ADVERTISEMENT

ADVERTISEMENT

അങ്കണവാടി ജീവനക്കാര്‍ മാര്‍ച്ച് നടത്തി

കണ്ണൂര്‍: അങ്കണവാടി വര്‍ക്കേഴ്‌സ് ആന്‍ഡ് ഹെല്‍പ്പേഴ്‌സ് അസോസിയേഷന്‍ (സിഐടിയു) ജില്ലാ കമ്മിറ്റിയുടെ നേതൃത്വത്തില്‍ ജില്ലാ വനിതാ ശിശു വികസന വകുപ്പ് ഓഫീസിലേക്ക് മാര്‍ച്ച് നടത്തി. സിഐടിയു ജില്ലാ സെക്രട്ടറി കെ. മനോഹരന്‍ ഉദ്ഘാടനം ചെയ്തു.

പോഷണ്‍ ട്രാക്കിലെ അപാകതകള്‍ പരിഹരിക്കുക, പ്രവര്‍ത്തനങ്ങള്‍ ചെയ്യുന്നതിന് പ്രവര്‍ത്തന സജ്ജമായ ഫോണ്‍ നല്‍കുക, മേലുദ്യോഗസ്ഥരുടെ പീഡനം അവസാനിപ്പിക്കുക, ജിവനക്കാരെ കേന്ദ്ര സര്‍ക്കാര്‍ തൊഴിലാളികളായി അംഗീകരിക്കുക തുടങ്ങിയ ആവശ്യങ്ങളുന്നയിച്ചായിരുന്നു മാര്‍ച്ച്. അസോസിയേഷന്‍ ജില്ലാ പ്രസിഡന്‍റ് ശ്രീജാ കുമാരി അധ്യക്ഷത വഹിച്ചു. കെ.പി. ഭവാനി, കെ. അശോകന്‍, പി. പ്രസന്ന, എം.എം. അനിത, ടി.വി. രജനി, കെ. അശോകന്‍ എന്നിവർ പ്രസംഗിച്ചു

ADVERTISEMENT

എസ്എഫ്ഐ അട്ടിമറിക്ക് പോലീസ് കൂട്ടുനിന്നു: മാർട്ടിൻ ജോർജ്

കണ്ണൂർ: കണ്ണൂർ സർവകലാശാല യൂണിയൻ തെരഞ്ഞെടുപ്പിൽ എസ്എഫ്ഐയുടെ അട്ടിമറി പ്രവർത്തനങ്ങൾക്ക് പോലീസ് ഒത്താശ ചെയ്തുകൊടുത്തതായി ഡിസിസി പ്രസിഡന്‍റ് മാർട്ടിൻ ജോർജ്. രാവിലെ മുതൽ താവക്കര കാമ്പസ് പരിസരത്ത് എസ്എഫ്ഐ പ്രവർത്തകർ സംഘർഷാവസ്ഥ സൃഷ്ടിക്കുകയായിരുന്നു. വോട്ട് ചെയ്യാൻ എത്തുന്ന യുഡിഎസ്എഫ് പ്രതിനിധികളെ തടയുകയും സ്ഥലത്ത് ഭീകരാന്തരീക്ഷം സൃഷ്ടിക്കുകയും ചെയ്തു. എംഎസ്എഫ് സ്ഥാനാർഥിയുടെ പക്കൽ നിന്ന് ബാലറ്റ് പേപ്പർ തട്ടിപ്പറിച്ച് ഓടിയ എസ്എഫ്ഐ സ്ഥാനാർഥിയെ പോലീസ് പിടികൂടിയെങ്കിലും ഉന്നത ഉദ്യോഗസ്ഥൻ ഇടപെട്ട് മോചിപ്പിക്കുകയായിരുന്നു.പോലീസിനെതിരെയും എസ്എഫ്ഐ പ്രവർത്തകർ ഭീഷണി മുഴക്കുകയുണ്ടായി. എസ്എഫ്ഐ ഭീഷണിക്ക് മുന്നിൽ പോലീസ് കീഴടങ്ങുന്ന കാഴ്ചയായിരുന്നു. യൂത്ത് ലീഗുകാർ ആയുധങ്ങളുമായെത്തി: കെ.കെ.രാഗേഷ്‌‌ കണ്ണൂർ: എസ്എഫ്ഐക്ക് മൃഗീയ ഭൂരിപക്ഷമുള്ള കണ്ണൂർ യൂണിവേഴ്സിറ്റി യൂണിയൻ തെരഞ്ഞെടുപ്പ് അക്രമത്തിലൂടെ പിടിച്ചെടുക്കാൻ യൂത്ത് ലീഗുകാർ വാഹനത്തിൽ ആയുധങ്ങളുമായി എത്തിയെന്ന് സിപിഎം ജില്ലാ സെക്രട്ടറി കെ.കെ.രാഗേഷ്. കള്ളവോട്ടിലൂടെയും അക്രമത്തിലൂടെയും തെരഞ്ഞെടുപ്പ് അട്ടിമറിക്കാനുള്ള ശ്രമം എസ്എഫ്ഐ തടയുകയാണ് ചെയ്തത്. കാന്പസിൽ തന്പടിച്ച് യൂത്ത് ലീഗ് ആക്രമണത്തിന് നേതൃത്വം നൽകുകയായിരുന്നുവെന്നും കെ.കെ.രാഗേഷ് പറഞ്ഞു.

കണ്ണൂർ സർവകലാശാല ആസ്ഥാനത്ത് കലാപം

കണ്ണൂര്‍: യൂണിവേഴ്സിറ്റി യൂണിയൻ തെരഞ്ഞെ‌ടുപ്പുമായി ബന്ധപ്പട്ട് താവക്കരയിലെ കണ്ണൂർ യൂണിവേഴ്സിറ്റി ആസ്ഥാനത്ത് തെരുവ് യുദ്ധം. എസ്എഫ്ഐ- യുഡിഎസ്എഫ് വിദ്യാർഥികൾ തമ്മിൽ സംഘർഷം. പലഘട്ടങ്ങളിലായി നടന്ന ഏറ്റുമുട്ടലിലും കല്ലേറിലും ഇരുവിഭാഗത്തിലുള്ളവർക്കും പോലീസുകാർക്കും പരിക്കേറ്റു. സംഘർഷം ഒഴിവാക്കാൻ പോലീസ് പലതവണ ലാത്തി വീശി. സംഘർഷത്തിൽ എസ്എഫ്ഐ ജില്ലാ വൈസ് പ്രസിഡന്‍റ് അശ്വന്ത്, കണ്ണൂർ ഏരിയാ കമ്മിറ്റി അംഗം വൈഷ്ണവ് പ്രകാശൻ, എംഎസ്എഫ് സംസ്ഥാന ജനറൽ സെക്രട്ടറി സി.കെ. നജാഫ്, യൂത്ത് ലീഗ് നേതാവ് ഷബീർ എടയന്നൂർ, സിവിൽ പോലീസ് ഓഫീസർ രജനി എന്നിവർക്ക് പരിക്കേറ്റു. കാന്പസിൽ നിർത്തിയിട്ട് ബൈക്കുകളിലുണ്ടായിരുന്ന ഹെൽമറ്റും ചെടിച്ചട്ടിയും കല്ലും വടികളുമുൾപ്പടെ കൈയിൽ കിട്ടിയതൊക്കെ എടുത്ത് വിദ്യാർഥികൾ പരസ്പരം എറിഞ്ഞു. ഇന്നലെ രാവിലെ 10ന് യൂണിയന്‍ തെരഞ്ഞെടുപ്പ് നടക്കാനിരിക്കെ ഒന്പതരയോടെയാണ് കാന്പസിനകത്ത് പ്രശ്നങ്ങൾ ആരംഭിച്ചത്. കാസർഗോഡ് എംഐസി ആർട്സ് ആൻഡ് സയൻസ് കോളജിലെ യൂണിവേഴ്സിറ്റി യൂണിയൻ കൗൺസിലറായ സഫ്‌വാനെ എസ്എഫ്ഐ പ്രവർത്തകർ തട്ടിക്കൊണ്ടുപോയതായി യുഡിഎസ്എഫ് ആരോപിച്ചു. ഇതേത്തുടർന്നുണ്ടായ വാക്കേറ്റമാണ് സംഘർഷത്തിന് തുടക്കം കുറിച്ചത്. സംഘർഷം രൂക്ഷമായതോടെ പോലീസ് ലാത്തിവീശി ഇരു വിഭാഗത്തെയും തുരത്തി. ഇതിനിടെ കെഎസ്‌യു, എംഎസ്എഫ് പ്രവർത്തകർ കള്ളവോട്ട് ചെയ്യാൻ ശ്രമിച്ചതായി എസ്എഫ്ഐ ആരോപിച്ചു. തിരിച്ചറിയൽ കാർഡില്ലാതെ പോളിംഗ് സ്റ്റേഷനിലേക്ക് കടത്തിവിടില്ലെന്ന പോലീസിന്‍റെ നിർദേശം ലംഘിച്ച് കെഎസ്‌യു, എംഎസ്എഫ് പ്രവർത്തകർ കടക്കാൻ ശ്രമിച്ചതായും ആരോപണമുണ്ട്. തിരിച്ചറിയിൽ കാർഡില്ലാത്തെ കടത്തിവിടില്ലെന്ന പ്രഖ്യാപിച്ച് എസ്എഫ്ഐ പ്രവർത്തകരും രംഗത്തെത്തിയത് വീണ്ടും സംഘർഷത്തിനിടയാക്കി. കെഎസ്‌യു,എംഎസ്എഫ് സഖ്യമുന്നണിയായ യുഡിഎസ്എഫ് കള്ളവോട്ട് ചെയ്യാൻ ശ്രമിച്ചത് തടഞ്ഞ വിരോധത്തിൽ അക്രമം നടത്തിയെന്നും ടൗൺ എസ്ഐ വി.വി ദീപ്തി പ്രവർത്തകരെ അകാരണമായി മർദിച്ചുവെന്നും എസ്എഫ്ഐ സംസ്ഥാന സെക്രട്ടറി പി.എസ്. സഞ്ജീവ് ആരോപിച്ചു. അതേസമയം തെരഞ്ഞെടുപ്പ് അട്ടിമറിക്കാൻ എസ്എഫ്ഐ മനപൂർവം അക്രമം അഴിച്ചു വിടുകയാണെന്നും പോലീസ് അകാരണമായി പ്രവർത്തകരെ മർദിച്ചെന്നും യുഡിഎസ്എഫും ആരോപിച്ചു. ആദ്യത്തെ സംഘർഷത്തിന് ശേഷം പതിനൊന്നരയോടെയാണ് രണ്ടാമത്തെ സംഘർഷം പൊട്ടിപ്പുറപ്പെട്ടത്.യുഡിഎസ്എഫ് സ്ഥാനാർഥിയുടെ ബാലറ്റ് പേപ്പർ എസ്എഫ്ഐ പ്രവർത്തക തട്ടിപ്പറിച്ചെന്ന ആരോപണത്തെ തുടർന്നാണ് വാക്കേറ്റവും കൈയാങ്കളിയുമുണ്ടായത്. ആരോപണ വിധേയയായ പ്രവർത്തകയെ പോലീസ് പിടിച്ചുവച്ചിരുന്നു. ഇവരെ മോചിപ്പിക്കാൻ എസ്എഫ്ഐ പ്രവർത്തകർ സംഘടിതമായി പോലീസിനെതിരെ തിരിഞ്ഞതോടെ പോലീസും പ്രവർത്തകരും തമ്മിൽ വാക്കേറ്റവും ഉന്തും തള്ളുമുണ്ടായി. എസ്എഫ്ഐക്കാരെ പ്രതിരോധിക്കാൻ യുഡിഎസ്എഫുകാരും എത്തിയതോടെ കൂട്ടത്തല്ലിലും ലാത്തിച്ചാർജിലും കലാശിക്കുകയായിരുന്നു. ഇതിനിടെ പോലീസ് പിടിച്ചുവച്ച പ്രവർത്തകയെ എസ്എഫ്ഐക്കാർ മോചിപ്പിച്ചു സ്ഥലത്തുനിന്ന് മാറ്റി. സംഘർഷം രൂക്ഷമാകുന്ന തരത്തിലേക്ക് നീങ്ങിയതോടെ ഇരുവിഭാഗക്കാരെയും പോലീസ് പോളിംഗ് ബൂത്തിനടുത്ത് നിന്ന് മാറ്റി. ഇതിനു പിന്നാലെ പ്രവര്‍ത്തകരെ മര്‍ദിച്ചവരെ കാന്പസ് വിട്ടുപോകാൻ അനുവദിക്കില്ലെന്ന് പറഞ്ഞ് എസ്എഫ്ഐ രംഗത്തെത്തിയത് വീണ്ടും സംഘർഷത്തിനിടയാക്കി. യുഡിഎസ്എഫിന്‍റെ യുയുസികൾ എത്തിയ ബസിനകത്ത് അക്രമികളുണ്ടെന്ന് പറഞ്ഞ് ബസ് വളഞ്ഞു. ഇതിനിടെ ബസിന്‍റെ കാറ്റഴിച്ചു വിടുകയും ചെയ്തു. ഇതോടെ കാന്പസിൽ പലയിടത്തായിരുന്ന യുഡിഎസ്എഫ് പ്രവർത്തകർ സംഘടിച്ച് ഇവിടെയെത്തുക‍യും ഏറ്റുമുട്ടുകയുമായിരുന്നു. പോലീസ് ലാത്തിച്ചാർജ് നടത്തി വിരട്ടിയോടിച്ചു. ഉച്ചയ്ക്ക് ഒന്നോടെയാണ് മൂന്നാമതും സംഘർഷമുണ്ടായത്. യുഡിഎസ്എഫ് യുയുസി കൗൺസിലറുമായി വന്ന വാഹനം എസ്എഫ്ഐ പ്രവർത്തകർ കാന്പസിൽ തടഞ്ഞതായിരുന്നു കാരണം. സ്ഥലത്തുണ്ടായിരുന്ന നേതാക്കൾ വാഹനം തടഞ്ഞ പ്രവർത്തകരെ പിന്തിരിപ്പിക്കുകയായിരുന്നു. സംഘർഷത്തെ തുടർന്ന് സിറ്റി പോലീസ് കമ്മീഷണർ നിധിൻരാജ്, എസിപി പ്രദീപൻ കണ്ണിപ്പൊയിൽ ഉൾപ്പെടെയുള്ള ഉന്നതോദ്യോഗസ്ഥരുടക്കമുള്ളവരുടെ നേതൃത്വത്തിലുള്ള പോലീസ് സംഘം സ്ഥലത്ത് ക്യാന്പ് ചെയ്താണ് സ്ഥിതിഗതികൾ നിയന്ത്രിച്ചത്. സിപിഎം ജില്ലാ സെക്രട്ടറി കെ.കെ രാഗേഷ്, മുസ്‌ലിം ലീഗ് ജില്ലാ പ്രസിഡന്‍റ് അബ്ദുൾ കരീം ചേലേരി, കോൺഗ്രസ് നേതാവ് പി.അബ്ദുൾ റഷീദ് തുടങ്ങിയവരും സ്ഥലത്തെത്തി.

ബസ് താഴ്ചയിലേക്ക് മറിഞ്ഞ് 10 പേർക്ക് പരിക്ക്

ഇരിട്ടി: പായം പഞ്ചായത്തിലെ വിളമന കരിവണ്ണൂരിൽ ബസ് നിയന്ത്രണംവിട്ട് താഴ്ചയിലേക്ക് മറിഞ്ഞ് 10 പേർക്ക് പരിക്കേറ്റു. മാടത്തിൽ - വിളമന - വള്ളിത്തോട്- ഇരിട്ടി റൂട്ടിൽ ഓടുന്ന അരുൺ ബസാണ് അപകടത്തിൽപ്പെട്ടത്. ആരുടെയും പരിക്ക് ഗുരുതരമല്ല. ഇന്നലെ രാവിലെ 8.15 ഓടെയായിരുന്നു അപകടം. സ്റ്റിയറിംഗിന്‍റെ നിയന്ത്രണം നഷ്ടപ്പെട്ട ബസ് റോഡിന് സമീപത്തെ രണ്ട് മീറ്ററോളം താഴ്ചയുളള വയലിലേക്ക് മറിയുകയായിരുന്നു. പരിക്കേറ്റവരെ ഇരിട്ടിയിലെ സ്വകാര്യ ആശുപത്രിയിൽ പ്രവേശിപ്പിച്ച് പ്രാഥമിക ചികിത്സ നല്കി. പെരുങ്കരി, കുന്നോത്ത് സ്കൂളുകളിലെ വിദ്യാർഥികൾ പതിവായി ഈ ബസിലാണ് യാത്ര ചെയ്തിരുന്നത്. റെഡ് അലേർട്ട് പ്രഖ്യാപിച്ചതോടെ 10 ‍യാത്രക്കാർ മാത്രമാണ് ഇന്നലെ ബസിൽ ഉണ്ടായിരുന്നത്. ഇതുകാരണം വലിയ ദുരന്തമാണ് ഒഴിവാക്കിയതെന്ന് നാട്ടുകാർ പറഞ്ഞു. ഇരിട്ടി അഗ്നിരക്ഷാനിലയത്തിൽ നിന്നുള്ള രണ്ട് യൂണിറ്റും ഇരിട്ടി പോലീസും സ്ഥലത്തെത്തിയാണ് പരിക്കേറ്റവരെ ആശുപത്രിയിൽ എത്തിച്ചത്.

ദേശീയ ഗ്രേപ്ലിംഗിൽ മെഡൽ നേട്ടവുമായി സെന്‍റ് മൈക്കിൾസ് സ്കൂൾ

കണ്ണൂർ: ഛത്തീസ്ഗഢിലെ ബിലാസ്പൂരില്‍ നടന്ന അഞ്ചാമത ദേശീയ ഗ്രേപ്ലിംഗ് ചാമ്പ്യന്‍ഷിപ്പില്‍ കേരളത്തിന് വേണ്ടി മെഡല്‍ നേടിയവരില്‍ സെന്‍റ് മൈക്കിള്‍സ് ആംഗ്ലോ ഇന്ത്യന്‍ ഹയര്‍ സെക്കന്‍ഡറി സ്കൂളിലെ കായികതാരങ്ങളും. ആണ്‍കുട്ടികളുടെ വിത്ത് ഗി, വിത്തൗട്ട് ഗി വിഭാഗങ്ങളിൽ സ്കൂളിലെ ആഷ്‌ലി ജോൺ രണ്ടു സ്വർണം നേടി. അലൻ സി. ജോസ് (ഒരു ഒരു സ്വർണം, ഒരു വെള്ളി) പി. ആദിദേവ് (രണ്ടു വെള്ളി) ടി.കെ.അമേഗ് (ഒരു വെള്ളിയും ഒരു വെങ്കലവും) ആല്‍ഡ്രിന്‍ ജെ. മെന്‍ഡോസ, അലോഷ്യസ് ‍സാല്‍വദോര്‍ മെന്‍ഡോസ,കെസ്റ്റര്‍ തോമസ് കുറിച്ചിയില്‍, ബെസ്റ്റര്‍ ജോസഫ് കുറിച്ചിയില്‍ എന്നിവർ ഓരോ വെങ്കലവും നേടി. മെഡൽ ജേതാക്കൾക്ക് സ്കൂളിൽ സ്വീകരണം നൽകി

കാർ സ്കൂട്ടറിലിടിച്ച് കടയിലേക്കു പാഞ്ഞുകയറി; രണ്ടുപേർക്ക് പരിക്ക്

മട്ടന്നൂർ: കാർ നിയന്ത്രണം വിട്ടു സ്കൂട്ടറിലിടിച്ച് കടയിലേക്കു പാഞ്ഞു കയറി. കാർ യാത്രക്കാരനും സ്കൂട്ടർ യാത്രക്കാരനും പരിക്കേറ്റു. ഇന്നലെ രാവിലെ പതിനൊന്നോടെ മട്ടന്നൂർ-തലശേരി റോഡിൽ കനാലിനു സമീപത്തെ എൻഎസ്എസ് ബിൽഡിംഗിനു മുന്നിലായിരുന്നു അപകടം. തലശേരി ഭാഗത്ത് നിന്ന് മട്ടന്നൂർ ഭാഗത്തേക്കു വരികയായിരുന്നു കാർ നിയന്ത്രണം വിട്ടു മട്ടന്നൂർ ഭാഗത്ത് നിന്ന് കൂത്തുപറമ്പ് ഭാഗത്തേക്കു പോകുകയായിരുന്ന സ്കൂട്ടറിൽ ഇടിച്ചശേഷം സമീപത്തെ സിമന്‍റ് കടയിലേക്കു പാഞ്ഞുകയറുകയായിരുന്നു. അപകടം നടക്കുമ്പോൾ കടയിൽ ആളില്ലാത്തതിനാൽ വൻ ദുരന്തമാണ് ഒഴിവായത്. പരിക്കേറ്റ സ്കൂട്ടറിലെ യാത്രക്കാരനും കാർ യാത്രക്കാരനും മട്ടന്നൂരിലെ സ്വകാര്യ ആശുപത്രിയിൽ ചികിത്സ തേടി.

പോലീസ് പരേഡ് ഗ്രൗണ്ട് സിന്തറ്റിക് ട്രാക്ക് 12ന് മുഖ്യമന്ത്രി നാടിന് സമർപ്പിക്കും

കണ്ണൂർ: കണ്ണൂർ പോലീസ് പോലീസ് പരേഡ് ഗ്രൗണ്ടിലെ സിന്തറ്റിക് ട്രാക്കും മൾട്ടി പർപ്പസ് ഇൻഡോർ കോർട്ടും 12ന് മുഖ്യമന്ത്രി പിണറായി വിജയൻ നാടിന് സമർപ്പിക്കും. കേരള പോലീസ് സ്പോർട്സ് ആൻഡ് യൂത്ത് വെൽഫെയർ സൊസൈറ്റി സ്കീം പ്രകാരം നവീകരിച്ച മൈതാനിയിൽ പുൽത്തകിടിയോടു കൂടിയ ഫുട്ബോൾ ഗ്രൗണ്ടും ഒരുക്കിയിട്ടുണ്ട്. 12ന് ഉച്ചകഴിഞ്ഞ 3.30ന് കണ്ണൂർ ദിനേശ് ഓഡിറ്റോറിയത്തിൽ നടക്കുന്ന ഉദ്ഘാടന പരിപാടിയിൽ മന്ത്രി കടന്നപ്പള്ളി രാമചന്ദ്രൻ അധ്യക്ഷത വഹിക്കും. എംഎൽഎമാരായ എം.വി. ഗോവിന്ദൻ, കെ.വി. സുമേഷ് എന്നിവർ വിശിഷ്ടാതിഥികളാകും. സംസ്ഥാന പോലീസ് മേധാവി രവാഡ ചന്ദ്രശേഖർ, എഡിജിപി എച്ച്. വെങ്കിടേഷ്, നോർത്ത് സോൺ ഐജി രാജ്പാൽ മീണ, കണ്ണൂർ റേഞ്ച് ഡിഐജി ജി. യതീഷ് ചന്ദ്ര, സിറ്റി കമ്മീഷണർ പി. നിധിൻരാജ് എന്നിവർ പങ്കെടുക്കും.

സിപിഎം ഭരണത്തിൽ കേരളം ക്രൈം സ്റ്റേറ്റായി മാറി: മുല്ലപ്പള്ളി രാമചന്ദ്രൻ

കണ്ണൂർ: ഒന്പത് വർഷത്തെ സിപിഎം ഭരണത്തിലൂടെ കേരളം കുറ്റകൃത്യങ്ങളുടെ സംസ്ഥാനമായി മാറിയെന്ന് കെപിസിസി മുൻ പ്രസിഡന്‍റ് മുല്ലപ്പള്ളി രാമചന്ദ്രൻ. പെൻഷൻ പരിഷ്കരണ നടപടി ഉടൻ ആരംഭിക്കുക, ആറു ഗഡു ക്ഷാമാശ്വാസം അനുവദിക്കുക, 2021 ന് ശേഷം വിരമിച്ച ജീവനക്കാരുടെ ശമ്പള പരിഷ്കരണ കുടിശിക ഉടൻ വിതരണം ചെയ്യുക തുടങ്ങിയ ആവശ്യങ്ങളുന്നയിച്ചാണ് കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ സംസ്ഥാന വ്യാപകമായി നടത്തുന്ന സമരത്തിന്‍റെ ഭാഗമായി കണ്ണൂർ കളക്ടറേറ്റിനു മുന്നിൽ ആരംഭിച്ച ദ്വിദിന സത്യഗ്രഹം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പി.വി. കൃഷ്ണൻ അധ്യക്ഷത വഹിച്ചു. സംസ്ഥാന പ്രസിഡന്‍റ് എം.പി. വേലായുധൻ,പി. സുഖ്ദേവൻ, ഡോ.കെ.വി. ഫിലോമിന, ടി.ഒ. ഗംഗാധരൻ ,രവീന്ദ്രൻ കൊയ്യോൻ ,കെ.രാധാകൃഷ്ണൻ ,എ.കെ.സുധാകരൻ, കെ.പി. ഭാസ്കരൻ, കെ.സി രാജൻ, പി.പി ചന്ദ്രാംഗതൻ ,എം.കെ. ജോസ് എന്നിവർ പ്രസംഗിച്ചു.

ആറളത്ത് നൂറ് ഹെക്‌ടറിൽ കേരഗ്രാമം പദ്ധതി

ഇരിട്ടി: നാളികേരത്തിന്‍റെ ഉത്പാദനവും ഉത്പാദന ക്ഷമതയും വർധിപ്പിക്കാൻ ആറളം പഞ്ചായത്തിൽ 100 ഹെക്‌ടറിൽ കേരഗ്രാമം പദ്ധതി നടപ്പിലാക്കും. ശാസ്ത്രീയ രീതിയിലുള്ള പുതുകൃഷിക്കും നിലവിലെ കൃഷി സംരക്ഷിച്ച് ഉത്പാദനം വർധിപ്പിക്കുന്നതിനും കർഷകർക്ക് സബ്‌സിഡി ഉൾപ്പെടെ ലഭ്യമാക്കും. മൂന്നുവർഷത്തേക്ക് വിത്തും വളവും മറ്റ് ആനുകൂല്യങ്ങളും ലഭ്യമാക്കുന്നതിനായി 37.67 ലക്ഷം രൂപയും അനുവദിക്കും. പദ്ധതിക്കായി പേരാവൂർ നിയോജക മണ്ഡലത്തിൽ ആറളം പഞ്ചായത്തിനെയാണ് കൃഷി വകുപ്പ് തെരഞ്ഞെടുത്തിരിക്കുന്നതെന്ന് സണ്ണിജോസഫ് എംഎൽഎ അറിയിച്ചു. പദ്ധതി പ്രകാരം ഒന്നാം വർഷം 25.67 ലക്ഷം രൂപയും രണ്ടാംവർഷം എട്ടുലക്ഷം രൂപയും മൂന്നാം വർഷം നാലുലക്ഷം രൂപയുമാണു ധനസഹായമായി നൽകുന്നത്. ആറളം കൃഷിഭവൻ മുഖേന സബ്‌സിഡി കേര കർഷകർക്ക് കൈമാറും.ആറളം ഫാം ഉൾപ്പെടെ പഞ്ചായത്തിൽ 900 ഹെക്‌ടറിലധികം തെങ്ങ് കൃഷിയുണ്ട്. ഇതിൽ 150 ഹെക്‌ടറിലധികം ആറളം ഫാം ഉൾപ്പെടുന്ന പ്രദേശമാണ്. ഫാമിൽ കാട്ടാന, കുരങ്ങ് ശല്യം മൂലം തേങ്ങയുടെ ഉത്പാദനം അഞ്ചിലൊന്നായി കുറഞ്ഞു. ആയിരത്തോളം തെങ്ങുകൾ കാട്ടാനക്കൂട്ടം കുത്തിവീഴ്ത്തി. വലിയ തോതിലുള്ള ഉത്പാദന തകർച്ചയാണു മേഖലയിൽ ഉണ്ടായിരിക്കുന്നത്. പുനർകൃഷി പോലും നടത്താൻ കഴിയാത്ത സാഹചര്യമാണു ഫാമിനുള്ളിലുള്ളത്. പഞ്ചായത്തിന്‍റെ മറ്റു ഭാഗങ്ങളായ പുതിയങ്ങാടി, കീഴ്പ്പള്ളി, ചെടിക്കുളം, കൊക്കോട്, കക്കുവ, പൂതക്കുണ്ട്, ആറളം, വട്ടപ്പറമ്പ് ഭാഗങ്ങളിലാണു കൂടുതലായും കൃഷി ചെയ്യുന്നത്. ഇവിടങ്ങളിലെ കേര കർഷകർക്കാണു പദ്ധതിയിലൂടെ സബ്‌സിഡിയും മറ്റ് ആനുകൂല്യങ്ങളും ലഭ്യമാക്കുക.

ഒറ്റത്തവണ ഉപയോഗമുള്ള പ്ലാസ്റ്റിക് നിരോധനം; സമൂഹ മാധ്യമങ്ങളിൽ തെറ്റായ പ്രചാരണം

കണ്ണൂർ: ഒറ്റത്തവണ ഉപയോഗിക്കാവുന്ന പ്ലാസ്റ്റിക് നിരോധനത്തിന് സുപ്രീംകോടതി സ്റ്റേ നല്‍കിയെന്ന് സമൂഹ മാധ്യമങ്ങളില്‍ പ്രചരിക്കുന്ന വാര്‍ത്ത വസ്തുതാവിരുദ്ധമെന്ന് ശുചിത്വമിഷന്‍ ജില്ലാ കോ -ഓര്‍ഡിനേറ്റര്‍ അറിയിച്ചു. സംസ്ഥാനത്തെ 10 മലയോര വിനോദ സഞ്ചാര കേന്ദ്രങ്ങളില്‍ അഞ്ച് ലിറ്ററില്‍ താഴെയുള്ള കുടിവെള്ള കുപ്പികളും രണ്ട് ലിറ്ററില്‍ താഴെയുള്ള ശീതളപാനീയ കുപ്പികളുമാണ് നിരോധിച്ച് ഹൈക്കോടതി ഉത്തരവിട്ടത്. ഇതേ നിരോധനം ഓഡിറ്റോറിയങ്ങള്‍ക്കും കല്യാണങ്ങള്‍ക്കും പൊതുപരിപാടികള്‍ക്കും ബാധകമാക്കി ഒക്ടോബര്‍ രണ്ടു മുതല്‍ നടപ്പാക്കാനായിരുന്നു ഹൈക്കോടതി ഉത്തരവ്. ഈ നിര്‍ദേശമാണ് സുപ്രീം കോടതി സ്റ്റേ ചെയ്തത്. 2020 ജനുവരിയില്‍ ഇറങ്ങിയ ഒറ്റത്തവണ ഉപയോഗിക്കാവുന്ന പ്ലാസ്റ്റിക്ക് നിരോധന ഉത്തരവിന് ഈ സ്റ്റേ ബാധകമല്ല. എല്ലാ തരത്തിലുമുള്ള പ്ലാസ്റ്റിക് ക്യാരി ബാഗുകള്‍, ഒറ്റതവണ ഉപയോഗമുള്ള സ്പൂണുകള്‍, സ്ട്രോ, ഫോര്‍ക്കുകള്‍, പ്ലാസ്റ്റിക് ആവരണമുള്ള പേപ്പര്‍ കപ്പുകളും പ്ലേറ്റുകളും, തെര്‍മോകോള്‍ പ്ലേറ്റുകള്‍, ഒറ്റ തവണ ഉപയോഗമുള്ള പ്ലാസ്റ്റിക് അലങ്കാര വസ്തുക്കള്‍, 500 മില്ലിയില്‍ താഴെയുള്ള കുടിവെള്ളക്കുപ്പികള്‍, ഗാര്‍ബേജ് ബാഗുകള്‍, പതാകകള്‍, പേപ്പര്‍ വാഴയില, 60 ജിഎസ്എമ്മിന് താഴെയുള്ള നോണ്‍ വൂവണ്‍ ബാഗുകള്‍ എന്നിവയ്ക്കാണ് കേരളത്തില്‍ നിലവില്‍ നിരോധനമുള്ളത്.

ജില്ലാ ആശുപത്രി സൂപ്പർ സ്‌പെഷാലിറ്റി ബ്ലോക്ക് ഉദ്ഘാടനം 11ന്; സംഘാടക സമിതി രൂപീകരിച്ചു

കണ്ണൂർ: ജില്ലാ ആശുപത്രിയിൽ അത്യാധുനിക സംവിധാനങ്ങളോടെ പുതിയതായി നിർമിച്ച സൂപ്പർ സ്‌പെഷാലിറ്റി ബ്ലോക്കിന്‍റെ ഉദ്ഘാടനം 11ന് മുഖ്യമന്ത്രി പിണറായി വിജയൻ നിർവഹിക്കും. ആരോഗ്യ മന്ത്രി വീണ ജോർജ് അധ്യക്ഷത വഹിക്കുന്ന ചടങ്ങിൽ മന്ത്രി രാമചന്ദ്രൻ കടന്നപ്പള്ളി അടക്കം വിവിധ മന്ത്രിമാർ, എംപിമാർ, എംഎൽഎമാർ, തദ്ദേശ ജനപ്രതിനിധികൾ തുടങ്ങിയവർ പങ്കെടുക്കും. പരിപാടികളുടെ നടത്തിപ്പിനായി വിവിധ സബ് കമ്മറ്റികളും യോഗത്തിൽ രൂപീകരിച്ചു. സംഘാടക സമിതി രൂപീകരണ യോഗത്തിൽ ജില്ലാ പഞ്ചായത്ത് പ്രസിഡന്‍റ് കെ.കെ. രത്‌നകുമാരി അധ്യക്ഷത വഹിച്ചു. ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ, എഡിഎം കലാഭാസ്‌കർ, ഡിഎംഒ ഡോ. എം.പിയൂഷ്, ഡിപിഎം ഡോ. അനിൽ കുമാർ, ജില്ലാ ആശുപത്രി സൂപ്രണ്ട് ഡോ. എം.കെ. ഷാജ്, ഡെപ്യൂട്ടി സൂപ്രണ്ട് ഡോ. ഗ്രിഫിൻ സുരേന്ദ്രൻ എന്നിവർ പ്രസംഗിച്ചു.

വൈദ്യുത തൂൺ ചെരിഞ്ഞ് അപകടാവസ്ഥയിലായി

ആലക്കോട്: അപകടത്തിന് വഴിയൊരുക്കി റോഡിലേക്ക് വൈദ്യുത തൂൺ ചാഞ്ഞു നിൽക്കുന്നു. ദിനം പ്രതി വിദ്യാർഥികൾ ഉൾപ്പെടെ നിരവധി യാത്രക്കാർ സഞ്ചരിക്കുന്ന കൊട്ടയാട് കവല- കുറ്റിപ്പുഴ റോഡിലാണ് വൈദ്യുത തൂൺ അപകടാവസ്ഥയിലായത്. കനത്ത മഴയിൽ തൂണിന്‍റെ ചുവട്ടിലെ മണ്ണ് ഒഴുകിപ്പോയതാണ് തൂണ് ചരിയാൻ ഇടയാക്കിയത്. തൂണ് ഏത് സമയത്തും നിലം പൊത്താവുന്ന നിലയിലാണ്. ആലക്കോട് സെക്ഷൻ പരിധിയിലെ തൂണാണ് ഒരുമാസത്തിലധികമായി അപകടാവസ്ഥയിൽ നില നിൽക്കുകയാണ്. പരാതി നൽകിട്ടും അധികൃതർ നടപടി സ്വീകരിക്കുന്നില്ലെന്നാണ് നാട്ടുകാരുടെ പരാതി.

ടിഎസ്എസ്എസ് വായാട്ടുപറമ്പ് ട്രസ്റ്റ് വാർഷിക പൊതുയോഗം

വായാട്ടുപറമ്പ്: തലശേരി സോഷ്യൽ സർവീസ് സൊസൈറ്റി (ടിഎസ്എസ്എസ്) വായാട്ടുപറമ്പ് ട്രസ്റ്റ് വാർഷിക പൊതുയോഗം ട്രസ്റ്റ് പ്രസിഡന്‍റ് ലൂക്കോസ് പുല്ലൻകുന്നേൽ പതാക ഉയർത്തി തുടക്കം കുറിച്ചു. ടിഎസ്എസ്എസ് അതിരൂപത ഡയറക്‌ടർ ഫാ. ബിബിൻ വരമ്പകത്ത് ഉദ്ഘാടനം ചെയ്തു. വായാട്ടുപറമ്പ് ഫൊറോന വികാരി റവ. ഡോ. തോമസ് തെങ്ങുംപള്ളിൽ അധ്യക്ഷത വഹിച്ചു. ടിഎസ്എസ്എസ് അതിരൂപത പ്രസിഡന്‍റ് ജോഷി കുന്നത്ത് മുഖ്യപ്രഭാഷണം നടത്തി. യൂണിറ്റ് സെക്രട്ടറി എം.എസ്. മോഹനൻ വാർഷിക റിപ്പോർട്ടും ജോയിന്‍റ് സെക്രട്ടറി ഡോളി ബെന്നി ഓഡിറ്റ് റിപ്പോർട്ടും അവതരിപ്പിച്ചു. വായാട്ടുപറമ്പ് ഫൊറോന സഹവികാരി ഫാ. നോയൽ ആനിക്കുഴിക്കാട്ടിൽ, ടിഎസ്എസ്എസ് ആലക്കോട് മേഖലാ സെക്രട്ടറി ഷാജി കുന്നുംപുറം, യൂണിറ്റ് പ്രസിഡന്‍റ് ലൂക്കോസ് പുല്ലൻകുന്നേൽ, ഇടവക കോ-ഓഡിനേറ്റർ പി.ജെ. മാത്യു, ഒ.ജെ. സ്കറിയ എന്നിവർ പ്രസംഗിച്ചു. എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർഥികളെ അനുമോദിച്ചു. മികച്ച അടുക്കളത്തോട്ടങ്ങൾ, ഗ്രാമിക ഗ്രൂപ്പുകൾ എന്നിവയ്ക്കുള്ള സമ്മാനങ്ങളും വിദ്യാഭ്യാസ വായ്പകളും റവ. ഡോ. തോമസ് തെങ്ങുംപള്ളിൽ വിതരണം ചെയ്തു. പങ്കെടുത്ത എല്ലാവർക്കും സ്നേഹവിരുന്നും നൽകി. സണ്ണി മരുതാനിക്കാട്ട്, ലാലി ഷാജി, ബിജു കൊട്ടാരം, സജി നിരപ്പേൽ, ലിൻസി കണ്ണാംപാടം, ജോഷി പൂക്കുടി തുടങ്ങിയവർ നേതൃത്വം നൽകി.

ഏരുവേശി പുഴയിൽ കാറും മുച്ചക്ര വാഹനവും വീണു; ഒരാളെ കാണാതായി

ഏരുവേശി: ഏരുവേശി പുഴയിൽ കാറും മുച്ചക്ര വാഹനവും വീണ് ഒരാളെ കാണാതായി. ചൊവ്വാഴ്ച രാത്രി 8.30 ഓടെ എരുത്ത് കടവിൽ കാർ നിയന്ത്രണം വിട്ട പുഴയിലേക്ക് വീണ് കുറച്ചുദൂരം ഒഴുകിപ്പോയെങ്കിലും ഡ്രൈവർ അദ്ഭുതകരമായി രക്ഷപ്പെട്ടു. ഇന്നലെ രാത്രി ഒന്പതോടെ മുച്ചക്ര വാഹനം പുഴയിലേക്ക് വീണ് യാത്രക്കാരനായ ആന്‍റണി മുണ്ടയ്ക്കലിനെ കാണാതായി. ആന്‍റണി മുണ്ടയ്ക്കൽ ചപ്പാത്ത് പാലം ക‌ടക്കുന്പോഴായിരുന്നു പുഴയിലേക്ക് മുച്ചക്ര വാഹനം പതിച്ചത്. പോലീസും ഫയർഫോഴ്സും എത്തി തിരച്ചിൽ ആരംഭിച്ചു. ചപ്പാത്ത് പാലം കടക്കുമ്പോഴാണ് കാറും അപകടത്തിൽ പെട്ടത്. പയ്യാവൂരിൽ ഫോട്ടോ ഡിസൈനറായ മണ്ണേരി സ്വദേശി ശ്രീജിത്തായിരുന്നു കാർ ഓടിച്ചിരുന്നത്. അദ്ദേഹം മാത്രമേ കാറിലുണ്ടായിരുന്നുള്ളൂ. ചപ്പാത്തിൽ നിന്ന് പുഴയിൽ വീണ് ഇരുപത് മീറ്ററോളം ഒഴുകിപ്പോയ ശേഷമാണ് ശ്രീജിത്തിന് രക്ഷപ്പെടാൻ കഴിഞ്ഞത്. ഡ്രൈവറുടെ സീറ്റിലെ ഡോറിന്‍റെ ഗ്ലാസ് തുറന്ന നിലയിലായിരുന്നതിനാൽ അതുവഴി ചാടി നീന്തി കരയിലെത്തുകയായിരുന്നു. പുഴയിലൂടെ വീണ്ടും ഇരുനൂറ് മീറ്ററോളം താഴേക്കൊഴുകി വെള്ളത്തിൽ മുങ്ങിപ്പോയ കാർ ഇന്നലെ ഇരിട്ടിയിൽ നിന്നെത്തിയ ഫയർഫോഴ്സ് സംഘവും നാട്ടുകാരും ചേർന്നാണ് കയർ കെട്ടിവലിച്ച് കരയിലെത്തിച്ചത്. വേനൽകാലത്ത് പുഴയിലെ ജലനിരപ്പും ശക്തമായ ഒഴുക്കും കുറയുമ്പോൾ മാത്രം വാഹനങ്ങൾക്ക് കടന്നു പോകാൻ നിർമിച്ച ചപ്പാത്താണ് ഇവിടെയുള്ളത്. ചപ്പാത്തിന്‍റെ മുകളിലൂടെ വെള്ളവും ഒഴുക്കും ശക്തമായുള്ളപ്പോൾ വാഹനങ്ങൾ കടത്തുന്നത് സുരക്ഷിതമല്ലെന്ന മുന്നറിയിപ്പ് ബോർഡുകളൊന്നും ഇവിടെ സ്ഥാപിച്ചിട്ടില്ല. അതാണ് ഇത്തരം അപകടങ്ങൾക്ക് ഇടയാക്കുന്നത്.

വീടിന് സമീപം 220 കെവി ലൈൻ പൊട്ടിവീണു

തളിപ്പറമ്പ: 220 കെവി ലൈൻ വീടിന് സമീപത്ത് പൊട്ടി വീണു. ചിറവക്ക് കോട്ടക്കുന്ന് ടവറിൽ നിന്ന് സിഎംആർ വില്ല വഴി പുളിമ്പറമ്പിലേക്ക് പോകുന്ന 220 കെവി വൈദ്യുത ലൈനാണ് ഇന്നലെ പുലർച്ചെ അഞ്ചോടെ പൊട്ടി വീണത്. കോട്ടക്കുന്ന് ടവറിന് സമീപം താമസിക്കുന്ന സമീറയുടെ വീടിന് തൊട്ടടുത്താണ് ലൈൻ പൊട്ടിവീണത്. അപകടം നടന്നയുടൻ ടവറിൽ വൻ അഗ്നിഗോളം രൂപപ്പെടുകയും പൊട്ടിത്തെറിയുണ്ടാവുകയും ചെയ്തു. പൊട്ടിവീണ വൈദ്യുത ലൈനിന്‍റെ ഒരു ഭാഗം സിഎംആർ വില്ലയുടെ കുട്ടികളുടെ പാർക്കിലാണ് വീണത്. പാർക്കിൽ ആളില്ലാതിരുന്നതിനാൽ വലിയ ദുരന്തം ഒഴിവായി. ലൈൻ പൊട്ടിവീണ ഉടനേ ടവറിൽ നിന്നുള്ള വൈദ്യുതിബന്ധം നിലച്ചിരുന്നു. എന്നാൽ ത്രി ഫെയ്‌സ് ലൈനിൽ വൈദ്യുതിയുണ്ടായിരുന്നു. സംഭവമറിഞ്ഞ് എത്തിയ കെഎസ്ഇബി ജീവനക്കാർ ലൈൻ ഓഫ് ചെയ്തു. പയ്യന്നൂർ ലൈൻ മെയിന്‍റനൻസ് സെക്ഷനിലെ സബ് എൻജിനിയർ കിരൺ, അസി. എൻജിനീയർ ദീപക്, ഓവർസിയർ പങ്കജാക്ഷൻ എന്നിവരുടെ നേതൃത്വത്തിലുള്ള സംഘം സ്ഥലമാണ് ലൈൻ പുനർ നിർമിച്ച് വൈദ്യുതി വിതരണം പുന:സ്ഥാപിച്ചത്.

"ചങ്ങാതിക്ക് ഒരു തൈ' പദ്ധതി

പയ്യാവൂർ: ലോക സൗഹൃദ ദിനാചരണത്തിന്‍റെ ഭാഗമായി പയ്യാവൂർ ചാമക്കാൽ ഗവ. എൽപി സ്കൂളിൽ "ചങ്ങാതിക്ക് ഒരു തൈ' പദ്ധതി നടപ്പാക്കി. പയ്യാവൂർ പഞ്ചായത്ത് ചാമക്കാൽ വാർഡംഗം പ്രഭാവതി മോഹൻ പദ്ധതി ഉദ്ഘാടനം ചെയ്തു. വിദ്യാർഥികൾ ശേഖരിച്ചു കൊണ്ടുവന്ന വൃക്ഷത്തൈകൾ ഓരോരുത്തരും സഹപാഠികൾക്കു കൈമാറി. സ്കൂൾ സീനിയർ അസിസ്റ്റന്‍റ് ജോസ്മി ജോസ്, മദർ പിടിഎ പ്രസിഡന്‍റ് സൗമ്യ ദിനേശ്, പി. ശില്പ, ടി.വി. ദീപ, എം.ടി. മധുസൂദനൻ, രജനി റിൻസ് എന്നിവർ നേതൃത്വം നൽകി. കുടിയാന്മല: ലോക സൗഹൃദ ദിനാചരണ ഭാഗമായി കുടിയാന്മല ഫാത്തിമ യുപി സ്കൂളിൽ ഇക്കോ ക്ലബിന്‍റെ ആഭിമുഖ്യത്തിൽ വിദ്യാർഥികൾ സഹപാഠികൾക്ക് വൃക്ഷത്തൈകൾ കൈമാറി. സ്കൂൾ മുഖ്യാധ്യാപിക മിനി ഏബ്രഹാം അധ്യക്ഷത വഹിച്ചു. സ്കൂൾ ലീഡർ ഇവ മരിയ പോൾ സ്കൂൾ ഇക്കോ ക്ലബ് ലീഡർ എ.ആർ.അജ്‌വിന് വൃക്ഷത്തൈ നൽകി ഉദ്ഘാടനം ചെയ്തു. അധ്യാപകരായ ബെൽജിമോൾ ബാബു, സൈജു ടോംസ് എന്നിവർ നേതൃത്വം നൽകി.

ചന്ദനക്കാംപാറ-പയ്യാവൂർ റോഡിൽ‌ വീണ്ടും കുഴികൾ; യാത്ര ദുസഹം

പൈസക്കരി: നിരവധി സ്വകാര്യ ബസുകളും കെഎസ്ആർടിസിയും സർവീസ് നടത്തുന്ന ചന്ദനക്കാംപാറ-പൈസക്കരി-പയ്യാവൂർ റോഡ് വീണ്ടും തകർന്നു. ചന്ദനക്കാംപാറ, ചീത്തപ്പാറ ജംഗ്ഷൻ, പൈസക്കരി, വണ്ണായികടവ്, കോയിപ്ര തുടങ്ങി പയ്യാവൂർ സെന്‍റ് ആൻസ് സ്കൂൾ വരെയുള്ള ഭാഗങ്ങളിൽ പലയിടങ്ങളിലും കുഴികൾ രൂപപ്പെട്ടിരിക്കുകയാണ്. 15 വർഷം മുന്പ് മെക്കാഡം ടാറിംഗ് നടത്തിയ റോഡിൽ നേരത്തെ കുഴികൾ രൂപപ്പെട്ട് ഗതാഗതം ദുസഹമായിരുന്നു. ഇത് സംബന്ധിച്ച് ദീപിക റിപ്പോർട്ടിനെ തുടർന്ന് താത്കാലികമായി കുഴിയടക്കൽ നടത്തിയതിനു പിന്നാലെയാണ് വീണ്ടും കുഴികൾ പ്രത്യക്ഷപ്പെട്ടു തുടങ്ങിയത്. ഇപ്പോൾ പലയിടങ്ങളിലും ആഴമുള്ള കുഴികൾ രൂപപ്പെട്ടിട്ടുണ്ട്. ഇരുചക്രവാഹനങ്ങൾ കുഴിയിൽ വീണ് യാത്രക്കാർക്ക് പരിക്കേൽക്കുന്നതും ചെറിയ വാഹനങ്ങൾ കേടുവരുന്നതും പതിവാണ്. കുഴികൾ വെട്ടിക്കാൻ ശ്രമിക്കുന്നതിനിടെ കഴിഞ്ഞ ആഴ്ച മാത്രം നാലു വാഹനങ്ങൾ അപകടത്തിൽപ്പെട്ടു. റോഡിലെ അപകടാവസ്ഥ ഒഴിവാക്കാൻ അടിയന്തിര നടപടികൾ സ്വീകരിക്കണമെന്ന് നാട്ടുകാർ ആവശ്യപ്പെട്ടു.

ചങ്ങാതിക്കൊരു തൈ പദ്ധതി

ചെറുപുഴ: കുട്ടികളിൽ പരസ്പര സ്നേഹം, സൗഹൃദം, പങ്കുവയ്ക്കൽ എന്നീ മൂല്യങ്ങൾ വളർത്തുന്നതിനായി കോഴിച്ചാൽ സെന്‍റ് അഗസ്റ്റിൻസ് എൽപി സ്കൂളിൽ ചങ്ങാതിമാർക്ക് വൃക്ഷതൈ സമ്മാനിക്കുന്ന ചങ്ങാതിക്കൊരു മരം പദ്ധതി നടപ്പാക്കി. പിടിഎ പ്രസിഡന്‍റ് ജിസ് ജോർജ് ഉദ്ഘാടനം ചെയ്തു. മദർ പിടിഎ പ്രസിഡന്‍റ് എം.ജെ. ഷെറ്റി, മുഖ്യാധ്യാപിക എം.എം. മേരി, പി.ജെ. അൽഫോൻസ, ബിബിന ജോർജ്, സ്വപ്ന ജോർജ് എന്നിവർ പ്രസംഗിച്ചു. കാർത്തികപുരം: ലോക സൗഹൃദ ദിനത്തിന്‍റെ ഭാഗമായി ചങ്ങാതിക്കൊരു തൈ പദ്ധതിയുടെ ഉദയഗിരി പഞ്ചായത്ത് തല ഉദ്ഘാടനം കാർത്തികപുരം ഗവ. വൊക്കേഷണൽ ഹയർ സെക്കൻഡറി സ്കൂളിൽ പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ നിർവഹിച്ചു. പഞ്ചായത്തംഗം എം.സി. ജനാർദനൻ അധ്യക്ഷത വഹിച്ചു. കെ.ടി. സുരേഷ് കുമാർ, എ.പി. രാജേഷ്, കെ.കെ. രതി, ജയ്നി മാത്യു , ഇന്ദു, ടി.വി. ശ്യാമള, മുഖ്യ അധ്യാപിക കെ. ലീനകുമാരി, നിധീഷ് എന്നിവർ പ്രസംഗിച്ചു. ആയിരം വ്യക്ഷതൈകളാണ് ചങ്ങാതിക്കൊരു തൈ പദ്ധതിയിലൂടെ നടുന്നത്.

ഐടി ഉപകരണങ്ങളുടെ സ്വിച്ച് ഓൺ കർമം നടത്തി

ആലക്കോട്: ഇരിക്കൂർ നിയോജക മണ്ഡലം ദിശാ ദർശൻ പദ്ധതിയുടെ ഭാഗമായ ഭാഷാമൃതം പരിപാടിയിൽ ആലക്കോട് എൻഎസ്എസ്എൽപി സ്കൂളിന് ലഭിച്ച ഒരു ലക്ഷം രൂപയുടെ ഐടി ഉപകരണങ്ങളുടെ സ്വിച്ച് ഓൺ കർമം സജീവ് ജോസഫ് എംഎൽഎ നിർവഹിച്ചു. പിടിഎ പ്രസിഡന്‍റ് എം.എൻ. സുധീഷ് അധ്യക്ഷത വഹിച്ചു. തളിപ്പറമ്പ നോർത്ത് എഇഒ കെ. മനോജ് മുഖ്യപ്രഭാഷണം നടത്തി. ഹെഡ്മിസ്ട്രസ് ബി. രഞ്ജിനി,കെ.കെ.സജ്ന എന്നിവർ പ്രസംഗിച്ചു.

ഹൈബ്രിഡ് പച്ചക്കറി കൃഷി വിളവെടുപ്പ് ഉദ്ഘാടനം

ചെറുപുഴ: പെരിങ്ങോം-വയക്കര ഗ്രാമപഞ്ചായത്ത് കൃഷിഭവന്‍റെ ആഭിമുഖ്യത്തിൽ സംസ്ഥാന ഹോർട്ടികൾച്ചർ മിഷൻ 2025-26 പദ്ധതി പ്രകാരം രണ്ടേക്കറോളം ഹൈബ്രിഡ് പച്ചക്കറി കൃഷി ചെയ്ത എം.സി. ഷാജിയുടെ കൃഷിയിടത്തിൽ പച്ചക്കറി വിളവെടുപ്പു ഉദ്ഘാടനം നടന്നു. പെരിങ്ങോം-വയക്കര ഗ്രാമപഞ്ചായത്ത് പ്രസിഡന്‍റ് വി.എം. ഉണ്ണികൃഷ്ണൻ ഉദ്ഘാടനം നിർവഹിച്ചു. വെള്ളരി, കക്കിരി, നരമ്പൻ, ചുരക്ക, മത്തൻ, പടവലം എന്നിവയാണു കൃഷി ചെയ്തത്. മറ്റുവർഷങ്ങളിൽ നിന്നും വിഭിന്നമായി ഈ വർഷത്തെ പ്രതികൂല കാലാവസ്ഥയിലും പച്ചക്കറി കൃഷിയിൽ മികച്ച വിജയം നേടുവാൻ ഷാജിക്ക് സാധിച്ചു. സ്റ്റാന്‍റിംഗ് കമ്മിറ്റി ചെയർപേഴ്സൺ ഫാത്തിമ ബീവി, കൃഷി ഓഫീസർ ടി.വി. തുഷാര, കൃഷി വകുപ്പ് ഉദ്യോഗസ്ഥർ എന്നിവർ പങ്കെടുത്തു.

ടിഎസ്എസ്എസ് പൊട്ടംപ്ലാവ് ട്രസ്റ്റ് വാർഷിക പൊതുയോഗം

പയ്യാവൂർ: തലശേരി സോഷ്യൽ സർവീസ് സൊസൈറ്റി (ടിഎസ്എസ്എസ്) പൊട്ടംപ്ലാവ് ട്രസ്റ്റിന്‍റേയും, മഹിളാ സേവാ സംഘത്തിന്‍റേയും (എംഎസ്എസ്) സംയുക്ത വാർഷിക പൊതുയോഗം പൊട്ടംപ്ലാവ് പാരിഷ് ഹാളിൽ ടിഎസ്എസ്എസ് റീജണൽ ഡയറക്ടർ ഫാ. ജോബി ചെരുവിൽ ഉദ്ഘാടനം ചെയ്തു. യൂണിറ്റ് ഡയറക്ടർ ഫാ. ജിസ് കളപ്പുരയ്ക്കൽ അധ്യക്ഷത വഹിച്ചു. ടിഎസ്എസ്എസ് അതിരൂപത പ്രസിഡന്‍റ് ജോഷി കുന്നത്ത് മുഖ്യപ്രഭാഷണം നടത്തി. മിനി ജോർജ്, സോജി പുളിയ്ക്കൽ, ലിസി ജിജി, ആനിമേറ്റർ സിസ്റ്റർ ലീമ റോസ് എസ്കെഡി, മിനി വെട്ടിയ്ക്കൽ, എൽസി പറമ്പേൽ, സിന്ധു പാറേക്കാട്ടിൽ എന്നിവർ പ്രസംഗിച്ചു. എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർഥികളെ അനുമോദിച്ചു.

മഴ മാറിയാലുടൻ അലക്സ് നഗർ- ഐച്ചേരി റോഡ് പ്രവൃത്തി ആരംഭിക്കും

അലക്സ്നഗർ: മഴ മാറിയാലുടൻ അലക്സ് നഗർ- ഐച്ചേരി റോഡ് പ്രവൃത്തി ആരംഭിക്കുമെന്ന് ശ്രീകണ്ഠപുരം നഗരസഭാ കൗൺസിലർ ത്രേസ്യാമ്മ മാത്യു അറിയിച്ചു. അലക്സ് നഗർ ഐച്ചേരി റോഡ് സംബന്ധിച്ച ദീപികയിൽ പ്രസിദ്ധീകരിച്ച വാർത്തയോട് പ്രതികരിക്കുകയായിരുന്നു അവർ. ഐച്ചേരി - അലക്സ്നഗർ റോഡിൽ പ്രധാന അറ്റകുറ്റപണി ചെയ്തിട്ട് 17വർഷമായി. അലക്സ്‌ നഗർ -കാഞ്ഞിലേരി പാലത്തിന്‍റെ അപ്രോച്ച് റോഡ് 2019 -ൽ വൺടൈം സെറ്റിൽമെന്‍റിൽ പൊതുമരാമത്ത് വകുപ്പിന് വിട്ടുകൊടുത്തു. നവീകരണത്തിനായി നാല് കോടി 36 ലക്ഷത്തിന്‍റെ എസ്റ്റിമേറ്റ് സർക്കാരിന്‍റെ പരിഗണന‍യിൽ കിടക്കുകയാണ്. അതിനിടയിൽ ഈ റോഡിന്‍റെ ശോച്യാവസ്ഥ ചൂണ്ടിക്കാണിച്ചപ്പോൾ അറ്റകുറ്റപണി ചെയ്യുന്നതിന് വേണ്ടി 2023-ൽ കൗൺസിൽ തീരുമാനപ്രകാരം നഗരസഭയ്ക്ക് തിരിച്ചു നൽകി. സജീവ് ജോസഫ് എംഎൽഎയുടെ ഇടപെടൽ മൂലം പ്രളയക്കെടുതിയിൽ ഉൾപ്പെടുത്തിയ 10 ലക്ഷം കൊണ്ട് 610 മീറ്റർ റീടാർ ചെയ്തു. ഇതിനിടയിൽ 48 വർഷം പഴക്കമുള്ള ഈ റോഡിലെ മാപ്പിനി ഭാഗത്തുള്ള കലുങ്ക് തകരുകയും ചെയ്തു. തുടർന്ന് അടിയന്തരമായി നഗരസഭ 10 ലക്ഷം അനുവദിച്ചു. ഇതിൽ എഴ് ലക്ഷം രൂപ പുതിയ കലുങ്കിന്‍റെ പ്രവൃത്തിക്കും മൂന്ന് ലക്ഷം റോഡിന്‍റെ കുറച്ചുഭാഗം ടാറിംഗിനും ഉപയോഗിച്ചു. ശ്രീകണ്ഠപുരം നഗരസഭയുടെ അഞ്ച് ലക്ഷം പോൾ എന്ന കരാറുകാരൻ ടെൻഡർ എടുത്തെങ്കിലും പ്രവൃത്തി ഇതുവരെ തുടങ്ങിയിട്ടില്ല. അലക്സ് നഗർ പാലത്തിന്‍റെ ഉദ്ഘാടനത്തിന് എത്തിയ മന്ത്രി മുഹമ്മദ് റിയാസ് റോഡ് അറ്റകുറ്റപണിക്കായി 15 ലക്ഷം അനുവദിച്ചു. ഫണ്ട് ലഭിച്ചത് കാലവർഷം തുടങ്ങിയ സമയത്താണ്. തമ്പാൻ എന്ന കരാറുകാരൻ ടെൻഡർ എടുത്തിട്ടുണ്ട്. ഇതു സംബന്ധിച്ച് 2025 -26 വാർഷിക പദ്ധതിയിൽ നഗരസഭ വച്ചിട്ടുണ്ട്. അതും ടെൻഡർ നടപടിയിലേക്ക് പോകുന്നു. ഈയൊരു റോഡിനു മാത്രം 50 ലക്ഷം അനുവദിച്ചിട്ടുണ്ട്. നാട്ടുകാരുടെ സഹകരണത്തോടെ മഴ മാറുന്പോൾ റോഡ് നവീകരണം ആരംഭിക്കും. വരുന്ന തെരഞ്ഞെടുപ്പിന് മുമ്പ് പ്രവൃത്തി പൂർണമായും പൂർത്തിയാക്കുമെന്നും ത്രേസ്യാമ്മ മാത്യു ദീപികയോടു വ്യക്തമാക്കി.

പേ വിഷബാധ ബോധവത്കരണ ക്ലാസ് നടത്തി

വായാട്ടുപറമ്പ്: വായാട്ടുപറമ്പ് സെന്‍റ് ജോസഫ്സ് ഹയർ സെക്കൻഡറി സ്കൂളിൽ പേ വിഷബാധ പ്രതിരോധം അറിവാണ് ബലം, ഭയമല്ല വേണ്ടത് എന്ന വിഷയത്തിൽ ക്ലാസ് സംഘടിപ്പിച്ചു. എഡ്യൂക്കേഷണൽ ഓഫീസർ ബിജു ആന്‍റണി ക്ലാസ് നയിച്ചു. പൊതുജനാരോഗ്യത്തിന് എക്കാലത്തും വലിയ വെല്ലുവിളി ഉയർത്തുന്ന ജന്തുജന്യ രോഗമായ പേവിഷബാധ അഥവാ റാബിസ് രോഗത്തെയും അതിന്‍റെ പ്രതിരോധത്തെയും കുട്ടികൾക്ക് പരിചയപ്പെടുത്തുക എന്നതായിരുന്നു ക്ലാസിന്‍റെ ലക്ഷ്യം.സ്കൂൾ മുഖ്യാധ്യാപകൻ ബിജു സി. ഏബ്രഹാം, അധ്യാപകരായ ലൈലാ സെബാസ്റ്റ്യൻ, ജോസ് ജോസഫ്, ബിബിൻ മാത്യു, മായ. കെ ജോർജ് എന്നിവർ ക്ലാസിന് നേതൃത്വം നൽകി.

പ്രഥമചന്ദ്രൻ കീഴുത്തള്ളി പുരസ്കാരം കണ്ണൂർ ശ്രീലതയ്ക്ക് സമ്മാനിക്കും

കണ്ണൂർ: സിപിഎം നേതാവും മുൻകാല നാടക ഗാനരചയിതാവുമായ ചന്ദ്രൻ കീഴുത്തള്ളിയുടെ സ്മരണാർഥം പുരോഗമന കലാസാഹിത്യ സംഘം എടക്കാട് മേഖലാ കമ്മിറ്റി ഏർപ്പെടുത്തിയ പ്രഥമ പുരസ്കാരം പഴയകാല നാടക നടി കണ്ണൂർ ശ്രീലതയ്ക്ക്. 10,000 രൂപയും പ്രശസ്തി പത്രവും അടങ്ങു ന്ന പുരസ്കാരം 24 ന് വൈകുന്നേരം നാലിന് തോട്ടട ഐടിഐയ്ക്ക് സമീപം നടക്കുന്ന ചടങ്ങിൽ കെ.ഇ.എൻ. കുഞ്ഞഹമ്മദ് സമ്മാനിക്കുമെന്ന് സംഘാടകർ പത്രസമ്മേളനത്തിൽ അറിയിച്ചു. പരിപാടിയുടെ സമാപനം കുറിച്ച് ജില്ലാതല നാടക ഗാന മത്സരവും അരങ്ങേറും. പത്ര സമ്മേളന ത്തിൽ കെ.വി. അജിത്ത് കുമാർ, പ്രത്യുഷ് പുരുഷോത്തമൻ, സി.എ. പദ്മനാഭൻ, ജനു ആയിച്ചാൻകണ്ടി, എം.വി. പ്രകാശൻ എന്നിവർ പങ്കെടുത്തു.

ആറു പതിറ്റാണ്ടിന്‍റെ കാത്തിരിപ്പിനൊടുവിൽ രവീന്ദ്രന്‍റെ വീട്ടിൽ വൈദ്യുതി എത്തി

ഇരിട്ടി: ആറു പതിറ്റാണ്ടിന്‍റെ കാത്തിരിപ്പിനൊടുവിൽ വീട്ടിൽ വെളിച്ചമെത്തിയപ്പോൾ സന്തോഷത്താൽ രവീന്ദ്രൻ പുളിക്കലിന്‍റെ കണ്ണ് നിറഞ്ഞു. വീട്ടിൽ വൈദ്യുതി വെളിച്ചം എത്തിക്കുകയെന്നത് രവീന്ദ്രൻ ഉള്ളിൽ കൊണ്ടുനടന്ന ജീവിത അഭിലാഷമായിരുന്നു. ആഗ്രഹം സഫലമായപ്പോൾ വൈദ്യുതി വകുപ്പ് ജീവനക്കാർക്ക് മുന്നിൽ കൈകൂപ്പിയ രവീന്ദ്രൻ വിതുമ്പി. കെഎസ്ഇബി എടൂർ സെക്ഷനിലെ ജീവനക്കാരുടെ നേതൃത്വത്തിലാണ് മുണ്ടയാം പറമ്പിലെ രവീന്ദ്രന്‍റെ വീട്ടിൽ വൈദ്യുതി എത്തിച്ചത്. മണ്ണെണ വിളക്കിന്‍റെ വെളിച്ചത്തിലായിരുന്നു കഴിഞ്ഞുപോന്നത്.മൂന്ന് വർഷം മുന്പ് അമ്മ മരിച്ചതോടെ രവീന്ദ്രൻ പുളിക്കൽ തനിച്ചായി. വൈദ്യുതി കണക്ഷനുവേണ്ടി ഓഫീസുകൾ പലതവണ കയറി ഇറങ്ങിയെങ്കിലും പല കാരണങ്ങൾക്കൊണ്ട് നടക്കാതെ പോയി. വൈദ്യുതി വകുപ്പ് ഇരിട്ടി സെക്ഷനിലെ ജീവനക്കാരുടെ കൂട്ടായ്മയിൽ തടസങ്ങൾ നീക്കി വീട്ടിൽ വയറിംഗ് ഉൾപ്പെടെ പൂർത്തിയാക്കി കണക്ഷൻ അനുവദിക്കുകയായിരുന്നു. അമ്മയുള്ളപ്പോൾ വൈദ്യുതി എത്തിക്കാൻ കഴിയാതെ പോയതിൽ വിഷമം ഉണ്ടെങ്കിലും ഏകാന്ത ജീവിതത്തിൽ കൂട്ടായി വെളിച്ചമുണ്ടല്ലോ എന്നത് ആശ്വാസമാണ്. അയ്യങ്കുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ ഉദ്ഘാടനം ചെയ്തു. ഇരിട്ടി ഡിവിഷൻ എക്‌സിക്യൂട്ടീവ് എൻജിനിയർ ശ്രീലാകുമാരി സ്വിച്ച് ഓൺ കർമം നിർവഹിച്ചു. ഇരിട്ടി സബ്ഡിവിഷൻ അസിസ്റ്റന്‍റ് എക്‌സിക്യൂട്ടീവ് എൻജിനിയർ ലീജോ തോമസ് അധ്യക്ഷത വഹിച്ചു. എടൂർ ഇലക്ട്രിക്കൽ സെക്ഷൻ അസിസ്റ്റന്‍റ് എൻജിനിയർ പി.ജി. സനീഷ്, വാർഡ് അംഗം മിനി വിശ്വനാഥൻ, അനിൽകുമാർ, എടൂർ സെക്ഷൻ സബ് എൻജിനീയർ അജേഷ്, ഷാജി എന്നിവർ പ്രസംഗിച്ചു.

അങ്കണവാടി ജീവനക്കാർ സൂചനാ പണിമുടക്ക് നടത്തി

കണ്ണൂർ: ഇന്ത്യൻ നാഷണൽ അങ്കണവാടി എംപ്ലോയീസ് കോൺഗ്രസ് (ഐഎൻടിയുസി) പ്രവർത്ത കർ സൂചനാ പണിമുടക്ക് നടത്തി കളക്ടറേറ്റ് പടിക്കൽ ധർണ നടത്തി. ഡിസിസി പ്രസിഡന്‍റ് മാർട്ടിൻ ജോർജ് ഉദ്ഘാടനം ചെയ്തു. 2025 മാർച്ചിൽ നടത്തിയ സമരത്തിനൊടുവിൽ ധനകാര്യ മന്ത്രി നല്കിയ ഉറപ്പ് പാലിക്കണമെന്നും, ഫെഡറേഷൻ നല്കിയ നിവേദനത്തിൽ പറയുന്ന ആവശ്യങ്ങൾ ഉടനടി അനുവദിക്കണമെന്നും മാർട്ടിൻ ജോർജ് പറഞ്ഞു. ജില്ലാ പ്രസിഡന്‍റ് കെ.സി. സ്മിത അധ്യഷത വഹിച്ചു. രേഖ ജേക്കബ്, കെ.വി. ശ്യാമള, ശ്രീജ മഠത്തിൽ, രാഹുൽ കായക്കൂൽ, കൂക്കിരി രാജേഷ്, ഇനാഫ്, വിമല എന്നിവർ പ്രസംഗിച്ചു.

വെമ്പുഴ പുഴ കരകവിഞ്ഞൊഴുകി കൃഷിയിടങ്ങൾ നശിക്കുന്നു

ഇരിട്ടി: എടൂർ,ആറളം, അയ്യൻകുന്ന് പഞ്ചായത്തുകളുടെ അതിർത്തിയായ വെമ്പുഴപുഴയിൽ നിർമിച്ച തടയണയുടെ പാർശ്വഭിത്തി ഇരുവശത്തും തകർന്നിട്ടു വർഷങ്ങളായി. തടയണക്കായി നിർമിച്ച പാർശ്വഭിത്തി തകർന്നതോടെ കരകവിഞ്ഞ് ഒഴുകുന്ന പുഴ കൃഷിയിടങ്ങളിലൂടെ ഒഴുകി കൃഷികൾ നശിച്ചു തുടങ്ങി. മഴവെള്ളം കുത്തിയൊഴുകിയുണ്ടായ കരയിടിച്ചിലിൽ രണ്ട് വീടുകൾ ഭീഷണി നേരിടുകയാണ്. അയ്യൻകുന്ന് പഞ്ചായത്തിലെ ഇടവലത്ത് ഉണ്ണിയുടെ വീടും കിണറും, ഇടവലത്ത് കൃ ഷ്ണന്‍റെ വീടുമാണ് അപകട ഭീഷണി നേരിടുന്നത്. ആറളം പഞ്ചായത്തിലെ തോണക്കര ടി.പി. ജോർജിന്‍റെ മകൾ സീന മാത്യുവിന്‍റെ പേരിലുള്ള 45 സെന്‍റ്, മകൻ അനീഷിന്‍റെ 40 സെന്‍റ് , മണപ്പാൻതോട് ജോർജിന്‍റെ 65 സെന്‍റ് എന്നിവ ചെളിയും പ്രളയാവശിഷ്ടങ്ങളും നിറഞ്ഞു ഉപയോഗശൂന്യമായി. പുഴ ഗതിമാറി കൃഷിയിടത്തിലൂടെയാണ് ഒഴുകുന്നത്. തോണക്കര ജോർജിന്‍റെ 110 റബർ മരങ്ങൾ ടാപ്പ് ചെയ്യാൻ പറ്റുന്നില്ല. മലവെള്ളപ്പാച്ചിലിൽ മിക്ക മരങ്ങളുടെയും ചുവടിൽ നിന്ന് മണ്ണെടുത്തുപോയി വേരുകൾ പുറത്തായ നിലയിലാണ്. ആറു വർഷം മുന്പ് മൈനർ ഇറിഗേഷൻ വിഭാഗത്തിന്‍റെ പദ്ധതി പ്രകാരം 25 ലക്ഷം ചെലവിലാണ് ഇരിട്ടി ബ്ലോക്ക് പഞ്ചായത്ത് മുഖേന തടയണ നിർമിച്ചത്. ഇപ്പോൾ തടയണ പദ്ധതിക്ക് നാഥനില്ലാത്ത അവസ്‌ഥയാണ്. പരാതി ആരോടു പറയണമെന്ന് പ്രതിസന്ധി നേരിടുന്ന കർഷകർക്കും അറിയില്ല. നിർമാണം പൂർത്തിയാക്കി രണ്ട് തവണ ജലസേചനത്തിനായി പദ്ധതി ഉപയോഗപ്പെടുത്തിയെങ്കിലും പിന്നീട് ബന്ധപ്പെട്ടവർ യാതൊരു അറ്റകുറ്റപ്പണിയും നടത്തിയില്ല. പ്രദേശത്തെ കർഷകർക്ക് ജലസേചന സൗകര്യം ഒരുക്കുകയായിരുന്നു തടയണയുടെ ലക്ഷ്യം. രണ്ട് വർഷം കഴിയും മുൻപേ ഇരുകരകളിലും കരിങ്കൽകൊണ്ടു കെട്ടിയ പാർശ്വ ഭിത്തി ഇടിഞ്ഞു. പിന്നീട് കൃഷിഭൂമിയിലൂടെയായി പുഴയുടെ ഒഴുക്ക്. തടയണയുടെ മരപ്പലകകൾ മൂന്ന് വർഷം മുന്പത്തെ കാലവർഷത്തിൽ ഒഴുകിപ്പോയതോടെ വേനൽക്കാലത്ത് വെള്ളം തടഞ്ഞുനിർത്താൻ കഴിയാതെയായി. തടയണയുടെ ഷട്ടറിന്‍റെ തൂണുകൾ തമ്മിൽ അകലം കുറവായതാണ് ഇപ്പോൾ സമീപത്തെ കർഷകർ നേരിടുന്ന പ്രശ്നം. മഴക്കാലത്ത് മലവെള്ള പാച്ചിലിൽ മരങ്ങളും ചപ്പുചവറുകളും വന്നടിഞ്ഞു ഒഴുക്ക് തടസപ്പെടുന്നതോടെ പുഴ പൂർണമായും കൃഷി ഇടത്തിലൂടെയാണ് ഒഴുകുന്നത്. കല്ലും മണ്ണും അടിഞ്ഞു തടയണയുടെ മുകൾ വശത്തെ പുഴയുടെ ആഴം കുറഞ്ഞതിനാൽ ചെറിയ മഴയ്ക്ക് പോലും കൃഷിയിടങ്ങളിലേക്കു കരകവിഞ്ഞ് വെള്ളം പരന്ന് തടാകതുല്യമായ സാഹചര്യമാണുള്ളത്. മന്ത്രിയുടെ നിർദേശവും പ്രാവർത്തികമായില്ല വെമ്പുഴയിൽ തടയണയുടെ പാർശ്വഭിത്തി തകർന്നതു കെട്ടി സംരക്ഷിക്കാൻ തൊഴിലുറപ്പ് പദ്ധതിയിൽ പുതിയ പദ്ധതി തയാറാക്കി നടപ്പിലാക്കാൻ മന്ത്രി ഒ.ആർ. കേളു കഴിഞ്ഞ വർഷം ഡിസംബർ 16 ന് ഇരിട്ടിയിൽ നടത്തിയ താലൂക്ക്‌തല പരാതി പരിഹാര അദാലത്തിൽ ആറളം പഞ്ചായത്ത് സെക്രട്ടറിയെ ചുമതലപ്പെടുത്തിയിരുന്നു. എടൂരിലെ തോണക്കര ടി.പി. ജോർജ് നൽകിയ അപേക്ഷയിലായിരുന്നു മന്ത്രിയുടെ നടപടി. വെമ്പുഴയുടെ അരിക് കെട്ടി സംരക്ഷിക്കുന്നതിന് ലക്ഷക്കണക്കിന് രൂപ ആവശ്യമാണെന്നും അതിർത്തി പൂർണമായും കെട്ടി സംരക്ഷിക്കാതെ ചെറിയൊരു ഭാഗം മാത്രമായി സംരക്ഷണ ഭിത്തി കെട്ടുന്നത് ഭാവിയിൽ കൂടുതൽ മണ്ണിടിച്ചിലിനു കാരണമാകുമെന്നും പഞ്ചായത്ത് സെക്രട്ടറി അറിയിച്ചതോടെയാണ് പുതിയ പദ്ധതി തയാറാക്കണമെന്ന് മന്ത്രി ആവശ്യപ്പെട്ടത്. എന്നാൽ ഇനിയും നടപടി ഉണ്ടായിട്ടില്ല.

അധ്യാപകർക്കും വിദ്യാർഥികൾക്കും മഞ്ഞപ്പിത്തം; പ്രതിരോധ നടപടിയുമായി ആരോഗ്യ വകുപ്പ്

ഇരിട്ടി: ഇരിട്ടി ഹയർസെക്കൻഡറി സ്‌കൂളിലെ മൂന്ന് അധ്യാപകർക്കും 10 വിദ്യാർഥികൾക്കും മഞ്ഞപ്പിത്തം പിടിപെട്ടതോടെ പ്രതിരോധ നടപടികൾ ശക്തമായി ആരോഗ്യ വകുപ്പ്. സ്‌കൂൾ കിണറ്റിലെ വെള്ളം ഉപയോഗിക്കുന്നതിന് നിരോധനം ഏർപ്പെടുത്തി. സ്‌കൂൾ മാനേജ്‌മെന്‍റും പ്രതിരോധ നടപടികൾ ആരംഭിച്ചു. സ്‌കൂൾ ഉച്ചഭക്ഷണത്തിനും മറ്റുമായുള്ള വെള്ളം പുറമെനിന്ന് എത്തിച്ചു തുടങ്ങി. സ്‌കൂളിലെ ടാങ്ക് വൃത്തിയാക്കുകയും സ്‌കൂൾ പരിസരങ്ങളിലും ജലസ്രോതസുകളിലും ക്ലോറിനേഷൻ നടത്തി. ഇരിട്ടി താലൂക്ക് ആശുപത്രി ആരോഗ്യ വിഭാഗത്തിന്‍റെ നേതൃത്വത്തിൽ കിണറ്റിലെ വെള്ളം പരിശോധിച്ചി രുന്നു. കിണറ്റിലെ വെള്ളം മുഴുവൻ പമ്പ് ചെയ്ത് മാറ്റാനും പുതുതായി വരുന്ന വെള്ളം പരിശോധന നടത്തിയതിന് ശേഷം ഉപയോഗിക്കാനുമാണ് നിർദേശം. സ്‌കൂൾ നടത്തിപ്പിൽ മാനേജ്‌മെന്‍റിൽ തന്നെ തകർക്കങ്ങളും കോടതി നടപടികളും വർഷങ്ങളായി നടക്കുന്നതിനാൽ ഇത്തരം കാര്യത്തിൽ വേണ്ടത്ര ശ്രദ്ധ ഉണ്ടാകുന്നില്ലെന്നാണ് രക്ഷിതാക്കളുടെ ആരോപണം.

പള്ളൂരിൽ ഓടിക്കൊണ്ടിരുന്ന സ്കൂട്ടറിന് തീപിടിച്ചു

മാഹി: മുഴപ്പിലങ്ങാട്-മാഹി ബൈപ്പാസ് പാതയിലെ പള്ളൂർ സബ്സ്റ്റേഷനു സമീപത്തെ സർവീസ് റോഡിൽ ഓടിക്കൊണ്ടിരുന്ന സ്കൂട്ടറിന് തീപിടിച്ചു. പുക കണ്ടയുടനെ സ്കൂട്ടറിൽ നിന്നിറങ്ങിയതിനാൽ ഓടിച്ചയാൾ രക്ഷപ്പെട്ടു. ഇന്നലെ വൈകുന്നേരം നാലോടെയായിരുന്നു സംഭവം. കുഞ്ഞിപ്പള്ളി സ്വദേശി മുഹമ്മദ് ഷബീലാണ് വണ്ടിയോടിച്ചിരുന്നത്. മാഹി അഗ്നിരക്ഷാസേന സ്ഥലത്തെത്തി തീയണക്കുകയായിരുന്നു.

സിബിഎസ്ഇ വോളിബോൾ: എടത്തൊട്ടി നവജ്യോതിക്ക് വീണ്ടും ഓവറോൾ കിരീടം

എടത്തൊട്ടി: സിബിഎസ്ഇ സ്റ്റേറ്റ് (ക്ലസ്റ്റർ 10) വോളിബോൾ ടൂർണമെന്‍റിൽ എടത്തൊട്ടി നവജ്യോതി സീനിയർ സെക്കൻഡറി സ്കൂൾ വീണ്ടും ഓവറോൾ ചാന്പ്യൻമാരായി. തൃശൂർ തൃപ്രയാർ ടിഎസ്ജിഎ ഇൻഡോർ സ്റ്റേഡിയത്തിൽ കേരളമാകെയുള്ള സിബിഎസ്ഇ സ്കൂളുകൾ മാറ്റുരച്ച ടൂർണമെന്‍റിൽ നവജ്യോതിയിലെ വിദ്യാർഥികൾ മികച്ച പ്രകടനമാണു കാഴ്ചവച്ചത്. അണ്ടർ 14 ആൺകുട്ടികളുടെ വിഭാഗത്തിൽ ചാന്പ്യൻമാരും അണ്ടർ 17 ആൺകുട്ടികളുടെയും അണ്ടർ 14 പെൺകുട്ടികളുടെയും വിഭാഗങ്ങളിൽ റണ്ണറപ്പുമായാണ് നവജ്യോതി ഓവറോൾ കിരീടം സ്വന്തമാക്കിയത്. കായികാധ്യാപകരായ കൊച്ചുറാണി, രാജേഷ് എന്നിവരാണ് ടീമിനെ പരിശീലിപ്പിച്ചത്. തുടർച്ചയായി 14 വർഷം കണ്ണൂർ സഹോദയയുടെ വോളിബോൾ ടൂർണമെന്‍റിൽ വിജയകിരീടം ചൂടിയ ചരിത്രവും നവജ്യോതിക്കുണ്ട്.

പതിനേഴുകാരി പ്രസവിച്ചു; അടുത്തബന്ധു അറസ്റ്റില്‍

കാസര്‍ഗോഡ്: പീഡനത്തിനിരയായ പതിനേഴുകാരി പ്രസവിച്ചു. അതീവരഹസ്യമായി കുഞ്ഞിനെ അനാഥ മന്ദിരത്തില്‍ കൈമാറാനുള്ള ശ്രമത്തിനിടയില്‍ സംഭവം പുറത്തായി. സംഭവത്തില്‍ പെണ്‍കുട്ടിയുടെ അമ്മയുടെ അടുത്ത ബന്ധുവായ 39കാരനെ ബദിയഡുക്ക പോലീസ് പോക്‌സോ നിയമപ്രകാരം അറസ്റ്റ് ചെയ്തു. ഇയാള്‍ക്ക് ഭാര്യയും മൂന്നു മക്കളുമുണ്ട്. പ്ലസ്ടു പഠനം കഴിഞ്ഞശേഷം വീട്ടില്‍ തന്നെയായിരുന്നു പെണ്‍കുട്ടി. ഇതിനിടയിലാണ് അയല്‍വക്കത്ത് താമസിച്ചിരുന്ന യുവാവില്‍ നിന്നു പീഡനം ഉണ്ടായത്. കടുത്ത വയറുവേദനയെ തുടര്‍ന്ന് പെണ്‍കുട്ടി സ്വകാര്യആശുപത്രിയില്‍ ചികിത്സ തേടിയിരുന്നു. സ്‌കാനിംഗ് നടത്തണമെന്നായിരുന്നു പരിശോധന നടത്തിയ ഡോക്ടര്‍ അറിയിച്ചത്. എന്നാല്‍ കുടുങ്ങുമെന്ന് ഉറപ്പായതോടെ അവിടെ നിന്നിറങ്ങി മറ്റൊരാശുപത്രിയില്‍ ചികിത്സ തേടി. അവിടെവച്ച് നടത്തിയ പരിശോധനയില്‍ പെണ്‍കുട്ടി ഗര്‍ഭിണിയാണെന്ന സൂചന ലഭിച്ചു. പെണ്‍കുട്ടിക്ക് 19 വയസായെന്നും വിവാഹിതയാണെന്നുമാണ് ആശുപത്രിയില്‍ പറഞ്ഞിരുന്നത്. എന്നാല്‍, അതിനുശേഷം പ്രസ്തുത ആശുപത്രിയില്‍ തുടര്‍ചികിത്സയ്ക്ക് പോകാതെ അമ്മയുടെ അടുത്ത ബന്ധുവിന്‍റെ സഹായത്തോടെ കാഞ്ഞങ്ങാട്ടെ സ്വകാര്യ ആശുപത്രിയില്‍ ചികിത്സ തേടി. പെണ്‍കുട്ടി ഗര്‍ഭിണിയാണെന്ന കാര്യം പുറത്തറിയാതിരിക്കുവാന്‍ ബേക്കല്‍ പോലീസ് സ്റ്റേഷന്‍ പരിധിയിലെ ഒരു ക്വാര്‍ട്ടേഴ്‌സിലേക്ക് താമസം മാറ്റി. ജൂലൈയിൽ പെണ്‍കുട്ടി ആണ്‍കുഞ്ഞിന് കാഞ്ഞങ്ങാട്ടെ സ്വകാര്യ ആശുപത്രിയില്‍ ജന്മം നല്‍കി. പ്രായപൂര്‍ത്തിയാണെന്ന് അറിയിച്ചതിനാല്‍ ആശുപത്രി അധികൃതരും വിവരം പുറത്തുവിട്ടില്ല. ആശുപത്രിയില്‍നിന്നു വീട്ടിലെത്തിയപ്പോൾ കുഞ്ഞിനെ ഉപേക്ഷിക്കാനായിരുന്നു ആദ്യം തീരുമാനിച്ചത്. എന്നാല്‍ അതു പ്രശ്നമാകുമോ എന്ന ഭയത്താല്‍ കുഞ്ഞിനെ ഏതെങ്കിലും അനാഥമന്ദിരത്തിലേല്‍പ്പിക്കാന്‍ തീരുമാനിക്കുകയായിരുന്നു. ഇതുപ്രകാരമാണ് പെണ്‍കുട്ടിയുടെ വീട്ടുകാര്‍ കുഞ്ഞുമായി തലശേരിയിലെ അനാഥമന്ദിരത്തിലെത്തിയത്. സംഭവത്തില്‍ സംശയം തോന്നിയ ഓര്‍ഫനേജ് അധികൃതര്‍ ചൈല്‍ഡ് വെല്‍ഫെയര്‍ കമ്മിറ്റിക്കു വിവരം കൈമാറി. അവര്‍ക്കും കുഞ്ഞിനെ അനാഥമന്ദിരത്തിനു കൈമാറാന്‍ എത്തിയ സംഭവത്തില്‍ ദുരൂഹത തോന്നി. തുടര്‍ന്ന് സിഡബ്ല്യുസി തലശേരി പോലീസിനെ വിവരമറിയിച്ചു. പ്രാഥമിക വിവരങ്ങള്‍ ശേഖരിച്ച ശേഷം തലശേരി പോലീസ് ബദിയഡുക്ക പോലീസിനെ അറിയിച്ചു. തുടർന്നാണ് പെണ്‍കുട്ടിയില്‍നിന്ന് മൊഴിയെടുത്ത ശേഷം യുവാവിനെ അറസ്റ്റ് ചെയ്തത്.

നോർത്ത് മലബാർ ട്രാവൽ ബസാർ നവംബറിൽ കണ്ണൂർ ഇന്‍റർനാഷണൽ എയർപോർട്ടിൽ

കണ്ണൂർ: നോർത്ത് മലബാർ ചേംബർ ഓഫ് കൊമേഴ്സിന്‍റെയും ടൂറിസം സംരംഭകരുടെയും സംയുക്ത സംരംഭമായ നോർത്ത് മലബാർ ടൂറിസം ഓർഗനൈസേഷന്‍റെയും(നോംറ്റോ) കണ്ണൂർ ഇന്‍റർനാഷണൽ എയർപോർട്ടിന്‍റെയും മെട്രോ മാർട്ടിന്‍റെയും സംയുക്താഭിമുഖ്യത്തിൽ മൂന്നാമത് നോർത്ത് മലബാർ ട്രാവൽ ബസാർ നവംബർ 15, 16 തിയതികളിൽ കണ്ണൂർ എയർപോർട്ടിൽ നടക്കും. ഇന്ത്യയുടെ വിവിധ സംസ്ഥാനങ്ങളിൾ നിന്നുള്ള അഞ്ഞൂറോളം ടൂർ ഓപ്പറേറ്റർമാരും ഉത്തരമലബാറിലെ ടൂറിസം സംരംഭകരും പങ്കെടുക്കും. ആകർഷകമായ നോർത്ത് മലബാർ ടൂറിസം സർക്യൂട്ടുകൾ മേളയിൽ ആവിഷ്കരിക്കും. സ്പിരിച്വൽ ടൂറിസം, ക്രൂയിസ് ടൂറിസം, ഹെൽത്ത് ടൂറിസം, മൈസ് ആന്‍റ് വെഡിംഗ് ടൂറിസം, വെൽനസ് ടൂറിസം തുടങ്ങിയ വിഷയങ്ങളെ ആസ്പദമാക്കി സെമിനാറുകൾ നടക്കും. വിനോദസഞ്ചാര മേഖലയിൽ നിന്നുള്ള നൂറോളം സ്ഥാപങ്ങൾ ഉത്പന്നങ്ങളും സേവനങ്ങളും ടൂർ ഓപ്പറേറ്റർമാരുടെ മുന്നിൽ അവതരിപ്പിക്കും. നോർത്ത് മലബാറിന്‍റെ രുചി വൈവിധ്യം.സാംസ്കാരിക തനിമ, നാടൻ കലാരൂപങ്ങൾ തുടങ്ങിയവയും ടൂർ ഓപ്പറേറ്റർമാരെ പരിചയപ്പെടുത്തും. ഉത്തരമലബാറിലേക്കുള്ള എയർലൈൻ കണക്ട്‌വിറ്റി പരമാവധി വർധിപ്പിക്കാനുള്ള ശ്രമത്തിലാണ് കണ്ണൂർ ഇന്‍റർനാഷണൽ എയർപോർട്ട് മാനേജിംഗ് ഡയറക്ടർ സി. ദിനേശ് കുമാർ പറഞ്ഞു. വിനോദ സഞ്ചാരികൾക്ക് വേണ്ട പരമാവധി സൗകര്യങ്ങൾ കണ്ണൂർ എയർപോർട്ട് ഉറപ്പ് വരുത്തുന്നുണ്ടെന്നും ടൂറിസം കേന്ദ്രങ്ങളുടെ പ്രചാരണ പ്രവർത്തനങ്ങളെല്ലാം എയർപോർട്ടിന്‍റെ പിന്തുണയുണ്ടാകുമെന്നും അദ്ദേഹം പറഞ്ഞു. പ്രമുഖ ഹോട്ടലുകൾ, റിസോർട്ടുകൾ, ഹോം സ്റ്റേകൾ, ഹൗസ് ബോട്ടുകൾ, ആയുർവേദ പഞ്ചകർമ സ്ഥാപനങ്ങൾ, ട്രാവൽ ഏജൻസികൾ, ടൂർ പ്ലാനർമാർ, മൈസ് പ്ലാനേഴ്സ്, ഹോസ്പിറ്റലുകൾ, ഡസ്റ്റിനേഷൻ മാനേജ്മെന്‍റ് ഏജൻസികൾ, ഫാം ടൂറിസം പ്രൊമോട്ടേഴ്സ് എന്നിവരുടെ സ്റ്റാളുകൾ ഉണ്ടാകും. പങ്കെടുക്കാൻ താത്പര്യമുള്ളവർ www.nmtb.in എന്ന വെബ്സൈറ്റിൽ രജിസ്റ്റർ ചെയ്യണം. ഫോൺ: 9947733339, 9995139933. പത്രസമ്മേളനത്തിൽ നോര്‍ത്ത് മലബാര്‍ ടൂറിസം ഓര്‍ഗനൈസേഷന്‍ രക്ഷാധികാരി പത്മശ്രീ എസ്.ആര്‍.ഡി.പ്രസാദ്, പ്രസിഡന്‍റ് ടി.കെ.രമേഷ് കുമാര്‍, മെട്രോ മാര്‍ട്ട് സിഇഒ സിജി നായര്‍, ചേംബർ സെക്രട്ടറി സി.അനില്‍കുമാര്‍, വൈസ് പ്രസിഡന്‍റ് സച്ചിന്‍ സൂര്യകാന്ത്, ട്രഷറർ കെ.,നാരായണന്‍ കുട്ടി, ടി.വി.മധുകുമാര്‍, കെ.കെ.പ്രദീപ് എന്നവരും പങ്കെടുത്തു.

എൽഐസിഎഒഐ ഏഴാം ഡിവിഷൻ സമ്മേളനം എട്ടിന് കണ്ണൂരിൽ

കണ്ണൂർ: എൽഐസി ഏജന്‍റ്സ് ഓർഗനൈസേഷൻ ഓഫ് ഇന്ത്യ (എൽഐസിഎഒഐ) യുടെ ഏഴാം ഡിവിഷൻ സമ്മേളനം എട്ടിന് കണ്ണൂരിൽ നടക്കും. തളാപ്പിലെ സുശീലാ ഗോപാലൻ സ്മാരക മന്ദിരം ഹാളിൽ രാവിലെ ഒന്പതിന് അഖിലേന്ത്യാ ജനറൽ സെക്രട്ടറി ഡോ. പി.ജി. ദിലീപ് ഉദ്ഘാടനം ചെയ്യുമെന്ന് കോഴിക്കോട് ഡിവിഷൻ ഭാരവാഹികളായ ഇ. സുർജിത്കുമാറും ഇ. ജയപ്രകാശും പത്രസമ്മേളനത്തിൽ അറിയിച്ചു. സോണൽ സെക്രട്ടറി പി.എൻ. സുധാകരൻ, സംസ്ഥാന ജനറൽ സെക്രട്ടറി എം.കെ. മോഹനൻ, കെ. അശോകൻ എന്നിവർ പങ്കെടുക്കും. അഞ്ച് ജില്ലകളിൽ നിന്നായി 25 ബ്രാഞ്ചുകളിൽ നിന്നുള്ള 230 പ്രതിനിധികൾ സമ്മേളനത്തിൽ പങ്കെടുക്കും. 24 സ്വകാര്യ കമ്പനികളോട് മത്സരിച്ച് എൽഐസി മുന്നേറുകയാണ്. എന്നാൽ സ്വകാര്യ കമ്പനിക ളുടെയും മൂലധന ശക്തികളുടെയും താത്പര്യത്തിനു വേണ്ടി എൽഐസിയെ സ്വകാര്യവത്കരിക്കുന്നതിനും ഓഹരി വില്ക്കുന്നതിനുമുള്ള നടപടികളു മായി കേന്ദ്ര സർക്കാർ മുന്നോട്ടുപോകുകയാണ്. ആകർഷകമായ പോളിസികൾ പിൻവലിച്ചു കൊണ്ടും ബോണസ് വെട്ടിക്കുറച്ചും ഏജന്‍റുമാരുടെ കമ്മീഷൻ കുറച്ചും ഏജന്‍റ്സ് ദ്രോഹ നടപടികളും തുടരുകയാണെന്നും നേതാക്കൾ പറഞ്ഞു. പത്രസമ്മേളനത്തിൽ എം. ലേഖധൻ, കെ. അനിൽകുമാർ, വി.പി. സജീവൻ എന്നിവരും പങ്കെടുത്തു.

പുതുക്കിയ ഉച്ചഭക്ഷണ മെനു പലയിടത്തുമായില്ല

കണ്ണൂർ: ഈ മാസം ഒന്നു മുതൽ സ്കൂളുകളിലെ ഉച്ചഭക്ഷണം പുതുക്കിയ മെനു അനുസരിച്ച് നടത്തണമെന്ന സർക്കാർ ഉത്തരവ് പലയിടത്തും നടപ്പായില്ല. മെനു പുതുക്കി നിശ്ചയിച്ചെങ്കിലും ഫണ്ട് വർധിപ്പിക്കാത്തതാണ് മെനു പ്രാബല്യത്തിൽ വരുത്താൻ തടസം. മെനു പുതുക്കിയിട്ടും അഞ്ചാം ക്ലാസ് വരെയുള്ള കുട്ടികൾക്ക് ഒരു ദിവസം നേരത്തെ നിശ്ചയിച്ച പ്രകാരമുള്ള 6.78 രൂപയും ആറു മുതൽ എട്ടുവരെയുള്ള കുട്ടികൾക്ക് 10.17 രൂപയും തന്നെയാണ് അനുവദിച്ചിരിക്കുന്നത്. പാചക വാതകം, പച്ചക്കറി, സാധനങ്ങൾ കൊണ്ടുവരുന്നതിന്‍റെ ചെലവ് എന്നിവയെല്ലാം വഹിക്കേണ്ടത് ഇതിൽ നിന്നാണ്. സാധാരണ ഭക്ഷണത്തിന് തന്നെ തുക തികയുന്നില്ലെന്ന പരാതി നിലനിൽക്കെയാണ് പുതുക്കിയ മെനു നടപ്പാക്കിയത്. ജനകീയ പങ്കാളിത്തത്തോടെ പുതുക്കിയ മെനു നടപ്പാക്കാനായിരുന്നു സർക്കാർ നിർദേശം. എന്നാൽ ഇത് ജില്ലയിൽ പലയിടത്തും പ്രയോഗികമാകുന്നില്ല. പുതുക്കിയ മെനുവിൽ ചോറ്, സാന്പാറ്, തോരൻ, ഇലക്കറികൾ, ഫ്രൈഡ് റൈസ് എന്നിവയുൾപ്പെടെ വ്യത്യസ്ത ദിവസങ്ങളിലായി 20 ഇനങ്ങളും ആറ് സ്പെഷൽ വിഭവങ്ങളും വിവിധയിനം ചമന്തികളുമാണ് ശിപാർശ ചെയ്യുന്നത്. ഫണ്ടിന്‍റെ അപര്യാപ്ത കാരണം പുതുക്കിയ മെനു എന്നത് പലയിടത്തും ഫണ്ടിൽ ഒതുങ്ങുന്ന മെനുവായാണ് ക്രമീകരിച്ചിരിക്കുന്നത്. പുതുക്കിയ മെനു പ്രകാരമുള്ള വിഭവങ്ങൾ തയാറാക്കാൻ പല പാചകതൊഴിലാളികൾക്കും അറിയില്ലെന്ന അവസ്ഥയുമുണ്ട്. അറിയാവുന്നവർ ഉണ്ടെങ്കിൽ തന്നെ തയാറാക്കലും ബുദ്ധിമുട്ടാണ്. സർക്കാർ നിർദേശിക്കുന്ന വിഭവങ്ങൾ ഒരുക്കാൻ കൂടുതൽ പാചകതൊഴിലാളികളും വേണ്ടതുണ്ട്. 150 ൽ അധികം കുട്ടികളുള്ള സ്കൂളിൽ രണ്ട് പാചകതൊഴിലാളികൾ വേണമെന്ന ആവശ്യത്തിന് വർഷങ്ങളുടെ പഴക്കമുണ്ടെങ്കിലു നടപ്പായിട്ടില്ല. 500നു മേൽ കുട്ടികളുള്ള സ്കൂളുകളിൽ മാത്രമാണ് രണ്ടു പാചകത്തൊഴിലാളികളെ നിയോഗിക്കാൻ സർക്കാർ അനുവദിച്ചത്. 250 ൽ അധികം കുട്ടികളുള്ള സ്കൂളുകളിലെ പാചക ത്തൊഴിലാളികളിൽ പലരും തങ്ങളുടെ കൈയിൽ നിന്ന് പണമെടുത്ത് ഒരു സഹായിയെ കൂടി നിയോഗിച്ചാണ് ജോലികൾ പൂർത്തിയാക്കുന്നത്. കഴിഞ്ഞ നാലു വർഷമായി ഇവരുടെ വേതനം വർധിപ്പിച്ചിട്ടുമില്ല. നാലു വർഷം മുന്പുള്ള 600 രൂപയാണ് ഇപ്പോഴും പ്രതിദിന വേതനം. പെൻഷൻ, മറ്റ് ആനുകൂല്യങ്ങൾ എന്നിവയൊന്നും തൊഴിലാളികൾക്കില്ല കുറഞ്ഞ വേതനമായിട്ടും കുട്ടികളുടെ കാര്യം എന്നതിനാലാണ് തങ്ങൾ ഈമേഖലയിൽ തുടരുന്നതെന്നാണ് പാചക തൊഴിലാളികൾ പറയുന്നത്. ഫണ്ട് പുതുക്കിയുള്ള ഉത്തരവും വേണം: കെപിപിഎച്ച്എ കുട്ടികൾക്ക് പോഷക സമൃദ്ധമായ ഉച്ചഭക്ഷണം നൽകണമെന്ന് തന്നെയാണ് എല്ലാവരുടെയും ആഗ്രഹം. ഇതിനായി പരിശ്രമിക്കുന്നുമുണ്ട്. നിലവിലെ തുക കൊണ്ട് പുതുക്കിയ മെനു നടപ്പിലാക്കൽ അപ്രായോഗികമാണ്. പുതുക്കിയ മെനു നടപ്പാക്കണമെന്ന് നിർബന്ധബുദ്ധി പോലെ കമ്പോള വിലയനുസരിച്ച് ഫണ്ടും വർധിപ്പിക്കണം. പാചകതൊഴിലാളികൾക്ക് വേതനം വർധിപ്പിക്കുകയും വിഭവങ്ങൾ തയാറാക്കാനുള്ള പരിശീലന നടപടികളും സ്വീകരിക്കണം. ഇതെല്ലാം സാധ്യമായാലേ സർക്കാർ ഉത്തരവ് പ്രകാരമുള്ള പുതിയ മെനു അതിന്‍റെ ലക്ഷ്യത്തിലെത്തുകയുള്ളൂവെന്ന് കേരള പ്രൈവറ്റ് പ്രൈമറി ഹെഡ്മാസ്റ്റേഴ്സ് അസോസിയേഷൻ (കെപിപിഎച്ച്എ) സംസ്ഥാന പ്രസിഡന്‍റ് പി.കൃഷ്ണപ്രസാദ്, ജനറൽ സെക്രട്ടറി ജി.സുനിൽകുമാർ പ്രസ്താവനയിൽ പറഞ്ഞു.

പങ്കെടുത്തത് നാട്ടുകാരിയെന്ന നിലയിൽ: കെ.കെ. ശൈലജ

കണ്ണൂര്‍: സി.സദാനന്ദന്‍ വധശ്രമക്കേസിലെ പ്രതികള്‍ക്ക് നല്കിയ യാത്രയയപ്പിൽ പങ്കെടുത്തത് നാട്ടുകാരിയെന്ന നിലയിലാണെന്നും ശിക്ഷിക്കപ്പെട്ടവര്‍ പാര്‍ട്ടി പ്രവര്‍ത്തകരായതിനാലാണ് അവരെ കാണാന്‍ പോയതെന്നും കെ.കെ. ശൈലജ എംഎല്‍എ. താന്‍ കമ്യൂണിസ്റ്റ് പാര്‍ട്ടി പ്രവര്‍ത്തകയാണ്. അവരും പാര്‍ട്ടി പ്രവര്‍ത്തകരാണ്. തന്‍റെ അറിവില്‍ അവര്‍ നാട്ടിലെ നന്മയ്ക്കുവേണ്ടി പ്രവര്‍ത്തിക്കുന്നവരാണ്. മാന്യമായി ജീവിതം നയിക്കുന്നവരാണവര്‍. താന്‍ പങ്കെടുത്തത് ഒരു കുറ്റകൃത്യത്തെ ന്യായീകരിക്കാനല്ലെന്നും കോടതിയുടെ വിധിയെ മാനിക്കുന്നതായും കെ.കെ. ശൈലജ പറഞ്ഞു. പ്രതികളെ പാര്‍ട്ടിയില്‍ നിന്ന് പുറത്താക്കിയിട്ടില്ല. പ്രതികളുടെ കുടുംബാംഗങ്ങള്‍ ഏറെ ദുഃഖത്തിലാണ്. അവര്‍ തെറ്റുകാരല്ലെന്ന് അവരുടെ കുടുംബം വിശ്വസിക്കുന്നു. അവര്‍ക്കൊപ്പം പാര്‍ട്ടി പ്രവര്‍ത്തക എന്ന നിലയില്‍ പങ്കുചേരുകയാണ്. എങ്കിലും കോടതി വിധിയെ തങ്ങള്‍ മാനിക്കുന്നു. മൊഴികളുടെ അടിസ്ഥാനത്തിലാണ് കോടതി വിധി വന്നത്. ഇത് യാത്രയയപ്പായി കാണാന്‍ കഴിയില്ലെന്നും തെറ്റായ യാതൊരു സന്ദേശവും ഇതില്‍ ഇല്ലെന്നും അവർ പറഞ്ഞു.

തദ്ദേശ തെരഞ്ഞെടുപ്പിൽ മുസ്‌ലിം ലീഗ് ‘മൂന്ന് ടേം’തുടരും

പി. ജയകൃഷ്ണൻ കണ്ണൂർ: തദ്ദേശ സ്വയംഭരണ തെരഞ്ഞെടുപ്പിൽ മത്സരിക്കാനുള്ള നിബന്ധനങ്ങളിൽ അയവു വരുത്താ തെ മുസ്‌ലിം ലീഗ്. മൂന്നു തവണ തദ്ദേശ സ്ഥാപനങ്ങളിൽ അംഗങ്ങളായവരെ പരിഗണിക്കേണ്ടെന്ന 2020 ലെ പാർട്ടി തീരുമാനം ഒരു സ്ഥിരം സംവിധാനമായി കൊണ്ടുവരികയാണ് ലക്ഷ്യം. മൂന്ന് ടേം വ്യവസ്ഥ കർശനമാക്കി യുവാക്കള്‍ക്ക് അവസരം നല്കണമെന്ന അഭിപ്രായം യൂത്ത് ലീഗിലും ശക്തമാണ്. പാർട്ടി സംസ്ഥാന അധ്യക്ഷൻ തന്നെ ഇത്തവണ ഇക്കാര്യം ഓർമപെടുത്തുകയും ചെയ്തിരുന്നു. തുടർച്ചയായി മത്സരിച്ചവർ മാറിനിൽക്കണമെന്ന വ്യവസ്ഥ മുസ്‌ലിം ലീഗിൽ നടപ്പാക്കാനുള്ള സാധ്യത തെളിഞ്ഞതോടെ ഇരകളാകുന്ന നേതാക്കള്‍ക്ക് ആശങ്ക ഉണ്ട്. സ്ഥാനം നിലനിർത്താനുള്ള നീക്കവും അണിയറയിൽ ശക്തമാണ്. ഒരു വീട്ടിൽനിന്ന് ഒരു സ്ഥാനാർഥി മതി, 30 ശതമാനം സീറ്റുകൾ യുവതി-യുവാക്കൾക്കും പുതുമുഖങ്ങ ൾക്കും നീക്കിവയ്ക്കണം എന്നീ നിർദേശങ്ങളും ഉയരുന്നുണ്ട്. അംഗങ്ങളായവരെ തന്നെ പ്രവർത്തനം പരിശോധിച്ചതിനുശേഷം മാത്രം തുടർഅവസരം എന്ന നിർദേശവും ഉണ്ട്. തീരുമാനം കർശനമായി നടപ്പാക്കാൻ സാധ്യത തെളിഞ്ഞതോടെ തദ്ദേശ തെരഞ്ഞെടുപ്പിൽ മുന്ന് പ്രാവശ്യം തെരഞ്ഞെടുക്കപ്പെട്ട ജനപ്രതിനിധികൾ ഇത്തവണ മാറി നില്ക്കേണ്ടി വരും. പാർട്ടിയിലെ ചിലർക്ക് ഈ തീരുമാനത്തോട് വിയോജിപ്പ് ഉണ്ടായിരുന്നെങ്കിലും പൊതുവെ ഏറെ പ്രശംസിക്കപ്പെട്ട തീരുമാനമായിരുന്നു 2020 ലേത്. മറ്റ് രാഷ്‌ട്രീയ പാർട്ടികൾക്കും മാതൃകയാക്കാവുന്ന നിർദേശമാണിതെന്ന അഭിപ്രായവും കഴിഞ്ഞ തവണ വ്യാപകമായിരുന്നു. കണ്ണൂർ കോർപറേഷനിലും ഇക്കാര്യം കർശനമാക്കും. കഴിഞ്ഞ തദ്ദേശ തെരഞ്ഞെടുപ്പിൽ മൂന്ന് ടേം നിർബന്ധമാക്കിയപ്പോൾ മത്സരിക്കാൻ അവസരം കിട്ടാത്തതിന്‍റെ പേരിൽ കണ്ണൂരിൽ നേതാക്കളെ ഓഫിസിൽ തടഞ്ഞ സംഭവമടക്കം വിവിധ പ്രതിഷേധങ്ങളും ഉയർന്നിരുന്നു. എന്നാൽ ഇത്തവണയും കർശന നിലപാടുമായി നേതൃത്വം മുന്നോട്ട് പോകുമെന്നാണ് ജില്ലയിലെ ഒരു പ്രധാന നേതാവ് ദീപികയോട് പറഞ്ഞത്. പാർട്ടി നേതൃത്വത്തിനെതിരേ പ്രതിഷേധിക്കുന്നവർക്കെതിരേ ശക്തമായ നടപടി സ്വീകരിക്കാനാണ് തീരുമാനം. പുതിയ പ്രവർത്തകർക്ക് അവസരം കൊടുക്കുക എന്നതാണ് തീരുമാനത്തിന്‍റെ ലക്ഷ്യം. തദ്ദേശ സ്വയം ഭരണ തെരഞ്ഞെടുപ്പിനായി മുസ്‌ലിം ലീഗ് ഒരുങ്ങി കഴിഞ്ഞു. സംസ്ഥാനത്തെ എല്ലാ ജില്ലകളിലും എംഎൽഎമാരടക്കം മൂന്ന് സംസ്ഥാന നേതാക്കൾക്ക് ചുമതല കൊടുത്തു. ജില്ലാതല യോഗങ്ങളും നടന്നു കഴിഞ്ഞു. ജില്ലകളിലെ കോർപറേഷൻ, മുൻസിപ്പാലിറ്റി, പഞ്ചായത്ത് എന്നിവിടങ്ങളിൽ മുതിർന്ന നേതാക്കളെ ഉൾപെടുത്തി സ്റ്റിയറിംഗ് കമ്മിറ്റികൾ രൂപീകരിക്കുകയും നിരീക്ഷകന്മാരെ ചുമതലപ്പെടു ത്തി പ്രവർത്തനം കാര്യക്ഷമമാക്കുവാനും ലീഗ് തിരുമാനിച്ചിട്ടുണ്ട്.

പയ്യാന്പലത്ത് തോണി മറിഞ്ഞു; മത്സ്യത്തൊഴിലാളികളെ രക്ഷിച്ചു

കണ്ണൂർ: പയ്യാന്പലം പുലിമുട്ടിനോട് ചേർന്ന പാറക്കെട്ട് ഭാഗത്ത് മീൻപിടിത്ത ഫൈബർ തോണി മറിഞ്ഞു. തോണിയിലുണ്ടായിരുന്ന രണ്ടു തൊഴിലാളികളെ കോസ്റ്റൽ പോലീസ് രക്ഷപ്പെടുത്തി. നീർക്കടവ് സ്വദേശികളായ രോഷൻബാബു, രാഹുൽ രാജ് എന്നിവരെയാണ് രക്ഷപ്പെടുത്തിയത്. ഇന്നലെ രാവിലെ 6.45 ഓടെയായിരുന്നു അപകടം. പുലിമുട്ട് ഭാഗത്ത് മത്സ്യലഭ്യതയുണ്ടെന്ന് മനസിലാക്കി ഇവിടേക്ക് തുഴയുന്നതിനിടെ ശക്തമായ തിരയിൽ തോണി പാറക്കെട്ടുകളുള്ള ഭാഗത്തേക്ക് നിയന്ത്രണം വിട്ട് ഒഴുകി മറിയുകയായിരുന്നു. സമീപത്തുണ്ടായിരുന്ന മറ്റു തോണിക്കാർ ഇവരെ രക്ഷിക്കാൻ ശ്രമിച്ചച്ചെങ്കിലും ശക്തമായ തിര കാരണം പാറക്കെട്ടുകൾക്കിടയിലേക്ക് പോകാനായില്ല . കോസ്റ്റൽ പോലീസ് എസ്ഐ വേണുഗോപാൽ, എഎസ്ഐ ഷിജിൻ, സീനിയർ സിവിൽ പോലീസ് ഓഫീസർ പ്രദീപ് കുമാർ എന്നിവരടങ്ങിയ സംഘം സ്ഥലത്തെത്തി ഏഴരയോടെയാണ് അപകടത്തിൽപ്പെട്ടവരെ രക്ഷിച്ചത്. അതുവരെ ഇവർ നീന്തിയും പാറക്കെട്ടിൽ പിടിച്ചും നിൽക്കുകയായിരുന്നു. ജില്ലാ ആശുപത്രിയിൽ വൈദ്യപരിശോധനയ്ക്ക് വിധേയമാക്കിയ ഇരുവർക്കും പ്രശ്നങ്ങളൊന്നുമില്ലെന്ന് കണ്ടെത്തിയതിനെ തുടർന്ന് പ്രഥമശുശ്രൂഷ നൽകി വിട്ടയച്ചു.

വാഹനാപകടത്തിൽ പരിക്കേറ്റ വീട്ടമ്മ മരിച്ചു

കൂത്തുപറമ്പ്: വാഹനാപകടത്തിൽ പരിക്കേറ്റു ചികിത്സയിലായിരുന്ന വീട്ടമ്മ മരിച്ചു. കിഴക്കേ കതിരൂർ കള്ളുഷാപ്പിനു സമീപം നീലാഞ്ജനത്തിൽ പ്രമീളയാണ് (57) മരിച്ചത്. സംസ്കാരം ഇന്ന് ഉച്ചകഴിഞ്ഞ് വലിയവെളിച്ചം ശാന്തിവനത്തിൽ. ഇക്കഴിഞ്ഞ ശനിയാഴ്ച രാത്രി എട്ടോടെ കൂത്തുപറമ്പ്-തലശേരി റോഡിൽ ഏഴാംമൈലിലായിരുന്നു അപകടം. മകനോടൊപ്പം ബൈക്കിൽ സഞ്ചരിക്കവെ കാറിടിക്കുകയായിരുന്നു. കണ്ണൂരിലെ സ്വകാര്യ ആശുപത്രിയിൽ ചികിത്സയിൽ കഴിയവെയായിരുന്നു മരണം സംഭവിച്ചത്. പരേതനായ ബാലൻ-വിമല ദന്പതികളുടെ മകളാണ്. ഭർത്താവ്: മോഹനൻ. മക്കൾ: ഷിൻസി, ഷിമിത്ത്, ഷിഗിൽ. മരുമകൻ: രഗിൽ. സഹോദരങ്ങൾ: പ്രകാശൻ, പ്രമോദ്, പ്രവീണ, പരേതയായ പ്രസീന.

തമിഴ്നാട് സ്വദേശി മരിച്ചനിലയിൽ

ഇരിട്ടി: ഇരിട്ടി ടൗണിൽ കെട്ടിടത്തിന്‍റെ ഗോവണിപ്പടിയിൽ കൂലിത്തൊഴിലാളിയെ മരിച്ചനിലയിൽ കണ്ടെത്തി. ടൗണിൽ വർഷങ്ങളായി വിവിധതരത്തിലുള്ള കൂലിപ്പണിയെടുത്ത് ഉപജീവനം നയിക്കുന്ന ദാസന്‍റെ മൃതദേഹമാണ് ഇരിട്ടി ബസ്‌സ്റ്റാൻഡ് ബൈപ്പാസ് റോഡിലെ ലോറി സ്റ്റാൻഡിനു സമീപത്തെ കെട്ടിടത്തിന്‍റെ മുകളിലെ കോണിപ്പടിയിൽ ഇന്നലെ രാവിലെ കണ്ടെത്തിയത്. ഇയാൾ തമിഴ്നാട് മാർത്താണ്ഡം സ്വദേശിയാണെന്നു പറയപ്പെടുന്നു. ഇരിട്ടി എസ്ഐ ഷറഫുദ്ദീന്‍റെ നേതൃത്വത്തിലുള്ള പോലീസ് സംഘം സ്ഥലത്തെത്തി ഇയാളെക്കുറിച്ചുള്ള വിശദവിവരങ്ങൾ അന്വേഷിച്ചുവരികയാണ്.

ഒമ്പതാം ക്ലാസുകാരിയെ പീഡിപ്പിച്ച ഓട്ടോ ഡ്രൈവർ പിടിയിൽ

തളിപ്പറമ്പ്: ഒമ്പതാം ക്ലാസുകാരിയെ പീഡിപ്പിച്ച കേസിൽ ഓട്ടോറിക്ഷ ഡ്രൈവർ പിടിയിൽ. മാതമംഗലത്തെ ഓട്ടോ ഡ്രൈവറായ കാനായി സ്വദേശി അനീഷ് (40) ആണ് പോക്സോ കേസിൽ അറസ്റ്റിലായത്. ഇന്നലെ മാതമംഗലത്തുനിന്നാണ് ഇയാളെ പിടികൂടുന്നത്. ജൂൺ നാലിനായിരുന്നു കേസിനാസ്‌പദമായ സംഭവം. അനീഷ് പെൺകുട്ടിയുടെ അമ്മയുമായി സോഷ്യൽമീഡിയ വഴി നേരത്തെ പരിചയത്തിലായിരുന്നുവെന്ന് പറയുന്നു. ഒരു ദിവസം അനീഷും പെൺകുട്ടിയുടെ അമ്മയായ യുവതിയും മൂന്നു മക്കൾക്കൊപ്പം പറശിനിക്കടവിൽ എത്തിയതായിരുന്നു. പ്ലസ്ടു വിദ്യാർഥിനി, ഒമ്പതാം ക്ലാസ് വിദ്യാർഥിനി, ഇളയകുട്ടി എന്നിവർക്കൊപ്പം എത്തിയ യുവതി അനീഷിനൊപ്പം പറശിനിക്കടവിലെ ലോഡ്‌ജിൽ മുറിയെടുത്ത് താമസിച്ചു. പിറ്റേന്ന് പുലർച്ചെ രണ്ടോടെ ഒമ്പതാം ക്ലാസുകാരിയായ പതിനാലുകാരിയെ അനീഷ് പീഡിപ്പിക്കുകയായിരുന്നു. ഇതു മൂത്തകുട്ടി കാണുകയും അമ്മയോട് വിവരം പറയുകയും ചെയ്തു. എന്നാൽ കുട്ടിയുടെ ഭാവിയും കുടുംബത്തിന്‍റെ മാനക്കേടുമോർത്ത് അമ്മ വിവരം മൂടിവയ്ക്കുകയായിരുന്നു. ഒമ്പതാം ക്ലാസുകാരി പിന്നീട് സ്കൂളിലെ അധ്യാപികയോട് സംഭവം പറയുകയും കൗൺസിലിംഗിനു ശേഷം ചൈൽഡ്‌ലൈൻ അധികൃതരെ വിവരം അറിയിക്കുകയുമായിരുന്നു. ചൈൽഡ് ലൈൻ അധികൃതർ നല്കിയ പരാതിയിലാണ് മേൽപ്പറമ്പ് പോലീസ് കേസെടുത്തത്. എന്നാൽ സംഭവം തളിപ്പറമ്പ് പോലീസ് സ്റ്റേഷൻ പരിധിയിലായതിനാൽ കേസ് പിന്നീട് അങ്ങോട്ടേക്ക് മാറ്റുകയായിരുന്നു. ഡിവൈഎസ്പി കെ.ഇ. പ്രേമചന്ദ്രൻ, ഇൻസ്പെക്ടർ ബാബുമോൻ, എസ്ഐ ദിനേശൻ എന്നിവരുടെ നേതൃത്വത്തിലാണ് പ്രതിയെ പിടികൂടുന്നത്.

കൊടുവള്ളി മേൽപ്പാലം 12ന് മുഖ്യമന്ത്രി നാടിന് സമർപ്പിക്കും

കണ്ണൂർ: തലശേരിയെയും ധർമടത്തെയും ബന്ധിപ്പിക്കുന്ന കൊടുവള്ളിയിലെ കുരുക്കഴിച്ചുകൊണ്ട് റെയിൽവേ മേൽപ്പാലം നിർമാണം പൂർത്തിയായി. മേൽപ്പാലം 12 ന് രാവിലെ 11.30 ന് മുഖ്യമന്ത്രി പിണറായി വിജയൻ നാടിന് സമർപ്പിക്കും. നിയമസഭാ സ്പീക്കർ എ.എൻ. ഷംസീർ അധ്യക്ഷത വഹിക്കും. ധനമന്ത്രി കെ.എൻ. ബാലഗോപാൽ മുഖ്യാതിഥിയാകും. കണ്ണൂരിൽനിന്ന് തലശേരി ഭാഗത്തേക്ക് വർഷങ്ങളായുള്ള ഗതാഗതക്കുരുക്കിന് ഇതോടെ ശാശ്വത പരിഹാരമാകുകയാണ്. കിഫ്ബി സഹായത്തോടെ നിർമിക്കുന്ന സംസ്ഥാനത്തെ പത്ത് റെയിൽവേ മേൽപ്പാലങ്ങളിലൊന്നാണ് കൊടുവള്ളിയിലേത്. മേൽപ്പാലത്തിന്‍റെ നിർമാണം ആർബിഡിസികെ മുഖേനയാണ് സർക്കാർ നടപ്പിലാക്കുന്നത്. 314 മീറ്റർ നീളത്തിൽ രണ്ടുവരി പാതയും നടപ്പാതയും ഉൾപ്പെടെ 10.05 മീറ്റർ വീതിയിലാണ് മേൽപ്പാല ത്തിന്‍റെ നിർമാണം. 7.5 മീറ്ററാണ് കാര്യേജ് വേ. മേൽപ്പാലത്തിന് പുറമെ ഇതിന്‍റെ സമീപത്തുള്ള ഭൂവുടമകൾക്ക് പ്രവേശനം നല്കുന്നതിനായി ദേശീയപാതയുടെ വശത്ത് നാല് മീറ്റർ വീതിയിൽ ഡ്രെയിനേജോടുകൂടിയ 210 മീറ്റർ സർവീസ് റോഡും നിർമിച്ചിട്ടുണ്ട്. 27 ഭൂവുടമകളിൽ നിന്നായി 123.6 സെന്‍റ് സ്ഥലമാണ് മേൽപ്പാലം നിർമാണത്തിനായി ഏറ്റെടുത്തത്. പദ്ധതിയുടെ മൊത്തം ചെലവ് 36.37 കോടി രൂപയാണ്.

കാട്ടുപന്നി കുറുകെ ചാടി; ബൈക്ക് യാത്രക്കാരന് പരിക്ക്

പുത്തിഗെ(കാസര്‍ഗോഡ്): കാട്ടുപന്നി റോഡിന് കുറുകെ ചാടിയതിനെ തുടർന്ന് റോഡിൽ തെറിച്ചുവീണ് ബൈക്ക് യാത്രക്കാരന് പരിക്കേറ്റു. ബാഡൂരിലെ മല്ലേശ പൂജാരിക്കാണ് (48) പരിക്കേറ്റത്. ശനിയാഴ്ച രാത്രി വിട്‌ളയിലെ ഭാര്യയുടെ വീട്ടിലേക്ക് ബൈക്കില്‍ സഞ്ചരിക്കുന്നതിനിടെ അതിര്‍ത്തിപ്രദേശമായ കുട്ത്തമൊഗേറിലാണ് അപകടം. റോഡിലേക്ക് തെറിച്ചുവീണ മല്ലേശിന്‍റെ കാലിന് ഗുരുതരമായി പരിക്കേറ്റു. ആദ്യം വിട്‌ളയിലെ ആശുപത്രിയിലും പരിക്ക് ഗുരുതരമായതിനാല്‍ മംഗളൂരുവിലെ സ്വകാര്യാശുപത്രിയിലേക്കും മാറ്റി. കാലിന്‍റെ എല്ലിന് പൊട്ടല്‍ ഉള്ളതിനാല്‍ ശസ്ത്രക്രിയ നടത്തണമെന്ന് ഡോക്ടര്‍മാര്‍ നിര്‍ദേശിച്ചതായി ബന്ധുക്കള്‍ പറഞ്ഞു.

ഫാഷന്‍ ഗോള്‍ഡ് നിക്ഷേപ തട്ടിപ്പ്: കമറുദ്ദീനും തങ്ങള്‍ക്കും എതിരേ കേസ്

കാസര്‍ഗോഡ്: ഫാഷന്‍ ഗോള്‍ഡ് നിക്ഷേപ തട്ടിപ്പുമായി ബന്ധപ്പെട്ട് മുന്‍ എംഎല്‍എ എം.സി. കമറുദ്ദീന്‍, മാനേജിംഗ് ഡയറക്ടര്‍ ടി.കെ. പൂക്കോയ തങ്ങള്‍ എന്നിവര്‍ക്കെതിരെ കാസര്‍ഗോഡ് ടൗണ്‍ പോലീസ് കേസെടുത്തു. തളങ്കര പള്ളിക്കാല്‍ റോഡിലെ കുണ്ടുവളപ്പില്‍ ന്യൂമാന്‍ കുഞ്ഞഹമ്മദ് ഹാജിയുടെ പരാതിയിലാണ് കേസെടുത്തത്. 2017 മെയ് 19നാണ് കുഞ്ഞഹമ്മദ് ഹാജി കാസര്‍ഗോഡ് പുതിയ ബസ് സ്റ്റാന്‍ഡിന് സമീപം പ്രവര്‍ത്തിച്ചിരുന്ന ഫാഷന്‍ഗോള്‍ഡില്‍ 10 ലക്ഷം രൂപ നിക്ഷേപിച്ചത്. പ്രതിമാസം 10 ശതമാനം ലാഭവിഹിതം നല്‍കാമെന്ന് വിശ്വസിപ്പിച്ചാണ് പണം സ്വീകരിച്ചത്. എന്നാല്‍ ലാഭവിഹിതം കിട്ടിയില്ല. നിക്ഷേപിച്ച തുക തിരികെ ആവശ്യപ്പെട്ടപ്പോള്‍ ഇതും നല്‍കിയില്ലെന്നും കുഞ്ഞഹമ്മദ് ഹാജിയുടെ പരാതിയില്‍ പറയുന്നു. സംസ്ഥാനത്തെ വിവിധ ഭാഗങ്ങളിലായി ഫാഷന്‍ ഗോള്‍ഡ് തട്ടിപ്പ് പ്രതികള്‍ക്കെതിരെ 210 കേസുകളുണ്ട്. 700 ഓളം പേരില്‍ നിന്നാണ് നിക്ഷേപം സ്വീകരിച്ചത്. പോലീസിന് പുറമെ ക്രൈംബ്രാഞ്ചും ഈ കേസില്‍ അന്വേഷണം നടത്തിയിരുന്നു.

ഒരു കുട്ടിയുടെ കുറവിൽ രണ്ട് തസ്തികകൾ ഇല്ലാതാകുന്നു

ഇരിട്ടി: ആറളം ഫാം ഗവ. ഹയർ സെക്കൻഡറി സ്കൂളിൽ ഒരു കുട്ടിയുടെ കുറവിൽ രണ്ട് തസ്തികകൾ ഇല്ലാതാകുന്നു. കായികാധ്യാപക തസ്തിക ഉൾപ്പെടെ രണ്ടു തസ്തികയാണ് ഇല്ലാതായത്. ഒന്നു മുതൽ 10 വരെ ക്ലാസുകളിൽ പൂർണമായും ഹയർസെക്കൻഡറി വിഭാഗത്തിൽ 70 ശതമാനവും പട്ടികവർഗ വിദ്യാർഥികൾ‌ പഠിക്കുന്ന സ്കൂളാണിത്. കായികാധ്യാപകന്‍റെ തസ്തിക നഷ്ടപ്പെട്ടാൽ സ്കൂളിന്‍റെ പ്രവർത്തനത്തെ സാരമായി ബാധിക്കുമെന്ന ആശങ്കയാണ് രക്ഷിതാക്കൾ. കായിക പരിശീലനമുള്ളതുകൊണ്ടാണ് പകുതിയിലധികം വിദ്യാർഥികളും സ്കൂളിലെത്തുന്നത്. അതുകൊണ്ടു തന്നെ പ്രത്യേക പരിഗണന നൽകി ആറളം ഫാം ഗവ.ഹയർ സെക്കൻഡറി സ്കൂളിൽ കായികാധ്യാപക തസ്തിക നിലനിർത്തണമെന്നാണ് രക്ഷിതാക്കളുടെ ആവശ്യം. എട്ട്, ഒന്പത് ക്ലാസുകളിൽ അഞ്ച് ഡിവിഷനുകളാണ് കായിക അധ്യാപകർക്ക് വേണ്ടത്. ഇതിൽ ഒരു കുട്ടിയുടെ കുറവ് വന്നതോടെയാണ് ഡിവിഷൻ ഇല്ലാതാകുന്നത്. ഒന്നു മുതൽ 10 വരെ ക്ലാസുകളിൽ 503 പട്ടികവർഗ വിദ്യാർഥികളും ഹയർസെക്കൻഡറി വിഭാഗത്തിൽ 200 കുട്ടികളിൽ 70 ശതമാനവും പട്ടികവർഗ വിഭാഗത്തിൽപ്പെട്ടവരാണ്. എട്ട്, ഒന്പത് ക്ലാസുകളിൽ കായികപരിശീലനത്തിന് പാഠപുസ്തകം നിലവിലുണ്ട്. കായികാധ്യാപക തസ്തിക ഇല്ലാതാകുന്നതോടെ ഈ പാഠപുസ്തകം ആര് കൈകാര്യം ചെയ്യുമെന്ന കാര്യത്തിലും അവ്യക്തതയുണ്ട്. ഡിവിഷൻ നഷ്ടപ്പെട്ടതോടെ ഫിസിക്കൽ സയൻസ് അധ്യാപിക മറ്റൊരു സ്കൂളിലേക്ക് പോകുകയാണെങ്കിൽ സ്കൂളിന്‍റെ പ്രവർത്തനത്തെ കാര്യമായി ബാധിക്കും. ദേശീയതലത്തിൽ വരെ വിവിധ കായികയിനങ്ങളിൽ പങ്കെടുത്ത വിദ്യാർഥികൾ പഠിക്കുന്ന സ്കൂളാണിത്.

സി. സദാനന്ദൻ വധശ്രമക്കേസ് : പ്രതികൾക്ക് വീണ്ടും ജയിൽ

മട്ടന്നൂർ/തലശേരി/ കണ്ണൂർ: രാജ്യസഭാ എംപിയും ബിജെപി സംസ്ഥാന വൈസ് പ്രസിഡന്‍റുമായ സി. സദാനന്ദനെ കാലുകൾ വെട്ടിമാറ്റി കൊലപ്പെടുത്താൻ ശ്രമിച്ചെന്ന കേസിൽ 30 വർഷത്തിനു ശേഷം പ്രതികൾ വീണ്ടും ജയിലിലേക്ക്. നേരത്തെ തലശേരി കോടതി ഏഴു വർഷത്തെ കഠിന തടവിന് വിധിച്ച പ്രതികൾ ആറുമാസത്തെ ത‌ടവിനു ശേഷം ഹൈക്കോടതിയിലും സുപ്രീം കോടതിയിലും അപ്പീൽ നൽകിയതിനെ തുടർന്ന് ജാമ്യത്തിലിറങ്ങിയിരുന്നു. ഹൈക്കോടതി അപ്പീൽ തള്ളിയിതിനു പിന്നാലെ സുപ്രീം കോടതിയെ സമീപിച്ചെങ്കിലും അപ്പീൽ പരിഗണിക്കുകപോലും ചെയ്യാതെ തള്ളിയതോടെ പ്രതികൾ തലശേരി കോടതിയിൽ കീഴടങ്ങുകയും കോടതി കണ്ണൂർ സെൻട്രൽ ജയിലിലേക്ക് അയയ്ക്കുകയുമായിരുന്നു. പ്രതികൾ കോടതിയിൽ കീഴടങ്ങാൻ പോകുന്നതിന് മുന്പായി മട്ടന്നൂർ ഉരുവച്ചാലിൽ പാർട്ടി ഓഫീസിൽ കെ.കെ. ശൈലജ എംഎൽഎ ഉൾപ്പെടെയുള്ള നേതാക്കളുടെ നേതൃത്വത്തിൽ യാത്രയയപ്പും നൽകി. മുദ്രാവാക്യം വിളികളോടെയാണ് പ്രതികളെ നേതാക്കളും പ്രവർത്തകരും കോടതിയിലേക്ക് യാത്രയയച്ചത്. യാത്രയയപ്പ് പരിപാടിയുടെ റീൽസുകളും സമൂഹ മാധ്യമത്തിൽ പ്രചരിക്കുന്നുണ്ട്. സിപിഎം മട്ടന്നൂർ ഏരിയ കമ്മിറ്റി അംഗങ്ങളായ ഉരുവച്ചാൽ സ്വദേശി പി.സുരേഷ്ബാബു, പെരിഞ്ചേരിയിലെ പി.എം. രാജൻ, മുൻ ലോക്കൽ സെക്രട്ടറിയും റിട്ട. അധ്യാപകനുമായ പി. കുഞ്ഞിക്കൃഷ്‌ണൻ, റിട്ട.അധ്യാപകൻ സി.രവീന്ദ്രൻ, മുൻ ചുമട്ടു തൊഴിലാളി സി.രാമചന്ദ്രൻ, കഴിക്കലിലെ കെ. ബാലകൃഷ്ണൻ, എം. നാണു, കെ.ശ്രീധരൻ എന്നിവരാണ് ഇന്നലെ തലശേരി കോടതിയിൽ കീഴടങ്ങിയത്. 12 പേരാണ് പ്രതിപ്പട്ടികയിലുണ്ടായിരുന്നത്. ഇതിൽ നാലു പേരെ വെറുതെ വിട്ടിരുന്നു. 1994 ജനുവരി 25ന് രാത്രി വീട്ടിലേക്ക് പോകുന്നതിനിടെയാണ് സി. സദാനന്ദന്‍ ആക്രമിക്കപ്പെട്ടത്. 2007 ഫെബ്രുവരിയിലാണ് തലശേരി പ്രിന്‍സിപ്പല്‍ അസി. സെഷന്‍സ് കോടതി പ്രതികൾക്ക് ശിക്ഷ വിധിച്ചത്. ഇവര്‍ സദാനന്ദന് 25,000 രൂപ വീതം നല്‍കാനും വിചാരണക്കോടതി വിധിച്ചിരുന്നു. അസി. സെഷൻസ് കോടതി വിധി 2013 ജൂണ്‍ 10ന് തലശേരി സെഷന്‍സ് കോടതിയും ശരിവച്ചു. ഇതോടെ പ്രതികൾ ഹൈക്കോടതിയിൽ അപ്പീൽ നൽകിയപ്പോൾ സദാനന്ദൻ നൽകിയ ക്രിമിനൽ റിവിഷൻ അപ്പീൽ പരിഗണിച്ച കോടതി പിഴത്തുക 50,000 ആയി വര്‍ധിപ്പിച്ചാണ് പ്രതികളുടെ അപ്പീൽ തള്ളിയത്. തലശേരി കോടതിയിൽനിന്നും വൈകുന്നേരത്തോടെ കണ്ണൂർ സെൻട്രൽ ജയിലിലെത്തിച്ച പ്രതികളെ ജയിൽ വളപ്പിൽ സിപിഎം കണ്ണൂർ ജില്ലാ സെക്രട്ടറി കെ.കെ. രാഗേഷിന്‍റെ നേതൃത്വത്തിൽ പാർട്ടി പ്രവർത്തകർ മുദ്രാവാക്യം വിളികളോടെയായിരുന്നു സ്വീകരിച്ചത്. പോലീസ് വാഹനത്തിൽനിന്ന് ഇറങ്ങി പ്രവർത്തകരെ അഭിവാദ്യം ചെയ്താണ് പ്രതികൾ ജയിലിലേക്ക് കയറിയത്.

ഭാര്യയുടെ നിയമനം: പ്രചരിക്കുന്നത് വസ്തുതാവിരുദ്ധമായ കാര്യങ്ങളെന്ന് സ്പീക്കർ

കണ്ണൂര്‍: തന്‍റെ ഭാര്യയുടെ ഗസ്റ്റ് അധ്യാപിക നിയമനവുമായി ബന്ധപ്പെട്ട് വസ്തുതാവിരുദ്ധമായ കാര്യങ്ങളാണ് പ്രചരിപ്പിക്കുന്നതെന്ന് സ്പീക്കര്‍ എ.എൻ. ഷംസീർ. കണ്ണൂരിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം. കുറെക്കാലമായി തനിക്കെതിരെ വ്യക്തിപരമായ കാര്യങ്ങളാണ് ചില മാധ്യമങ്ങള്‍ കൊടുക്കുന്നത്. സ്പീക്കറെ കിട്ടിയെന്ന തരത്തില്‍ വാളെടുത്ത് വീശുമ്പോള്‍ എന്തെങ്കിലും തെറ്റായ കാര്യങ്ങള്‍ നടന്നിട്ടുണ്ടോയെന്ന് കൃത്യമായി പരിശോധിക്കാനും തയാറാകണം. നിലവാരം കുറഞ്ഞ വാര്‍ത്തകളാണ് മാധ്യമങ്ങള്‍ ഇക്കാര്യത്തില്‍ നല്‍കുന്നതെന്നും അദ്ദേഹം പറഞ്ഞു. ടി.പി. ചന്ദ്രശേഖരന്‍ വധക്കേസ് പ്രതികള്‍ മദ്യപിച്ച സംഭവം മാധ്യമങ്ങളിലൂടെയാണ് ശ്രദ്ധയില്‍പ്പെട്ടതെന്നും പിന്നാലെ നടപടി സ്വീകരിച്ചെന്നും ഷംസീര്‍ പറഞ്ഞു. ജയിലിന് പുറത്താണ് മദ്യപാനം നടന്നത്. ജയിലിനകത്ത് നടന്നതായി തന്‍റെ ശ്രദ്ധയില്‍പ്പെട്ടിട്ടില്ല. ഫോണും ജയിലിനുള്ളില്‍ ഉപയോഗിച്ചതായി കണ്ടെത്തിയിട്ടില്ല. സംഭവത്തില്‍ മൂന്ന് പോലീസ് ഉദ്യോഗസ്ഥരെ സസ്പെന്‍ഡ് ചെയ്തുവെന്നും ഷംസീർ പറഞ്ഞു. അടൂരിനെ പോലെ ഒരാളില്‍ നിന്നുണ്ടാകാന്‍ പാടില്ലാത്ത പ്രസ്താവനയാണുണ്ടായതെന്നും അദ്ദേഹം പറഞ്ഞു.

കേളകത്ത് ടാസ്ക് ഫോഴ്സ‌് രൂപീകരിച്ചു

കേളകം: ആറളം പുനരധിവാസ മേഖലയിലെ വന്യമൃഗശല്യം മുൻനിർത്തി മനുഷ്യാവകാശ പ്രവർത്തകനായ പോൾ മാത്യൂസ് ഹൈക്കോടതിയിൽ സമർപ്പിച്ച പൊതുതാത്പര്യ ഹർജിയുടെ ഭാഗമാകുന്നതിനായി കേളകം പഞ്ചായത്തിൽ ജനകീയ ടാസ്ക് ഫോഴ്സ് കമ്മിറ്റി രൂപവത്കരിച്ചു. ഹൈക്കോടതി മാനദണ്ഡപ്രകാരമുള്ള അഞ്ചംഗ കമ്മിറ്റിയാണു രൂപവത്കരിച്ചത്. ജനങ്ങളെ പങ്കെടുപ്പിച്ചുകൊണ്ടുതന്നെ വന്യമൃഗശല്യത്തിൽ പ്രതിവിധികൾ ഉണ്ടാകണമെന്നതും ഇതിനായി പ്രദേശവാസികളുടെ ടാസ്ക് ഫോഴ്സ് കമ്മിറ്റികൾ രൂപവത്കരിക്കണമെന്നതും കേരള ഹൈക്കോടതിയുടെ നിർദേശമായിരുന്നു.ആറളം വന്യജീവി സങ്കേതത്തിനു ചുറ്റും കാട്ടാന ഉൾപ്പെടെയുള്ള വന്യമൃഗങ്ങളുടെ അതിരൂക്ഷമായ ശല്യം മുൻനിർത്തിയാണു ഹൈക്കോടതി ഡിവിഷൻ ബെഞ്ച് എല്ലാ ബുധനാഴ്ചയും പൊതുതാത്പര്യ ഹർജിയിൽ വാദം കേൾക്കുന്നത്. ആറളം പുനരധിവാസ മേഖലയോടൊപ്പം നിലവിൽ വന്യമൃഗശല്യ പ്രശ്‌നങ്ങൾ നേരിടുന്ന മറ്റു സമീപ പ്രദേശങ്ങളുടെയും വിഷയങ്ങൾ ഹൈക്കോടതിയെ ധരിപ്പിക്കുമെന്ന് ഹർജിക്കാരനായ പോൾ മാത്യൂസ് പറഞ്ഞു. എം.ജെ. റോബിൻ, ടോമി ചാത്തൻപാറ, മാത്യു തൈവേലിക്കകത്ത്, പ്രവീൺ താഴത്തെ മുറി, ടോമി കാലായിൽ എന്നിവരാണു ടാസ്ക് ഫോഴ്‌സ് കമ്മിറ്റി അംഗങ്ങൾ.

കോട്ടത്ത് സ്വകാര്യബസും കാറും കൂട്ടിയിടിച്ചു; ബസ് കടയിലേക്ക് പാഞ്ഞുകയറി

കൂത്തുപറമ്പ്: പെരളശേരി കോട്ടത്ത് സ്വകാര്യ ബസും കാറും കൂട്ടിയിടിച്ചു. ഇടിയുടെ ആഘാതത്തിൽ നിയന്ത്രണംവിട്ട ബസ് എതിർവശത്തെ കടയിലേക്കും പാഞ്ഞുകയറി. അപകടത്തിൽ കാർ ഡ്രൈവർക്കു സാരമായി പരിക്കേറ്റു. ഇന്നലെ ഉച്ചകഴിഞ്ഞ് മൂന്നോടെ കോട്ടം ഈസ്റ്റ് എൽപി സ്കൂളിനു സമീപമായിരുന്നു അപകടം. കണ്ണൂർ ഭാഗത്തു നിന്ന് കൂത്തുപറമ്പ് ഭാഗത്തേക്കു വരുന്ന ബസും എതിർദിശയിൽ നിന്ന് വന്ന കാറും കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ ബസ് നിയന്ത്രണം വിട്ട് എതിർവശത്തെ സ്‌റ്റേഷനറി കടയിൽ പാഞ്ഞുകയറുകയും ചെയ്തു. സംഭവ സമയം കട ഉടമ ഭക്ഷണം കഴിക്കാൻ പോയതിനാൽ വലിയ അപകടമാണ് ഒഴിവായത്. അപകടത്തിൽ സാരമായി പരിക്കേറ്റ കാർ ഡ്രൈവറെ സ്വകാര്യ ആശുപത്രിയിൽ പ്രവേശിപ്പിച്ചു. അപകടത്തിൽ കാർ പൂർണമായും ബസിന്‍റെ മുൻഭാഗവും തകർന്നു. കടയ്ക്കും കേടുപാടുകൾ സംഭവിച്ചു.

ആരോഗ്യ ബോധവത്കരണ ക്ലാസ് സംഘടിപ്പിച്ചു

കേളകം: മഞ്ഞളാംപുറം യുപി സ്കൂളിൽ ആരോഗ്യ ബോധവത്കരണ ക്ലാസും കർക്കിടക മാസ മരുന്ന് കഞ്ഞി വിതരണവും നടത്തി. കർക്കിടകത്തിന്‍റെ പ്രാധാന്യവും പ്രസക്തിയും ഉൾപ്പെടുത്തി ഡോ. കെ.എസ്. രാജീവ് ക്ലാസ് നയിച്ചു. പിടിഎ പ്രസിഡന്‍റ് ബഷീർ അധ്യക്ഷത വഹിച്ചു. സ്കൂൾ മുഖ്യാധ്യാപിക എൻ.എസ്. സൂസമ്മ, സീനിയർ അസിസ്റ്റന്‍റ് ഷിജോ മാത്യു എന്നിവർ പ്രസംഗിച്ചു. തുടർന്ന് സ്കൂളിലെ എല്ലാ കുട്ടികൾക്കും കർക്കിടക മരുന്ന് കഞ്ഞി വിതരണവും നടത്തി.

വളയംകോട് -മാഞ്ചുവട്- പള്ളിപ്പാലം റോഡിലെ കലുങ്ക് അപകടാവസ്ഥയിൽ

ഇരിട്ടി: വളയം കോട് - മാഞ്ചുവട് -പള്ളിപ്പാലം പൊതുമരാമത്ത് റോഡിൽ പ്രളയത്തിൽ തകർന്ന മാഞ്ചുവട് പാലത്തിന് സമീപമുള്ള കലുങ്കിന്‍റെ കെട്ടിടിഞ്ഞ് അപകടാവസ്‌ഥയിൽ. റോഡിന്‍റെ അരികിൽ വിള്ളൽ വീണ് റോഡ് ഉൾപ്പെടെ ഏത് നിമിഷവും ഇടിഞ്ഞ് വീണ് ഗതാഗതം ഉൾപ്പെടെ തടസപ്പെട്ടേക്കാം. 2018 ലെ പ്രളയത്തിൽ മാഞ്ചുവട് പാലം തകർന്നതോടെ പ്രദേശം ഒറ്റപ്പെട്ട നിലയിലായിരുന്നു. എടപ്പുഴ-പള്ളിപ്പാലം ചുറ്റി വളഞ്ഞായിരുന്നു വലിയ വാഹനങ്ങൾ സഞ്ചരിച്ചിരുന്നത്. കലുങ്ക് തകർന്നതോടെ അതും നിലയ്ക്കുന്ന സാഹചര്യമാണ്. ഇതുവഴിയായിരുന്നു അഞ്ചോളം സ്കൂളുകളിലേക്കുള്ള ബസ് കടന്ന് പോയിരുന്നത്. കലുങ്ക് അപകടത്തിൽ ആയതോടെ സ്കൂൾ ബസുകൾ വരാതായതോടെ വിദ്യാർഥികൾ ബുദ്ധിമുട്ടിലായി. പഞ്ചായത്തും പൊതുമരാമത്തും യാതൊരു ഇടപെടലും നടത്തിയിട്ടില്ലെന്ന് മാഞ്ചുവട് വാർഡ് കോൺഗ്രസ് കമ്മിറ്റി ആരോപിച്ചു. ജനങ്ങളുടെ യാത്രാക്ലേശം പരിഹരിക്കാൻ പൊതുമരാമത്ത് അടിയന്തരമായി ഇടപെട്ടില്ലെങ്കിൽ സമരപരിപാടികളുമായി മുന്നോട്ട് പോകുമെന്നും പ്രസിഡന്‍റ് രാജു ആലുംപറമ്പിൽ, ബാബു കുന്നേത്തടം, വിൽസൺ പുളിക്കയിൽ, ആശ കാപ്പുങ്കൽ, ബിന്ദു സുകുമാരൻ, റെജി തടത്തിമാക്കൽ എന്നിവർ പറഞ്ഞു.

ലയണ്‍സ് ക്ലബ് ഇരിട്ടി റോയല്‍ ഉദ്ഘാടനം

ഇരിട്ടി: ഇരിട്ടി റോയല്‍ ലയൺസ് ക്ലബിന്‍റെ ഉദ്ഘാടനം ഡിസ്ട്രിക്ട് ഗവര്‍ണര്‍ രവി ഗുപ്ത നിർവഹിച്ചു. ഇരിട്ടി സിറ്റി ലയണ്‍സ് പ്രസിഡന്‍റ് എന്‍.കെ. ബിജു അധ്യക്ഷത വഹിച്ചു. വൈസ് ഡിസ്ട്രിക്ട് ഗവര്‍ണര്‍ പി.എസ്. സൂരജ് പുതിയ ഭാരവാഹികളുടെ സ്ഥാനാരോഹണം നടത്തി. നിര്‍ധരായ രണ്ടു വിദ്യാര്‍ഥികള്‍ക്ക് പിഎസ്‌സി കോച്ചിംഗ് കോഴ്‌സ് പൂര്‍ത്തിയാക്കുന്നത് വരെയുള്ള ധനസഹായത്തിന്‍റെ ആദ്യ ഗഡു റീജ ഗുപ്ത കൈമാറി. എ.കെ. ഹസന്‍, കാബിനറ്റ് സെക്രട്ടറി രാജേഷ് കുഞ്ഞപ്പന്‍, കാബിനറ്റ് ട്രഷറര്‍ പി.എം. ഷാനവാസ്, അംഗങ്ങളായ ദിലീപ് സുകുമാര്‍, എസ്. ബിജോയ്, ബിജിത്ത് കുളങ്ങരത്ത്, പ്രഫ.ഡോ. അനിത ദിലീപ്, ഡോ. മീതു മനോജ്, ഡോ. ജി. ശിവരാമകൃഷ്ണന്‍, എൻ.ജെ. ജോസഫ്, ജിമ്മി തോമസ്, പി.കെ. ആന്‍റണി, വി.എസ്. ജയന്‍ എന്നിവര്‍ പ്രസംഗിച്ചു. ഭാരവാഹികള്‍ : എ.കെ. ഹസൻന-പ്രസിഡന്‍റ്, ഡോ.ജി. ശിവരാമകൃഷ്ണന്‍, പി.കെ. ജോസ്-വൈസ് പ്രസിഡന്‍റുമാർ,വി.എസ്. ജയന്‍ -സെക്രട്ടറി, ജോയ് പടിയൂര്‍ -ജോ. സെക്രട്ടറി, പി.സി. അനില്‍കുമാര്‍ -ട്രഷറര്‍.

നഗരമധ്യത്തിലെ നായ പരിപാലന കേന്ദ്രം ജനങ്ങൾക്ക് ദുരിതമാകുന്നു

കണ്ണൂർ: നഗരമധ്യത്തിൽ പോലീസ് മൈതാനിക്കു മുൻവശം സൊസൈറ്റി ഫോർ ദി പ്രിവൻഷൻ ഓഫ് ക്രൂവൽറ്റി ടു ആനിമൽസ് (എസ്പിസിഎ) കെട്ടിട വളപ്പിലെ നായപരിപാലന കേന്ദ്രം ജനങ്ങൾക്കും ബസ് കാത്തുനിൽക്കുന്നവർക്കും ദുരിതമാകുന്നു. രോഗം ബാധിച്ചതും അല്ലാത്തതുമായ നിരവധി നായകളെയാണ് ഒരു മൃഗസ്നേഹ സംഘടന ഇവിടെ കൂട്ടിലാക്കി പരിചരിക്കുന്നത്. പരിക്കു പറ്റുന്ന തെരുവ് നായകളെ പരിചരിക്കാനായി താത്കാലിക കൂട് സ്ഥാപിക്കാൻ അനുമതി തേടിയെത്തിയ സംഘടനയ്ക്ക് എസ്പിസിഎ അനുമതി നൽകുകയായിരുന്നു. ഇതിനു പിന്നാലെ സംഘടന കൂടുകളുടെ എണ്ണം വർധിപ്പിച്ച് പരിപാലന കേന്ദ്രമാക്കി മാറ്റിയെന്നാണ് ആക്ഷേപം. പഴയങ്ങാടി, തളിപ്പറന്പ്, പയ്യന്നൂർ, കാസർഗോഡ് ഭാഗത്തേക്കുള്ള ബസ് കാത്തിരിപ് കേന്ദ്രം ഇതിന്‍റെ മുന്നിലാണ്. നായകളുടെ വിസർജ്യവും മറ്റും ശരിയായ രീതിയിൽ സംസ്കരിക്കാത്തതിനാൽ കടുത്ത ദുർഗന്ധമാണ്. നായകളുടെ വിസർജ്യവും ഭക്ഷണാവശിഷ്ടങ്ങളും റോഡിലേക്ക് തള്ളുന്നതായും ആരോപണമുണ്ട്. ബസ് കാത്തു നിൽക്കുന്നവർ കടുത്ത ദുർഗന്ധം സഹിച്ചാണ് ഇവിടെ നിൽക്കുന്നുത്. ശരിയായ രീതിയിൽ മാലിന്യ സംസ്കരണം നടത്തുന്നില്ലെന്ന് കാണിച്ച് മലിനീകരണ നിയന്ത്രണ ബോർഡ് സ്ഥലം ഉടമകളായ എസ്പിസിഎക്ക് നോട്ടീസ് നൽകിയിട്ടുണ്ട്. സ്ഥലം ഒഴിയണമെന്ന് ആവശ്യപ്പെട്ടിട്ടും നായപരിപാലന കേന്ദ്രം നടത്തിപ്പുകാർ തയാറാവുന്നില്ലെന്ന് എസ്പിസിഎ അധികൃതർ പറഞ്ഞു. നിയമ നടപടികളിലേക്ക് നീങ്ങാനാണ് എസ്പിസിഎയുടെ തീരുമാനം. ജനങ്ങളെ ബുദ്ധിമുട്ടിലാക്കുന്ന ഈ നായപരിപാലന കേന്ദ്രത്തിനെതിരെ പരാതികൾ ഉയർന്നിട്ടും കോർപറേഷനോ ബന്ധപ്പെട്ട വകുപ്പധികൃതരോ നടപടികൾ സ്വീകരിക്കുന്നില്ലെന്നും പരാതിയുണ്ട്. ഇതൊന്നും കാണാൻ ആളില്ലേ? മൃഗപരിപാലന കേന്ദ്രങ്ങൾ നടത്തുന്പോൾ പാലിക്കേണ്ട നിയമങ്ങളെല്ലാം ഇവിടെ കാറ്റിൽ പറത്തുകയാണ്. കടുത്ത ദുർഗന്ധത്തിനൊപ്പം ഭീതിയിലാണ് ഇവിടെ ബസ് കാത്തു നിൽക്കുന്നത്. രാവിലെ നായകളെ കൂട്ടിൽ നിന്ന് തുറന്നു വിടുന്നത് കാണാറുണ്ട്. ഏതെങ്കിലും സാഹചര്യത്തിൽ ഇവ പുറത്തേക്ക് വന്നാൽ കടി കൊള്ളുമെന്ന കാര്യത്തിൽ സംശയമില്ല. ഇത് ഇവിടെ നിന്ന് ഒഴിവാക്കാൻ ബന്ധപ്പെട്ടവർ നടപടി എടുത്തേ മതിയാകൂ. പരിപാലനമാകാം, ബുദ്ധിമുട്ടിക്കരുത് മൃഗങ്ങളെ പരിപാലിക്കുകയും സംരക്ഷിക്കുകയുമൊക്കെ വേണമെന്നും പക്ഷേ അത് പൊതുജനങ്ങൾക്ക് ദുരിതമാകുന്ന തരത്തിലാകരുതെന്നും വീ‌ട്ടമ്മയായ റീന പറഞ്ഞു. നഗരത്തിലെ ഏറ്റവും പ്രധാന സ്ഥലത്തു തന്നെയുള്ള നായപരിപാലന കേന്ദ്രത്തിൽ നിന്നുള്ള ദുർഗന്ധം കാരണം ഇതിലൂടെ നടന്നു പോകാനോ ബസ് കാത്തു നിൽക്കാനോ കഴിയുന്നില്ലെന്നും അവർ പറഞ്ഞു.

എസ്പിസി ദിനാചരണം സംഘടിപ്പിച്ചു

കുടിയാന്മല: മേരി ക്വീൻസ് ഹൈസ്കൂളിൽ സ്റ്റുഡന്‍റ് പോലീസ് കേഡറ്റിന്‍റെ (എസ്പിസി) പതിനഞ്ചാം ജന്മദിനത്തോടനുബന്ധിച്ച് എസ്പിസി ദിനാചരണം സംഘടിപ്പിച്ചു. സ്കൂൾ മാനേജർ ഫാ. പോൾ വള്ളോപ്പിളളി ഉദ്ഘാടനം ചെയ്തു. കുടിയാന്മല എസ്ഐ പ്രകാശൻ പടിയ്ക്കൽ അധ്യക്ഷത വഹിച്ചു. സ്കൂൾ മുഖ്യാധ്യാപകൻ സുനിൽ ജോസഫ്, ഡ്രിൽ ഇൻസ്ട്രക്‌ടർ പി. ഷഫീഖ് എന്നിവർ പ്രസംഗിച്ചു. അധ്യാപകരായ ഡെസ്റ്റി ദേവസ്യ, ഐറിൻ സോജൻ എന്നിവർ നേതൃത്വം നൽകി. വിദ്യാർഥികൾ വിവിധ കലാപരിപാടികളും അവതരിപ്പിച്ചു. ചെമ്പേരി: നിർമല ഹൈസ്കൂളിൽ വിവിധ പരിപാടികളോടെ സ്റ്റുഡന്‍റ് പോലീസ് കേഡറ്റ് (എസ്പിസി) ദിനം ആചരിച്ചു. സ്കൂൾ മുഖ്യാധ്യാപകൻ ജോഷി ജോൺ പതാക ഉയർത്തി. സീനിയർ കാഡറ്റ് ലീഡർ ജെറോൾ ജോസ് പരേഡിനു നേതൃത്വം നൽകി. എസ്പിസി ഗീതം, പ്രതിജ്ഞ, ഡിക്ലറേഷൻ പ്രസന്‍റേഷൻ എന്നിവയും നടന്നു. സീനിയർ കേഡറ്റ് ഷിലോൺ ഏഞ്ചൽ എസ്പിസി അനുഭവങ്ങൾ പങ്കുവച്ചു. തുടർന്ന് കേഡറ്റുകൾ കുടിയാന്മല പോലീസ് സ്റ്റേഷൻ സന്ദർശിച്ചു. എസ്എച്ച്ഒ എം.എൻ. ബിജോയ് കേഡറ്റുകളെ മധുരം നൽകി സ്വീകരിച്ചു. സ്റ്റേഷനിലെ മുഴുവൻ പോലീസ് ഓഫീസർമാർക്കും കേഡറ്റുകൾ ഉപഹാരങ്ങൾ സമ്മാനിച്ചു. സിപിഒമാരായ ബീന ഫിലിപ്പ്, വിനോദ് അഗസ്റ്റിൻ, ഡ്രിൽ ഇൻസ്ട്രക്‌ടർ ബൈജു എന്നിവർ നേതൃത്വം നൽകി. ചെറുപുഴ: പ്രാപ്പൊയിൽ ഗവ. ഹയർ സെക്കൻഡറി സ്കൂളിലെ എസ്പിസി കേഡറ്റ് പദ്ധതിയുടെ പതിനാറാം ജന്മദിനം ആഘോഷിച്ചു. ചെറുപുഴ പോലീസ് സ്റ്റേഷൻ ഹൗസ് ഓഫീസർ എം.പി. വിനീഷ്കുമാർ പതാക ഉയർത്തി. പിടിഎ പ്രസിഡന്‍റ് കെ.സി. ലക്ഷ്മണൻ അധ്യക്ഷത വഹിച്ചു. സിവിൽ പോലീസ് ഓഫീസർ കെ. അനിത, അജിത്ത്കുമാർ, കെ.വി. ലത എന്നിവർ പ്രസംഗിച്ചു. തുടർന്ന് കാഡറ്റുകൾ ചെറുപുഴ പോലീസ് സ്റ്റേഷൻ സന്ദർശിക്കുകയും ദൈനംദിന പ്രവർത്തനങ്ങൾ മനസിലാക്കുകയും ചെയ്തു.

പാളയാട് പാലം പ്രവൃത്തി പുനരാരംഭിച്ചു

തളിപ്പറമ്പ്: പ്രതിഷേധങ്ങൾക്കൊടുവിൽ പാളയാട് പാലത്തിന്‍റെ പ്രവൃത്തി പുനരാരംഭിച്ചു. പഴയ പാലം പൊളിച്ചിട്ടിട്ട് മാസങ്ങൾ കഴിഞ്ഞെങ്കിലും പ്രവൃത്തി ഇഴഞ്ഞു നീങ്ങുന്നത് കാരണം നാട്ടുകാരുടെ യാത്രാ ദുരിതം വർധിച്ചതാണ് പ്രധിഷേധങ്ങൾക്കിടയാക്കുന്നത്. തളിപ്പറമ്പിൽ നിന്ന് മാന്ധംകുണ്ടി ലേക്കുള്ള പ്രധാന റോഡിൽ പാളയാട് തോടിന് കുറുകെയുള്ള പാലം പൊളിച്ച് പ്രവൃത്തി തുടങ്ങിയിട്ട് മാസങ്ങളായി. ഇരുഭാഗത്തും തൂണുകൾക്ക് പകരമായി കോൺക്രീറ്റ് ഭിത്തി നിർമാണം പൂർത്തിയായിരുന്നു. ആദ്യം ഇതുവഴി കടന്നുപോകുന്ന കുടിവെള്ള പൈപ്പ് മാറ്റി സ്ഥാപിക്കാത്തത് കാരണം പ്രവൃത്തി തുടങ്ങാൻ തന്നെ വൈകിയിരുന്നു. ഒടുവിൽ നാട്ടുകാർ പ്രതിഷേധവുമായി രംഗത്തെത്തി. മാന്ധംകുണ്ട് റസിഡൻസ് അസോസിയേഷൻ ഇക്കാര്യം ആവശ്യപ്പെട്ട് നഗരസഭ ഓഫീസിലേക്ക് മാർച്ചും നടത്തുകയും ചെയ്തു. ഇതിനുശേഷമാണ് വാട്ടർ അഥോറിറ്റി അധികൃതർ പൈപ്പ് മാറ്റി സ്ഥാപിച്ചത്. എം.വി. ഗോവിന്ദൻ എംഎൽഎയുടെ ഫണ്ട് ഉപയോഗിച്ചാണ് പഴയ പാലം പൊളിച്ച് പുതിയത് പണിയാൻ തീരുമാനിച്ചത്. പിന്നീട് മഴയുടെ പേരിലും പ്രവൃത്തി നിലച്ച സ്ഥിതിയായിരുന്നു. തോട്ടിൽ ശക്തമായ ഒഴുക്കും കാരണമായി പറഞ്ഞു. കഴിഞ്ഞ ദിവസം മുതൽ കരാറുകാരൻ വീണ്ടും നിർമാണ സാമഗ്രികൾ ഇറക്കുകയും പ്രവൃത്തി പുനരാരംഭിക്കുകയും ചെയ്തിട്ടുണ്ട്.

ചക്ക ഫെസ്റ്റ് സംഘടിപ്പിച്ചു

പെരിങ്ങോം: പെരിങ്ങോം-വയക്കര പഞ്ചായത്ത് സിഡിഎസിന്‍റെ നേത്യത്വത്തിൽ ചക്ക ഫെസ്റ്റ് സംഘടിപ്പിച്ചു. പെരിങ്ങോം-വയക്കര പഞ്ചായത്ത് പ്രസിഡന്‍റ് വി.എം. ഉണ്ണികൃഷ്ണൻ ഉദ്ഘാടനം ചെയ്തു. സിഡിഎസ് ചെയർപേഴ്‌സൺ സി.വി. സ്മിത അധ്യക്ഷത വഹിച്ചു. വൈസ് പ്രസിഡന്‍റ് ബിന്ദു രാജൻ കുട്ടി, ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയർമാൻ ഫാത്തിമ ബീവി, പഞ്ചായത്തംഗം പുഷ്പമോഹൻ, കെ. രാധാമണി എന്നിവർ പ്രസംഗിച്ചു. ചക്ക കൊണ്ടുണ്ടാക്കിയ അന്പതിൽപ്പരം വിഭവങ്ങളും ഇലക്കറികളും ഫെസ്റ്റിലുണ്ടായിരുന്നു. വിദ്യാർഥികൾ, ജനപ്രതിനിധികൾ, വ്യാപാരികൾ, നാട്ടുകാർ തുടങ്ങി ധാരാളം പേർ പങ്കെടുത്തു.

അലക്സ് നഗർ-ഐച്ചേരി റോഡ് പൊട്ടിത്തകർന്നിട്ട് ഒന്പതു വർഷം

അലക്സ്‌നഗർ: അലക്സ്-നഗർ ഐച്ചേരി റോഡ് പൊട്ടിത്തകർന്ന് കാൽനടയാത്ര പോലും ദുസ്സഹമായി. കഴിഞ്ഞ ഒന്പത് വർഷമായി തങ്ങൾ അനുഭവിക്കുന്ന ദുരിതത്തിന് പരിഹാരം കാണാൻ ഇനിയാരെ സമീപിക്കണമെന്നറിയാതെ വലയുകയാണ് ഇവിടുത്തുകാർ. ഒന്പതു വർഷമായി തകർന്നു കിടക്കുന്ന റോഡ് നവീകരിക്കണമെന്ന് നിരവധി തവണ അപേക്ഷ നൽകിയിട്ടും പൊതുമരാമത്ത് വകുപ്പിന്‍റെ ഭാഗത്ത് നിന്നും നടപട‌ികളുണ്ടായില്ലെന്ന് ഇവിടുത്തുകാർ പറയുന്നു. പൊട്ടിത്തകർന്ന റോഡിൽ ക്വാറി വേസ്റ്റ് ഇട്ട് താത്കാലിക പരിഹാരം ഇടക്കിടെ നടത്തുകയാണ്. മഴ മാറിയിൽ വാഹനങ്ങൾ കടന്നു പോകുന്പോൾ പ്രദേശം പൊടിയിൽ മുങ്ങുന്നതും പതിവാണ്. വർഷങ്ങളായി അറ്റുകുറ്റപ്പണിപോലും നടത്താതെ തകർന്നുകിടക്കുന്ന അലക്സ്‌നഗർ-ഐച്ചേരി റോഡിലൂടെ മാപ്പിനി മുതൽ പാലം വരെയുള്ള ഭാഗമാണ് ഏറ്റവും ശോചനീയമായ അവസ്ഥയിലുള്ളത്. ഒന്നര വർഷം മുമ്പ് തുറന്നുകൊടുത്ത അലക്സ് നഗർ പാലം നിർമാണത്തിന്‍റെ ഉദ്ഘാടനവേളയിൽ റോഡ് നവീകരണം ഉടൻ നടത്തുമെന്ന് മന്ത്രി പി.എ. മുഹമ്മദ് റിയാസ് പ്രഖ്യാപിച്ചിരുന്നുവെങ്കിലും ഒന്നുമായിട്ടില്ല. ആദ്യം 5.50 മീറ്റർ വീതിയിൽ റോഡ് നവീകരിക്കാനായിരുന്നു പദ്ധതി. എന്നാൽ കരാറുകാരന്‍റെ അനാസ്ഥമൂലം പ്രവൃത്തി നീണ്ടു പോകുകയാണ്. ഇതിനിടെ സജീവ് ജോസഫ് എംഎൽഎ ഇടപെടലിനെ തുടർന്ന് ഫണ്ട് പാസായതായി പറയുന്നുണ്ടെങ്കിലും സ്ഥിരീകരണമില്ലെന്നും നാട്ടുകാർ പറഞ്ഞു. ക്വാറി വേസ്റ്റല്ല, റോഡാണ് വേണ്ടത് ബസ് ഓടിയിരുന്ന റോഡാണ് തകർന്നു കിടക്കുന്നത്. മഴ കഴിഞ്ഞാലുടൻ റോഡ് നവീകരണത്തിനുള്ള നടപടികൾ ഉണ്ടാക്കാൻ ബന്ധപ്പെട്ടവർ തയാറാകണം. ഇടയ്ക്കിടെ തകർന്ന റോഡിൽ ക്വാറി വേസ്റ്റ് ഇറക്കിയുള്ള താത്കാലിക പരിഹാരമല്ല വേണ്ടത്. കൃത്യമായ രീതിയിലുള്ള റോഡ് നവീകരണം നടത്തി യാത്രാ ക്ലേശം പരിഹരിക്കണം.

പെരുന്പടവിൽ ഗതാഗതക്കുരുക്ക് രൂക്ഷം

പെരുമ്പടവ്: പെരുന്പടവ് ‌ ടൗണിലെ അനധികൃത പാർക്കിംഗും നിയമം കാറ്റിൽ പറത്തിയുള്ള ടിപ്പറുകളുടെ സർവീസും അപകട ഭീഷണിക്കൊപ്പം ഗതാഗതകുരുക്കിനും ഇടയാക്കുന്നു. ടൗണിലെത്തുന്ന പലരും മറ്റു വാഹനങ്ങൾക്ക് കടന്നു പോകാനുള്ള സൗകര്യമുണ്ടെന്ന കാര്യം പരിഗണിക്കാതെ തോന്നിയതു പോലെയാണ് വാഹനങ്ങൾ നിർത്തിയിടുന്നത്. കൂടാതെ സ്കൂൾ പ്രവർത്തനം ആരംഭിക്കുന്ന സമയത്തും വിടുന്ന സമയത്തും ‌ടിപ്പറുകൾ സർവീസ് നടത്തരുതെന്ന നിയമവും പാലിക്കുന്നില്ല. വീതി കുറഞ്ഞ റോഡിന്‍റെ ഇരുവശങ്ങളിൽ പോലും അലക്ഷ്യമായുള്ള പാർക്കിംഗ് പതിവാണ്. ഇതു കാരണം റോഡിലുടെ വാഹനങ്ങൾക്ക് സുഗമമായി കടന്നു പോകുവാനോ എതിരേ വരുന്ന വാഹനത്തിന് കടന്നു പോകാനോ കഴിയാത്ത അവസ്ഥയുണ്ട്. ‌എട്ടു മീറ്ററിൽ താഴെ മാത്രം വീതിയുള്ള റോഡരികിലെ ഓവുചാലുകൾ സ്ലാബിട്ട് മൂടിയിട്ടുമില്ല. ടൗണിനോട് ചേർന്ന് ബസ് സ്റ്റാൻഡ് ഉണ്ടെങ്കിലും ബസുകൾ പലതും ടൗണിലാണ് നിർത്തിയിടുന്നത്. ഇതുകാരണം മഴയത്ത് ബസ്കയറാൻ വിദ്യാർഥികൾ ഉൾപ്പടെയുള്ളവർ കടവരാന്തയിൽ കാത്തു നിൽക്കേണ്ടിയും വരുന്നുണ്ട്. റോഡിനോട് ചേർന്നുള്ള സ്കൂളുകളിൽ കെ.ജി സ്കൂൾ മുതൽ ഹയർ സെക്കൻഡറി വരെയുള്ള സ്കൂളുകളിലായി ആയിരത്തിലധികം കുട്ടികളുണ്ട്. രാവിലെയും വൈകുന്നേരവും സ്കൂൾ കുട്ടികൾ വാഹനങ്ങൾക്കിടയിലൂടെയാണ് നടന്നു പോകുന്നത് വലിയ അപകട ഭീഷണിയാണ് ഉയർത്തുന്നത്. സെന്‍റ് ജോസഫ് പള്ളി, വിവിധ ബാങ്കുകൾ ആശുപത്രികൾ, വ്യാപാര സ്ഥാപനങ്ങൾ എന്നിവയും റോഡിന്‍റെ വശങ്ങളിലായുണ്ട്. നേരത്തെ ടൗണിൽ ഹോം ഗാർഡിനെ ഡ്യൂട്ടിക്ക് നിയോഗിച്ചിരുന്നപ്പോൾ അനധികൃത പാർക്കിംഗ് തടയാൻ കഴിഞ്ഞിരുന്നു. പിന്നീട് ഡ്യൂട്ടിക്ക് ആരെയും നിയോഗിക്കാഞ്ഞതോടെ തോന്നിയ പോലെയുള്ള പാർക്കിംഗും തിരിച്ചെത്തുകയായിരുന്നു. പോലീസടക്കമുള്ളവരുടെ മുന്നിൽ ഇക്കാര്യങ്ങൾ ശ്രദ്ധയിൽ പെടുത്തിയിട്ടും നടപടി ഉണ്ടാകുന്നില്ലെന്നും ആക്ഷേപമുണ്ട്. റോഡിന് ഇരുവശങ്ങളിലെയും ഓടകൾ സ്ലാബിട്ട് മൂടി നടപ്പാതയാക്കണമെന്ന് ഗ്രാമസഭയിൽ ഉന്നയിച്ചിട്ടും നടപടി ഉണ്ടായില്ലെന്ന് നാട്ടുകാർ പറഞ്ഞു.

സ്കൂട്ടറും ലോറിയും കൂട്ടിയിടിച്ച് യുവാവ് മരിച്ചു

പേരാവൂർ: പേരാവൂർ തെരുവിൽ ടിപ്പറും സ്‌കൂട്ടറും കൂട്ടിയിടിച്ച് സ്കൂട്ടർ യാത്രികനായ യുവാവ് മരിച്ചു. ആര്യപ്പറമ്പ് സ്വദേശി പുത്തൻവീട്ടിൽ മിഥുൻരാജാണ് (34) മരിച്ചത്. ഇന്നലെ രാവിലെ ഏഴരയോടെ ജോലിക്കായി പേരാവൂർ ഭാഗത്തേക്ക് പോകുന്നതിനിടെയാണ് അപകടം നടന്നത്. കൂടെയുണ്ടായിരുന്ന സഹയാത്രികയ്ക്ക് പരിക്കേറ്റു. ഇലക്‌ട്രീഷനായിരുന്നു മിഥുൻരാജ്. രാജൻ- പ്രേമ ദന്പതികളുടെ മകനാണ് മിഥുൻരാജ്. സഹോദരൻ: രാഹുൽ.

വ്യാപാരി കുടുംബസംഗമവും അനുമോദനവും

പയ്യാവൂർ: വ്യാപാരി വ്യവസായി സമിതി പയ്യാവൂർ യൂണിറ്റ് കുടുംബ സംഗമവും ഉന്നത വിജയികൾക്കുള്ള അനുമോദനവും പയ്യാവൂർ വൈഎംസിഎ ഹാളിൽ നടന്നു. സമിതി സംസ്ഥാന കമ്മിറ്റിയംഗം ചാക്കോ മുല്ലപ്പള്ളി ഉദ്ഘാടനം ചെയ്തു. യൂണിറ്റ് പ്രസിഡന്‍റ് വി. സോമരാജൻ അധ്യക്ഷത വഹിച്ചു. സാമൂഹിക പ്രവർത്തകൻ മിനേഷ് മണക്കാട് മുഖ്യപ്രഭാഷണം നടത്തി. ചടങ്ങിൽ എസ്എസ്എൽസി, പ്ലസ് ടു, സ്പോർട്സ് എന്നിവയിൽ ഉന്നത വിജയം കരസ്ഥമാക്കിയവരെയും യുഎസ്എസ് നേടിയവരെയും ഫലകവും കാഷ് അവാർഡും നൽകി അനുമോദിച്ചു. യൂണിറ്റ് സെക്രട്ടറി ഐബീഷ് പി. ബേബി, ജില്ലാ കമ്മിറ്റിയംഗം അജയൻ, കെ. തോമസ്, അജോ ജോസഫ് എന്നിവർ പ്രസംഗിച്ചു. അരവിന്ദാക്ഷൻ കൊതേരി ലഹരിക്കെതിരെയുള്ള ഏകാംഗ നാടകം "മൂക്കുത്തി' അവതരിപ്പിച്ചു.

ലോട്ടറി സ്റ്റാൾ അജ്ഞാതർ താഴിട്ട് പൂട്ടി

തളിപ്പറമ്പ്: രാത്രി ലോട്ടറി സ്റ്റാൾ അടച്ച് ഉടമ പോയതിന് പിന്നാലെ അജ്ഞാതർ സ്റ്റാൾ മറ്റൊരു താഴിട്ട് പൂട്ടി. ധർശാല എൻജിനിയറിംഗ് കോളേജിന് സമീപം ലോട്ടറി വില്പന നടത്തുന്ന ബക്കളം മൈലാട് സ്വദേശി ഷീമയുടെ ലോട്ടറി സ്റ്റാളാണ് പൂട്ടിയത്. ശനിയാഴ്ച രാത്രി സ്റ്റാൾ പൂട്ടിയതിന് ശേഷം ഇന്നലെ രാവിലെ തുറക്കാനെത്തിയപ്പോഴാണ് മറ്റൊരു പൂട്ട് കണ്ടത്. വിവിരമറിഞ്ഞെത്തിയ സിഐടിയു ലോട്ടറി തൊഴിലാളി അസോസിയേഷൻ നേതാക്കളും ചേർന്ന് പൂട്ട് മുറിച്ചു മാറ്റിയാണ് സ്റ്റാൾ തുറന്നത്. ലോട്ടറി വിറ്റ് ഉപജീവനം നടത്തുന്ന സ്ത്രീകൾ ഉൾപ്പടെയുള്ളവരെ ദ്രോഹിക്കുന്ന സമൂഹ്യവിരുദ്ധർക്കെതിരെ ശക്തമായ നടപടി സ്വീകരിക്കണമെന്ന് സിഐടിയു ആവശ്യപ്പെട്ടു. നേരത്തെ ബക്കളത്ത് നടത്തിയിരുന്ന ലോട്ടറി സ്റ്റാൾ ഷീമ ധർമശാലയിലേക്ക് മാറ്റിയതായിരുന്നു. ഷീമയുടെ പരാതിയൽ തളിപ്പറന്പ് പോലീസ് കേസെടുത്തു.

കാറും സ്കൂട്ടറും കൂട്ടിയിടിച്ച് യുവാവിന് പരിക്ക്

നടുവിൽ: കാറും സ്കൂട്ടറും കൂട്ടിയിടിച്ച് യുവാവിന് പരിക്ക്. സ്കൂട്ടർ യാത്രക്കാരനും നടുവിൽ സ്വദേശിയുമായ അബ്ദുള്ളക്കുട്ടിക്കാണ് (25) പരിക്കേറ്റത്. പടിഞ്ഞാറെ കവലയിൽ ശനിയാഴ്ച രാത്രിയാണ് അപകടം. ഇൻഡിക്കേറ്ററിട്ട് റോഡിന്‍റെ മറുഭാഗത്തേക്ക് വരികയായിരുന്ന കാറിൽ സ്കൂട്ടി വന്നിടിക്കുകയായിരുന്നു. പടപ്പേങ്ങാട് സ്വദേശിയുടേതാണ് കാറ്. അബ്ദുള്ളക്കുട്ടിക്ക് കാലുകളിലാണ് പരിക്കേറ്റത്. തളിപ്പറമ്പിലെ ആശുപത്രിയിൽ പ്രവേശിപ്പിച്ചു.

ഛത്തീസ്ഗഡ് സംഭവത്തിൽ പ്രതിഷേധിച്ചു

ശ്രീകണ്ഠപുരം: ഛത്തീസ്ഗഡിൽ കന്യാസ്ത്രീകളുടെ മേൽ ചുമത്തിയ മുഴവൻ കള്ളക്കേസുകളും പിൻവലിക്കുക, ക്രൈസ്തവ പീഡനം അവസാനിപ്പിക്കുക, ഭരണഘടന നൽകുന്ന അവകാശങ്ങൾ സംരക്ഷിക്കുക തുടങ്ങിയ ആവശ്യങ്ങളുന്നയിച്ച ശ്രീകണ്ഠപുരം ഉണ്ണിമിശിഹാ പള്ളി ഇടവക കൂട്ടായ്മ പ്രതിഷേധിച്ചു. ചെമ്പന്തൊട്ടി ഫൊറോന വികാരി ഫാ. ആന്‍റണി മഞ്ഞളാകുന്നേൽ ഉദ്ഘാടനം ചെയ്തു. ഇടവക വികാരി ഫാ. ജോസഫ് മഞ്ചപ്പള്ളി അധ്യക്ഷത വഹിച്ചു. ഉണ്ണിമിശിഹാ പള്ളിയിൽ നിന്നും ആരംഭിച്ച പ്രതിഷേധ ജാഥയിലും പൊതുസമ്മേളനത്തിലും നിരവധിപേർ പങ്കെടുത്തു. ഫാ. മാർട്ടിൻ പാഴുപറമ്പിൽ, ഡോ. മനുജോസഫ് വാഴപ്പിള്ളി, രാജു ചൂരപ്പാടി, റെജി കാര്യാങ്കൽ, ആന്‍റോ ജോസഫ്, ബേബി തൈക്കാനം, ഏബ്രഹാം കുറ്റിക്കാട്ടുകുന്നേൽ, സി.കെ. അലക്സ്, ഫ്രാൻസിസ് തോലമ്പുഴ, റെജി തോമസ്, ഫിലിപ്പ് കുട്ടി, ജോർജ് ജോസഫ്, റോസമ്മ പതുപ്പള്ളിൽ, സിസ്റ്റർ ജോനറ്റ്, സിസ്റ്റർ ജോസ്ന, മേരിക്കുട്ടി ജോൺസൻ എന്നിവർ നേതൃത്വം നല്കി. ആലക്കോട്: കന്യാസ്ത്രീകളെ കള്ളക്കേസിൽ കുടുക്കിയ ബിജെപി സർക്കാരിന്‍റെ ന്യൂനപക്ഷ വേട്ടയിൽ പ്രതിഷേധിച്ചു മൈനോരിറ്റി കോൺഗ്രസ്‌ ഇരിക്കൂർ നിയോജക മണ്ഡലം കമ്മിറ്റിയുടെ നേതൃത്വത്തിൽ ആലക്കോട് ടൗണിൽ പ്രതിഷേധ യോഗം നടത്തി. യുഡിഫ് ജില്ലാ ചെയർമാൻ പി.ടി. മാത്യു ഉദ്ഘാടനം ചെയ്തു. നിയോജക മണ്ഡലം ചെയർമാൻ ജോബി തൊണ്ടംകുളം അധ്യക്ഷത വഹിച്ചു. ടി.എൻ. സക്കീർ ഹുസൈൻ, എൻ.ആർ. മായിൻ, ജോസ് വട്ടമല, ജിൻസ് മാത്യു, സി.എച്ച്. മൊയ്തീൻ കുട്ടി, സനോജ് ചിറമട്ടൽ എന്നിവർ പ്രസംഗിച്ചു.

ആശുപത്രി കവാടത്തിലെ ഇരുന്പ് പൈപ്പ് പാത തകർന്നത് ഭീഷണിയാകുന്നു

തളിപ്പറമ്പ്: കന്നുകാലികൾ ആശുപത്രി വളപ്പിൽ കടക്കാതിരിക്കാനും വാഹനങ്ങൾ കടന്നുപോകുന്നതിനുമായി തളിപ്പറന്പ് താലൂക്ക് ആശുപത്രിയുടെ ഗേറ്റിലെ ഓവുചാലിന് മുകളിലായി സ്ഥാപിച്ച ഇരുന്പു പൈപ്പുകൾ ദ്രവിച്ച് തകർന്നത് അപകടഭീഷണിയുയർത്തുന്നു. നിരത്തി സ്ഥാപിച്ച പൈപ്പകുൾ പലതും പൊട്ടി കൂർത്ത് ഭാഗങ്ങൾ കാൽനടയാത്രക്കാർക്കും കടന്നുപോകുന്ന വാഹനങ്ങൾക്കും ഭീഷണി സൃഷ്ടിക്കുകയാണ്. ചില പൈപ്പുകൾ പൊട്ടിയതു മൂലമുണ്ടായ വലിയ വിടവിൽ ഒരാളുടെ കാൽ താഴ്ന്നു പോയിരുന്നു. അപകട ഭീഷണി ഉയർത്തുന്ന പൈപ്പുകൾ എത്രയും പെട്ടെന്ന് മാറ്റിസ്ഥാപിക്കണമെന്ന ആവശ്യം ശക്തമാണ്.

ഭിന്നശേഷി ജീവനക്കാരുടെ സുപ്രീം കോടതി വിധികൾ ഉടൻ നടപ്പിലാക്കണം: ഡിഎഇഎ

കണ്ണൂർ: സൂപ്പർ ന്യൂമററി തസ്തികയിൽ ജോലി ചെയ്യുന്ന ഭിന്നശേഷി ജീവനക്കാരുടെ തസ്തിക ഏകീകരിച്ചു മറ്റ് സ്ഥിര ജീവനക്കാർക്ക് അനുവദിക്കപ്പെട്ടിട്ടുള്ള സർവീസ് ആനുകൂല്യങ്ങൾ പുനഃസ്ഥാപിക്കണമെന്ന സുപ്രീം കോടതി വിധിയും, പ്രമോഷൻ സംവരണവുമായി ബന്ധപ്പെട്ട സുപ്രീം കോടതി വിധിയും മുഴുവൻ സർക്കാർ ഭിന്നശേഷി ജീവനക്കാർക്കും പ്രയോജനം കിട്ടുന്ന രീതിയിൽ പുറപ്പെടുവിക്കണമെന്നും ഡിഫറന്‍റ്‌ലി ഏബ്ൾഡ് എംപ്ലോയീസ് അസോസിയേഷൻ (ഡിഎഇഎ) സർക്കാരിനോട് ആവശ്യപ്പെട്ടു. ഡിഎഇഎ ജില്ലാ പ്രവർത്തക യോഗം കണ്ണൂർ സ്പോർട്സ് കൗൺസിൽ ഹാളിൽ സംസ്ഥാന വൈസ് പ്രസിഡന്‍റ് കെ.എൻ. ആനന്ദ് നാറാത്ത് ഉദ്ഘാടനം ചെയ്തു. ജില്ലാ പ്രസിഡന്‍റ് ഷാജി പി. മുഴപ്പിലങ്ങാട് അധ്യക്ഷത വഹിച്ചു. കെ. കിഷോർ, പി.പി. തനൂജ, ഇ. സരിത, വി.വി. സുരേന്ദ്രൻ തുടങ്ങിയവർ പ്രസംഗിച്ചു. സംഘടന ഉന്നയിച്ചിട്ടുള്ള വിഷയങ്ങളിൽ സർക്കാർ ഉടനടി തീരുമാനം എടുക്കണമെന്ന് ആവശ്യപ്പെട്ടുകൊണ്ട് മുഖ്യമന്ത്രി, ഗവർണർ, പ്രതിപക്ഷ നേതാവ്, വകുപ്പ് മന്ത്രി, ധനകാര്യ മന്ത്രി, നിയമ മന്ത്രി, ചീഫ് സെക്രട്ടറി എന്നിവർക്ക് സംസ്ഥാന സമിതി നിവേദനം നൽകിയതായും കെ.എൻ. ആനന്ദ് നാറാത്ത് അറിയിച്ചു.

ടിഎസ്എസ്എസ് കോട്ടൂർ ട്രസ്റ്റ് വാർഷിക പൊതുയോഗം

കോട്ടൂർ: തലശേരി സോഷ്യൽ സർവീസ് സൊസൈറ്റിയുടെ (ടിഎസ്എസ്എസ്) ആഭിമുഖ്യത്തിലുള്ള കോട്ടൂർ ട്രസ്റ്റിന്‍റെ വാർഷിക പൊതുയോഗം ടിഎസ്എസ്എസ് അതിരൂപത പ്രസിഡന്‍റ് ജോഷി കുന്നത്ത് ഉദ്ഘാടനം ചെയ്തു. യൂണിറ്റ് ഡയറക്ടർ ഫാ. ജോബി എടത്തനാല്‍ സിഎസ്ടി അധ്യക്ഷത വഹിച്ചു. യൂണിറ്റ് പ്രസിഡന്‍റ് ഡോ. ഷിജോ ജോസ് മഞ്ചപ്പിള്ളിൽ ആമുഖപ്രഭാഷണവും ടിഎസ്എസ്എസ് പ്രോഗ്രാം മാനേജർ ലിസി ജിജി മുഖ്യപ്രഭാഷണവും നടത്തി. യൂണിറ്റ് സെക്രട്ടറി ലിറ്റ്ന മനോജ് വാർഷിക റിപ്പോർട്ടും കണക്കും അവതരിപ്പിച്ചു. കോട്ടൂർ പാരിഷ് കോ-ഓർഡിനേറ്റർ സൈജോ വട്ടക്കാവുങ്കൽ, വർഗീസ് പുളിയൻപ്ലാവിൽ എന്നിവർ പ്രസംഗിച്ചു.

ചെന്പേരിയിൽ അടച്ചിട്ട കടയ്ക്കുള്ളിൽ തീപിടിത്തം; ലക്ഷങ്ങളുടെ നഷ്ടം

ചെമ്പേരി: ചെന്പേരി ടൗണിലെ വ്യാപാര സ്ഥാപനത്തിലുണ്ടായ തീപിടിത്തത്തിൽ ലക്ഷങ്ങളുടെ നഷ്ടം. മൂന്ന് നിലകളിലായുള്ള സാധനങ്ങൾ കത്തിനശിച്ചു. ലിജോ സ്റ്റോഴ്സ് എന്ന കടയിലാണ് ഇന്നലെ വൈകുന്നേരം അഞ്ചോടെ തീപിടിത്തമുണ്ടായത്. ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് കരുതുന്നത്. ഇന്നലെ ഞായാറാഴ്ച കട തുറന്നിരുന്നില്ല. അറ്റകുറ്റിപ്പണിക്കായി കെഎസ്ഇബി അധികൃതർ വൈദ്യത ലൈൻ രാവിലെ ഓഫ് ചെ്യത ശേഷം വൈകുന്നേരമാണ് ഓൺ ചെയ്തത്. ഇതിനു പിന്നാലെയാണ് കടയിൽ തീപിടിത്തമുണ്ടായത്. ലൈനിൽ കുടി അമിത വോൾട്ടേജ് പ്രവഹിച്ചതാകാം കടയിലെ ഉപകരണങ്ങൾ കത്താനിടയാക്കിയതെന്നും സംശയം ഉയരുന്നുണ്ട്. കെട്ടിടത്തിന്‍റെ മുകൾ ഭാഗത്ത് നിന്ന് പുക ഉയരുന്നത് മറ്റൊരു വ്യാപാരിയുടെ ശ്രദ്ധയിൽപ്പെട്ടതോടെയാണ് തീപിടിത്ത വിവരം അറിയുന്നത്. വിവരമറിഞ്ഞെത്തിയവർ കടയിലെ വൈദ്യുതി ബന്ധം വിഛേദിച്ചു. കുടിയാന്മല പോലീസും തളിപ്പറമ്പിൽ നിന്ന് അഗ്നിരക്ഷാസേനയും സ്ഥലത്തെത്തിയിരുന്നു. തീ സമീപത്തെ കടകളിലേക്ക് പടരുന്നതിന് മുന്പ് അണയ്ക്കാനായതിനാലാണ് വൻ ദുരന്തം ഒഴിവായത്. ഇതോടൊപ്പം ടൗണിലെ മറ്റ് ചില വ്യാപാര സ്ഥപനങ്ങളിലും വൈദ്യുതി ഉപകരണങ്ങൾ കത്തി നശിച്ചിട്ടുണ്ട്. റീഗൽ ബേക്കറിയിലെ ഫ്രിഡ്ജ്, മണലുംകുഴി വെജിറ്റബിൾസിലെ ഫ്രീസർ, നീതി ലാബിന്‍റെ ലൈറ്റ് ബോർഡ്, ഭാരത് ഇലക്‌‌ട്രിക്കൽസിലെ വൈദ്യുത മീറ്റർ, സാജു ബ്രദേഴ്സിലെ ലൈറ്റുകൾ എന്നിവ കത്തിനശിച്ചവയിൽ പെടുന്നു.

വിദേശനാണ്യ വിനിമയ ചട്ടലംഘനം: കുണിയ കോളജിനെതിരെ ഇഡി അന്വേഷണം

കാസര്‍ഗോഡ്: രാജ്യത്തിന്‍റെ വിദേശനാണ്യ, വിദേശ സംഭാവന നിയമങ്ങള്‍ ലംഘിച്ചുവെന്നാരോപിച്ച് കുണിയ കോളജ് ഓഫ് ആര്‍ട്സ് ആന്‍ഡ് സയന്‍സസിന്‍റെ നടത്തിപ്പുകാരായ കുഞ്ഞഹമ്മദ് മുസ്‌‌ലിയാര്‍ മെമ്മോറിയല്‍ ട്രസ്റ്റിനിനെതിരെ എന്‍ഫോഴ്സ്മെന്‍റ് ഡയറക്ടറേറ്റ് അന്വേഷണം ആരംഭിച്ചു. ട്രസ്റ്റിന് യുഎഇ ആസ്ഥാനമായുള്ള വ്യവസായി ഇബ്രാഹിം അഹമ്മദ് അലിയില്‍നിന്നു 2021 മുതല്‍ 220 കോടി രൂപ ലഭിച്ചതായി ഏജന്‍സി പുറത്തിറക്കിയ പ്രസ്താവനയില്‍ പറയുന്നു. ട്രസ്റ്റ് 2010 ലെ വിദേശ സംഭാവന നിയന്ത്രണ നിയമപ്രകാരം (എഫ്സിആര്‍എ) രജിസ്റ്റര്‍ ചെയ്തിട്ടില്ല. കൂടാതെ വിദേശത്തുനിന്നു ഫണ്ട് സ്വീകരിക്കുന്നതിന് കേന്ദ്ര ആഭ്യന്തര മന്ത്രാലയത്തിന്‍റെ അനുമതി വാങ്ങുകയോ എഫ്സിആര്‍എ ബാങ്ക് അക്കൗണ്ട് എടുക്കുകയോ ചെയ്തിട്ടില്ല. ട്രസ്റ്റ് പൊതുജനസംഭാവനകള്‍ അഭ്യര്‍ഥിച്ചിട്ടില്ലാത്തതിനാല്‍ എഫ്സിആര്‍എ രജിസ്‌ട്രേഷന്‍ ആവശ്യമില്ലെന്ന് ഒരു ട്രസ്റ്റ് ഡയറക്ടര്‍ പറഞ്ഞു. തന്‍റെ ജന്മനാട്ടില്‍ ലോകോത്തര വിദ്യാഭ്യാസ സ്ഥാപനം നിര്‍മിക്കാന്‍ സഹായിക്കുന്നതിനായി ഇബ്രാഹിം അഹമ്മദ് അലിയുടെ സ്വകാര്യസ്വത്തില്‍നിന്നാണ് പണം ലഭിച്ചതെന്നും അദ്ദേഹം വ്യക്തമാക്കി. എന്നാല്‍ ഈ അവകാശവാദം നിയമപരമായി നിലനില്‍ക്കില്ലെന്ന് ഇഡി വാദിക്കുന്നു. ജൂലൈ 31ന് ഏജന്‍സിയുടെ കൊച്ചി സോണല്‍ ഓഫീസിലെ ഉദ്യോഗസ്ഥര്‍ കാസര്‍ഗോഡുള്ള ട്രസ്റ്റുമായി ബന്ധപ്പെട്ട രണ്ടു സ്ഥലങ്ങളില്‍ റെയ്ഡ് നടത്തി. കഴിഞ്ഞ നാലു വര്‍ഷത്തിനിടെ ട്രസ്റ്റിന് 220 കോടി രൂപ ലഭിച്ചതായി അന്വേഷണ ഉദ്യോഗസ്ഥര്‍ കണ്ടെത്തിയതായി പറയുന്നു. ഫണ്ടുകള്‍ അണ്‍സെക്യുവേര്‍ഡ് ലോണുകള്‍ ആയി രേഖപ്പെടുത്തിയിട്ടുണ്ട്. എന്നിരുന്നാലും വായ്പാ കരാറുകളോ പലിശ നിബന്ധനകളോ തിരിച്ചടവ് ഷെഡ്യൂളുകളോ ഉണ്ടായിരുന്നില്ല. ഇതുവരെ തിരിച്ചടവുകള്‍ നടത്തിയിട്ടില്ല. ഇബ്രാഹിം യുഎഇയില്‍ രജിസ്റ്റര്‍ ചെയ്തിട്ടുള്ള തന്‍റെ സ്ഥാപനമായ യൂണിവേഴ്‌സല്‍ ലൂബ്രിക്കന്‍റ്സ് എല്‍എല്‍സിയില്‍നിന്ന് പണം കൈമാറിയതായും ഇഡി ചൂണ്ടിക്കാട്ടി. കുണിയ സ്വദേശി ഇബ്രാഹിം ഗള്‍ഫിലെ പെട്രോളിയം, ലൂബ്രിക്കന്‍റ് മേഖലയില്‍ വിജയകരമായ ഒരു ബിസിനസ് സാമ്രാജ്യം കെട്ടിപ്പടുത്തിട്ടുണ്ട്. വിദ്യാഭ്യാസത്തില്‍ ശ്രദ്ധ കേന്ദ്രീകരിക്കുന്നതിനായി കുഞ്ഞഹമ്മദ് മുസ്‌ലിയാര്‍ മെമ്മോറിയല്‍ ട്രസ്റ്റ് സ്ഥാപിക്കുകയും 2023 ല്‍ തന്‍റെ ജന്മനാട്ടില്‍ 100 ഏക്കര്‍ കാമ്പസില്‍ കുണിയ കോളജ് ഓഫ് ആര്‍ട്‌സ് ആന്‍ഡ് സയന്‍സസ് ആരംഭിക്കുകയും ചെയ്തു. ജീവകാരുണ്യ ഉദ്ദേശ്യം ഉണ്ടായിരുന്നിട്ടും ധനസഹായം നല്‍കുന്ന രീതി 1999 ലെ ഫോറിന്‍ എക്‌സ്‌ചേഞ്ച് മാനേജ്മെന്‍റ് ആക്റ്റിലെേ (ഫെമ) പ്രധാന വ്യവസ്ഥകളെ ലംഘിക്കുന്നുവെന്ന് ഇഡി ഉദ്യോഗസ്ഥര്‍ പറയുന്നു. വിദേശ ഫണ്ടിന്‍റെ ഒരു ഭാഗം ഇന്ത്യയില്‍ കൃഷിഭൂമി വാങ്ങാന്‍ ഉപയോഗിച്ചതായി ആരോപിക്കപ്പെടുന്നു. ഇതു നിലവിലുള്ള ഫെമ ചട്ടങ്ങള്‍ക്ക് വിരുദ്ധമായ നീക്കമാണെന്ന് ഇഡി പറഞ്ഞു. ഇബ്രാഹിമില്‍നിന്നു ട്രസ്റ്റിന് 2.49 കോടി രൂപ പണമായി ലഭിച്ചതായും ഏജന്‍സി കണ്ടെത്തി. ഇതു ഫെമ വ്യവസ്ഥകളെ കൂടുതല്‍ ലംഘിക്കുന്നുണ്ടെന്നും ഏജന്‍സി പറയുന്നു. എഫ്സിആര്‍എയുടെ സെക്ഷന്‍ 2(1)(എച്ച്) പ്രകാരം പ്രവാസി ഇന്ത്യക്കാര്‍ ഉള്‍പ്പെടെയുള്ള വിദേശ സ്രോതസില്‍ നിന്നുള്ള ഏതൊരു സംഭാവനയും കൈമാറ്റവും കറന്‍സി ഡെലിവറിയും വിദേശ സംഭാവനയായി കണക്കാക്കുന്നു. നിയമത്തിലെ സെക്‌‌ഷന്‍ 11 അനുസരിച്ച്, വിദ്യാഭ്യാസ, സാംസ്‌കാരിക, മത, സാമൂഹിക അല്ലെങ്കില്‍ സാമ്പത്തിക പ്രവര്‍ത്തനങ്ങളില്‍ ഏര്‍പ്പെട്ടിരിക്കുന്ന ഏതൊരു സ്ഥാപനവും വിദേശ ഫണ്ട് സ്വീകരിക്കുന്നതിന് മുമ്പ് എഫ്സിആര്‍എയ്ക്ക് കീഴില്‍ രജിസ്റ്റര്‍ ചെയ്യുകയോ ആഭ്യന്തര മന്ത്രാലയത്തില്‍നിന്ന് മുന്‍കൂര്‍ അനുതി നേടുകയോ വേണം. ട്രസ്റ്റ് രണ്ടും ചെയ്തില്ല. ഫലത്തില്‍ 220 കോടി രൂപയുടെ മുഴുവന്‍ വരവും ഇതോടെ നിയമവിരുദ്ധമായെന്ന് ഇഡി പറഞ്ഞു.

ഷംസീറിന്‍റെ ഭാര്യയുടെ നിയമനം; കോടതിയെ സമീപിക്കുമെന്ന്

കണ്ണൂർ: നാലുവർഷം സേവനം പൂർത്തിയാക്കിയ മറ്റ് ഡിപ്പാർട്ട്മെന്‍റുകളിലെ മുഴുവൻ ഗസ്റ്റ് അധ്യാപകരെയും പിരിച്ചുവിടുകയും നിയമസഭാ സ്പീക്കർ ഷംസീറിന്‍റെ ഭാര്യ ജോലിചെയ്യുന്ന ടീച്ചർ എഡ്യൂക്കേഷൻ സെന്‍ററിലെ ഗസ്റ്റ് അധ്യാപകർക്ക് മാത്രമായി പ്രത്യേക പരിഗണന നൽകുകയും ചെയ്തത് സ്വജനപക്ഷപാതത്തിന്‍റെ ഒടുവിലത്തെ ഉദാഹരണമാണെന്നും എല്ലാവർക്കും ഒരേ നീതി ലഭ്യമാക്കുവാൻ ഉടൻ കോടതിയെ സമീപിക്കുമെന്നും കണ്ണൂർ സർവകലാശാല സെനറ്റേഴ്സ് ഫോറം കൺവീനർ ഡോ.ഷിനോ പി. ജോസ് അറിയിച്ചു. വൈസ് ചാൻസലർ സിൻഡിക്കേറ്റ് അംഗങ്ങളുടെ നീതിയുക്തമല്ലാത്ത നിലപാടിന് ഒപ്പം നിൽക്കുന്നത് ദൗർഭാഗ്യകരമാണ്. വിവാദമായതിന് ഒരിടവേളയ് ക്കുശേഷം നിയമസഭാ സ്പീക്കറുടെ ഭാര്യ ടീച്ചർ എഡ്യുക്കേഷൻ സെന്‍ററിൽ വീണ്ടും ജോലിയിൽ പ്രവേശിച്ചു എന്നത് അക്കാദമിക് സമൂഹത്തെ അധികാര ഗർവ് കാട്ടി ഇടതുപക്ഷം വെല്ലുവിളിക്കുന്നതിന് തുല്യമാണെന്നും സെനറ്റേഴ്സ് ഫോറം ആരോപിച്ചു. അതിനിടയിൽ എല്ലാവർക്കും ഒരേ നീതി ഉറപ്പാക്കണമെന്നും ടീച്ചർ എഡ്യുക്കേഷൻ സെന്‍ററിലെ സ്വജനപക്ഷപാത വിവാദം അന്വേഷിക്കണമെന്നും ആവശ്യപ്പെട്ട് സെനറ്റേഴ്‌സ് ഫോറം നൽകിയ പരാതിക്ക് മറുപടിയായി സർക്കാരിലേക്ക് സിൻഡിക്കേറ്റ് നിർദ്ദേശപ്രകാരം ക്ലാരിഫിക്കേഷൻ ചോദിച്ചിട്ടുണ്ടെന്നും ടീച്ചർ എഡ്യുക്കേഷൻ സെന്‍ററിലെ ഗസ്റ്റ് അധ്യാപകരുടെ കാര്യത്തിൽ തീരുമാനം മറുപടി വന്നതിനു ശേഷം കൈക്കൊള്ളുമെന്നും രജിസ്ട്രാർ ഫോറം കൺവീനറെ അറിയിച്ചു. അഭ്യസ്തവിദ്യരായ നൂറുകണക്കിന് തൊഴിൽ അന്വേഷകരെ മാറ്റിനിർത്തി നിയമസഭാ സ്പീക്കറുടെ ഭാര്യയ്ക്ക് പ്രത്യേക പരിഗണന നൽകിയത് പൊതുസമൂഹത്തിൽ ചർച്ചയാക്കുമെന്നും നിയമ വ്യവസ്ഥ ഉപയോഗിച്ച് ഈ ബന്ധു നിയമനം ചോദ്യം ചെയ്യുമെന്നും സെനറ്റേഴ്സ് ഫോറം അറിയിച്ചു.

ശ്രവണ: നവീകരിച്ച കോഴിക്കോട് യൂണിറ്റ് ഉദ്ഘാടനം ചെയ്തു

കോഴിക്കോട്: കേരളത്തിലെ പ്രമുഖ ശ്രവണ പരിചരണ സ്ഥാപനമായ ശ്രവണ ഹിയറിംഗ് എയ്ഡ് സെന്‍ററിന്‍റെ നവീകരിച്ച കോഴിക്കോട് യൂണിറ്റ് വിപുലമായ സൗകര്യങ്ങളോടെ മാവൂർ റോഡ് വൈഎംഎസിഎ ജംഗ്ഷനിലെ എരോത് സെന്‍റർ ബിൽഡിംഗിൽ പ്രവർത്തനമാരംഭിച്ചു. എം.കെ. രാഘവൻ എംപി ഉദ്ഘാടനം ചെയ്തു. കേൾവിക്കുറവ് നിശബ്ദമായി നമ്മെ ബാധിക്കുന്ന ഒരു പ്രശ്നമാണെന്നും ഇത്തരം സാഹചര്യങ്ങളിലൂടെ കടന്നു പോകുന്നവർക്ക് ശ്രവണ നൽകുന്ന പരിചരണവും കരുതലും വലിയ ആശ്വാസമാണെന്നും എം.കെ. രാഘവൻ എംപി പറഞ്ഞു. സാന്പത്തിക പ്രശ്നങ്ങളാൽ ശ്രവണ സഹായി വാങ്ങാൻ കഴിയാത്ത അഞ്ചു പേർക്ക് ഉദ്ഘാടനത്തോടനുബന്ധിച്ച് ശ്രവണ സഹായികൾ വിതരണം ചെയ്തു. നവീകരിച്ച യൂണിറ്റിന്‍റെ ഉദ്ഘാടനത്തോടനുബന്ധിച്ച് "ഹിയറിംഗ് എയ്ഡ് അപ്ഗ്രേഡ് ആൻഡ് എക്സ്ചേഞ്ച് ഫെസ്റ്റിവൽ’ എന്ന ഓഫറും പ്രഖ്യാപിച്ചിട്ടുണ്ട്. ഈ ഓഫറിലൂടെ ഉപഭോക്താക്കൾക്ക് തങ്ങളുടെ പഴയ ഹിയറിംഗ് എയ്ഡുകൾ നൽകി ആകർഷകമായ വിലക്കിഴിവിൽ പുതിയവ സ്വന്തമാക്കാനാകും. ആധുനിക സാങ്കേതികവിദ്യ, പരിചയസന്പന്നരായ ഓഡിയോളജിസ്റ്റുകൾ, വ്യക്തിഗത പരിചരണം എന്നിവയിലൂടെ ഉപഭോക്താക്കൾക്ക് മികച്ച സേവനം നൽകാനാണ് ശ്രവണ എപ്പോഴും ശ്രമിക്കുന്നതെന്ന് മാനേജിംഗ് ഡയറക്ടർ ശ്രീജിത്ത് പറഞ്ഞു. ഉദ്ഘാടന ചടങ്ങിൽ ഐഎംഎ കോഴിക്കോട് ജില്ലാ പ്രസിഡന്‍റ് ഡോ. ശങ്കർ മാഹാദേവൻ, കോർപറേഷൻ സ്റ്റാൻഡിംഗ് കമ്മിറ്റി ചെയർമാൻ പി. ദിവാകരൻ എന്നിവർ പ്രസംഗിച്ചു. ശ്രവണ ഡയറക്ടറും ചീഫ് ഓഡിയോളജിസ്റ്റുമായ അശ്വതി ശ്രീജിത്ത് സ്വാഗതവും അഡ്മിനിസ്ട്രേറ്റർ ജിന്‍റോ എം. തോമസ് നന്ദിയും പറഞ്ഞു.

വിട പറഞ്ഞത് കണ്ണൂരിന്‍റെ അത്യപൂർവ മനുഷ്യസ്നേഹി ; "രണ്ടു രൂപ ഡോക്‌ടർ'

കണ്ണൂർ: മനുഷ്യസ്നേഹിയായ ആതുരസേവനത്തെപ്പറ്റി വ്യക്തമായ കാഴ്ചപ്പാടുള്ള ഡോക്ടർ ഗോപാലൻ നമ്പ്യാർ തന്‍റെ മക്കൾ ഡോക്ടർമാർ ആയപ്പോൾ അവർക്ക് കൃത്യമായ ഉപദേശം കൊടുത്തു. എങ്ങനെയായിരിക്കണം ഒരു ഡോക്ടർ സമൂഹത്തിലെ രോഗികളോട് പെരുമാറേണ്ടത് എന്നതിന്‍റെ സാക്ഷ്യപത്രങ്ങളായിരുന്നു പിന്നീട് അവരുടെ ഭിഷഗ്വര ജീവിതം. പണം ഉണ്ടാക്കുക എന്ന ആത്യന്തിക ലക്ഷ്യത്തോടെയാണ് നിങ്ങൾ ഡോക്ടർ ആകുന്നതെങ്കിൽ ഇന്നുതന്നെ ഈ പണി ഉപേക്ഷിച്ച് വല്ല ബാങ്ക് കൊള്ളക്കും പൊയ്ക്കോളൂവെന്നാണ് ആ മനുഷ്യസ്നേഹി മക്കളോട് പറഞ്ഞത്. ആ അച്ഛന്‍റെ വാക്കുകൾ ഹൃദയത്തിൽ ഏറ്റുവാങ്ങിക്കൊണ്ട് തന്‍റെ ജീവിതം സമൂഹത്തിലെ പാവപ്പെട്ടവർക്ക് വേണ്ടി ചെലവഴിച്ച മഹനീയ വ്യക്തിത്വത്തിന്‍റെ നേർരൂപമായിരുന്നു അന്തരിച്ച ഡോക്ടർ രൈരു ഗോപാൽ. ഏറെക്കാലം രണ്ടുരൂപയായിരുന്നു അദ്ദേഹത്തിന്‍റെ ഫീസ്. " രണ്ടു രൂപ ഡോക്ടര്‍ ' എന്ന വിളിപ്പേരില്‍ പ്രശസ്തനായിരുന്നു അദ്ദേഹം. മരുന്നും പരിശോധനയുമടക്കം നാല്‍പ്പതോ അമ്പതോ രൂപ മാത്രമാണ് രോഗികളില്‍നിന്നും വാങ്ങുക. പിന്നീട് ഫീസ് 10 രൂപയാക്കി. നിര്‍ധനരോഗികളില്‍നിന്ന് ഈ തുച്ഛമായ ഫീസ് പോലും അദ്ദേഹം വാങ്ങിയിരുന്നില്ല. മാത്രമല്ല, ആവശ്യമായ മരുന്നുകള്‍ സൗജന്യമായി നല്‍കുകയും ചെയ്തിരുന്നു. മൂന്നുദിവസത്തിനു ശേഷവും രോഗം മാറിയില്ലെങ്കില്‍,വീണ്ടുമെത്തുന്ന രോഗികളില്‍നിന്ന് ഫീസ് ഈടാക്കില്ലെന്നു മാത്രമല്ല, മരുന്നുകള്‍ സൗജന്യമായി നല്‍കുകയും ചെയ്തിരുന്നു. കണ്ണൂര്‍ ജില്ലയില്‍ നിന്നു മാത്രമല്ല, അയല്‍ ജില്ലകളില്‍നിന്നു പോലും ഡോക്ടറെ കാണാന്‍ ആളുകളെത്തിയിരുന്നു. രോഗികളുടെ സമയം വില പ്പെട്ടതാണെന്ന് മനസിലാക്കിയായിരുന്നു ഡോ. രൈരു ഗോപാലിന്‍റെ പ്രവര്‍ത്തനം. ജോലിക്കു പോകേണ്ട തൊഴിലാളികള്‍ക്കും കൂലിപ്പണിക്കാര്‍ക്കും വിദ്യാര്‍ഥികള്‍ക്കുമെല്ലാം സൗകര്യപ്രദമാകുന്ന വിധത്തില്‍ പുലര്‍ച്ചയായിരുന്നു പരിശോധന. ചെറുപ്പത്തിൽ പുലര്‍ച്ചെ മൂന്നുമുതല്‍ ഡോക്ടര്‍ പരിശോധന തുടങ്ങിയിരുന്നു. അന്നൊക്കെ മുന്നൂറിലേറെ രോഗികളുണ്ടാകും. പിന്നീട്, പരിശോധന പുലർച്ചെ ആറുമുതലാക്കി. പുലര്‍ച്ചെ 2.15ന് എഴുന്നേല്‍ക്കുന്നതോടെയാണ് ഡോക്‌ടറുടെ ഒരുദിവസം ആരംഭിക്കുന്നത്. നേരെ പശുത്തൊഴുത്തിലേക്ക്. തൊഴുത്ത് വൃത്തിയാക്കി പശുക്കളെ കുളിപ്പിച്ച് പാല്‍ കറന്നെടുക്കും. ശേഷം കുളികഴിഞ്ഞ് പൂജാ മുറിയിലേക്ക്. അഞ്ചരമുതല്‍ പത്രം വായനയും പാല്‍ വിതരണവും. തളാപ്പ് എൽഐസി ഓഫീസിന് സമീപത്തെ വീട്ടിലാണ് 35 വർഷം രോഗികളെ പരിശോധിച്ചത്. ഇവിടെ രാവിലെ ആറുമുതല്‍ രോഗികളെത്തി തുടങ്ങും. എണ്ണം തൊണ്ണൂറും നൂറുമൊക്കെ കടക്കും. രാവിലെ 10 വരെ പരിശോധന നീളും. പിന്നീട്, താണ മാണിക്കക്കാവിനടുത്ത് " ലക്ഷ്മി' വീട്ടിലാണ് 10 വർഷത്തോളമായി രോഗികളെ പരിശോധിച്ചിരുന്നത്. ആരോഗ്യം കുറഞ്ഞതോടെ രോഗികളുടെ എണ്ണവും ക്രമേണ കുറച്ചു. പരിശോധിക്കാന്‍ വയ്യാതായതോടെ പരിശോധന നിർത്തിയതും വാർത്തയായിരുന്നു. 18 ലക്ഷം രോഗികള്‍ക്ക് മരുന്നും സ്‌നേഹവും കുറിച്ചുകൊടുത്താണ് ഡോക്ടര്‍ ജോലിയിൽനിന്ന് വിരമിച്ചത്. എന്‍റെ ജോലി ചെയ്യാനുള്ള ആരോഗ്യം ഇന്നെനിക്കില്ല. അതുകൊണ്ട് രോഗികളെ പരിശോധിക്കുന്നതും മരുന്ന് കൊടുക്കുന്നതും നിര്‍ത്തുകയാണെന്ന ബോര്‍ഡ് ഗേറ്റില്‍ തൂക്കിയാണ് അമ്പത് വര്‍ഷത്തിലേറെ രോഗികള്‍ക്കൊപ്പം ജീവിച്ച ഡോക്ടര്‍ ലളിതമായി ജോലിയില്‍നിന്ന് വിരമിച്ചത്. 2024 മേയ് എട്ടിനായിരുന്നു ഇത്. ഈ കുറിപ്പ് മന്ത്രി മുഹമ്മദ് റിയാസ് ഫേസ്ബുക്കിൽ പങ്കുവച്ചതും ചർച്ചയായിരുന്നു.

എന്നു തീരും നരകയാത്ര

ഇരിട്ടി: മാക്കൂട്ടം ചുരം അന്തർ സംസ്ഥാനപാതയിൽ ദുരിതവഴികൾ താണ്ടി യാത്രക്കാർ. റോഡേത് കുഴിയേത് എന്നു തിരിച്ചറിയാൻ കഴിയാതെ ഇരുചക്ര വാഹനം മുതൽ വലിയ ചരക്കുവാഹങ്ങൾ വരെ നട്ടം തിരിയുകയാണ്. മുന്പ് അരമണിക്കൂറിൽ ചുരം കടക്കാമായിരുന്നു. ഇപ്പോൾ കുറഞ്ഞത് ഒന്നര മണിക്കൂറാണ് യാത്രയ്ക്കു വേണ്ടത്. എത്ര പരിചയസമ്പന്നനായ ഡ്രൈവ റായാലും കുഴിയിൽ വീണ് നടുവൊടിയാതെ യാത്രചെയ്യാൻ കഴിയാത്ത സാഹചര്യമാണ്. കൂട്ടുപുഴ മുതൽ മാക്കൂട്ടം ചെക്ക് പോസ്റ്റ് വരെയുള്ള അഞ്ചു കിലോമീറ്ററും പെരുമ്പാടി മുതൽ നാലു കിലോമീറ്റർ കൂട്ടുപുഴ ഭാഗത്തേക്കുമാണ് റോഡ് പൂർണമായി തകർന്നുകിടക്കുന്നത്. ബാക്കിയുള്ള ദൂരം രണ്ട് റീച്ചുകളിലായി നാലു കിലോമീറ്റർ വീതികൂട്ടിയും പുനർനിർമാണം ന‌ടത്തിയും ബാക്കി അറ്റകുറ്റപ്പണികളും പൂർത്തിയാക്കിയിരുന്നു. ദിനം പ്രതി നൂറുകണക്കിന് യാത്രാവാഹനങ്ങളും അതിൽ കൂടുതൽ ചരക്കു വാഹനങ്ങളും കടന്നുപോകുന്ന ചുരംപാത കർണാടക സംസ്ഥാന പാത 91 ന്‍റെ ഭാഗമാണ്. ചരക്ക്നീക്കം ദുർഘടം; മരങ്ങളും ഭീഷണി ചുരംപാത വഴി ദിനം പ്രതി ആയിരത്തിലധികം യാത്രാവാഹനങ്ങളും അത്രത്തോളം ചരക്ക് വാഹനങ്ങളും കടന്നുപോകുന്നുണ്ട്. ബംഗളൂരുവിൽനിന്ന് 30 ഓളം ടൂറിസ്റ്റ് ബസുകളും അത്രത്തോളം കേരള, കർണാടക ആർടിസി ബസുകളും സ്വകാര്യ ബസുകളും സർവീസ് നടത്തുന്നുണ്ട്. കണ്ണൂർ, കോഴിക്കോട് ഭാഗങ്ങളിലേക്ക് പച്ചക്കറികളും മുട്ടയും കോഴിയും എത്തുന്നത് ചുരംപാത വഴിയാണ്. യാത്രാ സമയത്തിലെ വർധനയും വാഹനങ്ങളുടെ കേടുപാടുകളും വലുതും ചെറുതുമായ ചരക്ക് വാഹനങ്ങൾക്ക് വലിയ പ്രതിസന്ധിയാണ് സൃഷ്ടിക്കുന്നത്. വർഷങ്ങൾക്ക് മുന്പ് നവീകരണം നടത്തിയശേഷം 16 കിലോമീറ്റർ വരുന്ന ചുരം പാതയിൽ പൂർണതോതിലുള്ള നവീകരണം പിന്നീട് ഉണ്ടായിട്ടില്ല. കൂടാതെ മരങ്ങൾ ഒടിഞ്ഞുവീഴുന്നതും ചുവടെ നിലംപൊത്തുന്നതുമാണ് ചുരം പാതയിലെ മറ്റൊരു ഭീഷണി. ഇക്കുറി കാലവർഷം തുടങ്ങിയ ശേഷം അമ്പതിലധികം കൂറ്റൻ മരങ്ങളാണ് പാതയിലേക്ക് നിലംപൊത്തിയത്. വലിയ അപകടങ്ങൾ ഉണ്ടായില്ലെങ്കിലും മണിക്കൂറുകളോളം ഗതാഗതം മുടങ്ങിയ. ഒരു ദിവസം വ്യത്യസ്ത സമയങ്ങളിലായി മൂന്നു മരങ്ങൾ വരെ നിലംപൊത്തി. രാത്രി യാത്രക്കാരാണ് ഇത്തരം സന്ദർഭങ്ങളിൽ മണിക്കൂറുകളോളം പെരുവഴിയിലാകുന്നത്. വിരാജ്പേട്ടയിൽനിന്നോ ഇരിട്ടിയിൽനിന്നോ അഗ്നി രക്ഷാസേന എത്തി വേണം മരം മുറിച്ചുമാറ്റി ഗതാഗത സ്തംഭനം ഒഴിവാക്കാൻ. ചുരം പാതയെ അപകടരഹിത പാതയാക്കണമെന്ന ആവശ്യം പലകോണുകളിൽനിന്നും ഉയരുന്നുണ്ടെങ്കിലും മടിക്കേരി ജില്ലാ ഭരണകൂടത്തിന്‍റെ ഭാഗത്തുനിന്ന് അനുകൂല സമീപനം ഉണ്ടാകുന്നില്ല.

അഖിലേന്ത്യാ ആദിവാസി മഹാസഭ ജില്ലാ പ്രവർത്തക യോഗം

ഇരിട്ടി: അഖിലേന്ത്യാ ആദിവാസി മഹാസഭ ജില്ലാ പ്രവർത്തകയോഗം ചേർന്നു. ആറളം പട്ടികവർഗ പുനരധിവാസ മേഖലയിൽ ഉൾപ്പെടെ കാട്ടാന ശല്യത്തിന് പരിഹാരം കാണണമെന്നും ആറളം പുനരധിവാസ പ്രവർത്തനം ലക്ഷ്യത്തിലെത്തിക്കണമെന്നും പ്രവർത്തകയോഗം ആവശ്യപ്പെട്ടു. ജില്ലയിലെ പട്ടികവർഗ ഉന്നതികളിൽ വിവിധങ്ങളായ പ്രശ്നങ്ങൾക്ക് പരിഹാരം കാണണമെന്ന് ആവശ്യപ്പെട്ട് സെപ്റ്റംബറിൽ പ്രക്ഷോഭം സംഘടിപ്പിക്കാനും പ്രവർത്തകയോഗം തീരുമാനിച്ചു. ഇരിട്ടി വ്യാപാര ഭവൻ ഹാളിൽ ചേർന്ന പ്രവർത്തക യോഗം അഖിലേന്ത്യാ ആദിവാസി മഹാസഭ സംസ്ഥാന സെക്രട്ടറിയും മുൻ എംഎൽഎയുമായ എം. കുമാരൻ ഉദ്ഘാടനം ചെയ്തു. ഇ.സി. അനീഷ് അധ്യക്ഷത വഹിച്ചു. സിപിഐ സംസ്ഥാന കൗൺസിൽ അംഗം സി.എൻ. ചന്ദ്രൻ, നേതാക്കളായ കെ.ടി. ജോസ്, പായം ബാബുരാജ്, പി.കെ. കരുണാകരൻ, കെ.ആർ. ചന്ദ്രകാന്ത് എന്നിവർ പ്രസംഗിച്ചു. ഭാരവാഹികളായി ശ്രീധരൻ-പ്രസിഡന്‍റ്, ഇ.സി. അനീഷ്, സുനിൽ മുഴക്കുന്ന്-വൈസ് പ്രസിഡന്‍റുമാർ, പി.കെ. കരുണാകരൻ-സെക്രട്ടറി, എം.കെ. വിജയൻ, പി.കെ. വാസു-ജോയിന്‍റ് സെക്രട്ടറിമാർ, എ.കെ. ഷീജൻ-ട്രഷറർ എന്നിവരെ തെരഞ്ഞെടുത്തു.

തലശേരിയിൽ ബസ് സർവീസ് സാധാരണ നിലയിൽ; സമരാഹ്വാനം നടത്തിയ വാട്ട്സാപ് ഗ്രൂപ്പിനെതിരേ കേസ്

തലശേരി: ബസ് കണ്ടക്ടറെ മർദിച്ചതിൽ പ്രതിഷേധിച്ച് നാലുനാൾ ജനങ്ങളെ ദുരിതത്തിലാക്കിയ ബസ് സമരത്തിന് വിരാമം. ജനരോഷം ശക്തമായതോടെ ഇന്നലെ ബസ് തൊഴിലാളികൾ സമരം പിൻവലിച്ച് സർവീസ് നടത്തി. പണിമുടക്കിയ ബസുകൾക്കതിരെ ഡിവൈഎഫ്ഐ രംഗത്തെത്തിയും പോലീസ് കർശന നടപടികളിലേക്ക് നീങ്ങിയതുമാണ് ഇന്നലെ ബസ് സർവീസ് ആരംഭിക്കാൻ പ്രേരിപ്പിച്ചത്. ട്രേഡ് യൂണിയനുകളും ബസുടമ സംഘടനകളും സമരത്തെ തള്ളിപറഞ്ഞിരുന്നു. സമരം പിൻവലിച്ചശേഷവും സർവീസ് നടത്താത്ത ബസുകളുടെ നടപടിക്കെതിരെ ഡിവൈഎഫ്ഐ പ്രവർത്തകർ പ്രതിഷേധിച്ചു. എഎസ്പി പിബി കിരൺ ഉൾപ്പെടെയുള്ള പോലീസ് ഉദ്യോഗസ്ഥർ ഇടപെട്ടാണ് പ്രതിഷേധം അവസാനിപ്പിച്ചത്. സർവീസ് നടത്താത്ത ബസുകൾ പരിശോധിച്ച് നടപടിയെടുക്കുമെന്ന് എഎസ്പി ഉറപ്പുനൽകി. ഡിവൈഎഫ്ഐ ജില്ലാ പ്രസിഡന്‍റ് മുഹമ്മദ് അഫ്സൽ, ബ്ലോക്ക് സെക്രട്ടറി പി. സനീഷ്, പി.വി. സച്ചിൻ, മുഹമ്മദ് ഫാസിൽ, ഫിദ പ്രദീപ്, കെ. മർഫാൻ എന്നിവരുടെ നേതൃത്വത്തിലായിരുന്നു പ്രതിഷേധം. കണ്ടക്ടറെ മർദിച്ചതിൽ പ്രതിഷേധിച്ച് ബസ് തൊഴിലാളികൾ ആദ്യ രണ്ടുദിവസം പണിമുടക്കിയത് ജാമ്യമില്ലാവകുപ്പ് പ്രകാരം കേസെടുക്കുകയും രണ്ടുപേരെ അറസ്റ്റുചെയ്ത് ജയിലിലിടക്കുകയും ചെയ്തിരുന്നു. ഇതോടെ ട്രേഡ് യൂണിയനുകൾ സമരത്തിൽ നിന്നും പിൻമാറിയെങ്കിലും ഒരു വിഭാഗം തൊഴിലാളികൾ നവമാധ്യമത്തിലൂടെ സമരം തുടരണമെന്ന് ആഹ്വാനം ചെയ്തതാണ് സമരം നീണ്ടു പോകാൻ ഇടയാക്കിയത്. കെഎൽ-58 പാനൂർ റൈഡർ വാട്സാപ് ഗ്രൂപ്പിലൂടെയായിരുന്നു സമരാഹ്വാനം. ഇതിനെതിരെ പോലീസ് കേസെടുത്തിട്ടുണ്ട്. അഡ്മിൻ അടക്കമുള്ളവർക്കെതിരെയാണ് കേസ്. കലാപശ്രമം, ഗൂഡാലോചന ഉൾപ്പെടെയുള്ള വകുപ്പുകൾ ചുമത്തിയാണ് കേസ് രജിസ്റ്റർ ചെയ്തത്. ഡിവൈഎഫ്ഐ ബ്ലോക്ക് സെക്രട്ടറി പി. സനീഷിന്‍റെ പരാതിയിലാണ് നടപടി. മൊബൈൽ ഫോണുകൾ പിടിച്ചെടുത്ത് പോലീസ് സൈബർ സെല്ലിൽ പരിശോധനക്ക് അയച്ചു. സമരം തുടരാൻ ആഹ്വാന ചെയ്ത വാട്സാപ് ഗ്രൂപ്പ് അഡ്മിൻമാരിൽ മൂന്നുപേർ പ്രവാസികളാണ്. രണ്ടുപേർ ബസ് തൊഴിലാളികളും രണ്ടുപേർ ഓട്ടോ തൊഴിലാളികളുമാണ്. ഇതിനിടെ, മദ്യപിച്ച് ബസ്‌സ്റ്റാൻഡിൽ ബഹളമുണ്ടാക്കിയ സമരാനുകൂലികളായ രണ്ടുപേരെ പോലീസ് അറസ്റ്റുചെയ്തു.

ഛത്തീസ്ഗഡ് സംഭവത്തിൽ പ്രതിഷേധിച്ചു

മാഹി: മാഹി സെന്‍റ് തെരേസാ ബസിലിക്ക പാരിഷ് കൗൺസിലിന്‍റെ നേതൃത്വത്തിൽ പ്രതിഷേധയോഗവും റാലിയും നടത്തി. കന്യാസ്ത്രീകളെ ആൾക്കൂട്ട വിചാരണ നടത്തിയവരെ നിയമപരമായി ശിക്ഷിക്കണമെന്നും ഭരണഘടനയുടെ ആർട്ടിക്കിൾ 25 പ്രകാരമുള്ള മതസ്വാതന്ത്ര്യം സംരക്ഷിക്കണമെന്നും ക്രൈസ്തവർക്കെതിരെയുള്ള ബോധപൂർവമായ ആക്രമണങ്ങൾ തടയണമെന്നും ആവശ്യപ്പെട്ടാണ് റാലി നടത്തിയത്. ബസിലിക്ക റെക്ടർ ഫാ. സെബാസ്റ്റ്യൻ കാരക്കാട്ട്, ഫാ. ബിനോയ് ഏബ്രഹാം, ഫാ. വിപിൻ ബെനറ്റ്, സിസ്റ്റർ നവ്യ, സിസ്റ്റർ അമല, ഷാജു കാനത്തിൽ, വിൻസെന്‍റ് ഫെർണാണ്ടസ്, സ്റ്റാൻലി ഡിസിൽവ എന്നിവർ പ്രസംഗിച്ചു. പിലാത്തറ: പിലാത്തറയിലും പയ്യന്നൂർ പുഞ്ചക്കാടും പ്രതിഷേധ മാർച്ചും ധർണയും നടത്തി. പിലാത്തറ വ്യാകുല മാതാ ഫൊറോന ഇടവകയുടെ നേതൃത്വത്തില്‍ പള്ളി പരിസരത്ത് നിന്നാരംഭിച്ച പ്രതിഷേധ മാര്‍ച്ച് പിലാത്തറ ബസ് സ്റ്റാൻഡ് പരിസരത്ത് സമാപിച്ചു. തുടര്‍ന്ന് നടന്ന ധര്‍ണ ഇടവക വികാരി ഫാ. തോംസണ്‍ കൊറ്റിയത്ത് ഉദ്ഘാടനം ചെയ്തു. അസിസ്റ്റന്‍റ് വികാരി ഫാ. ഷിജു അധ്യക്ഷത വഹിച്ചു. ഫിലിക്‌സ് ജോര്‍ജ്, കെ.ജി. വർഗീസ്, പുഷ്പ ക്രിസ്റ്റി, സിസ്റ്റര്‍ ആശ ജോസ്, സ്റ്റാന്‍ലി പാട്രിക്ക്, ലില്ലി ഫെണ്‍ണാണ്ടസ്, ജോസ് ക്രിസ്റ്റഫര്‍, കെ. വിജയകുമാര്‍ എന്നിവര്‍ പ്രസംഗിച്ചു.

ഭിന്നശേഷി ജീവനക്കാരുടെ സുപ്രീം കോടതി വിധികൾ ഉടൻ നടപ്പിലാക്കണം: ഡിഎഇഎ

കണ്ണൂർ: സൂപ്പർ ന്യൂമററി തസ്തികയിൽ ജോലി ചെയ്യുന്ന ഭിന്നശേഷി ജീവനക്കാരുടെ തസ്തിക ഏകീകരിച്ചു മറ്റ് സ്ഥിര ജീവനക്കാർക്ക് അനുവദിക്കപ്പെട്ടിട്ടുള്ള സർവീസ് ആനുകൂല്യങ്ങൾ പുനഃസ്ഥാപിക്കണമെന്ന സുപ്രീം കോടതി വിധിയും, പ്രമോഷൻ സംവരണവുമായി ബന്ധപ്പെട്ട സുപ്രീം കോടതി വിധിയും മുഴുവൻ സർക്കാർ ഭിന്നശേഷി ജീവനക്കാർക്കും പ്രയോജനം കിട്ടുന്ന രീതിയിൽ പുറപ്പെടുവിക്കണമെന്നും ഡിഫറന്‍റ്‌ലി ഏബ്ൾഡ് എംപ്ലോയീസ് അസോസിയേഷൻ (ഡിഎഇഎ) സർക്കാരിനോട് ആവശ്യപ്പെട്ടു. ഡിഎഇഎ ജില്ലാ പ്രവർത്തക യോഗം കണ്ണൂർ സ്പോർട്സ് കൗൺസിൽ ഹാളിൽ സംസ്ഥാന വൈസ് പ്രസിഡന്‍റ് കെ.എൻ. ആനന്ദ് നാറാത്ത് ഉദ്ഘാടനം ചെയ്തു. ജില്ലാ പ്രസിഡന്‍റ് ഷാജി പി. മുഴപ്പിലങ്ങാട് അധ്യക്ഷത വഹിച്ചു. കെ. കിഷോർ, പി.പി. തനൂജ, ഇ. സരിത, വി.വി. സുരേന്ദ്രൻ തുടങ്ങിയവർ പ്രസംഗിച്ചു. സംഘടന ഉന്നയിച്ചിട്ടുള്ള വിഷയങ്ങളിൽ സർക്കാർ ഉടനടി തീരുമാനം എടുക്കണമെന്ന് ആവശ്യപ്പെട്ടുകൊണ്ട് മുഖ്യമന്ത്രി, ഗവർണർ, പ്രതിപക്ഷ നേതാവ്, വകുപ്പ് മന്ത്രി, ധനകാര്യ മന്ത്രി, നിയമ മന്ത്രി, ചീഫ് സെക്രട്ടറി എന്നിവർക്ക് സംസ്ഥാന സമിതി നിവേദനം നൽകിയതായും കെ.എൻ. ആനന്ദ് നാറാത്ത് അറിയിച്ചു.

ഉമ്മൻചാണ്ടി സ്‌മൃതി കേന്ദ്രം ഉദ്ഘാടനം ചെയ്തു

ഇരിട്ടി: പടിയൂരിൽ ഉമ്മൻചാണ്ടി സ്‌മൃതികേന്ദ്രം കെപിസിസി പ്രസിഡന്‍റ് സണ്ണി ജോസഫ് എംഎൽഎ ഉദ്ഘാടനം ചെയ്തു. ജനശ്രീ മിഷൻ ജില്ലാ ചെയർമാൻ ചന്ദ്രൻ തില്ലങ്കേരി അധ്യക്ഷത വഹിച്ചു. ഇരിട്ടി, തളിപ്പറമ്പ് ബ്ലോക്കുകൾക്ക് സൗജന്യമായി നൽകുന്ന ഫ്രീസർ കൈമാറി. ബ്ലോക്ക് ചെയർമാൻ ബാലൻ, മട്ടന്നൂർ ബ്ലോക്ക് പ്രസിഡന്‍റ് സുരേഷ് മാവില, മോഹനൻ, ഒ.കെ. പ്രസാദ്, റഷീദ്, മണ്ഡലം പ്രസിഡന്‍റ് കെ.പി. ബാബു, നസീമ ഖാദർ, ഉഷ അനിൽ, ജോർജ് വടക്കുംകര, പി. കുഞ്ഞികൃഷ്‌ണൻ, ഷഹന രാജീവൻ, കെ.കെ. വിജയൻ എന്നിവർ പ്രസംഗിച്ചു.

സഹകരണ പെൻഷൻ പരിഷ്കരണം ഉടൻ നടപ്പിലാക്കണം: കെപിസിഎസ്പിഎ

കണ്ണൂർ: കേരളത്തിലെ സഹകരണ പെൻഷൻകാരെ തീർത്തും അവഗണിക്കുന്ന സർക്കാർ നിലപാട് തിരുത്തണമെന്നും പെൻഷൻ പരിഹരണത്തിനായി കോടതി നിർദേശപ്രകാരം രൂപീകൃതമായ ജുഡീഷ്യറി കമ്മിറ്റി റിപ്പോർട്ട് ലഭിച്ച് മാസങ്ങൾ കഴിഞ്ഞിട്ടും സർക്കാർ തീരുമാനം നീട്ടിക്കൊണ്ട് പോകുന്നത് പ്രതിഷേധാർഹമാണെന്നും നിർത്തിവച്ച ഡിഎ പുനഃസ്ഥാപിക്കണമെന്നും പ്രൈമറി കോ-ഓപ്പറേറ്റീവ് സർവീസ് പെൻഷനേഴ്സ് അസോസിയേഷൻ (കെപിസിഎസ്പിഎ) ജില്ലാ സമ്മേളനം സർക്കാരിനോട് ആവശ്യപ്പെട്ടു. സമ്മേളനം ഡിസിസി പ്രസിഡന്‍റ് മാർട്ടിൻ ജോർജ് ഉദ്ഘാടനം ചെയ്തു. ജില്ലാ പ്രസിഡന്‍റ് കെ. രവീന്ദ്രൻ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി എൻ. സ്വാമിനാഥൻ മുഖ്യപ്രഭാഷണം നടത്തി. സംസ്ഥാന വൈസ് പ്രസിഡന്‍റ് വി.ആർ. ഭാസ്കരൻ മുതിർന്ന പെൻഷൻകാരെ ആദരിച്ചു. സംസ്ഥാന ഭാരവാഹികളായ എൻ.കെ. രാമകൃഷ്ണൻ, കെ.ഗോവിന്ദൻ, ജോസ് പൂമല, വി. സുന്ദരൻ, കെ. ഹരീന്ദ്രൻ, കൊപ്പൽ പ്രഭാകരൻ, കോഴിക്കോട് ജില്ലാ പ്രസിഡന്‍റ് കെ. ശ്രീകുമാർ, കാസർഗോഡ് ജില്ലാ പ്രസിഡന്‍റ് ചന്ദ്രശേഖരൻ, കെസിഇഎഫിന്‍റെ മുൻ സംസ്ഥാന പ്രസിഡന്‍റുമാരായ പി.കെ. വിനയകുമാർ, എം. രാജു, താലൂക്ക് പ്രസിഡന്‍റ് ചന്ദ്രൻ കാണിച്ചേരി, പി.കെ. ജനാർദനൻ, പി.സി. സ്കറിയ, ഉണ്ണികൃഷ്ണൻ പയ്യന്നൂർ എന്നിവർ പ്രസംഗിച്ചു. പുതിയ ജില്ലാ കമ്മിറ്റി ഭാരവാഹികൾ: കെ. രവീന്ദ്രൻ-പ്രസിഡന്‍റ്, പി.കെ. ജനാർദനൻ-സെക്രട്ടറി, കെ.എം. ശിവദാസൻ-വൈസ് പ്രസിഡന്‍റ്, പി.പി. ബാലൻ-വൈസ് പ്രസിഡന്‍റ്, ഉണ്ണികൃഷ്ണൻ പയ്യന്നൂർ, വി. ബാലകൃഷ്ണൻ ഇരിട്ടി-ജോയിന്‍റ് സെക്രട്ടറിമാർ, പി.സി. സ്കറിയ-ട്രഷറർ എന്നിവരെ തെരഞ്ഞെടുത്തു.‌

ട്രാൻസ്‌ഫോർമർ ഭീഷണി; ചെവികൊടുക്കാതെ അധികൃതർ

ഇരിട്ടി: ആറളം പഞ്ചായത്തിലെ ചെടിക്കുളം ടൗണിലെ അപകടാവസ്ഥയിലുള്ള ട്രാൻസ്ഫോർമർ മാറ്റി സ്ഥാപിക്കണമെന്നാവശ്യം ഇനിയും നടപ്പായില്ല. ജനപ്രതിനിധികളും നാട്ടുകാരും നിരവധി പരാതി നൽകിയിട്ടും അധികൃതർ ഗൗനിക്കുന്നില്ല. റോഡ് നവീകരിച്ചതോടെ ടൗണിൽ ഒരു തിട്ടയിലാണ് ട്രാൻസ്‌ഫോർമർ നിൽക്കുന്നത്. രണ്ട് കടയുടെ വരാന്തയിലേക്ക് സ്റ്റേ വയർ വലിച്ചുകെട്ടിയ നിലയിലാണ്. ഇതിനു സമീപത്തായി പ്രവർത്തിക്കുന്ന സ്കൂളിൽ നിന്ന് വിദ്യാർഥികൾ സഞ്ചരിക്കുന്നത് ട്രാൻസ്‌ഫോർമറിന് സമീപത്തുകൂടെയാണ്. സ്ഥലപരിമിതിയുള്ള ടൗണിൽ ഓട്ടോകൾ പാർക്ക് ചെയ്യുന്നത് ട്രാൻസ്‌ഫോർമറിന് കീഴെയാണ്. സമീപത്തു തന്നെ ട്രാൻസ്‌ഫോർമർ മാറ്റി സ്ഥാപിക്കാൻ സൗകര്യപ്രദമായ സ്ഥലം ലഭ്യമാണ്. മാറ്റി സ്ഥാപിക്കുന്നതിനുള്ള പണം ആരുനൽകും എന്നതാണ് കെഎസ്ഇബിയുടെ ചോദ്യം. ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധൻ രേഖാമൂലം പരാതി നൽകുകയും താലൂക്ക് വികസന സമിതി യോഗത്തിൽ ഉന്നയിക്കുകയും ചെയ്തിരുന്നു. ഇതൊന്നും തങ്ങൾക്ക് ബാധിക്കില്ല എന്ന നിലപാടിൽ ഉറക്കം നടിക്കുകയാണ് കെഎസ്ഇബി. പാലത്തുംകടവ് എൽപി സ്‌കൂളിന് മുന്നിൽ തുറന്നിട്ട ട്രാൻസ്‌ഫോർമർ അയ്യൻകുന്നിലെ പാലത്തുംകടവ് എൽപി സ്‌കൂളിന് മുന്നിൽ യാതൊരു സുരക്ഷയും ഇല്ലാതെ തുറന്നിട്ട ട്രാൻസ്ഫോർമർ ഉയർന്ന അപകടഭീഷണി അധികൃതർ കണ്ടില്ലെന്ന് നടിക്കുന്നു. സ്‌കൂളിൽ നിന്ന് 50 മീറ്റർ ദൂരത്തിലാണ് ട്രാൻസ്ഫോർമർ സ്ഥിതി ചെയ്യുന്നത്. കഴിഞ്ഞദിവസം വിദ്യാർഥികൾ ട്രാൻസ് ഫോമറിനുളളിലേക്ക് പ്രവേശിക്കുന്നത് ശ്രദ്ധയിൽപ്പെട്ടതോടെ റിബർ കെട്ടി വേലിയുണ്ടാക്കിയിരിക്കുകയാണ്. ട്രാൻസ്ഫോമറിന് ചുറ്റും സുരക്ഷാ വേലി സ്ഥാപിക്കണമെന്നാണ് നിയമം. അപകടാവസ്ഥ ചൂണ്ടിക്കാണിച്ച് നാട്ടുകാർ നിരവധിതവണ പരാതി നൽകിയിട്ടും യാതൊരു നടപടിയും സ്വീകരിക്കുന്നില്ല. അപകടംസംഭവിച്ച ശേഷം മാത്രമേ ഉണരുകയുള്ളൂ എന്നതാണ് അധികൃതരുടെ നിലപാടെന്ന് വാർഡ് അംഗം ബിജോയി പ്ലാത്തോട്ട പറഞ്ഞു. പേരട്ടയിൽ പള്ളിക്കും സ്കൂളിനും സമീപം ട്രാൻസ്‌ഫോർമർ പേരട്ട കല്ലംതോട് പള്ളിക്കും സ്കൂളിനും സമീപത്തെ വളവിൽ സ്ഥാപിച്ചിരിക്കുന്ന ട്രാൻസ്‌ഫോർമർ വാഹനങ്ങൾക്കും യാത്രക്കാർക്കും ഭീഷണിയാകുന്നു. അടിയന്തരമായി മാറ്റിസ്ഥാപിക്കണം എന്നാണ് നാട്ടുകാരുടെ ആവശ്യം. ഇതു സംബന്ധിച്ച് അധികൃതർക്ക് പരാതി നൽകിയിരിക്കുകയാണ് പഞ്ചായത്ത് അംഗം കൂടിയായ ബിജു വെങ്ങലപള്ളി. ട്രാൻസ്ഫോർമറുകൾ വീതികുറഞ്ഞ വഴിയുടെ ഓരങ്ങളിൽ സ്ഥാപിക്കുന്നത് ഭീഷണിയാകുന്നതായി അവർ പറഞ്ഞു. ട്രാൻസ്ഫോർമറുകൾ വഴികളിൽ സ്ഥാപിക്കാതെ സ്വന്തം സ്ഥലത്ത് സ്ഥാപിക്കാനുള്ള നടപടി കെഎസ്ഇബി സ്വീകരിക്കണമെന്ന് അദ്ദേഹം ആവശ്യപ്പെട്ടു. പേരട്ടയിൽ ഇത്തരത്തിൽ നിരവധിസ്ഥലത്ത് വളവുകളിൽ കെഎസ്ഇബി സ്ഥപിച്ചിരിക്കുന്ന ട്രാൻസ്ഫോർമറുകൾ ഭീഷണി തീർക്കുന്നതായും ഇത് മാറ്റനായുള്ള നടപടി സ്വീകരിക്കണമെന്നുമാണ് നാട്ടുകാരുടെ ആവശ്യം.

വാഹനാപകടത്തിൽ പരിക്കേറ്റ് ചികിത്സയിലായിരുന്ന ഗൃഹനാഥ മരിച്ചു

കണ്ണൂർ: താണയിലുണ്ടായ വാഹനാപകടത്തിൽ പരിക്കേറ്റ് ചികിത്സയിലായിരുന്ന ഗൃഹനാഥ മരിച്ചു. തിലാനൂർ ശിശുമന്ദിരം ബസ് സ്റ്റോപ്പിന് സമീപം പി.പി. ശകുന്തള (60) യാണ് മരിച്ചത്. ശനിയാഴ്ച വൈകുന്നേരം 5.30 ഓടെ താണയ്ക്ക് സമീപം വച്ച് അജ്ഞാത വാഹനം ഇടിക്കുകയായിരുന്നു. ചാലയിലെ സ്വകാര്യആശുപത്രിയിൽ ചികിത്സയിലായിരുന്ന ശകുന്തള ഇന്നലെ ഉച്ചയോടെ മരിച്ചു. വാഹനം കണ്ടെത്താൻ പോലീസ് സിസിടിവികൾ പരിശോധിച്ചുവരികയാണ്. ടുബാക്കോ യൂണിയൻ പ്രവർത്തകയും സിഐടിയു കണ്ണൂർ ഏരിയ ജോയിന്‍റ് സെക്രട്ടറിയുമാണ്. ഓട്ടോമൊബൈൽ സഹകരണ സംഘത്തിൽ ഇപ്പോൾ താത്കാലികമായി ജോലി ചെയ്തുവരികയായിരുന്നു. ഭർത്താവ്: പി.പി. മോഹനൻ (വ്യാപാരി). മകൻ: ഷമില്‍ സഹോദരൻ: പരേതനായ കുഞ്ഞിക്കണ്ണൻ. സംസ്കാരം ഇന്ന് രണ്ടിന് പയ്യാമ്പലത്ത് നടക്കും.

ഹൃദയാരാം സിൽവർ ജൂബിലി ആഘോഷത്തിന് സമാപനം

കണ്ണൂർ: തിരുഹൃദയ സന്യാസിനി സമൂഹത്തിന്‍റെ കീഴിലുള്ള ഹൃദയാരാം ഗ്രൂപ്പ് ഓഫ് മെന്‍റൽ ഹെൽത്ത് ഇൻസ്റ്റിറ്റ്യൂഷൻസ് സിൽവർ ജൂബിലി ആഘോഷങ്ങൾക്ക് പ്രൗഢമായ സമാപനം. ധർമശാല ലക്സോട്ടിക്ക ഇന്‍റർനാഷണൽ കൺവൻഷൻ സെന്‍ററിൽ നടന്ന സമാപന ആഘോഷം മന്ത്രി കടന്നപ്പള്ളി രാമചന്ദ്രൻ വിളക്കുകൊളുത്തി ഉദ്ഘാടനം ചെയ്തു. സമർപ്പണ ബോധം സമൂഹത്തിന്‍റെ ആത്മഗീതമായി മാറിയാൽ നാട് രക്ഷപ്പെടുമെന്ന് മന്ത്രി ഉദ്ഘാടന പ്രസംഗത്തിൽ പറഞ്ഞു. മറ്റുള്ളവരുടെ വേദനയും ദുഃഖവും തന്‍റേതു കൂടിയാണെന്ന് ഹൃദയമുള്ളവർക്കു മാത്രമേ കാണാൻ കഴിയൂ. ഹൃദയാരാം ഇതിന് ഉത്തമമാതൃകയാണ്. പദവിയോ, ജാതിയോ, മതമോ നോക്കാതെ ഏത് വിഭാഗത്തിൽപ്പെട്ടവരുടെയും പ്രശ്നങ്ങൾ പരിഹരിക്കാൻ ഹൃദയാരാം ആത്മാർഥമായി ഇടപെട്ടു. ഹൃദയശുദ്ധിയുടെ ആത്മരാഗമാണ് അവിടെ കാണാൻ കഴിഞ്ഞതെന്നും മന്ത്രി പറഞ്ഞു. തലശേരി ആർച്ച്ബിഷപ് മാർ ജോസഫ് പാംപ്ലാനി അധ്യക്ഷത വഹിച്ചു. കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിൽ ജൂബിലി സുവനീർ പ്രകാശനം ചെയ്തു. ഹൃദയംകൊണ്ടുള്ള കേൾവി ഈ നാടിന് അനുഗ്രഹമായി മാറട്ടെയെന്ന് പ്രകാശനം നിർവഹിച്ച് ബിഷപ് ആശംസിച്ചു. കണ്ണൂർ രൂപത സഹായമെത്രാൻ ഡോ. ഡെന്നിസ് കുറുപ്പശേരി അനുഗ്രഹപ്രഭാഷണം നടത്തി. കണ്ണൂരിലേയും സമീപ പ്രദേശങ്ങളിലേയും ജനങ്ങളുടെ ഹൃദയത്തിൽ പരിമളവും ശോഭയും പകർന്നു നല്കാൻ ഹൃദയാരാമിന് ഇതിനകം സാധിച്ചുവെന്ന് ബിഷപ് പറഞ്ഞു. എസ്എച്ച് കോൺഗ്രിഗേഷൻ സുപ്പീരിയർ ജനറൽ സിസ്റ്റർ ഉഷ മരിയ ആമുഖപ്രഭാഷണം നടത്തി. ഹൃദയാരാം കടന്നുവന്ന വഴികളെക്കുറിച്ച് ഹൃദയാരാം ഗ്രൂപ്പ് ഓഫ് ഇൻസ്റ്റിറ്റ്യൂഷന്‍സ് അസിസ്റ്റന്‍റ് ഡയറക്ടർ ഡോ. സിസ്റ്റർ ജാൻസി പോൾ എസ്എച്ച് വിശദീകരിച്ചു. ജൂബിലിയോട‌‌‌‌‌നുബന്ധിച്ച് ആരംഭിക്കുന്ന പുതിയ സംരംഭങ്ങളുടെ ഉദ്ഘാടനവും നടന്നു. പിജിഡിഎൽഡിയുടെ ഉദ്ഘാടനം കണ്ണൂർ സർവകലാശാല വൈസ് ചാൻസലർ കെ.കെ. സാജുവും ലൈഫ് എലൈക്സർ കെ.വി. സുമേഷ് എംഎൽഎയും വിംഗ്സ് കണ്ണൂർ യൂണിവേഴ്സിറ്റി രജിസ്ട്രാർ ഡോ.ജോബി കെ. ജോസും ഉദ്ഘാടനം ചെയ്തു. ഹൃദയാരാം ഫൗണ്ടർ ഡയറക്ടറും എസ്എച്ച് കോൺഗ്രിഗേഷൻ പ്രൊവിൻഷ്യൽ സുപ്പീരിയറുമായ സിസ്റ്റർ ഡോ. ട്രീസ പാലയ്ക്കൽ എസ്എച്ചിനെ ചടങ്ങിൽ ആദരിച്ചു. തലശേരി അതിരൂപത വികാരി ജനറാൾ മോൺ. സെബാസ്റ്റ്യൻ പാലാക്കുഴി, കണ്ണൂർ രൂപത വികാരി ജനറാൾ മോൺ. ക്ലാരൻസ് പാലിയത്ത്, ഡോ. കെ.വി. ലതീഷ്, തളിപ്പറന്പ് സെന്‍റ് മേരീസ് ഫൊറോന വികാരി ഫാ. മാത്യു ആശാരിപറന്പിൽ, ഡോ. സിസ്റ്റർ റിൻസി അഗസ്റ്റിൻ എസ്എച്ച്, സിസ്റ്റർ ഡോ. ജോൺസി മരിയ എസ്എച്ച്, കണ്ണൂർ ഹോളി ഫാമിലി പള്ളി വികാരി ഫാ. മാത്യു നരിക്കുഴി, സിസ്റ്റർ റെജി ജേക്കബ് എസ്എച്ച്, ദീപിക കണ്ണൂർ റസിഡന്‍റ് മാനേജർ ഫാ. ജോബിൻ വലിയപറന്പിൽ, സിസ്റ്റർ ഡോ. റിൻസി അഗസ്റ്റിൻ, സി.എ. അബ്ദുൾ ഗഫൂർ എന്നിവർ പ്രസംഗിച്ചു. തുടർന്ന് കലാപരിപാടികളും അരങ്ങേറി. സോഷ്യൽമീഡിയ രോഗികളുടെ മാനസികാരോഗ്യം വീണ്ടെടുക്കണം: മാർ ജോസഫ് പാംപ്ലാനി വായിൽ തോന്നുന്നതെന്തും വിളിച്ചുപറയുകയും തങ്ങളുടെ വികാര വിക്ഷോഭങ്ങൾ പങ്കുവയ്ക്കുകയും ചെയ്യുന്നവർ സോഷ്യൽ മീഡിയയിൽ അഭിരമിക്കുകയാണെന്ന് തലശേരി ആർച്ച്ബിഷപ് മാർ ജോസഫ് പാംപ്ലാനി. ഇത്തരം സോഷ്യൽ മീഡിയ രോഗികളുടെ മാനസികാരോഗ്യം വീണ്ടെടുക്കുക കാലഘട്ടത്തിന്‍റെ അനിവാര്യതയാണെന്നും ആർച്ച്ബിഷപ് പറഞ്ഞു. ധർമശാല ലക്സോട്ടിക്ക ഇന്‍റർനാഷണൽ കൺവൻഷൻ സെന്‍ററിൽ നടന്ന ഹൃദയാരാം സിൽവർ ജൂബിലി സമാപന സമ്മേളനത്തിൽ അധ്യക്ഷത വഹിച്ചു പ്രസംഗിക്കുകയായിരുന്നു ആർച്ച്ബിഷപ്. മാനസികാരോഗ്യത്തിന് പ്രാധാന്യം നല്കേണ്ടത് ഏറ്റവും പ്രധാനമാണ്. തിരുഹൃദയ സന്യാസിനി സമൂഹത്തെ പോലെ മാനസികാരോഗ്യം വീണ്ടെടുക്കുന്നതിന് സമൂഹത്തിൽ ഇത്രയധികം കഠിനപ്രയത്നം ചെയ്യുന്ന മറ്റൊരു സന്യാസിനി വിഭാഗമില്ല. ജാതി-മത ഭേദമന്യേ ഏത് വിഭാഗത്തിൽപ്പെട്ടവർക്കും സ്നേഹവും സാന്ത്വനവും നല്കി അവരെ നല്ല ജീവിതത്തിലേക്ക് തിരിച്ചുകൊണ്ടുവരാൻ ഇവർക്ക് സാധിച്ചു. ചെറിയ പ്രതിസന്ധിയിൽ പോലും സമൂഹം തളർന്നുപോകുന്ന സാഹചര്യത്തിൽ ഹൃദയാരാം ചെയ്യുന്ന തരത്തിലുള്ള ഇടപെടൽ ആവശ്യമാണെന്നും ആർച്ച്ബിഷപ് പറഞ്ഞു.

കുടിയേറ്റ പൈതൃകം പകർന്ന് ദീപിക സെമിനാർ

കുടിയേറ്റം ചരിത്രം മാറ്റിമറിച്ചു: മാർ ജോസഫ് പാംപ്ലാനി കുടിയേറ്റം എന്നത് സാമൂഹിക പ്രതിഭാസമാണെന്നും കേരളത്തിന്‍റെ ചരിത്രത്തെ മാറ്റിമറിച്ചത് കുടിയേറ്റമാണെന്നും സെമിനാറിന്‍റെ സമാപന സമ്മേളനം ഉദ്ഘാടനം ചെയ്ത തലശേരി ആർച്ച്ബിഷപ് മാർ ജോസഫ് പാംപ്ലാനി പറഞ്ഞു. കുടിയേറ്റ ജനത ഒരിക്കലും കൈയേറ്റക്കാരല്ലെന്ന് ആത്മാഭിമാനത്തോടെ പറയാനാകും. കാടുകൾ വെട്ടിത്തെളിച്ച് മണ്ണിൽ കനകം വിളയിച്ചു. കേരളത്തിന്‍റെ സന്പദ് വ്യവസ്ഥയുടെ 30 ശതമാനം കുടിയേറ്റ ഭൂമിയിൽ നിന്നാണ്. വന്യമൃഗങ്ങളോടും മലന്പനിയോടും പോരാടിയ അതിജീവനമായിരുന്നു കുടിയേറ്റക്കാരുടേത്. മലബാറിന്‍റെ മലമടക്കുകളിൽ റോഡുകൾ, പാലങ്ങൾ എന്നിവ നിർമിച്ചു. സംഘടിതമായിട്ടായിരുന്നു അവർ ഓരോന്നും നിർമിച്ചത്. ഏത് അന്യായത്തെയും എതിർക്കാർ കുടിയേറ്റ ജനതയുണ്ടാകും. വർഗീയതയുടെ പേരിൽ ഇന്ത്യ മുഴുവൻ ഭിന്നിച്ചാലും മലയോര ജനത ഭിന്നിക്കില്ല. കുടിയേറ്റക്കാലത്ത് ഒറ്റക്കെട്ടായ മലയോര ജനത ഇന്നും ഒറ്റക്കെട്ടാണെന്നും മാർ ജോസഫ് പാംപ്ലാനി പറഞ്ഞു. കുടിയേറ്റക്കാർ പ്രതീക്ഷയുടെ മിഷനറിമാർ: മാർ ജോസഫ് പണ്ടാരശേരിൽ നാടിന്‍റെ വികസനത്തിന് ശ്രദ്ധേയമായ നേട്ടങ്ങൾ നല്കിയത് കുടിയേറ്റക്കാരായിരുന്നുവെന്നും അവർ പ്രതീക്ഷയുടെ മിഷനറിമാരായിരുന്നുവെന്നും കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിൽ. കുടിയേറ്റ ചരിത്രസെമിനാർ ഉദ്ഘാടനം ചെയ്തു പ്രസംഗിക്കുകയായിരുന്നു ബിഷപ്.

കുടിയേറ്റക്കാർ കടന്നുവന്ന ചരിത്രവഴികൾ പുതുതലമുറ ഓർക്കേണ്ടതാണ്. എന്നാൽ, പുതിയതലമുറ വിദേശങ്ങളിലേക്ക് കുടിയേറുന്ന പ്രവണതയാണ് കണ്ടുവരുന്നത്. യുവത്വം ഒളിച്ചോടി പോകുവാൻ പാടില്ല. മലബാറിൽ ഇനിയും വികസനസാധ്യതകളുണ്ട്. അതിനാൽ, ഇവിടം ഉപേക്ഷിച്ച് പോകരുത്. നിങ്ങളും കഠിനമായി അധ്വാനിക്കണം. കൃഷി നിലനിൽക്കണം.ടൂറിസം, മെഡിക്കൽ ടൂറിസം, കടൽ സന്പത്ത് തുടങ്ങിയവയിലെല്ലാം കേരളത്തിൽ അനന്ത സാധ്യതകളാണുള്ളത്. കൃഷി വ്യവസായമായി മാറണം. ചെറുപ്പക്കാർ കൃഷിയിലേക്ക് വരണം. സാങ്കേതിക വിദ്യകളും ഐടി സാധ്യതകളും കൃഷിയിൽ പരീക്ഷിക്കണം. പണം മുടക്കി കൃഷി ചെയ്യണം. കൃഷിയിൽനിന്ന് ലഭിക്കുന്ന പണം മറ്റ് മേഖലകളിൽ നിക്ഷേപിക്കണം. അങ്ങനെ, പൂർവ പിതാക്കന്മാരെ പോലെ നിങ്ങളും പ്രതീക്ഷയുടെ മിഷനറിമാരായി മാറണം. കുടിയേറ്റത്തിന്‍റെ സ്ഥാനം മഹത്തരം: സണ്ണി ജോസഫ് എംഎൽഎ ഇന്നത്തെ കേരള ചരിത്രത്തിന്‍റെ സർവമേഖലകളിലും കുടിയേറ്റത്തിന്‍റെ സ്ഥാനം വളരെ മഹത്തരമാണ്. പട്ടിണി മാറ്റാൻ മികച്ച കാർഷിക അവസരങ്ങൾക്കായി പുതിയ മേച്ചിൽപ്പുറം തേടിയാണ് മലബാറിലും മലയോരത്തും കുടിയേറ്റജനത എത്തിയത്. മലമ്പാമ്പിനോടും മലമ്പനിയോടും മല്ലടിച്ചാണ് മലയോരത്തെ മലർവാടിയാക്കിയത്.

അതിന് ത്യാഗത്തിന്‍റെ, കൂട്ടായ്മകളുടെ, ലക്ഷ്യബോധത്തിന്‍റെ ചരിത്ര യാഥാർഥ്യങ്ങൾ ഒട്ടനവധിയാണ്. ഇന്നത്തെ വികസനത്തിന്‍റെ താങ്ങും തണലും കുടിയേറ്റ ജനതയുടെ വിയർപ്പിന്‍റെയും അനുഭവത്തിന്‍റെയും നേർസാക്ഷ്യമാണ് എന്ന കാര്യത്തിൽ ആർക്കും വിസ്മരിക്കാനാവില്ല. കെപിസിസി പ്രസിഡന്‍റായതിന് പിന്നിലെ കരുത്തും വഴികാട്ടിയും കുടിയേറ്റത്തിന്‍റെ മകനായ തനിക്കും അഭിമാനിക്കാനാകും. കുടിയേറ്റ പൈതൃകം കുടുംബങ്ങളും കുട്ടികളും: റവ. ഡോ. ഫിലിപ്പ് കവിയിൽ പൈതൃകമെന്നത് തലമുറകളിലൂടെ ലഭിച്ച സമ്പത്താണ്. അത് സ്വത്ത്, സംസ്കാരം, വിശ്വാസം ഏതുമാകാം. കുടിയേറ്റത്തിന്‍റെ യഥാർഥ പൈതൃകം കുടുംബങ്ങളും കുട്ടികളുമാണ്. പണ്ട് ഒരു കുടുംബത്തിൽ 12 വരെ കുട്ടികളാണ്. ഇന്നത് ഒന്ന് അല്ലെങ്കിൽ രണ്ട്. ചിലപ്പോൾ മൂന്നുവരെ അപൂർവം. 12 പേർ ഉള്ളിടത്ത് പട്ടിണിയുണ്ട്. സമ്പത്തില്ല എങ്കിലും അധ്വാനിക്കും. എന്നാൽ, ഇന്നത്തെ തലമുറ അധ്വാനിക്കുന്നുണ്ടോ എന്ന് ആത്മപരിശോധന നടത്താൻ കുടിയേറ്റസമൂഹം തയാറാകണം. അന്ന് ഒന്നിന്‍റെയും വേലിക്കെട്ടുകളോ വേർതിരിവുകളോ ഇല്ലായിരുന്നു. റോഡ് വെട്ടാൻ പോലും കൂട്ടായ്മ ഉണ്ടായിരുന്നു.മനുഷ്യനെ മനുഷ്യനായി കാണാൻ കഴിഞ്ഞതാണ് മലബാർ കുടിയേറ്റത്തിന്‍റെ പ്രത്യേകതയും മൂല്യവും. പാരന്പര്യം പുതുതലമുറ ഏറ്റെടുക്കണം: സജീവ് ജോസഫ് എംഎൽഎ കുടിയേറ്റത്തിൽ നിന്ന് കുടിയിറക്കത്തിന്‍റെ കാലഘട്ടത്തിലാണ് നാം ജീവിക്കുന്നത്. മലബാർ കുടിയേറ്റത്തിന്‍റെ നൂറ് വർഷത്തെ മാറ്റം, സ്വാധീനം, വെല്ലുവിളികൾ നിറഞ്ഞ ചരിത്രവഴികൾ എന്നിവ ചർച്ചചെയ്യുമ്പോൾ അത് വരും തലമുറയ്ക്ക് പകരാനാകണം. നാടിന്‍റെ ഇന്നത്തെ മാറ്റം കുടിയേറ്റത്തിന്‍റെ യഥാർഥ വിജയം എന്നു പറയുമ്പോൾ തന്നെ കുടിയേറ്റക്കാരെ സ്വീകരിച്ചവരെയും ഒപ്പം നിന്നവരെയും വിസ്മരിക്കരുത്. പൈതൃകവും പാരമ്പര്യവും പുതിയ തലമുറ കൂടി ഏറ്റെടുത്താൽ മാത്രമേ ഇത്തരം സെമിനാറുകൾ അർഥപൂർണമാകുകയുള്ളൂ. മാർ വള്ളോപ്പിള്ളി കുടിയേറ്റക്കാരുടെ കിരീടം വയ്ക്കാത്ത രാജാവ് കുടിയേറ്റ കർഷകരെ ഒന്നിപ്പിക്കുക എന്ന ദൗത്യമായിരുന്നു മാർ സെബാസ്റ്റ്യൻ വള്ളോപ്പിള്ളിയുടേത്. കുടിയേറ്റക്കാരുടെ ആവലാതികൾ കേട്ടു. പരിഹരിക്കാൻ പറ്റുന്നത് പരിഹരിച്ചു. കുടിയേറ്റക്കാരുടെ ഇടയിൽ ആത്മവിശ്വാസം വളർത്തിയതാണ് പിതാവിന്‍റെ ഏറ്റവും വലിയ സംഭാവന. അവർക്ക് നേതാവും മാർഗദർശിയുമായിരുന്നു പിതാവ്. കുടിയേറ്റ മേഖലകളിലൂടെ നിരന്തരമായി യാത്ര ചെയ്തു.

ആഢംബരവും ധൂർത്തും ഒഴിവാക്കി ജീവിച്ച പിതാവ് എല്ലാ മതങ്ങൾക്കും സ്വീകാര്യനായിരുന്നു. കുടിയേറ്റക്കാരുടെ കിരീടം വയ്ക്കാത്ത രാജാവെന്ന് പിതാവിനെ വിശേഷിപ്പിക്കാം. കുടിയിറക്ക് നേരിടേണ്ടി വന്നപ്പോഴും പ്രകൃതി ദുരിതങ്ങൾ വന്നപ്പോഴും കുടിയേറ്റകാർക്കൊപ്പം പിതാവും ഉണ്ടായിരുന്നു. ക്നാനായക്കാർ നടത്തിയത് യഥാർഥ സംഘടിത കുടിയേറ്റം യഥാർഥ സംഘടിത കുടിയേറ്റമാണ് ക്നാനായക്കാർ മലബാറിൽ നടത്തിയത്. കുടിയേറ്റ ചരിത്രത്തെ വളച്ചൊടിക്കാൻ ഒളിഞ്ഞും തെളിഞ്ഞും പല കോണുകളിൽ നിന്നും ശ്രമമുണ്ടായി. പക്ഷേ, രാജപുരം, പനത്തടി, മടമ്പം, റാണിപുരം പ്രദേശങ്ങളിലെ കുടിയേറ്റം ആർക്കും തള്ളിപ്പറയാനാവാത്ത വിജയഗാഥകളാണ്. ഇക്കാര്യത്തിൽ ഓരോ തലമുറയ്ക്കും അവബോധം നൽകാൻ അനിവാര്യമായ കാലഘട്ടമാണ് കടന്നുപോകുന്നത്. എല്ലാ കുടിയേറ്റങ്ങളും കാലാവസ്ഥയും ഭൂപ്രകൃതിയും വന്യജീവികളുടെ ആക്രമണം, രോഗങ്ങളും ആരോഗ്യപ്രശ്നങ്ങളും,ഗതാഗത സൗകര്യങ്ങളുടെ അഭാവം, സാമ്പത്തിക ഞെരുക്കം തുടങ്ങി നിരവധി വിഷയങ്ങളിലൂടെയാണ് കടന്നുപോയിട്ടുള്ളത്. സംഘടിത കുടിയേറ്റത്തിനൊപ്പം അസംഘടിത കുടിയേറ്റം എവിടെയും ചർച്ചയായി വന്നിട്ടില്ലെന്നതും ശ്രദ്ധിക്കേണ്ടതാണ്. കുടിയേറ്റത്തിന്‍റെ ആകെ തുക കാർഷിക സംസ്കാരം മലബാർ കുടിയേറ്റത്തിന്‍റെ ആകെ തുകയാണ് കാർഷിക സംസ്കാരമെന്ന് സാഹിത്യകാരൻ കൽപ്പറ്റ നാരായണൻ. അതിലൂടെ വന്ന മാറ്റങ്ങളാണ് ഇന്നത്തെ കേരളം. കർഷകരെല്ലാം ഉത്പാദകരാണ്. എന്നാൽ, ഇന്നത്തെ പൊതുസമൂഹം ഉപഭോക്താക്കളാണ്. തേങ്ങയ്ക്ക് വില കിട്ടുമ്പോൾ സന്തോഷിക്കുന്ന കർഷകന്‍റെ കൂടെ നാം നിൽക്കുന്നില്ല. മറിച്ച് പ്രതിഷേധിക്കുന്ന ഉപഭോക്താവിന്‍റെ ഭാഗത്തുനിന്നാണ് നാം ചിന്തിക്കുന്നത്. മണ്ണിൽ സ്വർണം വിളയിക്കാനെത്തി ഉത്പാദകരായി മാറിയതാണ് യഥാർഥ മലബാർ കുടിയേറ്റം. വനം വന്യജീവികൾക്കുള്ളതാണെങ്കിൽ അതിന് സാഹചര്യം ഒരുക്കേണ്ടത് സർക്കാരാണ്. വിദ്യാഭ്യാസ മേഖലയിലെ സംഭാവനകൾ അതുല്യം കാർഷിക മേഖലയോടൊപ്പം വിദ്യാഭ്യാസ മേഖലയിലും കുടിയേറ്റക്കാരുടെ സംഭാവന നിസ്തുലമാണ്. മലബാറിലേക്ക് കുടിയേറി വന്നപ്പോൾ യാതൊരു വിദ്യാഭ്യാസ സൗകര്യങ്ങളും ഇല്ലായിരുന്നു. എന്നാൽ, ആരുടെയും സഹായത്തിന് കാത്തുനിൽക്കാതെ കുടിയേറ്റക്കാർ സ്കൂളുകൾ സ്ഥാപിച്ചു. മാസക്കൂട്ടം, ഉത്പന്ന പിരിവ്, ചിട്ടി, പിടിയരി, വീതപ്പിരിവ് എന്നിവ വഴി സ്കൂളുകൾ പണിയുന്നതിനുള്ള പണം സന്പാദിച്ചു. കൃഷി ചെയ്തു കിട്ടുന്ന വരുമാനവും സ്കൂളുകൾക്കായി വിനിയോഗിച്ചു. സ്കൂളില്ലെങ്കിലും എല്ലാ പള്ളികളും കേന്ദ്രീകരിച്ച് സ്കൂൾ കമ്മിറ്റികളും ഉണ്ടായിരുന്നു. ആദിവാസികളെ ഒരിക്കലും കുടിയേറ്റക്കാർ ചൂഷണം ചെയ്തിരുന്നില്ല. കുടിയേറ്റക്കാർ സ്ഥാപിച്ച സ്കൂളുകളിൽ ആദിവാസികൾക്ക് പ്രവേശനം ഉണ്ടായിരുന്നു. മലബാർ മേഖലയിൽ പല വിദ്യാഭ്യാസ സ്ഥാപനങ്ങൾക്കും തുടക്കമിട്ടത് കുടിയേറ്റക്കാരായിരുന്നു. കൃഷിയിൽ നിന്നുള്ള പിന്മാറ്റം പ്രതിസന്ധി സൃഷ്ടിക്കും തലമുറകളുടെ അഭിലാഷങ്ങളിൽ ഉണ്ടായ മാറ്റങ്ങളാണ് കുടിയേറ്റ ജനത ഇന്ന് അനുഭവിക്കുന്ന പ്രതിസന്ധി. കാർഷികവൃത്തിയെ അവജ്ഞയോടെ കാണുന്ന ഒരു തലമുറയാണ് ഇന്നുള്ളത്. വനാതിർത്തി വ്യാപന നിയമം, പരിസ്ഥിതി ദുർബലനിയമം, വന്യമൃഗശല്യം തുടങ്ങിയവ കർഷകർക്ക് നിസാര പ്രശ്നങ്ങളല്ല. ഗുരുതരമായ പ്രശ്നങ്ങളാണ്. ഉത്തരവാദിത്വപ്പെട്ടവർ ഇത് കണക്കിലെടുക്കുന്നില്ല. വികസനപദ്ധതികൾ എന്തുവന്നാലും അത് ബാധിക്കുന്നത് കർഷകരെയാണ്. കുടിയിറക്കമല്ല, പുതിയ തലമുറയുടെ കൃഷിയിൽ നിന്നുള്ള വഴിമാറ്റമാണ് സമകാലിക പ്രതിസന്ധി. ജനസംഖ്യയുടെ കുറവും വലിയൊരു പ്രതിസന്ധിയാണ്. കുടിയേറ്റക്കാർ യഥാർഥ കർഷകർ മലബാറിലെ കുടിയേറ്റക്കാരെല്ലാം കാട് നശിപ്പിച്ച പരിസ്ഥിതി നാശകരാണെന്ന അടിസ്ഥാനരഹിതമായ വാദം ചരിത്രകാലം മുതലേ കേൾക്കുന്നതാണ്. കുടിയേറ്റക്കാർ കൃഷി ചെയ്യാൻ വന്നവരാണ്. കൃഷിയിലൂടെ പട്ടിണി മാറ്റുക എന്നതു മാത്രമായിരുന്നു അവരുടെ ലക്ഷ്യം. യഥാർഥത്തിൽ മലബാറിൽ കാടിന്‍റെ പച്ചപ്പ് ഇല്ലാതാക്കിയത് കുടിയേറ്റക്കാരല്ല. നാട് അടക്കിവാണവരും കാട് ഭരിച്ചവരുമാണ് കാസർഗോട്ടും ആറളത്തുമടക്കം വികസനത്തിന്‍റെ പേരിൽ മരങ്ങൾ വെട്ടി വിറ്റത്. കൂപ്പ് ലേലം കഴിഞ്ഞ് അടിക്കാടുകൾ മാത്രമുള്ള ഭൂമിയാണ് കുടിയേറ്റക്കാർക്ക് ലഭിച്ചത്. കാലഘട്ടത്തെ തെറ്റിദ്ധരിപ്പിച്ച് സർക്കാർ നടത്തിക്കൊണ്ടിരിക്കുന്ന പിൻവാതിൽ കുടിയേറ്റമാണ് അന്ന് നടത്തിയത്. ഗാഡ്ഗിൽ അടക്കമുള്ള കമ്മിറ്റികൾ ഇന്നും കുടിയേറ്റ കർഷകരുടെ കൃഷിരീതികൾ പഠനവിധേയമാക്കിയിട്ടില്ല.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]