയിനുകളുടെ സ്റ്റോപ്പിനായി ശ്രമം തുടരും നെടുമ്പാശേരി വിമാനത്താവളത്തില്‍ എത്തിച്ചേരുന്ന ദീര്‍ഘദൂര യാത്രക്കാര്‍ക്കും സമീപ സംസ്ഥാനത്തുനിന്നുള്ള യാത്രക്കാര്‍ക്കും ഏറെ സഹായകരമാകുന്ന ഇവിടെ പ്രീമിയം ട്രെയിനുകള്‍ക്ക് ഉള്‍പ്പെടെ സ്റ്റോപ്പ് അനുവദിക്കുന്നതിനുള്ള നടപടികള്‍ തുടര്‍ന്ന് നടത്തുമെന്ന് ബെന്നി ബഹനാന്‍ എംപി പറഞ്ഞു.

പ്രതിപക്ഷ എതിര്‍പ്പ് മറികടന്ന് ബ്രഹ്മപുരത്ത് ബയോമൈനിംഗ് കരാര്‍ കാലാവധി നീട്ടി നല്‍കി

കൗൺസിൽ തീരുമാനം പ്രതിപക്ഷത്തിന്‍റെ എതിർപ്പുകളെ മറികടന്ന് കൊച്ചി: പ്രതിപക്ഷ എതിര്‍പ്പുകളെ മറികടന്ന് ബ്രഹ്മപുരത്ത് ബയോമൈനിംഗ് നടത്തുന്ന ഭൂമി ഗ്രീന്‍ എനര്‍ജി കമ്പനിക്ക് കരാര്‍ കാലാവധി നീട്ടി നല്‍കി. കൊച്ചിയുടെ പൊതുവായ വിഷയത്തില്‍ തര്‍ക്കത്തിന് പോകുന്നത് ശരിയല്ലെന്ന് പറഞ്ഞാണ് മേയര്‍ അഡ്വ.എം. അനില്‍കുമാര്‍ സെപ്റ്റംബര്‍ 30 വരെ കമ്പനിക്ക് കാലാവധി നീട്ടി നല്‍കിയത്. സാമ്പത്തിക പ്രയാസം, മഴ എന്നിവ കാരണം നിലവിലെ സമയക്രമത്തില്‍ ബയോമൈനിംഗ് പൂര്‍ത്തിയാക്കാനാകില്ലെന്നും കരാര്‍ കാലാവധി നീട്ടി നല്‍കണമെന്നും ഭൂമി ഗ്രീന്‍ എനര്‍ജി ആവശ്യപ്പെട്ടിരുന്നു. കൗണ്‍സിലില്‍ വിഷയം പരിഗണിച്ചപ്പോള്‍ പ്രതിപക്ഷം എതിര്‍പ്പുമായി രംഗത്തെത്തി. ടണ്ണിന് 1690 രൂപയ്ക്ക് ഭൂമി ഗ്രീന്‍ എനര്‍ജിക്ക് കരാര്‍ ഒപ്പ് വയ്ക്കുമ്പോള്‍ 16 മാസ കാലാവധിയാണ് നല്‍കിയിരുന്നത്. സമയം ദീര്‍ഘിപ്പിച്ചു നല്‍കുമ്പോള്‍ ഉയര്‍ന്ന നിരക്ക് നല്‍കാന്‍ കഴിയില്ലെന്നു പ്രതിപക്ഷ നേതാവ് ആന്‍റണി കുരീത്തറയും യുഡിഎഫ് പാര്‍ലമെന്‍ററി പാര്‍ട്ടി നേതാവ് എം.ജി. അരിസ്റ്റോട്ടിലും പറഞ്ഞു. ബയോമൈനിംഗ് 90 ശതമാനം പൂര്‍ത്തിയാക്കിയെന്നും ശേഷിക്കുന്നത് കാലതാമസം കൂടാതെ പൂര്‍ത്തീകരിക്കാനാണ് കമ്പനിയുടെ ആവശ്യം അംഗീകരിച്ചതെന്നും മേയര്‍ പറഞ്ഞു. മാലിന്യ വിഷയത്തെ രാഷ്ട്രീയമായി കാണുന്നത് ശരിയല്ല. നല്ലരീതിയില്‍ പ്രവര്‍ത്തിക്കുന്ന സ്ഥാപനമാണ് ഭൂമി ഗ്രീന്‍ എനര്‍ജി. ആര്‍ഡിഎഫിന്‍റെ തൂക്കം നോക്കിയല്ല, മാലിന്യത്തിന്‍റെ അളവ് നോക്കിയാണ് ബില്‍ നല്‍കിയതെന്നും ഇക്കാര്യങ്ങളില്‍ ആര്‍ക്കും പരിശോധന നടത്താമെന്നും മേയര്‍ പറഞ്ഞു.

ഹൈക്കോടതിയില്‍ ജോലി വാഗ്ദാനം ചെയ്ത് ലക്ഷങ്ങള്‍ തട്ടിയയാള്‍ പിടിയില്‍

കൊച്ചി: കേരള ഹൈക്കോടതിയില്‍ ജോലി വാഗ്ദാനം ചെയ്ത് യുവാവില്‍ നിന്നും അഞ്ചുലക്ഷത്തിലേറെ രൂപ കവര്‍ന്ന പ്രതി പിടിയില്‍. തിരുവനന്തപുരം നേമം ഉടുമ്പന്നൂര്‍ തിരുവാതിരയില്‍ മോഹന്‍ കുമാറാ(63)ണ് എറണാകുളം സെന്‍ട്രല്‍ പോലീസിന്‍റെ പിടിയിലായത്. പച്ചാളം സ്വദേശിയായ യുവാവിന് ഹൈക്കോടതിയില്‍ ഓഫീസര്‍ അറ്റൻഡന്‍റായി ജോലി തരപ്പെടുത്തി നല്‍കാമെന്ന് വിശ്വസിപ്പിച്ച് പല തീയതികളിലായി അഞ്ചുലക്ഷം തട്ടിയെടുത്തു. യുവാവ് നല്‍കിയ പരാതിയുടെ അടിസ്ഥാനത്തില്‍ നടത്തിയ അന്വേഷണത്തിലാണ് പ്രതി പിടിയിലായത്. പ്രതിക്കെതിരെ കൂടുതല്‍ പരാതികള്‍ ലഭിച്ചിട്ടുണ്ടെന്നും വിശദമായ അന്വേഷണം നടത്തുകയാണെന്നും പോലീസ് അറിയിച്ചു. എറണാകുളം സെന്‍ട്രല്‍ സ്റ്റേഷന്‍ ഹൗസ് ഓഫീസര്‍ അനീഷ് ജോയിയുടെ നേതൃത്വത്തിലുള്ള പോലീസ് സംഘമാണ് പ്രതിയെ പിടികൂടിയത്.

എറണാകുളത്തിന്‍റെ മനം കവർന്ന് കളക്ടർ എൻ.എസ്.കെ. ഉമേഷിന് പടിയിറക്കം

പാലക്കാടു നിന്ന് സ്ഥലം മാറിവരുന്ന ജി. പ്രിയങ്കയാണ് എറണാകുളത്തിന്‍റെ പുതിയ കളക്ടർ കാക്കനാട്: ഈ വർഷത്തെ സംസ്ഥാന റവന്യൂ അവാർഡിൽ സംസ്ഥാനത്തെ മികച്ച കളക്ടറെന്ന അംഗീകാരം നേടിയതിന്‍റെ തിളക്കത്തിൽ എറണാകുളത്തിന്‍റെ പ്രിയപ്പെട്ട കളക്ടർ എൻ. എസ്. കെ. ഉമേഷിന് പടിയിറക്കം. പൊതുവിദ്യാഭ്യാസ ഡയറക്ടറായാണ് പുതിയ നിയമനം. കേരള ഫിനാൻഷ്യൽ കോർപറേഷൻ മാനേജിംഗ് ഡയറക്ടറുടെ ചുമതലയും അദ്ദേഹം വഹിക്കും. പാലക്കാട് നിന്ന് സ്ഥലം മാറുന്ന ജി. പ്രിയങ്കയാണ് എറണാകുളത്തിന്‍റെ പുതിയ കളക്ടർ. അവർ എത്തുന്ന മുറയ്ക്ക് എൻ.എസ്.കെ ഉമേഷ്‌ സ്ഥാനമൊഴിയും. രണ്ടു വർഷം മുന്പൊരു മാർച്ചിൽ ബ്രഹ്മപുരം മാലിന്യ സംസ്കരണ പ്ലാന്‍റ് കത്തിയെരിഞ്ഞ ദിനങ്ങളിലൊന്നിലാണ് സൗമ്യനും തമിഴ്നാട്ടുകാരനായ എൻ.എസ്.കെ. ഉമേഷ് ജില്ലയുടെ ചുമതലയേറ്റത്. നഗരത്തെ സ്ഥിരം ശ്വാസംമുട്ടിച്ച ബ്രഹ്മപുരം തീപിടിത്ത പ്രശ്നത്തിന് സമയബന്ധിതമായ പരിഹാരം കാണാൻ അദ്ദേഹത്തിനായി. താരതമ്യങ്ങളില്ലാത്ത ഒരു പിടിനേട്ടങ്ങളും വെല്ലുവിളികളെ അവസരങ്ങളാക്കി മാറ്റിയ ഇടപെടലുകളും അദ്ദേഹത്തെ എറണാകുളത്തിന്‍റെ ജനപ്രിയ കളക്ടറാക്കി; കേരളത്തിലെ ബെസ്റ്റ് കളക്ടറും. കളമശേരി ബോംബ് സ്ഫോടനം, പട്ടയ പ്രശ്നം പരിഹരിക്കൽ, കൊച്ചിയിലെ കനാൽ നവീകരണവുമെല്ലാം അദ്ദേഹത്തിന്‍റെ കർമശേഷിയെ ശ്രദ്ധേയമാക്കി. 2024ലെ ലോക്സഭാ തെരഞ്ഞെടുപ്പുമായി ബന്ധപ്പെട്ട് മികച്ച പ്രവർത്തനം നടത്തിയ ജില്ലാ വരണാധികാരിക്ക് സംസ്ഥാന മുഖ്യ തെരഞ്ഞെടുപ്പ് ഓഫീസർ ഏർപ്പെടുത്തിയ പുരസ്കാരവും എൻ.എസ്.കെ. ഉമേഷിനെ തേടിയെത്തി. സോഷ്യൽ മീഡിയയിലും താരം കുട്ടികളോട് പ്രത്യേകിച്ച് വിദ്യാര്‍ത്ഥികളോട് ഏറെ അടുപ്പം സൂക്ഷിക്കുന്ന ഭരണാധികാരിയായിരുന്നു ഉമേഷ്. 'മഴയല്ലെ അവധി തരുമോ അങ്കിൾ ' എന്ന ചോദ്യവുമായി അനവധി കുട്ടികളാണ് ആറര ലക്ഷത്തിലധികം ഫോളോവേഴ്സുള്ള ജില്ലാ കളക്ടറുടെ ഫേസ്ബുക്കിൽ വന്നിരുന്നത്. അവരോട് പഠനകാലം ആസ്വദിക്കാനും അത് തിരിച്ചു വരാത്ത സുവർണകാലമാണെന്നും സുരക്ഷാമാർഗ നിർദേശങ്ങൾക്കടിസ്ഥാനമാക്കി താൻ കൃത്യമായി അവധി പ്രഖ്യാപിച്ചുകൊള്ളാമെന്നും പറയുന്ന വീഡിയോ സമൂഹമാധ്യമങ്ങളിലെല്ലാം വൈറലായിരുന്നു. അദ്ദേഹം പങ്കുവയ്ക്കുന്ന പോസ്റ്റുകൾക്ക് മികച്ച പ്രതികരണമാണ് ലഭിക്കുന്നത്. കരുതലിന്‍റെ കരങ്ങൾ കഴിഞ്ഞ ജനുവരിയിൽ രണ്ടാഴ്ചയിലേറെയായി തകർന്ന ലോറിയിൽ ദുരിതമനുഭവിച്ച് എറണാകുളത്ത് കഴിഞ്ഞ സേലം സ്വദേശി മൂർത്തിക്ക് സഹായഹസ്തവുമായി അദ്ദേഹം നേരിട്ടെത്തിയത് വാർത്തയായിരുന്നു. ലോറിയിടിച്ച് തകർന്ന വൈദ്യുതി പോസ്റ്റിന്‍റെ പിഴത്തുക കളക്ടർ സ്വന്തം കൈയിൽ നിന്ന് അടയ്ക്കാൻ തയാറായതോടെയാണ് മൂർത്തിയുടെ ദുരിതമവസാനിച്ചത്. 2018-ൽ കേരളം വിറങ്ങലിച്ചുനിന്ന ആദ്യ പ്രളയത്തിൽ ദുരിതാശ്വാസ പ്രവർത്തനങ്ങൾക്കായി വയനാട് സബ് കളക്ടറായിരുന്ന ഉമേഷ് നേരിട്ടിറങ്ങിയത് വലിയ ജനശ്രദ്ധ നേടിയിരുന്നു. സേലം സ്വദേശിയായ ഉമേഷ് 2015 ബാച്ച് ഐഎഎസ് ഉദ്യോഗസ്ഥനാണ്. ഇടുക്കി കളക്ടർ വി വിഘ്നേശ്വരിയാണ് ഭാര്യ. കൃഷി വകുപ്പ് അഡീഷണൽ സെക്രട്ടറിയായി വിഘ്നേശ്വരിക്കും സ്ഥാനമാറ്റമുണ്ട്.

സ്ഥാനാരോഹണം

കല്ലൂർക്കാട്: ലയണ്‍സ് ക്ലബ് പുതിയ ഭാരവാഹികളുടെ സ്ഥാനാരോഹണം നടത്തി. കല്ലൂർകാട് ലയണ്‍സ് ക്ലബ് പ്രസിഡന്‍റ് ജിബിൻ റാത്തപ്പിള്ളി അധ്യക്ഷത വഹിച്ചു. യോഗത്തിൽ ലയണ്‍സ് ഇന്‍റർനാഷണൽ റീജണൽ കോ-ഓർഡിനേറ്റർ പ്രഫ. സാംസണ്‍ തോമസ് പുതിയ ഭാരവാഹികളുടെ സ്ഥാനാരോഹണവും കല്ലൂർക്കാട് സർക്കിൾ ഇൻസ്പെക്ടർ കെ. ഉണ്ണികൃഷ്ണൻ സർവീസ് പ്രോജക്ടുകളുടെ ഉദ്ഘാടനവും നിർവഹിച്ചു.

കന്യാസ്ത്രീമാരുടെ മോചനം നീണ്ടാല്‍ കേരളജനത പാര്‍ലമെന്‍റിനു മുമ്പില്‍ ഒന്നിക്കും: മാര്‍ കല്ലറങ്ങാട്ട്

പാലാ: ഛത്തീസ്ഗഡിൽ ജയിലില്‍ കിടക്കുന്ന കന്യാസ്ത്രീകള്‍ ഭാരതത്തിലെ ക്രൈസ്തവരെ കോര്‍ത്തിണക്കുന്ന ചങ്ങലയാണെന്നും ഇവരുടെ ജയില്‍വാസം അനിശ്ചിതമായി നീണ്ടാല്‍ കേരള ജനത ഡല്‍ഹി പാര്‍ലമെന്‍റിനു മുന്നില്‍ ഒന്നിക്കുമെന്നും ബിഷപ് മാർ ജോസഫ് കല്ലറങ്ങാട്ട് . ഛത്തീസ്ഗഡില്‍ ജയിലില്‍ കഴിയുന്നു കന്യാസ്ത്രീകള്‍ക്ക് ഐക്യദാർഢ്യം പ്രഖ്യാപിച്ച് ഇന്നലെ പാലാ രൂപത ഭരണങ്ങാനത്ത് നടത്തിയ പ്രാര്‍ഥനാ യജ്ഞത്തില്‍ സന്ദേശം നല്‍കുകയായിരുന്നു ബിഷപ്. മതസ്വാതന്ത്ര്യം തടയുന്നത് അപകടകരമാണ്. സഭയ്ക്ക് രാഷ്‌ട്രീയമില്ല. എന്നാല്‍ രാഷ്‌ട്രീയക്കാരെ തങ്ങളുടെ അവകാശങ്ങള്‍ സംബന്ധിച്ച് പഠിപ്പിക്കാന്‍ ഉത്തരവാദിത്വമുണ്ട്. ക്രൈസ്തവര്‍ അംഗബലത്തിൽ ചെറുതാണെങ്കിലും മൂല്യങ്ങളിൽ സ്വാധീനമുള്ളവരാണെന്നും ബിഷപ് ഉദ്ബോധിപ്പിച്ചു. തീര്‍ഥാടന കേന്ദ്രവും ഫൊറോന ദേവാലയപരിസരവും തിങ്ങിനിറഞ്ഞ അല്മായരും സന്യസ്തരും ജപമാല കൈകളിലേന്തി പ്രാര്‍ഥനയോടെയാണ് ജയിലില്‍ കഴിയുന്ന കന്യാസ്ത്രീകള്‍ക്കു വേണ്ടി പ്രാര്‍ഥിച്ചും ഐക്യദാര്‍ഢ്യം പ്രഖ്യാപിച്ചും വിശുദ്ധ അല്‍ഫോന്‍സാമ്മയ്ക്ക് അവരെ സമര്‍പ്പിച്ചത്. തീര്‍ഥാടന ദേവാലയത്തില്‍നിന്ന് ആരംഭിച്ച ജപമാല റാലി ഫൊറോന ദേവാലയം ചുറ്റി തിരികെ തീര്‍ഥാടന ദേവാലയത്തിലെത്തി സമാപിച്ചു. രൂപത മുഖ്യ വികാരി ജനറാള്‍ മോണ്‍. ജോസഫ് തടത്തില്‍ കൃതജ്ഞത പറഞ്ഞു.

‘കീരംപാറ വനാതിർത്തി മേഖലയിലെ വന്യജീവിശല്യം പരിഹരിക്കണം’

കോതമംഗലം: കീരംപാറ പഞ്ചായത്തിന്‍റെ വനാതിർത്തി മേഖലയിലെ ജനങ്ങളുടെ ജീവന് ഭീഷണിയായും കൃഷികൾ നശിപ്പിച്ചും വിഹരിക്കുന്ന കാട്ടാനകൾ അടക്കമുള്ള വന്യജീവികളുടെ ശല്യം അവസാനിപ്പിക്കാൻ എംഎൽഎയും സർക്കാരും ശാശ്വത നടപടികളൊന്നും എടുക്കുന്നില്ലെന്ന് യുഡിഎഫ് ജില്ലാ കണ്‍വീനർ ഷിബു തെക്കുംപുറം. കഴിഞ്ഞ ഏതാനും വർഷമായി വനങ്ങൾ വളരെ കുറവുള്ള കീരംപാറ പഞ്ചായത്തിലെ ജനവാസ മേഖലകളിലാണ് വന്യജീവി ശല്യം നിരന്തരം അനുഭവപ്പെടുന്നത്. ചേലമല എന്ന സ്ഥലമാണ് കീരംപാറ പഞ്ചായത്തിലെ വനമായിട്ടുള്ളത്. മറ്റുള്ള മുഴുവൻ പ്രദേശങ്ങളും റബർ തോട്ടങ്ങളും പൈനാപ്പിൾ കൃഷിയിടങ്ങളും മറ്റ് വിവിധ കൃഷികളും ജനങ്ങൾ തിങ്ങിപ്പാർക്കുന്ന പ്രദേശങ്ങളുമാണ്. പെരിയാർ പുഴ നീന്തിക്കടന്നാണ് കാട്ടാനകൾ എത്തുന്നത്. കുട്ടന്പുഴ വനമേഖലകളിൽനിന്നും ഇഞ്ചത്തൊട്ടി, കാഞ്ഞിരവേലി ഭാഗങ്ങളിൽ നിന്നുമാണ് പുന്നേക്കാട് മേഖലയിലേക്ക് കാട്ടാനകൾ എത്തുന്നത്. കഴിഞ്ഞ ദിവസങ്ങളിൽ കുട്ടന്പുഴ മേഖലയിൽനിന്ന് എട്ടോളം ആനകളാണ് കൂട്ടമായെത്തിയത്. ഈ ആനകൾ അക്രമവാസനയുള്ളതുമാണ്. കാർ ആക്രമിക്കുകയും ആംബുലൻസിന്‍റെ പുറകെ ഓടിയെത്തിയതും ഈ കാട്ടാനക്കൂട്ടങ്ങളാണ്. സ്ഥിരമായി ആർആർടിയെ നിയമിക്കുകയും വനപാലകരും വാച്ചർമാരും നിരീക്ഷണം നടത്തി ആനക്കൂട്ടങ്ങളെ കാട്ടിലേക്ക് തിരിച്ചയയ്ക്കുകയും ഹാംഗിംഗ് ഫെൻസിംഗും കോണ്‍ക്രീറ്റ് വേലികളും ട്രഞ്ചുകളും നിർമിക്കുകയും വേണം. ഈ ആവശ്യങ്ങൾ യുഡിഎഫ് ജില്ലാ കമ്മിറ്റി ഏറ്റെടുത്ത് തുടർ സമരങ്ങൾ സംഘടിപ്പിക്കുമെന്നും ജില്ലാ കണ്‍വീനർ പറഞ്ഞു. യുഡിഎഫ് കീരംപാറ മണ്ഡലം ചെയർമാൻ രാജു പള്ളിത്താഴത്ത് അധ്യക്ഷത വഹിച്ചു.

കന്യാസ്ത്രീമാരുടെ അറസ്റ്റ് : കോതമംഗലത്ത് ആം ആദ്മി പ്രതിഷേധം

കോതമംഗലം: ഛത്തീസ്ഗഡിൽ കന്യാസ്ത്രീമാരെ ജാമ്യമില്ലാ വകുപ്പുകൾ ചുമത്തി ജയിലിലടച്ചതിൽ പ്രതിഷേധിച്ച് ആം ആദ്മി പാർട്ടി കോതമംഗലത്ത് പ്രകടനം സംഘടിപ്പിച്ചു. കെസിബിസി സംസ്ഥാന മദ്യവിരുദ്ധ ഏകോപന സമിതി മധ്യമേഖല പ്രസിഡന്‍റ് ജെയിസ് കോറന്പേൽ ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് വിജോയി പുളിക്കൽ അധ്യക്ഷത വഹിച്ചു. എകെസിസി രൂപത സെക്രട്ടറി ജിജി പുളിക്കൽ, ഗ്രീൻ വിഷൻ സംസ്ഥാന സെക്രട്ടറി ജോണ്‍സൻ കറുകപ്പിള്ളി, ആം ആദ്മി പാർട്ടി എറണാകുളം ജില്ലാ വൈസ് പ്രസിഡന്‍റ് കെ.എസ്. ഗോപിനാഥൻ, സെക്രട്ടറി റെജി ജോർജ്, ട്രഷറർ ലാലു മാത്യു, ജിജോ പൗലോസ്, എം.എ. രവി, ബാബു പിച്ചാട്ട്, ജിയോ സണ്ണി, സാബു കുരിശിങ്കൽ, സി.കെ. കുമാരൻ, കെ.സി. ബോസ്, സാജൻ വർഗീസ് എന്നിവർ പ്രസംഗിച്ചു. ബിജെപി രാജ്യത്ത് ഭയത്തിന്‍റെ അന്തരീക്ഷം വിതയ്‌ക്കാൻ ശ്രമിക്കുന്നു: എംഎൽഎ മൂവാറ്റുപുഴ: ബിജെപിക്കും സംഘപരിവാറിനും സ്തുതി പാടുന്നവർക്ക് കേക്കും മധുരവും നൽകിയും മറിച്ചു ബൈബിളിൽ എഴുതപ്പെട്ട വാക്യങ്ങൾ പോലെ പ്രവർത്തിക്കുകയും ജീവിക്കുകയും ചെയ്യുന്നവർക്ക് കൈവിലങ്ങും എന്നതാണ് ബിജെപി നയമെന്നും മാത്യു കുഴൽനാടൻ എംഎൽഎ. ഛത്തീസ്ഗഡിൽ കന്യാസ്ത്രീമാരെ അറസ്റ്റ് ചെയ്തതിൽ പ്രതിഷേധിച്ചു മൂവാറ്റുപുഴ ബ്ലോക്ക് കോണ്‍ഗ്രസ് കമ്മിറ്റിയും കെപിസിസി മൈനോരിറ്റി സെൽ നിയോജകമണ്ഡലം കമ്മിറ്റിയും ചേർന്ന് സംഘടിപ്പിച്ച സമര ജ്വാല ഉദ്ഘാടനം ചെയ്യുകയായിരുന്നു അദ്ദേഹം. രാജ്യത്ത് ഭയത്തിന്‍റെ അന്തരീക്ഷം വിതയ്‌ക്കാനാണ് നരേന്ദ്ര മോദിയും അമിത് ഷായും ശ്രമിക്കുന്നത്. തങ്ങൾക്കെതിരെ സംസാരിക്കുന്നവരെ ഭയപ്പെടുത്തി നിശബ്ദരാക്കുന്നതിനാണ് സംഘപരിവാർ ശ്രമം. ന്യൂനപക്ഷങ്ങളെ വേട്ടയാടാൻ തീവ്ര സംഘടനകൾക്ക് പ്രോത്സാഹനം നൽകുന്നത് ബിജെപി സർക്കാരാണ്. കേരളത്തിലെ ക്രൈസ്തവരോട് ബിജെപി കാണിക്കുന്നത് കാപട്യം നിറഞ്ഞ സ്നേഹമാണ്. കഴിഞ്ഞ 10 വർഷങ്ങളിൽ 4200 ഓളം ക്രൈസ്തവരാണ് രാജ്യത്തിന്‍റെ വിവിധ ഭാഗങ്ങളിൽ ആക്രമിക്കപ്പെട്ടത്. ക്രൈസ്തവരെ നിരന്തരം ഭയപ്പെടുത്തി അവരെ തങ്ങൾക്ക് അനുകൂലമാക്കാനാണ് ഇപ്പോൾ ബിജെപി ശ്രമിക്കുന്നതെന്നും മാത്യു കുഴൽനാടൻ പറഞ്ഞു. കോണ്‍ഗ്രസ് ബ്ലോക്ക് പ്രസിഡന്‍റ് സാബു ജോണ്‍ അധ്യക്ഷത വഹിച്ചു. കേരള കോണ്‍ഗ്രസ് പ്രതിഷേധ മാർച്ചും ധർണയും നടത്തി കോതമംഗലം: മനുഷ്യക്കടത്തും മതപരിവർത്തനവും ആരോപിച്ച് രണ്ട് കന്യാസ്ത്രീമാരെ ജയിലിലടച്ച കിരാത നടപടിക്കെതിരെയും മതന്യൂനപക്ഷങ്ങളുടെ നേരെ നടക്കുന്ന അതിക്രമങ്ങൾക്കുമെതിരെ കേരള കോണ്‍ഗ്രസ് കോതമംഗലം നിയോജകമണ്ഡലം കമ്മിറ്റിയുടെ നേതൃത്വത്തിൽ ടൗണിൽ വായ മൂടിക്കെട്ടി പ്രതിഷേധ മാർച്ചും പോസ്റ്റ് ഓഫീസിന് മുന്നിൽ ധർണയും നടത്തി. മുൻ മന്ത്രി ടി.യു. കുരുവിള ധർണ ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് എ.ടി. പൗലോസ് അധ്യക്ഷത വഹിച്ചു. ജില്ലാ പ്രസിഡന്‍റ് ഷിബു തെക്കുംപുറം മുഖ്യപ്രഭാഷണം നടത്തി. പ്രതിഷേധ സംഗമം സംഘടിപ്പിച്ചു കോതമംഗലം: ഛത്തീസ്ഗഡിൽ മലയാളികളായ സിസ്റ്റർ വന്ദന, സിസ്റ്റർ പ്രീതി എന്നീ കന്യാസ്ത്രീമാരെ മനുഷ്യക്കടത്തും മതപരിവർത്തനവും ആരോപിച്ച് ജാമ്യമില്ലാ വകുപ്പുകൾ ചുമത്തി ജയിലിൽ അടച്ചതിൽ കോതമംഗലം ബ്ലോക്ക് കോണ്‍ഗ്രസ് കമ്മിറ്റി പ്രതിഷേധ സംഗമം സംഘടിപ്പിച്ചു. കെപിസിസി അംഗം എ.ജി. ജോർജ് ഉദ്ഘാടനം നിർവഹിച്ചു. ബ്ലോക്ക് പ്രസിഡന്‍റ് ഷമീർ പനയ്‌ക്കൽ അധ്യക്ഷത വഹിച്ചു. പ്രതിഷേധ സമ്മേളനം പിറവം: ഛത്തീസ്ഗഡിൽ ജയിലിലടയ്ക്കപ്പെട്ട കന്യാസ്ത്രീമാരെ മോചിപ്പിക്കണമെന്ന് ആവശ്യപ്പെട്ടുകൊണ്ടും ഭരണകൂട ഭീകരതയ്ക്കെതിരെ പ്രതിഷേധിച്ചുകൊണ്ടും മലങ്കര കാത്തലിക് അസോസിയേഷൻ മൂവാറ്റുപുഴ ഭദ്രാസന സമിതിയും പിറവം മേഖലയിലെ വിവിധ ക്രൈസ്തവ കൂട്ടായ്മകളും സംയുക്തമായി പ്രതിഷേധ റാലിയും സമ്മേളനവും സംഘടിപ്പിച്ചു. പിറവം സെന്‍റ് മേരീസ് ബേത്‌‌‌ലഹേം മലങ്കര കത്തോലിക്ക പള്ളിയിൽനിന്ന് ആരംഭിച്ച പ്രതിഷേധ റാലി ടൗണിൽ അവസാനിച്ചു. തുടർന്ന് പ്രതിഷേധ സമ്മേളനത്തിന് എംസിഎ മൂവാറ്റുപുഴ ഭദ്രാസന പ്രസിഡന്‍റ് ജേക്കബ് ഞാറക്കാട് അധ്യക്ഷത വഹിച്ചു. മേഖലാ വികാരി ഫാ. ഐസക് കോച്ചേരി സമ്മേളനം ഉദ്ഘാടനം ചെയ്തു. നഗരസഭ ചെയർപേഴ്സൺ ജൂലി സാബു മുഖ്യപ്രഭാഷണം നടത്തി. കാവക്കാട് പള്ളിയിൽ പ്രതിഷേധിച്ചു കാവക്കാട്: ഛത്തീസ്ഗഡിൽ കന്യാസ്ത്രീമാരെ അറസ്റ്റ് ചെയ്തതിൽ പ്രതിഷേധിച്ച് കാവക്കാട് നിത്യസഹായമാത പള്ളിയിൽ പിതൃവേദിയുടെയും മറ്റ് സംഘടനകളുടെയും നേതൃത്വത്തിൽ പള്ളിയങ്കണത്തിൽ പ്രതിഷേധ യോഗം നടത്തി. ഫാ. ഫ്രാൻസിസ് ഇടക്കുടി ഉദ്ഘാടനം ചെയ്തു. വി.എം. ഫ്രാൻസീസ്, മാത്യൂസ് കളപ്പുര, പി.എം. ജോസ്, സിസ്റ്റർ ആൻസി വെട്ടുപാറയ്‌ക്കൽ, സിസ്റ്റർ ഡാലിയ, ഷിവാഗോ തോമസ്, പി.സി. ഷൈബി ജോസഫ് വടക്കേടത്ത്, റീത്ത ജോർജ്, ലിറ്റി റോണി, ജിൻസ ഡാലു, അന്നക്കുട്ടി മാത്യൂസ്, മോളി ജോബി, ജോയി പാലക്കുടി, ലിജോ നന്പ്യാട്ടേൽ, ബാബു ജോർജ് എന്നിവർ പ്രസംഗിച്ചു. സിപിഐ പ്രതിഷേധ ജ്വാല തെളിച്ചു മൂവാറ്റുപുഴ: ഛത്തീസ്ഗഡിൽ കന്യാസ്ത്രീമാരെ അറസ്റ്റ് ചെയ്ത സംഭവത്തിൽ പ്രതിഷേധിച്ച് സിപിഐ, എഐവൈഎഫ് കുര്യൻമല ബ്രാഞ്ച് കമ്മിറ്റികളുടെ നേതൃത്വത്തിൽ പ്രതിഷേധ ജ്വാല തെളിച്ചു. സിപിഐ ലോക്കൽ കമ്മിറ്റിയംഗം സി.എ. ഇഖ്ബാൽ ഉദ്ഘാടനം ചെയ്തു. ബ്രാഞ്ച് സെക്രട്ടറി സി.എൻ. ഷാനവാസ്, ടി.ബി. മാഹീൻ, കെ.ബി രവി എന്നിവർ പ്രസംഗിച്ചു. ധർണ നടത്തി കോതമംഗലം: കന്യാസ്ത്രീമാരെ അറസ്റ്റ് ചെയ്തതിൽ പ്രതിഷേധിച്ച് കേരള കോണ്‍ഗ്രസ്-ജേക്കബ് കോതമംഗലം നിയോജക മണ്ഡലം കമ്മിറ്റിയുടെ നേതൃത്വത്തിൽ ഹെഡ് പോസ്റ്റ് ഓഫീസിനു മുന്നിൽ ധർണ നടത്തി. സമരം ജില്ല പ്രസിഡന്‍റ് ഇ.എം. മൈക്കിൾ ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് മാത്യു ജോസഫ് അധ്യക്ഷത വഹിച്ചു. പ്രതിഷേധ സദസ് വാഴക്കുളം: ഛത്തീസ്ഗഡിൽ കന്യാസ്ത്രീമാരെ ജയിലിൽ അടച്ച നടപടിയിൽ പ്രതിഷേധിച്ച് മഞ്ഞള്ളൂർ ബ്ലോക്ക് കോണ്‍ഗ്രസ് കമ്മിറ്റിയുടെ ആഭിമുഖ്യത്തിൽ വാഴക്കുളത്ത് പ്രതിഷേധ സദസ് സംഘടിപ്പിച്ചു. ഡിസിസി ജനറൽ സെക്രട്ടറി പി.പി. എൽദോസ് ഉദ്ഘാടനം ചെയ്തു. മഞ്ഞള്ളൂർ ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് സുഭാഷ് കടയ്ക്കോട്ട് അധ്യക്ഷത വഹിച്ചു. പ്രതിഷേധ പ്രകടനവും യോഗവും മൂവാറ്റുപുഴ: കന്യാസ്ത്രീമാരെ ആക്രമിക്കുകയും തുറങ്കിലടക്കുകയും ചെയ്ത ആർഎസ്എസ് നടപടിയിൽ പ്രതിഷേധിച്ച് ഡിവൈഎഫ്ഐ മൂവാറ്റുപുഴ ബ്ലോക്ക് കമ്മിറ്റിയുടെ നേതൃത്വത്തിൽ പ്രതിഷേധ പ്രകടനവും യോഗവും സംഘടിപ്പിച്ചു. ആരക്കുഴ മൂഴിയിൽ സംഘടിപ്പിച്ച പ്രതിഷേധ യോഗം ഡിവൈഎഫ്ഐ ജില്ലാ സെക്രട്ടറിയേറ്റംഗം ഫെബിൻ പി. മൂസ ഉദ്ഘാടനം ചെയ്തു. ഡിവൈഎഫ്ഐ ബ്ലോക്ക് പ്രസിഡന്‍റ് കെ.കെ. അനീഷ് അധ്യക്ഷത വഹിച്ചു.

ആയുർവേദ മെഡിക്കൽ ക്യാന്പ്

മൂവാറ്റുപുഴ: ആരക്കുഴ പഞ്ചായത്തിന്‍റെയും ആയുർവേദ ആശുപത്രിയുടെയും ആറൂർ മീൻകുന്നം പബ്ലിക് ലൈബ്രറിയുടെയും സംയുക്താഭിമുഖ്യത്തിൽ മീൻകുന്നം സെന്‍റ് ജോസഫ്സ് പള്ളി പാരിഷ് ഹാളിൽ ആയുർവേദ മെഡിക്കൽ ക്യാന്പ് സംഘടിപ്പിച്ചു. പഞ്ചായത്ത് സ്ഥിരംസമിതി അധ്യക്ഷ സുനിത വിനോദ് ഉദ്ഘാടനം ചെയ്തു. സ്ഥിരംസമിതി അധ്യക്ഷൻ വിഷ്ണു ബാബു അധ്യക്ഷത വഹിച്ചു. ആരോഗ്യ പരിരക്ഷയെക്കുറിച്ചും ആയുർവേദ ചികിത്സാവിധിയെക്കുറിച്ചും ഡോ. ജയറാണി ക്ലാസ് നയിച്ചു. ജാൻസി മാത്യു, സാബു പൊതൂർ, ജിജു ഓണാട്ട്, എം.ടി എമ്മാനുവൽ, ജോഷി തോട്ടുപുറം, ഡേവിസ് പാലാട്ടി, എൽബി ജിബിൻ എന്നിവർ പ്രസംഗിച്ചു. തുടർന്ന് രോഗീപരിശോധനയും മരുന്ന് വിതരണവും നടന്നു.

സ്കൂളിലും വ്യാപാര സ്ഥാപനത്തിലും മോഷണം

കോതമംഗലം: സ്കൂളിലും വ്യാപാര സ്ഥാപനത്തിലും മോഷണം. രാമല്ലൂർ സേക്രഡ് ഹാർട്ട് എൽപി സ്കൂൾ, സമീപത്തുള്ള പിഎംഎ പച്ചക്കറിക്കട എന്നിവിടങ്ങളിലാണ് കഴിഞ്ഞ ദിവസം മോഷണം നടന്നത്. സ്കൂൾ ഓഫീസിന്‍റെ വാതിൽ തകർത്ത് അകത്ത് കടക്കാൻ ശ്രമിച്ചതിനാൽ വാതിലിന് കേടുപാടുകൾ സംഭവിച്ചിട്ടുണ്ട്. സമീപത്തുള്ള വ്യാപാര സ്ഥാപനത്തിന്‍റെ പൂട്ട് തകർത്ത് അകത്തു കടന്ന മോഷ്ടാവ് 2,000 രൂപയും നിരവധി സിഗരറ്റ് പാക്കറ്റുകളും കവർന്നു. എണ്ണയും മറ്റ് പലചരക്ക് സാധനങ്ങളും കൊണ്ടുപോകാനായി ചാക്കിലാക്കി വച്ചെങ്കിലും കൊണ്ടുപോകാൻ സാധിച്ചില്ല. പച്ചക്കറിക്കടയിലെ രണ്ടു സിസി ടിവി കാമറകളിൽ ഒന്ന് മോഷ്ടാവ് പേപ്പർ വച്ച് മറച്ചെങ്കിലും രണ്ടാമത്തേതിൽ മോഷ്ടാവിന്‍റെ ചിത്രം പതിഞ്ഞിട്ടുണ്ട്. മേഖലയിൽ മോഷണം കൂടുതലായി റിപ്പോർട്ട് ചെയ്യുന്ന സാഹചര്യത്തിൽ പോലീസ് പെട്രോളിംഗ് കൂടുതൽ കർശനമാക്കാൻ നിർദേശം നൽകിയതായി സ്ഥാപനങ്ങൾ സന്ദർശിച്ച ആന്‍റണി ജോണ്‍ എംഎൽഎ പറഞ്ഞു. സംസ്ഥാന യുവജന ക്ഷേമ അംഗം റോണി മാത്യു, സ്കൂൾ മുൻ പിടിഎ പ്രസിഡന്‍റ് സോണി മാത്യു എന്നിവരും എംഎൽഎയോടൊപ്പമുണ്ടായിരുന്നു.

നെല്ലാട് - കിഴക്കമ്പലം റോഡിൽ മഞ്ചനാടിൽ അപകടം പതിവ്

കോലഞ്ചേരി: തേക്കടി-എറണാകുളം സ്റ്റേറ്റ് ഹൈവേയുടെ ഭാഗമായ നെല്ലാട്-കിഴക്കമ്പലം റോഡിൽ മഞ്ചനാട് ഭാഗത്ത് അപകടം തുടർക്കഥയാകുന്നു. നീണ്ട 15 വർഷത്തെ കാത്തിരിപ്പിനൊടുവിൽ ബിഎംബിസി നിലവാരത്തിൽ ടാർ ചെയ്ത റോഡാണിത്. ഒരു വശം പെരിയാർവാലി കനാലിന്‍റെ മഞ്ചനാട് ഡിസ്ട്രിബ്യൂട്ടറിയുടെ മഞ്ചനാട് പാടശേഖരത്തിലേക്കുള്ള ടെയിൽ എൻഡ് കനാലും തെക്ക് വശത്ത് പൂർത്തീകരിക്കാത്ത ആഴം കൂടിയ ഓടയും സ്ഥിതി ചെയ്യുന്ന ഇവിടം റോഡ് അപകടകരമായ രീതിയിൽ ഉയർത്തി പണിതതിനാൽ രണ്ടു വലിയ വാഹനങ്ങൾ വന്നാൽ കാൽനട യാത്രക്കാർക്കോ സൈക്കിൾ യാത്രക്കാർക്കോ ഇരുചക്ര വാഹന യാത്രക്കാർക്കോ മാറാൻ പറ്റാത്ത സ്ഥിതിയാണ് നിലവിലുള്ളത്. ഒട്ടനവധി ബസുകൾ സർവീസ് നടത്തുന്ന ഈ റോഡിൽ ഉന്നത നിലവാരത്തിൽ ടാർ ചെയ്തതോടെ വാഹനത്തിരക്ക് കൂടിയിട്ടുണ്ട്. ഇതുവരെ ഇരുപതോളം അപകടങ്ങൾ നടന്നതായി നാട്ടുകാർ ചൂണ്ടിക്കാട്ടി. ദിനംപ്രതിയെന്നവണ്ണം ഇരുചക്ര വാഹനങ്ങൾ കനാലിൽ വീഴുന്നത് പതിവായി. ദുരന്തം വരുന്നതിന് മുമ്പായി പ്രശ്നപരിഹാരത്തിനായി മുഖ്യമന്ത്രി ഉൾപ്പെടെയുള്ളവർക്ക് നിവേദനം നൽകാനൊരുങ്ങുകയാണ് നാട്ടുകാർ.

40-ാം വയസിൽ മകനോടൊപ്പം ബിരുദ വിദ്യാർഥിനിയായി അമ്മയും

കോതമംഗലം: നാൽപ്പതാം വയസിൽ പതിനേഴുകാരനായ മകൻ വൈഷ്ണവ് കെ. ബിനുവിനൊപ്പം ബിരുദ വിദ്യാർഥിനിയായതിന്‍റെ സന്തോഷത്തിലാണ് അമ്മ പൂർണിമ. കോതമംഗലം മാർ അത്തനേഷ്യസ് കോളജാണ് അപൂർവതയ്ക്ക് സാക്ഷ്യം വഹിക്കുന്നത്. ബിരുദം നേടണമെന്ന ആഗ്രഹത്തിനു മുന്നിൽ പ്രായം പൂർണിമയ്‌ക്ക് ഒരു തടസമല്ലായിരുന്നു. കോളജിൽ പഠിക്കണമെന്ന മോഹം പൂവണിയുന്നത് മകനൊപ്പമാകുന്പോൾ സന്തോഷം ഇരട്ടിയാണ്. ഉച്ചയ്‌ക്കുള്ള ഇടവേളയിൽ മകന്‍റെ കൈ പിടിച്ചു കോളജ് വരാന്തയിലൂടെ നടക്കുന്നത് പൂർണിമയ്‌ക്ക് ഏറെ സന്തോഷമാണ്. ഫുട്ബോൾ കളിയെ പ്രണയിക്കുന്ന മകൻ വൈഷ്ണവ് കെ. ബിനു സ്പോർട്സ് ക്വാട്ടയിൽ പ്രവേശനം നേടിയ ബികോം ഒന്നാം വർഷ വിദ്യാർഥിയാണ്. ഇംഗ്ലീഷ്, മലയാളം സാഹിത്യത്തേയും വായനയേയും സ്നേഹിക്കുന്ന പൂർണിമ ഒന്നാം വർഷ ഇംഗ്ലീഷ് ബിരുദ വിദ്യാർഥിനിയാണ്. ന്യൂജെൻ തലമുറയുടെ കൂടെ പഠിക്കുന്നതിന്‍റെ ജാള്യതയൊന്നും പൂർണിമക്കില്ല. വീട്ടുകാര്യങ്ങളും അടുക്കളക്കാര്യങ്ങളും എല്ലാം ചെയ്ത് തീർത്ത് രണ്ടു മക്കളിൽ ഇളയവനും പോത്താനിക്കാട് സെന്‍റ് സേവ്യേഴ്സ് സ്കൂളിലെ ആറാം ക്ലാസ് വിദ്യാർഥിയുമായ വൈഭവ് ദേവിനെ സ്കൂളിൽ അയച്ചതിനു ശേഷമാണ് ഉച്ചഭക്ഷണവുമായി ഈ അമ്മയുടെയും മൂത്ത മകന്‍റെയും ഒരുമിച്ചുള്ള കോളജ് യാത്ര. വൈകിട്ടും ഒന്നിച്ചാണ് മടക്കം. മികച്ച ഫുട്ബോൾ കളിക്കാരനും ഇടുക്കി ജില്ലാ ഫുട്ബോൾ ടീമിലെ മുൻ അംഗവും കോതമംഗലം കെഎസ്ആർടിസി ഡിപ്പോയിലെ കണ്ടക്ടറുമാണ് ഭർത്താവ് പോത്താനിക്കാട് മാവുടി, കൊച്ചുപുരക്കൽ കെ.എസ്. ബിനു.

കുട്ടമ്പുഴ ആദിവാസി ഉന്നതിയിൽ കാട്ടാനക്കൂട്ടം വീട് തകര്‍ത്തു

കോതമംഗലം: കുട്ടമ്പുഴ വനാന്തര ആദിവാസി ഉന്നതിയിൽ വാരിയത്ത് കാട്ടാനകൂട്ടം വീട് തകര്‍ത്തു. വീട്ടുകാര്‍ രക്ഷപ്പെട്ടത് ഭാഗ്യത്തിന്. മാണിക്കുടിയില്‍ താമസിക്കുന്ന സുരേഷ് കുപ്പുസ്വാമിയുടെ വീടാണ് ആനകൂട്ടം തകര്‍ത്തത്. കഴിഞ്ഞ ദിവസം രാത്രിയിലാണ് സംഭവം. സുരേഷും ഭാര്യയും കുട്ടിയുമാണ് വീട്ടില്‍ താമസിച്ചിരുന്നത്. ആക്രമണത്തിന് ഏതാനും മിനിട്ട് മുമ്പ് വീടിന് സമീപം ആനയുടെ സാമീപ്യം മനസിലായ സുരേഷ് ഭാര്യയേയും കുട്ടിയേയും കൂട്ടി മറ്റൊരു വീട്ടില്‍ അഭയം തേടിയതുകൊണ്ടാണ് രക്ഷപ്പെട്ടത്. ഇവര്‍ വീട്ടില്‍നിന്ന് പോയി ഏതാനും മിനിട്ടുകള്‍ക്കകം വീട് ആനകൂട്ടം ചവിട്ടിമെതിച്ചാണ് കടന്നുപോയത്. വീട്ടുസാധനങ്ങളടക്കം നശിപ്പിച്ചിരുന്നു. മുളയും ഈറ്റയും ഉപയോഗിച്ച് നിര്‍മിച്ച വീടാകെ നിലംപത്തി. സമീപകാലത്ത് വാരിയം ഉന്നതിയില്‍ ആനശല്യം കൂടിയിരിക്കുകയാണ്. ഏതാനും മാസം മുമ്പ് മാണിക്കുടിയിലെ അങ്കണവാടിയുടെ ജനാലയും കമ്യൂണിറ്റി ഹാളിന്‍റെ ഷീറ്റും ഊരിലെ ഏക പലചരക്ക് കടയും ആനകൂട്ടം തകര്‍ത്തിരുന്നു.

ഫാക്കല്‍റ്റി ട്രെയിനിംഗ് പ്രോഗ്രാം നടത്തി

കൊച്ചി: സെന്‍റ് തെരേസാസ് കോളജ് അധ്യാപകര്‍ക്കായി കോളജ് പ്രൊട്ടക്ഷന്‍ ഗ്രൂപ്പിന്‍റെ ആഭിമുഖ്യത്തില്‍ ഫാക്കല്‍റ്റി ട്രെയിനിംഗ് പ്രോഗ്രാം സംഘടിപ്പിച്ചു. കോളജ് ആര്‍ട്‌സ് ഓഡിറ്റോറിയത്തില്‍ "ലഹരി രഹിത സമൂഹ സൃഷ്ടി' എന്ന വിഷയത്തില്‍ സെല്‍ഫ് ഫിനാന്‍സ് വിഭാഗം അധ്യാപകര്‍ക്കായി കൊച്ചി സിറ്റി അസിസ്റ്റന്‍റ് പോലീസ് കമ്മീഷണര്‍ പി.എച്ച്. ഇബ്രാഹിം, റഗുലര്‍ ഡിപ്പാര്‍ട്ട്‌മെന്‍റ് വിഭാഗം അധ്യാപകര്‍ക്കായി ട്രെയിനറും മെന്‍ററുമായ അഡ്വ. ചാര്‍ളി പോള്‍ എന്നിവര്‍ ക്ലാസുകള്‍ നയിച്ചു. പ്രിന്‍സിപ്പൽ ഡോ. അനു ജോസഫ് (ചെയര്‍മാന്‍, സിപിജി), ഡയറക്ടര്‍മാരായ സിസ്റ്റര്‍ ഫ്രാന്‍സിസ് ആന്‍, സിസ്റ്റര്‍ ടെസ, കോളജ് പ്രൊട്ടക്ഷന്‍ ഗ്രൂപ്പ് ഫാക്കല്‍റ്റി കോ-ഓര്‍ഡിനേറ്റര്‍ മേജര്‍ ഡോ. കെ.വി. സെലീന, സബ്. ലെഫ്. ലിസി ജോസ്, ഡോ. ആന്‍ തോമസ് കിരിയാന്തന്‍, ഡോ. ജെന്‍സി ട്രീസ, സോണിയ മരിയ ലോബോ, എലിസബത്ത് ഏബ്രഹാം, ഡോ. അന്നു രാജു, എസ്ഐ ബാബു പി. ജോണ്‍ എന്നിവര്‍ നേതൃത്വം നല്‍കി.

ഗതാഗത നിയന്ത്രണം

പറവൂർ : പൊതുമരാമത്ത് വകുപ്പ് പറവൂർ അസിസ്റ്റന്‍റ് എൻജിനീയറുടെ കാര്യാലയത്തിന്‍റെ പരിധിയിലുള്ള വരാപ്പുഴ ഫെറി റോഡിൽ (ചെട്ടി ഭാഗം മുതൽ മണ്ണം തുരുത്ത് ഫെറി വരെയുള്ള ഭാഗം) അറ്റകുറ്റപ്പണികൾ ഇന്ന് ആരംഭിക്കുന്നതാണ്. പ്രവൃത്തി പൂർത്തീകരിക്കുന്നത് വരെ ഈ റോഡിൽ കൂടിയുള്ള ഗതാഗതം ഭാഗികമായി നിയന്ത്രണം ഉണ്ടായിരിക്കും. തൃപ്പൂണിത്തുറ: തൃപ്പൂണിത്തുറ മിനി സിവിൽ സ്റ്റേഷന്‍റെ മുൻവശത്ത് അപകടകരമായി നിൽക്കുന്ന മരത്തിന്റെ ശിഖരങ്ങൾ ഇന്നും നാളെയുമായി രാവിലെ ആറു മുതൽ മുറിച്ചു നീക്കം ചെയ്യുന്നതിനാൽ ഈ വഴിയുള്ള ഗതാഗതത്തിന് നിയന്ത്രണമുണ്ടാകുമെന്നും സിവിൽ സ്റ്റേഷൻ വളപ്പിലേയ്ക്ക് വാഹനങ്ങൾക്ക് പ്രവേശനം അനുവദിക്കുന്നതല്ലെന്നും നടമ വില്ലേജ് ഓഫീസർ അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]