ഐസാറ്റിൽ ആന്‍റി റാഗിംഗ് വാരാഘോഷം

കളമശേരി: ആൽബർട്ടിയൻ ഇൻസ്റ്റിറ്റൂട്ട് ഓഫ് സയൻസ് ആൻഡ് ടെക്നോളജിയിൽ (ഐസാറ്റ്) ആന്റി റാഗിംഗ് വാരാഘോഷങ്ങൾക്ക് തുടക്കമായി.

സെമിനാർ ഹാളിൽ ഇന്നലെ രാവിലെ 10.30ന് മൈൻഡ് എന്നവർ ചാരിറ്റബിൾ ട്രസ്റ്റ് സ്ഥാപക മായ മേനോൻ ഉദ്ഘാടനം ചെയ്തു. കോളജിലെ കംപ്യൂട്ടർ സയൻസ് ആൻഡ് എൻജിനീയറിംഗ് വകുപ്പ്, ആന്‍റി റാഗിംഗ് കമ്മിറ്റി എന്നിവ നേതൃത്വത്തിലാണ് പരിപാടി സംഘടിപ്പിച്ചത്. പ്രിൻസിപ്പൽ ഡോ. വി. വീണ അധ്യക്ഷത വഹിച്ചു.

സൈബർ ബുള്ളിയിംഗ് എന്ന വിഷയത്തിൽ അവർ മുഖ്യപ്രഭാഷണം നടത്തി. ആവർത്തിച്ച് നടക്കുന്ന ഇത്തരം ബോധവത്കരണ പരിപാടികൾ വിദ്യാർഥികളിൽ ഉത്തരവാദിത്വബോധവും പരസ്പര ബഹുമാനവും വളർത്താൻ സഹായിക്കുമെന്ന് സംഘാടകർ അഭിപ്രായപ്പെട്ടു.

ADVERTISEMENT

പ്രവാസി മലയാളി കത്തോലിക്ക സംഗമം നടത്തി

കൊച്ചി: പ്രവാസി മലയാളി കത്തോലിക്ക സംഗമം ഗര്‍ഷോം 2025 കലൂര്‍ റിന്യൂവല്‍ സെന്‍ററില്‍ നടത്തി. അംഗങ്ങളുടെ മക്കള്‍ക്ക് സ്‌കോളര്‍ഷിപ്പ്, തണല്‍ കുടുംബസഹായ പദ്ധതി എന്നിവ സംഗമത്തില്‍ ഉദ്ഘാടനം ചെയ്തു. ബിഷപ് മാര്‍ തോമസ് തുരുത്തിമറ്റം ഉദ്ഘാടനം നിര്‍വഹിച്ചു. സ്പിരിച്വല്‍ ഡയറക്ടര്‍ ഫാ.ജോയ് മേനാച്ചേരി, ബിന്ദു ജോണ്‍സണ്‍, അല്‍ഫോണ്‍സ സേവ്യര്‍, മാത്യു പുത്തന്‍പുരയ്ക്കല്‍, ഡേവിസ് മാത്യു, ഫ്രാന്‍സിസ് കൈതാരത്ത്, പീറ്റര്‍ പൈലി, ചാണ്ടി ജേക്കബ്, ജോര്‍ജ് മങ്ങാട്ട് എന്നിവര്‍ പ്രസംഗിച്ചു.

മനസോടിത്തിരി മണ്ണ് പദ്ധതി : 30 ലൈഫ് ഗുണഭോക്താക്കള്‍ക്ക് ഭൂമി സ്വന്തമാകുന്നു

മൂവാറ്റുപുഴ: സംസ്ഥാന സര്‍ക്കാരിന്‍റെ ‘മനസോടിത്തിരി മണ്ണ്’പദ്ധതിയിലൂടെ 30 ലൈഫ് ഗുണഭോക്താക്കള്‍ക്ക് സ്വന്തം ഭൂമി എന്ന സ്വപ്നം യാഥാര്‍ഥ്യമാകുന്നു. ഫെഡറല്‍ ബാങ്ക് ആയവന പഞ്ചായത്തിനു കൈമാറിയ ഒന്നര ഏക്കര്‍ സ്ഥലത്തിന്‍റെ ആധാരം വിതരണം ചെയ്യുകയും, വീട് നിര്‍മാണത്തിനുള്ള ആദ്യ ഗഡു കൈമാറുകയും ചെയ്യുന്ന ചടങ്ങ് 18ന് നടക്കും. വീടില്ലാത്ത മുഴുവന്‍ ആളുകള്‍ക്കും വീട് എന്ന സര്‍ക്കാർ നയത്തിന്‍റെ ഭാഗമായാണ് പദ്ധതി. കാവക്കാട് മണപ്പുഴ ഭാഗത്താണ് ഫെഡറല്‍ ബാങ്കിന്‍റെ സഹായത്തോടെ ഒന്നര ഏക്കര്‍ സ്ഥലം ലഭ്യമായത്. സ്ഥലം ഇല്ലാത്തവര്‍ക്കായി ഭൂമി കണ്ടെത്തി നല്‍കുന്ന ഈ ഉദ്യമം സ്വന്തമായി ഒരു തുണ്ട് ഭൂമി പോലും ഇല്ലാത്ത 30 കുടുംബങ്ങള്‍ക്ക് വലിയ ആശ്വാസമാണ് നല്‍കുന്നത്. കൂടാതെ ഇവര്‍ക്ക് വീട് നിര്‍മാണത്തിനുള്ള ആദ്യഗഡു സഹായധനവും ഇതോടൊപ്പം കൈമാറും. ആയവന പഞ്ചായത്ത് പ്രിയദര്‍ശിനി ഹാളില്‍ വൈകുന്നേരം മൂന്നിന് നടക്കുന്ന ചടങ്ങ് മന്ത്രി പി. രാജീവ് ഉദ്ഘാടനം ചെയ്യും. മാത്യു കുഴല്‍നാടന്‍ എംഎല്‍എ അധ്യക്ഷത വഹിക്കും. പഞ്ചായത്ത് വൈസ് പ്രസിഡന്‍റ് രാജന്‍ കടയക്കോട്ട്, പ്രസിഡന്‍റ് സറുമി അജീഷ് എന്നിവര്‍ പ്രസംഗിക്കും.

സ്റ്റീൽ പാത്രത്തിൽ തല കുടുങ്ങിയ പൂച്ചയെ അഗ്നിരക്ഷാസേന രക്ഷപ്പെടുത്തി

കോതമംഗലം: സ്റ്റീൽ പാത്രത്തിൽ തല കുടുങ്ങിയ പൂച്ചയെ അഗ്നിരക്ഷാസേന രക്ഷപ്പെടുത്തി. നെല്ലിക്കുഴി പഞ്ചായത്ത് ഓലിപ്പാറ ഇരമല്ലൂർ എരമതുരുത്തേൽ യാസിന്‍റെ വീട്ടിലെ പൂച്ചയുടെ തലയാണ് സ്റ്റീൽ വാട്ടർ ബോട്ടിലിൽ കുടുങ്ങിയത്. സേനയെ വിളിച്ച് അറിയിച്ചതനുസരിച്ച് സേന സംഭവത്തെത്തി കട്ടർ ഉപയോഗിച്ച് വാട്ടർ ബോട്ടിൽ കട്ട് ചെയ്ത് പൂച്ചയെ രക്ഷപ്പെടുത്തുകയായിരുന്നു. സീനിയർ ഓഫീസർ സിദ്ദിഖ് ഇസ്മായിൽ, ഫയർ ആൻഡ് റെസ്ക്യൂ ഓഫീസർമാരായ കെ.പി. ഷമിർ, പി.എം. നിസാമുദ്ദീൻ,വി.എച്ച്. അജ്നാസ്,എസ്. ഷഹീൻ എന്നിവരുടെ നേതൃത്വത്തിൽ ആയിരുന്നു രക്ഷാപ്രവർത്തനം.

തെരുവുനായ ആക്രമണം: മൂന്നു പേർക്ക് പരിക്കേറ്റു

കല്ലൂർക്കാട്: തെരുവുനായ ആക്രമണത്തിൽ കലൂരിൽ മൂന്നു പേർക്ക് പരിക്കേറ്റു. പി.എം. ഉല്ലാസ് പുതിയ പറമ്പിൽ, വിൽസൺ ജോൺ കാനത്തിൽ, ബേബി കൂനംപ്ലായ്ക്കൽ എന്നിവർക്കാണ് കടിയേറ്റത്. ഇവർ തൊടുപുഴ ജില്ലാ ആശുപത്രിയിൽ ചികിത്സ തേടി. ഇന്നലെ രാവിലെ ഒമ്പതോടെയായിരുന്നു സംഭവം. പയ്യാവ് ഭാഗത്തുനിന്ന് ഓടിയെത്തിയ നായ കലൂർ ഐപ്പ് മെമ്മോറിയൽ സ്കൂളിനു സമീപമുള്ള ഹാർഡ്‌വെയർ കടയിലുണ്ടായിരുന്ന ഉല്ലാസിനെ ആക്രമിച്ചു. ഒപ്പമുണ്ടായിരുന്നവർ സ്ഥാപനത്തിലെ ഉപകരണങ്ങളെടുത്ത് നായയെ ഓടിക്കുകയായിരുന്നു. പുരയിടത്തിലെ ജാതിത്തോട്ടത്തിൽ ജോലി ചെയ്യുന്നതിനിടെയാണ് ബേബിയെ തെരുവുനായ കടിച്ചത്. കലൂർ ബസ് സ്റ്റാൻഡിനു സമീപത്തുവച്ച് ഓട്ടോ ഡ്രൈവറായ വിൽസനേയും നായ ആക്രമിച്ചു. കലൂരിൽ നിന്ന് ഓടിയ നായ കുമാരമംഗലം പഞ്ചായത്തിലെ ഒരു വീട്ടിൽ കയറി മൂന്നു നായക്കുട്ടികളെയും പശുവിനേയും ആക്രമിച്ചു. പ്രദേശവാസികൾ ചേർന്ന് നടത്തിയ തെരച്ചിലിൽ കലൂരിൽ നിന്ന് തന്നെ നായയെ പിടികൂടി.

പട്ടിക വർഗ ഉന്നതികളിൽ സിവിൽ ഡിഫൻസ് സുരക്ഷാ പരിശീലന പദ്ധതിയുമായി ഫയർ ആൻഡ് റെസ്ക്യൂ

കോതമംഗലം: പട്ടിക വർഗ ഉന്നതികളിൽ അടിയന്തര രക്ഷാപ്രവർത്തന പദ്ധതിയുമായി കോതമംഗലം അഗ്നിരക്ഷാ നിലയം. കുട്ടമ്പുഴ പഞ്ചായത്തിലെ വാരിയം, കുഞ്ചിപ്പാറ, തലവച്ചുപാറ, തേരാ പട്ടിക വർഗ ഉന്നതികളെയും കല്ലേലി മേടിനെയും ഉൾപ്പെടുത്തിയാണ് വിവിധ ഘട്ടങ്ങളായുള്ള പരിശീലനപദ്ധതി തയാറാക്കിയിട്ടുള്ളത്. വനമേഖലകളായും പുഴകളാലും ചുറ്റപ്പെട്ട, ഒറ്റപ്പെട്ട പ്രദേശങ്ങളിൽ ഏതെങ്കിലും തരത്തിലുള്ള അടിയന്തര സാഹചര്യമുണ്ടായാൽ രക്ഷാപ്രവർത്തകർക്ക് ഇവിടെ എത്തിച്ചേരാൻ വളരെ കാലതാമസം നേരിടും. പൂയംകുട്ടി പുഴയിൽ വെള്ളം ഉയർന്നാൽ കരമാർഗത്തിലൂടെ ഇവിടെ എത്തിച്ചേരുക വളരെ ദുഷ്കരവും ആണ്. പ്രദേശങ്ങളിലെ സുരക്ഷാപ്രവർത്തനങ്ങൾ വിലയിരുത്തുന്നതിന് ഇവിടം സന്ദർശിച്ച എറണാകുളം ജില്ലാ ഫയർ ഓഫീസർ കെ.ഹരികുമാറിന്‍റെ നിർദേശപ്രകാരമാണ് പ്രത്യേക പരിശീലന പദ്ധതിയുമായി കോതമംഗലം അഗ്നിരക്ഷാനിലയം രംഗത്ത് എത്തിയത്. കോതമംഗലം സ്റ്റേഷൻ ഓഫീസർ ഇൻ ചാർജ് സതീഷ് ജോസിന്‍റെ നേതൃത്വത്തിൽ പ്രഗൽഭരായ പരിശീലകർ ക്ലാസുകൾ നയിക്കും. നാളെ രാവിലെ 10ന് കുഞ്ചിപ്പാറ പഞ്ചായത്ത് കമ്യൂണിറ്റി ഹാളിൽ പരിശീലന പരിപാടി ആരംഭിക്കും.കുട്ടമ്പുഴ പഞ്ചായത്ത് പ്രസിഡന്‍റ് കാന്തി വെള്ളക്കയ്യൻ അധ്യക്ഷത വഹിക്കും. ആൻറണി ജോൺ എംഎൽഎ ഉദ്ഘാടനം ചെയ്യും. കെ.ഹരികുമാർ മുഖ്യപ്രഭാഷണം നടത്തും.

യൂണിറ്റി മാപ്പ് നിര്‍മിച്ച് നിര്‍മല കോളജ്

മൂവാറ്റുപുഴ : സ്വാതന്ത്ര്യ ദിനത്തോടനുബന്ധിച്ച് മൂവാറ്റുപുഴ നിര്‍മല കോളജ് വര്‍ണശാല ക്ലബിന്‍റെ ആഭിമുഖ്യത്തില്‍ യൂണിറ്റി മാപ്പ് നിര്‍മിച്ചു. കോളജിലെ 3000 വിദ്യാര്‍ഥികളുടെയും 200 അധ്യാപരുടെയും കൈപ്പത്തികള്‍ പതിപ്പിച്ച ഇന്ത്യയുടെ ഭൂപടമാണ് വിദ്യാര്‍ഥികള്‍ ചേര്‍ന്ന് ഒരുക്കിയത്. പൂര്‍ണമായും പ്ലാസ്റ്റിക് ഒഴിവാക്കി തുണിയില്‍ വിദ്യാര്‍ഥികള്‍ വരച്ചാണ് മാപ്പ് നിര്‍മിച്ചത്. 30 അടി നീളത്തില്‍ 15 അടി വീതിയില്‍ പ്രാഥമിക വര്‍ണങ്ങളായ ചുവപ്പ്, പച്ച, നീലയും അവയുടെ ദ്വിതീയ വര്‍ണങ്ങളും ഉപയോഗിച്ചാണ് മാപ്പ് പൂര്‍ത്തീകരിച്ചത്. നാനാത്വത്തില്‍ ഏകത്വം എന്ന ആശയം മുന്‍നിര്‍ത്തി ഒരുമയുടെ സന്ദേശം മറ്റുള്ളവരിലേക്ക് എത്തിക്കുക എന്ന ലക്ഷ്യത്തോടെയായിരുന്നു കലാസൃഷ്ടിയുടെ രൂപകല്‍പ്പന. കോളജ് പ്രിന്‍സിപ്പല്‍ റവ. ഡോ. ജസ്റ്റിന്‍ കെ. കുര്യാക്കോസ്, ബര്‍സാര്‍ ഫാ. പോള്‍ കളത്തൂര്‍, കോളജ് ഓട്ടോണോമസ് ഡയറക്ടര്‍ ഡോ. കെ.വി. തോമസ്, വൈസ് പ്രിന്‍സിപ്പല്‍മാരായ ഡോ. സോണി കുര്യാക്കോസ്, ഡോ. ജിജി കെ. ജോസഫ്, സ്റ്റുഡന്‍റ് വെല്‍ഫയര്‍ ഡീന്‍ ഡോ. കെ.വി വിനോദ്, ക്ലബ് കോ-ഓര്‍ഡിനേറ്റര്‍ അനിത ജെ. മറ്റം, വര്‍ണശാല കോ-ഓര്‍ഡിനേറ്റര്‍മാരായ എ. പൂര്‍ണ പുഷ്‌കല, വിഥുല തോമസ്, വിദ്യാര്‍ഥികളായ മുഹമ്മദ് റാസില്‍, സസ്ന സാജു, എല്‍സീറ്റ ആന്‍റണി, മീര പി. നമ്പൂതിരി എന്നിവര്‍ നേതൃത്വം നല്‍കി.

ആരോഗ്യലക്ഷ്മി പദ്ധതിക്ക് ആരക്കുഴയിൽ തുടക്കമായി

മൂവാറ്റുപുഴ : ജില്ലാ പഞ്ചായത്തിന്‍റെ വാര്‍ഷിക പദ്ധതിയുടെ ഭാഗമായി ഭാരതീയ ചികിത്സാ വകുപ്പിന്‍റെ സഹായത്തോടെ നടപ്പാക്കുന്ന സ്ത്രീകളുടെ സമഗ്ര ആരോഗ്യത്തിനായുള്ള ആരോഗ്യ ലക്ഷ്മി പദ്ധതിക്ക് ആരക്കുഴ ഗവ. ആയുര്‍വേദ ഡിസ്പെന്‍സറിയില്‍ തുടക്കമായി. പദ്ധതിയുടെ ഉദ്ഘാടനം ജില്ലാ പഞ്ചായത്തംഗം ഉല്ലാസ് തോമസ് നിര്‍വഹിച്ചു. 1.6 കോടിയുടെ ആയുര്‍വേദ മരുന്നുകളാണ് ഈ പദ്ധതിയിലൂടെ ജില്ലയില്‍ വിതരണം ചെയ്യുന്നത്. സ്ത്രീകള്‍ക്കുണ്ടാകുന്ന ആര്‍ത്തവ പ്രശ്നങ്ങള്‍, ഹോര്‍മോണ്‍ വ്യതിയാനങ്ങള്‍, ആര്‍ത്തവ വിരാമത്തോടനുബന്ധിച്ചുള്ള ആരോഗ്യപ്രശ്‌നങ്ങള്‍, കൗമാരക്കാരില്‍ ഉണ്ടാകുന്ന ആര്‍ത്തവ ചക്രത്തിലെ ക്രമക്കേടുകള്‍, അമിത രക്തസ്രാവം, വെള്ളപോക്ക് മുതലായ ആരോഗ്യ പ്രശ്‌നങ്ങള്‍ക്കുള്ള പരിഹാരത്തിനായി ജില്ലയിലെ മുഴുവന്‍ സര്‍ക്കാര്‍ ആയുര്‍വേദ സ്ഥാപനങ്ങള്‍ വഴി ആരോഗ്യലക്ഷ്മി പദ്ധതി നടപ്പാക്കാനാണ് ജില്ലാ പഞ്ചായത്ത് ലക്ഷ്യമിട്ടിട്ടുള്ളത്. ആരക്കുഴ ഗവ. ആയുര്‍വേദ ഡിസ്പെന്‍സറിയില്‍ നടന്ന ചടങ്ങില്‍ പഞ്ചായത്ത് പ്രസിഡന്‍റ് എസ്. ലസിത അധ്യക്ഷത വഹിച്ചു. മെഡിക്കല്‍ ഓഫീസര്‍ ഡോ. ജയറാണി പദ്ധതിയെക്കുറിച്ച് വിശദീകരിച്ചു. പഞ്ചായത്ത് വൈസ് പ്രസിഡന്‍റ് ബിജു തോട്ടുപുറം, പഞ്ചായത്തംഗങ്ങളായ ജാന്‍സി മാത്യു, സിബി കുര്യക്കോസ്, സാബു പൊതുര്‍, ജിജു ഓണാട്ട്, വിഷ്ണു ബാബു എന്നിവര്‍ പ്രസംഗിച്ചു.

കച്ചേരിത്താഴത്തെ ഗര്‍ത്തം: ഹൈവേ റിസര്‍ച്ച് ഇന്‍സ്റ്റിറ്റ്യൂട്ട് ഉദ്യോഗസ്ഥർ സന്ദർശിച്ചു

മൂവാറ്റുപുഴ: കച്ചേരിത്താഴം പാലത്തിന് സമീപം റോഡരികില്‍ ഗര്‍ത്തമുണ്ടായ സ്ഥലത്ത് കേരള ഹൈവേ റിസര്‍ച്ച് ഇന്‍സ്റ്റിറ്റ്യൂട്ട് ഉദ്യോഗസ്ഥരെത്തി സ്ഥിതി വിലയിരുത്തി. രണ്ടു തവണ ഗര്‍ത്തമുണ്ടായ ഈ ഭാഗത്ത് വിദഗ്ധ പരിശോധനയും ശാശ്വത പരിഹാരത്തിനുള്ള പദ്ധതിയും തയാറാക്കാതെ താത്കാലിക നിര്‍മ്മാണ പ്രവര്‍ത്തനം നടത്തിയാല്‍ ഭാവിയില്‍ കൂടുതല്‍ അപകടമുണ്ടാകാനിടയുണ്ടെന്ന് സംഘം വിലയിരുത്തി. ഗര്‍ത്തമുണ്ടായ ഭാഗത്ത് കുഴിച്ച ശേഷം ഇവിടം നികത്തി ടാര്‍ ചെയ്യുന്നതിനായിരുന്നു ആലോചന. രണ്ടു പാലങ്ങളോട് ചേര്‍ന്ന് പുഴയിലേക്ക് തുറക്കുന്ന ആഴത്തിലുള്ള രണ്ട് ഓടകളുടെ സ്ലാബുകള്‍ക്ക് തകരാറുണ്ടായി മണ്ണിടിഞ്ഞ് താഴ്ന്നതാണ് ഗര്‍ത്തമുണ്ടാകാന്‍ കാരണമെന്നാണ് പ്രാഥമിക നിഗമനം. കഴിഞ്ഞ 11ന് രാവിലെ സ്‌കൂള്‍ വാഹനത്തിന്‍റെ മുന്‍ ചക്രം ടാറില്‍ താഴ്ന്നു. തുടര്‍ന്നാണ് ഗര്‍ത്തം കണ്ടെത്തിയത്. മൂന്ന് വര്‍ഷം മുമ്പ് ഇവിടെ റോഡിടിഞ്ഞ് ഗര്‍ത്തം ഉണ്ടായതാണ്. അന്ന് താത്കാലികമായി ഗര്‍ത്തം മണ്ണിട്ട് നികത്തി ടാര്‍ ചെയ്ത് ഗതാഗതം പുനരാരംഭിച്ചു. ഇവിടെ തുടര്‍ച്ചയായി ഗര്‍ത്തം ഉണ്ടാകുന്നത് അപകട ഭീഷണിയായി മാറിയിരിക്കുകയാണ്. താത്കാലികമായി ഇരുമ്പ് ഷീറ്റ് പൈലിംഗ് ചെയ്ത് മണ്ണിട്ട് ഉറപ്പിക്കാനാണ് ഇപ്പോള്‍ തീരുമാനിച്ചിരിക്കുന്നത്. തിരക്കേറിയ റോഡ് അടച്ചിടുന്നത് പ്രായോഗികമല്ലാത്തതിനാലാണ് താത്കാലികമായി ഇരുമ്പ് ഷീറ്റ് പൈലിംഗ് നടത്തി സഞ്ചാരയോഗ്യമാക്കുന്നത്. കെഎച്ച്ആര്‍ഐ സംഘം റിപ്പോര്‍ട്ട് നല്‍കിയശേഷം കൂടുതല്‍ ഉന്നത ഉദ്യോഗസ്ഥര്‍ സ്ഥലത്തെത്തി പരിശോധന നടത്തി ശാശ്വത പരിഹാരം കണ്ടെത്താനാണ് തീരുമാനം. മാത്യു കുഴല്‍നാടന്‍ എംഎല്‍എ, മുന്‍ എംഎല്‍എമാരായ എല്‍ദോ ഏബ്രാഹാം, ബാബു പോള്‍, നഗരസഭാ അധ്യക്ഷന്‍ പി.പി. എല്‍ദോസ്, തിരുവനന്തപുരം കേരള ഹൈവേ റിസര്‍ച്ച് ഇന്‍സ്റ്റിറ്റ്യൂട്ട് അസിസ്റ്റന്‍റ് എക്‌സിക്യൂട്ടീവ് എന്‍ജിനീയര്‍ ഷീജ റാണി, അസി. എന്‍ജിനീയര്‍ അരവിന്ദ് അനില്‍കുമാര്‍ തുടങ്ങിയവരാണ് സ്ഥലം സന്ദര്‍ശിച്ചത്. ഗര്‍ത്തം: മന്ത്രിയുടെ ഇടപെടല്‍ ആവശ്യപ്പെട്ടു മൂവാറ്റുപുഴ: എംസി റോഡില്‍ കച്ചേരിത്താഴത്ത് രൂപംകൊണ്ട ഗര്‍ത്തത്തില്‍ അടിയന്തര നടപടിയെടുക്കണമെന്ന് ആവശ്യപ്പെട്ട് മന്ത്രി മുഹമ്മദ് റിയാസുമായി മാത്യു കുഴല്‍നാടന്‍ എംഎല്‍എ ചര്‍ച്ച നടത്തി. കെആര്‍എഫ്ബി തയാറാക്കിയ റിപ്പോര്‍ട്ടും കേരള ഹൈവേ റിസര്‍ച്ച് ഇന്‍സ്റ്റിറ്റ്യൂട്ട് സംഘം നടത്തിയ സ്ഥലപരിശോധനയുടെ വിലയിരുത്തലുകളും എംഎല്‍എ മന്ത്രിയുടെ ശ്രദ്ധയില്‍പ്പെടുത്തി. ഗര്‍ത്തം കൂടുതല്‍ വ്യാപിക്കുകയാണെന്നും ഭാരമേറിയ വാഹനങ്ങളടക്കം കടന്നുപോകുന്നതു മൂലം കച്ചേരിതാഴത്തെ വലിയ പാലം വഴിയുള്ള ഗതാഗതം തടസപ്പെടുന്ന സാഹചര്യം ഉടന്‍ ഉണ്ടാകാമെന്നും എംഎല്‍എ മന്ത്രിയെ ധരിപ്പിച്ചു. പ്രശ്‌നത്തിന് അടിയന്തര പരിഹാര നടപടികള്‍ സ്വീകരിക്കാമെന്ന് മന്ത്രി ഉറപ്പു നല്‍കിയതായി എംഎല്‍എ അറിയിച്ചു.

കോതമംഗലം-പെരുമ്പന്‍കുത്ത് റോഡിന്‍റെ വശങ്ങളിലെ അപകട ഭീഷണിയായ മരങ്ങൾ മുറിച്ചുമാറ്റണം

കോതമംഗലം: കോതമംഗലം-പെരുമ്പന്‍കുത്ത് റോഡിന്‍റെ ഇരുവശങ്ങളിലും സ്വകാര്യ ഭൂമിയിൽ വൈദ്യുതി ലൈനിനും യാത്രക്കാര്‍ക്കും ഭീഷണിയായി നില്‍ക്കുന്ന മരങ്ങളെല്ലാം മുറിച്ചു മാറ്റാന്‍ അധികൃതര്‍ അടിയന്തര നടപടി സ്വീകരിക്കണമെന്ന് കര്‍ഷക കോണ്‍ഗ്രസ് കീരംപാറ മേഖലാ നേതൃ സംഗമം ആവശ്യപ്പെട്ടു. കഴിഞ്ഞ ദിവസം രാത്രി കീരംപാറ - ഊഞ്ഞാപ്പാറ കവലയ്ക്കു മധ്യേ എസ്ടി കോണ്‍വന്‍റ് ജംഗ്ഷനില്‍ സ്വകാര്യ വ്യക്തിയുടെ പുരയിടത്തിൽ റോഡരികില്‍നിന്ന വലിയ മരം കടപുഴകി വൈദ്യുതി ബോര്‍ഡിന്‍റെ 11 കെവി ലൈനിലേക്കു വീണ് മണിക്കൂറുകളോളം ഗതാഗതം സ്തംഭിച്ചു. പരിസര പ്രദേശങ്ങളിലെ വൈദ്യുത ബന്ധം തകരാറിലായി. വൈദ്യുതി ബോർഡ് ഉദ്യോഗസ്ഥരും പോലീസും അഗ്നിരക്ഷാ സേനയുമെത്തി മണിക്കൂറുകൾ പരിശ്രമിച്ചാണ് ഗതാഗതം പുനസ്ഥാപിച്ചത്. പഞ്ചായത്ത് പ്രസിഡന്‍റ് ഗോപി മുട്ടത്ത് നേതൃത്വം നൽകി. ഇക്കാര്യങ്ങൾ ആവശ്യപ്പെട്ട് മന്ത്രിമാർക്കും ജില്ലാ കളക്ടര്‍ക്കും നിവേദനം നല്‍കുമെന്ന് കര്‍ഷക കോണ്‍ഗ്രസ് സംസ്ഥാന ജനറല്‍ സെക്രട്ടറി പി.സി. ജോര്‍ജ് അറിയിച്ചു.

റംബൂട്ടാൻ വിലയിടിവ്: സർക്കാർ അടിയന്തര നടപടി സ്വീകരിക്കണമെന്ന് കേരള കർഷക യൂണിയൻ

കോതമംഗലം: റംബൂട്ടാൻ വിലയിടിവ് നിയന്ത്രിക്കാൻ സർക്കാർ അടിയന്തര നടപടി സ്വീകരിക്കണെമെന്ന് കേരള കർഷക യൂണിയൻ ജില്ലാ പ്രവർത്തകയോഗം ആവശ്യെപെട്ടു. റംബൂട്ടാൻ വില കുത്തനെ താഴ്ന്നതോടെ കർഷകർ പ്രതിസന്ധിയിലായിരിക്കുകയാണ്. റബർ കൃഷി ലാഭകരമല്ലാതായതോടെ വലിയ തോതിൽ റംബൂട്ടാൻ കൃഷി ചെയ്ത കർഷകരാണ് വിലയിടിവിൽ പ്രതിസന്ധിയിലായത്. ഉത്പാദനം വർധിച്ചതോടെ വില കുത്തനെ ഇടിഞ്ഞതാണ് കർഷകരെ പ്രതിസന്ധിയിലാക്കിയത്. 250 രൂപ വിലയുണ്ടായിരുന്ന റംബൂട്ടാൻ കിലോ 150ലേക്കാണ് കൂപ്പുകുത്തിയത്. വില കുത്തനെ താഴ്ന്നതോടെ കച്ചവടക്കാരും കർഷകരും വൻ പ്രതിസന്ധിയിലായി. റംബൂട്ടാൻ കയറ്റി അയക്കുന്നതും നിലച്ചു. റംബൂട്ടാൻ വിലയിടിവ് തടയാൻ സർക്കാർ അടിയന്തര നടപടി സ്വീകരിക്കണമെന്നും, താങ്ങുവില ഏർപ്പെടുത്തി കർഷകരിൽനിന്ന് സംഭരിക്കണമെന്നും കേരള കർഷക യൂണിയൻ എറണാകുളം ജില്ലാ പ്രവർത്തക യോഗം ആവശ്യപ്പെട്ടു. നാളെ മൂവാറ്റുപുഴയിൽ നടക്കുന്ന കർഷക സംഗമവും കർഷകരെ ആദരിക്കലും വൻവിജയമാക്കാനും യോഗം തീരുമാനിച്ചു. പാർട്ടി ജില്ലാ പ്രസിഡന്‍റ് ഷിബു തെക്കുംപുറം ഉദ്ഘാടനം ചെയ്തു. കർഷക യൂണിയൻ ജില്ലാ പ്രസിഡന്‍റ് വിനോദ് തെക്കേക്കര അധ്യക്ഷത വഹിച്ചു. കർഷക യൂണിയൻ സംസ്ഥാന പ്രസിഡന്‍റ് വർഗീസ് വെട്ടിയാങ്കൽ മുഖ്യപ്രഭാഷണം നടത്തി. സംസ്ഥാന സെക്രട്ടറിമാരായ സോജൻ പിട്ടാപ്പിള്ളിൽ, ആന്‍റണി ഓലിയപ്പുറം, ജോണി പുളിന്തടം, ടി.ഡി. സ്റ്റീഫൻ, വർഗീസ് താന, ജില്ലാ ജനറൽ സെക്രട്ടറി സജി തെക്കേക്കര, ജില്ലാ ഭാരവാഹികളായ ബിജു വെട്ടികുഴ, ജോസ് തുടുമ്മേൽ, ബിനോയ് മെതിപ്പാറ, ഏലിയാസ് പൈനാടത്ത്, സി.വി. കുര്യൻ,കെ. ഒ വിൽ‌സൺ എന്നിവർ പ്രസംഗിച്ചു.

കുട്ടികള്‍ക്കെതിരായ ലൈംഗീകാതിക്രമങ്ങള്‍ക്കെതിരെ സ്‌നേഹിതയുടെ സേഫ് ടച്ച്

കൊച്ചി: കുട്ടികള്‍ക്കെതിരെ നടക്കുന്ന ലൈംഗിക അതിക്രമങ്ങളെ പ്രതിരോധിക്കുന്നതിന് സേഫ് ടച്ച്, അണ്‍ സേഫ് ടച്ച് എന്നീ വിഷയങ്ങളില്‍ ബോധവല്‍ക്കരണ കാമ്പയിനുമായി സ്‌നേഹിത. കമ്യൂണിറ്റി കൗണ്‍സിലര്‍മാരുടെ നേതൃത്വത്തില്‍ സ്‌കൂളുകളിലും, ബാലസഭകളിലും ബഡ്‌സ് സ്‌കൂളുകളിലും കുട്ടികളുടെ കൂട്ടായ്മകളിലും നേരിട്ടും സ്‌നേഹിത ടീം അംഗങ്ങളുടെ നേതൃത്വത്തില്‍ ഓണ്‍ലൈനായും ബോധവത്കരണ പ്രവര്‍ത്തനങ്ങള്‍ നടത്തും. സ്‌നേഹിത @ സ്‌കൂള്‍ പദ്ധതി പ്രകാരം സ്‌കൂള്‍ കൗണ്‍സിലര്‍മാരുടെ സേവനം ലഭ്യമല്ലാത്ത സ്‌കൂളുകളില്‍ കമ്യൂണിറ്റി കൗണ്‍സിലര്‍മാരുടെയും സ്‌നേഹിത ടീം അംഗങ്ങളുടെയും നേതൃത്വത്തില്‍ മാസത്തിലൊരിക്കല്‍ എക്സ്റ്റന്‍ഷന്‍ സെന്‍റര്‍ പ്രവര്‍ത്തനങ്ങള്‍ ആരംഭിക്കും. പ്രശ്‌നങ്ങളിലൂടെ കടന്നു പോകുന്ന കുട്ടികള്‍ക്ക് പ്രാഥമിക മാനസിക പിന്തുണ നല്‍കുക എന്നതാണ് പദ്ധതിയിലൂടെ ഉദ്ദേശിക്കുന്നത്. മയക്കുമരുന്ന്, ലൈംഗികാതിക്രമങ്ങള്‍, മൊബൈല്‍ ഫോണ്‍ ആസക്തി തുടങ്ങിയവയെ ചെറുക്കുന്നതിന് അയല്‍ക്കൂട്ട അംഗങ്ങള്‍ക്കും പൊതുജനങ്ങള്‍ക്കും സ്‌നേഹിത മുഖാന്തിരം ബോധവത്കരണ പ്രവര്‍ത്തനങ്ങള്‍ സംഘടിപ്പിക്കും. ഇതര സംസ്ഥാന തൊഴിലാളികളുടെ കുട്ടികള്‍ക്ക് വിവിധ പിന്തുണകള്‍ നല്‍കുന്നതിന് സ്‌നേഹിതയുടെ നേതൃത്വത്തില്‍ ഇടപെടലുകള്‍ നടത്താനും സ്‌നേഹിത ലക്ഷ്യമിടുന്നു. സ്വാതന്ത്ര്യദിനത്തോടനുബന്ധിച്ച് ആരംഭിക്കുന്ന കാമ്പയിന്‍ പ്രവര്‍ത്തനങ്ങള്‍ 2026 മാര്‍ച്ച് എട്ട് അന്താരാഷ്ട്ര വനിതാദിനം വരെ തുടരും. സേഫ് ടച്ച് കാമ്പയിന് തുടക്കം കുറിച്ച് ജില്ലാ കളക്ടര്‍ ജി. പ്രിയങ്ക സേഫ് ടച്ച് പോസ്റ്ററുകള്‍ പ്രകാശനം ചെയ്തു.

നഗരസഭാ കൗണ്‍സിലറായി കാല്‍ നൂറ്റാണ്ട് : ലിസി ടീച്ചര്‍ സ്മാരക അവാര്‍ഡ് ജേതാവ് റീത്താപോളിനെ അനുമോദിച്ചു

അങ്കമാലി: അങ്കമാലി നഗരസഭയില്‍ കൗണ്‍സിലറായി കാല്‍ നൂറ്റാണ്ട് പിന്നിടുന്ന റീത്താപോളിനെ അനുമോദിച്ചു. മഹിളാ കോണ്‍ഗ്രസ് അങ്കമാലി, കാലടി ബ്ലോക്ക് കമ്മിറ്റികളുടെ നേതൃത്വത്തില്‍ സംഘടിപ്പിച്ച ചടങ്ങില്‍ റോജി എം. ജോണ്‍ എംഎല്‍എ മികച്ച പൊതുപ്രവര്‍ത്തകയ്ക്കുള്ള ലിസി ടീച്ചര്‍ സ്മാരക അവാര്‍ഡ് റീത്താപോളിന് സമ്മാനിച്ചു. മഹിളാ കോണ്‍ഗ്രസ് മുന്‍ സംസ്ഥാന പ്രസിഡന്‍റ് അഡ്വ. ബിന്ദു ക്യഷ്ണ പൊന്നാടയണിയിച്ചു. എംപിസി ഡയറക്ടറായി തെരഞ്ഞെടുക്കപ്പെട്ട നഗരസഭാ വൈസ് ചെയര്‍പേഴ്സണ്‍ സിനി മനോജ്, സര്‍ക്കിള്‍ സഹകരണ യൂണിയന്‍ ഡയറക്ടറായി തെരഞ്ഞെടുക്കപ്പെട്ട മേരി വര്‍ഗീസ്, മുതിര്‍ന്ന മഹിളാ കോണ്‍ഗ്രസ് പ്രവര്‍ത്തകരായ കൊച്ചുത്രേസ്യ തങ്കച്ചന്‍, അല്‍ഫോന്‍സ എന്നിവരേയും ചടങ്ങില്‍ അനുമോദിച്ചു. മഹിളാ കോണ്‍ഗ്രസ് അങ്കമാലി ബ്ലോക്ക് പ്രസിഡന്‍റ് ലാലി ആന്‍റു അധ്യക്ഷത വഹിച്ചു. മുന്‍ എംഎല്‍എ പി.ജെ. ജോയി, മഹിളാ കോണ്‍ഗ്രസ് ജില്ലാ പ്രസിഡന്‍റ് സുനില സിബി, കാലടി ബ്ലോക്ക് പ്രസിഡന്‍റ് ബിജി സാജു, നഗരസഭാ മുന്‍ ചെയര്‍മാന്‍ മാത്യു തോമസ്, യുഡിഎഫ് നിയോജകണ്ഡലം കണ്‍വീനര്‍ ടി.എം. വര്‍ഗീസ്, പെന്‍ഷനേഴ്സ് അസോസിയേഷന്‍ സംസ്ഥാന വൈസ് പ്രസിഡന്‍റ് കെ.വി. മുരളി, ഡികെടിഎഫ് ജില്ലാ പ്രസിഡന്‍റ് കൊച്ചാപ്പു പുളിയ്ക്കല്‍, ഡിസിസി ജനറല്‍ സെക്രട്ടറിമാരായ അഡ്വ. കെ.ബി. സാബു, മനോജ് മുല്ലശേരി, പൗലോസ് കല്ലറയ്ക്കല്‍, അഡ്വ. കെ.എസ്. ഷാജി, കെ.കെ. ജോഷി, ഐഎന്‍ടിയുസി റീജിയണല്‍ പ്രസിഡന്‍റ് ബാബു സാനി,ഷൈനി ജോര്‍ജ്, ലിസി പോളി, മീര അവറാച്ചന്‍, ലിസ തോമസ് എന്നിവര്‍ പ്രസംഗിച്ചു.

കാഞ്ഞൂർ പഞ്ചായത്തിനു മുന്നിൽ ധർണ നടത്തി

കാലടി: സിപിഐ കാഞ്ഞൂർ ലോക്കൽ കമ്മിറ്റിയുടെയും കിസാൻ സഭ കാഞ്ഞൂർ ലോക്കൽ കമ്മിറ്റിയുടെയും സംയുക്താഭിമുഖ്യത്തിൽ കാഞ്ഞൂർ പഞ്ചായത്തിന് മുന്നിൽ ധർണ നടത്തി. മുൻ എംഎൽഎ എൽദോ ഏബ്രഹാം സമരം ഉദ്ഘാടനം ചെയ്തു. കർഷകർക്ക് ലഭ്യമാക്കേണ്ട സബ്സിഡി തുക ഉടൻ വിതരണം ചെയ്യുക, ജൽജീവൻ പദ്ധതി പ്രകാരം പൊളിച്ചിട്ടിരിക്കുന്ന റോഡുകൾ അടിയന്തരമായി അറ്റകുറ്റപ്പണി നടത്തുക,പഞ്ചായത്ത് പ്രദേശത്തെ കാനകൾ വൃത്തിയാക്കുകു എന്നീ ആവശ്യങ്ങൾ ഉന്നയിച്ചാണ് സമരം സംഘടിപ്പിച്ചത്. സിപിഐ ലോക്കൽ സെക്രട്ടറി സി.വി.ജോസ് അധ്യക്ഷത വഹിച്ചു.ജില്ലാ പഞ്ചായത്ത് അംഗം ശാരദ മോഹൻ,സിപിഐ ആലുവ മണ്ഡലം സെക്രട്ടറി വി. മുഹമ്മദ്, സിപിഐ നേതാക്കളായ ഷിഹാബ് പറേലി, ടി.ആർ. സലി,ബൈജു കാച്ചപ്പിള്ളി, സുധീപ് പറക്കാട്ട്,എൽഡിഎഫ് നേതാക്കളായ മുരളി പുത്തൻവേലി, പോൾ പെട്ട,ജോസ് പേഴപ്പറമ്പിൽ എന്നിവർ പ്രസംഗിച്ചു. പി.എ. കരീം, ഇ.ആർ. ചന്ദ്രൻ, പി.എ. മജീദ്,പി.എ. യൂസഫ് എന്നിവർ നേതൃത്വം നൽകി.

ഫിസാറ്റ് ടെഗ്‌സെറ്റ് 2025

കൊച്ചി: സ്‌കൂള്‍ വിദ്യാര്‍ഥികള്‍ക്കായി സാങ്കേതിക വിദ്യയുടെയും തൊഴിലവസരങ്ങളുടെയും വാതായനങ്ങള്‍ തുറക്കുന്ന ഫിസാറ്റ് ടെഗ്‌സെറ്റ്- 2025 പരിശീലന പരിപാടി മേലൂര്‍ സെന്‍റ് ജോസഫ്സ് സ്‌കൂളില്‍ നടന്നു. ഫിസാറ്റ് ചെയര്‍മാന്‍ പി.ആര്‍. ഷിമിത്ത് സമ്മേളനം ഉദ്ഘാടനം ചെയ്തു. ഫിസാറ്റ് ഇലക്ട്രോണിക്‌സ് ആന്‍ഡ് കമ്യൂണിക്കേഷന്‍ എന്‍ജിനീയറിംഗ് വിഭാഗത്തിലെ സോഷ്യല്‍ ഔട്ട് റീച്ച് സെല്ലിന്‍റെ നേതൃത്വത്തില്‍ ടീച്ച് ഗൈഡ് ട്രാന്‍സ്‌ഫോം' എന്ന ആശയവുമായി, വിദ്യാര്‍ഥികളെ സാങ്കേതിക വിദ്യയുടെയും കരിയര്‍ മാര്‍ഗനിര്‍ദേശത്തിന്‍റെയും ലോകത്തേക്ക് പരിചയപ്പെടുത്തുകയായിരുന്നു പരിപാടിയുടെ ലക്ഷ്യം. ഇലക്ട്രോണിക്‌സ് ആന്‍ഡ് കമ്യൂണിക്കേഷന്‍സ് വിഭാഗം മേധാവി ഡോ. ബിജോയ് വര്‍ഗീസ്, എം. മനോജ് കുമാര്‍ എന്നിവര്‍ ക്ലാസുകളെടുത്തു. അധ്യാപികമാരായ മിനു കുര്യാക്കോസ്, ജെസ്‌ലിന്‍ പി. ജോ, സ്‌കൂള്‍ പിടിഎ പ്രസിഡന്‍റ് ടി.ഒ. ബെനി , വാര്‍ഡ് മെമ്പര്‍ ജാന്‍സി പൂളോസ് എന്നിവര്‍ പങ്കെടുത്തു.

ഉമ്മന്‍ചാണ്ടി കള്‍ച്ചറല്‍ ഫോറം ഉദ്ഘാടനം ചെയ്തു

കൊച്ചി: മുന്‍ മുഖ്യമന്ത്രി ഉമ്മന്‍ചാണ്ടിയുടെ പേരില്‍ ആരംഭിച്ച ഉമ്മന്‍ചാണ്ടി കള്‍ച്ചറല്‍ ഫോറം ചാണ്ടി ഉമ്മന്‍ എംഎല്‍എ ഉദ്ഘാടനം ചെയ്തു. ലൂര്‍ദ് ആശുപത്രിക്ക് മുന്നില്‍ നടന്ന ഉദ്ഘാടനത്തോടനുബന്ധിച്ച് ഹൃദ്രോഗ നിര്‍ണയ ക്യാമ്പ് ഹൈബി ഈഡന്‍ എംപിയും സൗജന്യ അരി വിതരണം ടി.ജെ. വിനോദ് എംഎല്‍എയും ഉദ്ഘാടനം ചെയ്തു. കള്‍ച്ചറല്‍ ഫോറം ചെയര്‍മാനും യൂത്ത് കോണ്‍ഗ്രസ് സംസ്ഥാന സെക്രട്ടറിയുമായ അഡ്വ. സഞ്ജയ് ജയിംസ് അധ്യക്ഷത വഹിച്ചു. ഡിസിസി പ്രസിഡന്‍റ് മുഹമ്മദ് ഷിയാസ്, യുഡിഎഫ് ജില്ലാ ചെയര്‍മാന്‍ ഡൊമിനിക് പ്രസന്‍റേഷന്‍ എന്നിവര്‍ മുഖ്യാതിഥികളായി. കെ. ബാബു എംഎല്‍എ, അജയ് തറയില്‍ എന്നിവര്‍ മുഖ്യപ്രഭാഷണം നടത്തി.

സഹികെട്ട് ജനമിളകി; അവധി മതിയാക്കി ഡോക്ടർമാർ ഹാജർ

വൈപ്പിൻ: ആവശ്യത്തിനു ഡോക്ടർമാരും ജീവനക്കാരും ഇല്ലാത്ത ഇടപ്പള്ളി ബ്ലോക്ക് പഞ്ചായത്തിന് കീഴിലുള്ള മാലിപ്പുറം ആശുപത്രിയുടെ കുത്തഴിഞ്ഞ നടത്തിപ്പിനെതിരെ ജനങ്ങൾ സംഘടിച്ച് ഇന്ന് മുതൽ സമരം തുടങ്ങാനിരിക്കെ, അവധിയിലായിരുന്ന മൂന്ന് ഡോക്ടർമാർ ഇന്നലെ മുതൽ ജോലിക്ക് എത്തിത്തുടങ്ങി. ബ്ലോക്ക് പഞ്ചായത്തിന്‍റെ സമ്മർദവും സമരസമിതി ഭീമഹർജി നൽകിയ സാഹചര്യത്തിലും ഡിഎംഒയുടെ അടിയന്തര നിർദേശത്തെ തുടർന്നാണ് മൂവരും ചാർജെടുത്തതെന്നാണ് അറിയുന്നത്. കൂടാതെ ഇന്നുമുതൽ ഒരു ഡോക്ടർ കൂടി ഇവിടെ സേവനത്തിനെത്തുമെന്ന് ആശുപത്രി മാനേജ്മെന്‍റ് കമ്മിറ്റി അറിയിച്ചു. പുതുതായി ഒരു ജീവനക്കാരനെ താൽക്കാലികമായി നിയമിക്കാനും തീരുമാനമുണ്ടത്രേ.പ്രവർത്തനം മെച്ചപ്പെടുത്താൻ കൂടുതൽ ജീവനക്കാരെയും ഡോക്ടർമാരെയും നിയമിക്കണമെന്ന് ആവശ്യപ്പെട്ട് ആരോഗ്യ മന്ത്രിയെ കാണാനും ബ്ലോക്ക് പഞ്ചായത്ത് പ്രസിഡന്‍റ് സരിത സനലിന്‍റെ അധ്യക്ഷതയിൽ ചേർന്ന ആശുപത്രി മാനേജ്മെന്‍റ് കമ്മിറ്റി തീരുമാനമെടുത്തിട്ടുണ്ട്. അതേസമയം ആവശ്യത്തിന് ഡോക്ടർമാരെ നിയമിച്ച് രാത്രി സേവനവും കിടത്തിചികിത്സയും പുനരാരംഭിക്കുന്നതുവരെ വിവിധ സമരമാർഗങ്ങളുമായി മുന്നോട്ടു പോകുമെന്ന് സമരസമിതി ചെയർമാൻ സി.ജി. ബിജു മുന്നറിയിപ്പ് നൽകി സമരത്തിന്‍റെ ഭാഗമായി ഇന്ന് മൂന്നിന് ആശുപത്രിയുടെ മുന്നിൽ പ്രഖ്യാപിച്ചിരുന്ന പ്രതിഷേധ കൂട്ടായ്മ മാറ്റമില്ലാതെ നടക്കുമെന്നും അദ്ദേഹം അറിയിച്ചു. ആറ് ഡോക്ടർമാരുടെ സേവനം ഉണ്ടായിരുന്ന ആശുപത്രിയിൽ രണ്ട് ഡോക്ടർമാരായി ചുരുങ്ങിയതോടെയാണ് ആശുപത്രിയുടെ താളം തെറ്റിയത്. ഇതോടെ പലപ്പോഴും ഒപി യുടെ പ്രവർത്തനം വരെ നിലച്ചു. ഇതേതുടർന്നാണ് നാട്ടുകാർ സമരത്തിന് ഇറങ്ങിയത്.

ആലങ്ങാട് കോട്ടപ്പുറം മേഖലയിൽ മോഷ്ടാക്കൾ വിലസുന്നു

ആലങ്ങാട്: ആലങ്ങാട് കോട്ടപ്പുറം മേഖലയിൽ മോഷ്ടാക്കൾ വിലസുന്നു. കഴിഞ്ഞ ദിവസം രാത്രി കോട്ടപ്പുറം പെട്രോൾ പമ്പിനു സമീപത്തെ ടൈൽ ഗോഡൗൺ കുത്തിത്തുറന്നു എയർ കണ്ടീഷനർ, ലാഡർ, ഇരുമ്പു സാമഗ്രികൾ എന്നിവ കവർന്നു. ഒരിടവേളയ്ക്കു ശേഷം കോട്ടപ്പുറം മേഖല കേന്ദ്രീകരിച്ചു വീണ്ടും മോഷ്ടാക്കൾ എത്തിയതോടെ നാട്ടുകാർ ഭീതിയിയാണ്. കഴിഞ്ഞ കുറച്ചു മാസങ്ങൾക്കിടെ കോട്ടപ്പുറം ഭാഗത്തെ വീടുകളുടെ മതിലുകളിൽ സ്ഥാപിച്ചിരുന്ന പിച്ചളയിൽ തീർത്ത നെയിം ബോർഡുകൾ വ്യാപകമായി കവർന്നിരുന്നു. സമീപത്തെ മുസ്ലിം പള്ളിയിലെ ഭണ്ഡാരം രണ്ടു തവണ കുത്തിപ്പൊളിക്കുകയും വഴിയരികിൽ നിർത്തിയിട്ട വാഹനങ്ങളും ബാറ്ററികളും കവർന്ന സംഭവവും ഉണ്ടായിരുന്നു. വീണ്ടും ഇതേ പ്രദേശത്തു തന്നെയാണ് മോഷണം നടന്നിരിക്കുന്നത്. മോഷണം നടന്ന സ്ഥലത്തു പോലീസ് പരിശോധന നടത്തി. സിസിടിവി ദൃശ്യങ്ങൾ കേന്ദ്രീകരിച്ച് അന്വേഷണം ആരംഭിച്ചിട്ടുണ്ട്. സംശയം തോന്നിയ ഒരാളെ കഴിഞ്ഞദിവസം ചോദ്യം ചെയ്തിരുന്നു.പോലീസിന്‍റെ കൃത്യമായ ഇടപെടൽ ഇല്ലാത്തതാണ് കോട്ടപ്പുറം, മാളികംപീടിക എന്നീ മേഖലയിൽ മോഷ്ടാക്കൾ വിലസുന്നത്. മോഷ്ടാക്കളുടെയും ലഹരിസംഘങ്ങളുടെയും ആക്രമണം കൂടിവരുന്ന സാഹചര്യത്തിൽ രാത്രി കാലങ്ങളിൽ പോലീസ് പട്രോളിംഗ് ശക്തമാക്കണമെന്നു നാട്ടുകാർ ആവശ്യപ്പെട്ടു.

കളമശേരിയിൽ വർക്ക്ഷോപ്പിൽ തീപിടുത്തം

കളമശേരി: കളമശേരി ടിവിഎസ് ജംഗ്‌ഷന് സമീപം പഴയ റോഡിലെ ടീംസ് ഓട്ടോമൊബൈൽസ് വർക്ക്ഷോപ്പിൽ തീപിടിത്തം. ഇന്നലെ രാവിലെ എട്ടരയോടെയാണ് തീപിടിത്തമുണ്ടായത്. വർക്ക്ഷോപ്പിൽ ഉണ്ടായിരുന്ന രണ്ട് ഓട്ടോറിക്ഷകൾക്കും വർക്ക്‌ഷോപ്പ് ഉപകരണങ്ങൾക്കും കേടുപാടുകൾ സംഭവിച്ചിട്ടുണ്ട്.ആലുവ സ്വദേശിയായ ബോസിന്‍റെ ഉടമസ്ഥതയിലുള്ളതാണ് വർക്ക്‌ഷോപ്പ്. ഏലൂരിൽ നിന്നും കാക്കനാട് നിന്നുമെത്തിയ അഗ്നിരക്ഷാ സേനയും നാട്ടുകാരും ചേർന്നാണ് തീയണച്ചത്. തീപിടുത്തത്തിന്‍റെ കാരണം വ്യക്തമല്ല.

മോഷണപരന്പര: പ്രതി അറസ്റ്റിൽ

പറവൂർ: കേരളത്തിലങ്ങോളമിങ്ങോളം ഇരുപത്തി അഞ്ചോളം മോഷണ കേസുകളിൽ പ്രതിയായ കോട്ടയം കിടങ്ങൂർ തെക്കേമഠം വേണുഗോപാൽ (വേണു - 52) പറവൂർ പോലീസിന്‍റെ പിടിയിലായി. കഴിഞ്ഞ നാലിന് ചേന്ദമംഗലം സ്വദേശിയുടെ ഇരുചക്ര വാഹനം കോടതി പരിസരത്ത് നിന്ന് ഇയാൾ മോഷ്ടിച്ചിരുന്നു. ഏലൂരിലെ വീടുകളിൽ വിദേശത്തുനിന്ന് കൊറിയറുണ്ടെന്ന് പറഞ്ഞ് തട്ടിപ്പ് നടത്താൻ ശ്രമിച്ച ഇയാൾ ഒരു വീട്ടിൽ നിന്ന് മൊബൈൽ ഫോണും കൊറിയർ ചാർജെന്ന വ്യാജേന 374 രൂപയും തട്ടിയെടുത്തു. നെടുമ്പാശേരി വിമാനത്താവളത്തിന് പരിസരത്ത് നിന്നാണ് ഇയാളെ പിടികൂടിയത്. മോഷ്ടിച്ച ഇരുചക്ര വാഹനവും ഇയാളിൽ നിന്ന് കണ്ടെടുത്തു. മുനമ്പം ഡിവൈഎസ്പി എസ്. ജയകൃഷ്ണൻ, പറവൂർ ഇൻസ്പെക്ടർ ഷോജോ വർഗീസ്, എസ്ഐ ബിബിൻ എന്നിവരുടെ നേതൃത്വത്തിലുള്ള സംഘമാണ് ഇയാളെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

സ്കൂൾ ബസ് ഫ്ലാഗ് ഓഫ്‌ ചെയ്തു

കൊച്ചി: എറണാകുളം മാർക്കറ്റ് റോഡിലുള്ള സെന്‍റ് മേരീസ് ഗേൾസ് ഹയർ സെക്കൻഡറി സ്കൂളിന് ഹൈബി ഈഡൻ എംപിയുടെ വികസന ഫണ്ടിൽ നിന്ന് അനുവദിച്ച സ്കൂൾ ബസ് എംപി ഫ്ലാഗ് ഓഫ്‌ ചെയ്തു. സ്കൂൾ ലോക്കൽ മാനേജർ സിസ്റ്റർ തെരേസ് മരിയ അധ്യക്ഷത വഹിച്ചു. ടി.ജെ.വിനോദ് എംഎൽഎ, പ്രധാനാധ്യാപിക സിസ്റ്റർ പി.കെ.ലൗലി, പിടിഎ പ്രസിഡന്‍റ് ജയിംസ് ജോസഫ്, സുജിമോൾ തുടങ്ങിയവർ പ്രസംഗിച്ചു.

പ്രതി പിടിയിൽ

ആലുവ: ജയിൽശിക്ഷ കഴിഞ്ഞിറങ്ങിയശേഷവും ഇരുചക്രവാഹന മോഷണം തുടർന്ന പ്രതി ആലുവ പോലീസിന്‍റെ പിടിയിലായി. അയ്യമ്പുഴ ചുള്ളി കോളാട്ടുകുടി ബിനോയി (41) യെയാണ് പിടികൂടിയത്. ആലുവയിൽ വാഹനം മോഷ്ടിച്ച കേസിൽ ഈ മാസം ഏഴിനാണ് ഇയാൾ ജയിലിൽ നിന്നിറങ്ങിയത്. തൊട്ടടുത്ത ദിവസം വീണ്ടും എറണാകുളത്ത് നിന്ന് ബൈക്ക് മോഷ്ടിച്ചു. അതിൽ വന്ന് ചാലക്കലുള്ള മൊബൈൽ ടവറിൽ നിന്ന് ബാറ്ററി മോഷ്ടിക്കാൻ ശ്രമിച്ചെങ്കിലും വിജയിച്ചില്ല. പിറ്റേന്ന് പെരുമ്പാവൂരിൽ നിന്ന് രണ്ട് ഇരുചക്രവാഹനങ്ങൾ മോഷ്ടിച്ചു. 25 ൽ ഏറെ മോഷണ കേസുകൾ ബിനോയിയുടെ പേരിലുണ്ട്. ഇൻസ്പെക്ടർ വി.എം കേഴ്സണിന്‍റെ നേതൃത്വത്തിലാണ് അറസ്റ്റ് ചെയ്തത്.

ഹരിതകർമ സേനയുടെ നല്ല പാഠത്തിന് സാൻതോം സ്കൂളിന്‍റെ ആദരം

മൂക്കന്നൂർ: സ്വാതന്ത്ര്യദിന ആഘോഷത്തിനൊപ്പം ആദരവ് പകർന്നും സാൻതോം സെൻട്രൽ സ്കൂൾ. സ്കൂളിൽ വിപുലമായി സംഘടിപ്പിച്ച സ്വാതന്ത്ര്യദിനാഘോഷത്തിന്‍റെ ഭാഗമായി മൂക്കന്നൂർ ഗ്രാമപഞ്ചായത്തിലെ ഹരിത കർമ സേനാംഗങ്ങളെയാണ് ആദരിച്ചത്. അധ്യാപകരുടെ നേതൃത്വത്തിൽ വിദ്യാർഥികൾ അവതരിപ്പിച്ച സ്കിറ്റ്, പാട്രിയോട്ടിക് ഡാൻസ്, റോൾപ്ലേ, ടാബ്ലോ എന്നിവ ചടങ്ങിന് കൊഴുപ്പേകി. ലോക്കൽ മാനേജർ സിസ്റ്റർ ശാലിനി, പ്രിൻസിപ്പൽ സിസ്റ്റർ ഉദയ തെരേസ , മൂക്കന്നൂർ ഗ്രാമപഞ്ചായത്ത് പ്രസിഡന്‍റ് കെ.വി. ബിബീഷ് , പിടിഎ വൈസ് പ്രസിഡന്‍റ് അനിറ്റ മരിയ എന്നിവർ ആശംസകൾ അർപ്പിച്ചു. ശരിയായ മാലിന്യ സംസ്കരണം എങ്ങനെ സാധ്യമാക്കാം, എന്നതിനെപ്പറ്റി ഹരിതകർമസേന മെമ്പർ മോളി വർഗീസ് സംസാരിച്ചു. സ്വാതന്ത്ര്യദിനാഘോഷത്തിന്‍റെ ഭാഗമായി നടത്തിയ വിവിധ മത്സരങ്ങളുടെ സമ്മാനദാനവും നടത്തി.

മുൻകൂർ വിവരം നൽകിയില്ല : വാട്ടർ അഥോറിറ്റി ജീവനക്കാരും പോലീസും തമ്മിൽ വാക്കേറ്റം

മരട്: കുടിവെള്ള പൈപ്പ് പൊട്ടിയുണ്ടായ ചോർച്ച പരിഹരിക്കുന്നതിനായി വാട്ടർ അഥോറിറ്റി ജീവനക്കാർ സ്ഥലത്തെത്തിയപ്പോൾ, പോലീസിന് മുൻകൂർ വിവരം നൽകിയില്ലെന്ന കാരണത്താൽ ഇരുവിഭാഗം ജീവനക്കാർ തമ്മിൽ വാക്കേറ്റമുണ്ടായി. മരട് നഗരസഭാ ചെയർപേഴ്സന്‍റെ മധ്യസ്ഥതയിൽ വൈകാതെ പ്രശ്നം പരിഹരിക്കുകയും ചെയ്തു.‌ മരട് നഗരസഭാ പരിധിയിലെ ന്യൂക്ലിയസ് മാളിന് സമീപത്ത് മൂന്നു സ്ഥലത്ത് പൈപ്പ് പൊട്ടിയതിനെ തുടർന്ന് സമീപ പ്രദേശങ്ങളിൽ കുടിവെള്ള വിതരണം തടസപ്പെട്ടിരുന്നു. നഗരസഭാ കൗൺസിലർമാരുൾപ്പെടെ അടിയന്തര പരിഹാരം ആവശ്യപ്പെട്ടതിനെ തുടർന്ന് ഇന്നലെെ രാവിലെ തന്നെ വാട്ടർ അഥോറിറ്റി സംഘം സ്ഥലത്തെത്തി. എന്നാൽ ഗതാഗത നിയന്ത്രണത്തിന് ആവശ്യമായ നടപടികൾ സ്വീകരിക്കുന്നത് സംബന്ധിച്ച് പോലീസിൽ വിവരം നൽകിയിരുന്നില്ല. തുടർന്ന് ഇതു സംബന്ധിച്ച് തർക്കമുണ്ടാകുകയും വാട്ടർ അഥോറിറ്റി ജീവനക്കാർ ജോലികൾ നിർത്തിവയ്ക്കുകയുമായിരുന്നു. പിന്നീട് വിവരമറിഞ്ഞ് സ്ഥലത്തെത്തിയ നഗരസഭാ ചെയർപേഴ്സൺ ആന്‍റണിആശാംപറമ്പിൽ ഇരുവകുപ്പുകളിലെയും ജീവനക്കാരുമായി സംസാരിച്ച് പ്രശ്നം അവസാനിപ്പിച്ചു. തുടർന്ന് വാട്ടർ അഥോറിറ്റി ജീവനക്കാർ പണികൾ പുനരാരംഭിച്ച് തകരാർ പരിഹരിച്ചു.ഭാവിയിൽ ഇത്തരം സാഹചര്യങ്ങളിൽ പരസ്പരം വിവരം കൈമാറാനും സഹകരിക്കാനും ഇരുവിഭാഗവും സമ്മതമറിയിച്ചു.

ഗതാഗതം തടസപ്പെടുത്തി പ്രതിഷേധ മാര്‍ച്ച്; 50ഓളം ബിജെപി നേതാക്കള്‍ക്കെതിരെ കേസ്

കൊച്ചി: നഗരത്തില്‍ ഗതാഗതം തടസപ്പെടുത്തി പ്രതിഷേധ മാര്‍ച്ച് നടത്തിയതിന് കണ്ടാലറിയാവുന്ന അമ്പതോളം ബിജെപി നേതാക്കൾക്കെതിരേ സെൻട്രല്‍ പോലീസ് കേസ് എടുത്തു. ബിജെപി സിറ്റി ജില്ലാ അധ്യക്ഷന്‍ അഡ്വ. കെ.എസ്. ഷൈജു, കെ.വി.എസ്. ഹരിദാസ്, കെ.എസ്. സജി, അനൂപ് അയ്യപ്പന്‍ പിള്ള, സജിനി നമ്പ്യാര്‍ എന്നിവര്‍ ഉള്‍പ്പെടെയുള്ളവർക്കെതിരെയാണ് കേസ് എടുത്തത്. കേന്ദ്രമന്ത്രി സുരേഷ് ഗോപിയുടെ തൃശൂര്‍ ഓഫീസിലേക്ക് സിപിഎം മാര്‍ച്ച് നടത്തിയതില്‍ പ്രതിഷേധിച്ച് ബുധനാഴ്ച എറണാകുളം ബിഎസ്എന്‍എല്‍ ഓഫീസിനു മുന്നില്‍ ബിജെപി സിറ്റി ഘടകം നടത്തിയ പ്രതിഷേധ മാര്‍ച്ചാണ് ഗതാഗത തടസം സൃഷ്ടിച്ചത്.

കൗണ്‍സിലിംഗ് ശക്തിപ്പെടുത്തും: വനിതാ കമ്മീഷന്‍

കൊച്ചി: സ്ത്രീകള്‍ ഇരകളാകുന്ന വിവിധ പ്രശ്‌നങ്ങളില്‍ അവര്‍ അനുഭവിക്കുന്ന മാനസിക സംഘര്‍ഷങ്ങള്‍ ഒഴിവാക്കുന്നതിന് സംസ്ഥാനത്താകെ വനിതാ കമ്മീഷന്‍റെ നേതൃത്വത്തില്‍ കൗണ്‍സിലിംഗ് ശക്തിപ്പെടുത്തുമെന്ന് വനിതാ കമ്മീഷന്‍ അധ്യക്ഷ പി. സതീദേവി. സംസ്ഥാനത്ത് വിവിധ പ്രശ്‌നങ്ങള്‍ മൂലം ആത്മഹത്യ ചെയ്യുന്ന സ്ത്രീകളുടെ എണ്ണം വർധിക്കുകയാണ്. ഇത്തരം ആത്മഹത്യാ പ്രേരണകളില്‍ നിന്ന് ഇവരെ പുറത്തുകൊണ്ട് വരുന്നതിന് കൗണ്‍സിലിംഗ് സഹായമാകും. ഇന്‍റേണല്‍ കമ്മിറ്റികള്‍ ഫലപ്രദമായ ഇടപെടലുകള്‍ നടത്തണമെന്നും അവര്‍ പറഞ്ഞു. വനിതാ കമ്മീഷന്‍ എറണാകുളം ജില്ലാ അദാലത്തിന് നേതൃത്വം നല്‍കി സംസാരിക്കുകയായിരുന്നു സതീദേവി. രണ്ടു ദിവസങ്ങളിലായി കാക്കനാട് കളക്ടറേറ്റ് കോണ്‍ഫറന്‍സ് ഹാളില്‍ നടന്ന അദാലത്തിന്‍റെ അവസാന ദിനം 21 പരാതികളാണ് തീര്‍പ്പാക്കിയത്. അഞ്ച് പരാതികളില്‍ വിവിധ വകുപ്പുകളില്‍ നിന്ന് റിപ്പോര്‍ട്ട് തേടി. രണ്ട് പരാതികള്‍ക്ക് കൗണ്‍സിലിംഗ് സംവിധാനവും ഏര്‍പ്പെടുത്തിയിട്ടുണ്ട്. 81 പരാതികളാണ് പരിഗണിച്ചത്.

മുഖ്യമന്ത്രിയുടെ പോലീസ്, എക്‌സൈസ് മെഡലുകള്‍ക്ക് അര്‍ഹരായവര്‍

കൊച്ചി : മുഖ്യമന്ത്രിയുടെ മെഡലിന് കൊച്ചി സിറ്റി പോലീസില്‍നിന്ന് 16 പേര്‍ അര്‍ഹരായി. മെഡലിന് അര്‍ഹരായവരുടെ പേര്, സ്‌റ്റേഷന്‍ ക്രമത്തില്‍: കെ.ജെ.ഫുള്‍ജന്‍ (എസ്‌ഐ, കൊച്ചി സിറ്റി ട്രാഫിക് എന്‍ഫോഴ്‌സ്‌മെന്‍റ് വെസ്റ്റ്), ഇ.എം. ഷാജി (മുളവുകാട് എസ്‌ഐ), വി. ശ്യാംകുമാര്‍ (എഎസ്‌ഐ, സൈബർ ക്രൈം സ്‌റ്റേഷന്‍), പി.ഡി. അജയന്‍ (എഎസ്‌ഐ, ഡിഎച്ച്ക്യു ക്യാമ്പ് കൊച്ചി സിറ്റി), എം.എ. ജോണ്‍ (സിപിഒ, ഫോര്‍ട്ട് കൊച്ചി), വി.എ. ഷിബു (സിപിഒ, കളമശേരി), എ. സുരാജ് (സീനിയര്‍ സിപിഒ, ഡിഎച്ച്ക്യു), കെ.പി. മുഹമ്മദ് ഇസ്ഹാക്ക് (സീനിയര്‍ സിപിഒ, കളമശേരി), എന്‍.എസ്.സുമേഷ് (സിപിഒ, ഡിഎച്ച്ക്യു ക്യാമ്പ് കൊച്ചി സിറ്റി), ഉമേഷ് ഉദയന്‍ (സിപിഒ, പള്ളുരുത്തി), കെ.സി. മഹേഷ് (സീനിയര്‍ സിപിഒ, ഫോര്‍ട്ടുകൊച്ചി), ബി.സി. ഹേമചന്ദ്ര (എഎസ്‌ഐ, സിറ്റി ട്രാഫിക് വെസ്റ്റ്), സി. പ്രീതി (എഎസ്‌ഐ, ഡിഎച്ച്ക്യു), ലിസി മത്തായി (എഎസ്‌ഐ, ഡിഎച്ച്ക്യു), ആര്‍.പി. ജയകുമാര്‍ (എഎസ്‌ഐ, കണ്‍ട്രോള്‍ റൂം), പി.കെ. ഷിഹാബ് (സിപിഒ, ട്രാഫിക് എന്‍ഫോഴ്‌സ്‌മെന്‍റ് വെസ്റ്റ്). മെഡലിന് അര്‍ഹരായ എക്‌സൈസ് ഉദ്യോഗസ്ഥര്‍: ജി. കൃഷ്ണകുമാര്‍ (അസി. കമ്മീഷണര്‍, ക്രൈംബ്രാഞ്ച് എറണാകുളം), കെ.എ. നിയാസ് (എഎസ്ഐ, മൂവാറ്റുപുഴ സര്‍ക്കിള്‍ ഓഫീസ്). അഗ്‌നി രക്ഷാസേനയില്‍നിന്ന് മെഡല്‍ ലഭിച്ചവര്‍: വി.എം. മിഥുന്‍ (ഫയര്‍ ആന്‍ഡ് റസ്‌ക്യു ഓഫീസര്‍, ഗാന്ധിനഗര്‍), എസ്,സുരാജ് (ഫയര്‍ ആന്‍ഡ് റസ്‌ക്യു ഓഫീസര്‍, ജലസുരക്ഷാ വിദഗ്ധ പരിശീലനകേന്ദ്രം ഫോര്‍ട്ടുകൊച്ചി).

ഇന്‍റര്‍ സ്‌കൂള്‍ ബാസ്‌കറ്റ്‌ബോള്‍: ക്വാര്‍ട്ടര്‍, സെമി മത്സരങ്ങള്‍ ഇന്ന്

കൊച്ചി: രാജഗിരി ഫ്‌ളഡ്‌ലിറ്റ് ഇന്‍ഡോര്‍ സ്‌റ്റേഡിയത്തില്‍ നടക്കുന്ന 38ാമത് ഫാ.ഫ്രാന്‍സിസ് സാലസ് ട്രോഫി സൗത്ത് ഇന്ത്യ ഇന്‍റര്‍ സ്‌കൂള്‍ ബാസ്‌കറ്റ്‌ബോള്‍ ടൂര്‍ണമെന്‍റിന്‍റെ ക്വാര്‍ട്ടര്‍, സെമി ഫൈനല്‍ മത്സരങ്ങള്‍ ഇന്ന് നടക്കും. ക്വാര്‍ട്ടര്‍ മത്സരങ്ങള്‍ രാവിലെയും സെമി ഫൈനല്‍ വൈകുന്നേരവുമാണ്. രണ്ടാംദിനമായ ഇന്നലെ ലീഗ് മത്സരങ്ങള്‍ അവസാനിക്കുമ്പോള്‍, ആണ്‍കുട്ടികളുടെ വിഭാഗത്തില്‍ ആതിഥേയരായ കളമശേരി രാജഗിരി സ്‌കൂളിനൊപ്പം മാന്നാനം സെന്‍റ് എഫ്രേംസ് എച്ച്എസ്എസ്, കുന്നംകുളം ഗവ. മോഡല്‍ ബോയ്‌സ് എച്ച്എസ്എസ്, തിരുവനന്തപുരം സെന്‍റ് ജോസഫ്‌സ് എച്ച്എസ്എസ്, തൂത്തുക്കുടി ക്രസന്‍റ് മെട്രിക് എച്ച്എസ്എസ്, പുളിക്കുന്നം സെന്‍റ് ജോസഫ്‌സ് എച്ച്എസ്എസ്, കോഴിക്കോട് സില്‍വര്‍ ഹില്‍ എച്ച്എസ്എസ്, കോട്ടയം ഗിരിദീപം ബഥനി എന്നീ ടീമുകൾ നോക്ക് ഔട്ട് റൗണ്ടില്‍ പ്രവേശിച്ചു. പെണ്‍കുട്ടികളുടെ വിഭാഗത്തില്‍ കോഴിക്കോട് പ്രോവിഡന്‍സ് എച്ച്എസ്എസ്, കോട്ടയം മൗണ്ട് കാര്‍മല്‍ എച്ച്എസ്എസ്, തൂത്തുക്കുടി ഹോളിക്രോസ് എച്ച്എസ്എസ്, പത്തനാപുരം മൗണ്ട് താബോര്‍ എച്ച്എസ്എസ്, ആലപ്പുഴ ജ്യോതിനികേതന്‍, കൊല്ലം എസ്എന്‍ ട്രസ്റ്റ് എച്ച്എസ്എസ് എന്നിവര്‍ അവസാന ആറില്‍ ഇടംനേടി. പെണ്‍കുട്ടികളില്‍ മൂന്ന് ഗ്രൂപ്പുകള്‍ മാത്രമുള്ളതിനാല്‍ ഗ്രൂപ്പ് എയില്‍ നിന്നും ഗ്രൂപ്പ് ബിയില്‍ നിന്നും ഒന്നാം സ്ഥാനത്തുള്ള ടീം നേരിട്ട് സെമി ഫൈനലിലേക്ക് യോഗ്യത നേടും.

ചുഴലിക്കാറ്റ്: കറുകുറ്റി, മൂക്കന്നൂർ പഞ്ചായത്തുകളിൽ വ്യാപകനാശം

അങ്കമാലി: അങ്കമാലിയില്‍ ഇന്നലെ രാവിലെ അപ്രതീക്ഷിതമായി ആഞ്ഞടിച്ച ചുഴലിക്കാറ്റില്‍ വ്യാപകനാശം. കറുകുറ്റി, മൂക്കന്നൂര്‍ പഞ്ചായത്തുകളിലെ വിവിധ പ്രദേശങ്ങളിലാണ് നാശനഷ്ടമുണ്ടായത്. വ്യാപക കൃഷിനാശത്തിനു പുറമെ, മരങ്ങള്‍ കടപുഴകി വീണ് നിരവധി വീടുകള്‍ക്ക് നാശനഷ്ടവും സംഭവിച്ചു. ഏകദേശം നാലു കിലോമീറ്റര്‍ ചുറ്റളവിലായിരുന്നു ചുഴലിക്കാറ്റ് സംഹാരതാണ്ഡവമാടിയത്. കാറ്റിന്‍റെ തീവ്രത നാട്ടുകാരെ ഭീതിയിലാക്കി. കറുകുറ്റി പഞ്ചായത്തിലെ 13,14 വാര്‍ഡുകളിലും മൂക്കന്നൂര്‍ പഞ്ചായത്തിലെ എട്ടാം വാര്‍ഡിലുമാണ് കൂടുതലായും നാശനഷ്ടങ്ങള്‍ സംഭവിച്ചത്. ജാതി, തേക്ക്, മാവ്, പ്ലാവ്, വാഴകള്‍ തുടങ്ങിയവ നിലംപതിച്ചു. വീടുകളുടെയും സ്ഥാപനങ്ങളുടെയും ആസ്ബസ്‌റ്റോസ്, ഇരുമ്പ് ഷീറ്റുകൾ കാറ്റിൽ പറന്നു. വൈദ്യുതി പോസ്റ്റുകളും ലൈനുകളും തകര്‍ന്നു. തകരാറിലായ മേഖലയിലെ വൈദ്യുതിബന്ധം രാത്രിയോടെയാണ് പുന:സ്ഥാപിച്ചത്. റോഡുകളിലേക്ക് മരംവീണ് ചിലയിടങ്ങളിൽ വാഹന ഗതാഗതം തടസപ്പെട്ടു. മൂക്കന്നൂര്‍ കൈപ്രമ്പാട്ട് ദേവസിയുടെ പറമ്പിലെ പുളിമരം വീണ് വീട്ടിലെ തൊഴുത്ത് പൂര്‍ണമായും തകര്‍ന്നു. തേക്ക് കടപുഴകി വീണ് ദേവസിയുടെ മതിലും തകര്‍ന്നു. വീടിന്‍റെ സണ്‍ഷൈഡിന് പൊട്ടലും സംഭവിച്ചു. ഏഴാം വാര്‍ഡില്‍ കണ്ണന്താനത്ത് പ്രശാന്തിന്‍റെ വീടിന് മുകളില്‍ വന്‍ മരം കടുപുഴകി വീണു. വെട്ടിക്ക റോജിയുടെ തേക്ക്, ജാതി തുടങ്ങിയ മരങ്ങളും നിലംപൊത്തി. ചുഴലിക്കാറ്റ് നാശം വിതച്ച പ്രദേശങ്ങള്‍ ത്രിതല പഞ്ചായത്ത് ജനപ്രതിനിധികളും ഉദ്യോഗസ്ഥരും സന്ദർശിച്ച് നാശനഷ്ടം വിലയിരുത്തി. നഷ്ടപരിഹാരം നൽകണമെന്ന് റോജി എം. ജോണ്‍ എംഎൽഎ അങ്കമാലി: നിയോജകമണ്ഡലത്തിലെ കറുകുറ്റി, മൂക്കന്നൂര്‍ പഞ്ചായത്തകളില്‍ ആഞ്ഞടിച്ച ചുഴലിക്കാറ്റില്‍ നിരവധി വീടുകള്‍ക്കും സ്ഥാപനങ്ങള്‍ക്കും നാശനഷ്ടങ്ങള്‍ സംഭവിക്കുകയും വ്യാപകമായ കൃഷി നാശം ഉണ്ടാവുകയും ചെയ്തിട്ടുണ്ടെന്നും അർഹമായ ജനങ്ങള്‍ക്ക് നഷ്ടപരിഹാരം നല്‍കണമെന്നും റോജി എം.ജോണ്‍ എംഎല്‍എ മുഖ്യമന്ത്രിയോട് ആവശ്യപ്പെട്ടു. നാശനഷ്ടം സംഭവിച്ച പ്രദേശങ്ങള്‍ ജനപ്രതിനിധികളോടൊപ്പം സന്ദര്‍ശിച്ചെന്നും ജനങ്ങള്‍ക്കുണ്ടായ പ്രയാസങ്ങള്‍ നേരിട്ട് മനസിലായെന്നും എംഎല്‍എ അറിയിച്ചു.

അഞ്ചാംക്ലാസുകാരനെ ഇരുട്ടുമുറിയില്‍ ഇരുത്തിയ സംഭവം: റിപ്പോര്‍ട്ട് കിട്ടിയാല്‍ ഉടൻ നടപടി: മന്ത്രി ശിവന്‍കുട്ടി

കാക്കനാട്: വൈകിയെത്തിയെന്ന കുറ്റത്തിന് അഞ്ചാം ക്ലാസുകാരനെ ഗ്രൗണ്ടില്‍ രണ്ടുവട്ടം ഓടിക്കുകയും ഇരുട്ടു മുറിയില്‍ ഒറ്റയ്ക്കിരുത്തുകയും ചെയ്‌തെന്ന രക്ഷിതാക്കളുടെ പരാതിയില്‍ ഇടപെട്ട് വിദ്യാഭ്യാസമന്ത്രി വി.ശിവന്‍കുട്ടി. കുട്ടിയുടെ ടിസി വാങ്ങേണ്ട കാര്യമില്ലെന്നും പരാതിയില്‍ കഴമ്പുണ്ടെങ്കില്‍ സ്‌കൂള്‍ അധികൃതര്‍ക്കെതിരെ കര്‍ശന നടപടി ഉണ്ടാകുമെന്നും മന്ത്രി ഉറപ്പു നല്‍കി. തൃക്കാക്കര മോഡല്‍ എന്‍ജിനിയറിംഗ് കോളജിനു സമീപമുള്ള കൊച്ചിന്‍ പബ്ലിക് സ്‌കൂളിലാണ് അഞ്ചാം ക്ലാസ് വിദ്യാര്‍ഥിക്ക് അധികൃതരില്‍ നിന്നും മാനസിക പീഡനം ഏല്‍ക്കേണ്ടി വന്നതായി പരാതി ഉയര്‍ന്നത്. സ്‌കൂള്‍ ബസിന് അമിതനിരക്ക് ഈടാക്കുന്നതിനാല്‍ കുട്ടിയെ മുത്തച്ഛനാണ് പതിവായി സ്‌കൂളില്‍ എത്തിച്ചിരുന്നത്. ചില ദിവസങ്ങളില്‍ അല്പം വൈകാറുമുണ്ടെന്ന് രക്ഷിതാക്കള്‍ പറഞ്ഞു. സ്‌കൂള്‍ ബസിലെ യാത്ര ഒഴിവാക്കിയതിന്‍റെ പകയാണ് കുട്ടിയെ മാനസിക പീഡനത്തിനിരയാക്കിയതെന്നാണ് രക്ഷിതാക്കളുടെ ആരോപണം. പരാതിയുമായി ചെന്ന കുട്ടിയുടെ പിതാവിനോട് സ്‌കൂള്‍ അധികൃതര്‍ മോശമായി സംസാരിക്കുകയും സ്‌കൂളില്‍നിന്ന് കുട്ടിയുടെ ടിസിയും വാങ്ങി പോകാന്‍ നിര്‍ദേശിക്കുകയും ചെയ്തതായി കുട്ടിയുടെ പിതാവ് മന്ത്രിയെ ഫോണില്‍ ധരിപ്പിക്കുകയായിരുന്നു. തുടര്‍ന്നാണ് സ്‌കൂളിനെതിരെ നടപടി സ്വീകരിക്കുമെന്ന് മന്ത്രി വ്യക്തമാക്കിയത്.വിശദമായ റിപ്പോര്‍ട്ടു സമര്‍പ്പിക്കാന്‍ ജില്ലാ വിദ്യാഭ്യാസ ഉപഡയറക്ടര്‍ക്ക് മന്ത്രി നിര്‍ദേശവും നല്‍കി. ആരോപണം നിഷേധിച്ച് സ്കൂൾ അധികൃതർ അതേസമയം ആരോപണം നിഷേധിച്ച് സ്കൂൾ അധികൃതർ രംഗത്തുവന്നു. വിദ്യാര്‍ഥിയുടെ രക്ഷിതാവിന്‍റെ പരാതിയില്‍ കഴമ്പില്ലെന്നും പതിവായി വൈകിവരുന്ന കുട്ടികള്‍ക്ക് രാവിലെ എട്ടരയ്ക്ക് തുടങ്ങുന്ന യോഗാ ക്ലാസുകളിലും വാം അപ്പിലും പങ്കെടുക്കാന്‍ കഴിയാത്തതിനാല്‍ അവര്‍ക്ക് പിന്നീട് പരിശീലനം നല്‍കുന്നതിന്‍റെ ഭാഗമായാണ് ഈ കുട്ടിയെയും മൈതാനത്ത് ഓടിച്ചതെന്നും ഇരുട്ടു മുറിയിലല്,ല വെളിച്ചമുള്ള മുറിയിലാണ് വിദ്യാര്‍ഥിയെ ഇരുത്തിയതെന്നും സ്‌കൂള്‍ മാനേജര്‍ പറഞ്ഞു. ക്ലാസ് ആരംഭിക്കുമ്പോഴാണ് മുറികളിലേക്കുള്ള വൈദ്യുതിബന്ധം പുനസ്ഥാപിക്കുന്നതെന്നും മാനേജര്‍ ഡോ.സക്കീര്‍ ഹുസൈന്‍ അറിയിച്ചു

ട്രെയിൻ തട്ടി യുവാവ് മരിച്ചനിലയിൽ

ഫോർട്ടുകൊച്ചി: ട്രെയിൻ തട്ടി യുവാവിനെ മരിച്ചനിലയിൽ കണ്ടെത്തി. ഫോർട്ടുകൊച്ചി പട്ടാളം ഇഎസ് ഐആശുപത്രിക്കു സമീപം താമസിക്കുന്ന കടവത്ത് വീട്ടിൽ കെ.എ. നിസാറിന്‍റെ (കെഎസ്ഇബി) മകൻ കെ.എൻ. ഉമർ ഫാറൂഖ് (26) ആണ് മരിച്ചത്. ബുധനാഴ്ച രാത്രി പത്തരയോടെ കുമ്പളം അരൂർ മേൽപ്പാലത്തിനു സമീപം റെയിൽപ്പാളത്തിലാണ് മൃതദേഹം കണ്ടെത്തിയത്.മാതാവ്: സുജ മോൾ. സഹോദരങ്ങൾ: ഫൈസി, ഫർദ്ദീൻ.

വാഹനാപകടത്തിൽ യുവാവ് മരിച്ചു

മൂവാറ്റുപുഴ: കാലാമ്പൂര് ആയവന പാലത്തിൽ ഓട്ടോ മറിഞ്ഞ്, അതിനടിയിൽപ്പെട്ട യുവാവ് മരിച്ചു. തൃക്ക അമ്പലത്തിനടുത്ത് താമസിക്കുന്ന മരങ്ങാട്ടിൽ വീട്ടിൽ പരേതനായ ഭാസ്കരന്‍റെ മകൻ ദിനേശൻ (54) ആണ് മരിച്ചത്. ഓട്ടോയുടെ അടിയിൽപ്പെട്ടു കിടന്ന യുവാവിനെ സമീപവാസികൾ മറ്റൊരു വാഹനത്തിൽ കയറ്റി ആശുപത്രിയിൽ എത്തിക്കുകയായിരുന്നു. പ്രത്യക്ഷത്തിൽ മുറിവുകളോ രക്തസ്രാവമോ ഉണ്ടായിരുന്നില്ലെങ്കിലും പിന്നീട് ആരോഗ്യനില വഷളായി മരണം സംഭവിക്കുകയായിരുന്നു. ചൊവ്വാഴ്‌ച രാത്രി 10 ഓടെയായിരുന്നു അപകടം. ബുധനാഴ്‌ച രാത്രിയാണ് മരണം സംഭവിച്ചത്. മൂവാറ്റുപുഴ വൺവേ ജംഗ്ഷനിൽ വർക്‌ഷോപ്പ് നടത്തുകയാണ് അവിവാഹിതനായ ദിനേഷൻ. സംസ്‌കാരം ഇന്ന്.

കച്ചേരിത്താഴത്തെ ഗര്‍ത്തം: ഹൈവേ റിസര്‍ച്ച് ഇന്‍സ്റ്റിറ്റ്യൂട്ട് ഉദ്യോഗസ്ഥരും സ്ഥലം സന്ദര്‍ശിക്കും

മൂവാറ്റുപുഴ: എംസി റോഡില്‍ കച്ചേരിത്താഴത്ത് ഗര്‍ത്തം രൂപപ്പെട്ട സാഹചര്യത്തില്‍ കൂടുതല്‍ പഠനത്തിനായി കേരള ഹൈവേ റിസര്‍ച്ച് ഇന്‍സ്റ്റിറ്റ്യൂട്ടിലെ ഉദ്യോഗസ്ഥര്‍ സ്ഥലം സന്ദര്‍ശിക്കും. തിങ്കളാഴ്ച രാവിലെയാണ് കച്ചേരിത്താഴം വലിയ പാലത്തിനോട് ചേര്‍ന്ന് ഗര്‍ത്തം രൂപപ്പെട്ടത്. മൂന്നു വര്‍ഷം മുമ്പും ഇതേ സ്ഥലത്ത് ഗര്‍ത്തം രൂപപ്പെട്ടിരുന്നു. മണ്ണിട്ട് നികത്തി റോഡ് ടാര്‍ ചെയ്ത് പൂര്‍വ സ്ഥിതിയിലാക്കിയ ഭാഗമാണ് ഇപ്പോള്‍ ഇടിഞ്ഞ് താഴ്ന്നിരിക്കുന്നത്. മണ്ണിനടിയിലെ ഓടയുടെ സ്ലാബിന് തകരാര്‍ സംഭവിച്ചതോടെ ഇതുവഴി മണ്ണ് ഒലിച്ച് സമീപത്തെ പുഴയിലേയ്ക്ക് പോയതാണ് ഗര്‍ത്തം രൂപപ്പെടാന്‍ കാരണമായതായി അധികൃതര്‍ പറയുന്നത്. പുതിയ സ്ലാബ് കോണ്‍ക്രീറ്റ് ചെയ്തശേഷം അതിനു മുകളില്‍ മണ്ണിട്ട് നികത്തി റോഡ് ടാറിംഗ് ചെയ്യേണ്ടതുണ്ട്. ഇതിന് കാലതാമസമെടുക്കും. അതിനാല്‍ എളുപ്പമാര്‍ഗത്തേക്കുറിച്ച് അധികൃതര്‍ ആലോചിച്ചുവരികയാണ്. ഇതിനു പുറമെ ഗര്‍ത്തത്തിന്‍റെ അരിക് ഇടിഞ്ഞുകൊണ്ടിരിക്കുന്നതും മറ്റൊരു വെല്ലുവിളിയായിരിക്കുകയാണ്. കെആര്‍എഫ്ബി സൂപ്രണ്ടിംഗ് എന്‍ജിനീയറടക്കമുള്ള ഉന്നത ഉദ്യോഗസ്ഥര്‍ സ്ഥലത്തെത്തിയിട്ടുണ്ട്. തിരക്കേറിയ പാലത്തിനോട് ചേര്‍ന്ന് ഗര്‍ത്തം രൂപപ്പെട്ടിരിക്കുന്നതിനാല്‍ ഇതുവഴിയുള്ള ഗതാഗത നിയന്ത്രണവും ഏര്‍പ്പെടുത്തിയിട്ടുണ്ട്.

നിര്‍മല കോളജിന് ഐഎസ്ഒ സര്‍ട്ടിഫിക്കേഷന്‍

മൂവാറ്റുപുഴ: പരിസ്ഥിതി സംരക്ഷണത്തില്‍ മൂവാറ്റുപുഴ നിര്‍മല കോളജിന് ഐഎസ്ഒ ഗ്രീന്‍ ഓഡിറ്റ് സര്‍ട്ടിഫിക്കേഷന്‍. ഐഎസ്ഒ അക്രഡിറ്റഡ് സ്ഥാപനമായ ട്രോപ്പിക്കല്‍ ഇന്‍സ്റ്റിറ്റ്യൂട്ട് ഓഫ് ഇക്കോളജിക്കല്‍ സയന്‍സ് നടത്തിയ ഓഡിറ്റിന്‍റെ അടിസ്ഥാനത്തിലാണ് നിര്‍മല കോളജിന് സര്‍ട്ടിഫിക്കേഷന്‍ ലഭിച്ചത്. കോളജ് ഓഡിറ്റോറിയത്തില്‍ സംഘടിപ്പിച്ച സര്‍ട്ടിഫിക്കറ്റ് ദാന ചടങ്ങില്‍ മാത്യു കുഴല്‍നാടന്‍ എംഎല്‍എ കോളജ് പ്രിന്‍സിപ്പല്‍ റവ.ഡോ ജസ്റ്റിന്‍ കെ. കുര്യാക്കോസിന് സര്‍ട്ടിഫിക്കറ്റ് കൈമാറി. ഊര്‍ജം, ജലം, പരിസ്ഥിതി തുടങ്ങി ആറ് മേഖലകളെ ഉള്‍ക്കൊള്ളിച്ച് നടത്തിയ ആറ് മാസം നീണ്ടു നിന്ന ഓഡിറ്റിന് ശേഷമാണ് കോളജിന്‍റെ ഈ നേട്ടം. കോളജ് മാനേജര്‍ മോണ്‍. പയസ് മലേക്കണ്ടത്തില്‍, കോളജ് ബര്‍സാര്‍ ഫാ. പോള്‍ കളത്തൂര്‍, വൈസ് പ്രിന്‍സിപ്പല്‍മാരായ ഡോ. സോണി കുര്യാക്കോസ്, ഡോ. ജിജി കെ. ജോസഫ്, കോ-ഓര്‍ഡിനേറ്റര്‍മാരായ ലിന്‍സി ടോം, ഡിനു അലക്സാണ്ടര്‍, ജി.ആര്‍. ശ്രീജ എന്നിവര്‍ ചടങ്ങില്‍ പങ്കെടുത്തു.

ഓണ്‍ലൈന്‍ മദ്യവില്പന നീക്കം ഉപേക്ഷിക്കണം: മദ്യവിരുദ്ധസമിതി കോതമംഗലം രൂപത കമ്മിറ്റി

കോതമംഗലം: ഓണ്‍ലൈന്‍ വില്പനയിലൂടെ മദ്യം വീട്ടിലെത്തിച്ച് കുടുംബങ്ങളുടെ സമാധാനം തകര്‍ക്കാനുള്ള നീക്കം ഉപേക്ഷിക്കണമെന്ന് കെസിബിസി മദ്യവിരുദ്ധ സമിതി കോതമംഗലം രൂപത കമ്മിറ്റി. മദ്യശാലകളിലെ തിരക്ക് കുറയ്ക്കാന്‍ എന്ന വ്യാജേന വീടുകളില്‍ മദ്യമെത്തിച്ച് കുടുംബങ്ങളെകൂടി മദ്യത്തില്‍ മുക്കിക്കൊല്ലാനുള്ള നീക്കത്തില്‍ സമിതി പ്രതിഷേധിച്ചു. കുടുംബജീവിതത്തില്‍ വലിയ പ്രതിസന്ധികള്‍ ഉണ്ടാക്കാന്‍ ഇത് കാരണമാകും. കുടുംബകലഹത്തിനും അക്രമത്തിനും കാരണമാകുന്ന നടപടിയില്‍നിന്ന് സർക്കാർ പിന്തിരിയണമെന്ന് ആവശ്യപ്പെട്ടു. സര്‍ക്കാരിന്‍റെ മദ്യനയത്തിലെ ഏറ്റവും നിന്ദ്യവും മനുഷ്യത്വരഹിതവുമായ ഭീകരമുഖമാണ് ഈ നീക്കത്തിലൂടെ ഒരിക്കല്‍ കൂടി മറനീക്കി പുറത്തുവരുന്നതെന്ന് സമിതി ചൂണ്ടിക്കാട്ടി. മദ്യത്തിന്‍റെ ഉപയോഗവും ലഭ്യതയും പടിപടിയായി കുറച്ചു കൊണ്ടുവരുമെന്ന തെരഞ്ഞെടുപ്പ് വാഗ്ദാനം നിരന്തരമായി ലംഘിച്ചുകൊണ്ട് മദ്യമുതലാളിത്ത താല്‍പര്യങ്ങളുടെ സംരക്ഷകരായി സര്‍ക്കാര്‍ അധഃപതിച്ചിരിക്കുകയാണ്. ഓണ്‍ലൈന്‍ മദ്യവില്പനയ്ക്കെതിരെ ജനകീയ പ്രതിരോധം സൃഷ്ടിക്കുമെന്നും ജനദ്രോഹമദ്യനയത്തിനെതിരെ പോരാട്ടങ്ങള്‍ സംഘടിപ്പിക്കുമെന്നും സമിതി മുന്നറിയിപ്പ് നല്‍കി. രൂപതാ പ്രസിഡന്‍റ് ജെയിംസ് കോറമ്പേല്‍ അധ്യക്ഷത വഹിച്ചു. രൂപത ഡയറക്ടര്‍ ഫാ.ജയിംസ് ഐക്കരമറ്റം ഉദ്ഘാടനം ചെയ്തു. രൂപതാ ജനറല്‍ സെക്രട്ടറി ജോണി കണ്ണാടന്‍, ജോയ്സ് മുക്കുടം, ജോബി ജോസഫ്, സെബാസ്റ്റ്യന്‍ കൊച്ചടിവാരം, ജോസ് കൈതമന, ആന്‍റണി പുല്ലന്‍, ജോയി പനയ്ക്കല്‍, പോള്‍ കൊങ്ങാടന്‍, ബിജു വെട്ടിക്കുഴ, ജോയി പടയാട്ടില്‍, ജോമോള്‍ സജി, ജോര്‍ജ് കൊടിയാറ്റ്, ഷൈനി കച്ചിറ, സിജു കൊട്ടാരത്തില്‍, മാര്‍ട്ടിന്‍ കീഴേമാടന്‍, ജോമോന്‍ ജേക്കബ്, ഏണസ്റ്റ് കെ.വി, സുനില്‍ സോമന്‍, മോന്‍സി മങ്ങാട്ട് എന്നിവര്‍ പ്രസംഗിച്ചു.

മൃതദേഹത്തോട് അനാദരവ്; വലിയ നീതി നിഷേധമെന്ന് യാക്കോബായ സഭ

പുത്തൻകുരിശ്: കട്ടച്ചിറ സെന്‍റ് മേരീസ് യാക്കോബായ സുറിയാനി പള്ളി ഇടവകാംഗമായ വ്യക്തിയുടെ മൃതദേഹം സംസ്‌കരിക്കുന്നത് തടഞ്ഞത് നീതി നിഷേധവും മനുഷ്യാവകാശ ലംഘനവുമാണെന്ന് യാക്കോബായ സഭ മീഡിയാ സെൽ ചെയർമാൻ ഡോ. കുര്യാക്കോസ് മാർ തെയോഫിലോസ് മെത്രാപ്പോലീത്ത പറഞ്ഞു. മൃതദേഹത്തോട് ഇത്തരത്തിൽ അനാദരവ് കാണിച്ച് തെറ്റായ ചിന്താഗതികളോടെ സഭാന്തരീക്ഷം കലുഷിതമാക്കുന്നത് ഒഴിവാക്കപ്പെടേണ്ടതാണ്. സെമിത്തേരി ബില്ലിലെ അവകാശങ്ങൾക്ക് തടസ്സം സൃഷ്ടിക്കാൻ അധികാരികൾ കൂട്ടു നിൽക്കരുതെന്നും സമൂഹത്തിൽ മൃതദേഹത്തോട് അനാദരവ് ആവർത്തിക്കപ്പെടരുതെന്നും മെത്രാപ്പോലീത്ത ആവശ്യപ്പെട്ടു.

മദ്യപിച്ചു പരിശോധനയ്ക്കെത്തിയ കോതമംഗലം താലൂക്ക് സപ്ലൈ ഓഫീസർക്ക് സസ്പെൻഷൻ

കോതമംഗലം: മദ്യപിച്ചു റേഷൻ കട പരിശോധനക്ക് എത്തിയ കോതമംഗലം താലൂക്ക് സപ്ലൈ ഓഫീസർ ഷിജു പി. തങ്കച്ചന് സസ്പെൻഷൻ. ജില്ല സപ്ലൈ ഓഫീസർ ബിന്ദു മോഹനന്‍റെയും കോതമംഗലം പോലീസ് ഇൻസ്പെക്ടറുടെയും റിപ്പോർട്ടിന്‍റെ അടിസ്ഥാനത്തിൽ പൊതുവിതരണ ഉപഭോക്തൃ കാര്യ കമ്മീഷണർ കെ. ഹിമ യാണ് നടപടി സ്വീകരിച്ചത്. ഇരമല്ലൂരിലെ 41 -ാം നമ്പർ കട വൈകിയാണ് തുറക്കുന്നതെന്ന് ആരോപിച്ച് നടപടിയെടുക്കാൻ എത്തിയതായിരുന്നു ഷിജു പി. തങ്കച്ചൻ. ചൊവ്വാഴ്ച്ച രാവിലെയാണ് ഇയാൾ പരിശോധനയ്ക്ക് എത്തിയത്. കട പൂട്ടാനുള്ള നടപടിക്കെതിരേ വ്യപാരികളുടെയും നാട്ടുകാരുടെയും എതിർപ്പുണ്ടാകുകയും ഇതിനിടെ ഷിജു മദ്യപിച്ചിട്ടുണ്ടെന്ന് സംശയം ഉയരുകയുമായിരുന്നു. ശാരീരിക അസാസ്ഥ്യം പ്രകടിപ്പിച്ച ഓഫീസറെ വൈദ്യ പരിശോധനക്കായി സ്വകാര്യ ആശുപത്രിയിൽ കൊണ്ടുപോകുന്നതിനിടെ ഓടുന്ന വാഹനത്തിൽനിന്നും ഇറങ്ങി ഓടാനും ശ്രമം നടത്തി. പക്ഷേ നാട്ടുകാർ ഈ ശ്രമം വിഫലമാക്കി. തുടർന്ന് സപ്ലൈ ഓഫീസറെ കോതമംഗലം പോലീസിന് കൈമാറുകയായിരുന്നു. താലൂക്ക് ആശുപത്രിയിൽ പ്രവേശിപ്പിച്ചു മെഡിക്കൽ പരിശോധനക്ക് വിധേയമാക്കിയപ്പോഴാണ് മദ്യപിച്ചിട്ടുണ്ടെന്ന് കണ്ടെത്തിയത്. ഇദേഹത്തിന്‍റെ മോശമായ ഇടപെടൽ സംബന്ധിച്ചു റേഷൻ വ്യാപാരികൾ നിരവധി തവണ മേൽ ഉദ്യോഗസ്ഥർക്ക് പരാതി നൽകിയിരുന്നതാണ്.

വിശ്വജ്യോതി കോളജ് ജൂബിലി വര്‍ഷത്തിലേക്ക്

വാഴക്കുളം: വാഴക്കുളം വിശ്വജ്യോതി എന്‍ജിനീയറിംഗ് കോളജിന്‍റെ ഒരു വര്‍ഷം നീണ്ടുനില്‍ക്കുന്ന സില്‍വര്‍ ജൂബിലി ആഘോഷങ്ങളുടെ ഉദ്ഘാടനം കോതമംഗലം ബിഷപ് മാര്‍ ജോര്‍ജ് മഠത്തിക്കണ്ടത്തില്‍ നിര്‍വഹിച്ചു. 2001 ലാണ് കോതമംഗലം രൂപതയുടെ കീഴില്‍ വിശ്വജ്യോതി എന്‍ജിനീയറിംഗ് കോളജ് പ്രവർത്തനം ആരംഭിക്കുന്നത്. നാക്, എന്‍ബിഎ അക്രഡിറ്റേഷനുകള്‍ ലഭിച്ചിട്ടുള്ള വിശ്വജ്യോതി എന്‍ജിനീയറിംഗ് കോളജിന് 2025 മുതല്‍ സ്വയംഭരണ അനുമതിയും ലഭിച്ചു. ഒരു വര്‍ഷം നീണ്ടുനില്‍ക്കുന്ന ജൂബിലി ആഘോഷങ്ങളുടെ ഭാഗമായി വിപുലമായ പൂര്‍വവിദ്യാര്‍ഥി സംഗമം, പ്രഭാഷണ പരമ്പരകള്‍, ചിത്ര പ്രദര്‍ശനം, സാങ്കേതിക പ്രദര്‍ശനങ്ങൾ, സ്‌കൂള്‍ തലത്തില്‍ സംഘടിപ്പിക്കുന്ന ശാസ്ത്ര സാങ്കേതിക മത്സരങ്ങള്‍, പ്രഫഷണല്‍ അസോസിയേഷനുകളും സൊസൈറ്റികളും സംഘടിപ്പിക്കുന്ന അക്കാദമിക് സെമിനാറുകള്‍, സില്‍വര്‍ ജൂബിലി ജോബ് ഫെയര്‍, വ്യാവസായിക സമ്മേളനങ്ങള്‍, വിവിധ തലങ്ങളിലുള്ള സ്‌കോളര്‍ഷിപ്പ് എന്‍ഡോവ്‌മെന്‍റ് ഫണ്ട്, ഡിജിറ്റല്‍ സാക്ഷരതാ പദ്ധതികള്‍, ഗ്രാമം ദത്തെടുക്കല്‍ പദ്ധതി, കലാ സാംസ്‌കാരിക പ്രദര്‍ശനങ്ങള്‍, അടിസ്ഥാന സൗകര്യ വികസനം തുടങ്ങിയ ഒട്ടനേകം പദ്ധതികളാണ് സില്‍വര്‍ ജൂബിലി ആഘോഷങ്ങളുടെ ഭാഗമായി നടപ്പാക്കുന്നതെന്ന് പ്രിന്‍സിപ്പല്‍ ഡോ. കെ.കെ. രാജന്‍ അറിയിച്ചു. രൂപതയുടെ വിദ്യാഭ്യാസ സ്ഥാപനങ്ങളുടെ മാനേജര്‍ മോണ്‍. പയസ് മലേക്കണ്ടത്തില്‍, ഉന്നതവിദ്യാഭ്യാസ സെക്രട്ടറിയും കോളജ് ഡയറക്ടറുമായ റവ.ഡോ. പോള്‍ പാറത്താഴം, ഡോ. കെ.വി തോമസ് കപ്യാരുമല, കെ.ടി മാത്യു കൊച്ചുമുട്ടം, വിവിധ വകുപ്പ് മേധാവികള്‍, പിടിഎ ഭാരവാഹികള്‍ തുടങ്ങിയവര്‍ പങ്കെടുത്തു.

പൂയംകുട്ടി പുഴയിൽ വീണ്ടും കാട്ടാനയുടെ ജഡം

കോതമംഗലം: പൂയംകുട്ടി പുഴയിൽ വീണ്ടും കാട്ടാനയുടെ ജഡം കണ്ടെത്തി. പീണ്ടിമേട് കുത്തിനടുത്ത് ചെല്ലാട്ടള ഭാഗത്തു പാറക്കെട്ടിലാണു ജഡം കണ്ടത്. 20 വയസുള്ള പിടിയാനയുടെ ജഡത്തിന് ഒരാഴ്ചയിലധികം പഴക്കമുണ്ട്. മലവെള്ളപ്പാച്ചിലിൽ പീണ്ടിമേട് കുത്തിൽപെട്ടു ചരിഞ്ഞതാകുമെന്നാണു വനപാലകരുടെ നിഗമനം. പോസ്റ്റ്മോർട്ടം നടത്തി സംസ്‌കരിച്ചു. കഴിഞ്ഞ ആഴ്ച പിടിയാനയുടെയും കൊമ്പന്‍റെയും ജഡം പുഴയിലെ മണികണ്ഠൻചാൽ ഭാഗത്തു കണ്ടെത്തിയിരുന്നു. ഈ ആനയും ആ സമയത്തു തന്നെ ഒരുമിച്ച് അപകടത്തിൽ പെട്ട് ചരിഞ്ഞതാകാമെന്നാണ് കരുതുന്നത്.

കിണറ്റിൽ വീണ പശുവിനെ രക്ഷപെടുത്തി

കോലഞ്ചേരി: കിണറ്റിൽ വീണ പശുവിനെ അഗ്നിരക്ഷാസേന രക്ഷപെടുത്തി. പൂതൃക്ക ഞാറതടത്തിൽ പൗലോസിന്‍റെ പശുവാണ് കിണറിൽ അകപ്പെട്ടത്. ഉദ്ദേശം 25 അടി താഴ്ചയും 10 അടി വെള്ളമുള്ള കിണറ്റിൽ ഇന്നലെ വൈകിട്ട് നാലോടെ പശു വീഴുകയായിരുന്നു. പട്ടിമറ്റം അഗ്നി രക്ഷാനിലയം സ്റ്റേഷൻ ഓഫീസർ എൻ.എച്ച്. അസൈനാരുടെ നേതൃതത്തിൽ സേനാംഗങ്ങളായ, കെ.കെ. ശ്യാംജി, എ.എം. സനൂപ് , വി.ജി. വിജിത്ത്കുമാർ, ആർ. ഷുഹൈബ്, ഷബീർ, രാമചന്ദ്രൻ നായർ, എന്നിവരും നാട്ടുകാരും ചേർന്ന് പശുവിനെ സുരക്ഷിതമായി കിണറ്റിൽ നിന്നും രക്ഷിച്ചു.

മുളക്കുളത്ത് മൂന്നുപേർക്ക് തെരുവു നായയുടെ കടിയേറ്റു

പിറവം: കോട്ടയം റോഡിൽ മുളക്കുളം കരിങ്കൽച്ചിറ ഭാഗത്ത് മൂന്നു പേർക്ക് തെരുവു നായയുടെ കടിയേറ്റു. പ്രദേശവാസികളായ ഇലവുന്താട്ടിൽ നാരായണൻ നായർ (70), പുത്തേത്ത് ബേബി ആൻഡ്രൂസ് (55), കൊമ്പനമാല സ്വദേശി ബേബി (54) എന്നിവർക്കാണ് കടിയേറ്റത്. ഇന്നലെ രാവിലെയാണ് സംഭവമുണ്ടായത്. ബേബി ആൻഡ്രൂസ് രാവിലെ പാൽ വാങ്ങാനിറങ്ങിയപ്പോഴാണ് നായയുടെ ആക്രമണമുണ്ടായത്. അധികം വൈകാതെ മുളക്കുളം പളളിപ്പടിയിൽ വെച്ചാണ് നാരായണൻ നായർക്ക് തെരുവ് നായയുടെ കടിയേറ്റത്. കൊമ്പനമാല ബേബി കരിങ്കൽച്ചിറ ഭാഗത്ത് ജോലിക്കെത്തിയതായിരുന്നു. ഇവിടെ ഒരു എരുമയ്ക്കും കടിയേറ്റിട്ടുണ്ട്. നാട്ടുകാർ സംഘടിച്ച് നായയെ തിരഞ്ഞിറങ്ങിയെങ്കിലും കണ്ടെത്താനായിട്ടില്ല. ഉച്ച കഴിഞ്ഞ് കരിങ്കൽച്ചിറ ഭാഗത്ത് വീണ്ടും തെരുവ് നായയുടെ ആക്രമണമുണ്ടായി. ഇരുചക്ര വാഹനങ്ങളിൽ പോയവർക്ക് പിന്നാലെ നായ പഞ്ഞു ചെന്നു. കടിയേറ്റവർ പിറവം താലൂക്ക് ആശുപത്രിയിൽ പ്രാഥമിക ചികിത്സയ്ക്ക് ശേഷം മൂവാറ്റുപുഴ താലൂക്ക് ആശുപത്രിയിൽ ചികിത്സക്കെത്തി. പ്രദേശത്തിപ്പോൾ തെരുവ് നായ്ക്കളുടെ ശല്യം രൂക്ഷമായിരിക്കുകയാണ്.

ഗോശ്രീ പാലം അറ്റകുറ്റപ്പണികൾ വൈകിയാൽ ടോൾ പിരിവ് തടയും

വൈപ്പിൻ: ഗോശ്രീ മേൽപ്പാലത്തിന്‍റെ അറ്റകുറ്റപ്പണികൾ അനന്തമായി നീളുകയാണെങ്കിൽ മുളവുകാട് ടോൾ കേന്ദ്രത്തിലെ ടോൾപിരിവ് തടയുന്നതടക്കമുള്ള സമരങ്ങൾക്ക് നേതൃത്വം നൽകുമെന്നും സിപിഐ വൈപ്പിൻ മണ്ഡലം കമ്മിറ്റി മുന്നറിയിപ്പ് നൽകി. തിരക്കേറുന്ന സമയത്ത് കണ്ടെയ്നർ സർവീസുകൾക്ക് നിയന്ത്രണം ഉറപ്പുവരുത്താനും ഒന്നാം പാലത്തിന്‍റെ ശോച്യാവസ്ഥ പരിഹരിക്കാനും അധികൃതർ സത്വര നടപടികൾ സ്വീകരിക്കണമെന്നും സിപിഐ ആവശ്യപ്പെട്ടു.

ഓട്ടോ ഡ്രൈവറുടെ ജീവൻ രക്ഷിച്ച എംവിഐയെ ആദരിച്ചു

ആലുവ: സിപിആർ നൽകി ഓട്ടോ ഡ്രൈവറുടെ ജീവൻ രക്ഷിച്ച എംവിഐ കെ.എസ്. സജിനെ തൃണമൂൽ കോൺഗ്രസ് ആലുവ നിയോജക മണ്ഡലം കമ്മിറ്റി ആദരിച്ചു. തൃണമൂൽ കോൺഗ്രസ് ജില്ലാ പ്രസിഡന്‍റ് ഡൊമിനിക് കാവുങ്കൽ, നിയോജക മണ്ഡലം പ്രസിഡന്‍റ് ഗഫൂർ എളമന എന്നിവരുടെ നേതൃത്വത്തിലായിരുന്നു ആദരിച്ചത്. ആലുവ സിവിൽ സ്റ്റേഷനിലെ പഴയ ലിഫ്റ്റ് മാറ്റി പുതിയ ലിഫ്റ്റിന്‍റെ പ്രവർത്തനങ്ങൾ ആരംഭിക്കാനുള്ള നടപടികൾ സ്വീകരിക്കണമെന്ന് ആവശ്യപെട്ട് ജില്ലാ കളക്ടർക്ക് തൃണമൂൽ കോൺഗ്രസ് ആലുവ നിയോജക മണ്ഡലം കമ്മിറ്റി നിവേദനം നൽകി.

അന്ധവിദ്യാലയത്തിലെ മിടുക്കന്മാർക്ക് സമ്മാനമായി ലാപ്ടോപ്പുകൾ

ആലുവ: കീഴ്മാട് അന്ധവിദ്യാലയത്തിലെ കുട്ടികൾക്ക് സ്വാതന്ത്ര്യദിന സമ്മാനമായി എംപിയുടെ മൂന്ന് ലാപ്ടോപ്പുകൾ ലഭിച്ചു. ഒപ്പമുണ്ട് എംപി എന്ന ബെന്നി ബെഹനാൻ എംപിയുടെ പദ്ധതിയുടെ ഭാഗമായാണ് ആലുവ സ്കൂൾ ഫോർ ദി ബ്ലൈൻഡിലെ കുട്ടികൾക്ക് കാഴ്ചപരിമിതർക്ക് ഉപയോഗിക്കാൻ കഴിയുന്ന സ്ക്രീൻ റീഡിംഗ് സോഫ്റ്റ് വെയറുകൾ ഉള്ള ലാപ്ടോപ്പുകൾ സമ്മാനിച്ചത്. അൻവർ സാദത്ത് എംഎൽഎ, ആലുവ മുൻസിപ്പൽ ചെയർമാൻ എം.ഒ. ജോൺ, കീഴ്മാട് സർവീസ് സഹകരണ ബാങ്ക് പ്രസിഡന്‍റ് മുജീബ്, പ്രധാനാധ്യാപിക ജിജി വർഗീസ്, സ്കൂൾ ലീഡർ എ. മുഹമ്മദ് എന്നിവർ പ്രസംഗിച്ചു.

പ്രതിഷേധം ശക്തമായി: ആലുവ സിവിൽ സ്റ്റേഷനിലെ ലിഫ്റ്റ് പ്രവർത്തനക്ഷമമാക്കി

ആലുവ : പ്രതിഷേധം ശക്തമായതോടെ ആലുവ സിവിൽ സ്റ്റേഷനിലെ ലിഫ്റ്റ് അറ്റകുറ്റപ്പണി നടത്തി പ്രവർത്തന ക്ഷമമാക്കി. നിരവധിപേർ ലിഫ്റ്റിൽ കുടുങ്ങുകയും പടികൾ കയറി മൂന്നാം നിലയിൽ എത്തിയ ഓട്ടോ ഡ്രൈവർക്ക് ശാരീരികസാസ്ഥ്യം ഉണ്ടാവുകയും ചെയ്തതോടെയാണ് അധികൃതർ അടിയന്തര നടപടി എടുത്തത്. പുതിയ ലിഫ്റ്റ് സ്ഥാപിക്കാനായി ആലുവ എംഎൽഎ അൻവർ സാദത്ത് 10 ലക്ഷം രൂപ അനുവദിച്ചിട്ട് വർഷങ്ങൾ കഴിഞ്ഞു. ചുമതലയുള്ള ചാലക്കുടിയിലെ പൊതുമരാമത്ത് എൻജിനീയറിംഗ് വിഭാഗം വിഷയം ഗൗരവത്തിൽ എടുക്കുന്നില്ലെന്നാണ് ഉദ്യോഗസ്ഥരുടേയും പരാതി. കഴിഞ്ഞ ദിവസം മൂന്നാം നിലയിലെ ആലുവ ജോയിന്‍റ് ആർടി ഓഫീസിൽ എത്തിയ ചൂർണിക്കര പഞ്ചായത്തിലെ കുന്നന്നേരി മാന്ത്രയ്ക്കൽ സ്വദേശിയായ ഹൈദ്രോസ് കുഴഞ്ഞു വീണു. ആലുവ ജോയിന്‍റ് ആർടി ഓഫീസിലെ എംവിഐ കെ.എസ്. സജിൻ സിപിആർ നൽകിയാണ് ജീവൻ രക്ഷിച്ചത്. ലിഫ്റ്റിൽ കയറി കുടുങ്ങിയവരെ ഫയർ ഫോഴ്സ് എത്തിയാണ് പലപ്പോഴും രക്ഷിക്കുന്നത്. ഭിന്നശേഷിയുള്ളവരും വയോധികരുമാണ് ലിഫ്റ്റ് ഇടയ്ക്കിടെ കേടാവുന്നതിനാൽ ഏറെ കഷ്ടപ്പെടുന്നത്. എംപ്ലോയ്‌മെന്‍റ് എക്‌ചേഞ്ച്, താലൂക്ക് ഓഫീസ് തുടങ്ങിയവയും മുകളിലെ നിലയിലാണ് പ്രവർത്തിക്കുന്നത്.

ബസ്‌സ്റ്റോപ്പിലേക്ക് കെഎസ്ആർടിസി ബസ് ഇടിച്ചു കയറി

ഉദയംപേരൂർ: ഉദയംപേരൂർ കൊച്ചുപള്ളിയിലെ ബസ് സ്റ്റോപ്പിലേയ്ക്ക് കെഎസ്ആർടിസി ബസ് ഇടിച്ചു കയറി. ഇവിടെയുണ്ടായിരുന്നവർ ഓടി മാറിയതിനാൽ വൻ ദുരന്തമൊഴിവായി. തൃപ്പൂണിത്തുറ-വൈക്കം റൂട്ടിൽ ഇന്നലെ രാവിലെ 11.30 ഓടെയായിരുന്നു അപകടം. തിരുവല്ലയിൽ നിന്നും എറണാകുളത്തേയ്ക്ക് പോയ ബസാണ് അപകടത്തിൽപ്പെട്ടത്. ബ്രേക്ക് കിട്ടാതിരുന്നതാണ് അപകടത്തിന് കാരണമെന്നും അറ്റകുറ്റപ്പണി കഴിഞ്ഞ് കിടന്ന ബസ് എടുത്തപ്പോൾ സ്റ്റിയറിംഗിന് വെട്ടലും ബ്രേക്കും കുറവുണ്ടായിരുന്നതായും ബസ് ജീവനക്കാരൻ പറഞ്ഞു. തൃപ്പൂണിത്തുറയിൽ നിന്നെത്തിയ അഗ്നിരക്ഷാ സേനാംഗങ്ങൾ മറിഞ്ഞ് വീണ ബസ് കാത്തിരിപ്പ് കേന്ദ്രം മുറിച്ചു നീക്കി.

കെവിഎസ് യൂത്ത് പാർലമെന്‍റ് സംഘടിപ്പിച്ചു

കൊച്ചി: പാർലമെന്‍റ് പ്രവർത്തനങ്ങൾ വിദ്യാർഥികൾക്ക് പരിചയപ്പെടുത്തുന്ന യൂത്ത് പാർലമെന്‍റ് വളരെ അഭിനന്ദനീയമാണെന്നു മുൻ കേന്ദ്രമന്ത്രിയും കേരള സർക്കാരിന്‍റെ ഡൽഹിയിലെ പ്രത്യേക പ്രതിനിധിയുമായ പ്രഫ. കെ.വി. തോമസ് പറഞ്ഞു. പാർലമെന്‍റ് സെക്രട്ടറിയേറ്റിന്‍റെ സഹായത്തോടുകൂടി കേന്ദ്രീയ വിദ്യാലയ സംഗതൻ (കെവിഎസ്) എറണാകുളം മേഖല വെല്ലിംഗ്ടൺ ഐലൻഡിലെ കേന്ദ്രീയ വിദ്യാലയത്തിൽ സംഘടിപ്പിച്ച യൂത്ത് പാർലമെന്‍റ് ഉദ്ഘാടനം ചെയ്യുകയായിരുന്നു അദ്ദേഹം. ആരോഗ്യകരമായ പാർലമെന്‍ററി പ്രവർത്തനങ്ങൾക്ക് യുവതലമുറയെ സജ്ജമാക്കുന്ന ശ്ലാഘനീയമായ മോഡൽ പാർലമെന്റാണ് ഈ മൽസരത്തിലൂടെ നടക്കുന്നതെന്ന് അദ്ദേഹം പറഞ്ഞു. തെരഞ്ഞെടുക്കപ്പെട്ട ആയിരത്തോളം വിദ്യാർഥികളാണ് പരിപാടിയിൽ പങ്കെടുത്തത്. സ്പീക്കർ, ഡപ്യൂട്ടി സ്പീക്കർ, പ്രധാനമന്ത്രി, പ്രതിപക്ഷ നേതാവ് തുടങ്ങിയവർ ഉൾക്കൊള്ളുന്ന പാർലമെന്‍റിന് സമാനമായ മോഡൽ പാർലമെന്‍റാണ് പരിചയപ്പെടുത്തുന്നത്. ഓരോ ടീമിനും ഒരു മണിക്കൂർ സമയം വീതമാണ് നൽകിയത്. തിരുവനന്തപുരം സിആർപിഎഫ് കേന്ദ്രീയ വിദ്യാലയത്തിലെ വിദ്യാർഥികളാണ് ഒന്നാം സ്ഥാനം നേ‌ടി. പ്രാദേശിക അടിസ്ഥാനത്തിൽ നടത്തുന്ന മത്സരത്തിൽ വിജയികളായവർ ദേശീയതല മത്സരത്തിൽ പങ്കെടുക്കും. കെവിഎസ് റീജണൽ ഡെപ്യൂട്ടി കമ്മീഷണർ സന്തോഷ് കുമാർ, അസി. കമ്മീഷണർ സോമഘോഷ്, വെല്ലിംഗ്ടൺ ഐലൻഡ് കേന്ദ്രീയ വിദ്യാലയം, പ്രിൻസിപ്പൽ ടി. വിജയൻ എന്നിവർ മത്സരങ്ങൾക്കു നേതൃത്വം നൽകി.

ഹോളി ഹോം കുടുംബ സംഗമം നടത്തി

കാലടി: ഹോളി ഹോം മിനിസ്ട്രിയുടെ നേതൃത്വത്തിൽ കുടുംബ സംഗമവും മിഷനറി ട്രെയിനിംഗ് കോഴ്സിന്‍റെ ( കൊരുസ്സോ) സർട്ടിഫിക്കറ്റ് വിതരണവും കാലടി സമീക്ഷയിൽ നടന്നു. ബിഷപ് മാർ അലക്സ് താരാമംഗലം ഉദ്ഘാടനം ചെയ്തു. വലിയ കുടുംബങ്ങളെ അദ്ദേഹം അദരിച്ചു.വലിയ കുടുംബങ്ങൾ ഈ കാലഘട്ടത്തിന്‍റെ ആവശ്യമാണെന്ന് അദ്ദേഹം അഭിപ്രായപ്പെട്ടു. സുവിശേഷ ദൗത്യം നിർവഹിക്കാൻ പഠനവും പരിശീലനവും ആവശ്യമാണെന്നും അദ്ദേഹം ഓർമിപ്പിച്ചു. പത്ത് മക്കളുള്ള സന്തോഷ് - രമ്യ , ഏഴു സിസേറിയനിലൂടെ ഏഴു മക്കളെ സ്വീകരിച്ച ജെനി - സുനി, ഏഴ് മക്കളുള്ള ജോബി - വിനിത ദമ്പതികളെ ആദരിച്ചു. ഹോളി ഹോം മിനിസ്ട്രിയുടെ സ്ഥാപകനും ചെയർമാനുമായ ഷിജു ജോസഫ് അധ്യക്ഷത വഹിച്ചു. പ്രോഗ്രാം കോ-ഓർഡിനേറ്റർ ഷിബു ജോസഫ്, ഹോളി ഹോം സെക്രട്ടറി ജിജോ അറക്കൽ, റിസോഴ്സ് ടീം അംഗങ്ങളായ ജയിംസ് കൊട്ടാരത്തിൽ ,പി.കെ.ജോണ, ഫാ.ജോഷി മയ്യാറ്റിൽ, ഫാ. ഇമ്മാനുവൽ, റോബിൻ, ബിനിത എന്നിവർ നേതൃത്വം നൽകി.

"അങ്കമാലി കല്യാണത്തലേന്ന് ' ഖത്തറില്‍ നവംബര്‍ 28ന്

കൊച്ചി: ഖത്തര്‍ അങ്കമാലി എന്‍ആര്‍ഐ അസോസിയേഷന്‍റെ (അന്‍‌റിയ ഖത്തര്‍) ആഭിമുഖ്യത്തില്‍ നവംബര്‍ 28ന് ഖത്തറില്‍ മെഗാ ഇവന്‍റ് സംഘടിപ്പിക്കുമെന്ന് ഭാരവാഹികള്‍ പത്രസമ്മേളനത്തില്‍ അറിയിച്ചു. ഖത്തര്‍ നാഷണല്‍ കണ്‍വന്‍ഷണല്‍ സെന്‍ററില്‍ അങ്കമാലി കല്യാണതലേന്ന് എന്ന പേരില്‍ വൈകിട്ട് ആറിനാണ് പരിപാടി. അങ്കമാലിയിലെയും പരിസരങ്ങളിലെയും നിരവധിപേരെ സഹായിക്കുന്ന ഖത്തറിലെ ചാരിറ്റബിള്‍ സംവിധാനമായ സ്‌നേഹസ്പര്‍ശം പദ്ധതിയിലേക്ക് ഫണ്ട് ശേഖരിക്കുന്നതിന്‍റെ ഭാഗമായാണ് പരിപാടി സംഘടിപ്പിക്കുന്നത്. സിനിമാ മേഖലയില്‍ നിന്നടക്കമുള്ള കലാകാരന്മാർ പരിപാടിയുടെ ഭാഗമാകുമെന്ന് പ്രസിഡന്‍റ് വിനോദ്കുമാര്‍ പറഞ്ഞു. അങ്കമാലിയിലെ പ്രശസ്തരെ ചടങ്ങില്‍ ആദരിക്കും. ജോയ് ജോസ്, വിനായക് മോഹന്‍, റിങ്കു ബിജു, ജോയ് പോള്‍ എന്നിവര്‍ പത്രസമ്മേളനത്തില്‍ പങ്കെടുത്തു.

ചിറ്റിലപ്പിള്ളി സ്‌ക്വയറില്‍ മുതിര്‍ന്ന പൗരന്മാര്‍ക്ക് പ്രത്യേക ആനുകൂല്യങ്ങള്‍

കൊച്ചി: തൃക്കാക്കര ചിറ്റിലപ്പിള്ളി സ്‌ക്വയര്‍ വെല്‍നെസ് പാര്‍ക്കില്‍ മുതിര്‍ന്ന പൗരന്മാര്‍ക്ക് പ്രത്യേക ആനുകൂല്യം പ്രഖ്യാപിച്ചു. 17 മുതല്‍ 31വരെ 60 വയസിന് മുകളിലുള്ള സന്ദര്‍ശകര്‍ക്ക് രാവിലെ വ്യായാമത്തിനായി സൗജന്യ പ്രവേശനം ഉണ്ടായിരിക്കും. ജോഗിംഗ് ട്രാക്ക്, സൈക്ലിംഗ്, ഓപ്പണ്‍ ജിം എന്നിവ ഉള്‍പ്പെടെ പാര്‍ക്കിലെ സൗകര്യങ്ങള്‍ ഉപയോഗിക്കാം. രാവിലെ ഒമ്പത് വരെയാണ് സൗകര്യങ്ങള്‍ ഉപയോഗിക്കാനാവുക. തുടര്‍ച്ചയായി അഞ്ചുവര്‍ഷം രാവിലെ വ്യായാമത്തിന് ചിറ്റിലപ്പിള്ളി സ്‌ക്വയര്‍ വെല്‍നെസ് പാര്‍ക്ക് ഉപയോഗിക്കുന്നവര്‍ക്ക് പിന്നീട് ഈ സൗകര്യങ്ങള്‍ വ്യായാമത്തിനായി നിബന്ധനകള്‍ക്ക് വിധേയമായി സൗജന്യമായും ഉപയോഗിക്കാം. രാവിലെ എട്ടു മുതല്‍ പ്രവേശനം അനുവദിക്കും. വയസ് രേഖപ്പെടുത്തിയിട്ടുള്ള ഐഡന്‍റിറ്റി കാര്‍ഡിന്‍റെ അടിസ്ഥാനത്തിലായിരിക്കും 15 ദിവസത്തെ സൗജന്യ സന്ദര്‍ശനം.

മഞ്ഞപ്ര വടക്കുംഭാഗം-ആനപ്പാറ റോഡിന് 4.40 കോടി

മഞ്ഞപ്ര: മഞ്ഞപ്ര പഞ്ചായത്തിലെ മഞ്ഞപ്ര വടക്കുംഭാഗം മുതല്‍ തവളപ്പാറ വഴി ആനപ്പാറ വരെയുള്ള റോഡ് ബിഎം ആൻഡ് ബിസി നിലവാരത്തില്‍ നിര്‍മിക്കാന്‍ 4.40 കോടി രൂപയുടെ പുതുക്കിയ പദ്ധതിക്ക് ഭരണാനുമതി ലഭിച്ചതായി റോജി എം. ജോണ്‍ എംഎല്‍എ അറിയിച്ചു. അങ്കമാലി നിയോജകമണ്ഡലത്തിലെ പ്രധാനപ്പെട്ട പൊതുമരാമത്ത് റോഡുകള്‍ ബിഎം ആൻഡ് ബിസി നിലവാരത്തില്‍ പുനര്‍നിര്‍മിക്കുന്നതിന്‍റെ ഭാഗമായി ഈ റോഡിന് നേരത്തെ നാല് കോടി രൂപ അനുവദിച്ചിരുന്നു. എന്നാല്‍ ഈ സാമ്പത്തിക വര്‍ഷം മുതല്‍ പിഡബ്ലുഡിയുടെ നിര്‍മാണ പ്രവര്‍ത്തനങ്ങളുടെ ഷെഡ്യൂള്‍ റേറ്റ് വര്‍ധിച്ച സാഹചര്യത്തില്‍ റോഡിന്‍റെ നിര്‍മാണത്തിനായി അധിക തുക ആവശ്യമായി വരുമെന്ന് ചൂണ്ടിക്കാട്ടി എംഎല്‍എ സര്‍ക്കാരില്‍ നിവേദനം സമര്‍പ്പിച്ചിരുന്നു. ഇതിന്‍റെ അടിസ്ഥാനത്തില്‍ പുതിയ നിരക്കിന് അനുസൃതമായി 4.40 കോടി രൂപയുടെ പുതുക്കിയ ഭരണാനുമതി സര്‍ക്കാര്‍ നല്‍കുകയാണുണ്ടായത്. ഭരണാനുമതി ലഭ്യമായ സാഹചര്യത്തില്‍ ടെൻഡര്‍ നടപടികള്‍ പൂര്‍ത്തീകരിച്ച് റോഡിന്‍റെ നിര്‍മാണം ഉടന്‍ ആരംഭിക്കുമെന്ന് എംഎല്‍എ അറിയിച്ചു.

പെരുന്പാവൂരിൽ സ്ഥല വാടകയുടെ മറവിൽ ഡ്രൈവിംഗ് സ്കൂളുകളുടെ കൊള്ള

പെരുമ്പാവൂർ: ഡ്രൈവിംഗ് ടെസ്‌റ്റിന്‍റെ സ്ഥല വാടകയെന്ന പേരിൽ ഡ്രൈവിംഗ് സ്‌കൂളുകളുടെ കൊള്ളയെന്ന് പരാതി. സർക്കാർ ഉടമസ്‌ഥതയിൽ പെരുമ്പാവൂരിൽ ഗ്രൗണ്ട് ഇല്ലാത്ത അവസ്‌ഥ മുതലെടുത്താണു സ്‌കൂളുകളുടെ കഴുത്തറുപ്പൻ നടപടി. ഡ്രൈവിംഗ് സ്കൂളുകളുടെ സംഘടന പട്ടാലിൽ ജോയിന്‍റ് ആർടി ഓഫീസിന് എതിർവശത്തുള്ള 50 സെന്‍റ് സ്‌ഥലം വാടകയ്ക്ക് എടുത്ത് ഗ്രൗണ്ടാക്കി മാറ്റിയാണ് ടെസ്‌റ്റ് നടത്തുന്നത്. ടെസ്‌റ്റ് ദിവസം 250 മുതൽ 500 രൂപ വരെയാണ് ഓരോ പഠിതാവിൽ നിന്നും സ്‌കൂളുകൾ ഈടാക്കുന്നത്. വാടക തുകയ്ക്ക് ഏകീകൃത രൂപമില്ല. തോന്നിയ പോലെയാണ് ഓരോ സ്‌കൂളും പണം ഈടാക്കുന്നതെന്നു പഠിതാക്കൾ പരാതിപ്പെടുന്നു. പഠിപ്പിക്കുന്നതിനും ആർടി ഓഫിസിൽ അടയ്ക്കേണ്ട ഫീസിനും പുറമെയാണ് ഈ തുക ഈടാക്കുന്നത് സ്വകാര്യ ഗ്രൗണ്ടിന്‍റെ വാടക മാസം 25,000 രൂപയാണ്. ആഴ്‌ചയിൽ അഞ്ച് ദിവസമാണ് ഇരുചക്രം അടക്കമുള്ള വാഹനങ്ങളിലെ ഡ്രൈവിംഗ് ടെസ്‌റ്റ്. ഒരു ബാച്ചിൽ 40 പേർ. ചില ദിവസം രണ്ട് ബാച്ചുകൾ അനുവദിക്കും. കൂടാതെ പ്രത്യേക അനുമതിയോടെ ടെസ്‌റ്റിനെത്തുന്നവരും ഉണ്ട് ദിവസവും ഗ്രൗണ്ട് വാടകയിനത്തിൽ ചുരുങ്ങിയത് 15,000-20,000 രൂപ ലഭിക്കും. ടെസ്‌റ്റിനെത്തുവർക്കു ശുചിമുറി സൗകര്യമോ ശുദ്ധജലമോ ലഭ്യമല്ല ടെസ്‌റ്റ് നടത്തുമ്പോൾ ഓരോ സ്‌കൂളിന്‍റെയും ഒരു ഇൻസ്ട്രക്ടർക്കാണു പ്രവേശനാനുമതി നൽകിയിരിക്കുന്നതെങ്കിലും കൂടുതൽ പേർ പ്രവേശിക്കുന്നു.മലമുറിയിൽ ആർടി ഓഫീസും ടെസ്‌റ്റ് ഗ്രൗണ്ടും നിർമിക്കാൻ 60 സെന്‍റ് സർക്കാർ പുറമ്പോക്ക് ഭൂമി കണ്ടെത്തിയിട്ടുണ്ടെങ്കിലും നടപടിയൊന്നുമായിട്ടില്ല. ഡ്രൈവിംഗ് ടെസ്‌റ്റ് ഗ്രൗണ്ട് വാടകയെന്ന രീതിയിൽ തുക ഈടാക്കുന്നുവെന്ന പരാതിയിൽ ഡ്രൈവിംഗ് സ്‌കൂൾ ഉടമകളോടു വിശദീകരണം തേടിയെന്ന് ജോയിന്‍റ് ആർടിഒ എസ്. പ്രദീപ് പറഞ്ഞു. ആശാൻ ഫീസ് എന്ന നിലയിലാണ് തുക വാങ്ങുന്നതെന്നാണ് സ്‌കൂളുകളുടെ വിശദീകരണം. 150 രൂപയിൽ കൂടുതൽ ഗ്രൗണ്ട് വാടകയായി വാങ്ങരുതെന്നു നിർദേശിച്ചിട്ടുണ്ടെന്നും അദ്ദേഹം പറഞ്ഞു.

എംഡിഎംഎ: 2 പേർ കൂടി അറസ്റ്റിൽ

കാലടി: കാലടിയിൽ എംഡിഎംഎ പിടികൂടിയ കേസിൽ രണ്ടുപേർ കൂടി അറസ്റ്റിൽ. വല്ലം റയോൺ പുരം അമ്പാടൻ വീട്ടിൽ സിയാദ് (43), സൗത്ത് വല്ലം വടക്കേക്കുടി സിദ്ദിഖ് (57) എന്നിവരെയാണ് പിടികൂടിയത്. കഴിഞ്ഞ മേയ് 28ന് കാലടിയിൽ 100 ഗ്രാം എംഡിഎംഎയുമായി മറ്റൂർ പിരാരൂർ സ്വദേശിനി ബിന്ദു, പെരുമ്പാവൂർ ചേലാമറ്റം സ്വദേശി ഷെഫീഖ് എന്നിവരെ പിടികൂടിയിരുന്നു. കേസിലെ മൂന്നാം പ്രതിയാണ് സിയാദ്. രാസലഹരി വാങ്ങുന്നതിന് 90,000 രൂപ കൊടുത്ത് വിട്ടത് ഇയാളാണ്. ലൊക്കേഷൻ അയച്ചുകൊടുത്തതും സിയാദാണ്. മയക്കുമരുന്നുമായി ബന്ധപ്പെട്ട കാര്യങ്ങൾക്ക് വാഹനം എത്തിച്ച് കൊടുത്തത് സിദ്ദിഖാണെന്ന് പോലീസ് കണ്ടെത്തി. ബംഗളൂരുവിൽ നിന്ന് മയക്കുമരുന്നുമായി അങ്കമാലിയിൽ ബസിറങ്ങിയ ബിന്ദുവിനെ സ്കൂട്ടറിൽ കൊണ്ടുപോകുന്ന വഴിയാണ് പിടികൂടിയത്. ബിന്ദുവിൽ നിന്നും ലഭിച്ച വിവരമനുസരിച്ച് ഷെഫീഖിനെയും പിടികൂടി.

അപകടാവസ്ഥയിലുള്ള കെട്ടിടങ്ങളുടെ പൊളിക്കൽ നടപടി വേഗത്തിലാക്കും

കൊച്ചി: ജില്ലയിലെ അപകടാവസ്ഥയിലുള്ള കെട്ടിടങ്ങള്‍ പൊളിച്ചു നീക്കുന്ന നടപടികളുടെ പുരോഗതി വിലയിരുത്താന്‍ ജില്ലാ കളക്ടര്‍ ജി. പ്രിയങ്കയുടെ അധ്യക്ഷതയില്‍ പ്രത്യേക യോഗം ചേര്‍ന്നു. കാലപ്പഴക്കം ചെന്നതും അപകടാവസ്ഥയിലുള്ളതുമായ കെട്ടിടങ്ങള്‍ പൊളിച്ചു നീക്കാന്‍ ബന്ധപ്പെട്ട വകുപ്പുകള്‍ പ്രത്യേക ജാഗ്രത പുലര്‍ത്തണം എന്ന് യോഗം നിര്‍ദേശിച്ചു. ഇതരസംസ്ഥാനതൊഴിലാളികള്‍ താമസിക്കുന്ന ഇടങ്ങളുടെ സ്ഥിതിയും പരിശോധിച്ച് സുരക്ഷ ഉറപ്പാക്കണം. പൊളിച്ചു നീക്കല്‍ വേഗത്തില്‍ പൂര്‍ത്തിയാക്കാന്‍ ബന്ധപ്പെട്ട വകുപ്പുകള്‍ പരസ്പരം സഹകരിച്ച് മുന്നോട്ടു പോകാനും ‍ ധാരണയായി. ദുരന്തനിവാരണ വിഭാഗം ഡെപ്യൂട്ടി കളക്ടര്‍ കെ. മനോജ് സംബന്ധിച്ചു.

ഹെറോയിനും കഞ്ചാവുമായി പിടിയിൽ

പെരുമ്പാവൂർ: ആസാം സ്വദേശികളായ അനാറുൽ ഹക്കി(28)നെ രണ്ട് ഗ്രാം ഹെറോയിനുമായും സാദിക്കുൽ ഇസ്ലാമിനെ(30) 12 ഗ്രാം കഞ്ചാവുമായും പെരുമ്പാവൂർ എക്‌സൈസ് റേഞ്ച് സംഘം പിടികൂടി. അനാറുൽ പെരുമ്പാവൂർ ഫിഷ് മാർക്കറ്റിന് സമീപത്ത് നിന്നും സാദിക്കുൽ പ്രൈവറ്റ് സ്റ്റാൻഡിലെ കംഫർട്ട് സ്റ്റേഷന് സമീപത്ത് നിന്നുമാണ് പിടിയിലായത്.

വിദേശ ജോലി തട്ടിപ്പ്: മൂന്നു പേർ അറസ്റ്റിൽ

ആലുവ:വിദേശജോലി വാഗ്ദാനം ചെയ്ത് കോടിക്കണക്കിന് രൂപ തട്ടിയെടുത്ത റിക്രൂട്ടിംഗ് സ്ഥാപനങ്ങളിൽ പോലീസ് നടത്തിയ റെയ്ഡിൽ ഒരു സ്ഥാപനത്തിന്‍റെ ഉടമയും നിയമോപദേശകനും ഉൾപ്പെടെ മൂന്നു പേർ അറസ്റ്റിൽ. ആലുവ ബാങ്ക് കവലയിലെ റോയൽ പ്ലാസയിൽ പ്രവർത്തിച്ചിരുന്ന മൈഗ്രിറ്റ് ഓവർസീസ് കൺസൾട്ടന്‍റ് എന്ന സ്ഥാപനത്തിന്‍റെ പാർട്ണർ ആലുവ ദേശം പി.വി.എസ് ഫ്ളാറ്റിൽ താമസിക്കുന്ന കണ്ണൂർ സ്വദേശിനി നിഷ വിജീഷ് (38), സ്ഥാപനത്തിൽ നിന്ന് കംപ്യൂട്ടർ, ഹാർഡ് ഡിസ്ക്ക് എന്നിവയടക്കം രേഖകൾ നീക്കാൻ ഉപദേശം നൽകിയ അഭിഭാഷകൻ പാലാ ഭരണങ്ങാനം വേലൻകുന്നേൽ അഡ്വ. ടോജി തോമസ് (39), സ്ഥാപനത്തിൽ നിന്ന് നീക്കിയ രേഖകൾ ഒളിപ്പിക്കാൻ സഹായിച്ച പോഞ്ഞാശേരിയിൽ വാടകയ്ക്ക് താമസിക്കുന്ന വെങ്ങോല ഐനിപ്പറമ്പിൽ സാൻവർ (41) എന്നിവരാണ് അറസ്റ്റിലായത്. നിരവധി ഉദ്യോഗാർഥികളുടെ പരാതികളുടെ അടിസ്ഥാനത്തിൽ കഴിഞ്ഞ തിങ്കളാഴ്ചയാണ് റോയൽ പ്ളാസയിൽ പ്രവർത്തിക്കുന്ന പത്തോളം റിക്രൂട്ട്മെന്‍റ് സ്ഥാപനങ്ങളിൽ പോലീസ് റെയ്ഡ് നടത്തിയത്. മൈഗ്രിറ്റ് ഉൾപ്പെടെ മൂന്ന് സ്ഥാപനങ്ങൾ പൂട്ടി സീൽ പതിക്കുകയും നഗരസഭയുടെ ലൈസൻസ് ഇല്ലാത്ത അഞ്ച് സ്ഥാപങ്ങൾക്ക് നോട്ടീസ് നൽകുകയും ചെയ്തിരുന്നു. ഇതിന്‍റെ തുടർച്ചയായിട്ടാണ് അറസ്റ്റ് നടന്നത്. മൈഗ്രിറ്റ് ഉടമ നിഷയുടെ ഭർത്താവും പ്രതിയാണ്. ഇയാൾ വിദേശത്തേക്ക് കടന്നതായി പറയപ്പെടുന്നു.

മുഖ്യമന്ത്രിയെ അധിക്ഷേപിച്ചതിന് മുഹമ്മദ് ഷിയാസിനെതിരെ കേസ്

കൊച്ചി: പറവൂരില്‍ നടന്ന മഹിളാ കോണ്‍ഗ്രസ് കണ്‍വന്‍ഷനില്‍ മുഖ്യമന്ത്രിയെ അധിക്ഷേപിച്ച് സംസാരിച്ചതിന് ജില്ലാ കോണ്‍ഗ്രസ് അധ്യക്ഷന്‍ മുഹമ്മദ് ഷിയാസിനെതിരെ പറവൂര്‍ പോലീസ് കേസെടുത്തു. കടുങ്ങല്ലൂര്‍ ഏലൂക്കര മുഹമ്മദ് അര്‍ഷാദ് നല്‍കിയ പരാതിയിലാണ് കേസെടുത്തത്. ഒമ്പതിന് പറവൂര്‍ മുനിസിപ്പല്‍ ഗ്രൗണ്ടില്‍ നടന്ന മഹിളാ കോണ്‍ഗ്രസ് കണ്‍വന്‍ഷനില്‍ മുഖ്യമന്ത്രിയെ കോവര്‍കഴുത എന്ന് വിളിച്ച് പരസ്യമായി ആക്ഷേപിക്കുകയും ഇത് സോഷ്യല്‍ മീഡിയയില്‍ പ്രചരിപ്പിക്കുകയും ചെയ്തുവെന്നാണ് പരാതിയില്‍ പറഞ്ഞിരിക്കുന്നത്. ചൊവ്വാഴ്ചയാണ് കേസെടുത്തത്.

കടമക്കുടി സമഗ്ര ടൂറിസം പദ്ധതിക്ക് ഉടന്‍ അംഗീകാരം: മന്ത്രി റിയാസ്

കൊച്ചി: കടമക്കുടിയുടെ സമഗ്ര ടൂറിസം വികസനം സാധ്യമാക്കുന്ന പദ്ധതിയുടെ രൂപരേഖയ്ക്ക് ഈ മാസം തന്നെ ഭരണാനുമതി നല്‍കാന്‍ ലക്ഷ്യമിടുന്നതായി മന്ത്രി പി.എ. മുഹമ്മദ് റിയാസ്. ഇതിന്‍റെ ഭാഗമായി പദ്ധതി രൂപരേഖ പരിശോധിച്ചുക്കുകയാണ്. സംസ്ഥാനത്തെ പ്രധാന ടൂറിസം പദ്ധതിയായി ഇതിനെ മാറ്റാന്‍ കഴിയും. ജലാശയങ്ങള്‍ എല്ലാം അതുപോലെ സംരക്ഷിക്കപ്പെടണം. തദ്ദേശസ്വയംഭരണ സ്ഥാപനങ്ങളുടെയും പ്രാദേശിക ജന വിഭാഗങ്ങളുടെയും യോജിപ്പോടെ കടമക്കുടിയെ ഡിസൈന്‍ഡ് ഡെസ്റ്റിനേഷനാക്കി മാറ്റണമെന്നും മന്ത്രി പറഞ്ഞു. കടമക്കുടി ദ്വീപ് സമൂഹത്തിന്‍റെ അനന്ത ടൂറിസം വികസന സാധ്യതയെ തിരിച്ചറിയാനും അത് വിപുലമായ തോതില്‍ സാക്ഷാത്കരിക്കുന്നതും ലക്ഷ്യമിട്ട് സംഘടിപ്പിച്ച -കടമക്കുടി വാലി ഓഫ് ഹെവന്‍- സെമിനാര്‍ ഓണ്‍ലൈനായി ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. ആനന്ദ് മഹീന്ദ്രയെ വരെ ആകര്‍ഷിച്ച സൗന്ദര്യമാണ് കടമക്കുടിയുടെത്. അദ്ദേഹം ഇവിടേക്ക് വരാമെന്ന് വാഗ്ദാനം ചെയ്യുകയും സര്‍ക്കാര്‍ അതിനെ സ്വാഗതം ചെയ്യുകയും ചെയ്തിട്ടുണ്ട്. കേരള ടൂറിസത്തെ സംബന്ധിച്ചിടത്തോളം ഇത് അംഗീകാരവും കടമക്കുടിക്ക് വലിയൊരു പരസ്യവുമാണ്. വരുന്നവരെ ഉള്‍ക്കൊള്ളാന്‍ സാധിക്കണം. നല്ല സൗകര്യങ്ങള്‍ ഒരുക്കുന്നതിനോടൊപ്പം വൃത്തിയായി സൂക്ഷിക്കുകയും വേണം. എങ്കില്‍ മാത്രമേ വരും നാളുകളിലും സഞ്ചാരികള്‍ എത്തുകയുള്ളൂ. ചെറിയ കടകള്‍ മുതല്‍ എല്ലാ വികസനവും ഡിസൈന്‍ഡ് ആയിരിക്കണം. സഞ്ചാരികളുടെ എണ്ണത്തില്‍ ഓരോ വര്‍ഷവും പുതിയ റിക്കാര്‍ഡ് നേടി കേരളത്തിലെ ടൂറിസം മേഖല വലിയ മുന്നേറ്റത്തിലൂടെയാണ് കടന്നുപോകുന്നത്. കടമക്കുടിയും ഈ മുന്നേറ്റത്തിന്‍റെ ഭാഗമാണെന്നും മന്ത്രി പറഞ്ഞു. കോതാട് നിഹാര റിസോര്‍ട്ടില്‍ നടന്ന സെമിനാറില്‍ കെ.എന്‍. ഉണ്ണികൃഷ്ണന്‍ എംഎല്‍എ അധ്യക്ഷത വഹിച്ചു. കടമക്കുടിയുടെ ടൂറിസം വികസന സാധ്യതകളെ പരിചയപ്പെടുത്തുന്നതിനായി സംഘടിപ്പിച്ച സെമിനാറില്‍ ഉരുത്തിരിയുന്ന നിര്‍ദേശങ്ങള്‍ പരിഗണിച്ച് കടമക്കുടിക്ക് സമഗ്രമായ ടൂറിസം പദ്ധതി തയ്യാറാക്കുമെന്ന് എംഎല്‍എ പറഞ്ഞു. സെമിനാറിലും തുടര്‍ ചര്‍ച്ചയിലും ടൂറിസം രംഗത്തെ വിദഗ്ധരും, ജനപ്രതിനിധികളും, പ്രാദേശിക സംരംഭകരും, നാട്ടുകാരും പങ്കെടുത്തു. യോഗം 25ന് കടമക്കുടിയുടെ ടൂറിസം സാധ്യതകള്‍ പരിശോധിക്കുന്നതിനായി 25ന് റവന്യൂ വകുപ്പിന്‍റെ സഹകരണത്തോടെ ഭൂവുടമകള്‍, റിസോര്‍ട്ട്, ഹോംസ്റ്റേ ഉടമകള്‍, വാട്ടര്‍ ആക്ടിവിറ്റിയുമായി ബന്ധപ്പെട്ട് പ്രവര്‍ത്തിക്കുന്നര്‍ എന്നിവരുടെ യോഗം വിളിച്ച് ചേര്‍ക്കും.

കണ്ടെയ്നർ ലോറി ബ്രേക്ക് ഡൗണായി; ഗോശ്രീ റോഡ് മൂന്നു മണിക്കൂർ നിശ്ചലം

വൈപ്പിൻ: ഗോശ്രീ സമാന്തര പാലം അടച്ചിട്ടതിനെ തുടർന്നുള്ള ഗതാഗതക്കുരുക്കിൽ വീർപ്പുമുട്ടുന്ന ദ്വീപു നിവാസികൾക്ക് കൂനിൻമേൽ കുരുവെന്നപോലെയായി, ഇന്നലെ ഒന്നാം പാലത്തിനടുത്ത് കണ്ടെയ്നർ ലോറി ബ്രേക്ക് ഡൗൺ ആയതിനെ തുടർന്ന് ഉണ്ടായ വൻഗതാഗതക്കുരുക്ക്. രാവിലെ എട്ടോടെ ഗോശ്രീ ഒന്നാം പാലത്തിന്‍റെ അപ്രോച്ചിനു കിഴക്ക് ഭാഗത്താണ് കണ്ടെയ്നർ ലോറി ബ്രേക്ക്ഡൗൺ ആയത്.ഇതിനിടെ മറ്റൊരു വാഹനം കണ്ടെയ്നർ ലോറിയുടെ പിന്നിൽ ഇടിച്ചതും വിനയായി. വാഹനങ്ങൾ റോഡിൽ തിങ്ങിനിറഞ്ഞതോടെ ഏതാണ്ട് മൂന്നു മണിക്കൂറോളം ഗോശ്രീ റോഡിലും എറണാകുളം ഭാഗത്തും ഗതാഗതം തടസപ്പെട്ടു. ഇതുമൂലം ദ്വീപുകളിൽ നിന്ന് രാവിലെ നഗരത്തിന്‍റെ വിവിധ ഭാഗങ്ങളിലേക്ക് ജോലിക്ക് പോകാനെത്തിയവരും വിദ്യാർഥികളും മറ്റും ഇടയ്ക്കിറങ്ങി കാൽനടയായിട്ടാണ് ഹൈക്കോർട്ട് കവലയിൽ എത്തി മറ്റിടങ്ങളിലേക്ക് ബസ് കയറിയത്. പിന്നീട് നഗരത്തിൽ നിന്നും കൂടുതൽ പോലീസ് എത്തിയാണ് ഗതാഗതം നിയന്ത്രിച്ചു വാഹനങ്ങളെ കടത്തിവിട്ടത്.

കൂലിത്തര്‍ക്കം : കൊച്ചി ഫിഷറീസ് ഹാര്‍ബര്‍ സ്തംഭിച്ചു, കോടികൾ നഷ്ടം

മട്ടാഞ്ചേരി: കൊച്ചി ഫിഷറീസ് ഹാര്‍ബറിലെ മീന്‍ ഇറക്കു വിഭാഗം തൊഴിലാളികളുടെ കൂലിത്തര്‍ക്കത്തെ തുടര്‍ന്നുണ്ടായ പ്രതിസന്ധിയിൽ ഹാര്‍ബര്‍ സ്തംഭനാവസ്ഥയിലേക്ക്. കഴിഞ്ഞ ദിവസമുണ്ടായ സംഘര്‍ഷത്തില്‍ രണ്ടു ബോട്ടുടമകള്‍ക്ക് മര്‍ദനമേറ്റതിനു പുറമെ ഇന്നലെ രാവിലെയും ഒരു ബോട്ടുടമയ്ക്ക് മര്‍ദനമേറ്റു. ഗില്‍നെറ്റ് വിഭാഗം ബോട്ടുടമയും ബയിംഗ് ഏജന്‍റ്സ് അസോസിയേഷന്‍ വൈസ് പ്രസിഡന്‍റുമായ സി.ബി റഷീദിനാണ് മര്‍ദനമേറ്റത്. ഇതോടെ എല്ലാ വിഭാഗം ബോട്ടുടമകളും പ്രതിഷേധവുമായി രംഗത്തു വരികയായിരുന്നു. ഇന്ന് ഹാര്‍ബര്‍ വ്യവസായ സമിതിയുടെ നേതൃത്വത്തില്‍ ഹാര്‍ബര്‍ ബഹിഷ്കരിച്ച് പ്രതിഷേധിക്കും.ബോട്ടുടമകളും കച്ചവടക്കാരും ബഹിഷ്കരണത്തില്‍ പങ്കാളികളാകും. ഇന്നലെ പേഴ്സിന്‍ ബോട്ടുകള്‍ ഒന്നും തന്നെ കടലില്‍ പോയില്ല.47 ബോട്ടുകളാണ് ഹാര്‍ബറില്‍നിന്നു കടലില്‍ പോകുന്നത്.നല്ല രീതിയില്‍ മത്സ്യം ലഭിക്കുന്ന വേളയില്‍ ബോട്ടുകള്‍ കടലില്‍ പോകാത്തതു മൂലം ഒരു ദിവസം മാത്രം രണ്ടു കോടിയുടെ നഷ്ടമാണുണ്ടാകുന്നതെന്ന് ബോട്ടുടമകള്‍ പറയുന്നു. പ്രശ്നത്തിന് പരിഹാരമായില്ലെങ്കില്‍ വരും ദിവസങ്ങളിലും ബോട്ടുകള്‍ കടലില്‍ ഇറങ്ങില്ല. ഇത് ഹാര്‍ബര്‍ സ്തംഭിക്കാൻ ഇടയാക്കും. ബോട്ടുടമകളോട് അനുഭാവം പ്രകടിപ്പിച്ച് കടലില്‍ പോകേണ്ടെന്ന് പേഴ്സിന്‍ മത്സ്യത്തൊഴിലാളി യൂണിയനും തീരുമാനിച്ചിട്ടുണ്ട്. ഇതോടെ കൊച്ചി ഹാർബർ സ്തംഭനത്തിലേക്ക് നീങ്ങുകയാണ്.

ഇണയ്ക്ക് ഇര തേടിയെത്തിയ മലമുഴക്കി വേ‌ഴാന്പൽ കൗതുകക്കാഴ്ച‍യായി

വൈപ്പിൻ: അടയിരിക്കുന്ന ഇണയ്ക്ക് ഇര തേടിയെത്തിയ മലമുഴക്കി വേഴാമ്പൽ നാട്ടുകാരിൽ കൗതുകമുണർത്തി. സാധാരണ വനമേഖലകളിൽ മാത്രം കണ്ടുവരുന്ന ഒരിനം വേഴാമ്പലാണിത്. ഇന്നലെ രാവിലെ നായരമ്പലത്ത് പടിഞ്ഞാറേക്കൂറ്റ് സജീവന്‍റെ വീട്ടുവളപ്പിലുള്ള ചൂണ്ടപ്പനയിലെ മൂത്തുപഴുത്ത കുലകളിലാണ് ഇതിനെ കണ്ടത്. കറുപ്പും മഞ്ഞയും കലര്‍ന്ന തൂവല്‍ത്തൊപ്പിയും മഞ്ഞ നിറത്തിലുള്ള നീണ്ട കൊക്കും ചുവന്ന കണ്ണുകളുമൊക്കെയുള്ള വേഴാമ്പലിന്‍റെ ചന്തം കാഴ്ചക്കാരുടെ മനംനിറച്ചു. വിവരമറിഞ്ഞെത്തിയ പക്ഷിനിരീക്ഷകരാണ് മലമുഴക്കി വേഴാമ്പലിനെ തിരിച്ചറിഞ്ഞത്. ചിലയ്ക്കുമ്പോൾ മലകൾക്കിടയിലെന്ന പോലെ പ്രതിധ്വനി ഉയർത്തുന്ന തരത്തിലെ ശബ്ദവും പറക്കുമ്പോൾ ശക്തമായ ചിറകടിയൊച്ചയുമുള്ളതുകൊണ്ടാണത്രേ ഇവയ്ക്ക് മലമുഴക്കി എന്നു പേരു വീണത്. പെൺകിളികൾ മുട്ടയിട്ട് അടയിരിക്കുന്ന സമയത്ത് ആൺകിളികൾ ഇണയ്ക്ക് ഇര അന്വേഷിച്ച് അകലങ്ങളിലേക്ക് പോകാറുണ്ടത്രേ. ഇങ്ങനെയായിരിക്കാം ഈ ചൂണ്ടപ്പനക്കുലകളിൽ ഇത് എത്തിച്ചേർന്നതെന്നും പക്ഷിനിരീക്ഷകർ വ്യക്തമാക്കി. ഹരുണി സുരേഷ്

ഓർമകളുടെ ‘രസതന്ത്രം' അറിഞ്ഞ് കോളജ് മുറ്റത്ത് ഒരുവട്ടംകൂടി...

കൊച്ചി: പഠിച്ചു വളർന്ന മാതൃവിദ്യാലയത്തിന്‍റെ തിരുമുറ്റത്ത് പതിറ്റാണ്ടുകൾക്കു ശേഷം അവർ ഒത്തുകൂടി. രസതന്ത്രത്തിന്‍റെ ആഴങ്ങളറിഞ്ഞ ക്ലാസ് മുറികളിൽ അവർ ഓർമകളുടെ രസക്കൂട്ടുകൾ പങ്കുവച്ചു. അവരങ്ങനെ വീണ്ടും പഴയ വിദ്യാർഥികളായി. തേവര സേക്രഡ് ഹാർട്ട് കോളജിൽ നിന്നു 1985 ൽ രസതന്ത്ര വിഭാഗത്തിൽ നിന്ന് പഠിച്ചിറങ്ങിയ പൂർവവിദ്യാർഥികളാണ് കോളജിൽ ഒത്തുകൂടിയത്. രസതന്ത്ര വിഭാഗം സ്ഥാപകനും മുൻ വകുപ്പ് മേധാവിയുമായിരുന്ന പ്രഫ. എം.വി. വർഗീസ് വിരമിച്ചതിന്‍റെ 50 വർഷവും വകുപ്പ് മേധാവിയും അധ്യാപകനുമായിരുന്ന പ്രഫ. കെ.എ.ഗോപാലകൃഷ്ണൻ വിരമിച്ചതിന്‍റെ 40 വർഷവും പൂർത്തിയാക്കിയതിന്‍റെ ഭാഗമായിരുന്നു സംഗമം. പഴയ ആ കുട്ടിക്കൂട്ടത്തിൽ മുൻ കേന്ദ്രമന്ത്രി മുതൽ ജഡ്ജിമാരും പ്രഫസർമാരും വരെ ഉണ്ടായിരുന്നു. തങ്ങളുടെ പ്രിയപ്പെട്ട അധ്യാപകരുടെ ഓർമകൾ ഒരിക്കകൂടി പുതുക്കാനായിരുന്നു തിരുഹൃദയ കലാലയം മുറ്റത്ത്‌ ഒത്തുചേരലെന്നു സംഘാടകർ പറഞ്ഞു. ഇരുന്നൂറോളം പേർ പങ്കെടുത്തു. കോളജിന്‍റെ മുൻ മാനേജരും പ്രിൻസിപ്പലുമായിരുന്ന റവ. ഡോ. ജോസ് കുറിയേടത്ത് അധ്യക്ഷത വഹിച്ചു. രസതന്ത്ര വിഭാഗം മുൻ മേധാവിയും മുൻ കേന്ദ്രമന്ത്രിയുമായ പ്രഫ. കെ.വി.തോമസ് മുഖ്യപ്രഭാഷണവും ഡോ. പി.ബാബു ജോസ് അനുസ്മരണ പ്രഭാഷണവും നടത്തി. ഡോ. വരുണ്ണി. വിജയഗോപാൽ, ഡോ. ശ്രീകാന്ത്, ജസ്റ്റിസ് എ. കെ. ജയശങ്കർ നമ്പ്യാർ എന്നിവർ പ്രസംഗിച്ചു. പ്രഫ. വി.എ. ജോസഫ്, പ്രഫ. കെ. വി. തോമസ്, ഡോ. പി. ബാബു ജോസ് എന്നിവരുടെ നേതൃത്വത്തിൽ പ്രഫ. എം. വി. വർഗീസിനെയും പ്രഫ. കെ. എ. ഗോപാലകൃഷ്ണനെയും അനുസ്മരിച്ച് എൻഡോവ്മെന്‍റ് വിഭാഗം സ്ഥാപിച്ചിട്ടുണ്ട്.

മനം കവരാന്‍ കടമക്കുടി

കൊച്ചി: വ്യവസായി ആനന്ദ് മഹീന്ദ്രയുടെ മനം കവര്‍ന്ന കടമക്കുടി കേരളത്തിന്‍റെ ടൂറിസം ഭൂപടത്തില്‍ ഇടംപിടിക്കാന്‍ അടിസ്ഥാന സൗകര്യങ്ങളടക്കം വിപുലപ്പെടുത്താന്‍ ഒരുങ്ങുന്നു. ഇതിന്‍റെ ഭാഗമായി എറണാകുളം ജില്ലാ ടൂറിസം പ്രമോഷന്‍ കൗണ്‍സില്‍ (ഡിടിപിസി) മാസ്റ്റര്‍ പ്ലാന്‍ തയാറാക്കൽ ആരംഭിച്ചു. അടുത്ത എട്ട് മാസം കടമക്കുടിയുടെ ടൂറിസം സാധ്യതകള്‍ വിശദമായി പഠിക്കും. റിപ്പോർട്ടിന്‍റെ അടിസ്ഥാനത്തില്‍ മുഖം മിനുക്കി സഞ്ചാരികളുടെ ഇഷ്ട വിനോദസഞ്ചാര കേന്ദ്രങ്ങളിലൊന്നാകാനുള്ള തയാറെടുപ്പിലാണ് കടമക്കുടി. നിലവില്‍ സമൂഹമാധ്യമങ്ങളില്‍ നിറയുന്ന റീലുകളിലൂടെ കൊച്ചിയുടെ മുഖമായി മാറിയ കടമക്കുടി ഒന്നുകൂടി മിനുങ്ങാനുള്ള ഒരുക്കത്തിലാണ്. ജില്ലയിലെ കാമ്പസുകളിലെ വിദ്യാര്‍ഥികളുടെ ഉള്‍പ്പെടെ സേവനം പ്രയോജനപ്പെടുത്തിയാകും മാസ്റ്റര്‍ പ്ലാന്‍ തയാറാക്കുക. ശുചിമുറി മുതല്‍ ഹോം സ്റ്റേ വരെ പെരിയാറിന്‍റെയും വേമ്പനാട്ടു കായലിന്‍റെയും ഇടയില്‍ ചിന്നിച്ചിതറി കിടക്കുന്ന 13 ദ്വീപ് സമൂഹങ്ങൾ ചേരുന്ന കടമക്കുടി പ്രധാന വിനോദ സഞ്ചാര കേന്ദ്രങ്ങളിലൊന്നായി മാറാന്‍ അടിസ്ഥാന സൗകര്യങ്ങളടക്കം ഒരുക്കേണ്ടതുണ്ടെന്ന് മനസിലാക്കിയാണ് ഡിടിപിസി മാസ്റ്റര്‍ പ്ലാന്‍ തയാറാക്കുന്നത്. ഇതില്‍ ശുചിമുറി മുതല്‍ ഹോം സ്റ്റേ വരെ ഉള്‍പ്പെടും. സഞ്ചാരികളെത്തുന്ന പ്രധാന ഇടങ്ങളില്‍ ശുചിമുറികളും വിശ്രമ കേന്ദ്രങ്ങളും വിനോദ ഉപാധികളും ഒരുക്കും. തദ്ദേശീയരായിട്ടുള്ളവരെയും വിദേശികളെയും ലക്ഷ്യമിട്ട് ഹോം സ്റ്റേ ഒരുക്കുന്ന കാര്യങ്ങളും മാസ്റ്റര്‍ പ്ലാനില്‍ ഇടം പിടിക്കും. പ്രദേശത്തുള്ളവര്‍ക്ക് വേണ്ട നിര്‍ദേശങ്ങളും പരിശീലനവും നല്‍കി നിലവിലെ സൗകര്യങ്ങള്‍ ഇതിനായി ഉപയോഗിക്കാനാണ് ലക്ഷ്യം. സിംഗിൾ വിന്‍ഡോ നിലവില്‍ കടമക്കുടിയിലേക്ക് എത്തിപ്പെടാന്‍ വിവിധയിടങ്ങളില്‍ നിന്ന് വഴിയുണ്ട്. എന്നാല്‍ ഇവ ഒരു കേന്ദ്രത്തിലേക്ക് ഒതുക്കാനാണ് ഡിടിപിസി ലക്ഷ്യമിടുന്നത്. ഇതിനായി മാപ്പിംഗ് നടത്തും. വാഹനങ്ങളിലടക്കം എത്തുന്നവര്‍ നിശ്ചിത പോയിന്റിലെത്തി വാഹനങ്ങള്‍ പാര്‍ക്ക് ചെയ്ത ശേഷം ലോക്കല്‍ ഗതാഗത സൗകര്യം ഉപയോഗിക്കുന്ന തരത്തിലേക്ക് മാറ്റും. ഇതിലൂടെ പ്രദേശത്തുള്ളവര്‍ക്ക് തൊഴില്‍ സൃഷ്ടിക്കാനുമാണ് നീക്കം. പ്രദേശവാസികളുടെ അഭിപ്രായങ്ങളും നിര്‍ദേശങ്ങളും മഖവിലയ്‌ക്കെടുത്താകും ഇത് മാസ്റ്റര്‍ പ്ലാനല്‍ ഉള്‍ക്കൊള്ളിക്കുക. എക്കല്‍ വില്ലനാകും കഴിഞ്ഞ ഏതാനും വര്‍ഷങ്ങളായി പെരിയാറിന്‍റെ ആഴം ഇല്ലാതാക്കി അടിഞ്ഞുകൂടിയിട്ടുള്ള എക്കല്‍ ചെളി നീക്കം ചെയ്യാതെ ടൂറിസം വികസനവുമായി മുന്നോട്ടു പോകാനാകില്ല. വലിയ ബോട്ടുകളെയടക്കം പ്രതീക്ഷിക്കുന്ന മേഖലയില്‍ കഴിഞ്ഞ വേലിയേറ്റക്കാലത്ത് ചങ്ങാടം സര്‍വീസുകള്‍ മുടങ്ങിയിരുന്നു. കഴിഞ്ഞ പ്രളയത്തില്‍ പെരിയാറിന്‍റെ അടിത്തട്ടില്‍ അടിഞ്ഞുകൂടിയ എക്കല്‍ ജലഗതാഗത്തിനു ഭീഷണിയാണെന്ന് കടമക്കുടി നിവാസികള്‍ പറയുന്നു. നിലവില്‍ ഇതുസംബന്ധിച്ച തീരുമാനം ഡിടിപിസിക്ക് മുന്നില്‍ ഇല്ലെന്നാണ് വിവരം. കൂടിയാലോചനകള്‍ക്ക് ശേഷം വിഷയം ഗൗരവമായി പരിഗണിച്ചേക്കും. പൊക്കാളിപ്പാടങ്ങള്‍ ഗണ്യമായി കുറഞ്ഞു വരുന്നതിലും പഠനം നടത്തി ഇവ പരിപോഷിപ്പിക്കുതിനാവശ്യമായ നീക്കങ്ങളും ഉള്‍ക്കൊള്ളിച്ചാകും മാസ്റ്റര്‍ പ്ലാനിന്‍റെ അന്തിമ രൂപം.

വീണ്ടും സൈബര്‍ തട്ടിപ്പ് : തട്ടിയത് 14.43 ലക്ഷം; ഇര 65കാരൻ

കൊച്ചി: കൊച്ചിയില്‍ വീണ്ടും സൈബര്‍ തട്ടിപ്പ്. വൃദ്ധനില്‍ നിന്ന് 14.43 ലക്ഷം രൂപ തട്ടിയെടുത്തതായി പരാതി. എറണാകുളം ചേരാനെല്ലൂര്‍ സ്വദേശിയായ 65കാരനാണ് തട്ടിപ്പിന് ഇരയായത്. ഫേസ്ബുക്കിലൂടെ പരിചയപ്പെട്ടയാള്‍ ട്രേഡിംഗിലൂടെ ലാഭം വാഗ്ദാനം ചെയ്ത് 14.43 ലക്ഷം രൂപയാണ് പരാതിക്കാരനില്‍ നിന്ന് തട്ടിയെടുത്തത്. അജ്ഞാതനായ ഇയാളെ പ്രതിചേര്‍ത്ത് ചേരാനെല്ലൂര്‍ പോലീസ് കേസ് എടുത്തിട്ടുണ്ട്. ഇക്കഴിഞ്ഞ് മാര്‍ച്ചിലാണ് തട്ടിപ്പിന്‍റെ തുടക്കം.പരാതിക്കാരന്‍റെ ഫേസ്ബുക്ക് സുഹൃത്തായശേഷം പ്രതി ട്രേഡിംഗിലൂടെ ലാഭവും മറ്റും വാഗ്ദാനം ചെയ്ത് പ്രലോഭിപ്പിക്കുകയായിരുന്നു. തുടര്‍ന്ന് ബാങ്ക് മുഖേനയും ഗൂഗിൾ പേ വഴിയും ഫേസ്ബുക്ക് സുഹൃത്ത് കൈമാറിയ വ്യാജ ഓണ്‍ലൈന്‍ ട്രേഡിംഗ് കമ്പനിയുടെ അക്കൗണ്ടില്‍ പണം നിക്ഷേപിച്ചു. ആദ്യ നിക്ഷേപത്തിന് ചെറിയ ലാഭം നല്‍കി. വിശ്വാസം ഇരട്ടിച്ചതോടെ 14.43 ലക്ഷം രൂപ നിക്ഷേപിക്കുകയായിരുന്നു. പിന്നീട് ലാഭമോ നിക്ഷേപമോ തിരികെ ലഭിക്കാതായതോടെ പോലീസിനെ സമീപിക്കുകയായിരുന്നു. പ്രതിയുടെ ഫേസ്ബുക്ക് ഐഡിയും മറ്റു വിവരങ്ങളും പരാതിക്കാരന്‍ പോലീസിന് കൈമാറിയിട്ടുണ്ട്.

കച്ചേരിത്താഴത്തെ ഗര്‍ത്തം: ഉദ്യോഗസ്ഥ സംഘം സ്ഥലം സന്ദർശിച്ചു

മൂവാറ്റുപുഴ: എംസി റോഡില്‍ കച്ചേരിത്താഴത്ത് വീണ്ടും ഗര്‍ത്തം രൂപപ്പെട്ട ഭാഗം ഉദ്യോഗസ്ഥ സംഘം സന്ദര്‍ശിച്ചു. വന്‍ അപകടസാധ്യത സൃഷ്ടിച്ച സാഹചര്യത്തില്‍ മാത്യു കുഴല്‍നാടന്‍ എംഎല്‍എയുടെ ഇടപെടലിനെ തുടര്‍ന്നാണ് ഉന്നത ഉദ്യോഗസ്ഥരുടെ നേതൃത്വത്തില്‍ അടിയന്തര സ്ഥലപരിശോധനയും ശാശ്വത പരിഹാരത്തിനുള്ള നടപടികളും ആരംഭിച്ചത്. തിങ്കളാഴ്ച രാവിലെയാണ് കച്ചേരിത്താഴം വലിയ പാലത്തിനോടു ചേര്‍ന്നു ഗര്‍ത്തം രൂപപ്പെട്ടത്. മൂന്നു വര്‍ഷം മുമ്പും ഇതേ സ്ഥലത്ത് ഗര്‍ത്തം രൂപപ്പെട്ടിരുന്നു. അന്നു നടത്തിയ പഠനങ്ങളും പരീക്ഷണാടിസ്ഥാനത്തിലുള്ള പുനര്‍നിര്‍മാണവും കഴിഞ്ഞ് ഏഴ് ദിവസത്തെ നിരീക്ഷണത്തിനുശേഷം ഗതാഗതം പൂര്‍ണമായി പുനഃസ്ഥാപിച്ചിരുന്നു. എന്നാല്‍ ഇത്തവണയും സമാന സാഹചര്യങ്ങള്‍ ആവര്‍ത്തിച്ചതോടെ യുദ്ധകാലാടിസ്ഥാനത്തില്‍ വിശദമായ പഠനം നടത്തി ശാശ്വതമായ പരിഹാരം കണ്ടെത്താന്‍ എംഎല്‍എ കഴിഞ്ഞ ദിവസം തന്നെ ബന്ധപ്പെട്ട ഉദ്യോഗസ്ഥരോട് നിര്‍ദേശിക്കുകയും ജില്ലാ കളക്ടറെ അറിയിക്കുകയും ചെയ്തിരുന്നു. തുടര്‍ന്ന് കെആര്‍എഫ്ബിയുടെ സൂപ്രണ്ടിംഗ് എന്‍ജിനീയര്‍ അടക്കമുള്ള ഉന്നത ഉദ്യോഗസ്ഥരും, അഗ്നിശമന രക്ഷാസേന, പിഡബ്ല്യുഡി വിദഗ്ധ സംഘങ്ങളും സ്ഥലത്തെത്തി വിശദമായ പരിശോധന നടത്തി. സമീപത്തെ പുഴയിലേക്കുള്ള പഴയ ഓടയ്ക്കു മുകളില്‍ സ്ഥാപിച്ചിരുന്ന കവര്‍ സ്ലാബുകള്‍ക്ക് സ്ഥാനചലനം സംഭവിച്ചത് മൂലം ഓടയ്ക്കു മുകളില്‍നിന്നു മാറുകയും ഇതുമൂലം മണ്ണും റോഡും ഇടിഞ്ഞ് ഓടയിലൂടെ ഒലിച്ച് പുഴയിലേക്ക് പോയതായി കണ്ടെത്തി. ഇത് മനസിലാക്കിയ ഉദ്യോഗസ്ഥ സംഘം സ്ലാബ് ഇടിഞ്ഞ ഭാഗം കണ്ടെത്തിയതിനുശേഷം ആ ഭാഗത്തെ റോഡ് പൂര്‍ണമായും കുഴിച്ചുമാറ്റി ഓട ശുദ്ധീകരിച്ച് പുതിയ സ്ലാബ് സ്ഥാപിക്കാനും രൂപപ്പെട്ട ഗര്‍ത്തം പൂര്‍ണമായി അടച്ച് ആവശ്യമായ കാലയളവ് കഴിഞ്ഞ് ഗതാഗതത്തിന് തുറന്നുകൊടുക്കാനുമുള്ള നടപടികള്‍ ആരംഭിച്ചു. സ്ലപരിശോധനയ്ക്കായി എംഎല്‍എയോടൊപ്പം, ആര്‍ഡിഒ പി.എ. അനി, കെആര്‍എഫ്ബി സൂപ്രണ്ടിംഗ് എന്‍ജിനീയര്‍ മഞ്ജുഷ, കെആര്‍എഫ്ബി എക്‌സിക്യൂട്ടീവ് എന്‍ജിനീയര്‍ ജയരാജ്, പിഡബ്ല്യുഡി റോഡ്‌സ് എക്‌സിക്യൂട്ടീവ് എന്‍ജിനീയര്‍ ഷാമോന്‍, കെആര്‍എഫ്ബി അസിസ്റ്റന്‍റ് എക്‌സിക്യൂട്ടീവ് എന്‍ജിനീയര്‍ പോള്‍ തോമസ്, പിഡബ്ല്യുഡി ബ്രിഡ്ജ് അസിസ്റ്റന്‍റ് എക്‌സിക്യൂട്ടീവ് എന്‍ജിനീയര്‍ എസ്.ജെ. സജിന, ഫയര്‍ഫോഴ്‌സിലെയും മോട്ടോര്‍ വാഹന വകുപ്പിലെയും ഉദ്യോഗസ്ഥന്മാര്‍ അടക്കമുള്ള സംഘമാണ് എത്തിയത്. വിദഗ്ധ സംഘം പരിശോധന നടത്തണം മൂവാറ്റുപുഴ: കച്ചേരിത്താഴം പാലത്തിന് സമീപം ഗര്‍ത്തം രൂപപ്പെട്ടത് ജനങ്ങള്‍ക്ക് ആശങ്കയുണ്ടാക്കുന്നതാണെന്നും അപകട സാധ്യത കണക്കാക്കി കേരള ഹൈവേ റിസേര്‍ച്ച് ഇന്‍സ്റ്റിറ്റ്യൂട്ടിന്‍റെ പ്രതിനിധി സംഘം സ്ഥല പരിശോധന നടത്തണമെന്നും മുന്‍ എംഎല്‍എ എല്‍ദോ എബ്രഹാം ആവശ്യപ്പെട്ടു. ഇതു സംബന്ധിച്ച് എല്‍ദോ എബ്രഹാം മന്ത്രി മുഹമ്മദ് റിയാസിന് കത്ത് നല്‍കി.

കോതമംഗലം പോലീസ് സ്റ്റേഷനിലേക്ക് ബിജെപിയുടെ പ്രതിഷേധപ്രകടനം

കോതമംഗലം: ടിടിഐ വിദ്യാർഥിനിയുടെ മരണത്തിൽ പ്രതിഷേധിച്ച് ബിജെപി കോതമംഗലം പോലീസ് സ്റ്റേഷനിലേക്ക് പ്രകടനം നടത്തി. ബിജെപി ഓഫീസിന് മുന്നിൽ നിന്ന് ആരംഭിച്ച പ്രതിഷേധ പ്രകടനം നഗരം ചുറ്റി പോലീസ് സ്റ്റേഷനു മുന്നിൽ എത്തിയപ്പോൾ ബാരിക്കേഡ് വച്ച് തടഞ്ഞു. തുടർന്ന് നടന്ന പ്രതിഷേധ യോഗത്തിൽ ബിജെപി എറണാകുളം ഈസ്റ്റ് ജില്ലാ പ്രസിഡന്‍റ് പി.പി.സജീവ് അധ്യക്ഷത വഹിച്ചു. ദേശീയ കൗൺസിൽ അംഗം പി.സി. ജോർജ് ഉദ്ഘാടനം ചെയ്തു. സംസ്ഥാന വൈസ് പ്രസിഡന്‍റ് ബി. ഗോപാലകൃഷ്ണൻ മുഖ്യപ്രഭാഷണം നടത്തി. ഇടത്, വലത് മുന്നണികളുടെ മൗനം സംശയാസ്പദം: പി.സി. ജോർജ് കോതമംഗലം : കോതമംഗലത്ത് ടിടിഐ വിദ്യാർഥിനി ആത്മഹത്യ ചെയ്ത സംഭവത്തിൽ ഇടതു, വലത് മുന്നണികളുടെ മൗനം സംശയാസ്പദമാണെന്ന് ബിജെപി ദേശീയ കൗൺസിൽ അംഗം പി.സി ജോർജ് പത്രസമ്മേളനത്തിൽ പറഞ്ഞു.നിരവധി തവണ സിമി ക്യാമ്പുകൾ നടന്ന ആലുവയിലെ പാനായികുളത്താണ് പെൺകുട്ടിയെ പൂട്ടിയിട്ട് മതം മാറ്റത്തിന് ഭീഷണിപ്പെടുത്തിയതും പ്രേരിപ്പിച്ചതും മർദിച്ചതും എന്നുള്ളത് വിഷയത്തിന്‍റെ ഗൗരവം വർധിപ്പിക്കുന്നുവെന്നും അദ്ദേഹം പറഞ്ഞു. നിർബന്ധിത മതപരിവർത്തനത്തിനായി വലിയ രീതിയിൽ ഭീഷണിപ്പെടുത്തുകയും പീഡിപ്പിക്കുകയും ചെയ്തു എന്ന് വ്യക്തമായ മൊഴി ഉണ്ടായ സാഹചര്യത്തിൽ ആ വിഷയത്തെക്കുറിച്ച് ഒരക്ഷരം പോലും മിണ്ടാതെ കോൺഗ്രസിന്‍റെയും സിപിഎമ്മിന്‍റെയും നേതാക്കൾ കാണിക്കുന്ന മൗനം കാലാകാലങ്ങളായി ഇവിടെയുള്ള ലൗ ജിഹാദിനെ കണ്ടില്ലെന്ന് നടിക്കുന്നതാണ്. എന്തെങ്കിലും പ്രതികരിച്ചാൽ ഇവിടുത്തെ രാജ്യവിരുദ്ധ വർഗീയ ശക്തികൾ തങ്ങൾക്ക് എതിരാകുമെന്ന് ഭയന്നു കൊണ്ടാണ് ഈ വിഷയത്തിൽ മുഖ്യമന്ത്രിയും പ്രതിപക്ഷ നേതാവും മൗനം പാലിക്കുന്നതെന്നും പി.സി.ജോർജ് പറഞ്ഞു. പത്രസമ്മേളനത്തിൽ ബിജെപി സംസ്ഥാന വൈസ് പ്രസിഡന്‍റ് ബി.ഗോപാലകൃഷ്ണൻ, എറണാകുളം ഈസ്റ്റ് ജില്ലാ പ്രസിഡൻഡ് പി.പിയ സജീവ് എന്നിവരും പങ്കെടുത്തു.

ടയർ പൊട്ടി; കെഎസ്ആർടിസി ബസ് വൈദ്യുത പോസ്റ്റ് ഇടിച്ചു തകർത്തു

കൂത്താട്ടുകുളം: ടയർ പൊട്ടിയതിനെ തുടർന്ന് നിയന്ത്രണംവിട്ട കെഎസ്ആർടിസി ബസ് വൈദ്യുത പോസ്റ്റ് ഇടിച്ചു തകർത്തു. യാത്രക്കാർ പരിക്കേൽക്കാതെ രക്ഷപ്പെട്ടു. കൂത്താട്ടുകുളത്തു നിന്ന് കോട്ടയത്തേക്ക് പോകുകയായിരുന്ന ഓർഡിനറി ബസിന്‍റെ മുൻവശത്തെ ടയറാണ് പൊട്ടിയത്. വെളിയന്നൂർ പഞ്ചായത്ത് ഓഫീസിനു സമീപം ഇന്നലെ രാവിലെ 11നായിരുന്നു സംഭവം. കൂത്താട്ടുകുളം ഡിപ്പോയിലെ ബസാണ് അപകടത്തിൽപ്പെട്ടത്. ഡിപ്പോയിലെ ബസുകൾ കാലപ്പഴക്കമേറിയവയാണെന്നും കൃത്യമായ അറ്റകുറ്റപ്പണികൾ വർക്‌ഷോപ്പിൽ നടത്താറില്ലെന്നും നാട്ടുകാർ ആരോപിച്ചു.

പാലക്കുഴ കാപ്പിപള്ളിക്ക്‌ സമീപം റോഡിലെ കലുങ്ക് ഇടിഞ്ഞു

പാലക്കുഴ: തൊടുപുഴ-കമ്പംമെട്ട് ഹൈവേയിൽ പാലക്കുഴ കാപ്പിപള്ളിക്ക്‌ സമീപം കലുങ്ക് ഇടിഞ്ഞ് റോഡ് തകർന്നു. കാപ്പിപള്ളി പാലത്തിന് സമീപം കുരുവേലിതാഴത്തെ പഴയ കലുങ്കിന്‍റെ ഒരു ഭാഗം തിങ്കളാഴ്ച രാത്രിയാണ് ഇടിഞ്ഞത്. വർഷങ്ങൾക്കു മുമ്പ് റോഡ് പുതുക്കി പണിതപ്പോൾ നിലവിൽ ഇവിടെ ഉണ്ടായിരുന്ന കലുങ്ക് നിലനിർത്തുകയും, തൊട്ടടുത്തു തന്നെ പുതിയ കലുങ്ക് നിർമിക്കുകയുമായിരുന്നു. കാലപ്പഴക്കം കൊണ്ട് ബലക്ഷയം സംഭവിച്ച പഴയ കലുങ്കാണ് അപകടകരമായ രീതിയിൽ ഇടിഞ്ഞ് താഴ്ന്നത്. ഗതാഗതം ഭാഗികമായി തടസപ്പെട്ടതോടെ ബസ് ഉൾപ്പെടെയുള്ള വലിയ വാഹനങ്ങൾക്ക്‌ കടന്നു പോകുവാൻ ബുദ്ധിമുട്ടി. തുടർന്ന് പിഡബ്ല്യുഡി ഉദ്യോഗസ്ഥർ എത്തി പ്രശ്നത്തിന് പരിഹാരമായി ഇടിഞ്ഞ ഭാഗത്ത് ക്വാറി വേസ്റ്റ് ഇടുകയും റോഡ് സൈഡിലെ വെള്ളക്കെട്ട് ഒഴിവാക്കുന്നതിന് ജെസിബിയുടെ സഹായത്തോടെ താൽക്കാലിക ചാൽ നിർമിക്കുകയും ചെയ്തു. താത്കാലിക പ്രശ്നപരിഹാരത്തിന് പകരം യുദ്ധകാല അടിസ്ഥാനത്തിൽ കലുങ്ക് പുനർനിർമിക്കണമെന്ന് ബ്ലോക്ക് പഞ്ചായത്ത് അംഗം സിബി ജോർജ് അധികാരികളോട് ആവശ്യപ്പെട്ടു.

കാവുംപടി റോഡില്‍ ഓടയുടെ സ്ലാബ് തകര്‍ന്നത് അപകടഭീഷണിയാകുന്നു

മൂവാറ്റുപുഴ: കാവുംപടി റോഡില്‍ ഓടയുടെ സ്ലാബ് തകര്‍ന്ന് അപകട ഭീഷണിയാകുന്നു. നിര്‍മല ഹൈസ്‌കൂളിന് മുന്‍ വശത്താണ് സ്ലാബ് ഒടിഞ്ഞ് അപകടഭീക്ഷണി ഉയര്‍ത്തുന്നത്. സ്‌കൂള്‍ ബസുകളടക്കം നിരവധി വാഹനങ്ങള്‍ സഞ്ചരിക്കുന്ന റോഡിലാണ് അപകട ഭീഷണി നിലനില്‍ക്കുന്നത്. മൂവാറ്റുപുഴ നഗരവികസനവുമായി ബന്ധപ്പെട്ട് നിര്‍മാണം നടക്കുന്നതിനാല്‍ ബസുകളടക്കമുള്ള വാഹനങ്ങള്‍ ഇതുവഴിയാണ് സഞ്ചരിക്കുന്നത്. ഇരു ചക്രവാഹനങ്ങളാണ് ഏറെയും അപകട ഭീഷണി നേരിടുന്നത്. വലിയ വാഹനങ്ങള്‍ക്ക് സൈഡ് കൊടുക്കുന്നതിനിടെ ഇരുചക്ര വാഹനങ്ങള്‍ അപകടത്തില്‍പ്പെടാന്‍ സാധ്യതയേറെയാണ്. കാല്‍നടയാത്രക്കാര്‍ക്കും ഭീഷണിയായി മാറിയിരിക്കുകയാണ്. അധികൃതര്‍ ഉടന്‍ വേണ്ട നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

ടിടിഐ വിദ്യാർഥിനിയുടെ ആത്മഹത്യ: റമീസിന്‍റെ കുടുംബാംഗങ്ങളെയും സുഹൃത്തിനെയും പ്രതിചേർക്കും

കോതമംഗലം: കോതമംഗലത്ത് ടിടിഐ വിദ്യാർഥിനി ജീവനൊടുക്കിയ സംഭവത്തിലെ പ്രതി പറവൂർ ആലങ്ങാട് പാനായിക്കുളം തോപ്പിൽപറമ്പിൽ റമീസിന്‍റെ (24) കുടുംബാംഗങ്ങളെയും സുഹൃത്തിനെയും കേസിൽ പ്രതിചേർക്കുമെന്ന് പ്രത്യേക അന്വേഷണ സംഘം. റമീസിന്‍റെ ബന്ധുക്കളെയും സുഹൃത്തിനെയും ഇന്നുതന്നെ കസ്റ്റഡിയിലെടുത്ത് ചോദ്യം ചെയ്യും.റിമാൻഡിലായ റമീസിനെ കസ്റ്റഡിയിൽ വാങ്ങാൻ പോലിസ് കോടതിയിൽ അപേക്ഷ നൽകിയിട്ടുണ്ട്. വിദ്യാർഥിനിയെ നിർബന്ധിത മതപരിവർത്തനത്തിന് വിധേയമാക്കാൻ നടത്തിയ ക്രൂരമർദനവും യുവതി അനുഭവിച്ച ദുരിതങ്ങൾ വിവരിക്കുന്ന ആത്മഹത്യാക്കുറിപ്പും, റമീസിന്‍റെ കൈവശം ഉണ്ടായിരുന്ന മൊബൈൽ ഫോണിലെ ചില ദൃശ്യങ്ങളും വാട്സ്ആപ് ചാറ്റുകളും അന്വേഷണസംഘം വിശദമായി പരിശോധിച്ചു. വിദ്യാർഥിനിയുടെ മാതാവും സഹോദരനും നൽകിയ സുപ്രധാന വിവരങ്ങളുടെകൂടി അടിസ്ഥാനത്തിലാണ് ബന്ധുക്കളെ പ്രതി ചേർക്കാൻ പോലീസ് ഒരുങ്ങുന്നത്. റമീസും കുടുംബാംഗങ്ങളും മതംമാറ്റത്തിന് നിർബന്ധിച്ചതിനാലും അപമാനിക്കപ്പെട്ടതിനാലുമാണ് ജീവനൊടുക്കുന്നതെന്ന് ആത്മഹത്യാക്കുറിപ്പിൽ വ്യക്തമാക്കിയിരുന്നു. ഇത് മുഖവിലയ്ക്കെടുത്ത് അന്വേഷണ സംഘം നടത്തിയ ശാസ്ത്രീയ അന്വേഷണമാണ് അമ്മയുൾപ്പെടെ കുടുംബാംഗങ്ങളും ആത്മത്യാക്കുറിപ്പിൽ പരാമർശിച്ചിട്ടുള്ള റമീസിന്‍റെ സുഹൃത്തും പ്രതിപ്പട്ടികയിലേക്ക് എത്തുന്നത്. ജില്ലാ പോലീസ് മേധാവിയുടെ നിർദേശത്തെ തുടർന്ന് മൂവാറ്റുപുഴ ഡിവൈഎസ്പി പി.എം. ബൈജു കോതമംഗലം ഇൻസ്പെക്ടർ പി.ടി. എന്നിവർ ബിജോയ് ഉൾപ്പെടുന്ന പ്രത്യേക സംഘമാണ് കേസ് അന്വേഷിക്കുന്നത്. എൻഐഎ അന്വേഷിക്കണമെന്ന് വിദ്യാർഥിനിയുടെ മാതാവ് കോതമംഗലം: ടിടിഐ വിദ്യാർഥിനി ആത്മഹത്യ ചെയ്ത സംഭവത്തിൽ കേസ് എൻഐഎ അന്വേഷിക്കണമെന്ന് ആവശ്യപ്പെട്ട് മാതാവ് മുഖ്യമന്ത്രിക്കും സംസ്ഥാന പോലീസ് മേധാവിക്കും കത്ത് അയച്ചു.തന്‍റെ മകളുടേത് നിർബന്ധിത മതപരിവർത്തന ശ്രമത്തെ തുടർന്നുണ്ടായ ആത്മഹത്യയാണ്. ദുർബല വകുപ്പുകളാണ് പ്രതിക്കെതിരെ ചുമത്തിയിട്ടുള്ളത്.വിവാഹം കഴിക്കണമെങ്കിൽ മതം മാറണം, മതം മാറിയശേഷം പ്രതിയുടെ കുടുംബവീട്ടിൽ താമസിക്കണം തുടങ്ങിയ വ്യവസ്ഥകൾ മകളുടെ മേൽ നിർബന്ധിതമായി അടിച്ചേൽപ്പിക്കുകയും മതംമാറ്റാനായി റമീസിന്‍റെ പാനായിക്കുളത്തെ വീട്ടിലെ മുറിയിൽ പൂട്ടിയിടുകയും മാസികവും ശാരീരികവുമായി പീഡിപ്പിക്കുകയും ചെയ്തതായി ആത്മഹത്യാക്കുറിപ്പിൽ ഉണ്ടെന്ന് കത്തിൽ പറയുന്നു.

റേഷൻ കട സസ്പെൻഡ് ചെയ്യാൻ മദ്യപിച്ചെത്തിയ സപ്ലൈ ഓഫീസർ കുടുങ്ങി

കോതമംഗലം: റേഷൻ കട സസ്പെൻഡ് ചെയ്യാന്‍ മദ്യപിച്ചെത്തിയ താലൂക്ക് സപ്ലൈ ഓഫീസർ കുടുങ്ങി. കോതമംഗലം താലൂക്ക് സപ്ലൈ ഓഫീസര്‍ ഷിജു തങ്കച്ചനാണ് മദ്യപിച്ച് ഡ്യൂട്ടിക്കെത്തിയത്. പ്രവര്‍ത്തന സമയം ലംഘിക്കുന്നതായി കാണിച്ച് ഇരമല്ലൂരിലെ റേഷന്‍കട സസ്പെൻഡ് ചെയ്യാന്‍ എത്തിയപ്പോഴാണ് ഓഫീസർ കുടുങ്ങിയത്. റേഷന്‍കടയ്ക്കെതിരേ പരാതിയില്ലെന്നും നടപടി പാടില്ലെന്നും ആവശ്യപ്പെട്ട് രംഗത്തിറങ്ങിയ നാട്ടുകാരോടുള്ള സപ്ലൈ ഓഫീസറുടെ പെരുമാറ്റമാണ് മദ്യപിച്ചിട്ടുണ്ടോയെന്ന സംശയമുയര്‍ത്തിയത്. ഇതോടെ നാട്ടുകാര്‍ പോലീസിനെ വിളിച്ചുവരുത്തി.ശാരീരിക അസാസ്ഥ്യം പ്രകടിപ്പിച്ച ഓഫീസറെ വൈദ്യപരിശോധനയ്ക്കായി സ്വകാര്യ ആശുപത്രിയിലാണ് ആദ്യമെത്തിച്ചത്. പരിശോധനയ്ക്ക് വിധേയമാകാതിരിക്കാനുള്ള ശ്രമവും അദേഹത്തിന്‍റെ ഭാഗത്തുനിന്നുണ്ടായി. പിന്നീട് പോലീസ് അദേഹത്തെ താലൂക്ക് ആശുപത്രിയില്‍ എത്തിച്ച് നടത്തിയ പരിശോധനയിലാണ് മദ്യപിച്ചതായി തെളിഞ്ഞത്. ഷിജു പി. തങ്കച്ചനെതിരേ വകുപ്പ് തല നടപടിക്ക് ശിപാർശ ഉണ്ട്. ഇയാൾക്കെതിരേ റേഷന്‍ വ്യാപാരികള്‍ക്ക് മുമ്പും പരാതികളുണ്ടായിരുന്നു. പ്രതികാര മനോഭാവത്തോടെയുള്ള നടപടിയാണ് താലൂക്ക് ഓഫീസറുടെ ഭാഗത്തുന്നുണ്ടായതെന്ന് ഇരമല്ലൂരിലെ റേഷൻ കട നടത്തിപ്പുകാര്‍ പറഞ്ഞു. പത്ത് മിനിട്ട് വൈകിയെന്ന കാരണം പറഞ്ഞാണ് നടപടിക്ക് ശ്രമിച്ചത്. പിന്നീട് റേഷന്‍ ഇന്‍സ്പെക്ടര്‍മാരുടെ നേതൃത്വത്തില്‍ റേഷന്‍കട സസ്പെൻഡ് ചെയ്യുന്നതിനുള്ള നടപടികള്‍ പൂര്‍ത്തീകരിച്ചു. കട സീല്‍ ചെയ്യുകയും ചെയ്തു. ഇതിനെതിരേ റേഷന്‍ ഡീലേഴ്സ് അസോസിയേഷന്‍ രംഗത്തുവന്നു. നടപടി പിന്‍വലിക്കണമെന്നും ആവശ്യപ്പെട്ടു. പിന്നീട് മന്ത്രിയുടെ ഓഫീസ് ഇടപെട്ട് വൈകുന്നേരത്തോടെ നടപടി പിന്‍വലിക്കുകയും റേഷന്‍കട തുറന്നുകൊടുക്കുകയും ചെയ്തു. സപ്ലൈ ഓഫീസറുടെ നടപടിയില്‍ പ്രതിഷേധിച്ച് റേഷന്‍ വ്യാപാരികള്‍ ഇന്ന് സപ്ലൈ ഓഫീസിന് മുമ്പില്‍ ധര്‍ണ നടത്തും.

വിദ്യാർഥികൾ ദേശീയ പതാകയിലെ ആശയം ഉൾക്കൊള്ളണം: ഉമ തോമസ്

കൊച്ചി: വിദ്യാർഥികൾ ദേശിയ പതാകയിലെ നിറങ്ങളിൽ അടങ്ങിയിരിക്കുന്ന ആശയങ്ങൾ ഉൾക്കൊണ്ടു വളരണമെന്ന് ഉമ തോമസ് എംഎൽഎ അഭിപ്രായപ്പെട്ടു.കെപിസിസി വിചാർ വിഭാഗ് എറണാകുളം ജില്ലയിലെ വിവിധ സ്കൂളുകളിൽ നടത്തുന്ന വിജയപതാക @78 പരിപാടിയുടെ ജില്ലാ തല ഉദ്ഘാടനം പൊന്നുരുന്നി സെന്‍റ് റീത്താസ് ഹൈസ്കൂളിൽ നിർവഹിച്ചു സംസാരിക്കുകയായിരുന്നു അവർ. വിചാർ വിഭാഗ് ജില്ലാ ചെയർമാൻ ഷൈജു കേളന്തറ അധ്യക്ഷത വഹിച്ചു. 78 കുട്ടികൾ ദേശീയ പതാകയുടെ ചിത്രം വരച്ചു. പ്രധാനാധ്യാപിക വിരോണി ഷീന മുഖ്യപ്രസംഗം നടത്തി.

ആലുവ റെയിൽവേ സ്റ്റേഷനിലെ സൗകര്യം വർധിപ്പിക്കണം

ആലുവ: റെയിവേ സ്റ്റേഷനിലെ മൂന്നാമത്തെ പ്ലാറ്റ്ഫോമിൽ കാത്തിരിപ്പു കേന്ദ്രം, ഭക്ഷണ ശാല തുടങ്ങിയവ ആരംഭിക്കണമെന്ന് ആലുവയിൽ എത്തുന്ന ദീർഘദൂര യാത്രക്കാരുടെ ആവശ്യം ശക്തമാകുന്നു. ട്രെയിൻ കാത്തുനിൽക്കുന്ന പ്രായമായവരും രോഗികളായവരുമാണ് ശുചിമുറിയില്ലാതെ ഏറ്റവും കഷ്ടപ്പെടുന്നത്. ട്രെയിൻ കയറാനായി എത്തുന്ന യാത്രക്കാരിൽ മൂത്ര സംബന്ധമായ രോഗമുള്ളവരും പ്രമേഹ രോഗികളും ഉണ്ടാകാറുണ്ട്. ഇവർക്ക് ഒന്നാം പ്ലാറ്റ്‌ഫോമിൽ പ്രവർത്തിക്കുന്ന കംഫർട്ട് സ്റ്റേഷനിൽ പോയി വരികയെന്നത് അപ്രായോഗികമാണ്. എല്ലാ സമയത്തും ഭക്ഷണശാലകളും പ്രവർത്തിക്കുന്നില്ല. അടിയന്തിരമായി അടിസ്ഥാന സൗകര്യങ്ങൾ ഒരുക്കണമെന്ന് പബ്ലിക് പ്ലാറ്റ് ഫോറം ട്രസ്‌റ്റ് ജനറൽ സെക്രട്ടറി പി.എ. ഹംസക്കോയ തിരുവന്തപുരം ഡിവിഷണൽ മാനേജർക്ക് നൽകിയ പരാതിയിൽ ആവശ്യപ്പെട്ടു.

അരൂരിൽ കായലിന്‍റെ നിറം മാറുന്നു; രാസമാലിന്യമെന്ന് സൂചന

അരൂർ : അരൂർ ഇൻഡസ്ട്രിയൽ ഏരിയായിലെ കായലിന്‍റെ നിറം മാറുന്നു. വ്യവസായ കേന്ദ്രത്തിലെ ചെമ്മീൻ തലസംസ്കരണ കമ്പനികളിലെ രാസമാലിന്യം കായലിൽ തള്ളുന്നതാണ് നിറം മാറ്റത്തിന് കാരണമെന്ന് മത്സ്യത്തൊഴിലാളികൾ പറയുന്നു. അരൂർ - ഇടക്കൊച്ചി പാലത്തിലൂടെ വാഹനങ്ങളിലും കാൽനടയായും സഞ്ചരിക്കുന്നവർ ദുർഗന്ധം സഹിക്കാൻ കഴിയാതെ മൂക്കുത്തിയാണ് പോകുന്നത്. വൈകുന്നേരങ്ങളിൽ കായൽ മനോഹാരിത ആസ്വദിക്കാൻ നൂറുകണക്കിനാളുകൾ എത്താറുള്ള പാലമാണിത്. വർധിച്ചുവരുന്ന ദുർഗന്ധം മൂലം കഴിഞ്ഞ കുറെ കാലമായി സഞ്ചാരികൾ പാലത്തിലേക്ക് കടക്കാറില്ല. പാലത്തിലും ശുചിമുറിമാലിന്യം ഉൾപ്പെടെ തള്ളുന്നതും പതിവായിട്ടുണ്ട്. അരൂർ ഗ്രാമപഞ്ചായത്ത് താല്പര്യമെടുത്ത് സഞ്ചാരികളെആകർഷിക്കാൻ കായലോരത്ത് ഇരിപ്പിടങ്ങളോടെ പാർക്ക് ഒരുക്കിയിരുന്നു. മാലിന്യം കുന്നുകൂടിയതിനെ തുടർന്ന് പാർക്ക് അനാഥമായി മാറിയിരിക്കുകയാണ്. വൈകുന്നേരങ്ങളിൽ സൂര്യാസ്തമയം കാണാനെത്തുന്നവർ മൂക്കുപൊത്തി ഓടുന്ന സ്ഥിതിയാണുള്ളത്. രാസമാലിന്യത്തിന്‍റെ കാഠിന്യം ഇടക്കൊച്ചി പാലത്തിന്‍റെ സ്പാനുകളിലെ കമ്പികളെ തുരുമ്പിപ്പിച്ച് തുടങ്ങിയിട്ടുണ്ടെന്ന് മത്സ്യത്തൊഴിലാളികൾ പറയുന്നു. കായൽ മലിനീകരണം മൂലം മത്സ്യക്ഷാമം രൂക്ഷമാണെന്ന് ചീനവലകളിലും നീട്ടു വലകളിലും മത്സ്യം പിടിക്കുന്ന തൊഴിലാളികൾ പറയുന്നു. ഇൻഡസ്ട്രിയൽ ഏരിയായിലെ തൊഴിലാളികളും, മുക്കം, പ്രോജക്ട് കോളനികളിൽ താമസിക്കുന്നവരും ശ്വസിക്കുന്നത് രാസമാലിന്യം കലർന്ന വായുവാണ്. ഗുരുതരമായ ആരോഗ്യ പ്രശ്നങ്ങൾ സൃഷ്ടിക്കുന്ന മലിനീകരണത്തെക്കുറിച്ച് പഠനം നടത്താൻ ആരോഗ്യവകുപ്പ് തയാറാകണമെന്നാണ് നാട്ടുകാരുടെ ആവശ്യം.

ലാപ്ടോപ്പ് മോഷ്ടാവ് അറസ്റ്റിൽ

കൊച്ചി: ഒന്നരലക്ഷം രൂപയുടെ ലാപ്ടോപ്പ് മോഷ്ടിച്ച കേസിൽ യുവാവിനെ പോലീസ് പിടികൂടി. തോപ്പുംപടി മുണ്ടംവേലി ആര്യാട് വീട്ടിൽ ഡിറ്റോ ജേക്കബി(48)നെയാണ് എറണാകുളം സെൻട്രൽ പോലീസ് ഇൻസ്പെക്ടർ അനീഷ് ജോയിയുടെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. കർണാടക സ്വദേശി ഇസ്രേൽ പോളിന്‍റെ ലാപ്ടോപ്പാണ് പ്രതി മോഷ്ടിച്ചത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

ആനയൂട്ട് നടത്തി

തൃപ്പൂണിത്തുറ: ലോക ഗജദിനത്തോടനുബന്ധിച്ച് ശ്രീപൂർണത്രയീശ ക്ഷേത്രത്തിൽ ആനയൂട്ട് നടത്തി. കൊച്ചി ദേവസ്വം ബോർഡ് മെമ്പർ അഡ്വ. കെ.പി.അജയൻ, അസി.കമ്മീഷണർ എം.ജി.യഹുലദാസ്, ഓഫീസർ ആർ.രഘുരാമൻ, ക്ഷേത്ര ഉപദേശക സമിതി പ്രസിഡന്‍റ് ടി.ജി. വേണുഗോപാൽ, സെക്രട്ടറി ടി. മുരളീധരൻ, പി.എസ്. പ്രസന്ന, ആർ. നന്ദകുമാർ എന്നിവർ നേതൃത്വം നൽകി. തുടർന്ന് നടന്ന ചടങ്ങിൽ കർണാടക സംഗീതജ്ഞ ഡോ. കെ. ഓമനക്കുട്ടിയെ ആദരിച്ചു.

ലിസി ടീച്ചറെ അനുസ്മരിച്ച് കോൺഗ്രസ് പ്രവർത്തകർ

അങ്കമാലി: നഗരസഭാ ഉപാധ്യക്ഷയും മഹിളാ കോണ്‍ഗ്രസ് നേതാവുമായിരുന്ന ലിസി ടീച്ചറുടെ മൂന്നാം ചരമ വാര്‍ഷികത്തോടനുബന്ധിച്ച് മഹിളാ കോണ്‍ഗ്രസ് അങ്കമാലി, കാലടി ബ്ലോക്ക് കമ്മിറ്റികളുടെ നേതൃത്വത്തില്‍ അനുസ്മരണ സമ്മേളനം സംഘടിപ്പിച്ചു. മഹിളാ കോണ്‍ഗ്രസ് മുന്‍ സംസ്ഥാന പ്രസിഡന്‍റും കോണ്‍ഗ്രസ് രാഷ്ട്രീയകാര്യ സമിതി അംഗവുമായ അഡ്വ. ബിന്ദു കൃഷ്ണ ഉദ്ഘാടനം ചെയ്തു. മഹിളാ കോണ്‍ഗ്രസ് അങ്കമാലി ബ്ലോക്ക് പ്രസിഡന്‍റ് ലാലി ആന്‍റു അധ്യക്ഷത വഹിച്ചു. റോജി എം. ജോണ്‍ എംഎല്‍എ മുഖ്യപ്രഭാഷണം നടത്തി. പി.ജെ. ജോയി, സുനിലാ സിബി, ബിജി സാജു, കൊച്ചുത്രേസ്യ തങ്കച്ചന്‍, മാത്യു തോമസ്, സിനി മനോജ്, ടി.എം.വര്‍ഗീസ്, കെ.വി. മുരളി, കൊച്ചാപ്പു പുളിയ്ക്കല്‍, അഡ്വ. കെ.ബി. സാബു, മനോജ് മുല്ലശേരി, പൗലോസ് കല്ലറയ്ക്കല്‍, അഡ്വ.കെ.എസ്.ഷാജി, കെ.കെ. ജോഷി, ബാബു സാനി, മേരി വര്‍ഗീസ്, ലിസി പോളി, മീര അവറാച്ചന്‍, ലിസ തോമസ്, റീത്താ പോള്‍ എന്നിവര്‍ പ്രസംഗിച്ചു.

രണ്ടു കുട്ടികള്‍ക്ക് എച്ച് 1 എന്‍1 : വെണ്ണല ഗവ.ഹൈസ്‌കൂളിലെ അഞ്ചാം ക്ലാസ് അടച്ചു

കൊച്ചി: എച്ച്1 എന്‍1 സ്ഥിരീകരിച്ചതിനെ തുടര്‍ന്ന് വെണ്ണല ഗവ. ഹൈസ്‌കൂളിലെ അഞ്ചാം ക്ലാസ് അടച്ചു. അഞ്ചാം ക്ലാസിലെ രണ്ട് വിദ്യാര്‍ഥികള്‍ക്കാണ് രോഗം സ്ഥിരീകരിച്ചത്. പഠനം ഓണ്‍ലൈന്‍ വഴി ആക്കിയിട്ടുണ്ട്. ജില്ലയില്‍ ആശങ്കപ്പെടേണ്ട സാഹചര്യം ഇല്ലെന്നും പനിബാധിതരായ കുട്ടികള്‍ സ്‌കൂളില്‍ എത്തരുതെന്ന നിര്‍ദേശം ആരോഗ്യവകുപ്പ് നല്‍കിയിട്ടുണ്ടെന്നും ഡിഎംഒ അറിയിച്ചു. നിലവില്‍ സ്‌കൂളുകള്‍ അടച്ചിടാന്‍ ആരോഗ്യവകുപ്പ് നിര്‍ദേശം നല്‍കിയിട്ടില്ലെന്നും മുന്‍കരുതലെന്ന നിലയില്‍ സ്‌കൂളുകള്‍ സ്വന്തം നിലയ്ക്ക് അടച്ചിടുന്നതാണെന്നും ഡിഎംഒ അറിയിച്ചു.

ബാലിദ്വീപ് ഫെസ്റ്റിന് ഇന്നു തുടക്കം

കൊച്ചി: ഇന്ത്യയിലെ ആദ്യ തീം അടിസ്ഥാന പ്രദർശനത്തിന് എറണാകുളത്തപ്പൻ ഗ്രൗണ്ട് വേദിയാകുന്നു. ആന്‍റിലിയ ബാലിദ്വീപ് ഫെസ്റ്റും ഓണം ട്രേഡ് ഫെയറും ഇന്ന് ആരംഭിക്കും. വൈകുന്നേരം അഞ്ചിന് എറണാകുളത്തപ്പൻ ഗ്രൗണ്ടിൽ ഹൈബി ഈഡൻ എം.പി ഉദ്ഘാടനം ചെയ്യും. ചലച്ചിത്ര താരങ്ങളായ ഗോവിന്ദ് പത്മസൂര്യ, അഞ്ജലി നായർ, റോൺസൺ വിൻസന്‍റ്, റിനി ആൻ ജോർജ്, നിർമാതാവ് എൻ.എം ബാദുഷ തുടങ്ങിയവർ വിശിഷ്ടാതിഥികളായി പങ്കെടുക്കും. ബാലിദ്വീപിൽ പോകുന്ന അതേ അനുഭവമാണ് സന്ദർശകർക്ക് ഇവിടെ ലഭിക്കുക. അണ്ടർ വാട്ടർ ടണൽ അക്വേറിയവും ഇവിടെ ആസ്വദിക്കാം. കേരളത്തിൽ കണ്ടിട്ടില്ലാത്ത തരം അപൂർവ അലങ്കാര മത്സ്യങ്ങളും ഉണ്ടാകും. രാവിലെ 11 മുതൽ രാത്രി ഒന്പതു വരെയാകും പ്രവേശനം. ടിക്കറ്റ് നിരക്ക് 100 രൂപ. അഞ്ച് വയസിൽ താഴെയുള്ളവർക്ക് പ്രവേശനം സൗജന്യം. സെപ്റ്റംബർ 21 ന് സമാപിക്കും. സന്ദർശകരിൽ നിന്ന് നറുക്കെടുത്ത് ഒരു ഭാഗ്യശാലിക്ക് എറണാകുളം ജില്ലയിൽ 3 സെന്‍റ് സ്ഥലം സൗജന്യമായി നൽകും. സംഘാടകരായ ഗ്ലോബൽ ഇന്ത്യ എന്‍റടെയ്ൻമെന്‍റിന്‍റെ ഡയറക്ടർമാരായ ഷമീർ വളവത്ത്, എം.കെ സായ്ദ്, പി.എ നാസർ, ഫ്രാൻസിസ് ലൈല എന്നിവർ വാർത്താസമ്മേളനത്തിൽ പങ്കെടുത്തു.

കാപ്സ് ജില്ലാ കോൺഫറൻസ്

കൊച്ചി: കേരള അസോസിയേഷൻ ഓഫ് പ്രഫഷണൽ സോഷ്യൽ വർക്കേഴ്‌സ് (കാപ്സ്) ജില്ലാ കോൺഫറൻസും എറണാകുളം ചാപ്റ്റർ വാർഷികവും ന‌ടത്തി. ചൂണ്ടി ഭാരതമാതാ കോളജ് ഓഫ് കോമേഴ്‌സ് ആൻഡ് ആർട്സിലെ സാമൂഹ്യപ്രവർത്തന വിഭാഗത്തിന്‍റെ സഹകരണത്തോടെ നടത്തിയ പരിപാടി സംസ്ഥാന ബാലാവകാശ കമ്മീഷൻ അംഗം സിസിലി ജോസഫ് ഉദ്ഘാടനം ചെയ്തു. ഐസിടിഎ ശാന്തി ഗ്രാം ഡയറക്ടറും ലോയോള കോളജ് ഓഫ് സോഷ്യൽ സയൻസ് മുൻ ഡയറക്ടറുമായ ഫാ. ജോയ് ജെയിംസ് മുഖ്യപ്രഭാഷണം നടത്തി. കൗൺസലിംഗ് ഇന്‍ സോഷ്യൽ വർക്ക്‌ എന്ന വിഷയത്തിൽ നടന്ന കോൺഫറൻസിൽ രാജഗിരി കോളജ് അസോ. പ്രഫസർ ഡോ. അനീഷ്‌, പ്രിൻസിപ്പൽ കൗൺസിലർ പി. നളിനി, മുൻ സിഡബ്ലുസി അംഗം ഡാർലിൻ ഡോണൾഡ് എന്നിവർ വിവിധ വിഷയങ്ങൾ അവതരിപ്പിച്ചു. രാജഗിരി കോളജ് മുൻ ഡീൻ സി.ജെ. മേരി വീനസ്, കാപ്സ് വർക്കിംഗ്‌ പ്രസിഡന്‍റ് ഡോ. എം.പി. ആന്‍റണി, എറണാകുളം ചാപ്റ്റർ പ്രസിഡന്‍റ് ഫാ. സോജൻ പി. ജോസഫ്, ജോയിന്‍റ് സെക്രട്ടറി ഡോ. ഷാലി, സെക്രട്ടറി വിറ്റിൽ നിക്‌സൺ എന്നിവർ പ്രസംഗിച്ചു.

അമൃത വിശ്വവിദ്യാപീഠത്തിൽ "സ്വാഗതം 2025'

കൊച്ചി: അമൃത വിശ്വവിദ്യാപീഠം കൊച്ചി കാമ്പസിലെ വിവിധ കോഴ്സുകളിലെ നവാഗതർക്ക് വരവേൽപു (സ്വാഗതം-2025 ) നൽകി. അമൃത കോളജ് ഓഫ് നഴ്സിംഗ്, സ്കൂൾ ഓഫ് ഫാർമസി, സ്കൂൾ ഓഫ് നാനോ സയൻസ് ആൻഡ് മോളിക്യുലാർ മെഡിസിൻ, സെന്‍റർ ഫോർ അലൈഡ് ഹെൽത്ത് സയൻസസ് എന്നിവയിലെ ആയിരത്തിലേറെ വിദ്യാർഥികൾക്കാണു സ്വീകരണം നൽകിയത്. മാതാ അമൃതാനന്ദമയി മഠം ജനറൽ സെക്രട്ടറി സ്വാമി പൂർണാമൃതാനന്ദപുരി ചടങ്ങിൽ അനുഗ്രഹ പ്രഭാഷണം നടത്തി. ലുപ്പിൻ ഫാർമസ്യൂട്ടിക്കൽ ആർ ആൻഡ് ഡി വിഭാഗം വൈസ് പ്രസിഡന്‍റ് ഡോ. സജീവ് ചന്ദ്രൻ, ഐഐടി മദ്രാസ് ബയോടെക്നോളജി വിഭാഗം മേധാവി പ്രഫ. ഗുഹൻ ജയരാമൻ എന്നിവർ മുഖ്യാതിഥികളായി. അമൃത വിശ്വവിദ്യാപീഠം രജിസ്ട്രാർ പി. അജിത് കുമാർ, ഡോ. ശാന്തകുമാർ വി. നായർ, ഡോ. കെ.പി. ഗിരീഷ് കുമാർ തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]