ADVERTISEMENT

ADVERTISEMENT

പേപ്പര്‍ സീഡ് പേനകള്‍ നിര്‍മിച്ച് വിദ്യാര്‍ഥികള്‍

തൃക്കാക്കര: പ്ലാസ്റ്റിക് വിരുദ്ധ പരിസ്ഥിതി പ്രവര്‍ത്തനങ്ങളുടെ ഭാഗമായി പേപ്പര്‍ സീഡ് പേനകള്‍ നിര്‍മിച്ചു കാര്‍ഡിനല്‍ ഹയര്‍ സെക്കൻഡറി സ്കൂളിലെ സ്‌കൗട്ട്‌സ് ആന്‍ഡ് ഗൈഡ്‌സ്, എന്‍എസ്എസ് വോളൻന്‍റിയർമാർ.

വിത്തുകള്‍ നിക്ഷേപിച്ച പേപ്പര്‍ പേനകളാണ് കുട്ടികള്‍ നിര്‍മിച്ചത്. സഹപാഠികള്‍ക്കും അധ്യാപകര്‍ക്കും പേനകള്‍ വിതരണം ചെയ്തു. പ്രിന്‍സിപ്പല്‍ ടി. തോമസ്, അധ്യാപകരായ ടെസി ജോണ്‍, ആശ ദേവസി, ശ്രീജ പി. ചന്ദ്രന്‍ എന്നിവര്‍ പരിപാടികള്‍ക്ക് നേതൃത്വം നല്‍കി.

ADVERTISEMENT

ജനകീയ പ്രതിഷേധ കൂട്ടായ്മ

മൂവാറ്റുപുഴ: ആദ്യ ഘട്ട ടാറിംഗ് പൂര്‍ത്തീകരിച്ച നഗര റോഡ് ഗതാഗതത്തിനായി തുറന്ന് നല്‍കിയ ട്രാഫിക് എസ്‌ഐ കെ.പി. സിദ്ദിഖിനെ സസ്‌പെൻഡ് ചെയ്ത നടപടിയില്‍ ജനകീയ പ്രതിഷേധ കൂട്ടായ്മ സംഘടിപ്പിച്ചു. ഡീന്‍ കുര്യാക്കോസ് എംപി ഉദ്ഘാടനം നിർവഹിച്ചു. നഗരസഭാധ്യക്ഷന്‍ പി.പി എല്‍ദോസ് അധ്യക്ഷത വഹിച്ചു. മാത്യു കുഴല്‍നാടന്‍ എംഎല്‍എ, മുന്‍ എംഎല്‍എ ജോസഫ് വാഴയ്ക്കന്‍, പ്രഫ. എം.പി മത്തായി, വിവിധ കക്ഷി നേതാക്കളായ കെ.എം സലിം, പി.എ ബഷീര്‍, ഷൈസന്‍ പി. മാങ്ങഴ, തോമസ് പീച്ചപ്പിള്ളി, ബേബി ജോണ്‍, എം.എസ് സുരേന്ദ്രന്‍, സാബു ജോണ്‍, സുഭാഷ് കടയ്‌ക്കോട്, ഉല്ലാസ് തോമസ്, ജോസ് പെരുമ്പിള്ളിക്കുന്നേല്‍, സലിം ഹാജി, മുഹമ്മദ് പനക്കന്‍ എന്നിവര്‍ പ്രസംഗിച്ചു.

എൽഡിഎഫ് പ്രതിഷേധിച്ചു

കൂത്താട്ടുകുളം: എൽഡിഎഫ് ഭരണം അട്ടിമറിച്ച് അധികാരമേറ്റ യുഡിഎഫ് ഭരണസമിതിയുടെ കെടുകാര്യസ്ഥതക്കെതിരേ എൽഡിഎഫ് മുനിസിപ്പൽ സമിതിയുടെ നേതൃത്വത്തിൽ നഗരസഭ വളയൽ സമരം നടന്നു. രാമപുരം കവലയിൽനിന്നും പ്രതിഷേധവുമായിയെത്തിയ സമരക്കാരെ പോലീസ് നഗരസഭയ്ക്ക് മുന്നിൽ തടഞ്ഞു. തുടർന്നു നഗരസഭയ്ക്കു മുന്നിൽ നടന്ന പ്രതിഷേധ സമരം സിപിഎം ജില്ലാ സെക്രട്ടറി എസ്. സതീഷ് ഉദ്ഘാടനം ചെയ്തു. എ.എസ്. രാജൻ അധ്യക്ഷത വഹിച്ചു.

ശാന്തിഗിരിയിൽ ഭിന്നശേഷി പുനരധിവാസ പദ്ധതി ഉദ്ഘാടനം ഇന്ന്

തൊടുപുഴ: വഴിത്തല ശാന്തിഗിരിയിൽ ഭിന്നശേഷി പുനരധിവാസ നൂതന പദ്ധതികളുടെ ഉദ്ഘാടനം ഇന്ന്. ഉച്ചകഴിഞ്ഞ് മൂന്നിന് ശാന്തിഗിരി കോളജിലെ ഫാ. ബീഡ് ഹാളിൽ ചേരുന്ന സമ്മേളനം പി.ജെ. ജോസഫ് എംഎൽഎ ഉദ്ഘാടനം ചെയ്യും. മൂവാറ്റുപുഴ കാർമൽ പ്രൊവിൻഷ്യൽ ഫാ. മാത്യു മഞ്ഞക്കുന്നേൽ അധ്യക്ഷത വഹിക്കും. സാമൂഹ്യനീതി ഓഫീസർ വി.എ. ഷംനാദ് മുഖ്യപ്രഭാഷണം നടത്തും. കാർമൽ പ്രോവിൻസ് കൗണ്‍സിലർ ഫാ. പോൾ കാടാംകുളം, കോളജ് പ്രിൻസിപ്പൽ ഫാ. ജോസ് തുറവയ്ക്കൽ, പുറപ്പുഴ പഞ്ചായത്ത് പ്രസിഡന്‍റ് എ.കെ. ഭാസ്കരൻ തുടങ്ങിയവർ പ്രസംഗിക്കും. ഫാ. പോൾ പാറക്കാട്ടേൽ സ്വാഗതവും പി.പി. തങ്കപ്പൻ നന്ദിയും പറയും. ശാന്തിഭവനം പദ്ധതി, 100 സ്വയംതൊഴിൽ പദ്ധതികൾ ഉൾപ്പെടുന്ന ശാന്തി ശക്തീകരണം, മെഡിക്കൽ ക്യാന്പുകൾ, കൃത്രിമോപകരണങ്ങളുടെ വിതരണം, ബോധവത്കരണ പരിപാടികൾ, പഠനവൈകല്യമുള്ള കുട്ടികളുടെ പരിശീലന കോഴ്സ്, ഉന്നത വിദ്യാഭ്യാസവും തൊഴിൽ പരിശീലനവും, പുനരധിവാസ വിവരശേഖരണവും പ്രചാരണവും, ഭിന്നശേഷി സംഗമം, സെമിനാറുകൾ, തടസരഹിത നിർമാണ പ്രചാരവും വക്കാലത്തും തുടങ്ങിയ നൂതന പദ്ധതികളാണ് ഉദ്ഘാടനം ചെയ്യുന്നത്. 1988-ൽ വഴിത്തലയിൽ ആരംഭിച്ച ശാന്തിഗിരി പുനരധിവാസ കേന്ദ്രത്തിൽ ഭിന്നശേഷിക്കാരുടെ പുനരധിവാസ പ്രവർത്തനങ്ങൾ 37 വർഷം പിന്നിടുകയാണ്. ശാന്തിഗിരി ഹോസ്റ്റലിൽ ശാരീരിക ന്യൂനതയുള്ള കുട്ടികൾക്ക് സൗജന്യ താമസവും പഠന പരിശീലന സൗകര്യങ്ങളും നൽകിവരുന്നു. 2002-ൽ സ്ഥാപിതമായ ശാന്തിഗിരി കോളജിൽ ഏഴ് യുജി പ്രോഗ്രാമുകളിലും നാല് പി.ജി പ്രോഗ്രാമുകളിലുമായി ആയിരത്തിലധികം കുട്ടികൾ പഠനം നടത്തുന്നുണ്ട്. 2016-ൽ ആരംഭിച്ച എംബിഎ കോളജും ഇവിടെ പ്രവർത്തിക്കുന്നു. വീൽചെയറിൽ സഞ്ചരിക്കുന്നവർക്ക് തൊഴിൽ നൽകുകയെന്ന ലക്ഷ്യത്തോടെ 2004-ൽ സ്ഥാപിതമായ ശാന്തിഗിരി പ്രസ് ഭിന്നശേഷിക്കാർക്ക് തൊഴിൽ പരിശീലനവും നൽകുന്നു. ഐടി മേഖലയിൽ നൈപുണ്യമുള്ള ഭിന്നശേഷിക്കാർക്ക് ജോലി നൽകുകയെന്ന ലക്ഷ്യത്തോടെ 2006-ൽ സ്ഥാപിതമായ ശാന്തി സോഫ്റ്റ് ടെക്നോളജീസ് ഇന്നു സോഫ്റ്റ്‌വെയർ വികസനത്തിലും ഉത്പന്ന നിർമാണത്തിലും വെബ്സൈറ്റ് നിർമാണത്തിലും പരിശീലന പ്രോഗ്രാമുകളിലും മുൻനിരയിലണ്. ശാന്തിഗിരി വർക്ക് ഷോപ്പ് ശ്രവണ വൈകല്യമുള്ളവർക്ക് തൊഴിൽ നൽകാൻ 2012- മുതൽ പ്രവർത്തിച്ചുവരുന്നു. സ്കൂൾ, കോളജ് ഫർണിച്ചറുകൾ, കെട്ടിടങ്ങളുടെ മേൽപ്പുര നിർമാണം തുടങ്ങിയവയും ശാന്തിഗിരി വർക്ക്ഷോപ്പ് ചെയ്തു നൽകുന്നു. ശാരീരിക വെല്ലുവിളികൾ നേരിടുന്നവർക്കായി ഫിസിയോതെറാപ്പി സെന്‍ററും പ്രവർത്തിക്കുന്നുണ്ട്. വൈകല്യമുള്ളവർക്ക് വിവാഹവും കുടുംബ ജീവിതവും സാധ്യമാണെന്ന സന്ദേശം നൽകാനായി 2002-ൽ മാര്യേജ് ബ്യൂറോ നിരവധിപേർക്ക് താങ്ങുംതണലുമായിട്ടുണ്ട്.

നിര്‍മല കോളജില്‍ ത്രിദിന അന്താരാഷ്ട്ര സെമിനാര്‍ സംഘടിപ്പിച്ചു

മൂവാറ്റുപുഴ: നിര്‍മല കോളജ് ജന്തുശാസ്ത്ര വിഭാഗവും, കോളജിലെ ബയോ ഡൈവേഴ്സിറ്റി ക്ലബും സംയുക്തമായി ത്രിദിന അന്താരാഷ്ട്ര സെമിനാര്‍ സംഘടിപ്പിച്ചു. അകശേരുകികളുടെ വര്‍ഗീകരണവും കംപ്യൂട്ടേഷണല്‍ ബയോളജിയും എന്ന വിഷയത്തിലായിരുന്നു സെമിനാര്‍. ശ്രീലങ്ക രജരത യൂണിവേഴ്സിറ്റി സീനിയര്‍ ലെക്ച്ചറര്‍ ഡോ. ദിനര്‍സര്‍ദേ സി. റഹീം അന്താരാഷ്ട്ര സെമിനാര്‍ ഉദ്ഘാടനം ചെയ്തു. കേരള ഫോറസ്റ്റ് ഡിപ്പാര്‍ട്മെന്‍റ് ചീഫ് വൈല്‍ഡ് ലൈഫ് വാര്‍ഡന്‍ ഡോ. പ്രമോദ് ജി. കൃഷ്ണന്‍ മുഖ്യ പ്രഭാഷണം നടത്തി. കേരള സംസ്ഥാന ജൈവവൈവിധ്യ ബോര്‍ഡിന്‍റെ സാമ്പത്തിക സഹായത്തിലാണ് സെമിനാര്‍ നടന്നത്. 30ല്‍പ്പരം ഗവേഷണ, അക്കാദമിക സ്ഥാപനങ്ങളില്‍ നിന്നായി നൂറോളം പേര്‍ സെമിനാറില്‍ പങ്കെടുത്തു.

കനത്ത മഴ: നേര്യമംഗലത്ത് കടകളിലും വീടുകളിലും വീണ്ടും വെള്ളം കയറി

കോതമംഗലം: കനത്ത മഴയിൽ നേര്യമംഗലം ടൗണിൽ കടകളിലും വീടുകളിലും വീണ്ടും വെള്ളം കയറി. ഇന്നലെ രാത്രി ഏഴോടെ പെയ്ത മഴയിൽ ടൗണിലെ താഴ്ഭാഗത്തുള്ള 15 കടകളും ടിബി ജംഗ്ഷനിലെ മൂന്നു വീടുകളുമാണു വെള്ളപ്പൊക്ക ഭീഷണിയിലായത്. ദേശീയപാത നവീകരിച്ചപ്പോഴുള്ള ഓട നിർമാണത്തിലെ അപാകത മൂലം റോഡിലൂടെ ചെളിവെള്ളം കുത്തിയൊഴുകുകയായിരുന്നു. ഗവ. ആശുപത്രിക്കു സമീപം നിലവിലെ കലുങ്ക് അടച്ച് ഓട നിർമിച്ചതും പുതിയ ഓടയിലൂടെ വെള്ളം ഒഴുകാത്തതുമാണു പ്രശ്‌നം. വില്ലാഞ്ചിറ ഭാഗത്തു നിന്നുള്ള ഓടകൾ പൂർത്തിയാക്കാതെ ഇടവിട്ടു നിർമിച്ചിരിക്കുന്നതും റോഡിലൂടെ മലവെള്ളപ്പാച്ചിലിനു കാരണമായി. കഴിഞ്ഞ 17ന് രാത്രിയും ടൗണിൽ കടകളിലും വീടുകളിലും വെള്ളം കയറിയിരുന്നു. പ്രതിഷേധം ഉയർന്നപ്പോൾ പ്രശ്നം ഉടൻ പരിഹരിക്കുമെന്ന് അധികൃതർ ഉറപ്പു നൽകിയെങ്കിലും നടപടിയുണ്ടായിട്ടില്ല.

കോതമംഗലം ചെറിയപള്ളിയിൽ കന്നി 20 പെരുന്നാൾ കൊടിയേറി

കോതമംഗലം: തീർത്ഥാടന കേന്ദ്രമായ കോതമംഗലം മാർ തോമ ചെറിയപള്ളിയിൽ കബറടങ്ങിയിരിക്കുന്ന പരിശുദ്ധനായ യൽദോ മാർ ബസേലിയോസ് ബാവായുടെ 340-ാം മത് ഓർമ്മപ്പെരുന്നാളിന് (കന്നി - 20) വികാരി ഫാ. ജോസ് മാത്യു തച്ചേത്തുകുടി കൊടിയേറ്റി. പരിശുദ്ധ ബാവായുടെ പാദ സ്പർശനത്താൽ അനുഗ്രഹീതമായ ചക്കാലക്കുടി ചാപ്പലിൽനിന്ന് പ്രദക്ഷണമായി പള്ളിയിൽ എത്തിച്ചേർന്ന് ധൂപ പ്രാർത്ഥനയ്ക്ക് ശേഷമാണ് കൊടിയുയർത്തിയത്. പ്രാർത്ഥനയ്ക്ക് മേഖല മെത്രാപ്പോലീത്ത ഏലിയാസ് മാർ യൂലിയോസ് മുഖ്യ കാർമികത്വം വഹിച്ചു. സഹവികാരിമാരായ ഫാ. സാജു ജോർജ്, ഫാ. എൽദോസ് ചെങ്ങമനാട്ട്, ഫാ. അമൽ കുഴികണ്ടത്തിൽ, ഫാ. നിയോൺ പൗലോസ്, ഫാ. സിച്ചു രാജു, തന്നാണ്ട് ട്രസ്റ്റിമാരായ കെ.കെ. ജോസഫ്, എബി ചേലാട്ട്, വർക്കിങ് കമ്മിറ്റിയംഗങ്ങൾ, മാനേജിംഗ് കമ്മിറ്റിയംങ്ങൾ എന്നിവർ നേതൃത്വം നൽകി. സഭയിലെ വൈദീകർ, എംഎൽഎ മാരായ ആന്‍റണി ജോൺ, എൽദോസ് കുന്നപ്പിള്ളി, മാത്യു കുഴൽനാടൻ, മുൻ മന്ത്രി ടി.യു. കുരുവിള, യുഡിഎഫ് ജില്ലാ കൺവീനർ ഷിബു തെക്കുംപുറം, മുൻസിപ്പൽ കൗൺസിലർമാരായ കെ.എ. നൗഷാദ്, ഷമീർ പനയ്ക്കൻ, ഉന്നത പോലീസ് ഉദ്യോഗസ്ഥർ, വിവിധ സർക്കാർ വകുപ്പുകളുടെ പ്രതിനിധികൾ, ജന പ്രതിനിധികൾ, രാഷ്ട്രീയ സാമൂഹിക നേതാക്കൾ എന്നിവർ പങ്കെടുത്തു. കൊടി ഉയർത്തലിനു ശേഷം കരിങ്ങാച്ചിറ ദൈവാലയത്തിൽനിന്നും പ്രത്യേകം തയാറാക്കി കൊണ്ടുവന്ന തമുക്ക് നേർച്ച ഭക്തജനങ്ങൾക്ക് വിതരണം ചെയ്തു. ബാവ കോതമംഗലത് എത്തി ചേർന്നപ്പോൾ ബാവയെ കണ്ട് അനുഗ്രഹം പ്രാപിക്കാനായി കരിങ്ങാച്ചിറയിൽനിന്നും വന്ന വിശ്വാസികൾ കൊണ്ടു വന്ന പലഹാരത്തിന്‍റെ അനുസ്മരണയിൽ ആണ് തമുക്ക് നേർച്ച നൽകുന്നത്. യൽദോ ബാവ കാലം ചെയ്ത സമയത്ത് പ്രകാശിച്ച കൽക്കുരിശിലെ പെരുന്നാൾ ഇന്ന് നടക്കും.

വിശുദ്ധ കുരിശിന്‍റെ പുകഴ്ചയുടെ തിരുനാൾ

പറവൂർ : കടൽവാതുരുത്ത് ഹോളിക്രോസ് ദേവാലയത്തിൽ വിശുദ്ധ കുരിശിന്‍റെ പുകഴ്ചയുടെ തിരുനാൾ തുടങ്ങി. ഇന്ന് വൈകിട്ട് അഞ്ചിന് 5.30ന് ദിവ്യബലി, 7. 30ന് ഇടവക ദിനാഘോഷം. നാളെ 5 30ന് ആഘോഷമായ പൊന്തിഫിക്കൽ ദിവ്യബലിക്ക്‌ ബിഷപ് ഡോ. ഡെന്നിസ് കുറുപ്പശേരി മുഖ്യകാർമികത്വം വഹിക്കും. തുടർന്ന് ഹോളിക്രോസ് ജംഗ്ഷനിലേക്ക് പ്രദക്ഷിണം. 28 ന് രാവിലെ ഒന്പതിന്ന് തിരുനാൾ ദിവ്യബലി: മോൺ. റോക്കി റോബിൻ കളത്തിൽ, തുടർന്ന് പ്രദക്ഷിണം. തിരുനാളിനോട് അനുബന്ധിച്ചുള്ള ഗോതുരുത്ത് വള്ളംകളി രാവിലെ 11ന് ആരംഭിക്കും. വൈകിട്ട് 5. 30ന് ദിവ്യബലി, തുടർന്ന് കൊടിയിറക്കം. 29 ന് രാവിലെ 6 30ന് ഇടവകയിൽ നിന്നു മരിച്ചുപോയവർക്കു വേണ്ടി ദിവ്യബലി ഉണ്ടായിരിക്കും.

ലോട്ടറി തൊഴിലാളികള്‍ പോസ്റ്റ് ഓഫീസ് ധര്‍ണ നടത്തി

പെരുമ്പാവൂര്‍: കേന്ദ്ര സര്‍ക്കാര്‍ ഏര്‍പ്പെടുത്തിയ 40 ശതമാനം ജിഎസ്ടി വെട്ടിക്കുറയ്ക്കണമെന്ന് ആവശ്യപ്പെട്ട് കേരള ലോട്ടറി ഏജന്‍റ്സ് ആന്‍ഡ് സെല്ലേഴ്സ് ഫോറം എച്ച്എംഎസ് പെരുമ്പാവൂര്‍ മേഖലാ കമ്മിറ്റിയുടെ നേതൃത്വത്തില്‍ ഹെഡ് പോസ്റ്റ് ഓഫീസിനു മുന്നില്‍ ധര്‍ണ നടത്തി. ലോട്ടറി യൂണിയന്‍ ജില്ലാ പ്രസിഡന്‍റ് കെ.കെ. ചന്ദ്രന്‍ ഉദ്ഘാടനം ചെയ്തു. കേരളത്തിലെ ലക്ഷക്കണക്കിന് വരുന്ന തൊഴിലാളികളെ സംരക്ഷിക്കുക, ജിഎസ്ടി 40 ശതമാനം എന്നുള്ളത് വെട്ടിക്കുറയ്ക്കുക തുടങ്ങിയ ആവശ്യങ്ങള്‍ ഉന്നയിച്ചായിരുന്നു ധര്‍ണ. പെരുമ്പാവൂര്‍ മേഖലാ പ്രസിഡന്‍റ് സജീവ് മാലുഫാസ് അധ്യക്ഷത വഹിച്ചു.

‘തലമുറ സംഗമം’ സംഘടിപ്പിച്ചു

നെടുമ്പാശേരി: കേരള വ്യാപാരി വ്യവസായി ഏകോപന സമിതി നെടുമ്പാശേരി മേഖലയും മർച്ചന്‍റ്സ് വെൽഫെയർ ട്രസ്റ്റ്, മർക്കന്‍റയിൽ കോ- ഓപ്പറേറ്റീവ് സൊസൈറ്റിയും സംയുക്തമായി ഒരുക്കിയ ‘തലമുറ സംഗമം’ ജില്ലാ പ്രസിഡന്‍റ് പി.സി. ജേക്കബ് ഉദ്ഘാടനം ചെയ്തു. ജില്ലാതലം വരെയുള്ള മുൻകാല പ്രവർത്തകരായ എ.കെ. പിയൂസ്, കെ.ബി . മോഹൻ, ഉഷാ രഘുനാഥ്, എൻ.എസ്. ഇളയത് തുടങ്ങിയവരെ ആദരിച്ചു. നെടുമ്പാശേരി മേഖലയുടെ കീഴിലുള്ള 16 യൂണിറ്റുകളിലെ പ്രവർത്തകർ അണിനിരന്ന ഓണാഘോഷ പരിപാടികളും ഓണസദ്യയും നടന്നു.

മരടിൽ ഫ്ലോട്ടിംഗ് ഡിസ്പെൻസറി

മരട്: മരട് നഗരസഭയിലെ വളന്തകാട് പ്രാഥമിക ആരോഗ്യ കേന്ദ്രത്തിന്‍റെ കീഴിലുള്ള ഫ്ലോട്ടിങ് ഡിസ്പെൻസറിയുടെ പ്രവർത്തനം പുനരാരംഭിച്ചു. പ്രവർത്തനോദ്ഘാടനം മരട് കടവിൽ സംഘടിപ്പിച്ച ചടങ്ങിൽ നഗരസഭാ ചെയർപേഴ്സൺ ആന്‍റണി ആശാംപറമ്പിൽ നിർവഹിച്ചു. വൈസ് ചെയർപേഴ്സൺ അഡ്വ. രശ്മി സനിൽ അധ്യക്ഷത വഹിച്ചു. ഫിറ്റ്നെസുമായി ബന്ധപ്പെട്ട സാങ്കേതിക കാരണങ്ങളാൽ രണ്ടു വർഷമായി ഡിസ്പെൻസറി പ്രവർത്തിച്ചിരുന്നില്ല. ഒരു ഡോക്ടർ, സ്റ്റാഫ് നഴ്സ്, ലാബ് ടെക്നീഷ്യൻ എന്നിവരടങ്ങുന്ന സംഘമാണ് ഡിസ്പെൻസറിയിലുള്ളത്. കോവിഡ് കാലഘട്ടത്തിൽ ഏറ്റവും കൂടുതൽ രോഗികൾക്ക് ഉപകാരപ്പെടുന്ന സേവനങ്ങളായിരുന്നു ഫ്ലോട്ടിംഗ് ഡിസ്പെൻസറി നൽകിയിരുന്നത്.

അങ്കമാലി നഗരസഭയിൽ "സ്വച്ഛതാ ഹി സേവ’ ആരംഭിച്ചു

അങ്കമാലി : ഗാന്ധിജയന്തി ദിനമായ ഒക്ടോബർ രണ്ടുവരെ അങ്കമാലി നഗരസഭ വിവിധ സ്ഥാപനങ്ങൾ കേന്ദ്രീകരിച്ച് ശുചിത്വോത്സവം " സ്വച്ഛതാ ഹി സേവ " ആരംഭിച്ചു. ഇതിന്‍റെ ഭാഗമായി കെഎസ്ആർടി സി ഡിപ്പോയിൽ സൂപ്രണ്ട് ജാൻസി വർഗീസിന്‍റെ നേതൃത്വത്തിൽ ജീവനക്കാർ സംഘടിപ്പിച്ചു. ശുചീകരണം നഗരസഭാ ചെയർപേഴ്സൺ ഷിയോ പോൾ ഉദ്ഘാടനം ചെയ്തു. ചടങ്ങിൽ ഡെപ്യൂട്ടി ചെയർപേഴ്സൺ സിനി മനോജ് അധ്യക്ഷത വഹിച്ചു. വികസനകാര്യ സ്ഥിരംസമിതി അധ്യക്ഷൻ പോൾ ജോവർ, സിസിഎം ആർ. അനിൽ, റിസോഴ്സ് പേഴ്സൺ പി. ശശി, ശുചിത്വമിഷൻ ജില്ലാ കോ-ഓർഡിനേറ്റർ പി.കെ. ലിജി എന്നിവർ പ്രസംഗിച്ചു. ചെയർപേഴ്സൺ, ജനപ്രതിനിധികള്‍ എന്നിവര്‍ ഉൾപ്പെടെ നഗരസഭയുടെ ആരോഗ്യവിഭാഗവും കെഎസ്ആർടിസി ജീവനക്കാരും യാത്രക്കാരും ചേർന്ന് ശുചിത്വ മുദ്രാവാക്യം ആലേഖനം ചെയ്ത പ്ലക്കാർഡുകളേന്തി ബസ്‌സ്റ്റാൻഡിൽ പ്രചാരണ പരിപാടിയും നടത്തി.

വാട്ടര്‍മെട്രോയെക്കുറിച്ചുള്ള കൂറ്റന്‍ പെയിന്‍റിംഗ് അനാച്ഛാദനം ചെയ്തു

കൊച്ചി: കൊച്ചി വാട്ടര്‍ മെട്രോയെക്കുറിച്ചുള്ള സൈബര്‍ ഡോമിലെ പോലീസ് ഇന്‍സ്‌പെക്ടര്‍ എ. അനന്തലാലിന്‍റെ കൂറ്റന്‍ പെയിന്‍റിംഗ് ഹൈക്കോര്‍ട്ട് ടെര്‍മിനലില്‍ മന്ത്രി പി. രാജീവ് അനാച്ഛാദനം ചെയ്തു. 15 അടി നീളവും ആറടി വീതിയുമുള്ള പെയിന്‍റിംഗ് അനന്തലാല്‍ ഒരു വര്‍ഷത്തിലേറെക്കാലത്തെ പരിശ്രമത്തിലൂടെയാണ് പൂര്‍ത്തിയാക്കിയത്. കൊച്ചി മെട്രോയെക്കുറിച്ച് അനന്തലാല്‍ തയാറാക്കിയ മ്യൂസിക് വീഡിയോയും ചടങ്ങില്‍ പ്രകാശനം ചെയ്തു. മധു വാസുദേവ് രചിച്ച് ഋത്വിക് ചന്ദ് സംഗീതം നല്‍കി സിത്താര കൃഷ്ണകുമാര്‍ ആലപിച്ച മ്യൂസിക് വീഡിയോ കൊച്ചി മെട്രോയുടെ വികസന നാള്‍വഴികളുടെ കലാപരമായ ആവിഷ്‌കാരമാണ്. എംഎല്‍എ മാരായ ടി.ജെ. വിനോദ്, കെ.എന്‍. ഉണ്ണികൃഷ്ണന്‍, കോര്‍പറേഷന്‍ കൗണ്‍സിലര്‍ മനു ജേക്കബ്, സിറ്റി പോലീസ് കമ്മീഷണര്‍ പുട്ട വിമലാദിത്യ, കോസ്റ്റ് ഗാര്‍ഡ് ഡിഐജി ആഷിഷ് മെഹ്‌റോത്തറ, മുന്‍ ഡിജിപിമാരായ ഹോര്‍മിസ് തരകന്‍, ബി. സന്ധ്യ, ഡിസിപി അശ്വതി, അസിസ്റ്റന്‍റ് കളക്ടര്‍ പാര്‍വതി, സണ്‍റൈസ് ഹോസ്പിറ്റല്‍ ഡയറക്ടര്‍ പര്‍വീന്‍ ഹഫീസ്, കൊച്ചി മെട്രോ മാനേജിംഗ് ഡയറക്ടര്‍ ലോക്നാഥ് ബെഹ്‌റ, ഡയറക്ടര്‍ സഞ്ജയ് കുമാര്‍, ചീഫ് ജനറല്‍ മാനേജര്‍മാരായ എ. മണികണ്ഠന്‍, ഷാജി ജനാര്‍ദനന്‍ തുടങ്ങിയവര്‍ പങ്കെടുത്തു.

പറവൂർ താലൂക്ക് ആശുപത്രിയുടെ പുതിയ ബ്ലോക്കിന് അഞ്ചു കോടിയുടെ ഭരണാനുമതി

പറവൂർ : പറവൂർ താലൂക്ക് ആശുപത്രിയിൽ പുതിയ ബ്ലോക്ക് നിർമിക്കുന്നതിനായി 2023-2024 വർഷത്തെ സംസ്ഥാന ബജറ്റിൽ ഉൾപ്പെടുത്തി അഞ്ച് കോടി രൂപയുടെ ഭരണാനുമതി ലഭിച്ചതായി പ്രതിപക്ഷ നേതാവ് വി.ഡി. സതീശൻ അറിയിച്ചു. ഇത് പ്രകാരം 7,980 സ്ക്വയർ ഫീറ്റ് കെട്ടിടമാണ് നിർമിക്കുന്നത്. മൂന്ന് നിലയ്ക്കുള്ള ഫൗണ്ടേഷനോടെ നിർമിക്കുന്ന പുതിയ ബ്ലോക്കിന്‍റെ ഗ്രൗണ്ട് ഫ്ലോർ പൂർണമായും നിർമിക്കുന്നതിനും ബാക്കി തുക ഉപയോഗിച്ച് അതിനു മുകളിൽ ഒരു നില കൂടി പണിയുന്നതിനുമാണ് എസ്റ്റിമേറ്റ് തയാറാക്കിയിരിക്കുന്നത്. ഗ്രൗണ്ട് ഫ്ലോറിൽ ഡോക്ടർമാർക്ക് ഇരുന്ന് രോഗികളെ പരിശോധിക്കുവാനുള്ള മുറികൾ, രോഗികൾക്ക് ഇരിക്കുവാനുള്ള വിശാലമായ മുറി, പ്രൊസീജ്വർ റൂമുകൾ, രോഗികൾക്കുള്ള വാർഡും മുറികളും, റിസപ്ഷൻ എന്നിവ ഉൾപ്പെടുത്തിയാണ് പ്ലാൻ തയാറാക്കിയിരിക്കുന്നത്. പൊതുമരാമത്ത് വകുപ്പ് കെട്ടിട വിഭാഗത്തിനാണ് ഇതിന്‍റെ നിർമാണ ചുമതല. സാങ്കേതികാനുമതി നൽകി പെരുമാറ്റച്ചട്ടം വരുന്നതിനു മുൻപായി നിർമാണം ആരംഭിക്കുവാൻ ബന്ധപ്പെട്ട എക്സിക്യൂട്ടീവ് എൻജിനീയർക്ക് നിർദേശം നൽകിയതായും പ്രതിപക്ഷ നേതാവ് അറിയിച്ചു.

രാജഗിരി സ്കൂളിൽ കൊയ്ത്തുത്സവം

കളമശേരി: രാജഗിരി ഹയർ സെക്കൻഡറി സ്കൂളിലെ കുട്ടിക്കർഷകരുടെ കരനെൽകൃഷി വിളവെടുത്തു. വിത്താഴം, ഞാറു നടീൽ, കൊയ്ത്തുത്സവം എന്നിങ്ങനെ മൂന്ന് ഘട്ടങ്ങളിലായി നടന്ന നെൽകൃഷിയിൽ വിളഞ്ഞ നൂറുമേനി കർഷക വേഷത്തിലെത്തിയ കുട്ടികൾ കൊയ്ത്തുപാട്ടിന്‍റെയും ചെണ്ടമേളത്തിന്‍റെയും അകമ്പടിയോടെ കൊയ്തെടുത്തു. കൊയ്ത്തുത്സവം സ്കൂൾ മാനേജർ ഫാ. ബെന്നി നൽക്കര ഉദ്ഘാടനം ചെയ്തു. കളമശേരി കൃഷി ഓഫീസർ അഞ്ജു മറിയം ഏബ്രഹാം വിശിഷ്ടാതിഥിയായി. സ്കൂൾ പ്രിൻസിപ്പൽ ഫാ. ടോമി കൊച്ചെലഞ്ഞിക്കൽ, സ്കൂൾ അഡ്മിനിസ്ട്രേറ്റർ ഫാ. ജോസി വടക്കേ ആക്കയിൽ, സീനിയർ കോ-ഓർഡിനേറ്റർ കെ.എ. ജോസ്, എൽപി കോ-ഓർഡിനേറ്റർ ജെം ജോസ്, പിടിഎ പ്രസിഡന്‍റ് കെ.ബി. സജീവൻ എന്നിവർ പങ്കെടുത്തു. രാജഗിരി ഹരിതഗിരിയുടെ നേതൃത്വത്തിലാണ് കൃഷി നടത്തിവരുന്നത്. കാർഷിക പ്രവർത്തങ്ങൾക്ക് കൃഷിവകുപ്പിന്‍റെ പുരസ്കാരവും സ്കൂളിന് ലഭിച്ചിട്ടുണ്ട്.

പറവൂർ നഗരസഭാ സ്റ്റേഡിയത്തിന്‍റെ നവീകരണം തുടങ്ങി

പറവൂർ : നഗരസഭയുടെ ഉടമസ്ഥതയിലുള്ള സ്റ്റേഡിയത്തിന്‍റെ നവീകരണ നിർമാണോദ്ഘാടനം മന്ത്രി ഒ. അബ്ദുറഹ്‌മാൻ നിർവഹിച്ചു. സ്റ്റേഡിയം ഗ്രൗണ്ടിൽ നടന് ചടങ്ങിൽ പ്രതിപക്ഷ നേതാവ് വി. ഡി. സതീശൻ അധ്യക്ഷത വഹിച്ചു. സ്പോർട്സ് കേരള ഫൗണ്ടേഷൻ ചീഫ് എഞ്ചിനീയർ അനിൽകുമാർ റിപ്പോർട്ട് അവതരിപ്പിച്ചു. നഗരസഭാ ചെയർപേഴ്സൺ ബീന ശശിധരൻ, വൈസ് ചെയർമാൻ എം.ജെ. രാജു, സ്ഥിരംസമിതി അധ്യക്ഷരായ വനജ ശശികുമാർ, ശ്യാമള ഗോവിന്ദൻ, കെ.ജെ. ഷൈൻ, സജി നമ്പായത്ത്, അനു വട്ടത്തറ, കൗൺസിലർമാർ, നഗരസഭ സെകട്ടറി പി.ബി. കൃഷ്ണകുമാരി, രാഷ്ട്രീയ സാമൂഹിക കായിക പ്രവർത്തകൾ പങ്കെടുത്തു സംസ്ഥാന ബജറ്റിൽ ഉൾപ്പെടുത്തി 10 കോടി രൂപ ചെലവിലാണ് സ്റ്റേഡിയം നിർമിക്കുന്നത്. സ്പോർട് കേരള ഫൗണ്ടേഷനിനാണ് നിർമാണ ചുമതല. ഗ്രേറ്റ് സ്പോർട്ട്സ് ടെക് ലിമിറ്റഡ് എന്ന സ്ഥാപനമാണ് പ്രവർത്തിയുടെ കരാർ ഏറ്റെടുത്തിരിക്കുന്നത്. പൂർത്തീകരിക്കുന്നതോടെ ആധുനിക സ്റ്റേഡിയം സജ്ജമാക്കും.

ഋതിക് ഘട്ടക് ഫിലിം ഫെസ്റ്റിവല്‍ സമാപിച്ചു

കൊച്ചി: കൊച്ചിന്‍ ഫിലിം സൊസൈറ്റി ചാവറ കള്‍ച്ചറല്‍ സെന്‍റര്‍ ഫെഡറേഷന്‍ ഓഫ് ഫിലിം സൊസൈറ്റിയുടെ സഹകരണത്തോടെ സംഘടിപ്പിച്ച നാല് ദിവസത്തെ ഋതിക് ഘട്ടക് ഫിലിം ഫെസ്റ്റിവല്‍ സമാപിച്ചു. ചാവറ കള്‍ച്ചറല്‍ സെന്‍റര്‍ ലൈബ്രറി ഹാളില്‍ നടന്ന സമാപന സ്‌ക്രീനിംഗിലും ഇതോടനുബന്ധിച്ച് നടന്ന ഓപ്പണ്‍ ഫോറത്തിലും ചാവറ കള്‍ച്ചറല്‍ സെന്‍റര്‍ ഡയറക്ടര്‍ ഫാ. അനില്‍ ഫിലിപ്പ് അധ്യക്ഷത വഹിച്ചു. പലയാനത്തിന്‍റെയും വ്യക്തിത്വത്തിന്‍റെയും പ്രതിസന്ധി ഋതിക് ഘട്ടക് സിനിമകളില്‍ എന്ന വിഷയത്തില്‍ അനൂപ് വര്‍മ മുഖ്യപ്രഭാഷണം നടത്തി. വിഭാജനത്തിന്‍റെയും പലായനത്തിന്‍റെയും നൊമ്പരങ്ങള്‍ വിവരിക്കുന്നതാണ് ഋതിക് ഘട്ടക്കിന്‍റെ സിനിമകളെന്ന് അനൂപ് വര്‍മ അഭിപ്രായപ്പെട്ടു.

ജീവനു ഭീഷണിയായി വൈദ്യുത ലൈൻ

തൃപ്പൂണിത്തുറ: പ്രദേശവാസികളുടെ ജീവനു ഭീഷണിയായി മാറിയിരിക്കുകയാണ് താഴ്ന്നു കിടക്കുന്ന വൈദ്യുത ലൈൻ. എരൂർ വെസ്റ്റ് ഇലഞ്ഞിത്തറ ക്ഷേത്രത്തിലേക്കുള്ള റോഡിലെ ഇടവഴിയിലെ വൈദ്യുത ലൈനാണ് കൈ ഉയർത്തിയാൽ തട്ടുന്നവിധം താഴ്ന്നു കിടക്കുന്നത്. രണ്ട് വൈദ്യുത പോസ്റ്റുകൾക്കിടയിലുള്ള ദൂരം തമ്മിൽ സാധാരണയിൽ കവിഞ്ഞ ദൂരമാണുള്ളത്. ഈ റോഡിന്‍റെ അവസാന ഭാഗത്തുള്ള വീടുകളിലേക്ക് ലോഡുമായി വരുന്ന വാഹനങ്ങൾ ലൈനിൽ മുട്ടാതെ ഭാഗ്യംകൊണ്ട് മാത്രമാണ് കടന്നു പോകുന്നതെന്ന് നാട്ടുകാർ പറഞ്ഞു. കുട്ടികൾ ഉൾപ്പെടെയുള്ളവർ നടന്നുപോകുന്ന ഈ വഴിയിലെ അപകട ഭീഷണി ഒഴിവാക്കണമെന്നാണ് നാട്ടുകാർ ആവശ്യപ്പെട്ടു.

റോ-റോയുടെ നഷ്ടക്കഥ: കിൻകോയുടേത് കള്ളക്കണക്കെന്ന് പാസഞ്ചേഴ്സ് അസോ.

വൈപ്പിൻ: വൈപ്പിൻ -ഫോർട്ടു കൊച്ചി റോറോ സർവീസ് നഷ്ടമാണെന്ന് പറഞ്ഞ് കിൻകോ നിരത്തിയത് കള്ളക്കണക്കെന്ന് വൈപ്പിൻ-ഫോർട്ടുകൊച്ചി പാസഞ്ചേഴ്സ് അസോസിയേഷൻ യോഗം ആരോപിച്ചു. ജങ്കാർ സർവീസ് കഴിഞ്ഞ മാർച്ചിൽ 8.44 ലക്ഷം രൂപ നഷ്ടത്തിലാണെന്നാണ് കിൻകോ പറയുന്നത്. ഈ കണക്കുകൾ വിശദമായി പരിശോധിക്കണമെന്ന് യോഗം കോർപറേഷനോട് ആവശ്യപ്പെട്ടു. മാത്രമല്ല, സർവീസ് കോർപറേഷൻ നേരിട്ട് നടത്തണമെന്നും യോഗം ആവശ്യപ്പെട്ടു. പ്രസിഡന്‍റ് ഫ്രാൻസീസ് ചമ്മണി അധ്യക്ഷത വഹിച്ചു.

ആലുവ നഗരസഭാ ശതാബ്ദി പണപ്പിരിവ് : കൗൺസിൽ യോഗത്തിൽ പ്രതിപക്ഷ ബഹളം

ആലുവ: പാൻ നമ്പർ ഉപയോഗിച്ച് ശതാബ്ദി ആഘോഷത്തിനായി പിരിച്ച തുക ഓഡിറ്റ് ചെയ്യണമെന്നാവശ്യപ്പെട്ട് ആലുവ നഗരസഭാ കൗൺസിൽ യോഗത്തിൽ പ്രതിപക്ഷ ബഹളം. ആവശ്യം അംഗീകരിക്കാത്തതിനെ തുടർന്ന് ബിജെപി കൗൺസിലർമാർ കൗൺസിലിൽ ഹാളിൽ നിന്നും വാക്കൗട്ട് നടത്തി. ബിജെപി കൗൺസിലർമാരായ എൻ. ശ്രീകാന്ത്, ശ്രീലത രാധാകൃഷ്ണൻ, ഇന്ദിര ദേവി എന്നിവരാണ് കൗൺസിലിൽ നിന്നും പ്രതിഷേധിച്ച് ഇറങ്ങിപ്പോയത്. നഗരസഭയുടെ പാൻ നമ്പർ ഉപയോഗിച്ചു തുടങ്ങിയ ബാങ്ക് അക്കൗണ്ട് ആയതിനാൽ അത് നഗരസഭയുടേതാണ്. ആ പണം നഗരസഭയുടെ കണക്കുകളിലോ ഓഡിറ്റിലോ വന്നിട്ടില്ല എന്നത് ഗുരുതര അഴിമതിയാണെന്ന് ബിജെപി പാർലമെന്‍ററി പാർട്ടി നേതാവ് എൻ. ശ്രീകാന്ത് ആരോപിച്ചു. ശതാബ്ദി ആഘോഷ എക്സിക്യൂട്ടീവ് കമ്മിറ്റി 2021 ഒക്ടോബർ 27ൽ കൂടിയ എക്സിക്യൂട്ടീവ് കമ്മിറ്റിയുടെ മൂന്നാമത്തെ പ്രമേയത്തിന്‍റെ അടിസ്ഥാനത്തിലാണ് അക്കൗണ്ട് തുടങ്ങിയത് എന്നാണ് ബാങ്ക് വ്യക്തമാക്കിയത്. എന്നാൽ അങ്ങനെ ഒരു എക്സിക്യൂട്ടീവ് കമ്മിറ്റി കൂടിയിട്ടില്ല എന്നും അത്തരത്തിലൊരു തീരുമാനം കൗൺസിലിൽ വന്നിട്ടില്ലായെന്നും അദ്ദേഹം പറഞ്ഞു. അതേ സമയം പാൻ നമ്പർ ദുരുപയോഗം ചെയ്ത സംഭവത്തിൽ ഇടതുപക്ഷത്തിന്‍റെ കൗൺസിലർ യോഗത്തിൽ പ്രതികരിച്ചില്ല. കഴിഞ്ഞ നഗരസഭാ തെരെഞ്ഞെടുപ്പിൽ മത്സരിച്ച് പരാജയപ്പെട്ട ചെയർമാൻ സ്ഥാനാർഥിയാണ് ശതാബ്ദിയാഘോഷ കൺവീനർ എന്നത് എൽഡിഎഫിനെ വെട്ടിലാക്കിയിരിക്കുകയാണ്. ശതാബ്ദിയാഘോഷ പരിപാടികൾ ഇടതുപക്ഷം ബഹിഷ്ക്കരിച്ചെങ്കിലും ഏതാനും കൗൺസിലർമാർ സഹകരിച്ചിരുന്നു.

പോക്‌സോ കേസ്: യൂബര്‍ ടാക്‌സി ഡ്രൈവര്‍ അറസ്റ്റില്‍

കൊച്ചി: പതിനഞ്ചുകാരിയായ വിദ്യാര്‍ഥിനിയോട് ലൈംഗികാതിക്രമം കാണിച്ച യൂബര്‍ ടാക്‌സി ഡ്രൈവര്‍ അറസ്റ്റില്‍. വയനാട് ചീരാല്‍ സ്വദേശി നൗഷാദ് (30) ആണ് പാലാരിവട്ടം പോലീസിന്‍റെ പിടിയിലായത്. പഠനത്തില്‍ മിടുക്കിയായിരുന്ന വിദ്യാര്‍ഥിനി പെട്ടെന്ന് പിന്നാക്കം പോയതിനെ തുടര്‍ന്ന് രക്ഷിതാക്കള്‍ മൊബൈല്‍ ഫോണ്‍ വിളികള്‍ നിരീക്ഷിച്ച് ചോദ്യം ചെയ്തപ്പോഴാണ് വിവാഹിതനായ നൗഷാദമുമായി സൗഹൃദത്തിലാണെന്ന് മനസിലായത്. രക്ഷിതാക്കള്‍ അറിയിച്ചതിനെ തുടര്‍ന്ന് പെണ്‍കുട്ടിയുടെ മൊഴിയുടെ അടിസ്ഥാനത്തില്‍ പോക്‌സോ വകുപ്പുകള്‍ പ്രകാരം പോലീസ് കേസ് രജിസ്റ്റര്‍ ചെയ്യുകയും പ്രതിയെ അറസ്റ്റ് ചെയ്യുകയുമായിരുന്നു. രക്ഷിതാക്കളുടെ സംരക്ഷണയിലുള്ള കുട്ടിയെ സ്‌നേഹം നടിച്ചും ഫോണ്‍ ചെയ്ത് പ്രലോഭിപ്പിച്ചും കാറില്‍ കയറ്റിയതിനുമുള്ള പോക്‌സോ വകുപ്പുകള്‍ ചുമത്തിയാണ് പാലാരിവട്ടം ഇന്‍സ്‌പെക്ടര്‍ കെ.ആര്‍. രൂപേഷിന്‍റെ നേതൃത്വത്തിലുള്ള അന്വേഷണസംഘം പ്രതിയെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

സീമാറ്റ് പരിശീലനം തുടങ്ങി

കൊച്ചി: സ്റ്റുഡന്‍റ് പോലീസ് കേഡറ്റ് പദ്ധതിയുടെ സ്‌കൂള്‍തല പ്രവര്‍ത്തനങ്ങള്‍ ഊര്‍ജിതപ്പെടുത്തുന്നതിന്‍റെ ഭാഗമായി സീമാറ്റിന്‍റെ (സ്റ്റേറ്റ് ഇന്‍സ്റ്റിറ്റ്യൂട്ട് ഓഫ് എജ്യുക്കേഷണല്‍ മാനേജ്‌മെന്‍റ് ആന്‍ഡ് ട്രെയിനിംഗ്)ആഭിമുഖ്യത്തില്‍ സോഷ്യല്‍ പോലീസിംഗ് ഡിവിഷന്‍റെ സഹകരണത്തോടെ സംസ്ഥാനതലത്തില്‍ നടത്തുന്ന പരിശീലന പരിപാടിയുടെ രണ്ടാം ഘട്ടം കൊച്ചിയില്‍ ആരംഭിച്ചു. എറണാകുളം, ഇടുക്കി, കോട്ടയം ജില്ലകളിലെ എസ്പിസി സ്‌കൂളുകളിലെ പ്രധാന അധ്യാപകര്‍ പങ്കെടുക്കുന്ന പരിശീലനം കൊച്ചി സിറ്റി പോലീസ് കമ്മീഷണര്‍ പുട്ട വിമലാദിത്യ ഉദ്ഘാടനം ചെയ്തു. സീമാറ്റ് അഡ്മിനിസ്‌ട്രേറ്റീവ് ഓഫീസര്‍ അനീസ ഇഖ്ബാല്‍, കണ്‍സള്‍ട്ടന്‍റ് പി. നിധിന്‍, സോഷ്യല്‍ പോലീസിംഗ് വിംഗ് അസി. ജില്ലാ നോഡല്‍ ഓഫീസര്‍ എം.ബി. സൂരജ് കുമാര്‍ തുടങ്ങിയവര്‍ നേതൃത്വം നല്‍കി. ട്രെയിനര്‍ തോമസ് വില്‍സണ്‍, സീമാറ്റ് ട്രെയിനര്‍മാരായ എന്‍.സി. വിജയകുമാര്‍, എം. ദുര്‍ഗാ മേനോന്‍, ഡോ. വിധു പി. നായര്‍ തുടങ്ങിയവര്‍ ക്ലാസുകള്‍ നയിച്ചു.

സിയാൽ സമീപ പഞ്ചായത്തുകൾക്കായി നടപ്പാക്കുന്നത് 100 കോടിയുടെ വികസന പ്രവർത്തനങ്ങൾ

നെടുമ്പാശേരി: കൊച്ചി അന്താരാഷ്ട്ര വിമാനത്താവളത്തിന്‍റെ സമീപ പ്രദേശങ്ങളിൽ നടപ്പു സാമ്പത്തിക വർഷം സിയാൽ നടപ്പാക്കുന്നത് 100 കോടിയുടെ വികസന പ്രവർത്തനങ്ങളെന്ന് മന്ത്രി പി. രാജീവ്. വിമാനത്താവളത്തിന്‍റെ തെക്ക്-വടക്ക് പ്രദേശങ്ങളെ തമ്മിൽ ബന്ധിപ്പിക്കാൻ ഉദ്ദേശിച്ച് സിയാൽ ആസൂത്രണം ചെയ്തിട്ടുള്ള എയർപോർട്ട് റിംഗ് റോഡിന്‍റെ ഉദ്‌ഘാടനം നിർവഹിക്കുകയായിരുന്നു മന്ത്രി. റിംഗ് റോഡിന്‍റെ ആദ്യ ഘട്ടമായ ഗേറ്റ് ആറ് മുതൽ കല്ലുംകൂട്ടം വരെയുള്ള ഭാഗമാണ് തുറന്നുകൊടുത്തത്. വിമാനത്താവളത്തിന്‍റെ ഓപ്പറേഷണൽ മേഖലയുടെ തെക്കു ഭാഗത്തുള്ള ഗേറ്റ് ആറു മുതൽ കാഞ്ഞൂർ പഞ്ചായത്തിലെ കല്ലുംകൂട്ടം വരെയുള്ള 600 മീറ്ററോളം ഭാഗത്താണ് ആദ്യഘട്ടമായി റോഡ് പണികഴിപ്പിച്ചിട്ടുള്ളത്. 1.6 കോടിയാണ് ചെലവ്. വിമാനത്താവളത്തെയും പരിസര പ്രദേശത്തെയും വെള്ളപ്പൊക്കത്തിൽ നിന്ന് സംരക്ഷിക്കുന്നതിന്‍റെ ഭാഗമായാണ് തെക്ക്-വടക്ക് മേഖലകളെ തമ്മിൽ ബന്ധിപ്പിക്കുന്ന റിംഗ് റോഡ് നിർമിക്കുന്നത്. സുരക്ഷാ വേലി, പേവ് ബ്ലോക്കുകൾ എന്നിവയും പദ്ധതിയിൽ ഉൾപ്പെടുത്തിയിട്ടുണ്ട്. മൂന്ന് പാലങ്ങൾ നിർമിക്കും വിമാനത്താവളത്തിന്‍റെ സമീപ പഞ്ചായത്തുകളിൽ സിയാലിന്‍റെ നേതൃത്വത്തിൽ മൂന്ന് പാലങ്ങൾ നിർമിക്കും. 40 കോടി ചെലവിൽ നിർമിക്കുന്ന പാലങ്ങളുടെ നിർമാണോദ്‌ഘാടനം നാളെ ഉച്ചകഴിഞ്ഞ് 3.15ന് മുഖ്യമന്ത്രി പിണറായി വിജയൻ നിർവഹിക്കും. പുളിയാമ്പിള്ളി, മഠത്തിമൂല, ചൊവ്വര എന്നിവിടങ്ങളിലാണ് മൂന്ന് പാലങ്ങൾ നിർമിക്കാൻ സിയാൽ പദ്ധതിയിടുന്നത്. സിയാൽ കോൺഫറൻസ് ഹാളിൽ നടക്കുന്ന ചടങ്ങിൽ മുഖ്യമന്ത്രി ഓൺലൈനായാണ് നിര്‍മാണോദ്ഘാടനം നിർവഹിക്കുക. 200 മീറ്റർ നീളത്തിൽ നിർമിക്കുന്ന പുളിയാമ്പിള്ളി പാലം തുറവുങ്കര - പിരാരൂർ പ്രദേശങ്ങളെ ബന്ധിപ്പിക്കുന്നതാണ്. ചൊവ്വര - നെടുവന്നൂർ സൗത്ത് എന്നീ പ്രദേശങ്ങളെ ബന്ധിപ്പിക്കുന്ന ചൊവ്വര പാലത്തിന്‍റെ നീളം 114 മീറ്ററാണ്. 177 മീറ്റർ നീളമുള്ള മഠത്തിമൂല പാലം കപ്രശേരി വെസ്റ്റ് - പുറയാർ പ്രദേശങ്ങളെയും ബന്ധിപ്പിക്കുന്നു. പാലങ്ങളുടെ ഇരുവശങ്ങളിലുമായി നടപ്പാത, അനുബന്ധ റോഡുകൾ എന്നിവയും നിർമിക്കും. കൊച്ചി വിമാനത്താവളത്തിന്‍റെ പരിസര പ്രദേശത്തെ വെള്ളപ്പൊക്ക ഭീഷണിയിൽ നിന്നും രക്ഷിക്കുക, ഗതാഗത അടിസ്ഥാന സൗകര്യ വികസനം എന്നിവ ശക്തിപ്പെടുത്തുക എന്നീ ലക്ഷ്യങ്ങളോടെയാണ് പാലങ്ങളുടെ നിർമാണം. നിർമ്മാണോദ്ഘാടന ചടങ്ങിൽ മന്ത്രി പി. രാജീവ് അധ്യക്ഷത വഹിക്കും. ബെന്നി ബഹന്നാൻ എംപി, എംഎൽഎമാരായ അൻവർ സാദത്ത്, റോജി എം. ജോൺ, സിയാൽ മാനേജിംഗ് ഡയറക്ടർ എസ്. സുഹാസ്, തദ്ദേശ സ്ഥാപനങ്ങളിലെ ജനപ്രതിനിധികൾ തുടങ്ങിയവർ പങ്കെടുക്കും.

സ്ക്രാപ് മർച്ചന്‍റ്സ് അസോ. കളക്ടറേറ്റ് മാർച്ച് നടത്തി

കൊച്ചി: അസംഘടിത മേഖലയിൽ പ്രവർത്തിക്കുന്ന പാഴ്‌വസ്തു വ്യാപാരികളുടെ തൊഴിൽ നഷ്ടപ്പെടുത്തുന്ന തദ്ദേശ സ്വയംഭരണ വകുപ്പിന്‍റെ ഉത്തരവ് പിൻവലിക്കണമെന്ന് സ്ക്രാപ് മർച്ചന്‍റ്സ് അസോസിയേഷൻ സംസ്ഥാന പ്രസിഡന്‍റ് മുഹമ്മദ്‌ ആസിഫ് ആവശ്യപ്പെട്ടു. ഖരമാലിന്യ നിർമാർജന പ്രക്രിയയിൽ പ്രവർത്തിക്കുന്ന മുഴുവൻ വ്യാപാരികളെയും ഫീഡർമാരെയും ഹരിതകർമ സേനാംഗങ്ങളായി പ്രഖ്യാപിക്കണമെന്നും പാഴ്‌വസ്തുക്കളെ നികുതിയിൽ നിന്ന് പൂർണമായും ഒഴിവാക്കണമെന്നും അദ്ദേഹം ആവശ്യപ്പെട്ടു. വിവിധ ആവശ്യങ്ങൾ ഉന്നയിച്ച് കേരള സ്ക്രാപ്പ് മർച്ചന്‍റ്സ് അസോസിയേഷൻ നടത്തിയ എറണാകുളം കളക്ടറേറ്റ് മാർച്ച് ഉദ്‌ഘാടനം ചെയ്യുകയായിരുന്നു അദ്ദേഹം. എറണാകുളം ജില്ലാ പ്രസിഡന്‍റ് റഷീദ് കാലടി അധ്യക്ഷനായിരുന്നു. സംസ്ഥാന സെക്രട്ടറി കെ പി എ ഷരീഫ് മലപ്പുറം മുഖ്യ പ്രഭാഷണം നടത്തി.

പാചക വാതകം : ഡെലിവറി ഏജന്‍റിനെക്കൊണ്ട് സിലിണ്ടറിന് ചോർച്ച ഇല്ലെന്ന് ഉറപ്പാക്കണം: കളക്ടർ

കൊച്ചി: ഗ്യാസ് ഏജന്‍സികള്‍ സിലിണ്ടറുമായി വീടുകളിലെത്തുമ്പോള്‍ ഡെലിവറി ഏജന്‍റിനെക്കൊണ്ട് സിലിണ്ടര്‍ തുറന്ന് പരിശോധിച്ച് ചോർച്ച ഇല്ലെന്ന് ഉപഭോക്താക്കള്‍ ഉറപ്പാക്കണമെന്ന് ജില്ലാ കളക്ടര്‍ ജി. പ്രിയങ്ക. ജില്ലയിലെ ഗാര്‍ഹിക പാചകവാതക സിലിണ്ടറുകളുടെ വിതരണം, ഏജന്‍സികളുടെ പ്രവര്‍ത്തനം, ഉപഭോക്താക്കളുടെ പരാതികള്‍ എന്നിവ അവലോകനം ചെയ്യുന്നതിനായി സംഘടിപ്പിച്ച പാചകവാതക അദാലത്തിൽ അധ്യക്ഷത വഹിച്ചു സംസാരിക്കുകയായിരുന്നു അവർ. കളക്ടറേറ്റ് കോണ്‍ഫറന്‍സ് ഹാളില്‍ നടന്ന അദാലത്തില്‍ പാചകവാതക വിതരണ രംഗത്ത് നിലനില്‍ക്കുന്ന വിവിധ പ്രശ്‌നങ്ങള്‍ ചര്‍ച്ച ചെയ്തു. പാചകവാതക സിലിണ്ടറുകളുടെ ചോർച്ച പോലുള്ള അടിയന്തര സാഹചര്യങ്ങളില്‍ ഉപഭോക്താക്കള്‍ക്ക് ഓയില്‍ കമ്പനികളുടെ എമര്‍ജന്‍സി ഹെല്‍പ്പ്‌ലൈന്‍ നമ്പറായ 1906ല്‍ നേരിട്ട് ബന്ധപ്പെട്ട പരാതികള്‍ രജിസ്റ്റര്‍ ചെയ്യാവുന്നതാണെന്ന് കളക്ടര്‍ യോഗത്തില്‍ അറിയിച്ചു. ഡെലിവറി വാഹനത്തിലുള്ള തൂക്ക പരിശോധനാ യന്ത്രത്തില്‍ സിലിണ്ടറിന്‍റെ തൂക്കം പരിശോധിച്ച് ഉറപ്പാക്കണമെന്നും ഡെലിവറി ഏജന്‍റുമാര്‍ക്ക് ഇതുസംബന്ധിച്ച് നിര്‍ദേശം നല്‍കാനും ഗ്യാസ് ഏജന്‍സി ഉടമകളോട് കളക്ടര്‍ ആവശ്യപ്പെട്ടു. കഴിഞ്ഞ ഒരു വര്‍ഷത്തിനിടെ ഗാര്‍ഹിക പാചകവാതക വിതരണവുമായി ബന്ധപ്പെട്ട് ജില്ലയില്‍ 54 പരാതികളാണ് ലഭിച്ചിട്ടുള്ളതെന്ന് ജില്ലാ സപ്ലൈ ഓഫീസര്‍ എസ്. ബിന്ദു അറിയിച്ചു. ഇതില്‍ 48 പരാതികള്‍ തീര്‍പ്പാക്കി. ബാക്കിയുള്ള ആറ് പരാതികളില്‍ നടപടികള്‍ തുടരുകയാണെന്നും അവര്‍ പറഞ്ഞു. പൊതുവിതരണ വകുപ്പ് ഉദ്യോഗസ്ഥര്‍, ഓയില്‍ കമ്പനി അധികൃതര്‍, പാചകവാതക വിതരണ ഏജന്‍സി പ്രതിനിധികള്‍, ഉപഭോക്തൃ സംഘടനാ പ്രതിനിധികള്‍ എന്നിവര്‍ അദാലത്തില്‍ പങ്കെടുത്തു.

തണ്ണീർത്തടം നികത്തുന്നതിനിടെ ക്ഷേത്രമതിൽ തകർന്ന സംഭവം: രണ്ടു പേർ അറസ്റ്റിൽ

പള്ളുരുത്തി: ഇടക്കൊച്ചിയിൽ രാത്രിയുടെ മറവിൽ തണ്ണീർത്തടം നികത്തുന്നതിനിടെ സമീപത്തെ ക്ഷേത്രമതിൽ തകർന്നു വീണ സംഭവത്തിൽ രണ്ടു പേർ അറസ്റ്റിൽ. പള്ളുരുത്തി സ്വദേശി ആന്‍റണി ഔസേപ്പ് (55), ഇടക്കൊച്ചി മഠത്തിപ്പറമ്പിൽ നിധിൻ (30) എന്നിവരാണ് അറസ്റ്റിലായത്. നിധിന് കോടതി ജാമ്യം അനുവദിച്ചു. ആന്‍റണിയെ ഇന്ന് കോടതിയിൽ ഹാജരാക്കുമെന്ന് പോലീസ് പറഞ്ഞു. ഇടക്കൊച്ചി കണ്ണങ്ങാട്ട് ക്ഷേത്രത്തിനോട് ചേർന്നുള്ള തണ്ണീർത്തടം നികത്താൻ ചൊവ്വാഴ്ച രാത്രിയിലാണ് സംഘമെത്തിയത്. അൻപതോളം വലിയ ലോറികളിൽ മണ്ണ് എത്തിച്ച് ഒറ്റരാത്രികൊണ്ട് തണ്ണീർത്തടം പൂർണമായും നികത്താനായിരുന്നു പദ്ധതി. വൻകിട ഭൂവില്പന സംഘമാണ് ഇതിന് പിന്നിലുള്ളതെന്ന് നാട്ടുകാർ പറയുന്നു. പുലർച്ചെ ക്ഷേത്രത്തിലെത്തിയ പൂജാരിയാണ് മതിൽ തകർന്നത് കണ്ടത്. വിവരമറിഞ്ഞ് ദേവസ്വം ഭാരവാഹികളും നാട്ടുകാരും സ്ഥലത്തെത്തി. രോഷാകുലരായ വിശ്വാസികളും നാട്ടുകാരും ചേർന്ന് പിന്നീട് റോഡ് ഉപരോധിച്ചു. രാവിലെ തുടങ്ങിയ റോഡ് ഉപരോധം വൈകുന്നേരത്തോടെയാണ് അവസാനിപ്പിച്ചത്. ക്ഷേത്രമതിലും റോഡും തകർന്നനിലയിലാണ്. ക്ഷേത്രവളപ്പിലുണ്ടായിരുന്ന ആൽമരം, മറ്റ് മരങ്ങൾ എന്നിവയും നികത്തലിനിടെ നശിച്ചിരുന്നു. ക്ഷേത്രത്തിലേക്കുള്ള റോഡിൽ തള്ളിയ മണ്ണ്, ജെസിബി ഉപയോഗിച്ച് നീക്കുന്നതിനിടെയാണ് റോഡ് തകർന്നത്. മണ്ണ് ഉപയോഗിച്ച് നികത്തുന്നതിനിടെ ക്ഷേത്രമതിലും തകർന്നിരുന്നു. തണ്ണീർത്തടം പൂർവസ്ഥിതിയിലാക്കുന്നതു വരെ പ്രതിഷേധം തുടരുമെന്ന് എസ്എൻഡിപി യൂണിയൻ ഭാരവാഹികൾ പറഞ്ഞു. ക്ഷേത്ര മതിലടക്കം തകർന്നതിൽ നാലു ലക്ഷം രൂപയുടെ നഷ്ടമാണ് കണക്കാക്കിയിരിക്കുന്നത്. കൊച്ചി തഹസിൽദാരും ഇടക്കൊച്ചി വില്ലേജ് ഉദ്യോഗസ്ഥരും സ്ഥലത്തെത്തി സ്ഥലം പരിശോധന നടത്തിയിരുന്നു. നികത്തൽ നടന്നത് പോലീസിന്‍റെ മൂക്കിൻതുമ്പിൽ തണ്ണീർത്തടം നികത്തൽ നടന്നത് പോലീസിന്‍റെ മൂക്കിൻ തുമ്പിലെന്ന് അത് വഴി യാത്ര ചെയ്ത വാഹന യാത്രികർ. കണ്ണങ്ങാട്ട് പാലത്തിന്‍റെ ഇരുവശവും ചൊവ്വാഴ്ച പോലീസിന്‍റെ രാത്രികാല പരിശോധന ഉണ്ടായിരുന്നു. പരിശോധന നടക്കുന്നതിന്‍റെ മുന്നിലൂടെയാണ് ടോറസ് വാഹനത്തിൽ മണ്ണ് എത്തിച്ചു നികത്തിയത്. പിറ്റേന്ന് വിവാദമായപ്പോഴാണ് പോലീസ് വിഷയത്തിൽ ഇടപെട്ടത്. ഇടക്കൊച്ചി മേഖലയിൽ നിരന്തരമായി തണ്ണീർത്തടം നികത്തുന്നുണ്ടെങ്കിലും പോലീസ് തിരിഞ്ഞു നോക്കാറില്ലെന്ന് നാട്ടുകാർ പറയുന്നു.

രണ്ടുകിലോയിലധികം കഞ്ചാവുമായി യുവാവ് അറസ്റ്റിൽ

കളമശേരി: കളമശേരിയിൽ കഞ്ചാവ് വേട്ട. 2.144 കിലോ കഞ്ചാവുമായി യുവാവ് പിടിയിലായി. മഞ്ഞുമ്മൽ എം എൽ എ റോഡിൽ കൂനത്ത് ഹൗസിൽ കെ.ആർ. റാഹി(26)നെയാണ് പോലീസ് അറസ്റ്റ് ചെയ്തത്. നാർക്കോട്ടിക് സെൽ അസിസ്റ്റന്‍റ് കമ്മീഷണർ കെ.എ. അബ്ദുൾ സലാമിന്‍റെ നേതൃത്വത്തിലുള്ള ഡാൻസാഫ് ടീം വട്ടേക്കുന്നം മേക്കേരി ലൈൻ റോഡിനു സമീപത്തു നിന്നാണ്്‌ സ്കൂട്ടറിൽ വില്പനയ്ക്കായി സൂക്ഷിച്ചിരുന്ന കഞ്ചാവുമായി പ്രതിയെ പിടികൂടിയത്.

ഭാര്യയെ ആക്രമിച്ചു; ഭർത്താവിനെതിരെ കേസ്

വൈപ്പിൻ: ഭാര്യയും ഭർത്താവും തമ്മിലുള്ള തർക്കത്തിൽ കോടതി ഉത്തരവ് ലംഘിച്ച് ഭാര്യ താമസിക്കുന്ന വീട്ടിലെത്തി അതിക്രമം കാണിച്ച മധ്യവയസ്കനെതിരെ പോലീസ് ഗാർഹിക പീഡനത്തിനു കേസ് എടുത്തു. ഭാര്യ നൽകിയ പരാതിയിൽ മാലിപ്പുറം കർത്തേടം കൊല്ലമ്മ പറമ്പിൽ ലൈജു(49 )വിനെതിരെയാണ് ഞാറക്കൽ പോലീസ് കേസ് എടുത്തത്. ബുധനാഴ്ച രാത്രി വീട്ടിലെത്തി പരാതിക്കാരിയുടെ സ്റ്റീൽ ഇട്ട കൈ പിടിച്ച് തിരിക്കുകയും ഭീഷണി പ്പെടുത്തിയെന്നുമാണ് പരാതി. ഇയാളോട് ഭാര്യ താമസിക്കുന്നിടത്ത് പോകരുതെന്ന് ഞാറക്കൽ ഫസ്റ്റ് ക്ലാസ് മജിസ്ട്രേറ്റ് കോടതി ഉത്തരവുള്ളതാണ്. ഇത് ലംഘിച്ചതിനും കേസുണ്ട്.

അനധികൃത നിര്‍മാണം പൊളിക്കാന്‍ നോട്ടീസ്

പെരുമ്പാവൂര്‍: കൂവപ്പടി പഞ്ചായത്തിലെ 17-ാം വാര്‍ഡില്‍ വാച്ചാല്‍ പാടത്ത് സപ്ലൈകോ ഗോഡൗണിന് പുറകില്‍ അനധികൃതമായി ഗോഡൗണ്‍ നിര്‍മാണം നടക്കുന്നത് പഞ്ചായത്ത് തടഞ്ഞു. കഴിഞ്ഞ ഓണം അവധി ദിവസങ്ങളില്‍ നടന്ന നിര്‍മാണ പ്രവര്‍ത്തനങ്ങള്‍ നിര്‍ത്താന്‍ പഞ്ചായത്ത് നോട്ടീസ് നല്‍കിയിരുന്നു. ഇതു ലംഘിച്ച് വീണ്ടും നിര്‍മാണം നടത്തുന്നത് നേരില്‍ക്കണ്ട പഞ്ചായത്ത് ഉദ്യോഗസ്ഥര്‍ സ്ഥലത്തെത്തി അനധികൃതമായി നടക്കുന്ന നിര്‍മാണം പൊളിക്കാന്‍ നോട്ടീസ് പതിക്കുകയായി രുന്നു. അയല്‍വാസിയുടെ പരാതിയില്‍ ഒരു വര്‍ഷമായി യാതൊരു വിധ അനുമതിയും ഇല്ലാതെയുള്ള നിര്‍മാണം നിര്‍ത്താന്‍ പഞ്ചായത്ത് സെക്രട്ടറി രണ്ടു തവണ നോട്ടീസ് നല്‍കിയിരുന്ന കെട്ടിടമാണിത്.

ബൈക്ക് മോഷ്ടാക്കള്‍ പിടിയില്‍

കൊച്ചി: ലിസി ആശുപത്രിക്ക് സമീപത്തു നിന്ന് ബൈക്ക് മോഷ്ടിച്ച മൂന്നു പേര്‍ പിടിയിലായി‍. ഏറ്റുമാനൂര്‍ പേരൂര്‍ ചെറുവാണ്ടൂര്‍ തെല്ലകത്തുകുഴി തോപ്പില്‍ മാക്‌സും (18) പ്രായപൂര്‍ത്തിയാകാത്ത രണ്ടു പേരുമാണ് അറസ്റ്റിലായത്. മോഷ്ടിച്ച വാഹനം കോട്ടയം ഭാഗത്ത് നിന്നും കണ്ടെടുത്തു. നോര്‍ത്ത് പ്രിന്‍സിപ്പല്‍ എസ്‌ഐ എയിന്‍ ബാബുവിന്‍റെ നേതൃത്വത്തിലുള്ള സംഘമാണ് പ്രതികളെ പിടികൂടിയത്. പ്രതികളെ കോടതിയില്‍ ഹാജരാക്കി.

ബസിടിച്ച് സ്കൂട്ടർ യാത്രികന്‍റെ മരണം: ഡ്രൈവർ ഒളിവിൽ

തോപ്പുംപടി: ബിഒടി പാലത്തില്‍ സ്വകാര്യ ബസിടിച്ച് സ്‌കൂട്ടര്‍ യാത്രികൻ മരിച്ച സംഭവത്തിൽ അപകടശേഷം ബസിൽ നിന്ന് ഇറങ്ങിയോടിയ ഡ്രൈവറെ ഇതുവരെ പിടികൂടാനായില്ല. ബുധനാഴ്ച രാത്രി 8.45ഓടെ ഫോര്‍ട്ടുകൊച്ചി - കളമശേരി റൂട്ടില്‍ ഓടുന്ന റോഡ്‌നെറ്റ് എന്ന ബസാണ് സ്കൂട്ടറിൽ ഇടിച്ചത്. അപകടത്തിൽ എളമക്കര പള്ളിപറമ്പില്‍ ജോസ് ഡൊമിനിക് (42) ആണ് മരിച്ചത്. അമിത വേഗത്തില്‍ മറ്റൊരു വാഹനത്തെ മറികടന്നെത്തിയ ബസ് ജോസിന്‍റെ സ്‌കൂട്ടറിൽ ഇടിക്കുകയായിരുന്നു. ഡ്രൈവറെ കണ്ടെത്താനുള്ള ശ്രമം തുടരുകയാണെന്ന് പോലീസ് പറഞ്ഞു.

ഓട്ടന്‍ തുള്ളലിലൂടെ ലഹരി വിരുദ്ധ ബോധവത്കരണം

കൊച്ചി: എറണാകുളം സെന്‍റ് തെരേസാസ് കോളജ് (ഓട്ടോണമസ്) കമ്യൂണിക്കേറ്റീവ് ഇംഗ്ലീഷ് വകുപ്പ്, ഭരതനാട്യം, ഫ്രഞ്ച്, ബിസിഎ വകുപ്പുകളുമായി സഹകരിച്ച്, കേരള സംസ്ഥാന എക്‌സൈസ് വകുപ്പിന്‍റെയും എറണാകുളം ജില്ലാ വിമുക്തി മിഷന്‍റെയും സഹകരണത്തോടെ ഓട്ടന്‍തുള്ളല്‍ കലയിലൂടെ ലഹരിക്കെതിരെ ബോധവത്കരണ പരിപാടി സംഘടിപ്പിച്ചു. എറണാകുളം അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ വി. ജയരാജ് ആണ് ഓട്ടന്‍തുള്ളല്‍ അവതരിപ്പിച്ചത്. സെന്‍റ് തെരേസാസ് കോളജ് ആര്‍ട്‌സ് ബ്ലോക്ക് ഡയറക്ടര്‍ സിസ്റ്റര്‍ ടെസ, പ്രിന്‍സിപ്പല്‍ ഡോ. അനു ജോസഫ് എന്നിവരും പരിപാടിയില്‍ പങ്കാളികളായി. ഓട്ടന്‍തുള്ളല്‍ അവതരണത്തിനോടൊപ്പം ലഹരി ഉപയോഗത്തിനെതിരെ വി. ജയരാജ് ബോധവത്കരണ ക്ലാസും നടത്തി.

കോളജ് ഹോസ്റ്റലിൽ ഭക്ഷ്യ വിഷബാധ; 20 വിദ്യാർഥികൾ ചികിത്സയിൽ

ആലുവ: എടത്തല കെഎംഇഎ കോളജ് ഹോസ്റ്റലിൽ 20 വിദ്യാർഥികൾക്ക് ഭക്ഷ്യവിഷബാധ. വിവിധ ആശുപത്രികളിൽ ഇവർ ചികിത്സ തേടി. ബുധനാഴ്ച രാത്രിയും ഇന്നലെ രാവിലെയുമായി ഭക്ഷണം കഴിച്ച വിദ്യാർഥികൾക്കാണ് ഛർദ്ദിയും വയറിളക്കവും ഉണ്ടായത്. ഒരേ കോമ്പൗണ്ടിൽ പ്രവർത്തിക്കുന്ന കെഎംഇഎയുടെ മൂന്ന് കോളജുകളും ഹോസ്റ്റലുകളും ഒക്ടോബർ അഞ്ചു വരെ അടച്ചു. ഭക്ഷ്യവിഷ ബാധയേറ്റ വിദ്യാർഥികൾ കളമശേരി മെഡിക്കൽ കോളേജ്, എടത്തല പ്രാഥമികാരോഗ്യ കേന്ദ്രം, സ്വകാര്യ ക്ലിനിക്കുകൾ എന്നിവിടങ്ങളിലാണ് ചികിത്സ തേടിയത്. ബുധനാഴ്ച രാത്രി ഹോസ്റ്റലിൽ താമസിക്കുന്ന അഞ്ചു പേർക്കാണ് ആദ്യം അസ്വസ്ഥതകൾ അനുഭവപ്പെട്ടത്. ഹോസ്റ്റലിലെ മോട്ടോർ തകരാറിലായതിനാൽ കഴിഞ്ഞ ദിവസങ്ങളിൽ ടാങ്കർ വെള്ളമാണ് ഉപയോഗിച്ചത്. ഈ വെള്ളമാണ് ഭക്ഷ്യവിഷബാധയ്ക്ക് കാരണമെന്നാണ് സൂചന. ഇന്നലെ കൂടുതൽ പേർക്ക് അസ്വസ്ഥതകൾ ഉണ്ടായതിനെ തുടർന്ന് വിദ്യാർഥികൾ പ്രതിഷേധവുമായി രംഗത്തെത്തി. പ്രിൻസിപ്പലിനെയും അധ്യാപകരെയും ഓഫീസിൽ ഉപരോധിച്ചു. ഇതേതുടർന്ന് 28 വരെ കോളജുകളും ഹോസ്റ്റലുകളും അടച്ചിടാനും ശുചീകരണം നടത്താനും തീരുമാനിച്ച് പിരിഞ്ഞു. എന്നാൽ വൈകുന്നേരം വീണ്ടും വിദ്യാർഥികൾ ഉപരോധം ആരംഭിച്ചു. ഹോസ്റ്റൽ അടയ്ക്കരുതെന്നും ഭക്ഷണം വേണമെന്നുമായിരുന്നു ആവശ്യം. ഇത് പരിഗണിക്കാതെ ഒക്ടോബർ അഞ്ചുവരെ അടച്ചിടാൻ തീരുമാനിക്കുകയായിരുന്നു.

കുത്തുകുഴിയിൽ വാഹനങ്ങളുടെ കൂട്ടയിടി; അഞ്ചു പേർക്ക് പരിക്ക്

കോതമംഗലം: കൊച്ചി-ധനുഷ്കോടി ദേശീയപാതയിൽ കുത്തുകുഴി കിഴക്കേക്കവലയിൽ ബസും കാറും സ്കൂട്ടറും കൂട്ടിയിടിച്ച് അഞ്ചു പേർക്ക് പരുക്കേറ്റു. കാർ യാത്രികരായ നെടുങ്കണ്ടം പച്ചടി മുതിയേടത്തുകുഴിയിൽ ബിനോയ് (49), ഭാര്യ മഞ്ജു (44), മകൾ എയ്ഞ്ചൽ (14), സുഹൃത്ത് അജിത്കുമാർ (45), സ്കൂട്ടർ യാത്രികൻ രഞ്ജിത് കെ. രാജീവ് എന്നിവരെ കോതമംഗലത്തെ ആശുപ്രതിയിൽ പ്രവേശിപ്പിച്ചു. ഇന്നലെ ഉച്ചയ്ക്കായിരുന്നു അപകടം. കോതമംഗലം ഭാഗത്തുനിന്നു പോയ കാർ വളവിൽ സ്കൂട്ടറിനെ മറികടക്കവെ എതിരേവന്ന ബസുമായി കൂട്ടിയിടിച്ചു. പിന്നാലെയെത്തിയ സ്കൂട്ടറും അപകടത്തിൽപ്പെട്ടു. കാറും സ്കൂട്ടറും ബസിന്‍റെ മുൻഭാഗവും തകർന്നു.

മഹാരാജാസ് കോളജിന് സ്റ്റേഡിയത്തിലെ കടമുറി വാടകയിനത്തില്‍ കിട്ടാനുള്ളത് മൂന്നരക്കോടി

കൊച്ചി: എറണാകുളം മഹാരാജാസ് കോളജിന് സ്റ്റേഡിയം പവലിയനിലുള്ള കടമുറികളുടെ വാടകയിനത്തില്‍ കിട്ടാനുള്ളത് മൂന്നരക്കോടിയോളം രൂപ. കോളജ് കെട്ടിടത്തിന്‍റെ പല ഭാഗങ്ങളും തകര്‍ന്നു വീണിട്ടും കോളജ് വികസന ഫണ്ടിന്‍റെ അഭാവം മൂലം വികസന പ്രവര്‍ത്തനങ്ങള്‍ നടക്കാത്ത അവസ്ഥയിലാണ് ഇത്രയധികം രൂപ കോളജിന് കുടിശിഖ ഇനത്തില്‍ കിട്ടാനുള്ളത്. 13 കട മുറികള്‍ ഉള്‍പ്പെടുന്ന കെട്ടിടത്തിലെ എല്ലാ കടകളും വാടകയ്ക്ക് നല്‍കിയിട്ടുണ്ട്. ഇതില്‍ നിന്നായി 3,31,42,497 രൂപയാണ് കുടിശിക ഇനത്തില്‍ കിട്ടാനുള്ളതെന്നാണ് അഡ്വ. ടി.ജി. റിതിന്‍ ഗോപിക്ക് ലഭിച്ച വിവരാവകാശ രേഖകളാണ് സൂചിപ്പിക്കുന്നത്. സ്ഥാപന മേധാവിയായ മഹാരാജാസ് കോളജ് പ്രിന്‍സിപ്പലിനാണ് കടമുറികള്‍ വാടകയ്ക്ക് നല്‍കുന്നതിനും വാടകക്കരാറില്‍ ഏര്‍പ്പെടുന്നതിനും വാടക പിരിക്കുന്നതിനുമുള്ള ഉത്തരവാദിത്വമെന്ന് രേഖകളിലുണ്ട്. ഓരോ കടമുറിക്കും ചതുരശ്രയടിക്ക് 32.22 രൂപ നിരക്കിലാണ് വാടക നിശ്ചയിച്ചിരിക്കുന്നത്. വാടക കുടിശിക കിട്ടാത്തതിനെ തുടര്‍ന്ന് ഷോപ്പ് ഉടമകളുമായി റെന്‍റ്് കണ്‍ട്രോള്‍ കോടതിയില്‍ കേസ് നിലനില്‍ക്കുകയാണെന്നും വിവരാവകാശ രേഖകളില്‍ പറയുന്നു. അതേസമയം, ഫണ്ടിന്‍റെ അപര്യാപ്തത മൂലം കോളജില്‍ അടിസ്ഥാന സൗകര്യ വികസനം പോലും നടക്കുന്നില്ലെന്നാണ് വിദ്യാര്‍ഥികള്‍ ആരോപിക്കുന്നത്. കോളജ് കെട്ടിട്ടങ്ങള്‍ പലതും അപകടാവസ്ഥയിലാണ്. ഈ അടുത്ത കാലത്ത് കെട്ടിടത്തിന്‍റെ പല ഭാഗങ്ങളും പൊളിഞ്ഞു വീഴുകയുണ്ടായി. ഹിസ്റ്ററി ബ്ലോക്കും മലയാളം ഡിപ്പാര്‍ട്ട്‌മെന്‍റിലെ പല ഭാഗങ്ങളും അപകടാവസ്ഥയിലാണ്. കോളജിന് കിട്ടാനുള്ള കോടികള്‍ ആരാണ് അന്യായമായി വാങ്ങുന്നതെന്നതില്‍ അന്വേഷണം നടത്തണമെന്ന് മഹാരാജാസ് കോളജ് കെഎസ് യു യൂണിറ്റ് പ്രസിഡന്‍റ് രാജീവ് പാട്രിക് ആവശ്യപ്പെട്ടു.

യുവാവിനെ ഷോക്കേറ്റ് മരിച്ചനിലയിൽ കണ്ടെത്തി

വൈപ്പിൻ: യുവാവിനെ വീടിനുള്ളിൽ ഷോക്കേറ്റ് മരിച്ച നിലയിൽ കാണ്ടെത്തി. ഞാറക്കൽ ജയ്ഹിന്ദ് മൈതാനിക്ക് പടിഞ്ഞാറ് കൈതവളപ്പിൽ ദാസന്‍റെ മകൻ വിനോദാ(44)ണ് മരിച്ചത്. ബുധനാഴ്ച വൈകിട്ട് വീടിന്‍റെ ഹാളിനോട് ചേർന്ന മുറിയിലാണ് മൃതദേഹം കണ്ടത്. ബന്ധുക്കൾ വിവരമറിയിച്ചതിനെ തുടർന്ന് ഞാറക്കൽ പോലീസ് എത്തി മേൽനടപടികൾ സ്വീകരിച്ചു. മൃതദേഹം പോസ്റ്റുമോർട്ടത്തിനുശേഷം സംസ്കരിച്ചു.

ഷോക്കേറ്റ് മരിച്ചു

മൂവാറ്റുപുഴ: വീട് നിര്‍മാണത്തിനിടെ ഇതരസംസ്ഥാന തൊഴിലാളി ഷോക്കേറ്റ് മരിച്ചു. ബംഗാള്‍ സ്വദേശി മുകളേഷ് റഹ്മാന്‍(45) ആണ് മരിച്ചത്. ഇന്നലെ രാവിലെ 9.30ഓടെ കിഴക്കേക്കര കുറുപ്പുതലത്തില്‍ ബഷീറിന്‍റെ വീട്ടിലായിരുന്നു അപകടം. അറ്റകുറ്റപ്പണികള്‍ക്കിടെ ശുചീകരണ പ്രവര്‍ത്തനം നടത്തുമ്പോഴാണ് ഷോക്കേറ്റത്. ഉടന്‍ മൂവാറ്റുപുഴ ജനറല്‍ ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം പോസ്റ്റ്മോര്‍ട്ടത്തിന്ശേഷം ബന്ധുക്കള്‍ക്ക് കൈമാറി.

കേഴമാന്‍ കുഞ്ഞിനെ രക്ഷപ്പെടുത്തി

കോതമംഗലം: നഗരത്തില്‍ ആള്‍ത്താമസമില്ലാത്ത വീടിന്‍റെ ഗേറ്റിലെ ഗ്രില്ലിനുള്ളില്‍ കുടുങ്ങിയ കേഴമാന്‍ കുഞ്ഞിനെ രക്ഷപ്പെടുത്തി. കോതമംഗലം ശോഭനപ്പടിയില്‍ കൂറ്റപ്പിള്ളി ഏണസ്റ്റ് പോളിന്‍റെ വീടിന്‍റെ ഗേറ്റിനിടയിലാണ് മൂന്നു വയസ് പ്രായമുള്ള മാന്‍കുഞ്ഞ് കുടുങ്ങിയത്. ഇന്നലെരാവിലെ 11നാണ് സംഭവം. നാട്ടുകാരാണ് പോലീസിനേയും വനപാലകരേയും വിവരം അറിയിച്ചത്. ഗേറ്റിനുള്ളില്‍ കുടുങ്ങിയ മാന്‍കുഞ്ഞിനെ നാട്ടുകാര്‍ രക്ഷപ്പെടുത്തി ഒഴിഞ്ഞ കൂട്ടിലാക്കി. ഗേറ്റിനുള്ളിലൂടെ കടന്നുപോകാന്‍ ശ്രമിക്കവെ മാനിന് വയറില്‍ പരിക്കേറ്റിരുന്നു. ആര്‍ആര്‍ടി സംഘം എത്തി മാനിനെ ഊന്നുകല്‍ മൃഗാശുപത്രിയില്‍ എത്തിച്ച് ചികിത്സ നല്‍കി.

പിറവം വള്ളംകളി ഒക്‌ടോബർ നാലിന്; വിപുലമായ ഒരുക്കം

പിറവം: മൂവാറ്റുപുഴയാറ്റിലെ ഒഴുക്കിനെതിരേയുള്ള പിറവം വള്ളംകളിക്ക് ഒരുക്കങ്ങളായി. ഒക്‌ടോബര്‍ നാലിന് നടക്കുന്ന വള്ളംകളി ഏറെ ശ്രദ്ധയാകര്‍ഷിക്കുന്നതാണ്. ടൂറിസം വകുപ്പ് ഐപിഎല്‍ -ക്രിക്കറ്റ് ലീഗ് മത്സരങ്ങളുടെ മാതൃകയില്‍ ചാമ്പ്യന്‍സ് ബോട്ട് ലീഗ് ആരംഭിച്ചതാണ് പിറവത്തിനു നേട്ടമായി വള്ളംകളി എത്തിയത്. ഓണാഘോഷങ്ങളുടെ ഭാഗമായി 1952 ല്‍ ചുരുങ്ങിയ നിലയില്‍ ആരംഭിച്ചതാണ് പിറവത്തെ വള്ളംകളി. നഗരസഭയുടെ ഓണോത്സവത്തിന് സമാപനം കുറിച്ച് വിനോദസഞ്ചാര വകുപ്പിന്‍റെ ആഭിമുഖ്യത്തില്‍ പിറവം പാലത്തിന് സമീപമാണ് വള്ളംകളി നടക്കുന്നത്. സംസ്ഥാന സര്‍ക്കാര്‍ വിനോദസഞ്ചാര വികസനം മുന്നില്‍കണ്ട് നടപ്പാക്കുന്ന ചാമ്പ്യന്‍സ് ബോട്ട് ലീഗിലെ നാലാമത്തെ മത്സരമാണ് പിറവത്ത് നടക്കുക. ജലോത്സവ മത്സരത്തിനായി ഒമ്പത് ചുണ്ടന്‍ വള്ളങ്ങള്‍ എത്തുന്നുണ്ട്. കൂടാതെ ഓടി വള്ളങ്ങളുടെ പ്രാദേശിക മത്സരവും നടക്കും. മുന്‍ മന്ത്രിമാരായ ഇ.എം.എസ്. നമ്പൂതിരിപ്പാട്, കെ. കരുണാകരന്‍, ടി.എം. ജേക്കബ് എന്നിവരുടെയും, പിറവം പഞ്ചായത്ത് പ്രസിഡന്‍റായിരുന്ന ഉമാദേവി അന്തര്‍ജനത്തിന്‍റെയും സ്മരണക്കായി ഏര്‍പ്പെടുത്തിയ ട്രോഫിയും കാഷ് അവാര്‍ഡുമാണ് ജേതാക്കള്‍ക്ക് വിതരണം ചെയ്യുന്നത്. പിറവം കൊള്ളിക്കല്‍ ഇറിഗേഷന്‍ വകുപ്പിന്‍റെ ഇന്‍സ്‌പെക്ഷന്‍ ബംഗ്ലാവില്‍ നടന്ന സംഘടക സമിതി യോഗം അനൂപ് ജേക്കബ് എംഎല്‍എ ഉദ്ഘാടനം ചെയ്തു. സംഘാടകസമിതി ഫിനാന്‍സ് കമ്മിറ്റി ചെയര്‍മാനായി നഗരസഭ ചെയര്‍പേഴ്‌സണ്‍ ജൂലി സാബു, റേസ് കമ്മിറ്റി ചെയര്‍മാനായി നഗരസഭാ വൈസ് ചെയര്‍മാന്‍ കെ.പി. സലിം, റിസപ്ഷന്‍ കമ്മിറ്റി ചെയര്‍മാന്‍ ഡോ. അജേഷ് മനോഹര്‍, രജിസ്‌ട്രേഷന്‍ കമ്മിറ്റി ചെയര്‍മാന്‍ ജില്‍സ് പെരിയപ്പുറം തുടങ്ങിയവരെ തെരഞ്ഞെടുത്തു.

സേഫ് സോണ്‍ ഹോസ്പിറ്റൽ കോൺക്ലേവുമായി ഐഎംഎ

കോതമംഗലം: കോതമംഗലം ഐഎംഎയുടെ നേതൃത്വത്തില്‍ സേഫ് സോണ്‍ ഹോസ്പിറ്റൽ കോൺക്ലേവ് നടത്തി. ഐഎംഎ സംസ്ഥാന പ്രസിഡന്‍റ് ഡോ. കെ. എ. ശ്രീവിലാസൻ ഉദ്‌ഘാടനം ചെയ്തു. സേഫ് സോണ്‍ ഹോസ്പിറ്റൽ കമ്മിറ്റി സംസ്ഥാന ചെയര്‍മാന്‍ ഡോ. എം.ഇ. സുഗതന്‍ അധ്യക്ഷനായി. കോതമംഗലം ഐഎംഎ പ്രസിഡന്‍റ് ഡോ. ലിസ തോമസ്, നിയുക്ത സംസ്ഥാന പ്രസിഡന്‍റുമാരായ ഡോ. എം.എൻ. മേനോന്‍, ഡോ. പി. ഗോപികുമാര്‍, മിഡ് സോണ്‍ വൈസ് പ്രസിഡന്‍റ് ഡോ. കെ. സുദര്‍ശന്‍, മിഡ് സോണ്‍ ജോയിന്‍റ് സെക്രട്ടറി ഡോ. അലക്സ് ഇട്ടിച്ചെറിയ, സേഫ് സോണ്‍ ഹോസ്പിറ്റൽ കമ്മിറ്റി കോ-കൺവീനർ ഡോ. ബേബി തോമസ്, തൃശൂര്‍ ജില്ലാ കോ-ഓർഡിനേറ്റർ ഡോ. എൽ. എൻ. വിശ്വനാഥന്‍,ഡോ. സിനി ഐസക് എന്നിവർ പ്രസംഗിച്ചു. ആശുപത്രി നടത്തിപ്പിന്‍റെ നിയമവശങ്ങളെക്കുറിച്ച് ഹൈക്കോടതി അഭിഭാഷക സന്ധ്യ രാജുവും ആശുപത്രി അതിക്രമങ്ങൾ എന്ന വിഷയത്തെക്കുറിച്ച് ഡോ. എം.എൻ. മേനോന്‍, ഡോ. ബേബി തോമസ്, ഡോ. എൽ. എൻ. വിശ്വനാഥന്‍ എന്നിവരും ക്ലാസുകൾ നയിച്ചു. 30 ആശുപത്രികളില്‍ നിന്ന് പ്രതിനിധികള്‍ പങ്കെടുത്തു.

കേബിളുകള്‍ മോഷണം പോയതായി പരാതി

മൂവാറ്റുപുഴ : മൂവാറ്റുപുഴക്കാവില്‍ നവരാത്രി ആഘോഷങ്ങളുടെ ഭാഗമായി കൊണ്ടുവന്ന ജനറേറ്ററിന്‍റെ കേബിളുകള്‍ മോഷണം പോയതായി പരാതി. ആഘോഷങ്ങളുടെ ഭാഗമായി ശബ്ദ സംവിധാനങ്ങളും, ലൈറ്റ് സംവിധാനങ്ങളും പ്രവര്‍ത്തിപ്പിക്കുന്നതിനായി കൊണ്ടുവന്ന 140 മീറ്ററോളം കേബിളാണ് കഴിഞ്ഞ രാത്രിയില്‍ മോഷണം പോയത്. മൂവാറ്റുപുഴ കാവിനോട് ചേര്‍ന്നുള്ള അന്നദാന മണ്ഡപത്തില്‍ വൈദ്യുതിയും ജനറേറ്ററുമായി ബന്ധിപ്പിച്ചിരുന്ന ഭാഗത്തേ കേബിളുകളാണ് നഷ്ടപ്പെട്ടത്. 40,000 ഓളം രൂപ വിലമതിക്കും. ക്ഷേത്രത്തിലെ മറ്റ് സാധനങ്ങളൊന്നും മോഷണം പോയിട്ടില്ലെന്നും, കേബിളുകള്‍ മോഷണം പോയ സംഭവത്തില്‍ സമഗ്രമായ അന്വേഷണം നടത്തി കുറ്റവാളികളെ ഉടന്‍ കണ്ടെത്തണമെന്നും ക്ഷേത്രം ഭാരവാഹി ശിവദാസന്‍ നമ്പൂതിരി പറഞ്ഞു. ക്ഷേത്രം ഭരണസമിതി മൂവാറ്റുപുഴ പോലീസില്‍ പരാതി നല്‍കിയിട്ടുണ്ട്.

വെള്ളക്കെട്ടിനു പരിഹാരം കാണണമെന്ന് ഹൈക്കോടതി

വാഴക്കുളം: വാഴക്കുളം - ആരക്കുഴ മൂഴി റോഡിൽ കാഞ്ഞിരംകുന്നേൽ കവലയിലെ വെള്ളക്കെട്ടിനു പരിഹാരം കാണണമെന്ന് ഹൈക്കോടതി. കാഞ്ഞിരംകുന്നേൽ അജിമോൻ ജോസ് നൽകിയ റിട്ട് ഹർജി പരിഗണിച്ചാണ് ഉത്തരവ്. വലിയ മഴ പെയ്താൽ പ്രദേശത്തെ വീടുകളിലുള്ളവർക്ക് റോഡിലേയ്ക്കിറങ്ങാനാകാത്ത വിധം വെള്ളം കെട്ടി നിൽക്കുന്ന അവസ്ഥയാണ്. പ്രശ്നത്തിന് പരിഹാരമുണ്ടാക്കണമെന്ന് പല തവണ ആവശ്യപ്പെട്ടെങ്കിലും പരിഹാരമുണ്ടായില്ലെന്ന് പരാതിക്കാരൻ ചൂണ്ടിക്കാട്ടി. റോഡിലെ വെള്ളക്കെട്ട് സംബന്ധിച്ച് 2023 ൽ കല്ലൂർക്കാട് പൊതുമരാമത്ത് വകുപ്പ് അസി.എൻജിനീയർക്ക് പ്രദേശവാസികൾ നിവേദനം നൽകിയിരുന്നു. ഓട നിർമിക്കുന്നതിന് എസ്റ്റിമേറ്റ് തയാറാക്കിയെങ്കിലും നിർമാണം നടന്നില്ല. വൈദ്യുത പോസ്റ്റുകൾ മാറ്റി സ്വകാര്യ വ്യക്തിയുടെ പുരിയിടത്തിലൂടെ വെള്ളം ഒഴുക്കിവിടുന്നതിനുള്ള സമ്മതപത്രവും നൽകിയിരുന്നു. എന്നാൽ റോഡു നവീകരണത്തോടനുബന്ധിച്ച് റോഡരികിൽ കോൺക്രീറ്റ് ചെയ്യുക മാത്രമാണ് ചെയ്തത്. ഇതുമൂലം ഒഴുക്കു തടസപ്പെടുകയും വലിയ മഴ പെയ്യുമ്പോൾ റോഡിൽ വെള്ളക്കെട്ട് രൂപപ്പെടുകയും പതിവായി. ഇതേത്തുടർന്നാണ് കോടതിയെ സമീപിച്ചത്.

റോഡരികില്‍ പാര്‍ക്ക് ചെയ്ത ലോറിക്ക് തീപിടിച്ചു

കോതമംഗലം: റോഡരികില്‍ പാര്‍ക്ക് ചെയ്ത ലോറിക്ക് തീപിടിച്ചു. കാബിന്‍ പൂര്‍ണമായും കത്തിനശിച്ചു. അഞ്ചുലക്ഷത്തില്‍പരം രൂപയുടെ നഷ്ടമുണ്ടായതായാണ് പ്രാഥമിക വിലയിരുത്തൽ. തങ്കളം ഐഎംഎ ഹാളിന് സമീപം ഇന്നലെ രാത്രി 7.30 ഓടെയായിരുന്നു തീപിടിത്തം. പാനിപ്ര ചിറ്റേത്തുകുടി പി.എം. അസീസിന്‍റെ ഉടമസ്ഥതയിലുള്ളതാണ് ലോറി. ഡ്രൈവറും സഹായിയും പുറത്തിറങ്ങിയ സമയത്തായിരുന്നു അപകടം. 2019 മോഡല്‍ ലോറി ഒരു മാസം മുമ്പാണ് അസീസ് വാങ്ങിയത്. ഷോര്‍ട്ട് സര്‍ക്യൂട്ട് ആണെന്നാണ് പ്രാഥമിക നിഗമനം. അഗ്നി രക്ഷാസേന എത്തി പെട്ടെന്ന് തീയണച്ചത് കൊണ്ടാണ് ലോറിയുടെ എന്‍ജിന്‍ ഭാഗത്തേക്കും പിന്നിലേക്കും തീപടരാതിരുന്നത്.

സമഗ്ര ആരോഗ്യ സുരക്ഷ കാമ്പയിന്‍ ആരംഭിച്ചു

മൂവാറ്റുപുഴ : കേരള എയ്ഡ്‌സ് കണ്‍ട്രോള്‍ സൊസൈറ്റിയും, കേരള സ്റ്റേറ്റ് എന്‍എസ്എസ് സെല്ലും സംയുക്തമായി നടപ്പാക്കുന്ന സമഗ്ര ആരോഗ്യ സുരക്ഷ കാമ്പയിന് പേഴയ്ക്കാപ്പിള്ളി ഗവ. ഹയര്‍ സെക്കന്‍ഡറി സ്‌കൂളില്‍ തുടക്കമായി. യുവജനങ്ങളില്‍ ലഹരി ഉപയോഗവും എയ്ഡ്സും വര്‍ദ്ധിച്ചു വരുന്ന സാഹചര്യത്തില്‍ വിവിധ നാടന്‍ കലാരൂപങ്ങളിലൂടെ കലാകാരന്മാരെ അണിനിരത്തി യുവജനങ്ങള്‍ക്കിടയില്‍ ബോധവത്ക്കരണം നടത്തുകയാണ് പരിപാടിയുടെ ലക്ഷ്യം. ഐഇസി വാന്‍ കാമ്പയിന്‍റെ ഭാഗമായി അന്തര്‍ദേശീയ യുവജന ദിനത്തില്‍ തിരുവനന്തുരത്തുനിന്ന് ആരംഭിച്ച കെഎസ്ആര്‍റ്റിസിയുടെ ബോധവല്‍കരണ വാഹനത്തിന് ജില്ലയില്‍ സ്വീകരണം നല്‍കി. പേഴയ്ക്കാപ്പിള്ളി ഗവ. ഹയര്‍ സെക്കന്‍ഡറി സ്‌കൂളില്‍ നടന്ന ചടങ്ങ് പായിപ്ര പഞ്ചായത്ത് സ്ഥിരംസമിതി അധ്യക്ഷ നെജി ഷാനവാസ് ഉദ്ഘാടനം ചെയ്തു. കേരളത്തിലെ വിദ്യാര്‍ഥികളില്‍ സമഗ്ര ആരോഗ്യ ബോധവല്‍ക്കരണത്തിന്‍റെയും സാമൂഹിക ഉത്തരവാദിത്തത്തിന്‍റെയും സന്ദേശം ഉയത്തിപ്പിടിച്ച് പത്തനംതിട്ട മുദ്ര സ്‌കൂള്‍ ഓഫ് പെര്‍ഫോമിംഗ് ആട്‌സ് കാക്കാരശി നാടകം അവതരിപ്പിച്ചു. തുടര്‍ന്ന് സ്‌കൂള്‍ വിദ്യാര്‍ഥികള്‍ ഫ്‌ളാഷ് മോബും ലഹരി വിരുദ്ധ ബോധവല്‍കരണ നൃത്ത ശില്‍പവും അവതരിപ്പിച്ചു. പിടിഎ പ്രസിഡന്‍റ് ഫൈസല്‍ മുണ്ടക്കാമറ്റം അധ്യക്ഷത വഹിച്ചു. യോഗത്തില്‍ യുവജാഗരണ്‍ ജില്ല നോഡല്‍ ഓഫീസര്‍ പ്രഫ. സിജോ ജോര്‍ജ് പദ്ധതി വിശദീകരണം നടത്തി. സ്‌കൂള്‍ പ്രിന്‍സിപ്പല്‍ ടി.ബി. സന്തോഷ്, എസ്എംസി ചെയര്‍മാന്‍ കെ.എന്‍. നാസര്‍, എന്‍എസ്എസ് പ്രോഗ്രാം ഓഫീസര്‍ ധനൂജ്, അധ്യാപകരായ പയസ് ഫിലിപ്പ്, ഡോ. ഒ.പി. അലി, ബിജോ ജോസഫ് എന്നിവര്‍ പ്രസംഗിച്ചു. അഞ്ച് ദിവസങ്ങളിലായി ജില്ലയിലെ തെരഞ്ഞെടുക്കപ്പെട്ട വിദ്യാഭ്യാസ സ്ഥാപനങ്ങളിലൂടെ വാഹനം കടന്നു പോകുകയും ബോധവല്‍കരണ കലാരൂപങ്ങള്‍ അവതരിപ്പിക്കുകയും ചെയ്യും. കാക്കാരശി നാടകം, പാവനാടകം, കഥാപ്രസംഗം എന്നീ കലാരൂപങ്ങളിലൂടെയാണ് ബോധവത്കരണം നടത്തുന്നത്.

അടിയന്തര പ്രമേയത്തിന് അനുമതി നിഷേധിച്ചു : കൂത്താട്ടുകുളം നഗരസഭയിൽ എൽഡിഎഫ് പ്രതിഷേധം

കൂത്താട്ടുകുളം : നഗരസഭ കൗൺസിൽ യോഗത്തിൽ അടിയന്തര പ്രമേയത്തിന് ഭരണാനുമതി നിഷേധിച്ചതിൽ പ്രതിഷേധിച്ച് എൽഡിഎഫ് കൗൺസിലർമാർ പ്രതിഷേധിച്ചു. നഗരസഭയിലെ ജനകീയ ഹോട്ടലിന്‍റെ നടത്തിപ്പുമായി ബന്ധപ്പെട്ട് അന്നത്തെ സിഡിഎസ് അംഗമായിരുന്ന കലാ രാജു ഹോട്ടൽ ആവശ്യങ്ങൾക്കായി വാങ്ങിയ പാത്രങ്ങളും ഫർണിച്ചറുകളും തിരികെ നൽകിയില്ല എന്ന വിഷയത്തിൽ എൽഡിഎഫ് കൗൺസിലർ സുമ വിശ്വംഭരൻ നൽകിയ പ്രമേയ അവതരണത്തിൽ അനുമതി നിഷേധിച്ചതിനെതിരേയാണ് പ്രതിപക്ഷം പ്രതിഷേധം രേഖപ്പെടുത്തിയത്. പ്രതിപക്ഷം മുദ്രാവാക്യം വിളിച്ച് പ്രതിഷേധം രേഖപ്പെടുത്തിയതിനെ തുടർന്ന് കൗൺസിലിയോഗം നിർത്തിവയ്ക്കുകയായിരുന്നു. 2021-ൽ കലാ രാജു ആരംഭിച്ച ജനകീയ ഹോട്ടലിലേക്ക് സർക്കാർ നിർദേശപ്രകാരം മുപ്പതിനായിരം രൂപയുടെ പാത്രങ്ങളും ഫർണിച്ചറുകളും നഗരസഭ കൗൺസിലർമാരുടെ നേതൃത്വത്തിൽ വാങ്ങി നൽകിയെന്നും. ഒരു വർഷം മാത്രം പ്രവർത്തിച്ച ഹോട്ടൽ നടത്തിപ്പിനായി ആറ് ലക്ഷം രൂപ സബ്സിഡിയായി കൈപ്പറ്റിയിട്ടുണ്ടെന്നും നഗരസഭയിലേക്ക് തിരിച്ചടയ്ക്കേണ്ട റിവോൾവിംഗ് ഫണ്ടായ 10,000 രൂപ ഇതുവരെ നഗരസഭയിലേക്ക് തിരിച്ചടച്ചിട്ട് ഇല്ലയെന്നും എൽഡിഎഫ് ആരോപിക്കുന്നു. കലാ രാജു ചെയർപേഴ്സൺ സ്ഥാനത്തുനിന്നും മാറിനിൽക്കുകയും പാത്രങ്ങൾ തിരിച്ചെത്തിക്കാനുള്ള നടപടികൾ സ്വീകരിക്കുകയും ചെയ്യണമെന്ന് മുൻ നഗരസഭ ചെയർപേഴ്സൺ വിജയ ശിവൻ, മുൻ വൈസ് ചെയർമാൻ സണ്ണി കുര്യാക്കോസ് എന്നിവർ പറഞ്ഞു. അതേസമയം എൽഡിഎഫ് അംഗങ്ങൾ ഉന്നയിക്കുന്ന ആരോപണങ്ങൾ അടിസ്ഥാനരഹിതമാണെന്നും തന്നെ വ്യക്തിഹത്യ ചെയ്യുന്നതിന്‍റെ ഭാഗമായാണ് ഇത്തരത്തിലുള്ള നിലപാടുകൾ സ്വീകരിക്കുന്നതെന്നും നഗരസഭ ചെയർപേഴ്സൺ കലാ രാജു പറഞ്ഞു. കൃത്യമായ രേഖകളോടുകൂടി അടുത്ത കൗൺസിലിൽ പ്രമേയം അവതരിപ്പിക്കാൻ അനുമതി നൽകാമെന്ന് പറഞ്ഞിരുന്നെങ്കിലും പ്രതിപക്ഷ അംഗങ്ങൾ തയാറാവാതെ പ്രതിഷേധിക്കുകയായിരുന്നു എന്നും കലാ രാജു പറഞ്ഞു. സാമ്പത്തിക പ്രതിസന്ധി നേരിട്ടതിനെ തുടർന്നാണ് ഹോട്ടലിന്‍റെ പ്രവർത്തനം അവസാനിപ്പിച്ചത്. ഇതു സംബന്ധിച്ച് നഗരസഭാ സെക്രട്ടറിക്ക് രേഖാമൂലം കത്ത് നൽകിയിരുന്നു. 50,000 രൂപയുടെ ലോൺ പൂർണമായി അടച്ചുതീർത്ത ശേഷം സ്വന്തമായി വാങ്ങിയിട്ടുള്ള പാത്രങ്ങൾ തിരികെ എടുക്കുകയാണ് ചെയ്തത്. ഇത് ആർഐ നേരിൽ കണ്ട് ബോധ്യപ്പെട്ട് താക്കോൽ കൈപ്പറ്റുകയായിരുന്നെന്നും കലാ രാജു പറഞ്ഞു.

കെട്ടിട നന്പർ ലഭിക്കുന്നതിലെ സാങ്കേതിക പ്രശ്നങ്ങൾ; അദാലത്ത് ഏഴിന്

കൂത്താട്ടുകുളം : കെട്ടിടനമ്പർ ലഭിക്കുന്നതിലെ സാങ്കേതിക പ്രശ്നങ്ങൾ മൂലം വലയുന്ന വ്യാപാരികൾക്കും കെട്ടിട ഉടമസ്ഥർക്കുമായി കൂത്താട്ടുകുളം നഗരസഭ അദാലത്ത് സംഘടിപ്പിക്കുന്നു. ഒക്ടോബർ ഏഴിന് നഗരസഭ ടൗൺഹാളിൽ അദാലത്ത് നടത്തും. അദാലത്തിൽ പരിഗണിക്കാനുള്ള അപേക്ഷകൾ രേഖകൾ സഹിതം 30 നകം നഗരസഭാ ഓഫീസിൽ സമർപ്പിക്കണം. അപേക്ഷകൾക്ക് ടോക്കൺ നൽകി മുൻഗണനാ ക്രമത്തിലാകും വിളിക്കുക. വിസ്തീർണം കൂട്ടി എടുത്തതിനും മുനിസിപ്പാലിറ്റിയുടെ അസസ്മെന്‍റ് രജിസ്റ്ററിൽ തെറ്റായി രേഖപ്പെടുത്തിയ വിസ്തീർണം മൂലവും, മറ്റു നിരവധി സാങ്കേതിക കാരണങ്ങൾ കൊണ്ടും 700 ൽപരം കെട്ടിടങ്ങളിൽ പ്രവർത്തിക്കുന്ന കച്ചവട സ്ഥാപനങ്ങൾക്ക് ലൈസൻസ് പുതുക്കാനോ പുതിയ ലൈസൻസ് എടുക്കാനോ കഴിഞ്ഞിട്ടില്ല. ഇതുമൂലം നൂറുകണക്കിന് കച്ചവടക്കാർക്ക് തങ്ങളുടെ ബാങ്ക് അക്കൗണ്ടുകൾ, നികുതികൾ എന്നിവയുമായി ബന്ധപ്പെട്ട വിവിധ തരത്തിലുള്ള പ്രശ്നങ്ങൾ അഭിമുഖീകരിക്കേണ്ടി വരുന്നുണ്ട്. പ്രശ്നങ്ങൾക്ക് പരിഹാരം നിർദേശിക്കുന്നതിനായി നഗരസഭ ഡെപ്യൂട്ടി ചെയർപേഴ്സൺ പി.ജി. സുനിൽ കുമാർ അധ്യക്ഷനായി ഒരു സബ്കമ്മിറ്റി രൂപീകരിച്ചിരുന്നു. കടകളും വ്യാപാര കെട്ടിടങ്ങളും കൂടാതെ പല വീടുകൾക്കും വിവിധങ്ങളായ സാഹചര്യങ്ങളിൽ നമ്പരുകൾ ലഭ്യമല്ലാതെ വന്നിട്ടുണ്ട്. കമ്മിറ്റിയുടെ നേതൃത്വത്തിൽ കെട്ടിട ഉടമകളുമായി വിഷയം ചർച്ച ചെയ്യുകയും യോഗം ചേരുകയും ചെയ്തു. കൗൺസിൽ സബ് കമ്മിറ്റി തീരുമാനം അംഗീകരിച്ചു.

ലഹരിക്കെതിരേ അണിനിരന്ന് സെന്‍റ് ജോർജ് സ്കൂൾ

കോതമംഗലം: സെന്‍റ് ജോർജ് ഹയർ സെക്കൻഡറി സ്കൂളിൽ വിദ്യാർഥികൾ ലഹരിക്കെതിരേ നോ ഡ്രഗ്സ് എസ് ജി എച്ച് എസ് എസ് എന്ന ആകൃതിയിൽ അണിനിരന്ന് ലഹരിക്കെതിരേ ബോധവൽക്കരണ പ്രതിജ്ഞ ചൊല്ലിക്കൊണ്ട് ജീവിതോത്സവം 2025 പദ്ധതിക്ക് തുടക്കം കുറിച്ചു. കേരള സർക്കാർ പൊതുവിദ്യാഭ്യാസ വകുപ്പ് നാഷണൽ സർവീസ് സ്കീമിന്‍റെ നേതൃത്വത്തിൽ അനുദിനം കരുത്തേകാം - 21 ദിന ചാലഞ്ച് പദ്ധതിയുടെ ഭാഗമായി കോതമംഗലം സെന്‍റ് ജോർജ് എച്ച്എസ്എസ് വിഭാഗം എൻഎസ്എസിന്‍റെ നേതൃത്വത്തിലാണ് പരിപാടി സംഘടിപ്പിച്ചത്. പ്രിൻസിപ്പൽ ജെയിൻ ജോസ് ഉദ്ഘാടനം ചെയ്തു. എൻഎസ്എസ് പ്രോഗ്രാം ഓഫീസർ വി.എസ്. ആൻസി, രാജേന്ദ്രൻ പോറ്റി എന്നിവർ നേതൃത്വം നൽകി.

ജനസമ്പർക്കയാത്രയുമായി എന്‍റെ നാട് ജനകീയ കൂട്ടായ്മ

കോതമംഗലം: എന്‍റെ നാട് ജനകീയ കൂട്ടായ്മയുടെ ഗാന്ധിദർശൻ പദ്ധതിയുടെ ഭാഗമായി പല്ലാരിമംഗലം പഞ്ചായത്തിൽ നടത്തിയ ജനസമ്പർക്കയാത്ര അടിവാട് വ്യാപാരി വ്യവസായി ഏകോപന സമിതി പ്രസിഡന്‍റും പോത്താനിക്കാട് റീജണൽ റൂറൽ കോ-ഓപ്പറേറ്റീവ് ബാങ്ക് പ്രസിഡന്‍റുമായ എം.എം. അലിയാർ ഉദ്ഘാടനം ചെയ്തു. എന്‍റെ നാട് ചെയർമാൻ ഷിബു തെക്കുംപുറം മുഖ്യപ്രഭാഷണം നടത്തി. പ്രസിഡന്‍റ് മുഹമ്മദ് മുഞ്ചക്കലിൽ അധ്യക്ഷത വഹിച്ചു. കോ-ഓർഡിനേറ്റർ ടി.എം. സെയ്ത് , കെ.ഇ. കാസിം , പി.പി. മുഹമ്മദ്, എം.എം. അബ്ദുറഹ്മാൻ, ശാമില ഷാഫി എന്നിവർ പ്രസംഗിച്ചു. തുടർന്ന് അടിവാട് മേഖലയിൽ ഭവന സന്ദർശനവും നടത്തി.

കീരമ്പാറയിൽ മാലിന്യം തള്ളിയ ആളെ പിടികൂടി

കോതമംഗലം: കീരമ്പാറയിൽ കനാല്‍ ബണ്ട് റോഡില്‍ ചാക്കില്‍ മാലിന്യം തള്ളിയ ആളെ പിടികൂടി. പഞ്ചായത്ത് 10000 രൂപ പിഴയടയ്ക്കാന്‍ നോട്ടീസ് നല്‍കി. നെടുംപാറ ഭാഗത്തെ കനാല്‍ ബണ്ട് റോഡിലാണ് നാല് ചാക്കുകളിലായി മാലിന്യം തള്ളിയത്. കുപ്പിച്ചില്ലും പഴകിയ തുണികളും തെര്‍മോകോളും മാസ്‌കുകളും അടക്കമാണ് തള്ളിയത്. ചാക്കിലുണ്ടായിരുന്ന എക്‌സ്റേ ഫിലിമാണ് മാലിന്യം തള്ളിയ ആളെ തിരിച്ചറിയാൻ ഇടയാക്കിയത്. ഫിലിം ഇട്ടിരുന്ന കവറിലെ ആശുപത്രിയില്‍ എത്തി അന്വേഷിച്ചതില്‍ നിന്നാണ് ആളുടെ മേല്‍വിലാസം ലഭിച്ചത്. പതിനായിരം രൂപ പിഴയടയ്ക്കാന്‍ പഞ്ചായത്ത് സെക്രട്ടറി നോട്ടീസ് നല്‍കിയതായി വാര്‍ഡ് മെന്പര്‍ വി.കെ. വര്‍ഗീസ് പറഞ്ഞു

കോതമംഗലം ചെറിയപള്ളിയിൽ കന്നി 20 പെരുന്നാളിന് ഇന്ന് കൊടിയേറും

കോതമംഗലം: തീർഥാടന കേന്ദ്രമായ മാർ തോമ ചെറിയ പള്ളിയിൽ 340-ാം ഓർമപെരുന്നാളിന് (കന്നി - 20) ഇന്ന് കൊടിയേറും. രാവിലെ 6.30 ന് പ്രഭാത നമസ്കാരം, 7.15 ന് അഞ്ചിന്മേൽ കുർബാന - ഏലിയാസ് മാർ യൂലിയോസ് മെത്രാ പ്പോലീത്ത മുഖ്യ കാർമികത്വം വഹിക്കും. എൽദോ ബാവയുടെ പാദസ് സ്പർശനത്താൽ അനുഗ്രഹീതമായ ചക്കാലക്കുടിയിലെ മാർ ബസേലിയോസ് ചാപ്പലിൽനിന്നും വൈകുന്നേരം നാലിന് പ്രദക്ഷണം പള്ളിയിലേക്ക്. പള്ളിയിലെ പ്രാർഥനയ്ക്ക് ശേഷം വികാരി ഫാ. ജോസ് മാത്യു തച്ചേത്തുകുടി കൊടിയുയർത്തും. തുടർന്ന് കരിങ്ങാച്ചിറ പള്ളിയിൽനിന്നും പ്രത്യേകം തയാറാക്കിക്കൊണ്ടുവരുന്ന തമുക്ക് നേർച്ച വിശ്വാസികൾക്ക് നൽകും. വൈകുന്നേരം ആറിന് സന്ധ്യാനമസ്കാരം. പെരുന്നാൾ ഗ്രീന്‍ പ്രോട്ടോക്കോള്‍ പാലിച്ച് കോതമംഗലം: മാര്‍ തോമാ ചെറിയപള്ളിയിലെ കന്നി - 20 പെരുന്നാൾ ഗ്രീന്‍ പ്രോട്ടോക്കോള്‍ പാലിച്ച് നടത്തും. പെരുന്നാളിന്‍റെ മുന്നൊരുക്കങ്ങള്‍ക്കായി വിവിധ വകുപ്പുകളിലെ ഉദ്യോഗസ്ഥരെ പങ്കെടുപ്പിച്ച് നടത്തിയ യോഗത്തില്‍ ആന്‍റണി ജോണ്‍ എംഎല്‍എ അധ്യക്ഷത വഹിച്ചു. പെരുന്നാളിന്‍റെ സുഗമമായ നടത്തിപ്പിന് സര്‍ക്കാര്‍ വകുപ്പുകളുടെ സഹകരണം ഉണ്ടാകും. ഭക്തജനങ്ങള്‍ക്ക് സൗകര്യപ്രദമായ നിലയില്‍ ട്രാഫിക് സംവിധാനം ക്രമീകരിക്കുന്നതിനും സുരക്ഷാ ക്രമീകരണങ്ങള്‍ക്കായി കൂടുതല്‍ പോലിസിനെ വിന്യസിക്കുന്നതിനും തീരുമാനിച്ചിട്ടുണ്ട്. ആരോഗ്യവകുപ്പ് പ്രത്യേക മെഡിക്കല്‍ ടീമിനെ നിയോഗിക്കും. വന്യമൃഗശല്യമുള്ള പ്രദേശങ്ങളില്‍ ഭക്തജനങ്ങളുടെ സുരക്ഷക്കായി വനപാലകരും ആര്‍ആര്‍ടിയും പ്രത്യേക നിരീക്ഷണം ഏര്‍പ്പെടുത്തും. കെഎസ്ആര്‍ടിസിയുടെ അധിക സര്‍വീസ് നടത്താനും തീരുമാനിച്ചു. പെരുന്നാള്‍ ദിവസങ്ങളില്‍ കുടിവെള്ള വിതരണവും വൈദ്യുതി വിതരണവും കുറ്റമറ്റതാക്കാന്‍ പ്രത്യേകം ശ്രദ്ധിക്കും. ചെറിയപള്ളി വികാരി ഫാ. ജോസ് മാത്യു തച്ചേത്തുകുടി, മുനിസിപ്പല്‍ ചെയര്‍മാന്‍ കെ.കെ. ടോമി, തഹസില്‍ദാര്‍ എം. അനില്‍കുമാര്‍, ഡിവൈഎസ്പി പി.എം. ബൈജു, ട്രസ്റ്റിമാരായ കെ.കെ. ജോസഫ്, എബി ചേലാട്ട്, വര്‍ക്കിംഗ് കമ്മറ്റി അംഗങ്ങളായ സലിം ചെറിയാന്‍, ബിനോയി തോമസ്, ഡോ. റോയി എം. ജോര്‍ജ്, ബേബി തോമസ് എന്നിവർ പ്രസംഗിച്ചു.

എംഡിഎംഎയുമായി യുവാക്കള്‍ പിടിയിൽ

കൊച്ചി: കടവന്ത്ര വിദ്യാനഗര്‍ ക്രോസ് റോഡിന് സമീപത്ത് നിന്നും എംഡിഎംഎയുമായി യുവാക്കള്‍ പിടിയിലായി. ഫോര്‍‌ട്ടുകൊച്ചി ഇഎസ്‌ഐ കുരിശിങ്കല്‍ ഫ്രാന്‍സിസ് (37), പള്ളുരുത്തി കൊട്ടേക്കാട് അജീഷ് (34), മുണ്ടംവേലി സൗദി പുന്നക്കല്‍ ഫ്രാന്‍സിസ് സേവ്യര്‍ ഫെര്‍ണാണ്ടസ് (35) എന്നിവരെയാണ് ഡാന്‍സാഫ് ടീം പിടികൂടിയത്. ഇവരില്‍ നിന്നും 28.40 ഗ്രാം എംഡിഎംഎ പോലീസ് പിടിച്ചെടുത്തു. പ്രതികള്‍ ഇടപാടുകാരെ നേരില്‍ കാണാത്ത രീതിയില്‍ ഓട്ടോറിക്ഷയില്‍ കറങ്ങിനടന്നാണ് ലഹരി കച്ചവടം നടത്തിയിരുന്നത്. ദിവസങ്ങളോളം നിരീക്ഷിച്ചാണ് ഡാന്‍സാഫ് ടീം പ്രതികളെ പിടികൂടിയത്.

നഗരസഭയിലെ കൈക്കൂലി; കോൺഗ്രസ് പ്രവർത്തകർ സോണൽ ഓഫീസ് ഉപരോധിച്ചു

പള്ളുരുത്തി: കൈക്കൂലി വാങ്ങുന്നതിനിടെ കൊച്ചി നഗരസഭ പള്ളുരുത്തി സോണൽ റവന്യു വിഭാഗം ക്ലർക്ക് പണവുമായി വിജിലൻസിന്‍റെ പിടിയിലായ സംഭവത്തിൽ കുറ്റക്കാരായ മുഴുവൻ ഉദ്യോഗസ്ഥർക്കെതിരെയും നടപടി വേണമെന്നാവശ്യപ്പെട്ട് നഗരസഭാ ഓഫീസിലേക്ക് ഉപരോധ സമരവുമായെത്തിയ കോൺഗ്രസ് പ്രവർത്തകരും പോലീസും തമ്മിൽ സംഘർഷം. സ്ത്രീകൾ അടക്കമുള്ള പ്രവർത്തകർ നഗരസഭ ഓഫീസിന് മുമ്പിൽ കുത്തിയിരുന്ന് പ്രതിഷേധിച്ചതോടെ കൂടുതൽ പോലീസ് സ്ഥലത്തെത്തി. ഉപരോധത്തിനിടെ ഓഫീസിലേക്ക് തള്ളിക്കയറുവാൻ ശ്രമിച്ച കോൺഗ്രസ്‌ പ്രവർത്തകരും പോലീസും തമ്മിൽ ഉന്തും തള്ളുമുണ്ടായി. ഇതിനിടയിൽ കൗൺസിലർ അഭിലാഷ് തോപ്പിൽ, കെപിസിസി സെക്രട്ടറി തമ്പി സുബ്രഹ്മണ്യൻ, ഡിസിസി സെക്രട്ടറി എൻ.ആർ.ശ്രീകുമാർ, ബ്ലോക്ക് പ്രസിഡന്‍റ് പി.പി.ജേക്കബ്, ഷിജു ചിറ്റേപ്പള്ളി അടക്കമുള്ള ഇരുപതോളം പേരെ പോലീസ് അറസ്റ്റ് ചെയ്തു നീക്കി. പോലീസുമായുള്ള പിടിവലിയിൽ ന്യൂനപക്ഷസെൽ ജില്ലാ സെക്രട്ടറി ടി.എ.സിയാദ് കുഴഞ്ഞു വീണതിനെ തുടർന്ന് ആശുപത്രിയിൽ പ്രവേശിപ്പിച്ചു.

ഫ്രാൻസിസ്കൻ അൽമായ സഭ റീജൺ കൗൺസിൽ സമാപിച്ചു

കൊച്ചി: വരാപ്പുഴ അതിരൂപത ഫ്രാൻസിസ്കൻ അൽമായ സഭ റീജൺ കൗൺസിൽ യോഗം മൂലമ്പിള്ളി പള്ളി വികാരി ഫാ. അഗസ്റ്റിൻ ഐസക് ഉദ്ഘാടനം ചെയ്തു. റീജൺ മിനിസ്റ്റർ അലക്സ് ആട്ടുള്ളിൽ അധ്യക്ഷത വഹിച്ചു. ഫാ. ബിനോയ് ലീൻ അനുഗ്രഹ പ്രഭാഷണം നടത്തി. പി.കെ. ജോസഫ്, മാർട്ടിൻ തപ്പലോടത്ത്, ജോൺ പുളിക്കൽ, ജോർജ് തുണ്ടിപറമ്പിൽ, ആന്‍റണി റാഫേൽ നമ്പുരത്ത് എന്നിവർ പ്രസംഗിച്ചു.

ആലുവ-പറവൂർ കെഎസ്ആർടിസി റോഡിൽ അജ്ഞാതസംഘത്തിന്‍റെ ആക്രമണം നടക്കുന്നതായി നാട്ടുകാർ

ആലങ്ങാട് : ആലുവ-പറവൂർ കെഎസ്ആർടിസി റോഡിൽ അജ്ഞാതസംഘം രാത്രിയിൽ സഞ്ചരിക്കുന്നവർക്കെതിരേ ആക്രമണം നടത്തുന്നതായി വ്യാപക പ്രചാരണം. സാമൂഹിക മാധ്യമങ്ങളിലാണ് ഇത്തരത്തിൽ വ്യാപക പ്രചരണം നടക്കുന്നത്. എന്നാൽ ആക്രമണം നടന്നതായി ആരും ഇതുവരെ പരാതിപ്പെട്ടിട്ടില്ല. ആലുവ -പറവൂർ റോഡിലെ മറിയപ്പടി, വലയോടം, പാലയ്ക്കൽ എന്നിവിടങ്ങളിലാണു അജ്ഞാത സംഘം വാഹനം തടഞ്ഞു നിർത്തിയുള്ള ആക്രമണം നടത്തിയതായി വാർത്ത പരന്നത്. ചൊവ്വാഴ്ച രാത്രി അങ്കമാലി ഭാഗത്തെ ആശുപത്രിയിലേക്കു കാറിൽ പോയ സംഘത്തിനെ മൂന്നംഗ അജ്ഞാത സംഘം ആക്രമിക്കാൻ ശ്രമിച്ചതായി പറയുന്നു. കാർ കൈകാണിച്ചു നിർത്തിയ ശേഷമാണ് ആക്രമിക്കാനുള്ള ശ്രമം നടന്നതെന്നാണ് പറയപ്പെടുന്നത്. എന്നാൽ ഇക്കാര്യത്തിൽ ഇതുവരെ ആരും പരാതി നൽകിയിട്ടില്ല. ആലങ്ങാട് പൊലീസ് സ്റ്റേഷൻ പരിധിയിൽ കഴിഞ്ഞ ഒരു മാസത്തിനിടെ മാത്രം അഞ്ച് മോഷണങ്ങളാണു നടന്നിട്ടുള്ളത്. കഴിഞ്ഞ ഒരു വർഷത്തിനിടെ നിരവധി മോഷണങ്ങൾ നടന്നിട്ടും ഭൂരിഭാഗം കേസിലും ആലങ്ങാട് പൊലീസിനു മോഷ്ടാക്കളെ പിടികൂടാൻ സാധിച്ചിട്ടില്ല. ലഹരിസംഘങ്ങളുടെ ശല്യമുള്ളതിനാൽ പലരും ഭയന്നിട്ടു രാത്രി പുറത്തിറങ്ങാറില്ല. ഈ അവസരം മുതലെടുത്താണു അജ്ഞാത സംഘം കറങ്ങി നടക്കുന്നതെന്നാണു നാട്ടുകാർ പറയുന്നത്.സംഭവം ശ്രദ്ധയിൽപ്പെട്ടെന്നും പ്രദേശത്തു പരിശോധന നടത്തിയെന്നും പൊലീസ് പറഞ്ഞു. എന്നാൽ സാമൂഹിക മാധ്യമങ്ങളിലൂടെ പ്രചരിക്കുന്ന വിവരങ്ങൾ കൃത്യമല്ലെന്നാണ് ആലങ്ങാട് പോലീസ് പറയുന്നത്.

ഇന്ദിരാഗാന്ധി കോ-ഓപ്പറേറ്റീവ് ആശുപത്രിയില്‍ ഡിജിറ്റല്‍ റേഡിയോഗ്രഫി

കൊച്ചി: കടവന്ത്ര ഇന്ദിരാഗാന്ധി കോ-ഓപ്പറേറ്റീവ് ആശുപത്രിയില്‍ റോട്ടറി ക്ലബ് ഓഫ് കൊച്ചിന്‍ ഡൗണ്‍ ടൗണ്‍ സംഭാവന ചെയ്ത എക്സ് റേ യൂണിറ്റ് ഉള്‍പ്പെടെയുള്ള ഡിജിറ്റല്‍ റേഡിയോഗ്രഫി സംവിധാനം റോട്ടറി ഡിസ്ട്രിക്ട് 3205 ഗവര്‍ണര്‍ ഡോ. ജി. എന്‍ രമേഷ് ഉദ്ഘാടനം ചെയ്തു. റോട്ടറി ക്ലബ്ബ് ഓഫ് കൊച്ചിന്‍ ഡൗണ്‍ ടൗണ്‍ പ്രസിഡന്‍റ് സൂസി പോള്‍ അധ്യക്ഷത വഹിച്ചു. ആശുപത്രി സെക്രട്ടറി അജയ് തറയില്‍, പ്രസിഡന്‍റ് എം.ഒ. ജോണ്‍, ഡിജിഎന്‍ ആര്‍. ജയശങ്കര്‍, റോട്ടറി മുന്‍ ഗവര്‍ണര്‍ അഡ്വ. സുന്ദര വടിവേലു തുടങ്ങിയവര്‍ പ്രസംഗിച്ചു.

ദേശീയ പോഷകാഹാര മാസാചരണം സംഘടിപ്പിച്ചു

കൊച്ചി: ലൂര്‍ദ് ആശുപത്രിയില്‍ ദേശീയ പോഷകാഹാര മാസാചരണത്തിന്‍റെ ഭാഗമായി ബോധവത്കരണ പരിപാടി സംഘടിപ്പിച്ചു. ലൂര്‍ദ് ഹോസ്പിറ്റല്‍ അസോസിയേറ്റ് ഡയറക്ടര്‍ ഫാ. വിമല്‍ ഫ്രാന്‍സിസ് ഉദ്ഘാടനം ചെയ്തു. ക്രിട്ടിക്കല്‍ കെയര്‍ വിഭാഗം സീനിയര്‍ കണ്‍സള്‍ട്ന്‍റ് ഡോ. ഇന്ദു രാജീവ് ക്ലാസെടുത്തു. എന്‍ഡക്രൈനോളജി വിഭാഗം കണ്‍സട്ടന്‍റ് ഡോ. നവ്യ മേരി കുര്യന്‍ പോളിസിസ്റ്റിക് ഓവറി സിന്‍ഡ്രോം എന്ന രോഗത്തെക്കുറിച്ച് ബോധവത്കരണം നടത്തി. പരിപാടിയുടെ ഭാഗമായി നടത്തിയ ക്വിസ് മത്സര വിജയികള്‍ക്ക് ലൂര്‍ദ് ആശുപത്രി അസിസ്റ്റന്‍റ് ഡയറക്ടര്‍ ഫാ. സെബി വിക്ടര്‍ സമ്മാനങ്ങള്‍ വിതരണം ചെയ്തു. ലൂര്‍ദ് ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സ് ഡയറക്ടര്‍ ഫാ. ജോര്‍ജ് സെക്വീര, ഫാ. ആന്‍റണി റാഫേല്‍ കോമരംചാത്ത്, ചീഫ് സയറ്റീഷ്യന്‍ ശില്പ ചന്ദ്രന്‍, സീനിയര്‍ ഡയറ്റീഷ്യന്‍ അനറ്റ് ജേക്കബ് തുടങ്ങിയവര്‍ പങ്കെടുത്തു.

ഹാർട്ട് കെയർ ഫൗണ്ടേഷൻ ഹൃദയസംഗമം 28ന്

കൊച്ചി: ലോക ഹൃദയദിനത്തോടനുബന്ധിച്ചു ഹാര്‍ട്ട് കെയര്‍ ഫൗണ്ടേഷന്‍ സംഘടിപ്പിക്കുന്ന ഹൃദയ സംഗമം 28 ന് എറണാകുളം ലിസി ആശുപത്രി ഓഡിറ്റോറിയത്തില്‍ നടക്കും. ഹൃദയ ശസ്ത്രക്രിയയ്ക്കു വിധേയരായ വ്യക്തികളുടെയും കുടുംബാംഗങ്ങളുടെയും ഒത്തുചേരലായ ഹൃദയ സംഗമം ലിസി ആശുപത്രി, റോട്ടറി ക്ലബ് ഓഫ് കൊച്ചിന്‍ ഗ്ലോബല്‍ എന്നിവരുമായി സഹകരിച്ചാണ് സംഘടിപ്പിക്കുന്നത്. രാവിലെ 11ന് ഉദ്ഘാടന ചടങ്ങില്‍ സൗത്ത് ഇന്ത്യന്‍ ബാങ്ക് സ്വതന്ത്ര ഡയറക്ടര്‍ വി.ജെ. കുര്യന്‍ മുഖ്യാതിഥിയാകും. സംഗമത്തിന്‍റെ ഭാഗമായി ബോധവത്കരണ ക്ലാസുകളും വിദഗ്ധരുമായി സംവദിക്കാനുള്ള അവസരവും ഒരുക്കിയിട്ടുണ്ട്. ഫൗണ്ടേഷന്‍ ചെയര്‍മാന്‍ ഡോ. ജോസ് ചാക്കോ പെരിയപ്പുറം, ലിസി ഡയറക്ടര്‍ റവ. ഡോ. പോള്‍ കരേടന്‍, ഫൗണ്ടേഷന്‍ ട്രസ്റ്റി ഡോ. ജേക്കബ് ഏബ്രഹാം, സെക്രട്ടറി രാജു കണ്ണമ്പുഴ, കൊച്ചി റോട്ടറി ക്ലബ് പ്രസിഡന്‍റ് സെബാസ്റ്റ്യന്‍ ജോസഫ്, മെഡിക്കല്‍ പാനല്‍ ചെയര്‍മാന്‍ ഡോ. റോണി മാത്യു കടവില്‍ എന്നിവര്‍ പങ്കെടുക്കും

വൈപ്പിനില്‍ ടൂറിസം ദിനാചരണം 27ന്

കൊച്ചി: ഡിടിപിസിയുടെയും കേന്ദ്ര ടൂറിസം മന്ത്രാലയത്തിന്‍റെയും സഹകരണത്തോടെ ലോക ടൂറിസം ദിനം വിപുലമായി ആഘോഷിക്കുമെന്ന് കെ.എന്‍. ഉണ്ണിക്കൃഷ്ണന്‍ എംഎല്‍എ പത്രസമ്മേളനത്തില്‍ പറഞ്ഞു. 27ന് രാവിലെ 8.30ന് ബോള്‍ഗാട്ടി പാലസില്‍ വീഡിയോ അവതരണങ്ങളും കള്‍ച്ചറല്‍ പ്രോഗ്രാമുകളും ഉണ്ടാകും. 11ന് കടമക്കുടി കാഴ്ചകള്‍ക്കായി പുറപ്പെടുന്ന ബോട്ട്‌യാത്ര കെ.എന്‍. ഉണ്ണിക്കൃഷ്ണന്‍ എംഎല്‍എ ഫ്ലാഗ് ഓഫ് ചെയ്യും. ബോള്‍ഗാട്ടി പാലസില്‍ 2.30നു ടൂറിസവും നിലനില്‍ക്കുന്ന പരിണാമങ്ങളും എന്ന വിഷയത്തില്‍ ചര്‍ച്ച നടക്കും. 3.30ന് സന്തോഷ് ജോര്‍ജ് കുളങ്ങരയുമായി നടക്കുന്ന ഫയര്‍സൈഡ് ചാറ്റില്‍ സംരംഭകരും വിദഗ്ധരും പങ്കെടുക്കും. തുടര്‍ന്ന് സമാപന ചടങ്ങ് സന്തോഷ് ജോര്‍ജ് കുളങ്ങര ഉദ്ഘാടനം ചെയ്യും. കെ.ജെ. മാക്‌സി എംഎല്‍എ അധ്യക്ഷത വഹിക്കും. കളക്ടര്‍ ജി. പ്രിയങ്ക മുഖ്യപ്രഭാഷണം നടത്തും. ചടങ്ങില്‍ മാധ്യമപ്രവര്‍ത്തകന്‍ കെ.വി. രാജശേഖരനും ബോട്ട് ബില്‍ഡര്‍ ആന്‍റണിക്കും ഡിടിപിസിയുടെ പുരസ്‌കാരം കെ.എന്‍. ഉണ്ണിക്കൃഷ്ണന്‍ എംഎല്‍എ സമ്മാനിക്കും. തുടര്‍ന്ന് ഫ്ലാഷ് മോബ്, നായരമ്പലം ത്രയംബകം ടീമിന്‍റെ കലാവതരണം, ശാന്തിപ്രിയയുടെ ബാവുള്‍ സംഗീതം, ഇരുള നൃത്തം എന്നിവ ഉണ്ടാകും.

ടൂറിസം ദിനാഘോഷം: കണ്ടൽ സംരക്ഷണ സന്ദേശവുമായി കയാക്കിംഗ് സംഘം

മരട്: ലോക ടൂറിസം ദിനാഘോഷത്തിന്‍റെ ഭാഗമായി വളന്തകാട് ദ്വീപിൽ, കൊച്ചി മാംഗ്രൂവ് കയാക്കിംഗും അൽ അമീൻ കോളേജ് ടൂറിസം വിഭാഗവും ഡിറ്റിപിസിയും സംയുക്തമായി കണ്ടൽച്ചെടി സംരക്ഷണ സന്ദേശവുമായി കയാക്കിംഗ് സംഘടിപ്പിച്ചു. മരട് നഗരസഭാ വൈസ് ചെയർപേഴ്സൻ അഡ്വ. രശ്മി സനിൽ ഉദ്ഘാടനം ചെയ്തു. എടത്തല അൽ-അമീൻ കോളജ് ടൂറിസം വിഭാഗം മേധാവി പ്രഫ. ജിസ് തെരേസാസ് ടൂറിസവും സുസ്ഥിര പരിവർത്തനവും തമ്മിലുള്ള ബന്ധത്തെക്കുറിച്ചും വളന്തകാട് പോലുള്ള സ്ഥലങ്ങൾ ഉത്തരവാദിത്തപരമായ ടൂറിസത്തിനും പരിസ്ഥിതി സൗഹൃദ യാത്രകൾക്കും ഏറ്റവും അനുയോജ്യമാണെന്നും പറഞ്ഞു. വളന്തകാടിലെ വിനോദസഞ്ചാര സാധ്യതകളെക്കുറിച്ച് കൊച്ചി മാംഗ്രൂവ് കയാക്കിംഗിലെ എൻ.എസ്.സൈഫുദീൻ സംസാരിച്ചു. ടൂറിസം വിഭാഗം അധ്യാപകരും വിദ്യാർഥികളുമുൾപ്പെടെ 80 പേർ പങ്കെടുത്ത പരിപാടിയെ പ്രദേശവാസികളും വിനോദ സഞ്ചാര പ്രവർത്തകരും ആവേശത്തോടെയാണ് സ്വീകരിച്ചത്.

സിഐഎസ്‌സിഇ നാഷണല്‍ ഗെയിംസിൽ അഭിമാനനേട്ടവുമായി ജ്ഞാനോദയ സ്കൂൾ

കൊച്ചി: സിഐഎസ്‌സിഇ നാഷണല്‍ സ്‌പോര്‍ട്‌സ് ആന്‍ഡ് ഗെയിംസില്‍ മെഡലുകൾ നേടി ചെങ്ങല്‍ ജ്ഞാനോദയ സെന്‍ട്രല്‍ സ്‌കൂൾ. കര്‍ണാടകയില്‍ നടന്ന കരാട്ടെ ചാമ്പ്യന്‍ഷിപ്പില്‍ സ്‌കൂളിലെ ആല്‍ഫിന്‍ ഡൈസന്‍, ടി.എസ് ആന്‍മേരി എന്നിവര്‍ വെങ്കല മെഡല്‍ കരസ്ഥമാക്കി. ആല്‍ഫിന്‍ ഡൈസന്‍ ആണ്‍കുട്ടികളുടെ അണ്ടര്‍ 19 വിഭാഗത്തിലും ടി.എസ്. ആന്‍മേരി പെണ്‍കുട്ടികളുടെ അണ്ടര്‍ 17 വിഭാഗത്തിലുമാണ് മെഡല്‍ നേടിയത്. മാര്‍ അത്തനേഷ്യസ് ഇന്‍റര്‍നാഷണല്‍ സ്‌കൂളില്‍ നടന്ന നാഷണല്‍ ലെവല്‍ ആര്‍ച്ചറി മത്സരത്തില്‍ പെണ്‍കുട്ടികളുടെ അണ്ടര്‍ 14 വിഭാഗത്തില്‍ നീരജ രജിത്ത് ഇന്ത്യന്‍ വിഭാഗത്തില്‍ രണ്ടാം സ്ഥാനവും ഓവറോള്‍ മൂന്നാം സ്ഥാനവും നേടി. നന്ദിത റെജിന്‍ ഇന്ത്യന്‍ വിഭാഗത്തില്‍ മൂന്നാം സ്ഥാനവും ഓവറോള്‍ നാലാം സ്ഥാനവും കരസ്ഥമാക്കി. ആണ്‍കുട്ടികളുടെ അണ്ടര്‍ 17 വിഭാഗത്തില്‍ ബെനഡിക്ട് പാപ്പു പോള്‍ കോമ്പൗണ്ട് റൗണ്ടില്‍ നാലാം സ്ഥാനം നേടി. മൂന്നു പേരും എസ്ജിഎഫ്‌ഐയിലേക്ക് തെരഞ്ഞെടുക്കപ്പെട്ടിട്ടുണ്ട്.

ജിഎസ്ടി നികുതിയിളവ്; ശില്പശാല സംഘടിപ്പിച്ചു

അങ്കമാലി: ജി എസ് ടി കൗൺസിൽ തീരുമാന പ്രകാരമുള്ള നികുതി മാറ്റങ്ങളുമായി ബന്ധപ്പെട്ട് വ്യാപാരികൾക്കായി ശില്പശാല സംഘടിപ്പിച്ചു. കേരള ടാക്സ് പ്രഫഷണൽസ് അസോസിയേഷന്‍റെ നേതൃത്വത്തിൽ നടന്ന ശില്പശാല പ്രസിഡന്‍റ് സാൻജോ ജോസഫ് ഉദ്ഘാടനം നിർവഹിച്ചു. ശില്പശാലയിൽ ടാക്സ് മേഖലയിലുള്ളവർ വിവിധ സംശയങ്ങളിൽ മറുപടി നല്കി. എബി കുര്യക്കോസ്, കെ.ഒ. ബാസ്റ്റിൻ, പോൾ ജോസഫ്, സി.എൽ. ബേബി , സ്മിന്‍റോ തളിയൻ, രഞ്ജിത്ത് രവീന്ദ്രൻ, ജിബിഷ് എന്നിവർ പ്രസംഗിച്ചു.

ചന്തിരൂർ സെന്‍റ് മേരീസ് പള്ളിയിൽ തിരുനാൾ

അരൂര്‍: ചന്തിരൂര്‍ സെന്‍റ് മേരീസ് പള്ളിയിലെ വിശുദ്ധ കാരുണ്യ മാതാവിന്‍റെ 46-ാമത്കൊന്പ്രേരിയ തിരുനാളിന് തുടക്കമായി. ഫാ. ജോസഫ് കൊരുത്തേടത്ത് കൊടിയേറ്റി. 28നാണ് തിരുനാള്‍. അന്ന് രാവിലെ ഒന്‍പതിന് മാതാവിന്‍റെ തിരുസ്വരൂപപ്രയാണം, വൈകിട്ട് നാലിന് ആഘോഷമായ തിരുനാള്‍ സമൂഹദിവ്യബലി. രാത്രി എട്ടിന് തിരുനാള്‍ സമാപന കുര്‍ബാന സമര്‍പ്പണം, തുടര്‍ന്ന് കൊടിയിറക്കം.

മാലിന്യ സംസ്കരണ പ്ലാന്‍റിലേക്കുള്ള വഴിയടച്ച സംഭവം : വീണ്ടും പോലീസ് സഹായം തേടി ആലുവ നഗരസഭ

ആലുവ: പാലസ് റോഡിൽ പെരിയാർ തീരത്ത് പ്രവർത്തിക്കുന്ന ആലുവ നഗരസഭയുടെ വേസ്റ്റ് വാട്ടർ ട്രീറ്റ്‌മെന്‍റ് പ്ലാന്‍റിലേക്ക് പോകാനുള്ള വഴി അടച്ചിട്ടത് തുറന്നുതരണം എന്നാവശ്യപ്പെട്ട് ആലുവ നഗരസഭ പോലീസിൽ വീണ്ടും പരാതി നൽകി. സമീപത്തെ അദ്വൈതാശ്രമം മാനേജ്‌മെന്‍റുമായി തർക്കത്തെ തുടർന്ന് കഴിഞ്ഞ 14ന് ഇവിടെ ഗേറ്റ് സ്ഥാപിച്ച് പൂട്ടിയിരുന്നു. അദ്വൈതാശ്രമത്തിലും പരിസരത്തും ചതയദിനത്തോടനുബന്ധിച്ച് സ്ഥാപിച്ച കൊ‌ടികൾ നഗരസഭാ ഉദ്യോഗസ്ഥർ നീക്കം ചെയ്തെന്നാരോപിച്ചാണ് ഇരുവരും തമ്മിൽ ഉടക്കിയത്. തുടർന്നാണ് നഗരസഭയുടെ പ്ലാന്‍റിലേക്കുള്ള വഴി അദ്വൈതാശ്രമം അധികൃതർ ഗേറ്റ് സ്ഥാപിച്ച് പൂട്ടിയത്. അദ്വൈതാശ്രമം നേരത്തെ സൗജന്യമായി നൽകിയ സ്ഥലത്താണ് വേസ്റ്റ് വാട്ടർ ട്രീറ്റ്മെന്‍റ് പ്ലാന്‍റും അതിലേക്കുള്ള വഴിയും സ്ഥിതി ചെയ്യുന്നത്. എന്നാൽ ഈ സ്ഥലത്തിന്‍റെ കരമടയ്ക്കുന്നത് ഇപ്പോഴും തങ്ങളാണെന്ന് അദ്വൈതാശ്രമം അധികൃതർ അവകാശപ്പെടുന്നു. പ്ലാന്‍റ് അറ്റകുറ്റപ്പണി നടത്താനായി എത്തുന്ന ജീവനക്കാർക്ക് പ്രവേശിക്കാൻ സഹായിക്കണമെന്നാണ് പോലീസിനോട് ആലുവ നഗരസഭ ആവശ്യപ്പെട്ടിരിക്കുന്നത്. കഴിഞ്ഞ 17ന് ഇതേ പരാതി ആലുവ നഗരസഭ നൽകിയിരുന്നു. നാഷണൽ ഗ്രീൻ ട്രൈബ്യൂണൽ യുദ്ധകാലാടിസ്ഥാനത്തിൽ പ്ലാന്‍റിന്‍റെ അറ്റകുറ്റപ്പണി തീർക്കുവാൻ ആവശ്യപ്പെട്ടിട്ടുണ്ട്. ഇത് എത്രയും വേഗം പൂർത്തിയാക്കണമെന്നാണ് നഗരസഭയ്ക്ക് ലഭിച്ചിരിക്കുന്ന നിർദേശം. അതിനാൽ തന്നെ അടിയന്തിരമായി പ്ലാന്‍റിന്‍റെ പുനരുദ്ധാരണ പ്രവർത്തികൾ പൂർത്തീകരിക്കാൻ ഇടപെടണമെന്നാണ് പോലീസിനോട് നഗരസഭ വീണ്ടും ആവശ്യപ്പെട്ടിരിക്കുന്നത്.

റോ റോ സര്‍വീസ് നഷ്ടത്തിലെന്ന് പ്രതിപക്ഷം

കൊച്ചി: കൊച്ചി കോര്‍പറേഷന്‍റെ ഉടമസ്ഥതയിലുള്ള സേതു സാഗര്‍ റോറോ ജങ്കാറിന്‍റെയും പാസഞ്ചര്‍ ബോട്ടിന്‍റെയും സര്‍വീസ് നഷ്ടത്തിലാണെന്നാണ് കണക്കുകള്‍ വ്യക്തമാക്കുന്നതെന്ന് പ്രതിപക്ഷം. കെഎസ്‌ഐഎന്‍സി നഗരസഭയ്ക്ക് സമര്‍പ്പിച്ച കണക്കിലാണ് 10 ലക്ഷം രൂപയുടെ നഷ്ടത്തിലാണ് സര്‍വീസ് നടത്തുന്നതെന്ന് കാണിച്ചിരിക്കുന്നത്. സംയുക്ത സംരംഭം ആയതിനാല്‍ നഷ്ടത്തിന്‍റെ പകുതി അഞ്ചു ലക്ഷം കോര്‍പറേഷന്‍ നല്‍കണമെന്ന് കരാര്‍ സ്ഥാപനം ആവശ്യപ്പെട്ടിരിക്കുകയാണെന്നും പ്രതിപക്ഷ കക്ഷി നേതാവ് അഡ്വ. ആന്‍റണി കുരിത്തറ, പാര്‍ലമെന്‍ററി പാര്‍ട്ടി സെക്രട്ടറി എം.ജി. അരിസ്‌റ്റോട്ടില്‍ എന്നിവര്‍ പറഞ്ഞു.

വല്ലാർപാടം തിരുനാൾ സമാപിച്ചു

കൊച്ചി: വല്ലാര്‍പാടം ബസിലിക്കയില്‍ പരിശുദ്ധ വല്ലാര്‍പാടത്തമ്മയുടെ തിരുനാളിന് ഭക്തിസാന്ദ്രമായ സമാപനം. ഇന്നലെ രാവിലെ 10ന് പൊന്തിഫിക്കല്‍ ദിവ്യബലിയില്‍ വരാപ്പുഴ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍ മുഖ്യകാര്‍മികത്വം വഹിച്ചു. ഫാ.ഷെല്‍ട്ടണ്‍ വചനസന്ദേശം നല്‍കി. പള്ളിവീട്ടില്‍ മീനാക്ഷിയമ്മയുടെ പിന്‍തലമുറക്കാര്‍ പരമ്പരാഗതമായി ചെയ്തു വരുന്ന മോരു വിതരണത്തിന്‍റെ ആശീര്‍വാദം ആര്‍ച്ച്ബിഷപ് നിര്‍വഹിച്ചു. തുടര്‍ന്ന് പാലിയത്ത് വലിയച്ചനായ രാജഗോപാലനച്ചനും പാലിയം ട്രസ്റ്റ് മാനേജര്‍ പാലിയത്ത് വേണുഗോപാലനച്ചനും ചേര്‍ന്ന് അള്‍ത്താരയിലെ കെടാവിളക്കില്‍ എണ്ണ പകര്‍ന്ന് തിരിതെളിച്ചു. തിരുക്കര്‍മങ്ങള്‍ക്കു ശേഷം ആഘോഷമായ പ്രദക്ഷിണം ഉണ്ടായിരുന്നു. ഒക്ടോബര്‍ ഒന്നിനാണ് എട്ടാമിടം. പളളിപ്പറമ്പില്‍ ആന്‍റണി ഗൊണ്‍സാല്‍വസാണ് ഈ വര്‍ഷത്തെ പ്രസുദേന്തി. ബസിലിക്ക റെക്ടര്‍ ഫാ. ജെറോം ചമ്മിണിക്കോടത്ത്, സഹവികാരിമാരായ ഫാ. ആന്‍റണി ഷൈന്‍ കാട്ടുപ്പറമ്പില്‍, ഫാ. ജിബു വര്‍ഗീസ് തൈത്തറ, ഫാ. മിക്‌സണ്‍ റാഫേല്‍ പുത്തന്‍ പറമ്പില്‍ എന്നിവരാണ് തിരുനാളാഘോഷ പരിപാടികള്‍ക്ക് നേതൃത്വം നല്കിയത്.

ചെങ്ങമനാട് പട്ടാപ്പകൽ വീട് കുത്തിത്തുറന്ന് അലമാരയിൽ സൂക്ഷിച്ച പണം കവർന്നു

നെടുമ്പാശേരി: പട്ടാപ്പകൽ വീട് കുത്തിത്തുറന്ന് അലമാരയിൽ സൂക്ഷിച്ചിരുന്ന പണം കവർന്നു. ചെങ്ങമനാട് പുതുവാശേരി കപ്പേളക്ക് സമീപം പള്ളിപ്പറമ്പിൽ ബിനുവിന്‍റെ വീട്ടിലാണ് മോഷണം നടന്നത്. അലമാരയിലെ ബാഗിൽ സൂക്ഷിച്ചിരുന്ന 73,500 രൂപയാണ് മോഷണം പോയത്. ബിനുവും കുടുംബവും പള്ളിയിൽ പോയ സമയത്തായിരുന്നു മോഷണം. ബിനുവും ഭാര്യയും ഹൈസ്കൂൾ വിദ്യാർഥികളായ രണ്ട് മക്കളും ഒരു കിലോമീറ്ററോളം മാത്രം അകലത്തുള്ള പള്ളിയിലാണ് പോയത്. മടങ്ങി വന്ന ശേഷം ഭാര്യ ചിട്ടിയിൽ അടയ്ക്കാൻ പണം എടുക്കാൻ നോക്കിയപ്പോഴാണ് ബാഗിൽനിന്ന് പണം നഷ്ടമായ വിവരം അറിയുന്നത്. പള്ളിയിൽ പോയപ്പോൾ വാതിൽ പൂട്ടി പതിവുപോലെ താക്കോൽ ചവിട്ടിക്കു താഴെയാണ് സൂക്ഷിച്ചിരുന്നത്. വാതിലിന്‍റെ താക്കോലും അലമാരയുടെ താക്കോലും ബാഗും യഥാസ്ഥാനത്തുണ്ടായിരുന്നുവെന്നും പറയുന്നു. താഴ് തകർത്താണ് മോഷ്ടാവ് വീടിനകത്ത് കയറിയത്. കഴിഞ്ഞ ദിവസം ബാങ്കിൽ നിന്നെടുത്ത 75,000 രൂപയുടെ 500 ന്‍റെ കെട്ടിൽ നിന്ന് പള്ളിയിൽ പോയപ്പോൾ 1500 രൂപ എടുത്തിരുന്നു. ബാക്കി തുക ബാഗിൽ സൂക്ഷിച്ച ശേഷമാണ് പള്ളിയിൽ പോയതെന്നാണ് ബിനു പറയുന്നത്. ചെങ്ങമനാട് സ്റ്റേഷനിൽ നൽകിയ പരാതിയെത്തുടർന്ന് പോലീസ് സ്ഥലത്തെത്തി പരിശോധന നടത്തി അന്വേഷണം ആരംഭിച്ചു.

കേസന്വേഷണത്തിനിടെ എക്സൈസ് ഉദ്യോഗസ്ഥർക്ക് മർദനം : ഒരു കുടുംബത്തിലെ അഞ്ച് പേർക്കെതിരേ കേസ്

വൈപ്പിൻ: സിവിൽ ഡ്രസിൽ അന്വേഷണത്തിനെത്തിയ എക്സൈസ് ഉദ്യോഗസ്ഥർക്ക് മർദനം. പരാതിയെ തുടർന്ന് ഒരു കുടുംബത്തിലെ മാതാപിതാക്കളും മൂന്നു മക്കളുമുൾപ്പെടെ അഞ്ചു പേർക്കെതിരേ ഞാറക്കൽ പോലീസ് കേസെടുത്തു. എളങ്കുന്നപ്പുഴ പെരുമാൾപടി സ്വദേശി ആകാശ്, അച്ഛൻ, അമ്മ, രണ്ടു സഹോദരങ്ങൾ എന്നിവർക്കെതിരെ മർദനം, ഔദ്യോഗിക കൃത്യനിർവഹണം തടയൽ എന്നീ വകുപ്പുകൾ ചേർത്താണ് കേസെടുത്തിട്ടുള്ളത്. ഞാറക്കൽ എക്സൈസ് ഓഫീസിലെ ഉദ്യോഗസ്ഥരായ ചെറായി സ്വദേശി കൈലാസൻ - 38 , ഞാറക്കൽ സ്വദേശി ഭരത് -30 എന്നിവർക്കാണ് മർദനമേറ്റത്. കഴിഞ്ഞ ദിവസം പകൽ പെരുമാൾപടി പടിഞ്ഞാറ് കുറ്റാരോപിതരുടെ വീട്ടുവളപ്പിലാണ് സംഭവം. മേലിൽ ഈ ഭാഗത്തേക്ക് വന്നാൽ വകവരുത്തുമെന്ന് ഭീഷണിപ്പെടുത്തിയതായും ഉദ്യോഗസ്ഥർ പരാതിയിൽ പറയുന്നു . അതിനിടെ ഉദ്യോഗസ്ഥർ വീട്ടുകാരെ മർദിച്ചതായും പരാതിയുണ്ട്.

ടോറസുകൾ തടഞ്ഞ് സമരം : ലോറിയുടെ ചില്ല് തകർന്നു; ചെറായിയിൽ സംഘർഷം

ചെറായി: രാത്രികാലങ്ങളിൽ വൈപ്പിൻ സംസ്ഥാനപാതയിലൂടെയുള്ള ടോറസ്, കണ്ടെയ്നർ ലോറികളുടെ മരണപ്പാച്ചിൽ അവസാനിപ്പിക്കാൻ പോലീസോ, മോട്ടോർ വാഹന വകുപ്പോ നടപടി എടുക്കാത്തതിൽ പ്രതിഷേധിച്ച് സിപിഎമ്മിന്‍റെ നേതൃത്വത്തിൽ നാട്ടുകാർ ടോറസുകൾ തടഞ്ഞിട്ടു. ബഹളങ്ങൾക്കിടയിൽ ഒരു ടോറസ് ലോറിയുടെ ചില്ല് തകർന്നത് ചെറിയ തോതിൽ സംഘർഷത്തിനും വഴിവച്ചു. കഴിഞ്ഞ ദിവസം രാത്രി ഒമ്പതരയോടെ ചെറായി ദേവസ്വം നടയിലായിരുന്നു സംഭവം. സിപിഎം ഏരിയ സെക്രട്ടറി എ.പി. പ്രിനിൽ, ഏരിയ കമ്മിറ്റി അംഗങ്ങളായ കെ.കെ. ജോഷി, പി.ബി. സജീവൻ, ഇ.സി. ശിവദാസ് എന്നിവരുടെ നേതൃത്വത്തിൽ നൂറോളം പേരാണ് സമരത്തിനെത്തിയത്. കണ്ടെയ്‌നർ ലോറികൾ കണ്ടെയ്‌നർ റോഡിലൂടെ മാത്രം പോവുക. സംസ്ഥാനപാതയിലൂടെ പോകുന്ന ടോറസുകളും ടിപ്പറുകളും കണ്ടെയ്നറുകളും നിയമപ്രകാരമുള്ള നിബന്ധനകൾ പാലിക്കുക. നിയമം ലംഘിക്കുന്നവർക്കെതിരേ പോലീസും മോട്ടോർ വാഹനവകുപ്പും നടപടിയെടുക്കുക എന്നിവയായിരുന്നു സമരക്കാരുടെ ആവശ്യങ്ങൾ. 21ന് പുലർച്ചെ അലക്ഷ്യമായി ഓടിച്ച ടോറസ് ഇടിച്ച് ചാത്തങ്ങാടുവച്ച് പള്ളിപ്പുറം സ്വദേശിയായ യുവാവ് മരിച്ചിരുന്നു. ഇതാണ് നാട്ടുകാരെ പ്രകോപിപ്പിച്ചത്. നിയന്ത്രണം പാലിച്ചില്ലെങ്കിൽ സമരം തുടരുമെന്ന്‌ ഏരിയ സെക്രട്ടറി പ്രിനിൽ മുന്നറിയിപ്പു നൽകി. പോലീസ് കേസെടുത്തു ചെറായി: ചെറായി ദേവസ്വം നടയിൽ ടോറസ് ലോറികൾ തടഞ്ഞവർക്കെതിരെ മുനമ്പം പോലീസ് സ്വമേധയാ കേസെടുത്തു. സിപിഎം വൈപ്പിൻ ഏരിയ സെക്രട്ടറി എ.പി. പ്രിനിൽ, കമ്മിറ്റി അംഗങ്ങളായ കെ.കെ. ജോഷി, പി.ബി. സജീവൻ, ഇ.സി. ശിവദാസ് എന്നിവർ ഉൾപ്പെടെ 65 ഓളം പേർക്കെതിരെയാണ് കേസെടുത്തിട്ടുള്ളത്.

ഇരട്ട സെഞ്ച്വറിയിൽ സോളി സ്പർശം

വൈപ്പിൻ: ജീവൻ നിലനിർത്താൻ സ്വാഭാവിക ശ്വസനത്തിലൂടെ ആവശ്യമായ പ്രാണവായു കിട്ടാത്ത ശ്വാസകോശ രോഗികൾക്കും മറ്റും സൗജന്യമായി പ്രാണവായു എത്തിക്കുന്ന സ്പർശം പദ്ധതിയിൽ 200 ഓക്സിജൻ സിലിണ്ടറുകൾ വിതരണം ചെയ്തതിന്‍റെ ആത്മനിർവൃതിയിലാണ് പള്ളിപ്പുറത്തെ പൊതുപ്രവർത്തകനായ വി .എസ് . സോളി രാജ്. കോവിഡ് കാലത്തെ പ്രതിസന്ധിയിൽ കുറച്ച് സഹപ്രവർത്തകരോടൊപ്പമാണ് സോളിരാജ് പദ്ധതിക്ക് തുടക്കം കുറിച്ചത്. ഇന്നലെ പള്ളിപ്പുറം പഞ്ചായത്ത് ഒന്നാം വാർഡിലെ മുരിക്കുംതറ കാർത്തികേയൻ ഭാര്യ ശകുന്തളയ്ക്ക് ഓക്സിജൻ സിലിണ്ടർ എത്തിച്ചതോടെയാണ് ഡബിൾ സെഞ്ചുറി തികഞ്ഞത്. പണമുള്ള രോഗികൾക്ക് ഇത്തരത്തിലുള്ള സിലിണ്ടർ വിലയ്ക്ക് വാങ്ങി വീട്ടിൽ സൂക്ഷിച്ച് ഉപയോഗിക്കാം. എന്നാൽ ശകുന്തളയെ പോലുള്ള ദരിദ്രരായ രോഗികൾക്ക് ഇതിനു കഴിയാതെ വരും. വീട്ടിൽ ഉപയോഗിക്കാൻ സർക്കാർ സംവിധാനത്തിൽ നിന്നോ ആശുപത്രികളിൽ നിന്നോ ഓക്സിജൻ സിലിണ്ടർ ലഭ്യമാകില്ല. വിലകൊടുത്തു വാങ്ങാൻ ഇരുപതിനായിരം രൂപയോളം വരും. വാടകയ്ക്ക് എടുക്കണമെങ്കിൽ 5000 രൂപയോളം ഡിപ്പോസിറ്റും മാസ വാടകയും നൽകണം. ഇവിടെയാണ് സോളിയുടെയും കൂട്ടരുടെയും സ്പർശം സാധാരണക്കാർക്ക് തണലാവുന്നത്. സിലിണ്ടർ തീർന്നു കഴിഞ്ഞാലും ഇവർ തന്നെ തികച്ചും സൗജന്യമായി ഇവ നിറച്ചു നൽകും. ഇങ്ങനെ 35 ഓളം പേർ ജീവിതം തിരികെ പിടിച്ചവർ ഉണ്ടെന്ന് സോളി രാജും കൂട്ടരും പറയുന്നു. ജാതി മത രാഷ്ട്രീയത്തിനു അതീതമായുള്ള ഈ സത്കർമ്മത്തിൽ പള്ളിപ്പുറം സ്വദേശികളായ രാജേഷ് ചിദംബരൻ, പി. ബി. സുധി, മനു കുഞ്ഞുമോൻ, ശ്രീജിത്ത് സോമൻ, ബിനു രാജ് പരമേശ്വരൻ എന്നിവരാണ് സോളി രാജിനൊപ്പം ഉള്ളത്.

വയോധികയെ ആക്രമിച്ച് കവർച്ച : അയൽവാസി അറസ്റ്റിൽ

പെരുമ്പാവൂർ: വയോധികയെ ആക്രമിച്ച് സ്വർണഭരണങ്ങൾ കവർന്ന കേസിൽ അയൽവാസി അറസ്റ്റിൽ. മാറമ്പിള്ളി പള്ളിപ്രം മുടിക്കൽ പെരിയാർ ജംഗ്ഷനു സമീപം ചക്കാലപ്പറമ്പിൽ റോയി (54) യെയാണ് പെരുമ്പാവൂർ പോലീസ് അറസ്റ്റ് ചെയ്തത്. ചെവ്വാഴ്ച ഉച്ചയ്ക്ക് പരാതിക്കാരിയായ വയോധിക വാടകയ്ക്കു താമസിക്കുന്ന വീട്ടിൽ അതിക്രമിച്ചു കയറിയ പ്രതി ചുറ്റികകൊണ്ട് തലയ്ക്കടിച്ച് പരിക്കേൽപ്പിക്കുകയായിരുന്നു. തുടർന്ന് അവർ ധരിച്ചിരുന്ന നാല് പവനോളം തൂക്കം വരുന്ന സ്വർണാഭരണങ്ങൾ പ്രതി കവർന്നു. സിഐ ടി. എം. സൂഫിയുടെ നേതൃത്വത്തിലുള്ള അന്വേഷണസംഘമാണ് പ്രതിയെ പിടികൂടിയത്.

പഞ്ചഗുസ്തിയിൽ വെള്ളി മെഡൽ

ആലുവ: ഹരിയാനയിലെ മധുപനിൽ നടന്ന ദേശീയ പോലീസ് റസ്‌ലിംഗ് ചാമ്പ്യൻഷിപ്പിൽ കേരള പോലീസിനെ പ്രതിനിധീകരിച്ച് പഞ്ചഗുസ്തി മത്സരത്തിൽ റൂറൽ ജില്ലയിലെ സിവിൽ പോലീസ് ഓഫീസർ എ.എൻ. സനീഷ് വെള്ളി മെഡൽ കരസ്ഥമാക്കി. 85 കിലോ വിഭാഗത്തിലാണ് നേട്ടം. മുൻ വർഷങ്ങളിൽ ഇതേ ഇനത്തിൽ സ്വർണം - വെള്ളി മെഡലുകൾ നേടിയിട്ടുണ്ട്. പെരുമ്പാവൂർ ഐമുറി സ്വദേശിയാണ്. സനീഷിനെ ജില്ലാ പോലീസ് മേധാവി എം. ഹേമലത അഭിനന്ദിച്ചു.

പലചരക്കുകടയുടെ മറവിൽ മദ്യവില്പന: പ്രതി പിടിയിൽ

പെരുമ്പാവൂർ: പലചരക്കുകടയുടെ മറവിൽ അനധികൃത മദ്യവില്പന നടത്തിയിരുന്നയാൾ എക്‌സൈസ് പിടിയിൽ. രായമംഗലം പൂനെല്ലി കവളപ്രാമിൽ തോമസ് (62)നെയാണ് പെരുമ്പാവൂർ എക്‌സൈസ് റേഞ്ച് സംഘം പിടികൂടിയത്. എംസി റോഡ് പുല്ലുവഴി നങ്ങേലിപ്പടിയിൽ പ്രവർത്തിച്ചിരുന്ന കടയുടെ മറവിലാണ് ഇയാൾ മദ്യവില്പന നടത്തിയിരുന്നതെന്ന് എക്‌സൈസ് പറഞ്ഞു. ഇയാളുടെ പക്കൽ നിന്നും 40 കുപ്പികളിലായി സൂക്ഷിച്ചിരുന്ന 20 ലിറ്റർ വിദേശ മദ്യവും, മദ്യവില്പനയിലൂടെ ലഭിച്ച 9,935 രൂപയും എക്‌സൈസ് പിടിച്ചെടുത്തു. കോടതിയിയിൽ ഹാജരാക്കിയ തോമസിനെ റിമാൻഡ് ചെയ്തു.

നഗരത്തിൽ ഫുഡ്‌സ്ട്രീറ്റുമായി ജിസിഡിഎ; ഉദ്ഘാടനം 27ന്

കൊച്ചി: പനമ്പിള്ളി നഗറിനടുത്തുള്ള കസ്തൂര്‍ബ നഗറില്‍ ഫുഡ്സ്ട്രീറ്റ് ഒരുക്കി ജിസിഡിഎ. 120 സ്‌ക്വയര്‍ഫീറ്റ്, 60 സ്‌ക്വയര്‍ഫീറ്റ് എന്നിങ്ങനെ രണ്ടു വലിപ്പത്തില്‍ 20 ഭക്ഷണശാലകളാണ് ഫുഡ്‌സ്ട്രീറ്റില്‍ സജീകരിച്ചിട്ടുള്ളത്. ഇരിപ്പിടങ്ങള്‍, ലൈറ്റിംഗ്, വാഷ് ഏരിയകള്‍, ടോയ്‌ലറ്റ് സംവിധാനങ്ങള്‍, ഖരദ്രാവക മാലിന്യ സംസ്‌കരണ സംവിധാനം, സുരക്ഷാ സംവിധാനങ്ങള്‍, പാര്‍ക്കിംഗ് സൗകര്യം, എന്നിവയും ഒരുക്കിയിട്ടുണ്ട്. കേരളീയ വിഭവങ്ങള്‍, നോര്‍ത്ത് ഇന്ത്യന്‍, സൗത്ത് ഇന്ത്യന്‍, ചൈനീസ്, കോണ്ടിനന്‍റല്‍, മില്ലറ്റ് അധിഷ്ഠിതം, ഫാസ്റ്റ് ഫുഡ്, ഡെസേര്‍ട്ടുകള്‍, പാനീയങ്ങള്‍ തുടങ്ങി വൈവിധ്യമാര്‍ന്ന രുചികള്‍ ഇവിടെ ലഭ്യമാകും. 20 കടമുറികളില്‍ എട്ട് എണ്ണം ജനറല്‍ വിഭാഗത്തിനായും ആറെണ്ണം വനിതകള്‍ക്കും പട്ടികജാതി വിഭാഗത്തിന് രണ്ടും പട്ടിക വര്‍ഗം, സമൃദ്ധി അറ്റ് കൊച്ചി, ട്രാന്‍സ്ജന്‍ഡര്‍, ഭിന്നശേഷിക്കാര്‍ എന്നിവര്‍ക്കായി ഓരോന്നും കടമുറികളാണ് സംവരണം ചെയ്തിട്ടുള്ളത്. കേന്ദ്ര സര്‍ക്കാരിന്‍റെ സാമ്പത്തിക സഹായത്തോടെ കേരള സര്‍ക്കാര്‍, ജിസിഡിഎ, എന്‍എച്ച്എം, കൊച്ചി നഗരസഭ, കേരള ഭക്ഷ്യസുരക്ഷാ വകുപ്പ് എന്നിവയുടെ സംയുക്ത സംരംഭമായാണ് പദ്ധതി നടപ്പിലാക്കിയത്. ഫുഡ് സ്ട്രീറ്റിന്‍റെ ഉദ്ഘാടനം 27ന് വൈകിട്ട് ആറരയ്ക്ക് ആരോഗ്യ മന്ത്രി വീണ ജോര്‍ജ് നിര്‍വഹിക്കും. ജിസിഡിഎ ചെയര്‍മാന്‍ കെ. ചന്ദ്രന്‍പിള്ള അധ്യക്ഷത വഹിക്കുന്ന ചടങ്ങില്‍ എംഎല്‍എമാരായ ടി.ജെ. വിനോദ്, കെ.ജെ. മാക്‌സി, പി.വി. ശ്രീനിജിന്‍, മേയര്‍ എം. അനില്‍കുമാര്‍ എന്നിവര്‍ പങ്കെടുക്കും.

ജോലി വാഗ്ദാനം ചെയ്ത് ലക്ഷം രൂപ തട്ടിയെടുത്തെന്ന്

വൈപ്പിൻ: കപ്പലിൽ ജോലി വാഗ്ദാനം ചെയ്ത് മുളവുകാട് സ്വദേശിയുടെ കൈയിൽനിന്ന് 1,08,000 രൂപ തട്ടിയെടുത്തതായി പരാതി. തട്ടിപ്പിനിരയായ തൈപ്പാടത്ത് റോജർ ആന്‍റണി നൽകിയ പരാതിയിൽ ഫോർട്ട്കൊച്ചി അമരാവതി സ്വദേശി ആന്‍റണി ടിജിൻ( 31) നെതിരെ മുളവുകാട് പോലീസ് കേസെടുത്തു. താൻ എംഎസ്‌സി ഷിപ്പിംഗ് കമ്പനിയിൽ ജോലി ചെയ്യുകയാണെന്നും, ഇവർ വഴി ജോലി ശരിയാക്കിത്തരാമെന്നും പറഞ്ഞ് വിശ്വസിപ്പിച്ച് പരാതിക്കാരനിൽ നിന്നും കഴിഞ്ഞ ഡിസംബർ, ജനുവരി മാസങ്ങളിൽ ബാങ്ക് അക്കൗണ്ട് മുഖേനയാണ് പണം തട്ടിയതത്രേ. വിശ്വസിപ്പിക്കുന്നതിനായി ഒരു ഇ-മെയിൽ ഐഡിയിൽ നിന്നും പരാതിക്കാരന് ജോലി സംബന്ധമായ സന്ദേശവും ലഭിച്ചിരുന്നതായി പരാതിയിൽ പറയുന്നു. പോലീസ് അന്വേഷണം ആരംഭിച്ചിട്ടുണ്ട്.

എടയാറിൽ മത്സ്യ സംസ്കരണ സ്ഥാപനത്തിൽ തീപിടിത്തം; ലക്ഷങ്ങളുടെ നഷ്ടം

ആലുവ: എടയാർ വ്യവസായ മേഖലയിൽ പാതാളം ബണ്ട് പാലത്തിന് സമീപം പ്രവർത്തിക്കുന്ന മത്സ്യ സംസ്കരണ ഫാക്ടറി പൂർണമായി കത്തിനശിച്ചു. ലക്ഷക്കണക്കിന് രൂപയുടെ നഷ്ടമെന്ന് വിലയിരുത്തൽ. ഇന്നലെ പുലർച്ചെ മൂന്നോടെയാണ് തീപിടിത്തമുണ്ടായത്. ഫാക്ടറിയിൽ ചെറു മത്സ്യങ്ങൾ പൊടിച്ച് വളവും മീൻതീറ്റയും ആക്കുകയാണ് ചെയ്യുന്നത്. കമ്പനിക്ക് തീപിടിച്ച് ഒരു മണിക്കൂറിന് ശേഷം പരിസരത്തുള്ളവരാണ് ഫയർഫോഴ്‌സിനെ വിവരമറിയിച്ചത്. ഏലൂർ, ആലുവ, പറവൂർ, തൃക്കാക്കര, ഗാന്ധിനഗർ എന്നിവിടങ്ങളിൽനിന്നുള്ള ഫയർഫോഴ്സ് സംഘം എത്തിയാണ് തീയണച്ചത്.

രാസലഹരിയുമായി പിടിയിൽ

പെരുമ്പാവൂർ: രാസലഹരിയുമായി ആസാം നൗഗോൺ സ്വദേശികളായ അർഫാൻ അലി (27) , ബഹാറുൾ ഇസ്ലാം (22) എന്നിവരെ പെരുമ്പാവൂർ പോലീസ് അറസ്റ്റ് ചെയ്തു. ചൊവ്വാഴ്ച വൈകിട്ട് പള്ളിപ്രം പാക്കാട്ടുതാഴം ഭായി കോളനി റോഡിൽനിന്നാണ് ഇരുവരെയും പിടികൂടിയത്. രണ്ടു പേരിൽ നിന്നുമായി 6.810 ഗ്രാം ഹെറോയിൻ കണ്ടെടുത്തു. അന്വേഷണസംഘത്തിൽ ഇൻസ്പെക്ടർ ടി.എം. സൂഫി, എസ്ഐമാരായ റിൻസ് എം. തോമസ്, അബ്ദുൽ ജലീൽ, എഎസ്ഐ രതീശൻ എന്നിവരാണ് ഉണ്ടായിരുന്നത്.

യുഡിഎഫ് ജില്ലാ നേതൃയോഗം 26ന്

കൊച്ചി: ഐക്യജനാധിപത്യമുന്നണി ജില്ലാനേതൃത്വ യോഗം 26ന് രാവിലെ 10 ന് ഡിസിസി ഓഫീസ് ഓഡിറ്റോറിയത്തിൽ നടക്കും. ചെയർമാൻ ഡൊമിനിക് പ്രസന്‍റേഷൻ അധ്യക്ഷത വഹിക്കും. എംപിമാർ, എംഎൽഎമാർ, ജില്ലാ കമ്മിറ്റി അംഗങ്ങൾ, നിയോജകമണ്ഡലം ചെയർമാൻമാർ, കൺവീനർമാർ എന്നിവർ യോഗത്തിൽ പങ്കെടുക്കുമെന്ന് ജില്ലാ കൺവീനർ ഷിബു തെക്കുംപുറം അറിയിച്ചു.

കളമശേരിയില്‍ ജുഡീഷല്‍ സിറ്റി : തുടര്‍നടപടികള്‍ക്ക് ആഭ്യന്തര വകുപ്പ്

കൊച്ചി: ജുഡീഷല്‍ സിറ്റി കളമശേരിയില്‍ സ്ഥാപിക്കുന്നതിന് മന്ത്രിസഭാ യോഗം അംഗീകാരം നല്‍കി. എച്ച്എംടിയുടെ കൈവശമുള്ള 27 ഏക്കര്‍ ഭൂമി ഏറ്റെടുത്ത് ജുഡീഷല്‍ സിറ്റി സ്ഥാപിക്കാനാണ് തീരുമാനം. പദ്ധതി നടപ്പാക്കുന്നതിനുള്ള പ്രാരംഭ നടപടികള്‍ സ്വീകരിക്കാന്‍ ആഭ്യന്തര വകുപ്പിനെ ചുമതലപ്പെടുത്തി. കേരള ഹൈക്കോടതി ഉള്‍പ്പെടുന്ന ജുഡീഷല്‍ സിറ്റിയുടെ പ്രാഥമിക രൂപരേഖ പൊതുമരാമത്ത് വകുപ്പ് തയാറാക്കിയിട്ടുണ്ട്. 27 ഏക്കര്‍ ഭൂമിയിലായി 12 ലക്ഷത്തിലധികം ചതുരശ്ര അടി കെട്ടിട സൗകര്യമുള്‍പ്പെടെ രാജ്യാന്തര തലത്തിലുള്ള ആധുനിക സംവിധാനങ്ങളും സൗകര്യങ്ങളും ഉള്ള ജുഡീഷല്‍ സിറ്റിയാണ് വിഭാവനം ചെയ്യുന്നത്. മൂന്ന് ടവറുകളിലായാണ് ജുഡീഷല്‍ സിറ്റി രൂപകല്‍പന ചെയ്തിരിക്കുന്നത്. പ്രധാന ടവറില്‍ ഏഴ് നിലകളും മറ്റ് രണ്ട് ടവറുകളില്‍ ആറ് നിലകള്‍ വീതവും ഉണ്ടാകും. മന്ത്രി പി. രാജീവ്, ഹൈക്കോടതി ജഡ്ജിമാരായ മുഹമ്മദ് മുഷ്താഖ്, ബെച്ചു കുര്യന്‍ തോമസ്, രാജ വിജയരാഘവന്‍, സതീഷ് നൈനാന്‍ എന്നിവരുടെയും നേതൃത്വത്തില്‍ കളമശേരിയിലെ സ്ഥലം സന്ദര്‍ശിച്ച ശേഷമാണ് പദ്ധതിയുടെ വിശദാംശങ്ങള്‍ തയാറാക്കിയത്. ഭൂമി ഏറ്റെടുക്കലും കെട്ടിട നിര്‍മാണവുമുള്‍പ്പെടെ 1,000 കോടിയില്‍പരം രൂപ ചെലവ് കണക്കാക്കുന്ന പദ്ധതിയാണിത്. പ്രാരംഭ നടപടികള്‍ക്കും കേന്ദ്ര സഹായം ലഭ്യമാക്കുന്നതിനുള്ള സാധ്യതകള്‍ പരിശോധിക്കുന്നതിനുമായി ആഭ്യന്തര വകുപ്പിനെ ചുമതലപ്പെടുത്തി. ചീഫ് ജസ്റ്റീസിന്‍റേതുള്‍പ്പെടെ 61 കോടതി ഹാളുകള്‍, രജിസ്ട്രാര്‍ ഓഫീസ്. ഓഡിറ്റോറിയം, വിവിധ കമ്മിറ്റികള്‍ക്കുള്ള മുറികള്‍, ഭരണവിഭാഗത്തിനുള്ള സൗകര്യങ്ങള്‍, ലൈബ്രറി ബ്ലോക്ക്, ആര്‍ബിട്രേഷന്‍ സെന്‍റര്‍, റിക്രൂട്ട്‌മെന്‍റ് സെല്‍, ഐടി വിഭാഗം, ഇന്‍ഫര്‍മേഷന്‍ സെന്‍റര്‍ തുടങ്ങി അതിവിപുലമായ സൗകര്യങ്ങള്‍ ഉണ്ടാകും. ഇതിനു പുറമേ അഡ്വക്കേറ്റ് ജനറല്‍ ഓഫീസ്, അഭിഭാഷകരുടെ ചേംബറുകള്‍, പാര്‍ക്കിംഗ് സൗകര്യം, മഴവെള്ള സംഭരണി എന്നിവയും രൂപകല്‍പന ചെയ്തിട്ടുണ്ട്. നിലവിലുള്ള ഹൈക്കോടതി സ്ഥലപരിമിതി നേരിടുന്ന സാഹചര്യത്തിലാണ് പുതിയ നിര്‍മാണത്തെക്കുറിച്ച് ഹൈക്കോടതിയില്‍നിന്ന് നിര്‍ദേശം ഉയര്‍ന്നത്.

അയര്‍ലന്‍ഡില്‍ മരിച്ച നഴ്‌സിന്‍റെ സംസ്‌കാരം തിങ്കളാഴ്ച

അങ്കമാലി: അയര്‍ലന്‍ഡിലെ ലോംഗ്‌ഫോര്‍ഡില്‍ മരിച്ച മലയാളി നഴ്‌സ് തൊടുപുഴ മുതലക്കോടം കിഴക്കേക്കര എപ്രേം സെബാസ്റ്റ്യന്‍റെ ഭാര്യയും അങ്കമാലി മൂക്കന്നൂര്‍അട്ടാറ മാളിയേക്കല്‍ കുടുംബാംഗവുമായ ഷാന്‍റി പോളിന്‍റെ (52) സംസ്‌കാരം തിങ്കളാഴ്ച നടക്കും . കാന്‍സര്‍ ചികിത്സയിലായിരുന്ന ഷാന്‍റി കഴിഞ്ഞ തിങ്കളാഴ്ച രാവിലെ എട്ടോടെ മുള്ളീംഗാര്‍ ആശുപത്രിയിലാണ് മരിച്ചത്. ലോംഗ്‌ഫോര്‍ഡ് സീറോ മലബാര്‍ ചര്‍ച്ച് അംഗവും മിഡ്‌ലാന്‍ഡ് ഇന്‍റലക്ച്വല്‍ ഡിസെബിലിറ്റി സെന്‍ററിൽ സ്റ്റാഫ് നഴ്‌സുമായിരുന്ന ഷാന്‍റി രണ്ട് വര്‍ഷത്തോളമായി കാന്‍സര്‍ ബാധിതയായി ചികിത്സയിലായിരുന്നു. നേരത്തെ താല ന്യൂകാസിലില്‍ താമസിക്കവേ പീമോണ്ട് ആശുപത്രിയിലും സേവനമനുഷ്ഠിച്ചിട്ടുണ്ട്. അഞ്ചു വര്‍ഷമായി കുടുംബം ലോംഗ്‌ഫോര്‍ഡിലാണ്. മക്കള്‍: കോളജ് വിദ്യാര്‍ഥികളായ എമില്‍, എവിന്‍, അലാന. ഷാന്‍റിയുടെ മൃതദേഹം ഞായറാഴ്ച വൈകിട്ട് ലോംഗ്‌ഫോര്‍ഡ് ഓക്‌ലാന്‍ഡിലെ ഗ്ലെനോന്‍ ഫ്യൂണറല്‍ ഹോമിലും തുടര്‍ന്ന് തിങ്കളാഴ്ച രാവിലെ ലോംഗ്‌ഫോര്‍ഡിലുള്ള വസതിയിലും പൊതുദര്‍ശനത്തിന് വയ്ക്കും. തുടര്‍ന്ന് സംസ്‌കാരം ലോംഗ്‌ഫോര്‍ഡിലുള്ള മൊയ്ഡോ സെന്‍റ് മേരീസ് പള്ളിയില്‍.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]