ADVERTISEMENT

ADVERTISEMENT

സേഫ് സോണ്‍ ഹോസ്പിറ്റൽ കോൺക്ലേവുമായി ഐഎംഎ

കോതമംഗലം: കോതമംഗലം ഐഎംഎയുടെ നേതൃത്വത്തില്‍ സേഫ് സോണ്‍ ഹോസ്പിറ്റൽ കോൺക്ലേവ് നടത്തി. ഐഎംഎ സംസ്ഥാന പ്രസിഡന്‍റ് ഡോ. കെ. എ. ശ്രീവിലാസൻ ഉദ്‌ഘാടനം ചെയ്തു. സേഫ് സോണ്‍ ഹോസ്പിറ്റൽ കമ്മിറ്റി സംസ്ഥാന ചെയര്‍മാന്‍ ഡോ. എം.ഇ. സുഗതന്‍ അധ്യക്ഷനായി.

കോതമംഗലം ഐഎംഎ പ്രസിഡന്‍റ് ഡോ. ലിസ തോമസ്, നിയുക്ത സംസ്ഥാന പ്രസിഡന്‍റുമാരായ ഡോ. എം.എൻ. മേനോന്‍, ഡോ. പി. ഗോപികുമാര്‍, മിഡ് സോണ്‍ വൈസ് പ്രസിഡന്‍റ് ഡോ. കെ. സുദര്‍ശന്‍, മിഡ് സോണ്‍ ജോയിന്‍റ് സെക്രട്ടറി ഡോ. അലക്സ് ഇട്ടിച്ചെറിയ, സേഫ് സോണ്‍ ഹോസ്പിറ്റൽ കമ്മിറ്റി കോ-കൺവീനർ ഡോ. ബേബി തോമസ്, തൃശൂര്‍ ജില്ലാ കോ-ഓർഡിനേറ്റർ ഡോ. എൽ. എൻ. വിശ്വനാഥന്‍,ഡോ. സിനി ഐസക് എന്നിവർ പ്രസംഗിച്ചു.

ആശുപത്രി നടത്തിപ്പിന്‍റെ നിയമവശങ്ങളെക്കുറിച്ച് ഹൈക്കോടതി അഭിഭാഷക സന്ധ്യ രാജുവും ആശുപത്രി അതിക്രമങ്ങൾ എന്ന വിഷയത്തെക്കുറിച്ച് ഡോ. എം.എൻ. മേനോന്‍, ഡോ. ബേബി തോമസ്, ഡോ. എൽ. എൻ. വിശ്വനാഥന്‍ എന്നിവരും ക്ലാസുകൾ നയിച്ചു. 30 ആശുപത്രികളില്‍ നിന്ന് പ്രതിനിധികള്‍ പങ്കെടുത്തു.

ADVERTISEMENT

യുവാവിനെ ഷോക്കേറ്റ് മരിച്ചനിലയിൽ കണ്ടെത്തി

വൈപ്പിൻ: യുവാവിനെ വീടിനുള്ളിൽ ഷോക്കേറ്റ് മരിച്ച നിലയിൽ കാണ്ടെത്തി. ഞാറക്കൽ ജയ്ഹിന്ദ് മൈതാനിക്ക് പടിഞ്ഞാറ് കൈതവളപ്പിൽ ദാസന്‍റെ മകൻ വിനോദാ(44)ണ് മരിച്ചത്. ബുധനാഴ്ച വൈകിട്ട് വീടിന്‍റെ ഹാളിനോട് ചേർന്ന മുറിയിലാണ് മൃതദേഹം കണ്ടത്. ബന്ധുക്കൾ വിവരമറിയിച്ചതിനെ തുടർന്ന് ഞാറക്കൽ പോലീസ് എത്തി മേൽനടപടികൾ സ്വീകരിച്ചു. മൃതദേഹം പോസ്റ്റുമോർട്ടത്തിനുശേഷം സംസ്കരിച്ചു.

ഷോക്കേറ്റ് മരിച്ചു

മൂവാറ്റുപുഴ: വീട് നിര്‍മാണത്തിനിടെ ഇതരസംസ്ഥാന തൊഴിലാളി ഷോക്കേറ്റ് മരിച്ചു. ബംഗാള്‍ സ്വദേശി മുകളേഷ് റഹ്മാന്‍(45) ആണ് മരിച്ചത്. ഇന്നലെ രാവിലെ 9.30ഓടെ കിഴക്കേക്കര കുറുപ്പുതലത്തില്‍ ബഷീറിന്‍റെ വീട്ടിലായിരുന്നു അപകടം. അറ്റകുറ്റപ്പണികള്‍ക്കിടെ ശുചീകരണ പ്രവര്‍ത്തനം നടത്തുമ്പോഴാണ് ഷോക്കേറ്റത്. ഉടന്‍ മൂവാറ്റുപുഴ ജനറല്‍ ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം പോസ്റ്റ്മോര്‍ട്ടത്തിന്ശേഷം ബന്ധുക്കള്‍ക്ക് കൈമാറി.

കേഴമാന്‍ കുഞ്ഞിനെ രക്ഷപ്പെടുത്തി

കോതമംഗലം: നഗരത്തില്‍ ആള്‍ത്താമസമില്ലാത്ത വീടിന്‍റെ ഗേറ്റിലെ ഗ്രില്ലിനുള്ളില്‍ കുടുങ്ങിയ കേഴമാന്‍ കുഞ്ഞിനെ രക്ഷപ്പെടുത്തി. കോതമംഗലം ശോഭനപ്പടിയില്‍ കൂറ്റപ്പിള്ളി ഏണസ്റ്റ് പോളിന്‍റെ വീടിന്‍റെ ഗേറ്റിനിടയിലാണ് മൂന്നു വയസ് പ്രായമുള്ള മാന്‍കുഞ്ഞ് കുടുങ്ങിയത്. ഇന്നലെരാവിലെ 11നാണ് സംഭവം. നാട്ടുകാരാണ് പോലീസിനേയും വനപാലകരേയും വിവരം അറിയിച്ചത്. ഗേറ്റിനുള്ളില്‍ കുടുങ്ങിയ മാന്‍കുഞ്ഞിനെ നാട്ടുകാര്‍ രക്ഷപ്പെടുത്തി ഒഴിഞ്ഞ കൂട്ടിലാക്കി. ഗേറ്റിനുള്ളിലൂടെ കടന്നുപോകാന്‍ ശ്രമിക്കവെ മാനിന് വയറില്‍ പരിക്കേറ്റിരുന്നു. ആര്‍ആര്‍ടി സംഘം എത്തി മാനിനെ ഊന്നുകല്‍ മൃഗാശുപത്രിയില്‍ എത്തിച്ച് ചികിത്സ നല്‍കി.

പിറവം വള്ളംകളി ഒക്‌ടോബർ നാലിന്; വിപുലമായ ഒരുക്കം

പിറവം: മൂവാറ്റുപുഴയാറ്റിലെ ഒഴുക്കിനെതിരേയുള്ള പിറവം വള്ളംകളിക്ക് ഒരുക്കങ്ങളായി. ഒക്‌ടോബര്‍ നാലിന് നടക്കുന്ന വള്ളംകളി ഏറെ ശ്രദ്ധയാകര്‍ഷിക്കുന്നതാണ്. ടൂറിസം വകുപ്പ് ഐപിഎല്‍ -ക്രിക്കറ്റ് ലീഗ് മത്സരങ്ങളുടെ മാതൃകയില്‍ ചാമ്പ്യന്‍സ് ബോട്ട് ലീഗ് ആരംഭിച്ചതാണ് പിറവത്തിനു നേട്ടമായി വള്ളംകളി എത്തിയത്. ഓണാഘോഷങ്ങളുടെ ഭാഗമായി 1952 ല്‍ ചുരുങ്ങിയ നിലയില്‍ ആരംഭിച്ചതാണ് പിറവത്തെ വള്ളംകളി. നഗരസഭയുടെ ഓണോത്സവത്തിന് സമാപനം കുറിച്ച് വിനോദസഞ്ചാര വകുപ്പിന്‍റെ ആഭിമുഖ്യത്തില്‍ പിറവം പാലത്തിന് സമീപമാണ് വള്ളംകളി നടക്കുന്നത്. സംസ്ഥാന സര്‍ക്കാര്‍ വിനോദസഞ്ചാര വികസനം മുന്നില്‍കണ്ട് നടപ്പാക്കുന്ന ചാമ്പ്യന്‍സ് ബോട്ട് ലീഗിലെ നാലാമത്തെ മത്സരമാണ് പിറവത്ത് നടക്കുക. ജലോത്സവ മത്സരത്തിനായി ഒമ്പത് ചുണ്ടന്‍ വള്ളങ്ങള്‍ എത്തുന്നുണ്ട്. കൂടാതെ ഓടി വള്ളങ്ങളുടെ പ്രാദേശിക മത്സരവും നടക്കും. മുന്‍ മന്ത്രിമാരായ ഇ.എം.എസ്. നമ്പൂതിരിപ്പാട്, കെ. കരുണാകരന്‍, ടി.എം. ജേക്കബ് എന്നിവരുടെയും, പിറവം പഞ്ചായത്ത് പ്രസിഡന്‍റായിരുന്ന ഉമാദേവി അന്തര്‍ജനത്തിന്‍റെയും സ്മരണക്കായി ഏര്‍പ്പെടുത്തിയ ട്രോഫിയും കാഷ് അവാര്‍ഡുമാണ് ജേതാക്കള്‍ക്ക് വിതരണം ചെയ്യുന്നത്. പിറവം കൊള്ളിക്കല്‍ ഇറിഗേഷന്‍ വകുപ്പിന്‍റെ ഇന്‍സ്‌പെക്ഷന്‍ ബംഗ്ലാവില്‍ നടന്ന സംഘടക സമിതി യോഗം അനൂപ് ജേക്കബ് എംഎല്‍എ ഉദ്ഘാടനം ചെയ്തു. സംഘാടകസമിതി ഫിനാന്‍സ് കമ്മിറ്റി ചെയര്‍മാനായി നഗരസഭ ചെയര്‍പേഴ്‌സണ്‍ ജൂലി സാബു, റേസ് കമ്മിറ്റി ചെയര്‍മാനായി നഗരസഭാ വൈസ് ചെയര്‍മാന്‍ കെ.പി. സലിം, റിസപ്ഷന്‍ കമ്മിറ്റി ചെയര്‍മാന്‍ ഡോ. അജേഷ് മനോഹര്‍, രജിസ്‌ട്രേഷന്‍ കമ്മിറ്റി ചെയര്‍മാന്‍ ജില്‍സ് പെരിയപ്പുറം തുടങ്ങിയവരെ തെരഞ്ഞെടുത്തു.

കേബിളുകള്‍ മോഷണം പോയതായി പരാതി

മൂവാറ്റുപുഴ : മൂവാറ്റുപുഴക്കാവില്‍ നവരാത്രി ആഘോഷങ്ങളുടെ ഭാഗമായി കൊണ്ടുവന്ന ജനറേറ്ററിന്‍റെ കേബിളുകള്‍ മോഷണം പോയതായി പരാതി. ആഘോഷങ്ങളുടെ ഭാഗമായി ശബ്ദ സംവിധാനങ്ങളും, ലൈറ്റ് സംവിധാനങ്ങളും പ്രവര്‍ത്തിപ്പിക്കുന്നതിനായി കൊണ്ടുവന്ന 140 മീറ്ററോളം കേബിളാണ് കഴിഞ്ഞ രാത്രിയില്‍ മോഷണം പോയത്. മൂവാറ്റുപുഴ കാവിനോട് ചേര്‍ന്നുള്ള അന്നദാന മണ്ഡപത്തില്‍ വൈദ്യുതിയും ജനറേറ്ററുമായി ബന്ധിപ്പിച്ചിരുന്ന ഭാഗത്തേ കേബിളുകളാണ് നഷ്ടപ്പെട്ടത്. 40,000 ഓളം രൂപ വിലമതിക്കും. ക്ഷേത്രത്തിലെ മറ്റ് സാധനങ്ങളൊന്നും മോഷണം പോയിട്ടില്ലെന്നും, കേബിളുകള്‍ മോഷണം പോയ സംഭവത്തില്‍ സമഗ്രമായ അന്വേഷണം നടത്തി കുറ്റവാളികളെ ഉടന്‍ കണ്ടെത്തണമെന്നും ക്ഷേത്രം ഭാരവാഹി ശിവദാസന്‍ നമ്പൂതിരി പറഞ്ഞു. ക്ഷേത്രം ഭരണസമിതി മൂവാറ്റുപുഴ പോലീസില്‍ പരാതി നല്‍കിയിട്ടുണ്ട്.

വെള്ളക്കെട്ടിനു പരിഹാരം കാണണമെന്ന് ഹൈക്കോടതി

വാഴക്കുളം: വാഴക്കുളം - ആരക്കുഴ മൂഴി റോഡിൽ കാഞ്ഞിരംകുന്നേൽ കവലയിലെ വെള്ളക്കെട്ടിനു പരിഹാരം കാണണമെന്ന് ഹൈക്കോടതി. കാഞ്ഞിരംകുന്നേൽ അജിമോൻ ജോസ് നൽകിയ റിട്ട് ഹർജി പരിഗണിച്ചാണ് ഉത്തരവ്. വലിയ മഴ പെയ്താൽ പ്രദേശത്തെ വീടുകളിലുള്ളവർക്ക് റോഡിലേയ്ക്കിറങ്ങാനാകാത്ത വിധം വെള്ളം കെട്ടി നിൽക്കുന്ന അവസ്ഥയാണ്. പ്രശ്നത്തിന് പരിഹാരമുണ്ടാക്കണമെന്ന് പല തവണ ആവശ്യപ്പെട്ടെങ്കിലും പരിഹാരമുണ്ടായില്ലെന്ന് പരാതിക്കാരൻ ചൂണ്ടിക്കാട്ടി. റോഡിലെ വെള്ളക്കെട്ട് സംബന്ധിച്ച് 2023 ൽ കല്ലൂർക്കാട് പൊതുമരാമത്ത് വകുപ്പ് അസി.എൻജിനീയർക്ക് പ്രദേശവാസികൾ നിവേദനം നൽകിയിരുന്നു. ഓട നിർമിക്കുന്നതിന് എസ്റ്റിമേറ്റ് തയാറാക്കിയെങ്കിലും നിർമാണം നടന്നില്ല. വൈദ്യുത പോസ്റ്റുകൾ മാറ്റി സ്വകാര്യ വ്യക്തിയുടെ പുരിയിടത്തിലൂടെ വെള്ളം ഒഴുക്കിവിടുന്നതിനുള്ള സമ്മതപത്രവും നൽകിയിരുന്നു. എന്നാൽ റോഡു നവീകരണത്തോടനുബന്ധിച്ച് റോഡരികിൽ കോൺക്രീറ്റ് ചെയ്യുക മാത്രമാണ് ചെയ്തത്. ഇതുമൂലം ഒഴുക്കു തടസപ്പെടുകയും വലിയ മഴ പെയ്യുമ്പോൾ റോഡിൽ വെള്ളക്കെട്ട് രൂപപ്പെടുകയും പതിവായി. ഇതേത്തുടർന്നാണ് കോടതിയെ സമീപിച്ചത്.

റോഡരികില്‍ പാര്‍ക്ക് ചെയ്ത ലോറിക്ക് തീപിടിച്ചു

കോതമംഗലം: റോഡരികില്‍ പാര്‍ക്ക് ചെയ്ത ലോറിക്ക് തീപിടിച്ചു. കാബിന്‍ പൂര്‍ണമായും കത്തിനശിച്ചു. അഞ്ചുലക്ഷത്തില്‍പരം രൂപയുടെ നഷ്ടമുണ്ടായതായാണ് പ്രാഥമിക വിലയിരുത്തൽ. തങ്കളം ഐഎംഎ ഹാളിന് സമീപം ഇന്നലെ രാത്രി 7.30 ഓടെയായിരുന്നു തീപിടിത്തം. പാനിപ്ര ചിറ്റേത്തുകുടി പി.എം. അസീസിന്‍റെ ഉടമസ്ഥതയിലുള്ളതാണ് ലോറി. ഡ്രൈവറും സഹായിയും പുറത്തിറങ്ങിയ സമയത്തായിരുന്നു അപകടം. 2019 മോഡല്‍ ലോറി ഒരു മാസം മുമ്പാണ് അസീസ് വാങ്ങിയത്. ഷോര്‍ട്ട് സര്‍ക്യൂട്ട് ആണെന്നാണ് പ്രാഥമിക നിഗമനം. അഗ്നി രക്ഷാസേന എത്തി പെട്ടെന്ന് തീയണച്ചത് കൊണ്ടാണ് ലോറിയുടെ എന്‍ജിന്‍ ഭാഗത്തേക്കും പിന്നിലേക്കും തീപടരാതിരുന്നത്.

സമഗ്ര ആരോഗ്യ സുരക്ഷ കാമ്പയിന്‍ ആരംഭിച്ചു

മൂവാറ്റുപുഴ : കേരള എയ്ഡ്‌സ് കണ്‍ട്രോള്‍ സൊസൈറ്റിയും, കേരള സ്റ്റേറ്റ് എന്‍എസ്എസ് സെല്ലും സംയുക്തമായി നടപ്പാക്കുന്ന സമഗ്ര ആരോഗ്യ സുരക്ഷ കാമ്പയിന് പേഴയ്ക്കാപ്പിള്ളി ഗവ. ഹയര്‍ സെക്കന്‍ഡറി സ്‌കൂളില്‍ തുടക്കമായി. യുവജനങ്ങളില്‍ ലഹരി ഉപയോഗവും എയ്ഡ്സും വര്‍ദ്ധിച്ചു വരുന്ന സാഹചര്യത്തില്‍ വിവിധ നാടന്‍ കലാരൂപങ്ങളിലൂടെ കലാകാരന്മാരെ അണിനിരത്തി യുവജനങ്ങള്‍ക്കിടയില്‍ ബോധവത്ക്കരണം നടത്തുകയാണ് പരിപാടിയുടെ ലക്ഷ്യം. ഐഇസി വാന്‍ കാമ്പയിന്‍റെ ഭാഗമായി അന്തര്‍ദേശീയ യുവജന ദിനത്തില്‍ തിരുവനന്തുരത്തുനിന്ന് ആരംഭിച്ച കെഎസ്ആര്‍റ്റിസിയുടെ ബോധവല്‍കരണ വാഹനത്തിന് ജില്ലയില്‍ സ്വീകരണം നല്‍കി. പേഴയ്ക്കാപ്പിള്ളി ഗവ. ഹയര്‍ സെക്കന്‍ഡറി സ്‌കൂളില്‍ നടന്ന ചടങ്ങ് പായിപ്ര പഞ്ചായത്ത് സ്ഥിരംസമിതി അധ്യക്ഷ നെജി ഷാനവാസ് ഉദ്ഘാടനം ചെയ്തു. കേരളത്തിലെ വിദ്യാര്‍ഥികളില്‍ സമഗ്ര ആരോഗ്യ ബോധവല്‍ക്കരണത്തിന്‍റെയും സാമൂഹിക ഉത്തരവാദിത്തത്തിന്‍റെയും സന്ദേശം ഉയത്തിപ്പിടിച്ച് പത്തനംതിട്ട മുദ്ര സ്‌കൂള്‍ ഓഫ് പെര്‍ഫോമിംഗ് ആട്‌സ് കാക്കാരശി നാടകം അവതരിപ്പിച്ചു. തുടര്‍ന്ന് സ്‌കൂള്‍ വിദ്യാര്‍ഥികള്‍ ഫ്‌ളാഷ് മോബും ലഹരി വിരുദ്ധ ബോധവല്‍കരണ നൃത്ത ശില്‍പവും അവതരിപ്പിച്ചു. പിടിഎ പ്രസിഡന്‍റ് ഫൈസല്‍ മുണ്ടക്കാമറ്റം അധ്യക്ഷത വഹിച്ചു. യോഗത്തില്‍ യുവജാഗരണ്‍ ജില്ല നോഡല്‍ ഓഫീസര്‍ പ്രഫ. സിജോ ജോര്‍ജ് പദ്ധതി വിശദീകരണം നടത്തി. സ്‌കൂള്‍ പ്രിന്‍സിപ്പല്‍ ടി.ബി. സന്തോഷ്, എസ്എംസി ചെയര്‍മാന്‍ കെ.എന്‍. നാസര്‍, എന്‍എസ്എസ് പ്രോഗ്രാം ഓഫീസര്‍ ധനൂജ്, അധ്യാപകരായ പയസ് ഫിലിപ്പ്, ഡോ. ഒ.പി. അലി, ബിജോ ജോസഫ് എന്നിവര്‍ പ്രസംഗിച്ചു. അഞ്ച് ദിവസങ്ങളിലായി ജില്ലയിലെ തെരഞ്ഞെടുക്കപ്പെട്ട വിദ്യാഭ്യാസ സ്ഥാപനങ്ങളിലൂടെ വാഹനം കടന്നു പോകുകയും ബോധവല്‍കരണ കലാരൂപങ്ങള്‍ അവതരിപ്പിക്കുകയും ചെയ്യും. കാക്കാരശി നാടകം, പാവനാടകം, കഥാപ്രസംഗം എന്നീ കലാരൂപങ്ങളിലൂടെയാണ് ബോധവത്കരണം നടത്തുന്നത്.

അടിയന്തര പ്രമേയത്തിന് അനുമതി നിഷേധിച്ചു : കൂത്താട്ടുകുളം നഗരസഭയിൽ എൽഡിഎഫ് പ്രതിഷേധം

കൂത്താട്ടുകുളം : നഗരസഭ കൗൺസിൽ യോഗത്തിൽ അടിയന്തര പ്രമേയത്തിന് ഭരണാനുമതി നിഷേധിച്ചതിൽ പ്രതിഷേധിച്ച് എൽഡിഎഫ് കൗൺസിലർമാർ പ്രതിഷേധിച്ചു. നഗരസഭയിലെ ജനകീയ ഹോട്ടലിന്‍റെ നടത്തിപ്പുമായി ബന്ധപ്പെട്ട് അന്നത്തെ സിഡിഎസ് അംഗമായിരുന്ന കലാ രാജു ഹോട്ടൽ ആവശ്യങ്ങൾക്കായി വാങ്ങിയ പാത്രങ്ങളും ഫർണിച്ചറുകളും തിരികെ നൽകിയില്ല എന്ന വിഷയത്തിൽ എൽഡിഎഫ് കൗൺസിലർ സുമ വിശ്വംഭരൻ നൽകിയ പ്രമേയ അവതരണത്തിൽ അനുമതി നിഷേധിച്ചതിനെതിരേയാണ് പ്രതിപക്ഷം പ്രതിഷേധം രേഖപ്പെടുത്തിയത്. പ്രതിപക്ഷം മുദ്രാവാക്യം വിളിച്ച് പ്രതിഷേധം രേഖപ്പെടുത്തിയതിനെ തുടർന്ന് കൗൺസിലിയോഗം നിർത്തിവയ്ക്കുകയായിരുന്നു. 2021-ൽ കലാ രാജു ആരംഭിച്ച ജനകീയ ഹോട്ടലിലേക്ക് സർക്കാർ നിർദേശപ്രകാരം മുപ്പതിനായിരം രൂപയുടെ പാത്രങ്ങളും ഫർണിച്ചറുകളും നഗരസഭ കൗൺസിലർമാരുടെ നേതൃത്വത്തിൽ വാങ്ങി നൽകിയെന്നും. ഒരു വർഷം മാത്രം പ്രവർത്തിച്ച ഹോട്ടൽ നടത്തിപ്പിനായി ആറ് ലക്ഷം രൂപ സബ്സിഡിയായി കൈപ്പറ്റിയിട്ടുണ്ടെന്നും നഗരസഭയിലേക്ക് തിരിച്ചടയ്ക്കേണ്ട റിവോൾവിംഗ് ഫണ്ടായ 10,000 രൂപ ഇതുവരെ നഗരസഭയിലേക്ക് തിരിച്ചടച്ചിട്ട് ഇല്ലയെന്നും എൽഡിഎഫ് ആരോപിക്കുന്നു. കലാ രാജു ചെയർപേഴ്സൺ സ്ഥാനത്തുനിന്നും മാറിനിൽക്കുകയും പാത്രങ്ങൾ തിരിച്ചെത്തിക്കാനുള്ള നടപടികൾ സ്വീകരിക്കുകയും ചെയ്യണമെന്ന് മുൻ നഗരസഭ ചെയർപേഴ്സൺ വിജയ ശിവൻ, മുൻ വൈസ് ചെയർമാൻ സണ്ണി കുര്യാക്കോസ് എന്നിവർ പറഞ്ഞു. അതേസമയം എൽഡിഎഫ് അംഗങ്ങൾ ഉന്നയിക്കുന്ന ആരോപണങ്ങൾ അടിസ്ഥാനരഹിതമാണെന്നും തന്നെ വ്യക്തിഹത്യ ചെയ്യുന്നതിന്‍റെ ഭാഗമായാണ് ഇത്തരത്തിലുള്ള നിലപാടുകൾ സ്വീകരിക്കുന്നതെന്നും നഗരസഭ ചെയർപേഴ്സൺ കലാ രാജു പറഞ്ഞു. കൃത്യമായ രേഖകളോടുകൂടി അടുത്ത കൗൺസിലിൽ പ്രമേയം അവതരിപ്പിക്കാൻ അനുമതി നൽകാമെന്ന് പറഞ്ഞിരുന്നെങ്കിലും പ്രതിപക്ഷ അംഗങ്ങൾ തയാറാവാതെ പ്രതിഷേധിക്കുകയായിരുന്നു എന്നും കലാ രാജു പറഞ്ഞു. സാമ്പത്തിക പ്രതിസന്ധി നേരിട്ടതിനെ തുടർന്നാണ് ഹോട്ടലിന്‍റെ പ്രവർത്തനം അവസാനിപ്പിച്ചത്. ഇതു സംബന്ധിച്ച് നഗരസഭാ സെക്രട്ടറിക്ക് രേഖാമൂലം കത്ത് നൽകിയിരുന്നു. 50,000 രൂപയുടെ ലോൺ പൂർണമായി അടച്ചുതീർത്ത ശേഷം സ്വന്തമായി വാങ്ങിയിട്ടുള്ള പാത്രങ്ങൾ തിരികെ എടുക്കുകയാണ് ചെയ്തത്. ഇത് ആർഐ നേരിൽ കണ്ട് ബോധ്യപ്പെട്ട് താക്കോൽ കൈപ്പറ്റുകയായിരുന്നെന്നും കലാ രാജു പറഞ്ഞു.

കെട്ടിട നന്പർ ലഭിക്കുന്നതിലെ സാങ്കേതിക പ്രശ്നങ്ങൾ; അദാലത്ത് ഏഴിന്

കൂത്താട്ടുകുളം : കെട്ടിടനമ്പർ ലഭിക്കുന്നതിലെ സാങ്കേതിക പ്രശ്നങ്ങൾ മൂലം വലയുന്ന വ്യാപാരികൾക്കും കെട്ടിട ഉടമസ്ഥർക്കുമായി കൂത്താട്ടുകുളം നഗരസഭ അദാലത്ത് സംഘടിപ്പിക്കുന്നു. ഒക്ടോബർ ഏഴിന് നഗരസഭ ടൗൺഹാളിൽ അദാലത്ത് നടത്തും. അദാലത്തിൽ പരിഗണിക്കാനുള്ള അപേക്ഷകൾ രേഖകൾ സഹിതം 30 നകം നഗരസഭാ ഓഫീസിൽ സമർപ്പിക്കണം. അപേക്ഷകൾക്ക് ടോക്കൺ നൽകി മുൻഗണനാ ക്രമത്തിലാകും വിളിക്കുക. വിസ്തീർണം കൂട്ടി എടുത്തതിനും മുനിസിപ്പാലിറ്റിയുടെ അസസ്മെന്‍റ് രജിസ്റ്ററിൽ തെറ്റായി രേഖപ്പെടുത്തിയ വിസ്തീർണം മൂലവും, മറ്റു നിരവധി സാങ്കേതിക കാരണങ്ങൾ കൊണ്ടും 700 ൽപരം കെട്ടിടങ്ങളിൽ പ്രവർത്തിക്കുന്ന കച്ചവട സ്ഥാപനങ്ങൾക്ക് ലൈസൻസ് പുതുക്കാനോ പുതിയ ലൈസൻസ് എടുക്കാനോ കഴിഞ്ഞിട്ടില്ല. ഇതുമൂലം നൂറുകണക്കിന് കച്ചവടക്കാർക്ക് തങ്ങളുടെ ബാങ്ക് അക്കൗണ്ടുകൾ, നികുതികൾ എന്നിവയുമായി ബന്ധപ്പെട്ട വിവിധ തരത്തിലുള്ള പ്രശ്നങ്ങൾ അഭിമുഖീകരിക്കേണ്ടി വരുന്നുണ്ട്. പ്രശ്നങ്ങൾക്ക് പരിഹാരം നിർദേശിക്കുന്നതിനായി നഗരസഭ ഡെപ്യൂട്ടി ചെയർപേഴ്സൺ പി.ജി. സുനിൽ കുമാർ അധ്യക്ഷനായി ഒരു സബ്കമ്മിറ്റി രൂപീകരിച്ചിരുന്നു. കടകളും വ്യാപാര കെട്ടിടങ്ങളും കൂടാതെ പല വീടുകൾക്കും വിവിധങ്ങളായ സാഹചര്യങ്ങളിൽ നമ്പരുകൾ ലഭ്യമല്ലാതെ വന്നിട്ടുണ്ട്. കമ്മിറ്റിയുടെ നേതൃത്വത്തിൽ കെട്ടിട ഉടമകളുമായി വിഷയം ചർച്ച ചെയ്യുകയും യോഗം ചേരുകയും ചെയ്തു. കൗൺസിൽ സബ് കമ്മിറ്റി തീരുമാനം അംഗീകരിച്ചു.

ലഹരിക്കെതിരേ അണിനിരന്ന് സെന്‍റ് ജോർജ് സ്കൂൾ

കോതമംഗലം: സെന്‍റ് ജോർജ് ഹയർ സെക്കൻഡറി സ്കൂളിൽ വിദ്യാർഥികൾ ലഹരിക്കെതിരേ നോ ഡ്രഗ്സ് എസ് ജി എച്ച് എസ് എസ് എന്ന ആകൃതിയിൽ അണിനിരന്ന് ലഹരിക്കെതിരേ ബോധവൽക്കരണ പ്രതിജ്ഞ ചൊല്ലിക്കൊണ്ട് ജീവിതോത്സവം 2025 പദ്ധതിക്ക് തുടക്കം കുറിച്ചു. കേരള സർക്കാർ പൊതുവിദ്യാഭ്യാസ വകുപ്പ് നാഷണൽ സർവീസ് സ്കീമിന്‍റെ നേതൃത്വത്തിൽ അനുദിനം കരുത്തേകാം - 21 ദിന ചാലഞ്ച് പദ്ധതിയുടെ ഭാഗമായി കോതമംഗലം സെന്‍റ് ജോർജ് എച്ച്എസ്എസ് വിഭാഗം എൻഎസ്എസിന്‍റെ നേതൃത്വത്തിലാണ് പരിപാടി സംഘടിപ്പിച്ചത്. പ്രിൻസിപ്പൽ ജെയിൻ ജോസ് ഉദ്ഘാടനം ചെയ്തു. എൻഎസ്എസ് പ്രോഗ്രാം ഓഫീസർ വി.എസ്. ആൻസി, രാജേന്ദ്രൻ പോറ്റി എന്നിവർ നേതൃത്വം നൽകി.

ജനസമ്പർക്കയാത്രയുമായി എന്‍റെ നാട് ജനകീയ കൂട്ടായ്മ

കോതമംഗലം: എന്‍റെ നാട് ജനകീയ കൂട്ടായ്മയുടെ ഗാന്ധിദർശൻ പദ്ധതിയുടെ ഭാഗമായി പല്ലാരിമംഗലം പഞ്ചായത്തിൽ നടത്തിയ ജനസമ്പർക്കയാത്ര അടിവാട് വ്യാപാരി വ്യവസായി ഏകോപന സമിതി പ്രസിഡന്‍റും പോത്താനിക്കാട് റീജണൽ റൂറൽ കോ-ഓപ്പറേറ്റീവ് ബാങ്ക് പ്രസിഡന്‍റുമായ എം.എം. അലിയാർ ഉദ്ഘാടനം ചെയ്തു. എന്‍റെ നാട് ചെയർമാൻ ഷിബു തെക്കുംപുറം മുഖ്യപ്രഭാഷണം നടത്തി. പ്രസിഡന്‍റ് മുഹമ്മദ് മുഞ്ചക്കലിൽ അധ്യക്ഷത വഹിച്ചു. കോ-ഓർഡിനേറ്റർ ടി.എം. സെയ്ത് , കെ.ഇ. കാസിം , പി.പി. മുഹമ്മദ്, എം.എം. അബ്ദുറഹ്മാൻ, ശാമില ഷാഫി എന്നിവർ പ്രസംഗിച്ചു. തുടർന്ന് അടിവാട് മേഖലയിൽ ഭവന സന്ദർശനവും നടത്തി.

കീരമ്പാറയിൽ മാലിന്യം തള്ളിയ ആളെ പിടികൂടി

കോതമംഗലം: കീരമ്പാറയിൽ കനാല്‍ ബണ്ട് റോഡില്‍ ചാക്കില്‍ മാലിന്യം തള്ളിയ ആളെ പിടികൂടി. പഞ്ചായത്ത് 10000 രൂപ പിഴയടയ്ക്കാന്‍ നോട്ടീസ് നല്‍കി. നെടുംപാറ ഭാഗത്തെ കനാല്‍ ബണ്ട് റോഡിലാണ് നാല് ചാക്കുകളിലായി മാലിന്യം തള്ളിയത്. കുപ്പിച്ചില്ലും പഴകിയ തുണികളും തെര്‍മോകോളും മാസ്‌കുകളും അടക്കമാണ് തള്ളിയത്. ചാക്കിലുണ്ടായിരുന്ന എക്‌സ്റേ ഫിലിമാണ് മാലിന്യം തള്ളിയ ആളെ തിരിച്ചറിയാൻ ഇടയാക്കിയത്. ഫിലിം ഇട്ടിരുന്ന കവറിലെ ആശുപത്രിയില്‍ എത്തി അന്വേഷിച്ചതില്‍ നിന്നാണ് ആളുടെ മേല്‍വിലാസം ലഭിച്ചത്. പതിനായിരം രൂപ പിഴയടയ്ക്കാന്‍ പഞ്ചായത്ത് സെക്രട്ടറി നോട്ടീസ് നല്‍കിയതായി വാര്‍ഡ് മെന്പര്‍ വി.കെ. വര്‍ഗീസ് പറഞ്ഞു

കോതമംഗലം ചെറിയപള്ളിയിൽ കന്നി 20 പെരുന്നാളിന് ഇന്ന് കൊടിയേറും

കോതമംഗലം: തീർഥാടന കേന്ദ്രമായ മാർ തോമ ചെറിയ പള്ളിയിൽ 340-ാം ഓർമപെരുന്നാളിന് (കന്നി - 20) ഇന്ന് കൊടിയേറും. രാവിലെ 6.30 ന് പ്രഭാത നമസ്കാരം, 7.15 ന് അഞ്ചിന്മേൽ കുർബാന - ഏലിയാസ് മാർ യൂലിയോസ് മെത്രാ പ്പോലീത്ത മുഖ്യ കാർമികത്വം വഹിക്കും. എൽദോ ബാവയുടെ പാദസ് സ്പർശനത്താൽ അനുഗ്രഹീതമായ ചക്കാലക്കുടിയിലെ മാർ ബസേലിയോസ് ചാപ്പലിൽനിന്നും വൈകുന്നേരം നാലിന് പ്രദക്ഷണം പള്ളിയിലേക്ക്. പള്ളിയിലെ പ്രാർഥനയ്ക്ക് ശേഷം വികാരി ഫാ. ജോസ് മാത്യു തച്ചേത്തുകുടി കൊടിയുയർത്തും. തുടർന്ന് കരിങ്ങാച്ചിറ പള്ളിയിൽനിന്നും പ്രത്യേകം തയാറാക്കിക്കൊണ്ടുവരുന്ന തമുക്ക് നേർച്ച വിശ്വാസികൾക്ക് നൽകും. വൈകുന്നേരം ആറിന് സന്ധ്യാനമസ്കാരം. പെരുന്നാൾ ഗ്രീന്‍ പ്രോട്ടോക്കോള്‍ പാലിച്ച് കോതമംഗലം: മാര്‍ തോമാ ചെറിയപള്ളിയിലെ കന്നി - 20 പെരുന്നാൾ ഗ്രീന്‍ പ്രോട്ടോക്കോള്‍ പാലിച്ച് നടത്തും. പെരുന്നാളിന്‍റെ മുന്നൊരുക്കങ്ങള്‍ക്കായി വിവിധ വകുപ്പുകളിലെ ഉദ്യോഗസ്ഥരെ പങ്കെടുപ്പിച്ച് നടത്തിയ യോഗത്തില്‍ ആന്‍റണി ജോണ്‍ എംഎല്‍എ അധ്യക്ഷത വഹിച്ചു. പെരുന്നാളിന്‍റെ സുഗമമായ നടത്തിപ്പിന് സര്‍ക്കാര്‍ വകുപ്പുകളുടെ സഹകരണം ഉണ്ടാകും. ഭക്തജനങ്ങള്‍ക്ക് സൗകര്യപ്രദമായ നിലയില്‍ ട്രാഫിക് സംവിധാനം ക്രമീകരിക്കുന്നതിനും സുരക്ഷാ ക്രമീകരണങ്ങള്‍ക്കായി കൂടുതല്‍ പോലിസിനെ വിന്യസിക്കുന്നതിനും തീരുമാനിച്ചിട്ടുണ്ട്. ആരോഗ്യവകുപ്പ് പ്രത്യേക മെഡിക്കല്‍ ടീമിനെ നിയോഗിക്കും. വന്യമൃഗശല്യമുള്ള പ്രദേശങ്ങളില്‍ ഭക്തജനങ്ങളുടെ സുരക്ഷക്കായി വനപാലകരും ആര്‍ആര്‍ടിയും പ്രത്യേക നിരീക്ഷണം ഏര്‍പ്പെടുത്തും. കെഎസ്ആര്‍ടിസിയുടെ അധിക സര്‍വീസ് നടത്താനും തീരുമാനിച്ചു. പെരുന്നാള്‍ ദിവസങ്ങളില്‍ കുടിവെള്ള വിതരണവും വൈദ്യുതി വിതരണവും കുറ്റമറ്റതാക്കാന്‍ പ്രത്യേകം ശ്രദ്ധിക്കും. ചെറിയപള്ളി വികാരി ഫാ. ജോസ് മാത്യു തച്ചേത്തുകുടി, മുനിസിപ്പല്‍ ചെയര്‍മാന്‍ കെ.കെ. ടോമി, തഹസില്‍ദാര്‍ എം. അനില്‍കുമാര്‍, ഡിവൈഎസ്പി പി.എം. ബൈജു, ട്രസ്റ്റിമാരായ കെ.കെ. ജോസഫ്, എബി ചേലാട്ട്, വര്‍ക്കിംഗ് കമ്മറ്റി അംഗങ്ങളായ സലിം ചെറിയാന്‍, ബിനോയി തോമസ്, ഡോ. റോയി എം. ജോര്‍ജ്, ബേബി തോമസ് എന്നിവർ പ്രസംഗിച്ചു.

എംഡിഎംഎയുമായി യുവാക്കള്‍ പിടിയിൽ

കൊച്ചി: കടവന്ത്ര വിദ്യാനഗര്‍ ക്രോസ് റോഡിന് സമീപത്ത് നിന്നും എംഡിഎംഎയുമായി യുവാക്കള്‍ പിടിയിലായി. ഫോര്‍‌ട്ടുകൊച്ചി ഇഎസ്‌ഐ കുരിശിങ്കല്‍ ഫ്രാന്‍സിസ് (37), പള്ളുരുത്തി കൊട്ടേക്കാട് അജീഷ് (34), മുണ്ടംവേലി സൗദി പുന്നക്കല്‍ ഫ്രാന്‍സിസ് സേവ്യര്‍ ഫെര്‍ണാണ്ടസ് (35) എന്നിവരെയാണ് ഡാന്‍സാഫ് ടീം പിടികൂടിയത്. ഇവരില്‍ നിന്നും 28.40 ഗ്രാം എംഡിഎംഎ പോലീസ് പിടിച്ചെടുത്തു. പ്രതികള്‍ ഇടപാടുകാരെ നേരില്‍ കാണാത്ത രീതിയില്‍ ഓട്ടോറിക്ഷയില്‍ കറങ്ങിനടന്നാണ് ലഹരി കച്ചവടം നടത്തിയിരുന്നത്. ദിവസങ്ങളോളം നിരീക്ഷിച്ചാണ് ഡാന്‍സാഫ് ടീം പ്രതികളെ പിടികൂടിയത്.

നഗരസഭയിലെ കൈക്കൂലി; കോൺഗ്രസ് പ്രവർത്തകർ സോണൽ ഓഫീസ് ഉപരോധിച്ചു

പള്ളുരുത്തി: കൈക്കൂലി വാങ്ങുന്നതിനിടെ കൊച്ചി നഗരസഭ പള്ളുരുത്തി സോണൽ റവന്യു വിഭാഗം ക്ലർക്ക് പണവുമായി വിജിലൻസിന്‍റെ പിടിയിലായ സംഭവത്തിൽ കുറ്റക്കാരായ മുഴുവൻ ഉദ്യോഗസ്ഥർക്കെതിരെയും നടപടി വേണമെന്നാവശ്യപ്പെട്ട് നഗരസഭാ ഓഫീസിലേക്ക് ഉപരോധ സമരവുമായെത്തിയ കോൺഗ്രസ് പ്രവർത്തകരും പോലീസും തമ്മിൽ സംഘർഷം. സ്ത്രീകൾ അടക്കമുള്ള പ്രവർത്തകർ നഗരസഭ ഓഫീസിന് മുമ്പിൽ കുത്തിയിരുന്ന് പ്രതിഷേധിച്ചതോടെ കൂടുതൽ പോലീസ് സ്ഥലത്തെത്തി. ഉപരോധത്തിനിടെ ഓഫീസിലേക്ക് തള്ളിക്കയറുവാൻ ശ്രമിച്ച കോൺഗ്രസ്‌ പ്രവർത്തകരും പോലീസും തമ്മിൽ ഉന്തും തള്ളുമുണ്ടായി. ഇതിനിടയിൽ കൗൺസിലർ അഭിലാഷ് തോപ്പിൽ, കെപിസിസി സെക്രട്ടറി തമ്പി സുബ്രഹ്മണ്യൻ, ഡിസിസി സെക്രട്ടറി എൻ.ആർ.ശ്രീകുമാർ, ബ്ലോക്ക് പ്രസിഡന്‍റ് പി.പി.ജേക്കബ്, ഷിജു ചിറ്റേപ്പള്ളി അടക്കമുള്ള ഇരുപതോളം പേരെ പോലീസ് അറസ്റ്റ് ചെയ്തു നീക്കി. പോലീസുമായുള്ള പിടിവലിയിൽ ന്യൂനപക്ഷസെൽ ജില്ലാ സെക്രട്ടറി ടി.എ.സിയാദ് കുഴഞ്ഞു വീണതിനെ തുടർന്ന് ആശുപത്രിയിൽ പ്രവേശിപ്പിച്ചു.

ഫ്രാൻസിസ്കൻ അൽമായ സഭ റീജൺ കൗൺസിൽ സമാപിച്ചു

കൊച്ചി: വരാപ്പുഴ അതിരൂപത ഫ്രാൻസിസ്കൻ അൽമായ സഭ റീജൺ കൗൺസിൽ യോഗം മൂലമ്പിള്ളി പള്ളി വികാരി ഫാ. അഗസ്റ്റിൻ ഐസക് ഉദ്ഘാടനം ചെയ്തു. റീജൺ മിനിസ്റ്റർ അലക്സ് ആട്ടുള്ളിൽ അധ്യക്ഷത വഹിച്ചു. ഫാ. ബിനോയ് ലീൻ അനുഗ്രഹ പ്രഭാഷണം നടത്തി. പി.കെ. ജോസഫ്, മാർട്ടിൻ തപ്പലോടത്ത്, ജോൺ പുളിക്കൽ, ജോർജ് തുണ്ടിപറമ്പിൽ, ആന്‍റണി റാഫേൽ നമ്പുരത്ത് എന്നിവർ പ്രസംഗിച്ചു.

ആലുവ-പറവൂർ കെഎസ്ആർടിസി റോഡിൽ അജ്ഞാതസംഘത്തിന്‍റെ ആക്രമണം നടക്കുന്നതായി നാട്ടുകാർ

ആലങ്ങാട് : ആലുവ-പറവൂർ കെഎസ്ആർടിസി റോഡിൽ അജ്ഞാതസംഘം രാത്രിയിൽ സഞ്ചരിക്കുന്നവർക്കെതിരേ ആക്രമണം നടത്തുന്നതായി വ്യാപക പ്രചാരണം. സാമൂഹിക മാധ്യമങ്ങളിലാണ് ഇത്തരത്തിൽ വ്യാപക പ്രചരണം നടക്കുന്നത്. എന്നാൽ ആക്രമണം നടന്നതായി ആരും ഇതുവരെ പരാതിപ്പെട്ടിട്ടില്ല. ആലുവ -പറവൂർ റോഡിലെ മറിയപ്പടി, വലയോടം, പാലയ്ക്കൽ എന്നിവിടങ്ങളിലാണു അജ്ഞാത സംഘം വാഹനം തടഞ്ഞു നിർത്തിയുള്ള ആക്രമണം നടത്തിയതായി വാർത്ത പരന്നത്. ചൊവ്വാഴ്ച രാത്രി അങ്കമാലി ഭാഗത്തെ ആശുപത്രിയിലേക്കു കാറിൽ പോയ സംഘത്തിനെ മൂന്നംഗ അജ്ഞാത സംഘം ആക്രമിക്കാൻ ശ്രമിച്ചതായി പറയുന്നു. കാർ കൈകാണിച്ചു നിർത്തിയ ശേഷമാണ് ആക്രമിക്കാനുള്ള ശ്രമം നടന്നതെന്നാണ് പറയപ്പെടുന്നത്. എന്നാൽ ഇക്കാര്യത്തിൽ ഇതുവരെ ആരും പരാതി നൽകിയിട്ടില്ല. ആലങ്ങാട് പൊലീസ് സ്റ്റേഷൻ പരിധിയിൽ കഴിഞ്ഞ ഒരു മാസത്തിനിടെ മാത്രം അഞ്ച് മോഷണങ്ങളാണു നടന്നിട്ടുള്ളത്. കഴിഞ്ഞ ഒരു വർഷത്തിനിടെ നിരവധി മോഷണങ്ങൾ നടന്നിട്ടും ഭൂരിഭാഗം കേസിലും ആലങ്ങാട് പൊലീസിനു മോഷ്ടാക്കളെ പിടികൂടാൻ സാധിച്ചിട്ടില്ല. ലഹരിസംഘങ്ങളുടെ ശല്യമുള്ളതിനാൽ പലരും ഭയന്നിട്ടു രാത്രി പുറത്തിറങ്ങാറില്ല. ഈ അവസരം മുതലെടുത്താണു അജ്ഞാത സംഘം കറങ്ങി നടക്കുന്നതെന്നാണു നാട്ടുകാർ പറയുന്നത്.സംഭവം ശ്രദ്ധയിൽപ്പെട്ടെന്നും പ്രദേശത്തു പരിശോധന നടത്തിയെന്നും പൊലീസ് പറഞ്ഞു. എന്നാൽ സാമൂഹിക മാധ്യമങ്ങളിലൂടെ പ്രചരിക്കുന്ന വിവരങ്ങൾ കൃത്യമല്ലെന്നാണ് ആലങ്ങാട് പോലീസ് പറയുന്നത്.

ഇന്ദിരാഗാന്ധി കോ-ഓപ്പറേറ്റീവ് ആശുപത്രിയില്‍ ഡിജിറ്റല്‍ റേഡിയോഗ്രഫി

കൊച്ചി: കടവന്ത്ര ഇന്ദിരാഗാന്ധി കോ-ഓപ്പറേറ്റീവ് ആശുപത്രിയില്‍ റോട്ടറി ക്ലബ് ഓഫ് കൊച്ചിന്‍ ഡൗണ്‍ ടൗണ്‍ സംഭാവന ചെയ്ത എക്സ് റേ യൂണിറ്റ് ഉള്‍പ്പെടെയുള്ള ഡിജിറ്റല്‍ റേഡിയോഗ്രഫി സംവിധാനം റോട്ടറി ഡിസ്ട്രിക്ട് 3205 ഗവര്‍ണര്‍ ഡോ. ജി. എന്‍ രമേഷ് ഉദ്ഘാടനം ചെയ്തു. റോട്ടറി ക്ലബ്ബ് ഓഫ് കൊച്ചിന്‍ ഡൗണ്‍ ടൗണ്‍ പ്രസിഡന്‍റ് സൂസി പോള്‍ അധ്യക്ഷത വഹിച്ചു. ആശുപത്രി സെക്രട്ടറി അജയ് തറയില്‍, പ്രസിഡന്‍റ് എം.ഒ. ജോണ്‍, ഡിജിഎന്‍ ആര്‍. ജയശങ്കര്‍, റോട്ടറി മുന്‍ ഗവര്‍ണര്‍ അഡ്വ. സുന്ദര വടിവേലു തുടങ്ങിയവര്‍ പ്രസംഗിച്ചു.

ദേശീയ പോഷകാഹാര മാസാചരണം സംഘടിപ്പിച്ചു

കൊച്ചി: ലൂര്‍ദ് ആശുപത്രിയില്‍ ദേശീയ പോഷകാഹാര മാസാചരണത്തിന്‍റെ ഭാഗമായി ബോധവത്കരണ പരിപാടി സംഘടിപ്പിച്ചു. ലൂര്‍ദ് ഹോസ്പിറ്റല്‍ അസോസിയേറ്റ് ഡയറക്ടര്‍ ഫാ. വിമല്‍ ഫ്രാന്‍സിസ് ഉദ്ഘാടനം ചെയ്തു. ക്രിട്ടിക്കല്‍ കെയര്‍ വിഭാഗം സീനിയര്‍ കണ്‍സള്‍ട്ന്‍റ് ഡോ. ഇന്ദു രാജീവ് ക്ലാസെടുത്തു. എന്‍ഡക്രൈനോളജി വിഭാഗം കണ്‍സട്ടന്‍റ് ഡോ. നവ്യ മേരി കുര്യന്‍ പോളിസിസ്റ്റിക് ഓവറി സിന്‍ഡ്രോം എന്ന രോഗത്തെക്കുറിച്ച് ബോധവത്കരണം നടത്തി. പരിപാടിയുടെ ഭാഗമായി നടത്തിയ ക്വിസ് മത്സര വിജയികള്‍ക്ക് ലൂര്‍ദ് ആശുപത്രി അസിസ്റ്റന്‍റ് ഡയറക്ടര്‍ ഫാ. സെബി വിക്ടര്‍ സമ്മാനങ്ങള്‍ വിതരണം ചെയ്തു. ലൂര്‍ദ് ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സ് ഡയറക്ടര്‍ ഫാ. ജോര്‍ജ് സെക്വീര, ഫാ. ആന്‍റണി റാഫേല്‍ കോമരംചാത്ത്, ചീഫ് സയറ്റീഷ്യന്‍ ശില്പ ചന്ദ്രന്‍, സീനിയര്‍ ഡയറ്റീഷ്യന്‍ അനറ്റ് ജേക്കബ് തുടങ്ങിയവര്‍ പങ്കെടുത്തു.

ഹാർട്ട് കെയർ ഫൗണ്ടേഷൻ ഹൃദയസംഗമം 28ന്

കൊച്ചി: ലോക ഹൃദയദിനത്തോടനുബന്ധിച്ചു ഹാര്‍ട്ട് കെയര്‍ ഫൗണ്ടേഷന്‍ സംഘടിപ്പിക്കുന്ന ഹൃദയ സംഗമം 28 ന് എറണാകുളം ലിസി ആശുപത്രി ഓഡിറ്റോറിയത്തില്‍ നടക്കും. ഹൃദയ ശസ്ത്രക്രിയയ്ക്കു വിധേയരായ വ്യക്തികളുടെയും കുടുംബാംഗങ്ങളുടെയും ഒത്തുചേരലായ ഹൃദയ സംഗമം ലിസി ആശുപത്രി, റോട്ടറി ക്ലബ് ഓഫ് കൊച്ചിന്‍ ഗ്ലോബല്‍ എന്നിവരുമായി സഹകരിച്ചാണ് സംഘടിപ്പിക്കുന്നത്. രാവിലെ 11ന് ഉദ്ഘാടന ചടങ്ങില്‍ സൗത്ത് ഇന്ത്യന്‍ ബാങ്ക് സ്വതന്ത്ര ഡയറക്ടര്‍ വി.ജെ. കുര്യന്‍ മുഖ്യാതിഥിയാകും. സംഗമത്തിന്‍റെ ഭാഗമായി ബോധവത്കരണ ക്ലാസുകളും വിദഗ്ധരുമായി സംവദിക്കാനുള്ള അവസരവും ഒരുക്കിയിട്ടുണ്ട്. ഫൗണ്ടേഷന്‍ ചെയര്‍മാന്‍ ഡോ. ജോസ് ചാക്കോ പെരിയപ്പുറം, ലിസി ഡയറക്ടര്‍ റവ. ഡോ. പോള്‍ കരേടന്‍, ഫൗണ്ടേഷന്‍ ട്രസ്റ്റി ഡോ. ജേക്കബ് ഏബ്രഹാം, സെക്രട്ടറി രാജു കണ്ണമ്പുഴ, കൊച്ചി റോട്ടറി ക്ലബ് പ്രസിഡന്‍റ് സെബാസ്റ്റ്യന്‍ ജോസഫ്, മെഡിക്കല്‍ പാനല്‍ ചെയര്‍മാന്‍ ഡോ. റോണി മാത്യു കടവില്‍ എന്നിവര്‍ പങ്കെടുക്കും

വൈപ്പിനില്‍ ടൂറിസം ദിനാചരണം 27ന്

കൊച്ചി: ഡിടിപിസിയുടെയും കേന്ദ്ര ടൂറിസം മന്ത്രാലയത്തിന്‍റെയും സഹകരണത്തോടെ ലോക ടൂറിസം ദിനം വിപുലമായി ആഘോഷിക്കുമെന്ന് കെ.എന്‍. ഉണ്ണിക്കൃഷ്ണന്‍ എംഎല്‍എ പത്രസമ്മേളനത്തില്‍ പറഞ്ഞു. 27ന് രാവിലെ 8.30ന് ബോള്‍ഗാട്ടി പാലസില്‍ വീഡിയോ അവതരണങ്ങളും കള്‍ച്ചറല്‍ പ്രോഗ്രാമുകളും ഉണ്ടാകും. 11ന് കടമക്കുടി കാഴ്ചകള്‍ക്കായി പുറപ്പെടുന്ന ബോട്ട്‌യാത്ര കെ.എന്‍. ഉണ്ണിക്കൃഷ്ണന്‍ എംഎല്‍എ ഫ്ലാഗ് ഓഫ് ചെയ്യും. ബോള്‍ഗാട്ടി പാലസില്‍ 2.30നു ടൂറിസവും നിലനില്‍ക്കുന്ന പരിണാമങ്ങളും എന്ന വിഷയത്തില്‍ ചര്‍ച്ച നടക്കും. 3.30ന് സന്തോഷ് ജോര്‍ജ് കുളങ്ങരയുമായി നടക്കുന്ന ഫയര്‍സൈഡ് ചാറ്റില്‍ സംരംഭകരും വിദഗ്ധരും പങ്കെടുക്കും. തുടര്‍ന്ന് സമാപന ചടങ്ങ് സന്തോഷ് ജോര്‍ജ് കുളങ്ങര ഉദ്ഘാടനം ചെയ്യും. കെ.ജെ. മാക്‌സി എംഎല്‍എ അധ്യക്ഷത വഹിക്കും. കളക്ടര്‍ ജി. പ്രിയങ്ക മുഖ്യപ്രഭാഷണം നടത്തും. ചടങ്ങില്‍ മാധ്യമപ്രവര്‍ത്തകന്‍ കെ.വി. രാജശേഖരനും ബോട്ട് ബില്‍ഡര്‍ ആന്‍റണിക്കും ഡിടിപിസിയുടെ പുരസ്‌കാരം കെ.എന്‍. ഉണ്ണിക്കൃഷ്ണന്‍ എംഎല്‍എ സമ്മാനിക്കും. തുടര്‍ന്ന് ഫ്ലാഷ് മോബ്, നായരമ്പലം ത്രയംബകം ടീമിന്‍റെ കലാവതരണം, ശാന്തിപ്രിയയുടെ ബാവുള്‍ സംഗീതം, ഇരുള നൃത്തം എന്നിവ ഉണ്ടാകും.

ടൂറിസം ദിനാഘോഷം: കണ്ടൽ സംരക്ഷണ സന്ദേശവുമായി കയാക്കിംഗ് സംഘം

മരട്: ലോക ടൂറിസം ദിനാഘോഷത്തിന്‍റെ ഭാഗമായി വളന്തകാട് ദ്വീപിൽ, കൊച്ചി മാംഗ്രൂവ് കയാക്കിംഗും അൽ അമീൻ കോളേജ് ടൂറിസം വിഭാഗവും ഡിറ്റിപിസിയും സംയുക്തമായി കണ്ടൽച്ചെടി സംരക്ഷണ സന്ദേശവുമായി കയാക്കിംഗ് സംഘടിപ്പിച്ചു. മരട് നഗരസഭാ വൈസ് ചെയർപേഴ്സൻ അഡ്വ. രശ്മി സനിൽ ഉദ്ഘാടനം ചെയ്തു. എടത്തല അൽ-അമീൻ കോളജ് ടൂറിസം വിഭാഗം മേധാവി പ്രഫ. ജിസ് തെരേസാസ് ടൂറിസവും സുസ്ഥിര പരിവർത്തനവും തമ്മിലുള്ള ബന്ധത്തെക്കുറിച്ചും വളന്തകാട് പോലുള്ള സ്ഥലങ്ങൾ ഉത്തരവാദിത്തപരമായ ടൂറിസത്തിനും പരിസ്ഥിതി സൗഹൃദ യാത്രകൾക്കും ഏറ്റവും അനുയോജ്യമാണെന്നും പറഞ്ഞു. വളന്തകാടിലെ വിനോദസഞ്ചാര സാധ്യതകളെക്കുറിച്ച് കൊച്ചി മാംഗ്രൂവ് കയാക്കിംഗിലെ എൻ.എസ്.സൈഫുദീൻ സംസാരിച്ചു. ടൂറിസം വിഭാഗം അധ്യാപകരും വിദ്യാർഥികളുമുൾപ്പെടെ 80 പേർ പങ്കെടുത്ത പരിപാടിയെ പ്രദേശവാസികളും വിനോദ സഞ്ചാര പ്രവർത്തകരും ആവേശത്തോടെയാണ് സ്വീകരിച്ചത്.

സിഐഎസ്‌സിഇ നാഷണല്‍ ഗെയിംസിൽ അഭിമാനനേട്ടവുമായി ജ്ഞാനോദയ സ്കൂൾ

കൊച്ചി: സിഐഎസ്‌സിഇ നാഷണല്‍ സ്‌പോര്‍ട്‌സ് ആന്‍ഡ് ഗെയിംസില്‍ മെഡലുകൾ നേടി ചെങ്ങല്‍ ജ്ഞാനോദയ സെന്‍ട്രല്‍ സ്‌കൂൾ. കര്‍ണാടകയില്‍ നടന്ന കരാട്ടെ ചാമ്പ്യന്‍ഷിപ്പില്‍ സ്‌കൂളിലെ ആല്‍ഫിന്‍ ഡൈസന്‍, ടി.എസ് ആന്‍മേരി എന്നിവര്‍ വെങ്കല മെഡല്‍ കരസ്ഥമാക്കി. ആല്‍ഫിന്‍ ഡൈസന്‍ ആണ്‍കുട്ടികളുടെ അണ്ടര്‍ 19 വിഭാഗത്തിലും ടി.എസ്. ആന്‍മേരി പെണ്‍കുട്ടികളുടെ അണ്ടര്‍ 17 വിഭാഗത്തിലുമാണ് മെഡല്‍ നേടിയത്. മാര്‍ അത്തനേഷ്യസ് ഇന്‍റര്‍നാഷണല്‍ സ്‌കൂളില്‍ നടന്ന നാഷണല്‍ ലെവല്‍ ആര്‍ച്ചറി മത്സരത്തില്‍ പെണ്‍കുട്ടികളുടെ അണ്ടര്‍ 14 വിഭാഗത്തില്‍ നീരജ രജിത്ത് ഇന്ത്യന്‍ വിഭാഗത്തില്‍ രണ്ടാം സ്ഥാനവും ഓവറോള്‍ മൂന്നാം സ്ഥാനവും നേടി. നന്ദിത റെജിന്‍ ഇന്ത്യന്‍ വിഭാഗത്തില്‍ മൂന്നാം സ്ഥാനവും ഓവറോള്‍ നാലാം സ്ഥാനവും കരസ്ഥമാക്കി. ആണ്‍കുട്ടികളുടെ അണ്ടര്‍ 17 വിഭാഗത്തില്‍ ബെനഡിക്ട് പാപ്പു പോള്‍ കോമ്പൗണ്ട് റൗണ്ടില്‍ നാലാം സ്ഥാനം നേടി. മൂന്നു പേരും എസ്ജിഎഫ്‌ഐയിലേക്ക് തെരഞ്ഞെടുക്കപ്പെട്ടിട്ടുണ്ട്.

ജിഎസ്ടി നികുതിയിളവ്; ശില്പശാല സംഘടിപ്പിച്ചു

അങ്കമാലി: ജി എസ് ടി കൗൺസിൽ തീരുമാന പ്രകാരമുള്ള നികുതി മാറ്റങ്ങളുമായി ബന്ധപ്പെട്ട് വ്യാപാരികൾക്കായി ശില്പശാല സംഘടിപ്പിച്ചു. കേരള ടാക്സ് പ്രഫഷണൽസ് അസോസിയേഷന്‍റെ നേതൃത്വത്തിൽ നടന്ന ശില്പശാല പ്രസിഡന്‍റ് സാൻജോ ജോസഫ് ഉദ്ഘാടനം നിർവഹിച്ചു. ശില്പശാലയിൽ ടാക്സ് മേഖലയിലുള്ളവർ വിവിധ സംശയങ്ങളിൽ മറുപടി നല്കി. എബി കുര്യക്കോസ്, കെ.ഒ. ബാസ്റ്റിൻ, പോൾ ജോസഫ്, സി.എൽ. ബേബി , സ്മിന്‍റോ തളിയൻ, രഞ്ജിത്ത് രവീന്ദ്രൻ, ജിബിഷ് എന്നിവർ പ്രസംഗിച്ചു.

ചന്തിരൂർ സെന്‍റ് മേരീസ് പള്ളിയിൽ തിരുനാൾ

അരൂര്‍: ചന്തിരൂര്‍ സെന്‍റ് മേരീസ് പള്ളിയിലെ വിശുദ്ധ കാരുണ്യ മാതാവിന്‍റെ 46-ാമത്കൊന്പ്രേരിയ തിരുനാളിന് തുടക്കമായി. ഫാ. ജോസഫ് കൊരുത്തേടത്ത് കൊടിയേറ്റി. 28നാണ് തിരുനാള്‍. അന്ന് രാവിലെ ഒന്‍പതിന് മാതാവിന്‍റെ തിരുസ്വരൂപപ്രയാണം, വൈകിട്ട് നാലിന് ആഘോഷമായ തിരുനാള്‍ സമൂഹദിവ്യബലി. രാത്രി എട്ടിന് തിരുനാള്‍ സമാപന കുര്‍ബാന സമര്‍പ്പണം, തുടര്‍ന്ന് കൊടിയിറക്കം.

മാലിന്യ സംസ്കരണ പ്ലാന്‍റിലേക്കുള്ള വഴിയടച്ച സംഭവം : വീണ്ടും പോലീസ് സഹായം തേടി ആലുവ നഗരസഭ

ആലുവ: പാലസ് റോഡിൽ പെരിയാർ തീരത്ത് പ്രവർത്തിക്കുന്ന ആലുവ നഗരസഭയുടെ വേസ്റ്റ് വാട്ടർ ട്രീറ്റ്‌മെന്‍റ് പ്ലാന്‍റിലേക്ക് പോകാനുള്ള വഴി അടച്ചിട്ടത് തുറന്നുതരണം എന്നാവശ്യപ്പെട്ട് ആലുവ നഗരസഭ പോലീസിൽ വീണ്ടും പരാതി നൽകി. സമീപത്തെ അദ്വൈതാശ്രമം മാനേജ്‌മെന്‍റുമായി തർക്കത്തെ തുടർന്ന് കഴിഞ്ഞ 14ന് ഇവിടെ ഗേറ്റ് സ്ഥാപിച്ച് പൂട്ടിയിരുന്നു. അദ്വൈതാശ്രമത്തിലും പരിസരത്തും ചതയദിനത്തോടനുബന്ധിച്ച് സ്ഥാപിച്ച കൊ‌ടികൾ നഗരസഭാ ഉദ്യോഗസ്ഥർ നീക്കം ചെയ്തെന്നാരോപിച്ചാണ് ഇരുവരും തമ്മിൽ ഉടക്കിയത്. തുടർന്നാണ് നഗരസഭയുടെ പ്ലാന്‍റിലേക്കുള്ള വഴി അദ്വൈതാശ്രമം അധികൃതർ ഗേറ്റ് സ്ഥാപിച്ച് പൂട്ടിയത്. അദ്വൈതാശ്രമം നേരത്തെ സൗജന്യമായി നൽകിയ സ്ഥലത്താണ് വേസ്റ്റ് വാട്ടർ ട്രീറ്റ്മെന്‍റ് പ്ലാന്‍റും അതിലേക്കുള്ള വഴിയും സ്ഥിതി ചെയ്യുന്നത്. എന്നാൽ ഈ സ്ഥലത്തിന്‍റെ കരമടയ്ക്കുന്നത് ഇപ്പോഴും തങ്ങളാണെന്ന് അദ്വൈതാശ്രമം അധികൃതർ അവകാശപ്പെടുന്നു. പ്ലാന്‍റ് അറ്റകുറ്റപ്പണി നടത്താനായി എത്തുന്ന ജീവനക്കാർക്ക് പ്രവേശിക്കാൻ സഹായിക്കണമെന്നാണ് പോലീസിനോട് ആലുവ നഗരസഭ ആവശ്യപ്പെട്ടിരിക്കുന്നത്. കഴിഞ്ഞ 17ന് ഇതേ പരാതി ആലുവ നഗരസഭ നൽകിയിരുന്നു. നാഷണൽ ഗ്രീൻ ട്രൈബ്യൂണൽ യുദ്ധകാലാടിസ്ഥാനത്തിൽ പ്ലാന്‍റിന്‍റെ അറ്റകുറ്റപ്പണി തീർക്കുവാൻ ആവശ്യപ്പെട്ടിട്ടുണ്ട്. ഇത് എത്രയും വേഗം പൂർത്തിയാക്കണമെന്നാണ് നഗരസഭയ്ക്ക് ലഭിച്ചിരിക്കുന്ന നിർദേശം. അതിനാൽ തന്നെ അടിയന്തിരമായി പ്ലാന്‍റിന്‍റെ പുനരുദ്ധാരണ പ്രവർത്തികൾ പൂർത്തീകരിക്കാൻ ഇടപെടണമെന്നാണ് പോലീസിനോട് നഗരസഭ വീണ്ടും ആവശ്യപ്പെട്ടിരിക്കുന്നത്.

റോ റോ സര്‍വീസ് നഷ്ടത്തിലെന്ന് പ്രതിപക്ഷം

കൊച്ചി: കൊച്ചി കോര്‍പറേഷന്‍റെ ഉടമസ്ഥതയിലുള്ള സേതു സാഗര്‍ റോറോ ജങ്കാറിന്‍റെയും പാസഞ്ചര്‍ ബോട്ടിന്‍റെയും സര്‍വീസ് നഷ്ടത്തിലാണെന്നാണ് കണക്കുകള്‍ വ്യക്തമാക്കുന്നതെന്ന് പ്രതിപക്ഷം. കെഎസ്‌ഐഎന്‍സി നഗരസഭയ്ക്ക് സമര്‍പ്പിച്ച കണക്കിലാണ് 10 ലക്ഷം രൂപയുടെ നഷ്ടത്തിലാണ് സര്‍വീസ് നടത്തുന്നതെന്ന് കാണിച്ചിരിക്കുന്നത്. സംയുക്ത സംരംഭം ആയതിനാല്‍ നഷ്ടത്തിന്‍റെ പകുതി അഞ്ചു ലക്ഷം കോര്‍പറേഷന്‍ നല്‍കണമെന്ന് കരാര്‍ സ്ഥാപനം ആവശ്യപ്പെട്ടിരിക്കുകയാണെന്നും പ്രതിപക്ഷ കക്ഷി നേതാവ് അഡ്വ. ആന്‍റണി കുരിത്തറ, പാര്‍ലമെന്‍ററി പാര്‍ട്ടി സെക്രട്ടറി എം.ജി. അരിസ്‌റ്റോട്ടില്‍ എന്നിവര്‍ പറഞ്ഞു.

വല്ലാർപാടം തിരുനാൾ സമാപിച്ചു

കൊച്ചി: വല്ലാര്‍പാടം ബസിലിക്കയില്‍ പരിശുദ്ധ വല്ലാര്‍പാടത്തമ്മയുടെ തിരുനാളിന് ഭക്തിസാന്ദ്രമായ സമാപനം. ഇന്നലെ രാവിലെ 10ന് പൊന്തിഫിക്കല്‍ ദിവ്യബലിയില്‍ വരാപ്പുഴ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍ മുഖ്യകാര്‍മികത്വം വഹിച്ചു. ഫാ.ഷെല്‍ട്ടണ്‍ വചനസന്ദേശം നല്‍കി. പള്ളിവീട്ടില്‍ മീനാക്ഷിയമ്മയുടെ പിന്‍തലമുറക്കാര്‍ പരമ്പരാഗതമായി ചെയ്തു വരുന്ന മോരു വിതരണത്തിന്‍റെ ആശീര്‍വാദം ആര്‍ച്ച്ബിഷപ് നിര്‍വഹിച്ചു. തുടര്‍ന്ന് പാലിയത്ത് വലിയച്ചനായ രാജഗോപാലനച്ചനും പാലിയം ട്രസ്റ്റ് മാനേജര്‍ പാലിയത്ത് വേണുഗോപാലനച്ചനും ചേര്‍ന്ന് അള്‍ത്താരയിലെ കെടാവിളക്കില്‍ എണ്ണ പകര്‍ന്ന് തിരിതെളിച്ചു. തിരുക്കര്‍മങ്ങള്‍ക്കു ശേഷം ആഘോഷമായ പ്രദക്ഷിണം ഉണ്ടായിരുന്നു. ഒക്ടോബര്‍ ഒന്നിനാണ് എട്ടാമിടം. പളളിപ്പറമ്പില്‍ ആന്‍റണി ഗൊണ്‍സാല്‍വസാണ് ഈ വര്‍ഷത്തെ പ്രസുദേന്തി. ബസിലിക്ക റെക്ടര്‍ ഫാ. ജെറോം ചമ്മിണിക്കോടത്ത്, സഹവികാരിമാരായ ഫാ. ആന്‍റണി ഷൈന്‍ കാട്ടുപ്പറമ്പില്‍, ഫാ. ജിബു വര്‍ഗീസ് തൈത്തറ, ഫാ. മിക്‌സണ്‍ റാഫേല്‍ പുത്തന്‍ പറമ്പില്‍ എന്നിവരാണ് തിരുനാളാഘോഷ പരിപാടികള്‍ക്ക് നേതൃത്വം നല്കിയത്.

ചെങ്ങമനാട് പട്ടാപ്പകൽ വീട് കുത്തിത്തുറന്ന് അലമാരയിൽ സൂക്ഷിച്ച പണം കവർന്നു

നെടുമ്പാശേരി: പട്ടാപ്പകൽ വീട് കുത്തിത്തുറന്ന് അലമാരയിൽ സൂക്ഷിച്ചിരുന്ന പണം കവർന്നു. ചെങ്ങമനാട് പുതുവാശേരി കപ്പേളക്ക് സമീപം പള്ളിപ്പറമ്പിൽ ബിനുവിന്‍റെ വീട്ടിലാണ് മോഷണം നടന്നത്. അലമാരയിലെ ബാഗിൽ സൂക്ഷിച്ചിരുന്ന 73,500 രൂപയാണ് മോഷണം പോയത്. ബിനുവും കുടുംബവും പള്ളിയിൽ പോയ സമയത്തായിരുന്നു മോഷണം. ബിനുവും ഭാര്യയും ഹൈസ്കൂൾ വിദ്യാർഥികളായ രണ്ട് മക്കളും ഒരു കിലോമീറ്ററോളം മാത്രം അകലത്തുള്ള പള്ളിയിലാണ് പോയത്. മടങ്ങി വന്ന ശേഷം ഭാര്യ ചിട്ടിയിൽ അടയ്ക്കാൻ പണം എടുക്കാൻ നോക്കിയപ്പോഴാണ് ബാഗിൽനിന്ന് പണം നഷ്ടമായ വിവരം അറിയുന്നത്. പള്ളിയിൽ പോയപ്പോൾ വാതിൽ പൂട്ടി പതിവുപോലെ താക്കോൽ ചവിട്ടിക്കു താഴെയാണ് സൂക്ഷിച്ചിരുന്നത്. വാതിലിന്‍റെ താക്കോലും അലമാരയുടെ താക്കോലും ബാഗും യഥാസ്ഥാനത്തുണ്ടായിരുന്നുവെന്നും പറയുന്നു. താഴ് തകർത്താണ് മോഷ്ടാവ് വീടിനകത്ത് കയറിയത്. കഴിഞ്ഞ ദിവസം ബാങ്കിൽ നിന്നെടുത്ത 75,000 രൂപയുടെ 500 ന്‍റെ കെട്ടിൽ നിന്ന് പള്ളിയിൽ പോയപ്പോൾ 1500 രൂപ എടുത്തിരുന്നു. ബാക്കി തുക ബാഗിൽ സൂക്ഷിച്ച ശേഷമാണ് പള്ളിയിൽ പോയതെന്നാണ് ബിനു പറയുന്നത്. ചെങ്ങമനാട് സ്റ്റേഷനിൽ നൽകിയ പരാതിയെത്തുടർന്ന് പോലീസ് സ്ഥലത്തെത്തി പരിശോധന നടത്തി അന്വേഷണം ആരംഭിച്ചു.

കേസന്വേഷണത്തിനിടെ എക്സൈസ് ഉദ്യോഗസ്ഥർക്ക് മർദനം : ഒരു കുടുംബത്തിലെ അഞ്ച് പേർക്കെതിരേ കേസ്

വൈപ്പിൻ: സിവിൽ ഡ്രസിൽ അന്വേഷണത്തിനെത്തിയ എക്സൈസ് ഉദ്യോഗസ്ഥർക്ക് മർദനം. പരാതിയെ തുടർന്ന് ഒരു കുടുംബത്തിലെ മാതാപിതാക്കളും മൂന്നു മക്കളുമുൾപ്പെടെ അഞ്ചു പേർക്കെതിരേ ഞാറക്കൽ പോലീസ് കേസെടുത്തു. എളങ്കുന്നപ്പുഴ പെരുമാൾപടി സ്വദേശി ആകാശ്, അച്ഛൻ, അമ്മ, രണ്ടു സഹോദരങ്ങൾ എന്നിവർക്കെതിരെ മർദനം, ഔദ്യോഗിക കൃത്യനിർവഹണം തടയൽ എന്നീ വകുപ്പുകൾ ചേർത്താണ് കേസെടുത്തിട്ടുള്ളത്. ഞാറക്കൽ എക്സൈസ് ഓഫീസിലെ ഉദ്യോഗസ്ഥരായ ചെറായി സ്വദേശി കൈലാസൻ - 38 , ഞാറക്കൽ സ്വദേശി ഭരത് -30 എന്നിവർക്കാണ് മർദനമേറ്റത്. കഴിഞ്ഞ ദിവസം പകൽ പെരുമാൾപടി പടിഞ്ഞാറ് കുറ്റാരോപിതരുടെ വീട്ടുവളപ്പിലാണ് സംഭവം. മേലിൽ ഈ ഭാഗത്തേക്ക് വന്നാൽ വകവരുത്തുമെന്ന് ഭീഷണിപ്പെടുത്തിയതായും ഉദ്യോഗസ്ഥർ പരാതിയിൽ പറയുന്നു . അതിനിടെ ഉദ്യോഗസ്ഥർ വീട്ടുകാരെ മർദിച്ചതായും പരാതിയുണ്ട്.

ടോറസുകൾ തടഞ്ഞ് സമരം : ലോറിയുടെ ചില്ല് തകർന്നു; ചെറായിയിൽ സംഘർഷം

ചെറായി: രാത്രികാലങ്ങളിൽ വൈപ്പിൻ സംസ്ഥാനപാതയിലൂടെയുള്ള ടോറസ്, കണ്ടെയ്നർ ലോറികളുടെ മരണപ്പാച്ചിൽ അവസാനിപ്പിക്കാൻ പോലീസോ, മോട്ടോർ വാഹന വകുപ്പോ നടപടി എടുക്കാത്തതിൽ പ്രതിഷേധിച്ച് സിപിഎമ്മിന്‍റെ നേതൃത്വത്തിൽ നാട്ടുകാർ ടോറസുകൾ തടഞ്ഞിട്ടു. ബഹളങ്ങൾക്കിടയിൽ ഒരു ടോറസ് ലോറിയുടെ ചില്ല് തകർന്നത് ചെറിയ തോതിൽ സംഘർഷത്തിനും വഴിവച്ചു. കഴിഞ്ഞ ദിവസം രാത്രി ഒമ്പതരയോടെ ചെറായി ദേവസ്വം നടയിലായിരുന്നു സംഭവം. സിപിഎം ഏരിയ സെക്രട്ടറി എ.പി. പ്രിനിൽ, ഏരിയ കമ്മിറ്റി അംഗങ്ങളായ കെ.കെ. ജോഷി, പി.ബി. സജീവൻ, ഇ.സി. ശിവദാസ് എന്നിവരുടെ നേതൃത്വത്തിൽ നൂറോളം പേരാണ് സമരത്തിനെത്തിയത്. കണ്ടെയ്‌നർ ലോറികൾ കണ്ടെയ്‌നർ റോഡിലൂടെ മാത്രം പോവുക. സംസ്ഥാനപാതയിലൂടെ പോകുന്ന ടോറസുകളും ടിപ്പറുകളും കണ്ടെയ്നറുകളും നിയമപ്രകാരമുള്ള നിബന്ധനകൾ പാലിക്കുക. നിയമം ലംഘിക്കുന്നവർക്കെതിരേ പോലീസും മോട്ടോർ വാഹനവകുപ്പും നടപടിയെടുക്കുക എന്നിവയായിരുന്നു സമരക്കാരുടെ ആവശ്യങ്ങൾ. 21ന് പുലർച്ചെ അലക്ഷ്യമായി ഓടിച്ച ടോറസ് ഇടിച്ച് ചാത്തങ്ങാടുവച്ച് പള്ളിപ്പുറം സ്വദേശിയായ യുവാവ് മരിച്ചിരുന്നു. ഇതാണ് നാട്ടുകാരെ പ്രകോപിപ്പിച്ചത്. നിയന്ത്രണം പാലിച്ചില്ലെങ്കിൽ സമരം തുടരുമെന്ന്‌ ഏരിയ സെക്രട്ടറി പ്രിനിൽ മുന്നറിയിപ്പു നൽകി. പോലീസ് കേസെടുത്തു ചെറായി: ചെറായി ദേവസ്വം നടയിൽ ടോറസ് ലോറികൾ തടഞ്ഞവർക്കെതിരെ മുനമ്പം പോലീസ് സ്വമേധയാ കേസെടുത്തു. സിപിഎം വൈപ്പിൻ ഏരിയ സെക്രട്ടറി എ.പി. പ്രിനിൽ, കമ്മിറ്റി അംഗങ്ങളായ കെ.കെ. ജോഷി, പി.ബി. സജീവൻ, ഇ.സി. ശിവദാസ് എന്നിവർ ഉൾപ്പെടെ 65 ഓളം പേർക്കെതിരെയാണ് കേസെടുത്തിട്ടുള്ളത്.

ഇരട്ട സെഞ്ച്വറിയിൽ സോളി സ്പർശം

വൈപ്പിൻ: ജീവൻ നിലനിർത്താൻ സ്വാഭാവിക ശ്വസനത്തിലൂടെ ആവശ്യമായ പ്രാണവായു കിട്ടാത്ത ശ്വാസകോശ രോഗികൾക്കും മറ്റും സൗജന്യമായി പ്രാണവായു എത്തിക്കുന്ന സ്പർശം പദ്ധതിയിൽ 200 ഓക്സിജൻ സിലിണ്ടറുകൾ വിതരണം ചെയ്തതിന്‍റെ ആത്മനിർവൃതിയിലാണ് പള്ളിപ്പുറത്തെ പൊതുപ്രവർത്തകനായ വി .എസ് . സോളി രാജ്. കോവിഡ് കാലത്തെ പ്രതിസന്ധിയിൽ കുറച്ച് സഹപ്രവർത്തകരോടൊപ്പമാണ് സോളിരാജ് പദ്ധതിക്ക് തുടക്കം കുറിച്ചത്. ഇന്നലെ പള്ളിപ്പുറം പഞ്ചായത്ത് ഒന്നാം വാർഡിലെ മുരിക്കുംതറ കാർത്തികേയൻ ഭാര്യ ശകുന്തളയ്ക്ക് ഓക്സിജൻ സിലിണ്ടർ എത്തിച്ചതോടെയാണ് ഡബിൾ സെഞ്ചുറി തികഞ്ഞത്. പണമുള്ള രോഗികൾക്ക് ഇത്തരത്തിലുള്ള സിലിണ്ടർ വിലയ്ക്ക് വാങ്ങി വീട്ടിൽ സൂക്ഷിച്ച് ഉപയോഗിക്കാം. എന്നാൽ ശകുന്തളയെ പോലുള്ള ദരിദ്രരായ രോഗികൾക്ക് ഇതിനു കഴിയാതെ വരും. വീട്ടിൽ ഉപയോഗിക്കാൻ സർക്കാർ സംവിധാനത്തിൽ നിന്നോ ആശുപത്രികളിൽ നിന്നോ ഓക്സിജൻ സിലിണ്ടർ ലഭ്യമാകില്ല. വിലകൊടുത്തു വാങ്ങാൻ ഇരുപതിനായിരം രൂപയോളം വരും. വാടകയ്ക്ക് എടുക്കണമെങ്കിൽ 5000 രൂപയോളം ഡിപ്പോസിറ്റും മാസ വാടകയും നൽകണം. ഇവിടെയാണ് സോളിയുടെയും കൂട്ടരുടെയും സ്പർശം സാധാരണക്കാർക്ക് തണലാവുന്നത്. സിലിണ്ടർ തീർന്നു കഴിഞ്ഞാലും ഇവർ തന്നെ തികച്ചും സൗജന്യമായി ഇവ നിറച്ചു നൽകും. ഇങ്ങനെ 35 ഓളം പേർ ജീവിതം തിരികെ പിടിച്ചവർ ഉണ്ടെന്ന് സോളി രാജും കൂട്ടരും പറയുന്നു. ജാതി മത രാഷ്ട്രീയത്തിനു അതീതമായുള്ള ഈ സത്കർമ്മത്തിൽ പള്ളിപ്പുറം സ്വദേശികളായ രാജേഷ് ചിദംബരൻ, പി. ബി. സുധി, മനു കുഞ്ഞുമോൻ, ശ്രീജിത്ത് സോമൻ, ബിനു രാജ് പരമേശ്വരൻ എന്നിവരാണ് സോളി രാജിനൊപ്പം ഉള്ളത്.

വയോധികയെ ആക്രമിച്ച് കവർച്ച : അയൽവാസി അറസ്റ്റിൽ

പെരുമ്പാവൂർ: വയോധികയെ ആക്രമിച്ച് സ്വർണഭരണങ്ങൾ കവർന്ന കേസിൽ അയൽവാസി അറസ്റ്റിൽ. മാറമ്പിള്ളി പള്ളിപ്രം മുടിക്കൽ പെരിയാർ ജംഗ്ഷനു സമീപം ചക്കാലപ്പറമ്പിൽ റോയി (54) യെയാണ് പെരുമ്പാവൂർ പോലീസ് അറസ്റ്റ് ചെയ്തത്. ചെവ്വാഴ്ച ഉച്ചയ്ക്ക് പരാതിക്കാരിയായ വയോധിക വാടകയ്ക്കു താമസിക്കുന്ന വീട്ടിൽ അതിക്രമിച്ചു കയറിയ പ്രതി ചുറ്റികകൊണ്ട് തലയ്ക്കടിച്ച് പരിക്കേൽപ്പിക്കുകയായിരുന്നു. തുടർന്ന് അവർ ധരിച്ചിരുന്ന നാല് പവനോളം തൂക്കം വരുന്ന സ്വർണാഭരണങ്ങൾ പ്രതി കവർന്നു. സിഐ ടി. എം. സൂഫിയുടെ നേതൃത്വത്തിലുള്ള അന്വേഷണസംഘമാണ് പ്രതിയെ പിടികൂടിയത്.

പഞ്ചഗുസ്തിയിൽ വെള്ളി മെഡൽ

ആലുവ: ഹരിയാനയിലെ മധുപനിൽ നടന്ന ദേശീയ പോലീസ് റസ്‌ലിംഗ് ചാമ്പ്യൻഷിപ്പിൽ കേരള പോലീസിനെ പ്രതിനിധീകരിച്ച് പഞ്ചഗുസ്തി മത്സരത്തിൽ റൂറൽ ജില്ലയിലെ സിവിൽ പോലീസ് ഓഫീസർ എ.എൻ. സനീഷ് വെള്ളി മെഡൽ കരസ്ഥമാക്കി. 85 കിലോ വിഭാഗത്തിലാണ് നേട്ടം. മുൻ വർഷങ്ങളിൽ ഇതേ ഇനത്തിൽ സ്വർണം - വെള്ളി മെഡലുകൾ നേടിയിട്ടുണ്ട്. പെരുമ്പാവൂർ ഐമുറി സ്വദേശിയാണ്. സനീഷിനെ ജില്ലാ പോലീസ് മേധാവി എം. ഹേമലത അഭിനന്ദിച്ചു.

പലചരക്കുകടയുടെ മറവിൽ മദ്യവില്പന: പ്രതി പിടിയിൽ

പെരുമ്പാവൂർ: പലചരക്കുകടയുടെ മറവിൽ അനധികൃത മദ്യവില്പന നടത്തിയിരുന്നയാൾ എക്‌സൈസ് പിടിയിൽ. രായമംഗലം പൂനെല്ലി കവളപ്രാമിൽ തോമസ് (62)നെയാണ് പെരുമ്പാവൂർ എക്‌സൈസ് റേഞ്ച് സംഘം പിടികൂടിയത്. എംസി റോഡ് പുല്ലുവഴി നങ്ങേലിപ്പടിയിൽ പ്രവർത്തിച്ചിരുന്ന കടയുടെ മറവിലാണ് ഇയാൾ മദ്യവില്പന നടത്തിയിരുന്നതെന്ന് എക്‌സൈസ് പറഞ്ഞു. ഇയാളുടെ പക്കൽ നിന്നും 40 കുപ്പികളിലായി സൂക്ഷിച്ചിരുന്ന 20 ലിറ്റർ വിദേശ മദ്യവും, മദ്യവില്പനയിലൂടെ ലഭിച്ച 9,935 രൂപയും എക്‌സൈസ് പിടിച്ചെടുത്തു. കോടതിയിയിൽ ഹാജരാക്കിയ തോമസിനെ റിമാൻഡ് ചെയ്തു.

നഗരത്തിൽ ഫുഡ്‌സ്ട്രീറ്റുമായി ജിസിഡിഎ; ഉദ്ഘാടനം 27ന്

കൊച്ചി: പനമ്പിള്ളി നഗറിനടുത്തുള്ള കസ്തൂര്‍ബ നഗറില്‍ ഫുഡ്സ്ട്രീറ്റ് ഒരുക്കി ജിസിഡിഎ. 120 സ്‌ക്വയര്‍ഫീറ്റ്, 60 സ്‌ക്വയര്‍ഫീറ്റ് എന്നിങ്ങനെ രണ്ടു വലിപ്പത്തില്‍ 20 ഭക്ഷണശാലകളാണ് ഫുഡ്‌സ്ട്രീറ്റില്‍ സജീകരിച്ചിട്ടുള്ളത്. ഇരിപ്പിടങ്ങള്‍, ലൈറ്റിംഗ്, വാഷ് ഏരിയകള്‍, ടോയ്‌ലറ്റ് സംവിധാനങ്ങള്‍, ഖരദ്രാവക മാലിന്യ സംസ്‌കരണ സംവിധാനം, സുരക്ഷാ സംവിധാനങ്ങള്‍, പാര്‍ക്കിംഗ് സൗകര്യം, എന്നിവയും ഒരുക്കിയിട്ടുണ്ട്. കേരളീയ വിഭവങ്ങള്‍, നോര്‍ത്ത് ഇന്ത്യന്‍, സൗത്ത് ഇന്ത്യന്‍, ചൈനീസ്, കോണ്ടിനന്‍റല്‍, മില്ലറ്റ് അധിഷ്ഠിതം, ഫാസ്റ്റ് ഫുഡ്, ഡെസേര്‍ട്ടുകള്‍, പാനീയങ്ങള്‍ തുടങ്ങി വൈവിധ്യമാര്‍ന്ന രുചികള്‍ ഇവിടെ ലഭ്യമാകും. 20 കടമുറികളില്‍ എട്ട് എണ്ണം ജനറല്‍ വിഭാഗത്തിനായും ആറെണ്ണം വനിതകള്‍ക്കും പട്ടികജാതി വിഭാഗത്തിന് രണ്ടും പട്ടിക വര്‍ഗം, സമൃദ്ധി അറ്റ് കൊച്ചി, ട്രാന്‍സ്ജന്‍ഡര്‍, ഭിന്നശേഷിക്കാര്‍ എന്നിവര്‍ക്കായി ഓരോന്നും കടമുറികളാണ് സംവരണം ചെയ്തിട്ടുള്ളത്. കേന്ദ്ര സര്‍ക്കാരിന്‍റെ സാമ്പത്തിക സഹായത്തോടെ കേരള സര്‍ക്കാര്‍, ജിസിഡിഎ, എന്‍എച്ച്എം, കൊച്ചി നഗരസഭ, കേരള ഭക്ഷ്യസുരക്ഷാ വകുപ്പ് എന്നിവയുടെ സംയുക്ത സംരംഭമായാണ് പദ്ധതി നടപ്പിലാക്കിയത്. ഫുഡ് സ്ട്രീറ്റിന്‍റെ ഉദ്ഘാടനം 27ന് വൈകിട്ട് ആറരയ്ക്ക് ആരോഗ്യ മന്ത്രി വീണ ജോര്‍ജ് നിര്‍വഹിക്കും. ജിസിഡിഎ ചെയര്‍മാന്‍ കെ. ചന്ദ്രന്‍പിള്ള അധ്യക്ഷത വഹിക്കുന്ന ചടങ്ങില്‍ എംഎല്‍എമാരായ ടി.ജെ. വിനോദ്, കെ.ജെ. മാക്‌സി, പി.വി. ശ്രീനിജിന്‍, മേയര്‍ എം. അനില്‍കുമാര്‍ എന്നിവര്‍ പങ്കെടുക്കും.

ജോലി വാഗ്ദാനം ചെയ്ത് ലക്ഷം രൂപ തട്ടിയെടുത്തെന്ന്

വൈപ്പിൻ: കപ്പലിൽ ജോലി വാഗ്ദാനം ചെയ്ത് മുളവുകാട് സ്വദേശിയുടെ കൈയിൽനിന്ന് 1,08,000 രൂപ തട്ടിയെടുത്തതായി പരാതി. തട്ടിപ്പിനിരയായ തൈപ്പാടത്ത് റോജർ ആന്‍റണി നൽകിയ പരാതിയിൽ ഫോർട്ട്കൊച്ചി അമരാവതി സ്വദേശി ആന്‍റണി ടിജിൻ( 31) നെതിരെ മുളവുകാട് പോലീസ് കേസെടുത്തു. താൻ എംഎസ്‌സി ഷിപ്പിംഗ് കമ്പനിയിൽ ജോലി ചെയ്യുകയാണെന്നും, ഇവർ വഴി ജോലി ശരിയാക്കിത്തരാമെന്നും പറഞ്ഞ് വിശ്വസിപ്പിച്ച് പരാതിക്കാരനിൽ നിന്നും കഴിഞ്ഞ ഡിസംബർ, ജനുവരി മാസങ്ങളിൽ ബാങ്ക് അക്കൗണ്ട് മുഖേനയാണ് പണം തട്ടിയതത്രേ. വിശ്വസിപ്പിക്കുന്നതിനായി ഒരു ഇ-മെയിൽ ഐഡിയിൽ നിന്നും പരാതിക്കാരന് ജോലി സംബന്ധമായ സന്ദേശവും ലഭിച്ചിരുന്നതായി പരാതിയിൽ പറയുന്നു. പോലീസ് അന്വേഷണം ആരംഭിച്ചിട്ടുണ്ട്.

എടയാറിൽ മത്സ്യ സംസ്കരണ സ്ഥാപനത്തിൽ തീപിടിത്തം; ലക്ഷങ്ങളുടെ നഷ്ടം

ആലുവ: എടയാർ വ്യവസായ മേഖലയിൽ പാതാളം ബണ്ട് പാലത്തിന് സമീപം പ്രവർത്തിക്കുന്ന മത്സ്യ സംസ്കരണ ഫാക്ടറി പൂർണമായി കത്തിനശിച്ചു. ലക്ഷക്കണക്കിന് രൂപയുടെ നഷ്ടമെന്ന് വിലയിരുത്തൽ. ഇന്നലെ പുലർച്ചെ മൂന്നോടെയാണ് തീപിടിത്തമുണ്ടായത്. ഫാക്ടറിയിൽ ചെറു മത്സ്യങ്ങൾ പൊടിച്ച് വളവും മീൻതീറ്റയും ആക്കുകയാണ് ചെയ്യുന്നത്. കമ്പനിക്ക് തീപിടിച്ച് ഒരു മണിക്കൂറിന് ശേഷം പരിസരത്തുള്ളവരാണ് ഫയർഫോഴ്‌സിനെ വിവരമറിയിച്ചത്. ഏലൂർ, ആലുവ, പറവൂർ, തൃക്കാക്കര, ഗാന്ധിനഗർ എന്നിവിടങ്ങളിൽനിന്നുള്ള ഫയർഫോഴ്സ് സംഘം എത്തിയാണ് തീയണച്ചത്.

രാസലഹരിയുമായി പിടിയിൽ

പെരുമ്പാവൂർ: രാസലഹരിയുമായി ആസാം നൗഗോൺ സ്വദേശികളായ അർഫാൻ അലി (27) , ബഹാറുൾ ഇസ്ലാം (22) എന്നിവരെ പെരുമ്പാവൂർ പോലീസ് അറസ്റ്റ് ചെയ്തു. ചൊവ്വാഴ്ച വൈകിട്ട് പള്ളിപ്രം പാക്കാട്ടുതാഴം ഭായി കോളനി റോഡിൽനിന്നാണ് ഇരുവരെയും പിടികൂടിയത്. രണ്ടു പേരിൽ നിന്നുമായി 6.810 ഗ്രാം ഹെറോയിൻ കണ്ടെടുത്തു. അന്വേഷണസംഘത്തിൽ ഇൻസ്പെക്ടർ ടി.എം. സൂഫി, എസ്ഐമാരായ റിൻസ് എം. തോമസ്, അബ്ദുൽ ജലീൽ, എഎസ്ഐ രതീശൻ എന്നിവരാണ് ഉണ്ടായിരുന്നത്.

യുഡിഎഫ് ജില്ലാ നേതൃയോഗം 26ന്

കൊച്ചി: ഐക്യജനാധിപത്യമുന്നണി ജില്ലാനേതൃത്വ യോഗം 26ന് രാവിലെ 10 ന് ഡിസിസി ഓഫീസ് ഓഡിറ്റോറിയത്തിൽ നടക്കും. ചെയർമാൻ ഡൊമിനിക് പ്രസന്‍റേഷൻ അധ്യക്ഷത വഹിക്കും. എംപിമാർ, എംഎൽഎമാർ, ജില്ലാ കമ്മിറ്റി അംഗങ്ങൾ, നിയോജകമണ്ഡലം ചെയർമാൻമാർ, കൺവീനർമാർ എന്നിവർ യോഗത്തിൽ പങ്കെടുക്കുമെന്ന് ജില്ലാ കൺവീനർ ഷിബു തെക്കുംപുറം അറിയിച്ചു.

കളമശേരിയില്‍ ജുഡീഷല്‍ സിറ്റി : തുടര്‍നടപടികള്‍ക്ക് ആഭ്യന്തര വകുപ്പ്

കൊച്ചി: ജുഡീഷല്‍ സിറ്റി കളമശേരിയില്‍ സ്ഥാപിക്കുന്നതിന് മന്ത്രിസഭാ യോഗം അംഗീകാരം നല്‍കി. എച്ച്എംടിയുടെ കൈവശമുള്ള 27 ഏക്കര്‍ ഭൂമി ഏറ്റെടുത്ത് ജുഡീഷല്‍ സിറ്റി സ്ഥാപിക്കാനാണ് തീരുമാനം. പദ്ധതി നടപ്പാക്കുന്നതിനുള്ള പ്രാരംഭ നടപടികള്‍ സ്വീകരിക്കാന്‍ ആഭ്യന്തര വകുപ്പിനെ ചുമതലപ്പെടുത്തി. കേരള ഹൈക്കോടതി ഉള്‍പ്പെടുന്ന ജുഡീഷല്‍ സിറ്റിയുടെ പ്രാഥമിക രൂപരേഖ പൊതുമരാമത്ത് വകുപ്പ് തയാറാക്കിയിട്ടുണ്ട്. 27 ഏക്കര്‍ ഭൂമിയിലായി 12 ലക്ഷത്തിലധികം ചതുരശ്ര അടി കെട്ടിട സൗകര്യമുള്‍പ്പെടെ രാജ്യാന്തര തലത്തിലുള്ള ആധുനിക സംവിധാനങ്ങളും സൗകര്യങ്ങളും ഉള്ള ജുഡീഷല്‍ സിറ്റിയാണ് വിഭാവനം ചെയ്യുന്നത്. മൂന്ന് ടവറുകളിലായാണ് ജുഡീഷല്‍ സിറ്റി രൂപകല്‍പന ചെയ്തിരിക്കുന്നത്. പ്രധാന ടവറില്‍ ഏഴ് നിലകളും മറ്റ് രണ്ട് ടവറുകളില്‍ ആറ് നിലകള്‍ വീതവും ഉണ്ടാകും. മന്ത്രി പി. രാജീവ്, ഹൈക്കോടതി ജഡ്ജിമാരായ മുഹമ്മദ് മുഷ്താഖ്, ബെച്ചു കുര്യന്‍ തോമസ്, രാജ വിജയരാഘവന്‍, സതീഷ് നൈനാന്‍ എന്നിവരുടെയും നേതൃത്വത്തില്‍ കളമശേരിയിലെ സ്ഥലം സന്ദര്‍ശിച്ച ശേഷമാണ് പദ്ധതിയുടെ വിശദാംശങ്ങള്‍ തയാറാക്കിയത്. ഭൂമി ഏറ്റെടുക്കലും കെട്ടിട നിര്‍മാണവുമുള്‍പ്പെടെ 1,000 കോടിയില്‍പരം രൂപ ചെലവ് കണക്കാക്കുന്ന പദ്ധതിയാണിത്. പ്രാരംഭ നടപടികള്‍ക്കും കേന്ദ്ര സഹായം ലഭ്യമാക്കുന്നതിനുള്ള സാധ്യതകള്‍ പരിശോധിക്കുന്നതിനുമായി ആഭ്യന്തര വകുപ്പിനെ ചുമതലപ്പെടുത്തി. ചീഫ് ജസ്റ്റീസിന്‍റേതുള്‍പ്പെടെ 61 കോടതി ഹാളുകള്‍, രജിസ്ട്രാര്‍ ഓഫീസ്. ഓഡിറ്റോറിയം, വിവിധ കമ്മിറ്റികള്‍ക്കുള്ള മുറികള്‍, ഭരണവിഭാഗത്തിനുള്ള സൗകര്യങ്ങള്‍, ലൈബ്രറി ബ്ലോക്ക്, ആര്‍ബിട്രേഷന്‍ സെന്‍റര്‍, റിക്രൂട്ട്‌മെന്‍റ് സെല്‍, ഐടി വിഭാഗം, ഇന്‍ഫര്‍മേഷന്‍ സെന്‍റര്‍ തുടങ്ങി അതിവിപുലമായ സൗകര്യങ്ങള്‍ ഉണ്ടാകും. ഇതിനു പുറമേ അഡ്വക്കേറ്റ് ജനറല്‍ ഓഫീസ്, അഭിഭാഷകരുടെ ചേംബറുകള്‍, പാര്‍ക്കിംഗ് സൗകര്യം, മഴവെള്ള സംഭരണി എന്നിവയും രൂപകല്‍പന ചെയ്തിട്ടുണ്ട്. നിലവിലുള്ള ഹൈക്കോടതി സ്ഥലപരിമിതി നേരിടുന്ന സാഹചര്യത്തിലാണ് പുതിയ നിര്‍മാണത്തെക്കുറിച്ച് ഹൈക്കോടതിയില്‍നിന്ന് നിര്‍ദേശം ഉയര്‍ന്നത്.

അയര്‍ലന്‍ഡില്‍ മരിച്ച നഴ്‌സിന്‍റെ സംസ്‌കാരം തിങ്കളാഴ്ച

അങ്കമാലി: അയര്‍ലന്‍ഡിലെ ലോംഗ്‌ഫോര്‍ഡില്‍ മരിച്ച മലയാളി നഴ്‌സ് തൊടുപുഴ മുതലക്കോടം കിഴക്കേക്കര എപ്രേം സെബാസ്റ്റ്യന്‍റെ ഭാര്യയും അങ്കമാലി മൂക്കന്നൂര്‍അട്ടാറ മാളിയേക്കല്‍ കുടുംബാംഗവുമായ ഷാന്‍റി പോളിന്‍റെ (52) സംസ്‌കാരം തിങ്കളാഴ്ച നടക്കും . കാന്‍സര്‍ ചികിത്സയിലായിരുന്ന ഷാന്‍റി കഴിഞ്ഞ തിങ്കളാഴ്ച രാവിലെ എട്ടോടെ മുള്ളീംഗാര്‍ ആശുപത്രിയിലാണ് മരിച്ചത്. ലോംഗ്‌ഫോര്‍ഡ് സീറോ മലബാര്‍ ചര്‍ച്ച് അംഗവും മിഡ്‌ലാന്‍ഡ് ഇന്‍റലക്ച്വല്‍ ഡിസെബിലിറ്റി സെന്‍ററിൽ സ്റ്റാഫ് നഴ്‌സുമായിരുന്ന ഷാന്‍റി രണ്ട് വര്‍ഷത്തോളമായി കാന്‍സര്‍ ബാധിതയായി ചികിത്സയിലായിരുന്നു. നേരത്തെ താല ന്യൂകാസിലില്‍ താമസിക്കവേ പീമോണ്ട് ആശുപത്രിയിലും സേവനമനുഷ്ഠിച്ചിട്ടുണ്ട്. അഞ്ചു വര്‍ഷമായി കുടുംബം ലോംഗ്‌ഫോര്‍ഡിലാണ്. മക്കള്‍: കോളജ് വിദ്യാര്‍ഥികളായ എമില്‍, എവിന്‍, അലാന. ഷാന്‍റിയുടെ മൃതദേഹം ഞായറാഴ്ച വൈകിട്ട് ലോംഗ്‌ഫോര്‍ഡ് ഓക്‌ലാന്‍ഡിലെ ഗ്ലെനോന്‍ ഫ്യൂണറല്‍ ഹോമിലും തുടര്‍ന്ന് തിങ്കളാഴ്ച രാവിലെ ലോംഗ്‌ഫോര്‍ഡിലുള്ള വസതിയിലും പൊതുദര്‍ശനത്തിന് വയ്ക്കും. തുടര്‍ന്ന് സംസ്‌കാരം ലോംഗ്‌ഫോര്‍ഡിലുള്ള മൊയ്ഡോ സെന്‍റ് മേരീസ് പള്ളിയില്‍.

11.5 പവൻ സ്വർണാഭരണങ്ങളും 20,000 രൂപയും മോഷണം പോയി

വൈപ്പിൻ : വീട്ടിൽ സൂക്ഷിച്ചിരുന്ന 11.5 പവന്‍റെ സ്വർണാഭരണങ്ങളും 20,000 രൂപയും മോഷണം പോയതായി പരാതി. എടവനക്കാട് ഇല്ലത്തുപടി കറുകപ്പാടത്ത് അഷ്റഫാണ് പരാതിക്കാരൻ. വീടിനകത്തെ കിടപ്പുമുറിയിലെ അലമാരിയിൽ സൂക്ഷിച്ചിരുന്ന ആഭരണങ്ങളും പണവുമാണ് കാണാതായതെന്ന് ഞാറക്കൽ പോലീസിൽ നല്കിയ പരാതിയിൽ പറ‍യുന്നു. കഴിഞ്ഞ 14ന് മൂന്ന് മാസം മുമ്പുള്ള ഏതോ ദിവസമാണ് ആഭരണങ്ങൾ നഷ്ടപ്പെട്ടിരിക്കുന്നത്. പോലീസ് അന്വേഷണം ആരംഭിച്ചു.

അനധികൃത മരം മുറി: രണ്ടു പേർക്കെതിരെ കേസെടുത്തു

കാക്കനാട് : സർക്കാർ പുറമ്പോക്ക് ഭൂമിയിൽ നിന്നും അനധികൃതമായി മരം മുറിച്ചു കടത്തിയ കേസിൽ രണ്ടു പേർക്കെതിരെ കേസെടുത്തു. കാക്കനാട് സ്വദേശികളായ ശ്രീകാന്ത്, ബിജു എന്നിവർക്കെതിരെയാണ് കേസ് . സീപോർട്ട് എയർപോർട്ട് റോഡിൽ ടിവി സെന്‍ററിനു സമീപമുള്ള സർക്കാർ ഭൂമിയിൽ നിന്നും ആഞ്ഞിലി, മുള, റബർ എന്നിവയാണ് മുറിച്ച് കടത്തിയത്. കാക്കനാട് വില്ലേജ് ഓഫീസർ നൽകിയ പരാതിയിൽ തൃക്കാക്കര പോലീസ് കേസെടുക്കുകയായിരുന്നു. സ്ഥലത്തെ മരം നീക്കുന്നതിനുപയോഗിച്ച ജെസിബി നേരത്തെ കസ്റ്റഡിയിലെടുത്തിരുന്നു. 20 കോടിയോളം മതിപ്പുവിലയുള്ള ഭൂമി പിടിച്ചെടുത്ത് റവന്യൂ വകുപ്പ് സ്ഥലത്ത് സർക്കാർ ബോർഡും സ്ഥാപിച്ചിരുന്നു.

ട്രെയിനിൽ മൊബൈൽ ഫോൺ കവർച്ച; രണ്ടു പേർ റിമാൻഡിൽ

കൊച്ചി: ട്രെയിനിന്‍റെ വാതിൽപ്പടിയിൽ ഇരുന്ന യാത്രക്കാരന്‍റെ മൊബൈൽ ഫോൺ കവർന്ന രണ്ടുപേർ കുടുങ്ങി. കവർച്ചാ സംഘത്തിലെ പ്രധാനിയായ അമ്പലമുകൾ അമൃത കോളനിയിൽ അരുൺ ( 32) , കളവു മുതൽ കുറഞ്ഞ വിലയ്ക്ക് വാങ്ങി പൊളിച്ചു വിൽക്കാൻ ശ്രമിച്ച എറണാകുളം കെഎസ്ആർടിസി ബസ് സ്റ്റാൻഡിനു സമീപം ഫോൺ പോ എന്ന മൊബൈൽ കട നടത്തുന്ന തോപ്പുംപടി സ്വദേശി സലാഹുദീ ൻ (35) എന്നിവരെയാണ് എറണാകുളം റെയിൽവേ ഡിവൈഎസ്പി ജോർജ് ജോസഫിന്‍റെ നേതൃത്വത്തിലുള്ള സംഘം അറസ്റ്റ് ചെയ്തത്. കഴിഞ്ഞ 19 ന് രാത്രി എട്ടിന് എറണാകുളം സൗത്ത് റെയിൽവേ സ്റ്റേഷനിൽ നിന്നു പുറപ്പെട്ട എറണാകുളം - ഓഖാ ട്രെയിനിന്‍റെ മുൻവശം ജനറൽ കോച്ചിലെ വാതിൽപ്പടിയിൽ ഇരുന്നു സഞ്ചരിച്ച തിരൂർ സ്വദേശിയുടെ 80,000 രൂപ വില വരുന്ന ഐ ഫോണാണ് നാലംഗ സംഘം കവർന്നത്. സലാഹുദ്ദീൻ ഇത് മോഷണ മുതൽ ആണെന്നറിഞ്ഞു കൊണ്ട് കുറഞ്ഞ വിലയ്ക്ക് വാങ്ങി പൊളിച്ചു വിൽക്കാൻ ശ്രമിക്കുകയായിരുന്നു. ട്രെയിൻ പുല്ലേപ്പടി ഓവർ ബ്രിഡ്ജിന്‍റെ താഴെയെത്തി വേഗത കുറച്ച സമയത്തായിരുന്നു സംഘം മൊബൈൽ ഫോൺ തട്ടിയെടുത്തത്.അരുണിന്‍റെ പേരിൽ എറണാകുളം, തൃശൂർ ജില്ലകളിലായി കവർച്ച, മോഷണം ഉൾപ്പെടെ ഏഴു കേസുകൾ നിലവിലുണ്ട്. പ്രതികളെ 15 ദിവസത്തേക്ക് റിമാൻഡ് ചെയ്തു. എറണാകുളം റെയിൽവേ പോലീസ് സ്റ്റേഷനിലെ സബ് ഇൻസ്പെക്ടർമാരായ എ. നിസാറുദീൻ, ഇ. കെ. അനിൽകുമാർ, എസ്‌സിപിഒമാരായ കെ.വി. ദിനിൽ, സഹേഷ്, തോമസ് , എ.പി.അനീഷ് കുമാർ, അഖിൽ തോമസ്, അലക്സ് എന്നിവരാണ് അന്വേഷണ സംഘത്തിൽ ഉണ്ടായിരുന്നത്.

സൗഹൃദം സ്ഥാപിച്ച് പണം തട്ടൽ; സംഘത്തിലെ രണ്ടാമനും പിടിയിൽ

മൂവാറ്റുപുഴ: മാധ്യമങ്ങളില്‍ സ്ഥലം വില്പനയ്ക്ക് എന്ന് പരസ്യം നല്‍കുന്നവരെ ഫോണില്‍ വിളിച്ച് സൗഹൃദം സ്ഥാപിച്ച് പണം തട്ടുന്ന സംഘത്തിലെ രണ്ടാമനെ തിരുവനന്തപുരത്തെ ഒളിത്താവളത്തില്‍നിന്ന് മൂവാറ്റുപുഴ പോലീസ് പിടികൂടി. തിരുവനന്തപുരം കവടിയാര്‍ അമ്പലമുക്ക് ഭാഗത്ത് അനിയന്‍ ലൈനില്‍ മുല്ലശേരില്‍ താമസിക്കുന്ന, ചിറയിന്‍കീഴ് കാട്ടുമ്പുറം സ്വദേശി ഷേര്‍മിള മന്‍സില്‍ സജിത്ത് കുമാറി(ദീപക്- 50) നെയാണ് മൂവാറ്റുപുഴ ഇന്‍സ്‌പെക്ടര്‍ ബേസില്‍ തോമസിന്‍റെ നേതൃത്വത്തിലുള്ള പ്രത്യേക അന്വേഷണസംഘം പിടികൂടിയത്. സ്ഥലം ബ്രോക്കര്‍ എന്നു പരിചയപ്പെടുത്തി വന്‍തുകകള്‍ വായ്പയായി നൽകാമെന്നും കൊടുക്കുന്ന തുകയ്ക്ക് ഇരട്ടി തുക നല്‍കാമെന്നും വാഗ്ദാനം നല്‍കി തട്ടിപ്പ് നടത്തുന്ന സംഘത്തിലെ കണ്ണിയാണ് ഇയാള്‍. ആലുവ സ്വദേശിയുടെ 15 ലക്ഷമാണ് തട്ടിപ്പിലൂടെ നഷ്ടമായത്. സ്ഥലം വില്പനയ്ക്ക് എന്ന് പരസ്യം നല്‍കിയ പരാതിക്കാരനെ ഫോണില്‍ വിളിച്ച് ജോഷി എന്ന് പേര് പറഞ്ഞ് പരിചയപ്പെട്ട് സൗഹൃദം സ്ഥാപിച്ചുക്കുകയായിരുന്നു. സിനിമാ മേഖലയില്‍ ബന്ധമുണ്ടെന്ന് വിശ്വസിപ്പിക്കുകയും തന്‍റെ കൈയില്‍ പലരുടെയും പണം ഉണ്ടെന്ന് പറഞ്ഞു വിശ്വസിപ്പിക്കുകയും ചെയ്തു. കേസിലെ ഒന്നാം പ്രതി കോട്ടയം വാഴൂര്‍ സ്വദേശി മണിയെ പോലീസ് അറസ്റ്റ് ചെയ്തിരുന്നു. കൂട്ടുപ്രതികളെപ്പറ്റിയും പോലീസ് അന്വേഷണം വ്യാപിപ്പിച്ചിട്ടുണ്ട്.കൂടുതല്‍ പേര്‍ തട്ടിപ്പിന് ഇരയായിട്ടുണ്ടോയെന്നും ജില്ലാ പോലീസ് മേധാവി എം. ഹേമലതയുടെ മേല്‍നോട്ടത്തിലുള്ള പ്രത്യേക സംഘം അന്വേഷിക്കുന്നുണ്ട്. തിരുവനന്തപുരത്ത് ഒളിവില്‍ കഴിഞ്ഞ പ്രതിയെ ദിവസങ്ങളോളം നിരീക്ഷണം നടത്തിയാണ് പിടികൂടിയത്. പ്രതിക്കെതിരേ തിരുവനന്തപുരം ഫോര്‍ട്ട് പോലീസ് സ്റ്റേഷന്‍, കൊല്ലം ഈസ്റ്റ്, ആറ്റിങ്ങല്‍, തമിഴ്‌നാട്ട് എന്നിവിടങ്ങളില്‍ കേസ് നിലവിലുണ്ട്. അന്വേഷണ സംഘത്തില്‍ സബ് ഇന്‍സ്‌പെക്ടര്‍മാരായ കെ.കെ. രാജേഷ്, പി.സി. ജയകുമാര്‍, സീനിയര്‍ സിപിഒ നിഷാന്ത് കുമാര്‍, ബിബില്‍ മോഹന്‍ എന്നിവരാണുണ്ടായിരുന്നത്.

കൈക്കൂലി വാങ്ങുന്നതിനിടെ നഗരസഭാ ഉദ്യോഗസ്ഥനെ വിജിലൻസ് പിടികൂടി

പള്ളുരുത്തി: കൈക്കൂലി വാങ്ങുന്നതിനിടെ കൊച്ചി നഗരസഭയുടെ പള്ളുരുത്തി സോണൽ ഓഫീസ് ക്ലാർക്ക് വിജിലൻസ് പിടിയിൽ. റവന്യൂ വിഭാഗം ക്ലാർക്ക് തിരുവനന്തപുരം പാറശാല സ്വദേശി എസ്. ഭവനിൽ എസ്.എസ്. പ്രകാശാണ് (30) പിടിയിലായത്. പള്ളുരുത്തിയിൽ നിർമാണം പൂർത്തീകരിച്ച ഇരുനിലക്കെട്ടിടത്തിന്‍റെ നിർമാണ പെർമിറ്റിൽ വന്ന അപാകത പരിഹരിക്കുന്നതിനായി പള്ളുരുത്തി സ്വദേശി തൂമ്പുങ്കൽ വീട്ടിൽ അഡ്വ. രോഹിത്തിൽനിന്നാണ് കൈക്കൂലി കൈപ്പറ്റിയത്. രണ്ട് ലക്ഷം രൂപയാണ് ആവശ്യപ്പെട്ടത്. ആദ്യപടിയായി അമ്പതിനായിരം രൂപ ആവശ്യപ്പെട്ടെങ്കിലും 25000 രൂപ നൽകാമെന്ന് പരാതിക്കാരൻ പറഞ്ഞു. ഉദ്യോഗസ്ഥൻ പണം ആവശ്യപ്പെട്ട വിവരം പരാതിക്കാരൻ വിജിലൻസിനെ അറിയിച്ചു. തുടർന്ന് ഫിനോഫ്സ്തിലിൻ പൗഡർ പുരട്ടിയ നോട്ടുകൾ നൽകി വിജിലൻസ് പരാതിക്കാരനെ ഉദ്യോഗസ്ഥന്‍റെ അടുക്കലേക്ക് അയയ്ക്കുകയും പിന്തുടർന്നെത്തിയ വിജിലൻസ് സംഘം ഉദ്യോഗസ്ഥനെ പിടികൂടുകയുമായിരുന്നു. എറണാകുളം സെൻട്രൻ റേഞ്ച് എസ്.പി. പി.എൻ.രമേശ്കുമാറിന്‍റെ നിർദേശാനുസരണം എറണാകുളം വിജിലൻസ് യൂണിറ്റ് ഡിവൈഎസ്പിമാരായ കെ.എ. തോമസ്, ജി. സുനിൽകുമാർ എന്നിവരുടെ നേതൃത്വത്തിൽ, ഇൻസ്പെക്ടർമാരായ ആർ. മധു, എം. മനു, എ. ഫിറോസ്, എൻ.എ. അനൂപ് എന്നിവരടങ്ങിയ സംഘമാണ് പിടികൂടിയത്.

കെ.ജെ. ഷൈനിന് എതിരായ സൈബര്‍ ആക്രമണം : വിവരങ്ങള്‍ പോലീസിന് കൈമാറാന്‍ മെറ്റ

കൊച്ചി: സിപിഎം നേതാവ് കെ.ജെ. ഷൈനിനെതിരായ സൈബര്‍ ആക്രമണ കേസില്‍ പ്രതികളുടെയും പോലീസ് നിരീക്ഷണത്തിലുള്ള സമൂഹ മാധ്യമ അക്കൗണ്ടുകളുടെയും വിവരങ്ങള്‍ അന്വേഷണസംഘത്തിന് കൈമാറാനൊരുങ്ങി മെറ്റ. ഇതിന്‍റെ ഭാഗമായി വിവരങ്ങള്‍ ക്രോഡീകരിച്ചു വരുന്നതായി മെറ്റ അന്വേഷണ ഉദ്യോഗസ്ഥരെ അറിയിച്ചു. കേസില്‍ പ്രതിചേര്‍ത്തിട്ടുള്ള കെ.എം. ഷാജഹാന്‍, കോണ്‍ഗ്രസ് പ്രദേശിക നേതാവ് സി.കെ. ഗോപാലകൃഷ്ണന്‍ എന്നിവരുടെ സമൂഹമാധ്യമ അക്കൗണ്ടുകള്‍ക്ക് പുറമേ പോസ്റ്റ് ഷെയര്‍ ചെയ്ത നൂറോളം പേജുകള്‍ നിരീക്ഷണത്തിലാണ്. ഇവയുടെ വിവരങ്ങളും പോലീസ് തേടിയിരുന്നു. പരമാവധി സൈബര്‍ തെളിവുകള്‍ ശേഖരിക്കാനാണ് അന്വേഷണസംഘത്തിന്‍റെ നീക്കം. കഴിഞ്ഞ ദിവസം കെ.എം. ഷാജഹാന്‍റെയും ഗോപാലകൃഷ്ണന്‍റെയും വീടുകളില്‍ നടത്തിയ പരിശോധനയില്‍ പിടിച്ചെടുത്ത മൊബൈല്‍ ഫോണുകള്‍ ശാസ്ത്രീയ പരിശോധനയ്ക്ക് കൈമാറും. അധിക്ഷേപ പരാമര്‍ശമുള്ള പോസ്റ്റും വീഡിയോയും ഇട്ടത് ഈ ഫോണുകളില്‍ നിന്നുതന്നെയാണോയെന്ന് പരിശോധിക്കുകയാണ് ലക്ഷ്യം. ഷാജഹാന്‍റെയും ഗോപാലകൃഷ്ണന്‍റെയും പോസ്റ്റുകളില്‍ കമന്‍റിട്ടവരില്‍ നിന്നടക്കം മൊഴി രേഖപ്പെടുത്തിയേക്കുമെന്നും സൂചനയുണ്ട്.

റോറോ ജങ്കാർ നിയന്ത്രണം വിട്ട് കടലിലേക്ക് ഒഴുകി

വൈപ്പിൻ : ഓട്ടത്തിനിടയിൽ എൻജിൻ പൊടുന്നനെ നിലച്ചു. ഫോർട്ടു കൊച്ചിയിൽ നിന്നും നിറയെ വാഹനങ്ങളും യാത്രക്കാരുമായി വൈപ്പിൻ ജെട്ടിയിലേക്ക് വരികയായിരുന്ന റോ റോ ജങ്കാർ കടലിലേക്ക് ഒഴുകി. നിയന്ത്രണം വിട്ട് ഒഴുകുന്നതിനിടയിൽ ഫോർട്ട് വൈപ്പിൻ ഭാഗത്തെ രണ്ട് ചീനവിലകളിൽ ഇടിച്ച് സാരമായ കേടുപാടുകളും വരുത്തി. മൂന്നാമത്തെ ചീനവലയുടെ ഭാഗത്തെത്തിയപ്പോഴേക്കും എൻജിൻ വീണ്ടും പ്രവർത്തിക്കുകയും ജീവനക്കാർ സാവധാനം ജങ്കാറിനെ വൈപ്പിൻ ജെട്ടിയിൽ അടുപ്പിക്കുകയും ചെയ്യുകയാ യിരുന്നു. കഴിഞ്ഞ രാത്രി ഒന്പതോടെയാണ് സംഭവം. രാത്രി 8.50ന് ഫോർട്ട് കൊച്ചി ജെട്ടിയിൽ നിന്നും പുറപ്പെട്ട സേതു സാഗർ -1 എന്ന ജങ്കാറാണ് നിയന്ത്രണം വിട്ട് ഒഴുകിയത്. ഇത് വൈപ്പിൻ ജെട്ടിയിൽ അടുക്കുന്നതിനു തൊട്ടു മുമ്പ് പെട്ടെന്ന് എൻജിൻ നിലക്കുകയായിരുന്നുവെന്ന് യാത്രക്കാർ പറയുന്നു. ഈ സമയം വേലിയിറക്കം ആയതിനാൽ ജങ്കാർ നിയന്ത്രണം വിട്ട് പടിഞ്ഞാറോട്ട് കടലിലേക്ക് ഒഴുകി. ഫോർട്ട് കൊച്ചി സ്വദേശി ഹെൻലി, ഉണ്ണി എന്നിവരുടെ ചീനവലകൾക്കാണ് കേടുപാടുകൾ വന്നിട്ടുള്ളത്.

പോലീസ് ചമഞ്ഞു പണം തട്ടല്‍ : ജില്ലയിൽ രണ്ടുപേർ അറസ്റ്റിൽ

കൊച്ചി/മട്ടാഞ്ചേരി: പോലീസ് ഉദ്യോഗസ്ഥനെന്ന് തെറ്റിദ്ധരിപ്പിച്ച് പണം തട്ടിയെന്ന കേസുകളിൽ ജില്ലയിൽ രണ്ടുപേർ അറസ്റ്റിൽ. വിദേശത്ത് ജോലി ശരിയാക്കി നല്കാമെന്ന് വിശ്വസിപ്പിച്ച് പണം തട്ടിയ കേസിലെ വാഗമണ്ണിൽ നിന്നും ഫോർട്ട് കൊച്ചി പോലീസും പോലീസ് ഉദ്യോഗസ്ഥനെന്ന് തെറ്റിദ്ധരിപ്പിച്ച് നഗരത്തിലെ ഒരു സ്ഥാപനത്തില്‍ നിന്ന് പണം തട്ടിയ പ്രതിയെ എറണാകുളം നോർത്ത് പോലീസുമാണ് പിടികൂടിയത്. വിദേശജോലി വാഗ്ദാനം നല്കി പണം കൈപ്പറ്റി വാഗമണ്ണില്‍ സുഹൃത്തുക്കള്‍ക്കൊപ്പം ഒളിവില്‍ കഴിയുകയായിരുന്ന പുതുവൈപ്പ് കുരിശുപറമ്പില്‍ ആന്‍റണി സിജിനെയാണ് (31) സൈബര്‍ സെല്ലിന്‍റെ സഹായത്തോടെ ടവര്‍ ലൊക്കേഷന്‍ കേന്ദ്രീകരിച്ചുള്ള അന്വേഷണത്തില്‍ പിടികൂടിയത്. തോപ്പുംപടി മുണ്ടംവേലി സ്വദേശിയില്‍ നിന്നാണ് യുകെയില്‍ ഡ്രൈവര്‍ ജോലി വാഗ്ദാനം ചെയ്‌ത് പല തവണയായി 52,810 രൂപ തട്ടിയെടുത്തത്. പ്രതി സമാന രീതിയില്‍ മുളവുകാട്, പള്ളുരുത്തി എന്നിവിടങ്ങളിലും തട്ടിപ്പ് നടത്തിയതായി വിവരം ലഭിച്ചതിന്‍റെ അടിസ്ഥാനത്തിലും പോലീസ് അന്വേഷണം ആരംഭിച്ചു. പോലീസ് ഉദ്യോഗസ്ഥരോടൊപ്പമുള്ള ഫോട്ടോകളും സെല്‍ഫികളും കാണിച്ചാണ് ആളുകളെ തെറ്റിദ്ധരിപ്പിച്ചിരുന്നത്. കൊച്ചി സിറ്റി ഡപ്യൂട്ടി പോലീസ് കമ്മീഷണര്‍ അശ്വതി ജിജിയുടെ നിര്‍ദേശ പ്രകാരം മട്ടാഞ്ചേരി അസി. കമ്മീഷണര്‍ ഉമേഷ് ഗോയലിന്‍റെ നേതൃത്വത്തില്‍ ഫോര്‍ട്ട്കൊച്ചി പോലീസ് ഇൻസ്പെക്ടര്‍ എം .എസ്. ഫൈസല്‍, എസ് ഐ എസ്. നവീന്‍, എസ്‌സിപിഒ മാരായ സൂരേഷ്, മഹേഷ്, ടി.പി . ശ്രീജിത്ത്, സിപിഒ മാരായ രാജേഷ്, പ്രജീഷ് എന്നിവര്‍ ചേര്‍ന്നാണ് പ്രതിയെ അറസ്റ്റ് ചെയ്തത്. ഓണാഘോഷത്തോടനുബന്ധിച്ച് പോലീസ് സ്റ്റേഷനില്‍ പരിപാടി നടത്തന്നതിന് വേണ്ടിയെന്ന് പറഞ്ഞ് നഗരത്തിലെ ഒരു സ്ഥാപനത്തില്‍ നിന്ന് പണം അപഹരിച്ച കോട്ടയം പൂഞ്ഞാര്‍ മണിയംകുന്ന് കിടങ്ങത്ത് കാരോട്ട് സിജോയാണ് എറണാകുളം നോര്‍ത്ത് പോലീസിന്‍റെ പിടിയിലായത്. സ്ഥാപനമുടമയായ സ്ത്രീയോട് 20000 രൂപയാണ് ആവശ്യപ്പെട്ടത്. 11000 രൂപ പരാതിക്കാരി നല്‍കി. എന്നാല്‍ ഇയാള്‍ ഈ പണം പോരായെന്നും മുഴുവന്‍ പണവും കിട്ടണമെന്നും അതുവരെ സ്ഥാപനം പ്രവര്‍ത്തിക്കാന്‍ പാടില്ലെന്നും അറിയിച്ചു. ഇതേത്തുടര്‍ന്ന് പരാതിക്കാരി രണ്ടാഴ്ചയോളം സ്ഥാപനം അടച്ചിട്ടു. പിന്നീട് സെൻട്രൽ അസി. കമ്മീഷണര്‍ക്ക് പരാതി നല്‍കി. സിസിടിവി ദൃശ്യങ്ങള്‍ ഉള്‍പ്പടെയുളളവ പരിശോധിച്ച് നടത്തിയ അന്വേഷണത്തിലാണ് പ്രതിയെക്കുറിച്ച് സൂചനകള്‍ ലഭിച്ചത്. പ്രതിക്കെതിരെ തൃശൂര്‍, ആലപ്പുഴ, കോട്ടയം എറണാകുളം എന്നീ ജില്ലകളില്‍ നിരവധി കേസുകളുണ്ട്. ഇയാള്‍ പോലീസ് വേഷത്തില്‍ പല തട്ടിപ്പുകളും നടത്തിയിട്ടുള്ളതായി അന്വേഷണത്തില്‍ തെളിഞ്ഞിട്ടുണ്ടെന്നും വരും ദിവസങ്ങള്‍ ഇയാള്‍ക്കെതിരെ കൂടുതല്‍ പരാതികള്‍ ലഭിക്കാന്‍ സാധ്യതയുണ്ടെന്നും പോലീസ് പറഞ്ഞു. എറണാകുളം സെന്‍ട്രല്‍ അസി. കമ്മീഷണര്‍ സിബി ടോമിന്‍റെ നിര്‍ദേശപ്രകാരം എറണാകുളം ടൗണ്‍ നോര്‍ത്ത് പ്രിന്‍സിപ്പല്‍ സബ് ഇന്‍സ്‌പെക്ടര്‍ ഐന്‍ ബാബുവിന്‍റെ നേതൃത്വത്തിലുള്ള അന്വേഷണ സംഘമാണ് പ്രതിയെ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

സ്വർണാഭരണങ്ങൾ കവർന്ന വ്യാജ ഡോക്ടർ കുടുങ്ങി

കൂത്താട്ടുകുളം: വ്യാജ ഡോക്ടർ ചമഞ്ഞ് വിധവയുടെ സ്വർണാഭരണങ്ങൾ കവർന്നയാൾ പോലീസിന്‍റെ പിടിയിലായി. ഫോർട്ടുകൊച്ചി അമരാവതി കൂലായത്ത് സ്റ്റീവൻ റെക്സൺ തോമസിനെ(25)യാണ് കൂത്താട്ടുകുളം പോലീസ് അറസ്റ്റ് ചെയ്തത്. കോഴിപ്പിള്ളി വണ്ടമ്പ്ര കാളശേരിൽ ഉഷ അശോകന്‍റെ വീട്ടിൽ അലമാരയിൽ സൂക്ഷിച്ചിരുന്ന സ്വർണാഭരണങ്ങളാണ് മോഷണം പോയത്. മൊബൈൽ ടവർ ലൊക്കേഷൻ കേന്ദ്രീകരിച്ച് നടത്തിയ അന്വേഷണത്തിൽ പ്രതിയെ പന്തളത്തുനിന്ന് പിടികൂടുകയായിരുന്നു. ഒരു പവൻ വീതമുള്ള രണ്ട് സ്വർണവളകളും, 23.900 ഗ്രാം തൂക്കമുള്ള ഒരു സ്വർണമാലയും, അര പവൻ തൂക്കം വരുന്ന രണ്ട് ജോടി കമ്മലും ഉൾപ്പെടെ 43.900 ഗ്രാം സ്വർണ ആഭരണങ്ങളാണ് മോഷണം പോയത്. ജൂലൈ-ഓഗസ്റ്റ് മാസങ്ങളിൽ ഉഷയുടെ കോഴിപ്പിള്ളിയിലുള്ള വീട്ടിൽ സ്റ്റീവൻ താമസിച്ചിരുന്നു. വിധവയായ ഉഷയുടെ വീടുപണി നടന്നു വരികയാണ്. മക്കൾ വിദേശത്ത് ആയതിനാൽ വീടുപണി നോക്കി നടത്തുന്നതിന് സഹായത്തിനായാണ് സ്റ്റീവൻ എത്തിയത്. താൻ ഡോക്ടറാണ് എന്നാണ് സ്റ്റീവൻ ഉഷയോട് പറഞ്ഞിരുന്നത്. അലമാരയിൽ സൂക്ഷിച്ചിരുന്ന മാല മാറിയെടുക്കുന്നതിനായി ഉഷ ജ്വല്ലറിയിൽ എത്തിയപ്പോഴാണ് മാല റോൾഡ് ഗോൾഡ് ആണെന്ന് മനസിലാകുന്നത്. ഉടൻ വീട്ടിൽ തിരിച്ചെത്തി അലമാര പരിശോധിച്ചപ്പോൾ അലമാരയിലിരുന്ന മറ്റ് സ്വർണാഭരണങ്ങളും നഷ്ടപ്പെട്ടതായി മനസിലായി. തുടർന്ന് കൂത്താട്ടുകുളം പോലീസിൽ പരാതി നൽകുകയായിരുന്നു. മൊബൈൽ ഫോൺ കേന്ദ്രീകരിച്ച് നടത്തിയ അന്വേഷണത്തിലാണ് പോലീസിന്‍റെ വലയിൽ പ്രതി കുടുങ്ങിയത്. അറസ്റ്റിലായ പ്രതിയെ കോടതിയിൽ ഹാജരാക്കി റിമാൻഡ് ചെയ്തു. ഫോർട്ടുകൊച്ചിയിൽ കംപ്യൂട്ടർ സർവീസിംഗ് ജോലി ചെയ്തുവരികയായിരുന്നു പ്രതി. പുത്തൻകുരിശ് ഡിവൈഎസ്പി വി.ടി. ഷാജന്‍റെ നിർദേശപ്രകാരം കൂത്താട്ടുകുളം സ്റ്റേഷൻ ഇൻസ്പെക്ടർ സഞ്ജു ജോസഫ്, പ്രിൻസിപ്പൽ എസ്ഐ സി.ആർ. രെഞ്ചുമോൾ, എഎസ്ഐമാരായ കെ.പി. അഭിലാഷ്, സി.ആർ. സുരേഷ്, എസ്‌സിപിഒ പി.കെ. മനോജ് എന്നിവരടങ്ങിയ സംഘമാണ് പ്രതിയെ പിടികൂടിയത്.

നടുറോഡിൽ നായ്പ്പട; പേടിയോടെ നാട്ടുകാർ

അരൂർ: അരൂർ പഞ്ചായത്ത് ഏഴാം വാർഡിൽ കണ്ണേഴത്ത് റോഡിൽ യാത്രക്കാരിൽ ഭീതി വിതച്ച് തെരുവുനായ്ക്കൾ . നടുറോഡിൽ നായ്ക്കൾ കൂട്ടത്തോടെ നിൽക്കുന്നതിനാൽ കാൽന‌ടയാത്രികർക്കും ഇരുചക്രവാഹനങ്ങൾക്കും ഇതുവഴി ക‌ടന്നുപോകാൻ പറ്റാത്ത അവസ്ഥയാണ്. ഹോട്ടൽ മാലിന്യങ്ങളും കോഴിയുടെ അവശിഷ്ടങ്ങളും ചാക്കിൽ കെട്ടി ആളൊഴിഞ്ഞ റോഡിന്‍റെ അരികിൽ തള്ളുന്നതിനാലാണ് നായ്ക്കൾ ഇവിടെ കൂട്ടത്തോടെ തന്പടിക്കുന്നത് . ഭക്ഷ്യാവശിഷ്ടങ്ങൾക്കായി നായ്ക്കൾ കടിപിടി കൂടുന്നതും യാത്രക്കാർക്കും വാഹനങ്ങൾക്കും പിന്നാലെ ഓടിയെത്തുന്നതും പതിവുകാഴ്ചയാണ്. തെരുവുനായ ശല്യം വർധിച്ചതോടെ നിരവധി പരാതികൾ പഞ്ചായത്തിൽ എത്തുന്നുണ്ടെങ്കിലും നടപടികളൊന്നുമുണ്ടായില്ലെന്നു നാട്ടുകാർ പറഞ്ഞു.

അയിരൂർപാടം മൃഗാശുപത്രി ഉപകേന്ദ്രം പ്രവർത്തനമാരംഭിച്ചു

കോതമംഗലം: പിണ്ടിമന സഹകരണ സംഘം കെട്ടിടത്തിൽ അനുവദിച്ച മൃഗാശുപത്രിയുടെ ഉപകേന്ദ്രത്തിന്‍റെ ഉദ്ഘാടനം ആന്‍റണി ജോൺ എംഎൽഎ നിർവ്വഹിച്ചു. പഞ്ചായത്ത് പ്രസിഡന്‍റ് ജെസി സാജു അധ്യക്ഷത വഹിച്ചു. വാർഡ് മെമ്പർ എസ്.എം. അലിയാർ, വൈസ് പ്രസിഡന്‍റ് ജയ്സൺ ദാനിയേൽ, വിൽസൺ കെ. ജോൺ, ടി.കെ. കുമാരി, സിജി ആന്‍റണി, ലതാ ഷാജി, ലാലി ജോയ്, ക്ഷീരസംഘം പ്രസിഡന്‍റ് ജയ്സൺ ജോർജ്, ഡയറക്ടർ ബോർഡ് അംഗങ്ങളായ ബിനു സാജു, റ്റി.എ. ടോമി, ടി.എ. അപ്പുക്കുട്ടൻ, സജിത്ത് കെ. വർഗീസ്, എം. ആർ. ജയചന്ദ്രൻ, സംഘം സെക്രട്ടറി അനുഷ ടി. സജിവ്, ഡോ. വിക്ടർ ജുബിൻ വർഗീസ്, എന്നിവർ പ്രസംഗിച്ചു.

നഗരസഭയ്ക്ക് മുന്നില്‍ പ്രതിഷേധിച്ചു

മൂവാറ്റുപുഴ: തദേശസ്ഥാപനങ്ങള്‍ വികസന സദസ് നടത്തണമെന്ന സംസ്ഥാന സര്‍ക്കാര്‍ ഉത്തരവ് നടപ്പാക്കില്ലെന്ന മൂവാറ്റുപുഴ നഗരസഭ കൗണ്‍സില്‍ തീരുമാനത്തിനെതിരേ പ്രതിപക്ഷ എല്‍ഡിഎഫ് അംഗങ്ങള്‍ കൗണ്‍സില്‍ യോഗം ബഹിഷ്‌കരിച്ചു. തുടര്‍ന്ന് നഗരസഭയ്ക്ക് മുന്നില്‍ പ്രതിഷേധ യോഗം ചേര്‍ന്നു. നഗരസഭാംഗങ്ങളായ ആര്‍. രാകേഷ്, കെ.ജി അനില്‍കുമാര്‍ എന്നിവര്‍ പ്രസംഗിച്ചു. ഉത്തരവ് പ്രകാരം വികസന സദസ് സംഘടിപ്പിച്ച് സര്‍ക്കാരിന്‍റെ വികസന പ്രവര്‍ത്തനങ്ങള്‍ പ്രദര്‍ശിപ്പിയ്ക്കണം. അതിദാരിദ്ര നിര്‍മാര്‍ജനം, ലൈഫ് മിഷന്‍, മാലിന്യമുക്ത നവകേരളം തുടങ്ങിയ പദ്ധതികളില്‍ തദേശസ്ഥാപനങ്ങള്‍ കൈവരിച്ച നേട്ടങ്ങള്‍ സെക്രട്ടറി അവതരിപ്പിക്കണം, ജനങ്ങളില്‍നിന്ന് അഭിപ്രായങ്ങളും നിര്‍ദേശങ്ങളും ആശയങ്ങളും ലഭ്യമാക്കുന്നതിന് ചര്‍ച്ച നടത്തണം, ഇവ ക്രോഡീകരിച്ച് തദേശസ്ഥാപനങ്ങള്‍ പോര്‍ട്ടലില്‍ അപ്‌ലോഡ് ചെയ്യണമെന്നാണ് സര്‍ക്കുലറിലുള്ളത്. എന്നാല്‍ മൂവാറ്റുപുഴ നഗരസഭയിലെ യുഡിഎഫ് ഭരണസമിതി ഇത് നടത്തേണ്ടതില്ലെന്ന് തീരുമാനിച്ചു. ഇത് അംഗീകരിക്കാനാകില്ലെന്നും സര്‍ക്കാര്‍ തീരുമാനം നടപ്പാക്കണമെന്നും ആവശ്യപ്പെട്ടാണ് പ്രതിപക്ഷാംഗങ്ങള്‍ പ്രതിഷേധിച്ചത്.

ഭൂതത്താൻകെട്ടിൽ ജുഡീഷൽ കമ്മീഷന്‍റെ തെളിവെടുപ്പ്

കോതമംഗലം: താനൂർ ബോട്ടപകടവുമായി ബന്ധപ്പെട്ട് നിയമിക്കപ്പെട്ട ജസ്റ്റിസ് വി.കെ. മോഹനൻ ജുഡീഷൽ കമ്മീഷൻ ഭൂതത്താൻകെട്ടിൽ തെളിവെടുപ്പും ഹിയറിംഗും നടത്തി. കമ്മീഷൻ സംസ്ഥാന വ്യാപകമായി നടത്തുന്ന രണ്ടാം ഘട്ട പൊതു തെളിവെടുപ്പിന്‍റെ ഭാഗമായാണ് ഭൂതത്താൻകെട്ടിലും എത്തിയത്. ജലാശയങ്ങളിൽ സർവീസ് നടത്തുന്ന ബോട്ടുകളിൽ പരിശോധന നടത്താൻ കനാൽ ഓഫീസർമാരുടെ സേവനം കാര്യക്ഷമമായി പ്രയോജനപ്പെടുത്തുക, ഭൂതത്താൻകെട്ടിൽ ആറുമാസമെങ്കിലും ബോട്ടിംഗ് നടത്താൻ സാഹചര്യമൊരുക്കുക, മലിനീകരണ സാധ്യത ഒഴിവാക്കാൻ സോളാർ ബോട്ടുകൾ ഉപയോഗിക്കുക എന്നിങ്ങനെ നിരവധി നിർദേശങ്ങൾ തെളിവെടുപ്പിൽ ഉയർന്നുവന്നു. രജിസ്റ്റർ ചെയ്ത 16 പേരിൽ 12 പേർ ഹിയറിംഗിൽ പങ്കെടുത്ത് അഭിപ്രായങ്ങൾ രേഖപ്പെടുത്തി. ഭൂതത്താൻകെട്ട് ഇറിഗേഷൻ ഇൻസ്പെക്ഷൻ ബംഗ്ലാവിൽ നടന്ന തെളിവെടുപ്പിൽ കമ്മീഷൻ അംഗങ്ങളായ കുസാറ്റ് ഷിപ്പ് ബിൽഡിംഗ് ടെക്നോളജി വിഭാഗം റിട്ട. പ്രഫ. ഡോ. കെ.പി. നാരായണൻ, കമ്മീഷൻ മെമ്പർ സെക്രട്ടറി റിട്ട. ജില്ലാ ജഡ്ജി ടി.കെ. രമേഷ് കുമാർ, കോർട്ട് ഓഫീസർ റിട്ട. മുൻസിഫ് മജിസ്ട്രേറ്റ് ജി. ചന്ദ്രശേഖരൻ, കമ്മീഷൻ ജോയിന്‍റ് സെക്രട്ടറി ശിവ പ്രസാദ്, കമ്മീഷൻ അഭിഭാഷകൻ അഡ്വ. ടി.പി. രമേശ്‌, നോഡൽ ഓഫീസറും ജില്ലാ ടൂറിസം പ്രമോഷൻ കൗൺസിൽ സെക്രട്ടറിയുമായ ലിജോ ജോസഫ്, ജനപ്രതിനിധികൾ, ബന്ധപ്പെട്ട ഉദ്യോഗസ്ഥർ, ബോട്ട് ജീവനക്കാർ, ഉടമകൾ എന്നിവർ പങ്കെടുത്തു. ജില്ലയിലെ തെളിവെടുപ്പ് ഇതോടുകൂടി പൂർത്തിയായി. ജലഗതാഗത മേഖലയിൽ അപകടങ്ങൾ ആവർത്തിക്കാതിരിക്കുന്നതിന് പരിഹാര മാർഗങ്ങൾ ശിപാർശ ചെയ്യുക, നിലവിലുള്ള ലൈസൻസിംഹ് എൻഫോഴ്സ്മെന്‍റ് സംവിധാനങ്ങൾ പര്യാപ്തമാണോയെന്ന് പരിശോധിക്കുക, മുൻകാലങ്ങളിലുണ്ടായ ബോട്ട് അപകടങ്ങളെ തുടർന്ന് നിയോഗിച്ച അന്വേഷണ കമ്മീഷനുകൾ സമർപ്പിച്ച റിപ്പോർട്ടുകളിൽ ബന്ധപ്പെട്ട വകുപ്പുകൾ സ്വീകരിച്ച നടപടികൾ അവലോകനം ചെയ്യുക തുടങ്ങിയ ലക്ഷ്യങ്ങളോടെയായിരുന്നു തെളിവെടുപ്പ്.

എംസിഎഫിൽ സന്ദർശനം നടത്തി

കൂത്താട്ടുകുളം: തൊഴിൽ സൗഹൃദ അന്തരീക്ഷം മെച്ചപ്പെടുത്തുന്നതിന്‍റെ ഭാഗമായി നഗരസഭ ഭരണ സമിതി എംസിഎഫിൽ സന്ദർശനം നടത്തി. തൊഴിലാളികളായ ഹരിത കർമ സേന അംഗങ്ങളുമായി കൂടിക്കാഴ്ച നടത്തുകയും നിലവിൽ തൊഴിലാളികൾ നേരിടുന്ന പരിഹാരങ്ങൾക്ക്‌ പരിഹാരം കാണുവാനുള്ള നടപടികൾ സ്വീകരിക്കുമെന്നും ഉറപ്പും നൽകി. വേതന വർധനവ് ഉറപ്പുവരുത്താനുള്ള നടപടികൾ സ്വീകരിക്കുമെന്നും തൊഴിലാളികൾക്ക് ജോലി സമയത്ത് ഉണ്ടാകുന്ന തെരുവുനായ ആക്രമണം ഉൾപ്പെടെയുള്ള അപകടങ്ങളിൽനിന്നും പരിരക്ഷ ലഭിക്കുന്നതിനായി ആരോഗ്യ ഗ്രൂപ്പ് ഇൻഷുറൻസ് പദ്ധതികൾ നടപ്പിലാക്കാൻ ശ്രമിക്കുമെന്നും ഭരണസമിതി അംഗങ്ങൾ അറിയിച്ചു. ഇതോടൊപ്പം എംസിഎഫിലെ സ്ഥലപരിമിതിക്ക് ഉള്ളിൽ നിന്നുകൊണ്ടു തന്നെ പ്ലാസ്റ്റിക് ശേഖരിക്കുന്നതിനും സൂക്ഷിച്ചുവയ്ക്കുന്നതിനും മെച്ചപ്പെട്ട സൗകര്യം ഒരുക്കും. നഗരസഭ ചെയർപേഴ്സൺ കലാ രാജു, വൈസ് ചെയർമാൻ പി.ജി. സുനിൽകുമാർ, ക്ഷേമകാര്യസ്ഥാനി കമ്മിറ്റി ചെയർമാൻ പ്രിൻസ് പോൾ ജോൺ, നഗരസഭ കൗൺസിലർ റോയ് ഇരട്ടയാനിക്കൽ, കേരള കോൺഗ്രസ് ജേക്കബ് മണ്ഡലം പ്രസിഡന്‍റ് എം.കെ. ചാക്കോച്ചൻ എന്നിവരാണ് എംസിഎഫിൽ സന്ദർശനം നടത്തിയത്.

മൂന്ന് വീടുകൾ നിർമിച്ച് നൽകി ലയൺസ് ക്ലബ്

കോതമംഗലം: ലയൺസ് ഇന്‍റർനാഷണൽ 318 - സി ചിറ്റിലപ്പള്ളി ഫൗണ്ടേഷന്‍റെ സഹകരണത്തോടെ കോതമംഗലം ഈസ്റ്റ് ലയൺസ് ക്ലബ് നൽകുന്ന അഞ്ച് വീടുകളിൽ വെളിയേച്ചാൽ കൂരികുളത്ത് നിർമാണം പൂർത്തീകരിച്ച മൂന്നു വീടുകളുടെ താക്കോൽ മുൻ ഡിസ്ട്രിക്റ്റ് ഗവർണർ രാജൻ എൻ. നമ്പൂതിരി കുടുബാംഗങ്ങൾക്കു കൈമാറി. ക്ലബ് പ്രസിഡന്‍റ് പി. തങ്കൻ അധ്യക്ഷത വഹിച്ചു. സോൺ ചെയർമാൻ ലൈജു ഫിലിപ്പ് മുഖ്യപ്രഭാഷണം നടത്തി.

കംപ്യൂട്ടര്‍ സയന്‍സ് ആൻഡ് ഡിസൈന്‍ അസോസിയേഷന്‍ ഉദ്ഘാടനം

വാഴക്കുളം: വിശ്വജ്യോതി എന്‍ജിനീയറിംഗ് കോളജില്‍ കംപ്യൂട്ടര്‍ സയന്‍സ് ആൻഡ് ഡിസൈന്‍ അസോസിയേഷന്‍ ഉദ്ഘാടനം ചെയ്തു. കംപ്യൂട്ടറൈസ്ഡ് അക്കൗണ്ടിംഗ് ആൻഡ് മാനേജ്‌മെന്‍റ് സര്‍വീസ് പ്രൈവറ്റ് ലിമിറ്റഡ് (കാംസ്) പ്രോജക്ട് മാനേജര്‍ ഡോ. ജോര്‍ജ്കുട്ടി ജോണ്‍ ഉദ്ഘാടനം ചെയ്തു. ബ്രിഡ്ജിംഗ് കോളജ് ടു കരിയര്‍ എന്ന വിഷയത്തിൽ അദ്ദേഹം മുഖ്യപ്രഭാഷണം നടത്തി. കോളജ് മാനേജര്‍ മോണ്‍. ഡോ. പയസ് മലേക്കണ്ടത്തില്‍, ഡയറക്ടര്‍ റവ. ഡോ. പോള്‍ പാറത്താഴം, പ്രിന്‍സിപ്പല്‍ ഡോ. കെ.കെ. രാജന്‍, ഡിപ്പാര്‍ട്ട്‌മെന്‍റ് മേധാവി സബിത രാജു, അസോസിയേഷന്‍ ഇന്‍ചാര്‍ജ് ഡോ. പീറ്റര്‍ റെജി രാമനാട്ട്, അസോസിയേഷന്‍ സെക്രട്ടറി അല്‍ക്ക മറിയം ബേബി എന്നിവര്‍ പങ്കെടുത്തു.

ലഹരിക്കെതിരേ സൈക്കിള്‍ റാലി

മൂവാറ്റുപുഴ: ലഹരി വിരുദ്ധ പ്രവര്‍ത്തനങ്ങളുടെ ഭാഗമായി എറണാകുളം ജില്ലാ പഞ്ചായത്തിന്‍റെ സഹകരണത്തോടെ പേഴയ്ക്കാപ്പിള്ളി ഗവ. ഹയര്‍ സെക്കന്‍ഡറി സ്‌കൂളില്‍ സൈക്കിള്‍ റാലി സംഘടിപ്പിച്ചു. പഞ്ചായത്ത് പ്രസിഡന്‍റ് എം.എസ്. അലിയാര്‍ റാലി ഫ്ലാഗ് ഓഫ് ചെയ്തു. പിടിഎ പ്രസിഡന്‍റ് ഫൈസല്‍ മുണ്ടക്കാമറ്റം അധ്യക്ഷത വഹിച്ചു. സ്ഥിരംസമിതി അധ്യക്ഷ നെജി ഷാനവാസ് ലഹരി വിരുദ്ധ പ്രതിജ്ഞ ചൊല്ലി. റെസിസ്റ്റന്‍സ് എന്ന പേരില്‍ എറണാകുളം ജില്ല പഞ്ചായത്ത് സംഘടിപ്പിക്കുന്ന കാന്പയിന്‍റെ ഭാഗമായാണ് പരിപാടി. വരും ദിവസങ്ങളില്‍ പോസ്റ്റര്‍ രചനാ മത്സരം, ഷോര്‍ട്ട് ഫിലിം നിര്‍മാണം, ക്വിസ് എന്നിവ നടക്കും. 30ന് ലഹരിമുക്ത കാമ്പസ് പ്രഖ്യാപനത്തോടെ പരിപാടികള്‍ സമാപിക്കും. പ്രിന്‍സിപ്പല്‍ ടി.ബി. സന്തോഷ് ലഹരിവിരുദ്ധ സന്ദേശം നല്‍കി. പ്രധാനാധ്യാപിക എ. സഫീന മുഖ്യപ്രഭാഷണം നടത്തി. എസ്എംസി ചെയര്‍മാന്‍ കെ.എന്‍. നാസര്‍, അധ്യാപകരായ പി.എം. റഹ്മത്ത്, പി.ഇ. സബിത, ഗീതു ജി. നായര്‍, പി.ആര്‍. അനുമോള്‍, കെ.എം. നൗഫല്‍, എം. സല്‍വ എന്നിവര്‍ പ്രസംഗിച്ചു.

നെല്ലിക്കുഴിയിൽ ചെക്ക്ഡാം റെഡി

കോതമംഗലം: നെല്ലിക്കുഴി പഞ്ചായത്തിലെ കുന്നത്തുകുഴി ചെക്ക്ഡാം നിർമാണം പൂർത്തീകരിച്ചു. കോതമംഗലം ബ്ലോക്ക് പഞ്ചായത്ത് 2024 - 2025 വാർഷിക പദ്ധതിയിൽ ഉൾപ്പെടുത്തി 20 ലക്ഷം രൂപ ചെലവഴിച്ചാണ് നെല്ലിക്കുഴി പഞ്ചായത്ത് പതിനേഴാം വാർഡിൽ ചെക്ക് ഡാമിന്‍റെ നിർമാണം പൂർത്തിയാക്കിയത്. ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ ഉദ്ഘാടനം ചെയ്തു. വൈസ് പ്രസിഡന്‍റ് ഡയാന നോബി അധ്യക്ഷത വഹിച്ചു. സ്ഥിരം സമിതി ചെയർമാൻമാരായ ജോമി തെക്കേക്കര, ജെയിംസ് കോറമ്പേൽ, ബ്ലോക്ക് പഞ്ചായത്ത് അംഗങ്ങളായ നിസ മോൾ ഇസ്മായിൽ, ടി.കെ. കുഞ്ഞുമോൻ, പഞ്ചായത്ത് അംഗങ്ങളായ ഷെറഫിയ ഷിഹാബ്, വൃന്ദ മനോജ്, നാസർ വട്ടേക്കാടൻ, പി.എ. ഷിഹാബ്, സി.വി. സൈനുദ്ദീൻ, സലിം അമ്പാട്ട് എന്നിവർ പ്രസംഗിച്ചു.

ഫലവൃക്ഷ തൈകൾ നൽകി

കോതമംഗലം: ബ്ലോക്ക് പഞ്ചായത്ത് വാർഷിക പദ്ധതിയുടെ ഭാഗമായി ഫലവൃക്ഷ തൈകൾ വിതരണം ചെയ്തു. 2025-2026 ജനകീയ ആസൂത്രണ പദ്ധതിയിൽ ഉൾപ്പെടുത്തി 10,70,000 രൂപ ചെലവഴിച്ച് ആറ് ഇനം അത്യുൽപാദന ശേഷിയുള്ള 6,000 ഫല വൃക്ഷ തൈകൾ ആണ് വിതരണത്തിനായി എത്തിച്ചിരിക്കുന്നത്. ഞാവൽ, ജബോട്ടിക്ക, അഭ്യു, മാങ്കോസ്റ്റിൻ, അവക്കാഡോ, ഡാൻസൂര്യ ജാക് എന്നിവയാണ് 75 ശതമാനം സബ്‌സിഡിയോടെ വിതരണം ചെയ്യുന്നത്. ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ ബ്ലോക്ക് തല വിതരണം ഉദ്ഘാടനം ചെയ്തു. വൈസ് പ്രസിഡന്‍റ് ഡയാന നോബി അധ്യക്ഷത വഹിച്ചു. കൃഷി അസിസ്റ്റന്‍റ് ഡയറക്റ്റർ പ്രിയമോൾ തോമസ്, ബ്ലോക്ക് പഞ്ചായത്ത് സ്ഥിരം സമിതി ചെയർമാൻ ജോമി തെക്കേക്കര,ബ്ലോക്ക് പഞ്ചായത്ത് അംഗം നിസ മോൾ ഇസ്മായിൽ, ജോയിന്‍റ് ബി.ഡി.ഒ. ഷൈജു പോൾ എന്നിവർ പ്രസംഗിച്ചു.

മാര്‍ ജോര്‍ജ് പുന്നക്കോട്ടിലിനെ സന്ദർശിച്ചു

മൂവാറ്റുപുഴ: ബിഷപ് മാര്‍ ജോര്‍ജ് പുന്നക്കോട്ടിലിന് നവതി ആശംസകള്‍ നേര്‍ന്ന് സിപിഎം ജില്ലാ സെക്രട്ടറി എസ്. സതീഷ്. മൂവാറ്റുപുഴ നെസ്റ്റ് പാസ്റ്ററല്‍ സെന്‍ററില്‍ എത്തിയാണ് ആശംസകള്‍ അറിയിച്ചത്. സിപിഎം മൂവാറ്റുപുഴ ഏരിയ സെക്രട്ടറി അനീഷ് എം. മാത്യു, ഏരിയ കമ്മിറ്റിയംഗം സജി ജോര്‍ജ്, സിപിഎം ആവോലി ലോക്കല്‍ കമ്മിറ്റിയംഗം അലക്‌സാണ്ടര്‍ ജോര്‍ഡി എന്നിവരും ഒപ്പമുണ്ടായിരുന്നു.

ഏമ്പക്കോട് കുടിവെള്ള പദ്ധതി ഉദ്ഘാടനം ചെയ്തു

പെരുമ്പാവൂർ: കൂവപ്പടി പഞ്ചായത്തിലെ ആറാം വാർഡിൽ നിർമിച്ച ഏമ്പക്കോട് കുടിവെളള പദ്ധതി ബെന്നി ബഹനാൻ എംപി ഉദ്ഘാടനം ചെയ്തു. മനോജ് മൂത്തേടൻ അധ്യക്ഷത വഹിച്ചു. ജില്ലാപഞ്ചായത്ത് പ്രസിഡന്‍റ് മനോജ് മൂത്തേടന്‍റെ വികസന ഫണ്ട് 30 ലക്ഷം രൂപ ചെലവഴിച്ചാണ് കുടിവെള്ള പദ്ധതി നിർമിച്ചത്. പഞ്ചായത്ത് പ്രസിഡന്‍റ് മായ കൃഷ്ണകുമാർ, ബ്ലോക്ക് പഞ്ചായത്ത് അംഗം അനു അബീഷ് , പഞ്ചായത്ത് അംഗങ്ങളായ സിനി എൽദോ ,ജിജി ശെൽവരാജ്, ഫാ. നെൽസൻ ജോയി, വാർഡ് വികസന സമിതി അംഗങ്ങളായ സാബു പാത്തിക്കൽ, എൽദോ പാത്തിക്കൽ , പി. ശിവൻ, മുരളീധരൻ മുളളൻ പറമ്പിൽ എന്നിവർ പ്രസംഗിച്ചു.

നായ ശല്യം നിയന്ത്രിക്കാൻ നടപടി സ്വീകരിക്കണം: ട്രുറ

തൃപ്പൂണിത്തുറ: നഗരത്തിൽതെരുവ് നായ ശല്യം പെരുകിവരുന്നത് നിയന്ത്രിക്കാൻ നടപടി സ്വീകരിക്കണമെന്ന് ട്രുറ മധ്യമേഖലാ വനിതാ വാർഷിക പൊതുയോഗം ആവശ്യപ്പെട്ടു. മേഖലാ പ്രസിഡന്‍റ് എം.പി. മേരിയുടെ അധ്യക്ഷതയിൽ നടന്ന പൊതുയോഗം ട്രുറ ചെയർമാൻ വി.പി. പ്രസാദ് ഉദ്ഘാടനം ചെയ്തു. വി.സി. ജയേന്ദ്രൻ, പി.എസ്. ഇന്ദിര, ബിൻസി ബിജു, പി.എം. മായ , സുഹദ തമ്പുരാൻ, പി.വി . ഇന്ദിരാദേവി തുടങ്ങിയവർ പ്രസംഗിച്ചു. പുതിയ ഭാരവാഹികളായി എം.വി. മേരി - പ്രസിഡന്‍റ്, ബിൻസി ബിജു - സെക്രട്ടറി, പി.എം. മായ - ട്രഷറർ എന്നിവരെ തെരഞ്ഞെടുത്തു.

തെരുവ് നായ ശല്യം: നടപടിയുമായി മരട് നഗരസഭ

മരട്: മരട് നഗരസഭ പ്രദേശത്ത് വർധിച്ചു വരുന്ന തെരുവ് നായ്ക്കളുടെ ഭീഷണി തടയുന്നതിനായി നഗരസഭ ചെയർമാൻ ആന്‍റണി ആശാംപറമ്പിലിന്‍റെ അധ്യക്ഷതയിൽ മോണിറ്ററിംഗ് കമ്മിറ്റി ചേർന്നു. നഗരസഭാ പ്രദേശത്ത് 650 ഓളം തെരുവ് നായ്ക്കളുണ്ടെന്നാണ് കണ്ടെത്തിയിട്ടുള്ളത്. ആദ്യഘട്ടമെന്ന നിലയ്ക്ക് നായ്ക്കൾക്ക് വാക്സിൻ എടുക്കുന്നതിനും പിന്നീട് സ്വകാര്യ ഏജൻസികളുടെ സഹകരണത്തോടെ എബിസി പ്രോഗ്രാം നടപ്പാക്കുന്നതിനും നായ്ക്കൾക്ക് ഭക്ഷണം നല്കുന്നതിനായി ഫീഡിംഗ് പോയിന്‍റുകൾ സ്ഥാപിക്കുന്നതിനും കമ്മിറ്റി തീരുമാനിച്ചു.

കറുകുറ്റി സ്റ്റാർ ജീസസ് ഹൈസ്കൂൾ 1993-96 ബാച്ച് കുടുംബസംഗമം നടത്തി

അങ്കമാലി : കറുകുറ്റി സ്റ്റാർ ജീസസ് ഹൈസ്കൂൾ പൂർവവിദ്യാർത്ഥികളുടെ 1993- 96 ബാച്ചിന്‍റെ കുടുംബസംഗമം സംഘടിപ്പിച്ചു. കറുകുറ്റി ചോല ഫാം റിസോർട്ടിൽ കലാ-കായിക മത്സരത്തോടെയാണ് ഈ കുടുംബ കൂട്ടായ്മയ്ക്ക് വേദിയിരുക്കിയത്. ചത്തീസ്ഗഡിൽ നടന്ന ബാസ്കറ്റ് ബോൾ ചാമ്പ്യൻ ഷിപ്പിൽ കേരളത്തെ പ്രതിനിധീകരിച്ച് ഇന്‍റർ സ്കൂൾ (14 വയസിന് താഴെ) കേരളത്തെ പ്രതിനിധീകരിച്ച അഭിനവ്‌ ബിജു, തൃശൂർ കിഡീസ് ബാസ്ക്കറ്റ്ബോൾ ടീം അംഗം അഭിനന്ദ് ബിജു, ഈ വർഷത്തെ എസ് എസ് എൽ സി വിജയി ഡോണൽ ടെൻസൻ, പ്ലസ് ടു വിജയി ഏയ്‌ഞ്ചൽ ടോണി, കരാട്ടെ എറണാകുളം ഡിസ്റ്റിക്ട് ചാമ്പ്യൻഷിപ്പിൽ ഒന്നും രണ്ടും സ്ഥാനങ്ങൾ നേടിയ ഡോണാൾഡ് ടെൻസൻ, ഡാനിയേൽ ടെൻസൻ, യൂട്യൂബർമാരായ ദിപു പരമേശ്വരൻ, ബിജു നാണു, ജുവൽ ബൈജു എന്നീ അംഗങ്ങളെ ചടങ്ങിൽ ആദരിച്ചു. ഭാരവാഹികളായ സനൽ ജോസഫ്, ബിജു നാണു, ബിനു പ്ലാക്കൽ, ഷൈജു ജോസഫ് ബൈജു വർഗ്ഗീസ്, ഷാജി ജോൺ, എബി അഗസ്റ്റിൻ, ടെൻസൻ ജോസഫ്, സുനിൽ മാവേലി എന്നിവർ പരിപാടികൾക്ക് നേതൃത്വം നൽകി.

മലയാറ്റൂരിൽ വള്ളംകളിക്കായി വിപുലമായ ഒരുക്കങ്ങൾ

കാലടി: മണപ്പാട്ട് ചിറയിൽ വള്ളംകളിക്കായി വിപുലമായ ഒരുക്കങ്ങളുമായി മലയാറ്റൂർ നിവാസികൾ. ഒക്ടോബർ രണ്ടിനാണ് വള്ളംകളി മത്സരങ്ങൾ. പ്രമുഖ ടീമുകൾ മത്സരത്തിൽ പങ്കെടുക്കും. വിളംബര ഘോഷയാത്രയ്ക്ക് ശേഷം വള്ളംകളി മത്സരങ്ങൾ ആരംഭിക്കും. വള്ളംകളിക്ക് എട്ടു ടീമുകളാണ് മത്സര രംഗത്തുള്ളത്. ഒന്നാം സമ്മാനം 25,000 രൂപ തുടങ്ങി മറ്റ് സമ്മാനങ്ങളും നൽകും. സംഘാടക സമിതി ചെയർമാൻ റോജി എം. ജോൺ എംഎൽഎ, ഗ്രാമ പഞ്ചായത്ത് പ്രസിഡന്‍റ് ജോയി അവോക്കാരൻ, വൈസ് പ്രസിഡന്‍റ് ലൈജി ബിജു, മെമ്പർമാരായ ജോയ്സൺ ഞാളിയൻ, ഷിൽബി ആന്‍റണി , ആനി ജോസ്, ബിൻസി ജോയ്, ബിജി സെബാസ്റ്റ്യൻ, വിജി റെജി, മിനി സേവ്യർ, സർവകക്ഷി നേതാക്കളായ ബിജു കണിയാംകുടി, സി.എസ്. ബോസ്, ജോബി വെളുത്തേപ്പിള്ളി, നെൽസൺ മാടവന എന്നിവർ പത്രസമ്മേളനത്തിൽപങ്കെടുത്തു

അട്ടാറ ലിങ്ക് റോഡിൽ നാട്ടുകാർ പാലം നിർമിച്ചു

അങ്കമാലി: കറുകുറ്റി പഞ്ചായത്തിലെ വടക്കേ അട്ടാറ, മൂക്കന്നൂർ പഞ്ചായത്തിലെ തെക്കേ അട്ടാറ നിവാസികളുടെ ചിരകാലസ്വപ്നം പൂവണിഞ്ഞു. വടക്കേ- തെക്കേ അട്ടാറ ലിങ്ക് റോഡ് നിർമാണവും ഈ റോഡിൽ നിർമിച്ചിരുന്ന താൽക്കാലിക പാലം തകർന്നതിനെ തുടർന്ന് കോൺക്രീറ്റ് പാലവും തദ്ദേശവാസികളുടെ തന്നെ ഒത്തൊരുമയോടെ സഫലമാക്കിയതിന്‍റെ ആഹ്ലാദ നിറവിലാണ് ഇവിടത്തുകാർ. ഇരു പഞ്ചായത്ത്‌ നിവാസികൾക്കും രണ്ടിടങ്ങളിലേക്കും വളരെ എളുപ്പയാത്ര സാധ്യമാക്കുന്ന ലിങ്ക് റോഡാണിത്. 2022 നവംബർ മാസത്തിൽ റോഡ് നിർമാണം തുടങ്ങി. മൂന്ന് മാസത്തിനുശേഷം താത്കാലിക പാലം സ്ഥാപിച്ച് റോഡ് നിർമാണം പൂർത്തിയാക്കി. രണ്ട് വർഷം പിന്നിട്ട താത്കാലിക പാലംഅഞ്ച് മാസം മുൻപ് പൂർണമായി തകർന്ന് ഇതുവഴി ഗതാഗതതടസം നേരിട്ടു. ഇതേത്തുടർന്ന് തദ്ദേശ വാസികളുടെ അശ്രാന്ത ശ്രമഫലമായാണ് കോൺക്രീറ്റ് പാലം പണി ഈയിടെ പൂർത്തിയാക്കിയത്. റോഡ് പണിക്ക് നാട്ടുകാരുടെ ശ്രമദാന പ്രവർത്തനങ്ങൾ കൂടാതെ 1. 5 ലക്ഷവും പുതിയ പാലത്തിന് ഏകദേശം 1.7 ലക്ഷവും ചെലവായി. ഈ തുക പൂർണമായും പ്രദേശവാസികളിൽ നിന്ന് പിരിവെടുത്താണ് നടത്തിയത്. ഇതേ തുടർന്ന് കെ.പി. ഹോർമിസ് ചാരിറ്റബിൾ ട്രസ്റ്റ് വഴി അഞ്ച് സോളാർ ലൈറ്റുകൾ ഈ റോഡിൽ സ്ഥാപിക്കുകയുണ്ടായി. പുതിയ പാലം നിർമിക്കുന്നതിന് ചിലവിന്‍റെ മുഖ്യപങ്കും വഹിച്ചത് മൂക്കന്നൂർ തെക്കേ അട്ടാറയിൽ പ്രവർത്തിക്കുന്ന ഹീ -മാൻ റോബോട്ടിക് പാർക്ക്‌ എംഡി കെ.ടി. ജോസാണ്. സിഎസ്ടി ബ്രദേഴ്സിന്‍റെയും, ഇരുമ്പിന്‍റെ റെഡിമെയ്ഡ് പാലം ക്രെയിൻ ഉപയോഗിച്ച് കൊണ്ടുവന്ന് കോൺക്രീറ്റിൽ ഉറപ്പിയ്ക്കാൻ രഞ്ജൻ ജെയിംസിന്‍റെയും സഹായവും ഉണ്ടായി. ടോമി ഒലിവേലി കോൺട്രാക്ടർ വർക്ക് നിറവേറ്റി. പാലത്തിന്‍റെ ഉദ്ഘാടനം വാർഡ് മെമ്പർ എൻ.ഒ. കുരിയച്ചൻ നിർവഹിച്ചു. റോഡ് നിർമാണ കമ്മിറ്റി കോ ഓർഡിനേറ്റർ മാത്യു ഹോർമീസ് പാലാട്ടി അധ്യക്ഷത വഹിച്ചു. ഹീ -മാൻ റോബോട്ടിക് പാർക്ക് എംഡി കെ.ടി. ജോസ് , റോഡ് നിർമാണ സമിതിയംഗം സെബി ജോസഫ് പള്ളിയാൻ, കെ.പി. ഹോർമിസ് ചാരിറ്റബിൾ ട്രസ്റ്റ് പ്രസിഡന്‍റ് പി.പി. മത്തായി, സെക്രട്ടറി എൻ.ഒ. പൗലോസ്, കറുകുറ്റി പഞ്ചായത്ത്‌ മെമ്പർ ജിജോ പോൾ, സൗത്ത് അട്ടാറ റെസിഡന്‍റ്സ് അസോസിയേഷൻ സെക്രട്ടറി സാജു ഏനായി എന്നിവർ പ്രസംഗിച്ചു.

കെഎൽസിഎയുടെ നേതൃത്വത്തിൽ പ്രതിഭോത്സവവും സമനീതി സംഗമവും

ഫോർട്ടുകൊച്ചി: കെഎൽസിഎ സെന്‍റ് ജോസഫ്സ് ചുള്ളിക്കൽ യൂണിറ്റിന്‍റെ ആഭിമുഖ്യത്തിൽ സമനീതി സംഗമവും പ്രതിഭോത്സവവും സംഘടിപ്പിച്ചു. കൊച്ചി രൂപത വികാരി ജനറാൾ മോൺ. ഷൈജു പരിയാത്തുശേരി സംഗമം ഉദ്ഘാടനം ചെയ്‌തു. കെഎൽസിഎ യൂണിറ്റ് പ്രസിഡന്‍റ് ബെന്നി ജോസഫ് അധ്യക്ഷത വഹിച്ചു. രൂപത ഡയറക്ടർ ഫാ. ആന്‍റണി കുഴിവേലിൽ മുഖ്യ പ്രഭാഷണം നടത്തി. യൂണിറ്റ് ഡയറക്ടർ ഫാ. എമ്മാനുവൽ പൊള്ളയിൽ അനുഗ്രഹ പ്രഭാഷണം നടത്തി. രൂപത പ്രസിഡന്‍റ് പൈലി ആലുങ്കൽ, സഹ വികാരി ഫാ. ജോബിൻ മാത്യു, മേഖല പ്രസിഡന്‍റ് ലിനു തോമസ്, രൂപത സെക്രട്ടറി വിദ്യ ജോജി, യൂണിറ്റ് ഭാരവാഹികളായ കെപി സേവ്യർ, റജീന ലീനസ്, ടോണി സാമുവൽ, ജോജി ജോർജ്, കൗൺസിലർ ബാസ്റ്റിൻ ബാബു തുടങ്ങിയവർ സംസാരിച്ചു. തുടർന്ന് നടന്ന കലാസദ്യ ഡയാന സിൽവസ്റ്റർ ഉത്‌ഘാടനം ചെയ്‌തു.

മോഷണശ്രമത്തിനിടെ പിടിയിൽ

ആലുവ: ആലുവ സെന്‍റ് ഫ്രാൻസിസ് ഹയർ സെക്കൻഡറി സ്കൂൾ ഓഫീസ് വാതിലുകൾ തകർത്ത് മോഷണം നടത്തുന്നതിനിടെ പ്രതിയെ ആലുവ പോലീസ് പിടികൂടി. ഇടുക്കി ഉടുമ്പൻചോല മരിയാപുരം നിരവത്ത് വീട്ടിൽ മഹേഷ് (41)ആണ് പിടിയിലായത്. കോട്ടയം, ഇടുക്കി ജില്ലകളിലായി നിരവധി മോഷണക്കേസുകളിൽ ഇയാൾ പ്രതിയാണ്. കഴിഞ്ഞ ദിവസം രാത്രി 11 ഓടെ സ്കൂൾ ഓഫീസിൽ നിന്നും വലിയ ശബ്ദം കേട്ട് സമീപത്തെ കോൺവെൻറിലെ സിസ്റ്റേഴ്സ് ആണ് മോഷണ ശ്രമം കണ്ട് ആലുവ പോലീസിനെ അറിയിച്ചത്. എൽപി സ്കൂൾ, ഹൈസ്കൂൾ, ഹയർ സെക്കൻഡറി സ്കൂൾ ഓഫീസുകളിലാണ് മോഷണത്തിന് ശ്രമിച്ചത്. എൽപി സ്കൂളിലെയും ഹൈസ്കൂളിലെയും ഓഫീസ് വാതിലുകൾ പ്രതി തകർത്തു. എൽപി സ്കൂളിൽ നിന്ന് 200 രൂപ ഒഴികെയൊന്നും മോഷ്ടാവിന് ലഭിച്ചില്ല.

കരാറുകാരനെ ആക്രമിച്ച സഹോദരങ്ങൾ അറസ്റ്റിൽ

കാലടി: വീടു പണിയുടെ കരാറുകാരനെ ആക്രമിച്ച് പരിക്കേൽപ്പിച്ച കേസിൽ സഹോദരന്മാർ അറസ്റ്റിൽ. ശ്രീമൂലനഗരം ചൊവ്വര ആശാരിമൂലയിൽ വിനോദ് (42), വിജു (44) എന്നിവരെയാണ് കാലടി പോലീസ് അറസ്റ്റ് ചെയ്തത്. സുരേഷ് എന്നയാളെയാണ് ആക്രമിച്ചത്. പ്രതികളുടെ ബന്ധുവിന്‍റെ വീടു പണിഞ്ഞതിനെ ചൊല്ലിയുള്ള തർക്കമാണ് മർദനത്തിൽ കലാശിച്ചത്. തിങ്കളാഴ്ചയായിരുന്നു സംഭവം. ഇൻസ്പെക്ടർ അനിൽ കുമാർ ടി. മേപ്പിള്ളി, എസ്ഐമാരായ ജയിംസ് മാത്യു, ജോഷി മാത്യു , റെജിമോൻ , ഏഎസ്ഐ സെബാസ്റ്റ്യൻ, സിപിഒമാരായ ജീമോൻ കെ. പിള്ള, നീതു എന്നിവരാണ് അന്വേഷണ സംഘത്തിലുള്ളത്.

തെരുവുനായ ശല്യം രൂക്ഷം

പറവൂർ: പറവൂർ മേഖലയിൽ തെരുവുനായശല്യംദിനംതോറും വർധിക്കുന്നു. തദ്ദേശ സ്വയംഭരണ സ്ഥാപനങ്ങളിൽ ഷെൽട്ടർ സ്ഥാപിച്ച് പൊതുഇടങ്ങളിലുള്ള തെരുവുനായ ശല്യത്തിന് അറുതി വരുത്തണമെന്ന് റെസിഡന്‍റ്സ് അസോ. അപ്ക്സ് കൗൺസിൽ പറവൂർ വരാപ്പുഴ മുത്തകുന്നം മേഖലാ കമ്മിറ്റിക്ക് വേണ്ടി പ്രസിഡന്‍റ് ജോസ് പോൾ വിതയത്തിൽ അധികൃതരോടാവശ്യപ്പെട്ടു.

എം.കെ. അര്‍ജുനന്‍ മാസ്റ്റര്‍ കള്‍ച്ചറല്‍ സെന്‍റർ നവീകരണം: നിർമാണോദ്ഘാടനം നടത്തി

കൊച്ചി: പ്രശസ്ത സംഗീതജ്ഞന്‍ എം.കെ. അര്‍ജുനന്‍ മാസ്റ്ററുടെ പേരില്‍ പള്ളുരുത്തിയില്‍ ആധുനിക രീതിയില്‍ നവീകരിക്കുന്ന കള്‍ച്ചറല്‍ സെന്‍റര്‍ കം സ്‌പോര്‍ട്‌സ് സെന്‍ററിന്‍റെ നിര്‍മാണോദ്ഘാടനം കെ.ജെ. മാക്‌സി എംഎല്‍എ നിര്‍വഹിച്ചു. ഗ്രീന്‍ റൂം ഉള്‍പ്പെടെയുള്ള നിലവിലെ കെട്ടിടത്തിന്‍റെ ശേഷി വര്‍ധിപ്പിക്കും. സന്ദര്‍ശകര്‍ക്കുള്ള സൗകര്യാനുസരണം ആധുനിക ടോയ്‌ലറ്റ് സംവിധാനം നിര്‍മിക്കും. നിര്‍മാണങ്ങളെല്ലാം ഭിന്നശേഷി സൗഹൃദപരമായിരിക്കും. എല്ലാ പ്രായത്തിലുള്ളവര്‍ക്കും വ്യായാമം ചെയ്യുന്നതിനായി ഗ്രൗണ്ടിന് ചുറ്റും വാക് വേ നിര്‍മിക്കും. വിശ്രമിക്കുന്നതിനും സമയം ചിലവിടുന്നതിനുമായി കൂടുതല്‍ ഇരിപ്പിടങ്ങള്‍ സജ്ജമാക്കും. ഓപ്പണ്‍ ജിം, ആംഫി തീയറ്റര്‍, കുട്ടികള്‍ക്കായി കളിയിടം, സെക്യൂരിറ്റി ക്യാബിന്‍, ഫീഡിംഗ് റൂം എന്നിവയും ഉണ്ടാകും. ഗ്രൗണ്ടിന്‍റെ ചുറ്റുമതില്‍ നവീകരിച്ച് ആകര്‍ഷകമാക്കും. ഹൈ മാസ്റ്റ് ലൈറ്റ്, കൂടുതല്‍ ബൊള്ളാര്‍ഡ് ലൈറ്റുകള്‍, ലാമ്പ് പോസ്റ്റുകള്‍ എന്നിവ സ്ഥാപിക്കും. ഗ്രൗണ്ടിന് ചുറ്റും ലാന്‍ഡ് സ്‌കെപ്പിംഗ് നടത്തി കൂടുതല്‍ സുന്ദരമാക്കും. പള്ളുരുത്തിയില്‍ 1.59 ഏക്കറില്‍ സ്ഥിതി ചെയ്യുന്ന എം.കെ. അര്‍ജുനന്‍ മാസ്റ്റര്‍ ഗ്രൗണ്ടിലാണ് പരമ്പരാഗത കലകളെ പരിപോഷിപ്പിക്കുന്നതിനായി സാംസ്‌കാരികകേന്ദ്രം ആരംഭിക്കുന്നത്. ഇവിടെ സ്‌റ്റേജ് ഉള്‍പ്പെടെ പുതുതായി നിര്‍മിക്കും. പുതുതലമുറയ്ക്ക് സാംസ്‌കാരിക പൈതൃകത്തെ കുറിച്ചുള്ള അറിവുകള്‍ നല്‍കുന്നതിനും മികവ് സൃഷ്ടിക്കുന്നതിനുമായി ശില്പശാലകള്‍, സംഗീതസദസുകള്‍ തുടങ്ങി പൊതുജനങ്ങള്‍ക്കായി കൂടുതല്‍ സൗകര്യപ്രദമായ പൊതുയിടങ്ങള്‍ ഒരുക്കുക എന്നതാണ് കള്‍ച്ചറല്‍ സെന്‍റര്‍ നവീകരണത്തിലൂടെ ലക്ഷ്യം വയ്ക്കുന്നതെന്ന് മേയര്‍ അഡ്വ.എം. അനില്‍കുമാര്‍ പറഞ്ഞു. മേയര്‍ അഡ്വ. എം.അനില്‍കുമാര്‍ അധ്യക്ഷത വഹിച്ച ചടങ്ങില്‍ ഡെപ്യൂട്ടി മേയര്‍ കെ.എ. അന്‍സിയ, കോര്‍പറേഷന്‍ സ്ഥിരം സമിതി അധ്യക്ഷരായ സി.എ. ഷക്കീര്‍, സി.ഡി. വല്‍സലകുമാരി, വി.എ. ശ്രീജിത്ത്, കൗണ്‍സിലര്‍ സി.ആര്‍. സുധീര്‍, ജിസിഡിഎ ചെയര്‍മാന്‍ കെ.ചന്ദ്രന്‍പിള്ള, മുന്‍ ചീഫ് സെക്രട്ടറി കെ.ജയകുമാര്‍, ജിസിഡിഎ സെക്രട്ടറി എം.വി. ഷാരി, ടൗണ്‍ പ്ലാനിംഗ് ഓഫീസര്‍ എസ്. സുഭാഷ് എന്നിവര്‍ പ്രസംഗിച്ചു. കിഫ്ബി ഫണ്ടില്‍ നിന്ന് 3.88 കോടി ചിലവഴിച്ച് കൊച്ചി നഗരസഭ ജിസിഡിഎ യും സിഎസ്എംഎല്ലുമായി സഹകരിച്ചാണ് പദ്ധതി നടപ്പിലാക്കുന്നത്. ഒന്‍പത് മാസം കൊണ്ട് പദ്ധത പൂര്‍ത്തീകരിക്കും.

സമൃദ്ധിയില്‍ ആയുര്‍വേദ വിധിപ്രകാരം തയാറാക്കിയ ചെറുകടികൾ വിതരണം ചെയ്തു

കൊച്ചി: ദേശീയ ആയുര്‍വേദ ദിനത്തോടനുബന്ധിച്ച് ആയുര്‍വേദ മെഡിക്കല്‍ അസോസിയേഷന്‍ ഓഫ് ഇന്ത്യ എറണാകുളം ജില്ലാ കമ്മിറ്റി സമൃദ്ധി ഭക്ഷണശാലയില്‍ ആയുര്‍വേദ വിധിപ്രകാരം പാകം ചെയ്ത മില്ലറ്റ് അട, ശാരിബാദി പാനകം എന്നിവ വിതരണം ചെയ്തു. ജില്ലാ പ്രസിഡന്‍റ് ഡോ. മനു ആര്‍. മംഗലത്ത്, ട്രഷറര്‍ ഡോ. രണ്‍ചന്ദ്, ഡോ. എസ്.കെ. ശ്രീരാജ്, ഡോ. ജിഷ്ണു വേണുഗോപാല്‍ എന്നിവര്‍ പങ്കെടുത്തു.

ഏലൂർ ചൗക്ക-ചേരാനല്ലൂർ പാലത്തിന് ഭരണാനുമതി

ഏലൂർ: മുട്ടാർ നദിക്കു കുറുകെയുള്ള ഏലൂർ ചൗക്ക -ചേരാനല്ലൂർ പാലം നിര്‍മാണത്തിന് ഭരണാനുമതി ലഭിച്ചതായി മന്ത്രി പി. രാജീവ് അറിയിച്ചു. 27.70 കോടി രൂപയുടെ പദ്ധതിയാണിത്. 153.24 മീറ്റർ നീളവും 11 മീറ്റർ വീതിയുമുള്ളതാണ് നിർദിഷ്ട പാലം. ഇതിൽ 20 മീറ്റർ വീതം നീളമുള്ള രണ്ടു ലാൻഡ് സ്പാനുകളും 19.85 മീറ്റർ നീളമുള്ള നാലു ലാൻഡ് സ്പാനുകളും, 32.04 മീറ്റർ നീളമുള്ള മധ്യ സ്പാനുമുണ്ട് . 7.50 മീറ്റർ വീതിയുള്ള കാരിയേജ് വേയും ഇരുഭാഗത്തുമായി 1.5 മീറ്റർ വീതിയുള്ള നടപ്പാതകളും നിർമിക്കും. ചേരാനല്ലൂർ ഭാഗത്ത് 329 ഉംഏലൂർ ഭാഗത്ത് 335 ഉം മീറ്റർ നീളത്തിലുള്ള അപ്രോച്ച് റോഡുകളും സര്‍വീസ് റോഡുകളും നിർമിക്കും. പ്രദേശവാസികളുടെ ദീർഘകാല ആവശ്യമായ പാലം നിർമാണം സമയബന്ധിതമായി പൂർത്തിയാക്കുമെന്നും മന്ത്രി പറഞ്ഞു.

പാനായിക്കുളം ഗവ. എൽപി സ്കൂളിൽ പുതിയ കെട്ടിടം നിർമിക്കാൻ ഭരണാനുമതി

ആലങ്ങാട് : പാനായിക്കുളം ഗവ. എൽപി സ്കൂളിൽ പുതിയ കെട്ടിടം നിർമിക്കാകാൻ സർക്കാർ ഭരണാനുമതി നൽകി. പുതിയ ക്ലാസ് റൂമുകൾ ഒരുക്കുന്നതിനാണ് 95.60 ലക്ഷം രൂപ അനുവദിച്ചിരിക്കുന്നത് എന്ന് വ്യവസായ മന്ത്രി പി.രാജീവ് പറഞ്ഞു. വിദ്യാഭ്യാസ വകുപ്പിൻ്റെ പദ്ധതി വിഹിതത്തിൽ നിന്നാണ് തുക അനുവദിച്ചത്. കളമശേരി മണ്ഡലത്തിൽ സ്കൂളുകളുടെ അടിസ്ഥാന സൗകര്യങ്ങൾ വികസിപ്പിക്കുന്നതിന് 30 കോടി രൂപയാണ് ചെലവഴിക്കുന്നത്. പുതിയ ക്ലാസ് മുറികൾ, ലാബുകൾ, പാചകപ്പുരകൾ തുടങ്ങി വിവിധ സൗകര്യങ്ങൾ ഒരുക്കുന്നതിനാണിത്.

ഉദ്ഘാടനം കഴിഞ്ഞിട്ട് രണ്ടുവർഷമായിട്ടും ഞാറക്കലിലെ കുടിവെള്ള സംഭരണി പ്രവർത്തനമാരംഭിച്ചില്ല

വൈപ്പിൻ : രണ്ടര വർഷം മുമ്പ് വകുപ്പു മന്ത്രി കൊട്ടിഘോഷിച്ച് ഉദ്ഘാടനം ചെയ്ത ഞാറക്കലെ കുടിവെള്ള സംഭരണി ഇന്നും വറ്റിവരണ്ടു തന്നെ കിടക്കുന്നു. ഇതിൽനിന്നു തുള്ളി വെള്ളം പോലും സംഭരിക്കാനോ വിതരണം ചെയ്യാനോ അധികൃതർ നാളിതുവരെ നടപടിയെടുത്തിട്ടില്ലെന്ന് ഗോശ്രീ മനുഷ്യവകാശ സംരക്ഷണ സമിതി ആരോപിക്കുന്നു. കുടിവെള്ളത്തിനായി നെട്ടോട്ടമോടുന്ന നായരമ്പലം, ഞാറക്കൽ നിവാസികളുടെ ദാഹമകറ്റാൻ ആറുകോടി രൂപ ചെലവാക്കിയാണ് ഈ ടാങ്ക് നിർമിച്ചത്. എന്നിട്ടും ഇഴഞ്ഞു വലിഞ്ഞ് 12 വർഷം കൊണ്ടാണ് വാട്ടർ അഥോറിറ്റി ഈ ജലസംഭരണിയുടെ നിർമാണം പൂർത്തിയാക്കിയത്. ഇതിനുശേഷം സ്ഥലം എംഎൽഎയുടെ നേതൃത്വത്തിലാണ് വകുപ്പുമന്ത്രി എത്തി ഉത്സവ മേളത്തോടെ ഉദ്ഘാടനം നടത്തിയത്. ഇതേ അവസ്ഥ തന്നെയാണ് മുരുക്കുംപാടം ജലസംഭരണിക്കും. വൈപ്പിൻ ദ്വീപിന്‍റെ തെക്കൻ മേഖലകളിലെ ദാഹം അകറ്റാൻ നാലു കോടി രൂപ ചെലവിൽ നിർമിച്ചതാണിത്. ഇതും ഉദ്ഘാടനം കഴിഞ്ഞ് വർഷങ്ങളായി . എന്നിട്ടും പ്രവർത്തനം ഇതുവരെ ആരംഭിച്ചിട്ടില്ല. ഈ സാഹചര്യത്തിൽ രണ്ടു സംഭരണികളും ഒരു മാസത്തിനകം പ്രവർത്തനം ആരംഭിച്ചില്ലെങ്കിൽ എറണാകുളം വാട്ടർ അഥോറിറ്റി സൂപ്രണ്ടിംഗ് എൻജിനീയറുടെ ഓഫീസിനു മുന്നിൽ ബഹുജനപ്രക്ഷോഭം ആരംഭിക്കുമെന്ന് ഗോശ്രീ മനുഷ്യാവകാശ സംരക്ഷണ സമിതി ചെയർമാൻ പോൾ ജെ. മാമ്പിള്ളി അറിയിച്ചു.

മധ്യവയസ്‌കൻ വീടിനുള്ളില്‍ മരിച്ചനിലയില്‍

മൂവാറ്റുപുഴ : വാളകം കുന്നയ്ക്കാലില്‍ ഒറ്റയ്ക്ക് താമസിച്ചിരുന്ന മധ്യവയസ്‌കനെ വീടിനുള്ളില്‍ മരിച്ചനിലയില്‍ കണ്ടെത്തി. ഓട്ടോറിക്ഷ തൊഴിലാളിയായ വാളകം കുന്നയ്ക്കാല്‍ ഇരുമ്പായില്‍ സാബു ജോണി (65)നെയാണ് വീടിനുള്ളില്‍ മരിച്ചനിലയില്‍ കണ്ടെത്തിയത്. മൊബൈല്‍ ഫോണില്‍ വിളിച്ച് കിട്ടാത്തതിനെ തുടര്‍ന്ന് പ്രദേശവാസികളും ഓട്ടോറിക്ഷ തൊഴിലാളികളും ചേര്‍ന്ന് പരിശോധന നടത്തിയപ്പോഴാണ് വീടിനുള്ളില്‍ മരിച്ചനിലയില്‍ കണ്ടത്. മൃതദേഹത്തിന് രണ്ട് ദിവസത്തോളം പഴക്കമുണ്ടെന്നാണ് പ്രാഥമിക നിഗമനം. മൂവാറ്റുപുഴ പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു. സംസ്‌കാരം ഇന്ന് രണ്ടിന് കുന്നയ്ക്കാല്‍ സെന്‍റ് ജോര്‍ജ് പള്ളിയില്‍. മാതാവ്: പരേതയായ സാറാമ്മ കോലഞ്ചേരി മഠത്തിക്കുടി കുടുംബാംഗം. സഹോദരങ്ങള്‍: സാജു, സജി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]