വോളന്‍റിയർ സംഗമം സംഘടിപ്പിച്ചു

പെരുമ്പടവ്: വെള്ളോറ ടാഗോർ മെമ്മോറിയൽ ഹയർ സെക്കൻഡറി സ്കൂൾ നാഷണൽ സർവീസ് സ്കീം വോളന്‍റിയർ സംഗമം "മനസ് 2025' സംഘടിപ്പിച്ചു.

യുവജന കമ്മീഷൻ ചെയർമാൻ എം. ഷാജർ ഉദ്ഘാടനം ചെയ്തു. എസ്.ബി. പ്രസാദ് മുഖ്യാതിഥിയായിരുന്നു. സ്കൂൾ പ്രിൻസിപ്പൽ പി. ദാമോദരൻ അധ്യക്ഷത വഹിച്ചു. പ്രേമ സുരേഷ്, കെ.ബി. രതീഷ്കുമാർ, സി.എ. ഗീത , കെ.സി. രാജൻ, എം.കെ. സതീശൻ, ശ്രീധരൻ കൈതപ്രം, വി. ഹരിദാസ് തുടങ്ങിയവർ പ്രസംഗിച്ചു.

ADVERTISEMENT

കരിസ്മാറ്റിക് ജൂബിലി തിരി കുടിയാന്മല പള്ളിയിൽ

കുടിയാന്മല: കേരള കത്തോലിക്ക കരിസ്മാറ്റിക് നവീകരണ മുന്നേറ്റം സുവർണ ജൂബിലി ആഘോഷങ്ങളുടെ ഭാഗമായി കരിസ്മാറ്റിക് ചെമ്പേരി സബ് സോണിന്‍റെ ആഭിമുഖ്യത്തിലുള്ള ജൂബിലി തിരി പ്രയാണം കുടിയാന്മല ഫാത്തിമ മാതാ പള്ളിയിൽ എത്തി. ഇടവക വികാരി ഫാ. പോൾ വള്ളോപ്പിള്ളിയും കരിസ്മാറ്റിക് പ്രാർഥനാ ഗ്രൂപ്പ് അംഗങ്ങളും ചേർന്ന് ജൂബിലി തിരി ഏറ്റുവാങ്ങി. പതിമൂന്നിന് രാവിലെ ഒന്പതിന് ജപമാല പ്രാർഥന, സ്തുതി ആരാധന എന്നിവയ്ക്കു ശേഷം ഫാ. പോൾ വള്ളോപ്പിള്ളി ജൂബിലി തിരി തെളിച്ച് ആമുഖ സന്ദേശം നൽകും. തുടർന്ന് വചനപ്രഘോഷണം, ദിവ്യകാരുണ്യ ആരാധന എന്നിവയ്ക്ക് കരിസ്മാറ്റിക് ചെമ്പേരി സബ്സോൺ ആനിമേറ്റർ ഫാ. ജോസഫ് പുതുമന നേതൃത്വം നൽകും. വിശുദ്ധ കുർബാനയ്ക്ക് ശേഷം ജൂബിലി തിരി പൊട്ടംപ്ലാവ് സെന്‍റ് ജോസഫ്സ് പള്ളിയിൽ എത്തിക്കും.

ഓണാഘോഷ പരിപാടികൾ സംഘടിപ്പിച്ചു

ഉദയഗിരി: ഉദയഗിരിയിലെ ഒന്പത് സ്വാശ്രയ സംഘങ്ങളുടെ കൂട്ടായ്മയായ "തിളക്ക'ത്തിന്‍റെ നേതൃത്വത്തിൽ ഉദയഗിരി പള്ളി ഗ്രൗണ്ടിൽ ഓണാഘോഷവും വടംവലി മത്സരവും നടത്തി. വ്യാപാരി വ്യവസായി ഏകോപന സമിതി പ്രസിഡന്‍റ് സണ്ണി മഠത്തിൽപറമ്പിൽ അധ്യക്ഷത വഹിച്ചു. ഇന്‍റലിജൻസ് ഡിവൈഎസ്പി ജയൻ പി. ഡൊമിനിക്ക് മുഖ്യാതിഥിയായിരുന്നു. ഉദയഗിരി സെന്‍റ് മേരീസ് പള്ളി വികാരി ഫാ. സേവ്യർ പുത്തൻപുരയ്ക്കൽ വടംവലി മത്സര വിജയികൾക്ക് കാഷ് അവാർഡുകളും എവർ റോളിംഗ് ട്രോഫികളും വിതരണം ചെയ്തു. ഓണക്കളികളുടെ സമ്മാനദാനം വിവിധ സ്വാശ്രയ സംഘങ്ങളുടെ പ്രസിഡന്‍റുമാർ നിർവഹിച്ചു. ഡിനോ മൈലപ്പറമ്പിൽ, കെ.ജി. മോഹൻദാസ് എന്നിവർ നേതൃത്വം നൽകി. ചെറുപുഴ: ചെറുപുഴ ലയൺസ് ക്ലബിന്‍റെ ഓണാഘോഷം ലയൺസ് വൈസ് ഡിസ്ട്രിക്ട് ഗവർണർ ടൈറ്റസ് തോമസ് ഉദ്ഘാടനം ചെയ്തു. ക്ലബ് പ്രസിഡന്‍റ് ബോബൻ ജോസഫ് അധ്യക്ഷത വഹിച്ചു. റീജണൽ ചെയർപേഴ്സൺ എൻ.ജെ. ജോസഫ്, സോൺ ചെയർപേഴ്സൺ മഞ്ജു അഭിലാഷ്, റോയി ജോസഫ്, തോമസ് ജോസഫ്, കെ.കെ. വേണുഗോപാൽ, മാത്യു ഫിലിപ്പ് തുടങ്ങിയവർ പ്രസംഗിച്ചു. പൂക്കളം, മാവേലി, വിവിധ കലാകായിക മത്സരങ്ങൾ, ഓണസദ്യ, കപ്പിൾ ഡാൻസ്, തിരുവാതിര എന്നിവയും ഉണ്ടായിരുന്നു. ചുഴലി: വിജ്ഞാന പോഷിണി വായനശാല ആൻഡ് ഗ്രന്ഥാലയവും ചുഴലി വൈബിസിയും സംയുക്ത മായി "വൈബോണം' ഓണാഘോഷ പരിപാടി സംഘടിപ്പിച്ചു. എൽകെജി മുതൽ ഹൈസ്കൂൾതലം വരെയുള്ള വിദ്യാർഥികൾക്കും മുതിർന്ന സ്ത്രീകൾ, പുരുഷൻമാർ എന്നിവർക്കുമായി രസകരമായ വിവിധ കലാ-യിക മത്സരങ്ങൾ നടത്തി. കമ്പവലി മത്സരത്തിൽ ടീം തോളൂർ ഒന്നാം സ്ഥാനവും ടീം കിഴക്കേമൂല രണ്ടാം സ്ഥാനവും നേടി. സമാപന ചടങ്ങിൽ മത്സര വിജയികൾക്ക് സമ്മാനങ്ങളും എൽഎസ്എസ് ജേതാക്കൾക്കുള്ള ഉപഹാരങ്ങളും വിതരണം ചെയ്തു. ചപ്പാരപ്പടവ്: കൂവേരി ജവഹർ സ്മാരക ഗ്രന്ഥശാലയുടെ നേതൃത്വത്തിൽ സംഘടിപ്പിച്ച ഓണാഘോഷ പരിപാടികൾ ലൈബ്രറി കൗൺസിൽ ജില്ലാ എക്സിക്യുട്ടിവ് മെംബർ വി.വി. റീത്ത ഉദ്ഘാടനം ചെയ്തു. ഗ്രന്ഥശാല പ്രസിഡന്‍റ് എം. ലക്ഷ്മണൻ അധ്യക്ഷത വഹിച്ചു. കെ.വി. സുരേഷ് ബാബു, സി.വി.കെ. പണിക്കർ, കെ. സുമേഷ്, കെ.എം. കൃഷ്ണൻ എന്നിവർ പ്രസംഗിച്ചു. പഞ്ചായത്തംഗം ടി.പി. ശ്രീജ സമ്മാനദാനം നടത്തി. വിവിധ കലാപരിപാടികളും അരങ്ങേറി. പയ്യാവൂർ: കാഞ്ഞിലേരി പൊതുജന വായനശാല, കൈരളി ക്ലബ്, കുടുംബശ്രീ, വിവിധ സ്വാശ്രയ സംഘങ്ങൾ എന്നിവയുടെ സംയുക്താഭിമുഖ്യത്തിൽ സംഘടിപ്പിച്ച ഓണം വാരാഘോഷം "ഒന്നിച്ചോണം നല്ലോണം' സമാപിച്ചു. സാംസ്കാരിക ഘോഷയാത്ര, വിവിധ കലാമത്സരങ്ങൾ, സർഗോത്സവം, വയോജനങ്ങൾക്ക് ഓണക്കോടി എന്നിവയാണ് ആഘോഷങ്ങളുടെ ഭാഗമായി സംഘടിപ്പിച്ചത്. സമാപനത്തിൽ നടന്ന സാംസ്കാരിക സമ്മേളനം എം.വി. ജനാർദനൻ ഉദ്ഘാടനം ചെയ്തു. സിനിമാ പ്രവർത്തകൻ മുരളി കുന്നുമ്പുറത്ത് മുഖ്യാതിഥിയായിരുന്നു. കുടുംബ സംഗമത്തിന്‍റെ ഭാഗമായി വിപുലമായ ഓണസദ്യയും നടത്തി. എരമം സന്തോഷ് മാരാരുടെ നേതൃത്വത്തിൽ ഇരുപത്തഞ്ച് കലാകാരൻമാർ അണി നിരന്ന പഞ്ചാരിമേളത്തോടെയാണ് ഓണം വാരാഘോഷം സമാപിച്ചത്.

ഗാന്ധിയൻ പഠനകേന്ദ്രം പുരസ്കാരം സമ്മാനിച്ചു

ചെറുപുഴ: ഗാന്ധിയൻ പഠന കേന്ദ്രം ശ്രദ്ധേയരായ അധ്യാപകർക്കായി ഏർപ്പെടുത്തിയ അവാർഡ് അധ്യാപക ദിനത്തിൽ കുണ്ടംതടം എയ്ഞ്ചൽസ് ഹോം സ്പെഷൽ സ്കൂൾ അധ്യാപിക കെ. സ്മിതയ്ക്ക് സമ്മാനിച്ചു. ഭിന്നശേഷി വിദ്യാർഥികൾക്കു വേണ്ടി നടത്തിയ പ്രവർത്തനങ്ങൾ പരിഗണിച്ചാണ് അവാർഡ്. ഭിന്നശേഷിക്കാരായ വിദ്യാർഥികളെ കലാപ്രവർത്തനങ്ങളിലൂടെ പൊതുധാരയിലേക്ക് കൊണ്ടുവരുന്നതിനായി നൂതന പ്രവർത്തനങ്ങൾ ആവിഷ്കരിച്ചിരുന്നു. കെ. സ്മിത വിദ്യാഭ്യാസ പ്രവർത്തനത്തോടപ്പം കലാ പ്രവർത്തനങ്ങൾക്കും നേതൃത്വം നൽകി വരുന്നു. ഉദ്ഘാടനവും അവാർഡ് വിതരണവും നവപുരം മതാതീത ദേവാലയം സ്ഥാപകനും സാമൂഹ്യ ചിന്തകനും പ്രഭാഷകനുമായ പ്രാപ്പൊയിൽ നാരായണൻ നിർവഹിച്ചു. ചടങ്ങിൽ എഴുത്തുകാരനും പൊതുപ്രവർത്തകനുമായ റഫീഖ് പറമ്പത്ത് അധ്യക്ഷത വഹിച്ചു. മാധ്യമ പ്രവർത്തകൻ പെരിങ്ങോം ഹാരീസ്, ബ്ലോഗർ അനീഷ് കടുമേനി എന്നിവർ പ്രസംഗിച്ചു. കെ. സ്മിത മറുപടി പ്രസംഗം നടത്തി.

പാറക്കടവിലെ ആസിഡ് ആക്രമണം: യുവാവ് അറസ്റ്റില്‍

രാജപുരം: പാണത്തൂര്‍ പാറക്കടവില്‍ യുവതിക്കു നേരെ ആസിഡ് ആക്രമണം നടത്തിയശേഷം ഒളിവില്‍പോയ ഭര്‍ത്താവ് അറസ്റ്റില്‍. കര്‍ണാടക കരിക്കെ ആനപ്പാറ സ്വദേശി കെ.സി.മനോജിനെയാണ് (46) രാജപുരം പോലീസ് അറസ്റ്റ് ചെയ്തത്. ഇന്നലെ രാവിലെ 8.45ഓടെ പാണത്തൂര്‍ പാറക്കടവിലെ കിടപ്പുരോഗിയായ ഒരാള്‍ മാത്രം താമസിച്ചിരുന്ന വീടിന്‍റെ കട്ടിലിന്‍റെ അടിയില്‍ നിന്നാണ് മനോജിനെ പോലീസ് പിടികൂടുന്നത്. തിരുവോണനാളിലാണ് കേസിനാസ്പദമായ സംഭവം നടന്നത്. ഭാര്യ ദിവ്യയ്ക്കു നേരെ മനോജ് ആസിഡ് ആക്രമണം നടത്തിയപ്പോള്‍ അമ്മയെ രക്ഷിക്കാനുള്ള ശ്രമത്തിനിടെ മകള്‍ നിന്നുമോള്‍ക്കും (17) ദിവ്യയുടെ സഹോദരന്‍റെ മകള്‍ മന്യയ്ക്കും (10) പൊള്ളലേല്‍ക്കുകയായിരുന്നു. നിന്നുമോളുടെ കൈകാലുകള്‍ക്കും മന്യയുടെ മുഖത്തും കൈകള്‍ക്കുമാണ് പൊള്ളലേറ്റത്. ഇരുവരുടെയും പരിക്കുകള്‍ ഗുരുതരമല്ല. രണ്ടു മതങ്ങളില്‍പ്പെട്ട ദിവ്യയും മനോജും പ്രണയവിവാഹിതരായതാണ്. ഇരുവരും കര്‍ണാടക അതിര്‍ത്തിയിലേക്ക് കുടിയേറിയ മലയാളി കുടുംബങ്ങളില്‍ പെട്ടവരാണ്. രണ്ടു സംസ്ഥാനങ്ങളിലാണെങ്കിലും ഇരുവരുടെയും വീടുകള്‍ തമ്മില്‍ ഒരു കിലോമീറ്റര്‍ ദൂരമേയുള്ളൂ. റബര്‍ ടാപ്പിംഗ് തൊഴിലാളിയായ മനോജിന്‍റെ മദ്യപാനശീലത്തെച്ചൊല്ലി കലഹിച്ച് ദിവ്യ ഏതാനും നാളുകളായി സ്വന്തം വീട്ടില്‍ താമസിക്കുകയായിരുന്നു.

എംഡിഎംഎയുമായി ആംബുലൻസ് ഡ്രൈവർ അറസ്റ്റിൽ

തളിപ്പറമ്പ്: ഓണം സ്പെഷൽ ഡ്രൈവിൽ എംഡിഎംഎയുമായി ആംബുലൻസ് ഡ്രൈവർ അറസ്റ്റിലായി. ആംബുലൻസ് ഡ്രൈവർ തളിപ്പറമ്പ് കണ്ടി വാതുക്കൽ സ്വദേശി കായക്കൂൽ പുതിയ പുരയിൽ വീട്ടിൽ കെ.പി. മുസ്തഫ (37) യെ തളിപ്പറമ്പ് എക്സൈസ് റേഞ്ച് അസിസ്റ്റന്‍റ് എക്സൈസ് ഇൻസ്പെക്ടർ ഗ്രേഡ് പി.കെ. രാജീവന്‍റെ നേതൃത്വത്തിലാണ് അറസ്റ്റ് ചെയ്തത്.ഇയാളിൽനിന്ന് 430 മില്ലി ഗ്രാം എംഡിഎംഎ പിടിച്ചെടുത്തു. ആംബുലൻസ് ഡ്രൈവറായ മുസ്തഫ രോഗികളുമായി കർണാടകയിലെ ആശുപത്രികളിലേക്ക് പോകുമ്പോൾ അവിടെനിന്ന് എംഡിഎംഎ ശേഖരിച്ച് മടങ്ങിയെത്തി നാട്ടിൽ വില്പന നടത്തിവരികയായിരുന്നു. എംഡിഎംഎ ചെറുപൊതികളിലാക്കി ഏതെങ്കിലും സ്ഥലത്ത് വച്ചശേഷം ഫോട്ടോ എടുത്ത് ആവശ്യക്കാർക്ക് അയച്ചുകൊടുക്കുകയും അവർ അവിടുന്ന് എടുത്തുകൊണ്ടുപോകുകയുമാണ് ചെയ്തിരുന്നത്. രഹസ്യവിവരത്തിന്‍റെ അടിസ്ഥാനത്തിൽ മാസങ്ങളായി എക്സൈസ് ഉദ്യോഗസ്ഥർ നിരീക്ഷിച്ചു വരികയായിരുന്നു. കർണാടകയിൽനിന്ന് എംഡിഎംഎ കേരളത്തിലേക്ക് എത്തിച്ചു വിതരണം ചെയ്യുന്ന പ്രധാന കണ്ണികളിൽ ഒരാളാണ് ഇയാൾ. അസിസ്റ്റന്‍റ് എക്സൈസ് ഇൻസ്പെക്ടർ ഗ്രേഡ് കെ. രാജേഷ്, പി.പി. മനോഹരൻ, എക്സൈസ് പ്രിവന്‍റീവ് ഓഫീസർ ഗ്രേഡ് മുഹമ്മദ് ഹാരിസ്, സിവിൽ എക്സൈസ് ഓഫീസമാരായ ടി.വി. വിജിത്ത്. കലേഷ്, സിവിൽ എക്സൈസ് ഓഫീസർ ഡ്രൈവർ പ്രകാശൻ എന്നിവർ അടങ്ങിയ സംഘമാണ് പ്രതിയെ പിടികൂടിയത്.

സമൂഹത്തിന്‍റെ പ്രതീക്ഷകൾ വിദ്യാർഥികൾ സഫലമാക്കണം: ബിഷപ് ഡോ. വടക്കുംതല

കണ്ണൂർ: സമൂഹം നേരിടുന്ന പ്രശ്നങ്ങൾക്കെല്ലാം പരിഹാരം വിദ്യാഭ്യാസത്തിലൂടെയാണ് കണ്ടെത്തേണ്ടതെന്നും സമൂഹത്തിന്‍റെ പ്രതീക്ഷകൾ വിദ്യാർഥികളിലൂടെ സഫലമാകണമെന്നും കണ്ണൂർ ബിഷപ് ഡോ. അലക്സ് വടക്കുംതല. കണ്ണൂർ സെന്‍റ് മൈക്കിൾസ് സ്കൂൾ ഹാളിൽ കേരള ലാറ്റിൻ കാത്തലിക് അസോസിയേഷൻ (കെഎൽസിഎ) സംഘടിപ്പിച്ച "മെറിറ്റ് ഡേ 2025' വിദ്യാഭ്യാസ അവാർഡ് വിതരണം ചെയ്തു പ്രസംഗിക്കുകയായിരുന്നു അദ്ദേഹം. മികച്ച നിലവാരം പുലർത്തുന്ന പ്രതിഭാസമ്പന്നരായ വിദ്യാർഥികളെക്കുറിച്ച് സമൂഹത്തിന് ഉന്നതമായ പ്രതീക്ഷകളാണുള്ളതെന്നും അതു സഫലമാക്കാൻ കഠിനാധ്വാനം ചെയ്യണമെന്നും ബിഷപ് പറഞ്ഞു. കണ്ണൂർ രൂപതയുടെ കീഴിലുള്ള കണ്ണൂർ, കാസർഗോഡ് ജില്ലകളിലെ എസ്എസ്എൽസി, പ്ലസ് ടു പരീക്ഷകളിൽ ഉന്നതവിജയം നേടിയ സമുദായാംഗങ്ങളായ വിദ്യാർഥികൾ ചടങ്ങിൽ അവാർഡ് ഏറ്റുവാങ്ങി. മറ്റു മേഖലകളിൽ മികവ് തെളിയിച്ച വിദ്യാർഥികളെയും ആദരിച്ചു. കണ്ണൂർ രൂപത കെഎൽസിഎയുടെ ആത്മീയ ഉപദേഷ്ടാവായി 26 വർഷം സേവനമനുഷ്ഠിച്ച ഫാ. മാർട്ടിൻ രായപ്പനെയും കെഎൽസിഎ കണ്ണൂർ രൂപതയുടെ ആത്മീയ ഉപദേഷ്ടാവായി സ്ഥാനമേറ്റ ഫാ. ആൻസിൽ പീറ്ററേയും ചടങ്ങിൽ ആദരിച്ചു. രൂപത പ്രസിഡന്‍റ് ഗോഡ്സൺ ഡിക്രൂസ് അധ്യക്ഷത വഹിച്ചു. ഫാ. മാർട്ടിൻ രായപ്പൻ, ഫാ. ആൻസിൽ പീറ്റർ, സംസ്ഥാന ട്രഷറർ രതീഷ് ആന്‍റണി, സംസ്ഥാന മുൻ പ്രസിഡന്‍റ് ആന്‍റണി നൊറോണ, രൂപത ജനറൽ സെക്രട്ടറി ശ്രീജൻ ഫ്രാൻസിസ്, സംസ്ഥാന സെക്രട്ടറി ജോൺ ബാബു, കെ എൽസിഡബ്ല്യുഎ സംസ്ഥാന പ്രസിഡന്‍റ് ഷെർലി സ്റ്റാൻലി, കെഎൽസിഡബ്ല്യുഎ ആനിമേറ്റർ സിസ്റ്റർ പ്രിൻസി ആന്‍റണി, കെ.എച്ച്. ജോൺ, സിഎൽസി രൂപത പ്രസിഡന്‍റ് ഡിയോൺ ആന്‍റണി ഡിക്രൂസ്, കെസിവൈഎം രൂപത പ്രസിഡന്‍റ് റോജൻ നെൽസൻ, പ്രീത സ്റ്റാൻലി, റിക്സൻ ജോസഫ്, എലിസബത്ത് കുന്നോത്ത്, ഡിക്സൺ ബാബു, ലെസ്‌‌ലി ഫെർണാണ്ടസ്, സ്റ്റെഫാൻ ബഞ്ചമിൻ തുടങ്ങിയവർ പ്രസംഗിച്ചു.

കണ്ണൂർ രാജ്യാന്തര വിമാനത്താവള വികസനം : "റൺവേ ദുരന്ത'ത്തിൽ മരണംകാത്ത് 200 കുടുംബങ്ങൾ

സ്വന്തം ലേഖകൻ മട്ടന്നൂർ: കണ്ണൂർ രാജ്യാന്തര വിമാനത്താവളത്തിന്‍റെ റൺവേ വികസനത്തിന് സ്ഥലം ഏറ്റെടുക്കാതെ കിടക്കുന്നതിനാൽ ഇരുന്നൂറിലധികം കുടുംബങ്ങൾ ദുരിതത്തിൽ. കീഴല്ലൂർ പഞ്ചായത്തിലെ കാനാട്, കോളിപ്പാലം, നല്ലാണി ഭാഗങ്ങളിലായാണു കണ്ണൂർ വിമാനത്താവളത്തിലെ റൺവേ വികസിപ്പിക്കാൻ 245 ഏക്കർ സ്ഥലം ഏറ്റെടുക്കേണ്ടത്. റൺവേ 3050 മീറ്ററിൽനിന്ന് 4000 ആക്കി വികസിപ്പിക്കുന്നതിനാണിത്. 2017ലാണ് റൺവേ വികസനത്തിന് സ്ഥലമേറ്റെടുക്കാൻ തീരുമാനിച്ചത്. തൊട്ടടുത്ത വർഷം വിജ്ഞാപനവും ഇറങ്ങി. എന്നാൽ ഏഴുവർഷം കഴിഞ്ഞിട്ടും തുടർനടപടികളൊന്നുമില്ല. സാമ്പത്തിക പ്രതിസന്ധിയിലുള്ള സർക്കാരിന് നഷ്‌ടപരിഹാരത്തിന് വേണ്ട വൻ തുക കണ്ടെത്താനുള്ള പ്രയാസമാണ് കാരണം. 942.63 കോടി രൂപയാണ് നഷ്‌ടപരിഹാരത്തിന് വേണ്ടി വരികയെന്നാണ് സർക്കാർ മുമ്പ് നിയമസഭയിൽ അറിയിച്ചത്. 162 കുടുംബങ്ങളെയാണ് പുനരധിവസിപ്പിക്കേണ്ടത്. സ്ഥലത്ത് വസ്തുവകകളുടെ മൂല്യനിർണയവും മറ്റും നടത്തിയെങ്കിലും സ്ഥലമേറ്റെടുപ്പിനുള്ള നടപടികൾ എങ്ങുമെത്തിയില്ല. സാമ്പത്തിക പ്രതിസന്ധിയിൽ നിൽക്കുന്ന വിമാനത്താവളത്തിന് റൺവേ വികസിപ്പിക്കാൻ വീണ്ടും കോടികൾ ചെലവിടുന്നതിനെതിരെയും ചോദ്യങ്ങളുയരും. പ്രതിഷേധങ്ങളും നിവേദനങ്ങളും നഷ്‌ടപരിഹാരം ലഭിക്കാത്തതിനാൽ പ്രതിഷേധങ്ങൾ നടത്തുകയും നിവേദനങ്ങൾ നൽകുകയും ചെയ്തിരുന്നുവെങ്കിലും ഇതുവരെ കുടുംബത്തിന് നരകത്തിൽനിന്ന് കരകയറനായില്ല. സ്ഥല ഉടമകൾ ആക്‌‌ഷൻ കമ്മിറ്റി രൂപീകരിച്ച് യോഗങ്ങൾ നടത്തിയും കണ്ണൂർ കളക്‌ടറേറ്റിലേക്കും മട്ടന്നൂരിലെ തഹസിൽദാരുടെ ഓഫീസിലേക്കുമടക്കം മാർച്ചും ധർണയും നടത്തിയെങ്കിലും ഇവരുടെ പ്രശ്നത്തിന് പരിഹാരമായില്ല. മുഖ്യമന്ത്രിക്ക് ഉൾപ്പെടെ നിവേദനം നൽകിയിരുന്നു. പ്രതിപക്ഷ നേതാവ് വി.ഡി. സതീശൻ കാനാട് പ്രദേശത്തെത്തി കുടുംബങ്ങളുടെ പ്രശ്നങ്ങൾ മനസിലാക്കിയിരുന്നു. എന്നാൽ വർഷം എട്ടുകഴിഞ്ഞിട്ടും കുടുംബങ്ങളുടെ പ്രശ്നത്തിന് പരിഹാരം കാണാത്തതിനാൽ കുടുംബം നിരാശയിലാണ്. ലക്ഷ്യം ഹബ് എയർപോർട്ട് കണ്ണൂരിനെ ഹബ് എയർപോർട്ട് എന്ന നിലയിൽ വികസിപ്പിക്കുക ലക്ഷ്യമിട്ടാണ് റൺവേ 4000 മീറ്ററാക്കി വികസിപ്പിക്കണമെന്ന ആവശ്യം ഉയർന്നത്. വലിയ വിമാനങ്ങൾക്കും ചരക്കുവിമാനങ്ങൾക്കും സുഗമമായി ലാൻഡ് ചെയ്യാൻ ഇതോടെ സാധിക്കും. റൺവേ വികസനത്തോടെ രാജ്യത്തെ നാലാമത്തെ വലിയ വിമാനത്താവളമായി മാറാൻ കണ്ണൂരിന് സാധിക്കും. വിമാനത്താവളത്തിന്‍റെ നിർമാണം മുക്കാൽഭാഗത്തോളം പൂർത്തിയായ സമയത്ത് യുഡിഎഫ് സർക്കാരിന്‍റെ നേതൃത്വത്തിൽ വിമാനത്താവളത്തിൽ പരീക്ഷണപ്പറക്കൽ സംഘടിപ്പിച്ചിരുന്നു. റൺവേ 4000 മീറ്ററാക്കി വികസിപ്പിക്കണമെന്ന് ആവശ്യപ്പെട്ട് എൽഡിഎഫിന്‍റെ നേതൃത്വത്തിൽ സമരം നടത്തിയിരുന്നു. തുടർന്നാണ് റൺവേ 4000 മീറ്ററാക്കി വികസിപ്പിക്കാൻ തീരുമാനമെടുത്തത്. എന്നാൽ വിമാനത്താവളം പ്രവർത്തനം തുടങ്ങി ഏഴുവർഷമാകാറായിട്ടും റൺവേ വികസനത്തിനുള്ള സ്ഥലമേറ്റെടുപ്പ് തുടങ്ങാനായിട്ടില്ല. പലായനത്തിന്‍റെ കഥ വിമാനത്താവള പ്രദേശത്ത് നിന്ന് ഉരുൾപൊട്ടൽ കണക്കെ വെള്ളവും കല്ലും മറ്റും കുത്തിയൊഴുകി വന്നപ്പോൾ പ്രാണരക്ഷാർഥം വീടൊഴിഞ്ഞ് പോയ ആറു കുടുംബങ്ങളുണ്ട്. സ്വന്തം വീട്ടിൽനിന്ന് ഭീതിയോടും വേദനയോടും കൂടി ഒഴിഞ്ഞുപോയ പി.കെ. നാരായണിയമ്മയും തമ്പായിയമ്മയും ഇന്ന് ജീവിച്ചിരിപ്പില്ല. ആറുമാസത്തിനകം നഷ്‌ടപരിഹാരവും പുനരധിവാസവും ശരിയാക്കാമെന്നാണ് കളക്‌ടർ ഉൾപ്പടെയുള്ളവർ അന്ന് ഉറപ്പുനൽകിയത്. ഇവരുടെ വാക്കിന് യാതൊരു വിലയുമില്ലെന്ന് എട്ടുവർഷത്തിനിപ്പുറം ഈ വീട്ടുകാർ തിരിച്ചറിയുന്നു. മുഖ്യമന്ത്രി ഉൾപ്പടെയുള്ളവരെ കണ്ട് നിവേദനം നൽകിയിട്ടും സമര പരമ്പരകൾ നടത്തിയിട്ടും അധികൃതർ കണ്ണുതുറന്നില്ല. 2017 മേയ് 21നാണ് വേനൽമഴയിൽ വൻതോതിൽ വെള്ളം കുത്തിയൊഴുകി വന്നത്. കീഴല്ലൂർ, കടാങ്ങോട്ട് ഭാഗങ്ങളിൽ ഉരുൾപൊട്ടലിനു സമാനമായ നാശനഷ്‌ടമുണ്ടായി. ഇവരുടെ വീടുകൾ താമസയോഗ്യമല്ലെന്ന് കണ്ടാണു മാറ്റിപ്പാർപ്പിക്കാൻ തീരുമാനിച്ചത്. വാടകവീടുകളിലേക്കാണു പലരും മാറിയത്. വിമാനത്താവള കമ്പനിയായ കിയാൽ വാടക നൽകണമെന്നും ധാരണയായിരുന്നു. എന്നാൽ എട്ടു മാസത്തോളം മാത്രമാണു വാടക ലഭിച്ചത്. പിന്നീട് അധികൃതരെ സമീപിച്ചെങ്കിലും കാര്യമുണ്ടായില്ല. തങ്ങളെ ആരും തിരിഞ്ഞുനോക്കാനില്ലെന്നു മനസിലാക്കിയപ്പോൾ നാരായണിയമ്മ കാനാട്ടെ പഴയ വീട്ടിലേക്ക് തന്നെ താമസം മാറ്റി. ശോച്യാവസ്ഥയിലായ വീട് തത്ക്കാലം വൃത്തിയാക്കിയാണ് പ്രതിഷേധ സൂചകമായി ഇവിടേക്കു മാറിയത്. സുരക്ഷാഭീഷണി കണക്കിലെടുത്ത് ജനപ്രതിനിധികളും ഉദ്യോഗസ്ഥരും ഉടനെത്തി ഇവരെ വീണ്ടും മാറ്റിപ്പാർപ്പിച്ചു. അമ്മ മരിച്ചപ്പോൾ മൃതദേഹം പോലും വീട്ടിലെത്തിക്കാൻ സാധിച്ചില്ലെന്ന് തമ്പായിയമ്മയുടെ മകൾ ഇ.കെ. ലേഖ കണ്ണീരോടെ പറയുന്നു. പ്രശ്‌ന പരിഹാരം തേടി ഇനി മുട്ടാത്ത വാതിലുകളില്ല. 245 ഏക്കർ സ്ഥലം ഏറ്റെടുക്കാനുള്ള നടപടികൾ പുരോഗമിക്കുകയാണെന്നും ഇവരോടൊപ്പം മാത്രമേ ഏഴു കുടുംബങ്ങൾക്കും നഷ്‌ടപരിഹാരം ലഭ്യമാക്കാൻ സാധിക്കുകയുള്ളൂ എന്നാണ് അധികൃതരുടെ നിലപാട്. ഇവരിൽ പലരുടെ വീടും തകർന്നുവീണു. വീടും സ്ഥലവും കാടുകയറി നശിക്കുന്നത് നിസഹായരായി നോക്കിനിൽക്കാൻ മാത്രമേ ഇവർക്ക് സാധിക്കുന്നുള്ളൂ. പ്രേതാലയം പോലെ ഒരു പ്രദേശം എട്ടുവർഷം വരെ ആൾപ്പാർപ്പും കൃഷിയുമൊക്കെ ഉണ്ടായിരുന്ന ഒരു മേഖല ഇന്ന് കാടുകയറിക്കിടക്കുകയാണ്. കാടുകൾക്കിടയിൽ പുരാവസ്തുക്കൾ പോലെ ജീർണിച്ച വീടുകൾ കാണാം. തമ്പായിയമ്മയുടെ വീട് ഏതാണ്ട് പൂർണമായും മണ്ണടിഞ്ഞുകഴിഞ്ഞു. തെങ്ങും കവുങ്ങുമുൾപ്പടെ ധാരാളം കൃഷിയുണ്ടായിരുന്ന സ്ഥലത്ത് ഇന്ന് ചെളിയും വെള്ളവും കയറി ചതുപ്പുനിലത്തിനു സമാനമായിക്കിടക്കുന്നു. തെങ്ങുകളും കവുങ്ങുകളും കരിഞ്ഞുണങ്ങി. വിമാനത്താവള പ്രദേശത്ത് നിന്നു വെള്ളം കുത്തിയൊഴുകി രൂപപ്പെട്ട തോടും ഇവിടെ കാണാം. 12 ലധികം വീട്ടുകാർ താമസിച്ചിരുന്ന സ്ഥലത്ത് ഇപ്പോൾ കെ. വിജയനും ഭാര്യയും മാത്രമാണുള്ളത്. അസുഖമായാൽ വിളിച്ചാൽ പോലും ആരും എത്താനില്ലാത്ത മേഖലയിലാണ് ഇദ്ദേഹം ഒറ്റയ്ക്ക് കഴിയുന്നതെന്നു നാട്ടുകാർ പറയുന്നു. എന്നാൽ മാറിത്താമസിക്കാനില്ലെന്നും എല്ലാറ്റിനും സാക്ഷിയായി താൻ ഇവിടെ വേണമെന്നുമാണ് വിജയൻ പറയുന്നത്. ജീർണിച്ച വീടുകളിൽനിന്ന് വിലപിടിപ്പുള്ള കതകുകളും വാതിലുകളും മറ്റും ചിലർ കൊണ്ടുപോയി. സർക്കാരിന്‍റെ അവഗണനയുടെ ബാക്കിപത്രമായി പ്രേതാലയം പോലെ കിടക്കുകയാണ് കാനാട് കോളിപ്പാലം ഭാഗത്തെ ഈ പ്രദേശം. നൂറുകണക്കിന് അടി ഉയരത്തിൽ മണ്ണിട്ട് ഉയർത്തി നിർമിച്ചിട്ടുള്ള വിമാനത്താവള റൺവേക്ക് തൊട്ടുതാഴെ വരുന്ന സ്ഥലമാണിത്. ദുരിതജീവിതങ്ങൾ മഴ പെയ്താൽ ചോർന്നൊലിക്കുന്ന വീട്ടിൽ നിന്നു മാറിത്താമസിക്കാനാണ് കാനാട്ടെ റസിയ എട്ടുവർഷം മുമ്പ് വീടിന്‍റെ പണി തുടങ്ങിയത്. തറ കെട്ടിയപ്പോഴേക്കും സ്ഥലം വിമാനത്താവള റൺവേ വികസനത്തിന് ഏറ്റെടുത്ത് സർക്കാർ വിജ്ഞാപനമിറക്കി. ബാക്കിയുള്ള നിർമാണത്തിനുള്ള അനുമതി നിഷേധിക്കപ്പെട്ടു. തറ കെട്ടാൻ ചെലവാക്കിയ പണം പോലും നഷ്‌ടമായ അവസ്ഥയാണ്. പല തവണ അധികൃതർക്ക് നിവേദനം നൽകിയെങ്കിലും സ്ഥലമേറ്റെടുപ്പ് പൂർത്തിയായാൽ മാത്രമേ രക്ഷയുള്ളൂ എന്നാണ് അധികൃതർ പറയുന്നത്. വീടിനായി കെട്ടിയ തറ കാടുകയറുമ്പോൾ ചോർന്നാലിക്കുന്ന ഒറ്റനില വീട്ടിൽ കഴിയേണ്ട ഗതികേടിലാണ് റസിയയും കുടുംബവും.

ഓണാഘോഷം സംഘടിപ്പിച്ചു

ഇരിട്ടി: ജനശ്രീ സുസ്ഥിര മിഷൻ അയ്യൻകുന്ന് പഞ്ചായത്തുതല ഓണാഘോഷവും കൺവൻഷനും കരിക്കോട്ടക്കരി ഹോളി ഫെയ്ത് ഇംഗ്ലീഷ് സ്കൂളിൽ സണ്ണി ജോസഫ് എംഎൽഎ ഉദ്ഘാടനം ചെയ്തു. ജനശ്രീ മണ്ഡലം ചെയർമാൻ ജോർജ് വടക്കുംകര അധ്യക്ഷത വഹിച്ചു. ജനശ്രീ ജില്ലാ ചെയർമാൻ ചന്ദ്രൻ തില്ലങ്കേരി മുഖ്യപ്രഭാഷണം നടത്തി. അയ്യൻകുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ, ജനശ്രീ ബ്ലോക്ക് ചെയർമാൻ ബാലൻ പടിയൂർ, ഡിസിസി സെക്രട്ടറി ജയ്സൺ കാരക്കാട്ട്, പഞ്ചായത്ത് അംഗം ജോസഫ് വട്ടുകുളം, ബിഷപ് വള്ളോപ്പിള്ളി ഫൗണ്ടേഷൻ ചെയർമാൻ മാത്യു എം. കണ്ടത്തിൽ, തോമസ് മാത്യു പള്ളത്തുശേരി, ജനശ്രീ ജില്ലാ കമ്മിറ്റിയംഗം പി.കെ. ഓമന ജില്ലാ കമ്മിറ്റി അംഗം മനോജ് എം. കണ്ടത്തിൽ, സെക്രട്ടറി ഷാജി മടയംകുന്നേൽ എന്നിവർ പ്രസംഗിച്ചു. മുതിർന്ന സാമൂഹ്യ പ്രവർത്തകൻ മാത്യു എം. കണ്ടത്തിൽ, പോസ്റ്റൽ ഡിപ്പാർട്ട്മെന്‍റിന്‍റെ പ്രത്യേക പുരസ്കാരം നേടിയ തോമസ് മടുക്കക്കൽ, മികച്ച കർഷകരായ തങ്കച്ചൻ മച്ചിത്താന്നിക്കൽ, ബേബി ചെരിയൻകാലായിൽ, ജെസി മമ്പള്ളിക്കുന്നേൽ, യുവ ഡോക്ടർ ക്രിസ്റ്റീന ദേവസ്യ, കലോത്സവ മത്സര വിജയികൾ എന്നിവരെ ആദരിച്ചു. ജനശ്രീ കുടുംബാംഗങ്ങളുടെ ഓണാഘോഷവും ഓണസദ്യയും നടന്നു. മട്ടന്നൂർ: മട്ടന്നൂർ ടെമ്പിൾ ഏരിയാ റസിഡൻസ് അസോസിയേഷൻ താരയുടെ നേതൃത്വത്തിൽ മട്ടന്നൂർ ലയൺസ് ഹാളിൽ ഓണാഘോഷം സംഘടിപ്പിച്ചു. പ്രസിഡന്‍റ് എ. രാമകൃഷ്ണവാര്യർ ഉദ്ഘാടനം ചെയ്തു. പി.ബി. സജിത്ത്, സുധീർ, വനിതാ വേദി സെക്രട്ടറി സ്മിത പ്രിജിത്ത് എന്നിവർ പ്രസംഗിച്ചു. തുടർന്ന് കലാ-കായിക മത്സരങ്ങൾ സംഘടിപ്പിച്ചു. പൂക്കളം തീർക്കുകയും ഓണസദ്യയും ഒരുക്കുകയും ചെയ്തു.

ഉദ്ഘാടനത്തിലൊതുങ്ങി പയ്യന്നൂര്‍ പുതിയ ബസ്‌സ്റ്റാൻഡ് നിര്‍മാണം

പയ്യന്നൂര്‍: മാസങ്ങള്‍ക്കപ മുമ്പ് മന്ത്രി കടന്നപ്പള്ളി രാമചന്ദ്രന്‍ ഉദ്ഘാടനം നിര്‍വഹിച്ച പയ്യന്നൂര്‍ പുതിയ ബസ് സ്റ്റാൻഡിന്‍റെ രണ്ടാംഘട്ട നിര്‍മാണ പ്രവൃത്തി ഉദ്ഘാടനത്തിലൊതുങ്ങി. സാങ്കേതികവും സാമ്പത്തികവുമായ നിരവധി കടമ്പകള്‍ പിന്നിട്ട് എല്ലാ അനുമതിയും നേടിയശേഷം ഊരാളുങ്കല്‍ ലേബര്‍ കോണ്‍ട്രാക്ട് കോ-ഓപ്പറേറ്റീവ് സൊസൈറ്റിയെ ഏല്പിച്ച രണ്ടാംഘട്ട നിര്‍മാണമാണ് അനിശ്ചിതത്വത്തിലായത്. 1990ല്‍ നിലവില്‍ വന്ന പയ്യന്നൂര്‍ നഗരസഭയുടെ ആദ്യതീരുമാനമായിരുന്നു ബസ്‌സ്റ്റാൻഡ് നിര്‍മാണം. ബസ്‌സ്റ്റാൻഡ് നിര്‍മാണത്തിനായി നടുവിലെ വീട്ടില്‍ ശങ്കരന്‍, എമ്മന്‍ രാഘവന്‍ എന്നിവരില്‍ നിന്ന് മൂന്നേക്കര്‍ 49 സെന്‍റ് സ്ഥലവും ചാലിക്കണ്ടി പീടികയില്‍ അബ്ദുള്ളയില്‍ നിന്ന് ഒരേക്കര്‍ സ്ഥലവും പുതിയ വീട്ടില്‍ രമണി, ചെരിപ്പാടി വിനോദ്കുമാര്‍ എന്നിവരില്‍ നിന്ന് ഒരേക്കര്‍ സ്ഥലവും ചേര്‍ത്ത് ആകെ അഞ്ചേക്കര്‍ 49 സെന്‍റ് സ്ഥലം 1997ലാണ് നഗരസഭയ്ക്ക് സൗജന്യമായി വിട്ടുകിട്ടിയത്. എന്നാല്‍, സാങ്കേതികവും സാമ്പത്തികവും നിയമപരവുമായ കാരണങ്ങളാല്‍ ബസ്‌സ്റ്റാൻഡ് നിര്‍മാണം നീണ്ടുപോകുകയായിരുന്നു. ഇതിനിടയില്‍ മണ്ണിട്ടുയര്‍ത്തുന്നതിനും കെനോപ്പി, പ്ലാറ്റ്‌ഫോം എന്നിവയുടെ നിര്‍മാണത്തിനുമായി 2,01,22,741 രൂപ ചെലവായി. പിന്നീട് രണ്ടാംഘട്ട നിര്‍മാണം തുടങ്ങുന്നതിനായി നിരവധി കടമ്പകളാണ് തരണം ചെയ്യേണ്ടി വന്നത്. ഒടുവില്‍ അനുമതി ലഭിച്ച 4.983 കോടിയുടെ പുതുക്കിയ എസ്റ്റിമേറ്റില്‍ നഗരസഭയുടെ തനതു ഫണ്ടുപയോഗിച്ചുള്ള ബസ്‌സ്റ്റാൻഡ് നിര്‍മാണം ഊരാളുങ്കല്‍ ലേബര്‍ കോണ്‍ട്രാക്ട് കോ-ഓപ്പറേറ്റീവ് സൊസൈറ്റിയെ ഏല്പിക്കുകയായിരുന്നു. പുതിയ ബസ് സ്റ്റാൻഡ് യാര്‍ഡ് നിര്‍മാണം, ടോയ്‌ലറ്റ് നിര്‍മാണം എന്നിവയായിരുന്നു പദ്ധതിയിലുള്‍പ്പെടുത്തിയിരുന്നത്. കഴിഞ്ഞ ഫെബ്രുവരി 17നായിരുന്നു കരാര്‍ ഏജന്‍സിയും നഗരസഭയുമായി കരാര്‍ ഉടമ്പടിയില്‍ ഒപ്പിട്ടത്. അതിന്‌ശേഷം മാര്‍ച്ച് 16നാണ് മന്ത്രി കടന്നപ്പള്ളി രാമചന്ദ്രന്‍ രണ്ടാംഘട്ട നിര്‍മാണ പ്രവര്‍ത്തിയുടെ ഉദ്ഘാടനം നിര്‍വഹിച്ചത്. ഇതോടെ പ്രാരംഭ പ്രവര്‍ത്തിയാരംഭിച്ച നിര്‍മാണ പ്രവര്‍ത്തനം അനിശ്ചിതത്വത്തിലായി. ഈ ഭരണസമിതിയുടെ കാലത്ത് തന്നെ നിര്‍മാണം പൂര്‍ത്തീകരിക്കാൻ ഉദ്ദേശിച്ചിരുന്ന പ്രവര്‍ത്തിയാണ് അഞ്ച് മാസത്തോളമായി നിശ്ചലമായി കിടക്കുന്നത്. എസ്റ്റിമേറ്റിലുണ്ടായിരുന്ന മെക്കാഡം ടാറിംഗ് കോണ്‍ക്രീറ്റാക്കി മാറ്റുന്ന പ്രവൃത്തിയുടെ പുതിയ നിരക്ക് കൂട്ടിച്ചേര്‍ക്കുന്നതിന് അനുമതി ലഭിക്കാനുള്ള കാലതാമസമാണ് വിനയായതെന്ന് നഗരസഭ ചെയര്‍മാന്‍ കെ.വി. ലളിത പറഞ്ഞു. ഉടൻ അനുമതി ലഭിക്കുമെന്നും ഇതേതുടര്‍ന്ന് നിര്‍മാണം ആരംഭിക്കാന്‍ കഴിയുമെന്നും ആറുമാസത്തിനുള്ളില്‍ നിര്‍മാണം പൂര്‍ത്തീകരിക്കാന്‍ കഴിയുമെന്നും ചെയര്‍മാന്‍ പറഞ്ഞു.

ഗുരു സന്ദേശം വെളിച്ചം പകരുന്നത്: സജീവ് ജോസഫ് എംഎല്‍എ

പയ്യന്നൂര്‍: ശ്രീനാരായണ ഗുരുവിന്‍റെ സന്ദേശങ്ങള്‍ക്ക് ഏറെ പ്രസക്തിയുള്ള കാലഘട്ടമാണെന്നും ഗുരുസ്മൃതികള്‍ നമ്മുടെ സമൂഹത്തിന് വെളിച്ചം പകരുന്നതാണെന്നും സജീവ് ജോസഫ് എംഎല്‍എ. പയ്യന്നൂര്‍ സ്വാമി ആനന്ദതീര്‍ഥ ട്രസ്റ്റിന്‍റെ ആഭിമുഖ്യത്തില്‍ ശ്രീനാരായണ വിദ്യാലയത്തില്‍ സംഘടിപ്പിച്ച ജയന്തി ആഘോഷം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ട്രസ്റ്റ് പ്രസിഡന്‍റ് ടി.വി. വസുമിത്രന്‍ അധ്യക്ഷത വഹിച്ചു. സാഹിത്യ അക്കാദമി വൈസ് പ്രസിഡന്‍റ് അശോകന്‍ ചരുവില്‍ മുഖ്യപ്രഭാഷണം നടത്തി. പയ്യന്നൂര്‍ കുഞ്ഞിരാമന്‍, എം. ഗീതാനന്ദന്‍, ആര്‍. ഉണ്ണിമാധവന്‍, രഘു തായത്തുവയല്‍ എന്നിവര്‍ പ്രസംഗിച്ചു. ഉന്നത വിജയികളായ വിദ്യാര്‍ഥികള്‍ക്കുള്ള സ്മൃതി പുരസ്‌കാരങ്ങളും കണ്ണൂര്‍-കാസര്‍ഗോഡ് ജില്ലകളിലെ എസ്എസ്എല്‍സി പരീക്ഷയില്‍ ഫുള്‍ എ പ്ലസ് നേടിയ എസ്‌സി-എസ്ടി വിദ്യാര്‍ഥികള്‍ക്കുള്ള സ്വാമി ആനന്ദ സ്മാരക പുരസ്‌കാരങ്ങളും വിതരണം ചെയ്തു.

ഓണം ഫെയറിൽ കുറഞ്ഞ ചെലവിൽ കൂടുതൽ സാധനം വാങ്ങാം

കണ്ണൂർ: ഓണം ഫെയറിൽ എത്തുന്നവരെ കാത്തിരിക്കുന്നത് ആകർഷകമായ കാഴ്ചകളാണ്. വെള്ളച്ചാട്ടങ്ങളും പക്ഷികളുടെ സങ്കേതവും കണ്ട് ഫോട്ടോയുമെടുത്ത് അകത്തേക്ക് പ്രവേശിക്കുന്നവരെ കാത്തിരിക്കുന്നത് ഒരു മികച്ച ഷോപ്പിംഗ് അനുഭവമാണ്. വിവിധങ്ങളായ ഓഫറുകളിൽ ഫർണിച്ചറുകൾ, വായന ഇഷ്ടപ്പെടുന്നവർക്കായി ബുക്ക്സ്റ്റാൾ, നല്ല ആരോഗ്യത്തിനായി ബോഡി മസാജർ, ഗ്യാസ് സേഫ്റ്റി, കുട്ടികളെ ആകർഷിക്കാനായി പഠനോപകരണങ്ങളും കളിപ്പാട്ടങ്ങളും, ഏല്ലാവരും ഒരുപോലെ ഇഷ്ടപ്പെടുന്ന കോഴിക്കോടൻ ഹൽവ, വാട്ടർ പ്യൂരിഫയർ, പാലക്കാടൻ പനംകരിപ്പെട്ടി, കുട്ടികളെയും വലിയവരെയും ആകർഷിക്കാനായി കൂളിംഗ് ഗ്ലാസുകൾ, തൊപ്പികൾ എന്നിങ്ങനെ നിരവധി സ്റ്റാളുകളാണ് ഫെയറിന് ഉള്ളിലുള്ളത്. ഇവകൂടാതെ പഴയമയുടെ രുചി പുതുതലമുറയിൽ എത്തിക്കുകയെന്ന ലക്ഷ്യത്തോടെ പഴയകാല മിഠായികളും സ്റ്റാളിലുണ്ട്. കുട്ടികളുടെ ശ്രദ്ധപിടിച്ചു പറ്റാനായി വ്യത്യസ്ത രീതികളിലുള്ള കളിക്കോപ്പുകളാണ് ഇവിടെയുള്ളത്. ഓണത്തിന് കുറഞ്ഞ വിലയിൽ നല്ല ട്രെൻഡി കളക്‌ഷമൻ സ്വന്തമാക്കാനായി കൂത്താംപള്ളി നെയ്ത്തുകാരുടെ സെറ്റ് സാരികളും സെറ്റ്മുണ്ടുകളും ഒരുക്കിയ സ്റ്റാളുകളുമുണ്ട്. 450 മുതൽ 800 രൂപ വരെയുള്ള സാരികളും സെറ്റ്മുണ്ടുകളുമാണ് ഇവിടെയുള്ളത്. ഇതിനെല്ലാം പുറമെ സൗന്ദര്യ സംരക്ഷകർക്കായി ആയുർവേദ ഉത്പന്നങ്ങളും വീട്ടമ്മമാർക്കായി അടുക്കള സാധനങ്ങളും ന്യൂജൻ പിള്ളേർക്കായി രാജസ്ഥാൻ കോലാപുരി ചെരിപ്പുകൾ, ബാഗ്, ചുരിദാറുകൾ തുടങ്ങിയവയും ഇവിടെ ലഭ്യമാണ്.

ജോജോ മൈലാടൂരിന് ദേശീയ അധ്യാപക അവാർഡ്

ചെറുപുഴ: ചെറുപുഴ സ്വദേശിയും കോഴിച്ചാൽ ഗവ. ഹയർ സെക്കൻഡറി സ്കൂൾ അധ്യാപകനുമായ ജോജോ മൈലാടൂരിന് സ്കൂൾ അക്കാദമി കേരളയുടെ ദേശീയ സ്കൂൾ രത്ന അവാർഡ് ലഭിച്ചു. വിഭ്യാഭ്യാസ രംഗത്ത് നടത്തിയ ഗവേഷണങ്ങൾ, അധ്യാപകർക്കായി എഴുതിയ "ആൽഫോ ക്ലാസ് റൂം-ടീച്ചിംഗ് ബിയോണ്ട് ബൗണ്ടറീസ്' എന്ന അധ്യാപകരുടെ കൈപ്പുസ്തകം, അധ്യാപകർ, ബിസിനസുകാർ, രക്ഷിതാക്കൾ, കുട്ടികൾ, പ്രോഫഷണലുകൾ എന്നിങ്ങനെ ജീവിതത്തിന്‍റെ വിവിധ തുറകളിൽപ്പെട്ടവർക്കായി നൽകുന്ന പരിശീലനം, വിവിധ പാഠ്യ, പാഠ്യേതര പ്രവർത്തനങ്ങൾ, ക്ലാസ് റൂം പഠനപ്രവർത്തനങ്ങൾ എന്നിവ പരിഗണിച്ചാണ് അവാർഡ്. ഭാര്യ പരേതയായ അനു. മക്കൾ ജ്വൽ എൽസ ജോജോ, മാർവൽ ട്രീസ ജോജോ, ഹേസൽ അന്ന ജോജോ.

അപകടക്കുഴികൾ അടയ്ക്കാൻ ഒടുവിൽ നാട്ടുകാർ രംഗത്തിറങ്ങി

ഇരിട്ടി: കാലവർഷത്തിൽ രൂപപ്പെട്ട ഇരിട്ടി-ഉളിക്കൽ റോഡിലെ കുഴികൾ അടയ്ക്കാൻ ഒടുവിൽ നാട്ടു കാരർ തന്നെ രംഗത്തിറങ്ങി. ഇരുചക്ര വാഹനങ്ങൾ ഉൾപ്പെടെ അപകടത്തിൽപ്പെടുന്നത് പതിവായ തോടെ നാട്ടുകാർ ഇടപെട്ട് ചുള്ളിയോട് ഭാഗത്തെ കുഴികളാണ് താത്കാലികമായി അടച്ചത്. കല്ലും ചെങ്കൽ കഷ്ണങ്ങളും മണ്ണും ചേർത്താണ് കുഴികൾ അടച്ചത്. പത്തുവർഷത്തിൽ അധികമായി കുഴിയടയ്ക്കൽ പ്രവൃത്തി മാത്രം നടക്കുന്ന റോഡ് പുനർനിർമിക്കണം എന്ന ആവശ്യം ശക്തമാണെങ്കിലും അധികൃതർ തയാറായിട്ടില്ല. ജില്ലയിലെ പ്രധാന ടുറിസം കേന്ദ്രമായ കാഞ്ഞിരക്കൊല്ലി, കാലാങ്കി വ്യൂ പോയിന്‍റ് തുടങ്ങിയ സ്ഥലങ്ങളിലേക്ക് ഇരിട്ടിയിൽ നിന്നും എത്തിപ്പെടാനുള്ള പ്രധാന റോഡ് കൂടിയാണിത്. ഓവുചാലുകൾ നിറഞ്ഞതോടെ വെള്ളം റോഡിലേക്ക് ഒഴുകുന്നതാണ് റോഡിൽ കുഴികൾ രൂപപ്പെടാൻ കാരണം. പൊതുമരാമത്ത് യഥാസമയം അറ്റകുറ്റപ്പണികൾ നടത്താത്തതാണ് റോഡിന്‍റെ തകർച്ചക്ക് കാരണമെന്ന് നാട്ടുകാർ പറയുന്നു. കുഴി നികത്താൻ മുജീബ് പുതിയപുരയിൽ, മിസ്ബാഹ്, മിർസ, അമൽരാജ്, ദേവസ്യ പാറപ്പുറം, മനോജ്‌ മഞ്ഞപ്പള്ളിൽ തുടങ്ങിയവർ നേതൃത്വം നല്കി.

ഓണം മൂഡിൽ ദേ, ഒരു മാവേലി ഫാദർ!

ആലക്കോട്: കരുവഞ്ചാൽ ശാന്തിഭവനിൽ വിശ്രമജീവിതം നയിക്കുന്ന വൈദികരെ തേടി "മാവേലി' എത്തിയത് വൈദികർക്കും ഓണാഘോഷത്തിൽ പങ്കെടുത്തവർക്കും നവ്യാനുഭവമായി. എല്ലാ വർഷവും ഓണാഘോഷം നടത്താറുണ്ടെങ്കിലും ആദ്യമായാണ് വൈദികൻ മാവേലിയായി പ്രജകളെ കാണാൻ എത്തിയത്. തലശേരി അതിരൂപതയിലെ മുതിർന്ന വൈദികനായ ഫാ. ജിയോ പുളിക്ക ലാണ് ഓണാഘോഷത്തിന്‍റെ ഭാഗമായുള്ള മാവേലി വേഷം കെട്ടിയത്. ആലക്കോട് -വായാട്ടുപറമ്പ് ഫൊറോനയിലെ വൈദികർ തമ്മിൽ നടത്തിയ വടംവലിയും മാവേലി ഉദ്ഘാടനം ചെയ്തു. അച്ചന്‍റെ മാവേലിവേഷവും പ്രജകൾക്ക് നല്കിയ സന്ദേശവും ഇപ്പോൾ സമൂഹമാധ്യമങ്ങളിലും വൈറലാണ്. മാവേലി പറഞ്ഞു -""ഞാൻ പാതാളത്തിൽ ചവിട്ടി താഴ്ത്തപ്പെട്ടതിനുശേഷം ഇവിടെ നിരവധി വടംവലികൾ നടന്നിട്ടുണ്ട്. ഇപ്പോഴും നടന്നു കൊണ്ടിരിക്കുകയാണ്. രാഷ്‌ട്രീയ രംഗത്തായാലും സഭാതലത്തിലായാലും സാമൂഹിക രംഗത്തായാലും. ആ വടംവലിയല്ല ഈ വടംവലി. ഒാണത്തിന്‍റെ വടംവലി പരസ്പര സ് നേഹത്തിന്‍റേയും ഐക്യത്തിന്‍റേയും വടംവലിയാണ്. അതിന് എല്ലാം ആശംസകളും നേരുന്നു.'' കൂത്തുപറമ്പ് നിർമലഗിരി കോളജ് പ്രിൻസിപ്പൽ, ഗുഡ് ഷെപ്പേഡ് സെമിനാരി ഡയറക്ടർ, വിമൽ ജ്യോതി എൻജിനിയറിംഗ് കോളജ് ചെയർമാൻ എന്നീ നിലകളിൽ പ്രവർത്തിച്ചതിനുശേഷം ഇപ്പോൾ കരുണാപുരം സെന്‍റ് മേരീസ് മൈനർ സെമിനാരിയിൽ സേവനം ചെയ്യുകയാണ് ഫാ. ജിയോ പുളിക്കൽ. ഓണാഘോഷത്തോടനുബന്ധിച്ച് കസേരകളി, അപ്പം കടി, സുന്ദരിക്ക് പൊട്ടു തൊടൽ അടക്കമുള്ള മത്സരങ്ങളും നിരവധി പേർ പങ്കെടുത്ത ഓണസദ്യയും നടത്തി.

നൂതന കർഷക സംസ്കാരം വളർത്തണം: ഇൻഫാം

തലശേരി: കാർഷിക മേഖല നേരിടുന്ന പ്രതിസന്ധികളെ അതിജീവിക്കാൻ കർഷകർ നൂതന കൃഷിരീതികളിലക്ക് തിരിയണമെന്നും മൂല്യവർധിത ഉത്പന്നങ്ങളുടെ നിർമാണത്തിനും വിതരണത്തിനും കർഷകർ തന്നെ മുന്നിട്ടിറങ്ങണമെന്നും തലശേരിയിൽ ചേർന്ന ഇൻഫാം മലബാർ റീജണൽ ജനറൽ ബോഡി യോഗം ആവശ്യപ്പെട്ടു. കർഷകർക്ക് പരിശീലനവും പ്രോത്സാഹനവും നല്കണമെന്നും ജനോപകാരപ്രദമായ പദ്ധതികളെപ്പറ്റി സർക്കാർ ബോധവത്കരണം നടത്തണമെന്നും യോഗം ആവശ്യപ്പെട്ടു. ഇൻഫാമിന്‍റെ ജൂബിലി വർഷത്തിന്‍റെ ഭാഗമായി വിവിധങ്ങളായ കാർഷിക പദ്ധതികൾ ആസൂത്രണം ചെയ്തു. സംഘടനാ ശാക്തീകരണത്തിന്‍റെ ഭാഗമായി യൂണിറ്റ്, മേഖലാ, ജില്ലാതല സമ്മേളനങ്ങൾ സംഘടിപ്പിക്കും. കർഷകരെ ആദരിക്കൽ, വിവിധ സെമിനാറുകൾ, കർഷക റാലി എന്നിവയും നടത്തും. തലശേരി സോഷ്യൽ സർവീസ് സൊസൈറ്റിയിൽ നടന്ന യോഗം ഇൻഫാം ദേശീയ ജനറൽ സെക്രട്ടറി ഫാ. ജോസഫ് കാവനാടി യോഗം ഉദ്ഘാടനം ചെയ്‌തു. ഇൻഫാം മലബാർ മേഖലാ ഡയറക്‌ടർ ഫാ. ജോസ് പെണ്ണാപറമ്പിൽ അധ്യക്ഷത വഹിച്ചു. തലശേരി അതിരൂപത ഡയറക്‌ടർ ഫാ. ബിബിൻ വരമ്പകത്ത്, സംസ്ഥാന വൈസ് പ്രസിഡന്‍റ് സ്കറിയ നെല്ലംകുഴി, ഫാ. ജോമോൻ ചെമ്പകശേരി, ഫാ. സായി പാറൻകുളങ്ങര, ഫാ. ജയ്സൻ കളത്തിപ്പറമ്പിൽ, സണ്ണി തുണ്ടത്തിൽ, ഗിരി മാത്യു തിരുതാലിൽ എന്നിവർ പ്രസംഗിച്ചു. തലശേരി, താമരശേരി, കോഴിക്കോട്, കണ്ണൂർ രൂപതകളിൽ നിന്നുള്ള ഭാരവാഹികൾ പങ്കെടുത്തു.

കേരളത്തിന്‍റെ വളർച്ചയ്ക്ക് ഭാവി സ്വപ്നം കാണുക: ചാണ്ടി ഉമ്മൻ എംഎൽഎ

തലശേരി: വിദേശ തൊഴിൽസാധ്യതകളെ മാത്രം ആശ്രയിക്കാതെ സ്വന്തം നാട്ടിൽ സ്ഥിരജോലി കണ്ടെത്താനുള്ള ശ്രമം യുവജനങ്ങളുടെ ഭാഗത്തുനിന്ന് ഉണ്ടാകണമെന്ന് ചാണ്ടി ഉമ്മൻ എംഎൽഎ. കെസിവൈഎം തലശേരി അതിരൂപത സംഘടിപ്പിക്കുന്ന പ്രഥമ യൂത്ത് അസംബ്ലിയിൽ ജനാധിപത്യത്തിൽ യുവജനങ്ങളുടെ പങ്കാളിത്തം എന്ന വിഷയത്തിൽ പ്രവർത്തകരോട് സംവദിക്കുകയായിരുന്നു അദ്ദേഹം. വെള്ളിയാഴ്ച തലശേരി സാൻജോസ് മെട്രോപ്പോളിറ്റൻ സ്കൂളിൽ ആരംഭിച്ച യൂത്ത് അസംബ്ലി തലശേരി ആർച്ച്ബിഷപ് മാർ ജോസഫ് പാംപ്ലാനി ഉദ്ഘാടനം ചെയ്തു. കത്തോലിക്കാസഭ ഭാവിയെ നോക്കികാണുന്നത് യുവജനങ്ങളുടെ കണ്ണുകളിലൂടെയാണ്. സമൂഹത്തിൽ കൃത്യമായ ഇടപെടലുകൾ നടത്താൻ യുവജനങ്ങൾക്ക് സാധിക്കണമെന്ന് ആർച്ച്ബിഷപ് പറഞ്ഞു. അതിരൂപത പ്രസിഡന്‍റ് അബിൻ വടക്കേക്കര അധ്യക്ഷത വഹിച്ചു. ഡയറക്‌ടർ ഫാ. അഖിൽ മുക്കുഴി ആമുഖ പ്രഭാഷണം നടത്തി. കത്തീഡ്രൽ വികാരി റവ. ഡോ. തോമസ് മേൽവെട്ടത്ത്, കെസിവൈഎം സംസ്ഥാന സെക്രട്ടറി വിപിൻ ജോസഫ്, അമൽ പേഴുകാട്ടിൽ, സോന ചവണിയാങ്കൽ എന്നിവർ പ്രസംഗിച്ചു. നവമാധ്യമരംഗത്ത് യുവജന പങ്കാളിത്തം എന്ന വിഷയത്തിൽ സീറോ മലബാർ സഭയുടെ പിആർഒ റവ. ഡോ. ടോം ഓലിക്കരോട്ട്, നാളെയുടെ യുവജന നേതാക്കൾ എന്ന വിഷയത്തിൽ കത്തോലിക്ക കോൺഗ്രസ് ഗ്ലോബൽ ഡയറക്‌ടർ റവ.ഡോ. ഫിലിപ്പ് കവിയിൽ, യുവത്വവും മാധ്യമവും എന്ന വിഷയത്തിൽ മുതിർന്ന മാധ്യമ പ്രവർത്തകൻ ടോം കുര്യാക്കോസ് എന്നിവർ ക്ലാസെടുത്തു. യൂത്ത് അസംബ്ലിയോടനുബന്ധിച്ച് വിവിധ സമൂഹിക വിഷയങ്ങളിൽ യുവജന പാർലമെന്‍റ് നടത്തി. ബിബിൻ പീടിയേക്കൽ, ശ്രേയ ശ്രുതിനിലയം, അഖിൽ നെല്ലിക്കൽ, സാൻജോസ് കളരിമുറിയിൽ, സോന ചവണിയാങ്കൽ, എഡ്വിൻ തെക്കേമുറിയിൽ, അഞ്ജു വരിക്കാനിക്കൽ, അപർണ സോണി, സിസ്റ്റർ ജോസ്ന റോസ് എസ്എച്ച് എന്നിവർ യൂത്ത് അസംബ്ലിക്ക് നേതൃത്വം നൽകി.

മിഷൻലീഗ് വാർഷികം എടൂരിൽ; സംഘാടകസമിതി രൂപീകരിച്ചു

ഇരിട്ടി: ഒക്ടോബർ രണ്ടിന് എടൂരിൽ നടക്കുന്ന ചെറുപുഷ്പ മിഷൻലീഗ് തലശേരി അതിരൂപത 66-ാം വാർഷികാഘോഷത്തിനായി 101 അംഗ സംഘാടക സമിതി രൂപീകരിച്ചു. രണ്ടിന് രാവിലെ ഒന്പതിന് പ്രതിനിധി സമ്മേളനവും വാർഷികാഘോഷവും തലശേരി ആർച്ച്ബിഷപ് മാർ ജോസഫ് പാംപ്ലാനി ഉദ്ഘാടനം ചെയ്യും. തുടർന്ന് 19 ഫൊറോനകളിലെ വിദ്യാർഥികൾ പങ്കെടുക്കുന്ന മെഗാ റാലിയും വിവിധ കലാപരിപാടികളും നടക്കും. എടൂർ പാരിഷ് ഹാളിൽ നടന്ന സംഘാടക സമിതി യോഗം സെന്‍റ് മേരീസ് ആർക്കി എപ്പിസ്കോപ്പൽ ഫൊറോന വികാരി ഫാ. തോമസ് വടക്കേമുറിയിൽ ഉദ്ഘാടനം ചെയ്തു. മിഷൻലീഗ് അതിരൂപത പ്രസിഡന്‍റ് ഷിജോ സ്രായിൽ അധ്യക്ഷത വഹിച്ചു. അതിരൂപത ഡയറക്ടർ ഫാ. ജിതിൻ വയലുങ്കൽ, ഫാ. മനോജ് കൊച്ചുപുരയ്ക്കൽ, ഫാ. അഭിലാഷ് ചെല്ലങ്കോട്ട് , കെസിവൈഎം എടൂർ മേഖല കോ-ഓർഡിനേറ്റർ ഫാ. അലക്സ് നിരപ്പേൽ, ഫാ. മെൽബിൻ തെങ്ങുംപള്ളി, സോജൻ കൊച്ചുമല , സി.ജെ. ജോസഫ് എന്നിവർ പ്രസംഗിച്ചു. ഇരിട്ടി റീജണിലെ വിവിധ ഇടവകകളിലെ സിസ്്റ്റർമാർ, മതബോധ അധ്യാപകർ, മിഷൻലീഗ് ഭാരവാഹികൾ, എടൂർ ഇടവകയിലെ കൈക്കാരൻമാർ , വിവിധ ഭാരവാഹികൾ എന്നിവർ സംഘാടക സമിതി യോഗത്തിൽ പങ്കെടുത്തു.

കാർ തടഞ്ഞ് കത്തികാട്ടി യാത്രികനെ കൊള്ളയടിച്ച പ്രതി അറസ്റ്റിൽ

മയ്യിൽ: മയ്യിൽ എട്ടേയാറിൽ ബൈക്കിലെത്തി കാർ തടഞ്ഞുനിർത്തി യാത്രികനെ കത്തികാട്ടി ഭീഷണിപ്പെടുത്തി പണം കൊള്ളയടിച്ച സംഭവത്തിൽ പ്രതി അറസ്റ്റിൽ. പാവന്നൂർമെട്ട സ്വദേശി എൻ.കെ. നിസാറിനെ (40 ) യാണ് മയ്യിൽ ഇൻസ്പെക്ടർ പി.സി. സഞ്ജയ് കുമാർ, എസ്ഐ പി. ഉണ്ണികൃഷ്‌ണൻ എന്നിവരുടെ നേതൃത്വത്തിൽ അറസ്റ്റു ചെയ്തത്. കുറ്റ്യാട്ടൂർ സ്വദേശിയും ഇപ്പോൾ പന്ന്യന്നൂരിൽ താമസിക്കുകയും ചെയ്യുന്ന മർവാൻ ഖാലിദിന്‍റെ 4000 ദുബായ് ദിർഹവും 30,000 രൂപയും കവർന്ന കേസിലാണ് 24 മണിക്കൂറിനുള്ളിൽ പ്രതി അറസ്റ്റിലാകുന്നത്. വെള്ളിയാഴ്ച വൈകുന്നേരം നാലിനായിരുന്നു കേസിനാ സ്പദമായ സംഭവം. താൻ കാർ ഓടിച്ചു പോകുന്നതിനിടെ ബൈക്കിലെത്തിയ പ്രതി കാർ നിർത്താൻ ആവശ്യപ്പെടുകയാ യിരുന്നുവെന്നാണ് ഖാലിദ് പോലീസിനോട് പറഞ്ഞത്. കാർ നിർത്തി ഗ്ലാസ് താഴ്ത്തിയപ്പോൾ മൊബൈൽ ഫോൺ തട്ടിയെടുത്തു. ഇതോടെ കാറിൽനിന്ന് പുറത്തിറങ്ങിയ ഖാലിദിനെ പ്രതി തലകൊണ്ട് ഇടിക്കുകയും വലതു കൈയുടെ ഷോൾഡറിന് കടിക്കുകയും ചെയ്ത ശേഷം കത്തികാട്ടി ഭീഷണിപ്പെടുത്തി പണമടങ്ങിയ പേഴ്സ് തട്ടിപ്പറിച്ചു കടന്നുകളയുകയായിരുന്നു. അറസ്റ്റു ചെയ്ത പ്രതിയെ പിന്നീട് കോടതിയിൽ ഹാജരാക്കി.

അവിടെ കല്യാണം; ഇവിടെ പോക്സോ കേസ്

കണ്ണൂർ: വിവാഹം കഴിഞ്ഞ് കുടുംബത്തോടെ കേരളത്തിലെത്തുന്ന ഇതരസംസ്ഥാന തൊഴിലാളികൾ പോക്സോ കേസിൽ അറസ്റ്റിലാകുന്നത് വ്യാപകമാകുന്നു. പ്രായപൂർത്തിയാകാത്ത പെൺകുട്ടികളെ വിവാഹം കഴിച്ചാണ് ഭാര്യയോടൊപ്പം വിവിധ ജോലികൾക്കായി ഇവർ കേരളത്തിൽ എത്തുന്നത്. ഭാര്യയെ പ്രസവത്തിന് ആശുപത്രിയിൽ പ്രവേശിപ്പിക്കുന്പോഴാണ് ഭർത്താവ് പോക്സോ കേസിൽ അറസ്റ്റിലാകുന്നത്. പ്രസവസമയത്ത് രജിസ്റ്ററിൽ ഭാര്യയുടെ വയസ് ചേർക്കുന്പോൾ 16 അല്ലെങ്കിൽ 17 ആണ് മിക്കവരുടെയും വയസ്. വയസ് കാണുന്പോൾ തന്നെ ഡോക്‌ടർമാർ പോലീസിൽ വിവരം അറിയിക്കും. തങ്ങളുടെ സംസ്ഥാനത്ത് വച്ച് വിവാഹം കഴിച്ചതിന്‍റെ രേഖകൾ കാണിച്ചാലും പോലീസെത്തി പോക്സോ കേസിലാണ് അറസ്റ്റ് ചെയ്യുന്നത്. കഴിഞ്ഞ ദിവസങ്ങളിൽ കണ്ണൂർ ജില്ലയിൽ തമിഴ്നാട് സ്വദേശികളായ രണ്ടുപേരാണ് അറസ്റ്റിലായത്. പോക്സോ കേസ് രജിസ്റ്റർ ചെയ്യുന്നതിനാൽ മാസങ്ങളോളം ജയിലിൽ കിടക്കേണ്ടി വരും. അതിനാൽ, കുഞ്ഞുമായി ജീവിക്കേണ്ടവരുടെ കാര്യം കഷ്ടമായിരിക്കും. ഇതരസംസ്ഥാനങ്ങളിൽ പല സമുദായങ്ങളും ആചാര പ്രകാരം 13 വയസു കഴിഞ്ഞാൽ പെൺകുട്ടികളെ വിവാഹം കഴിക്കുന്നത് പതിവാണ്. എന്നാൽ, കേരളത്തിൽ വന്നാൽ പോക്സോ കേസിൽ അകപ്പെടുന്നത് വ്യാപകമായിരിക്കുകയാണ്.

മരിച്ചവരെ പോലും ജാമ്യക്കാരാക്കിയെന്ന് ഫിഷറീസ് വകുപ്പിന്‍റെ അന്വേഷണ റിപ്പോർട്ട്

കണ്ണൂർ: ആയിക്കരയിലെ സിപിഎം നിയന്ത്രണത്തിലുള്ള മത്സ്യത്തൊഴിലാളി സഹകരണ സംഘത്തിൽ നടന്ന വായ്പാ തട്ടിപ്പിൽ മരിച്ചവരെ പോലും ജാമ്യക്കാരാക്കി ചേർത്താണ് തട്ടിപ്പ് നടത്തിയതെന്ന് അന്വേഷണ റിപ്പോർട്ട്. സെക്രട്ടറിയുടെയും ഭരണ സമിതിയുടെയും അറിവോടെയാണ് ഇത്തരത്തിൽ മരിച്ചവരെ ജാമ്യക്കാരാക്കി തട്ടിപ്പ് നടത്തിയതെന്നാണ് ഫിഷറീസ് വകുപ്പ് നടത്തിയ അന്വേഷണ റിപ്പോർട്ടിൽ പറയുന്നത്. 20 വർഷങ്ങൾക്കു മുന്പ് മരിച്ചവരെ പോലും ഇത്തരത്തിൽ വ്യാജ ജാമ്യക്കാരായി ചേർത്തതായാണ് കണ്ടെത്തിയത്. നേരത്തെ നല്ല നിലയിൽ മത്സ്യതൊഴിലാളികളുടെ ക്ഷേമത്തിനായി പ്രവർത്തിച്ചുപോന്നിരുന്ന സഹകരണ സംഘത്തിൽ വ്യാജ വായ്പ വ്യാപകമായി നൽകിയതോടെ സംഘത്തിന്‍റെ പ്രവർത്തനം സ്തംഭനാവസ്ഥയിലാകുകയായിരുന്നു. സംഘടിത കൊള്ളയാണ് ഇവിടെ നടന്നതെന്നാണ് ഫിഷറീസ് അസിസ്റ്റന്‍റ് രജിസ്ട്രാര്‍ പി.ജി. സന്തോഷ് കുമാര്‍ തയാറാക്കിയ റിപ്പോർട്ടിൽ പറയുന്നത്. വ്യാജമായി സൃഷ്ടിച്ച ചില സേവിംഗ് അക്കൗണ്ടുകള്‍ വഴി സഹകരണ സംഘത്തിൽനിന്നു പണം പുറത്തേക്ക് കടത്തി‍‍യെന്നാണ് വിവരം. സംഘത്തിൽ വലിയ തുകകൾ സ്ഥിരനിക്ഷേപമായി ലഭിച്ചിരുന്ന ദിവസങ്ങളില്‍ ഈ തുകകൾ അക്കൗണ്ട് ഉടമകൾ അറിയാതെ പിൻവലിച്ചിട്ടുണ്ട്. സെക്രട്ടറിയായിരുന്ന സുനിതയെ സസ്പെൻഡ് ചെയ്യുന്നതിന് തൊട്ടുമുന്പുള്ള ദിവസങ്ങളിൽ വരെ ഇത്തരം ഇടപാടുകൾ നടത്തിയിരുന്നു. സംഘം ഭാരവാഹികളുടെ പേരിലും സംഘത്തിൽ ജീവനക്കാരായിരുന്നവരുടെ പേരിലുമെല്ലാം സേവിംഗ്സ് ബാങ്ക് അക്കൗണ്ടുകൾ തുറന്നിരുന്നു. സെക്രട്ടറിയായിരുന്ന സുനിതയുടെ മകളുടെ പേരിൽ സേവിംഗ്സ് അക്കൗണ്ട് തുറന്ന് പണമിടപാട് നടത്തിയിട്ടുണ്ട്. ആയിക്കര സ്വദേശിയായ സിറാജ് എന്നയാളുടെ എസ്ബിഐ അക്കൗണ്ടിലൂടെ ഒന്നേമുക്കാൽ കോടിയോളം രൂപയുടെ ഇടപാടും അജീന എന്നയാളുടെ അക്കൗണ്ടിലേക്ക് ഒരുകോടി 30 ലക്ഷം രൂപയുടെയും ഇടപാടുകൾ നടന്നതായി സ്ഥാപനത്തിന്‍റെ രേഖകളിലുണ്ട്. എന്നാൽ ഇത്തരം ഇടപാടുകൾ നടന്നത് തങ്ങൾ അറിഞ്ഞിട്ടില്ലെന്നാണ് ഇരുവരും അന്വേഷണ കമ്മീഷനെ അറിയിച്ചത്. സഹകരണ സംഘത്തിലെ സാന്പത്തിക ക്രമക്കേടുമായി ബന്ധപ്പെട്ട് ഭാരവാഹികൾക്കെതിരെ പോലീസ് കേസ് രജിസ്റ്റർ ചെയ്തതല്ലാതെ മറ്റു നടപടികൾ ഉണ്ടായിട്ടില്ലെന്ന് നിക്ഷേപകരും മത്സ്യത്തൊഴിലാളികളും ആരോപിക്കുന്നു.

സെൻട്രൽ ജയിലിൽ മദ്യവും കഞ്ചാവും സുലഭമെന്ന് മുൻ തടവുകാരന്‍

കണ്ണൂര്‍: മദ്യവും കഞ്ചാവുമുൾപ്പടെയുള്ള നിരോധിത വസ്തുക്കൾ വേണ്ടപ്പെട്ടവർക്ക് ഒരു തടസവുമില്ലാതെ ആവശ്യക്കാർക്ക് സുലഭമായി ലഭിക്കുന്നുണ്ടെന്ന് മുൻ തടവുകാരന്‍റെ വെളിപ്പെടുത്തൽ. ഒരു സ്വകാര്യ ചാനലിനു നൽകിയ അഭിമുഖത്തിലാണ് തടവുശിക്ഷ കഴിഞ്ഞ് പുറത്തിറങ്ങിയ ആൾ ഇക്കാര്യം വെളിപ്പെടുത്തിയത്. ജയിലിനകത്ത് എത്തുന്ന ബീഡി തടവുകാർ തന്നെ കരിഞ്ചന്തയിലാണ് വില്പന നടത്തുന്നത്. മൂന്നു കെട്ട് ബീഡിക്ക് ആയിരം രൂപവരെ ഈടാക്കുന്നുണ്ട്. ജയിലിനകത്തേക്ക് മദ്യം, കഞ്ചാവ്, മൊബൈൽ ഫോണുകൾ എന്നിവ എത്തുന്നത് ഉദ്യോഗസ്ഥരുടെ ഒത്താശയോടു കൂടിയാണ്. ജയിലിനു പുറത്തുനിന്ന് സാധനങ്ങൾ എറിഞ്ഞുകൊടുക്കുന്നുണ്ട്. ഇതിനു പിന്നിലും ഉദ്യോഗസ്ഥരുടെ ഒത്താശയുണ്ടെന്ന് കരുതുന്നു. അധികൃതരുടെയും മറ്റുള്ളവരുടെയും ശ്രദ്ധ തിരിക്കാനാണ് ചിലപ്പോഴൊക്കെ ഫോണും മറ്റും പിടിച്ചെടുക്കുന്നത്. സ്വാധീനമുള്ള തടവുകാർക്ക് എന്തും ലഭിക്കുമെന്ന അവസ്ഥയാണെന്നും മുൻ‌ തടവുകാരൻ പറ ഞ്ഞു.

ഉത്രാട രാത്രിയിൽ നഗരം ശുചിയാക്കി കണ്ണൂർ മേയറും ജനപ്രതിനിധികളും

കണ്ണൂർ: തിരുവോണത്തലേന്നായ ഉത്രാട രാത്രിയിൽ മേയറുടെയും ജനപ്രതിനിധികളുടെയും നേതൃത്വത്തിൽ നഗരം വൃത്തിയാക്കി തിരുവോണത്തെ വരവേറ്റു. നഗരത്തിലെ തിരക്കൊഴിഞ്ഞതിനു പിന്നാലെയാണ് മേയറും ജനപ്രതിനിധികളും ഉദ്യോഗസ്ഥരും നഗരശുചീകരണത്തിനിറങ്ങിയത്. ഓണത്തോടനുബന്ധിച്ചുള്ള പൂക്കച്ചവടത്തിന്‍റെയും മറ്റ് വഴിയോര വാണിഭങ്ങളുടെയും അവശിഷ്ടങ്ങൾ നഗരത്തിൽ പലയിടത്തും നിറഞ്ഞുനിന്ന സാഹചര്യത്തിലാണ് മേയർ മുസ്‌ലിഹ് മഠത്തിലിന്‍റെ നേതൃത്വത്തിൽ നഗരശുചീകരണം നടത്തിയത്. സ്റ്റേഡിയം കോംപ്ലക്സ്, റെയിൽവേ സ്റ്റേഷൻ കിഴക്കെ കവാടം, കാൽടെക്സ് ജംഗ്ഷൻ തുടങ്ങിയടങ്ങളിൽ നിന്നു പൂർണമായും മാലിന്യങ്ങൾ നീക്കം ചെയ്തു. ഡെപ്യൂട്ടി മേയർ പി. ഇന്ദിര, സ്റ്റാൻഡിംഗ് കമ്മിറ്റി ചെയർപേഴ്സൺ എം.പി രാജേഷ്, മുൻ മേയർ ടി.ഒ മോഹനൻ, കൗൺസിലർമാരായ കെ.പി. അബ്ദുൽറസാഖ്, കൂക്കിരി രാജേഷ്, കെ.പി. റാഷിദ്, ക്ലീൻ സിറ്റി മാനേജർ ഷൈൻ പി. ജോൺ, എസ്‌വിഎച്ച്ഒമാരായ സുധീർ ബാബു, സജില, ബിന്ദു, അനുഷ്ക, ജെഎച്ച്ഐ അഷ്റഫ്, കോർപറേഷൻ ശുചീകരണ തൊഴിലാളികൾ തുടങ്ങിയവർ നേതൃത്വം നൽകി.

ഓട്ടോ ടാക്സിയും കാറും കൂട്ടിയിടിച്ച് അഞ്ചുപേർക്കു പരിക്ക്

മട്ടന്നൂർ: ചാവശേരിയിൽ ഓട്ടോ ടാക്സിയും കാറും കൂട്ടിയിടിച്ചുണ്ടായ അപകടത്തിൽ അഞ്ചുപേർക്കു പരിക്കേറ്റു. വെള്ളിയാഴ്ച വൈകുന്നേരം നാലോടെയായിരുന്നു അപകടം. ഇരിട്ടി കോളിക്കടവിൽ നിന്നും കൂത്തുപറന്പിലേക്ക് പോകുകയായിരുന്ന ഓട്ടോ ടാക്സിയും മട്ടന്നൂർ ഭാഗത്ത് നിന്നും തില്ലങ്കേരിയിലേക്ക് പോകുകയായിരുന്ന കാറുമാണ് കൂട്ടിയിടിച്ചത്. ഇടിയുടെ ആഘാതത്തിൽ ഓട്ടോ ടാക്സിയിൽ കുടുങ്ങിയ ഡ്രൈവർ കോളിക്കടവിലെ ദേവനെ ഏറെ പരിശ്രമിച്ചാണ് പുറത്തെടുത്തത്. ദേവൻ ഉൾപ്പെടെ ഓട്ടോ ടാക്സിയിലെ നാലു പേർക്കും കാർ യാത്രികനുമാണ് പരിക്കേറ്റത്. അപകടത്തിൽ ഇരു വാഹനങ്ങളുടെയും മുൻ ഭാഗം തകർന്നു.

ഇരിട്ടി ഫെസ്റ്റിന് തുടക്കം

ഇരിട്ടി: നഗരസഭയുടെ വാർഷിക പദ്ധതിയിൽപെടുത്തി സംഘടിപ്പിക്കുന്ന ഇരിട്ടി ഫെസ്റ്റ് നായനാർ ഓപ്പൺ ഓഡിറ്റോറിയത്തിൽ ആരംഭിച്ചു. ഫെസ്റ്റിന്‍റെ ഭാഗമായുള്ള ബാലസഭ കലോത്സവം "മയിൽപ്പീലി' സിനിമ സംവിധായകൻ രാജീവ് നടുവനാട് ഉദ്ഘാടനം ചെയ്തു. നഗരസഭാധ്യക്ഷ കെ. ശ്രീലത അധ്യക്ഷത വഹിച്ചു. സിഡിഎസ് ചെയർപേഴ്സൺ കെ. സ്മിത, കൗൺസിലർമാരായ പി. രഘു, സി.കെ. അനിത, പി. രജിഷ, സിഡിഎസ് അംഗം ബിജിന എന്നിവർ പ്രസംഗിച്ചു. ഇന്നു രാവിലെ10ന് വനിത കലോത്സവം "ആരവം' ഡോ. കീർത്തി പ്രഭ ഉദ്ഘാടനം ചെയ്യും. നാളെ രാവിലെ 10ന് അങ്കണവാടി കലോത്സവം "ശലഭം' ഇരിട്ടി ഡിവൈഎസ്‌പി പി.കെ. ധനജ്‌ഞയ ബാബു ഉദ്ഘാടനം ചെയ്യും. ഒന്പതി രാവിലെ 10ന് ഭിന്നശേഷി സംഗമം "താലോലം', വയോജന സംഗമം "ഓർമച്ചെപ്പ്' എന്നിവ സംസ്ഥാന ന്യൂനപക്ഷ കമ്മിഷൻ അംഗം പി. റോസ ഉദ്ഘാടനം ചെയ്യും. വൈകുന്നേരം ആറിന് സംഗീത സന്ധ്യ, മെഗാ മ്യൂസിക്കൽ നൈറ്റ്, ഗാനമേള എന്നിവ അരങ്ങേറും.

കാർ നിയന്ത്രണം വിട്ട് ഇരുചക്ര വാഹനങ്ങൾ ഇടിച്ചു തകർത്തു

മുണ്ടേരി: നിയന്ത്രണം വിട്ട കാർ ഇരുചക്ര വാഹനങ്ങളിൽ ഇടിച്ചുണ്ടായ അപകടത്തിൽ നാല് ഇരുചക്രവാഹനങ്ങൾ തകർന്നു. രണ്ടുപേർക്ക് പരിക്കേറ്റു. കടയിൽ സാധനങ്ങൾ വാങ്ങിക്കാനെത്തിയെ അന്യസംസ്ഥാന തൊഴിലാളികൾക്കാണ് പരിക്കേറ്റത്. ഇവരെ ആശുപത്രിയിൽ പ്രവേശിപ്പിച്ചു. പരിക്ക് സാരമുള്ളതല്ല. വെള്ളിയാഴ്ച രാവിലെ ഒമ്പതോടെ മുണ്ടേരി മായിന്‍മുക്കിലായിരുന്നു അപകടം. കുടുക്കിമൊട്ടയില്‍ നിന്ന് മായിന്‍ മുക്കിലേക്ക് വന്ന കാറാണ് അപകടത്തിൽപ്പെട്ടത്.

മേരി ഭവന് അവശ്യവസ്തുക്കൾ കൈമാറി

ഉളിക്കൽ: കുടുംബശ്രീയുടെ ജൂബിലി വർഷത്തിൽ മൂന്നാമത് കാരുണ്യയാത്ര പരിയാരം മേരി ഭവനിലേക്ക് നടത്തി. ജില്ലയിലെ മികച്ച എഡിഎസ് ആയി തെരഞ്ഞെടുത്ത മാട്ടറ കുടുംബശ്രീ വാർഡ് ജൂബിലിയുടെ ഭാഗമായി വെമ്പുവ തെരേസ ഭവൻ, വിളമന പ്രൊവിഡൻസ് ഹോം, പരിയാരം മേരി ഭവൻ എന്നിവിടങ്ങളിലേക്ക് കാരുണ്യയാത്രകൾ സംഘടിപ്പിച്ചത്. ഒന്നരലക്ഷം രൂപയുടെ അവശ്യവസ്തുക്കളാണ് മൂന്ന് ഹോമുകളിലായി കൈമാറിയത്. ഉത്രാടനാളിൽ സംഘടിപ്പിച്ച പരിപാടിയിൽ അമ്മാർക്ക് പുതുവസ്ത്രങ്ങളും കൈമാറി. കാരുണ്യയാത്ര മാട്ടറയിൽ ഉളിക്കൽ പഞ്ചായത്ത് പ്രസിഡന്‍റ് പി.സി. ഷാജി ഫ്ലാഗ് ഓഫ് ചെയ്തു. എഡിഎസ് സെക്രട്ടറി വത്സല പുഷ്പൻ അധ്യക്ഷത വഹിച്ചു. കണ്ണൂരിൽ ഭക്ഷ്യവസ്തുക്കൾ ജില്ലാ പഞ്ചായത്ത്‌ അംഗം സി.പി. ഷിജു മേരി ഭവൻ മദർ സുപ്പീരിയർ സിസ്റ്റർ ലിസ്മക്ക് കൈമാറി. എഡിഎസ് ചെയർപേഴ്സൺ സുലോചന ദിനേശ് അധ്യക്ഷത വഹിച്ചു. ഉളിക്കൽ പഞ്ചായത്തംഗം സരുൺ തോമസ് പ്രസംഗിച്ചു. കുടുംബശ്രീ അംഗങ്ങളായ ജാൻസി, സി. ഷൈല, ബീന, ബിന്ദു ഐസക് എന്നിവർ നേതൃത്വം നൽകി.

ഓണാഘോഷം സംഘടിപ്പിച്ചു

ഇരിട്ടി: പത്തുനാൾ നീണ്ട പായം ഗ്രാമീണ ഗ്രസ്ഥാലയത്തിന്‍റെ നേതൃത്വത്തിലുള്ള ഓണാഘോഷം സമാപിച്ചു. വിവിധ കലാ-കായിക മത്സരങ്ങൾ പുസ്തക ചർച്ച, കമ്പവലി, നാടൊരുമിച്ച ഓണസദ്യ, നാട്ടിലെ അഭിനേതാക്കൾ അണിനിരന്ന നാടകം എന്നിവ നടത്തി. സാംസ്കാരിക സമ്മേളനം കെ.വി. സക്കീർ ഹുസൈൻ ഉദ്ഘാടനവും കെ. പദ്മനാഭൻ എൻഡോവ്മെന്‍റ് വിതരണവും നടത്തി. സംഘാടക സമിതി ചെയർമാൻ എം. പ്രകാശൻ അധ്യക്ഷത വഹിച്ചു. ലൈബ്രറി കൗൺസിൽ താലൂക്ക് സെക്രട്ടറി രഞ്ജിത് കമൽ അനുമോദനം നടത്തി. ഗ്രന്ഥാലയം സെക്രട്ടറി എം. പവിത്രൻ സമ്മാനങ്ങൾ വിതരണം ചെയ്തു. താലൂക്ക് എക്സിക്യൂട്ടീവ് അംഗം എം. ബാബുരാജ് , എം, ഷിബു, എൻ.പി. ഷീജ, പി.വി. രാധാമണി, രാധ ബിജു , ടി. നന്ദിത്, പി.ടി. ശശിധരൻ, വി. ധാർമിക്, ഗ്രന്ഥാലയം പ്രസിഡന്‍റ് കെ. അശോകൻഎന്നിവർ പ്രസംഗിച്ചു. ചക്കരക്കൽ: കാപ്പാട് വിബ്ജ്യോർ റസിഡന്‍റ്സ് അസോസിയേഷൻ ഓണാഘോഷ പരിപാടിയും വാഹനാപകടത്തിൽപെട്ട പെൺകുട്ടിയുടെ ജീവൻ രക്ഷിക്കുന്നതിന് ശ്രദ്ധേയമായ പ്രവർത്തനം കാഴ്ചവച്ച കാപ്പാട്ടെ ആംബുലൻസ് ഡ്രൈവർ എൻ. സജീറിനുള്ള സ്വീകരണവും തിരുവോണ നാളിൽ നടന്നു. കാപ്പാട് ആരോഗ്യ ഉപകേന്ദ്രത്തിന് സമീപം നടന്ന പരിപാടി പ്രമുഖ പ്രഭാഷകനും അഭിഭാഷകനുമായ കെ.വി. കേശവൻ ഉദ്ഘാടനം ചെയ്തു. സി.പി. മാനോജ് കുമാർ, ഉഷാ ഭായ്, കെ. ശൈലജ, പി. ബാലചന്ദ്രൻ, എം. അനീഷ്, പി.പി. പ്രഭാകരൻ, കെ.പി. പ്രമോദ് എന്നിവർ പ്രസംഗിച്ചു. പൂക്കളമത്സരത്തിൽ ടി. ദിനേശ് കുമാറിന്‍റെ കുടുംബം ഒന്നാം സ്ഥാനം നേടി. പുഷ്പലത സുരേശൻ, പി. ജനാർദ്ദനൻ എന്നിവരുടെ കുടുംബങ്ങൾ യഥാക്രമം രണ്ടും മൂന്നും സ്ഥാനങ്ങൾ നേടി.

വിജ്ഞാന കേരളം മിനി ജോബ് ഫെയർ നാളെ

കണ്ണൂർ: വിജ്ഞാന കേരളം പദ്ധതിയുടെ ഭാഗമായി ജില്ലയിൽ സംഘടിപ്പിക്കുന്ന മൂന്നാമത്തെ മിനി ജോബ് ഫെയർ നാളെ. പള്ളിക്കുന്ന് കൃഷ്ണമേനോൻ സ്മാരക ഗവ. വനിത കോളജിൽ രാവിലെ ഒന്പതു മുതൽ നടക്കും. രാവിലെ 10ന് മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്യും. ജില്ലയിലെ അഭ്യസ്തവിദ്യരായ തൊഴിലന്വേഷകർക്ക് സർക്കാരിതര മേഖലകളിലെ പ്രാദേശിക തൊഴിലസരങ്ങൾ ലഭ്യമാക്കുകയാണ് മിനി ജോബ് ഫെയർ വഴി വിജ്ഞാന കേരളം പദ്ധതി ലക്ഷ്യമിടുന്നത്. കണ്ണൂർ ബ്ലോക്ക് പഞ്ചായത്തും കണ്ണൂർ കോർപറേഷനും ചേർന്നാണ് മിനി ജോബ് ഫെയറിന് നേതൃത്വം നല്കുന്നത്. വിവിധ വിഭാഗങ്ങളിൽ ഉൾപ്പെട്ട 200 ലധികം തസ്തികകളും 1200 ലധികം തൊഴിലവസരങ്ങളും ലഭ്യമാണ്. പത്താം ക്ലാസ് മുതൽ വിഎച്ച്എസ്‌സി, ബിരുദ-ബിരുദാനന്തര ബിരുദധാരികൾക്കും ഐടിഐ, പോളിടെക്നിക്, ബിടെക് തുടങ്ങിയ പ്രഫഷണൽ യോഗ്യതയുള്ളവർക്കും അപേക്ഷിക്കാവുന്ന നിരവധി അവസരങ്ങൾ ലഭ്യമാണ്. ഇതൊടൊപ്പം മെഡിക്കൽ, പാരാമെഡിക്കൽ മേഖലയിലുള്ള ഉദ്യോഗാർഥികൾക്കും ധാരാളം അവസരങ്ങളുണ്ട്. വിവിധ മേഖലകളിൽ നിന്നും 45 കമ്പനികളാണ് തൊഴിൽ മേളയിൽ പങ്കെടുക്കുന്നത്. ജോബ് ഫെയറിൽ പങ്കെടുക്കാൻ താത്പര്യമുള്ള ഉദ്യോഗാർഥികൾ താഴെ കൊടുത്ത ഗൂഗിൾ ഫോമിൽ രജിസ്റ്റർ ചെയ്യുക. https://forms.gle/mJmiDY4Ne1awchYi8 രാവിലെ ഒന്പത് മുതൽ രജിസ്ട്രേഷൻ ആരംഭിക്കും. മുൻകൂട്ടി രജിസ്റ്റർ ചെയ്യാത്തവർക്ക് സ്പോട്ട് രജിസ്ട്രേഷഷൻ സൗകര്യം ലഭ്യമായിരിക്കും.

ആയിക്കര ആരോഗ്യമാതാ പള്ളി തിരുനാൾ തുടങ്ങി

കണ്ണൂർ: ആയിക്കര ഗവ. ഹോസ്പിറ്റലിന് സമീപമുള്ള പരിശുദ്ധ ആരോഗ്യ മാതാ പള്ളിയിലെ 13 വരെ നിണ്ടുനില്ക്കുന്ന തിരുനാളിന് തുടക്കമായി. ഹോളി ട്രിനിറ്റി കത്തീഡ്രൽ വികാരി ഫാ. ആൻസിൽ പീറ്റർ കൊടിയേറ്റി. തുടർന്ന് നടന്ന ജപമാലയ്ക്കും ആഘോഷമായ ദിവ്യബലിക്കും കണ്ണൂർ ഫൊറോന വികാരി ഫാ. ബെന്നി മണപ്പാട്ട് മുഖ്യകാർമികത്വം വഹിച്ചു. ഫാ. ആൻസിൽ പീറ്റർ, ഫാ. അബിൻരാജ് എന്നിവർ സഹകാർമികരായിരുന്നു. തുടർന്ന് ആരോഗ്യ മാതാവിനോടുളള നൊവേ നയും , നേർച്ച വിതരണവും ഉണ്ടായിരുന്നു. 12 വരെ ദിവസവും വൈകുന്നേരം അഞ്ചിന് ജപമാല, ദിവ്യബലി, നൊവേന, നേർച്ച വിതരണം എന്നിവ ഉണ്ടായിരിക്കും. പരിശുദ്ധ കന്യക മറിയത്തിന്‍റെ ജനന തിരുനാൾ ദിനമായ എട്ടിന് വൈകുന്നേരം അഞ്ചിന് ആഘോഷമായ ജപമാല, ദിവ്യബലി, നൊവേന, നേർച്ച വിതരണം എന്നിവയ്ക്ക് കണ്ണൂർ ബിഷപ് ഡോ. അലക്സ് വടക്കുംതല മുഖ്യ കാർമികത്വം വഹിക്കും. അന്നേദിവസം കുട്ടികൾക്കുള്ള ചേറുണും, പാച്ചോർ വിതരണവും ഉണ്ടായിരിക്കും. തുടർന്നുള്ള നൊവേന ദിവസങ്ങളിൽ ഫാ. തോംസൺ ആന്‍റണി, ഫാ. റോബിൻ ബാബു, ഫാ. എബി സെബാസ്റ്റ്യൻ, ഫാ. രാജു ക്രിസ്തുദാസ്, ഫാ. ജോയ് പൈനാടത്ത് എന്നിവർ മുഖ്യ കാർമികരായിരി ക്കും. പ്രധാന തിരുനാൾ ദിനമായ 13ന് രാവിലെ 10ന് ആഘോഷമായ സമൂഹ ബലിക്ക് മാനന്തവാടി അമലോത്ഭവ മാതാ പള്ളി വികാരി ഫാ. വില്യം രാജൻ മുഖ്യകാർമികനായിരിക്കും. വാദ്യഘോഷങ്ങളുടെ അകമ്പടിയോടെ പരിശുദ്ധ കന്യക മറിയത്തിന്‍റെ തിരുസ്വരൂപം വഹിച്ചു കൊണ്ടുളള വർണ ശബളമായ നഗര പ്രദക്ഷിണം ഉണ്ടായിരിക്കും. തുടർന്ന് നൊവേനയും പരിശുദ്ധ ദിവ്യ കാരുണ്യ ആശീർവാദവും ഊട്ടുനേർച്ചും ഉണ്ടായിരിക്കും. വൈകുന്നേരം ആറിന് കലാസന്ധ്യയോടെ തിരുനാൾ കൊടിയിറങ്ങും.

ഡയപ്പര്‍ ബാങ്ക് ആരംഭിച്ചു

പയ്യന്നൂര്‍: സമഗ്ര ശിക്ഷ കേരളത്തിന്‍റെ ഭാഗമായി പയ്യന്നൂര്‍ ബിആര്‍സിയുടെ നേതൃത്വത്തില്‍ ഡയപ്പര്‍ ബാങ്ക് പ്രവര്‍ത്തനമാരംഭിച്ചു. സബ് ജില്ലയിലെ കിടപ്പിലായ 23 കുട്ടികള്‍ക്ക് എല്ലാ മാസവും ഡയപ്പര്‍ വിതരണം ചെയ്യാനായാണ് പദ്ധതിയാരംഭിച്ചത്. ഡയപ്പര്‍ ബാങ്കിന്‍റെ ഉദ്ഘാടനം എസ്എസ്കെ ജില്ലാ പ്രോഗ്രാം ഓഫീസര്‍ ഡോ. സബിത്ത് നിർവഹിച്ചു. ബിപിസി എം.വി. ഉമേഷ് അധ്യക്ഷത വഹിച്ചു. റോട്ടറി മിഡ്ടൗണ്‍ പ്രസിഡന്‍റ് അശോകന്‍ വേങ്ങയില്‍ ബാങ്കിന്‍റെ സെപ്റ്റംബര്‍ മാസത്തെ പ്രവര്‍ത്തനത്തിനായുള്ള ചെലവിനുള്ള തുകയുടെ ചെക്ക് കൈമാറി.

സർക്കാർ സർക്കുലർ കത്തിച്ച് പ്രതിഷേധിച്ചു

മട്ടന്നൂർ: ആശാവർക്കർമാരുടെ സമരത്തിന് ഐക്യദാർഡ്യം പ്രകടപ്പിച്ച് കീഴല്ലൂർ മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ കീഴല്ലൂർ പഞ്ചായത്ത് ഓഫീസിനു മുന്നിൽ സർക്കാർ സർക്കുലർ കത്തിച്ച് പ്രതിഷേധിച്ചു. മണ്ഡലം പ്രസിഡന്‍റ് എ.കെ. ദീപേഷ്, പ്രശാന്തൻ കൊതേരി, സി. ഹേമചന്ദ്രൻ, പി.സി.പദ്മനാഭൻ, എം. രത്നകുമാർ, എ.കെ.സതീശൻ, സജിത്ത് പനയത്താംപറമ്പ്, എൻ.കെ. അനിത, ഉഷ പാറക്കണ്ടി, റീന രാജൻ, ഷിൽജ പ്രവീൺ, റിയാസ് എടയന്നൂർ, വിനീത് കുമ്മാനം, സനിൽ, സുധീഷ് കക്കോത്ത്, സന്തോഷ് വാച്ചാക്കീൽ എന്നിവർ പങ്കെടുത്തു.

കരുവഞ്ചാൽ വൈഎംസിഎ വടംവലി മത്സരം

കരുവഞ്ചാൽ: കരുവഞ്ചാൽ വൈഎംസിഎ സംഘടിപ്പിച്ച 27-ാമത് വടംവലി മത്സരം ഉത്രാട ദിനത്തിൽ നടന്നു. വടംവലി മത്സരത്തിൽ ഒന്നാംസ്ഥാനം നേടിയ ഫൈറ്റേഴ്സ് കാഞ്ഞിരങ്ങാടിന് ജോസഫ്-മറിയക്കുട്ടി കളരിക്കൽ മെമ്മോറിയൽ ട്രോഫി ആലക്കോട് എസ്ഐ പി.കെ. മുഹമ്മദ് സമ്മാനിച്ചു. മത്സരത്തിൽ ഒന്നാംസ്ഥാനം: ഫൈറ്റേഴ്സ് കാഞ്ഞിരങ്ങാട്, വയനാട്. രണ്ടാം സ്ഥാനം: തണ്ടർ ബോയ്സ് മീനങ്ങാടി, വയനാട്. മൂന്നാം സ്ഥാനം: ബ്രദേഴ്സ് പറവൂർ, മാതമംഗലം. അണ്ടർ 19 ആൺകുട്ടികളുടെ മത്സരത്തിൽ ഒന്നാംസ്ഥാനം: എടൂരിന്‍റെ കമ്പക്കാർ ബി ടീം. രണ്ടാം സ്ഥാനം: എടൂരിന്‍റെ കമ്പക്കാർ എ ടീം. പെൺകുട്ടികളുടെ വിഭാഗത്തിൽ ഗവ. ഹയർ സെക്കൻഡറി സ്കൂൾ പ്രാപ്പൊയിൽ ഒന്നാം സ്ഥാനവും എടൂരിന്‍റെ കമ്പക്കാർ രണ്ടാം സ്ഥാനവും നേടി. വടംവലി മത്സരത്തോടൊപ്പം അക്യുപങ്ചർ ചികിത്സകനും ജീവകാരുണ്യ പ്രവർത്തകനുമായ ഡോ. സജീവ് മറ്റത്തിൽ, വിശിഷ്‌ട സേവനത്തിനുള്ള മുഖ്യമന്ത്രിയുടെ പോലീസ് മെഡൽ ലഭിച്ച ആലക്കോട് പോലീസ് സ്റ്റേഷനിലെ എഎസ്ഐ പി. രവീന്ദ്രൻ എന്നിവരെ ആദരിച്ചു.

അധ്യാപക ദിനാചരണം നടത്തി

കുടിയാന്മല: അധ്യാപക ദിനാചരണത്തിന്‍റെ ഭാഗമായി വൈസ്മെൻ ഇന്‍റർനാഷണൽ കുടിയാന്മല ക്ലബിന്‍റെ ആഭിമുഖ്യത്തിൽ റിട്ട. അധ്യാപക ദമ്പതികളായ തെള്ളിയിൽ മാത്യു-എൽസി എന്നിവരെയും കുടിയാന്മല ഹോളിക്രോസ് പബ്ലിക് സ്കൂൾ പ്രിൻസിപ്പൽ സിസ്റ്റർ റോസിലിൻ, അധ്യാപിക സിസ്റ്റർ മെറിൻ, കുടിയാന്മല ഹൈസ്കൂളിലെ ക്ലീറ്റസ് പോൾ, നെല്ലിപ്പാറ യുപി സ്കൂൾ മുഖ്യാധ്യാപിക ഷീന സാബു, ഫാത്തിമ യുപി സ്കൂൾ റിട്ട. അധ്യാപിക മേരി ആലങ്ങാടൻ എന്നിവരെയും ആദരിച്ചു. കുടിയാന്മല വൈസ്മെൻ പ്രസിഡന്‍റ് ജോയ് ജോൺ, സെക്രട്ടറി സിജോ കണ്ണേഴത്ത് എന്നിവർ അധ്യാപകരെ ഷാളണിയിച്ചു. ജിമ്മി ആയിത്തമറ്റം, ജോബിന്‍സ് കണ്ണേഴത്ത്, പൗലോസ് മൂഞ്ഞേലി, സെബാസ്റ്റ്യൻ കുരിശുംമൂട്ടിൽ, ജോസ് മുണ്ടാമ്പള്ളിൽ, സാലി മുണ്ടാംമ്പള്ളിൽ, സനീഷ് ജോസഫ് പെരികലംകാട്ടിൽ എന്നിവർ നേതൃത്വം നൽകി. അധ്യാപക ദിനാചരണ ഭാഗമായി വൈഎംസിഎ കുടിയാന്മല യൂണിറ്റിന്‍റെ ആഭിമുഖ്യത്തിൽ കുടിയാന്മല മേരി ക്യൂൻസ് ഹൈസ്കൂൾ റിട്ട. അധ്യാപിക തെയ്യാമ്മ വർഗീസ് കൊല്ലംപറമ്പിലിനെ ആദരിച്ചു. വൈഎംസിഎ പ്രസിഡന്‍റ് ജിമ്മി ആയിത്തമറ്റം വനിതാ വിംഗ് പ്രസിഡന്‍റ് സാലി ജോസ് മുണ്ടാംപള്ളിൽ എന്നിവർ ചേർന്ന് ഷാളണിയിച്ചു. ട്രഷറർ സെബാസ്റ്റ്യൻ കുരിശുമൂട്ടിൽ, ബിനു ഇളംകുന്നത്തുപുഴ, രാജു പന്തമാക്കൽ, സനീഷ് പെരികിലംകാട്ടിൽ, ജോബിൻസ് കണ്ണേഴത്ത്, ജോസ് മുണ്ടാംപള്ളിൽ, പൗലോസ് മൂഞ്ഞേലി എന്നിവർ പ്രസംഗിച്ചു. ചെമ്പേരി: അധ്യാപക ദിനാചരണഭാഗമായി വൈഎംസിഎ ചെമ്പേരി യൂണിറ്റിന്‍റെ ആഭിമുഖ്യത്തിൽ ചെമ്പേരിയിലെ മുതിർന്ന അങ്കണവാടി അധ്യാപിക മേരി ഫ്രാൻസിസിനെ വസതിയിലെത്തി ആദരിച്ചു. വൈഎംസിഎ സബ് റീജിയൻ സ്റ്റാൻഡിംഗ് കമ്മിറ്റി ചെയർമാൻ ടോമി ചാമക്കാലായിൽ പൊന്നാടയണിയിച്ചു. വൈഎംസിഎ പ്രസിഡന്‍റ് ഷീൻ ഏബ്രഹാം വേലിയ്ക്കകത്ത്, വൈസ് പ്രസിഡന്‍റ് നിബിൻ ജോയി ഉറുമ്പിൽ, സെക്രട്ടറി റോബി ഇലവുങ്കൽ, ഡയറക്ടർ ബോർഡ് അംഗങ്ങളായ ജോസ് കരിവേലിയ്ക്കൽ, അജി തോമസ് കൊട്ടാരത്തിൽ, സജിത്ത് കൊച്ചുപറമ്പിൽ എന്നിവർ നേതൃത്വം നൽകി.

റൺ പാലക്കയംതട്ട് മിനി മാരത്തൺ: സംഘാടക സമിതി യോഗം

പുലിക്കുരുമ്പ: ഇരിക്കൂർ ടൂറിസം ഇന്നൊവേഷൻ കൗൺസിലും ടൂറിസം വകുപ്പും ചേർന്ന് സംഘടിപ്പിക്കുന്ന റൺ പാലക്കയം തട്ട് മിനി മാരത്തൺ വിജയമാക്കാൻ നടുവിൽ പഞ്ചായത്തുതല യോഗത്തിൽ തീരുമാനമായി. പുലിക്കുരുമ്പ സെന്‍റ് അഗസ്റ്റിൻസ് പള്ളി പാരിഷ് ഹാളിൽ നടന്ന സംഘാടക സമിതി യോഗം സജീവ് ജോസഫ് എംഎൽഎ ഉദ്ഘാടനം ചെയ്തു. മാരത്തൺ 13ന് രാവിലെ ആറിന് പയ്യാവൂർ പഞ്ചായത്ത് ബസ്‌സ്റ്റാൻഡിന് സമീപത്ത് നിന്നാരംഭിക്കും. മിനി മാരത്തണിന്‍റെ വിജയത്തിനായി ഓൺലൈനിൽ രജിസ്ട്രഷേനും നടുവിൽ മണ്ടളത്ത് സംഘാടക സമിതി ഓഫീസും പ്രവർത്തിച്ചു വരികയാണ്. ഇരിക്കൂർ മണ്ഡലത്തിലെ വിവിധ പഞ്ചായത്തുകളിൽ ഒരുക്കങ്ങൾ അവസാനഘട്ടത്തിലേക്ക് നീങ്ങുകയാണ്. പുലിക്കുരുമ്പ സെന്‍റ് അഗസ്റ്റിൻസ് പള്ളി വികാരി ഫാ. തോമസ് പൈമ്പള്ളി അധ്യക്ഷത വഹിച്ചു. ഇരിക്കൂർ ടൂറിസം ഇന്നൊവേഷൻ കൗൺസിൽ ചെയർമാൻ പി.ടി. മാത്യു പരിപാടിയെ കുറിച്ച് വിശദീകരിച്ചു. നടുവിൽ പഞ്ചായത്ത് പ്രസിഡന്‍റ് ബേബി ഓടന്പള്ളി, വൈസ് പ്രസിഡന്‍റ് സി.എച്ച്. സീനത്ത്, ബ്ലോക്ക് പഞ്ചായത്ത് മെംബർ ജോഷി കണ്ടത്തിൽ, ജില്ലാ സ്പോർട്സ് കൗൺസിൽ സെക്രട്ടറി എം.എ. നിക്കോളാസ്, വിവിധ സംഘടനകളിലെ ഭാരവാഹികളായ സിസ്റ്റർ റോസ് മഞ്ഞളാങ്കൽ, പി. സുരേഷ്, ടി.പി. ലക്ഷ്മണൻ, ഷാജി പാണക്കുഴി, ഏബ്രഹാം ഈറ്റക്കൽ തുടങ്ങിയവർ പങ്കെടുത്തു.

ഓണാഘോഷം നടത്തി

തേർത്തല്ലി: മരിയസ് മാതൃവേദി മേരിഗിരി മേഖലയുടെ ആഭിമുഖ്യത്തിൽ രയറോം യൂണിറ്റിൽ ഓണാഘോഷം ഒന്നിച്ചോണം നല്ലോണം 2K25 എന്ന പേരിൽ നടത്തി. മേരിഗിരി ഫൊറോന വികാരി ഫാ. ഏബ്രഹാം മഠത്തിമ്യാലിൽ ഉദ്ഘാടനം ചെയ്തു. മേഖലാ പ്രസിഡന്‍റ് ലിൻസി ജിജിമോൻ പതാക ഉയർത്തി. മേഖല ഡയറക്ടർ ഫാ. തോമസ് കണ്ടത്തിൽ സിഎം, ആനിമേറ്റർ സിസ്റ്റർ റോയ്സ് ജോർജ് എസ്എച്ച് തുടങ്ങിയവർ നേതൃത്വം നല്കി. രയറോം ഇടവക വികാരി ഫാ. ആന്‍റണി തെക്കേമുറി, വിവിധ യൂണിറ്റുകളിലെ ആനിമേറ്റേഴ്സ്, ഡീക്കൻ ജോസഫ് വലിയവീട്ടിൽ എന്നിവർ പരിപാടികൾ നിയന്ത്രിച്ചു. നൂറോളം അമ്മമാർ മത്സരങ്ങളിൽ പങ്കെടുത്തു. അമ്മമാരുടെ വാശിയേറിയ വടംവലിയും നടന്നു. നെല്ലിക്കുറ്റി: കേരളോദയ വായനശാലയും നെല്ലിക്കുറ്റിയിലെ വിവിധ സംഘടനകളും സംയുക്തമായി നടത്തിയ ഓണാഘോഷം നെല്ലിക്കുറ്റി സെന്‍റ് അഗസ്റ്റിൻസ് പള്ളി വികാരി ഫാ. മാത്യു ഓലിയ്ക്കൽ ഉദ്ഘാടനം ചെയ്തു. ഏരുവേശി പഞ്ചായത്ത് പ്രസിഡന്‍റ് മിനി ഷൈബി അധ്യക്ഷത വഹിച്ചു. ഇരിക്കൂർ ബ്ലോക്ക് പഞ്ചായത്ത് അംഗം സോജൻ കാരാമയിൽ മത്സര വിജയികൾക്ക് സമ്മാനങ്ങൾ വിതരണം ചെയ്തു. ടോമി ചാമക്കാലായിൽ, സാവിയോ ഇടയാടിയിൽ, സുനിൽ അന്തീനാട്ട്, തോമസ് കടവുംകണ്ടത്തിൽ, ലൈസൺ മാവുങ്കൽ, ജോണി മലേക്കുടിയിൽ, ഷാജി അറയ്ക്കൽ, സിബിച്ചൻ മുണ്ടയ്ക്കൽ എന്നിവർ പ്രസംഗിച്ചു.

ഫീസ് വർധനയ്ക്കെതിരേ പ്രതിഷേധ ധർണ നടത്തി

പയ്യാവൂർ: കാഞ്ഞിരക്കൊല്ലിയിലെ ടൂറിസ്റ്റ് കേന്ദ്രങ്ങളായ അളകാപുരി വെള്ളച്ചാട്ടം, ശശിപ്പാറ വ്യൂപോയിന്‍റ് എന്നിവിടങ്ങളിലെ പ്രവേശന ഫീസ് 20 രൂപയായിരുന്നത് കഴിഞ്ഞവർഷം 50 രൂപയായും ഈ വർഷം വീണ്ടും 60 രൂപയായും ഉയർത്തിയതിനെതിരെ കോൺഗ്രസ് കാഞ്ഞിരക്കൊല്ലി, ശാന്തിനഗർ വാർഡ് കമ്മിറ്റികളുടെ ആഭിമുഖ്യത്തിൽ കാഞ്ഞിരക്കൊല്ലി ഫോറസ്റ്റ് ഓഫീസിനു മുന്നിൽ പ്രതിഷേധ ധർണ നടത്തി. യാതൊരുവിധ അടിസ്ഥാന സൗകര്യങ്ങളും ഏർപ്പെടുത്താതെ ഫീസ് വർധനമാത്രം നടപ്പാക്കുന്ന സർക്കാർ നടപടി ഉടൻ പിൻവലിക്കുക. അളകാപുരി വെള്ളച്ചാട്ടത്തിലേക്കുള്ള പ്രവേശനകവാടം മുതൽ വെള്ളച്ചാട്ടംവരെയുള്ള 600 മീറ്റർ നടപ്പാത എത്രയും വേഗത്തിൽ കോൺക്രീറ്റ് ചെയ്ത് ഇരുവശങ്ങളിലും കൈവരി സ്ഥാപിക്കുക, വെള്ളച്ചാട്ടത്തിനു സമീപം കംഫർട്ട് സ്റ്റേഷൻ നിർമിക്കുക, കാഞ്ഞിരക്കൊല്ലി മുതൽ ശശിപ്പാറ വരെയുള്ള റോഡ് വീതികൂട്ടി ടാർ ചെയ്യുക എന്നീ ആവശ്യങ്ങളും ഉന്നയിച്ചാണ് ധർണ നടത്തിയത്. കോൺഗ്രസ് പയ്യാവൂർ മണ്ഡലം കമ്മിറ്റി പ്രസിഡന്‍റ് ഇ.കെ. കുര്യൻ ധർണ ഉദ്ഘാടനം ചെയ്തു. വാർഡ് പ്രസിഡന്‍റ് ഷാജി കടൂക്കുന്നേൽ അധ്യക്ഷത വഹിച്ചു. കോൺഗ്രസ്‌ ബ്ലോക്ക് ജനറൽ സെക്രട്ടറി കെ.വി. ഫ്രാൻസിസ്, ഇരിക്കൂർ ബ്ലോക്ക്‌ പഞ്ചായത്തംഗം പി.ആർ. രാഘവൻ, കോൺഗ്രസ് പയ്യാവൂർ മണ്ഡലം ജനറൽ സെക്രട്ടറിമാരായ ജേക്കബ് പനന്താനം, ഷാജി പാട്ടശേരിൽ, സൈമൺ തെരുവക്കുന്നേൽ, നേതാക്കളായ നോബിൾ പീറ്റർ, ബിനോയ്‌ കണ്ടത്തുംകുടി, രജീഷ് അമ്പാട്ട്, സുരേഷ് കണ്ടങ്കരി, ചെറിയാൻ പാറയ്ക്കൽ, ജോസ് ആഞ്ഞിലത്തോപ്പിൽ എന്നിവർ പ്രസംഗിച്ചു.

വീട് കുത്തിത്തുറന്ന് സ്വർണവും പണവും കവർന്നു

കണ്ണപുരം: വീട് കുത്തിത്തുറന്ന് സ്വർണാഭരണങ്ങളും പണവും കവർന്നു. കല്യാശേരി ചെക്കിക്കുണ്ട് കോളനിയിൽ താമസിക്കുന്ന പി.പി. റഹ്മത്തിന്‍റെ വീട്ടിലാണ് കവർച്ച നടന്നത്. വീടിന്‍റെ മുൻ വശത്തെ വാതിൽ കുത്തിത്തുറന്ന് അകത്തു കടന്ന മോഷ്ടാവ് മുറിയിലെ അലമാരയിൽ സൂക്ഷിച്ച 20,000 രൂപയും മൂന്നര പവൻ സ്വർണാഭരണവും കടന്നു. കിടക്കയുടെ അടിയിൽ സൂക്ഷിച്ച ഒന്നര പവന്‍റെ മാലയും രണ്ട് പവൻ തൂക്കമുള്ള വളയുമാണ് കവർന്നത്. ഇക്കഴിഞ്ഞ അഞ്ചിന് രാത്രി ഏഴിനും എട്ടിനും ഇടയിലാണ് കവർച്ച നടന്നതെന്ന് പരാതിയിൽ പറയുന്നു. 2,75,000 രൂപയുടെ നഷ്ടം കണക്കാക്കുന്നു. സംഭവത്തിൽ കണ്ണപുരം പോലീസ് കേസെടുത്ത് അന്വേഷണം ആരംഭിച്ചു.

മദ്യവുമായി പിടിയിലായി

പെരിങ്ങോം: അളവില്‍ കൂടുതല്‍ ഇന്ത്യന്‍ നിമിത വിദേശ മദ്യം കൈവശം വച്ചയാളെ പെരിങ്ങോം പോലീസ് അറസ്റ്റ ചെയ്തു. പെരിങ്ങോത്തെ ശശീന്ദ്രനാനെയാണ് (57) അറസ്റ്റ് ചെയ്തത്. വ്യാഴാഴ്ച ഉച്ചകഴിഞ്ഞ് രണ്ടരയോടെ കുറ്റൂര്‍ സണ്‍റൈസ് കോളജിന് സമീപത്തുനിന്നാണ് ഇയാൾ പിടിയിലായത്. 500 മില്ലിയുടെ 12 കുപ്പി മദ്യം പി‌ടിച്ചെടുത്തു. മദ്യം കസ്റ്റഡയിലെടുത്ത് അളവില്‍ കൂടുതല്‍ മദ്യം കൈവശംവച്ച കുറ്റത്തിന് കേസെടുത്തു.

നായനാർമല ക്വാറിയിൽ മണ്ണിടിഞ്ഞു: ജനങ്ങൾ ഭീതിയിൽ

ചെമ്പന്തൊട്ടി: നയനാർ മലയിലെ കരിങ്കൽ ക്വാറിയിൽ മണ്ണിടിച്ചിലുണ്ടായത് പരിസരവാസികളെ ഭീതിയിലാക്കി. ക്വാറി ഉടമകൾ മണ്ണിടിഞ്ഞത് മറയ്ക്കാൻ പ്ലാസ്റ്റിക് ഷീറ്റിട്ട് മൂടിയിരിക്കുകയാണിപ്പോൾ. മണ്ണിടിച്ചിൽ മൂലം ക്വാറിയുടെ താഴെ ഭാഗങ്ങളിൽ താമസിക്കുന്ന നൂറുകണക്കിന് കുടുംബങ്ങൾ അപകട ഭീഷണിയിലാണ് കഴിയുന്നത്. ക്വാറി വിരുദ്ധ സമിതിയുടെ സമരത്തെ തുടർന്ന് പ്രവർത്തനം തടഞ്ഞിട്ടുള്ള ക്വാറി തുറക്കാനുള്ള ശ്രമം ഉപേക്ഷിക്കണമെന്ന് നയനാർമല ക്വാറി വിരുദ്ധ സമിതി ഭാരവാഹികൾ ആവശ്യപ്പെട്ടു. നയനാർ മലയിൽ പുതുതായി വീണ്ടും ക്വാറി തുടങ്ങാൻ ഒരു കാരണവശാലും അനുവദിക്കില്ലന്ന് ക്വാറി വിരുദ്ധ സമിതി മുഖ്യ രക്ഷാധികാരിയും ചെമ്പന്തൊട്ടി സെന്‍റ് ജോർജ് ഫൊറോന വികാരിയുമായ ഫാ. ആന്‍റണി മഞ്ഞളാംകുന്നേൽ, രക്ഷാധികാരിയും ശ്രീകണ്ഠപുരം നഗരസഭ കൗൺസിലറുമായ കെ.ജെ. ചാക്കോ കൊന്നയ്ക്കൽ, ചെയർമാൻ വർഗീസ് വയലാമണ്ണിൽ, കൺവീനർ കെ.എം. ഷംസീർ, ട്രഷർ രാജു വയലിൽ എന്നിവർ അറിയിച്ചു.

കനത്ത മഴയിൽ വീട് തകർന്നു

കാർത്തികപുരം: കനത്ത മഴയിൽ മണക്കടവ് ചീക്കാട് നമ്പ്യാർ മലയിലെ ചിറയ്ക്കൽ ചന്ദ്രന്‍റെ വീട് തകർന്നു. വീട്ടിലുണ്ടായിരുന്നവർ പരിക്കേൽക്കാതെ രക്ഷപെട്ടു. ശക്തമായ മലവെള്ളപ്പാച്ചിലിൽ ചെളിയും കല്ലും വീടിനോട് ചേർന്നുള്ള മൺതിട്ടയും വീടിനു മേൽ പതിക്കുകയായിരുന്നു. സമീപത്ത് നിന്ന മരവും വീടിന് മുകളിലേക്ക് പതിച്ചു. അപകടത്തിൽ വീട് പുർണമായി തകർന്നു. അഞ്ചുലക്ഷം രുപയുടെ നഷ്ടം കണക്കാക്കുന്നു. കൂലിപ്പണിയെടുക്കുന്ന ചന്ദ്രനും ഭാര്യയും രണ്ടു മക്കളുമാണ് ഈ വീട്ടിൽ കഴിഞ്ഞിരുന്നത്.

ബിനോജിനെ ആദരിച്ചു

തേർത്തല്ലി: കേരള മനസാക്ഷിയെ ഞെട്ടിച്ച കൊടും ക്രിമിനൽ ഗോവിന്ദചാമിയെ പിടികൂടാൻ കേരള പോലീസിനെ സഹായിച്ച ബിനോജ് ഇരട്ടയാനിക്കലിനെ കത്തോലിക്ക കോൺഗ്രസ്‌ പെരിങ്ങാല യൂണിറ്റിന്‍റെ നേതൃത്വത്തിൽ ആദരിച്ചു. ബിനോജിന്‍റെ മനസാന്നിധ്യവും അവസരോചിതമായ ഇടപെടലുമാണ് ഗോവിന്ദച്ചാമിയെ കണ്ണൂർ ടൗണിൽ നിന്ന് പിടികൂടാൻ ഇടയാക്കിയത്. ഫാ. മാത്യു കായമ്മാക്കൽ, കത്തോലിക്ക കോൺഗ്രസ് രൂപത സെക്രട്ടറി ജയിംസ് ഇമ്മാനുവേൽ, സാബു വടക്കേഞാലിപ്പറമ്പിൽ, സാജു കാരാടി, ജോസ് കൈതക്കളത്ത്, സിബി കാട്ടിക്കാനാ, ജോർജ്‌ കണിയാമ്പാല, തങ്കച്ചൻ കൊച്ചുവീട്ടിൽ എന്നിവർ നേതൃത്വം നൽകി.

കാർ നിയന്ത്രണം വിട്ട് ഇരുചക്ര വാഹനങ്ങൾ ഇടിച്ചു തകർത്തു

മുണ്ടേരി: നിയന്ത്രണം വിട്ട കാർ ഇരുചക്ര വാഹനങ്ങളിൽ ഇടിച്ചുണ്ടായ അപകടത്തിൽ നാല് ഇരുചക്രവാഹനങ്ങൾ തകർന്നു. രണ്ടുപേർക്ക് പരിക്കേറ്റു. കടയിൽ സാധനങ്ങൾ വാങ്ങിക്കാനെത്തിയെ അന്യസംസ്ഥാന തൊഴിലാളികൾക്കാണ് പരിക്കേറ്റത്. ഇവരെ ആശുപത്രിയിൽ പ്രവേശിപ്പിച്ചു. പരിക്ക് സാരമുള്ളതല്ല. വെള്ളിയാഴ്ച രാവിലെ ഒമ്പതോടെ മുണ്ടേരി മായിന്‍മുക്കിലായിരുന്നു അപകടം. കുടുക്കിമൊട്ടയില്‍ നിന്ന് മായിന്‍ മുക്കിലേക്ക് വന്ന കാറാണ് അപകടത്തിൽപ്പെട്ടത്.

നബിദിന ഘോഷയാത്ര നടത്തി

ആലക്കോട്: രയറോം മഹല്ല് ജമാഅത്ത് കമ്മിറ്റിയും മദ്രസ കോളജ് കമ്മിറ്റിയും സംയുക്തമായി രയറോം, പത്തായക്കുണ്ട്, കാക്കടവ് പ്രദേശങ്ങളിൽ ഘോഷയാത്ര സംഘടിപ്പിച്ചു. മഹല്ല് പ്രസിഡന്‍റ് എം.എ. ഖലീൽ റഹ്മാൻ, മഹല്ല് ഖത്തീബ് അബ്ദുള്ള ഫൈസി, ജനറൽ സക്രട്ടറി വി.എം. നൗഷാദ്, വി.വി. അബ്ദുള്ള, ഹാഫിൾ വാഹിദ് മൗലവി, ഒ.വി. മമ്മു, പി.എം. മുഹമ്മദ് കുഞ്ഞി എന്നിവർ നേതൃത്വം നല്കി.

കാർ കേടുവരുത്തിയതിന് കേസെടുത്തു

വളപട്ടണം: നിർത്തിയിട്ട കാർ കന്പിക്കഷ്ണം കൊണ്ട് വരഞ്ഞ് കേടുവരുത്തിയെന്ന പരാതിയിൽ വളപട്ടണം പോലീസ് കേസെടുത്തു. കളരിവാതുക്കലിലെ സുഹ്റാസിൽ കെ.സി. മജ്നാസിന്‍റെ പരാതിയിൽ കണ്ടാലറിയാവുന്ന 55 വയസ് തോന്നിക്കുന്നയാൾക്കെതിരെയാണ് കേസെടുത്തത്. വളപട്ടണം മന്നയിലെ അടച്ചിട്ട ഒരു കടയുടെ മുന്നിൽ നിർത്തിയിട്ട കാറിൽ ഇരുന്ന് ഫോണിൽ സംസാരിക്കുന്നതിനിടെ കണ്ടാലറിയാവുന്ന ആൾ കന്പി കഷ്ണം കൊണ്ട് കാറിന്‍റെ ബോഡിയിൽ വരഞ്ഞ് പെയിന്‍റിന് കേടുവരുത്തിയെന്നാണ് പരാതി.

ജില്ലാ കളക്ടറുടെ ഇന്‍റേൺഷിപ്പ് പ്രോഗ്രാമിലേക്ക് അപേക്ഷിക്കാം

കണ്ണൂർ: ബിരുദധാരികളായ യുവതീ യുവാക്കൾക്ക് ജില്ലാ ഭരണകൂടത്തോടൊപ്പം പ്രവർത്തിക്കുന്നതിനുള്ള അവസരം ഒരുക്കി ജില്ലാ കളക്ടറുടെ ഇന്‍റേൺഷിപ്പ് പ്രോഗ്രാം. മികച്ച കരിയർ വളർച്ചയ്ക്കും വ്യക്തിഗത വികാസത്തിനും മുതൽകൂട്ടാകുന്ന രീതിയിലാണ് ഇന്‍റേൺഷിപ്പ് പ്രോഗ്രാം ക്രമീകരിച്ചരിക്കുന്നത്. ജില്ലയിലെ വിവിധ വികസന, സാമൂഹ്യക്ഷേമ പദ്ധതികളുടെ ഭാഗമായി പ്രവർത്തിക്കാനും അതുവഴി സർക്കാർ സംവിധാനത്തെക്കുറിച്ച് വ്യക്തമായ കാഴ്ച്ചപ്പാട് നേടുന്നതിനും ഡിസിഐപി വഴി ഒരുക്കും. താത്പര്യമുള്ളവർ https:// tinyurl.com/dcipknrbatch5 ഈ ലിങ്കിൽ ക്ലിക്ക് ചെയ്തിനുശേഷം ഓൺലൈനായി അപേക്ഷ പൂരിപ്പിച്ച് നല്കേണ്ടതാണ്.എട്ടിനകം അപേക്ഷ സമർപ്പിക്കണം. നാലു മാസമാണ് ഇന്‍റേൺഷിപ്പിന്‍റെ കാലാവധി. സ്റ്റൈപെൻഡ് ഉണ്ടായിരുക്കുന്നതല്ല. പ്രായപരിധി 2025 ഓഗസ്റ്റ് ഒന്നിന് 30 വയസ്. വിശദവിവരങ്ങൾക്ക് മേൽ പരാമർശിച്ച ലിങ്ക് സന്ദർശിക്കുക (അപേക്ഷാ ഫോം, ഡിസിഐപി ഇന്‍റേൺഷിപ്പിന്‍റെ കൂടുതൽ വിശദമായ വിവരങ്ങൾക്ക് എന്നിവ ലഭ്യമാണ്). ഫോൺ: 94977 15811, 0497 2700243. ഇമെയിൽ: dcknr.ker @nic.in.

കേന്ദ്രീകൃത മൂല്യനിർണയ ക്യാമ്പുകളിലേക്ക് നിയമനം

കണ്ണൂർ: ശ്രീനാരായണഗുരു ഓപ്പൺ യൂണിവേഴ്സിറ്റിയുടെ വിവിധ പരീക്ഷകളുടെ മൂല്യനിർണയ ത്തിനായി കാസർഗോഡ്, കണ്ണൂർ, കോഴിക്കോട്, മലപ്പുറം, പാലക്കാട്, തൃശൂർ, എറണാകുളം, കോട്ടയം, ആലപ്പുഴ, കൊല്ലം, തിരുവനന്തപുരം ജില്ലകളിലെ കേന്ദ്രീകൃത മൂല്യനിർണയ ക്യാമ്പുകളിലേക്ക് ഡാറ്റാ എൻട്രി ഓപ്പറേറ്റർ (ഡിഇഒ), മൾട്ടി ടാസ്കിംഗ് സ്റ്റാഫ് (എംടിസ്) എന്നിവരെ താത്കാലിക ദിവസ വേതനാടിസ്ഥാനത്തിൽ ആവശ്യമുണ്ട്. വിദ്യാഭ്യാസ യോഗ്യത: ഡാറ്റാ എൻട്രി ഓപ്പറേറ്റർ (ഡിഇഒ): പ്ലസ് ടു, കംപ്യൂട്ടർ പരിജ്ഞാനം. (വിജ്ഞാപന തീയതിയിൽ പ്രായപരിധി 60 വയസ്). മൾട്ടി ടാസ്കിംഗ് സ്റ്റാഫ് (എംടിഎസ്): ഏഴാംക്ലാസ് പാസ് (പ്രായപരിധി 60 വയസ്). ഏതെങ്കിലും സർവകലാശാലയുടെ പരീക്ഷാ വിഭാഗത്തിൽ മൂല്യനിർണയ ക്യാമ്പുകളിൽ ജോലി ചെയ്ത് മുൻപരിചയം ഉള്ളവർക്ക് മുൻഗണന. അപേക്ഷകൾ ഓൺലൈനായി www. sgou.ac.in എന്ന വെബ്സൈറ്റിൽ ചുവടെ ചേർത്തിരിക്കുന്ന ലിങ്കിലൂടെ സമർപ്പിക്കാം. അപേക്ഷ സമർപ്പിക്കേണ്ട അവസാന തീയതി 17. ലിങ്ക്: https:// dms.sgou.ac.in/ciep/public/camp-duty/register.

ഓട്ടോ മറിഞ്ഞ് ഡ്രൈവർ മരിച്ചു

ശ്രീകണ്ഠപുരം: ചെമ്പന്തൊട്ടിയിൽ ഓട്ടോറിക്ഷ നിയന്ത്രണംവിട്ട് മറിഞ്ഞുണ്ടായ അപകടത്തിൽ ഓട്ടോ ഡ്രൈവർ മരിച്ചു. ശ്രീകണ്ഠപുരം നിടിയേങ്ങ എകെജി നഗറിലെ മലയൻപറമ്പിൽ കേളുപണിക്കർ-പാർവതി ദമ്പതികളുടെ മകൻ എം.വി. ശശിധരനാണ് (53) മരിച്ചത്. വെള്ളിയാഴ്ച രാത്രി 7.30 ഓടെ നിടിയേങ്ങ-ചെമ്പന്തൊട്ടി റോഡിൽ മത്തായിക്കുന്ന് ഇറക്കത്തിലാണ് അപകടം. നാട്ടുകാരും പോലീസും ചേർന്ന ഉടൻ ആശുപത്രിയിലെത്തിച്ചെങ്കിലും മരിച്ചു. നേരത്തെ നിടിയേങ്ങയിലെ ടൈലറായിരുന്നു ശശിധരൻ. ഭാര്യ: നിഷ. മക്കൾ: അദ്വൈത്, അഞ്ജിത. മരുമകൻ: ഷരുൺ. സഹോദരങ്ങൾ: കൃഷ്ണൻ പണിക്കർ, ശാന്ത.

ബൈക്ക് മരത്തിലിടിച്ച് യുവാവ് മരിച്ചു

മട്ടന്നൂർ: ബൈക്ക് നി‍യന്ത്രണംവിട്ട് മരത്തിലിടിച്ച് പ്രവാസിയായ യുവാവ് മരിച്ചു. കീഴല്ലൂർ വടക്കുംമ്പേത്ത് ചോമ്പാൽ ഹൗസിൽ പി. സന്തോഷ്- ഷീജ ദന്പതികളുടെ മകൻ വി. മിഥുനാണ് (27) മരിച്ചത്. തിരുവോണ ദിവസം വൈകുന്നേരം നാലിന് കീഴല്ലൂർ വടക്കുന്പേത്തായിരുന്നു അപകടം. നിയന്ത്രണം വിട്ട ബൈക്ക് റോഡരികിലെ മരത്തിൽ ഇടിക്കുകയായിരുന്നു. അപകടത്തിൽ ഗുരുതരമായി പരിക്കേറ്റ മിഥുനിനെ കണ്ണൂരിലെ സ്വകാര്യ ആശുപത്രിയിൽ പ്രവേശിച്ചെങ്കിലും രാത്രിയോടെ മരിച്ചു. മിഥിനിനൊപ്പം ബൈക്കിൽ യാത്ര ചെയ്തിരുന്ന സുഹൃത്ത് വി.കെ. അക്ഷയ് നിസാര പരിക്കുകളോടെ രക്ഷപ്പെട്ടു. മിഥുനായിരുന്നു ബൈക്ക് ഓടിച്ചത്. സൗദിയിൽ ജോലി ചെയ്യുന്ന മിഥുൻ ഓണം ആഘോഷിക്കാൻ നാട്ടിലെത്തിയതായിരുന്നു. സംസ്കാരം ഇന്നു പത്തിന് പയ്യാന്പലത്ത് നടക്കും. സഹോദരൻ: ഷില്ലു (സൗദി അറേബ്യ).

മെറ്റീരിയൽ റിക്കവറി ഫെസിലിറ്റി സെന്‍റർ പ്രവർത്തനം തുടങ്ങി

കൂത്തുപറമ്പ്: നഗരസഭയുടെ നേതൃത്വത്തിൽ പാലാപ്പറമ്പിൽ നിർമിച്ച മെറ്റീരിയൽ റിക്കവറി ഫെസിലിറ്റി സെന്‍റർ വി. ശിവദാസൻ എംപി ഉദ്ഘാടനം ചെയ്തു. സർക്കാർ സഹായത്തോടെ 45 ലക്ഷം രൂപ ചെലവഴിച്ചാണ് റിക്കവറി സെന്‍റർ നിർമിച്ചത്. നഗരസഭയിലെ ഹരിതകർമ സേനാംഗങ്ങൾ ശേഖരിക്കുന്ന അജൈവ മാലിന്യങ്ങൾ ഈ കേന്ദ്രത്തിൽ വേർതിരിച്ച് വിവിധ കമ്പനികൾക്ക് കൈമാറും. നഗരസഭ ചെയർപേഴ്സൺ വി. സുജാത അധ്യക്ഷത വഹിച്ചു. എൻജിനിയർ എം. റഷീദ് റിപ്പോർട്ട് അവതരിപ്പിച്ചു. വൈസ് ചെയർമാൻ വി. രാമകൃഷ്‌ണൻ, സ്റ്റാൻഡിംഗ് കമ്മിറ്റി അധ്യക്ഷന്മാരായ ലിജി സജേഷ്, കെ.വി. രജീഷ്, കെ. അജിത, കെ.കെ. ഷമീർ, എം.വി. ശ്രീജ, വാർഡ് അംഗം എം.എൻ. അബ്ദുൾ റഹ്മാൻ, വിവിധ രാഷ്‌ട്രീയ കക്ഷി പ്രതിനിധികളായ കെ. ധനഞ്ജയൻ, അഷറഫ് ഹാജി, സി.കെ. സുരേഷ് ബാബു, മുഹമ്മദ് റാഫി, ഹെൽത്ത് ഇൻസ്പെക്ടർ പി.ജി. അജിത്ത്, ക്ലീൻസിറ്റി മാനേജർ കെ.സി. ലതീഷ് എന്നിവർ പ്രസംഗിച്ചു.

വിനോദ വിജ്ഞാന കേന്ദ്രത്തിന് തറക്കല്ലിട്ടു

കേളകം: എംപിയുടെ പ്രാദേശിക വികസന ഫണ്ട് ഉപയോഗിച്ച് കേളകം പഞ്ചായത്തിലെ ഒന്നാം വാർഡിൽ 55 ലക്ഷം രൂപ ചെലവിൽ നിർമിക്കുന്ന വളയംചാൽ വിനോദ വിജ്ഞാന കേന്ദ്രത്തിന് തറക്കല്ലിട്ടു. വളയംചാലിൽ നടന്ന ചടങ്ങിൽ ഡോ. വി. ശിവദാസൻ എംപി തറക്കല്ലിടീൽ ചടങ്ങ് നിർവഹിച്ചത്. ലൈബ്രറി, യോഗ സെന്‍റർ, മിനി ഹാൾ, കളിസ്ഥലം എന്നീ സൗകര്യങ്ങളോടുകൂടിയാണ് വിനോദ വിജ്ഞാന കേന്ദ്രം ഒരുക്കുന്നത്. പഞ്ചായത്ത് പ്രസിഡന്‍റ് സി.ടി. അനീഷ് അധ്യക്ഷത വഹിച്ചു. സ്ഥിരം സമിതി അധ്യക്ഷരായ പ്രീത ഗംഗാധരൻ, ടോമി പുളിക്കക്കണ്ടം, സജീവൻ പാലുമി, പഞ്ചായത്തംഗങ്ങായ ജോണി പാമ്പാടിയിൽ, ലീലാമ്മ ജോണി, മനോഹരൻ മരാടി, ബ്ലോക്ക് പഞ്ചായത്തംഗം മേരിക്കുട്ടി, കെ.കെ. റിനീഷ്, ഷാന്‍റി വർഗീസ് എന്നിവർ പ്രസംഗിച്ചു.

അന്തേവാസികൾക്കൊപ്പം ഓണവും നബിദിനവും ആഘോഷിച്ച് കുരുന്നുകൾ

മട്ടന്നൂർ: ഉത്രാടദിനത്തിൽ കൂത്തുപറമ്പ് പാലാപറമ്പിലെ സ്നേഹ നികേതൻ വൃദ്ധ സദനത്തിൽ അന്തേവാസികൾക്കൊപ്പം ഓണവും നബിദിനവും ആഘോഷിച്ച് കാനാട് എൽപി സ്കൂൾ കുരുന്നുകൾ. നാൽപത് അന്തേവാസികൾക്കൊപ്പം വിശേഷങ്ങൾ പങ്കുവച്ചും സ്വാന്തനമായും അന്നത്തെ ദിവസം കുട്ടികളും അധ്യാപകരും അവിസ്മരണീയമാക്കി. മുഖ്യാധ്യാപിക പി.എം. ശ്രീലീന, സ്നേഹ നികേതൻ സിസ്റ്റർ ആൽഫിൻ, പിടിഎ പ്രസിഡന്‍റ് എം.കെ. റിജേഷ്, സ്കൂൾ ലീഡർ ദേവാഞ്ജനശ്രീസ്ഥ, സ്റ്റാഫ് സെക്രട്ടറി വി. രാജേഷ് എന്നിവർ പ്രസംഗിച്ചു. ഓണസദ്യ ഒരുക്കാനുള്ള വിഭവങ്ങൾ സിസ്റ്റർ ആൽഫിൻ മുഖ്യാധ്യാപികയിൽ നിന്നും ഏറ്റുവാങ്ങി. അന്തേവാസികൾക്ക് മധുര പലഹാരങ്ങൾ വിതരണം ചെയ്തു. കുട്ടികളുടെയും അന്തേവാസികളുടെയും കലാപരിപാടികൾ അരങ്ങേറി.

ഇരിട്ടിയിൽ പുതിയ സിനിമാ തിയറ്റർ

ഇരിട്ടി: ഇരിട്ടിയിൽ കഴിഞ്ഞ അഞ്ചുവർഷമായി അടഞ്ഞുകിടന്നിരുന്ന കല്പനാ തീയറ്റർ അത്യാധുനിക സവിധാനങ്ങളോടെ തുറന്നു. കീഴൂർ സ്വദേശി ഇ.ജി. മോഹനന്‍റെ ഉടമസ്ഥതയിലുള്ള ടാക്കീസ് സിനിമാ നിർമാതാവ് ലിസ്റ്റിൻ സ്റ്റീഫന്‍റെ നേതൃത്വത്തിലുള്ള മാജിക് ഫ്രെയിം തിയറ്റർ ഗ്രൂപ്പാണ് ഏറ്റെടുത്ത് നവീകരിച്ചിരിക്കുന്നത്. സണ്ണി ജോസഫ് എംഎൽഎ, ലിബർട്ടി ബഷീർ, സിനിമാതാരം മഹിമ നമ്പ്യാർ എന്നിവർ ചേർന്ന് തിയേറ്റർ തുറന്നു കൊടുത്തു. ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധൻ, ഇരിട്ടി നഗരസഭാ ചെയർപേഴ്‌സൺ കെ. ശ്രീലത, പ്രഗതി വിദ്യാനികേതൻ പ്രിൻസിപ്പൽ വത്സൻ തില്ലങ്കേരി, തിയേറ്റർ ഉടമ ഇ.ജി. മോഹനൻ, തോമസ് വർഗീസ്, ബാബുരാജ് പായം, വിപിൻ തോമസ്, മഹിമാ നമ്പ്യാർ, ലിബർട്ടി ബഷീർ, ലിസ്റ്റിൻ സ്റ്റീഫൻ തുടങ്ങിയവർ പ്രസംഗിച്ചു. തിയറ്ററിൽ പ്രദർശനം ആരംഭിച്ചു.

ഗ്യാസ് ഏജൻസി നല്കാമെന്ന് പറഞ്ഞ് മൂന്നേകാൽ ലക്ഷം തട്ടി; രണ്ടുപേർക്കെതിരേ കേസ്

പരിയാരം: പാചക വാതകം വിതരണം ചെയ്യുന്ന ഗ്യാസ് ഏജന്‍സി ശരിയാക്കിത്തരാമെന്ന് വിശ്വസിപ്പിച്ച് മണ്ടൂര്‍ സ്വദേശിയുടെ 3,30,000 രൂപ തട്ടിയെടുത്ത സംഭവത്തില്‍ തൃശൂര്‍ സ്വദേശി ഉള്‍പ്പെടെ രണ്ടുപേര്‍ക്കെതിരേ പരിയാരം പോലീസ് കേസെടുത്തു. ചെറുതാഴം മണ്ടൂര്‍ അമ്പലം റോഡിലെ കപ്പച്ചേരി വീട്ടില്‍ മുരളീധരന്‍ കൊഴുമ്മലിന്‍റെ (58) പരാതിയിൽ തൃശൂര്‍ കൊടകര മുകുന്ദപുരം മണക്കുളങ്ങര പാച്ചേനവീട്ടില്‍ മുരളീധരന്‍ നായര്‍, കോഴിക്കോട് പേരാമ്പ്ര ധനലക്ഷ്മി നിവാസില്‍ സുബ്രഹ്മണ്യന്‍ എന്നിവരുടെ പേരിലാണ് കേസെടുത്തത്. 2023 ജൂണ്‍ ഒന്പത് മുതല്‍ നവംബര്‍ 26 വരെയുള്ള കാലയളവില്‍ മുരളീധരന്‍ കൊഴുമ്മലിന് പാചക ഗ്യാസ് ഏജന്‍സി വാങ്ങിത്തരാമെന്ന് വിശ്വസിപ്പിച്ച് ഒന്നാംപ്രതിയുടെ അക്കൗണ്ടിലേക്ക് പണം ട്രാന്‍സ്ഫര്‍ ചെയ്തു നല്കുകയായിരുന്നു. എന്നാല്‍, ഗ്യാസ് ഏജന്‍സിയോ പണമോ നല്കാതെ വഞ്ചിച്ചുവെന്നാണ് പരാതി.

മട്ടന്നൂരിൽ വാഹനാപകടങ്ങളിൽ രണ്ടുപേർക്ക് പരിക്ക്

മട്ടന്നൂർ: മട്ടന്നൂരിൽ രണ്ടിടങ്ങളിലുണ്ടായ വാഹനാപകടങ്ങളിൽ രണ്ടുപേർക്ക് പരിക്ക്. പാലോട്ടുപള്ളി, മരുതായി എന്നിവിടങ്ങളിലായിരുന്നു അപകടം. മട്ടന്നൂർ-ഇരിട്ടി റോഡിൽ പാലോട്ടുപള്ളി പെട്രോൾ പമ്പിനു മുന്നിൽ കാറും സ്കൂട്ടറും കൂട്ടിയിടിച്ചും മരുതായിൽ കാർ നിയന്ത്രണം വിട്ട് മതിലിൽ ഇടിച്ചുമായിരുന്നു അപകടം. അപകടത്തിൽ കാർ യാത്രികനായ ഒരാൾക്ക് പരിക്കേറ്റു. ഇരിക്കൂർ ഭാഗത്തേക്കു പോകുകയായിരുന്ന കാർ നിയന്ത്രണം വിട്ട് റോഡരികിൽ നിലത്തുണ്ടായിരുന്ന ഇരുമ്പ് പൈപ്പിൽ ഇടിക്കുകയും എതിർ ദിശയിലേക്ക് മാറി റോഡരികിലെ കരിങ്കൽ ഭിത്തിയിൽ ഇടിക്കുകയായിരുന്നു. അപകടത്തിൽ കാറിന്‍റെ ഒരുവശം പൂർണമായും തകർന്നു. ഇരിട്ടി ഭാഗത്ത് നിന്നു മട്ടന്നൂർ ഭാഗത്തേക്കു പോകുകയായിരുന്ന കാറും മട്ടന്നൂരിൽ നിന്ന് ഇരിട്ടി ഭാഗത്തേക്കു പോകുകയായിരുന്ന സ്കൂട്ടറുമാണ് കൂട്ടിയിടിച്ചത്. പരിക്കേറ്റ സ്കൂട്ടർ യാത്രക്കാരനെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു.

കണ്ണൂരിൽ കളറാക്കി ടൂറിസം ഓണാഘോഷം

കണ്ണൂർ: കണ്ണൂരുകാർക്ക് സന്തോഷ പൊന്നോണ രാവുകൾ സമ്മാനിച്ച് സംസ്ഥാന ടൂറിസം വകുപ്പും ജില്ലാ ടൂറിസം പ്രമോഷൻ കൗൺസിലും ചേർന്ന സംഘടിപ്പിക്കുന്ന ഓണാഘോഷം. പരിപാടിയുടെ ഔദ്യോഗിക ഉദ്ഘാടനം ടൗൺ സ്‌ക്വയറിൽ മന്ത്രി കടന്നപ്പള്ളി രാമചന്ദ്രൻ നിർവഹിച്ചു. കോർപറേഷൻ മേയർ മുസ്‌ലിഹ് മഠത്തിൽ അധ്യക്ഷത വഹിച്ചു. സിനിമാ താരം പി.പി. കുഞ്ഞിക്കൃഷ്ണൻ, ബാലതാരവും ഫ്ലവേഴ്സ് ടോപ് സിംഗർ ഫെയിമുമായ റാനിയ റഫീക്ക് എന്നിവർ വിശിഷ്ടാതിഥികളായിരുന്നു. തുടർന്ന് മലബാർ മാജിക്ക് സർക്കിൾ അവതരിപ്പിച്ച് മാജിക്ക് നൈറ്റ്, അരങ്ങ് കൊയിലാണ്ടിയുടെ നാടൻ പാട്ടുകളുടെ ദൃശ്യാവിഷ്‌കാരം-മുടിയാട്ടം, കാളകളി, പരുന്താട്ടം തുടങ്ങിയവയും യംഗ് സ്റ്റാർ കണ്ണൂർ അവതരിപ്പിച്ച ഡാൻസ് ഫ്യൂഷനും അരങ്ങേറി. തിരുവോണ ദിനമായ ഇന്ന് വൈകുന്നേരം അഞ്ചിന് ദിശ സ്കൂൾ മ്യൂസിക്കിന്‍റെ മ്യൂസിക് ഫ്യൂഷൻ, തഞ്ചാവൂർ സൗത്ത് സോൺ കൾച്ചറസ് സെന്‍ററിന്‍റെയും ഭാരത ഭവന്‍റെയും നേതൃത്വത്തിൽ ഇന്ത്യൻ വസന്തം, ഷംസുദ്ദീൻ ചെർപ്പുളശേരിയുടെ ഇന്ത്യൻ മാങ്കോ ട്രീ മാജിക്, സിനിമതാരം മൃദുല വിജയ്‌യുടെ ക്ലാസിക്കൽ ഡാൻസ്, ഫോക് കാറ്റ്സ് മീഡിയയുടെ മെഗാ മ്യൂസിക്കൽ ഫ്യൂഷൻ ഫോക്ക് രാവ് എന്നിവ അരങ്ങേറും.

മഴയിൽ കുതിരാത്ത ആവേശം; ഉത്രാടപ്പാച്ചിലിൽ തിരക്കിലമർന്ന് ഇരിട്ടി

ഇരിട്ടി: തോരാത്ത മഴയ്ക്കും തളർത്താൻ കഴിയാത്ത ആവേശത്തോടെ ജനം ഓണം ആഘോഷമാക്കാൻ നഗരത്തിൽ ഇറങ്ങിയതോടെ ഉത്രാടത്തിരക്കിൽ ഇരിട്ടി നഗരം വീർപ്പുമുട്ടി. കഴിഞ്ഞ ദിവസങ്ങളിലെ മഴയും കാറ്റും ഇരുണ്ട ആകാശവും വ്യാപാരികളുടെ മനസിലും ആശങ്കയുടെ കാർമേഘം നിറച്ചെങ്കിലും ഉത്രാടം ദിനമായ ഇന്നലെ ഇതൊന്നും ജനത്തിരക്കിനെ ബാധിച്ചില്ല. വസ്ത്ര വ്യാപാര സ്ഥാപനങ്ങളിലും പച്ചക്കറി, പലവ്യഞ്ജന കടകളിലും പൂക്കടകളിലുമാണ് വൻ തിരക്കനുഭവപ്പെട്ടത്. നഗരത്തിൽ ഇരുപതിലധികം ഇടങ്ങളിൽ പൂക്കച്ചവടം ഉണ്ടായിരുന്നു. കഴിഞ്ഞ ദിവസങ്ങളിൽ മഴകാരണം കാര്യമായ വ്യാപാരം ഉണ്ടായിരുന്നില്ല. കാർഷിക മേഖലയിലെ മുരടിപ്പും നിർമാണ മേഖലയിലും ചെങ്കൽ, മറ്റു ഖനന മേഖലകളിലുമുണ്ടായ അനിശ്ചിതത്വവും ആവേശത്തിന് ചെറിയ ഇടിവുണ്ടാക്കി. ഗതാഗതക്കുരുക്ക് അഴിക്കാൻ പോലീസ് നടത്തിയ ഇടപെടലുകളും ജനങ്ങൾക്ക് ആശ്വാസം പകർന്നു. ഗതാഗത നിയന്ത്രണത്തിനായി 25 പോലീസുകാരെയും നാല് മൊബൈൽ പട്രോളിംഗ് ടീമുകളെയും നഗരത്തിൽ നിയോഗിച്ചിരുന്നു. മേലെ സ്റ്റാൻഡ്, പഴയ സ്റ്റാൻഡ്, ബസ് സ്റ്റാൻഡ് വൺവേ റോഡ്, സിറ്റി സെന്‍റർ, പഴയ പോസ്റ്റ് ഓഫീസ് പരിസരം, പയഞ്ചേരിമുക്ക് എന്നിവിടങ്ങളിലുണ്ടാകുന്ന ഗതാഗത തടസം നീക്കുന്നതിന് പാർക്കിംഗ് നിയന്ത്രണം ശക്തമാക്കി പോലീസ് പ്രതിരോധിച്ചു.

അഞ്ജിമ അജേഷിനെ അനുമോദിച്ചു

പെരിങ്ങോം: പെരിങ്ങോം കെപി നഗർ റസിഡന്‍റ്സ് അസോസിയേഷൻ അനുമോദന സദസ് നടത്തി. ചെന്നൈയിൽ നടന്ന ദേശീയ ഷൂരി കരാട്ടെ കുബുഡോ ടൂർണമെന്‍റിൽ ഒന്നാംസ്ഥാനം നേടിയ പെരിങ്ങോം കേന്ദ്രീയ വിദ്യാലയത്തിലെ വിദ്യാർഥിനിയും കെപി നഗർ സ്വദേശിയുമായ അഞ്ജിമ അജേഷിനെ കെപി നഗർ റസിഡന്‍റ്സ് അസോസിയേഷൻ അനുമോദിച്ചു. ഉദ്ഘാടനവും ഉപഹാര വിതരണവും എഴുത്തുകാരി ഡോ. എം.എ. മുംതാസ് നിർവഹിച്ചു. എം.വി. കുഞ്ഞിരാമൻ അധ്യക്ഷത വഹിച്ചു. സി. സുന്ദരൻ, അജിത്ത്കുമാർ തകിടിയേൽ, രാഗിണി ബിജു, സി. പദ്മനാഭൻ, കെ.എം. ഷാമോൻ, കെ.വി. പ്രേമരാജൻ, എ.ടി.വി. പ്രശാന്തൻ, ഇ.പി.വി. ശ്രീജിത്ത് എന്നിവർ പ്രസംഗിച്ചു. അഞ്ജിമ അജേഷ് മറുപടി പ്രസംഗം നടത്തി. കെപി നഗറിലെ ഇ.എസ്. അജേഷ്-കെ. മായമോൾ ദന്പതികളുടെ മകളാണ് അഞ്ജിമ അജേഷ്.

ഫീസ് വർധന ടൂറിസം മേഖലയെ തളർത്തും: സജീവ് ജോസഫ് എംഎൽഎ

കാഞ്ഞിരക്കൊല്ലി: കാഞ്ഞിരക്കൊല്ലി ടൂറിസം വ്യൂ പോയിന്‍റിലെ പ്രവേശന ഫീസ് അടിക്കടി വർധിപ്പിക്കുന്ന സർക്കാർ നടപടി തികച്ചും ജനദ്രോഹപരമാണെന്നും അത് ടൂറിസം മേഖലയെ തളർത്തുമെന്നും സജീവ് ജോസഫ് എംഎൽഎ. കോൺഗ്രസ് കാഞ്ഞിരക്കൊല്ലി രണ്ടാം വാർഡ് കൺവൻഷൻ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ടൂറിസം രംഗത്ത് പിച്ചവച്ച് തുടങ്ങിയ കാഞ്ഞിരക്കൊല്ലി പോലെയുള്ള മേഖലകളിൽ അടിസ്ഥാന സൗകര്യങ്ങൾ ഒരുക്കാതെ 20 രൂപയായിരുന്ന പ്രവേശന ഫീസ് 50 രൂപയായും ഇപ്പോൾ 60 രൂപയായും ഉയർത്തിയ സർക്കാർ നടപടി ഉടൻ പുനഃപരിശോധിക്കണമെന്ന് എംഎൽഎ ആവശ്യപ്പെട്ടു. വാർഡ് പ്രസിഡന്‍റ് ഷാജി കടൂക്കുന്നേൽ അധ്യക്ഷത വഹിച്ചു. കോൺഗ്രസ് ഇരിക്കൂർ ബ്ലോക്ക് പ്രസിഡന്‍റ് എ.ജെ. ജോസഫ്, പയ്യാവൂർ മണ്ഡലം പ്രസിഡന്‍റ് ഇ.കെ. കുര്യൻ, കോൺഗ്രസ് ബ്ലോക്ക് ജനറൽ സെക്രട്ടറി കെ.വി. ഫ്രാൻസിസ്, ബൂത്ത് പ്രസിഡന്‍റ് നോബിൾ പീറ്റർ, ജോസ് ആഞ്ഞിലിത്തോപ്പിൽ എന്നിവർ പ്രസംഗിച്ചു. പ്രവേശന ഫീസ് വർധനക്കെതിരെ കാഞ്ഞിരക്കൊല്ലി, ശാന്തിനഗർ വാർഡ് കോൺഗ്രസ് കമ്മിറ്റികളുടെ നേതൃത്വത്തിൽ നാളെ രാവിലെ 10.30 മുതൽ കാഞ്ഞിരക്കൊല്ലി ഫോറസ്റ്റ് ഓഫീസിനു മുന്നിൽ ധർണ നടത്താനും യോഗം തീരുമാനിച്ചു.

മാതൃവേദി പലഹാര നിർമാണ മത്സരം

ആലക്കോട്: മാതൃവേദി ആലക്കോട് മേഖലാതല ക്രിസ്‌തീയ പരമ്പരാഗത പലഹാര നിർമാണ മത്സരം നടത്തി. മാതൃവേദി തലശേരി അതിരൂപത സമിതിയുടെ ആഭിമുഖ്യത്തിൽ സംഘടിപ്പിച്ച നസ്രാണി ഫെസ്റ്റിന്‍റെ ഭാഗമായാണ് മത്സരം. കുട്ടാപറമ്പ് ലിറ്റിൽ ഫ്ലവർ പള്ളി ഓഡിറ്റോറിയത്തിൽ "നസ്രാണി പാരമ്പര്യം പാത്രത്തിൽ' എന്ന പ്രമേയത്തെ അടിസ്ഥാനമാക്കി നടത്തിയ മത്സരത്തിൽ ക്രൈസ്‌തവ വേഷങ്ങൾ അണിഞ്ഞാണ് മാതൃവേദി അംഗങ്ങൾ പങ്കെടുത്ത് പലഹാരങ്ങൾ ഉണ്ടാക്കിയത്. മാതൃവേദി കുട്ടാപറമ്പ് യൂണിറ്റ് ഒന്നാംസ്ഥാനവും, ഉദയഗിരി യൂണിറ്റ് രണ്ടാം സ്ഥാനവും പരപ്പ യൂണിറ്റ് മൂന്നാംസ്ഥാനവും നേടി. നെല്ലിപ്പാറ, മാമ്പൊയിൽ യൂണിറ്റുകൾ പ്രോത്സാഹന സമ്മാനം നേടി. മാതൃവേദി മേഖല ഡയറക്‌ടർ ഫാ. തോമസ് ചക്കിട്ടമുറി, ഫാ. വിപിൻ ആനചാരിൽ, മേഖല ആനിമേറ്റർ സിസ്റ്റർ ജെ. റോസ്, മേഖല ഭാരവാഹികളായ ജോണി കണ്ണോളിൽ, റെന്‍റി തയ്യിൽ, ലൂസി ജോൺ പടിഞ്ഞാത്ത്, ഷൈനി ഉപ്പൻമാക്കൽ എന്നിവർ നേതൃത്വം നൽകി. തലശേരി അതിരൂപത തല മാതൃവേദി നസ്രാണി ഫെസ്റ്റിലേക്ക് ആലക്കോട് മേഖല യോഗ്യതയും നേടി.

ഗ്യാസ് ഏജൻസി നല്കാമെന്ന് പറഞ്ഞ് മൂന്നേകാൽ ലക്ഷം തട്ടി; രണ്ടുപേർക്കെതിരേ കേസ്

പരിയാരം: പാചക വാതകം വിതരണം ചെയ്യുന്ന ഗ്യാസ് ഏജന്‍സി ശരിയാക്കിത്തരാമെന്ന് വിശ്വസിപ്പിച്ച് മണ്ടൂര്‍ സ്വദേശിയുടെ 3,30,000 രൂപ തട്ടിയെടുത്ത സംഭവത്തില്‍ തൃശൂര്‍ സ്വദേശി ഉള്‍പ്പെടെ രണ്ടുപേര്‍ക്കെതിരേ പരിയാരം പോലീസ് കേസെടുത്തു. ചെറുതാഴം മണ്ടൂര്‍ അമ്പലം റോഡിലെ കപ്പച്ചേരി വീട്ടില്‍ മുരളീധരന്‍ കൊഴുമ്മലിന്‍റെ (58) പരാതിയിൽ തൃശൂര്‍ കൊടകര മുകുന്ദപുരം മണക്കുളങ്ങര പാച്ചേനവീട്ടില്‍ മുരളീധരന്‍ നായര്‍, കോഴിക്കോട് പേരാമ്പ്ര ധനലക്ഷ്മി നിവാസില്‍ സുബ്രഹ്മണ്യന്‍ എന്നിവരുടെ പേരിലാണ് കേസെടുത്തത്. 2023 ജൂണ്‍ ഒന്പത് മുതല്‍ നവംബര്‍ 26 വരെയുള്ള കാലയളവില്‍ മുരളീധരന്‍ കൊഴുമ്മലിന് പാചക ഗ്യാസ് ഏജന്‍സി വാങ്ങിത്തരാമെന്ന് വിശ്വസിപ്പിച്ച് ഒന്നാംപ്രതിയുടെ അക്കൗണ്ടിലേക്ക് പണം ട്രാന്‍സ്ഫര്‍ ചെയ്തു നല്കുകയായിരുന്നു. എന്നാല്‍, ഗ്യാസ് ഏജന്‍സിയോ പണമോ നല്കാതെ വഞ്ചിച്ചുവെന്നാണ് പരാതി.

അനധികൃത കച്ചവടത്തിനെതിരേ വ്യാപാരികളുടെ പ്രതിഷേധം

തളിപ്പറമ്പ്: ഓണക്കാല കച്ചവടം ഇല്ലാതാക്കുന്ന രീതിയിൽ തളിപ്പറമ്പ് നഗരത്തിൽ അനധികൃത കച്ചവടം നടത്താൻ നഗരസഭ കൂട്ടുനില്ക്കുന്നുവെന്ന് തളിപ്പറമ്പ് മർച്ചന്‍റ്സ് അസോസിയേഷൻ നേതാക്കൾ ആരോപിച്ചു. നഗരസഭയുടെ വ്യാപാരി ദ്രോഹ നടപടി തുടർന്നാൽ ശക്തമായ പ്രതിഷേധ പരിപാടികളുമായി രംഗത്തു വരുമെന്നും നേതാക്കളായ കെ.എസ്. റിയാസും വി. താജുദ്ദീനും പറഞ്ഞു. നഗരസഭ അനുമതി നല്കിയെന്ന പേരിൽ കച്ചവട സ്ഥാപനങ്ങളുടെ മുന്നിൽ വലിയ ടെന്‍റ്കെട്ടി നടത്തുന്ന തെരുവു കച്ചവടം വ്യാപാരികൾക്ക് തിരിച്ചടിയാണ്. ടെന്‍റ് മറഞ്ഞ് സ്ഥാപനം കാണാത്ത സാഹചര്യമാണ്. ആളുകൾക്ക് സ്ഥാപനങ്ങളിലേക്ക് കയറാൻ പോലും സാധിക്കുന്നില്ല. ദേശീയപാതയിൽ കോഫി ഹൗസിന് സമീപം ടെന്‍റ് കെട്ടി പൂ വ്യാപാരം നടത്തുന്നതുമായി ബന്ധപെട്ട് അവിടെയുള്ള വ്യാപാരികൾ പരാതി പറഞ്ഞതിനെ തുടർന്ന് പോലിസിനെയും നഗരസഭ അധികൃതരേയും വിവരം അറിയിച്ചു. തുടർന്ന് പോലിസ് ഉദ്യോഗസ്ഥർ സ്ഥലത്തെത്തി. ശക്തമായ പ്രതിഷേധത്തെ തുടർന്ന് ടെന്‍റ് അഴിച്ചുമാറ്റി മറവ് ഒഴിവാക്കിയാണ് പൂ വ്യാപാരം പുനരാംരംഭിച്ചത്

ശ്രീകണ്ഠപുരത്തെ ബ്രേക്ക് പോയ ടേക്ക് എ ബ്രേക്ക്

ശ്രീകണ്ഠപുരം: ഇരിട്ടി-തളിപ്പറമ്പ് സംസ്ഥാന പാതയിലൂടെ കടന്നുപോകുന്ന യാത്രികർക്ക് വിശ്രമി ക്കുന്നതിനായി ശ്രീകണ്ഠപുരത്ത് സ്ഥാപിച്ച ടേക്ക് എ ബ്രേക്ക് വഴിയോര വിശ്രമകേന്ദ്രം അധികൃത രുടെ അനാസ്ഥമൂലം നശിക്കുന്നു. കോട്ടൂർ പാലത്തോടു ചേർന്ന് റോഡിൽ നിന്നും താഴെമാറിയാണ് 45 ലക്ഷം രൂപ ചെലവില്‍ നിര്‍മിച്ച കെട്ടിടം ഉള്ളത്. സൗന്ദര്യവത്കരണവും മറ്റും പൊടിപൊടിക്കുമ്പോഴാണ് വഴിയോര വിശ്രമ കേന്ദ്രം അധികൃതരുടെ അനാസ്ഥമൂലം നശിക്കുന്നത്. ഏറെ കൊട്ടിഘോഷിച്ച് ടൂറിസം വകുപ്പ് 2016ലാണ് ഇത് സ്ഥാപിച്ചത്. അന്ന് പ്രതിമാസം 18,000 രൂപയ്ക്ക് സ്ഥാപന നടത്തിപ്പ് സ്വകാര്യ വ്യക്തിക്ക് ഡിടിപിസി കരാർ നല്കി യെങ്കിലും നഗരസഭയും ഡിടിപിസിയും തമ്മിൽ പാർക്കിംഗ് ഫീസ് പിരിക്കുന്നതിനെ ചൊല്ലി തർക്കം ഉടലെടുത്തു. ഒരുവർഷം നടത്തിയ ശേഷം കരാറുകാരൻ പൂട്ടിപ്പോകുകയും ചെയ്തു. അന്നു മുതൽ 45 ലക്ഷം രൂപ ചെലവില്‍ നിര്‍മിച്ച കെട്ടിടം അനാഥമായി കിടക്കുകയാണ്. ഇതിനിടയില്‍ സ്ഥാപനം ഏറ്റെടുക്കാമെ ന്നും നാലുലക്ഷം രൂപയുടെ അറ്റകുറ്റപ്പണികൾ നടത്താമെന്നും നഗരസഭ അറിയിച്ചിരുന്നു. എന്നാൽ, കെട്ടിടം നിർമിച്ച ഏജൻസിക്കു മാത്രമേ അറ്റകുറ്റപ്പണി നടത്താൻ കഴിയുകയുള്ളുവെന്ന് നഗരസഭ എൻജിനിയറിംഗ് വിഭാഗം അറിയിച്ചതിനെ തുടർന്ന് തീരുമാനം പാതിവഴിയിലായി. നിർമാണത്തിലെ ക്രമക്കേടുകളെക്കുറിച്ച് വിജിലൻസ് അന്വേഷണം നടക്കുന്നതിനാൽ നിർമാണം നടത്തിയ ഏജൻസി അറ്റകുറ്റപ്പണിക്ക് തയാറായതുമില്ല. സംസ്ഥാനത്തുടനീളം ദേശീയ-സംസ്ഥാന പാതയോരങ്ങളിൽ ഇത്തരം സ്ഥാപനങ്ങൾ ആരംഭിക്കാനുള്ള പദ്ധതി കഴിഞ്ഞ യുഡിഎഫ് ഭരണകാല ത്താണ് ആരംഭിച്ചത്. ശൗചാലയം, കോഫി ഷോപ്പ്, എടിഎം, വിശ്രമമുറി എന്നിവ സ്ഥാപനത്തിൽ ആരംഭിക്കുമെന്നായിരുന്നു അധികൃതരുടെ വാഗ്ദാനം. എന്നാല്‍, ശൗചാലയം മാത്രമാണ് ഇവിടെ തുറന്നത്. ആ കെട്ടിടവും നശിക്കുകയാണ്. നൂറു കണക്കിന് യാത്രികർ എത്തുന്ന ശ്രീകണ്ഠപുരം ടൗണിന് ടേക്ക് എ ബ്രേക്ക് ഇന്ന് നാണക്കേടായി മാറുകയാണ്. കോട്ടൂർ പാലത്തോട് ചേർന്ന് ടൗൺ സ്ക്വയറിൽ വല്ലപ്പോഴും മാത്രമാണ് പൊതുപരിപാടികൾ നടക്കുന്നത്. അതിനാൽ കരാർ എടുത്തവർക്കും ഗുണം ലഭിക്കില്ല. ദീർഘവീക്ഷണമില്ലാതെയുള്ള നിർമാണവും കേന്ദ്രത്തിന് തിരിച്ചടിയായി.

പറക്കളായി കൂട്ട ആത്മഹത്യ: മരണം നാലായി

കാഞ്ഞങ്ങാട്: അമ്പലത്തറ പറക്കളായി ഒണ്ടാംപുളിയിലെ ഒരു കുടുംബത്തിലെ നാലുപേരും ആസിഡ് കഴിച്ച് ജീവനൊടുക്കാന്‍ ശ്രമിച്ച സംഭവത്തില്‍ ഇളയമകന്‍ രാഗേഷും (32) മരിച്ചു. ആന്തരാവയങ്ങള്‍ക്കും വായിലും ഗുരുതരമായി പൊള്ളലേറ്റ് പരിയാരത്തെ കണ്ണൂർ ഗവ.മെഡിക്കല്‍ കോളജില്‍ ചികിത്സയിലായിരുന്ന രാഗേഷ് ഇന്നലെ പുലര്‍ച്ചെയാണ് മരിച്ചത്. ഓഗസ്റ്റ് 28ന് പുലര്‍ച്ചെയാണ് രാഗേഷ് ഉള്‍പ്പെടെ നാലംഗ കുടുംബം ആസിഡ് കഴിച്ചത്.രാഗേഷിന്‍റെ അച്ഛന്‍ എം.ഗോപി (56), അമ്മ കെ.വി. ഇന്ദിര (54), ജ്യേഷ്ഠന്‍ രഞ്ജേഷ് (37) എന്നിവര്‍ സംഭവദിവസം മരിച്ചു.

കൊട്ടിയൂർ ബോയ്സ് ടൗൺ ചുരം പാതയിൽ വീണ്ടും മണ്ണിടിച്ചിൽ

കൊട്ടിയൂർ: കൊട്ടിയൂർ ബോയ്സ് ടൗൺ പാൽചുരം ചുരം പാതയിൽ വീണ്ടും മണ്ണിടിച്ചിൽ. ചെകുത്താൻ തോടിനു സമീപം നേരത്തെ മണ്ണിടിച്ചിലുണ്ടായ പ്രദേശത്തിന് തൊട്ടടുത്താണ് വീണ്ടും മണ്ണിടിഞ്ഞത്. മണ്ണും വലിയ പാറയും റോഡിലേക്ക് വീണു. ഇന്നലെ രാത്രി എട്ടോടെയാണ് മണ്ണിടിച്ചിൽ ഉണ്ടായത്. റോഡിന്‍റെ ഒരു വശത്തേക്ക് മണ്ണ് വീണെങ്കിലും ഗതാഗതം പൂർണമായി തടസപ്പെട്ടില്ല. രാത്രിയോടെ തന്നെ മണ്ണും പാറയും നീക്കി ഗതാഗതം പൂർണ സ്ഥിതിയിലാക്കി. മഴ തുടരുന്ന സാഹചര്യത്തിൽ വീണ്ടും പാറക്കൂട്ടങ്ങളും മണ്ണും ചുരത്തിൽ ഇടിയാൻ സാധ്യതയുള്ളതിനാൽ രാത്രികാല യാത്ര പരമാവധി ഒഴിവാക്കണമെന്ന് അധികൃതർ അറിയിച്ചു.

ശ്രീകണ്ഠപുരത്ത് ആശുപത്രിയിലെ അത്യാഹിത വിഭാഗത്തില്‍ തീപിടിത്തം: ഉപകരണങ്ങൾ കത്തിനശിച്ചു

ശ്രീകണ്ഠപുരം: സ്വകാര്യ ആശുപത്രിയിലെ അത്യാഹിത വിഭാഗത്തില്‍ തീപിടിത്തം. ഒരുലക്ഷം രൂപ വിലവരുന്ന ഉപകരണങ്ങൾ കത്തിനശിച്ചു. ശ്രീകണ്ഠപുരം ഐഎംസി ആശുപത്രിയില്‍ ഇന്നലെ പുലര്‍ച്ചെ 12.10നായിരുന്നു തീപിടിച്ചത്. അത്യാഹിത വിഭാഗത്തിലെ ഡെഫിബ്രിലേറ്റർ എന്ന ഉപകരണത്തിൽ നിന്നാണ് തീ പടർന്നതെന്ന് സംശയിക്കുന്നു. സംഭവസമയം അത്യാഹിത വിഭാഗത്തിൽ ആറ് രോഗികളും മൂന്ന് നഴ്‌സുമാരും ഒരു ഡോക്ടറുമാണ് ഉണ്ടായിരുന്നത്. ഉപകരണത്തിലുണ്ടായ ഷോർട്ട് സർക്യൂട്ടാണ് അപകടത്തിന് കാരണമെന്നാണ് നിഗമനം. തീയും പുകയും പടർന്നതോടെ ജീവനക്കാർ തീയണക്കാൻ ശ്രമിച്ചു. രോഗികളെ ഉടൻ മറ്റ് സ്ഥലത്തേയ്ക്ക് മാറ്റുകയും ചെയ്തു.വിരമറിയിച്ചതിനെത്തുടർന്ന് തളിപ്പറമ്പിൽ നിന്ന് ഫയർഫോഴ്‌സ് സംഘവും ശ്രീകണ്ഠപുരത്ത് നിന്ന് പോലീസും സ്ഥലത്തെത്തിയിരുന്നു. ഗ്രേഡ് അസി.സ്റ്റേഷന്‍ ഓഫീസര്‍ കെ.വി.സഹദേവന്‍ ഫയര്‍ ആൻഡ് റസ്‌ക്യൂ ഓഫീസര്‍മാരായ വൈശാഖ് പ്രകാശന്‍, പി. വിപിന്‍, സി. അഭിനേഷ്, ജി. കിരണ്‍, ഹോംഗാര്‍ഡുമാരായ വി. ജയന്‍, കെ. സജിത്ത് എന്നിവരുടെ നേതൃത്വത്തിലാണ് തീയണച്ചത്.

എൻഐആർഎഫ് റാങ്കിംഗിൽ നിർമലഗിരി കോളജ്

നിർമലഗിരി: കേന്ദ്ര വിദ്യാഭ്യാസ മന്ത്രാലയത്തിനു കീഴിലുള്ള നാഷണൽ ഇൻസ്റ്റിറ്റ്യൂഷണൽ റാങ്കിംഗ് ഫ്രെയിം വർക്ക് (എൻഐആർഎഫ്) പുറത്തിറക്കിയ ഏറ്റവും പുതിയ റാങ്കിംഗിൽ (2025) കണ്ണൂർ യൂണിവേഴ്സിറ്റിയുടെ കീഴിലുള്ള ഏക ഓട്ടോണമസ് കോളജായ നിർമലഗിരി കോളജ് മികച്ച നേട്ടം കൈവരിച്ചു. രാജ്യത്തെ മികച്ച കോളജുകളുടെ പട്ടികയിൽ 101-150 ബാൻഡിലാണ് കോളജ് ഈ വർഷവും ഇടം നേടിയത്. 2018 മുതൽ എൻഐആർഎഫ് ഉയർന്ന റാങ്കിംഗിൽ കോളജ് ഇടം നേടിയിട്ടുണ്ട്. കോളജിന്‍റെ അക്കാദമിക് മികവ്, ഗവേഷണ നേട്ടങ്ങൾ, പഠന സൗകര്യങ്ങൾ, പ്ലേസ്‌മെന്‍റ് സാധ്യതകൾ, സാമൂഹിക പ്രതിബദ്ധത തുടങ്ങിയ വിവിധ മാനദണ്ഡങ്ങളിലെ മികച്ച പ്രവർത്തനങ്ങളെ മുൻനിർത്തിയാണ് റാങ്കിംഗ്. വിദ്യാർഥികൾക്ക് ഗുണമേന്മയുള്ള വിദ്യാഭ്യാസം നല്കുന്നതിനുള്ള സ്ഥാപനത്തിന്‍റെ നിരന്തരമായ ശ്രമങ്ങളെയാണ് റാങ്കിംഗ് അംഗീകരിക്കുന്നത്. ഈ നേട്ടം സ്ഥാപനത്തിലെ അധ്യാപകർക്കും അഡ്മിനിട്രേറ്റീവ് അംഗങ്ങൾക്കും വിദ്യാർഥികൾക്കും പൂർവ വിദ്യാർഥികൾക്കും മാനേജ്‌മെന്‍റിനും അഭിമാനകരമാണെന്ന് കോളജ് പ്രിൻസിപ്പൽ ഡോ. സിസ്റ്റർ സെലിൻ മാത്യു അറിയിച്ചു.

ഗതാഗതക്കുരുക്കിൽപ്പെട്ട കാറിൽ നിന്നിറങ്ങിയ ഗൃഹനാഥൻ വളപട്ടണം പുഴയിൽ ചാടി

കണ്ണൂർ: വളപട്ടണം പാലത്തിൽ ഗതാഗതക്കുരുക്കിൽപ്പെട്ട കാറിൽ നിന്ന് ഇറങ്ങിയ ഗൃഹനാഥൻ പുഴയിൽ ചാടി. കുടുംബാംഗങ്ങൾക്കൊപ്പം കാറിൽ സഞ്ചരിക്കുകയായിരുന്ന കീച്ചേരി സ്വദേശി ഗോപിനാഥ (63) നാണ് പുഴയിൽ ചാടിയത്. ഇന്നലെ വൈകുന്നേരമാണ് സംഭവം. ഹൈവേ പാലത്തി നടുത്ത് കാർ ട്രാഫിക് ജാമിൽ കുടുങ്ങിയപ്പോഴാണ് സംഭവം. ഈ സമയം ഇദ്ദേഹത്തിന്‍റെ കുടുംബാംഗങ്ങൾ കാറിലുണ്ടായിരുന്നു. അവർക്ക് തടയാൻ കഴിയുന്നതിന് മുന്പുതന്നെ ഗോപിനാഥ് പാലത്തിന്‍റെ കൈവരി മറികടന്ന് പുഴയിൽ ചാടുകയായിരുന്നു. വയറ്റിലെ അസുഖത്തിന് ചികിത്സ തുടരുന്ന ഗോപിനാഥൻ മാനസികമായി ഏറെ പ്രയാസത്തിലായിരുന്നുവെന്നു പറയുന്നു. ആശുപത്രിയിൽനിന്ന് വീട്ടിലേക്ക് മടങ്ങുന്നതിനിടെയാണ് പുഴയിൽ ചാടിയത്. നേരത്തെ പ്രവാസിയായിരുന്ന ഗോപിനാഥൻ ഇപ്പോൾ റിയൽ എസ്റ്റേറ്റ് മേഖലയിൽ പ്രവർത്തിക്കുകയായിരുന്നു.നാട്ടുകാർ വിവരമറിയിച്ചതിനെ തുടർന്ന് കണ്ണൂരിൽ നിന്ന് ഫയർഫോഴ്സും വളപട്ടണം പോലിസും. കോസ്റ്റ് ഗോർഡും സ്ഥലത്തെത്തി രാത്രി വൈകും വരെ പുഴയിൽ തെരച്ചിൽ നടത്തിയെങ്കിലും കണ്ടെത്താനായില്ല. ശക്തമായ മലവെള്ളപ്പാച്ചിലും അടിയൊഴുക്കും തെരച്ചിലിന് തിരിച്ചടിയായിരുന്നു. ഇന്ന് വീണ്ടും തെരച്ചിൽ പുനരാരംഭിക്കും.

ഇരിണാവിൽ വീടിനുനേരെ ബോംബേറ്: പ്രതികളെക്കുറിച്ച് സൂചന; കാറും തിരിച്ചറിഞ്ഞു

പഴയങ്ങാടി: ഇരിണാവിൽ വീടിനുനേരേ ബോംബേറ്. ബുധനാഴ്ച ഉച്ചകഴിഞ്ഞ് മൂന്നോടെ ഇരിണാവ് കച്ചേരിത്തറയ്ക്ക് സമീപം പടപ്പിൽ സുബൈദയുടെ വീടിനുനേരേയാണ് ബോംബേറുണ്ടായത്. ഉഗ്ര സ്ഫോടനത്തിൽ രണ്ട് ബോംബുകളാണ് വീട്ടുമുറ്റത്ത് നിന്ന് പൊട്ടിത്തെറിച്ചത്. ഗൃഹനാഥയുടെ നിലവിളിയിൽ നാട്ടുകാരും ഭയചകിതരായി. 200 മീറ്റർ കൂടുതൽ ദൂരത്തിൽ സ്ഫോടനത്തിന്‍റെ അലയൊലികൾ കേട്ടതായി നാട്ടുകാർ പറഞ്ഞു. വീടിനുനേരേ ബോംബേറിഞ്ഞ കേസിലെ പ്രതികളെക്കുറിച്ച് കണ്ണപുരം പോലീസിന് സൂചന ലഭിച്ചു. സംഭവത്തിൽ രണ്ടുപേർക്കെതിരേ കേസെടുത്തിരുന്നു. പ്രധാന റോഡിൽ കാറിൽ എത്തിയ സംഘം ഏറെ അകലെയല്ലാത്ത വീട്ടിലേക്ക് നടന്ന് എത്തിയാണ് ബോംബെറിഞ്ഞത്. സംഭവം നടക്കുന്പോൾ സുബൈദ മാത്രമാണ് വീട്ടിലുണ്ടായിരുന്നത്. അക്രമികളുടെ കൈയിൽ തോക്ക് ഉണ്ടായിരുന്നതായി നാട്ടുകാർ പറഞ്ഞു. അക്രമം നടന്ന വീടിന് സമീപത്തെ സ്ഥലങ്ങളിലെ സിസിടിവി ദൃശ്യം പരിശോധിച്ചതിൽ നിന്നാണ് കാറിലെത്തിയ രണ്ടുപേരാണ് അക്രമം നടത്തിയതെന്ന് വ്യക്തമായത്. ഇതിൽ ഒരാളെയും പ്രതികളെ ത്തിയ കാറും പോലീസ് തിരിച്ചറിഞ്ഞു. ആക്രമണത്തിന് പിന്നിലുള്ള കാരണങ്ങൾ വിശദമായി പരിശോധിച്ചുവരികയാണെന്ന് അന്വഷണ ചുമതലയുള്ള കണ്ണപുരം എസ്എച്ച്ഒ പറഞ്ഞു. സ്ഥലത്ത് ബോംബ് സ്ക്വാഡ്, ഡോഗ് സ്ക്വാഡ്, ഫോറൻസിക് എന്നിവർ സ്ഥലെത്തെത്തി പരിശോധന നടത്തി. സുബൈദയുടെ പരാതിയിലാണ് കണ്ടാലറിയാവുന്ന രണ്ടുപേർക്കെതിരേ കണ്ണപുരം പോലീസ് കേസെടുത്ത് അന്വേഷണമാരംഭിച്ചത്.

മലബാർ കാത്തലിക് ബിഷപ്സ് കോൺഫറൻസ് നടത്തി

താമരശേരി: ഉത്തരകേരള (മലബാർ) കാത്തലിക് ബിഷപ്സ് കോൺഫറൻസ് താമരശേരി മേരി മാതാ കത്തീഡ്രലിൽ നടന്നു. രണ്ടു ദിവസങ്ങളിലായി നടന്ന കോൺഫറൻസിൽ ഇന്നലെ രാവിലെ നടന്ന ദിവ്യബലിയിൽ മാനന്തവാടി രൂപത സഹായമെത്രാൻ മാർ അലക്സ് താരാമംഗലം മുഖ്യകാർമികത്വം വഹിച്ചു. ബത്തേരി രൂപത അധ്യക്ഷൻ ജോസഫ് മാർ തോമസ് വചന സന്ദേശം നൽകി. തലശേരി അതിരൂപത ആർച്ച്ബിഷപ് മാർ ജോസഫ് പാംപ്ലാനി, താമരശേരി രൂപത അധ്യക്ഷൻ മാർ റെമീജിയോസ് ഇഞ്ചനാനിയിൽ, കോഴിക്കോട് അതിരൂപത ആർച്ച്ബിഷപ് ഡോ. വർഗീസ് ചക്കാലയ്ക്കൽ, കണ്ണൂർ രൂപത ബിഷപ് ഡോ. അലക്സ് വടക്കുംതല, സഹായമെത്രാൻ ഡോ. ഡെന്നിസ് കുറുപ്പശേരി, മാനന്തവാടി രൂപതാധ്യക്ഷൻ മാർ ജോസ് പൊരുന്നേടം, കോട്ടയം രൂപത സഹായമെത്രാൻ മാർ ജോസഫ് പണ്ടാരശേരിൽ, ആർച്ച്ബിഷപ് എമരിറ്റസുമാരായ മാർ ജോർജ് വലിയമറ്റം, മാർ ജോർജ് ഞറളക്കാട്ട് എന്നിവർ സഹകാർമികത്വം വഹിച്ചു. തുടർന്ന് നടന്ന യോഗത്തിൽ കണ്ണൂർ രൂപത ബിഷപ് ഡോ. അലക്സ് വടക്കുംതല അധ്യക്ഷത വഹിച്ചു. താമരശേരി രൂപത ചാൻസിലർ ഫാ. സെബാസ്റ്റ്യൻ കവളക്കാട്ട്, പ്രൊക്കുറേറ്റർ ഫാ. ജോർജ് മുണ്ടനാട്ട്, താമരശേരി മേരി മാതാ കത്തീഡ്രൽ വികാരി ഫാ. തോമസ് ചിലമ്പിക്കുന്നേൽ എന്നിവർ നേതൃത്വം നൽകി.

മകളെ കൊല്ലാന്‍ ശ്രമിച്ച അച്ഛൻ അറസ്റ്റിൽ

പയ്യന്നൂര്‍: മകളെ ക്രൂരമായി മര്‍ദിക്കുകയും കൊലപ്പെടുത്താന്‍ ശ്രമിക്കുകയും ചെയ്ത അച്ഛനെ പയ്യന്നൂര്‍ പോലീസ് അറസ്റ്റു ചെയ്തു. കരിവെള്ളൂര്‍ പാലത്തറയിലെ അശ്വിനിയുടെ പരാതിയില്‍ വധശ്രമമുള്‍പ്പെടെയുള്ള വകുപ്പുകളില്‍ കേസെടുത്തതിനെ തുടര്‍ന്നാണ് അച്ഛൻ കെ.വി. ശശിയെ (55) പോലീസ് ചെയ്തത്. തിങ്കളാഴ്ച രാത്രി എട്ടരയോടെയാണ് മകളുടെ പരാതിക്കാസ്പദമായ സംഭവം. അമ്മയെ ഉപദ്രവിക്കുന്നത് കണ്ട് ചോദ്യം ചെയ്തതില്‍ പ്രകോപിതനായ അച്ഛന്‍ മകളെ കൊല്ലുമെന്ന് ഭീഷണിപ്പെടുത്തുകയും കൈയിലുണ്ടായിരുന്ന വാളുകൊണ്ട് വെട്ടാന്‍ ശ്രമിച്ചതായും പരാതിയില്‍ പറയുന്നു. വാളുകൊണ്ടുള്ള വെട്ട് കൈകൊണ്ട് തടുക്കാനായതിനാലാണ് മരണം സംഭവിക്കാതിരുന്നതെന്ന് പരാതിയിലുണ്ട്. കാലുകൊണ്ട് ചവിട്ടിയും മുടിക്ക് കുത്തിപ്പിടിച്ച് ദേഹോപദ്രവമേല്‍പ്പിച്ചതിലും പരിക്കേറ്റ് ചെറുവത്തൂര്‍ സ്വകാര്യ ആശുപത്രിയില്‍ ചികിത്സയില്‍ കഴിയുന്ന പരാതിക്കാരി പോലീസിന് നല്‍കിയ മൊഴിയുടെ അടിസ്ഥാനത്തിലാണ് കേസെടുത്തിരുന്നത്.

മാതാപിതാക്കൾ വഴക്കിട്ടു; ഇരിട്ടിയിൽനിന്ന് പിണങ്ങിപ്പോയ പതിനഞ്ചുകാരി തൃശൂരിൽ

ഇരിട്ടി: മാതാപിതാക്കൾ വഴക്കിട്ടതിനെ തുടർന്ന് പിണങ്ങി പോയ പതിനഞ്ചുകാരിയെ ഇന്നലെ പുലർച്ചെ 1.30 ഓടെ തൃശൂർ റെയിൽവേ സ്റ്റേഷനിൽ നിന്ന് കണ്ടെത്തി. ഇരിട്ടിയിലാണ് സംഭവം.ബുധനാഴ്ച ഉച്ചകഴിഞ്ഞ് മൂന്നുമുതലാണ് കുട്ടിയെ കാണാതായത്. കുട്ടിയെ കാണാതായെന്ന് മനസിലായതോടെ മാതാപിതാക്കൾ പോലീസിൽ പരാതി നൽകി. തുടർന്ന് പോലീസും സോഷ്യൽ മീഡിയയും ഒരുപോലെ ഉണർന്ന് പ്രവർത്തിച്ചു. കുട്ടിയെ പല ബസ് സ്റ്റോപ്പുകളിലും കണ്ടതായി പോലീസിന് വിവരം ലഭിച്ചെങ്കിലും കണ്ടെത്താനായില്ല. തുടർന്നാണ് പുലർച്ചെ 1.30 ഓടെ തൃശൂർ റെയിൽവേ പോലീസ് കുട്ടിയെ കണ്ടെത്തുന്നതും പോലീസിനെ വിവരം അറിയിക്കുന്നതും. മാതാപിതാക്കൾ തമ്മിലുള്ള വഴക്കിൽ മനംനൊന്താണ് കുട്ടി വീട്ടുകാരോട് പറയാതെ തൃശൂരിലുള്ള അമ്മയുടെ ബന്ധുവിന്‍റെ വീട്ടിലേക്ക് പോയതെന്നാണ് ലഭിക്കുന്ന വിവരം. എന്തായാലും കുട്ടിയെ തിരിച്ചുകിട്ടിയതിന്‍റെ ആശ്വാസത്തിലാണ് ബന്ധുക്കളും നാട്ടുകാരും. തൃശൂരിൽ എത്തുന്ന ബന്ധുക്കൾക്ക് കുട്ടിയെ കൈമാറി. ഓണത്തിരക്കിൽ അധികമാരുടെയും ശ്രദ്ധയിൽപ്പെടാതെ കുട്ടി തൃശൂർവരെ എത്തുകയായിരുന്നു. പുലർച്ചെ റെയിൽവേ സ്റ്റേഷനിൽ തനിച്ചൊരു പെൺകുട്ടിയെ കണ്ട് സംശയം തോന്നിയ റെയിൽവേ പോലീസ് കുട്ടിയോട് കാര്യങ്ങൾ തിരക്കുകയായിരുന്നു.

തിരക്കിലമർന്ന് ഉത്രാടം; ഇന്ന് തിരുവോണം

കണ്ണൂർ: ഇരുണ്ട കാർമേഘങ്ങളോ, കനത്ത മഴയോ ഓണക്കാഴ്ചകൾക്ക് ഒട്ടും മങ്ങലേൽപ്പിച്ചില്ലതിരുവോണസദ്യക്കായി സാധനങ്ങള്‍ വാങ്ങാനും പൂക്കളും പുതുവസ്ത്രവും സ്വന്തമാക്കാനും ഇത്തവണ കണ്ണൂർ നഗരത്തിലടക്കം വലിയ തിക്കും തിരക്കുമാണ് ഉത്രാടദിവസം കാണാനായത്. മഴയേയും ആഘോഷമാക്കുന്ന തിരക്കാണ് ഉത്രാടം നാളിൽ കണ്ണൂർ നഗരത്തിലടക്കം ദൃശ്യമായത്. മനസ് നിറഞ്ഞ ഷോപ്പിംഗ് കഴിയുമ്പോള്‍ കീശകാലിയാകുന്ന ദിനം കൂടിയാണ് ഉത്രാടമെന്ന് പറയാം. ഉത്രാടനാളില്‍ വിപണി രാത്രി വൈകും വരെ സജീവമായിരുന്നു. പച്ചക്കറി കടകളിലും പലവ്യഞ്ജന കടകളിലും തുണിക്കടകളിലും നിന്നു തിരിയാനാവാത്ത തിരക്ക്. കാശുപോയാലും വേണ്ടില്ല കാര്യം നടക്കട്ടെയെന്ന് വേവലാതിപ്പെടുന്ന മലയാളിയുടെ ദിനം. പണ്ട് ഗ്രാമച്ചന്തകളിലെ തിരക്കായിരുന്നു ഉത്രാടപാച്ചിലെങ്കില്‍ ഇന്നത് നഗരങ്ങളിലേക്ക് മാറിയിട്ടുണ്ട്. മാളുകള്‍ ഉത്രാടപാച്ചിലിന്‍റെ പുത്തന്‍ ഇടങ്ങളായും മാറിക്കഴിഞ്ഞു. ഒരു കരുതല്‍ മനസിലുള്ളതിനാല്‍ ഓണ്‍ലൈന്‍ വ്യാപാരവും തകര്‍ക്കുകയാണ്. ഓര്‍ഡര്‍ കിട്ടിയ സാധനങ്ങളുമായി ഉപഭോക്താക്കളുടെ വീടുതേടി പോകുന്ന കച്ചവടക്കാരുടെ ന്യൂജന്‍ കച്ചവടത്തിന്‍റെ ഉത്രാടപാച്ചിലാകും വരും കാലം. വിപണി വീട്ടിലേക്ക് എത്തും കാലം. എങ്കിലും നഗരത്തിലെ ഷോപ്പിംഗ് മാമാങ്കത്തിന് ഇത്തവണയും ഒരു കുറവും വന്നിട്ടില്ല. പൂക്കളമൊരുക്കിയും ആഘോഷങ്ങളുമായും ഓണം കളറാക്കുകയാണ് മലയാളി. ഉത്രാടം നാളിൽ ജനം ഒഴുകി എത്തിയതോടെ നാടും നഗരവും ഓണത്തിരക്കിലമർന്നു. എങ്ങും ഓണ ലഹരിയാണ്. മഴ മാറി മാനം തെളിയുന്ന ഇടവേള നോക്കിയാണ് കുടുംബാംഗങ്ങൾ പുറത്തിറങ്ങുന്നത്. എന്നാൽ പിന്നീടുള്ള മഴയെക്കുറിച്ചറിയാതെ മലയാളി ഓണത്തിമർപ്പിലാണ്.

ബൈക്ക് വൈദ്യുത പോസ്റ്റിലിടിച്ച് യുവാവ് മരിച്ചു

മയ്യിൽ: ബൈക്ക് വൈദ്യുത പോസ്റ്റിലിടിച്ച് യുവാവ് മരിച്ചു. പാറാൽ പള്ളിയത്തെ പള്ളിയത്ത്പറമ്പിൽ ഹൗസിൽ സമീർ- ഖദീജ ദന്പതികളുടെ മകൻ എം.കെ. നിഹാലാണ് (21) മരിച്ചത്. ബുധനാഴ്ച രാത്രി പള്ളിയത്തായിരുന്നു അപകടം. നബിദിനത്തിനോടനുബന്ധിച്ച് പടന്നോട്ട് വിദ്യാർഥികളെ ദഫ് പഠിപ്പിച്ച് വീട്ടിലേക്ക് മടങ്ങുകയായിരുന്നു നിഹാൽ. ഗുരുതരമായി പരിക്കേറ്റ നിഹാലിനെ കണ്ണൂർ എകെജി ആശുപത്രിയിൽ എത്തിച്ചെങ്കിലും രക്ഷിക്കാനായില്ല. എസ്കെഎസ്എസ്എഫ് പള്ളിയത്ത് ശാഖാ മുൻ സർഗലയം സെക്രട്ടറിയായ നിഹാൽ കൊയ്യോട്ടുപാലം ശ്രുതി ലൈറ്റ് ആൻഡ് സൗണ്ട് ജീവനക്കാരനാണ്. സഹോദരി: നിദ ഫാത്തിമ.

കാറിനുള്ളിൽ യുവാവ് കുഴഞ്ഞുവീണ് മരിച്ചു

ചെറുപുഴ: കാറിനുള്ളിൽ യുവാവ് കുഴഞ്ഞുവീണ് മരിച്ചു. ഇടവരമ്പിലെ പുത്തൻപുരയ്ക്കൽ (കങ്ങഴ) സന്തോഷ്-മിനി ദന്പതികളുടെ മകൻ സിനോയാണ് (31) മരിച്ചത്. ഇന്നലെ രാവിലെ എട്ടോടെയായിരുന്നു സംഭവം. വീട്ടിൽനിന്ന് പള്ളിയിലേക്ക് കാറിൽ പോകുമ്പോൾ കാറിനുള്ളിൽ കുഴഞ്ഞുവീഴുകയായിരുന്നു. മൃതദേഹം പരിയാരത്തെ കണ്ണൂർ ഗവ. മെഡിക്കൽ കോളജ് മോർച്ചറിയിൽ. സഹോദരൻ: സിജോ. സംസ്കാരം ഇന്ന് രണ്ടിന് കോഴിച്ചാൽ സെന്‍റ് ജോർജ് യാക്കോബായ പള്ളിയിൽ.

പെയിന്‍റിംഗ് ജോലിക്കിടെ കെട്ടിടത്തിൽനിന്ന് കുഴഞ്ഞുവീണ യുവാവ് മരിച്ചു

വളപട്ടണം: നാറാത്ത് പള്ളിപ്പറമ്പിൽ പെയിന്‍റിംഗ് ജോലിക്കിടെ കെട്ടിടത്തിൽനിന്ന് കുഴഞ്ഞുവീണു ഗുരുതരമായി പരുക്കേറ്റ യുവാവ് ചികിത്സയ്ക്കിടെ മരിച്ചു. പള്ളിപ്പറമ്പ് കായച്ചിറ മേക്കര വീട്ടിൽ നൂറുദീനാണ് (37) മരിച്ചത്. കഴിഞ്ഞ ഒരാഴ്ചയോളമായി കണ്ണൂർ എകെജി സഹകരണ ആശുപത്രി യിൽ അതിതീവ്ര പരിചരണ വിഭാഗത്തിൽ ചികിത്സയിലായിരുന്നു. മുസ്‌ലിം ലീഗ് കായച്ചിറ ശാഖാ പ്രവർത്തകനാണ്. അബ്ദുറഹ്മാൻ - കായച്ചിറ മേക്കര വീട്ടിൽ ഫാത്തിമ ദമ്പതികളുടെ മകനാണ്. ഭാര്യ: ജുമൈല മക്കൾ: നൂഹ്, നൈസാൻ. സഹോദരങ്ങൾ: സിദ്ധിഖ്, ഷംസുദ്ദീൻ, സുമയ്യ, കുഞ്ഞായിഷ.

രാജവെന്പാലയെ പിടികൂടി

ഇരിട്ടി: മണിക്കടവ് പീടികകുന്നിലെ വീട്ടുപറന്പിൽ നിന്ന് രാജവെന്പാലയെ പിടികൂടി. സിബി മൈക്കിളിന്‍റെ വീട്ടുപറന്പിലെ മരത്തിന്‍റെ സമീപത്താണ് ചൊവ്വാഴ്ച രാജവെന്പാലയെ കണ്ടത്. ഉടൻ വനംവകുപ്പിന്‍റെ താത്കാലിക ജോലിക്കാരനും മാക് പ്രവർത്തകനുമായ ഫൈസൽ വിളക്കോടിനെ വിവരം അറിയിക്കുകയായിരുന്നു. ഫൈസലും സഹായി ശശീന്ദ്രൻ വെളിയമ്പറയും സ്ഥലത്തെത്തി മരത്തിന്‍റെ വേരുകൾക്ക് ഇടയിൽ കയറി രക്ഷപ്പെടാൻ ശ്രമിച്ച രാജവെമ്പാലയെ സാഹസികമായാണ് പിടികൂടിയത്. രാജവെമ്പാലയെ പിന്നീട് അതിന്‍റെ ആവാസ വ്യവസ്ഥയിൽ തുറന്നുവിട്ടു. മൂന്നുവർഷത്തെ സേവനത്തിൽ ഫൈസൽ 92 ഓളം രാജവെന്പാലയെ പിടികൂടിയിട്ടുണ്ട്.

മട്ടന്നൂരിൽ അന്താരാഷ്‌ട്ര നിലവാരമുള്ള സ്പോർട്സ് കോംപ്ലക്സ് വരുന്നു

മട്ടന്നൂർ: മട്ടന്നൂരിൽ സ്പോർട്സ് കോംപ്ലക്സ് നിർമിക്കുന്നതിന് കിഫ്ബിയിൽ നിന്നും 23 കോടി രൂപയുടെ ഡിപിആറിന് മന്ത്രിസഭാ യോഗം ഭരണാനുമതി നല്കി. മട്ടന്നൂർ നഗരസഭയിൽ അയ്യല്ലൂർ റോഡിൽ കനാലിന് സമീപം ഇറിഗേഷനിൽ നിന്ന് വിട്ടുകിട്ടിയ 3.90 ഏക്കർ ഭൂമിയിലാണ് സ്പോർട്സ് കോംപ്ലക്സ് നിർമിക്കുന്നത്. ഒന്നാംഘട്ടത്തിൽ ഇൻഡോർ സ്റ്റേഡിയവും പ്ലെയേഴ്സ് റൂമും അനുബന്ധ സൗകര്യങ്ങളുമാണ് ഉള്ളത്. ബാസ്കറ്റ്ബോൾ, വോളിബോൾ, ബാഡ്മിന്‍റൺ കോർട്ടുകൾ, ഫിറ്റ്നസ് സെന്‍റർ, 2600 ഓളം പേർക്ക് ഇരിക്കാൻ കഴിയുന്ന സ്റ്റേഡിയം എന്നിവ ഒന്നാംഘട്ടത്തിൽ നിർമിക്കും. രണ്ടാംഘട്ടത്തിൽ സ്വിമ്മിംഗ് പൂൾ ഉൾപ്പെടെയുള്ള അക്വാട്ടിക് കോംപ്ലക്സ് എന്നിവ നിർമിക്കും. മട്ടന്നൂർ നിയോജക മണ്ഡലത്തിൽ കെ.കെ. ശൈലജ എംഎൽഎയുടെ നേതൃത്വത്തിൽ നടത്തുന്ന തരംഗം സമഗ്ര വിദ്യാഭ്യാസ പദ്ധതിയുടെ ഭാഗമായി കായിക മേഖലയിൽ കൂടുതൽ വിദ്യാർഥികളെ കാര്യക്ഷമമായി പരിശീലിപ്പിക്കുന്നതിന്‍റെ ഭാഗമായാണ് കളിസ്ഥലങ്ങളും കോച്ചിംഗ് സെന്‍ററുകളും ആരംഭിക്കുന്നത്. ഇതിന്‍റെ ഭാഗമായി 2024ൽ തയാറാക്കി സമർപ്പിച്ച ഡിപിആറിനാണ് അംഗീകാരമായത്. വിമാനത്താവളം ഉൾപ്പെടെ സാധ്യതകൾ വിനിയോഗിച്ചു കായിക മേഖലയിലെ പ്രഗത്ഭരായ വ്യക്തികളെ ഉൾപ്പെടെ ഉപയോഗിച്ചു പരിശീലനം സംഘടിപ്പിക്കാൻ സ്പോർട്സ് കോംപ്ലക്സ് യാഥാർഥ്യമാകുന്നതിലൂടെ സാധിക്കുമെന്ന് കെ.കെ. ശൈലജ എംഎൽഎ പറഞ്ഞു.

സേവന സന്നദ്ധരായി അവധിനാളിലും എൻഎസ്എസ് വോളന്‍റിയർമാർ

ഉളിക്കൽ: സെന്‍റ് തോമസ് ഹയർ സെക്കൻഡറി സ്കൂളിലെ എൻഎസ്എസ് വോളന്‍റിയർമാർ അവധിനാളിലും സേവനവുമായി രംഗത്ത്. ഇവർ സമാഹരിച്ച പൊതിച്ചോർ, അരി, പച്ചക്കറി, സോപ്പ്, സോപ്പുപൊടി, ക്ലീനിംഗ് ലോഷൻ എന്നിവ കുട്ടികൾ വിളമന പ്രൊവിഡൻസ് ഹോമിലെത്തി കൈമാറി. അന്തേവാസികൾക്കൊപ്പം ഓണപ്പാട്ടുകൾ പാടിയും നൃത്തം ചെയ്തും കുശലം പറഞ്ഞും വോളന്‍റിയർമാർ സമയം ചെലവഴിച്ചു. അലോണ റോസ് ലിഞ്ചു, ഈവ ആൻ ബിജു, ആദിയമരിയ, ആഷ്‌ലിയ, ഹെൻട്രി സിബി, ക്രിസ്റ്റോ ബിനു, വോളന്‍റിയർ ലീഡർ ടിയ ജേക്കബ് തുടങ്ങിയവർ നേതൃത്വം നല്കി.

മഴയിൽ കുതിർന്ന് ഓണം വിപണി

ഇരിട്ടി: കനത്ത മഴ പൂക്കച്ചവടക്കാരെയും വഴിയോര കച്ചവടക്കാരെയുമാണ് പ്രതിസന്ധിയിലാക്കിയത്. ഓണം വിപണി ലക്ഷ്യമാക്കി ഇതര സംസ്ഥാനത്തു നിന്നും വൻതോതിൽ പൂവിറക്കി കച്ചവടം നടത്തുന്നവരുടെ പ്രതീക്ഷകൾ മഴയെടുത്തു. മഴയത്ത് പൂക്കൾ നശിക്കാതിരിക്കാൻ പ്ലാസ്റ്റിക് ഷീറ്റുകൾ വിരിച്ച് പുതച്ചാണ് കച്ചവടക്കാർ പൂക്കളെ താത്കാലികമായി സംരക്ഷിച്ചത്. മഴ അല്പസമയം മാറിയതോടെ വിപണിയെ സജീവമാക്കിയെങ്കിലും ഇടവിട്ട് പെയ്ത മഴ കച്ചവടത്തെ പ്രതികൂലമാക്കി. നഗരത്തിന്‍റെ പലഭാഗങ്ങളിലും രൂപപ്പെട്ടവെള്ളക്കെട്ടും വാഹനങ്ങൾ പാർക്ക് ചെയ്യാൻ സ്ഥലമില്ലാത്തതും ഗതാഗതക്കുരുക്കും ഓണവിപണിയെ ബാധിച്ചു.

തന്‍റെ വാർഡിലെ എല്ലാ വീടുകളിലും ഓണസദ്യയൊരുക്കാൻ പച്ചക്കറിയുമായി കൗൺസിലർ കെ.വി. കുഞ്ഞിരാമൻ

ശ്രീകണ്ഠപുരം: നഗരസഭയിലെ ഒരു കൗൺസിലറുടെ വീട്ടുമുറ്റത്തെ കാഴ്ചകൾ കണ്ടാൽ പച്ചക്കറിച്ചന്തപോലും തോറ്റുപോകും. നല്ല നാടൻചേന, കൂട്ട് കറിക്ക് വേണ്ട നാടൻ നേന്ത്രക്കായ എന്നു തുടങ്ങി വിപണിയിലെ എല്ലാത്തരം പച്ചക്കറികളും കൗൺസിലറുടെ വീട്ടമുറ്റത്ത് ഒരു ഉത്സവച്ചന്തമാണ് സൃഷ്ടിക്കുന്നത്. തന്‍റെ വാർഡിലെ എല്ലാ വീടുകളിലേക്കും ഓണസദ്യക്കുള്ള പച്ചക്കറി എത്തിക്കുന്ന തിരക്കിലാണ് നഗരസഭാ നിടിയേങ്ങ വാർഡ് കൗൺസിലർ കെ.വി. കുഞ്ഞിരാമൻ. ഉത്രാടത്തിന് മുന്പായി പച്ചക്കറികൾ തന്‍റെ വാർഡിലെ മുഴുവൻ വീടുകളിലും പാക്കറ്റുകളിലാക്കി എത്തിച്ചു കഴിഞ്ഞു. അധ്യാപകനായിരുന്ന അദ്ദേഹത്തിന് വാർഡ് വികസന സമിതി അംഗങ്ങളും സഹപ്രവർത്തകരും കൂടി പിന്തുണ നൽകിയപ്പോൾ സാധാരണക്കാരന്‍റെ ഓണാഘോഷത്തിന് വലിയ ഒരു ചേർത്തു നിർത്തൽ കൂടിയാണ് കൗൺസിലറുടെ ഈ ഇടപെടൽ. പച്ചക്കറികൾക്കെല്ലാം പൊള്ളുന്ന വിലയാണെങ്കിലും, നേന്ത്രവാഴയും, ചേനയും എല്ലാം ഇവരുടെ കൂട്ടായ കൃഷിയിൽ നിന്ന് ലഭിച്ച ഉത്പന്നമാണ്. ഇതിനായി ഒന്നര ഏക്കറോളം കൃഷി ഇവർ ഇറക്കി, തൊഴിലുറപ്പ് തൊഴിലാളികളും കൈമെയ് മറന്ന് അധ്വാനിച്ചാണ് കൃഷി ചെയ്തത്. വാർഡിന് പുറത്തുള്ള രണ്ട് തൊഴിലുറപ്പുകാർക്കും മാഷിന്‍റെ ഈ ഓണകിറ്റ് എത്തും. തികച്ചും ജൈവവളകൃഷിയിലൂടെ വിഷരഹിത നാടൻ ഇനങ്ങളാണ് ചേനയും, നേന്ത്രവാഴക്കായയും. കൗൺസിലർക്ക് ലഭിക്കുന്ന ഓണറേറിയം അടക്കമുള്ള തുകയും മറ്റുള്ളവരുടെ സാമ്പത്തിക സഹായവും സ്വരൂപിച്ചാണ് കുഞ്ഞിരാമൻ ഇതിനായുള്ള ഫണ്ട് കണ്ടെത്തുന്നത്. മുറ്റം നിറയെ മൈസൂരുവിൽ നിന്നും കുഞ്ഞിരാമൻ നേരിട്ട് ചെന്ന് സ്വരൂപിച്ചതാണ് പച്ചക്കറികൾ. പച്ചക്കറിക്കിറ്റുകളിലാക്കി വീടുകളിൽ വിതരണം ചെയ്യുന്ന ചടങ്ങിന്‍റെ ഉദ്ഘാടനം നഗരസഭാധ്യക്ഷ കെ.വി. ഫിലോമിന നിർവഹിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]