തൊഴിൽ മേള സംഘടിപ്പിച്ചു

കൂത്തുപറമ്പ്: വിജ്ഞാന കേരളം, കൂത്തുപറമ്പ് നഗരസഭ, ബ്ലോക്ക് പഞ്ചായത്ത് എന്നിവയുടെ സംയുക്താഭിമുഖ്യത്തിൽ നിർമലഗിരി കോളജിൽ സംഘടിപ്പിച്ച തൊഴിൽമേള കെ.കെ. ശൈലജ എംഎൽഎ ഉദ്ഘാടനം ചെയ്തു. നഗരസഭ ചെയർപേഴ്സൺ വി. സുജാത അധ്യക്ഷത വഹിച്ചു.

വിജ്ഞാന കേരളം ജില്ലാ മിഷൻ കോ-ഓർഡിനേറ്റർ ഡോ. എം. സുർജിത് പദ്ധതി വിശദീകരിച്ചു. ബ്ലോക്ക് പഞ്ചായത്ത് പ്രസിഡന്‍റ് ആർ. ഷീല, ജില്ലാ പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ യു.പി. ശോഭ, ജില്ലാ പഞ്ചായത്തംഗം ഉഷ രയരോത്ത്, ബ്ലോക്ക് പഞ്ചായത്ത് വൈസ് പ്രസിഡന്‍റ് പി. ഷൈറീന, പഞ്ചായത്ത് പ്രസിഡന്‍റുമാരായ പി.സി. ഗംഗാധരൻ, വി. ബാലൻ, സെക്കീന തെക്കയിൽ, സി. രാജീവൻ, എൻ.വി. ഷിനിജ, കെ. ലത, കുടുംബശ്രീ ജില്ലാ മിഷൻ കോ-ഓർഡിനേറ്റർ വി. ജയൻ, കോളജ് പ്രിൻസിപ്പൽ സിസ്റ്റർ ഡോ. സലിൻ മാത്യു, ബ്ലോക്ക് പഞ്ചായത്ത് സെക്രട്ടറി മുന്ന പി. സദാനന്ദ് എന്നിവർ പ്രസംഗിച്ചു. 38 കമ്പനികളിൽ നിന്നുള്ള മാനേജ്മെന്‍റ് പ്രതിനിധികളാണ് അഭിമുഖം നടത്തിയത്.

ADVERTISEMENT

കുറ്റ്യാട്ടൂരിൽ യുവതിയെ തീകൊളുത്തി കൊല്ലാൻ ശ്രമം

മയ്യിൽ: വെള്ളം ചോദിച്ച് വീട്ടിലെത്തിയ യുവാവ് യുവതിയെ പെട്രോൾ ഒഴിച്ച് തീകൊളുത്തി കൊല്ലാൻ ശ്രമിച്ചു. കുറ്റ്യാട്ടൂർ ഉരുവച്ചാലിലെ പ്രവാസിയായ അജേഷിന്‍റെ ഭാര്യ പ്രവീണയെയാണ് (35) ഇരിക്കൂർ കുട്ടാവ് സ്വദേശി ജിജേഷ് (40) തീകൊളുത്തി കൊല്ലാൻ ശ്രമിച്ചത്. ഇന്നലെ ഉച്ചകഴിഞ്ഞ് രണ്ടോടെയായിരുന്നു സംഭവം. വെള്ളം ചോദിച്ച് എത്തിയ യുവാവ് വീടിനു പിന്നിലായിരുന്ന പ്രവീണയുടെ മേൽ പെട്രോൾ ഒഴിക്കുകയും തീകൊളുത്തുകയുമായിരുന്നു. ഇതിനിടെ ജിജേഷിനും പൊള്ളലേറ്റു. യുവതിയെ തീകൊളുത്തിയ ശേഷം യുവാവ് സ്വയം ജീവനൊടുക്കാൻ ശ്രമിക്കുകയായിരുന്നു. ബഹളം കേട്ടെത്തിയ നാട്ടുകാർ ഗുരുതരമായി പൊള്ളലേറ്റ ഇരുവരെയും കണ്ണൂർ ഗവ. മെഡിക്കൽ കോളജിൽ പ്രവേശിപ്പിച്ചു. കുട്ടാവ് സ്വദേശിനിയായ പ്രവീണയും ജിജേഷും തമ്മിൽ നേരത്തെ പരിചയമുണ്ടായിരുന്നതായി പറയപ്പെടുന്നു. എന്നാൽ അക്രമത്തിനു കാരണം എന്താണെന്ന് വ്യക്തമല്ലെന്ന് പോലീസ് പറഞ്ഞു. പോലീസ് അന്വേഷണം ആരംഭിച്ചിട്ടുണ്ട്. സമീപത്തെ പെട്രോൾ പന്പ് ഉൾപ്പടെയുള്ള സ്ഥലങ്ങളിൽ നിന്നുള്ള സിസിടിവി ദൃശ്യങ്ങൾ പോലീസ് പരിശോധിക്കുന്നുണ്ട്. കണ്ണൂർ എസിപി പ്രദീപൻ കണ്ണിപൊയിലിന്‍റെ നേതൃത്വത്തിലാണ് അന്വേഷണം.

ഗ്രീഷ്മയുടേത് നീറ്റ് വിജയം; രണ്ട് മാർക്കിൽ വഴുതിയത് ഒന്നാം റാങ്ക്

കണ്ണൂർ: ഓൾ ഇന്ത്യ മെഡിക്കൽ പിജി എൻട്രൻസ് പരീക്ഷയിൽ കണ്ണൂർ സ്വദേശിനിക്ക് രണ്ടാം റാങ്ക്. താഴെചൊവ്വ കിഴുത്തള്ളി ശ്രീവിലാസത്തിലെ ഗൗതമൻ-ഷൈമ ദന്പതികളുടെ മകൾ ഡോ. ഗ്രീഷ്മയ്ക്കാണ് അഭിമാനനേട്ടം. രണ്ട് മാർക്കിനാണ് ഗ്രീഷ്മയ്ക്ക് ഒന്നാം റാങ്ക് നഷ്ടമായത്. ഗ്രീഷ്മയ്ക്ക് 705 മാർക്കും ഒന്നാം റാങ്ക് നേടിയ നോർത്ത് ഇന്ത്യയിലെ വിദ്യാർഥിക്ക് 707 മാർക്കുമായിരുന്നു. ഓഗസ്റ്റ് മൂന്നിനായിരുന്നു നീറ്റ് പിജി പരീക്ഷ. രണ്ടര ലക്ഷത്തോളം പരീക്ഷാർഥികളാണ് പിജി എൻട്രൻസ് എഴുതിയത്. അതിൽനിന്ന് രണ്ടാം റാങ്ക് സ്വന്തമാക്കാൻ കഴിഞ്ഞതിൽ ഏറെ സന്തോഷമുണ്ടെന്ന് ഗ്രീഷ്മ പറഞ്ഞു. പിജി പഠനത്തിന് കോഴിക്കോട് മെഡിക്കൽ കോളജിൽ ചേരാനുള്ള തയാറെടുപ്പിലാണ് ഗ്രീഷ്മ. യുജി എൻട്രൻസ് പരീക്ഷയിൽ ഓൾ ഇന്ത്യ തലത്തിൽ മൂവായിരത്തിനടുത്തായിരുന്നു റാങ്ക്. കേരളത്തിൽ 530-ാം റാങ്ക് നേടിയാണ് തിരുവനന്തപുരം മെഡിക്കൽ കോളജിൽ എംബിബിഎസിനു ചേർന്നത്. സെക്കൻഡ് ക്ലാസോടെ എംബിബിഎസ് പൂർത്തിയാക്കിയശേഷം ഒരു വർഷമായി പിജി എൻട്രൻസ് പരിശീലനത്തിലായിരുന്നു. തോട്ടട സെന്‍റ് ഫ്രാൻസിസ് കോൺവന്‍റ് സ്കൂളിലായിരുന്നു എട്ടാം ക്ലാസുവരെ പഠിച്ചത്. തുടർന്ന് പ്ലസ്ടു വരെ കേന്ദ്രീയ വിദ്യാലയത്തിലായിരുന്നു പഠനം. വേണ്ടത് നിരന്തര പരിശീലനം 15 ശതമാനത്തിന് മുകളിൽ മാർക്ക് നേടിയ മുഴുവൻ പരീക്ഷാർഥികളും വിജയിക്കാറുണ്ട്. പക്ഷേ റാങ്കിലേക്കുള്ള മത്സരമാണ് കടുപ്പം. നിരന്തരമായ പരിശീലനം ഉണ്ടെങ്കിൽ ഉയർന്ന റാങ്ക് നേടിയെടുക്കാൻ കഴിയുമെന്ന് ഗ്രീഷ്മ പറയുന്നു. എട്ടു മുതൽ ഒൻപതു വരെ മാസം ചിട്ടയായ പഠനം, പരീക്ഷയോട് അടുത്തുള്ള ദിവസങ്ങളിലെ 12 മണിക്കൂർ വരെ നീളുന്ന പഠനം, നോട്ട് റീഡിംഗ് റിവിഷൻ, ചോദ്യോത്തരങ്ങൾ പരിശീലിക്കൽ എന്നിവയിലൂടെയും മികച്ച റാങ്കിലേക്ക് എത്താമെന്നും ഗ്രീഷ്മ പറയുന്നു. പരിശീലനത്തിന് കോഴിക്കോടുള്ള സ്ഥാപനത്തിൽ ചേർന്നെങ്കിലും വളരെ കുറച്ചു ദിവസം മാത്രമാണ് ക്ലാസിൽ പോയിരുന്നത്. വീട്ടിലിരുന്നുള്ള ഓൺലൈൻ പരിശീലനത്തിലൂടെയാണ് നേട്ടം കൈവരിക്കാനായതെന്നും ഗ്രീഷ്മ ദീപികയോട് പറഞ്ഞു.

ഗോവിന്ദച്ചാമിയുടെ ജയില്‍ച്ചാട്ടം: വൻ വീഴ്ചയെന്ന് വിദഗ്ധസമിതി

കണ്ണൂര്‍: കൊടും കുറ്റവാളി ഗോവിന്ദച്ചാമിയുടെ ജയിൽച്ചാട്ടത്തിൽ കണ്ണൂർ സെൻട്രൽ ജയിൽ അധികൃതരുടേത് വൻ വീഴ്ചയെന്നും അതീവ സുരക്ഷാഭീഷണിയാണ് ഇവിടെയുള്ളതെന്നും സർക്കാർ നിയോഗിച്ച വിദഗ്ധസമിതിയുടെ കണ്ടെത്തൽ. സെല്ലുകൾക്ക് കാലപ്പഴക്കം ഉണ്ടെന്നും മതിലുകൾ തകർച്ചാവസ്ഥയിലാണെന്നും റിട്ട. ജസ്റ്റിസ് സി.എന്‍.രാമചന്ദ്രന്‍ നായര്‍, മുന്‍ പോലീസ് മേധാവി ജേക്കബ് പുന്നൂസ് എന്നിവരടങ്ങിയ സമിതി രണ്ടു ദിവസമായി സെൻട്രൽ ജയിലിൽ നടത്തിയ പരിശോധനയിൽ കണ്ടെത്തി. പ്രഥമദൃഷ്ട്യാ തന്നെ ഉദ്യോഗസ്ഥരുടെ വീഴ്ച വ്യക്തമാണെന്ന് ജസ്റ്റിസ് സി.എൻ. രാമചന്ദ്രന്‍ നായര്‍ മാധ്യമങ്ങളോട് പറഞ്ഞു. ആര്‍ക്കെതിരെയും വ്യക്തിപരമായ നടപടി ശിപാര്‍ശ ചെയ്യില്ലെന്നും അദ്ദേഹം പറഞ്ഞു. തടവുകാർക്ക് മൊബൈൽ ഫോണുകൾ എത്തുന്നത് തടയാൻ ഉദ്യോഗസ്ഥർ കർശന നടപടികൾ സ്വീകരിക്കണമെന്ന് റിട്ട. ഡിജിപി ജേക്കബ് പുന്നൂസ് പറഞ്ഞു. ജയിലിൽ ആധുനിക പരിശോധന സംവിധാനങ്ങളൊരുക്കാൻ സർക്കാരിനോട് ശിപാർശ ചെയ്യും. ഗോവിന്ദച്ചാമിയുടെ ജയിൽ ചാട്ടം ഉദ്യോഗസ്ഥരുടെ ഭാഗത്ത് നിന്നുള്ള വീഴ്ച മാത്രമല്ല, സിസ്റ്റത്തിന്‍റെ കൂടി വീഴ്ചയാണെന്നും ജേക്കബ് പുന്നൂസ് പറഞ്ഞു. കണ്ണൂർ സെൻട്രൽ ജയിലിൽ രണ്ടു ദിവസമായി പരിശോധന നടത്തിയ സംഘം ഗോവിന്ദച്ചാമിയെ താമസിപ്പിച്ചിരുന്ന അതീവ സുരക്ഷയുള്ള പത്താം ബ്ലോക്ക് ഉൾപ്പടെ ജയിലിലെ മുഴുവൻ സ്ഥലവും പരിശോധിച്ചു. ദിവസങ്ങളോളം നീണ്ട തയാറെടുപ്പിലൂടെയാണ് ഗോവിന്ദച്ചാമി ജയിൽ ചാടിയതെന്നാണ് വിലയിരുത്തൽ. സെല്ലിന്‍റെ നാലു കന്പികളുടെ രണ്ട് ഭാഗങ്ങൾ മുറിച്ചുമാറ്റാനുള്ള ശ്രമം കണ്ടെത്താനായില്ലെന്നത് ജയിലധികൃതരുടെ വീഴ്ചയാണ്. കന്പികൾ മുറിക്കാൻ ഉപയോഗിച്ചതെന്ന് കാണിച്ച് പോലീസ് കണ്ടെടുത്ത ആയുധം ഉപയോഗിച്ച് മാത്രം കന്പികൾ മുറിക്കാൻ കഴിയില്ല, സാധാരണ ഹാക്സോ ബ്ലേഡ് ഉപയോഗിച്ച് ഇത്രയും ബലമുള്ള കന്പികൾ മുറിക്കാനാവില്ലെന്നും കൂടുതൽ മൂർച്ചയുള്ള എന്തോ ആയുധം ഉപയോഗിച്ചിട്ടുണ്ടെന്നുമാണ് സമിതിയുടെ നിഗമനം.

ആദിവാസി കുടുംബത്തിന്‍റെ വീടും സ്ഥലവും ജപ്തി ചെയ്തത് പരിശോധിക്കാൻ കളക്ടറുടെ നിർദേശം

കൊട്ടിയൂർ: പൊട്ടൻതോടില്‍ ആദിവാസി കുടുംബത്തിന്‍റെ വീടും സ്ഥലം ജപ്തി ചെയ്തു വില്പനയ്ക്ക് വച്ചതുമായി ബന്ധപ്പെട്ട നടപടികൾ പരിശോധിക്കാൻ ഇരിട്ടി തഹസിൽദാർക്ക് ജില്ലാ കളക്ടറുടെ നിർദേശം. തുടര്‍നടപടികള്‍ സ്വീകരിക്കാന്‍ ഫയല്‍ സര്‍ക്കാരിന് കൈമാറാനും കളക്ടര്‍ നിര്‍ദേശം നല്‍കി. കൊട്ടിയൂര്‍ പഞ്ചായത്ത് പ്രസിഡന്‍റ് റോയി നമ്പുടാകം നല്‍കിയ കത്തിനെ തുടര്‍ന്നാണ് കളക്ടറുടെ ഇടപെടൽ. സിപിഐ പേരാവൂര്‍ മണ്ഡലം കമ്മിറ്റിയും വിഷയത്തില്‍ ഇടപെട്ടിരുന്നു. നടപടികള്‍ നിര്‍ത്തിവയ്ക്കണമെന്ന് കാണിച്ച് റവന്യു മന്ത്രി കെ. രാജന് കത്ത് നല്‍കിയിരുന്നു. തഹസില്‍ദാറുടെ ഉത്തരവ് റദ്ദാക്കണമെന്ന് ആവശ്യപ്പെട്ട് മുഖ്യമന്ത്രിക്കും പട്ടിക വകുപ്പ് മന്ത്രിക്കും റോയി നന്പുടാകം കത്തയച്ചിരുന്നു. കോടതി വിധിച്ച 40,000 രൂപ പിഴ അടയ്ക്കാത്തതിനെ തുടർന്നായിരുന്നു കൊട്ടിയൂർ പഞ്ചായത്തിലെ ചുങ്കക്കുന്നിലുള്ള പൊട്ടൻതോട് ഉന്നതിയിലെ കരിക്കൻ ചോടോത്ത് ചെല്ലക്കയുടേയും മക്കളുടേയും പേരിലുള്ള ഭൂമിയും വീടുകളും ജപ്‌തി ചെയ്‌തത്. വീടും സ്ഥലവും പരസ്യമായി ലേലം ചെയ്യുമെന്ന് കാണിച്ച് റവന്യു വകുപ്പ് നോട്ടീസും നൽകിയിരുന്നു. സഹോദരിയുടെ മകനുമായി ബന്ധപ്പെട്ട് പോലീസ് കേസ് ഉണ്ടായപ്പോൾ ചെല്ലക്കയുടെ ഭർത്താവ് വെളുക്കന്‍ ജാമ്യം നിന്നിരുന്നു. അതിൽ പ്രതികളായ കക്ഷികളും ജാമ്യക്കാരും പതിവായി ഹാജരാകാത്തതിനാലാണ് തുടർനടപടികൾ ഉണ്ടായത്. കേസിൽ പ്രതികളായവർ ഇപ്പോൾ ആറളം സെറ്റിൽമെന്‍റ് ഏരിയയിൽ വീടും സ്ഥലവും ലഭിച്ച് താമസിക്കുകയാണെങ്കിലും തങ്ങളുടെ കുടുംബമാണ് നടപടികൾക്ക് ഇരയായതെന്നും ചെല്ലക്കയും കുടുംബവും പറഞ്ഞു. ജാമ്യംനിന്ന വെളുക്കൻ 12 വർഷം മുന്പ് മരിച്ചു. ആറ് മക്കളാണ് വെളുക്കൻ- ചെല്ലക്ക ദന്പതികൾക്കുള്ളത്. ഇതിൽ രണ്ടു മക്കളും വർഷങ്ങൾക്കു മുന്പ് മരിച്ചു. വെളുക്കന് എട്ട് സെന്‍റ് ഭൂമിയാണ് ഉണ്ടായിരുന്നത്. ഇതിൽ ഒരു ഭാഗത്ത് മകന്‍റെ മകൾ വീടുവച്ച് താമസിക്കുന്നുണ്ട്. ചെല്ലക്കയ്ക്ക് 80 വയസിനു മുകളിലാണ് പ്രായം. നടപടികൾ അന്തിമഘട്ടത്തിൽ എത്തിയപ്പോൾ മാത്രമാണ് കേസ് സംബന്ധിച്ച വിവരം കുടുംബം അറിയുന്നത്. റവന്യു വകുപ്പിന് വേണ്ടി ഇരിട്ടി തഹസിൽദാരാണ് നടപടികൾ സ്വീകരിച്ചിട്ടുള്ളത്. തുകയും ചെലവും പലിശയും അടച്ചാൽ ലേലം ഒഴിവാക്കുമെന്നും അറിയിച്ചിട്ടുണ്ട്. എന്നാൽ, ഇത്തരം ഒരു കോടതി നടപടി ഉണ്ടായിരുന്നതായി തങ്ങൾക്ക് അറിവില്ലെന്നാണ് കുടുംബം പറയുന്നത്.പണിയ വിഭാഗത്തിൽപ്പെട്ടവരാണ് വെളുക്കനും കുടുംബവും. അതിനാൽ തന്നെ കോടതി നടപടികൾ ഉണ്ടാകുമ്പോൾ പട്ടികജാതി പട്ടികവർഗ വകുപ്പ് ഇടപെടേണ്ടതാണെങ്കിലും അതുണ്ടായിട്ടുമില്ല. രണ്ട് പതിറ്റാണ്ടോളം പഴക്കമുള്ള കേസിൽ നിരവധി നടപടിക്രമങ്ങൾ പൂർത്തിയാക്കിയാൽ മാത്രമാണ് ജപ്‌തി ലേല നടപടികൾ വരെ എത്തുക. കേസ് സംബന്ധിച്ച് പോലീസ് പരിശോധന വേണമെന്ന ആവശ്യവും ഉയർന്നിട്ടുണ്ട്. കേസിലെ കക്ഷികൾ ഇപ്പോഴും ജീവിച്ചിരിക്കുന്നതിനാലും ജാമ്യംനിന്ന വ്യക്‌തി മരിച്ച് പതിറ്റാണ്ട് കഴിഞ്ഞതിനാലും നടപടി സ്വീകരിക്കുന്നത് ഒഴിവാക്കണമെന്നാണ് ചെല്ലക്കയും മക്കളും ആവശ്യപ്പെടുന്നത്.

ഏഷ്യൻ പവർലിഫ്റ്റിംഗ്: വെള്ളിത്തിളക്കത്തിൽ രഞ്ജു ബിജു

കരുവഞ്ചാൽ: വേൾഡ് പവർ ലിഫ്റ്റിംഗ് ഫെഡറേഷൻ നേപ്പാൾ കാഠ്മണ്ഡുവിൽ നടത്തിയ ഏഷ്യൻ പവർലിഫ്റ്റിംഗ് ചാമ്പ്യൻഷിപ്പ് -2025 വനിതാ വിഭാഗം 72 കിലോ 40 പ്ലസ് വിഭാഗത്തിൽ ഇന്ത്യക്ക് വേണ്ടി വെള്ളി നേടി കരുവഞ്ചാൽ സ്വദേശിനി രഞ്ജു ബിജു. ഈ വർഷം ഹിമാചൽ പ്രദേശിൽ നടന്ന നാഷണൽ പവർ ലിഫ്റ്റിംഗ് ചാമ്പ്യൻഷിപ്പിൽ കേരളത്തിന്‌ വേണ്ടി സ്വർണം നേടിയിരുന്നു. നവംബറിൽ ശ്രീലങ്കയിൽ നടക്കുന്ന വേൾഡ് പവർ ലിഫ്റ്റിംഗ് ചാമ്പ്യൻഷിപ്പിലേക്കുള്ള യോഗ്യതയും രഞ്ജു നേടിയിട്ടുണ്ട്. കരുവഞ്ചാൽ കുപ്പക്കാട്ട് ബിജു ആന്‍റണിയുടെ ഭാര്യയും ചിറ്റാരിക്കാൽ തോട്ടത്തിൽ സണ്ണി-എൽസമ്മ ദന്പതികളുടെ മകളുമാണ്.

ഒ.കെ. വിനീഷ് ദേശീയ ഫെൻസിംഗ് അസോ. വൈസ് പ്രസിഡന്‍റ്

നൈനിത്താൾ (ഉത്തരാഖണ്ഡ്): ഫെൻസിംഗ് അസോസിയേഷൻ ഓഫ് ഇന്ത്യയുടെ 2025-29 വർഷത്തെ തെരഞ്ഞെടുപ്പിൽ ഒ.കെ. വിനീഷ് വൈസ് പ്രസിഡന്‍റായി തെരഞ്ഞെടുക്കപ്പെട്ടു. മഹാരാഷ്‌ട്ര മുൻ ആഭ്യന്തരമന്ത്രി സതേഷ് പട്ടേൽ പ്രസിഡന്‍റായും ഇന്ത്യൻ ഒളിമ്പിക് അസോസിയേഷൻ മുൻ ജനറൽ സെക്രട്ടറി രാജീവ് മേത്ത സെക്രട്ടറിയായും ഒഡീഷയിലെ ദിപേന്ദ്ര സഹൂ ട്രഷററായും തെരഞ്ഞെടുക്കപ്പെട്ടു. കേരളത്തിൽ ഫെൻസിംഗ് രംഗത്ത് സജീവമായ ഒ.കെ. വിനീഷ് കേരള സ്‌പോർട്സ് കൗൺസിൽ മുൻ വൈസ് പ്രസിഡന്‍റും കണ്ണൂർ ജില്ലാ സ്‌പോർട്സ് കൗൺസിൽ മുൻ പ്രസിഡന്‍റുമായിരുന്നു. ഇപ്പോൾ കേരള ഫെൻസിംഗ് അസോസിയേഷൻ പ്രസിഡന്‍റാണ്. 52 അംഗ കമ്മിറ്റിയിലൂടെയാണു ഭാരവാഹികളെ തെരഞ്ഞെടുത്തത്. അത്‌ലറ്റിക്ക് കമ്മിറ്റി അംഗങ്ങളായി ഭവാനി ദേവി, രാധിക അവധി എന്നിവരെയും തെരഞ്ഞെടുത്തു.

ബസ് കണ്ടക്ടറെ മർദിച്ച കേസിൽ പ്രതികൾ കോടതിയിൽ കീഴടങ്ങി

തലശേരി: തലശേരി- തൊട്ടിൽപാലം റൂട്ടിൽ സർവീസ് നടത്തുന്ന സ്വകാര്യ ബസ് കണ്ടക്ടറെ മർദിച്ച കേസിൽ പ്രധാന പ്രതികളായ നാലുപേർ തലശേരി ഒന്നാംക്ലാസ് ജുഡീഷ്യല്‍ മജിസ്‌ട്രേറ്റ് കോടതിയില്‍ കീഴടങ്ങി. പ്രതികളെ കോടതി റിമാന്‍ഡ് ചെയ്തു. ഇതോടെ കേസിലെ മുഴുവന്‍ പ്രതികളും ജുഡീഷ്യല്‍ കസ്റ്റഡിയിലായി. മുൻകൂർ ജാമ്യഹർജി കഴിഞ്ഞദിവസം തള്ളിയതിനു പിന്നാലെയാണ് ഹർജി നൽകിയ നാദാപുരം വെള്ളൂർ സ്വദേശി വിശ്വജിത്തും പെരിങ്ങത്തൂർ സ്വദേശി വട്ടക്കണ്ടി സവാദും മറ്റു രണ്ടു പ്രതികളായ വിഷ്ണു, ജിനീഷ് എന്നിവരും കോടതിയിൽ കീഴടങ്ങിയത്. ജഗന്നാഥ് ബസ് കണ്ടക്ടര്‍ ഇരിങ്ങണ്ണൂര്‍ സ്വദേശി കെ. വിഷ്ണുവിനായിരുന്നു മർദനമേറ്റത്. സംഭവത്തിനു ശേഷം മൂന്നാഴ്ചയായി ഒളിവില്‍ കഴിയുകയായിരുന്നു പ്രതികള്‍. വധശ്രമമുള്‍പ്പെടെ ഒമ്പതു വകുപ്പുകളാണ് പ്രതികള്‍ക്കെതിരേ ചുമത്തിയിട്ടുള്ളത്. കുറ്റകൃത്യത്തില്‍ നേരിട്ട് പങ്കെടുത്തവരാണെന്നും ഡിജിറ്റല്‍ തെളിവുകള്‍ ഉള്‍പ്പടെ ശക്തമായ തെളിവുകള്‍ പ്രതികള്‍ക്കെതിരേ ഉണ്ടെന്നുമുള്ള പ്രോസിക്യൂഷന്‍ വാദം അംഗീകരിച്ചാണ് കോടതി മുൻകൂർ ജാമ്യ ഹർജി തള്ളിയത്. ഏറെ പൊതുജന ശ്രദ്ധയാകര്‍ഷിച്ച കേസായതിനാൽ പ്രതികളെ സംരക്ഷിക്കുന്നവരെകൂടി ഉള്‍പ്പെടുത്തി പ്രതിപ്പട്ടിക വിപുലീകരിക്കാനുള്ള നീക്കവും നടക്കുന്നുണ്ട്. സംഭവത്തില്‍ എട്ടു പേര്‍ക്കെതിരെയാണ് ചൊക്ലി പോലീസ് വധശ്രമത്തിന് കേസെടുത്തത്. കഴിഞ്ഞ 29നായിരുന്നു കേസിനാസ്പദമായ സംഭവം.

മുന്നാട് കോളജിൽ കെഎസ്‌യു സ്ഥാനാർഥിയെ താമസസ്ഥലത്തു കയറി മർദ്ദിച്ചു

മുന്നാട്: സിപിഎം നിയന്ത്രണത്തിലുള്ള പീപ്പിൾസ് കോളജിൽ കെ എസ് യു സ്ഥാനാർഥിയായി നാമനിർദേശ പത്രിക നൽകിയ കണ്ണൂർ പാനൂർ സ്വദേശിക്ക് മർദനം. മൂന്നാംവർഷ ബിരുദ വിദ്യാർഥി പാനൂർ കൊളവല്ലൂരിലെ പി.അജ് വാദി(24)നാണ് മർദനമേറ്റത്. എസ്എഫ്ഐ പ്രവർത്തകരടങ്ങിയ 12 അംഗ സംഘം ചൊവ്വാഴ്ച രാത്രി 7.45 ഓടെ അജ്വാദ് താമസിക്കുന്ന വാടക ക്വാർട്ടേഴ്സിൽ കയറി ആക്രമിക്കുകയായിരുന്നുവെന്ന് പറയുന്നു. കൈകൊണ്ട് അടിച്ചും വയറ്റത്ത് ചവിട്ടിയും പരിക്കേൽപ്പിച്ചതായാണ് പരാതി. അജ് വാദിന്‍റെ പരാതിയിൽ കോളജിലെ എസ്എഫ്ഐ പ്രവർത്തകരായ വട്ടപ്പാറയിലെ ശരത് ശശിധരൻ, മുന്നാട്ടെ അതുൽരാജ്, അനുരാജ്, അരിച്ചെപ്പിലെ വിഷ്ണു, അഖിൽരാജ്, പെരിയയിലെ ശ്രീരൂപ് എന്നിവർക്കും കണ്ടാലറിയാവുന്ന മറ്റ് ആറുപേർക്കുമെതിരെ ബേഡകം പോലീസ് കേസെടുത്തു.

സംഘം ചേര്‍ന്ന് മര്‍ദനം: അഞ്ച് പേര്‍ക്കെതിരേ വധശ്രമത്തിന് കേസ്

പയ്യന്നൂര്‍: സ്‌കൂട്ടറില്‍ കയറ്റിക്കൊണ്ടുപോയി സംഘം ചേര്‍ന്ന് മാരകായുധങ്ങളുപയോഗിച്ച് മര്‍ദിച്ചതായുള്ള പരാതിയില്‍ അഞ്ച് പേര്‍ക്കെതിരേ വധശ്രമമുള്‍പ്പെടെയുള്ള വകുപ്പുകളില്‍ പയ്യന്നൂര്‍ പോലീസ് കേസെടുത്തു. രാമന്തളി പാലക്കോട് ജുമാ മസ്ജിദിന് സമീപത്തെ മുഹമ്മദ് റഫീഖിന്‍റെ പരാതിയിലാണ് ഇംത്യാസിനും കൂടെയുണ്ടായിരുന്ന കണ്ടാലറിയാവുന്നവരുള്‍പ്പെടെ അഞ്ച് പേര്‍ക്കെതിരേയും കേസെടുത്തത്. തിങ്കളാഴ്ച രാവിലെ ഒന്പതോടെയാണ് പരാതിക്കാസ്പദമായ സംഭവം. പാലക്കോട് പെട്രോള്‍ പമ്പിന് സമീപം നില്‍ക്കുകയായിരുന്ന പരാതിക്കാരനെ ഇംത്യാസ് സ്‌കൂട്ടറില്‍ കയറ്റി ഓലക്കാല്‍ ഹാര്‍ബറിന് സമീപം കൊണ്ടുപോയാണ് ആക്രമിച്ചത്. പരാതിക്കാരന്‍റെ മരുമകളും ഭര്‍ത്താവും തമ്മിലുള്ള പ്രശ്‌നത്തില്‍ ഇടപെട്ടതിന്‍റെ വിരോധത്തിലാണ് മരണംവരെ സംഭവിക്കുമായിരുന്ന ആക്രമണമുണ്ടായതെന്ന പരാതിയിലാണ് പോലീസ് കേസെടുത്തത്.

കേരള സ്റ്റാർട്ടപ്പ് മിഷൻ ലീപ് സെന്‍റർ ഉദ്ഘാടനം നാളെ

കണ്ണൂർ: കേരള സ്റ്റാർട്ടപ്പ് മിഷൻ ലീപ് സെന്‍റർ കണ്ണൂർ സർവകലാശാലയിൽ നാളെ ഉദ്ഘാടനം ചെയ്യും. വൈസ് ചാൻസിലർ ഡോ.കെ കെ സാജു ഉദ്ഘാടനം നിർവഹിക്കും. സ്റ്റാർട്ടപ്പ് മിഷനും സർവകലാശാലയും തമ്മിലുള്ള ധാരണപത്രം കെഎസ്‌യുഎം സിഇഒ അനൂപ് അംബിക രജിസ്ട്രാർ ഡോ. ജോബി കെ. ജോസിന് കൈമാറും. റെഡിഫ് മെയിൽ സ്ഥാപകനും സർവകലാശാല ഇന്നേവേഷൻ സെന്‍റർ മുഖ്യ ഉപദേഷ്ടാവുമായ അജിത്ത് ബാലകൃഷ്ണൻ മുഖ്യപ്രഭാഷണം നടത്തും. സർവകലാശാല തലത്തിൽ ആദ്യമായാണ് കേരള സ്റ്റാർട്ടപ്പ് മിഷൻ ലീപ് സെന്‍റർ ആരംഭിക്കുന്നത്. നോർത്ത് മലബാർ ചേംബർ പ്രസിഡന്‍റ് ടി.കെ. രമേഷ്കുമാർ, സർവകലാശാല സിൻഡിക്കേറ്റ് അംഗങ്ങളായ പ്രഫ. എ. അശോകൻ, ഡോ. കെ.ടി. ചന്ദ്രമോഹൻ, ഡോ. കെ.പി. അനീഷ്കുമാർ, സർവകലാശാല എന്‍റർപ്രണർഷിപ്പ് കോ-ഓർഡിനേറ്റർ ഡോ. യു. ഫൈസൽ, സ്റ്റാർട്ടപ്പ് സംരംഭകർ, അധ്യാപകർ, വിദ്യാർഥികൾ എന്നിവർ പങ്കെടുക്കും.

ഇരിട്ടി അഗ്നിരക്ഷാ നിലയത്തിന് കെട്ടിടം യാഥാർഥ്യമാകുന്നു; 1.62 കോടിയുടെ പ്രവൃത്തിക്ക് ഭരണാനുമതി

ഇരിട്ടി: ഒന്നര പതിറ്റാണ്ടായി ഇടിഞ്ഞുപൊളിഞ്ഞ വാടക കെട്ടിടത്തിൽ വീർപ്പുമുട്ടി കഴിയുന്ന ഇരിട്ടി അഗ്നിരക്ഷാ നിലയത്തിന് പുതിയ കെട്ടിടം നിർമിക്കാൻ 1.62 കോടിയുടെ ഭരണാനുമതി ലഭിച്ചു. കഴിഞ്ഞ ബജറ്റിൽ കെട്ടിട നിർമാണത്തിന് 30 ലക്ഷം അനുവദിച്ചിരുന്നു. കെട്ടിടത്തിന്‍റെ നിർമാണത്തിന് പൊതുമരാമത്ത് വകുപ്പ് തയാറാക്കിയ എസ്റ്റിമേറ്റിന് ഭരണാനുമതി നൽകിയതായി സണ്ണി ജോസഫ് എംഎൽഎ അറിയിച്ചു. അഗ്‌നിരക്ഷാ വകുപ്പ് അംഗീകരിച്ച പദ്ധതിയിൽ ഓഫീസ്‌ കം റിക്കാർഡ് റൂം, സ്റ്റേഷൻ ഓഫീസർ, അസിസ്റ്റന്‍റ് സ്റ്റേഷൻ ഓഫീസർ റൂം, ലേഡീസ് റെസ്റ്റ് റൂം, കിച്ചൺ, ഡൈനിംഗ് റൂം, സ്റ്റോർ കം മെക്കാനിക് റൂം, കംപ്രസർ റൂം, ടോയ്‌ലറ്റ് എന്നിവയാണ് നിർമിക്കുന്നത്. സാങ്കേതികാനുമതി ലഭിച്ച് ടെൻഡർ നടപടികൾ പൂർത്തിയാകുന്ന മുറയ്ക്ക് പ്രവൃത്തി ആരംഭിക്കാൻ കഴിയുമെന്നും എംഎൽഎ അറിയിച്ചു. ഇരിട്ടി-എടക്കാനം റോഡിൽ ബലക്ഷയം ബാധിച്ച പഴയ സർക്കാർ ആശുപത്രി കെട്ടിടത്തിൽ വീർപ്പുമുട്ടി കഴിയുന്ന ഓഫീസിനെ സൗകര്യമുള്ള സ്ഥലത്തേക്ക് മാറ്റണമെന്ന ആവശ്യത്തിന് വർഷങ്ങൾക്ക് ശേഷമാണ് അനുമതി ലഭിച്ചത്. പയഞ്ചേരി വികാസ്നഗർ റോഡിൽ പഴയ ക്വാറിയോട് ചേർന്ന പൊതുമരാമത്ത് വകുപ്പിന്‍റെ അധീനതയിലുള്ള 1.40 ഏക്കർ ഭൂമിയിൽ 40 സെന്‍റ് ഭൂമി ഇരിട്ടി അഗ്‌നിരക്ഷാ നിലയത്തിന് കെട്ടിട നിർമാണത്തിനായി പതിച്ചു നൽകുന്നത് നാലുവർഷം മുന്പാണ്. പഴയ ആശുപത്രി കെട്ടിടം അറ്റകുറ്റപ്പണി തീർത്താണ് അഗ്‌നിരക്ഷാ നിലയത്തിനുള്ള ഓഫീസായി പ്രവർത്തിക്കുന്നത്. ഇടുങ്ങിയ മുറികളും കനത്ത മഴ പെയ്താൽ വെള്ളം കയറുകയും ചെയ്യുന്ന കെട്ടിടത്തിലാണ് 2010 ഡിസംബർ മുതൽ ഓഫീസ് പ്രവർത്തിക്കുന്നത്. രണ്ട് ഫയർ എൻജിനുകൾ, ആംബുലൻസ്, ജീവൻരക്ഷാ വാഹനങ്ങൾ ഉൾപ്പെടെയുള്ളവ നിർത്തിയിടാനുള്ള സൗകര്യങ്ങളും പരിമിതമാണ്. കഴിഞ്ഞ രണ്ട് പ്രളയത്തിലും ഓഫീസിൽ വെള്ളം കയറി ഫയലുകളും ഉപകരണങ്ങളുമെല്ലാം നശിച്ചിരുന്നു. പ്രതിവർഷം 200 ഓളം കേസുകളാണ് അഗ്നിരക്ഷാ നിലയം കൈകാര്യം ചെയ്യുന്നത്. വേനൽക്കാലത്തുണ്ടാകുന്ന തീപിടിത്തവും മഴക്കാലത്ത് മരംകടപുഴകി ഉണ്ടാകുന്ന അപകടങ്ങളും ഏറെയാണ്. മലയോര മേഖലയുടെ പ്രത്യേകതകൾ ഉൾക്കൊണ്ട് സേനയെ ഫലപ്രദമായി വിനിയോഗിക്കാനുള്ള സൗകര്യം അത്യാവശ്യമാണ്.

മൊട്ടുക്കൊമ്പൻ ജനവാസ മേഖലയിൽ തുടരുന്നു

ഇരിട്ടി: ആർആർടിയും വനപാലകരും ആനയെ കാട്ടിലേക്ക് തുരത്താൻ പാടുപെടുമ്പോൾ ആനകൾ മേഖലയിൽ നിന്ന് പിന്മാറാൻ മടിക്കുന്നത് ഭീഷണി ആകുന്നു. ഇന്നലെ രാവിലെ ബ്ലോക്ക് ഏഴിൽ ഇറങ്ങിയ മൊട്ടുക്കൊമ്പനെ തുരത്തുന്നതിനിടയിൽ ആന തിരിഞ്ഞ് വീണ്ടും വയനാടൻ കാട്ടിലേക്ക് കയറിയതോടെ തുരത്താൻ കഴിയാതെ വനപാലകർ പിന്മാറി. ജനവാസ മേഖലയോട് ചേർന്ന് ആന നിലയുറപ്പിച്ചതോടെ പ്രദേശവാസികൾ ജാഗ്രത പാലിക്കണം എന്ന് ആർആർടി മുന്നറിയിപ്പ് നൽകിയിരിക്കുകയാണ്. വിദ്യാർഥികളും തൊഴിലാളികളും സ്കൂളിലേക്കും ജോലിക്കും പുറപ്പെടുന്ന സമയത്താണ് ആന ഇറങ്ങി ഭീതി സൃഷ്ടിക്കുന്നത്. പുനരധിവാസ മേഖലയിൽ ഉൾപ്പെടെ ആനകളെ തുരത്താൻ "ഗജമുക്തി' പുരോഗമിക്കുന്നുണ്ടെങ്കിലും പ്രതികൂല കാലാവസ്ഥയിൽ ആനകളെ കാട്ടിൽ എത്തിക്കാൻ കഴിയാതെ വരുന്നുണ്ട്. ഭക്ഷണം, വെള്ളം എന്നിവ ധാരാളം ലഭിക്കുന്നതുകൊണ്ട് ആനകൾ വയനാടൻ കാടിൽ നിന്നും പിന്മാറാൻ തയാറാകുന്നില്ല. മേഖലയിൽ പുറം കാടുകൾ വെട്ടിത്തെളിച്ച ഭാഗങ്ങൾ വീണ്ടും തളിർത്ത് പൊങ്ങിയതോടെ ആനകൾക്ക് ധാരാളം ഭക്ഷണം ലഭിക്കുന്നതാണ് ഇവിടം ആനകൾക്ക് പ്രിയപ്പെട്ടത് ആകുന്നത്. വയനാടൻ കാടിന്‍റെ ഉള്ളിലേക്ക് വനപാലകർക്ക് എത്തിപ്പെടാൻ വഴിയും മറ്റ് സൗകര്യങ്ങളും ഇല്ലാത്തതും ആനകളെ ഇവിടെ നിന്നും തുരത്തുന്നതിന് തടസമാകുന്നു. തുരത്തുന്ന ആനകൾ ഉൾപ്പെടെ വീണ്ടും തിരിച്ചെത്തുന്നത് തടയാൻ ആനകൾ സ്ഥിരമായി ഇറങ്ങുന്ന വഴികളിൽ നിലവിലുള്ള ലൈൻ സോളാർ വേലിക്ക് പുറമെ മറ്റൊരു സോളോർ വേലി കൂടി സ്ഥാപിച്ച് കൂടുതൽ സുരക്ഷ ഉറപ്പുവരുത്താനുള്ള നടപടികൾ വനംവകുപ്പ് ആരംഭിച്ചു കഴിഞ്ഞു. ഇതിനായി പൂക്കുണ്ട് ഭാഗത്ത് തൂക്കുവേലിയുടെ നിർമാണം ആരംഭിച്ചു കഴിഞ്ഞു. ആറളം പുനരധിവാസ മേഖലയിലെ സുരക്ഷയുടെ കാര്യത്തിൽ കോടതിയുടെ പ്രത്യേക നിരീക്ഷണവും ഇടപെടലുകളും ഉണ്ടാകുന്നത് പ്രതിരോധ പ്രവർത്തനങ്ങൾ വേഗത്തിൽ ആകുന്നുണ്ട്. ആന മതിൽ നിർമാണത്തിലെ തടസങ്ങൾ നീങ്ങി പ്രവൃത്തി ആരംഭിച്ചാൽ മാത്രമേ ആനയുടെ ശല്യത്തിൽ നിന്നും പ്രദേശത്തിന് മോചനമുള്ളൂ. ആന മതിലിനായുള്ള പ്രദേശവാസികളുടെ നീണ്ട കാത്തിരിപ്പ് തുടരുകയാണ്.

കൺസ്ട്രക്‌ഷൻ വർക്കേഴ്സ് ഫെഡറേഷന്‍ കളക്‌ടറേറ്റ് മാർച്ച് നടത്തി ‌

കണ്ണൂര്‍: കുടിശികയായ പെൻഷൻ തുക ഉടൻ വിതരണം ചെയ്യുക, നിർമാണ തൊഴിലാളി ക്ഷേമനിധിയെ സംരക്ഷിക്കുക, കുടിശികയായ ആനുകൂല്യങ്ങൾ ഉടൻ വിതരണം ചെയ്യുക, തുടങ്ങിയ ആവശ്യങ്ങൾ ഉന്നയിച്ച് കൺസ്ട്രക്‌ഷൻ വർക്കേഴ്സ് ഫെഡറേഷന്‍ (എഐടിയുസി) ജില്ലാ കമ്മിറ്റിയുടെ നേതൃത്വത്തിൽ കളക്‌ടറേറ്റ് മാർച്ചും ധർണയും ‌സംഘടിപ്പിച്ചു. കൺസ്ട്രക്‌ഷൻ വർക്കേഴ്സ് ഫെഡറേഷന്‍ (എഐടിയുസി) സംസ്ഥാന വൈസ് പ്രസിഡന്‍റ് കെ.വി. കൃഷ്ണൻ മാർച്ചും ധർണയും ഉദ്ഘാടനം ചെയ്തു. സംസ്ഥാന വർക്കിംഗ് കമ്മിറ്റിയംഗം സി. വിജയൻ അധ്യക്ഷത വഹിച്ചു. സിപിഐ ജില്ലാ സെക്രട്ടറി സി.പി. സന്തോഷ് കുമാർ, എഐടിയുസി ജില്ലാ പ്രസിഡന്‍റ് എം. ഗംഗാധരൻ, എം. അനിൽകുമാർ, ടി.വി. നാരായണൻ എന്നിവർ പ്രസംഗിച്ചു.

ബൊക്കാഷി ബക്കറ്റ് വിതരണോദ്ഘാടനം

ഇരിട്ടി: ആറളം പഞ്ചായത്ത് വാർഷിക പദ്ധതിയിൽ ഉൾപ്പെടുത്തി ബൊക്കാഷി ബക്കറ്റ് നൽകുന്നതിന്‍റെയും പൊതുസ്ഥലങ്ങളിൽ അജൈവ മാലിന്യ ശേഖരണ ബിന്നുകൾ സ്ഥാപിക്കുന്നതിന്‍റെയും ഉദ്ഘാടനം ആറളം പഞ്ചായത്ത് പ്രസിഡന്‍റ് കെ.പി. രാജേഷ് നിർവഹിച്ചു. ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ഇ.സി. രാജു അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് കെ.ജെ. ജെസിമോൾ, വികസനകാര്യ സ്റ്റാൻഡിംഗ് കമ്മിറ്റി ചെയർമാൻ ജോസഫ് അന്ത്യാംകുളം, വിഇഒ പി. ഷിനി, വിഇഒ പി. ഷാജീവൻ എന്നിവർ പ്രസംഗിച്ചു. ബൊക്കാഷി ബക്കറ്റിന്‍റെ ഉപയോഗരീതിയെക്കുറിച്ച് ബയോ ഡ്രോപ്സ് ഉദ്യോഗസ്ഥർ വിശദീകരിച്ചു. ചടങ്ങിൽ പഞ്ചായത്ത് അംഗങ്ങൾ, ഹരിതകർമ സേനാഗങ്ങൾ, ജീവനക്കാർ, ഗുണഭോക്താക്കൾ എന്നിവർ പങ്കെടുത്തു.

മാക്കൂട്ടം ചുരത്തിൽ ലോറി നിയന്ത്രണം വിട്ട് മറിഞ്ഞു

ഇരിട്ടി: മാക്കൂട്ടം ചുരത്തിൽ ക്രെയിൻ കയറ്റിവന്ന ലോറി നിയന്ത്രണം വിട്ട് റോഡരികിലേക്ക് മറിഞ്ഞു. ഛത്തീസ്ഗഡിൽ നിന്ന് കണ്ണൂരിലേക്ക് പോകുകയായിരുന്ന ലോറിയാണ് അപകടത്തിൽപ്പെട്ടത്. ചുരം ഇറക്കത്തിനിടയിൽ ലോറി നിയന്ത്രണം വിട്ടപ്പോൾ ഡ്രൈവറുടെ സന്ദർഭോചിത ഇടപെടൽ കാരണം റോഡരിയിലെ ചെളിയിലേക്ക് വണ്ടി ഇറക്കിയാണ് അപകട തീവ്രത കുറച്ചത്. ലോറി അപകടത്തിൽപ്പെട്ട സ്ഥലത്ത് വലിയ താഴ്ചയായിരുന്നു. അവിടേക്ക് പതിക്കാതിരിക്കാൻ ഡ്രൈവർ നടത്തിയ ശ്രമമാണ് വലിയ അപകടത്തിൽ നിന്ന് ഒഴിവാക്കിയത്. കഴിഞ്ഞദിവസം രാത്രിയായിരുന്നു സംഭവം. വിരാജ് പേട്ടയിൽ നിന്ന് ക്രെയിൻ എത്തിയാണ് ലോറി ഉയർത്തിയത്.

ഡീസല്‍ ടാങ്കര്‍ മറിഞ്ഞ് അപകടം

പയ്യന്നൂര്‍: ദേശീയപാത കണ്ടോത്ത് കോത്തായി മുക്കില്‍ ഡീസല്‍ ടാങ്കര്‍ മറിഞ്ഞ് ഗതാഗത തടസപ്പെട്ടു. കഴിഞ്ഞ ദിവസം രാത്രി 10.30 തോടെയാണ് അപകടം. മംഗലാപുരത്ത് നിന്നും തിരുവനന്തപുരം കെഎസ്ആര്‍ടിസി ഡിപ്പോയിലേക്ക് 14,000 ലിറ്റര്‍ ഡീസലുമായി പോകുന്ന ടാങ്കര്‍ ലോറിയാണ് മറിഞ്ഞത്. ഇതോടെ ഡീസല്‍ നിറയ്ക്കുന്ന മുകളിലത്തെ ടാങ്ക് ലിഡ്ഡിലൂടെ പുറത്തേക്കൊഴുകിയ ഡീസലാണ് റോഡില്‍ പരന്ന് അപകടാവസ്ഥയുണ്ടാക്കിയത്. വിവരമറിഞ്ഞെത്തിയ പയ്യന്നൂര്‍ അഗ്നിരക്ഷാസേന സ്‌റ്റേഷന്‍ ഓഫീസര്‍ സി.പി. രാജേഷിന്‍റെ നേതൃത്വത്തിൽ പുറത്തേക്കൊഴുകിക്കൊണ്ടിരുന്ന ഡീസല്‍ ബക്കറ്റുകളില്‍ ശേഖരിച്ച് റോഡിലേക്കുള്ള ഡീസലിന്‍റെ ഒഴുക്ക് നിയന്ത്രിക്കുകയായിരുന്നു. പിന്നീട് വിളിച്ചുവരുത്തിയ രണ്ട് ക്രെയിനുകളുപയോഗിച്ചാണ് ടാങ്കറിനെ നിവര്‍ത്തി സുരക്ഷിതമായ സ്ഥലത്തേക്ക് മാറ്റിയത്. റോഡില്‍ ഒഴുകിയ ഡീസല്‍ വെള്ളം പമ്പ് ചെയ്ത് നീക്കം ചെയ്തതിനു ശേഷമാണ് ഗതാഗതം പുനഃസ്ഥാപിച്ചത്. അപകടത്തില്‍പ്പെട്ട ടാങ്കറിന്‍റെ ഡ്രൈവര്‍ തസ്‌റീഫ് അദ്ഭുതകരമായി രക്ഷപ്പെട്ടു.

മൊട്ടാന്പ്രത്ത് രണ്ടുപേർക്ക് തെരുവുനായയുടെ കടിയേറ്റു

പഴയങ്ങാടി: മൊട്ടാമ്പ്രാത്ത് രണ്ടുപേർക്ക് തെരുവുനായയുടെ കടിയേറ്റു. മാടായി വാടിക്കൽകടവ് സ്വദേശിയായ ഭാസ്കരൻ (57), നാടോടി സ്ത്ര‌ീയുമായ വയോധികയ്ക്കുമാണ് കടിയേറ്റത്. മൊട്ടാന്പ്രത്ത് ബസ് ഇറങ്ങി നാടൻ പണിക്കായി നടന്നുപോകവെ ഭാസ്കാരനെ ഓടിയെത്തിയ തെരുവുനായ കാലിൽ കടിക്കുകയായിരുന്നു. ഇന്നലെ രാവിലെ 8.30 ഓടെയായിരുന്നു സംഭവം. തുടർന്ന് ഇതിന് സമീപം നാടോടിസ്ത്രീയായ വയോധികയ്ക്കും നായയുടെ കടിയേറ്റു. ഇരുവരെയും കടിച്ചത് ഒരേ നായയാണെന്നാണ് നാട്ടുകാർ പറയുന്നത്. ഭാസ്കരൻ പഴയങ്ങാടി താലൂക്ക് ആശുപത്രിയിൽ ചികിത്സ തേടി. രണ്ടു മൂന്ന് ദിവസങ്ങളായി ഈ പ്രദേശത്ത് അലഞ്ഞ് തിരിയുന്ന തെരുവുനായക്ക് പേവിഷബാധയുള്ളതായി നാട്ടുകാർ പറയുന്നു. മാടായി പഞ്ചായത്തിലെ പഴയങ്ങാടി, മൊട്ടാമ്പ്രം റെയിൽവേ സ്റ്റേഷൻ പരിസരം, റെയിൽവേ ഗേറ്റ്, വെങ്ങര മുക്ക് സർക്കിൾ പരിസരം എന്നിവിടങ്ങളിലും തെരുവുനായ ശല്യം രൂക്ഷമാണ്. കുട്ടികൾക്കും കടയിൽ നിന്ന് സാധനങ്ങൾ വാങ്ങിപ്പോകുന്നവർക്കുനേരെയും തെരുവുനായകൾ പാഞ്ഞ് അടുക്കുന്നതും വീണ് പരിക്കേൽക്കുന്നതും ഈ മേഖലകളിൽ പതിവാവുകയാണ്. തെരുവുനായ ശല്യം രൂക്ഷമാകുന്നത് പഞ്ചായത്ത് അധികൃതരുടെ ശ്രദ്ധയിൽ പെടുത്തിയിട്ടും ഇവയെ നിയന്ത്രിക്കാനുള്ള നടപടികൾ പോലും സ്വീകരിക്കാൻ അധികൃതർ മുൻകൈ എടുക്കുന്നല്ലെന്ന പാരാതിയുമുണ്ട്.

രണ്ട് മാസത്തിനിടെ 1900 പേർക്ക് രോഗം ബാധിച്ചതായി കണക്ക്

കണ്ണൂർ: ജില്ലയിൽ മഞ്ഞപ്പിത്തം വ്യാപകമാകുന്നു. ജൂൺ മാസം മുതൽ ഇന്നലെ വരെ 1900 പേരിൽ രോഗം സ്ഥിരീകരിച്ചതായാണ് കണക്ക്. ഈ കണക്കിൽപ്പെടാതെ ധാരാളമാളുകൾ സ്വകാര്യ ചികിത്സ തേടുന്നുണ്ട്. ‌കഴിഞ്ഞ വർഷത്തെ അപേക്ഷിച്ച് ഈ വർഷം രോഗം ബാധിച്ചവരുടെ എണ്ണം കൂടുതലാണ്. തൃപ്പങ്ങോട്ടൂർ, തളിപ്പറമ്പ്, ഇരിട്ടി, ആറളം, ചിറക്കൽ, ശ്രീകണ്ഠാപുരം, മലപ്പട്ടം, കുറ്റ്യാട്ടൂർ, പാനൂർ, ചപ്പാരപ്പടവ്, മാലൂർ എന്നിവിടങ്ങളിലാണു രോഗവ്യാപനം കൂടുതൽ. ഡപ്യൂട്ടി ജില്ല മെഡിക്കൽ ഓഫീസറുടെ നേതൃത്വത്തിൽ മഞ്ഞപ്പിത്തബാധിത പ്രദേശങ്ങൾ സന്ദർശിച്ച് സ്ഥിതിഗതികൾ വിലയിരുത്തി. ഇത്തവണ പലരിലും രോഗത്തിന് തീവ്രത കൂടുതലാണെന്നാണ് വിവരം. പലർക്കും കിടത്തിച്ചികിത്സയ‌ടക്കം വേണ്ടിവന്നു. വൈറൽ ഹെപ്പറ്റൈറ്റിസ് എയാണ് മഞ്ഞപ്പിത്തത്തിന് കാരണമാകുന്നത്. മഞ്ഞപ്പിത്ത ലക്ഷണങ്ങൾ കണ്ടാൽ എത്രയും പെട്ടെന്ന് വൈദ്യസഹായം തേടണം. രോഗി നന്നായി വിശ്രമിക്കുകയും വേണം. കുട്ടികളിലും വ്യാപകം സ്കൂൾ വിദ്യാർഥികളിലടക്കം മഞ്ഞപ്പിത്തം റിപ്പോർട്ട് ചെയ്തിട്ടുണ്ട്. മലയോരത്തെ പല സ്കൂളുകളിലും വ്യാപകമായി മഞ്ഞപ്പിത്തം റിപ്പോർട്ട് ചെയ്തിട്ടുണ്ട്. കഴിഞ്ഞദിവസം ഇരിട്ടിയിലെ ഒരു സ്കൂളിൽ 35 വിദ്യാർഥികൾക്കും മൂന്ന് അധ്യാപകർക്കും മഞ്ഞപ്പിത്തം ബാധിച്ചിരുന്നു. സ്കൂളിലെ കുടിവെള്ളത്തിന് ഉപയോഗിക്കുന്ന കിണറ്റിൽ ഈകോളി ബാക്ടീരിയയുടെ സാന്നിധ്യം കണ്ടെത്തിയിരുന്നു. ഇതേ തുടർന്നാണ് മഞ്ഞപ്പിത്തം വ്യാപകമായതെന്നാണ് അധികൃതർ പറയുന്നത്. സ്കൂൾ തുറക്കുന്നതിന് മുന്പ് കുടിവെള്ള പരിശോധന നടത്തുന്നുണ്ട്. എന്നാൽ, സർട്ടിഫിക്കറ്റ് ലഭിക്കാനായി പലരും വെള്ളം മാറ്റി നല്കുന്നുണ്ടെന്ന ആക്ഷേപം ഉയർന്ന് വരുന്നുണ്ട്. ജില്ലയിലെ സ്കൂളുകളിലും പൊതുവിടങ്ങളിലെ കുടിവെള്ള സ്രോതസുകളിലും പരിശോധന ശക്തമാക്കിയിട്ടുണ്ടെന്ന് അധികൃതർ പറഞ്ഞു. ലക്ഷണങ്ങൾ തുടക്കത്തിൽ ചെറിയ പനി, ക്ഷീണം, വിശപ്പില്ലായ്മ, ഓക്കാനം, ഛർദി. പിന്നീട് ശരീരത്തിലെ ബിലുറബിൻ അളവ് വർധിക്കുന്നു. കണ്ണിന്‍റെ വെള്ള, ചർമം, മൂത്രം എന്നിവയ്ക്ക് കടുത്ത മഞ്ഞനിറം വരുന്നു. ഇതോടൊപ്പം ഛർദി, വിശപ്പില്ലായ്മ, കടുത്ത ക്ഷീണം. മഞ്ഞപ്പിത്തം കൂടുന്തോറും കരളിലെ എൻസൈമുകളും വർധിക്കും. മഞ്ഞപ്പിത്തം മാരമകമായാൽ അത് തലച്ചോറിന്‍റെയും കരളിന്‍റെയും പ്രവർത്തനത്തെ ബാധിക്കാം. ഇത് മരണകാരണമായിത്തീരാം. മുൻകരുതലുകൾ തിളപ്പിച്ചാറ്റിയ വെള്ളം മാത്രം കുടിക്കുക ജലസ്രോതസുകൾ ക്ലോറിനേഷൻ ചെയ്യുക. ജ്യൂസ് മറ്റു പാനീയങ്ങൾ എന്നിവ ഉണ്ടാക്കാൻ വ്യവസായിക ആവശ്യങ്ങൾക്കുള്ള ഐസ് ഉപയോഗിക്കരുത്. തിളപ്പിച്ചാറിയതോ ശുദ്ധീകരിച്ചതോ ആയ വെള്ളം മാത്രം ഫ്രിഡ്ജിൽ തണുപ്പിക്കാൻ വയ്ക്കുക. രോഗബാധിതർ പ്രത്യേക ശൗചാലയം, പാത്രങ്ങൾ എന്നിവ ഉപയോഗിക്കണം. രോഗി ഉപയോഗിക്കുന്ന പാത്രങ്ങൾ, വസ്ത്രങ്ങൾ എന്നിവ പങ്കിടാതിരിക്കുക. സ്വന്തം ലേഖിക

ഒറ്റപ്പാലക്കുന്നിൽ ജലസംഭരണി നിർമിച്ചിട്ട് ആറുമാസം; കുടിവെള്ളമെത്തിയില്ല

തളിപ്പറമ്പ്: പുഷ്പഗിരി ഗാന്ധിനഗര്‍-കരിമ്പം ഒറ്റപ്പാലനഗര്‍ പ്രദേശത്ത് കുടിവെള്ളം എത്തിക്കാനായി ജലസംഭരണി നിർമാണം പൂർത്തിയായിട്ട് ആറുമാസം കഴിഞ്ഞെങ്കിലും ഇനിയും വെള്ളം എത്തിക്കാൻ നടപടിയായില്ല. കടുത്ത ജലദൗര്‍ലഭ്യം നേരിടുന്ന പുഷ്പഗിരി ഗാന്ധിനഗര്‍-കരിമ്പം ഒറ്റപ്പാലനഗര്‍ പ്രദേശത്തുകാരുടെ ഏറെ നാളായുള്ള ആവശ്യപ്രകാരമാണ് വാട്ടര്‍ അതോറിറ്റി ഒറ്റപ്പാലക്കുന്നിന് മുകളില്‍ പുതിയ വാട്ടര്‍ ടാങ്ക് സ്ഥാപിച്ചത്. ഗാന്ധിനഗര്‍ വികസന സമിതി ചെയര്‍മാന്‍ റിട്ട. എഡിഎം എ.സി. മാത്യുവിന്‍റെ നേതൃത്വത്തില്‍ നാട്ടുകാര്‍ നടത്തിയ ശ്രമത്തിന്‍റെ ഭാഗമായിട്ടാണ് ഒരുലക്ഷം ലിറ്റര്‍ സംഭരണശേഷിയുള്ള ടാങ്ക് സ്ഥാപിച്ചത്. ഇവിടേക്ക് വെള്ളമെത്തിക്കാന്‍ 900 മീറ്റര്‍ നീളത്തില്‍ ജിഐ പൈപ്പ് ഉള്‍പ്പെടെ സ്ഥാപിക്കുകയും ചെയ്തു. രണ്ടു കോടിയായിരുന്നു നിര്‍മാണ ചെലവ്. ഫെബ്രുവരിയില്‍ ടാങ്ക് നിര്‍മാണം പൂര്‍ത്തിയായി. കൂനം-കാഞ്ഞിരങ്ങാട്-ആടിക്കുംപാറ മെയിന്‍ പൈപ്പ്‌ലൈനില്‍ നിന്ന് ടാങ്കിലേക്ക് കണക്‌ഷന്‍ നല്‍കാന്‍ അഞ്ച് മീറ്ററോളം നീളത്തില്‍ കണക്‌ഷന്‍ പൈപ്പ് സ്ഥാപിക്കാനുണ്ട്. മഴയ്ക്ക് മുമ്പായി ഈ പ്രവൃത്തികൂടി പൂര്‍ത്തീകരിക്കുമെന്ന് വാട്ടര്‍ അതോറിറ്റി അധികൃതര്‍ ഗാന്ധിനഗര്‍ വികസന സമിതിക്ക് ഉറപ്പുനല്‍കിയിരുന്നു. എന്നാൽ, മാസം ആറായിട്ടും ഒന്നും നടന്നില്ല. അടിയന്തരമായി നിര്‍മാണ പ്രവൃത്തികള്‍ പൂര്‍ത്തീകരിച്ച് കുടിവെള്ളം എത്തിക്കണമെന്നാണ് നാട്ടുകാരുടെ ആവശ്യം.

സർക്കാർ ആശുപത്രികൾ നാഥനില്ലാത്ത കളരിയായിരുന്ന കാലം മാറി: എം.വി. ജയരാജൻ

കൂത്തുപറമ്പ്: ഒരുകാലത്ത് സർക്കാർ ആശുപത്രികൾ നാഥനില്ലാ കളരികളായിരുന്നുവെങ്കിൽ ഇന്ന് മികച്ച ചികിത്സ നൽകുന്ന നാഥനുള്ള കേന്ദ്രങ്ങളാക്കി ആശുപത്രികളെ എൽഡിഎഫ് സർക്കാർ മാറ്റി‍യെന്ന് മുൻ എംഎൽഎയും സിപിഎം നേതാവുമായ എം.വി. ജയരാജൻ. സർക്കാർ ആശുപത്രികളെ ആശ്രയിക്കുന്നവരുടെ എണ്ണം ഗണ്യമായി വർധിച്ചിട്ടുണ്ടെന്നും അദ്ദേഹം പറഞ്ഞു. കേരള ഗവ. നഴ്സസ് അസോസിയേഷൻ അറുപത്തി എട്ടാമത് ജില്ലാ സമ്മേളനത്തിന്‍റെ ഭാഗമായുള്ള പൊതുസമ്മേളനം കൂത്തുപറമ്പ് മാറോളി ഘട്ട് ടൗൺ സ്ക്വയറിൽ ഉദ്ഘാടനം ചെയ്തു പ്രസംഗിക്കുകയായിരുന്നു എം.വി. ജയരാജൻ. കേരളത്തിന്‍റെ ആരോഗ്യ മേഖലയിലെ മുന്നേറ്റത്തിന് ഡോക്ടർമാരും നഴ്സുമാരും വഹിക്കുന്ന പങ്ക് വലുതാണെന്നും അദ്ദേഹം പറഞ്ഞു. സമ്മേളനത്തിന്‍റെ ഭാഗമായി കൂത്തുപറമ്പ് പാലത്തുങ്കര കേന്ദ്രീകരിച്ച് നടന്ന പ്രകടനം മാറോളിഘട്ട് ടൗൺ സ്ക്വയറിൽ സമാപിച്ചു. അസോസിയേഷൻ ജില്ലാ പ്രസിഡന്‍റ് പി.ആർ. സീന അധ്യക്ഷത വഹിച്ചു. സംസ്ഥാന സെക്രട്ടറി ടി.ടി. ഖമറുസമാൻ, ജില്ലാ സെക്രട്ടറി സനീഷ് ടി. തോമസ്, എം. സുകുമാരൻ, വി.പി. സാജൻ, എൻ. ദീപ എന്നിവർ പ്രസംഗിച്ചു.

ടിഎസ്എസ്എസ് പൈസക്കരി മേഖല വാർഷികം

പയ്യാവൂർ: തലശേരി സോഷ്യൽ സർവീസ് സൊസൈറ്റി (ടിഎസ്എസ്എസ്) പൈസക്കരി മേഖലാ വാർഷിക പൊതുയോഗവും കർഷക ദിനാചരണവും പൈസക്കരി ദേവമാതാ പാരിഷ് ഹാളിൽ നടന്നു. ടിഎസ്എസ്എസ് അതിരൂപത ഡയറക്ടർ ഫാ. ബിബിൻ വരമ്പകത്ത് ഉദ്ഘാടനം ചെയ്തു. അതിരൂപത പ്രസിഡന്‍റ് ജോഷി കുന്നത്ത് അധ്യക്ഷത വഹിച്ചു. പൈസക്കരി മേഖലാ പ്രസിഡന്‍റ് ആന്‍റണി സേവ്യർ ആമുഖ പ്രഭാഷണവും അതിരൂപത അസോസിയേറ്റ് ഡയറക്ടർ ഫാ. ആൽബിൻ തെങ്ങുംപള്ളിൽ മുഖ്യപ്രഭാഷണവും നടത്തി. മേഖലാ സെക്രട്ടറി മാനുവൽ കോയിക്കൽ മേഖല വാർഷിക റിപ്പോർട്ടും സിസ്റ്റർ ലിറ്റിൽ തെരേസ് സംഘനിധി ഓഡിറ്റ് റിപ്പോർട്ടും അവതരിപ്പിച്ചു. ടിഎസ്എസ്എസ് പ്രോഗ്രാം മാനേജർ ലിസി ജിജി യൂണിറ്റുകളുടെ വിലയിരുത്തൽ നടത്തി. ചന്ദനക്കാംപാറ ഇടവക അസി. വികാരി ഫാ. ജിൻസ് ചൊള്ളമ്പുഴ, തോമസ് മാത്യു എന്നിവർ പ്രസംഗിച്ചു. പൈസക്കരി മേഖലയിലെ മികച്ച കർഷകരായി ബേബി ജോർജ് കോലക്കുന്നേൽ, മാണി ചേന്നാട്ട് എന്നിവരെ അതിരൂപത ഡയറക്ടർ ഫാ. ബിബിൻ വരമ്പകത്ത് പൊന്നാടയണിയിച്ച് ആദരിച്ചു. മികച്ച യൂണിറ്റുകളായി ഒന്നാംസ്ഥാനം-പൈസക്കരി ട്രസ്റ്റ്, രണ്ടാംസ്ഥാനം-ചന്ദനക്കാംപാറ ട്രസ്റ്റ്, മൂന്നാംസ്ഥാനം-ചുണ്ടപ്പറമ്പ്, ഏറ്റുപാറ ട്രസ്റ്റുകൾ എന്നിവർക്കുള്ള അവാർഡുകൾ അതിരൂപത അസോസിയേറ്റ് ഡയറക്ടർ ഫാ. ആൽബിൻ തെങ്ങുംപള്ളിൽ സമ്മാനിച്ചു.

രാജീവ് ഗാന്ധി സദ്ഭാവന ദിവസ്

പയ്യാവൂർ: മുൻ പ്രധാനമന്ത്രിയും കോൺഗ്രസ് നേതാവും ആധുനിക ഇന്ത്യയുടെ ശില്പിയുമായ രാജീവ് ഗാന്ധിയുടെ എൺപത്തൊന്നാമത് ജന്മവാർഷികദിനം "സദ്ഭാവന ദിവസ്' ആയി കോൺഗ്രസ് മണ്ഡലം കമ്മിറ്റിയുടെ ആഭിമുഖ്യത്തിൽ പയ്യാവൂർ ഇന്ദിരാഭവനിൽ ആചരിച്ചു. മണ്ഡലം പ്രസിഡന്‍റ് ഇ.കെ. കുര്യൻ അധ്യക്ഷത വഹിച്ചു. കോൺഗ്രസ് ബ്ലോക്ക് വൈസ് പ്രസിഡന്‍റ് ജോയ് പുന്നശേരിമലയിൽ, ബ്ലോക്ക് പഞ്ചായത്തംഗം പി.ആർ. രാഘവൻ, കോൺഗ്രസ് നേതാക്കളായ ജേക്കബ് പനന്താനം, കുര്യാച്ചൻ മുണ്ടയ്ക്കൽ, കുര്യാക്കോസ് തെരുവത്ത്, ലിസി മൈക്കിൾ, സജി അട്ടിയ്ക്കൽ, സൈമൺ പെരുവക്കുന്നേൽ, ജോസഫ് അറയ്ക്കപറമ്പിൽ, മൈക്കിൾ ചാണ്ടിക്കൊല്ലി, രാജേഷ് രാമ്പേത്ത്, സ്കറിയ പൂവന്നിക്കുന്നേൽ, ടോമി കിഴങ്ങാട്ട്, തോമസ് മച്ചികാട്ട്, ജോസഫ് ചക്കാനിക്കുന്നേൽ, രാജൻ വായോറ, ബേബി കുരുവിക്കാട്ടിൽ, ജോർജ് മേനാക്കുന്നേൽ, ജോയ് പാറയ്ക്കൽ എന്നിവർ പ്രസംഗിച്ചു. ചെറുപുഴ: ചെറുപുഴ മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ പുഷ്പാർച്ചനയും അനുസ്മരണയോഗവും സംഘടിപ്പിച്ചു. മണ്ഡലം പ്രസിഡന്‍റ് ടി.പി. ചന്ദ്രൻ അധ്യക്ഷത വഹിച്ചു. ഡിസിസി നിർവാഹക സമിതിയംഗം ആലയിൽ ബാലകൃഷ്ണൻ ഉദ്ഘാടനം ചെയ്തു. സലിം തേക്കാട്ടിൽ, തോമസ് കൈപ്പനാനിക്കൽ, എം. സജീവൻ, റോമി പി. ദേവസ്യ, ജോൺ ജോസഫ് തയ്യിൽ, എം. കരുണാകരൻ, ജിജി കൊച്ചുപറമ്പിൽ, പി.പി. ബാലകൃഷ്ണൻ, ബിബിൻ രാജ്, കൃഷ്ണൻകുട്ടി, കൃഷ്ണൻ പള്ളിക്കര, പ്രഭാത് ജോർജ്, ഷൈജു, ജയിംസ് കൊങ്ങോല എന്നിവർ പ്രസംഗിച്ചു. പുളിങ്ങോം മണ്ഡലം കോൺഗ്രസ്‌ കമ്മിറ്റി "സദ്ഭാവന' ദിനം ആചരിച്ചു. മണ്ഡലം പ്രസിഡന്‍റ് മനോജ്‌ വടക്കേൽ പുഷ്പാർച്ചനയ്ക്കും അനുസ്മരണ യോഗത്തിനും നേതൃത്വം നൽകി. ജയിംസ് രാമത്തറ, ബാബു കണകൊമ്പിൽ, എൻ.എം. മുഹമ്മദ്‌, സജി പൊടിമറ്റം, ബിനോ ചിറ്റാട്ടിൽ, ബൈജു പൊട്ടംപ്ലാക്കൽ, ഷുക്കൂർ, ദാസൻ എന്നിവർ പ്രസംഗിച്ചു. ഐഎൻടിയുസി നേതാക്കൾ, പ്രവർത്തകർ എന്നിവർ പുഷ്പാർച്ചനയിലും അനുസ്മരണത്തിലും പങ്കെടുത്തു. തളിപ്പറമ്പ്: കോൺഗ്രസ് തളിപ്പറമ്പ് മണ്ഡലം കമ്മിറ്റി സദ്ഭാവനാ ദിനം ആചരിച്ചു. ഛായാചിത്രത്തിൽ പുഷ്പാർച്ചനയും അനുസ്മരണ യോഗവും സംഘടിപ്പിച്ചു. തളിപ്പറമ്പ് കോൺഗ്രസ് മന്ദിരത്തിൽ മഹിളാ കോൺഗ്രസ് സംസ്ഥാന ഉപാധ്യക്ഷ രജനി രമാനന്ദ് ഉദ്ഘാടനം ചെയ്തു. ടി.ആർ. മോഹൻദാസ് അധ്യക്ഷത വഹിച്ചു എം.എൻ. പൂമംഗലം മുഖ്യപ്രഭാഷണം നടത്തി. രാഹുൽ വെച്ചിയോട്ട്, മാവില പദ്മനാഭൻ, സി.വി. സോമനാഥൻ, കുഞ്ഞമ്മ തോമസ്, പ്രമീള രാജൻ, വി. അഭിലാഷ്, ദീപ രഞ്ജിത്ത്, കെ.എൻ. അഷ്റഫ്, പി.വി. നാണു, പി. സോമൻ, കെ. പ്രഭാകരൻ എന്നിവർ പ്രസംഗിച്ചു.

കുഞ്ഞിക്കൈകളിൽ കുഞ്ഞിത്തൈകൾ

ചെറുപുഴ: ചെറുപുഴ ജെഎം യുപി സ്കൂൾ ബണ്ണീസ് യൂണിറ്റിന്‍റെ ആഭിമുഖ്യത്തിൽ പച്ചക്കറിക്കൃഷി ആരംഭിച്ചു. മണ്ണിനെ തൊടാനും താൻ നട്ട തൈകൾ ഇടക്ക് വന്നു നിരീക്ഷിക്കാനും സ്വന്തം വീടുകളിലും പച്ചക്കറിത്തൈ നട്ടുപിടിപ്പിച്ച് പരിപാലിക്കണം എന്നുള്ള ചിന്തയാണ് കുട്ടികൾക്ക് ഇതിലൂടെ ലഭിക്കുന്നത്. മുളക്, വഴുതന തൈകളാണ് കുട്ടികൾ നട്ടുപിടിപ്പിച്ചത്. മുഖ്യാധ്യാപകൻ പി.എൻ. ഉണ്ണികൃഷ്ണൻ പ്രീ-പ്രൈമറി വിഭാഗം ചാർജ് വഹിക്കുന്ന പി. ലീന എന്നിവർ പ്രസംഗിച്ചു. ബണ്ണി ആന്‍റിമാരായ എം.ബി. ഷീബ, കെ.എം. രാജനി, ആയമാരായ പ്രീത, ഷിബിജ എന്നിർ നേതൃത്വം നൽകി.

കത്തോലിക്ക കോൺഗ്രസ് കർഷകരെ ആദരിച്ചു

പൈസക്കരി: കത്തോലിക്കാ കോൺഗ്രസ് പൈസക്കരി യൂണിറ്റിന്‍റെ ആഭിമുഖ്യത്തിൽ കർഷക ദിനാചരണത്തിന്‍റെ ഭാഗമായി കർഷകരെ ആദരിച്ചു. ഇടവകയിലെ 20 മാതൃകാ കർഷകരെ ആർച്ച്ബിഷപ് മാർ ജോസഫ് പാംപ്ലാനി ഷാളണിയിച്ച് ആദരിച്ചു. തെരഞ്ഞെടുത്ത കർഷകർക്ക് ഫൊറോന വികാരി ഫാ. നോബിൾ ഓണംകുളം ദീപിക കർഷകൻ മാസിക വിതരണം ചെയ്തു. യൂണിറ്റ് പ്രസിഡന്‍റ് വിൽസൺ ചാക്കോ, പാരിഷ് കോ-ഓർഡിനേറ്റർ ബിനു മാത്യു, കത്തോലിക്ക കോൺഗ്രസ് ഗ്ലോബൽ വർക്കിംഗ് കമ്മറ്റി മെംബർ ബേബി നെട്ടനാനി, അതിരൂപതാ സെക്രട്ടറി വർഗീസ് പള്ളിച്ചിറ എന്നിവർ നേതൃത്വം നൽകി. തെരഞ്ഞെടുത്ത കർഷകർക്ക് ദീപിക കർഷകൻ മാസിക ഒരു വർഷക്കാലത്തേക്കാണ് സൗജന്യമായി നൽകുന്നത്.

വിദ്യാർഥികളെ അനുമോദിച്ചു

പെരിങ്ങോം: പെരിങ്ങോം സർവീസ് സഹകരണ ബാങ്ക് പരിധിയിൽ നിന്നും എസ്എസ്എൽസി, പ്ലസ്ടു പരീക്ഷകളിൽ മുഴുവൻ വിഷയങ്ങളിലും എപ്ലസ് നേടിയ വിദ്യാർഥികളെ അനുമോദിച്ചു. ചീമേനി തുറന്ന ജയിൽ സൂപ്രണ്ട് കെ.ബി. അൻസാർ ഉദ്ഘാടനം ചെയ്തു. ബാങ്ക് പ്രസിഡന്‍റ് മനേഷ് മോഹൻ അധ്യക്ഷത വഹിച്ചു. പി. രവീന്ദ്രൻ, പി. അജയകുമാർ, കെ.വി. കുഞ്ഞിക്കൃഷ്ണൻ, ബാങ്ക് സെക്രട്ടറി കെ.ആർ. ഗീത, വൈസ് പ്രസിഡന്‍റ് പി.വി. സുരേഷ് ബാബു എന്നിവർ പ്രസംഗിച്ചു.

കനത്ത മഴയിൽ കൂറ്റൻ പാറ റോഡിലേക്ക് വീണു

കാർത്തികപുരം: കനത്ത മഴയിൽ മാമ്പോയിൽ-ജയഗിരി റോഡിൽ കൂറ്റൻ പാറ റോഡിലേക്ക് വീണു. 25 അടിയോളം പൊക്കമുള്ള മൺതിട്ടയും പാറയുമാണ് റോഡിലേക്ക് ഇടിഞ്ഞു വീണത്. ഇതേത്തുടർന്ന് ഇതുവഴിയുള്ള ഗതാഗതം തടസപ്പെട്ടു. അപകട സമയത്ത് റോഡിൽ വാഹനങ്ങളോ ആളുകളോ ഇല്ലാത്തതിനാലാണ് ദുരന്തം ഒഴിവായത്. സമീപത്തെ ബാംബു നഴ്സറിയുടെ ഒരു ഭാഗവും തകർന്നു. നാട്ടുകാർ ഏറെ നേരം പരിശ്രമിച്ചാണ് ഗതാഗതം പുനഃസ്ഥാപിച്ചത്. ശക്തമായ മഴയിൽ ഈ പ്രദേശത്തെ റോഡും തകർന്ന നിലയിലാണ്.

തളിപ്പറമ്പ് താലൂക്ക് ആശുപത്രിയില്‍ പുതിയ കെട്ടിടത്തിലെ ലിഫ്റ്റ് പണിമുടക്കി

തളിപ്പറമ്പ്: തളിപ്പറമ്പ് ഗവ. താലൂക്ക് ആശുപത്രിയിലെ ലിഫ്റ്റ് പണിമുടക്കിയതോടെ രോഗികളും ജീവനക്കാരും ദുരിതത്തിലായി. പുതുതായി നിര്‍മിച്ച ആശുപത്രി കെട്ടിടത്തിലെ ലിഫ്റ്റാണ് പണിമുടക്കിയിരിക്കുന്നത്. ഈ ആശുപത്രി കെട്ടിടത്തിൽ ഇപ്പോള്‍ മുഴുവൻ വാര്‍ഡുകളും ഒപികളും പ്രവര്‍ത്തിക്കാൻ തുടങ്ങിയിട്ട് കുറച്ച് മാസങ്ങളെ ആയിട്ടുള്ളൂ. ലിഫ്റ്റില്ലാത്തതിനാൽ വീല്‍ചെയറുകളിലും സ്‌ട്രെക്ച്ചറുകളിലുമായി വാര്‍ഡുകളില്‍ എത്തിക്കേണ്ട രോഗികളുമായി ജീവനക്കാരും കൂട്ടിരിപ്പുകാരും വളരെ പ്രിസന്ധിയിലായി. എത്രയും പെട്ടെന്ന് ലിഫ്റ്റ് ശരിയാക്കി രോഗികളുടെയും കൂട്ടിരിപ്പുകാരുടെയും ദുരിതം കുറയ്ക്കണമെന്നാണ് നാട്ടുകാർ ആവശ്യപ്പെടുന്നത്.

കെഎസ്‌യു പ്രവർത്തകനെ എംഎസ്എഫ്-ലീഗ് സംഘം മർദിച്ചതായി പരാതി

കണ്ണൂർ: കെഎസ്‌യു പ്രവർത്തകനെ എംഎസ്എഫ്-യൂത്ത് ലീഗ് പ്രവർത്തകർ മർദിച്ചതായി പരാതി. കണ്ണൂർ കാൾടെക്സിൽ ചൊവ്വാഴ്ച രാത്രിയായിരുന്നു മർദനം. കെഎസ്‍യു പ്രവർത്തകനായ അജ്മൽ റോഷനാണ് പരിക്കേറ്റത്. പരിക്കേറ്റ അജ്മൽ റോഷനെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. തളിപ്പറമ്പ് സർ സയ്യിദ് ഇൻസ്റ്റിറ്റ്യൂട്ടിലെ തെരഞ്ഞെടുപ്പിൽ നോമിനേഷൻ നൽകിയതാണ് മർദനത്തിന് പിന്നിലെന്നാണ് കെഎസ്‍യു ആരോപണം. തളിപ്പറമ്പ് സർ സയ്യിദ് ഇൻസ്റ്റിറ്റ്യൂട്ടിലെ തെരഞ്ഞെടുപ്പിൽ കെഎസ്‌യുവും എംഎസ്എഫും സഖ്യമായല്ല മത്സരിക്കുന്നത്. ചൊവ്വാഴ്ച നോമിനേഷൻ നൽകാൻ കോളജിലേക്ക് പോകുമ്പോഴാണ് സംഭവം. നോമിനേഷൻ കീറി എറിഞ്ഞെന്നും കെഎസ്‌യു ആരോപിക്കുന്നു. കൂടാതെ, യൂത്ത് ലീഗ് പ്രവർത്തകർ തടഞ്ഞുവച്ച് മർദിച്ചുവെന്നും അജ്മൽ റോഷൻ പരാതിയിൽ പറയുന്നു.

എസ്എഫ്ഐ പത്രിക തള്ളി: ദേവമാതയിൽ ചെയർമാൻ സ്ഥാനം കെഎസ്‌യുവിന്

പയ്യാവൂർ: പൈസക്കരി ദേവമാതാ കോളജ് യൂണിയൻ തെരഞ്ഞെടുപ്പിൽ എസ്എഫ്ഐ ചെയർമാൻ സ്ഥാനാർഥിയുടെ പത്രിക തള്ളിയതിനെ തുടർന്ന് കെഎസ്‌യു സ്ഥാനാർഥി പി. അഭിനന്ദ് എതിരില്ലാതെ തെരഞ്ഞെടുക്കപ്പെട്ടു. എസ്എഫ്ഐ സ്ഥാനാർഥി മീര പ്രസാദിന്‍റെ നാമനിർദേശ പത്രികയാണ് തള്ളിയത്. ജനന തീയതി ചേർത്തതിൽ പിശക് സംഭവിച്ചതായി സൂക്ഷ്മ പരിശോധനയിൽ കണ്ടെത്തിയതിനെ തുടർന്നാണ് പത്രിക തള്ളിയത്. എസ്എഫ്ഐ ചെയർമാൻ സ്ഥാനാർഥിയുടേത് ഒഴികെ ഇരുകൂട്ടരും സമർപ്പിച്ച മറ്റെല്ലാ പത്രികകളും സ്വീകരിച്ചിട്ടുണ്ട്.

ഗോവിന്ദച്ചാമിയുടെ ജയില്‍ ചാട്ടം: പ്രത്യേക അന്വേഷണ സംഘം സെൻട്രൽ ജയിലിലെത്തി

കണ്ണൂര്‍: ഗോവിന്ദച്ചാമി ജയിൽ ചാടിയതിന്‍റെ പശ്ചാത്തലത്തിൽ കണ്ണൂർ സെൻട്രൽ ജയിലിലെ സുരക്ഷ വീഴ്ചകൾ പരിശോധിക്കുന്നതിന് സർക്കാർ നിയോഗിച്ച പ്രത്യേക അന്വേഷണ സംഘം ജയിൽ സന്ദർശിച്ച് സ്ഥിതിഗതികൾ വിലയിരുത്തി. റിട്ട. ജസ്റ്റിസ് സി.എന്‍. രാമചന്ദ്രന്‍ നായര്‍, മുന്‍ ഡിജിപി ജേക്കബ് പുന്നൂസ് എന്നിവരടങ്ങിയ പ്രത്യേക സംഘമാണ് സെൻട്രൽ ജയിലിലെത്തി സുരക്ഷ ക്രമീകരണങ്ങൾ വിലയിരുത്തിയത്. സംസ്ഥാനത്തെ മുഴുവൻ ജയിലുകളും സന്ദർശിച്ച് ഇവർ സുരക്ഷ സംബന്ധിച്ച് സർക്കാരിന് റിപ്പോർട്ട് സമർപ്പിക്കും. കഴിഞ്ഞ മാസം മുഖ്യമന്ത്രിയുടെ നേതൃത്വത്തിൽ നടത്തിയ യോഗ തീരുമാനപ്രകാരമാണ് ജയിൽ സുരക്ഷ സംബന്ധിച്ച് അന്വേഷണം നടത്തി റിപ്പോർട്ട് സമർപ്പിക്കാൻ പ്രത്യേക അന്വേഷണ സംഘത്തെ നിയോഗിച്ചത്. കണ്ണൂർ സെൻട്രൽ ജയിലിൽ നിന്ന് ഗോവിന്ദച്ചാമി രക്ഷപ്പെടാനിടയാക്കിയത് വലിയ സുരക്ഷാ വീഴ്ചയായാണ് അന്വേഷണ സംഘം വിലയിരുത്തിയത്. ദിവസങ്ങളെടുത്ത് സെല്ലിന്‍റെ ഇരുന്പ് കന്പികൾ മുറിച്ചത്, മുറിക്കാനുള്ള ബ്ലേഡ് തടവുകാരന് ലഭിച്ചത് എന്നിവ ജയിൽ ജീവനക്കാർ അറിഞ്ഞില്ലെന്നത് സെല്ലുകളിൽ കൃത്യമായ പരിശോധന നടത്താത്തത് കാരണമാണെന്നാണ് വിലയിരുത്തൽ. കൂടാതെ പത്താം ബ്ലോക്കിലെ മതിൽ മറികടന്ന് ജയിലിന്‍റെ കൂറ്റൻ മതിലും ഒറ്റക്കൈയാനായ ഗോവിന്ദച്ചാമി മറികടന്ന് രക്ഷപ്പെട്ടിട്ടും ജയിലധികൃതർ അറിഞ്ഞില്ലെന്ന് വലിയ വീഴ്ചയയാണ് ജയിൽ അധികൃതരുടെ ഭാഗത്ത് നിന്നും ഗുരുതരമായ വീഴ്ച സംഭവിച്ചതായാണ് അന്വേഷണ സംഘത്തിന്‍റെ വിലയിരുത്തൽ.

വിമാനടിക്കറ്റ് നിരക്ക് കുത്തനെ ഉയർത്തി

മട്ടന്നൂർ: അവധി കഴിഞ്ഞു വിദേശത്തേക്ക് മടങ്ങുന്ന പ്രവാസികളെ പിഴിയാൻ യാത്രാനിരക്ക് കുത്തനെ ഉയർത്തി വിമാനക്കമ്പനികൾ. ഈ മാസം ടിക്കറ്റ് നിരക്കിൽ മൂന്നു മുതൽ അഞ്ചിരിട്ടി വരെ വർധനയാണ് വരുത്തിയത്. സാധാരണ 8000 മുതൽ 12000 രൂപയ്ക്ക് ലഭ്യമാകുന്ന ടിക്കറ്റുകൾക്ക് ഒറ്റയടിക്ക് 40,000 രൂപയ്ക്ക് മുകളിലായി. ഓണക്കാലം കഴിയുന്നത് വരെ ഇനി ടിക്കറ്റ് നിരക്കിൽ കുറവ് പ്രതീക്ഷിക്കേണ്ടതില്ലെന്നാണ് സൂചനകൾ. എല്ലാ വർഷത്തേയും പോലെ പ്രവാസികളെ പരമാവധി പിഴിയുകയാണ് വിമാനക്കമ്പനികൾ. 25ന് കണ്ണൂരിൽ നിന്ന് ദാമാമിലേക്ക് എയർഇന്ത്യ എക്‌സ്പ്രസിന് 40,000 രൂപ വരെയാണ് നല്കേണ്ടത്. സാധാരണ 15,000 രൂപ വരെയാണ് ദോഹയിലേക്കുള്ള ടിക്കറ്റ് നിരക്ക്. ഇൻഡിഗോയ്ക്ക് ദാമാമിലേക്ക് 40,000 രൂപയാണ് 25ന്‍റെ നിരക്ക്. എയർഇന്ത്യ എക്‌സ്പ്രസിന് കുവൈറ്റിലേക്ക് 25ന് 38,000 രൂപയാണ് ഈടാക്കുന്നത്. 12,000 മുതൽ 15,000 രൂപ വരെയാണ് കുവൈറ്റിലേക്ക് സാധാരണ നല്കേണ്ടി വരാറുള്ളത്. കണ്ണൂരിൽ നിന്ന് അബുദാബിയിലേക്ക് 34,000 രൂപയും ദുബായിലേക്ക് 30,400 രൂപയും മസ്കറ്റിലേക്ക് 26,256 രൂപയും ഷാർജയിലേക്ക് 37,960 രൂപയുമാണ് ടിക്കറ്റിന് ഈടാക്കുന്നത്. ഓണം സീസൺ കണക്കിലെടുത്ത് ഈ മാസം അവസാനവും സെപ്റ്റംബർ ആദ്യവും നാട്ടിലേക്കുള്ള ടിക്കറ്റ് നിരക്കും കുത്തനെ ഉയരാൻ സാധ്യതയേറെയാണ്. വിദേശ രാജ്യങ്ങളിൽ സ്കൂളുകൾ തുറക്കാ നാകുമ്പോഴാണ് പ്രവാസികൾ കുടുംബസമേതം തിരിച്ചു പോകുന്നത്. ഇതു മുന്നിൽക്കണ്ടാണ് ഓഗസ്റ്റ് ആദ്യം തന്നെ ടിക്കറ്റ് നിരക്ക് വർധിച്ചത്. ക്രിസ്മസ്, പുതുവർഷ സീസണുകളിലും ഉയർന്ന യാത്രാനിരക്ക് ഈടാക്കും. പെട്ടെന്ന് യാത്രയ്ക്ക് തയാറെടുക്കുന്നവർക്ക് തൊട്ടടുള്ള ദിവസത്തെ ടിക്കറ്റ് ലഭിക്കണമെങ്കിൽ അഞ്ചി രട്ടി വരെ തുക അധികം നല്കേണ്ടിവരും. പ്രവാസി യാത്രക്കാരോടുള്ള വിമാനക്കമ്പനികളുടെ ചൂഷ ണത്തെക്കുറിച്ച് പലതവണ സംസ്ഥാന സർക്കാരും ഇവിടത്തെ എംപിമാരും കേന്ദ്രസർക്കാരിന്‍റെ ശ്രദ്ധയിൽപ്പെടുത്തിയതാണ്. എന്നാൽ ടിക്കറ്റ്‌ നിരക്ക് നിശ്ചയിക്കാനുള്ള കമ്പനികളുടെ അധികാര ത്തിൽ ഇടപെടാൻ കഴിയില്ലെന്നാണ് പതിവു മറുപടി. മാസങ്ങൾക്ക് മുമ്പ് ബുക്ക് ചെയ്താലും ഇരട്ടിയിലേറെ തുക നല്കേണ്ടിവരുന്നതായി യാത്രക്കാർ പറയുന്നു.

പരാജയം മറയ്ക്കാൻ എസ്എഫ്ഐ വർഗീയ ചാപ്പ കുത്തുന്നു: എംഎസ്എഫ്

കണ്ണൂർ: സർവകലാശാലകളിലും വിവിധ കോളജുകളിലും ഉണ്ടായ പരാജയം മറച്ചുവയ്ക്കാൻ എംഎസ്എഫിനെ എസ്എഫ്ഐ വർഗീയ ചാപ്പ കുത്താൻ ശ്രമിക്കുന്നതായി എംഎസ്എഫ് സംസ്ഥാന സെക്രട്ടറി റുമൈസ റസീഖ് പത്രസമ്മേളനത്തിൽ ആരോപിച്ചു. കാന്പസുകളിൽ എംഎസ്എഫ് മതം പറഞ്ഞ് വോട്ടു പിടിക്കുന്നതായി സ്ഥാപിക്കാൻ എസ്എഫ്ഐ വോയ്സ് ക്ലിപ് പുറത്തുവിട്ടിരുന്നു. ആ ശബ്ദത്തിന് ഉടമ കൃഷ്ണമേനോൻ കോളജിലെ മുൻ വിദ്യാർഥിയും സ്റ്റുഡന്‍റസ് ഇസ്‌ലാമിക് ഓർഗനൈസേഷന്‍റെ (എസ്ഐഒ) വനിതാ വിഭാഗമായ ജിഐഒയുടെ പ്രവർത്തകയുടേതാണ്. കോളജിലെത്തിയവേളയിൽ ഈ വിദ്യാർഥിനി എംഎസ്എഫ് പ്രവർത്തകയായിരുന്നു.കഴിഞ്ഞ തവണ എസ്എഫ്ഐയുടെ ഏകാധിപത്യവും ഇത്തവണ കാന്പസുകളിലെ വിഷയങ്ങളും മുൻ നിർത്തിയാണ് എംഎസ്എഫ് പ്രചാരണം നടത്തിയത്. എംഎസ്എഫിനെതിരേ തെറ്റായ പ്രചാരണം നടത്തിയതിന് എസ്എഫ്ഐ മാപ്പു പറയണമെന്ന് അവർ ആവശ്യപ്പെട്ടു. എംഎസ്എഫ് ഹരിത സംസ്ഥാന വൈസ് ചെയർ പേഴ്സൺ നഹല സഹീദ്, ടി.പി. ഫർഹാന, ഫാത്തിമ സകരിയ എന്നിവരും പത്രസമ്മേളനത്തിൽ പങ്കെടുത്തു.

24 മണിക്കൂറും അലാറം മുഴക്കി എടിഎം

ഇരിട്ടി: എടൂർ ടൗണിൽ പ്രവർത്തിക്കുന്ന സ്റ്റേറ്റ് ബാങ്ക് എടിഎമ്മിലെ സുരക്ഷാ അലാറം രാപകൽ വ്യത്യാസമില്ലാതെ 24 മണിക്കൂറും ശബ്‌ദിക്കുന്നത് ഇടപാടുകാരെയും സമീപത്തെ വ്യാപാരികളെയും ആശങ്കയിലാക്കുന്നു. മാസങ്ങളായി സുരക്ഷാ അലാറം അലോസരം സൃഷ്ടിക്കുന്നത് ബാങ്ക് അധികൃതരുടെ ശ്രദ്ധയിൽപ്പെടുത്തിയിട്ടും യാതൊരു നടപടിയും എടുക്കുന്നില്ലെന്നാണ് പ്രദേശവാസികൾ പറയുന്നത്. പണം എടുത്തുകൊണ്ടിരിക്കുമ്പോൾ സുരക്ഷാ അലാറം അടിക്കുന്നത് ഇടപാടുകാരെ ഭയപ്പെടുത്തുന്നു. സമീപത്തെ വീടുകൾക്കും ഇതേ പ്രശ്നം തന്നെയാണ്. രാത്രിയിൽ വലിയ ശബ്ദത്തിൽ അലാറം അടിക്കുന്നത് യഥാർഥ കള്ളൻ എത്തിയിട്ടാണോ എന്നു തിരിച്ചറിയാൻ കഴിയാതെ പോകുമെന്നാണ് പ്രദേശവാസികൾ പറയുന്നത്. അലാറം ശബ്ദം കേട്ട് ആംബുലൻസ് വരുന്നതെന്ന് കരുതി വാഹനം ഒതുക്കി നിർത്തി വഴി ഒരുക്കിയ സംഭവവും ഉണ്ടായിട്ടുണ്ട്. അധികൃതരുടെ അനാസ്ഥ വലിയ മോഷണത്തിന് ഉൾപ്പെടെ കാരണമാകുമെന്നാണ് പ്രദേശവാസികൾ പറയുന്നത്. അലാറം അടിച്ചാലും ആരും ശ്രദ്ധിക്കാതായതോടെ മോഷ്ടാക്കൾ ഉൾപ്പെടെ എത്താനുള്ള സാധ്യത തള്ളിക്കളയാനാവില്ലെന്നാണ് വ്യാപാരികൾ പറയുന്നത്. പ്രദശവാസികൾക്കും വ്യാപാരികൾക്കും ഇടപാടുകാർക്കും ഒരേപോലെ അലോസരം സൃഷ്ടിക്കുന്ന എടിഎമ്മിന്‍റെ അലാറം ബാങ്ക് അധികൃതർ ഉടൻ ശരിയാക്കണമെന്നാണ് നാട്ടുകാരുടെ ആവശ്യം.

കായികാധ്യാപകരുടെ നിസഹരണം; സ്കൂൾ കായികമേള പ്രതിസന്ധിയിലാകും

നിശാന്ത് ഘോഷ് കണ്ണൂര്‍: കായികാധ്യാപകരുടെ നിസഹകരണ സമരം ഒത്തു തീർപ്പാക്കിയില്ലെങ്കിൽ സ്കൂൾ കായികമേളകളുടെ നടത്തിപ്പ് പ്രതിസന്ധിയിലാകും. യുപി വിഭാഗത്തില്‍ 500 കുട്ടികള്‍ക്ക് ഒരു കായികാധ്യാപകന്‍ എന്നത് മാറ്റി 300 കുട്ടികള്‍ക്ക് ഒരു അധ്യാപകന്‍ എന്ന മാനദണ്ഡം വേണമെന്നാണ് കായികാധ്യാപകരുടെ പ്രധാന ആവശ്യം. അതേ സമയം 499 കുട്ടികളാണ് സ്‌കൂളിലുള്ളതെങ്കില്‍ കായികാധ്യാപകന്‍റെ ജോലി നഷ്ടപ്പെടുന്ന അവസ്ഥയുമുണ്ട്. ഇതു സംബന്ധിച്ച് സർക്കാരുമായി അധ്യാപക സംഘടനകൾ ഒരു മാസം മുന്പ് ചർച്ച നടത്തിയപ്പോൾ പ്രശ്നം പരിഹിരിക്കുമെന്ന് ഉറപ്പ് നൽകിയിട്ടും നടപടി ഉണ്ടാകാത്ത സാഹചര്യത്തിലാണ് നിസഹകരണ സമരം ശക്തമാക്കാൻ കായികാധ്യാപകരുടെ സംഘടകളുടെ തീരുമാനം. നിസഹകരണത്തെ തുടർന്ന് ദേശീയതലത്തിൽ നടത്തുന്ന സുബ്രതോ കപ്പ് ഫുട്ബോൾ ടൂർണമെന്‍റിന്‍റെ മാറ്റ് കുറഞ്ഞിരുന്നു. ഡിഡിഇമാർ പ്രത്യേക ഉത്തരവിറക്കിയായിരുന്നു ഒടുവിൽ സുബ്രതോ കപ്പ് ടൂർണമെന്‍റ് ഒരു വിധം നടത്തിയത്. നിലവിൽ ജൂണിയർ ബോയ്‌സ് വിഭാഗത്തില്‍ സബ് ജില്ല, ജില്ലാതല മത്സരങ്ങളില്ലാതെയാണ് സംസ്ഥാനതല മത്സരങ്ങള്‍ അടുത്ത മാസം സംഘടിപ്പിക്കുന്നത്. പെൺകുട്ടികളുടെ വിഭാഗത്തില്‍ സബ് ജില്ല തലത്തിൽ നടത്താതെ ജില്ലാതലം മുതലാണ് മത്സരം നടന്നത്. സെപ്റ്റംബർ അവസാനമാണ് സബ് ജില്ലാ കായികമേളകള്‍ ആരംഭിക്കേണ്ടത്. ഒക്‌ടോബറില്‍ ജില്ലയും അവസാനം സംസ്ഥാന മേളയും നടത്തുക എന്നതാണ് പതിവ് രീതി. കായികാധ്യാപകർ ശക്തമായ നിസഹകരണവുമായി രംഗത്തെത്തിയാൽ ഇവയുടെ നടത്തിപ്പ് പ്രതിസന്ധിയിലാകും. സർക്കാർ അനുകൂല നിലപാട് സ്വീകരിച്ചില്ലെങ്കിൽ സമരവുമായി മുന്നോട്ടു പോകുമെന്ന് സംയുക്തകായികാധ്യാപക സംഘടനാ കണ്ണൂർ ജില്ലാ പ്രസിഡന്‍റ് പി.പി. ഉദയകുമാർ പറഞ്ഞു. കായിക മേള നടത്തിപ്പിനോടനുബന്ധിച്ച് കായികാധ്യാപകര്‍ക്ക് ഭീമമായ സാമ്പത്തിക ബാധ്യത വരുന്നതായും ആക്ഷേപമുണ്ട്. കഴിഞ്ഞ വര്‍ഷത്തെ മേള നടത്തിപ്പിന്‍റെ ചെലവ് കിട്ടിയെങ്കിലും അതിന് മുമ്പത്തെ രണ്ട് വര്‍ഷത്തെ തുക കുടിശികയാണ്. തിരുവനന്തപുരത്ത് 20,85,000, കണ്ണൂര്‍ 11,56,000, മലപ്പുറം 10,74,000, കൊല്ലം 1,30,000, പത്തനംതിട്ട 1,25,000, എറണാകുളം 3,00,000, തൃശൂർ 5,15,000, പാലക്കാട് 8,90,000, കാസര്‍ഗോഡ് 3,30,000 എന്നിങ്ങനെയാണ്‌ കുടിശിക തുക. കുട്ടികളുടെ ശാരീരികവും മാനസികവുമായ വളർച്ചയ്ക്ക് കായിക വിദ്യാഭ്യാസത്തിന് ഊന്നൽ നൽകണമെന്ന് സർക്കാർ തന്നെ നിഷ്കർഷിക്കുന്പോഴും കായിക മേഖലയോട് പുറംതിരിഞ്ഞ് നിൽക്കുന്ന സമീപനമാണ് സർക്കാരിന്‍റേതെന്നും കായികാധ്യാപകർ ആരോപിക്കുന്നു.

ആറളത്തെ 2000 കർഷകർ പുറത്താകൽ ഭീഷണിയിൽ

ഇരിട്ടി: കർഷകർക്ക് കേന്ദ്രസർക്കാരിൽ നിന്നുള്ള ആനുകൂല്യങ്ങൾ ലഭിക്കുന്നതിന് നടപ്പാക്കുന്ന അഗ്രി സ്റ്റാക്ക് കർഷക രജിസ്‌ട്രേഷൻ പദ്ധതിയിൽനിന്ന് ആറളം പുരധിവാസ മേഖലയിലെ രണ്ടായിരത്തോളം കർഷകർ പുറത്താകൽ ഭീഷണിയിൽ. പദ്ധതിയിൽ രജിസ്റ്റർ ചെയ്യാൻ ഭൂനികുതി നിർബന്ധമാക്കിക്കൊണ്ടുള്ള രജിസ്‌ട്രേഷൻ നടപടികളാണ് ആദിവാസി കുടുംബങ്ങളെ ആശങ്കയിലാക്കിയിരിക്കുന്നത്. വനാവകാശ നിയമപ്രകാരം ഭൂമി ലഭിച്ച പുനാധിവാസ മേഖലയിലെ താമസക്കാർക്ക് നികുതിചീട്ട് ലഭ്യമല്ല. ആദിവാസി കർഷകരെ പദ്ധതിയിൽ അംഗമാക്കുന്നതിന് നികുതിചീട്ടിന് പകരം പട്ടയമോ മറ്റ് കൈവശാവകാശ രേഖകളോ അപേക്ഷയോടൊപ്പം സമർപ്പിക്കാനുള്ള സംവിധാനം നിലവിലുള്ള രജിസ്ട്രേഷൻ നടപടിയിൽ ഉൾപ്പെടുത്തിയിട്ടുമില്ല. വനാവകാശ നിയമം പ്രകാരം ഭൂമി ലഭിച്ച കർഷകർക്ക് അപേക്ഷിക്കാനുള്ള വ്യവസ്ഥകൾ ഉൾക്കൊള്ളിച്ചുള്ള നടപടിക്രമങ്ങൾ ഉണ്ടാകുമെന്നാണ് കൃഷി വകുപ്പ് അധികൃതർ പറയുന്നതെങ്കിലും കർഷകർ ആശങ്കയിലാണ്. കർഷക രജിസ്‌ട്രേഷൻ നടത്തിയില്ലെങ്കിൽ കർഷകർക്ക് പിഎം കിസാൻ പദ്ധതിയിൽ തുടരാൻ കഴിയില്ല. പുനരധിവാസ മേഖലയിലെ രണ്ടായിരത്തോളം കർഷകർക്ക് നിലവിൽ ലഭിക്കുന്ന കാർഷിക ആനുകൂല്യങ്ങൾ ഇതോടെ നിലച്ചേക്കും. പുനരധിവാസ മേഖലയിൽ 3375 കുടുംബങ്ങൾക്കാണ് ഒരു ഏക്കർ വീതം ഭൂമി സർക്കാർ വിതരണം ചെയ്തത്. ഭൂമിയുടെ പട്ടയം മാത്രമാണ് ഇവർക്ക് നൽകിയിരിക്കുന്നത്. നികുതി ഇല്ലാത്ത ഭൂമിയായതിനാൽ നികുതിചീട്ടുമില്ല. പട്ടയ ഭൂമി കൈമാറ്റം ചെയ്യാനും അവകാശമില്ല. 3375 കുടുംബങ്ങളിൽ ഏറിയ പങ്കും കാർഷികവൃത്തിയിലുള്ളവരാണ്. അഗ്രി സ്റ്റാക്ക് രജിസ്‌ട്രേഷൻ ഫോമിൽ നികുതി ചീട്ടിന് പകരം പട്ടയമോ ആധാരമോ എന്നുകൂടിയുള്ള സംവിധാനം കൂടി ഉണ്ടായാൽ എല്ലാവർക്കും അപേക്ഷിക്കാൻ കഴിയും. പുനരധിവാസ മേഖലയിൽ ഒരു റേഷൻ കാർഡിലെ ഒരംഗത്തിന് പ്രധാനമന്ത്രി കിസാൻ സമ്മാൻ നിധി പദ്ധതി പ്രകാരം പ്രതിമാസം ലഭിക്കുന്ന രണ്ടായിരം രൂപ പുതിയ രജിസ്ട്രേഷൻ പൂർത്തിയാക്കിയില്ലെങ്കിൽ മുടങ്ങിയേക്കും. ഇതു വരെ കിസാൻ സമ്മാൻ നിധിയിൽ നിന്നുള്ള ആനുകൂല്യം മുടങ്ങില്ലെന്നാണ് ബന്ധപ്പെട്ടവർ പറയുന്നത്. രജിസ്‌ട്രേഷൻ സമയപരിധി അവസാനിക്കുന്നതിനു മുമ്പേ ഐടി വിഭാഗം ആപ്ലിക്കേഷൻ തിരുത്തൽ വരുത്തി പരിഹാരം കാണുമെന്ന പ്രതീക്ഷയിലാണ് പുനരധിവാസ മേഖലയിലെ കർഷകരും കൃഷിഭവൻ അധികൃതരും.

വെജ്കോ സംഭരണ-വിതരണ കേന്ദ്രം ഉദ്ഘാടനം ചെയ്തു

മാത്തിൽ: റീജണല്‍ ഫ്രൂട്ട്സ് ആൻഡ് വെജിറ്റബിള്‍ പ്രൊഡ്യൂസേര്‍സ് കോ-ഓപറേറ്റീവ് മാര്‍ക്കറ്റിംഗ് സൊസൈറ്റി (വെജ്കോ) മാത്തിൽ സംഭരണ-വിതരണ കേന്ദ്രം ആരംഭിച്ചു. കാങ്കോല്‍-ആലപ്പടമ്പ് പഞ്ചായത്ത് പ്രസിഡന്‍റ് എം.വി. സുനില്‍കുമാര്‍ ഉദ്ഘാടനം ചെയ്തു. സംഘം പ്രസിഡന്‍റ് എം.കെ. മോഹനന്‍ അധ്യക്ഷത വഹിച്ചു. പഞ്ചായത്തംഗം കെ. പങ്കജാക്ഷന്‍ ആദ്യ വില്പന നിർവഹിച്ചു. സഹകരണ സംഘം അസി. രജിസ്ട്രാര്‍ എ.പി. രജനി കാര്‍ഷികോത്പന്നങ്ങൾ ഏറ്റുവാങ്ങി. പഞ്ചായത്ത് വൈസ് പ്രസിഡന്‍റ് കെ. പദ്മിനി, ബ്ലോക്ക് പഞ്ചായത്തംഗം ലിസി ഏലിയാസ്, സംഘം വൈസ് പ്രസിഡന്‍റ് കെ.സി. സുമിത്രന്‍, എം.പി. ദാമോദരന്‍, എ. അനിൽകുമാർ, വി.വി. ഭാസ്കരന്‍, സി. ബാലകൃഷ്ണന്‍, ടി.കെ. സജേഷ് എന്നിവര്‍ പ്രസംഗിച്ചു.

വ്യാപാരിയെ മർദിച്ച സംഭവം: ചെമ്പേരിയിൽ കെവിവിഇഎസ് ഹർത്താൽ ആചരിച്ചു

ചെമ്പേരി: ചെന്പേരി ടൗണിലെ വ്യാപാരിയെ കടയിൽ കയറി മർദിച്ചതിൽ പ്രതിഷേധിച്ച് കേരള വ്യാപാരി വ്യവസായി ഏകോപന സമിതി ചെന്പേരി യൂണിറ്റിന്‍റെ നേതൃത്വത്തിൽ കടകൾ അടച്ച് ഹർത്താൽ നടത്തി. ഇന്നലെ ഉച്ചകഴിഞ്ഞ് നടത്തിയ ഹർത്താലിനൊപ്പം പ്രകടനവും പ്രതിഷേധ യോഗവും നടത്തി. പ്രതിഷേധ യോഗം കെവിവിഇഎസ് ശ്രീകണ്ഠപുരം മേഖല പ്രസിഡന്‍റ് ജോർജ് തോണിയ്ക്കൽ ഉദ്ഘാടനം ചെയ്തു. മദ്യപാനിയും സാമൂഹ്യവിരുദ്ധനുമായ വ്യക്തി കടയിൽ അതിക്രമിച്ച് കയറി അക്രമം നടത്തിയിട്ടും പോലീസ് ശക്തമായ നടപടികൾ സ്വീകരിക്കുന്നില്ലെന്ന് വ്യാപാരികൾ കുറ്റപ്പെടുത്തി. അക്രമിക്കെതിരെ ശക്തമായ നടപടിയുണ്ടായില്ലെങ്കിൽ പോലീസ് സ്റ്റേഷൻ മാർച്ച് ഉൾപ്പെടെയുള്ള സമര പരിപാടികൾ നടത്തുമെന്ന് ജോർജ് തോണിക്കൽ പറഞ്ഞു. സെക്രട്ടറി റെജി പവൻ, വൈസ് പ്രസിഡന്‍റുമാരായ സാജു മണ്ഡപത്തിൽ, പയസ് മരിയ. ട്രഷർ രാജു ആൽവിൻ, യൂത്ത് വിംഗ് പ്രസിഡന്‍റ് അനീഷ് തോണക്കര എന്നിവർ പ്രസംഗിച്ചു.

വെള്ളാട് വില്ലേജ് ഓഫീസ് കെട്ടിട നിർമാണം ഉടൻ ആരംഭിക്കണം: എൻഎച്ച്ആർഇഎം

കരുവഞ്ചാൽ: അനന്തമായി നീളുന്ന വെള്ളാട് വില്ലേജ് ഓഫീസിന്‍റെ കെട്ടിട നിർമാണ പ്രവർത്തനങ്ങൾ ഉടൻ ആരംഭിക്കണമെന്ന് നാഷണൽ ഹ്യൂമൻ റൈറ്റ്സ് എൻവയോൺമെന്‍റ് മിഷൻ (എൻഎച്ച്ആർഇഎം) തളിപ്പറമ്പ് താലൂക്ക് കമ്മിറ്റി യോഗം ബന്ധപ്പെട്ട അധികാരികളോട് ആവശ്യപ്പെട്ടു. ഒരുവർഷം മുമ്പ് 50 ലക്ഷം രൂപയുടെ എസ്റ്റിമേറ്റ് തയാറാക്കി 48 ലക്ഷം രൂപയ്ക്ക് ടെൻഡർ നടപടികൾ പൂർത്തീകരിച്ച നിർമാണ പ്രവർത്തനങ്ങളാണ് എട്ടുലക്ഷം കൂടി എസ്റ്റിമേറ്റ് വർധിപ്പിച്ച് റീ ടെൻഡർ നടത്തണമെന്ന കരാറുകാരന്‍റെ ആവശ്യത്തിനു മുന്നിൽ മുട്ടിലിഴയുന്നത്. 1989ൽ സ്ഥാപിതമായ കേരള സംസ്ഥാന നിർമിതി കേന്ദ്രയാണ് നിർമാണ പ്രവർത്തനങ്ങളുടെ മേൽനോട്ടം വഹിക്കുന്നത്. ചെലവ് കുറഞ്ഞതും പരിസ്ഥിതി സൗഹൃദപരവുമായ നിർമാണ സാങ്കേതികവിദ്യകൾ പരിശീലിപ്പിക്കാനും നിർമാണ പ്രവർത്തനങ്ങൾക്കു മേൽനോട്ടം വഹിക്കാനും സ്ഥാപിതമായ നിർമിതി കേന്ദ്രം കരാറുകാർക്ക് ലാഭം ഉണ്ടാക്കിക്കൊടുക്കുന്ന ഏജൻസിയായി തരംതാഴുന്ന കാഴ്ചയാണു കാണാൻ സാധിക്കുന്നതെന്ന് യോഗം കുറ്റപ്പെടുത്തി. സമീപപ്രദേശങ്ങളിൽ ഒരു‌വർഷം മുമ്പ് നിർമിതി കേന്ദ്രം പണി പൂർത്തീകരിച്ച വില്ലേജ് ഓഫീസ് കെട്ടിടങ്ങൾ ചോർന്നൊലിക്കുകയാണെന്നും ചെലവുകുറഞ്ഞ നിർമാണ സാമഗ്രികൾ പ്രദേശത്ത് ലഭ്യമായിട്ടും ഇവ ഉപയോഗിക്കുന്നില്ലെന്നും ഇവർ ആരോപിക്കുന്നു. നിർമാണ പ്രവർത്തനങ്ങൾ നീണ്ടുപോകുന്നപക്ഷം പ്രത്യക്ഷ സമരപരിപാടികൾക്കു നേതൃത്വം നൽകാൻ യോഗം തീരുമാനിച്ചു. യോഗത്തിൽ ജെയ്സൻ ഡൊമിനിക്ക് അധ്യക്ഷത വഹിച്ചു. മോഹൻദാസ് കെ. മേനോൻ, ബിജു ആന്‍റണി തുടങ്ങിയവർ പ്രസംഗിച്ചു.

റോഡരികിൽ മാലിന്യം തള്ളിയ ആളെ കണ്ടെത്തി തിരിച്ചെടുപ്പിച്ചു; പിഴയീടാക്കി

ചെറുപുഴ: റോഡരികിൽ മാലിന്യം തള്ളിയ ആളെ കണ്ടെത്തി തിരിച്ചെടുപ്പിച്ച ശേഷം പിഴ ചുമത്തി. ചെറുപുഴ പഞ്ചായത്തിലെ പ്രാപ്പൊയിൽ-രയറോം റോഡരികിൽ ഏയ്യൻകല്ല് ഭാഗത്താണ് കുട്ടികളുടെ ഡയപ്പർ ഉൾപ്പടെയുള്ള മാലിന്യം തള്ളിയത്. നാട്ടുകാർ വിവരമറിയിച്ചതിനെ തുടർന്ന് പഞ്ചായത്ത് എൻഫോഴ്സ്മെന്‍റ് സ്ക്വാഡ് സ്ഥലത്തെത്തി നടത്തിയ പരിശോധനയിൽ മാലിന്യം തള്ളിയ പാപ്പിനിശേരി സ്വദേശിയെ കണ്ടെത്തി ഇയാളെ വിളിച്ചു വരുത്തി മാലിന്യം തിരിച്ചെടുപ്പിക്കുകയും 20000 രൂപ പിഴ ഈടാക്കുകയുമായിരുന്നു. പരിശോധനയ്ക്ക് പഞ്ചായത്ത് അസിസ്റ്റന്‍റ് സെക്രട്ടറി അനിൽ കരിച്ചേരി, പുളിങ്ങോം എഫ്എച്ച്സി ഹെൽത്ത് ഇൻസ്‌പെക്ടർ വി. മുഹമ്മദ്‌ ശരീഫ്, ജെഎച്ച്ഐ ആര്യ രാജപ്പൻ, പഞ്ചായത്ത്‌ ഹെൽത്ത് ഇൻസ്‌പെക്ടർ ജോബിൻ ജോർജ്, വിഇഒ പ്രജീഷ്, പഞ്ചായത്തംഗം വി. ഭാർഗവി എന്നിവർ പങ്കെടുത്തു.

എരുത്ത്കടവിലെ അപകടസ്ഥലം എംഎൽഎ സന്ദശിച്ചു

ചെന്പേരി: ഏരുവേശി പഞ്ചായത്തിലെ മുയിപ്ര എരുത്തുകടവിലെ പുഴയിലുള്ള ചപ്പാത്ത് പാലത്തിൽ തുടർച്ചയായി വാഹനാപകടങ്ങളുണ്ടായ സ്ഥലം സജീവ് ജോസഫ് എംഎൽഎ സന്ദർശിച്ചു. ഇവിടെ സംഭവിച്ച അപകടത്തിൽ മരണപ്പെട്ട മുണ്ടയ്ക്കൽ ആന്‍റണിയുടെ വീട്ടിലെത്തിയ ശേഷമാണ് എംഎൽഎ അപകടസ്ഥലം സന്ദർശിച്ചത്. തുടർന്ന് പരിസരവാസികളുടെ യോഗത്തിലും പങ്കെടുത്തു. പത്തു വർഷങ്ങൾക്ക് മുമ്പ് അന്നത്തെ എംഎൽഎ കെ.സി. ജോസഫിന്‍റെ നേതൃത്വത്തിൽ മൈനർ ഇറിഗഷൻ വകുപ്പ് മുഖേന ഇവിടെ റഗുലേറ്റർ കം ബ്രിഡ്ജ് സ്ഥാപിക്കുന്നതിനായി ആറുലക്ഷം രൂപ ചെലവഴിച്ച് പ്രാഥമിക പഠനം നടത്തിയിരുന്നു. തുടർന്ന് പതിനഞ്ച് കോടി രൂപയുടെ നിർമാണ പ്രവൃത്തിക്ക് വേണ്ടി എസ്റ്റിമേറ്റ് തയാറാക്കാനുള്ള പ്രവർത്തനവും ആരംഭിച്ചിരുന്നു. പാലത്തിലേക്ക് എത്തിച്ചേരാനാവശ്യമായ അപ്രോച്ച് റോഡിനുള്ള സ്ഥലം സൗജന്യമായി വിട്ടുകിട്ടാതിരുന്നതും അക്കാലത്ത് സംസ്ഥാനത്തുണ്ടായ ഭരണമാറ്റവുമാണ് തുടർപ്രവർത്തനങ്ങൾ അനിശ്ചിതമാക്കിയത്. ഇത് സംബന്ധിച്ച് നാട്ടുകാരുടെ അഭിപ്രായങ്ങൾ കേട്ട എംഎൽഎ സ്ഥലം ഉടമകളുമായി നേരിട്ട് സംസാരിക്കാനും മൈനർ ഇറിഗേഷൻ, പൊതുമരാമത്ത് വകുപ്പുകളുമായി ബന്ധപ്പെട്ടു തുടർപ്രവർത്തനങ്ങൾ ഊർജിതപ്പെടുത്താനും ആവശ്യമായ നീക്കം നടത്തുമെന്ന് ഉറപ്പുനൽകി. ഇതിനായി മുഴുവൻ രാഷ്‌ട്രീയ പാർട്ടി പ്രതിനിധികളെയും ഉൾപ്പെടുത്തിയുള്ള പ്രധിനിധി സംഘത്തോടൊപ്പം വകുപ്പ് മന്ത്രിമാരെ നേരിൽ കാണാനും യോഗം തീരുമാനിച്ചു. യോഗത്തിൽ പഞ്ചായത്ത്‌ പ്രസിഡന്‍റ് മിനി ഷൈബി, വൈസ് പ്രസിഡന്‍റ് മധു തൊട്ടിയിൽ, മുൻ പ്രസിഡന്‍റുമാരായ എം. നാരായണൻ, ടെസി ഇമ്മാനുവൽ, വിവിധ രാഷ്‌ട്രീയ പാർട്ടി പ്രതിനിധികളായ ജോസ് പരത്തനാൽ, ജോയ് കുഴിവേലിപ്പുറത്ത്, പി. സദാനന്ദൻ, കെ.വി. കൃഷ്ണൻ, എം.സി. രഞ്ജിത്ത്,എം. സനോജ്, കൃഷ്ണൻ കുമിഴി, കെ. ദിനേശൻ എന്നിവർ പങ്കെടുത്തു.

നിർദിഷ്ട കൂവേരി ഗവ. കോളജ് ചുവപ്പ് നാടയിൽ ഉറങ്ങുന്നു

പെരുമ്പടവ്: മലയോര മേഖലയിലെ ഉന്നത വിദ്യാഭ്യാസ മേഖലയുടെ അപര്യാപ്തത പരിഹരിക്കുക്ക എന്ന ലക്ഷ്യത്തോടെ ആവിഷ്കരിച്ച ഗവ. കോളജ് എങ്ങുമെത്താതെ ഫയലിൽ ഉറങ്ങുന്നു. മലയോരത്ത് ഗവ. കോളജ് വേണമെന്ന് ആവശ്യം മനസിലാക്കി തളിപ്പറന്പ് എംഎൽഎ എം.വി. ഗോവിന്ദന്‍റെ ഇടപെടലിനെ കോളജ് വിദ്യാഭ്യാസ ഡയറക്ടർ ‍ഡോ. എത്സമ്മ ജോസഫിന്‍റെ നേതൃത്വത്തിലുള്ള സംഘം നാടുകാണിക്കു സമീപമുള്ള എറങ്കപൊയിൽ സന്ദർശിച്ചിരുന്നു. ഇതിന്‍റെ ഭാഗമായി കൂവേരി വില്ലേജിൽ പെടുന്ന 12 ഏക്കർ സ്ഥലം കോളജിനായി നിർദേശിക്കുകയും ഭൗതിക സൗകര്യങ്ങൾ ഇവിടെ ഒരുക്കാമെന്ന് വിലയിരുത്തുകയും ചെയ്തിരുന്നു. താത്കാലിക കെട്ടിടങ്ങൾ വരെ ഇവിടെ ലഭ്യവുമായിരുന്നു. ഇതിന് ഒരു തുടർച്ചയുണ്ടാകാത്തതാണ് പദ്ധതി സ്തംഭിക്കാൻ കാരണം. പിന്നീട് നാടുകാണിയിൽ ലോകോളജ് ആരംഭിക്കുന്നതിനെ കുറിച്ചും ആലോചിച്ചു. സാങ്കേതിക അനുമതികളൊക്കെ ലഭ്യമായെങ്കിലും ഹൈക്കോടതി ബാർ കൗൺസിലിന്‍റെ അംഗീകാരം ലഭിക്കാത്തതിനാൽ ഇതും ഇഴഞ്ഞു നീങ്ങുകയാണ്. ആലക്കോട്, ചെറുപുഴ, കുടിയാന്മല, പെരുമ്പടവ് മേഖലകളിൽ നിന്നുള്ള വിദ്യാർഥികൾക്ക് ഉന്നത വിദ്യാഭ്യാസം സാധ്യമാകണമെങ്കിൽ നിലവിൽ ഏറെ കിലോമീറ്ററുകൾ സഞ്ചരിക്കേണ്ട അവസ്ഥയാണ്.

കരിസ്മാറ്റിക് ജൂബിലി തിരി കനകക്കുന്ന് പള്ളിയിൽ

കനകക്കുന്ന്: കേരള കത്തോലിക്ക കരിസ്മാറ്റിക്ക് നവീകരണ മുന്നേറ്റം സുവർണ ജൂബിലി ആഘോഷങ്ങളുടെ ഭാഗമായി കരിസ്മാറ്റിക് ചെമ്പേരി സബ് സോണിന്‍റെ ആഭിമുഖ്യത്തിൽ നടത്തിവരുന്ന ജൂബിലി തിരി പ്രയാണം കുടിയാന്മല കനകക്കുന്നിലെ കരുണാമയൻ ഈശോയുടെ തീർഥാടന പള്ളിയിലെത്തി. വികാരി ഫാ. ജെറിൻ പന്തല്ലൂപ്പറമ്പിലും പാരിഷ് ട്രസ്റ്റിമാരും ചേർന്ന് ഏറ്റുവാങ്ങി. 30ന് ഉച്ചകഴിഞ്ഞ് ഒന്നു മുതൽ ജപമാല പ്രാർഥന, സ്തുതി ആരാധന, വചന പ്രഘോഷണം, വിശുദ്ധ കുർബാന, ദിവ്യകാരുണ്യ സൗഖ്യാരാധന, ദിവ്യകാരുണ്യ പ്രദക്ഷിണം, പ്രാർഥനാ ഗ്രൂപ്പുകളുടെ രൂപീകരണം എന്നിവ നടക്കും. ഇവിടത്തെ ശുശ്രൂഷകൾക്ക് ശേഷം ജൂബിലി തിരി കുടിയാന്മല ഫാത്തിമ മാതാ പള്ളിയിലേക്ക് എത്തിക്കുമെന്ന് കരിസ്മാറ്റിക് നവീകരണ മുന്നേറ്റം ചെമ്പേരി സബ് സോൺ കോ-ഓർഡിനേറ്റർ വിൻസെന്‍റ് മായയിൽ അറിയിച്ചു.

മിൽമ ക്ഷീരസദനം ഭവന പദ്ധതിക്ക് തറക്കല്ലിട്ടു

പെരിങ്ങോം: മിൽമ ക്ഷീരസദനം ഭവന നിർമാണ പദ്ധതിയുടെ തറക്കല്ലിടൽ മാത്തിൽ വെളിച്ചംതോടിൽ മിൽമ ചെയർമാൻ കെ.എസ്. മണി നിർവഹിച്ചു. കാങ്കോൽ-ആലപ്പടമ്പ് പഞ്ചായത്ത് പ്രസിഡന്‍റ് എം.വി. സുനിൽകുമാർ അധ്യക്ഷത വഹിച്ചു. ജില്ലയിൽ രണ്ടു വീടുകളാണ് പദ്ധതിയിലൂടെ നിർമിക്കുക. ഇതിൽ ഒരു വീടിന്‍റെ തറക്കല്ലിടലാണ് നടന്നത്. മിൽമ മലബാർ മേഖല മാനേജിംഗ് ഡയറക്ടർ കെ.സി. ജയിംസ് പദ്ധതി വിശദീകരിച്ചു. പഞ്ചായത്തംഗം ബാബു കുര്യാക്കോസ്, പയ്യന്നൂർ ബ്ലോക്ക് പഞ്ചായത്ത് അംഗം ലിസി ഏലിയാസ്, മിൽമ കണ്ണൂർ ഡയറി മാനേജർ ആർബിൻ എം. ഭാസ്കർ, വി.ടി. ചാക്കോ, കെ. ചിൽസു, എം.ഇ. ജലജ എന്നിവർ പ്രസംഗിച്ചു.

കെജിഎൻഎ ജില്ലാ സമ്മേളനത്തിന് തുടക്കമായി

കൂത്തുപറമ്പ്: ലോകത്തിന് മാതൃകയായ കേരളത്തിന്‍റെ പൊതുജനാരോഗ്യ മേഖലയെ അപകീർത്തിപെടുത്താനുള്ള സംഘടിത നീക്കത്തെ ചെറുത്ത് തോൽപ്പിക്കണമെന്നും സാധാരണക്കാർ ആശ്രയിക്കുന്ന ആരോഗ്യ മേഖലയെ കൂടുതൽ ശക്തിപ്പെടുത്താനുള്ള നടപടികൾ ഉണ്ടാകണമെന്നും കേരള ഗവ. നഴ്സസ് അസോസിയേഷൻ (കെജിഎൻഎ) ജില്ലാ സമ്മേളനം ആവശ്യപ്പെട്ടു. കൂത്തുപറമ്പ് റൂറൽ ബാങ്ക് ഓഡിറ്റോറിയത്തിൽ നടന്ന കൗൺസിൽ സമ്മേളനം കെജിഎൻഎ സംസ്ഥാന സെക്രട്ടറി ടി.ടി. ഖമറുസമൻ ഉദ്ഘാടനം ചെയ്തു. ജില്ലാ പ്രസിഡന്‍റ് പി.ആർ. സീന അധ്യക്ഷത വഹിച്ചു. സംസ്ഥാന കമ്മിറ്റി അംഗങ്ങളായ ടി.വി. ദീപ, സനീഷ് ടി. തോമസ്, ജില്ലാ ജോയിന്‍റ് സെക്രട്ടറി പി. പ്രീത, കെ.വി. സീന എന്നിവർ പ്രസംഗിച്ചു. ജില്ലാ സെക്രട്ടറി കെ.വി. പുഷ്പജ പ്രവർത്തന റിപ്പോർട്ടും ട്രഷറർ വി.പി. സാജൻ വരവുചെലവ് കണക്കും എൻ. രതീഷ് പൊതുപ്രമേയവും അവതരിപ്പിച്ചു. ഇന്നുരാവിലെ 9.30ന് സിറ്റി ഓഡിറ്റോറിയത്തിൽ ഖാദി ബോർഡ് വൈസ് ചെയർമാൻ പി. ജയരാജൻ സമ്മേളനം ഉദ്ഘാടനം ചെയ്യും. യാത്രയയപ്പ് സമ്മേളനം കെ.കെ. ശൈലജ എംഎൽഎയും പ്രതിനിധി സമ്മേളനം കെജിഎൻഎ സംസ്ഥാന സെക്രട്ടറി എൽ. ദീപയും ഉദ്ഘാടനം ചെയ്യും. വൈകുന്നേരം നഴ്സുമാർ അണിനിരക്കുന്ന പ്രകടനം നടക്കും. തുടർന്ന് മാറോളിഘട്ട് ടൗൺ സ്ക്വയറിൽ നടക്കുന്ന പൊതുസമ്മേളനം മുൻ എംഎൽഎ എം.വി. ജയരാജൻ ഉദ്ഘാടനം ചെയ്യും. ഭാരവാഹികൾ: പി.ആർ. സീന-പ്രസിഡന്‍റ്, എ.എൻ. രതീഷ്, കെ.വി. സീന-വൈസ് പ്രസിഡന്‍റുമാർ, സനീഷ് ടി. തോമസ്-സെക്രട്ടറി, പി. പ്രീത, എസ്. ദീപു-ജോയിന്‍റ് സെക്രട്ടറിമാർ, വി.പി. സാജൻ-ട്രഷറർ.

ഇരിട്ടി എംജി കോളജ് മെറിറ്റ് ഡേ

ഇരിട്ടി: ഇരിട്ടി മഹാത്മാഗാന്ധി കോളജ് മെറിറ്റ് ഡേയോടനുബന്ധിച്ച് ബിരുദദാന ചടങ്ങും കോളജ് സ്ഥാപക മാനേജരായിരുന്ന കെ.പി. നൂറുദ്ദീന്‍റെ അനുസ്മരണവും അദ്ദേഹത്തിന്‍റെ പേരിൽ ഏർപ്പെടുത്തിയ എൻഡോവ്മെന്‍റുകളുടെയും മുരളീധരൻ മെമ്മോറിയൽ, പി.എം. ഭാസ്കരൻ മെമ്മോറിയൽ, വിവിധ ഡിപ്പാർട്ട്മെന്‍റുകൾ എന്നിവയും ഏർപ്പെടുത്തിയ എൻഡോവ്മെന്‍റുകളുടെയും വിതരണവും കോളജ് ഓഡിറ്റോറിയത്തിൽ നടന്നു. മെറിറ്റ് ഡേ ഉദ്‌ഘാടനവും വിദ്യാർഥികൾക്കുള്ള ബിരുദ സർട്ടിഫിക്കറ്റുകളുടെ വിതരണവും കെപിസിസി പ്രസിഡന്‍റ് സണ്ണി ജോസഫ് എംഎൽഎ നിർവഹിച്ചു. കോളജ് മാനേജർ ചന്ദ്രൻ തില്ലങ്കേരി അധ്യക്ഷത വഹിച്ചു. കോളജ് പ്രിൻസിപ്പൽ ഡോ. ആർ. സ്വരൂപ, ഐക്യൂഎസി കോ-ഓർഡിനേറ്റർ ഡോ. അനീഷ് കുമാർ, എഡ്യുക്കേഷണൽ സൊസൈറ്റി ജനറൽ സെക്രട്ടറി വൈ.വൈ. മത്തായി, പിടിഎ വൈസ് പ്രസിഡന്‍റ് പി.കെ. മുരളീധരൻ, സി.വി. സന്ധ്യ, ജയസാഗർ അടിയേരി, കെ. ഹിമ, സി.കെ. മഞ്ജു, എം.കെ. വിനോദ്, എം.ജെ. മിനി ജോൺ, സെബിൻ ജോർജ്, ഡോ. ആർ. ബിജുമോൻ എന്നിവർ പ്രസംഗിച്ചു.

ഇരിട്ടി പുഴയോട് ചേർന്ന ഭാഗത്ത് സംസ്ഥാനപാതയിൽ മണ്ണിടിച്ചിൽ

ഇരിട്ടി: ഇരിട്ടി പുഴയോട് ചേർന്ന് സംസ്ഥാന പാത കടന്നുപോകുന്ന ഭാഗത്തെ മണ്ണിടിച്ചിൽ ഭീതി പരത്തുന്നു. താന്തോട് ഭാഗത്താണ് കരയിടിച്ചിൽ രൂക്ഷമായത്. ഇതോടെ സംസ്ഥാനപാത തകരുന്ന അവസ്ഥയാണ്. റോഡിനോട് ചേർന്നുള്ള ഭാഗമാണ് പുഴയിലേക്ക് ഇടിഞ്ഞത്. ഇരിട്ടി-തളിപ്പറമ്പ് സംസ്ഥാനപാതയുടെയും ഇരിട്ടി-ഉളിക്കൽ പാതയുടെയും ഭാഗമായ പ്രദേശമാണിത്. കഴിഞ്ഞദിവസം റോഡരികിലെ ചെളി മണ്ണുമാന്തി യന്ത്രം ഉപയോഗിച്ച് നീക്കുകയും റോഡരികിലെ കാട് വെട്ടിമാറ്റുകയും ചെയ്തപ്പോഴാണ് അപകടകരമായ രീതിയിലുള്ള മണ്ണിടിച്ചിൽ ശ്രദ്ധയിൽപ്പെട്ടത്. പുഴയോട് ചേർന്ന റോഡിന്‍റെ കുറച്ച് ഭാഗത്ത് സംരക്ഷണ സംവിധാനം ഒരുക്കിയതിനു ചേർന്നാണ് കരയിടിച്ചിൽ ഉണ്ടായിരിക്കുന്നത്. വാഹനങ്ങളും കാൽനടയാത്രക്കാരും അപകടത്തിൽപ്പെടാതിരിക്കാൻ സംരക്ഷണ വേലി സ്ഥാപിച്ചിരിക്കുകയാണ്. ഭാരം കയറ്റിയ വലിയ വാഹനങ്ങൾ ഉൾപ്പെടെ നൂറുകണക്കിന് വാഹനങ്ങൾ കടന്നുപോകുന്ന റോഡുകൂടിയാണിത്. ഓരോ കാലവർഷത്തിലും പുഴയോരം ചെറിയ തോതിൽ ഇടിയാറുണ്ടെങ്കിലും മഴ ശക്തമായതോടെ മണ്ണിടിച്ചിൽ വർധിച്ചിരിക്കുകയാണ്. ബാവലി, ബാരാപോൾ പുഴകൾ ഇരിട്ടി പോലീസ്‌റ്റേഷന് സമീപം പുഴയിൽ വച്ചാണ് സംഗമിക്കുന്നത്. ഇരുപുഴകളിലും കുത്തൊഴുക്ക് ശക്തമാകുമ്പോൾ തന്തോട് ഭാഗത്തും പുഴയിൽ വെള്ളത്തിന്‍റെ ഒഴുക്ക് ശക്തമാകും. ഇതാണ് കരയിടിച്ചലിന് ഇടയാക്കുന്നത്. ഇരിട്ടിയിൽ ഉണ്ടായ പ്രളയത്തിൽ പുഴനിറഞ്ഞ് തന്തോട് ഭാഗങ്ങളിൽ റോഡിലേക്ക് വെള്ളം കയറിയിരുന്നു. ഇവിടെ പുഴയിൽ ജലനിരപ്പ് ഉയരുന്നതും കരയിടിച്ചിലും തടയാൻ സ്ഥിരമായ സംവിധാനം ഒരുക്കാതെ താത്കാലിക നടപടികൾ മാത്രം സ്വീകരിക്കുന്ന പൊതുമരാമത്ത് വകുപ്പിന്‍റെ നടപടിയിൽ പ്രതിഷേധം ശക്തമാണ്. റോഡരികിൽ പുഴയോരം ഇടിഞ്ഞ ഭാഗത്ത് ചുവന്ന തുണികൊണ്ട് മുന്നറിയിപ്പ് സ്ഥാപിക്കുക മാത്രമാണ് ചെയ്തിരിക്കുന്നത്. രാത്രിയിൽ ഇതുവഴി യാത്ര ചെയ്യുന്ന കാൽനടയാത്രക്കാർ ഉൾപ്പെടെ അപകടത്തിൽപ്പെടാനുള്ള സാധ്യത കൂടുതലാണെന്ന് പ്രദേശവാസികൾ പറയുന്നു. ഇരുചക്ര യാത്രക്കാരും കാൽ നടയാത്രക്കാരുമാണ് വലിയ അപകട ഭീഷണി നേരിടുന്നത്.

സംസ്ഥാന ജീവനക്കാർക്കും അധ്യാപകർക്കും ബോണസ് അനുവദിക്കണം: ഫെസ്റ്റൊ

കണ്ണൂർ: സംസ്ഥാന ജീവനക്കാർക്കും അധ്യാപകർക്കും പരിധിയില്ലാതെ ഒരു മാസത്തെ ശമ്പളം ബോണസായി അനുവദിക്കണമെന്നാവശ്യപ്പെട്ട് സർക്കാർ ജീവനക്കാരുടെയും അധ്യാപകരുടെയും സംയുക്ത സംഘടനയായ ഫെസ്റ്റൊ കളക്ടറേറ്റിനു മുന്നിലും താലൂക്ക് കേന്ദ്രങ്ങളിലും പ്രകടനവും പൊതുയോഗങ്ങളും നടത്തി. കളക്ടറേറ്റിനു മുന്നിൽ നടന്ന പ്രതിഷേധ പരിപാടി കേരള എൻജിഒ യൂണിയൻ സംസ്ഥാന സെക്രട്ടേറിയറ്റംഗം എ.എം. സുഷമ ഉദ്ഘാടനം ചെയ്തു. ജില്ലാ പ്രസിഡന്‍റ് കെ.സി. സുനിൽ അധ്യക്ഷത വഹിച്ചു. കെ. ഷാജി, പി.പി. സന്തോഷ്കുമാർ എന്നിവർ പ്രസംഗിച്ചു. പയ്യന്നൂരിൽ വി.പി. രജനീഷ്, പി.വി. മനോജ്കുമാർ എന്നിവർ പ്രസംഗിച്ചു. തളിപ്പറമ്പിൽ ദീപേഷ്, ടി. പ്രകാശൻ എന്നിവരും ഇരിട്ടിയിൽ പി.എ. ലനീഷ്, വി.വി. വിനോദ് കുമാർ, ജി. നന്ദനൻ, കെ.എം. ജയചന്ദ്രൻ എന്നിവരും തലശേരിയിൽ ടി.വി.സഖീഷ്, പി. സന്തോഷ്കുമാർ, ജയരാജൻ കാരായി എന്നിവരും പ്രസംഗിച്ചു.

വനിതാ കമ്മീഷൻ അദാലത്ത്: 19 കേസുകൾ തീർപ്പാക്കി

കണ്ണൂർ: വനിതാകമ്മീഷൻ അംഗം പി. കുഞ്ഞായിഷയുടെ നേതൃത്വത്തിൽ കളക്ടറേറ്റ് ഓഡിറ്റോറിയത്തിൽ നടത്തിയ അദാലത്തിൽ 68 കേസുകൾ പരിഗണിച്ചതിൽ 19 എണ്ണം തീർപ്പാക്കി. ഏഴെണ്ണം പോലീസ് റിപ്പോർട്ടിനായും മൂന്നെണ്ണം ജാഗ്രതാ സമിതിക്കും കൈമാറി. ഒരു പരാതി ജില്ലാ ലീഗൽ സർവീസ് അഥോറിറ്റിക്ക് കൈമാറി. 38 പരാതികൾ അടുത്ത സിറ്റിംഗിലേക്ക് മാറ്റി. പുതുതായി ഒരു പരാതി ലഭിച്ചു. വനിതാ കമ്മീഷൻ കലാലയങ്ങളിലും സ്‌കൂളുകളിലും നടത്തിവരുന്ന പ്രീ ആൻഡ് പോസ്റ്റ് മാരിറ്റൽ കൗൺസലിംഗ്, കലാലയ ജ്യോതി ഉണർവ് എന്നീ പരിപാടികൾ സെപ്റ്റംബറിൽ കണ്ണൂർ ജില്ലയിൽ ആരംഭിക്കുമെന്ന് പി. കുഞ്ഞായിഷ പറഞ്ഞു. കലാലയ ജ്യോതി ഉണർവ് പരിപാടിയിൽ സ്‌കൂൾ വിദ്യാർഥികൾക്കായി സൈബർ, ലഹരി, പോക്സോ, ലിംഗനീതി എന്നീ വിഷയങ്ങളിൽ ക്ലാസുകൾ സംഘടിപ്പിക്കും. കലാലയങ്ങളിൽ വിദ്യാർഥികൾക്ക് പ്രീ ആൻഡ് പോസ്റ്റ് മാരിറ്റൽ കൗൺസലിംഗും നടത്തും. ജില്ലയിലെ തെരഞ്ഞെടുത്ത സ്‌കൂളുകളിലും കോളജുകളിലുമാണ് പരിപാടി സംഘടിപ്പിക്കുക. വിദ്യാർഥികളുമായി മുഖാമുഖം പരിപാടിയും നടത്തുമെന്നും കമ്മീഷൻ അംഗം പറഞ്ഞു. അഭിഭാഷകരായ പദ്മജ പദ്മനാഭൻ, കെ.പി. ഷിമ്മി, കൗൺസിലർ അശ്വതി രമേശൻ എന്നിവരും സിറ്റിംഗിൽ പങ്കെടുത്തു.

മുന്നറിയിപ്പില്ലാതെ വാഹനം വഴി തിരിച്ചുവിട്ടു; കണ്ണൂർ-തോട്ടട-തലശേരി റൂട്ടിൽ സ്വകാര്യ ബസുകളുടെ മിന്നൽ പണിമുടക്ക്

കണ്ണൂർ: കണ്ണൂർ-തോട്ടട-തലശേരി റൂട്ടിൽ സ്വകാര്യ ബസുകളുടെ മിന്നൽ പണിമുടക്ക്. ദേശീയ പാത വികസന പ്രവൃത്തിയുടെ പേരിൽ മുന്നറിയിപ്പില്ലാതെ നടാലിൽ ദേശീയപാത 66 ലേക്കുള്ള പ്രവേശനം തടഞ്ഞതിനെ തുടർന്നാണ് സമരം. ബസുകൾ വഴിതിരിച്ച് വിട്ടതോടെ തൊഴിലാളികളാണ് സമരം തുടങ്ങിയത്. അടിപ്പാത വിഷയത്തിൽ നടപടി ഉണ്ടാകാത്തതിൽ സമരത്തിന് ഉടമകളുടെയും പിന്തുണയുണ്ട്. അപ്രതീക്ഷിത സമരത്തിൽ യാത്രക്കാർ വലഞ്ഞു. ചൊവ്വാഴ്ച്ച രാവിലെ 12 വരെ ബസുകൾ ഓടിയിരുന്നു. കണ്ണൂരിൽ നിന്ന് തോട്ടട വഴി തലശേരിയിലേക്ക് വരുന്ന ബസുകളെ നടാൽ റെയിൽവേ ഗേറ്റ് കടന്ന് ഇടത്തോട്ട് പഴയ ബൈപ്പാസ് റോഡ് വഴി 500 മീറ്റർ കഴിഞ്ഞ് പുതിയ ദേശീയ പാതയിലേക്ക് കടത്തി വിടുകയാണ് ചെയ്തത്. ഇതോടെ ബസുകൾക്ക് അധിക ദൂരം സഞ്ചരിക്കേണ്ട സ്ഥിതിയുണ്ടായി. കൂടാതെ ഒകെ യുപി സ്കൂൾ ബസ് സ്റ്റോപ്പിലെ യാത്രക്കാർ ഒന്നുകിൽ നടാൽ സൂര്യ ബാറിന് മുൻവശമോ എടക്കാടയ്ക്കോ എത്തി ബസ് കയറേണ്ട സ്ഥിതിയായി. ഉച്ചയ്ക് ശേഷം അധിക ദൂരം സഞ്ചരിക്കേണ്ടതിൽ പ്രതിഷേധിച്ച് സ്വകാര്യ ബസ് ജീവനക്കാർ പണിമുടക്കുകയായിരുന്നു. ഇതോടെ വൈകുന്നേരം സ്കൂൾ വിട് വീട്ടിലേക്ക് പോകേണ്ടവരും ജോലി കഴിഞ്ഞ് സ്റ്റോപ്പിലെത്തിയവരും പെരുവഴിയിലായി.

ലോറികൾ കൂട്ടിയിടിച്ച് അപകടം

ചാവശേരി: ചാവശേരി ഗവ. ഹയർ സെക്കൻഡറി സ്കൂളിന് മുന്നിൽ ലോറികൾ കൂട്ടിയിടിച്ച് അപകടം. ഇന്നലെ പുലർച്ചെ അഞ്ചോടെയായിരുന്നു അപകടം. ഇരിട്ടി ഭാഗത്ത് നിന്ന് കോഴി കയറ്റി മട്ടന്നൂർ ഭാഗത്തേക്ക് പോകുകയായിരുന്ന ലോറിയും മട്ടന്നൂർ ഭാഗത്ത് നിന്ന് ഇരിട്ടിയിലേക്ക് പോകുകയായിരുന്ന പാർസൽ ലോറിയുമാണ് കൂട്ടിയിടിച്ചത്. ലോറിയിലെ ഒരാൾക്ക് നിസാര പരിക്കേറ്റു. അപകടത്തെ തുടർന്ന് ഗതാഗതം തടസപ്പെട്ടു. അപകടത്തിൽപ്പെട്ട ലോറിയിൽ നിന്ന് കോഴികൾ മറ്റൊരു ലോറിയിലേക്ക് മാറ്റി. വിവരം അറിഞ്ഞെത്തിയ മട്ടന്നൂർ പോലീസ് അപകടത്തിൽപ്പെട്ട ലോറികൾ റോഡിൽ നിന്ന് നീക്കി.

ഇരിട്ടി താലൂക്ക് ആശുപത്രി : ഇഴഞ്ഞിഴഞ്ഞ് ഒരു നിർമാണം

ഇരിട്ടി: കിഫ്ബി പദ്ധതിയിൽ ഉൾപ്പെടുത്തി 68.72 കോടി രൂപ ചെലവിൽ നിർമിക്കുന്ന ഇരിട്ടി താലൂക്ക് ആശുപത്രിയുടെ പുതിയ ബ്ലോക്കിന്‍റെ നിർമാണം വൈകുന്നു. നിർമാണം ആരംഭിച്ച് 16 മാസം പിന്നിടുമ്പോൾ പൂർത്തിയാക്കാൻ കഴിഞ്ഞത് 17 ശതമാനം പ്രവൃത്തികൾ മാത്രമാണ്. അത്യാധുനിക സൗകര്യങ്ങളോടെ നിർമിക്കുന്ന 9370 സ്‌ക്വയർ മീറ്റർ കെട്ടിടത്തിന്‍റെ നിർമാണ കാലാവധി 28 മാസമാണ്. എന്നാൽ, ഇനി അവശേഷിക്കുന്ന 12 മാസത്തിനുള്ളിൽ ബാക്കി പണികൾ പൂർത്തിയാക്കുക പ്രായോഗികമല്ല. ഇതോടെ പുതിയ ബ്ലോക്കിന്‍റെ നിർമാണം പൂർത്തിയാകാൻ വീണ്ടും വർഷങ്ങൾ പലത് കാത്തിരിക്കേണ്ട സഹചര്യമാണ്. ഏകദേശം 11 കോടി രൂപയുടെ പ്രവൃത്തികൾ ഇവിടെ പൂർത്തിയായി കഴിഞ്ഞു. നിർമാണ കാലാവധിക്കുള്ളിൽ പൂർത്തിയാക്കാൻ ലക്ഷ്യമിട്ട് പ്രവർത്തനം ആരംഭിച്ചെങ്കിലും പദ്ധതിയുടെ പ്രാരംഭം മുതൽ നിരവധി തടസങ്ങൾ നേരിടുകയായിരുന്നു. പഴയ ബ്ലോക്കിനും പുതിയ ഒപി ബ്ലോക്കിനും നടുവിലായുള്ള ചെരിവിലാണ് പുതിയ ബ്ലോക്ക് നിർമിക്കുന്നത്. പൈലിംഗ് പ്രവൃത്തികൾ ആരംഭിച്ചതിന് ശേഷമാണ് എസ്റ്റിമേറ്റിൽ ഇല്ലാതിരുന്ന സംരക്ഷണ ഭിത്തി നിർമിക്കുന്നതിനുള്ള നിർദേശം അധികൃതരുടെ ഭാഗത്തുനിന്നും വരുന്നത്. 130 മീറ്റർ നീളത്തിൽ സംരക്ഷണ ഭിത്തി സ്ഥലത്തെ മരം മുറിച്ചുമാറ്റാൻ വന്ന കാലതാമസം നിർമാണത്തിന് തടസമായി. കരാറുകാരൻ തന്നെ മരം ടെൻഡർ എടുത്തതോടെ മരത്തിന്‍റെ പ്രശ്നം പരിഹരിച്ചെങ്കിലും നിർമാണം നടക്കുന്ന സ്ഥലത്തെ ഭൂമിശാസ്ത്രപരമായ പ്രശ്നങ്ങളാണ് വീണ്ടും നിർമാണത്തിന് തടസമാകുന്നത്. പ്രോജക്‌ടിൽ ഇല്ലാതിരുന്ന കൂറ്റൻ സംരക്ഷണ ഭിത്തിയുടെ നിർമാണം പൂർത്തിയാക്കേണ്ടതായി വന്നു. 130 മീറ്റർ നീളവും എട്ടുമുതൽ മൂന്നുമീറ്റർവരെ ഉയരമുള്ള കൂറ്റൻ കോൺക്രീറ്റ് ഭിത്തിയാണ് ഏകദേശം നിർമാണം പൂർത്തിയായിരിക്കുന്നത്. ഭിത്തിയുടെ നിർമാണം പൈലിംഗ് ഉൾപ്പെടെയുള്ള മറ്റു പ്രവൃത്തികൾ മുടങ്ങാൻ കാരണമായി. പൂർത്തിയാക്കേണ്ട 225 പൈലിംഗിൽ 172 എണ്ണം മാത്രമാണ് പൂർത്തിയാക്കിയിരിക്കുന്നത്. ഇതോടെ നിശ്ചയിച്ച സമയത്ത് കെട്ടിട നിർമാണം പൂർത്തിയാക്കാൻ കഴിയില്ലെന്നാണ് അധികൃതർ പറയുന്നത്. ‌ നിർമാണ കാലാവധി കൂട്ടിനൽകേണ്ടി വരും നിലവിലെ സാഹചര്യത്തിൽ നിർമാണ കാലാവധിക്കുള്ളിൽ കെട്ടിടത്തിന്‍റെ 50 ശതമാനത്തിനുള്ളിൽ പ്രവൃത്തികൾ മാത്രമാണ് പൂർത്തിയാക്കാൻ കഴിയുക എന്നതാണ് യാഥാർഥ്യം. പ്രത്യേക സഹചര്യത്തിൽ കരാർ കമ്പനിക്ക് സമയം കൂട്ടിയനുവദിക്കുക മാത്രമാണ് സർക്കാരിന് മുന്നിലുള്ള ഏക പോംവഴി. കെഎസ്ഇബിക്കാണ് പദ്ധതിയുടെ മേൽനോട്ടം. ഊരാളുങ്കൽ സൊസൈറ്റിക്കാണ് നിർമാണ കരാർ. പലകാരണങ്ങൾ കൊണ്ട് നിർമാണം ഇഴഞ്ഞുനീങ്ങുന്ന പദ്ധതി ആശുപത്രിയിൽ ചികിത്സ തേടിയെത്തുന്നവരെ ദുരിതത്തിലാക്കിയിരിക്കുകയാണ്. നിർമാണ പ്രവൃത്തികൾ നടക്കുന്നതുകൊണ്ട് വാഹനങ്ങൾ കടന്നുപോകാനും നിർത്തിയിടാനും സ്ഥലം ഇല്ലാതെ ബുദ്ധിമുട്ട് നേരിടുകയാണ്. എത്ര നാളുകൾ ഈ ദുരിതം താണ്ടണമെന്നാണ് താലൂക്ക് ആശുപത്രിയെ ആശ്രയിക്കുന്ന സാധാരണക്കാരായ ജനങ്ങൾ ചോദിക്കുന്നത്.

സ്റ്റീമർ പൊട്ടിത്തെറിച്ച് ആസാം സ്വദേശി മരിച്ചു

തളിപ്പറമ്പ്: നാടുകാണി കിൻഫ്ര വ്യവസായ പാർക്കിലെ ഫാക്ടറിയിൽ സ്റ്റീമർ പൊട്ടിത്തെറിച്ച് പരിക്കേറ്റ ആസാം സ്വദേശിയായ യുവാവ് മരിച്ചു. നാഗോൺ ജില്ലയിലെ അമ്പഗൻ ബുർബന്ധയിലെ ആമിർ ഹുസൈൻ (29) ആണ് മരിച്ചത്. കിൻഫ്ര പാർക്കിലെ നാറ്റ ന്യൂട്രികോ ഫാക്ടറിയിലെ ജീവനക്കാരനായിരുന്നു. കുപ്പിയിൽ ശീതള പാനീയങ്ങൾ നിർമിക്കുന്ന കമ്പനിയാണിത്. തിങ്കളാഴ്ച വൈകുന്നേരം 4.30 ഓടെയായിരുന്നു അപകടം. ജോലിക്കിടെ പാനീയങ്ങൾ നിർമിക്കാൻ ഉപയോഗിക്കുന്ന സ്റ്റീമർ പൊട്ടിത്തെറിക്കുകയായിരുന്നു. സ്റ്റീമർ പൊട്ടിയതോടെ ആമിർ ഹുസൈൻ തെറിച്ച് മതിലിലിടിക്കുകയും വീഴ്‌ച‌യുടെ ആഘാതത്തിൽ മതിലിലുണ്ടായിരുന്ന ഇരുമ്പ് കമ്പി തലയിൽ തുളച്ചുകയറുകയുമായിരുന്നു. ഉടൻ പരിയാരത്തെ കണ്ണൂർ ഗവ. മെഡിക്കൽ കോളജിലും തുടർന്ന് കണ്ണൂർ എകെജി ആശുപത്രിയിലുമെത്തിച്ചെങ്കിലും മരിച്ച. മാസങ്ങൾക്ക് മുമ്പാണ് ആമിർ ഹുസൈൻ സ്ഥാപനത്തിൽ ജോലിക്കെത്തിയത്. നാറാത്ത് സ്വദേശി അബ്ദുള്ളയുടെ ഉടമസ്ഥതയിലുള്ളതാണ് ഫാക്ടറി.

കെഎസ്ആർടിസി ബസിടിച്ച് പരിക്കേറ്റ വീട്ടമ്മ മരിച്ചു

ഇരിട്ടി: റോഡ് മുറിച്ചു കടക്കുന്നതിനിടയിൽ കെഎസ്ആർടിസി ബസിടിച്ച് പരിക്കേറ്റ് ചികിത്സയിലായിരുന്ന വീട്ടമ്മ മരിച്ചു. വാണിയപ്പാറയിലെ പരേതനായ കുഞ്ഞപ്പന്‍റെ ഭാര്യ ഒറ്റേടത്ത് സരസുവാണ് (75) മരിച്ചത്. കഴിഞ്ഞ തിങ്കളാഴ്ച കാഞ്ഞങ്ങാട് ചാലക്കുന്നിൽ വച്ചായിരുന്നു അപകടം. സംസ്കാരം ഇന്ന് രാവിലെ പത്തിന് ആനപ്പന്തി അസംബ്ലീസ് ഓഫ് ഗോഡ് പള്ളിയിൽ. മക്കൾ: സുരേഷ്, രാജേഷ് , സ്വപ്ന. .മരുമക്കൾ: അജിത, രമ്യ, ആന്‍റോ.

ഗോവിന്ദച്ചാമിയുടെ ജയിൽച്ചാട്ടം; പ്രത്യേകസംഘം കണ്ണൂരിൽ

കണ്ണൂർ: ഗോവിന്ദച്ചാമിയുടെ ജയില്‍ചാട്ടത്തെക്കുറിച്ച് അന്വേഷിക്കാൻ നിയോഗിച്ച പ്രത്യേക സംഘം ഇന്ന് കണ്ണൂർ സെൻട്രൽ ജയിലിൽ എത്തി തെളിവെടുപ്പ് നടത്തും. ഇന്നും നാളെയുമാണ് തെളിവെടുപ്പ്. ജയിലിലെ മുഴുവൻ ജീവനക്കാരോടും തെളിവെടുപ്പിന് ഹാജരാകാൻ പ്രത്യേകസംഘം നിർദേശിച്ചിട്ടുണ്ട്. ജസ്റ്റീസ് സി. എന്‍. രാമചന്ദനും റിട്ട. ഡിജിപി ജേക്കബ് പുന്നൂസും അടങ്ങുന്നതാണ് കമ്മിറ്റി. മുഖ്യമന്ത്രി വിളിച്ച ഉന്നതതലയോഗത്തിലാണ് ജയിൽ ചാട്ടം അന്വേഷിക്കാൻ പ്രത്യേകം കമ്മിറ്റിയെ നിയോഗിച്ചത്. കണ്ണൂരിലെ അതിസുരക്ഷാ ജയിലില്‍നിന്ന് ഗോവിന്ദച്ചാമി രക്ഷപ്പെട്ടത് വൻ വിവാദമായിരുന്നു. സുരക്ഷാ വീഴ്ചകള്‍ കണ്ടെത്തുന്നതിനും ജയില്‍ ജീവനക്കാരുടെ ഉത്തരവാദിത്തം നിര്‍ണയിക്കുന്നതിനുമാണ് പ്രത്യേക സംഘത്തെ നിശ്ചയിച്ചത്. കണ്ണൂര്‍ സെന്‍ട്രല്‍ ജയിലിലെ പത്താം ബി ബ്ലോക്കില്‍ നിന്നാണ് ഗോവിന്ദച്ചാമി രക്ഷപ്പെട്ടത്. അര്‍ധരാത്രി ജയില്‍ കമ്പികള്‍ മുറിച്ച് മതില്‍ ചാടിയായിരുന്നു രക്ഷപ്പെടല്‍. അഞ്ചുമണിക്കൂര്‍ വൈകിയാണ് ജയില്‍ അധികൃതര്‍ വിവരമറിഞ്ഞത്. ഇലക്ട്രിക് ഫെന്‍സിംഗ് പ്രവര്‍ത്തിച്ചില്ല, നിരീക്ഷണ സംവിധാനങ്ങളില്‍ പാളിച്ചകള്‍ തുടങ്ങിയ ഗുരുതരമായ വീഴ്ചകള്‍ വകുപ്പ്തല അന്വേഷണത്തില്‍ കണ്ടെത്തിയിരുന്നു. ജയില്‍ചാട്ടത്തില്‍ ജയില്‍ ജീവനക്കാരോ തടവുകാരോ കൃത്യത്തില്‍ സഹായിച്ചിട്ടില്ല. ഗോവിന്ദച്ചാമിക്ക് സഹതടവുകാരുമായി കാര്യമായ ബന്ധം ഉണ്ടായിരുന്നില്ല എന്നും വകുപ്പ് തല അന്വേഷണത്തില്‍ കണ്ടെത്തിയിരുന്നു. ജയില്‍ ഡിഐജി വി. ജയകുമാര്‍ സമര്‍പ്പിച്ച പ്രാഥമിക റിപ്പോര്‍ട്ടിനു ശേഷമാണ് പ്രത്യേക അന്വേഷണ സംഘം രൂപീകരിച്ചത്.

ഭക്ഷണം തൊണ്ടയിൽ കുടുങ്ങിയ സഹപാഠിയെ രക്ഷിച്ച് എസ്പിസി കേഡറ്റ്

കാഞ്ഞങ്ങാട്: ദുർഗ ഹയർ സെക്കൻഡറി സ്കൂളിലെ എസ്പിസി കേഡറ്റ് മുഹമ്മദ് സഹൽ ഷഹസാദിന് ദുരന്തനിവാരണസേനയുടെ പരിശീലനം കിട്ടിയത് വെറുതെയായില്ല. തൊട്ടടുത്തിരുന്ന് ഭക്ഷണം കഴിക്കുകയായിരുന്ന സഹപാഠി ഭക്ഷണം തൊണ്ടയിൽ കുടുങ്ങി വീർപ്പുമുട്ടിയപ്പോൾ നിമിഷാർധനേരം കൊണ്ട് നെഞ്ചിലും പൊക്കിളിലും അമർത്തി ഭക്ഷണാവശിഷ്ടങ്ങളെ പുറത്തെത്തിച്ച് ശ്വാസഗതി നേരെയാക്കാനും ജീവൻ രക്ഷിക്കാനും സഹലിന് കഴിഞ്ഞു. സഹപാഠിയായ മുഹമ്മദ് അജാസ് ഫാദിയാണ് സഹലിന്‍റെ കൃത്യസമയത്തെ ഇടപെടൽ കൊണ്ട് അപകടത്തിൽനിന്നും രക്ഷപ്പെട്ടത്. കഴിഞ്ഞ ദിവസം ഉച്ചയ്ക്ക് ഇരുവരും ഒരുമിച്ച് കടയിൽനിന്ന് ഭക്ഷണം വാങ്ങി കഴിക്കുമ്പോഴായിരുന്നു സംഭവം. ബല്ല കടപ്പുറത്തെ ആർ.സി. ബഷീറിന്‍റെയും ആരിഫയുടെയും മകനാണ് സഹൽ. സ്കൂൾ എസ്പിസി യൂണിറ്റിന്‍റെ നേതൃത്വത്തിൽ സഹലിനെ അനുമോദിച്ചു. ഹൊസ്ദുർഗ് പോലീസ് സ്റ്റേഷൻ എസ്എച്ച്ഒ പി. അജിത് കുമാർ സഹലിന് ഉപഹാരം നൽകി. പിടിഎ എക്സിക്യൂട്ടീവ് കമ്മിറ്റി അംഗം പി. പ്രഭാകരൻ അധ്യക്ഷത വഹിച്ചു. എൻഡിആർഎഫ് ഇൻസ്പക്ടർ അർജ്ജുൻപാൽ രജപഥ്, സബ് ഇൻസ്പെക്ടർ പ്രദീപ് ഭട്ട്, എസ്പിസി ജില്ല എഡിഎൻഒ ടി. തമ്പാൻ, പരിശീലകൻ കെ. രവീന്ദ്രൻ, മുഖ്യാധ്യാപിക പി. സുമ, സ്റ്റാഫ് സെക്രട്ടറി കെ.വി. രാജേഷ്, എം. തുഷാര, പി.വി. ശ്രീജിത്ത് എന്നിവർ പ്രസംഗിച്ചു.

‌ഗോത്രശ്രീ കർഷക കമ്പനി

ഇരിട്ടി: ആദിവാസി ഉത്പന്നങ്ങൾ വിപണിയിലെത്തിക്കാൻ ആറളം ഫാമിൽ ഗോത്രശ്രീ കർഷക കമ്പനി തുടങ്ങി. നബാർഡിന്‍റെ ആദിവാസി വികസന ഫണ്ടിൽപ്പെടുത്തി നടപ്പാക്കിയ പദ്ധതി പ്രവർത്തനങ്ങളുടെ തുടർച്ചയായി സെന്‍റർ ഫോർ റിസർച്ച് ആൻഡ് ഡവലപ്‌മെന്‍റ് രൂപീകരിച്ച ഗോത്രശ്രീ ആദിവാസി കർഷക ഉത്പാദക കമ്പനി ആദിവാസി ഉത്പന്നങ്ങൾ വിപണിയിലെത്തിക്കും. ആറളം ആദിവാസി പുനരധിവാസ മേഖലയിൽ 2017 മുതൽ നടപ്പിലാക്കിയ പദ്ധതി പ്രവർത്തനത്തിന്‍റെ തുടർച്ചയായാണ് കമ്പനി രൂപീകരിച്ചത്. 10 ആദിവാസി കർഷകർ ഡയറക്ടർ ബോർഡ് അംഗങ്ങളായുള്ള കമ്പനിയിൽ ആയിരം രൂപയുടെ മൂല്യമുള്ള ഓഹരിയെടുത്ത് 410 പേരാണ് അംഗത്വമെടുത്തത്. പദ്ധതി പ്രദേശത്ത് പ്രവർത്തിച്ചുവരുന്ന ഫ്ലോർമിൽ, കശുവണ്ടി സംസ്‌കരണ യൂണിറ്റ്, തയ്യൽ യൂണിറ്റുകൾ കമ്പനിയുടെ ആസ്തിയായി നിലവിലുണ്ട്. ഇറച്ചിക്കോഴി ഫാം, മഞ്ഞൾ, എള്ള്, കുറുന്തോട്ടി എന്നിവ വ്യാവസായികാടിസ്ഥാനത്തിൽ കൃഷിചെയ്യാനുള്ള പദ്ധതികൾ എന്നിവയ്ക്കും രൂപം നൽകും. കർഷകരുടെ ഉത്പന്നങ്ങൾ ശേഖരിക്കുന്നതിനും വിപണനം നടത്തുന്നതിനുമായി പുനരധിവാസ മേഖല ബ്ലോക്ക് പത്തിലെ കോട്ടപ്പാറയിലും ബ്ലോക്ക് 11 ലെ കക്കുവയിലും രണ്ട് കേന്ദ്രങ്ങൾ ആരംഭിച്ചു. കക്കുവയിലെ വിപണന കേന്ദ്രം ആറളം ഫാം മാനേജിംഗ് ഡയറക്ടർ എസ്. സുജീഷ് ഉദ്ഘാടനം ചെയ്തു. ഉന്നതി മൂപ്പൻ മോഹനൻ അധ്യക്ഷത വഹിച്ചു. ഫാം അഡ്മിനിസ്‌ട്രേറ്റീവ് ഓഫീസർ ഡോ. കെ.പി. നിതീഷ് കുമാർ മുഖ്യാതിഥിയായി. ഡയറക്ടർമാരായ കുമാരൻ കോട്ടി, കെ.കെ. മിനി, ഷൈല ഭരതൻ, വത്സല മോഹൻ എന്നിവർ പ്രസംഗിച്ചു. സിആർഡി പ്രോഗ്രാം ഓഫീസർ ഇ.സി. ഷാജി പദ്ധതി വിശദീകരിച്ചു.

ഉപേക്ഷിക്കപ്പെട്ട നിലയിൽ മാഹിമദ്യം പിടികൂടി

തളിപ്പറമ്പ്: വെള്ളാരംപാറയിൽ ഉപേക്ഷിക്കപ്പെട്ട നിലയിൽ മാഹിമദ്യം പിടികൂടി. 27 കുപ്പി മദ്യമാണ് പിടികൂടിയത്. ഓണം സ്‌പെഷൽ ഡ്രൈവിന്‍റെ ഭാഗമായി തളിപ്പറമ്പ് എക്സൈസ് റേഞ്ച് അസി.എക്സൈസ് ഇൻസ്പെക്ടർ അഷ്‌റഫ്‌ മലപ്പട്ടവും പാർട്ടിയും തളിപ്പറമ്പ റേഞ്ച് പരിധിയിലെ വിവിധ ഭാഗങ്ങളിൽ നടത്തിയ പരിശോധനയിലാണ് മദ്യം പിടികൂടിയത്. ഓണം വിപണി ലക്ഷ്യമാക്കി സൂക്ഷിച്ചു വയ്ക്കാൻകൊണ്ടുവരുമ്പോൾ എക്സൈസ്കാരെ കണ്ട് ഉപേക്ഷിച്ചതാണെന്നാണ് നാഗമനം. പ്രിവന്‍റീവ് ഓഫീസർമാരായ നികേഷ്, ഫെമിൻ, വനിത സിവിൽ എക്സൈസ് ഓഫീസർ എൻ. സുജിത എന്നിവരും മദ്യം പിടികൂടിയ സംഘത്തിൽ ഉണ്ടായിരുന്നു.

രത്നക്കല്ല് തട്ടിയെടുത്ത രണ്ടു യുവാക്കൾ പിടിയിൽ

തളിപ്പറമ്പ്: രണ്ടര വർഷം മുന്പ് കോടികൾ വിലവരുന്ന രണ്ടു കിലോ തൂക്കമുള്ള രത്നക്കല്ല് പട്ടാപ്പകൽ ബൈക്കിലെത്തി തട്ടിയെടുത്ത രണ്ടുപേരെ തളിപ്പറമ്പ് പോലീസ് അറസ്റ്റ് ചെയ്തു. ഒരാൾ പിടിയിലാകാനുണ്ട്. ചെറുകുന്ന് തെക്കുമ്പാടിലെ കലേഷ് (36), ചെറുകുന്ന് ആയിരംതെങ്ങിലെ പി.പി. രാഹുൽ (30) എന്നിവരാണ് ഇന്നലെ പിടിയിലായത്. 2023 ജനുവരി ഏഴിന് രാവിലെ 11 നാണ് സംഭവം. തളിപ്പറമ്പ് ലൂർദ് ആശുപത്രിക്ക് പിന്നിലെ ആളൊഴിഞ്ഞ സ്ഥലത്ത് പാലകുളങ്ങരയിലെ തുമ്പിയോടന്‍ വീട്ടില്‍ കൃഷ്ണന്‍റെ (70) പക്കൽനിന്ന് അക്വമറൈൻ എന്ന രത്നക്കല്ലും ജിയോളജിക്കൽ വകുപ്പിന്‍റെ സർട്ടിഫിക്കറ്റും തട്ടിയെടുത്ത് രണ്ടംഗ സംഘം ബൈക്കിൽ രക്ഷപ്പെടുകയായിരുന്നു. കോടികൾ വിലവരുന്ന രത്നക്കല്ല് 45 വർഷമായി ഇയാളുടെ കൈവശമുണ്ടായിരുന്നതായി പറയുന്നു. കലേഷിനൊപ്പം ചില പ്രമുഖ ജ്വല്ലറിക്കാർ കല്ല് വാങ്ങാൻ എത്തിയിരുന്നു. പിന്നീട് കലേഷിനെ കൃഷ്ണൻ ഒഴിവാക്കിയതിനെ തുടർന്ന് കലേഷാണ് കല്ല് തട്ടിയെടുക്കാൻ പദ്ധതി തയാറാക്കിയത്. മയ്യിലിലെ ബിജു എന്ന് കലേഷ് പരിചയപ്പെടുത്തിയത് പ്രകാരം രത്നക്കല്ല് അടങ്ങിയ ബാഗുമായി കൃഷ്ണൻ ചിറവക്ക് ലൂർദ് ആശുപത്രിയ്ക്ക് പിറകിലെ പാർക്കിംഗ് സ്ഥലത്ത് എത്തുകയായിരുന്നു. ഈ സമയം ബൈക്കിലെത്തിയ രണ്ടംഗ സംഘം ബാഗ് തട്ടിപ്പറിച്ച് രക്ഷപ്പെട്ടു. ബൈക്ക് ഓടിച്ചിരുന്നയാളെയാണ് പിടികൂടാനുള്ളത്. കൃഷ്‌ണന്‍റെ പരാതിയിൽ കേസെടുത്തെങ്കിലും അന്വേഷണം എങ്ങും എത്തിയിരുന്നില്ല. തളിപ്പറമ്പ് ഡിവൈഎസ് പി കെ.ഇ. പ്രേമചന്ദ്രൻ, സി.ഐ ബാബുമോൻ, എസ്ഐ ദിനേശൻ കൊതേരി എന്നിവരാണ് പ്രതിയെ പിടികൂടിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

കാരുണ്യയുടെ ഒരുകോടി പാചകത്തൊഴിലാളിക്ക്

കാസര്‍ഗോഡ്: കേരള സര്‍ക്കാരിന്‍റെ കാരുണ്യലോട്ടറിയുടെ ഒന്നാംസമ്മാനമായ ഒരു കോടി രൂപ കര്‍ണാടക സ്വദേശിയായ പാചകത്തൊഴിലാളിക്ക്. സുള്ള്യ ഉബ്രടുക്കയിലെ വിനയ് യവതയാണ് (40) സമ്മാനാര്‍ഹനായത്. ശനിയാഴ്ച രാവിലെ ദേലംപാടി പഞ്ചിക്കലില്‍നിന്നാണ് കെസെഡ് 445643 എന്ന ടിക്കറ്റ് വിനയ് വാങ്ങിയത്. കാസര്‍ഗോഡ് കെഎസ്ആര്‍ടിസി പരിസരത്തെ മധു ലോട്ടറീസ് ഏജന്‍സി വഴി വില്പന നടത്തിയ ടിക്കറ്റിനാണ് സമ്മാനം ലഭിച്ചത്. കാറ്ററിംഗ് സര്‍വീസ് സ്ഥാപന ഉടമയാണ് വിനയ്. പാചകത്തിനായി പഞ്ചിക്കലിലേക്ക് വന്നപ്പോഴാണ് ടിക്കറ്റെടുത്തത്. സ്ഥിരമായി ടിക്കറ്റെടുക്കുന്ന ശീലമില്ലെന്നും ക്ഷേത്രസന്ദര്‍ശന വേളയിലും പാചകത്തിനായും കേരളത്തിലെത്തുമ്പോഴാണ് ടിക്കറ്റെടുക്കാറുള്ളതെന്നും വിനയ് പറഞ്ഞു. ഭാര്യ ആഷികയും മൂന്നാംക്ലാസുകാരി നിഹാരികയും അങ്കണവാടി വിദ്യാർഥിനി നിഷ്‌കയും അടങ്ങുന്നതാണ് വിനയുടെ കുടുംബം.

പ്ലസ് ടു വിദ്യാർഥികൾ വാടകയ്ക്കെടുത്ത് ഓട‌ിച്ച കാർ തലകീഴായി മറിഞ്ഞു

ഇരിട്ടി: 17 വയസുള്ള പ്ലസ് ടു വിദ്യാർഥികൾ വാടകയ്ക്കെടുത്ത് ഓട‌ിച്ച കാർ അപകടത്തിൽപ്പെട്ടു. തലകീഴായി മറിഞ്ഞ കാറിലെ പെൺകുട്ടികളടക്കമുള്ള യാത്രക്കാർ രക്ഷപ്പെട്ടു. ശബ്ദം കേട്ട് ഓടിക്കൂടിയ പ്രദേശവാസികൾ യാത്രക്കാരായ നാലു വിദ്യാർഥികളെയും ഇരിട്ടിയിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇരിട്ടി-കൂട്ടുപുഴ റോഡിൽ ബെൻഹിൽ സ്കൂളിനും കേളൻപീടികയ്ക്കും ഇടയിൽ ഇന്നലെ രാവിലെ 11 ഓടെ ആയിരുന്നു അപകടം. വാഹനത്തിൽ സ്‌കൂളിലെ നാല് വിദ്യാർഥികളാണുണ്ടാ‍യിരുന്നത്. പെൺകുട്ടികൾ രണ്ടുപേരും സ്കൂൾ യൂണിഫോമിൽ ആയിരുന്നു. അമിതവേഗതയിൽ എത്തിയ വാഹനം നിയന്ത്രണം നഷ്ടപ്പെട്ട് സുരക്ഷാ തൂണുകളിൽ ഇടിച്ചുമറിയുകയായിരുന്നു. ഇടിയുടെ ആഘാതത്തിൽ ആറിലധികം തൂണുകൾ തകർത്ത ശേഷമാണ് വാഹനം മറിഞ്ഞത്. വാഹനം ഭാഗികമായി തകർന്നു. വാഹനം ഓടിച്ച വിദ്യാർഥിക്ക് ലൈസൻസ് ഇല്ലെന്ന് പോലീസ് പറഞ്ഞു. വാഹനം ഓടിച്ച പാലോട്ടുപള്ളി സ്വദേശി മുഹമ്മദ് ആസാദിനെതിരേ (18) ഇരിട്ടി പോലീസ് കേസെടുത്തു. അശ്രദ്ധമായി വാഹനം ഓടിച്ച് അപകടം ഉണ്ടാക്കിയതിനാണ് കേസ്.

വിദ്യാര്‍ഥിയുടെ കര്‍ണപുടം തകര്‍ത്ത സംഭവം: അന്വേഷണത്തിന് ഉത്തരവിട്ടു

കാസര്‍ഗോഡ്: കുണ്ടംകുഴി ജിഎച്ച്എസ്എസിലെ പത്താംക്ലാസ് വിദ്യാര്‍ഥിയുടെ കര്‍ണപുടം അടിച്ചുതകര്‍ത്ത സംഭവത്തില്‍ വിദ്യാഭ്യാസമന്ത്രി വി.ശിവന്‍കുട്ടി അന്വേഷണത്തിന് ഉത്തരവിട്ടു. കാസര്‍ഗോഡ് വിദ്യാഭ്യാസ ഡെപ്യൂട്ടി ഡയറക്ടര്‍ക്കാണ് അന്വേഷണച്ചുമതല. വിദ്യാര്‍ഥികള്‍ തെറ്റുചെയ്താല്‍ നിയമം നോക്കി മാത്രമേ ശിക്ഷാനടപടികള്‍ സ്വീകരിക്കാവൂയെന്നും ഒരു കാരണവശാലും കുട്ടികളെ ഉപദ്രവിക്കാന്‍ പാടില്ലെന്നും മന്ത്രി പറഞ്ഞു. ഈമാസം 11നാണ് സംഭവം. സ്‌കൂള്‍ അംബ്ലിക്കിടെ വിദ്യാര്‍ഥി കാലുകൊണ്ടു ചരല്‍നീക്കിയതില്‍ പ്രകോപിതനായ മുഖ്യാധ്യാപകന്‍ എം.അശോകന്‍ കുട്ടിയെ മുന്നിലേക്ക് വിളിച്ച് വിദ്യാര്‍ഥികളുടെയെല്ലാം മുന്നില്‍ വച്ച് കോളറില്‍ പിടിച്ചുവെന്നും വലതുചെവി ചേര്‍ത്ത് മുഖത്തടിക്കുകയുമായിരുന്നുവെന്നും പറയുന്നു. കുട്ടിയെ വൈദ്യപരിശോധനയ്ക്ക് വിധേയനാക്കിയപ്പോഴാണ് വലതുചെവിയുടെ കര്‍ണപുടം പൊട്ടിയതായി അറിയുന്നത്. കുട്ടിയെ അടിയന്തര ശസ്ത്രക്രിയക്ക് വിധേയമാക്കാനും ഡോക്ടര്‍മാര്‍ നിര്‍ദേശിച്ചിരുന്നു. സംഭവത്തില്‍ ബാവകാശകമ്മീഷന്‍ സ്വമേധയാ കേസെടുത്തിരുന്നു. മുഖ്യാധ്യാപകന് വീഴ്ച സംഭവിച്ചു: പിടിഎ പ്രസിഡന്‍റ് കുണ്ടംകുഴി: വിദ്യാര്‍ഥിയുടെ കര്‍ണപുടം അടിച്ചുപൊട്ടിച്ച സംഭവത്തില്‍ മുഖ്യാധ്യാപകന് വീഴ്ച സംഭവിച്ചതായി കുണ്ടംകുഴി ജിഎച്ച്എസ്എസ് പിടിഎ പ്രസിഡന്‍റ് എം. മാധവന്‍. സംഭവസമയത്ത് അധ്യാപകന്‍റെ ഒരു കൈയില്‍ മൈക്ക് ഉണ്ടായിരുന്നു. സംസാരിക്കുന്നതിനിടെ കൈ വീശിയപ്പോഴാണ് ചെവിക്ക് അടിയേറ്റത്. അധ്യാപകന്‍ മനഃപൂര്‍വം തെറ്റ് ചെയ്തതായി കരുതുന്നില്ല. എന്നാല്‍ അദ്ദേഹത്തിന് വീഴ്ച സംഭവിച്ചു. കുട്ടിക്ക് ചികിത്സാസഹായം വാഗ്ദാനം ചെയ്തിരുന്നതായും എന്നാല്‍ ഒരു ലക്ഷം രൂപ വാഗ്ദാനം ചെയ്‌തെന്ന പ്രചരണം തെറ്റാണെന്നും അദ്ദേഹം പറഞ്ഞു.

കഞ്ചാവ് കടത്ത്: പ്രതിക്ക് തടവും പിഴയും

കാസര്‍ഗോഡ്: കാറില്‍ ആറു കിലോ കഞ്ചാവ് കടത്തിയ കേസിലെ പ്രതിക്ക് മൂന്നു വര്‍ഷം കഠിനതടവും 20,000 രൂപ പിഴയും ശിക്ഷ. കണ്ണൂര്‍ ധര്‍മടം മീത്തല്‍പീടികയിലെ എന്‍.കെ.സല്‍മാനെയാണ് (26) കാസര്‍ഗോഡ് അഡീഷണല്‍ ഡിസ്ട്രിക്ട് ആന്‍ഡ് സെഷന്‍സ് കോടതി(രണ്ട്) ജഡ്ജ് കെ.പ്രിയ ശിക്ഷിച്ചത്. പിഴയടച്ചില്ലെങ്കില്‍ മൂന്നുമാസം അധികതടവ് അനുഭവിക്കണം. 2020 ജൂണ്‍ രണ്ടിന് പുലര്‍ച്ചെ അഞ്ചിനു കുമ്പള ഭാരത് പെട്രോള്‍ പമ്പിന് എതിര്‍വശം കഞ്ചാവ് പിടികൂടിയ കേസിലെ രണ്ടാം പ്രതിയായ സല്‍മാനെ കുമ്പള എസ്‌ഐ ആയിരുന്ന കെ.വിനോദ്കുമാറും സംഘവുമാണ് പിടികൂടിയത്. കുമ്പള ഇന്‍സ്‌പെക്ടറായിരുന്ന പി. പ്രമോദാണ് അന്വേഷണം നടത്തി കോടതിയില്‍ കുറ്റപത്രം സമര്‍പ്പിച്ചത്. കേസിലെ ഒന്നാംപ്രതിക്ക് കഴിഞ്ഞ മാസം സമാനമായ ശിക്ഷ ലഭിച്ചിരുന്നു. മൂന്നാംപ്രതി ഒളിവിലാണ്. പ്രോസിക്യൂഷന് വേണ്ടി അഡീഷണല്‍ ഗവ.പ്ലീഡര്‍ ജി.ചന്ദ്രമോഹന്‍, അഡ്വ. ചിത്രകല എന്നിവര്‍ ഹാജരായി.

സ്വാതന്ത്ര്യ ദിനാഘോഷം

പെരുമ്പടവ്: പെരുമ്പടവ് സെന്‍റ് ജോസഫ്സ് ഇംഗ്ലീഷ് സ്കൂളിൽ സ്വാതന്ത്ര്യദിനാഘോഷം വിപുലമായ പരിപാടികളോടെ നടന്നു. ചപ്പാരപ്പടവ് പഞ്ചായത്ത് പ്രസിഡന്‍റ് സുനിജ ബാലകൃഷ്ണൻ ഉദ്ഘാടനം ചെയ്തു. സ്കൂൾ മാനേജർ ഫാ. ജോർജ് തൈക്കുന്നുംപുറം അധ്യക്ഷത വഹിച്ചു. സ്കൂൾ പ്രിൻസിപ്പൽ സിസ്റ്റർ ബില്‍സി റാഫേൽ, പഞ്ചായത്ത് അംഗം എം.പി. ജ്യോതിലക്ഷ്മി, പിടിഎ പ്രസിഡന്‍റ് ഷെൽമോൻ പൈനാടത്ത്, പെരുമ്പടവ് ബിവിജെഎം ഹയർ സെക്കൻഡറി സ്കൂൾ പ്രിൻസിപ്പൽ ജോസുകുട്ടി, മുഖ്യാധ്യാപകൻ ജോസി മാത്യു, റിട്ട. സബ് ഇൻസ്പെക്ടർ പി.ജെ. ജോളി, സ്കൂൾ ലീഡർ മരീറ്റ ഷെൽമോൻ, ക്രിസ്റ്റഫർ ജോഷ്വൽ, ജൈന ആൻ ജിജോ, ഗ്ലൈസി സാബു എന്നിവർ പ്രസംഗിച്ചു. കുട്ടികളുടെ വിവിധ മത്സര പരിപാടികളും മാർച്ച് ഫാസ്റ്റും നടന്നു. പെരുമ്പടവ് വൈഎംസിഎയുടെ നേതൃത്വത്തിൽ മധുര പലഹാര വിതരണവും പെരുമ്പടവ് ആവേ മരിയ മാതൃവേദിയുടെ ആഭിമുഖ്യത്തിൽ സമ്മാനങ്ങളും വിതരണം ചെയ്തു.

റോഡു നന്നാക്കിയില്ലെങ്കിൽ സർവീസ് നിർത്തിവയ്ക്കുമെന്ന് ബസ് ഉടമകൾ

കണ്ണൂർ: അടിയന്തരമായി ജില്ലയിലെ റോഡുകൾ അറ്റകുറ്റപ്പണി നടത്തിയില്ലെങ്കിൽ ബസ് സർവീസ് നിർത്തിവയ്ക്കാൻ ജില്ലാ ബസ് ഓപ്പറേറ്റേഴ്സ് അസോസിയേഷൻ തീരുമാനിച്ചു. റോഡ് തകർന്നതോടെ ഗതാഗതക്കുരുക്ക് രൂക്ഷമായിരിക്കുകയാണ്. ഗതാഗതക്കുരുക്ക് കാരണം ദിവസേന ഒന്നും രണ്ടും ട്രിപ്പുകൾ മുടങ്ങുന്നു. മാത്രമല്ല, പല ബസ് സ്റ്റാൻഡുകളിലും കയറാത്തതിന്‍റെ പേരിൽ യാത്രക്കാരും തൊഴിലാളികളും തമ്മിൽ ദിവസേന സംഘർഷങ്ങളുണ്ടാകുകയാണ്. അതിനാൽ രാവിലെ 8.30 മുതൽ 11.30 വരെയും വൈകുന്നേരം നാലുമുതൽ 6.30 വരെയും സ്വകാര്യ വാഹനങ്ങൾ കണ്ണൂർ, തലശേരി, തളിപ്പറന്പ്, പയ്യന്നൂർ ടൗണുകളിൽ പ്രവേശിക്കാൻ അനുവദിക്കരുതെന്നും പൊതുവാഹനങ്ങൾ മാത്രം പ്രവേശിക്കാൻ അനുവദിച്ച് ഗതാഗതക്കുരുക്ക് ഒഴിവാക്കാൻ അടിയന്തര നടപടി സ്വീകരിക്കണമെന്നും യോഗം ആവശ്യപ്പെട്ടു. ജില്ലാ പ്രസിഡന്‍റ് പി.പി. മോഹനൻ അധ്യക്ഷത വഹിച്ചു. രാജ്കുമാർ കരുവാരത്ത്, പി. രാജൻ, കെ.പി. മുരളീധരൻ, കെ. വിജയമോഹൻ, കെ.പി. മോഹനൻ, എം.ഒ. രാജേഷൻ തുടങ്ങിയവർ പ്രസംഗിച്ചു.

പുളിങ്ങോം-പാലാവയൽ ലയൺസ് ക്ലബ് ഭാരവാഹികൾ സ്ഥാനമേറ്റു

ചെറുപുഴ: പുളിങ്ങോം-പാലാവയൽ ലയൺസ് ക്ലബിന്‍റെ 2025- 26 വർഷത്തെ ഭാരവാഹികളുടെ സ്ഥാനാരോഹണം നടന്നു. പുളിങ്ങോം വ്യാപാര ഭവൻ ഓഡിറ്റോറിയത്തിൽ നടന്ന യോഗം ട്രെയിനർ എ.വി. വാമൻകുമാർ ഉദ്ഘാടനം ചെയ്തു. പ്രസിഡന്‍റ് ജോസ് പ്രകാശ് അധ്യക്ഷത വഹിച്ചു. ലയൺസ് 318 ഇ ജില്ലാ സെക്രട്ടറി വേണുഗോപാൽ വിശിഷ്ടാതിഥിയായിരുന്നു. റീജണൽ ചെയർമാൻ രാഘവൻ തെക്കടവൻ, സോൺ ചെയർമാൻമാരായ ജീവ് ജയിംസ്, വിശ്വനാഥൻ, പ്രോഗാം ഡയറക്ടർ ജോൺ തോമസ് എന്നിവർ പ്രസംഗിച്ചു. ജോസ് പ്രകാശ്-പ്രസിഡന്‍റ്, കെ.കെ. അഭിലാഷ്-സെക്രട്ടറി, ഷാജു കാപ്പിൽ-ട്രഷറർ എന്നിവരുടെ നേതൃത്വത്തിലുള്ള ഭരണസമിതിയാണ് ചുമതലയേറ്റത്.

കർണാടകയിൽ ആട് മോഷണം: ജാമ്യത്തിലിറങ്ങി മുങ്ങിയ മണക്കടവ് സ്വദേശി അറസ്റ്റിൽ

ആലക്കോട്: കർണാടകയിലെ ആട് മോഷണക്കേസിൽ ജാമ്യത്തിലിറങ്ങി മുങ്ങിയ യുവാവ് അറസ്റ്റിൽ. മണക്കടവ് ചീക്കാട് സ്വദേശി ഉന്മേഷ് (36) ആണ് ബെല്ലാരി പോലീസ് ആലക്കോട് നിന്ന് അറസ്റ്റ് ചെയ്ത‌ത്. 2021ൽ ബെല്ലാരി പോലീസ് സ്റ്റേഷൻ പരിധിയിലെ ഫാമിൽ നിന്ന് ഉന്മേഷ് ഉൾപ്പെട്ട സംഘം ആടിനെ മോഷ്ടിച്ച് കടത്തിയിരുന്നു. ഈ കേസിൽ അറസ്റ്റിലായ ഉന്മേഷ് ജാമ്യത്തിലിറങ്ങിയ ശേഷം കോടതിയിൽ ഹാജരാകാതെ മുങ്ങി നടക്കുകയായിരുന്നു. നിരവധി കേസുകളിൽ പ്രതിയായ ഇയാളെ കാപ്പ പ്രകാരം 2022ൽ അറസ്റ്റ് ചെയ്‌ത് ജയിലിൽ അടച്ചിരുന്നു. പിന്നീട് ജാമ്യത്തിൽ ഇറങ്ങുകയായിരുന്നു. കഴിഞ്ഞ ദിവസം കാർത്തികപുരത്തെ ഹോട്ടലിൽ കയറി അതിക്രമം നടത്തിയതിന് ഉന്മേഷിനെയും സുഹൃത്ത് സോജനെയും ആലക്കോട് എസ്ഐ കെ.ജെ. മാത്യു അറസ്റ്റ് ചെയ്തിരുന്നു. ചോദ്യം ചെയ്യലിലാണ് കർണാടക കേസിൽ മുങ്ങിയതാണെന്ന് വ്യക്തമായത്. ആലക്കോട് പോലീസ് വിവരം അറിയിച്ചതിനെത്തുടർന്ന് ബെല്ലാരി പോലീസ് ആലക്കോട്ടെത്തി ഉന്മേഷിനെ കസ്റ്റഡിയിലെടുത്തത്.

ശാപമോക്ഷമില്ലാതെ ചപ്പാരപ്പടവ് പാലം

ചപ്പാരപ്പടവ്: നാലു പതിറ്റാണ്ടുമുമ്പ് പണി പൂർത്തീകരിച്ച ചപ്പാരപ്പടവ് പാലം ദുർബലാവസ്ഥയിൽ. ചപ്പാരപ്പടവ് പാലത്തിന്‍റെ പുനരുദ്ധാരണം അനിശ്ചിതമായി നീളുന്നതിൽ പ്രതിഷേധവും ശക്തമാകുകയാണ്. നാലുവർഷം മുന്പ് പൊതുമരാമത്ത് വകുപ്പ് തയാറാക്കിയ ബലപ്പെടുത്തൽ ആവശ്യമുള്ള പാലങ്ങളുടെ പട്ടികയിൽ ചപ്പാരപ്പടവ് പാലത്തെ ഉൾപ്പെടുത്തിയതാണ്. പാലം ബലപ്പെടുത്തണമെന്നാവശ്യപ്പെട്ടു ചപ്പാരപ്പടവ് പഞ്ചായത്ത് ഭരണസമിതി പ്രമേയവും പാസാക്കിയിരുന്നു. നേരത്തെ പലതവണ പരിശോധന നടത്തിയ പൊതുമരാമത്ത് ഉദ്യോഗസ്ഥർക്കും പാലത്തിന്‍റെ ബലക്ഷയം ബോധ്യപ്പെട്ടിരുന്നു. ഇതിനുപുറമെ 2021 ഡിസംബർ 30നു പാലത്തിന്‍റെ ഉറപ്പു പരിശോധിക്കാൻ അത്യാധുനിക യന്ത്രസാമഗ്രികളോടെ കേരള ഹൈവേ റിസർച്ച് ഇൻസ്റ്റിറ്റ്യൂട്ട് (കെഎച്ച്ആർഐ) സംഘവും സ്ഥലത്ത് എത്തിയിരുന്നു. കെഎച്ച്ആർഐ അസിസ്റ്റന്‍റ് എൻജിനിയറുടെ നേതൃത്വത്തിലെത്തിയ സംഘം പാലം പരിശോധിച്ചു വിദഗ്ധ പരിശോധനയ്ക്കായി പാലത്തിന്‍റെ അടിയിൽ നിന്നു സാന്പിൾ ശേഖരിച്ചു. പിന്നീട് നാളിതു വരെ തുടർനടപടികൾ ഉണ്ടായില്ല. അതേസമയം, മലയോര മേഖലയിലെ ഒട്ടേറെ റോഡുകളെ കോർത്തിണക്കുന്ന ചപ്പാരപ്പടവ് പാലം അനുദിനം ദുർബലമായിക്കൊണ്ടിരിക്കുകയാണ്.

ചെറുപുഷ്‌പം ചന്ദനക്കാംപാറയും സ്പോർട്‌സ് ഡിവിഷൻ കണ്ണൂരും ചാമ്പ്യന്മാർ

തലശേരി: ജില്ലാ സബ് ജൂണിയർ ബാസ്ക‌റ്റ്ബോൾ ടൂർണമെന്‍റിൽ ആൺകുട്ടികളുടെ വിഭാഗത്തിൽ ചെറുപുഷ്‌പം ചന്ദനക്കാംപാറയും പെൺകുട്ടികളുടെ വിഭാഗത്തിൽ സ്പോർട്‌സ് ഡിവിഷൻ കണ്ണൂരും ചാമ്പ്യന്മാരായി. മികച്ച കളിക്കാരായി ആൺകുട്ടികളുടെ വിഭാഗത്തിൽ ജെസ്‌വിൻ, പെൺകുട്ടികളുടെ വിഭാഗത്തിൽ നർമിൻ ജോയ് എന്നിവരെ തെരഞ്ഞെടുത്തു. തലശേരി മുനിസിപ്പൽ ഇൻഡോർ കോർട്ടിൽ ജില്ലാ ബാസ്കറ്റ്ബോൾ അസോസിയേഷൻ സെക്രട്ടറി ജസീം മാളിയേക്കൽ ഉദ്ഘാടനം ചെയ്‌തു. വി.സി. ഹാഷിം അധ്യക്ഷത വഹിച്ചു. പോലീസ് സബ് ഇൻസ്പെക്ടർ ടി. ധനേഷ്, അസോസിയേഷൻ വൈസ് പ്രസിഡന്‍റ് എം.എ. നിക്കോളാസ് എന്നിവർ സമ്മാനദാനം നിർവഹിച്ചു. ജോ. സെക്രട്ടറി പ്രജു കെ. പോൾ, പ്രസിഡന്‍റ് ജാസിം ഉസ്‌മാൻ എന്നിവർ പ്രസംഗിച്ചു.

ജലസ്രോതസിൽ ഡീസൽ കലരുന്ന സംഭവം; വില്ലേജ് ഓഫീസിന് മുന്നിൽ ധർണ നടത്തി

ഇരിട്ടി: അയ്യൻകുന്ന് പഞ്ചായത്തിലെ കരിക്കോട്ടക്കരിക്ക് അടുത്ത വലിയപറമ്പുംകരിയിലെ ജലസ്രോതസിൽ ഡീസൽ കലരുന്ന സംഭവത്തിൽ നടപടി സ്വീകരിക്കാത്തതിൽ പ്രതിഷേധിച്ച് ആക്‌ഷൻ കൗൺസിലിന്‍റെ നേതൃത്വത്തിൽ ധർണ നടത്തി. കരിക്കോട്ടക്കരി വില്ലേജ് ഓഫീസിന് മുന്നിൽ നടത്തിയ ധർണ പഞ്ചായത്ത് മുൻ പ്രസിഡന്‍റ് കെ.സി. ചാക്കോ ഉദ്ഘാടനം ചെയ്തു. പഞ്ചായത്ത് അംഗം ജോസഫ് വട്ടുകുളം അധ്യക്ഷത വഹിച്ചു. ആക്‌ഷൻ കൗൺസിൽ അംഗങ്ങളായ ജോസ് മുതിരക്കാല, ജിനോ വടക്കേടം, മാമച്ചൻ നാലോലിക്കൽ, ടോമി ഉണ്ണിമാക്കൽ, ബാബു പടിഞ്ഞാറേമുറിയിൽ, ചാക്കോ മുണ്ടംകുന്നേൽ, ബിജോയ് വണ്ടൻമാക്കൽ എന്നിവർ പ്രസംഗിച്ചു. വില്ലേജ് ഓഫീസർ മുതൽ കളക്‌ടർക്കു വരെ പരാതി നൽകിയിട്ടും പ്രശ്നത്തിന് പരിഹാരം കാണാതെ വന്നതോടെയാണ് പ്രദേശവാസികൾ ആക്‌ഷൻ കൗൺസിൽ രൂപീകരിച്ച് പ്രത്യക്ഷ സമരം ആരംഭിക്കുന്നത്.

ഫാസിസത്തെ ചെറുക്കേണ്ടത് കാലത്തിന്‍റെ ആവശ്യം: ഡോ. എ.കെ. രാമകൃഷ്ണന്‍

പയ്യന്നൂര്‍: ഫാസിസത്തെ ജനാധിപത്യത്തിലൂടെ ചെറുക്കണമെന്ന കാര്യം പലസ്തീനെക്കുറിച്ച് മിണ്ടുന്നതു പോലും കുറ്റകരമായിത്തീരുന്ന തലതിരിഞ്ഞ കാലത്ത് പ്രധാനമാണെന്ന് ജവഹര്‍ലാല്‍ നെഹ്‌റു സര്‍വകലാശാല മുന്‍ പ്രഫസറും പ്രഭാഷകനുമായ ഡോ. എ.കെ. രാമകൃഷ്ണന്‍. പയ്യന്നൂര്‍ ഓപ്പണ്‍ ഫ്രെയിം ഫിലിം സൊസൈറ്റി സംഘടിപ്പിച്ച യുദ്ധവിരുദ്ധ ചലച്ചിത്ര മേള ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. പശ്ചിമേഷ്യയെക്കുറിച്ച് ഏകമുഖമായ വീക്ഷണം പ്രചരിപ്പിക്കാനാണ് ഭരണകൂടം ശ്രമിക്കുന്നത്. ഇതിലൂടെ ഇവിടത്തെ മത ന്യൂനപക്ഷങ്ങളെ അടിച്ചമര്‍ത്താനുള്ള ന്യായം നിര്‍മിക്കലാണ് ലക്ഷ്യമാക്കുന്നത്. ഇത്തരം ഏകാധികാരപരവും വസ്തുതാ വിരുദ്ധവുമായ ആഖ്യാനങ്ങളെ ചെറുത്തു മാത്രമേ ജനാധിപത്യത്തെ പുതുക്കാന്‍ കഴിയൂവെന്നും അദ്ദേഹം പറഞ്ഞു. കൈരളി മിനി ഓഡിറ്റോറിയത്തില്‍ നടന്ന പരിപാടിയില്‍ കെ. രാമചന്ദ്രന്‍ അധ്യക്ഷത വഹിച്ചു.

വലയിൽ കുടുങ്ങിക്കിടന്ന ചേരയെ രക്ഷപ്പെടുത്തി

ഇരിട്ടി: കിണർവലയിൽ കുടുങ്ങി രക്ഷപ്പെടാനാകാതെ രണ്ടുദിവസം കിടന്ന ചേരയെ മാർക്ക് പ്രവർത്തകനും വനം വകുപ്പിന്‍റെ താത്കാലിക വാച്ചറുമായ ഫൈസൽ വിളക്കോട് രക്ഷപ്പെടുത്തി. ഇരിട്ടി നേരമ്പോക്കിലെ റിട്ട. കായികാധ്യാപകൻ രമേശന്‍റെ വീട്ടു കിണറിന്‍റെ വലയിലാണ് കൂറ്റൻ ചേര കുടുങ്ങിയത്. വലയിൽ തലയുടെ ഭാഗം കുടുങ്ങിക്കിടക്കുകയായിരുന്നു. ഫൈസൽ വലമുറിച്ചുമാറ്റി ചേരയെ രക്ഷപ്പെടുത്തുകയായിരുന്നു.

നവതി ആഘോഷം: സംഘാടക സമിതി രൂപീകരിച്ചു

പേരാവൂര്‍: 1936ൽ ആരംഭിച്ച തൊണ്ടിയില്‍ സെന്‍റ് ജോണ്‍സ് യുപി സ്‌കൂളിന്‍റെ നവതി ആഘോഷ സംഘാടക സമിതി യോഗം ജില്ലാ പഞ്ചായത്ത് അംഗം വി. ഗീത ഉദ്ഘാടനം ചെയ്തു. നവതി ആഘോഷത്തിന്‍റെ ഭാഗമായി വിളംബര ജാഥ, പൂര്‍വ വിദ്യാര്‍ഥി-അധ്യാപക-മാനേജേഴ്‌സ് സംഗമങ്ങള്‍, കലാകായിക മത്സരങ്ങള്‍, മെഡിക്കല്‍ ക്യാമ്പുകള്‍, സാഹിത്യ സാംസ്‌കാരിക പരിപാടികള്‍, നവതി സ്മരണിക, നവതി സ്മാരകം, ആദരിക്കല്‍, എക്‌സിബിഷന്‍, വാര്‍ഷികം തുടങ്ങി 90 ഇന പരിപാടികള്‍ യോഗം അംഗീകരിച്ചു. സ്‌കൂള്‍ മാനേജര്‍ ഫാ. മാത്യു തെക്കേമുറി രക്ഷാധികാരിയും, പിടിഎ പ്രസിഡന്‍റ് വിനോദ് നടുവത്താനി ചെയര്‍മാനും സ്‌കൂള്‍ മുഖ്യാധ്യാപകൻ മാത്യു ജോസഫ് വരമ്പുങ്കല്‍ ജനറല്‍ കണ്‍വീനറുമായി 301 സംഘാടക സമിതി രൂപീകരിച്ചു. സ്‌കൂള്‍ അസിസ്റ്റന്‍റ് മാനേജര്‍ പോള്‍ മുണ്ടയ്ക്കല്‍ അധ്യക്ഷത വഹിച്ചു. പേരാവൂര്‍ പഞ്ചായത്ത് മെംബര്‍മാരായ രാജു ജോസഫ്, ബാബു കോഴികാടന്‍, പി. നൂറുദ്ദീന്‍, സ്‌കൂള്‍ മുഖ്യാധ്യാപകൻ മാത്യു ജോസഫ് വരമ്പുങ്കല്‍, ഒ. മാത്യു, സി. എല്‍സി ജെയിംസ്, വിനോദ് നടുവത്താനി, ബിന്ദു കൃഷ്ണ തുടങ്ങിയവർ പ്രസംഗിച്ചു.

പൊട്ടിവീണ വൈദ്യുത ലൈനിൽനിന്നും ഷോക്കേറ്റ ബൈക്ക് യാത്രക്കാർക്ക് രക്ഷകനായി മാത്യു

ഇരിട്ടി: മഴയിലും കാറ്റിലും പൊട്ടിവീണ വൈദ്യുത ലൈനിൽ നിന്ന് ഷോക്കേറ്റ ബൈക്ക് യാത്രക്കാർക്ക് രക്ഷകനായി പ്രദേശവാസിയായ മാത്യു ജോർജ് ആട്ടേൽ. കഴിഞ്ഞദിവസം രാത്രിയിലാണ് കീഴ്പള്ളിക്ക് സമീപത്തെ അത്തിക്കൽ കരടിമല ട്രാൻസ്‌ഫോർമറിനടുത്ത് വൈദ്യുത കമ്പി പൊട്ടിവിണത്. ഇത് ശ്രദ്ധയിൽപ്പെടാതെ പിറ്റേന്ന് രാവിലെ ഇതുവഴി യാത്ര ചെയ്ത ബൈക്ക് യാത്രക്കാർക്ക് ഷോക്കേൽക്കുകയായിരുന്നു. ഈസമയം സമീപത്തെ വീട്ടിൽ ഉണ്ടയിരുന്ന മാത്യു ജോർജ് ഓടിയെത്തി ഉണങ്ങിയ കമ്പുകൊണ്ട് പൊട്ടിക്കിടന്ന ലൈൻ തട്ടിമാറ്റി യാത്രക്കരെ രക്ഷിക്കുകയായിരുന്നു. മാത്യുവിന്‍റെ അവസരോചിതമായ ഇടപെടൽ രണ്ട് ജീവനുകളാണ് രക്ഷിക്കാൻ കഴിഞ്ഞത്. എടൂർ സെക്‌ഷൻ അസി. എൻജിനിയർ, സബ് എൻജിനിയർമാർ എന്നിവർ സ്ഥലത്തെത്തി മാത്യുവിനെ അഭിനന്ദിച്ചു‌.

തെരുവുനായ ശല്യത്തിന് പരിഹാരമായില്ല: കേളകത്തെ വ്യാപാരികൾ പ്രതിസന്ധിയിൽ

കേളകം: കേളകം ടൗണിലും, കേളകം-അടക്കാത്തോട് റോഡിലും തെരുവുനായകളുടെ കൂട്ടം വട്ടമിടുന്നത് യാത്രക്കാർക്കും വ്യാപാരികൾക്കും ഭീഷണിയായി. പ്രശ്നത്തിന് പരിഹാരം തേടി വ്യാപാരികളും നാട്ടുകാരും നിരന്തരം പഞ്ചായത്ത് സെക്രട്ടറിക്കും, പ്രസിഡന്‍റിനും പരാതി നൽകിയെങ്കിലും നടപടിയുണ്ടായില്ല. രാത്രിയെന്നോ പകലെന്നോ വ്യത്യാസമില്ലാതെ അലഞ്ഞ് തിരിയുന്ന തെരുവ് നായകള്‍ ഇതുവഴിയുള്ള യാത്രക്കാരുടെ നേരെയും അടുക്കാറുണ്ട്. സ്‌കൂളില്‍ പോകുന്ന വിദ്യാഥികള്‍ ഭയപ്പാടോടെയാണ് കടന്ന് പോകുന്നത്. തെരുവുനായശല്യം രൂക്ഷമായ സാഹചര്യത്തില്‍ അധികൃതര്‍ വേണ്ട നടപടികള്‍ സ്വീകരില്ലെങ്കിൽ കടകൾ അടച്ചിടുകയല്ലാതെ മാർഗമില്ലെന്ന് അടയ്ക്കാത്തോട് റോഡിലെ വ്യാപാരികൾ പറയുന്നു. തെരുവുനായകൾ നിരന്ന് കിടക്കുന്ന കടകളിലും സ്ഥാപനത്തിലും കടന്നു ചെല്ലാനാകാതെ മടങ്ങുകയാണ് ഇടപാടുകാർ.

സ്വകാര്യ ബസിനു പിന്നിൽ സ്കൂൾ വാനിടിച്ച് അപകടം

മട്ടന്നൂർ: ചാവശേരി കാശിമുക്കിൽ സ്വകാര്യ ബസിനു പിന്നിൽ സ്കൂൾ വാനിടിച്ച് അപകടം. ഇന്നലെ ഉച്ചയ്ക്ക് 1.30 ഓടെ പെട്രോൾ പമ്പിനു മുന്നിലായിരുന്നു അപകടം. മട്ടന്നൂർ ഭാഗത്ത് നിന്ന് ഇരിട്ടിയിലേക്കു പോകുകയായിരുന്ന സ്വകാര്യ ബസിനു പിന്നിൽ സ്കൂളിൽ നിന്ന് വിദ്യാർഥികളെ കയറ്റി ഇരിട്ടി ഭാഗത്തേക്കു പോകുകയായിരുന്ന വാൻ ഇടിക്കുകയായിരുന്നു. ബസ് പെട്ടെന്ന് ബ്രേക്കിട്ടതാണ് അപകടത്തിനു കാരണമായതെന്നു പറയുന്നു. കാശിമുക്ക് സ്റ്റോപ്പിൽ നിർത്താതെ ബസ് പെട്രോൾ പമ്പിനു മുന്നിൽ പെട്ടെന്ന് നിർത്തിയതിനാൽ പിന്നാലെയെത്തിയ സ്കൂൾ വാൻ ഇടിക്കുകയായിരുന്നു. വിദ്യാർഥികൾ പരിക്കേൽക്കാതെ രക്ഷപ്പെട്ടു. മട്ടന്നൂർ പോലീസ് സ്ഥലത്തെത്തി അപകടത്തിൽപ്പെട്ട വാഹനങ്ങൾ നീക്കി.

റോഡു നന്നാക്കിയില്ലെങ്കിൽ സർവീസ് നിർത്തിവയ്ക്കുമെന്ന് ബസ് ഉടമകൾ

കണ്ണൂർ: അടിയന്തരമായി ജില്ലയിലെ റോഡുകൾ അറ്റകുറ്റപ്പണി നടത്തിയില്ലെങ്കിൽ ബസ് സർവീസ് നിർത്തിവയ്ക്കാൻ ജില്ലാ ബസ് ഓപ്പറേറ്റേഴ്സ് അസോസിയേഷൻ തീരുമാനിച്ചു. റോഡ് തകർന്നതോടെ ഗതാഗതക്കുരുക്ക് രൂക്ഷമായിരിക്കുകയാണ്. ഗതാഗതക്കുരുക്ക് കാരണം ദിവസേന ഒന്നും രണ്ടും ട്രിപ്പുകൾ മുടങ്ങുന്നു. മാത്രമല്ല, പല ബസ് സ്റ്റാൻഡുകളിലും കയറാത്തതിന്‍റെ പേരിൽ യാത്രക്കാരും തൊഴിലാളികളും തമ്മിൽ ദിവസേന സംഘർഷങ്ങളുണ്ടാകുകയാണ്. അതിനാൽ രാവിലെ 8.30 മുതൽ 11.30 വരെയും വൈകുന്നേരം നാലുമുതൽ 6.30 വരെയും സ്വകാര്യ വാഹനങ്ങൾ കണ്ണൂർ, തലശേരി, തളിപ്പറന്പ്, പയ്യന്നൂർ ടൗണുകളിൽ പ്രവേശിക്കാൻ അനുവദിക്കരുതെന്നും പൊതുവാഹനങ്ങൾ മാത്രം പ്രവേശിക്കാൻ അനുവദിച്ച് ഗതാഗതക്കുരുക്ക് ഒഴിവാക്കാൻ അടിയന്തര നടപടി സ്വീകരിക്കണമെന്നും യോഗം ആവശ്യപ്പെട്ടു. ജില്ലാ പ്രസിഡന്‍റ് പി.പി. മോഹനൻ അധ്യക്ഷത വഹിച്ചു. രാജ്കുമാർ കരുവാരത്ത്, പി. രാജൻ, കെ.പി. മുരളീധരൻ, കെ. വിജയമോഹൻ, കെ.പി. മോഹനൻ, എം.ഒ. രാജേഷൻ തുടങ്ങിയവർ പ്രസംഗിച്ചു.

പാലത്തുംകടവിൽ 10 കുടുംബങ്ങൾ യാത്രാദുരിതത്തിൽ

ഇരിട്ടി: റീബിൾഡ് കേരള പദ്ധതിയിൽ നിർമിച്ച എടൂർ-പാലത്തുംകടവ് റോഡിലെ പദ്ധതിയിൽ നിന്ന് ഒഴിവാക്കിയ 500 മീറ്റർ ദൂരത്തിലെ 10 ഓളം കുടുംബങ്ങൾ യാത്രാ ദുരിതത്തിൽ. ഒഴിവാക്കിയ 500 മീറ്റർ ഭാഗം റോഡ് പൂർണമായും പൊട്ടിപ്പൊളിഞ്ഞ് വാഹനങ്ങൾക്ക് കടന്നുപോകാൻ കഴിയാത്തവിധത്തിയായി. റോഡ് തകർന്നതോടെ സ്കൂൾ വാഹനം ഉൾപ്പെടെ റോഡ് തകർന്ന ഭാഗത്തേക്ക് സർവീസ് നടത്താൻ തയാറാകാതെ വരുന്നത് മാതാപിതാക്കളെ ബുദ്ധിമുട്ടിക്കുന്നു. മുന്പ് സർവീസ് നടത്തിയിരുന്ന സ്കൂൾ വാഹനങ്ങളുടെ അറ്റകുറ്റപ്പണിക്ക് പോലും തുക തികയാതെ വരുന്നതോടെയാണ് 500 മീറ്ററിലൂടെയുള്ള സർവീസ് അവസാനിപ്പിക്കാൻ നിർബന്ധിതരാകുന്നത്. എട്ട് വിദ്യാർഥികളാണ് ഇവിടെ നിന്ന് വിവിധ സ്കൂളുകളിൽ പഠിക്കുന്നത്. വന്യമൃഗ ഭീതി നിലനിൽക്കുന്ന പ്രദേശം ആയതുകൊണ്ട് രാവിലെയും വൈകുന്നേരവും വിദ്യാർഥികൾക്ക് ഒപ്പം മുതിർന്നവരും നടന്ന് എത്തിയാണ് സ്കൂളിൽ പോകുന്നത്. കാർഷിക മേഖലയെ ആശ്രയിച്ചു കഴിയുന്ന കുടുംബങ്ങൾക്ക് വലിയ സാമ്പത്തിക ബാധ്യതയാണ് വരുത്തി വയ്ക്കുന്നത്. റീബിൽഡ് കേരള പദ്ധതിയിൽ നിന്ന് ഒഴിവാക്കുന്ന ഭാഗം റീ ടാറിംഗ് നടത്തി നൽകുമെന്ന അധികൃതരുടെ ഉറപ്പ് പാലിക്കുന്നില്ലെന്നാണ് കുടുംബങ്ങൾ പറയുന്നത്. വഴിയുണ്ട് പൊതുഗതാഗത സംവിധാനം ഒന്നുമില്ല റീബിൽഡ് കേരള പദ്ധതിയിൽ റോഡിന്‍റേയും ബസ് കാത്തിരിപ്പ് കേന്ദ്രത്തിന്‍റേയും നിർമാണം പൂർത്തിയാക്കിയെങ്കിലും ചരൾ മുതൽ പാലത്തുംകടവ് റീച്ചിൽ ഒരു ബസുപോലും സർവീസ് നടത്തുന്നില്ല. ഇത് വിദ്യാർഥികൾ ഉൾപ്പെടെയുള്ള പ്രദേശവാസികളെ യാത്രാ ദുരിതത്തിൽ ആക്കിയിരിക്കുകയാണ്. സ്കൂളിൽ എത്താൻ ടാക്സി സർവീസുകളെയാണ് വിദ്യാർഥികൾ ആശ്രയിക്കുന്നത്. മാസം വലിയ തുക നൽകിയാണ് മാതാപിതാക്കൾ കുട്ടികളെ സ്കൂളിൽ എത്തിക്കുന്നത്. വിദ്യാർഥികൾ മാത്രമല്ല പ്രദേശത്തെ ജനങ്ങളും കൂട്ടുപുഴയിൽ നിന്ന് ടാക്സി വാഹനങ്ങളെ ആശ്രയിച്ചാണ് യാത്ര ചെയ്യുന്നത്. അടിയന്തര ആവശ്യങ്ങൾക്ക് പോലും വലിയ തുക നൽകി ടാക്സി വാഹനത്തെ ആശ്രയിച്ചാണ് ജനങ്ങൾ യാത്ര ചെയ്യുന്നത്.

വാഹനാപകടത്തിൽ പരിക്കേറ്റ വയോധികൻ മരിച്ചു

ഇരിട്ടി: വാഹനാപകടത്തിൽ പരിക്കേറ്റു ചികിത്സയിലിരുന്നയാൾ മരിച്ചു. ഉളിയിൽ കല്ലേരിക്കലിലെ റസിയ മൻസിലിൽ ടി.പി. അഹമ്മദ്കുട്ടി ഹാജി (83) ആണ് മരിച്ചത്. കബറടക്കം ഇന്ന്. ഒരുമാസം മുമ്പ് ഇരുപത്തിഒന്നാം മൈലിൽ റോഡ് മുറിച്ച് കടക്കവേ ബസിടിച്ച് ഗുരുതരമായി പരിക്കേറ്റു ചികിത്സയിലായിരുന്നു. മംഗളൂരുവിലെ ഒരു സ്വകാര്യ ആശുപത്രിയിലായിരുന്നു മരണം. ഭാര്യ: കദീജ. മക്കൾ: റസിയ, മറിയു, റഹ്‌മത്ത്, ഇസ്ഹാഖ്, മുഹമ്മദ്‌, മുർഷിദ്, റൗഷിന, നാജിഹ, ഫൈസൽ, ഫാസിൽ, പരേതയായ ഹസീന. മരുമക്കൾ: ആസാദ്, ഷുഹൈബ്, അൻസാരി, റൈഹാനത്ത്, റമീസ്, ജസ്‌ന, നൗഷാദ്, വാസിൽ, ഷഹാന, റജ.

തെറ്റ് തിരുത്തലിന്‍റെ മറവിൽ വോട്ടർ പട്ടികയിൽ വ്യാപക ക്രമക്കേടിനു ശ്രമിക്കുന്നതായി ആരോപണം

പയ്യാവൂർ: പയ്യാവൂർ പഞ്ചായത്തിലെ വോട്ടർ പട്ടികയിൽ വാർഡുകൾ മാറി വോട്ടർമാർ ഉൾപ്പെട്ടത് തിരുത്തുന്നതിന് വേണ്ടി പഞ്ചായത്ത് സ്വമേധയാ നടത്തുന്ന പ്രക്രിയയുടെ മറവിൽ വ്യാപകമായി ക്രമക്കേട് നടത്താനുള്ള ശ്രമം നടക്കുന്നതായി പഞ്ചായത്തിലെ പ്രതിപക്ഷ അംഗങ്ങൾ ആരോപിച്ചു. ഡീലിമിറ്റേഷൻ കമ്മീഷൻ നടത്തിയ വാർഡ് വിഭജനത്തിൽ വ്യാപകമായ ക്രമക്കേടുകളും നിയമവിരുദ്ധ പ്രവർത്തനങ്ങളുമാണ് ഭരണസമിതിയുടെ നിർദേശത്തെ തുടർന്ന് ചുമതയുള്ള ഉദ്യോഗസ്ഥർ നടത്തിയത്. കരട് വോട്ടർ പട്ടികയിൽ വോട്ടർമാർ തെറ്റായി വാർഡ് മാറി ഉൾപ്പെട്ടിട്ടുണ്ടെങ്കിൽ സ്വമേധയാ തിരുത്താമെന്നുള്ള തെരഞ്ഞെടുപ്പ് കമ്മീഷന്‍റെ നിർദേശത്തിന്‍റെ മറവിലാണ് സിപിഎമ്മിന്‍റെയും ഭരണസമിതിയും നേതൃത്വത്തിന്‍റേയും നിർദേശത്തെ തുടർന്ന് പഞ്ചായത്തിലെ ചില ഉദ്യോഗസ്ഥരുടെ നേതൃത്വത്തിൽ ക്രമക്കേടിനു ശ്രമിക്കുന്നത്. ഇടതുപക്ഷത്തിന് ജയസാധ്യത കുറഞ്ഞ വാർഡുകളിൽ നിന്ന് യുഡിഎഫ് അനുകൂല വോട്ടർമാരെ കൂട്ടത്തോടെ മറ്റു വാർഡുകളിലേക്ക് മാറ്റി ചേർക്കുന്നതിനുള്ള പ്രവർത്തനങ്ങളാണ് നടക്കുന്നത്. വ്യാപകമായി വോട്ടർ മാരെ പട്ടികയിൽ നിന്ന് നീക്കം ചെയ്യുന്നതിനുള്ള ശ്രമങ്ങളും നടക്കുന്നുണ്ട്. നാട്ടിലുള്ളവരുടെ വരെ വോട്ട് തള്ളിക്കാനുള്ള നടപടികൾ നടക്കുന്നു. പഞ്ചായത്തിൽ നിയമിക്കപ്പെട്ട സിപിഎം അനുകൂല താത്കാലിക കരാർ ജീവനക്കാരാണ് ഇത്തരത്തിൽ ക്രമക്കേടുകൾക്ക് നേതൃത്വം നൽകുന്നത്. ഡീലിമിറ്റേഷൻ പ്രവർത്തനങ്ങളും വോട്ടർപട്ടിക പ്രവർത്തനങ്ങളും സുതാര്യമായും നിയമപരമായും നടത്തണമെന്നിരിക്കെ നിയമവിരുദ്ധമായി പാർട്ടി താത്പര്യം സംരക്ഷിക്കാൻ നിയമിക്കപ്പെട്ട താത്കാലിക ഉദ്യോഗസ്ഥരെ കൊണ്ടും മറ്റും ഇത്തരം ചുമതലകൾ ചെയ്യിപ്പിക്കുന്നത് നിയമവിരുദ്ധമാണ്. ഇത്തരത്തിൽ ആരെങ്കിലും ഉണ്ടാക്കുന്ന തെറ്റായ പട്ടികയുടെയും അന്വേഷണം റിപ്പോർട്ടുകളുടെയും താഴെ ഒപ്പിട്ടു കൊടുക്കുന്ന ഉദ്യോഗസ്ഥർക്കെതിരെ നിയമ നടപടികൾ സ്വീകരിക്കും. വാർഡ് വിഭജനവുമായി ബന്ധപ്പെട്ട ക്രമക്കേടിനെതിരെ നിലവിൽ ഹൈക്കോടതിയെ സമീപിച്ചിട്ടുണ്ട്. വോട്ടർ പട്ടികയിലും ക്രമക്കേട് നടന്നതായി ബോധ്യപ്പെട്ടാൽ വീണ്ടും നിയമ നടപടിയുമായി മുന്നോട്ടു പോകുമെന്നും, പഞ്ചായത്ത് അംഗങ്ങളായ ടെൻസൺ ജോർജ്, ടി.പി. അഷ്റഫ്, ജിത്തു തോമസ്, ആനീസ് നെട്ടനാനിക്കൽ, സിന്ധു ബെന്നി, സിജി ഒഴാങ്കൽ എന്നിവർ പറഞ്ഞു.

കെസിവൈഎം പോലീസ് ഉദ്യോഗസ്ഥരെ ആദരിച്ചു

തളിപ്പറമ്പ്: സ്വാതന്ത്ര്യ ദിനത്തോടനുബന്ധിച്ച് തളിപ്പറമ്പ് കെസിവൈഎം യൂണിറ്റിന്‍റെ ആഭിമുഖ്യത്തിൽ തളിപ്പറമ്പ് പോലീസ് സ്റ്റേഷനിലെ പോലീസ് ഉദ്യോഗസ്ഥരെ ആദരിച്ചു. യൂണിറ്റ് പ്രസിഡന്‍റ് ടെലക്സ് കോറോത്ത് അധ്യക്ഷത വഹിച്ചു. യൂണിറ്റ് ഡയറക്ടർ ഫാ. ടോമി മാളക്കാരൻ ഉദ്ഘാടനം ചെയ്തു. വൈസ് ഡയറക്ടർ സിസ്റ്റർ വിനയ സിഎംസി, ആനിമേറ്റർ വിജു ചേലയ്ക്കമാക്കൽ, ആൻലിയ ഇരുപ്പൂഴിക്കൽ, ശരത് പോൾ എന്നിവർ പ്രസംഗിച്ചു. തളിപ്പറമ്പ് സബ് ഇൻസ്‌പെക്ടർ കെ. ദിനേശൻ നന്ദി പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]