ഓഡിറ്റോറിയം ഉദ്ഘാടനം ചെയ്തു

വൈക്കം: പടിഞ്ഞാറ്റുംചേരി പടിഞ്ഞാറേമുറി 1634-ാം നമ്പർ എൻഎസ്എസ് കരയോഗം നിർമിച്ച വൈക്കം പദ്‌മനാഭപിള്ള മെമ്മോറിയൽ എൻഎസ്എസ് ഓഡിറ്റോറിയം യൂണിയൻ ചെയർമാൻ പി.ജി.എം. നായർ കാരിക്കോട് ഉദ്ഘാടനം ചെയ്തു. കരയോഗം ഹാളിൽ നടന്ന സമ്മേളനത്തിൽ പ്രസിഡന്‍റ് പി. ശിവരാമകൃഷ്ണൻ നായർ അധ്യക്ഷത വഹിച്ചു.

യൂണിയൻ വൈസ് ചെയർമാൻ പി. വേണു ഗോപാൽ, യൂണിയൻ സെക്രട്ടറി അഖിൽ ആർ. നായർ, നഗരസഭാ കൗൺസിലർ രാജശേഖരൻ, എൻഎസ്എസ് പ്രതിനിധിസഭാ മെംബർ എസ്. മധു, മേഖലാ ചെയർമാൻ ബി. ജയകുമാർ, വനിതാ യൂണി യൻ സെക്രട്ടറി മീരാ മോഹൻദാസ്, അഡീഷണൽ ഇൻസ്പെക്ടർ എസ്. മുരുകേഷ്, കരയോഗം സെക്രട്ടറി എസ്.യു. കൃഷ്ണകുമാർ, എം. ബാലചന്ദ്രൻ, ആർ. സുരേ ഷ്കുമാർ, എസ്. വിദ്യ, രമ്യാ ശിവദാസൻ, പി.ആർ. സുരേഷ്‌കുമാർ എന്നിവർ പ്രസംഗിച്ചു.

ADVERTISEMENT

ചങ്ങനാശേരി ബോട്ട് ക്ലബ് നാളെ പുന്നമടയിലേക്ക്

ചങ്ങനാശേരി: 71-ാമത് നെഹ്‌റു ട്രോഫി ജലോത്സവത്തില്‍ മത്സരിക്കുന്ന സിബിസിയുടെ ചമ്പക്കുളം ചുണ്ടന്‍റെ വിജയത്തിന് ചങ്ങനാശേരിക്കാരുടെ അനുഗ്രഹങ്ങള്‍ സ്വീകരിച്ചുകൊണ്ട് സംഘടിപ്പിക്കുന്ന ജലോത്സവ വിളംബര പ്രയാണം ഇന്ന് നടക്കും. വൈകുന്നേരം അഞ്ചിന് മീഡിയാ വില്ലേജില്‍നിന്ന് ആരംഭിക്കുന്ന വര്‍ണ ശബളമായ ഘോഷയാത്ര ഡിവൈഎസ്പി കെ.പി. ടോംസണ്‍ ഫ്ലാഗ് ഓഫ് ചെയ്യും. എന്‍എസ്എസ് സെക്രട്ടറി ഹരികുമാര്‍ കോയിക്കല്‍, എസ്എന്‍ഡിപി യോഗം യൂണിയന്‍ പ്രസിഡന്‍റ് ഗിരീഷ് കോനാട്ട്, പഴയ പള്ളി മുസ്‌ലിം ജമാഅത് പ്രസിഡന്‍റ് മുഹമ്മദ് ഫുവാദ്, സിബിസി ഡയറക്ടര്‍മാരായ ഫാ. സബാസ്റ്റ്യന്‍ പുന്നശേരി, ഫാ. ജോഫി പുതുപ്പറമ്പ് എന്നിവര്‍ പ്രസംഗിക്കും. സെന്‍ട്രല്‍ ജംഗ്ഷന്‍വഴി അഞ്ചുവിളക്ക് സ്‌ക്വയറില്‍ റാലി സമാപിക്കുമ്പോള്‍ അവിടെ നടക്കുന്ന പൊതുസമ്മേളനം ജോബ് മൈക്കിള്‍ എംഎല്‍എ ഉദ്ഘാടനം ചെയ്യും. സിബിസി ക്യാപ്റ്റന്‍ സണ്ണി തോമസ് ഇടിമണ്ണിക്കല്‍, മര്‍ച്ചന്‍റ്സ് അസോസിയേഷന്‍ പ്രസിഡന്‍റ് ജോണ്‍സണ്‍ പ്ലാന്തോട്ടം, ബോട്ട് ജെട്ടി വികസന സമിതി എക്‌സിക്യുട്ടീവ് അംഗം റോഷന്‍ വാടാപറമ്പില്‍, മീഡിയാ വില്ലേജ് ബര്‍സാര്‍ ഫാ. ലിപിന്‍ തുണ്ടുകളം, ജോബി തൂമ്പുങ്കല്‍ എന്നിവര്‍ പ്രസംഗിക്കും.

കേരള കോണ്‍ഗ്രസ് ധര്‍ണ നടത്തി

ചങ്ങനാശേരി: ചങ്ങനാശേരി നഗരത്തിലെ വിവിധ റോഡുകളുടെ ശോചനീയാവസ്ഥയ്ക്ക് പരിഹാരം കാണുക, ഗതാഗതക്കുരുക്കു പരിഹരിക്കുക, വഴി വിളക്കുകള്‍ പ്രകാശിപ്പിക്കുക, തെരുവുനായകളുടെ ശല്യമൊഴിവാക്കാന്‍ നടപടി സ്വീകരിക്കുക തുടങ്ങി ആവശ്യങ്ങള്‍ ഉന്നയിച്ചുകൊണ്ട് ടൗണ്‍ ഈസ്റ്റ് വെസ്റ്റ് മണ്ഡലം കമ്മിറ്റികളുടെ നേതൃത്വത്തില്‍ മുനിസിപ്പല്‍ ജംഗ്ഷനില്‍ ധര്‍ണ നടത്തി. ഈസ്റ്റ് മണ്ഡലം പ്രസിഡന്‍റ് മാത്യു വര്‍ഗീസ് അധ്യക്ഷത വഹിച്ചു. വെസ്റ്റ് മണ്ഡലം പ്രസിഡന്‍റ് സിബിച്ചന്‍ ഇടശേരിപ്പറമ്പില്‍ വിഷയാവതരണം നടത്തി. പാര്‍ട്ടി സംസ്ഥാന വൈസ് ചെയര്‍മാന്‍ കെ.എഫ്. വര്‍ഗീസ് സമരം ഉദ്ഘാടനം ചെയ്തു. മാത്തുക്കുട്ടി പ്ലാത്താനം, വി.ജെ. ലാലി, സി.ഡി. വത്സപ്പന്‍, ജോര്‍ജുകുട്ടി മാപ്പിളശേരി, ആര്‍. ശശിധരന്‍ നായര്‍, സിബി ചാമക്കാല, മുകുന്ദന്‍ രാജു, ജോബിന്‍ എസ്. കൊട്ടാരം, ജോസുകുട്ടി നെടുമുടി, സന്തോഷ് ആന്‍റണി, സച്ചിന്‍ സാജന്‍, കുര്യൻ, ബേബിച്ചന്‍ സഎന്നിവര്‍ പ്രസംഗിച്ചു.

മാവേലി ഈ വഴി എങ്ങനെ വരും ?

ചങ്ങനാശേരി: നാടും നഗരവും തിരുവോണത്തിമിര്‍പ്പിലേക്കു നീങ്ങുമ്പോള്‍ നഗരത്തിലെ ഒട്ടുമിക്ക റോഡുകളും തകര്‍ച്ചയില്‍. പല റോഡുകളും തകര്‍ന്ന് ഗട്ടറുകള്‍ രൂപപ്പെട്ട് ചെളിക്കുളമാണ്. വാഹനങ്ങളില്‍ വന്നാല്‍ തെന്നി മറിയും. നടന്നാല്‍ കാല്‍തട്ടി വീഴും. ഭൂരിപക്ഷം റോഡുകളുടെയും അവസ്ഥ ഇതുതന്നെ. കഴിഞ്ഞ രണ്ടുവര്‍ഷക്കാലമായി റോഡുകള്‍ക്ക് കാര്യമായ അറ്റകുറ്റപ്പണികള്‍ നടത്താന്‍ നഗരഭരണാധികാരികള്‍ വേണ്ടത്ര നടപടികള്‍ സ്വീകരിക്കാഞ്ഞതാണ് റോഡുകളുടെ അവസ്ഥ ഇത്രയേറെ ശോചനീയമാകാന്‍ കാരണം. നഗരസഭ അധികാരത്തില്‍വന്ന ആദ്യവര്‍ഷങ്ങളില്‍ 37 വാര്‍ഡുകള്‍ക്കും പത്തുലക്ഷം രൂപവീതം ഫണ്ട് അനുവദിച്ച് റോഡ് നിര്‍മാണം നടത്തിയിരുന്നു. തുടര്‍ന്നുള്ള വര്‍ഷങ്ങളില്‍ ഫണ്ട് ഇല്ലാത്തതിന്‍റെ പേരില്‍ നിര്‍മാണ നടപടികള്‍ മന്ദീഭവിച്ചു. ടെന്‍ഡര്‍ നടപടികള്‍ പൂര്‍ത്തീകരിച്ചപ്പോള്‍ കരാര്‍ ഏറ്റെടുക്കാന്‍ കരാറുകാര്‍ വൈമനസ്യം കാട്ടിയതും ഏറ്റെടുത്ത കരാറുകാര്‍ക്ക് മഴ പ്രതിസന്ധിയായതും റോഡ് അറ്റകുറ്റപ്പണികളെ ബാധിച്ചു. പൈപ്പുകള്‍ സ്ഥാപിക്കാന്‍ കുഴിച്ച റോഡുകളും തകര്‍ച്ച നേരിട്ട അവസ്ഥയിലാണ്. മതുമൂല-മോര്‍ക്കുളങ്ങര, അസംപ്ഷന്‍- എസ്ബി കോളജ് റോഡ്, പെരുന്ന മന്നംനഗര്‍, ബോട്ടുജെട്ടി-വണ്ടിപ്പേട്ട തുടങ്ങിയ തകര്‍ന്ന റോഡുകളില്‍ പ്രധാനപ്പെട്ടതാണ്. എന്തേ വഴിവിളക്കുകള്‍ തെളിയാന്‍ ഇത്ര താമസം? നഗരത്തിലെ 37 വാര്‍ഡുകളിലായി അയ്യായിരത്തി അറുനൂറോളം വഴിവിളക്കുകളാണുള്ളത്. ഇതില്‍ മൂവായിരത്തിലേറെ വിളക്കുകള്‍ തെളിഞ്ഞിട്ട് മാസങ്ങളേറെയായി. ളായിക്കാട് മുതല്‍ പാലാത്രച്ചിറവരെയുള്ള എന്‍എച്ച്-183, ചങ്ങനാശേരി കുരിശുംമൂട്, മാര്‍ക്കറ്റ് റോഡ്, പെരുന്ന റെഡ്‌സ്‌ക്വയര്‍ ബൈപാസ് റോഡ് തുടങ്ങിയ റോഡുകളിലെയും ളായിക്കാട്- പാലാത്രച്ചിറ ബൈപാസിലെയും ഭൂരിപക്ഷം വഴിവിളക്കുകളും പ്രകാശിക്കുന്നില്ല. കഴിഞ്ഞ ക്രിസ്മസ് കാലത്തിനുശേഷം വഴിവിളക്ക് തെളിക്കുന്നതിനുള്ള നടപടികള്‍ നടന്നിട്ടില്ല. പല വഴിവിളക്കുകളുടെയും കണക്‌ഷനുകളും തകരാറിലാണ്. ചില വാര്‍ഡുകളില്‍ കൗണ്‍സിലര്‍മാര്‍ ജോലിക്കാരെ നിയോഗിച്ച് വഴിവിളക്കുകള്‍ തെളിക്കുന്ന സാഹചര്യങ്ങളുമുണ്ട്. വഴിവിളക്കുകളില്ലാത്തതുമൂലം നഗരത്തിന്‍റെ പലഭാഗങ്ങളിലും ഇരുട്ടാണ്. വ്യാപാര സ്ഥാപനങ്ങളിലെ ലൈറ്റുകള്‍ അണയ്ക്കുന്നതോടെ നഗരം കൂരിരുട്ടിലാകുകയാണ് പതിവ്. വഴിവിളക്കുകള്‍ തെളിക്കുന്ന ചുമതല പഴയ കരാറുകാരനെ ഏല്‍പ്പിക്കാന്‍ ജൂലൈയില്‍ ചേര്‍ന്ന കൗണ്‍സില്‍യോഗം തീരുമാനിച്ചിരുന്നു. വിളക്കു കത്തിയില്ലെങ്കിലും ലക്ഷക്കണക്കിനു രൂപ നഗരസഭ വൈദ്യുതി ബോര്‍ഡിന് അടയ്‌ക്കേണ്ടി വരുന്നുണ്ട്.

മൂലേക്കടവ് പാലം: സ്ഥലം വിട്ടൊഴിയൽ രേഖകൾ കൈമാറി

ചെമ്പ്: ചെമ്പ് - മറവന്‍തുരുത്ത് പഞ്ചായത്തുകളെ തമ്മില്‍ ബന്ധിപ്പിച്ച് മൂവാറ്റുപുഴയാറിനു കുറകെ നിര്‍മിക്കുന്ന മൂലേക്കടവ് പാലത്തിന്‍റെ സമീപറോഡിന്‍റെ ഭൂമി ഏറ്റെടുക്കല്‍ നടപടികള്‍ പൂര്‍ത്തികരിച്ചു. പാലത്തിന്‍റെ സമീപ റോഡ് നിര്‍മാണത്തിനായി 23 ഭൂവുടമകളില്‍നിന്നായി 48.79 ആര്‍ വസ്തുവാണ് ഏറ്റെടുത്തത്. ഭൂവുടമകള്‍ക്ക് വിതരണം ചെയ്യേണ്ട 2,54,84,451 രൂപ ഭൂവുടമകള്‍ക്ക് കൈമാറിയിരുന്നു. പാലത്തിന്‍റെ ഇരു കരകളില്‍നിന്നുള്ള ഭൂവുടമകളില്‍നിന്ന് ഭൂമിവിട്ടൊഴിയല്‍ രേഖകള്‍ എല്‍എ (കിഫ്ബി) സ്‌പെഷല്‍ തഹസില്‍ദാരുടെ സാന്നിദ്ധ്യത്തില്‍ ഇന്നലെ ഏറ്റുവാങ്ങി കെആര്‍എഫ്ബി അധികൃതര്‍ക്കു കൈമാറി. കിഫ്ബിയില്‍നിന്ന് 25 കോടി രൂപയാണ് പാലം നിര്‍മിക്കുന്നതിനായി അനുവദിച്ചിരിക്കുന്നത്. 210 മീറ്റര്‍ നീളമുള്ള പാലത്തിനു 11 മീറ്റര്‍ വീതിയുണ്ടാകും. ചെമ്പ് പഞ്ചായത്തിലെ അവികസിത പ്രദേശമായി തുടരുന്ന ഏനാദിയിലെ ജനങ്ങള്‍ക്ക് പാലം യാഥാര്‍ഥ്യമാകുന്നതോടെ ഗതാഗതസൗകര്യം വര്‍ധിക്കും. സാധാരണ തൊഴിലാളികളും ഇടത്തരക്കാരും താമസിക്കുന്ന ഏനാദിയുടെ വികസനത്തിനു സഹായകരമായ പാലം താമസിയാതെ യാഥാര്‍ഥ്യമാകുമെന്നതിനാല്‍ ഏനാദിനിവാസികള്‍ വലിയ ആഹ്ലാദത്തിലാണ്. പാലം പൂര്‍ത്തിയാകുന്നതോടെ തലയോലപ്പറമ്പ്, മറവന്‍തുരുത്ത് നിവാസികള്‍ക്ക് മൂലേക്കടവ് പാലത്തിലൂടെ ബ്രഹ്‌മമംഗലത്തെത്തി അരയന്‍കാവ് വഴി എറണാകുളത്തേക്കു പോകാനാകും. ഗതാഗതകുരുക്കില്‍നിന്ന് ഒഴിഞ്ഞിമാറി ഒരു എളുപ്പമാര്‍ഗമായി ഈ പാലവും പാതയും മാറുന്നതോടെ ഏനാദിയുടെ വികസനത്തിനും ആക്കംകൂടും. ജില്ലാ പഞ്ചായത്ത് അംഗം പി.എസ്.പുഷ്പമണി, മറവന്‍തുരുത്ത് പഞ്ചായത്ത് പ്രസിഡന്‍റ് പ്രീതി, വൈസ് പ്രസിഡന്‍റ് വി.ടി. പ്രതാപന്‍, ചെമ്പ് പഞ്ചായത്ത് പ്രസിഡന്‍റ് സുകന്യ സുകുമാരന്‍, വൈസ് പ്രസിഡന്‍റ് കെ.കെ. രമേശന്‍ തുടങ്ങി നിരവധിപേര്‍ ഒപ്പമുണ്ടായിരുന്നു. പാലത്തിന്‍റെ 80 ശതമാനം നിര്‍മാണപ്രവര്‍ത്തനങ്ങള്‍ പൂര്‍ത്തീകരിച്ചുകഴിഞ്ഞു. സമീപറോഡിന്‍റെ ഫൈനല്‍ ഡിസൈനു വരുന്ന കിഫ്ബി മീറ്റിംഗിന്‍ അംഗീകാരം ലഭിച്ചാലുടന്‍ ശേഷിക്കുന്ന നിര്‍മാണപ്രവര്‍ത്തനങ്ങള്‍ കൂടി പൂര്‍ത്തീകരിച്ച് പാലം നാടിനു സമര്‍പ്പാക്കാനാകുമെന്ന് സി.കെ. ആശ എംഎല്‍എ അറിയിച്ചു.

11 ലക്ഷം തട്ടി മുങ്ങിയ പ്രതിയെ ഗുജറാത്തിലെത്തി പോലീസ് പിടികൂടി

കടുത്തുരുത്തി: വെര്‍ച്വല്‍ അറസ്റ്റിലൂടെ വയോധികനായ വൈദികന്‍റെ 11 ലക്ഷം തട്ടിയെടുത്ത കേസിലെ പ്രതിയെ ഗുജറാത്തിലെത്തി പോലീസ് അറസ്റ്റ് ചെയ്തു. സിബിഐ ഉദ്യോഗസ്ഥന്‍ ചമഞ്ഞ് വയോധികനായ വൈദികന്‍റെ പണം തട്ടിയെടുത്ത കേസിലെ പ്രതിയെയാണ് കടുത്തുരുത്തി പോലീസ് അറസ്റ്റ് ചെയ്തത്. ഗുജറാത്ത് വഡോദര ന്യൂ സാമ റോഡില്‍ പഞ്ചം ഹൈറ്റ്‌സിനു സമീപം ഹരികപുര്‍ സൊസൈറ്റിയില്‍ 108ല്‍ മന്ദീപ് സിംഗിനെയാണ് കടുത്തുരുത്തി എസ്എച്ച്ഒ റെനീഷ് ഇല്ലിക്കലിന്‍റെ നേതൃത്വത്തിലുള്ള സംഘം അറസ്റ്റ് ചെയ്തത്. ആറിനായിരുന്നു കേസിനാസ്പദമായ സംഭവം. സിബിഐ ഉദ്യോഗസ്ഥരാണെന്നും വൈദീകന്‍റെ അക്കൗണ്ട് വഴി കള്ളപ്പണ ഇടപാട് നടന്നതായും ധരിപ്പിച്ച് വ്യാജ രേഖകള്‍ കാട്ടി ഭീഷണിപ്പെടുത്തിയാണ് തട്ടിപ്പുസംഘം വൈദികനെ കുടുക്കിയത്. തുടര്‍ന്ന് ഇദേഹത്തിന്‍റെ അക്കൗണ്ടില്‍നിന്ന് 11 ലക്ഷം രൂപ ട്രാന്‍സ്ഫര്‍ ചെയ്ത് എടുക്കുകയും ചെയതു. രണ്ടാം ദിവസം വീണ്ടും തട്ടിപ്പുസംഘം വൈദികനെ ഫോണില്‍ ബന്ധപ്പെട്ട് പണം ആവശ്യപ്പെട്ടു. ഇതേത്തുടര്‍ന്ന് വൈദികന്‍ കടുത്തുരുത്തി പോലീസിനെ വിവരം അറിയിച്ചു. ഇതോടെ ജില്ലാ പോലീസ് ചീഫ് എ. ഷാഹുല്‍ ഹമീദിന്‍റെ നിര്‍ദേശാനുസരണം കേസ് അന്വേഷിക്കുന്നതിനായി പ്രത്യേക സംഘം രുപീകരിക്കുകയായിരുന്നു. ഗുജറാത്ത് വഡോദരയിലെ ആക്‌സിസ് ബാങ്കിലെ അക്കൗണ്ടിലാണ് വൈദികന്‍റെ പണം എത്തിയിരുന്നത്. തുടര്‍ന്ന് ഈ അക്കൗണ്ട് പരിശോധിച്ചപ്പോള്‍ 11 ലക്ഷം രൂപ പിന്‍വലിച്ചതായി കണ്ടെത്തി. ഗുജറാത്തില്‍ താമസിക്കുന്ന ഹരിയാന സ്വദേശിയായ മന്ദീപ് സിംഗാണ് പണം പിന്‍വലിച്ചത്. രണ്ടു ചെക്കുകള്‍ ഉപയോഗിച്ച് ബാങ്കില്‍ നേരിട്ടെത്തി ഇയാള്‍ പണം പിന്‍വലിക്കുകയായിരുന്നെന്ന് പോലീസ് അന്വേഷണത്തില്‍ കണ്ടെത്തി. തുടര്‍ന്ന് പോലീസ് സംഘം ഇയാളെ അറസ്റ്റ് ചെയ്യുകയായിരുന്നു. പ്രതിയെ ഗുജറാത്ത് കോടതിയില്‍ ഹാജരാക്കിയ ശേഷം കേരളത്തിലേക്ക് എത്തിക്കും.

ബിന്ദുവിന്‍റെ കുടുംബത്തിന് വീട് നിർമിച്ചു നൽകുന്നു

തലയോലപ്പറമ്പ്: കോട്ടയം മെഡിക്കൽ കോളജ് ആശുപത്രിയിൽ ശുചിമുറി സമുച്ചയം തകർന്നു വീണതിനെത്തുടർന്ന് മരണപ്പെട്ട തലയോലപ്പറമ്പ് സ്വദേശി ഡി. ബിന്ദുവിന്‍റെ കുടുംബത്തിന് വിദ്യാഭ്യാസ വകുപ്പിനു കീഴിലുള്ള എൻഎസ്എസ് പണിതു നൽകുന്ന വീടിന്‍റെ നിർമാണം ആരംഭിച്ചു. ബിന്ദുവിന്‍റെ മരണത്തെത്തുടർന്ന് നിർധന കുടുംബത്തിന് വാസയോഗ്യമായ വീട് നിർമിച്ചുനൽകുമെന്ന് മന്ത്രി ആർ. ബിന്ദു മരണപ്പെട്ട ബിന്ദുവിന്‍റെ വീട് സന്ദർശിച്ചപ്പോൾ വാഗ്ദാനം നൽകിയിരുന്നു. 12.50 ലക്ഷം രൂപ വിനിയോഗിച്ചാണ് വീട് നവീകരിക്കുന്നത്. വീടിന്‍റെ ആസ്ബറ്റോസ് ഷീറ്റ് മേൽക്കൂരയുള്ള അടുക്കളയായി ഉപയോഗിച്ചിരുന്ന ഭാഗം പൂർണമായും പൊളിച്ചുമാറ്റി കുളിമുറിയും ശൗചാലയവും ഉൾപ്പെടുന്ന ഒരു മുറിയും അടുക്കളയും വർക്ക് ഏരിയയും തീർത്ത് നിലവിലുള്ള വീടിനോടു കൂട്ടിച്ചേർത്ത് കോൺക്രീറ്റ് ചെയ്യും. മോശമായ കട്ടിളകളും, വാതിലുകളും, ജനലുകളുമെല്ലാം ഇളക്കിമാറ്റി പുതിയവ യഥാസ്ഥാനത്ത് ഉറപ്പിച്ചുകഴിഞ്ഞു. വീടിന്‍റെ സൺഷെയ്ഡ് ഭാഗം പുതുക്കി. കാലാവസ്ഥ അനുകൂലമായാൽ ഒരു മാസത്തിനകം വീടിന്‍റെ നിർമാണം പൂർത്തിയാക്കാനാകുമെന്നാണ് കരുതുന്നതെന്ന് നിർമാണപ്രവർത്തനങ്ങൾ ഏകോപിപ്പിക്കുന്ന സിപിഎം തലയോലപ്പറമ്പ് ഏരിയാ സെക്രട്ടറി ഡോ. സി.എം. കുസുമൻ പറഞ്ഞു.

യൂത്ത് ഫ്രണ്ട്-എം മഹാറാലിയും പൊതുസമ്മേളനവും 30ന്

കടുത്തുരുത്തി: യൂത്ത് ഫ്രണ്ട് എം കടുത്തുരുത്തി നിയോജക മണ്ഡലം റാലിയും സമ്മേളനവും 30ന് കടുത്തുരുത്തിയില്‍ നടക്കുമെന്ന് യൂത്ത് ഫ്രണ്ട്-എം നിയോജക മണ്ഡലം പ്രസിഡന്‍റ് ബിബിന്‍ വെട്ടിയാനിക്കല്‍, പാര്‍ട്ടി നിയോജകമണ്ഡലം പ്രസിഡന്‍റ് തോമസ് ടി. കീറപ്പുറം എന്നിവര്‍ അറിയിച്ചു. യുവജനശക്തി വിളിച്ചോതുന്ന റാലിയും പൊതുസമ്മേളനവും കേരള യൂത്ത് ഫ്രണ്ട്-എം കടുത്തുരുത്തി നിയോജകമണ്ഡലം കമ്മിറ്റിയുടെ ആഭിമുഖ്യത്തിലാണ് ഒരുക്കിയിട്ടുള്ളതെന്ന് ഭാരവാഹികള്‍ പറഞ്ഞു. 30ന് നാലിന് നിയോജക മണ്ഡലത്തിലെ 11 പഞ്ചായത്തുകളില്‍ നിന്ന് 12 മണ്ഡലം കമ്മിറ്റികളിലെ ആയിരക്കണക്കിന് പ്രതിനിധികള്‍ പരിപാടിയില്‍ പങ്കെടുക്കും. 2,500ലേറെ യുവജനങ്ങള്‍ പങ്കെടുക്കുമെന്ന് ഭാരവാഹികള്‍ അറിയിച്ചു. നാലിന് കടുത്തുരുത്തി ബ്ലോക്ക് ജംഗ്ഷനില്‍നിന്ന് റാലി ആരംഭിക്കും. മണ്ഡലം പ്രസിഡന്‍റുമാരുടെ പിന്നില്‍ നേതാക്കന്മാരും തുടര്‍ന്ന് പ്രവര്‍ത്തകരും അണിനിരക്കും. റാലി കടുത്തുരുത്തി ടൗണിലൂടെയെത്തി തളിയില്‍ ക്ഷേത്രകവാടം വഴി പഞ്ചായത്ത് പാര്‍ക്കിംഗ് ഗ്രൗണ്ടില്‍ സമാപിക്കും. റാലിക്കു ശേഷം ടൗണിലെ പഞ്ചായത്ത് പാര്‍ക്കിംഗ് ഗ്രൗണ്ടില്‍ പ്രത്യേകം തയാറാക്കിയ പന്തലില്‍ പാര്‍ട്ടി ചെയര്‍മാന്‍ ജോസ് കെ. മാണി എംപി സമ്മേളനം ഉദ്ഘാടനം ചെയ്യും. യൂത്ത് ഫ്രണ്ട്-എം കടുത്തുരുത്തി നിയോജകമണ്ഡലം പ്രസിഡന്‍റ് ബിബിന്‍ വെട്ടിയാനിക്കല്‍ അധ്യക്ഷത വഹിക്കും. കേരള കോണ്‍സ്-എം പാര്‍ട്ടി എംഎല്‍എമാരും പാര്‍ട്ടിയുടെയും യൂത്ത് ഫ്രണ്ടിന്‍റെയും സംസ്ഥാന -ജില്ലാ നേതാക്കന്മാരും പങ്കെടുക്കും. ‌ റാലിക്കും പൊതുസമ്മേളനത്തിനും മുന്നോടിയായി 12 മണ്ഡലങ്ങളിലും യൂത്ത് ഫ്രണ്ടിന്‍റെ മേഖലാ സമ്മേളനങ്ങള്‍ നടത്തിയിരുന്നു.

തത്തപ്പള്ളി ക്ഷേത്രത്തില്‍ മോഷണം: പണവും മൊബൈല്‍ ഫോണും നഷ്ടപ്പെട്ടു

കടുത്തുരുത്തി: തത്തപ്പള്ളി വേണുഗോപാല-അന്തിമഹാകാള ക്ഷേത്രത്തില്‍ മോഷണം. സഹശാന്തിയുടെ മൊബൈല്‍ ഫോണും 500 രൂപയും മോഷണം പോയി. ഇന്നലെ പുലര്‍ച്ചെ രണ്ടോടെയാണ് സംഭവം. വിനായക ചതുര്‍ഥി ആഘോഷത്തോടനുബന്ധിച്ചുള്ള അഷ്ടദ്രവ്യ മഹാഗണപതി ഹോമത്തിനുള്ള പ്രസാദ സാധനങ്ങള്‍ തയാറാക്കുവാന്‍ മേല്‍ശാന്തി മുള്ളന്‍കുഴിമന പ്രസാദ് നമ്പൂതിരി, സഹശാന്തി ഇരുവായ്ക്കല്‍ രാജഗോപാല്‍ നമ്പൂതിരി എന്നിവര്‍ പുലര്‍ച്ചെ ഒന്നരയോടെതന്നെ ഉണര്‍ന്നിരുന്നു. തിടപ്പള്ളിയില്‍ പ്രസാദം തയാറാക്കിക്കൊണ്ടിരുന്നപ്പോള്‍ ഇതുവഴി നടന്നുവന്ന ഒരു യുവാവ് തിടപ്പള്ളിയുടെ അടുത്ത മുറിയില്‍ ഇരുന്ന സഹശാന്തിയുടെ മൊബൈല്‍ ഫോണും പാത്രത്തില്‍ സൂക്ഷിച്ചിരുന്ന വഴിപാടായി ലഭിച്ച തുകയും മോഷ്ടിക്കുകയാണുണ്ടായതെന്ന് പോലീസില്‍ നല്‍കിയ പരാതിയില്‍ പറയുന്നു. എന്തോ ശബ്ദംകേട്ടു മേല്‍ശാന്തി ഇറങ്ങിവന്നപ്പോള്‍ മോഷ്ടാവ് ഓടി മറയുകയാണുണ്ടായത്. ഓടിപ്പോകുന്ന വഴി അയയില്‍ കിടന്ന ഉടയാട എടുത്തു തലയിൽ ഇടുകയും ചെയ്തു. ശാന്തിമാര്‍ പിറകേ ചെന്നെങ്കിലും മോഷ്ടാവ് ഓടി മറഞ്ഞു. പെട്ടിയില്‍ക്കിടന്ന ആറായിരത്തോളം വരുന്ന തുക തലേന്ന് വൈകൂന്നേരം ഇവിടെനിന്നു മാറ്റിയിരുന്നു. അതിനാല്‍ ചെറിയ തുകയും 10,000 രൂപ വിലവരുന്ന മൊബൈല്‍ ഫോണും മാത്രമേ നഷ്ടമായുള്ളൂ. തത്തപ്പള്ളി ക്ഷേത്രാങ്കണത്തിലും സമീപത്തുള്ള പുരയിടത്തിലും അസമയങ്ങളില്‍ ബൈക്കിലെത്തുന്ന യുവാക്കള്‍ കൂട്ടംകൂടിയിരിക്കുന്നത് പതിവാണെന്ന് ക്ഷേത്രോപദേശക ഭാരവാഹികള്‍ പറയുന്നു. ക്ഷേത്രത്തിനു ചുറ്റുമതില്‍ പൂര്‍ണമല്ലാത്തതിനാല്‍ അസമയത്തു ക്ഷേത്രത്തില്‍ ആളുകള്‍ കടന്നുകയറുന്നതു തടയ‌ാന്‍ സാധിക്കുന്നില്ലെന്ന് ഉപദേശക സമിതി സെക്രട്ടറി സി.എന്‍. രാജീവ് പറഞ്ഞു. ചുറ്റുമതില്‍ നിര്‍മാണം പൂര്‍ത്തിയാക്കാന്‍ തിരുവിതാംകൂര്‍ ദേവസ്വം ബോര്‍ഡ് നടപടിയെടുക്കണമെന്നും അദേഹം ആവശ്യപ്പെട്ടു. മോഷണം സംബന്ധിച്ച് ദേവസ്വം ബോര്‍ഡ് അധികൃതരും ശാന്തിമാരും ക്ഷേത്രോപദേശക സമിതിയും കടുത്തുരുത്തി പോലീസില്‍ പരാതി നല്‍കി.

കടുത്തുരുത്തി-പിറവം റോഡിൽ കൈലാസപുരത്ത് കലുങ്ക് നിര്‍മാണം ആരംഭിച്ചു

കടുത്തുരുത്തി: മഴക്കാലത്ത് വെള്ളക്കെട്ട് പ്രശ്‌നം മൂലം സ്ഥിരമായി യാത്രാദുരിതം അനുഭവിക്കുന്ന കടുത്തുരുത്തി-പിറവം റോഡിലെ പ്രതിസന്ധി പരിഹരിക്കുന്നതിനു വേണ്ടി കൈലാസപുരം ക്ഷേത്രത്തിനു സമീപത്ത് കലുങ്ക് നിര്‍മാണ പ്രവര്‍ത്തനങ്ങള്‍ക്കു തുടക്കം കുറിച്ചതായി മോന്‍സ് ജോസഫ് എംഎല്‍എ അറിയിച്ചു. രണ്ടു മാസത്തിനുള്ളില്‍ കലുങ്ക് നിര്‍മാണ പ്രവര്‍ത്തനങ്ങള്‍ പൂര്‍ത്തീകരിക്കും. കൈലാസപുരം ക്ഷേത്രഭാഗത്ത് വെള്ളക്കെട്ടു മൂലം സ്ഥിരമായി യാത്രാക്ലേശം നേരിടുന്ന പ്രതിസന്ധിക്ക് പുതിയ കലുങ്ക് നിര്‍മാണത്തിലൂടെ കഴിയുമെന്നാണ് കരുതുന്നത്. ‌കടുത്തുരുത്തി - പിറവം റോഡില്‍ നടന്നുവരുന്ന നിര്‍മാണ പ്രവര്‍ത്തനങ്ങള്‍ വരുംദിവസങ്ങളില്‍ ത്വരിതപ്പെടുത്തും. റോഡ് നിര്‍മാണ സാധനസാമഗ്രികളുടെ ലഭ്യതക്കുറവ് ഇപ്പോള്‍ പ്രതിസന്ധി ഉണ്ടാക്കിയിട്ടുണ്ട്. ഇക്കാര്യങ്ങള്‍ പരിഹരിച്ച് അടുത്തഘട്ട നിര്‍മാണ പ്രവര്‍ത്തനങ്ങള്‍ സമയ ബന്ധിതമായി നടപ്പാക്കുന്നതിന് നടപടി സ്വീകരിച്ചിട്ടുണ്ട്. റോഡ് നിര്‍മാണ പ്രവര്‍ത്തനങ്ങള്‍ ബലവത്തായി നടപ്പാക്കുന്നതിനും പൊടിശല്യം ഒഴിവാക്കുന്നതിനും ഉപകരിക്കുന്ന വിധത്തില്‍ വരുംദിവസങ്ങളില്‍ റോഡ് വികസന ജോലികള്‍ നടപ്പാക്കും. കടുത്തുരുത്തി മുതല്‍ അറുനൂറ്റിമംഗലം വരെയുള്ള റോഡ് നിര്‍മാണ പ്രവര്‍ത്തനങ്ങള്‍ ത്വരിതപ്പെടുത്തുന്നതിന് പൊതുമരാമത്ത് വകുപ്പിന്‍റെ മേല്‍നോട്ടത്തില്‍ നടപടി സ്വീകരിച്ചിട്ടുണ്ട്.

എംഡിഎംഎയുമായി യുവാവ് പിടിയിൽ

വൈക്കം: വൈക്കത്ത് എംഡിഎംഎയുമായി യുവാവ് പിടിയിൽ. വൈക്കം വൈക്കപ്രയാർ കൊച്ചുകണിയാംതറ വിഷ്ണുവി.ഗോപാലി (32) നെയാണ് 34.28 ഗ്രാം എംഡിഎംഎയുമായി ജില്ലാ പോലീസ് മേധാവിയുടെ ലഹരിവിരുദ്ധ സ്ക്വാഡും വൈക്കം പോലീസും ചേർന്ന് വൈക്കപ്രയാറിലെ വീട്ടിൽനിന്നാണ് അറസ്റ്റ് ചെയ്തത്. ഇയാളുടെ വീട്ടിലെ അടുക്കളയിൽ മസാലകൾ സൂക്ഷിക്കുന്ന ടിന്നിൽ ഒളിപ്പിച്ചുവച്ചനിലയിലാണ് നിരോധിത ലഹരിവസ്തുവായ എംഡിഎംഎ കണ്ടെടുത്തത്. ഇയാളുടെ പക്കൽനിന്ന് എംഡിഎംഎ നിശ്ചിത അളവിൽ തൂക്കുന്നതിനുള്ള കാൽക്കുലേറ്ററിന്‍റെ വലിപ്പമുള്ള ഡിജിറ്റൽ ത്രാസ്, ലഹരിവസ്തു നിറയ്ക്കാനുള്ള ചെറിയ പ്ലാസ്റ്റിക് കവർ, ലഹരിവസ്തു വലിക്കുന്നതിനുള്ള വസ്തുവടക്കം പോലീസ് വീട്ടിൽനിന്നു പിടികൂടി. ബംഗളൂരുവിൽ തങ്ങുന്ന ഇയാൾ ഇന്നലെ നാട്ടിലെത്തുമെന്നും വിൽപ്പനക്കായിലഹരിവസ്തുക്കൾ കൊണ്ടുവരുമെന്നും പോലീസിന് രഹസ്യവിവരം ലഭിച്ചതിനെത്തുടർന്ന് ഇയാളുടെ നീക്കങ്ങൾ പോലീസ് നിരീക്ഷിച്ചുവരികയായിരുന്നു.ഇന്നലെ ഉച്ചകഴിഞ്ഞ് 2.30ന് പോലീസ് എത്തി നടത്തിയ പരിശോധനയിലാണ് ലഹരിവസ്തുകണ്ടെത്തിയത്. ബംഗളൂരുവിൽനിന്ന് വിൽപനയ്ക്കായാണ് എംഡിഎംഎ കൊണ്ടുവന്നതെന്ന് ചോദ്യം ചെയ്യലിൽ ഇയാൾ പോലീസിനോടു പറഞ്ഞു. 2023ൽ അരലിറ്റർ ഹാഷിഷ് ഓയിൽ കൈവശം വച്ചതുമായി ബന്ധപ്പെട്ട് ബാംഗ്ലൂർ ദേവനഹള്ളി പോലീസ് ഇയാൾക്കെതിരേ കേസെടുത്തിട്ടുണ്ട്. 2024ൽ ഇയാളെ എംഡിഎംഎയുമായി വൈക്കം എക്സൈസും പിടികൂടിയിരുന്നു. കോട്ടയം ജില്ലാ പോലീസ് മേധാവി ഷാഹുൽ ഹമീദിനു ലഭിച്ച രഹസ്യവിവരത്തിന്‍റെ അടിസ്ഥാനത്തിൽ വൈക്കം ഡി വൈ എസ്പി പി.ബി. വിജയന്‍റെ നിർദേശപ്രകാരം വൈക്കം എസ്എച്ച്ഒ എസ്. സുകേഷിന്‍റെ നേതൃത്വത്തിൽ ജൂണിയർ എസ്ഐ ജി. വിഷ്ണു, എഎസ്ഐ പ്രീതിജ്, സീനിയർ സിവിൽ പോലീസ് ഓഫീസർമാരായ വിജയശങ്കർ, ജോസ് മോൻ, ഷാമോൻ, സിവിൽ പോലീസ് ഓഫീസർമാരായ സുധീഷ്, രതീഷ്, വനിതാ സിവിൽ പോലീസ് ഓഫീസർ നെയ്തിൽ ജ്യോതി എന്നിവരടങ്ങുന്ന സംഘവും ജില്ലാ പോലീസ് മേധാവിയുടെ ഡാൻസാഫ് ടീമും ചേർന്നാണ് പ്രതിയെ അറസ്റ്റ് ചെയ്തത്. പ്രതിയെ കോടതിയിൽ ഹാജരാക്കും. വിപണിയിൽ ലക്ഷങ്ങൾ വില വരുന്ന മയക്കുമരുന്നാണ് കണ്ടെത്തിയത്.

ഓമല്ലൂര്‍ കനാല്‍ സൗന്ദര്യവത്കരിക്കുന്നു

കുറുപ്പന്തറ: ഓമല്ലൂര്‍ കനാല്‍ സൗന്ദര്യവത്കരണത്തടൊപ്പം ഓമല്ലൂര്‍ കനാല്‍ പ്രദേശത്ത് കിഡ്‌സ് പാര്‍ക്കും ഓപ്പണ്‍ ജിം ഉള്‍പ്പെടുന്ന വിനോദ-വിജ്ഞാന ഹാപ്പിനസ് പാര്‍ക്കെന്ന സ്വപ്നവും പൂവണിയുന്നു. ഓമല്ലൂര്‍ കനാല്‍ പ്രദേശത്ത് ഉഴവൂര്‍ ബ്ലോക്ക് പഞ്ചായത്ത് വിഭാവനം ചെയ്യുന്ന പാര്‍ക്കിന‌ു വേണ്ടിയുള്ള പ്രവര്‍ത്തനം അവസാന റീച്ചിലാണ്. 1.5 കിലോമീറ്റര്‍ ദൈര്‍ഘ്യം വരുന്ന കനാലും പരിസരവും മോടിപിടിപ്പിച്ചു സൗന്ദര്യവത്കരിക്കാന്‍ പരിസരവാസികളായ നാല്പ തോളം കുടുംബങ്ങള്‍ ചേര്‍ന്നുണ്ടാക്കിയ വീ കാന്‍ സര്‍വീസ് ആന്‍ഡ് ചാരിറ്റബിള്‍ ഫൗണ്ടേഷനാണ് പ്രവര്‍ത്തനങ്ങള്‍ ഏകോപിപ്പിക്കുന്നത്. ജില്ലാ പഞ്ചായത്തിന്‍റെ ആഭിമുഖ്യത്തില്‍ കനാല്‍ പരിസരം ശുചികരിക്കുന്നതിനും മാനസികോല്ലാസത്തിനുമായി ടൈലുകള്‍ വിരിച്ചു മനോഹരമാക്കാനുള്ള പദ്ധതിക്കു സാങ്കേതികാനുമതി ലഭ്യമായിട്ടുണ്ട്. കനാല്‍പ്രദേശം ഫലവൃക്ഷത്തൈകളും തണല്‍മരങ്ങളും ഉദ്യാനങ്ങളും നട്ടുപരിപാലിച്ചു ചിത്രശലഭങ്ങളെയും മറ്റും ആകര്‍ഷിക്കാന്‍ ഉദ്ദേശിച്ചുള്ള മാഞ്ഞൂര്‍ പഞ്ചായത്തിന്‍റെ പദ്ധതിയും പുരോഗമിക്കുന്നു. കനാല്‍ വശങ്ങളില്‍ മണ്ണൊലിപ്പു തടയുന്നതിനുള്ള കയര്‍ ഭൂവസ്ത്രം ധരിക്കുന്നതിനുള്ള അനുമതി ലഭിച്ചതോടെ, ഇറിഗേഷന്‍ വകുപ്പുമായി മാഞ്ഞൂര്‍ പഞ്ചായത്ത് ധാരണാപത്രത്തില്‍ ഒപ്പുവച്ചു. കയര്‍ ഭൂവസ്ത്രത്തിനിടെയില്‍ പേള്‍ ഗ്രാസ് വച്ചുപിടിപ്പിച്ചുകൊണ്ട് കനാല്‍ പരിസരം പച്ചപ്പരവതാനി വിരിച്ചു സൗന്ദര്യവത്കരണത്തിന് മാറ്റുകൂട്ടുന്നതിനുള്ള ശ്രമങ്ങളും നടത്തിവരികയാണ്. കനാല്‍ പ്രദേശത്തുള്ള അപകടസാധ്യത നിറഞ്ഞ ചില പ്രദേശങ്ങളില്‍ മോന്‍സ് ജോസഫ് എംഎൽഎ നല്‍കുന്ന ഫണ്ടുപയോഗിച്ചു ക്രാഷ് ബാരിയര്‍ സ്ഥാപിക്കാനുള്ള പദ്ധതിയുടെ എസ്റ്റിമേറ്റ് എടുത്തു ഭരണാനുമതിക്കായി കാത്തിരിക്കുകയാണ്. ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാല മുന്‍കൈയെടുത്ത് പദ്ധതി പ്രദേശത്തിന്‍റെ പാലാ റോഡ് ജംഗ്ഷനില്‍ മിനി ഹൈമാസ്റ്റിനുള്ള അനുമതി ലഭ്യമാക്കിയിട്ടുണ്ട്. കോണ്‍ക്രീറ്റ് പൊളിഞ്ഞുപോയ കാനാലിനുള്ളിലെ ഭാഗം നന്നാക്കുന്നതിനായി മന്ത്രി റോഷി അഗസ്റ്റിന്‍ പത്തു ലക്ഷം രൂപ അനുവദിച്ചിട്ടുണ്ട്. ഇതിന്‍റെ എസ്റ്റിമേറ്റെടുത്ത് കൈമാറിയിട്ടുണ്ട്. നടപ്പു വര്‍ഷം വിവിധ പദ്ധതികള്‍ക്കായി ഉഴവൂര്‍ ബ്ലോക്ക് പഞ്ചായത്ത് പത്തു ലക്ഷം രൂപയും ജില്ലാ പഞ്ചായത്ത് 15 ലക്ഷം രൂപയും എംഎല്‍എയുടെ ആസ്തി വികസനഫണ്ടില്‍നിന്നു ക്രാഷ് ബാരിയര്‍ സ്ഥാപിക്കാനുള്ള നടപടകളുമാണ് പുരോഗമിക്കുന്നത്. പദ്ധതി പ്രദേശത്തുണ്ടായിരുന്ന അനധികൃത കൃഷികള്‍ ഫൗണ്ടേഷനംഗങ്ങളുടെ ശ്രമഫലമായി മാറ്റുകയും നിലവില്‍ വഴിയാത്രക്കാര്‍ക്കു തടസമായി നില്‍ക്കുന്ന വൈദ്യുതി പോസ്റ്റുകള്‍ വശങ്ങളിലേക്കു മാറ്റിസ്ഥാപിക്കുവാനുള്ള ശ്രമങ്ങളും ഫൗണ്ടേഷന്‍ നടത്തുന്നുണ്ട്. പദ്ധതി പ്രദേശത്തിന് സമ്മര്‍ ഗ്രീന്‍ - വേനല്‍ പച്ച എന്നാണ് നാമകരണം ചെയ്തിട്ടുള്ളത്. കുട്ടികള്‍ക്ക് കളിക്കാനും ഉല്ലസിക്കാനും പദ്ധതി പ്രദേശം അന്തരീക്ഷ മലിനീകരണത്തില്‍നിന്നു തടയുന്നതിനുമായുള്ള വിവിധ പദ്ധതികളുടെ പണിപ്പുരയിലാണെന്ന് ഫൗണ്ടേഷന്‍ ഭാരവാഹികളായ അഡ്വ. ജെയ്‌സണ്‍ പാളിയില്‍, ഡോ. ജെയ്‌സണ്‍ പി. ജേക്കബ്, പീറ്റര്‍ ജോസ്, അപ്പച്ചായി പാളിയില്‍, പി.ടി. മനുരാജ് എന്നിവര്‍ അറിയിച്ചു.

മെഡി. കോളജിൽ വിദ്യാർഥിനിക്ക് തെരുവുനായയുടെ കടിയേറ്റു

ഗാന്ധിനഗർ: കോട്ടയം മെഡിക്കൽ കോളജ് ആശുപത്രി പരിസരത്തെ തെരുവ് നായ്ക്കളുടെ ശല്യം രൂക്ഷമാകുന്നു. കഴിഞ്ഞ ദിവസം അഞ്ചാം വർഷ മെഡിക്കൽ വിദ്യാർഥിനിയെ നായ കടിച്ചു. ലേഡീസ് ഹോസ്റ്റലിൽനിന്നു കോളജിലേക്ക് വരുമ്പോൾ കൂട്ടംകൂടിനിന്ന തെരുനായ്ക്കളിൽ ഒന്ന് വിദ്യാർഥിനിയെ കടിക്കുകയായിരുന്നു. ഭീതിയിലായ വിദ്യാർഥി സഹപാഠികളെ വിളിച്ചാണ് അത്യാഹിത വിഭാഗത്തിൽ പ്രവേശിക്കപ്പെട്ടത്.

സര്‍ക്കാരിന്‍റെ നെല്ലുനയത്തിനെതിരേ മങ്കൊമ്പില്‍ നെല്‍കര്‍ഷക പ്രതിഷേധം

ചങ്ങനാശേരി: കേന്ദ്രസര്‍ക്കാര്‍ അരിയുടെ വില നല്‍കുമ്പോള്‍ നെല്ലിന്‍റെ വില നല്‍കാമെന്നു വ്യക്തമാക്കിയുള്ള സംസ്ഥാന സര്‍ക്കാറിന്‍റെ പുതിയ നെല്ലുസംഭരണ നയപ്രഖ്യാപനം ഒരു രീതിയിലും നെല്‍ കര്‍ഷകര്‍ക്ക് അംഗീകരിക്കാനാവില്ലെന്ന് നെല്‍ കര്‍ഷക സംരക്ഷണ സമിതി രക്ഷാധികാരി വി.ജെ. ലാലി സപ്ലൈകോ പാഡിയുടെ 2025-26 വര്‍ഷത്തെ നെല്ല് സംഭരണ നയത്തിലെ വികലതകള്‍ക്കെതിരേ നെല്‍ കര്‍ഷക സംരക്ഷണ സമിതി സംസ്ഥാന ഭാരവാഹികള്‍ മങ്കൊമ്പ് പാഡി മാര്‍ക്കറ്റിംഗ് ഓഫീസിന് മുന്നില്‍ സംഘടിപ്പിച്ച സമര പരിപാടി പ്രതിഷേധാഗ്‌നി-ആഗ് ഉദ്ഘാടനം ചെയ്യുകയായിരുന്നു അദ്ദേഹം. വൈസ് പ്രസിഡന്‍റ് കെ.ബി. മോഹനന്‍ അധ്യക്ഷത വഹിച്ചു. ജനറല്‍ സെക്രട്ടറി സോണിച്ചന്‍ പുളുങ്കുന്ന്, വര്‍ക്കിംഗ് പ്രസിഡന്‍റ് പി.ആര്‍. സതീശന്‍, ലാലിച്ചന്‍ പള്ളിവാതുക്കല്‍, പി. വേലായുധന്‍ നായര്‍, ഷാജി മുടന്താഞ്ഞിലി, ജോസി കുര്യന്‍, റോയി ഊരാംവേലി, വിശ്വനാഥപിള്ള ഹരിപ്പാട്, തോമാച്ചന്‍ ഇല്ലിക്കല്‍, കറിയാച്ചന്‍ ചേന്നങ്കര, സുഭാഷ് പറമ്പിശേരി, ജി. സൂരജ്, റാഫി ജോസ് മോഴൂര്‍, ജോജി തോമസ് തുടങ്ങിയവര്‍ പ്രസംഗിച്ചു.

അധിക ഡ്യൂട്ടി: മെഡി. കോളജ് ആശുപത്രിയിൽ സെക്യൂരിറ്റി ജീവനക്കാർ പണിമുടക്കി

ഗാന്ധിനഗർ: കോട്ടയം മെഡിക്കൽ കോളജിൽ സ്വകാര്യ ഏജൻസി മുഖേന നിയമിക്കപ്പെട്ട സെക്യൂരിറ്റി ജീവനക്കാർ പണിമുടക്കി. അഞ്ച് സ്ത്രീകളടക്കം 15 പേരാണ് ഡ്യൂട്ടി ചെയ്യുന്നത്. എട്ടു മണിക്കൂർ ഡ്യൂട്ടിയും 18,000 രൂപയും നാല് ഓഫ് എന്നുമായിരുന്നു സ്വകാര്യ മാനേജ്മെന്‍റുമായി സെക്യൂരിറ്റിക്കാർ വാക്കാൽ ഉടമ്പടി ഉണ്ടാക്കിയിരുന്നത്. എന്നാൽ ചൊവ്വാഴ്ച രാത്രി മാനേജ്മെന്‍റ് പ്രതിനിധികൾ മെഡിക്കൽ കോളജിൽ എത്തുകയും 12 മണിക്കൂർ ജോലി ചെയ്യണമെന്ന് ഡ്യൂട്ടിയിലുള്ളവരോട് ആവശ്യപ്പെടുകയും ചെയ്തു. ഇന്നലെ രാവിലെ ഡ്യൂട്ടിക്കായി ഇവർ എത്തിയപ്പോഴാണ് രാത്രിയിൽ ഡ്യൂട്ടിയിലുണ്ടായിരുന്നവർ ഏജൻസി പറഞ്ഞ കാര്യം സഹപ്രവർത്തകരെ അറിയിച്ചത്. തുടർന്ന് മുഴുവൻ പേരും ഡ്യൂട്ടി ബഹിഷ്കരിച്ചു. പിന്നീട് രാവിലെ 11 ഓടെ ഏജൻസി മാനേജർ മെഡിക്കൽ കോളജിലെത്തി പണിമുടക്കിയ സെക്യൂരിറ്റി ജീവനക്കാരുമായി സംസാരിച്ചു. തുടർന്ന് 12 മണിക്കൂർ ഡ്യൂട്ടിയും 23,000 രൂപ ശബളവും നാല് ഓഫും കൊടുക്കാമെന്ന ധാരണയിൽ ഇവർ ഡ്യൂട്ടിക്ക് കയറി. ‌ ഡ്യൂട്ടിയിൽ കയറി ഒരു മണിക്കൂർ കഴിഞ്ഞപ്പോഴാണ് അറിയുന്നത് അഞ്ചു സ്ത്രീ ജീവനക്കാരിൽ രണ്ടു പേർ വേണ്ടെന്നും സ്ത്രീ ജീവനക്കാർക്ക് രാത്രികാല ഡ്യൂട്ടി വേണ്ടെന്നുമാണ് ഏജൻസി തീരുമാനമെന്നത്. വളരെ കുറഞ്ഞ തുകയ്ക്കാണ് മെഡിക്കൽ കോളജിലെ സെക്യൂരിറ്റിക്കാരെ നിയമിക്കുന്നതിന് ക്വട്ടേഷൻ പിടിച്ചത്. അതുകൊണ്ട് കൂടുതൽ തുക വേതനമായി നൽകാൻ കഴിയില്ല. വനിതാ സെക്യൂരിറ്റിക്കാർക്ക് ആശുപത്രി അധികൃതർ താമസസൗകര്യം ക്രമീകരിച്ചു തരാത്തതിനാൽ ദിവസേന പോയി വരുന്ന വനിതകൾക്ക് മാത്രമേ ഡ്യൂട്ടി അവസരം നൽകാൻ പറ്റുകയുള്ളൂവെന്നും ഏജൻസി മാനേജർ എ.വി. തോമസ് പറഞ്ഞു

വാകത്താനം സെന്‍റ് ജയിംസ് പള്ളിയിലെ ‌മോഷണം: പ്രതികൾ പിടിയിൽ

വാകത്താനം: വാകത്താനത്തെ പള്ളിയില്‍നിന്നു സ്വര്‍ണവും പൂജാപാത്രങ്ങളും മോഷ്ടിച്ച കേസിലെ പ്രതികളെ പിടികൂടി. തിരുനെല്‍വേലി തെങ്കാശി ലക്ഷ്മിഭവനത്തില്‍ വസന്തകുമാര്‍ (54), പേരൂര്‍ പുട്ടത്തങ്കല്‍ വി.എസ്. ശശി(71), അതിരമ്പുഴ പേമലമുകളില്‍ ഉദയകുമാര്‍ (61) എന്നിവരെയാണ് വാകത്താനം- കോട്ടയം വെസ്റ്റ് പോലീസ് സംഘങ്ങളുടെ നേതൃത്വത്തില്‍ അറസ്റ്റ് ചെയ്തത്. വാകത്താനം തൃക്കോതമംഗലം സെന്‍റ് ജയിംസ് ഓര്‍ത്തഡോക്‌സ് പള്ളിയുടെ ഓഫീസ് മുറിയും വികാരിയുടെ മുറിയും കുത്തിത്തുറന്ന് പൂജാ പാത്രവും അലമാരയില്‍ സൂക്ഷിച്ചിരുന്ന 10 സ്വര്‍ണ താലിയും മോഷ്ടിച്ചു കളയുകയായിരുന്നു സംഘം. ഇക്കഴിഞ്ഞ ജൂണ്‍ 28, 29 തീയതികളിലാണ് പ്രതികള്‍ മോഷണം നടത്തിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

അക്ഷരനഗരിക്ക് ഇത്തവണ ഹൈടെക് ഓണം : ഓണം ഫെസ്റ്റിന് ഇന്നു തുടക്കം

കോട്ടയം: അക്ഷരനഗരിയായ കോട്ടയത്തിന് ഇത്തവണത്തെ ഓണം ഹൈടെക്. ഇന്നു മുതല്‍ നാഗമ്പടം മൈതാനത്ത് ആരംഭിക്കുന്ന കോട്ടയം ഓണം ഫെസ്റ്റില്‍ കാഴ്ചകള്‍ എല്ലാം നിര്‍മിത ബുദ്ധിയുടെയും റോബോട്ടിക്‌സിന്‍റെയും സഹായത്തോടെ തയാറാക്കിയിട്ടുള്ളതാണ്. ഇന്ത്യയില്‍ ഏറ്റവും വലിയ സൂപ്പര്‍ റിയാലിറ്റി ഡോം തിയറ്റര്‍, മനുഷ്യ റോബോട്ടുകള്‍, റോബോ നായകുട്ടികള്‍, അന്യഗ്രഹ ജീവികളുടെ ലോകമായ അവതാര്‍ വേള്‍ഡ് തുടങ്ങി അനവധി മായിക കാഴ്ചകളാണ് ഓണം ഫെസ്റ്റ് പവലിയനില്‍ ഒരുക്കിയിട്ടുള്ളത്. ഇന്ന് ഉച്ചകഴിഞ്ഞ് 3.30ന് കോട്ടയം നഗരസഭാ അധ്യക്ഷ ബിന്‍സി സെബാസ്റ്റ്യന്‍ ഓണം ഫെസ്റ്റ് ഉദ്ഘാടനം ചെയ്യും. ഫെസ്റ്റിനോടനുബന്ധിച്ചു വ്യാപാര വാണിജ്യ മേള, വിശാലമായ ഫുഡ് കോര്‍ട്ട്, ഹൈടെക് അമ്യൂസ്‌മെന്‍റ് പാര്‍ക്ക്, നഴ്‌സറി എന്നിവയും സജ്ജീകരിച്ചിട്ടുണ്ട്. വ്യാപാര മേളയില്‍ ഫര്‍ണിച്ചര്‍, കിച്ചന്‍ ടൂള്‍സ്, ക്രോക്കറി, ബെഡ് ഷീറ്റ്, ഫാന്‍സി, കിഡ്സ് ടോയ്സ്, കോഴിക്കോടന്‍ ഹല്‍വ, പഴയകാല മിഠായി തുടങ്ങിയ സാധനങ്ങള്‍ ആദായ വിലയ്ക്ക് വാങ്ങാന്‍ കഴിയും. വിവിധയിനം തൈകളുടെയും വിത്തുകളുടെയും വില്‍പനയുണ്ട്. സെപ്റ്റംബര്‍ 14വരെ എല്ലാ ദിവസവും രാവിലെ 11 മുതല്‍ രാത്രി 10വരെയാണ് ഫെസ്റ്റ്. ടിക്കറ്റ് നിരക്ക് 100 രൂപ. അഞ്ചുവയസു വരെയുള്ള കുട്ടികള്‍ക്ക് പ്രവേശനം സൗജന്യമാണ്. ഫോൺ - 9747964954, 7306513972, 9846890290

അഖില്‍ സി. വര്‍ഗീസ്- അവിശ്വസനീയ തട്ടിപ്പുകഥയിലെ നായകൻ

കോട്ടയം: നഗരസഭയിലെ രണ്ടരക്കോടി തട്ടിപ്പുകാരന്‍ അഖില്‍ സി. വര്‍ഗീസ് നയിച്ചത് ആഡംബരജീവിതം. അമ്മ പി. ശ്യാമളയുടെ അക്കൗണ്ടില്‍ ലഭിച്ചിരുന്ന തട്ടിപ്പുപണം ഓരോ മാസവും കൃത്യമായി തന്‍റെ പല അക്കൗണ്ടുകളിലേക്കു മാറ്റിയിരുന്ന പ്രതി, ഈ തുക ഉപയോഗിച്ച് ആഡംബര ജീവിതമാണ് നയിച്ചിരുന്നതെന്നു പോലീസ് സംഘം കണ്ടെത്തി. നാലു വര്‍ഷം തുടര്‍ന്ന തട്ടിപ്പ് വഴിയാണ് കൊല്ലം സ്വദേശിയായ അഖില്‍ കോട്ടയം നഗരസഭ ഓഫീസിലെ പെന്‍ഷന്‍ ഫണ്ടില്‍നിന്നും 2.40 കോടി അപഹരിച്ചത്. തട്ടിയെടുത്ത പണം ഉപയോഗിച്ച് മൂന്ന് ബൈക്കുകളാണ് അഖില്‍ സി. വര്‍ഗീസ് വാങ്ങിയത്. ഇതില്‍ ലക്ഷങ്ങള്‍ വിലവരുന്ന ഒരു ഹാര്‍ലി ഡേവിഡ്സണ്‍ ബൈക്കും ഉള്‍പ്പെടുന്നു. ഒരു കാറും ഇയാള്‍ വാങ്ങിയിട്ടുണ്ട്. ഇതുകൂടാതെ കൊല്ലത്ത് ഏഴു സെന്‍റ് സ്ഥലവും വാങ്ങി. ഈരാറ്റുപേട്ടയിലെ ബാങ്കില്‍ ഇയാള്‍ക്ക് വായ്പയുണ്ടായിരുന്നു. തട്ടിച്ചെടുത്ത പണമാണ് ഈ വായ്പ കുടിശിക അടച്ചുതീര്‍ക്കാന്‍ പ്രതി ഉപയോഗിച്ചിരുന്നതെന്ന് വിജിലന്‍സ് കണ്ടെത്തിയിട്ടുണ്ട്. ‌ ഇതുകൂടാതെയാണ് പ്രതി നാല് ക്രെഡിറ്റ് കാര്‍ഡുകള്‍ ഉപയോഗിച്ചിരുന്നത്. ഈ കാര്‍ഡുകള്‍ ഉപയോഗിച്ചും വന്‍ തുക ചെലവഴിച്ചിരുന്നു. ഈ കാര്‍ഡുകളുടെ ബില്ലടയ്ക്കാനും തട്ടിപ്പുതുകയാണ് ഇയാള്‍ ഉപയോഗിച്ചിരുന്നതെന്നും കണ്ടെത്തിയിട്ടുണ്ട്. കോട്ടയത്ത് വിവിധ ജ്വല്ലറികളില്‍നിന്നും സ്വര്‍ണം വാങ്ങിയതായും വിജിലന്‍സിനോട് സമ്മതിച്ചു. നാലു വര്‍ഷമാണ് അഖില്‍ സി. വര്‍ഗീസ് കോട്ടയം നഗരസഭയില്‍ ജോലി ചെയ്തിരുന്നത്. കഴിഞ്ഞ വര്‍ഷം നഗരസഭാ സെക്രട്ടറിയാണ് തട്ടിപ്പ് സംബന്ധിച്ചു നഗരസഭാ കൗണ്‍സില്‍ യോഗത്തില്‍ റിപ്പോര്‍ട്ട് ചെയ്തത്.

പെരുന്തേനീച്ചപ്പട തോറ്റോടും ജോഷിയുടെ പച്ചമരുന്നില്‍

കോട്ടയം: അപകടകാരിയായ പെരുന്തേനീച്ചക്കൂട്ടമുണ്ടോ, പേടിക്കേണ്ട ജോഷിയെ വിളിക്കാം. പൂഞ്ഞാറില്‍നിന്നു ജോഷി പാഞ്ഞെത്തിയാല്‍ പെരുന്തേനീച്ചകള്‍ പറന്നകലും. പാലാ കുരിശുപള്ളിയുടെ മുകളിലും അരുവിത്തുറ പള്ളിയിലെ സെന്‍റ് ജോര്‍ജിന്‍റെ രൂപത്തിനു സമീപവും കുറവിലങ്ങാട് സയന്‍സ് സിറ്റി കെട്ടിടത്തിന്‍റെ മുകളിലും മാത്രമല്ല പെരുമരങ്ങള്‍ക്കു മുകളിലും കൈപ്പൊക്കത്തിലുമൊക്കെ കൂടുകൂട്ടിയ തേനീച്ചക്കൂട്ടത്തെയാണ് പൂഞ്ഞാര്‍ പനച്ചിപ്പാറ മൂഴിയാങ്കല്‍ ജോഷി ജോര്‍ജ് നൊടിയിടയില്‍ തുരത്തിയത്. ഏറ്റവും ഒടുവില്‍ ചൂണ്ടച്ചേരി കോളജില്‍ ഓണാഘോഷത്തിനിടെ ഇളകിയെത്തിയ തേനീച്ചക്കൂട്ടത്തെയും ളാക്കാട്ടൂര്‍ എന്‍എസ്എസ് സ്‌കൂളിലെ തേനീച്ചകളെയും ജോഷി പറപ്പിച്ചു. ജോഷിക്ക് കോളജ് വിദ്യാഭ്യാസ കാലത്ത് വീട്ടില്‍ വന്‍തേനീച്ച വളര്‍ത്തലുണ്ടായിരുന്നു. പാലക്കാട് അട്ടപ്പാടിയിലെ സ്ഥലത്തെ കൃഷികാര്യങ്ങള്‍ നോക്കാന്‍ പോയ സമയത്ത് അവിടത്തെ ആദിവാസികളില്‍നിന്നാണ് പെരുന്തേനീച്ചക്കൂട്ടത്തെ തുരത്തുന്നതിനുള്ള രീതി മനസിലാക്കിയത്. കിട്ടിയ അറിവ് നാട്ടില്‍ പരീക്ഷിച്ചപ്പോള്‍ വിജയം. അതോടെ പെരുന്തേനീച്ച കൂടുവച്ചിരിക്കുന്നിടത്തൊക്കെനിന്നും ജോഷിക്ക് വിളിയെത്തി. എട്ടു കൂട്ടം പച്ചമരുന്നുകള്‍ ചേര്‍ത്തുണ്ടാകുന്ന മരുന്ന് പുകച്ചാണ് തേനീച്ചകളെ തുരത്തുന്നത്. ആദ്യം അടുത്തെത്തി അക്രമകാരികളാണോ ശാന്തരാണോ എന്ന് നിരീക്ഷിക്കും. ഇതിനനുസരിച്ചാണ് മരുന്നു പ്രയോഗം. ചൂട്ടില്‍ ചകിരി വച്ച് അതിലാണ് മരുന്ന് വയ്ക്കുന്നത്. മരുന്നില്‍വച്ച് ഉണക്കിയെടുത്ത ചകിരിയാണ് ഉപയോഗിക്കുന്നത്. പുക എത്തുമ്പോള്‍ ശേഷിയും ഓര്‍മയും നഷ്ടപ്പെട്ട തേനീച്ചകള്‍ പറന്നകലും. മരുന്നിന്‍റെ കൂട്ട് ജോഷിയുടെ രഹസ്യമാണ്. ഉയരമുള്ള സ്ഥലങ്ങളിലാണെങ്കില്‍ കൈവശമുള്ള 18 അടി ഉയരമുള്ള തോട്ടി ഉപയോഗിക്കും. മുകളില്‍ കയറാന്‍ ബുദ്ധിമുട്ടാണെങ്കില്‍ ജെസിബി, ക്രെയിന്‍ എന്നിവയില്‍ തോട്ടി കെട്ടിയും മരുന്ന് പുകയ്ക്കും. ആരു വിളിച്ചാലും അവിടെയെത്തി ഈച്ചയെ തുരത്തും. പെട്രോള്‍ കൂലി ഉള്‍പ്പെടെയുളള ചെറിയ ഫീസ് വാങ്ങും. പെരുന്തേനീച്ചയെ മാത്രമല്ല കടന്നലിനെയും മരുന്നില്‍ പുകച്ചു തുരത്തും. വനം വകുപ്പിന്‍റെയും ജില്ലാ കളക്ടറുടെയും ലൈസന്‍സും ജോഷിക്കുണ്ട്. 2010-15 കാലഘട്ടത്തില്‍ പൂഞ്ഞാർ‍ ഗ്രാമപഞ്ചായത്ത് പ്രസിഡന്‍റായിരുന്ന ജോഷി അറിയപ്പെടുന്ന പൊതു പ്രവര്‍ത്തകനുമാണ്. പെരുന്തേനീച്ചയില്‍നിന്ന് നാട്ടുകാരെ രക്ഷിക്കുന്ന ജോഷിക്ക് ഉമ്മന്‍ ചാണ്ടി സര്‍ക്കാരിന്‍റെ കാലത്ത് ജീവന്‍ രക്ഷാ പുരസ്‌കാരം ലഭിച്ചിട്ടുണ്ട്. കേരള കോണ്‍ഗ്രസ്-എം പൂഞ്ഞാര്‍ മണ്ഡലം പ്രസിഡന്‍റു കൂടിയായ ജോഷിക്ക് ഭാര്യയും മൂന്നു മക്കളുമാണുള്ളത്.

മണര്‍കാട് കത്തീഡ്രലില്‍ എട്ടുനോമ്പ് പെരുന്നാളിന് ഒന്നിനു കൊടിയേറും

കോട്ടയം: മരിയന്‍ തീര്‍ഥാടന കേന്ദ്രമായ മണര്‍കാട് സെന്‍റ് മേരീസ് യാക്കോബായ സുറിയാനി കത്തീഡ്രലില്‍ എട്ടുനോമ്പ് പെരുന്നാളിന് സെപ്റ്റംബര്‍ ഒന്നിന് കൊടിയേറും. 31നു വൈകുന്നേരം സന്ധ്യാപ്രാര്‍ഥനയോടെ നോമ്പാചരണത്തിനു തുടക്കമാകും. സന്ധ്യാപ്രാര്‍ഥനയെത്തുടര്‍ന്ന് വൈദികരുടെയും കത്തീഡ്രല്‍ ഭാരവാഹികളുടെയും മാനേജിംഗ് കമ്മിറ്റി അംഗങ്ങളുടെയും നേതൃത്വത്തില്‍ കല്‍ക്കുരിശില്‍ തിരിതെളിക്കും. തുടര്‍ന്ന് പെരുന്നാളിനോട് അനുബന്ധിച്ച് ആരംഭിച്ചിരിക്കുന്ന വിവിധ കൗണ്ടറുകളുടെ ഉദ്ഘാടനം നിര്‍വഹിക്കും. ഇലുമിനേഷന്‍ ലൈറ്റുകളുടെ സ്വിച്ച് ഓണ്‍ കര്‍മവും പോലീസ് കണ്‍ട്രോള്‍ റൂമിന്‍റെ ഉദ്ഘാടനവും ജില്ലാ പോലീസ് മേധാവി ഷാഹുല്‍ ഹമീദ് നിര്‍വഹിക്കും. കരോട്ടെ പള്ളിയില്‍ സെപ്റ്റംബര്‍ ഒന്നുമുതല്‍ എട്ടുവരെ രാവിലെ ആറിന് വിശുദ്ധ കുര്‍ബാനയും കത്തീഡ്രലില്‍ രാവിലെ 7.30ന് പ്രഭാത പ്രാര്‍ഥനയും 8.30ന് വിശുദ്ധ കുര്‍ബാനയും വൈകുന്നേരം അഞ്ചിന് സന്ധ്യാപ്രാര്‍ഥനയും ഉണ്ടായിരിക്കും. സെപ്റ്റംബര്‍ ഒന്നുമുതല്‍ അഞ്ചുവരെ ഉച്ചയ്ക്ക് 12ന് മധ്യാഹ്ന പ്രാര്‍ഥനയും രാവിലെ 11നും ഉച്ചകഴിഞ്ഞ് 2.30നും പ്രസംഗവും സെപ്റ്റംബര്‍ ഒന്നു മുതല്‍ രണ്ടുവരെ വൈകുന്നേരം ആറിന് ധ്യാനവും ഉണ്ടായിരിക്കും. സെപ്റ്റംബര്‍ ഒന്നിന് മൂന്നിന്മേല്‍ കുര്‍ബാനയ്ക്ക് ഡോ. തോമസ് മാര്‍ തീമോത്തിയോസ് മുഖ്യകാര്‍മികത്വം വഹിക്കും. ഉച്ചകഴിഞ്ഞ് രണ്ടിന് കൊടിമരഘോഷയാത്രയ്ക്കായി പള്ളിയില്‍നിന്ന് പുറപ്പെടും. വൈകുന്നേരം 4.30ന് ഡോ. തോമസ് മാര്‍ തീമോത്തിയോസ് മെത്രാപ്പോലീത്തയുടെ നേതൃത്വത്തില്‍ പ്രാര്‍ഥനയ്ക്കുശേഷം കൊടിമരം ഉയര്‍ത്തും. കുര്യാക്കോസ് മാര്‍ ഈവാനിയോസ് സെപ്റ്റംബര്‍ രണ്ടിനും പൗലോസ് മാര്‍ ഐറേനിയോസ് സെപ്റ്റംബര്‍ മൂന്നിനും മൂന്നിന്മേല്‍ കുര്‍ബാനയ്ക്ക് മുഖ്യകാര്‍മികത്വം വഹിക്കും. മെറിറ്റ് ഡേയും വയോജനങ്ങളെ ആദരിക്കലും മൂന്നിന് വൈകുന്നേരം ആറിന് നടക്കും. സെപ്റ്റംബര്‍ നാലിന് മൂന്നിന്മേല്‍ കുര്‍ബാനയ്ക്ക് ഐസക് മാര്‍ ഒസ്താത്തിയോസ് മുഖ്യകാര്‍മികത്വം വഹിക്കും. വൈകുന്നേരം ആറിന് ആധ്യാത്മിക സംഘടനകളുടെ പൊതുസമ്മേളനം. സെപ്റ്റംബര്‍ അഞ്ചിന് മൂന്നിന്മേല്‍ കുര്‍ബാനയ്ക്ക് മര്‍ക്കോസ് മാര്‍ ക്രിസോസ്റ്റമോസ് പ്രധാന കാര്‍മികത്വം വഹിക്കും. സെപ്റ്റംബര്‍ ആറിന് കുര്യാക്കോസ് മാര്‍ തെയോഫിലോസിന്‍റെ പ്രധാന കാര്‍മികത്വത്തില്‍ അഞ്ചിന്മേല്‍ കുര്‍ബാന. ഉച്ചകഴിഞ്ഞ് രണ്ടിന് കുരിശുപള്ളികളിലേക്കുള്ള ഭക്തിനിര്‍ഭരമായ റാസ. സെപ്റ്റംബര്‍ ഏഴിന് ശ്രേഷ്ഠ കാതോലിക്കാ ബസേലിയോസ് ജോസഫ് ബാവാ മൂന്നിന്മേല്‍ കുര്‍ബാനയ്ക്കു പ്രധാന കാര്‍മികത്വം വഹിക്കും. 11.30ന് ഉച്ചനമസ്‌കാരത്തെത്തുടര്‍ന്ന് ശ്രേഷ്ഠ കാതോലിക്കാ ബാവായുടെ മുഖ്യകാര്‍മികത്വത്തില്‍ നടതുറക്കല്‍ ശുശ്രൂഷ. തുടര്‍ന്ന് കറിനേര്‍ച്ചയ്ക്കുള്ള പന്തിരുനാഴി ഘോഷയാത്ര. വൈകുന്നേരം 7.30ന് കരോട്ടെ പള്ളി ചുറ്റിയുള്ള പ്രദക്ഷിണം. 8.45ന് ആകാശവിസ്മയം. 10ന് പരിചമുട്ടുകളി, മാര്‍ഗം കളി. രാത്രി 12ന് ശേഷം കറിനേര്‍ച്ച വിതരണം. പ്രധാന പെരുന്നാള്‍ ദിനമായ സെപ്റ്റംബര്‍ എട്ടിന് മൂന്നിന്മേല്‍ കുര്‍ബാനയ്ക്ക് മാത്യൂസ് മാര്‍ അപ്രേം മുഖ്യകാര്‍മികത്വം വഹിക്കും. ഉച്ചകഴിഞ്ഞ് രണ്ടിന് കരോട്ടെ പള്ളി ചുറ്റിയുള്ള പ്രദക്ഷിണം, ആശീര്‍വാദം. വൈകുന്നേരം മൂന്നിന് നടക്കുന്ന നേര്‍ച്ചവിളമ്പോടെ പെരുന്നാള്‍ സമാപിക്കും. പത്രസമ്മേളനത്തില്‍ കത്തീഡ്രല്‍ സഹവികാരിയും പ്രോഗ്രാം ജോയിന്‍റ് കണ്‍വീനറുമായ ഫാ. ലിറ്റു തണ്ടാശേരില്‍, കത്തീഡ്രല്‍ ട്രസ്റ്റിമാരായ സുരേഷ് കെ. ഏബ്രഹാം കണിയാംപറമ്പില്‍, ബെന്നി ടി. ചെറിയാന്‍ താഴത്തേടത്ത്, ജോര്‍ജ് സഖറിയ ചെമ്പോല, കത്തീഡ്രല്‍ സെക്രട്ടറി പി.എ. ചെറിയാന്‍ പാണാപറമ്പില്‍, പ്രോഗ്രാം കോ-ഓര്‍ഡിനേറ്റര്‍ ഡീക്കന്‍ ഡോ. ജിതിന്‍ കുര്യന്‍ ആന്‍ഡ്രൂസ് എന്നിവര്‍ പങ്കെടുത്തു.

കുറ്റ്യാടി തെങ്ങിനു ഭൗമസൂചികാപദവി പരിഗണനയില്‍

കോട്ടയം: മണ്ഡരിയെയും ചെള്ളിനെയും ചെറുക്കുന്ന പ്രതിരോധശേഷിയും മികച്ച വിളവും ലക്ഷ്യമിട്ട് കര്‍ഷകർ നട്ടുവരുന്ന കുറ്റ്യാടി തെങ്ങിനു ഭൗമസൂചികാപദവി പരിഗണനയില്‍. കേരള കാര്‍ഷിക സര്‍വകലാശാലയും കോഴിക്കോട് ജില്ലയിലെ കാവിലുംപാറ പഞ്ചായത്തും ചേര്‍ന്നാണ് നാട്ടുപെരുമയുള്ള കുറ്റ്യാടി തെങ്ങിനെ തനിമയുള്ള ഫലവൃക്ഷമായി അറിയപ്പെടാനുള്ള സാധ്യത തേടുന്നത്. ജിയോഗ്രഫിക്കല്‍ ഇന്‍ഡിക്കേഷന്‍ അഥവാ ഭൗമസൂചികാപദവി ലഭിക്കുന്ന കേരളത്തിലെ ആദ്യ തെങ്ങിനമായി ഇത് മാറും. നട്ട് അഞ്ചാം വര്‍ഷം കായ്ഫലവും നൂറു വര്‍ഷം ആയുസുമുള്ള ഈ ഇനത്തിന് പ്രതിരോധശേഷി കൂടുതലുണ്ട്. വലിയ തേങ്ങയും കഴമ്പുള്ള അകവും മറ്റ് തനിമകളാണ്. തേങ്ങ വില്‍ക്കുന്നതിനെക്കാള്‍ തേങ്ങ നന്നായി ഉണക്കി മുളപ്പിച്ച് തൈകളായി വിറ്റ് കൂടുതല്‍ ലാഭമുണ്ടാക്കാനാണ് കുറ്റ്യാടി കര്‍ഷകര്‍ക്ക് താത്പര്യം. ഭൗമസൂചിക ലഭ്യമാക്കാന്‍ കാവിലുംപാറ പഞ്ചായത്ത് മൂന്നു ലക്ഷം രൂപ വിനിയോഗിച്ചാണ് കാര്‍ഷിക സര്‍വകലാശാലയുടെ സഹകരണത്തോടെ ഫയല്‍ നടപടികള്‍ നീക്കുന്നത്. കേന്ദ്ര നാണ്യവിള ഗവേഷണകേന്ദ്രമാണ് ഭൗമസൂചിക പ്രഖ്യാപിക്കുന്നത്. മൂന്നു വര്‍ഷത്തിനുള്ളില്‍ അംഗീകാരം ലഭിക്കുമെന്നാണ് പ്രതീക്ഷ.

അധിക തസ്തികനിര്‍ണയം അംഗീകാരം : സര്‍ക്കാര്‍ അടിയന്തര പരിഹാരം കാണണമെന്ന് പ്രൈവറ്റ് സ്‌കൂള്‍ മാനേജേഴ്‌സ് അസോ.

കോട്ടയം: വിദ്യാര്‍ഥികളുടെ വര്‍ധനമൂലം ഉണ്ടാകുന്ന അധിക തസ്തികനിര്‍ണയം അംഗീകാരം സംബന്ധിച്ച വിഷയത്തില്‍ സര്‍ക്കാര്‍ അടിയന്തര പരിഹാരം കാണണമെന്ന് കേരള പ്രൈവറ്റ് സ്‌കൂള്‍ മാനേജേഴ്‌സ് അസോസിയേഷന്‍. 2010ല്‍ സര്‍ക്കാര്‍ ഇറക്കിയ 1:1 ഉത്തരവിനെതിരേ എയ്ഡഡ് സ്‌കൂള്‍ മാനേജര്‍മാര്‍ സുപ്രീം കോടതിയില്‍ നല്‍കിയ കേസ് തീര്‍പ്പാക്കാത്തതിനാല്‍ 2021ല്‍ സര്‍ക്കാര്‍ ഇറക്കിയ പുതിയ ഉത്തരവിലൂടെ താത്കാലിക പരിഹാരം കണ്ടിരുന്നു. ആയതിനാല്‍ 2021 ലെ ഇടതു സര്‍ക്കാര്‍ ചെയ്തതുപോലെ സുപ്രീം കോടതി കേസ് തീര്‍പ്പാക്കാത്തതിനാല്‍ സമാനമായ ഒരുത്തരവിലൂടെ വിദ്യാര്‍ഥികളുടെ വര്‍ധനമൂലം ഉണ്ടാകുന്ന അധിക തസ്തിക പ്രതിസന്ധിക്ക് പരിഹാരം കാണണമെന്നാണ് മാനേജേഴ്‌സ് അസോസിയേഷന്‍ ആവശ്യപ്പെട്ടത്. സുപ്രീം കോടതി ഉത്തരവില്‍ പറഞ്ഞിരിക്കുന്നതുപോലെ ഭിന്നശേഷി സംവരണം നടപ്പാക്കുന്നത് ഹൊറിസോണ്ടല്‍ റിസര്‍വേഷന്‍ കാറ്റഗറിയില്‍ ഉള്‍പ്പെടുത്തി ഒരു സ്ഥാപനത്തിലെ മുഴുവന്‍ ഒഴിവുകളെയും ഒറ്റ കേഡറായി പരിഗണിച്ച് നല്‍കിയാല്‍ തീരാവുന്ന കാര്യം മാത്രമാണ്. ഇങ്ങനെ ചെയ്താല്‍ നിലവില്‍ സംസ്ഥാനത്ത് ഉടലെടുത്തിരിക്കുന്ന വിദ്യാഭ്യാസ മേഖലയിലെ നിയമനങ്ങളുമായി ബന്ധപ്പെട്ട ഭൂരിപക്ഷം ഭിന്നശേഷിക്കാരെയും ഉള്‍ക്കൊണ്ടു പരിഹരിക്കാന്‍ സാധിക്കും. കൂടാതെ കോടതി ഉത്തരവുകള്‍ പ്രകാരം സ്‌കൂളുകളിലെ ഭിന്നശേഷി നിയമനത്തിന് ഒരു സ്റ്റേറ്റ് ലെവല്‍ സെലക്‌ഷന്‍ കമ്മിറ്റി ഉണ്ടാക്കുവാനും അവര്‍ നല്‍കുന്ന ഉദ്യോഗാര്‍ഥികളുടെ ലിസ്റ്റില്‍നിന്നും മാനേജര്‍മാര്‍ ഉദ്യോഗാര്‍ഥികളെ നിയമിക്കുന്നത് ഉറപ്പുവരുത്താനുമാണ് പറഞ്ഞിരിക്കുന്നത്. എന്നാല്‍ ഇതുമായി ബന്ധപ്പെട്ട് വിദ്യാഭ്യാസ വകുപ്പ് ഇറക്കിയ ഉത്തരവില്‍ പ്രസ്തുത കമ്മിറ്റികള്‍ ഉദ്യോഗാര്‍ഥികളുടെ റാങ്ക് ലിസ്റ്റ് പ്രസിദ്ധീകരിക്കാനും അതുപ്രകാരം മാനേജര്‍മാര്‍ അപ്പോയിന്‍റ്മെന്‍റുകള്‍ നടത്താനുമാണ് പറഞ്ഞിരിക്കുന്നത്. ഇത് മാനേജ്‌മെന്‍റുകളുടെ ഉദ്യോഗാര്‍ഥികളെ തെരഞ്ഞെടുക്കാനുള്ള അവകാശത്തിന്മേലുള്ള കടന്നുകയറ്റമാണെന്നും മാനേജേഴ്‌സ് അസോസിയേഷന്‍ കുറ്റപ്പെടുത്തി. പത്രസമ്മേളനത്തില്‍ ജില്ലാ പ്രസിഡന്‍റ് ആര്‍. ഗോപീകൃഷ്ണന്‍, വൈസ്പ്രസിഡന്‍റ് കെ.ആര്‍. വിജയന്‍, ട്രഷറര്‍ ആര്‍. മധുലാല്‍, എക്‌സിക്യൂട്ടീവ് അംഗം അരുണ്‍ വാസുദേവന്‍ എന്നിവര്‍ പങ്കെടുത്തു.

സ്നേഹദീപം പദ്ധതി: രണ്ടു വീടുകള്‍ക്ക് ഇന്ന് തറക്കല്ലിടും

കിടങ്ങൂര്‍: ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ നേതൃത്വം നൽകുന്ന സ്നേഹദീപം ഭവനപദ്ധതി പ്രകാരമുള്ള രണ്ടു വീടുകളുടെ കൂടി നിര്‍മാണത്തിന് ഇന്ന് കിടങ്ങൂര്‍ പഞ്ചായത്തില്‍ തുടക്കം കുറിക്കും. പദ്ധതി പ്രകാരമുള്ള 54-ാം വീടാണിത്. രണ്ടു വീടുകളുടെയും താക്കോല്‍ സമര്‍പ്പണം സെപ്റ്റംബര്‍ പകുതിയോടെ നടത്തും. സ്നേഹദീപം കിടങ്ങൂരിന്‍റെ നേതൃത്വത്തിലുള്ള പതിനൊന്നും പന്ത്രണ്ടും വീടുകളുടെ ശിലാസ്ഥാപന കര്‍മം ഇന്നു രാവിലെ 9.30ന് കിടങ്ങൂര്‍ വാലേപ്പടിക്ക് സമീപം കിടങ്ങൂര്‍ പോലീസ് എസ്എച്ച്ഒ കെ.എല്‍. മഹേഷ് നിര്‍വ്വഹിക്കും. യോഗത്തില്‍ സ്നേഹദീപം കിടങ്ങൂര്‍ പ്രസിഡന്‍റ് ഡോ. മേഴ്സി ജോണ്‍ അധ്യക്ഷത വഹിക്കും.

കുടക്കച്ചിറ-ആണ്ടൂർ റോഡിൽ അപകടഭീഷണിയായി വൈദ്യുതി പോസ്റ്റ്

കുടക്കച്ചിറ: കുടക്കച്ചിറ-ആണ്ടൂർ റോഡിൽ വാഹനങ്ങൾക്ക് ഭീഷണിയായി വൈദ്യുതി പോസ്റ്റ്. പരുവനാടി ജംഗ്ഷനു സമീപം റോഡിലേക്ക് അപകടകരമാംവിധം ചെരിഞ്ഞുനിൽക്കുന്ന പോസ്റ്റിൽ തട്ടി വാഹനങ്ങളുടെ റിയർവ്യൂ മിറർ പൊട്ടുന്നതു പതിവായിരിക്കുകയാണ്. എതിരേ വാഹനങ്ങൾ വരുന്പോൾ ഭാഗ്യംകൊണ്ടുമാത്രമാണ് പോസ്റ്റിൽ ഇടിക്കാതെ അപകടം ഒഴിവാകുന്നത്. വൈക്കം-പാലാ റോഡിന്‍റെയും പാലാ-ഉഴവൂർ റോഡിന്‍റെയും ലിങ്ക് റോഡായ ഈ റോഡിൽ സ്കൂൾ വാഹനങ്ങൾ ഉൾപ്പെടെ നിരവധി വാഹനങ്ങളാണ് സഞ്ചരിക്കുന്നത്. റോഡിന്‍റെ വശം ചേർന്നുവരുന്ന ബൈക്ക് യാത്രികർ പലപ്പോഴും രക്ഷപ്പെടുന്നത് തലനാരിഴയ്ക്കാണ്. വലിയ അപകടങ്ങൾ ഉണ്ടാകുന്നതിനുമുന്പ് പോസ്റ്റ് മാറ്റിസ്ഥാപിച്ച് അപകടഭീഷണി ഒഴിവാക്കാൻ വൈദ്യുതിബോർഡ് അധികൃതർ തയാറാകണമെന്ന് നാട്ടുകാർ ആവശ്യപ്പെട്ടു.

കളത്തൂരിൽ ഫിറ്റ്നെസ് സെന്‍റർ തുറന്നു

കുറവിലങ്ങാട്: ഉഴവൂർ ബ്ലോക്ക് പഞ്ചായത്തിന്‍റെ നേതൃത്വത്തിൽ കളത്തൂരിൽ വനിതകൾക്കായി ഫിറ്റ്‌നെസ് സെന്‍റർ തുറന്നു. കുറവിലങ്ങാട് ഡിവിഷനിൽ കണിയോടി സാംസ്‌കാരിക നിലയത്തിലാണ് പുതിയ സെന്‍റർ പ്രവർത്തനം തുടങ്ങിയത്. സെന്‍ററിന്‍റെ ഉദ്ഘാടനം ബ്ലോക്ക് പഞ്ചായത്ത് മെംബർ പി.സി. കുര്യൻ നിർവഹിച്ചു. പഞ്ചായത്തംഗം ടെസി സജീവ് അധ്യക്ഷത വഹിച്ചു. ബ്ലോക്ക് പഞ്ചായത്തംഗം സിൻസി മാത്യു, പഞ്ചായത്തംഗം ബിജു പുഞ്ചായിൽ, ഗുണഭോക്തൃസമിതി പ്രസിഡന്‍റ് ത്രേസ്യാമ്മ കാരക്കാട്ട്, ബ്ലെസി ആവിയിൽ, മിനിമോൾ ജോർജ് എന്നിവർ പ്രസംഗിച്ചു. ബ്ലോക്ക് പഞ്ചായത്ത് വനിതാ ഘടക പദ്ധതിയിൽ ഉൾപ്പെടുത്തിയ സെന്‍ററിന് അടിസ്ഥാന സൗകര്യങ്ങൾക്കും ഉപകരണങ്ങൾക്കുമായി 6.5 ലക്ഷം രൂപ വിനിയോഗിച്ചതായി ബ്ലോക്ക് പഞ്ചായത്തംഗം പി.സി. കുര്യൻ പറഞ്ഞു.

ളാലം പഴയ പള്ളിയില്‍ എട്ടുനോമ്പ് തിരുനാള്‍

പാലാ: പ്രസിദ്ധ മരിയന്‍ തീര്‍ഥാടന കേന്ദ്രമായ പാലാ ളാലം പഴയ പള്ളിയില്‍ എട്ടുനോമ്പാചരണത്തിന്‍റെ ഭാഗമായി 30 മുതല്‍ സെപ്റ്റംബര്‍ എട്ടുവരെ പരിശുദ്ധ കന്യകമറിയത്തിന്‍റെ ജനനത്തിരുനാളും 414-ാമത് കല്ലിട്ട തിരുനാളും സംയുക്തമായി ആഘോഷിക്കും. 30നു വൈകുന്നേരം നാലിന് പുതുതായി നിര്‍മിച്ച കൊടിമരത്തിന്‍റെ ആശീര്‍വാദകര്‍മവും തിരുനാള്‍ കൊടിയേറ്റും മാര്‍ ജോസഫ് കല്ലറങ്ങാട്ട് നിര്‍വഹിക്കും. തുടര്‍ന്ന് പ്രസുദേന്തി വാഴ്ച, വിശുദ്ധ കുര്‍ബാന, സന്ദേശം, നൊവേന. വികാരി ഫാ. ജോസഫ് തടത്തില്‍ മുഖ്യകാര്‍മികത്വം വഹിക്കും. 31 മുതല്‍ സെപ്റ്റംബര്‍ ഏഴുവരെ തീയതികളിൽ പുലര്‍ച്ചെ 4.30 മുതല്‍ 5.30 വരെ ദിവ്യകാരുണ്യ ആരാധനയും ജപമാലയും ഉണ്ടായിരിക്കും. രാവിലെ 7.00, 9.30, വൈകുന്നേരം 4.30, 7.00 എന്നീ സമയങ്ങളില്‍ വിശുദ്ധ കുര്‍ബാനയും നൊവേനയും വൈകുന്നേരം 5.30ന് ജപമാല പ്രദക്ഷിണവും. സെപ്റ്റംബര്‍ ഒന്നിന് വൈകുന്നേരം നാലിന് മാര്‍ ജോസഫ് സ്രാമ്പിക്കല്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കും. പ്രധാന തിരുനാള്‍ ദിനമായ സെപ്റ്റംബര്‍ എട്ടിന് രാവിലെ 4.15 മുതല്‍ പൂച്ചെണ്ട് സമര്‍പ്പിക്കുന്നതിനുള്ള അവസരമുണ്ട്. 4.30നു ദിവ്യകാരുണ്യ ആരാധനയും ജപമാലയും. 5.30, 7.00, 9.30, 12.30, വൈകുന്നേരം 4.00 - വിശുദ്ധ കുര്‍ബാനയും നൊവേനയും. 6.30ന് ടൗണ്‍ ചുറ്റി പ്രദക്ഷിണം. ആഘോഷ പരിപാടികള്‍ക്ക് വികാരി ഫാ. ജോസഫ് തടത്തില്‍, പാസ്റ്ററല്‍ അസിസ്റ്റന്‍റ് ഫാ. ജോസഫ് ആലഞ്ചേരില്‍, അസി. വികാരിമാരായ ഫാ. സ്‌കറിയ മേനാംപറമ്പില്‍, ഫാ. ആന്‍റണി നങ്ങാപറമ്പില്‍, കൈക്കാരന്മാരായ ബേബിച്ചന്‍ ചക്കാലയ്ക്കല്‍, ടെന്‍സണ്‍ വലിയകാപ്പില്‍, ജോര്‍ജുകുട്ടി ഞാവള്ളില്‍, സാബു തേനംമാക്കല്‍, കണ്‍വീനര്‍മാരായ രാജേഷ് പാറയില്‍, തങ്കച്ചന്‍ കാപ്പില്‍, ലിജോ ആനിത്തോട്ടം എന്നിവര്‍ നേതൃത്വം നല്‍കും. വാക്കാട് പള്ളിയിൽ വാക്കാട്: സെബിമൗണ്ട് സെന്‍റ് സെബാസ്റ്റ്യൻസ് പള്ളിയിൽ പരിശുദ്ധ ദൈവമാതാവിന്‍റെ ജനനത്തിരുനാളും എട്ടുനോമ്പാചരണവും ഒന്നുമുതൽ എട്ടുവരെ നടക്കും. എല്ലാ ദിവസവും വൈകുന്നേരം ആറിന് ജപമാല, ലദീഞ്ഞ്, നേർച്ചവിതരണം. എട്ടിനു വൈകുന്നേരം അഞ്ചിന് വിശുദ്ധ കുർബാന, ജപമാലറാലി, മേരിനാമധാരീ സംഗമം, പാച്ചോർ നേർച്ച. രാമപുരം പള്ളിയില്‍ പ്രധാന തിരുനാള്‍ ഇന്ന് രാമപുരം: സെന്‍റ് അഗസ്റ്റിന്‍സ് ഫൊറോന പള്ളിയില്‍ വിശുദ്ധ ആഗസ്തീനോസിന്‍റെ പ്രധാന തിരുനാള്‍ ഇന്ന് ആഘോഷിക്കും. രാവിലെ ആറിന് സപ്ര. 6.15നും, 7.15നും പത്തിനും വൈകുന്നേരം നാലിനും വിശുദ്ധ കുര്‍ബാന. ഉച്ചയ്ക്ക് 12ന് പ്രദക്ഷിണം.

ടേക്ക് എ ബ്രേക്ക് ഇപ്പോൾ ബ്രേക്ക് മാത്രം!

പാലാ: ലക്ഷങ്ങള്‍ മുടക്കി സംസ്ഥാന പാതയോരത്ത് പഞ്ചായത്ത് പണിത ടേക്ക് എ ബ്രേക്ക് വിശ്രമകേന്ദ്രം വെറുതെകിടന്നു നശിക്കുന്നു. 2022ൽ 30 ലക്ഷം മുടക്കി കരൂർ പഞ്ചായത്ത് പണിത കേന്ദ്രമാണ് ഇപ്പോൾ സാമൂഹ്യവിരുദ്ധർക്ക് അഴിഞ്ഞാടാൻ വിട്ടുകൊടുത്തിരിക്കുന്നത്. യാത്രക്കാർക്ക് വിശ്രമിക്കാനും മറ്റ് ആവശ്യങ്ങൾക്കുമായിട്ടായിരുന്നു നിർമാണം. പുനലൂര്‍-മൂവാറ്റുപുഴ സംസ്ഥാന പാതയില്‍ ഇത്രയും സ്ഥലസൗകര്യമുള്ള ടേക്ക് എ ബ്രക്ക് സ്ഥാപനം വേറെയില്ല. വാഹനങ്ങള്‍ പാര്‍ക്ക് ചെയ്യാനും വിശ്രമിക്കാനും ആവശ്യത്തിനു സ്ഥലസൗകര്യമുണ്ടായിരുന്നു. എന്നാല്‍, പ്രവർത്തനം നിലച്ച് ഉപേക്ഷിക്കപ്പെട്ടതോടെ കെട്ടിടം മദ്യപരുടെയും സാമൂഹ്യവിരുദ്ധരുടെയും താവളമായി. ഇതു നാട്ടുകാര്‍ക്കും ശല്യമായി മാറിയിട്ടുണ്ട്. മദ്യക്കുപ്പികള്‍ നിറഞ്ഞ നിലയിലാണ് കെട്ടിടവും പരിസരപ്രദേശവും. ഉപകരണങ്ങളും നശിക്കുന്നു സംസ്ഥാന പാതയിലൂടെ വാഹനങ്ങളില്‍ കടന്നുപോകുന്നവര്‍ പ്രാഥമികാവശ്യങ്ങള്‍ നിറവേറ്റാന്‍ സൗകര്യമില്ലാതെ വിഷമിക്കുമ്പോഴാണ് ഈ കെട്ടിടം നോക്കുകുത്തിയാകുന്നത്. കെട്ടിടം നിര്‍മിച്ചതിനു ശേഷം ഏതാനും മാസം സ്വകാര്യ വ്യക്തി ഏറ്റെടുത്തു നടത്തിയിരുന്നു. എന്നാല്‍, പിന്നീട് പ്രവർത്തനം നിർത്തി. അതിനു ശേഷം മറ്റു കരാറുകാര്‍ക്കു നല്‍കാൻ പഞ്ചായത്ത് നടപടിയെടുത്തില്ല. കെട്ടിടം വെറുതെ കിടന്നു നശിക്കുന്ന സാഹചര്യമാണുള്ളത്. പൊതുപ്രവര്‍ത്തകര്‍ താലൂക്ക് വികസന സമിതിയില്‍ പരാതി നല്‍കിയെങ്കിലും നടപടിയുണ്ടായില്ല. കെട്ടിടത്തിനുള്ളിലെ ഉപകരണങ്ങളും നശിക്കുകയാണ്. ഇപ്പ ശരിയാക്കാം! സ്വകാര്യ കരാറുകാര്‍ക്കു പകരം കുടുംബശ്രീയെ സ്ഥാപനം എല്‍പ്പിക്കാനുള്ള നടപടി തുടങ്ങിയെന്നാണ് പഞ്ചായത്ത് ഭരണസമിതി അവകാശപ്പെടുന്നത്. ചില സാങ്കേതിക നടപടികള്‍ കാരണം താമസിക്കുകയാണത്രേ. കെട്ടിടം പ്രവര്‍ത്തനസജ്ജമാക്കിയാല്‍ സംസ്ഥാനപാതയിലൂടെ കടന്നുപോകുന്ന ആയിരക്കണക്കിനാളുകള്‍ക്കു പ്രയോജനപ്പെടുമെന്നു ചൂണ്ടിക്കാണിക്കപ്പെടുന്നു.

കേരളത്തിൽ പട്ടിണിഓണമെന്ന്

പാറത്തോട്: കാർഷിക മേഖല തകർച്ച നേരിടുന്ന ഈ അവസരത്തിൽ കേരളത്തിൽ ഇത്തവണ പട്ടിണി ഓണമെന്ന് മുൻ കേന്ദ്രമന്ത്രി പി.സി. തോമസ്. കേരള കോൺഗ്രസ് പാറത്തോട് മണ്ഡലം നേതൃയോഗം പാറത്തോട് പെൻഷൻ ഭവനിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സംസ്ഥാന ജനറൽ സെക്രട്ടറി ജോയി ഏബ്രഹാം ആമുഖപ്രസംഗം നടത്തി. ജില്ലാ പ്രസിഡന്‍റ് ജയ്സൺ ഒഴുകയിൽ, നിയോജകമണ്ഡലം പ്രസിഡന്‍റ് മജു പുളിക്കൽ, ഉന്നതാധികാര സമിതി അംഗങ്ങളായ മറിയാമ്മ ടീച്ചർ, സാബു പ്ലാത്തോട്ടം, ജോസഫ് വാരണം, സംസ്ഥാന സെക്രട്ടറിമാരായ ജോജി വാളിപ്ലാക്കൽ, സോണി തോമസ്, ജില്ലാ സെക്രട്ടറിമാരായ രാജു മായാലിൽ, വർഗീസ് കൊച്ചുകുന്നേൽ, സിബി നമ്പുടാകം, ജോൺസി വാന്തിയിൽ, അലക്സ് പുതിയാപറമ്പിൽ, തോമസുകുട്ടി വാരണത്ത് എന്നിവർ പ്രസംഗിച്ചു.

താണ്ടാംപറമ്പിൽപടി-വാഴുവേലിൽപടി റോഡ് തുറന്നു

കോരുത്തോട്: കോരുത്തോട് പഞ്ചായത്തിലെ താണ്ടാംപറമ്പിൽപടി-വാഴുവേലിൽപടി റോഡിന്‍റെ ഉദ്ഘാടനം സെബാസ്റ്റ്യൻ കുളത്തുങ്കൽ എംഎൽഎ നിർവഹിച്ചു. മുൻ പഞ്ചായത്ത് വൈസ് പ്രസിഡന്‍റ് തോമസ് മാണി കുമ്പുക്കൽ, ശ്യാമള വാസുദേവൻ, ഗർവാസീസ് മ്യാലിൽ, ജോയി പുരയിടത്തിൽ, പ്രദീപ് മടുക്ക, എം. ജിജി, അനിൽ കുമാർ, ഷാജി തുണ്ടത്തിൽ, ജോസഫ് പെരുവാച്ചിറ, ഔതക്കുട്ടി കരോട്ട് വെച്ചൂർ തുടങ്ങിയവർ പ്രസംഗിച്ചു. എംഎൽഎ ഫണ്ടിൽനിന്ന് അഞ്ചു ലക്ഷം രൂപ അനുവദിച്ചാണ് റോഡ് കോൺക്രീറ്റ് ചെയ്ത് ഗതാഗതയോഗ്യമാക്കിയത്.

പൊന്തൻപുഴ പട്ടയപ്രശ്നത്തിൽ സർക്കാരിന്‍റെ നിസംഗത അവസാനിപ്പിക്കണം: മജുഷ് മാത്യൂസ്

മണിമല: പൊന്തൻപുഴ വനത്തോട് ചേർന്നുകിടക്കുന്ന പ്രദേശങ്ങളിലെ നൂറുകണക്കിന് സാധാരണക്കാരായ ജനങ്ങളുടെ പട്ടയപ്രശ്നങ്ങളിൽ സർക്കാർ നിസംഗത തുടരാനാണ് ഭാവമെങ്കിൽ ശക്തമായ സമരപരിപാടികൾക്ക് കർഷക കോൺഗ്രസ് നേതൃത്വം നൽകുമെന്ന് സംസ്ഥാന പ്രസിഡന്‍റ് മജുഷ് മാത്യൂസ്. പൊന്തൻപുഴ പ്രദേശത്തെ പട്ടയപ്രശ്നങ്ങൾ ശാശ്വതമായി പരിഹരിക്കണമെന്നാവശ്യപ്പെട്ട് കർഷക കോൺഗ്രസ് കാഞ്ഞിരപ്പള്ളി നിയോജകമണ്ഡലം കമ്മിറ്റിയുടെ നേതൃത്വത്തിൽ മണിമല വില്ലേജ് ഓഫീസിലേക്ക് നടത്തിയ മാർച്ചും ധർണയും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പ്രദേശത്ത് ഡിജിറ്റൽ സർവേ ഉൾപ്പെടെയുള്ള നടപടിക്രമങ്ങൾ പൂർത്തിയാക്കിയെന്ന് അവകാശപ്പെട്ട് പട്ടയത്തിനുള്ള അപേക്ഷകൾ കർഷകരിൽനിന്നു വാങ്ങി മാസങ്ങൾ പിന്നിട്ടിട്ടും എന്തുകൊണ്ട് ഇതുവരെ പട്ടയം നൽകാൻ കഴിയുന്നില്ലെന്ന് സർക്കാർ വ്യക്തമാക്കണമെന്നും അദ്ദേഹം പറഞ്ഞു. നിയോജകമണ്ഡലം പ്രസിഡന്‍റ് ഗോപാലകൃഷ്ണൻ നായർ കങ്ങഴ അധ്യക്ഷത വഹിച്ചു. ജില്ലാ പ്രസിഡന്‍റ് തോമസുകുട്ടി മണക്കുന്നേൽ മുഖ്യപ്രഭാഷണം നടത്തി. ഡിസിസി ജനറൽ സെക്രട്ടറി പ്രഫ. റോണി കെ. ബേബി, കർഷക കോൺഗ്രസ് സംസ്ഥാന ഭാരവാഹികളായ ജോർജ് കൊട്ടാരം, സന്തോഷ് ചാന്നാനിക്കാട്, റോയി തങ്കച്ചൻ, ജില്ലാ ഭാരവാഹികളായ ഫിലിപ്പ് പള്ളിവാതിൽക്കൽ, ജോഷി മാത്യു, റ്റെഡി മൈക്കിൾ, പൂഞ്ഞാർ മാത്യു, ജോൺസൺ മുണ്ടക്കയം, റെജികുമാർ അമ്പലത്തിനാംകുന്നേൽ തുടങ്ങിയവർ പ്രസംഗിച്ചു.

മലയോര മേഖലയിൽ വ്യാജവാറ്റ് പെരുകുന്നു

മുണ്ടക്കയം: മലയോര മേഖലയിൽ ഓണം ലക്ഷ്യമാക്കി ചാരായവാറ്റ് കേന്ദ്രങ്ങളും വ്യാജ മദ്യ നിർമാണവും പെരുകി. ഇതോടെ എക്സൈസ് വകുപ്പ് പരിശോധന ഊർജിതമാക്കി. കോരുത്തോട്, പെരുവന്താനം, കൂട്ടിക്കൽ, മുണ്ടക്കയം അടക്കമുള്ള പഞ്ചായത്തുകളുടെ മലയോര മേഖലയിലാണ് വ്യാജമദ്യ നിർമാണം കൂടുതൽ. കഴിഞ്ഞ രണ്ടാഴ്ചയ്ക്കിടെ കൂട്ടിക്കൽ, പെരുവന്താനം, കോരുത്തോട് പഞ്ചായത്തുകളിലായി മൂന്ന് വലിയ കേസുകളാണ് റിപ്പോർട്ട് ചെയ്തത്. കൂട്ടിക്കൽ, പെരുവന്താനം പഞ്ചായത്തുകളിൽനിന്നു ചാരായം നിർമിക്കാനുള്ള കോടയാണ് എക്സൈസ് പോലീസ് സംഘങ്ങൾ പിടികൂടി നശിപ്പിച്ചതെങ്കിൽ കോരുത്തോട്ടിൽനിന്നു കണ്ടെത്തിയത് കുപ്പികളിൽ നിറച്ച വ്യാജ മദ്യമാണ്. വർഷങ്ങൾക്കു മുമ്പ് എരുമേലി എലിവാലിക്കരയിൽ വ്യാജമദ്യ നിർമാണ കേന്ദ്രം കണ്ടെത്തിയിരുന്നു. പ്രമുഖ ബ്രാൻഡിലുള്ള മദ്യം വലിയ തോതിലാണ് അന്ന് ഇവിടെ ഉത്പാദിപ്പിച്ചു വിറ്റഴിച്ചിരുന്നത്. ഇതിനു സമാനമായ വലിയ കേന്ദ്രങ്ങൾ പ്രവർത്തിക്കുന്നുണ്ടോയെന്ന സംശയവും ആളുകൾ പങ്കുവയ്ക്കുന്നുണ്ട്. വന്യമൃഗശല്യം മറ വനാതിർത്തി പങ്കിടുന്ന സ്ഥലങ്ങളിലെ വന്യമൃഗശല്യം രൂക്ഷമായ സ്ഥലങ്ങൾ കേന്ദ്രീകരിച്ച് ഇത്തരം സംഘങ്ങൾ തന്പടിക്കുന്നുണ്ട്. പെരുവന്താനം പഞ്ചായത്തിലെ ടിആർ ആൻഡ് ടി എസ്റ്റേറ്റിൽ ഏക്കറു കണക്കിനു സ്ഥലമാണ് വനാതിർത്തിയോടു ചേർന്ന് കാടുപിടിച്ചു കിടക്കുന്നത്. ഉപയോഗശൂന്യമായി കിടക്കുന്ന ഈ പ്രദേശത്ത് ആന അടക്കമുള്ള വന്യമൃഗങ്ങളുടെ സാന്നിധ്യവുമുണ്ട്. നാട്ടുകാരുടെ ഇടപെടൽ കുറവാണെന്നതിനാൽ ഈ മേഖലയിലും ചാരായവാറ്റ് സംഘങ്ങളുണ്ട്. കഴിഞ്ഞ ദിവസം പോലീസ് ഇവിടെ നടത്തിയ പരിശോധനയിൽ കോട പിടികൂടിയിരുന്നു. ജനം ഒഴിഞ്ഞ മേഖലയിലും പ്രളയത്തിൽ വ്യാപക നാശനഷ്ടമുണ്ടായ കൂട്ടിക്കൽ പഞ്ചായത്തിലെ പ്ലാപ്പള്ളി അടക്കമുള്ള മേഖലയിൽ വ്യാജമദ്യ നിർമാണ കേന്ദ്രങ്ങൾ സജീവമാകുന്നതായി സൂചനയുണ്ട്. പ്രളയത്തിൽ വലിയ ദുരിതം നേരിട്ട് ഈ മേഖലയിൽനിന്നു നിരവധി കുടുംബങ്ങൾ മറ്റു സ്ഥലങ്ങളിലേക്കു താമസം മാറ്റിയിരുന്നു. വിജനമായ ഇത്തരം സ്ഥലങ്ങൾ സാമൂഹ്യവിരുദ്ധർ കൈയേറുകയാണ്. കഴിഞ്ഞ ദിവസം എക്സൈസ് ഈ ഭാഗത്തു നടത്തിയ പരിശോധനയിൽ കോട കണ്ടെത്തി നശിപ്പിച്ചിരുന്നു.

മുക്കുപണ്ടം പണയംവച്ച് 1.65 ലക്ഷം രൂപ തട്ടിയെടുത്തു; രണ്ടു പേർ അറസ്റ്റിൽ

എരുമേലി: സ്വർണപ്പണയ ഇടപാട് സ്ഥാപനത്തിൽ മുക്കുപണ്ടം പലപ്പോഴായി പണയം വച്ച് 1.65 ലക്ഷം രൂപ തട്ടിയെടുത്തവർ ഒടുവിൽ അത് വിറ്റ് പണം നൽകാൻ ആവശ്യപ്പെട്ട് സ്ഥാപനത്തിൽ എത്തിയപ്പോൾ കുടുങ്ങി. സ്വർണം അല്ലെന്ന് സംശയം തോന്നിയ സ്ഥാപന ഉടമ മറ്റൊരു പണയ ഇടപാട് സ്ഥാപനത്തിലെ ടെസ്റ്റിംഗ് ഉപകരണത്തിൽ പരിശോധിച്ചതോടെയാണ് തട്ടിപ്പ് മനസിലായത്. എരുമേലി ജോസ്ന ഫൈനാൻസ് സ്ഥാപനത്തിലാണ് സംഭവം. എരുമേലി ശ്രീനിപുരം കോളനി സ്വദേശികളായ കൊച്ചുതോട്ടം ധനേഷ് (45), സുഹൃത്ത് കനകപ്പലം നിർത്തലിൽ സുരേഷ് (42) എന്നിവരാണ് അറസ്റ്റിലായത്. പ്രതികൾ അഞ്ച് തവണയാണ് പണയം വച്ച് പുതുക്കിയത്. സ്വർണത്തിന് വിപണിവില കൂടുമ്പോൾ ഇവർ കൂടുതൽ തുകയ്ക്ക് പുതുക്കിവച്ച് കൂടുതൽ പണം നേടുകയായിരുന്നു. സ്വർണമാണെന്ന് പരിശോധിച്ച് ഉറപ്പ് വരുത്തുന്ന ഉപകരണം സ്ഥാപനത്തിൽ ഇല്ലായെന്ന് അറിഞ്ഞാണ് ഇവർ തട്ടിപ്പ് നടത്തിയതെന്ന് പോലീസ് പറയുന്നു. കഴിഞ്ഞ ദിവസം പ്രതികൾ എത്തി തങ്ങൾ മുമ്പ് പണയം വച്ച മുഴുവൻ സ്വർണങ്ങളും വിലയ്ക്ക് എടുത്തു പലിശ കഴിഞ്ഞ ശേഷം ബാക്കിയുള്ള തുക നൽകാൻ ആവശ്യപ്പെട്ടു. ഇതോടെയാണ് സ്ഥാപന ഉടമ വില്പന വില നിർണയിക്കാനായി അടുത്തുള്ള സ്വർണപ്പണയ ഇടപാട് സ്ഥാപനത്തിലെ ഉപകരണത്തിൽ പരിശോധിച്ചത്. പരിശോധനയിൽ മുക്കുപണ്ടമാണെന്ന് മനസിലായി. എന്നാൽ, പ്രതികൾ ഇത് നിഷേധിച്ചു. ഒറിജിനൽ സ്വർണമാണെന്ന് ഇവർ തറപ്പിച്ചു പറഞ്ഞു. തുടർന്ന് പോലീസിൽ വിവരം അറിയിക്കുകയായിരുന്നു. പോലീസ് നടത്തിയ ചോദ്യം ചെയ്യലിൽ തട്ടിപ്പ് സമ്മതിച്ച രണ്ട് പ്രതികളെയും അറസ്റ്റ് ചെയ്യുകയായിരുന്നു. എരുമേലി പോലിസ് സ്റ്റേഷൻ എസ്എച്ച്ഒ ഇ.ഡി. ബിജുവിന്‍റെ നേതൃത്വത്തിലാണ് അന്വേഷണം നടത്തിയത്. എസ്ഐമാരായ രാജേഷ്, രവി, രാധാകൃഷ്ണപിള്ള, എഎസ്ഐ ബിജു, ഡ്രൈവർ റോബിൻ എന്നിവർ അന്വേഷണത്തിൽ പങ്കെടുത്തു. പ്രതികൾ മറ്റ് സ്ഥാപനങ്ങളിൽ സമാന തട്ടിപ്പ് നടത്തിയിട്ടുണ്ടോ‍യെന്നും സ്വർണം പോലെ തോന്നിപ്പിക്കുന്ന ആഭരണങ്ങൾ ആര് നൽകിയെന്നും അന്വേഷണം നടത്തുമെന്നും‌ പോലീസ് പറഞ്ഞു. കാഞ്ഞിരപ്പള്ളി കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

നൈപുണ്യ പരിശീലന പദ്ധതി: സെന്‍റ് ഡൊമിനിക്‌സ് കോളജിൽ ഭക്ഷ്യമേള

കാഞ്ഞിരപ്പള്ളി: വിദ്യാര്‍ഥികള്‍ക്ക് പഠനത്തോടൊപ്പം സ്വയം തൊഴില്‍ കണ്ടെത്തുന്നതിന് ബ്ലോക്ക് പഞ്ചായത്ത് നടത്തുന്ന നൈപുണ്യ പരിശീലന പദ്ധതിയുടെ ഭാഗമായി സെന്‍റ് ഡൊമിനിക്‌സ് കോളജില്‍ ഭക്ഷ്യമേള നടത്തി. ബി.വോക് വിഭാഗത്തിലെ ഭക്ഷണശാസ്ത്രത്തില്‍ പരിശീലനം നേടിയ 60 വിദ്യാര്‍ഥികളാണ് വിഭവങ്ങള്‍ തയാറാക്കിയത്. അഞ്ച് കൗണ്ടറുകളിലായി വിപണനസാധ്യതയുള്ള മുപ്പത് ഭക്ഷ്യവിഭവങ്ങളാണ് കുട്ടികള്‍ ഒരുക്കിയത്. പത്തു ദിവസത്തെ പാചക പരിശീലനമാണ് കുട്ടികള്‍ക്കായി കോളജില്‍ നടത്തിയത്. പരിശീലനം ലഭിച്ചവരില്‍ പത്തു കുട്ടികള്‍ക്ക് ഭക്ഷ്യസംരംഭം തുടങ്ങാനുള്ള വ്യവസായവകുപ്പിന്‍റെ ലൈസന്‍സ് ലഭിച്ചു. കോളജ് ബി.വോക് വിഭാഗം, ഇഡി ക്ലബ്, എച്ച്ആര്‍ സെൽ എന്നിവ നേതൃത്വം നല്‍കി. ബ്ലോക്ക് പഞ്ചായത്ത് നൈപുണ്യ പദ്ധതിയില്‍ സെന്‍റ് ഡൊമിനിക്‌സ്, എരുമേലി എംഇഎസ് എന്നീ കോളജുകളിലെ ഭക്ഷ്യസംസ്‌കരണത്തില്‍ 60 പേര്‍ക്കും ബ്യൂട്ടീഷന്‍ കോഴ്‌സില്‍ 50 പേര്‍ക്കും മോഡേന്‍ എംബ്രോയ്ഡറി കോഴ്‌സില്‍ 20 പേര്‍ക്കും റബര്‍ ആന്‍ഡ് പ്ലാസ്റ്റിക് ടെക്‌നോളജിയില്‍ 26 പേര്‍ക്കും പരിശീലനം നല്‍കി. ഭക്ഷ്യമേള ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് ഉദ്ഘാടനം ചെയ്തു. വൈസ് പ്രസിഡന്‍റ് ജോളി മടുക്കക്കുഴി അധ്യക്ഷത വഹിച്ചു. കോളജ് ബര്‍സാര്‍ റവ.ഡോ. മനോജ് പാലക്കുടി, പ്രിന്‍സിപ്പല്‍ സീമോന്‍ തോമസ്, ഇഡി ക്ലബ് കോ-ഓര്‍ഡിനേറ്റര്‍ റാണി അല്‍ഫോന്‍സ് ജോയല്‍, ബി. വോക് വിഭാഗം മേധാവി നിത്യ കൃഷ്ണ, വ്യവസായ ഓഫീസര്‍ കെ.കെ. ഫൈസല്‍ തുടങ്ങിയവര്‍ പ്രസംഗിച്ചു.

ഓണാഘോഷം സംഘടിപ്പിച്ച് അരുവിത്തുറ കോളജ്

ആരുവിത്തുറ: സെന്‍റ് ജോർജ് കോളജിൽ ഓണാഘോഷം "തജ്ജം തകജ്ജം - 2025' വിപുലമായ പരിപാടികളോടെ സംഘടിപ്പിച്ചു. ആഘോഷങ്ങളുടെ ഉദ്ഘാടനം വൈസ് പ്രിൻസിപ്പൽ ഡോ. ജിലു ആനി ജോൺ നിർവഹിച്ചു. ചടങ്ങിൽ ബർസാർ റവ. ഫാ. ബിജു കുന്നയ്ക്കാട്ട്, പ്രോഗ്രാം കോഓർഡിനേറ്റർ ഡോ. നീനുമോൾ സെബാസ്റ്റ്യൻ, യൂണിയൻ ചെയർമാൻ ആദിൽ ബഷീർ തുടങ്ങയവർ സംസാരിച്ചു. അത്തപൂക്കളമത്സരം, തിരുവാതിര, മ്യൂസിക്ക് ബാൻഡ്, വിദ്യാർഥികളുടെയും അധ്യാപകരുടെയും സംഘനൃത്തങ്ങൾ, ഓണം ഫാഷൻ റാമ്പ് വാക്ക്, വംടവലി തുടങ്ങിയവ ആഘോഷത്തിന്‍റെ ഭാഗമായി നടന്നു. ആഘോത്തോടനുബന്ധിച്ച് സംഘടിപ്പിച്ച ചിത്തിര ഘോഷയാത്രയിൽ വാധ്യമേളങ്ങൾക്കൊപ്പം മുത്തുക്കുടകളും മലയാള തനിമയുള്ള വേഷവിധാനങ്ങളുമായി വിദ്യാർഥികൾ അണിനിരന്നു.

നാലുപങ്ക്: ആർക്കും ഇതിൽ ഒരു പങ്കുമില്ലേ?

കുമരകം: ഉദ്ഘാടനം കഴിഞ്ഞ് വർഷം അഞ്ചു കഴിഞ്ഞിട്ടും പ്രവർത്തന രഹിതമായി കുമരകം നാലുപങ്ക് ബോട്ട് ടെർമിനൽ. കോടികൾ മുടക്കി നിർമിച്ച ബോട്ടു ടെർമിനലിൽ ഇതുവരെ ഒരു ഹൗസ് ബോട്ട് പോലും നങ്കൂരമിട്ടിട്ടില്ല. 50 ലക്ഷം മുടക്കി നിർമിച്ച മത്സ്യസങ്കേതം ഇല്ലാതാക്കിയാണ് ടെർമിനൽ നിർമിച്ചത്. എന്നിട്ടാണ് ദുരവസ്ഥ. വേണ്ടത്ര പഠനമില്ലാതെ നിർമിച്ചതാണ് കുരുക്കായതെന്നു ചൂണ്ടിക്കാണിക്കപ്പെടുന്നു. ശക്തമായ കാറ്റും തിരമാലയും അടിക്കുന്ന ഭാഗത്താണ് ടെർമിനൽ. ഇവിടെ ബോട്ടുകൾക്ക് നങ്കൂരമിട്ടു കിടക്കാൻ കഴിയുന്നില്ലെന്നാണ് പരാതി. എല്‍ രൂപത്തിലുള്ള ടെര്‍മിനലില്‍ കായലിലെ സര്‍വ മാലിന്യങ്ങളും വന്നടിഞ്ഞുകൊണ്ടിരിക്കുകയാണ്. പറയുന്നതല്ലാതെ വിനോദസഞ്ചാര വകുപ്പ് കോടികള്‍ മുടക്കി നിര്‍മിച്ച ടെര്‍മിനലിന്‍റെ അവകാശം ഇപ്പോള്‍ കുമരകം പഞ്ചായത്തിനാണ്. നല്ല വരുമാനം ലഭിക്കത്തക്കവിധം പദ്ധതികള്‍ ആവിഷ്‌കരിച്ചു നടപ്പാക്കുമെന്നു പലതവണ പഞ്ചായത്തധികൃതര്‍ പറഞ്ഞിരുന്നു. എന്നാല്‍, ഒന്നും ഇതുവരെ നടപ്പിലായിട്ടില്ല. അതേസമയം, ടെര്‍മിനല്‍ അറ്റകുറ്റപ്പണി നടത്തി നവീകരിച്ചു വിനോദസഞ്ചാരികളെ ആകര്‍ഷിക്കാന്‍ പദ്ധതി ആസൂത്രണം ചെയ്തിട്ടുണ്ടെന്നാണ് പഞ്ചായത്തിന്‍റെ പുതിയ ഭാഷ്യം. ചെറുവിശ്രമകേന്ദ്രങ്ങള്‍, ലഘുഭക്ഷണശാല, സൂര്യാസ്തമനം ദര്‍ശിക്കാനുള്ള ക്രമീകരണം, കുട്ടികള്‍ക്ക് പാര്‍ക്ക് തുടങ്ങിയവയാണ് പദ്ധതിയിലുള്ളതെന്നു പഞ്ചായത്ത് പ്രസിഡന്‍റ് പറയുന്നു. സ്വകാര്യ വ്യക്തിക്കു ടെൻഡര്‍ നല്‍കി പാസ്മൂലം നന്ദര്‍ശകരെ സ്വീകരിക്കാനാണ് പഞ്ചായത്ത് ലക്ഷ്യമിടുന്നത്. അടുത്ത മാസം ടെൻഡര്‍ ക്ഷണിക്കുമെന്നാണ് വിവരം. പുതിയ ജെട്ടി പരിഹാരം ബോട്ട് ടെര്‍മിനലിനോടു ചേര്‍ന്നു സർവീസ് ബോട്ടുകള്‍ക്കു പാര്‍ക്ക് ചെയ്യാന്‍ കഴിയുംവിധം പുതിയ ജെട്ടി സ്ഥാപിച്ചാല്‍ ജലഗതാഗതത്തിനും ടൂറിസത്തിനും ഏറെ പ്രയോജനം ലഭിക്കുമെന്നു ചൂണ്ടിക്കാണിക്കപ്പെടുന്നു. ജലഗതാ വകുപ്പിന്‍റെ കോട്ടയം-ആലപ്പുഴ സര്‍വീസ് നാലുപങ്ക് ജെട്ടിവഴിയായാല്‍ അതു ഗുണം ചെയ്യും. ആലപ്പുഴയുമായി ഏറ്റവും അടുത്ത കുമരകത്തിന്‍റെ ഭാഗമാണ് നാലുപങ്ക് പള്ളിക്കായല്‍ പ്രദേശം. 13 കിലോമീറ്റര്‍ മാത്രമാണ് ദൂരം. നെഹ്‌റു ട്രോഫി ജലമേള നടക്കുന്ന പുന്നമടയില്‍ എത്താന്‍ 14 കിലോമീറ്റര്‍ മാത്രം സഞ്ചരിച്ചാല്‍ മതി. കൊഞ്ചുമട ബസ് സര്‍വീസ് നാലുപങ്കിലേക്കു നീട്ടിയാല്‍ ബോട്ടില്‍ വരുന്നവര്‍ക്കു കുമരകംവഴി എളുപ്പം കോട്ടയത്ത് എത്താനാകും. നിലവില്‍ കുമരകത്തുനിന്നു കരമാര്‍ഗം ആലപ്പുഴയിലെത്താന്‍ 45 കിലോമീറ്റര്‍ സഞ്ചരിക്കണം.

കേരള കോണ്‍ഗ്രസ് ജനസമ്പര്‍ക്ക പരിപാടി

പായിപ്പാട്: കേരള കോണ്‍ഗ്രസ് പായിപ്പാട് മണ്ഡലം കമ്മിറ്റി ജനസമ്പര്‍ക്ക പരിപാടിയും ഫണ്ട് ശേഖരണവും നടത്തി. ഉന്നതാധികാരസമിതിയംഗം വി.ജെ. ലാലി ഉദ്ഘാടനം ചെയ്തു. മണ്ഡലം പ്രസിഡന്‍റ് ജോഷി സെബാസ്റ്റ്യന്‍ അധ്യക്ഷത വഹിച്ചു. പാര്‍ട്ടി സംസ്ഥാന സെക്രട്ടറി ജോര്‍ജുകുട്ടി മാപ്പിളശേരി മുഖ്യപ്രഭാഷണം നടത്തി. നിയോജകമണ്ഡലം പ്രസിഡന്‍റ് മാത്തുക്കുട്ടി പ്ലാത്താനം, സിബി ചാമക്കാല, കുര്യന്‍ തൂമ്പുങ്കല്‍, സെബാസ്റ്റ്യന്‍ സ്രാങ്കല്‍, ജോസഫ് തോമസ് എന്നിവര്‍ പ്രസംഗിച്ചു.

തുണി ഇസ്തിരിയിടാന്‍ നൽകിയ ബാഗിൽ അരലക്ഷം രൂപ; തിരികെ നല്‍കി യുവാവ്

കുമരകം: തുണി ഇസ്തിരിയിടാന്‍ നല്‍കിയ ബാഗില്‍ മറന്നുവച്ച അരലക്ഷം രൂപ തിരികെ നല്‍കിയ യുവാവിന് അഭിനന്ദനപ്രവാഹം. കുമരകം ചന്തക്കവലയില്‍ ലോണ്‍ട്രി സോണ്‍ എന്ന സ്ഥാപനം നടത്തുന്ന ഒറവണക്കളം കണ്ണന്‍ ബൈജു (32) ആണ് പണം ഉടമയ്ക്കു തിരികെ നല്‍കി മാതൃകയായത്. തുണികള്‍ ഇസ്തിരിയിടാന്‍ നല്‍കിയ ബാഗില്‍ പണം സൂക്ഷിച്ചിരുന്ന കാര്യം ഉടമ ഓര്‍ത്തിരുന്നില്ല. തുണി നല്‍കാന്‍ കടയിലെത്തിയപ്പോള്‍ കണ്ണന്‍ കടയിലുണ്ടായിരുന്നില്ല. സമീപത്തുള്ള ആശ ഹെയര്‍ കട്ടിംഗ് സലൂണില്‍ ബാഗ് ഏല്പ്പിച്ചു മടങ്ങുകയായിരുന്നു. ഈ സ്ഥാപനത്തിന്‍റെ ഉടമയാണ് ബാഗ് കണ്ണനെ ഏല്‍പ്പിച്ചത്. തുണികള്‍ ഇസ്തിരിയിടാന്‍ എടുക്കുന്നതിനിടെ പണം കണ്ട കണ്ണന്‍ ഉടനെ ഉടമയെ അറിയിച്ച് പണം കൈമാറുകയായിരുന്നു.

സ്റ്റോപ്പ് മാറി പക്ഷേ, ബസ് മാറിയില്ല

തലയോലപ്പറമ്പ്: വൈക്കം-എറണാകുളം റൂട്ടിലെ മറവൻതുരുത്ത് ടോൾ ജംഗ്ഷനിലെ സ്റ്റോപ്പ് മാറ്റിയിട്ടും ബസുകൾ അതു പാലിക്കാത്തതിനാൽ ഗതാഗതക്കുരുക്ക് തുടരുന്നു. ബസ് സ്റ്റോപ്പ് മാറ്റിയിട്ടും ബസുകൾ ജംഗ്ഷനിൽത്തന്നെ യാത്രക്കാരെ കയറ്റിയിറക്കുകയാണ്. വൈക്കത്തുനിന്നു ചെമ്മനാകരിയിലേക്കു പോകുന്ന ബസുകളും എറണാകുളത്തുനിന്നും വൈക്കത്തുനിന്നും പാലാം കടവുഭാഗത്തേക്കു വരുന്ന വാഹനങ്ങളും ടോൾ ജംഗ്ഷനിലാണ് നിർത്തുന്നത്. വീതി കുറഞ്ഞ കവലയിൽ ഇതു വലിയ ഗതാഗതക്കുരുക്കിനും അപകടങ്ങൾക്കും ഇടയാക്കുന്നു. തീരുമാനം ഇങ്ങനെ ഗതാഗതക്കുരുക്ക് രൂക്ഷമാകുകയും അപകടം പതിവാകുകയും ചെയ്തതോടെ എംഎൽഎ,ആർടിഒ, തഹസിൽദാർ, എസ്എച്ച്ഒ, എംവിഡി എന്നിവരടങ്ങുന്ന താലൂക്ക് വികസന സമിതിയുടെ നിർദേശപ്രകാരം മറവൻതുരുത്ത് പഞ്ചായത്ത് കമ്മിറ്റിയാണ് രണ്ടു ഭാഗങ്ങളിലേക്കുള്ള ബസ് സ്റ്റോപ്പുകൾ മാറ്റി ബോർഡുകൾ സ്ഥാപിച്ചത്. വൈക്കം ഭാഗത്തേക്കുള്ള ബസുകൾ ടോൾജംഗ്ഷനിൽനിന്നു 250 മീറ്റർ മാറി എസ്ബിഐ, കെഎസ്എഫ് ഇ എന്നിവയ്ക്കു സമീപത്തും എറണാകുളം ഭാഗത്തേക്കുള്ള ബസുകൾ ടോളിൽനിന്നു 200 മീറ്റർ മാറി ചെമ്മനാകരി റോഡിലേക്കു തിരിയുന്നതിനടുത്തും യാത്രക്കാരെ കയറ്റിയിറക്കുന്ന വിധത്തിലായിരുന്നു ക്രമീകരണം. നടക്കുന്നത് ഇങ്ങനെ തീരുമാനമെടുത്ത് രണ്ടു മാസം കഴിഞ്ഞിട്ടും ബസുകൾ മാറ്റിയ സ്റ്റോപ്പ് ഉപയോഗിക്കുന്നില്ല. ബസ് സ്റ്റോപ്പിനായി ബോർഡ് സ്ഥാപിച്ചിടത്തുനിന്നു ഓട്ടോസ്റ്റാൻഡ് മാറ്റിയത് ഓട്ടോ തൊഴിലാളികളെയും ദുരിതത്തിലാക്കി. നൂറു കണക്കിനു യാത്രക്കാരും വാഹനങ്ങളും കടന്നുവരുന്ന ടോൾകവലയിൽ രാവിലെയും വൈകുന്നേരവുമുണ്ടാകുന്ന ഗതാഗതക്കുരുക്ക് കാൽനടക്കാർക്കും വാഹന യാത്രികർക്കും ഒരു പോലെ ദുരിതമാണ്.

ബന്ദിപ്പൂക്കൃഷിയിൽ നേട്ടംകൊയ്ത് പഞ്ചായത്ത് ജീവനക്കാർ

മറവൻതുരുത്ത്: ഔദ്യോഗിക ജീവിതത്തിലെ തിരക്കുകൾക്കിടയിലും കൃഷിയെ നെഞ്ചോടു ചേർത്തുപിടിച്ച് വിജയഗാഥ രചിക്കുകയാണ് മറവൻതുരുത്ത് പഞ്ചായത്തിലെ രണ്ടു ജീവനക്കാർ. മറവൻതുരുത്ത് പഞ്ചായത്തിലെ ക്ലർക്ക് പാലാംകടവ് പാറയ്ക്കൽ മറ്റത്തിൽ കെ.കെ. മനോജും പഞ്ചായത്തിലെ വാഹന ഡ്രൈവറായ മറവൻതുരുത്ത് പുത്തൻപറമ്പിൽ ജെ. സാമുവലുമാണ് ബന്ദിപ്പൂകൃഷിയും ഏത്തവാഴക്കൃഷിയും വിജയകരമായി നടത്തി നാടിനാകെ പ്രചോദനമാകുന്നത്. പുലർച്ചെയും ജോലി കഴിഞ്ഞ് വൈകുന്നേരവുമാണ് ഇവർ കൃഷിയിൽ വ്യാപൃതരാകുന്നത്. കൃഷിയോടുള്ള ഇരുവരുടെയും ആഭിമുഖ്യം അറിയാവുന്ന സഹപ്രവർത്തകരും ജനപ്രതിനിധികളും കൃഷി ഉദ്യോഗസ്ഥരും സുമനസുകളും ഇവർക്ക് പിൻബലവും പ്രോത്സാഹനവും നൽകുന്നു. മറവൻതുരുത്ത് പഞ്ചായത്തിന് സമീപത്ത് 20 സെന്‍റിൽ ഇവർ നട്ട 1,200 മഞ്ഞ, ചുവപ്പ് ബന്ദിച്ചെടികൾ പൂവിട്ട് വിൽപ്പനയ്ക്ക് പാകമായി. ബന്ദിക്ക് പുറമേ പരീക്ഷണാടിസ്ഥാനത്തിൽ വാടാമല്ലിയും ഇഞ്ചിയും കൃഷി ചെയ്തിട്ടുണ്ട്. ഓണപ്പൂക്കളം തീർക്കാനും അലങ്കാരങ്ങൾക്കുമായി നിരവധിപ്പേർ ഇതിനകം പൂക്കൾ ആവശ്യപ്പെട്ട് പൂന്തോട്ടത്തിൽ എത്തിക്കഴിഞ്ഞു. കഴിഞ്ഞ തവണ 4,000 ബന്ദികൾ നട്ട് കൃഷി വൻവിജയമായിരുന്നെങ്കിലും വയനാട് ദുരന്തത്തെത്തുടർന്ന് ആഘോഷങ്ങൾ ഇല്ലാതായതോടെ പൂക്കൾ വിറ്റഴിക്കാനാകാതെ ഇവർക്കു വലിയ സാന്പത്തിക നഷ്ടം നേരിട്ടു. തുടർന്ന് തൊഴിലുറപ്പ് തൊഴിലാളികളുടെ സഹായത്തോടെ പുരയിടം ഒരുക്കി വെണ്ട, വഴുതന, വെള്ളരി, തണ്ണിമത്തൻ, വിവിധയിനം പയറുകൾ തുടങ്ങിയവ കൃഷി ചെയ്തു. കുടുംബശ്രീ വനിതകളുടെ സഹായത്തോടെ മിതമായ നിരക്കിൽ ഉത്പന്നങ്ങൾ പ്രാദേശികമായി വിറ്റഴിച്ചു. കൃഷി വിജയമായതോടെ പൂക്കൃഷിയിലെ നഷ്ടം നികത്താനായി. സമീപത്ത് 32 സെന്‍റിൽ കൃഷിചെയ്ത 250 മഞ്ചേരി കുള്ളൻ ഏത്തവാഴകളിൽ ഭൂരിഭാഗവും ഇപ്പോൾ കുലകളായി. മറ്റ് ഏത്തവാഴകൾ ഏഴു മാസംകൊണ്ടു കുലയ്ക്കുമ്പോൾ മഞ്ചേരിക്കുള്ളന് അഞ്ചരമാസത്തിനകം കുലയാകും.നീർവാർച്ച കുറവുള്ള പുരയിടത്തിൽ അനുയോജ്യമായ ഈ ഇനത്തിന് ഉയരം കുറവായതിനാൽ മറിയില്ല. പത്തു മുതൽ14 കിലോവരെ തൂക്കമുള്ള കുലകൾ ലഭിക്കുമെന്ന് മനോജും സാമുവലും പറയുന്നു. മനോജിന് മുണ്ടാർ പോത്തൻമാലിയിൽ അഞ്ചേക്കർ നെൽക്കൃഷിയുമുണ്ട്. മനസിന് സംതൃപ്തിയും ശരീരത്തിന്‍റെ ആരോഗ്യ സംരക്ഷണവും സാധിക്കുന്നതിനാൽ കൃഷിയിൽ തങ്ങൾ ലഹരി കണ്ടെത്തുകയാണെന്ന് ഇരുവരും സാക്ഷ്യപ്പെ ടുത്തുന്നു.

വല്ലകം ജീവനിലയത്തിൽ ഓണാഘോഷം

വൈക്കം: വല്ലകം ജീവനിലയത്തിൽ അത്ത ദിനത്തിൽ ഓണാഘോഷത്തിന്‍റെ ഭാഗമായി "അത്തം പത്തിന് പൊന്നോണം, എന്‍റെ ഓണച്ചിന്തകൾ' എന്ന പരിപാടി സംഘടിപ്പിച്ചു. റെനർജി സിസ്റ്റത്തിന്‍റെ ആഭിമുഖ്യത്തിൽ സംഘടിപ്പിച്ച ഓണാഘോഷം ചലചിത്ര പിന്നണി ഗായകൻ വി. ദേവാനന്ദ് ഉദ്ഘാടനം ചെയ്തു. ഡയറക്ടർ എം.വി. മനോജ് മാളിയേക്കൽ അധ്യക്ഷത വഹിച്ചു. വൈക്കം നഗരസഭാ ചെയർപേഴ്സൺ പ്രീതാ രാജേഷ് ജീവനിലയത്തിലെ അന്തേവാസികൾക്ക് ഓണക്കോടി നൽകി. ലേബർ ഇൻഡ്യ പബ്ലിക്കേഷൻസ് ചെയർമാൻ ജോർജ് കുളങ്ങര, സംസ്ഥാന നാടക അവാർഡ് ജേതാവ് പ്രദീപ് മാളവിക, കഥകളി നടൻ പള്ളിപ്പുറം സുനിൽ, പ്രഫ. സിറിയക് ചോലങ്കേരി, മാധ്യമ പ്രവർത്തകൻ കെ.ആർ. സുശീലൻ, ജയ് ജോൺ, വി.ടി. ജയിംസ് തുടങ്ങിയവർ പ്രസംഗിച്ചു.

അറസ്റ്റ് ചെയ്തു

വൈക്കം: കാനഡയിൽ ജോലി വാഗ്ദാനം ചെയ്ത് ഏഴുലക്ഷത്തോളം രൂപ തട്ടിയെടുത്ത കേസിലെ പ്രതി അറസ്റ്റിൽ. പാലക്കാട് ഒറ്റപ്പാലം പാലത്തിങ്കൽ ഷിഹാസ് വില്ലയിൽ സെയ്ത് മുഹമ്മദി(63)നെയാണ് വൈക്കം പോലീസ് അറസ്റ്റ് ചെയ്തത്. കാനഡയിൽ ജോലി വാഗ്ദാനം ചെയ്ത് ഇയാൾ 11 തവണകളിലായി അക്കൗണ്ട് മുഖാന്തിരവും നേരിട്ടുമായി അഭിലാഷ് എന്നയാളിൽനിന്ന് 6,90,000 രൂപ തട്ടിയെടുത്ത കേസിലാണ് അറസ്റ്റിലായത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

കാണാതായ വിദ്യാര്‍ഥി വീട്ടില്‍ മടങ്ങിയെത്തി

കടുത്തുരുത്തി: കാണാതായ വിദ്യാര്‍ഥി വീട്ടില്‍ മടങ്ങിയെത്തി. മേമ്മുറി സ്വദേശിയായ 16 കാരനെയാണ് കഴിഞ്ഞ ദിവസം കാണാതായത്. ഇന്നലെ രാവിലെ 11 ഓടെ ഇയാള്‍ വീട്ടില്‍ മടങ്ങിയയെത്തുകയായിരുന്നു. വിദ്യാര്‍ഥിയെ കാണാതായതിനെത്തുടര്‍ന്ന് വീട്ടുകാര്‍ നല്‍കിയ പരാതിയില്‍ കടുത്തുരുത്തി പോലീസ് കേസെടുത്ത് അന്വേഷണമാരംഭിച്ചിരുന്നു. വിദ്യാര്‍ഥിയെ പിന്നീട് കോടതിയില്‍ ഹാജരാക്കി. കോടതിയുടെ നിര്‍ദേശാനുസരണം കൗണ്‍സലിംഗ് നല്‍കുന്നതിനായി വിദ്യാര്‍ഥിയെ ഇന്നു രാവിലെ ചൈല്‍ഡ് വെല്‍ഫെയര്‍ കമ്മിറ്റിക്ക് മുമ്പാകെ ഹാജരാക്കും. വിദ്യാര്‍ഥിയുടെ സുഹൃത്തുക്കളായ 20 വയസുകാരെ പോലീസ് ചേദ്യം ചെയ്തു. ഇവരുടെ അറിവോടെയാണ് 16 കാരന്‍ വീടുവിട്ടിറങ്ങിയതെന്നു പോലീസ് കരുതുന്നു.

ബിസിഎമ്മിൽ വിദ്യാർഥികളുടെ ഓണവിപണി

കോട്ടയം: ഓണക്കോടി മുതല്‍ റെഡിമെയ്ഡ് പൂക്കളംവരെ. ഓണത്തിനുള്ള എല്ലാ വിഭവങ്ങളും ബിസിഎം കോളജിലെ ഓണവിപണിയില്‍ കിട്ടും. കോളജിലെ സെന്‍റര്‍ ഫോര്‍ വിമന്‍ എംപവര്‍മെന്‍റ് ആന്‍ഡ് സ്‌കില്‍ ഡെവലപ്‌മെന്‍റിന്‍റെ ഭാഗമായിട്ടാണ് കുട്ടികള്‍ ഓണവിപണി ഒരുക്കിയത്. ‌പായസമടക്കം ഓണസദ്യക്കുവേണ്ട എല്ലാ വിഭവങ്ങളും ഇവിടെ ന്യായവിലയ്ക്കു ലഭിക്കും. ഓണക്കോടികളുടെ വിവിധ ഡിസൈനുകളും ഫാഷനുകളുമുണ്ട്. തീര്‍ന്നില്ല, പൂക്കളം വേണമെങ്കില്‍ റെഡിമെയ്ഡ് പൂക്കളവുമുണ്ട്. ഓരോ ഡിപ്പാര്‍ട്ട്മെന്‍റിനും പ്രത്യേകം സ്റ്റാളുകളുണ്ട്. എല്ലാം നടത്തുന്നത് വിദ്യാര്‍ഥികള്‍തന്നെയാണ്. കോളജിലെ ഒഴിവുസമയങ്ങളില്‍ വിദ്യാര്‍ഥികള്‍ നിര്‍മിച്ച കരകൗശല വസ്തുക്കള്‍, എംബ്രോയിഡറി വര്‍ക്ക് ചെയ്ത തുണിത്തരങ്ങള്‍, വിദ്യാര്‍ഥികള്‍ വീട്ടില്‍നിന്നെത്തിച്ച പച്ചക്കറികള്‍, അച്ചാറുകള്‍, മധുരപലഹാരങ്ങള്‍ അങ്ങനെ വില്പനയ്ക്കായി നിരവധി സാധനങ്ങളാണ് ഓരോ സ്റ്റാളിലുമുള്ളത്. ഓണവിപണി മാത്രമല്ല ഓണക്കളികളും മത്സരങ്ങളും ഒരുക്കിയിട്ടുണ്ട്. ഓണത്തിനു വേണ്ടതെല്ലാം തങ്ങളുടെ കലാലയത്തില്‍നിന്ന് ഇത്തവണ വാങ്ങാമെന്ന ആവേശത്തിലാണ് കോളജിലെ കുട്ടികള്‍. 29നാണ് കോളജില്‍ വിപുലമായ ഓണാഘോഷം.

ആസാമിൽനിന്നു മുങ്ങിയ പോക്സോ കേസ് പ്രതി പിടിയിൽ

ഗാന്ധിനഗർ: കുമ്മനത്ത് ഒളിവില്‍ കഴിഞ്ഞുവന്നിരുന്ന ആസാം സ്വദേശിയെ കോട്ടയം വെസ്റ്റ് പോലീസ് അറസ്റ്റ് ചെയ്തു. ആസാമിലെ ജൂരിയ പോലീസ് സ്റ്റേഷനില്‍ രജിസ്റ്റര്‍ ചെയ്ത പോക്സോ കേസില്‍ പ്രതിയായ മുജാഹിർ അലാം എന്ന യുവാവിനെയാണ് കോട്ടയം വെസ്റ്റ് പോലീസ് പിടികൂടിയത്. സിപിഒമാരായ സലമോൻ, എസ്‌സിപിഒ അരുൺകുമാർ എന്നിവരാണ് പ്രതിയെ പിടികൂടാൻ നേതൃത്വം നൽകിയത്. തുടര്‍നടപടിക്ക് ശേഷം ആസാം പോലീസിന് പ്രതിയെ കൈമാറി.

കെ.പി. ചെറിയാന് ദേശീയ പുരസ്‌കാരം

കടുത്തുരുത്തി: കേന്ദ്ര തോട്ടവിള ഗവേഷണ കേന്ദ്രത്തിന്‍റെ കേരകര്‍ഷക അവാര്‍ഡ് റിട്ട. സ്‌കൂള്‍ പ്രിന്‍സിപ്പള്‍ ഞീഴൂര്‍ മഠത്തിപ്പറമ്പ് കുരീക്കോട്ടില്‍ കെ.പി. ചെറിയാന്. നാളികേര ദിനമായ സെപ്റ്റംബര്‍ രണ്ടിന് കാസര്‍ഗോഡ് നടക്കുന്ന ചടങ്ങില്‍ പുരസ്‌കാരം സമ്മാനിക്കും. കടുത്തുരുത്തി സെന്‍റ് മൈക്കിള്‍സ് ഹൈസ്‌കൂളിലെ പ്രിന്‍സിപ്പലായിരുന്ന കെ.പി. ചെറിയാന്‍ 2005 മുതലാണ് സജീവമായി തെങ്ങ് കൃഷിയിലേക്ക് തിരിയുന്നത്. ആറേക്കറിലാണ് കൃഷി. വിവിധയിനം തെങ്ങുകള്‍ക്കൊപ്പം 15 ഓളം ഇടവിളകളും കൃഷി ചെയ്യുന്നുണ്ട്. ഭാര്യ റിട്ട. അധ്യാപിക അല്‍ഫോന്‍സാ ചെറിയാന്‍. മക്കള്‍ - ഫിനില്‍, ടോം, ജയിംസ്, അനു.

പഞ്ചായത്തിന്‍റെ ഭൂപടം വരച്ച വിദ്യാര്‍ഥികള്‍ക്കു നാടിന്‍റെ ആദരം

അകലക്കുന്നം: പഞ്ചായത്തില്‍ പഠനപ്രവര്‍ത്തനത്തിന്‍റെ ഭാഗമായി കോയമ്പത്തൂര്‍, പഞ്ചാബ് കാര്‍ഷിക സര്‍വകലാശാലകളില്‍നിന്നും എത്തിയ വിദ്യാര്‍ഥികള്‍ക്ക് നാടിന്‍റെ ആദരം. നാട്ടുകാരില്‍നിന്നും വാര്‍ഡ് മെംബര്‍മാരില്‍നിന്നും പഞ്ചായത്തിന്‍റെ ചരിത്രവും സംസ്‌കാരവും രൂപവും മനസിലാക്കിയ വിദ്യാര്‍ഥികള്‍ നിലത്ത് ചായക്കൂട്ടുകളാല്‍ പഞ്ചായത്തിന്‍റെ ഭൂപടം വരയ്ക്കുകയും വാര്‍ഡ് തിരിച്ച് പ്രധാനപ്പെട്ട വഴികളും തോടുകളും ആരാധനാലയങ്ങളും സ്ഥാപനങ്ങളും പച്ചത്തുരുത്തുകളും വരച്ചുചേര്‍ക്കുകയും ചെയ്തു. കോയമ്പത്തൂര്‍ കാരുണ്യ ഇന്‍സ്റ്റിറ്റ്യൂട്ട് ഓഫ് ടെക്‌നോളജി ആൻഡ് സയന്‍സ്, പഞ്ചാബ് ലൗലി പ്രഫഷണല്‍ യൂണിവേഴ്‌സിറ്റി എന്നിവിടങ്ങളിലെ വിദ്യാര്‍ഥികളാണ് റൂറല്‍ അഗ്രിക്കള്‍ച്ചറല്‍ വര്‍ക്ക് എക്സ്പീരിയന്‍സിന്‍റെ ഭാഗമായി അകലക്കുന്നം പഞ്ചായത്ത് സന്ദര്‍ശിച്ചത്. പഞ്ചായത്ത് പ്രസിഡന്‍റ് സിന്ധു അനില്‍കുമാറും വൈസ് പ്രസിഡന്‍റ് മാത്തുക്കുട്ടി ഞായര്‍കുളവും കൃഷി ഓഫീസര്‍ ഡോ. രേവതി ചന്ദ്രനും പഞ്ചായത്ത് സെക്രട്ടറി സജിത്ത് മാത്യൂസും പഞ്ചായത്ത് അംഗങ്ങളും ചേര്‍ന്ന് വിദ്യാർഥികളെ സ്വീകരിച്ചു. പഠന പ്രവര്‍ത്തനത്തിന്‍റെ ഭാഗമായി മൂന്നു ദിവസം വിദ്യാര്‍ഥികള്‍ പഞ്ചായത്തിലെ വിവിധ പ്രദേശങ്ങള്‍ സന്ദര്‍ശിക്കുകയും കാര്‍ഷിക സംസ്‌കാരം അടുത്തറിയുകയും കര്‍ഷകരുമായി നേരിട്ട് സംസാരിക്കുകയും അവരുടെ പ്രശ്‌നങ്ങളും പ്രതിബന്ധങ്ങളും കീടരോഗബാധകളും അടുത്തറിയുകയും ചെയ്തു.

ബിസിഎമ്മിൽ വിദ്യാർഥികളുടെ ഓണവിപണി

കോട്ടയം: ഓണക്കോടി മുതല്‍ റെഡിമെയ്ഡ് പൂക്കളംവരെ. ഓണത്തിനുള്ള എല്ലാ വിഭവങ്ങളും ബിസിഎം കോളജിലെ ഓണവിപണിയില്‍ കിട്ടും. കോളജിലെ സെന്‍റര്‍ ഫോര്‍ വിമന്‍ എംപവര്‍മെന്‍റ് ആന്‍ഡ് സ്‌കില്‍ ഡെവലപ്‌മെന്‍റിന്‍റെ ഭാഗമായിട്ടാണ് കുട്ടികള്‍ ഓണവിപണി ഒരുക്കിയത്. ‌പായസമടക്കം ഓണസദ്യക്കുവേണ്ട എല്ലാ വിഭവങ്ങളും ഇവിടെ ന്യായവിലയ്ക്കു ലഭിക്കും. ഓണക്കോടികളുടെ വിവിധ ഡിസൈനുകളും ഫാഷനുകളുമുണ്ട്. തീര്‍ന്നില്ല, പൂക്കളം വേണമെങ്കില്‍ റെഡിമെയ്ഡ് പൂക്കളവുമുണ്ട്. ഓരോ ഡിപ്പാര്‍ട്ട്മെന്‍റിനും പ്രത്യേകം സ്റ്റാളുകളുണ്ട്. എല്ലാം നടത്തുന്നത് വിദ്യാര്‍ഥികള്‍തന്നെയാണ്. കോളജിലെ ഒഴിവുസമയങ്ങളില്‍ വിദ്യാര്‍ഥികള്‍ നിര്‍മിച്ച കരകൗശല വസ്തുക്കള്‍, എംബ്രോയിഡറി വര്‍ക്ക് ചെയ്ത തുണിത്തരങ്ങള്‍, വിദ്യാര്‍ഥികള്‍ വീട്ടില്‍നിന്നെത്തിച്ച പച്ചക്കറികള്‍, അച്ചാറുകള്‍, മധുരപലഹാരങ്ങള്‍ അങ്ങനെ വില്പനയ്ക്കായി നിരവധി സാധനങ്ങളാണ് ഓരോ സ്റ്റാളിലുമുള്ളത്. ഓണവിപണി മാത്രമല്ല ഓണക്കളികളും മത്സരങ്ങളും ഒരുക്കിയിട്ടുണ്ട്. ഓണത്തിനു വേണ്ടതെല്ലാം തങ്ങളുടെ കലാലയത്തില്‍നിന്ന് ഇത്തവണ വാങ്ങാമെന്ന ആവേശത്തിലാണ് കോളജിലെ കുട്ടികള്‍. 29നാണ് കോളജില്‍ വിപുലമായ ഓണാഘോഷം.

നെല്‍കര്‍ഷകർ ഇന്ന് മങ്കൊമ്പ് പാഡി മാര്‍ക്കറ്റിംഗ് ഓഫീസ് വളയും

ചങ്ങനാശേരി: നിലവില്‍ ആശങ്കയിലൂടെ കടന്നുപോകുന്ന നെല്‍കര്‍ഷക സമൂഹത്തിന്‍റെ നിലനില്‍പ്പുതന്നെ ചോദ്യം ചെയ്തുകൊണ്ട് സപ്ലൈകോ പാഡി 2025-26 വര്‍ഷത്തെ നെല്ല് സംഭരണ നയം പ്രഖ്യാപിച്ചതില്‍ നെല്‍കര്‍ഷകര്‍ക്കിടയില്‍ വ്യാപക പ്രതിഷേധം. 2024-25 വര്‍ഷത്തെ പുഞ്ചക്കൃഷിയുടെ നെല്ലുവില പോലും പൂര്‍ണമായി ലഭ്യമാകാത്ത സാഹചര്യത്തില്‍ കടം വാങ്ങിയും വട്ടിപ്പലിശയ്ക്ക് പണം കണ്ടെത്തിയും 2025-26 വര്‍ഷത്തെ ഒന്നാം വിളയ്ക്ക് ഇറങ്ങിയ കര്‍ഷകര്‍ക്ക് ഇരുട്ടടി നല്‍കുന്നതാണ് പുതിയ സംഭരണ നയമെന്ന് നെല്‍ കര്‍ഷകര്‍ അഭിപ്രായപ്പെട്ടു. പുതിയ നെല്ലു സംഭരണ നയത്തിനെതിരേ നെല്‍കര്‍ഷക സംരക്ഷണ സമിതിയുടെ നേതൃത്വത്തില്‍ മങ്കൊമ്പ് പാഡി മാര്‍ക്കറ്റിംഗ് ഓഫീസിന്‍റെ മുമ്പില്‍ ഇന്ന് രാവിലെ 10ന് പ്രതിഷേധാഗ്‌നി സംഘടിപ്പിക്കുമെന്ന് ഭാരവാഹികള്‍ പറഞ്ഞു. സംഭരിച്ച നെല്ലു കുത്തി അരിയാക്കി പൊതുവിതരണ സംവിധാനത്തിലൂടെ വിതരണം ചെയ്തശേഷം കേന്ദ്ര സർക്കാരിന് കണക്കുകള്‍ സമര്‍പ്പിച്ച് പണം കിട്ടുമ്പോള്‍ തരാമെന്ന സപ്ലൈകോയുടെ നിലപാട് തീര്‍ത്തും കര്‍ഷക വിരുദ്ധമാണ്. കൂടാതെ സപ്ലൈകോ നിശ്ചയിക്കന്ന സംഭരണ കേന്ദ്രങ്ങളില്‍ കര്‍ഷകര്‍ നെല്ല് നേരിട്ടെത്തിക്കണമെന്നുള്ള നിബന്ധനയും കര്‍ഷകര്‍ക്ക് ബുദ്ധിമുട്ടല്ലാതെ മറ്റൊന്നും സമ്മാനിക്കുന്നില്ല. ഗുണനിലവാരത്തിന്‍റെ പേരില്‍ നിലവില്‍ കര്‍ഷകരെ പിഴിഞ്ഞെടുക്കുന്ന കിഴിവ് നയത്തിന് അടിവരയിടുന്നതാണ് പുതിയ നയപ്രഖ്യാപനം. കേന്ദ്രം അഞ്ചാമതും താങ്ങുവിലയിൽ ഒരു കിലോ നെല്ലിന് വര്‍ധിപ്പിച്ച 69 പൈസയുടെ വിലവര്‍ധന ഈ നയത്തിലും പ്രതിഫലിച്ചിട്ടില്ലെന്നത് ഖേദകരവും കുറ്റകരവുമായ സംസ്ഥാനത്തിന്‍റെ നെല്‍ കര്‍ഷക വിരുദ്ധ നിലപാടായി ചൂണ്ടിക്കാണിക്കുന്നതായും കര്‍ഷകര്‍ പറഞ്ഞു. കേന്ദ്ര- സംസ്ഥാന സര്‍ക്കാരുകള്‍ നെല്ല് സംഭരണവുമായി ബന്ധപ്പെട്ട് ഒപ്പിട്ട ധാരണാ പത്രപ്രകാരം നെല്ലു സംഭരിച്ച് 48 മണിക്കൂറിനുള്ളില്‍ നെല്‍ കര്‍ഷകര്‍ക്ക് വില ലഭ്യമാക്കുമെന്നു പറഞ്ഞിരിക്കെ സപ്ലൈകോ പാഡിയുടെ നയമായി വന്നിരിക്കുന്ന പുതിയ തീരുമാനം കേന്ദ്ര-സംസ്ഥാന സർക്കാരുകളുടെ അറിവോടെയാണോ എന്ന് വ്യക്തമാക്കണമെന്നും നെല്‍കര്‍ഷക സംരക്ഷണ സമിതി ഭാരവാഹികള്‍ ആരോപിച്ചു. കേന്ദ്രവും സംസ്ഥാനവും ഒരുമിച്ചിരുന്ന് ഈ വിഷയം ചര്‍ച്ച ചെയ്തു നെല്ലിന്‍റെ വില സമയബന്ധിതമായി ലഭ്യമാക്കാന്‍ വേണ്ട അടിയന്തര ഇടപെടല്‍ ഉണ്ടാവണമെന്നും നെല്‍ കര്‍ഷക സംരക്ഷണ സമിതി കോര്‍ കമ്മിറ്റി ആവശ്യപ്പെട്ടു. യോഗത്തില്‍ പ്രസിഡന്‍റ് റെജീന അഷ്‌റഫ് അധ്യക്ഷത വഹിച്ചു. വൈസ് പ്രസിഡന്‍റ് ലാലിച്ചന്‍ പള്ളിവാതുക്കല്‍ ഉദ്ഘാടനം ചെയ്തു. രക്ഷാധികാരി വി.ജെ. ലാലി, കോഓർഡിനേറ്റര്‍ ജോസ് കാവനാട്, വൈസ് പ്രസിഡന്‍റുമാരായ ഷാജി മുടന്താഞ്ഞിലി, റോയി ഊരാംവേലി, വിശ്വനാഥപിള്ള ഹരിപ്പാട്, കെ.ബി. മോഹനന്‍ വെളിയനാട്, പി. വേലായുധന്‍ നായര്‍, സെക്രട്ടറി മാത്യു തോമസ്, ജനറല്‍ സെക്രട്ടറി സോണിച്ചന്‍ പുളിങ്കുന്ന് തുടങ്ങിയവര്‍ പ്രസംഗിച്ചു.

പായിപ്പാട് പഞ്ചായത്തില്‍ വിവിധ പദ്ധതികള്‍ നാടിന് സമര്‍പ്പിച്ചു

പായിപ്പാട്: പായിപ്പാട് പഞ്ചായത്ത് പൂര്‍ത്തീകരിച്ച വിവിധ പദ്ധതികളുടെ ഉദ്ഘാടനം നാലുകോടി സെന്‍റ് തോമസ് പള്ളി ഓഡിറ്റോറിയത്തില്‍ നടന്ന ചടങ്ങില്‍ മന്ത്രി വി.എന്‍. വാസവന്‍ ഉദ്ഘാടനം ചെയ്തു. മുഖ്യമന്ത്രി പിണറായി വിജയന്‍റെ നേതൃത്വത്തിലുള്ള ഇടതുപക്ഷ സര്‍ക്കാര്‍ വികസനരംഗത്ത് രാജ്യത്തിനു മാതൃകയാണന്ന് മന്ത്രി പറഞ്ഞു. പായിപ്പാട് പഞ്ചായത്ത് ലൈഫ് പദ്ധതിയില്‍ നിര്‍മിച്ച 104 വീടുകളുടെ സമര്‍പ്പണം, പഞ്ചായത്തിന്‍റെ നേതൃത്വത്തില്‍ 76 ലക്ഷം രൂപ മുടക്കി നിര്‍മിച്ച പട്ടികജാതി പൊതുശ്മശാനം, പഞ്ചായത്ത് ഒന്നാം വാര്‍ഡിലെ നക്രല്‍ പുതുവലില്‍ പുതുതായി നിര്‍മിച്ച വാട്ടര്‍ ട്രീറ്റ്‌മെന്‍റ് പ്ലാന്‍റ്, വനിത ഫിറ്റ്‌നസ് സെന്‍റര്‍, വനിതാ വായ്പ പദ്ധതി തുടങ്ങിയവയാണ് ഉദ്ഘാടനം ചെയ്തത്. ജോബ് മൈക്കിൾ എംഎല്‍എ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജില്ലാ പഞ്ചായത്തംഗം മഞ്ജു സുജിത്ത്, മാടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് എന്‍. രാജു, പഞ്ചായത്ത് പ്രസിഡന്‍റ് കെ.ഡി. മോഹനന്‍, വൈസ് പ്രസിഡന്‍റ് ഷൈനി ജോജോ, ബ്ലോക്ക് പഞ്ചായത്തംഗങ്ങളായ വിനു ജോബ്, ടീനാമോള്‍ റോബി, പഞ്ചായത്തംഗങ്ങളായ എബി വര്‍ഗീസ്, അനിജ ലാലന്‍, ത്രേസ്യാമ്മ തോമസ്, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷന്‍ ടി. രഞ്ജിത്ത്, പഞ്ചായത്തംഗങ്ങളായ ജയിംസ് വേഷ്ണാല്‍, ജയന്‍ ഗോപാലന്‍, സിബിച്ചന്‍ ഒട്ടത്തില്‍, ആനി രാജു, ഗീതാ ശശിധരന്‍, ഗീത തോമസ്, ടി.കെ. കരുണാകരന്‍, മുബാഷ് മുഹമ്മദ് ഇസ്മയില്‍, രജനി ശ്രീജിത്ത്, ഡാര്‍ലി ടെജി, കെ.എ. പാപ്പച്ചന്‍ തുടങ്ങിയവര്‍ പ്രസംഗിച്ചു.

വനിതാ കമ്മീഷന്‍ അദാലത്ത്: ആറു പരാതികള്‍ തീര്‍പ്പാക്കി

ചങ്ങനാശേരി: ഭാര്യ-ഭര്‍തൃ ബന്ധങ്ങളിലെ പ്രശ്നങ്ങള്‍ കൂടിവരുന്നതിന്‍റെ കാരണങ്ങളിലൊന്ന് മാനസീകാരോഗ്യത്തിന്‍റെ കുറവാണെന്നും കൗണ്‍സലിംഗിലൂടെ ഇവ മാറ്റിയെടുക്കാമെന്നും വനിതാ കമ്മിഷന്‍ അംഗം അഡ്വ. ഇന്ദിരാ രവീന്ദ്രന്‍. എന്നാല്‍ പലരും കൗണ്‍സലിംഗിനു തയാറാകുന്നില്ല. അതിനാല്‍ വിവാഹപൂര്‍വ കൗണ്‍സലിംഗ് അത്യന്താപേക്ഷിതമാണെന്നും വനിതാ കമ്മീഷന്‍ അതിനായി പരിശീലന പരിപാടികള്‍ സംഘടിപ്പിക്കുമെന്നും ചങ്ങനാശേരിയില്‍ നടന്ന വനിതാ കമ്മീഷന്‍ അദാലത്തിനുശേഷം അഡ്വ. ഇന്ദിരാ രവീന്ദ്രന്‍ പറഞ്ഞു. സ്വകാര്യ വിദ്യാഭ്യാസ സ്ഥാപനങ്ങളില്‍ ജീവനക്കാരുടെ ആനുകൂല്യങ്ങള്‍ തടഞ്ഞുവച്ച് അകാരണമായി പിരിച്ചുവിടുന്നുവെന്ന പരാതികള്‍ ഉയരുന്നുണ്ടെന്നും ഇത്തരം പരാതികള്‍ക്ക് അറുതിവരുത്താന്‍ സര്‍ക്കാര്‍ തലത്തില്‍ നിയമം കൊണ്ടുവരണമെന്നും വനിതാ കമ്മീഷന്‍ അംഗം പറഞ്ഞു. അദാലത്തില്‍ 70 കേസുകള്‍ പരിഗണിച്ചു. ആറെണ്ണം തീര്‍പ്പാക്കി. 61 എണ്ണം അടുത്ത അദാലത്തിലേക്കു മാറ്റി. ഒരു കേസില്‍ കമ്മീഷന്‍ റിപ്പോര്‍ട്ട് തേടി. അഭിഭാഷകരായ സി.കെ. സുരേന്ദ്രന്‍, സി.എ. ജോസ്, ഷൈനി ഗോപി, കൗണ്‍സലര്‍ ഗ്രീഷ്മ എന്നിവരും പങ്കെടുത്തു.

അസംപ്ഷന്‍ കോളജ് യൂണിയന്‍ ഭാരവാഹികള്‍

ചങ്ങനാശേരി: അസംപ്ഷന്‍ കോളജില്‍ പാര്‍ലമെന്‍ററി രീതിയില്‍ നടന്ന യൂണിയന്‍ തെരഞ്ഞെടുപ്പില്‍ എസ്. ജില്‍സിമോള്‍ (ചെയര്‍പേഴ്സണ്‍), അനുഗ്രഹ മേരി ജോസഫ് (വൈസ് ചെയര്‍പേഴ്‌സണ്‍), സുബിന്‍ ചാക്കോ (ജനറല്‍ സെക്രട്ടറി), ആര്‍ച്ചാ അജയകുമാര്‍ (ആര്‍ട്സ് ക്ലബ് സെക്രട്ടറി) എന്നിവര്‍ വിജയിച്ചു. ഫിദ സുഹ ഫാത്തിമ, കെ.എസ്. ഐഡ എന്നിവരാണ് കൗണ്‍സിലര്‍മാര്‍. ഫാ. റോജന്‍ പുരയ്ക്കലായിരുന്നു റിട്ടേണിംഗ് ഓഫീസര്‍.

മദ്യപസംഘം അഴിഞ്ഞാടി; സെക്യൂരിറ്റി ജീവനക്കാരന് ഗുരുതര പരിക്ക്

കുമരകം: ബോട്ട് ജെട്ടിക്കു സമീപപ്രദേശങ്ങള്‍ മദ്യപസംഘങ്ങളുടെ താവളമായി മാറി. ഇന്നലെ വൈകുന്നേരം മദ്യപിച്ചെത്തിയ യുവാക്കള്‍ ഗോകുലം ഗ്രാന്‍ഡ് റിസോര്‍ട്ട് ജീവനക്കാരനെ ക്രൂരമായി മര്‍ദിച്ചു. ഗുരുതരമായി പരിക്കേറ്റ ജീവനക്കാരനെ കോട്ടയം മെഡിക്കല്‍ കോളജിലെ തീവ്രപരിചരണ വിഭാഗത്തില്‍ പ്രവേശിപ്പിച്ചു. ധാരാളം വിനോദസഞ്ചാരികള്‍ വരുന്ന കുമരകത്ത് ഇത്തരം മദ്യപസംഘങ്ങളുടെ സ്വൈര്യവിഹാരം ഭീഷണിയായി മാറിയിരിക്കുകയാണ്. റിസോര്‍ട്ടില്‍ സൂര്യാസ്തമയം ആസ്വദിച്ചിരിക്കുന്ന അതിഥികളുടെ ഇടയിലേക്ക് ഇന്നലെ മദ്യപസംഘങ്ങള്‍ കടന്നുകയറിയതാണ് പ്രശ്‌നങ്ങള്‍ക്ക് തുടക്കമിട്ടത്. തടയാന്‍ ശ്രമിച്ച സെക്യൂരിറ്റി ജീവനക്കാരനെ സംഘം റിസോര്‍ട്ടിനുള്ളില്‍ അതിക്രമിച്ചു കയറി മര്‍ദിക്കുകയായിരുന്നു. ജീവനക്കാരന്‍റെ മുഖത്തും തലയ്ക്കുമാണ് ഗുരുതരമായി പരുക്കേറ്റത്. സാമൂഹ്യവിരുദ്ധ ശല്യം ടൂറിസം മേഖലയ്ക്ക് വന്‍ ഭീഷണിയായി മാറിയെന്ന് റിസോര്‍ട്ട് നടത്തിപ്പുകാര്‍ പറഞ്ഞു. കേരളത്തിലെ മറ്റ് ടൂറിസ്റ്റ് ഡെസ്റ്റിനേഷനുകളെ അപേക്ഷിച്ച് കുമരകത്തേക്കുള്ള അതിഥികളുടെ ഒഴുക്ക് വര്‍ധിച്ചിരിക്കുന്ന സാഹചര്യത്തില്‍ ഇത്തരത്തിലുള്ള അതിക്രമങ്ങൾ തടയാന്‍ അധികാരികള്‍ കര്‍ശന നടപടി സ്വീകരിക്കണമെന്നും അവര്‍ ആവശ്യപ്പെട്ടു.

കുറിച്ചിയിലെ തെരുവുനായ ശല്യം നിയന്ത്രിക്കണം

കുറിച്ചി: പേവിഷബാധയുള്ളവ അടക്കമുള്ള തെരുവുനായ ശല്യം കുറിച്ചിയില്‍ രൂക്ഷമായിരിക്കുന്ന സാഹചര്യത്തില്‍ തെരുവുനായ നിയന്ത്രണത്തിനായി കുറിച്ചി പഞ്ചായത്തില്‍ നായകള്‍ക്ക് ഷെല്‍ട്ടര്‍ പണിയണമെന്നും നായ്ക്കള്‍ക്ക് വാക്സിനേഷന്‍ നല്‍കണമെന്നും കേരള കോണ്‍ഗ്രസ് കുറിച്ചി മണ്ഡലം സമ്മേളനം ആവശ്യപ്പെട്ടു. മണ്ഡലം പ്രസിഡന്‍റ് ജിക്കു കുര്യക്കോസിന്‍റെ അധ്യക്ഷതയില്‍ ചേര്‍ന്ന സമ്മേളനം സംസ്ഥാന വൈസ് ചെയര്‍മാന്‍ കെ.എഫ്. വര്‍ഗീസ് ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് മാത്തുകുട്ടി പ്ലാത്താനം, സി.ഡി. വത്സപ്പന്‍, ജോര്‍ജുകുട്ടി മാപ്പിളശേരി, ആര്‍. ശശിധരന്‍ നായര്‍, ഡോ. ജോബിന്‍ എസ്. കൊട്ടാരം, കെ.എ. തോമസ്, കുര്യന്‍ തൂമ്പുങ്കല്‍, ജോസഫ് ആന്‍റണി, ഡോ. സെബിന്‍ എസ്. കൊട്ടാരം തുടങ്ങിയവര്‍ പ്രസംഗിച്ചു.

കുറിച്ചി പഞ്ചായത്തിലെ ഭാസ്‌കരന്‍ നഗര്‍ അംബേദ്കര്‍ ഗ്രാമവികസന പദ്ധതിയില്‍

കുറിച്ചി: ചങ്ങനാശേരി നിയോജകമണ്ഡലത്തിലെ കുറിച്ചി പഞ്ചായത്തിലെ ഭാസ്‌കരന്‍ നഗറിനെ അംബേദ്കര്‍ ഗ്രാമ വികസന പദ്ധതിയില്‍ ഉള്‍പ്പെടുത്തി ഉത്തരവായതായി ജോബ് മൈക്കിള്‍ എംഎല്‍എ അറിയിച്ചു. പട്ടികജാതി വികസന വകുപ്പിന്‍റെ അടിസ്ഥാന വികസനം ലക്ഷ്യമാക്കിയുള്ള പദ്ധതിയിലാണ് 2025 -26 സാമ്പത്തിക വര്‍ഷത്തില്‍ ഭാസ്‌കരന്‍ നഗറിനെ തെരഞ്ഞെടുത്തിരിക്കുന്നത്. ജോബ് മൈക്കിള്‍ എംഎല്‍എയായി തെരഞ്ഞെടുക്കപ്പെട്ടശേഷം ആറാമത്തെ നഗറാണ് അംബേദ്കര്‍ പദ്ധതിയില്‍ ഉള്‍പ്പെടുന്നത്. ഒരു പ്രദേശത്ത് ഒരു കോടി രൂപ മുടക്കിയുള്ള വികസനമാണ് നടക്കുന്നത്. സമഗ്രമായ വികസനം എല്ലാ മേഖലയിലും എത്തിക്കുക എന്നതാണ് ലക്ഷ്യമെന്നും അതിന്‍റെ ഭാഗമായുള്ള പ്രവര്‍ത്തനങ്ങള്‍ നാടിനെ മികച്ച രീതിയില്‍ മുന്നോട്ട് നയിക്കുമെന്നും എംഎല്‍എ അറിയിച്ചു.

വൈക്കം-വെച്ചൂർ റോഡ് ഭൂമി ഏറ്റെടുക്കൽ: ഗസറ്റ് വിജ്ഞാപനമായി

വൈക്കം: കിഫ്ബിയുടെ 157 കോടിരൂപ ധനസഹായത്തോടെ നിർമിക്കുന്ന വൈക്കം - വെച്ചൂർ റോഡിന്‍റെ ഭൂമി ഏറ്റെടുക്കൽ പ്രവൃത്തികളുടെ അവസാന നടപടിക്രമങ്ങളുടെ ഭാഗമായുള്ള കെഎൽഎ ആർആർ ആക്ട് 2013 പ്രകാരമുള്ള 19(1) നോട്ടിഫിക്കേഷൻ കേരള ഗസറ്റിൽ പ്രസിദ്ധീകരിച്ചു. ഗസറ്റ് നോട്ടിഫിക്കേഷൻ തീയതി മുതൽ 30 ദിവസത്തെ നോട്ടീസ് നൽകി ഭൂമി ഏറ്റെടുക്കുന്ന 963 ഭൂവുടമകളെയും നേരിൽകേട്ട് ബന്ധപ്പെട്ട രേഖകൾ പരിശോധിച്ചതിനുശേഷം ഭൂമിവില കൈമാറാനാകുമെന്ന് സി.കെ. ആശ എംഎൽഎ അറിയിച്ചു. ഏറ്റെടുക്കുന്ന ഭൂമിയുടെ വിലയായി 85.77 കോടി രൂപ കിഫ്ബിയിൽനിന്നു കെആർഎഫ്ബി വഴി ഭൂമി ഏറ്റെടുക്കൽ സ്പെഷൽ തഹസിൽദാർക്ക് കൈമാറി. ഭൂമി ഏറ്റെടുത്ത് സമയബന്ധിതമായി റോഡ് നിർമാണം ആരംഭിക്കാനാവുന്ന സാഹചര്യമാണ് നിലവിലുള്ളതെന്ന് എംഎൽഎ പറഞ്ഞു.

സിബിഎസ്ഇ ക്ലസ്റ്റര്‍ -11 ബാസ്‌കറ്റ്‌ബോള്‍ ടൂര്‍ണമെന്‍റിന് ഇന്നു കൊടിയിറക്കം

കോട്ടയം: സിബിഎസ്ഇ ക്ലസ്റ്റര്‍ -11 ബാസ്‌കറ്റ്‌ബോള്‍ ടൂര്‍ണമെന്‍റിന് ഇന്നു കൊടിയിറക്കം. വൈകുന്നേരം ആറിനു നടക്കുന്ന സമാപന സമ്മേളനത്തിന്‍റെ ഉദ്ഘാടനവും വിജയികള്‍ക്കുള്ള സമ്മാനദാനവും കോട്ടയം ചീഫ്. ജുഡീഷ്യല്‍ മജിസ്‌ട്രേറ്റ് എച്ച്. റോഷ്‌നി നിര്‍വഹിക്കും. സ്‌കൂള്‍ മാനേജര്‍ ഫാ. ജേക്കബ് വട്ടക്കാട്ട്, പ്രിന്‍സിപ്പല്‍ ഫാ. തോമസ് പാറത്താനം എന്നിവര്‍ പങ്കെടുക്കും. ഇന്നലെ നടന്ന ക്വാര്‍ട്ടര്‍ ഫൈനല്‍ മത്സരങ്ങളില്‍ അണ്ടര്‍ 19 ബോയ്‌സില്‍ ലൂര്‍ദ് പബ്ലിക് സ്‌കൂള്‍ കോട്ടയം, ഡല്‍ഹി പബ്ലിക് സ്‌കൂള്‍ അണ്ടര്‍ 17 ബോയ്‌സില്‍ എകെഎം ചങ്ങനാശേരി, രാജഗിരി പബ്ലിക് സ്‌കൂള്‍ തിരുവാങ്കുളം, എസ്എച്ച് കിളിമല, ജ്യോതി നികേതന്‍ ആലപ്പി, അണ്ടര്‍ 14 ബോയ്‌സില്‍ എകെഎം ചങ്ങനാശേരി, ജ്യോതി നികേതന്‍ ആലപ്പി, ബിവി ഭവന്‍സ് കൊടുങ്ങല്ലൂര്‍, ടോക്ക് എച്ച് വൈറ്റില എന്നീ ടീമുകള്‍ സെമി ഫൈനലിലേക്ക് കടന്നു. അണ്ടര്‍ 19 ഗേള്‍സില്‍ ലൂര്‍ദ് പബ്ലിക് സ്‌കൂള്‍ കോട്ടയം, എസ്എച്ച് കിളിമല, ക്രിസ്തുജയന്തി കാക്കനാട്, ചോയിസ് സ്‌കൂള്‍ തൃപ്പൂണിത്തുറ, അണ്ടര്‍ 17 ഗേള്‍സില്‍ രാജഗിരി കളമശേരി ജ്യോതി നികേതന്‍ ആലപ്പുഴ, അസീസി വിദ്യാനികേതന്‍ കാക്കനാട്, ഓക്‌സ്‌ഫോർഡ് സെന്‍റര്‍ കരവല്ലൂര്‍ അണ്ടര്‍ 14 ഗേള്‍സില്‍ ലൂര്‍ദ് പബ്ലിക് സ്‌കൂള്‍ കോട്ടയം രാജഗിരി കളമശേരി, ജ്യോതിനികേതന്‍ ആലപ്പുഴ, ഭവന്‍സ് മുന്‍ഷി തൃപ്പൂണിത്തറ എന്നീ ടീമുകള്‍ സെമി ഫൈനലിലേക്ക് കടന്നു.

കുരുമ്പന്‍മൂഴി, അറയാഞ്ഞിലിമണ്‍ നിവാസികളുടെ പ്രളയദുരിതം പമ്പകടക്കും

കോട്ടയം: കുരുമ്പന്‍മൂഴി, അറയാഞ്ഞിലിമണ്‍ മലയോരവാസികളുടെ തീരാദുരിതം പമ്പകടക്കുന്നു. കിഴക്കന്‍ മലയോര വനപ്രദേശമായ കുരുമ്പന്‍മൂഴിയിലും അറയാഞ്ഞിലിമണ്ണിലും പമ്പാനദിക്കു കുറുകെ പുതിയ പാലങ്ങളുടെ നിര്‍മാണ ഉദ്ഘാടനം നവംബര്‍ 11ന് നടക്കും. രണ്ടു പാലങ്ങളുടെയും പണി എട്ടു മാസത്തിനുള്ളില്‍ പൂര്‍ത്തിയാകും. ശക്തമായ മഴ പെയ്താല്‍ നിലവിലുള്ള രണ്ട് കോസ് വേകളും വെള്ളത്തിലാവുന്നതിനൊപ്പം മലയോരവാസികള്‍ വനാതിര്‍ത്തിയില്‍ ഒറ്റപ്പെടുകയും ചെയ്യും. കാലങ്ങളായി പ്രദേശവാസികള്‍ നേരിടുന്ന ദുരിതത്തിന് പരിഹാരമാണ് പുതിയ പാലങ്ങള്‍. പട്ടികവര്‍ഗ വികസന വകുപ്പിന്‍റെ കോര്‍പ്പസ് ഫണ്ടില്‍ നിന്നാണ് ഇതിനുള്ള ഫണ്ട് അനുവദിച്ചത്. അറയാഞ്ഞിലിമണ്ണില്‍ 2.6 കോടി രൂപ മുടക്കിലാണ് പാലം പണിയുന്നത്. പാലത്തിന്‍റെ നിര്‍മാണ ചുമതല പൊതുമരാമത്ത് വകുപ്പിന് കീഴിലുള്ള കേരള സ്റ്റേറ്റ് കണ്‍സ്ട്രക്‌ഷന്‍ കോര്‍പറേഷനാണ്. ഉയരംകൂട്ടി നടപ്പാത എന്ന ഉദ്ദേശ്യത്തില്‍ നിര്‍മിക്കുന്ന പാലത്തിലൂടെ ചെറിയ ആംബുലന്‍സ് ഉള്‍പ്പെടെ ചെറു വാഹനങ്ങള്‍ക്ക് കടന്നുപോകാനാകും. 1.8 മീറ്റര്‍ വീതിയും 90 മീറ്റര്‍ നീളവുമുള്ള പാലത്തിന് ഏഴ് തൂണുകളുണ്ടാകും. ഒരുവശം പമ്പാനദിയും ബാക്കി മൂന്നു വശങ്ങളും ശബരിമല വനത്താലും ചുറ്റപ്പെട്ട് ഒറ്റപ്പെട്ടു കിടക്കുന്ന പ്രദേശങ്ങളാണ് പെരുനാട് പഞ്ചായത്തിലെ അറയാഞ്ഞിലിമണ്ണും നാറാണംമൂഴി പഞ്ചായത്തിലെ കുരുമ്പന്‍മൂഴിയും. കോട്ടയം ജില്ലയിലെ കണമല, പമ്പാവാലി, മുക്കൂട്ടുതറ, എരുമേലി പ്രദേശങ്ങളിലേക്കുള്ള യാത്ര ഇതോടെ എളുപ്പമാകും. 3.97 കോടി രൂപ ചെലവിലാണ് സ്റ്റീല്‍ ഇന്‍ഡസ്ട്രീസ് ലിമിറ്റഡ് കേരള കുരുമ്പന്‍മൂഴിയില്‍ ഇരുമ്പ് പാലം നിര്‍മിക്കുന്നത്. നിലവിലുള്ള കോസ്‌വേയുടെ കൈവരികള്‍ തകര്‍ന്ന സ്ഥിതിയിലാണ്. 2018ലെ മഹാപ്രളയവും പെരുന്തേനരുവി ചെറുകിട ജലവൈദ്യുത പദ്ധതിയുടെ തടയണയും കാരണം വന്‍തോതില്‍ മണല്‍ അടിഞ്ഞതിനാല്‍ ഒറ്റ മഴയില്‍ പാലം മൂടിപ്പോകുന്ന സാഹചര്യമാണ്. 650 കുടുംബങ്ങള്‍ താമസിക്കുന്ന കുരുമ്പന്‍മൂഴിയിലെ മൂന്ന് ആദിവാസി കോളനി വാസികള്‍ മഴക്കാലത്ത് വലിയ ദുരിതമാണ് നേരിടുന്നത്.

തഞ്ചാവൂരിലുണ്ടായ ബൈക്കപകടം: യുവാവ് മരിച്ചു

തലയോലപ്പറമ്പ്: തമിഴ്‌നാട് തഞ്ചാവൂരിൽ ബൈക്കുകൾ കൂട്ടിയിടിച്ചുണ്ടായ അപകടത്തിൽ ഗുരുതരമായി പരിക്കേറ്റ തലയോലപ്പറമ്പ് ഇടവട്ടം സ്വദേശിയായ യുവാവ് മരിച്ചു. ഇടവട്ടം രാഗരശ്മിയിൽ പരേതനായ മുരളീധരൻപിള്ളയുടെ മകൻ ഇന്ത്യൻ ഓവർസീസ് ബാങ്ക് തഞ്ചാവൂർ നാഗപട്ടണം റീജണൽ ഓഫീസിലെ ജീവനക്കാരൻ എം. രാഹുൽ(36)ആണ് മരിച്ചത്. തിങ്കളാഴ്‌ച ജോലിക്കു ശേഷം സ്പോർട്‌സ് മീറ്റിൽ പങ്കെടുത്ത് താമസ സ്‌ഥലത്തേക്കു മടങ്ങുന്നതിനിടെ രാത്രി ഒൻപതോടെയായിരുന്നു അപകടം. റോഡിൽ തലയടിച്ചുവീണ രാഹുലിനെ തമിഴ്‌നാട് പോലീസെത്തി തിരുവാരൂർ ഗവ.ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. രാഹുലിന്‍റെ ലൈസൻസിൽനിന്നു വിലാസം കണ്ടെത്തി ഇന്നലെ രാവിലെ എട്ടോടെ വിവരം വീട്ടുകാരെ അറിയിക്കുകയായിരുന്നു. ഇന്നലെ ഇടവട്ടത്തെ വീട്ടിലേക്കു വരാനിരിക്കെയാണ് അപകടം സംഭവിച്ചത്. നടപടികൾ പൂർത്തീകരിച്ച് മൃതദേഹം ഇന്ന് രാവിലെ വീട്ടിലെത്തിച്ച് ഉച്ചകഴിഞ്ഞ് മൂന്നിന് വീട്ടുവളപ്പിൽ സംസ്‌കരിക്കും. മാതാവ് കൃഷ്‌ണകുമാരി. ഭാര്യ: പൂർണിമ മോഹൻ. ആലപ്പുഴ ചെക്കിടിക്കാവ് എടത്വ കാർത്തിക കുടുംബാംഗം. മകൻ: ഇഷാൻകൃഷ്‌ണ (വെള്ളൂർ ഭവൻസ് സ്‌കൂളിലെ ഒന്നാംക്ലാസ് വിദ്യാർഥി).

അതിരമ്പുഴ പള്ളിമുറ്റത്തെ അതിക്രമം: പ്രതി പിടിയിൽ

അതിരമ്പുഴ: അതിരമ്പുഴ പള്ളിമുറ്റത്ത് തൊഴിലാളിയെ ആക്രമിച്ചു കൊലപ്പെടുത്താൻ ശ്രമിച്ച കേസിലെ പ്രതി അറസ്റ്റിൽ. അതിരമ്പുഴ നാല്പാത്തിമല വടക്കേത്തുപറമ്പിൽ ആദർശ് മനോജിനെ (21)യാണ് ഏറ്റുമാനൂർ പാേലീസ് അറസ്റ്റ് ചെയ്തത്. പള്ളിമേടയിൽ മാർബിൾ പോളീഷിംഗിൽ ഏർപ്പെട്ടിരുന്ന ചങ്ങനാശേരി ഇത്തിത്താനം സ്വദേശി ബിജുവിനെ ചില്ലുകുപ്പി ഉപയോഗിച്ച് തലയ്ക്കടിച്ചു പരിക്കേല്പിച്ച സംഭവത്തിലാണ് ആദർശിനെ അറസ്റ്റ് ചെയ്തത്. കഴിഞ്ഞ വ്യാഴാഴ്ചയാണ് കേസിനാസ്പദമായ സംഭവമുണ്ടാകുന്നത്. പള്ളിമുറ്റത്ത് കൂട്ടംകൂടി ബഹളംവച്ചത് ചാേദ്യംചെയ്ത പള്ളിയിലെ സെക്യൂരിറ്റി ജീവനക്കാരനെ ആക്രമിച്ച സംഘത്തെ പിന്തിരിപ്പിക്കാൻ എത്തിയതായിരുന്നു ബിജുവും മകനും മറ്റൊരു ജോലിക്കാരനും. ഇവർക്കു നേരേ തിരിഞ്ഞ ആദർശ് ബിജുവിന്‍റെ തലയിൽ ചില്ലുകുപ്പികൊണ്ട് അടിച്ച് മാരകമായി പരിക്കേല്പിക്കുകയായിരുന്നു. സംഭവശേഷം കടന്നുകളഞ്ഞ ആദർശിനെ ദിവസങ്ങൾ നീണ്ട തെരച്ചിലിലാണ് തിങ്കളാഴ്ച പിടികൂടിയത്. എസ്എച്ച്ഒ ഇൻസ്പെക്ടർ എ.എസ്. അൻസൽ, എസ്ഐമാരായ എ.എസ്. അഖിൽദേവ്, ആഷിൽ രവി, സീനിയർ സിവിൽ പോലീസ് ഓഫീസർ സുനിൽ കുര്യൻ, സിവിൽ പോലീസ് ഓഫീസർമാരായ വി.കെ. അനീഷ്, പി.എസ്. സനൂപ്, അനിൽകുമാർ എന്നിവരടങ്ങുന്ന സംഘമാണ് ഇയാളെ പിടികൂടിയത്. ഗാന്ധിനഗർ പോലീസ് സ്റ്റേഷൻ ക്രിമിനൽ ലിസ്റ്റിൽ ഉൾപ്പെട്ട ഇയാൾക്കെതിരേ ഏറ്റുമാനൂർ സ്റ്റേഷനിൽ അഞ്ച് ക്രിമിനൽ കേസുകൾ വേറെയും നിലവിലുണ്ട്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

75 ലക്ഷം ലിറ്റര്‍ പാല്‍ മില്‍മ വിപണിയിലെത്തിക്കും

കോട്ടയം: ഓണാഘോഷത്തോടനുബന്ധിച്ച് 75 ലക്ഷം ലിറ്റര്‍ പാല്‍ മില്‍മ വിപണിയിലെത്തിക്കും. കഴിഞ്ഞ വര്‍ഷത്തേക്കള്‍ 10 ശതമാനം അധികം പാലാണ് ഇത്തവണ മില്‍മ വിപണിയിലെത്തിക്കുന്നത്. 12 ലക്ഷം ലിറ്റര്‍ പാല്‍ മാത്രമേ കേരളത്തില്‍നിന്നു ലഭിക്കുന്നുള്ളൂ. ബാക്കിയുള്ള പാല്‍ കര്‍ണാടക, ആന്ധ്രാ, മഹാരാഷ്‌ട്ര, തമിഴ്‌നാട് എന്നിവിടങ്ങളില്‍ സഹകരണ ഫെഡറേഷനുകളില്‍നിന്നു സംഭരിക്കും. മൂന്നു മുതല്‍ ഏഴുവരെയുള്ള ദിവസങ്ങളിലാണ് ഏറ്റവും കൂടുതല്‍ പാല്‍ ചെലവാകുന്നത്. ഈ ദിവസങ്ങളില്‍ മുന്‍ വര്‍ഷങ്ങളില്‍നിന്നു വ്യത്യസ്തമായി ഇത്തവണ പാലിന്‍റെ ഉപയോഗം വര്‍ധിക്കുമെന്നാണ് മില്‍മയുടെ കണക്കുകൂട്ടല്‍. മില്‍മ സംഭരിക്കുന്ന പാലില്‍നിന്നും സംസ്ഥാനത്തെ 14 ഡെയറി യൂണിറ്റുകളിൽനിന്നും തൈരും നെയ്യും ഉത്പാദിപ്പിക്കുന്നുണ്ട്. ഇതും 10 ശതമാനം വര്‍ധിപ്പിക്കുന്നുണ്ട്. പായസം ഉള്‍പ്പെടെയുള്ള ഓണസദ്യയിലെ വിഭവങ്ങള്‍ക്കായി പാലും പാല്‍ ഉത്പന്നങ്ങളും ധാരാളം ആവശ്യമായി വരും. നിലവിലെ സാഹചര്യത്തില്‍ ആവശ്യത്തിനു പാലും പാലുത്പന്നങ്ങളും നല്‍കാന്‍ മില്‍മ എല്ലാവിധ ക്രമീകരണങ്ങളും ഏര്‍പ്പെടുത്തിയതായി ചെയര്‍മാന്‍ കെ.എസ്. മണി അറിയിച്ചു. അതേസമയം ഓണവിപണി ലക്ഷ്യമാക്കി വന്‍തോതില്‍ വ്യാജ പാല്‍ വിപണിയിലെത്തുന്നുണ്ട്. ഇതു തടയുന്നതിനായി ക്ഷീരവികസന വകുപ്പ് ആര്യങ്കാവ്, കമ്പംമെട്ട്, കുമളി, വാളയാര്‍ എന്നിവിടങ്ങളില്‍ പരിശോധനയ്ക്കുള്ള സംവിധാനവും ഒരുക്കിയിട്ടുണ്ട്. മുന്‍കാലങ്ങളില്‍ ഓണക്കാലത്ത് വന്‍തോതില്‍ വ്യാജപാല്‍ എത്തിയിരുന്നു. ഇതു തടയുന്നതിന്‍റെ ഭാഗമായിട്ടാണ് ഇത്തവണ പരിശോധന കര്‍ശനമാക്കിയത്. 92 സ്പെഷൽ ട്രെയിനുകളും കോച്ചുകളും കോട്ടയം: ഓണക്കാലത്തെ യാത്രാത്തിരക്ക് കുറയ്ക്കാന്‍ 92 സ്‌പെഷല്‍ ട്രെയിനുകള്‍ ഓടിക്കും. ചെന്നൈയില്‍ നിന്ന് കേരളത്തിലേക്ക് ആറ്, കേരളത്തിൽനിന്ന് മംഗളൂരുവിലേക്ക് 22, ബംഗളൂരുവിലേക്ക് 18 വേളാങ്കണ്ണിയിലേക്ക് 10, പാട്നയിലേക്ക് 36 എന്ന ക്രമത്തിലാണ് അധിക സര്‍വീസുകള്‍. കൂടാതെ പത്ത് ട്രെയിനുകളില്‍ അധിക കോച്ച് തിരക്കിന്‍റെ പശ്ചാത്തലത്തില്‍ ഉള്‍പ്പെടുത്തിയിട്ടുണ്ട്. തിരുവനന്തപുരം-കോഴിക്കോട്-തിരുവനന്തപുരം ജന്‍ശതാബ്ദി എക്സ്പ്രസില്‍ ഒരു ചെയര്‍ കാര്‍ അധികമായി ഉള്‍പ്പെടുത്തി. തിരുവനന്തപുരം-എറണാകുളം-തിരുവനന്തപുരം വഞ്ചിനാട് എക്സ്പ്രസില്‍ ഒരു ജനറല്‍ സെക്കൻഡ് ക്ലാസ് കോച്ച് കൂടി ഉള്‍പ്പെടുത്തി. തിരുവനന്തപുരം-ഗുരുവായൂര്‍-തിരുവനന്തപുരം ഇന്‍റര്‍സിറ്റി എക്സ്പ്രസിലും തിരുവനന്തപുരം-മധുരൈ-തിരുവനന്തപുരം അമൃത എക്സ്പ്രസിലും ഒരോ ജനറല്‍ സെക്കൻഡ് ക്ലാസ് കോച്ചുകള്‍ ചേര്‍ത്തു. മംഗളൂരു-തിരുവനന്തപുരം-മംഗളൂരു മാവേലി എക്സ്പ്രസില്‍ ഒരു സ്ലീപ്പര്‍ കോച്ചും അധികമുണ്ട്. അത്തംപിറന്നു; പൂവിപണി സജീവം കോട്ടയം: അത്തം പിറന്നതോടെ പൂവിപണിയും സജീവം. കാലാവസ്ഥ പ്രതികൂലമായതിനാല്‍ ഇത്തവണ മറുനാടന്‍ പൂക്കള്‍ കുറവാണ്. ഇതര സംസ്ഥാനത്തുനിന്നെത്തുന്ന പൂക്കള്‍ക്ക് വില കൂടുതലാണ്. അതിനാല്‍ ഇത്തവണ പൂക്കളമിട്ടാല്‍ കൈപൊള്ളും. ജമന്തിയുടെ വില 300 രൂപയിലെത്തി. ബന്തിപ്പൂവില 200 രൂപയായി. ഓണം അടുക്കുന്നതോടെ വില വീണ്ടും കൂടാനാണ് സാധ്യത. മുല്ലപ്പൂവിനു കിലോയ്ക്ക് 1500-1800 വരെയാണ്. അത്തം മുതല്‍ തിരുവോണം വരെയാണ് വീടുകളില്‍ പൂക്കളമിടുന്നത്. നാടന്‍പൂക്കള്‍ നന്നേ കുറവായതിനാല്‍ പൂക്കള്‍ വില കൊടുത്ത് വാങ്ങാതെ നിവൃത്തിയില്ല. സ്‌കൂളുകളിലും കോളജുകളിലും ഓഫീസുകളിലും സ്ഥാപനങ്ങളിലും ഓണാഘോഷം അടുത്ത ദിവസം തുടങ്ങും. തുമ്പപ്പൂവ്, തുളസി, തൊട്ടാവാടിപ്പൂ, മുക്കുറ്റി, കാക്കപ്പൂവ് തുടങ്ങിയ നാടന്‍ പൂക്കളാണ് അത്തപ്പൂക്കളമൊരുക്കാന്‍ പ്രധാനമായും ഉപയോഗിച്ചിരുന്നത്. ഇവയില്ലെന്നു മാത്രമല്ല ഓണത്തിന്‍റെ വരവറിയിക്കാന്‍ പോലും തുമ്പപ്പൂവ് ഇല്ല. കമ്പം, തോവാള, ശീലായംപെട്ടി, ദിണ്ടിഗല്‍ എന്നിവിടങ്ങളില്‍ നിന്നാണ് പൂക്കൾ പ്രധാനമായും എത്തുന്നത്. തമിഴ്‌നാട്ടില്‍ നിന്നും ഓരോ ദിവസവും ലോഡ് കണക്കിനു പൂക്കളാണ് വരുന്നത്. വരും ദിവസങ്ങളില്‍ പൂവിപണി കൂടുതൽ സജീവമാകും.

തൂശനിലയാണ് താരം

കോട്ടയം: ഓണസദ്യയുണ്ണാന്‍ ഓന്നാന്തരം തൂശനിലയുമായി ഈറ്റയ്ക്കകുന്നേല്‍ ഫാംസ്. കഴിഞ്ഞ 18 വര്‍ഷമായി തമിഴ്‌നാട്ടില്‍ വാഴയില കൃഷിയും പച്ചക്കറി കൃഷിയും നടത്തിവരുന്ന പാലാ ഭരണങ്ങാനം ഈറ്റയ്ക്കകുന്നേല്‍ പ്രമോദ് ഫിലിപ്പിന്‍റെ ഫാമില്‍നിന്ന് ഓണത്തിനായി ലോഡു കണക്കിനു വാഴയിലകളാണ് കേരളത്തിലേക്ക് എത്തുന്നത്. തമിഴ്‌നാട്ടിലെ കമ്പം, ഗൂഡല്ലൂര്‍, തഞ്ചാവൂര്‍, ആലകുളം കര്‍ണാടകയിലെ ചിക്കമംഗ്‌ളൂരു എന്നിവിടങ്ങളിലാണ് പ്രമോദ് ഏക്കറുകണക്കിനു തോട്ടം പാട്ടത്തിനെടുത്ത് വാഴയില കൃഷി ചെയ്യുന്നത്. ഹോട്ടലുകള്‍, കോളജുകള്‍, ക്ലബ്ബുകള്‍ എന്നിവര്‍ ഓണസദ്യക്കായി വാഴയിലകള്‍ ഓര്‍ഡര്‍ ചെയ്തു കഴിഞ്ഞു. കൂടാതെ കല്യാണസദ്യക്കായി കാറ്ററിംഗ് സ്ഥാപനങ്ങളും ഓര്‍ഡര്‍ ചെയ്തിട്ടുണ്ട്. ഓണത്തോടനുബന്ധിച്ച് അഞ്ചു ലക്ഷത്തോളം വാഴയിലകള്‍ക്കാണ് ഇതുവരെ പ്രമോദിന് ഓര്‍ഡര്‍ ലഭിച്ചിരിക്കുന്നത്. കോട്ടയം, എറണാകുളം, ഇടുക്കി, പത്തനംതിട്ട ജില്ലകളിലാണ് പ്രധാന വിപണി. ഒരു വാഴയില നാലുരൂപയ്ക്കാണ് വില്‍പന. ഞാലിപൂവന്‍ വാഴയിലകളാണ് സദ്യക്കായി ഉപയോഗിക്കുന്നത്. ഏത്തവാഴയില പെട്ടന്ന് പൊട്ടിപ്പോകുന്നതിനാലും പാളയംതോടന്‍ വാഴയിലയ്ക്ക് കട്ടി കൂടുന്നതിനാലും ഉപയോഗിക്കില്ല. വാഴ നട്ടു കുലയായാല്‍ കുല ആദ്യം വെട്ടിവില്‍ക്കും. തുടര്‍ന്ന് ഇല ഉപയോഗിക്കും കുല വെട്ടിയ വാഴ വിത്തായും ഉപയോഗിക്കും. കേരളത്തിലെ കര്‍ഷകര്‍ക്ക് വാഴക്കൃഷി ഉണ്ടെങ്കിലും വാഴയില കൃഷി അധികം ഇല്ല. കര്‍ഷകര്‍ക്ക് ആവശ്യമായ മാര്‍ഗ നിര്‍ദേശങ്ങള്‍ ലഭിച്ചു ശരിയായ രീതിയില്‍ വാഴകള്‍ വളര്‍ത്തിയാല്‍ ഗുണമേന്മയുള്ള വാഴയിലകള്‍ ഇവിടെത്തന്നെ വളര്‍ത്തിയെടുക്കാന്‍ സാധിക്കുമെന്ന് പ്രമോദ് ഫിലിപ്പ് പറയുന്നു. വാഴയില കൃഷിക്കൊപ്പം കമ്പത്ത് പച്ചക്കറി കൃഷിയുമുണ്ട്. കോട്ടയം ജില്ലയിലെ പ്രമുഖ എന്‍ജനിയറിംഗ് കോളജുകളിലേക്കും ആശുപത്രികളിലേക്കും ഇവിടെനിന്നാണ് പതിവായി പച്ചക്കറി എത്തുന്നത്.

സപ്ലൈകോ ഓണം ഫെയറിന് തുടക്കം

കോട്ടയം: നിത്യോപയോഗസാധനങ്ങള്‍ പരമാവധി വിലക്കുറവില്‍ നൽകുന്നതിനായി സപ്ലൈകോ ഓണം ഫെയറും സഞ്ചരിക്കുന്ന ഓണച്ചന്തയും ആരംഭിച്ചു. തിരുനക്കര മൈതാനത്ത് മന്ത്രി വി.എൻ. വാസവൻ ഉദ്ഘാടനം ചെയ്തു. സെപ്റ്റംബര്‍ നാലു വരെയാണ് ഓണം ഫെയറും സഞ്ചരിക്കുന്ന ഓണച്ചന്തയും. ജില്ലയിലെ ഒന്‍പതുനിയോജകമണ്ഡലങ്ങളിലെ വിവിധ കേന്ദ്രങ്ങളില്‍ രാവിലെ 9.30 മുതല്‍ രാത്രി ഏഴു വരെ സഞ്ചരിക്കുന്ന ഓണച്ചന്ത എത്തും. സപ്ലൈകോ ഓണം ഫെയറില്‍ സബ്സിഡി സാധനങ്ങള്‍ക്കൊപ്പം ഇരുനൂറ്റന്പതിലധികം ബ്രാന്‍ഡഡ് നിത്യോപയോഗ സാധനങ്ങള്‍ക്കും ഓഫറുകളും വിലക്കുറവുമുണ്ട്. തിരുവഞ്ചൂര്‍ രാധാകൃഷ്ണന്‍ എംഎല്‍എ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേം സാഗര്‍ ആദ്യ വില്‍പന നിര്‍വഹിച്ചു. നഗരസഭാംഗം ജയമോള്‍ ജോസഫ്, ജില്ലാ സപ്ലൈകോ ഓഫീസര്‍ ബി. സജനി, സപ്ലൈകോ മേഖലാ മാനേജര്‍ ആര്‍. ബോബന്‍ തുടങ്ങിയവര്‍ പ്രസംഗിച്ചു. ഓണച്ചന്ത ഇന്ന് എത്തിച്ചേരുന്നത് വെട്ടത്തുകവല, കൈതേപ്പാലം: രാവിലെ 9.30 മുതല്‍ 10.45 വരെ പയ്യപ്പാടി: രാവിലെ 11.15 മുതല്‍ ഉച്ചയ്ക്ക് 12.45 വരെ തിരുവഞ്ചൂര്‍: ഉച്ചകഴിഞ്ഞ് രണ്ടു മുതല്‍ 3.15 വരെ യൂണിവേഴ്സിറ്റി കവല: ഉച്ചകഴിഞ്ഞ് 3.45 മുതല്‍ വൈകുന്നേരം അഞ്ചു വരെ പ്രാവട്ടം: വൈകുന്നേരം 5.30 മുതല്‍ രാത്രി ഏഴു വരെ

വാങ്ങിക്കൂട്ടാം വേണ്ടതൊക്കെ

149 ഓണച്ചന്തകള്‍ ഒരുങ്ങുന്നു കോട്ടയം: ഓണത്തെ വരവേല്‍ക്കാന്‍ കൃഷിവകുപ്പും ഒരുങ്ങി. ജനങ്ങള്‍ക്ക് ന്യായവിലയില്‍ പച്ചക്കറികളും പഴവര്‍ഗങ്ങളും ഉറപ്പാക്കുന്നതിനായി കൃഷിവകുപ്പും ഹോര്‍ട്ടികോര്‍പ്പും വെജിറ്റബിള്‍ ആന്‍ഡ് ഫ്രൂട്ട്‌സ് പ്രമോഷന്‍ കൗണ്‍സിലും 149 ഓണച്ചന്തകള്‍ നടത്തും. സെപ്റ്റംബര്‍ ഒന്നു മുതല്‍ ഉത്രാടദിനമായ നാലുവരെയാണ് ചന്തകള്‍ പ്രവര്‍ത്തിക്കുന്നത്. പഞ്ചായത്തുകളിലെയും നഗരസഭകളിലെയും കൃഷിഭവനുകള്‍ കേന്ദ്രീകരിച്ച് 79 ഓണചന്തകള്‍ കൃഷിവകുപ്പ് നേരിട്ട് നടത്തുമ്പോള്‍ ഔട്ട്‌ലെറ്റുകള്‍, സപ്ലൈകോ ഓണവിപണി, കുടുംബശ്രീ ഓണം വിപണി എന്നിവിടങ്ങളിലായി ഹോര്‍ട്ടികോര്‍പ് 55 ചന്തകള്‍ നടത്തും. വെജിറ്റബിള്‍ ആന്‍ഡ് ഫ്രൂട്‌സ് പ്രമോഷന്‍ കൗണ്‍സില്‍ ജില്ലയുടെ വിവിധയിടങ്ങളിലായി 15 ചന്തകള്‍ തുറക്കും. ഓണവിപണി ലക്ഷ്യമാക്കി ഹോര്‍ട്ടികോര്‍പ് ജില്ലയില്‍ 100 ടണ്‍ പച്ചക്കറികളാണ് സംഭരിക്കുന്നത്. കൃഷി വകുപ്പ് 40 ടണ്‍ പച്ചക്കറികളും സംഭരിക്കും. നാട്ടിന്‍ പുറങ്ങളിലെ കര്‍ഷകരില്‍നിന്നു പരമാവധി പച്ചക്കറികളും പഴവര്‍ഗങ്ങളും സംഭരിക്കാനാണ് തീരുമാനം. ശേഷിക്കുന്നവ പുറത്തുനിന്നു സംഭരിക്കും. ശീതകാല പച്ചകറികളായ കാബേജ്, കാരറ്റ്, വെളുത്തുള്ളി തുടങ്ങിയ വട്ടവടയില്‍നിന്നാണ് സംഭരിക്കുന്നത്. പച്ചക്കറികള്‍ കൂടുതല്‍ ഉത്പാദിപ്പിക്കുന്ന മലപ്പുറം, തൃശൂര്‍ ജില്ലകളില്‍നിന്നാണ് മറ്റു പച്ചക്കറികളുടെ സംഭരണം. സവോള, ഉള്ളി,കിഴങ്ങ് എന്നിവ തമിഴ്‌നാട്ടില്‍നിന്നാണ് സംഭരിക്കുന്നത്. പൊതുവിപണിയില്‍നിന്നു 10 ശതമാനം അധിക വില കര്‍ഷകര്‍ക്കു നല്‍കിയാണ് സംഭരണം. സംഭരിച്ച പച്ചക്കറികള്‍ ചന്തകളില്‍ 30 ശതമാനം വിലക്കുറവില്‍ നല്‍കും. ഓണച്ചന്തകളില്‍ കൃഷി വകുപ്പിന്‍റെ കേരള ആഗ്രോ ഉത്പന്നങ്ങള്‍ മാത്രം വില്‍ക്കാനുള്ള സ്റ്റാളുമുണ്ട്. പച്ചക്കറികളുടെ സംഭരണം, വിപണനം എന്നിവ സംബന്ധിച്ച് ഇന്നലെ കളക്ടറേറ്റില്‍ ഉന്നതതല യോഗം ചേര്‍ന്ന് പ്രവര്‍ത്തനങ്ങള്‍ വിലയിരുത്തി.

വ്യാജമദ്യം പിടികൂടി

മുണ്ടക്കയം: ഓണത്തോടനുബന്ധിച്ച് അനധികൃത മദ്യ വില്പന തടയുകയെന്ന ലക്ഷ്യത്തോടെ എക്സൈസ് ഡെപ്യൂട്ടി കമ്മീഷണർ കെ.കെ. അജയ്‌യുടെ നിർദേശാനുസരണം പ്രവർത്തിക്കുന്ന സ്പെഷൽ സ്ക്വാഡ് നടത്തിയ പരിശോധനയിൽ വ്യാജമദ്യം പിടികൂടി. കോരുത്തോട് ടൗണിൽ സ്വകാര്യ വ്യക്തിയുടെ കെട്ടിടത്തിന് മുകളിൽ ഒളിപ്പിച്ച നിലയിലായിരുന്നു വ്യാജ മദ്യം. 36 കുപ്പികളിലായി 6.5 ലിറ്റർ വ്യാജ മദ്യമാണ് പിടികൂടിയത്. കോരുത്തോട് മേഖലയിൽ വ്യാജമദ്യ വില്പന നടക്കുന്നതായി എക്സൈസിന് രഹസ്യവിവരം ലഭിച്ചിരുന്നു. കാഞ്ഞിരപ്പള്ളി റേഞ്ച് ഇൻസ്പെക്ടർ സുധി കെ. സത്യപാലന്‍റെ നേതൃത്വത്തിലുളള സ്ക്വാഡ് ദിവസങ്ങളോളം നടത്തിയ തെരച്ചിലിലാണ് വ്യാജമദ്യകേന്ദ്രം കണ്ടെത്തിയത്. പ്രിവന്‍റീവ് ഓഫീസർ കെ.എൻ. സുരേഷ് കുമാർ, സിവിൽ എക്സൈസ് ഓഫീസർ സനൽ മോഹൻദാസ്, കാഞ്ഞിരപ്പള്ളി റേഞ്ച് ഓഫീസിലെ പ്രിവന്‍റീവ് ഓഫീസർ ഇ.സി. അരുൺകുമാർ, സിവിൽ എക്സൈസ് ഓഫീസർമാരായ പി.എൻ. ഷൈജു. ടി.എസ്. രതീഷ്, അതുൽ മണിയപ്പൻ തുടങ്ങിയവരുടെ നേതൃത്വത്തിലുള്ള സംഘമാണ് വ്യാജമദ്യം പിടികൂടിയത്.

അടിമാലി-കുമളി ദേശീയപാത അതിർത്തിനിർണയം തുടങ്ങി

ചെറുതോണി: അടിമാലി-കുമളി ദേശീയപാതയുടെ സ്ഥലമെടുപ്പുമായി ബന്ധപ്പെട്ടുള്ള അതിർത്തിനിർണയം ആരംഭിച്ചു. 350 കോടി രൂപ ചെലവഴിച്ചുള്ള സ്ഥലമെടുപ്പ് പ്രവൃത്തികൾ 2026 മാർച്ചിൽ പൂർത്തിയാക്കുമെന്ന് ഡീൻ കുര്യാക്കോസ് എംപി പറഞ്ഞു. ദേശീയപാതയുടെ മൂന്നാംഘട്ട പ്രവർത്തനങ്ങളുടെ ഭാഗമായി വിസ്തൃതി വർധിപ്പിക്കുന്നതിനാവശ്യമായ നടപടികളാണ് ആരംഭിച്ചത്. ദേശീയപാത 185 കടന്നുപോകുന്ന അടിമാലിയിൽ തുടങ്ങി കുമളി ചെളിമട വരെയുള്ള ഭാഗത്ത് ഇരുവശങ്ങളും വിസ്തൃതി വർധിപ്പിക്കുന്നതോടൊപ്പം പുതിയ ഘടന വരുന്നതോടെ വളവുകൾ കുറച്ച് പുതിയ പാലങ്ങൾ നിർമിക്കുന്നതുൾപ്പെടെയുള്ള ജോലികളും തടിയമ്പാട് ആരംഭിച്ചു. ഡീൻ കുര്യാക്കോസ് എംപി, ബ്ലോക്ക് പഞ്ചായത്ത് അംഗം ആൻസി തോമസ്, വാഴത്തോപ്പ് പഞ്ചായത്ത് അംഗങ്ങളായ ടിന്‍റു സുഭാഷ്, ആലീസ് ജോസ്, പൊതുപ്രവർത്തകരായ എ.പി. ഉസ്മാൻ, പി.ഡി. ജോസഫ്, വിജയൻ കല്ലിങ്കൽ, ജോയി വർഗീസ്, ടെജോ കാക്കനാടൻ, ദേശീയപാതയുടെയും പൊതുമരാമത്ത് വകുപ്പിന്‍റെയും ഉദ്യോഗസ്ഥർ ഉൾപ്പെടെയുള്ളവർ സ്ഥലത്തെത്തിയിരുന്നു.

കുരുക്കഴിക്കാൻ മുന്നിൽ ഓടി ഉടമ; യാത്രക്കാരനുമായി ബസ് ആശുപത്രിയിലേക്ക്

കാഞ്ഞിരപ്പള്ളി: കുഴഞ്ഞുവീണ യാത്രികനെ ബസില്‍ത്തന്നെ ആശുപത്രിയിലെത്തിച്ചു രക്ഷകരായി ബസ് ഉടമയും ജീവനക്കാരും. ‌പൊന്‍കുന്നം-കാഞ്ഞിരപ്പള്ളി-എരുമേലി-വെച്ചൂച്ചിറ റൂട്ടിലോടുന്ന സെന്‍റ് ആന്‍റണീസ് ബസ് ഉടമ വഞ്ചിമല മാവേലിക്കുന്നേല്‍ ജോര്‍ജ് ജോസഫ്, ഡ്രൈവര്‍ എസ്എന്‍ പുരം വട്ടുകളത്തില്‍ ഗോപു ജി. ദാസ്, കണ്ടക്ടര്‍ വട്ടക്കാവ് മാവിലവീട്ടില്‍ ബിജു കേശവന്‍ എന്നിവര്‍ ചേര്‍ന്നാണ് ഇരുപത്താറാംമൈൽ മേരി ക്വീൻസ് ആശുപത്രിയിലെത്തിച്ചത്. കാഞ്ഞിരപ്പള്ളി ബസ് സ്റ്റാന്‍ഡില്‍ ഇന്നലെ വൈകുന്നേരം 5.05ന് കുളപ്പുറം സ്വദേശി അജിമോന്‍ (49) ആണ് കുഴഞ്ഞുവീണത്. ഉടന്‍ ബസില്‍ത്തന്നെ മേരി ക്വീൻസ് ആശുപത്രിയിലെത്തിച്ചു. രോഗിയുമായി ദേശീയപാതയിലേക്ക് ഇറങ്ങിയപ്പോള്‍ ബസ് ഉടമ ജോര്‍ജ് ജോസഫ് ബസിനു മുന്നില്‍ ഓടി ഗതാഗതക്കുരുക്കഴിച്ചാണ് ബസിനു വഴിയൊരുക്കിയത്. ചികിത്സയ്ക്കു ശേഷം അജിമോന്‍ പിന്നീട് ആശുപത്രിയില്‍നിന്നു വീട്ടിലേക്കു മടങ്ങി.

സഹകരണ ഓണവിപണി ആരംഭിച്ചു

പൊൻകുന്നം: സംസ്ഥാന സർക്കാരും കൺസ്യൂമർ ഫെഡും സഹകരണവകുപ്പുമായി ചേർന്ന് പൊതുവിപണിയിലെ വിലക്കയറ്റം നിയന്ത്രിക്കുന്നതിനായി പൊൻകുന്നം മാർക്കറ്റിംഗ് സഹകരണസംഘത്തിൽ ഓണം സഹകരണ വിപണി പ്രവർത്തനമാരംഭിച്ചു. ചീഫ് വിപ്പ് ഡോ. എൻ. ജയരാജ് ഉദ്ഘാടനം ചെയ്തു. സംഘം പ്രസിഡന്‍റ് ഷാജി പാമ്പൂരി അധ്യക്ഷത വഹിച്ചു. വൈസ് പ്രസിഡന്‍റ് മോളി ജോൺ, ഭരണസമിതി അംഗങ്ങളായ മാത്തുക്കുട്ടി തൊമ്മിത്താഴെ, ജോർജുകുട്ടി പൂതക്കുഴി, സി.ജി. രാജൻ, രാഹുൽ ബി. പിള്ള, ഷൈല ജോൺ, കെ.പി. സുശീലൻ, ഇമ്മാനുവൽ കോഴിപ്പൂവനാനി, സനോജ് പനയ്ക്കൻ, കാർത്തിക ശ്രീകാന്ത്, വാർഡ് മെംബർ കെ.എ. ഏബ്രഹാം, സെക്രട്ടറി ടോജി പി. തോമസ്, വ്യാപാരി വ്യവസായി യൂണിറ്റ് സെക്രട്ടറി സാബു അമല, പി.ജെ. സ്കറിയ പട്ടരുകാലായിൽ എന്നിവർ പ്രസംഗിച്ചു. അരി, പഞ്ചസാര, വെളിച്ചെണ്ണ, പയർവർഗങ്ങൾ ഉൾപ്പെടെ 11 ഇനം സാധനങ്ങൾ 1020 രൂപയ്ക്കാണ് നൽകുന്നത്. കൊക്കയാർ: കൊക്കയാർ സഹകരണബാങ്കിന്‍റെ നേതൃത്വത്തിൽ ഓണംവിപണി 29നു തുടങ്ങും. 13 സബ്സിഡി ഇനങ്ങളും നോൺ സബ്സിഡി സാധനങ്ങളുമടങ്ങുന്ന കിറ്റുകളാക്കിയാണ് വിതരണം ചെയ്യുന്നത്. റേഷൻ കാർഡ് അടിസ്ഥാനത്തിലാണ് വിതരണമെന്ന് ബാങ്ക് സെക്രട്ടറി എൻ.ഐ. ഷെമീന അറിയിച്ചു. 29നു രാവിലെ 9.30 ന് ബാങ്ക് പ്രസിഡന്‍റ് മാമച്ചൻ ലൂക്കോസ് ഓണംവിപണി ഉദ്ഘാടനം ചെയ്യും. മുണ്ടക്കയം: മുണ്ടക്കയം സഹകരണ ബാങ്കിന്‍റെയും കൺസ്യൂമർ ഫെഡിന്‍റെയും നേതൃത്വത്തിൽ നടത്തുന്ന ഓണവിപണിക്ക് തുടക്കമായി. ബാങ്ക് ഓഡിറ്റോറിയത്തിൽ നടന്ന സമ്മേളനത്തിൽ പ്രസിഡന്‍റ് റോയി കപ്പിലുമാക്കൽ ഓണവിപണിയുടെ ഉദ്ഘാടനം നിർവഹിച്ചു. വൈസ് പ്രസിഡന്‍റ് അൻസാരി മഠത്തിൽ അധ്യക്ഷത വഹിച്ചു. ഭരണസമിതി അംഗങ്ങളായ ബെന്നി ചേറ്റുകുഴി, ടി.സി. സെയ്ത് മുഹമ്മദ്‌, ഡോ. എൻ.എസ്. ഷാജി, അബ്ദു ആലസംപാട്ടിൽ, റെജി വാര്യമറ്റം, രഞ്ജിത്ത് ഹരിദാസ്, നെബിൻ കാരക്കാട്ട്, ആൻസി അഗസ്റ്റിൻ, ബിന്ദു ജോബിൻ, സാറാമ്മ സുധീർ, സി.എസ്. സിനി, ആർ. സീനിയ, സെക്രട്ടറി മിനു ബേബി, അസിസ്റ്റന്‍റ് സെക്രട്ടറി ഷിബി സി. കുര്യൻ തുടങ്ങിയവർ പ്രസംഗിച്ചു. യോഗത്തിൽ മുണ്ടക്കയം, കൂട്ടിക്കൽ പഞ്ചായത്തുകളിലെ കാർഷിക വികസന സമിതികൾനിന്ന് തെരഞ്ഞെടുക്കപ്പെട്ട മികച്ച കർഷകരെ ആദരിച്ചു. ഓണച്ചന്തയിലേക്ക് കാർഷികോത്പന്നങ്ങൾ നൽകാം കൂരാലി: എലിക്കുളം കൃഷിഭവൻ സെപ്റ്റംബർ ഒന്നുമുതൽ കൂരാലിയിൽ നടത്തുന്ന ഓണച്ചന്തയിലേക്ക് എലിക്കുളത്തെ കർഷകർക്ക് ഉത്പന്നങ്ങൾ നൽകാം. പൊതുവിപണിയിലെ മൊത്തവിലയേക്കാൾ പത്തു ശതമാനം വില അധികം നൽകിയാണ് സംഭരിക്കുന്നത്. ഉത്പന്നങ്ങൾ നൽകാൻ താത്പര്യമുള്ള കർഷകർ പേരും വിലാസവും ഫോൺനമ്പരും വിളയുടെ ഇനവും തൂക്കവും 28നു വൈകുന്നേരം അഞ്ചിന് മുന്പ് അറിയിക്കണം. ഫോൺ: 7025613229.

പുലിയുടെ ആക്രമണമെന്നു സംശയം; പശുവിനെ ചത്ത നിലയിൽ കണ്ടെത്തി

കൊക്കയാർ: മലയോര മേഖലയെ ഭീതിയിലാഴ്ത്തി കൊക്കയാർ പഞ്ചായത്തിന്‍റെ മേലോരം ഭാഗത്ത് വീണ്ടും പുലിയുടെ സാന്നിധ്യം. പ്രദേശവാസിയുടെ പശുവിനെ അജ്ഞാത ജീവി കടിച്ചുകൊന്ന നിലയിൽ കണ്ടെത്തി. പുലിയുടെ ആക്രമണമാണെന്ന സംശയമാണ് നാട്ടുകാർ പങ്കുവയ്ക്കുന്നത്. വനംവകുപ്പ് ഉദ്യോഗസ്ഥരെ വിവരം അറിയിച്ചതിനെത്തുടർന്ന് ജീവനക്കാരെത്തി പ്രദേശത്ത് കാമറ സ്ഥാപിച്ച് നിരീക്ഷണം ആരംഭിച്ചു. രണ്ടാഴ്ച മുമ്പ് പ്രദേശത്ത് വളർത്തുനായയെ അജ്ഞാത ജീവി ആക്രമിച്ചു കൊന്നിരുന്നു. ഏതാനും മാസങ്ങൾക്കു മുമ്പ് കൂട്ടിക്കൽ പഞ്ചായത്തിലെ മ്ലാക്കരയിൽ പുലിയെ ചത്ത നിലയിൽ കണ്ടിരുന്നു. വാഗമൺ മലനിരകളോട് അതിർത്തി പങ്കിടുന്ന മേലോരം ഭാഗത്ത് പുലിയുടെ സാന്നിധ്യം സ്ഥിരീകരിച്ചതോടെ പ്രദേശവാസികൾ കടുത്ത ഭീതിയിലാണ്.

എയ്ഞ്ചൽസ് വില്ലേജിൽ മാലാഖമാരുടെ കടകൾ തുറന്നു

വാഴൂർ ഈസ്റ്റ്: ചെങ്കൽ പത്തൊന്പതാംമൈൽ എയ്ഞ്ചൽസ് വില്ലേജിൽ പുതുതായി ആരംഭിച്ച മാലാഖമാരുടെ കടകളുടെ ഉദ്ഘാടനം സാമൂഹ്യനീതി-ഉന്നത വിദ്യാഭ്യാസ മന്ത്രി ഡോ. ആർ. ബിന്ദു നിർവഹിച്ചു. തുടർന്നു നടന്ന യോഗത്തിൽ കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ, ചീഫ് വിപ്പ് ഡോ. എൻ. ജയരാജ്, വികാരി ജനറാൾ റവ. ഡോ. സെബാസ്റ്റ്യൻ കൊല്ലംകുന്നേൽ, എയ്ഞ്ചൽസ് വില്ലേജ് ഡയറക്ടർ ഫാ. റോയി മാത്യു വടക്കേൽ, പ്രിൻസിപ്പൽ സിസ്റ്റർ ലിറ്റി സേവ്യർ എസ്‌സിജെജി എന്നിവർ പ്രസംഗിച്ചു. എയ്ഞ്ചൽസ് വില്ലേജിലെ മാനസിക വെല്ലുവിളി നേരിടുന്ന കുട്ടികളുടെ തൊഴിൽ സംരംഭങ്ങളുടെ ഭാഗമായാണ് എയ്ഞ്ചൽസ് ഗിഫ്റ്റ്സ്‌ - ചാരിറ്റി സ്റ്റോർ, എയ്ഞ്ചൽസ് എയ്ഡ്സ് ഷോപ്പ് (ഭിന്നശേഷി സഹായ ഉപകരണങ്ങൾ ലഭ്യമാകുന്ന കട), വിനീതിന്‍റെ തട്ടുകട തുടങ്ങിയ മൂന്നു കടകൾ ആരംഭിച്ചിരിക്കുന്നത്.

ഓണാഘോഷം

കുറുമണ്ണ്: സെന്‍റ് ജോണ്‍സ് ഹൈസ്‌കൂളില്‍ ഇന്ന് ഓണാഘോഷം നടത്തും. രാവിലെ 8.45ന് കുട്ടികളുടെ അത്തപ്പൂക്കള മത്സരം. മലയാളി മങ്ക, കേരള ശ്രീമാന്‍, ഓണപ്പാട്ട്, വടംവലി, മിഠായി പെറുക്കല്‍, തിരികത്തിച്ചോട്ടം, ബോള്‍ പാസിംഗ്, ബോംബിംഗ് ദ സിറ്റി എന്നീ മത്സരങ്ങള്‍ കുട്ടികള്‍ക്കായി നടത്തും. എല്‍പി, യുപി, എച്ച്എസ് വിഭാഗം കുട്ടികള്‍ സംയുക്തമായി മെഗാ തിരുവാതിര നടത്തും. മത്സരങ്ങള്‍ക്കു ശേഷം നടക്കുന്ന സാംസ്‌കാരിക സമ്മേളനം ജില്ലാ പഞ്ചായത്തംഗം രാജേഷ് വാളിപ്ലാക്കല്‍ ഉദ്ഘാടനം ചെയ്യും. സ്‌കൂള്‍ മാനേജര്‍ ഫാ. തോമസ് മണിയഞ്ചിറ അധ്യക്ഷത വഹിക്കും. പഞ്ചായത്ത് പ്രസിഡന്‍റ് ജിജി തമ്പി, മെംബര്‍മാരായ ബിന്ദു ജേക്കബ്, ബിന്ദു വിനു, പിടിഎ പ്രസിഡന്‍റ് സുബി ഓടയ്ക്കല്‍, പൂര്‍വ അധ്യാപകര്‍ എന്നിവര്‍ പ്രസംഗിക്കും. പഞ്ചായത്ത് വൈസ് പ്രസിഡന്‍റ് വി.ജി. സോമന്‍ സമ്മാനദാനം നിര്‍വഹിക്കും. ചെമ്മലമറ്റം: ലിറ്റിൽ ഫ്ളവർ ഹൈസ്കൂളിൽ ഓണാഘോഷം ഇന്നു വിവിധ പരിപാടികളോടെ ആഘോഷിക്കും. ഇന്നു രാവിലെ 9.30നു സ്കൂൾ മാനേജർ ഫാ. സെബാസ്റ്റ്യൻ കൊല്ലംപറമ്പിൽ ഓണാഘോഷം ഉദ്ഘാടനം ചെയ്യും തുടർന്ന് പുലികളി, തിരുവാതിരകളി, മലയാളി മാമൻ, മലയാളി മങ്ക, കറിക്കരിയൽ മത്സരം എന്നിവ നടത്തും. കൊച്ചിടപ്പാടി: എം.ജി. ശ്രീകുമാര്‍ ഫാന്‍സ് അസോസിയേഷന്‍ സംസ്ഥാന കമ്മിറ്റി, ഓംറാം ലൈബ്രറി എന്നിവയുടെ ആഭിമുഖ്യത്തില്‍ കൊച്ചിടപ്പാടി സ്‌നേഹാരാം സ്‌പെഷല്‍ സ്‌കൂളില്‍ ഓണാഘോഷവും സാംസ്‌കാരികസമ്മേളനവും കുട്ടികളുടെ കലാപരിപാടികളും 27ന് ഉച്ചയ്ക്ക് 12നു നടത്തും. ഓണസദ്യക്കുശേഷം നടക്കുന്ന സാംസ്‌കാരികസമ്മേളനം പി.സി. ജോര്‍ജ് ഉദ്ഘാടനം ചെയ്യും. ഇ.ആര്‍. ബിജു അധ്യക്ഷത വഹിക്കും. സ്‌നേഹാരാം സ്‌പെഷല്‍ സ്‌കൂള്‍ പ്രിന്‍സിപ്പല്‍ സിസ്റ്റര്‍ റോസ്മിത, സിജി ടോണി, അനില്‍ തെക്കേക്കര, ദേവസ്യാച്ചന്‍ വാണിയപ്പുര, സിജി പനച്ചിക്കല്‍, പി.ജി. ജനാര്‍ദനന്‍, മാത്യൂസ് പൂഞ്ഞാര്‍, ഷിബി തോമസ് എന്നിവര്‍ പ്രസംഗിക്കും. ഓംറാം മിഖായേല്‍ ഐവനോവിന്‍റെ പുസ്തകം "ആല്‍ക്കെമി' പ്രകാശനവും ഡോ. ജോസഫ് ഫ്രാന്‍സിസ്, റോജര്‍ സെബാസ്റ്റ്യന്‍, ജോഷി മറ്റക്കര എന്നിവരെ ആദരിക്കലും യോഗത്തിൽ നടക്കും. സാംസ്‌കാരിക സമ്മേളനത്തിനുശേഷം ജോഷി മറ്റക്കര നയിക്കുന്ന ഗാനമേളയും സ്‌നേഹാരാം കുട്ടികളുടെ വിവിധ കലാപരിപാടികളും നടക്കും.

10% ലാഭവിഹിതവുമായി മീനച്ചിൽ ഈസ്റ്റ് അർബൻ ബാങ്ക്

പൂഞ്ഞാർ: കേരളത്തിലെ മുൻനിര അർബൻ ബാങ്കുകളുടെ ശ്രേണിയിലുള്ള മീനച്ചിൽ ഈസ്റ്റ് അർബൻ സഹകരണ ബാങ്ക്, റിസർവ് ബാങ്ക് ഓഫ് ഇന്ത്യയുടെ ഫിനാൻഷലി സൗണ്ട് ആൻഡ് വെൽ മാനേജ്‌ഡ് ബാങ്ക് പദവി കരസ്ഥമാക്കിയതിനൊപ്പം ഓഹരിയുടമകൾക്ക് പത്തു ശതമാനം ലാഭവിഹിതം പ്രഖ്യാപിച്ചു. കേരളത്തിലെ സഹകരണമേഖല കടുത്ത പ്രതിസന്ധികളിലൂടെ കടന്നുപോകുന്ന ഈ കാലയളവിൽ ആർബിഐ മാനദണ്ഡമായ മൂന്നു ശതമാനം നെറ്റ് എൻപിഎ എന്നത് ഒരു ശതമാനം നെറ്റ് എൻപിഎ എന്ന നേട്ടത്തിലേക്ക് എത്താൻ സാധിച്ചു. ഓഹരിയുടമകൾക്ക് സെപ്റ്റംബർ ഒന്നുമുതൽ ലാഭവിഹിതം ശാഖകളിൽനിന്നു കൈപ്പറ്റാം. കോട്ടയം ജില്ലയിൽ ഏറ്റവുമധികം കുടുംബശ്രീവായ്‌പകൾ നൽകിവരുന്ന ബാങ്കിൽ മൊബൈൽ ബാങ്കിംഗ്, ഗൂഗിൾ പേ ഉൾപ്പെടെയുള്ള നവയുഗ സേവനങ്ങൾ നവംബറോടെ ആരംഭിക്കും.

കുറവിലങ്ങാടിന്‍റെ വചനവിരുന്നിന് നാളെ തിരി തെളിയും

കുറവിലങ്ങാട്: ലക്ഷോപലക്ഷങ്ങളിലേക്ക് വചനാഗ്നി സമ്മാനിച്ച കുറവിലങ്ങാട് ബൈബിൾ കൺവൻഷൻ ഒരു പതിറ്റാണ്ട് പിന്നിടുന്നു. പത്താമത് ബൈബിൾ കൺവൻഷനു നാളെ തിരിതെളിയും. നാളെ വൈകുന്നേരം 4.30ന് വിശുദ്ധ കുർബാനയെത്തുടർന്ന് പാലാ രൂപത മുഖ്യവികാരി ജനറാൾ മോൺ. ഡോ. ജോസഫ് തടത്തിൽ ബൈബിൾ കൺവൻഷൻ ഉദ്ഘാടനം ചെയ്യും. വിവിധ ദിവസങ്ങളിൽ പാലാ രൂപത വികാരി ജനറാൾമാരായ മോൺ. ജോസഫ് മലേപ്പറമ്പിൽ, മോൺ. ജോസഫ് കണിയോടിക്കൽ, മോൺ. സെബാസ്റ്റ്യൻ വേത്താനത്ത്, മുട്ടുചിറ പരിശുദ്ധ റൂഹാദ്ക്കുദിശ ഫൊറോന വികാരി ഫാ. ഏബ്രഹാം കൊല്ലിത്താനത്തുമലയിൽ എന്നിവർ വിശുദ്ധ കുർബാന അർപ്പിക്കും. എല്ലാ ദിവസങ്ങളിലും രാവിലെ 5.30, 6.30, 7.30, വൈകുന്നേരം 4.30 എന്നീ സമയങ്ങളിൽ വിശുദ്ധ കുർബാനയുണ്ടായിരിക്കും. വൈകുന്നേരം ഒൻപതിന് കൺവൻഷൻ സമാപിക്കും. 29 മുതൽ സെപ്റ്റംബർ ഒന്നുവരെ തീയതികളിൽ കുമ്പസാരത്തിനും കൗൺസലിംഗിനും അവസരമൊരുക്കിയിട്ടുണ്ട്. ഫാ. സേവ്യർഖാൻ വട്ടായിൽ, ഫാ. ബിനോയി കരിമരുതുങ്കൽ എന്നിവരാണ് കൺവൻഷനു നേതൃത്വം നൽകുന്നത്.

ഫാ. തോമസ് കിഴക്കേലിന് സ്വീകരണം നല്‍കി

പാലാ: സീറോമലബാര്‍ സഭ സോഷ്യല്‍ മിനിസ്ട്രിയുടെ 2025ലെ സ്പന്ദന്‍ അവാര്‍ഡ് ജേതാവ് പിഎസ്ഡബ്ല്യുഎസ് ഡയറക്ടർ ഫാ. തോമസ് കിഴക്കേലിന് ഇന്നലെ പാലാ ഷാലോം പാസ്റ്ററല്‍ സെന്‍ററില്‍ സ്വീകരണം നല്‍കി. രൂപത വികാരി ജനറാള്‍ മോണ്‍. സെബാസ്റ്റ്യന്‍ വേത്താനത്ത് ഉദ്ഘാടനം ചെയ്തു. റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍ അധ്യക്ഷത വഹിച്ച സമ്മേളനത്തില്‍ വിവിധ സംഘടനകളുടെയും സ്ഥാപനങ്ങളുടെയും ഡയറക്ടര്‍മാരും വൈദികരും സംഘടനാ ഭാരവാഹികളും പ്രസംഗിച്ചു. പാലാ സോഷ്യല്‍ വെല്‍ഫയര്‍ സൊസൈറ്റി നേതൃത്വം നല്‍കുന്ന വിവിധങ്ങളായ സുസ്ഥിര സാമൂഹ്യ നിര്‍മിതിയാണ് അവാര്‍ഡ് നിര്‍ണയത്തില്‍ മുഖ്യപരിഗണനാ വിഷയമായത്. പാലാ സാന്‍തോം ഫുഡ് ഫാക്‌ടറി, കേരള ഗ്രോസ്റ്റോര്‍, അഗ്രിമ കാര്‍ഷിക നഴ്‌സറികള്‍, അഗ്രിമ ഇക്കോ ഷോപ്പുകള്‍, ഓപ്പണ്‍ മാര്‍ക്കറ്റുകള്‍ തുടങ്ങി കാര്‍ഷികരംഗത്തെ മുന്നേറ്റ പ്രവര്‍ത്തനങ്ങള്‍, ദുരിതാശ്വാസ സഹായ പദ്ധതികള്‍, ഭവന നിര്‍മാണ സഹായങ്ങള്‍, കുടുംബോദ്ധാരണ പദ്ധതികള്‍, ജല്‍ ജീവന്‍ മിഷന്‍, ജലനിധി കുടിവെള്ള പദ്ധതികള്‍, ന്യൂനപക്ഷ ക്ഷേമ വായ്പകള്‍ തുടങ്ങി സര്‍ക്കാര്‍ പദ്ധതികളും തനതു പദ്ധതികളും ജനങ്ങളിലെത്തിക്കുന്നതിന് നേതൃത്വം നല്‍കുന്നത് പരിഗണിച്ചാണ് സീറോമലബാര്‍ സഭയുടെ സ്പന്ദന്‍ അവാര്‍ഡിന് ഫാ. തോമസ് കിഴക്കേല്‍ അര്‍ഹനായത്.

പാലാ രൂപത എപ്പാര്‍ക്കിയല്‍ യൂത്ത് അസംബ്ലി 31 മുതല്‍

പാലാ: രൂപതയുടെ എപ്പാര്‍ക്കിയല്‍ യൂത്ത് അസംബ്ലി 31, സെപ്റ്റംബര്‍ ഒന്ന്, രണ്ട് തീയതികളില്‍ പാലാ അല്‍ഫോന്‍സിയന്‍ പാസ്റ്ററല്‍ ഇന്‍സ്റ്റിറ്റ്യൂട്ടില്‍ നടത്തും. യുവജനങ്ങളുടെ ആത്മീയ, സാമൂഹിക, ബൗദ്ധിക സംഗമമായ യൂത്ത് അസംബ്ലിയില്‍ യുവജനങ്ങള്‍ നേരിടുന്ന പ്രശ്‌നങ്ങള്‍ വിശദമായി ചര്‍ച്ച ചെയ്യുകയും പരിഹാരമാര്‍ഗങ്ങള്‍ നിര്‍ദേശിക്കുകയും ചെയ്യും. 31ന് ഉച്ചകഴിഞ്ഞ് മൂന്നിന് ആരംഭിക്കുന്ന അസംബ്ലിയില്‍ ബിഷപ് മാര്‍ ജോസഫ് കല്ലറങ്ങാട്ട്, മുഖ്യ വികാരി ജനറാള്‍ മോൺ. ജോസഫ് തടത്തില്‍, വികാരി ജനറാള്‍മാരായ മോണ്‍. സെബാസ്റ്റ്യന്‍ വേത്താനത്ത്, മോൺ. ജോസഫ് കണിയോടിക്കല്‍, മോൺ‌. ജോസഫ് മലേപ്പറമ്പില്‍ എന്നിവര്‍ വിവിധ ദിവസങ്ങളില്‍ യുവജനങ്ങളുമായി സംവദിക്കും. രാഷ്‌ട്രീയനേതാക്കളായ ജിന്‍റോ ജോണ്‍, അഡ്വ. റോണി മാത്യു, അഡ്വ. ഷോണ്‍ ജോര്‍ജ് എന്നിവര്‍ മാധ്യമപ്രവര്‍ത്തകന്‍ ടോം കുര്യാക്കോസിനൊപ്പം പാനല്‍ചര്‍ച്ചയില്‍ പങ്കെടുക്കും. സഭ, സംഘടന, രാഷ്‌ട്രീയം, സംരംഭകത്വം, കുടുംബം, സാങ്കേതികവിദ്യ എന്നീ വിഷയങ്ങള്‍ വിശദമായി ചര്‍ച്ച ചെയ്യപ്പെടുന്ന അസംബ്ലിയില്‍ സഭാതലത്തിലുള്ള മറ്റു യുവജനസംഘടനാ പ്രതിനിധികളും രൂപതയിലെ വിവിധ സംഘടനാ ഡയറക്ടര്‍മാരും വിവിധ ദിവസങ്ങളിലായി പങ്കെടുക്കും. ഇരുനൂറോളം യുവജന പ്രതിനിധികള്‍ പങ്കെടുക്കുന്ന അസംബ്ലി സെപ്റ്റംബര്‍ രണ്ടിന് ഉച്ചകഴിഞ്ഞ് ഒന്നിന് സമാപിക്കും. എസ്എംവൈഎം പാലാ രൂപത ഡയറക്ടര്‍ ഫാ. മാണി കൊഴുപ്പന്‍കുറ്റി, പ്രസിഡന്‍റ് അന്‍വിന്‍ സോണി ഓടച്ചുവട്ടില്‍, ജനറല്‍ സെക്രട്ടറി റോബിന്‍ ടി. ജോസ് താന്നിമല, ട്രഷറര്‍ എഡ്വിന്‍ ജെയ്സ്, സംസ്ഥാന സിന്‍ഡിക്കറ്റംഗം മിജോ ജോയി, ഓഫീസ് സെക്രട്ടറി ഡോണ്‍ ജോസഫ് സോണി എന്നിവര്‍ നേതൃത്വം നല്‍കും.

റോഡ് ആറു മാസമായി തോട്ടിൽ; ആരും തിരിഞ്ഞുനോക്കുന്നില്ല

പയപ്പാർ: അന്ത്യാളം-പയപ്പാര്‍ റോഡിന്‍റെ ഒരു ഭാഗം ഇടിഞ്ഞ് തോട്ടിലേക്കു പതിച്ചിട്ട് ആറു മാസം കഴിഞ്ഞിട്ടും ആരും തിരിഞ്ഞുനോക്കുന്നില്ല. സംരക്ഷണഭിത്തി നിർമിക്കാൻ യാതൊരു നടപടിയും അധികൃതർ സ്വീകരിച്ചിട്ടില്ല. ബസോ മറ്റു വാഹനങ്ങളോ തോട്ടില്‍വീണ് ദുരന്തമുണ്ടാകാൻ കാത്തിരിക്കുകയാണോ അധികൃതരെന്നാണ് നാട്ടുകാരുടെ ചോദ്യം. കരൂർ പഞ്ചായത്ത് മെംബര്‍ ലിന്‍റണ്‍ ജോസഫിന്‍റെ നേതൃത്വത്തില്‍ പിഡബ്ല്യുഡിക്കു പരാതി നല്‍കിയിട്ടു മാസങ്ങള്‍ കഴിഞ്ഞു. ഒരു നടപടിയുമില്ല. റോഡ് ഇടിഞ്ഞ ഭാഗത്ത് മൂന്നു വീപ്പകള്‍ നിരത്തിയശേഷം കൈകഴുകിയിരിക്കുകയാണ് പിഡബ്ല്യുഡി അധികാരികള്‍. ഇപ്പോഴും ഇടിയുന്നു ‌ഇപ്പോഴും ഭാരവാഹനങ്ങൾ കടന്നുപോകുമ്പോള്‍ റോഡിന്‍റെ വശം വീണ്ടും ഇടിയുന്നുണ്ടെന്നാണ് നാട്ടുകാര്‍ പറയുന്നുത്. രാമപുരം റൂട്ടില്‍നിന്നു തൊടുപുഴ റൂട്ടിലേക്കുള്ള പിഡബ്ല്യുഡി റോഡാണ് അന്ത്യാളം മുതല്‍ പയപ്പാര്‍ വരെയുള്ളത്. ഈ റോഡിലെ ചൂഴിപ്പാലത്തിന്‍റെ താഴെഭാഗത്തായി മുപ്പത് മീറ്ററോളം നീളത്തിലാണ് റോഡ് ഇടിഞ്ഞു സമീപത്തെ തോട്ടില്‍ പതിച്ചത്. സ്വതേ വീതി കുറഞ്ഞ ഈ വഴിയില്‍ റോഡ് ഇടിഞ്ഞതോടെ വാഹനയാത്ര അപകടഭീഷണിയിലാണ്. ഇടിഞ്ഞ റോഡിന്‍റെ നേരേ മറുവശം വലിയ കുഴികളും രൂപപ്പെട്ടിരിക്കുകയാണ്. മണ്ണ് കുതിർന്നു കഴിഞ്ഞ മഴക്കാലത്ത് ഏഴാച്ചേരി വലിയതോട് കരകവിഞ്ഞപ്പോള്‍ റോഡ് ഇടിഞ്ഞ ഭാഗത്തും വെള്ളം കയറിയിരുന്നു. ഇതോടെ ഈ ഭാഗത്തെ മണ്ണ് കൂടുതല്‍ കുതിര്‍ന്ന അവസ്ഥയിലാണ്. മഴ മാറിയെങ്കിലും റോഡ് ഇടിഞ്ഞ ഭാഗം ഇപ്പോഴും അപകടഭീഷണിയിലാണ്. ഒരു സ്വകാര്യ ബസും സ്‌കൂള്‍ വാഹനങ്ങളും ഉള്‍പ്പെടെ നിരവധി വാഹനങ്ങള്‍ ദിവസേന കടന്നുപോകുന്ന റോഡാണിത്. ഈ ഭാഗത്തു വാഹനങ്ങള്‍ക്കു സൈഡ് കൊടുക്കാനുള്ള ഇടമില്ല. ഏതു നിമിഷവും ഇവിടെ വാഹനങ്ങള്‍ തോട്ടിലേക്കു വീഴാം.

ജീവനക്കാരുടെ ക്ഷേമം ഉറപ്പാക്കുന്നതില്‍ സഹകരണ മേഖല മുന്നിൽ: മന്ത്രി വാസവന്‍

കോട്ടയം: ജീവനക്കാരുടെ ക്ഷേമം മുന്‍നിര്‍ത്തിയുള്ള പ്രവര്‍ത്തനങ്ങളില്‍ സഹകരണ മേഖല മാതൃകയാണെന്ന് മന്ത്രി വി.എന്‍. വാസവന്‍. സംസ്ഥാന സഹകരണ ജീവനക്കാരുടെ വെല്‍ഫെയര്‍ ബോര്‍ഡ് അംഗങ്ങളുടെ മക്കള്‍ക്ക് വിദ്യാഭ്യാസ മികവിനുള്ള സ്‌കോളര്‍ഷിപ്പു വിതരണവും കുടിശിക ഒഴിവാക്കിയുള്ള അംഗത്വ കാമ്പയിന്‍റെ സംസ്ഥാനതല ഉദ്ഘാടനവും നിര്‍വഹിച്ചു പ്രസംഗിക്കുകയായിരുന്നു അദ്ദേഹം. കോട്ടയം സാഹിത്യപ്രവര്‍ത്തക സഹകരണസംഘം ഹാളില്‍ നടന്ന ചടങ്ങില്‍ കോ-ഓപ്പറേറ്റീവ് എംപ്ലോയീസ് വെല്‍ഫെയര്‍ ബോര്‍ഡ് വൈസ് ചെയര്‍മാന്‍ ആര്‍. സനല്‍കുമാര്‍ അധ്യക്ഷത വഹിച്ചു. കോ-ഓപ്പറേറ്റീവ് എംപ്ലോയീസ് വെല്‍ഫെയര്‍ ബോര്‍ഡില്‍ അംഗങ്ങളായ സഹകരണസംഘം ജീവനക്കാരുടെയും സഹകരണ വകുപ്പിന്‍റെ നിയന്ത്രണത്തിലുള്ള ബോര്‍ഡുകളിലെ ജീവനക്കാരുടെയും മക്കളില്‍ കോട്ടയം, ഇടുക്കി ജില്ലകളില്‍ ഉന്നതവിജയം നേടിയവര്‍ക്കാണ് കാഷ് അവാര്‍ഡും സ്‌കോളര്‍ഷിപ്പും നല്‍കിയത്. പുതുതായി അംഗത്വമെടുക്കുന്നവര്‍ക്ക് കുടിശിക വിഹിതം ഒഴിവാക്കി അംഗത്വമനുവദിക്കാന്‍ ബോര്‍ഡ് ചട്ടത്തില്‍ ഇളവനുവദിച്ച് സര്‍ക്കാര്‍ ഉത്തരവായിരുന്നു. മറവന്‍തുരുത്ത് ക്ഷീരോത്പാദക സഹകരണ സംഘത്തിലെ എം. അമ്പിളിക്ക് അംഗത്വം നല്‍കിക്കൊണ്ട് മന്ത്രി വി.എന്‍. വാസവന്‍ ഈ പദ്ധതിയുടെ സംസ്ഥാനതല ഉദ്ഘാടനം നിര്‍വഹിച്ചു. സേവനത്തിലിരിക്കെ മരണമടഞ്ഞ ജീവനക്കാരുടെ മക്കളുടെ തുടര്‍പഠനത്തിനുള്ള സ്‌കോളര്‍ഷിപ്പ് വിതരണത്തിന്‍റെയും സംസ്ഥാനതല ഉദ്ഘാടനം മന്ത്രി നിര്‍വഹിച്ചു. സംസ്ഥാന സഹകരണ യൂണിയന്‍ മാനേജിംഗ് കമ്മിറ്റിയംഗം കെ.എം. രാധാകൃഷ്ണന്‍, എംജി യൂണിവേഴ്സിറ്റി സിന്‍ഡിക്കറ്റംഗം റെജി സക്കറിയ, സഹകരണവകുപ്പ് അഡീഷണല്‍ രജിസ്ട്രാര്‍ ഇ. നിസാമുദീന്‍ എന്നിവര്‍ പ്രസംഗിച്ചു.

വഴിയോരത്തെ കല്ല് മാറ്റാത്തതില്‍ പ്രതിഷേധം ശക്തം

അകലക്കുന്നം: അകലക്കുന്നം പഞ്ചായത്തിലെ മൈങ്കണ്ടം-കാഞ്ഞിരമറ്റം റോഡില്‍ വഴിയോരത്ത് പിഡബ്ള്യുഡി അധികൃതര്‍ രണ്ടുവര്‍ഷം മുമ്പ് ഇറക്കിയിട്ട കരിങ്കല്ല് മാറ്റാത്തതില്‍ പ്രതിഷേധവുമായി നാട്ടുകാര്‍. സമീപ പഞ്ചായത്തായ പള്ളിക്കത്തോട്ടിലെ തോടുവക്ക് പൊളിച്ചപ്പോള്‍ ലഭിച്ച കരിങ്കല്ലാണ് വഴിയോരത്ത് അര കിലോമിറ്ററോളം ദൂരത്തില്‍ നിരത്തിയിട്ടിരിക്കുന്നത്. കല്ല് മാറ്റാത്തതിനാല്‍ വഴിയോരം കാടുകയറി മൂടി വഴിയാത്രക്കാര്‍ക്കും വാഹന യാത്രക്കാര്‍ക്കും ദുരിതമായി മാറിയിരിക്കുകയാണ്. തിരുവഞ്ചൂര്‍-ഒട്ടയ്ക്കല്‍ റോഡിന്‍റെ ഭാഗമായ ഈ റോഡിലൂടെ ആംബുലന്‍സും സ്‌കൂള്‍ വാഹനങ്ങളും ഉള്‍പ്പെടെ നിരവധി വാഹനങ്ങളാണ് ദിവസേന കടന്നുപോകുന്നത്. കിഴക്കന്‍ മേഖലയായ കാഞ്ഞിപ്പള്ളി, കട്ടപ്പന ഭാഗങ്ങളില്‍നിന്നും ചേര്‍പ്പുങ്കല്‍ മെഡിസിറ്റിയിലേക്കും കോട്ടയം മെഡിക്കല്‍ കോളജിലേക്കും പെട്ടെന്ന് എത്തിച്ചേരുവാനുള്ള വഴിയായതിനാല്‍ കരിങ്കല്ല് മൂലം റോഡിന്‍റെ വീതി കുറഞ്ഞത് അപകടം വരുത്തിവയ്ക്കുമെന്നാണ് നാട്ടുകാര്‍ പറയുന്നത്. കെ.ആര്‍. നാരായണന്‍ ഫിലിം ഇന്‍സ്റ്റിറ്റ്യൂട്ടിലേക്കുള്ള പ്രധാന പാതയും ഇതാണ്. ഈ ഭാഗം കാട് കയറി കിടക്കുന്നതിനാല്‍ മാലിന്യം വലിച്ചെറിയുന്നത് പതിവാണെന്നു നാട്ടുകാരും പറയുന്നു. കരിങ്കല്ല് മാറ്റണമെന്ന് അകലക്കുന്നം പഞ്ചായത്ത് കമ്മിറ്റി യോഗം ചേര്‍ന്ന് തീരുമാനമെടുത്ത് പിഡബ്ല്യുഡി അധികൃതര്‍ക്ക് പല തവണ പരാതി നല്കിയെങ്കിലും യാതൊരു നടപടിയും എടുത്തിട്ടില്ല. ജില്ലാ വികസനസമിതി യോഗത്തിലും പഞ്ചായത്ത് അധികൃതര്‍ നിവേദനം നല്കിയിരുന്നു. കരിങ്കല്ല് മാറ്റി നാട്ടുകാര്‍ക്ക് സുഗമമായി നടക്കാന്‍ കഴിയുന്ന രീതിയില്‍ റോഡ് ഗതാഗത യോഗ്യമാക്കിയില്ലെങ്കില്‍ പിഡബ്ള്യുഡി ഓഫീസിലേക്ക് മാര്‍ച്ചും ധര്‍ണയും ഉള്‍പ്പെടെയുള്ള സമര പരിപാടികളുമായി മുന്നോട്ടു പോകുമെന്ന് നാട്ടുകാര്‍ മുന്നറിയിപ്പു നല്കി.

വൈജ്ഞാനിക സമൂഹസൃഷ്ടിയില്‍ എംജി യൂണിവേഴ്‌സിറ്റി മാതൃക: മന്ത്രി ബിന്ദു

കോട്ടയം: പുതിയ വൈജ്ഞാനിക സമൂഹം ലക്ഷ്യമിട്ടുള്ള പ്രവര്‍ത്തനങ്ങളില്‍ മാതൃകയാകാന്‍ എംജി യൂണിവേഴ്‌സിറ്റിക്ക് കഴിഞ്ഞെന്ന് മന്ത്രി ഡോ.ആര്‍. ബിന്ദു. കാമ്പസില്‍ പുതുതായി നിര്‍മിച്ച ഹോസ്റ്റലുകളുടെ ഉദ്ഘാടനവും ഇന്‍റര്‍നാഷണല്‍ സ്റ്റുഡന്‍റ്സ് ഹോസ്റ്റലിന്‍റെ നിര്‍മാണോദ്ഘാടനവും നിര്‍വഹിച്ചു പ്രസംഗിക്കുകയായിരുന്നു മന്ത്രി. മന്ത്രി വി.എന്‍. വാസവന്‍ അധ്യക്ഷത വഹിച്ചു. കെ. ഫ്രാന്‍സിസ് ജോര്‍ജ് എംപി മുഖ്യപ്രഭാഷണം നടത്തി. ഹോസ്റ്റലുകളുടെ നിര്‍മാണജോലി നിര്‍വഹിച്ച കോണ്‍ട്രാക്‌ടറെ ജോബ് മൈക്കിള്‍ എംഎല്‍എ ആദരിച്ചു. വൈസ് ചാന്‍സലര്‍ ഡോ. സി.ടി. അരവിന്ദകുമാര്‍, സിന്‍ഡിക്കറ്റ് അംഗം റെജി സഖറിയ, രജിസ്ട്രാര്‍ ഡോ. ബിസ്മി ഗോപാലകൃഷ്ണന്‍, ഡിപ്പാര്‍ട്ട്‌മെന്‍റ് സ്റ്റുഡന്‍റ്സ് യൂണിയന്‍ ചെയര്‍പേഴ്‌സണ്‍ വി.ടി. വിനയ, ട്രാന്‍സ്ജെന്‍ഡര്‍ വിദ്യാര്‍ഥികളുടെ പ്രതിനിധി എം. അനുരാജ് എന്നിവര്‍ പ്രസംഗിച്ചു. ഏറ്റുമാനൂര്‍ ബ്ലോക്ക് പഞ്ചായത്തംഗം ജയിംസ് കുര്യന്‍, സര്‍വകലാശാലാ സിന്‍ഡിക്കറ്റ് അംഗങ്ങള്‍, സെനറ്റ് അംഗങ്ങള്‍, സംഘടനാ പ്രതിനിധികള്‍ വകുപ്പ് മേധാവികള്‍, അധ്യാപകര്‍, വിദ്യാര്‍ഥികള്‍ തുടങ്ങിയവര്‍ പങ്കെടുത്തു.

ബെഞ്ചമിന്‍ ബെയ്‌ലി പ്രതിമ അനാച്ഛാദനവും സില്‍വര്‍ ജൂബിലി സമാപന സമ്മേളനവും

കോട്ടയം: സിഎംഎസ് കോളജ് ഹയര്‍ സെക്കന്‍ഡറി സ്‌കൂൾ സില്‍വര്‍ ജൂബിലി ആഘോഷങ്ങൾക്ക് സമാപനമായി. ഇതോടനുബന്ധിച്ച് സ്‌കൂള്‍ അങ്കണത്തില്‍ സ്‌കൂളിന്‍റെ സ്ഥാപകന്‍ റവ. ബെഞ്ചമിന്‍ ബെയ്‌ലിയുടെ അര്‍ധകായ പ്രതിമ സിഎസ്‌ഐ മധ്യകേരള മഹായിടവക ബിഷപ് ഡോ. മലയില്‍ സാബു കോശി ചെറിയാന്‍ പ്രതിഷ്ഠിച്ചു. കെ. ഫ്രാന്‍സിസ് ജോര്‍ജ് എംപി അനാച്ഛാദനം നിര്‍വഹിച്ചു. തുടര്‍ന്നു നടന്ന പൊതുസമ്മേളനം ബിഷപ് ഡോ. മലയില്‍ സാബു കോശി ചെറിയാന്‍ ഉദ്ഘാടനം ചെയ്തു. തിരുവഞ്ചൂര്‍ രാധാകൃഷ്ണന്‍ എംഎല്‍എ റവ. ബെഞ്ചമിന്‍ ബെ‌യ്‌ലി ഇഗ്‌നൈറ്റ് സ്‌കോളര്‍ഷിപ്പ് ഉദ്ഘാടനവും വിതരണവും നടത്തി. സ്‌കൂളിന്‍റെ ചരിത്രം രേഖപ്പെടുത്തിയ ബുക്ക്‌ലെറ്റ് കോര്‍പറേറ്റ് മാനേജര്‍ ഫാ. സുമോദ് സി. ചെറിയാന്‍ പ്രകാശനം ചെയ്തു. ലോക്കല്‍ മാനേജര്‍ ഫാ. നെല്‍സണ്‍ ചാക്കോ അധ്യക്ഷത വഹിച്ചു. മധ്യകേരള മഹായിടവക ഔദ്യോഗിക ഭാരവാഹികളായ വൈദിക സെക്രട്ടറി ഫാ. അനിയന്‍ കെ. പോള്‍, ട്രഷറര്‍ റവ. ജിജി ജോണ്‍ ജേക്കബ്, പിടിഎ പ്രസിഡന്‍റ് ഏബ്രഹാം പി. ജോര്‍ജ്, മുന്‍ പ്രിന്‍സിപ്പല്‍ ഡോ. സാലി ജേക്കബ്, കവിത ഐസക്, എലിസബത്ത് ജിസ് നൈനാന്‍ തുടങ്ങിയവര്‍ പ്രസംഗിച്ചു. സമ്മേളനത്തില്‍ പൂര്‍വ വിദ്യാര്‍ഥികളായ ഡോ. ഷാവാസ് ഷെറീഫ്, എം. ദീപു, ക്രിസ് കുര്യന്‍ ജേക്കബ് എന്നിവരെ ആദരിച്ചു.

മെഡി. കോളജ് ആശുപത്രി വളപ്പിൽ നിയന്ത്രണംവിട്ട കാർ ഇരുമ്പുതൂണിൽ ഇടിച്ചു

ഗാന്ധിനഗർ: മെഡിക്കൽ കോളജ് ആശുപത്രിയിലെ വനിതാ ഡോക്ടറുടെ കാർ നിയന്ത്രണം വിട്ട് ഇരുമ്പ് തൂണുകൾ തകർത്തു. ആശുപത്രിയിലെ പാർക്കിംഗ് ഏരിയയിൽ പാർക്ക് ചെയ്തിരുന്ന കാർ വനിതാ ഡോക്ടർ പുറത്തേക്കിറക്കുമ്പോൾ ആശുപത്രി വളപ്പിലേക്കു വന്ന മറ്റൊരു വാഹനത്തിൽ ഇടിക്കാതിരിക്കാൻ ബ്രേക്കിട്ടപ്പോൾ കാറിന്‍റെ നിയന്ത്രണം വിടുകയായിരുന്നു. എതിർവശതത്തുണ്ടാ യിരുന്ന വൈദ്യുതി പോസ്റ്റിനോടു ചേർന്ന ഇരുമ്പുതൂണുകളിൽ ഇടിച്ചാണ് കാർ നിന്നത്. വൈദ്യുതി പോസ്റ്റിൽ ഇടിക്കാതിരുന്നതിനാൽ വലിയ അപകടം ഒഴിവായി. കാർഡിയോളജി വിഭാഗത്തിനു സമീപമാണ് സംഭവം. അപകടത്തിൽ വൈദ്യുതി പോസ്റ്റിനും കാറിനും ഇടയിൽ അകപ്പെട്ട് ബൈക്ക് കുടുങ്ങിയിരുന്നു.

തെരുവുനായക്കൂട്ടം കുറുകെച്ചാടി; ബൈക്ക് യാത്രികനു പരിക്ക്

മണർകാട്: തെരുവുനായക്കുട്ടം കുറുകെച്ചാടിയതിനെത്തുടർന്ന് ബൈക്ക് മറിഞ്ഞ് ഓൺലൈൻ ഭക്ഷണ വിതരണക്കാരനു പരിക്ക്. ചുങ്കം മള്ളൂശേരി സ്വദേശി പടിഞ്ഞാറേക്കാട്ടിൽ ലൂക്കോസ് തോമസിനാണ് (55) പരിക്കേറ്റത്. ഞായറാഴ്ച രാത്രി 8.15ന് ഐരാറ്റുനടയിലെ മൈക്രോ ലാബിനു മുൻപിലായിരുന്നു അപകടം. ആർഐടി കോളജിലെ ഹോസ്‌റ്റ‌ൽ വിദ്യാർഥികൾക്കു ഭക്ഷണം എത്തിക്കുന്നതിനായി പാമ്പാടിയിലേക്കു പോകുകയായിരുന്നു. മൈക്രോലാബിനു മുൻവശത്ത് എത്തിയപ്പോൾ തെരുവുനായ്ക്കൾ പെട്ടന്നു ദേശീയപാതക്കു കുറുകെ കടക്കുകയായിരുന്നുവെന്നു ലൂക്കോസ് പറഞ്ഞു. നായയുടെ ദേഹത്ത് തട്ടി ബൈക്കിന്‍റെ നിയന്ത്രണം നഷ്‌ടപ്പെട്ടു മറിഞ്ഞു. സാരമായി പരിക്കേറ്റ ലൂക്കോസിനെ ആംബുലൻസിലാണ് ഏറ്റുമാനൂരിലെ സ്വകാര്യ ആശുപത്രിയിൽ എത്തിച്ചത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]