ടി.യു. കുരുവിളയുടെ നവതി ആഘോഷിച്ചു

കോതമംഗലം: മുൻ മന്ത്രി ടി.യു. കുരുവിളയുടെ നവതി ആഘോഷം കേരള കോൺഗ്രസ് സംസ്ഥാന കോർഡിനേറ്റർ അപു ജോൺ ജോസഫ് ഉദ്ഘാടനം ചെയ്തു. കേരള കോൺഗ്രസ് കോതമംഗലം നിയോജകമണ്ഡലം കമ്മിറ്റിയുടെ ആഭിമുഖ്യത്തിൽ ടി.യു. കുരുവിളയെ ആദരിച്ചു.

എ.ടി.പൗലോസിന്‍റെ അധ്യക്ഷതയിൽ ചേർന്ന അനുമോദന യോഗത്തിൽ ജില്ലാ പ്രസിഡന്‍റ് ഷിബു തെക്കുംപുറം, ജോമി തെക്കേക്കര, റോയി സ്കറിയ, സി.കെ സത്യൻ, റാണിക്കുട്ടി ജോർജ് തുടങ്ങിയവർ പങ്കെടുത്തു.

ADVERTISEMENT

കോളജ് യൂണിയന്‍ തെരഞ്ഞെടുപ്പ് : ജില്ലയില്‍ എസ്എഫ്‌ഐയ്ക്ക് മുൻതൂക്കം

തേവര എസ്എച്ചും ആലുവ യുസിയും മൂവാറ്റുപുഴ നിർമലയും നിലനിര്‍ത്തി കെഎസ്‌യു കൊച്ചി: എംജി സര്‍വകലാശാലയ്ക്ക് കീഴിലുള്ള കോളജ് യൂണിയന്‍ തെരഞ്ഞെടുപ്പില്‍ ജില്ലയില്‍ എസ്എഫ്‌ഐയ്ക്ക് മുൻതൂക്കം. തെരഞ്ഞെടുപ്പ് നടന്ന 41 കോളജുകളില്‍ 31 ഇടത്ത് എസ്എഫ്‌ഐ വിജയിച്ചതായി ഭാരവാഹികള്‍ അവകാശപ്പെട്ടു. അതേസമയം 14 ഇടങ്ങളില്‍ യൂണിയന്‍ നേടിയതായി കെഎസ്‌യുവും അവകാശപ്പെട്ടു. 12 കോളജുകളില്‍ മുഴുവന്‍ സീറ്റുകളിലും എതിരില്ലാതെ എസ്എഫ്‌ഐ യൂണിയന്‍ നേടിയതായി കഴിഞ്ഞ ദിവസം ഭാരവാഹികള്‍ അറിയിച്ചിരുന്നു. ഇതിനുപിന്നാലെ ഇന്നലെ തെരഞ്ഞെടുപ്പ് നടന്ന 29 കോളജുകളില്‍ 22 ഇടത്ത് വിജയിച്ചു. മഹാരാജാസ് കോളജ്, ഗവ.ലോ കോളജ്, എറണാകുളം സെന്‍റ് ആല്‍ബര്‍ട്‌സ് കോളജ്, കൊച്ചിന്‍ കോളജ്, ഐരാപുരം എസ്എസ്‌വി കോളജ് തുടങ്ങിയ കോളജുകളില്‍ എസ്എഫ്‌ഐ വിജയിച്ചു. ആറ് കാമ്പസുകളിൽ കെഎസ്‌യുവില്‍നിന്നും ഒരിടത്ത് എംഎസ്എഫില്‍ നിന്നും യൂണിയന്‍ തിരിച്ചുപിടിച്ചതായും എസ്എഫ്‌ഐ സെക്രട്ടറി ടി.ആര്‍. അര്‍ജുന്‍ പറഞ്ഞു. കൊച്ചിന്‍ കോളജ്, ഇടക്കൊച്ചി സിയന്ന കോളജ്, മണിമലക്കുന്ന് ഗവ.കോളജ്, തൃക്കാക്കര ഭാരത് മാതാ കോളജ്, കുന്നുകര എംഇഎസ് കോളജ്, പിറവം ബിപിസി കോളജ് എന്നീ കാമ്പസുകള്‍ കെഎസ്‌യുവില്‍നിന്നും മൂവാറ്റുപുഴ ഇലാഹിയ കോളജ് എംഎസ്എഫില്‍നിന്നും തിരിച്ചുപിടിച്ചതായാണ് എസ്എഫ്ഐ അവകാശപ്പെട്ടത് അതേസമയം കെഎസ്‌യുവിന് മികച്ച മുന്നേറ്റം നടത്താനായതായി ജില്ലാ പ്രസിഡന്‍റ് കെ.എം. കൃഷ്ണലാല്‍ പറഞ്ഞു. കാലടി ശ്രീ ശങ്കരാ കോളജ്, തേവര എസ്എച്ച് കോളജ്, ആലുവ യുസി കോളജ്, മൂവാറ്റുപുഴ നിര്‍മല കോളജ്, നെല്ലിക്കുഴി ഇന്ദിരാഗാന്ധി കോളജ്, ചൂണ്ടി ഭാരത് മാതാ ലോ കോളജ്, ചൂണ്ടി ഭാരത് മാതാ ആര്‍ട്‌സ് കോളജ്, എടത്തല അല്‍അമീന്‍ കോളജ്, അങ്കമാലി സെന്‍റ് ആന്‍സ് കോളജ് എന്നിവ നിലനിര്‍ത്തുകയും പെരുമ്പാവൂര്‍ ജയഭാരത് കോളജ്, മാറമ്പിള്ളി എംഇഎസ് കോളജ്, കുമ്പളം കെഎംഎം കോളജ്, എടത്തല എംഇഎസ് കോളജ് എന്നിവ എസ്എഫ്‌ഐയില്‍ നിന്ന് തിരിച്ചുപിടിക്കുകയും ചെയ്തതായി കൃഷ്ണലാല്‍ പറഞ്ഞു. എടത്തല കെഎംഇഎ കോളജ് എംഎസ്എഫിന്‍റെ കൈയില്‍ നിന്ന് തിരിച്ചുപിടിച്ചു. തെരഞ്ഞെടുപ്പ് ഫലപ്രഖ്യാപനത്തിന് പിന്നാലെ വിവിധ കോളജുകളില്‍ വിജയാഘോഷവും പ്രകടനവും നടത്തി.

കട്ടവനെ കിട്ടിയില്ല, കണ്ടവനെ പൊക്കി

ആളുമാറി കസ്റ്റഡിയിലെടുത്ത യുവാവ് മർദനത്തെത്തുടർന്ന് ആശുപത്രിയിൽ മൂവാറ്റുപുഴ: ആളുമാറി കസ്റ്റഡിയിലെടുത്ത യുവാവിനെ മൂവാറ്റുപുഴ ജനമൈത്രി പോലീസ് മാതാവിന്‍റെയും ഭാര്യയുടെയും ഒന്നര വയസുള്ള കുഞ്ഞിന്‍റെയും മുന്നില്‍ വച്ച് ക്രൂരമായി മര്‍ദിച്ചതായി പരാതി. പെരുമ്പല്ലൂര്‍ മടത്തിക്കുടിയില്‍ ആന്‍റണിയുടെ മകന്‍ അമല്‍ ആന്‍റണി (35) ആണ് പോലീസിന്‍റെ മര്‍ദനത്തിന് ഇരയായത്. ഇലക്ട്രിക് വയറിംഗ് തൊഴിലാളിയായ അമല്‍ കഴിഞ്ഞ 12ന് സമീപത്തെ പണിസ്ഥലത്തുനിന്നും ഉച്ചയ്ക്ക് ഭക്ഷണം കഴിക്കാന്‍ വീട്ടിലെത്തിയപ്പോഴാണ് സംഭവം. മഫ്തിയിലെത്തിയ പോലീസ് ഉദ്യോഗസ്ഥന്‍ ഭക്ഷണം കഴിച്ചുകൊണ്ടിരുന്ന അമലിനോട് ഇറങ്ങി വരാന്‍ ആവശ്യപ്പെട്ടു. ആക്രിക്കടയില്‍ ബാറ്ററി വിറ്റിരുന്നോവെന്ന് ചോദിച്ചു. തന്‍റെ വീട്ടിലെ പത്തുവര്‍ഷത്തിലേറെ പഴക്കമുള്ള ഇന്‍വെര്‍ട്ടിന്‍റെ ബാറ്ററി തകറാറിലായതിനെ തുടര്‍ന്ന് ആക്രിക്കടയില്‍ വിറ്റിരുന്നതായി മറുപടി നല്‍കി. ഉടന്‍ പോലീസ് ഉദ്യോഗസ്ഥന്‍ അമലിനെ വലിച്ചിറക്കി വീട്ടുമുറ്റത്തിട്ട് മര്‍ദിക്കുകയായിരുന്നു. പിന്നീട് ബലമായി ജീപ്പില്‍ കയറ്റി കൊണ്ടുപോകുന്നതിനിടയും മര്‍ദനം തുടര്‍ന്നതായി അമല്‍ പറഞ്ഞു. മൂവാറ്റുപുഴ പി ഒ ജംഗ്ഷനിലെ വ്യാപാര സ്ഥാപനത്തില്‍നിന്നും ബാറ്ററി മോഷണം പോയി എന്ന പരാതിയുടെ അടിസ്ഥാനത്തിലായിരുന്നു പോലീസ് നടപടി. സ്റ്റേഷനില്‍ പരാതിക്കാർ എത്തി ബാറ്ററിയുടെ ബില്ല് നല്‍കിയപ്പോഴാണ് പോലീസിന് അമളി മനസിലായത്. മോഷണം പോയത് മൂന്ന് വര്‍ഷം മാത്രം പഴക്കമുള്ള ബാറ്ററിയും പോലീസ് പിടിച്ചെടുത്തത് പത്ത് വര്‍ഷത്തിലേറെ പഴക്കമുള്ള ബാറ്ററിയുമായിരുന്നു. ഇതോടെ പോലീസ് നിരപരാധിയാണെന്നു കസ്റ്റഡിയിലെടുത്തയാളെ വിട്ടയക്കുകയായിരുന്നു. പിന്നീട് ശരീരവേദനയും ക്ഷീണവും മാറാതെ വന്നതോടെ അമല്‍ ജനറല്‍ ആശുപത്രിയില്‍ ചികിത്സതേടി. ഡോക്ടറുടെ നിര്‍ദേശനുസരണം എംആര്‍ഐ സ്‌കാന്‍ എടുക്കുകയും ചെയ്തു. ഇതു സംബന്ധിച്ച് ജില്ലാ പോലീസ് മേധാവിക്കും, പോലീസ് കംപ്ലയിന്‍റ് അഥോറിറ്റിക്കും അമല്‍ പരാതി നല്‍കിയിട്ടുണ്ട്.

വീട്ടമ്മയുടെ ആത്മഹത്യ : പ്രദീപ് കുമാറിന്‍റെ മകൾക്ക് ജാമ്യം

പറവൂർ: പണം പലിശക്കു നൽകിയതു സംബന്ധിച്ച തർക്കത്തെത്തുടർന്ന് കോട്ടുവള്ളി സൗത്ത് റേഷന്‍കടയ്ക്കു സമീപം പുളിക്കത്തറ വീട്ടില്‍ ആശ(46) പുഴയില്‍ ചാടി മരിച്ച സംഭവത്തിൽ അറസ്റ്റിലായ കോട്ടുവള്ളി സൗത്ത് കടത്തുകടവിൽ ദീപ(38)യ്ക്ക് കോടതി ഉപാധികളോടെ ജാമ്യം അനുവദിച്ചു. സംഭവത്തിൽ ആരോപണ വിധേയനായ റിട്ട. പോലീസ് ഉദ്യോഗസ്ഥൻ പ്രദീപ്കുമാറിന്‍റെയും ബിന്ദുവിന്‍റെയും മകളാണ് ദീപ. തിങ്കളാഴ്ച ആശയുടെ വീട്ടിലെത്തി പണം തിരികെ ചോദിച്ച് പ്രശ്നമുണ്ടാക്കിയ പ്രദീപ്കുമാറിന്‍റെയും ബിന്ദുവിന്‍റെയും കൂടെ മക്കളായ ദീപയും, ദിവ്യയും ഉണ്ടായിരുന്നെന്ന മൊഴിയുടെ അടിസ്ഥാനത്തിൽ ആത്മഹത്യ പ്രേരണകുറ്റം ചുമത്തി നാലുപേർക്ക് എതിരേയും കേസ് എടുത്തിരുന്നു. കഴിഞ്ഞ ദിവസം രാത്രി കലൂരിലെ ഭർത്താവിന്‍റെ ഓഫീസിൽ നിന്ന് മജിസ്ട്രേറ്റിന്‍റെ ഉത്തരവോടെ കസ്റ്റഡിയിലെടുത്ത ദീപയെ പോലീസ് വിശദമായി ചോദ്യം ചെയ്തു. മരിച്ച ആശയും പ്രദീപ്കുമാറും തമ്മിലുള്ള സാമ്പത്തിക ഇടപാടുകൾ പോലീസ് വിശദമായി പരിശോധിക്കുകയാണ്. പ്രദീപ്കുമാറിൽ നിന്ന് ആശ വൻതുക പലിശയ്ക്കു വാങ്ങിയ വിവരം അടുത്തിടെയാണ് ഭർത്താവ് ഉൾപ്പടെയുള്ള ബന്ധുക്കൾ അറിഞ്ഞത്. പണം ഏതു വിധത്തിൽ ചെലവഴിച്ചു എന്നും പോലീസ് പരിശോധിക്കുന്നുണ്ട്. സംഭവത്തിന് ശേഷം ഒളിവിൽപ്പോയ പ്രദീപ്കുമാർ, ബിന്ദു, മകൾ ദിവ്യ എന്നിവരെ കണ്ടെത്താനായുള്ള അന്വേഷണം ഊർജിതമാക്കി.

വി.ഡി. സതീശന്‍റെ ഓഫീസ് ആക്രമണം: കോൺഗ്രസ് മാർച്ചിൽ സംഘർഷം

പറവൂർ: പ്രതിപക്ഷ നേതാവ് വി.ഡി. സതീശന്‍റെ ഓഫീസിനു നേരേയുണ്ടായ ആക്രമണത്തിൽ പ്രതിഷേധിച്ച് കോൺഗ്രസ് പറവൂർ പോലീസ് സ്റ്റേഷനിലേക്ക് നടത്തിയ മാർച്ചിൽ സംഘർഷം. സമരക്കാരെ തടയാൻ പോലീസ് സ്ഥാപിച്ച ബാരിക്കേഡ് പ്രവർത്തകർ മറിച്ചിട്ടു. പോലീസ് സ്റ്റേഷന്‍റെ ഗേറ്റ് തകർത്ത് അകത്തു കടക്കാൻ പ്രവർത്തകർ ശ്രമിച്ചെങ്കിലും മുതിർന്ന നേതാക്കൾ ഇടപ്പെട്ട് പിന്തിരിപ്പിച്ചു. തുടർന്ന് റോജി എം. ജോൺ എംഎൽഎ സമരം ഉദ്ഘാടനം ചെയ്തു. ഇടതുപക്ഷ സൈബർ ഗുണ്ടകൾ കുറെ ക്കാലമായി വി.ഡി. സതീശനെ ലക്ഷ്യമിട്ടിരിക്കുകയാണെന്നും, ഇത് വിലപ്പോകില്ലെന്നും റോജി പറഞ്ഞു. പ്രതിപക്ഷ നേതാവിന്‍റെ ഓഫീസിനു നേരേ ഉണ്ടായ ആക്രമണം കാക്കിയിട്ട ഡിവൈഎഫ്ഐക്കാരായ പോലീസുകാർ നോക്കിനിന്നതായും അദ്ദേഹം ആരോപിച്ചു. ഉമ തോമസ് എംഎൽഎ, ഡിസിസി പ്രസിഡന്‍റ് മുഹമ്മദ് ഷിയാസ്, യൂത്ത്കോൺഗ്രസ് സംസ്ഥാന വൈസ് പ്രസിഡന്‍റ് അബിൻ വർക്കി, അബ്ദുൽ മുത്തലിബ്, മനോജ് മൂത്തേടൻ, എം.ടി. ജയൻ, ജമാൽ മണക്കാടൻ തുടങ്ങിയവർ സംസാരിച്ചു.

ഡിവൈഎഫ്ഐ മാർച്ച് അക്രമാസക്തമായി; പ്രതിപക്ഷ നേതാവിന്‍റെ ഓഫീസ് ആക്രമിച്ചതിന് കേസെടുത്തു

പറവൂർ: പ്രതിപക്ഷ നേതാവിന്‍റെ പറവൂരിലെ ഓഫീസിലേക്ക് ഡിവൈഎഫ്ഐ നടത്തിയ മാർച്ചിൽ സംഘർഷം. പൂവൻ കോഴിയും, രാഹുൽ മാങ്കൂട്ടത്തിന്‍റെ കോലവുമായി നടത്തിയ മാർച്ച് ഓഫീസിന്‍റെ 200 മീറ്റർ അകലെ ബാരിക്കേഡുവച്ച് പോലീസ് തടഞ്ഞെങ്കിലും സമരക്കാർ ബാരിക്കേഡ് മറികടന്നു ഓഫീസിനു മുന്നിലെത്തി. ഓഫീസിലുണ്ടായിരുന്ന കോൺഗ്രസ് പ്രവർത്തകർ ഗേറ്റ് അടച്ചതിനെ തുടർന്ന് പ്രവർത്തകർക്ക് ഓഫീസ് അങ്കണത്തിൽ പ്രവേശിക്കാനായില്ല. എന്നാൽ സമരക്കാർ അകത്തേക്ക് തള്ളികയറാൻ ശ്രമിച്ചതും, അകത്തുള്ള പ്രവർത്തകർ പ്രതിരോധിച്ചതും സംഘർഷത്തിനിടയാക്കി. ചെറിയ തോതിൽ കല്ലേറുമുണ്ടായി. തുടർന്ന് പോലീസും, നേതാക്കളും ചേർന്ന് രംഗം ശാന്തമാക്കി പ്രവർത്തകരെ ഓഫീസിനു സമീപത്തുനിന്ന് നീക്കി. തുടർന്നു നടന്ന പ്രതിഷേധയോഗം ജനാധിപത്യ മഹിളാ അസോസിയേഷൻ ജില്ലാ സെക്രട്ടറി പുഷ്പദാസ് ഉദ്ഘാടനം ചെയ്തു. ഡിവൈഎഫ്ഐ പറവൂർ ബ്ലോക്ക് സെക്രട്ടറി എം. രാഹുൽ അധ്യക്ഷനായി. ഡിവൈഎഫ്ഐ സംസ്ഥാന കമ്മിറ്റിയംഗം എൽ. ആദർശ്, സിപിഎം പറവൂർ ഏരിയ സെക്രട്ടറി ടി.വി. നിധിൻ, മഹിളാ അസോ. സംസ്ഥാന കമ്മിറ്റിയംഗം പി.എസ്. ഷൈല, ഏരിയ സെക്രട്ടറി എം.ആർ. റീന, പ്രസിഡന്‍റ് എം.എ. രശ്മി തുടങ്ങിയവർ പ്രസംഗിച്ചു. സംഭവത്തിൽ പോലീസ് രണ്ടു കേസുകൾ രജിസ്റ്റർ ചെയ്തു. പ്രതിപക്ഷ നേതാവിന്‍റെ വസതിക്കു നേരേയുണ്ടായ അക്രമണത്തിനും, ഓഫീസിലുണ്ടായിരുന്നവരെ അകമിച്ചതിനുമാണ് കേസ്. കെഎസ്‌യു താലൂക്ക് പ്രസിഡന്‍റ് ആന്‍റണി,യൂത്ത് കോൺഗ്രസ് ബ്ലോക്ക് വൈസ് പ്രസിഡന്‍റ് അജ്മൽ ഖാൻ എന്നിവർക്ക് പരിക്കേറ്റതായി പ്രതിപക്ഷ നേതാവിന്‍റെ ഓഫീസിൽനിന്ന് അറിയിച്ചു.

ഫിഷറീസ് ഹാര്‍ബര്‍ സമരം പിന്‍വലിച്ചു

മട്ടാഞ്ചേരി: കഴിഞ്ഞ ഒരാഴ്ചയിലേറെയായി കൊച്ചി ഫിഷറീസ് ഹാര്‍ബറിന്‍റെ പ്രവര്‍ത്തനം പ്രതിസന്ധിയിലാക്കിയ സിഐടിയു തൊഴിലാളികളുടെയും ബോട്ടുടമകളുടെയും സമരം പിന്‍വലിച്ചു. ഹാര്‍ബര്‍ വ്യവസായ സമിതി ചെയര്‍മാന്‍ എ.എം നൗഷാദിന്‍റെ നേതൃത്വത്തില്‍ ബോട്ടുടമകളും സിപിഎല്‍യു സിഐടിയു നേതാക്കളും പേഴ്സിന്‍ നെറ്റ് തൊഴിലാളി യൂണിയന്‍ ഭാരവാഹികളും ചേര്‍ന്ന് നടത്തിയ ചര്‍ച്ചയിലാണ് ഹാര്‍ബറിന്‍റെ പ്രവര്‍ത്തനം പുനരാരംഭിക്കാന്‍ ധാരണയായത്. തീരുമാന പ്രകാരം ഇന്നലെ ഹാര്‍ബറില്‍ ഗില്‍നെറ്റ്,ട്രോള്‍ നെറ്റ് ബോട്ടുകളിലെ മത്സ്യക്കച്ചവടം നടന്നു. പേഴ്സിന്‍ നെറ്റ് ബോട്ടുകള്‍ ഇന്ന് മുതല്‍ കടലില്‍ ഇറങ്ങും. മീന്‍ ഇറക്ക് വിഭാഗത്തിലെ തൊഴിലാളികളുടെ കൂലിയുമായി ബന്ധപ്പെട്ട് ബോട്ടുടമകള്‍ മുന്നോട്ടുവച്ച മൂന്ന് നിര്‍ദേശങ്ങള്‍ സംബന്ധിച്ച് യൂണിയന്‍ ചര്‍ച്ച ചെയ്ത് തീരുമാനമെടുക്കാന്‍ ധാരണയായിട്ടുണ്ട്. അത് വരെ ഹാര്‍ബറിന്‍റെ പ്രവര്‍ത്തനം തടസപ്പെടുന്ന യാതൊന്നും ഉണ്ടാകരുതെന്നും യോഗത്തില്‍ ധാരണയായി.എ.എം നൗഷാദിന്‍റെ നേതൃത്വത്തില്‍ നേരത്തേ നടത്തിയ ചര്‍ച്ചയെ തുടര്‍ന്ന് തിങ്കളാഴ്ച ഹാര്‍ബര്‍ പ്രവര്‍ത്തിച്ചെങ്കിലും വീണ്ടും പ്രശ്നം ഉടലെടുക്കുകയായിരുന്നു. ഹാര്‍ബര്‍ അടച്ചിട്ടതുമൂലം ആയിരങ്ങള്‍ക്ക് തൊഴില്‍ നഷ്ടപ്പെടുകയും വ്യാപാര സ്ഥാപനങ്ങളെ വിഷയം ബാധിക്കുകയും ചെയ്ത പശ്ചാത്തലത്തിലാണ് ഹാര്‍ബര്‍ വ്യവസായ സമിതി ചെയര്‍മാന്‍ എ.എം നൗഷാദ് വീണ്ടും അനുരഞ്ജന ചര്‍ച്ചക്ക് നേതൃത്വം നല്‍കിയത്. പേഴ്സിന്‍ വിഭാഗത്തിലെ മീന്‍ ഇറക്ക് വിഭാഗം തൊഴിലാളികള്‍ക്ക് നല്‍കുന്ന രണ്ടു ശതമാനം കൂലി നല്‍കാന്‍ കഴിയില്ലെന്ന് ബോട്ടുടമകള്‍ തീരുമാനിച്ചതോടെയാണ് പ്രശ്നം ആരംഭിച്ചത്. പ്രവര്‍ത്തന ചിലവ് കഴിഞ്ഞ് ലഭിക്കുന്നതിന്‍റെ രണ്ട് ശതമാനം നല്‍കാന്‍ കഴിയൂവെന്നാണ് ബോട്ടുടമകള്‍ നിലപാട് സ്വീകരിച്ചത്.എന്നാല്‍ ലഭിക്കുന്ന ആകെ തുകയുടെ രണ്ട് ശതമാനം വേണമെന്ന നിലപാടില്‍ സിപിഎല്‍യു തൊഴിലാളികള്‍ ഉറച്ചു നില്‍ക്കുകയും ഹാര്‍ബറില്‍ സംഘര്‍ഷാവസ്ഥ ഉടലെടുക്കുകയുമായിരുന്നു. ചര്‍ച്ചയില്‍ ബോട്ടുടമകളെ പ്രതിനിധീകരിച്ച് സി.എസ് യൂസഫ്, എം.മജീദ്, മനാഫ്, സിഐടിയു, സിപിഎല്‍യു യൂണിയനുകളെ പ്രതിനിധീകരിച്ച് കെ.എം റിയാദ്, ബി.ഹംസ, ഷാജി, പേഴ്സിന്‍ നെറ്റ് ബോട്ട് മത്സ്യ തൊഴിലാളി യൂണിയനെ പ്രതിനിധീകരിച്ച് ജാക്സന്‍ പൊള്ളയില്‍, മൈക്കിള്‍ എന്നിവരും പങ്കെടുത്തു.

മനുഷ്യാവകാശ കമ്മീഷന്‍ ഇടപെട്ടു; ജയിലിലെ ജാതിപ്പേര് വിളിയില്‍ രണ്ടു മാസത്തിനകം അന്തിമ റിപ്പോര്‍ട്ട്

കൊച്ചി: കാക്കനാട് ജില്ലാ ജയിലിലെ ഫാര്‍മസിസ്റ്റിനെ ഡോക്ടര്‍ ജാതിപ്പേര് വിളിച്ച് അപമാനിച്ചെന്ന പരാതിയില്‍ രണ്ടുമാസത്തിനകം അന്വേഷണം പൂര്‍ത്തിയാക്കി ബന്ധപ്പെട്ട കോടതിക്കു മുന്നില്‍ അന്തിമ റിപ്പോര്‍ട്ട് സമര്‍പ്പിക്കുമെന്ന് തൃക്കാക്കര അസിസ്റ്റന്‍റ് പോലീസ് കമ്മീഷണര്‍ മനുഷ്യാവകാശ കമ്മീഷനെ അറിയിച്ചു. മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റീസ് അലക്‌സാണ്ടര്‍ തോമസിന്‍റെ ഉത്തരവിന്‍റെ അടിസ്ഥാനത്തിലാണ് നടപടി. ഡോക്ടറും ഫാര്‍മസിസ്റ്റും ആരോഗ്യവകുപ്പിലെ ഉദ്യോഗസ്ഥരാണെന്നും ഇരുവരെയും ജില്ലാ ജയിലില്‍ നിന്നും സ്ഥലം മാറ്റിയെന്നും ജയില്‍ സൂപ്രണ്ട് മനുഷ്യാവകാശ കമ്മീഷനെ അറിയിച്ചു. സര്‍ക്കാര്‍ ആവശ്യമായ വകുപ്പുതല നടപടികള്‍ സ്വീകരിച്ച സാഹചര്യത്തില്‍ മറ്റു നടപടികള്‍ ആവശ്യമില്ലെന്ന് ജസ്റ്റീസ് അലക്‌സാണ്ടര്‍ തോമസ് ഉത്തരവില്‍ പറഞ്ഞു. ആരോപണം സത്യമാണെന്ന് കണ്ടെത്തിയതായി ജയില്‍ സൂപ്രണ്ട് പറഞ്ഞു. പിന്നാക്ക വിഭാഗക്കാരനായ ഫാര്‍മസിസ്റ്റിന്‍റെ പരാതിയില്‍ ക്രൈം 82/2025 നമ്പറായി കേസെടുത്തിട്ടുണ്ടെന്ന് ജില്ലാ പോലീസ് മേധാവിയും കമ്മീഷനെ അറിയിച്ചു.

ക്രിപ്റ്റോ കറൻസി ട്രേഡിംഗ്: യുവാവിന്‍റെ 22 ലക്ഷം തട്ടി

തൃപ്പൂണിത്തുറ: ക്രിപ്റ്റോ കറൻസി ട്രേഡിംഗിലൂടെ ലാഭം നൽകാമെന്ന് പറഞ്ഞ് വിശ്വസിപ്പിച്ച് യുവാവിൽ നിന്ന് 22 ലക്ഷം രൂപ തട്ടിയതായി പരാതി. തൃപ്പൂണിത്തുറ സ്വദേശിയാണ് പണം നഷ്ടപ്പെട്ടതായി കാണിച്ച് ഹിൽപാലസ് പോലീസിൽ പരാതി നൽകിയത്. വാട്സ്ആപ് ഗ്രൂപ്പിലെത്തിച്ച് വ്യാജ ട്രേഡിംഗ് ആപ്പിന്‍റെ ലിങ്ക് നൽകിയാണ് തട്ടിപ്പ് നടത്തിയത്. ആദ്യം ചെറിയ തുകയ്ക്ക് ട്രേഡിംഗ് നടത്തി ചെറിയ ലാഭം ലഭിച്ചു. തുടർന്ന് വലിയ തുക നൽകിയാൽ കൂടുതൽ പണം ലഭിക്കുമെന്ന വാഗ്ദാനം വന്നതോടെ ഓഫർ സ്വീകരിച്ച് ട്രേഡിംഗ് നടത്തി. ഇതിന് പിന്നാലെ പുതിയ നിബന്ധനകൾ വരികയായിരുന്നു. പണം പിൻവലിക്കാൻ ശ്രമിച്ചതോടെ അക്കൗണ്ട് മരവിപ്പിച്ച് ടാക്സ്, ഫീസ് എന്നീയിനങ്ങളിലെല്ലാം വീണ്ടും വീണ്ടും യുവാവിൽ നിന്ന് ഇവർ പണം വാങ്ങി. തുടർന്ന് തുകയൊന്നും പിൻവലിക്കാൻ കഴിയാതെ വന്നപ്പോഴാണ് യുവാവ് പരാതിയുമായെത്തിയത്.

ആലുവ മെട്രോ സ്റ്റേഷൻ പരിസരത്ത് തന്പടിച്ച് മൊബൈൽ കവർച്ചാസംഘം

ആലുവ: കൊച്ചി മെട്രോ ആലുവ സ്റ്റേഷൻ പരിസരത്ത് മൊബൈൽ തട്ടിയെടുത്ത് ഓടുന്ന സംഘം വിലസുന്നതായി പരാതി. ഇന്നലെ രാവിലെ മെട്രോ സ്റ്റേഷനിലേക്ക് നടന്നുപോവുകയായിരുന്ന യുവതിയുടെ മൊബൈൽ തട്ടിയെടുത്ത് ഓടിയെങ്കിലും യാത്രക്കാർ പ്രതിയെ പിടികൂടി പോലീസിൽ ഏൽപ്പിച്ചു. അതിനിടെ കഴിഞ്ഞ ദിവസം പിടികൂടി ഏൽപ്പിച്ച മറ്റൊരു പ്രതിയെ പോലീസ് വെറുതെവിട്ടതായും പരാതിയുണ്ട്. രേഖാമൂലം പരാതി നൽകാതെ കേസെടുക്കാനാവില്ലെന്നാണ് പോലീസ് നിലപാട്. മെട്രോ പരിസരത്ത് അതിഥി തൊഴിലാളികളുടെ ഒരു സംഘം മോഷണം ലക്ഷ്യമാക്കി തമ്പടിക്കുന്നതായാണ് വ്യാപാരികളുടെയും യാത്രക്കാരുടെയും പരാതി.

ഇരട്ട സ്വര്‍ണവുമായി അഞ്ജലി

കൊച്ചി: ഇരട്ട സ്വര്‍ണ നേട്ടത്തോടെ മീറ്റിലെ മിന്നും താരമായി തൃക്കാക്കര ഭവന്‍സ് വരുണ വിദ്യാലയത്തിലെ പ്ലസ് ടു വിദ്യാര്‍ഥിനി അഞ്ജലി പി.ജോഷി. അണ്ടര്‍ 19 വിഭാഗത്തില്‍ 100, 200 മീറ്ററുകളിലാണ് അഞ്ജലി സ്വര്‍ണം നേടിയത്. കഴിഞ്ഞ വര്‍ഷവും ഇതേ ഇനങ്ങളില്‍ അഞ്ജലി ഇരട്ട സ്വര്‍ണ നേട്ടത്തോടെ ദേശീയ ചാമ്പ്യന്‍ഷിപ്പിന് യോഗ്യത നേടിയിരുന്നു. ഇന്നലെ 200 മീറ്ററില്‍ 27.5 സെക്കന്‍ഡ് എന്ന കരിയറിലെ മികച്ച സമയം കുറിച്ചായിരുന്നു അഞ്ജലിയുടെ സുവര്‍ണ നേട്ടം. നാലാം ക്ലാസ് മുതല്‍ കായിക മത്സരങ്ങളില്‍ സ്ഥിരം സാന്നിധ്യമാണ് ഈ മിടുക്കി. എറണാകുളം മേൽക്കോയ്മ കൊച്ചി: മഹാരാജാസ് ഗ്രൗണ്ടില്‍ സമാപിച്ച സിബിഎസ്ഇ സ്‌കൂളുകളുടെ ക്ലസ്റ്റര്‍ 11 അത്‌ലറ്റിക് മീറ്റില്‍ ആതിഥേയരായ എറണാകുളം ജില്ലയ്ക്ക് ആധിപത്യം. 1209 പോയന്‍റുമായാണ് എറണാകുളം ഒന്നാമതെത്തിയത്. രണ്ടാം സ്ഥാനക്കാരേക്കാൾ 964 പോയന്‍റ് എറണാകുളം ജില്ലയ്ക്കു കൂടുതലുണ്ട്. പോയന്‍റ് പട്ടികയില്‍ 10 സ്ഥാനങ്ങളില്‍ ഏഴിലും ജില്ലയിലെ സ്‌കൂളുകളാണ്. കാറ്റഗറി പട്ടികയില്‍ അണ്ടര്‍ 14 ബോയ്സ് വിഭാഗം ഒഴികെ മറ്റെല്ലാ വിഭാഗത്തിലും ഒന്നാമതുള്ളതും ജില്ലയിലെ സ്‌കൂളുകളാണ്. ഐശ്വര്യക്ക് ഇത് രണ്ടാം സ്വര്‍ണം കൊച്ചി: സിബിഎസ്ഇ അത്‌ലറ്റിക് മീറ്റില്‍ തുടര്‍ച്ചയായ രണ്ടാം വട്ടവും ഹൈജംപില്‍ സ്വര്‍ണം നേടി എരൂര്‍ ഭവന്‍സിലെ ഐശ്വര്യ സൂരജ് നായര്‍. 1.46 മീറ്റര്‍ ചാടിയാണ് ഐശ്വര്യ നേട്ടം കൊയ്തത്. കഴിഞ്ഞ വര്‍ഷം കരിയര്‍ ബെസ്റ്റായ 1.50 ചാടി വാരണാസിയില്‍ നടന്ന നാഷണല്‍സില്‍ പങ്കെടുത്ത ഐശ്വര്യ അവിടെ വെള്ളിമെഡല്‍ ജേത്രിയുമാണ്.

നങ്ങേലിപ്പടിയിൽ കാറും സ്കൂട്ടറും കൂട്ടിയിടിച്ച് വ്യാപാരി മരിച്ചു

കോതമംഗലം: പെരുമ്പാവൂര്‍-കോതമംഗലം റോഡില്‍ നങ്ങേലിപ്പടി റാഡോ കമ്പനിക്ക് സമീപം കാറും സ്‌കൂട്ടറും കൂട്ടിയിടിച്ച് നെല്ലിക്കുഴി സ്വദേശിക്ക് ദാരുണാന്ത്യം. നെല്ലിക്കുഴി ഇടപ്പാറ മുഹമ്മദ് (കുഞ്ഞുമുഹമ്മദ്-48) ആണ് മരിച്ചത്. ഇന്നലെ വൈകിട്ട് ആറിനായിരുന്നു അപകടം. നെല്ലിക്കുഴിയില്‍ പച്ചക്കറി വ്യാപാരിയായ മുഹമ്മദ് കോതമംഗലത്ത് പോയി മടങ്ങവേ പെരുമ്പാവൂര്‍ ഭാഗത്തുനിന്ന് വന്ന കാര്‍ തെറ്റായ ദിശയിൽ വന്ന് എതിരെ വന്ന സ്‌കൂട്ടറിൽ ഇടിക്കുകയായിരുന്നു. റാഡോ കമ്പനിയുടെ മതിലില്‍ ഇടിച്ച് വട്ടംതിരിഞ്ഞ് കാറിന്‍റെ പിന്‍ഭാഗം സ്‌കൂട്ടറിൽ ഇടിക്കുകയായിരുന്നുവെന്ന് പോലീസ് പറഞ്ഞു. റാഡോ കമ്പനിയുടെ മതിലും തകര്‍ന്നിട്ടുണ്ട്. മതിലിനും കാറിന്‍റെ പിന്‍ഭാഗത്തെ ടയറിനും ഇടയില്‍ കുരുങ്ങികിടക്കുന്ന നിലയിലായിരുന്നു സ്‌കൂട്ടര്‍ കിടന്നത്. ഗുരുതര പരിക്കേറ്റ മുഹമ്മദിനെ താലൂക്ക് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മൃതദേഹം താലൂക്ക് ആശുപത്രി മോര്‍ച്ചറിയില്‍. ഭാര്യ: റംല പാനിപ്ര കോനേത്താന്‍. മക്കള്‍: അല്‍ത്താഫ്, അല്‍ന ഫാത്തിമ. കബറടക്കം ഇന്ന് 1.30 ന് നെല്ലിക്കുഴി കമ്പനിപ്പടി നെല്ലിക്കുന്നത്ത് ജുമാ മസ്ജിദ് കബര്‍സ്ഥാനില്‍.

സിബിഎസ്ഇ ക്ലസ്റ്റര്‍ 11 അത്‌ലറ്റിക് മീറ്റ് : വാഴക്കുളം കാര്‍മല്‍ പബ്ലിക് സ്‌കൂളിന് കിരീടം

കൊച്ചി: തിരുവനന്തപുരം മുതല്‍ എറണാകുളം വരെയുള്ള സിബിഎസ്ഇ സ്‌കൂളുകളുടെ ക്ലസ്റ്റര്‍ 11 അത്‌ലറ്റിക് മീറ്റില്‍ നിലവിലെ ചാമ്പ്യന്‍മാരായ വാഴക്കുളം കാര്‍മല്‍ പബ്ലിക് സ്‌കൂളിന് ഓവറോള്‍ കിരീടം. രണ്ട് ദിവസമായി മഹാരാജാസ് കോളജ് ഗ്രൗണ്ടില്‍ നടന്ന മീറ്റില്‍ 237 പോയിന്‍റോടെയാണ് കാര്‍മല്‍ വീണ്ടും ചാമ്പ്യന്മാരായത്. 182 പോയിന്‍റുമായി വടുതല ചിന്മയ വിദ്യാലയ ഫസ്റ്റ് റണ്ണറപ്പും 142 പോയിന്‍റോടെ സെന്‍റ് പീറ്റേഴ്‌സ് കടയിരുപ്പ് സെക്കൻഡ് റണ്ണറപ്പുമായി. പോയന്‍റ് പട്ടികയില്‍ ആദ്യ മൂന്നു സ്ഥാനങ്ങളിലും ആതിഥേയരായ എറണാകുളം ജില്ലയിലെ സ്‌കൂളുകളാണ്. കൂടുതല്‍ പോയന്‍റ് നേടിയ ജില്ലകളുടെ പട്ടികയില്‍ എറണാകുളമാണ് മുന്നില്‍. (1209). ഇടുക്കി (245)യും തിരുവനന്തപുരം (127) യഥാക്രമം രണ്ടു, മൂന്നാം സ്ഥാനങ്ങളിലുണ്ട്. ഒന്‍പത് ഇനങ്ങളിലായി 33 സ്‌കൂളുകളാണ് മാറ്റുരച്ചത്. അണ്ടര്‍ 14 ബോയ്സ് വിഭാഗത്തില്‍ ബിലീവേഴ്‌സ് ചര്‍ച്ച് റെസിഡന്‍ഷ്യല്‍ സ്‌കൂള്‍ തിരുവല്ല (37), പെണ്‍കുട്ടികളുടെ വിഭാഗത്തില്‍ ഭവന്‍സ് ആദര്‍ശ വിദ്യാലയ കാക്കനാട് (22), അണ്ടര്‍ 17 ബോയ്സ് വിഭാഗത്തില്‍ ചിന്മയ വിദ്യാലയ വടുതല (55), പെണ്‍കുട്ടികളുടെ വിഭാഗത്തില്‍ കാര്‍മല്‍ പബ്ലിക് സ്‌കൂള്‍ മൂവാറ്റുപുഴ (56), അണ്ടര്‍ 19 ബോയ്സ് വിഭാഗത്തില്‍ കാര്‍മല്‍ പബ്ലിക് സ്‌കൂള്‍ മൂവാറ്റുപുഴ (86), പെണ്‍കുട്ടികളുടെ വിഭാഗത്തില്‍ ചിന്മയ വിദ്യാലയ വടുതല (56) എന്നീ സ്‌കൂളുകള്‍ ഒന്നാമതെത്തി. സമാപന സമ്മേളനത്തില്‍ വിജയികള്‍ക്കുള്ള ട്രോഫികള്‍ മീറ്റ് സംഘാടക സമിതി ചെയര്‍മാനും പെരുമ്പാവൂര്‍ പ്രഗതി അക്കാദമി മാനേജിംഗ് ഡയറക്ടര്‍ ഡോ. ഇന്ദിര രാജന്‍ സമ്മാനിച്ചു.

റോഡുകള്‍ 26നകം നന്നാക്കിയില്ലെങ്കിൽ എന്‍ജിനീയര്‍മാരെ നേരിട്ട് വിളിച്ചുവരുത്തും: കോടതി

കൊച്ചി: കൊച്ചി നഗരത്തിലെ റോഡുകള്‍ നന്നാക്കുന്നതുമായി ബന്ധപ്പെട്ട ഹൈക്കോടതിയുടെ കര്‍ശന മുന്നറിയിപ്പ്. ഈ മാസം 26ന് ശേഷം നഗരത്തിലെ പ്രധാന റോഡുകളുടെ അറ്റകുറ്റപ്പണികള്‍ ശേഷിക്കുന്നതായി ശ്രദ്ധയില്‍പ്പെട്ടാല്‍ ബന്ധപ്പെട്ട എന്‍ജിനിയര്‍മാരെ നേരിട്ട് വിളിച്ചുവരുത്തും. തൃശൂരില്‍ റോഡിലെ കുഴിയില്‍ വീണ് യുവാവ് മരിച്ച സംഭവത്തിലടക്കം കൃത്യമായ റിപ്പോര്‍ട്ട് ഇതുവരെ ലഭിച്ചിട്ടില്ലെന്ന് ജസ്റ്റീസ് ദേവന്‍ രാമചന്ദ്രന്‍ ചൂണ്ടിക്കാട്ടി. അടുത്ത തവണ കേസ് പരിഗണിക്കുമ്പോള്‍ റിപ്പോര്‍ട്ട് സമര്‍പ്പിച്ചിരിക്കണം. പിതാവിനൊപ്പം ഇരുചക്ര വാഹനത്തില്‍ സഞ്ചരിക്കുമ്പോള്‍ തെറിച്ചുവീണ ബാലിക പാലക്കാട് ബസ് കയറി മരിച്ച സംഭവത്തിന്‍റെ വിശദാംശങ്ങള്‍ കോടതി തേടി. മഴ ശമിച്ചതോടെ എല്ലാ റോഡുകളിലും അറ്റകുറ്റപ്പണി ഊര്‍ജിതമാണെന്ന് പൊതുമരാമത്ത് വകുപ്പും കോര്‍പറേഷനും അറിയിച്ചു. കലൂര്‍ കടവന്ത്ര റോഡിന്‍റെ അറ്റകുറ്റപ്പണി പൂര്‍ത്തിയാകാറായെന്ന് ജിസിഡിഎയും അറിയിച്ചു. എന്നാല്‍, അവകാശപ്പെടുന്ന തരത്തിലുള്ള പുരോഗതി റോഡ് അറ്റകുറ്റപ്പണിയില്‍ ഉണ്ടായിട്ടുള്ളതായി കാണുന്നില്ലെന്നായിരുന്നു അമിക്കസ് ക്യൂറി കോടതിയെ അറിയിച്ചത്.

16കാരനെ കാണാനില്ലെന്ന് പരാതി

വൈപ്പിൻ: മൊബൈൽ ഫോൺ നൽകാത്തതിനെച്ചൊല്ലി വീട്ടുകാരുമായി വഴക്കിട്ട് വീടുവിട്ട 16കാരനെ കാണാനില്ലെന്ന് പരാതി. എളങ്കുന്നപ്പുഴ വളപ്പ് ബോട്ട് ജെട്ടിക്ക് സമീപം താമസിക്കുന്ന പതിനാറുകാരനെയാണ് കാണാതായത്. 20നു രാത്രി പത്തരയോടെ വീടുവിട്ടിറങ്ങിയ ബാലൻ പിന്നീട് വീട്ടിൽ തിരിച്ചെത്തിയില്ല. പിതാവ് ഞാറക്കൽ പോലീസിൽ നൽകിയ പരാതിയിൽ കേസെടുത്തിട്ടുണ്ട്.

വാഹനാപകടത്തിൽ ദമ്പതികൾക്ക് പരിക്ക്

പനങ്ങാട്: നെട്ടൂരിലെ മാടവന സിഗ്നലിന് സമീപത്തുണ്ടായ വാഹനാപകടത്തിൽ ദമ്പതികൾക്ക് പരിക്കേറ്റു. ആലപ്പുഴ കുത്തിയതോട് കോടംതുരുത്ത് ആലത്തറ വീട്ടിൽ ലിനെറ്റ് (30), ഷാരോൺ സേവ്യർ (36) എന്നിവർക്കാണ് പരിക്കേറ്റത്. ഇവർ സഞ്ചരിച്ച ഇരുചക്രവാഹനത്തിൽ കാറിടിക്കുകയായിരുന്നു. ഇരുവരെയും നെട്ടൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇന്നലെ ഉച്ചകഴിഞ്ഞ് 3.35 ഓടെയായിരുന്നു അപകടം.

അങ്കണവാടി ജീവനക്കാർക്ക് ആദരം

കോതമംഗലം: നഗരസഭയിലെ അങ്കണവാടി ജീവനക്കാരെ ആദരിച്ചു.നഗരസഭയുടെ നേതൃത്വത്തിലാണ് നഗരസഭാ പരിധിയിലെ 31 അങ്കണവാടികളിലേയും വർക്കർമാരെയും ഹെൽപ്പർമാരെയും ആദരിച്ചത്. സമ്മേളനം ആന്‍റണി ജോൺ എംഎൽഎ ഉദ്ഘാടനം ചെയ്തു. വൈസ് ചെയർപേഴ്സൺ സിന്ധു ഗണേഷൻ അധ്യക്ഷത വഹിച്ചു.

നഗരസഭയിൽ കന്യാസ്ത്രീകൾക്ക് വോട്ടവകാശം നിഷേധിക്കുന്നു: കോൺഗ്രസ്‌ പരാതി നൽകി

മൂവാറ്റുപുഴ: നഗരസഭ പരിധിയിലുള്ള വിവിധ കോൺവെന്‍റുകളിലെ സ്ഥിര താമസക്കാരായ കന്യാസ്ത്രീകൾക്ക് വോട്ടവകാശം നിഷേധിക്കുന്നതായി പരാതി. ഇതു സംബന്ധിച്ചു കോൺഗ്രസ്‌ നഗരസഭ സെക്രട്ടറിക്കു പരാതി നൽകി. സിപിഎം പ്രവർത്തകർ ഇവരെ ഭീഷണിപ്പെടുത്തുന്നതയും പരാതിയിൽ പറയുന്നു. നഗരസഭ ജീവനക്കാർ എന്ന വ്യാജേന കോൺവെന്‍റുകളിൽ കടന്നു ചെന്നാണ് ഇവർ ഭീഷണി മുഴക്കുന്നത്. ജാതിയും മതവും രാഷ്ട്രീയവും നോക്കി വോട്ടവകാശം നിഷേധിക്കുന്നത് ഭരണഘടനാ ലംഘനം ആണെന്നും കോൺഗ്രസ്‌ ബ്ലോക്ക് പ്രസിഡന്‍റ് സാബു ജോൺ പറഞ്ഞു. കന്യാസ്ത്രീകളുടെ വോട്ട് സംബന്ധിച്ചു പരാതികളിൽ കൃത്യമായ അന്വേഷണം നടത്തി ഇവർക്കു ജനാധിപത്യപരമായി വോട്ട് രേഖപ്പെടുത്തുന്നതിനുള്ള നടപടികൾ സ്വീകരിക്കണമെന്ന് നഗരസഭ സെക്രട്ടറിക്ക് നൽകിയ പരാതിയിൽ കോൺഗ്രസ്‌ ആവശ്യപ്പെട്ടു. ബ്ലോക്ക് പ്രസിഡന്‍റ് സാബു ജോൺ, മണ്ഡലം പ്രസിഡന്‍റ് കെ.എ. അബ്ദുൾ സലാം, ബ്ലോക്ക് ഭാരവാഹികളായ ജോയ്സ് മേരി ആന്‍റണി, കെ.കെ. സുബൈർ, മുഹമ്മദ്‌ ചെറുകപ്പിള്ളി, പി.പി. അലി, ഖാദർ കടികുളം എന്നിവരാണ് പരാതി നൽകിയത്.

കച്ചേരിത്താഴത്തെ ഗര്‍ത്തത്തിനു ശാശ്വത പരിഹാരമാകുന്നു

മൂവാറ്റുപുഴ: കച്ചേരിത്താഴത്ത് റോഡിൽ രൂപം കൊണ്ട ഗര്‍ത്തത്തിനു ശാശ്വത പരിഹാരമാകുന്നു. കിഫ്ബിയുടെ ഉന്നതതല സംഘം നടത്തിയ സ്ഥലപരിശോധനയ്ക്കും, മാത്യു കുഴല്‍നാടന്‍ എംഎല്‍എയുടെ നേതൃത്വത്തില്‍ ചേര്‍ന്ന അവലോകന യോഗത്തിനും ശേഷമാണ് നിര്‍ദേശങ്ങള്‍ക്ക് അന്തിമരൂപമായത്. കച്ചേരിത്താഴത്ത് ഇന്ത്യന്‍ ബേക്കറിയുടെ മുന്‍വശത്തുള്ള ഡ്രെയിനേജിന്‍റെ ജലധാര നഗരസഭയുടെ സ്ഥലത്തിലൂടെ പുഴയിലേക്ക് തിരിച്ചുവിടാനാണ് തീരുമാനം. മറുഭാഗത്ത് രാജേശ്വരി ഹോട്ടലിന്‍റെ മുന്‍വശത്തു വരെ എത്തിയിരിക്കുന്ന പുതിയ റോഡിലെ ഡ്രെയിനേജ്, കെഎസ്ഇബി, ജല അഥോറിറ്റി ഡിപ്പാര്‍ട്ട്‌മെന്‍റുകളുടെ നിലവിലെ പോസ്റ്റും, വാട്ടര്‍ കണക്ഷന്‍റെ പൈപ്പുകളും മാറ്റിയശേഷം പൈപ്പുകള്‍ ഉപയോഗിച്ച് ഡ്രെയിനേജ് നിര്‍മിച്ച് പുഴയിലേക്ക് ഒഴുക്കും. ബലക്ഷയം സംഭവിച്ച പഴയ കല്‍ക്കെട്ട് ഡ്രെയിനേജ് പൂര്‍ണ്ണമായും അടച്ചുപൂട്ടാനും ധാരണയായി. എന്നാല്‍ നിലവില്‍ ഒഴുകുന്ന രണ്ട് ഡ്രെയിനേജുകളുടെ ആഴവും വിസ്തൃതിയും കൃത്യമായി കണ്ടെത്തണമെന്നും കൂടാതെ ഈ ഡ്രെയിനേജുകള്‍ക്ക് പുറമേ മറ്റേതെങ്കിലും ഡ്രെയിനേജ് ഉണ്ടോ എന്ന പരിശോധനയ്ക്കും ശേഷമേ ഏതുവിധത്തിലാണ് അടക്കേണ്ടതെന്നുള്ള തീരുമാനം കിഫ്ബി നിര്‍ദേശിക്കുകയുള്ളൂ. നാഷണല്‍ സെന്‍റര്‍ ഫോര്‍ എര്‍ത്ത് സയന്‍സ് ആൻഡ് സ്റ്റഡീസിന്‍റെ വിദഗ്ധ സംഘം ഗ്രൗണ്ട് പെനിട്രേറ്റിംഗ് റഡാര്‍ ഉപയോഗിച്ച് നടത്തിയ സ്‌കാനിംഗ് റിപ്പോര്‍ട്ടിന്‍റെ കൂടി അടിസ്ഥാനത്തിലായിരിക്കും മാര്‍ഗരേഖയ്ക്ക് കിഫ്ബി അന്തിമ അനുമതി നല്‍കുക. നഗരസഭയുടെ സ്ഥലത്തുകൂടിയുള്ള ഡ്രെയിനേജ് നിര്‍മാണത്തിന് അനുമതി ചോദിച്ച് നഗരസഭയ്ക്ക് അടിയന്തരമായി കത്ത് നല്‍കാന്‍ എംഎല്‍എ കെആര്‍എഫ്ബിയോട് നിര്‍ദേശിച്ചു. പൊതുതാല്‍പര്യം മുന്‍നിര്‍ത്തി കെആര്‍എഫ്ബിയുടെ അഭ്യര്‍ത്ഥന ലഭിക്കുന്ന മുറയ്ക്ക് നഗരസഭ ഇതിനു വേണ്ട എല്ലാ സൗകര്യങ്ങളും ഒരുക്കുമെന്ന് നഗരസഭാധ്യക്ഷന്‍ പി.പി. എല്‍ദോസും പറഞ്ഞു. ഇന്നലെ വൈകുന്നേരം ചേര്‍ന്ന അടിയന്തരയോഗത്തില്‍ മാത്യു കുഴല്‍നാടന്‍ എംഎല്‍എ, നഗരസഭാധ്യക്ഷന്‍ പി.പി. എല്‍ദോസ്, കിഫ്ബി പ്രിന്‍സിപ്പല്‍ ടെക്‌നിക്കല്‍ എക്‌സാമിന്‍ അരുണ്‍ തോമസ്, ജല അഥോറിറ്റി സൂപ്രണ്ടിംഗ് എന്‍ജിനീയര്‍ വികെഎസ്ഐ, കെഎച്ച്എഐ ജോയിന്റ് ഡയറക്ടര്‍ ഷെമി എസ്. ബാബു, കെആര്‍എഫ്ബി എക്‌സിക്യൂട്ടീവ് എന്‍ജിനീയര്‍ ജയരാജ്, ജല അഥോറിറ്റി എക്‌സിക്യൂട്ടീവ് എന്‍ജിനീയര്‍ നിഷ ഐസക്, കെആര്‍എഫ്ബി അസിസ്റ്റന്‍റ് എക്‌സിക്യൂട്ടീവ് എന്‍ജിനീയര്‍ പോള്‍ തോമസ്, ജല അഥോറിറ്റി അസിസ്റ്റന്‍റ് എക്‌സിക്യൂട്ടീവ് എന്‍ജിനീയര്‍ ഷാനു പോള്‍, കെആര്‍എഫ്ബി അസിസ്റ്റന്‍റ് എന്‍ജിനീയര്‍ മുഹ്‌സീന, കെഎസ്ഇബി അസിസ്റ്റന്‍റ് എന്‍ജിനീയര്‍ രാജേഷ് തുടങ്ങിയവര്‍ പങ്കെടുത്തു.

എംഎ കോളജ് അധ്യാപകന് അന്തർദേശീയ പുരസ്കാരം

കോതമംഗലം: ന്യൂയോർക് ആസ്ഥാനമായി പ്രവർത്തിക്കുന്ന അമേരിക്കൻ സൊസൈറ്റി ഓഫ് മെക്കാനിക്കൽ എൻജിനീയേഴ്സ് (എഎസ്എംഇ) ആഗോളതലത്തിൽ നൽകുന്ന 2025 ലെ മികച്ച സ്റ്റുഡന്‍റ് സെക്ഷൻ അധ്യാപകനുള്ള അവാർഡ് കോതമംഗലം മാർ അത്തനേഷ്യസ് എൻജിനീയറിംഗ് കോളജിലെ മെക്കാനിക്കൽ വിഭാഗം അധ്യാപകൻ ഡോ. ബോബിൻ ചെറിയാൻ ജോസ് കരസ്ഥമാക്കി. പ്രശസ്തിപത്രവും 500 അമേരിക്കൻ ഡോളർ തുകയുമടങ്ങുന്നതാണ് പുരസ്കാരം.

മൂവാറ്റുപുഴ നഗരത്തിലെ റോഡുകളുടെ ശോച്യാവസ്ഥ: പുനര്‍നിര്‍മാണത്തിന് മൂന്നു മാസം സമയം അംഗീകരിക്കാനാവില്ല: ഹൈക്കോടതി

മൂവാറ്റുപുഴ: നഗരത്തിലെ റോഡുകളുടെ പുനര്‍നിര്‍മാണ ചുമതലയുള്ള കേരള റോഡ് ഫണ്ട് ബോര്‍ഡ് നിര്‍മാണ പ്രവര്‍ത്തികള്‍ പൂര്‍ത്തീകരിക്കുന്നതിന് മൂന്നു മാസം സമയം ആവശ്യപ്പെട്ടത് അംഗീകരിക്കാനാകില്ലെന്ന് ഹൈക്കോടതി. ഒരു വര്‍ഷം കൊണ്ട് തീരേണ്ട ഒരു കിലോമീറ്റര്‍ മാത്രം ദൈര്‍ഘ്യമുള്ള നഗരത്തിലെ റോഡുകളുടെ നിര്‍മാണ പ്രവര്‍ത്തികള്‍ അനന്തമായി നീളുന്ന സാഹചര്യത്തില്‍ നിര്‍മാണം സമയബന്ധിതമായി പൂര്‍ത്തീകരിക്കണമെന്നുള്‍പ്പെടെ പല ആവശ്യങ്ങളും ഉന്നയിച്ച് മൂവാറ്റുപുഴ ഡെവലപ്‌മെന്‍റ് അസോസിയേഷന് വേണ്ടി സെക്രട്ടറി ഒ.വി. അനീഷ് നല്‍കിയ ഹര്‍ജിയിലാണ് ഹൈക്കോടതിയുടെ നിരീക്ഷണം. നിര്‍മാണ പ്രവര്‍ത്തികള്‍ പൂര്‍ത്തീകരിക്കുന്നതിന് ഇനിയും മൂന്നു മാസം സമയം വേണമെന്നായിരുന്നു കെആര്‍എഫ്ബിയുടെ നിലപാട്. എന്നാല്‍ ഇതിനെ ശക്തമായി എതിര്‍ത്ത ഹര്‍ജിക്കാര്‍ ഡിപ്പാര്‍ട്ട്‌മെന്‍റിന്‍റെ പിടിപ്പുകേടുകൊണ്ടാണ് നിര്‍മാണ പ്രവര്‍ത്തികള്‍ പൂര്‍ത്തീകരിക്കാന്‍ വൈകിയതെന്ന് കോടതിയെ ബോധിപ്പിച്ചു. ഇനിയും മൂന്നു മാസം എന്ന നിലപാട് ഒരു കാരണവശാലും അംഗീകരിക്കാന്‍ പറ്റില്ലെന്നും നിര്‍മാണ പ്രവര്‍ത്തികള്‍ പൂര്‍ത്തീകരിക്കാത്തത് മൂലം ജനങ്ങള്‍ തീരാദുരിതത്തിലാണെന്നും ഓണത്തിന് മുമ്പ് നഗരത്തിലെ റോഡുകള്‍ അടിയന്തരമായി റീടാര്‍ ചെയ്യണമെന്നും ആവശ്യമുന്നയിച്ചു. എന്നാല്‍ മണ്‍സൂണ്‍ ആയതിനാല്‍ ഇനിയും മൂന്നു മാസം സമയം വേണമെന്നാണ് കെആര്‍എഫ്ബിയുടെ നിലപാട്. കേരളത്തില്‍ ജൂണ്‍ മാസം മണ്‍സൂണ്‍ ഉണ്ടാകുന്നത് നിങ്ങള്‍ക്ക് അറിയില്ലേ എന്ന് ചീഫ് ജസ്റ്റീസിന്‍റെ ചോദ്യത്തിന് പക്ഷേ കെആര്‍ഫ്ബിക്ക് ഉത്തരമില്ലായിരുന്നു. മണ്‍സൂണിന് മുന്‍പ് നിര്‍മാണ പ്രവര്‍ത്തികള്‍ പൂര്‍ത്തീകരിക്കുന്നതിന് ആവശ്യത്തിന് സമയമുണ്ടായിരുന്നുവെന്നും എന്നാല്‍ വിവിധ ഡിപ്പാര്‍ട്ട്‌മെന്‍റുകളുടെ ഏകോപനം ഇല്ലായ്മ മൂലമാണ് ജോലികള്‍ നീണ്ടുപോയതെന്നും അതിനു പദ്ധതിയുടെ ചുമതലക്കാരായ കെആര്‍എഫ്ബി മാത്രമാണ് ഉത്തരവാദികളെന്നും ഹര്‍ജിക്കാര്‍ കോടതിയെ അറിയിച്ചു. മൂന്നു മാസം ഒരു സാഹചര്യത്തിലും അനുവദിക്കാന്‍ പറ്റില്ലെന്നും ഇനി തുടര്‍ന്നുള്ള ജോലികള്‍ എപ്രകാരം ചെയ്യുമെന്നുള്ളതിനെ കുറിച്ച് വിശദമായ ഒരു വര്‍ക്ക് ഷീറ്റ് തന്നെ ഹാജരാക്കാന്‍ ഹൈക്കോടതി ഡിവിഷന്‍ ബഞ്ച് ഉത്തരവിട്ടു. അതില്‍ ഓരോ ദിവസവും ചെയ്യാന്‍ ഉദ്ദേശിക്കുന്ന ജോലികളെപ്പറ്റി വിശദമായി പ്രതിപാദിക്കണമെന്നും ഈ വിവരങ്ങള്‍ കാണിച്ച് സത്യവാങ്മൂലം ഫയല്‍ ചെയ്യണമെന്നും ചീഫ് ജസ്റ്റിസ് അധ്യക്ഷനായ ഡിവിഷന്‍ ബഞ്ച് ഉത്തരവിൽ പറഞ്ഞിട്ടുണ്ട്. കേസ് തുടര്‍ നടപടികള്‍ക്കായി 26 ലേക്ക് മാറ്റി. ഹര്‍ജിക്കാര്‍ക്ക് വേണ്ടി അഭിഭാഷകനായ എല്‍. റാം മോഹന്‍ ഹാജരായി.

പ്ലൈവുഡ് കമ്പനിക്കെതിരേ പഞ്ചായത്ത്

മൂവാറ്റുപുഴ: ആരക്കുഴ പഞ്ചായത്ത് ഒമ്പതാം വാര്‍ഡില്‍ പ്രവര്‍ത്തനമാരംഭിക്കാന്‍ പോകുന്ന പ്ലൈവുഡ് കമ്പനിക്ക് കെ സ്വിഫ്റ്റ് വഴി ലഭിച്ചിരിക്കുന്ന ലൈസന്‍സും കെട്ടിട നിര്‍മാണ പെര്‍മിറ്റും റദ്ദ് ചെയ്യണമെന്ന് ആവശ്യപ്പെട്ട് ആരക്കുഴ പഞ്ചായത്തിലെ മുഴുവന്‍ ഭരണസമിതി അംഗങ്ങളും ചേര്‍ന്ന് മന്ത്രി പി. രാജീവിന് നിവേദനം നല്‍കി. ഭരണസമിതിയുടെയും പ്രദേശവാസികളുടെയും എതിര്‍പ്പിനെയും പരാതികളെയും മറികടന്ന് കെട്ടിട നിര്‍മാണ പെര്‍മിറ്റും കെ സ്വിഫ്റ്റ് വഴി ലൈസന്‍സും കരസ്ഥമാക്കിയതിനുള്ള ആശങ്ക മന്ത്രിയുടെ ശ്രദ്ധയില്‍പ്പെടുത്തി. പ്ലൈവുഡ് കമ്പനി തുടങ്ങാന്‍ ഉദേശിക്കുന്ന സ്ഥലത്തിന് താഴ്ഭാഗത്തായി നൂറുകണക്കിന് കുടുംബങ്ങള്‍ ഉപയോഗിച്ചുവരുന്ന കുടിവെള്ള സ്രോതസായ രണ്ട് പൊതു കിണറുകളുണ്ട്. അതിനാല്‍ ഗുരുതരമായ ആരോഗ്യപ്രശ്‌നങ്ങള്‍ക്ക് കാരണമാകും. നാട്ടുകാരുടെ പരാതിയെ തുടര്‍ന്ന് പ്ലൈവുഡ് കമ്പനിക്ക് അനുമതി നല്‍കേണ്ടതില്ലെന്ന് പഞ്ചായത്ത് കമ്മിറ്റി തീരുമാനിച്ചിരുന്നു. കെ സ്വിഫ്റ്റ് ലൈസന്‍സുള്ളതിനാല്‍ സ്വാഭാവികമായും പഞ്ചായത്ത് ഭരണസമിതിയെ നോക്കുകുത്തിയാക്കി പ്രവര്‍ത്തനം ആരംഭിക്കുമെന്നതിനാല്‍ നല്‍കിയിട്ടുള്ള പെര്‍മിറ്റും ലൈസന്‍സും റദ്ദ് ചെയ്ത് ഉത്തരവ് ഉണ്ടാകണമെന്നും ജനങ്ങളുടെ ആശങ്ക പരിഹരിച്ച് ആരോഗ്യകരമായ സൈ്വര്യ ജീവിതത്തിന് വേണ്ട സാഹചര്യം ഒരുക്കണമെന്നും പ്രസിഡന്റ് ലിസിത മോഹനനും വൈസ് പ്രസിഡന്‍റ് ബിജു തോട്ടുപുറവും മന്ത്രിയോട് അഭ്യര്‍ഥിച്ചു. ഭരണസമിതിയംഗങ്ങളായ ഓമന മോഹനന്‍, ജിജു ഓണാട്ട്, ദീപ്തി സണ്ണി, സെലിന്‍ ചെറിയാന്‍, ഷീജ അജി, സുനിത വിനോദ്, സാബു പൊതൂര്‍, ആല്‍ബി ആല്‍ബിന്‍, വിഷ്ണു ബാബു, ജാന്‍സി മാത്യു, സിബി കുര്യാക്കോസ് എന്നിവരുടെ സാന്നിധ്യത്തിലാണ് മന്ത്രിക്ക് നിവേദനം നല്‍കിയത്.

വിവാഹ ഫോട്ടോ നൽകിയില്ല; നവവരന്‍റെ പരാതിയിൽ ഫോട്ടോഗ്രാഫർമാർക്കെതിരെ കേസ്

വൈപ്പിൻ: മുൻകൂർ പണം കൈപ്പറ്റിയ ശേഷം വിവാഹത്തിന്‍റെയും സേവ് ദ ഡേറ്റിന്‍റെയും ചിത്രങ്ങളും വീഡിയോകളും നൽകാതെ മുങ്ങിയ ഫോട്ടോഗ്രഫർമാർക്കെതിരെ മുളവുകാട് പോലീസ് വഞ്ചനാ കുറ്റത്തിന് കേസെടുത്തു. നവവരനായ കർണാടക ഉടുപ്പി സ്വദേശി ഷാരോൺ തോമസ് എറണാകുളം ഫസ്റ്റ് ക്ലാസ് മജിസ്ട്രേറ്റ് മുമ്പാകെ നൽകിയ സ്വകാര്യ അന്യായത്തിൽ കോടതി നിർദേശപ്രകാരമാണ് പോലീസ് കേസെടുത്തിട്ടുള്ളത്. ആലുവ കടുങ്ങല്ലൂർ ബിനാനിപുരം സ്വദേശി വിപിൻ, പാലക്കാട് ആലത്തൂർ മുടപ്പല്ലൂർ സ്വദേശി അജേഷ് എന്നിവർക്കെതിരെയാണ് കേസ്. കഴിഞ്ഞ ഡിസംബറിൽ നടന്ന വിവാഹത്തിന്‍റെയും സേവ് ദ ഡേറ്റിന്‍റെയും ഫോട്ടോയും വീഡിയോയും മറ്റും എടുത്തു നൽകാമെന്ന് ഉറപ്പുനൽകി മൂന്നു തവണകളായി ബാങ്ക് അക്കൗണ്ട് വഴി 1,59,000 രൂപ നവവരനായ ഷാരോൺ തോമസിൽ നിന്നും പ്രതികൾ വാങ്ങിയെന്നാണ് പരാതി. എന്നാൽ ഇതുവരെയായി ഫോട്ടോകളും വീഡിയോകളും നൽകാതെ വന്നതിനെത്തുടർന്ന് ഷാരോൺ പണം തിരികെ ആവശ്യപ്പെട്ടെങ്കിലും ഇരുവരും നൽകിയില്ല. തുടർന്നാണ് കോടതിയെ സമീപിച്ചത്.

ഓണത്തെ വരവേല്ക്കാൻ കസ്റ്റംസ് പ്രിവന്‍റീവ് കമ്മീഷണറേറ്റിന്‍റെ ആൽബം

നെടുമ്പാശേരി: ഓണത്തെ വരവേല്ക്കാൻ പ്രത്യേക ആൽബവുമായി കസ്റ്റംസ് പ്രിവൻറീവ് കമ്മീഷണറേറ്റ്. എസ്.എ. മധു രചിച്ച ആൽബം സംവിധാനം ചെയ്തത് ആന്‍റണി സെബാസ്റ്റ്യനാണ്. അമൽ ജോസാണ് സംഗീതവും ആലാപനവും നിർവഹിച്ചത് കസ്റ്റംസ് കമ്മീഷണർ ഡോ. ടി. ടിജു ആൽബം പുറത്തിറക്കി. അഡീഷണൽ കമ്മീഷണർ ജോ പോൾ മാമ്പിള്ളി, ഡെപൂട്ടി കമ്മീഷണർമാരായ അജിത് കൃഷ്ണൻ, ഉമ്മൻ ജോസഫ്,സൈഫുദ്ദീൻ, വി. ശാന്തി എന്നിവർ സംസാരിച്ചു. മയക്കുമരുന്നിന്‍റേയും മറ്റ് കള്ളക്കടത്തിന്‍റെയും നിരീക്ഷണത്തിന്‍റെയും വേട്ടയുടേയും ഇടയ്ക്ക് ലഭിക്കുന്ന വിശ്രമസമയങ്ങളെ ഉപയോഗപ്പെടുത്തിയാണ് ആൽബം തയാറാക്കിയത്.

കിഴക്കന്പലം ഗ്രാമപഞ്ചായത്ത് ഓണാഘോഷം

കിഴക്കമ്പലം: കിഴക്കമ്പലം ഗ്രാമ പഞ്ചായത്തിലെ ഓണാഘോഷവും ചിങ്ങോത്സവവും ട്വന്‍റി 20 പാർട്ടി പ്രസിഡന്‍റ് സാബു എം. ജേക്കബ് ഉദ്ഘാടനം ചെയ്തു. പഞ്ചായത്തിലെ 19 വാർഡുകളിൽ ഏറ്റവും നല്ല പ്രവർത്തനം നടക്കുന്ന വാർഡുകളിൽ 15-ാം വാർഡ് മുൻ നിരയിൽ ആണ്. അതിനാൽ മെന്പർ ഷീബ ജോർജിനെ വരുന്ന തെരഞ്ഞെടുപ്പിൽ വീണ്ടും സ്ഥാനാർഥിയായി മത്സരിപ്പിക്കുമെന്നും സാബും എം. ജേക്കബ് ആഘോഷച്ചടങ്ങിനിടെ പ്രഖ്യാപിച്ചു. കഴിഞ്ഞ നാല് പഞ്ചായത്ത് തെരഞ്ഞെടുപ്പുകളിലും തുടർച്ചയായി 72 ശതമാനം വോട്ടു നേടി ഞാറള്ളൂർ വാർഡാണ് മുന്നിട്ടു നിൽക്കുന്നത്. ബാക്കി വാർഡുകളും ആ നിരയിലേയ്ക്ക് ഉയരണമെന്നും സാബു ജേക്കബ് ഉദ്ഘാടന പ്രസംഗത്തിൽ പറഞ്ഞു. ച ടങ്ങിൽ പഞ്ചായത്തിൽഏറ്റവും നല്ല പ്രവർത്തനം കാഴ്ചവച്ച മികച്ച കർഷകർക്കും ക്ഷീര കർഷകർക്കും അവാർഡു നൽകിയും പൊന്നാട അണിയിച്ചും ആദരിച്ചു. വാർഡ് മെമ്പർ ഷീബാ ജോർജ് അധ്യക്ഷത വഹിച്ചു. വാർഡ് പ്രസിഡന്‍റ് ജിജോ ജോസഫ്, പഞ്ചായത്ത് പ്രസിഡന്‍റ് മിനി രതീഷ്, വൈസ് പ്രസിഡന്‍റ് ജിൻസി അജി, ബ്ലോക്ക് പഞ്ചായത്ത് അംഗം കെ.വി. രാജു, പഞ്ചായത്ത് മെമ്പർമാരായ ജിബി മത്തായി, നാൻസി ജിജോ, ലിൻഡ ആന്‍റണി, മേരി ഏലിയാസ്, ദീപാ ജേക്കബ്, അബിളി വിജിൽ, ആർ. ബിന്ദു എന്നിവർ സംസാരിച്ചു.

ദേശീയപാതയിലെ ട്രാഫിക് കുരുക്കഴിക്കണം: എൻസിപി

കളമശേരി: ദേശീയപാതയിലെ മാസങ്ങളായുള്ള ട്രാഫിക്കുരുക്കിന് പരിഹാരം കാണണമെന്നാവശ്യപ്പെട്ട് നാഷണലിസ്റ്റ് കോൺഗ്രസ്സ് പാർട്ടി (എൻസിപി)യുടെ നേതൃത്വത്തിൽ കളമശേരി എച്ച്എംടി കവലയിൽ പ്രതിഷേധ സമരം നടത്തി. പ്രതിഷേധ സമരം എൻസിപി ദേശീയ ജനറൽ സെക്രട്ടറിയും, സംസ്ഥാന പ്രസിഡന്‍റുമായ എൻ.എ. മുഹമ്മദ് കുട്ടി ഉദ്ഘാടനം ചെയ്തു. ജില്ലാ പ്രസിഡന്‍റ് കെ.കെ. ജയപ്രകാശ് അധ്യക്ഷനായി. സംഘടനാ ജനറൽ സെക്രട്ടറി കല്ലറ മോഹൻ ദാസ്, ബോസ്കോ കളമശേരി, നാസർ ബുഹാരി, പ്രദീപ് വടക്കേടത്ത്, വി.കെ. തുളസീധരൻ, രാജു തോമസ്, കെ.എക്സ് ജോൺസൺ, മുഹമ്മദ് സക്കീർ തുടങ്ങിയവർ പങ്കെടുത്തു. മുഖ്യമന്ത്രി, ഗതാഗത വകുപ്പ് മന്ത്രി, വ്യവസായ വകുപ്പ് മന്ത്രി എന്നിവർക്ക് ഭീമ ഹർജി നൽകാൻ ഒപ്പുശേഖരണവും നടത്തി.

എംജി റോഡിലെ നടത്തം സൂക്ഷിച്ചു വേണം : കാനകളുടെ നവീകരണം തോന്നും പോലെ...!

കൊച്ചി: എംജി റോഡ് മെട്രോ സ്റ്റേഷൻ മുതൽ മാധവ ഫാർമസി ജംഗ്ഷൻ വരെ നവീകരണത്തിന്‍റെ ഭാഗമായി കാനയുടെ സ്ലാബുകൾ അപകടകരമായ രീതിയിൽ തുറന്നിട്ടിരിക്കുന്നതു കാൽനടയാത്രക്കാർക്ക് ഭീഷണിയാവുന്നു. നിർമാണ പ്രവർത്തനം പാതിവഴിയിൽ ഉപേക്ഷിച്ച നിലയിലായതിൽ പ്രതിഷേധം ശക്തമാണ്. സ്ലാബുകൾ ഇളക്കി മാറ്റി പുതിയവ സ്ഥാപിക്കാനും നടപ്പാത ആധുനികവത്കരിച്ച് മനോഹരമാക്കാനും 100 മീറ്റർ പ്രവർത്തിക്ക് 1. 30 കോടിക്കാണ് കരാർ നൽകിയിട്ടുള്ളത്. പണികൾക്കായി നടപ്പാതയിൽ കൂട്ടിയിട്ടിട്ടുള്ള മെറ്റൽ, മണൽ എന്നിവയും, ക്രമരഹിതമായിക്കിടക്കുന്ന കോൺക്രീറ്റ് സ്ലാബുകളും അപകടം ക്ഷണിച്ചുവരുത്തുന്നുണ്ട്. ഇതിനടുത്തുള്ള പുറമ്പോക്ക് ഭൂമികൂടി ഉൾപ്പെടുത്തി നഗരഹൃദയഭാഗം മോടിപിടിപ്പിക്കേണ്ടതിനു പകരം അധികൃതർ അഴിമതിക്ക് കുടപിടിക്കുകയാണെന്ന് റാക്കോ- റസിഡന്‍റ്സ് അസോസിയേഷൻ കോ- ഓർഡിനേഷൻ കൗൺസിൽ ജില്ലാ കമ്മറ്റി ആരോപിച്ചു. കോ- ഓർഡിനേഷൻ കൗൺസിലിന്‍റെ നേതൃത്വത്തിൽ എംജി റോഡിൽ പ്രതിഷേധ സമരം നടത്തി. റാക്കോ ജില്ലാ പ്രസിഡന്‍റ് കുമ്പളം രവി അധ്യക്ഷത വഹിച്ചു. സി.ആർ. നീലകണ്ഠൻ ഉദ്ഘാടനം ചെയ്തു. സംസ്ഥാന ജനറൽ സെക്രട്ടറി കുരുവിള മാത്യുസ് മുഖ്യപ്രഭാഷണം നടത്തി. കെ.ജി. രാധാകൃഷ്ണൻ, കെ.എസ്. ദിലീപ്കുമാർ, രാധാകൃഷ്ണൻ കടവുങ്കൽ, കെ.കെ. വാമലോചനൻ, നോർബട്ട് അടിമുറി, ജലജ ആചാര്യ, ഏലൂർ ഗോപിനാഥ്, പി.ഡി. രാജീവ്, സി. ചാണ്ടി, സലാം പുല്ലേപ്പടി, ജോവൽ ചെറിയാൻ,സൈനബ, സുശീല കങ്ങരപ്പടി,വേണു കറുകപ്പിള്ളി തുടങ്ങിയവർ പ്രസംഗിച്ചു.

മെഡിസെപ്പ് പദ്ധതി പിൻവലിക്കണം: കെപിഎസ്ടിഎ

ആലുവ: അധ്യാപകരിൽ നിന്ന് നിർബന്ധപൂർവം പ്രീമിയം ഈടാക്കി ചികിത്സാസഹായം നൽകാതെ നടപ്പിലാക്കാൻ ശ്രമിക്കുന്ന മെഡിസെപ്പ് ആരോഗ്യ ഇൻഷ്വറൻസ് പദ്ധതി അടിയന്തിരമായി പിൻവലിക്കണമെന്ന് കെപിഎസ്ടിഎ ആവശ്യപ്പെട്ടു. പ്രതിഷേധത്തിന്‍റെ ഭാഗമായി സംസ്ഥാനത്തെ എല്ലാ വിദ്യാഭ്യാസ ജില്ലാ ഓഫീസുകൾക്ക് മുന്നിലും കെപിഎസ്ടിഎ ധർണ നടത്തി. ആലുവ വിദ്യാഭ്യാസ ജില്ലാ ഓഫീസുകൾക്ക് മുന്നിൽ സംഘടിപ്പിച്ച പ്രതിഷേധ ധർണ കെപിസിസി ജന. സെക്രട്ടറി ബി.എ. അബ്ദുൽ മുത്തലിബ് ഉദ്ഘാടനം ചെയ്തു. വിദ്യാഭ്യാസ ജില്ല പ്രസിഡന്‍റ് മാർട്ടിൻ ജോസഫ് അധ്യക്ഷത വഹിച്ചു.

കൊച്ചി കോര്‍പറേഷനിലും മല്‍സരത്തിനൊരുങ്ങി ട്വന്‍റി 20

കൊച്ചി: ട്വന്‍റി 20 കൊച്ചി കോര്‍പറേഷനിലും മത്സരിക്കാനൊരുങ്ങുന്നു. തദ്ദേശ തെരഞ്ഞെടുപ്പില്‍ കോര്‍പറേഷനിലെ 76 ഡിവിഷനിലും പാര്‍ട്ടി മല്‍സരിക്കുമെന്ന് സംസ്ഥാന പ്രസിഡന്‍റ് സാബു എം. ജേക്കബ് പറഞ്ഞു. സാമ്പത്തിക തലസ്ഥാനമായ കൊച്ചി നഗരത്തിന്‍റെ അവസ്ഥ പരമ ദയനീയമാണെന്ന് അദ്ദഹം പറഞ്ഞു. ചെറിയ മഴപെയ്താല്‍പ്പോലും വെള്ളത്തില്‍ മുങ്ങുന്ന കൊച്ചിയുടെ അവസ്ഥയ്ക്കു മാറ്റംവരണം. വെള്ളക്കെട്ട് നിവാരണത്തിനായി കോടിക്കണക്കിന് രൂപ ചെലവഴിച്ചിട്ടും മാറിമാറി ഭരിച്ച മുന്നണികള്‍ക്ക് ഇതിന് പരിഹാരം കാണാന്‍ സാധിച്ചിട്ടില്ല. ഭരണം കിട്ടിയാൽ കോര്‍പറേഷന്‍ പരിധിയിലുള്ള മുഴുവന്‍ റോഡുകളും ബിഎംബിസി നിലവാരത്തില്‍ ടാര്‍ ചെയ്യും. മാലിന്യപ്രശ്‌നം പൂര്‍ണമായും പരിഹരിക്കും. കോര്‍പറേഷനിലെ ട്വന്‍റി 20 മോഡല്‍ ഭരണം നടപ്പാക്കുകയാണ് അടുത്ത തെരഞ്ഞെടുപ്പിലൂടെ ലക്ഷ്യമിടുന്നതെന്നും സാബു പറഞ്ഞു.

കെഎസ്ആർടിസി ബസും വാനും കൂട്ടിയിടിച്ചു : ദേശീയപാതയിൽ മണിക്കൂറുകൾ ഗതാഗതക്കുരുക്ക്

അരൂർ: അരൂർ-തുറവൂർ ഉയരപ്പാത നിർമാണം നടക്കുന്ന ദേശീയപാതയിൽ കെഎസ്ആർടിസി ബസും വാനും കൂട്ടിയിടിച്ചു. ആർക്കും പരിക്കില്ല. ഇന്നലെ പുലർച്ചെ അഞ്ചരയോടെ അരൂരിൽനിന്നു തുറവൂർ ഭാഗത്തേക്ക് പോവുകയായിരുന്നു വാഹനങ്ങൾ പള്ളിക്കു സമീപം എസ്എൻഡിപി കെട്ടിടത്തിന്‍റെ മുന്നിലാണ് കൂട്ടിയിടിച്ചത്. തുടർന്നുണ്ടായ ഗതാഗതക്കുരുക്കിൽ പാചകവാതക സിലിണ്ടറുകൾ കയറ്റി പോകുകയായിരുന്ന ലോറിയും വഴിയിലായി. ഏറെ നേരം വാഹനം നിർത്തിയിട്ടതോടെ എയർബ്രേക്ക് സംവിധാനം തകരാറിലാകുകയായിരുന്നു. വഴിമുടക്കി ദേശീയപാതയുടെ നടുവിൽക്കിടന്ന ലോറി ഒരു മണിക്കൂറുകൾക്കു ശേഷമാണ് റോഡരികിലേക്ക് തള്ളിമാറ്റിയത്. യന്ത്രത്തകരാർ പരിഹരിക്കാൻ പ്രദേശത്തുള്ള വർക്ക്ഷോപ്പിൽ നിന്ന് ആളുവന്നെങ്കിലും കമ്പനിയുടെ മെക്കാനിക് തന്നെ വരണമെന്ന് ഡ്രൈവർ നിർബന്ധം പിടിച്ചു. പിന്നീട് കമ്പനി മെക്കാനിക് എത്തിയാണ് ലോറി കൊണ്ടുപോയത്.

ഫ്ളാറ്റു സമുച്ചയത്തിൽ കുടുങ്ങിയ വീട്ടമ്മയെ രക്ഷിച്ചു

കാക്കനാട് : എൻജിഒ ക്വാർട്ടേഴ്സിനു സമീപം 23 നിലകളുള്ള ഫ്ലാറ്റു സമുച്ചയത്തിന്‍റെനാലാം നിലയിൽ ഡോർ ലോക്കായതിനെതുടർന്ന് കുടുങ്ങിപ്പോയ വീട്ടമ്മയെ തൃക്കാക്കര അഗ്നി രക്ഷാനിലയത്തിൽ നിന്നെത്തി രക്ഷപ്പെടുത്തി. ഇവർ താമസിക്കുന്ന ഫ്ലാറ്റിന്‍റെ മുൻവാതിലും, ബാൽക്കണിയിൽ നിന്നും അകത്തേക്കുളള വാതിലും ലോക്കായതിനെതുടർന്ന് ബാൽക്കണിയിൽ കുടുങ്ങി പോയ വീട്ടമ്മയെ അഞ്ചാം നിലയിൽ നിന്നും റോപ്പിൽ തൂങ്ങിയെ ത്തിയ അഗ്നിരക്ഷാ പ്രവർത്തകർ രക്ഷപെടുത്തുകയായിരുന്നു. തമിഴ്നാട് സ്വദേശിനിയായ ജീവയെന്ന യുവതിയാണ് 23 നിലകളുള്ള ഫ്ലാറ്റിന്‍റെ നാലാം നിലയിൽ കുടുങ്ങിയത്.

തമ്മനം പുല്ലേപ്പടി റോഡിന്‍റെ ശോച്യാവസ്ഥ: എഡ്രാക്ക് ധർണ ന‌ടത്തി

കൊച്ചി: തമ്മനം പുല്ലേപ്പടി റോഡിന്‍റെ ശോച്യാവസ്ഥക്കെതിരെ എറണാകുളം ജില്ലാ റസിഡന്‍റ്സ് അസോസിയേഷൻ അപെക്സ് കൗൺസിൽ (എഡ്രാക്) പാലാരിവട്ടം മേഖല കമ്മിറ്റിയുടെ ആഭിമുഖ്യത്തിൽ സായാഹ്ന ധർണ നടത്തി. എഡ്രാക്ക് ജനറൽ സെക്രട്ടറി പി.സി. അജിത്കുമാർ ഉദ്ഘാടനം ചെയ്തു. ജില്ലാ വൈസ് പ്രസിഡന്‍റ് അഡ്വ. ഡി.ജി. സുരേഷ് അധ്യക്ഷനായി. വനിതാ കമ്മിറ്റി ജില്ലാ പ്രസിഡന്‍റ് ജെയിൻ ത്രിലോക്, ജില്ലാ സെക്രട്ടറി ടി.എസ്. മാധവൻ, വ്യാപാരി സംഘടനാ പ്രതിനിധി, ഓട്ടോറിക്ഷ തൊഴിലാളി യൂണിയൻ പ്രതിനിധി, കൗൺസിലർമാരായ ജോർജ് നാനാട്ട്, സക്കീർ തമ്മനം,വിനോദ ലൈബ്രറി പ്രസിഡന്‍റ് ലെനിൻ, എഡ്രാക് മേഖല സെക്രട്ടറി സ്റ്റീഫൻ നാനാട്ട്, കെ.വി. മാർട്ടിൻ, ശ്രീദേവി കമ്മത്ത്, ബാലചന്ദ്ര കമ്മത്ത്, മോളി ചാർളി,ശാന്തിഗിരി ആശ്രമം പ്രതിനിധി ആർ. സതീശൻ എന്നിവർ സംസാരിച്ചു.

വിനായകനെ തള്ളി ‘അമ്മ’

കൊച്ചി: അടൂര്‍ ഗോപാലകൃഷ്ണനെയും യേശുദാസിനെയും അധിക്ഷേപിച്ചുള്ള പരാമര്‍ശങ്ങൾ നടത്തിയ സംഭവത്തിൽ നടന്‍ വിനായകനെ താര സംഘടനയായ അമ്മ പരസ്യമായി തള്ളിപ്പറഞ്ഞു. നടന്‍ വിനായകന്‍റെ ഇത്തരത്തിലുള്ള പ്രവൃത്തികളില്‍ പ്രതിഷേധം രേഖപ്പെടുത്തുന്നതായും അമ്മ പത്രക്കുറിപ്പില്‍ അറിയിച്ചു. മെമ്മറി കാര്‍ഡ് വിവാദത്തില്‍ അന്വേഷണം നടത്താന്‍ അമ്മ അഞ്ചംഗ സമിതിയെ നിയോഗിച്ചു. 60 ദിവസത്തിനുള്ളില്‍ അന്വേഷണം നടത്തി റിപ്പോര്‍ട്ട് നല്‍കാനാണ് ആവശ്യപ്പെട്ടിരിക്കുന്നത്. പുതിയ ഭരണസമിതിയുടെ ആദ്യ എക്‌സിക്യൂട്ടീവ് യോഗത്തിലാണ് തീരുമാനം.

ഇ- വേസ്റ്റ് ഉണ്ടോ ! ഉടന്‍ പണവുമായി പെരുമ്പാവൂര്‍ നഗരസഭ

പെരുമ്പാവൂര്‍: നഗരസഭാ പരിധിയിലെ ഇലക്ടോണിക് വേസ്റ്റുകള്‍ പണം നല്‍കി ശേഖരിക്കാനുള്ള പദ്ധതിയുമായി പെരുമ്പാവൂര്‍ നഗരസഭ. വീടുകളില്‍ നിന്നും സ്ഥാപനങ്ങളില്‍ നിന്നും ഇ-മാലിന്യങ്ങള്‍ ഹരിത കര്‍മസേനാംഗങ്ങള്‍ ശേഖരിക്കുകയും, മാലിന്യം കൈമാറുന്ന നിമിഷം തന്നെ പണം നല്‍കുകയും ചെയ്യും. നഗരത്തിലെ എല്ലാ വാര്‍ഡുകളില്‍ നിന്നും ഇ-മാലിന്യ ശേഖരണം നടത്തും. നഗരത്തില്‍ ശുചിത്വം ഉറപ്പാക്കുന്നതിനും പരിസ്ഥിതി സംരക്ഷണത്തിനുമായി പദ്ധതി പ്രയോജനപ്പെടും. പദ്ധതി നഗരസഭാ ചെയര്‍മാന്‍ പോള്‍ പാത്തിക്കല്‍ ഉദ്ഘാടനം ചെയ്തു. ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ സി.കെ. രാമകൃഷ്ണന്‍ അധ്യക്ഷത വഹിച്ചു. വൈസ് ചെയര്‍പേഴ്‌സണ്‍ ആനി മാര്‍ട്ടിന്‍, ഹെല്‍ത്ത് സൂപ്പര്‍വൈസര്‍ സജു മാട്ടില്‍, സിഡിഎസ് പ്രസിഡന്‍റ് ജാസ്മിന്‍ ബഷീര്‍ എന്നിവര്‍ സംസാരിച്ചു.

മലയാറ്റൂർ-നീലീശ്വരം പഞ്ചായത്തിലെ കാടപ്പാറ പ്രദേശം പുലിപ്പേടിയില്‍

കാലടി: മലയാറ്റൂര്‍-നീലീശ്വരം പഞ്ചായത്തിലെ കാടപ്പാറ പ്രദേശത്ത് സ്ഥിതി ചെയ്യുന്ന ന്യൂമാന്‍ അക്കാദമി സ്കൂളില്‍ ഇന്നലെ രാത്രി പുലി ഇറങ്ങി. സ്കൂള്‍ കോമ്പൗണ്ടിൽ ആടിനെ കൊന്ന് ഭാഗികമായി തിന്നശേഷം ഉപേക്ഷിച്ച നിലയില്‍ കണ്ടെത്തി. സ്ഥലം പരിശോധിച്ചതില്‍ നിന്നും ഇത് പുലി കൊന്ന് തിന്നതാണെന്ന് ഫോറസ്റ്റ് ഉദ്യോഗസ്ഥര്‍ അറിയിച്ചു. സമാനമായ രീതിയില്‍ കുറച്ച് ദിവസം മുമ്പ് പഞ്ചായത്തിലെ യൂക്കാലി പ്രദേശത്തും പുലി പശുവിനെ ആക്രമിച്ചിരുന്നു.നിരന്തരമായ പുലിയുടെ ആക്രമണത്തില്‍ പ്രദേശവാസികള്‍ വലിയ ആശങ്കയിലാണ്. നൂറുകണക്കിന് വിദ്യാര്‍ത്ഥികള്‍ പഠിക്കുന്ന ഒരു സ്കൂളിന്‍റെ കോമ്പൗണ്ടിലാണ് ഇന്നലെ ആടിനെ അജ്ഞാത ജീവി കടിച്ചു തിന്നത്. അന്താരാഷ്ട്ര തീര്‍ത്ഥാടന കേന്ദ്രമായ മലയാറ്റൂര്‍ കുരിശുമുടിയിലേക്കും സമീപ പ്രദേശത്തേക്കും മറ്റുമായി ധാരാളം ടൂറിസ്റ്റുകള്‍ എത്തിച്ചേരുന്നതാണ്. പുലിയുടെ ആക്രമണം ഉണ്ടായ സ്ഥലം റോജി എം. ജോൺ എംഎല്‍എ ഫോറസ്റ്റ് ഉദ്യോഗസ്ഥരോടൊപ്പം സന്ദര്‍ശിച്ചു. വനമേഖലാ പ്രദേശമായ ഇവിടെ ഉണ്ടാകുന്ന പുലിയുടെ ആക്രമണം ഒഴിവാക്കുന്നതിനായി കൂട് സ്ഥാപിച്ച് പുലിയെ പിടിക്കുന്നതിന് ആവശ്യമായ നടപടികള്‍ കൈക്കൊള്ളണമെന്നും, പ്രദേശവാസികളുടെ ആശങ്ക കണക്കിലെടുത്ത് ഇതിന് ശാശ്വത പരിഹാരം കണ്ടെത്തുന്നതിന് അടിയന്തിര ഇടപെടല്‍ അഭ്യര്‍ഥിച്ച് റോജി എം. ജോണ്‍ എംഎല്‍എ വനം വകുപ്പു മന്ത്രി എ.കെ. ശശീന്ദ്രന് കത്ത് നല്‍കി.

16കാരനെ കാണ്മാനില്ലെന്ന് പരാതി

വൈപ്പിൻ: മൊബൈൽ ഫോൺ നൽകാത്തതിനെച്ചൊല്ലി വീട്ടുകാരുമായി വഴക്കിട്ട് വീടുവിട്ട 16കാരനെ കാണ്മാനില്ലെന്ന് പരാതി. എളങ്കുന്നപ്പുഴ വളപ്പ് ബോട്ട് ജെട്ടിക്ക് സമീപം താമസിക്കുന്ന പതിനാറുകാരനെയാണ് കാണാതായത്. 20നു രാത്രി പത്തരയോടെ വീടുവിട്ടിറങ്ങിയ ബാലൻ പിന്നീട് വീട്ടിൽ തിരിച്ചെത്തിയില്ല. പിതാവ് ഞാറക്കൽ പോലീസിൽ നൽകിയ പരാതിയിൽ കേസെടുത്തിട്ടുണ്ട്.

വാഹനാപകടത്തിൽ ദമ്പതികൾക്ക് പരിക്കേറ്റു

പനങ്ങാട്: നെട്ടൂരിലെ മാടവന സിഗ്നലിന് സമീപത്തുണ്ടായ വാഹനാപകടത്തിൽ ദമ്പതികൾക്ക് പരിക്കേറ്റു. ആലപ്പുഴ കുത്തിയതോട് കോടംതുരുത്ത് ആലത്തറ വീട്ടിൽ ലിനെറ്റ് (30), ഷാരോൺ സേവ്യർ (36) എന്നിവർക്കാണ് പരിക്കേറ്റത്. ഇവർ സഞ്ചരിച്ച ഇരുചക്രവാഹനത്തിൽ കാറിടിക്കുകയായിരുന്നു. ഇരുവരെയും നെട്ടൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇന്നലെ ഉച്ചകഴിഞ്ഞ് 3.35 ഓടെയായിരുന്നു അപകടം.

കളക്ടറേറ്റിൽ ബോംബ് ഭീഷണി : ഭീഷണിയെത്തിയത് മദ്രാസ് ടൈഗേഴ്‌സിന്‍റെ ഇ-മെയിലിൽ നിന്ന്

ഇ-സിഗരറ്റ് മാതൃകയിലുള്ള ബോംബ് വച്ചിട്ടുണ്ടെന്നായിരുന്നു ഭീഷണി കാക്കനാട്: എറണാകുളം കളക്ടറേറ്റിൽ ബോംബ് ഭീഷണി. കളക്ടറേറ്റ് സമുച്ചയത്തിലെ താഴത്തെ നിലയില്‍ പ്രവര്‍ത്തിക്കുന്ന ജില്ലാ ശിശു സംരക്ഷണ ഓഫീസില്‍ വ്യാഴാഴ്ച രാവിലെ ഏഴരയോടെ ഇ- മെയില്‍ വഴിയാണ് ഭീഷണി സന്ദേശമെത്തിയത്. ഉച്ചയ്ക്ക് ഒന്നരയ്ക്ക് ബോംബ് പൊട്ടുമെന്നും ജീവനക്കാരെ ഒഴിപ്പിക്കണമെന്നുമായിരുന്നു മദ്രാസ് ടൈഗേഴ്‌സിന്‍റെ ഇ-മെയില്‍ സന്ദേശം. ഓഫീസ് മേധാവി രാവിലെ എട്ടരയോടെ വീട്ടില്‍ വച്ച് ഔദ്യോഗിക മൊബൈല്‍ ഫോണില്‍ ഇ-മെയില്‍ പരിശോധിച്ചപ്പോഴാണ് സന്ദേശം ശ്രദ്ധയില്‍പ്പെട്ടത്. വിവരമറിഞ്ഞതിനെ തുടര്‍ന്ന് പോലീസും ഡോഗ് സ്‌ക്വാഡും ഓഫീസ് അരിച്ചുപെറുക്കിയെങ്കിലും സംശയാസ്പദമായ ഒന്നും കണ്ടെത്താനായില്ല. പത്തരയോടെ പരിശോധന പൂര്‍ത്തിയാക്കിയശേഷമാണ് ജീവനക്കാര്‍ ജോലിയില്‍ പ്രവേശിപ്പിച്ചത്. തമിഴ്‌നാട് ഡിഎംകെ രാഷ്ട്രീയവുമായി ബന്ധപ്പെട്ട് ഇംഗ്ലീഷിലാണ് ഇ-മെയില്‍ അയച്ചിരുന്നത്. രാജഗിരി മദ്രാസ് ടൈഗേഴ്‌സ് എന്ന പേരിലായിരുന്നു വനിത ശിശു ക്ഷേമ ഓഫീസര്‍ക്ക് മെയില്‍ സന്ദേശം ലഭിച്ചത്. ഇ-സിഗരറ്റ് രൂപത്തിലുള്ള ബോംബ് പൊട്ടുമെന്നായിരുന്നു സന്ദേശം. ഇ-മെയില്‍ സന്ദേശത്തിന്‍റെ ഉറവിടം കണ്ടെത്താന്‍ അന്വേഷണം ശക്തമാക്കിയെന്നു പോലീസ് പറഞ്ഞു. കഴിഞ്ഞ ഏപ്രിലില്‍ കേന്ദ്ര സര്‍ക്കാര്‍ ഓഫീസുകള്‍ പ്രവര്‍ത്തിക്കുന്ന കാക്കനാട് കേന്ദ്രീയ ഭവനിലും ഹൈക്കോടതിക്കു നേരെയും മദ്രാസ് ടൈഗേഴ്‌സിന്‍റെ ബോംബ് ഭീഷണി സന്ദേശം ലഭിച്ചിരുന്നു. കേന്ദ്രീയ ഭവനിലെ മൂന്നാം നിലയിലെ പെട്രോളിയം എക്‌സ്പ്ലോസീവ്‌സ് വിഭാഗം ഡെപ്യൂട്ടി കണ്‍ട്രോളറുടെ ഓഫീസ് ഇ-മെയിലിലേക്ക് ആണ് അന്ന് സന്ദേശം അയച്ചത്. തമിഴ്‌നാട്ടിലെ പ്രമുഖര്‍ ഉള്‍പ്പെടെയുള്ളവര്‍ക്കെതിരെയുള്ള ലഹരിക്കേസ് പിന്‍വലിക്കണമെന്നായിരുന്നു അന്നത്തെ ഭീഷണി സന്ദേശത്തില്‍ സൂചിപ്പിച്ചിരുന്നത്.

നങ്ങേലിപ്പടിയിൽ കാറും സ്കൂട്ടറും കൂട്ടിയിടിച്ച് വ്യാപാരി മരിച്ചു

കോതമംഗലം: പെരുമ്പാവൂര്‍-കോതമംഗലം റോഡില്‍ നങ്ങേലിപ്പടി റാഡോ കമ്പനിക്ക് സമീപം കാറും സ്‌കൂട്ടറും കൂട്ടിയിടിച്ച് നെല്ലിക്കുഴി സ്വദേശിക്ക് ദാരുണാന്ത്യം. നെല്ലിക്കുഴി ഇടപ്പാറ മുഹമ്മദ് (കുഞ്ഞുമുഹമ്മദ്-48) ആണ് മരിച്ചത്. ഇന്നലെ വൈകിട്ട് ആറിനായിരുന്നു അപകടം. നെല്ലിക്കുഴിയില്‍ പച്ചക്കറി വ്യാപാരിയായ മുഹമ്മദ് കോതമംഗലത്ത് പോയി മടങ്ങവേ പെരുമ്പാവൂര്‍ ഭാഗത്തുനിന്ന് വന്ന കാര്‍ തെറ്റായ ദിശയിൽ വന്ന് എതിരെ വന്ന സ്‌കൂട്ടറിൽ ഇടിക്കുകയായിരുന്നു. റാഡോ കമ്പനിയുടെ മതിലില്‍ ഇടിച്ച് വട്ടംതിരിഞ്ഞ് കാറിന്‍റെ പിന്‍ഭാഗം സ്‌കൂട്ടറിൽ ഇടിക്കുകയായിരുന്നുവെന്ന് പോലീസ് പറഞ്ഞു. റാഡോ കമ്പനിയുടെ മതിലും തകര്‍ന്നിട്ടുണ്ട്. മതിലിനും കാറിന്‍റെ പിന്‍ഭാഗത്തെ ടയറിനും ഇടയില്‍ കുരുങ്ങികിടക്കുന്ന നിലയിലായിരുന്നു സ്‌കൂട്ടര്‍ കിടന്നത്. ഗുരുതര പരിക്കേറ്റ മുഹമ്മദിനെ താലൂക്ക് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മൃതദേഹം താലൂക്ക് ആശുപത്രി മോര്‍ച്ചറിയില്‍. ഭാര്യ: റംല പാനിപ്ര കോനേത്താന്‍. മക്കള്‍: അല്‍ത്താഫ്, അല്‍ന ഫാത്തിമ. കബറടക്കം ഇന്ന് 1.30 ന് നെല്ലിക്കുഴി കമ്പനിപ്പടി നെല്ലിക്കുന്നത്ത് ജുമാ മസ്ജിദ് കബര്‍സ്ഥാനില്‍.

കൂത്താട്ടുകുളം നഗരസഭ ചെയർപേഴ്സൺ, വൈസ് ചെയർമാൻ തെരഞ്ഞെടുപ്പ് 29ന്

കൂത്താട്ടുകുളം: നഗരസഭയിലെ ചെയർപേഴ്സൺ വൈസ് ചെയർമാൻ തെരഞ്ഞെടുപ്പ് 29ന് നടക്കും. രാവിലെ 11ന് ചെയർപേഴ്സൺ തെരഞ്ഞെടുപ്പും ഉച്ചകഴിഞ്ഞ് രണ്ടിന് വൈസ് ചെയർപേഴ്സൺ തെരഞ്ഞെടുപ്പുമാകും നടക്കുക. ദാരിദ്രലഘൂകരണ വിഭാഗം ജില്ലാ ഓഫിസറാകും വരണാധികാരി. ഈ മാസം അഞ്ചിനാണ് യുഡിഎഫ് കൊണ്ടുവന്ന അവിശ്വാസ പ്രമേയത്തിലൂടെ നഗരസഭാ ചെയർപഴ്സണും വൈസ് ചെയർമാനും പുറത്തായത്. കഴിഞ്ഞ ജനുവരിയിൽ യുഡിഎഫ് കൊണ്ടുവന്ന അവിശ്വാസ പ്രമേയ അവതരണത്തെ തുടർന്ന് സിപിഎം കൗൺസിലർ കല രാജുവിനെ സിപിഎം പ്രവർത്തകർ തന്നെ തട്ടിക്കൊണ്ടുപോയത് വിവാദമായിരുന്നു. അഞ്ചിലെ അവിശ്വാസ പ്രമേയ ചർച്ചയിൽ കല രാജു യുഡിഎഫിനെ അനുകൂലിച്ച് വോട്ട് രേഖപ്പെടുത്തിയതോടെയാണു എൽ ഡിഎഫിന് ഭരണം നഷ്ടമായത്.

ഡോ. എം. ലീലാവതിക്ക് പുരസ്കാരം സമ്മാനിക്കാൻ പ്രിയങ്ക ഗാന്ധി എത്തും

കളമശേരി: ഡോ. എം. ലീലാവതിയെ നേരിൽ കാണാനും കോൺഗ്രസ് സാഹിത്യ വിഭാഗത്തിന്‍റെ പ്രിയദർശിനി പുരസ്കാരം സമ്മാനിക്കാനും പ്രിയങ്ക ഗാന്ധി എംപി 23ന് വൈകുന്നേരം നാലിന് ലീലാവതി ടീച്ചറുടെ കളമശേരിയിലെ വസതിയിലെത്തും. എഐസിസി ജനറൽ സെക്രട്ടറി കെ.സി. വേണുഗോപാൽ, കെപിസിസി പ്രസിഡന്‍റ് സണ്ണി ജോസഫ്, പ്രതിപക്ഷ നേതാവ് വി.ഡി. സതീശൻ, ഹൈബി ഈഡൻ എംപി, എംഎൽഎമാർ തുടങ്ങിയവർ പരിപാടിയിൽ പങ്കെടുക്കും.

കോടതി ഇടപെട്ടു : എടവനക്കാട്ട് കടൽഭിത്തി നിർമാണം ആരംഭിക്കാൻ കളക്ടറുടെ നിർദേശം

വൈപ്പിൻ: എടവനക്കാട് ടെട്രാപോഡ് ഉപയോഗിച്ചുള്ള കടൽഭിത്തി നിർമിക്കാൻ ബന്ധപ്പെട്ട ഉദ്യോഗസ്ഥർക്ക് ജില്ലാ കളക്ടർ നിർദേശം നൽകി. ഹൈക്കോടതി ഇടപെടലിനെ തുടർന്ന് ഉദ്യോഗസ്ഥരെയും ജനകീയ സമരസമിതി പ്രതിനിധികളെയും വിളിച്ചുകൂട്ടി നടത്തിയ യോഗത്തിലാണ് ജിഡ അനുവദിച്ച തുകയും ദുരന്തനിവാരണ അഥോറിറ്റി പ്രഖ്യാപിച്ച തുകയും അടിയന്തരമായി ലഭ്യമാക്കി കടൽഭിത്തി നിർമാണം ആരംഭിക്കാൻ കളക്ടർ നിർദേശം നൽകിയത്. സുനാമിക്കു ശേഷം കടൽഭിത്തി പുനർനിർമിക്കാത്ത എടവനക്കാട് തീരത്ത് ടെട്രാ പോഡ് ഉപയോഗിച്ചുള്ള കടൽഭിത്തി നിർമിക്കണമെന്ന് ആവശ്യപ്പെട്ട് ജനകീയ സമരസമിതി നിരന്തരം സമരത്തിലായിരുന്നു. തുടർന്ന് പഞ്ചായത്ത് ഇടപെട്ട് എംഎൽഎ മുഖേന ജിഡയിൽനിന്ന് 35 കോടി രൂപ അനുവദിച്ചു. ബാക്കി 21 കോടി ദുരന്തനിവാരണ അഥോറിറ്റിയിൽ നിന്നും നൽകാമെന്നും പ്രഖ്യാപനമുണ്ടായി. എന്നാൽ പ്രഖ്യാപനം കഴിഞ്ഞ് നാലു മാസങ്ങൾ പിന്നിട്ടിട്ടും നടപടിയില്ലാതെ വന്നതോടെ ജനകീയ സമരസമിതി ഹൈക്കോടതിയെ സമീപിക്കുകയായിരുന്നു. തുടർന്ന് കോടതി നിർദേശപ്രകാരമാണ് ജില്ലാ കളക്ടർ ഇടപെട്ടത്.

ഭാര്യയെ ചുറ്റികയ്ക്ക് കൊലപ്പെടുത്താൻ ശ്രമം; ഭർത്താവ് അറസ്റ്റിൽ

വാഴക്കുളം: ഭാര്യയെ ചുറ്റികയ്ക്കടിച്ച് കൊലപ്പെടുത്താൻ ശ്രമിച്ച കേസിൽ യുവാവിനെ അറസ്റ്റ് ചെയ്തു. ഏനാനല്ലൂർ തോട്ടഞ്ചേരി പുൽപ്പാറക്കുടിയിൽ അനന്തു ചന്ദ്ര(33)നെയാണ് കല്ലൂർക്കാട് പോലീസ് അറസ്റ്റ് ചെയ്തത്. മൂവാറ്റുപുഴ കോടതിയിൽ ഹാജരാക്കിയ ഇയാളെ റിമാൻഡ് ചെയ്തു. ചൊവ്വാഴ്ച വൈകുന്നേരം നാലരയോടെയായിരുന്നു സംഭവം. ഇയാളുടെ മദ്യപാന ശീലം ഭാര്യ അനു ചോദ്യം ചെയ്തതാണ് അക്രമത്തിൽ കലാശിച്ചതെന്ന് പോലീസ് പറഞ്ഞു. തലയിൽ ഗുരുതര പരിക്കേറ്റ അനു കോലഞ്ചേരി മെഡിക്കൽ കോളജ് ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്. കല്ലൂർക്കാട് സിഐ കെ. ഉണ്ണികൃഷ്ണൻ, എസ്ഐമാരായ വി.എ. അസീസ്, അബ്ദുൾ റഹ്മാൻ, എഎസ്ഐ ജിമ്മോൻ ജോർജ്, സിപിഒമാരായ സനൽ വി. കുമാർ, അഫ്സൽ കോയ, റോബിൻ തോമസ് എന്നിവരാണ് അന്വേഷണസംഘത്തിൽ ഉണ്ടായിരുന്നത്.

വിലവര്‍ധന, പൂഴ്ത്തിവയ്പ്പ്: സ്‌പെഷല്‍ സ്‌ക്വാഡ് രൂപീകരിച്ചു : വരും ദിവസങ്ങളില്‍ ഊര്‍ജിത പരിശോധന

കൊച്ചി: ഓണത്തോടനുബന്ധിച്ച് കരിഞ്ചന്ത, പൂഴ്ത്തിവയ്പ്പ്, ഭക്ഷ്യ സാധനങ്ങളില്‍ മായം ചേര്‍ക്കല്‍, അളവ് തൂക്ക ഉപകരണങ്ങളിലെ തട്ടിപ്പ് എന്നിവ തടയുന്നതിനായി ആറു വകുപ്പുകളെ ഉള്‍പ്പെടുത്തി സ്‌പെഷല്‍ സ്‌ക്വാഡ് രൂപീകരിച്ചു. പൊതുവിപണിയില്‍ അവശ്യസാധങ്ങളുടെ ലഭ്യത ഉറപ്പുവരുന്നുന്നതിനും വിലക്കയറ്റം ഒഴിവാക്കാനുമുള്ള നടപടികള്‍ ശക്തമാക്കുന്നതിന്‍റെ ഭാഗമായി ജില്ലാ കളക്ടര്‍ ജി. പ്രിയങ്കയുടെ നേതൃത്വത്തില്‍ ചേര്‍ന്ന പ്രത്യേക യോഗത്തിലാണ് സ്‌ക്വാഡ് രൂപീകരിച്ചത്. റവന്യൂ, പൊതുവിതരണം, ലീഗല്‍ മെട്രോളജി, ഭക്ഷ്യസുരക്ഷ, തദ്ദേശ സ്വയംഭരണം, പോലീസ് എന്നീ വകുപ്പിലെ ഉദ്യോഗസ്ഥരാണ് സ്‌ക്വാഡിലുള്ളത്. ഉത്സവകാലത്തെ വിലക്കയറ്റം സാധാരണക്കാരെയാണ് കൂടുതല്‍ ബാധിക്കുകയെന്നതിനാൽ സ്‌ക്വാഡിന്‍റെ പരിശോധന വരും ദിവസങ്ങളില്‍ ഉര്‍ജിതമാക്കുമെന്ന് ജില്ലാ കളക്ടര്‍ പറഞ്ഞു. ഇത്തവണത്തെ ഓണത്തിന് സംസ്ഥാനത്ത് നിലവിലുള്ള ഹരിതചട്ടങ്ങള്‍ പാലിക്കാന്‍ വ്യാപാരസ്ഥാപനങ്ങള്‍ ശ്രദ്ധ പുലര്‍ത്തണം. പ്ലാസ്റ്റിക് ഉത്പന്നങ്ങള്‍ വിപണിയിലെത്തുന്നത് തടയാൻ നടപടി സ്വീകരിക്കണമെന്നും യോഗം നിര്‍ദേശിച്ചു. കളക്ടറുടെ ചേംബറില്‍ ചേര്‍ന്ന യോഗത്തില്‍ ജില്ലാ സപ്ലൈ ഓഫീസര്‍ എസ്.ഒ. ബിന്ദു ബന്ധപ്പെട്ട വകുപ്പുകളിലെ ഉദ്യോഗസ്ഥര്‍, വ്യാപാരി വ്യവസായി പ്രതിനിധികള്‍ എന്നിവര്‍ പങ്കെടുത്തു.

പറവൂർ കോടതിയിൽ ബോംബ് ഭീഷണി

പറവൂർ: ബോംബ് ഭീഷണിയെ തുടർന്ന് പറവൂർ കോടതിയിലെ നടപടികൾ നിർത്തിവച്ചു പരിശോധന നടത്തി. ഇന്നലെ രാവിലെ എറണാകുളം പ്രിൻസിപ്പൽ കോടതിയിലാണ് പറവൂർ സബ് കോടതിയിൽ ബോംബ് വച്ചിട്ടുള്ളതായി സന്ദേശമെത്തിയത്. സന്ദേശം പറവൂരിലേക്ക് കൈമാറി. പറവൂരിൽ ഒന്നിലധികം സബ് കോടതികൾ ഉള്ളതിനാലും, ഇതിൽ ഒന്നിന്‍റെ മുകൾ നിലയിൽ അഡീഷണൽ സെഷൻസ് കോടതി പ്രവർത്തിക്കുന്നതിന്നാലും ഇവിടെയുള്ള ആറ് കോടതികളുടെയും പ്രവർത്തനം നിർത്തിവച്ചു. തുടർന്ന് സ്ഥലത്തെത്തിയ ബോംബ് സ്ക്വാഡും, ഡോഗ് സ്ക്വാഡും എല്ലാ കോടതികളിലും പരിശോധന നടത്തി. എന്നാൽ അസാധാരണമായി ഒന്നും കണ്ടെത്താനായില്ല. മദ്രാസ് ടൈഗേഴ്സ് എന്ന സംഘടനയാണ് ബോംബ് ഭീക്ഷണി സന്ദേശം അയച്ചിരിക്കുന്നത്. റൂറൽ എസ്പി ഡോ. എം. ഹേമലത സ്ഥലത്തെത്തി വിശദമായ അന്വേഷണം നടത്തി.

ടിടിസി വിദ്യാർഥിനിയുടെ ആത്മഹത്യ; റമീസുമായി തെളിവെടുത്തു

കോതമംഗലം: കറുകടത്ത് ടിടിസി വിദ്യാര്‍ഥിനി ജീവനൊടുക്കിയ കേസിലെ മുഖ്യപ്രതി ആലങ്ങാട് പാനായികുളം തോപ്പില്‍പ്പറമ്പില്‍ റമീസിനെ രണ്ടു ദിവസത്തെ കസ്റ്റഡി കാലാവധിയില്‍ ചോദ്യം ചെയ്തു. പ്രതി പെണ്‍കുട്ടിയുമായി താമസിച്ച കോതമംഗലം, നേര്യമംഗലം എന്നിവിടങ്ങളിലെ ലോഡജുകള്‍ കേന്ദ്രീകരിച്ച് ഇന്നലെ തെളിവെടുപ്പ് നടത്തി. റമീസിന്‍റെ വീട്ടില്‍ ഉള്‍പ്പെടെ വിവിധ സ്ഥലങ്ങളില്‍ തെളിവെടുപ്പ് ചൊവാഴ്ച പൂര്‍ത്തിയാക്കിയിരുന്നു. ചോദ്യംചെയ്യലിനും തെളിവെടുപ്പിനുംശേഷം റമീസിനെ വീണ്ടും കോടതിയില്‍ ഹാജരാക്കി റിമാന്‍ഡ് ചെയ്തു. കേസില്‍ റമീസിന്‍റെ മാതാപിതാക്കളും സുഹൃത്ത് അബ്ദുള്‍സഹദും ഉള്‍പ്പെടെ നാല് പ്രതികളാണുള്ളത്.ലോഡ്ജിന്‍റെ പേരുകള്‍ പ്രതിക്ക് അറിയാതെ വന്നതോടെ വിവിധ ലോഡ്ജുകളില്‍ പോലീസിന് പരിശോധന നടത്തേണ്ടിവന്നു. രജിസ്റ്റര്‍ പരിശോധനയില്‍ റമീസിന്‍റെയും പെണ്‍കുട്ടിയുടെയും പേരുകള്‍ കണ്ടെത്തിയ ലോഡ്ജുകളില്‍ എത്തിച്ചാണ് തെളിവെടുപ്പ് പൂര്‍ത്തിയാക്കിയത്.

വീട്ടമ്മയുടെ ആത്മഹത്യ : അന്വേഷണത്തിന് പ്രത്യേക സംഘം

ദുരൂഹത ബാക്കി കൊച്ചി/ പറവൂര്‍: കോട്ടുവള്ളി സ്വദേശിനിയായ വീട്ടമ്മ പുഴയില്‍ ചാടി ആത്മഹത്യ ചെയ്ത സംഭവത്തില്‍ ദുരൂഹതകള്‍ ബാക്കി. ഇവരുടെ പണമിപാട് സംബന്ധിച്ച് വീട്ടുകാര്‍ക്കടക്കം അറിവില്ലായിരുന്നു എന്നതാണ് ദുരൂഹതകള്‍ വര്‍ധിപ്പിക്കുന്നത്. സംഭവത്തില്‍ മുനമ്പം ഡിവൈഎസ്പിയുടെ നേതൃത്വത്തിലുള്ള പ്രത്യേക സംഘം അന്വേഷണം നടത്തും. അസ്വഭാവിക മരണത്തിന് പറവൂര്‍ പോലീസ് കേസെടുത്തിരുന്നു. മരിച്ച ആശ ബെന്നിയും ആരോപണ വിധേയരായവരും തമ്മിലുള്ള പണമിടപാട് സംബന്ധിച്ച് ദുരൂഹതകള്‍ തുടരുന്നതിനിടെയാണ് റൂറല്‍ എസ്പി എം. ഹേമലത കേസ് അന്വേഷണം പ്രത്യേക സംഘത്തിന് കൈമാറിയത്. മുനമ്പം ഡിവൈഎസ്പി എസ്. ജയകൃഷ്ണന്‍റെ നേതൃത്വത്തിലുള്ള 12 അംഗ അന്വേഷണ സംഘത്തില്‍ വരാപ്പുഴ, പറവൂര്‍, മുനമ്പം എസ്എച്ച്ഒമാരും സൈബര്‍ ഉദ്യോഗസ്ഥരും ഉണ്ട്. ഇവരുടെ ബാങ്ക് രേഖകളും, മൊബൈല്‍ ഫോണ്‍ അടക്കമുള്ളവ പോലീസ് വിശദമായി പരിശോധിക്കും. പറവൂര്‍ താലൂക്ക് ആശുപത്രിയില്‍ പോസ്റ്റ്‌മോര്‍ട്ടം നടപടികള്‍ പൂര്‍ത്തിയാക്കി ബന്ധുക്കള്‍ക്ക് കൈമാറിയ ആശയുടെ മൃതദേഹം കോട്ടുവളളിയിലെ വീട്ടില്‍ പൊതുദര്‍ശനത്തിന് വച്ചു. തുടര്‍ന്ന് ഉച്ചകഴിഞ്ഞ് മൂന്നോടെ കോട്ടുവള്ളി സെന്‍റ് സെബാസ്റ്റ്യന്‍സ് പള്ളി സെമിത്തേരിയില്‍ വന്‍ ജനാവലിയുടെ സാന്നിധ്യത്തില്‍ മൃതദേഹം സംസ്‌കരിച്ചു. സ്ത്രീകള്‍ തമ്മില്‍ നടന്ന പണമിടപാടാണ് ആശയുടെ ആത്മഹത്യയിലേക്ക് നയിച്ചതെന്നാണ് പ്രാഥമിക കണ്ടെത്തല്‍. ആശ നടത്തിയ പണമിടപ്പാടുകളെക്കുറിച്ച് മരണത്തിന് മുമ്പ് ആശ കൈ ഞരമ്പ് മുറിക്കുന്നതുവരെ വീട്ടുകാര്‍ അറിഞ്ഞിരുന്നില്ല. പണം ആവശ്യപ്പെട്ടുള്ള നിരന്തരം ഭീഷണിയെത്തുടര്‍ന്ന് ഇവര്‍ എസ്പി ഓഫിസില്‍ പരാതി നല്‍കുകയും ചെയ്തിരുന്നു. ഇരുകൂട്ടരെയും ഒരുമിച്ചിരുത്തി പോലീസ് ചര്‍ച്ച നടത്തി ഇത് ആവര്‍ത്തിക്കരുതെന്ന് മുന്നറിയിപ്പ് നല്‍കിയെങ്കിലും ഇതു വകവയ്ക്കാതെ തിങ്കളാഴ്ച രാത്രിയോടെ പ്രദീപും കൂട്ടരും ആശയുടെ വീട്ടിലെത്തി ബഹളം വച്ചിരുന്നു. ഇതിനു പിന്നാലെയാണ് ചൊവ്വാഴ്ച ആശ പുഴയില്‍ ചാടി ആത്മഹത്യ ചെയ്തത്. ബിന്ദുവിന്‍റെ പക്കല്‍നിന്ന് 10 ലക്ഷം വാങ്ങിയിരുന്നുവെന്നും ഇത് പല പ്രാവശ്യമായി കൊടുത്ത് തീര്‍ത്തിരുന്നതായും ആശ പറഞ്ഞതായി ബന്ധുക്കള്‍ പറയുന്നു. എന്നാല്‍ 22 ലക്ഷം രൂപ കിട്ടാനുണ്ടെന്നായിരുന്നു പ്രദീപും ബിന്ദുവും അവകാശപ്പെട്ടിരുന്നത്. പ്രദീപും ബിന്ദുവും ഒളിവില്‍ ആശയുടെ ആത്മഹത്യാ കുറുപ്പില്‍ പരാമര്‍ശിച്ചിട്ടുള്ള റിട്ട. പോലീസ് ഉദ്യോഗസ്ഥന്‍ കോട്ടുവള്ളി കടത്തുകടവ് സ്വദേശി പ്രദീപ്, ഇയാളുടെ ഭാര്യ ബിന്ദു എന്നിവര്‍ക്കെതിരെ ആത്മഹത്യ പ്രേരണ കുറ്റത്തിനാണ് പോലീസ് കേസെടുത്തിട്ടുള്ളത്. സംഭവത്തിനു പിന്നാലെ ഒളിവില്‍ പോയ ഇവരെ അറസ്റ്റ് ചെയ്യാനായിട്ടില്ല. ഇവരുടെ ഫോണുകളും സ്വിച്ച് ഓഫ് ചെയ്ത നിലയിലാണ്. കൈക്കൂലി,സസ്‌പെന്‍ഷന്‍; പ്രദീപ് സര്‍വീസില്‍ നടപടി നേരിട്ടയാള്‍ കേസില്‍ ആരോപണ വിധേയനായ പ്രദീപ് സര്‍വീസിലിരിക്കെ കൈക്കൂലി കേസില്‍ അടക്കം സസ്‌പെന്‍ഷന്‍ നേരിട്ടയാളാണ്. വരാപ്പുഴ സ്വദേശിയായ ശ്രീജിത്തിന്‍റെ കസ്റ്റഡി മരണ കേസില്‍ അന്ന് ശ്രീജിത്തിന്‍റെ ബന്ധുക്കളില്‍നിന്ന് കൈക്കൂലി വാങ്ങിയതിന് അറസ്റ്റിലാവുകയും സസ്‌പെന്‍ഡ് ചെയ്യപ്പെടുകയും ചെയ്തിട്ടുണ്ട് പ്രദീപ്. 2018 ഏപില്‍ ഒമ്പതിനായിരുന്നു വരാപ്പുഴ ദേവസ്വംപാടം സ്വദേശി ശ്രീജിത്തിനെ ഒരു വീടാക്രമണവുമായി ബന്ധപ്പെട്ട് പോലീസ് കസ്റ്റഡിയിലെടുക്കുന്നത്. അന്നത്തെ റൂറല്‍ എസ്പി രൂപീകരിച്ച റൂറല്‍ ടൈഗര്‍ ഫോഴ്‌സ് എന്ന സ്‌ക്വാഡ് ശ്രീജിത്തിനെ ആളുമാറി കസ്റ്റഡിയിലെടുക്കുകയും ക്രൂരമായി മര്‍ദിച്ച് കൊലപ്പെടുത്തുകയും ചെയ്തു എന്നായിരുന്നു കേസ്. അറസ്റ്റിലായ ശ്രീജിത്തിന്‍റെ ആരോഗ്യനില മോശമായതോടെ പ്രതിപ്പട്ടികയില്‍ നിന്ന് ഒഴിവാക്കാന്‍ ഇടനിലക്കാര്‍ വഴി വീട്ടുകാര്‍ തിരക്കിയപ്പോഴാണ് അന്നത്തെ സിഐയുടെ ഡ്രൈവറായ പ്രദീപ് കൈക്കൂലി ആവശ്യപ്പെട്ടത്. 25,000 രൂപയാണ് പ്രദീപ് ചോദിച്ചത്. എന്നാല്‍ 15,000 രൂപ നല്‍കിയെന്നാണ് ശ്രീജിത്തിന്‍റെ ബന്ധുക്കള്‍ പോലീസിനു നല്‍കിയ മൊഴി. ശ്രീജിത്ത് കസ്റ്റഡിയില്‍ കൊല്ലപ്പെട്ടതോടെ അഭിഭാഷകര്‍ വഴി പ്രദീപ് ബന്ധുക്കള്‍ക്ക് പണം തിരിച്ചു നല്‍കി. സംഭവം പുറത്തുവരികയും അന്വേഷണത്തിനൊടുവില്‍ പ്രദീപിനെ സര്‍വീസില്‍ നിന്ന് സസ്‌പെന്‍ഡ് ചെയ്യുകയും ചെയ്തിരുന്നു. ആശയുടെ കുറിപ്പ്, മരിക്കാന്‍ എനിക്ക് പേടിയാണ് ‘മരിക്കാന്‍ എനിക്ക് പേടിയാണ്, ഞാന്‍ എന്തു ചെയ്യും ദൈവമേ... അവരുടെ പ്രഷര്‍ കൊണ്ട് ഞാന്‍ 11–ാം തീയതി കൈഞരമ്പ് മുറിച്ചു. ഇനിയും ഞാൻ മൂന്നു പേപ്പറില്‍ ഒപ്പിടണം. അല്ലെങ്കില്‍ എന്‍റെ ഭര്‍ത്താവിനെയും മക്കളെയും കുടുക്കും എന്ന് പറഞ്ഞ് ഇന്നലെയും ഭീഷണിപ്പെടുത്തി. ഞാന്‍ മരിച്ചാല്‍ ഉത്തരവാദി ബിന്ദു പ്രദീപും കുടുംബവുമാണ്. ആശയുടെ കുറിപ്പില്‍ പറയുന്നു. ഞാന്‍ ഒരു ലക്ഷത്തിന് പതിനായിരം രൂപ പലിശ കൊടുത്തിരുന്നു. ഭര്‍ത്താവ് ചിട്ടി പിടിച്ച എട്ടര ലക്ഷം രൂപയും സ്വര്‍ണം പണയം വച്ച പൈസയും മറ്റുള്ളവരില്‍ നിന്ന്സ്വര്‍ണം വാങ്ങി പണയം വച്ചും പ്രദീപിന്‍റെയും ബിന്ദുവിന്‍റെയും മുതലും പലിശയുമെല്ലാം നല്‍കി. ഇനി 22 ലക്ഷം രൂപ കൂടി നല്‍കണമെന്നും അതിന് മുദ്രപ്പത്രത്തില്‍ ഒപ്പിട്ടു കൊടുക്കണമെന്നും പ്രദീപും ബിന്ദുവും ആവശ്യപ്പെട്ടു എന്നും കുറിപ്പിലുണ്ട്. പോലീസ് ഇടപെടല്‍ ഉണ്ടായില്ലെന്ന് കുടുംബം സംഭവത്തില്‍ പോലീസിന്‍റെ ഭാഗത്തുനിന്നും കൃത്യമായ ഇടപെടല്‍ ഉണ്ടായില്ലെന്ന് ആശ ബെന്നിയുടെ കുടുംബം ആരോപിച്ചു. ആശ ജീവനൊടുക്കുന്നതിന് ദിവസങ്ങള്‍ക്ക് മുമ്പ് കുടുംബം എസ്പിക്ക് പരാതി നല്‍കിയിരുന്നു. ഇത് പറവൂര്‍ പോലീസ് സ്റ്റേഷനിലേക്ക് കൈമാറിയെങ്കിലും പറവൂരില്‍ പോലീസ് ഒത്തുതീര്‍പ്പിനാണ് ശ്രമിച്ചത്. പോലീസ് സ്റ്റേഷനില്‍ നിന്നും എത്തിയ ഉടനെ പ്രദീപ് വീടിന് മുന്നിലെത്തി ഭീഷണിപ്പെടുത്തിയെന്നും കുടുംബം ആരോപിച്ചു. പോലീസ് സ്റ്റേഷനില്‍വച്ച് പ്രദീപ് ആശയോട് പ്രകോപനപരമായി ഇടപെടുന്നതിന്‍റെ ദൃശ്യങ്ങള്‍ ഇന്നലെ പുറത്തുവന്നിരുന്നു.

സീനിയേഴ്‌സിനേക്കാൾ മികച്ച സമയവുമായി സയാന്‍

കൊച്ചി: നൂറു മീറ്ററില്‍ സീനിയർ വിഭാഗത്തേക്കാൾ മികച്ച സമയത്തിൽ ഫിനിഷ് ചെയ്ത് വടുതല ചിന്മയ വിദ്യാലയത്തിലെ പത്താംക്ലാസ് വിദ്യാര്‍ഥി സയാന്‍ ഫൈസല്‍ വേഗമേറിയ താരമായി. അണ്ടര്‍ 17 കാറ്റഗറിയില്‍ മത്സരിച്ച സയാന്‍ 11.10 സെക്കന്‍ഡിൽ ഓടിയെത്തിയപ്പോൾ അണ്ടര്‍ 19 ല്‍ ഒന്നാമതെത്തിയ വാഴക്കുളം കാര്‍മല്‍ പബ്ലിക് സ്‌കൂളിലെ എസ്.ആരുഷ് 11.30 സെക്കന്‍ഡെടുത്തു. വനിതാ വിഭാഗത്തില്‍ അണ്ടര്‍ 19 ല്‍ തൃക്കാക്കര ഭവന്‍സ് വരുണ വിദ്യാലയത്തിലെ അഞ്ജലി പി.ജോഷി (13.10) വേഗമേറിയ താരമായി. കഴിഞ്ഞ വര്‍ഷം അണ്ടര്‍ 17 കാറ്റഗറിയില്‍ മത്സരിച്ച അഞ്ജലി സ്വര്‍ണം നേടിയിരുന്നു. കളക്ടറുടെ ചാര്‍ട്ടേഡ് അക്കൗണ്ടന്‍റായ ഷിനിയുടെയും ജോഷിയുടെയും മകളാണ് പ്ലസ് ടു വിദ്യാര്‍ഥിനിയായ അഞ്ജലി. പെണ്‍കുട്ടികളുടെ അണ്ടർ 17 ല്‍ കഴക്കൂട്ടം സെന്‍റ് തോമസ് പബ്ലിക് സ്‌കൂളിലെ പ്ലസ് വണ്‍ കാരിയായ അന്ന എല്‍സ രഞ്ജു (13.30), അണ്ടര്‍ 14 ല്‍ കട്ടപ്പന ഇന്‍ഫന്‍റ് ജീസസ് സ്‌കൂളിലെ എട്ടാംക്ലാസുകാരി അന്ന റോസ് ബെര്‍ലി (13.90), ആൺകുട്ടികളുടെ അണ്ടര്‍ 14 കാറ്റഗറിയില്‍ വൈറ്റില ടോക്എച്ച് പബ്ലിക് സ്‌കൂളിലെ എട്ടാംക്ലാസുകാരൻ നഥാനിയേല്‍ ജോണ്‍ ജോസഫ് (12.40) എന്നിവരും സ്പ്രിന്‍റില്‍ സ്വര്‍ണം നേടി.

സിബിഎസ്ഇ ക്ലസ്റ്റര്‍ 11 അത്‌ലറ്റിക് മീറ്റ് : മൂവാറ്റുപുഴ കാര്‍മല്‍ പബ്ലിക് സ്‌കൂള്‍ മുന്നില്‍

കൊച്ചി: തിരുവനന്തപുരം മുതല്‍ എറണാകുളം വരെയുള്ള സിബിഎസ്ഇ സ്‌കൂളുകളുടെ ക്ലസ്റ്റര്‍ 11 അത്‌ലറ്റിക് മീറ്റില്‍ നിലവിലെ ചാമ്പ്യന്‍മാരായ മൂവാറ്റുപുഴ കാര്‍മല്‍ പബ്ലിക് സ്‌കൂള്‍ തേരോട്ടം തുടങ്ങി. മഹാരാജാസ് കോളജ് ഗ്രൗണ്ടില്‍ തിരിതെളിഞ്ഞ മീറ്റില്‍ 37 ഫൈനല്‍ പൂര്‍ത്തിയായപ്പോള്‍ 158 പോയന്‍റുമായാണ് കാര്‍മലിന്‍റെ കുതിപ്പ്. 885 പോയന്‍റോടെ എറണാകുളം ജില്ല ഒന്നാമതാണ്. ഇടുക്കിയും തിരുവനന്തപുരവുമാണ് യഥാക്രമം രണ്ടും മൂന്നാം സ്ഥാനങ്ങളില്‍. ആദ്യ 10 സ്ഥാനത്തുള്ള ഏഴ് സ്‌കൂളുകളും എറണാകുളം ജില്ലയില്‍ നിന്നുള്ളവയാണ്. ആണ്‍കുട്ടികളില്‍ വടുതല ചിന്മയ വിദ്യാലയയിലെ സയാന്‍ ഫൈസലും പെണ്‍കുട്ടികളില്‍ തൃക്കാക്കര ഭവന്‍സ് വരുണ വിദ്യാലയത്തിലെ അഞ്ജലി പി.ജോഷിയും വേഗതാരങ്ങളായി. അണ്ടര്‍ 14 ആണ്‍കുട്ടികളുടെ വിഭാഗത്തില്‍ 20 പോയന്‍റുമായി എളമക്കര ഭവന്‍സ് വിദ്യാമന്ദിറും തിരുവല്ല ബിലീവേഴ്‌സ് ചര്‍ച്ച് റസിഡന്‍റ് സ്‌കൂളും ഒപ്പത്തിനൊപ്പമാണ്. പെണ്‍കുട്ടികളുടെ വിഭാഗത്തില്‍ കാക്കനാട് ഭവന്‍സ് ആദര്‍ശ വിദ്യാലയ ആണ് മുന്നില്‍(17).അണ്ടര്‍ 17 ബോയ്സിൽ വടുതല ചിന്മയ വിദ്യാലയം 32 പോയന്‍റുമായി മുന്നിലുണ്ട്. ഗേൾസിൽ മൂവാറ്റുപുഴ കാര്‍മല്‍ പബ്ലിക് സ്‌കൂളാണ് (38)ഒന്നാമത്. അണ്ടര്‍ 19 ആണ്‍ വിഭാഗത്തിലും മൂവാറ്റുപുഴ കാര്‍മല്‍ പബ്ലിക് സ്‌കൂള്‍ ആധിപത്യം സ്ഥാപിച്ചു (52). 35 പോയിന്‍റുള്ള കാക്കനാട് ഭവന്‍സ് ആദര്‍ശ വിദ്യാലയയാണ് പെണ്‍വിഭാഗത്തില്‍ മുന്നില്‍. കനത്ത മഴകാരണം ഇന്നലെ രാവിലെ 6.30ന് തുടങ്ങേണ്ട മത്സരങ്ങള്‍ വൈകിയാണ് ആരംഭിച്ചത്. അവസാന ദിനമായ ഇന്ന് 200 മീറ്റര്‍, 800 മീറ്റര്‍, ജാവലിന്‍ത്രോ ഉള്‍പ്പെടെ 37 ഇനങ്ങളിലാണ് ഫൈനല്‍. കബഡി സംസ്ഥാന താരത്തിന് ലോംഗ് ജംപില്‍ സ്വര്‍ണം കൊച്ചി: സിബിഎസ്ഇ ക്ലസ്റ്റര്‍ 11 അത്‌ലറ്റിക് മീറ്റില്‍ സംസ്ഥാന കബഡി താരം കൂടിയായ കാക്കനാട് ഭവന്‍സ് ആദര്‍ശ് വിദ്യാലയത്തിലെ അഫ്രീന്‍ ഷക്കീലിന് സ്വര്‍ണം. പെണ്‍കുട്ടികളുടെ അണ്ടര്‍ 19 ലോംഗ് ജംപിലാണ് ദേശീയ സ്വര്‍ണ നേട്ടക്കാരികൂടിയായ അഫ്രീന്‍ ഒന്നാമതെത്തിയത്. 4.85 മീറ്ററിലായിരുന്നു നേട്ടം. റായ്പൂരില്‍ നടന്ന ദേശീയ സിബിഎസ്ഇ സ്‌കൂള്‍ മീറ്റില്‍ അണ്ടര്‍ 17 വിഭാഗത്തില്‍ അഫ്രീന്‍ സ്വര്‍ണം നേടിയിരുന്നു. അന്ന് 5.10 മീറ്റര്‍ എന്ന മികച്ച ദൂരം കുറിച്ചെങ്കിലും ഇന്നലെ ഈ മികവ് പുലര്‍ത്താനായില്ല. വാരണാസിയില്‍ നടന്ന ദേശീയ മീറ്റില്‍ 5.15 മീറ്റര്‍ താണ്ടിയെങ്കിലും നാലാം സ്ഥാനത്ത് തൃപ്തിപ്പെടേണ്ടിവന്നു. കാക്കനാട് സ്വദേശികളായ ഷക്കീല്‍-ഷഫ്‌ന ദമ്പതികളുടെ മകളാണ് പ്ലസ് ടു വിദ്യാര്‍ഥിനിയായ അഫ്രീന്‍.

കാറിടിച്ച് കാൽനട യാത്രികയ്‌ക്ക് പരിക്ക്

വൈപ്പിൻ: പെരുന്പിള്ളിയിൽ കാറിടിച്ച് കാൽനടയാത്രികയ്‌ക്ക് പരിക്കേറ്റു. ഞാറക്കൽ പെരുമ്പിള്ളി പുഞ്ചേപ്പടി പൗലോസിന്‍റെ ഭാര്യ തങ്കമണിക്കാണ് (61) പരിക്കേറ്റത്. കഴിഞ്ഞദിവസം പുലർച്ചെ 5.30ഓടെയായിരുന്നു അപകടം. തലയ്ക്ക് പരിക്കേറ്റ ഇവരെ ഞാറക്കൽ ക്രിസ്തുജയന്തി ആശുപത്രിയിൽ പ്രവേശിപ്പിച്ചു.

അമിത്ഷായുടെ സന്ദര്‍ശനം: നഗരത്തില്‍ ഗതാഗത നിയന്ത്രണം

കൊച്ചി: കേന്ദ്ര ആഭ്യന്തരമന്ത്രി അമിത് ഷായുടെ കൊച്ചി സന്ദര്‍ശനത്തിനോടനുബന്ധിച്ച് ഇന്നും നാളെയും കൊച്ചി നഗരത്തില്‍ ഗതാഗതനിയന്ത്രണം ഉണ്ടായിരിക്കും. ഇന്ന് രാത്രി എട്ടിന് ശേഷം ദേശീയപാത 544 മുട്ടം, കളമശേരി, ഇടപ്പള്ളി, പാലാരിവട്ടം, കലൂര്‍, കച്ചേരിപ്പടി, ബാനര്‍ജി റോഡ്, ഹൈക്കോടതി ജംഗ്ഷന്‍, ഗോശ്രീപാലം, ബോള്‍ഗാട്ടി ജംഗ്ഷന്‍ എന്നിവിടങ്ങള്‍ ഗതാഗതനിയന്ത്രണം ഉണ്ടായിരിക്കും. നാളെ രാവിലെ 11 മുതല്‍ മുതല്‍ ഉച്ചയ്ക്ക് രണ്ട് വരെ ബോള്‍ഗാട്ടി ജംഗ്ഷന്‍, ഗോശ്രീ ഒന്നാം പാലം, ഹൈക്കോടതി ജംഗ്ഷന്‍, ബാനര്‍ജി റോഡ്, കലൂര്‍, പാലാരിവട്ടം, ഇടപ്പള്ളി, ദേശീയപാതാ 544 കളമശേരി, മുട്ടം എന്നിവിടങ്ങളിലും ഗതാഗതനിയന്ത്രണം ഉണ്ടായിരിക്കും.

പരാതിക്കാരനു മർദനം; പോലീസ് ഉദ്യോഗസ്ഥർക്കെതിരെ ഡിജിപിക്കു പരാതി

ആലങ്ങാട്: ആലങ്ങാട് പോലീസ് സ്റ്റേഷനിൽ പരാതി നൽകാനെത്തിയ വയോധികനു മർദനമേറ്റ സംഭവത്തിൽ പോലീസ് ഉദ്യോഗസ്ഥർക്കെതിരെ ഡിജിപിക്കു പരാതി. ആലങ്ങാട് സിഐ ജസ്റ്റിൻ, എസ്ഐ പ്രദീപ്, സിവിൽ പോലീസ് ഓഫീസർ എന്നിവർക്കെതിരെയാണു ഇയാളുടെ കുടുംബം മർദിച്ചതായി പരാതി നൽകിയിരിക്കുന്നത്. കഴിഞ്ഞ ദിവസമാണ് ആലങ്ങാട് സ്റ്റേഷനിൽ പരാതിനൽകാൻ പോയ ആലങ്ങാട് മാളികംപീടിക കൃഷ്ണഭവനിൽ ചന്ദ്രനെ(61) മർദനമേറ്റ നിലയിൽ ആശുപത്രിയിൽ പ്രവേശിപ്പിച്ചത്. കാറ്ററിംഗുമായി ബന്ധപ്പെട്ട തുക നൽകാൻ താമസിച്ചതിനെത്തുടർന്നു കഴിഞ്ഞ ദിവസം ഇതുമായി ബന്ധപ്പെട്ട ചിലർ ഇയാളുടെ വീട്ടിൽ അതിക്രമിച്ചു കയറി സ്കൂട്ടറും പണവും ഉൾപ്പെടെ കവർന്നതായി പറയപ്പെടുന്നു. ഇതുമായി ബന്ധപ്പെട്ടു പരാതി നൽകാനാണു ചന്ദ്രൻ സ്റ്റേഷനിൽ എത്തിയത്. എന്നാൽ പിന്നീട് ചന്ദ്രനെ മർദനമേറ്റ നിലയിൽ മെഡിക്കൽ കോളജിൽ പ്രവേശിപ്പിച്ചിക്കുകയായിരുന്നു. നിലവിൽ ഇയാളെ വിദഗ്ധ ചികിത്സയ്ക്കായി ആലുവയിലെ സ്വകാര്യ ആശുപത്രിയിലേക്ക് മാറ്റി. സംഭവം വിവാദമായതോടെ വിഷയം ഒത്തുത്തീർപ്പാക്കാനായി കുടുംബത്തെ പലരും സമീപിക്കുന്നതായും സൂചനയുണ്ട്.

കയറ്റുമതി മേഖലയിലെ സംരംഭകര്‍ക്കായി രാജഗിരിയില്‍ ശില്‍പശാല

കൊച്ചി: കയറ്റുമതി മേഖലയിലെ സംരംഭകരുടെ ഉന്നമനം ലക്ഷ്യമിട്ട് കാക്കനാട് രാജഗിരി ബിസിനസ് സ്‌കൂളുമായി സഹകരിച്ച് കേന്ദ്രസര്‍ക്കാരിന്റെ എംഎസ്എംഇ മന്ത്രാലയത്തിന് കീഴിലുള്ള എംഎസ്എംഇ ഡെവലപ്മെന്‍റ് ആൻഡ് ഫെസിലിറ്റേഷന്‍ ഓഫീസ് ശില്പശാല സംഘടിപ്പിച്ചു. എംപവറിംഗ് എക്സ്പോര്‍ട്ട് എക്സലന്‍സ് എന്ന വിഷയത്തില്‍ കാക്കനാട് രാജഗിരി വാലി കാമ്പസില്‍ നടന്ന ശില്പശാലയില്‍ ഇരുനൂറോളം ചെറുകിട സംരംഭകര്‍ പങ്കെടുത്തു. കേരള സംസ്ഥാന വ്യവസായ വികസന കോര്‍പറേഷന്‍ (കെഎസ്ഐഡിസി) ചെയര്‍മാന്‍ ബാലഗോപാല്‍ ചന്ദ്രശേഖരന്‍ ഉദ്ഘാടനം ചെയ്തു. ഐഇടിഎസ് ജോയിന്‍റ് ഡയറക്ടര്‍ ജി.എസ്. പ്രകാശ് അധ്യക്ഷത വഹിച്ചു. തൃശൂര്‍ എംഎസ്എംഇ ഡിഎഫ്ഒ യു.സി. ലചിതമോള്‍, രാജഗിരി ബിസിനസ് സ്‌കൂള്‍ അസോസിയേറ്റ് ഡീന്‍ ഡോ. എയ്ഞ്ചല സൂസന്‍ മാത്യു, ബിസിനസ് സ്‌കൂൾ അസിസ്റ്റന്‍റ് ഡയറക്ടർ റവ. ഡോ. ഫ്രാന്‍സിസ് സെബാസ്റ്റ്യന്‍ എന്നിവർ പ്രസംഗിച്ചു. യുകെയുമായുള്ള വ്യാപാര സാധ്യതകള്‍, ഇന്തോ-അമേരിക്കന്‍- ജപ്പാൻ വ്യാപാര സാധ്യതകള്‍, കയറ്റുമതി പായ്ക്കേജിംഗ്, സാങ്കേതിക വിദ്യകള്‍, എക്സ്പോര്‍ട്ട് ഫിനാന്‍സ് ആൻഡ് എക്സിം ബാങ്ക് സേവനങ്ങള്‍ തുടങ്ങിയ വിഷയങ്ങളില്‍ സെഷനുകള്‍ നടന്നു.

ഒക്കലിൽ മോഷണ പരന്പര; ജനം ഭീതിയിൽ

പെരുമ്പാവൂര്‍: ഒക്കല്‍ പഞ്ചായത്തിലെ ഇടവൂര്‍ പ്രദേശത്ത് കഴിഞ്ഞ ഒരാഴ്ചയ്ക്കിടെ രാത്രികാലങ്ങളില്‍ നടന്ന മോഷണങ്ങള്‍മൂലം ഭീതിയിലായി ജനങ്ങൾ. ആര്‍ത്തുങ്കല്‍ മനോജിന്‍റെ വീട്ടില്‍ നിന്നും രണ്ടേകാല്‍ പവന്‍ മാലയും, എട്ടിയാട്ടിരാ സുലൈമാന്‍ കുട്ടിയുടെ വീട്ടില്‍ നിന്നും ഒന്നേകാല്‍ പവന്‍ മാലയും നഷ്ടപ്പെട്ടു. നെടിയാന്‍ അബ്ദുൾ ഖാദറിന്‍റെ വീട്ടിലും മോഷണ ശ്രമം ഉണ്ടായി. രാത്രികാലങ്ങളില്‍ ഇടവൂര്‍ പ്രദേശത്ത് പോലീസ് പട്രോളിംഗ് ഉള്‍പ്പെടെയുള്ള നടപടികള്‍ ശക്തമാക്കണമെന്നും, മോഷ്ടാക്കളെ പിടികൂടി സ്വര്‍ണം നഷ്ടപ്പെട്ടവര്‍ക്ക് തിരികെ ലഭിക്കുന്നതിനുള്ള അവസരം ഉണ്ടാക്കണമെന്നും ജനങ്ങളുടെ ആശങ്ക അകറ്റണമെന്നും ആവശ്യപ്പെട്ട് യൂത്ത് കോണ്‍ഗ്രസ് ഇടവൂര്‍ യൂണിറ്റ് കമ്മിറ്റി, കോടനാട് സര്‍ക്കിള്‍ ഇന്‍സ്‌പെക്ടര്‍ മനു രാജിന് നിവേദനം നല്‍കി. മുഹമ്മദ് യൂനുസ്, കെ.എച്ച്. സിയാദ്, മുഹമ്മദ് റംസിം എന്നിവരുടെ നേതൃത്വത്തില്‍ സമര്‍പ്പിച്ച നിവേദനത്തില്‍ അടിയന്തിര നടപടികള്‍ സ്വീകരിക്കുമെന്ന് പോലീസ് അധികാരികള്‍ ഉറപ്പ് നല്‍കി.

സ്വച്ഛ് സര്‍വേക്ഷണ്‍ സര്‍വേയില്‍ ഒന്നാമത്; കൊച്ചി നഗരസഭയ്ക്ക് സര്‍ക്കാരിന്‍റെ ആദരം

കൊച്ചി: കേന്ദ്ര പാര്‍പ്പിട നഗരകാര്യ മന്ത്രാലയത്തിന്‍റെ നേതൃത്വത്തില്‍ നടന്ന ശുചിത്വ സര്‍വേയായ സ്വച്ഛ് സര്‍വേക്ഷൺ സര്‍വേയില്‍ ഒന്നാം സ്ഥാനം നേടിയ കൊച്ചി നഗരസഭയ്ക്ക് സംസ്ഥാന സര്‍ക്കാരിന്‍റെ ആദരവ്. തിരുവനന്തപുരത്ത് നടന്ന ചടങ്ങില്‍ മന്ത്രി എം.ബി. രാജേഷില്‍ നിന്ന് കൊച്ചി നഗരസഭാ മേയര്‍ക്ക് വേണ്ടി ആരോഗ്യകാര്യ സ്ഥിരംസമിതി അധ്യക്ഷന്‍ ടി.കെ. അഷ്‌റഫ് ആദരം ഏറ്റുവാങ്ങി. നഗരസഭാ സെക്രട്ടറി പി.എസ്. ഷിബു, ഹെല്‍ത്ത് ഓഫീസര്‍ ഇന്‍ ചാര്‍ജ് സുധീഷ് കുമാര്‍, ഹരിത കേരളം മിഷന്‍ റിസോഴ്‌സ് പേഴ്‌സണ്‍ നിസ തുടങ്ങിയവരും ചടങ്ങില്‍ പങ്കെടുത്തു.

മിന്നൽ പരിശോധന : 42 സ്‌കൂള്‍ ബസുകളിലും 73 സ്വകാര്യബസുകളിലും ചട്ടലംഘനം

കാക്കനാട്: എറണാകുളം, മൂവാറ്റുപുഴ എന്‍ഫോഴ്‌സ്‌മെന്‍റ് ആര്‍ടിഒമാരുടെ നിര്‍ദേശപ്രകാരം ഇന്നലെ നടത്തിയ മിന്നല്‍പരിശോധനകളില്‍ 42 സ്‌കൂള്‍ ബസുകള്‍ക്കും73 സ്വകാര്യ ബസുകള്‍ക്കുമെതിരെ മോട്ടോര്‍ വാഹന വകുപ്പിന്‍റെ നടപടി. എറണാകുളത്ത് നിന്നും രണ്ട് സ്‌ക്വാഡും പെരുമ്പാവൂര്‍, കോതമംഗലം എന്നിവിടങ്ങളില്‍ നിന്നും ഓരോ സ്‌ക്വാഡും സംയുക്തമായാണ് പരിശോധന നടത്തിയത്. സ്‌കൂള്‍ വാഹനങ്ങള്‍ക്ക് 34,750 രൂപയും സ്വകാര്യ ബസുകള്‍ക്കെല്ലാം കൂടി 1, 22, 200 രൂപയും പിഴയിട്ടു. മദ്യപിച്ചു വാഹനമോടിക്കല്‍, പെര്‍മിറ്റ് ഇല്ലാതെ വാഹനം ഓടിക്കല്‍, സ്‌കൂള്‍ വാഹനങ്ങളില്‍ പ്രവര്‍ത്തിപരിചയം ഇല്ലാത്ത ഡ്രൈവര്‍മാര്‍, ഫിറ്റ്‌നസ് സര്‍ട്ടിഫിക്കറ്റ് ഇല്ലാത്ത വാഹനങ്ങള്‍, യൂണിഫോം ധരിക്കാത്തതെയും സീറ്റ് ബെല്‍റ്റ് ധരിക്കാതെയും വാഹനം ഓടിച്ചവർ തുടങ്ങിയ ഇനത്തിലും പിഴ ചുമത്തി. പെരുമ്പാവൂര്‍ സബ് ആര്‍ടി ഓഫീസിന്‍റെ പരിധിയിലുള്ള പട്ടിമറ്റം, കിഴക്കമ്പലം, പെരുമ്പാവൂര്‍ കുറുപ്പംപടി,പോഞ്ഞാശേരി, വല്ലം, കൂവപ്പടി എന്നിവിടങ്ങള്‍ കേന്ദ്രീകരിച്ചായിരുന്നു പരിശോധന. മദ്യപിച്ച് സ്‌കൂള്‍ വാഹനം ഓടിച്ച ഡ്രൈവറെ കസ്റ്റഡിയിലെടുത്ത ശേഷം എറണാകുളം എന്‍ഫോഴ്‌സ്‌മെന്‍റ് വിഭാഗത്തിലെ അസിസ്റ്റന്‍റ് മോട്ടോര്‍ വെഹിക്കിള്‍ ഇന്‍സ്‌പെക്ടര്‍ സോണി ജോണ്‍ കുട്ടികളെ സുരക്ഷിതമായി സ്‌കൂളില്‍ എത്തിച്ചും മാതൃകയായി. സ്വകാര്യ ബസുകളില്‍ നടത്തിയ പരിശോധനയില്‍ 73 വാഹനങ്ങള്‍ക്കെതിരെ നടപടിയെടുത്ത് 1,22,200രൂപ പിഴയായും ഈടാക്കി. പെര്‍മിറ്റില്ലാത്തതും ടാക്‌സ് അടയ്ക്കാത്തതുമായ വാഹനങ്ങള്‍, നിരോധിത എയര്‍ഹോണ്‍ ഘടിപ്പിച്ചവ, ലൈസന്‍സ് ഇല്ലാത്ത ഡ്രൈവര്‍മാര്‍ തുടങ്ങി വിവിധ ചട്ടലംഘനങ്ങള്‍ക്കും കേസെടുത്തു. വരും ദിവസങ്ങളിലും പരിശോധന തുടരുമെന്ന് ആര്‍ടിഒ (എന്‍ഫോഴ്‌സ്‌മെന്‍റ് എറണാകുളം) അറിയിച്ചു.

ആലുവയിൽ ജൈവമാലിന്യം സ‌ംസ്കരിക്കാൻ ഓട്ടോമാറ്റിക് ബൂത്ത് തുറക്കുന്നു

ആലുവ: ദൈനംദിന ജൈവമാലിന്യ സംസ്കരണത്തിൽ പുതിയ പാത വെട്ടിത്തുറന്ന് ആലുവ നഗരസഭ. റോബോട്ടിക് സാങ്കേതിക വിദ്യയില്‍ അധിഷ്ഠിതമായ ഇന്ത്യയിലെ ആദ്യത്തെ ഓട്ടോമാറ്റിക് റോബോബിന്‍ മാലിന്യ സംസ്കരണ ബൂത്തിന്‍റെ ഉദ്ഘാടനം മന്ത്രി പി. രാജീവ് 23ന് ഉച്ചകഴിഞ്ഞ് മൂന്നിന് നിര്‍വഹിക്കും. ആലുവ നഗരസഭാ കാര്യാലയ കോമ്പൗണ്ടിൽ ഒരു വർഷത്തിലധികമായി നടത്തി പരീക്ഷിച്ച് വിജയിച്ച സംസ്കരണ ബൂത്ത് മഹാത്മഗാന്ധി സ്ക്വയറിലാണ് പൊതുജനങ്ങൾക്കായി ശനിയാഴ്ച പ്രവർത്തനമാരംഭിക്കുക. ആറ് മണിക്കൂർ കൊണ്ടാണ് മാലിന്യം വളമായി മാറുന്നത്. ഒരു കിലോ മാലിന്യം വളമാക്കാൻ ഏഴ് രൂപയാണ് ഈടാക്കുന്നത്. അതിൽ രണ്ട് രൂപ വീതം നഗരസഭയ്ക്ക് ലഭിക്കും. ബാങ്ക് എടിഎം കൗണ്ടർ മാതൃകയിൽ ആലുവ നഗരസഭാ ഓഫീസ് വളപ്പിലാണ് സംസ്ഥാനത്ത് ആദ്യമായി പുതിയ സംവിധാനം പരീക്ഷിച്ചത്. നഗരസഭാ കാന്‍റീനിലെ ഭക്ഷണ മാലിന്യമാണ് ഇവിടെ ഉപയോഗിച്ചത്. ആദ്യഘട്ടത്തിൽ രണ്ടെണ്ണമാണ് ആലുവ നഗരസഭ സ്ഥാപിക്കുന്നത്. രണ്ടാമത്തേത് ആലുവ മാർക്കറ്റിൽ നിർമാണം നടന്നുകൊണ്ടിരിക്കുകയാണ്. എടയാർ കേന്ദ്രമായി പ്രവർത്തിക്കുന്ന റോബോബിൻ എൻവിറോ ടെക് എന്ന സ്ഥാപനമാണ് ഉപജ്ഞാതാക്കൾ.ബൂത്തിന് മുമ്പിൽ സ്ഥാപിച്ചിട്ടുള്ള ത്രാസിലേക്കാണ് ആവശ്യക്കാർ മാലിന്യം വയ്ക്കേണ്ടത്. തൂക്കം, തുക എന്നിവ സൂചിപ്പിച്ച് ക്യൂ ആർ കോഡ് സ്ക്രീനിൽ തെളിയും. ഗൂഗിൾ പേ വഴി സ്കാൻ ചെയ്ത് തുക അടച്ചാൽ ബോക്സ് പുറത്തേക്ക് വരും. ഇതിലാണ് മാലിന്യം നിക്ഷേപിക്കേണ്ടത്. റോബോട്ടിക് ബയോവേസ്റ്റ് മാനേജിംഗ് എക്സ്‌പീരിയൻസ് എയർ കണ്ടീഷൻ പബ്ലിക് ബൂത്ത് എന്നാണ് പേരിട്ടിരിക്കുന്നത്. 22 ലക്ഷം രൂപ മുടക്കിയാണ് ആദ്യ ബൂത്ത് ആലുവയിൽ സ്ഥാപിച്ചത്.

മട്ടാഞ്ചേരി പള്ളിയിൽ ബൈബിൾ കൺവൻഷൻ തുടങ്ങി

ഫോർട്ടുകൊച്ചി: പ്രസിദ്ധ തീർഥാടന കേന്ദ്രമായ മട്ടാഞ്ചേരിയിലെ കൂനൻ കുരിശ് പള്ളിയിൽ തിരുനാളിന് ഒരുക്കമായി നടത്തപ്പെടുന്ന കൂനൻ കുരിശ് ബൈബിൾ കൺവൻഷന് തുടക്കം കുറിച്ചു. കൊച്ചി രൂപത ചാൻസിലർ ഫാ. ജോണി സേവ്യർ പുതുക്കാട്ട് ഉദ്ഘാടനം നിർവഹിച്ചു. നാല് ദിവസങ്ങളിലായി നടത്തപെടുന്ന കൺവൻഷന് മോൺ. സെബാസ്റ്റ്യൻ പൂവത്തിങ്കൽ നേതൃത്വം നൽകും. കൺവെൻഷൻ ശനിയാഴ്ച സമാപിക്കും.

തൃപ്പൂണിത്തുറ താലൂക്ക് ആശുപത്രിയിൽ ജീവനക്കാർ കുറവ്; രോഗികൾക്കു മണിക്കൂറുകളുടെ കാത്തിരിപ്പ്...

തൃപ്പൂണിത്തുറ: താലൂക്ക് ആശുപത്രിയിൽ ഡോക്ടർമാരുടെയും മറ്റു ജീവനക്കാരുടെയും അഭാവത്തെ തുടർന്ന് കഴിഞ്ഞദിവസം രോഗികൾക്ക് ക്യൂ നിൽക്കേണ്ടി വന്നത് മണിക്കൂറുകൾ. കുട്ടികളും പ്രായമായവരുമായ രോഗികൾക്ക് രണ്ടു മണിക്കൂർ കാഷ്വാലിറ്റിക്കു മുന്നിൽ കാത്തുനിന്ന ശേഷമാണ് ഡോക്ടറെ കാണാനായത്. ഉച്ചയ്ക്ക് ഒന്നിന് ഒപി അടയ്ക്കുന്നതോടെ രോഗികളുടെ ഏക ആശ്രയം കാഷ്വാലിറ്റിയാണ്. പുറത്ത് നൂറുകണക്കിന് രോഗികൾ കാത്തു നിൽക്കുന്പോഴും ചികിത്സിക്കാനുള്ളത് ഒരു ഡോക്ടർ മാത്രം. മിക്ക ദിവസങ്ങളിലും ഇതു തന്നെയാണ് അവസ്ഥയെന്നും അവിടെയുണ്ടായിരുന്നവർ പറഞ്ഞു. മണിക്കൂറുകൾ കാത്തുനിന്നിട്ടും ചികിത്സ ലഭിക്കാത്തതിനാൽ സ്വകാര്യ ആശുപത്രിയിലേക്ക് പോകുന്നവരുമുണ്ട്. ഫാർമസിയിൽനിന്ന് മരുന്ന് ഇല്ലെന്ന് പറഞ്ഞ് പല മരുന്നിനും പുറത്തെ മെഡിക്കൽ ഷോപ്പുകളിലേക്ക് പറഞ്ഞയക്കുന്നത് പതിവാണെന്നും ആക്ഷേപമുണ്ട്. അറ്റൻഡർമാർ ഇല്ലാതിരുന്നതിനാൽ കഴിഞ്ഞദിവസം ഓട്ടോറിക്ഷയിൽ കൊണ്ടുവരുന്നതിനിടെ അബോധാവസ്ഥയിലായ വീട്ടമ്മയെ അവിടെ ക്യൂവിൽ നിന്ന രോഗികളാണ് സ്ട്രെച്ചറിൽ കിടത്തി കാഷ്വാലിറ്റിയിൽ എത്തിച്ചത്. മിക്ക ദിവസങ്ങളിലും പല വകുപ്പുകളിലെയും ഡോക്ടർമാർ ഇല്ലാത്തതിനാൽ രാവിലെ ഏഴിനെത്തി ഒന്പതു വരെ കാത്തു നിന്ന ശേഷം തിരിച്ചു പോകേണ്ട അവസ്ഥയും രോഗികൾക്കുണ്ട്.

ദീപിക നമ്മുടെ ഭാഷ പദ്ധതി : ആലുവ ജ്യോതി പബ്ലിക്‌ സ്കൂളിൽ

ആലുവ : ആലുവ നാലാംമൈൽ ജ്യോതി പബ്ലിക്‌ സ്കൂളിലും ദീപിക നമ്മുടെ ഭാഷ‌ പദ്ധതിക്കു തുടക്കമായി.സ്കൂൾ മാനേജർ ഫാ. ജോസഫ് പാണ്ടിയപ്പിള്ളിൽ ദീപിക പത്രം വിദ്യാർഥി പ്രതിനിധി ഗൗതം കൃഷ്ണക്കു നൽകി പദ്ധതിയുടെ ഉദ്ഘാടനം നിർവഹിച്ചു. ചടങ്ങിൽ സ്കൂൾ പ്രിൻസിപ്പൽ കവിത സണ്ണി, പി ആർഒ മിനി പയസ്, ബർസാർ ഫാ. റിച്ചാർഡ് ജെയിംസ്, അധ്യാപികമാരായ പൂനം കുമാരി, ഷേർലി ജോയി, ദീപിക ഏരിയ മാനേജർ റ്റി. എ. നിബിൻ തുടങ്ങിയവർ പങ്കെടുത്തു സംസാരിച്ചു.

നിർധനർക്ക് ആയിരം ഡയാലിസിസ് പൂര്‍ത്തിയാക്കി മൂക്കന്നൂര്‍ റോയല്‍ ക്ലബ്

മൂക്കന്നൂര്‍: നിര്‍ധന രോഗികള്‍ക്കായി മൂക്കന്നൂര്‍ റോയല്‍ ക്ലബ് 1000 പേര്‍ക്ക് സൗജന്യ ഡയലിസിസ് നല്‍കി. പദ്ധതി പൂര്‍ത്തീകരണോനോടനുബന്ധിച്ച് നടന്ന പൊതുസമ്മേളനം കിഡ്‌നി ഫൗണ്ടേഷന്‍ ചെയര്‍മാന്‍ ഫാ.ഡേവീസ് ചിറമ്മല്‍ ഉദ്ഘാടനം ചെയ്തു. റോയല്‍ ക്ലബ് പ്രസിഡന്‍റ് പോളി മണവാളന്‍ അധ്യക്ഷത വഹിച്ചു. മൂക്കന്നൂര്‍ എല്‍എഫ് ആശ്രമം സുപ്പീരിയര്‍ ബ്രദര്‍ ജോര്‍ജ് കൊട്ടാരംകുന്നേല്‍, സെക്രട്ടറി ജെസ്റ്റിന്‍ പടയാട്ടില്‍, ട്രഷറര്‍ കുര്യാക്കോസ്, സ്ഥാപകപ്രസിഡന്‍റ് പി.ഡി.ആന്‍റണി, പ്രോഗ്രാം കണ്‍വീനര്‍ ടി.ടി. പോളച്ചന്‍, മിനി വര്‍ഗീസ് തുടങ്ങിയവര്‍ പ്രസംഗിച്ചു. ഗ്ലോബല്‍ എക്സ‌ലന്‍സ് അവാര്‍ഡ് കരസ്ഥമാക്കിയ പോള്‍മാന്‍ ഗ്രൂപ്പ് മാനേജിംഗ് ഡയറക്ടര്‍ ഷൈന്‍ പോള്‍, വിവിധ തലങ്ങളില്‍ മികവ് തെളിയിച്ച വിദ്യാര്‍ഥികര്‍ എന്നിവരെ ചടങ്ങില്‍ ആദരിച്ചു.

പൂയംകുട്ടി പുഴയിൽ ഒഴുകിയെത്തിയ കാട്ടാനയുടെ ജഡം സംസ്കരിച്ചു

കോതമംഗലം: പൂയംകുട്ടിപുഴയില്‍ മരത്തില്‍ തങ്ങിനില്‍ക്കുന്ന നിലയില്‍ കണ്ടെത്തിയ കാട്ടാനയുടെ ജഡം സംസ്‌കാരിച്ചു. 15 വയസ് പ്രായമുള്ള കൊമ്പനാനയുടെ ജഡത്തിന് രണ്ടാഴ്ചയോളം പഴക്കമുണ്ടെന്ന് വനം റേയ്ഞ്ച് അധികൃതര്‍ പറയുന്നു. രണ്ടാഴ്ചയ്ക്കിടെ ആറ് ആനകളുടെ ജഡം പുഴയില്‍ ഒഴുകിയതിൽ രണ്ട് കൊമ്പനും നാല് പിടിയാനയും ആയിരുന്നു. പീണ്ടിമേട് വെള്ളച്ചാട്ടത്തിന് മുകളിലെ ആനത്താര കുറുകെ കടക്കുമ്പോള്‍ ഒഴുക്കില്‍പ്പെട്ട് താഴേക്ക് പതിച്ച് ജീവന്‍ നഷ്ടപ്പെട്ടതാവാനാണ് സാധ്യതയെന്നാണ് വന പാലകരുടെ നിഗമനം. കൂടുതല്‍ ആനകള്‍ ചരിഞ്ഞിട്ടുണ്ടോയെന്ന് അന്വേഷണം നടത്തിവരുന്നു. പുഴയില്‍ ഒഴുക്കുള്ളത് കൊണ്ട് പൂര്‍ണമായും തെരച്ചില്‍ നടത്താനായിട്ടില്ല. പൂയംകുട്ടി, ആനക്കുളം സ്റ്റേഷനുകളിലെ വനപാലകരും വാച്ചര്‍മാരും അടങ്ങുന്ന സംഘമാണ് പീണ്ടിമേട് വെള്ളച്ചാട്ടതിന് താഴേ മുതല്‍ പുഴയില്‍ തിരച്ചില്‍ നടത്തുന്നത്. മലയാറ്റൂര്‍ ഡിഎഫ്ഒ പി. കാര്‍ത്തിക്, കോടനാട് അഭയാരണ്ടം അസിസ്റ്റന്‍റ് ഫോറസ്റ്റ് വെറ്റനറി ഓഫീസര്‍ ഡോ. ബിനോയ് സി. ബാബു, കുട്ടംപുഴ റേഞ്ച് ഓഫീസര്‍ വി.പി. മുരളീദാസ് എന്നിവരുടെ നേതൃത്വത്തില്‍ പോസ്റ്റുമോര്‍ട്ടം നടത്തിയാണ് ജഡം സംസ്‌കരിച്ചത്.

കിഴക്കമ്പലം-നെല്ലാട് റോഡ് തകർന്നു

കിഴക്കമ്പലം : മൂന്നു മാസം മുന്പ് മുപ്പതു കോടി രൂപയോളം ചെലവഴിച്ച് നിർമിച്ച കിഴക്കമ്പലം-നെല്ലാട് റോഡ് തകർന്നു. പട്ടിമറ്റം ജംഗ്ഷനു സമീപത്തുള്ള റോഡിന്‍റെ ഇരുവശവും കോൺക്രീറ്റ് ചെയ്ത ഭാഗമാണ് തകർന്നത്. ഈ ഭാഗത്തുള്ള റോഡ് മുഴുവനായും ഏതു സമയത്തും നിലംപൊത്താവുന്ന സ്ഥിതിയിലായതിനാൽ ഈ ഭാഗത്തുകൂടി സഞ്ചരിക്കാതിരിക്കാൻ അടച്ചു കെട്ടിയ നിലയിലാണ്. റോഡ് നിർമാണം നടക്കുന്പോൾ തന്നെ ഈ ഭാഗത്ത് കാന നിർമിക്കണമെന്ന കാര്യം പിഡബ്ല്യുഡി അസി.എക്സിക്യൂട്ടീവ്എൻജിനിയറെ കണ്ട് പരിസരവാസികൾ ധരിപ്പിച്ചിരുന്നു. എന്നാൽ യാതൊരു നടപടിയുമുണ്ടായില്ലെന്ന് പ്രദേശത്തെ വാർഡ് മെന്പർ ടി.എ. ഇബ്രാഹിം പറഞ്ഞു. റോഡിന്‍റെ ഉദ്ഘാടനം നടന്നപ്പോഴുണ്ടായിരുന്ന പിഡബ്ല്യുഡി ഉദ്യോഗസ്ഥരെല്ലാം ഇപ്പോൾ സ്ഥലം മാറിപ്പോയി. പട്ടിമറ്റം എരുമപ്പാറ ഭാഗത്ത് എച്ച്പി പമ്പിനോട് ചേർന്ന് റോഡിന്‍റെ ഇരുവശവും കോൺക്രീറ്റ് ചെയ്യാത്തതും കാൽനട യാത്രക്കാർക്കും മറ്റ് വാഹനങ്ങൾക്കും ബുദ്ധിമുട്ട് ഉണ്ടാക്കുന്നുണ്ട്. കിഫ്ബി ഫണ്ട് ഉപയോഗിച്ച് നിർമാണം നടത്തിയ റോഡിന്‍റെ ഉദ്ഘാടനം മന്ത്രി ഓൺലൈയിനിലും സ്‌ഥലം എംഎൽഎ നേരിട്ട് എത്തിയുമാണ് മൂന്ന് മാസങ്ങൾക്കു മുമ്പ് നിർവഹിച്ചത്.

മിന്നൽ പരിശോധന : 115 ബസുകളിൽ ചട്ടലംഘനം

കാക്കനാട്: എറണാകുളം, മൂവാറ്റുപുഴ എന്‍ഫോഴ്‌സ്‌മെന്‍റ് ആര്‍ടിഒമാരുടെ നിര്‍ദേശപ്രകാരം ഇന്നലെ നടത്തിയ മിന്നല്‍പരിശോധനകളില്‍ 115 ബസുകൾക്കെതിരേ നടപടി. 42 സ്‌കൂള്‍ ബസുകള്‍ക്കും 73 സ്വകാര്യ ബസുകള്‍ക്കുമെതിരേയാണ് മോട്ടോര്‍ വാഹന വകുപ്പ് നടപടി സ്വീകരിച്ചത്. എറണാകുളത്ത് നിന്നും രണ്ട് സ്‌ക്വാഡും, പെരുമ്പാവൂര്‍, കോതമംഗലം എന്നിവിടങ്ങളില്‍ നിന്നും ഓരോ സ്‌ക്വാഡും സംയുക്തമായാണ് പരിശോധന നടത്തിയത്. സ്‌കൂള്‍ വാഹനങ്ങള്‍ക്ക് 34,750 രൂപയും സ്വകാര്യ ബസുകള്‍ക്കെല്ലാം കൂടി 1, 22, 200 രൂപയും പിഴയിട്ടു. മദ്യപിച്ചു വാഹനമോടിക്കല്‍, പെര്‍മിറ്റ് ഇല്ലാതെ വാഹനം ഓടിക്കല്‍, സ്‌കൂള്‍ വാഹനങ്ങളില്‍ പ്രവര്‍ത്തിപരിചയം ഇല്ലാത്ത ഡ്രൈവര്‍മാര്‍, ഫിറ്റ്‌നസ് സര്‍ട്ടിഫിക്കറ്റ് ഇല്ലാത്ത വാഹനനങ്ങള്‍, യൂണിഫോം ധരിക്കാത്തതെയും സീറ്റ് ബെല്‍റ്റ് ധരിക്കാതെയും വാഹനം ഓടിച്ചവർ തുടങ്ങിയ ഇനത്തിലും പിഴ ചുമത്തി. പെരുമ്പാവൂര്‍ സബ് ആര്‍ടി ഓഫീസിന്‍റെ പരിധിയിലുള്ള പട്ടിമറ്റം, കിഴക്കമ്പലം, പെരുമ്പാവൂര്‍ കുറുപ്പംപടി,പോഞ്ഞാശേരി, വല്ലം, കൂവപ്പടി എന്നിവിടങ്ങള്‍ കേന്ദ്രീകരിച്ചായിരുന്നു പരിശോധന. മദ്യപിച്ച് സ്‌കൂള്‍ വാഹനം ഓടിച്ച ഡ്രൈവറെ കസ്റ്റഡിയിലെടുത്ത ശേഷം എറണാകുളം എന്‍ഫോഴ്‌സ്‌മെന്‍റ് വിഭാഗത്തിലെ അസിസ്റ്റന്‍റ് മോട്ടോര്‍ വെഹിക്കിള്‍ ഇന്‍സ്‌പെക്ടര്‍ സോണി ജോണ്‍ കുട്ടികളെ സുരക്ഷിതമായി സ്‌കൂളില്‍ എത്തിച്ചും മാതൃകയായി. സ്വകാര്യ ബസുകളില്‍ നടത്തിയ പരിശോധനയില്‍ 73 വാഹനങ്ങള്‍ക്കെതിരെ നടപടിയെടുത്ത് 1,22,200രൂപ പിഴയായും ഈടാക്കി. പെര്‍മിറ്റില്ലാത്തതും,ടാക്‌സ് അടക്കാത്തതുമായ വാഹനങ്ങള്‍, നിരോധിത എയര്‍ഹോണ്‍ ഘടിപ്പിച്ചവ, ലൈസന്‍സ് ഇല്ലാത്ത ഡ്രൈവര്‍മാര്‍ തുടങ്ങി വിവിധ ചട്ടലംഘനങ്ങള്‍ക്കും കേസെടുത്തു. വരും ദിവസങ്ങളിലും പരിശോധന തുടരുമെന്ന് ആര്‍ടിഒ (എന്‍ഫോഴ്‌സ്‌മെന്‍റ്) എറണാകുളം അറിയിച്ചു.

കച്ചേരിത്താഴത്തെ ഗർത്തം : പരിശോധനയ്ക്ക് എൻസിഇഎസ്എസ് സംഘമെത്തി

മൂവാറ്റുപുഴ: കച്ചേരിത്താഴത്ത് റോഡിൽ രൂപപ്പെട്ട ഗര്‍ത്തവുമായി ബന്ധപ്പെട്ട് കേന്ദ്ര ഏജന്‍സിയായ നാഷണല്‍ സെന്‍റര്‍ ഫോര്‍ എര്‍ത്ത് സയന്‍സ് സ്റ്റഡീസ് (എൻസിഇഎസ്എസ്) സംഘമെത്തി പ്രാഥമിക പരിശോധന നടത്തി. മാത്യു കുഴല്‍നാടന്‍ എംഎല്‍എയുടെ നിര്‍ദേശപ്രകാരം സംഭവത്തിന്‍റെ ആധികാരികമായ പഠനം നടത്തി ശാശ്വതപരിഹാരങ്ങള്‍ കണ്ടെത്താനാണ് കേന്ദ്ര സംഘം എത്തിയത്. ഇന്നും ഉന്നതതല സംഘം സ്ഥല പരിശോധന നടത്തും. കഴിഞ്ഞ ദിവസങ്ങളില്‍ കേരള റോഡ് ഫണ്ട് ബോര്‍ഡും, കേരള ഹൈവേ റിസര്‍ച്ച് ഇന്‍സ്റ്റിറ്റ്യൂട്ടും സ്ഥലത്തെത്തി പരിശോധന നടത്തിയിരുന്നു. 50 വര്‍ഷങ്ങള്‍ക്കു മുന്‍പ് ഉള്ളപഴയ കല്‍ക്കെട്ടുകൊണ്ടുള്ള ഡ്രെയിനേജിന്‍റെ കല്ലുകള്‍ കാലപ്പഴക്കം കാരണം തകരുകയും മുകളിലെ കവര്‍ സ്ലാബ് ഡ്രൈനേജിലേക്ക് വീഴുകയും പുഴയിലെ വെള്ളം കയറിയിറങ്ങി ഉടനെ ഈഓടയിലൂടെ മണ്ണുകള്‍ ഒലിച്ചു പുഴയിലേക്ക് എത്തിയതുമാണ് റോഡ് തകര്‍ന്ന് ഗര്‍ത്തം രൂപപ്പെടാന്‍ കാരണമെന്ന് കെആര്‍എഫ്ബി കണ്ടെത്തിയിരുന്നു. എന്നാല്‍ ഈ കണ്ടെത്തലുകള്‍ ആധികാരികമാണെന്ന് പരിശോധിക്കുന്നതിനൊപ്പം തന്നെ ഭൂമിക്കടിയിലൂടെയുള്ള മറ്റ് നീരൊഴുക്കുകളോ, ചാലുകളോ ഇവിടെക്കെത്തുന്നുണ്ടോയെന്നതും കൂടി പരിശോധിക്കാനാണ് എൻസിഇഎസ്എസ് സംഘം ഇന്നലെ എത്തിയത്. സ്ഥലം പരിശോധിച്ച സംഘം പ്രധാന ഭാഗങ്ങള്‍കണ്ടെത്തി അടയാളപ്പെടുത്തി. പ്രാഥമിക പഠനത്തിന് ശേഷംമാത്യു കുഴല്‍നാടന്‍ എംഎല്‍എയുടെ നേതൃത്വത്തില്‍ ചേര്‍ന്ന അവലോകന യോഗത്തില്‍ പൂര്‍ണമായ കൃതയോടു കൂടിയുള്ള നിഗമനത്തിനായി ജിപിആര്‍ (ഗ്രൗണ്ട് പെനിട്രേറ്റിംഗ് റഡാര്‍) മെഷീന്‍റെ സഹായത്തോടുകൂടിയുള്ള സ്‌കാനിംഗ് ആവശ്യമാണെന്ന് നിര്‍ദേശം ഉദ്യോഗസ്ഥര്‍ മുന്നോട്ടുവച്ചു. ഇതിന്‍റെ അടിസ്ഥാനത്തില്‍ ജിപിആര്‍ മെഷീന്‍ വെച്ച് സ്ഥലപരിശോധന നടത്തുന്നതിന് വേണ്ടനടപടികള്‍ എംഎല്‍എ സ്വീകരിച്ചു. റോഡിനടിയിലൂടെയുള്ള ഡ്രൈനേജുകളുടെ ലൊക്കേഷന്‍ കണ്ടെത്താനും മറ്റു തടസങ്ങളോ, നീരൊഴുക്കുകളോ 30 അടി താഴ്ചയില്‍ വരെ ഉണ്ടോയെന്നുംഈ മെഷീന്‍റെ സഹായത്തോടുകൂടി പരിശോധക്കാന്‍ സാധിക്കുനനതാണ്. യോഗത്തില്‍ മാത്യു കുഴല്‍നാടന്‍ എംഎല്‍എ, നഗരസഭാധ്യക്ഷന്‍ പി.പി എല്‍ദോസ്, കെഎച്ച്ആര്‍ഐ ജോയിന്‍റ് ഡയറക്ടര്‍ഷെമി എസ്. ബാബു, കെഎച്ച്ആര്‍ഐ ഡെപ്യൂട്ടി ഡയറക്ടര്‍ഷീജ റാണി,കെആര്‍എഫ്ബി അസിസ്റ്റന്‍റ് എക്‌സിക്യൂട്ടീവ് എന്‍ജിനീയര്‍ പോള്‍ തോമസ്, അസിസ്റ്റന്‍റ് എന്‍ജിനീയര്‍ മുഹ്‌സീന, കരാര്‍ കമ്പനിയുടെ പ്രതിനിധി ഉനൈസ് തുടങ്ങിയവര്‍ യോഗത്തില്‍ പങ്കെടുത്തു.

പിറവത്ത് മലിനജലം പുഴയിലേക്ക് : മത്സ്യങ്ങൾ ചത്തുപൊങ്ങി

പിറവം: പാലത്തിന് സമീപം പുഴയിലേക്ക് മലിനജലം ഒഴുക്കിയതിനെത്തുടർന്ന് മത്സ്യങ്ങൾ ചത്തുപൊങ്ങി. ഇന്നലെ ഉച്ചയോടെ ചാപ്പൽ പള്ളിക്ക് സമീപമുള്ള ഓടയുടെ ഭാഗത്തുനിന്നുമാണ് മലിനജലം പുഴയിൽ കലർന്നത്. ടൗണിൽനിന്നും ഒഴുകിയെത്തുന്നതാണ് ഈ മലിനജലം. പ്രദേശത്ത് ചൂണ്ടയിട്ട് മീൻപിടിച്ചുകൊണ്ടിരുന്നവരാണ് ഇത് ആദ്യം കണ്ടത്. ചുവന്ന കളറോട് കൂടിയ മലിനജലം പുഴയിലേക്ക് എത്തിയതോടെ മത്സ്യങ്ങൾ ചത്തു പൊങ്ങുകയായിരുന്നു. ചത്ത മത്സ്യങ്ങൾ പുഴയിലെ ഒഴുക്കിൽ ഒഴുകിപ്പോയി. ടൗണിലെ ഹോട്ടലുകളിലെയടക്കം മാലിന്യം ഒഴുകിയെത്തുന്നത് ഇവിടുത്തെ ഓവ് ചാലിലൂടെയാണ്. ഇതു സംബന്ധിച്ചു നേരത്തെ മുതൽ പരാതിയുള്ളതാണങ്കിലും പരിഹരിക്കാനുള്ള നടപടിയൊന്നും സ്വീകരിക്കാറില്ല. നഗരസഭ ഹെൽത്ത് വിഭാഗം പരിശോധന നടത്തി ടൗണിലെ ഒരു ഹോട്ടലുടമയ്ക്ക് നോട്ടീസ് നൽകിയിട്ടുണ്ട്. ഇവരുടെ മലിനജലം ശേഖരിച്ചിരുന്ന ടാങ്കിൽ നിന്നും പമ്പ് ചെയ്ത് ഓടയിലൂടെ ഒഴുക്കിയതാണന്നാണ് കണ്ടെത്തിയിരിക്കുന്നത്.

മംഗലത്തുതാഴത്തെ കലുങ്ക് പൂർണമായി പൊളിച്ചു നിർമിക്കും

കൂത്താട്ടുകുളം: കൂത്താട്ടുകുളം-പാലാ റോഡിൽ മംഗലത്തുതാഴത്തെ കലുങ്ക് പൂർണമായി പൊളിച്ച് നിർമിക്കാൻ തീരുമാനമായി. തകരാർ സംഭവിച്ച കലുങ്കിന്‍റെ മെയിൻ സ്ലാബിന്‍റെ ഒരു വശം പൂർണമായി പൊളിച്ചു നീക്കിയിരുന്നു. പൊളിച്ചു നീക്കിയ ഭാഗം പുനർ നിർമിക്കുന്നതിനായി ഉദ്യോഗസ്ഥർ എത്തുകയും തുടർന്ന് നാട്ടുകാർ നിർമാണ പ്രവർത്തനങ്ങൾ തടയുകയും ചെയ്തിരുന്നു. കലുങ്ക് പൂർണമായി പുനർ നിർമിക്കണമെന്ന് ആവശ്യപ്പെട്ടാണു നാട്ടുകാർ നിർമാണ പ്രവർത്തനങ്ങൾ തടഞ്ഞത്. കലുങ്കിന്‍റെ വശങ്ങളിലെ ഭിത്തി ഉൾപ്പെടെയുള്ള ഭാഗം പരിശോധിച്ച ശേഷം ബലക്ഷയം കണ്ടെത്തിയാൽ കലുങ്ക് പൂർണമായി പുലർ നിർമിക്കാം എന്നായിരുന്നു പിഡബ്ല്യുഡി അധികൃതർ അറിയിച്ചത്. ഇത്തരത്തിൽ പരിശോധന നടത്തിയതിന്‍റെ ഫലം പുറത്തു വരുന്നതിനു മുമ്പ് തന്നെ കലുങ്ക് പൂർണമായി പുനർനിർമിക്കാൻ തീരുമാനമെടുക്കുകയായിരുന്നു. കലുങ്ക് പണിത കരാറുകാരൻതന്നെ പുനർനിർമാണം നടത്തുമെന്ന് പിഡബ്ല്യുഡി അധികൃതർ അറിയിച്ചു. രണ്ടു മാസത്തിനുള്ളിൽ പണി പൂർത്തിയാക്കി ഗതാഗതത്തിനു തുറന്നു നൽകും. നിലവിൽ ഈ ഭാഗത്ത് ഒറ്റവരി ഗതാഗത നിയന്ത്രണം ഏർപ്പെടുത്തിയിരിക്കുകയാണ്.

അപകടംവിതച്ച് ടോറസ് ലോറികളുടെ മരണപ്പാച്ചില്‍

മൂവാറ്റുപുഴ: ടോറസ് ലോറികളുടെ മരണപ്പാച്ചില്‍ അപകടങ്ങള്‍ക്കു കാരണമാകുന്നു. മൂവാറ്റുപുഴ - തേനി സംസ്ഥാന പാതയിലൂടെ പായുന്ന ലോറികളാണ് അപകടങ്ങള്‍ വരുത്തിവയ്ക്കുന്നത്. ചെറുതും വലുതുമായ നിരവധി അപകടങ്ങള്‍ ദിവസവും ഉണ്ടായിട്ടും അധികൃതര്‍ നടപടി സ്വീകരിക്കാത്തതില്‍ പ്രതിഷേധം വ്യാപകമായിട്ടുണ്ട്. ഇന്നലെ രാവിലെ 8.30ഓടെ മണിയംകുളം കവലയില്‍ സ്‌കൂള്‍ ബസിനു പിന്നില്‍ കരിങ്കല്ല് കയറ്റിവന്ന ടോറസ് ലോറി ഇടിച്ചുണ്ടായ അപകടമാണ് ഒടുവിലത്തേത്. അപകടത്തില്‍ നിരവധി വിദ്യാര്‍ഥികള്‍ക്ക് പരിക്കേറ്റു. രണ്ടാഴ്ച മുമ്പ് കല്ലൂര്‍ക്കാട് കോട്ടക്കവലയില്‍ പിക്അപ്പ് വാനിടിച്ച് പത്ത് വയസുകാരന്‍ മരിച്ചു. ഉന്നത നിലവാരത്തില്‍ റോഡിന്‍റെ നിര്‍മാണം പൂര്‍ത്തിയായതോടെ ഇരുചക്രവാഹനങ്ങള്‍ മുതല്‍ ടോറസ് ലോറികള്‍ വരെ അമിത വേഗത്തിലാണ് പായുന്നത്. ഇതിനെതിരേ നാട്ടുകാര്‍ പലവട്ടം പരാതിപ്പെട്ടെങ്കിലും അധികൃതര്‍ യാതൊരു നടപടിയും സ്വീകരിക്കുന്നില്ലെന്ന് ആരോപണം ഉയര്‍ന്നിട്ടുണ്ട്. രാവിലെയും വൈകുന്നേരവും സ്‌കൂള്‍ സമയങ്ങളില്‍ ടിപ്പര്‍ ലോറികളടക്കമുള്ള ഭാരവണ്ടികള്‍ സര്‍വീസ് നടത്തരുതെന്ന നിയമം കാറ്റില്‍ പറത്തിയാണ് ഇവിടെ ലോറികള്‍ ചീറി പായുന്നത്. കരിങ്കല്‍ കയറ്റിപ്പോകുന്ന ലോറികളില്‍നിന്നും കല്ലു തെറിച്ച് റോഡിലേക്കു വീണ സംഭവംവരെ ഉണ്ടായിട്ടുണ്ട്.

ടോറസ് ലോറി സ്‌കൂള്‍ ബസിലിടിച്ചു : 18 വിദ്യാര്‍ഥികള്‍ക്ക് പരിക്ക്

മൂവാറ്റുപുഴ: കരിങ്കല്ല് കയറ്റി അമിത വേഗത്തിലെത്തിയ ടോറസ് ലോറി സ്‌കൂള്‍ ബസിന് പിന്നിലിടിച്ചുണ്ടായ അപകടത്തില്‍ ബസിലുണ്ടായിരുന്ന 13 കുട്ടികള്‍ക്കും, ഇതോടൊപ്പം കൂട്ടിയിടിച്ച ക്രൂയിസ് വാഹനത്തിലുണ്ടായിരുന്ന അഞ്ച് വിദ്യാര്‍ഥികള്‍ക്കും പരിക്കേറ്റു. ഇന്നലെ രാവിലെ 8.30 ഓടെ മൂവാറ്റുപുഴ-തേനി സംസ്ഥാനപാതയില്‍ കിഴക്കേക്കര മണിയംകുളം കവലയിലായിരുന്നു അപകടം. മൂവാറ്റുപുഴ വിമലഗിരി ഇന്‍റര്‍നാഷണല്‍ സ്‌കൂള്‍ ബസിനു മുന്നില്‍ ക്രൂയിസ് വാഹനം ബ്രേക്ക് ചെയ്തപ്പോള്‍ പിറകിലുണ്ടായ സ്‌കൂള്‍ ബസും വേഗത കുറയ്ക്കുകയായിരുന്നു. ഇതിനിടെയാണ് അമിതവേഗത്തില്‍ പിന്നാലെയെത്തിയ ടോറസ് ലോറി സ്‌കൂള്‍ ബസിനു പിന്നിലിടിച്ചത്. ഇതോടെ മൂന്നു വാഹനങ്ങളും കൂട്ടിയിടിച്ചു. സ്‌കൂള്‍ ബസിനും ക്രൂയിസ് വാഹനത്തിനും കേടുപാടുകള്‍ സംഭവിച്ചു. പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു. അപകടത്തില്‍ മൂവാറ്റുപുഴ വിമലഗിരി ഇന്‍റര്‍നാഷണല്‍ സ്‌കൂള്‍ വിദ്യാര്‍ഥികളായ എസ്. ശ്രീപാല്‍(12), ഇവാന്‍ ജോര്‍ജ് മാത്യു(നാല്), സിയാന്‍ റാബി ആദം (ഒമ്പത്), ജൂഡ് ജോര്‍ജ് മാത്യു (ഒമ്പത്), ലോറ വില്യം(10), ധ്യാന്‍ തോമസ് (ഏഴ്), മുഹമ്മദ് അയാന്‍ (ഒമ്പത്), ആന്‍ഫിന്‍ റെജി (ഏഴ്), എഞ്ചല്‍ റെജി (11), മീര ഹാരീസ് (11), അലീന ആര്‍. മഞ്‌ജേഷ് (16), സെലീന സേറ മഞ്ജേഷ് (അഞ്ച്), ഇവാന്‍ ജോര്‍ജ് മാത്യു (14) ഇവരില്‍ അഞ്ച് പേരെ എംസിഎസ് ആശുപത്രിയിലും എട്ടുപേരെ നിര്‍മല മെഡിക്കല്‍ സെന്‍ററിലും പ്രവേശിപ്പിച്ചു. ക്രൂയിസ് വാഹനത്തിലുണ്ടായിരുന്ന നിര്‍മല പബ്ലിക് സ്‌കൂള്‍ വിദ്യാര്‍ഥികളായ മുഹമ്മദ് അയാന്‍ (ഒമ്പത്), ആര്‍ച്ച നീരജ് (എട്ട്), ദേവസൂര്യ വിമല്‍ (10), ദേവജിത്ത് വിനില്‍ (14), കെ. ഇവാന്‍ഞ്ചലി(ഒമ്പത്) എന്നിവരെ മൂവാറ്റുപുഴ എംസിഎസ് ആശുപത്രിയിലും പ്രവേശിപ്പിച്ചു. മുഖത്ത് മുറിവേറ്റ ആന്‍ഫിന്‍ റെജിയെ തൊടുപുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചു. നിസാരമായി പരിക്കേറ്റ മറ്റുള്ളവരെ പ്രാഥമിക ചികിത്സയ്ക്കുശേഷം വിട്ടയച്ചു.

വാഹനാപകടത്തിൽ യുവാവ് മരിച്ചു

കളമശേരി: ഇടപ്പള്ളി ടോളിന് സമീപം അജ്ഞാത വാഹനം ഇടിച്ചു യുവാവ് മരിച്ചു. പാലക്കാട്‌ ഇരമയൂർ കോട്ടക്കര വീട്ടിൽ വിപിൻ വിനോദ് (25) ആണ് മരിച്ചത്. ഇന്നലെ പുലർച്ചെ രണ്ടോടെയായിരുന്നു അപകടം. വൈറ്റിലയിൽ ഫേബ്രിക്കേഷൻ ജോലി ചെയ്യുന്ന വിപിൻ ആലുവ ഭാഗത്തേക്ക് ബൈക്കിൽ പോകവെ, അതേ ദിശയിൽ വന്ന വാഹനം ഇടിച്ചാണ് അപകടമുണ്ടായത്. അപകടത്തിനിടയാക്കിയ വാഹനത്തെക്കുറിച്ച് അന്വേഷണം ആരംഭിച്ചതായി കളമശേരി പോലീസ് പറഞ്ഞു. മൃതദേഹം പത്തടിപ്പാലത്തെ സ്വകാര്യ ആശുപത്രി മോർച്ചറിയിൽ.

ഗൃഹനാഥൻ കിണറ്റിൽ മരിച്ച നിലയിൽ

കാലടി: കാലടി കുറ്റിലക്കരയിൽ ഗൃഹനാഥനെ കിണറ്റിൽ മരിച്ച നിലയിൽ കണ്ടത്തി. കുറ്റിലക്കര തൂമ്പാലൻ വീട്ടീൽ പരേതനായ ദേവസിയുടെ മകൻ ടി.ഡി. ജോസ്(55) ആണ് മരിച്ചത്. ഇന്നലെ രാവിലെ മുതൽ ജോസിനെ കാണാതായിരുന്നു. അന്വേഷണത്തിൽ വീടിന് എതിർവശത്തെ പറമ്പിലെ കിണറ്റിനു സമീപം ജോസ് ഉപയോഗിക്കുന്ന മുണ്ട് കാണപ്പെട്ടു. തുടർന്ന് നടത്തിയ പരിശോധനയിലാണ് ജോസിന്‍റെ മൃതദേഹം കിണറ്റിൽ കണ്ടെത്തിയത്. തുടർന്ന് കാലടി പോലീസും അങ്കമാലി അഗ്നിരക്ഷാസേനയും ചേർന്ന് മൃതദേഹം കിണറ്റിൽനിന്നു പുറത്തെടുത്തു. ഇൻക്വസ്റ്റ് നടപടികൾ പൂർത്തിയാക്കി മൃതദേഹം പോസ്റ്റ്മോർട്ടത്തിനയച്ചു. സംസ്കാരം പിന്നീട് ഭാര്യ: ജാൻസി. മക്കൾ: ആൻ മരിയ, ആൽബിൻ.

ലൈബ്രറി കൗണ്‍സില്‍ നേതൃയോഗങ്ങള്‍

മൂവാറ്റുപുഴ : മൂവാറ്റുപുഴ താലൂക്ക് ലൈബ്രറി കൗണ്‍സിലിന്‍റെ നേതൃത്വത്തില്‍ ലൈബ്രറി സെക്രട്ടറിമാര്‍, പ്രസിഡന്‍റുമാര്‍, ലൈബ്രേറിയന്മാര്‍ എന്നിവരുടെ സംയുക്ത യോഗം കൂത്താട്ടുകുളം, മൂവാറ്റുപുഴ എന്നീ മേഖലകളിലായി നടന്നു. കൂത്താട്ടുകുളത്ത് നടന്ന യോഗം ജില്ലാ ലൈബ്രറി കൗണ്‍സില്‍ വൈസ് പ്രസിഡന്‍റ് ഡോ. രാജി കെ. പോള്‍ ഉദ്ഘാടനം ചെയ്തു. മൂവാറ്റുപുഴയില്‍ നടന്ന യോഗം ജില്ലാ എക്‌സിക്യൂട്ടീവംഗം എം.ആര്‍. പ്രഭാകരന്‍ ഉദ്ഘാടനം ചെയ്തു. താലൂക്ക് പ്രസിഡന്‍റ് ജോഷി സ്‌കറിയ അധ്യക്ഷത വഹിച്ചു. താലൂക്കിലെ 73 ഗ്രന്ഥശാലകളും വാര്‍ഷീക ഗ്രാന്‍റിനുള്ള അപേക്ഷ ഓണ്‍ലൈനായി നല്‍കുവാനും വായനവസന്തം വീട്ടിലേക്ക് ഒരു പുസ്തകം പദ്ധതി എബിസി ഗ്രേഡിലുള്ള എല്ലാ ലൈബ്രറികളിലും നടപ്പാക്കുന്നതോടൊപ്പം എല്ലാ വീടുകളിലും വീട്ടുമുറ്റ സദസ് സംഘടിപ്പിക്കുവാനും തീരുമാനിച്ചതായി താലൂക്ക് സെക്രട്ടറി സി.കെ. ഉണ്ണി അറിയിച്ചു.

അഗ്നിരക്ഷാ നിലയത്തിന് വാട്ടര്‍ പ്യൂരിഫയര്‍ നൽകി

മൂവാറ്റുപുഴ: അഗ്നിരക്ഷാ നിലയത്തിന് വാട്ടര്‍ പ്യൂരിഫയര്‍ നൽകി ബാങ്ക് ഓഫ് ബറോഡ. മൂവാറ്റുപുഴ അഗ്നിരക്ഷാ നിലയം സ്റ്റേഷന്‍ ഓഫീസര്‍ കെ.എന്‍. സതീശന്‍, അസി സ്റ്റേഷന്‍ ഓഫീസര്‍ കെ.സി ബിജുമോന്‍ എന്നിവര്‍ ബാങ്ക് ഓഫ് ബറോഡാ മൂവാറ്റുപുഴ ബ്രാഞ്ച് മാനേജര്‍മാരായ ടിജോ, വിശേശ്വര്‍ പ്രഭു എന്നിവരിൽനിന്നും ഏറ്റുവാങ്ങി.

ബിജുവിന്‍റെ കുടുംബത്തിനായി കാരുണ്യ യാത്ര

കോതമംഗലം: പൂയംകുട്ടി മണികണ്ഠൻച്ചാൽ ചപ്പാത്തിൽ ഒഴുക്കിൽപ്പെട്ട് മരണമടഞ്ഞ ബിജുവിന്‍റെ കുടുംബത്തെ സഹായിക്കുന്നതിനായി ഐഷാസ് ഗ്രൂപ്പിന്‍റെ ബസുകൾ കാരുണ്യ യാത്ര നടത്തി. കാരുണ്യ യാത്രയുടെ ഉദ്ഘാടനം പ്രൈവറ്റ് ബസ് സ്റ്റാൻഡിൽ ആന്‍റണി ജോൺ എംഎൽഎ നിർവഹിച്ചു. കുട്ടമ്പുഴ പഞ്ചായത്ത് പ്രസിഡന്‍റ് കാന്തി വെള്ളക്കയ്യൻ അധ്യക്ഷത വഹിച്ചു. മേയ്‌ 25-ന് രാവിലെയാണ് മണികണ്ഠൻച്ചാൽ ചപ്പാത്തിൽ വച്ച് ഒഴുക്കിൽപ്പെട്ട് ബിജു മരിച്ചത്. ഒരു ദിവസത്തെ ഐഷാസ് ഗ്രൂപ്പിന്‍റെ 10 ബസുകളുടെ മുഴുവൻ കളക്ഷനും ബിജുവിന്‍റെ കുടുംബത്തിന് കൈമാറാനാണ് തീരുമാനിച്ചിട്ടുള്ളത്.

നിര്‍മല കോളജില്‍ ഖാദി ദിനാചരണം

മൂവാറ്റുപുഴ: വിവിധ പരിപാടികളോടെ മൂവാറ്റുപുഴ നിര്‍മല കോളജില്‍ ഖാദി ദിനം ആചരിച്ചു. കോളജിലെ 200ല്‍പ്പരം അധ്യാപകരും അനധ്യാപകരും ഖാദി വസ്ത്രങ്ങള്‍ അണിഞ്ഞാണ് എത്തിയത്. കോളജ് ഓഡിറ്റോറിയത്തില്‍ വസ്ത്രധാര എന്ന പേരില്‍ നടത്തിയ പരിപാടി കേരള ഖാദി വില്ലേജ് വ്യവസായ ബോര്‍ഡ് വൈസ് ചെയര്‍മാന്‍ പി. ജയരാജന്‍ ഉദ്ഘാടനം ചെയ്തു. വേറിട്ട രീതിയില്‍ ഖാദിയുടെ പ്രചാരണം നടത്തിയ നിര്‍മല കോളജിന് ഖാദി ബോര്‍ഡിന്‍റെ പ്രശംസ പത്രം ഖാദി ബോര്‍ഡ് വൈസ് ചെയര്‍മാന്‍ പി. ജയരാജന്‍ കോളജ് പ്രിന്‍സിപ്പല്‍ റവ. ഡോ. ജസ്റ്റിന്‍ കെ. കുര്യാക്കോസിന് കൈമാറി. ചടങ്ങില്‍ കോളജ് മാനേജര്‍ മോണ്‍. പയസ് മലേക്കണ്ടത്തില്‍ അധ്യക്ഷത വഹിച്ചു. കോളജ് ബര്‍സാര്‍ ഫാ. പോള്‍ കളത്തൂര്‍, വൈസ് പ്രിന്‍സിപ്പല്‍മാരായ ഡോ. സോണി കുര്യാക്കോസ്, ഡോ. ജിജി കെ. ജോസഫ്, കോളജ് ഐക്യുഎസി കോ-ഓര്‍ഡിനേറ്റര്‍ ഡോ. വി.ജെ. ജിജോ, ഖാദി ബോര്‍ഡ് അംഗങ്ങളായ സാജന്‍ തൊടുക, കെ.എ. രതീഷ് എന്നിവര്‍ പ്രസംഗിച്ചു. ഖാദി ദിനത്തിനോടനുബന്ധിച്ച് ഖാദി പ്രദര്‍ശന മേളയും കോളജില്‍ സംഘടിപ്പിച്ചു.

പിഴ തുക തട്ടിപ്പ്: സസ്‌പെന്‍ഷനിലായ ഉദ്യോഗസ്ഥയെ അറസ്റ്റ് ചെയ്യണമെന്ന്

മൂവാറ്റുപുഴ: പിഴ തുക തട്ടിപ്പ് കേസില്‍ സസ്‌പെന്‍ഷനിലായ വനിതാ സിവില്‍ പോലീസ് ഓഫീസറെ ഉടന്‍ അറസ്റ്റ് ചെയ്യണമെന്ന് മൂവാറ്റുപുഴ ബ്ലോക്ക് കോണ്‍ഗ്രസ് കമ്മിറ്റി. ഇടതുപക്ഷ അനുകൂല സംഘടന നേതാവായ ഉദ്യോഗസ്ഥയെ സംരക്ഷിക്കാനാണ് സര്‍ക്കാര്‍ ശ്രമിക്കുന്നതെന്ന് ബ്ലോക്ക് പ്രസിഡന്‍റ് സാബു ജോണ്‍ ആരോപിച്ചു. ഉദ്യോഗസ്ഥയുടെ വീട്ടില്‍ പരിശോധന നടത്തി രേഖകള്‍ പിടിച്ചെടുത്തെന്നാണ് പോലീസ് അവകാശപ്പെടുന്നത്. എന്നാല്‍ തെളിവുകള്‍ ലഭിച്ചിട്ടും ഇവരെ അറസ്റ്റ് ചെയ്യാന്‍ പോലീസ് തയ്യാറായിട്ടില്ല. ഉദ്യോഗസ്ഥയുടെ മുന്‍കൂര്‍ ജാമ്യാപേക്ഷ കോടതി തള്ളിയിരുന്നു. ഇവര്‍ ജോലി ചെയ്തിരുന്ന മൂവാറ്റുപുഴ പോലീസ് സ്റ്റേഷനിലെ മേല്‍ ഉദ്യോഗസ്ഥനാണ് കേസ് അന്വേഷിക്കുന്നത്. മൂവാറ്റുപുഴ ട്രാഫിക് പോലീസ് സ്റ്റേഷനില്‍ റൈറ്ററായിരുന്ന 2018 ജനുവരി ഒന്നു മുതല്‍ 2022 ഡിസംബര്‍ 31 വരെയുള്ള കാലയളവിലെ പിഴ തുക മുഴുവന്‍ ബാങ്കില്‍ അടയ്ക്കാതെ രേഖകളില്‍ കൃത്രിമം കാട്ടി തട്ടിയെടുത്തുവെന്നാണ് കേസ്. മറ്റു പോലീസ് ഉദ്യോഗസ്ഥര്‍ക്കും പങ്കുണ്ടെന്ന് ആരോപണം ഉയര്‍ന്നിരുന്നു. ഇവരെ രക്ഷിക്കുന്നതിന്‍റെ ഭാഗമായാണോ ഉദ്യോഗസ്ഥയെ അറസ്റ്റ് ചെയ്യാന്‍ മടിക്കുന്നതെന്ന് സംശയമുണ്ടെന്ന് കോണ്‍ഗ്രസ് ആരോപിച്ചു. കേസ് ക്രൈം ബ്രാഞ്ച് അന്വേഷിക്കണമെന്ന് ആവശ്യപ്പെട്ട് ഡിജിപിക്ക് പരാതി നല്‍കുമെന്നും കോണ്‍ഗ്രസ് അറിയിച്ചു.

"കാർഷിക ഉത്പന്നങ്ങൾക്ക് തറവില നിശ്ചയിക്കണം'

കോതമംഗലം: കാർഷിക വിളകൾക്ക് മിനിമം തറവില നിശ്ചയിച്ച് ഇടനിലക്കാരുടെ ചൂഷണം അവസാനിപ്പിക്കണമെന്ന് കേരള കോൺഗ്രസ് സംസ്ഥാന കോ-ഓർഡിനേറ്റർ അപു ജോൺ ജോസഫ്. കേരള കർഷക യൂണിയൻ കോതമംഗലം നിയോജകമണ്ഡലം കമ്മിറ്റിയുടെ ആഭിമുഖ്യത്തിൽ സംഘടിപ്പിച്ച കർഷക ദിനാഘോഷത്തിൽ മാതൃകാ കർഷകരെ ആദരിച്ച് സംസാരിക്കുകയായിരുന്നു അദ്ദഹേം. കാർഷിക ഉത്പന്നങ്ങൾക്ക് വില ഉയർന്നാലും ഉത്പാദകരായ കൃഷിക്കാർക്ക് ന്യായമായ വില ലഭിക്കുന്നില്ല. ഒരു കരിക്ക് 55 രൂപയ്ക്ക് വഴിയരികിൽ വിൽക്കുമ്പോൾ അത് ഉത്പാദിപ്പിക്കുന്ന കർഷകന് 15 രൂപയാണ് ലഭിക്കുക. അത്തരത്തിൽ എല്ലാ വിളകൾക്കും ഇടതട്ടുകാരുടെ ചൂഷണം നേരിടേണ്ടിവരുന്നുണ്ട്. വന്യമൃഗ ശല്യത്തിന് ശാശ്വത പരിഹാരം കാണണം. കോതമംഗലം നിയോജകമണ്ഡലത്തിലെ എട്ട് പഞ്ചായത്തിൽ നിന്നും മുനിസിപ്പാലിറ്റിയിൽ നിന്നുമുള്ള മാതൃക കർഷകരെ ചടങ്ങിൽ ആദരിച്ചു. കർഷക യൂണിയൻ നിയോജകമണ്ഡലം പ്രസിഡന്‍റ് ബിജു വെട്ടിക്കുഴ അധ്യക്ഷത വഹിച്ചു. കർഷക ദിനാഘോഷം മുൻ മന്ത്രി ടി.യു. കുരുവിള ഉദ്ഘാടനം ചെയ്തു. സംസ്ഥാന കോ-ഓർഡിനേറ്റർ അപു ജോൺ ജോസഫ് കർഷകരെ ആദരിച്ചു. ജില്ലാ പ്രസിഡൻറ് ഷിബു തെക്കുംപുറം മുഖ്യപ്രഭാഷണം നടത്തി. കർഷക യൂണിയൻ സംസ്ഥാന പ്രസിഡന്‍റ് വർഗീസ് വെട്ടിയാങ്കൽ, നിയോജകമണ്ഡലം പ്രസിഡൻറ് എ.ടി. പൗലോസ്, സംസ്ഥാന ജനറൽ സെക്രട്ടറിമാരായ ജോമി തെക്കേക്കര, റോയി സ്കറിയ, സി.കെ. സത്യൻ, റാണികുട്ടി ജോർജ്, കർഷക യൂണിയൻ സംസ്ഥാന ജനറൽ സെക്രട്ടറിമാരായ ആന്‍റണി ഓലിയപുറം, ജോണി പുളിന്തടം, സോജൻ പിട്ടാപ്പിള്ളിൽ തുടങ്ങിയവർ പ്രസംഗിച്ചു

കൂറ്റൻ പാറക്കഷണം റോഡിലേക്ക് പതിച്ച് ഗതാഗതം തടസപ്പെട്ടു

മൂവാറ്റുപുഴ: കൂറ്റൻ പാറക്കഷണം റോഡിലേക്ക് പതിച്ച് ഗതാഗതം തടസപ്പെട്ടു. ആരക്കുഴ പഞ്ചായത്ത് പതിമൂന്നാം വാർഡിലെ പെരുമ്പല്ലൂർ പോസ്റ്റ് ഓഫീസ്- മാറാടി റോഡിലാണ് സംഭവം. തിങ്കളാഴ്ച പുലർച്ചെ ഉഗ്ര ശബ്ദത്തോടുകൂടി സ്വകാര്യ വ്യക്തിയുടെ പുരയിടത്തോട് ചേർന്നുള്ള പാറക്കഷണം റോഡിലേക്ക് പതിക്കുകയായിരുന്നു. മൂവാറ്റുപുഴ പണ്ടപ്പിള്ളി ലിങ്ക് റോഡിൽ നിന്നും എംസി റോഡുമായി ബന്ധിപ്പിക്കുന്ന പ്രധാന ലിങ്ക് റോഡുകളിലൊന്നാണ് പോസ്റ്റ് ഓഫീസ് -മാറാടി ലിങ്ക് റോഡ്. ദിവസേന സ്കൂൾ കുട്ടികൾ ഉൾപ്പെടെ നിരവധി യാത്രകരുടെ ആശ്രമായിരുന്ന റോഡിലേക്ക് പാറകഷണം പതിച്ചതോടെ ഗതാഗതം തടസപ്പെട്ടിരുന്നു. സംഭവം അറിഞ്ഞു നാട്ടുകാരും പൊതുപ്രവർത്തകരും സ്ഥലത്തെത്തി. കോൺഗ്രസ്‌ ആരക്കുഴ മണ്ഡലം പ്രസിഡന്‍റ് പോൾ ലൂയിസ് പാലുംമൂട്ടിലിന്റെ നേതൃത്തിൽ ജെസിബി ഉപയോഗിച്ച് പാറക്കക്ഷണം നീക്കം ചെയ്താണ് ഗതാഗതം പുനസ്ഥാപിച്ചത്. കുറച്ചു വർഷങ്ങൾക്ക് മുമ്പ് ഇതേ സ്ഥലത്ത് സമാന രീതിയിൽ കരിങ്കൽകൂട്ടം റോഡിലേക്ക് പതിച്ചിരുന്നു.അന്ന് മുതൽ നിരന്തരമായി പരാതി ഉന്നയിച്ചിട്ടും പരിഹാര നടപടി അധികാരികളിൽ നിന്നും ഉണ്ടായിട്ടില്ലെന്നും ആക്ഷേപമുണ്ട്.

കൂത്താട്ടുകുളം നഗരസഭയിൽ ഉദ്യോഗസ്ഥരുടെ ബാറ്ററി വാങ്ങൽ വിവാദത്തിലേക്ക്

കൂത്താട്ടുകുളം: നഗരസഭ കൗൺസിൽ അനുമതിയില്ലാതെ ഉദ്യോഗസ്ഥർ 3.5 ലക്ഷം രൂപയുടെ ഇൻവെർട്ടർ ബാറ്ററികൾ വാങ്ങിയത് വിവാദമാകുന്നു. നഗരസഭ കാര്യാലയത്തിലെ ഇൻവെർട്ടർ സംവിധാനം തകരാറിലായിതിനെ തുടർന്നു പുതിയ ബാറ്ററികൾ വാങ്ങുന്നതിന് കൗൺസിലിന്‍റെ അനുമതി തേടിയിരുന്നു. പുതിയ ബാറ്ററികൾ വാങ്ങുന്നതിന് ഇന്നലെ നഗരസഭയിൽ ചേർന്ന കൗൺസിൽ യോഗത്തിൽ പ്രത്യേക അജണ്ട വയ്ക്കുകയും വിഷയം ചർച്ചക്കെടുക്കുകയും ചെയ്തു. ആക്ടിംഗ് ചെയർപേഴ്സൺ ജിജി ഷാനവാസിന്‍റെ അധ്യക്ഷതയിൽ ചർച്ച നടക്കുമ്പോൾ തന്നെ പുതിയ ബാറ്ററികളും അനുബന്ധ സാധനങ്ങളും നഗരസഭയിൽ എത്തി. നഗരസഭാ സെക്രട്ടറിയുടെ റൂമിനു സമീപം നിരത്തി വച്ചിരിക്കുന്ന പുതിയ ഇൻവെർട്ടർ ബാറ്ററികൾ ചർച്ചയ്ക്കിടയിൽ കൗൺസിൽ ഹാളിൽനിന്നും പുറത്തെത്തിയ കൗൺസിലർ പി.സി. ഭാസ്കരന്‍റെ ശ്രദ്ധയിൽ പെടുകയായിരുന്നു. ഉടൻതന്നെ കൗൺസിലർ തിരികെ ഹാളിൽ എത്തി മറ്റ് കൗൺസിലർമാരെ സംഭവം അറിയിക്കുകയും ചെയ്തു. കൗൺസിലിന്‍റെ അറിവും നിർദേശവും ഇല്ലാതെയാണ് ബാറ്ററി വാങ്ങൽ നടന്നിട്ടുള്ളത്. നഗരസഭയിലേക്ക് ആവശ്യമായ സാധനങ്ങൾ വാങ്ങുന്നതിനുള്ള യാതൊരു നടപടിക്രമങ്ങളും പാലിക്കപ്പെട്ടിട്ടില്ലെന്നും അന്വേഷണം വേണമെന്നും ആവശ്യപ്പെട്ട് യുഡിഎഫ് കൗൺസിലർമാർ വാക്ക് ഔട്ട് നടത്തി. കൗൺസിലിനെ മറികടന്നുള്ള തീരുമാനങ്ങൾ നടപ്പാക്കാൻ ഒരു കാരണവശാലും അനുവദിക്കുകയില്ല എന്ന് യുഡിഎഫ് ചെയർമാൻ പ്രിൻസ് പോൾ ജോൺ കക്ഷി നേതാക്കളായ സി.എ. തങ്കച്ചൻ, ബേബി കീരാന്തടം, പി.സി. ഭാസ്കരൻ എന്നിവർ പറഞ്ഞു. ഭരണം അട്ടിമറിച്ചാൽ ഉദ്യോഗസ്ഥ ഭരണവും തുടർന്നു കൊള്ളയും നടക്കാൻ സാധ്യത ഉണ്ടാകുമെന്നും എൽഡിഎഫ് നേതൃത്വം നേരത്തെ അറിയിച്ചിരുന്നു. ഉദ്യോഗസ്ഥർക്കെതിരേ നടപടി സ്വീകരിക്കണമെന്നും അവിശ്വാസത്തിലൂടെ പുറത്തായ മുൻ വൈസ് ചെയർമാൻ സണ്ണി കുര്യാക്കോസ് പറഞ്ഞു.

എല്‍ഡിഎഫ് പ്രതിഷേധ യോഗം

മൂവാറ്റുപുഴ: എല്‍ഡിഎഫ് നഗരസഭാംഗം കെ.ജി. അനില്‍കുമാറിനെ ഉള്‍പ്പെടെ മര്‍ദിച്ച യുഡിഎഫ് പ്രവര്‍ത്തകര്‍ക്കെതിരെ നടപടിയെടുക്കണമെന്ന് ആവശ്യപ്പെട്ട് എല്‍ഡിഎഫിന്‍റെ നേതൃത്വത്തില്‍ നഗരസഭയ്ക്ക് മുന്നില്‍ പ്രതിഷേധ യോഗം ചേര്‍ന്നു. കോതമംഗലം നഗരസഭയില്‍ നിന്നുള്ളവരെ നിയമവിരുദ്ധമായി മൂവാറ്റുപുഴ നഗരസഭയിലെ വോട്ടര്‍ പട്ടികയില്‍ പേര് ചേര്‍ക്കാന്‍ അപേക്ഷ നല്‍കിയതില്‍ നടപടിയെടുക്കണമെന്നും എല്‍ഡിഎഫ് നേതാക്കള്‍ ആവശ്യപ്പെട്ടു. സിപിഎം ഏരിയാ സെക്രട്ടറി അനീഷ് എം. മാത്യു യോഗം ഉദ്ഘാടനം ചെയ്തു.

പുതിയ വോട്ടർമാരെ ചേർക്കൽ : മൂവാറ്റുപുഴ നഗരസഭയിൽ സംഘർഷം

സിപിഎം കൗൺസിലർക്കു പരിക്ക് മൂവാറ്റുപുഴ: നഗരസഭയില്‍ പുതിയ വോട്ടര്‍മാരെ ചേര്‍ക്കുന്നതുമായി ബന്ധപ്പെട്ടുണ്ടായ തര്‍ക്കം സംഘർഷത്തില്‍ കലാശിച്ചു. നഗരസഭാംഗത്തിന് പരിക്കേറ്റു. ഇന്നലെ വൈകുന്നേരം 3.30 ഓടെയാണ് സംഭവങ്ങളുടെ തുടക്കം. 30-ാം വാര്‍ഡ് കൗണ്‍സിലര്‍ സുബൈറിന്‍റെ നേതൃത്വത്തില്‍ ഹിയറിംഗിനായി മുറിയിലേക്ക് കയറുമ്പോള്‍ സിപിഎം പ്രവര്‍ത്തകര്‍ തടഞ്ഞു. ഇത് ചോദ്യം ചെയ്തതാണ് സംഘര്‍ഷത്തിന് വഴിവച്ചത്. കോണ്‍ഗ്രസ് - ലീഗ് പ്രവര്‍ത്തകര്‍ ഒരുവശത്തും സിപിഎം കൗണ്‍സിലര്‍മാരടക്കം മറുവശത്തും നിന്ന് തര്‍ക്കം രൂക്ഷമായി. ഇതിനിടെയാണ് നഗരസഭാംഗവും സിപിഎം ലോക്കല്‍ സെക്രട്ടറിയുമായ എ.കെ. അനില്‍കുമാറിന് പരിക്കേറ്റത്. ഇതോടെ സംഘര്‍ഷം രൂക്ഷമായി. ഇതിനിടെ ഒരുപറ്റം യുവാക്കളും നഗരസഭാ ഓഫീസിലേക്കെത്തി. ഗുണ്ടകളെന്നാരോപിച്ച് യുവാക്കളെയും കൗണ്‍സിലര്‍ സുബൈറിനെയും പുറത്തിറക്കണമെന്നാവശ്യപ്പെട്ട് സിപിഎം ഏരിയ സെക്രട്ടറി അനീഷ് മാത്യുവിന്‍റെ നേതൃത്വത്തില്‍ കുത്തിയിരിപ്പ് സമരം നടത്തി. ഇതോടെ മൂവാറ്റുപുഴ സിഐ ബേസില്‍ തോമസിന്‍റെ നേതൃത്വത്തില്‍ വന്‍ പോലീസ് സംഘവും സ്ഥലത്തെത്തി. തുടര്‍ന്ന് യുവാക്കളെ പോലീസ് സ്റ്റേഷനിലേക്ക് കൊണ്ടുപോയി. ഇതിനിടെ ഒരു വിഭാഗം തടഞ്ഞെങ്കിലും ഇവരെ തള്ളി നീക്കിയാണ് പോലീസ് പോയത്. നഗരസഭാംഗത്തെ ആക്രമിച്ചതുമായി ബന്ധപ്പെട്ട് പായിപ്ര മുതിരക്കാലായില്‍ റെമിന്‍സിനെതിരേയും, കണ്ടാലറിയാവുന്ന മറ്റ് രണ്ട് പേര്‍ക്കെതിരെയും പോലീസ് കേസെടുത്തു. യുഡിഎഫ് ഭരിക്കുന്ന നഗരസഭയില്‍ 30-ാം വാര്‍ഡില്‍ മാത്രം 250-ഓളം കള്ളവോട്ടുകളാണ് ചേര്‍ത്തിട്ടുള്ളതെന്നും അതിര്‍ത്തി പഞ്ചായത്തായ പായിപ്രയില്‍ നിന്നുപോലും ബന്ധുക്കളുടെ വോട്ടുകള്‍ ചേര്‍ത്ത് ഹിയറിംഗിനെത്തിച്ചെന്നുമാണ് സിപിഎം പ്രവര്‍ത്തകര്‍ ആരോപിക്കുന്നത്. എന്നാല്‍ പുതിയ വോട്ടര്‍മാരെ ചേര്‍ക്കുന്നതില്‍ ഇടതുപക്ഷം വ്യാപകമായ ക്രമക്കേട് നടത്തുകയാണെന്ന് കോണ്‍ഗ്രസ് ബ്ലോക്ക് കമ്മിറ്റി ആരോപിച്ചു. സിപിഎം, ഡിവൈഎഫ്‌ഐ നേതാക്കളാണ് നഗരസഭയിലുണ്ടായ ആക്രമത്തിന് പിന്നിലെന്നും കോണ്‍ഗ്രസ് ബ്ലോക്ക് പ്രസിഡന്‍റ് സാബു ജോണ്‍, മണ്ഡലം പ്രസിഡന്‍റ് അബ്ദുല്‍ സലാം എന്നിവര്‍ പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]