ADVERTISEMENT

ADVERTISEMENT

യാത്രാദുരിതം: താലൂക്ക് ഓഫീസിനു മുന്നിൽ പ്രതിഷേധസമരം

ചാലക്കുടി: ദേശീയപാതയിലെ ദുരിതയാത്രയ്ക്ക് അടിയന്തരമായി പരിഹാരം ഉണ്ടാക്കണമെന്നാവശ്യപ്പെട്ട് കേരള സിറ്റിസൺ ഫോറത്തിന്‍റെ നേതൃത്വത്തിൽ താലൂക്ക് ഓഫീസിനുമുന്നിൽ പ്രതിഷേധസമരംനടത്തി.

സംസ്ഥാന പ്രസിഡന്‍റ് പി.ജെ. ആന്‍റണി ഉദ്ഘാടനംചെയ്തു. മണ്ഡലം പ്രസിഡന്‍റ് ഹസീന നിഷാബ് അധ്യക്ഷതവഹിച്ചു. വൈ. ഔസേപ്പച്ചൻ, ഡോ. മാർട്ടിൻ പോൾ, പി.ജി. മോഹനൻ, സിറിൾ, ഫ്രാൻസിസ് ഊക്കൻ എന്നിവർ പ്രസംഗിച്ചു.

ADVERTISEMENT

ഔഷധ നെൽകൃഷിയുമായി വെസ്റ്റ് കൊരട്ടി കൂട്ടുകൃഷിസംഘം

വെസ്റ്റ് കൊരട്ടി: കർക്കടകമാസത്തിൽ ഔഷധ നെൽകൃഷിയുമായി വെസ്റ്റ് കൊരട്ടി കൂട്ടുകൃഷിസംഘം. അന്നമനട കൃഷിഭവനും വെസ്റ്റ് കൊരട്ടി കൂട്ടുകൃഷി പാടശേഖരസമിതിയും സംയുക്തമായാണ് വെസ്റ്റ് കൊരട്ടി വെള്ളിലംപാടത്ത് ഔഷധ - പോഷക ഗുണങ്ങളുള്ള നവര നെൽകൃഷിയിറക്കിയത്. വിത്തുവിതച്ച് കേവലം 80 ദിവസത്തിനുള്ളിൽ കൊയ്തെടുക്കാനാകും. ഗ്രാമപഞ്ചായത്ത് പ്രസിഡന്‍റ് പി.വി. വിനോദും കൃഷി ഓഫീസർ പി.കെ. ബിജുമോനും വിത്തിടൽ നിർവഹിച്ചു. ഗ്രാമപഞ്ചായത്ത് അംഗങ്ങളായ എം.യു. കൃഷ്ണകുമാർ, മോളി വർഗീസ്, പാടശേഖരസമിതി ഭാരവാഹികളായ ജി.ഡി. തോമസ്, കെ.എം. സലീം, കെ. വേണുഗോപാൽ എന്നിവരുടെ നേതൃത്വത്തിലാണ് കൃഷിയിറക്കലും പരിപാലനവും.

മന്ത്രി ബിന്ദു മാപ്പുപറയണം: യുഡിഎഫ്

ഇരിങ്ങാലക്കുട: ഠാണാ - ചന്തക്കുന്ന് വികസനത്തിന്‍റെ ഭാഗമായുള്ള പണികള്‍ വൈകുന്നതിന്‍റെ ഉത്തരവാദിത്വം നഗരസഭയ്ക്കാണെന്നുള്ള ആരോപണത്തില്‍ മന്ത്രി ആര്‍. ബിന്ദു മാപ്പുപറയണമെവന്നാവശ്യപ്പെട്ട് യുഡിഎഫ് കൗണ്‍സിലര്‍മാര്‍ പ്രതിഷേധധര്‍ണ നടത്തി. വികസനത്തിന്‍റെ ഭാഗമായി ഈ പ്രദേശത്തുള്ള നഗരസഭയുടെ അധീനതയിലുള്ള കെട്ടിടങ്ങള്‍ സമയബന്ധിതമായി പൊളിച്ചുനീക്കിയതാണ്. സ്വന്തംവീഴ്ച മറച്ചുവച്ച് മറ്റുള്ളവരുടെ തലയില്‍ കെട്ടിവയ്ക്കാനുള്ള ശ്രമം ജനങ്ങള്‍ തിരിച്ചറിയുമെന്നും യുഡിഎഫ് കൗണ്‍സിലര്‍മാര്‍ പറഞ്ഞു. നഗരസഭാ മന്ദിരത്തിനു മുന്നില്‍നടന്ന പ്രതിഷേധധര്‍ണ യുഡിഎഫ് പാര്‍ലമെന്‍ററി പാര്‍ട്ടി നേതാവ് സോണിയ ഗിരി ഉദ്ഘാടനംചെയ്തു. നഗരസഭ ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷതവഹിച്ചു. വൈസ് ചെയര്‍മാന്‍ ബൈജു കുറ്റിക്കാടന്‍, കൗണ്‍സിലര്‍മാരായ ടി.വി. ചാര്‍ളി, എം.ആര്‍. ഷാജു തുടങ്ങിയവര്‍ സംസാരിച്ചു.

കോൺഗ്രസ് റോഡ് ഉപരോധിച്ചു

ചാലക്കുടി: പൊതുമരാമത്ത് വകുപ്പിനുകീഴിലുള്ള റോഡുകളുടെ ശോചനീയാവസ്ഥ പരിഹരിക്കുന്നതിനും നിരന്തരമായുണ്ടാകുന്ന അപകടങ്ങൾക്ക് പരിഹാരമുണ്ടാക്കുന്നതിനും നടപടി സ്വീകരിക്കാത്ത, സർക്കാരിന്‍റെയും മന്ത്രിയുടേയും നിലപാടിൽ പ്രതിഷേധിച്ച് മണ്ഡലം കോൺഗ്രസ് കമ്മിറ്റി റോഡ് ഉപരോധിച്ച് പ്രതിഷേധിച്ചു. സൗത്ത് ജംഗ്ഷനിൽനടന്ന പ്രതിഷേധം നഗരസഭ ചെയർപേഴ്സൻ ഷിബു വാലപ്പൻ ഉദ്ഘാടനംചെയ്തു. മണ്ഡലം പ്രസിഡന്‍റ് ജോണി പുല്ലൻ അധ്യക്ഷതവഹിച്ചു. ബ്ലോക്ക് വൈസ് പ്രസിഡന്‍റ് ബിജു ചിറയത്ത്, പി.വി. വേണു, ജോർജ് തോമസ്, വൈസ് ചെയർപേഴ്സൻ സി. ശ്രീദേവി, എബി ജോർജ്, ആലീസ് ഷിബു എന്നിവർ പ്രസംഗിച്ചു.

ഠാണ - ചന്തക്കുന്ന് റോഡ് വികസനം: വ്യാപാരികള്‍ പ്രതിഷേധധര്‍ണ നടത്തി

ഇരിങ്ങാലക്കുട: ഠാണ - ചന്തക്കുന്ന് റോഡ് വികസനത്തിന്‍റെ മെല്ലപ്പോക്ക് അവസാനിപ്പിക്കുക, പണികള്‍ സമയബന്ധിതമായി പൂര്‍ത്തിയാക്കുക എന്നീ ആവശ്യങ്ങള്‍ ഉന്നയിച്ചു കേരള വ്യാപാരി വ്യവസായി ഏകോപനസമിതിയുടെ ആഭിമുഖ്യത്തില്‍ പ്രതിഷേധധര്‍ണ നടത്തി. തൃശൂര്‍ ജില്ലാ പ്രസിഡന്‍റ് കെ.വി. അബ്ദുല്‍ഹമീദ് ഉദ്ഘാടനംചെയ്തു. ജില്ലാ ട്രഷറര്‍ ജോയ് മൂത്തേടന്‍ മുഖ്യാതിഥിയായിരുന്നു. യൂണിറ്റ് പ്രസിഡന്‍റ് ഷാജു പാറേക്കാടന്‍ അധ്യക്ഷതവഹിച്ചു. കെ.എ. നജ്ജാഹ് മുഖ്യപ്രഭാഷണംനടത്തി. എബിന്‍ വെള്ളനിക്കാരന്‍, ടി.വി. ആന്‍റോ, പി.പി. ജോഷി, കെ.കെ. കൃഷ്ണനന്ദ ബാബു എന്നിവര്‍ സംസാരിച്ചു.

കൊടകര ടൗണിലെ റോഡില്‍ കുഴികള്‍ രൂപപ്പെട്ടു

കൊടകര: ടൗണിലെ വെള്ളിക്കുളങ്ങര റോഡില്‍ കുഴികള്‍ രൂപപ്പെട്ടത് യാത്രക്കാര്‍ക്കു വ്യാപാരികള്‍ക്കും ഒരുപോലെ ദുരിതമായി. കനത്തുപെയ്ത മഴയിലാണ് മെക്കാഡം റോഡില്‍ കുഴികള്‍ രൂപംകൊണ്ടത്. വെള്ളം നിറഞ്ഞുകിടക്കുന്ന ഈ കുഴികളിലൂടെ വാഹനങ്ങള്‍ കടന്നുപോകുമ്പോള്‍ സമീപത്തുള്ള ഫുട്പാത്തിലൂടെ നടന്നുപോകുന്നവരുടെ ദേഹത്തേക്കും വ്യാപാരസ്ഥാപനങ്ങളിലേക്കും വെള്ളം തെറിക്കുന്നത് പതിവായി. ടൗണിലെ തിരക്കുള്ള ഈ ഭാഗത്ത് കുഴികള്‍ രൂപപ്പെട്ടത് ഗതാഗതക്കുരുക്കിനും കാരണമാകുന്നുണ്ട്.

മറിയം ആലുക്കയുടെ ത്രിഫ്റ്റ് മാർക്കറ്റ് ഏറ്റെടുത്ത് തൃശൂർ

സ്വന്തം ലേഖകൻ തൃശൂർ: ഒരു നോക്കിൽ തോന്നിയ ചിന്ത, ഹൃദയങ്ങൾ കീഴടക്കി മുന്നോട്ട്. ഇഷ്ടവസ്ത്രങ്ങളിൽ ചാരിറ്റിആശയം കണ്ടെത്തിയ പതിനൊന്നാംക്ലാസുകാരി മറിയം ആലുക്കയുടെ മനസിൽ വിരിഞ്ഞ ആശയം ഇരുകൈയുംനീട്ടി സ്വീകരിച്ച് തൃശൂർ ജനത. സെക്കൻഡ് ചാൻസ് ത്രിഫ്റ്റ് മാർക്കറ്റ് വൻവിജയം. ആളുകളിൽനിന്ന് അവർ ഉപയോഗിക്കാത്തതും അധികം ഉപയോഗിക്കാത്തതുമായ വസ്ത്രങ്ങളും വസ്തുക്കളും സ്വീകരിച്ച്, വൃത്തിയാക്കി, ചുരുങ്ങിയ നിരക്കിൽ വില്പന നടത്തുക, അതിലൂടെ ലഭിക്കുന്ന തുക ചാരിറ്റി പ്രവർത്തനങ്ങൾക്കു നൽകുക എന്ന മറിയത്തിന്‍റെ നല്ല മനസിനു വീട്ടുകാരും കൂട്ടുകാരും കൈകോർത്തതോടെ ആശയം ഗംഭീരവിജയമാവുകയായിരുന്നു. ബംഗളൂരു ഹാരോ ഇന്‍റർനാഷനൽ സ്കൂളിലെ പ്ലസ് വണ്‍ വിദ്യാർഥിനിയായ മറിയം അവധിക്കാലത്തു നാട്ടിലെത്തിയപ്പോഴാണ് തന്‍റെ ഇഷ്ടവസ്ത്രങ്ങളുടെ വാർഡ്രോബ് വെറുതെയൊന്നു തുറന്നുനോക്കിയത്. ഒരുകാലത്തു താൻ ധരിക്കാൻ ഏറ്റവും ഇഷ്ടപ്പെട്ടിരുന്നതും അധികം ധരിക്കാത്തതുമായ വസ്ത്രങ്ങളുടെ ശേഖരം ശ്രദ്ധയിൽപ്പെട്ടു. ഓർമയിൽപോലും ഇല്ലാതിരുന്ന വസ്ത്രങ്ങൾ തനിക്കിനി വേണ്ടിവരില്ല. എന്നാൽ, മറ്റുള്ളവർക്ക് ഇതാകാം ഏറെ പ്രിയപ്പെട്ട സമ്മാനം എന്ന ചിന്തയും ഉദിച്ചു. അവിടെനിന്നാണ് മലയാളികൾക്ക് അധികം പരിചിതമല്ലാത്ത ത്രിഫ്റ്റ് മാർക്കറ്റ് എന്ന ആശയത്തിനു തുടക്കം. ഇതിന്‍റെ ഭാഗമായി സെക്കൻഡ് ചാൻസ് എന്ന പേരിൽ ഇൻസ്റ്റഗ്രാം അക്കൗണ്ടും തുടങ്ങി തന്‍റെ ആഗ്രഹം മറിയം പങ്കുവച്ചു. ഒരുമാസംമുന്പാണ് ബന്ധുക്കളിൽനിന്നും സുഹൃത്തുക്കളിൽനിന്നും നല്ലനിലയിലുള്ള വസ്ത്രങ്ങളും ചെരിപ്പുകളും പുസ്തകങ്ങളും ശേഖരിക്കുന്നതിനു തുടക്കമിട്ടത്. തുടർന്നു സ്വന്തം കൈകൾകൊണ്ടുതന്നെ അവ വൃത്തിയാക്കി, വില്പനയ്ക്കായി സജ്ജമാക്കുകയുമായിരുന്നു. എംജി റോഡിലെ ആലുക്കാസ് ബിൽഡിംഗിൽ ഒരുക്കിയ ത്രിഫ്റ്റ് മാർക്കറ്റിൽ വിമൻസ്, മെൻസ്, കിഡ്സ് വെയറുകൾ, ഷൂസ്, ബാഗ്, പുസ്തകങ്ങൾ തുടങ്ങി വിവിധങ്ങളായ വസ്തുക്കളാണ് വില്പനയ്ക്കായി ഒരുക്കിയത്. ആയിരങ്ങൾ വിലവരുന്ന വസ്തുക്കളാണെങ്കിലും ഇവിടെ അതിനു 59 രൂപ മുതൽ 600 രൂപയ്ക്കുതാഴെ മാത്രമേ വിലവരുന്നുള്ളൂ. ഒരു വസ്ത്രംകൊണ്ടെങ്കിലും മറ്റൊരാളുടെ ആത്മാവിൽ ചിരിയുണ്ടാക്കാനാകുമെന്ന് ഞാൻ വിശ്വസിക്കുന്നുവെന്ന മറിയത്തിന്‍റെ വാക്കുകൾ വെറുംവാക്കല്ല, അതൊരു യുവതയുടെ ലക്ഷ്യപ്രഖ്യാപനംതന്നെയാണ്. വിൽക്കാതെ ശേഷിക്കുന്ന വസ്ത്രങ്ങൾ ചാരിറ്റിയിലേക്കു നൽകുമെന്നും വില്പനയിൽനിന്നു കിട്ടുന്ന മുഴുവൻ വരുമാനവും അതിലേക്കാകുമെന്നും മറിയം ഉറപ്പുപറയുന്നു. ജോസ് ആലുക്കാസ് ഗ്രൂപ്പ് മാനേജിംഗ് ഡയറക്ടർ വർഗീസ് ആലുക്കയുടെയും സ്മിത ആലുക്കയുടെയും മകളായ മറിയം വരുംവർഷങ്ങളിലും വിപുലമായ രീതിയിൽ ഇത്തരം പദ്ധതികൾ നടപ്പാക്കാനാണ് ലക്ഷ്യമിടുന്നത്. രാവിലെ പത്തുമുതൽ രാത്രി ഏഴുവരെ നടക്കുന്ന സെക്കൻഡ് ചാൻസ് ത്രിഫ്റ്റ് മാർക്കറ്റ് ഇന്നു സമാപിക്കും.

തൃശൂരിലും അരിച്ചുപെറുക്കി, ഗോവിന്ദച്ചാമിക്കായി

തൃശൂർ: കണ്ണൂർ സെൻട്രൽ ജയിലിൽനിന്നു ഗോവിന്ദച്ചാമി ചാടിയ വിവരം ലഭിച്ചയുടൻ തൃശൂരിൽ പോലീസ് സംഘം ആ ക്രിമിനലിനായി വ്യാപകതെരച്ചിൽ ആരംഭിച്ചിരുന്നു. കണ്ണൂരിൽനിന്നു തൃശൂരിലേക്കെത്താൻ സമയമെടുക്കുമെങ്കിലും രാത്രിയിൽ ജയിൽ ചാടിയിട്ടുണ്ടെങ്കിൽ രാവിലെയോടെ ഗോവിന്ദച്ചാമി തൃശൂരിലെത്തിയിരിക്കാമെന്ന കണക്കുകൂട്ടലിലാണ് ഇന്നലെ തൃശൂർ സിറ്റി, റൂറൽ പോലീസ് ജില്ലയാകെ അരിച്ചുപെറുക്കിയത്. ഓരോ പോലീസ് സ്റ്റേഷനിൽനിന്നും രണ്ടു ടീമുകളെവീതം അതാതു സ്റ്റേഷൻ പരിധിയിലെ പരിശോധനയ്ക്കായി നിയോഗിച്ചിരുന്നു. സകലയിടത്തും പോലീസ് പരിശോധന നടത്തുന്നതിനിടെയാണ് കണ്ണൂരിൽനിന്നുതന്നെ ഗോവിന്ദച്ചാമിയെ പിടികൂടിയ വാർത്ത വന്നത്. സൗമ്യകേസും ഗോവിന്ദച്ചാമിയുമെല്ലാം തൃശൂരിന് ഏറെ പരിചിതമായതുകൊണ്ടുതന്നെ തൃശൂർക്കാരും ഗോവിന്ദച്ചാമിയുടെ ജയിൽചാട്ടം ഞെട്ടലോടെയാണ് കേട്ടത്. കേരളം വിട്ടാൽ ഗോവിന്ദച്ചാമിയെ പിടികിട്ടാൻ എളുപ്പമല്ല തൃശൂർ: ജയിൽചാടി മണിക്കൂറുകൾക്കുള്ളിൽ ഗോവിന്ദച്ചാമിയെന്ന കൊടുംകുറ്റവാളിയെ പിടികൂടാൻ സാധിച്ചതു ഭാഗ്യംകൊണ്ടുമാത്രം. പല സംസ്ഥാനങ്ങളിലും ബന്ധങ്ങളുള്ള ഈ ക്രിമിനൽ കേരളം വിട്ടിരുന്നെങ്കിൽ പിടികൂടുക പോലീസിന് ഒട്ടും എളുപ്പമാകുമായിരുന്നില്ല. തമിഴ്നാട്ടിലും ആന്ധ്രയിലും കർണാടകയിലും മഹാരാഷ്ട്രയിലുമടക്കം ഇന്ത്യയുടെ പല സംസ്ഥാനങ്ങളിലും ഗോവിന്ദച്ചാമിക്കു ബന്ധങ്ങളുണ്ട്. അതും ക്രിമിനലുകളുമായുള്ള അടുത്ത ബന്ധം. ആന്ധ്രയിലെ ചില ഭാഗങ്ങളിലുള്ള നക്സൽ ഗ്രൂപ്പുകളായിവരെ ഗോവിന്ദച്ചാമിക്ക് അടുത്ത ബന്ധമുള്ളതായി നേരത്തേതന്നെ റിപ്പോർട്ടുകളുണ്ടായിരുന്നു. ഗോവിന്ദച്ചാമിക്കുവേണ്ടി വാദിക്കാൻ ലക്ഷങ്ങൾ മുടക്കാൻ പുറമേനിന്ന് ആളുകൾ വന്നപ്പോഴാണ് ഈ കൊടുംക്രിമിനലിന്‍റെ ബന്ധങ്ങളെക്കുറിച്ച് പുറംലോകമറിഞ്ഞത്.

നിർമലമാത സെൻട്രൽ സ്കൂളിനു കിരീടം

ചാലക്കുടി: സികെഎം എൻഎസ്എസ് സ്കൂളിൽ നടന്ന തൃശൂർ സഹോദയ സ്കൂൾ കോംപ്ലക്സ് ടീച്ചേഴ്സ് കലോത്സവത്തിൽ തൃശൂർ ഈസ്റ്റ്ഫോർട്ട് നിർമലമാത സെൻട്രൽ സ്കൂൾ കിരീടം നേടി. ചിറ്റിലപ്പിള്ളി ഐഇഎസ് പബ്ലിക് സ്കൂളും തൃശൂർ ദേവമാത സിഎംഐ പബ്ലിക് സ്കൂളും രണ്ടാംസ്ഥാനം പങ്കിട്ടു. ഗുരുകുലം പബ്ലിക് സ്കൂൾ വെങ്ങിണിശേരിക്കാണ് മൂന്നാംസ്ഥാനം. കലോത്സവം സിബിഎസ്‌സി മാനേജ്മെന്‍റ് അസോസിയേഷൻ ജില്ലാ പ്രസിഡന്‍റ് ടി.കെ. ആദിത്യവർമരാജ ഉദ്ഘാടനം ചെയ്തു. തൃശൂർ സഹോദയ ജനറൽ സെക്രട്ടറി ഷമീം ബാവ അധ്യക്ഷത വഹിച്ചു. സികെഎം എൻഎസ്എസ് സ്കൂൾ പ്രിൻസിപ്പലും കലോത്സവം ജനറൽ കൺവീനറുമായ മൃദുല മധു, തൃശൂർ സഹോദയ വൈസ് പ്രസിഡന്‍റ് സജീവ്കുമാർ, ഹിമ രാജീവ്, ബാബു കോയിക്കര എന്നിവർ പ്രസംഗിച്ചു.

വോട്ടർപട്ടികയിൽ വ്യാപക പിഴവെന്നു പരാതി

തൃശൂർ: കോർപറേഷനിലെ ഡീലിമിറ്റേഷൻ കഴിഞ്ഞ ഡിവിഷനുകളിലെ കരടു വോട്ടർപട്ടികയിൽ വ്യാപകപിഴവെന്നു പരാതി. ഈ ഡിവിഷനുകളിലെ വോട്ടർമാർ മറ്റു ഡിവിഷനുകളിൽ ഇടംപിടിച്ചു. പാട്ടുരായ്ക്കൽ, കുരിയിച്ചിറ, സിവിൽസ്റ്റേഷൻ, ചെന്പുക്കാവ്, മിഷൻ ക്വാർട്ടേഴ്സ് തുടങ്ങിയ ഡിവിഷനുകളിലെ വോട്ടർമാരാണ് മറ്റു ഡിവിഷനുകളിലും ഇടംപിടിച്ചത്. കരടുപട്ടികയിൽ വോട്ടർമാരുടെ എണ്ണത്തിലും ചില ഡിവിഷനുകളിൽ കുറവുണ്ടായി. ചിലയിടത്ത് ആറായിരംവരെ വോട്ടുകൾ വന്നപ്പോൾ ചിലയിടത്തു രണ്ടായിരത്തിൽതാഴെ മാത്രമാണ്. പുതുതായി വന്ന തിരുവന്പാടി ഡിവിഷനിൽ ആകെ വോട്ടർമാർ 2268 മാത്രമാണ്. നടത്തറ ഡിവിഷൻ പേരുമാറി കൃഷ്ണപുരമായപ്പോൾ വോട്ടർമാരുടെ എണ്ണം 6717 ആയി. വോട്ടുചേർക്കുന്പോൾ ഇതിനിയും വർധിക്കും. വോട്ടുകൾ ക്രമീകരിച്ചതിൽ പിഴവുണ്ടായിട്ടുണ്ട്. കോർപറേഷനിലെ സിപിഎം നേതൃത്വം ഡിവിഷനുകളിൽ നടത്തിയ ക്രമക്കേടാണു തെളിവുസഹിതം പുറത്തുവന്നതെന്നു കെപിസിസി സെക്രട്ടറിയും കൗണ്‍സിലറുമായ ജോണ്‍ ഡാനിയൽ ആരോപിച്ചു. ജയിക്കാനാവശ്യമായ രീതിയിൽ ഡിവിഷനുകൾ പുനഃക്രമീകരിച്ചപ്പോൾ വോട്ടുകൾ ക്രമീകരിക്കുന്നതിൽ അബദ്ധംപറ്റി. പല ഡിവിഷനുകളിലും വോട്ടുകൾ കുറഞ്ഞപ്പോൾ തൊട്ടടുത്ത ഡിവിഷനിൽനിന്ന് ഉൾപ്പെടുത്തിയതാണു കാണാൻ കഴിഞ്ഞത്. ഡിവിഷനുകളിൽനിന്നു മാറ്റിയ വോട്ടുകൾ അതാതു ഡിവിഷനിലേക്കു ചേർക്കണമെന്ന് ആവശ്യപ്പെട്ടു കോർപറേഷൻ സെക്രട്ടറിക്കു രേഖാമൂലം പരാതിനൽകി. പരിഹാരമുണ്ടായില്ലെങ്കിൽ കോടതിയെ സമീപിക്കുമെന്നും ജോണ്‍ ഡാനിയൽ പറഞ്ഞു.

കുഴികൾ നിരന്തരം മൂടി സുരക്ഷ ഉറപ്പാക്കണം: ജില്ലാ കളക്ടർ

തൃശൂർ: റോഡുകളിലെ കുഴികൾ നിരന്തരം അറ്റകുറ്റപ്പണികൾ നടത്തി യാത്രക്കാരുടെ സുരക്ഷ ഉറപ്പാക്കണമെന്നു ജില്ലാ കളക്ടർ അർജുൻ പാണ്ഡ്യൻ. റോഡ് സുരക്ഷയുമായി ബന്ധപ്പെട്ടു മുൻയോഗങ്ങളിലെ നിർദേശങ്ങൾ പാലിക്കുന്നുണ്ടെന്ന് ഉദ്യോഗസ്ഥർ ഉറപ്പാക്കണമെന്നും മഴക്കാലപ്രവൃത്തികൾ അവലോകനംചെയ്യാൻ ചേർന്ന ജില്ലാ ദുരന്ത നിവാരണ അഥോറിറ്റി യോഗത്തിൽ കളക്ടർ നിർദേശം നൽകി. സ്കൂളുകളുടെ ഫിറ്റ്നസ് തദ്ദേശ പൊതുമരാമത്ത് എൻജിനീയറോ സർട്ടിഫൈഡ് സ്ട്രക്ചറൽ എൻജിനീയറോ പരിശോധിച്ചെന്നും ഫിറ്റ്നസ് ഇല്ലാത്ത കെട്ടിടങ്ങളിൽ അധ്യയനം നടക്കുന്നില്ലെന്ന് അതാതു തദ്ദേശസ്ഥാപനങ്ങൾ ഉറപ്പാക്കണം. സ്കൂളുകളിലേക്കുള്ള വഴികൾ, പൊതുഇടങ്ങൾ എന്നിവിടങ്ങളിലെ അപകടാവസ്ഥയിലുളള വൈദ്യുതി പോസ്റ്റുകൾ, കന്പികൾ എന്നിവ മാറ്റാൻ കെഎസ്ഇബിക്കു നിർദേശം നൽകി. ചേർപ്പ്- പുള്ള് മേഖലയിലെ വെള്ളക്കെട്ട് ഒഴിവാക്കാൻ സബ് കളക്ടറെ ചുമതലപ്പെടുത്തി. ചാഴൂർ പഞ്ചായത്തിന്‍റെ ഫണ്ട് ഉപയോഗിച്ചു ചണ്ടി, കുളവാഴ എന്നിവ നീക്കുന്ന നടപടിയും ചേർപ്പ് പഞ്ചായത്ത് ഫണ്ടുപയോഗിച്ചു ജലസേചനവകുപ്പ് വിവിധയിടങ്ങളിൽ നിർമാണം നടത്തുന്നുണ്ടെന്നും ഉദ്യോഗസ്ഥർ അറിയിച്ചു. സ്ലൂയിസ്, ബണ്ടുകൾ എന്നിവ തുറക്കാൻ ഉത്തരവു നൽകിയെന്നു സബ് കളക്ടർ അറിയിച്ചു. പ്രദേശത്തു സ്ഥിരമായ ദുരിതാശ്വാസ ക്യാന്പ് തുറക്കാനുള്ള സ്ഥലം കണ്ടെത്തി സർക്കാരിലേക്ക് അയയ്ക്കാൻ തൃശൂർ തഹസിൽദാർക്കും എസ്റ്റിമേറ്റ് തയാറാക്കാൻ പിഡബ്ല്യുഡി കെട്ടിടവിഭാഗത്തിനും കളക്ടർ നിർദേശം നൽകി. കമാൻഡോമുഖത്തു സ്ഥിരമായി എഫ്ആർപി ഷട്ടർ സ്ഥാപിക്കാൻ നാട്ടിക എംഎൽഎയുടെ ഫണ്ട് ഉപയോഗിക്കുമെന്നും മുനയത്തെ താത്കാലിക ബണ്ടിലെ മണ്ണു നീക്കിത്തുടങ്ങിയെന്നും ഇറിഗേഷൻ എക്സിക്യൂട്ടീവ് എൻജിനീയർ അറിയിച്ചു. മണ്ണിടിച്ചിലുള്ള സ്ഥലങ്ങളിൽ മുൻകരുതലെടുക്കണമെന്നും മഴക്കാലത്തുണ്ടായ നഷ്ടങ്ങളുടെ മൂല്യനിർണയം വേഗത്തിലാക്കണമെന്നും കളക്ടർ നിർദേശിച്ചു. സബ് കളക്ടർ അഖിൽ വി. മേനോൻ, ഡെപ്യൂട്ടി കളക്ടർ ജി.കെ. പ്രദീപ്, എൽഎസ്ജിഡി ജോയിന്‍റ് ഡയറക്ടർ സജു സെബാസ്റ്റ്യൻ, വിവിധ വകുപ്പ് ഉദ്യോഗസ്ഥർ പങ്കെടുത്തു. പുഴയ്ക്കൽവഴി സ്വകാര്യബസുകൾ സർവീസ് നിർത്തുന്നു തൃശൂർ: റോഡുകളുടെ ശോച്യാവസ്ഥയിൽ പ്രതിഷേധിച്ച് ശക്തൻ സ്റ്റാൻഡിൽനിന്നു പുഴയ്ക്കൽ വഴി പോകുന്ന എല്ലാ സ്വകാര്യബസുകളും ഓഗസ്റ്റ് അഞ്ചു മുതൽ അനിശ്ചിതകാലത്തേക്കു സർവീസ് നിർത്തിവയ്ക്കുമെന്നു ബസുടമ കോ ഓർഡിനേഷൻ കമ്മിറ്റി അറിയിച്ചു. ‌ഇതുസംബന്ധിച്ച് ജില്ലാ കളക്ടർ, ഡെപ്യൂട്ടി കളക്ടർ, അസിസ്റ്റന്‍റ് ആർടിഒ, പോലീസ് കമ്മീഷണർ എന്നിവർക്കു കോഓർഡിനേഷൻ കമ്മിറ്റി നിവേദനം നല്കി. പൂങ്കുന്നം- മുതുവറ റോഡിലെ കുഴികളിൽ വീണുള്ള അപകടം പെരുകുകയാണ്. ഇരുചക്രവാഹന യാത്രികരടക്കമുള്ള നിരവധിപേർക്കു പരിക്കേൽക്കുകയും മരണവും സംഭവിക്കുകയും ചെയ്തിട്ടുണ്ട്. ശോഭ സിറ്റിക്കുമുന്പിൽ പാലംപണി നടക്കുന്നിടത്തു മണിക്കൂറുകളോളമാണു ഗതാഗതക്കുരുക്ക്. ഇതുമൂലം ബസുകളുടെ ട്രിപ്പ് മുടങ്ങുന്നു. മറ്റു വഴികളിലൂടെ സർവീസ് നടത്തേണ്ടിവരുന്നതിനാൽ വൻ ഡീസൽ നഷ്ടമാണ്. അറ്റകുറ്റപ്പണികൾക്കായും വലിയൊരു തുക നഷ്ടപ്പെടുന്നു. ഇതിനുപുറമേ, പോലീസും മോട്ടോർ വാഹന വകുപ്പും ഭീമമായ ഫൈനുകളും അടപ്പിക്കുന്നു. അയ്യന്തോൾമുതൽ ടൊയോട്ടോയ്ക്കു മുൻവശംവരെയുള്ള റോഡിന്‍റെ അവസ്ഥയും പരിതാപകരമാണ്. പൂങ്കുന്നം - അമല ഭാഗത്തു റോഡുപണി മന്ദഗതിയിലാണ്. റോഡുപണി നടക്കുന്നിടത്ത് എതിർവശത്തുകൂടി ഇരുചക്രവാഹനങ്ങൾ വരുന്നതു ഗതാഗതക്കുരുക്കുണ്ടാക്കുന്നു. ആ ഭാഗങ്ങളിൽ പോലീസ് ഉദ്യോഗസ്ഥരെയോ കരാർജീവനക്കാരെയോ നിർത്തി കുന്നംകുളത്തുനിന്നു വരുന്ന ചെറുവാഹനങ്ങൾ മുണ്ടൂർ, അമല ഭാഗത്തുനിന്നും തിരിച്ചുവിടാവുന്നതാണെന്നും കോ ഓർഡിനേഷൻ കമ്മിറ്റി ചൂണ്ടിക്കാട്ടി.

രോഗകേന്ദ്രമായി തൃശൂർ ഗവ. മെഡിക്കൽ കോളജ്

മുളങ്കുന്നത്തുകാവ്: മഴക്കാല പകർച്ചവ്യാധികളും ഡെങ്കിപ്പനിയും ജില്ലയിൽ പടരുന്പോൾ രോഗകേന്ദ്രമായി തൃശൂർ ഗവ. മെഡിക്കൽ കോളജ് മാറുന്നെന്നു പരാതി. അത്യാഹിതവിഭാഗത്തിനു മുന്നിലെ കംഫർട്ട് സ്റ്റേഷനിലെ സെപ്റ്റിക് ടാങ്ക് തകർന്നിട്ടുമാസങ്ങളായിട്ടും പരിഹാരം കാണാനാകാതെ അധികൃതർ. ആശുപത്രിയിലെത്തുന്നവർ കടുത്ത രോഗവുമായി തിരികെ പോകേണ്ട സ്ഥിതിയാണ്. കഴിഞ്ഞമാസം കംഫർട്ട് സ്റ്റേഷിനിലെ സെപ്റ്റിക് ടാങ്കുകൾ പൊട്ടി വിസർജ്യങ്ങളും മലിനജലവും പുറത്തേക്ക് ഒഴുകിയിരുന്നു. ഇതേത്തുടർന്ന് രണ്ട് ലക്ഷം രൂപ ചെലവഴിച്ച് അറ്റകുറ്റപ്പണികൾ നടത്തിയിരുന്നു. എന്നാൽ മഴ കനത്തപ്പോൾ സെപ്റ്റിക് ടാങ്കുകൾ നിറഞ്ഞുകവിഞ്ഞ മാലിന്യം പുറത്തേക്ക് ഒഴുകിത്തുടങ്ങി. ആളുകൾ കാണാതിരിക്കാൻ സ്ലാബുകൾ വലിയ ടർപ്പായകൾ ഉപയോഗിച്ചുമൂടി. മഴ ശക്തമായപ്പോൾ ടർപ്പായകളെല്ലാം മലിനജലത്തിൽ മുങ്ങി. മെഡിക്കൽ കോളജ് ആശുപത്രി അത്യാഹിതവിഭാഗത്തിനു മുന്നിൽ കാന്‍റീൻ, കാർപാർക്കിംഗ്, എടിഎം, ഡോർമിറ്ററി എന്നിവയ്ക്കുസമീപമാണ് കംഫർട്ട് സ്റ്റേഷൻ. ആശുപത്രി എംപ്ലോയീസ് സഹകരണസംഘത്തിനാണ് ഇതിന്‍റെ നടത്തിപ്പുകരാർ. രോഗികൾക്കും അവരുടെ കൂട്ടിരിപ്പുകാർക്കും ആശുപത്രിയിലെത്തുന്നവർക്കും പ്രാഥിമാകാവശ്യങ്ങൾക്കുവേണ്ടിയാണ് കംഫർട്ട് സ്റ്റേഷൻ രാവും പകലും പ്രവർത്തിക്കുന്നത്. ടാങ്കിന്‍റെ പരിസരത്തെ മലിനവെള്ളത്തിൽ കൊതുകുകളും കൂത്താടികളും പുഴുക്കളും നിറഞ്ഞിരിക്കുകയാണ്. അധികൃതർ അടിയന്തരമായി ഇടപെട്ടു പരിഹാരം കണ്ടെത്തണമെന്നു രോഗികളും കൂട്ടിരിപ്പുകാരും ആവശ്യപ്പെട്ടു.

ഹാഷിഷ് ഓയിലുമായി യുവാവ് അറസ്റ്റിൽ

പുതുക്കാട്: സ്കൂൾവിദ്യാർഥികൾക്ക് വിതരണം ചെയ്യുന്നതിനായി എത്തിച്ച ഹാഷിഷ് ഓയിലുമായി യുവാവ് അറസ്റ്റിൽ. അളഗപ്പനഗർ വെള്ളയത്ത് വീട്ടിൽ വിഷ്ണുനാരായണനെ(27)യാണ് പുതുക്കാട് പോലീസ് അറസ്റ്റ് ചെയ്തത്. കഴിഞ്ഞദിവസം ഉച്ചയ്ക്ക് എരിപ്പോട് ശക്തി ഓട്ടുകമ്പനിക്കു സമീപത്തുനിന്നാണ് ഇയാളെ പോലീസ് പിടികൂടിയത്. 9.16 ഗ്രാം ഹാഷിഷ്ഓയിൽ ഇയാളിൽനിന്ന് പോലീസ് കണ്ടെടുത്തു.കോടതിയിൽ ഹാജരാക്കിയ പ്രതിയെ റിമാന്‍ഡ് ചെയ്തു. മയക്കുമരുന്ന് ഉപയോഗിച്ച കേസിൽ ഇയാൾ മുൻപ് പിടിയിലായിട്ടുണ്ട്. പുതുക്കാട് എസ്എച്ച്ഒ മഹേന്ദ്ര സിംഹൻ, എസ്ഐ എൻ. പ്രദീപ്, പ്രൊബേഷൻ എസ്ഐ വൈഷ്ണവ്, സിവിൽ പോലീസ് ഓഫീസർ സുജിത്ത് എന്നിവർ ചേർന്നാണ് പ്രതിയെ പിടികൂടിയത്.

കൊലക്കേസ് പ്രതിയെ ബംഗാളിൽനിന്ന് പിടികൂടി

ചേർപ്പ്: ജാമ്യത്തിലിറങ്ങി ഒളിവിൽപോയ കൊലക്കേസ് പ്രതിയെ പശ്ചിമബംഗാളിൽ നിന്നും ചേർപ്പ് പോലീസ് പിടികൂടി. പശ്ചിമ ബംഗാൾ ഹൂബ്ലി ഷേർഫുലി സേരംപോർ സ്വദേശി ബീരു(31) ആണ് പിടിയിലായത്. ചേർപ്പ് പെരിഞ്ചേരിയിൽ താമസിച്ചിരുന്ന സ്വർണപ്പണിക്കാരനായ ഇതരസംസ്ഥാന തൊഴിലാളി മൻസൂർ മാലിക്കിനെ കൊലചെയ്ത കേസിലെ പ്രതിയാണ്. ഒളിവിൽപോയ ഇയാളെ തൃശൂർ ഫസ്റ്റ് അഡീഷണൽ സെഷൻസ് കോടതി പിടികിട്ടാപ്പുള്ളിയായി പ്രഖ്യാപിച്ചിരുന്നു. 2021 ഡിസംബറിലാണ് കൊലപാതകം നടന്നത്. പെരിഞ്ചേരിയിലെ വാടകവീട്ടിൽ മുകൾ നിലയിൽ മൻസൂർ മാലിക്കും കൂടുംബവും താഴെ ബീരുവുമാണ് താമസിച്ചിരുന്നത്. മൻസൂർമാലിക്കിന്‍റെ ഭാര്യയുടെ കാമുകനായ ബീരു മൻസൂറിന് മദ്യം നൽകി ബോധരഹിതനാക്കി ഇരുമ്പുവടി കൊണ്ട് തലയ്ക്കടിച്ച് കൊലപ്പെടുത്തി വീടിനുപിറകിൽ കുഴിച്ചുമൂടുകയിരുന്നു. ചേർപ്പ് പോലീസ് സ്റ്റേഷൻ സബ് ഇൻസ്പെക്ടർ കെ.എസ്. സുബിന്ദ്, എഎസ്ഐ ജോയ് തോമസ്, സീനിയർ സിവിൽ പൊലീസ് ഓഫീസർ റിൻസൻ എന്നിവരാണ് അന്വേഷണ സംഘത്തിലുണ്ടായിരുന്നത്.

തെരുവുനായ് ആക്രമണത്തിൽ 35 കോഴികൾ ചത്തു

ഗുരുവായൂർ: തെരുവുനായ് ആക്രമണത്തിൽ 35 കോഴികൾ ചത്തു. കാവീട് ചെറുപറമ്പിൽ ശശിധരന്‍റെ വീട്ടിലെ കോഴികളാണ് ചത്തത്. രാവിലെ പുറത്തു പോയിരുന്ന വീട്ടുകാർ ഉച്ചയോടെ തിരിച്ചെത്തിയപ്പോഴാണ് കോഴികളെ ചത്തനിലയിൽ കണ്ടെത്തിയത്. 40 നാടൻ കോഴികൾ ഉണ്ടായിരുന്നതിൽ അഞ്ചെണ്ണത്തെ സമീപത്തെ മരത്തിനു മുകളിലും മറ്റുമായി കണ്ടെത്തി.വലകെട്ടി കോഴികളെ സംരക്ഷിച്ചിരുന്നെങ്കിലും വല മുറിച്ചാണ് കോഴികളെ കൊന്നത്.

റോഡരികിൽ മാലിന്യംതള്ളിയ മൂന്നു തട്ടുകടകൾ അടപ്പിച്ചു

ആമ്പല്ലൂർ: റോഡരികില്‍ വൻതോതിൽ മാലിന്യംതള്ളിയ തട്ടുകടകൾ അധികൃതർ അടപ്പിച്ചു. ആമ്പല്ലൂരിൽ ദേശീയപാതയോരത്ത് പ്രവര്‍ത്തിക്കുന്ന ചേട്ടന്‍റെ കട, അപ്പു തട്ടുകട, കുളു തട്ടുകട എന്നിവയാണ് അളഗപ്പനഗര്‍ പഞ്ചായത്തും ആരോഗ്യവകുപ്പും ചേർന്ന് അടപ്പിച്ചത്. തട്ടുകടകളിൽ നിന്ന് 25,000 രൂപ വീതം പിഴയും ഈടാക്കിയിട്ടുണ്ട്. രാത്രിയിലാണ് ഇവിടെ മാലിന്യംതള്ളുന്നതെന്ന് ആരോഗ്യവകുപ്പ് അധികൃതർ പറഞ്ഞു. കടകളില്‍ വൃത്തിഹീനമായ സാഹചര്യത്തില്‍ ഭക്ഷണം സൂക്ഷിക്കുന്നതായും തട്ടുകടയുടെ പിറകിലെ പറമ്പിലും മാലിന്യം കുന്നുകൂട്ടി ഇട്ടിരിക്കുന്നതായും അധികൃതർ കണ്ടെത്തി. മേഖലയില്‍ പലയിടങ്ങളിലായി ഭക്ഷണാവശിഷ്ടങ്ങളും പ്ലാസ്റ്റിക്കുകളും ഹോട്ടലുകള്‍ അലക്ഷ്യമായി വലിച്ചെറിയുന്നുവെന്ന പരാതിയെ തുടര്‍ന്നായിരുന്നു പരിശോധന. പിടിക്കപ്പെടും എന്നായപ്പോൾ കടയുടമകൾ പരസ്പരം പഴിചാരി രക്ഷപ്പെടാനാണ് ശ്രമിച്ചത്. തട്ടുകടക്കാരിൽനിന്നു സ്ഥലമുടമകളിൽ നിന്നും പിഴയീടാക്കിയിട്ടുണ്ട്. ഉടന്‍ തന്നെ മാലിന്യം നീക്കം ചെയ്യാനും നിര്‍ദേശം നല്‍കി. അളഗപ്പനഗര്‍ പഞ്ചായത്ത് പ്രസിഡന്‍റ് കെ. രാജേശ്വരി, പഞ്ചായത്ത് സെക്രട്ടറി പി.ബി. സുഭാഷ്, ഹെല്‍ത്ത് ഇന്‍സ്‌പെക്ടര്‍ എം.ആര്‍. രഘു, ജൂണിയര്‍ ഹെല്‍ത്ത് ഇന്‍സ്‌പെക്ടര്‍മാരായ എം.പി. ഹരീഷ്, നസ്രീം നവാസ്, സുനേന എന്നിവരുടെ നേതൃത്വത്തിലായിരുന്നു പരിശോധന.

ചെളി തെറിപ്പിച്ചു ; യുവാവ് കാർയാത്രക്കാരനെ കത്രികകൊണ്ട് ആക്രമിച്ചു

എരുമപ്പെട്ടി: പന്നിത്തടം പെട്രോൾ പമ്പിൽവച്ച് ബൈക്കിലെത്തിയ യുവാവ് കാർയാത്രികനെ കത്രിക ഉപയോഗിച്ച് ആക്രമിച്ചു. ദേഹത്തേക്കു ചെളിവെള്ളം തെറിപ്പിച്ചുവെന്നു പറഞ്ഞായിരുന്നു ആക്രമണം.കാർയാത്രികനു നെഞ്ചിൽ ചെറിയ മുറിവേറ്റു. ആക്രമണം നടത്തിയ യുവാവിനെ എരുമപ്പെട്ടി പോലീസ് കസ്റ്റഡിയിലെടുത്തു. കുന്നംകുളം അഞ്ഞൂര് സ്വദേശി സാമ്പ്രിക്കൽ വീട്ടിൽ സുരേഷ്(49) ആണ് ആക്രമണം നടത്തിയത്. കാർയാത്രക്കാരൻ ആശുപത്രിയിൽ ചികിത്സതേടി. ഇന്നലെ രാത്രി 7.30 ഓടെയാണ് സംഭവം. ആക്രമണംകണ്ട് പമ്പിലുണ്ടായിരുന്നവർ യുവാവിനെ പിടിച്ചുമാറ്റിയതിനാൽ യാത്രക്കാരനു വലിയ പരിക്കേറ്റിട്ടില്ല.

മനക്കൊടി - പുള്ള് റോഡിലെ വെള്ളക്കെട്ടിനു ശമനമില്ല

അരിമ്പൂർ: ജില്ലയിലെ വിനോദസഞ്ചാരകേന്ദ്രമായ മനക്കൊടി - പുള്ള് റോഡ് കഴിഞ്ഞ രണ്ടുമാസമായി വെള്ളംകയറി അടച്ചതിനാൽ പ്രദേശത്തെ ടൂറിസംമേഖല പൂർണമായും സ്തംഭിച്ചു. തൃശൂരിൽനിന്ന് തൃപ്രയാറിലേക്കും, കാഞ്ഞാണി - വാടാനപ്പള്ളി ഭാഗത്ത് നിന്ന് ഇരിങ്ങാലക്കുടയിലേക്കുള്ള എളുപ്പമാർഗമാണ് 60 ദിവസമായി അടഞ്ഞുകിടക്കുന്നത്. ജില്ലയിൽ ഇത്തരത്തിൽ വെള്ളംകയറി യാത്ര മുടങ്ങിക്കിടക്കുന്ന ഏക പൊതുമരാമത്ത് റോഡാണിത്. വിനോദസഞ്ചാരികളുടെ വരവ് നിലച്ചതോടെ അരിമ്പൂർ - ചാഴൂർ പഞ്ചായത്തിലെ കുട്ട വഞ്ചി, പെടസ്ട്രൽ ബോട്ടിംഗ്, കയാക്കിംഗ് എന്നിവയും ഇതുമായി ബന്ധപ്പെട്ട് പ്രവർത്തിക്കുന്ന വ്യാപാര സ്ഥാപനങ്ങളുംതട്ട് കടകളുടെ പ്രവർത്തനവും നിലച്ചു. ഒട്ടേറെപേരുടെ ഉപജീവനമാർഗങ്ങളാണ് ഇതോടെ പ്രതിസന്ധിയിലായത്. തൃശൂർ - കാട്ടൂർ റൂട്ടിൽ ഓടികൊണ്ടിരുന്ന സ്വകാര്യ ബസ് ഓട്ടം നിറുത്തുകയും ചെയ്തു. കരുവാലി, കുളവാഴ, ചണ്ടി എന്നിവ മനക്കൊടി പുള്ള് കനാലിനോട് ചേർന്നുള്ള പെരുമ്പുഴ കനാലിൽ അടിഞ്ഞു ഒഴുക്ക് നിലച്ചതാണ് വെള്ളക്കെട്ടിന് ഒരു കാരണം. കൂടാതെ കരുവന്നൂർ പുഴയിലെ മുനയം കെട്ട് പൂർണമായും പൊളിച്ചു നീക്കാത്തതും വെള്ളകെട്ടിന് കാരണമാണ്. മഴക്കാലത്തും വേനലിലും തുടർച്ചയായി മഴ പെയ്താൽ കെഎൽഡിസി കനാലിൽ വെള്ളം നിറഞ്ഞ് പൊതുമരാമത്ത് റോഡ് കരകവിഞ്ഞ് സമീപത്തെ വാരിയംകോൾപടവിലെ കൃഷി നശിക്കുന്നതും ഇവിടെ പതിവാണ്. മനക്കൊടി അയ്യപ്പക്ഷേത്രം മുതൽ പുള്ള് പാലം വരെയുള്ള ഒന്നേകാൽ കിലോമീറ്റർദൂരത്തിലുള്ള റോഡ് ഒരു മീറ്ററോളം ഉയർത്തുകയാണ് പ്രശ്ന പരിഹാരത്തിനുള്ള ഏകമാർഗമെന്ന് അരിമ്പൂർ പഞ്ചായത്ത് സംയുക്ത പാടശേഖര സമിതി ചെയർമാൻ കെ രാഗേഷ് പറഞ്ഞു. ടൂറിസം മേഖലയിലെ സ്തംഭനവും വാഹന ഗതാഗത നിരോധനവും ശ്രദ്ധയിൽ പെട്ട മുരളി പെരുനെല്ലി എംഎൽഎ സ്ഥലം സന്ദർശിച്ചിരുന്നു. എംഎൽഎ യുടെ ഇടപെടലിനെ തുടർന്ന് തിരുവനന്തപുരത്ത് നിന്ന് എത്തിയ കെഎച്ച് ആർഐ വകുപ്പിലെ ഉദ്യോഗസ്ഥ സംഘം മനക്കൊടി - പുള്ള് റോഡിലെത്തി പരിശോധന നടത്തിയിരുന്നു. ഇവർ പൊതുമരാമത്ത് വകുപ്പിന് നൽകുന്ന റിപ്പോർട്ടിന്‍റെ അടിസ്ഥാനത്തിൽ റോഡ് ഉയർത്തുമെന്ന പ്രതീക്ഷയിലാണ് ജനങ്ങൾ. അരിമ്പൂരിന്‍റെ വെള്ളംനിറഞ്ഞുകിടക്കുന്ന കനാലും നെൽപാടങ്ങളുടെ പച്ചപ്പും ഒരുമിപ്പിച്ച് പ്രാദേശിക ടൂറിസം സാധ്യതകൾ പഠിക്കണമെന്നും അത് നടപ്പിലാക്കണമെന്നും റോഡിലെ വെള്ളക്കെട്ടൊഴിവാക്കണം തുടങ്ങിയ ആവശ്യങ്ങളുന്നയിച്ചും ഈ പ്രശ്നത്തിന് മന്ത്രിതല ഇടപെട ആവശ്യപ്പെട്ടും പൊതുമരാമത്ത് വകുപ്പ് മന്ത്രിയെ നേരിൽ കണ്ട് ചർച്ച നടത്താനൊരുങ്ങുകയാണ് സംയുക്ത കർഷക സമിതി ഭാരവാഹികൾ.

കുഴഞ്ഞുവീണ് അബോധാവസ്ഥയിലായ വിദ്യാർഥിക്കു രക്ഷകരായി കുന്നംകുളം പോലീസ്

കുന്നംകുളം: മൊബൈൽ ഫോൺ നൽകാത്തതിനെതുടർന്ന് വീട്ടുകാരുമായി വഴക്കിട്ട് മുറിയിൽ കയറി വാതിൽ അടച്ചതിനുശേഷം കുഴഞ്ഞുവീണ് അബോധാവസ്ഥയിലായ വിദ്യാർഥിക്കു രക്ഷകരായി കുന്നംകുളം പോലീസ്. പോലീസിന്‍റെ സമ യോചിതമായ ഇടപെടൽമൂലമാണ് കുട്ടിയുടെ ജീവൻ രക്ഷിക്കാനായത്. ഇന്നലെ ഉച്ചയ്ക്ക് ഒരുമണിയോടെയായിരുന്നു സംഭവം. ചൂണ്ടൽ പുതുശേരി സ്വദേശി 12 കാരനായ ആറാം ക്ലാസ് വിദ്യാർഥിയാണ് കുഴഞ്ഞുവീണ് അബോധാവസ്ഥയിലായത്. വീട്ടുകാർ നിരവധിതവണ വാതിൽ മുട്ടിവിളിച്ചിട്ടും തുറക്കാത്തതിനെത്തുടർന്ന് കുട്ടിയുടെ മാതാവ് പോലീസിന്‍റെ ഹെൽപ്പ് ലൈൻ നമ്പറിൽ വിളിച്ച് വിവരം പറയുകയായിരുന്നു. തുടർന്ന് ഹെൽപ്പ് ലൈൻ നമ്പറിൽ നിന്നും കുന്നംകുളം പോലീസ് സ്റ്റേഷനിലേക്ക് വിവരം കൈമാറി. നിമിഷങ്ങൾക്കകം ഡ്യൂട്ടിയിൽ ഉണ്ടായിരുന്ന കുന്നംകുളം സബ് ഇൻസ്പെക്ടർ കെ.എൻ. ഹരിഹരസോനു, അസിസ്റ്റന്‍റ് സബ് ഇൻസ്പെക്ടർ ജോഷി, സിവിൽ പോലീസ് ഓഫീസർ അൻഷാദ് എന്നിവരുടെ നേതൃത്വത്തിലുള്ള പോലീസ് സംഘം കുട്ടിയുടെ വീട്ടിലെത്തി. പോലീസ് വിളിച്ചു നോക്കിയിട്ടും കുട്ടി വാതിൽ തുറക്കാത്തതിനെത്തുടർന്ന് പോലീസുകാർ വാതിൽ ചവിട്ടിപ്പൊളിക്കുകയും പോലീസ് ജീപ്പിൽ തന്നെ കുട്ടിയെ കുന്നംകുളം കാണിപ്പയ്യൂരിലെ സ്വകാര്യ ആശുപത്രിയിൽ അത്യാഹിതവിഭാഗത്തിൽ പ്രവേശിപ്പിക്കുകയുമായിരുന്നു. കുട്ടി അപകടനില തരണം ചെയ്തതായി ആശുപത്രി അധികൃതർ അറിയിച്ചു.

ചൂണ്ടലിൽ ബസപകടം; ആറുപേർക്ക് പരിക്ക്

ചൂണ്ടൽ: ചൂണ്ടലിൽ നിയന്ത്രണംവിട്ട സ്വകാര്യബസ് പറമ്പിലേക്കുമറിഞ്ഞ് ആറുപേർക്കു പരിക്കേറ്റു. കുന്നംകുളത്തുനിന്നും തൃശൂരിലേക്ക് പോവുകയായിരുന്ന വിനായക എന്ന ലിമിറ്റഡ് സ്റ്റോപ്പ് ബസാണ് അപകടത്തിൽപ്പെട്ടത്. ഇന്നലെ വൈകീട്ട് അഞ്ചരയ്ക്കായിരുന്നു അപകടം. നിയന്ത്രണംവിട്ട ബസ് റോഡിന് ഇടതുഭാഗത്തെ കാനയിലേക്കു ചെരിയുകയും തൊട്ടടുത്ത വീടിന്‍റെ മതിലിനോടുചേർന്ന് മറിഞ്ഞു നിൽക്കുകയുമായിരുന്നു. ബസ് പൂർണമായും മറിയാത്തതിനാൽ വൻദുരന്തം ഒഴിവായി. റോഡ്സൈഡിൽ നിന്നിരുന്ന ഇലക്ട്രിക് പോസ്റ്റുകൾ അപകടത്തിൽ തകർന്നു. കുന്നംകുളത്തുനിന്നും കേച്ചേരിയിൽനിന്നും ആംബുലൻസുകളെത്തിയാണ് രക്ഷാപ്രവർത്തനം വേഗത്തിലാക്കിയത്. പരിക്കേറ്റവരെ മലങ്കര, യൂണിറ്റി, റോയൽ ആശുപത്രികളിൽ പ്രവേശിപ്പിച്ചിട്ടുണ്ട്. ആരുടെയും പരിക്ക് ഗുരുതരമല്ല. അപകടത്തെത്തുടർന്ന് ഹൈവേയിൽ ഏറെനേരം ഗതാഗതം തടസപ്പെട്ടു.

പാടത്ത് മരിച്ചനിലയിൽ

പുന്നയൂർക്കുളം: പെരുന്പടപ്പ് കോടത്തൂർ മുറിയാഞ്ചിറക്കൽ ആലിയെ (63) കോടത്തൂർ പാടത്ത് മരിച്ചനിലയിൽ കാണപ്പെട്ടു. പെരുന്പടപ്പ് പോലീസ് നടപടി സ്വീകരിച്ചു. താലൂക്ക് ആശുപത്രിയിൽ പോസ്റ്റ് മോർട്ടത്തിനു ശേഷം കബറടക്കം നടത്തി. ഭാര്യ: ഫാത്തിമ. മക്കൾ: ഫിറോസ് (കുവൈറ്റ്), ഷിനീഷ് (ഖത്തർ), ഷിജില. മരുമക്കൾ: ഷാജു, നെസ്‌സി, ഹസീന.

ജീവിതത്തിലേക്ക് തിരിച്ചുവരാൻ യുവാവ് സഹായംതേടുന്നു

മാള: ഇരുവൃക്കകളും തകരാറിലായി ഡയാലിസിസ് നടത്തുന്ന യുവാവിന് വൃക്ക മാറ്റിവയ്ക്കുന്നതിനായി സുമനസുകളുടെ സഹായംതേടുന്നു. മാള പുത്തൻചിറയിൽ പിണ്ടാണി പടിഞ്ഞാറെ മിച്ചഭൂമിയിൽ താമസിക്കുന്ന പള്ളിപ്പാട്ട് ജോൺസൺ മകൻ നിജോമോൻ(32)ആണ് മുന്നോട്ടുള്ള ജീവിതത്തിന് സഹായം ആവശ്യമായുള്ളത്. ഇരുവൃക്കകളും തകരാറിലായതുമൂലം ആറുവർഷമായി ആഴ്ചയിൽ മൂന്ന് ഡയാലിസിസ് വീതം ചെയ്യുകയാണ്. ഇപ്പോൾ വൃക്ക ലഭ്യമായതിനാൽ അമൃത ആശുപത്രിയിൽ ഓപ്പറേഷൻ നടത്തുന്നതിനുള്ള എല്ലാ ടെസ്റ്റുകളും പൂർത്തിയായി. എത്രയും പെട്ടെന്ന് ഓപ്പറേഷൻ നടത്തണം. നാല് സെന്‍റ് സ്ഥലത്ത് താമസിക്കുന്ന, കൂലിപ്പണിക്കാരനായ പിതാവും സഹോദരിയുമാണ് നിജോമോനുള്ളത്. മാതാവ് നേരത്തെ മരണപ്പെട്ടു. ഏകദേശം 15 ലക്ഷം രൂപയോളം ഓപ്പറേഷന് ആവശ്യമാണ്. കൂലിപ്പണിക്കാരനായ പിതാവിനെകൊണ്ട് ഇത്രയും തുക സമാഹരിക്കാൻ സാധിക്കില്ല. ആയതിനാൽ നാട്ടുകാരുടെ നേതൃത്വത്തിൽ ജനകീയ കമ്മിറ്റി രൂപീകരിച്ചു. ബെന്നി ബഹനാൻ എംപി, വി.ആർ. സുനിൽകുമാർ എംഎൽഎ, ഗ്രാമപഞ്ചായത്ത് പ്രസിഡന്‍റ് റോമി ബേബി, വാർഡ് മെമ്പർ സംഗീത അനീഷ് എന്നിവർ മുഖ്യരക്ഷാധികാരികളായി എസ്ബിഐ പുത്തൻചിറ ശാഖയിൽ നിജോമോൻ ചികിത്സാസഹായസമിതി എന്ന പേരിൽ അക്കൗണ്ട് തുറന്നിട്ടുണ്ട്. അക്കൗണ്ട് നമ്പർ: 38986559114, ഐഎഫ്എസ്‌സി കോഡ്: എസ്ബിഐന്‌ 0071124. ഫോൺ: 9946293181.

രക്ഷാപ്രവര്‍ത്തനപരിശീലനം സംഘടിപ്പിച്ചു

ഇരിങ്ങാലക്കുട: അടിയന്തരഘട്ടങ്ങളില്‍ ആവശ്യമുള്ള സുരക്ഷാക്രമീകരണങ്ങളും പ്രവര്‍ത്തനങ്ങളും ഏകോപിപ്പിക്കുന്നതിനും സംഘടിപ്പിക്കുന്നതിനും ആവശ്യമായ തീവ്രപരിശീലന കളരിയുമായി ക്രൈസ്റ്റ് കോളജ് ബിപിഇ വിദ്യാര്‍ഥികള്‍. കായിക അധ്യാപകരാകേണ്ട ബിപിഇഎസ് വിദ്യാര്‍ഥികള്‍ക്ക് ക്രൈസ്റ്റ് കോളജിന്‍റെ നേതൃത്വത്തിലാണ് ക്യാമ്പ് സംഘടിപ്പിച്ചത്. മലപ്പുറം മങ്കട കുമരഗിരി എസ്റ്റേറ്റില്‍നടന്ന പരിശീലന ക്യാമ്പില്‍ റസ്‌ക്യുമിഷന്‍ ഓപ്പറേഷന്‍, മോക്ക് ഡ്രില്‍, നേതൃത്വ പാടവ ക്ലാസുകള്‍, സാഹസിക പരിപാടികള്‍ എന്നിവ ഉള്‍പ്പെടുത്തിയിരുന്നു. ബിപിഎസ് ഫസ്റ്റ് ഇയറിലെ 41 വിദ്യാര്‍ഥികള്‍ പരിശീലനം പൂര്‍ത്തിയാക്കി.

പിതൃസ്മരണയിൽ വിശ്വാസികൾ; ബലിതർപ്പണം നടന്നു

കയ്പമംഗലം: തീരദേശത്തെ ക്ഷേത്രങ്ങളിലും കടൽത്തീരങ്ങളിലും കർക്കടകവാവ് പിതൃബലിതർപ്പണ ചടങ്ങുകൾനടന്നു. കൂരിക്കുഴി ദേശം ശ്രീഭഗവതി മഹാദേവക്ഷേത്രത്തിന്‍റെ ആഭിമുഖ്യത്തിൽ കമ്പനിക്കടവ് കടപ്പുറത്ത് ബലിതർപ്പണച്ചടങ്ങ് സംഘടിപ്പിച്ചു. പുലർച്ചെ മുതൽ ആരംഭിച്ച ചടങ്ങുകൾക്ക് ലിജീഷ് ശാന്തി മുഖ്യകാർമികത്വംവഹിച്ചു. ക്ഷേത്രം ഭാരവാഹികളായ കെ.കെ. ശേഖരൻ, കെ.കെ. അഭിലാഷ്, കെ.എം. വിജയൻ, പ്രതാപൻ പനയ്ക്കൽ, സന്തോഷ് കൈതവളപ്പിൽ, പ്രതാപൻ കിഴക്കേവീട്ടിൽ, കെ.ജി. സതീഷ് എന്നിവർ നേതൃത്വംനൽകി. നിരവധിപേർ ചടങ്ങുകളിൽ പങ്കെടുത്തു. ഇരിങ്ങാലക്കുട: വിശ്വനാഥപുരം ക്ഷേത്രത്തില്‍ ബലിതര്‍പ്പണത്തിന് ആയിരങ്ങള്‍ എത്തിച്ചേര്‍ന്നു. വിപുലമായ സജ്ജീകരണങ്ങളാണ് സമാജം കമ്മിറ്റി ഒരുക്കിയിരുന്നത്. പുജാകര്‍മങ്ങള്‍ ക്ഷേത്രം മേല്‍ശാന്തി മണിശാന്തിയുടെ നേതൃത്വത്തില്‍നടന്നു. ക്രമീകരണങ്ങള്‍ക്ക് എസ്എന്‍ബിഎസ് സമാജം പ്രസിഡന്‍റ് എന്‍.ബി. കിഷോര്‍, സെക്രട്ടറി വിശ്വംഭരന്‍, ട്രഷറര്‍ വേണു തോട്ടുങ്ങല്‍, മറ്റു കമ്മിറ്റി അംഗങ്ങള്‍, മാതൃസംഘം, എസ്എന്‍വൈഎസ് എന്നിവര്‍ നേതൃത്വംനല്‍കി. വഴിയമ്പലം: കയ്പമംഗലം വഞ്ചിപ്പുര അയിരൂർ ചാപ്പക്കടവ് ഗുളികൻ, മുത്തപ്പൻ, ഭഗവതി ക്ഷേത്രത്തിന്‍റെ നേതൃത്വത്തിൽ ബലിതർപ്പണംനടത്തി. ക്ഷേത്രം മേൽശാന്തി ലിജേഷ് മുഖ്യകാർമികത്വംവഹിച്ചു. മൂന്നുപീടിക: ദേവമംഗലം ക്ഷേത്രത്തിൽ കർക്കടക അമാവാസി പിതൃ ബലിതർപ്പണം നടത്തി. ക്ഷേത്രം മേൽശാന്തി സനു ശാന്തി മുഖ്യകാർമികത്വം വഹിച്ചു. ക്ഷേത്രം രക്ഷാധികാരി ബൈജുചന്ദ്രൻ, പ്രസിഡന്‍റ് വി.കെ. ചന്ദ്രശേഖരൻ, സെക്രട്ടറി സി.കെ. രാമു, ശിവ പ്രകാശൻ, പിആർഒ കെ.ആർ. സത്യൻ എന്നിവർ നേതൃത്വം നൽകി. മറ്റത്തൂര്‍: ചെമ്പുച്ചിറ മഹാദേവ ക്ഷേത്രത്തില്‍ കര്‍ക്കടകവാവ് ബലിതര്‍പ്പണചടങ്ങുകളില്‍ ആയിരങ്ങള്‍ പങ്കെടുത്തു. ചടങ്ങുകള്‍ക്ക് ക്ഷേത്രം മേല്‍ശാന്തി മനോജ് മുഖ്യകാര്‍മികത്വംവഹിച്ചു. ക്ഷേത്രസമിതി ്രസിഡന്‍റ് ശ്രീധരന്‍ കളരിക്കല്‍, സുഷാന്ത് ചിന്നങ്ങത്ത്, അനില്‍ പട്ട്‌ളിക്കാടന്‍ തുടങ്ങിയവര്‍ നേതൃത്വംനല്‍കി. മറ്റത്തൂര്‍: പന്തല്ലൂര്‍ ചെങ്ങാന്തുരുത്തി ശ്രീശിവശക്തി മഹാവിഷ്ണുക്ഷേത്രത്തിലെ വാവുബലി തര്‍പ്പണച്ചടങ്ങുകളില്‍ നിരവധി പേര്‍ സംബന്ധിച്ചു. രാമചന്ദന്‍ ഇളയത്, ശിവന്‍ ശാന്തികള്‍ എന്നിവരുടെ നേതൃത്വത്തില്‍ പിതൃബലി തര്‍പ്പണംനടന്നു. പ്രസിഡന്‍റ് രവീന്ദ്രന്‍ കല്ലുംപുറം, പ്രശാന്ത് കളരിക്കല്‍, ശശി കല്ലുംപുറം, സുകുമാരന്‍ വടക്കൂടന്‍ എന്നിവര്‍ നേതൃത്വംനല്‍കി.

പാലുമായിപ്പോയ വാഹനം മറിഞ്ഞു

മേലൂർ: ഗ്രാമപഞ്ചായത്തിലെ വിവിധ പാൽസംഭരണകേന്ദ്രങ്ങളിൽനിന്നു പാൽ ശേഖരിച്ചുപോകുകയായിരുന്ന പിക്കപ്പ് വാഹനം തലകീഴായി മറിഞ്ഞു. ഡ്രൈവർ നിസാരപരിക്കുകളോടെ രക്ഷപ്പെട്ടു. ഇന്നലെ രാവിലെ എട്ടോടെ മേലൂർ ജംഗ്ഷനിലെ റേഷൻ കടയ്ക്കുസമീപമാണ് അപകടമുണ്ടായത്. അപ്രതീക്ഷിതമായി മുന്നിലെത്തിയ ബൈക്കിൽ ഇടിക്കാതിരിക്കാൻ ശ്രമിക്കുന്നതിനിടെ നിയന്ത്രണംവിട്ട് വാഹനം തലകീഴായി മറിയുകയായിരുന്നു. ഓടിക്കൂടിയ നാട്ടുകാർ വാഹനം ഉയർത്തി ഡ്രൈവറെ പുറത്തെടുത്തു. വാഹനത്തിനു ഭാഗികമായി കേടുപാടു സംഭവിച്ചു. വിവിധ കേന്ദ്രങ്ങളിൽനിന്നു ശേഖരിച്ച 700 ലിറ്ററോളം പാൽ സെൻട്രൽ യൂണിറ്റിലേക്കു കൊണ്ടു പോകുന്നതിനിടെയാണ് അപകടം ഉണ്ടായത്. പാൽ ശേഖരിച്ചിരുന്ന ജാറുകൾ റോഡിലേക്കുവീണ് പാലുമുഴുവൻ റോഡിൽ ഒലിച്ചുപോയി.

ദേശീയപാത നിര്‌മാണം: പ്രതിഷേധക്കൂട്ടായ്മ സംഘടിപ്പിച്ചു

ചാലക്കുടി: ദേശീയപാത നിര്‌മാണസ്തംഭനത്തിനെതിരേ ആർജെഡി പ്രതിഷേധക്കൂട്ടായ്മ സംഘടിപ്പിച്ചു. സംസ്ഥാന സെക്രട്ടറി യൂജിൻ മോറേലി ഉദ്ഘാടനം ചെയ്തു. അടിപ്പാത നിർമിച്ച് അടിപറ്റിയ ജനതയാണ് ചാലക്കുടിയിലേതെന്ന് അദ്ദേഹം പറഞ്ഞു. യാതൊരുവിധത്തിലുള്ള മുന്നൊരുക്കങ്ങൾ ഇല്ലാതെയാണ് അഞ്ച് അടിപ്പാതകൾ ചാലക്കുടിയോടു ചേർന്നുള്ള ദേശീയപാതയിൽ നിർമിക്കുന്നത്. ഒച്ചിഴയുന്ന വേഗത്തിലാണ് നിർമാണം നടക്കുന്നത്. രാജ്യംകണ്ട ഏറ്റവും വലിയ അഴിമതിയാണ് ടോൾപിരിവിലൂടെ പാലിയേക്കരയിൽ നടക്കുന്നതെന്നും അദ്ദേഹം പറഞ്ഞു. മണ്ഡലം പ്രസിഡന്‍റ് പോൾ പുല്ലൻ അധ്യക്ഷതവഹിച്ചു. ജോർജ് വി. ഐ നിക്കൽ, സി.എ. തോമസ്, ഗ്രാമപഞ്ചായത്തംഗം ആനി ജോയ്, എ.ടി. വർഗീസ്, ജനത പൗലോസ്, എ.എൽ. കൊച്ചപ്പൻ തുടങ്ങിയവർ പ്രസംഗിച്ചു.

ഠാണാ - ചന്തക്കുന്ന് വികസനം: വ്യാപാരികളുടെ പ്രതിഷേധധര്‍ണ ഇന്ന്

ഇരിങ്ങാലക്കുട: പ്രദേശവാസികളുടെ സ്വപ്‌നപദ്ധതിയായ ഠാണാ - ചന്തക്കുന്ന് വികസനം പണിതുടങ്ങി ഒരുവര്‍ഷം പിന്നിട്ടിട്ടും പൂര്‍ത്തിയാകാത്തത്തില്‍ പ്രതിഷേധിച്ച് ഇന്നു ധര്‍ണ നടത്തും. കേരള വ്യാപാരി വ്യവസായി ഏകോപനസമിതിയുടെ ആഭിമുഖ്യത്തില്‍ ഠാണാ ജംഗ്ഷനില്‍ നടക്കുന്ന ധര്‍ണ ജില്ലാ പ്രസിഡന്‍റ് കെ.വി. അബ്ദുല്‍ ഹമീദ് ഉദ്ഘാടനംചെയ്യും. സൂചനാസമരം മാത്രമാണ് ഇന്നു നടക്കുന്നതെന്നും അനുകൂലനടപടികള്‍ ഉണ്ടായില്ലെങ്കില്‍ ശക്തമായ സമരപരിപാടികളുമായി മുന്നോട്ടുപോകുമെന്നും പത്രസമ്മേളനത്തില്‍ കേരള വ്യാപാരി വ്യവസായി ഏകോപനസമിതി പ്രസിഡന്‍റ് ഷാജു പാറേക്കാടന്‍, ജനറല്‍ സെക്രട്ടറി എബിന്‍ വെള്ളാനിക്കാരന്‍ എന്നിവര്‍ പറഞ്ഞു. ഇലക്ട്രിക് പോസ്റ്റുകള്‍, ടെലിഫോണ്‍ പോസ്റ്റുകള്‍ എന്നിവ ഇതുവരെയും നീക്കംചെയ്തിട്ടില്ല. രണ്ട് കലുങ്കുകള്‍ മാറ്റിപ്പണിയാനുണ്ട്. ഉദ്ഘാടനശേഷം ഒരുവര്‍ഷത്തിനുള്ളില്‍ കുറേ ചെറിയ കടകള്‍ അടച്ചുപൂട്ടി. തുറന്നിരിക്കുന്ന സ്ഥാപനങ്ങളിലെ വ്യാപാരം 50 ശതമാനത്തില്‍താഴെയായി കുറഞ്ഞു. പല സ്ഥാപനങ്ങളും പൂട്ടാന്‍ തയാറായിക്കൊണ്ടിരിക്കുന്നു. ഇനി യഥാര്‍ഥപണികള്‍ തുടങ്ങിയാല്‍ ഈ പ്രദേശത്തെ വ്യാപാരികളുടെ സ്ഥിതി കൂടുതല്‍ ദുരിതത്തിലാകും. വിവിധ ആവശ്യങ്ങള്‍ ഉന്നയിച്ച് നിരവധി നിവേദനങ്ങള്‍ നല്‍കിയെങ്കിലും ഇതുവരെയും മന്ത്രിയില്‍നിന്ന് മറുപടിയോ ആശ്വാസവാക്കോ ഉണ്ടായിട്ടില്ലെന്നും വ്യാപാരിനേതാക്കള്‍ പറഞ്ഞു. മറുപടി പറയേണ്ടതു നഗരസഭാ അധികൃതര്‌: മന്ത്രി ബിന്ദു ഇരിങ്ങാലക്കുട: സ്വന്തം ഉടമസ്ഥതയിലുള്ള കെട്ടിടങ്ങളുടെ പൊളിച്ചുനീക്കല്‍ പൂര്‍ത്തീകരിച്ചുതരാന്‍ സാധിക്കാത്ത നഗരസഭാ അധികൃതരാണ് നിര്‍മാണത്തില്‍ കാലതാമസം വന്നിട്ടുണ്ടെങ്കില്‍ മറുപടി പറയേണ്ടത്. സ്വകാര്യവ്യക്തികളുടെയും സര്‍ക്കാരിന്‍റെയും ആരാധാനാലയങ്ങളുടെയും അടക്കമുള്ള കെട്ടിടങ്ങള്‍ പൊളിച്ചുനീക്കി റോഡിന് വഴിയൊരുക്കാന്‍ കഴിഞ്ഞുവെങ്കിലും ഇക്കഴിഞ്ഞ ഏപ്രില്‍ അവസാനംമാത്രമാണ് നഗരസഭയുടെ കൈവശമുള്ള രണ്ടു കെട്ടിടങ്ങള്‍ പൂര്‍ണമായും പൊളിച്ചുമാറ്റിയത്. ഇതിനുവേണ്ടിവന്ന കാലതാമസമാണ് പ്രധാനമായും പദ്ധതി വൈകിച്ചത്. പദ്ധതിപ്രദേശത്തെ നിര്‍മിതികള്‍ പൂര്‍ണമായും പൊളിച്ചുനീക്കിയതിനുശേഷംമാത്രമേ ആവശ്യമായ തുകയ്ക്കുവേണ്ടി എസ്റ്റിമേറ്റ് സര്‍ക്കാരിന് സമര്‍പ്പിക്കാനാകു. ഉത്സവങ്ങള്‍ പൂര്‍ത്തിയായശേഷവും പ്രവൃത്തി തുടരാന്‍ നഗരസഭയുടെ കൃത്യതയില്ലായ്മമൂലം സാധിക്കാതെവന്നു. പുത്തന്‍തോട്, കരുവന്നൂര്‍ ഭാഗത്തെ പ്രവൃത്തി എടുക്കുന്നതിനുമുമ്പായി ഠാണാ- ചന്തക്കുന്ന് ഭാഗം പണിക്കായി എടുക്കാമായിരുന്നതും നഗരസഭയുടെ വീഴ്ചയാല്‍ കഴിഞ്ഞില്ല.

നികുതിനഷ്ടത്തിന്‍റെ ഉത്തരവാദിത്വം ഇടതുപക്ഷത്തിന്: രാജൻ പല്ലൻ

തൃശൂർ: ചട്ടങ്ങൾ പാലിക്കാതെ നടപ്പാക്കിയ വസ്തുനികുതിപരിഷ്കാരം റദ്ദാക്കിയ ഹൈക്കോടതിനടപടി ഇടതുഭരണത്തിനേറ്റ തിരിച്ചടിയാണെന്നും 250 കോടിയുടെ നികുതിവരുമാനനഷ്ടത്തിന്‍റെ ഉത്തരവാദിത്വത്തിൽനിന്ന് ഒഴിഞ്ഞുമാറാനാകില്ലെന്നും കോർപറേഷൻ പ്രതിപക്ഷനേതാവ് രാജൻ ജെ. പല്ലൻ. നഷ്ടത്തിന്‍റെ ഉത്തരവാദിത്വം യുഡിഎഫ് ഭരണത്തിനുമേൽ കെട്ടിവയ്ക്കാനുള്ളനീക്കം വിലപ്പോകില്ല. 2011ൽ സർക്കാർ ഇറക്കിയ നികുതിപരിഷ്കാര ഉത്തരവ് 2013ൽ യുഡിഎഫ് കൗണ്‍സിൽ നടപ്പാക്കാൻ തീരുമാനിച്ചെങ്കിലും വ്യാപകപരാതികളെത്തുടർന്ന് 2014ൽ ഉമ്മൻ ചാണ്ടി സർക്കാർ മരവിപ്പിച്ചു. ഇക്കാര്യം കോർപറേഷൻ ഭരണനേതൃത്വം ഹൈക്കോടതിയിലും മറച്ചുവച്ചു. 2019ൽ ഇടതുസർക്കാരിന്‍റെ ഉത്തരവാണ് സംസ്ഥാനത്തു നടപ്പാക്കിയത്. അതിൽ യുഡിഎഫ് കൗണ്‍സിലിന് ഉത്തരവാദിത്വമില്ല. നാലുമാസത്തിനകം നികുതിപരിഷ്കാരം നടപ്പാക്കാനായിരുന്നു പുതിയ ഉത്തരവെങ്കിലും ഒന്പതുമാസത്തിനുശേഷമാണ് കൗണ്‍സിലിൽ പാസാക്കിയത്. നാലുവർഷംകഴിഞ്ഞു 2023ൽ ആണു നടപ്പാക്കിയത്. ചട്ടപ്രകാരം പരിഷ്കാരം നടപ്പാക്കാത്തതിനാൽ നഷ്ടത്തിന്‍റെ ഉത്തരവാദിത്വം ഏറ്റെടുക്കുന്നതിൽ ഉദ്യോഗസ്ഥതലത്തിൽ തർക്കമുണ്ടായതും 10 ശതമാനം പുതിയ സേവന ഉപനികുതി മുൻകാലപ്രാബല്യത്തിൽ അടിച്ചേൽപ്പിക്കാനുള്ള നീക്കവും പരിഷ്കാരം വൈകാൻ ഇടയാക്കി. നിയമം അനുസരിച്ചു പുതിയ നികുതിക്കു മുൻകാലപ്രാബല്യമില്ല. കുടിശിക പിരിക്കാനുള്ള നീക്കത്തിനെതിരേ കൗണ്‍സിലിൽ ഉയർത്തിയ വാദങ്ങളും അംഗീകരിച്ചില്ല. ഉപനികുതി നിർബന്ധിതനികുതിയാണോ എന്നതിൽ സർക്കാരിൽനിന്നു വ്യക്തത തേടണം. ഓഡിറ്റ് റിപ്പോർട്ടുണ്ടെങ്കിൽ പുറത്തുവിടണം. 250 കോടി വരുമാനനഷ്ടമുണ്ടായതിന്‍റെയും നിയമവിരുദ്ധമായി ഉപസേവനനികുതി നടപ്പാക്കിയതിലെയും ഉത്തരവാദികളെ കണ്ടെത്തി നഷ്ടം നികത്താൻ ഓഡിറ്റ് വിഭാഗം ഡയറക്ടറെ അന്വേഷണത്തിനു നിയോഗിക്കണം. ഹൈക്കോടതി സിംഗിൾ ബെഞ്ച് വിധി കൗണ്‍സിലിനെ അറിയിക്കാതെ മേയറുടെ മുൻകൂർ‌അനുമതിയിലാണ് ഡിവിഷൻ ബെഞ്ചിനെ സമീപിച്ചത്. യോഗംകഴിഞ്ഞ് 96 മണിക്കൂറിനകം ഇറക്കേണ്ട മിനിറ്റ്സ് ഒരുമാസം പിന്നിട്ടിട്ടും പുറത്തുവിട്ടിട്ടില്ല. നികുതിപരിഷ്കാരം ഹൈക്കോടതി റദ്ദാക്കിയ സാഹചര്യത്തിൽ ജനങ്ങളുടെ നികുതിപ്പണം ഉപയോഗിച്ചു സുപ്രീംകോടതിയിൽ അപ്പീൽ പോകരുതെന്നും അനർഹമായി പിടിച്ചെടുത്ത പണം ജനങ്ങൾക്കു തിരിച്ചുനൽകണമെന്നും രാജൻ പല്ലൻ ആവശ്യപ്പെട്ടു.

നാട്ടിലിറങ്ങിയ കാട്ടുപന്നിക്ക് വെടി

തൃശൂർ: കാട്ടുപന്നികളെ വെടിവച്ചുകൊല്ലാനുള്ള നടപടി ആരംഭിച്ച് തൃശൂർ കോർപറേഷൻ. പ്രതിപക്ഷനേതാവ് രാജൻ ജെ. പല്ലന്‍റെ പരാതിപ്രകാരം മേയർ എം.കെ. വർഗീസാണ് ആക്രമണകാരികളായ കാട്ടുപന്നികളെ വെടിവച്ചുകൊല്ലാൻ പ്രത്യേക ഉത്തരവു നൽകിയത്. ഇതേത്തുടർന്ന് ബുധനാഴ്ച രാത്രി പതിനൊന്നാം ഡിവിഷനിലെ കൈരളിനഗർ പ്രദേശത്തുനിന്നും അക്രമകാരിയായ കാട്ടുപന്നിയെ കോർപറേഷന്‍റെ നേതൃത്വത്തിൽ വെടിവച്ചുകൊല്ലുകയായിരുന്നു. ഏകദേശം 100 കിലോ ഭാരംവരുന്ന കാട്ടുപന്നിയുടെ ജഡം നിയമാനുസൃതം മറവുചെയ്യുകയുമായിരുന്നു. ഏതാനും ദിവസങ്ങൾക്കുമുന്പാണ് ആക്രമണകാരികളായ കാട്ടുപന്നികളെ വെടിവച്ചുകൊല്ലാൻ നിയമാനുസൃതം ഉത്തരവുവന്നത്. നേരത്തേയും ഗാന്ധിനഗർ ഡിവിഷനിലെ കൈരളിനഗർ റസിഡൻസ് അസോസിയേഷൻ, കേര റസിഡൻസ് അസോസിയേഷൻ, ഗാന്ധിനഗർ റസിഡൻസ് അസോസിയേഷൻ, എംജി നഗർ റസിഡൻസ് അസോസിയേഷൻ തുടങ്ങിയവ നിരന്തരം കാട്ടുപന്നിശല്യത്തെക്കുറിച്ചു പരാതിപ്പെട്ടിരുന്നു.

മനുഷ്യാവകാശ കമ്മീഷനു മുന്നിൽ കൈമലർത്തി അധികൃതർ

തൃശൂർ: ഗവ. മെഡിക്കൽ കോളജ് ആശുപത്രിയിൽ ഒപി, ഐപി രോഗികൾക്ക് അൾട്രാസൗണ്ട് സ്കാൻ, സിടി സ്കാൻ, എംആർഐ സ്കാൻ ഫലങ്ങൾ ലഭിക്കാൻ രണ്ടുമാസം സമയമെടുക്കുന്നതിൽ മനുഷ്യാവകാശ കമ്മീഷനിൽ കൈമലർത്തി ആശുപത്രി അധികൃതർ. പരാധീനതകളുടെ വിശദറിപ്പോർട്ട് സമർപ്പിച്ചു കൈകഴുകാനാണ് ആശുപത്രി സൂപ്രണ്ടിന്‍റെ ശ്രമം. വകുപ്പുമേധാവിയുടെ മറുപടിസഹിതമാണ് സൂപ്രണ്ടിന്‍റെ വിശദീകരണം. മെഡിക്കൽ കോളജ് മുൻജീവനക്കാരനും ആശുപത്രി വികസന സൊസൈറ്റി മുൻ അംഗവുമായ കെ.എൻ. നാരായണൻ നൽകിയ പരാതിയിൽ കമ്മീഷൻ റിപ്പോർട്ട് തേടിയിരുന്നു. നാഷണൽ മെഡിക്കൽ മിഷന്‍റെ നിർദേശം നടപ്പാക്കാനാകാത്ത സാഹചര്യമാണെന്നും ആവശ്യമായ തസ്തികൾ ഒഴിഞ്ഞുകിടക്കുകയാണെന്നും സൂപ്രണ്ടിന്‍റെ റിപ്പോർട്ടിൽ പറയുന്നു. റേഡിയോളജി വകുപ്പിൽ 10 തസ്തികയാണ് വേണ്ടത്. രണ്ടുപേരാണുള്ളത്. സർക്കാർ അനുവദിച്ച നിരവധി തസ്തികകൾ ഒഴിഞ്ഞുകിടക്കുന്നു. പലരും കാസർഗോഡ് അടക്കമുള്ള മെഡിക്കൽ കോളജുകളിലേക്കു സ്ഥലംമാറിപ്പോയി. രണ്ടുപേർ ശൂന്യ വേതനാവധിക്ക് അപേക്ഷ കൊടുത്തു. പത്തുപേർ വേണ്ട സഥാനത്തു രണ്ടു ഡോക്ടർമാരാണുള്ളതെന്നും വിശദീകരണത്തിൽ പറയുന്നു. നിലവിലെ സാഹചര്യവും കണക്കുകളും പറയുന്നുണ്ടെങ്കിലും നടപടിയെന്തെന്നു വിശദീകരണത്തിൽ പറയുന്നില്ല. തങ്ങൾക്കു തനിച്ചു കൂടുതലായെന്നും ചെയ്യാനാകില്ലെന്നാണ് ആശുപത്രി അധികൃതർ കമ്മീഷനെ അറിയിച്ചത്.

വിഎസിനു കേരളമേകിയത് അത്യപൂർവ യാത്രാമൊഴി: എ. വിജയരാഘവൻ

തൃശൂർ: സമൂഹത്തിന്‍റെ ഏറ്റവും താഴെത്തട്ടിലുള്ള മനുഷ്യനെ സമൂഹത്തിന്‍റെ പൊതുധാരയിൽ കരുത്തോടെ നിൽക്കാൻ പ്രാപ്തമാക്കിയതാണു വിഎസിന്‍റെ മഹത്വമെന്നു സിപിഎം പോളിറ്റ് ബ്യൂറോ അംഗം എ. വിജയരാഘവൻ. വി.എസ്. അച്യുതാനന്ദന്‍റെ നിര്യാണത്തിൽ അനുശോചിച്ച് തൃശൂർ ടൗണ്‍ഹാളിൽ ചേർന്ന സർവകക്ഷിയോഗത്തിൽ പ്രസംഗിക്കുകയായിരുന്നു അദ്ദേഹം. മണ്ണിനുവേണ്ടിയുള്ള മനുഷ്യന്‍റെ സമരങ്ങൾക്കു നേതൃത്വം നൽകിയവരുണ്ടാക്കിയതാണ് ഇന്നത്തെ കേരളം. അതിൽ പ്രധാനിയാണ് വിഎസ്. അത്യപൂർവമായ യാത്രാമൊഴിയാണ് കേരളം വിഎസിനു നൽകിയത്. പൊതുജീവിതത്തിന്‍റെ പൂർണതയാണ് ജനങ്ങളുടെ ഈ സ്നേഹവായ്പ്. ഒരു നേതാവ് തങ്ങളുടെ ജീവിതത്തിൽ എന്തുമാത്രം സ്വാധീനംചെലുത്തി എന്നതിന്‍റെ പ്രതിഫലനമാണു കഴിഞ്ഞദിവസങ്ങളിൽ കേരളം കണ്ടത്. നാം ആഗ്രഹിക്കുന്ന കാര്യങ്ങൾ നമുക്കായി നിർവഹിച്ചയാൾക്കു നൽകിയ അന്ത്യാഭിവാദ്യമായിരുന്നു അതെന്നും വിജയരാഘവൻ പറഞ്ഞു. അനുശോചനയോഗത്തിൽ മന്ത്രി ഡോ. ആർ. ബിന്ദു, അതിരൂപത ആർച്ച്ബിഷപ് മാർ ആൻഡ്രൂസ് താഴത്ത്, പൗരസ്ത്യ കൽദായ സുറിയാനിസഭ മൈത്രാപ്പോലീത്ത മാർ ഔഗിൻ കുര്യാക്കോസ്, മേയർ എം.കെ. വർഗീസ്, എ.സി. മൊയ്തീൻ എംഎൽഎ, പി. ബാലചന്ദ്രൻ എംഎൽഎ, സിപിഎം ജില്ലാ സെക്രട്ടറി കെ.വി. അബ്ദുൾ ഖാദർ, ഡിസിസി പ്രസിഡന്‍റ് അഡ്വ. ജോസഫ് ടാജറ്റ്, യാക്കോബായസഭയിലെ ഫാ. ബേസിൽ ബേബി, എംഇഎസ് പ്രസിഡന്‍റ് ഡോ. പി.എ. ഫസൽ ഗഫൂർ, ബിജെപി നേതാവ് എം.എസ്. സന്പൂർണ, സിപിഐ സംസ്ഥാന കൗണ്‍സിൽ അംഗം കെ.കെ. വൽസരാജ്, മുസ്ലിം ലീഗ് ജില്ലാ സെക്രട്ടറി സി.എച്ച്. റഷീദ്, കേരള കോണ്‍ഗ്രസ്-എം ജില്ലാ പ്രസിഡന്‍റ് ഉണ്ണികൃഷ്ണൻ ഈച്ചരത്ത്, വി.എസ്. സുനിൽകുമാർ, എൻസിപി നേതാവ് പി.കെ. രാജൻ, എം.കെ. കണ്ണൻ, സാഹിത്യ അക്കാദമി സെക്രട്ടറി സി.പി. അബൂബക്കർ, സംഗീത നാടക അക്കാദമി സെക്രട്ടറി കരിവെള്ളൂർ മുരളി,അഡ്വ. സി.ടി. ജോഫി, പി.ആർ.എൻ. നന്പീശൻ, സോളി തോമസ്, സി.ആർ. വൽസൻ, ജോണ്‍സൻ കാഞ്ഞിരത്തിങ്കൽ, പി.എം. ഏലിയാസ്, സിപിഐ ജില്ലാ സെക്രട്ടറി കെ.ജി. ശിവാനന്ദൻ, ഷൈജു പള്ളം, ഗോപിനാഥൻ താറ്റാട്ട്, പോൾ എം. ചാക്കോ, അതുല്യഘോഷ്, ലോനപ്പൻ തച്ചാറന്പിൽ, പുഷ്പാംഗദൻ, റോയ് പെരിഞ്ചേരി, വിജയ് ഹരി, എന്നിവർ പ്രസംഗിച്ചു. മുതിർന്ന സിപിഎം നേതാക്കളായ എൻ.ആർ. ബാലൻ, ബേബി ജോണ്‍ എന്നിവരും പങ്കെടുത്തു.

പിതൃസ്മരണയിൽമുങ്ങി ആയിരങ്ങൾ

തിരുവില്വാമലയിൽ നിളാതീരം മന്ത്രമുഖരിതമായി തിരുവില്വാമല: മൺമറഞ്ഞുപോയ ഉറ്റവരെ സ്മരിച്ച് കർക്കടകവാവിൽ ആയിരങ്ങൾ നിളാതീരത്ത് പിതൃതർപ്പണം നടത്തി. പാമ്പാടി ഐവർമഠം ക്ഷേത്രപരിസരത്തെ പുലർച്ചെ മൂന്നിന് പിതൃതർപ്പണചടങ്ങുകൾ ആരംഭിച്ചു. അതിരാവിലെതന്നെ ക്ഷേത്രപരിസരം ഭക്തജനങ്ങളെക്കൊണ്ടു നിറഞ്ഞു. പുഴയിലെ സ്നാനത്തിനുശേഷം ഈറനുടുത്തു പരികർമികൾ ചൊല്ലിക്കൊടുത്ത മന്ത്രങ്ങൾ ഏറ്റുചൊല്ലി സ്ത്രീകളും കുട്ടികളും അടക്കമുള്ളവർ പ്രാർഥനാപൂർവം നിളയിൽ മുങ്ങിനിവർന്നു. പിതൃക്കൾക്കു മോക്ഷംലഭിക്കാൻ പഞ്ചപാണ്ഡവന്മാർ ശ്രീകൃഷ്ണന്‍റെ ഉപദേശപ്രകാരം ഭാരതഖണ്ഡത്തിൽ ബലിതർപ്പണംനടത്തിയെന്നാണ് ഐതിഹ്യം. ബലിതർപ്പണത്തിനായി വിപുലമായ സൗകര്യങ്ങളാണ് നിളയോരത്ത് ഒരുക്കിയിരുന്നത്. വിശ്വാസികൾക്കായി പ്രത്യേകം പന്തൽ നിർമിച്ചിരുന്നു. തിരക്ക് നിയന്ത്രിക്കാനായി ഐവർമഠം ശ്രീകൃഷ്ണ ക്ഷേത്രത്തിൽ പ്രത്യേക കൗണ്ടറുകളും തുറന്നു. ശ്രീ വില്വാദ്രിനാഥ ക്ഷേത്രത്തിലും വൻ ഭക്തജനതിരക്കായിരുന്നു. നിളാതീരത്ത് ബലിതർപ്പണം കഴിഞ്ഞ് വില്വാദ്രിനാഥ ക്ഷേത്രത്തിൽ ദർശനം നടത്തിയാണ് ഭക്തർ മടങ്ങിയത്. ഐവർമഠം ശ്രീകൃഷ്ണ ക്ഷേത്രം, രമേഷ് കോരപ്പത്ത്, ബ്രാഹ്മണസഭ എന്നിവരുടെ നേതൃത്വത്തിലായിരുന്നു ചടങ്ങുകൾ. ഐവർമഠത്തിനു പുറമേ മറ്റു സ്നാനഘട്ടങ്ങളിലും ധാരാളമാളുകൾ ബലിയിടാൻ എത്തി. പ്രതികൂല കാലാവസ്ഥ തുടരുന്നതിനാൽ ബലിതർപ്പണം നടക്കുന്ന കടവിലും പുഴയോരത്തും കനത്ത സുരക്ഷാസംവിധാനങ്ങൾ പോലീസ് ഒരുക്കിയിരുന്നു. സേവാഭാരതിയുടെയും മറ്റു സന്നദ്ധസംഘടനകളുടെയും നേതൃത്വത്തിൽ രാവിലെമുതൽ ചുക്കുകാപ്പി വിതരണം ചെയ്തിരുന്നു. വാക്കടപ്പുറം പ്രാർഥനാനിർഭരം ചാവക്കാട്: വേർപ്പെട്ടവരുടെ ഓർമയിൽ വിതുമ്പി വാക്കടപ്പുറം. കർക്കടകവാവിൽ പിതൃബലിതർപ്പണത്തിനായി പഞ്ചവടി കടപ്പുറത്തെത്തിയത് ആയിരങ്ങൾ. കടലോരത്ത് ബലിയിട്ട് മുങ്ങിക്കുളിച്ച് ഈറനുടുത്ത് കരയ്ക്കുകയറുമ്പോഴും ചുണ്ടിലും മനസിലും പ്രാർഥനാമന്ത്രങ്ങൾ മാത്രം. തിലഹവനം, പിതൃസായൂജ്യ പൂജ തുടങ്ങിയവയ്ക്കും വലിയ തിരക്കനുഭവപ്പെട്ടു. പ്രസിദ്ധമായ പഞ്ചവടി ശങ്കരനാരായണ മഹാക്ഷേത്ര കമ്മിറ്റിയുടെ നേതൃത്വത്തിൽ വാക്കടപ്പുറത്ത് ഒരുക്കിയ പിതൃബലിതർപ്പണത്തിൽ പങ്കെടുക്കാൻ ബുധനാഴ്ച രാത്രിമുതൽ വിശ്വാസികൾ എത്തിയിരുന്നു. ഇന്നലെ പുലർച്ചെ രണ്ടര മുതൽ രാവിലെ പത്തു വരെയായിരുന്നു ബലിയിടൽ ചടങ്ങുകൾ. കടപ്പുറത്ത് പ്രത്യേകം ഒരുക്കിയ യജ്ഞശാലയിലായിരുന്നു ചടങ്ങ്. ഒരേസമയം ആയിരം പേർക്ക് ബലിയിടാനുള്ള പന്തൽ കടപ്പുറത്ത് ഒരുക്കിയിരുന്നു. പതിനായിരത്തിലധികംപേർ ബലിതർപ്പണത്തിന് ശീട്ടാക്കിയിരുന്നു. ബലിയിടാൻ എത്തിയ മുഴുവൻപേർക്കും പ്രഭാതഭക്ഷണം നൽകി. ക്ഷേത്രം മേൽശാന്തി സുമേഷ് ശർമ, ശാന്തിമാരായ ഷൈൻ , അരുൺ, ലൈവാഷ് തുടങ്ങിയവർ മുഖ്യ കാർമികത്വം വഹിച്ചു. ഭാരവാഹികളായ ദിലീപ് കുമാർ പാലപ്പെട്ടി , കെ.എസ്. ബാലൻ, വാക്കയിൽ വിശ്വനാഥൻ, വാസു തറയിൽ, വിനയ ദാസ് താമരശേരി, ടി.എം. വിക്രമൻ രാജൻ മാസ്റ്റർ, വി.എസ്. സദാനന്ദൻ, എ.സി. ബാലകൃഷ്ണൻ തുടങ്ങിയവർ നേതൃത്വംനൽകി. പോലീസ്, ഫയർ, ആംബുലൻസ്, വോളന്‍റിയർമാർ തുടങ്ങിയവർ തീരത്ത് സജ്ജമായിരുന്നു.

മോഡൽ റോഡെന്ന സ്വപ്‍നം പൂവണിയും; സ്ഥലം ഏറ്റെടുക്കൽ പൂർത്തീകരിച്ചാൽ...

തൃശൂർ: അയ്യന്തോൾ മോഡൽ റോഡിന്‍റെ നിർമാണപ്രവർത്തങ്ങൾക്കായുള്ള നടപടികൾ വേഗത്തിലാക്കാൻ പൊതുമരാമത്തു മന്ത്രി മുഹമ്മദ് റിയാസിന്‍റെ നിർദേശം. രണ്ടുപതിറ്റാണ്ടു പിന്നിട്ടിട്ടും നിർമാണം പൂർത്തിയാക്കാൻ കഴിയാത്ത റോഡിൽ റവന്യു വകുപ്പുംകൂടി ചേർന്ന് സ്ഥലം ഏറ്റെടുക്കൽ എന്ന കടന്പ കടന്നാൽമാത്രമേ ബജറ്റ് പ്രവൃത്തി പൂർത്തീകരിക്കാൻ സാധിക്കുകയുള്ളൂവെന്ന് അസിസ്റ്റന്‍റ് എക്സിക്യൂട്ടീവ് എൻജിനീയർ. ഗവ. ഉത്തരവുപ്രകാരം അംഗീകരിച്ച തൃശൂർ സിറ്റി കോർപറേഷൻ മാസ്റ്റർ പ്ലാൻ പ്രകാരം 25 മീറ്റർ വീതിയിൽ അലൈൻമെന്‍റ് സ്കെച്ച് തയാറാക്കണമെന്ന നിർദേശത്തെതുടർന്ന് ചീഫ് എൻജിനീയറുടെ കാര്യാലയത്തിൽനിന്നു റിവൈസ്ഡ് അലൈൻമെന്‍റ് സ്കെച്ച് അംഗീകരിച്ചു ലഭ്യമായിട്ടുണ്ട്. എന്നാൽ, സ്കെച്ച് പ്രകാരം ലഭ്യമായ റവന്യൂ ബി ഉത്തരവിലെ 35 സർവേ നന്പറുകൾ കൂടാതെ എട്ടു സർവേ നന്പറുകൾകൂടി അധികമായി ഉൾപ്പെടുത്തി റവന്യു വകുപ്പുമായി ചേർന്നു സ്ഥലമേറ്റെടുപ്പു നടപടികൾ വേഗത്തിൽ പൂർത്തീകരിച്ചാൽമാത്രമേ മോഡൽ റോഡ് നിർമാണം എന്ന സ്വപ്‍നം പൂവണിയുകയുള്ളൂ എന്നതാണ് യാഥാർഥ്യം. അതത്ര പെട്ടെന്നു നടപ്പിലാകുന്നതുമല്ല. നിർമാണപ്രവർത്തനങ്ങളുടെ ഭാഗമായി എട്ടുലക്ഷം രൂപയോളം ചെലവഴിച്ച് കൾവർട്ടും ഡ്രെയ്ൻ പ്രവൃത്തികളും നേരത്തേ പൂർത്തീകരിച്ചിട്ടുണ്ട്. മൂന്നുഘട്ടങ്ങളിലായി 2024 ൽ ജൂണ്‍ 21 ന് ആരംഭിച്ച നിർമാണപ്രവൃത്തികൾ 2016 മേയ് 15 ന് അവസാനിക്കുകയായിരുന്നു. ബാക്കി പണികൾക്കു 2020 ഒക്ടോബർ 23 ന് ഭരണാനുമതി ലഭിക്കുകയും 20 കോടി രൂപ അനുവദിക്കുകയും ചെയ്തിരുന്നു. കഴിഞ്ഞ 19 ന് അയ്യന്തോളിൽ യുവാവ് അപകടത്തിൽ മരിച്ചതിനെതുടർന്നാണ് റോഡ് നിർമാണം വീണ്ടും ചർച്ചയായത്. ഇതുസംബന്ധിച്ച് ടൂവീലർ യൂസേഴ്സ് അസോസിയേഷൻ ചെയർമാൻ ജെയിംസ് മുട്ടിക്കൽ പൊതുമരാമത്തുമന്ത്രിക്കു നിവേദനം നൽകിയതിന്‍റെ അടിസ്ഥാനത്തിലാണ് റോഡ നിർമാണ നടപടികൾ വേഗത്തിലാക്കാൻ മന്ത്രി നിർദേശിച്ചിട്ടുള്ളത്.

പടികൾ കയറി വലയേണ്ട, കോർപറേഷനിൽ ലിഫ്റ്റായി

സ്വന്തം ലേഖകൻ തൃശൂർ: പടികൾ കയറി വലയേണ്ട, കോർപറേഷനിൽ എത്തുന്നവർക്ക് ഇനി ലിഫ്റ്റിൽ നിലകൾ കയറിയിറങ്ങാം. ഭിന്നശേഷിക്കാർക്കും വയോധികർക്കും ആശ്വാസംപകർന്നുകൊണ്ട്, അരനൂറ്റാണ്ടു പിന്നിട്ട കോർപറേഷന്‍റെ ചരിത്രത്തിൽ ഇതാദ്യമായാണ് ലിഫ്റ്റ് സംവിധാനം ഒരുക്കുന്നത്. ഉദ്ഘാടനത്തിനു കാത്തുനിൽക്കാതെ പൊതുജനങ്ങൾക്കായി ലിഫ്റ്റ് തുറന്നുനൽകി. ഒരേസമയം 13 പേർക്കു കയറാൻ കഴിയുന്ന ലിഫ്റ്റിൽ ഭിന്നശേഷിക്കാർക്കുൾപ്പെടെ കയറാൻ റാന്പ് സൗകര്യവും ഏർപ്പെടുത്തിയിട്ടുണ്ട്. ഒരുകോടിയോളം രൂപ ചെലവഴിച്ചാണ് കോർപറേഷൻ എൻജിനീയറിംഗ് കെട്ടിടത്തിൽ ലിഫ്റ്റ് നിർമാണം പൂർത്തീകരിച്ചിരിക്കുന്നത്. തൊഴിലുറപ്പുപദ്ധതിയുടെയും എൻജിനീയറിംഗ് വിഭാഗത്തിന്‍റെയും കുടുംബശ്രീയുടെയും എൻയുഎൽഎമ്മിന്‍റെയും ഉൾപ്പെടെ വിവിധ ഓഫീസുകൾ പ്രവർത്തിക്കുന്ന കെട്ടിടത്തിൽ ഭിന്നശേഷിക്കാർക്കും വയോധികർക്കും സേവനങ്ങൾ ലഭിക്കുന്നതിനായി പടികൾ കയറിയിറങ്ങേണ്ടിവരുന്നത് ദുരിതമായിരുന്നു. ഇതിനാണ് ലിഫ്റ്റ് വന്നതോടെ പരിഹാരമായത്. 2022-23 കാലഘട്ടത്തിലാണ് ലിഫ്റ്റ് നിർമാണം ആരംഭിച്ചത്. എന്നാൽ പഴയ കെട്ടിടമായതിനാൽതന്നെ ഇലക്ട്രിക്കൽ സംവിധാനം അടക്കമുള്ളവയ്ക്ക് അനുമതി ലഭിക്കാനുണ്ടായ കാലതാമസമാണ് നിർമാണം വൈകിച്ചതെന്ന് എൻജിനീയറിംഗ് വിഭാഗം പറയുന്നു. ലിഫ്റ്റിന്‍റെ ഉദ്ഘാടനം ഉടൻതന്നെ നടത്തുമെന്നും ജനങ്ങളുടെ ബുദ്ധിമുട്ടിനു പരഹാരം കാണുകയാണ് തങ്ങളുടെ ലക്ഷ്യമെന്നും മേയർ എം.കെ. വർഗീസ് പറഞ്ഞു.

റോഡിൽ മരം കടപുഴകിവീണു ഗതാഗതം സ്തംഭിച്ചു

പഴയന്നൂർ: കായാംപൂവം-ഒറ്റപ്പാലം സംസ്ഥാനപാതയ്ക്കു കുറുകെ മരം കടപുഴകി വീണു. റോഡരികിൽ ഉണ്ടായിരുന്ന ഉണങ്ങിദ്രവിച്ച മരം വൈദ്യുതി ലൈനിലേക്ക് വീഴുകയായിരുന്നു. ആസമയം റോഡിൽ വാഹനങ്ങൾ ഇല്ലാത്തതിനാൽ വൻദുരന്തം ഒഴിവാക്കി. മരം വീണതുമൂലം റോഡിൽ അരമണിക്കൂറോളം ഗതാഗതം തടസപ്പെട്ടു. സിപിഐ നേതാക്കളായ പി.ആർ. വിശ്വനാഥൻ, പ്രസാദ്, പാറമേൽപ്പടി ജയപ്രകാശൻ, കുഴിയമ്പാടം മനോജ്, സിഐടിയു തൊഴിലാളിയായ രാജൻ തുടങ്ങിയവർ ഗതാഗതം സുഗമമാക്കാൻ നേതൃത്വം നൽകി. കെഎസ്ഇബി ജീവനക്കാരും സ്ഥലത്തെത്തിയിരുന്നു.

കാർ ഇടിച്ച് വീടുതകർന്നു

വേലൂർ: പാത്രമംഗലത്ത് നിയന്ത്രണംവിട്ട കാർ വ്യാപാരസ്ഥാപനവും വീടും ഇടിച്ചുതകർത്തു. എയ്യാൽ സ്വദേശി ഓടിച്ചിരുന്ന കാറാണ് അപകടത്തിൽപ്പെട്ടത്. പാത്രമംഗലം തേവര ശശിയുടെ ഓടിട്ട വീടാണ് തകർന്നത്. കാറിടിച്ച് വീടിന്‍റെ മുൻവശത്തെ ചുമർ പൂർണമായി തകർന്നു. തട്ടാൻവീട്ടിൽ രവിയെന്ന് വിളിക്കുന്ന നാരായണന്‍റെ ഉടമസ്ഥതയിലുള്ള പിഎൻവി സ്റ്റോഴ്സ് എന്ന കടയ്ക്കും നാശനഷ്ടമുണ്ടായി. കടയുടെ മുൻവശത്തെ ട്രസിന്‍റെ കാലുകൾ കാറിടിച്ച് തകർന്നതിനെതുടർന്ന് ട്രസ് നിലംപൊത്തി. മുൻവശത്ത് വില്പനയ്ക്കുവച്ചിരുന്ന പച്ചക്കറിയും പലവ്യഞ്ജനങ്ങളും ഉപയോഗശൂന്യമായി. കാറിന്‍റെ മുൻവശം തകർന്നിട്ടുണ്ട്. അപകടത്തിൽ ആർക്കും പരിക്കില്ല.

പിതൃസ്മൃതി പുരസ്കാരങ്ങൾ സമർപ്പിച്ചു

ഗുരുവായൂർ: ക്ഷേത്രപാരമ്പര്യ തറവാട്ടുകൂട്ടായ്മയുടെ നേതൃത്വത്തിൽ പിതൃസ്മൃതി ദിനാചരണ സദസും പുരസ്കാരസമർപ്പണവും നടത്തി. നഗരസഭ ചെയർമാൻ എം. കൃഷ്ണദാസ് ഉദ്ഘാടനം ചെയ്തു. കൂട്ടായ്മ പ്രസിഡന്‍റ് കെ.ടി. ശിവരാമൻ നായർ അധ്യക്ഷനായി. തെക്കുമുറി മാധവൻ നായർ സ്മാരക പിതൃസ്മൃതി പുരസ്കാരം ഗുരുവായൂർ ക്ഷേത്രം തന്ത്രി ചേന്നാസ് ദിനേശൻ നമ്പൂതിരിപ്പാട് ജ്യോതിഷ രത്നം കാണിപ്പയ്യൂർ നാരായണൻ നമ്പൂതിരിപ്പാടിനും കണ്ടലിയൂർ സുശീലാമ്മ സ്മാരക മാതൃസ്മൃതി പുരസ്കാരം ചൊവ്വല്ലൂർ സരസ്വതി കൃഷ്ണൻകുട്ടിക്കും സമർപ്പിച്ചു. 10,001 രൂപയും ഫലകവും അടങ്ങുന്നതാണ് പുരസ്കാരം. നഗരസഭ പ്രതിപക്ഷ നേതാവ് കെ.പി.ഉദയൻ, കൗൺസിലർ ശോഭ ഹരിനാരായണൻ, ആർ.നാരായണൻ, അഡ്വ. രവി ചങ്കത്ത്, അനിൽ കല്ലാറ്റ്, ബാലൻ വാറണാട്ട്, ഡോ. കെ.കൃഷ്ണദാസ് എന്നിവർ പ്രസംഗിച്ചു.

ദേവസ്വംമന്ത്രി വി.എൻ.വാസവൻ ഞായറാഴ്ച ഗുരുവായൂരിൽ

ഗുരുവായൂർ: ദേവസ്വം മന്ത്രി വി.എൻ. വാസവൻ ഞായറാഴ്ച ഗുരുവായൂരിലെത്തും. ദേവസ്വത്തിന്‍റെ വിവിധ വികസന പദ്ധതികളുടെ സമർപ്പണം അദ്ദേഹം നിർവഹിക്കും. ഉച്ചയ്ക്ക് 12ന് തെക്കേനടയിലെ ശ്രീഗുരുവായൂരപ്പൻ ഓഡിറ്റോറിയത്തിൽ നടക്കുന്ന ചടങ്ങിൽ പാഞ്ചജന്യം അനക്സ്, ക്ഷേത്രത്തിലെ പുതിയ വൈദ്യുതദീപങ്ങളുടെ സമർപ്പണം, ആനക്കോട്ടയിൽ 10 ആനകൾക്ക് നിർമിച്ചിട്ടുള്ള ഷെഡ്, ഇംഗ്ലീഷ് മീഡിയം സ്കൂളിലെ നവീകരിച്ച മൈതാനം എന്നിവയുടെ സമർപ്പണം മന്ത്രി നടത്തും. ദേവസ്വം ചെയർമാൻ ഡോ.വി.കെ. വിജയൻ അധ്യക്ഷനാകും. എൻ.കെ. അക്ബർ എംഎൽഎ, നഗരസഭ ചെയർമാൻ എം. കൃഷ്ണദാസ് എന്നിവർ പങ്കെടുക്കും.

ഭക്തശ്രീ, രാമകീർത്തി അവാർഡുകൾ പ്രഖ്യാപിച്ചു

വടക്കാഞ്ചേരി: സൗഹൃദം സെന്‍റർ മികച്ച ആധ്യാത്മിക-സാംസ്കാരിക പ്രവർത്തകനു നൽകുന്ന ഭക്തശ്രീ അവാർഡിന് പ്രശസ്ത സംഗീതജ്ഞനും സാംസ്കാരികപ്രവർത്തകനുമായ റവ. ഡോ. പോൾ പൂവത്തിങ്കലും പ്രശസ്ത രാമായണ വൈജ്ഞാനികർക്കു നൽകുന്ന രാമകീർത്തി അവാർഡിന് പ്രശസ്ത സാഹിത്യപണ്ഡിതനും നിരൂപകനുമായ ഡോ. പുത്തേഴത്ത് രാമചന്ദ്രനും അർഹരായി. പ്രശസ്തിഫലകവും 5,001 രൂപയുമാണ് അവാർഡ്. നാളെ രാവിലെ 10 മുതൽ അമ്പിളി ഭവനിൽ നടത്തുന്ന ഏകദിന രാമായണ സെമിനാറിൽ ഡയറക്ടർ പ്രഫ. പുന്നയ്ക്കൽ നാരായണൻ അവാർഡുകൾ സമ്മാനിക്കും. പ്രശസ്ത സിനി-സീരിയൽ നടൻ എൻ. നന്ദകിഷോർ സെമിനാർ ഉദ്ഘാടനം ചെയ്യും. സൗഹൃദം സൊസൈറ്റി പ്രസിഡന്‍റ് ഇ. സുമതിക്കുട്ടി അധ്യക്ഷയാവും. വിവിധ രാമായണ ഗ്രന്ഥങ്ങളുടെ പ്രദർശനവും വില്പനയും സെമിനാറിനോടനുബന്ധിച്ച് ഉണ്ടാകുമെന്നു ഭാരവാഹികളായ ടി.എൻ. നമ്പീശൻ, ഉഷ രാമചന്ദ്രൻ എന്നിവർ അറിയിച്ചു.

തെക്കുംകരയിലും പുന്നയൂർക്കുളത്തും തെരുവുനായ്ശല്യം രൂക്ഷം

പുന്നംപറമ്പ്: തെക്കുംകര പഞ്ചായത്തിന്‍റെ വിവിധ ഭാഗങ്ങളിൽ തെരുവുനായ്ശല്യം രൂക്ഷമാകുന്നു. ടെറസ് വീടുകൾക്കുമുകളിൽ കഴുകി ഉണക്കാൻ ഇടുന്ന തുണികളും ചവിട്ടുപടിയിൽ ഊരിയിടുന്ന ചെരിപ്പുകളും കടിച്ചുകൊണ്ടുപോയി നശിപ്പിക്കുന്നതും നിത്യസംഭവമാണ്. രാവിലെ പ്രഭാതസവാരിക്കുപോകുന്നവരെയും പത്രവിതരണക്കാരെയും പുലർച്ചെ പാൽ അളക്കാൻ ക്ഷീരസംഘങ്ങളിൽ എത്തുന്നവരെയും സ്കൂളിൽ പോകുന്ന വിദ്യാർഥികളെയും ഓടിവന്ന് ആക്രമിക്കുന്നതും നിത്യസംഭവമായി മാറിക്കഴിഞ്ഞു. കഴിഞ്ഞദിവസം പിഞ്ചുകുഞ്ഞുൾപ്പടെ ആറുപേരെ തെരുവുനായ്ക്കൾ ആക്രമിച്ചിരുന്നു. പഞ്ചായത്തിലെ 18 വാർഡുകളിലും പ്രത്യേകിച്ച് പുന്നംപറമ്പ് സെന്‍ററിലും നായ്ക്കളുടെ ശല്യം കൂടുകയാണ്. നായ്ക്കൾ തമ്മിൽ കടികൂടി റോഡിലൂടെ ഓടുന്ന നായ്ക്കൾ ഇരുചക്രവാഹനയാത്രക്കാർക്കും ഭീഷണിയാണ്. ആളൊഴിഞ്ഞ വീടുകളിലും കല്യാണമണ്ഡപങ്ങളിലും തങ്ങുന്ന നായ്ക്കൾ പലപ്പോഴും വളർത്തു മൃഗങ്ങളെയും ആക്രമിക്കുന്നുണ്ട്. തെരുവുനായ്ക്കളെ പിടികൂടാൻ ഉടൻ അധികൃതർ നടപടിയെടുക്കണമെന്നാണ് നാട്ടുകാരുടെ ആവശ്യം. പുന്നയൂർക്കുളം: വടക്കേക്കാട്, പുന്നയൂർക്കുളം മേഖലയിൽ തെരുവുനായ് ശല്യം രൂക്ഷമായി; അധികൃതർ നടപടിയെടുക്കുന്നില്ലെന്ന് പരാതി. പ്രദേശത്ത് അലഞ്ഞുനടക്കുന്ന നായ്ക്കൾ മനുഷ്യർക്കും വളർത്തുമൃഗങ്ങൾക്കും ഭീഷണിയാകുകയാണ്. ഇരുചക്ര വാഹനങ്ങളിൽ സഞ്ചരിക്കുന്നവർക്കു നേരെ ചാടിവീഴുന്ന നായ്ക്കൾ നിരവധി അപകടങ്ങൾക്ക് കാരണമാകുന്നുണ്ട്. മുക്കിലപ്പീടിക, എടക്കര റോഡ്, നാലാംകല്ല്, ആറ്റുപുറം, കല്ലിങ്ങൽ എന്നിവിടങ്ങളിലാണ് തെരുവുനായ് ശല്യം രൂക്ഷമായിട്ടുള്ളത്. ഇറച്ചിക്കടകളിലെയും മറ്റും അവശിഷ്ടങ്ങൾ പൊതുനിരത്തിലും പൊന്തക്കാടുകളിലും തള്ളുന്നതാണ് നായ്ക്കൾ പെരുകാൻ കാരണമെന്ന് നാട്ടുകാർ പറഞ്ഞു. തെരുവുനായ് ശല്യം ഒഴിവാക്കാൻ അധികൃതരുടെ ഭാഗത്തുനിന്ന് അടിയന്തരനടപടി വേണമെന്നാണ് ആവശ്യം.

റെയിൽവേ മേൽപ്പാലത്തിൽ വീണ്ടും കുഴികൾ രൂപപ്പെട്ടു

ഒല്ലൂർ: തൈക്കാട്ടുശേരി റെയിൽവേ മേൽപ്പാലത്തിൽ വീണ്ടും കുഴികൾ രൂപപ്പെട്ടു. കോൺക്രീറ്റ് തകർന്ന് പാലത്തിലെ കമ്പികൾ പുറത്തുവന്ന നിലയിലാണ്. ദിവസവും നൂറുകണക്കിന് വാഹനങ്ങൾ കടന്നുപോകുന്ന റോഡാണിത്. പാലത്തിന്‍റെ അപ്രോച്ച് റോഡിൽ വിരിച്ച ടൈലുകളും ഇളകിയ നിലയിലാണ്. റെയിൽവേയുടെ കീഴിലുള്ള പാലത്തിൽ രൂപപ്പെട്ട കുഴികൾ റെയിൽവേയുടെ അനുമതിയോടെ നേരത്തെ അടച്ചിരുന്നുവെങ്കിലും ശക്തമായ മഴയിൽ വീണ്ടും കുഴികൾ രൂപപ്പെടുകയായിരുന്നു.

കുഴിയിൽവീണ് സ്ത്രീക്കു പരിക്ക്

ഗുരുവായൂർ: കാനയിലേക്കു വെള്ളം ഒഴുകിയിറങ്ങാൻ സ്ഥാപിച്ച ചെറിയ കുഴിയിൽ വീണ് വഴിയാത്രക്കാരിക്കു പരിക്കേറ്റു. പുത്തംപല്ലി പാങ്ങിൽ രാജന്‍റെ ഭാര്യ സുനിത(58)യ്ക്കാണ് പരിക്കേറ്റത്. മുഖത്തിനും പല്ലിനും പരിക്കേറ്റ ഇവരെ ആക്ട്സ് പ്രവർത്തകർ കുന്നംകുളത്തെ സ്വകാര്യആശുപത്രിയിൽ പ്രവേശിപ്പിച്ചു. ചാമുണ്ഡേശ്വരി റോഡിലാണ് സംഭവം. കാനയിലേക്ക് വെള്ളം ഒഴുകിപ്പോകാനുള്ള ചെറിയകുഴിയിൽ സ്ഥാപിച്ചിട്ടുള്ള ഇരുമ്പുനെറ്റ് ഇല്ലാത്തതിനാലാണ് ഇവർ വീണത്. കാനയ്ക്കുസമീപമുള്ള കുഴിയിൽ സ്ഥാപിച്ചിട്ടുള്ള ഇരുമ്പുമൂടികൾ ഒട്ടുമിക്ക പ്രദേശത്തും ഇല്ലാത്ത സ്ഥിതിയാണ്. ഇരുമ്പിൽ സ്ഥാപിച്ചിട്ടുള്ള മൂടികൾ മോഷ്ടിക്കപ്പെടുന്നതായാണ് വിവരം.

വിശ്വാസനിറവിൽ ബലിതർപ്പണം

ഗുരുവായൂര്‍: ദേവസ്വം കീഴേടമായ നെന്‍മിനി ബലരാമക്ഷേത്രത്തില്‍ കര്‍ക്കടക വാവുബലിക്ക് അതിരാവിലെ മുതൽ നീണ്ട വരിയായിരുന്നു. സൂര്യനാരായണന്‍ ഇളയത് മുഖ്യകാര്‍മികനായി. ക്ഷേത്ര ക്ഷേമസമിതിയുടെ ആഭിമുഖ്യത്തില്‍ അഷ്ടദ്രവ്യ ഗണപതിഹോമവും ഭഗവത് സേവയും ഉണ്ടായി. തന്ത്രി പുലിയന്നൂര്‍ ജയന്തന്‍ നമ്പൂതിരി നേതൃത്വംനല്‍കി. ബലിയിടാനെത്തിയവര്‍ക്ക് ദേവസ്വം പ്രഭാത ഭക്ഷണം നല്‍കി. ഗുരുവായൂര്‍ പെരുന്തട്ട ശിവക്ഷേത്രത്തില്‍ അഞ്ഞൂറിലേറെപ്പേര്‍ ബലിയിടാനെത്തി. രാമകൃഷ്ണന്‍ ഇളയത് മുഖ്യകാര്‍മികനായി. പെരുന്തട്ട ക്ഷേത്രത്തിലും ഭക്തർക്ക് ലഘുഭക്ഷണം നൽകി. പഴയന്നൂർ: ഭാരതപ്പുഴയുടെയും ഗായത്രിപ്പുഴയുടെയും സംഗമസ്ഥാനമായ മായന്നൂർ കൂട്ടിൽമുക്കിൽ മൂലമണ്ണൂർ ശ്രീ ദുർഗാദേവി മഹാവിഷ്ണുക്ഷേത്രത്തിൽ ക്ഷേത്രക്ഷേമസമിതിയുടെ ആഭിമുഖ്യത്തിൽ കർക്കടകവാവു ബലിതർപ്പണം നടത്തി. ചടങ്ങുകൾക്ക് കണ്ഠപ്പ ശർമ മുഖ്യകാർമികനായിരുന്നു. ക്ഷേത്രത്തിന്‍റെ വനമാലിതീർഥം തർപ്പണക്കടവിലാണ് ബലിതർപ്പണം നടത്തിയത്. ഭക്തജനങ്ങൾക്ക് ഇന്നുമുതൽ എല്ലാ ദിവസങ്ങളിലും ബലിസമർപ്പണം നടത്തുന്നതിന് ക്ഷേത്രത്തിൽ ആചാര്യൻ ഉണ്ടായിരിക്കുമെന്ന് ക്ഷേത്രക്ഷേമസമിതി അറിയിച്ചു. വടക്കേത്തറ ശ്രീനാരായണഗുരുദേവ ക്ഷേത്രം എസ്എൻഡിപി ശാഖാ യോഗത്തിന്‍റെ ആഭിമുഖ്യത്തിൽ സംഘടിപ്പിച്ച ബലിതർപ്പണച്ചടങ്ങുകൾ ഭക്തിസാന്ദ്രമായി. ബലിതർപ്പണ ചടങ്ങുകൾ ചീരക്കുഴി ഗായത്രിപ്പുഴയോരത്ത് നടന്നു. വിനീത് ശാന്തി കാർമികത്വം വഹിച്ചു. നൂറുകണക്കിന് വിശ്വാസികൾ ചടങ്ങുകളിൽ പങ്കെടുത്തു.

വിഎസിന്‍റെ വിയോഗത്തിൽ അനുശോചനയോഗം

തൃശൂർ: ബേക്കേഴ്സ് അസോസിയേഷൻ സംസ്ഥാനകമ്മിറ്റിയുടെ നേതൃത്വത്തിൽ മുൻമുഖ്യമന്ത്രി വി.എസ്. അച്യുതാനന്ദന്‍റെ വിയോഗത്തിൽ അനുശോചനയോഗം ചേർന്നു. സംസ്ഥാന പ്രസിഡന്‍റ് കിരണ്‍ എസ്. പാലയ്ക്കൽ അധ്യക്ഷത വഹിച്ചു. ജനറൽ സെക്രട്ടറി ബിജു പ്രേംശങ്കർ, ട്രഷറർ സി.പി. പ്രേമൻ, ഓർഗനൈസിംഗ് സെക്രട്ടറി അഷ്റഫ് നല്ലളം, അഡ്വൈസറി ബോർഡ് ചെയർമാൻ മുഹമ്മദ് ഫൗസീർ, ജോയിന്‍റ് കണ്‍വീനർ വിജേഷ് വിശ്വനാഥ്, സെക്രട്ടറിമാരായ എം.വി. നവീൻ, ഹെന്നി ജോസഫ്, സ്മാർട്ട് ടീം സംസ്ഥാന ട്രഷറർ അർച്ചിത്, ഓർഗനൈസിംഗ് സെക്രട്ടറി ഷോജിൽ അശോക്, എക്സിക്യൂട്ടീവ് അംഗം പോൾ ചെമ്മണ്ണൂർ എന്നിവർ പങ്കെടുത്തു. വിഎസ് മുഖ്യമന്ത്രി ആയിരുന്ന കാലയളവിൽ ബേക്കറിവ്യവസായവുമായി ബന്ധപ്പെട്ട കാര്യങ്ങളിൽ ഉചിതമായ ഇടപെടലുകൾ നടത്തിയിരുന്നുവെന്നു യോഗം അനുസ്മരിച്ചു.

വിഎസ്: ലാലൂരിനായി ഉറവിടമാലിന്യ സംസ്കരണം മുന്നോട്ടുവച്ച മുഖ്യമന്ത്രി

തൃശൂർ: ലാലൂരിനെ മാലിന്യത്തിൽനിന്നു മോചിപ്പിക്കാൻ ഉറവിട‌മാലിന്യ‌സംസ്കരണമെന്ന ആശയം മുന്പോട്ടുവച്ച മുഖ്യമന്ത്രിയായിരുന്നു വി.എസ്. അച്യുതാനന്ദനെന്നു ലാലൂർ മലിനീകരണവിരുദ്ധ സമരസമിതി അനുസ്മരിച്ചു. പതിറ്റാണ്ടുകളായി മാലിന്യവിരുദ്ധസമരത്തിലേർപ്പെട്ടിരുന്ന സമരസമിതിയെ ചർച്ചയ്ക്കുവിളിച്ച് വികേന്ദ്രീകൃത മാലിന്യസംസ്കരണം നടപ്പാക്കാൻ കാർഷികസർവകലാശാലയുമായി കരാറുണ്ടാക്കിയതു വിഎസ് മുഖ്യമന്ത്രിയായിരുന്ന കാലത്തായിരുന്നു. സർവകലാശാല പ്രോ വൈസ് ചാൻസലർ ഡോ. പത്തിയൂർ ഗോപിനാഥിനെ നോഡൽ ഓഫീസറായി നിയമിക്കുകയും പ്രവർത്തനത്തിനായി 9.4 കോടി രൂപ അനുവദിക്കുകയും അതിൽ 94 ലക്ഷം രൂപ ഉടൻ കൈമാറുകയും ചെയ്തു. ഉറവിടമാലിന്യ സംസ്കരണം എന്ന ആശയം മുന്പോട്ടുവച്ച മുഖ്യമന്ത്രിയുടെ ആശയം പിന്നീടു വളരെയധികം ചർച്ചചെയ്യപ്പെട്ടു. ഇതിനുശേഷമാണ് അനിശ്ചിതകാല നിരാഹാരസമരം ലാലൂർ മലിനീകരണവിരുദ്ധ സമരസമിതി അവസാനിപ്പിക്കുന്നത്. ഓരോ ഘട്ടത്തിലും സമരസമിതിയുടെ അഭിപ്രായങ്ങളും നിർദേശങ്ങളും തേടിയാണ് ഇത്രയും കാര്യങ്ങൾ വിഎസ് നടപ്പാക്കിയതെന്നും സമരസമിതി അനുശോചനയോഗം ഓർമിച്ചു. യോഗത്തിൽ ലാലൂർ മലിനീകരണവിരുദ്ധ സമരസമിതി ചെയർമാൻ ടി.കെ. വാസു അധ്യക്ഷത വഹിച്ചു. വൈസ് ചെയർമാൻ അഡ്വ. രഘുനാഥ് കഴുങ്കിൽ, കൺവീനർ സി.പി. ജോസ്, കെ.ജി. അനിൽകുമാർ, സുനിൽ ലാലൂർ, കെ.യു. പ്രഭാകരൻ, ലൂവിസ് താഴത്ത്, കെ.കെ. ഓമന, കെ.ജി. ഉണ്ണികൃഷ്ണൻ, ബേബി മാളിയേക്കൽ തുടങ്ങിയവർ പ്രസംഗിച്ചു.

കോർപറേഷൻ കെട്ടിടങ്ങൾതന്നെ "മരണവാതിലിൽ’

സി.ജി. ജിജാസൽ തൃശൂർ: അപകടഭീഷണിയുള്ള പഴക്കമുള്ള കെട്ടിടങ്ങൾ സ്വമേധയാ പൊളിച്ചുനീക്കാൻ അടിയന്തരനിർദേശങ്ങൾ നൽകുന്ന കോർപറേഷന്‍റെ തന്നെ കെട്ടിടങ്ങളും തകർച്ചാഭീഷണിയിൽ. മഴക്കാലത്ത് ഈർപ്പമേറ്റും കോണ്‍ക്രീറ്റ് തകർന്നും കന്പികൾ പുറത്തേക്കു കാണിച്ചുമാണ് കോർപറേഷൻ കെട്ടിടങ്ങളുടെ നില്പ്. വൈദ്യുതിവിഭാഗം, എൻജിനീയറിംഗ് വിഭാഗം, സ്റ്റാൻഡിംഗ് കമ്മിറ്റി ചെയർമാന്മാരുടെ ഓഫീസ് എന്നിവയടങ്ങിയ കെട്ടിടങ്ങളെല്ലാംതന്നെ ജീവഭയം ഉണർത്തുന്നു. വൈദ്യുതിവിഭാഗം കെട്ടിടത്തിലെ ചുമർ പൊളിഞ്ഞു കന്പികൾ പുറത്താണ്. സീലിംഗ് തകർന്നിട്ടുണ്ട്. മറ്റു ചില കെട്ടിടങ്ങളിൽ തൂണുകൾ തകർന്നിട്ടുള്ളതും അപകടഭീഷണി ഉയർത്തുന്നുണ്ട്. അപകടഭീഷണിയുള്ള കെട്ടിടങ്ങൾ ഉടമകൾ സ്വമേധയാ നീക്കണം, അല്ലെങ്കിൽ നിയമനടപടി നേരിടും എന്നു പൊതുജനത്തിനു മേയറുടെ മുന്നറിയിപ്പുണ്ടെങ്കിലും, സ്വന്തം കോന്പൗണ്ടിലെയും ഓഫീസുകളിലെയും കെട്ടിടങ്ങളുടെ ദുരവസ്ഥ കാണാതെപോകുന്നതു വൈരുധ്യമായി മാറുന്നു. ജീവൻവച്ച് പന്താടുന്നു: രാജൻ ജെ. പല്ലൻ സ്റ്റെബിലിറ്റി ഇല്ലാത്ത കെട്ടിടങ്ങൾ പൊളിച്ചുനീക്കണമെന്നു പലതവണ പറഞ്ഞിട്ടും കേൾക്കാത്ത കേർപറേഷൻ ഏതാനും നാളുകൾക്കുമുന്പ് ആശുപത്രിക്കെട്ടിടം വീണപ്പോൾമാത്രമാണ് ഉണർന്നത്. ഇപ്പോൾ ഭീഷണിയുള്ള കെട്ടിടങ്ങൾ സ്വമേധയാ പൊളിക്കണമെന്നും അല്ലെങ്കിൽ നടപടികൾ സ്വീകരിക്കുമെന്നും പറയുന്നു. എന്നാൽ സ്വന്തം ഓഫീസ് വളപ്പിലെ കെട്ടിടങ്ങൾപോലും നോക്കിനന്നാക്കാൻ മേയർക്കോ ഭരണാധികാരികൾക്കോ കഴിയുന്നില്ല. കോർപറേഷൻ വൈദ്യുതിവിഭാഗം കെട്ടിടത്തിൽ തന്‍റെ മുന്പിൽവച്ചാണ് ഒരാൾക്കു സീലിംഗ് അടർന്നുവീണ് പരിക്കേറ്റിട്ടുള്ളത്. എന്നിട്ടും കെട്ടിടം ബലപ്പെടുത്താനോ ഉറപ്പുനോക്കാനോ മേയർക്കു നേരമായിട്ടില്ല. ജനങ്ങളുടെ ജീവൻവച്ച് പന്താടുകയാണ് ഇവർ ചെയ്യുന്നത്. ജനം ഇതുവിലയിരുത്തുന്നുണ്ടെന്ന് ഓർക്കണമെന്നും അദ്ദേഹം പറഞ്ഞു. പറയുന്നതേ ചെയ്യൂ, ചെയ്യുന്നതേ പറയൂ; പരിഹാരം ഉറപ്പെന്നു മേയർ താൻ മറ്റുള്ളവരെപ്പോലെയല്ല, പറയുന്നതേ ചെയ്യൂ, ചെയ്യുന്നതേ പറയൂ. പ്രശ്‍നങ്ങൾ ന്യായീകരിക്കാനല്ല, പരിഹരിക്കാനാണ് താൻ ശ്രമിക്കുന്നത്. നഗരത്തിലെ പഴയ കെട്ടിടങ്ങൾക്കെതിരേ ഭരണത്തിൽ ഇരിക്കുന്പോൾ നടപടികൾ സ്വീകരിക്കാത്തവർ അതിനെ ഇപ്പോൾ വലിയ കുറ്റമായി ചിത്രീകരിക്കുകയാണ്. താൻ അധികാരത്തിൽ എത്തിയതിനുശേഷമാണ് അവയ്ക്കെതിരേ നടപടി സ്വീകരിച്ചത്. കോർപറേഷൻ അങ്കണത്തിലെ അപകട കെട്ടിടങ്ങൾ പൊളിച്ചുമാറ്റി. അപകടത്തിലായ വൈദ്യുതിവിഭാഗം കെട്ടിടത്തിനായി പോസ്റ്റ് ഓഫീസ് പരിസരത്ത് 39 കോടിയുടെ നിർമാണം നടക്കുന്നുണ്ട്. എൻജിനീയറിംഗ് കെട്ടിടത്തിൽ രണ്ടുകോടിയുടെ നിർമാണം പൂർത്തീകരിച്ച് ആധുനികവത്കരിക്കും. സ്റ്റാൻഡിംഗ് കമ്മിറ്റി ചെയർപേഴ്സൺമാരുടെ കെട്ടിടത്തിൽ മെയിന്‍റനൻസ് മാത്രമേ നടത്താൻ കഴിയൂ. പൈതൃകകെട്ടിടങ്ങളായതു കാരണം എല്ലാം പൊളിക്കാൻ കഴിയില്ലെന്നും മേയർ കൂട്ടിച്ചേർത്തു.

ഒരുകോടി എട്ടുലക്ഷം രൂപയുടെ ഓണ്‍ലൈന്‍ ഷെയര്‍ ട്രേഡിംഗ് തട്ടിപ്പ്; യുവാവ് അറസ്റ്റിൽ

ചാലക്കുടി: ഓണ്‍ലൈന്‍ ഷെയര്‍ ട്രേഡിംഗിലൂടെ പണം നേടാമെന്നു വിശ്വസിപ്പിച്ച് പരിയാരം സ്വദേശിയില്‍നിന്ന് ഒരു കോടി എട്ടുലക്ഷം രൂപ തട്ടിയെടുത്ത കേസില്‍ ഇടനിലക്കാരനായ യുവാവ് അറസ്റ്റില്‍. നിലമ്പൂര്‍ പന്നിക്കോട്ടുമുണ്ട സ്വദേശി പുലത്തുവീട്ടില്‍ ഷിബിനെ(22)യാണ് അറസ്റ്റുചെയ്തത്. തൃശൂര്‍ റൂറല്‍ സൈബര്‍ പോലീസ് നിലമ്പൂരിൽനിന്നുമാണ് പ്രതിയെ പിടികൂടിയത്. പരാതിക്കാരനെ ഓണ്‍ലൈന്‍ ട്രേഡിംഗ് ചെയ്യുന്ന ബാരിക് ഗോള്‍ഡ് കാപ്പിറ്റല്‍ എന്ന ട്രേഡിംഗ് കമ്പനിയാണെന്നു ഫേസ്ബുക്ക്, വാട്‌സാപ്പ്, ടെലിഗ്രാം തുടങ്ങിയ പ്രമുഖ സോഷ്യല്‍ മീഡിയകളിലൂടെ സന്ദേശങ്ങളയച്ച് വിശ്വസിപ്പിക്കുകയായിരുന്നു. തുടർന്നു ട്രേഡിംഗ് ചെയ്യുന്നതിനുള്ള വാലറ്റ് ഫോണില്‍ ഇന്‍സ്റ്റാള്‍ ചെയ്യിപ്പിച്ചു. 2024 നവംബര്‍ നാലുമുതല്‍ 2025 ഫെബ്രുവരി 25 വരെയുള്ള കാലയളവുകളിലായി ട്രേഡിംഗ് നടത്തിച്ചു ടാക്‌സ്, കണ്‍വേര്‍ഷന്‍ ഫീ എന്നീ ഇനങ്ങളിലായി പരാതിക്കാരന്‍റെ ബാങ്ക് അക്കൗണ്ടില്‍നിന്നു പ്രധാന പ്രതികളുടെ ബാങ്ക് അക്കൗണ്ടിലേക്കു പണം അയച്ചുവാങ്ങിയായിരുന്നു തട്ടിപ്പ്. തട്ടിപ്പുപണം കൈമാറ്റം ചെയ്യുന്നതിനായി പ്രതികള്‍ക്കു ബാങ്ക് അക്കൗണ്ടുകള്‍ എടുക്കുന്നതിനായി സഹായംനല്‍കി 15,000 രൂപ കമ്മീഷന്‍ കൈപ്പറ്റി തട്ടിപ്പില്‍ പങ്കാളിയായതിനാണ് ഷിബിനെ അറസ്റ്റുചെയ്തത്. കര്‍ണാടക, രാജസ്ഥാന്‍ സംസ്ഥാനങ്ങളില്‍ തട്ടിപ്പുകേസുകളിലെ പ്രതിയാണ് ഷിബിന്‍. തൃശൂര്‍ റൂറല്‍ സൈബര്‍ എസ്എച്ച്ഒ പി.എസ്. സുജിത്ത്, സബ് ഇന്‍സ്‌പെക്ടര്‍മാരായ രമ്യ കാര്‍ത്തികേയന്‍, സബ് ഇന്‍സ്‌പെക്ടര്‍ കെ.വി. ജസ്റ്റിന്‍ വര്‍ഗീസ്, സിവില്‍ പോലീസ് ഓഫീസര്‍ എച്ച്.ബി. നെഷ്‌റു, ടെലികമ്യൂണിക്കേഷന്‍ സിവില്‍ പോലീസ് ഓഫീസര്‍ ടി.പി. ശ്രീനാഥ്, ഡ്രൈവര്‍ സിപിഒ അനന്തു എന്നിവരാണ് അന്വേഷണസംഘത്തില്‍ ഉണ്ടായിരുന്നത്.

യുവാവിനെ ആക്രമിച്ച് കവർച്ചചെയ്ത കേസിൽ നാലു പ്രതികൾ പിടിയിൽ

മണ്ണുത്തി: യുവാവിനെ ആക്രമിച്ച് കവർച്ചയ്ക്കിരയാക്കിയ സംഭവത്തിൽ പ്രതികളെ പോലീസ് അറസ്റ്റ് ചെയ്തു. ചിയ്യാരം സ്വദേശിയായ ചീരമ്പത്ത് സച്ചിൻ (27), ചിയ്യാരം കണ്ണംകുളങ്ങര തയ്യിൽ സഞ്ജു (26), അമ്മാടം പള്ളിപ്പുറം പുളിപറമ്പിൽ അജുൻ (30) എന്നിവരെയും പ്രതികളുടെ സഹായിയായ മുപ്ലിയം അജയ് ദേവി (32) നെയു മാണ് തൃശൂർ സിറ്റി പോലീസ് കർണാടകയിൽനിന്ന് അതിവിദഗ്ധമായി പിടികൂടിയത്. വെള്ളാനിക്കര സ്വദേശിയെ ഏഴോളം പ്രതികൾ ചേർന്നു നടത്തിയ ദേഹോപദ്രവം, വധശ്രമം, കവർച്ച എന്നിവയിൽ മണ്ണുത്തി പോലീസ് സ്റ്റേഷനിൽ പ്രതികൾക്കെതിരേ കേസെടുത്ത് അന്വേഷണം നടത്തിവരികയായിരുന്നു. കേസിലെ മൂന്നു പ്രതികളെ നേരത്തെ അറസ്റ്റ് ചെയ്തിരുന്നു. കർണാടകയിൽ പ്രതികൾ ഉപയോഗിച്ചിരുന്ന കാറും അന്വേഷണസംഘം കണ്ടെത്തിയിട്ടുണ്ട്. മണ്ണുത്തി ഇൻസ്‌പെക്ടർ കെ.സി. ബൈജു, സാഗോക്ക് ടീമംഗങ്ങളായ അസിസ്റ്റന്‍റ് സബ് ഇൻസ്പെക്ടർ പഴനിസ്വാമി, സിവിൽപോലീസ് ഓഫീസർ ശ്രീജിത്ത്‌, നെടുപുഴ പോലീസ് സ്റ്റേഷനിലെ സബ് ഇൻസ്‌പെക്ടർ കെ.ജി. ജയനാരായണൻ, സീനിയർ സിവിൽ പോലീസ് ഓഫീസർ അനിൽകുമാർ. സിവിൽ പോലീസ് ഓഫീസർ അബീഷ് ആന്‍റണി എന്നിവരും അന്വേഷണസംഘത്തിലുണ്ടായിരുന്നു.

സുപ്രീംകോടതി പരാമർശങ്ങൾ കേന്ദ്രത്തിനുള്ള തിരിച്ചടി: എൻസിപി -എസ്

തൃശൂർ: പ്രതിപക്ഷകക്ഷികൾക്കും നേതാക്കൾക്കുമെതിരേ ഇഡിയെ ആയുധമാക്കുന്ന കേന്ദ്രസർക്കാരിനെതിരേയുള്ള അതിശക്തമായ തിരിച്ചടിയാണു സുപ്രീംകോടതിയുടെ പരാമർശങ്ങളെന്ന് എൻസിപി - എസ് സംസ്ഥാന വർക്കിംഗ് പ്രസിഡന്‍റ് പി.കെ. രാജൻമാസ്റ്റർ അഭിപ്രായപെട്ടു. എൻസിപി മുൻ സംസ്ഥാന പ്രസിഡന്‍റ് ഉഴവൂർ വിജയന്‍റെ എട്ടാം ചരമവാർഷികദിനത്തിൽ അനുസ്മരണം ഉദ്ഘാടനം ചെയ്യുകയായിരുന്നു അദ്ദേഹം. കുത്സിതമാർഗങ്ങളിലൂടെ സർവാധിപത്യം അടിച്ചേൽപ്പിക്കാനുള്ള നിഗൂഢശ്രമങ്ങളിൽനിന്നു കേന്ദ്രം പിൻമാറുന്നില്ലെങ്കിൽ ജനങ്ങളിൽനിന്നു കൂടുതൽ ശക്തമായ തിരിച്ചടി ലഭിക്കുമെന്നും അദ്ദേഹം പറഞ്ഞു. സംസ്ഥാനസെക്രട്ടറി അഡ്വ. രഘു കെ. മാരാത്ത് മുഖ്യപ്രഭാഷണം നടത്തി. എൻഎംസി അഖിലേന്ത്യ ജനറൽ സെക്രട്ടറി എം. പദ്മിനി, സംസ്ഥാന നിർവാഹകസമിതി അംഗങ്ങളായ ഇ.എ. ദിനമണി, വിശാലാക്ഷി മല്ലിശേരി, എൻവൈസി സംസ്ഥാനപ്രസിഡന്‍റ് സി.ആർ. സജിത്ത്, ജില്ലാ ഭാരവാഹികളായ യു.കെ. ഗോപാലൻ, കെ.എം. സൈനുദീൻ, സി.കെ. രാധാകൃഷ്ണൻ, ടി.ജി. സുന്ദർലാൽ, വി.എം. നയന, അഡ്വ. കെ.എൻ. വിവേകാനന്ദൻ, ഷിജു കീടായി, വിജിത വിനുകുമാർ എന്നിവർ പ്രസംഗിച്ചു. വിഎസ്. അച്യുതാനന്ദന്‍റെ നിര്യാണത്തിൽ യോഗം അനുശോചിച്ചു.

ഡയപ്പര്‍ മാലിന്യസംസ്‌കരണത്തിന് ഇരിങ്ങാലക്കുട നഗരസഭ

ഇരിങ്ങാലക്കുട: ഡയപ്പര്‍ മാലിന്യ സംസ്‌കരണത്തിന് ശാശ്വത പരിഹാരവുമായി ഇരിങ്ങാലക്കുട നഗരസഭ. നഗരസഭയും ആക്രി ഏജന്‍സിയും ചേര്‍ന്നാണ് പൊതുജനങ്ങളില്‍ നിന്ന് ആപ്പ് വഴി ഡയപ്പര്‍ ശേഖരിച്ച് സംസ്‌കരിക്കാനുള്ള പദ്ധതി ആവിഷ്‌കരിച്ചിരിക്കുന്നത്. പ്ലേസ്റ്റോറില്‍ നിന്ന് ആക്രി ആപ്പ് ഡൗണ്‍ലോഡ് ചെയ്ത് അതില്‍ വാര്‍ഡ് നമ്പറും വിലാസവും നല്‍കിയാല്‍ ഏതു ദിവസമാണ് ഡയപ്പര്‍ മാലിന്യം ശേഖരിക്കാന്‍ ബന്ധപ്പെട്ടവര്‍ വീടുകളിലേക്ക് എത്തുക എന്ന വിവരം ലഭിക്കും. ഒരു കിലോയ്ക്ക് 45 രൂപയും 12 ശതമാനം ജിഎസ്ടിയുമാണ് ഇതിനായി ഉപഭോക്താക്കള്‍ നല്‍കേണ്ടത്. ഡയപ്പര്‍ മാലിന്യം ശേഖരിക്കുന്ന സേവന വണ്ടിയുടെ ഫ്ലാഗ് ഒഫ് നഗരസഭ ചെയര്‍പേഴ്സണ്‍ മേരിക്കുട്ടി ജോയ് നിര്‍വഹിച്ചു. എല്ലാ കൗണ്‍സിലര്‍മാരും ജനങ്ങള്‍ക്ക് ഡയപ്പര്‍ സംസ്‌കരണം നടത്തുന്നതിനുള്ള നിര്‍ദേശങ്ങള്‍ നല്‍കണമെന്നും ചെയര്‍പേഴ്സണ്‍ പറഞ്ഞു.

പെരിങ്ങൽകുത്തിൽ 24 മെഗാവാട്ടിന്‍റെ ഒരു ജനറേറ്റർകൂടി സ്ഥാപിക്കാൻ നീക്കം

ചാലക്കുടി: പെരിങ്ങൽകുത്ത് എസ്എച്ച്പി സ്റ്റേജ് രണ്ട് എന്നപേരിൽ 24 മെഗാവാട്ടിന്‍റെ ഒരു ജനറേറ്റർകൂടി സ്ഥാപിക്കാൻ വൈദ്യുതി ബോർഡ് ആലോചിക്കുന്നു. പദ്ധതിയുമായി ബന്ധപ്പെട്ട് മാൻടെക് കൺസൾട്ടന്‍റ്സ് പ്രൈവറ്റ് ലിമിറ്റഡ് എന്ന ഉത്തർപ്രദേശിലെ നോയിഡയിലുള്ള സ്ഥാപനം പരിസ്ഥിതി ആഘാതപഠനം നടത്തി. പദ്ധതിയും പഠനവും സംബന്ധിച്ച പൊതുതെളിവെടുപ്പ് നാളെ 11 ന് അതിരപ്പിള്ളി കണ്ണംകുഴിയിലെ കമ്യൂണിറ്റി ഹാളിൽ നടത്തും. നിലവിലുള്ള പെരിങ്ങൽകുത്ത് അണക്കെട്ടും ജലസംഭരണിയും ഉപയോഗപ്പെടുത്തിക്കൊണ്ട് 24 മെഗാവാട്ടിന്‍റെ ഒരു ജനറേറ്റർകൂടി സ്ഥാപിക്കുക എന്നതാണ് പദ്ധതി ലക്ഷ്യം. പെരിങ്ങൽകുത്ത് എസ്എച്ച്പി സ്റ്റേജ് ഒന്നിൽ നിർമിച്ച ടണലും പെൻസ്റ്റോക്കും സ്റ്റേജ് രണ്ടിന് ആവശ്യമായ വെള്ളംകൂടി കൊണ്ടുവരാൻ പാകത്തിലാണ് നിർമിച്ചിട്ടുള്ളത്. അതിനാൽതന്നെ അധികമായി 140 മീറ്റർ പെൻസ്റ്റോക്ക് പൈപ്പും ടർബൈനും ജനറേറ്ററും മറ്റ് അനുബന്ധസംവിധാനങ്ങളും മാത്രമാണ് പുതിയതായി നിർമിക്കുന്നത്. 80.7 കോടി രൂപയാണ് പദ്ധതിച്ചെലവായി കണക്കാക്കുന്നത്. മഴക്കാലത്തു പെരിങ്ങൽകുത്തിൽ ലഭ്യമാകുന്ന അധികജലം ഉപയോഗപ്പെടുത്തി 3.64 കോടി യൂണിറ്റും വേനൽക്കാലത്തു വൈകീട്ട് നാലുമണിക്കൂർ സമയങ്ങളിൽ 1.75 കോടി യൂണിറ്റ് വൈദ്യുതിയും ഉൾപ്പെടെ ആകെ 5.38 കോടി യൂണിറ്റ് വൈദ്യുതി ഉത്പാദിപ്പിക്കാൻ കഴിയുമെന്നാണ് പഠന റിപ്പോർട്ട് പറയുന്നത്. പുതിയ നിർമാണപ്രവർത്തനങ്ങൾ പരിമിതമായതിനാൽ പദ്ധതിനിർമാണവുമായി ബന്ധപ്പെട്ട പരിസ്ഥിതി ആഘാതം പരിമിതമായിരിക്കുമെന്നു ചാലക്കുടിപ്പുഴ സംരക്ഷണസമിതി ചൂണ്ടിക്കാട്ടുന്നു. മഴക്കാലത്തിനു ശേഷമുള്ള മാസങ്ങളിൽ വൈദ്യുതി ഉത്പാദനക്രമത്തിൽ വരുത്തുമെന്നു പറയുന്ന മാറ്റങ്ങൾ പുഴയിലെ നീരൊഴുക്കിന്‍റെ തോതിൽ വലിയ വ്യതിയാനങ്ങൾ വരുത്തും. ഇതു ജല ആവാസവ്യവസ്ഥയിൽ സൃഷ്ടിക്കുന്ന ആഘാതങ്ങൾ സംബന്ധിച്ച് പരിസ്ഥിതി ആഘാതപഠനം നിശബ്ദമാണെന്നും സമിതി കുറ്റപ്പെടുത്തി. വർഷം 15 ലക്ഷത്തിലധികം വിനോദസഞ്ചാരികളെ ആകർഷിക്കുന്ന അതിരപ്പിള്ളി, വാഴച്ചാൽ ജലപാതങ്ങൾ പുതിയ പദ്ധതി ഇല്ലാതാക്കുമെന്നും വിനോദസഞ്ചാരമേഖലയെ ഇതു ഗുരുതരമായി ബാധിക്കുമെന്നും പുഴസംരക്ഷണസമിതി മുന്നറിയിപ്പു നൽകുന്നു.

നാലമ്പല തീര്‍ഥാടനം: ആരോഗ്യവകുപ്പ് മിന്നല്‍പരിശോധന നടത്തി

ഇരിങ്ങാലക്കുട: നാലമ്പല ദര്‍ശനത്തിന്‍റെ ഭാഗമായി കൂടല്‍മാണിക്യം ക്ഷേത്രപരിസരത്തുള്ള എല്ലാ ഹോട്ടലുകളിലും റസ്റ്റോറന്‍റുകളിലും നഗരസഭ ഹെല്‍ത്ത് സ്‌ക്വാഡ് പരിശോധന നടത്തി. ഇരിങ്ങാലക്കുടയില്‍ എത്തുന്ന തീര്‍ഥാടകര്‍ക്ക് ഭക്ഷ്യസുരക്ഷ ഉറപ്പുവരുത്തുന്നതിനായി വിവിധ ഭക്ഷ്യശാലകളിലെ ശുചിത്വം പരിശോധിക്കുകയും ജീവനക്കാര്‍ക്ക് ബോധവത്ക്കരണം നടത്തുകയും ചെയ്തു. ന്യൂനതകള്‍ കണ്ടെത്തിയ സ്ഥാപനങ്ങള്‍ക്ക് നോട്ടീസും നല്‍കി. ബസ് സ്റ്റാന്‍ഡ് കെട്ടിടത്തില്‍ പ്രവര്‍ത്തിക്കുന്ന സോള്‍ട്ട് പെപ്പര്‍ എന്ന് റസ്റ്റോറന്‍റിനു നോട്ടീസ് നല്‍കി. നഗരസഭ ആരോഗ്യ വിഭാഗം സീനിയര്‍ പബ്ലിക് ഹെല്‍ത്ത് ഇന്‍സ്പെക്ടര്‍ നിസാര്‍ നേതൃത്വം നല്‍കി. പബ്ലിക് ഹെല്‍ത്ത് ഇന്‍സ്പെക്ടര്‍മാരായ എന്‍.എച്ച്. നജ്മ, വിന്‍സി, പി.എം. നീതു എന്നിവര്‍ അടങ്ങിയ സ്‌ക്വാഡ് ആണ് പരിശോധന നടത്തിയത്.

വീട്ടില്‍ വളര്‍ത്തിയിരുന്ന പക്ഷികളെ മോഷ്ടിച്ചതായി പരാതി

പുല്ലൂര്‍: വീട്ടില്‍ വളര്‍ത്തിയിരുന്ന വിലകൂടിയ പക്ഷികള്‍ മോഷണം പോയതായി പരാതി. പുല്ലൂര്‍ ആനരുളി സ്വദേശി ചാമക്കാല വീട്ടില്‍ ജോമോന്‍റെ വീടിന്‍റെ ടെറസിനു മുകളില്‍ വളര്‍ത്തിയിരുന്ന വിലകൂടിയ പക്ഷികളാണ് മോഷണം പോയത്. പ്രത്യേകം സജ്ജമാക്കിയ കൂടുകളിലാണ് വിലകൂടിയ പക്ഷികളെ വളര്‍ത്തിയിരുന്നത്. കഴിഞ്ഞദിവസം രാത്രി ഒന്നിനും രണ്ടിനും ഇടയിലാണ് മോഷണം നടത്തിരുന്നത്. ശബ്ദം കേട്ട് ജോമോനും വീട്ടുകാരും ഉണര്‍ന്നു വന്നപ്പോഴേക്കും മോഷ്ടാക്കള്‍ വിലകൂടിയ പതിനഞ്ചോളം പ്രാവുകളെയും മറ്റുചില പക്ഷികളെയും കൂടും മോഷ്ടിച്ച് കടന്നുകളഞ്ഞിരുന്നു. കൂടുകള്‍ എല്ലാംതന്നെ തുറന്നു കിടക്കുകയായിരുന്നു. കുറച്ചു പ്രാവുകളെയും കിളികളെയും ബാക്കിവച്ചിട്ടാണ് അവര്‍ പോയത്. ഇതില്‍ കോഴികളും ഉണ്ടായിരുന്നു. 15 പ്രാവുകളും ഒരു കോക്ക്ടൈലും അവയെ പരിപാലിക്കുന്ന 2000 രൂപ വിലവരുന്ന കൂടുമാണ് മോഷണം പോയത്. ഈ ദിവസങ്ങളില്‍ സംശയാസ്പദമായി വീടിനു സമീപത്തൊരാളെ കണ്ടിരുന്നതായും അയല്‍ക്കാര്‍ പറഞ്ഞിരുന്നതായി ഇരിങ്ങാലക്കുട പോലീസില്‍ ജോമോന്‍ നല്‍കിയ പരാതിയില്‍ പറയുന്നുണ്ട്. പക്ഷികളെ കുറിച്ചും വീടും പരിസരവും വ്യക്തമായും അറിയാവുന്നവരുമാണ് മോഷണം നടത്തിയതെന്നാണ് സൂചന. ഇത്തരം പക്ഷികളെ വില്പന നടത്തുന്നവരേയും കേന്ദ്രീകരിച്ച് അന്വേഷണം നടക്കുന്നുണ്ട്.

പെരിങ്ങൽകുത്തിലെ ജലനിരപ്പ് താഴ്ത്തണം: പുഴസംരക്ഷണസമിതി

ചാലക്കുടി: പെരിങ്ങൽകുത്തിലെ ജലനിരപ്പ് അടിയന്തരമായി താഴ്ത്തണമെന്ന് പുഴ സംരക്ഷണസമിതി ആവശ്യപ്പെട്ടു. ചാലക്കുടി പുഴയ്ക്കു കുറുകയുള്ള എല്ലാ അണക്കെട്ടുകളും പൂർണസംഭരണശേഷിയോടടുത്തതോടെ പുഴത്തടത്തിലെ വെള്ളപ്പൊക്കഭീഷണി വർധിച്ചിരിക്കയാണ്. ഏറ്റവും മുകളിലുള്ള തമിഴ്നാട് ഷോളയാർ ഡാമിൽ ആഴ്ചകളായി ജലനിരപ്പും സംഭരണവും 100 ശതമാനത്തിനടുത്താണ്. ഇക്കഴിഞ്ഞ ദിവസങ്ങളിൽ ഇവിടെനിന്ന് അധികജലം കേരള ഷോളയാറിലേക്ക് തുറന്നുവിടുന്ന സാഹചര്യമുണ്ടായി. ജലനിരപ്പ് 1823.24 അടി എത്തിയതോടെ ഇന്നലെ രാവിലെ 10ന് പറമ്പിക്കുളത്ത് മൂന്നാമത്തെ പ്രളയ മുന്നറിയിപ്പും പുറപ്പെടുവിച്ചു. ശക്തമായ മഴപെയ്താൽ അവിടെനിന്ന് അടുത്തദിവസങ്ങളിൽ പെരിങ്ങൽക്കുത്തിലേക്ക് വെള്ളം തുറന്നുവിടാൻ സാധ്യതയുണ്ട്. കേരള ഷോളയാറിൽ ഇന്നലെ 86 ശതമാനം ജലമുണ്ട്. കഴിഞ്ഞ നാലു ദിവസംകൊണ്ട് 12 ശതമാനമാണ് ഇവിടെ സംഭരണം വർധിച്ചത്. ഇടനാട്ടിലും കിഴക്കൻ മേഖലകളിലും ഇന്നലെ ശക്തമായ മഴയാണ് ലഭിച്ചത്. ശക്തമായ മഴ തുടരാൻ സാധ്യതയുള്ളതിനാലും മുകളിലെ അണക്കെട്ടുകളിൽ നിന്ന് ഏതുസമയത്തും വെള്ളം തുറന്നു വിടാവുന്ന സാഹചര്യം നിലനിൽക്കുന്നതിനാലും പുഴത്തടത്തിലെ വെള്ളപ്പൊക്ക സാധ്യത കുറയ്ക്കുന്നതിനായി പുഴയിലെ ജലനിരപ്പ് ഇനിയും അധികം വർധിക്കുന്നതിനു മുന്പുതന്നെ പെരിങ്ങൽകുത്തിൽനിന്ന് അടിയന്തരമായി ഒരു സ്ലുയിസ് വാൽവ് എങ്കിലും തുറന്ന് ജലനിരപ്പ് താഴ്ത്താൻ അധികൃതർ തയ്യാറാവണമെന്ന് ചാലക്കുടി റിവർ പ്രൊട്ടക്ഷൻ ഫോറം, ജല ജാഗ്രത സമിതി പ്രവർത്തകർ ആവശ്യപ്പെട്ടു.

ഹൈസ്കൂൾ വിദ്യാർഥികൾക്ക് നീന്തൽപരിശീലനം ആരംഭിച്ചു

പനങ്ങാട്: ഹൈസ്കൂൾ വിദ്യാർഥികൾക്കു വേണ്ടി പോഴങ്കാവ് ഗ്രാമപഞ്ചായത്തു കുളത്തിൽ നടപ്പാക്കുന്ന നീന്തൽ സാക്ഷരത പരിശീലനത്തിന്‍റെ ഉദ്ഘാടനം പ്രസിഡന്‍റ് എം.എസ്.മോഹനൻ നിർവഹിച്ചു. ആരോഗ്യ വിദ്യഭ്യാസകാര്യ സ്റ്റാൻഡിംഗ് കമ്മിറ്റി ചെയർമാൻ പി.എ. നൗഷാദ് അധ്യക്ഷത വഹിച്ചു. ഗ്രാമപഞ്ചായത്ത് പരിധിയിലെ വിദ്യാലയങ്ങളിലും പഞ്ചായത്ത് പരിധിയിൽ താമസിക്കുന്ന ആൺകുട്ടികൾക്കും പെൺകുട്ടികൾക്കുമാണ് പരിശീലനം നൽകുന്നത്. 10 വർഷമായി തുടരുന്ന പദ്ധതിയിലൂടെ ആയിരത്തിലധികം വിദ്യാർഥികൾക്ക് പരിശീലനവും സർട്ടിഫിക്കറ്റുകളും വിതരണം ചെയ്തു. നീന്തലിൽ മികവു തെളിയിക്കുന്ന കുട്ടികൾക്ക് പ്രത്യേക തുടർപരിശീലനവും പദ്ധതിയിലൂടെ നൽകും. നീന്തൽ ഇൻസ്ട്രക്റ്റർ മൂത്തേടത്ത് ഹരിലാലാണ് പരിശീലനം നൽകുന്നത്. വാർഡ് മെമ്പർ കെ.ആർ. രാജേഷ്, ഇംപ്ലിമെന്‍റിംഗ് ഓഫീസർ സൈജ ടീച്ചർ, വാർഡ് മെന്പർ ഇബ്രാഹിം കുട്ടി, കോ-ഓർഡിനേറ്റർ എൻ.എം. ശ്യാംലി, ഇൻസ്ട്രക്റ്റർ ഹരിലാൽ തുടങ്ങിയവർ പ്രസംഗിച്ചു.

മുരിക്കുങ്ങല്‍ റോഡിൽ ഗര്‍ത്തം: യാത്രക്കാർ ഭീതിയിൽ

കോടാലി: പൂവാലിത്തോട് പാലത്തിനുസമീപം മുരിക്കുങ്ങലിലേക്കുള്ള റോഡില്‍ ഗര്‍ത്തം രൂപപ്പെട്ടു. ഇതുവഴിയുള്ള യാത്ര അപകടഭീഷണിയിലായി. സര്‍വീസ് സ്റ്റേഷന്‍ മുരിക്കുങ്ങല്‍ റോഡിലെ കൾവര്‍ട്ട് പാലത്തിനോടു ചേര്‍ന്നാണ് ടാറിട്ട റോഡില്‍ മണ്ണിടിഞ്ഞ് ആഴത്തിലുള്ള ഗര്‍ത്തം രൂപം കൊണ്ടത്. മുരിക്കുങ്ങല്‍, താളൂപ്പാടം, മുപ്ലി പ്രദേശങ്ങളില്‍ നിന്നുള്ളവര്‍ക്ക് കോടാലിയിലേക്ക് എത്താനുള്ള എളുപ്പമാര്‍ഗം കൂടിയാണ് ഈ റോഡ്. ഇവിടെ കൊടകര -വെള്ളിക്കുളങ്ങര റോഡില്‍ നിന്ന് മുരിക്കുങ്ങല്‍ ഭാഗത്തേക്ക് തിരിയുന്ന റോഡിൽ പാലത്തിന്‍റെ കോണ്‍ക്രീറ്റ് സ്ലാബിനോടു ചേര്‍ന്നാണ് ഇപ്പോള്‍ ഗര്‍ത്തം ഉണ്ടായിട്ടുള്ളത്. യാത്രക്കാർക്ക് മുന്നറിയിപ്പ് നല്‍കാനായി ഗര്‍ത്തത്തിനു ചുറ്റും കല്ലുകള്‍ സ്ഥാപിച്ച് താല്‍ക്കാലിക സംവിധാനം ഒരുക്കിയിരിക്കയാണ് നാട്ടുകാര്‍. റോഡിന്‍റെ ദുര്‍ബലാവസ്ഥക്കു പരിഹാരം കാണാന്‍ അടിയന്തിരനടപടി ഉണ്ടാകണമെന്നു നാട്ടുകാര്‍ ആവശ്യപ്പെട്ടു. ഇതുവഴിയുള്ള ഗതാഗതം നിരോധിച്ച് എത്രയും വേഗം അറ്റകുറ്റപണി നടത്തി റോഡ് സഞ്ചാരയോഗ്യമാക്കുമെന്ന് വാര്‍ഡ് അംഗം ലിന്‍റോ പള്ളിപ്പറമ്പന്‍ അറിയിച്ചു.

കൊലപാതക ശ്രമം: ഒളിവിൽകഴിഞ്ഞ രണ്ടുപേർകൂടി അറസ്റ്റിൽ

വാടാനപ്പിള്ളി: യുവാവിനെ തട്ടിക്കൊണ്ടുപോയി കവർച്ചചെയ്തു കൊലപ്പെടുത്താൻ ശ്രമിച്ച കേസിൽ ഒളിവിൽകഴിഞ്ഞിരുന്ന രണ്ടു പേർകൂടി അറസ്റ്റിൽ. വാടാനപ്പിള്ളി സ്വദേശി കളായ ശാന്തി റോഡ് വടക്കൻ വീട്ടിൽ അഭിഷേക് (22 ), പടിയത്ത് വീട്ടിൽ സഞ്ജയ് (22) എന്നിവരെയാണ് തൃശൂർ റൂറൽ ജില്ലാ പോലീസ് മേധാവി ബി. കൃഷ്ണകുമാറിന്‍റെ നേതൃത്വത്തിലുള്ള അന്വേഷണസംഘം അറസ്റ്റ് ചെയ്തത്. അഭിഷേകിനെ തൃപ്രയാറിൽനിന്നും സഞ്ജയ്നെ നടുവിൽക്കരയിൽനിന്നുമാണ് അറസ്റ്റ് ചെയ്തത്. കേസിൽ കുപ്രസിദ്ധ ഗുണ്ടയായ ബിൻഷാദ് ഉൾപ്പടെ എട്ടുപേരെ കഴിഞ്ഞദിവസം അറസ്റ്റുചെയ്ത് റിമാൻഡ് ചെയ്തിരുന്നു. 18 ന് രാത്രിയിൽ വാടാനപ്പിള്ളി നടുവിൽക്കര സ്വദേശിയായ യുവാവിനെയാണ് സംഘം തട്ടിക്കൊണ്ടുപോയി കൊലപ്പെടുത്താൻ ശ്രമിച്ചത്.

ഐവർമഠത്തിൽ വിപുലമായ ഒരുക്കങ്ങൾ

തിരുവില്വാമല: വാവുബലി തർപ്പണത്തിന് വിപുലമായ ഒരുക്കങ്ങളുമായി പാമ്പാടി ഐവർമഠം. മൺമറഞ്ഞുപോയ തങ്ങളുടെ ഉറ്റവരെ സ്മരിച്ച് ആയിരങ്ങൾ നിളാതീരത്ത് പിതൃതർപ്പണം നടത്തും. പാമ്പാടി ഐവർമഠം ക്ഷേത്രപരിസരത്തെ ഭാരതപ്പുഴയോരത്ത് ഇന്നു പുലർച്ചെ മൂന്നുമുതൽ പിതൃതർപ്പണ ചടങ്ങുകൾ ആരംഭിക്കും. പുഴയിലെ സ്നാനത്തിനു‌ശേഷം ഈറനുടുത്ത് പരികർമികൾ ചൊല്ലിക്കൊടുത്ത മന്ത്രങ്ങൾ ഏറ്റുചൊല്ലി സ്ത്രീകളും കുട്ടികളും അടക്കമുള്ളവർ പ്രാർഥനാപൂർവം നിളയിൽ മുങ്ങിനിവരും. ബലി തർപ്പണത്തിനായി വിപുലമായ സൗകര്യങ്ങളാണ് നിളയോരത്ത് ഒരുക്കിയിരിക്കുന്നത് . മഴയുടെ പശ്ചാത്തലത്തിൽ നനയാതെ കർമങ്ങൾ ചെയ്യാനുള്ള ക്രമീകരണങ്ങളാണ് ഐവർമഠം ക്ഷേത്രാധികൃതർ ചെയ്തിട്ടുള്ളത് . പുഴയോരത്ത് പ്രത്യേകം പന്തൽ നിർമിച്ചിട്ടുണ്ട്. തിരക്കുനിയന്ത്രിക്കാനായി ഐവർമഠം ശ്രീകൃഷ്ണ ക്ഷേത്രത്തിൽ പ്രത്യേക കൗണ്ടറുകളും ഇന്നു പുലർച്ച മുതൽ തുറന്നു പ്രവർത്തിക്കും. ഐവർമഠം ശ്രീകൃഷ്ണ ക്ഷേത്രം, രമേഷ് കോരപ്പത്ത്, ബ്രാഹ്മണസഭ എന്നിവരുടെ നേതൃത്വത്തിലാലാണ് ചടങ്ങുകൾ. കർക്കടകവാവ് ബലിതർപ്പണചടങ്ങുകൾക്കു ജില്ലയിലെ പ്രധാനകേന്ദ്രമായ പാമ്പാടി ഐവർമഠത്തിനു പുറമേ മറ്റു സ്നാനഘട്ടങ്ങളിലും ധാരാളമാളുകൾ ബലിയിടാൻ എത്തിച്ചേരും. പ്രതികൂല കാലാവസ്ഥ തുടരുന്നതിനാൽ ബലിതർപ്പണം നടക്കുന്ന കടവിലും പുഴയോരത്തും കനത്ത സുരക്ഷാസംവിധാനങ്ങൾ പോലീസും ഫയർ‌ഫോഴ്സും ഒരുക്കും. തിരക്കുനിയന്ത്രിക്കാനും ഗതാഗതക്കുരുക്ക് ഒഴിവാക്കാനും പ്രത്യേകമായി പോലീസിനെ വിന്യസിക്കും. മോഷ്ടാക്കളെയും മറ്റും നിരീക്ഷിക്കാൻ തിരക്കുള്ളഭാഗത്ത് സിസിടിവി കാമറകളും സ്ഥാപിച്ചിട്ടുണ്ട്.

ഒ. പനീർശെൽവം ഗുരുവായൂരിൽ

ഗുരുവായൂർ: തമിഴ്നാട് മുൻ മുഖ്യമന്ത്രി ഒ. പനീർശെൽവം ക്ഷേത്ര ദർശനം നടത്തി.ഇന്നലെ രാവിലെ പത്തോടെ ക്ഷേത്രത്തിലെത്തിയ അദ്ദേഹം ദർശനശേഷം തുലാഭാരം വഴിപാടും നടത്തി. ശർക്കര, വെണ്ണ എന്നിവകൊണ്ടാണ് തുലാഭാരം നടത്തിയത്. മകൻ ജയപ്രദീപും കൂടെയുണ്ടായിരുന്നു.ദേവസ്വം ചെയർമാൻ ഡോ. വി.കെ. വിജയൻ, ഭരണസമിതി അംഗം മനോജ് ബി. നായർ, ക്ഷേത്രം ഡിഎ പ്രമോദ് കളരിക്കൽ, മാനേജർ എ.വി. പ്രശാന്ത് എന്നിവർ ചേർന്ന് സ്വീകരിച്ചു.

അപകടാവസ്ഥയിലായ കെട്ടിടത്തിൽനിന്നു മാറ്റിയിട്ടും ദുരിതംമാറാതെ വിദ്യാർഥികൾ

സ്വന്തം ലേഖകൻ തിരുവില്വാമല: പാന്പാടി ഗവ. ഹയർ സെക്കൻഡറി സ്കൂളിലെ യുപി വിഭാഗത്തിലെ കുട്ടികൾ പുതിയ അധ്യയനവർഷത്തിൽ പഴയ കെട്ടിടത്തിൽനിന്നു മാറിയിട്ടും ദുരിതം തീരുന്നില്ല. നിലവിൽ ഓഫീസ് പ്രവർത്തിക്കുന്ന കെട്ടിടത്തിനു മുകളിലുള്ള ലൈബ്രറി ഹാളിലേക്കും എട്ടാംക്ലാസ് പ്രവർത്തിക്കുന്ന ക്ലാസ് മുറിയിലേക്കുമാണു കുട്ടികളെ മാറ്റിയത്. ലൈബ്രറി കെട്ടിടം മഴയിൽ ചോർന്നൊലിക്കും. ഷീറ്റ് മേഞ്ഞ ഭാഗത്തെ സീലിംഗ് അടർന്നുവീഴാറായ നിലയിലാണ്. 128 വർഷം പഴക്കമുള്ള കെട്ടിടത്തിലായിരുന്നു ഇതുവരെ പഠനം. ഈ വർഷവും ഫിറ്റ്നസ് സർട്ടിഫിക്കറ്റ് കിട്ടിയെങ്കിലും മേൽക്കൂരയുടെ കഴുക്കോലും ഓടുമെല്ലാം ഏതുനിമിഷവും നിലംപൊത്താവുന്ന സ്ഥിതിയിലായിരുന്നു. ഇതേക്കുറിച്ചു ജൂണ്‍ നാലിനു ദീപിക വാർത്തയും നൽകി. കഴിഞ്ഞദിവസമാണു കുട്ടികളെ പുതിയ സ്ഥലത്തേക്കു മാറ്റിയത്. യുപി വിഭാഗത്തിൽ അഞ്ച്, ആറ്, ഏഴ് ക്ലാസുകളിൽ ഓരോ ഡിവിഷനാണുള്ളത്. ഇതിൽ രണ്ടെണ്ണം ലൈബ്രറി ഹാളിലേക്കും ഒരെണ്ണം എട്ടാംക്ലാസിലേക്കും മാറ്റി. ശോച്യാവസ്ഥ തുടരുന്ന സാഹചര്യത്തിൽ സ് കൂളിൽനിന്നു കുട്ടികളെ മാറ്റുന്ന കാര്യം ആലോചിക്കുമെന്നു രക്ഷിതാക്കളും പറയുന്നു.

തൃപ്രയാർ പാലത്തിൽ വഴിവിളക്കുകളില്ല: നട്ടുച്ചപ്പന്തം കൊളുത്തി യൂത്ത്കോൺഗ്രസ്

തൃപ്രയാർ: പാലത്തിലെ വഴിവിളക്കുകൾ കത്തിക്കണമെന്ന ആവശ്യവുമായി "നട്ടുച്ചപ്പന്തം കൊളുത്തി' സമരവുമായി യൂത്ത് കോൺഗ്രസ്. നാലമ്പല ദർശനകാലത്തുപോലും തൃപ്രയാർ പാലത്തിലെ വഴിവിളക്കുകൾ തെളിയിക്കാൻ നടപടികൾ സ്വീകരിക്കാത്ത നാട്ടിക - താന്ന്യം പഞ്ചായത്തുകളുടെ അനാസ്ഥക്കെതിരെയാണ് നാട്ടിക നിയോജക മണ്ഡലം യൂത്ത് കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധം സം ഘടിപ്പിച്ചത്. പ്രതിഷേധ സമരം ഡിസിസി ജനറൽ സെക്രട്ടറി ശോഭ സുബിൻ ഉദ്ഘാടനം ചെയ്തു. യൂത്ത് കോൺഗ്രസ് നാട്ടിക നിയോജകമണ്ഡലം പ്രസിഡന്‍റ് അഡ്വ. എ.വി. യദുകൃഷ്ണൻ, ബ്ലോക്ക് കോ ൺഗ്രസ് വൈസ് പ്രസിഡന്‍റ്് ഷൈൻ നാട്ടിക, യൂത്ത് കോൺഗ്രസ് ജില്ലാ ജനറൽ സെക്രട്ടറി ബിനോയ് ലാൽ തുടങ്ങിയവർ സംസാരിച്ചു.

വരന്തരപ്പിള്ളിയില്‍ രണ്ടു മാസംമുന്പ് ടാറിംഗ് നടത്തിയ റോഡ് തകര്‍ന്നു

നന്തിപുലം: വരന്തരപ്പിള്ളി പഞ്ചായത്തില്‍ രണ്ടുമാസംമുന്പ് ടാറിംഗ് നടത്തിയ ആറ്റപ്പിള്ളി - നമ്പിടിമൂല റോഡ് തകര്‍ന്നു. ഒരു കിലോമീറ്ററിലധികം ദൂരമുള്ള റോഡാണ് കഴി ഞ്ഞ മാര്‍ച്ചില്‍ ടാറിംഗ് പൂര്‍ത്തീകരിച്ചത്. 35 ലക്ഷം രൂപ ചെലവഴിച്ച് ടാറിട്ട റോഡ് പലയിടത്തും കുണ്ടും കുഴിയും നിറഞ്ഞ നിലയിലാണ്. നിര്‍മാണം‌കഴിഞ്ഞ് ഒരാഴ്ചക്കുള്ളില്‍ ടാറിംഗ് ഇളകിപ്പോയതായി നാട്ടുകാര്‍ ആരോപിച്ചു. നിരവധി വാഹനങ്ങള്‍ കടന്നുപോകുന്ന റോഡില്‍ കുഴികള്‍ രൂപപ്പെട്ടതോടെ യാത്രക്കാര്‍ ദുരിതത്തിലായിരിക്കുകയാണ്. റോഡ് നിര്‍മാണത്തിലെ അഴിമതി അന്വേഷിക്കണമെന്നാവശ്യപ്പെട്ട് കോണ്‍ഗ്രസ് വരന്തരപ്പിള്ളി മണ്ഡലം വൈസ് പ്രസിഡന്‍റ് ലിയോ പോള്‍ വിജിലന്‍സില്‍ പരാതി നല്‍കി. ടാറിംഗ് കഴിഞ്ഞ് ഒരു മാസത്തിനുള്ളില്‍ റോഡ് തകര്‍ന്നത് അറിഞ്ഞിട്ടും കരാറുകാരന് മുഴുവന്‍ഫണ്ടും പഞ്ചായത്ത് നല്‍കിയതായി കോണ്‍ഗ്രസ് മണ്ഡലം കമ്മിറ്റി ആരോപിച്ചു. ടാറിംഗ് നടത്തി മാസങ്ങള്‍ക്കുള്ളില്‍ റോഡ് തകര്‍ന്നതില്‍ പ്രതിഷേധിച്ച് കോണ്‍ഗ്രസ് പ്രവര്‍ത്തകര്‍ ധര്‍ണ നടത്തി. മണ്ഡലം പ്രസിഡന്‍റ് ഇ.എ. ഓമന ഉദ്ഘാടനം ചെയ് തു. വാര്‍ഡ് പ്രസിഡന്‍റ് ലോന പള്ളത്ത് അധ്യക്ഷത വഹിച്ചു. യുഡിഎഫ് ചെയര്‍മാന്‍ കെ.എല്‍. ജോസ്, ലിയോപോള്‍, സിജോ ഞെരിഞ്ഞമ്പിള്ളി, റിന്‍റോ ഞെരിഞ്ഞമ്പിളി തുടങ്ങിയവര്‍ സംസാരിച്ചു.

ജൂബിലിയിൽ കെമിക്കൽ ബയോളജി നാഷണൽ സിന്പോസിയം

തൃശൂർ: കെമിക്കൽ ബയോളജി ആൻഡ് ഡ്രഗ് ഡിസൈൻ എന്ന വിഷയത്തെ ആസ്പദമാക്കി ജൂബിലി ഗവേഷണകേന്ദ്രത്തിന്‍റെ ആഭിമുഖ്യത്തിൽ നാഷണൽ സിന്പോസിയം സംഘടിപ്പിച്ചു. മൂന്നു സംസ്ഥാനങ്ങളിൽനിന്നായി തൊണ്ണൂറോളംപേർ പങ്കെടുത്തു. ആധുനിക കോശ എൻജിനീയറിംഗിലൂടെ കാൻസറിനെതിരായി മരുന്നു വികസിപ്പിക്കുന്നതിനെപ്പറ്റി ഡോ.ടി.ആർ. സന്തോഷ്കുമാർ (ആർജിസിബി തിരുവനന്തപുരം) പ്രബന്ധം അവതരിപ്പിച്ചു. മൾട്ടി ഡ്രഗ് റസിസ്റ്റന്‍റ് ബാക്ടീരിയക്കെതിരേ മരുന്നുഗവേഷണത്തിനു സഹായിക്കുന്ന വിവിധതരം കംപ്യൂട്ടർ അധിഷ്ഠിത പഠനങ്ങളെപ്പറ്റി ഡോ. സിനോഷ് സ്കറിയാച്ചൻ (സെന്‍റ് പയസ് കോളജ്, കാസർഗോഡ്)വിവരിച്ചു. കംപ്യൂട്ടേഷണൽ കെമിസ്ട്രിയും ബയോളജിയും എങ്ങനെ മരുന്നു വികസിപ്പിക്കാൻ ഉപയോഗിക്കാമെന്നു ഡോ. സുസ്മിത ഡേ (കാലിക്കട്ട് യൂണിവേഴ്സിറ്റി) വിശദീകരിച്ചു. ഡോ. ജിതേഷ് കോട്ടൂർ(വൈറോളജി ഇൻസ്റ്റിറ്റ്യൂട്ട്, തിരുവനന്തപുരം), ഡോ. രമ്യ ചന്ദ്രൻ (ജൂബിലി, തൃശൂർ) എന്നിവരും പ്രബന്ധങ്ങൾ അവതരിപ്പിച്ചു. സിന്പോസിയത്തിൽ അവതരിപ്പിച്ച 45 പ്രബന്ധങ്ങളുടെ സംക്ഷിപ്തരൂപം പുസ്തകമായി പ്രസിദ്ധീകരിച്ചതിന്‍റെ പ്രകാശനം ജൂബിലി അസി. ഡയറക്ടർ ഫാ. ടെറിൻ മുള്ളക്കര റിസർച്ച് ഡയറക്ടർ ഡോ. ഡി.എം. വാസുദേവനു നൽകി നിർവഹിച്ചു. ഡോ. ദിലീപ് വിജയൻ സ്വാഗതവും ഡോ. പി.ആർ. വർഗീസ് നന്ദിയും രേഖപ്പെടുത്തി. ഡോ. വി.ജെ. ഷൈൻ (ആർജിസിബി, തിരുവനന്തപുരം) മികച്ച പ്രബന്ധ അവതാരകനായി തെരഞ്ഞെടുക്കപ്പെട്ടു. ഹിമശ്രീ (ജൂബിലി), ആർ. പാർവതി (കേരള യൂണിവേഴ്സിറ്റി), ടി. അമൃത (യെനൊപോയ യൂണിവേഴ്സിറ്റി) എന്നിവർക്കു പോസ്റ്റർ വിഭാഗത്തിൽ അവാർഡുകൾ ലഭിച്ചു.

വീട്ടിലേക്കുള്ള വഴി കൊട്ടിയടച്ചു

നടത്തറ: റോഡ് വികസനത്തിന് 10 സെന്‍റ്് സ്ഥലം വിട്ടുനൽകിയിട്ടും വീട്ടിലേക്കുള്ള വഴി കൊട്ടിയടച്ച് വയോധികയായ വീട്ടമ്മയോട് അധികൃതരു ടെ ക്രൂരത. വലക്കാവ് ചാലംപാടം നിരപ്പിലാവുങ്കൽ സൂസമ്മ തോമസിനാണ് വീടിനുപുറത്തിറങ്ങാൻ പറ്റാത്തവിധം അധികൃതരുടെ ക്രൂരത. ചാലംപാടം - കൂട്ടാല ശ്രീധരിപാലം അപ്രോച്ച് റോഡിന്‍റെ നിർമാണത്തിന്‍റെ ഭാഗമായാണ് സൂസമ്മയുടെ വീടിന്‍റെ മുൻവശം ഒമ്പതടിക്കുമുകളിൽ ഉയരത്തിൽ കോൺക്രീറ്റ് ചെയ്ത് അടച്ചുകെട്ടിയത്. രണ്ടടിമാത്രമേ റോഡ് ഉയർത്തി നിർമിക്കുകയുള്ളു എന്ന ഉറപ്പിലാണ് വീട്ടുമുറ്റത്തിന്‍റെ മുക്കാൽഭാഗം ഉൾപ്പടെയുള്ള ഒമ്പതര സെന്‍റിലധികം ഭൂമി സർക്കാരിനു വിട്ടുനൽകിയത്. മൂന്നുവർഷം മുൻപ് ഭർത്താവ് തോമസും ഒന്പതുമാസം മുൻപ് മൂത്ത മകൻ ബെന്നിയും മരിച്ച സൂസമ്മയ്ക്ക് ഇപ്പോൾ വീടിനുപുറത്തേക്ക് ഇറങ്ങാൻപറ്റാത്തവിധം വീടിനുമുന്നിൽ വൻമതിൽ തീർത്ത് ക്രൂരത കാട്ടിയിരിക്കുന്നത്. പൊതുമരാമത്ത് മന്ത്രി മുഹമ്മദ് റിയാസ്, ജില്ലാ കളക്ടർ, നടത്തറ പഞ്ചായത്ത് എന്നിവർക്കുപരാതി നൽകിയെങ്കിലും യാതൊരു നടപടിയും ഉണ്ടായില്ലെന്ന് കുടുംബാംഗങ്ങൾ പറഞ്ഞു. മക്കൾക്ക് എഴുതിക്കൊടുത്ത ഇരുവശത്തുമുള്ള ഭൂമി വിട്ടുതന്നാൽ റോഡ് നിർമിച്ചുനൽകാമെന്ന വിചിത്രവാദമാണ് പഞ്ചായത്ത് ഉന്നയിക്കുന്നത്. ഇത് ഒരിക്കലും പ്രാവർത്തികമായ കാര്യമല്ലെന്നും വെള്ളം കയറുന്ന ഭാഗത്ത് പാലം ഉയർത്തിനിർമിക്കാതെ അനാവശ്യമായിട്ടാണ് ഇവിടെ റോഡ് ഉയർത്തി നിർമിക്കുന്നതെന്നും വീട്ടുകാർ പറഞ്ഞു.

ടോറസ് ലോറി മറിഞ്ഞു: ഡ്രൈവർ രക്ഷപ്പെട്ടു

കയ്പമംഗലം: പെരിഞ്ഞനത്ത് ടോറസ് ലോറി മറിഞ്ഞ് അപകടം. ഡ്രൈവർ അത്ഭുതകരമായി രക്ഷപ്പെട്ടു. കഴിഞ്ഞദിവസം പുലർച്ചെയാണ് അപകടം ഉണ്ടായത്. നിർദിഷ്ട ദേശീയപാത നിർമാണക്കമ്പനിയുടെ ടോറസാണ് ലോഡ് ഇറക്കാൻ ശ്രമിക്കുന്നതിനിടെ മറിഞ്ഞത്. വാഹനത്തിൽനിന്ന് മെറ്റൽ ഇറക്കിയെങ്കിലും ടോറസ് വൈകിയും നിവർത്തിയിട്ടില്ല. പെരിഞ്ഞനം കൊറ്റംകുളം പാലത്തിന് തെക്കുഭാഗത്താണ് അപകടമുണ്ടായത്. അപകടത്തിൽ ആർക്കും പരിക്കില്ല.

കാർ മീഡിയനിലെ ചാലിലേക്കു മറിഞ്ഞു

മുരിങ്ങൂർ: അടിപ്പാതനിർമാണംനടക്കുന്ന ദേശീയപാത മുരിങ്ങൂരിൽ ഇന്നോവ കാർ മീഡിയനിലെ ചാലിലേക്ക് മറിഞ്ഞു. യാത്രക്കാർ പരിക്കേൽക്കാതെ രക്ഷപ്പെട്ടു. തൃശൂരിൽനിന്നു അങ്കമാലിയിലേക്കുള്ള ട്രാക്കിൽ ഇന്നലെ ഉച്ചകഴിഞ്ഞ് 2.15 ഓടെയായിരുന്നു അപകടം. മൂന്നാർ ബൈസൺവാലിയിൽനിന്നു തൃശൂരിലെത്തി തിരിച്ചു മൂന്നാറിലേക്കു മടങ്ങുന്നതിനിടെയാണ് കാർ അപകടത്തിൽപ്പെട്ടത്. മുന്നിൽ സഞ്ചരിച്ചിരുന്ന വാഹനം ഇടത്തെ ട്രാക്കിൽനിന്നു പെട്ടെന്ന് വലത്തെ ട്രാക്കിലേക്ക് പ്രവേശിച്ചപ്പോള്‌ അതിൽ ഇടിക്കാതിരിക്കാൻ പൊടുന്നനെ ബ്രേക്കിട്ടതിനെ തുടർന്ന് നിയന്ത്രണംവിട്ട ഇന്നോവ കാർ മീഡിയനിലേക്ക് ഇടിച്ചുകയറി ചാലിലേക്കു വീഴുകയായിരുന്നു. ക്രെയിൻ എത്തിച്ച് വാഹനം കയറ്റുന്നതുവരെ ഗതാഗതക്കുരുക്ക് രൂക്ഷമായി തുടർന്നു. മുരിങ്ങൂർ മുതൽ പൊങ്ങം വരെ ദിനംപ്രതിയെന്നോണം അപകടമുണ്ടാകുന്നത് ജനങ്ങളെ ആശങ്കയിലാഴ്ത്തുകയാണ്.

വെളളിക്കുളങ്ങര - വെറ്റിലപ്പാറ; മലയോര ഹൈവേ നിർമാണം ആരംഭിച്ചു

ചായ്പൻകുഴി: മലയോരഹൈവേ നിർമാണം ആരംഭിച്ചു. വെളളിക്കുളങ്ങര മുതൽ വെറ്റിലപ്പാറ വരെയുളള 18.25 കി.മീറ്റര്‌ ദൂരത്തിൽ കോർമലയിൽനിന്ന് തുടങ്ങി ചായ്പൻകുഴിവരെയുളള റോഡിലെ കലുങ്ക്, കാന എന്നിവയുടെ നിര്‍മാണജോലികൾ ദ്രുതഗതിയിൽ പുരോഗമിക്കുകയാണ്. മഴക്കാലമാണെങ്കിലും ജോലികൾ മുടക്കംകൂടാതെ നടത്താൻ കരാർ കമ്പനി പരിശ്രമിക്കുന്നുണ്ട്. ചായ്പൻകുഴി പള്ളി ജംഗ്ഷൻവരെ പണികളെത്തി. ചായ്പൻകുഴി - വെട്ടിക്കുഴി റോഡിലെ നഷ്ടപരിഹാരത്തുക ലഭിച്ചവരുടെ വീടുകളിൽ കെആർഎഫ്ബി അസി.എക്സിക്യൂട്ടീവ് എന്‌ജിനീയറും പഞ്ചായത്ത് - ജനപ്രതിനിധികളുമെത്തി മതിൽ, കിണർ എന്നിവ നീക്കംചെയ്യാൻ ആവശ്യപ്പെട്ടു. 12 മീറ്റർ വീതിയിലാണ് റോഡ് നിർമിക്കേണ്ടത്. നഷ്ടപരിഹാരത്തുക കൂടുതൽ വേണമെന്നാവശ്യപ്പെട്ട് ചില ഭൂവുടമകൾ കോടതിയെ സമീപിച്ചിട്ടുണ്ട്. ഭൂരിഭാഗംപേരും ഭൂമി വിട്ടുനല്കിക്കഴിഞ്ഞു.

മുരിങ്ങൂരിലും ചിറങ്ങരയിലും അടിമുടി പൊടിപടലം !

കൊരട്ടി: ദേശീയപാത വികസനത്തിന്‍റെ ഭാഗമായി നിർമാണം നടക്കുന്ന മുരിങ്ങൂർ, ചിറങ്ങര മേഖലകളിൽ അടിമുടി പൊടി. മഴ പത്തുമിനിറ്റ് മാറിനിന്നാൽ അന്തരീക്ഷംനിറയെ പൊടിയാണ്. മുരിങ്ങൂരിൽ കോട്ടമുറി ജംഗ്ഷൻ മുതൽ ഡിവൈൻനഗർ അടിപ്പാത കഴിയുംവരെയും ചിറങ്ങരയിൽ പെരുമ്പി മുതൽ പൊങ്ങം വരെയുമാണ് പൊടിപടലങ്ങൾ മൂലം വാഹനയാത്രികരും കാൽനടയാത്രക്കാരും ബുദ്ധിമുട്ടുനേരിടുന്നത്. ഭാരവണ്ടികൾ കടന്നുപോകുമ്പോൾ തൊട്ടുമുന്നിൽ സഞ്ചരിക്കുന്ന വാഹനംപോലും കാണാനാകാത്ത ഗതികേടിലാണ് പിന്നിലുള്ള വാഹനയാത്രികർ. റോഡിന്‍റെ ഇരുഭാഗങ്ങളിലും പ്രവർത്തിക്കുന്ന കച്ചവടസ്ഥാപനങ്ങൾ നേരിടുന്ന പ്രതിസന്ധി ചെറുതല്ല. ഗതാഗതക്കുരുക്കിനുപിന്നാലെയുള്ള ഇരുട്ടടിയാണ് അന്തരീക്ഷത്തിലെ പൊടി. സ്ഥാപനങ്ങൾ അടച്ചുപൂട്ടണ്ടേ അവസ്ഥയിലാണ് കാര്യങ്ങൾ പോകുന്നതെന്നാണ് വ്യാപാരികൾ പറയുന്നത്. നിർമാണത്തിന്‍റെ പ്രാരംഭഘട്ടങ്ങളിൽ ടാങ്കറിൽ വെള്ളമെത്തിച്ച് പൊടി ഉയരാതിരിക്കാനുള്ള നടപടികൾ ഉണ്ടായിരുന്നെങ്കിലും നിലവിൽ ആരും തിരിഞ്ഞുനോക്കുന്നില്ലെന്ന് വ്യാപകപരാതിയുണ്ട്.

മുരിങ്ങൂരിൽ അടിപ്പാതയുടെ ക്രോസിംഗ് ഏരിയ തുറന്നു; ചിറങ്ങരയിൽ ഇന്നു തുറന്നേക്കും

മുരിങ്ങൂർ: നിർമാണത്തിന്‍റെ പ്രാരംഭഘട്ടം മുതൽ വിവാദങ്ങൾക്കും ഒട്ടേറെ പ്രതിഷേധങ്ങൾക്കും സാക്ഷ്യംവഹിച്ച മുരിങ്ങൂർ, ചിറങ്ങര അടിപ്പാതകളിൽ മുരിങ്ങൂർ അടിപ്പാതയുടെ ക്രോസിംഗ് ഏരിയ തുറന്നു. ചിറങ്ങര അടിപ്പാതയുടെ ക്രോസിംഗ് ഏരിയ ഇന്ന് തുറന്നേക്കും. രണ്ടിടങ്ങളിലും ഭിത്തികൾ നിർമിച്ച് നാലരമീറ്റർ ഉയരത്തിൽ ഒരു സ്പാനിലുള്ള അടിപ്പാതയാണ് നിർമിക്കുന്നത്. ഇതിൽ ആദ്യ കടമ്പയാണ് പൂർത്തിയായിരിക്കുന്നത്. ക്യൂറിംഗ് പിരിയഡ് പൂർത്തിയാക്കി കോൺക്രീറ്റിംഗിന് താങ്ങായി നിർത്തിയിരുന്ന ഇരുമ്പ് തൂണുകൾ നീക്കംചെയ്തിട്ടുണ്ട്. ഇതാേടെ ദേശീയപാതയ്ക്കു കുറുകെകടക്കാൻ സൗകര്യമായി. ഔദ്യോഗികമായി തുറന്നിട്ടില്ലെങ്കിലും ഇതിലൂടെ ചെറുവാഹനങ്ങളും കാൽനടയാത്രക്കാരും കടന്നുപോകുന്നുണ്ട്. അടിപ്പാതയ്ക്ക് രണ്ടു ഭാഗത്തേക്കുള്ള അപ്രോച്ച് റോഡിന്‍റെ നിർമാണം മന്ദഗതിയിലാണ്. മഴയും നിർമാണത്തെ സാരമായി ബാധിക്കുന്നുണ്ടെങ്കിലും ആവശ്യത്തിന് തൊഴിലാളികൾ നിർമാണസ്ഥലങ്ങളിലില്ല.

പരിസ്ഥിതി ചലച്ചിത്രമേള കൊടിയിറങ്ങി

ഇരിങ്ങാലക്കുട: അന്താരാഷ്ട്ര പരിസ്ഥിതി ചലച്ചിത്രമേളയില്‍ ശ്രദ്ധ നേടി അദ്രയിയും മണ്ണും. സ്വതന്ത്ര ഇന്ത്യയിലെതന്നെ ആദ്യ പരിസ്ഥിതിസമരങ്ങളിലൊന്നായ ചാലിയാര്‍ സമരത്തിന്‍റെ നായകനായ കെ.എ. റഹ‌്മാന്‍റെ ജീവചരിത്രം അടയാളപ്പെടുത്തുന്ന അദ്രയി എഴുത്തുകാരികൂടിയായ ഫര്‍സാനയുടെ സൃഷ്ടിയാണ്. മൂന്നാറില്‍ ഭൂമിക്കും മണ്ണിനും അവകാശങ്ങള്‍ക്കുമായി പൊമ്പിളൈ ഒരുമൈയുടെ നേതൃത്വത്തില്‍നടന്ന പോരാട്ടങ്ങളിലൂടെ സഞ്ചരിക്കുന്ന രാംദാസ് കടവല്ലൂരിന്‍റെ മണ്ണും സെന്‍റ് ജോസഫ്സ് കോളജില്‍നടന്ന മേളയുടെ പ്രധാന ആകര്‍ഷണമായി. പ്രദര്‍ശനാനന്തരം സംവിധായകന്‍ രാംദാസ് കടവല്ലൂര്‍, ഫോട്ടോഗ്രാഫര്‍ പ്രതാപ് ജോസഫ് എന്നിവരെ തൃശൂര്‍ കില കോളജ് പ്രിന്‍സിപ്പല്‍ ഡോ. എസ്. ശ്രീകുമാര്‍ ആദരിച്ചു. പരിസ്ഥിത മേളയില്‍ പ്രദര്‍ശിപ്പിച്ച ചിത്രങ്ങളുടെ അണിയറ പ്രവര്‍ത്തകരായ അജയ് കോവൂര്‍, കെ. ബിനു, അരവിന്ദ് മോഹന്‍രാജ്, ഇ.ജി. ശ്രീകാന്ത്, കെ.വി. ബിനോജ് എന്നിവരും മേളയുടെ സാന്നിധ്യങ്ങളായി. വൈകീട്ടുനടന്ന സമാപന ചടങ്ങില്‍ കോളജ് പ്രിന്‍സിപ്പല്‍ സിസ്റ്റര്‍ ഡോ. ബ്ലെസി, സംവിധായകന്‍ പ്രതാപ് ജോസഫ് എന്നിവര്‍ചേര്‍ന്ന് രണ്ടാമത് പരിസ്ഥിതി ചലച്ചിത്രമേളയുടെ കൊടിയിറക്കി.

ഇരിങ്ങാലക്കുട കെഎസ്ആര്‍ടിസിയിലെ പ്രതിസന്ധി: സംരക്ഷണസമിതി രൂപവത്കരിച്ചു

ഇരിങ്ങാലക്കുട: പൂട്ടല്‍ഭീഷണി നേരിടുന്ന ഇരിങ്ങാലക്കുട കെഎസ്ആര്‍ടിസി ഓപ്പറേറ്റിംഗ് സെന്‍ററിനെ കൈപിടിച്ചുയര്‍ത്താന്‍ നാട്ടുകാര്‍ രംഗത്ത്. ആവശ്യത്തിന് ജീവനക്കാരില്ലാത്തതിനാല്‍ പ്രതിസന്ധി നേരിടുന്ന സെന്‍ററാണിത്. ഇപ്പോഴത്തെ നിലതുടര്‍ന്നാല്‍ അധികംവൈകാതെ സെന്‍ററിന് പൂട്ടുവിഴുമെന്നുള്ള ആശങ്ക കാരണമാണ് സംരക്ഷണസമിതി രൂപവത്കരിച്ചിരിക്കുന്നത്. യോഗം തോമസ് ഉണ്ണിയാടന്‍ ഉദ്ഘാടനംചെയ്തു. കൊരുമ്പിശേരി റെസിഡന്‍റ്സ് അസോസിയേഷന്‍ പ്രസിഡന്‍റ് രാജീവ് മുല്ലപ്പിള്ളി അധ്യക്ഷനായി. നേരത്തെ 29 സര്‍വീസുകള്‍ ഓപ്പറേറ്റ് ചെയ്തിരുന്ന ഇരിങ്ങാലക്കുടയില്‍നിന്ന് ഇപ്പോള്‍ 16 സര്‍വീസുകള്‍ മാത്രമാണ് ഓപ്പറേറ്റ് ചെയ്യുന്നത്. വലിയ വിജയമായ ബജറ്റ് ടൂറിസവും ജീവനക്കാരില്ലാത്തതിനാല്‍ ഒഴിവാക്കി. ഡ്രൈവര്‍മാരുടേയും കണ്ടക്ടര്‍മാരുടേയും ഒഴിവുനികത്തുന്നതിന് പുറമെ അക്കൗണ്ട്സ് സെക്ഷനില്‍ കുറവുള്ള ക്ലാര്‍ക്കുമാരെ നിയമിക്കുകയുംവേണം. എന്നാല്‍അതിനാവശ്യമായ നടപടിയും ജനപ്രതിനിധികളുടെ ഭാഗത്തുനിന്നു ഉണ്ടാകുന്നില്ലെന്ന് യോഗം കുറ്റപ്പെടുത്തി. കെഎസ്ആര്‍ടിസി സംരക്ഷണസമിതി ഭാരവാഹികളായി തോമസ് ഉണ്ണിയാടന്‍ - മുഖ്യ രക്ഷാധികാരി, വാര്‍ഡ് കൗണ്‍സിലര്‍ അമ്പിളി ജയന്‍, ടി. അപ്പുക്കുട്ടന്‍നായര്‍ - രക്ഷാധികാരികള്‍, രാജീവ് മുല്ലപ്പിള്ളി -ചെയര്‍മാന്‍, എം.കെ. സേതുമാധവന്‍- ജന. കണ്‍വീനര്‍ എന്നിവരെ തെരഞ്ഞെടുത്തു. വിപുലമായ യോഗം 28ന് നാലിന് ചേരുമെന്ന് സമിതി ഭാരവാഹികള്‍ അറിയിച്ചു.

അമലയിൽ ന്യുട്രീഷൻ കോണ്‍ഗ്രസ്

തൃശൂർ: അമല ആശുപത്രിയിലെ ന്യൂട്രീഷൻ ആൻഡ് ഡയറ്ററ്റിക്സ് വിഭാഗം സംഘടിപ്പിച്ച ഏകദിന ന്യുട്രീഷൻ കോണ്‍ഗ്രസ് മുംബൈ ടാറ്റ മെമ്മോറിയൽ ഹോ സ്പിറ്റലിലെ ക്ലിനിക്കൽ ന്യുട്രീഷൻ ഡിപ്പാർട്ട്മെന്‍റ് മേധാവി ശിവശങ്കർ തിമ്മ്യൻ പ്യാതി ഉദ്ഘാടനം ചെയ്തു. അമല ജോയിന്‍റ് ഡയറക്ടർ ഫാ. ഷിബു പുത്തൻപുരയ്ക്കൽ, ഫാ. ആന്‍റണി പെരിഞ്ചേരി, ന്യുട്രീഷൻ ആൻഡ് ഡയറ്ററ്റിക്സ് ഇൻചാർജ് ഡോ. റീന കെ. ചിറ്റിലപ്പിള്ളി, കാൻസർവിഭാഗം ഡോ. പി. ഉണ്ണികൃഷ്ണൻ, ഡോ. സുനു സിറിയക്, ഡോ. ഫെബിൻ ആന്‍റണി എന്നിവർ ക്ലാസുകൾ നയിച്ചു. വിവിധ ജില്ലകളിൽനിന്നായി 130 പേർ പങ്കെടുത്തു.

ജെഎംഎ വിദ്യാഭ്യാസ പുരസ്കാരസമർപ്പണം

തൃശൂർ: അറിവുമാത്രമല്ല, മാനുഷികമായ തിരിച്ചറിവുകൾകൂടി നേടുന്പോഴേ ഓരോ വിദ്യാർഥിയും സാമൂഹികബോധമുള്ള പുതുതലമുറയായി വളരൂവെന്നു ജയരാജ് വാര്യർ. ജ്വല്ലറി മാനുഫാക്ചറേഴ്സ് അസോസിയേഷൻ അംഗങ്ങളുടെ മക്കൾക്കുള്ള വിദ്യാഭ്യാസപുരസ്കാരസമർപ്പണം ഉദ്ഘാടനം ചെയ്യുകയായിരുന്നു അദ്ദേഹം. ഓരോ വിദ്യാർഥിയും ഇഷ്ടമുള്ളതു പഠിക്കാനും തെരഞ്ഞെടുക്കാനും പ്രാപ്തരാവുന്പോഴാണു വിദ്യാഭ്യാസം അർഥപൂർണമാവുന്നതെന്നും അദ്ദേഹം പറഞ്ഞു. ജെഎംഎ സംസ്ഥാന പ്രസിഡന്‍റ് എ.കെ. സാബു അധ്യക്ഷത വഹിച്ചു. പി.വി. ജോസ്, റാഫി ആന്‍റണി, സി.എസ്. അജയകുമാർ, രവീന്ദ്രൻ ചെറുശേരി, ജെയ്സൻ മാണി, ബാബു മേച്ചേരിപ്പടി, തോമസ് കോനിക്കര, വിജയ് ഹരി, ജെയിംസ് പാലമിറ്റം, കെ.പി. ജോസ്, കുര്യപ്പൻ കെ. എരിഞ്ഞേരി, കെ.പി. വർഗീസ്, പി.വി. കൃഷ്ണകുമാർ എന്നിവർ പ്രസംഗിച്ചു.

വാഴക്കോട് ബസുകൾ കൂട്ടിയിടിച്ച് 30 പേർക്കു പരിക്ക്

പഴയന്നൂർ: വാഴക്കോട്-പ്ലാഴി സംസ്ഥാനപാതയിൽ ഉദുവടിയിൽ സ്വകാര്യ ബസും കെഎസ്ആർടിസി ബസും കൂട്ടിയിടിച്ച് ഡ്രൈവർമാരുൾപ്പടെ മുപ്പതു പേർക്കു പരിക്ക്. ചൊവ്വാഴ്ച വൈകീട്ട് 6.45-ന് ഉദുവടി ചിറങ്കോണം ഇറക്കത്തിലാണ് അപകടം. തൃശൂരിൽനിന്നു മണ്ണാർക്കാട്ടേക്കു പോവുകയായിരുന്ന കെ എസ്ആർടിസി ബസും തിരുവില്വാമലയിൽനിന്നു തൃശൂരിലേക്കു പോവുകയായിരുന്ന അരുവേലിക്കൽ എന്ന സ്വകാര്യബസുമാണു കൂട്ടിയിടിച്ചത്. ഇടിയുടെ ആഘാതത്തിൽ ഇരു ബസുകളുടെയും മുൻഭാഗം ഭാഗികമായി തകർന്നു. പരിക്കേറ്റവരെ വിവിധ ആശുപത്രികളിൽ പ്രവേശിപ്പിച്ചു. സാരമായി പരിക്കേറ്റവരെ തൃശൂർ മെഡിക്കൽ കോളജ് ആശുപത്രിയിലേക്കു മാറ്റി. കോലഴി ആലുക്കവീട്ടിൽ പോ ളി (57), മുളങ്കുന്നത്തുകാവ് കോഞ്ചിറ റോഡിൽ രാജൻ (56), തമിഴ്നാട് ഉശിരാംപെട്ടി സ്വദേശി ശങ്കരൻ (63), കെഎസ്ആർടിസി തൃശൂർ ഡിപ്പോയിലെ മെക്കാനിക്ക് ചേലക്കര വെങ്ങനെല്ലൂർ സ്വദേശി നോബിൾ (42), കെഎസ്ആർടിസി ബസ്‌ ഡ്രൈവർ മുണ്ടൂർ സ്വദേശി കൃഷ്ണകുമാർ എന്നിവരാണു മെഡിക്കൽ കോളജ് ആശുപത്രിയിൽ ചികിത്സയിലുള്ളത്. ഗുരുതരമായി പരിക്കേറ്റ ഡ്രൈ വർ കൃഷ്ണകുമാറിനെ അടിയന്തര ശസ്ത്രക്രിയയ്ക്കു വിധേയനാക്കി. അപകടത്തെത്തുടർന്ന് സംസ്ഥാനപാതയിൽ ഏറെനേരം ഗതാഗതം തടസപ്പെട്ടു. ചേലക്കര പോലീസ് സ്ഥലത്തെത്തി മേൽനടപടികൾ സ്വീകരിച്ചു.

ചില്ലിചിക്കനിൽ സോസ് കൂടിയെന്ന് ആരോപണം; ഹോട്ടൽ ജീവനക്കാരനു മർദനമേറ്റു

തളിക്കുളം: ചില്ലിചിക്കനിൽ സോസ് കൂടിയെന്നാരോപിച്ച് തളിക്കുളം ചിക്ക് സിറ്റി ഹോട്ടലിലെ ജീവ നക്കാരനു മർദനം. ജിവനക്കാരൻ ഷാജഹാനാ(24) ണ് മർദനത്തിൽ പരിക്കേറ്റത്. ഇയാളെ ഏങ്ങണ്ടിയൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവത്തിൽ കേരള ഹോട്ടൽ ആന്‍ഡ് റസ്റ്റോറന്‍റ് അസോസിയേഷൻ തൃപ്രയാർ യൂണിറ്റ് പ്രതിഷേധിച്ചു. പ്രതിയെ ഉടൻ അറസ്റ്റ് ചെയ്യണമെന്നും അല്ലാത്തപക്ഷം ശക്തമായ സമരങ്ങളുമായി മുന്നോട്ടുപോകുമെന്നും സെക്രട്ടറി അക്ഷയ് എസ്. കൃഷ്ണ, പ്രസിഡന്‍റ് ആർ.എ. മുഹമ്മദ് എന്നിവർ പറഞ്ഞു.

കണ്ണാറയിൽ കാറും ഓട്ടോറിക്ഷയും കൂട്ടിയിടിച്ച് രണ്ടുപേർക്കുപരിക്ക്

കണ്ണാറ: ഒരപ്പൻപാറയിൽ കാറും ഓട്ടോറിക്ഷയും കൂട്ടിയിടിച്ചുണ്ടായ അപകടത്തിൽ രണ്ടുപേർക്കു പരിക്കേറ്റു. പട്ടിക്കാട് സ്വദേശി അജയ്, ഓട്ടോ ഡ്രൈവർ പീച്ചി തെക്കേക്കുളം സ്വദേശി അഖിൽ എന്നിവർക്കാണ് പരിക്കേറ്റത്. ഇവരെ തൃശൂർ ജൂബിലി മിഷൻ ആശുപത്രിയിൽ പ്രവേശിപ്പിച്ചു. അജയ് യുടെ പരിക്ക് ഗുരുതരമല്ല. ഇന്നലെ രാത്രി എട്ടരയോടെയാണ് അപകടമുണ്ടായത്. പീച്ചി ഭാഗത്തുനിന്നും വരികയായിരുന്ന കാർ പട്ടിക്കാട് ഭാഗത്തുനിന്നും വരികയായിരുന്ന ഓട്ടോറിക്ഷയിൽ ഇടിക്കുകയായിരുന്നു. ഇടിയുടെ ആഘാതത്തിൽ ഓട്ടോയുടെ മുൻഭാഗം പൂർണമായും തകർന്നു. നാട്ടുകാർ ഏറെ പരിശ്രമിച്ചാണ് പരിക്കേറ്റ ഓട്ടോ ഡ്രൈവറെ പുറത്തെടുത്തത്. പീച്ചി പോലീസും തൃശൂരിൽനിന്നുള്ള അഗ്നിരക്ഷാസേനയും സ്ഥലത്തെത്തി മേൽനടപടികൾ സ്വീകരിച്ചു.

തലപ്പിള്ളി താലൂക്ക് ഓഫീസിൽ അധികൃതരുടെ മൂക്കിനുതാഴെ മാലിന്യനിക്ഷേപകേന്ദ്രം

വടക്കാഞ്ചേരി: തലപ്പിള്ളി താലൂക്ക് ഓഫീസിൽ മാലിന്യം കുന്നുകൂടുന്നു. മാലിന്യനിക്ഷേപകേന്ദ്രമായി മിനിസിവിൽ‌സ്റ്റേഷൻ മാറിയതായി നാട്ടുകാർ. ശുചിത്വനഗരമായി വടക്കാഞ്ചേരി നഗരസഭയെ മാറ്റുവാനുള്ള പ്രവർത്തനം ഒരുഭാഗത്ത് നടക്കുമ്പോഴാണ് സർക്കാർ ഓഫീസുകൾ സ്ഥിതിചെയ്യുന്ന മിനി സിവിൽ സ്റ്റേഷൻ മാലിന്യനിക്ഷേപകേന്ദ്രമായിമാറുന്നത്. മാസങ്ങളായി റോഡരികിൽനിന്നും എടുത്തുകൊണ്ടുവരുന്ന കൊടിതോരണങ്ങളും പ്ലാസ്റ്റിക്കും ചപ്പുചവറുകളുമാണു പ്രദേശത്ത് കൂട്ടിയിട്ടിരിക്കുന്നത്. അധികൃതരുടെ ശ്രദ്ധ യിൽപ്പെടുത്തിയിട്ടും നഗരസഭ നടപടി എടുക്കുന്നില്ലെന്നതാണു ശ്രദ്ധേയം. സിവിൽ സ്റ്റേഷനിൽക്കിടക്കുന്ന മാലിന്യം സിവിൽ സ്റ്റേഷൻ അധികൃതർതന്നെ എടുത്തുമാറ്റണമെന്നാണു നഗരസഭയുടെ നിലപാട്. എന്നാൽ മാലിന്യം നീക്കേണ്ടതു നഗരസഭയാണന്നാണു സിവിൽസ്റ്റേഷൻ അധികൃതരുടെ ഭാഷ്യം. ശുദ്ധജലത്തിനും മറ്റു ആവശ്യങ്ങൾക്കും ഉപയോഗിക്കുന്ന കിണറുകൾക്കു നടുവിലാണു മാലിന്യം കൂട്ടിയിട്ടിരിക്കുന്നത്. അതുകൊണ്ടുതന്നെ കാലവർഷം ശക്തമായതോടെ പനി ഉൾപ്പടെയുള്ള രോഗങ്ങൾ പടർന്നുപിടിക്കുമോ എന്ന ആശങ്കയും ജനങ്ങൾക്കുണ്ട്. ഉടൻതന്നെ മാലിന്യം നീക്കംചെയ്യാൻ നടപടി സ്വീകരിക്കണമെന്ന് നാട്ടുകാരും ആവശ്യപ്പെട്ടു.

സമരങ്ങൾ ഫലംകണ്ടു; വെള്ളക്കെട്ട് പരിഹരിക്കാൻ കാനയ്ക്ക് 85 ലക്ഷം

ചാവക്കാട്: ദേശീയപാത 66 ഒരുമനയൂർ ബൈപ്പാസിലെ വെള്ളക്കെട്ടിനു പരിഹാരമാകുന്നു. 85 ലക്ഷം രൂപ ചെലവിൽ കാനനിർമിക്കുന്നതിനു പൊതുമരാമത്ത് നാഷണൽ ഹൈവേ വിഭാഗം കരാർ നൽകി. റോഡിന്‍റെ ഗുരുതരാവസ്ഥയും റോഡിലെ കാന തകർന്നതിനാൽ വീടുകളിലേക്കുംമറ്റും വെള്ളവും ചെളിയും കയറി ജനങ്ങൾ ദുരിതത്തിലായ വിവരവും മന്ത്രി മുഹമ്മദ് റിയാസിനെ എംഎൽഎ അറിയിച്ചു. തുടർന്നാണു സംസ്ഥാന സർക്കാരി ന്‍റെ നോൺ പ്ലാനിൽ ഉൾപ്പെടുത്തി അടിയന്തരമായി കാന നിർമിക്കുന്നതിന് 85 ലക്ഷം രൂപ അനുവദിച്ചതെന്ന് എൻ.കെ. അക്ബർ എംഎൽഎ അറിയിച്ചു. എംഎൽഎ, നാഷണൽ ഹൈവേ അസിസ്റ്റന്‍റ്് എക്സിക്യൂട്ടീവ് എൻജിനീയർ പി. സുമ, ചെയർപേഴ്‌സൺ ഷീജ പ്രശാന്ത്, മുൻ സ്റ്റാൻഡിംഗ് കമ്മിറ്റി ചെയർമാൻ എ.എച്ച്. അക്ബർ, പി.എസ്. അശോകൻ, ഉദ്യോഗസ്ഥർ തുടങ്ങിയവർ സന്ദർശിച്ചു. റോഡ് നിർമാണത്തിനായി 2.45 കോടി രൂപ അനുവദിക്കുന്നതിനു ദേശീയപാതയ്ക്ക് കത്തും എസ്റ്റിമേറ്റും ലഭിച്ചതായും എത്രയും വേഗം റോഡിന്‍റെ നിർമാണം നടത്തുമെന്നും ദേശീയപാത ചീഫ് എൻജിനീയർ ദീപ്തി ഭാനു എൻ.കെ. അക്ബർ എംഎൽഎയെ അറിയിച്ചു.

കർക്കടക്കവാവുബലി നാളെ: പഞ്ചവടി ഒരുങ്ങി

ചാവക്കാട്: കര്‍ക്കടകവാവിന്‍റെ ഭാഗമായുള്ള ബലിതര്‍പ്പണ ചടങ്ങുകള്‍ക്കായി പഞ്ചവടി വാ കടപ്പുറത്ത് വിപുലമായ ഒരുക്കങ്ങൾ സജീകരിച്ചതായി ഭാരവാഹികൾ വാർത്താസമ്മേളനത്തിൽ അറിയിച്ചു. പഞ്ചവടി ശങ്കരനാരായണ മഹാക്ഷേത്ര കമ്മിറ്റിയുടെ നേതൃത്വത്തിൽ പഞ്ചവടി കടപ്പുറത്ത് വിപുലമായ ഒരുക്കമാണ് തയാറാക്കിയിട്ടു ള്ളത്. ഒരേസമയം ആയിരംപേർക്ക് ബലിയിടാവുന്ന വിശാലമായ പന്തൽ ഉയർന്നുവെന്ന് ക്ഷേത്രം പ്രസിഡന്‍റ് ദിലീപ്കുമാര്‍ പാലപ്പെട്ടി, ജോയിന്‍റ് സെക്രട്ടറി കെ.എസ്. ബാലന്‍ എന്നിവര്‍വാർത്തസമ്മേളനത്തില്‍ അറിയിച്ചു. കര്‍ക്കടക വാവുദിനമായ നാളെ പുലര്‍ച്ചെ 2.30 മുതല്‍ പഞ്ചവടി വാ കടപ്പുറത്ത് പ്രത്യേ കം സജ്ജമാക്കിയ യജ്ഞശാലയില്‍ ബലിതര്‍പ്പണചടങ്ങുകള്‍ ആരംഭിക്കും. രാവിലെ 10 വരെ തുടരും. തിലഹവനം, പിതൃസായൂജ്യപൂജ എന്നിവ നടത്താന്‍ ഭക്തര്‍ക്കു സൗകര്യമുണ്ടാവും. ബലിയിടാനായി കഴിഞ്ഞ വർഷം പതിനായിരം പേർ ശീട്ടാക്കിയിരുന്നു. ഇത്തവണ അതിൽ കൂടുതൽപേർ എത്തും. മുഴുവൻപേർക്കും പ്രഭാതഭക്ഷണം സൗജന്യമായി നൽകും. ബലിയിട്ട് കടലിൽ മുങ്ങിക്കുളിക്കുന്നവരുടെ സുരക്ഷക്കായി പോലീസ്, തീരദേശ പോലീസ്, ആംബുലന്‍സ്, വൈദ്യസഹായം തീരദേശ ജാഗ്രത സമിതിതുടങ്ങിയവരുടെ സാന്നിധ്യവും ഉണ്ടാവുമെന്ന് വിശ്വനാഥന്‍ വാക്കയില്‍, വാസു തറയില്‍ എന്നിവർ പറഞ്ഞു.

ജില്ലാ ആശുപത്രിയിൽ ആവശ്യത്തിന് ഡോക്ടർമാരില്ല; രോഗികൾ വലയുന്നു

വടക്കാഞ്ചേരി: ജില്ലാആശുപത്രിയിൽ ആവശ്യത്തിനു ഡോക്ടർമാർ ഇല്ലാത്തതിനെ തുടർന്ന് രോഗികൾ വലയുന്നു. കാലവർഷം ശക്തിപ്രാപിച്ചതോടെ ദിനംപ്രതി നൂറുകണക്കിനു രോഗികളാണ് ആശുപത്രിയിലെത്തുന്നത്. ഉച്ചയ്ക്ക് ഒരുമണികഴിഞ്ഞാൽ പിന്നെ ഒരു ഡോക്ടറുടെ സേവനംമാത്രമാണ് ഉണ്ടാകുക. പനികൾ പടർന്നുപിടിക്കുന്നതുമൂലം ആശുപത്രിയിൽ എല്ലാ ദിവസവും രോഗികളുടെ നീണ്ടനിരയാണു കാണപ്പെടുന്നത്. വൈകീട്ട് ആറുകഴിഞ്ഞാൽ പിന്നെ എക്സെറെ ഉൾപ്പടെയുള്ള സേവനങ്ങളും ലഭിക്കാറില്ല. ആശുപത്രിയുടെ വികസനംലക്ഷ്യമിട്ട് നിരവധി കെട്ടിടങ്ങളാണ് കോടികൾ മുടക്കി നിർമിക്കുന്നതെങ്കിലും ആവശ്യമായ ഡോക്ടർമാർ ഇല്ലാത്തതാണ് വടക്കാഞ്ചേരി ജില്ലാ ആശുപത്രിയുടെ ശാപം. അതുകൊണ്ടുതന്നെ ബന്ധപ്പെട്ട അധികൃതർ ഉടൻ ഇടപെടണമെന്നാണു നാട്ടുകാരുടെ ആവശ്യം.

ജൂബിലിയിൽ പീഡിയാട്രിക് ശില്പശാല

തൃശൂർ: ഇന്ത്യൻ അക്കാദമി ഓഫ് പീഡിയാട്രിക്സിന്‍റെ പ്രസിഡൻഷ്യൽ ആക്‌ഷൻ പ്ലാൻ 2025 ന്‍റെ ഭാഗമായി ജൂബിലി മിഷൻ മെഡിക്കൽ കോളജിലെ പീഡിയാട്രിക് വിഭാഗത്തിന്‍റെ നേതൃത്വത്തിൽ പീഡിയാട്രിക് ഇസിജി ഹാൻഡ്സ് ഓണ്‍ വർക്ക്ഷോപ്പ് സംഘടിപ്പിച്ചു. ആശുപത്രി ഡയറക്ടർ ഫാ. റെന്നി മുണ്ടൻകുരിയൻ ഉദ്ഘാടനം ചെയ്തു. ഇന്ത്യൻ അസോസിയേഷൻ ഫോർ പീഡിയാട്രിക്സ് ജില്ലാ പ്രസിഡന്‍റ് ഡോ. എ.കെ. ഇട്ടൂപ്പ്, സെക്രട്ടറി ഡോ. സുനിൽകുമാർ മേനോൻ, ജൂബിലി മിഷൻ മെഡിക്കൽ കോളജ് പ്രിൻസിപ്പൽ ഡോ. എം.എ. ആൻഡ്രൂസ്, മെഡിക്കൽ സൂപ്രണ്ട് ഡോ. ഷിബു കള്ളിവളപ്പിൽ, ഇന്ത്യൻ അസോസിയേഷൻ ഫോർ പീഡിയാട്രിക്സിന്‍റെ മുൻ ദേശീയ വൈസ് പ്രസിഡന്‍റ് ഡോ. അനന്തകേശവൻ, ജൂബിലി പീഡിയാട്രിക് വിഭാഗം മുൻമേധാവി ഡോ. വിനോദ് ജേക്കബ് ചെറിയാൻ എന്നിവർ പങ്കെടുത്തു. ഓർഗനൈസിംഗ് ചെയർമാനും ജൂബിലിയുടെ പീഡിയാട്രിക് വിഭാഗം മേധാവിയുമായ ഡോ. ടി.എം. സഞ്ജീവ് കുമാർ നന്ദി പറഞ്ഞു. കേരളത്തിലെ പ്രമുഖ പീഡിയാട്രിക് കാർഡിയോളജിസ്റ്റും തിരുവനന്തപുരം മെഡിക്കൽ കോളജിലെ റിട്ട. പ്രഫസറുമായ ഡോ. സുൽഫിക്കർ അഹമ്മദായിരുന്നു മുഖ്യ ഫാക്കൽട്ടി. ജൂബിലി മിഷൻ മെഡിക്കൽ കോളജിലെ പീഡിയാട്രിക് കാർഡിയോളജി വിഭാഗം മേധാവി ഡോ. എഡ്വിൻ ഫ്രാൻസിസും കാർഡിയോളജി വിഭാഗത്തിലെ ഡോ. ബിനോ ബഞ്ചമിനും വിവിധതരം ഹൃദയരോഗങ്ങളെക്കുറിച്ചും ജന്മനായുള്ള ഹൃദയവൈകല്യങ്ങളിലെ ഇസിജി വ്യതിയാനങ്ങളെക്കുറിച്ചും ക്ലാസെടുത്തു. തൃശൂർ, എറണാകുളം, പാലക്കാട് ജില്ലകളിൽനിന്നു പീഡിയാട്രീഷ്യൻമാരും പോസ്റ്റ് ഗ്രാജ്വേറ്റ് വിദ്യാർഥികളുമടക്കം എഴുപതോളം ശിശുരോഗവിദഗ്ധർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]