ADVERTISEMENT

ADVERTISEMENT

ജനറൽ ആശുപത്രിയിൽ മരുന്നുകൾ നൽകി

കൊച്ചി: ജീവൻരക്ഷാ ചാരിറ്റി ആൻഡ് സർവീസ് സൊസൈറ്റി എറണാകുളം ജനറൽ ആശുപത്രി കാൻസർ വാർഡിൽ സൗജന്യ മരുന്ന്, ധനസഹായ വിതരണം നടത്തി.

അര ലക്ഷം രൂപയുടെ ജീവൻ രക്ഷാ മരുന്നുകൾ പരിസ്ഥിതി പ്രവർത്തകൻ സി.ആർ. നീലകണ്ഠൻ , കാൻസർ വിഭാഗം മേധാവി ഡോ. ബാലമുരളീകൃഷ്ണയ്ക്കു കൈമാറി. സൊസൈറ്റി പ്രസിഡന്‍റ് അഡ്വ. ജോർജ് ജോസഫ് മാപ്പിളപ്പറമ്പിൽ അധ്യക്ഷത വഹിച്ചു.

പി.എസ്. അരവിന്ദാക്ഷൻ നായർ, ഡോ. കെ. എസ്. മായ, ഡോ. ബാലമുരളീകൃഷ്ണ, ഡോ. രഘുത്തമൻ എന്നിവർ പ്രസംഗിച്ചു. 80 ഡയാലിസിസ് രോഗികൾക്ക് ധനസഹായ വിതരണവും ഉണ്ടായിരുന്നു.

ADVERTISEMENT

കൊച്ചി ഫിഷറീസ് ഹാര്‍ബറിലെ കൂലി തര്‍ക്കത്തിന് താത്കാലിക പരിഹാരം

നോക്ക് കൂലി പരാതി ജില്ലാ ലേബര്‍ ഓഫീസര്‍ അന്വേഷിക്കും മട്ടാഞ്ചേരി: കൊച്ചി ഫിഷറീസ് ഹാര്‍ബറിലെ മീന്‍ ഇറക്ക് വിഭാഗം തൊഴിലാളികളുടെ കൂലി തര്‍ക്കത്തെ തുടര്‍ന്ന് ഉടലെടുത്ത പ്രതിസന്ധിക്ക് താല്‍ക്കാലിക പരിഹാരം. ബുധനാഴ്ച ജില്ലാ ലേബര്‍ ഓഫീസര്‍ എം.എം ജോവിന്‍ വിളിച്ചുചേര്‍ത്ത അനുരഞ്ജന യോഗത്തിലാണ് താല്‍ക്കാലിക പരിഹാരമായത്. ഇതോടെ ഹാര്‍ബര്‍ പ്രവര്‍ത്തനം ഇന്നലെ സാധാരണ പോലെ നടന്നു. തര്‍ക്ക വിഷയത്തിലിരിക്കുന്ന വേതനത്തിന്‍റെ 62.5 ശതമാനം ആറാം തീയതി നല്‍കാന്‍ യോഗത്തില്‍ ധാരണയായി. തൊഴിലുടമകളായ ബോട്ടുടമകള്‍ ഉന്നയിച്ച നോക്ക് കൂലി പ്രശ്‌നം ജില്ലാ ലേബര്‍ ഓഫീസര്‍ അന്വേഷിച്ച് തീരുമാനമെടുക്കും. അതേസമയം കഴിഞ്ഞ 14 വര്‍ഷമായി രണ്ട് ശതമാനമാണ് വേതനം ലഭിച്ചു കൊണ്ടിരിക്കുന്നതെന്നും ഓഗസ്റ്റ് 23 മുതല്‍ സെപ്റ്റംബര്‍ 29 വരെയുള്ള വേതനത്തിന്‍റെ 62.5 ശതമാനം നല്‍കാമെന്ന് തൊഴിലുടമ സമ്മതിച്ചതിന്‍റെ അടിസ്ഥാനത്തിലാണ് തൊഴില്‍ പുനരാരംഭിക്കുന്നതെന്നും തൊഴിലുടമ ഉന്നയിച്ച നോക്ക് കൂലി സമ്പ്രദായം അംഗീകരിക്കുന്നില്ലെന്നും തൊഴിലാളി യൂണിയന്‍ നേതാക്കള്‍ യോഗത്തില്‍ വ്യക്തമാക്കി. സിഐടിയു യൂണിയന്‍ വാദം ബോട്ടുടമകള്‍ അംഗീകരിക്കില്ലെങ്കിലും ലേബര്‍ ഓഫീസറുടെ അഭ്യര്‍ഥന മാനിക്കുകയാണെന്നും ബോട്ടുടമകളും യോഗത്തില്‍ അറിയിച്ചു. യോഗത്തില്‍ ബോട്ടുടമകള്‍ക്കു വേണ്ടി സിബി പുന്നൂസ്, എ.പി.റോയ് എന്നിവരും തൊഴിലാളി യൂണിയന് വേണ്ടി കെ.എം റിയാദ്, ബെനഡിക്റ്റ് ഫെര്‍ണാണ്ടസ്, വി.എം യൂസഫ്, ആര്‍.ഐ. അക്ബര്‍, പി.കെ. റഷിമോന്‍ എന്നിവരും പങ്കെടുത്തു. അടുത്ത ചര്‍ച്ച പത്തിന് ഉച്ചക്ക് മൂന്നിന് നടക്കും. വിഷയത്തില്‍ മന്ത്രി പി.രാജീവ്, ഹൈബി ഈഡന്‍ എംപി എന്നിവര്‍ ഇടപെട്ടതായാണ് വിവരം. കൂലിത്തര്‍ക്കത്തെ തുടര്‍ന്ന് പേഴ്‌സിന്‍ നെറ്റ് ബോട്ടിലെ മീന്‍ ഇറക്കാന്‍ തൊഴിലാളികള്‍ തയാറാകാതിരുന്നത് വീണ്ടും പ്രശ്‌നത്തിന് കാരണമായത്. ഹാര്‍ബര്‍ പ്രശ്‌നത്തില്‍ പേഴ്‌സിന്‍ നെറ്റ് ബോട്ട് തൊഴിലാളി യൂണിയന്‍ ഹാര്‍ബര്‍ വളയല്‍ ഉള്‍പ്പെടെയുള്ള സമരം തീരുമാനിച്ച സാഹചര്യത്തില്‍ വിഷയം കൂടുതല്‍ സങ്കീര്‍ണമാകുമെന്ന ആശങ്കയാണ് അവധി ദിനമായിട്ടു കൂടി ജില്ലാ ലേബര്‍ ഓഫിസര്‍ അനുരഞ്ജന യോഗം വിളിച്ചു ചേര്‍ത്തത്. ഇന്നലെ കടലില്‍ പോയ ബോട്ടുകള്‍ക്ക് മത്സ്യം ലഭിക്കുകയും ചെയ്തു.

ക്ഷേത്ര ഭണ്ഡാരങ്ങൾ തകർത്ത് മോഷണം

കളമശേരി: സൗത്ത് കളമശേരി ശാന്തിനഗറിൽ ചുള്ളിക്കാവ് ദുർഗ ഭഗവതി ക്ഷേത്രത്തിലെ ഭണ്ഡാരങ്ങൾ തകർത്ത് മോഷണം. പ്രധാന ശ്രീകോവിലിന് ചുറ്റുമുള്ള ഉപ ക്ഷേത്രങ്ങളുടെ മുന്നിലായി വച്ചിരുന്ന അഞ്ച് ചെറിയ സ്റ്റീൽ ഭണ്ഡാരങ്ങളുടെ പൂട്ട് തകർത്താണ് പണം കവർന്നത്. കൂടാതെ പ്രധാന ഗോപുരത്തിന്‍റെ ഭണ്ഡാരവും തകർത്തിട്ടുണ്ട്. സംഭവത്തിൽ 6,000 ത്തിൽ പരം രൂപ നഷ്ടമായതായി ക്ഷേത്ര ഭാരവാഹികൾ പോലീസിൽ നൽകിയ പരാതിയിൽ പറയുന്നു. ബുധനാഴ്ച രാത്രി 9.30 വരെ വിജയദശമി ഒരുക്കങ്ങളുമായി ബന്ധപ്പെട്ട് ആളുകൾ ക്ഷേത്രത്തിൽ ഉണ്ടായിരുന്നു. അർധരാത്രി പന്ത്രണ്ടിനുശേഷം ഒരാൾ ക്ഷേത്രത്തിൽ കടക്കുന്നത് സിസിടിവി ദൃശ്യങ്ങളിലുണ്ട്. ചെറിയ കമ്പിവടി ഉപയോഗിച്ചാണ് സ്റ്റീൽ ഭണ്ഡാരങ്ങളുടെ പൂട്ട് തകർത്തിട്ടുള്ളത്. ഇന്നലെ പുലർച്ചെ അഞ്ചിന് ക്ഷേത്ര നട തുറക്കാൻ എത്തിയ ജീവനക്കാരനാണ് മോഷണം നടന്നത് കണ്ടത്. രണ്ടു ദിവസം മുമ്പ് ഭണ്ഡാരങ്ങൾ തുറന്ന് തുക എടുത്തിരുന്നു. അഞ്ചു വർഷം മുമ്പ്, ക്ഷേത്രത്തിന്‍റെ ഓഫീസിൽ നിന്ന് ശമ്പളം കൊടുക്കാനായി വച്ചിരുന്ന 45,000 രൂപ മോഷണം പോയിരുന്നു. ഈ സംഭവത്തിൽ പ്രതികളെ ഇനിയും പിടികൂടിയിട്ടില്ല. കളമശേരി പോലീസ് സ്ഥലത്തെത്തി വിവരങ്ങൾ ശേഖരിച്ചു.

നഗരമധ്യത്തിൽ അമ്പമ്പോ...പെരുമ്പാമ്പ് വലയിലാക്കി വനം വകുപ്പ്

കൊച്ചി: നഗരത്തിലെ മരത്തിൽ കണ്ടെത്തിയ കൂറ്റൻ പെരുമ്പാമ്പിനെ പിടികൂടി. എറണാകുളത്തപ്പന്‍ അമ്പലത്തിന് സമീപത്തുള്ള എസ്‌സിഎസ്ടി മെന്‍സ് ഹോസ്റ്റല്‍ കോമ്പൗണ്ടിലെ മരത്തിനു മുകളിലാണ് പെരുമ്പാമ്പിനെ കണ്ടത്. റോഡിലൂടെ നടന്നു പോയവരാണ് ബുധനാഴ്ച രാവിലെ ആദ്യം പാമ്പിനെ കണ്ടത്. ഇവര്‍ സമീപത്തുള്ള കടക്കാരെയും വനംവകുപ്പ് ഉദ്യോഗസ്ഥരെയും വിവരം അറിയിക്കുകയായിരുന്നു. ഫയർഫോഴ്സ് വെളളം ചീറ്റിച്ച് പാമ്പിനെ നിലത്തിറക്കാന്‍ ആദ്യം ശ്രമിച്ചെങ്കിലും താഴെ വീണ് പരിക്കേൽക്കുമോയെന്ന ആശങ്കയിൽ ഈ നീക്കം ഉപേക്ഷിക്കുകയായിരുന്നു. ഇതിനിടെ, രാത്രി 7.30 ഓടെ പാമ്പ് മരത്തിന്‍റെ മറ്റൊരു ചില്ലയിലേക്ക് നീങ്ങവെ, തനിയെ നിലത്തേക്ക് വീണു. ഇതോടെ വനംവകുപ്പ് ജീവനക്കാർ പിടികൂടുകയായിരുന്നു. പെരുമ്പാമ്പിനെ കോടനാട് വനമേഖലയില്‍ വിടുമെന്ന് അവർ അറിയിച്ചു. അതേസമയം പെരുമ്പാമ്പ് എങ്ങനെ ഇവിടെ എത്തി എന്നതില്‍ വ്യക്തത വന്നിട്ടില്ല.

വികസന സദസ്: ജില്ലാതല ഉദ്ഘാടനം നാളെ ഏലൂരില്‍

കൊച്ചി: തദ്ദേശ സ്ഥാപനങ്ങളുടെ വികസന പ്രവര്‍ത്തനങ്ങള്‍ ജനങ്ങള്‍ക്ക് മുന്നില്‍ അവതരിപ്പിക്കുന്ന വികസന സദസിന് ജില്ലയില്‍ നാളെ തുടക്കമാകും.പാതാളം മുനിസിപ്പല്‍ ടൗണ്‍ ഹാളില്‍ രാവിലെ പത്തിന് നടക്കുന്ന വികസന സദസിന്‍റെ ജില്ലാതല ഉദ്ഘാടനം മന്ത്രി പി. രാജീവ് നിര്‍വഹിക്കും. ചടങ്ങില്‍ ഏലൂര്‍ നഗരസഭാ ചെയര്‍മാന്‍ എ.ഡി. സുജില്‍ അധ്യക്ഷത വഹിക്കും. ജില്ലാ കളക്ടര്‍ ജി. പ്രിയങ്ക മുഖ്യാതിഥിയാകും. തദ്ദേശ സ്ഥാപനങ്ങളും സംസ്ഥാന സര്‍ക്കാരും ഇതുവരെ കൈവരിച്ച നേട്ടങ്ങളും മുന്നേറ്റങ്ങളും സംബന്ധിച്ച് ജനങ്ങളെ ബോധവാന്മാരാക്കുന്നതിനൊപ്പം തദ്ദേശ സ്ഥാപനങ്ങളുടെ ഭാവി വികസനത്തിനായുള്ള ആശയങ്ങളും നിര്‍ദേശങ്ങളും പൊതുജനങ്ങളില്‍നിന്ന് സ്വീകരിക്കും. ഇതിനായി ഓപ്പണ്‍ ഫോറം, സംഗ്രഹ ചര്‍ച്ച എന്നിവ സംഘടിപ്പിക്കും. ചര്‍ച്ചയില്‍ ഉരുത്തിരിയുന്ന അഭിപ്രായങ്ങള്‍ ക്രോഡീകരിച്ച് സംസ്ഥാനത്തിന്‍റെ പൊതുവായ വികസന പ്രവര്‍ത്തനങ്ങളില്‍ പരിഗണിക്കുകയാണ് ലക്ഷ്യം. 2020-25 കാലഘട്ടത്തില്‍ നഗരസഭ നടത്തിയ വികസന നേട്ടങ്ങള്‍ ചടങ്ങില്‍ അവതരിപ്പിക്കും. നഗരസഭയുടെ പ്രവര്‍ത്തനങ്ങളില്‍ ശ്രദ്ധേയമായ പങ്കു വഹിച്ച ഹരിതകര്‍മസേന, കുടുംബശ്രീ അംഗങ്ങള്‍, ആശാവര്‍ക്കര്‍മാര്‍ എന്നിവരെ ചടങ്ങില്‍ ആദരിക്കും.

സ്കൂട്ടർ മോഷ്ടാവിനെ പിടികൂടി

തൃപ്പൂണിത്തുറ: കിഴക്കേക്കോട്ടയിൽനിന്ന് സ്കൂട്ടർ മോഷ്ടിച്ച കേസിൽ പറവൂർ വഴിക്കുളങ്ങര പൂത്താംമ്പള്ളിയിൽ ലിജേഷ് ജോർജി(39)നെ ഹിൽപാലസ് പോലീസ് അറസ്റ്റ് ചെയ്തു. കഴിഞ്ഞ 29ന് രാത്രി 9.50ഓടെയാണ് സ്കൂട്ടർ മോഷണം പോയത്. കിഴക്കേക്കോട്ട സ്റ്റാച്യൂ റോഡിൽ ഹാർമണി വീഡിയോ ഷോപ്പിനു മുന്നിൽ പാർക്ക് ചെയ്തിരുന്ന തെക്കുംഭാഗം തൈക്കാട്ടുപറമ്പിൽ സ്മിതയുടെ സ്കൂട്ടറാണ് പ്രതി മോഷ്ടിച്ചത്.

കൊച്ചി സ്റ്റേഡിയത്തില്‍ മെസിയെ വരവേല്‍ക്കാന്‍ ഒരുക്കങ്ങൾ തുടങ്ങി

കൊച്ചി: മെസിയും അര്‍ജന്‍റീന ദേശീയ ടീമും സൗഹൃദ മത്സരത്തിനായി കൊച്ചിയിലെത്തുന്പോൾ വേദിയാകുന്ന കൊച്ചി അന്താരാഷ്ട്ര സ്‌റ്റേഡിയത്തില്‍ നവീകരണ പ്രവര്‍ത്തനങ്ങള്‍ ആരംഭിച്ചു. കളിക്കളം നവീകരിക്കുന്ന പ്രവര്‍ത്തനങ്ങളാണ് ഇപ്പോള്‍ ആരംഭിച്ചിട്ടുള്ളത്. അന്താരാഷ്ട്ര ഫുട്‌ബോള്‍ മത്സരങ്ങള്‍ക്ക് അനുയോജ്യമായ ടര്‍ഫ് ആയതിനാല്‍ പുതിയ ടര്‍ഫ് നിര്‍മിക്കേണ്ട ആവശ്യം ഇവിടെയില്ല. പക്ഷെ പുല്‍ത്തട്ട് മെച്ചപ്പെടുത്തേണ്ടതുണ്ട്. നിലവിലുള്ള പുല്ല് പരമാവധി മുറിച്ചുമാറ്റുന്ന സീറോ കട്ടിംഗ് ജോലികളാണ് ആരംഭിച്ചിട്ടുള്ളത്. ശേഷം വളവും ആവശ്യമായ പോഷക ഘടകങ്ങളും നല്‍കി പുല്ല് വളര്‍ത്തും. പലഘട്ടങ്ങളിലായി ഇത്തരത്തില്‍ വളര്‍ത്തിയും മുറിച്ചുമാണ് മത്സരത്തിന് അനുയോജ്യമായ പുല്‍ത്തട്ട് നിര്‍മിച്ചെടുക്കുക. ഏറ്റവും ഒടുവില്‍ 25 മുതല്‍ 30 മില്ലിമീറ്റര്‍ ഉയരത്തില്‍ പുല്ല് മുറിച്ച് മത്സരത്തിനനുയോജ്യമായ ടര്‍ഫ് ആക്കി മാറ്റും. ഒരു മാസമെടുക്കും ഈ പ്രവര്‍ത്തനങ്ങള്‍ പൂര്‍ത്തിയാകാന്‍. ഇതിനിടെ ഗാലറിയുടെയും ഡ്രസ്സിംഗ് റൂമുകളുടേയും ടോയ്‌ലറ്റ് മുറികളുടെയും നവീകരണ പ്രവര്‍ത്തനങ്ങള്‍ നടക്കും. മൂന്ന് നിലകളിലായുള്ള ഗാലറിയിലെ മുഴുവന്‍ കസേരകളും മാറ്റി സ്ഥാപിക്കും. അടിയന്തിര ഘട്ടമുണ്ടായാല്‍ ചുരുങ്ങിയ സമയത്തിനുള്ളില്‍ ആളുകള്‍ക്ക് പുറത്ത് കടക്കാന്‍ തടസമില്ലാത്ത വിധമാകും പുതിയ കസേരകള്‍ സ്ഥാപിക്കുക. നിലവില്‍ 70,000 കാണികള്‍ക്കുള്ള ഇരിപ്പിടങ്ങളുണ്ട്. മാറ്റി സ്ഥാപിക്കുമ്പോള്‍ കസേരകളുടെ എണ്ണം 50,000 മായി കുറയ്ക്കുന്നതിനും ആലോചനകള്‍ നടക്കുന്നുണ്ട്. നാലു ഡ്രസിംഗ് റൂമുകളാണ് സ്‌റ്റേഡിയത്തിലുള്ളത്. ഓരോ ടീമിനും രണ്ടു റൂമുകള്‍ വീതം നല്‍കും. ഡ്രസിംഗ് റൂമുകള്‍ കുറേക്കൂടി മെച്ചപ്പെടുത്തണമെന്ന് കഴിഞ്ഞ ദിവസം സ്റ്റേഡിയത്തിലെ സൗകര്യങ്ങള്‍ വിലയിരുത്താനെത്തിയ അര്‍ജന്‍റീന ടീം മാനേജര്‍ ഹെക്ടര്‍ ഡാനിയേല്‍ കബ്രേര നിര്‍ദേശിച്ചിരുന്നു. കൂടാതെ വിവിഐപി ലോഞ്ചും കൂടുതല്‍ സൗകര്യങ്ങളോടെ മെച്ചപ്പെടുത്തും. ഫ്‌ളെഡ് ലിറ്റുകള്‍ മാറ്റി സ്ഥാപിക്കുന്ന പണികളും പുരോഗമിക്കുകയാണ്. നവംബര്‍ ആദ്യവാരത്തില്‍ തന്നെ എല്ലാ പണികളും പൂര്‍ത്തീകരിക്കാനാണ് സംഘാടകരുടെയും സര്‍ക്കാരിന്‍റെയും ശ്രമം. സൗഹൃദ മത്സരത്തിനെത്തുന്ന ലോക ചാമ്പ്യന്മാര്‍ക്ക് എതിരാളി ഓസ്‌ട്രേലിയ തന്നെയാകുമെന്ന് സ്ഥരീകരണം വന്നിട്ടുണ്ട്. ഇക്കാര്യം മുഖ്യമന്ത്രി ഔദ്യോഗികമായി പ്രഖ്യാപിക്കുക മാത്രമേ ബാക്കിയുള്ളൂ. ഫിഫ റാങ്കിംഗില്‍ 25-ാം സ്ഥാനത്തുള്ള ഓസ്‌ട്രേലിയ മിന്നും ഫോമിലാണ്. 15 പോയിന്‍റുകള്‍ നഷ്ടമായി ഇപ്പോള്‍ മൂന്നാമതാണ് അര്‍ജന്‍റീനയുടെ സ്ഥാനം. ഖത്തര്‍ ലോകകപ്പിനു ശേഷം 2023 ജൂണില്‍ ഇരുവരും ഏറ്റുമുട്ടിയ സൗഹൃദ മത്സരത്തില്‍ 2-0 ന് അര്‍ജന്‍റീന ജയിച്ചിരുന്നു.

വള്ളത്തിനു നേരെ ചരക്ക് കപ്പൽ : വന്‍ ദുരന്തം ഒഴിവായി

ഫോര്‍ട്ടുകൊച്ചി: മത്സ്യബന്ധന വള്ളത്തിന് നേരെ ചരക്ക് കപ്പലെത്തിയെങ്കിലും കൂട്ടിയിടിക്കാത്തതിനാൽ വൻ ദുരന്തംഒഴിവായി. വള്ളത്തിൽ 45 തൊഴിലാളികൾ ഉണ്ടായിരുന്നു. കൊച്ചിയില്‍ നിന്ന് മത്സ്യബന്ധനത്തിന് പോയ ആലപ്പുഴ പള്ളിത്തോട് സ്വദേശി സ്റ്റാലിന്‍ പുത്തന്‍വീട്ടിലിന്‍റെ ഉടമസ്ഥതയിലുള്ള പ്രത്യാശ എന്ന വള്ളത്തിനു നേരെയാണ് എംഎസ്‌സി സില്‍വര്‍ 2 എന്ന കപ്പല്‍ എത്തിയത്. ബുധനാഴ്ച വൈകുന്നേരം അഞ്ചോടെ കൊച്ചിയില്‍ നിന്ന് തെക്കുപടിഞ്ഞാറ് മാറി 9.54 നോര്‍ത്തില്‍ (കണ്ണമാലി പടിഞ്ഞാറ് 7.5 നോട്ടിക്കല്‍ മൈൽ ദൂരെ) വല കോരി നില്‍ക്കുന്ന സമയത്താണ് കപ്പല്‍ വള്ളത്തിനടുത്തേക്ക് എത്തിയതെന്ന് തൊഴിലാളികള്‍ പറഞ്ഞു. ഹോണ്‍ മുഴക്കിയും വയര്‍ലെസിലൂടെ സന്ദേശം നല്‍കിയും അപകടമുന്നറിയിപ്പ് കൈമാറിയെങ്കിലും കപ്പല്‍ ക്യാപ്റ്റന്‍ അത് ചെവിക്കൊണ്ടില്ലെന്ന് മത്സ്യത്തൊഴിലാളികള്‍ ആരോപിച്ചു. മറ്റു വള്ളങ്ങള്‍ കൂടി വന്ന് ഹോണ്‍ മുഴക്കുകയും തൊഴിലാളികള്‍ ഒച്ചവയ്ക്കുകയും ചെയ്തു. ഈ സമയം ചില മത്സ്യത്തൊഴിലാളികള്‍ പ്രാണരക്ഷാര്‍ഥം വെള്ളത്തിലേക്ക് ചാടി. മത്സ്യത്തൊഴിലാളികളുടെ‍ ബഹളം കേട്ടാണ് കപ്പല്‍ നിര്‍ത്തിയത്. ഇതിനിടെ വള്ളത്തിന്‍റെ പിന്‍ഭാഗത്ത് കപ്പല്‍ ഇടിക്കുകയും ചെയ്തു. തുടര്‍ന്ന് കപ്പല്‍ പിന്നിലേക്ക് എടുത്താണ് യാത്ര തുടര്‍ന്നത്. വള്ളത്തിന്‍റെ അമരത്ത് കേടുപാടുകള്‍ സംഭവിച്ചിട്ടുണ്ട്. 10 ലക്ഷത്തോളം രൂപയുടെ നാശനഷ്ടമുണ്ടായതായി തൊഴിലാളികള്‍ പറഞ്ഞു. സംഭവത്തില്‍ കോസ്റ്റല്‍ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. പേരുദോഷവുമായി എംഎസ്‌സി മെഡിറ്ററേനിയന്‍ ഷിപ്പിംഗ് കമ്പനിയുടെ എംഎസ്‌സി എല്‍സ 3 എന്ന കപ്പല്‍ കൊച്ചി തീരത്ത് അപകടത്തിൽപ്പെട്ട് ഏതാനും മാസങ്ങള്‍ പിന്നിടുന്നതിനിടെയാണ് ഇതേ കമ്പനിയുടെ മറ്റൊരു കപ്പല്‍ അപകട ഭീഷണിയായത്. എല്‍സ ത്രീ മുങ്ങിയതിനെ തുടര്‍ന്ന് സംസ്ഥാനത്തിനുണ്ടായ നഷ്ടങ്ങള്‍ക്ക് പരാഹാരം ആവശ്യപ്പെട്ട് കോടതിയില്‍ നടപടികള്‍ പുരോഗമിക്കവെയാണ് വീണ്ടും മറ്റൊരു സംഭവം. ക്യാപ്റ്റന്‍ മദ്യപിച്ചിരുന്നു എന്ന് മത്സ്യത്തൊഴിലാളികള്‍ ആരോപിച്ചു. സമീപത്തുണ്ടായിരുന്ന ബോട്ടുകള്‍ ഹോണ്‍ മുഴക്കുകയും ഒച്ച ഉണ്ടാക്കുകയും ചെയ്തെങ്കിലും ക്യാപ്റ്റന്‍ കപ്പലിന്‍റെ ഗതിതിരിച്ചു വിടാനോ അപകടം സംഭവിക്കുന്നതിന് മുന്‍പ് തന്നെ നിര്‍ത്താനോ ശ്രമിച്ചില്ലെന്നും ആക്ഷേപമുണ്ട്. ട്രാഫിക് കൂടിയതും അപകടകാരണം വിഴിഞ്ഞം പോര്‍ട്ട് വന്നതോടെ കേരള തീരത്ത് കപ്പല്‍ ചാലുകളിലൂടെയുള്ള സഞ്ചാരം കൂടിയത് തുടർച്ചയായി ഉണ്ടാകുന്ന കപ്പല്‍ അപകടങ്ങളുടെ ഒരു കാരണമായി വിദഗ്ധര്‍ ചൂണ്ടിക്കാട്ടുന്നു. 2012ല്‍ എന്‍‌റിക്കാലെക്‌സി വെടിവയ്പ് സംഭവത്തിന് ശേഷം എട്ട് കപ്പലപകടങ്ങളാണ് കേരളാ തീരത്ത് ഉണ്ടായത്. ഇതിൽ ആകെ 15 തൊഴിലാളികള്‍ മരണമടയുകയും ചെയ്തിട്ടുണ്ട്. ട്രാഫിക് വര്‍ധിച്ചതോടെ നിയമങ്ങളെല്ലാം ലംഘിച്ചാണ് ഭൂരിപക്ഷം കപ്പലുകളും യാത്ര ചെയ്യുന്നതെന്ന് മത്സ്യത്തൊഴിലാളി സംഘടനാ ഭാരവാഹികള്‍ ആരോപിച്ചു. കപ്പല്‍ തടയേണ്ടി വരും: സ്വതന്ത്ര മത്സ്യത്തൊഴിലാളി ഫെഡറേഷന്‍ കൊച്ചി: എംഎസി എല്‍സ 3 കപ്പല്‍ മത്സ്യബന്ധന മേഖലയില്‍ മുങ്ങിയതിന്‍റെ ദുരന്തഫലങ്ങള്‍ മത്സ്യത്തൊഴിലാളികള്‍ നേരിടുന്നതിനിടെയാണ് അതേ കമ്പനിയുടെ മറ്റൊരു കപ്പല്‍ അപകടഭീഷണിയായതെന്ന് കേരള സ്വതന്ത്ര മത്സ്യത്തൊഴിലാളി ഫെഡറേഷന്‍ സംസ്ഥാന പ്രസിഡന്‍റ് ജാക്‌സണ്‍ പൊള്ളയില്‍, സംസ്ഥാന സെക്രട്ടറി അബ്ദുല്‍ റാസിക് എന്നിവര്‍ പറഞ്ഞു. കേന്ദ്ര ഷിപ്പിംഗ് മന്ത്രാലയവും പോര്‍ട്ട് അധികാരികളും കോസ്റ്റല്‍ പോലീസും നടപടി സ്വീകരിച്ചില്ലെങ്കില്‍ പോര്‍ട്ടിലെത്തുന്ന കപ്പലുകള്‍ മത്സ്യത്തൊഴിലാളികള്‍ക്ക് തടയേണ്ടി വരുമെന്നും, പ്രത്യാശ വള്ളത്തിനുണ്ടായ നഷ്ടം കപ്പല്‍ കമ്പനി നല്‍കണമെന്നും ഇവർ ആവശ്യപ്പെട്ടു. മത്സ്യത്തൊഴിലാളികളുടെ സുരക്ഷ ഉറപ്പാക്കണം: ചാള്‍സ് ജോര്‍ജ് കൊച്ചി: കടലില്‍ മത്സ്യബന്ധനത്തില്‍ ഏര്‍പ്പെടുന്ന തൊഴിലാളികളുടെ ജീവനും സ്വത്തിനും സുരക്ഷ ഉറപ്പാക്കണമെന്ന് കേരള മത്സ്യത്തൊഴിലാളി ഐക്യവേദി സംസ്ഥാന പ്രസിഡന്‍റ് ചാള്‍സ് ജോര്‍ജ്. കേരളതീരത്ത് കപ്പലിടിച്ചുള്ള അപകടങ്ങള്‍ കൂടി വരികയാണ്. പലപ്പോഴും ഇടിച്ച കപ്പലുകള്‍ നിര്‍ത്താതെ പോകുന്നു. ഇതു സംബന്ധമായ ഇന്‍റര്‍നാഷണല്‍ മാരിടൈം ഓര്‍ഗനൈസേഷന്‍ പെരുമാറ്റ ചട്ടം കപ്പലുകള്‍ പാലിക്കുന്നില്ല. ഇപ്പോള്‍ ഇടിച്ച എംഎസിയും പൂര്‍ണമായ നിയമലംഘനമാണ് നടത്തിയിരിക്കുന്നത്. നിയമലംഘനം നടത്തിയ ക്യാപ്റ്റനെ അറസ്റ്റ് ചെയ്യണം. മത്സ്യത്തൊഴിലാളികള്‍ക്ക് അര്‍ഹമായ നഷ്ടപരിഹാരം നല്‍കണം. മത്സ്യത്തൊഴിലാളികളുടെ തൊഴിലിനും തൊഴിലിടത്തിനും ആവശ്യമായ സുരക്ഷ ഉറപ്പാക്കാന്‍ കേന്ദ്രസംസ്ഥാന സര്‍ക്കാരുകള്‍ നടപടി സ്വീകരിക്കണമെന്നും ചാള്‍സ് ജോര്‍ജ് ആവശ്യപ്പെട്ടു.

കന്നി 20 പെരുന്നാൾ : കോതമംഗലത്തേക്ക് വിശ്വാസികളുടെ പ്രവാഹം

കോതമംഗലം: കോതമംഗലം മാര്‍ത്തോമാ ചെറിയപള്ളിയിലെ കന്നി 20 പെരുന്നാളില്‍ പങ്കെടുക്കാനും പരിശുദ്ധ യല്‍ദോ മാര്‍ ബസേലിയോസ് ബാവയുടെ കബറിടം വണങ്ങി അനുഗ്രഹം പ്രാപിക്കുന്നതിനും വിശ്വാസികളുടെ നിലയ്ക്കാത്ത പ്രവാഹം. ഇന്നലെ രാവിലെ മുതല്‍തന്നെ മാർത്തോമ പള്ളിയിലേക്ക് വിശ്വാസികളുടെ ഒഴുക്ക് തുടങ്ങിയിരുന്നു. ഇടയ്ക്കിടെ പെയ്ത മഴയെ അവഗണിച്ചും അണമുറിയാതെ കാൽനട തീർഥാടകർ എത്തിക്കൊണ്ടിരുന്നു. രാവിലെ വിശുദ്ധ മൂന്നിന്‍മേല്‍ കുര്‍ബാനയ്ക്ക് മാത്യൂസ് മാര്‍ അന്തീമോസ് മെത്രാപ്പോലീത്ത മുഖ്യകാര്‍മികത്വം വഹിച്ചു. സന്ധ്യാ നമസ്കാരത്തിന് ശ്രേഷ്ഠ കാതോലിക്ക ബസേലിയോസ് ജോസഫ് ബാവ മുഖ്യകാര്‍മികത്വം വഹിച്ചു. വിശ്വാസികള്‍ക്ക് പള്ളിയില്‍ പ്രവേശിക്കുന്നതിനും കബറിടം വണങ്ങുന്നതിനും ആവശ്യമായ ക്രമീകരണങ്ങള്‍ ഉറപ്പാക്കിയിരുന്നു. വോളന്‍റിയര്‍മാരും പോലീസും ഇതിനായി സജീവമായി ഉണ്ടായിരുന്നു. ടൗണില്‍ ഗതാഗത ക്രമീകരണവും ഏര്‍പ്പെടുത്തിയിരുന്നു. രാവിലെ മുതല്‍തന്നെ നേര്‍ച്ചക്കഞ്ഞി വിതരണംചെയ്തു. വൈകുന്നേരത്തോട എല്ലാ മേഖലകളില്‍നിന്നുമുള്ള കാല്‍നട തീര്‍ഥാടകർ പള്ളിയിലെത്തി. പതിവുപോലെ കബറിങ്കല്‍ സമര്‍പ്പിക്കുന്നതിനുള്ള ഏലയ്ക്കാ മാലയുമായാണ് ഹൈറേഞ്ചിൽ നിന്നുള്ള തീര്‍ഥാടകര്‍ എത്തിയത്. ഏലിയാസ് മാര്‍ അത്തനാസിയോസ് മെത്രാപ്പോലീത്തയുടെ നേതൃത്വത്തിലെത്തിയ തീര്‍ഥാടക സംഘത്തിന് കോഴിപ്പിള്ളി കവലയില്‍ സ്വീകരണം നല്‍കി. ചെറിയപള്ളിയിലെ വൈദികരും മാനേജിംഗ് കമ്മറ്റി അംഗങ്ങളും ഡീന്‍ കുര്യാക്കോസ് എംപി ഉള്‍പ്പെടെയുള്ള ജനപ്രതിനിധികളും സ്വീകരണത്തില്‍ പങ്കെടുത്തു. പടിഞ്ഞാറന്‍ മേഖലയില്‍നിന്നുള്ള തീര്‍ഥാടക സംഘത്തിന് മൂവാറ്റുപുഴ കവലയിലും വടക്കന്‍ മേഖലാസംഘത്തിന് ഹൈറേഞ്ച് കവലയിലും പോത്താനിക്കാട് മേഖലയില്‍ നിന്നുളള തീര്‍ഥാടകര്‍ക്ക് ചക്കാലക്കുടി ചാപ്പലിലും സ്വീകരണം നല്‍കി. രാത്രി പത്തിന് നഗരം ചുറ്റിയുള്ള പ്രദക്ഷിണം ആരംഭിച്ചു. മർത്തമറിയം കത്തീഡ്രൽ വലിയ പള്ളി, സെന്‍റ് ജോർജ് കത്തീഡ്രൽ, മലയിൻകീഴിലുളള കുരിശടി, എംബിഎംഎം ആശുപത്രി, ടൗൺ കുരിശ് എന്നിവിടങ്ങളിൽ കൂടി മാർ ബേസിൽ ഹയർ സെക്കൻഡറി സ്കൂൾ റോഡ് വഴി പള്ളിയിൽ എത്തിച്ചേർന്നു. ആശീർവാദത്തിനുശേഷം ആകാശ വിസ്മയവും ഉണ്ടായിരുന്നു. ഇന്ന് ഇന്ന് രാവിലെ 5.30 നുള്ള കുര്‍ബാനയ്ക്ക് ഏബ്രഹാം മാര്‍ സേവേറിയോസ് മെത്രാപ്പോലീത്തയും ഏഴിനുള്ള കുര്‍ബാനയ്ക്ക് തോമസ് മാര്‍ തിമോത്തിയോസ് മെത്രാപ്പോലീത്തയും 8.30 നുള്ള കുര്‍ബാനയ്ക്ക് ശ്രേഷ്ഠ കാതോലിക്ക ബസേലിയോസ് ജോസഫ് ബാവയും കാര്‍മികത്വം വഹിക്കും. 10.30 ന് നേര്‍ച്ചസദ്യ ആരംഭിക്കും. ഉച്ചകഴിഞ്ഞ് രണ്ടിന് ചക്കാലക്കുടി ചാപ്പലിലേക്ക് പ്രദക്ഷിണം. നാളെയാണ് പെരുന്നാൾ സമാപിക്കുന്നത്. സമീപ പ്രദേശത്തെ ഗജവീരൻമാർ പള്ളിയുടെ പൂമുഖത്തെത്തി പരിശുദ്ധ ബാവയുടെ കബർ വണങ്ങുന്നതും പ്രത്യേകതയാണ്.

ചാരിറ്റബിൾ ട്രസ്റ്റിന് പിന്തുണയുമായി വോളിബോൾ ക്ലബ്

വാഴക്കുളം: വാഴക്കുളം ചാരിറ്റബിൾ ട്രസ്റ്റിന്‍റെ ആഭിമുഖ്യത്തിലുള്ള സൗജന്യ ഡയാലിസിസ് സെന്‍ററിന് പിന്തുണയുമായി സെന്‍റ് ജോർജ് വോളിബോൾ ക്ലബ്ബും. ഡയാലിസിസ് സെന്‍ററിന്‍റെ പ്രവർത്തനങ്ങൾക്കായി ഒന്നര ലക്ഷം രൂപയുടെ ചെക്ക് ക്ലബ് പ്രസിഡന്‍റും അംഗങ്ങളും ചേർന്ന് വാഴക്കുളം ചാരിറ്റബിൾ ട്രസ്റ്റ് ചെയർമാൻ സിജു സെബാസ്റ്റ്യനും ഭാരവാഹികൾക്കും കൈമാറി. എല്ലാവർഷവും ഒരു ലക്ഷം രൂപ ക്ലബംഗങ്ങളുടെ നേതൃത്വത്തിൽ ട്രസ്റ്റിനു നൽകുമെന്ന് പ്രസിഡന്‍റ് തോമസ് വർഗീസ് അറിയിച്ചു. ക്ലബ് ജനറൽ സെക്രട്ടറി ജേക്കബ് ജോസഫ്, വൈസ് പ്രസിഡന്‍റ് ജോജോ വർഗീസ്, ട്രഷറർ പി.എൻ. ജയകുമാർ, ക്ലബ് കമ്മറ്റി അംഗങ്ങളായ ജോസ് വർഗീസ്, ജിജി മണവാളൻ, ഡോണി ജോർജ്, ട്രസ്റ്റ്‌ ഭാരവാഹികളായ ജോണി മെതിപ്പാറ, പ്രഫ. ജോസ് അഗസ്റ്റിൻ, സാജു ടി. ജോസ് തുടങ്ങിയവർ പങ്കെടുത്തു.

സെന്‍ട്രല്‍ റീജന്‍ കലോത്സവ്

മൂവാറ്റുപുഴ: ഐഡിയല്‍ അസോസിയേഷന്‍ ഫോര്‍ മൈനോരിറ്റി എഡ്യൂക്കേഷന്‍ സെന്‍ട്രല്‍ റീജന്‍ കലോത്സവ് ഇന്നും നാളെയുമായി പേഴയ്ക്കാപ്പിള്ളി അറഫ പബ്ലിക് സ്‌കൂളില്‍ നടക്കുമെന്ന് ഭാരവാഹികള്‍ പത്രസമ്മേളനത്തില്‍ പറഞ്ഞു. എറണാകുളം, ഇടുക്കി ജില്ലകളിലെ 21 സ്‌കൂളുകളിൽനിന്ന് മൂന്ന് മുതല്‍ 10 വരെ ക്ലാസുകളിലുള്ള 900 വിദ്യാർഥികൾ പങ്കെടുക്കും. 130 ഇനങ്ങളില്‍ രാവിലെ ഒമ്പത് മുതല്‍ വൈകുന്നേരം ഏഴുവരെയാണ് മത്സരങ്ങള്‍. ഇന്ന് രാവിലെ ഒമ്പതിന് ഡീന്‍ കുര്യാക്കോസ് എംപി കലോത്സവം ഉദ്ഘാടനം ചെയ്യും. അല്‍ അസര്‍ ഗ്രൂപ്പ് ഓഫ് ഇന്‍സ്റ്റിറ്റ്യൂട്ട് ചെയര്‍മാന്‍ കെ.എം. മൂസ അധ്യക്ഷത വഹിക്കും. സ്‌കൂള്‍ മാനേജര്‍ കെ.ഇ. ഷാജി മുഖ്യ പ്രഭാഷണം നടത്തും. നാളെ വൈകുന്നേരം ഏഴിന് നടക്കുന്ന സമ്മാനദാന ചടങ്ങില്‍ പ്രിന്‍സിപ്പല്‍ കൗണ്‍സില്‍ ചെയര്‍മാന്‍ ഡോ. കെ.എം. അബ്ദുല്‍ റഷീദ് അധ്യക്ഷത വഹിക്കും. മാത്യു കുഴല്‍നാടന്‍ എംഎല്‍എ മുഖ്യാതിഥിയായിരിക്കും. പത്രസമ്മേളനത്തില്‍ കെ.എം. അബ്ദുള്‍ റഷീദ്, വി.എ. ജുനൈദ് സഖാഫി, നൗഷാദ് കാസിം, കെ.ഇ. ഷാജി, ഫെബിന ജമാല്‍, അന്‍ഷാദ് മജീദ് എന്നിവര്‍ പങ്കെടുത്തു.

ഗാന്ധി ജയന്തി : കുട്ടമ്പുഴയിൽ ശുചിത്വ സഭ നടത്തി

കോതമംഗലം : കുട്ടമ്പുഴ പഞ്ചായത്ത്, ഹരിതകർമസേനാംഗങ്ങൾ, തൊഴിലുറപ്പ് തൊഴിലാളികൾ, കുടുംബശ്രീ അംഗങ്ങൾ എന്നിവരുടെ നേതൃത്വത്തിൽ ‘ഗാന്ധിസ്മൃതി’ ശുചിത്വ സഭ നടത്തി. പഞ്ചായത്ത് പ്രസിഡന്‍റ് കാന്തി വെള്ളക്കയ്യൻ ഉദ്ഘാടനം ചെയ്തു. സ്ഥിരംസമിതി ചെയർമാൻ കെ.എ. സിബി അധ്യക്ഷത വഹിച്ചു. പഞ്ചായത്തംഗങ്ങളായ ഡെയ്സി ജോയി, ആലീസ് സിബി, ഗ്രാമസേവകൻ ജിതിൻ മങ്ങാട്ട് എന്നിവർ പങ്കെടുത്തു. ജനപ്രതിനിധികളുടെ നേതൃത്വത്തിൽ കുട്ടമ്പുഴ ടൗൺ ശുചീകരിക്കുകയും പൂച്ചെടികൾ നടുകയും ചെയ്തു.

പല്ലാരിമംഗലത്ത് നവീകരിച്ച ഗവ. ഹോമിയോ ആശുപത്രി ഉദ്ഘാടനം ചെയ്തു

പോത്താനിക്കാട്: പല്ലാരിമംഗലം പഞ്ചായത്തില്‍ നവീകരിച്ച ഗവ. ഹോമിയോ ആശുപത്രിയുടേയും യോഗാഹാളിന്‍റേയും ഉദ്ഘാടനം ആന്‍റണി ജോണ്‍ എംഎല്‍എ നിര്‍വഹിച്ചു. പഞ്ചായത്ത് പ്രസിഡന്‍റ് ഖദീജ മുഹമ്മദ് അധ്യക്ഷത വഹിച്ചു. വൈസ് പ്രസിഡന്‍റ് ഒ.ഇ. അബ്ബാസ് മുഖ്യപ്രഭാഷണം നടത്തി. പഞ്ചായത്തംഗങ്ങളായ റിയാസ് തുരുത്തേല്‍, സീനത്ത് മൈതീന്‍, എ.എ. രമണന്‍, മെഡിക്കല്‍ ഓഫീസര്‍ ഡോ. ജെസി തോമസ്, എം.എം. ബക്കര്‍ എന്നിവര്‍ പ്രസംഗിച്ചു.

നേര്യമംഗലത്ത് ജില്ലാ കൃഷിത്തോട്ടത്തിൽ നിർമിച്ച റസ്റ്ററന്‍റ് മന്ദിരം ഉദ്ഘാടനം ഇന്ന്

കോതമംഗലം: എറണാകുളം ജില്ലാ പഞ്ചായത്ത് 1.20 കോടി രൂപ ചെലവഴിച്ച് നേര്യമംഗലം ജില്ലാ കൃഷിത്തോട്ടത്തിൽ നിർമിച്ച റസ്റ്ററന്‍റ് മന്ദിരം ഇന്ന് രാവിലെ ഒൻപതിന് പ്രതിപക്ഷ നേതാവ് വി.ഡി. സതീശൻ ഉദ്ഘാടനം ചെയ്യും. 250 ഏക്കറിലധികം വിസ്തൃതിയുള്ള സംസ്ഥാനത്തെ ഏറ്റവും മികച്ച ഫാമുകളിലൊന്നായ നേര്യമംഗലം ഫാമിൽ ജില്ലാ പഞ്ചായത്ത് നടപ്പിലാക്കുന്ന ഫാം ടൂറിസം പദ്ധതികളുടെ ഭാഗമായാണ് പൊതുജനങ്ങൾക്കും വിനോദ സഞ്ചാരികൾക്കും ഏറെ സഹായകരമാകുന്ന നിലയിൽ റസ്റ്ററന്‍റ് മന്ദിരം നിർമിച്ചിട്ടുളളത്. 8000 ചതുരശ്ര അടി വിസ്തീർണമുള്ള റസ്റ്ററന്‍റിൽ ഒരേ സമയം നൂറിലധികം പേർക്ക് ഭക്ഷണം കഴിക്കുന്നതിനുള്ള സൗകര്യമുണ്ട്. റസ്റ്ററന്‍റിനോടു ചേർന്ന് ആവശ്യമായ പാർക്കിംഗ് സംവിധാനവും ഫാമിൽ ഒരുക്കിയിട്ടുണ്ട്. ആന്‍റണി ജോൺ എംഎൽ എ അധ്യക്ഷത വഹിക്കും. ഡീൻ കുര്യാക്കോസ് എംപി മുഖ്യാതിഥിയായിരിക്കും. ത്രിതല പഞ്ചായത്ത് ജനപ്രതിനിധികൾ, കൃഷി വകുപ്പ് ഉദ്യോഗസ്ഥർ, ഫാം കൗൺസിൽ അംഗങ്ങൾ എന്നിവർ പങ്കെടുക്കും.

വലിയ ജപമാലയുമായി മാറാടി സെന്‍റ് ജോർജ് പള്ളി കെസിവൈഎം

മൂവാറ്റുപുഴ: ജപമാല മാസാചരണം ഓർമപ്പെടുത്തി മാറാടി സെന്‍റ് ജോർജ് പള്ളിയിലെ യുവദീപ്തി കെസിവൈഎം യൂണിറ്റ്. പള്ളിയുടെ മുൻഭാഗത്ത് അറുപതടി ചുറ്റളവുള്ള ജപമാല നിർമിച്ച് സ്ഥാപിച്ചിരിക്കുകയാണ് ഇവർ. വലിയ പ്ലാസ്റ്റിക് പന്തുകൾ ജപമാല രൂപത്തിൽ കോർത്ത് ഉള്ളിൽ ബൾബുകൾ സ്ഥാപിച്ചാണ് ജപമാല നിർമിച്ചിരിക്കുന്നത്. വികാരി ഫാ. ജയിംസ് ചൂരത്തൊട്ടിയുടെ നിർദേശാനുസരണം കെസിവൈഎം യൂണിറ്റ് പ്രസിഡന്‍റ് ഡിന്‍റോമോൻ ബേബി, സെക്രട്ടറി അതുൽ ബെന്നി, ട്രഷറർ ആൽബർട്ട് ബെന്നി, കമ്മറ്റിയംഗങ്ങളായ ആൻസൺ ജോസഫ്, ബിനിറ്റ് പി. നോബിൾ, ജേക്കബ് സാന്‍റി, ജോയെൽ ബൈജു, ഡൊമിനിക് തോമസ് തുടങ്ങിയവരുടെ നേതൃത്വത്തിൽ കെസിവൈഎം അംഗങ്ങളുടെ സഹകരണത്തോടെയാണ് ജപമാല നിർമാണം നടത്തിയത്.

മൂവാറ്റുപുഴ എംസിഎസ് ആശുപത്രിയില്‍ കാര്‍ഡിയോളജി വിഭാഗം സജ്ജമായി

മൂവാറ്റുപുഴ: മൂവാറ്റുപുഴ എംസിഎസ് ആശുപത്രിയില്‍ കാര്‍ഡിയോളജി വിഭാഗം പ്രവര്‍ത്തന സജ്ജമായതായി ആശുപത്രി ഭാരവാഹികള്‍ പത്രസമ്മേളനത്തില്‍ അറിയിച്ചു. ഇന്ന് വൈകുന്നേരം 2.30ന് ഹാര്‍ട്ട് ഇന്‍സ്റ്റിറ്റ്യൂട്ടിന്‍റെയും അനന്ത നേത്രാലയത്തിന്‍റെയും ഉദ്ഘാടനം നിയമസഭാ സ്പീക്കര്‍ എ.എന്‍. ഷംസീര്‍ നിര്‍വഹിക്കും. ഒപി ബ്ലോക്ക് ഉദ്ഘാടനം നഗരസഭാധ്യക്ഷന്‍ പി.പി. എല്‍ദോസ് നിര്‍വഹിക്കും. കേരള ബാങ്ക് പ്രസിഡന്‍റ് ഗോപി കോട്ടമുറിക്കല്‍ മുഖ്യപ്രഭാഷണം നടത്തും. അനന്ത നേത്രാലയ ആറ് മുതല്‍ പ്രവര്‍ത്തനം ആരംഭിക്കും. ഉദ്ഘാടനത്തോടനുബന്ധിച്ച് ആദ്യം പേര് നല്‍കുന്ന 25 പേര്‍ക്ക് സൗജന്യ ഹൃദ്രോഗ പരിശോധന നടത്തും. എംസിഎസ് ആശുപത്രി ചെയര്‍മാന്‍ പി.എം. ഇസ്മായില്‍, സെക്രട്ടറി എം.എ. സഹീര്‍, സിഇഒ ലിമി ഏബ്രഹാം, കാര്‍ഡിയോളജി വിഭാഗം ഡയറക്ടര്‍ എം. ടിന്‍റുമോന്‍ എന്നിവര്‍ പത്രസമ്മേളനത്തില്‍ പങ്കെടുത്തു.

വേങ്ങച്ചുവടിൽ മൂല്യവര്‍ധിത ഉത്പാദന കേന്ദ്രം ഉദ്ഘാടനം ഇന്ന്

വാഴക്കുളം: കര്‍ഷകരെ സഹായിക്കുന്നതിനായി വേങ്ങച്ചുവടിൽ ആരംഭിച്ച മൂല്യവര്‍ധിത ഉത്പാദന കേന്ദ്രത്തിന്‍റെ ഉദ്ഘാടനം ഇന്ന്. വേങ്ങച്ചുവട് ബ്ലോക്ക് പഞ്ചായത്ത് കെട്ടിടത്തിന്‍റെ ഹാളില്‍ വൈകുന്നേരം നാലിന് പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം നിര്‍വഹിക്കും. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ അധ്യക്ഷത വഹിക്കും. ഡീന്‍ കുര്യാക്കോസ് എംപി ഉത്പന്ന കേന്ദ്രത്തിന്‍റെ സ്വിച്ച് ഓണ്‍ നിര്‍വഹിക്കും. മാത്യു കുഴല്‍നാടന്‍ എംഎല്‍എ ആദ്യ വില്പന നിര്‍വഹിക്കും. ജില്ലാ പഞ്ചായത്ത് വൈസ് പ്രസിഡന്‍റ് എല്‍സി ജോര്‍ജ് ലോഗോ പ്രകാശനം ചെയ്യും. ജില്ലാ പഞ്ചായത്തംഗം ഉല്ലാസ് തോമസ്, ജില്ലാ വ്യവസായ ഓഫീസര്‍ പി.എ. നജീബ്, ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണന്‍, മഞ്ഞള്ളൂര്‍ പഞ്ചായത്ത് പ്രസിഡന്‍റ് ആന്‍സി ജോസ്, മുന്‍ എംഎല്‍എമാരായ ജോസഫ് വാഴയ്ക്കന്‍, എല്‍ദോ ഏബ്രഹാം, ബാബു പോള്‍, ജോണി നെല്ലൂര്‍, മൂവാറ്റുപുഴ പൈനാപ്പിള്‍ ഫാര്‍മേഴ്‌സ് പ്രൊഡ്യൂസര്‍ കമ്പനി ചെയര്‍മാന്‍ ജിബിന്‍ റാത്തപ്പിള്ളില്‍ തുടങ്ങിയവര്‍ പങ്കെടുക്കും. ജില്ലാ പഞ്ചായത്ത്, മൂവാറ്റുപുഴ ബ്ലോക്ക് പഞ്ചായത്ത്, മൂവാറ്റുപുഴ പൈനാപ്പിള്‍ ഫാര്‍മേഴ്‌സ് പ്രൊഡ്യൂസര്‍ കമ്പനി, ജില്ലാ വ്യവസായ കേന്ദ്രം, കൃഷി വകുപ്പ് തുടങ്ങിയവയുടെ ആഭിമുഖ്യത്തില്‍ 85 ലക്ഷം രൂപ മുടക്കിലാണ് മൂല്യവര്‍ധിത ഉത്പന്ന കേന്ദ്രം ആരംഭിക്കുന്നത്. ജില്ലയിലെ പ്രധാന കാര്‍ഷികോത്പന്നങ്ങളായ പൈനാപ്പിള്‍, മാമ്പഴം, ചക്ക, നേന്ത്രക്കായ, പപ്പായ, മരച്ചീനി തുടങ്ങിയവ വിളവെടുപ്പു കാലത്ത് കര്‍ഷകരില്‍ നിന്ന് സംഭരിച്ച് മൂല്യവര്‍ധിത ഉത്പന്നങ്ങളാക്കി വിപണനം നടത്തുകയാണ് ലക്ഷ്യം.

പട്ടിമറ്റം മണ്ഡലം കോൺഗ്രസിന്‍റെ ഭവന സന്ദർശന യാത്ര ഇന്ന് സമാപിക്കും

കിഴക്കമ്പലം: പട്ടിമറ്റം മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ നടത്തിയ ഭവന സന്ദർശന യാത്രയുടെ സമാപനവും വിവിധ കാരുണ്യ പദ്ധതികളുടെ ഉദ്ഘാടനവും ഇന്ന് നടക്കും. വൈകിട്ട് ആറിന് പട്ടിമറ്റത്ത് നടക്കുന്ന പരിപാടി പ്രതിപക്ഷ നേതാവ് വി.ഡി. സതീശൻ ഉദ്ഘാടനം ചെയ്യും. മണ്ഡലം കോൺഗ്രസ് കമ്മിറ്റി പ്രസിഡന്‍റ് ഹനീഫ കുഴുപ്പിള്ളി അധ്യക്ഷത വഹിക്കും. പരിപാടിയോടനുബന്ധിച്ച് ബെന്നി ബഹനാൻ എംപി പാലിയേറ്റീവ് കെയർ യൂണിറ്റിന്‍റെ ഉദ്ഘാടനവും ലോഗോ പ്രകാശനവും നിർവഹിക്കും. തെരഞ്ഞെടുക്കപ്പെട്ടവർക്കുള്ള സൗജന്യ മരുന്ന് വിതരണ കൂപ്പൺ ഉദ്ഘാടനം കെപിസിസി വൈസ് പ്രസിഡന്‍റ് വി.പി. സജീന്ദ്രൻ നിർവഹിക്കും. അകാലത്തിൽ മരണമടഞ്ഞ സുനിൽ നായർക്കുള്ള ഒരു ലക്ഷം രൂപയുടെ ചെക്ക് കൈമാറ്റം ഡിസിസി പ്രസിഡന്‍റ് മുഹമ്മദ് ഷിയാസ് നിർവഹിക്കും. അകാലത്തിൽ മരണമടഞ്ഞവരുടെ ആശ്രിതർക്കുള്ള പെൻഷൻ സ്‌കീം ഉദ്ഘാടനം കെപിസിസി സെക്രട്ടറി അബ്ദുൾ മുത്തലിബ് നിർവഹിക്കും. വി.പി. സജീന്ദ്രൻ എഴുതിയ ലേഖനം കാലടി സംസ്കൃത സർവകലാശാലയിൽ പാഠ്യ വിഷയമാക്കിയതിൽ സജീന്ദ്രനെ പട്ടിമറ്റം മണ്ഡലം കോൺഗ്രസ് കമ്മിറ്റി ആദരിക്കും. തെക്കേ കവലയിൽ നിന്ന് ആരംഭിക്കുന്ന പ്രകടനം പട്ടിമറ്റത്ത് സമാപിക്കും. തുടർന്ന് മ്യൂസിക് നൈറ്റും അരങ്ങേറും.

ഡ്രൈഡേയിൽ മദ്യവില്പന; ഒരാള്‍ അറസ്റ്റില്‍

പോത്താനിക്കാട്: ഡ്രൈഡേയിൽ അനധികൃത മദ്യവില്പന നടത്തിയയാളെ എക്സൈസ് പിടികൂടി.പോത്താനിക്കാട് ഞരളക്കാട്ട് സനലിനെ കോതമംഗലം എക്സൈസ് സംഘമാണ് അറസ്റ്റ് ചെയ്തത്. ഇയാളുടെ കൈവശമുണ്ടായിരുന്ന 25 ലിറ്റര്‍ ഇന്ത്യന്‍ നിര്‍മിത വിദേശ മദ്യം എക്സൈസ് കണ്ടെടുത്തു. സാധാരണ ദിവസങ്ങളില്‍ മദ്യം വാങ്ങി ശേഖരിക്കുകയും ഡ്രൈഡേയിൽ ഉയര്‍ന്ന വിലയില്‍ മദ്യം വില്പന നടത്തുകയുമായിരുന്നു പ്രതി ചെയ്തിരുന്നതെന്ന് എക്സൈസ് പറഞ്ഞു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

കന്നി-20 പെരുന്നാൾ : ‘എന്‍റെ നാട് ’മെഡിക്കൽ കെയർ, ഫസ്റ്റ് എയ്ഡ് യൂണിറ്റുകൾ സജ്ജം

കോതമംഗലം : മാർത്തോമാ ചെറിയ പള്ളി കന്നി - 20 പെരുന്നാളിനോടനുബന്ധിച്ച് എന്‍റെ നാട് ജനകീയ കൂട്ടായ്മയുടെ നേതൃത്വത്തിൽ ആരംഭിച്ച മെഡിക്കൽ കെയർ യൂണിറ്റിന്‍റെയും തീർഥാടകർ എത്തുന്ന വിവിധ മേഖലകളിൽ സേവനം നല്കുന്ന ഫസ്റ്റ് എയ്ഡ് മൊബൈൽ യൂണിറ്റിന്‍റെയും ഉദ്ഘാടനം ചെറിയ പള്ളി വികാരി ഫാ. ജോസ് മാത്യു തച്ചേത്ത്കുടി നിർവഹിച്ചു. കവളങ്ങാട്, കുട്ടമ്പുഴ, കോട്ടപ്പടി, കീരമ്പാറ, പിണ്ടിമന, വാരപ്പെട്ടി പഞ്ചായത്തുകളിലും മുനിസിപ്പാലിറ്റിയിലും ഫസ്റ്റ് എയ്ഡ് സേവനം ലഭ്യമാക്കിക്കൊണ്ട് ഈ വർഷവും എന്‍റെ നാട് മഹത്തരമായ പ്രവർത്തനമാണ് നടത്തുന്നതെന്ന് വികാരി പറഞ്ഞു. എന്‍റെ നാട് ചെയർമാൻ ഷിബു തെക്കുംപുറം, പള്ളി കമ്മിറ്റി ട്രസ്റ്റിമാരായ കെ.കെ ജോസഫ്, എബി ചേലാട്ട്, പള്ളി കമ്മിറ്റിയംഗങ്ങൾ എന്നിവർ പങ്കെടുത്തു.

പുറയാർ റെയിൽവേ മേൽപ്പാലം നിർമാണം നാളെ ആരംഭിക്കും

നെടുമ്പാശേരി : ദേശം-കാലടി റോഡിലെ യാത്രക്കാരുടെ ചിരകാല സ്വപ്നമായിരുന്ന പുറയാർ റെയിൽവേ മേൽപ്പാലം നിർമാണം നാളെ ആരംഭിക്കും. ഉച്ചയ്ക്ക് 12 ന് മന്ത്രി പി.എ. മുഹമ്മദ് റിയാസ് നിർമാണോദ്ഘാടനം നിർവഹിക്കും. അൻവർ സാദത്ത് എംഎൽഎ അധ്യക്ഷത വഹിക്കും. ബെന്നി ബഹനാൻ എംപി, മറ്റു ജനപ്രതിനിധികൾ തുടങ്ങിയവരും പങ്കെടുക്കും. ‌ മേൽപ്പാലം യാഥാർഥ്യമാകുന്നതോടെ തിരുവൈരാണിക്കുളം ക്ഷേത്രം, കാഞ്ഞൂർ പള്ളി എന്നി വിടങ്ങളിലേക്കും ചെങ്ങമനാട്, ശ്രീമൂലനഗരം, കാഞ്ഞൂർ പഞ്ചായത്ത് നിവാസികൾക്ക് ആലുവ, കാലടി ഭാഗങ്ങളിലേക്കുമുള്ള യാത്ര സുഗമമാകും. 63.71 കോടിയാണ് മേൽപ്പാലത്തിന്‍റെ നിർമാണച്ചെലവ്. പാലത്തിന്‍റെ അപ്രോച്ച് റോഡ് നിർമാണത്തിനായി സ്ഥലം ഏറ്റെടുക്കുന്നതിന് 18.81 കോടിയും പാലം നിർമിക്കാൻ 34.90 കോടിയുമാണ് അനുവദിച്ചിട്ടുള്ളത്. ഭരണാനുമതിയും സാങ്കേതികാനുമതിയും ലഭ്യമാക്കി ടെൻഡർ നടപടികളും പൂർത്തിയാക്കി.റോഡ്‌സ് ആൻഡ് ബ്രിഡസ് കോർപറേഷനാണ് പാലത്തിന്‍റെ നിർമാണച്ചുമതല.

വിജ്ഞാൻ മിനി മാരത്തൺ നടത്തി

ശ്രീമൂലനഗരം: എടനാട് വിജ്ഞാനപീഠം ഇംഗ്ലീഷ് മീഡിയം സ്കൂളിന്‍റെ സുവർണജൂബിലിയോടനുബന്ധിച്ചു ഗാന്ധിജയന്തി ദിനത്തിൽ വിജ്ഞാൻ മിനി മാരത്തൺ നടത്തി. ആലുവ അസി. എക്സൈസ് ഇൻസ്പെക്ടർ എസ്.എ. സനൽകുമാർ ഉദ്ഘാടനം ചെയ്തു. സ്കൂൾ മാനേജർ ഫാ.അനിൽ കിളിയേൽക്കുടി അധ്യക്ഷത വഹിച്ചു. ഫ്രിനി പോൾ ദാസ്, കെ.എസ്. ഷാജി, സിജോ മത്തായി, ധനേഷ് ചാക്കപ്പൻ എന്നിവർ പ്രസംഗിച്ചു. വിദ്യാർഥികളുൾപ്പടെ ഇരുനൂറോളം പേർ പങ്കെടുത്തു.

പൂതംകുറ്റി പള്ളിയില്‍ നിന്ന് കോതമംഗലം കാല്‍നട തീര്‍ഥയാത്ര പുറപ്പെട്ടു

അങ്കമാലി: കോതമംഗലം മാര്‍ത്തോമ്മന്‍ ചെറിയപള്ളിയില്‍ പരിശുദ്ധ യല്‍ദോ മാര്‍ ബസേലിയോസ് ബാവായുടെ കബറിലേയ്ക്കുള്ള പൂതംകുറ്റി മേഖല കാല്‍നട തീര്‍ഥയാത്ര സെന്‍റ് മേരീസ് പള്ളിയില്‍ നിന്ന് പുറപ്പെട്ടു. പുലര്‍ച്ച വിശുദ്ധ കുര്‍ബാനയ്ക്ക് ശേഷം പള്ളിമുറ്റത്ത് പരിശുദ്ധ യല്‍ദോ മാര്‍ ബസേലിയോസ് ബാവായുടെ നാമത്തിലുള്ള കുരിശിന്‍ തൊട്ടിയില്‍ നിന്ന് ഭദ്രദീപം കൊളുത്തി വികാരി ഫാ. ജോസഫ് പള്ളിയ്ക്കല്‍ തീര്‍ഥയാത്രയുടെ ഉദ്ഘാടനം നിർവഹിച്ചു. പള്ളി ട്രസ്റ്റിമാരായ കെ.ടി. ഷാജി, എല്‍ദോ ഏലിയാസ്, സെക്രട്ടറി ടി.എം. യാക്കോബ്, പി.പി. എല്‍ദോ, ടി.എം. വര്‍ഗീസ്, കെ.എം. വര്‍ഗീസ്, കെ.വി. മത്തായി എന്നിവരുടെ നേതൃത്വത്തിലാണ് യാത്ര പുറപ്പെട്ടത്. കിടങ്ങൂര്‍ മാര്‍ ബസേലിയോസ് ബാവാ പള്ളിയില്‍ നിന്ന് ആരംഭിച്ച കാല്‍നടതീര്‍ഥയാത്ര തുറവൂര്‍ ചാപ്പലില്‍ സംഗമിച്ചു. ആഴകം, പീച്ചാനിക്കാട്, പൊയ്ക്കാട്ടുശേരി പള്ളികളില്‍ നിന്ന് പുറപ്പെട്ട തീര്‍ഥയാത്രകള്‍ മറ്റൂരില്‍ പ്രധാന തീര്‍ഥയാത്രയോട് ചേര്‍ന്നു. തീര്‍ഥാടകരെ ശ്രേഷ്ഠ കാതോലിക്ക ബസേലിയോസ് ജോസഫ് ബാവായുടെയും സഭയിലെ മറ്റ് മെത്രാപ്പോലീത്തമാരുടെയും നേതൃത്വത്തില്‍ സ്വീകരിച്ചു. സന്ധ്യാപ്രാര്‍ഥനയ്ക്ക് ശേഷം ബാവായുടെ കബര്‍ വണങ്ങി വിശ്വാസികള്‍ മടങ്ങി. ടൈറ്റസ് വര്‍ഗീസ് കൊറെപ്പിസ്‌ക്കോപ്പ, വര്‍ഗീസ് അരീയ്ക്കല്‍ കോറെപ്പീസ്‌ക്കോപ്പ, ഫാ. ജോസഫ് പള്ളിയ്ക്കല്‍, ഫാ. വര്‍ഗീസ് അറയ്ക്കല്‍, ഫാ. തങ്കച്ചന്‍ അരീയ്ക്കല്‍, ഫാ. ഏല്യാസ് അരീയ്ക്കല്‍, ഫാ. വര്‍ഗീസ് തൈപ്പറമ്പില്‍, ഫാ. വില്‍സണ്‍ വര്‍ഗീസ്, ഫാ. വര്‍ഗീസ് വി. അരീയ്ക്കല്‍ എന്നിവര്‍ തീര്‍ത്ഥയാത്രയ്ക്കും വിവിധ പള്ളികളിലെ സ്വീകരണങ്ങള്‍ക്കും നേതൃത്വം നല്‍കി. കരിങ്ങാച്ചിറ സെന്‍റ് ജോർജ് യാക്കോബായ സുറിയാനി കത്തീഡ്രലിൽ നിന്നുള്ള തീർഥയാത്രയ്ക്ക് ഫാ. ടിജോ മർക്കോസ്, ഫാ. സ്ലീബ കളരിക്കൽ, ഫാ. ബിനു സ്ക്കറിയ കോഴിക്കോട്ട്, ഫാ. ജോണി തുരുത്തിയിൽ, ജീവൻ മാലായിൽ, എം.പി.പോൾ, ഐ.കെ. ജോർജ് എന്നിവർ നേതൃത്വം നൽകി.

സിപിആര്‍ പരിശീലനപരിപാടി സംഘടിപ്പിച്ചു

കൊച്ചി: ലോക ഹൃദയദിനത്തോടനുബന്ധിച്ച് ഐഎംഎ കൊച്ചി സംസ്ഥാന ആരോഗ്യ വകുപ്പുമായി സഹകരിച്ച് നഗരത്തിന്‍റെ വിവിധ ഭാഗങ്ങളില്‍ സിപിആര്‍ പരിശീലന പരിപാടികൾ സംഘടിപ്പിച്ചു. റെയില്‍വേ പോര്‍ട്ടര്‍മാര്‍, പൊതുജനങ്ങള്‍, ഓട്ടോറിക്ഷാ ഡ്രൈവര്‍മാര്‍, ചുമട്ട് തൊഴിലാളികള്‍, ശുചീകരണ തൊഴിലാളികള്‍, വീട്ടു ജോലിക്കാര്‍ ഉള്‍പ്പെടെയുള്ളവര്‍ക്കായിരുന്നു പരിശീലനം നല്കിയത്. ഐഎംഎ കൊച്ചി മുന്‍ പ്രസിഡന്‍റ് ഡോ. എം.എം. ഹനീഷ്, ഡോ. ഷെദിന്‍ ഭരതന്‍, ഡോ. ശേഷാ തോമസ്, ഡോ. മുഹമ്മദ് അലിഫ്, ശ്രീസുധീന്ദ്ര ആശുപത്രി മെഡിക്കല്‍ ടീം എന്നിവരുടെ നേതൃത്വത്തില്‍ കലൂര്‍, തേവര, ചമ്പക്കര, എളംകുളം, രവിപുരം, തമ്മനം എന്നിവടങ്ങളിലെ പ്രാഥമാകാരോഗ്യ കേന്ദ്രങ്ങള്‍, ഓള്‍ഡ് ഏജ് ഹോം എന്നിവടങ്ങളിലാണ് അടിയന്തര ജീവന്‍ രക്ഷാ സഹായ പരിശീലന പരിപാടികള്‍ സംഘടിപ്പിച്ചതെന്ന് ഐഎംഎ കൊച്ചി പ്രസിഡന്‍റ് ഡോ. ജേക്കബ് ഏബ്രാഹം, സെക്രട്ടറി ഡോ. സച്ചിന്‍ സുരേഷ്, ട്രഷറര്‍ ഡോ. ബെന്‍സീര്‍ ഹുസൈന്‍ എന്നിവര്‍ പറഞ്ഞു.

ദക്ഷിണ മൂകാംബിക ക്ഷേത്രത്തിൽ 1,117 കുരുന്നുകളെ എഴുത്തിനിരുത്തി

പറവൂർ: പറവൂരിലെ ദക്ഷിണ മൂകാംബിക ക്ഷേത്രത്തിൽ അറിവിന്‍റെ ആദ്യാക്ഷരം നുകരാൻ 1,117 കുരുന്നുകളെത്തി. ഇന്നലെ പുലർച്ചെ മുതൽ വിദ്യാരംഭത്തിന് എത്തിയവരുടെ വലിയ തിരക്കായിരുന്നു. ഹരിശ്രീ കുറിക്കാൻ കേരളത്തിന്‍റെ വിവിധ ഭാഗങ്ങളിൽ നിന്നുള്ളവർ കുട്ടികളുമായി എത്തി. ക്ഷേത്രാങ്കണത്തിൽ പ്രത്യേകം സ‌ജ്ജമാക്കിയ വിദ്യാരംഭ മണ്ഡപത്തിലായിരുന്നു എഴുത്തിനിരുത്ത്. തന്ത്രി പുളിയന്നൂർ ഹരിനാരായണൻ നമ്പൂതിരിയുടെയും മേൽശാന്തി ബി.എം. അജിത്കുമാറിന്‍റെയും കാർമികത്വത്തിൽ പുലർച്ചെ അഞ്ചിന് പൂജയെടുത്തു. തിരുവതാംകൂർ ദേവസ്വം ബോർഡ് പ്രസിഡന്‍റ് പി.എസ്. പ്രശാന്ത് ഭദ്രദീപം കൊളുത്തി വിദ്യാരംഭത്തിന് തുടക്കംകുറിച്ചു. പുലർച്ചെ മുതൽ ആരംഭിച്ച വിദ്യാരംഭം പകൽ 1.30നാണ് സമാപിച്ചത്. 18 ഗുരുക്കന്മാർ കുട്ടികളെ എഴുത്തിനിരുത്തി. ദർശനത്തിനു ശേഷം ചുറ്റമ്പലത്തിനകത്തും ക്ഷേത്ര ചുവരിനോടു ചേർന്നും മണ്ണിൽ കുട്ടികളും മുതിർന്നവരും അക്ഷരങ്ങൾ എഴുതിയാണ് മടങ്ങിയത്. സരസ്വതി മണ്ഡപത്തിലെ സംഗീതോത്സവത്തിൽ സംഗീതാർച്ചന, സംഗീതക്കച്ചേരി, വയലിൻ അർച്ചന, ത്യാഗരാജ പഞ്ചരത്ന കീർത്തനാലാപനം, കാവടി ചിന്ത്, തിരുവാതിരകളി, സോപാന സംഗീതാർച്ചന, ഇടയ്ക്ക കച്ചേരി, വയലിൻ സോളോ, ഭക്തിഗാനമേള എന്നിവ അരങ്ങേറി. പ്രതിപക്ഷനേതാവ് വി.ഡി. സതീശൻ ക്ഷേത്രദർശനത്തിന് എത്തിയിരുന്നു. തിരക്ക് നിയന്ത്രിക്കാൻ മുനമ്പം ഡിവൈഎസ്പി എസ്. ജയകൃഷ്ണന്‍റെ നേതൃത്വത്തിൽ പൊലീസ് സംഘവും, മറ്റ് സന്നദ്ധ സംഘടനാ വളണ്ടിയർമാരും രംഗത്തുണ്ടായിരുന്നു. ക്ഷേത്രത്തിലെത്തിയവർക്ക് പറവൂർ പോലീസിന്‍റെ നേതൃത്വത്തിൽ ചുക്കുകാപ്പിയും ലഘുഭക്ഷണവും നൽകി. ആവണംകോട് 800 ഓളം കുരുന്നുകൾ നെടുമ്പാശേരി: നെടുമ്പാശേരി ആവണംകോട് സരസ്വതി ക്ഷേത്രത്തിൽ വിജയദശമി ദിനത്തിൽ എണ്ണൂറോളം കുഞ്ഞുങ്ങൾ ഹരിശ്രീ കുറിച്ചു. പശ്ചിമ ബംഗാൾ, ആന്ധ്ര, തമിഴ്‌നാട്, കർണാടകം തുടങ്ങിയ സംസ്ഥാനങ്ങളിൽ നിന്നുൾപ്പെടെ കുട്ടികൾ ഹരിശ്രീ കുറിക്കാൻ എത്തിയിരുന്നു. കേരള ഹൈക്കോടതി ജസ്റ്റിസ് മുരളി പുരുഷോത്തമൻ, ആർ.കെ. ദാമോദരൻ, ശ്രീമൂലനഗരം മോഹൻ, തന്ത്രി പ്രതിനിധി ബ്രഹ്മശ്രീ നാരായണമംഗലത്ത് ഇല്ലത്ത് ഗോവിന്ദൻ നമ്പൂതിരി, കെ.എൻ.കെ. നമ്പീശൻ തുടങ്ങി അധ്യാപകരും പണ്ഡിത ശ്രേഷ്‌ഠരും കലാകാരന്മാരും അടങ്ങിയ ആചാര്യന്മാരാണ് കുട്ടികളെ ഹരിശ്രീ കുറിക്കാൻ എത്തിയത്. 34 മത് നവരാത്രി ക്ലാസിക്കൽ നൃത്തസംഗീതോത്സവം പഞ്ചരത്നകീർത്തനാലാപനത്തിലൂടെ അവസാനിച്ചു. 11 ദിവസങ്ങളിലായി നടന്ന നൃത്ത-സംഗീത ആരാധനകളിൽ 600 ഓളം വിദ്യാർഥികളും പ്രഫഷണൽ കലാകാരന്മാരും പങ്കുകൊണ്ടു. ഉദയനാപുരം ഹരിയുടെ നേതൃത്വത്തിൽ പഞ്ചവാദ്യവും അരങ്ങേറിയിരുന്നു. ആവണംകോട് സരസ്വതി ക്ഷേത്രത്തിൽ ഇനി പതിവ് പോലെ നിത്യേന ക്ഷേത്രത്തിൽ വിദ്യാരംഭം ചെയ്യാൻ സാധിക്കും. ഇതിനായി രാവിലെ 9ന് ക്ഷേത്രത്തിൽ എത്തിച്ചേർന്നാൽ മതിയാകും.

മലയാറ്റൂർ വള്ളംകളി: ഒന്നാംസ്ഥാനം കെബിസി കുറുങ്കോട്ടയ്ക്ക്

കാലടി: മലയാറ്റൂർ വള്ളംകളിയിൽ ഒന്നാം സ്ഥാനം കെബിസി കുറുങ്കോട്ട(ശ്രീ മൂകാംബിക വള്ളം)യ്ക്ക്. രണ്ടാം സ്ഥാനം ഇടിവാൾ കോട്ട് കൊടുങ്ങല്ലൂർ (രുദ്രമാല) കരസ്ഥമാക്കി. വള്ളംകളിയുടെ ആവേശത്തിമിർപ്പ് വിളിച്ചോതി ഉച്ചയ്ക്ക് 2.30 തോടെ നടന്ന ജലഘോഷയാത്ര കാണികളിൽ ആവേശം വിതറി. തുടർന്ന് പ്രമുഖ ടീമുകൾ പങ്കെടുത്ത വള്ളംകളി മത്സരം ആരംഭിച്ചു. ബെന്നി ബഹനാൻ എംപി മത്സരങ്ങൾ ഉദ്ഘാടനം ചെയ്തു. കാട്ടൂർ പൊഞ്ചനത്തമ്മയ്ക്കാണ് മൂന്നാം സ്ഥാനം. സംഘാടക സമിതി കൺവീനർ റോജി എം. ജോൺ എംഎൽഎ ,ചെയർമാൻ ഗ്രാമ പഞ്ചായത്ത് പ്രസിഡന്‍റ് ജോയി അവോക്കാരൻ മുൻ എംഎൽഎ മാരായ പി.ജെ. ജോയി, അഡ്വ. ജോസ് തെറ്റയിൽ, മുനിസിപ്പൽ ചെയർമാൻ അഡ്വ. ഷിയോ പോൾ ,ബ്ലോക്ക് പഞ്ചായത്ത് പ്രസിഡന്‍റ് കൊച്ചുത്രേസ്യ തങ്കച്ചൻ, ജില്ലാ പഞ്ചായത്തംഗം അനിമോൾ ബേബി, മലയാറ്റൂർ പള്ളി വികാരി ഫാ. ജോസ് ഒഴലക്കാട്ട്, വിമലഗിരി പള്ളി വികാരി ഫാ. പോൾ പടയാട്ടി എന്നിവർ പ്രസംഗിച്ചു. എട്ട് ചെറു വള്ളങ്ങളാണ് മത്സരത്തിൽ പങ്കെടുത്തത്. വിജയികൾക്ക് റോജി എം. ജോൺ എംഎൽഎ സമ്മാനങ്ങൾ നല്കി.

സിഎൽ‌സി അതിരൂപത മരിയോത്സവം; തൃപ്പൂണിത്തുറ ഫൊറോനയ്ക്ക് ഓവറോൾ

കൊച്ചി: എറണാകുളം-അങ്കമാലി അതിരൂപത സിഎൽസി മരിയോത്സവം സമാപിച്ചു. തൃക്കാക്കര ഭാരതമാതാ കോളജിൽ നടന്ന കലാ, സാഹിത്യ മത്സരങ്ങൾ അതിരൂപത ചാൻസലർ ഫാ. ആന്‍റണി വാഴക്കാല ഉദ്ഘാടനം ചെയ്തു. അതിരൂപത പ്രസിഡന്‍റ് സിനോബി ജോയ് അധ്യക്ഷത വഹിച്ചു. തൃപ്പൂണിത്തുറ ഫൊറോന ഓവറോൾ ചാന്പ്യൻഷിപ്പ് നേടി. വല്ലം, കറുകുറ്റി ഫൊറോനകൾക്കാണ് യഥാക്രമം രണ്ടും മൂന്നും സ്ഥാനങ്ങൾ. വിജയികൾക്ക് പ്രമോട്ടർ ഫാ. ആന്‍റോ ചാലിശേരി കാഷ് പ്രൈസുകളും മെമന്‍റോകളും സമ്മാനിച്ചു. 14 ഇനങ്ങളിലായി നടന്ന കലാമത്സരങ്ങളിൽ 16 ഫോറോനകളിൽ നിന്നായി 650 പേർ പങ്കെടുത്തു.അതിരൂപത ഭാരവാഹികളായ ഹെനിന്‍റ് ജോസഫ്, അഖിൽ, മാർട്ടിൻ, എക്സിക്യൂട്ടീവ് കമ്മിറ്റി അംഗങ്ങൾ എന്നിവർ നേതൃത്വം നൽകി.

തിരുനാളാഘോഷം

സെന്‍റ് ഫ്രാൻസിസ് അസീസി കത്തീഡ്രലിൽ കൊച്ചി: എറണാകുളം സെന്‍റ് ഫ്രാൻസിസ് അസീസി കത്തീഡ്രലിൽ വിശുദ്ധന്‍റെ 204-ാമത് കൊന്പ്രേരിയ തിരുനാളിനു കോടിയേറി. വരാപ്പുഴ ആർച്ച്ബിഷപ് ഡോ. ജോസഫ് കളത്തിപ്പറമ്പിൽ കൊടിയേറ്റിനും ദിവ്യബലിക്കും മുഖ്യ കാർമികത്വം വഹിച്ചു. ആശീർഭവൻ ഡയറക്ടർ റവ. ഡോ. വിൻസന്‍റ് വാര്യത്ത് വചനപ്രഘോഷണം നടത്തി. വികാരി ഫാ.പീറ്റർ കൊച്ചുവീട്ടിൽ, ഫാ. റോഷൻ റാഫേൽ നെയ്ശേരി, ഫാ. ഷിബു സേവ്യർ, ഫാ. ബെൻസൺ ജോർജ് ആലപ്പാട്ട് എന്നിവർ സഹകാർമികരായിരുന്നു. അഞ്ചിനു വൈകുന്നേരം അഞ്ചിന് ആഘോഷമായ പൊന്തിഫിക്കൽ തിരുനാൾ ദിവ്യബലിക്ക് ആർച്ച്ബിഷപ് ഡോ. ഫ്രാൻസിസ് കല്ലറക്കൽ മുഖ്യകാർമികത്വം വഹിക്കും. റവ. ഡോ. സ്റ്റാൻലി മാതിരപ്പിള്ളി വചനപ്രഘോഷണം നടത്തും. സെന്‍റ് മേരീസ് കത്തീഡ്രൽ ബസലിക്കയിൽ കൊച്ചി: എറണാകുളം സെന്‍റ് മേരീസ് കത്തീഡ്രൽ ബസലിക്കയിൽ ഇടവക മധ്യസ്ഥയായ പരിശുദ്ധ തുറമുഖ മാതാവിന്‍റെ 125 ാമത് ദർശന തിരുനാളിനു തുടക്കം. ബസലിക്ക അഡ്മിനിസ്ട്രേറ്റർ ഫാ. തോമസ് മങ്ങാട്ട് കൊടിയേറ്റി. ഇന്നു വൈകുന്നേരം ആറിന് പ്രസുദേന്തിമാരുടെ വാഴ്ച , ആരാധന , ജപമാല , നൊവേന , ലദീഞ്ഞ് . വചനസന്ദേശം ഫാ. ജെൻസ് പാലച്ചുവട്ടിൽ. വേസ്പരദിനമായ നാളെ വൈകുന്നേരം 5.30ന് രൂപം എഴുന്നള്ളിപ്പ് , തിരുസ്വരൂപ പ്രതിഷ്ഠ , തിരിവെഞ്ചരിപ്പ് , ആരാധന , ജപമാല , പ്രദക്ഷിണം , വാഴ്‌വ്. വചനസന്ദേശം ഫാ. ബോബി കട്ടക്കകത്തൂട്ട്. തിരുനാൾ ദിനമായ അഞ്ചിനു രാവിലെ ഒന്പതിന് ഫാ. റോമൽ കണിയാംപറമ്പിലിന്‍റെ കാർമികത്വത്തിൽ ആഘോഷമായ തിരുനാൾ കുർബാന (സെന്‍റ് മേരീസ് കോൺവെന്‍റിൽ)വചന സന്ദേശം ഫാ. സനു പുതുശേരി. തുടർന്നു ബസലിക്കയിലേക്കു പ്രദക്ഷിണം, വാഴ്‌വ്, സ്നേഹവിരുന്ന് എന്നിവയുണ്ടാകും. എളംകുളം ലിറ്റിൽ ഫ്ലവർ പള്ളിയിൽ കൊച്ചി: എളംകുളം ലിറ്റിൽ ഫ്ലവർ പള്ളിയിൽ വിശുദ്ധ കൊച്ചുത്രേസ്യയുടെ ദർശന തിരുനാളിന് കൊടിയേറി. ആർച്ച് ബിഷപ്പ് മാർ ആന്‍റണി കരിയിൽ തിരുകർമങ്ങൾക്ക് മുഖ്യ കാർമികത്വം വഹിച്ചു. ലിസി ഹോസ്പിറ്റൽ ഡയറക്ടർ ഫാ. പോൾ കരേടൻ കുർബാന അർപ്പിച്ചു. വെള്ളിയാഴ്ച വൈകിട്ട് 5.30 ന് ലത്തീൻ റീത്തിൽ ദിവ്യബലി കാർമികൻ-ആർച്ച് ബിഷപ്പ് ഡോ. ഫ്രാൻസിസ് കല്ലറയ്ക്കൽ. ശനിയാഴ്ച വൈകിട്ട് അഞ്ചിന് ആഘോഷമായ കുർബാന. തുടർന്ന് പട്ടണപ്രദക്ഷിണം. ഞായറാഴ്ച വൈകിട്ട് അഞ്ചിന് ആഘോഷമായ തിരുനാൾ കുർബാന. വൈകിട്ട് 7.30 ന് നാടകം. തിങ്കളാഴ്ച പരേതർക്ക് വേണ്ടിയുള്ള വിശുദ്ധ കുർബാന. പൊറ്റക്കുഴി പള്ളിയില്‍ കൊച്ചി: കലൂര്‍ പൊറ്റക്കുഴി ചെറുപുഷ്പ ദേവാലയത്തില്‍ വിശുദ്ധ കൊച്ചുത്രേസ്യായയുടെ ദര്‍ശനത്തിരുനാളിന് കൊടിയേറി. വരാപ്പുഴ അതിരൂപത വികാര്‍ ജനറല്‍ മോണ്‍. മാത്യു കല്ലിങ്കല്‍ കൊടിയേറ്റിന് മുഖ്യകാര്‍മ്മികത്വം വഹിച്ചു. തുടര്‍ന്ന് ദിവ്യബലി, ജൂബിലി ലോഗോയുടെ പ്രകാശനം എന്നിവ നടന്നു. വേസ്പര ദിനമായ നാളെ വൈകുന്നേരം അഞ്ചിന് പൊന്തിഫിക്കല്‍ ദിവ്യബലിക്ക് വരാപ്പുഴ ആര്‍ച്ച് ബിഷപ് ഡോ. ജോസഫ് കളത്തിപ്പറമ്പില്‍ മുഖ്യകാര്‍മികത്വം വഹിക്കും. തുടര്‍ന്ന് പ്രദക്ഷിണം. ഒക്ടോബര്‍ അഞ്ചിന് രാവിലെ ഒമ്പതിന് തിരുനാള്‍ ദിവ്യബലിയ്ക്ക് ഫാ. ഹെന്‍റി പട്ടരുമഠത്തില്‍ മുഖ്യകാര്‍മികത്വം വഹിക്കും. തുടര്‍ന്ന് പ്രദക്ഷിണം.

റോ-റോ ജെട്ടിക്കടുത്തെ പാർക്കിംഗ് കേന്ദ്രം തുറക്കുന്നില്ല : ഫോർട്ടുവൈപ്പിനിൽ ഗതാഗതക്കുരുക്ക് പതിവ്

വൈപ്പിൻ : റോ-റോ ജങ്കാറിൽ കയറാനായി എത്തുന്ന വാഹനങ്ങൾക്ക് വൈപ്പിൻ ജെട്ടിയിൽ പാർക്കിംഗിന് സ്ഥലം ഉണ്ടായിട്ടും അത് തുറന്നു കൊടുക്കാൻ കൊച്ചിൻ കോർപറേഷൻ തയാറാകാത്തതിൽ സ്ഥലവാസികളിൽ അമർഷം. ജങ്കാറിൽ കയറാനായി എത്തുന്ന വാഹനങ്ങൾ റോഡിൽ നീണ്ട നിര സൃഷ്ടിക്കുന്നത് പലപ്പോഴും ഇവിടെ ഗതാഗത തടസം ഉണ്ടാക്കുന്നു. ഇതാണ് പ്രാദേശിവാസികളിലെ കലിപ്പിനു കാരണം. ഇങ്ങിനെ റോഡ് ബ്ലോക്ക് ആയിക്കഴിഞ്ഞാൽ സ്വകാര്യ ബസുകൾ വൈപ്പിൻ സ്റ്റാൻഡിലേക്ക് വരാൻ കൂട്ടാക്കില്ല. മാത്രമല്ല ഈ പ്രദേശത്തുകാർക്ക് വാഹനങ്ങളുമായി പുറത്തേക്ക് ഇറങ്ങാനും വയ്യാത്ത അവസ്ഥയാകും. ഇന്നലെ ഉച്ചഭക്ഷണ സമയത്തുള്ള ഇടവേളയിൽ വൈപ്പിൻ ജങ്കാർ ജെട്ടിയിൽ നിന്ന് കാളമുക്ക് ഭാഗത്തേക്ക് വാഹനങ്ങളുടെ വൻനിര പ്രത്യക്ഷപ്പെട്ടതോടെ ഈ ഭാഗത്ത് ഏറെനേരം ഗതാഗത തടസം ഉണ്ടായി. വൈപ്പിൻ ബസ് സ്റ്റാൻഡിനോട് ചേർന്ന കോർപറേഷന്‍റെ അധീനതയിൽപ്പെട്ട സ്ഥലത്ത് വാഹനങ്ങൾക്ക് പാർക്ക് ചെയ്യാൻ സൗകര്യം ഉണ്ട്. എന്നാൽ ഹൈക്കോടതി പറഞ്ഞിട്ട് പോലും കോർപറേഷൻ അനങ്ങുന്നില്ലെന്നാണ് നാട്ടുകാരുടെആരോപണം. ഈ സാഹചര്യത്തിൽ കോർപറേഷൻ അടിയന്തരമായി വൈപ്പിൻ ജെട്ടിയിലെ പാർക്കിംഗ് കേന്ദ്രം തുറന്നുകൊടുക്കണമെന്ന് സിപിഎം ഫോർട്ട് വൈപ്പിൻ ബ്രാഞ്ച് സെക്രട്ടറി ജോണി വൈപ്പിൻ ആവശ്യപ്പെട്ടു.

വീടുകൾ കുത്തിത്തുറന്ന് കവർച്ച; ആസാം സ്വദേശികൾ അറസ്റ്റിൽ

ആലങ്ങാട്: നീറിക്കോട് വീടുകൾ കുത്തിത്തുറന്ന് മോഷണം നടത്തിയ ഇതര സംസ്ഥാനക്കാരായ മൂന്നുപേരെ നാട്ടുകാർ പിടികൂടി പോലീസിൽ ഏൽപ്പിച്ചു. ഒരു വീട്ടിൽ നിന്നും നാലു പവൻ സ്വർണവും 800 രൂപയും മോഷ്ടിച്ച സംഘം മറ്റൊരു സ്ഥലത്ത് മോഷണത്തിനു ശ്രമിക്കുന്നതിനിടെയാണ് നാട്ടുകാർ പിടികൂടിയത്. ആസാം സോനിക്പൂർ സ്വദേശികളായ സദാം ഹുസൈൻ (21) ജമാൽ (26), അജിബുർ റഹ്മാൻ (25) എന്നീ പ്രതികളെ നാട്ടുകാർ പിടികൂടി ആലുവ വെസ്റ്റ് പോലീസിനു കൈമാറി. ഇന്നലെ രാവിലെ 10 ഓടെയായിരുന്നു സംഭവം. നീറിക്കോട് സെന്‍റ് സെബാസ്റ്റ്യൻ റോഡിൽ താമസിക്കുന്ന കുന്നത്ത് ജൂഡിയുടെ വീട്ടിൽ നിന്ന് നാലു പവന്‍റെ സ്വർണവും 800 രൂപയും കവർന്ന മോഷ്ടാക്കൾ നീറിക്കോട് കവലയിലെത്തി കൈതരാൻ ആന്‍റണിയുടെ വീടിന്‍റെ വാതിൽ പൊളിക്കാൻ ശ്രമിക്കുന്നതിനിടെ ശബ്ദം കേട്ടെത്തിയ നാട്ടുകാർ ഓടിച്ചിട്ടു പിടിക്കുകയായിരുന്നു. ആദ്യം പിടിയിലായ പ്രതിയെ പരിശോധിച്ചപ്പോഴാണ് സ്വർണവും പണവും കണ്ടെടുത്തത്. ഓടിരക്ഷപ്പെട്ട മറ്റു രണ്ടു പ്രതികളെ പിന്നീട് വരാപ്പുഴ മൂലംപിള്ളി പാലത്തിനു താഴെ നിന്ന് പോലീസ് പിടികൂടി. ജൂഡിയുടെ വീട്ടുകാർ കൂനമ്മാവിൽ ഒരു മരണ ആവശ്യത്തിനു പോയ സമയത്താണ് സംഘം കവർച്ച നടത്തിയത്. കൈതാരൻ ആന്‍റണിയും കുടുംബവും ഗോവയിൽ വിനോദയാത്രയ്ക്ക് പോയിരിക്കുകയായിരുന്നു. ഗോവയിൽ വച്ച് സിസി ടിവി പരിശോധിച്ച ഇവരാണ് അയൽവാസികളെ മോഷണസംഘം വീട്ടിലെത്തിയ കാര്യം അറിയിച്ചതെന്നും പറയപ്പെടുന്നു.

ഓൺലൈൻ തട്ടിപ്പ്: പ്രതി ഗുജറാത്തിൽ പിടിയിൽ

കിഴക്കമ്പലം: ഓൺലൈൻ തട്ടിപ്പിലൂടെ പ്രവാസിയുടെ ലക്ഷങ്ങൾ തട്ടിയെടുത്ത കേസിലെ മുഖ്യപ്രതിയെ ഗുജറാത്ത് ധുരേലിയ ഗ്രാമത്തിൽ നിന്ന് പോലീസ് പിടികൂടി. മുംബൈ ഈസ്റ്റ് അന്തേരിയിൽ താമസിക്കുന്ന രാജസ്ഥാൻ സ്വദേശി ലക്ഷ്മൺ ലാൽ കുമാവത്തി(27)നെയാണ് തടിയിട്ടപറമ്പ് പോലീസ് സാഹസികമായി പിടികൂടിയത്. പ്രവാസിയായ വാഴക്കുളം സ്വദേശിയുടെ 27 ലക്ഷം രുപയാണ് ഇയാൾ ഉൾപ്പെട്ട സംഘം തട്ടിയെടുത്തത്. സമൂഹമാധ്യമം വഴിയാണ് വാഴക്കുളം സ്വദേശി ഇയാളെ പരിചയപ്പെട്ടത്. ഒൺലൈൻ ട്രേഡിംഗിലൂടെ വൻ ലാഭമാണ് പ്രതി വാഗ്ദാനം ചെയ്തത്. ഇതനുസരിച്ച് ആദ്യം കുറച്ച് തുക ട്രേഡിംഗിൽ നിക്ഷേപിച്ചു. ഇതിന് 6000 രൂപ ലാഭമാണെന്ന് പറഞ്ഞ് തിരികെ നൽകി. ഇതോടെ വിശ്വാസം വർധിച്ച പ്രവാസി ഘട്ടങ്ങളായി 27 ലക്ഷം രൂപ നിക്ഷേപിക്കുകയായിരുന്നു. തുടർന്ന് തുകയും ലാഭവും തിരികെ ചോദിച്ചപ്പോൾ സംഘം മുങ്ങി. പിന്നീട് പ്രവാസി പോലീസിൽ പരാതി നൽകുകയായിരുന്നു. ജില്ലാ പോലീസ് മേധാവി എം. ഹേമലതയുടെ മേൽനോട്ടത്തിൽ പ്രത്യേക ടീം രൂപീകരിച്ച് അന്വേഷണം ആരംഭിച്ചു. പോലീസ് മുംബൈയിലെത്തിയപ്പോൾ ഇയാൾ ഗുജറാത്തിലേക്ക് കടന്നു. മൊബൈൽ സ്വിച്ച് ഓഫ് ചെയ്തതിനാൽ കണ്ടുപിടിക്കുക ശ്രമകരമായിരുന്നു. തുടർന്ന് അന്വേഷണസംഘം വേഷം മാറി ദിവസങ്ങളോളം അവിടെ താമസിച്ചാണ് പ്രതിയെ കണ്ടെത്തിയത്. മുംബൈയിൽ പ്ലംബിംഗ്‌ കരാർ കമ്പനി നടത്തുന്ന ഇയാൾ ഇതിന്‍റെ മറവിലാണ് തട്ടിപ്പു നടത്തിയിരുന്നത്. കോടികളുടെ ഇടപാടാണ് അക്കൗണ്ടിലൂടെ നടന്നിട്ടുള്ളത്. നിരവധി പേർ തട്ടിപ്പിനിരയായിട്ടുണ്ടെന്നാണ് ലഭ്യമാകുന്ന വിവരം. എഎസ്പി ഹാർദിക് മീണ, ഇൻസ്പെക്ടർ പി.ജെ. കുര്യാക്കോസ്, എസ്ഐ എൻ.കെ. ജേക്കബ്, സീനിയർ സിപിഒ കെ.കെ. ഷിബു, സിപിഒ മിഥുൻ മോഹൻ എന്നിവരാണ് അന്വേഷണ സംഘത്തിൽ ഉണ്ടായിരുന്നത്.

ആവണിയും അജിനും ആശുപത്രിയിൽനിന്ന് മടങ്ങി

കൊച്ചി: രണ്ടാഴ്ച മുമ്പ് 36 മണിക്കൂറിന്‍റെ ഇടവേളയില്‍ ലിസി ആശുപത്രിയില്‍ ഹൃദയം മാറ്റിവയ്ക്കല്‍ ശസ്ത്രക്രിയയ്ക്ക് വിധേയരായ അങ്കമാലി നായത്തോട് സ്വദേശി അജിന്‍ ഏലിയാസും (28), കൊല്ലം കരുകോണ്‍ സ്വദേശി ആവണി കൃഷ്ണയും (13) പുതിയ ഹൃദയത്തുടിപ്പുകളുമായി ആശുപത്രി വിട്ടു. കൊട്ടാരക്കര സ്വദേശി ഐസക് ജോര്‍ജിന്‍റെ (33) ഹൃദയമാണ് അജിനില്‍ മാറ്റിവച്ചത്. വാഹനാപകടത്തില്‍ മരിച്ച അങ്കമാലി സ്വദേശി ബില്‍ജിത്തി(18)ന്‍റെ ഹൃദയമാണ് ആവണിയില്‍ സ്പന്ദിക്കുന്നത്. ഡോ. ജോസ് ചാക്കോ പെരിയപ്പുറത്തിന്‍റെ നേതൃത്വത്തില്‍ ഡോ. ജേക്കബ് ഏബ്രഹാം, ഡോ. ജീവേഷ് തോമസ്, ഡോ. ജോ ജോസഫ്, ഡോ. ശ്രീശങ്കര്‍ എന്നിവരടങ്ങിയ മെഡിക്കല്‍ സംഘമാണ് ശസ്ത്രക്രിയ നടത്തിയത്. ഡോ. റോണി മാത്യു കടവില്‍, ഡോ. ഭാസ്‌കര്‍ രംഗനാഥന്‍, ഡോ. സാജന്‍ കോശി, ഡോ. എസ്.ആര്‍. അനില്‍, ഡോ. പി. മുരുകന്‍, ഡോ. ജോബ് വില്‍സണ്‍, ഡോ. ഗ്രേസ് മരിയ, ഡോ. ആന്‍റണി ജോര്‍ജ്, ഡോ. ജനു റോസ്, ഡോ. ആബിദ് ഇക്ബാല്‍, ഡോ. ജഗന്‍ ജോസ്, ഡോ. ആയിഷ നാസര്‍, രാജി രമേഷ്, സൗമ്യ സുനീഷ് എന്നിവര്‍ തുടര്‍ചികിത്സകളിലും പങ്കാളികളായി. ആശുപത്രി ഡയറക്ടര്‍ ഫാ. പോള്‍ കരേടന്‍റെ നേതൃത്വത്തില്‍, ഫാ. റോജന്‍ നങ്ങേലിമാലില്‍, ഫാ. റെജു കണ്ണമ്പുഴ, ഫാ. ഡേവിസ് പടന്നയ്ക്കല്‍, ഫാ. ജെറ്റോ തോട്ടുങ്കല്‍, ചികിത്സയ്ക്ക് നേതൃത്വം നല്‍കിയ ഡോക്ടര്‍മാര്‍, ആശുപത്രി ജീവനക്കാര്‍ തുടങ്ങിയവര്‍ ചേര്‍ന്നാണ് രണ്ട് പേരെയും യാത്രയാക്കിയത്. ഇരുവര്‍ക്കും വൈകാതെ തന്നെ സാധാരണ ജീവിതം നയിക്കാന്‍ കഴിയുമെന്ന് ഡോ. ജോസ് ചാക്കോ പെരിയപുറം പറഞ്ഞു. രണ്ട് പേരുടെയും ആരോഗ്യനിലയില്‍ അദ്ദേഹം പരിപൂർണ തൃപ്തി രേഖപ്പെടുത്തി. തുടര്‍ച്ചയായി നടന്ന അവയവദാനങ്ങളും വിജയകരമായ ശസ്ത്രക്രിയകളും സമൂഹത്തില്‍ വലിയ അവബോധം സൃഷ്ടിച്ചെന്നും കഴിഞ്ഞ രണ്ടാഴ്ചയ്ക്കിടെ ആയിരത്തിലധികം പേര്‍ അവയവദാനത്തിന് തയാറായി രജിസ്റ്റര്‍ ചെയ്തുവെന്നും കെസോട്ടോ എക്‌സിക്യൂട്ടീവ് ഡയറക്ടര്‍ ഡോ. നോബിള്‍ ഗ്രേഷ്യസ് പറഞ്ഞു.

വേർപിരിഞ്ഞ് കഴിയുന്ന ഭാര്യ മക്കളെ കാണാനെത്തിയപ്പോൾ ഭർത്താവിന്‍റെ കുത്തേറ്റു

അങ്കമാലി: ഭർത്താവിൽനിന്ന് വേർപിരിഞ്ഞ് കഴിയുന്ന ഭാര്യ മക്കളെ കാണാൻ എത്തിയപ്പോൾ ഭർത്താവ് കത്തിക്ക് കുത്തി. ഗുരുതരാവസ്ഥയിലായ ഭാര്യയെ കറുകുറ്റി അപ്പോളോ അഡ്ലക്സ് ആശുപത്രിയിൽ പ്രവേശിപ്പിച്ചു. ഭർത്താവ് ഒളിവിലാണ്. മൂക്കന്നൂർ പുതുശേരി വീട്ടിൽ ജിനു (44)വിന്‍റെ ഭാര്യ റിയ (36) യ്ക്കാണ് കുത്തേറ്റത്. ഇന്നലെ രാവിലെ പത്തോടെ മൂക്കന്നൂർ ഫൊറോന പള്ളിക്കു പിന്നിലുള്ള കാളാർകുഴി റോഡിലാണ് സംഭവം. ശ്രീമൂലനഗരം സ്വദേശിനിയാണ് റിയ. ഇറ്റലിയിൽ ജോലിയുള്ള റിയ ഏതാനും ദിവസത്തെ അവധിക്കാണ് നാട്ടിലെത്തിയത്. കോടതിയുടെ അനുമതിയോടെയാണ് റിയ ഇന്നലെ മക്കളെ കാണാൻ ശ്രമിച്ചത്. മക്കളെ കാണാൻ ജിനു വിസമ്മതിച്ചിരുന്നു. റിയ എത്തിയതറിഞ്ഞ ജിനു കത്തിയുമായെത്തി നടുറോഡിൽ വച്ച് കുത്തുകയായിരുന്നു. തുടർന്ന് ജിനു സ്കൂട്ടറിൽ കടന്നുകളഞ്ഞു. കഴുത്തിലും വയറിലും കുത്തേറ്റ് ഗുരുതര പരിക്കുകളോടെ ചികിത്സയിൽ കഴിയുന്ന റിയയ്ക്ക് ശസ്ത്രക്രിയ വേണ്ടിവരും. അങ്കമാലി പോലീസ് കേസെടുത്ത് അന്വേഷണം ആരംഭിച്ചു. ജിനുവിനെ കണ്ടെത്താനുള്ള ഊർജിത ശ്രമത്തിലാണ് പോലീസ്. ഇവരുടെ വിവാഹമോചന കേസ് കോടതിയുടെ പരിഗണനയിലിരിക്കെയാണ് ആക്രമണം. പത്തിലും എട്ടിലും പഠിക്കുന്ന രണ്ട് ആൺമക്കളാണ് ഇവർക്കുള്ളത്.

ആഘോഷമായി പവിഴമല്ലിത്തറ മേളം

ചോറ്റാനിക്കര: ആചാരത്തിന്‍റെയും കലാവൈദഗ്ധ്യത്തിന്‍റെയും മധുര സംഗമമായി പവിഴമല്ലിത്തറ മേളം ചോറ്റാനിക്കര ദേവീക്ഷേത്രത്തിൽ തടിച്ചുകൂടിയ ആയിരങ്ങളെ ആവേശഭരിതരാക്കി. നടൻ ജയറാമിന്‍റെ പ്രമാണത്തിൽ കൊട്ടിക്കയറിയ പഞ്ചാരിയുടെ മുഴക്കം ചോറ്റാനിക്കരയ്ക്ക് ആഘോഷമായി. കൊടിമരച്ചോട്ടിൽ മുന്നിൽ നിന്ന് പതിഞ്ഞ കാലത്തിൽ കൊട്ടിക്കയറിയ മേളം രണ്ടും മൂന്നും നാലും കാലങ്ങൾ കയറി ചോറ്റാനിക്കര ദേവിയുടെ ശ്രീമൂലസ്ഥാനമായ പവിഴമല്ലിത്തറയ്ക്ക് മുന്നിൽ അഞ്ചാം കാലത്തിൽ ഉച്ചസ്ഥായിയിലെത്തിയതോടെ മേളത്തിന്‍റെ ഹുങ്കാരം ക്ഷേത്രവളപ്പിൽ പ്രകമ്പനമായി മുഴങ്ങി. ഇതോടെ കൈയ് മെയ് മറന്ന് ദ്രുതചലനങ്ങളോടെ താളം പിടിച്ച മേളാസ്വാദകരും ആവേശത്തിലായി. മേളത്തിൽ ഇടന്തലയിൽ 17 പേരാണ് ഉണ്ടായിരുന്നത്. ജയറാമിന്‍റെ വലത്തെ കൂട്ടായി മട്ടന്നൂർ ശ്രീകാന്ത്, ഇടത്തെ കൂട്ടായി മട്ടന്നൂർ ശ്രീരാജ്, ഇലത്താളത്തിൽ പാഞ്ഞാൽ വേലക്കുട്ടി, കുഴലിൽ പനമണ്ണ മനോഹരൻ, കൊമ്പിൽ മച്ചാട് ഹരിദാസ് തുടങ്ങിയവരും പങ്കെടുത്തു. ദുർഗാഷ്ടമി നാളിൽ ദേവിക്ക് അർച്ചനയായാണ് ജയറാമിന്‍റെ മേളപ്പെരുക്കം. 125 കലാകാരന്മാർ പങ്കെടുത്ത മേളം രാവിലെ 9.15 ഓടെ തുടങ്ങി ഉച്ചയ്ക്ക് 12.40 ഓടെയാണ് കൊട്ടിക്കലാശത്തിലെത്തിയത്.ഇത് 12-ാമത്തെ തവണയാണ് ജയറാം മേളപ്രമാണിയായത്.

മരണത്തിലും കൈകോർത്ത് ദമ്പതികൾ

തൃപ്പൂണിത്തുറ: ഭർത്താവ് മരിച്ചതിന്‍റെ പിന്നാലെ ഭാര്യയും മരിച്ചു. എരൂർ പിഷാരികോവിൽ റോഡ് അയ്യമ്പിള്ളിച്ചിറ ലൈനിൽ താമസിക്കുന്ന മലപ്പുറം കോട്ടപ്പടി വിശ്രാന്തിയിൽ ശിവരാമപ്പൊതുവാൾ (83, റിട്ട.എജിഎം, ബിഎസ്എൻഎൽ ), ഭാര്യ കെ.പി.രാധ (77, റിട്ട.എച്ച്എം) എന്നിവരാണ് ഒരു ദിവസത്തിന്‍റെ ഇടവേളയിൽ മരിച്ചത്. തിങ്കളാഴ്ച പുലർച്ചെയായിരുന്നു ശിവരാമപ്പൊതുവാളിന്‍റെ മരണം. ബന്ധുക്കൾ എത്താനുള്ളതിനാൽ സംസ്കാര ചടങ്ങുകൾ അടുത്ത ദിവസത്തേക്ക് ക്രമീകരിച്ചിരുന്നപ്പോഴാണ് രോഗശയ്യയിലായിരുന്ന ഭാര്യ രാധ ഇന്നലെ പുലർച്ചെ മരിച്ചത്. സംസ്കാരം നടത്തി. മക്കൾ: മധു, വിധു, ജ്യോതി. മരുമക്കൾ: മഞ്ജു, ധന്യ, വിനോദ്.

ഭർത്താവ് ഓടിച്ചിരുന്ന ഓട്ടോ മറിഞ്ഞ് ഭാര്യ മരിച്ചു

മൂവാറ്റുപുഴ : ഭർത്താവ് ഓടിച്ചിരുന്ന ഓട്ടോറിക്ഷ നിയന്ത്രണം നഷ്ടപ്പെട്ട് മറിഞ്ഞുണ്ടായ അപകടത്തിൽ ഭാര്യ മരിച്ചു. പെരിങ്ങഴ നാമറ്റത്തിൽ സേവ്യറിന്‍റെ ഭാര്യ ജയ്മോൾ (53)ആണ് മരിച്ചത്. ഇന്നലെ വൈകുന്നേരം ആറോടെ പെരിങ്ങഴ വള്ളിക്കട റോഡിൽ മധുരം ബേക്കറി കവലയ്ക്ക് സമീപമായിരുന്നു അപകടം.‌ വാഹനത്തിനടിയിൽ അകപ്പെട്ട ജയ്മോളെ ഉടൻ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.പോസ്റ്റുമോർട്ടത്തിനുശേഷം മൃതദേഹം ഇന്ന് ബന്ധുക്കൾക്ക് വിട്ടുകൊടുക്കും.സംസ്കാരം പിന്നീട്. മക്കൾ : അമൽ, ബിമൽ

സി.എസ് രാമചന്ദ്രന്‍ കെവിവിഇഎസ് ജില്ലാ ജനറല്‍ സെക്രട്ടറി

കൊച്ചി: കേരള വ്യാപാരി വ്യവസായി ഏകോപന സമിതി (കെവിവിഇഎസ്) എറണാകുളം ജില്ലാ ജനറല്‍ സെക്രട്ടറിയായി സി.എസ്. രാമചന്ദ്രനെ (പാലാരിവട്ടം) തെരഞ്ഞെടുത്തതായി ജില്ലാ പ്രസിഡന്‍റ് പി.സി. ജേക്കബ് പത്രക്കുറിപ്പില്‍ അറിയിച്ചു. ജില്ലാ വ്യാപാര ഭവനില്‍ ചേര്‍ന്ന ജില്ലാ പ്രവര്‍ത്തക സമിതിയ യോഗത്തില്‍ ഐകകണ്ഠ്യേനയായിരുന്നു തെരഞ്ഞെടുപ്പ്. വിഭാഗീയ പ്രവര്‍ത്തനങ്ങളെ തുടര്‍ന്ന് നിലവിലെ ജനറല്‍ സെക്രട്ടറി എ.ജെ റിയാസിനെ തല്‍സ്ഥാനത്തുനിന്നു് നീക്കിയതിനെ തുടര്‍ന്നാണ് സി.എസ് രാമചന്ദ്രനെ തെരഞ്ഞെടുത്തത്.

ആലുവ ഹൈടെക്ക് വയോജനകേന്ദ്രത്തിന്‍റെ നിർമാണം നിലച്ചിട്ട് ആറു വർഷം

ആലുവ: ജില്ലാ പഞ്ചായത്തും ജില്ലാ ആശുപത്രിയും ചേർന്ന് ആവിഷ്കരിച്ച ഹൈടെക്ക് സ്പെഷാലിറ്റി വയോജനകേന്ദ്രം ആറ് വർഷം കഴിഞ്ഞിട്ടും പാതിവഴിയിൽ. 2019 ജനുവരി 14 ന് തറക്കല്ലിട്ട് നിർമാണം ആരംഭിച്ച സർക്കാർ മേഖലയിലെ ആദ്യ സ്പെഷാലിറ്റി വയോജനകേന്ദ്രമാണ് കഴിഞ്ഞ മൂന്ന് വർഷമായി നിർമാണം മുടങ്ങിക്കിടക്കുന്നത്. ആറ് വർഷം മുമ്പ് ആറ് കോടി രൂപ ചെലവ് പ്രഖ്യാപിച്ച് തുടങ്ങിയ പദ്ധതി ആറ് വയോജന ദിനങ്ങൾ കടന്നു പോയിട്ടും മൂന്ന്നിലയുടെ കോൺക്രീറ്റ് കെട്ടിടമായി സ്തംഭിച്ചിരിക്കുകയാണ്. ബിഎസ്എൻഎൽ ഓഫീസിന് എതിർവശത്തായി ഈഎസ് ഐ റോഡിലെ പദ്ധതി പ്രദേശത്ത് കെട്ടിടത്തിന് ചുറ്റും കാടുകയറി നശിച്ചു കിടക്കുകയാണ്. ചെലവ് അധികരിച്ചതിനാൽ പദ്ധതി പൂർത്തീകരിക്കാൻ മതിയായ ഫണ്ട് ഇല്ലെന്നാണ് ജില്ലാ പഞ്ചായത്ത് വിശദീകരിക്കുന്നത്‌. ഇനിയും കോടികൾ മുടക്കിയാൽ മാത്രമേ കെട്ടിട നിർമാണം മുഴുവനാക്കാനും വിവിധ സൗകര്യങ്ങൾ ഒരുക്കാനും കഴിയൂ. ഓരോ നിലകളിലും 10 വീതം മുറികൾ, സ്ത്രീകൾക്കും പുരുഷന്മാർക്കുമായി ഡോർമെട്രികൽ, എസി മുറികൾ, ഡൈനിംഗ് ഏരിയ, റിക്രിയേഷൻ ഏരിയ, പരിശീലന കേന്ദ്രം, വാക്‌വേകൾ തുടങ്ങിയ സൗകര്യങ്ങളും തയാറാക്കാൻ വേണ്ട ഫണ്ട് ജില്ലാ പഞ്ചായത്തിന്‍റെ കൈയിലില്ല. നിലവിലെ ഭരണസമിതിയുടെ കാലത്ത് പദ്ധതി നടപ്പിലാകില്ലെന്ന് ഏതാണ്ട് ഉറപ്പായിരിക്കുകയാണ്.

സഹൃദയ നാരീശക്തി പദ്ധതിക്ക് പറവൂരിൽ തുടക്കമായി

പറവൂർ: എറണാകുളം-അങ്കമാലി അതിരൂപതാ സാമൂഹ്യ പ്രവർത്തന വിഭാഗമായ സഹൃദയ, വിധവകൾ, സിംഗിൾ മദർ എന്നിവർക്കായി സംഘടിപ്പിക്കുന്ന സൗജന്യ നൈപുണ്യ വികസന പരിശീലന പദ്ധതിയായ നാരീശക്തി പരിശീലന പരിപാടിക്ക് പറവൂരിൽ തുടക്കമായി. സഹൃദയ മേഖലാ ഓഫീസിൽ ചിറ്റാട്ടുകര ഗ്രാമപഞ്ചായത്ത് പ്രസിഡന്‍റ് ശാന്തിനി ഗോപകുമാർ പരിശീലനത്തിന്‍റെ ഉദ്ഘാടനം നിര്‍വഹിച്ചു. സഹൃദയ എക്സിക്യൂട്ടീവ് ഡയറക്ടർ ഫാ. ജോസ് കൊളുത്തുവെള്ളിൽ അധ്യക്ഷനായിരുന്നു. സഹൃദയ അസോസിയേറ്റ് ഡയറക്ടർ ഫാ. ആന്‍റണി പുതിയാപറമ്പിൽ, പ്രോഗ്രാം ഓഫീസർ കെ.ഒ. മാത്യൂസ്, മേഖലാ കോ ഓർഡിനേറ്റർ പി.വി. സെലിൻ, പ്രൊജക്ട് കോ ഓർഡിനേറ്റർ സെബിൻ ജോസഫ് തുടങ്ങിയവർ സംസാരിച്ചു. 20നും 50നും മധ്യേ പ്രായമുള്ള നൂറ് വനിതകള്‍ക്ക് തയ്യല്‍, ബ്യൂട്ടീഷ്യന്‍ കോഴ്സുകളിലായി നൽകുന്ന 150 മണിക്കൂര്‍ ദൈര്‍ഘ്യമുള്ള പരിശീലനത്തിൽ ബുക്ക് കീപ്പിംഗ്, ബാങ്ക് ലോണ്‍ ഇടപാടുകള്‍, മറ്റ് ഔദ്യോഗിക നടപടിക്രമങ്ങള്‍ തുടങ്ങിയ അടിസ്ഥാന സംരംഭകത്വ മൊഡ്യൂളുകളും ഉള്‍പ്പെടുത്തിയിട്ടുണ്ട്. പരിശീലനം വിജയകരമായി പൂര്‍ത്തിയാക്കി മികവ് പുലര്‍ത്തുന്ന 50 പേര്‍ക്ക് സ്വയംതൊഴില്‍ സംരംഭം തുടങ്ങുവാനാവശ്യമായ മൂലധന പിന്തുണയും നല്കും.

പ്രായം മറന്നുള്ള മേളക്കൊഴുപ്പിലൂടെ വിസ്മയിപ്പിച്ച് സായംപ്രഭ കൂട്ടായ്മ

പറവൂര്‍: കോട്ടപ്പുറം രൂപതയുടെ നിയന്ത്രണത്തിലുള്ള കിഡ്‌സിന്‍റെ (കോട്ടപ്പുറം ഇന്‍റഗ്രേറ്റഡ് ഡെവലപ്‌മെന്‍റ് സൊസൈറ്റി) ആഭിമുഖ്യത്തില്‍ 13 വര്‍ഷം മുമ്പ് ഗോതുരുത്ത് കടല്‍വാതുരുത്ത് ഹോളിക്രോസ് ഇടവകയില്‍ രൂപീകരിച്ച സായംപ്രഭ കൂട്ടായ്മ അവതരിപ്പിച്ച ശിങ്കാരിമേളം ശ്രദ്ധേയമായി. 60 വയസ് കഴിഞ്ഞവരുടെ കൂട്ടായ്മയായ ഇതിലെ 18 മുതിര്‍ന്ന അംഗങ്ങളാണ് ഹോളിക്രോസ് ദേവാലയത്തിലെ വിശുദ്ധ കുരിശിന്‍റെ മഹത്വീകരണ തിരുനാളിനോടനുബന്ധിച്ച് നടന്ന ഇടവകദിനത്തില്‍ ശിങ്കാരിമേളം അവതരിപ്പിച്ചത്. ചെണ്ടമേളം ശാസ്ത്രീയമായി അഭ്യസിച്ച് അരങ്ങേറ്റം നടത്തിയ തോമസ് കളരിത്തറയുടെയും സെബാസ്റ്റ്യന്‍ കുറുപ്പശേരിയുടെയും ശിക്ഷണത്തിലായിരുന്നു പരിശീലനം. മുമ്പ് ഒരിക്കല്‍പോലും ചെണ്ട കൈകൊണ്ട് തൊടാന്‍ അവസരം ലഭിക്കാത്തവരായിരുന്നു ഇവരെല്ലാവരും എന്നതാണ് വാസ്തവം. പള്ളി വികാരി ഫാ. ജോയ് തേലക്കാട്ടിന്‍റെ പ്രോത്സാഹനത്തില്‍ തോമസ് കളരിത്തറ, സെബാസ്റ്റ്യന്‍ കുറുപ്പശേരി, ഷെല്ലി പുത്തന്‍വീട്ടില്‍, വര്‍ഗീസ് കളത്തില്‍, മാത്യു കളത്തില്‍, ജോര്‍ജ് പുത്തന്‍വീട്ടില്‍, ഗ്രേസി ഷെല്ലി, മാര്‍ഗി തോമസ്, മറിയിലി ഓസോ, എല്‍സി റാഫേല്‍, ലില്ലി ജോയ്, ഫിലോ സെബാസ്റ്റ്യന്‍, ബേബി ജെറി, മേരി റോക്കി, കര്‍മലി കുഞ്ഞപ്പന്‍, ഗ്രേസി ജോര്‍ജ്, ബേബി കുഞ്ഞപ്പന്‍, സ്റ്റെല്ല ഡാനിയല്‍ എന്നിവരാണ് ശിങ്കാരിമേളം അവതരിപ്പിച്ചത്.

തുരുത്തിപ്പുറം ഫൊറോനാ പള്ളിയിൽ

പറവൂർ: ചരിത്രപ്രസിദ്ധമായ തുരുത്തിപ്പുറം ഫൊറോന പള്ളിയിൽ വിശുദ്ധ ഫ്രാൻസിസ് അസീസിയുടെയും പരിശുദ്ധ മാതാവിന്‍റെയും കൊമ്പ്രേരിയ തിരുനാളിന് കൊടിയേറി. കോട്ടപ്പുറം ബിഷപ് ഡോ. അംബ്രോസ് പുത്തൻവീട്ടിൽ മുഖ്യ കാർമികനായി. ഇന്ന് വൈകീട്ട് അഞ്ചിന് ജപമാല. 5.30 ന് ദിവ്യബലി, വചന സന്ദേശം. നാളെ ഇടവക ദിനം. രാവിലെ 7ന് ദിവ്യബലി തുടർന്ന് ഇലക് ത്തോർ വാഴ്ച . പിന്നീട് 2026ലെ പ്രസ്തുദേന്തി വാഴ്ച. തിരുനാൾ ദിനമായ അഞ്ചിന് രാവിലെ 9.30 ന് പൊന്തിഫിക്കൽ ദിവ്യബലി. കണ്ണൂർ രൂപത സഹായ മെത്രാൻ റവ.ഡോ. ഡെന്നിസ് കുറുപ്പശേരി മുഖ്യകാർമികനാവും. മോൺ. റോക്കി റോബിൻ കളത്തിൽ വചനപ്രഘോഷണം നടത്തും. കാഴ്ച സമർപ്പണത്തിനുശേഷം പടിഞ്ഞാറും ഭാഗത്തേക്കുള്ള പ്രദക്ഷിണം നടക്കും. വൈകുന്നേരം ആറിന് തിരുനാൾ സമാപന ദിവ്യബലി കൊടിയിറക്കം രൂപം എടുത്തു വയ്ക്കൽ എന്നിവ നടക്കും. രാത്രി എട്ടിന് ഗാനമേള.

അധ്യാപകരുടെ സേവനത്തെ മാനിക്കാത്ത സർക്കാർ നിലപാട് ദൗർഭാഗ്യകരം: അതിരൂപത ടീച്ചേഴ്‌സ് ഗിൽഡ്

കൊച്ചി: ഭിന്നശേഷി സംവരണവുമായി ബന്ധപ്പെട്ട സർക്കാരിന്‍റെ എല്ലാ നിർദേശങ്ങളും കത്തോലിക്കാ മാനേജ്മെന്‍റുകൾ പാലിച്ചിട്ടും സത്യവിരുദ്ധമാ‍യ പ്രസ്താവനകളിലൂടെ നീതിനിഷേധിക്കുന്നത് അപലപനീയമെന്ന് എറണാകുളം - അങ്കമാലി അതിരൂപത ടീച്ചേഴ്‌സ് ഗിൽഡ്. ഭിന്നശേഷി വിഷയത്തിൽ എൻഎസ്എസിനു ലഭിച്ച സുപ്രീം കോടതിവിധി സമാന സ്വഭാവമുള്ള മറ്റു മാനേജ്മെന്‍റുകളുടെ കാര്യത്തിലും ബാധകമാണെന്നിരിക്കെ, സുപ്രീം കോടതിയിൽ നിന്നും സമാനവിധി വാങ്ങണമെന്ന വിദ്യാഭ്യാസ മന്ത്രിയുടെ പിടിവാശി ജനാധിപത്യമര്യാദകൾക്ക് ചേർന്നതല്ല. ഭരണഘടനയുടെ മൂല്യങ്ങൾക്ക് നിരക്കാത്ത, അധ്യാപകരുടെ സേവനത്തെ മാനിക്കാത്ത സർക്കാർ നിലപാട് ദൗർഭാഗ്യകരവും പ്രതിഷേധാർഹവുമാണ്. പ്രഥമാധ്യാപകരുടെ കൃത്യവിലോപം കൊണ്ടാണ് ദിവസവേതനക്കാരുടെ വേതനം വൈകുന്നതെന്ന വിദ്യാഭ്യാസ മന്ത്രിയുടെ പ്രസ്താവനയും വാസ്തവവിരുദ്ധമാണ്. വിദ്യാഭ്യാസ മന്ത്രി ഉദ്യോഗസ്ഥർ പറയുന്നത് മാത്രം കേട്ടു പ്രവർത്തിക്കേണ്ട ആളല്ല. വസ്തുതകൾ പഠിച്ച് യാഥാർഥ്യബോധത്തോടെ മുന്നോട്ടുനീങ്ങണം. കേരള പൊതുസമൂഹത്തെ തെറ്റിദ്ധരിപ്പിച്ച പൊതുവിദ്യാഭ്യാസ മന്ത്രിയുടെ വസ്തുതാവിരുദ്ധമായ പ്രസ്താവനകൾ തിരുത്തണമെന്ന് അതിരൂപത ഡയറക്ടർ ഫാ.തോമസ് നങ്ങേലിമാലിൽ, പ്രസിഡന്‍റ് ജീബ പൗലോസ്, സെക്രട്ടറി ബിനോയി ജോസഫ് എന്നിവർ ആവശ്യപ്പെട്ടു.

മാർത്തോമാ ഭവനിലെ അതിക്രമം: ന്യൂനപക്ഷ മോർച്ച ധർണ നടത്തി

കൊച്ചി: കളമശേരി മാർത്തോമാ ഭവനിൽ രാത്രിയുടെ മറവിൽ കൈയേറ്റവും അക്രമവും നടത്തിയവരെ നിയമത്തിനു മുന്നിൽ കൊണ്ടുവരണമെന്ന് ആവശ്യപ്പെട്ട് ബിജെപി ന്യൂനപക്ഷ മോർച്ച കണയന്നൂർ താലൂക്ക് ഓഫീസിനു മുന്നിൽ പ്രതിഷേധ ധർണ നടത്തി. സംസ്ഥാന പ്രസിഡന്‍റ് സുമിത് ജോർജിന്‍റെ നേതൃത്വത്തിൽ നടന്ന ധർണ എൻഡിഎ സംസ്ഥാന ഉപാധ്യക്ഷൻ എ.എൻ. രാധാകൃഷ്ണൻ ഉദ്ഘാടനം ചെയ്തു. ബിജെപി എറണാകുളം സിറ്റി ജില്ലാ പ്രസിഡന്‍റ് അഡ്വ. കെ.എസ് ഷൈജു, നേതാക്കളായ എം.എ. ബ്രഹ്മരാജ്, എസ്. സജി, കോർപറേഷൻ കൗൺസിലർ പത്മജ എസ്. മേനോൻ തുടങ്ങിയവർ പ്രസംഗിച്ചു.

മഞ്ഞുമ്മല്‍ സെന്‍റ് ജോസഫ്‌സ് ആശുപത്രിയില്‍ ഹൃദയദിനാചരണം

കൊച്ചി: മഞ്ഞുമ്മല്‍ സെന്‍റ് ജോസഫ്‌സ് ആശുപത്രിയില്‍ ഹൃദയ ദിനം ആചരിച്ചു. ആശുപത്രി ഡയറക്ടര്‍ ഫാ. ലാല്‍ജു പോളപ്പറമ്പില്‍ ഉദ്ഘാടനം ചെയ്തു. അസോസിയേറ്റ് ഡയറക്ടര്‍മാരായ ഫാ. ജിന്‍സണ്‍, ഫാ. അനുപ്രതാപ്, ഫാ. സൈമണ്‍, മെഡിക്കല്‍ സൂപ്രണ്ട് എം.എന്‍. വെങ്കിടേശ്വരന്‍, ഹൃദ്രോഗ വിദഗ്ദ്ധരായ ഡോ. ജിമ്മി ജോര്‍ജ്, ഡോ. സരിത ശേഖര്‍ ശശികല, ഡോ. വിഷ്ണു, അഡ്മിനിസ്‌ട്രേറ്റര്‍ സെലിൻ മാത്യു, നഴ്‌സിംഗ് സൂപ്രണ്ട് സിസ്റ്റര്‍ സംഗീത എന്നിവര്‍ പങ്കെടുത്തു.

അങ്കമാലി സീനിയർ സിറ്റിസൺസ് ഫോറം രജതജൂബിലി നിറവിൽ; വയോജന ദിനാചരണം ഇന്ന്

അങ്കമാലി : രജതജൂബിലി നിറവിൽ എത്തിനിൽക്കുന്ന അങ്കമാലി സീനിയർ സിറ്റിസൺസ് ഫോറം ഇന്ന് വിപുലമായ പരിപാടികളോടെ വയോജനദിനം ആചരിക്കുന്നു. സെന്‍റ് ജോർജ് ഷോപ്പിംഗ് കോംപ്ലക്സിലെ സീനിയർ സിറ്റിസൺസ് ഫോറം ഹാളിൽ രാവിലെ ഒന്പതിന് രജിസ്ട്രേഷൻ, തുടർന്ന് കലാ -കായിക മത്സരങ്ങൾ, പൊതുസമ്മേളനം എന്നിവ നടക്കും. പൊതുസമ്മേളനം റോജി എം. ജോൺ എംഎൽഎ ഉദ്ഘാടനം നിർവഹിക്കും. സീനിയർ സിറ്റിസൺസ് ഫോറം പ്രസിഡന്‍റും നഗരസഭ മുൻ ചെയർമാനുമായ പി.എ. തോമസ് അധ്യക്ഷത വഹിക്കും. മുതിർന്ന പൗരന്മാർക്ക് വേണ്ടിയുള്ള സാമൂഹിക പ്രവർത്തന മികവിനുള്ള അങ്കമാലി ന്യൂസ്‌ ക്ലബ്‌ പുരസ്‌കാര സമർപ്പണവും വയോജന നിയമത്തെക്കുറിച്ചുള്ള ഉദ്ബോധനവും പോലീസ് അങ്കമാലി സർക്കിൾ ഇൻസ്‌പെക്ടർ എ. രമേഷ് നിർവഹിക്കും. മുൻ എം എൽ എ പി. ജെ ജോയ് മുഖ്യപ്രഭാഷണം നടത്തും. ചടങ്ങിൽ അനുഗ്രഹ പ്രഭാഷണവും സമ്മാനദാനവും ഫാ. ലൂക്കോസ് കുന്നത്തൂർ നിർവഹിക്കും. വയോജന സംരക്ഷണനിധി പീറ്റേഴ്‌സ് റൈസ് മാനേജിംഗ് ഡയറക്ടർ പത്രോസ് തെറ്റയിൽ വിതരണം ചെയ്യും.

മെഗാ തിരുവാതിര സംഘടിപ്പിച്ചു

കൊച്ചി: എറണാകുളം ഡിസ്ട്രിക്ട് റസിഡന്‍റ്സ് അസോസിയേഷന്‍ അപെക്‌സ് കൗണ്‍സില്‍ (എഡ്രാക്) 23 മത് വാര്‍ഷികത്തോടനുബന്ധിച്ച് ജില്ലാ വനിതാ സമിതിയുടെ നേതൃത്വത്തില്‍ 300ല്‍ പരം വനിതകള്‍ അണിനിരന്ന മെഗാ തിരുവാതിര അവതരിപ്പിച്ചത് ശ്രദ്ധേയമായി. വനിതാ കമ്മിറ്റി ജില്ലാ പ്രസിഡന്‍റ് ജെയിന്‍ തൃലോക്, സെക്രട്ടറി തങ്കമണി മധുസൂദനന്‍ എന്നിവര്‍ നേതൃത്വം നല്‍കി. കോര്‍പറേഷന്‍ സ്ഥിരം സമിതി അധ്യക്ഷന്‍ വി.എ. ശ്രീജിത്ത് സര്‍ട്ടിഫിക്കറ്റുകള്‍ വിതരണം ചെയ്തു. കൗണ്‍സിലര്‍മാരായ സന്ത വിജയന്‍, ദീപ വര്‍മ, രജനി മണി, പൊന്നമ്മ പരമേശ്വരന്‍ എന്നിവരും ചടങ്ങില്‍ പങ്കെടുത്തു.

ഡയാലിസ് സഹായ പദ്ധതി: ധനസഹായം കൈമാറി

കൊച്ചി: റോട്ടറി കൊച്ചി മിഡ്ടൗണിന്‍റെ നേതൃത്വത്തില്‍ മുത്തൂറ്റ് മിനി ഫിനാന്‍സിന്‍റെ സഹകരണത്തോടെ നിര്‍ദ്ധനരായ കിഡ്‌നി രോഗികളെ സഹായിക്കുന്നതിനായി നടപ്പിലാക്കുന്ന ഡയാലിസിസ് സഹായ പദ്ധതിയുടെ ഭാഗമായുള്ള ധനസഹായം എറണാകുളം ലിസി ആശുപത്രിക്ക് കൈമാറി. കൊച്ചി മിഡ്ടൗണ്‍ പ്രസിഡന്‍റ് അഡ്വ. പി. ഗോപകുമാര്‍, മുത്തൂറ്റ് മിനി ഫിനാന്‍സ് സിഎസ്ആര്‍ പ്രോജക്ട് ചെയര്‍മാന്‍ കെ. കെ. ജോര്‍ജ് എന്നിവരില്‍ നിന്ന് ഒരു വര്‍ഷത്തെ ഡയലാസിസിനുളള ധനസഹായത്തിന്‍റെ ചെക്ക് ലിസി ആശുപത്രി ഡയറക്ടര്‍ ഫാ. പോള്‍ കരേടന്‍ ഏറ്റുവാങ്ങി. റോട്ടറി കൊച്ചി മിഡ്ടൗണ്‍ സെക്രട്ടറി ഡോ. ബൈജു കുണ്ടില്‍, റൊട്ടേറിയന്‍ ടി.ടി തോമസ്, ബാബു ജോസഫ്, മുത്തൂറ്റ് മിനി ഫിനാന്‍സ് സിഇഒ കെ. ഇ. മത്തായി തുടങ്ങിയവര്‍ പങ്കെടുത്തു.

കണ്ടനാട് പാടശേഖരത്തിൽ വിത്തുവിതച്ച് നടൻ ധ്യാനും കൃഷിയിടത്തിലേക്ക്

ഉദയംപേരൂർ: കണ്ടനാട് പാടശേഖരത്തിൽ ഇത്തവണ കൃഷിയിറക്കാൻ നടൻ ധ്യാനുമെത്തി. 10 വർഷം മുൻപ് രണ്ട് ഏക്കറിൽ പിതാവ് ശ്രീനിവാസൻ തുടങ്ങിയ കൃഷിക്ക് പിന്നാലെയാണ് പാടശേഖര സമിതിക്കൊപ്പം ഇത്തവണ ധ്യാൻ ശ്രീനിവാസനും കൃഷിയിറക്കാനെത്തിയത്. ഹൈബി ഈഡൻ എംപിയോടൊപ്പമാണ് ധ്യാൻ നെല്ല് വിതച്ചത്. 80 ഏക്കറിലാണ് ഇത്തവണത്തെ കൃഷി. ഉമ വിത്തുകളാണ് വിതയ്ക്കുന്നത്. 1500 കിലോഗ്രാമിൽ ഏറെ വിത്തുകൾ ഇവിടെ എത്തിയിട്ടുണ്ട്. 5 ഏക്കറിൽ നാടൻ വിത്തുകളും വിതയ്ക്കും. പഞ്ചായത്ത്, കൃഷിഭവൻ, മധ്യകേരള ഫാർമർ പ്രൊഡ്യൂസർ കമ്പനി എന്നിവയുടെ നേതൃത്വത്തിൽ സംഘടിപ്പിച്ച വിത ഉത്സവം കണ്ടനാട് ചെമ്മാച്ചൻ പള്ളിയോടു ചേർന്നുള്ള പുന്നച്ചാലിൽ‌ പാടശേഖരത്തിലാണ് നടന്നത്. പഞ്ചായത്ത് പ്രസിഡന്‍റ് സജിത മുരളി അധ്യക്ഷത വഹിച്ചു. നടൻ മണികണ്ഠൻ ആചാരി, മുളന്തുരുത്തി ബ്ലോക്ക് പഞ്ചായത്ത് പ്രസിഡന്‍റ് ഷാജി മാധവൻ, ജോർജ് കുളങ്ങര, സഞ്ജു സൂസൻ, കെ.വി. അനിത തുടങ്ങിയവർ പ്രസംഗിച്ചു. വിത ഉത്സവത്തിന്‍റെ ഭാഗമായി ചെളിയിൽ പന്ത് കളിക്കാനും അവസരമൊരുക്കിയിരുന്നു.ധ്യാൻ ശ്രീനിവാസൻ, നാട്ടുകാരായ മനു ഫിലിപ്പ് തുകലൻ, സാജു കുര്യൻ വൈശ്യംപറമ്പിൽ എന്നിവർ ചേർന്നാണ് പാടം പാട്ടത്തിനെടുത്ത് കൃഷിയിറക്കുന്നത്.

കന്നി 20 പെരുന്നാൾ : കാൽനട തീർഥാടകർക്ക് നാളെ കോതമംഗലത്ത് സ്വീകരണം

കോതമംഗലം : സർവമത തീർഥാടന കേന്ദ്രമായ കോതമംഗലം മാർത്തോമ്മ ചെറിയപള്ളിയിൽ കബറടങ്ങിയിരിക്കുന്ന യൽദോ മാർ ബസേലിയോസ് ബാവയുടെ 340-ാംമത് ഓർമപ്പെരുന്നാളിന് (കന്നി 20 ) നാനാദിക്കിൽ നിന്ന് കാൽനടയായെത്തുന്ന തീർഥാടകർക്ക് നാളെ കോതമംഗലം ചെറിയ പള്ളിയിൽ സ്വീകരണം നൽകും. 2, 3 തീയതികൾ കോതമംഗലം ഫെസ്റ്റിവൽ ഏരിയയായി സർക്കാർ പ്രഖ്യാപിച്ചിട്ടുണ്ട്. പെരുന്നാൾ നേർച്ച സദ്യയ്ക്കുള്ള ഉത്പന്ന ശേഖരണം കലവറ നിറയ്ക്കൽ മാത്യൂസ് മാർ അന്തിമോസ് മെത്രാപ്പോലീത്ത ഉദ്ഘാടനം ചെയ്തു. കന്നി 20 പെരുന്നാൾ വിളവെടുപ്പിന്‍റെയും പെരുന്നാളായിട്ട് പഴയകാലങ്ങളിൽ അറിയപ്പെട്ടിരുന്നു. അതിൻെറ ഓർമയ്ക്കായിട്ട് നാനാ ജാതി മതസ്ഥരായ ആളുകൾ വഴിപാടായി ഫലമൂലാദികൾ പള്ളിയിൽ സമർപ്പിച്ചു വരുന്നുണ്ട്. ഇന്ന് രാവിലെ അർപ്പിക്കപ്പെടുന്ന വിശുദ്ധ അഞ്ചിന്മേൽ കുർബ്ബാനയ്ക്ക് മർക്കോസ് മാർ ക്രിസോസ്റ്റോമോസ് മെത്രാപ്പോലീത്ത മുഖ്യകാർമികത്വം വഹിക്കും. വൈകുന്നേരം നാലിന് തീർത്ഥാടകരായി എത്തുന്ന ആളുകളുടെ സുരക്ഷാ ക്രമീകരണങ്ങൾക്കായുള്ള പോലീസ് എയ്ഡ് പോസ്റ്റിന്‍റെയും റവന്യൂ കൺട്രോൾ റൂമിന്‍റെയും പ്രവർത്തനമാരംഭിക്കും. ആറിന് സന്ധ്യാ നമസ്കാരവും നടത്തും. നാളെ രാവിലെ 7.15 ന് വിശുദ്ധ മൂന്നിന്മേൽ കുർബ്ബാനയ്ക്ക് ഡോ. മാത്യൂസ് മാർ അന്തിമോസ് മെത്രാപ്പോലീത്ത പ്രധാന കാർമികത്വം വഹിക്കും. വൈകിട്ട് അഞ്ചിന് ഹൈറേഞ്ച്, പടിഞ്ഞാറൻ, വടക്കൻ, പോത്താനിക്കാട് എന്നീ മേഖലകളിൽ നിന്നും കാൽനട തീർഥാടകരായി എത്തുന്ന തീർഥാടക സംഘത്തെ വൈദീകരും പള്ളി ഭരണ സമിതിയും ചേർന്ന് സ്വീകരിക്കും. തുടർന്ന് സന്ധ്യാ നമസ്കാരത്തിന് ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവ പ്രധാന കാർമികത്വവും മറ്റു മെത്രാപ്പോലീത്തമാർ സഹകാർമികത്വവും വഹിക്കും. രാത്രി 10 ന് 101 പൊൻ - വെള്ളി കുരിശുകളുടെ അകമ്പടിയോടെ നഗരം ചുറ്റി പ്രദക്ഷിണം നടത്തും. രാവിലെ ഒന്പത് മുതൽ രാത്രി 10 വരെ പള്ളിയിൽ എത്തുന്ന മുഴുവൻ തീർഥാടകർക്കും നേർച്ചക്കഞ്ഞി വിതരണം പളളിയുടെ പടിഞ്ഞാറുവശത്ത് പ്രത്യേകം തയാറാക്കിയ പന്തലിൽ നൽകും.

കിഴക്കേക്കര-അടൂപ്പറമ്പ് റോഡ് തകര്‍ന്നു; യാത്രക്കാർ ദുരിതത്തിൽ

മൂവാറ്റുപുഴ : തകര്‍ന്നു തരിപ്പണമായ കിഴക്കേക്കര - അടൂപ്പറമ്പ് റോഡില്‍ വെള്ളക്കെട്ടും രൂക്ഷമായതോടെ യാത്രക്കാര്‍ ദുരിതത്തില്‍. കിഴക്കേക്കര ഈസ്റ്റ് ഹൈസ്‌കൂളിനു മുന്നില്‍ നിന്ന് അടൂപ്പറമ്പ് മാവിന്‍ചുവട് വരെ രണ്ടര കിലോമീറ്റര്‍ ദൂരമാണ് തകര്‍ന്ന് തരിപ്പണമായിരിക്കുന്നത്. ബിഎംബിസി നിലവാരത്തില്‍ നിര്‍മിച്ച റോഡില്‍ ഭാരവാഹനങ്ങളുള്‍പ്പെടെ പതിവായി കടന്നുപോയതോടെയാണ് കുഴികള്‍ രൂപപ്പെട്ടത്. നഗരവികസനത്തിന്‍റെ ഭാഗമായി മൂന്നു മാസം മുമ്പ് വാഹന ഗതാഗതം ഇതുവഴി തിരിച്ചുവിട്ടതാണ് തകര്‍ച്ചയ്ക്കു കാരണമായതെന്ന് ചൂണ്ടിക്കാട്ടുന്നു. എംസി റോഡ് വഴി കോട്ടയം ഭാഗത്തേയ്ക്കും മൂവാറ്റുപുഴ, തൊടുപുഴ, പുനലൂര്‍ ഭാഗത്തേക്കും ആരക്കുഴ, ആലപ്പുഴ, പണ്ടപ്പിള്ളി ഭാഗത്തേയ്ക്കുമുള്ള വാഹനങ്ങളാണ് ഇതുവഴി തിരിച്ചുവിട്ടത്. കൂടാതെ അന്തര്‍ സംസ്ഥാന ചരക്കു വാഹനങ്ങളും ടിപ്പര്‍, ടോറസ് വാഹനങ്ങളും ഇതുവഴിയാണ് സഞ്ചരിക്കുന്നത്. ഇട തടവില്ലാതെ വാഹനങ്ങള്‍ കടന്നുപോയതോടെ റോഡിന്‍റെ അടിത്തട്ട് ഇളകുകയും കലുങ്കുകള്‍ പലതും തകരുകയും ഓടകളില്‍ മണ്ണ് അടിഞ്ഞു കൂടുകയും ചെയ്തു. റോഡുകള്‍ തകര്‍ന്നതോടെ വാഹനങ്ങള്‍ നിയന്ത്രണംവിട്ട് ക്ഷേത്രത്തിന്‍റെയും സ്‌കൂളിന്‍റെയും സ്വകാര്യ വ്യക്തികളുടെ പറന്പിന്‍റെയും ചുറ്റുമതിലുകള്‍ തകര്‍ത്തിട്ടുള്ള സംഭവങ്ങളും ഉണ്ടായിട്ടുണ്ട്. റോഡിന്‍റെ ദുരവസ്ഥ പരിഹരിക്കണമെന്ന് ആവശ്യപ്പെട്ട് നിരവധി പരാതികള്‍ ഉയര്‍ന്നിട്ടും പൊതുമരാമത്ത് റോഡ് വിഭാഗം നടപടി സ്വീകരിച്ചില്ലെന്നും നാട്ടുകാര്‍ ആരോപിച്ചു.

നവീകരിച്ച അന്ധ വനിതാ തൊഴില്‍ പരിശീലന കേന്ദ്രം ഉദ്ഘാടനം മൂന്നിന്

പോത്താനിക്കാട്: ജില്ലാ പഞ്ചായത്ത് ഫണ്ട് വിനിയോഗിച്ച് നവീകരിച്ച പോത്താനിക്കാട് അന്ധ വനിതാ തൊഴില്‍ പരിശീലന, ഉത്പാദന കേന്ദ്രത്തിന്‍റെ ഉദ്ഘാടനം മൂന്നിന് പ്രതിപക്ഷനേതാവ് വി.ഡി. സതീശന്‍ നിര്‍വഹിക്കും. എറണാകുളം ജില്ലാ പഞ്ചായത്തില്‍നിന്നും 37 ലക്ഷം രൂപ ഉപയോഗിച്ചാണ് കെട്ടിടം നവീകരിച്ചത്. ഫെഡറേഷന്‍ ഓഫ് ദി ബ്ലൈന്‍ഡിന്‍റെ നേതൃത്വത്തില്‍ 1988 ല്‍ കാഴ്ച പരിമിതിയുള്ള വനിതകള്‍ക്ക് താമസിച്ച് തൊഴില്‍ പരിശീലനവും വരുമാനവും ലക്ഷ്യമിട്ടാണ് ആരംഭിച്ചത്. സംസ്ഥാനത്തെ ആദ്യ അന്ധ വനിതാ പരിശീലന കേന്ദ്രമാണിത്. അന്ധ വനിതകള്‍ക്കായി വിവിധ മേഖലകളിലുള്ള തൊഴില്‍ പരിശീലനവും ഉത്പന്നങ്ങളുടെ നിര്‍മാണവും, വിപണനവും ആരംഭിച്ചതിലൂടെ നിരവധി കുടുംബങ്ങളെ ഇരുട്ടിന്‍റെ ലോകത്തുനിന്ന് വെളിച്ചത്തിലേക്ക് കേന്ദ്രം നയിച്ചു. അന്ധവനിതകള്‍ക്കു വേണ്ടി ബ്രെയിലിയില്‍ പൊതുവിദ്യാഭ്യാസം ഉള്‍പ്പെടെയുള്ള വിവിധ പരിശീലന പരിപാടികള്‍ ഇവിടെ നടന്നിരുന്നു മെഴുകുതിരി നിര്‍മാണം, കുട നിര്‍മാണം, തയ്യല്‍, ഹോം സയന്‍സ്, പ്ലാസ്റ്റിക് കസേര വരിയല്‍, ക്ലീനിംഗ് ലിക്വിഡ് നിര്‍മ്മാണം തുടങ്ങി വിവിധ മേഖലകളില്‍ തൊഴില്‍ പരിശീലനങ്ങളാണ് ഇപ്പോള്‍ ഇവിടെ നടക്കുന്നത്. 20 വര്‍ഷം മുന്‍പുവരെ ഓരോ ബാച്ചിലും 80ലധികം വനിതകള്‍ ഇവിടെ താമസിച്ച് തൊഴില്‍ പരിശീലനം നേടിയിരുന്നു. എന്നാല്‍ 2003-2004 കാലഘട്ടത്തില്‍ കേന്ദ്രസര്‍ക്കാരില്‍നിന്നും ഈ സ്ഥാപനത്തിന് ലഭിച്ചിരുന്ന സാമ്പത്തിക സഹായം നിലച്ചതിനെ തുടര്‍ന്നാണ് സെന്‍ററിന്‍റെ പ്രവര്‍ത്തനം പ്രതിസന്ധിയിലായത്. സ്ഥാപനത്തിന്‍റെ ചുമതലക്കാരായ കേരള ഫെഡറേഷന്‍ ഓഫ് ദ ബ്ലൈന്‍ഡ് ഭാരവാഹികള്‍ സുമനസുകളുടെ സഹായത്തോടുകൂടിയാണ് ഈ കേന്ദ്രം നടത്തിക്കൊണ്ടുപോകുന്നത്. 38 വര്‍ഷത്തോളമായി കെട്ടിടത്തിന് അറ്റകുറ്റപ്പണികള്‍ ചെയ്യാന്‍ കഴിയാത്തതുമൂലം പരിശീലന കേന്ദ്രം അതിശോചനീയമായ അവസ്ഥയിലായി. ഈ സാഹചര്യത്തിലാണ് ജില്ലാ പഞ്ചായത്ത് ഭിന്നശേഷി ഘടക പദ്ധതിയില്‍പ്പെടുത്തി ഈ കേന്ദ്രം നവീകരിക്കുന്നതിനും കാഴ്ച പരിമിതിയുള്ള നിരാലംബരായ വനിതകള്‍ക്ക് സുരക്ഷിതമായി താമസിച്ച് തൊഴില്‍ പരിശീലനം നേടുന്നതിനുംവേണ്ടി ഫണ്ട് അനുവദിച്ചതെന്ന് ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടനും, ഡിവിഷന്‍ അംഗം റാണിക്കുട്ടി ജോര്‍ജും പറഞ്ഞു. കെട്ടിട നവീകരണത്തിന് പുറമെ വിവിധ മേഖലകളില്‍ ആവശ്യമായ തൊഴില്‍ പരിശീലനത്തിനായി ആദ്യഘട്ടം എന്ന നിലയില്‍ ജില്ലാ പഞ്ചായത്ത് പത്തുലക്ഷം രൂപ അനുദിച്ചിട്ടുണ്ട്. കേന്ദ്രത്തിന്‍റെ ഉദ്ഘാടനചടങ്ങിൽ മാത്യു കുഴല്‍നാടന്‍ എംഎല്‍എ അധ്യക്ഷത വഹിക്കും. ഡീന്‍ കുര്യാക്കോസ് എം പി മുഖ്യാതിഥിയായിരിക്കും. ത്രിതല പഞ്ചായത്ത് ജനപ്രതിനിധികളും, സാമൂഹിക രാഷ്ട്രീയ രംഗങ്ങളിലെ വ്യക്തികളും ചടങ്ങില്‍ പങ്കെടുക്കും.

പിതൃവേദി പൈങ്ങോട്ടൂര്‍ ഫൊറോന നേതൃയോഗം

പോത്താനിക്കാട്: പിതൃവേദി പൈങ്ങോട്ടൂര്‍ ഫൊറോന നേതൃയോഗം പിതൃവേദി കോതമംഗലം രൂപത ഡയറക്ടര്‍ റവ. ഡോ. ആന്‍റണി പുത്തന്‍കുളം ഉദ്ഘാടനം ചെയ്തു. പിതാക്കന്‍മാരുടെ കൂട്ടായ്മ ഇടവകകളെ കൂടുതല്‍ ശാക്തീകരിക്കുകയും അതിലൂടെ എല്ലാ സംഘടനകള്‍ക്കും ഊര്‍ജം വര്‍ധിക്കുമെന്നും അദ്ദേഹം പറഞ്ഞു. പൈങ്ങോട്ടൂര്‍ സെന്‍റ് ആന്‍റണീസ് ഫൊറോന പള്ളി വികാരി ഫാ. കുര്യാക്കോസ് കൊടകല്ലില്‍ അധ്യക്ഷത വഹിച്ചു. പൈങ്ങോട്ടൂര്‍ ഫൊറോനയുടെ കീഴിലുള്ള പോത്താനിക്കാട്, കുളപ്പുറം, കടവൂര്‍, പുന്നമറ്റം, മുള്ളരിങ്ങാട് ഇടവകകളില്‍ നിന്നുള്ള പിതാക്കന്‍മാരാണ് യോഗത്തില്‍ പങ്കെടുത്തത്. പിതൃവേദി പൈങ്ങോട്ടൂര്‍ ഫൊറോന കമ്മിറ്റി ഭാരവാഹികളായി ഫാ. കുര്യാക്കോസ് കൊടകല്ലില്‍ (ഡയറക്ടര്‍), സന്തോഷ് ജോര്‍ജ് (പ്രസിഡന്‍റ്), അനില്‍ കല്ലട (വൈസ് പ്രസിഡന്‍റ്), ജോണ്‍ ആടുകുഴിയില്‍ (സെക്രട്ടറി), റോണി ആണ്ടൂര്‍ (ജോ. സെക്രട്ടറി), ജോണ്‍സന്‍ മുള്ളരിങ്ങാട് (ട്രഷറര്‍) എന്നിവരെ തെരഞ്ഞെടുത്തു. പ്രഫ. ജോസ് ഏബ്രഹാം, കെ.എം.ചാക്കോ, ജിലേഷ് മാത്യു, എന്നിവര്‍ പ്രസംഗിച്ചു.

മഹാത്മജി പുരസ്കാരം ടോമി തന്നിട്ടാമാക്കലിന്

വാഴക്കുളം: മികച്ച പഞ്ചായത്തംഗത്തിനുള്ള മഹാത്മജി പുരസ്കാരം മഞ്ഞള്ളൂർ പഞ്ചായത്ത് വൈസ് പ്രസിഡന്‍റ് ടോമി തന്നിട്ടാമാക്കലിന് ലഭിച്ചു. തിരുവനന്തപുരത്ത് നടന്ന ചടങ്ങില്‍ മന്ത്രി റോഷി അഗസ്റ്റിൻ പുരസ്കാരം നൽകി. മികച്ച പ്രവര്‍ത്തനങ്ങള്‍ നടത്തുന്ന ജനപ്രതിനിധികള്‍ക്കും കലാസാംസ്കാ രിക, ജീവകാരുണ്യ മേഖലയിലെ പ്രതിഭകൾക്കും ജവഹര്‍ലാല്‍ നെഹ്റു കള്‍ച്ചറല്‍ സൊസൈറ്റിയുടെ ആഭിമുഖ്യത്തിൽ നൽകുന്ന പുരസ്കാരമാണിത്. 20 വർഷമായി തുടർച്ചയായി പഞ്ചായത്തംഗമായ ടോമി തന്നിട്ടാമാക്കൽ കഴിഞ്ഞ 10 വർഷമായി പഞ്ചായത്തു വൈസ് പ്രസിഡന്‍റാണ്. യുഡിഎഫ് മഞ്ഞള്ളൂർ മണ്ഡലം ചെയർമാൻ, ബ്ലോക്ക് കോൺഗ്രസ് കമ്മറ്റി വൈസ് പ്രസിഡന്‍റ് എന്നീ നിലകളിലും പ്രവർത്തിക്കുന്നു.

എംബിബിഎസ് രണ്ടാം റാങ്കുമായി ആദർശ് നാരായണൻ

കൂത്താട്ടുകുളം: കേരള ആരോഗ്യ സർവകലാശാല എംബിബിഎസ് പരീക്ഷയിൽ രണ്ടാം റാങ്കുമായി കാക്കൂർ സ്വദേശി ആദർശ് നാരായണൻ. കാക്കൂര്‍ അമ്പലത്തിങ്കല്‍ പരേതനായ കെ.സി. നാരായണന്‍റെയും എ.കെ. ശന്തകുമാരിടുടെയും മകനാണ് ആദര്‍ശ്. പത്താം ക്ലാസിൽ എല്ലാ വിഷയത്തിനും എ പ്ലസും, പ്ലസ്‌ടു പരീക്ഷയില്‍ മുഴുവന്‍ മാര്‍ക്കും നേടിയിരുന്നു. പത്താം ക്ലാസ് വരെ തിരുമാറാടി ഗവ. ഹയര്‍ സെക്കന്‍ഡറി സ്കൂളിലും, പ്ലസ്‌ടു പാമ്പാക്കുട ഗവ. ഹയര്‍ സെക്കന്‍ഡറി സ്കൂളിലുമാണ് പഠനം പൂര്‍ത്തിയാക്കിയത്. കൊല്ലം മെഡിക്കൽ കോളജ് 2020 ബാച്ച് വിദ്യാർത്ഥിയാണ് ആദർശ്. സഹോദരൻ നന്ദു നാരായണൻ യുകെയിൽ എംടെക് വിദ്യാഭ്യാസം നടത്തുന്നു.

ലോക ഹൃദയദിനാചരണം

മൂവാറ്റുപുഴ: ലോക ഹൃദയദിനത്തോടനുബന്ധിച്ച് നിര്‍മല മെഡിക്കല്‍ സെന്‍ററിലെ കാര്‍ഡിയോളജി ഡിപ്പാര്‍ട്ട്മെന്‍റിന്‍റെ നേതൃത്വത്തില്‍ ലോക ഹൃദയദിനാചരണം സംഘടിപ്പിച്ചു. ആശുപത്രിയില്‍ നിന്നാരംഭിച്ച വര്‍ണശബളമായ റാലി ആശുപത്രി അഡ്മിനിസ്‌ട്രേറ്റര്‍ സിസ്റ്റര്‍ ജെസി ജോസ് ഫ്‌ളാഗ് ഓഫ് ചെയ്തു. മൂവാറ്റുപുഴ കെഎസ്ആര്‍ടിസി ഡിപ്പോയില്‍ നടന്ന സമാപന ചടങ്ങില്‍ പ്രൊവിന്‍ഷ്യല്‍ സുപ്പീരിയര്‍ സിസ്റ്റര്‍ മെര്‍ലിന്‍ അധ്യക്ഷത വഹിച്ചു. മൂവാറ്റുപുഴ ഹോളി മാഗി പള്ളി വികാരി ഫാ. മാനുവല്‍ പിച്ചളക്കാട്ട്, എറ്റിഒ എന്‍.പി. രാജേഷ്, അഡ്മിനിസ്‌ട്രേറ്റര്‍ സിസ്റ്റര്‍ ജെസി ജോസ്, അസി. അഡ്മിനിസ്‌ട്രേറ്റര്‍ സിസ്റ്റര്‍ ജെസ്‌ലിന്‍, ഇന്‍റര്‍വെന്‍ഷണല്‍ കാര്‍ഡിയോളജിസ്റ്റ് ഡോ. ജുബില്‍ പി. മാത്യു, ഡോ. ടോമിലിന്‍, ഡോ. മുരളി, ജനറല്‍ മാനേജര്‍ പാട്രിക് എം. കല്ലട എന്നിവര്‍ പ്രസംഗിച്ചു. ചടങ്ങില്‍ മുന്‍ അഡ്മിനിസ്‌ട്രേറ്റര്‍ സിസ്റ്റര്‍ ജോവിയറ്റ്, മെഡിക്കല്‍ സൂപ്രണ്ട് ഡോ. സിസ്റ്റര്‍ തെരേസ്, നഴ്സിംഗ് സൂപ്രണ്ട് സിസ്റ്റര്‍ ലീമാ റോസ്, പിആര്‍ഒ രതീഷ് കൃഷ്ണന്‍, ഓപ്പറേഷന്‍സ് മാനേജര്‍ കുമാര്‍, നഴ്സിംഗ് കോളജ്, നഴ്സിംഗ് സ്‌കൂള്‍ എന്നിവടങ്ങളിലെ അധ്യാപകര്‍, വിദ്യാര്‍ഥികള്‍, തുടങ്ങിയവര്‍ പങ്കെടുത്തു. തുടര്‍ന്ന് നഴ്സിംഗ് വിദ്യാഥികളുടെ ഫ്ളാഷ് മോബും നടത്തി. നിര്‍മല മെഡിക്കല്‍ സെന്‍ററിലെ കാര്‍ഡിയോളജി ഡിപ്പാര്‍ട്ടുമെന്‍റിനോടനുബന്ധിച്ച് അത്യാധുനിക സൗകര്യങ്ങളോടെയുള്ള കാത്ത്‌ലാബ്, സിസിയു എന്നിവയുടെ സേവനം 24 മണിക്കൂറും ലഭ്യമാണ്. കോലഞ്ചേരി: കോലഞ്ചേരി എംഒഎസ്‌സി മെഡിക്കൽ കോളജിന്‍റെ ആഭിമുഖ്യത്തിൽ ലോക ഹൃദയ ദിനാചരണം നടത്തി. ഇതോടനുബന്ധിച്ച് ഡോണ്ട് മിസ് എ ബീറ്റ്- കാർഡിയോളജി അപ്ഡേറ്റ്സ് എന്ന വിഷയം ആസ്പദമാക്കി നടത്തിയ ശില്പശാലയുടെ ഉദ്ഘാടനം ആശുപത്രി സെക്രട്ടറിയും സിഇഒയുമായ ജോയ് പി. ജേക്കബ് നിർവഹിച്ചു. തുടർന്ന് നടത്തിയ ശില്പശാലയിൽ ഹൃദ്രോഗ വിദഗ്ധരായ ഡോ. സുധയകുമാർ, ഡോ. വി. എൽ ജയപ്രകാശ്, ഡോ. മനു വർമ തുടങ്ങിയവർ വിവിധ വിഷയങ്ങൾ ആസ്പദമാക്കി ക്ലാസുകൾ നയിച്ചു. നൂറിലധികം ഡോക്ടർമാർ പരിപാടിയിൽ പങ്കെടുത്തു.

ബിജെപി - സിപിഎം കൂട്ടുകെട്ട് കേരളത്തിന്‍റെ സമാധാന അന്തരീക്ഷം തകർക്കും: മുഹമ്മദ് ഷിയാസ്

കോതമംഗലം: ബിജെപി - സിപിഎം അവിശുദ്ധ കൂട്ടുകെട്ട് കേരളത്തിന്‍റെ സമാധാന അന്തരീക്ഷത്തെ തകർക്കുന്ന നിലയിലേക്ക് വളർന്നതായി ഡിസിസി പ്രസിഡന്‍റ് മുഹമ്മദ് ഷിയാസ്. രാഹുൽ ഗാന്ധിക്കെതിരെ വധഭീഷണി മുഴക്കിയ ബിജെപി വക്താവ് പ്രിന്‍റ് മഹാദേവനെതിരെ നിയമ നടപടി സ്വീകരിക്കണമെന്നാവശ്യപ്പെട്ട് കോതമംഗലം ബ്ളോക്ക് കോൺഗ്രസ് കമ്മിറ്റിയുടെ നേതൃത്വത്തിൽ നഗരത്തിൽ നടത്തിയ പ്രതിഷേധ സമരം ഉദ്ഘാടനം ചെയ്യുകയായിരുന്നു അദ്ദേഹം. ബ്ലോക്ക് പ്രസിഡന്‍റ് ഷമീർ പനക്കൽ അധ്യക്ഷത വഹിച്ചു. എ.ജി. ജോർജ്, കെ.പി. ബാബു, പി.പി. ഉതുപ്പാൻ, അബു മൊയ്തീൻ, എം.എസ്. എൽദോസ്, കെ.ഐ. ജേക്കബ്, പി.എസ്. നജീബ്, സീതി മുഹമ്മദ്, സുരേഷ് ആലപ്പാട്ട് എന്നിവർ പങ്കെടുത്തു.

നിയന്ത്രണംവിട്ട കാർ ഇടിച്ച് മൂന്നു പേർക്ക് പരിക്ക്

കോതമംഗലം: പള്ളിത്താഴെ ഇറക്കത്തിൽ നിയന്ത്രണംവിട്ട കാർ ഇടിച്ച് മൂന്ന ു പേർക്ക് പരിക്കേറ്റു. മാമല തോന്നാട്ട് ബേസിൽ സ്ലീബാച്ചൻ (34), മേബി മരിയ ഏബ്രഹാം (34), അശമന്നൂർ പ്ലാമൂട്ടിൽ അക്‌സ ആൻസ് (9) എന്നിവർക്കാണ് പരിക്കേറ്റത്. ഇവർ കോതമംഗലം ധർമഗിരി ആശുപത്രിയിൽ ചികിത്സ തേടി. ചെറിയപള്ളിത്താഴത്ത് തിങ്കളാഴ്‌ച രാത്രിയിലായിരുന്നു അപകടം. വലിയപള്ളി റോഡിലെ ഇറക്കത്തിൽ കാർ നിയന്ത്രണം വിട്ട് ദേശീയപാതയിലേക്ക് എത്തുന്നതിനിടെ റോഡിലൂടെ പോയവരെ ഇടിക്കുകയായിരുന്നു. റോഡരിൽ പാർക്ക് ചെയ്തിരുന്ന മറ്റൊരു കാറിലിടിച്ച വാഹനം സമീപത്തെ കടയുടെ ഷട്ടറിലിടിച്ചാണ് നിന്നത്.

സേവന ദിനം ആചരിച്ചു

കോലഞ്ചേരി: കോലഞ്ചേരി കോടതി സമുച്ചയത്തിൽ സേവന ദിനം ആചരിച്ചു. കോലഞ്ചേരി ബാർ അസോസിയേഷന്‍റെ നേതൃത്വത്തിൽ കോടതി ജീവനക്കാരും, ക്ലർക്ക് അസോസിയേഷനും ചേർന്നാണ് സേവനദിനാചരണം നടത്തിയത്. ബാർ അസോസിയേഷൻ പ്രസിഡന്‍റ് ഷിജി ശിവജി അധ്യക്ഷത വഹിച്ച ചടങ്ങിൽ മുൻസിഫ് മജിസ്ട്രേറ്റ് എൻ.എ. സിർഷ , ന്യായാധികാരി ജെയ്സി അഗസ്റ്റിൻ തുടങ്ങിയവർ ചേർന്ന് സന്ദേശം നല്കി. കോലഞ്ചേരി കോടതിയുടെ ചുറ്റും പരിസരവും ഇതോടനുബന്ധിച്ച് വൃത്തിയാക്കി. ബാർ അസോസിയേഷൻ വൈസ് പ്രസിഡന്‍റ് ആൻസി ലില്ല, സെക്രട്ടറി സജോ സക്കറിയ ആൻഡ്രൂസ്, ജോയിന്‍റ് സെക്രട്ടറി ടി.പി. ഫിനി മോൾ, ട്രഷറർ ഹരിത ഹരിഹരൻ, കമ്മിറ്റിയംഗങ്ങളായ മിനി കുമാരി, അശ്വതി കൃഷ്ണൻ , ആതിര അപ്പുക്കുട്ടൻ, ശില്പ ഗോപാലൻ തുടങ്ങിയവർ നേതൃത്വം നൽകി.

സൗജന്യ ഡയാലിസിസ് സെന്‍റർ ഉദ്ഘാടനം മൂന്നിന്

വാഴക്കുളം: വാഴക്കുളം ചാരിറ്റബിള്‍ ട്രസ്റ്റിന്‍റെയും സെന്‍റ് ജോര്‍ജ് ആശുപത്രിയുടെയും ആഭിമുഖ്യത്തിലുള്ള സൗജന്യ ഡയാലിസിസ് സെന്‍ററിന്‍റെ ഉദ്ഘാടനം മൂന്നിന് നടക്കും. വൈകുന്നേരം അഞ്ചിന് വാഴക്കുളം സെന്‍റ് ജോര്‍ജ് ആശുപത്രി അങ്കണത്തില്‍ നിയമസഭാ സ്പീക്കര്‍ എ.എന്‍. ഷംസീര്‍ ഉദ്ഘാടനം ചെയ്യും. പ്രതിപക്ഷ നേതാവ് വി.ഡി. സതീശൻ പൊതുസമ്മേളനം ഉദ്ഘാടനം ചെയ്യും. മന്ത്രി റോഷി അഗസ്റ്റിന്‍ ഡയാലിസിസ് സെന്‍ററിന്‍റെ സ്വിച്ച് ഓണ്‍ നിര്‍വഹിക്കും. ജസ്റ്റീസ് സോഫി തോമസ് ഡയാലിസിസ് ക്ലബ് ലോഗോ പ്രകാശനം നിര്‍വഹിക്കും. വ്യാപാരി വ്യവസായി ഏകോപന സമിതി സംസ്ഥാന പ്രസിഡന്‍റ് രാജു അപ്‌സര ഡയാലിസിസ് ക്ലബ് ഉദ്ഘാടനം ചെയ്യും. ട്രസ്റ്റ് ചെയര്‍മാന്‍ സിജു സെബാസ്റ്റ്യന്‍ അധ്യക്ഷത വഹിക്കും. ഡീന്‍ കുര്യാക്കോസ് എംപി മുഖ്യാതിഥിയായി പങ്കെടുക്കും. മാത്യു കുഴല്‍നാടന്‍ എംഎല്‍എ മുഖ്യപ്രഭാഷണം നടത്തും. കോതമംഗലം രൂപത വികാരി ജനറാള്‍ മോണ്‍. പയസ് മലേക്കണ്ടത്തില്‍ അനുഗ്രഹപ്രഭാഷണം നടത്തും. സെന്‍റ് ജോര്‍ജ് ആശുപത്രി ഡയറക്ടര്‍ ഫാ. ജോര്‍ജ് പൊട്ടയ്ക്കല്‍, ജില്ലാ പഞ്ചായത്തംഗം ഉല്ലാസ് തോമസ്, ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണന്‍, വ്യാപാരി വ്യവസായി ഏകോപന സമിതി ജില്ലാ പ്രസിഡന്‍റ് പി.സി. ജേക്കബ്, ട്രസ്റ്റ് ടെക്നിക്കല്‍ ഡയറക്ടര്‍ ഡോ. മാത്യൂസ് നമ്പേലില്‍, ഡോ. ടോം മണ്ണപ്പുറത്ത്, ഫാ. ഫ്രാന്‍സിസ് ആലപ്പാട്ട്, ഫാ. സാനു കൊച്ചുപറമ്പില്‍, ഫാ. തോമസ് മഞ്ഞക്കുന്നേല്‍, പി.ഡി. ജോസ്, ഡോ. സോണി ജെയിംസ് തുടങ്ങിയവര്‍ പ്രസംഗിക്കും. മർച്ചന്‍റ്സ് അസോസിയേഷന്‍റെയും വിവിധ സംഘടനകളുടെയും സുമനസുകളുടെയും സഹകരണത്തോടെയാണ് സൗജന്യ ഡയാലിസിസ് സെന്‍റർ പ്രാവർത്തികമാകുന്നത്. ചാരിറ്റബിൾ ട്രസ്റ്റിന്‍റെ ധനശേഖരണാർഥം രൂപീകരിച്ച ഡയാലിസിസ് ക്ലബിന്‍റെ പ്രചരണത്തിനായി വൈകുന്നേരം 4.30ന് വാഴക്കുളം കല്ലൂർക്കാട് കവലയിൽ നിന്ന് ആശുപത്രി അങ്കണത്തിലേക്ക് വാക്കത്തൺ നടത്തും. ആശുപത്രി ഡയറക്ടർ ഫാ. ജോർജ് പൊട്ടയ്ക്കൽ ഫ്ലാഗ് ഓഫ് ചെയ്യും.

യുവാവിനെ കുത്തിയശേഷം സ്കൂട്ടർ മോഷണം; രണ്ടുപേർ അറസ്റ്റിൽ

കാക്കനാട്: തൃക്കാക്കര പൈപ്പ് ലൈൻ റോഡിൽ യുവാവിനെ കുത്തി പരിക്കേൽപ്പിച്ചശേഷം സ്കൂട്ടറുമായി കടന്ന സംഭവത്തിൽ കാപ്പ കേസ് പ്രതിയടക്കം രണ്ടുപേർ അറസ്റ്റിൽ. തൃശൂർ സ്വദേശി അക്ഷയ്(25) പാലക്കാട് സ്വദേശി സതീശൻ(30) എന്നിവരെയാണ് തൃക്കാക്കര പോലീസ് അറസ്റ്റ് ചെയ്തത്. കഴിഞ്ഞ മാസം 22 ന് രാത്രി 11ഓടെയായിരുന്നു സംഭവം. പരാതിക്കാരന്‍റെ സുഹൃത്തുക്കളെ തൃക്കാക്കര ബിഎംസി കോളജിന് മുന്നിൽവച്ച് പ്രതികൾ ആക്രമിച്ചതു ചോദ്യം ചെയ്ത ശേഷം മടങ്ങിയ പരാതിക്കാരനെ അക്ഷയും സതീശനും പിന്തുടർന്ന് തൃക്കാക്കര പൈപ്പ് ലൈനിലുള്ള കഫേയുടെ മുന്നിൽ വച്ച് കത്തിക്ക് കുത്തിയശേഷം സ്കൂട്ടറുമായി കടന്നുകളയുകയായിരുന്നു. സിസിടിവി ദൃശ്യങ്ങളടക്കം പരിശോധിച്ചു പോലീസ് നടത്തിയ അന്വേഷണത്തിൽ പ്രതികൾ സംഭവ സ്ഥലത്തെത്തിയ വാഹനത്തിന്‍റെ നമ്പർ കണ്ടെത്തുകയും ഇന്നലെ പുലർച്ചെ ഇടപ്പള്ളി ലുലു മാളിന് സമീപം വച്ച് അറസ്റ്റുചെയ്യുകയുമായിരുന്നു. ഒന്നാം പ്രതി അക്ഷയ് തൃശൂർ, പാലക്കാട് ജില്ലകളിൽ കാപ്പ കേസ് അടക്കം 17 കേസുകളിൽ പ്രതിയാണ്. തൃക്കാക്കര അസി. കമ്മീഷണർ പി.എസ്.ഷിജുവിന്‍റെ നിർദേശാനുസരണം തൃക്കാക്കര പോലീസ് ഇൻസ്പെക്ടർ കിരൺ സി. നായരുടെ മേൽനോട്ടത്തിൽ എസ്ഐ വി .ബി.അനസ് , ജാഫർ, സിപിഒ സാൽമോൻ എന്നിവർ ചേർന്നാണ് പ്രതികളെ അറസ്റ്റ് ചെയ്തത്. ഇവരെ കോടതിയിൽ ഹാജരാക്കി റിമാൻഡ് ചെയ്തു.

ജീവിത ശൈലിയിൽ മാറ്റം വരുത്തി ഹൃദയാരോഗ്യം വീണ്ടെടുക്കണം: കളക്ടർ

പറവൂർ: വ്യായാമവും ആരോഗ്യകരമായ ആഹാര രീതികളും ഉൾപ്പെടെ അനുഗുണമായ മാറ്റങ്ങളിലൂടെ ജീവിതശൈലിയെ നവീകരിക്കണമെന്നും അതിനായി മുഴുവൻ പേരെയും അണി ചേർക്കണമെന്നും ജില്ലാ കളക്ടർ ജി. പ്രിയങ്ക പറഞ്ഞു. ജില്ലാ മെഡിക്കൽ ഓഫീസും ദേശീയ ആരോഗ്യ ദൗത്യവും പറവൂർ ബ്ലോക്ക് പഞ്ചായത്തിന്‍റെ സഹകരണത്തോടെ ലോക ഹൃദയദിനത്തിൽ മാല്യങ്കര എസ്എൻഎം കോളേജിൽ സംഘടിപ്പിച്ച ഹൃദയപൂർവം പരിപാടിയുടെ ജില്ലാ തല ഉദ്ഘാടനം നിർവഹിച്ച് പ്രസംഗിക്കുകയായിരുന്നു കളക്ടർ. പറവൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് കെ.എസ്. സനീഷ് അധ്യക്ഷനായി. ജില്ലാ മെഡിക്കൽ ഓഫീസർ ഡോ. ആശാദേവി മുഖ്യപ്രഭാഷണം നടത്തി. ഹൃദയപൂർവം എറണാകുളം കാമ്പയിൻ വടക്കേക്കര പഞ്ചായത്ത് പ്രസിഡന്‍റ് രശ്മി അനിൽകുമാർ ഉദ്ഘാടനം ചെയ്തു. ഡെപ്യൂട്ടി ഡിഎംഒ ഡോ. ആരതി കൃഷ്ണൻ വിഷയാവതരണം നടത്തി. ജില്ലാ പഞ്ചായത്ത് അംഗം എ എസ് അനിൽകുമാർ മുഖ്യാതിഥിയായി. ദിനാചരണത്തിന് തുടക്കം കുറിച്ചുകൊണ്ടുള്ള വിളംബര റാലി ജില്ലാ മെഡിക്കൽ ഓഫീസർ ഡോ.ആശാദേവി ഫ്ലാഗ് ഓഫ് ചെയ്തു.

ദേശീയപതാകയുടെ നിറം പൂശിയ ബസുകള്‍ ജില്ലയിലെത്തി

കൊച്ചി: ദേശീയപതാകയുടെ പ്രമേയം ഉള്‍ക്കൊള്ളിച്ചുകൊണ്ട് രൂപകല്പന ചെയ്ത കെഎസ്ആര്‍ടിസിയുടെ പുതിയ ബസുകള്‍ ജില്ലയിലും എത്തി. വിവിധ ഡിപ്പോകള്‍ക്കായി അനുവദിച്ച 11 ബസുകളാണ് എത്തിയത്. ഇതില്‍ ആറെണ്ണം എറണാകുളം ഡിപ്പോക്കും, ആലുവ, പെരുമ്പാവൂര്‍ ഡിപ്പോകള്‍ക്ക് രണ്ടും, മൂവാറ്റുപുഴയ്ക്ക് ഒരു ബസുമാണ് അനുവദിച്ചിരിക്കുന്നത്. കഴിഞ്ഞ ദിവസം എത്തിയ ബസുകള്‍ വാണിജ്യാടിസ്ഥാനത്തിൽ സര്‍വീസ് ആരംഭിച്ചു. എറണാകുളം ഡിപ്പോയ്ക്ക് ലഭിച്ച ആറു ബസുകളില്‍ ഒന്ന് എസി സ്ലീപ്പര്‍ ബസാണ്. എറണാകുളം-ചെന്നൈ റൂട്ടില്‍ നിലവില്‍ സര്‍വീസ് നടത്തിയിരുന്ന സ്വിഫ്റ്റ് പ്രീമിയം എസി ബസിനു പകരമായാണ് പുതിയ ബസ് സര്‍വീസ് നടത്തുന്നത്. ഇരിപ്പിടങ്ങള്‍ ഇല്ലാതെ കിടന്നുപോകുന്നതിനുള്ള ബര്‍ത്തുകളാണ് ബസിലുള്ളത്. കൂടാതെ മൊബൈല്‍ ചാര്‍ജിംഗ് പോയിന്‍റുകള്‍, ടെലിവിഷന്‍, സിസി ടിവി, ഓണ്‍ബോര്‍ഡ് ക്യാമറകള്‍ എന്നിവയുമുണ്ട്. വൈകുന്നേരം 5.30ന് എറണാകുളം ഡിപ്പോയില്‍നിന്ന് പുറപ്പെടുന്ന ബസ് പിന്നേറ്റ് പുലര്‍ച്ചെ 6.40ന് ചെന്നൈയില്‍ എത്തും. അന്ന് വൈകുന്നേരം 6.30നാണ് ചെന്നൈയില്‍ നിന്നുള്ള മടക്കയാത്ര. പിറ്റേന്ന് രാവിലെ 7.30ന് എറണാകുളത്ത് ബസ് എത്തിച്ചേരും. എറണാകുളം-തിരുപ്പൂര്‍, എറണാകുളം-പൂപ്പാറ, എറണാകുളം-കുമളി, എറണാകുളം-നെടുങ്കണ്ടം എന്നീ റൂട്ടുകളിലേക്കാണ് ഫാസ്റ്റ് പാസഞ്ചര്‍ കാറ്റഗറിയിലുള്ള മറ്റ് അഞ്ച് ബസുകളുടെ സര്‍വീസ്. ആലുവ ഡിപ്പോയ്ക്കായി ഒരു ഫാസ്റ്റ് പാസഞ്ചര്‍ ബസും ഒരു മിനി ബസുമാണ് എത്തിയിരിക്കുന്നത്. മൂന്നാര്‍, മറയൂര്‍, കോവില്‍കടവ് വഴി കാന്തല്ലൂരിലേക്കാണ് 35 സീറ്റുള്ള ഫാസ്റ്റ് പാസഞ്ചര്‍ ബസിന്‍റെ സര്‍വീസ്. രാവിലെ ഏഴിന് ആലുവയില്‍ നിന്ന് ആരംഭിച്ച് വടക്കന്‍ പറവൂരിലേക്ക് പോകുന്ന ബസ് അവിടെ നിന്നും കാന്തല്ലൂരിലേക്കുള്ള ഷെഡ്യൂള്‍ ആരംഭിക്കും. ആലുവ-തൃപ്പൂണിത്തുറ, ആലുവ-ഇന്‍ഫോപാര്‍ക്ക് റൂട്ടുകളിലാണ് 28 സീറ്റുള്ള മിനി ബസിന്‍റെ സര്‍വീസ്. പെരുമ്പാവൂര്‍ ഡിപ്പോയ്ക്കായി അനുവദിച്ച രണ്ടു പുതിയ ബസുകളില്‍ ഒന്ന് ഫാസ്റ്റ് പാസഞ്ചറും ഒരെണ്ണം എസി പ്രീമിയം സൂപ്പര്‍ ഫാസ്റ്റുമാണ്. പത്തനംതിട്ടയിലേക്കാണ് പാസ്റ്റ് പാസഞ്ചര്‍ ബസിന്‍റെ സര്‍വീസ്. എസി പ്രീമിയം സൂപ്പര്‍ ഫാസ്റ്റ് കോട്ടയംവഴി തിരുവനന്തപുരത്തേക്കും സര്‍വീസ് നടത്തും. മൂവാറ്റുപുഴ ഡിപ്പോയ്ക്ക് ലഭിച്ച പാസ്റ്റ് പാസഞ്ചര്‍ ബസ് തേക്കടി റൂട്ടില്‍ വിന്യസിച്ചിരിക്കുന്നത്.

കൊച്ചി ഫിഷറീസ് : ഹാര്‍ബറിലെ കൂലിത്തര്‍ക്കം സംഘര്‍ഷാവസ്ഥയിലേക്ക്

മട്ടാഞ്ചേരി: കൊച്ചി ഫിഷറീസ് ഹാര്‍ബറില്‍ തൊഴിലാളികളും ബോട്ടുടമകളും തമ്മില്‍ തര്‍ക്കം വീണ്ടും രൂക്ഷമായി. ഹാര്‍ബറിലെ മീന്‍ ഇറക്ക് വിഭാഗം തൊഴിലാളികളുടെ കൂലിത്തര്‍ക്കത്തെ തുടര്‍ന്ന് ഇന്നലെ മീനുമായി എത്തിയ ബോട്ടിലെ മീന്‍ ഇറക്കാന്‍ സിപിഎല്‍യു സിഐടിയുവിന്‍റെ നേതൃത്വത്തിലുള്ള തൊഴിലാളികള്‍ തയാറായില്ല. ഇതോടെ ബോട്ടിലെ മത്സ്യം മോശമാകുന്ന അവസ്ഥയാണ്. ആഴ്ചകൾക്ക് മുൻപ് കൂലി തര്‍ക്കത്തെ തുടര്‍ന്ന് ഹാര്‍ബര്‍ നിശ്ചലാവസ്ഥയിലായിരുന്നു. ഇതിനെ തുടര്‍ന്ന് ഹാര്‍ബര്‍ വ്യവസായ സംരക്ഷണ സമിതിയുടെ നേതൃത്വത്തില്‍ നടത്തിയ ചര്‍ച്ചയില്‍ ബോട്ടുടമകള്‍ കൂലിയുമായി ബന്ധപ്പെട്ട് മൂന്ന് നിര്‍ദേശങ്ങള്‍ വച്ചിരുന്നു. ഇതില്‍ ഒന്ന് ചര്‍ച്ച ചെയ്ത് കഴിഞ്ഞ മാസം 25 നുള്ളില്‍ കരാര്‍ ചെയ്യാമെന്ന് തൊഴിലാളി യൂണിയന്‍ ഉറപ്പ് നല്‍കിയിരുന്നതായി ബോട്ടുടമകള്‍ പറയുന്നു. കരാറാകാതെ കൂലി നല്‍കാനാകില്ലെന്ന നിലപാടില്‍ ബോട്ടുടമകള്‍ ഉറച്ചു നിന്നു.എന്നാല്‍ കഴിഞ്ഞ 45 ദിവസമായി പണിയെടുത്ത കൂലി നല്‍കാത്തത് പ്രതിഷേധാര്‍ഹമാണെന്നും ഇനി മുതല്‍ കൂലി നല്‍കുന്ന ബോട്ടുകളില്‍ മാത്രമേ പണിയെുക്കൂവെന്ന നിലപാടില്‍ തൊഴിലാളികളും എത്തി. ഇന്നലെ എത്തിയ ബോട്ടുകളില്‍ കൂലി നല്‍കിയ ബോട്ടുകളിലെ മീന്‍ തൊഴിലാളികള്‍ ഇറക്കി. എന്നാല്‍ നല്‍കാത്ത ബോട്ടുകളിലെ മീന്‍ ഇറക്കാത്തതാണ് പ്രതിസന്ധിക്ക് കാരണമായത്. പിടിക്കുന്ന മത്സ്യത്തിന്‍റെ മൊത്തം വിലയുടെ രണ്ട് ശതമാനമാണ് പേഴ്സിന്‍ നെറ്റ് മീന്‍ ഇറക്ക് വിഭാഗം തൊഴിലാളികള്‍ക്ക് നല്‍കിയിരുന്നത്. എന്നാല്‍ പ്രവര്‍ത്തന ചെലവ് കഴിച്ചുള്ള തുകയുടെ ശതമാനമേ നല്‍കാന്‍ കഴിയൂവെന്ന നിലപാടിലാണ് ബോട്ടുടമകള്‍.

സാമൂഹിക പ്രതിബദ്ധത സാനുമാഷിന്‍റെ മുഖമുദ്ര: പി.എസ്. ശ്രീകല

കൊച്ചി: സാമൂഹ്യ പ്രതിബദ്ധതയായിരുന്നു സാനുമാഷിന്‍റെ മുഖമുദ്രയെന്നും ഇതുകൊണ്ടാണ് പൊതു ഇടങ്ങളില്‍ അദ്ദേഹം കൂടുതല്‍ തൽപരനായിരുന്നതെന്നും കേരള നോളജ് ഇക്കണോമി മിഷന്‍ ഡയറക്ടര്‍ പി.എസ്. ശ്രീകല അഭിപ്രായപ്പെട്ടു. ചാവറ കള്‍ച്ചറല്‍ സെന്‍ററും ലളിതാംബിക അന്തര്‍ജനം സാഹിത്യവേദിയും സംഘടിപ്പിച്ച ‘നിത്യവിസ്മയ സാനു’ പ്രഫ. എം.കെ. സാനു അനുസ്മരണ ചടങ്ങില്‍ മുഖ്യപ്രഭാഷണം നടത്തുകയായിരുന്നു അവര്‍. എവിടെയും യാത്ര ചെയ്തു പ്രസംഗിക്കുവാന്‍ അവസാന നാളുകളില്‍ പോലും അദ്ദേഹം തയാറായിരുന്നു. ആരെയും വേദനിപ്പിക്കുന്ന തരത്തില്‍ വിമര്‍ശിക്കുവാനോ സംസാരിക്കുവാനോ മാഷ് തയാറായിരുന്നില്ല. മനുഷ്യത്വം ഇല്ലെങ്കില്‍ മനുഷ്യന്‍ അല്ല എന്ന ശ്രീനാരായണ ഗുരുവിന്‍റെ ദര്‍ശനത്തെ ജീവിതത്തില്‍ പ്രാവര്‍ത്തികമാക്കിയ വ്യക്തിയാണ് സാനു മാഷെന്നും ശ്രീകല കൂട്ടിച്ചേർത്തു. ചാവറ കള്‍ച്ചറല്‍ സെന്‍റര്‍ ഡയറക്ടര്‍ ഫാ. അനില്‍ ഫിലിപ്പ് അധ്യക്ഷത വഹിച്ച ചടങ്ങിൽ ലളിതാംബിക അന്തര്‍ജനം സെന്‍റര്‍ ഡയറക്ടര്‍ തനൂജ ഭട്ടതിരി, ജയശ്രീ ശങ്കര്‍, ഫൗസിയ കളപ്പാട്ട്, രഞ്ജിത്ത് സാനു, അനാമിക സജീവ്, സിന്ധു സൂസന്‍ വര്‍ഗീസ്, ഡോ. രേണു പുത്തൂര്‍, കെ. സരസ്വതിയമ്മ, നിജു ആന്‍ ഫിലിപ്പ്, സീജ ജിതേഷ് മീരബെന്‍ എന്നിവര്‍ പ്രസംഗിച്ചു.

നിയന്ത്രണംവിട്ട കാർ വൈദ്യുത പോസ്റ്റ് തകർത്തു

ആലുവ: നിയന്ത്രണം വിട്ട കാർ വൈദ്യുത പോസ്റ്റ് തകർത്ത് കലുങ്കിൽ ഇടിച്ചുനിന്നു. കീഴ്മാട് സർക്കുലർ റൂട്ടിൽ അയ്യങ്കോഴി ഭഗവതി ക്ഷേത്രത്തിനു സമീപമാണ് അപകടം നടന്നത്. കുട്ടമശേരി ഭാഗത്തുനിന്നും കീഴ്മാടിലേക്ക് വരികയായിരുന്ന കാർ നിയന്ത്രണം വിട്ട് വൈദ്യുത പോസ്റ്റിൽ ഇടിക്കുകയായിരുന്നു. ഇടിയുടെ ആഘാതത്തിൽ പോസ്റ്റ് വട്ടം ഒടിഞ്ഞു വീണു. തുടർന്ന് കലുങ്കിൽ ഇടിച്ചാണ് കാർ നിന്നത്. അപകടത്തിൽ ആർക്കും പരിക്കില്ല.

ദേശീയ പാതയിൽ അപകടക്കെണി: പുളിഞ്ചോട് വേണം സംരക്ഷണ ഭിത്തി

ആലുവ: ദേശീയപാതയിൽ ഇരുവശത്തുമായി പുളിഞ്ചോട് മെട്രോസ്റ്റേഷന് സമീപത്തെ പത്തടി താഴ്ചയുള്ള കാനയിലേക്ക് വാഹനങ്ങൾ മറിയുന്നത് ആവർത്തിച്ചിട്ടും കൈവരി സ്ഥാപിക്കാനോ മുന്നറിയിപ്പ് ബോർഡുകൾ സ്ഥാപിക്കാനോ തയാകുന്നില്ലെന്ന് പരാതി. അതി വേഗതയിൽ വാഹനങ്ങൾ കടന്നു പോകുന്ന ഈ മേഖലയിൽ രണ്ട്ഇരുമ്പു കുറ്റികൾ മാത്രമാണ് ഉള്ളത്. തെരുവ് വിളക്കുകൾ കൃത്യമായി കത്താത്ത ഇവിടെ വലിയ അപകടങ്ങൾ പതിയിരിക്കുകയാണെന്ന് നാട്ടുകാർ മുന്നറിയിപ്പ് നൽകുന്നു. മെട്രോ സ്റ്റേഷനിൽനിന്നും ആലുവ ഭാഗത്തേക്കുരുന്ന പാതയിൽ ഏകദേശം 100 മീറ്ററോളം നീളത്തിൽ റോഡിനോട് ചേർന്നുപത്ത് അടിയിലേറെ ആഴത്തിലാണ് ഭൂമി. മൈനൂട്ടിൽ ഭഗവതി ക്ഷേത്രത്തിന് മുൻവശത്തെ ഭൂമിയാണ് റോഡ് നിരപ്പിൽനിന്നും താഴ്ന്ന് കിടക്കുന്നത്. ഇവിടെ റോഡിൽ രണ്ടര അടി ഉയരത്തിൽ രണ്ട് ഇരുമ്പ് കുറ്റികളാണ് സുരക്ഷക്കായി ആകെ സ്ഥാപിച്ചിട്ടുള്ളത്. എതിർവശത്തെ ട്രാക്കിലും ഇതുതന്നെയാണ് സ്ഥിതി. രണ്ടര മാസം മുമ്പ് 22 ചക്ര ട്രെയിലർ നിയന്ത്രണം തെറ്റി തലകീഴായി മറിഞ്ഞ് വളഞ്ഞുപോയി. ദിവസങ്ങൾ നീണ്ട പരിശ്രമത്തിനൊടുവിലാണ് ട്രെയിലർ പുറത്തെടുത്തത്. ഡ്രൈവറും ക്ളീനറും അത്ഭുതകരമായി രക്ഷപ്പെട്ടു. പരിസരം കാടുപിടിച്ച് കിടക്കുന്നതിനാൽ വാഹനയാത്രികർക്ക് ഭൂനിരപ്പ്‌ വളരെ താഴെയാണെന്ന കാര്യം അറിയാനാകില്ല. ദേശീയപാതയിൽ പുളിഞ്ചോട് ഭാഗത്ത് ഇവരുവശത്തെയും അപകടാവസ്ഥ ഒഴിവാക്കാൻ സംരക്ഷണഭിത്തി നിർമിക്കണമെന്ന് കേരള സാംസ്കാരിക പരിഷത്ത് ജില്ലാ പ്രസിഡന്‍റ് വി.ടി. സതീഷ് ആവശ്യപ്പെട്ടു.

മിനി മാരത്തണ്‍ സംഘടിപ്പിച്ചു

കൊച്ചി: ലോക ഹൃദയദിനത്തോടനുബന്ധിച്ച് പ്രമുഖ ഓട്ടോമോട്ടീവ് ഡീലര്‍ഷിപ്പായ ഇന്‍ഡല്‍ ഓട്ടോമോട്ടീവ്‌സും റെനൈ മെഡിസിറ്റിയും സംയുക്തമായി മിനി മാരത്തണ്‍ സംഘടിപ്പിച്ചു. ഹൃദയാരോഗ്യത്തെക്കുറിച്ചുള്ള അവബോധം വളര്‍ത്തുക എന്ന ലക്ഷ്യത്തോടെയാണ് മാരത്തണ്‍ നടന്നത്. ഇന്നലെ രാവിലെ നടന്ന ചടങ്ങില്‍ റെനൈ മെഡിസിറ്റി കാര്‍ഡിയോളജി വിഭാഗം മേധാവി ഡോ. വിനോദ് തോമസ്, ഇന്‍ഡല്‍ ഓട്ടോമോട്ടീവ്‌സ് എച്ച്ആര്‍ ആന്‍ഡ് ട്രെയിനിംഗ് മേധാവി ഉണ്ണികൃഷ്ണന്‍ എന്നിവര്‍ ഫ്‌ളാഗ് ഓഫ് നിര്‍വഹിച്ചു. ഫിനിഷിംഗ് പോയിന്‍റായ ഇന്‍ഡല്‍ ഹൗസിന് മുന്നില്‍ റെനൈ മെഡിസിറ്റിയില്‍ നിന്നുള്ള 20 അംഗ സംഘത്തിന്‍റെ ബോധവത്കരണ ഫ്‌ളാഷ് മോബും അരങ്ങേറി. സമാപന ചടങ്ങിന്‍റെ ഭാഗമായി ഹൃദയാരോഗ്യത്തെക്കുറിച്ച് റെനൈ മെഡിസിറ്റിയിലെ കാര്‍ഡിയോളജി വിദഗ്ധര്‍ പങ്കെടുത്ത പാനല്‍ ചര്‍ച്ചയും നടന്നു.

ലോക ഹൃദയ ദിനാചരണം

അങ്കമാലി എൽഎഫിൽ അങ്കമാലി: അങ്കമാലി ലിറ്റിൽ ഫ്ലവർ ആശുപത്രിയിലെ കാർഡിയാക് സെന്‍ററിന്‍റെ ആഭിമുഖ്യത്തിൽ നടന്ന ലോക ഹൃദയ ദിനാചരണം ആലുവ റൂറൽ ഡിവൈഎസ്പി ടി.ആർ. രാജേഷ് ഉദ്ഘാടനം ചെയ്തു. അങ്കമാലി കെഎസ്ആർടിസി ബസ് സ്റ്റാൻഡിൽ നടന്ന ചടങ്ങിൽ മുനിസിപ്പൽ ചെയർമാൻ ഷിയോ പോൾ ഹൃദയ ദിന വാക്കത്തണ്‍ ഫ്ലാഗ് ഓഫ് ചെയ്തു. ആശുപത്രി ഡയറക്ടർ ഫാ. ജേക്കബ് ജെ. പാലക്കാപ്പിള്ളി അധ്യക്ഷത വഹിച്ചു. ഡോ. സ്റ്റിജി ജോസഫ്, ഡോ. എ.കെ. റഫീഖ്, ജോയിന്‍റ് ഡയറക്ടർ ഫാ. വർഗീസ് പൊന്തേന്പിള്ളി, ഫാ. എബിൻ കളപ്പുരക്കൽ, ഡോ. അൻവർ വർഗീസ്, ഡോ. ഡെനിൻ എഡ്ഗർ, ഡോ. പ്രസാദ് കുട്ടപ്പൻ എന്നിവർ പ്രസംഗിച്ചു. സിപിആർ പരിശീലനത്തിൽ ഡോ. ഹാരിഷ് മോഹൻ ക്ലാസ് നയിച്ചു. നഴ്സിംഗ് വിദ്യാർഥികളുടെ ഫ്ലാഷ് മോബ്, വാക്കത്തൺ എന്നിവയുണ്ടായിരുന്നു. ലൂർദ് ആശുപത്രിയിൽ കൊച്ചി: എറണാകുളം ലൂർദ് ആശുപത്രിയിൽ ലോകഹൃദയ ദിനാഘോഷം മേയർ എം. അനിൽകുമാർ ഉദ്ഘാടനം ചെയ്തു. ഡയറക്ടർ ഫാ. ജോർജ് സെക്വീര അധ്യക്ഷത വഹിച്ചു. നടൻ രമേഷ് പിഷാരടി, ഐഎംഎ കൊച്ചി പ്രസിഡന്‍റ് ഡോ. ജേക്കബ് ഏബ്രഹാം കാർഡിയോളജി സ്പെഷൽ ഹെൽത്ത് ചെക്കപ്പ് കൂപ്പൺ ഉദ്ഘാടനം ചെയ്തു. കാർഡിയോളജി വിഭാഗം മേധാവി ഡോ.എസ്. സുജിത് കുമാർ, സിനിയർ കാർഡിയോളജിസ്റ്റ് ഡോ. ജോർജ് തയ്യിൽ എന്നിവർ എന്നിവർ പ്രസംഗിച്ചു. ഹൃദയാരോഗ്യത്തെ സംബന്ധിച്ച ബോധവത്കരണ ക്ലാസുകൾ, സിപിആർ പരിശീലനം, സ്കിറ്റ്, ഫ്ലാഷ് മോബ് എന്നിവയുണ്ടായിരുന്നു.

വടവുകോട് പുത്തന്‍കുരിശ് പഞ്ചായത്തിനെ മാലിന്യ വിമുക്തമാക്കും: സാബു എം. ജേക്കബ്

കിഴക്കമ്പലം: വരുന്ന പഞ്ചായത്ത് തെരഞ്ഞെടുപ്പിൽ ട്വന്‍റി 20 അധികാരത്തിലെത്തിയാൽ വടവുകോട് പുത്തന്‍ കുരിശ് പഞ്ചായത്തിനെ മാലിന്യമുക്തമാക്കുമെന്ന് സംസ്ഥാന പ്രസിഡന്‍റ് സാബു എം. ജേക്കബ്. തെരഞ്ഞെടുപ്പ് പ്രചാരണത്തിന് തുടക്കം കുറിച്ചുകൊണ്ട് വടുവുകോട് പുത്തന്‍കുരിശ് പഞ്ചായത്തിൽ നടന്ന പാര്‍ട്ടിയുടെ കണ്‍വന്‍ഷന്‍ ഉദ്ഘാടനം ചെയ്യുകയായിരുന്നു അദേഹം. ഇടതു വലതു മുന്നണികൾ മാറിമാറി ഭരിച്ചു വ്യവസായ സ്ഥാപനങ്ങളിൽനിന്നും കമ്പനികളിൽനിന്നും ഭീമമായ തുകകൾ കൈപറ്റി നാടിനെ മാലിന്യത്തിൽ മുക്കിയിരിക്കുകയാണ്. പുത്തൻകുരിശിനെ അഴിമതിയിൽനിന്നും മാലിന്യ പ്രശ്നത്തിൽനിന്നും മോചിപ്പിക്കാൻ ട്വന്‍റി-20 ക്കു മാത്രമേ സാധിക്കുകയുള്ളു എന്നും സാബു എം. ജേക്കബ് പറഞ്ഞു. പാർട്ടി വൈസ് പ്രസിഡന്‍റ് വി. ഗോപകുമാര്‍, സ്റ്റേറ്റ് കമ്മിറ്റി എക്‌സിക്യൂട്ടീവ് അംഗം ചാര്‍ളി പോള്‍, ജില്ലാ കോഓര്‍ഡിനേറ്റര്‍ പി.വൈ. അബ്രാഹം, കുന്നത്ത് നാട് നിയോജകമണ്ഡലം പ്രസിഡന്‍റ് ജിബി എബ്രഹാം, നിയോജകമണ്ഡലം കമ്മിറ്റിയംഗങ്ങളായ പി.വൈ. മത്തായി, പീറ്റര്‍ കെ. ജോസഫ് തുടങ്ങിയവര്‍ പ്രസംഗിച്ചു.

റോട്ടറി കൊച്ചിൻ കോസ്മോസ് വാക്കത്തൺ

കൊച്ചി: ലോക ഹൃദയദിനമായ ഇന്നലെ റോട്ടറി കൊച്ചിൻ കോസ്മോസ് വാക്കത്തൺ സംഘടിപ്പിച്ചു. എറണാകുളം ഡർബാർ ഹാൾ ഗ്രൗണ്ടിൽ നിന്ന് ആരംഭിച്ച ഒമ്പതാമത് എഡിഷൻ വാക്കത്തോൺ ജില്ലാ കളക്ടർ ജി. പ്രിയങ്കയും റോട്ടറി ഡിസ്ട്രിക്ട് ഗവർണർ ജി.എൻ. രമേഷും ചേർന്ന് ഫ്ളാഗ് ഓഫ് ചെയ്തു. റോട്ടറി ക്ലബ് പ്രസിഡന്‍റ് ദീപക് കാഞ്ഞിരത്തിങ്കൽ, സെക്രട്ടറി ശ്രീകുമാർ പണിക്കർ, ട്രഷറർ ജി., ഗോപകുമാർ, കാർഡിയോളജി ഡോക്ടർമാരായ ആർ. അനിൽകുമാർ , പി. ബ്ലസൻ വർഗീസ്, സജി കുരുട്ടുകുളം, വിനോദ് തോമസ്, വിജാ ജോർജ് , ബ്രിജേഷ് പി. കോട്ടയിൽ, ആർ. കൃഷ്ണകുമാർ എന്നിവർ പ്രസംഗിച്ചു.

ജോലി വാഗ്ദാനം ചെയ്ത് രണ്ട് ലക്ഷം തട്ടി: കോടതി നിർദേശപ്രകാരം പോലീസ് കേസെടുത്തു

വൈപ്പിൻ: ജോലി വാഗ്ദാനം ചെയ്ത് രണ്ടുലക്ഷം രൂപ തട്ടിയെടുത്തെന്ന വീട്ടമ്മയുടെ ഹർജിയിൽ കോടതി നിർദേശപ്രകാരം കുറ്റാരോപിതർക്കെതിരെ പോലീസ് കേസെടുത്തു. തൃശൂർ കോട്ടപ്പുറം സ്വദേശി ശ്യാം മോഹൻ, തൃശൂർ മുപ്ലിയം സ്വദേശി അനൂപ് എന്നിവർക്കെതിരെയാണ് കേസെടുത്തിട്ടുള്ളത്. നായരമ്പലം നെടുങ്ങാട് സ്വദേശിയായ വീട്ടമ്മയുടെ മകൾക്ക് സ്വകാര്യ സ്ഥാപനത്തിൽ ഫീൽഡ് സ്റ്റാഫ് ആയി 2 8,000 രൂപ ശമ്പളത്തിന് ജോലി വാഗ്ദാനം ചെയ്തതാണ് പണം തട്ടിയത്. കഴിഞ്ഞ മേയിൽ ചെക്ക് മുഖേനയാണ് 2 ലക്ഷം രൂപ കൈമാറിയത്. തുടർന്ന് ജൂണിൽ കമ്പനിയുടെ പേരിലുള്ള ഒരു വ്യാജ ഓഫർ ലെറ്ററും നൽകി. പിന്നീടാണ് തട്ടിപ്പാണെന്ന് വ്യക്തമായത്. പൈസ തിരികെ ആവശ്യപ്പെട്ടപ്പോൾ നൽകിയില്ല. ഇതെ തുടർന്നാണ് വീട്ടമ്മ കോടതിയെ സമീപിച്ചത്.

എറണാകുളത്തപ്പന്‍ ക്ഷേത്രത്തിലെ ക്ഷേത്രോപദേശക സമിതി തെരഞ്ഞെടുപ്പിന് അനുമതി

കൊച്ചി: എറണാകുളത്തപ്പന്‍ ക്ഷേത്രത്തിലെ ക്ഷേത്രോപദേശക സമിതി തെരഞ്ഞെടുപ്പിന് ഹൈക്കോടതി അനുമതി നല്‍കി. തെരഞ്ഞെടുപ്പ് തടഞ്ഞ് പുറപ്പെടുവിച്ച ഇടക്കാല ഉത്തരവ് പിന്‍വലിച്ചാണ് തെരഞ്ഞെടുപ്പിന് കൊച്ചിന്‍ ദേവസ്വം ബോര്‍ഡിന് ദേവസ്വം ബെഞ്ച് അനുമതി നല്‍കിയത്. എറണാകുളം ക്ഷേത്ര ക്ഷേമസമിതിയുടെ എതിര്‍പ്പ് പരിഗണിച്ചായിരുന്നു തെരഞ്ഞെടുപ്പ് തടഞ്ഞ് 2023 മേയ് 12ന് കോടതി ഇടക്കാല ഉത്തരവ് പുറപ്പെടുവിച്ചത്. 2016 മുതല്‍ ക്ഷേത്ര നടത്തിപ്പില്‍ പങ്കാളിയാണെന്ന് ചൂണ്ടിക്കാട്ടിയാണ് എറണാകുളം ക്ഷേത്ര ക്ഷേമസമിതി പുതിയ ക്ഷേത്രോപദേശക സമിതി രൂപീകരിക്കാനുള്ള കൊച്ചിന്‍ ദേവസ്വം ബോര്‍ഡ് തീരുമാനത്തെ എതിര്‍ത്തത്. സമിതി ഓഡിറ്റിനായി വര്‍ഷങ്ങളായി രേഖകള്‍ നല്‍കിയിട്ടില്ലെന്നും ഗുരുതരമായ ആരോപണമാണ് നേരിടുന്നത് എന്നതിനാൽ സമിതിയെ ഒരു കാരണവശാലും ക്ഷേത്ര നടത്തിപ്പില്‍ പങ്കാളിയാക്കാനാകില്ലെന്നും വിലയിരുത്തിയാണ് കോടതിയുടെ ഉത്തരവ്. 2023 സെപ്റ്റംബറില്‍ സമിതിയുടെ കാലാവധി കഴിഞ്ഞതാണ്. ക്ഷേത്രോപദേശക സമിതിയായി അംഗീകരിക്കണമെന്ന ആവശ്യം ദേവസ്വം ബോര്‍ഡ് തള്ളിയിരുന്നു. അതിനാല്‍ തെരഞ്ഞെടുപ്പ് നടത്താനുള്ള തീരുമാനം നീട്ടിവയ്ക്കാനാവില്ലെന്ന് കോടതി വ്യക്തമാക്കി.

തുരുത്തി ഫ്ളാറ്റ് ഉദ്ഘാടനം: സിപിഎം രാഷ്ട്രീയ ചടങ്ങാക്കിയെന്ന്

ഫോർട്ടുകൊച്ചി: മൂന്ന് മുന്നണികളുടെയും അവകാശവാദങ്ങളാല്‍ വിവാദമായ തുരുത്തി ഇരട്ട ഫ്ളാറ്റ് ഉദ്ഘാടന ചടങ്ങും വിവാദത്തില്‍. ജനകീയ പരിപാടിയാക്കി മറ്റുന്നതിന് പകരം സിപിഎം ഏകപക്ഷീയമായി തങ്ങളുടെ പരിപാടിയാക്കി മാറ്റിയെന്ന ആക്ഷേപമാണ് ഉയര്‍ന്നിട്ടുള്ളത്. പരിപാടിയുടെ സംഘാടക സമിതി യോഗത്തിലും എല്‍ഡിഎഫ് ഘടക കക്ഷികളെ ക്ഷണിക്കാതെ സിപിഎം ഏകപക്ഷീയമായ നിലപാട് സ്വീകരിച്ചെന്നാണ് ആക്ഷേപം. പരിപാടിയില്‍ സിപിഎം ജില്ലാ സെക്രട്ടറി എസ്‌. സതീശ് ഉള്‍പെടെയുള്ള നേതാക്കള്‍ സദസില്‍ ഉണ്ടായിരുന്നുവെങ്കിലും സിപിഐ ഉള്‍പെടെയുള്ള മറ്റു പാര്‍ട്ടികളുടെ നേതാക്കളില്‍ പലരും ഉണ്ടായിരുന്നില്ല. കെ.ജെ. മാക്സി എംഎല്‍എ ഉള്‍പെടെയുള്ള ചില സിപിഎം നേതാക്കള്‍ ഏകപക്ഷീയ നിലപാടുമായി മുന്നോട്ട് പോകുകയാണെന്നും ആക്ഷേപമുണ്ട്.

കാപ്പ ചുമത്തി നാടുകടത്തി

കിഴക്കമ്പലം: നിരന്തര കുറ്റാവാളിയെ കാപ്പ ചുമത്തി നാടുകടത്തി. ആലുവ എടത്തല ചൂണ്ടി മണികണ്ഠൻ (ബിലാൽ 32 ) നെ യാണ് കാപ്പ ചുമത്തി ഒരു വർഷത്തേക്കു നാടുകടത്തിയത്. റൂറൽ ജില്ലാ പോലീസ് മേധാവി എം. ഹേമലതയുടെ റിപ്പോർട്ടിന്‍റെ അടിസ്ഥാനത്തിൽ എറണാകുളം റേഞ്ച് ഡിഐജി സതീഷ് ബിനോ ആണ് ഉത്തരവിട്ടത്. കഴിഞ്ഞ ഏഴ് വർഷത്തിനുള്ളിൽ കൊലപാതകം, കൊലപാതക ശ്രമം, ദേഹോപദ്രവം, മയക്ക് മരുന്ന് വിലപന തുടങ്ങി നിരവധി കേസിൽ പ്രതിയാണ്. കഴിഞ്ഞ മേയിൽ ഇയാൾ തടയിട്ടപറമ്പ് പോലീസ് സ്റ്റേഷൻ പരിധിയിൽ അതിഥി തൊഴിലാളികൾ താമസിക്കുന്ന കെട്ടിടത്തിൽ അതിക്രമിച്ച് കയറി പണവും, മൊബൈൽ ഫോണും കവർന്നിരുന്നു. ഈ കേസിൽ കേസിൽ പ്രതിയായതിനെ തുടർന്നാണ് നടപടി.

എംപി ഫണ്ട് സൂക്ഷ്മതയോടെ വിനിയോഗിക്കുന്നുവെന്ന് ഉറപ്പ് വരുത്തും: ഡീന്‍ കുര്യാക്കോസ് എംപി

കോതമംഗലം: നാമമാത്രമായി ലഭിക്കുന്ന എംപി ഫണ്ട് ഏതു നിർമാണപ്രവര്‍ത്തനത്തിന് അനുവദിക്കുമ്പോഴും സൂഷ്മതയും, സൂതാര്യതയും ഉറപ്പു വരുത്തുമെന്ന് ഡീന്‍ കുര്യാക്കോസ് എംപി. എംപിയുടെ പ്രാദേശിക വികസനഫണ്ട് ഉപയോഗിച്ച് കോതമംഗലം നഗരസഭയിലെ മിനിപ്പടിയില്‍ നിർമിച്ച ആധുനികരീതിയിലുള്ള വെയിറ്റിംഗ് ഷെഡ് ഉദ്ഘാടനം ചെയ്യുകയായിരുന്നു അദ്ദേഹം. കൊച്ചി ധനുഷ്കോടി ദേശീയ പാതയുടെ നിർമാണപ്രവര്‍ത്തനങ്ങള്‍ അതിവേഗം നടക്കുന്നുണ്ട്. മഴവെള്ളപാച്ചിലില്‍ നേര്യമംഗലത്ത് അനുഭവപ്പെട്ട വെള്ളക്കെട്ടും നിർമാണങ്ങള്‍ക്കിടയില്‍ റോഡിന്‍റെ ഇരുസൈഡിലും വന്നിട്ടുള്ള ജനങ്ങളുടെ പരാതികളെല്ലാം അടിയന്തരമായി പരിഹരിക്കാന്‍ ബന്ധപ്പെട്ട ഉദ്യോഗസ്ഥര്‍ക്കും കോണ്‍ട്രാക്ടര്‍ക്കും നിർദേശം നല്‍കിയിട്ടുണ്ടെന്നും എംപി പറഞ്ഞു. വാര്‍ഡ് കൗണ്‍സിലര്‍ സിന്ധു ജിജോ അധ്യക്ഷത വഹിച്ചു. പ്രിന്‍സ് വര്‍ക്കി ആമുഖപ്രസംഗം നടത്തി. യുഡിഎഫ് ജില്ല കണ്‍വീനര്‍ ഷിബു തെക്കുംപുറം, മുനിസിപ്പല്‍ മുന്‍ ചെയര്‍മാന്‍മാരായ കെ.പി. ബാബു, വി.വി. കുര്യന്‍, കോണ്‍ഗ്രസ് കവളങ്ങാട് ബ്ലോക്ക് പ്രസിഡന്‍റ് ബാബു ഏലിയാസ്, മണ്ഡലം പ്രസിഡന്‍റ് സണ്ണി വർഗീസ്, കര്‍ഷകകോണ്‍ഗ്രസ് സംസ്ഥാന ജനറല്‍ സെക്രട്ടറി പി.സി. ജോര്‍ജ്, കേരള കോണ്‍ഗ്രസ് നിയോജകമണ്ഡലം പ്രസിഡന്‍റ് എ.ടി. പൗലോസ്, ജനപ്രതിനിധികളായ റാണിക്കുട്ടി ജോര്‍ജ്, ജെയിംസ് കോറമ്പേല്‍, ജോമി തെക്കേക്കര, ജിജോ തോമസ്, ബിജു പുതുക്കുന്നത്ത്, എബി കുര്യാക്കോസ്, ജെയിന്‍ ജോസ്, എല്‍ദോസ് പൊയ്ക്കാട്ടില്‍, ആന്‍റണി ഓലിയപ്പുറം തുടങ്ങിയവര്‍ പങ്കെടുത്തു.

എന്‍സിസി തല്‍ സൈനിക് ക്യാമ്പില്‍ നിർമല കോളജിന് തിളക്കമാര്‍ന്ന നേട്ടം

മൂവാറ്റുപുഴ : ഡല്‍ഹിയില്‍ നടന്ന എന്‍സിസി ദേശീയ തല്‍ സൈനിക് ക്യാമ്പില്‍ പങ്കെടുത്ത മൂവാറ്റുപുഴ നിര്‍മല കോളജ് എന്‍സിസി കേഡറ്റുകള്‍ക്ക് തിളക്കമാര്‍ന്ന നേട്ടം. കോളജ് ഇക്കണോമിക്സ് വിഭാഗം മൂന്നാം വര്‍ഷ വിദ്യാര്‍ഥിനി പാര്‍വതി ശ്രീനിവാസനും, രണ്ടാം വര്‍ഷ സുവോളജി വിദ്യാര്‍ഥിനി ആബിദ ഇബ്രാഹിമുമാണ് നേട്ടത്തിന് അര്‍ഹരായത്. കേരള-ലക്ഷദ്വീപ് ഡയറക്ടറേറ്റിനെ പ്രതിനിധീകരിച്ച് ജഡ്ജിംഗ് ഡിസ്റ്റന്‍സ് ആൻഡ് ഫീല്‍ഡ് സിഗ്‌നല്‍സ് എന്ന വിഭാഗത്തിലാണ് പാര്‍വതിയുടെ സ്വര്‍ണ മെഡല്‍ നേട്ടം. കൂടാതെ സംസ്ഥാന തലത്തില്‍ ഹെല്‍ത്ത് ആൻഡ് ഹൈജീന്‍ വിഭാഗത്തില്‍ ആബിദ ഇബ്രാഹിം വെള്ളി മെഡലും നേടി. രാജ്യത്തെ 17 ഡയറക്ടറേറ്റുകളില്‍ നിന്ന് കേഡറ്റുകള്‍ പങ്കെടുത്ത ക്യാമ്പിലൂടെയാണ് നിര്‍മല കോളജിലെ എന്‍സിസി കേഡറ്റുകള്‍ നേട്ടത്തിന് അര്‍ഹരായത്.

കുടിവെള്ള പദ്ധതിയുടെ നിർമാണോദ്ഘാടനം

കൂത്താട്ടുകുളം: നഗരസഭ ഡിവിഷൻ 11ൽ എംഎൽഎയുടെ ആസ്തി വികസന ഫണ്ടിൽ നിന്നും 20 ലക്ഷം രൂപ അനുവദിച്ച പുത്തൻകുടിലിൽ കുടിവെള്ള പദ്ധതിയുടെ നിർമാണോദ്ഘാടനം അനൂപ് ജേക്കബ് എംഎൽഎ നിർവഹിച്ചു. നഗരസഭാ ചെയർപേഴ്സൺ കലാ രാജു അധ്യക്ഷത വഹിച്ചു. വൈസ് ചെയർമാൻ പി.ജി. സുനിൽകുമാർ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ പ്രിൻസ് പോൾ ജോൺ, കൗൺസിലർമാരായ സി.എ. തങ്കച്ചൻ, ബോബൻ വർഗീസ്, പി.സി. ഭാസ്കരൻ, സിബി കൊട്ടാരം, ജിജോ ടി. ബേബി, റോയി ഇരട്ടയാനിക്കൽ, ലിസി ജോസ് , ടി.എസ്. സാറ, വി.ജെ. ശശീന്ദ്രൻ, റെജി ജോൺ, എം.എ. ഷാജി, എൻ.കെ. ചാക്കോച്ചൻ എന്നിവർ പ്രസംഗിച്ചു.

ജോലി വാഗ്ദാനം ചെയ്ത് രണ്ട് ലക്ഷം തട്ടി: കോടതി നിർദേശപ്രകാരം പോലീസ് കേസെടുത്തു

വൈപ്പിൻ: ജോലി വാഗ്ദാനം ചെയ്ത് രണ്ടുലക്ഷം രൂപ തട്ടിയെടുത്തെന്ന വീട്ടമ്മയുടെ ഹർജിയിൽ കോടതി നിർദേശപ്രകാരം കുറ്റാരോപിതർക്കെതിരെ പോലീസ് കേസെടുത്തു. തൃശൂർ കോട്ടപ്പുറം സ്വദേശി ശ്യാം മോഹൻ, തൃശൂർ മുപ്ലിയം സ്വദേശി അനൂപ് എന്നിവർക്കെതിരെയാണ് കേസെടുത്തിട്ടുള്ളത്. നായരമ്പലം നെടുങ്ങാട് സ്വദേശിയായ വീട്ടമ്മയുടെ മകൾക്ക് സ്വകാര്യ സ്ഥാപനത്തിൽ ഫീൽഡ് സ്റ്റാഫ് ആയി 2 8,000 രൂപ ശമ്പളത്തിന് ജോലി വാഗ്ദാനം ചെയ്തതാണ് പണം തട്ടിയത്. കഴിഞ്ഞ മേയിൽ ചെക്ക് മുഖേനയാണ് 2 ലക്ഷം രൂപ കൈമാറിയത്. തുടർന്ന് ജൂണിൽ കമ്പനിയുടെ പേരിലുള്ള ഒരു വ്യാജ ഓഫർ ലെറ്ററും നൽകി. പിന്നീടാണ് തട്ടിപ്പാണെന്ന് വ്യക്തമായത്. പൈസ തിരികെ ആവശ്യപ്പെട്ടപ്പോൾ നൽകിയില്ല. ഇതെ തുടർന്നാണ് വീട്ടമ്മ കോടതിയെ സമീപിച്ചത്.

ജനകീയ മാര്‍ച്ചും കുറ്റപത്രം സമര്‍പ്പണവും

മൂവാറ്റുപുഴ : ആവോലി, പായിപ്ര പഞ്ചായത്ത് ഓഫീസുകള്‍ക്ക് മുന്നിലേക്ക് എല്‍ഡിഎഫ് ജനകീയ മാര്‍ച്ചും കുറ്റപത്രം സമര്‍പ്പണവും നടത്തി. യുഡിഎഫ് ഭരണസമിതിക്കെതിരേ അഴിമതിയും കെടുകാര്യസ്ഥതയും ആരോപിച്ച് സംഘടിപ്പിച്ച മാർച്ച് ആവോലി കവലയില്‍ നിന്ന് ആരോപിച്ച് ഓഫീസിനു മുന്നില്‍ സമാപിച്ചു. സിപിഎം ജില്ലാ കമ്മിറ്റിയംഗം എന്‍.സി. മോഹനന്‍ ഉദ്ഘാടനം ചെയ്തു. കെ.ഇ. മജീദ് അധ്യക്ഷത വഹിച്ചു. സിപിഐ ജില്ലാ കമ്മിറ്റിയംഗം എല്‍ദോ ഏബ്രഹാം കുറ്റപത്രം സമര്‍പ്പണം നടത്തി. സിപിഎം ലോക്കല്‍ സെക്രട്ടറി സി.കെ. സോമന്‍, സിപിഐ ലോക്കല്‍ സെക്രട്ടറി എം.കെ അജി, പഞ്ചായത്തംഗങ്ങളായ ഷാജു വടക്കന്‍, രാജേഷ് പൊന്നുംപുരയിടം തുടങ്ങിയവര്‍ പ്രസംഗിച്ചു. പേഴയ്ക്കാപ്പിള്ളി കവലയില്‍നിന്ന് തുടങ്ങിയ ജനകീയ മാര്‍ച്ച് പായിപ്ര പഞ്ചായത്ത് ഓഫീസിനു മുന്നില്‍ സമാപിച്ചു. സിപിഐ ജില്ലാ സെക്രട്ടറി എന്‍ അരുണ്‍ ഉദ്ഘാടനം ചെയ്തു. സിപിഐ ലോക്കല്‍ സെക്രട്ടറി കെ.കെ. ശ്രീകാന്ത് അധ്യക്ഷത വഹിച്ചു. സിപിഎം ഏരിയ സെക്രട്ടറി അനീഷ് എം. മാത്യു കുറ്റപത്രം സമര്‍പ്പണം നടത്തി. സിപിഎം ഏരിയ കമ്മിറ്റിയംഗങ്ങളായ ആര്‍. സുകുമാരന്‍, വി.ആര്‍. ശാലിനി, ലോക്കല്‍ സെക്രട്ടറിമാരായ ബാബു ബേബി, എം.എ. റിയാസ്ഖാന്‍, ഒ.കെ. മുഹമ്മദ്, സിപിഐ ലോക്കല്‍ സെക്രട്ടറി കെ.എ. അനൂപ്, ടി.വി ജോയി, സീന ബോസ്, ഇ.എം. ഷാജി തുടങ്ങിയവര്‍ പ്രസംഗിച്ചു.

സ്വകാര്യ ബസിടിച്ച് സ്‌കൂട്ടര്‍ യാത്രികന്‍ മരിച്ച സംഭവം: ബസ് ഡ്രൈവറെ പിടികൂടാനായില്ല

കൊച്ചി: കൊച്ചിയില്‍ സ്വകാര്യ ബസിടിച്ച് സ്‌കൂട്ടര്‍ യാത്രികനായ യുവാവ് മരിച്ച സംഭവത്തില്‍ ബസ്ഡ്രൈവര്‍ ഇപ്പോഴും ഒളിവില്‍ തന്നെ. അമിത വേഗതയിലെത്തിയ സ്വകാര്യ ബസിടിച്ച് എളമക്കര പള്ളിപ്പറമ്പ് വീട്ടില്‍ ജോസ് ഡൊമിനിക്കാ(42)ണ് കഴിഞ്ഞ 26ന് മരിച്ചത്. അപകടത്തെ തുടര്‍ന്ന് ബസ് ഡ്രൈവര്‍ ഇറങ്ങിയോടുകയായിരുന്നു. ഒളിവില്‍ പോയ ഇയാളെ കണ്ടെത്തുന്നതിനായി പോലീസ് അന്വേഷണം നടത്തുന്നുണ്ട്. അമിത വേഗത, അശ്രദ്ധമായി വാഹനം ഓടിക്കല്‍ എന്നീ വകുപ്പുകള്‍ ചുമത്തിയാണ് ഡ്രൈവര്‍ക്കെതിരെ ഹാര്‍ബര്‍ പോലീസ് കേസെടുത്തിരിക്കുന്നത്. തോപ്പുംപടി ബിഒടി പാലത്തിന് നടുവില്‍ ഫോര്‍ട്ട്‌കൊച്ചി ആലുവ റൂട്ടില്‍ സര്‍വീസ് നടത്തുന്ന റോഡ് ലാന്‍ഡ് എന്ന ബസാണ് അപകടമുണ്ടാക്കിയത്. ബിഒടി സിഗ്‌നലില്‍നിന്ന് ബസ് അമിത വേഗത്തില്‍ മറ്റൊരു വാഹനത്തെ മറികടക്കുന്നതിനിടെ എതിരേ വന്ന സ്‌കൂട്ടറില്‍ ഇടിക്കുകയായിരുന്നു. ഡ്രൈവര്‍ ഇറങ്ങി ഓടിയതിനെ തുടര്‍ന്ന് ബസില്‍ ഉണ്ടായിരുന്ന കണ്ടക്ടറാണ് ബസ് പാലത്തില്‍ നിന്നും മാറ്റിയിട്ടത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]