ADVERTISEMENT

ADVERTISEMENT

കൊരട്ടിയിൽ കുടുംബശ്രീ സിഡിഎസ് വാർഷികാഘോഷം

കൊരട്ടി: കുടുംബശ്രീ സിഡിഎസ് വാർഷികാഘോഷം ഗ്രാമപഞ്ചായത്ത് പ്രസിഡന്‍റ് പി.സി.ബിജു ഉദ്ഘാടനം ചെയ്തു. സിഡിഎസ് ചെയർപേഴ്സൺ സ്മിത രാജേഷ് അധ്യക്ഷത വഹിച്ചു. ജില്ലാ മിഷൻ കോ-ഒാർഡിനേറ്റർ യു. സലിൽ മുഖ്യാതിഥിയായി. ബാലസഭ കുട്ടികളെ ചടങ്ങിൽ ആദരിച്ചു.

പഞ്ചായത്ത് വൈസ് പ്രസിഡന്‍റ് ഷൈനി ഷാജി, ത്രിതലപഞ്ചായത്ത് അംഗങ്ങളായ കുമാരി ബാലൻ, ഇന്ദിര പ്രകാശൻ, സിന്ധു രവി, ഷിമ സുധിൻ, റെയ്മോൾ ജോസ്, മെമ്പർ സെക്രട്ടറി എം.ജെ. ഫ്രാൻസിസ്, സിഡിഎസ് വൈസ് ചെയർപേഴ്സൺ പ്രിൻസി ജോസഫ്, ബേബി ഉണ്ണി എന്നിവർ പ്രസംഗിച്ചു.

ADVERTISEMENT

തെരുവുനായ് ഭീഷണിക്കെതിരേ പച്ചയണിഞ്ഞ് മണ്‍സൂണ്‍വാക്ക്

തൃശൂർ: പച്ച ടീഷർട്ടും വെള്ളത്തൊപ്പിയും ധരിച്ച് സ്ത്രീകളടക്കമുള്ള പ്രഭാതനടത്തക്കാർ തെരുവുനായ്ക്കളെ നിയന്ത്രിക്കണമെന്ന സന്ദേശവുമായി മണ്‍സൂണ്‍വാക്ക് നടത്തി. വേൾഡ് മലയാളി കൗണ്‍സിൽ വള്ളുവനാട് പ്രൊവിൻസ് സംഘടിപ്പിച്ച മഴക്കാലനടത്തത്തിൽ വിവിധ പ്രദേശങ്ങളിലെ പ്രഭാതനടത്തസംഘങ്ങളിലെ എഴുന്നൂറോളം പേർ പങ്കാളികളായി. വടക്കുന്നാഥ ക്ഷേത്രമൈതാനിയിലെ മണികണ്ഠനാൽത്തറയ്ക്കരികിൽ തൃശൂർ എസിപി സലീഷ് എൻ. ശങ്കരൻ ഫ്ലാഗ് ഓഫ് ചെയ്തു. തെരുവുനായ് ഭീഷണിക്കെതിരേ പ്രചാരണം നയിക്കുന്ന ജോസ് മാവേലി, രാജീവ് എന്നിവരെ ആദരിച്ചു. പൂമലയിലേക്കു 14 കിലോമീറ്ററായിരുന്നു നടത്തം. കൂട്ടനടത്തം പൂമലയിലെ റിച്ച് ഇന്ത്യ റിസോർട്ടിൽ സമാപിച്ചു. മെഗാ സൂംബാ ഡാൻസും അവതരിപ്പിച്ചു. പങ്കെടുത്തവർക്കു ടീ ഷർട്ടും തൊപ്പിയും ലഘുഭക്ഷണവും സൗജന്യമായി നൽകി. തെരുവുനായ് ശല്യത്തിനെതിരേ അവബോധം സൃഷ്ടിക്കാനുള്ള പൈലറ്റ് പ്രൊജക്ടായാണ് മണ്‍സൂണ്‍ വാക്ക് നടത്തിയത്. തെരുവുനായ്ക്കൾക്കു ഷെൽട്ടർ നിർമിക്കാൻ രണ്ടേക്കർ ലഭിച്ചാൽ വിദേശങ്ങളിലേതുപോലെ സൗകര്യങ്ങളുള്ള ഷെൽട്ടറുകൾ നിർമിച്ചുപരിപാലിക്കാൻ വേൾഡ് മലയാളി കൗണ്‍സിൽ മുന്നിലുണ്ടാകുമെന്ന് വള്ളുവനാട് പ്രൊവിൻസ് ചെയർമാൻ ജോസ് പുതുക്കാടൻ അറിയിച്ചു. പ്രോഗ്രാം കോ-ഓർഡിനേറ്റർമാരായ എ.എസ്. രാജീവ്, സുജിത് ശ്രീനിവാസൻ, ഗ്ലോബൽ വൈസ് ചെയർമാൻ സുരേന്ദ്രൻ കണ്ണാട്ട്, പ്രൊവിൻസ് പ്രസിഡന്‍റ് ജെയ്സണ്‍, സെക്രട്ടറി ചന്ദ്രപ്രകാശ് എടമന, ട്രഷറർ രാജാഗോപാലൻ, എം.എം.എ. റസാക്ക്, അഡ്വ. ഷാജി കോടങ്കണ്ടത്ത്, രഞ്ജി മഞ്ഞില, ടൈനി ഫ്രാൻസിസ് തുടങ്ങിയവർ പങ്കെടുത്തു.

സഹോദയ സിബിഎസ്ഇ അധ്യാപക കലോത്സവം: മാള ഡോ. രാജു ഡേവിസ് ഇന്‍റര്‍നാഷണല്‍ സ്‌കൂള്‍ ജേതാക്കള്‍

ഇരിങ്ങാലക്കുട: തൃശൂര്‍ സെന്‍ട്രല്‍ സഹോദയ സിബിഎസ്ഇ അധ്യാപക കലോത്സവത്തില്‍ 251 പോയിന്‍റുമായി മാള ഡോ. രാജു ഡേവിസ് ഇന്‍റര്‍നാഷണല്‍ സ്‌കൂള്‍ ജേതാക്കളായി. 221 പോയിന്‍റുമായി മാള ഹോളി ഗ്രേസ് അക്കാദമി രണ്ടാം സ്ഥാനവും, 175 പോയിന്‍റുമായി ഇരിങ്ങാലക്കുട ശാന്തിനികേതന്‍ പബ്ലിക് സ്‌കൂള്‍ മൂന്നാം സ്ഥാനവും കരസ്ഥമാക്കി. സമാപന സമ്മേളത്തില്‍ തൃശൂര്‍ സെന്‍ട്രല്‍ സഹോദയ പ്രസിഡന്‍റ് ബിനു. കെ. രാജ് അധ്യക്ഷത വഹിച്ചു. തൃശൂര്‍ സഹോദയ ചീഫ് പേട്രണ്‍ ഡോ. രാജു ഡേവിസ് വിജയികള്‍ക്ക് സമ്മാനങ്ങള്‍ വിതരണം ചെയ്തു. സഹോദയ ജനറല്‍ സെക്രട്ടറി പി.എന്‍. ഗോപകുമാര്‍, വിവിധ സിബിഎസ്ഇ വിദ്യാലയങ്ങളിലെ സ്‌കൂള്‍ പ്രിന്‍സിപ്പൽ‍മാരായ സുമീത സന്തോഷ് കുമാര്‍, മിന്‍റു മാത്യു, പി. എസ്.ഉഷ, ഡോ. പി.വി. ലിവിയ, ഇ.ടി.ലത, വിജിത ജിജേഷ്, എസ്എന്‍ഇഎസ് ചെയര്‍മാന്‍ പി.കെ. പ്രസന്നന്‍, സെക്രട്ടറി സജിതന്‍ കുഞ്ഞിലിക്കാട്ടില്‍, സ്‌കൂള്‍ അഡ്മിനിസ്‌ട്രേറ്റര്‍ ടി.പി. ലീന, കലോത്സവ ഇന്‍ ചാര്‍ജ് സിന്ധു ശങ്കര്‍, ഹെഡ്മിസ്ട്രസ് സജിത അനില്‍കുമാര്‍ എന്നിവര്‍ സന്നിഹിതരായിരുന്നു.

ആംബുലൻസിനു വഴിയൊരുക്കി വനിതാ പോലീസ് ഉദ്യോഗസ്ഥ

തൃശൂർ: ഗതാഗതക്കുരുക്കിൽപെട്ട ആംബുലൻസിനു വഴിയൊരുക്കിയ വനിതാ പോലീസ് ഉദ്യോഗസ്ഥയ്ക്ക് സോഷ്യൽ മീഡിയയിൽ അഭിനന്ദനപ്രവാഹം. അത്യാസന്ന നിലയിലായ രോഗിയുമായി മെഡിക്കൽ കോളജിലേക്കു പോകുന്പോഴാണ് അശ്വനി ജംഗ്ഷനിൽ ആംബുലൻസ് കുരുങ്ങിയത്. ഡ്യൂട്ടിയിലുണ്ടായിരുന്ന തൃശൂർ സിറ്റി വനിതാ പോലീസ് സ്റ്റേഷനിലെ എഎസ്ഐ അപർണ ലവകുമാർ ആംബുലൻസിന്‍റെ മുന്നിലേക്ക് ഓടിയെത്തി മറ്റു വാഹനങ്ങൾ നിയന്ത്രിച്ചു വഴിയൊരുക്കുകയായിരുന്നു. മെഡി ഹബ് ഹെൽത്ത് കെയറിന്‍റെ ആംബുലൻസ് ഡ്രൈവർ ഫൈസലിന് ഒപ്പമുണ്ടായിരുന്ന ഇർഫാനാണ് ദൃശ്യങ്ങൾ പകർത്തി സമൂഹമാധ്യമങ്ങളിൽ പങ്കുവച്ചത്. കൃത്യസമയത്ത് ജീവൻ രക്ഷിക്കാൻ ഇടപെട്ടതിന് തൃശൂർ സിറ്റി പോലീസ് കമ്മീഷണർ ആർ. ഇളങ്കോ ഉദ്യോഗസ്ഥയ്ക്ക് ഗുഡ് സർവീസ് എൻട്രി പ്രഖ്യാപിച്ചു. കഴിഞ്ഞ വാർഷിക അത്ലറ്റിക് മീറ്റിൽ നൂറുമീറ്റർ ഓട്ടത്തിലെ ഒന്നാംസ്ഥാനക്കാരിയായിരുന്നു അപർണ ലവകുമാർ. മുന്പ് ഒല്ലൂർ സ്റ്റേഷനിലുണ്ടായിരുന്നപ്പോൾ ആശുപത്രി ചെലവിലേക്ക് ഒരു സ്ത്രീയ്ക്കു സ്വർണവള ഊരിനൽകിയ സംഭവം ഓർമിച്ചാണ് പലരും ഈ വീഡിയോ പങ്കുവച്ചത്.

ജനറൽ ആശുപത്രി കാട് കയറുന്നു, കോണ്‍ക്രീറ്റ് തകരുന്നു

സി.ജി. ജിജാസൽ തൃശൂർ: കോർപറേഷൻ ജനറൽ ആശുപത്രി. നാടിന്‍റെ ആരോഗ്യം കൈമാറേണ്ട ഇടം, ഇന്നിപ്പോൾ ചികിത്സയ്ക്കായി കാത്തിരിക്കുകയാണ്. ചരിത്രത്തിന്‍റെ താളുകളിൽ നിറപ്പകിട്ടോടെ തലയുയർത്തിനിന്നിരുന്ന ഈ ആതുരാലയം ഇന്ന് അവഗണനയാലും ജാഗ്രതക്കുറവിനാലും കാടുകയറി നശിക്കുന്നു. നവീകരണപ്രവൃത്തികളിലൂടെ നിറംപിടിപ്പിച്ച കെട്ടിടം പുറത്തുനിന്നു തിളക്കമുള്ളതായി തോന്നാമെങ്കിലും, അതിന്‍റെ ഉള്ളുതന്നെ ദുരന്തത്തിന്‍റെ അരികിലാണ്. സണ്‍ഷെയ്ഡുകൾ തകർന്ന കെട്ടിടത്തിന്‍റെ കോണ്‍ക്രീറ്റ് പാളികൾ ഓരോ ദിനവും പൊട്ടിവീഴുകയാണ്. ദിവസേന നൂറുകണക്കിനു രോഗികൾ എത്തുന്ന ആശുപത്രിക്കാണ് ഈ അവസ്ഥയെന്നു മറക്കരുത്. കാലപ്പഴക്കത്താലും ഈർപ്പത്താലും തകർച്ച നേരിടുന്ന ചുറ്റുമതിലുകളും ഈർപ്പംപടർന്ന ചുവരുകളും പൈപ്പുകൾ തകർന്നു ചോരുന്ന മലിനജലം സണ്‍ഷെയ്ഡുകളിൽകൂടി തട്ടിത്തെറിച്ചു മോർച്ചറി റോഡിലൂടെയുള്ള യാത്രക്കാരുടെ ദേഹത്തേക്കു തെറിക്കുന്നതും ഇവിടെ പതിവുകാഴ്ചയായി മാറിയിരിക്കയാണ്. മഴയും വെയിലും മാറിമാറിവരുന്ന കാലാവസ്ഥയിൽ പകർച്ചവ്യാധികൾ ഭീഷണിയായി നിലനിൽക്കുന്പോഴും ആശുപത്രിയുടെ ചുറ്റുപാടുകൾ കാടുകയറി നിശ്ചലമായി കിടക്കുകയാണെന്നതും ആശുപത്രിയുടെ ദുരവസ്ഥയെ ചൂണ്ടിക്കാണിക്കുന്നു. കോളജ് റോഡിലും മോർച്ചറി റോഡിലും ആശുപത്രിയുടെ കെട്ടിടങ്ങൾക്കുചുറ്റുമുള്ള ഇടങ്ങളിൽ വലിയതോതിൽ പുല്ലും പടർപ്പും വളർന്നിരിക്കയാണ്. ആശുപത്രിയെന്നതിനോടു പൊരുത്തപ്പെടാത്ത ഈ അവസ്ഥയെക്കുറിച്ച് അതിനുള്ളിൽ ജോലിചെയ്യുന്നവർപോലും കണ്ണടച്ചുനിൽക്കുന്നുവെന്നതാണ് ഏറ്റവും ദുഃഖകരമായ മറ്റൊരു കാര്യം. വീടും പരിസരവും വൃത്തിയാക്കാത്തതിനു സാധാരണ ജനങ്ങൾക്കു പിഴ ഈടാക്കുന്ന ആരോഗ്യപ്രവർത്തകർ, തങ്ങളുടേതായ സ്ഥാപനത്തിലെ ഈ കാഴ്ചയെ എന്തുകൊണ്ടാണ് കാണാത്തത്? ഇതാണ് നാട്ടുകാരുടെ വേദനയും ചോദ്യംകൂടിയുമാകുന്നത്. കെട്ടിടത്തിന്‍റെ ഉറപ്പും സുരക്ഷയും പുനഃപരിശോധിക്കണം: രാജൻ പല്ലൻ ആശുപത്രിയുടെ ശോചനീയാവസ്ഥ പരിഹരിക്കണമെന്നും കെട്ടിടത്തിന്‍റെ ഉറപ്പും സുരക്ഷയും പുനഃപരിശോധിക്കേണ്ടതാണെന്നും പ്രതിപക്ഷനേതാവ് രാജൻ ജെ. പല്ലൻ ആവശ്യപ്പെട്ടു. കോർപറേഷൻ അധികാരികൾ ആരും കെട്ടിടം ശ്രദ്ധിക്കുന്നില്ലെന്ന് ഒറ്റനോട്ടത്തിൽ മനസിലാകുംവിധമാണ് ആശുപതിയിലും കെട്ടിടത്തിലും പലയിടങ്ങളിലും കാടുകയറിയിരിക്കുന്നത്. മലിനജലം പലവിധ അസുഖങ്ങൾക്കും വഴിവയ്ക്കുന്നു. ആശുപതിയുടെ ദയനീയസ്ഥിതി നേരത്തേ പ്രതിപക്ഷം രണ്ടുതവണ കൗണ്‍സിലിൽ ഉന്നയിച്ചതാണ്. വരുംകൗണ്‍സലിലും ഇക്കാര്യം ഉന്നയിക്കും. വിഷയത്തിൽ അടിയന്തരനടപടികൾ സ്വീകരിക്കണമെന്നും അദ്ദേഹം ആവശ്യപ്പെട്ടു.

ഇക്കുറി പുലിക്കളി പൊരിക്കും

തൃശൂർ: നാലോണനാളിൽ തൃശൂർ നഗരത്തിലേക്കിറങ്ങാൻ പുലിമടകളിൽ ഒരുക്കങ്ങൾ തുടങ്ങി. പുലികളിറങ്ങുന്ന വിവരം പടുകൂറ്റൻ ഫ്ലെക്സുകളുയർത്തി നാടറിയിച്ചുകഴിഞ്ഞു പുലിക്കളിസംഘങ്ങൾ. ആവേശം വാരിവിതറുന്ന ചിത്രങ്ങളും തലക്കെട്ടുകളും അടിക്കുറിപ്പുകളും സഹിതമാണ് പുലിക്കളിക്കിറങ്ങുന്ന ദേശങ്ങൾ ഫ്ലെക്സുകൾ ഉയർത്തിയിരിക്കുന്നത്. അയ്യന്തോൾ, കുട്ടൻകുളങ്ങര, സീതാറാം മിൽ ദേശം, യുവജനസംഘം വിയ്യൂർ, ചക്കാമുക്ക് തുടങ്ങിയ ദേശങ്ങളെല്ലാം ഫ്ലെക്സുകൾ സ്ഥാപിച്ചിട്ടുണ്ട്. കളിക്കാരെയും കൊട്ടുകാരെയും സംഘങ്ങൾ ബുക്ക് ചെയ്തുകഴിഞ്ഞു. കുടവയറൻപുലികൾക്കുള്ള ബുക്കിംഗ് നേരത്തേതന്നെ കഴിഞ്ഞു. നീണ്ട ഇടവേളയ്ക്കുശേഷം ശക്തന്‍റെ തട്ടകത്തിലേക്കു തിരിച്ചെത്തുന്ന പുലിക്കളിസംഘങ്ങളും ഇത്തവണയും പുലികളായി തുടരും എന്ന പ്രഖ്യാപിച്ച പുലിക്കളി ടീമുകളും പുലിപ്പൂരത്തിന് എത്തുന്നുണ്ട്. ആകെ എത്ര ടീമുകൾ പങ്കെടുക്കുന്നുണ്ടെന്നറിയാൻ ഈ മാസം 15 വരെ കാത്തിരിക്കണം. അന്നാണ് അപേക്ഷ നൽകേണ അവസാനതീയതി. കോർപറേഷന്‍റ നേതൃത്വത്തിൽ നാലോണനാളിൽ സംഘടിപ്പിക്കുന്ന പുലിക്കളിയുടെ സംഘാടകസമിതി രൂപീകരിച്ചുകഴിഞ്ഞു. പുലിക്കളിസംഘങ്ങൾക്കുള്ള സഹായധനമായി 3,12,500 രൂപ ഇത്തവണയും നൽകും. 62,500 രൂപയാണ് ഒന്നാംസമ്മാനം. 50,000 രൂപ, 43,750 രൂപ എന്നിങ്ങനെയാണ് രണ്ട്, മൂന്ന് സമ്മാനങ്ങൾ. ട്രോഫികളും ഉണ്ടാകും. ഈ വർഷം മുതൽ മികച്ച പുലിവരയ്ക്കും സമ്മാനം നൽകുന്നുണ്ട്. അതുകൊണ്ടുതന്നെ മുൻവർഷങ്ങളെക്കാൾ പുലിവര ഇത്തവണ കെങ്കേമമാകും. ഓണ്‍ലൈൻ, സോഷ്യൽമീഡിയ എന്നിവയിലൂടെ പുലിക്കളിക്കു പ്രചാരം നൽകാനും തങ്ങളുടെ ദേശത്തെ പുലിക്കളിയുടെ വിശേഷങ്ങൾ പങ്കിടാനും പുതിയ മാർഗങ്ങൾ തേടിയിട്ടുണ്ട് ചില സംഘങ്ങൾ. കുമ്മാട്ടിസംഘങ്ങളും ഇത്തവണ മുൻവർഷത്തെക്കാൾ സജീവമായി ഫ്ലെക്സുകളുയർത്തി രംഗത്തുണ്ട്.

ജനകീയ നേന്ത്രവാഴകൃഷി വിളവെടുപ്പ് ഉദ്ഘാടനം

കൈപ്പറമ്പ്: കേരള കർഷകസംഘം മുതുവന്നൂർ യൂണിറ്റ് "ചങ്ങാലിക്കോടൻ നേന്ത്രവാഴ കൃഷി'യുടെ വിളവെടുപ്പ് ഉത്സവം നടത്തി. ഇന്നലെ രാവിലെ ഒമ്പതിന് കൈപ്പറമ്പ് പുത്തൂർ ചീരോത്ത്പടിയിൽ നടന്ന ചടങ്ങ് ഗ്രാമപഞ്ചായത്ത് പ്രസിഡന്‍റ്് കെ.കെ. ഉഷദേവി ടീച്ചറുടെ അധ്യക്ഷതയിൽ സേവ്യർ ചിറ്റിലപ്പിള്ളി എംഎൽഎ ഉദ്ഘാടനം നിർവഹിച്ചു. കൺവീനർ വി.ഡി. ബേബി, കർഷകസംഘം ജില്ലാ സെക്രട്ടറി എ.എസ്. കുട്ടി, പുഴയ്ക്കൽ ബ്ലോക്ക് മെമ്പർ സി.എ. സന്തോഷ്, മുണ്ടൂർ സർവീസ് സഹകരണ ബാങ്ക് പ്രസിഡന്‍റ്് എം.ജെ. നിജോൺ, സി.പി.എം. കൈപ്പറമ്പ് എൽ.സി. സെക്രട്ടറി എം.എസ്. ശ്രീജിത്ത് തുടങ്ങിയവർ സംസാരിച്ചു.

കാറുകൾ തമ്മിൽ കൂട്ടിയിടിച്ച് ആറുപേർക്ക് പരിക്ക്

വടക്കാഞ്ചേരി: മുണ്ടത്തിക്കോട് പാൽ സൊസൈറ്റിക്ക് സമീപം കാറുകൾ തമ്മിൽ കൂട്ടിയിടിച്ച് ആറു പേർക്ക് പരിക്കേറ്റു. വേലൂർ ഒലക്കേങ്കിൽ വീട്ടിൽ സലോമി(52), വാക സ്വദേശി ഇടക്കളത്തൂർ വീട്ടിൽഎഡ്വിൻ(18) എന്നിവരെ തൃശൂർ മെഡിക്കൽ കോളജിൽ പ്രവേശിപ്പിച്ചു. പരിക്കേറ്റ നാലുപേരെ മറ്റു വാഹനങ്ങളിൽ മെഡിക്കൽ കോളജിൽ എത്തിച്ചു.

ബാറിൽ വടിവാൾവീശി ഭീകരാന്തരീക്ഷം സൃഷ്ടിച്ച അഞ്ചംഗസംഘം അറസ്റ്റിൽ

അന്തിക്കാട്: ബാറിൽ വടിവാൾവീശി ഭീകരാന്തരീക്ഷം സൃഷ്ടിച്ച് മാനേജരേയും ജീവനക്കാരേയും ബാറിൽ എത്തിയവരേയും കൊല്ലുമെന്ന് ഭീഷണിപ്പെടുത്തുകയും ചെയ്ത കേസിൽ നിരവധി കേസിൽ പ്രതികളായ കുപ്രസിദ്ധ ഗുണ്ട അമ്പലക്കാവിടി സനീഷും നാല് കൂട്ടാളികളും അറസ്റ്റിൽ. മനക്കൊടി വെളുത്തൂർ സ്വദേശികളായ പുളിക്കൽ വീട്ടിൽ അമ്പലക്കാവിടി എന്നറിയപ്പെടുന്ന സനീഷ് ( 38), ചുള്ളിപറമ്പിൽ വീട്ടിൽ കുടു എന്നറിയപ്പെടുന്ന അഭിഷേക് (23), ചുള്ളിപറമ്പിൽ വീട്ടിൽ ശ്രീജിത്ത് (34), കാഞ്ഞിരത്തിങ്കൾ വീട്ടിൽ സെബിൻ (20), മനക്കൊടി സ്വദേശി തട്ടിൽ വീട്ടിൽ മനു (26) എന്നിവരെയാണ് തൃശൂർ റൂറൽ പോലീസ് മേധാവി ബി. കൃഷ്ണകുമാറിന്‍റെ നേതൃത്വത്തിലുള്ള പൊലീസ് അറസ്റ്റ് ചെയ്തത്. ഈ മാസം മൂന്നിന് വൈകീട്ട് കുന്നത്തങ്ങാടി ബാറിന് മുന്നിൽ വച്ചായിരുന്നുസംഭവം. പരസ്പരം വാക്കുതർക്കവും അടിപിടിയും ഉണ്ടാക്കുകയും പ്രതികളിൽ ഒരാൾ ബാറിന് മുറ്റത്ത് നിർത്തിയിട്ടിരുന്ന കാറിൽ നിന്നും വടിവാൾ എടുത്ത് വീശി കൊല്ലുമെന്ന് ഭീഷണിപ്പെടുത്തുകയും മറ്റൊരു പ്രതിയുടെ വാൾ പിടിച്ചുവാങ്ങി ചുഴറ്റി സ്ഥലത്ത് ഭീകരാന്തരീക്ഷം സൃഷ്ടിക്കുകയുമായിരുന്നു. ഇത് കണ്ട് തടയാൻ വന്ന ബാർ മാനേജരായ പടിയം കൊട്ടാരപ്പറമ്പ് സ്വദേശി വൈലപ്പിള്ളി വീട്ടിൽ രാജേന്ദ്രൻ (57) എന്നയാളെയും ബാറിലെ ജീവനക്കാരെയും ബാറിൽ മദ്യപിക്കാൻ വന്നവരെയും കൊല്ലുമെന്ന് പറഞ്ഞ് ഭീഷണിപ്പെടുത്തുകയും ചെയ്യുകയായിരുന്നു. അന്തിക്കാട് പൊലീസ് സ്റ്റേഷൻ ഇൻസ്പെക്ടർ എ.എസ്. സരിൻ, എസ്ഐമാരായ അഫ്സൽ, ജോസി, സിപിഒമാരായ അനീഷ്, കിരൺ, രഘു എന്നിവരും പ്രതികളെ പിടികൂടിയ സംഘത്തിൽ ഉണ്ടായിരുന്നു.

" ഡീർ സഫാരി പാർക്ക് ' നിർമാണോദ്ഘാടനം നടന്നു

പുത്തൂർ: സുവോളജിക്കൽ പാർക്കിൽ പെറ്റ് സൂവിന്‍റേയും വെർച്വൽ സൂവിന്‍റേയും നിർമാണ പ്രവർത്തനങ്ങൾ ഈ മാസം തന്നെ ആരംഭിക്കുമെന്ന് റവന്യൂ മന്ത്രി കെ. രാജൻ പറഞ്ഞു. സുവോളജിക്കൽ പാർക്കിലെ ഡീർ സഫാരി പാർക്കിന്‍റെ നിർമാണോദ്ഘാടന ശിലാസ്ഥാപനം നിർവഹിച്ച് സംസാരിക്കുകയായിരുന്നു മന്ത്രി. പെറ്റ് സൂ ആരംഭിക്കുന്നതിന്‍റെ ധാരണ ഉണ്ടാക്കിക്കഴിഞ്ഞു. കുട്ടികൾക്ക് അരുമ മൃഗങ്ങളുമായി ഉല്ലസിക്കാനുള്ള സാധ്യതയാണ് ഇവിടെ ഒരുക്കുന്നതെന്നും മന്ത്രി പറഞ്ഞു. സൂവിൽ വരുന്ന കുട്ടികൾക്ക് ആർട്ടിഫിഷ്യൽ ഇന്‍റലിജൻസിന്‍റെ പൂർണമായിട്ടുള്ള സഹായത്തോടെ മൃഗങ്ങളെ കെട്ടിപ്പിടിക്കാനും, നാല് തരത്തിലുള്ള രാജ്യങ്ങളിലെ സഫാരി സൂ അനുഭവങ്ങൾ വെർച്വലായി കുറഞ്ഞ സ്ഥലത്ത് നിന്ന് കാണാനും പറ്റുന്ന പ്രത്യേക സംവിധാനമാണ് വെർച്വൽ സൂവിൽ ഒരുക്കുന്നത്. കണ്ണട വെച്ച് കാണുന്ന സംവിധാനമല്ല, അവർക്ക് യാത്ര ചെയ്യാനും ഇഷ്ടമുള്ള മൃഗങ്ങളെ തൊട്ട് നിന്ന് കാണാനും ആസ്വദിക്കാനുമുള്ള അവസരമാണ് ഒരുക്കുന്നതെന്നും 45 മിനുറ്റോളം യാത്ര തോന്നിക്കും വിധത്തിലുള്ള വെർച്വൽ സൂ ഒരുക്കാനുള്ള സൗകര്യങ്ങൾ 15ന് നേരിട്ട് പരിശോധിക്കുമെന്നും ആവശ്യമായ സൗകര്യം ഒരുക്കുമെന്നും മന്ത്രി കൂട്ടിച്ചേർത്തു. തൃശൂർ സുവോളജിക്കൽ പാർക്കിന്‍റെ നിർമാണ പ്രവർത്തനങ്ങൾ ഏകദേശം പൂർത്തിയായി. മറ്റു മൃഗശാലകളിൽ നിന്നും മൃഗങ്ങളെ കൊണ്ടുവരുന്നതും പാർക്ക് ശുചീകരണവും മാത്രമാണ് ബാക്കിയായിട്ടുള്ളത്. കർണാടകയിൽ നിന്നും 246 തരം മൃഗങ്ങളെയും പക്ഷികളെയും കൊണ്ടുവരുന്നതിന് നടപടികൾ അവസാന ഘട്ടത്തിലാണ്. വിദേശത്ത് നിന്ന് അഞ്ച് തരത്തിലുള്ള പക്ഷികളെ കൊണ്ടുവരുന്നതിനുള്ള നടപടികളുമായും മുന്നോട്ടുപോവുകയാണെന്നും അദ്ദേഹം പറഞ്ഞു. സൂവോളജിക്കൽ പാർക്ക് ഓറിയന്‍റേഷൻ സെന്‍ററിൽ നടന്ന ചടങ്ങിൽ പുത്തൂർ ഗ്രാമപഞ്ചായത്ത് പ്രസിഡന്‍റ്് മിനി ഉണ്ണികൃഷ്ണൻ അധ്യക്ഷത വഹിച്ചു. ഒല്ലൂക്കര ബ്ലോക്ക് പഞ്ചായത്ത് പ്രസിഡന്‍റ് കെ.ആർ. രവി മുഖ്യാതിഥിയായി. ചീഫ് ഫോറസ്റ്റ് കൺസർവേറ്റർ ഡോ. ആർ. ആടലരശൻ സ്വാഗതവും തൃശൂർ സുവോളജിക്കൽ പാർക്ക് ഡയറക്ടർ ബി.എൻ. നാഗരാജ് നന്ദിയും പറഞ്ഞു. തൃശൂർ സുവോളജിക്കൽ പാർക്ക് സ്പെഷൽ ഓഫീസർ കെ.ജെ. വർഗീസ് റിപ്പോർട്ട് അവതരിപ്പിച്ചു. ജില്ലാ പഞ്ചായത്തംഗം കെ.വി സജു, പുത്തൂർ ഗ്രാമപഞ്ചായത്ത് വൈസ് പ്രസിഡന്‍റ് അശ്വതി സുനീഷ്, ഒല്ലൂക്കര ബ്ലോക്ക് പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ സിനി പ്രദീപ്‌കുമാർ, ഒല്ലൂക്കര ബ്ലോക്ക് പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ പി.എസ്. ബാബു, പുത്തൂർ ഗ്രാമപഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ നളിനി വിശ്വംഭരൻ, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ പി.എസ്. സജിത്ത്, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ലിബി വർഗീസ്, മൂന്നാം വാർഡ് മെമ്പർ സുജിത അർജുനൻ തുടങ്ങിയവർ സംസാരിച്ചു. ബ്ലോക്ക് - ഗ്രാമപഞ്ചായത്ത് അംഗങ്ങൾ, രാഷ്ട്രീയ പാർട്ടി പ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു.

കന്നാറ്റുപാടം ബ്രിട്ടീഷ് പാലത്തിന് സുരക്ഷാവേലി സ്ഥാപിച്ചു

പാലപ്പിള്ളി: കുറുമാലിപ്പുഴയ്ക്ക് കുറുകെയുള്ള കന്നാറ്റുപാടം ബ്രിട്ടീഷ് പാലത്തിന് സുരക്ഷാ വേലിയായി. വീതി കുറഞ്ഞ പാലത്തിന്‍റെ ഇരുവശങ്ങളിലും 15 അടിയോളം താഴ്ചയും അതിനോട് ചേർന്ന് പുഴയുമാണുള്ളത്. കന്നാറ്റുപാടം സ്കൂളിന് സമീപത്തെ പാലത്തിന് സുരക്ഷാ സംവിധാനം ഇല്ലാത്തത് വലിയ ആശങ്കയായിരുന്നു. നാട്ടുകാരുടെ നിരന്തരമുള്ള ആവശ്യത്തെ തുടർന്നാണ് പാലത്തിന് സുരക്ഷാ വേലി സ്ഥാപിച്ചത്. കൂടാതെ പൊതുപ്രവർത്തകനായ സുരേഷ് ചെമ്മനാടൻ ഒരു വർഷം മുൻപേ ജില്ല കളക്ടർക്ക് നിവേദനവും നൽകിയിരുന്നു. ആവശ്യം ശ്രദ്ധയിൽപ്പെട്ടതോടെ ജില്ലാ പഞ്ചായത്ത് അടിയന്തര യോഗം ചേരുകയും പാലത്തിന് സുരക്ഷാ വേലി സ്ഥാപിക്കാൻ തീരുമാനിക്കുകയുമായിരുന്നു. തുടർന്ന് വരന്തരപ്പിള്ളി ഗ്രാമപഞ്ചായത്ത് എൽഎസ്ജിഡി അധികൃതരെ നിർവഹണം ഏൽപ്പിച്ചു. അതിവേഗം ടെൻഡർ നടപടികളും സുരക്ഷാവേലി സ്ഥാപിക്കലും പൂർത്തിയായി. ഉടൻതന്നെ ഉദ്ഘാടനവും ഉണ്ടാകുമെന്ന് ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ് അറിയിച്ചു. 1921ൽ കുറുമാലി പുഴയ്ക്ക് കുറുകെ പണിത ബ്രിട്ടീഷ് പാലത്തിന് സുരക്ഷ സംവിധാനം ഇല്ലാത്തത് ബസുകൾക്കും മറ്റുവാഹനങ്ങൾക്കും അപകട ഭീഷണിയായിരുന്നു. കാന്നാറ്റുപാടം സ്കൂളിലേക്ക് വിദ്യാർഥികൾ പോകുന്നതും ബ്രിട്ടീഷ് പാലത്തെ ആശ്രയിച്ചാണ്. കോടാലി, വെള്ളിക്കുളങ്ങര, കൊടകര, ചാലക്കുടി, അതിരപ്പിള്ളി ഭാഗങ്ങളിൽനിന്ന് ചിമ്മിനി ഡാമിലേക്ക് വരുന്ന വിനോദ സഞ്ചാരികൾ ആശ്രയിക്കുന്നതും ഈ പാലത്തെയാണ്.

ഭാരതപ്പുഴയോരം കൈയേറുന്നെന്ന് പരാതി

തിരുവില്വാമല: പാമ്പാടി പാമ്പിൻകാവിനു സമീപം ഭാരതപ്പുഴയോരം വേലിയും മതിലും നിർമിച്ച് കൈയേറുന്നതായി പരാതി. തിരുവില്വാമല പഞ്ചായത്തിലെ പാമ്പാടി വില്ലേജിൽ അഞ്ചാം വാർഡ് കണ്ണംകുണ്ട് ചെക്ക് ഡാമിനു സമീപമാണ് സ്വകാര്യവ്യക്തികൾ പുഴയോരവും ചെക്ക് ഡാമിനോടുചേർന്ന ഭാഗവും വളച്ചുകെട്ടി കൈവശപ്പെടുന്നതായി പരാതി ഉയർന്നിരിക്കുന്നത്. ഈ പ്രദേശത്തെ ഒട്ടേറെ കുടുംബങ്ങൾ നിളയുടെ ഈ കടവിനെയാണ് ആശ്രയിക്കുന്നത്. കൃഷിയും കന്നുകാലിവളർത്തലും മീൻപിടിത്തവും ഉപജീവനമാർഗമായവരാണ് പ്രദേശവാസികളിൽ ഏറെയും. കഴിഞ്ഞദിവസം പുഴയോടു ചേർന്ന ഭാഗത്ത് മതിൽ പണിയുന്നത് വാർഡ് മെമ്പർ വിനി ഉണ്ണികൃഷ്ണന്‍റെ നേതൃത്വത്തിൽ നാട്ടുകാർ തടഞ്ഞിരുന്നു. ജനങ്ങളുടെ പ്രതിഷേധത്തെ തുടർന്ന് കുറച്ചു മാറിയാണ് ഇപ്പോൾ നിർമാണ പ്രവർത്തനങ്ങൾ നടക്കുന്നത്. പുഴയിലേക്ക് ഇറങ്ങാനുള്ള വഴി തടസപ്പെട്ടതായി പരാതിക്കാർ പറയുന്നു. അമ്പതോളം കുടുംബങ്ങളാണ് പരാതിയുമായി രംഗത്തുവന്നിട്ടുള്ളത്. തഹസിൽദാർ, ഇറിഗേഷൻ എക്സിക്യൂട്ടീവ് എൻജിനീയർ, ജില്ലാ പട്ടികജാതി വികസന ഓഫീസർ തുടങ്ങിയവർക്ക് കോളനിവാസികൾ പരാതി നൽകിയിട്ടുണ്ട് . എംഎൽഎ യു.ആർ. പ്രദീപിനും പരാതിനൽകുമെന്ന് നാട്ടുകാർ പറഞ്ഞു.

വിദ്യാഭ്യാസ എൻഡോവ്മെന്‍റും ചികിത്സ ധനസഹായവും വിതരണം ചെയ്തു

കൊടുങ്ങല്ലൂർ: പുല്ലൂറ്റ് സർവീസ് സഹകരണ ബാങ്ക് മെമ്പർമാരുടെ മക്കളിൽ എസ്എസ്എൽസി, പ്ലസ് ടു പരീക്ഷകളിൽ ഉന്നതവിജയം നേടിയ വിദ്യാർഥികൾ, വില്ലേജിലെ സ്കൂളുകളിൽനിന്ന് ഏറ്റവും കൂടുതൽ മാർക്കുവാങ്ങി വിജയിച്ചവർ, പ്രൊഫഷണൽ കോഴ്സ് ഉന്നതവിജയം നേടിയവർ എന്നിവർക്ക് വിദ്യാഭ്യാസ എൻഡോവ്മെന്‍റുകളും ചികിത്സാ സഹായത്തിന് അർഹരായവർക്ക് ധനസഹായവും വിതരണം ചെയ്തു. പുല്ലൂറ്റ് എൻഎസ്എസ് ഹാളിൽ നടന്ന "ആദരം 2025 "സമ്മേളനത്തിൽ ബാങ്ക് പ്രസിഡന്‍റ് കെ.ജി. മുരളീധരൻ അധ്യക്ഷത വഹിച്ചു. സമ്മേളനം കൊടുങ്ങല്ലൂർ കാർഷിക ഗ്രാമവികസന ബാങ്ക് പ്രസിഡന്‍റ് ടി.എം. നാസർ ഉദ്ഘാടനം ചെയ്തു. വാർഡ് കൗൺസിലർമാരായ സി. നന്ദകുമാർ, പി.എൻ. വിനയചന്ദ്രൻ, പി.വി. രമണൻ, ഇ.എസ്. സഗീർ എന്നിവർ ആശംസകളർപ്പിച്ചു. ബാങ്ക് ഡയറക്ടർമാർ, ജീവനക്കാർ, എൻഡോവ്മെന്‍റ്് ഏർപ്പെടുത്തിയ സി.ഡി. ബുർഹർ, സജീവൻ കൊല്ലംപറമ്പിൽ, പരാരത്ത് കമലാക്ഷി, ഓമന വിജയൻ എന്നിവർ പങ്കെടുത്തു. വൈസ് പ്രസിഡന്‍റ് സി.ആർ. പമ്പ സ്വാഗതവും സെക്രട്ടറി അനിതകുമാരി നന്ദിയും പറഞ്ഞു.

കാരിക്കടവ് ആദിവാസി ഉന്നതിയില്‍ റോട്ടറി ക്ലബിന്‍റെ ആശ പദ്ധതി

വെള്ളിക്കുളങ്ങര: ലോക ആദിവാസി ദിനത്തോടനുബന്ധിച്ച് അങ്കമാലി റോട്ടറി ക്ലബ്ബിന്‍റെ നേതൃത്വത്തില്‍ ആദിവാസികളുടെ ക്ഷേമത്തിനായി നടപ്പാക്കുന്ന ആശ പ്രോജക്ടിന്‍റെ രണ്ടാംഘട്ട പ്രവര്‍ത്തനങ്ങള്‍ക്ക് മറ്റത്തൂര്‍ പഞ്ചായത്തിലെ കാരിക്കടവ് ഉന്നതിയില്‍ തുടക്കം കുറിച്ചു. ഹൈക്കോടതി ജഡ്ജി പി.എം. മനോജ് ഉദ്ഘാടനം ചെയ്തു. കാരിക്കടവ് ഉന്നതിയില്‍ അങ്കമാലി റോട്ടറി ക്ലബ് പുതുക്കി നിര്‍മിച്ചു നല്‍കിയ വീടിന്‍റെ താക്കോല്‍ വീട്ടമ്മ രാധാമണിക്കു നല്‍കിയാണ് ഉദ്ഘാടനം നിര്‍വഹിച്ചത്. കമ്യൂണിറ്റി ഹാളിലേക്കുള്ള ഇന്‍വെര്‍ട്ടര്‍, എല്‍ഇഡി ലൈറ്റുകള്‍, ഫാനുകള്‍, കുട്ടികള്‍ക്കുള്ള സ്‌പോര്‍ട്‌സ് ബനിയനുകള്‍, ഫുട്‌ബോള്‍, ചെസ് ബോര്‍ഡുകള്‍, കാരംസ് ബോര്‍ഡ്, മൊബൈല്‍ ഫോണ്‍, എഫ്എം റേഡിയോ, അലമാര, മേശ, കസേരകള്‍, ലൈബ്രറി പുസ്തകങ്ങള്‍ തുടങ്ങിയവയും വിതരണം ചെയ്തു. റോട്ടറി ക്ലബ് പ്രസിഡന്‍റ് അഡ്വ. കിറോഷ് രാജന്‍ പൊന്നമ്പില്‍ അധ്യക്ഷത വഹിച്ചു. പ്രോജക്ട് കോ-ഓഡിനേറ്റര്‍ ഇ.പി. ജയചന്ദ്രന്‍, വെള്ളിക്കുള ങ്ങര റേഞ്ച് ഫോറസ്റ്റ് ഓഫീസര്‍ കെ.എസ്. ഷിനോജ്, ട്രൈബല്‍ വകുപ്പ് ഉദ്യോഗസ്ഥ സവിത ജോയ്, ഊര് മൂപ്പന്‍ ചന്ദ്രന്‍ എന്നിവര്‍ പ്രസംഗിച്ചു.

നഗരസഭ കുടുംബശ്രീ വാര്‍ഷികാഘോഷം

ഇരിങ്ങാലക്കുട: കുടുംബശ്രീ വന്നതിനുശേഷം സ്ത്രീകള്‍ക്ക് അടുക്കളയില്‍ നിന്ന് അരങ്ങത്തേക്ക് കടന്നുവരാന്‍ സാധിച്ചുവെന്ന് മന്ത്രി ഡോ. ആര്‍. ബിന്ദു. ഇരിങ്ങാലക്കുട നഗരസഭ കുടുംബശ്രീ വാര്‍ഷികാഘോഷം ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. തന്‍റെ കഴിവുകള്‍ സമൂഹത്തിനുമുമ്പില്‍ കൊണ്ടുവരാനും സന്തോഷപരമായ നിമിഷങ്ങള്‍ നേടിയെടുക്കാനും സ്ത്രീശക്തീകരണത്തിനും കുടുംബശ്രീയിലൂടെ സ്ത്രീകള്‍ക്കു സാധിച്ചു. ദാരിദ്ര്യലഘൂകരണവും പ്രാദേശിക സാമ്പത്തിക വികസനവും കുടുംബശ്രീയുടെ ലക്ഷ്യമാണെന്ന് മന്ത്രി കൂട്ടിചേര്‍ത്തു. അരങ്ങ് മത്സര വിജയികള്‍ക്കുള്ള സമ്മാനദാനവും മന്ത്രി നിര്‍വഹിച്ചു. ഇരിങ്ങാലക്കുട ടൗണ്‍ ഹാളില്‍ നടന്ന ചടങ്ങില്‍ മുനിസിപ്പല്‍ ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷത വഹിച്ചു. സെക്രട്ടറി വി. സജിത റിപ്പോര്‍ട്ട് അവതരിപ്പിച്ചു. സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍മാരായ സി.സി. ഷിബിന്‍, ഫെനി എബിന്‍ വെള്ളാനിക്കാരന്‍, അംബിക പള്ളിപ്പുറത്ത്, പാര്‍ലമെന്‍ററി പാര്‍ട്ടി ലീഡര്‍മാരായ സോണിയ ഗിരി, അല്‍ഫോണ്‍സ തോമസ്, കുടുംബശ്രീ ജില്ല പ്രോഗ്രാം മാനേജര്‍ റെജി തോമസ്, സിഡിഎസ് 1 ചെയര്‍പേഴ്‌സണ്‍ പി.കെ. പുഷ്പാവതി തുടങ്ങിയവര്‍ പ്രസംഗിച്ചു.

കളഞ്ഞുകിട്ടിയ പണം ഉടമയ്ക്കു നൽകി എൻജിനീയറിംഗ് വിദ്യാർഥി

മേലൂർ: റോഡിൽ കളഞ്ഞുകിട്ടിയ 52,300 രൂപ ഉടമയെ കണ്ടെത്തി തിരിച്ചുനൽകി എൻജിനീയറിംഗ് വിദ്യാർഥി. മേലൂർ പൂലാനി പുത്തൻവീട്ടിൽ മദനൻ മകൻ അതുലിനാണ് പണം വഴിയിൽനിന്നും കളഞ്ഞുകിട്ടിയത്. തുടർന്ന് വാർഡ് മെമ്പർ അംബിക ബാബുവിന് പണം ഏൽപ്പിക്കുകയായിരുന്നു. ചാലക്കുടിയിലെ മാടവന സ്റ്റോഴ്സ് ഉടമ ജോർജ് മാടവനയുടെ മൊത്തവ്യാപാര കേന്ദ്രത്തിൽ നിന്നും കനകമല, കുറ്റിച്ചിറ ഭാഗങ്ങളിലെ കടകളിലേക്ക് വിതരണത്തിനു പോയ മിനി വാനിലെ ഡ്രൈവറുടെയും സഹായിയുടെയും കൈ യ്യിൽനിന്നാണ് പണം നഷ്ടപ്പെട്ടത്. പനമ്പിള്ളി കോളജ് പരിസരത്തെ കടയിൽ നിന്നും പണം വാങ്ങി ബാഗിലാക്കി വാഹനത്തിനു പിന്നിലേക്ക് ഇടുന്നതിനിടയിലാണു ലക്ഷ്യംതെറ്റി റോഡിലേക്കു വീണത്. തുടർന്ന് പണം നഷ്ടപെട്ട വിവരം ചാലക്കുടി, കൊടകര പോ ലീസ് സ്റ്റേഷനിലേക്ക് മർച്ചന്‍റ്്സ് അസോസിയേഷൻ പ്രസിഡന്‍റ്് ജോയ് മൂത്തേടൻ അറിയിക്കുകയായിരുന്നു. ഉടമയെ കണ്ടെത്തിയശേഷം മേലൂർ പഞ്ചായത്ത് മെമ്പർ അംബിക ബാബു, സിഐ എം.കെ. സജീവൻ, മർച്ചന്‍റ് അസോസിയേഷൻ പ്രസിഡന്‍റ് ജോയ് മൂത്തേടൻ എന്നിവരുടെ സാന്നിധ്യത്തിൽ അതുൽ പണം ഉടമയ്ക്കു കൈമാറി. വഴിയിൽനിന്നുംകിട്ടിയ സ്വർണമാല ഉടമയ്ക്കു കൈമാറി ടോറസ് ഡ്രൈവർ മേലൂർ: സാമ്പത്തിക പരാധീനതകൾക്കിടയിലും പ്രാരാബ്ധങ്ങൾക്കിടിയിലുംപെട്ട് വലയുന്നതിനിടെ വഴിയിൽനിന്നും കളഞ്ഞുകിട്ടിയ സ്വർണമാല ഉടമയ്ക്കു കൈമാറി ടോറസ് ലോ റി ഡ്രൈവർ മാതൃകയായി. മേലൂർ ജംഗ്ഷനിൽനിന്നും പുഷ്പഗിരി റോഡിലുള്ള കോ ഴിക്കടയ്ക്കുസമീപത്തുനിന്നാണ് മേലൂർ കാലടി പെരുംകുളങ്ങര ശ്രീകുമാർ എന്ന ലാോറി ഡ്രൈവർക്ക് സ്വർണമാല കളഞ്ഞുകിട്ടിയത്. തുടർന്ന് കാലടി വാർഡ് മെമ്പർ പി.എ. സാബുവിനെ മാല ഏൽപ്പിച്ചു. വാർട്സ് ആപ്പ് അടക്കമുള്ള സാമൂഹ്യമാധ്യമങ്ങളിലൂടെ വിവരം അറിയിച്ചതിനു‌പിന്നാലെ മേലൂർ പള്ളിയിലും ഇന്നലെ കുർബാനമധ്യേ വിളിച്ചുപറഞ്ഞു. തുടർന്നാണ് മാല തെക്കൻ ജോർജ് മകൾ ജെസ്നയുടേതാണെന്നു തിരിച്ചറിഞ്ഞത്. വാർഡ് മെമ്പറുടെ സാന്നിധ്യത്തിൽ ശ്രീകുമാർ മാല ഉടമയായ ജെസ്നക്കു കൈമാറി.

കൊരട്ടിമുത്തിയുടെ തിരുനാൾ: ആഘോഷക്കമ്മിറ്റി രൂപീകരിച്ചു

കൊരട്ടി: ഒക്ടോബറിൽ നടക്കുന്ന കൊരട്ടിമുത്തിയുടെ തിരുനാൾ ക്രമീകരണങ്ങൾ കുറ്റമറ്റതാക്കുന്നതിനുവേണ്ടി ആഘോഷക്കമ്മിറ്റി രൂപീകരിച്ചു. ജനറൽ കൺവീനറായി ജിഷോ ജോസ് മുള്ളക്കരയെയും ജോയിന്‍റ് കൺവീനറായി സുനിൽ ജോസ് ഗോപുരനെയും തെരഞ്ഞെടുത്തു. സബ് കമ്മിറ്റി ലീഡർമാരായി ബാബു മാറ്റത്തിൽ (പള്ളിയകം), പോളി വെള്ളാട്ടുപറമ്പൻ (പൂവൻകുല), തോമസ് വാരാണാട്ട് (രൂപപ്പുര), ബാബു മഞ്ഞളി (പ്രദക്ഷിണം), ബിനോയ്‌ മാളിയേക്കൽ (തുലാഭാരം), സാം സൺ ചിറ്റിലപ്പിള്ളി (ഭക്ഷണം), ടിന്‍റോ ആന്‍റു (വെടിക്കെട്ട്), റിനി ഷാജു (അൾത്താര), ജോളി മാളിയേക്കൽ (ദീപാലങ്കാരം), അജി ജോർജ് ചെരപ്പറമ്പൻ(കച്ചവടം), ജോജോ പയ്യപ്പിള്ളി (പാർക്കിംഗ്) ബിൻസി ഡെന്നി (ഫസ്റ്റ് എയ്ഡ്), ജോയ്സൺ എടത്തിപ്പറമ്പൻ ( പൊൻ-വെള്ളി) അലക്സ്‌ ജിമ്മി വെളിയത്ത് (പബ്ലിസിറ്റി), വി.എസ്. സോഹൻ (സെക്യൂരിറ്റി) എന്നിവരെയും തെരഞ്ഞെടുത്തു.

നഗരസഭയിലെ 11 അങ്കണവാടികള്‍ ഇപ്പോഴും വാടകക്കെട്ടിടത്തില്‍

ഇരിങ്ങാലക്കുട: ഈ കുഞ്ഞുമക്കളെയുംകൊണ്ട് ഞങ്ങളെവിടെ പോകാനാണ്..? ഇരിങ്ങാലക്കുടയില്‍ സ്വന്തമായി സ്ഥലമില്ലാത്ത അങ്കണവാടിയിലെ ജീവനക്കാര്‍ ചോദിക്കുന്നു. നഗരസഭയില്‍ 41 വാര്‍ഡുകളിലായി 60 അങ്കണവാടികളാണുള്ളത്. എന്നാല്‍, ഇതില്‍ സ്വന്തമായി സ്ഥലവും കെട്ടിടവുമില്ലാതെ വാടകക്കെട്ടിടത്തില്‍ പ്രവര്‍ത്തിക്കുന്നത് 11 അങ്കണവാടികളാണ്. ഇവയില്‍ പലതും ഒറ്റമുറി കെട്ടിടത്തിലോ, തകരഷീറ്റിട്ട കെട്ടിടത്തിലോ ആണ്. ബൃന്ദ, വിജയ്, നൈവേദ്യ, കേരളപ്പിറവി സുവര്‍ണ ജൂബിലി, സ്‌നേഹതീരം, ചൈതന്യ, നവജ്യോതി, ഗുരു കുലം, കാരുകുളങ്ങര, ശാന്തിനഗര്‍, സിവില്‍ സ്റ്റേഷന്‍ എന്നീ അങ്കണവാടികളാണു വാടകക്കെട്ടിടത്തില്‍ പ്രവത്തിക്കുന്നത്. എപ്പോള്‍വേണമെങ്കിലും ഒഴിഞ്ഞുപോകേണ്ടിവരുമെന്ന ആശങ്കയിലാണ് ഇവിടെ പഠനം. എല്ലാ അങ്കണവാടികള്‍ക്കും സ്വന്തമായി കെട്ടിടം നിര്‍മിച്ചുനല്‍കുന്ന പദ്ധതിക്കു സര്‍ക്കാര്‍ തുടക്കമിട്ടിട്ടുണ്ടെങ്കിലും സ്ഥലം ലഭ്യമാക്കാന്‍ കഴിയാത്തതാണു തിരിച്ചടിയാകുന്നത്. വകുപ്പ് അനുവദിക്കുന്ന ചെറിയ തുകയ്ക്ക് സ്ഥലം കണ്ടെത്താന്‍ നഗരസഭയ്ക്ക് കഴിയുന്നില്ല. മൂന്നു സെന്‍റ് ലഭിച്ചാല്‍ മാത്രമേ അവശ്യസൗകര്യങ്ങളോടെ അങ്കണവാടിക്കെട്ടിടം പണിയാനാകൂ. ഐസിഡിഎസിന്‍റേയോ തദ്ദേശസ്ഥാപനത്തിന്‍റേയോ എംഎല്‍എയുടെയോ എംപിയുടെയോ വികസനപദ്ധതികളില്‍ നിന്നുള്ള തുക കെട്ടിടത്തിന്‍റെ നിര്‍മാണത്തിനു കണ്ടെത്താനാകും. കുഞ്ഞുങ്ങളുടെ ആരോഗ്യപരിപാലനം, പ്രതിരോധ കുത്തിവയ്പ്പുകള്‍, പോഷകാഹാരം ഉറപ്പാക്കല്‍, പ്രാഥമിക ബാലപാഠം, അമ്മമാരുടെയും ഗര്‍ഭിണികളുടെയും ക്ഷേമം തുടങ്ങിയ പ്രവര്‍ത്തനങ്ങളാണ് അങ്കണവാടികള്‍ നടത്തുന്നത്. ഇതിനാവശ്യമായ കെട്ടിടം, കളിസ്ഥലം, പ്രാഥമികസൗകര്യം, സുരക്ഷിതമായ ചുറ്റുപാട് എന്നിവ പല വാടക കെട്ടിടങ്ങളിലും ഉണ്ടാകാറില്ല. മഴ പെയ്യുന്ന സമയത്ത് കുട്ടികളെ പുറത്തിറക്കിക്കൊണ്ടുപോകുക വലിയ പ്രയാസമാണ്. അടിസ്ഥാന സൗകര്യങ്ങളില്ലാത്തതിനാല്‍ ഇത്തരം അങ്കണവാടികളില്‍ ഓരോ വര്‍ഷവും കുട്ടികളുടെ എണ്ണവും കുറയുകയാണ്. എട്ടാം വാര്‍ഡിലെ ലക്ഷ്മി, 34-ാം വാര്‍ഡിലെ ഇ.കെ. നായനാര്‍ സ്മാരകം എന്നീ അങ്കണവാടികളില്‍ ആണ് ഏറ്റവും കൂടുതല്‍ കുട്ടികള്‍ പഠിക്കുന്നത്. 18 കുട്ടികള്‍ വീതമാണ് ഇവിടെയുള്ളത്. ഏറ്റവും കുറവ് കുട്ടികളുള്ളത് വാര്‍ഡിലെ സുവര്‍ണദീപം അങ്കണവാടിയിൽ - നാലുപേര്‍. കഴിഞ്ഞ അഞ്ചു വര്‍ഷത്തിനുള്ളില്‍ 24 അങ്കണവാടികള്‍ നവീകരിച്ചു. എന്നാല്‍ നഗരസഭയില്‍ ഒരു അങ്കണവാടിപോലും സ്മാര്‍ട്ടല്ല.

നാലമ്പല ദര്‍ശനത്തിന് ആയിരങ്ങള്‍, ഭക്തരുടെനിര കിലോമീറ്ററോളം നീണ്ടു

ഇരിങ്ങാലക്കുട: കൂടല്‍മാണിക്യ ക്ഷേത്രത്തിലും അരിപ്പാലം പായമ്മല്‍ ക്ഷേത്രത്തിലും നാലമ്പല ദര്‍ശനത്തിനു വന്‍തിരക്ക്. ഇന്നലെ കര്‍ക്കടക മാസത്തിലെ അവസാന ഞായറായിരുന്നതിനാല്‍ വന്‍ ഭക്തജനത്തിരക്കായിരുന്നു. ദര്‍ശനത്തിനായി കാത്തുനിന്ന ഭക്തജനങ്ങളുടെ നിര കിലോമീറ്ററോളം നീണ്ടു. മണിക്കൂറുകളോളം കാത്തുനിന്നാണ് കൂടല്‍മാണിക്യത്തിലും പായമ്മലിലും ദര്‍ശനത്തിനായി സാധിച്ചത്. ദര്‍ശനത്തിനായി ഭക്തരുടെ വരി എംജി റോഡ് വരെ നീണ്ടപ്പോള്‍ തിരക്ക് നിയന്ത്രിക്കാന്‍ പോലീസും വോളന്‍റിയര്‍മാരും എറെ ബുദ്ധിമുട്ടി. പുലര്‍ച്ചെ മുതല്‍ ഭക്തജനങ്ങള്‍ എത്തിക്കൊണ്ടിരുന്നു. പാര്‍ക്കിംഗിനു സൗകര്യം ഒരുക്കിയിരുന്നുവെങ്കിലും പല ഡ്രൈവര്‍മാരും സ്ഥലമറിയാതെ വാഹനങ്ങളുമായി കറങ്ങിയതു ഗതാഗതക്കുരുക്കിനിടയാക്കി. കൂടല്‍മാണിക്യം ക്ഷേത്രപരിസരത്തുള്ള റോഡുകളിലും ഗതാഗതം സ്തംഭിച്ചു. തീര്‍ഥാടകരെയുംകൊണ്ട് എത്തിയ ബസുകള്‍ അടക്കമുള്ള വാഹനങ്ങള്‍ മെയിന്‍ റോഡിലും നിറഞ്ഞതോടെ നഗരം ഗതാഗതക്കുരുക്കിലായി. പതിനായിരത്തിലധികം ഭക്തര്‍ക്ക് അന്നദാനം നല്‍കിയതായും കര്‍ണാടക, തമിഴ്‌നാട് എന്നീ സംസ്ഥാനങ്ങളില്‍നിന്ന് തീര്‍ഥാടകര്‍ എത്തിയതായും ദേവസ്വം അധികൃതര്‍ അറിയിച്ചു. 8000 ത്തോളം പേര്‍ക്ക് പായമ്മല്‍ ക്ഷേത്രത്തില്‍ അന്നദാനം നല്‍കി. തീര്‍ഥാടകരുടെ ക്യൂ അയോധ്യഹാള്‍വരെ നീണ്ടു. ഹരിപ്പാട്, പത്തനംതിട്ട, കോട്ടയം, വയനാട്, തലശേരി, കണ്ണൂര്‍, തൃശൂര്‍, ഗുരുവായൂര്‍, ഇരിങ്ങാലക്കുട എന്നീ കേന്ദ്രങ്ങളില്‍ നിന്നായി 12 സ്‌പെഷല്‍ സര്‍വീസുകള്‍ കെഎസ്ആര്‍ടിസി നടത്തി. ഇതിനു പുറമേ ടൂറിസം വകുപ്പിന്‍റെ രണ്ടു ബസുകളും കൊച്ചിന്‍ ദേവസ്വം ബോര്‍ഡിന്‍റെ രണ്ടുബസുകളും സര്‍വീസ് നടത്തി.

പനി ബാധിച്ച് വിദ്യാർഥി മരിച്ചു

പുത്തൻപീടിക: പനി ബാധിച്ച് ബിഫാം വിദ്യാർഥി മരിച്ചു. പുത്തൻപീടിക സെന്‍റ് ആന്‍റണീസ് പള്ളി ഗ്രൗണ്ടിനു സമീപം തേയ്ക്കാനത്ത് ബിജുവിന്‍റെ മകൾ അലക്സിയ(19) ആണ് മരിച്ചത്. പനി ബാധിച്ചതിനെ തുടർന്ന് അലക്സിയയെ തൃശൂരിലെ ആശുപത്രിയിൽ പ്രവേശിപ്പിക്കുകയായിരുന്നു. ചികിത്സയിലിരിക്കെ മരിച്ചു. ചാലക്കുടി സെന്‍റ് ജെയിംസ് അക്കാദമിയിലെ ബിഫാം വിദ്യാർഥിയാണ്. സംസ്കാരം പിന്നീട് പുത്തൻപീടിക സെന്‍റ് ആന്‍റണീസ് പള്ളിയിൽ. മാതാവ്: സവിത. സഹോദരി: അലോണ.

ആമ്പല്ലൂരിൽ സര്‍വീസ് റോഡ് കീറി കാനപണി, കുരുക്ക് കടുപ്പം

ആമ്പല്ലൂർ: ദേശീയപാതയിൽ അടിപ്പാതയുടെ പണി നടക്കുന്ന ആമ്പല്ലൂരിൽ സര്‍വീസ് റോഡ് കീറി കാനപണി തുടങ്ങിയതോടെ അനിയന്ത്രിതമായി ഗതാഗതക്കുരുക്ക്. ആമ്പല്ലൂർ സെന്‍ററിലെ വെള്ളക്കെട്ട് ഒഴിവാക്കാനാണ് നിലവിലെ കാന പൊളിച്ചുപണിയുന്നത്. തൃശൂര്‍ - ചാലക്കുടി ഭാഗത്തേക്കുള്ള സര്‍വീസ് റോഡിലാണ് കാനപണി. വെള്ളിയാഴ്ച വൈകീട്ടാണ് പണി തുടങ്ങിയത്. പണി ആരംഭിച്ചതോടെ റോഡിന്‍റെ വീതി കുറയുകയും ഗതാഗതക്കുരുക്ക് രൂക്ഷമാവുകയുമായിരുന്നു. രണ്ടും മൂന്നും വരികളിലായി പോയിരുന്ന വാഹനങ്ങള്‍ ഒറ്റവരിയാക്കി വിട്ടുതുടങ്ങിയതോടെ കുരുക്കു മുറുകി. മണിക്കൂറുകള്‍ എടുത്താണ് വാഹനങ്ങള്‍ കടന്നുപോയിരുന്നത്. വരന്തരപ്പിള്ളി റോഡിൽനിന്നു വരുന്ന വാഹനങ്ങൾകൂടിയായതോടെ ഗതാഗതക്കുരുക്ക് നിയന്ത്രണാതീതമായി. ആംബുലന്‍സ് ഉൾപ്പെടെ അവശ്യസർവീസുകൾ തിരക്കിൽ കുടുങ്ങിക്കിടപ്പായിരുന്നു. അടിപ്പാതയുടെ പണിനടക്കുന്ന സാഹചര്യത്തില്‍ മഴ കൂടി പെയ്തതോടെ ആമ്പല്ലൂര്‍ പരിസരങ്ങളില്‍ വെള്ളക്കെട്ട് രൂക്ഷമായിരുന്നു. തുടർന്നാണ് സര്‍വീസ് റോഡിലെ കാന പൊളിച്ചുപണിയാൻ തുടങ്ങിയത്. കെഎസ്ആര്‍ടിസി ബസും കാറും കൂട്ടിയിടിച്ച് അപകടം പാലിയേക്കര: മണലി പാലത്തിനു സമീപം കെഎസ്ആര്‍ടിസി ബസും കാറും കൂട്ടിയിടിച്ച് അപ കടം. ഇന്നലെ രാവിലെ ഒമ്പതോടെയായിരുന്നു അപകടം. കോട്ടയത്തുനിന്നും വരികയായിരുന്ന കാറും കെഎസ്ആര്‍ടിസി ബസുമാണ് അപകടത്തില്‍ പെട്ടത്. അപകടത്തെതുടര്‍ന്ന് വാഹനങ്ങളുടെ നിര പുതുക്കാട് വരെ എത്തിയിരുന്നു. രണ്ടുമണിക്കൂറോളം ദേശീയപാതയില്‍ ഗതാഗതം സ്തംഭിച്ചു.

പത്തുകോടിയിലധികം രൂപയുടെ തട്ടിപ്പ്; മാള സഹ. ബാങ്കിലെ 21 പേർ പ്രതികൾ

മാള: പത്തുകോടിയിലേറെ രൂപയുടെ തട്ടിപ്പുനടന്നെന്ന കണ്ടെത്തലിൽ മാള സർവീസ് സഹകരണ ബാങ്കിന്‍റെ മുൻ പ്രസിഡന്‍റും ഡയറക്ടർ ബോർഡിലെ 20 മെമ്പർമാരും ഉൾപ്പെടെ 21 പേർക്കെതിരേ പോലീസ് കേസെടുത്തു. സഹകരണ സംഘം ജോയിന്‍റ് രജിസ്ട്രാറുടെ (ജനറൽ) പരാതിയിലാണ് മാള പോലീസ് സ്റ്റേഷനിൽ ഇന്നലെ കേസ് രജിസ്റ്റർ ചെയ്തത്. 2006 ഒക്ടോബർ ഏഴുമുതൽ 2024 ജനുവരി 21 വരെയുള്ള സമയത്താണ് തട്ടിപ്പുനടന്നത്. പല ദിവസങ്ങളിലായി ഭരണസമിതി അംഗങ്ങൾ എന്ന നിലയിൽ അധികാരദുർവിനിയോഗം നടത്തി വഴിയില്ലാത്തതും നിലമടക്കം വിലയില്ലാത്തതുമായ ഭൂമികൾ ബാങ്കിൽ പണയപ്പെടുത്തി 10,07,69,991 രൂപ വായ്പയായി വാങ്ങി നാളിതുവരെ തിരിച്ചടയ്ക്കാതെ തട്ടിപ്പ് നടത്തിയെന്നാണ് ആരോപണം. മാള സർവീസ് കോഓപ്പറേറ്റീവ് ബാങ്കിലെ മുൻ പ്രസിഡന്‍റ് വലിയപറമ്പ് അതിയാരത്ത് എ.ആർ. രാധാകൃഷ്ണൻ, ഡയറക്ടർ ബോർഡിലെ മെമ്പർമാരായിരുന്ന അബ്ദുള്ളക്കുട്ടി, ബിന്ദു പ്രദീപ്, ജയ്സൺ വർഗീസ്, ജിമ്മി ജോയ്, ജോഷി പെരേപ്പാടൻ, ടി.പി. കൃഷ്ണൻകുട്ടി, നിയാസ്, പി.സി. ഗോപി, പി.കെ. ഗോപി, പോൾസൺ ഓളാട്ടുപുറം, പ്രീജ ഉണ്ണികൃഷ്ണൻ, ഷിന്‍റോ എടാട്ടുകാരൻ, സിന്ധു അശോകൻ, തോമസ് പഞ്ഞിക്കാരൻ, വിജയ കുറുപ്പ്, വിത്സൻ കാഞ്ഞൂത്തറ, ബൈജു വാണിയംപള്ളി, പി.ഐ. ജോർജ്, എം.ജെ. ജോയ്, സെൻസൻ എന്നീ 21 പേരെയാണ് പ്രതിപ്പട്ടികയിൽ ചേർത്തിട്ടുള്ളത്. ഇരിങ്ങാലക്കുട ഡിവൈഎസ്പി കെ.ജി. സുരേഷ്, മാള ഇൻസ്പെക്ടർ വി. സജിൻ ശശി എന്നിവരുടെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്.

കേരളത്തിലേക്ക് സ്പിരിറ്റൊഴുകും; ജാഗ്രതയിൽ എക്സൈസും പോലീസും

തൃശൂർ: ഓണക്കാലത്തു ലഹരിപിടിപ്പിക്കാൻ കേരളത്തിലേക്കു വൻതോതിൽ സ്പിരിറ്റൊഴുകുമെന്നു സൂചന. നിരീക്ഷണവും പരിശോധനകളും ശക്തമാക്കി എക്സൈസും പോലീസും. കൊടകരയിൽ ഇന്നലെ പിടികൂടിയ 2700 ലിറ്ററിലധികം സ്പിരിറ്റ് ഇത്തരത്തിൽ ഓണം കൊഴുപ്പിക്കാനായി കൊണ്ടുവന്നതാണ്. കേരളത്തിന്‍റെ പല ഭാഗങ്ങളിലേക്കും വൻതോതിൽ സ്പിരിറ്റ് ഓണക്കാലത്ത് എത്തുമെന്നാണ് എക്സൈസിനു കിട്ടിയിട്ടുള്ള വിവരം. അതുകൊണ്ടുതന്നെ സംസ്ഥാനത്തെന്പാടും എക്സൈസ് വാഹനപരിശോധനകളും പതിവു റെയ്ഡുകളും കർശനമാക്കിയിട്ടുണ്ട്. അന്യസംസ്ഥാനങ്ങളിൽനിന്നുതന്നെയാണ് പ്രധാനമായും സ്പിരിറ്റ് എത്തുന്നത്. ഓണക്കാലത്തു വൻതോതിൽ വ്യാജമദ്യ ഉത്പാദനവും വിതരണവും ലക്ഷ്യമിട്ടാണ് സ്പിരിറ്റ് കടത്ത് നടത്തുന്നത്. ബംഗളുരുവിൽനിന്നുതന്നെയാണ് വൻതോതിൽ സ്പിരിറ്റെത്തുന്നതെന്നാണ് വിവരം. വൻതോതിൽ എത്തിക്കുന്ന സ്പിരിറ്റ് എക്സൈസിന്‍റെയോ പോലീസിന്‍റെയോ കണ്ണിൽപെടാത്ത സ്ഥലത്തെ ഗോഡൗണുകളിൽ സൂക്ഷിച്ച് ആവശ്യക്കാർക്കു വേണ്ട അളവിൽ എത്തിച്ചുകൊടുക്കുന്ന രീതിയാണുള്ളത്. ബംഗളുരുവിൽനിന്നും മറ്റും സ്പിരിറ്റ് വാങ്ങുന്പോൾ മുഴുവൻ തുകയും നൽകണമെന്നുള്ളതുകൊണ്ട് കേരളത്തിൽനിന്നു കൈനിറയെ പണവുമായാണ് സ്പിരിറ്റ് മാഫിയാ സംഘങ്ങൾ അതിർത്തി കടക്കുക. സ്പിരിറ്റ് കടത്തിനു മണി പന്പിംഗ് നടത്താൻ വന്പൻമാരും രംഗത്തുണ്ട്.

ഭാര്യക്കു ക്രൂരമർദനം; സിപിഎം നേതാവിനെതിരേ കേസ്

എരുമപ്പെട്ടി: ഭാര്യയെ മർദിച്ച സംഭവത്തിൽ കടങ്ങോട് ഗ്രാമപഞ്ചായത്ത് ആദൂർ വാർഡ് മെമ്പറും സിപിഎം നേതാവുമായ പി.എം. മുഹമ്മദുകുട്ടിക്കെതിരേ പോലീസ് കേസെടുത്തു. ശാരീരികമായും മാനസികമായും തന്നെ നിരന്തരം പീഡിപ്പിക്കുന്നെന്ന ഭാര്യ നബീസയുടെ പരാതിയിൽ ഗാർഹികപീഡനം ഉൾപ്പടെയുള്ള വകുപ്പ് ചേർത്താണ് എരുമപ്പെട്ടി പോലീസ് കേസെടുത്തത്. സംഭവത്തെതുടർന്ന് സിപിഎം ആദൂർ ബ്രാഞ്ച് സെക്രട്ടറിയായിരുന്ന മുഹമ്മദുകുട്ടിയെ തൽസ്ഥാനത്തുനിന്ന് ഒഴിവാക്കി. പാർട്ടിയിൽനിന്നു സസ്പെൻഡ് ചെയ്തിട്ടുമുണ്ട്. ജൂലൈ 31-നാണ് കേസിനാസ്പദമായ സംഭവം. ആദൂരിൽ പ്രവർത്തിക്കുന്ന സഹകരണ ബാങ്കിലെ താത്കാലിക സ്വീപ്പറായിരുന്നു നബീസ. ജോലിക്കു പോകുന്നതിനിടയിൽ റോഡിൽവച്ചാണ് മുഹമ്മദുകുട്ടി മർദിച്ചത്. കഴിഞ്ഞ ഫെബ്രുവരി 14 ന് ഇത്തരത്തിൽ മർദിച്ച് വീട്ടിൽനിന്ന് ഇറക്കിവിട്ടതിനാൽ ബന്ധുവിന്‍റെ വീട്ടിലാണ് ഇപ്പോൾ താമസിക്കുന്നത്. ഇവിടെനിന്ന് ജോലിക്കു വരുമ്പോഴാണ് വിജനമായ സ്ഥലത്തുവച്ച് നബീസയെ ക്രൂരമായി മർദിച്ചത്. നബീസയുടെ ശരീരത്തിന്‍റെ പല ഭാഗങ്ങളിലും മുറിവുകളുണ്ടായിട്ടുണ്ട്. നെഞ്ചിലും വാരിയെല്ലിലും ചവിട്ടിയതിനെതുടർന്ന് ശ്വാസതടസവും അനുഭവപ്പെടുന്നുണ്ടെന്നു പറയുന്നു. മുഹമ്മദുകുട്ടിയുടെ ആദ്യഭാര്യ മരിച്ചതിനെതുടർന്ന് 2017 ലാണ് ഒറ്റപ്പാലം സ്വദേശിയായ നബീസയെ വിവാഹംചെയ്തത്. നബീസയുടെ ആദ്യവിവാഹമാണ്. അന്നു നബീസയ്ക്കു 47 വയസും മുഹമ്മദ്കുട്ടിക്ക് 65 വയസുമായിരുന്നു പ്രായം. വിവാഹം കഴിഞ്ഞു രണ്ടുമാസം പിന്നിട്ടപ്പോൾതന്നെ ഭർത്താവ് ദേഹോപദ്രവം തുടങ്ങിയെന്നു നബീസ പറയുന്നു. വിവാഹമോചനം നടത്തി പിരിഞ്ഞുപോകണമെന്നും അല്ലെങ്കിൽ കൊന്നു തോട്ടിൽ തള്ളുമെന്നു നിരന്തരം ഭീഷണിപ്പെടുത്തിയിരുന്നുവെന്നും നബീസ പരാതിയിൽ പറഞ്ഞു. പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

സൗജന്യപദ്ധതികളുമായി അമല ഗ്രാമപദ്ധതി

തൃശൂർ: അമല ഗ്രാമപദ്ധതികളുടെ രണ്ടാംവാർഷികത്തോടനുബന്ധിച്ച് അടാട്ട്, കൈപ്പറമ്പ്, വേലൂർ, തോളൂർ, എരുമപ്പെട്ടി പഞ്ചായത്തുകളിൽ നടപ്പാക്കുന്ന 40 ലക്ഷം രൂപയുടെ സൗജന്യ ആരോഗ്യപദ്ധതി രേഖകളുടെ കൈമാറ്റം സേവ്യർ ചിറ്റിലപ്പിള്ളി എംഎൽഎ നിർവഹിച്ചു. അമല മെഡിക്കൽ കോളജ് ഡയറക്ടർ ഫാ. ജൂലിയസ് അറയ്ക്കൽ, ജോയിന്‍റ് ഡയറക്ടർമാരായ ഫാ. ഡെൽജോ പുത്തൂർ, ഫാ. ഷിബു പുത്തൻപുരയ്ക്കൽ, അസോസിയേറ്റ് ഡയറക്ടർ ഫാ. ആന്‍റണി മണ്ണുമ്മൽ, പഞ്ചായത്ത് പ്രസിഡന്‍റുമാരായ വസന്ത് ലാൽ, ടി.ആർ. ഷോബി, വൈസ് പ്രസിഡന്‍റുമാരായ ലില്ലി ജോസ്, ഉഷ, ഡോ.സി.എം. ശ്രുതി, ജനറൽ മാനേജർ ബോർജിയോ ലൂയിസ് തുടങ്ങിയവർ പങ്കെടുത്തു. മികച്ച പഞ്ചായത്ത്, ആശാവർക്കർ യൂണിറ്റ്, തൊഴിലുറപ്പ് യൂണിറ്റ്, പഞ്ചായത്ത് അടിസ്ഥാനത്തിൽ ഡെങ്കുദിനാചരണ ക്വിസ് മത്സരവിജയികൾ എന്നിവർക്ക് അവാർഡുകൾ നൽകി.

എരുമപ്പെട്ടി പഞ്ചായത്ത് പ്രസിഡന്‍റ് എസ്. ബസന്ത്‌ലാൽ ജില്ലയിലെ മികച്ച പഞ്ചായത്ത് പ്രസിഡന്‍റ്

വടക്കാഞ്ചേരി: എരുമപ്പെട്ടി പഞ്ചായത്ത് പ്രസിഡന്‍റ് എസ്. ബസന്ത്‌ലാൽ ജില്ലയിലെ മികച്ച പഞ്ചായത്ത് പ്രസിഡന്‍റ്. കേരള യൂത്ത്ഗൈഡൻസ് മൂവ്മെന്‍റിന്‍റെ 2025ലെ പുരസ്കാരമാണ് എസ്. ബസന്ത്‌ലാലിനു നൽകുന്നതെന്ന് ഭാരവാഹികൾ പത്രസമ്മേളനത്തിൽ പറഞ്ഞു. 25,000 രൂപയും ഫലകവും അടങ്ങുന്നതാണ് അവാർഡ്. ഡോ.രാജൻ വർഗീസ്, പ്രഫ. എം.കെ. രാമചന്ദ്രൻ, ജെ. ഉഷ എന്നിവരടങ്ങിയ ജൂറിയാണ് അവാർഡ് നിർണയിച്ചത്. ജനപ്രതിനിധി എന്ന നിലയിൽ ലഭിച്ച മാതൃകാപരവും രാഷ്ട്രീയത്തിനതീതവുമായ പൊതുജന അംഗീകാരം, അഴിമതിരഹിതമായ പ്രവർത്തനം, പ്ലാൻഫണ്ടിന്‍റെ വിനിയോഗം എന്നിവയെല്ലാമാണ് ബസന്ത്‌ലാലിനെ പുരസ്കാരത്തിന് അർഹനാക്കിയതെന്നു ഭാരവാഹികൾ പറഞ്ഞു. സെപ്റ്റംബർ ആദ്യവാരം എരുമപ്പെട്ടി പഞ്ചായത്തിൽ നടക്കുന്ന ചടങ്ങിൽ പുരസ്കാരസമർപ്പണം നടക്കുമെന്നും ഭാരവാഹികൾ കൂട്ടിച്ചേർത്തു. പത്രസമ്മേളനത്തിൽ സംഘടനാ പ്രസിഡന്‍റ് അഡ്വ. സേവ്യർ പാലാട്ടി, സെക്രട്ടറി സോണി തോമസ്, കെ.പി. ഫ്രാൻസിസ് എന്നിവർ പങ്കെടുത്തു.

പട്ടികവിഭാഗത്തിന്‍റെ ഉന്നമനം സര്‍ക്കാര്‍ ലക്ഷ്യം: മന്ത്രി കേളു

ചാവക്കാട്: പട്ടികജാതി - പട്ടികവര്‍ഗ വിഭാഗത്തിന്‍റെ വിദ്യാഭ്യാസരംഗത്തെ സര്‍വതല ഉന്നമനമാണ് സര്‍ക്കാര്‍ ലക്ഷ്യമെന്ന് മന്ത്രി ഒ.ആര്‍. കേളു പറഞ്ഞു. ഒരുമനയൂര്‍ പഞ്ചായത്തില്‍ നടപ്പാക്കിയ 37 വീടുകളുടെ പുനരുദ്ധാരണവും ഒറ്റത്തെങ്ങ് നഗറിനുള്ളിലെ ഉന്നതിറോഡില്‍ കട്ടവിരിക്കലും തെക്കഞ്ചേരി റോഡിന്‍റെ നവീകരണവും ഉദ്ഘാടനം ചെയ്യുകയായിരുന്നു മന്ത്രി. എന്‍.കെ. അക്ബര്‍ എംഎല്‍എ ചടങ്ങില്‍ അധ്യക്ഷനായി. അംബേദ്കര്‍ഗ്രാമം പദ്ധതി 96.97 ലക്ഷം രൂപയാണ് ഇതിനായി ചെലവഴിച്ചത്. നിര്‍മിതികേന്ദ്രം റീജിയണല്‍ എൻജനീയര്‍ എ.എം. സതീദേവി റിപ്പോര്‍ട്ട് അവതരിപ്പിച്ചു. ഒരുമനയൂര്‍ പഞ്ചായത്ത് പ്രസിഡന്‍റ് വിജിത സന്തോഷ്, കെ.വി. രവീന്ദ്രന്‍, ഇ.ടി. ഫിലോമിന, ഷൈനി ഷാജി തുടങ്ങിയവര്‍ പ്രസംഗിച്ചു.

ഭക്തയുടെ സ്വർണാഭരണങ്ങൾ കവർന്ന സ്ത്രീ അറസ്റ്റിൽ

ഗുരുവായൂര്‍: ക്ഷേത്രദര്‍ശനത്തിനെത്തിയ തമിഴ്നാട് സ്വദേശിയായ ഭക്തയുടെ സ്വര്‍ണാഭരണങ്ങള്‍ ഗുരുവായൂര്‍ ദേവസ്വം കംഫര്‍ട്ട് സ്റ്റേഷനില്‍ നിന്നും മോഷ്ടിച്ച സ്ത്രീയെ ഗുരുവായൂര്‍ ടെമ്പിള്‍ പോലീസ് അറസ്റ്റു ചെയ്തു. തൃശൂര്‍ ആറങ്ങോട്ടുകര മച്ചാട്ടുപറമ്പില്‍ വീട്ടിൽ വസന്ത(57)യെയാണ് ഗുരുവായൂര്‍ ടെമ്പിള്‍ സിഐ ജി. അജയകുമാറിന്‍റെ നിര്‍ദേശപ്രകാരം ടെമ്പിള്‍ എസ് ഐ പ്രീത ബാബുവും സംഘവും അറസ്റ്റുചെയ്തത്. കഴിഞ്ഞ മേയ് മൂന്നിന് ക്ഷേത്രദര്‍ശനത്തിനു മുമ്പ് ദേവസ്വം കംഫര്‍ട്ട് സ്റ്റേഷനില്‍ കുളിക്കാനെത്തിയതായിരുന്നു തമിഴ്നാട് സ്വദേശിനിയായ ഭക്തയും മകളും. അവർ പുറത്തുവച്ചിരുന്ന ബാഗില്‍നിന്നും നാലുപവന്‍ വരുന്ന സ്വര്‍ണാഭരണം വസന്ത കവർന്നു. കുളികഴിഞ്ഞെത്തി ബാഗ് തുറന്നപ്പോഴാണ് ആഭരണം നഷ്ടപ്പെട്ടത് അറിഞ്ഞത്. ഉടന്‍ ടെമ്പിള്‍ പോലീസില്‍ പരാതി നല്‍കി. കംഫര്‍ട്ട് സ്റ്റേഷനിലെ സിസിടിവി പരിശോധനയിലാണു വസന്ത പിടിയിലായത്. മോഷ്ടിച്ചതിൽ ഒരു മാല പ്രതി പിടിയിലായ സമയത്ത് അണിഞ്ഞിരുന്നു. ബാക്കിയുള്ള സ്വര്‍ണം വടക്കാഞ്ചേരിയിലെ സ്വകാര്യ പണമിടപാടുസ്ഥാപനത്തില്‍നിന്നു പോലീസ് കണ്ടെടുത്തു. 2022ല്‍ ഗുരുവായൂരില്‍വച്ച് ഒരു പഴ്‌സ് മോഷ്ടിച്ച കേസില്‍ പിടിയിലായ വസന്ത ജയില്‍ശിക്ഷയനുഭവിച്ചിരുന്നു. പ്രതിയെ പിടികൂടിയ സംഘത്തില്‍ എഎസ്ഐമാരായ അഭിലാഷ്, സാജന്‍, സീനിയര്‍ സിപിഒ രഞ്ജിത് എന്നിവരും ഉണ്ടായിരുന്നു. കോടതിയില്‍ ഹാജരാക്കിയ പ്രതിയെ റിമാൻഡ് ചെയ്തു.

മദ്യലഹരിയില്‍ ആക്രമിച്ച് പരിക്കേല്‍പ്പിച്ചു; ബന്ധു അറസ്റ്റില്‍

ഇരിങ്ങാലക്കുട: മദ്യലഹരിയില്‍ യുവാവിനെ ആക്രമിച്ച് പരിക്കേല്‍പ്പിച്ച സംഭവത്തില്‍ ബന്ധു അറസ്റ്റില്‍. ഇരിങ്ങാലക്കുട കനാല്‍ ബേസ് സ്വദേശി അരിക്കാട്ടുപറമ്പില്‍ വീട്ടില്‍ സന്ദീപി(45) നെയാണ് അറസ്റ്റ് ചെയ്തത്. അരിക്കാട്ടുപറമ്പില്‍ വീട്ടില്‍ ഹിരേഷി(39) നാണ് പരിക്കേറ്റത്. കഴിഞ്ഞദിവസം രാത്രി ഇരിങ്ങാലക്കുട കനാല്‍ ബേസിലുള്ള വീടിനുമുന്നില്‍വച്ച് മദ്യപിച്ചശേഷമുണ്ടായ തര്‍ക്കത്തെതുടര്‍ന്നുള്ള വൈരാഗ്യത്താല്‍ തടഞ്ഞുനിര്‍ത്തി കത്തികൊണ്ട് ആക്രമിച്ച് പരിക്കേല്‍പ്പിക്കുകയായിരുന്നു. ഹിരേഷിന്‍റെ അമ്മയുടെ ബന്ധുവാണ് സന്ദീപ്. സംഭവത്തില്‍ പരിക്കേറ്റ് റോഡില്‍ കിടക്കുകയായിരുന്ന ഹിരേഷിനെ പോലീസ് ചെന്നാണ് ആശുപത്രിയിലേക്കു കൊണ്ടുപോയത്. ഇരിങ്ങാലക്കുട ആശുപത്രിയില്‍ പ്രാഥമിക ചികിത്സ നല്‍കിയശേഷം വിദഗ്ധചികിത്സയ്ക്കായി തൃശൂര്‍ മെഡിക്കല്‍ കോളജില്‍ പ്രവേശിപ്പിച്ചു. ഇരിങ്ങാലക്കുട പോലീസ് സ്റ്റേഷന്‍ ഇന്‍സ്‌പെക്ടര്‍ എം.എസ്. ഷാജന്‍, സബ് ഇന്‍സ്‌പെക്ടര്‍ കൃഷ്ണപ്രസാദ്, ജിഎഎസ്ഐ മാരായ ഷാബു, ഗോപകുമാര്‍, ജിഎസ് സിപിഒമാരായ മുരുകദാസ്, ദേവേഷ്, സവീഷ്, ദിനുലാല്‍ എന്നിവര്‍ ചേര്‍ന്നാണ് പ്രതിയെ അറസ്റ്റ് ചെയ്തത്.

വേലൂർ പഞ്ചായത്ത് ഓഫീസ് കെട്ടിടം ഉദ്ഘാടനംചെയ്തു

വേലൂർ: പഞ്ചായത്ത് ഓഫീസ് കെട്ടിടത്തിന്‍റെ ഉദ്ഘാടനം മന്ത്രി എം.ബി. രാജേഷ് നിർവഹിച്ചു. കുന്നംകുളം എംഎൽഎ എ.സി. മൊയ്തീൻ അധ്യക്ഷതവഹിച്ചു. കെ. രാധകൃഷ്ണൻ എംപി താക്കോൽദാനംനിർവഹിച്ചു. ‌സേവ്യർ ചിറ്റിലപ്പിള്ളി എംഎൽഎ മുഖ്യാതിഥിയായി. കുന്നംകുളം എംഎൽഎയുടെ ആസ്തിവികസന ഫണ്ടിൽനിന്നും അനുവദിച്ച തുകയും പഞ്ചായത്ത് വിഹിതവും ഉൾപ്പെടെ 3,25,65,000 രൂപ ചെലവഴിച്ചാണ് കെട്ടിടം നിർമിച്ചത്. പഞ്ചായത്ത് പ്രസിഡന്‍റ് ടി.ആർ. ഷോബി, പഞ്ചായത്ത് സെക്രട്ടറി ടി.പി. സിന്ധു, ചൊവ്വന്നൂർ ബ്ലോക്ക് പഞ്ചായത്ത് പ്രസിഡന്‍റ് ആൻസി വില്യംസ്, ഗുരുവായൂർ ദേവസ്വം ചെയർമാൻ വി.കെ. വിജയൻ, ജില്ലാ പഞ്ചായത്തംഗം ജലീൽ ആദൂർ, പഞ്ചായത്ത് വൈസ് പ്രസിഡന്‍റ് കർമല ജോൺസൺ പ്രസംഗിച്ചു.

ഇന്ത്യാവിരുദ്ധ നിലപാടുകൾക്കെതിരേ കോൺഗ്രസ് മാർച്ച്

തൃശൂർ: അമേരിക്കയുടെ ഇന്ത്യാവിരുദ്ധ നിലപാടുകൾക്കെതിരേയും മോദിഭരണകൂടത്തിന്‍റെ നയപരാജയങ്ങൾക്കെതിരേയും കോൺഗ്രസ് ജില്ലാ കോൺഗ്രസ് കമ്മിറ്റി പ്രതിഷേധപ്രകടനം നടത്തി. ഡിസിസിയിൽനിന്ന് ആരംഭിച്ച പ്രകടനം സ്വരാജ് റൗണ്ട്ചുറ്റി തെക്കേഗോപുരനടയിൽ സമാപിച്ചു. ഡിസിസി പ്രസിഡന്‍റ് അഡ്വ. ജോസഫ് ടാജറ്റ് നേതൃത്വം നൽകി. രാജേന്ദ്രൻ അരങ്ങത്ത്, സുനിൽ അന്തിക്കാട്, എ. പ്രസാദ്, ഐ.പി. പോൾ, സി.ഒ. ജേക്കബ്, കെ.കെ. ബാബു, അഡ്വ. വി. സുരേഷ്കുമാർ, അഡ്വ. സിജോ കടവിൽ, അനിൽ പുളിക്കൻ തുടങ്ങിയവർ പങ്കെടുത്തു.

ഫോറസ്റ്റ് ഉദ്യോഗസ്ഥർക്കെതിരേ എംഎൽഎയുടെ രൂക്ഷവിമർശനം

വടക്കാഞ്ചേരി: ഫോറസ്റ്റ് ഉദ്യോഗസ്ഥർക്കെതിരേ സേവ്യർ ചിറ്റിലപ്പിള്ളി എംഎൽഎയുടെ രൂക്ഷവിമർശനം. വാഴാനി ഫോറസ്റ്റ് സ്റ്റേഷൻ നിർത്തുന്നുവെന്ന ഉത്തരവ് തന്നെ അറിയിക്കാതെ പുറത്തിറക്കിയതാണ് എംഎൽഎയെ ചൊടിപ്പിച്ചത്. ഇന്നലെരാവിലെ വടക്കാഞ്ചേരി ബ്ലോക്ക് പഞ്ചായത്ത് കാര്യാലയത്തിൽ എംപി കെ. രാധാകൃഷ്ണൻ, എംഎൽഎമാരായ സേവ്യർ ചിറ്റിലപ്പിള്ളി, യു.ആർ. പ്രദീപ് എന്നിവർ സംയുക്തമായി വിളിച്ചുചേർത്ത ഉന്നതതലയോഗത്തിലാണ് സേവ്യർ ചിറ്റിലപ്പിളളി ഉദ്യോഗസ്ഥരെ രൂക്ഷമായി വിമർശിച്ചത്. ഫോറസ്റ്റ് ഉദ്യോഗസ്ഥർ തികഞ്ഞ അനാസ്ഥയാണ് കാട്ടുന്നത്. ജനപ്രതിനിധികൾ അറിയാതെ ഫോറസ്റ്റ് ഉദ്യോഗസ്ഥർ തീരുമാനമെടുക്കുന്നത് ശരിയല്ല. താനാണ് നിയോജകമണ്ഡലത്തിലെ എംഎൽഎയെന്നും അധികാരം മറ്റാർക്കുംനൽകിയിട്ടില്ലന്നും എംഎൽഎ രൂക്ഷമായ ഭാഷയിൽപറഞ്ഞു. നാണക്കേടുണ്ടാക്കുംവിധം ഏതു ഉദ്യോഗസ്ഥർ പ്രവർത്തിച്ചാലും അത് കണ്ടുനിൽക്കാൻ തന്നെ കിട്ടില്ലെന്നും എംഎൽഎ കൂട്ടിച്ചേർത്തു. സിസിഎഫിന്‍റേയും ഉയർന്ന മറ്റു ഫോറസ്റ്റ് ഉദ്യോഗസ്ഥരുടേയും മുന്നിലാണ് എംഎൽഎ തുറന്നടിച്ചത്. യോഗത്തിൽ നഗരസഭ ചെയർമാൻ പി.എൻ. സുരേന്ദ്രൻ, തെക്കുംകര പഞ്ചായത്ത് പ്രസിഡന്‍റ് ടി.വി. സുനിൽകുമാർ, ബ്ലോക്ക് പഞ്ചായത്ത് പ്രസിഡന്‍റ് കെ.വി. നഫീസ, വൈസ് പ്രസിഡന്‍റ് സി.വി. സുനിൽകുമാർ എന്നിവർ പങ്കെടുത്തു. കൃഷിയിടങ്ങളിൽ ആനയുൾപ്പടെയുള്ള വന്യമൃഗങ്ങൾ ഇറങ്ങുമ്പോൾ വിളിച്ചാൽ അധികൃതർ എത്താറില്ലെന്നും അതിനുള്ള നടപടി ഉണ്ടാകണമെന്നും യോഗത്തിൽ പങ്കെടുത്ത കർഷകർ പറഞ്ഞു.

വാഴാനി ഫോറസ്റ്റ് ഓഫീസ്: തീരുമാനം വനംകൊള്ള നടത്തിയവരെ സംരക്ഷിക്കാൻ: കോൺഗ്രസ്

പുന്നംപറമ്പ്: വാഴാനി ഫോറസ്റ്റ് ഓഫീസ് മാറ്റാനുള്ള തീരുമാനം അകമലയിൽ വനംകൊള്ളനടത്തിയവരെ സംരക്ഷിക്കാനെന്നു കോൺഗ്രസ്. വാഴാനി ഫോറസ്റ്റ് സ്റ്റേഷൻ അകമലയിലേക്ക് മാറ്റാനുള്ള നീക്കത്തിനെതിരേ തെക്കുംകര മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ സംഘടിപ്പിച്ച വാഴാനി ഫോറസ്റ്റ് ഓഫീസ് ഉപരോധത്തിലാണ് ആരോപണമുന്നയിച്ചത്. ഉപരോധം ഡിസിസി ജനറൽ സെക്രട്ടറി എൻ.ആർ. സതീശൻ ഉദ്ഘാടനംചെയ്തു. മണ്ഡലം കോൺഗ്രസ് പ്രസിഡന്‍റ് ജെയ്സൻ മാത്യു അധ്യക്ഷതവഹിച്ചു. ബ്ലോക്ക് കോൺഗ്രസ് പ്രസിഡന്‍റ് പി.ജി. ജയദീപ് മുഖ്യപ്രഭാഷണംനടത്തി. ഒ. ശ്രീകൃഷ്ണൻ, വി.ജി. സുരേഷ്കുമാർ, എൽദോ തോമസ്, ഐ.എ. സബീല, പി.ജെ. ഷാജു, അജിഷ് വാഴാനി എന്നിവർ പ്രസംഗിച്ചു.

കൊട്ടേക്കാട് - മുണ്ടൂർ റോഡ് വികസനത്തിനു സ്ഥലം വിട്ടുനൽകി കുറ്റൂർ പള്ളി

കുറ്റൂർ: കൊട്ടേക്കാട് - മുണ്ടൂർ റോഡ് വികസനത്തിനു സ്ഥലം വിട്ടുനൽകി കുറ്റൂർ മേരിമാത പള്ളി. പള്ളിയുടെ മുൻവശത്തെ, സെന്‍റിന് 12 ലക്ഷത്തോളം രൂപ വിലവരുന്ന ഭൂമിയിൽ അരസെന്‍റ് ആണ് റോഡ് നവീകരണത്തിനായി സൗജന്യമായി നൽകിയത്. പള്ളി വിട്ടുനൽകിയ സ്ഥലം എംഎൽഎ സേവ്യർ ചിറ്റിലപ്പിള്ളിയുടെ നേതൃത്വത്തിൽ സന്ദർശിച്ച് രേഖകൾ കൈമാറി. സ്ഥലം വിട്ടുനൽകുന്നതിലൂടെ കുറ്റൂർ പള്ളിയുടെ മുൻവശത്തുള്ള വളവുകളിൽ കട്ട വിരിച്ച് റോഡ് വേഗത്തിൽ തകരുന്നതും അപകടസാധ്യതയും ഒഴിവാകും. റോഡ് നവീകരണത്തിനായി സൗജന്യമായി സ്ഥലംവിട്ടുനൽകിയത് ഏവർക്കും മാതൃകയാണെന്നു രേഖകൾ കൈമാറി സേവ്യർ ചിറ്റിലപ്പള്ളി എംഎൽഎ പറഞ്ഞു. ഭൂമി സംബന്ധിച്ച രേഖകൾ ഇടവകവികാരി ഫാ. ജോജു പൊറുത്തൂർ, അസിസ്റ്റന്‍റ് വികാരി ഫാ. ആൽബിൻ ചൂണ്ടൽ എന്നിവർക്ക് എംഎൽഎ കൈമാറി. പിഡബ്ല്യുഡി അസിസ്റ്റന്‍റ് എൻജിനീയർ യു.ആർ. രജിത, കോലഴി പഞ്ചായത്ത് വൈസ് പ്രസിഡന്‍റ് എംഡി വികാസ് രാജ്, സ്റ്റാൻഡിംഗ് കമ്മിറ്റി ചെയർപേഴ്സണ്‍ ഉഷ രവീന്ദ്രൻ, പഞ്ചായത്തംഗം പ്രകാശ് ഡി. ചിറ്റിലപ്പിള്ളി എന്നിവർ എംഎൽഎയ്ക്കൊപ്പം ഉണ്ടായിരുന്നു. കൊട്ടേക്കാട് - മുണ്ടൂർ റോഡിന്‍റെ ബിഎം ബിസി നിലവാരത്തിൽ 12.70 കോടി രൂപ ചെലവഴിച്ചാണ് നവീകരണപ്രവൃത്തികൾ അതിവേഗത്തിൽ പുരോഗമിക്കുന്നത്.

ഉദ്ഘാടനം ബഹിഷ്കരിച്ച് പ്രതിപക്ഷം

വേലൂർ: പഞ്ചായത്ത് പ്രതിപക്ഷ അംഗങ്ങൾ ഉദ്ഘാടനച്ചടങ്ങ് ബഹിഷ്കരിച്ച് ധർണയും മാർച്ചും നടത്തി. വേലൂർ പഞ്ചായത്ത് പ്രതിപക്ഷ കോൺഗ്രസ് മെമ്പർമാരും മണ്ഡലം കമ്മിറ്റി ഭാരവാഹികളും സംഘടിപ്പിച്ച പ്രതിഷേധസമരം കെപിസിസി സെക്രട്ടറി ജോൺ ഡാനിയൽ ഉദ്ഘാടനം ചെയ്തു. മണ്ഡലം പ്രസിഡന്‍റ് ഫ്രെഡി പി ജോൺ, പ്രതിപക്ഷനേതാവ് സ്വപ്ന രാമചന്ദ്രൻ, ബ്ലോക്ക് വൈസ് പ്രസിഡന്‍റ് പി.പി. യേശുദാസ്, പഞ്ചായത്ത് മെമ്പർമാരായ പി.എൻ. അനിൽ, സി.ഡി. സൈമൺ തുടങ്ങി നിരവധിപേർ ധർണയിലും പ്രതിഷേധ മാർച്ചിലും പങ്കെടുത്തു.

ഉദ്യോഗാർഥികൾക്ക് ശുഭപ്രതീക്ഷയായി നഗരസഭ തൊഴിൽമേള

ഗുരുവായൂർ: നഗരസഭയുടെ പ്രാദേശിക തൊഴിൽമേള പ്രതീക്ഷ 25ൽ നൂറുകണക്കിന് ഉദ്യോഗാർഥികളുടെ പങ്കാളിത്തം. 506 ഉദ്യോഗാർഥികൾ വിവിധ സ്ഥാപനങ്ങളിലേക്കുള്ള തൊഴിൽപട്ടികയിൽ ഇടംനേടി. 38 ഉദ്യോഗാർഥികൾക്ക് നിയമന ഉത്തരവുനൽകി. നഗരസഭയിലും പുറത്തുനിന്നുമായി 700ലേറെപേർ തൊഴിൽമേളയിൽ പങ്കെടുത്തു. വിവിധ സ്ഥാപന ഉടമകളുടെ പ്രതിനിധികൾ നേരിട്ടെത്തി അഭിമുഖം നടത്തിയാണ് ഉദ്യോഗാർഥികളെ തെരഞ്ഞെടുത്തത്. സംസ്ഥാനത്ത് തദ്ദേശസ്ഥാപനങ്ങളിൽ ആദ്യമായി ഗുരുവായൂരിലാണ് ഇത്തരിൽ തൊഴിൽമേള നടക്കുന്നത്. ശ്രീകൃഷ്ണ സ്കൂളിൽ നഗരസഭ കൃത്യമായ മുന്നൊരുക്കം നടത്തിയത് ഉദ്യോഗാർഥികൾക്ക് ബുദ്ധിമുട്ടില്ലാതെ അഭിമുഖത്തിൽ പങ്കെടുക്കാനായി. നഗരസഭ ചെയർപേഴ്സൺ എം. കൃഷ്ണദാസ് ഉദ്ഘാടനംചെയ്തു. ഡെപ്യൂട്ടി ചെയർപേഴ്സൺ അനീഷ്മ ഷാനോജ് അധ്യക്ഷത വഹിച്ചു. സ്ഥിരംസമിതി അധ്യക്ഷന്മാരായ എ.എം. ഷഫീര്‍, ശൈലജ സുധൻ, എ.എസ് മനോജ്‌, ബിന്ദു അജിത്കുമാർ, കുടുംബശ്രീ ജില്ലാ മിഷൻ കോ-ഓർഡിനേറ്റർ ഡോ.യു. സലിൽ, എ.വി. ജ്യോതിഷ്കുമാർ, വി.എസ്. ദീപ എന്നിവർ പ്രസംഗിച്ചു.

പെൺകുട്ടിയോട് ലൈംഗിക അതിക്രമം; യുവാവിനു കഠിനതടവും പിഴയും

ചാവക്കാട്: 14 വയസുള്ള പെൺകുട്ടിയോടു ലൈംഗിക അതിക്രമംനടത്തിയ കേസിൽ 27 കാരന് എട്ടുവർഷം കഠിനതടവും 35,000 രൂപ പിഴയുംവിധിച്ചു. പിഴ അടയ്ക്കാത്തപക്ഷം ഏഴുമാസം അധികതടവ് അനുഭവിക്കണം. ആലുവ ചൂർണിക്കര പട്ടേരിപ്പുറം കുരിശിങ്കൽ ജിതിനെയാണ്ചാവക്കാട് പ്രത്യേക അതിവേഗകോടതി ജഡ്ജി എസ്. ലിഷ ശിക്ഷിച്ചത്. 2024 മാർച്ച് ഏഴിന് സ്കൂൾവിട്ടുവരികയായിരുന്ന പെൺകുട്ടിയെ ഓമ്നി കാറിൽവന്ന പ്രതി ലൈംഗിക അതിക്രമം നടത്തുകയും തട്ടിക്കൊണ്ടുപോകാൻ ശ്രമിക്കുകയുംചെയ്തുവെന്നതാണ് കേസ്. രക്ഷപ്പെട്ട പെൺകുട്ടി അടുത്തവീട്ടിൽ അഭയംപ്രാപിക്കുകയും രാത്രി ചാവക്കാട് പോലീസ് സ്റ്റേഷനിലെത്തി മൊഴികൊടുക്കുകയായിരുന്നു. എസ്ഐ സെസിൽ ക്രിസ്ത്യൻരാജ് കുറ്റപത്രം സമർപ്പിച്ചു. പ്രോസിക്യൂഷനുവേണ്ടി സ്പെഷൽ പബ്ലിക് പ്രോസിക്യൂട്ടർ സിജു മുട്ടത്ത്, അഡ്വ.സി. നിഷ എന്നിവർ ഹാജരായി.

ന്യൂനപക്ഷങ്ങൾക്കു സംരക്ഷണം ഉറപ്പാക്കാൻ പ്രധാനമന്ത്രി ഇടപെടണം: കത്തോലിക്ക കോണ്‍ഗ്രസ്

തൃശൂർ: ഒഡീഷയിൽ കത്തോലിക്ക വൈദികർക്കും സന്യസ്തർക്കുമെതിരേ നടന്ന ആക്രമണത്തെ കത്തോലിക്ക കോണ്‍ഗ്രസ് തൃശൂർ അതിരൂപതാസമിതി അപലപിച്ചു. രാജ്യത്തിന്‍റെ വിവിധ ഭാഗങ്ങളിൽ മതന്യൂനപക്ഷങ്ങൾക്കുനേരേ, പ്രത്യേകിച്ച് ക്രൈസ്തവർക്കുനേരെ വർധിച്ചുവരുന്ന അക്രമസംഭവങ്ങൾ ന്യൂനപക്ഷങ്ങളിൽ അരക്ഷിതബോധം സൃഷ്ടിക്കുന്നതാണെന്നു യോഗം വിലയിരുത്തി. ആവർത്തിച്ചുവരുന്ന ഇത്തരം സംഭവങ്ങളിൽ പ്രധാനമന്ത്രി ഇടപെടണമെന്നും മതന്യൂനപക്ഷങ്ങൾക്കു സുരക്ഷിതബോധം വീണ്ടെടുക്കാനും ഭരണഘടന ഉറപ്പുനൽകുന്ന മതസ്വാതന്ത്ര്യം ഉറപ്പുവരുത്താനും സത്വരനടപടി സ്വീകരിക്കണമെന്ന് യോഗം ആവശ്യപ്പെട്ടു. അതിരൂപത പ്രസിഡന്‍റ് ഡോ. ജോബി തോമസ് കാക്കശേരി അധ്യക്ഷത വഹിച്ചു. ഡയറക്ടർ ഫാ. ജീജോ വള്ളൂപ്പാറ, ഗ്ലോബൽ വൈസ് പ്രസിഡന്‍റ് ഡോ. കെ.എം. ഫ്രാൻസിസ്, പാസ്റ്ററൽ കൗണ്‍സിൽ സെക്രട്ടറി ജോഷി വടക്കൻ, അതിരൂപത ഭാരവാഹികളായ കെ.സി. ഡേവിസ്, റോണി അഗസ്റ്റ്യൻ, അഡ്വ. ബൈജു ജോസഫ്, ലീല വർഗീസ്, ആന്‍റോ തൊറയൻ, മേഴ്സി ജോയ് എന്നിവർ പ്രസംഗിച്ചു.

ജൂബിലിയിൽ മുലയൂട്ടൽ വാരാചരണം

തൃശൂർ: ലോക മുലയൂട്ടൽ വാരാചരണത്തോടനുബന്ധിച്ചു ജൂബിലി മിഷൻ മെഡിക്കൽ കോളജ് ആൻഡ് റിസർച്ച് ഇൻസ്റ്റിറ്റ്യൂട്ടിൽ മുലയൂട്ടലിന്‍റെ പ്രാധാന്യത്തെക്കുറിച്ച് അമ്മമാർക്കു ക്ലാസുകളും ആരോഗ്യപ്രവർത്തകർക്ക് അവബോധം വർധിപ്പിക്കാൻ ക്വിസ് മത്സരവും നടത്തി. റോട്ടറി മുൻ ഡയറക്ടർ ഗവർണറും എലൈറ്റ് ഗ്രൂപ്പ് ഓഫ് കന്പനി ചെയർമാനും എംഡിയുമായ ടി.ആർ. വിജയകുമാർ ഉദ്ഘാടനം ചെയ്തു. പ്രിൻസിപ്പൽ ഡോ. എം.എ. ആൻഡ്രൂസ് അധ്യക്ഷത വഹിച്ചു. ജൂബിലി മിൽക്ക് ബാങ്കിലേക്കു മുലപ്പാൽ നൽകിയ ജൂബിലി സ്റ്റാഫ് അംഗങ്ങളെ അനുമോദിച്ചു. നവീകരിച്ച മുലയൂട്ടൽ ബോധവത്കരണ പോസ്റ്റർ ടി.ആർ. വിജയകുമാർ പ്രകാശനം ചെയ്തു. മുലയൂട്ടലുമായി ബന്ധപ്പെട്ട സംശയനിവാരണത്തിനായുള്ള ഹെൽപ്പ് ഡെസ്ക് അസിസ്റ്റന്‍റ് ഡയറക്ടർ ഫാ. ടെറിൻ മുള്ളക്കര പൊതുജനങ്ങൾക്കായി സമർപ്പിച്ചു. സിഇഒ ഡോ. ബെന്നി ജോസഫ് ക്വിസ് മത്സരവിജയികൾക്ക് സമ്മാനങ്ങൾ നൽകി. മെഡിക്കൽ സൂപ്രണ്ട് ഡോ. ഷിബു സി.കള്ളിവളപ്പിൽ, ഗൈനക്കോളജി വിഭാഗം മേധാവി ഡോ. ബിന്ദു മേനോൻ, പീഡിയാട്രിക് വിഭാഗം മേധാവി ഡോ. ടി.എം. സഞ്ജീവ്കുമാർ, ശിശുരോഗവിഭാഗം മേധാവി ഡോ. നെൽബി ജോർജ് മാത്യു, അസിസ്റ്റന്‍റ് പ്രഫ. ഡോ. വിമൽ വിൻസന്‍റ് എന്നിവർ പ്രസംഗിച്ചു.

സംസ്ഥാന സ്കൂൾ കലോത്സവത്തിൽ സാംസ്കാരികോത്സവം പുനഃസ്ഥാപിക്കണം

തൃശൂർ: ജില്ലയിൽ നടക്കുന്ന സംസ്ഥാന സ്കൂൾ കലോത്സവത്തിൽ സാംസ്കാരികോത്സവം പുനഃസ്ഥാപിക്കണമെന്ന് ആർഎസ്പി ജില്ലാ സെക്രട്ടറി എം.പി. ജോബി ആവശ്യപ്പെട്ടു.മാന്വൽ പരിഷ്കരണത്തിന്‍റെ പേരിൽ ചർച്ചകൂടാതെ ചില ഉദ്യോഗസ്ഥരുടെ താല്പര്യത്തിനുവേണ്ടി കഴിഞ്ഞവർഷം തിരുവനന്തപുരത്തു നടന്ന കലോത്സവത്തിൽ സാംസ്കാരികോത്സവം വെട്ടിമാറ്റിയിരുന്നു. ഉദ്യോഗസ്ഥവൃന്ദം വിദ്യാഭ്യാസമന്ത്രിയെ തെറ്റിദ്ധരിപ്പിച്ചാണ് അതു സാധ്യമാക്കിയത്. വിദ്യാഭ്യാസത്തിന്‍റെ ഭാഗമാണു സാംസ്കാരികമെന്നു മനസിലാക്കണം. സാംസ്കാരികതലസ്ഥാനമായ തൃശൂരിൽ നടക്കുന്ന കലോത്സവത്തിൽ സാംസ്കാരികോത്സവം പുനഃസ്ഥാപിക്കണമെന്നും ചെയ്തുപരിചയമുള്ള അധ്യാപകസംഘടനയെ കമ്മിറ്റി ഏല്പിക്കണമെന്നും ആവശ്യപ്പെട്ടു. വിഷയം മന്ത്രിമാരായ കെ. രാജൻ, ആർ. ബിന്ദു എന്നിവരുടെ ശ്രദ്ധയിൽപ്പെടുത്തിയതായും എം.പി. ജോബി അറിയിച്ചു.

വന്യജീവി ആക്രമണം നേരിടാന്‍ എന്തൊക്കെ മാര്‍ഗങ്ങളുണ്ടെന്ന് കാട്ടിത്തരാം: വി.ഡി. സതീശൻ

പഴയന്നൂർ: യുഡിഎഫ് അധികാരത്തിൽ വന്നാൽ സർക്കാരിൽ എത്ര കോടി നിക്ഷേപിച്ചിലും പ്രശ്നം വന്നാൽ സർക്കാർ ഫണ്ടിൽനിന്നു പരിഹരിക്കുമെന്നു പ്രതിപക്ഷനേതാവ് വി.ഡി. സതീശൻ പറഞ്ഞു. പഴയന്നൂർ കർഷക സർവീസ് സഹകരണ ബാങ്ക് സഹകാരിസംഗമം ഉദ്ഘാടനംചെയ്തു സംസാരിക്കുകയായിരുന്നു അദ്ദേഹം. സംസ്ഥാനത്ത് ഉടനീളം വന്യജീവി ആക്രമണങ്ങള്‍ രൂക്ഷമായിട്ടും സര്‍ക്കാര്‍ ഒരു നടപടിയും സ്വീകരിക്കുന്നില്ലെന്നു സതീശൻ തുടർന്നു. അതിനെതിരേയാണ് യുഡിഎഫ് മലയോര സമരയാത്ര നടത്തിയത്. മലയോരത്ത് ജീവിക്കുന്ന ജനങ്ങളെ സര്‍ക്കാര്‍ വിധിക്കു വിട്ടുകൊടുത്തിരിക്കുകയാണ്. മരിച്ചെങ്കില്‍ നഷ്ടപരിഹാരം നല്‍കാമെന്ന രീതിയാണ് വനം മന്ത്രി സ്വീകരിക്കുന്നത്. വന്യജീവി ആക്രമണത്തെ നേരിടാന്‍ എന്തൊക്കെ മാര്‍ഗങ്ങള്‍ ഉണ്ടെന്ന് യുഡിഎഫ് കാട്ടിത്തരാമെന്നു വി.ഡി. സതീശൻ പറഞ്ഞു. ഇന്ത്യൻ ജനാധിപത്യം തകർന്നു. ഏകാധിപത്യമാണ് നടക്കുന്നത്. തൃശൂരിൽ 32,000 വോട്ടിന് യുഡിഎഫ് ജയിക്കുന്ന സ്ഥാനത്ത് ഒരുലക്ഷത്തിനുമുകളിൽ നേടിയാണ് ബിജെപി ജയംവരിച്ചത് ഇവിടെയും വ്യാപകമായ ക്രമക്കേടു നടന്നിട്ടുണ്ടെന്നു പ്രതിപക്ഷനേതാവ് ആരോപിച്ചു.

ചേലക്കരയിലെ കാട്ടാനശല്യം; ഉദ്യോഗസ്ഥർ സ്ഥലം സന്ദർശിച്ചു

ചേലക്കര: കഴിഞ്ഞദിവസങ്ങളിൽ ജനവാസമേഖലയിലേക്ക് ഇറങ്ങിയ കാട്ടാനയുടെ പ്രശ്നത്തിൽ മുള്ളൂർക്കര ആറ്റൂർ, മണലാടി പ്രദേശങ്ങളിൽ ജില്ലാ ഡിവിഷൻ ഫോറസ്റ്റ് ഓഫീസർ കെ.ജി. മാർട്ടിൻ, മുള്ളൂർക്കര പഞ്ചായത്ത് അധികൃതരും സ്ഥലസന്ദർശനം നടത്തി. ഒരു യുവതിയെയും ഇരുചക്രവാഹനയാത്രികനെയും മറ്റൊരു യുവാവിനെയും കാട്ടാനയോടിച്ചതിന്‍റെ പശ്ചാത്തലത്തിലായിരുന്നു സന്ദർശനം. ഉന്നത വനംവകുപ്പ് ഉദ്യോഗസ്ഥരുടെ നേതൃത്വത്തിലുള്ള സംഘമാണ് സന്ദർശനം നടത്തിയത്. കാട്ടാനകളെ ഉൾവനത്തിലേക്ക് കയറ്റിവിടാനാവശ്യമായ മാസ് ഡ്രൈവ് നടത്തുന്നതിനെ കുറിച്ച് ഡിഎഫ്ഒ കീഴുദ്യോഗസ്ഥരുമായി സംസാരിച്ചു. അടിയന്തരമായി നിരന്തരം കാട്ടാനകളിറങ്ങുന്ന മേഖലകളിൽ താത്കാലിക വൈദ്യുതവേലികൾ സ്ഥാപിക്കാനും ഡിഎഫ്ഒ നിർദേശം നൽകി. വഴിവിളക്കുകളില്ലാത്തയിടങ്ങളിൽ അടിയന്തരമായി വഴിവിളക്കുകൾ സ്ഥാപിക്കാനുള്ള നടപടി സ്വീകരിക്കുമെന്ന് പഞ്ചായത്ത് പ്രസിഡന്‍റ് ജനങ്ങൾക്ക് ഉറപ്പ് നൽകി. പഞ്ചായത്തിന്‍റെ നേതൃത്വത്തിൽ സംസ്ഥാനപാതയിൽ മുന്നറിയിപ്പ് ബോർഡുകൾ സ്ഥാപിക്കാനും തീരുമാനമായി. മച്ചാട് റേഞ്ച് ഓഫീസർ അജിൽ പി. വേണുഗോപാൽ, വടക്കാഞ്ചേരി റെയിഞ്ച് ഫോറസ്റ്റ് ഓഫീസർ അശോക് രാജ്, ഡെപ്യൂട്ടി ഫോറസ്റ്റ് ഓഫീസർ പി. വിനോദ്, പഞ്ചായത്ത് പ്രസിഡന്‍റ് ഗിരിജ മേലേടത്ത്, തങ്കപ്പൻ തുടങ്ങിയവരും ഉണ്ടായിരുന്നു.

ഠാണ - ചന്തക്കുന്ന് വികസനം; ആശുപത്രി റോഡിലെ കാനനിര്‍മാണം അവസാനഘട്ടത്തില്‍

ഇരിങ്ങാലക്കുട: ഠാണ - ചന്തക്കുന്ന് വികസനത്തിന്‍റെ ഭാഗമായി ഇരിങ്ങാലക്കുട - കല്ലേറ്റുംകര റോഡില്‍ ജനറല്‍ ആശുപത്രി വരെയുള്ള ഭാഗത്ത് കാനനിര്‍മാണം അവസാനഘട്ടത്തില്‍. പൊതുമരാമത്തുവകുപ്പിന്‍റെ നേതൃത്വത്തില്‍ 100 മീറ്ററിലാണ് ഇരുവശത്തും കാന നിര്‍മിക്കുന്നത്. ജെസിബി ഉപയോഗിച്ച് കുഴിയെടുത്ത് കോണ്‍ക്രീറ്റിടല്‍ ആരംഭിച്ചു. ഒരാഴ്ചയ്ക്കകം ഠാണാ മുതല്‍ ആശുപത്രി കവാടംവരയുള്ള കാനയുടെ പണികള്‍ പൂര്‍ത്തിയാകും. ശേഷം ചന്തക്കുന്ന് ജംഗ്ഷനും പോട്ട - മൂന്നുപീടിക റോഡിലും കുറച്ചുഭാഗത്ത് കാനനിര്‍മാണം പൂര്‍ത്തീകരിക്കും. തൃശൂര്‍ - കൊടുങ്ങല്ലൂര്‍ സംസ്ഥാനപാതയിലെ നിര്‍മാണം കെഎസ്ടിപിയുടെ നേതൃത്വത്തിലാണ്. ആദ്യം പൂതംകുളം വരെ കാന നിര്‍മിക്കും. ഇതിനുപിന്നാലെ പൂതംകുളം മുതല്‍ സെന്‍റ്് ജോസഫ്‌സ് കോളജ് ഇറക്കംവരെ വൈദ്യുതിക്കാലുകള്‍ മാറ്റിസ്ഥാപിക്കുന്ന ജോലി വൈകാതെ ആരംഭിക്കും. പുതിയ തൂണുകളെത്തിയാല്‍ വൈദ്യുതി ലൈനുകള്‍ മാറ്റും. കൊടുങ്ങല്ലൂര്‍ - ഷൊര്‍ണൂര്‍ സംസ്ഥാനപാത നിലവില്‍ രണ്ടുവരിയിലാണ് കോണ്‍ക്രീറ്റിടുന്നത്. ഇതില്‍ പൂതംകുളം മുതല്‍ സെന്‍റ്് ജോസഫ്‌സ് കോളജ് ഇറക്കംവരെ 17 മീറ്റര്‍ വീതിയില്‍ നാലുവരിയായിട്ടാണ് നിര്‍മാണം. റോഡിനുപുറമേ ഇരുവശത്തും നടപ്പാത, കൈവരി, ഡിവൈഡര്‍, റിഫ്ലക്ടറുകള്‍, ദിശാബോര്‍ഡുകള്‍ എന്നിവയും സ്ഥാപിക്കണം. നിര്‍മാണപ്രവൃര്‍ത്തികള്‍ക്കായി 11 കോടി രൂപ ചെലവുവരും. സ്ഥലമേറ്റെടുക്കല്‍ പൂര്‍ത്തിയായിട്ടുണ്ടെങ്കിലും നാലുവരിയില്‍ റോഡ് നിര്‍മാണത്തിനു കൂടുതല്‍ ചെലവ് വരുമെന്നുള്ളതിനാല്‍ കെഎസ്ടിപി പുതിയ പദ്ധതി സര്‍ക്കാരിനും ബാങ്കിനും സമര്‍പ്പിക്കുകയായിരുന്നു. ഈ പദ്ധതി അംഗീകരിച്ചാണ് ജര്‍മന്‍ ബാങ്ക് അനുമതി നല്‍കിയിരിക്കുന്നത്. ഠാണാ- ചന്തക്കുന്ന് റോഡില്‍ യൂട്ടിലിറ്റി പ്രവൃത്തികളാണ് ഇപ്പോള്‍ നടക്കുന്നത്. തൃശൂര്‍- കൊടുങ്ങല്ലൂര്‍ റോഡില്‍ കരുവന്നൂര്‍ ഭാഗത്തെ റോഡിന്‍റെ കോണ്‍ക്രീറ്റിംഗ് പൂര്‍ത്തിയാകുന്നതോടെ ജില്ലാ ഭരണകൂടവുമായി ആലോചിച്ച‌ശേഷം ഠാണാവില്‍ കോണ്‍ക്രീ റ്റിംഗ് ആരംഭിക്കും. ഗതാഗതം തിരിച്ചുവിടുന്നതിനുള്ള റൂട്ടുകള്‍ നിശ്ചയിക്കുന്നതടക്കമുള്ള നടപടികള്‍ പൂര്‍ത്തീകരിച്ചശേഷമേ ഠാണാ ജംഗ്ഷനില്‍ കോണ്‍ക്രീറ്റിംഗ് നടപടികള്‍ ആരംഭിക്കുകയുള്ളൂ. അടുത്തയാഴ്ച ഇതുസംബന്ധിച്ച് കളക്ടറുടെ സാന്നിധ്യത്തില്‍ യോഗം ചേരുന്നുണ്ട്. ഒരു മാസ ത്തിനകം കോണ്‍ക്രീറ്റിംഗ് നടപടികള്‍ ആരംഭിക്കാനാകുമെന്നാണു പ്രതീക്ഷയെന്ന് അധികൃതര്‍ വ്യക്തമാക്കി.

നഗരസഭ അയൽക്കൂട്ട സെക്രട്ടറിമാരുടെ സംഗമം നടത്തി

ചാലക്കുടി: കുടുംബശ്രീ സിഡിഎസ് "ചലനം മെന്‍റർഷിപ്' പ്രോഗ്രാമിന്‍റെ ഭാഗമായി നഗരസഭ അയൽക്കൂട്ട സെക്രട്ടറിമാരുടെ സംഗമം സംഘടിപ്പിച്ചു. രാജീവ്ഗാന്ധി ടൗൺ ഹാളിൽ നടത്തിയ സംഗമം സനീഷ്കുമാർ ജോസഫ് എംഎൽഎ ഉദ്ഘാടനം ചെയ്തു. സ്റ്റേറ്റ് പ്രോഗ്രാം മാനേജർ സി.സി. നിഷാദ് ക്ലാസുകൾ നയിച്ചു. നഗരസഭ ചെയർപേഴ്സൺ ഷിബു വാലപ്പൻ അധ്യക്ഷത വഹിച്ചു. തൃശൂർ ജില്ലാ മിഷൻ എഡിഎംസി രാധാകൃഷ്ണൻ മുഖ്യാതിഥിയായി. ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ പ്രീതി ബാബു, വികസനകാര്യ സ്റ്റാൻഡിംഗ്‌കമ്മിറ്റി ചെയർമാൻ കെ.വി. പോൾ, സിഡി എസ് ചെയർപേഴ്സൺ സുബി ഷാജി, വൈസ് ചെയർപേഴ്സൺ ജോമോൾ ബാബു തുടങ്ങിയവർ പ്രസംഗിച്ചു.

"കൃഷിയും വ്യവസായവും ഒന്നിച്ചുവളരുന്ന കേരളം' - ഏകദിന കോണ്‍ക്ലേവ് നാളെ

കൊടകര: മറ്റത്തൂര്‍ ലേബര്‍ കോണ്‍ട്രാക്ട് സഹകരണ സംഘത്തിന്‍റെ ആഭിമുഖ്യത്തില്‍ സംഘടിപ്പിക്കുന്ന കൃഷിയും വ്യവസായവും ഒന്നിച്ചുവളരുന്ന കേരളം എന്ന വിഷയത്തെ ആസ്പദമാക്കിയുള്ള ഏകദിന കോണ്‍ക്ലേവ് നാളെ നടക്കും. മറ്റത്തൂര്‍ ചെട്ടിച്ചാലിലുള്ള ഔഷധ സസ്യ സംസ്‌കരണ സംഭരണ കേന്ദ്രത്തില്‍ നടക്കുന്ന സെമിനാര്‍ രാവിലെ 9.30ന് കെ.കെ. രാമചന്ദ്രന്‍ എംഎല്‍എ ഉദ്ഘാടനം ചെയ്യും. ഔഷധ സസ്യബോര്‍ഡ് ചീഫ് എക്‌സിക്യൂട്ടീവ് ഓഫീസര്‍ ഡോ. ടി.കെ. ഹൃദിക് അധ്യക്ഷത വഹിക്കും. എംഎല്‍എ മാരായ യു.ആര്‍. പ്രദീപ്, എം. വിജിന്‍, ഔഷധി ചെയര്‍പേഴ്‌സന്‍ ശോഭന ജോര്‍ജ്,ദേവസ്വം റിക്രൂട്ട്‌മെന്‍റ്് ബോര്‍ഡ് ചെയര്‍മാന്‍ കെ.ബി. മോഹന്‍ദാസ്, ആയുര്‍വേദ മെഡിസിന്‍ മാനുഫാക്‌ചേഴ്‌സ് ഓര്‍ഗനൈസേഷന്‍ ഓഫ് ഇന്ത്യ ജനറല്‍ സെക്രട്ടറി ഡോ. ഡി. രാമനാഥന്‍ തുടങ്ങിയവര്‍ പങ്കെടുക്കും. തുടര്‍ന്ന് നടക്കുന്ന സെഷനില്‍ കൃഷിയും വ്യവസായവും ഒന്നിച്ചുവളരുന്ന കേരളം എന്ന വിഷയം മുന്‍ മന്ത്രി പ്രഫ. സി. രവീന്ദ്രനാഥ് അവതരിപ്പിക്കും. ഉച്ചകഴിഞ്ഞ് നടക്കുന്ന സെഷനില്‍ നവകേരളത്തില്‍ സുസ്ഥിരകാര്‍ഷിക വികസനത്തിന്‍റെ പങ്ക് എന്ന വിഷയത്ത ആസ്പദമാക്കി മുന്‍ മന്ത്രി ഡോ. ടി.എം. തോമസ് ഐസക് സംസാരിക്കും.

സ്‌കൗട്ട്‌സ് ആന്‍ഡ് ഗൈഡ്‌സ് ലീഡേഴ്‌സ് മീറ്റ് നടന്നു

ഇരിങ്ങാലക്കുട: കേരള സ്റ്റേറ്റ് ഭാരത് സ്‌കൗട്ട് ആന്‍ഡ് ഗൈഡ്‌സ് ഇരിങ്ങാലക്കുട ജില്ലാ അസോസിയേഷന്‍റെ നേതൃത്വത്തില്‍ സ്‌കൗട്ട് ഗൈഡ് ലീഡേഴ്‌സിന്‍റെ ഏകദിന പരിശീലനം ഡിസ്ട്രിക്ട് ഹെഡ് ക്വാര്‍ട്ടേഴ്‌സില്‍ നടന്നു. ഇരിങ്ങാലക്കുട നഗരസഭ ചെയര്‍പേഴ്‌സണ്‍ മേരിക്കുട്ടി ജോയ് ഉദ്ഘാടനം നിര്‍വഹിച്ചു. ഡിസ്ട്രിക്ട് ട്രെയിനിംഗ് കമ്മീഷണര്‍ (ഗൈഡ്) ഐഷാബി അധ്യക്ഷത വഹിച്ചു. വിദ്യാഭ്യാസ ജില്ലയിലെ വിവിധ വിദ്യാലയങ്ങളില്‍ നിന്നായി 123 കുട്ടികള്‍ പങ്കെടുത്തു. ജില്ലാ സെക്രട്ടറി ഡോമിനിക് പറേക്കാട്ട്, ഡിസ്റ്റിക് ഓര്‍ഗനൈസിംഗ് കമ്മീഷണര്‍(ജി) കെ.കെ. ജോയ്‌സി, ഇരിങ്ങാലക്കുട ലോക്കല്‍ അസോസിയേഷന്‍ പ്രസിഡന്‍റ് കുര്യന്‍ ജോസഫ്, ഗവ. മോഡല്‍ എച്ച്എസ്എസ് പ്രിന്‍സിപ്പല്‍ മുരളി, ഡിസ്ട്രിക്ട് ട്രെയിനിംഗ് കമ്മീഷണര്‍ (സ്‌കൗട്ട്) പി.ജി. കൃഷ്ണനുണ്ണി, ജില്ല ഓര്‍ഗനൈസിംഗ് കമ്മീഷണര്‍ കെ.ഡി. ജയപ്രകാശന്‍, ജില്ലാ റോവര്‍ വിഭാഗം കമ്മീഷണര്‍ വി.ബി. പ്രസാദ്, ജില്ല ട്രഷറര്‍ എ.ബി. ബെനക്്‌സ്, സ്‌കൗട്ട് മാസ്റ്റര്‍ രാജേഷ്, ജില്ലാ ജോയിന്‍ സെക്രട്ടറി ബിന്‍സി തോമസ് തുടങ്ങിയവര്‍ പ്രസംഗിച്ചു.

സെന്‍റ്് ജോസഫ്സ് കോളജിലെ സുവോളജി അസോ. ഉദ്ഘാടനം

ഇരിങ്ങാലക്കുട: സെന്റ് ജോസഫ്സ് കോളജ് സുവോളജി വിഭാഗം അസോസിയേഷന്‍ ഉദ്ഘാടനവും മെറിറ്റ് ദിനവും സംയുക്തമായി സംഘടിപ്പിച്ചു. കൊച്ചിന്‍ സിഎംഎഫ്ആര്‍ഐയിലെ ഷെല്‍ഫിഷ് ഫിഷറീസ് ഡിവിഷനിലെ സീനിയര്‍ സയ ന്‍റിസ്റ്റും വകുപ്പ് മേധാവിയുമായ ഡോ. ജോസിലിന്‍ ജോസ് ഉദ് ഘാടനം നിര്‍വഹിച്ചു. കോളജ് പ്രിന്‍സിപ്പല്‍ സിസ്റ്റര്‍ ഡോ. ബ്ലെസി അധ്യക്ഷത വഹിച്ചു. സുവോളജി വിഭാഗം മേധാവി ഡോ. ജി. വിദ്യ, ഡോ. ജിജി പൗലോസ്, ഡോ. അനൂപ കെ. ആന്‍റണി, അസോസിയേഷന്‍ സെക്രട്ടറി റിച്ച റാഫി എന്നിവര്‍ സംസാരിച്ചു.

പ്രണതോസ്മി - 2025

ചാലക്കുടി: എസ്എസ്എൽസി പരീക്ഷയിൽ തൃശൂർ ജില്ലയിൽ ഒന്നാം‌സ്ഥാനവും സംസ്ഥാനതലത്തിലെ ശ്രദ്ധേയമായ സ്ഥാനവും കരസ്ഥമാക്കിയ ഇരിങ്ങാലക്കുട വിദ്യാഭ്യാസജില്ലയിലെ പ്രധാനാധ്യാപകർ, അധ്യാപകർ, അനധ്യാപകർ, വിദ്യാഭ്യാസ ഉപജില്ല ഓഫീസ് സ്റ്റാഫ്‌ എന്നിവരെ ആദരിക്കുന്ന പ്രണതോസ്മി - 2025 നടത്തി. കാർമൽ ഹയർ സെക്കൻഡറി സ്കൂളിൽ സനീഷ്കുമാർ ജോസഫ് എം എൽഎ ഉദ്ഘാടനം ചെയ്തു. ജില്ലാ വിദ്യാഭ്യാസ ഓഫീസർ ടി. ഷൈല അധ്യക്ഷത വഹിച്ചു. തൃശൂർ ജില്ലാ വിദ്യാഭ്യാസ ഉപഡയറക്ടർ പി.എം. ബാലകൃഷ്ണൻ വിശിഷ്ടാതിഥിയായി. കെ.ആർ. സുമേഷ് മുഖ്യപ്രഭാഷണം നടത്തി. കാർമൽ ഹയർസെക്കൻഡറി സ്കൂൾ പ്രിൻസിപ്പൽ ഫാ. ജോസ് താണിക്കൽ സിഎംഐ, ഫോറം കൺവീനർ ടി.കെ. ലത, മേജോ പോൾ എന്നിവർ പ്രസംഗിച്ചു. വിദ്യാഭ്യാസജില്ലയിലെ 84 വിദ്യാലയങ്ങളിൽനിന്നുള്ള അധ്യാപക അനധ്യാപകരെ ആദരിച്ചു.

നടവരമ്പ് സെന്‍റ് മേരീസ് പള്ളിയിൽ തിരുനാളും ഊട്ടുനേര്‍ച്ചയും 15ന്

നടവരമ്പ്: സെന്‍റ്് മേരീസ് അസംപ്ഷന്‍ ദേവാലയത്തില്‍ പരിശുദ്ധ മാതാവിന്‍റെ സ്വര്‍ഗാരോപണ തിരുനാളും ഊട്ടുനേര്‍ച്ചയും 15 ന് ആഘോഷിക്കും. ഇരിങ്ങാലക്കുട സ്പിരിച്ച്വാലിറ്റി സെന്‍റര്‍ സ്പിരിച്ച്വല്‍ ഡയറക്ടര്‍ ഫാ. ആന്‍റോ തച്ചില്‍ തിരുനാള്‍ കൊടിയേറ്റം നിര്‍വഹിച്ചു. 14 ന് വൈകീട്ട് 5.30 ന് ലദീഞ്ഞ്, നൊവേന, ദിവ്യബലി, കൂടുതുറക്കല്‍ ശുശ്രൂഷ, പള്ളിചുറ്റി പ്രദിക്ഷണം എന്നിവയ്ക്ക് ഫാ. ലിജു മഞ്ഞപ്രക്കാരന്‍ മുഖ്യകാര്‍മ്മികനാകും. തിരുനാള്‍ ദിനമായ 15 ന് രാവിലെ 6.30 ന് ദിവ്യബലി. തുടര്‍ന്ന് നേര്‍ച്ച ഊട്ട് ആശീര്‍വാദം എന്നിവ നടക്കും. 9.30ന് നടക്കുന്ന തിരുനാള്‍ ദിവ്യബലിക്ക് കൊടകര സഹൃദയ കോളജ് ഓഫ് അഡ്വാന്‍സ്ഡ് സ്റ്റഡീസ് ഫൈനാന്‍സ് ഓഫീസര്‍ ഫാ. സിബിന്‍ വാഴപ്പിള്ളി കാര്‍മികത്വം വഹിക്കും. ഇരിങ്ങാലക്കുട ക്രൈസ്റ്റ് ആശ്രമാംഗം ഫാ. ജോ ജോ അരിക്കാടന്‍ സിഎംഐ സന്ദേശം നല്‍കും. തുടര്‍ന്ന് തിരുനാള്‍ പ്രദക്ഷിണം, നേര്‍ച്ചയൂട്ട് വിതരണം എന്നിവ നടക്കും. 13, 14, 15 തീയതികളില്‍ മാതാവിന്‍റെ വള, മാല, കിരീടം എന്നിവ എടുത്തുവെയ്ക്കുന്നതിനുള്ള സൗകര്യം ഏര്‍പ്പെടുത്തിയിട്ടുണ്ട്. തിരുനാളിന്‍റെ വിജയത്തിനായി വികാരി ഫാ. വര്‍ഗീസ് ചാലിശേരി, ജനറല്‍ കണ്‍വീനര്‍ ആച്ചാണ്ടി ജോണ്‍ സണ്ണി, കൈക്കാരന്മാരായ മാളിയേക്കല്‍ കുരിയപ്പന്‍ ജോസഫ്, പൊട്ടത്തുപറമ്പില്‍ ഔസേഫ് ഡേവിഡ്, കോരേത്ത് ദേവസി ബിജു തുടങ്ങിയവരുടെ നേതൃത്വത്തില്‍ വിപുലമായ കമ്മിറ്റിയാണു രൂപീകരിച്ചിരിക്കുന്നത്.

വീടിനുള്ളിൽ മരിച്ചനിലയിൽ

വടക്കാഞ്ചേരി: വയോധികനെ വീടിനുള്ളിൽ മരിച്ചനിലയിൽ കണ്ടെത്തി. മംഗലം അമ്മാട്ടി വീട്ടിൽ ജോണി (68) ആണ് മരിച്ചത്. ഇന്നലെ രാവിലെ വീടിന്‍റെ വരാന്തയിൽ മരിച്ചുകിടക്കുകയായിരുന്നു. വിവിധ അസുഖങ്ങളാൽ ചികിത്സയിലായിരുന്നു. കുറച്ചുകാലമായി ഒറ്റയ്ക്കാണ് താമസം. വടക്കാഞ്ചേരി പോലീസ് സ്ഥലത്തെത്തി മേൽനടപടികൾ സ്വീകരിച്ചു.

നാഷണല്‍ ഹയര്‍സെക്കന്‍ഡറി സ്‌കൂളില്‍ ലഹരിവിരുദ്ധ ബോധവത്കരണ സെമിനാര്‍

ഇരിങ്ങാലക്കുട: ഇരിങ്ങാലക്കുട ജനമൈത്രി പോലീസ് സമിതിയും ഇരിങ്ങാലക്കുട നാഷണല്‍ ഹയര്‍ സെക്കന്‍ഡറി സ്‌കൂളും സംയുക്തമായി ലഹരിവിരുദ്ധ ബോധവത്കരണ സെമിനാര്‍ സംഘടിപ്പിച്ചു. നാഷണല്‍ ഹൈസ്‌കൂളില്‍ നടന്ന സെമിനാറിന്‍റെ ഉദ്ഘാടന പ്രസംഗത്തില്‍ പഠനവും കായിക വിനോദങ്ങളും ജീവിതവുമാകട്ടെ ലഹരിയെന്നും വിദ്യാര്‍ഥികള്‍ ചിട്ടയായ ജീവിത ശൈലി രൂപപ്പെടുത്തണമെന്നും ഇരിങ്ങാലക്കുട പോലീസ് എസ്എച്ച്ഒ എം.എസ്. ഷാജന്‍ പറഞ്ഞു. സ്‌കൂള്‍ മാനേജര്‍ വിപിആര്‍ മേനോന്‍ അധ്യക്ഷത വഹിച്ച ചടങ്ങിന് ഹെഡ്മിസ്ട്രസ് സീന സ്വാഗതം ആശംസിച്ചു. എക്‌സൈസ് ഉദ്യോഗസ്ഥന്‍ രാജേന്ദ്രന്‍ വിദ്യാര്‍ഥികള്‍ക്കായുള്ള ബോധവ‍ക്കരണ ക്ലാസ് എടുത്തു. യോഗത്തിന് ഷിജി നന്ദി പ്രകാശിപ്പിച്ചു. സെമിനാറിനു സബ് ഇന്‍സ്‌പെക്ടര്‍ ഓഫ് പോലീസ് കെ.എം. നാസര്‍, സമിതിയംഗങ്ങളായ കെ.എന്‍. സുഭാഷ്, രമേഷ് വാരിയര്‍, പി.ആര്‍. സ്റ്റാന്‍ലി എന്നിവര്‍ നേതൃത്വം നല്‍കി.

അംബേദ്കർ ഗ്രാമം: ആയിരത്തോളം ഉന്നതികൾക്ക് സഹായംനൽകി: മന്ത്രി ഒ.ആർ. കേളു

മാള: അംബേദ്കർ ഗ്രാമം പദ്ധതി ആരംഭിച്ച് പത്ത് വർഷം പിന്നിടുമ്പോൾ ആയിരത്തോളം ഉന്നതികൾക്ക് ഒരുകോടി രൂപ വീതം സർക്കാർ സഹായം ലഭ്യമാക്കിയതായി മന്ത്രി ഒ.ആർ. കേളു. പദ്ധതിയുടെ ഭാഗമായി സംസ്ഥാനത്ത് എസ്‌സി വിഭാഗത്തിൽ നിന്നുള്ള 50 ഉന്നതികളും എസ്ടി വിഭാഗത്തിൽ നിന്നുള്ള 50 ഉന്നതികളും ഉൾപ്പെടെ ആകെ 100 ഉന്നതികൾ ഓരോ വർഷവും തെരഞ്ഞെടുത്തതായും മന്ത്രി പറഞ്ഞു. പൊയ്യ ഗ്രാമപഞ്ചായത്തിൽ ഉൾപ്പെടുന്ന പൂപ്പത്തി ഉന്നതിയിൽ അംബേദ്കർ ഗ്രാമം പദ്ധതിയുടെ ഭാഗമായി പൂർത്തിയായ വികസന പ്രവർത്തനങ്ങളുടെ ഉദ്ഘാടനം നിർവഹിച്ചു സംസാരിക്കുകയായിരുന്നു മന്ത്രി. വി. ആർ. സുനിൽകുമാർ എംഎൽഎ അധ്യക്ഷത വഹിച്ചു. പൂപ്പത്തിയിലുള്ള അംബേദ്കർ ഗ്രാമത്തിൽ 72,32,209 രൂപ ചെലവഴിച്ച് നാല് നിർമാണ പ്രവർത്തങ്ങളാണ് പൂർത്തീകരിച്ചത്. 5,83,088 രൂപ ചെലവഴിച്ച് 109 വീടുകളിലേക്ക് 500 ലിറ്റർ പിവിസി വാട്ടർ ടാങ്കുകൾ വിതരണം ചെയ്തു. വീടുകളിലേക്കുള്ള കുടിവെള്ള വിതരണ പദ്ധതിയുടെ ഭാഗമായി 17 വീടുകളിലേക്ക് ഗാർഹിക വാട്ടർ കണക്ഷൻ ലഭ്യമാക്കുന്നതിനായി 11,64,569 രൂപ ചെലവഴിച്ചു. 20,39,815 രൂപ ചെലവഴിച്ച് രണ്ട് നിലകളിലായി വനിതാ സ്വയംതൊഴിൽ കേന്ദ്രം നിർമിച്ചിട്ടുണ്ട്. ‌മാള ബ്ലോക്ക് പഞ്ചായത്ത് പ്രസിഡന്‍റ്്് രേഖ ഷാന്‍റി, മുൻ ജില്ലാ പഞ്ചായത്ത് പ്രസിഡന്‍റ്് പി. കെ. ഡേവിസ്, തൃശൂർ ജില്ലാ പട്ടികജാതി വികസന ഓഫീസർ കെ സന്ധ്യ, എസ്‌സി ഡെവലപ്മെന്റ് ഓഫീസർ എസ്. ശ്യാം ശങ്കർ, ജനപ്രതിനിധികൾ, മെമ്പർമാർ, ഉന്നതി നിവാസികൾ തുടങ്ങിയവർ ചടങ്ങിൽ പങ്കെടുത്തു.

ന്യൂനപക്ഷവേട്ട ഇന്ത്യക്ക് ഭൂഷണമല്ല: എം.കെ. ഉല്ലേഖ്

മാള: മനുഷ്യനന്മക്കായി ഉണ്ടാക്കുന്ന നിയമസംഹിതകള്‍ ദുരുപയോഗം ചെയ്ത് രാജ്യത്ത് അരാജകത്വം സൃഷ്ടിക്കുന്ന മതമൗലികവാദികളാണ് ഇന്ത്യയുടെ ശത്രുക്കളെന്ന് ഗ്രന്ഥകാരനും ടൈംസ് ഓഫ് ഇന്ത്യ, എക്കണോമിക് ടൈംസ് എന്നിവയുടെ എഡിറ്ററുമായിരുന്ന എം. കെ. ഉല്ലേഖ് അഭിപ്രായപ്പെട്ടു. ന്യൂനപക്ഷങ്ങളെ വേട്ടയാടുന്ന പ്രവണത മതേതരരാജ്യമായ ഇന്ത്യയ്ക്ക് ഭൂഷണമല്ലെന്നും അദ്ദേഹം കൂട്ടിച്ചേർത്തു. മാള ഡോ. രാജ ു ഡേവിസ് ഇന്‍റര്‍നാഷണല്‍ സ്കൂളില്‍ നടന്നുവരുന്ന ഡെസിനിയല്‍ നോളജ് സീരീസിലെ പത്താമത് പ്രഭാഷണപരിപാടിയില്‍ പ്രസംഗിക്കുകയായിരുന്നു അദ്ദേഹം. ചെയര്‍മാന്‍ ഡോ. രാജു ഡേവിസ് പെരേപ്പാടന്‍ അധ്യക്ഷത വഹിച്ചു. ഡയറക്ടര്‍ അന്ന ഗ്രേസ് രാജു, പ്രിന്‍സിപ്പൽ‍ ഇ.ടി. ലത, വ്രിസ വിപിന്‍, ആരോണ്‍ ദേവ്, വൈഗ രഞ്ജിത് എന്നിവര്‍ പ്രസംഗിച്ചു.

തിരനോട്ടം ഒരുക്കുന്ന "അരങ്ങ്' ക്രൈസ്റ്റ് കോളജ് ഓഡിറ്റോറിയത്തില്‍ നാളെ

ഇരിങ്ങാലക്കുട: ഡോ. കെ.എന്‍. പിഷാരടി സ്മാരക കഥകളി ക്ലബ്ബിന്‍റെ സംഘാടനത്തില്‍ തിരനോട്ടം ഒരുക്കുന്ന അരങ്ങിന് നാളെ ക്രൈസ്റ്റ് കോളജ് ഓഡിറ്റോറിയത്തില്‍ വേദിയാകുന്നു. രാവിലെ 9.30ന് ആരംഭിക്കുന്ന അരങ്ങില്‍ ഗുരുദക്ഷിണയെത്തുടര്‍ന്ന് കോട്ടക്കല്‍ പിഎസ്‌വി നാട്യസംഘം അവതരിപ്പിക്കുന്ന "കീചകവധം' കഥകളിയുടെ സമ്പൂര്‍ണ്ണാവതരണം ഉണ്ടായിരിക്കും. നാട്യസംഘത്തിലെ നാല്പതോളം കലാകാരന്മാര്‍ ചൊല്ലിയാടിയുറപ്പിച്ച് അവതരിപ്പിക്കുന്ന എട്ടുമണിക്കൂറിലധികം നീണ്ടുനില്ക്കുന്ന ഈ ബൃഹത് അവതരണത്തില്‍ നായക കഥാപാത്രമായ കീചകവേഷത്തിന് ഡോ. സദനം കൃഷ്ണന്‍കുട്ടി പ്രത്യേക ക്ഷണിതാവായി പങ്കെടുക്കും. ജീവിതത്തിലുടനീളം സര്‍ഗാത്മകതനിറഞ്ഞ കലാസപര്യ പിന്‍തുടര്‍ന്ന മുതിര്‍ന്ന ആചാര്യന്മാര്‍ക്കുള്ള ദക്ഷിണ ഇത്തവണ കഥകളി നാട്യാചാര്യന്‍ കലാമണ്ഡലം കെ.ജി. വാസുദേവന്‍, അണിയറശില്പി കോട്ടയ്ക്കല്‍ കുഞ്ഞിരാമന്‍ എന്നീ മഹാപ്രതിഭകള്‍ക്ക് നല്കി ആദരിക്കുന്നു. കോട്ടയ്ക്കല്‍ കുഞ്ഞിരാമന് നല്കുന്ന ദക്ഷിണ കൊടുങ്ങല്ലൂര്‍ കുഞ്ഞിക്കുട്ടി തമ്പുരാട്ടിയുടെ സ്മരണാര്‍ത്ഥം ഏര്‍പ്പെടുത്തിയതാണ്. കഥകളി ക്ലബ് പ്രതിനിധികളായ രമേശന്‍ നമ്പീശന്‍ (പ്രസിഡന്‍റ്്), അഡ്വ. രാജേഷ് തമ്പാന്‍ (സെക്രട്ടറി), ടി.എന്‍. കൃഷ്ണദാസ് (ട്രഷറര്‍), തിരനോട്ടം പ്രതിനിധികളായ പി.എസ്. രാമസ്വാമി, ശശികുമാര്‍ തോട്ടുപുറം, തിരനോട്ടം കോ- ഓര്‍ഡിനേറ്റര്‍ അനിയന്‍ മംഗലശേരി എന്നിവര്‍ പത്രസമ്മേളനത്തില്‍ പങ്കെടുത്തു.

അരിപ്പാലത്തെ മാവേലിസ്റ്റോര്‍ നിര്‍ത്തി

അരിപ്പാലം: പൂമംഗലം പഞ്ചായത്തില്‍ അരിപ്പാലത്ത് പ്രവര്‍ത്തിച്ചിരുന്ന സിവില്‍സപ്ലൈസിന്‍റെ മാവേലിസ്റ്റോര്‍ നിര്‍ത്തി. വര്‍ഷങ്ങളായി പ്രദേശത്തെ ജനങ്ങള്‍ക്ക് ആശ്രയമായിരുന്ന മാവേലിസ്റ്റോറാണ് ഓഗസ്റ്റ് ഒന്നുമുതല്‍ നിര്‍ത്തിയത്. അരിപ്പാലത്ത് മാവേലിസ്റ്റോര്‍ പ്രവര്‍ത്തിച്ചിരുന്ന കെട്ടിടം ഉടമ മറ്റൊരാള്‍ക്ക് വിറ്റതി നാല്‍ ഒഴിയാന്‍ ആവശ്യപ്പെടുകയായിരുന്നു. കരാര്‍ തീര്‍ന്നതോടെയാണ് ആ മാസം മുതല്‍ സ്റ്റോറിന്‍റെ പ്രവര്‍ത്തനം നിര്‍ത്തിയത്. മാവേലിസ്റ്റോര്‍ പൂട്ടിയതിനെതിരേ ബിജെപി പൂമംഗലം പഞ്ചായത്ത് കമ്മിറ്റി രംഗത്തെത്തി. പൂമംഗലം പഞ്ചായത്തിന്‍റെ അനാസ്ഥയാണ് അടച്ചുപൂട്ടലിന് കാരണമെന്ന് ബിജെപി ആരോപിച്ചു. ഓണത്തിനു മുന്‍പ് ഔട്ട്‌ലറ്റ് തുറന്നുപ്രവര്‍ത്തിച്ചില്ലെങ്കില്‍ പഞ്ചായത്തില്‍ ഉപരോധം നടത്തുമെന്നും ബിജെപി നേതാവ് ബിജോയ് കുന്നുമ്മല്‍ പറഞ്ഞു. അതേസമയം പൂമംഗലം പഞ്ചായത്തില്‍ത്തന്നെ മാവേലി സ്റ്റോര്‍ തുടരുമെന്നും അരിപ്പാലത്ത് മറ്റൊരുസ്ഥലം കിട്ടാത്തതിനാല്‍ എടക്കുളം നെറ്റിയാട് സെന്‍ററിലേക്കാണ് മാവേലിസ്റ്റോര്‍ മാറ്റുന്നതെന്നും പഞ്ചായത്ത് പ്രസിഡന്‍റ് കെ.എസ്. തമ്പി പറഞ്ഞു. പൂമംഗലം സഹകരണബാങ്ക് നേരത്തേ പ്രവര്‍ത്തിച്ചിരുന്ന കെട്ടിടത്തിലേക്കാണ് മാറ്റുന്നത്. ഇതിന്‍റെ ഭാഗമായിട്ടാണ് അരിപ്പാലത്ത് പ്രവര്‍ത്തിച്ചുവരുന്ന മാവേലിസ്റ്റോര്‍ താത്കാലികമായി നിര്‍ത്തിയത്. ഓണത്തിന് മുന്‍പേ എടക്കുളത്ത് മാവേലിസ്റ്റോര്‍ അവിടെ പ്രവര്‍ത്തനം ആരംഭിക്കുമെന്നും പ്രസിഡന്‌റ് കൂട്ടിച്ചേര്‍ത്തു.

ആശുപത്രിജീവനക്കാരിയെ ആക്രമിച്ച സ്ത്രീ അറസ്റ്റിൽ

കൊടുങ്ങല്ലൂർ: താലൂക്ക് ആശൂപത്രിയിലെ കാഷ്വാലിറ്റിയിൽ ബഹളം വയ്ക്കുകയും പിടിച്ചുമാറ്റാൻ ശ്രമിച്ച സെക്യൂരിറ്റി ജീവനക്കാരിയെ കൊല്ലുമെന്നും മറ്റും ഭീഷണിപ്പെടുത്തി ആക്രമിച്ച് ഔദ്യോഗിക കൃത്യനിർവഹണം തടസപ്പെടുത്തിയ സംഭവത്തിൽ മതിലകം പള്ളിവളവ് കണ്ടകത്ത് വീട്ടിൽ കദീജ (65) അറസ്റ്റിൽ. ആറിന് വൈകീട്ട് 6.45നാണ് സംഭവം. കൊടുങ്ങല്ലൂർ പോലീസ് സ്റ്റേഷൻ ഇൻസ്പെക്ടർ ബി.കെ. അരുൺ, സബ് ഇൻസ്പെക്ടർ ടി.എം. കശ്യപൻ, സിവിൽ പോലീസ് ഓഫീസർമാരായ ഗിൽബർട്ട്, അമൽദേവ് എന്നിവരുടെ നേതൃത്വത്തിലാണ് പ്രതിയെ അറസ്റ്റ് ചെയ്തത്.

സ്കൂൾവിദ്യാർഥികളെ കബളിപ്പിച്ച് ബാറിലേക്ക് കൊണ്ടുപോയി മദ്യം കുടിപ്പിച്ച സംഭവം: കെഎസ്ഇബി ജീവനക്കാരനും ബാർ ജീവനക്കാരും അറസ്റ്റിൽ

ചാലക്കുടി: സ്കൂൾ വിദ്യാർഥികളെ കബളിപ്പിച്ച് മദ്യം കൊടുക്കുവാനായി ബാറിലേക്ക് കൊണ്ടുവന്ന കെഎസ്ഇബി ജീവനക്കാരനും മദ്യം നൽകിയ ബാർ ജീവനക്കാരെയും പോലീസ് അറസ്റ്റുചെയ്തൂ. കെഎസ്ഇബി ജീവനക്കാരൻ അന്നമനട കാട്ടുകണ്ടത്തിൽ വീട്ടിൽ സ്നേഹേഷ് (44), മദ്യം നൽകിയ ബാർ ജീവനക്കാരായ പാലക്കാട് കിഴക്കഞ്ചേരി എളവൂർപാടം കാട്ടിരിക്കൽ വീട്ടിൽ ദിവാകരൻ (45), വയനാട് പുൽപ്പള്ളി വടക്കൽ അനീഷ് (34) എന്നിവരാണ് അറസ്റ്റിലായത്. ഇവർക്കെതിരെ ജുവനൈൽ ജസ്റ്റിസ് ആക്ട് പ്രകാരവും അബ്കാരി ആക്ട് പ്രകാരവും കേസെടുത്തു. കഴിഞ്ഞദിവസം 4.30ന് ചായ്പൻകുഴിയിലുള്ള സ്കൂളിന്‍റെ മുന്നിൽനിന്നും പ്രായപൂർത്തിയാകാത്ത രണ്ട് സ്കൂൾ കുട്ടികളെ മോട്ടോർ സൈക്കിളിൽ മോതിരക്കണ്ണിയിലുള്ള ബാറിലേക്ക് കൂട്ടിക്കൊണ്ടുപോയി ബാറിൽവച്ച് കുട്ടികൾക്ക് ബിയർ വാങ്ങിക്കുടിക്കാൻ നൽകുകയായിരുന്നു. കെഎസ്ഇബി ജീവനക്കാരനായ സ്നേഹേഷിനെതിരെ വകുപ്പുതല നടപടികൾക്കായി റിപ്പോർട്ട് സമർപ്പിക്കും. ചാലക്കുടി പോലീസ് സ്റ്റേഷൻ ഇൻസ്പെക്ടർ എം.കെ. സജീവ്, എസ്ഐമാരായ ഋഷിപ്രസാദ്, കെ.കെ. ബിജു, ഹരിശങ്കർ പ്രസാദ്, എഎസ്ഐ ജിബി, സിവിൽ പോലീസ് ഓഫീസർമാരായ സുജിത്ത്, സജിത്ത് എന്നിവർ ചേർന്നാണ് പ്രതിയെ പിടികൂടിയത്.

അമലയില്‍ എന്‍എംസി ശില്പശാല

തൃശൂർ: അമല മെഡിക്കല്‍ കോളജ് അധ്യാപകര്‍ക്കായി നാഷണല്‍ മെഡിക്കല്‍ കൗണ്‍സിലിന്‍റെ നേതൃത്വത്തില്‍ ആരംഭിച്ച ത്രിദിനശില്പശാലയുടെ ഉദ്ഘാടനം ഡയറക്ടര്‍ ഫാ. ജൂലിയസ് അറയ്ക്കല്‍ നിര്‍വഹിച്ചു. ഫാ. ആന്‍റണി മണ്ണുമ്മല്‍, ഡോ. ബെറ്റ്സി തോമസ്, ഡോ. ദീപ്തി രാമകൃഷ്ണന്‍, ഡോ. ലോല ദാസ്, ഡോ. റെന്നീസ് ഡേവിസ്, എന്‍എംസി ഒബ്സര്‍വര്‍ ഡോ. സരിത ജെ. ഷെണോയ്, കോ ഓര്‍ഡിനേറ്റര്‍ ഡോ. സുനില്‍ കെ. മേനോന്‍ എന്നിവര്‍ പ്രസംഗിച്ചു.

ഒഡീഷയിലെ ആക്രമണം: തൃശൂർ അതിരൂപത പ്രതിഷേധിച്ചു

തൃശൂർ: ഒഡീഷയിലെ ജലേശ്വറിൽ വൈദികർക്കും സന്യസ്തർക്കുമെതിരേ ബജ്‌രംഗ്ദൾ നടത്തിയ ആൾക്കൂട്ട അക്രമത്തിനെതിരേ തൃശൂർ അതിരൂപത പ്രതിഷേധിച്ചു. ക്രൈസ്തവസമൂഹത്തിനെതിരേ തീവ്രനിലപാടുകളുള്ള ചില മതസംഘടനകളുടെ നേതൃത്വത്തിൽ വ്യാപകമായി നടന്നുവരുന്ന ആക്രമണങ്ങളിൽ അതിരൂപത ഉത്കണ്ഠയും ആശങ്കയും രേഖപ്പെടുത്തി. ഭരണഘടന ഉറപ്പുനൽകുന്ന മതസ്വാതന്ത്ര്യത്തിനും സുരക്ഷിതത്വത്തിനും എതിരായ തുടരെയുള്ള ആക്രമണങ്ങൾ ആവർത്തിക്കാതിരിക്കാൻ കേന്ദ്രസർക്കാർ സംസ്ഥാനങ്ങൾക്കു നിർദേശം നൽകണം. ഭയരഹിതമായി ജീവിക്കാനും പൗരന്മാരുടെ മതപരമായ അവകാശങ്ങൾ സംരക്ഷിക്കാനും സർക്കാരും നിയമ സംവിധാനങ്ങളും ശക്തമായ നടപടികൾ സ്വീകരിക്കണമെന്നും തൃശൂർ അതിരൂപത ഓർമപ്പെടുത്തി.

പട്ടികജാതി വിഭാഗത്തിലെ അമ്പതിനായിരം യുവാക്കള്‍ക്കു തൊഴില്‍ കണ്ടെത്തിനല്‍കും: മന്ത്രി

പുതുക്കാട്: സംസ്ഥാന സര്‍ക്കാരിന്‍റെ വിജ്ഞാനകേരളം പദ്ധതിയിലൂടെ അമ്പതിനായിരത്തിലധികം പട്ടികജാതി പട്ടികവര്‍ഗ യുവാക്കള്‍ക്ക് തൊഴില്‍ നല്‍കുന്നതിനാണ് സര്‍ക്കാരിന്‍റെ ലക്ഷ്യമെന്ന് മന്ത്രി ഒ.ആര്‍. കേളു പറഞ്ഞു. പുതുക്കാട് രണ്ടാംകല്ല് ഉന്നതിയില്‍ നടപ്പാക്കിയ ഒരുകോടി രൂപയുടെ അംബേദ്കര്‍ ഗ്രാമവികസനപദ്ധതി ഉദ്ഘാടനംനിര്‍വഹിച്ചു സംസാരിക്കുകയായിരുന്നു മന്ത്രി. കെ.കെ. രാമചന്ദ്രന്‍ എംഎല്‍എ അധ്യക്ഷതവഹിച്ചു. കൊടകര ബ്ലോക്ക് പഞ്ചായത്ത് പ്രസിഡന്‍റ് കെ.എം. ചന്ദ്രന്‍, ജില്ലാപഞ്ചായത്ത് അംഗം സരിത രാജേഷ്, ബ്ലോക്ക് പഞ്ചായത്ത് അംഗം സതി സുധീര്‍, പുതുക്കാട് ഗ്രാമപഞ്ചായത്ത് വൈസ് പ്രസിഡന്‍റ് ഷൈനി ജോജു, ഗ്രാമപഞ്ചായത്ത് അംഗം ഹിമ ദാസന്‍, ജില്ലാ പട്ടികജാതി ഉപദേശകസമിതി അംഗം പി.കെ. ശിവരാമന്‍, ജില്ലാ പട്ടികജാതി വികസന ഓഫിസര്‍ കെ. സന്ധ്യ എന്നിവര്‍ സംസാരിച്ചു. രണ്ടാംകല്ല് ഉന്നതിയില്‍ അംബേദ്കര്‍ ഗ്രാമം പദ്ധതിയുടെ ഭാഗമായി ഒമ്പതു വീടുകളുടെ നവീകരണം, മൂന്ന് റോഡുകളുടെ നിര്‍മാണം, ഡിജിറ്റല്‍ ലൈബ്രറി, ഡ്രെയ്‌നേജ് സംവിധാനം എന്നിവയാണ് നടപ്പിലാക്കിയത്.

വേലൂർ പഞ്ചായത്ത് ഓഫീസ് ഉദ്ഘാടനം ഇന്ന്; കോൺഗ്രസ് പ്രതിഷേധിക്കും

എരുമപ്പെട്ടി: വേലൂർ ഗ്രാമപഞ്ചായത്തിന്‍റെ ഓഫീസ് കെട്ടിട്ട നിർമാണത്തിൽ എംഎൽഎയും ഭരണസമിതിയും ജനങ്ങളെ വഞ്ചിച്ചെന്നും നിർമാണത്തിൽ അഴിമതിയുണ്ടെന്നും ആരോപിച്ച് കോൺഗ്രസ് രംഗത്തെത്തി. ഇന്നുനടക്കുന്ന ഉദ്ഘാടനം ബഹിഷ്കരിച്ച് പഞ്ചായത്ത് ഓഫീസിലേക്ക് മാർച്ചും ധർണയും നടത്തുമെന്ന് പ്രതിപക്ഷമായ കോൺഗ്രസ് മെമ്പർമാരും മണ്ഡലം കമ്മിറ്റി ഭാരവാഹികളും വാർത്താസമ്മേളനത്തിൽ അറിയിച്ചു. നാലുകോടി രൂപ ചെലവു വരുന്ന കെട്ടിടം നിർമിക്കുന്നതിന് മുഴുവൻ ഫണ്ടും എ.സി. മൊയ്തീൻ എംഎൽഎ നൽകുമെന്ന് ഉറപ്പുനൽകിയിരുന്നു. എന്നാൽ തനത് ഫണ്ടിൽനിന്ന് ആദ്യഗഡുവായി 80 ലക്ഷം നൽകിയെങ്കിലും കരിവന്നൂർ കേസിൽ പ്രതിയായതോടെ ബാക്കിയുള്ള ഫണ്ട് നൽകിയില്ല. ഇതോടെ നിർമാണംനിലച്ചു. വാടകക്കെട്ടിടത്തിലേക്ക് പ്രവർത്തനം മാറ്റിയതിനാൽ തനത് ഫണ്ടിൽനിന്ന് പഞ്ചായത്ത് 25 ലക്ഷം രൂപ വാടക നൽകേണ്ടിവന്നു. വാർഡുകളിലെ വികസനപ്രവർത്തനത്തിനായി നീക്കിവച്ച പഞ്ചായത്ത് തനത് ഫണ്ടിൽനിന്നു മൂന്നുകോടി 30 ലക്ഷം രൂപ ചെലവഴിച്ചാണ് കെട്ടിടത്തിന്‍റെ നിർമാണം പൂർത്തീകരിച്ചതെന്നും കോൺഗ്രസ് അറിയിച്ചു. ഇതോടെ ഭൂരിഭാഗം വാർഡുകളിലെയും കുടിവെള്ളപദ്ധതികളുടെയും റോഡുകളുടെയും ലൈഫ് പദ്ധതിയിലെ വീടുകളുടെയും നിർമാണംനിലച്ചു. ജൽ ജീവൻ പദ്ധതിക്കായി പൊളിച്ച റോഡുകൾ പുനർനിമിക്കാൻ കഴിഞ്ഞില്ല. എന്നാൽ സിപിഎം ഭരിക്കുന്ന വാർഡുകളിലേക്ക്‌ എംഎൽഎ ഫണ്ടും ജില്ല, ബ്ലോക്ക് ഫണ്ടുകളും അനുവദിച്ച് പ്രതിപക്ഷവാർഡുകളെ അവഗണിച്ചുവെന്നു കോൺഗ്രസ് ആരോപിച്ചു. കെട്ടിടനിർമാണത്തിന് ഫണ്ട് കണ്ടെത്തുന്നതിനായി നികുതി എട്ടുശതമാനത്തിൽനിന്നു 10 ശതമാനം ഉയർത്തി ജനങ്ങളെ ബുദ്ധിമുട്ടിച്ചു. ഇതിനെതിരേ നടന്ന പ്രതിപക്ഷസമരങ്ങളെ ഭരണസമിതി കണ്ടില്ലെന്ന് നടിച്ചു. മുഴുവൻ ഫണ്ട് തരാമെന്ന് വാഗ്ദാനംനൽകി വഞ്ചിച്ച എംഎൽഎക്കും ഫണ്ട് അനുവദിക്കാതിരുന്ന വകുപ്പുമന്ത്രിക്കും വേലൂരിലെ ജനങ്ങളുടെ നികുതിപ്പണം കൊണ്ട് നിർമിച്ച പഞ്ചായത്ത് ഓഫീസ് കെട്ടിടം ഉദ്ഘാടനംചെയ്യാൻ യോഗ്യതയില്ലായെന്നും കോൺഗ്രസ് ആരോപിച്ചു. എംഎൽഎയുടെയും ഭരണസമിതിയുടെയും ജനദ്രോഹനടപടിക്കെതിരേ കോൺഗ്രസ് നടത്തുന്ന പ്രതിഷേധ സമരം കെപിസിസി സെക്രട്ടറി ജോൺ ഡാനിയൽ ഉദ്ഘാടനംചെയ്യുമെന്നും കോൺഗ്രസ് നേതാക്കൾ അറിയിച്ചു. എരുമപ്പെട്ടി പ്രസ് ക്ലബിൽ നടത്തിയ വാർത്താസമ്മേളനത്തിൽ മണ്ഡലം പ്രസിഡന്‍റ് ഫ്രെഡി പി. ജോൺ, പ്രതിപക്ഷനേതാവ് സ്വപ്ന രാമചന്ദ്രൻ, ബ്ലോക്ക് വൈസ് പ്രസിഡന്‍റ് പി.പി. യേശുദാസ്, പഞ്ചായത്ത് മെമ്പർമാരായ പി.എൻ. അനിൽ, സി.ഡി. സൈമൺ എന്നിവർ പങ്കെടുത്തു.

ഗുരുവായൂരപ്പനു വഴിപാടായി നടപ്പന്തൽ സമർപ്പിച്ചു

ഗുരുവായൂർ: ക്ഷേത്രത്തിന്‍റെ കിഴക്കേനടയിൽ മേൽപുത്തൂർ ഓഡിറ്റോറിയത്തിന് തെക്കുഭാഗത്തായി നിർമിച്ച നടപ്പന്തൽ ഗുരുവായൂരപ്പന് സമർപ്പിച്ചു. കിഴക്കേനടയിൽ അലങ്കാരഗോപുരത്തിന് മുന്നിൽ നിർമിച്ച സ്റ്റീൽ ഗേറ്റും ഭഗവാന് സമർപ്പിച്ചു. തമിഴ്നാട് കുംഭകോണം ഗുരുവായൂരപ്പ ഭക്തസംഘത്തിന്‍റെ വഴിപാടായാണ് 60 ലക്ഷം ചെലവിട്ട നിർമാണപ്രവൃത്തികള്‌ വഴിപാടായി സമർപ്പിച്ചത്. ഇതിനുപുറമെ ക്ഷേത്രത്തിന്‍റെ കിഴക്കേഗോപുരത്തിലേയും പടിഞ്ഞാറെഗോപുരത്തിലേയും തൂണുകളിൽ പൊതിഞ്ഞ വെള്ളിയുടെ പോളീഷിംഗും ഇവർ ചെയ്തുനൽകും. ദേവസ്വം ചെയർമാൻ ഡോ.വി.കെ. വിജയൻ നടപ്പന്തൽ സമർപ്പണം നിർവഹിച്ചു. ദേവസ്വം ഭരണസമിതി അംഗങ്ങളായ മല്ലിശേരി പരമേശ്വരൻ നമ്പൂതിരിപ്പാട്, സി. മനോജ്, മനോജ് ബി.നായർ, കെ.പി. വിശ്വനാഥൻ, അഡ്മിനിസ്ട്രേറ്റർ ഒ.ബി. അരുൺകുമാർ, കുംഭകോണം ശ്രീഗുരുവായൂരപ്പൻ ട്രസ്റ്റ് പ്രസിഡന്‍റ് മണിചന്ദ്രൻ, എൻജിനീയർമാരായ എം.വി. രാജൻ, എം.കെ. അശോക്‌കുമാർ എന്നിവർ പങ്കെടുത്തു.

വാഴാനി ഫോറസ്റ്റ് സ്റ്റേഷന്‍റെ പ്രവർത്തനം അകമലയിലേക്കു മാറ്റില്ല

വടക്കാഞ്ചേരി: ദീപിക വാർത്ത ശ്രദ്ധയിൽപ്പെട്ട എംഎൽഎയുടെ ഇടപെടലിൽ വാഴാനി ഫോറസ്റ്റ് സ്റ്റേഷന്‍റെ പ്രവർത്തനം അകമലയിലേക്കുമാറ്റില്ല. വാഴാനി ഫോറസ്റ്റ് സ്റ്റേഷൻ അകമലയിലേക്ക് മാറ്റുന്നതായുള്ള വാർത്തയാണ് സേവ്യർ ചിറ്റിലപ്പിള്ളി എംഎൽഎയുടെ ശ്രദ്ധയിൽപ്പെട്ടത്. വനംമന്ത്രിയുടെ ഓഫീസുമായി നടത്തിയ അടിയന്തര ഇടപെടലിനെത്തുടർന്ന് ഉത്തരവ് നടപ്പാക്കേണ്ടതില്ലെന്ന് ഡിഎഫ്ഒ പുതിയ ഉത്തരവിറക്കിയതായി സേവ്യർ ചിറ്റിലപ്പിള്ളി എംഎൽഎ അറിയിച്ചു. മച്ചാട്, വടക്കാഞ്ചേരി റേയ്ഞ്ചുകളിലെ വനാതിർത്തികളിൽ കാട്ടാനശല്യവും വന്യമൃഗ ഭീതിയും നിലനിൽക്കുന്ന സാഹചര്യത്തിൽ പ്രതിരോധപ്രവർത്തനങ്ങൾ ശക്തിപ്പെടുത്തുകയാണ് സർക്കാർ ചെയ്യുന്നത്. നിർത്തലാക്കിയ അകമല ഫോറസ്റ്റ് സ്റ്റേഷൻ പുന:സ്ഥാപിക്കുകയാണുവേണ്ടത്. കൂടുതൽ വാച്ചർമാരെ നിയോഗിച്ച് പ്രതിരോധപ്രവർത്തനങ്ങൾ ശക്തിപ്പെടുത്തണം. ഇതിനുപകരം വാഴാനിയിലെ ഫോറസ്റ്റ് സ്റ്റേഷൻ അകമലയിലേക്കുമാറ്റി ക്രമീകരണം നടത്തിയതായി ഉത്തരവിറങ്ങിയ സാഹചര്യം പരിശോധിക്കുമെന്ന് സേവ്യർ ചിറ്റിലപ്പിള്ളി എംഎൽഎ പറഞ്ഞു.

മേയർക്ക് എതിരേ ഭരണപക്ഷം; സംരക്ഷിക്കുമെന്നു പ്രതിപക്ഷം

തൃശൂർ: മേയർക്കെതിരേ വീണ്ടും ഭരണപക്ഷം. മേയറെ സംരക്ഷിക്കുമെന്ന‌ു പ്രതിപക്ഷവും. വഞ്ചിച്ചു പുറത്താക്കിയവർ എന്തുകാണിച്ച് സംരക്ഷിക്കുമെന്നു ഭരണപക്ഷത്തിന്‍റെ ചോദ്യം. കോർപറേഷൻ കൗണ്‍സിൽ യോഗത്തിൽ വീണ്ടും നാടകീയനിമിഷങ്ങൾ. അങ്കണവാടിനിർമാണത്തിനായി സ്ഥലം വാങ്ങുന്നതുമായി ബന്ധപ്പെട്ടുള്ള അജൻഡയിൽ, കുട്ടികളില്ലാത്ത സാഹചര്യത്തിൽ അങ്കണവാടിതന്നെ വേണമെന്നില്ല എന്ന് പ്രതിപക്ഷ കൗണ്‍സിലറും സ്റ്റാൻഡിംഗ് കമ്മിറ്റി ചെയർപേഴ്സണുമായ മുകേഷ് കൂളപറന്പിൽ നടത്തിയ പരാമർശമാണ് തമ്മിൽത്തല്ലിനു തുടക്കമിട്ടത്. അങ്കണവാടിയെന്നതു കുട്ടികളെ നോക്കാൻ മാത്രമുള്ള ഇടമല്ലെന്നും തന്‍റെ ഡിവിഷനിൽ അങ്കണവാടിക്കു സ്ഥലം വാങ്ങിയിട്ടുണ്ടെന്നും പ്രതിപക്ഷ കൗണ്‍സിലർ ലാലി ജെയിംസ് പറഞ്ഞതോടെ ഭരണമുന്നണി കൗണ്‍സിലർ അനീസ് അഹമദ് മേയർക്കെതിരേ രംഗത്തുവന്നു. ചിലർക്കുമാത്രം ചില പദ്ധതികൾ നടപ്പാക്കിക്കിട്ടുന്നുവെന്ന് ആരോപിച്ച് പ്രതിഷേധം അറിയിച്ച അനീസിനെ ശാന്തനാക്കാൻ മേയർ എം.കെ. വർഗീസ് ശ്രമിച്ചെങ്കിലും അനീസിനു പിന്തുണയുമായി ഭരണമുന്നണിയിലെതന്നെ സാറാമ്മ റോബ്സണും ഷീബ ബാബുവും ശബ്ദം ഉയർത്തിയതോടെ, കിട്ടിയ അവസരം മുതലാക്കാനുള്ള പ്രതിപക്ഷശ്രമത്തെച്ചൊല്ലിയും കൗണ്‍സിലിൽ ഇരുമുന്നണികളും കൊന്പുകോർത്തു. പാർട്ടിയിലെ തമ്മിൽത്തല്ല് പാർലിമെന്‍ററി പാർട്ടിസമ്മേളനത്തിൽ മതിയെന്നും മേയറെ ഒറ്റപ്പെടുത്തരുതെന്നും മേയർക്കു പ്രതിപക്ഷം സംരക്ഷണം നൽകുമെന്നും പ്രതിപക്ഷനേതാവ് രാജൻ പല്ലനും കോണ്‍ഗ്രസ് കൗണ്‍സിലർ ജോണ്‍ ഡാനിയലും പറഞ്ഞു. ഇതിനെതിരേ രംഗത്തുവന്ന ഭരണമുന്നണി കൗണ്‍സിലർ ആർ. രാഹുൽനാഥിന്‍റെ സംസാരത്തിനു തടയിടാനുള്ള വർഗീസ് കണ്ടംകുളത്തിക്ക് എതിരേ രാഹുൽനാഥും തിരിഞ്ഞതോടെ വാദപ്രതിവാദങ്ങൾ ശക്തമായി. നേതാക്കൾക്കുമാത്രമല്ല മറ്റുള്ളവർക്കും സംസാരിക്കാൻ അനുവാദമുണ്ടെന്നായി രാഹുൽനാഥ്. അങ്കണവാടി വിഷയവുമായി ബന്ധപ്പെട്ട് പലതവണ ആവശ്യപ്പെട്ടിട്ടും നടപ്പാക്കാൻ കഴിയാതെ പോയതാണ് അനീസിന്‍റെ പ്രതിഷേധത്തിന് ഇടയാക്കിയത്. വിഷയം തന്‍റെ ശ്രദ്ധയിൽപ്പെട്ടിട്ടില്ലെന്നും പരിശോധിക്കാമെന്നും എല്ലാവർക്കും പദ്ധതികൾ ഒരുപോലെ ലഭ്യമാകണമെന്നാണ് താൻ ആഗ്രഹിക്കുന്നതെന്നും മേയർ പറഞ്ഞു. കോർപറേഷന്‍റെ സബ്സ്റ്റേഷൻ നിർമാണോദ്ഘാടനവുമായി ബന്ധപ്പെട്ട് കേന്ദ്രമന്ത്രി സുരേഷ് ഗോപിയുടെ ചിത്രം എല്ലായിടത്തും ഫ്ലെക്സ് അടിച്ചുവയ്ക്കുന്പോഴും കേന്ദ്രമന്ത്രിയുടെ ഒഴിവുകൂടി അറിഞ്ഞുവേണം അതു ചെയ്യാനെന്നും മനഃപൂർവം ഒഴിവാക്കാനുള്ള ശ്രമം അംഗീകരിക്കാൻ കഴിയില്ലെന്നും ബിജെപി കൗണ്‍സിലർമാർ പറഞ്ഞു. എന്നാൽ, സുരേഷ്ഗോപിയെ പലതവണ ബന്ധപ്പെടാൻ ശ്രമിച്ചിട്ടും കിട്ടിയില്ലെന്നായിരുന്നു മേയറുടെ വാദം. മേൽക്കൂര റോഡിലേക്കു വീണ സംഭവം: വിജിലൻസ് അന്വേഷണം പ്രഖ്യാപിച്ച് മേയർ തൃശൂർ: കോർപറേഷൻ കെട്ടിടത്തിന്‍റെ മുകളിൽ സ്ഥാപിച്ചിരുന്ന ഷീറ്റുമേഞ്ഞ മേൽക്കൂര എംഒ റോഡിലേക്കു വീണ സംഭവത്തിൽ വിജിലൻസ് അന്വേഷണം പ്രഖ്യാപിച്ച് മേയർ എം.കെ. വർഗീസ്. എന്നാൽ, കുറ്റക്കാരായ ഉദ്യോഗസ്ഥരെ സസ്പെൻഡ് ചെയ്യാതിരിക്കാനുള്ള തന്ത്രമാണിതെന്നും വിജിലൻസ് അന്വേഷണം പ്രഖ്യാപനത്തിൽ ഒതുങ്ങുമെന്നും പ്രതിപക്ഷനേതാവ് രാജൻ ജെ. പല്ലൻ കുറ്റപ്പെടുത്തി. കുറ്റക്കാരായ ഉദ്യോഗസ്ഥരെ സസ്പെൻഡ് ചെയ്തു സർക്കാരിനു റിപ്പോർട്ട് കൈമാറണം. സെക്രട്ടറിയുടെ റിപ്പോർട്ടിൽ അസിസ്റ്റന്‍റ് എൻജിനീയർ നിഷാന്തിനു വീഴ്ച പറ്റിയതാണെന്നുണ്ടെന്നും ടെക്നിക്കൽ അനുമതി കൊടുത്ത അന്നത്തെ സൂപ്രണ്ടിംഗ് എൻജിനീയർ ഷൈബി ജോർജ് നിയമം പാലിച്ചിട്ടില്ലെന്നും രാജൻ പല്ലൻ കുറ്റപ്പെടുത്തി.

വീട് ജപ്തിചെയ്തു; കുടുംബത്തെ ഇറക്കിവിടാനുള്ള ബാങ്കിന്‍റെ ശ്രമം തടഞ്ഞു

എരുമപ്പെട്ടി: നെല്ലുവായിൽ വീട് ജപ്തിചെയ്ത് കുടുംബത്തെ ഇറക്കിവിടാനുള്ള ബാങ്കിന്‍റെ ശ്രമം സിപിഎം നേതാക്കൾ തടഞ്ഞു. മഹാരാഷ്ട്ര ആസ്ഥാനമായി പ്രവർത്തിക്കുന്ന ഉജ്ജീവൻ സ്മോൾ ഫിനാൻസ് ബാങ്ക് ഉദ്യോഗസ്ഥരാണ് ജപ്തി നടപടികൾ സ്വീകരിച്ചത്. വീട്ടുകാരെടുത്ത ലോൺ തിരിച്ചടവുമുടങ്ങി കുടിശികയായതിനെ തുടർന്നായിരുന്നു ബാങ്കിന്‍റെ നടപടി. വിവരമറിഞ്ഞ് സ്ഥലത്തെത്തിയ സിപിഎം വടക്കാഞ്ചേരി ഏരിയാകമ്മിറ്റിയംഗം കെ.എം. അഷറഫിന്‍റെ നേതൃത്വത്തിൽ ലോക്കൽ സെക്രട്ടറി പി.സി. അബാൽ മണി, വാർഡ് മെമ്പർ എൻ.പി. അജയൻ എന്നിവർ ജപ്തി തടയുകയായിരുന്നു. സംഭവ സമയത്ത് ഗൃഹനാഥൻ വീട്ടിലുണ്ടായിരുന്നില്ല. അദ്ദേഹത്തിന്‍റം ഭാര്യയും ഗർഭിണിയായ മകൾ ഉൾപ്പടെ രണ്ട് പെൺമക്കളും ഇവരുടെ ചെറിയ കുഞ്ഞുങ്ങളുമാണ് വീട്ടിലുണ്ടായിരുന്നത്. ഇവരെ വീട്ടിൽനിന്നിറക്കി പോലീസും കോടതിയിൽനിന്ന് കമ്മീഷനുമായിയെത്തിയ ബാങ്ക് ഉദ്യോസ്ഥരും വാതിൽപൂട്ടി സീൽചെയ്തു. വിവരമറിഞ്ഞെത്തിയ സിപിഎം നേതാക്കൾ ഉദ്യേഗസ്ഥരുമായി വാക്കേറ്റമുണ്ടാകുകയും പൂട്ടുതുറന്ന് വീട്ടുകാരെ അകത്തുകയറ്റുകയുംചെയ്തു. പിന്നീട് സ്ഥലത്തെത്തിയ ഗൃഹനാഥൻ ചർച്ചനടത്തി വായ്പ തിരിച്ചടയ്ക്കാൻ ബാങ്ക് അധികൃതരിൽനിന്ന് സമയം നീട്ടിവാങ്ങി.

ബാങ്ക് സെക്യൂരിറ്റി ജീവനക്കാരൻ ട്രെയിൻതട്ടി മരിച്ചനിലയിൽ

ഗുരുവായൂർ: വിമുക്തഭടനായ ബാങ്ക് സെക്യൂരിറ്റി ജീവനക്കാരനെ ട്രെയിൻതട്ടി മരിച്ചനിലയിൽ കണ്ടെത്തി. കുന്നംകുളം പെരുമ്പിലാവ് പൊറവൂർ ചൂണ്ടലാത്ത് വീട്ടിൽ ദിലീപിനെ(44)യാണ് മരിച്ച നിലയിൽ കണ്ടെത്തിയത്. ബോർഡർ സെക്യൂരിറ്റി ഫോഴ്സിൽ ഹവിൽദാർ ആയിരുന്ന ദിലീപ് മൂന്നു വർഷം മുമ്പാണ് ഗുരുവായൂർ കിഴക്കേനടയിലെ എസ്ബിഐ ബ്രാഞ്ചിൽ സെക്യൂരിറ്റി ജോലിക്ക് കയറിയത്. ഇന്നലെ രാവിലെ ബാങ്കിലെത്തി അവധി പറഞ്ഞ് തിരിച്ചു പോയിരുന്നു. എട്ടരയോടെ കർണ്ണംകോട്ട് ബസാർ റെയിൽവേ ഗേറ്റിനു സമീപം ഫോണിൽ സംസാരിച്ചു നിൽക്കുന്നതായി പരിസരവാസികൾ കണ്ടിരുന്നു. 8.40ന് എറണാകുളം പാസഞ്ചർ കടന്നുപോയതിനുശേഷമാണ് മൃതദേഹം കണ്ടെത്തിയത്. ഗുരുവായൂർ ടെമ്പിൾ പോലീസ് മേൽനടപടികൾ സ്വീകരിച്ചു. ഭാര്യ: ശ്യാമ. മകൾ: അൻസിക.

ഡ്രൈവർ കുഴഞ്ഞുവീണ് മരിച്ചു

തളിക്കുളം: തളിക്കുളം സ്വദേശി കുഴഞ്ഞുവീണ് മരിച്ചു. മുറ്റിച്ചൂർ പാലത്തിനു തെക്ക് കിഴക്കിനിയത്ത് പരേതനായ കൊച്ചുമോന്‍റെ മകൻ സത്യൻ(68) ആണ് മരിച്ചത്. ഷാപ്പ് ഏജൻസിയുടെ കള്ളുവിതരണ വാഹനത്തിന്‍റെ ഡ്രൈവറായിരുന്നു. ഇന്നലെ ഉച്ചയ്ക്ക് മുറ്റിച്ചൂർ പാലത്തിനു സമീപം കുഴഞ്ഞുവീഴുകയായിരുന്നു. ഉടനെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മാതാവ്: മീനാക്ഷി. ഭാര്യ: ഗീത. മക്കൾ: ഷിബിൻ, ഷിജി. മരുമക്കൾ: ശാന്തി, ശ്രീജു.

തൂങ്ങിമരിച്ചനിലയിൽ

കാെരട്ടി: കൊരട്ടി അങ്ങാടി റെയിൽവേ സ്‌റ്റേഷൻ പ്ലാറ്റ്ഫോമിലെ തണൽമരത്തിൽ അജ്ഞാതനെ തൂങ്ങി മരിച്ചനിലയിൽ കണ്ടെത്തി. ഇന്നലെ രാവിലെ സ്റ്റേഷനിലെത്തിയ യാത്രക്കാരാണ് ടിക്കറ്റ് കൗണ്ടറിലെ ജീവനക്കാരനെയും പോലീസിനെയും വിവരം അറിയിച്ചത്. കൊരട്ടി പോലീസ് സ്ഥലത്തെത്തി മേൽനടപടികൾ സ്വീകരിച്ചു. തുടർന്ന് മൃതദേഹം ചാലക്കുടി താലൂക്ക് ആശുപത്രിയിലേക്കു മാറ്റി. 55 വയസ് തോന്നിക്കുന്ന പുരുഷന്‍റേതാണ് മൃതദേഹം.

സഹൃദയ കോളജില്‍ ഹിരോഷിമ ദിനാചരണം

കൊടകര: സഹൃദയ കോളജ് ഓഫ് അഡ്വാന്‍സ്ഡ് സ്റ്റഡീസിലെ എന്‍എസ്എസ് യൂണിറ്റിന്‍റെ നേതൃത്വത്തില്‍ ഹിരോഷിമ ദുരന്തത്തിന്‍റെ 80 ാം വാര്‍ഷികാചരണം സംഘടിപ്പിച്ചു. എന്‍എസ്എസ് വോളന്‍റിയര്‍ ശ്രേയ സുരേഷ് നിര്‍മിച്ച സമാധാനത്തിന്‍റെ പ്രതീകമായ സഡാക്കൊ കൊക്കുകളെ എക്‌സിക്യൂട്ടീവ് ഡയറക്ടര്‍ റവ. ഡോ. ഡേവിസ് ചെങ്ങിനിയാടന്‍ പ്രിന്‍സിപ്പല്‍ ഡോ. കെ.എല്‍. ജോയ്, വൈസ് പ്രിന്‍സിപ്പല്‍ ഡോ. കെ. കരുണ എന്നിവര്‍ക്കുകൈമാറി ഉദ്ഘാടനം ചെയ്തു. കോളജ് അസോസിയേറ്റ് എക്‌സിക്യൂട്ടീവ് ഡയറക്ടര്‍ റവ. ഡോ. ജോജി കല്ലിങ്കല്‍, ഡീന്‍ ഓഫ് അക്കാദമിക്‌സ് ഡോ. എം. ബി. ഷീബ, എന്‍എസ്എസ് പ്രോഗ്രാം ഓഫീസര്‍ കെ. ജയകുമാര്‍, വോളന്‍റിയര്‍മാരായ ഏയ്ഞ്ചല്‍ റോസ്, പൂര്‍ണിമ ശങ്കര്‍, ഗോപിക മുരളീധരന്‍, മുഹമ്മദ് നിഹാല്‍ എന്നിവര്‍ പ്രസംഗിച്ചു.

മന്ത്രി ആര്‍. ബിന്ദുവിന്‍റെ ഓഫീസിലേക്ക് എബിവിപി മാര്‍ച്ച്

ഇരിങ്ങാലക്കുട: സര്‍വകലാശാലകളില്‍ സ്ഥിരം വിസിമാരെ നിയമിക്കുക, കേരളത്തിലെ ഗവ. കോളജുകളില്‍ സ്ഥിരം പ്രിന്‍സിപ്പല്‍മാരെ നിയമിക്കുക, സര്‍വകലാശാല ഭരണത്തില്‍ സര്‍ക്കാരിന്‍റെ രാഷ്ട്രീയ ഇടപെടലുകള്‍ അവസാനിപ്പിക്കുക എന്നീ വിഷയങ്ങള്‍ ഉന്നയിച്ചുകൊണ്ട് ഉന്നത വിദ്യാഭ്യാസ മന്ത്രി ഡോ. ആര്‍. ബിന്ദുവിന്‍റെ ഇരിങ്ങാലക്കുടയിലെ ഓഫീസിലേക്ക് എബിവിപി തൃശൂര്‍ ജില്ലാ കമ്മിറ്റിയുടെ നേതൃത്വത്തില്‍ പ്രതിഷേധ മാര്‍ച്ച് സംഘടിപ്പിച്ചു. ആല്‍ത്തറയ്ക്കുസമീപം പോലീസ് മാര്‍ച്ച് തടഞ്ഞു. എബിവിപി സംസ്ഥാന ജോയിന്‍റ്് സെക്രട്ടറി ആര്‍. അശ്വതി മാര്‍ച്ച് ഉദ്ഘാടനം ചെയ്തു പ്രസംഗിച്ചു. എബിവിപി തൃശൂര്‍ ജില്ല സെ ക്രട്ടറി കെ.എസ്. യദുകൃഷ്ണന്‍, സംസ്ഥാനസമിതി അംഗം വിഘ്നേശ്, ജില്ലാസമിതി അംഗങ്ങളായ എം.ബി. അരുണ്‍, സി ദ്ധാര്‍ഥ്, അമല്‍, ആനയ്കൃഷ് ണ തുടങ്ങിയവര്‍ മാര്‍ച്ചിനു നേതൃത്വം നല്‍കി.

പ്രോജക്ട് റിപ്പോര്‍ട്ട് തയാറാക്കാന്‍ ഉദ്യോഗസ്ഥ സംഘമെത്തി

മൂന്നുമുറി: മറ്റത്തൂര്‍ പഞ്ചായത്തില്‍ പ്രാദേശിക ടൂറിസംപദ്ധതി നടപ്പാക്കുന്നതുമായി ബന്ധപ്പെട്ട് ഡിടിപിസി ഉദ്യോഗസ്ഥസംഘം ഇന്നലെ കുഞ്ഞാ ലിപ്പാറ പ്രദേശം സന്ദര്‍ശിച്ചു. ഡെസ്റ്റിനേഷന്‍ ചലഞ്ച് പദ്ധതിയിലുള്‍പ്പെടുത്തി നടപ്പാക്കുന്ന ടൂറിസം പ്രോജക്ടിനുവേണ്ടി വിശദമായ റിപ്പോര്‍ട്ട് തയാറാക്കുന്നതിനായാണു ടൂറിസം പ്രമോഷന്‍ കൗണ്‍സിലില്‍നിന്നുള്ള ഉദ്യോഗസ്ഥര്‍ കുഞ്ഞാലിപ്പാറയിലെത്തിയത്. ഡെപ്യൂട്ടി ഡയറക്ടര്‍ ആര്‍.സി. പ്രേംഭാസ്, ഡിടിപിസി സെക്രട്ടറി സി. വിജയരാജ്, സി എര്‍ത്ത് ആര്‍ക്കിടെക്ട് സി.പി. സുനില്‍ എന്നിവരടങ്ങിയ സംഘമാണ് ഇവിടെയെത്തി സാധ്യതാപഠനം നടത്തിയത്. ഡിടിപിസിയും മറ്റത്തൂര്‍ പഞ്ചായത്തും സംയുക്തമായാണ് പദ്ധതി നടപ്പാകുന്നത്. ഇതിനായി നേരത്തെ മറ്റത്തൂര്‍ പഞ്ചായത്ത് തയാറാക്കിയ ഡി പിആറില്‍ മാറ്റങ്ങള്‍ വരുത്തിക്കൊണ്ടുള്ള പ്രോജക്ട് റിപ്പോര്‍ട്ട് ഒരാഴ്ചയ്ക്കകം തയാറാക്കി ജില്ലാ കളക്ടര്‍ക്ക് സമര്‍പ്പിക്കുമെന്നും കളക്ടറുടെ അംഗീകാരം ലഭിച്ചാല്‍ ഈ 31നകം വിശദമായ റിപ്പോര്‍ട്ട് തയാറാക്കി വകുപ്പുതല അനുമതിക്കു സമര്‍പ്പിക്കുമെന്നും അനുമതി ലഭിച്ചാലുടന്‍ പദ്ധതിയുടെ നിര്‍മാണജോലികള്‍ ആരംഭിക്കുമെന്നും ടൂറിസം ഡെപ്യൂട്ടി ഡയറക്ടര്‍ ആര്‍.സി. പ്രേംഭാസ് പറഞ്ഞു. ആദ്യഘട്ടത്തില്‍ സഞ്ചാരികള്‍ക്കാവശ്യമായ അടിസ്ഥാന‌സൗകര്യങ്ങള്‍ ഒരുക്കുന്നതിനാണ് ഊന്നല്‍ നല്‍കുക. ഏകദേശം ഒരു കോടിരൂപയോളമാണു പദ്ധതിക്കു ചെലവുപ്രതീക്ഷിക്കുന്നത്. നാടിന് ഉണര്‍വേകുന്ന മികച്ച പദ്ധതിയായി കുഞ്ഞാലിപ്പാറ ടൂറിസം മാറുമെന്ന് വാര്‍ഡ് മെംബര്‍ എം.എസ്. സുമേഷ് പറഞ്ഞു.

സ്‌കൂളിലെ സീലിംഗ് വീണ സംഭവം ; പ്രതിഷേധം ശക്തം

യൂത്ത് കോണ്‍ഗ്രസ് പ്രകടനവും പ്രതിഷേധയോഗവും കോടാലി: ഗവ. എല്‍പി സ്‌കൂള്‍ ഓഡിറ്റോറിയത്തിന്‍റെ സീലിംഗ് നിര്‍മാണത്തില്‍ അഴിമതികാണിച്ചവരെ ശിക്ഷിക്കണമെന്നാവശ്യപ്പെട്ട് യൂത്ത് കോണ്‍ഗ്രസ് മറ്റത്തൂര്‍ മണ്ഡലം കമ്മിറ്റിയുടെ നേതൃത്വത്തില്‍ പ്രതിഷേധപ്രകടനവും പൊതുയോഗവും സംഘടിപ്പിച്ചു. യൂത്ത് കോണ്‍ഗ്രസ് സംസ്ഥാന വൈസ് പ്രസിഡന്‍റ് ഒ.ജെ. ജനീഷ് ഉദ്ഘാടനം ചെയ്തു. മണ്ഡലം പ്രസിഡന്‍റ് ് പ്രതീഷ് പണ്ടാരത്തില്‍ അധ്യക്ഷത വഹിച്ചു. ഡിസിസി ജനറല്‍ സെക്രട്ടറി ടി.എം. ചന്ദ്രന്‍, യൂത്ത് കോണ്‍ഗ്രസ് സംസ്ഥാന സെക്രട്ടറി ജെറോണ്‍ ജോണ്‍, ഷാഫി കല്ലൂപറമ്പില്‍, സി.എച്ച്. സാദത്ത്, ലിന്‍റോ പള്ളിപ്പറമ്പന്‍, പ്രവീണ്‍ എം. കുമാര്‍, എ.ബി. പ്രിന്‍സ്, നൈജോ ആന്‍റോ, ലിനോ മൈക്കിള്‍ എന്നിവര്‍ പ്രസംഗിച്ചു. ബിജെപിയുടെ പന്തംകൊളുത്തിപ്രകടനം കോടാലി: ഗവ. എല്‍പി സ്‌കൂളില്‍ ഓഡിറ്റോറിയത്തിലെ സീലിംഗ് തകര്‍ന്നുവീണ സംഭവത്തില്‍ അന്വേഷണം ആവശ്യപ്പെട്ട് ബിജെപിയുടെ നേതൃത്വത്തില്‍ കോടാലിയില്‍ പന്തംകൊളുത്തി പ്രകടനം നടത്തി. തുടര്‍ന്ന് ആല്‍ത്തറയ്ക്കല്‍ നടന്ന പൊതുയോഗം ബിജെപി ജില്ലാ പ്രസിഡന്‍റ് ജസ്റ്റിന്‍ ജേക്കബ് ഉദ്ഘാടനം ചെയ്തു. മറ്റത്തൂര്‍ മേഖല പ്രസിഡന്‍റ് വേണുഗോപാല്‍ തോട്ടത്തില്‍, വെള്ളിക്കുളങ്ങര മേഖല പ്രസിഡന്‍റ് സജിത ചന്ദ്രന്‍, അഡ്വ. പി.ജി. ജയന്‍, ശ്രീധരന്‍ കളരിക്കല്‍, സുധീര്‍ വെട്ടിയാട്ടില്‍ തുടങ്ങിയവര്‍ പ്രസംഗിച്ചു. എന്‍ജിനീയര്‍മാരുടെ സംഘം പരിശോധനയ്ക്കെത്തി കോടാലി: കോടാലി ജിഎല്‍പി സ്‌കൂളില്‍ ഓഡിറ്റോറിയത്തിന്‍റെ സീലിംഗ് ഇളകി വീണതിനെക്കുറിച്ച് അന്വേഷിക്കാന്‍ തദ്ദേശസ്വയംഭരണ വകുപ്പിലെ എന്‍ജിനീയര്‍മാരുടെ സംഘം എത്തി. എക്‌സിക്യൂട്ടീവ് എന്‍ജിനീയര്‍ പി.ജെ. സ്മിതയുടെ നേതൃത്വത്തിലുള്ള സംഘമാണ് ഇന്നലെ പരിശോധനക്കെത്തിയത്. കൊടകര ബ്ലോക്ക് പഞ്ചായത്ത് അസി.എക്‌സിക്യൂട്ട് എന്‍ജിനീയര്‍ എം.ജെ. രതീഷ്, മറ്റത്തൂര്‍ പഞ്ചായത്ത് അസി.എന്‍ജിനീയര്‍ ദിവ്യഗോപിനാഥ് എന്നിവരും പരിശോധന സംഘത്തിലുണ്ടായിരുന്നു. സീലിംഗ് വീഴാനിടയായതു സംബന്ധിച്ച് അന്വേഷിച്ച് റിപ്പോര്‍ട്ട് നല്‍കാന്‍ ജില്ലാ കളക്ടര്‍ നിര്‍ദേശിച്ചതിന്‍റെ അടിസ്ഥാനത്തിലാണ് ഇവര്‍ സ്‌കൂളില്‍ പരിശോധനയ്ക്കെത്തിയത്.

കുത്തിപ്പൊളി; റീറ്റെയിൻ വാൾ നിർമാണം ജനകീയ പ്രതിഷേധത്തെത്തുടർന്ന് രാത്രി നിർത്തിവച്ചു

കൊരട്ടി: മുരിങ്ങൂരിനും ചിറങ്ങരയ്ക്കും പിന്നാലെ കൊരട്ടിയിൽ മൂന്നു സ്പാനുകളിലുയർത്തിയ മേൽപ്പാലത്തിന്‍റെ അപ്രോച്ച് റോഡ് നിർമിക്കുന്നതിനുള്ള റീറ്റെയിൻ വാളിനായി മൂന്നു വാലറ്റവും കുത്തിപ്പൊളിച്ചു. സർക്കാർ അച്ചുകൂടത്തിനുസമീപം കുത്തിപ്പൊളിച്ചതു യാതൊ രു സുരക്ഷാമാനദണ്ഡങ്ങളും പാലിക്കാതെയാണെന്നും വെളിച്ചമില്ലാത്ത ഭാഗമെന്ന നിലയിൽ ലൈറ്റുകളോ അപകടസൂചന നൽകുന്ന ബ്ലിങ്കിംഗ് ലൈറ്റുകളാോ സ്ഥാപിക്കാതെ റീറ്റെയിൻ വാളിനായി കുഴിയെടുക്കാൻ അനുവദിക്കില്ലെന്നുമുള്ള നിലപാടുമായി പ്രദേശവാസികൾ രംഗത്തെത്തി. വൈകീട്ട് അഞ്ചോടെ മണ്ണുമാന്തിയന്ത്രം ഉപയോഗിച്ചുള്ള നിർമാണപ്രവൃത്തികൾ നിർത്തിവച്ചെങ്കിലും രാത്രി ഏഴോടെ പുനരാരംഭിച്ചു. തുടർന്ന് ജനങ്ങൾ ഒറ്റക്കെട്ടായി രംഗത്തെത്തി നിർമാണം തടഞ്ഞു. ജെസിബി ഓപ്പറേറ്ററും ഒരു കരാർ ജീവനക്കാരനും മാത്രമാണ് സ്ഥലത്തുണ്ടായത്. തുടർന്ന് പ്രോജക്ട് ഡയറക്ടറും സൈറ്റ് ഇൻചാർജും ടെലഫോണിൽ അനുനയനീക്കവുമായി വന്നെങ്കിലും പ്രതിഷേധം കടുത്തതോടെ നിർമാണം നിർത്തിവച്ചു. സംഭവമറിഞ്ഞ് രാത്രി എട്ടരയോടെ കൊരട്ടി പോലീസ് സ്ഥലത്തെത്തി. കൊരട്ടി പോലീസ് സ്റ്റേഷനു സമീപം ബുധനാഴ്ച വൈകീട്ടോടെയാണ് ആദ്യം കുത്തിപ്പൊളിച്ചത്. താത്കാലികമായി നിർത്തിവയ്ക്കുന്നുവെന്ന രീതിയിലാണ് കുഴിയെടുക്കാൻ വന്നവർ പോയതെങ്കിലും ഇന്നലെ മറ്റു രണ്ടിടങ്ങളിൽ കുഴിയെടുക്കുകയായിരുന്നു. സർവീസ് റോഡുകൾ ടാർ ചെയ്ത് സഞ്ചാരം സുഗമമാക്കി കൊരട്ടിയിൽ നിർമാണം ആരംഭിച്ചാൽ മതിയെന്നാണു പൊതുവികാരം. എൻഎച്ച്എഎയും നിർമാണ ക്കമ്പനിയും നൽകുന്ന ഉറപ്പുകൾ പ്രാവർത്തികമാക്കാറില്ലെന്നും നിർമാണം നിർത്തി യോഗം വിളിച്ചുചേർത്ത് കൂടിയാലോചനകളിലൂടെ ദേശീയപാത വികസനം നടപ്പിലാക്കണമെന്നാണ് നാട്ടുകാരുടെ നിലപാട്. രണ്ടു ദിവസം മഴ മാറി നിന്നാൽ മുരിങ്ങൂരിലെയും ചിറങ്ങരയിലെയും കൊ രട്ടിയിലെയും ബദൽറോഡുകൾ ടാർ ചെയ്യാമെന്ന പ്രോജക്ട് ഡയറക്ടറുടെ ഉറപ്പുപോലും പാലിക്കപ്പെട്ടിട്ടില്ല. പ്രശ്നങ്ങളുടെ നിജസ്ഥിതി ചൂണ്ടിക്കാട്ടി ഗ്രാമപഞ്ചായത്ത് പ്രസിഡന്‍റ്് പി.സി. ബിജു ഇന്നലെ ജില്ലാ കളക്ടർക്കു കത്തുനൽകിയിട്ടുണ്ട്.

തെരുവുനായ് നിയന്ത്രണസന്ദേശവുമായി മണ്‍സൂണ്‍ വാക്ക് പത്തിന്

തൃശൂർ: തെരുവുനായ് നിയന്ത്രണസന്ദേശവുമായി വേൾഡ് മലയാളി കൗണ്‍സിൽ വള്ളുവനാട് പ്രോവിൻസ് മണ്‍സൂണ്‍ വാക്ക് പത്തിനു രാവിലെ ആറിനു നടക്കും. എഴുന്നൂറോളംപേർ പങ്കെടുക്കും. തൃശൂർ വടക്കുന്നാഥ ക്ഷേത്രം തെക്കേഗോപുരനടയിൽനിന്നു പൂമലയിലേക്കു 14 കിലോമീറ്ററാണു നടക്കുന്നത്. ജില്ലാ കളക്റ്റർ അർജുൻ പാണ്ഡ്യൻ ഫ്ളാഗ് ഓഫ് ചെയ്യും. ഡോഗ് വെൽഫയർ കമ്മിറ്റി ചെയർമാൻ ജോസ് മാവേലി, കേരള സീനിയർ ലീഡേഴ്സ് ഫോറം ജനകീയസമിതി പ്രസിഡന്‍റ് രാജീവ് എന്നിവർ പങ്കെടുക്കും. തെക്കേഗോപുരനടയിൽ മെഗാ സൂംബാ ഡാൻസ് അവതരിപ്പിച്ചാണു മണ്‍സൂണ്‍ വാക്കിനു തുടക്കം കുറിക്കുക. പങ്കെടുക്കുന്നവർക്കു ടീഷർട്ടും തൊപ്പിയും നൽകും. പൂമലയിലെ റിച്ച് ഇന്ത്യ റിസോർട്ടിലാണു സമാപനം. ഇവിടെ റിഫ്രഷ്മെന്‍റ് സൗകര്യമുണ്ടാകും. തൃശൂർ നഗരത്തിലേക്കു തിരിച്ചുപോകാൻ വാഹനങ്ങൾ എർപ്പെടുത്തിയിട്ടുണ്ട്. സർക്കാർ രണ്ട‌േക്കർ അനുവദിക്കുകയാണെങ്കിൽ തെരുവുനായ്ക്കൾക്കു ഷെൽട്ടർ നിർമിച്ചു പരിപാലിക്കാൻ വേൾഡ് മലയാളി കൗണ്‍സിൽ മുന്നിലുണ്ടാകുമെന്നു ഭാരവാഹികൾ അറിയിച്ചു. പ്രോഗ്രാം കോ ഓർഡിനേറ്റർമാരായ എ.എസ്. രാജീവ്, സുജിത് ശ്രീനിവാസൻ, വള്ളുവനാട് പ്രോവിൻസ് ചെയർമാൻ ജോസ് പുതുക്കാടൻ, ഗ്ലോബൽ വൈസ് ചെയർമാൻ സുരേന്ദ്രൻ കണ്ണാട്ട്, പ്രോവിൻസ് സെക്രട്ടറി എൻ.പി. രാമചന്ദ്രൻ, വൈസ് പ്രസിഡന്‍റ് ജെയ്സണ്‍ മുറ്റിച്ചൂകാരൻ, ആക്ടിംഗ് സെക്രട്ടറി ചന്ദ്രപ്രകാശ് എടമന, ട്രഷറർ രാജഗോപാലൻ, ചാപ്റ്റർ പ്രസിഡന്‍റ് ദിലീപ്, സെക്രട്ടറി അഡ്വ. ശ്രീകുമാർ എന്നിവർ നേതൃത്വം നൽകും. ജെയ്സണ്‍ മുറ്റിച്ചൂക്കാരൻ, സുജിത് ശ്രീനിവാസൻ എന്നിവരാണു ഷെൽട്ടറിന്‍റെ പ്രോജക്ട് കോഓർഡിനേറ്റർമാർ. കഴിഞ്ഞദിവസം ബാങ്കോക്കിൽ നടന്ന വേൾഡ് മലയാളി കൗണ്‍സിൽ ബിനാലേയിൽ ഗ്ലോബൽ ചെയർമാനായി തോമസ് മൊട്ടയ്ക്കലിനെയും പ്രസിഡന്‍റായി ഡോ. ബാബു സ്റ്റീഫനെയും തെരഞ്ഞെടുത്തിരുന്നു. സുരേന്ദ്രൻ കണ്ണാട്ട് ഗ്ലോബൽ വൈസ് പ്രസിഡന്‍റും സുജിത് ശ്രീനിവാസൻ ഗ്ലോബൽ ഫോറം ചെയർമാനുമായി തെരഞ്ഞെടുക്കപ്പെട്ടു.

വയോധികരെ തെരുവിലിറക്കിയ സർക്കാരിനു തുടരാൻ അവകാശമില്ല: സോയ ജോസഫ്

തൃശൂർ: വയോധികരായ പെൻഷൻകാരെ അവകാശങ്ങൾക്കുവേണ്ടി തെരുവിലിറക്കുന്ന പിണറായി സർക്കാരിനു കേരളത്തിൽ ഭരണം തുടരാൻ അവകാശമില്ലെന്നു യൂത്ത് കോണ്‍ഗ്രസ് സംസ്ഥാന സെക്രട്ടറി ഡോ. സോയ ജോസഫ്. വിവിധ ആവശ്യങ്ങളുന്നയിച്ചു കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ കളക്ടറേറ്റിനുമുന്നിൽ നടത്തിയ ദ്വിദിനധർണയുടെ രണ്ടാംദിവസത്തെ യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അവർ. വനിതാ ഫോറം ജില്ലാ പ്രസിഡന്‍റ് നദീറ, കെ‌എസ്എസ്‌പിഎ ജില്ലാ പ്രസിഡന്‍റ് കെ.ജി. ഉണ്ണികൃഷ്ണൻ, സെക്രട്ടറി കെ.എ. ഫ്രാൻസിസ്, ട്രീഷറർ ഗിരീന്ദ്രബാബു, സംസ്ഥാനസെക്രട്ടറി ടി.എം. കുഞ്ഞുമൊയ്തീൻ, കൊച്ചുത്രേസ്യ ജെ. മുരിങ്ങാത്തേരി, ജെസി തരകൻ, പി.എസ്. സുന്ദരൻ, എം.സി. പോളച്ചൻ, എ.ജി. നാരായണൻ, വി.സി. ജോണ്‍സൻ, എം.എഫ്. ജോയ്, ലിസി ഓസ്റ്റിൻ, സി.ജെ. ത്രേസ്യ എന്നിവർ പ്രസംഗിച്ചു.

വിശുദ്ധ എവുപ്രാസ്യമ്മയുടെ തിരുനാൾ 29ന്; പന്തലിനു കാൽനാട്ടി

ഒല്ലൂർ: വിശുദ്ധ എവുപ്രാസ്യമ്മയുടെ തീർഥകേന്ദ്രത്തിൽ ഊട്ടുതിരുനാൾ 29ന് ആഘോഷിക്കും. തിരുനാളിനോടനുബന്ധിച്ചുള്ള പന്തലിന്‍റെ കാൽനാട്ടുകർമം തീർഥകേന്ദ്രം റെക്ടർ ഫാ. ജോയ് ചിറ്റിലപ്പിള്ളി നിർവഹിച്ചു. 10 നു രാവിലെ ആറിനു തൃശൂർ ലൂർദ് കത്തീഡ്രലിൽ നടക്കുന്ന വിശുദ്ധ കുർബാനയ്ക്കുശേഷം വിളംബരഘോഷയാത്ര ആരംഭിക്കും. 17നു രാവിലെ ആറിന് എടത്തിരുത്തി ഫൊറോന പള്ളിയിലെ ദിവ്യബലിക്കുശേഷം ഫൊറോന വികാരി തിരുനാൾ കമ്മിറ്റിക്കു ഉയർത്താനുള്ള കൈമാറും. രാവിലെ 9.30 ന് അതിരൂപത മെത്രാപ്പോലീത്ത മാർ ആൻഡ്രൂസ് താഴത്ത് തീർഥകേന്ദ്രത്തിൽ കൊടി ഏറ്റുവാങ്ങും. 20 നു വൈകീട്ട് അഞ്ചിനു ദിവ്യബലിക്കുശേഷം അതിരൂപത വികാരി ജനറാൾ മോണ്‍. ജെയ്സണ്‍ കൂനംപ്ലാക്കൽ തിരുനാൾകൊടിയേറ്റം നിർവഹിക്കും. 24 നു വൈകീട്ട് നാലിനു വാഹനവെഞ്ചരിപ്പും ഉണ്ടായിരിക്കും. തിരുനാളിനു മുന്നോടിയായി നടന്ന യോഗത്തിൽ താജ് ആന്‍റണിയെ ജനറൽ കണ്‍വീനറായും പോളി ജോസ്, ഡേവീസ് കൊള്ളന്നൂർ, കെ.ടി. ജോജു, ജോസ് ഉക്രാൻ, ജോസഫ് ചെറുശേരി, സലിൽ പാണേങ്ങാടൻ, ആനന്ദ് മൊയലൻ, ജയ മുത്തിപ്പീടിക, വിൽസണ്‍ പുലിക്കോടൻ, എ.ജെ. ആന്‍റണി എന്നിവരെ വിവിധ കമ്മിറ്റി കണ്‍വീനർമാരായും തെരഞ്ഞെടുത്തു.

ടോൾ കരാർ കമ്പനിയെ പുറത്താക്കാൻ സർക്കാർ തയാറാവണം: ജോസഫ് ടാജറ്റ്

തൃശൂർ: പാലിയേക്കര ടോൾ കരാർ കമ്പനിയുടെ വീഴ്‌ചകളും ലംഘനങ്ങളും ഹൈക്കോടതി ശരിവച്ച സാഹചര്യത്തിൽ ടോൾ കരാർ കമ്പനിയെ പുറത്താക്കാൻ സംസ്ഥാന സർക്കാർ മുൻകൈയെടുക്കണമെന്നു ഡിസിസി പ്രസിഡന്‍റും ജില്ലാ പഞ്ചായത്ത് പ്രതിപക്ഷനേതാവുമായ അഡ്വ. ജോസഫ് ടാജറ്റ് പത്രസമ്മേളനത്തിൽ പറഞ്ഞു. സർക്കാരിന്‍റെ ഇരട്ടത്താപ്പ് ജനങ്ങൾക്കു ബോധ്യപ്പെട്ടിട്ടുണ്ട്. നിയമപോരാട്ടങ്ങൾ പൊതുജനത്തെ ഏൽപ്പിക്കാതെ സർക്കാർ ഏറ്റെടുക്കണം. ടോൾ കരാർ ത്രികക്ഷികരാറിലെ കക്ഷിയായ സർക്കാർ ഉത്തരവാദിത്വം നിർവഹിക്കണം. സ്വാഭാവികമായും കരാർ കമ്പനിയും എൻഎച്ച്എഐയും ഹൈക്കോടതിവിധിക്കെതിരേ സുപ്രീം കോടതിയെ സമീപിക്കും. അതിനെതിരേ സർക്കാർ സുപ്രീം കോടതിയിൽ ഹാജരായി കേസ് നടത്തണം. സംസ്ഥാനത്തെ ജനങ്ങളുടെ സുരക്ഷയും യാത്രാസൗകര്യവും സുഗമമാക്കേണ്ട ഉത്തരവാദിത്വം സർക്കാരിനാണെന്നു കോടതി കണ്ടെത്തിയിട്ടുണ്ട്. ജനങ്ങളുടെ യാത്രാസൗകര്യം തകരാറിലായെന്നും കോടതി പരാമർശിച്ചു. ടോൾപിരിവ് തടഞ്ഞ കളക്ടറുടെ ഉത്തരവ് സർക്കാരിന്‍റെ നിർദേശപ്രകാരമാണു പിൻവലിച്ചതെന്നു വ്യക്തമായിട്ടുണ്ട്. ജൂലൈവരെ പിരിച്ചെടുത്തത് 1614.26 കോടി രൂപ കരാർലംഘനങ്ങൾ നടക്കുന്നതായും സേഫ്റ്റി ഓഡിറ്റ് റിപ്പോർട്ടിലെ പരിഹാരനിർദേശങ്ങൾ ഇനിയും നടപ്പാക്കിയിട്ടില്ലെന്നും വിവരാവകാശരേഖകൾ വ്യക്തമാക്കുന്നതായി അഡ്വ. ജോസഫ് ടാജറ്റ് വ്യക്തമാക്കി. കഴിഞ്ഞ 13 വർഷമായി ജനങ്ങൾ ദുരിതമനുഭവിക്കുകയാണ്. ജൂലൈ വരെ 1614.26 കോടി രൂപ പിരിച്ചതായും പ്രതിദിനം 40,000 വാഹനങ്ങൾ കടന്നുപോകുന്നതായും 51 ലക്ഷം രൂപ വരുമാനമുണ്ടെന്നും രേഖ വ്യക്തമാക്കുന്നു. കരാർലംഘനങ്ങളുടെ പേരിൽ മേയ്‌വരെ 2353.92 കോടി രൂപ കരാർ കമ്പനിക്കു പിഴ ചുമത്തിയിട്ടുണ്ടെന്നു രേഖയിലുണ്ട്. ഇത്രയൊക്കെ ജനങ്ങളെ കൊള്ളയടിച്ചിട്ടും സംസ്ഥാനസർക്കാർ നിലപാടു സ്വീകരിക്കാത്തതു പ്രതിഷേധാർഹമാണ്. കമ്പനിയെ കരിമ്പട്ടികയിൽപെടുത്തി കരാറിൽനിന്ന് ഒഴിവാക്കാനും പിഴ ഇടാക്കാനും എൻഎച്ച്എഐ ആർബ്രിട്രേഷൻ ട്രൈബ്യൂണൽ നൽകിയ കേസിൽനിന്നു സംസ്ഥാനസർക്കാർ കോടതിയെ സമീപിച്ച് ഒഴിവായതു കമ്പനിയെ സഹായിക്കുന്ന നിലപാടാണ്. കമ്പനിക്കെതിരേ വാദങ്ങൾ ഉന്നയിക്കാവുന്ന സാഹചര്യമാണു നഷ്ടപ്പെടുത്തിയത്.

ആവർത്തിച്ചു ശ്രദ്ധയിൽപ്പെടുത്തിയിട്ടും എൻഎച്ച്എഐ നടപടിയെടുത്തില്ല

തൃശൂർ: മണ്ണുത്തി-അങ്കമാലി ദേശീയപാതയിലെ ടോൾപിരിവ് നിർത്തലാക്കിയ ഹൈക്കോടതിവിധിയിൽ എൻഎച്ച്എഐയ്ക്കു രൂക്ഷവിമർശനം. സംസ്ഥാന ചീഫ് സെക്രട്ടറി, കരാറുകാരൻ, എൻഎച്ച്എഐ എന്നിവയുമായി ചേർന്നു ചർച്ചനടത്തി കേന്ദ്രസർക്കാർ ഉചിതമായ നടപടി സ്വീകരിക്കണം. എൻഎച്ച്എഐ പ്രശ്നങ്ങൾ കൃത്യമായ സമയങ്ങളിൽ പരിഹരിക്കേണ്ടതായിരുന്നു. ആവർത്തിച്ചു ശ്രദ്ധയിൽപ്പെടുത്തിയിട്ടും എൻഎച്ച്എഐ കേന്ദ്രസർക്കാരുമായി ചേർന്നു നടപടിയെടുത്തില്ലെന്നും വിധിയിൽ ചൂണ്ടിക്കാട്ടുന്നു. ദേശീയപാതയിലെ യാത്ര സുഗമമാക്കാൻ എൻഎച്ച്എഐയ്ക്കു ബാധ്യതയുണ്ട്. പൊതുവിശ്വാസത്തിലൂന്നിയുള്ള ബന്ധമാണ് ജനങ്ങളും എൻഎച്ച്എഐയും തമ്മിലുള്ളത്. അതു ലംഘിച്ച് ടോൾ പിരിവ് ജനങ്ങളിൽ അടിച്ചേൽപ്പിക്കാനാകില്ല. 65 കിലോമീറ്ററിൽ ആകെ നാലു കിലോമീറ്ററിൽ മാത്രമാണു പ്രശ്നമെന്ന വാദവും ഹൈക്കോടതി തള്ളി. ഗതാഗതക്കുരുക്കിനു നിരവധി പ്രശ്നങ്ങളുണ്ടാകാം. മേൽപ്പാലം, അടിപ്പാത എന്നിവയുടെ നിർമാണം, സർവീസ് റോഡുകൾ ഗതാഗതയോഗ്യമാക്കുന്നതിലെ കരാർകന്പനിയുടെ പിഴവ് എന്നിങ്ങനെയുള്ള കാര്യങ്ങൾ പരിഗണിക്കുന്നില്ല. ഈ സാഹചര്യത്തിൽ ജനങ്ങളിൽനിന്നു ടോൾ ഈടാക്കുന്നതിലെ നിയമസാധുതയിൽമാത്രമാണ് ശ്രദ്ധിക്കുന്നതെന്നും കോടതി പറഞ്ഞു. ടോൾ നിർത്തിവച്ചുള്ള ജില്ലാ കളക്ടറുടെ ഉത്തരവിലും പിഴവുകൾ വ്യക്തമാണ്. ഉത്തരവ് പിൻവലിച്ചതിനുശേഷമുള്ള യോഗത്തിൽ നിർമാണസ്ഥലങ്ങളിൽ റോഡ് ഇടുങ്ങിയതും മഴയിൽ വെള്ളക്കെട്ടുണ്ടായതും പരിഹരിക്കാമെന്നു ദേശീയപാത അഥോറിറ്റി ഉറപ്പുനൽകിയിരുന്നു. ഇതും പാലിച്ചില്ല. സ്വകാര്യ സ്ഥാപനങ്ങളുമായി ചേർന്നു കരാറുകൾ ഉണ്ടാക്കുന്പോൾ സർക്കാരിന്‍റെ ഉത്തരവാദിത്വം ഇല്ലാതാകുന്നില്ല. ജനങ്ങളുടെ താത്പര്യം സംരക്ഷിക്കുന്നതിനു മുകളിലല്ല ഒന്നും. ജനങ്ങൾക്കു സേവനങ്ങൾ ലഭിക്കുന്നില്ലെങ്കിൽ സ്വകാര്യകരാറിന്‍റെ പേരിൽ പണം നൽകാൻ നിർബന്ധിക്കാനാകില്ല. മൂന്നുമണിക്കൂർവരെ യാത്രകൾ വൈകുന്ന സാഹചര്യമുണ്ട്. നിശ്ചിതകാലയളവിനുള്ളിൽ ഇക്കാര്യങ്ങൾ ചർച്ച ചെയ്തു പരിഹരിക്കണമെന്നും ഉത്തരവിൽ വ്യക്തമാക്കുന്നു.

ദീപിക കളർ ഇന്ത്യ മത്സരം ഇന്ന്

തൃശൂർ: ഇന്ത്യയെന്ന വികാരം ഹൃദയതാളമായി മാറുന്ന ദീപിക കളർ ഇന്ത്യ മത്സരം ഇന്ന്. രാജ്യസ്നേഹത്തിനൊപ്പം മയക്കുമരുന്നിനെതിരായ പ്രതിരോധമുയർത്തി കുട്ടികൾ രചിക്കുന്ന പുതുചരിത്രത്തിന് ഇന്നു രാജ്യം സാക്ഷ്യംവഹിക്കും. ഇന്ത്യയുടെ 79-ാമത് സ്വാതന്ത്ര്യദിനാഘോഷത്തിന്‍റെ ഭാഗമായി ദീപിക നടത്തുന്ന കളർ ഇന്ത്യ സീസണ്‍ ഫോർ മത്സരത്തിൽ രാജ്യമെന്പാടുംനിന്ന് പത്തു ലക്ഷത്തോളം വിദ്യാർഥികൾ നിറംചാർത്തും. ലഹരിക്കെതിരേയുള്ള പോരാട്ടവും ഭാരതത്തിന്‍റെ ഐക്യവും അഖണ്ഡതയും ഊട്ടിയുറപ്പിക്കാനുള്ള സന്ദേശവും കുട്ടികൾക്കു പകർന്നുനൽകാൻ ലക്ഷ്യമിട്ടാണ് ദീപികയും ദീപിക ബാലസഖ്യവും കൈകോർത്ത് കളർ ഇന്ത്യ മത്സരം സംഘടിപ്പിക്കുന്നത്. മത്സരത്തിൽ പങ്കുചേരുന്ന എല്ലാവർക്കും പ്രശസ്ത സിനിമാതാരം മഞ്ജു വാര്യരുടെ കൈയൊപ്പുള്ള സർട്ടിഫിക്കറ്റുകൾ നൽകും. മത്സരത്തിന്‍റെ തൃശൂർ ജില്ലാതല ഉദ്ഘാടനം രാവിലെ പത്തിനു കിഴക്കേകോട്ട നിർമലമാത സെൻട്രൽ സ്കൂളിൽ തൃശൂർ റേഞ്ച് ഡിഐജി ഹരിശങ്കർ നിർവഹിക്കും. കൽദായ സുറിയാനിസഭ അധ്യക്ഷൻ മാർ ഔഗിൻ കുര്യാക്കോസ് മെത്രാപ്പോലീത്ത അധ്യക്ഷത വഹിക്കും. കേരള പെയിന്‍റ്സ് ചെയർമാൻ ജോസഫ് ലിജോ, നിർമലമാത സ്കൂൾ പ്രിൻസിപ്പൽ സിസ്റ്റർ ലിൻസ മരിയ, ദീപിക റസിഡന്‍റ് മാനേജർ ഫാ. ജിയോ തെക്കിനിയത്ത്, സർക്കുലേഷൻ മാനേജർ കെ.എൽ. ഡേവിസ് എന്നിവർ പങ്കെടുക്കും. കളർ ഇന്ത്യ ഇരിങ്ങാലക്കുട മേഖലാതല ഉദ്ഘാടനം ഇരിങ്ങാലക്കുട ക്രൈസ്റ്റ് വിദ്യാനികേതനിൽ തൃശൂർ റൂറൽ ജില്ലാ സ്പെഷൽ ബ്രാഞ്ച് ഡിവൈഎസ്പി പി.ആർ. ബിജോയ് നിർവഹിക്കും. ക്രൈസ്റ്റ് വിദ്യാനികേതൻ പ്രിൻസിപ്പൽ ഫാ. ജോയ് ആലപ്പാട്ട് സിഎംഐ അധ്യക്ഷത വഹിക്കും. ചാലക്കുടി മേഖലാതല ഉദ്ഘാടനം കുഴിക്കാട്ടുശേരി സെന്‍റ് മേരീസ് എൽപി സ്കൂളിൽ രാഷ്ട്രദീപിക ലിമിറ്റഡ് ഡയറക്ടർ ഇട്ടൂപ്പ് കോനൂപ്പറന്പൻ നിർവഹിക്കും. ഇരിങ്ങാലക്കുട രൂപത ഡിഎഫ്സി ഡയറക്ടർ ഫാ. ജോൺ കവലക്കാട്ട് അധ്യക്ഷത വഹിക്കും. ഇരിങ്ങാലക്കുട രൂപത ഡിഎഫ്സി പ്രസിഡന്‍റ് ജോസഫ് വാസുപുരത്തുകാരൻ, ദീപിക കോഓർഡിനേറ്റിംഗ് എഡിറ്റർ ഫാ. റിന്‍റോ പയ്യപ്പിള്ളി എന്നിവർ പങ്കെടുക്കും. ഗുരുവായൂർ മേഖലാതല ഉദ്ഘാടനം ബ്രഹ്മകുളം സെന്‍റ് തെരേസാസ് സിജിഎച്ച്എസിൽ കേരള ചിത്രകല അക്കാദമി അംഗം അജിത്ത് സ്മൂത്ത് നിർവഹിക്കും. സ്കൂൾ ഹെഡ്മിസ്ട്രസ് സിസ്റ്റർ ഡെയ്സ് മരിയ എഫ്സിസി അധ്യക്ഷത വഹിക്കും. പറപ്പൂർ മേഖലാതല ഉദ്ഘാടനം ചൊവ്വന്നൂർ സെന്‍റ് മേരീസ് ജിഎച്ച്എസിൽ കുന്നംകുളം നഗരസഭ ചെയർപേഴ്സൺ സീത രവീന്ദ്രൻ നിർവഹിക്കും. ഹെഡ്മിസ്ട്രസ് സിസ്റ്റർ ഡോ. വിന്നി സിഎസ്‌സി അധ്യക്ഷത വഹിക്കും. ആർട്ടിസ്റ്റ് ഗോപീകൃഷ്ണൻ മുഖ്യാതിഥിയാകും. ഒല്ലൂർ മേഖലാതല ഉദ്ഘാടനം വേലൂപ്പാടം സെന്‍റ് പയസ് ടെൻത്ത് കോൺവന്‍റ് സ്കൂളിൽ ആർട്ടിസ്റ്റ് ഡേവിസ് നിർവഹിക്കും. ഹെഡ്മിസ്ട്രസ് സിസ്റ്റർ റെനി തെരേസ് സിഎംസി അധ്യക്ഷത വഹിക്കും.

ഇനിയും പ്രതികരിക്കും; പലരുടെയും കണ്ണുതുറക്കാൻ: എം.എൽ. റോസി

തൃശൂർ: മേയർക്കെതിരേ തുടർച്ചയായി ആരോപണങ്ങൾ ഉന്നയിക്കുന്പോഴും താൻ പാർട്ടി വിടുമെന്ന് ആരും കരുതേണ്ടെന്നും തനിക്കു പദവി തന്നവർക്ക് ആ ബഹുമാനം തിരികെനൽകുമെന്നും ഡെപ്യൂട്ടി മേയർ എം.എൽ. റോസി. തന്‍റെ ഓഫീസ് മുറിയിലെ ശുചിമുറിയിൽ ഉച്ചകഴിഞ്ഞാൽ പതിവായി വെള്ളം മുടങ്ങാറുണ്ട്. അക്കാര്യം പലതവണ അറിയിച്ചിട്ടും പരിഹാരം ആകാത്തതിനെത്തുടർന്നാണു പരസ്യമായി പ്രതിഷേധിച്ചത്. വിഷയം ഇപ്പോൾ പരിഹരിച്ചിട്ടുണ്ട്. എന്നാൽ കോർപറേഷൻഭരണത്തിലെ കൂട്ടായ്മക്കുറവിനെതിരേ ഇനിയും പ്രതികരിക്കും. അതൊരു കണ്ണുതുറക്കലിനുംകൂടിയാണ്. എന്നുകരുതി താൻ പാർട്ടി വിടുമെന്ന് ആരും കരുതേണ്ട. ഡെപ്യൂട്ടി മേയറായി നാളിതുവരെയായി ഒരു നെയിംബോർഡ് നൽകാനോ ഓഫീസ് മുറിയുടെയും ശുചിമുറിയുടെയും തകരാറുള്ള വാതിലുകൾ മാറ്റാനോ പ്രശ്നം പരിഹരിക്കാനോ ഒരു നടപടിയും ഇതുവരെ ഉണ്ടായിട്ടില്ല. ഓഫീസ് മുറിയിലേക്കു ടിവി ആവശ്യപ്പെട്ടിരുന്നു. പക്ഷേ ലഭിച്ചതു പഴക്കമേറെയുള്ള ടിവിയാണ്. എന്നാൽ എം.കെ. വർഗീസ് മേയറായി ചുമതലയേറ്റപ്പോൾ ചേംബർ പൊളിച്ചുപണിതതും അതിന് എലിയെ പഴിച്ചതും എല്ലാവർക്കും അറിയുന്നതാണ്. അത്തരം സാഹസത്തിനു താൻ മുതിരാത്തത്, തനിക്കല്ല നാടിനാണു വികസനം ആവശ്യമുള്ളത് എന്നറിയാവുന്നതിലാണ്: റോസി പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]