ADVERTISEMENT

ADVERTISEMENT

ജെഎംഎ വിദ്യാഭ്യാസ പുരസ്കാരസമർപ്പണം

തൃശൂർ: അറിവുമാത്രമല്ല, മാനുഷികമായ തിരിച്ചറിവുകൾകൂടി നേടുന്പോഴേ ഓരോ വിദ്യാർഥിയും സാമൂഹികബോധമുള്ള പുതുതലമുറയായി വളരൂവെന്നു ജയരാജ് വാര്യർ.

ജ്വല്ലറി മാനുഫാക്ചറേഴ്സ് അസോസിയേഷൻ അംഗങ്ങളുടെ മക്കൾക്കുള്ള വിദ്യാഭ്യാസപുരസ്കാരസമർപ്പണം ഉദ്ഘാടനം ചെയ്യുകയായിരുന്നു അദ്ദേഹം. ഓരോ വിദ്യാർഥിയും ഇഷ്ടമുള്ളതു പഠിക്കാനും തെരഞ്ഞെടുക്കാനും പ്രാപ്തരാവുന്പോഴാണു വിദ്യാഭ്യാസം അർഥപൂർണമാവുന്നതെന്നും അദ്ദേഹം പറഞ്ഞു.

ജെഎംഎ സംസ്ഥാന പ്രസിഡന്‍റ് എ.കെ. സാബു അധ്യക്ഷത വഹിച്ചു. പി.വി. ജോസ്, റാഫി ആന്‍റണി, സി.എസ്. അജയകുമാർ, രവീന്ദ്രൻ ചെറുശേരി, ജെയ്സൻ മാണി, ബാബു മേച്ചേരിപ്പടി, തോമസ് കോനിക്കര, വിജയ് ഹരി, ജെയിംസ് പാലമിറ്റം, കെ.പി. ജോസ്, കുര്യപ്പൻ കെ. എരിഞ്ഞേരി, കെ.പി. വർഗീസ്, പി.വി. കൃഷ്ണകുമാർ എന്നിവർ പ്രസംഗിച്ചു.

ADVERTISEMENT

ടോറസ് ലോറി മറിഞ്ഞു: ഡ്രൈവർ രക്ഷപ്പെട്ടു

കയ്പമംഗലം: പെരിഞ്ഞനത്ത് ടോറസ് ലോറി മറിഞ്ഞ് അപകടം. ഡ്രൈവർ അത്ഭുതകരമായി രക്ഷപ്പെട്ടു. കഴിഞ്ഞദിവസം പുലർച്ചെയാണ് അപകടം ഉണ്ടായത്. നിർദിഷ്ട ദേശീയപാത നിർമാണക്കമ്പനിയുടെ ടോറസാണ് ലോഡ് ഇറക്കാൻ ശ്രമിക്കുന്നതിനിടെ മറിഞ്ഞത്. വാഹനത്തിൽനിന്ന് മെറ്റൽ ഇറക്കിയെങ്കിലും ടോറസ് വൈകിയും നിവർത്തിയിട്ടില്ല. പെരിഞ്ഞനം കൊറ്റംകുളം പാലത്തിന് തെക്കുഭാഗത്താണ് അപകടമുണ്ടായത്. അപകടത്തിൽ ആർക്കും പരിക്കില്ല.

കാർ മീഡിയനിലെ ചാലിലേക്കു മറിഞ്ഞു

മുരിങ്ങൂർ: അടിപ്പാതനിർമാണംനടക്കുന്ന ദേശീയപാത മുരിങ്ങൂരിൽ ഇന്നോവ കാർ മീഡിയനിലെ ചാലിലേക്ക് മറിഞ്ഞു. യാത്രക്കാർ പരിക്കേൽക്കാതെ രക്ഷപ്പെട്ടു. തൃശൂരിൽനിന്നു അങ്കമാലിയിലേക്കുള്ള ട്രാക്കിൽ ഇന്നലെ ഉച്ചകഴിഞ്ഞ് 2.15 ഓടെയായിരുന്നു അപകടം. മൂന്നാർ ബൈസൺവാലിയിൽനിന്നു തൃശൂരിലെത്തി തിരിച്ചു മൂന്നാറിലേക്കു മടങ്ങുന്നതിനിടെയാണ് കാർ അപകടത്തിൽപ്പെട്ടത്. മുന്നിൽ സഞ്ചരിച്ചിരുന്ന വാഹനം ഇടത്തെ ട്രാക്കിൽനിന്നു പെട്ടെന്ന് വലത്തെ ട്രാക്കിലേക്ക് പ്രവേശിച്ചപ്പോള്‌ അതിൽ ഇടിക്കാതിരിക്കാൻ പൊടുന്നനെ ബ്രേക്കിട്ടതിനെ തുടർന്ന് നിയന്ത്രണംവിട്ട ഇന്നോവ കാർ മീഡിയനിലേക്ക് ഇടിച്ചുകയറി ചാലിലേക്കു വീഴുകയായിരുന്നു. ക്രെയിൻ എത്തിച്ച് വാഹനം കയറ്റുന്നതുവരെ ഗതാഗതക്കുരുക്ക് രൂക്ഷമായി തുടർന്നു. മുരിങ്ങൂർ മുതൽ പൊങ്ങം വരെ ദിനംപ്രതിയെന്നോണം അപകടമുണ്ടാകുന്നത് ജനങ്ങളെ ആശങ്കയിലാഴ്ത്തുകയാണ്.

വെളളിക്കുളങ്ങര - വെറ്റിലപ്പാറ; മലയോര ഹൈവേ നിർമാണം ആരംഭിച്ചു

ചായ്പൻകുഴി: മലയോരഹൈവേ നിർമാണം ആരംഭിച്ചു. വെളളിക്കുളങ്ങര മുതൽ വെറ്റിലപ്പാറ വരെയുളള 18.25 കി.മീറ്റര്‌ ദൂരത്തിൽ കോർമലയിൽനിന്ന് തുടങ്ങി ചായ്പൻകുഴിവരെയുളള റോഡിലെ കലുങ്ക്, കാന എന്നിവയുടെ നിര്‍മാണജോലികൾ ദ്രുതഗതിയിൽ പുരോഗമിക്കുകയാണ്. മഴക്കാലമാണെങ്കിലും ജോലികൾ മുടക്കംകൂടാതെ നടത്താൻ കരാർ കമ്പനി പരിശ്രമിക്കുന്നുണ്ട്. ചായ്പൻകുഴി പള്ളി ജംഗ്ഷൻവരെ പണികളെത്തി. ചായ്പൻകുഴി - വെട്ടിക്കുഴി റോഡിലെ നഷ്ടപരിഹാരത്തുക ലഭിച്ചവരുടെ വീടുകളിൽ കെആർഎഫ്ബി അസി.എക്സിക്യൂട്ടീവ് എന്‌ജിനീയറും പഞ്ചായത്ത് - ജനപ്രതിനിധികളുമെത്തി മതിൽ, കിണർ എന്നിവ നീക്കംചെയ്യാൻ ആവശ്യപ്പെട്ടു. 12 മീറ്റർ വീതിയിലാണ് റോഡ് നിർമിക്കേണ്ടത്. നഷ്ടപരിഹാരത്തുക കൂടുതൽ വേണമെന്നാവശ്യപ്പെട്ട് ചില ഭൂവുടമകൾ കോടതിയെ സമീപിച്ചിട്ടുണ്ട്. ഭൂരിഭാഗംപേരും ഭൂമി വിട്ടുനല്കിക്കഴിഞ്ഞു.

മുരിങ്ങൂരിലും ചിറങ്ങരയിലും അടിമുടി പൊടിപടലം !

കൊരട്ടി: ദേശീയപാത വികസനത്തിന്‍റെ ഭാഗമായി നിർമാണം നടക്കുന്ന മുരിങ്ങൂർ, ചിറങ്ങര മേഖലകളിൽ അടിമുടി പൊടി. മഴ പത്തുമിനിറ്റ് മാറിനിന്നാൽ അന്തരീക്ഷംനിറയെ പൊടിയാണ്. മുരിങ്ങൂരിൽ കോട്ടമുറി ജംഗ്ഷൻ മുതൽ ഡിവൈൻനഗർ അടിപ്പാത കഴിയുംവരെയും ചിറങ്ങരയിൽ പെരുമ്പി മുതൽ പൊങ്ങം വരെയുമാണ് പൊടിപടലങ്ങൾ മൂലം വാഹനയാത്രികരും കാൽനടയാത്രക്കാരും ബുദ്ധിമുട്ടുനേരിടുന്നത്. ഭാരവണ്ടികൾ കടന്നുപോകുമ്പോൾ തൊട്ടുമുന്നിൽ സഞ്ചരിക്കുന്ന വാഹനംപോലും കാണാനാകാത്ത ഗതികേടിലാണ് പിന്നിലുള്ള വാഹനയാത്രികർ. റോഡിന്‍റെ ഇരുഭാഗങ്ങളിലും പ്രവർത്തിക്കുന്ന കച്ചവടസ്ഥാപനങ്ങൾ നേരിടുന്ന പ്രതിസന്ധി ചെറുതല്ല. ഗതാഗതക്കുരുക്കിനുപിന്നാലെയുള്ള ഇരുട്ടടിയാണ് അന്തരീക്ഷത്തിലെ പൊടി. സ്ഥാപനങ്ങൾ അടച്ചുപൂട്ടണ്ടേ അവസ്ഥയിലാണ് കാര്യങ്ങൾ പോകുന്നതെന്നാണ് വ്യാപാരികൾ പറയുന്നത്. നിർമാണത്തിന്‍റെ പ്രാരംഭഘട്ടങ്ങളിൽ ടാങ്കറിൽ വെള്ളമെത്തിച്ച് പൊടി ഉയരാതിരിക്കാനുള്ള നടപടികൾ ഉണ്ടായിരുന്നെങ്കിലും നിലവിൽ ആരും തിരിഞ്ഞുനോക്കുന്നില്ലെന്ന് വ്യാപകപരാതിയുണ്ട്.

മുരിങ്ങൂരിൽ അടിപ്പാതയുടെ ക്രോസിംഗ് ഏരിയ തുറന്നു; ചിറങ്ങരയിൽ ഇന്നു തുറന്നേക്കും

മുരിങ്ങൂർ: നിർമാണത്തിന്‍റെ പ്രാരംഭഘട്ടം മുതൽ വിവാദങ്ങൾക്കും ഒട്ടേറെ പ്രതിഷേധങ്ങൾക്കും സാക്ഷ്യംവഹിച്ച മുരിങ്ങൂർ, ചിറങ്ങര അടിപ്പാതകളിൽ മുരിങ്ങൂർ അടിപ്പാതയുടെ ക്രോസിംഗ് ഏരിയ തുറന്നു. ചിറങ്ങര അടിപ്പാതയുടെ ക്രോസിംഗ് ഏരിയ ഇന്ന് തുറന്നേക്കും. രണ്ടിടങ്ങളിലും ഭിത്തികൾ നിർമിച്ച് നാലരമീറ്റർ ഉയരത്തിൽ ഒരു സ്പാനിലുള്ള അടിപ്പാതയാണ് നിർമിക്കുന്നത്. ഇതിൽ ആദ്യ കടമ്പയാണ് പൂർത്തിയായിരിക്കുന്നത്. ക്യൂറിംഗ് പിരിയഡ് പൂർത്തിയാക്കി കോൺക്രീറ്റിംഗിന് താങ്ങായി നിർത്തിയിരുന്ന ഇരുമ്പ് തൂണുകൾ നീക്കംചെയ്തിട്ടുണ്ട്. ഇതാേടെ ദേശീയപാതയ്ക്കു കുറുകെകടക്കാൻ സൗകര്യമായി. ഔദ്യോഗികമായി തുറന്നിട്ടില്ലെങ്കിലും ഇതിലൂടെ ചെറുവാഹനങ്ങളും കാൽനടയാത്രക്കാരും കടന്നുപോകുന്നുണ്ട്. അടിപ്പാതയ്ക്ക് രണ്ടു ഭാഗത്തേക്കുള്ള അപ്രോച്ച് റോഡിന്‍റെ നിർമാണം മന്ദഗതിയിലാണ്. മഴയും നിർമാണത്തെ സാരമായി ബാധിക്കുന്നുണ്ടെങ്കിലും ആവശ്യത്തിന് തൊഴിലാളികൾ നിർമാണസ്ഥലങ്ങളിലില്ല.

പരിസ്ഥിതി ചലച്ചിത്രമേള കൊടിയിറങ്ങി

ഇരിങ്ങാലക്കുട: അന്താരാഷ്ട്ര പരിസ്ഥിതി ചലച്ചിത്രമേളയില്‍ ശ്രദ്ധ നേടി അദ്രയിയും മണ്ണും. സ്വതന്ത്ര ഇന്ത്യയിലെതന്നെ ആദ്യ പരിസ്ഥിതിസമരങ്ങളിലൊന്നായ ചാലിയാര്‍ സമരത്തിന്‍റെ നായകനായ കെ.എ. റഹ‌്മാന്‍റെ ജീവചരിത്രം അടയാളപ്പെടുത്തുന്ന അദ്രയി എഴുത്തുകാരികൂടിയായ ഫര്‍സാനയുടെ സൃഷ്ടിയാണ്. മൂന്നാറില്‍ ഭൂമിക്കും മണ്ണിനും അവകാശങ്ങള്‍ക്കുമായി പൊമ്പിളൈ ഒരുമൈയുടെ നേതൃത്വത്തില്‍നടന്ന പോരാട്ടങ്ങളിലൂടെ സഞ്ചരിക്കുന്ന രാംദാസ് കടവല്ലൂരിന്‍റെ മണ്ണും സെന്‍റ് ജോസഫ്സ് കോളജില്‍നടന്ന മേളയുടെ പ്രധാന ആകര്‍ഷണമായി. പ്രദര്‍ശനാനന്തരം സംവിധായകന്‍ രാംദാസ് കടവല്ലൂര്‍, ഫോട്ടോഗ്രാഫര്‍ പ്രതാപ് ജോസഫ് എന്നിവരെ തൃശൂര്‍ കില കോളജ് പ്രിന്‍സിപ്പല്‍ ഡോ. എസ്. ശ്രീകുമാര്‍ ആദരിച്ചു. പരിസ്ഥിത മേളയില്‍ പ്രദര്‍ശിപ്പിച്ച ചിത്രങ്ങളുടെ അണിയറ പ്രവര്‍ത്തകരായ അജയ് കോവൂര്‍, കെ. ബിനു, അരവിന്ദ് മോഹന്‍രാജ്, ഇ.ജി. ശ്രീകാന്ത്, കെ.വി. ബിനോജ് എന്നിവരും മേളയുടെ സാന്നിധ്യങ്ങളായി. വൈകീട്ടുനടന്ന സമാപന ചടങ്ങില്‍ കോളജ് പ്രിന്‍സിപ്പല്‍ സിസ്റ്റര്‍ ഡോ. ബ്ലെസി, സംവിധായകന്‍ പ്രതാപ് ജോസഫ് എന്നിവര്‍ചേര്‍ന്ന് രണ്ടാമത് പരിസ്ഥിതി ചലച്ചിത്രമേളയുടെ കൊടിയിറക്കി.

ഇരിങ്ങാലക്കുട കെഎസ്ആര്‍ടിസിയിലെ പ്രതിസന്ധി: സംരക്ഷണസമിതി രൂപവത്കരിച്ചു

ഇരിങ്ങാലക്കുട: പൂട്ടല്‍ഭീഷണി നേരിടുന്ന ഇരിങ്ങാലക്കുട കെഎസ്ആര്‍ടിസി ഓപ്പറേറ്റിംഗ് സെന്‍ററിനെ കൈപിടിച്ചുയര്‍ത്താന്‍ നാട്ടുകാര്‍ രംഗത്ത്. ആവശ്യത്തിന് ജീവനക്കാരില്ലാത്തതിനാല്‍ പ്രതിസന്ധി നേരിടുന്ന സെന്‍ററാണിത്. ഇപ്പോഴത്തെ നിലതുടര്‍ന്നാല്‍ അധികംവൈകാതെ സെന്‍ററിന് പൂട്ടുവിഴുമെന്നുള്ള ആശങ്ക കാരണമാണ് സംരക്ഷണസമിതി രൂപവത്കരിച്ചിരിക്കുന്നത്. യോഗം തോമസ് ഉണ്ണിയാടന്‍ ഉദ്ഘാടനംചെയ്തു. കൊരുമ്പിശേരി റെസിഡന്‍റ്സ് അസോസിയേഷന്‍ പ്രസിഡന്‍റ് രാജീവ് മുല്ലപ്പിള്ളി അധ്യക്ഷനായി. നേരത്തെ 29 സര്‍വീസുകള്‍ ഓപ്പറേറ്റ് ചെയ്തിരുന്ന ഇരിങ്ങാലക്കുടയില്‍നിന്ന് ഇപ്പോള്‍ 16 സര്‍വീസുകള്‍ മാത്രമാണ് ഓപ്പറേറ്റ് ചെയ്യുന്നത്. വലിയ വിജയമായ ബജറ്റ് ടൂറിസവും ജീവനക്കാരില്ലാത്തതിനാല്‍ ഒഴിവാക്കി. ഡ്രൈവര്‍മാരുടേയും കണ്ടക്ടര്‍മാരുടേയും ഒഴിവുനികത്തുന്നതിന് പുറമെ അക്കൗണ്ട്സ് സെക്ഷനില്‍ കുറവുള്ള ക്ലാര്‍ക്കുമാരെ നിയമിക്കുകയുംവേണം. എന്നാല്‍അതിനാവശ്യമായ നടപടിയും ജനപ്രതിനിധികളുടെ ഭാഗത്തുനിന്നു ഉണ്ടാകുന്നില്ലെന്ന് യോഗം കുറ്റപ്പെടുത്തി. കെഎസ്ആര്‍ടിസി സംരക്ഷണസമിതി ഭാരവാഹികളായി തോമസ് ഉണ്ണിയാടന്‍ - മുഖ്യ രക്ഷാധികാരി, വാര്‍ഡ് കൗണ്‍സിലര്‍ അമ്പിളി ജയന്‍, ടി. അപ്പുക്കുട്ടന്‍നായര്‍ - രക്ഷാധികാരികള്‍, രാജീവ് മുല്ലപ്പിള്ളി -ചെയര്‍മാന്‍, എം.കെ. സേതുമാധവന്‍- ജന. കണ്‍വീനര്‍ എന്നിവരെ തെരഞ്ഞെടുത്തു. വിപുലമായ യോഗം 28ന് നാലിന് ചേരുമെന്ന് സമിതി ഭാരവാഹികള്‍ അറിയിച്ചു.

അമലയിൽ ന്യുട്രീഷൻ കോണ്‍ഗ്രസ്

തൃശൂർ: അമല ആശുപത്രിയിലെ ന്യൂട്രീഷൻ ആൻഡ് ഡയറ്ററ്റിക്സ് വിഭാഗം സംഘടിപ്പിച്ച ഏകദിന ന്യുട്രീഷൻ കോണ്‍ഗ്രസ് മുംബൈ ടാറ്റ മെമ്മോറിയൽ ഹോ സ്പിറ്റലിലെ ക്ലിനിക്കൽ ന്യുട്രീഷൻ ഡിപ്പാർട്ട്മെന്‍റ് മേധാവി ശിവശങ്കർ തിമ്മ്യൻ പ്യാതി ഉദ്ഘാടനം ചെയ്തു. അമല ജോയിന്‍റ് ഡയറക്ടർ ഫാ. ഷിബു പുത്തൻപുരയ്ക്കൽ, ഫാ. ആന്‍റണി പെരിഞ്ചേരി, ന്യുട്രീഷൻ ആൻഡ് ഡയറ്ററ്റിക്സ് ഇൻചാർജ് ഡോ. റീന കെ. ചിറ്റിലപ്പിള്ളി, കാൻസർവിഭാഗം ഡോ. പി. ഉണ്ണികൃഷ്ണൻ, ഡോ. സുനു സിറിയക്, ഡോ. ഫെബിൻ ആന്‍റണി എന്നിവർ ക്ലാസുകൾ നയിച്ചു. വിവിധ ജില്ലകളിൽനിന്നായി 130 പേർ പങ്കെടുത്തു.

വാഴക്കോട് ബസുകൾ കൂട്ടിയിടിച്ച് 30 പേർക്കു പരിക്ക്

പഴയന്നൂർ: വാഴക്കോട്-പ്ലാഴി സംസ്ഥാനപാതയിൽ ഉദുവടിയിൽ സ്വകാര്യ ബസും കെഎസ്ആർടിസി ബസും കൂട്ടിയിടിച്ച് ഡ്രൈവർമാരുൾപ്പടെ മുപ്പതു പേർക്കു പരിക്ക്. ചൊവ്വാഴ്ച വൈകീട്ട് 6.45-ന് ഉദുവടി ചിറങ്കോണം ഇറക്കത്തിലാണ് അപകടം. തൃശൂരിൽനിന്നു മണ്ണാർക്കാട്ടേക്കു പോവുകയായിരുന്ന കെ എസ്ആർടിസി ബസും തിരുവില്വാമലയിൽനിന്നു തൃശൂരിലേക്കു പോവുകയായിരുന്ന അരുവേലിക്കൽ എന്ന സ്വകാര്യബസുമാണു കൂട്ടിയിടിച്ചത്. ഇടിയുടെ ആഘാതത്തിൽ ഇരു ബസുകളുടെയും മുൻഭാഗം ഭാഗികമായി തകർന്നു. പരിക്കേറ്റവരെ വിവിധ ആശുപത്രികളിൽ പ്രവേശിപ്പിച്ചു. സാരമായി പരിക്കേറ്റവരെ തൃശൂർ മെഡിക്കൽ കോളജ് ആശുപത്രിയിലേക്കു മാറ്റി. കോലഴി ആലുക്കവീട്ടിൽ പോ ളി (57), മുളങ്കുന്നത്തുകാവ് കോഞ്ചിറ റോഡിൽ രാജൻ (56), തമിഴ്നാട് ഉശിരാംപെട്ടി സ്വദേശി ശങ്കരൻ (63), കെഎസ്ആർടിസി തൃശൂർ ഡിപ്പോയിലെ മെക്കാനിക്ക് ചേലക്കര വെങ്ങനെല്ലൂർ സ്വദേശി നോബിൾ (42), കെഎസ്ആർടിസി ബസ്‌ ഡ്രൈവർ മുണ്ടൂർ സ്വദേശി കൃഷ്ണകുമാർ എന്നിവരാണു മെഡിക്കൽ കോളജ് ആശുപത്രിയിൽ ചികിത്സയിലുള്ളത്. ഗുരുതരമായി പരിക്കേറ്റ ഡ്രൈ വർ കൃഷ്ണകുമാറിനെ അടിയന്തര ശസ്ത്രക്രിയയ്ക്കു വിധേയനാക്കി. അപകടത്തെത്തുടർന്ന് സംസ്ഥാനപാതയിൽ ഏറെനേരം ഗതാഗതം തടസപ്പെട്ടു. ചേലക്കര പോലീസ് സ്ഥലത്തെത്തി മേൽനടപടികൾ സ്വീകരിച്ചു.

ചില്ലിചിക്കനിൽ സോസ് കൂടിയെന്ന് ആരോപണം; ഹോട്ടൽ ജീവനക്കാരനു മർദനമേറ്റു

തളിക്കുളം: ചില്ലിചിക്കനിൽ സോസ് കൂടിയെന്നാരോപിച്ച് തളിക്കുളം ചിക്ക് സിറ്റി ഹോട്ടലിലെ ജീവ നക്കാരനു മർദനം. ജിവനക്കാരൻ ഷാജഹാനാ(24) ണ് മർദനത്തിൽ പരിക്കേറ്റത്. ഇയാളെ ഏങ്ങണ്ടിയൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവത്തിൽ കേരള ഹോട്ടൽ ആന്‍ഡ് റസ്റ്റോറന്‍റ് അസോസിയേഷൻ തൃപ്രയാർ യൂണിറ്റ് പ്രതിഷേധിച്ചു. പ്രതിയെ ഉടൻ അറസ്റ്റ് ചെയ്യണമെന്നും അല്ലാത്തപക്ഷം ശക്തമായ സമരങ്ങളുമായി മുന്നോട്ടുപോകുമെന്നും സെക്രട്ടറി അക്ഷയ് എസ്. കൃഷ്ണ, പ്രസിഡന്‍റ് ആർ.എ. മുഹമ്മദ് എന്നിവർ പറഞ്ഞു.

കണ്ണാറയിൽ കാറും ഓട്ടോറിക്ഷയും കൂട്ടിയിടിച്ച് രണ്ടുപേർക്കുപരിക്ക്

കണ്ണാറ: ഒരപ്പൻപാറയിൽ കാറും ഓട്ടോറിക്ഷയും കൂട്ടിയിടിച്ചുണ്ടായ അപകടത്തിൽ രണ്ടുപേർക്കു പരിക്കേറ്റു. പട്ടിക്കാട് സ്വദേശി അജയ്, ഓട്ടോ ഡ്രൈവർ പീച്ചി തെക്കേക്കുളം സ്വദേശി അഖിൽ എന്നിവർക്കാണ് പരിക്കേറ്റത്. ഇവരെ തൃശൂർ ജൂബിലി മിഷൻ ആശുപത്രിയിൽ പ്രവേശിപ്പിച്ചു. അജയ് യുടെ പരിക്ക് ഗുരുതരമല്ല. ഇന്നലെ രാത്രി എട്ടരയോടെയാണ് അപകടമുണ്ടായത്. പീച്ചി ഭാഗത്തുനിന്നും വരികയായിരുന്ന കാർ പട്ടിക്കാട് ഭാഗത്തുനിന്നും വരികയായിരുന്ന ഓട്ടോറിക്ഷയിൽ ഇടിക്കുകയായിരുന്നു. ഇടിയുടെ ആഘാതത്തിൽ ഓട്ടോയുടെ മുൻഭാഗം പൂർണമായും തകർന്നു. നാട്ടുകാർ ഏറെ പരിശ്രമിച്ചാണ് പരിക്കേറ്റ ഓട്ടോ ഡ്രൈവറെ പുറത്തെടുത്തത്. പീച്ചി പോലീസും തൃശൂരിൽനിന്നുള്ള അഗ്നിരക്ഷാസേനയും സ്ഥലത്തെത്തി മേൽനടപടികൾ സ്വീകരിച്ചു.

തലപ്പിള്ളി താലൂക്ക് ഓഫീസിൽ അധികൃതരുടെ മൂക്കിനുതാഴെ മാലിന്യനിക്ഷേപകേന്ദ്രം

വടക്കാഞ്ചേരി: തലപ്പിള്ളി താലൂക്ക് ഓഫീസിൽ മാലിന്യം കുന്നുകൂടുന്നു. മാലിന്യനിക്ഷേപകേന്ദ്രമായി മിനിസിവിൽ‌സ്റ്റേഷൻ മാറിയതായി നാട്ടുകാർ. ശുചിത്വനഗരമായി വടക്കാഞ്ചേരി നഗരസഭയെ മാറ്റുവാനുള്ള പ്രവർത്തനം ഒരുഭാഗത്ത് നടക്കുമ്പോഴാണ് സർക്കാർ ഓഫീസുകൾ സ്ഥിതിചെയ്യുന്ന മിനി സിവിൽ സ്റ്റേഷൻ മാലിന്യനിക്ഷേപകേന്ദ്രമായിമാറുന്നത്. മാസങ്ങളായി റോഡരികിൽനിന്നും എടുത്തുകൊണ്ടുവരുന്ന കൊടിതോരണങ്ങളും പ്ലാസ്റ്റിക്കും ചപ്പുചവറുകളുമാണു പ്രദേശത്ത് കൂട്ടിയിട്ടിരിക്കുന്നത്. അധികൃതരുടെ ശ്രദ്ധ യിൽപ്പെടുത്തിയിട്ടും നഗരസഭ നടപടി എടുക്കുന്നില്ലെന്നതാണു ശ്രദ്ധേയം. സിവിൽ സ്റ്റേഷനിൽക്കിടക്കുന്ന മാലിന്യം സിവിൽ സ്റ്റേഷൻ അധികൃതർതന്നെ എടുത്തുമാറ്റണമെന്നാണു നഗരസഭയുടെ നിലപാട്. എന്നാൽ മാലിന്യം നീക്കേണ്ടതു നഗരസഭയാണന്നാണു സിവിൽസ്റ്റേഷൻ അധികൃതരുടെ ഭാഷ്യം. ശുദ്ധജലത്തിനും മറ്റു ആവശ്യങ്ങൾക്കും ഉപയോഗിക്കുന്ന കിണറുകൾക്കു നടുവിലാണു മാലിന്യം കൂട്ടിയിട്ടിരിക്കുന്നത്. അതുകൊണ്ടുതന്നെ കാലവർഷം ശക്തമായതോടെ പനി ഉൾപ്പടെയുള്ള രോഗങ്ങൾ പടർന്നുപിടിക്കുമോ എന്ന ആശങ്കയും ജനങ്ങൾക്കുണ്ട്. ഉടൻതന്നെ മാലിന്യം നീക്കംചെയ്യാൻ നടപടി സ്വീകരിക്കണമെന്ന് നാട്ടുകാരും ആവശ്യപ്പെട്ടു.

സമരങ്ങൾ ഫലംകണ്ടു; വെള്ളക്കെട്ട് പരിഹരിക്കാൻ കാനയ്ക്ക് 85 ലക്ഷം

ചാവക്കാട്: ദേശീയപാത 66 ഒരുമനയൂർ ബൈപ്പാസിലെ വെള്ളക്കെട്ടിനു പരിഹാരമാകുന്നു. 85 ലക്ഷം രൂപ ചെലവിൽ കാനനിർമിക്കുന്നതിനു പൊതുമരാമത്ത് നാഷണൽ ഹൈവേ വിഭാഗം കരാർ നൽകി. റോഡിന്‍റെ ഗുരുതരാവസ്ഥയും റോഡിലെ കാന തകർന്നതിനാൽ വീടുകളിലേക്കുംമറ്റും വെള്ളവും ചെളിയും കയറി ജനങ്ങൾ ദുരിതത്തിലായ വിവരവും മന്ത്രി മുഹമ്മദ് റിയാസിനെ എംഎൽഎ അറിയിച്ചു. തുടർന്നാണു സംസ്ഥാന സർക്കാരി ന്‍റെ നോൺ പ്ലാനിൽ ഉൾപ്പെടുത്തി അടിയന്തരമായി കാന നിർമിക്കുന്നതിന് 85 ലക്ഷം രൂപ അനുവദിച്ചതെന്ന് എൻ.കെ. അക്ബർ എംഎൽഎ അറിയിച്ചു. എംഎൽഎ, നാഷണൽ ഹൈവേ അസിസ്റ്റന്‍റ്് എക്സിക്യൂട്ടീവ് എൻജിനീയർ പി. സുമ, ചെയർപേഴ്‌സൺ ഷീജ പ്രശാന്ത്, മുൻ സ്റ്റാൻഡിംഗ് കമ്മിറ്റി ചെയർമാൻ എ.എച്ച്. അക്ബർ, പി.എസ്. അശോകൻ, ഉദ്യോഗസ്ഥർ തുടങ്ങിയവർ സന്ദർശിച്ചു. റോഡ് നിർമാണത്തിനായി 2.45 കോടി രൂപ അനുവദിക്കുന്നതിനു ദേശീയപാതയ്ക്ക് കത്തും എസ്റ്റിമേറ്റും ലഭിച്ചതായും എത്രയും വേഗം റോഡിന്‍റെ നിർമാണം നടത്തുമെന്നും ദേശീയപാത ചീഫ് എൻജിനീയർ ദീപ്തി ഭാനു എൻ.കെ. അക്ബർ എംഎൽഎയെ അറിയിച്ചു.

കർക്കടക്കവാവുബലി നാളെ: പഞ്ചവടി ഒരുങ്ങി

ചാവക്കാട്: കര്‍ക്കടകവാവിന്‍റെ ഭാഗമായുള്ള ബലിതര്‍പ്പണ ചടങ്ങുകള്‍ക്കായി പഞ്ചവടി വാ കടപ്പുറത്ത് വിപുലമായ ഒരുക്കങ്ങൾ സജീകരിച്ചതായി ഭാരവാഹികൾ വാർത്താസമ്മേളനത്തിൽ അറിയിച്ചു. പഞ്ചവടി ശങ്കരനാരായണ മഹാക്ഷേത്ര കമ്മിറ്റിയുടെ നേതൃത്വത്തിൽ പഞ്ചവടി കടപ്പുറത്ത് വിപുലമായ ഒരുക്കമാണ് തയാറാക്കിയിട്ടു ള്ളത്. ഒരേസമയം ആയിരംപേർക്ക് ബലിയിടാവുന്ന വിശാലമായ പന്തൽ ഉയർന്നുവെന്ന് ക്ഷേത്രം പ്രസിഡന്‍റ് ദിലീപ്കുമാര്‍ പാലപ്പെട്ടി, ജോയിന്‍റ് സെക്രട്ടറി കെ.എസ്. ബാലന്‍ എന്നിവര്‍വാർത്തസമ്മേളനത്തില്‍ അറിയിച്ചു. കര്‍ക്കടക വാവുദിനമായ നാളെ പുലര്‍ച്ചെ 2.30 മുതല്‍ പഞ്ചവടി വാ കടപ്പുറത്ത് പ്രത്യേ കം സജ്ജമാക്കിയ യജ്ഞശാലയില്‍ ബലിതര്‍പ്പണചടങ്ങുകള്‍ ആരംഭിക്കും. രാവിലെ 10 വരെ തുടരും. തിലഹവനം, പിതൃസായൂജ്യപൂജ എന്നിവ നടത്താന്‍ ഭക്തര്‍ക്കു സൗകര്യമുണ്ടാവും. ബലിയിടാനായി കഴിഞ്ഞ വർഷം പതിനായിരം പേർ ശീട്ടാക്കിയിരുന്നു. ഇത്തവണ അതിൽ കൂടുതൽപേർ എത്തും. മുഴുവൻപേർക്കും പ്രഭാതഭക്ഷണം സൗജന്യമായി നൽകും. ബലിയിട്ട് കടലിൽ മുങ്ങിക്കുളിക്കുന്നവരുടെ സുരക്ഷക്കായി പോലീസ്, തീരദേശ പോലീസ്, ആംബുലന്‍സ്, വൈദ്യസഹായം തീരദേശ ജാഗ്രത സമിതിതുടങ്ങിയവരുടെ സാന്നിധ്യവും ഉണ്ടാവുമെന്ന് വിശ്വനാഥന്‍ വാക്കയില്‍, വാസു തറയില്‍ എന്നിവർ പറഞ്ഞു.

ജില്ലാ ആശുപത്രിയിൽ ആവശ്യത്തിന് ഡോക്ടർമാരില്ല; രോഗികൾ വലയുന്നു

വടക്കാഞ്ചേരി: ജില്ലാആശുപത്രിയിൽ ആവശ്യത്തിനു ഡോക്ടർമാർ ഇല്ലാത്തതിനെ തുടർന്ന് രോഗികൾ വലയുന്നു. കാലവർഷം ശക്തിപ്രാപിച്ചതോടെ ദിനംപ്രതി നൂറുകണക്കിനു രോഗികളാണ് ആശുപത്രിയിലെത്തുന്നത്. ഉച്ചയ്ക്ക് ഒരുമണികഴിഞ്ഞാൽ പിന്നെ ഒരു ഡോക്ടറുടെ സേവനംമാത്രമാണ് ഉണ്ടാകുക. പനികൾ പടർന്നുപിടിക്കുന്നതുമൂലം ആശുപത്രിയിൽ എല്ലാ ദിവസവും രോഗികളുടെ നീണ്ടനിരയാണു കാണപ്പെടുന്നത്. വൈകീട്ട് ആറുകഴിഞ്ഞാൽ പിന്നെ എക്സെറെ ഉൾപ്പടെയുള്ള സേവനങ്ങളും ലഭിക്കാറില്ല. ആശുപത്രിയുടെ വികസനംലക്ഷ്യമിട്ട് നിരവധി കെട്ടിടങ്ങളാണ് കോടികൾ മുടക്കി നിർമിക്കുന്നതെങ്കിലും ആവശ്യമായ ഡോക്ടർമാർ ഇല്ലാത്തതാണ് വടക്കാഞ്ചേരി ജില്ലാ ആശുപത്രിയുടെ ശാപം. അതുകൊണ്ടുതന്നെ ബന്ധപ്പെട്ട അധികൃതർ ഉടൻ ഇടപെടണമെന്നാണു നാട്ടുകാരുടെ ആവശ്യം.

ജൂബിലിയിൽ പീഡിയാട്രിക് ശില്പശാല

തൃശൂർ: ഇന്ത്യൻ അക്കാദമി ഓഫ് പീഡിയാട്രിക്സിന്‍റെ പ്രസിഡൻഷ്യൽ ആക്‌ഷൻ പ്ലാൻ 2025 ന്‍റെ ഭാഗമായി ജൂബിലി മിഷൻ മെഡിക്കൽ കോളജിലെ പീഡിയാട്രിക് വിഭാഗത്തിന്‍റെ നേതൃത്വത്തിൽ പീഡിയാട്രിക് ഇസിജി ഹാൻഡ്സ് ഓണ്‍ വർക്ക്ഷോപ്പ് സംഘടിപ്പിച്ചു. ആശുപത്രി ഡയറക്ടർ ഫാ. റെന്നി മുണ്ടൻകുരിയൻ ഉദ്ഘാടനം ചെയ്തു. ഇന്ത്യൻ അസോസിയേഷൻ ഫോർ പീഡിയാട്രിക്സ് ജില്ലാ പ്രസിഡന്‍റ് ഡോ. എ.കെ. ഇട്ടൂപ്പ്, സെക്രട്ടറി ഡോ. സുനിൽകുമാർ മേനോൻ, ജൂബിലി മിഷൻ മെഡിക്കൽ കോളജ് പ്രിൻസിപ്പൽ ഡോ. എം.എ. ആൻഡ്രൂസ്, മെഡിക്കൽ സൂപ്രണ്ട് ഡോ. ഷിബു കള്ളിവളപ്പിൽ, ഇന്ത്യൻ അസോസിയേഷൻ ഫോർ പീഡിയാട്രിക്സിന്‍റെ മുൻ ദേശീയ വൈസ് പ്രസിഡന്‍റ് ഡോ. അനന്തകേശവൻ, ജൂബിലി പീഡിയാട്രിക് വിഭാഗം മുൻമേധാവി ഡോ. വിനോദ് ജേക്കബ് ചെറിയാൻ എന്നിവർ പങ്കെടുത്തു. ഓർഗനൈസിംഗ് ചെയർമാനും ജൂബിലിയുടെ പീഡിയാട്രിക് വിഭാഗം മേധാവിയുമായ ഡോ. ടി.എം. സഞ്ജീവ് കുമാർ നന്ദി പറഞ്ഞു. കേരളത്തിലെ പ്രമുഖ പീഡിയാട്രിക് കാർഡിയോളജിസ്റ്റും തിരുവനന്തപുരം മെഡിക്കൽ കോളജിലെ റിട്ട. പ്രഫസറുമായ ഡോ. സുൽഫിക്കർ അഹമ്മദായിരുന്നു മുഖ്യ ഫാക്കൽട്ടി. ജൂബിലി മിഷൻ മെഡിക്കൽ കോളജിലെ പീഡിയാട്രിക് കാർഡിയോളജി വിഭാഗം മേധാവി ഡോ. എഡ്വിൻ ഫ്രാൻസിസും കാർഡിയോളജി വിഭാഗത്തിലെ ഡോ. ബിനോ ബഞ്ചമിനും വിവിധതരം ഹൃദയരോഗങ്ങളെക്കുറിച്ചും ജന്മനായുള്ള ഹൃദയവൈകല്യങ്ങളിലെ ഇസിജി വ്യതിയാനങ്ങളെക്കുറിച്ചും ക്ലാസെടുത്തു. തൃശൂർ, എറണാകുളം, പാലക്കാട് ജില്ലകളിൽനിന്നു പീഡിയാട്രീഷ്യൻമാരും പോസ്റ്റ് ഗ്രാജ്വേറ്റ് വിദ്യാർഥികളുമടക്കം എഴുപതോളം ശിശുരോഗവിദഗ്ധർ പങ്കെടുത്തു.

കളക്ടറുടെ മുന്നറിയിപ്പിൽ വിരണ്ടു; നഗരത്തിലെ കുഴികൾ മൂടുന്നു

തൃശൂർ: റോഡിലെ കുഴികൾമൂലം ഉണ്ടാകുന്ന അപകടങ്ങളും മരണങ്ങളും തുടർക്കഥയായതോടെ കളക്ടറുടെ മുന്നറിയിപ്പ് ഫലംകണ്ടു. നഗരത്തിലെ റോഡുകളിലെ കുഴികൾ തിടുക്കത്തിൽ നികത്തി കരാറുകാർ. എന്നാൽ നികത്തലിനു മണിക്കൂറുകൾമാത്രമേ ആയുസുള്ളൂ എന്നതിനാൽ ഇനി ആരോടു പരാതി പറയുമെന്നറിയാതെ ജനം ദുരിതയാത്ര തുടരുന്നു. കഴിഞ്ഞ ശനിയാഴ്ചയാണ് റോഡിലെ കുഴികളിൽ വീണ് അപകടം ഉണ്ടായാൽ ഉദ്യോഗസ്ഥർക്കെതിരേയും കരാറുകാർക്കെതിരേയും ദുരന്തനിവാരണനിയമം 2005 ലെ സെക്‌ഷൻ 51 (ബി) പ്രകാരം നടപടി സ്വീകരിക്കുമെന്നു ജില്ലാ കളക്ടർ അർജുൻ പാണ്ഡ്യൻ ഉത്തരവിട്ടത്. ഇതേത്തുടർന്നാണ് നഗരത്തിലെ ഉൾപ്പെടെ ഉള്ള റോഡുകൾ യുദ്ധകാലാടിസ്ഥാനത്തിൽ നികത്താൻ ആരംഭിച്ചത്. എന്നാൽ, ചടങ്ങുപോലെ നടക്കുന്ന കുഴിയടയ്ക്കൽ ഒറ്റദിവസംകൊണ്ട് സമൂഹമാധ്യമങ്ങളിൽ വൈറലായി. മിനിലോറിയിൽ റോഡ് മിക്സ് (റോഡ് ബോണ്ട്) സമഗ്രികളുമായി എത്തുന്ന തൊഴിലാളികൾ കുഴികളിൽ റോഡ് ബോണ്ട് ഉൾപ്പെടെയുള്ള മിശ്രിതമിട്ട് അതേ വാഹനം കയറ്റിറക്കിയും തൊഴിലാളികൾ കാലുകൊണ്ടും അവ ഉറപ്പിച്ച്, പേപ്പർ ഇട്ടുമടങ്ങുകയാണ്. ഈ ദൃശ്യം കളിയാക്കൽ കമന്‍റുകളോടൊപ്പം സമൂഹമാധ്യമങ്ങളിൽ നിറഞ്ഞത്. ഒരടിയെക്കാൾ ചെറിയ കുഴികൾ നികത്താൻമാത്രം ഉപയോഗിക്കുന്ന റോഡ് ബോണ്ട് വലിയ കുഴികളിൽ ഉപയോഗിക്കാറില്ലെന്നും ഉപയോഗിക്കേണ്ട സാഹചര്യങ്ങളിൽ അവ ശരിയായവിധം സെറ്റ് ആകുവാൻ റോഡ് റോളർ പോലെയുള്ളവ ഉപയോഗിക്കണമെന്നും എൻജിനീയർമാർ ചൂണ്ടിക്കാട്ടുന്നു. അതൊന്നും ഈ കുഴിയടയ്ക്കലുകാർ ശ്രദ്ധിക്കുന്നില്ല. ഇതിനെപുറമെ, കുഴി അടയ്ക്കുന്നതിനുപിറകെ വീണ്ടും കുഴികൾ രൂപപ്പെടുന്നതോടെ റോഡുകളിൽ മെറ്റലുകൾ പരക്കുന്നതു പുതിയ വെല്ലുവളി ഉയർത്തുകയാണ്. കുഴികളിൽ വീഴുന്പോൾ സ്വീകരിക്കുമെന്ന് പ്രഖ്യാപിച്ച മുന്നറിയിപ്പുകൾ നിരത്തിൽ നിരക്കുന്ന മെറ്റലുകൾക്കും ബാധകമാക്കണമെന്ന് ഇരുചക്രയാത്രികർ ആവശ്യപ്പെടുന്നു.

പന്നിഫാമിലെ മാലിന്യത്തിൽനിന്ന് കൈനൂർ ഗ്രാമത്തെ രക്ഷിച്ച വിഎസ്

സ്വന്തം ലേഖകൻ തൃശൂർ: പന്നിവളർത്തൽകേന്ദ്രത്തിലെ മാലിന്യത്തിൽനിന്നു കൈനൂർ ഗ്രാമത്തെയും കുരുടൻ ചിറ പ്രദേശത്തെയും രക്ഷിച്ച മുഖ്യമന്ത്രിയായിരുന്നു വി.എസ്. അച്യുതാനന്ദൻ. അദ്ദേഹത്തിന്‍റെ നിശ്ചയദാർഢ്യത്തോടെയുള്ള തീരുമാനവും നടപടികളുമാണ് നാട്ടുകാർക്കു രക്ഷയായത്. പുത്തൂർ ഗ്രാമപഞ്ചായത്തിലെ കൈനൂർ അയ്യമ്പിള്ളിക്കുന്നിനു മുകളിലായിരുന്നു കെഎൽഡി ബോർഡിന്‍റെ സർക്കാർവക പന്നിവളർത്തൽ കേന്ദ്രം. ഇവിടെനിന്നുള്ള മാലിന്യം കൈനൂരിലെയും കുരുടൻചിറയിലെയും നൂറുകണക്കിനു വീടുകൾക്കു ദുരിതമായിരുന്നു. മാലിന്യപ്രശ്നത്തിനു ശാശ്വതപരിഹാരംതേടി വനിതാസംഘങ്ങളുടെ നേതൃത്വത്തിലും പൗരസമിതിയുടെ നേതൃത്വത്തിലും നടത്തിയ അഞ്ചു വർഷക്കാലം നീണ്ട സമരത്തിനും പ്രശ്നപരിഹാരത്തിനും പ്രതിപക്ഷനേതാവെന്ന നിലയിലും പിന്നീടു മുഖ്യമന്ത്രി എന്ന നിലയിലും വി.എസ്. അച്യുതാനന്ദൻ ആത്മാർഥമായി സഹകരിച്ചിരുന്നു. കൈനൂർ സമരം ആരംഭിക്കുമ്പോൾ വിഎസ് പ്രതിപക്ഷനേതാവായിരുന്നു. പ്രശ്നപരിഹാരത്തിനായി അദ്ദേഹം അന്നേ മുഖ്യമന്ത്രിക്കും വകുപ്പുമന്ത്രിക്കും കത്തുനൽകി. ഡോ. സുകുമാർ അഴീക്കോട് നിരാഹാരം പ്രഖ്യാപിച്ച വേളയിൽ കൈനൂർപ്രശ്‌നത്തെക്കുറിച്ച് ഒരു ലേഖനവും അച്യുതാനന്ദൻ പ്രമുഖപത്രത്തിൽ പ്രസിദ്ധീകരിച്ചു. പിന്നീട് അദ്ദേഹം മുഖ്യമന്ത്രിയായിരിക്കെ അഡ്വ. തേറമ്പിൽ രാമകൃഷ്ണ‌ൻ എംഎൽഎ കൈനൂർപ്രശ്‌നം സംബന്ധിച്ചു സബ്മിഷൻ ഉന്നയിച്ചപ്പോൾ അനുയോജ്യമായ മറ്റൊരു സ്ഥലം കണ്ടെത്താനായിട്ടില്ലെന്ന വകുപ്പുമന്ത്രിയുടെ മറുപടിയെ വെട്ടി വിഎസ് എഴുന്നേറ്റ് പ്രസ്താവന നടത്തി. ''അത്യന്തം പ്രാധാന്യമർഹിക്കുന്ന ഒരു പ്രശ്‌നമാണിത്. മേധ പട്‌കറും ഡോ. സുകുമാർ അഴീക്കോടും ഇടപെട്ട ഈ പ്രശ്‌നത്തെ ഞാനും സപ്പോർട്ട് ചെയ്തിരുന്നു. വിവാദപരമായ പ്രശ‌നത്തിലേക്ക് ഇതിനെ എത്തിക്കാൻ ഗവൺമെന്‍റ് ഉദ്ദേശിക്കുന്നില്ല. ജനങ്ങളുടെയും പ്രതിപക്ഷത്തിന്‍റെയും സഭയുടെയും വികാരം മനസിലാക്കി ജനങ്ങൾക്കു ക്ലേശമുണ്ടാക്കാതെ എത്രയും പെട്ടെന്ന് കേന്ദ്രം മാറ്റിസ്ഥാപിക്കാനാവശ്യമായ നടപടി സ്വീകരിക്കുന്നതാണ്.'' ജനങ്ങളെ ബാധിക്കുന്ന ഒരു പ്രശ്ന‌ത്തിൽ സാങ്കേതികമായ നടപടിയും മറുപടിയുമല്ല വേണ്ടതെന്ന് അദ്ദേഹം ഉറച്ചുവിശ്വസിച്ചിരുന്നു. കെഎൽഡി ബോർഡിന്‍റെയും പന്നിപ്രജനനകേന്ദ്രത്തിന്‍റെയും അധികൃതർ പല തന്ത്രങ്ങൾ മെനഞ്ഞു പന്നിഫാം മാറ്റുന്നതു വൈകിപ്പിക്കാൻ ശ്രമിച്ചുകൊണ്ടിരുന്നപ്പോൾ അതിനെയെല്ലാം മറികടന്ന് പ്രത്യേക മന്ത്രിസഭായോഗം ചേർന്ന് ഒരു നിശ്ചിതതീയതിക്കുള്ളിൽ ഫാം മാറ്റുമെന്ന് ഉത്തരവിറക്കാൻ മുൻകൈയെടുക്കുകയും ചെയ്തു. തീരുമാനം യാഥാർഥ്യമാകുന്നതുവരെ അദ്ദേഹം ജാഗ്രതപാലിക്കുകയും ചെയ്തു. അന്നത്തെ സമരസഹായസമിതിയുടെ കൺവീനറായിരുന്ന സർവോദയമണ്ഡലം ഭാരവാഹി എം. പീതാംബരൻ കൈനൂര്‍ സമരത്തെക്കുറിച്ച് എഴുതിയ പുസ്തകത്തിൽ പ്രശ്നത്തിൽ വിഎസ് നടത്തിയ ശ്രമങ്ങളെക്കുറിച്ചു വിവരിക്കുന്നുണ്ട്.

നിർമാണം ആരംഭിച്ച് രണ്ടു പതിറ്റാണ്ട്; പണിപൂർത്തിയാകാതെ മോഡൽ റോഡ്

തൃശൂർ: രണ്ടുപതിറ്റാണ്ട് പിന്നിട്ടിട്ടും നിർമാണം പൂർത്തിയാക്കാൻ കഴിയാതെ അയ്യന്തോൾ - പുഴയ്ക്കൽ മോഡൽ റോഡ്. 21 വർഷംമുൻപ് (21.6.2004) ഘട്ടംഘട്ടമായി ആരംഭിച്ച മോഡൽ റോഡിന്‍റെ നിർമാണമാണ് നാളിതുവരെയായിട്ടും പൂർത്തീകരിക്കാത്തത്. കളക്ടറുടെ ഔദ്യോഗികവസതി മുതൽ പുഴയ്ക്കൽ പാടംവരെയുള്ള ഭാഗമാണ് ഇനിയും പൂർത്തിയാക്കാനുള്ളത്. ഈ ഭാഗത്താണ് കഴിഞ്ഞ 19 ന് ഒരു യുവാവിന്‍റെ ജീവൻ ബൈക്കപകടത്തിൽ പൊലിഞ്ഞത്. 19 വർഷംമുൻപ് നിർമാണപ്രവർത്തനങ്ങൾ സ്തംഭിച്ച റോഡ്, അഞ്ചുവർഷങ്ങൾക്കുമുൻപ് നിർമാണം പുനരാരംഭിക്കാൻ സംസ്ഥാനസർക്കാർ ഭരണാനുമതി നൽകുകയും 20 കോടി രൂപ അനുവദിക്കുകയും ചെയ്തിരുന്നു. എന്നാൽ കേസുകളും പരാതികളും ഇല്ലാതിരുന്നിട്ടും, ഏറ്റെടുക്കേണ്ട ഭൂമി അളന്നു കല്ലുകൾ സ്ഥാപിച്ചിട്ടും നിർമാണംമാത്രം പുനരാരംഭിക്കാൻ കഴിഞ്ഞിട്ടില്ല. പൂർണതോതിലുള്ള പുനർനിർമാണത്തിന് അനുമതി ഉള്ളതിനാൽ കാനനിർമാണവും റോഡിന്‍റെ പ്രധാന അറ്റകുറ്റപ്പണികളും വർഷങ്ങളായി മുടങ്ങിക്കിടക്കുകയാണ്. ഏറ്റവും തിരക്കുള്ള ഗ്രൗണ്ട് ജംഗ്ഷനിലെ റോഡ് തകർന്നിട്ട് രണ്ടുവർഷത്തോളമായി. ഇടയ്ക്കിടെ ഓട്ടയടയ്ക്കലും പാച്ച് വർക്കും മാത്രം നടക്കുന്പോഴും റോഡിലെ വൻഗർത്തങ്ങളിൽപെട്ട് ഇരുചക്രവാഹനങ്ങൾ അപകടത്തിൽപെടുന്നതു പതിവാകുകയാണ്. വെറും ഒരു കിലോമീറ്റർമാത്രം വരുന്ന, അയ്യന്തോൾ കോണ്‍വെന്‍റ് മുതൽ പുഴയ്ക്കൽപാടം ജംഗ്ഷൻ വരെയുള്ള ഭാഗത്തെ റോഡ് നിർമാണംകൂടി പൂർത്തീകരിച്ചാൽ ജില്ലയുടെ വടക്കുഭാഗത്തേക്കും തിരിച്ചുമുള്ള ഗതാഗതം സുഗമമാക്കുവാൻ സാധിക്കും. വിഷയത്തിൽ അടിയന്തരനടപടി സ്വീകരിക്കണമെന്നാവശ്യപ്പെട്ട് മുഖ്യമന്ത്രി പിണറായി വിജയനും പൊതുമരാമത്തുമന്ത്രി മുഹമ്മദ് റിയാസിനും ടൂ വീലർ യൂസേഴ്സ് അസോസിയേഷൻ ചെയർമാൻ ജെയിംസ് മുട്ടിക്കൽ നിവേദനം നൽകി.

ബൈക്കപകടത്തിൽ യുവാവ് മരിച്ചു

തളിക്കുളം: ഹഷ്മി നഗറിൽ നിയന്ത്രണംവിട്ട ബൈക്ക് മതിലിൽ ഇടിച്ച് യുവാവ് മരിച്ചു. ഹഷ്മി നഗർ ഫത്തഹ് പള്ളിക്കു സമീപം തിരുവാടത്ത് സുരേഷിന്‍റെ മകൻ സാനന്ദ് (20) ആണ് മരിച്ചത്. തിങ്കളാഴ്ച രാത്രി 11നായിരുന്നു അപകടം. നിയന്ത്രണംവിട്ട ബൈക്ക് കാനയിലേക്ക് മറിയുകയും പിന്നീട് മതിലിലിൽ ഇടിക്കുകയായിരുന്നുവെന്ന് നാട്ടുകാർ പറഞ്ഞു. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വാടാനപ്പിള്ളി പോലീസ് മേൽനടപടികൾ സ്വീകരിച്ചു. വീതി കുറഞ്ഞ റോഡിലെ കാനയിൽ സ്ലാമ്പ് നിർമിക്കണമെന്നും വൈദ്യുതി പോസ്റ്റ് നീക്കണമെന്നും ആവശ്യപ്പെട്ട് പഞ്ചായത്തിൽ പരാതി നൽകി മൂന്നു മാസം പിന്നിട്ടിട്ടും നടപടിയുണ്ടായില്ലെന്ന് നാട്ടുകാർ പറഞ്ഞു.

വാഹനാപകടം: സ്കൂട്ടർ യാത്രികൻ മരിച്ചു

മാള: അഷ്ടമിച്ചിറയിൽ ഗുഡ്‌സ് ഓട്ടോറിക്ഷയും സ്കൂട്ടറും കൂട്ടിയിടിച്ച് സ്കൂട്ടർ യാത്രികൻ മരിച്ചു. കുഴിക്കാട്ടുശേരിയിൽ താമസിക്കുന്ന ഇരിങ്ങാലക്കുട പൊറത്തുശേരി സ്വദേശി കോട്ടക്കകത്തുകാരൻ ജോയ്(64) ആണ് മരിച്ചത്. ഇന്നലെ ഉച്ചയ്ക്ക് ഒന്നരയോടുകൂടിയാണ് അപകടം. കുഴിക്കാട്ടുശേരിയിലെ മരിയ തെരേസ ആശുപത്രിയിൽ ആദ്യം എത്തിച്ചു. അവിടെനിന്ന് അപ്പോളോ ആശുപത്രിയിൽ കൊണ്ടുപോയെങ്കിലും മരണം സംഭവിക്കുകയായിരുന്നു. ഭാര്യ: നീന, മക്കൾ: അലീന, അച്ചു. മരുമകൻ: ജിതിൻ.

കള്ളുകുപ്പികൊണ്ട് തലയ്ക്കടിച്ചു കൊലപ്പെടുത്താൻ ശ്രമിച്ച പ്രതി പിടിയിൽ

വടക്കാഞ്ചേരി: കള്ള്ഷാപ്പിൽ ബില്ല് കൊടുക്കുന്നതിൽ കള്ളുകുപ്പികൊണ്ട് തലക്കടിച്ചുകൊലപ്പെടുത്താൻ ശ്രമിച്ച കേസിലെ പ്രതിയെ വടക്കാഞ്ചേരി പോലീസ് പിടികൂടി. അത്താണി സ്വദേശി ദേവൻ (21) നെയാണ് വടക്കാഞ്ചേരി പോലീസ് പിടികൂടിയത്. അത്താണി കള്ളുഷാപ്പിൽ വെച്ചായിരുന്നു സംഭവം. പൂമല ചോറ്റുപാറ കൊല്ലാറ വീട്ടിൽ അക്ഷയ് (22)നെയാണ് കള്ളുകുപ്പികൊണ്ട് തലയ്ക്കടിച്ചത്. പരിക്കേറ്റ അക്ഷയ് പ്രതി ദേവൻ എന്നിവർ സുഹൃത്തുക്കളാണ്. ഇവരുടെ പേരിൽ നിരവധി കേസുകളുമുണ്ട്. അത്താണി കള്ളുഷാപ്പിൽ ദേവന്‍റെ പിറന്നാൾ ആഘോഷത്തിനിടെ യാണ് മർദ്ദനമേറ്റത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

പോലീസിനെ ആക്രമിച്ച പ്രതിക്ക് ഏഴരമാസം തടവ്

ചാവക്കാട്: പേരാമംഗലം ഹൈവേപോലീസ് സ്റ്റേഷൻ സബ് ഇൻസ്പെക്ടർ എം.പി. വർഗീസിനെ കൃത്യനിർവഹണം തടസപ്പെടുത്തി ദേഹോപദ്രവം ഏൽപ്പിച്ച കേസിൽ പ്രതിക്ക് ഏഴരമാസത്തെ തടവ്. രണ്ടാം പ്രതിയായ പുഴയ്ക്കൽ അമലാനഗർ പുല്ലംപറമ്പിൽ കൃഷ്ണകുമാറി (40)നെയാണ് ചാവക്കാട് അസിസ്റ്റന്‍റ്് സെഷൻസ് കോടതി വിവിധ വകുപ്പുകളിലായി ആകെ ഏഴുമാസം 15 ദിവസം തടവിന് ശിക്ഷിച്ചത്. ‌2018 ഏപ്രിൽ 25ന് രാത്രിയായിരുന്നു സംഭവം. എരനെല്ലൂരിൽ വാഹനാപകടത്തെ തുടർന്ന് നാട്ടുകാർ രണ്ടുപേരെ തടഞ്ഞുവെച്ചിട്ടുണ്ട് എന്നറിഞ്ഞ് സ്ഥലത്തെത്തിയ പേരാമംഗലം ഹൈവേ സബ് ഇൻസ്പെക്ടർ വർഗീസിനെ ആക്രമിച്ചുവെന്നാണ് കേസ്. പ്രോസിക്യൂഷന് വേണ്ടി അഡീഷണൽ പബ്ലിക് പ്രോസിക്യൂട്ടർ അഡ്വ. കെ.ആർ. രജിത്കുമാർ ഹാജരായി.

യുവാവിനെ തട്ടിക്കൊണ്ടുപോയി കൊലപ്പെടുത്തുവാൻ ശ്രമം: ഗുണ്ടാനേതാവടക്കം എട്ടുപേർ അറസ്റ്റിൽ

വാടാനപ്പിള്ളി: യുവാവിനെ തട്ടിക്കൊണ്ടുപോയി കവർച്ചചെയ്തു കൊലപ്പെടുത്താൻശ്രമിച്ച കേസിൽ ഗുണ്ടാനേതാവും സ്റ്റേഷൻ റൗഡിയും 25 ക്രിമിനൽ കേസുകളിലെ പ്രതിയുമായ ബിൻഷാദ് അടക്കം എട്ട് പ്രതികൾ അറസ്റ്റിൽ. വാടാനപ്പിള്ളി ഫസൽ നഗർ സ്വദേശി ബിൻഷാദ് (36), ഇടശേരി സുലൈമാൻ പള്ളിക്കുസമീപം പുത്തൻപുരയിൽ വീട്ടിൽ മുഹമ്മദ് അഷ്‌ഫാക്ക് (23), വാടാനപ്പിള്ളി കുട്ടമുഖം സ്വദേശി വടക്കിനേടത്ത് വീട്ടിൽ മുഹമ്മദ് അസ്‌ലം (28), ഗണേശമംഗലം എംഎൽഎ വളവ് സ്വദേശി അമ്പലത്ത് വീട്ടിൽ ഷിഫാസ് (30), വാടാനപ്പിള്ളി റഹ്മത്ത് നഗർ സ്വദേശി പോക്കാക്കില്ലത്ത് വീട്ടിൽ ഫാസിൽ (24), ഗണേശമംഗലം സ്വദേശി അമ്പലത്തുവീട്ടിൽ ഷാഫി മുഹമ്മദ് (36), വാടാനപ്പിള്ളി ബീച്ച് സ്വദേശി രായംമരക്കാർ വീട്ടിൽ ആഷിഖ് (27), ഗണേശമംഗലം എംഎൽഎ വളവ് സ്വദേശി അറക്കവീട്ടിൽ മുഹമ്മദ് റയീസ് (22) എന്നിവരെയാണ് തൃശൂർ റൂറൽ ജില്ലാ പൊലീസ് മേധാവി ബി.കൃഷ്ണകുമാറിന്‍റെ നേതൃത്വത്തിലുള്ള അന്വേഷണ സംഘം അറസ്റ്റ് ചെയ്തത്. 18ന് രാത്രിയിൽ വാടാനപ്പിള്ളി നടുവിൽക്കര സ്വദേശിയായ യുവാവിനെ തട്ടിക്കൊണ്ടുപോയി കൊലപ്പെടുത്താൻ ശ്രമിച്ച കേസിലാണ് അറസ്റ്റ്. പ്രതികളുമായുള്ള പ്രശ്നങ്ങൾ പറഞ്ഞുതീർക്കാമെന്ന് പറഞ്ഞ് വിട്ടിൽനിന്നും നടുവിൽക്കര ദേശീയപാതയുടെ പണി നടക്കുന്ന സ്ഥലത്തേക്ക് യുവാവിനെ വിളിച്ചുവരുത്തി. തുടർന്ന് അവിടെ നിന്നും അഷ്ഫാക്കും മറ്റൊരു പ്രതിയും ചേർന്ന് സ്കൂട്ടറിൽ കയറ്റി തട്ടികൊണ്ടുപോയി വാടാനപ്പിള്ളി ബീച്ച് ശാന്തിറോഡിന് സമീപമുള്ള ആളൊഴിഞ്ഞ പറമ്പിൽ എത്തിച്ച് ക്രൂരമായി ആക്രമിച്ച് പരിക്കേൽപ്പിക്കുകയും കഴുത്തിൽ തോർത്തുമുണ്ട് മുറുക്കി കൊല്ലാൻ ശ്രമിക്കുകയുമായിരുന്നു. ഈ കേസിലെ പരാതിക്കാരന്‍റെ സുഹൃത്തിന്‍റെ സഹോദരൻ ഷാഫിക്ക് 26,000 രൂപ കൊടുക്കാനുള്ളതിനെ സംബന്ധിച്ച് ജൂൺ 29ന് തൃത്തല്ലൂരിൽ നടന്ന അടിപിടിയിൽ പരാതിക്കാരൻ ഇടപെട്ട് പ്രതികളെ പിടിച്ചുമാറ്റിയതിലുള്ള വൈരാഗ്യത്താലാണ് പ്രതികൾ യുവാവിനെ ആക്രമിച്ചത്. യുവാവിന്‍റെ കൈവശമുണ്ടായിരുന്ന 1000 രൂപയും മൊബൈൽ ഫോണും ഇവർ കവർച്ച ചെയ്തിരുന്നു. യുവാവിനെ നടുവിൽക്കരയിൽ നിന്നും തട്ടി കൊണ്ടുപോയതായി ജില്ലാ പൊലീസ് മേധാവിക്ക് രഹസ്യവിവരം ലഭിച്ചതിനെ തുടർന്ന് വാടാനപ്പള്ളി ഇൻസ്പെക്ടർ എൻ.ബി. ഷൈജു, എസ് .ഐ മാരായ സനദ്, പ്രദീപ് എന്നിവർ ചേർന്ന് അന്വേഷണം നടത്തുകയും ശാന്തി റോഡിലെ തെങ്ങിൻപറമ്പിലെ ഒളിസങ്കേതം കണ്ടെത്തുകയായിരുന്നു. തുടർന്ന് ഈ സ്ഥലത്തിന്‍റെ ഉടമയും പ്രതിയുമായ ഷിഫാസ്, അഷ്‌ഫാക്ക്, ആഷിഖ്, ഷാഫി എന്നീ നാലുപ്രതികളെ മണിക്കൂറുകൾക്കുള്ളിൽ സ്ഥലത്തുനിന്ന് പിടികൂടാൻ സാധിച്ചു. തുടർന്ന് നടത്തിയ ഊർജിതമായ അന്വേഷണത്തിന്‍റെ ഭാഗമായാണ് കേസിലെ പ്രധാന പ്രതിയായ ബിൻഷാദ്, അസ്ലം, ഫാസിൽ, റയീസ് എന്നിവരെ വടക്കേക്കാട് മല്ലാട് ഒളി സങ്കേതത്തിൽ നിന്നും പിടികൂടിയത്. കൊടുങ്ങല്ലൂർ ഡിവൈഎസ്പി വി.കെ. രാജു, വാടാനപ്പിള്ളി ഇൻസ്പെക്ടർ ഷൈജു, പ്രോബേഷൻ എസ്ഐ സനദ്, എൻ. പ്രദീപ്, എസ്ഐമാരായ ഷാഫി യുസഫ്, പ്രദീപ്, എഎസ്ഐ ലിജു ഇയ്യാനി, എസ്സിപിഒ ജിനേഷ്, രാജ്കുമാർ, സിപിഒമാരായ നിഷാന്ത്, ബിജു, സുർജിത്ത്, അഖിൽ, അമൽ എന്നിവർ ചേർന്നാണ് പ്രതികളെ പിടികൂടിയത്.

ജൂബിലിയിൽ മെഡിക്കൽ കോണ്‍ഫറൻസ്

തൃശൂർ: ജൂബിലി മിഷൻ മെഡിക്കൽ കോളജിൽ സൈക്യാട്രി വിഭാഗത്തിന്‍റെ ആഭിമുഖ്യത്തിൽ കൗമാരപ്രായക്കാരുടെ സ്വഭാവവൈകല്യങ്ങൾ എന്ന വിഷയത്തെ ആസ്പദമാക്കി മെഡിക്കൽ കോണ്‍ഫറൻസ് സംഘടിപ്പിച്ചു. കേരള ആരോഗ്യസർവകലാശാല റിസർച്ച് ഡീൻ ഡോ. കെ.എസ്. ഷാജി ഉദ്ഘാടനം ചെയ്തു. ജൂബിലി മിഷൻ ആശുപത്രി ഡയറക്ടർ ഫാ. റെന്നി മുണ്ടൻകുരിയൻ, പ്രിൻസിപ്പൽ ഡോ. എം.എ. ആൻഡ്രൂസ്, സൈക്യാട്രി പ്രഫസർ എമരിറ്റസ് ഡോ. ജെയിംസ് ടി. ആന്‍റണി, സൈക്യാട്രി വിഭാഗം മേധാവി ഡോ. നീതി വത്സൻ, അസിസ്റ്റന്‍റ് പ്രഫസർ ഡോ. ജോമി ചക്കാലക്കുടി എന്നിവർ സന്നിഹിതരായി. കൗമാരക്കാരിലെ സ്വഭാവവൈകല്യങ്ങൾ, ആത്മഹത്യാപ്രവണത, അക്രമവാസന, സ്കൂളിൽ പോകാനുള്ള വിമുഖത എന്നീ വിഷയങ്ങളെ കേന്ദ്രീകരിച്ച് ക്ലാസുകൾ നടന്നു. കാരക്കോണം മെഡിക്കൽ കോളജിലെ പ്രഫസർ ഡോ. അനിൽ പ്രഭാകരൻ, കൊച്ചിയിലെ പീജെയ്സ് ന്യൂറോസെന്‍ററിലെ സീനിയർ സൈക്യാട്രിസ്റ്റ് ഡോ. ഫിലിപ്പ് ജോണ്‍, കോട്ടയം മെഡിക്കൽ കോളജ് പ്രിൻസിപ്പൽ ഡോ. വർഗീസ് പുന്നൂസ്, തിരുവനന്തപുരം– മെന്‍റൽ ഹെൽത്ത് സെന്‍ററിലെ സീനിയർ സൈക്യാട്രിസ്റ്റ് ഡോ. ഇന്ദു വി. നായർ, പുതുച്ചേരി ജിപ്മറിലെ ഡോ. വികാസ് മേനോൻ എന്നിവർ ക്ലാസുകൾ നയിച്ചു.

ആൻ മൂക്കനെ മന്ത്രി അനുമോദിച്ചു

തൃശൂർ: കേന്ദ്ര സർക്കാരിന്‍റെ അന്താരാഷ്ട്ര യോഗാ ദിനാഘോഷത്തിൽ പ്രത്യേക ക്ഷണിതവായി പങ്കെടുത്ത അരണാട്ടുകര ഇൻഫന്‍റ് ജീസസ് കോണ്‍വെന്‍റ് ഗേൾസ് ഹൈസ്കൂളിലെ എട്ടാംക്ലാസ് വിദ്യാർഥി ആൻ മൂക്കനെ മന്ത്രി കെ. കൃഷ്ണൻകുട്ടി അനുമോദിച്ചു. രാമനിലയത്തിൽവച്ചാണ് മന്ത്രി ആൻ മൂക്കനെ അനുമോദിച്ചത്. ഇന്ത്യ ഗവണ്‍മെന്‍റ് മിനിസ്ട്രി ഓഫ് സോഷ്യൽ ജസ്റ്റീസ്‌ ആൻഡ് എംപവർമെന്‍റിന്‍റെ നേതൃത്വത്തിൽ ഹൈദരാബാദിൽ സംഘടിപ്പിച്ച യോഗദിനാഘോഷത്തിലാണ് ആൻ മൂക്കൻ പ്രത്യേക ക്ഷണിതാവായി യോഗ പ്രകടനം കാഴ്ചവച്ചത്. ഡിപ്പാർട്ട്മെന്‍റ് ഓഫ് എംപവർമെന്‍റ് ഓഫ് പേഴ്സണ്‍ ഡിസബിലിറ്റീസ് വിഭാഗത്തിലാണ് അംഗപരിമിതയായ ആൻമൂക്കൻ പങ്കെടുത്തത്. കേന്ദ്രമന്ത്രി ഡോ. വീരേന്ദ്രകുമാറും നേരത്തേ ആനിനെ പ്രത്യേകം അനുമോദിച്ചിരുന്നു അയ്യന്തോൾ സ്വദേശികളും അധ്യാപകരുമായ ജീൻ മൂക്കന്‍റെയും പിൻസിയുടെയും മകളാണ്. യോഗയിൽ സംസ്ഥാനതലത്തിലും ദേശീയ തലത്തിലും നിരവധി പുരസ്കാരങ്ങൾ നേടിയിട്ടുള്ള ആൻ തിരുവനന്തപുരത്തു സംഘടിപ്പിച്ച സംസ്ഥാന യോഗ ഒളിന്പ്യാഡ് 2025 ലെ മികച്ച പ്രകടനത്തിനും സമ്മാനം കരസ്ഥമാക്കിയിരുന്നു.

അപകടഭീഷണിയിൽ മച്ചാട് ഗവ. ഹയർ സെക്കൻഡറി സ്കൂളിലെ കെട്ടിടം

പുന്നംപറമ്പ്: ആയിരത്തിലധികം കുട്ടികൾ പഠിക്കുന്ന തെക്കുംകര പഞ്ചായത്തിലെ സർക്കാർ സ്കൂളായ മച്ചാട് ഗവ. ഹയർസെക്കൻഡറി സ്കൂളിലെ 65 വർഷത്തോളം പഴക്കമുള്ള കെട്ടിടം കാലപ്പഴക്കത്താൽ ഏത് നിമിഷവും നിലംപതിക്കാവുന്ന അവസ്ഥയിലാണ്. നിരവധിതവണ പരാതിപ്പെട്ടിട്ടും സ്കൂൾ അധികൃതർ നടപടിയെടുക്കാത്തതിനെ തുടർന്ന് വാർഡ്മെമ്പർ കെ. രാമചന്ദ്രൻ ഇതുസംബന്ധിച്ച് തലപ്പള്ളി താലൂക്ക് തഹസിൽദാർക്ക് ഇന്നലെ പരാതി നൽകുകയായിരുന്നു. പരാതിയുടെ ഗൗരവം മനസ്സിലാക്കിയ തലപ്പള്ളി താലൂക്ക് തഹസിൽദാർ രാജേഷ് മാരാത്തിന്‍റെനേതൃത്വത്തിലുള്ള റവന്യൂ ഉദ്യോഗസ്ഥർ സ്ഥലം സന്ദർശിക്കുകയും സ്കൂൾ അധികൃതരുമായി സംസാരിച്ച് അടിയന്തര നടപടിക്ക് നിർദേശം നൽകുകയും ചെയ്തു. ഇതുസംബന്ധിച്ച് ജില്ലാ പഞ്ചായത്തിന് കത്തയച്ചിരുന്നതായി സ്കൂൾ അധികൃതർ തഹസിൽദാരെ ബോധ്യപ്പെടുത്തി. അപകട സാധ്യത മുന്നിൽക്കണ്ട് അടിയന്തരമായ നടപടി സ്വീകരിക്കുവാൻ ഇടപെടൽ ഉണ്ടാകുമെന്ന് തഹസിൽദാർ വ്യക്തമാക്കി. റോഡിനോട് ചേർന്നുള്ള പഴയ കെട്ടിടം റോഡ് നിർമാണത്തിന്‍റെ ഭാഗമായി കാന കോരിയതിനാൽ മതിൽ ഉൾപ്പെടെ ഇളകി നിൽക്കുകയാണ്. സ്കൂൾ കുട്ടികൾ കയറാതിരിക്കുവാൻ കയറുകെട്ടി നോഎൻട്രി ബോർഡ് സ്ഥാപിച്ചിട്ടുണ്ടെങ്കിലും അധ്യാപകരുടെ കണ്ണുവെട്ടിച്ച് കുട്ടികൾ ഈ ഭാഗത്തേക്ക് എത്തുന്നുണ്ട്. വിഷയത്തിൽ അടിയന്തര നടപടികൾ ഉണ്ടാകണമെന്ന് വാർഡ് മെമ്പറും രക്ഷിതാക്കളും ആവശ്യപ്പെട്ടു. എന്നാൽ 2018മുതൽ ആരോപണം ഉന്നയിച്ച കെട്ടിടത്തിൽ ക്ലാസുകൾ ഉണ്ടായിരുന്നില്ലെന്നും ഹൈസ്കൂൾ ഓഫീസ് മാത്രമാണ് പ്രവർത്തിച്ചിരുന്നതെന്നും വൈകാതെ തന്നെ ഓഫീസും മറ്റൊരു കെട്ടിടത്തിലേക്ക് മാറ്റുകയും ചെയ്തു. ആദ്യകാലത്ത് നിർമിച്ച കെട്ടിടം പൊളിച്ചുനീക്കണമെന്ന് ആവശ്യപ്പെട്ട് സ്കൂൾ അധികൃതർ ജില്ലാ പഞ്ചായത്ത് അധികൃതർക്ക് കത്തുനൽകിയിട്ടുണ്ടെന്നും എന്തുകാരണത്താലാണ് കെട്ടിടം പൊളിച്ചു നീക്കുന്നതെന്നും കാണിച്ചുകൊണ്ട് ജില്ലാ പഞ്ചായത്തിൽ നിന്നും മറുപടി കിട്ടിയതായും കെട്ടിടത്തിന്‍റെ ശോചനിയാവസ്ഥകാണിച്ച് വീണ്ടും കത്ത് നൽകുമെന്നും നടപടികൃമങ്ങൾ പൂർത്തിയാക്കി കെട്ടിടം ഉടൻ പൊളിച്ചു നീക്കുമെന്നും സ്കൂൾ അധികൃതർ പറഞ്ഞു.

വയോധികദമ്പതികൾക്കു നഗരസഭാ അഗതിമന്ദിരത്തിൽ താമസമൊരുങ്ങി

ഗുരുവായൂർ: ബന്ധുക്കളില്ലാതെ മേല്പാലത്തിന് താഴെ കഴിഞ്ഞിരുന്ന വയോധിക ദമ്പതികൾക്ക് സാമൂഹ്യ പ്രവർത്തകരുടെ ഇടപെടലിൽ നഗരസഭ അഗതിമന്ദിരത്തിൽ സുരക്ഷിതമായി തലചായ്ക്കാം. ഗുരുവായൂർ തിരുവെങ്കിടം സ്വദേശിയായ രാധയ്ക്കും, ഭർത്താവ് മോഹൻദാസിനുമാണ് നഗരസഭ തണലേകിയത്. ഇവർക്ക് പ്രായാധിക്യംമൂലം ജോലി ചെയ്യാനാകാത്ത സ്ഥിതിയായിരുന്നു. മമ്മിയൂരിലെ വാടകഫ്ലാറ്റിൽ നിന്നും തെരുവിൽ താമസം തുടങ്ങിയിട്ട് രണ്ടു മാസത്തിലേറെയായി. വയോധികരെ അഗതിമന്ദിരത്തിലേക്കു മാറ്റണമെന്ന് ആവശ്യപ്പെട്ട് പൊതുപ്രവർത്തകനായ അജു. എം. ജോണി നഗരസഭ ചെയർമാൻ എം. കൃഷ്ണദാസിനെ സമീപിച്ചു. ചെയർമാൻ അനുകൂല നിലപാട് സ്വീകരിച്ചു. ടെമ്പിൾ സിഐ ജി. അജയൂമാറിന്‍റെ സഹായത്തോടെ ആവശ്യമായ രേഖകൾ തയ്യാറാക്കി വയോധികരെ ഇന്നലെ അഗതിമന്ദിരത്തിൽ പ്രവേശിപ്പിച്ചു. പൊതുപ്രവർത്തകരായ എം.വി. ബിജു, ഇ.ആർ. ഗോപിനാഥൻ, ഗിരീഷ്, ജയഘോഷ്‌ എന്നിവരും സഹായത്തിനുണ്ടായി.

ഡിവൈഎസ്പി ഓഫീസിനരികെനിന്നും മലമ്പാമ്പിനെ പിടികൂടി

ചാലക്കുടി: ഡിവൈഎസ്പി ഓഫീ സിനു സമീപത്തുനിന്നും മലമ്പാ മ്പിനെ പിടികൂടി. ഓഫീസ് പരിസരത്തെ പോലീസ് ക്വാർട്ടേഴ് സിനുസമീപം കാടുപിടിച്ചുകിടന്നിരുന്ന പറമ്പ് വൃത്തിയാക്കുന്നതിനിടയിലാണ് ഏകദേശം 10 അടി നീളവും 12 കിലോയോളം തൂക്കവുമുള്ള മലമ്പമ്പിനെ പിടികൂടിയത്. പറമ്പ് വൃത്തിയാക്കുന്നതിനിടയിൽ ഹിറ്റാച്ചി ഡ്രൈവറാണ് പുല്ലിനിടയിൽ പാമ്പിനെ കണ്ടത്. വനപാലകരെ വിവരമറിയിച്ചതിനെത്തുടർന്ന് റെസ്‌ക്യൂ വർമാരായ ബിബിഷും ദീപുവും ചേർന്ന് പാമ്പിനെ പിടികൂടി.

അതിരപ്പിള്ളി റോട്ടറി ക്ലബ് സ്ഥാനാരോഹണം

ചാലക്കുടി: അതിരപ്പിള്ളി റോട്ടറി ക്ലബ്ബിന്‍റെ സ്ഥാനാരോഹണം നടത്തി. പ്രസിഡന്‍റ്് ലിജോ മത്തായി അധ്യക്ഷത വഹിച്ചു. റോട്ടറി ഡിസ്ട്രിക്ട് ഗവർണർ ഇലക്ട് ജോഷി ചാക്കോ സ്ഥാനരോഹണം ഉദ്ഘാടനം ചെയ്തു. 2024 - 25 വർഷത്തെ റിപ്പോർട്ട്‌ സെക്രട്ടറി അമൽജിത് അവതരിപ്പിച്ചു. 2025 - 26 കാലഘട്ടത്തിലേക്കുള്ള ഭാരവാഹികളായി വിനോദ് ജേക്കബ് - പ്രസിഡന്‍റ്, അബിഷ് ജോസ് - വൈസ് പ്രസിഡന്‍റ്, ബിജു കുര്യാക്കോസ് - സെക്രട്ടറി, അഡ്വ. ജയൻ കുറ്റിച്ചാക്കു - ജോയിന്‍റ്് സെക്രട്ടറി, പി.ജി. പ്രദീപ് - ട്രഷറർ എന്നിവർ സ്ഥാനമേറ്റു. അസി. ഗവർണർ ഷാജു ജോസ് പുതിയതായി മെമ്പർഷിപ്പ് സ്വീകരിച്ച അംഗങ്ങൾക്ക് പ്രതിജ്ഞ ചൊല്ലിക്കൊടുത്ത് അംഗത്വം നൽകി. നവസരണി പ്രൊജക്ട് വഴി ഡ്രൈവിംഗ് പരിശീലത്തിനായി വിനോദ് ജേക്കബ് സംഭാവന നൽകിയ വാഹനംവഴി അതിരപ്പിള്ളി മേഖലയിലെ 125 ട്രൈബൽ വിഭാഗത്തിൽപ്പെട്ട യുവാക്കൾക്ക് ലൈസൻസ് ലഭിക്കുകയും അതിൽ 30 ഓളം പേർ സ്വന്തമായി വാഹനം വാങ്ങുകയും ചെയ്തതായി യോഗത്തിൽ പങ്കെടുത്ത ഫോറസ്റ്റ് ഡിപ്പാർട്ട്മെന്‍റ് പ്രതിനിധി കെ. ആർ. രാജീവ്‌ അറിയിച്ചു. യോഗത്തിൽ ജിജി ആർ. രമേശ്‌, ചാർട്ടർ പ്രസിഡന്‍റ്് ഡോ. ജോർജ് കോലഞ്ചേരി, എം. ജെ. ജോബി, സെക്രഡ് ഹാർട്ട്‌ കോളജ് പ്രിൻസിപ്പൽ സിസ്റ്റർ ഡോ. ഐറിൻ, ഡയറക്ടർമാരായ ജയൻ കുറ്റിച്ചാക്കു, അബിഷ് ജോസ്, പി.ജി. പ്രദീപ്‌ എന്നിവർ പ്രസംഗിച്ചു.

പൂവത്തുംകടവ് ഫാർമേഴ്‌സ് സഹ. ബാങ്കിന്‍റെ വിദ്യാഭ്യാസ അവാർഡ് സമർപ്പണം നടത്തി

കയ്പമംഗലം: പൂവത്തുംകടവ് ഫാർമേഴ്‌സ് സർവീസ് സഹകരണ ബാങ്കിന്‍റെ ആഭിമുഖ്യത്തിൽ വിദ്യാഭ്യാസ അവാർഡ് സമർപ്പണം നടത്തി. എസ്.എൻ. പുരം എസ്‌ബി തേവർപ്ലാസയിൽ നടന്ന അവാർഡ് സമർപ്പണസമ്മേളനം ഇ.ടി. ടൈസൺ എംഎൽഎ ഉദ്‌ഘാടനം ചെയ്തു. വൈസ് പ്രസിഡന്‍റ് എം.കെ. ചന്ദ്രൻ അധ്യക്ഷത വഹിച്ചു. സംഗീത നാടക അക്കാദമി - സംസ്ഥാന പ്രൊഫഷണൽ നാടക മത്സരത്തിൽ മികച്ച ഗായികയായി തെരഞ്ഞെടുക്കപ്പെട്ട ഹിമ ഷിൻജോ, സമ്മിശ്ര കർഷകനുള്ള അവാർഡ് നേടിയ ബിബിൻ. പി.ദാസ് എന്നിവരെ അനുമോദിച്ചു. 2025 വർഷത്തെ എസ്എസ്എൽസി, പ്ലസ് ടു പരീക്ഷകളിൽ എല്ലാ വിഷയങ്ങളിലും എ പ്ലസ് നേടിയ ബാങ്ക് അംഗങ്ങളുടെ മക്കൾക്കുള്ള വിദ്യാഭ്യാസ അവാർഡുകൾ സമർപ്പിച്ചു. മതിലകം ബ്ലോക്ക് പഞ്ചായത്ത് പ്രസിഡന്‍റ്് സി.കെ. ഗിരിജ പ്ലസ് ടു അവാർഡ് ദാനവും ശ്രീനാരായണപുരം ഗ്രാമപഞ്ചായത്ത് പ്രസിഡന്‍റ്് എം.എസ്. മോഹനൻ എസ്എസ്എൽസി അവാർഡ് ദാനവും നിർവഹിച്ചു. മതിലകം ഗ്രാമപഞ്ചായത്ത് ആരോഗ്യ- വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്‌സൺ സുമതി സുന്ദരൻ, ശ്രീനാരായണപുരം ഗ്രാമപഞ്ചായത്ത് മെമ്പർ ടി.എസ്. ശീതൾ, ബാങ്ക് ഭരണ സമിതി അംഗങ്ങളായ എം. ആർ. ജോഷി, എം. എസ്. മോഹൻദാസ്, പി. അജിത്കുമാർ, മാനേജിംഗ് ഡയറക്ടർ ടി.ബി. ശ്രീജ തുടങ്ങിയവർ പ്രസംഗിച്ചു. മറ്റു ഡയറക്ടർ ബോർഡ് മെമ്പർമാർ, സഹകാരികൾ തുടങ്ങിയവർ പങ്കെടുത്തു.

കാട്ടൂര്‍ സര്‍വീസ് സഹകരണ ബാങ്ക് വിദ്യാഭ്യാസ അവാര്‍ഡുകള്‍ നല്‍കി

കാട്ടൂര്‍: സര്‍വീസ് സഹകരണ‌ബാങ്കിലെ മെമ്പര്‍മാരുടെ മക്കളില്‍ എസ്എസ്എല്‍സി, പ്ലസ്ടു പരീക്ഷകളില്‍ എല്ലാ വിഷയങ്ങളിലും എ പ്ലസ് നേടി വിജയിച്ചവരെ മെമന്‍റോയും കാഷ് അവാര്‍ഡും നല്‍കി ആദരിച്ചു. വിദ്യാദരം ചടങ്ങ് തൃശൂര്‍ ജില്ല അസി. കളക്ടര്‍ സ്വാതി മോഹന്‍ റാത്തോഡ് ഉദ്ഘാടനം ചെയ്തു. ബാങ്ക് പ്രസിഡന്‍റ് ജോമോന്‍ വലിയവീട്ടില്‍ അധ്യക്ഷത വഹിച്ചു. ഭരണസമിതി അംഗങ്ങളായ എം.ജെ. റാഫി, മധുജ ഹരിദാസ്, എം.ഐ. അഷ്‌റഫ്, ഷെറിന്‍ തേര്‍മഠം, ഇ.എല്‍. ജോസ്, പി.പി. ആന്‍റണി, രാജന്‍ കുരുമ്പേപറമ്പില്‍, കെ.ബി. ബൈജു, പി.എ. മുഹമ്മദ് ഇക്ബാല്‍, രാജേഷ് കാട്ടിക്കോവില്‍, സ്മിത മനോജ് എന്നിവര്‍ ആശം സകളര്‍പ്പിച്ചു. ബാങ്ക് വൈസ് പ്രസിഡന്‍റ്് പ്രമീള അശോകന്‍ സ്വാഗതവും സെക്രട്ടറി ടി.വി. വിജയകുമാര്‍ നന്ദിയും പറഞ്ഞു.

അടിപ്പാതയിലെ ഗതാഗതക്കുരുക്ക് ഒഴിവാക്കാൻ നടപടി സ്വീകരിക്കും

ചാലക്കുടി: കോടതിജംഗ്ഷനിലെ അടിപ്പാതയിൽ തുടർച്ചയായി ഉണ്ടാകുന്ന അതി രൂക്ഷമായ ഗതാഗതക്കുരുക്ക് ഒഴിവാക്കുന്നതിനുവേണ്ട ക്രമീകരണങ്ങളും നിയന്ത്രണങ്ങളും നടപ്പിലാക്കുവാൻ ജനപ്രതിനിധികളും ബസ് ഉടമകൾ ഉൾപ്പെടെയുള്ള മറ്റു വിഭാഗങ്ങളുമായി ചർച്ച നടത്താൻ നഗരസഭയിലെ ട്രാഫിക് റെഗുലേറ്ററി കമ്മിറ്റി തീരുമാനിച്ചു. സർവീസ് റോഡുകളിൽ ചില ഭാഗങ്ങളിൽ ഗതാഗത നിയന്ത്രണവും അടിപ്പാതയ്ക്ക് ഇരുഭാഗത്തും ബെൽ മൗത്തുകൾ സൗകര്യപ്പെടുത്തുന്നതും ഉൾപ്പടെ ചർച്ച ചെയ്തു. സിവിൽ സ്റ്റേഷൻ, ഇറിഗേഷൻ ഓഫീസുകളുടെ ഭാഗത്ത് ബെൽ മൗത്ത് സൗകര്യപ്പെടുത്തു ന്നതിനുള്ള നടപടികൾ എംഎൽഎ സ്വീകരിക്കുന്നുണ്ടെന്നും ഇരുഭാഗത്തേയും ഇലക്ട്രിക് ലൈനുകൾ മാറ്റിസ്ഥാപിക്കുന്നതിനു നഗരസഭ പണം അടയ്ക്കാൻ തയാറാണെന്ന് കെഎസ്ഇബിയെ അറിയിച്ചിട്ടുണ്ടെന്നും ചെയർപേഴ്സൺ ഷിബു വാലപ്പൻ യോഗത്തിൽ പറഞ്ഞു. നോർത്ത് ബസ് സ്റ്റാൻഡിൽനിന്നും ബസ് സർവീസ് ആരംഭിക്കുന്നതിനുള്ള നടപടികൾ സ്വീകരിക്കുവാനും മാർക്കറ്റ് റോഡിലെ വൺവെ സംവിധാനം കാര്യക്ഷമമാക്കാനും തീരുമാനിച്ചു. ഇക്കാര്യത്തിൽ ശക്തമായ നടപടി പോലീസിന്‍റെ ഭാഗത്തുനിന്നും ഉണ്ടാകുമെന്ന് സർക്കിൾ ഇൻസ്പെക്ടർ പറഞ്ഞു. റോഡിലെ അനധികൃത പാർക്കിം ഗും അനധികൃത കച്ചവടങ്ങളും കർശനമായി ഒഴിവാക്കും. സൗത്ത് പള്ളി സ്റ്റോപ്പിലെ ഓട്ടോറിക്ഷ സ്റ്റാൻഡ് മാറ്റണമെന്ന ഹൈക്കോടതി വിധിയും താലൂക്ക് ആശുപത്രി പരിസരത്തെ ഓട്ടോ ടാക്സി സ്റ്റാൻഡിന്‍റെ കോടതി വിധിയും നടപ്പിലാക്കുന്നതിന് ഓട്ടോറിക്ഷ പ്രതിനിധികളുമായി ചർച്ച്ചെയ്ത് നടപടി സ്വീകരിക്കും. ചെയർപേഴ്സൺ ഷിബു വാലപ്പൻ അധ്യക്ഷത വഹിച്ചു. എസ്എച്ച്ഒ എം.കെ. സജീവ്, ഡെപ്യൂട്ടി തഹസിൽദാർ പി.എസ്. ജയദേവൻ, എഎം‌വിഐ മെൽവിൻ ജോൺ, അനു. കെ. സദാനന്ദൻ എന്നിവർ പങ്കെടുത്തു.

നെല്‍കര്‍ഷകരോടുള്ള അവഗണനയ്ക്കു പരിഹാരമായില്ല, പ്രതിഷേധസമരം തുടരും: തോമസ് ഉണ്ണിയാടന്‍

മുരിയാട്: നെല്‍കര്‍ഷകരോടുള്ള സംസ്ഥാന സര്‍ക്കാരിന്‍റെ മനോഭാവത്തിനു യാതൊരു മാറ്റവും ഉണ്ടായിട്ടില്ലെന്നും അവഗണന തുടരുകയാണെന്നും കേരള കോ ണ്‍ഗ്രസ് ഡെപ്യൂട്ടി ചെയര്‍മാന്‍ തോമസ് ഉണ്ണിയാടന്‍. കേരള കോണ്‍ഗ്രസ് മുരിയാട് മണ്ഡലം സമ്മേളനം ഉദ്ഘാടനം ചെയ്തുപ്രസംഗിക്കുകയായിരുന്നു അദ്ദേഹം. സംഭരിച്ച നെല്ലിന്‍റെ പണം നാളുകള്‍ പിന്നിട്ടിട്ടും കര്‍ഷകര്‍ക്ക് കൊടുത്തു തീര്‍ക്കാന്‍ സര്‍ക്കാര്‍ ഇപ്പോഴും തയാറായിട്ടില്ല. നെല്‍കര്‍ഷകര്‍ ഉയര്‍ത്തിയ പ്രശ്‌നങ്ങള്‍ പരിഹാരമില്ലാതെ നീളുകയാണ്. ഈ പ്രശ്‌നത്തില്‍ കേരള കോണ്‍ഗ്രസ് നടത്തിവരുന്ന സമരം തുടരുമെന്നും ഉണ്ണിയാടൻ അറിയിച്ചു. മണ്ഡലം പ്രസിഡന്‍റ്് എന്‍.ഡി. പോള്‍ നെരേപ്പറമ്പില്‍ അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി മിനി മോഹന്‍ദാസ്, നിയോജക മണ്ഡലം പ്രസിഡന്‍റ്് റോക്കി ആളൂക്കാരന്‍ എന്നിവര്‍ മുഖ്യപ്രഭാഷണം നടത്തി. ഭാരവാഹികളായ സേതുമാധവന്‍ പറയംവളപ്പില്‍, സതീഷ് കാട്ടൂര്‍, തോമസ് ഇല്ലിക്കല്‍, ഐ.പി. പോള്‍, സുരേഷ് ബാബു, സലീഷ് കുഴിക്കാട്ടിപ്പുറത്ത്, കെ.പി. അരവിന്ദാക്ഷന്‍, പ്രിന്‍ഫിന്‍ പോള്‍ എന്നിവര്‍ പ്ര സംഗിച്ചു. മുതിര്‍ന്ന നേതാക്കളായ കെ.കെ. അന്തോണി കിഴക്കൂടന്‍, എന്‍.കെ. ജോസ്, യോഹന്നാന്‍ നെരേപ്പറമ്പില്‍ എന്നിവരെ ആദരിച്ചു.

കിണര്‍ റീചാര്‍ജിംഗിന് 25 ലക്ഷം രൂപയുടെ പദ്ധതിയുമായി മുരിയാട് പഞ്ചായത്ത്

മുരിയാട്: ശുദ്ധജല സ്വാശ്രയത്വം എന്ന ലക്ഷ്യത്തിനായി ഗ്രീന്‍ മുരിയാട് പദ്ധതിയില്‍ ഉള്‍പ്പെടുത്തി പഞ്ചായത്തിലെ 300 കിണറുകള്‍ ആദ്യഘട്ടത്തില്‍ റീചാര്‍ജ് ചെയ്യുന്നതിനുള്ള പദ്ധതി മുരിയാട് പഞ്ചായത്ത് ആവിഷ്‌കരിച്ചു. കൂടാതെ എന്‍ആര്‍ഇജിയും കിണര്‍ റീ ചാര്‍ജിംഗിനുള്ള പദ്ധതി ആവിഷ്‌കരിച്ചിട്ടുണ്ട്. ആദ്യഘട്ടത്തില്‍ 300 എന്‍ആര്‍ഇജി പദ്ധതിക്ക് പുറമേ 25 ലക്ഷം രൂപയാണ് പഞ്ചായത്ത് ഇതിനായി നീക്കിവച്ചിട്ടുള്ളത്. പഞ്ചായത്തിന്‍റെ ഇഎംഎസ് ഹാളില്‍ നടന്ന ഗുണഭോക്തൃ സംഗമത്തില്‍വച്ച് പദ്ധതി പഞ്ചായത്ത് പ്രസിഡന്‍റ്് ജോസ് ജെ. ചിറ്റിലപ്പിള്ളി ഉദ്ഘാടനം ചെയ്തു. വൈസ് പ്രസിഡന്‍റ് രതി ഗോപി അധ്യക്ഷത വഹിച്ചു. വി.ഒ. ഗീത പദ്ധതി വിശദീകരിച്ചു. മുരിയാട് മേഖലയിലെ ഗുണഭോക്താക്കളുടെ സംഗമം പഞ്ചായത്ത് ഹാളിലും പുല്ലൂര്‍ മേഖലയിലെ ഗുണഭോക്തൃ സംഗമം പുല്ലൂര്‍ ബാങ്ക് ഹാളിലും നടന്നു. സ്റ്റാന്‍ഡിംഗ് കമ്മിറ്റി ചെയര്‍മാന്‍മാരായ സരിത സുരേഷ്, കെ.യു. വിജയന്‍, ഭരണ‌സമിതി അംഗങ്ങളായ സേവ്യര്‍ ആളൂക്കാരന്‍, എ.എസ്. സുനില്‍കുമാര്‍, ജിനി സതീശന്‍, നിഖിത അനൂപ്, മണി സജയന്‍, ആര്‍എച്ച്ആര്‍ഡിസി ചീഫ് എക്സിക്യൂട്ടീവ് ഓഫീസര്‍ വിപിന്‍ പോള്‍, വിഇഒ തനൂജ, സെക്രട്ടറി പി.ബി. ജോഷി എന്നിവര്‍ പ്രസംഗിച്ചു. റെയിന്‍ വാട്ടര്‍ ഹാര്‍വെസ്റ്റിംഗ് റിസര്‍ച്ച് ആൻഡ് ഡെവലപ്മെന്‍റ് സെന്‍ററാണ് നിര്‍വഹണം നടത്തുക.

സുരക്ഷയില്ലാതെ പാതാളക്കുഴികൾ

കൊരട്ടി: ദേശീയപാത വികസനത്തിന്‍റെ ഭാഗമായി വെള്ളക്കെട്ട് ഒഴിവാക്കാൻ ദേശീയപാത അഥോറിറ്റിയുടെ മേൽനോട്ടത്തിൽ കൊരട്ടി പോലീസ് സ്റ്റേഷനു സമീപത്ത് കരാർ കമ്പനി നടത്തുന്ന നിർമാണപ്രവൃത്തികളുടെ നേർചിത്രമാണിത്. ദേശീയപാതക്ക് കുറുകെയിട്ടിരിക്കുന്ന ഓടയിലൂടെ വെള്ളം ഒഴുക്കിക്കളയാൻ നിർമിക്കുന്ന വ്യാപ്തിയും ആഴവും എറിയ കുഴികളിൽ ഒന്നാണിത്. നിർമാണങ്ങൾക്കിടെ ജനങ്ങളുടെ സുരക്ഷ ഉറപ്പാക്കാൻ കരാർ കമ്പനി യാതൊരു സുരക്ഷാ മാനദണ്ഡങ്ങളും പാലിക്കുന്നില്ല എന്നതാണു യാഥാർഥ്യം. പ്രധാനപാതയോടുചേർന്ന് കോൺക്രീറ്റ് സ്ലാബുകളും സുരക്ഷാ‌റിബണും കെട്ടിയിട്ടുണ്ടെങ്കിലും സർവീസ് റോഡിനോടുചേർന്ന ഭാഗങ്ങളിൽ യാതൊരു സുരക്ഷയുമില്ല. പ്രധാന‌പാതയിൽ തിരക്കേറിയാൽ ഡ്രൈവർമാരും വാഹന‌യാത്രികരും ആശ്രയിക്കുന്നത് ഈ സർവീസ് റോഡിനെയാണ്. കൂടാതെ രാത്രി സമയങ്ങളിൽ വെളിച്ചക്കുറവുമുണ്ട്. വാഹനങ്ങൾ സർവീസ് റോഡിലൂടെ കടന്നുവന്നാൽ കുഴിയിൽ വീഴാനുള്ള സാധ്യത ഏറെയാണ്. ദേശീയപാതകടന്നുപോകുന്ന മുരിങ്ങൂർ, കൊരട്ടി, പെരുമ്പി, ചിറങ്ങര,പൊങ്ങം പ്രദേശങ്ങൾ ഒട്ടേറെ അപകടങ്ങൾക്കും അപകടമരണങ്ങൾക്കും സാക്ഷ്യംവഹിച്ചിട്ടും ഇത്തരം ചതിക്കുഴിക്കുള്ളിൽ അകപ്പെടാതിരിക്കാൻ എൻഎച്ച്എഐയുടെയും നിർമാണക്കമ്പനിയുടെയും ഭാഗത്തുനിന്ന് കാര്യക്ഷമമായ ഇടപെടലില്ല.

കോടതിമുറ്റത്തുനിന്ന് ആശുപത്രിയിലെത്തി കുഞ്ഞിനു ജന്മംനൽകി വനിതാ സിപിഒ

ഒല്ലൂർ: പോലീസിനെ ആക്രമിച്ച കേസിൽ ഡ്യൂട്ടിയുടെ ഭാഗമായി മൊഴിനല്കാൻ, അനുവദനീയമായ പ്രസവാവധിപോലും ദീർഘിപ്പിച്ചു കോടതിയിലെത്തിയ വനിതാ സിവിൽ പോലീസ് ഓഫീസർ കോടതിമുറ്റത്തുനിന്ന് ആശുപത്രിയിലെത്തി ആൺകുഞ്ഞിനു ജന്മം നൽകി. ഒല്ലൂർ പോലീസ് സ്റ്റേഷനിലെ സിപിഒ ശ്രീലക്ഷ്മിയാണു പ്രസവിച്ചത്. കോടതിയിലെത്തിയപ്പോൾ ബ്ലീഡിംഗ് കണ്ടതിനെതുടർന്ന് ആശുപത്രിയിലെത്തിക്കുകയായിരുന്നു. ശാരീരികവിശ്രമം വേണ്ട സമയത്തും ഡ്യൂട്ടിയിലെത്തിയ പോലീസ് ഉദ്യോഗസ്ഥയുടെ കൃത്യനിർവഹണത്തോടുള്ള ആത്മാർഥതയെ സിറ്റി പോലീസ് കമ്മീഷണർ ആർ. ഇളങ്കോയും സഹപ്രവർത്തകരും അഭിനന്ദിച്ചു. ഒല്ലൂർ പോലീസ് സ്റ്റേഷനിലെ ഇൻസ്പെക്ടറായിരുന്ന ഫർഷാദിനെ ആക്രമിച്ചുപരിക്കേല്പിച്ച കേസിൽ മൊഴിനൽകാനാണു ശ്രീലക്ഷ്മി കോടതിയിൽ ഡ്യൂട്ടിക്കായി എത്തിയത്. ഈ കേസിൽ മൊഴിനൽകിയശേഷമേ അവധിയെടുക്കൂവെന്നു ശ്രീലക്ഷ്മി തീരുമാനിച്ചിരുന്നു. വീട്ടുകാരും സഹപ്രവർത്തകരും പ്രസവാവധി താമസിപ്പിക്കുന്നതിൽ ഉണ്ടായേക്കാവുന്ന ശാരീരിക ബുദ്ധിമുട്ടുകൾ അറിയിച്ചെങ്കിലും ശ്രീലക്ഷ്മി തീരുമാനത്തിൽ ഉറച്ചുനിന്നു. ഒന്പതുമാസം കഴിഞ്ഞ ശ്രീലക്ഷ്മി ദിവസവും ഓട്ടോറിക്ഷയിലാണു സ്റ്റേഷനിലെത്തിയിരുന്നത്. ഇന്നലെ സ്റ്റേഷനിൽനിന്നു സഹപ്രവർത്തകരോടൊപ്പം വാഹനത്തിൽ കോടതിമുറ്റത്തെത്തിയപ്പോൾ ബ്ലീഡിംഗുണ്ടാകുകയായിരുന്നു. ഉടൻതന്നെ അടുത്ത സ്വകാര്യ ആശുപത്രിയിൽ എത്തിക്കുകയും പ്രസവം നടക്കുകയുമായിരുന്നു.

ദേശീയ കടല്‍നീന്തൽ; ഡോ. രാജു ഡേവിസ് സ്കൂളിനു രണ്ടാംസ്ഥാനം

മാള: ചെന്നൈയിലെ മറീന ബിച്ചില്‍ നടന്ന ദേശീയ അക്വാഫെസ്റ്റ് കടല്‍ നീന്തല്‍ ട്രൈ എലോൺ അക്വാ ചാമ്പ്യൻഷിപ്പില്‍ ഡോ. രാജു ഡേവിസ് ഇന്‍റര്‍നാഷണല്‍ സ്കൂളിന് അഖിലേന്ത്യതലത്തില്‍ ഓവറോള്‍ രണ്ടാംസ്ഥാനം. വിവിധ ഇനങ്ങളിലായി മൂന്ന് ഒന്നാംസ്ഥാനവും നാലു രണ്ടാംസ്ഥാനവും ഒരു മൂന്നാം സ്ഥാനവും നേടിയാണ് ദേശീയതലത്തിൽ സ്കൂൾ രണ്ടാംസ്ഥാനത്തെത്തിയത്. ഒരു കിലോമീറ്റര്‍ കടല്‍നീന്തലില്‍ സബ് ജൂണിയര്‍ വിഭാഗത്തില്‍ എട്ടാംക്ലാസ് വിദ്യാര്‍ഥി ഡെറിന്‍ ഡെന്നി ഒന്നാംസ്ഥാനം നേടി. ജൂണിയര്‍ വിഭാഗത്തില്‍ അരകിലോമീറ്ററില്‍ ഒമ്പതാം ക്ലാസ് വിദ്യാര്‍ഥികളായ കെ.എം. മുഹമ്മദ്, വസിം മേത്തര്‍, അദ്വൈത് രാജീവ് എന്നിവർ രണ്ടാംസ്ഥാനവും നേടി. സബ്ജൂണിയര്‍ വിഭാഗത്തില്‍ എട്ടാം ക്ലാസിലെ നേദിക് ജോസഫ് കെ.ജെ. മൂന്നാം സ്ഥാനം നേടി. പെണ്‍കുട്ടികളുടെ വിഭാഗത്തില്‍ ഏഴാം ക്ലാസിലെ സെഫാനിയ ഫാന്‍റിന്‍ രണ്ടാംസ്ഥാനവും സബ് ജൂണിയര്‍ പെണ്‍കുട്ടികളുടെ വിഭാഗത്തില്‍ ആറാം ക്ലാസിലെ സാന്‍ഡ്രിയ ഫാന്‍റിന്‍ രണ്ടാംസ്ഥാനവും നേടി. മാസ്റ്റേഴ്സ് വിഭാഗത്തില്‍ എം. സുനില്‍, എലൈറ്റ് വിഭാഗത്തില്‍ വി. സതീഷ് എന്നിവര്‍ ഒരു കിലോമിറ്റർ ഇനത്തില്‍ ഒന്നാംസ്ഥാനം നേടി.

സംഗീതവും സർക്കസും കൂട്ടിയിണക്കി "ഊരാളി സിർക്കോ' ആദ്യപ്രദർശനം

തൃശൂർ: മനക്കൊടിയിലെ സാധന സെന്‍റർ ഫോർ ക്രിയേറ്റീവ് പ്രാക്ടീസ്, തൃശൂർ ഫോർത്ത് വാൾ വേൾഡ് പ്രീമിയർ എന്നിവർ സംയുക്തമായി "ഊരാളി സിർക്കോ' രംഗാവതരണം 24നു വൈകീട്ട് ഏഴിനു സംഗീത നാടക അക്കാദമി റീജണൽ തിയേറ്ററിൽ നടത്തും. സർക്കസിന്‍റെ സാധ്യതകളും സംഗീതവും കൂട്ടിയിണക്കി ഊരാളി സംഗീത ബാൻഡിലെ മാർട്ടിൻ ഊരാളി, സജി ഊരാളി, സുധീഷ് ഊരാളി, ഷാജി ഊരാളി, മല്ലു പി. ശേഖർ എന്നിവരാണു വേദിയിലെത്തുന്നത്. ലാറ്റിനമേരിക്കൻ സർക്കസ് നാടക കലാകാരിയായ ഇൻഗ്രിദ് ഫ്ളോറെസിന്‍റെ പരിശീലനത്തിലാണ് ആദ്യാവതരണം. ഇരുപതുവർഷങ്ങളായി ഇന്ത്യക്കകത്തും പുറത്തുമായി വിവിധ കലാപ്രവർത്തനങ്ങൾ നടത്തിവരുന്ന സാധന സെന്‍റർ ഫോർ ക്രിയേറ്റീവ് പ്രാക്ടീസ് കോഫി ഗുരു, ഇൻ എ കംപാർട്ട്മെന്‍റ, ഓവർ എ കപ്പ് ഓഫ് ടീ, ആഫ്റ്റർ ദ സൈലൻസ്, ഓടിച്ചോടിച്ച് ഒരു ബസ് നാടകം എന്നീ നാടകാവതരണങ്ങൾക്കു പുറമേ ഊരാളി പാട്ടും പറച്ചിലും എന്ന സംഗീതപരിപാടിയും അറുനൂറോളം വേദികളിൽ അവതരിപ്പിച്ചിട്ടുണ്ട്. ലോകത്താദ്യമായി യാത്രാബസ് ഇരുവശത്തും തുറക്കാവുന്ന അവതരണ ഇടമാക്കി മാറ്റിയാണ് ഊരാളി കലാസഞ്ചാരം നടത്തിയത്. സർക്കസ്, തിയേറ്റർ, മ്യൂസിക്, പെയിന്‍റിംഗ് എന്നീ വിവിധ കലാവിഭാഗങ്ങൾ ഒരുമിച്ച് ചേരുന്നതാണ് ഊരാളി സർക്കോ. സസ്പെൻഷൻ കാപ്പിലാർ എന്നറിയപ്പെടുന്ന ഹെയർ ഹാംഗിംഗ് പരിപാടി മുഖ്യ സവിശേഷതയാണ്. ഒന്നരമണിക്കൂർ ദൈർഘ്യമുള്ള പരിപാടിക്ക് 250 രൂപയുടെ പാസുകൾ ഓണ്‍ലൈനിലും നേരിട്ടും ലഭിക്കും. സംഗീത നാടക അക്കാദമിയിലെ പ്രീമിയർ ഷോയ്ക്കുശേഷം ലോകവ്യാപകമായും അവതരിപ്പിക്കും. കേരളത്തിൽനിന്നു ലോക കലാരംഗത്തേക്ക് ആനുകാലികമായ പ്രവേശനത്തിനു ലക്ഷ്യംവച്ചുള്ള ഈ അവതരണത്തിൽ വ്യത്യസ്തങ്ങളായ റോക്ക്, റെഗ്ഗെ, ഫോക്, റാപ്പ്, ഇലക്ട്രോണിക്, ലാറ്റിൻ ശൈലികളിലുമുള്ള പാട്ടുകളും തിയേറ്റർ ക്ലൗണിംഗും ഇടകലർത്തിയിരിക്കുന്നു. കെ.ജി. ആന്‍റോ, ജോസ് കോശി, ഡിവിൻക്, ജോണി, ഡയാന റോഡ്രിഗസ് എന്നിവരാണു പരിപാടിയുടെ അണിയറക്കാർ. ഫോണ്‍: 7558049381. വാർത്താസമ്മേളനത്തിൽ മാർട്ടിൻ ഊരാളി, സജി ഊരാളി, സന്ദീപ്, ഇൻഗ്രിദ് ഫളോറെസ്, ഡയാന റോഡ്രിഗസ് എന്നിവർ പങ്കെടുത്തു.

റോഡപകടങ്ങളിൽ ഭരണകൂടങ്ങൾക്ക് നിസംഗത: അഡ്വ. ജോസഫ് ടാജറ്റ്

തൃശൂർ: റോഡപകടങ്ങളും മരണങ്ങളും തുടർന്നിട്ടും ജില്ലാ ഭരണകൂടത്തിന്‍റെയും മേയറുടെയും മൗനം ക്രൂരതയെന്നു ഡിസിസി പ്രസിഡന്‍റും ജില്ലാ പഞ്ചായത്ത് പ്രതിപക്ഷനേതാവുമായ അഡ്വ. ജോസഫ് ടാജറ്റ്. അപകടമരണങ്ങളുണ്ടായിട്ടും ഗതാഗതക്കുരുക്കിൽ ജനം ബുദ്ധിമുട്ടിയിട്ടും നടപടിയില്ല. ജില്ലാ കളക്ടറുടെ മൂക്കിനുതാഴെയാണ് ഏബൽ ചാക്കോ എന്ന യുവാവ് മരിച്ചത്. ദേശീയപാതകളും സംസ്ഥാന, ജില്ലാ, പഞ്ചായത്ത് റോഡുകളെല്ലാം പൊട്ടിപ്പൊളിഞ്ഞു സഞ്ചരിക്കാൻ കഴിയാത്ത സ്ഥിതിയിലാണ്. ജനജീവിതം താറുമാറായി. റോഡ് തകർച്ച, ഗതാഗതക്കുരുക്ക് എന്നിവയ്ക്കെതിരേ ജില്ലാതലത്തിൽ കോണ്‍ഗ്രസ് നടത്തുന്ന പ്രതിഷേധത്തിന്‍റെ ഭാഗമായി തൃശൂർ പുഴയ്ക്കൽ ജംഗ്ഷനിൽ നടത്തിയ പ്രതിഷേധം ഉദ്ഘാടനം ചെയ്തു പ്രസംഗിക്കുകയായിരുന്നു ടാജറ്റ്. മണ്ഡലം പ്രസിഡന്‍റ് കെ. സുരേഷ് കുമാർ, എ. പ്രസാദ്, രാജൻ ജെ. പല്ലൻ, സിജോ കടവിൽ, രവി താണിക്കൽ, ഫ്രാൻസിസ് ചാലിശേരി, കൗണ്‍സിലർമാരായ കെ. രാമനാഥൻ, എ.കെ. സുരേഷ് കുമാർ, ലാലി ജെയിംസ്, മേഫി ഡെൽസണ്‍, സുനിത വിനു, സുനിൽരാജ്, വിനീഷ് തയ്യിൽ, സിന്ധു ചാക്കോള, റെജി ജോയ് എന്നിവർ പ്രസംഗിച്ചു.

മുരിയാട് കര്‍ഷകസമരത്തിന് ഊര്‍ജംപകര്‍ന്ന വിപ്ലവ സ ൂര്യന്‍

ഇരിങ്ങാലക്കുട: മുരിയാട് കര്‍ഷകസമരത്തിന് ഊര്‍ജംപകര്‍ന്ന വിപ്ലവസൂര്യനാണ് വി.എസ്. അച്യുതാനന്ദന്‍. 2007 ജൂണ്‍ നാലിനാണ് മുഖ്യമന്ത്രിയായിരുന്ന വിഎസ് മുരിയാട് സമരപ്പന്തല്‍ സന്ദര്‍ശിച്ചത്. അന്നു രാവിലെമുതല്‍ വിഎസ് തൃശൂരിലെ രാമനിലയത്തിലുണ്ടായിരുന്നു. ഈ സമയം ഇടതുപക്ഷനേതാക്കള്‍ മുരിയാട് സമരത്തെ തള്ളിപ്പറഞ്ഞ് തൃശൂരില്‍ പത്രസമ്മേളനം നടത്തുകയായിരുന്നു. കമ്യൂണിസ്റ്റ് സര്‍ക്കാരിനെ അസ്ഥിരപ്പെടുത്തുവാനും ഭൂപരിഷ്‌കരണനിയമത്തെ അട്ടിമറിക്കുവാനും നിഗൂഢശക്തികളുടെ പിന്തുണയോടെ നടക്കുന്ന സമരമാണെന്നായിരുന്നു പ്രാദേശിക ഇടതുനേതാക്കളുടെ പ്രചാരണം. സ്വാതന്ത്ര്യസമരസേനാനി കെ.പി. പോളി, കര്‍ഷകമുന്നേറ്റം മുഖ്യസംഘാടകന്‍ വര്‍ഗീസ് തൊടുപറമ്പില്‍, വര്‍ക്കിംഗ് ചെയര്‍മാന്‍ വി.വി. അയ്യപ്പന്‍, വൈസ് ചെയര്‍മാന്‍ പി.സി. ആന്‍റണി, കെ.എ. കുഞ്ഞന്‍ എന്നിവര്‍ രാവിലെതന്നെ രാമനിലയത്തില്‍ എത്തി വിഎസിനെ കണ്ട് കര്‍ഷകസമരത്തിന്‍റെ ലക്ഷ്യങ്ങളെക്കുറിച്ച് ബോധ്യപ്പെടുത്തി. സമരപ്പന്തലില്‍ വരണമെന്ന് അവര്‍ ആവശ്യപ്പെട്ടു. സമരം സര്‍ക്കാര്‍ ഗൗരവമായി കാണുവന്നുവെന്നു വിഎസ് മറുപടി നല്‍കി. ഉച്ചകഴിഞ്ഞ് മടക്കയാത്രയ്ക്കായി കാറില്‍ കയറിയപ്പോഴാണ് വിഎസ് ഗണ്‍മാനോടു പറഞ്ഞത്. ഹൈവേയില്‍ വലിയതിരക്കായിരിക്കും, അതിനാല്‍ മുന്‍മന്ത്രി പി.കെ. ചാത്തന്‍മാസ്റ്ററുടെ മാപ്രാണത്തെ വീടിനു സമീപത്തുകൂടി പോകാമെന്നും അതിനായി കരുവന്നൂര്‍വഴി യാത്രതിരിക്കണമെന്നും നിര്‍ദേശം നല്‍കി. ആ യാത്ര എത്തിയതു മാപ്രാണത്തെ കോന്തിപുലത്തുള്ള മുരിയാട് കര്‍ഷകമുന്നേറ്റത്തിന്‍റെ സമരപ്പന്തലിലേക്കായിരുന്നു. റോഡില്‍ കാര്‍ നിര്‍ത്തി കനാല്‍ബണ്ടിലൂടെ ഏറെ ദൂരം നടന്നാണ് വിഎസ് സമരപ്പന്തലിലെത്തിയത്. ആവേശപൂര്‍വമാണ് വിഎസിനെ കര്‍ഷകര്‍ എതിരേറ്റത്. മുദ്രാവാക്യങ്ങളോടെ കര്‍ഷകര്‍ വിഎസിനെ സമരപ്പന്തലിലേക്ക് ആനയിച്ചു. പന്തലിലിരുന്ന് വിഎസ് കര്‍ഷകരുടെ പ്രശ്നങ്ങളും ദുരിതങ്ങളും കേട്ടു. പ്രാദേശിക സിപിഎം നേതൃത്വം എതിര്‍ത്തുനില്‍ക്കുനോള്‍പോലും വിഎസ് സമരപ്പന്തലിലെത്തിയതു വലിയ വാര്‍ത്തയായി. ഇനി ഞങ്ങള്‍ എന്തു ചെയ്യണമെന്ന കര്‍ഷകരുടെ ചോദ്യങ്ങള്‍ക്കു വിഎസ് മറുപടി പറഞ്ഞു: പോരാട്ടങ്ങള്‍ നിര്‍ത്തേണ്ടതു ലക്ഷ്യംനേടുമ്പോള്‍മാത്രമാണ്. ഈ വാക്കുകള്‍ കര്‍ഷകജനതയ്ക്ക് പോരാട്ടവീര്യം പകര്‍ന്നു. ഇതോടെ സമരത്തിന്‍റെ ഗതിമാറി. അവസാനം നെല്‍വയല്‍ സംരക്ഷണനിയമവും മുരിയാടിനുവേണ്ടിയുള്ള പ്രത്യേക പാക്കേജും നേടി സമരം വിജയംകണ്ടു. കളിമണ്‍ഖനന മാഫിയയ്ക്കും ഭൂമാഫിയയ്ക്കും താക്കീതുനല്കുന്നതായിരുന്നു വിഎസിന്‍റെ സന്ദര്‍ശനം. സിപിഎം ജില്ലാ കമ്മിറ്റി അനുശോചിച്ചു തൃശൂർ: ജില്ലയിലെ പാർട്ടിയുടെ വളർച്ചയിൽ വി.എസ്. അച്യുതാനന്ദന്‍റെ സംഭാവനകൾ നിസ്തുലമാണെന്നു സിപിഎം തൃശൂർ ജില്ലാ കമ്മിറ്റി. പാർട്ടിയുടെ സംസ്ഥാനസെക്രട്ടറിയെന്ന നിലയിൽ വി.എസ്. നൽകിയ കരുത്ത് അവിസ്മരണീയമാണ്. എണ്‍പതിൽ അദ്ദേഹം സെക്രട്ടറിയായതുമുതൽ ചുമതലയൊഴിയുംവരെ ചെറുതും വലുതുമായ പ്രശ്നങ്ങളിൽ ഇടപെട്ടിട്ടുണ്ട്. പ്രതിപക്ഷനേതാവായിരുന്നപ്പോൾ പ്രാദേശികപ്രശ്നങ്ങൾ പോലും സംസ്ഥാനതലത്തിൽ ഉയർത്തി. മുഖ്യമന്ത്രിയായിരിക്കെ ജില്ലയിലെ വികസനക്കുതിപ്പന് ഉതകുന്ന നിരവധി പദ്ധതികൾ അനുവദിച്ചു. വി.എസിന്‍റെ മറക്കാനാകാത്ത സംഭാവനകൾക്കുമുന്നിൽ അനുശോചനം രേഖപ്പെടുത്തുന്നെന്നും ജില്ലാ സെക്രട്ടറി കെ.വി. അബ്ദുൾ ഖാദർ പറഞ്ഞു. വിഎസ് തലയെടുപ്പുള്ള നേതാവ്: തേറന്പിൽ തൃശൂര്‍: തലയെടുപ്പുള്ള നേതാവിനെയാണു വി.എസ്. അച്യുതാനന്ദന്‍റെ നിര്യാണത്തിലൂടെ സിപിഎമ്മിനു നഷ്ടമായതെന്നു മുന്‍ നിയമസഭാ സ്പീക്കര്‍ തേറമ്പില്‍ രാമകൃഷ്ണന്‍ പറഞ്ഞു. നിലപാടുകള്‍കൊണ്ട് കേരളരാഷ്ട്രീയത്തിലെ അവഗണിക്കാന്‍ കഴിയാത്ത വ്യക്തിത്വമായി അദ്ദേഹം മാറി. രാഷ്ട്രീയമായ അഭിപ്രായവ്യത്യാസങ്ങളുണ്ടെങ്കിലും വ്യക്തിപരമായി കാലുഷ്യം ലവശേലം പുലര്‍ത്താത്ത നേതാവായിരുന്നു വിഎസ്. നിയമസഭാ സ്പീക്കറായിരുന്നപ്പോള്‍ പ്രതിപക്ഷനേതാവ് എന്ന നിലയ്ക്ക് അദ്ദേഹവുമായി കൂടുതല്‍ ഇടപഴകാന്‍ സാധിച്ചു. സ്പീക്കറായിരുന്ന എന്‍റെ നിഷ്പക്ഷതയെക്കുറിച്ച് ഒരു പ്രതിപക്ഷനേതാവെന്നനിലയിൽ അദ്ദേഹം പല പ്രാവശ്യവും പല വേദികളിലും പറഞ്ഞിരുന്നു. അദ്ദേഹം എനിക്കു നല്‍കിയ അങ്ങേയറ്റത്തെ അംഗീകാരമായി ഞാനതിനെ കാണുന്നു. രാഷ്ട്രീയരംഗത്തെ പഴയ തലമുറയുടെ കരുത്തനായ ഒരു കണ്ണിയാണു നാടിനു നഷ്ടമായതെന്നും തേറന്പിൽ പറഞ്ഞു. ഒരധ്യാത്മിക രാഷ്‌ട്രീയമനസിന്‍റെ വിടവാങ്ങൽ: മാർ ഔഗിൻ കുര്യാക്കോസ് തൃശൂർ: സമൂഹനന്മയ്ക്കായി ജീവിതം അർപ്പിച്ച, പൗരാവകാശങ്ങൾക്കുവേണ്ടി സമരംചെയ്ത ഒരധ്യാത്മിക രാഷ്‌ട്രീയമനസിന്‍റെ വിടവാങ്ങലാണു വി.എസ്. അച്യുതാനന്ദന്‍റെ വിയോഗമെന്നു പൗരസ്‌ത്യ കൽദായ സുറിയാനി സഭ മെത്രാപ്പോലീത്ത മാർ ഔഗിൻ കുര്യാക്കോസ് അനുസ്മരിച്ചു. കേരളത്തിന്‍റെ സാമൂഹികബോധത്തെയും ഭരണരീതിയെയും ഗൗരവത്തോടെ സ്വാധീനിച്ച അദ്ദേഹത്തിന്‍റെ ഓർമ എപ്പോഴും ഉജ്വലമായി നിൽക്കും. കമ്യൂണിസ്റ്റ് പാർട്ടിയുടെ പൈതൃകവും പ്രവർത്തനരീതിയും തനതായ സത്യനിഷ്ഠയോടെയും ജനസമ്പർക്കത്തോടെയും അദ്ദേഹം പ്രതിനിധീകരിച്ചെന്നും അദ്ദേഹം പറഞ്ഞു.

വിഎസിന്‍റെ ഓർമകളിൽ; ഗുരുവായൂർ സത്യഗ്രഹ സ്മാരകങ്ങൾ

ഗുരുവായൂർ: ക്ഷേത്രപ്രവേശന സത്യഗ്രഹ സമരത്തിന്‍റെ ജ്വലിക്കുന്ന സ്മരണകളായി ഗുരുവായൂരിൽ നിലകൊള്ളുന്ന രണ്ടു സ്മാരകങ്ങളും നാടിനു സമർപ്പിച്ചത് വി.എസ്. അച്യുതാനന്ദൻ. വിഎസ് മുഖ്യമന്ത്രിയായിരുന്ന സമയത്ത് 2007 ജൂൺ അഞ്ചിനായിരുന്നു നഗരസഭയുടെ ഗുരുവായൂർ സത്യഗ്രഹകവാടത്തിന്‍റെ സമർപ്പണം. ഇപ്പോഴത്തെ നഗരസഭാ ചെയർമാൻ എം. കൃഷ്ണദാസാണ് അന്നും ചെയർമാൻ. 2008 ഓഗസ്റ്റ് 16നായിരുന്നു ഗുരുവായൂർ ദേവസ്വംവക പൂന്താനം ഓഡിറ്റോറിയവും ദേവസ്വത്തിന്‍റെ സത്യഗ്രഹസ്മാരകമന്ദിരവും സമർപ്പിച്ചത്. പിന്നീട് പ്രതിപക്ഷനേതാവായിരിക്കുമ്പോൾ കാവീട് തലേങ്ങാട്ടിരിയിൽ ഗുരുവായൂരിലെ ആദ്യകാല കമ്യൂണിസ്റ്റ് നേതാവായ സി.കെ. കുമാരനെ ആദരിക്കുന്ന പരിപാടിയിൽ ഉദ്ഘാടകനായി എത്തിയതും വിഎസ് ആയിരുന്നു. കേരളത്തിന്‍റെ നവോത്ഥാനത്തിന് തുടക്കംകുറച്ച ഗുരുവായൂർ സത്യഗ്രഹത്തിന്‍റെ സ്മാരകങ്ങളുടെ സമർപ്പണം നടത്താനെത്തിയത് നവോത്ഥാനനായകനായ വിഎസ് ആയി എന്നതു ഗുരുവായൂരിന് എക്കാലത്തും അഭിമാനിക്കാവുന്നതായി.

തടവുകാരൻ ശ്വാസംമുട്ടലിനെ തുടർന്ന് മരിച്ചു

വിയ്യൂർ: സെൻട്രൽ ജയിലിൽ പോക്സോ കേസിൽ ശിക്ഷ അനുഭവിച്ചു വരികയായിരുന്ന തടവുകാരൻ ശ്വാസം മുട്ടലിനെ തുടർന്ന് മരിച്ചു. വടക്കേക്കാട് എടക്കര ഉദയം തിരുത്തി വീട്ടിൽ കുഞ്ഞുമ്മദ് (68) ആണ് ജയിലിൽ നിന്ന് മെഡിക്കൽ കോളജിലേക്ക് പോകുന്നതിനിടെ മരിച്ചത്. ഒന്നര വർഷമായി തടവുകാരനാണ്.

വഴിയാത്രക്കാരന്‍ ബൈക്കിടിച്ചു മരിച്ചു

മൂന്നുമുറി: ബൈക്കിടിച്ച് പരിക്കേറ്റയാള്‍ ചികിത്സയിലിരിക്കെ മരിച്ചു. അവിട്ടപ്പിള്ളി ആട്ടോക്കാരന്‍ വറീതിന്റെ മകന്‍ ദേവസി(68)യാണ് മരിച്ചത്. ഞായറാഴ്ച വൈകുന്നേരം റോഡിലൂടെ നടന്നുപോകുമ്പോള്‍ ചേലക്കാട്ടുകര പെട്രോള്‍പമ്പിനു സമീപം പിറകില്‍ നിന്ന് ബൈക്ക് ഇടിക്കുകയായിരുന്നു. ഉടന്‍ മറ്റത്തൂര്‍ ആരോഗ്യകേന്ദ്രത്തിലും തുടര്‍ന്ന് തൃശൂരിലെ സ്വകാര്യ ആശുപത്രിയിലും എത്തിച്ചു. ചികില്‍സയിലിരിക്കെ ഇന്നലെ ഉച്ചയോടെ മരിച്ചു. സംസ്‌കാരം നാളെ രാവിലെ 11ന് മൂന്നുമുറി സെന്‍റ് ജോണ്‍ ദി ബാപ്റ്റിസ്റ്റ് പള്ളിയില്‍. ഭാര്യ: റോസിലി. മക്കള്‍: ഡിക്‌സന്‍, ദിവ്യ, ഡിന്‍ഷ.

മന്ത്രി ആര്‍. ബിന്ദുവിന്‍റെ ഓഫീസിലേക്ക് കെഎസ്‌യു മാര്‍ച്ച്; സംഘര്‍ഷം

ഇരിങ്ങാലക്കുട: ഉന്നത വിദ്യാഭ്യാസ മന്ത്രി ഡോ. ആര്‍. ബിന്ദുവിന്‍റെ ഓഫീസിലേക്ക് കെഎസ്‌യു ഇരിങ്ങാലക്കുട നിയോജകമണ്ഡലം കമ്മിറ്റി നടത്തിയ മാര്‍ച്ചില്‍ സംഘര്‍ഷം. കീം റാങ്ക് ലിസ്റ്റ് ഹൈക്കോടതി റദ്ദാക്കിയത് ഉന്നതവിദ്യാഭ്യാസമന്ത്രിയുടെ അനാസ്ഥമൂലമാണെന്നും ഇതോടെ വിദ്യാര്‍ഥികളുടെ ഭാവി അനിശ്ചിതത്വത്തിലാക്കിയെന്നും ആരോപിച്ചായിരുന്നു മാര്‍ച്ച്. കനത്ത മഴയില്‍ ഠാണാവിലെ ഐടിയു ബാങ്ക് പരിസരത്തുനിന്നാരംഭിച്ച മാര്‍ച്ചിന് നിയോജക മണ്ഡലം പ്രസിഡന്‍റ് ഫെസ്റ്റിന്‍ ഔസേപ്പ് നേതൃത്വം നല്‍കി. മെയിന്‍ റോഡില്‍ പഴയ ചന്തപ്പുര റോഡിനു സമീപം ബാരിക്കേഡുകള്‍വച്ച് പ്രവര്‍ത്തകരെ പോലീസ് തടഞ്ഞു. കെപിസിസി മുന്‍ ജനറല്‍ സെക്രട്ടറി എം.പി. ജാക്സണ്‍ മാര്‍ച്ച് ഉദ്ഘാടനം ചെയ്തു. ഉദ്ഘാടന പ്രസംഗത്തിനുശേഷം കെഎസ്‌യു പ്രവര്‍ത്തകര്‍ ബാരിക്കേഡ് മറികടക്കാനും മറിച്ചിടാനും ശ്രമിച്ചപ്പോഴാണു പോലീസുമായി സംഘര്‍ഷം ഉണ്ടായത്. രണ്ടുവട്ടം പോലീസുമായി ഉന്തും തള്ളും ഉണ്ടായെങ്കിലും കോണ്‍ഗ്രസിലെ മുതിര്‍ന്ന നേതാക്കള്‍ ഇടപെട്ട് പ്രവര്‍ത്തകരെ ശാന്തരാക്കുകയായിരുന്നു. ഏറെനേരം റോഡില്‍ കുത്തിയിരുന്നു ഉപരോധം സൃഷ്ടിച്ച കെഎസ്‌യു പ്രവര്‍ത്തകരെ പോലീസ് ബലം പ്രയോഗിച്ച് അറസ്റ്റ് ചെയ്തുനീക്കുകയായിരന്നു. യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറി മിഥുന്‍ മോഹന്‍, യൂത്ത് കോണ്‍ഗ്രസ് ജില്ലാ വൈസ് പ്രസിഡന്‍റ്് വിഷ്ണുചന്ദ്രന്‍, യൂത്ത് കോണ്‍ഗ്രസ് നിയോജകമണ്ഡലം പ്രസിഡന്‍റ് സനല്‍ കല്ലൂക്കാരന്‍, കെഎസ്‌യു ജില്ലാ വൈസ് പ്രസിഡന്‍റ് ഗണേഷ് ആറ്റൂര്‍, ജില്ലാ ജനറല്‍ സെക്രട്ടറി എം. വി. ആദിത്യന്‍, റൈഹാന്‍ ഷെഹീര്‍ എന്നിവര്‍ പ്രസംഗിച്ചു. ബ്ലോക്ക് കോണ്‍ഗ്രസ് മണ്ഡലം പ്രസിഡന്‍റ്് സോമന്‍ ചിറ്റേത്ത്, മണ്ഡലം പ്രസിഡന്‍റ്് അബ്ദുള്‍ ഹക്ക്, മുന്‍ ബ്ലോക്ക് പ്രസിഡന്‍റ് ടി.വി. ചാര്‍ളി, ബിജു പോള്‍ അക്കരക്കാരന്‍ എന്നിവര്‍ സന്നിഹിതരായിരുന്നു.

ഠാണ - ചന്തക്കുന്ന് വികസനം ഇഴഞ്ഞുനീങ്ങുന്നതായി ആക്ഷേപം

ഇരിങ്ങാലക്കുട: പട്ടണത്തിന്‍റെ സ്വപ്നപദ്ധതിയായ ഠാണ - ചന്തക്കുന്ന് വികസനം ഇഴഞ്ഞുനീങ്ങുന്നതായി ആക്ഷേപം. 2024 ജൂലൈ 15ന് തുടക്കം കുറിച്ച പദ്ധതി ഒരു വര്‍ഷം പിന്നിട്ടിട്ടും എവിടെയും എത്തിയില്ലെന്നാണു നാട്ടുകാരുടെ പരാതി. ദുരിതപൂർണമാണ് വ്യാപാരികളുടെയും യാത്രക്കാരുടെയും അവസ്ഥ. ഒരിടത്ത് കടമുറികള്‍ പൊളിക്കൽ, മറ്റിടങ്ങളിൽ ചെളിക്കുളം. നടപ്പാതകള്‍ പലതും ചെളിക്കൂമ്പാരമായി മാറിയിരിക്കുകയാണ്. പല കടകള്‍ക്കു മുന്നിലും വലിയ ഗർത്തങ്ങളാണ്. കടകളിലെ വില്പന നന്നേകുറഞ്ഞു. റോഡ് കോണ്‍ക്രീറ്റിംഗ് നടത്തുന്നതിനു പകരം മെക്കാഡം ടാറിംഗ് മതിയെന്ന് വ്യാപാരി വ്യവസായി ഏകോപനസമിതി ഇതിനകം മന്ത്രിയോട് രേഖാമൂലം ആവശ്യപ്പെട്ടിട്ടുണ്ട്. കെട്ടിടങ്ങള്‍ പൊളിച്ചുനീക്കിയെങ്കിലും തുടര്‍നടപടികള്‍ ഉണ്ടാകാത്തതിനാല്‍ പൊളിച്ചിട്ട കെട്ടിടങ്ങള്‍ക്കു മുന്നില്‍ ടാര്‍പോളിന്‍ കെട്ടി വ്യാപാരികള്‍ കച്ചവടം ആരംഭിച്ചിരിക്കുകയാണ്. കുണ്ടും കുഴിയുമായി കിടക്കുന്ന നടപ്പാതകളില്‍ വീഴുന്നവരുടെ എണ്ണം ചെറുതല്ല. സ്‌കൂള്‍ കുട്ടികളും സ്ത്രീകളുമാണ് ഇത്തരം അപകടത്തില്‍പെടുന്നവരില്‍ ഏറെ പേരും. ഇനിയും തങ്ങളുടെ സഹനശക്തി പരീക്ഷിക്കരുതേ എന്ന അപേക്ഷയിലാണ് വ്യാ പാരികളും യാത്രക്കാരും. ഇരിങ്ങാലക്കുട ടൗണിന്‍റെയും അനുബന്ധ പ്രദേശങ്ങളുടെയും വ്യാപാരവാണിജ്യ സാംസ്‌കാരിക മേഖലകളുടെ വളര്‍ച്ചയ്ക്ക് ആക്കംകൂട്ടുന്ന ജംഗ്ഷന്‍ വികസനപദ്ധതി ഇരിങ്ങാലക്കുടയുടെ വികസനക്കുതിപ്പിലേക്ക് നയിക്കുമെന്ന് കരുതിയാണ് ഇതുവരെയും ഏവരും സഹിച്ചത്. ഇരിങ്ങാലക്കുട ജനറല്‍ ആശുപത്രി, ടെലിഫോണ്‍ എക്സ്ചേഞ്ച്, വിവിധ ബാങ്കുകള്‍, സെന്‍റ് തോമസ് കത്തീഡ്രല്‍, ബിഷപ് ഹൗസ്, സെന്‍റ് ജോസഫ്സ് കോളജ്, ടൗണ്‍ ജുമാ മസ്ജിദ് എന്നിവയെല്ലാം ഈ റോഡിലാണ്. വൈദ്യുതിക്കാലുകൾ മാറ്റിയില്ല; കുടിവെള്ള പൈപ്പ് ലൈന്‍ വലിച്ചിട്ടില്ല ചന്തക്കുന്നില്‍ മൂന്നുപീടിക റോഡില്‍ 50 മീറ്ററും കൊടുങ്ങല്ലൂര്‍ റോഡില്‍ സെന്‍റ് ജോസഫ്സ് കോളജ് വരെയും ഠാണാവില്‍ തൃശൂര്‍ റോഡില്‍ ബൈപ്പാസ് റോഡ് വരെയും ചാലക്കുടി റോഡില്‍ ഗവ. ആശുപത്രിവരെയുമാണ് വികസനം നടപ്പാക്കുന്നത്. 17 മീറ്റർ വീതിയിൽ നാലുവരിപ്പാതയാണു നിര്‍മിക്കുന്നത്. മുകുന്ദപുരം താലൂക്കിലെ ഇരിങ്ങാലക്കുട, മനവലശേരി വില്ലേജുകളില്‍ ഉള്‍പെട്ട 0.7190 ഹെക്ടര്‍ ഭൂമിയാണ് ഠാണ - ചന്തക്കുന്ന് ജംഗ്ഷന്‍ വികസനത്തിനായി പൊന്നുംവില നല്കി സർക്കാർ ഏറ്റെടുത്തത്. 41.86 കോടി രൂപയാണ് ഭൂമി ഏറ്റെടുക്കലിന് മാത്രം ചെലവായത്. റോഡ് വികസനത്തിന്‍റെ ഭാഗമായി ഇരുവശത്തുനിന്നും സ്ഥലം ഏറ്റെടുക്കല്‍ പൂര്‍ത്തിയായെങ്കിലും വൈദ്യുതിക്കാലുകള്‍ മാറ്റിസ്ഥാപിക്കുകയോ കുടിവെള്ള പൈപ്പ് ലൈന്‍ വലിക്കുകയോ ചെയ്തിട്ടില്ല. മാപ്രാണം മുതല്‍ കരുവന്നൂര്‍ വരെയുള്ള ഭാഗത്തെ പണികള്‍ പൂര്‍ത്തിയാകുന്നതോടെ പൂതംകുളം മുതല്‍ സെന്‍റ് ജോസഫ്സ് കോളജ് വരെയുള്ള ഭാഗത്തെ പണികള്‍ ആരംഭിക്കുമെന്നാണ് അധികൃതര്‍ പറയുന്നത്.

സെന്‍റ്് ജോസഫ്സ് കോളജിലെ ഋതു കാര്‍ണിവല്‍ ശ്രദ്ധേയം

ഇരിങ്ങാലക്കുട: സെന്‍റ്് ജോസഫ്സ് കോളജില്‍ ഋതു അന്തര്‍ദേശീയ പരിസ്ഥിതി ചലച്ചിത്ര മേളയ്ക്കൊപ്പം എക്സിബിഷന്‍ വേദികള്‍ ഉണര്‍ന്നതോടെ ആയിരങ്ങളാണ് കാണികളായെത്തിയത്. സയന്‍സ് എക്സിബിഷന്‍, മലയാളം വിഭാഗമൊരുക്കിയ ബഷീര്‍ കഥാപാത്രങ്ങള്‍നിരന്ന ഭാര്‍ഗവീനിലയം, ഇംഗ്ലീഷ് വിഭാഗത്തിന്‍റെ വിവിധ കാലഘട്ടങ്ങളിലെ പ്രശസ്ത കഥാപാത്ര പരിചയം, ചരിത്രവിഭാഗത്തിന്‍റെ തത്സമയ കളിമണ്‍ പാത്രനിര്‍മാണം, മ്യൂസിയപരിചയം, ബിവോക് മാത്തമാറ്റിക്സ് ആന്‍ഡ് ആര്‍ട്ടിഫിഷ്യല്‍ ഇന്‍റലിജന്‍സ് ഒരുക്കിയ വിവിധതരം ആര്‍ട്ടിഫിഷ്യല്‍ ഇന്‍റലിജന്‍സിന്‍റെയും റോബോട്ടിന്‍റെയും പരിചയപ്പെടുത്തല്‍, വിവിധ ലാബുകളില്‍ നടത്തിയ രസകരമായ പരീക്ഷണങ്ങള്‍, ജീസസ് യൂത്തൊരുക്കിയ പ്രൊ ലൈഫ് എക്സിബിഷന്‍, കൊമേഴ്സ്, ഇക്കണോമിക്സ് വിഭാഗത്തിലെ വിദ്യാര്‍ഥികള്‍ ഒരുക്കിയ ബാന്‍ഡുകള്‍, വളകള്‍, ബാഗുകള്‍ തുടങ്ങിയവയുടെ വില്പന, ഫോറസ്റ്റ് വകുപ്പുമായി സഹകരിച്ച് ഗണിതശാസ്ത്ര വിഭാഗവും കമ്പ്യൂട്ടര്‍ സയന്‍സ് വിഭാഗവും ഒരുക്കിയ വിവിധ ഫലവൃക്ഷത്തൈയുടെയും പച്ചക്കറി, പൂച്ചെടികളുടെയും വില്പന എന്നിവയും നടന്നു. കോളജിന്‍റെ സ്‌ക്രിപ്റ്റ് ഗാര്‍ഡനില്‍ ഒരുക്കിയ ഓലക്കുടിലില്‍ കോളജിന്‍റെ മ്യൂസിക് ബാന്‍ഡ് "ഋതുരാഗം' എന്ന പേരില്‍ പരിപാടി സംഘടിപ്പിച്ചു. ഡാന്‍സ് ക്ലബ് സംഘടിപ്പിച്ച നൃത്തം, എല്ലാ ഡിപ്പാര്‍ട്ടുമെന്‍റുകളും നടത്തിയ ഫ്ലാഷ് മോബ് തുടങ്ങിയവ കാര്‍ണിവലിന് ആവേശം പകര്‍ന്നു. ഫാഷന്‍ ടെക്നോളജി വിഭാഗം "കാളിക' എന്ന പേരില്‍ തുരുമ്പില്‍‌നിന്ന് നിറക്കൂട്ടൊരുക്കി വസ്ത്രങ്ങള്‍ ഡിസൈന്‍ ചെയ്തു നടത്തിയ ഫാഷന്‍ ഷോ കാര്‍ണിവലിന്‍റെ പ്രധാന ആകര്‍ഷണമായി. എന്‍എസ്എസിനോടൊപ്പം ചേര്‍ന്ന് വിവിധ ഡിപ്പാര്‍ട്ടുമെന്‍റുകളും കോളജിലെ നോണ്‍ ടീച്ചിംഗ് സ്റ്റാഫും നടത്തിയ തട്ടുകടകള്‍ വിഭവരുചി വൈവിധ്യംകൊണ്ട് ശ്രദ്ധേയമായി. കോളജിന്‍റെ ഇന്‍ഡോര്‍ സ്റ്റേഡിയത്തില്‍ നിരവധി ഗെയിമുകളും സംഘടിപ്പിച്ചിരുന്നു.

സമ്പാളൂരിൽ യുവജനദിനം ആചരിച്ചു

സമ്പാളൂർ: വിശുദ്ധ ഫ്രാൻസിസ് സേവ്യറിന്‍റെ തീർഥാടന ദേവാലയത്തിൽ യുവജനദിനം ആചരിച്ചു. ഇരിങ്ങാലക്കുട രൂപത വികാരി ജനറാൾ മോൺ. ജോളി വടക്കൻ ഉദ്ഘാടനം ചെയ്തു. വികാരി റവ. ഡോ. ജോൺസൺ പങ്കേത്ത് അധ്യക്ഷത വഹിച്ചു. തുടർന്ന് സംഗീതസംവിധായകൻ അൽഫോൺസ് ജോസഫിന്‍റെ നേതൃത്വത്തിൽ യുവജനങ്ങൾക്കുവേണ്ടിയുള്ള പ്രോഗ്രാമും മാള സർക്കിൾ ഇൻസ്പെക്ടർ കെ.ജി. ജയപ്രദീപിന്‍റെ നേതൃത്വത്തിൽ ലഹരിയെക്കുറിച്ചുള്ള ബോധവത്്കരണ ക്ലാസും നടത്തി. കോട്ടപ്പുറം രൂപത യൂത്ത് ഡയറക്ടർ ഫാ. നോയൽ കുരിശിങ്കൽ, ചേതന മ്യൂസിക്കൽ അക്കാദമി ഡയറക്ടർ ഫാ. തോമസ് ചക്കാ ലമറ്റത്ത്, സഹവികാരി ഫാ. റെക്സൻ പങ്കേത്ത്, കൈക്കാരന്മാരായ ഫ്രാൻസിസ് സിമേതി, ആഷ്‌ലി ഡി റോസായോ, പാരിഷ് കൗൺസിൽ സെക്രട്ടറി ഷൈൻ അവരേശ്, കേന്ദ്ര‌സമിതി പ്രസിഡന്‍റ് ജോമോൻ പിൻഹിരോ, വിശ്വാസ പരിശീലന പ്രധാന അധ്യാപിക ഐവി ലൂയിസ് എന്നിവർ പ്രസംഗിച്ചു.

ഓപ്പറേഷൻ തിയറ്ററിലേക്ക് ഉപകരണങ്ങൾ നൽകി

ചാലക്കുടി: പവർ ഗ്രിഡ് കോർപറേഷൻ ഓഫ് ഇൻഡ്യയുടെ സിഎസ്ആർ ഫണ്ട് ഉപയോഗിച്ച് ചാലക്കുടി താലൂക്ക് ആശുപത്രി ഓപ്പറേഷൻ തിയറ്ററിലേക്ക് സർജറി ഉപകരണങ്ങൾ കൈമാറി. അഞ്ചു വ്യത്യസ്‌ത ഉപകരണങ്ങൾക്ക് 49,00,000 രൂപ ചെലവഴിച്ചു. ഉപകരണങ്ങളുടെ കൈമാറൽ നഗരസഭ ചെയർമാൻ ഷിബു വാലപ്പൻ ഉദ്ഘാടനം ചെയ്തു. ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ദിപു ദിനേശ് അധ്യക്ഷത വഹിച്ചു. തൃശൂർ ജില്ലാ മെഡിക്കൽ ഓഫീസർ ഡോ. ടി.പി. ശ്രീദേവി മുഖ്യപ്രഭാഷണം നടത്തി. പവർ ഗ്രിഡ് കോർപറേഷൻ സീനിയർ ഡെപ്യൂട്ടി ജനറൽ മാനേജർ ബി‌പ്ലോബ് പ്രൊജക്ട‌് റിപ്പോർട്ട് അവതരിപ്പിച്ചു. ഡെപ്യൂട്ടി ജനറൽ മാനേജർ എസ്. കലൈശെൽവി രേഖകൾ കൈമാറി. ആശുപത്രി സൂപ്രണ്ട് ഡോ. എ.എ. മിനിമോൾ ഉപകരണങ്ങൾ ഏറ്റുവാങ്ങി. വാർഡ് കൗൺസിലർ വി.ജെ. ജോജി, സ്റ്റാഫ് പ്രതിനിധി സി. സുബ്രഹ്മണ്യൻ, ലേ സെക്രട്ടറി മനോജ് എബ്രഹാം എന്നിവർ പ്രസംഗിച്ചു.

കോടാലി - മോനൊടി റോഡില്‍ കുഴികള്‍ നിറഞ്ഞു, ദുരിതയാത്ര

കോടാലി: മറ്റത്തൂര്‍ പഞ്ചായത്തിലെ കോടാലി-മോനൊടി റോഡില്‍ കുഴികള്‍ നിറഞ്ഞത് ഇതുവഴിയുള്ള യാത്ര ദുസഹമാക്കുന്നു. മലയോരഗ്രാമങ്ങളായ മോനൊടി, മുട്ടത്തുകുളങ്ങര, കടമ്പോട്, മാങ്കുറ്റിപ്പാടം പ്രദേശങ്ങളെ വ്യാപാരകേന്ദ്രമായ കോടാലിയുമായി ബന്ധിപ്പിക്കുന്ന ഈ റോഡില്‍ കുഴികള്‍ നിറഞ്ഞതോടെ പ്രദേശവാസികള്‍ ദുരിതത്തിലാണ്. നാലുസ്വകാര്യ ബസുകള്‍ സര്‍വീസ് നടത്തുന്ന റോഡില്‍ മാങ്കുറ്റിപ്പാടം ശാന്തിനഗര്‍, കടമ്പോട് കുരുലിപടി, എസ്എന്‍ഡിപി വഴി പരിസരം എന്നിവിടങ്ങളിലാണ് കുഴികള്‍ ഉള്ളത്. വര്‍ഷങ്ങളായി റീടാറിംഗ് നടക്കാത്ത ഈ റോഡിന്‍റെ നവീകരണത്തിന് ഫണ്ട് അനുവദിച്ചിട്ടുള്ളതായി പറയുന്നുണ്ടെങ്കിലും നിര്‍മാണത്തിനുള്ള നടപടികള്‍ ഉണ്ടായിട്ടില്ല.

നഗരസഭ മൈതാനത്തെ മാലിന്യം ; അധികൃതരോടു വിശദീകരണം ആവശ്യപ്പെട്ട് ജില്ലാഭരണകൂടം

ഇരിങ്ങാലക്കുട: നഗരസഭ മൈതാനത്ത് നടത്തിയ ഞാറ്റുവേല മഹോത്സവത്തെ തുടര്‍ന്ന് മൈതാനം മാലിന്യ നിക്ഷേപകേന്ദ്രമായെന്ന സിപിഐ കൗണ്‍സിലറും 12-ാം വാര്‍ഡ് കൗണ്‍സിലറുമായ മാര്‍ട്ടിന്‍ ആലേങ്ങാടന്‍റെ പരാതിയില്‍ അടിയന്തരമായി റിപ്പോര്‍ട്ട് നല്‍കാന്‍ നഗരസഭ സെക്രട്ടറിയോട് ആവശ്യപ്പെട്ട് ജില്ലാ ഭരണകൂടം. പരിപാടിയുടെ ഭാഗമായി മൈതാനത്ത് ഒരുക്കിയ ശൗചാലയത്തില്‍നിന്നും മറ്റുമുള്ള മാലിന്യങ്ങള്‍ ഗ്രൗണ്ടില്‍ത്തന്നെ അശാസ്ത്രീയമായി സംസ്‌കരിച്ചെന്ന പരാതിയാണ് ലഭിച്ചിട്ടുള്ളതെന്നും മാലിന്യമുക്ത കേരള പദ്ധതി നടപ്പാക്കേണ്ട നഗരസഭതന്നെ നിയമവിരുദ്ധ പ്രവൃത്തികള്‍ നടത്തുന്നതായിട്ടാണ് പരാതി ലഭിച്ചിട്ടുള്ളതെന്നും ജില്ലാ ഭരണകൂടം ചൂണ്ടിക്കാണിച്ചിട്ടുണ്ട്. വിഷയത്തില്‍ അന്വേഷണം നടത്തി നടപടികള്‍ സ്വീകരിച്ച് പരാതിക്കാരനായ മാര്‍ട്ടിന്‍ ആലേങ്ങാടന് മറുപടി നല്‍കാനും നടപടികള്‍ റിപ്പോര്‍ട്ട് ചെയ്യാനും തദ്ദേശ വകുപ്പ് ജോയിന്‍റ്് ഡയറക്ടര്‍ക്കും ശുചിത്വമിഷന്‍ ജില്ലാ കോ-ഒാര്‍ഡിനേറ്റര്‍ക്കും ജില്ലാ ഭരണകൂടം നിര്‍ദേശം നല്‍കിയിട്ടുണ്ട്.

പെരുവന്മല ശിവക്ഷേത്രത്തിന്‍റെ ഭൂമി വീണ്ടെടുത്തുതുടങ്ങി

കേച്ചേരി: കൊച്ചിൻ ദേവസ്വം ബോർഡിന്‍റെ കീഴിലുള്ള പെരുവന്മല ശിവക്ഷേത്രത്തിന്‍റെ ഭൂമി തിരിച്ചുപിടിച്ചു തുടങ്ങി. സ്വകാര്യ വ്യക്തികൾ വർഷങ്ങൾക്കുമുമ്പ് കെെയേറിയ എരനെല്ലൂർ വില്ലേജിലെ ഏഴ് ഏക്കർ ഭൂമിയാണ് ഏറ്റെടുത്തത്. ദേവസ്വം സ്പെഷല്‌ തഹസിൽദാർ വി.സി. പ്രസന്നന്‍റെ നേതൃത്വത്തിലുള്ള സംഘം ശനിയാഴ്ച പെരുവന്മലയിലെത്തി ഭൂമി ഏറ്റെടുത്ത് ദേവസ്വം ഓഫീസർ ടി.കെ. ധന്യയ്ക്ക് രേഖാമൂലം കൈമാറി. കെെയേറിയ ഭൂമി തിരിച്ചുപിടിക്കുന്നതിനുള്ള നടപടികൾ വർഷങ്ങളായി നടക്കുകയാണ്. ഡിജിറ്റൽ സർവേ ഉൾപ്പെടെ ഏഴുവർഷം മുൻപ് പൂർത്തിയാക്കി. പെരുവന്മല ശിവക്ഷേത്രത്തിന്‍റെ 66.69 ഏക്കർ ഭൂമിയിൽ 35 ഏക്കറോളം ഭൂമി കെെയേറിയിട്ടുള്ളതായി കണ്ടെത്തി. അതിൽ 25 ഏക്കറോളം ഭൂമി വൻകിട കെെയേറ്റങ്ങളാണ്. ഭൂമി കെെയേറിയവർക്ക് അഞ്ചുവർഷങ്ങൾക്കു മുൻപ് നോട്ടീസ് നൽകി ഹിയറിംഗ്് നടത്തി. അതിൽ രേഖകൾ ഹാജരാക്കാൻ കഴിയാത്തവരുടെ ഭൂമിയാണ് ഇപ്പോൾ തിരിച്ചുപിടിച്ചു തുടങ്ങിയത്. എരനെല്ലൂർ വില്ലേജിലും ചിറനെല്ലൂർ വില്ലേജിലും ഉൾപ്പെടെയുള്ള ഭൂമികൾഏറ്റെടുക്കൽ തുടരുമെന്ന് ഉദ്യോഗസ്ഥർ അറിയിച്ചു. ഈ മേഖലയിലെ ചിലർ ഹാജരാക്കിയ പട്ടയ രേഖകൾ പരിശോധിക്കുകയാണെന്നും സ്പെഷൽ തഹസിൽദാർ വി.സി. പ്രസന്നൻ പറഞ്ഞു. സർവേയർ കെ.എൻ. അനിൽകുമാർ, റവന്യു ഇൻസ്പെക്ടർ ആർ. സ്മിത, എം.എ. സുരേഷ്കുമാർ, കെ.കെ. രവീന്ദ്രനാഥ് എന്നിവർ സംഘത്തിലുണ്ടായിരുന്നു. വീട് ഒഴികെയുള്ള സ്ഥലങ്ങൾ കുറ്റിയടിച്ച് കല്ലിടാനുള്ള ശ്രമമാണ് ശനിയാഴ്ച നടത്തിയത്. രാഷ്ട്രീയസ്വാധീനം ഉപയോഗിച്ച് വ്യാജ പട്ടയം കൈവശമാക്കിയവരുമുണ്ടെന്നും സർക്കാർ പുതിയ വീട് നിർമിച്ചുനൽകിയാൽ മാത്രമേ വീടുകൾ ഒഴിപ്പിക്കാൻ സാധിക്കുകയുള്ളൂവെന്നും പ്രദേശവാസികൾ പറഞ്ഞു. കോടതിവിധിയെ തുടർന്ന് ഏതാനും നാളുകൾക്കുമുമ്പ് പ്രദേശവാസികൾ സമര രംഗത്തിറങ്ങിയിരുന്നു. 4, 5 സെന്‍റ് സ്ഥലങ്ങളിൽ വർഷങ്ങളായി വീടുവച്ചുതാമസിക്കുന്ന ആരെയും ഇറക്കിവിടില്ലെന്നും പുറംപറമ്പായി കൈവശംവച്ചത് മാത്രമേ തിരിച്ചുപിടിക്കൂവെന്നും അന്നത്തേ ദേവസ്വം ബോർഡ് അറിയിച്ചിരുന്നതായും മുൻ ജില്ലാപഞ്ചായത്ത് പ്രസിഡന്‍റ് സി.സി. ശ്രീകുമാർ പറഞ്ഞു.

മികവ് 2025: വിദ്യാർഥികളെ ആദരിച്ചു

ചെവ്വൂർ: വെെഎംസിഎയുടെ നേതൃത്വത്തിൽ ഉന്നതവിജയം നേടിയ ചെവ്വൂർ നിവാസികളായ വിദ്യാർഥികളെ ആദരിച്ചു. ചെവ്വൂർ വൈഎംസിഎ പ്രസിഡന്‍റ് ജോബി ജോർജ് അധ്യക്ഷതവഹിച്ചു. അസി. ഫോറസ്റ്റ് കണ്‌സര്‌വേറ്റര്‌ ഡെല്‌റ്റോ എല്‌. ‌മാറോ ക്കി ഉദ്ഘാടനം നിർവഹിച്ചു. കേരള കാത്തലിക് ഫെഡറേഷൻ ട്രഷറർ അഡ്വ. ബിജു കുണ്ടുകുളം മുഖ്യപ്രഭാഷണം നടത്തി. പഞ്ചായത്ത് മെന്പർമാരായ വനജ, ജോസ് ചാക്കേരി എന്നിവർ സംസാരിച്ചു. മഹാത്മാഗാന്ധി യൂണിവേഴ്സിറ്റിയിൽനിന്നു മൂന്നാംറാങ്ക് കരസ്ഥമാക്കിയ സാന്ദ്ര ഷോബിയെ അഭിനന്ദിച്ചു. സെക്രട്ടറി ജോസഫ് പുളിക്കൻ, പ്രോഗ്രാം കണ്‍വീനർ ഇ.പി. ജോസഫ്, വിമൻസ് ഫോറം കണ്‍വീനർ ലീന ലാസർ, ഹൈസ്കൂൾ വൈഎംസിഎ പ്രസിഡന്‍റ് ജെസ്മരിയ ആന്‍റോ എന്നിവർ സംസാരിച്ചു. ട്രഷറർ പോൾസണ്‍ മാറോക്കി,വിമൻസ് ഫോറം ചെയർപേഴ്സൻ അഡ്വ. ലീന ജോസ്, ഹൈവൈ വൈസ് പ്രസിഡന്‍റ് ഗ്രേസ്ജോ സിജോ എന്നിവർ പരിപാടികൾക്കു നേതൃത്വം നൽകി.

കുഴിയിലെ വെള്ളത്തിൽകുളിച്ച് ബിജെപിക്കാർ

എരുമപ്പെട്ടി: നെല്ലുവായ് - പട്ടാമ്പി റോഡിന്‍റെ ശോചനീയാവസ്ഥ പരിഹരിക്കണമെന്നാവശ്യപ്പെട്ടു ബിജെപി പ്രവർത്തകർ റോഡിലെ കുഴിയിലെ വെള്ളത്തിൽകുളിച്ച് പ്രതിഷേധിച്ചു. കുട്ടഞ്ചേരി പ്രദേശത്തുള്ള രണ്ട് കലുങ്ക് പാലത്തിന്‍റെ പണി പൂർത്തീകരിച്ചിട്ടില്ല. ഈ ഭാഗത്ത് റോഡിൽ നിരവധി കുഴികൾ രൂപപ്പെട്ടിട്ടുണ്ട്. കുഴികളിൽച്ചാടി ബൈക്ക് മറിഞ്ഞ് യാത്രക്കാർക്ക് പരുക്കുപറ്റുന്നത് പതിവായിരിക്കുകയാണ്. എംഎൽഎയും പഞ്ചായത്ത് ഭരണസമിതിയും പൊതുമരാമത്തുവകുപ്പും ജനങ്ങളുടെ ജീവന് വിൽകൽപ്പിക്കുന്നില്ലെന്നും വാർഡിലെ ബ്ലോക്ക്, പഞ്ചായത്ത് മെമ്പർമാർ യാതൊരു നടപടിയും കൈകൊള്ളുന്നില്ലെന്നും ബിജെപി ആരോപിച്ചു. എരുമപ്പെട്ടി മണ്ഡലം ജനറൽസെക്രട്ടറി വിഷ്ണു അമ്പാടി സമരം ഉദ്ഘാടനംചെയ്തു. പഞ്ചായത്ത് കമ്മിറ്റി പ്രസിഡന്‍റ് സുഭാഷ് ചന്ദ്രൻ അധ്യക്ഷനായി. നേതാക്കളായ രാജേഷ് കുട്ടഞ്ചേരി, ആനന്ദൻ, മുരളി വടക്കൂട്ട്, എൻ.സി. ബാലൻ, അജേഷ് എന്നിവർ നേതൃത്വം നൽകി.

ദേവാലയങ്ങളില്‌ തിരുനാളാഘോഷം

സെന്‍റ് ആൻസ് പള്ളി തൃശൂർ: പടിഞ്ഞാറേകോട്ട സെന്‍റ് ആൻസ് പള്ളിയിലെ ഉൗട്ടുതിരുനാളിനു പുല്ലഴി സെന്‍റ് ജോസഫ്സ് ഹോം ഡയറക്ടർ ഫാ. ലിജോ ചിറ്റിലപ്പിള്ളി കൊടിയേറ്റി. വികാരി ഫാ. പോൾ താണിക്കൽ, ജനറൽ കണ്‍വീനർ ഡേവി ഈനാശു പടിക്കല, പബ്ലിസിറ്റി കണ്‍വീനർ സിജോ കള്ളിക്കാടൻ, കൈക്കാരൻമാരായ വിൻസന്‍റ് കളത്തിങ്കൽ, ജാൻസൻ പുത്തൂക്കര, എൽജോ കല്ലുവീട്ടിൽ, ജോയ് ചക്കാലയ്ക്കൽ എന്നിവർ നേതൃത്വം നൽകി. കുറുമല സെന്‍റ് മേരീസ് കത്തോലിക്ക പള്ളി ചേലക്കര: മാർ ഈവാനിയോസ് പിതാവിന്‍റെ 72-ാം ഓർമപ്പെരുന്നാൾ ആഘോഷിച്ചു. രാവിലെ ചേലക്കര ഫൊറോന പള്ളിയിൽ നിന്നാരംഭിച്ച പദയാത്രയിൽ നൂറുകണക്കിന് വിശ്വാസികൾ പങ്കെടുത്തു. തുടർന്ന് വിശുദ്ധ കുർബാനയ്ക്ക് യൂഹാനോൻ മാർ ക്രിസോസ്റ്റം മെത്രാപോലീത്ത മുഖ്യകാർമികത്വംവഹിച്ചു. അനുസ്മരണപ്രസംഗം, സമൂഹബലി, ധൂപപ്രാർഥന, നേർച്ചസദ്യ എന്നിവയുണ്ടായിരുന്നു.

അപകടങ്ങളിൽ പരിക്കേറ്റു

വാഹനങ്ങൾ കൂട്ടിയിടിച്ച് രണ്ടുപേർക്കു പരിക്ക് കുട്ടനെല്ലൂർ: പിക്കപ്പ് വാനിനു പിന്നിൽ മിനി ടിപ്പർ ലോറി ഇടിച്ച് രണ്ടുപേർക്ക് പരിക്കേറ്റു. മിനി ടിപ്പർ ലോറി ഡ്രൈവർ റിവിൻ വർഗീസ്(26), പിക്കപ്പ് വാൻ ഡ്രൈവർ തമിഴ്നാട് സ്വദേശി സുധീഷ് (26) എന്നിവർക്കാണ് പരിക്കേറ്റത്. മിനി ടിപ്പർ ലോറിയുടെ ക്യാബിനിൽ കുടുങ്ങിയ ഡ്രൈവറെ ഫയർഫോഴ്സ് എത്തിയാണ് രക്ഷപ്പെടുത്തിയത്. ടയർ പഞ്ചറായി നിർത്തിയിട്ടിരുന്ന പിക്കപ്പ് വാനിന് പിന്നിൽ മിനി ടിപ്പർ ലോറി ഇടിക്കുകയായിരുന്നു. തൃശൂർ അഗ്നിരക്ഷാനിലയത്തിലെ സീനിയർ ഫയർ ആൻഡ് റെസ്ക്യൂ ഓഫീസർ പി.കെ. രഞ്ജിത്ത്, റെസ്ക്യൂ ഓഫീസർമാരായ കെ. പ്രകാശൻ, വി.വി. ജിമോദ് , ഐ. ബിജോയ്‌ എന്നിവരുടെ നേതൃത്വത്തിലാണ് രക്ഷാപ്രവർത്തനം നടത്തിയത്. കാറിടിച്ച് സ്കൂട്ടർ യാത്രികനും കാൽനട യാത്രികനും പരിക്ക് കേച്ചേരി: ചൂണ്ടൽ എസ്ബിഐ ബാങ്കിനുസമീപം കാർ ഇടിച്ചു സ്കൂട്ടർ യാത്രികനും കാൽനടയാത്രികനും പരിക്ക്. പരിസ്കൂട്ടർ യാത്രികൻ കേച്ചേരി എരനെല്ലൂർ സ്വദേശി മഞ്ഞക്കാട്ടിൽ വീട്ടിൽ ധർമൻ(60), കാൽനടയാത്രികനായ ചൂണ്ടൽ സ്വദേശി കോലാടിപ്പറമ്പിൽ വീട്ടിൽ സുബ്രഹ്ണ്യൻ(63) എന്നിവരെ കേച്ചേരി ആകട്സ് പ്രവർത്തകർ കുന്നംകുളം മലങ്കര ആശുപത്രിയിൽ പ്രവേശിപ്പിച്ചു. ഇന്നലെ രാവിലെ ഒമ്പതുമണിയോടെയായിരുന്നു അപകടം. കാർ വൈദ്യുതി പോസ്റ്റ് ഇടിച്ചുതകർത്തു വടക്കാഞ്ചേരി: നിയന്ത്രണംവിട്ട കാർ വൈദ്യുതി പോസ്റ്റ് ഇടിച്ചുതകർത്തു. യാത്രക്കാർ അത്ഭുതകരമായി രക്ഷപ്പെട്ടു. വാഴക്കോട് - പ്ലാഴി സംസ്ഥാന പാതയിൽ ആറ്റൂരുവച്ചായിരുന്നു അപകടം. നിയന്ത്രണംവിട്ട കാർ ഇലക്ട്രിക് പോസ്റ്റിലേക്ക് ഇടിച്ചുകയറിയാണ് അപകടം. യാത്രക്കാർ നിസാര പരിക്കുകളോടെ അത്ഭുതകരമായി രക്ഷപ്പെട്ടു. ഇന്നലെ രാവിലെയായിരുന്നു അപകടം. തെക്കുംകര മച്ചാട് മണലിത്തറ സ്വദേശി ശ്രീകൃഷ്ണന്‍റെ കാറാണ് അപകടത്തിൽപ്പെട്ടത്. ഐവർമഠത്തിൽപോയി തിരികെവരുന്നതിനിടെ നിയന്ത്രണംവിട്ട കാർ ഇലക്ട്രിക് പോസ്റ്റിലേക്ക് ഇടിച്ചുകയറുകയായിരുന്നു. ഇടിയുടെ ആഘാതത്തിൽ പോസ്റ്റ് മറിഞ്ഞ് സംസ്ഥാനപാതയ്ക്ക് കുറുകെ വീണതോടെ ഇതുവഴിയുള്ള ഗതാഗതം തടസപ്പെട്ടു. പ്രദേശത്ത് വൈദ്യുതി ബന്ധവും താറുമാറായി. കെഎസ്ഇബിയെയും പോലീസിനെയും വിവരമറിയിച്ചു. പോസ്റ്റ് പിന്നീട് മാറ്റിസ്ഥാപിച്ചു.

ഗുരുവായൂര്‍ മണ്ഡലംതല പട്ടയമേള 28ന്

ചാവക്കാട്: ഗുരുവായൂര്‍ നിയോജകമണ്ഡലംതല പട്ടയമേള 28ന് നടത്തും. മന്ത്രി കെ. രാജന്‍ ഉദ്ഘാടനംചെയ്യും. പുന്നയൂർ പഞ്ചായത്തിലെ അൽ സാക്കി ഓഡിറ്റോറിയത്തിൽ ഉച്ചകഴിഞ്ഞ് മൂന്നിന് നടക്കുന്ന ചടങ്ങിൽ എൻ.കെ. അക്ബർ എംഎൽഎ അധ്യക്ഷതവഹിക്കും. ഗുരുവായൂര്‍ മണ്ഡലത്തിലെ വിവിധ പഞ്ചായത്തുകളിലായി 145 പട്ടയങ്ങളാണ് വിതരണം ചെയ്യുന്നത്. പുറമ്പോക്ക് പട്ടയങ്ങള്‍ 60, ദേവസ്വം പട്ടയങ്ങള്‍ 20, ലാന്‍ഡ് ടെബ്രൂണല്‍ പട്ടയങ്ങള്‍ 65 എന്നിങ്ങനെയാണ് വിതരണം ചെയ്യുക. അകലാട് മൂന്നൈനി പ്രദേശത്തെ ജനങ്ങളുടെയും എടക്കഴിയൂര്‍ ഫിഷറീസ് കോളനിയിലെ ജനങ്ങളുടെയും ദശാബ്ദങ്ങളായുള്ള പട്ടയപ്രശ്നത്തിന് ഇതോടെ പരിഹാരമാകുമെന്ന് എംഎൽഎ അറിയിച്ചു. പട്ടയമേള നടത്തുന്നതുസംബന്ധിച്ച് എംഎല്‍എയുടെ അധ്യക്ഷതയില്‍ ചാവക്കാടുചേര്‍ന്ന യോഗത്തില്‍ നഗരസഭ ചെയര്‍പേഴ്സണ്‍ ഷീജ പ്രശാന്ത്, ബ്ലോക്ക് പഞ്ചായത്ത് പ്രസിഡന്‍റ് നഫീസക്കുട്ടി വലിയകത്ത്, പഞ്ചായത്ത് പ്രസിഡന്‍റുമാരായ ടി.വി. സുരേന്ദ്രന്‍, ജാസ്മിന്‍ ഷഹീര്‍, വിജിത സന്തോഷ്, തഹസില്‍ദാര്‍ കിഷോര്‍കുമാര്‍, വകുപ്പ് ഉദ്യോഗസ്ഥര്‍ തുടങ്ങിയവര്‍ ചർച്ചയിൽ പങ്കെടുത്തു.

വടക്കാഞ്ചേരി പട്ടയമേള 26ന്

വടക്കാഞ്ചേരി: നിയോജകമണ്ഡലം തല പട്ടയമേള 26ന് വൈകിട്ട് അഞ്ചിന്് വരടിയം ജിയുപി സ്കൂൾ അങ്കണത്തിൽ റവന്യുമന്ത്രി കെ. രാജൻ ഉദ്ഘാടനംചെയ്യും. സേവ്യർ ചിറ്റിലപ്പിള്ളി എംഎൽഎ അധ്യക്ഷനും കെ. രാധാകൃഷ്ണൻ എംപി മുഖ്യാതിഥിയുമാകും. പട്ടയമേളയിൽ വടക്കാഞ്ചേരി നിയോജകമണ്ഡലത്തിലെ താമസക്കാരായ 531 കുടുംബങ്ങൾക്ക് പട്ടയങ്ങൾ വിതരണംചെയ്യും. സംസ്ഥാന സർക്കാരിന്‍റെ ഭൂരഹിതരില്ലാത്ത കേരളം പദ്ധതിയുടെ ഭാഗമായി സംഘടിപ്പിക്കുന്ന മേളയിൽ വിതരണംചെയ്യുന്നതിനായി 43 വനഭൂമി പട്ടയങ്ങള്‌, 37 ദേവസ്വം പട്ടയങ്ങള്‌, 298 ലാൻഡ് ട്രൈബ്യൂണൽ പട്ടയങ്ങള്‌, ഒരു ഇനാംപട്ടയം, 127 മിച്ചഭൂമി പട്ടയങ്ങള്‌, 25 പുറമ്പോക്ക് പട്ടയങ്ങളും തയാറായിട്ടുണ്ടെന്ന് സേവ്യർ ചിറ്റിലപ്പിള്ളി എംഎൽഎ അറിയിച്ചു. 127 മിച്ചഭൂമി പട്ടയങ്ങളിൽ അവണൂർ അംബേദ്കർനഗർ 97 പട്ടയങ്ങളും ഇത്തപ്പാറ 22 പട്ടയങ്ങളും മൈലാടുംകുന്ന് എട്ടു പട്ടയങ്ങളും ഉൾപ്പെടുന്നു. പട്ടയമിഷൻ പ്രവർത്തനങ്ങളുടെ ഭാഗമായി വടക്കാഞ്ചേരി നഗരസഭയിലെ കുമരനെല്ലൂർ തെലുങ്കർ നഗർ, മുണ്ടത്തിക്കോട് കുംഭാര നഗർ, മലാക്ക മിച്ചഭൂമി പ്രദേശങ്ങളിൽ 50 വർഷത്തിലേറെയായി സ്ഥിരതാസക്കാരായവര്‌ക്ക് പട്ടയം ലഭ്യമാക്കിയതിന്‍റെതുടർച്ചയായാണ് പട്ടയമേള സംഘടിപ്പിക്കുന്നത്. പട്ടയമേളയുടെ നടത്തിപ്പിനായി മണിത്തറ കമ്മ്യൂണിറ്റി ഹാളിൽ ചേർന്ന സംഘാടകസമിതി രൂപികരണയോഗം സേവ്യർ ചിറ്റിലപ്പിള്ളി എംഎൽഎ ഉദ്ഘാടനംചെയ്തു, അവണൂർ ഗ്രാമപഞ്ചായത്ത് പ്രസിഡന്‍റ് തങ്കമണി ശങ്കുണ്ണി അധ്യക്ഷതവഹിച്ചു. വടക്കാഞ്ചേരി നഗരസഭ ചെയർമാൻ പി.എൻ. സുരേന്ദ്രൻ, പുഴയ്ക്കൽ ബ്ലോക്ക്‌ പഞ്ചായത്ത് പ്രസിഡന്‍റ് ലീല രാമകൃഷ്ണൻ, കോലഴി ഗ്രാമപഞ്ചായത്ത് പ്രസിഡന്‍റ് ലക്ഷ്മി വിശ്വംഭരൻ, കൈപ്പറമ്പ് ഗ്രാമപഞ്ചായത്ത് പ്രസിഡന്‍റ്് കെ.കെ. ഉഷാദേവി, തെക്കുംകര ഗ്രാമപഞ്ചായത്ത് പ്രസിഡന്‍റ്് ടി.വി. സുനിൽകുമാർ, അടാട്ട് ഗ്രാമപഞ്ചായത്ത്പ്രസിഡന്‍റ് സിമി അജിത്‌കുമാർ, മുളങ്കുന്നത്തുകാവ് ഗ്രാമപഞ്ചായത്ത് പ്രസിഡന്‍റ് കെ.ജെ. ദേവസി, തൃശൂർ തഹസിൽദാർ ടി. ജയശ്രീ, ദുരേഖ തഹസിൽദാർ നിഷ ആർ. ദാസ്, തലപ്പിള്ളി തഹസിൽദാർ എം.ആർ. രാജേഷ്, ദുരേഖ തഹസിൽദാർ സി. സന്തോഷ് എന്നിവർ സംസാരിച്ചു.

പോസ്റ്റർ പ്രകാശനം ചെയ്തു

തൃശൂർ: തൃശൂർ കലാസദൻ വീണ്ടും നാടകരംഗത്തേക്ക്. ഏറെ നാളുകൾക്കുശേഷം തൃശൂർ കലാസദൻ അണിയിച്ചൊരുക്കുന്ന പ്രഫഷണൽ നാടകം ‘എന്‍റെ പിഴ ’യുടെ ടൈറ്റിൽ പോസ്റ്റർ തൃശൂർ അതിരൂപത സഹായമെത്രാൻ മാർ ടോണി നീലങ്കാവിൽ പ്രകാശനം ചെയ്തു. ആർച്ച്ബിഷപ് ഹൗസിൽ നടന്ന ചടങ്ങിൽ കലാസദൻ പ്രസിഡന്‍റ് ബാബു കവലക്കാട്ട്, സെക്രട്ടറി ഫാ. ജിയോ തെക്കിനിയത്ത്, മാനേജിംഗ് കമ്മിറ്റി അംഗങ്ങളായ ജേക്കബ് ചെങ്ങലായ്, സിൽവി, മേഴ്സി ബാബു, അൽഫോണ്‍സ, സംവിധായകൻ ഫാ. ഫിജോ ജോസഫ് ആലപ്പാടൻ എന്നിവർ സന്നിഹിതരായി.

അണ്ടത്തോട് ജിഎംഎൽപി സ്കൂളിനു രണ്ടുകോടി

പുന്നയൂർക്കുളം: അണ്ടത്തോട് ജിഎംഎൽപി സ്കൂൾ നവീകരണത്തിന് രണ്ടുകോടി രൂപയുടെ ഭരണാനുമതി ലഭിച്ചെന്ന് എൻ.കെ. അക്ബർ എംഎൽഎ. മുകൾനിലയിലെ ക്ലാസ് റൂം, പാചകപ്പുര, ചുറ്റുമതിൽ, യാർഡ് ടൈലിംഗ്, കവാടം തുടങ്ങിയവയ്ക്കാണു തുക അനുവദിച്ചത്. 165 വർഷം പഴക്കമുള്ള സ്കൂൾ ദേശീയപാത വികസനത്തിനായി വിട്ടുനൽകിയതോടെ വാടക കെട്ടിടത്തിലേക്കു മാറി. പിന്നീടു പുതിയേടത്തു സോമൻ സൗജന്യമായി നൽകിയ 20 സെന്‍റ് അടക്കം 52 സെന്‍റിൽ കെട്ടിടം നിർമിച്ചു. ഈ അധ്യയനവർഷം മുതൽ പുതിയ കെട്ടിടത്തിലാണു പ്രവർത്തനം. മുകൾനിലയിൽ നാലു ക്ലാസ്മുറികൾ നിർമിക്കാൻ ഒരുകോടിയുടെ ഭരണാനുമതി ലഭിച്ചിരുന്നു. ഇതിനു പുറമേയാണു രണ്ടുകോടി കൂടി ലഭിച്ചത്. സ്കൂളിനായി ഇതുവരെ 4.75 കോടിയാണു സർക്കാർ അനുവദിച്ചത്.

അന്താരാഷ്ട്ര അംഗീകാരത്തിലേക്ക് കേരളത്തെ നയിച്ച് രണ്ടു ഗവേഷകര്‍

ഇരിങ്ങാലക്കുട: ചൈനയിലെ ബെയ്ജിംഗില്‍ നടന്ന 15 ാമത് ഇന്റര്‍നാഷണല്‍ സിമ്പോസിയം ഓഫ് ന്യൂറോപ്റ്ററോളജിയില്‍ പങ്കെടുത്ത് കേരളത്തിലെ രണ്ടു ഗവേഷകര്‍ സംസ്ഥാനത്തിന് അന്താരാഷ്ട്ര അംഗീകാരം നേടിക്കൊടുത്തു. ഇരിങ്ങാലക്കുട ക്രൈസ്റ്റ് കോളജിലെ ഷഡ്പദ എന്റമോളജി റിസര്‍ച്ച് ലാബിലെ ഗവേഷകനും എല്‍ത്തുരുത്ത് സെന്‍റ് അലോഷ്യസ് കോളജിലെ അസിസ്റ്റന്‍റ് പ്രഫസറുമായ ടി.ബി. സൂര്യനാരായണന്‍ ഇന്ത്യയിലെ വലച്ചിറകന്‍ ശ്രേണിയിലെ പഠനനില എന്ന വിഷയത്തില്‍ അവതരിപ്പിച്ച പ്രഭാഷണം, ഇന്ത്യയിലെ വലച്ചിറകന്‍ ജീവികളുടെ വൈവിധ്യം, ഗവേഷണ പുരോഗതി, സംരക്ഷണ വെല്ലുവിളികള്‍ എന്നിവ വിശദീകരിച്ചു. ക്രൈസ്റ്റ് കോളജിലെ എസ്ഇആര്‍എല്‍ ലാബ് മേധാവിയും അസിസ്റ്റന്‍റ് പ്രഫസറുമായ ഡോ.സി. ബിജോയ് കേരളത്തിലെ ഓള്‍ഫ്ളൈസ് എന്ന വലച്ചിറകന്‍ വിഭാഗത്തിന്‍റെ ആവാസവും ഉയരപരമായ മുന്‍ഗണനകളും എന്ന വിഷയത്തില്‍ ഗവേഷണ പ്രബന്ധം അവതരിപ്പിച്ചു. കേരളത്തിലെ അപൂര്‍വ വലച്ചിറകന്‍ വിഭാഗത്തില്‍പ്പെടുന്ന ജീവികളുടെ വിതരണം, പരിസ്ഥിതി അനുയോജ്യത തുടങ്ങിയവയെക്കുറിച്ചുള്ള വിവരങ്ങള്‍ ഈ പ്രബന്ധത്തിലൂടെ ലഭിച്ചു.

സംഗീതനാടക അക്കാദമി പുസ്തകശാല ഉദ്ഘാടനം ഇന്ന്

തൃശൂർ: കേരള സംഗീതനാടക അക്കാദമിയുടെ പുസ്തകശാല സാംസ്കാരികമന്ത്രി സജി ചെറിയാൻ ഇന്നു രാവിലെ 10.50ന് ഉദ്ഘാടനം ചെയ്യും. മന്ത്രി ആർ. ബിന്ദു പങ്കെടുക്കും. അക്കാദമിവളപ്പിലാണു പുസ്ത കശാല. 1964 മുതൽ അക്കാദമി പുസ്തകപ്രകാശനം ആരംഭിച്ചെങ്കിലും വിൽക്കാൻ സ്വന്തമായി പുസ്തക ശാല ഉണ്ടായിരുന്നില്ല. അക്കാദമി ഓഫീസ്, ഓണ്‍ലൈൻ എന്നിവയിലൂടെയായിരുന്നു പ്രധാനമായും വിൽപന. കേരളത്തിൽ കലാസംബന്ധിയായ പുസ്തകങ്ങൾ പ്രസിദ്ധീകരിക്കുന്ന ആധികാരികസ്ഥാപനമാണ് സംഗീതനാടക അക്കാദമി. 1964ൽ കാവാലം നാരായണപ്പണിക്കർ സെക്രട്ടറി ആയിരുന്നപ്പോൾ എണ്ണപ്പാടം വെങ്കിട രാമഭാഗവതർ എഴുതിയ വെങ്കിട്ടരമണീയം ആണ് അക്കാദമി പ്രസിദ്ധീകരിച്ച ആദ്യ പുസ്തകം. ഇതുവരെ 78 പുസ്തകങ്ങൾ പുറത്തിറക്കി. എട്ടെണ്ണം ഉടൻ പുറത്തിറങ്ങും. പുസ്തകങ്ങൾക്ക് 20 ശതമാനം മുതൽ 50 ശതമാനം വരെ വിലക്കിഴിവുണ്ട്. പ്രസന്നയുടെ ഇന്ത്യൻ മെത്തേഡ് ഓഫ് ആക്ടിംഗിന്‍റെ മലയാളപരിഭാഷയും കേരള സംഗീതനാടക അക്കാദമിയുടെ ചരിത്രവും ബെർതോൾട് ബ്രെഹ്റ്റിന്‍റെ സന്പൂർണ നാടകങ്ങളുടെ മലയാള പരിഭാഷയും ഉടൻ പുറത്തിറങ്ങും.

അങ്കണവാടി ടീച്ചർമാരുടെയും ഹെൽപ്പർമാരുടെയും പ്രശ്നങ്ങൾക്ക് പരിഹാരംകാണും: വി.ഡി. സതീശൻ

ചാലക്കുടി: അങ്കണവാടി ടീച്ചർമാരുടെയും ഹെൽപ്പർമാരുടെയും പ്രശ്നങ്ങൾ നിയമസഭയിൽ അവതരിപ്പിച്ചുവെങ്കിലും പരിഹാരമായില്ലെന്നും പരിഹാരംകാണുന്ന സമയം വരുമെന്നും പ്രതിപക്ഷ നേതാവ് വി.ഡി. സതീശൻ. ചാലക്കുടി നഗരസഭ ഏഴാം വാർഡ് വികസനസമിതിയുടെ നേതൃത്വത്തിൽ സുമനസുകൾ വാങ്ങിനൽകിയ സ്ഥലത്ത് 56 ലക്ഷം രൂപ ചെലവിൽ നിർമിച്ച അനുഗ്രഹ അങ്കണവാടി കെട്ടിടത്തിന്‍റെ ഉദ്ഘാടനം നിർവഹിച്ച് പ്രസംഗിക്കുകയായിരുന്നു പ്രതിപക്ഷ നേതാവ്. ഹെൽത്ത് വെൽനെസ് സെന്‍റർ, വയോജന മന്ദിരം കെട്ടിടങ്ങളുടെ ശിലാസ്ഥാപനവും വി.ഡി. സതീശൻ നിർവഹിച്ചു. സനീഷ് കുമാർ ജോസഫ് എംഎൽഎ അധ്യക്ഷത വഹിച്ചു. നഗരസഭ ചെയർമാൻ ഷിബു വാലപ്പൻ ചികിത്സാസഹായ വിതരണം നടത്തി. ജനറൽ കൺവീനർ വി.ഒ. പൈലപ്പൻ, നഗരസഭാ വൈസ് ചെയർപേഴ്സൺ സി. ശ്രീദേവി, സ്റ്റാൻഡിംഗ് കമ്മറ്റി ചെയർമാൻമാരായ കെ.വി. പോൾ, പ്രീതി ബാബു, ദിപു ദിനേശ്, ആനി പോൾ, യുഡിഎഫ് ലീഡർ അഡ്വ. ബിജു എസ്. ചിറയത്ത്, കൗൺസിലർമാരായ ആലീസ് ഷിബു, സൂസമ്മ ആന്‍റണി, തോമസ് മാളിയേക്കൽ, റോസി ലാസർ, അങ്കണവാടി ടീച്ചർ റോസിലി ജോർജ്, കൺവിനർമാരായ ജോണി പുതുക്കാട്ടുകാരൻ, സി.കെ. പോൾ എന്നിവർ പ്രസംഗിച്ചു. പ്രവാസി മലയാളി തോമസ് മേലെപ്പുറം, ജോണി മേച്ചേരി, തങ്കച്ചൻ കട്ടക്കയം, സാബു ഇടശേരി തുടങ്ങിയവരെ പ്രതിപക്ഷ നേതാവ് ആദരിച്ചു.

അടിസ്ഥാന സൗകര്യങ്ങൾ പാളുന്നു ; ലേണിംഗ് സിറ്റിക്കു വേണം, നല്ലൊരു സ്റ്റഡി ക്ലാസ്

സി.ജി. ജിജാസൽ തൃശൂർ: ലേണിംഗ് സിറ്റിയെന്ന് അഭിമാനിക്കുന്ന തൃശൂർ നഗരത്തിൽ ഒരു മഴപെയ്താൽ ചീട്ടുകൊട്ടാരംപോലെ പൊളിയുന്നത് അടിസ്ഥാനസൗകര്യങ്ങളാണ്. ശുചിത്വനഗരം, സുന്ദരനഗരം തുടങ്ങിയ പ്രചാരണങ്ങൾ സജീവമായ നഗരത്തിൽ നടക്കാൻ പറ്റാത്ത നടപ്പാതകളും ദുർഗന്ധപൂരിതമായ വഴികളും കുഴികൾ നിറഞ്ഞ റോഡുകളും ദുരിതത്തിന്‍റെ കയ്പേറിയ അനുഭവമാണ് ജനങ്ങൾക്കു സമ്മാനിക്കുന്നത്. ഒരു വിദ്യാഭ്യാസനഗരത്തിനായി അർഹമായ നിലവാരത്തിൽ അടിസ്ഥാനസൗകര്യങ്ങൾ ഒരുക്കപ്പെടാത്ത സാഹചര്യത്തിൽ, ലേണിംഗ് സിറ്റി പദവി പേരിൽമാത്രം ഒതുങ്ങുന്നുവെന്നു പൊതുജനം പറഞ്ഞാൽ അവരെ കുറ്റപ്പെടുത്തരുത്. ശുചിത്വനഗരം സുന്ദരനഗരം (പേരിൽമാത്രം) പഴയൊരു മലയാളസിനിമയിൽ ദൈവത്തിന്‍റെ സ്വന്തം നാട്ടിലെത്തിയ മണവാളൻ (സലിംകുമാർ) മാലിന്യത്തിന്‍റെ മണമടിച്ച് കൊച്ചിയെത്തി എന്നുപറയുന്നപോലെയാണ് നഗരത്തിൽ എത്തുന്ന ഏതൊരു യാത്രികന്‍റെയും അവസ്ഥയിപ്പോൾ. ഏത് ഉറക്കത്തിൽ ആണെങ്കിൽപ്പോലും മൂക്കിലേക്ക് അടിച്ചുകയറുന്ന രൂക്ഷമായ ദുർഗന്ധം ശക്തൻ എത്തിയെന്ന് അറിയിക്കുന്ന അവസ്ഥയിലാണ് കാര്യങ്ങൾ. തൃശൂരിനുതന്നെ അഭിമാനനിമിഷം സമ്മാനിച്ച ലേണിംഗ് സിറ്റി പദവിക്കു ശക്തനിലെ ആകാശപ്പാത നൽകിയ സംഭാവന വളരെ വലുതാണെങ്കിലും പാതയ്ക്കുതാഴെയും സമീപത്തെ മാർക്കറ്റിനുചുറ്റും ഇപ്പോൾ ഉയരുന്നതു മാലിന്യങ്ങളുടെയും മൂത്രത്തിന്‍റെയും രൂക്ഷഗന്ധമാണ്. ശുചിത്വനഗരം സുന്ദരനഗരമെന്നു മാർക്കറ്റ് പരിസരത്തുൾപ്പെടെ പലയിടങ്ങളിലും ചുവർചിത്രങ്ങളായി പ്രത്യക്ഷപ്പെടുന്പോഴും അതിനുമുൻപിൽപോലും കാര്യം സാധിക്കുന്നവർ നിരവധിയാണ്. പട്ടാളം മാർക്കറ്റ് ഭാഗത്താണെങ്കിൽ പഴയ മാലിന്യസംസ്കരണകേന്ദ്രത്തിന്‍റെ ബാക്കി മഴവെള്ളത്തിൽ കിടന്നു ചീഞ്ഞഴുകി സ്ഥിരമായി ദുർഗന്ധം പരത്തിക്കൊണ്ടേയിരിക്കുന്നു. ആയിരങ്ങൾ വരുന്ന മാർക്കറ്റിൽ പേരിനുപോലും ടോയ്‌ലറ്റ് സൗകര്യം ഇല്ലാതായതോടെ അടച്ചുപൂട്ടിയ ഇ ടോയ്‌ലറ്റിനുചുറ്റും ആവശ്യക്കാർ കാര്യം സാധിക്കുന്നതു കാണാം. ഫലം മൂക്കുപൊത്താതെ ഈ ഭാഗത്തൊന്നും നടക്കാനാകില്ല. അരിയങ്ങാടിയിലും സ്ഥിതി സമാനമാണ്. എന്നാൽ ഇവിടം ടോയ്‌ലറ്റ് ഒരുക്കാൻ ഒരുവിഭാഗം തൊഴിലാളികൾ സമ്മതിക്കാതിരുന്നതാണ് കാരണമെന്നാണ് അധികൃതർ പറയുന്നത്. വഴിയരികിൽ ശങ്കതീർക്കാതിരിക്കാൻ ബോർഡ് സ്ഥപിച്ചിട്ടുണ്ടങ്കിലും ആ ബോർഡ് തിരിച്ചുവച്ച് അതിനുതാഴെയാണ് ഇപ്പോൾ ഇവിടെയുള്ളവർ കാര്യം സാധിക്കുന്നത്. ഒരിടത്തു പൂക്കളും പൂന്തോട്ടങ്ങളുമായി സുഗന്ധപൂരിതമാക്കാൻ അധികാരികൾ ശ്രമിക്കുന്ന നഗരത്തിൽതന്നെയാണ് ഈ ദുർഗന്ധം വമിക്കുന്ന വഴികൾ എന്നതാണ് വിരോധാഭാസം. നടപ്പാതയുണ്ട് പക്ഷേ, നടക്കാൻ പറ്റില്ല ഒരുകാലത്തു ടൈൽ വിരിച്ച് സുന്ദരമാക്കിയിരുന്ന നഗരത്തിലെ നടപ്പാതകൾ ഇപ്പോൾ മണ്ണും പുല്ലും നിറഞ്ഞ് വികൃതമാണ്. നഗരത്തിന്‍റെതന്നെ തിരക്കേറെയുള്ള പ്രദേശങ്ങളിൽ ഒന്നായ ഇക്കണ്ടവാര്യർ റോഡിൽ നടപ്പാതകളിൽ പലയിടങ്ങളിലും കൂട്ടിയിട്ടിരിക്കുന്ന മണ്ണും വളർന്നുപൊന്തിയ പുല്ലുകളും അനധികൃത പാർക്കിംഗുകളും നടപ്പാതയെ ഇടവഴിയായി മാറ്റി. എന്നിട്ടും സുരക്ഷിതമായ നടപ്പാതസൗകര്യം ഒരുക്കാൻ അധികൃതർ കാണിക്കുന്ന മടി അപകടങ്ങളിലേക്കാണ് വിരൽ ചൂണ്ടുന്നതെന്നതിൽ സംശയമില്ല. നിരത്തിൽ രക്തംപൊടിഞ്ഞിട്ടല്ല, അതിനു മുൻപുവേണം പരിഹാരമെന്നു ജനം നയം വ്യക്തമാക്കുന്നു. മഴ വന്നു, പിറകെ കുഴികളും കാറ്റുവീശിയാൽ വൈദ്യുതി പോകുംപോലെയാണ് നഗരത്തിലെ റോഡുകളുടെ അവസ്ഥയും. തോടായ റോഡെല്ലാം പൊടിയും കല്ലുമിട്ട് അടച്ച് പതിവുനാടകം തുടരുന്പോഴും അവയ്ക്കെല്ലാം മണിക്കൂറുകളുടെ മാത്രമേ ആയുസുള്ളുവെന്നു ജനത്തിനു മനസിലായിട്ടും കുഴിയടയ്ക്കുന്ന കരാറുകാരനോ അതിനു നേതൃത്വംനൽകുന്ന അധികാരികൾക്കോ മനസിലായിട്ടില്ല. ഇതു നിരത്തിലെ യാത്രകൾ ദുഷ്കരമാക്കുകയാണ്. ` പിഡബ്ല്യുഡിക്കു കീഴിലുള്ള അശ്വിനി ജംഗ്ഷൻ, ജൂബിലി ആശുപത്രി പരിസരം, റിട്ട. പോലീസ് ഉദ്യോഗസ്ഥനെയും ഭാര്യയെയും ഗുരുതരപരിക്കേല്പിച്ച കോവിലകത്തുംപാടം റോഡ് എന്നിവിടങ്ങളിലെല്ലാം കുഴികൾ വീണ്ടും തുറന്നതു നാടറിഞ്ഞിട്ടും അധികാരികൾ അറിഞ്ഞിട്ടില്ല. അല്ലെങ്കിൽ അറിയാമട്ടു നടിക്കുന്നു.

അജ്ഞാതമൃതദേഹം കണ്ടെത്തി

ചേർപ്പ്: മണലിപ്പുഴയിൽ അജ്ഞാത മൃതദേഹം കണ്ടെത്തി. കടലാശേരി പാലക്കടവ് പാലത്തിനു സമീപത്താണ് പുരുഷന്‍റെ മൃതദേഹം കണ്ടെത്തിയത്. ഇന്നലെ വൈകീട്ട് അഞ്ചോടെയാണ് സംഭവം. എറവക്കാട് ഓടൻചിറ ഷട്ടറിനു സമീപം ചൂണ്ടയിട്ടിരുന്നവരാണ് പുഴയിലൂടെ മൃതദേഹം ഒഴുകിപ്പോകുന്നത് കണ്ടത്. പിന്നീട് പാലത്തിനു സമീപം തടഞ്ഞുനിന്ന മൃതദേഹം നാട്ടുകാരും പോലീസും ചേർന്ന് പുറത്തെടുത്തു. ഏകദേശം 55 വയസ് തോന്നിക്കുന്ന ആളുടെ മൃതദേഹമാണ് കണ്ടെത്തിയത്. ചുവന്ന ഷർട്ടും വെള്ളമുണ്ടുമാണ് വേഷം. ചേർപ്പ് പോലീസ് അന്വേഷണം ആരംഭിച്ചു.

ദേശീയപാത മുരിങ്ങൂരിലും പെരുമ്പിയിലും വാഹനാപകടം; മൂന്നുപേർക്ക് പരിക്ക്

കൊരട്ടി: ദേശീയപാത മുരിങ്ങൂരിലും പെരുമ്പിയിലും ഇന്നലെ രാവിലെയുണ്ടായ വാഹനാപകടങ്ങളിൽ മൂന്നുപേർക്ക് പരിക്ക്. മഴ തുള്ളിയിട്ടാൽ അപകടം ഉറപ്പെന്ന രീതിയിലേക്കുമാറിയ പെരുമ്പിയിലെ അപകടവളവിൽ നിയന്ത്രണംവിട്ട് മീഡിയനിലേക്ക് രണ്ടു കാറുകളാണ് ഇടിച്ചുകയറിയത്. രാവിലെ ഏഴരയോടെയായിരുന്നു രണ്ട് അപകടങ്ങളും നടന്നത്. ചാലക്കുടി ഭാഗത്തുനിന്ന് കോതമംഗലത്തേക്ക് പോകുകയായിരുന്ന കാറാണ് നിയന്ത്രണംവിട്ട് മീഡിയനിലേക്ക് ആദ്യം മറിഞ്ഞത്.

തലകീഴായിമറിഞ്ഞെങ്കിലും യാത്രക്കാർ പരിക്കേൽക്കാതെ രക്ഷപ്പെട്ടു. തുടർന്ന് പത്തു മിനിറ്റിനുള്ളില്‌ ഇതേസ്ഥലത്ത് മലപ്പുറത്തുനിന്നു അങ്കമാലി ഭാഗത്തേയ്ക്കുപോവുകയായിരുന്ന കാറും മീഡിയനിലേക്ക് ഇടിച്ചുകയറി അപകടത്തിൽപ്പെട്ടു. ഇതിൽ സഞ്ചരിച്ചിരുന്നവരിൽ മൂന്നുപേർക്ക് പരിക്കേറ്റു. മൂവരേയും ഉടൻ കറുകുറ്റിയിലെ സ്വകാര്യാശുപത്രിയിലെത്തിച്ചു. തലയ്ക്ക് സാരമായി പരിക്കേറ്റ ഒരാളെ ഐസിയുവിലേക്ക് മാറ്റി. മറ്റു രണ്ടുപേർക്കും കൈകാലുകൾക്കാണ് പരിക്കേറ്റത്. ‌മുരിങ്ങൂർ ഡിവൈൻ ധ്യാനകേന്ദ്രത്തിനുസമീപത്തെ അടിപ്പാതയ്ക്കുമുകളിൽ അങ്കമാലി ഭാഗത്തുനിന്ന് തൃശൂർ ഭാഗത്തേയ്ക്ക് പോവുകയായിരുന്ന നാഷണൽ പെർമിറ്റ് ലോറി മീഡിയനിലേക്ക് ഇടിച്ചുകയറി. മീഡിയനിലെ ഇരുമ്പ് ബാരിക്കേഡ് തകർത്ത് എതിർദിശയിലേക്കുള്ള ട്രാക്കിലേക്കുകയറി മറ്റൊരു നാഷണൽ പെർമിറ്റ് ലോറിയിൽ ഇടിച്ചാണ് നിന്നത്. ഇന്നലെ രാവിലെ ഏഴേമുക്കാലോടെയായിരുന്നു സംഭവം. അപകടത്തിൽ ആർക്കും പരിക്കില്ല. രണ്ടു ലോറികളുടെയും മുൻഭാഗം തകർന്നിട്ടുണ്ട്. തുടർന്ന് അങ്കമാലി ഭാഗത്തയ്ക്കുള്ള ഗതാഗതക്കുരുക്ക് പതിവിലും രൂക്ഷമായി. വാഹനങ്ങൾ നീക്കംചെയ്യാനും ഗതാഗതക്കുരുക്ക് ഒഴിവാക്കാനും കൊരട്ടി പോലീസ് മേൽനടപടികൾ സ്വീകരിച്ചു. അപകടത്തുരുത്തായി മാറിയ പെരുമ്പിയിൽമാത്രം ഒരുവർഷത്തിനുള്ളിൽ അമ്പതിലേറെ അപകടങ്ങൾ ഉണ്ടായിട്ടുണ്ട്. അപകടവളവും കുണ്ടും കുഴിയും വെള്ളക്കെട്ടും ടാർ മുഴച്ചുനിൽക്കുന്ന പ്രതലവുമാണ് അപകടത്തിനുകാരണമാകുന്നത്. വിഷയം പലവട്ടം അധികൃതരുടെ ശ്രദ്ധയിൽപ്പെടുത്തിയിട്ടും നിസംഗത തുടരുകയാണ്.

യുവാവിന്‍റെ മരണം: കോണ്‍ഗ്രസ്, ബിജെപി റോഡ് ഉപരോധിച്ചു

തൃശൂർ: അയ്യന്തോൾ കുറിഞ്ഞ്യാക്കലിൽ ബസിനെ മറികടക്കുന്നതിനിടെ ബൈക്ക് അപകടത്തിൽപെട്ട് യുവാവ് മരിച്ച സംഭവത്തിൽ പ്രതിഷേധിച്ച് കോണ്‍ഗ്രസ്, ബിജെപി കൗണ്‍സിലർമാരും പ്രവർത്തകരും റോഡ് ഉപരോധിച്ചു. എതിരേ വന്ന ബൈക്ക് റോഡിലെ കുഴിയിൽ വീഴാതിരിക്കാൻ വെട്ടിച്ചപ്പോൾ കൂട്ടിയിടി ഒഴിവാക്കാൻ ശ്രമിക്കുന്നതിനിടെയാണ് യുവാവ് നിയന്ത്രണംവിട്ടു ബസിനടിയിലേക്കു വീണത്. അധികൃതരുടെ അനാസ്ഥയിലാണ് റോഡിൽ ഒരു ജീവൻകൂടി പൊലിഞ്ഞതെന്ന് പ്രതിഷേധക്കാർ ആരോപിച്ചു. റോഡിലെ കുഴി അടയ്ക്കാൻ തയ്യാറായില്ലെങ്കിൽ പ്രതിഷേധം ശക്തമാക്കുമെന്ന് മുന്നറിയിപ്പും നൽകി. പ്രതിപക്ഷനേതാവ് രാജൻ ജെ. പല്ലന്‍റെ നേതൃത്വത്തിൽ കോണ്‍ഗ്രസ് നടത്തിയ പ്രതിഷേധസമരത്തിൽ പങ്കെടുത്ത കൗണ്‍സിലർമാരായ മേഫി ഡെൽസണ്‍, സുനിതാ വിനു, ലാലി ജെയിംസ്, കെ.സുരേഷ്, കെ. സുമേഷ്, കോണ്‍ഗ്രസ് നേതാവ് എ. പ്രസാദ് എന്നിവരെ പോലീസ് അറസ്റ്റ് ചെയ്തു വെസ്റ്റ് പോലീസ് സ്റ്റേഷനിലേക്കു കൊണ്ടുപോയി. ഉച്ചയോടെ കേസെടുത്തു ജാമ്യത്തിൽ വിട്ടയച്ചു. ബിജെപി സമരത്തിന് കൗണ്‍സിലർമാരായ എൻ. പ്രസാദ്, ഡോ. വി. ആതിര, മേഖലാ പ്രസിഡന്‍റ് എ. നാഗേഷ്, വൈസ് പ്രസിഡന്‍റ് ബിജോയ് തോമസ്, മണ്ഡലം പ്രസിഡന്‍റ്് രഘുനാഥ് സി. മേനോൻ, ജില്ലാ മീഡിയ കണ്‍വീനർ ദിനേഷ്കുമാർ കരിപ്പേരിൽ നേതൃത്വംനൽകി. പോലീസിനെതിരേ കോണ്‍ഗ്രസ് തൃശൂർ: അയ്യന്തോളിൽ റോഡിലെ കുഴിയിൽപെടാതിരിക്കാൻ ബൈക്ക് വെട്ടിച്ചപ്പോൾ ബസിനടിയിൽപെട്ട് മരിച്ച ലാലൂർ സ്വദേശി ആബേൽ ചാക്കോയുടെ മരണത്തിന്‍റെ ഉത്തരവാദിത്തത്തിൽനിന്ന് പൊതുമരാമത്ത് വകുപ്പിനെയും കോർപറേഷനെയും രക്ഷിക്കാൻ പോലീസിന്‍റെ ഭാഗത്തുനിന്ന് ബോധപൂർമായ ശ്രമം നടക്കുന്നതായി കെപിസിസി സെക്രട്ടറിയും കൗണ്‍സിലറുമായ ജോണ്‍ ഡാനിയൽ ആരോപിച്ചു. ബസിലെ സിസിടിവി ദൃശ്യം എടുത്ത് കൊല്ലപ്പെട്ടയാളുടെ തലയിൽ കെട്ടിവയ്ക്കാനുള്ള രാഷ്ട്രീയ ഇടപെടൽ ഒരു കാരണവശാലും അംഗീകരിക്കില്ല. റോഡ് കോർപറേഷന്‍റെതല്ലെന്നു പറഞ്ഞൊഴിയാൻ മേയർ ശ്രമിക്കരുതെന്നും ജോണ്‍ ഡാനിയൽ പറഞ്ഞു.

എട്ടുമണിക്കൂർ ഗതാഗതക്കുരുക്ക്

പുതുക്കാട്: ദേശീയപാത ആന്പല്ലൂരിൽ ഇന്നലെ യാത്രക്കാർ എട്ടുമണിക്കൂർ പെരുവഴിയിലായി. തൃശൂർ ഭാഗത്തേക്കുപോകുന്ന പാതയിലാണ് ഗതാഗതക്കുരുക്ക് രൂക്ഷമായത്. പുതുക്കാട് സെന്‍ററുംകടന്ന് വാഹനനിര നീണ്ടു. രാവിലെ മുതൽ തുടങ്ങിയ കുരുക്ക് ഉച്ചയായിട്ടും കുറഞ്ഞില്ല. അടിപ്പാതനിർമാണം നടക്കുന്ന ആന്പല്ലൂരിലെ സർവീസ് റോഡിലെ കുഴികളും ഡ്രൈനേജിലെ തകർന്ന സ്ലാബുകൾ മാറ്റുന്നതുമാണ് വാഹനങ്ങളുടെ മെല്ലെപ്പോക്കിനും വൻ ഗതാഗതക്കുരുക്കിനും കാരണമായത്. അടിപ്പാതനിർമാണം ആരംഭിച്ചതോടെ ഇരുവശത്തുമുള്ള പാതയിൽ ഒറ്റവരിയായിട്ടാണു വാഹനങ്ങൾ കടത്തിവിടുന്നത്. ഡ്രൈനേജിന്‍റെ മുകളിലൂടെ വാഹനങ്ങൾക്കു കടന്നുപോകാവുന്ന തരത്തിൽ ഉറപ്പുള്ള സ്ലാബുകളാണു സ്ഥാപിച്ചതെന്നു പറയുന്നുണ്ടെങ്കിലും പലയിടത്തും സ്ലാബുകൾ തകരുന്നത് കുരുക്ക് രൂക്ഷമാക്കുകയാണ്. ഇത്തരത്തിൽ തകർന്ന സ്ലാബുകൾ മാറ്റിസ്ഥാപിക്കാൻ ശനിയാഴ്ച രാവിലെമുതൽ ഗതാഗതനിയന്ത്രണം ഏർപ്പെടുത്തിയതാണ് ഇന്നലെ വലിയ കുരുക്കിനിടയാക്കിയത്. പിന്നീട് ഗതാഗതക്കുരുക്ക് നിയന്ത്രിക്കാൻ കഴിയാതെ വന്നതോടെ സ്ലാബ് മാറ്റൽ അധികൃതർ ഉപേക്ഷിക്കുകയായിരുന്നു. തകർന്ന സ്ലാബിനു മുകളിലൂടെ വാഹനങ്ങൾ കടന്നുപോകുന്നത് അപകടങ്ങൾക്കും ഗതാഗതക്കുരുക്കിനും ഇടയാക്കും. തിരക്കിൽപ്പെടുന്ന ചെറുവാഹനങ്ങൾ വരി പാലിക്കാതെ കയറിപ്പോകാൻ ശ്രമിക്കുന്നതു തർക്കത്തിനും ഗതാഗതക്കുരുക്കിനും ഇടയാക്കുന്നുണ്ട്. തൃശൂർ ഭാഗത്തേക്കുള്ള ദേശീയപാതയിലും സർവീസ് റോഡിലും വാഹനങ്ങൾ നിറഞ്ഞതോടെ പുതുക്കാട് മുതൽ ആന്പല്ലൂർ വരെയുള്ള ഭാഗത്തെ വ്യാപാരസ്ഥാപനങ്ങളിലേക്കും ആശുപത്രിയിലേക്കും ആളുകൾക്ക് എത്താൻ കഴിയാത്ത സ്ഥിതിയായി. വാഹനം എത്താത്തതുമൂലം പുതുക്കാട് സ്റ്റാൻഡിനു മുൻപിലെ ആശുപത്രിയിലെത്തിയ രോഗിയെ ബൈക്കിലാണു തിരികെവിട്ടത്. ആംബുലൻസുകൾ ഉൾപ്പടെയുള്ള വാഹനങ്ങൾ ഒരു മണിക്കൂറോളം എടുത്താണ് ആന്പല്ലൂർ മറികടക്കുന്നത്. മണിക്കൂറുകളോളം ഗതാഗതക്കുരുക്കിൽപ്പെട്ട് യാത്രക്കാർ വലയുന്പോഴും ദേശീയപാത അഥോറിറ്റിയും കരാർ കന്പനിയും പ്രശ്നത്തിൽ ഇടപെടാത്തത് പ്രതിഷേധത്തിനിടയാക്കുന്നുണ്ട്.

തകഴി നാട്ടിൻപുറത്തിന്‍റെ കഥയും ഭാഷയും പകർന്ന കഥാകാരൻ: കവി രാവുണ്ണി

തൃശൂർ: നാട്ടിൻപുറത്തിന്‍റെ കഥകൾ തനി നാട്ടിൻപുറത്തുകാരന്‍റെ ഭാഷയിൽ പകർന്നുതന്ന മലയാളംകണ്ട മികച്ച കഥാകാരനായിരുന്നു തകഴിയെന്ന് കവി രാവുണ്ണി. തൃശൂർ ലിറ്റററി ഫോറം ചേറൂർ സാഹിതിയിൽ സംഘടിപ്പിച്ച സിനിമാചരിത്രസഞ്ചാര സംവാദം വെള്ളിത്തിരയിൽ തകഴിയുടെ സിനിമാസാഹിത്യ സംഭാവനകൾ ഉൾക്കൊള്ളുന്ന സിനിമാരവങ്ങൾ ഉദ്ഘാടനം ചെയ്യുകയായിരുന്നു അദ്ദേഹം. നോവലിസ്റ്റ് സുനിത വിത്സൻ അധ്യക്ഷത വഹിച്ചു. സതീഷ് കുമാർ വിശാഖപട്ടണം, ഡോ. ആനന്ദൻ, സുരേഷ് കോന്പാത്ത് എന്നിവർ തകഴിയുടെ രചനകൾ, ജീവിതം, വീക്ഷണം എന്നിവയിൽ പ്രഭാഷണങ്ങൾ നടത്തി. ഇ.ജി. സുബ്രഹ്മണ്യൻ, അപർണ ബാലകൃഷ്ണൻ എന്നിവർ നേതൃത്വംനൽകി. സി.വി. ജോസ്, പ്രമീള ഗോപാലകൃഷ്ണൻ എന്നിവർ തകഴിയുടെ സിനിമകളിലെ ഗാനങ്ങൾ അവതരിപ്പിച്ചു. കെ. ഉണ്ണികൃഷ്ണൻ, മോഹൻദാസ് പാറപ്പുറത്ത്, പി. വിനോദ് എന്നിവർ സന്നിഹിതരായി.

അമലയിൽ നഴ്സസ് കോണ്‍ഫറൻസ്

തൃശൂർ: അമല സ്കൂൾ ഓഫ് നഴ്സിംഗിന്‍റെ ആഭിമുഖ്യത്തിൽ നടത്തിയ സംസ്ഥാനതല നഴ്സസ് കോണ്‍ഫറൻസ് ‘ടെക്ബോണ്‍’ന്‍റെ ഉദ്ഘാടനം അമല ഗൈനക്കോളജി വിഭാഗം മേധാവി ഡോ. അനോജ് കാട്ടൂക്കാരൻ നിർവഹിച്ചു. അമല ജോയിന്‍റ് ഡയറക്ടർ ഫാ. ആന്‍റണി പെരിഞ്ചേരി, അസോസിയേറ്റ് ഡയറക്ടർ ഫാ. ആന്‍റണി മണ്ണുമ്മൽ, നഴ്സിംഗ് കോളജ് പ്രിൻസിപ്പൽ ഡോ. രാജി രഘുനാഥ്, ചീഫ് നഴ്സിംഗ് ഓഫീസർ സിസ്റ്റർ ലിഖിത, സ്കൂൾ ഓഫ് നഴ്സിംഗ് പ്രിൻസിപ്പൽ സിസ്റ്റർ മിനി, വൈസ് പ്രിൻസിപ്പൽ സിസ്റ്റർ റീന വർഗീസ് എന്നിവർ പ്രസംഗിച്ചു. സംസ്ഥാനത്തെ നഴ്സിംഗ് വിദ്യാർഥികളും സ്റ്റാഫംഗങ്ങളും പങ്കെടുത്തു.

റോഡിലെ കുഴിയിൽവീണ് അപകടമുണ്ടായാൽ ഉദ്യോഗസ്ഥർക്കും കരാറുകാർക്കുമെതിരേ കേസെടുക്കും: കളക്ടർ

തൃശൂർ: ജില്ലയിലെ റോഡുകളിലെ കുഴികൾ അടിയന്തരമായി അടച്ച് അപകടാവസ്ഥ ഒഴിവാക്കണമെന്ന് ജില്ലാ കളക്ടർ അർജുൻ പാണ്ഡ്യൻ ബന്ധപ്പെട്ട വകുപ്പുകൾക്കു നിർദേശം നൽകി. റോഡിലെ കുഴികൾമൂലം എന്തെങ്കിലും അപകടം സംഭവിച്ചാൽ ബന്ധപ്പെട്ട ഉദ്യോഗസ്ഥർക്കും കരാറുകാർക്കുമെതിരേ ദുരന്തനിവാരണനിയമം 2005ലെ സെക്ഷൻ 51 (ബി) പ്രകാരം നടപടി സ്വീകരിക്കും. കുറ്റകരമായ അനാസ്ഥമൂലം അപകടങ്ങൾ സംഭവിക്കുകയാണെങ്കിൽ ബിഎൻഎസ് സെക്്ഷൻ 125, 106 ഉൾപ്പെടെയുള്ള ശിക്ഷാനടപടികളുമായി മുന്നോട്ടുപോകുന്നതിനു പോലീസിനു നിർദേശം നൽകിയതായി കളക്ടർ അറിയിച്ചു. ജില്ലയിലെ റോഡുകളിലെ അറ്റകുറ്റപ്പണികൾ അടിയന്തരമായി പൂർത്തിയാക്കി അപകടാവസ്ഥ ഒഴിവാക്കുന്നതിനു നേരത്തെ ചേർന്ന ജില്ലാ റോഡ് സുരക്ഷാസമിതി യോഗങ്ങളിലും ജില്ലാ ദുരന്തനിവാരണ അഥോറിറ്റി യോഗങ്ങളിലും നിർദേശിച്ചിരുന്നു. എന്നാൽ പാലിച്ചതായി കാണുന്നില്ല. റോഡിലെ കുഴികൾ മൂലം നിരവധി അപകടങ്ങൾ റിപ്പോർട്ട് ചെയ്യുന്ന സാഹചര്യത്തിൽ ജില്ലയിലെ എല്ലാ റോഡിലെയും അപകടകരമായ കുഴികൾ അടച്ച് അപകടസാഹചര്യം ഒഴിവാക്കുന്നതിനു വേണ്ട നടപടികൾ അടിയന്തരമായി സ്വീകരിക്കണമെന്നും ജില്ലാ കളക്ടർ നിർദേശം നൽകി.

"മൂന്നാമത്തെ ശനിയാഴ്ചകളിൽ ഇനി ജനകീയ ശുചീകരണം'

വടക്കാഞ്ചേരി: മാതൃകാപരമായി മാലിന്യസംസ്കരണം നടത്തുന്ന നഗരസഭയാണ് വടക്കാഞ്ചേരിയെന്ന് മന്ത്രി എം.ബി. രാജേഷ്. മൂന്നാമത്തെ ശനിയാഴ്ചകളിൽ ഇനി ജനകീയ ശുചീകരണം നടത്തുമെന്നും ഇതിന്‍റെ സംസ്ഥാനതല ഉദ്ഘാടനവും മന്ത്രി നിർവഹിച്ചു. തലപ്പിള്ളി താലൂക്ക് ഓഫീസ് പരിസരം മന്ത്രിയുടെ നേതൃത്വത്തിൽ ശുദ്ധീകരിച്ച് ജനകീയ ശുചീകരണ പ്രവർത്തനത്തിന് തുടക്കം കുറിച്ചു. മാലിന്യസംസ്കരണത്തിലും ശുചിത്വ പരിപാലനത്തിലുമെല്ലാം കേരളം കൈവരിക്കുന്ന മാതൃകാപരമായ നേട്ടം സുസ്ഥിരമായി നിലനിർത്തുകയാണ് ജനകീയ ശുചീകരണ പരിപാടിയിലൂടെ ലക്ഷ്യമെടുന്നതെന്ന് മന്ത്രിപറഞ്ഞു. തെരുവുനായ നിയന്ത്രണത്തിന് ഏറെ പരിമിതികൾ നിലനിൽക്കുമ്പോഴും പൊതുവിടങ്ങൾ വൃത്തിയായി സൂക്ഷിക്കുക വഴി തെരുവുനായ ശല്യവും പകർച്ചവ്യാധികളും കുറയ്ക്കാനാകുമെന്നും മന്ത്രി കൂട്ടിച്ചേർത്തു. ഇത്തവണത്തെ സ്വച്ഛ് സർവേയിൽ വടക്കാഞ്ചേരി ഉൾപ്പെടെ 23 നഗരസഭകൾ സ്റ്റാർ അംഗീകാരം നേടി. കഴിഞ്ഞവർഷം 1370 നു മുകളിൽ ഉണ്ടായിരുന്ന കേരളത്തിലെ നഗരസഭകളുടെ റാങ്കിംഗ് ഈ വർഷം നൂറിൽ താഴെ എട്ടു നഗരസഭകളും ആയിരത്തിനു താഴെ ഭൂരിക്ഷം നഗരസഭകളും റാങ്ക് നേടിയതായും മന്ത്രികൂട്ടിച്ചേർത്തു. ചടങ്ങിൽ നഗരസഭ ചെയർമാൻ പി.എൻ. സുരേന്ദ്രൻ അധ്യക്ഷനായി. വൈസ് ചെയർപേഴ്സൺ ഷീല മോഹൻ, നഗരസഭ സ്റ്റാൻഡിംഗ് കമ്മിറ്റി ചെയർമാൻമാരായ എം.ആർ. അനൂപ് കിഷോർ, എ.എം. ജമീലാബി, പി.ആർ. അരവിന്ദാക്ഷൻ, സ്വപ്നശശി, സി.വി. മുഹമ്മദ് ബഷീർ, പ്രതിപക്ഷ നേതാവ് എസ്എഎ ആസാദ്, ശുചിത്വമിഷൻ ജില്ലാ കൊ- ഒാർഡിനേറ്റർ കെ.കെ. മനോജ്, ഹരിത കേരള മിഷൻ ജില്ലാ കൊ- ഒാർഡിനേറ്റർ ദിദിക, അരുൺ വിൻസന്‍റ്്, എൻ.കെ. പ്രമോദ്, അജീഷ് കർക്കിടകത്ത്, സിദ്ദിഖ്, ജനപ്രതിനിധികൾ, വിവിധ രാഷ്ട്രീയ കക്ഷി പ്രതിനിധികൾ തുടങ്ങിയവർ പങ്കെടുത്തു. എന്നാൽ എംഎൽഎ സേവ്യർ ചിറ്റിലപ്പിള്ളി തിരുവനന്തപുരത്താണന്നും, കെ. രാധാകൃഷ്ണൻ എംപി പാർട്ടിയുടെ ഒഴിവാക്കാൻ കഴിയാത്ത യോഗത്തിലാണന്നും പിന്നീട് സംഘാടകർ അറിയിച്ചു. സ്ഥിരമായി നഗരസഭക്ക് ഒരുസെക്രട്ടറിയെ നിയമിക്കണമെന്ന് ചടങ്ങിൽ പങ്കെടുത്ത നഗരസഭ പ്രതിപക്ഷ നേതാവ് എസ്എഎ അസാദ് പറഞ്ഞു. മന്ത്രിയുടെ പ്രസംഗത്തിനെതിരെ വിയോജനകുറിപ്പ് രേഖപ്പെടുത്തിയതിനുശേഷമായിരുന്നു അസാദ് മന്ത്രിയോട് സെക്രട്ടറിയെ നിയമിക്കാനുള്ള ഉത്തരവ് ഇറക്കണമെന്ന് ആവശ്യപ്പെട്ടത്. എന്നാൽ സ്ഥലം മാറി പോയ സെക്രട്ടറിമാരെ തിരികെ കൊണ്ടുവരാനല്ല പുതിയ സെക്രട്ടറിയെ നിയമിക്കാനാണ് മന്ത്രി തയ്യാറാകേണ്ടതെന്നും ആസാദ് കൂട്ടിചേർത്തു.

കനത്ത മഴയിൽ റോഡ് ഇടിഞ്ഞു

പുത്തൂർ: മരോട്ടിച്ചാൽ വഴിനടച്ചിറപ്പാലത്തിന് സമീപം റോഡ് തകർന്നു. റോഡിന്‍റെ സംരക്ഷണഭിത്തി ഉൾപ്പടെ ഇടിഞ്ഞ നിലയിലാണ്. രാവിലെ മുതൽ റോഡും സംരക്ഷണഭിത്തിയും വിണ്ടുനിൽക്കുന്ന അവസ്ഥയിൽ ആയിരുന്നു. ഏറേനാളായി വഴിനടച്ചിറ പാലവും സമീപത്തെ റോഡും അപകടവസ്ഥയിലായിരുന്നു. ജനപ്രതിനിധികളും നാട്ടുകാരും നിരന്തരം റോഡിന്‍റെ അപകടാവസ്ഥയെ പറ്റി ബന്ധപ്പെട്ടവരെ അറിയിച്ചെങ്കിലും യാതൊരുവിധ നടപടിയും ഉണ്ടായില്ല. ഇതുവഴി കടന്നുപോകുന്ന മലയോര ഹൈവേയുടെ പേരിലാണ് ഈ റോഡിന്‍റെ നിർമാണപ്രവൃത്തികൾ നീണ്ടുപോകാൻ കാരണമായത്. റോഡിന്‍റെ സംരക്ഷണഭിത്തി ഉൾപ്പടെ ഇടിഞ്ഞതോടെ ഇതുവഴിയുള്ള വാഹനയാത്ര ഏറെ അപകടവസ്ഥയിലായി. പാലവും അപകടാവസ്ഥയിലാണ്. സ്വകാര്യ ബസുകളും സ്കൂൾ വാഹനങ്ങളും ഉൾപ്പെടെ നിരവധി വാഹനങ്ങൾ കടന്നുപോകുന്ന ഈ റോഡിന്‍റെ ദുരവസ്ഥ എത്രയും വേഗം പരിഹരിക്കണം എന്നാണ് യാത്രക്കാരുടെയും ആവശ്യം. റോഡ് തകർന്നതോടെ ഇതുവഴിയുള്ള വലിയ വാഹനങ്ങളുടെ യാത്രയ്ക്കും നിയന്ത്രണം ഏർപ്പെടുത്തി. കൂടുതൽ അപകടങ്ങൾ ഉണ്ടവുന്നതിന് മുമ്പ് എത്രയും വേഗം റോഡും പാലവും സഞ്ചാരയോഗ്യമാക്കണമെന്നാണ് യാത്രക്കാരുടെ ആവശ്യം.

രോഗിക്ക് രക്ഷകരായി എസ്ഐയും പൊതുപ്രവര്‍ത്തകനും

പുതുക്കാട്: ദേശീയപാതയിലെ ഗതാഗതകുരുക്കില്‍പെട്ട് മണിക്കൂറുകളോളം ആശുപത്രിയില്‍ കുടുങ്ങിയ രോഗിക്ക് രക്ഷകരായി ചാലക്കുടി സ്റ്റേഷനിലെ എസ്ഐ വിശ്വനാഥനും പൊതുപ്രവര്‍ത്തകനായ സിന്‍റോ പയ്യപ്പിള്ളിയും. പുതുക്കാട് കെഎസ്ആര്‍ടിസി സ്റ്റാൻഡിന് എതിര്‍വശത്തുള്ള സ്വകാര്യ ആശുപത്രിയിലേക്ക് ഫിസിയോതെറാപ്പിക്കായി എത്തിയ പുതുക്കാട് സ്വദേശി വെളിയത്ത് അഗസ്റ്റിനാണ് മണിക്കൂറുകളോളം ദുരിതത്തില്‍ അകപ്പെട്ടത്. രാവിലെ ഒമ്പതിന് ചികിത്സയ്ക്കായി ഭാര്യയാേടൊപ്പം എത്തിയ അഗസ്റ്റിന്‍ ചികിത്സ കഴിഞ്ഞ് വീട്ടിലേക്ക് പോകാനാകാതെ നാല് മണിക്കൂറുകളോളമാണ് ആശുപത്രിക്ക് മുന്‍പിലെ ഗതാഗതകുരുക്കില്‍ കാത്തു നില്‍ക്കേണ്ടി വന്നത്. സര്‍വീസ് റോഡില്‍ മണിക്കൂറുകളോളം കുരുങ്ങി ക്കിടക്കുന്ന വാഹനങ്ങള്‍ മൂലം ഇവര്‍വിളിച്ച വാഹനങ്ങള്‍ക്ക് അടുത്തേയ്ക്ക് എത്താനായില്ല. ഈ സമയം ബാങ്കിലേക്ക് എത്തിയ വിശ്വനാഥനും ബാങ്കിലെ ജീവനക്കാരനായ സിന്‍റോയും ടാക്സികള്‍ വിളിച്ചു നോക്കിയെങ്കിലും തിരക്കിലൂടെ കടന്നുവരാന്‍ കഴിയാത്ത സ്ഥിതിയായിരുന്നു. തുടര്‍ന്ന് വിശ്വനാഥനും സിന്‍റോയും ചേര്‍ന്ന് ബാങ്കിലേക്ക് വന്നയാളുടെ ബൈക്കില്‍ കയറ്റിയിരുത്തി വീട്ടിലേക്ക് എത്തിക്കുകയായിരുന്നു.

കാരമുക്ക് പള്ളിയിൽ തിരുനാൾ

കാരമുക്ക്: സെന്‍റ് ജോൺ ബാപ്റ്റിസ്റ്റ് ദേവാലയത്തിലെ ഊട്ടുതിരുനാൾ കൊടിയേറ്റം നടത്തി. കണ്ടശാംകടവ് സെന്‍റ് മേരീസ് ഫെറോനാ വികാരി ഫാ. റാഫേൽ ആക്കാമറ്റത്തിൽ കൊടിയേറ്റം നിർവഹിച്ചു. തിരുനാൾ ദിനമായ 27ന് രാവിലെ 6.30ന് ലദീഞ്ഞ്, നൊവേന, രൂപം എഴുന്നള്ളിച്ചു വയ്ക്കൽ, ദിവ്യബലി എന്നിവ നടത്തും. ഫാ. ജോസ് ആളൂർ കാർമികനാക്കും. രാവിലെ പത്തിന് ആഘോഷമായ തിരുനാൾ ദിവ്യബലി, തിരുനാൾ സന്ദേശം, പ്രദക്ഷണം എന്നിവയും ഉണ്ടാകും. ചടങ്ങുകൾക്ക് വികാരി ജനറാൾ മോൺ. ജോസ് കോനിക്കര മുഖ്യകാർമികത്വം വഹിക്കും. വികാരി ഫാ. ടോണി റോസ് വാഴപ്പിള്ളി നേർച്ച ഭക്ഷണം ആശീർവദിക്കും. കൊടിയേറ്റ ചടങ്ങുകൾക്ക് ജനറൽ കൺവീനർ നെൽസൺ തോലത്ത്, കൈക്കാരന്മാരായ പി. എ. പോൾസൺ, ടി.പി. ബൈജു, കെ.സി. ജീജോ, പബ്ലിസിറ്റി കൺവീനർ പി.ജെ. ബെന്നി എന്നിവർ പരിപാടികൾക്ക് നേതൃത്വം നൽകി.

തൃശൂർ വെസ്റ്റ് ഉപജില്ല പ്രതിഭാസംഗമം

തൃശൂർ: ജില്ലാ പഞ്ചായത്തിന്‍റെ നേതൃത്വത്തിൽ നടന്ന തൃശൂർ വെസ്റ്റ് ഉപജില്ല പ്രതിഭാസംഗമം സിറ്റി പോലീസ് കമ്മീഷണർ ആർ. ഇളങ്കോ ഉദ്ഘാടനം ചെയ്തു. ജീവിതമാണു യഥാർഥ ലഹരിയെന്നും രാസലഹരികൾ ജീവിതത്തെയും പ്രതിഭകളെയും ഇല്ലാതാക്കുമെന്നും അദ്ദേഹം പറഞ്ഞു. ജില്ലാ പഞ്ചായത്ത് അംഗം വി.എൻ. സുർജിത്ത് അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ് മുഖ്യാതിഥിയായി. ജില്ലാ പഞ്ചായത്ത് അംഗം ലിനി, ഉപജില്ലാ വിദ്യാഭ്യാസ ഓഫീസർ പി.ജെ. ബിജു, പുഴയ്ക്കൽ ബ്ലോക്ക് പഞ്ചായത്ത് പ്രസിഡന്‍റ് ലീലാ രാമകൃഷ്ണൻ, വിവിധ പഞ്ചായത്ത് പ്രസിഡന്‍റുമാരായ ജിന നന്ദൻ, സ്മിത അജയകുമാർ, ശ്രീകല കുഞ്ഞുണ്ണി, കെ.കെ. ഉഷ, സിമി അജിത്ത് കുമാർ, ഹെഡ് മാസ്റ്റർ ഫോറം കണ്‍വീനർ ജോഷി ഡി. കൊള്ളന്നൂർ, തങ്കമണി ശങ്കുണ്ണി, ഡോ. കെ. ഉമാദേവി തുടങ്ങിയവർ പ്രസംഗിച്ചു.

സെനറ്റിൽ പ്രതിഷേധം ശക്തമാക്കി കെപിസിടിഎ അംഗങ്ങൾ

തൃശൂർ: സർവകലാശാല ജീവനക്കാരെ ആക്രമിക്കുന്നവർക്കെതിരേ നടപടി സ്വീകരിക്കുക, കള്ളക്കേസുകൾ അവസാനിപ്പിക്കുക, സർവകലാശാല കാന്പസിൽ സമാധാനം പുനഃസ്ഥാപിക്കുക തുടങ്ങിയ ആവശ്യങ്ങൾ ഉയർത്തി കെപിസിടിഎ സെനറ്റ് അംഗങ്ങൾ പ്രതിഷേധിച്ചു. ഡോ. വി.എം. ചാക്കോ, ഡോ. പി. സുൽഫി, ഡോ. ഇ. ശ്രീലത, ഡോ. ജി. സുനിൽകുമാർ, ഡോ. മനോജ് മാത്യൂസ്, ഡോ. ആർ. ജയകുമാർ, അഡ്വ. എം. രാജൻ എന്നിവരാണു പ്രതിഷേധവുമായി രംഗത്തെത്തിയത്. രജിസ്ട്രാറും ഇടതുപക്ഷ സിൻഡിക്കേറ്റും ഏകപക്ഷീയമായി സർവകലാശാല ജീവനക്കാരെ കേസിൽ കുടുക്കി ദ്രോഹിക്കുകയാണെന്നും വിദ്യാർഥികളെക്കൊണ്ട് ജീവനക്കാരെ മർദ്ദിക്കുകയാണെന്നും കുറ്റപ്പെടുത്തി. നീതിക്കുവേണ്ടി നിലകൊള്ളുന്ന വൈസ് ചാൻസലറെ ഒറ്റപ്പെടുത്താൻ ഇടതു സിൻഡിക്കറ്റ് അംഗങ്ങൾ നടത്തുന്ന ഒന്നും വിലപ്പോവില്ല എന്ന് സിൻഡിക്കേറ്റ് അംഗങ്ങളായ ടി.ജെ. മാർട്ടിൻ, പി. മധു എന്നിവർ പറഞ്ഞു.

കോൺഗ്രസിലെ പടലപ്പിണക്കം: ബ്ലോക്ക് പ്രസിഡന്‍റ് മാധ്യമങ്ങളെ കണ്ടു

വടക്കാഞ്ചേരി: നയം വ്യക്തമാക്കി ബ്ലോക്ക് കോൺഗ്രസ് പ്രസിഡന്‍റ്് പി.ജി. ജയദീപ്. കോൺഗ്രസ് ഭരണഘടനയിൽ അണികൾക്ക് നിർദേശം നൽകാനുള്ള ചുമതല പ്രസിഡന്‍റിനാണന്നും, മറ്റാരെയും പാർട്ടി ചുമതലപ്പെടുത്തിയിട്ടില്ലെന്നും ബ്ലോക്ക് കോൺഗ്രസ് പ്രസിഡണ്ട് പി.ജി. ജയദീപ് മാധ്യമ പ്രവർത്തകരോട് പറഞ്ഞു. വടക്കാഞ്ചേരിയിൽ കോൺഗ്രസിനുള്ളിലെ പടലപ്പിണക്കം നേതാക്കൾ പറയുന്നതുപോലെഅവസാനിച്ചിട്ടില്ല. ഇന്നലെ വടക്കാഞ്ചേരിയിൽ നടന്ന മന്ത്രി രാജേഷിന്‍റെ പരിപാടിയിൽ നിന്നും വിട്ടുനിൽക്കാൻ മുൻ പ്രതിപക്ഷ നേതാവും ഡിസിസി സെക്രട്ടറിയുമായ കെ അജിത്കുമാർ പറഞ്ഞിരുന്നു. ഇതിനെതിരെയാണ് ബ്ലോക്ക് പ്രസിഡന്‍റ് മാധ്യമ പ്രവർത്തകരെ കണ്ടത്. ജനങ്ങൾക്ക് ഉപകാരപ്പെടുന്ന പൊതുവായ വിഷയങ്ങളിൽ പാർട്ടി മാറി നിൽക്കാതെ യോജിച്ചുപോകണമെന്നാണ് മുകളിൽ നിന്നും തനിക്ക് ലഭിച്ചിരിക്കുന്ന നിർദേശമെന്ന് ബ്ലോക്ക് പ്രസിഡന്‍റ്് പി.ജി. ജയദീപ് പറഞ്ഞു.

കൗണ്‍സിലർമാരുടെ സസ്പെൻഷൻ റദ്ദാക്കി

തൃശൂർ: ജൂണ്‍ 30ന് കോർപറേഷൻ കൗണ്‍സിൽ യോഗം അലങ്കോലമാക്കിയതിനെത്തുടർന്ന് സസ്പെൻഡ് ചെയ്യപ്പെട്ട 10 കോണ്‍ഗ്രസ് കൗണ്‍സിലർമാരുടെ സസ്പെൻഷൻ റദ്ദാക്കി. റോഡിലെ കുഴിയിൽവീണു മരിച്ച യുവാവിന്‍റെ പേരിലാണ് കൗണ്‍സിലിൽ നാടകീയസംഭവങ്ങൾ അരങ്ങേറിയത്. തുടർന്ന് കൗണ്‍സിൽ ഹാളിലെ മേശപ്പുറത്തുകയറി പ്രതിഷേധിച്ച കൗണ്‍സിലർമാരെയാണ് മേയർ സസ്പെൻഡ് ചെയ്തത്. വിഷയത്തിൽ പാർലമെന്‍ററി നേതൃത്വവുമായി നടന്ന ചർച്ചയിൽ കോണ്‍ഗ്രസ് കൗണ്‍സിലർമാർ ഖേദം രേഖപ്പെടുത്തുകയും കൗണ്‍സിൽ യോഗനടപടികൾ സുഗമമായി നടത്തികൊണ്ടുപോകുന്നതിനു സഹകരിക്കുന്നതാണെന്നും ഉറപ്പുനൽകുകയും ചെയ്തോടെയാണ് സസ്പെൻഷൻ ഉത്തരവ് റദ്ദ് ചെയ്തതെന്നു മേയർ അറിയിച്ചു.

പഞ്ചായത്ത് യോഗത്തിൽ നടുത്തളത്തിൽ കുത്തിയിരുന്ന് പ്രതിഷേധം; ഇറങ്ങിപ്പോക്ക്

കൊരട്ടി: തിരുമുടിക്കുന്ന് ഗാന്ധിഗ്രാം ത്വക് രോഗാശുപത്രി വളപ്പിൽ ശുചിമുറി മാലിന്യ സംസ്കരണ പ്ലാന്‍റ് നിർമിക്കാനുള്ള പഞ്ചായത്ത് തീരുമാനം പുന:പരിശോധിക്കണമെന്ന് പഞ്ചായത്ത് യോഗത്തിൽ പ്രതിപക്ഷം ആവശ്യപ്പെട്ടതിനെത്തുടർന്ന് ബഹളം. കോൺഗ്രസ് പാർലിമെന്‍ററി പാർട്ടി ലീഡർ ബിജോയ് പെരേപ്പാടൻ പ്രമേയത്തിലൂടെയാണ് ഇക്കാര്യം ആവശ്യപ്പെട്ടത്. 2024 - 25 വർഷത്തിൽ എഫ്എസ്ടിപി നിർമാണവുമായി ബന്ധപ്പെട്ട പദ്ധതി ഉപേക്ഷിച്ചെ ന്നും 2025 - 26 വർഷത്തിൽ ഈ പദ്ധതി നിലവിലില്ലെന്നും പ്രസിഡന്‍റ് പി.സി. ബിജു മറുപടി നൽകി. പ്ലാന്‍റ്് സ്ഥാപിക്കുന്നതിന് ത്വക് രോഗാശുപത്രിയിലെ 50 സെന്‍റ് ഭൂമി സർക്കാരിൽനിന്നും വിട്ടുകിട്ടുന്നതിനായി ഇക്കഴിഞ്ഞ ഫെ ബ്രുവരിയിൽ ജില്ലാ കളക്ടർക്ക് നൽകിയ അപേക്ഷ റദ്ദാക്കാൻ പഞ്ചായത്ത് കമ്മിറ്റി തയാറാകണമെന്ന് ബിജോയ് ആവശ്യപ്പെട്ടു. വിഷയവുമായി ബന്ധപ്പെട്ട് തുടർചർച്ച അനുവദിക്കാത്തതിൽ പ്രതിഷേധിച്ച് യുഡിഎഫ് അംഗ ങ്ങൾ പഞ്ചായത്ത് യോഗത്തിൽ നടുത്തളത്തിൽ കുത്തിയിരുന്ന് പ്രതിഷേധിച്ചു. പഞ്ചായത്ത് അംഗങ്ങളുടെ അഭിപ്രായം ആരായാനും വോട്ടിനിടാനുമുള്ള ധൈര്യം പ്രസിഡന്‍റിനില്ലാത്തത് രഹസ്യ അജൻഡയുടെ ഭാഗമാണെന്നും യുഡിഎഫ് കുറ്റപ്പെടുത്തി. ഹരിതകർമസേന മുഖേന വീടുകളിൽ നിന്നും ശേഖരിക്കുന്ന മാലിന്യങ്ങൾ മാസങ്ങളോളം വഴിവക്കുകളിൽ ചാക്കുകളിലായി കിടക്കുകയാണെന്നും അതുപോലും കൃത്യതയോടെ നിർവഹിക്കാത്തവരാണ് ആരോഗ്യകേന്ദ്രം സ്ഥിതിചെയ്യുന്ന വളപ്പിൽ ശുചിമുറി സംസ്കരണ പ്ലാന്‍റിനു തിടുക്കംകൂ ട്ടുന്നതെന്നും കൊരട്ടിയെ മാലിന്യഹബ് ആക്കാനുള്ള നീക്കം ചെറുക്കുമെന്നും കോ ൺഗ്രസ് അംഗങ്ങൾ മുന്നറിയിപ്പുനൽകി. പഞ്ചായത്ത് കമ്മിറ്റിക്കിടെ നടുത്തളത്തിൽ കുത്തിയിരുന്ന് രൂക്ഷമായ മുദ്രാവാക്യങ്ങളുമായി കോൺഗ്രസ് അംഗങ്ങൾ പ്രതിഷേധിച്ചതിനെത്തുടർന്ന് പഞ്ചായത്ത് യോഗം അവസാനിപ്പിച്ചു. പാർലിമെന്‍ററി പാർട്ടി ലീഡർ ബിജോയ് പെരേപ്പാടൻ, പഞ്ചായത്ത് അംഗങ്ങളായ വർഗീസ് പയ്യപ്പിള്ളി, ചാക്കപ്പൻ പോൾ, ഗ്രേസി സ്കറിയ, പോൾസി ജിയോ എന്നിവർ നടുത്തളത്തിലിരുന്ന് പ്രതിഷേധിച്ചു, ഇറങ്ങിപ്പോയി. തുടർന്ന് പഞ്ചായത്ത് കാര്യാലയത്തിനു മുന്നിൽ നടന്ന പ്രതിഷധയോഗം ബ്ലോക്ക് കോൺഗ്രസ് വൈസ് പ്രസിഡന്‍റ്് ഫിൻസോ തങ്കച്ചൻ ഉദ്ഘാടനം ചെയ്തു. മണ്ഡലം പ്രസിഡന്‍റ് ആൽബിൻ പൗലോസ്, സച്ചിൻ രാജ്, വർഗീസ് പൈനാടത്ത്, പി.കെ.വർഗീസ്, ബിജോയ് പാപ്പച്ചൻ, എം.എ. രാമകൃഷ്ണൻ, എ.കെ.ബാബു, ടോജി ജേക്കബ് എന്നിവർ പ്രസംഗിച്ചു. പ്ലാന്‍റ്് സ്ഥാപിക്കാനുള്ള നീക്കത്തിനെതിരെ ബിജെപി അംഗങ്ങ ളായ പി.ജി. സത്യപാലൻ, ബിജി സുരേഷ് എന്നിവർ വിയോജനക്കുറിപ്പു നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]