ADVERTISEMENT

ADVERTISEMENT

മെഗാ ക്ലീന്‍അപ്പ് ഡ്രൈവും അവബോധ സൈക്കിള്‍ റാലിയും

കൊച്ചി: എറണാകുളം സെന്‍റ് ആല്‍ബര്‍ട്സ് കോളജും കൊച്ചി നഗരസഭയും ചേര്‍ന്ന് സംഘടിപ്പിച്ച മെഗാ ക്ലീന്‍അപ്പ് ഡ്രൈവും അവബോധ സൈക്കിള്‍ റാലിയും എറണാകുളം വഞ്ചി സ്‌ക്വയറില്‍ ടി.ജെ. വിനോദ് എംഎല്‍എ ഫ്ലാഗ് ഓഫ് ചെയ്തു.

നഗരസഭ കൗണ്‍സിലര്‍ മനു ജേക്കബ് പ്രസംഗിച്ചു. പരിപാടിയില്‍ സെന്‍റ് ആല്‍ബര്‍ട്സ് കോളജ് മാനേജര്‍ റവ. ഡോ. ആന്‍റണി തോപ്പില്‍, പ്രിന്‍സിപ്പൽ ഡോ. ജോസഫ് ജസ്റ്റിന്‍ റിബല്ലോ, രജിസ്ട്രാര്‍ ഫാ. ഷൈന്‍ പോളി കളത്തില്‍ എന്നിവര്‍ സന്നിഹിതരായിരുന്നു.

ADVERTISEMENT

ജില്ലാ ക്ഷീര സംഗമത്തിന് തുടക്കം

കൊച്ചി: ക്ഷീരവികസന വകുപ്പ് സംഘടിപ്പിക്കുന്ന ജില്ലാ ക്ഷീര സംഗമത്തിന് പോഞ്ഞാശേരി മൂണ്‍ലെറ്റ് കണ്‍വന്‍ഷന്‍ സെന്‍ററില്‍ തുടക്കമായി. ഔദ്യോഗിക ഉദ്ഘാടനം ഇന്ന് രാവിലെ 10.30ന് മന്ത്രി ജെ. ചിഞ്ചുറാണി നിര്‍വഹിക്കും. മന്ത്രി പി. രാജീവ് അധ്യക്ഷത വഹിക്കും. മില്‍മ എറണാകുളം റീജണല്‍ ചെയര്‍മാന്‍ സി. എന്‍. വത്സലന്‍പിള്ള പതാക ഉയര്‍ത്തിയതോടെയാണ് ക്ഷീരസംഗമത്തിന് തുടക്കമായത്. പരിപാടിയോടനുബന്ധിച്ച് നടന്ന ശ്രേയസ് മെഡിക്കല്‍ ക്യാമ്പ്, കാഴ്ച ഡയറി എക്‌സിബിഷന്‍ എന്നിവയുടെ ഉദ്ഘാടനം ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ നിര്‍വഹിച്ചു. ജില്ലയിലെ ക്ഷീര സംഘം ജീവനക്കാരുടെയും വിരമിച്ച ജീവനക്കാരുടെയും ക്ഷീര കര്‍ഷകരുടെയും മക്കളില്‍ വിവിധ മേഖലകളില്‍ മികവ് പുലര്‍ത്തിയവരെ ആദരിച്ചു. സെമിനാറുകളും സംഗമത്തിന്‍റെ ഭാഗമായി നടന്നു. തുടര്‍ന്ന് നടന്ന അരങ്ങ് കലാപരിപാടികള്‍ അന്‍വര്‍ സാദത്ത് എംഎല്‍എ ഉദ്ഘാടനം ചെയ്തു. സംഘം ജീവനക്കാര്‍, ഉദ്യോഗസ്ഥര്‍ എന്നിവര്‍ വിവിധ കലാപരിപാടികള്‍ അവതരിപ്പിച്ചു.

വാഹന മോഷണ കേസ്: പ്രതി അറസ്റ്റിൽ

മട്ടാഞ്ചേരി: നിരവധി വാഹന മോഷണ കേസിലെ പ്രതിയെ തോപ്പുംപടി പോലീസ് പിടികൂടി. മട്ടാഞ്ചേരി ചക്കരയിടുക്ക് സ്വദേശി ശിഹാബ്(28)നെയാണ് മട്ടാഞ്ചേരി അസി. കമ്മീഷണർ ഉമേഷ് ഗോയലിന്‍റെ നേതൃത്വത്തിലുള്ള സ്ക്വാഡ് അംഗങ്ങള്‍ അറസ്റ്റ് ചെയ്തത്. ചുള്ളിക്കല്‍ അബാദ് ഹോട്ടലിനു സമീപം നിര്‍ത്തിയിട്ടിരുന്ന ഓട്ടോറിക്ഷ മോഷ്ടിച്ച കേസിലാണ് ഇയാളെ എറണാകുളം ശ്രീധര്‍ തിയറ്ററിനു സമീപത്തുനിന്ന് അറസ്റ്റ് ചെയ്തത്. ചേരാനല്ലൂര്‍, സെന്‍ട്രൽ, ബിനാനിപുരം സ്റ്റേഷനുകളിലും ഇയാള്‍ക്ക് വാഹന മോഷണം, ബാറ്ററി മോഷണം തുടങ്ങിയ കേസുകളുണ്ടെന്ന് പോലീസ് പറഞ്ഞു. തോപ്പുംപടി ഇന്‍സ്പെക്ടര്‍ എ.എന്‍. ഷാജു, എസ്ഐ പി. ഷാബി, സീനിയര്‍ സിവില്‍ പോലീസ് ഓഫീസര്‍മാരായ എഡ്വിന്‍ റോസ്, ബിബിന്‍ മോന്‍, അനീഷ്, സുനില്‍ കുമാര്‍ എന്നിവരാണ് അന്വേഷണ സംഘത്തിൽ ഉണ്ടായിരുന്നത്.

സ്ത്രീയോട് അസഭ്യം പറഞ്ഞത് ചോദ്യം ചെയ്തു; യുവാവിനെ തലയ്ക്കടിച്ച് വീഴ്ത്തി

കൊച്ചി: സ്ത്രീയോട് അസഭ്യം പറഞ്ഞത് ചോദ്യം യുവാവിനെ ഇരുമ്പു വടികൊണ്ട് തലയ്ക്കടിച്ച് പരിക്കേൽപ്പിച്ചു. കടവന്ത്ര മെട്രോ സ്റ്റേഷന് സമീപം പ്രവര്‍ത്തിക്കുന്ന കോഫി ഷോപ്പില്‍ വ്യാഴാഴ്ച പുലര്‍ച്ചെ ഒന്നോടെയായിരുന്നു സംഭവം. പള്ളുരുത്തി ഇടക്കൊച്ചി സ്വദേശിയായ 22കാരനാണ് ആക്രമണത്തില്‍ പരിക്കേറ്റത്. സംഭവത്തില്‍ കണ്ടാലറിയാവുന്ന മൂന്നു പേരെ പ്രതി ചേര്‍ത്ത് സൗത്ത് പോലീസ് കേസെടുത്തു. കഫേയില്‍ ഉണ്ടായിരുന്ന സ്ത്രീയോട് പ്രതികളില്‍ രണ്ടുപേര്‍ അസഭ്യം പറഞ്ഞത് യുവാവ് ചോദ്യം ചെയ്തു. ഇതോടെ പ്രതികള്‍ മൂന്നുപേരും ചേര്‍ന്ന് യുവാവിനെ തടഞ്ഞുവയ്ക്കുകയും മര്‍ദിച്ച ശേഷം കൈയില്‍ കരുതിയിരുന്ന ഇരുമ്പുവടികൊണ്ട് തലയ്ക്കടിച്ച് പരിക്കൽപ്പിക്കുകയുമായിരുന്നു. ആക്രമണത്തിന് ശേഷം കടന്നുകളഞ്ഞ പ്രതികള്‍ക്കായി പോലീസ് സിസിടിവി കേന്ദ്രീകരിച്ച് അന്വേഷണം ആരംഭിച്ചു.

തെരഞ്ഞെടുപ്പ് കമ്മീഷന്‍ ഇരട്ട വോട്ടുകൾ സംരക്ഷിക്കുന്നു: മുഹമ്മദ് ഷിയാസ്

കൊച്ചി: ഇരട്ട വോട്ടുകള്‍ പ്രോത്സാഹിപ്പിക്കാനുള്ള തെരഞ്ഞെടുപ്പ് കമ്മീഷന്‍ നീക്കം അവസാനിപ്പിക്കണമെന്ന് ഡിസിസി പ്രസിഡന്‍റ് മുഹമ്മദ് ഷിയാസ്. തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് അടുത്തിരിക്കെ, വോട്ടര്‍ പട്ടിക ശുദ്ധീകരിക്കാന്‍ യാതൊരു ശ്രമവും നടത്താതെ ഇരട്ട വോട്ടുകളെ സംരക്ഷിക്കാനുള്ള നയമാണ് കമ്മീഷന്‍ സ്വീകരിക്കുന്നതെന്ന് അദ്ദേഹം കുറ്റപ്പെടുത്തി. ഒരു വോട്ടര്‍ക്ക് വിവിധ തദ്ദേശ സ്ഥാപനങ്ങളിലോ, അതേ തദ്ദേശസ്ഥാപനത്തിലെ വിവിധ വാര്‍ഡുകളിലോ വോട്ടര്‍പട്ടികയില്‍ പേര് നിലനിര്‍ത്തുന്നതിന് സഹായിക്കുന്ന രീതിയിലാണ് വോട്ടര്‍ പട്ടിക ഓണ്‍ലൈന്‍ ആയി പരിശോധിക്കുന്നതെന്ന് അദ്ദേഹം പറഞ്ഞു. ഇതിന് സഹായകമാകുന്ന തരത്തിലാണ് വോട്ടര്‍ ഐഡി നമ്പര്‍ വെബ്‌സൈറ്റുകളില്‍ നിന്ന് നീക്കം ചെയ്ത് സംസ്ഥാന തെരഞ്ഞെടുപ്പ് കമ്മീഷന്‍ സഹായിക്കുന്നത്. ഈ നടപടി പിന്‍വലിക്കണമെന്ന് ഷിയാസ് ആവശ്യപ്പെട്ടു. തദ്ദേശസ്ഥാപന തെരഞ്ഞെടുപ്പുകളില്‍ വളരെ ചെറിയ മാര്‍ജിനില്‍ ആണ് സാധാരണ വിജയം നിശ്ചയിക്കാറുള്ളത്. ഇത്തരം വിജയങ്ങള്‍ ഭരണത്തിന് നിര്‍ണായകവും ആകാറുണ്ട്. ഇക്കാര്യങ്ങള്‍ വ്യക്തമായി മനസിലാക്കിയാണ് ഭരണകക്ഷിയുടെ ചട്ടുകമായി ഇരട്ട വോട്ടുകള്‍ക്ക് കമ്മീഷന്‍ സംരക്ഷണം ഒരുക്കുന്നത്. ഈ നീക്കത്തോടെ വോട്ടറുടെ ഒന്നിലധികം വരുന്ന വോട്ടുകള്‍ പരിശോധിക്കാനാകാത്ത സാഹചര്യമാണ്. ഇത് തദ്ദേശ തെരഞ്ഞെടുപ്പിനെ ഗുരുതരമായി ബാധിക്കുമെന്നും തീരുമാനം എത്രയും വേഗം പുനപരിശോധിക്കണമെന്നും മുഹമ്മദ് ഷിയാസ് പറഞ്ഞു.

സ്ഥിരനിക്ഷേപം നല്‍കിയില്ല : അവകാശിക്ക് തുകയും നഷ്ടപരിഹാരവും നല്‍കാൻ ഉത്തരവ്

കൊച്ചി: കാലാവധി കഴിഞ്ഞ സ്ഥിര നിക്ഷേപ തുക അവകാശിക്ക് നല്‍കുന്നതില്‍ വീഴ്ചവരുത്തിയ ബാങ്ക്, നിക്ഷേപ തുകയും നഷ്ടപരിഹാരവും നല്‍കണമെന്ന് എറണാകുളം ജില്ലാ ഉപഭോക്തൃ തര്‍ക്കപരിഹാര കോടതി. വൈറ്റില സ്വദേശി പി.പി. ജോര്‍ജാണ് പരാതിക്കാരൻ. ജോര്‍ജിന്‍റെ പിതാവ് പി.വി. പീറ്റര്‍ 1989ല്‍ സ്റ്റേറ്റ് ബാങ്ക് ഓഫ് ട്രാവന്‍കൂര്‍ വൈറ്റില ശാഖയില്‍ 39,000 രൂപയുടെ സ്ഥിര നിക്ഷേപം നടത്തിയിരുന്നു. 2022 ജൂണില്‍ പിതാവ് മരിച്ചു. ഇതിനുശേഷം അവകാശിയായ പരാതിക്കാരന്‍ നിക്ഷേ പ തുക തിരികെ ലഭിക്കുന്നതിന് ബാങ്കിനെ സമീപിച്ചു. എന്നാല്‍ എസ്ബിടി ബാങ്ക് എസ്ബിഐയില്‍ ലയിപ്പിച്ചപ്പോള്‍ രേഖകള്‍ കാണാതായെന്ന കാരണം പറഞ്ഞ് തുക നിരസിച്ചു. ഈ സാഹചര്യത്തിലാണ് മകന്‍ പരിഹാരം തേടി ഉപഭോക്തൃ കോടതിയെ സമീപിച്ചത്. അസല്‍ സ്ഥിര നിക്ഷേപ രസീത്, ആധാര്‍ കാര്‍ഡ്, ജനന രജിസ്റ്റര്‍ രേഖ, പിതാവിന്‍റെ മരണ സര്‍ട്ടിഫിക്കറ്റ്, ബാങ്കുമായി നടത്തിയ കത്തിടപാടുകള്‍ എന്നിവ പരാതിക്കാരന്‍ കോടതിയില്‍ ഹാജരാക്കി. 10 വര്‍ഷത്തിലധികം അവകാശപ്പെടാത്ത നിക്ഷേപങ്ങള്‍ ബാങ്ക് ആര്‍ബിഐയിലേക്ക് കൈമാറിയാലും, നിക്ഷേപകരുടെ അവകാശം നഷ്ടമാകില്ല. ബാങ്കുകള്‍ തന്നെ നിക്ഷേപകര്‍ക്ക് തുക നല്‍കിയ ശേഷം ആര്‍ബിഐയില്‍ നിന്ന് റീഫണ്ട് ലഭ്യമാക്കുക എന്ന ബാധ്യതയാണ് ബാങ്കിനുള്ളതെന്ന് ആര്‍ബിഐയുടെയും എസ്ബിഐയുടെയും വിവിധ സര്‍ക്കുലറുകള്‍ പരാമര്‍ശിച്ചുകൊണ്ട് കോടതി വ്യക്തമാക്കി. ഒരു സ്ഥിര നിക്ഷേപ രേഖ വെറും അക്കൗണ്ടിംഗ് രേഖ മാത്രമല്ല, അത് ഒരു കുടുംബത്തിന്‍റെ ജീവിതസമ്പാദ്യവും വിശ്വാസവുമാണ്. ബാങ്കിന്‍റെ ആഭ്യന്തര വ്യവസ്ഥകള്‍ കൊണ്ട് ഉപഭോക്താവിന്‍റെ അവകാശങ്ങള്‍ നഷ്ടപ്പെടുന്നത് അനുവദിക്കാനാകില്ലെന്ന് ഡി.ബി. ബിനു അധ്യക്ഷനായ വി. രാമചന്ദ്രന്‍, ടി.എന്‍. ശ്രീവിദ്യ എന്നിവരുടെ ബെഞ്ച് നിരീക്ഷിച്ചു. അവകാശികള്‍ ഇല്ലാതെ രാജ്യത്തെ വിവിധ ബാങ്കുകളിലായി 67,000 കോടിയോളം രൂപ നിലവിലുണ്ടെന്നും ഉത്തരവില്‍ കോടതി പരാമര്‍ശിച്ചു. പരാതിക്കാരന്‍റെ പിതാവിന്‍റെ സ്ഥിര നിക്ഷേപ തുകയായ 39,000 രൂപയും ആര്‍ബിഐയുടെയും എസ്ബിഐയുടെയും സര്‍ക്കുലറുകള്‍ പ്രകാരം ബാധകമായ പലിശ സഹിതം പരാതിക്കാരന് നല്‍കണം. കൂടാതെ ബാങ്കിന്‍റെ നടപടി മൂലം മനക്ലേശം, ധന നഷ്ടം എന്നിവ കണക്കാക്കി നഷ്ടപരിഹാരമായി 50,000 രൂപയും കോടതി ചെലവായി 5000 രൂപയും 45 ദിവസത്തിനകം പരാതിക്കാരന് നലകണമെന്ന് എതിര്‍കക്ഷികള്‍ക്ക് കോടതി ഉത്തരവ് നല്‍കി. അഡ്വ. കെ.വി. ജോര്‍ജാണ് പരാതിക്കാരനു വേണ്ടി ഹാജരായത്.

ഗോശ്രീ പാലത്തിൽ വീണ്ടും ഗതാഗതക്കുരുക്ക്

വൈപ്പിൻ: നാട്ടുകാരുടെ സമരത്തെ തുടർന്ന് ഗോശ്രീ ഒന്നാം പാലത്തിൽ താത്കാലികമായി നികത്തിയ കുഴികൾ ഒരുമാസം തികയും മുമ്പേ വീണ്ടും പ്രത്യക്ഷപ്പെട്ടതോടെ പാലത്തിൽ വീണ്ടും ഗതാഗതക്കുരുക്ക് രൂക്ഷമായി. പാലത്തിലെ കുഴികളെത്തുമ്പോൾ വാഹനങ്ങൾ വേഗത കുറയ്ക്കുന്നതിനാൽ പലപ്പോഴും ഒന്നാം പാലത്തിൽ എറണാകുളത്തുനിന്ന് വൈപ്പിൻ ഭാഗത്തേക്ക് വരുന്ന വാഹനങ്ങളുടെ നീണ്ടനിര രൂപപ്പെടുന്നു. ഇവ കടന്നു പോകാൻ വൈപ്പിൻ, പറവൂർ, വരാപ്പുഴ ഭാഗങ്ങളിൽ നിന്നും എറണാകുളത്തേക്കുള്ള വാഹനങ്ങളെ ബോൾഗാട്ടി ഭാഗത്ത് വച്ച് ഏറെനേരം തടഞ്ഞിടുന്നതും പതിവാണ്.

സഹോദയ സ്‌കൂൾ കോംപ്ലക്സ് കലോത്സവം : വൈറ്റില ടോക് എച്ച് മുന്നിൽ

കൊച്ചി: സിബിഎസ്ഇ കൊച്ചി സഹോദയ സ്‌കൂൾ കോംപ്ലക്സ് കലോത്സവത്തിന്‍റ രണ്ടാംഘട്ട മത്സരങ്ങൾക്ക് കടയിരുപ്പ് സെന്‍റ് പീറ്റേഴ്‌സ് സീനിയർ സെക്കൻഡറി സ്‌കൂളിൽ തുടക്കമായി. ആദ്യ ദിനം നൂറോളം മത്സരയിനങ്ങൾ പൂർത്തിയായപ്പോൾ വൈറ്റില ടോക് എച്ച് പബ്ലിക് സ്കൂളാണ് 570 പോയിന്‍റുമായി ഒന്നാം സ്ഥാനത്ത്. കാക്കനാട് ഭവൻസ് ആദർശ വിദ്യാലയ 561 പോയിന്‍റോടെ രണ്ടാം സ്ഥാനത്തുണ്ട്. 550 പോയിന്‍റുമായി വടുതല ചിന്മയ വിദ്യാലയയാണു മൂന്നാമത്. പത്ത് വേദികളിലായി നടക്കന്ന മത്സരങ്ങൾ ഇന്നലെ സിന്തൈറ്റ് മാനേജിംഗ് ഡയറക്ടർ അജു ജേക്കബ് ഉദ്‌ഘാടനം ചെയ്തു. സ്‌കൂൾ പ്രിൻസിപ്പൽ ആർ.കെ. മോസസ്, പരമഭട്ടാര കേന്ദ്രീയ വിദ്യാലയ പ്രിൻസിപ്പൽ മനോജ് മോഹൻ, കൊച്ചി സഹോദയ പ്രസിഡന്‍റ് വിനുമോൻ കെ. മാത്യു തുടങ്ങിയവർ പ്രസംഗിച്ചു. മാർഗംകളി, ഭരതനാട്യം, നാടോടിനൃത്തം, ഗ്രൂപ്പ് ഡാൻസ്, മിമിക്രി, മോണോആക്ട്, മൃദംഗം, ശാസ്ത്രീയ സംഗീതം തുടങ്ങിയ മത്സരങ്ങൾ ഇന്ന് നടക്കും.

ഊന്നുകല്ലിൽ കാര്‍ മറിഞ്ഞു

കോതമംഗലം: ഊന്നുകല്ലിന് സമീപം വെള്ളാമക്കുത്തില്‍ വളവു തിരിയുന്നതിനിടെ കാര്‍ നിയന്ത്രണംവിട്ട് മറിഞ്ഞു. കാര്‍ ഓടിച്ചിരുന്ന ഇടപ്പള്ളി സ്വദേശിനി പരിക്കേൽക്കാതെ അദ്ഭുതകരമായി രക്ഷപ്പെട്ടു. ഇന്നലെ രാവിലെ 10ഓടെയായിരുന്നു അപകടം. കാര്‍ വളവ് തിരിയുന്നതിനിടെ സൂര്യപ്രകാശം ശക്തമായി കണ്ണില്‍ അടിച്ചതാണ് അപകടത്തിന് കാരണമായതെന്ന് യുവതി പറഞ്ഞു.

സി.കെ. ഗോപാലകൃഷ്ണന്‍റെ ഭാര്യക്കെതിരായ സൈബർ ആക്രമണം: യുഡിഎഫ് സമരത്തിന്

പറവൂർ: സൈബർ ആക്രമണത്തിനെതിരെ പ്രാദേശിക കോൺഗ്രസ് നേതാവ് സി.കെ. ഗോപാലകൃഷ്ണന്‍റെ ഭാര്യ ഷേർളി നൽകിയ പരാതി അന്വേഷിച്ച് നടപടി സ്വീകരിക്കാൻ തയാറാകാത്ത പോലീസിന്‍റെ നടപടിയിൽ യുഡിഎഫ് പറവൂർ നിയോജക മണ്ഡലം യോഗം പ്രതിഷേധം രേഖപ്പെടുത്തി. സിപിഎം നേതാവ് കെ.ജെ.ഷൈനിനെതിരേ ഫേസ്ബുക്ക് പോസ്റ്റിട്ട സി.കെ. ഗോപാലകൃഷ്ണനെതിരെ പോലീസ് നടപടി ഉണ്ടായതിനു ശേഷമാണ് ഷേർളിക്കെതിരെ കടുത്ത സൈബർ ആക്രമണം സിപിഎം സൈബർ ഗ്രൂപ്പിൽ നിന്നുണ്ടായത്. ഇതിനെതിരെ പരാതിപ്പെട്ടെങ്കിലും ദിവസങ്ങൾ കഴിഞ്ഞിട്ടും ഒരു നടപടിയും സ്വീകരിക്കാൻ പോലീസ് തയാറായില്ല. ഷേർളിയെ പിന്തുണച്ച് മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പ്രകടനം നടത്തിയിരുന്നു. പോലീസ് അനാസ്ഥയിൽ പ്രതിഷേധിച്ച് പോലീസ് സ്റ്റേഷൻ മാർച്ച് ഉൾപ്പെടെയുള്ള സമരപരിപാടികൾക്ക് തയാറെടുക്കുകയാണ് യുഡിഎഫ് നേതൃത്വം. വരുന്ന തദ്ദേശ തെരഞ്ഞെടുപ്പിൽ യുഡിഎഫ് ഘടകകക്ഷികൾക്കല്ലാതെ മറ്റാർക്കും അഡ്ജസ്റ്റ്മെന്‍റ് എന്ന നിലയിൽ സീറ്റുകൾ നൽകരുതെന്ന് യോഗത്തിൽ പങ്കെടുത്ത ചില പ്രതിനിധികൾ ആവശ്യപ്പെട്ടു. യുഡിഎഫ് നിയോജക മണ്ഡലം ചെയർമാൻ പി.എസ്. രഞ്ജിത്ത് അധ്യക്ഷത വഹിച്ചു. മുൻ എം പി കെ.പി ധനപാലൻ ഉദ്ഘാടനം ചെയ്തു.

ട്രെയിനിനു നേരെ കല്ലേറ്; പ്ലസ് വൺ വിദ്യാർഥികൾ കുടുങ്ങി

കൊച്ചി : ഇടപ്പള്ളി - കളമശേരി റെയിൽവേ സ്റ്റേഷനുകൾക്കിടയിൽ ട്രെയിനിനു നേരെ കല്ലെറിഞ്ഞ പ്രായപൂർത്തിയാകാത്ത രണ്ടു പേർ അറസ്റ്റിലായി. ഇരുവരും പ്ലസ് വൺ വിദ്യാർഥികളാണ്. കഴിഞ്ഞ 25നായിരുന്നു സംഭവം. കല്ലേറിൽ ഫയർഫോഴ്സ് ഉദ്യോഗസ്ഥന്‍റെ തലയ്ക്ക് പരിക്കേറ്റതിനെ തുടർന്ന് എറണാകുളം റെയിൽവേ പോലീസ് കേസ് എടുത്തിരുന്നു. കളമശേരിയിലും പരിസരങ്ങളിലുമുള്ള നിരവധി സിസിടിവി ദൃശ്യങ്ങൾ കേന്ദ്രീകരിച്ച് എറണാകുളം റെയിൽവേ ഡിവൈഎസ്പി ജോർജ് ജോസഫിന്‍റെ മേൽനോട്ടത്തിൽ എറണാകുളം റെയിൽവേ പോലീസ് എസ്എച്ച്ഒ എ. നിസാറുദ്ദീനും ഡാൻസാഫ്, ഇന്‍റലിജൻസ് ടീമും നടത്തിയ അന്വേഷണത്തിലാണ് ഇരുവരും പിടിയിലായത്. 10 വർഷം വരെ തടവിന് ശിക്ഷിക്കാവുന്ന ഗുരുതര കുറ്റകൃത്യത്തിൽ ഏർപ്പെട്ട കുട്ടികളെ എറണാകുളം ജൂവനൈൽ ജസ്റ്റീസ് ബോർഡ് മുന്പാകെ മാതാപിതാക്കളോടൊപ്പം ഹാജരാക്കി. ജെജെ ബോർഡ് കുട്ടികളെ 15 ദിവസത്തേക്ക് കാക്കനാട് ഒബ്സെർവേഷൻ ഹോമിലേക്ക് മാറ്റി.

ഇടക്കൊച്ചിയിൽ അഗ്നിബാധ : വീട് പൂർണമായും കത്തിനശിച്ചു

പള്ളുരുത്തി: ഇടക്കൊച്ചിയിൽ വീടിന് തീപിടിച്ചു. ആളപായമില്ല. ഇന്നലെ രാവിലെ ഒമ്പതോടെയായിരുന്നു സംഭവം. പനച്ചിത്തറ വീട്ടിൽ പ്രതാപന്‍റെയും സിന്ധുവിന്‍റെയും കുടുംബങ്ങൾ ഒരുമിച്ച് താമസിച്ചിരുന്ന വീടാണ് പൂർണമായും കത്തിനശിച്ചത്. തീപിടിച്ച മുറി പൂട്ടിയിട്ടിരിക്കുകയായിരുന്നു. ഇവിടെ നിന്നാണ് തീ ആദ്യം ഉയർന്നത്. ഈ സമയം തൊട്ടടുത്ത മുറിയിലുള്ളവർ ജോലിക്ക് പോയിരിക്കുകയായിരുന്നു. നാട്ടുകാർ വെള്ളം ഒഴിച്ചു തീയണയ്ക്കാൻ ശ്രമിച്ചെങ്കിലും ആർക്കും സമീപ ത്തേക്ക്് എത്താനാകാത്ത വിധം തീ ആളിപ്പടരുകയായിരുന്നു. കൗൺസിലർ അഭിലാഷ് തോപ്പിൽ അറിയിച്ചതിനെ തുടർന്ന് മട്ടാഞ്ചേരി, അരൂർ എന്നിവിടങ്ങളിൽ നിന്ന് അഗ്നിരക്ഷാ സേനയെത്തി ഏറെ നേരത്തെ ശ്രമത്തിനൊടുവിലാണ് തീയണയ്ക്കാനായത്. ഓടിട്ട വീടിന്‍റെ മേൽക്കൂര പൂർണമായും തകർന്നു. വീട്ടിലുണ്ടായിരുന്ന എസി, ടിവി, സ്കൂൾ സർട്ടിഫിക്കറ്റ്, അലമാര ഉൾപ്പെടെ സകലതും തീയിൽ ചാമ്പലായി. കത്തിയ അലമാരിയിൽ വച്ചിരുന്ന ഒരു പവൻ സ്വർണം, ലോൺ അടയ്ക്കാൻ വച്ചിരുന്ന പണം എന്നിവയും കത്തിനശിച്ചതായി വീട്ടുടമ സിന്ധു പറഞ്ഞു. അരൂർ ഫയർസ്റ്റേഷനിൽ നിന്നുള്ള സ്റ്റേഷൻ ഓഫീസർ പി.എ. ലിഷാദ്, എസ്എഫ്ആർഒ വി.എസ്. സനീഷ് എന്നിവരുടെ നേതൃത്വത്തിൽ രണ്ട് യൂണിറ്റും മട്ടാഞ്ചേരി ഫയർ സ്റ്റേഷനിൽ നിന്നും സ്റ്റേഷൻ ഇൻ ചാർജ് പി. ബി. സുഭാഷിന്‍റെ നേതൃത്വത്തിൽ ഉദ്യോഗസ്ഥരായ എം. മനോജ് , എം. മനു, കെ.എസ്. സജിത്ത്, സന്ദീപ് മോഹൻ, വി.പി. അനൂപ് , സലിംകുമാർ, പി. ടി. രാജീവ് ഒരു യൂണിറ്റും സംഭവ സ്ഥലത്തെത്തി തീയണയ്ക്കുന്നതിനുള്ള പ്രവർത്തനങ്ങൾക്ക് നേതൃത്വം നൽകി. സംഭവം അറിയിച്ചതിനെ തുടർന്ന് ഇടക്കൊച്ചി വില്ലേജ് ഓഫീസ് ഉദ്യോഗസ്ഥരും സ്ഥലത്തെത്തി.

അരക്കിലോ കഞ്ചാവുമായി യുവാവ് അറസ്റ്റില്‍

കൊച്ചി: വില്പനയ്‌ക്കെത്തിച്ച അരക്കിലോ കഞ്ചാവുമായി യുവാവ് അറസ്റ്റില്‍. എറണാകുളം ചേലാമറ്റം തൊണ്ടുകടവ് കുടിയില്‍ അഭിഷേകി(25)നെയാണ് എറണാകുളം സെന്‍ട്രല്‍ പോലീസ് അറസ്റ്റ് ചെയ്തത്. കഴിഞ്ഞ ദിവസം പോലീസ് നടത്തിയ വാഹന പരിശോധനയ്ക്കിടെ രാത്രി 10.45ന് വീക്ഷണം റോഡില്‍നിന്നാണ് ഇയാള്‍ പിടിയിലായത്. ഇയാളുടെ പാന്‍റിന്‍റെ പോക്കറ്റിലും സ്‌കൂട്ടറിലുണ്ടായിരുന്ന സഞ്ചിയിലുമായി ചെറിയ സിപ് ലോക്ക് കവറുകളിലാണ് കഞ്ചാവ് സൂക്ഷിച്ചിരുന്നത്.

ഉപേക്ഷിച്ച കണ്ണാടിച്ചില്ലുകളിൽ വിസ്മയക്കാഴ്ചയായി ഗാന്ധി

കൊച്ചി: ഉപേക്ഷിക്കപ്പെട്ട കണ്ണാടിച്ചില്ലുകളിൽ കലയും കരവിരുതും സമന്വയിച്ചപ്പോൾ പിറന്നത് വ്യത്യസ്തമായൊരു ഗാന്ധിശില്പം. "ഗാന്ധി - റിഫ്‌ളക്ഷൻസ് ഇൻ റീക്ലെയിംഡ് ഗ്ലാസ്' എന്ന് പേരിട്ട കലാസൃഷ്ടി കൊച്ചി ജെയിൻ യൂണിവേഴ്‌സിറ്റിയിലെ വിദ്യാർഥികളാണ് ഒരുക്കിയത്. ഊന്നുവടിയുമായി നടന്നുനീങ്ങുന്ന ഗാന്ധിജിയുടെ രൂപമാണു പാഴ്ക്കണ്ണാടിച്ചില്ലുകളും മൾട്ടിവുഡും ഉപയോഗിച്ച് വിദ്യാർഥികൾ നിർമിച്ചത്. ശില്പത്തിൽ തട്ടുന്ന ഓരോ പ്രകാശ കിരണവും അഹിംസയുടെയും സത്യാന്വേഷണത്തിന്‍റെയും കാലാതീതമായ ഗാന്ധിയൻ പ്രസക്തി ഓർമിപ്പിക്കുന്നുവെന്നു വിദ്യാർഥികൾ പറഞ്ഞു. പാഴ്‍വസ്തുക്കൾക്ക് പുതിയ രൂപവും ഭാവവും നൽകുന്നതിലൂടെ പരിസ്ഥിതി സംരക്ഷണത്തിന്‍റെ പ്രാധാന്യവും ഈ നിർമിതി വിളിച്ചോതുന്നതായും അവർ വ്യക്തമാക്കി. ജെയിൻ സർവകലാശാലയിലെ സ്കൂൾ ഓഫ് ഡിസൈൻ, മീഡിയ ആൻഡ് ക്രിയേറ്റീവ് ആർട്‌സിലെ വിദ്യാർഥികളാണ് ശില്പത്തിന് രൂപം നൽകിയത്. തൃക്കാക്കര മുനിസിപ്പൽ പാർക്കിന് സമീപം സ്ഥാപിച്ച ശില്പം ഉമാ തോമസ് എംഎൽഎ അനാച്ഛാദനം ചെയ്തു. ജെയിൻ യൂണിവേഴ്സിറ്റിയുടെ ഫ്യൂച്ചർ കേരള മിഷന്‍റെ ഭാഗമായാണ് ശില്പം നിർമിച്ചത്. മിഷൻ ചെയർമാൻ വേണു രാജാമണി, ജെയിൻ യൂണിവേഴ്സിറ്റി ന്യൂ ഇനീഷ്യേറ്റീവ്സ് ഡയറക്ടർ ടോം ജോസഫ്, പ്രോ വൈസ് ചാൻസലർ ഡോ. ജെ. ലത, നഗരസഭാ ചെയർപേഴ്സൺ രാധാമണിപിള്ള, വാർഡ് കൗൺസിലർ വി.ഡി. സുരേഷ് എന്നിവരും ചടങ്ങിൽ പങ്കെടുത്തു. photo: തൃക്കാക്കര മുനിസിപ്പൽ പാർക്കിന് സമീപം സ്ഥാപിച്ച "ഗാന്ധി - റിഫ്‌ളക്ഷൻസ് ഇൻ റീക്ലെയിംഡ് ഗ്ലാസ്' എന്ന കലാസൃഷ്ടി ഉമാ തോമസ് എംഎൽഎ അനാച്ഛാദനം ചെയ്തപ്പോൾ

കന്നി 20 പെരുന്നാൾ : ചരിത്ര സ്മരണകൾ ഉണർത്തി ചക്കാലക്കുടി ചാപ്പൽ പ്രദക്ഷിണം

കോതമംഗലം: മാർത്തോമ്മാ ചെറിയപള്ളിയിലെ കന്നി 20 പെരുന്നാളിന് ചരിത്ര സ്മരണകൾ ഉണർത്തി ചക്കാലക്കുടി ചാപ്പലിലേക്ക് ഭക്തി നിർഭരമായ പ്രദക്ഷിണം. 340 വര്‍ഷം മുമ്പ് പരിശുദ്ധ യെല്‍ദോ മാര്‍ ബസേലിയോസ് ബാവ കോതമംഗലത്ത് ആദ്യമെത്തിയത് കോഴിപ്പിള്ളിയിലാണ്. അവിടെ പരിശുദ്ധ ബാവ വിശ്രമിക്കുകയും അത്ഭുതം പ്രകടിപ്പിക്കുകയും ചെയ്ത സ്ഥലത്ത് നിര്‍മിച്ച ചാപ്പലിലേക്കായിരുന്നു ഇന്നലെ പ്രദക്ഷിണം. ചക്കാലനായര്‍ യുവാവിന്‍റെ സഹായത്തോടെ പരിശുദ്ധ ബാവ ചെറിയപള്ളിയിലേക്ക് നടന്നെത്തിയതിന്‍റെ അനുസ്മരണമാണ് കന്നി ഇരുപതിലെ ചരിത്രപ്രസിദ്ധമായ പ്രദക്ഷിണം. പരിശുദ്ധ ബാവയ്ക്ക് വഴി കാണിച്ചു നല്‍കിയ ചക്കാലനായര്‍ യുവാവിന്‍റെ പിന്‍തലമുറക്കാരായ പുതീക്കല്‍ കുടുംബത്തിലെ അംഗം പ്രദക്ഷിണത്തില്‍ വിളക്കേന്തുന്നതും പാരമ്പര്യ ചടങ്ങാണ്. വര്‍ഷങ്ങളായി ഈ ദൗത്യം നിറവേറ്റുന്ന സുരേഷ് തന്നെയാണ് ഇത്തവണയും പ്രദക്ഷിണ വഴിയിൽ തൂക്കുവിളക്കേന്തിയത്. കന്നി 20 പെരുന്നാളിന്‍റെ ഏറ്റവും പ്രധാനപ്പെട്ട ചടങ്ങുകളിലൊന്നാണ് ചക്കാലക്കുടി ചാപ്പല്‍ പ്രദക്ഷിണം. ആയിരക്കണക്കിന് വിശ്വാസികളാണ് പ്രദക്ഷിണത്തില്‍ പങ്കുകൊണ്ടത്. ചെറിയപള്ളിയില്‍നിന്നും പുറപ്പെട്ട പ്രദക്ഷിണം ചക്കാലക്കുടി ചാപ്പല്‍ ചുറ്റി തിരികെ പള്ളിയില്‍ സമാപിച്ചു. മണിക്കൂറുകളെടുത്താണ് പ്രദക്ഷിണം പൂര്‍ത്തീകരിച്ചത്. വികാരി ഫാ. ജോസ് മാത്യു തച്ചേത്തുകുടി, സഹവികാരിമാരായ ഫാ. സാജു ജോര്‍ജ്, ഫാ. എല്‍ദോസ് ചെങ്ങമനാട്ട്, ഫാ. അമല്‍ കുഴികണ്ടത്തില്‍, ഫാ. നിയോണ്‍ പൗലോസ്, ഫാ. സിച്ചു രാജു, തന്നാണ്ട് ട്രസ്റ്റിമാരായ കെ.കെ. ജോസഫ്, എബി ചേലാട്ട്, തുടങ്ങിയവരും മറ്റ് മാനേജിംഗ് കമ്മറ്റി അംഗങ്ങളും ഭക്തസംഘടനാ ഭാരവാഹികളും പ്രദക്ഷിണത്തിന് നേതൃത്വം നല്‍കി. കന്നി 20 പെരുന്നാളിന് ഇന്ന് കൊടിയിറങ്ങും പത്ത് ദിവസം നീണ്ടുനിന്ന കന്നി 20 പെരുന്നാളിന് ഇന്ന് കൊടിയിറങ്ങും. വൈകുന്നേരം നാലിനാണ് കൊടിയിറക്ക്. ഇന്ന് രാവിലെ എട്ടിന് ഏലിയാസ് മാര്‍ അത്താനാസിയോസ് മെത്രാപ്പോലീത്തയുടെ മുഖ്യകാര്‍മികത്വത്തില്‍ മൂന്നിന്‍മേല്‍ കുര്‍ബാനയും തുടര്‍ന്ന് പാച്ചോര്‍ നേര്‍ച്ചയും. രാവിലെ 10ന് ഗജവീരന്‍മാര്‍ കബര്‍ വണങ്ങാനെത്തും. ഇന്നലെയും വലിയ ഭക്തനത്തിരക്കാണ് പള്ളിയില്‍ അനുഭവപ്പെട്ടത്.

ഡയാലിസിസിന് മുമ്പ് ആരോഗ്യ സംരക്ഷണ ബോധവത്കരണം അനിവാര്യം: സ്പീക്കർ

വാഴക്കുളം: ഡയാലിസിസ് സംവിധാനത്തിലേക്കെത്തുന്നതിനു മുമ്പ് ജീവിത ശൈലീ രോഗങ്ങളിൽനിന്ന് മോചനം പ്രാപിക്കാൻ ആരോഗ്യ സംരക്ഷണ ബോധവത്കരണം അനിവാര്യമാണെന്ന് സ്പീക്കർ എ.എൻ. ഷംസീർ. വാഴക്കുളം ചാരിറ്റബിള്‍ ട്രസ്റ്റിന്‍റെയും സെന്‍റ് ജോര്‍ജ് ആശുപത്രിയുടെയും ആഭിമുഖ്യത്തിൽ ആരംഭിക്കുന്ന സൗജന്യ ഡയാലിസിസ് സെന്‍റർ ഉദ്ഘാടനം ചെയ്യുകയായിരുന്നു സ്പീക്കർ. വാക്കിംഗ് ക്ലബ്, കായിക വിനോദങ്ങൾ, ജിം തുടങ്ങിയവയിലൂടെ ആരോഗ്യ സംരക്ഷണത്തിന് മുൻകൈയെടുക്കണമെന്നും സൗജന്യ ഡയാലിസിസ് സെന്‍ററിനായി എല്ലാവരും മാസം തോറും നേർച്ച പോലെ തുക നൽകി പ്രസ്ഥാനം നിലനിർത്തണമെന്നും അദ്ദേഹം ആവശ്യപ്പെട്ടു. പ്രതിപക്ഷ നേതാവ് വി.ഡി. സതീശൻ പൊതുസമ്മേളനം ഉദ്ഘാടനം ചെയ്തു. വൃക്കരോഗികൾ കൂടി വരുന്ന കാലഘട്ടത്തിൽ ഇത്തരമൊരു ചിന്താഗതി വാഴക്കുളത്തിന് ഉണ്ടായത് അഭിലഷണീയമാണെന്ന് അദ്ദേഹം പറഞ്ഞു. സ്വകാര്യ ആശുപത്രികളോടനുബന്ധിച്ച് ഇത്തരം സൗകര്യങ്ങൾ നൽകാറില്ല. വാഴക്കുളം സെന്‍റ് ജോർജ് ആശുപത്രി ഇക്കാര്യത്തിൽ നല്ല മാതൃകയായെന്നും വി.ഡി. സതീശൻ അഭിപ്രായപ്പെട്ടു. വ്യാപാരി വ്യവസായി ഏകോപന സമിതി വർക്കിംഗ് പ്രസിഡന്‍റ് ജിമ്മി ചക്യേത്ത് ഡയാലിസിസ് ക്ലബ് ഉദ്ഘാടനം ചെയ്തു. ട്രസ്റ്റ് ചെയര്‍മാന്‍ സിജു സെബാസ്റ്റ്യന്‍ അധ്യക്ഷത വഹിച്ചു. ഡീന്‍ കുര്യാക്കോസ് എംപി, മാത്യു കുഴല്‍നാടന്‍ എംഎല്‍എ, വികാരി ജനറാള്‍ മോണ്‍. പയസ് മലേക്കണ്ടത്തില്‍, സെന്‍റ് ജോര്‍ജ് ആശുപത്രി ഡയറക്ടര്‍ ഫാ. ജോര്‍ജ് പൊട്ടയ്ക്കല്‍, ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണന്‍, വൈസ് പ്രസിഡന്‍റ് ജോസി ജോളി തുടങ്ങിയവര്‍ പ്രസംഗിച്ചു. ചാരിറ്റബിൾ ട്രസ്റ്റിന്‍റെ ധനശേഖരണാർഥം രൂപീകരിച്ച ഡയാലിസിസ് ക്ലബിന്‍റെ പ്രചരണത്തിനായി വാഴക്കുളം കല്ലൂർക്കാട് കവലയിൽനിന്ന് ആശുപത്രി അങ്കണത്തിലേയ്ക്ക് വാക്കത്തോൺ നടത്തി.

മൂല്യവർധിത ഉത്പന്ന കേന്ദ്രം ഉദ്ഘാടനം ചെയ്തു

വാഴക്കുളം: വേങ്ങച്ചുവട് ബ്ലോക്ക് പഞ്ചായത്തു കെട്ടിടത്തിൽ ആരംഭിച്ച മൂല്യവർദ്ധിത ഉത്പന്ന കേന്ദ്രം പ്രതിപക്ഷനേതാവ് വി.ഡി സതീശന്‍ ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ അധ്യക്ഷത വഹിച്ചു. ഡീന്‍ കുര്യാക്കോസ് എംപി സ്വിച്ച് ഓണ്‍ കർമം നിർവഹിച്ചു. മാത്യു കുഴല്‍നാടന്‍ എംഎല്‍എ ആദ്യ വില്പന നടത്തി. ജില്ലാ പഞ്ചായത്ത് വൈസ് പ്രസിഡന്‍റ് എല്‍സി ജോര്‍ജ്‌ ലോഗോ പ്രകാശനം ചെയ്തു. ജില്ലാ വ്യവസായ ഓഫീസര്‍ പി.എ. നജീബ് പദ്ധതി വിശദീകരണം നടത്തി. മുൻ ജില്ലാ പഞ്ചായത്ത് പ്രസിഡന്‍റ് ഉല്ലാസ് തോമസ്, ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണന്‍, മൂവാറ്റുപുഴ പൈനാപ്പിൾ ഫാർമേഴ്സ് പ്രൊഡ്യൂസർ കമ്പനി ചെയർമാൻ ജിബിൻ റാത്തപ്പിള്ളി തുടങ്ങിയവർ പ്രസംഗിച്ചു. ജില്ലാ പഞ്ചായത്തും മുവാറ്റുപുഴ പൈനാപ്പിള്‍ ഫാര്‍മേഴ്‌സ് പ്രൊഡ്യൂസര്‍ കമ്പനിയുമായുള്ള ധാരണാപത്രത്തിന്‍റെ അടിസ്ഥാനത്തില്‍ ബ്ലോക്ക് പഞ്ചായത്ത്, ഗ്രാമപഞ്ചായത്ത്, ജില്ലാ വ്യവസായകേന്ദ്രം, കൃഷിവകുപ്പ്, മറ്റ് അനുബന്ധ സ്ഥാപനങ്ങള്‍ എന്നിവയുടെ സഹകരണത്തോടെ 85 ലക്ഷം രൂപ മുതല്‍ മുടക്കിലാണ് കേന്ദ്രം ആരംഭിച്ചത്. കാര്‍ഷികവിളകള്‍ക്ക് ന്യായമായ വില ലഭിക്കാത്ത സാഹചര്യത്തില്‍ അവ സംസ്‌കരിച്ച് ഗുണമേന്മയുള്ള മൂല്യവര്‍ദ്ധിത ഉല്‍പ്പന്നങ്ങളാക്കി മാറ്റി തദ്ദേശീയമായും വിദേശത്തും വിപണിസാധ്യത കണ്ടെത്തി കര്‍ഷകന് മെച്ചപ്പെട്ട വില ലഭ്യമാക്കാനുദ്ദേശിച്ചാണ് പദ്ധതി നടപ്പാക്കുന്നത്.

കൂത്താട്ടുകുളം-പാലാ റോഡ് 13ന് ഗതാഗതത്തിനായി തുറക്കും

കൂത്താട്ടുകുളം: കാലാവസ്ഥ അനുകൂലമെങ്കിൽ അറ്റകുറ്റപ്പണികൾ പൂത്തിയാക്കി കൂത്താട്ടുകുളം-പാലാ റോഡ് ഈ മാസം 13ന് ഗതാഗതത്തിന് തുറന്നു നൽകുമെന്ന് പിഡബ്ല്യുഡി അധികൃതർ അറിയിച്ചു. റോഡിൽ ടൈൽ വിരിക്കുന്ന ജോലികളുടെ പ്രാരംഭ നടപടികൾ ആരംഭിച്ചിട്ടുണ്ട്. രാമപുരം കവല മുതൽ മാരുതി കവല വരെയുള്ള ഭാഗത്താണ് റോഡിൽ അറ്റകുറ്റപ്പണികൾ നടന്നുവരുന്നത്. കുഴികൾ രൂപപ്പെട്ട സ്ഥലങ്ങളിലെ ബിഎം ലെയർ ടാറിംഗ് ജെസിബിയുടെ സഹായത്തോടെ ഇളക്കിമാറ്റുകയും ഈ മിശ്രിതം റോളറിന്‍റെ സഹായത്തോടെ ഈ ഭാഗങ്ങളിൽ തന്നെ പുനർ ക്രമീകരിക്കുകയും ഇതിനു മുകളിൽ റീ സോളിംഗ് ചെയ്യുകയും ചെയ്തിട്ടുണ്ട്. ഈ ഭാഗങ്ങളിൽ വരുംദിവസങ്ങളിൽ ടൈൽ വിരിച്ച് റോഡ് യാത്ര യോഗ്യമാക്കും. രാമപുരം കവല മുതൽ മാരുതി കവല വരെയുള്ള റോഡിൽ നാല് സ്ഥലങ്ങളിലാണ് ടൈൽ വിരിക്കുന്നത്. കൂത്താട്ടുകുളം ടൗണിൽനിന്നും പാലാ റോഡിലേക്ക് പ്രവേശിക്കുന്ന ഭാഗത്തും എൻഎസ്എസ് കെട്ടിടത്തിന് സമീപവും മാരുതി കവലയ്ക്ക് സമീപം രണ്ട് സ്ഥലങ്ങളിലും ആണ് ടൈൽ വിരിക്കുക. ഈ റോഡിൽ മംഗലത്തുതാഴത്ത് കലുങ്കിന്‍റെ നിർമാണം നടക്കുന്നതിനാൽ ഇതുവഴിയുള്ള ഗതാഗതം പൂർണമായി നിരോധിച്ചിരിക്കുകയാണ്. കലുങ്ക് നിർമാണം പൂർത്തിയായി ഗതാഗതത്തിന് തുറന്നു നൽകാൻ സജ്ജമായിരിക്കുകയാണ്.

നേര്യമംഗലം ജില്ലാ കൃഷിത്തോട്ടം സംസ്ഥാനത്തെ മാതൃകാ കൃഷിത്തോട്ടമാക്കണം: വി.ഡി. സതീശൻ

കോതമംഗലം: നേര്യമംഗലം ജില്ലാ കൃഷിത്തോട്ടം മുമ്പ് സംസ്ഥാനത്തെ ഒന്നാമത്തെ കൃഷിത്തോട്ടമാക്കി മാറ്റിയപോലെ വീണ്ടും ഒന്നാമത്തെയും മാതൃകാ കൃഷിത്തോട്ടവുമാക്കി മാറ്റണമെന്ന് പ്രതിപക്ഷ നേതാവ് വി.ഡി. സതീശൻ തൊഴിലാളികളോടും ഉദ്യോഗസ്ഥരോടും ജനപ്രതിനിധികളോടും പറഞ്ഞു. നേര്യമംഗലം ജില്ലാ കൃഷിത്തോട്ടത്തിൽ ജില്ലാ പഞ്ചായത്ത് ഒരു കോടി ഇരുപത് ലക്ഷം രൂപ മുടക്കി പണിതീർത്ത റസ്റ്ററന്‍റ് മന്ദിരം ഉദ്ഘാടനം ചെയ്യുകയായിരുന്നു അദ്ദേഹം. ആന്‍റണി ജോൺ എംഎൽഎ അധ്യക്ഷത വഹിച്ചു. ഡീൻ കുരിയാക്കോസ് എംപി മുഖ്യാതിഥി ആയിരുന്നു. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ, ജില്ലാ പഞ്ചായത്ത് വൈസ് പ്രസിഡന്‍റ് എൽസി ജോർജ്, ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ, കവളങ്ങാട് പഞ്ചായത്ത് പ്രസിഡന്‍റ് ടി.എച്ച്. നൗഷാദ്, ജില്ലാ പഞ്ചായത്ത് മുൻ പ്രസിഡന്‍റ് ഉല്ലാസ് തോമസ്, ജില്ലാ പഞ്ചായത്ത് അംഗങ്ങളായ കെ. കെ. ദാനി, റാണിക്കുട്ടി ജോർജ്, റഷീദാ സലീം, ലിസി അലക്സ്, ഷൈനി ജോർജ്, ജില്ലാ പഞ്ചായത്ത് അഡിഷണൽ ഡയറക്ടർ തോമസ് സാമുവേൽ, ജില്ലാ കൃഷി ഓഫീസർ പി. ഇന്ദുനായർ, പഞ്ചായത്ത് വികസനകാര്യ സ്ഥിരം സമിതി അധ്യക്ഷ സനിതാ റഹീം, യുഡിഎഫ് ജില്ലാ കൺവീനർ ഷിബു തെക്കുംപുറം, സൈജന്‍റ് ചാക്കോ, ജിംസിയ ബിജു, കെ.പി. ബാബു, ബാബു ഏലിയാസ്, പി.എം. കണ്ണൻ, പി.എം. ശിവൻ, കെ.പി. വിജയൻ, എം.വി. യാക്കോബ്, കെ.ഇ. ജോയി, ബിജു പുള്ളിൽ, ശാരദാ മോഹൻ, ഫാം സൂപ്രണ്ട് ജാസ്മിൻ തോമസ് എന്നിവർ പ്രസംഗിച്ചു.

കുടുംബങ്ങള്‍ പ്രാർഥനയുടെയും കൂട്ടായ്മയുടെയും ഇടങ്ങളാകണം: മാര്‍ ജോർജ് മഠത്തിക്കണ്ടത്തില്‍

മൂവാറ്റുപുഴ: കുടുംബങ്ങള്‍ സഭയുടെ അടിസ്ഥാന ചാലകശക്തിയാകുന്നത് പ്രാര്‍ഥനയുടെയും സന്തോഷത്തിന്‍റെയും സ്നേഹത്തിന്‍റെയും കൂട്ടായ്മയുടെയും ഇടങ്ങളായി മാറുമ്പോഴാണെന്ന് ബിഷപ് മാര്‍ ജോര്‍ജ് മഠത്തിക്കണ്ടത്തില്‍. മൂവാറ്റുപുഴ നെസ്റ്റ് പാസ്റ്ററല്‍ സെന്‍ററില്‍ നടന്ന കോതമംഗലം രൂപതയിലെ ജൂബിലേറിയൻ ദമ്പതീസംഗമം ഉദ്ഘാടനം ചെയ്യുകയായിരുന്നു അദ്ദേഹം. വിശ്വാസം, വിശുദ്ധ ഗ്രന്ഥം, വിശുദ്ധ കുര്‍ബാന തുടങ്ങിയ അടിസ്ഥാനങ്ങളിലായിരിക്കണം കുടുംബങ്ങളെ വാര്‍ത്തെടുക്കേണ്ടത്. വിധേയത്വം ഒരു അടിമത്തമല്ല, ക്രിസ്തുവിനോടുള്ള ബഹുമാനത്തിന്‍റെ അടയാളമാണെന്നും ബിഷപ് പറഞ്ഞു. ഫാമിലി അപ്പോസ്തലേറ്റ് രൂപതാ പ്രസിഡന്‍റ് ഡിഗോള്‍ കെ. ജോര്‍ജ് അധ്യക്ഷത വഹിച്ചു. രൂപത ഡയറക്ടര്‍ റവ. ഡോ. ആന്‍റണി പുത്തന്‍കുളം ആമുഖ സന്ദേശം നല്‍കി. സീറോ മലബാര്‍ പ്രൊ-ലൈഫ് കമ്മീഷന്‍ സെക്രട്ടറി ജോയ്സ് മുക്കുടം, ഫാമിലി അപ്പോസ്തലേറ്റ് രൂപത ട്രഷറര്‍ ലോറന്‍സ് ഏബ്രഹാം എന്നിവര്‍ പ്രസംഗിച്ചു. വികാരി ജനറാള്‍ മോണ്‍. വിന്‍സെന്‍റ് നെടുങ്ങാട്ട് കുര്‍ബാന അര്‍പ്പിച്ച് സന്ദേശം നല്‍കി. വിവാഹത്തിന്‍റെ സുവര്‍ണ, രജത ജൂബിലി ആഘോഷിക്കുന്ന 650 ഓളം ദമ്പതികളാണ് സംഗമത്തില്‍ പങ്കെടുത്തത്. ഫാമിലി അപ്പോസ്തലേറ്റ്, മാതൃവേദി, പിതൃവേദി, യുദിത് നവോമി, പ്രൊ-ലൈഫ് സംഘടനകളുടെ രൂപത, ഫൊറോന ഭാരവാഹികള്‍ നേതൃത്വം നല്‍കി.

തോടുകൾ ആഴം കൂട്ടി മാലിന്യ മുക്തമാക്കും

പറവൂർ: ജില്ലാ പഞ്ചായത്ത് വാർഷിക പദ്ധതിയിൽ 30 ലക്ഷം രൂപ ചിലവിട്ട് വടക്കേക്കര പഞ്ചായത്തിലെ ഒന്ന്, രണ്ട്, 20 വാർഡുകളിലെ തോടുകൾ ആഴംകൂട്ടി നീരൊഴുക്ക് സുഗമമാക്കി മാലിന്യ മുക്‌തമാക്കുന്നു. പദ്ധതി ജില്ലാ പഞ്ചായത്തംഗം എ.എസ് .അനിൽകുമാർ ഉദ്ഘാടനം ചെയ്തു.വടക്കേക്കര പഞ്ചായത്ത് പ്രസിഡന്‍റ് രശ്മി അനിൽകുമാർ അധ്യക്ഷയായി. പറവൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് കെ.എസ്. സനീഷ്, ലൈജു ജോസഫ്, സജ്ന സൈമൺ, പി.പി. ദേവൻ, സീന അരുൺ, മായ ഷാജി, ആന്‍റോ പി. മാത്യു പടമാടൻ എന്നിവർ സംസാരിച്ചു.

നവീകരിച്ച വേങ്ങൂർ കുറ്റിലക്കര റോഡ് നാടിന് സമർപ്പിച്ചു

കാലടി: മഴ പെയ്താൽ കുണ്ടും, കുഴിയുമായി കാൽനടയാത്ര പോലും ദുസഹമായിരുന്ന വേങ്ങൂർ കുറ്റിലക്കര റോഡ് മൂന്ന് വർഷങ്ങളിലായി നവീകരിച്ച് നാടിന് സമർപ്പിച്ചു. റോജി എം. ജോൺ എംഎൽഎ റോഡിന്‍റെ ഉദ്ഘാടനം നിർവഹിച്ചു. ഗ്രാമ പഞ്ചായത്ത് പ്രസിഡന്‍റ് ഷൈജൻ തോട്ടപ്പിള്ളി അധ്യക്ഷത വഹിച്ചു. ഗ്രാമപഞ്ചായത്ത് വൈസ് പ്രസിഡന്‍റ് ഷാനിദ നൗഷാദ്, വികസനകാര്യ സ്ഥിരംസമിതി അധ്യക്ഷ ശാന്താ ചാക്കോ തുടങ്ങിയവർ പങ്കെടുത്തു. പഞ്ചായത്തിന്‍റെയും, ജില്ലാ പഞ്ചായത്തിന്‍റെയും, പ്രദേശത്തെ വിവിധ സ്ഥാപനങ്ങൾ ചെലവഴിച്ചവയും ഉൾപ്പെടെ 81 ലക്ഷം രൂപ ചിലവിലാണ് റോഡ് ടൈൽ വിരിച്ച് നവീകരിച്ചത്.

പൊതുകിണർ തിരിച്ചുപിടിച്ചു

ആലുവ: പൊതു കിണർ ഭാഗികമായി അടച്ച് വീട്ടിലേക്ക് വഴിയൊരുക്കിയത് കീഴ്മാട് പഞ്ചായത്ത് തിരിച്ചു പിടിച്ചു. കൈയേറ്റം ഒഴിയാൻ നൽകിയ നോട്ടീസിനെതിരെ കെട്ടിട ഉടമ ഓംബുഡ്സ്മാനെ സമീപിച്ചെങ്കിലും ഹർജി തള്ളിയതോടെയാണ് പൊതുകിണർ തിരികെ പിടിയ്ക്കാൻ പഞ്ചായത്ത് തീരുമാനിച്ചത്. കിണറിനു മുകളിൽ സ്വകാര്യ വ്യക്തി നടത്തിയ കോൺക്രീറ്റ് ഇന്നലെ ജെസിബി സഹായത്താൽ പൊളിച്ചു കളഞ്ഞു. കീഴ്മാട് ഗ്രാമപഞ്ചായത്ത് 19-ാം വാർഡിൽ എടയപ്പുറം റേഷൻകട കവലയ്ക്ക് സമീപമാണ് രണ്ടു വർഷത്തോളമായി സ്വകാര്യ വ്യക്തി പൊതുകിണർ കൈവശപ്പെടുത്തിയിരുന്നത്. കിണറിനോട് ചേർന്നുള്ള സ്ഥലമുടമ മാനാടത്ത് ഷാഹിദ അബ്ദുൾ ലത്തീഫ് കെട്ടിടം നിർമിക്കുന്നതിനായുള്ള സാധനസാമഗ്രികൾ കൂട്ടിയിട്ടിരിക്കുകയായിരുന്നു. എന്നാൽ കെട്ടിടം പൂർത്തിയാക്കി കെട്ടിട നമ്പർ വാങ്ങിയ ഉടമ കിണറിന്‍റെ തുറന്നഭാഗം ഭാഗികമായി കോൺക്രീറ്റ് ചെയ്ത് പുതിയ കെട്ടിടത്തിന്‍റെ മുകൾനിലയിലേക്ക് വഴിയൊരുക്കി. ഇത് തിരിച്ചു പിടിക്കാനുള്ള ശ്രമമാണ് ഇപ്പോൾ വിജയിച്ചിരിക്കുന്നത്.

വിജ്ഞാൻ മിനി മാരത്തൺ നടത്തി

കാലടി: എടനാട് വിജ്ഞാനപീഠം ഇംഗ്ലീഷ് മീഡിയം സ്കൂളിന്‍റെ സുവർണ ജൂബിലിയോടനുബന്ധിച്ച് ഗാന്ധിജയന്തി ദിനത്തിൽ വിജ്ഞാൻ മിനി മാരത്തൺ നടത്തി. ആലുവ അസി. എക്സൈസ് ഇൻസ്പെക്ടർ എസ്.എ. സനൽകുമാർ ഉദ്ഘാടനം ചെയ്തു. സ്കൂൾ മാനേജർ ഫാ. അനിൽ കിളിയേൽക്കുടി അധ്യക്ഷത വഹിച്ചു. ഫ്രിനി പോൾ ദാസ്, കെ.എസ്. ഷാജി, സിജോ മതത്തായി, ധനേഷ് ചാക്കപ്പൻ എന്നിവർ പ്രസംഗിച്ചു. വിദ്യാർഥികളുൾപ്പടെ ഇരുനൂറോളം പേർ പങ്കെടുത്തു.

കടൽകയറ്റത്തിൽ തകർന്ന തീരദേശ റോഡ് പുനർനിർമിക്കാത്തതിൽ ആക്ഷേപം

വൈപ്പിൻ : കടൽകയറ്റത്തെ തുടർന്ന് നായരമ്പലം വെളിയത്താംപറമ്പ് കടപ്പുറം ഭാഗത്ത് തകർന്ന തീരദേശ റോഡ് പുനർനിർമിക്കാൻ പൊതുമരാമത്ത് അധികൃതർ കൂട്ടാക്കുന്നില്ലെന്ന് വ്യാപകമായ ആക്ഷേപം. അടുത്തിടെ പുനർ നിർമിച്ച റോഡ് ആണിത്. ഈ ഭാഗത്ത് ഇനിയും ഒരു കടലാക്രമണം ഉണ്ടായാൽ റോഡ് രണ്ടായി മുറിയാനുള്ള സാധ്യതയുണ്ടെന്നാണ് നാട്ടുകാർ പറയുന്നത്.ഈ സാഹചര്യത്തിൽ ഇറിഗേഷൻ വകുപ്പും പൊതുമരാമത്ത് വകുപ്പും ചേർന്ന് അടിയന്തരമായി പരിഹാരം കാണണമെന്ന് പന്ത്രണ്ടാം വാർഡ് അംഗം സിസി സിജി ആവശ്യപ്പെട്ടു.

ഫ്‌ളാഷ് മോബ് അവതരിപ്പിച്ചു

കങ്ങരപ്പടി: ഗാന്ധിജയന്തിയോടനുബന്ധിച്ച് ശുചിത്വ ഭാരതം ആരോഗ്യ, പരിസ്ഥിതി പരിപാലനം എന്ന ആശയത്തെ അടിസ്ഥാനമാക്കി ഹോളിക്രോസ് കോണ്‍വന്‍റ് സ്‌കൂളിലെ വിദ്യാർഥികൾ കങ്ങരപ്പടി ടൗണില്‍ ഫ്‌ളാഷ് മോബ് അവതരിപ്പിച്ചു. സ്‌കൂള്‍ പ്രിന്‍സിപ്പല്‍ സിസ്റ്റര്‍ ലൈസ ജോസഫ്, സിസ്റ്റര്‍ ജാന്‍സി പോള്‍, സൂര്യ വിനീത് എന്നിവര്‍ നേതൃത്വം നല്‍കി. കങ്ങരപ്പടി വ്യാപാരി വ്യവസായി ഏകോപന സമിതി യൂണിറ്റ് പ്രസിഡന്‍റ് രമേഷ് കുമാര്‍, അധ്യാപക പ്രതിനിധി സോണി കുരുവിള, വിദ്യാര്‍ഥി പ്രതിനിധി മുഹമ്മദ് അമീന്‍, വ്യാപാരി വ്യവസായി ഏകോപന സമിതി വൈസ് പ്രസിഡന്‍റ് ജിന്‍സണ്‍ കങ്ങരപ്പടി, യൂത്ത് വിംഗ് പ്രസിഡന്‍റ് വിപിന്‍ തുടങ്ങിയവർ പങ്കെടുത്തു.

ഇന്‍റർ കൊളീജിയറ്റ് വോളിബോൾ ടൂർണമെന്‍റിന് തുടക്കം

വരാപ്പുഴ: പപ്പന്‍ സ്മാരക ത്രിദിന അഖില കേരള ഇന്‍റര്‍ കൊളീജിയറ്റ് വോളിബോള്‍ ടൂര്‍ണമെന്‍റിനു തുടക്കം. വരാപ്പുഴ പപ്പന്‍ ഇന്‍ഡോര്‍ സ്റ്റേഡിയത്തില്‍ ഹൈബി ഈഡന്‍ എംപി ഉദ്ഘാടനം ചെയ്തു. പപ്പന്‍ സ്‌പോര്‍ട്സ് അക്കാദമി പ്രസിഡന്‍റ് മാത്തപ്പന്‍ കാനപ്പിള്ളി അധ്യക്ഷത വഹിച്ചു. വരാപ്പുഴ പഞ്ചായത്ത് പ്രസിഡന്‍റ് കൊച്ചുറാണി ജോസഫ്, ജില്ല പഞ്ചായത്തംഗം യേശുദാസ് പറപ്പിള്ളി, പഞ്ചായത്ത് സ്റ്റാൻഡിംഗ് കമ്മിറ്റി ചെയര്‍പേഴ്‌സണ്‍മാരായ വിജു ചുള്ളിക്കാട്ട്, അമ്പിളി സജീവന്‍, വാര്‍ഡംഗങ്ങളായ ജിനി ജോജന്‍, എന്‍.എസ്. സ്വരൂപ്, പപ്പന്‍ അക്കാദമി സെക്രട്ടറി കെ.എന്‍. പ്രകാശന്‍ ട്രഷറര്‍ ഷൈന്‍ മൈക്കിള്‍ എന്നിവര്‍ പ്രസംഗിച്ചു.

കേരള പ്രവാസി സംഘം ജാഥ ആരംഭിച്ചു

കളമശേരി: പ്രവാസി ക്ഷേമനിധിയിൽ കേന്ദ്ര വിഹിതം നൽകണമെന്നാവശ്യപ്പെട്ട് കേരള പ്രവാസി സംഘം എറണാകുളം ജില്ലാ കമ്മിറ്റിയുടെ നേതൃത്വത്തിൽ ഏഴിനും എട്ടിനും ആലുവ ഹെഡ് പോസ്റ്റാഫീസിന് മുമ്പിൽ സംഘടിപ്പിച്ചിട്ടുള്ള രാപകൽ സമരത്തിന്‍റെ പ്രചരണാർത്ഥമുള്ള ജില്ലാ ജാഥ പര്യടനം ആരംഭിച്ചു. കളമശേരിയിൽ ചേർന്ന യോഗത്തിൽ സംസ്ഥാന എക്സിക്യൂട്ടീവ് കമ്മിറ്റി അംഗം എം.യു. അഷറഫ് ജാഥ ഉദ്ഘാടനം ചെയ്തു. ജില്ലാ ട്രഷറർ അധ്യക്ഷനായി. കെ.ബി. വർഗീസ്, പി.എൻ. ദേവനന്ദൻ, കെ.കെ. അശോകൻ, ടി.കെ. സലിം എന്നിവർ സംസാരിച്ചു. സ്വീകരണത്തിന് നന്ദി പറഞ്ഞ് ജാഥാ ക്യാപ്റ്റൻ സി.ഇ. നാസർ, വൈസ് ക്യാപ്റ്റൻ സാജിത മുഹമ്മദാലി എന്നിവർ സംസാരിച്ചു. ശനിയാഴ്ച ജാഥ അങ്കമാലിയിൽ നിന്നാരംഭിച്ച് കോലഞ്ചേരിയിലെ പെരിങ്ങാലയിൽ സമാപിക്കും.

കഞ്ചാവുമായി ആസാം സ്വദേശി അറസ്റ്റിൽ

വൈപ്പിൻ : നാട്ടുകാർ പിടികൂടി പോലീസിൽ ഏൽപ്പിച്ച ഇതര സംസ്ഥാന തൊഴിലാളിയുടെ പക്കൽനിന്നും കഞ്ചാവ് പിടികൂടി. ആസാം സ്വദേശിയായ ഹേമ ചന്ദ്ര ടൈഡ് ( 31)ന്‍റെ പക്കൽനിന്നാണ് മുളവുകാട് പോലീസ് 120 ഗ്രാം കഞ്ചാവ് പിടികൂടിയത്. തുടർന്ന് ഇയാളെ കസ്റ്റഡിയിലെടുത്ത് കേസെടുക്കുകയായിരുന്നു. കഴിഞ്ഞദിവസം ബോൾഗാട്ടി കവലയിൽവച്ചാണ് നാട്ടുകാർ പിടികൂടി ഇയാളെ പോലീസിൽ ഏൽപ്പിച്ചത്. പോലീസെത്തി പരിശോധിച്ചപ്പോൾ ഇയാളിൽ നിന്നും ആദ്യം 25 ഗ്രാം കഞ്ചാവും പിന്നീട് ഇയാളെ ചോദ്യം ചെയ്തതിൽ നിന്നും വീട്ടിൽ സൂക്ഷിച്ചിരുന്ന 95 ഗ്രാം കഞ്ചാവും പോലീസ് കണ്ടെത്തുകയായിരുന്നു.

വളപ്പിൽ ആക്രിക്കടയിൽ മോഷണം

വൈപ്പിൻ : മാലിപ്പുറം വളപ്പിൽ ആക്രിക്കടയിൽ മോഷണം. 40000 രൂപയുടെ ചെമ്പ്,പിച്ചള, തുടങ്ങിയ സാധനങ്ങൾ നഷ്ടപ്പെട്ടു. മാലിപ്പുറം വളപ്പ് ഇടം പാടത്ത് സീനത്ത് നടത്തുന്ന ജീസ് ട്രേഡേഴ്സ് എന്ന സ്ഥാപനത്തിലാണ് കഴിഞ്ഞ ദിവസം മോഷണം നടന്നത്. ഉടമ നൽകിയ പരാതിയിൽ ഞാറയ്ക്കൽ പോലീസ് കേസെടുത്തു. കഴിഞ്ഞയാഴ്ച എടവനക്കാട് ചാത്തങ്ങാട് വടക്കേക്കര ഭാഗത്തുള്ള ആക്രിക്കടയിലും മോഷണം നടന്നിരുന്നു. ബ്ലായിൽ ഷാനവാസിന്‍റെ സ്ഥാപനത്തിൽ നിന്ന് 15 കിലോ ചെമ്പ്കമ്പിയും 6,000 രൂപയുമാണ് അന്ന് മോഷണം പോയത്.

വാഹനങ്ങൾ കൂട്ടിയിടിച്ചു; ഒരാൾക്ക് ഗുരുതര പരിക്ക്

മരട്: മരടിൽ വാഹനങ്ങളുടെ കൂട്ടയിടി. നിയന്ത്രണംവിട്ട കാർ അഞ്ച് ഇരുചക്ര വാഹനങ്ങളിലും ഒരു പിക്ക് അപ്പ്, ഓട്ടോ, കാർ എന്നിവയിലുമാണ് ഇടിച്ചത്. ഇന്നലെ വൈകിട്ട് 6.15 ഓടെ മരട് കൊട്ടാരം ജംഗ്ഷൻ കഴിഞ്ഞ് പാണ്ഡവത്ത് ക്ഷേത്രം വരെയുള്ള ഭാഗത്താണ് കാർ അപകടമുണ്ടാക്കിയത്. അപകടത്തിൽ ഗുരുതര പരിക്കേറ്റ ഒരാളെ ആശുപത്രിയിൽ പ്രവേശിപ്പിച്ചു. കുണ്ടന്നൂർ ഭാഗത്തേക്ക് പോകുകയായിരുന്ന യുവതി ഓടിച്ച കാർ ആദ്യം ഒരു ബുള്ളറ്റിൽ ഇടിക്കുകയായിരുന്നു. പിന്നീട് നിയന്ത്രണം വിട്ട കാർ നാല് ഇരുചക്ര വാഹനങ്ങളിലും ഒരു ഓട്ടോയിലുമിടിച്ചു. പിന്നാലെ മറ്റൊരു കാറിൽ ഇടിച്ചതിനെ തുടർന്ന് ഇടിയേറ്റ കാർ വട്ടം തിരിഞ്ഞ് പിക് അപ്പ് വാഹനത്തിലുമിടിച്ചു. അപകടമുണ്ടാക്കിയ കാർ സമീപത്തെ മതിലിലിടിച്ചാണ് നിന്നത്. കാർ ആദ്യം ഇടിച്ച ബുള്ളറ്റ് യാത്രികൻ മരട് സ്വദേശി ഭാഗ്യനാഥ് (54)നെ ആദ്യം പിഎസ് മിഷൻ ആശുപത്രിയിലും പരിക്ക് ഗുരുതരമായതിനെ തുടർന്ന് നെട്ടൂരിലെ സ്വകാര്യ ആശുപത്രിയിലേക്കും മാറ്റി. അപകടങ്ങളിൽ ഒരു കാൽനടയാത്രക്കാരനും പരിക്കേറ്റിരുന്നു. മറ്റ് വാഹന യാത്രക്കാർക്കാർക്കും കാര്യമായ പരിക്കില്ല. അപകടങ്ങളെ തുടർന്ന് ഈ റോഡിൽ ഇരുഭാഗത്തും രൂക്ഷമായ ഗതാഗത കുരുക്കുണ്ടായി.

കൊച്ചി ഫിഷറീസ് ഹാര്‍ബറിലെ കൂലി തര്‍ക്കത്തിന് താത്കാലിക പരിഹാരം

നോക്ക് കൂലി പരാതി ജില്ലാ ലേബര്‍ ഓഫീസര്‍ അന്വേഷിക്കും മട്ടാഞ്ചേരി: കൊച്ചി ഫിഷറീസ് ഹാര്‍ബറിലെ മീന്‍ ഇറക്ക് വിഭാഗം തൊഴിലാളികളുടെ കൂലി തര്‍ക്കത്തെ തുടര്‍ന്ന് ഉടലെടുത്ത പ്രതിസന്ധിക്ക് താല്‍ക്കാലിക പരിഹാരം. ബുധനാഴ്ച ജില്ലാ ലേബര്‍ ഓഫീസര്‍ എം.എം ജോവിന്‍ വിളിച്ചുചേര്‍ത്ത അനുരഞ്ജന യോഗത്തിലാണ് താല്‍ക്കാലിക പരിഹാരമായത്. ഇതോടെ ഹാര്‍ബര്‍ പ്രവര്‍ത്തനം ഇന്നലെ സാധാരണ പോലെ നടന്നു. തര്‍ക്ക വിഷയത്തിലിരിക്കുന്ന വേതനത്തിന്‍റെ 62.5 ശതമാനം ആറാം തീയതി നല്‍കാന്‍ യോഗത്തില്‍ ധാരണയായി. തൊഴിലുടമകളായ ബോട്ടുടമകള്‍ ഉന്നയിച്ച നോക്ക് കൂലി പ്രശ്‌നം ജില്ലാ ലേബര്‍ ഓഫീസര്‍ അന്വേഷിച്ച് തീരുമാനമെടുക്കും. അതേസമയം കഴിഞ്ഞ 14 വര്‍ഷമായി രണ്ട് ശതമാനമാണ് വേതനം ലഭിച്ചു കൊണ്ടിരിക്കുന്നതെന്നും ഓഗസ്റ്റ് 23 മുതല്‍ സെപ്റ്റംബര്‍ 29 വരെയുള്ള വേതനത്തിന്‍റെ 62.5 ശതമാനം നല്‍കാമെന്ന് തൊഴിലുടമ സമ്മതിച്ചതിന്‍റെ അടിസ്ഥാനത്തിലാണ് തൊഴില്‍ പുനരാരംഭിക്കുന്നതെന്നും തൊഴിലുടമ ഉന്നയിച്ച നോക്ക് കൂലി സമ്പ്രദായം അംഗീകരിക്കുന്നില്ലെന്നും തൊഴിലാളി യൂണിയന്‍ നേതാക്കള്‍ യോഗത്തില്‍ വ്യക്തമാക്കി. സിഐടിയു യൂണിയന്‍ വാദം ബോട്ടുടമകള്‍ അംഗീകരിക്കില്ലെങ്കിലും ലേബര്‍ ഓഫീസറുടെ അഭ്യര്‍ഥന മാനിക്കുകയാണെന്നും ബോട്ടുടമകളും യോഗത്തില്‍ അറിയിച്ചു. യോഗത്തില്‍ ബോട്ടുടമകള്‍ക്കു വേണ്ടി സിബി പുന്നൂസ്, എ.പി.റോയ് എന്നിവരും തൊഴിലാളി യൂണിയന് വേണ്ടി കെ.എം റിയാദ്, ബെനഡിക്റ്റ് ഫെര്‍ണാണ്ടസ്, വി.എം യൂസഫ്, ആര്‍.ഐ. അക്ബര്‍, പി.കെ. റഷിമോന്‍ എന്നിവരും പങ്കെടുത്തു. അടുത്ത ചര്‍ച്ച പത്തിന് ഉച്ചക്ക് മൂന്നിന് നടക്കും. വിഷയത്തില്‍ മന്ത്രി പി.രാജീവ്, ഹൈബി ഈഡന്‍ എംപി എന്നിവര്‍ ഇടപെട്ടതായാണ് വിവരം. കൂലിത്തര്‍ക്കത്തെ തുടര്‍ന്ന് പേഴ്‌സിന്‍ നെറ്റ് ബോട്ടിലെ മീന്‍ ഇറക്കാന്‍ തൊഴിലാളികള്‍ തയാറാകാതിരുന്നത് വീണ്ടും പ്രശ്‌നത്തിന് കാരണമായത്. ഹാര്‍ബര്‍ പ്രശ്‌നത്തില്‍ പേഴ്‌സിന്‍ നെറ്റ് ബോട്ട് തൊഴിലാളി യൂണിയന്‍ ഹാര്‍ബര്‍ വളയല്‍ ഉള്‍പ്പെടെയുള്ള സമരം തീരുമാനിച്ച സാഹചര്യത്തില്‍ വിഷയം കൂടുതല്‍ സങ്കീര്‍ണമാകുമെന്ന ആശങ്കയാണ് അവധി ദിനമായിട്ടു കൂടി ജില്ലാ ലേബര്‍ ഓഫിസര്‍ അനുരഞ്ജന യോഗം വിളിച്ചു ചേര്‍ത്തത്. ഇന്നലെ കടലില്‍ പോയ ബോട്ടുകള്‍ക്ക് മത്സ്യം ലഭിക്കുകയും ചെയ്തു.

ക്ഷേത്ര ഭണ്ഡാരങ്ങൾ തകർത്ത് മോഷണം

കളമശേരി: സൗത്ത് കളമശേരി ശാന്തിനഗറിൽ ചുള്ളിക്കാവ് ദുർഗ ഭഗവതി ക്ഷേത്രത്തിലെ ഭണ്ഡാരങ്ങൾ തകർത്ത് മോഷണം. പ്രധാന ശ്രീകോവിലിന് ചുറ്റുമുള്ള ഉപ ക്ഷേത്രങ്ങളുടെ മുന്നിലായി വച്ചിരുന്ന അഞ്ച് ചെറിയ സ്റ്റീൽ ഭണ്ഡാരങ്ങളുടെ പൂട്ട് തകർത്താണ് പണം കവർന്നത്. കൂടാതെ പ്രധാന ഗോപുരത്തിന്‍റെ ഭണ്ഡാരവും തകർത്തിട്ടുണ്ട്. സംഭവത്തിൽ 6,000 ത്തിൽ പരം രൂപ നഷ്ടമായതായി ക്ഷേത്ര ഭാരവാഹികൾ പോലീസിൽ നൽകിയ പരാതിയിൽ പറയുന്നു. ബുധനാഴ്ച രാത്രി 9.30 വരെ വിജയദശമി ഒരുക്കങ്ങളുമായി ബന്ധപ്പെട്ട് ആളുകൾ ക്ഷേത്രത്തിൽ ഉണ്ടായിരുന്നു. അർധരാത്രി പന്ത്രണ്ടിനുശേഷം ഒരാൾ ക്ഷേത്രത്തിൽ കടക്കുന്നത് സിസിടിവി ദൃശ്യങ്ങളിലുണ്ട്. ചെറിയ കമ്പിവടി ഉപയോഗിച്ചാണ് സ്റ്റീൽ ഭണ്ഡാരങ്ങളുടെ പൂട്ട് തകർത്തിട്ടുള്ളത്. ഇന്നലെ പുലർച്ചെ അഞ്ചിന് ക്ഷേത്ര നട തുറക്കാൻ എത്തിയ ജീവനക്കാരനാണ് മോഷണം നടന്നത് കണ്ടത്. രണ്ടു ദിവസം മുമ്പ് ഭണ്ഡാരങ്ങൾ തുറന്ന് തുക എടുത്തിരുന്നു. അഞ്ചു വർഷം മുമ്പ്, ക്ഷേത്രത്തിന്‍റെ ഓഫീസിൽ നിന്ന് ശമ്പളം കൊടുക്കാനായി വച്ചിരുന്ന 45,000 രൂപ മോഷണം പോയിരുന്നു. ഈ സംഭവത്തിൽ പ്രതികളെ ഇനിയും പിടികൂടിയിട്ടില്ല. കളമശേരി പോലീസ് സ്ഥലത്തെത്തി വിവരങ്ങൾ ശേഖരിച്ചു.

നഗരമധ്യത്തിൽ അമ്പമ്പോ...പെരുമ്പാമ്പ് വലയിലാക്കി വനം വകുപ്പ്

കൊച്ചി: നഗരത്തിലെ മരത്തിൽ കണ്ടെത്തിയ കൂറ്റൻ പെരുമ്പാമ്പിനെ പിടികൂടി. എറണാകുളത്തപ്പന്‍ അമ്പലത്തിന് സമീപത്തുള്ള എസ്‌സിഎസ്ടി മെന്‍സ് ഹോസ്റ്റല്‍ കോമ്പൗണ്ടിലെ മരത്തിനു മുകളിലാണ് പെരുമ്പാമ്പിനെ കണ്ടത്. റോഡിലൂടെ നടന്നു പോയവരാണ് ബുധനാഴ്ച രാവിലെ ആദ്യം പാമ്പിനെ കണ്ടത്. ഇവര്‍ സമീപത്തുള്ള കടക്കാരെയും വനംവകുപ്പ് ഉദ്യോഗസ്ഥരെയും വിവരം അറിയിക്കുകയായിരുന്നു. ഫയർഫോഴ്സ് വെളളം ചീറ്റിച്ച് പാമ്പിനെ നിലത്തിറക്കാന്‍ ആദ്യം ശ്രമിച്ചെങ്കിലും താഴെ വീണ് പരിക്കേൽക്കുമോയെന്ന ആശങ്കയിൽ ഈ നീക്കം ഉപേക്ഷിക്കുകയായിരുന്നു. ഇതിനിടെ, രാത്രി 7.30 ഓടെ പാമ്പ് മരത്തിന്‍റെ മറ്റൊരു ചില്ലയിലേക്ക് നീങ്ങവെ, തനിയെ നിലത്തേക്ക് വീണു. ഇതോടെ വനംവകുപ്പ് ജീവനക്കാർ പിടികൂടുകയായിരുന്നു. പെരുമ്പാമ്പിനെ കോടനാട് വനമേഖലയില്‍ വിടുമെന്ന് അവർ അറിയിച്ചു. അതേസമയം പെരുമ്പാമ്പ് എങ്ങനെ ഇവിടെ എത്തി എന്നതില്‍ വ്യക്തത വന്നിട്ടില്ല.

വികസന സദസ്: ജില്ലാതല ഉദ്ഘാടനം നാളെ ഏലൂരില്‍

കൊച്ചി: തദ്ദേശ സ്ഥാപനങ്ങളുടെ വികസന പ്രവര്‍ത്തനങ്ങള്‍ ജനങ്ങള്‍ക്ക് മുന്നില്‍ അവതരിപ്പിക്കുന്ന വികസന സദസിന് ജില്ലയില്‍ നാളെ തുടക്കമാകും.പാതാളം മുനിസിപ്പല്‍ ടൗണ്‍ ഹാളില്‍ രാവിലെ പത്തിന് നടക്കുന്ന വികസന സദസിന്‍റെ ജില്ലാതല ഉദ്ഘാടനം മന്ത്രി പി. രാജീവ് നിര്‍വഹിക്കും. ചടങ്ങില്‍ ഏലൂര്‍ നഗരസഭാ ചെയര്‍മാന്‍ എ.ഡി. സുജില്‍ അധ്യക്ഷത വഹിക്കും. ജില്ലാ കളക്ടര്‍ ജി. പ്രിയങ്ക മുഖ്യാതിഥിയാകും. തദ്ദേശ സ്ഥാപനങ്ങളും സംസ്ഥാന സര്‍ക്കാരും ഇതുവരെ കൈവരിച്ച നേട്ടങ്ങളും മുന്നേറ്റങ്ങളും സംബന്ധിച്ച് ജനങ്ങളെ ബോധവാന്മാരാക്കുന്നതിനൊപ്പം തദ്ദേശ സ്ഥാപനങ്ങളുടെ ഭാവി വികസനത്തിനായുള്ള ആശയങ്ങളും നിര്‍ദേശങ്ങളും പൊതുജനങ്ങളില്‍നിന്ന് സ്വീകരിക്കും. ഇതിനായി ഓപ്പണ്‍ ഫോറം, സംഗ്രഹ ചര്‍ച്ച എന്നിവ സംഘടിപ്പിക്കും. ചര്‍ച്ചയില്‍ ഉരുത്തിരിയുന്ന അഭിപ്രായങ്ങള്‍ ക്രോഡീകരിച്ച് സംസ്ഥാനത്തിന്‍റെ പൊതുവായ വികസന പ്രവര്‍ത്തനങ്ങളില്‍ പരിഗണിക്കുകയാണ് ലക്ഷ്യം. 2020-25 കാലഘട്ടത്തില്‍ നഗരസഭ നടത്തിയ വികസന നേട്ടങ്ങള്‍ ചടങ്ങില്‍ അവതരിപ്പിക്കും. നഗരസഭയുടെ പ്രവര്‍ത്തനങ്ങളില്‍ ശ്രദ്ധേയമായ പങ്കു വഹിച്ച ഹരിതകര്‍മസേന, കുടുംബശ്രീ അംഗങ്ങള്‍, ആശാവര്‍ക്കര്‍മാര്‍ എന്നിവരെ ചടങ്ങില്‍ ആദരിക്കും.

സ്കൂട്ടർ മോഷ്ടാവിനെ പിടികൂടി

തൃപ്പൂണിത്തുറ: കിഴക്കേക്കോട്ടയിൽനിന്ന് സ്കൂട്ടർ മോഷ്ടിച്ച കേസിൽ പറവൂർ വഴിക്കുളങ്ങര പൂത്താംമ്പള്ളിയിൽ ലിജേഷ് ജോർജി(39)നെ ഹിൽപാലസ് പോലീസ് അറസ്റ്റ് ചെയ്തു. കഴിഞ്ഞ 29ന് രാത്രി 9.50ഓടെയാണ് സ്കൂട്ടർ മോഷണം പോയത്. കിഴക്കേക്കോട്ട സ്റ്റാച്യൂ റോഡിൽ ഹാർമണി വീഡിയോ ഷോപ്പിനു മുന്നിൽ പാർക്ക് ചെയ്തിരുന്ന തെക്കുംഭാഗം തൈക്കാട്ടുപറമ്പിൽ സ്മിതയുടെ സ്കൂട്ടറാണ് പ്രതി മോഷ്ടിച്ചത്.

കൊച്ചി സ്റ്റേഡിയത്തില്‍ മെസിയെ വരവേല്‍ക്കാന്‍ ഒരുക്കങ്ങൾ തുടങ്ങി

കൊച്ചി: മെസിയും അര്‍ജന്‍റീന ദേശീയ ടീമും സൗഹൃദ മത്സരത്തിനായി കൊച്ചിയിലെത്തുന്പോൾ വേദിയാകുന്ന കൊച്ചി അന്താരാഷ്ട്ര സ്‌റ്റേഡിയത്തില്‍ നവീകരണ പ്രവര്‍ത്തനങ്ങള്‍ ആരംഭിച്ചു. കളിക്കളം നവീകരിക്കുന്ന പ്രവര്‍ത്തനങ്ങളാണ് ഇപ്പോള്‍ ആരംഭിച്ചിട്ടുള്ളത്. അന്താരാഷ്ട്ര ഫുട്‌ബോള്‍ മത്സരങ്ങള്‍ക്ക് അനുയോജ്യമായ ടര്‍ഫ് ആയതിനാല്‍ പുതിയ ടര്‍ഫ് നിര്‍മിക്കേണ്ട ആവശ്യം ഇവിടെയില്ല. പക്ഷെ പുല്‍ത്തട്ട് മെച്ചപ്പെടുത്തേണ്ടതുണ്ട്. നിലവിലുള്ള പുല്ല് പരമാവധി മുറിച്ചുമാറ്റുന്ന സീറോ കട്ടിംഗ് ജോലികളാണ് ആരംഭിച്ചിട്ടുള്ളത്. ശേഷം വളവും ആവശ്യമായ പോഷക ഘടകങ്ങളും നല്‍കി പുല്ല് വളര്‍ത്തും. പലഘട്ടങ്ങളിലായി ഇത്തരത്തില്‍ വളര്‍ത്തിയും മുറിച്ചുമാണ് മത്സരത്തിന് അനുയോജ്യമായ പുല്‍ത്തട്ട് നിര്‍മിച്ചെടുക്കുക. ഏറ്റവും ഒടുവില്‍ 25 മുതല്‍ 30 മില്ലിമീറ്റര്‍ ഉയരത്തില്‍ പുല്ല് മുറിച്ച് മത്സരത്തിനനുയോജ്യമായ ടര്‍ഫ് ആക്കി മാറ്റും. ഒരു മാസമെടുക്കും ഈ പ്രവര്‍ത്തനങ്ങള്‍ പൂര്‍ത്തിയാകാന്‍. ഇതിനിടെ ഗാലറിയുടെയും ഡ്രസ്സിംഗ് റൂമുകളുടേയും ടോയ്‌ലറ്റ് മുറികളുടെയും നവീകരണ പ്രവര്‍ത്തനങ്ങള്‍ നടക്കും. മൂന്ന് നിലകളിലായുള്ള ഗാലറിയിലെ മുഴുവന്‍ കസേരകളും മാറ്റി സ്ഥാപിക്കും. അടിയന്തിര ഘട്ടമുണ്ടായാല്‍ ചുരുങ്ങിയ സമയത്തിനുള്ളില്‍ ആളുകള്‍ക്ക് പുറത്ത് കടക്കാന്‍ തടസമില്ലാത്ത വിധമാകും പുതിയ കസേരകള്‍ സ്ഥാപിക്കുക. നിലവില്‍ 70,000 കാണികള്‍ക്കുള്ള ഇരിപ്പിടങ്ങളുണ്ട്. മാറ്റി സ്ഥാപിക്കുമ്പോള്‍ കസേരകളുടെ എണ്ണം 50,000 മായി കുറയ്ക്കുന്നതിനും ആലോചനകള്‍ നടക്കുന്നുണ്ട്. നാലു ഡ്രസിംഗ് റൂമുകളാണ് സ്‌റ്റേഡിയത്തിലുള്ളത്. ഓരോ ടീമിനും രണ്ടു റൂമുകള്‍ വീതം നല്‍കും. ഡ്രസിംഗ് റൂമുകള്‍ കുറേക്കൂടി മെച്ചപ്പെടുത്തണമെന്ന് കഴിഞ്ഞ ദിവസം സ്റ്റേഡിയത്തിലെ സൗകര്യങ്ങള്‍ വിലയിരുത്താനെത്തിയ അര്‍ജന്‍റീന ടീം മാനേജര്‍ ഹെക്ടര്‍ ഡാനിയേല്‍ കബ്രേര നിര്‍ദേശിച്ചിരുന്നു. കൂടാതെ വിവിഐപി ലോഞ്ചും കൂടുതല്‍ സൗകര്യങ്ങളോടെ മെച്ചപ്പെടുത്തും. ഫ്‌ളെഡ് ലിറ്റുകള്‍ മാറ്റി സ്ഥാപിക്കുന്ന പണികളും പുരോഗമിക്കുകയാണ്. നവംബര്‍ ആദ്യവാരത്തില്‍ തന്നെ എല്ലാ പണികളും പൂര്‍ത്തീകരിക്കാനാണ് സംഘാടകരുടെയും സര്‍ക്കാരിന്‍റെയും ശ്രമം. സൗഹൃദ മത്സരത്തിനെത്തുന്ന ലോക ചാമ്പ്യന്മാര്‍ക്ക് എതിരാളി ഓസ്‌ട്രേലിയ തന്നെയാകുമെന്ന് സ്ഥരീകരണം വന്നിട്ടുണ്ട്. ഇക്കാര്യം മുഖ്യമന്ത്രി ഔദ്യോഗികമായി പ്രഖ്യാപിക്കുക മാത്രമേ ബാക്കിയുള്ളൂ. ഫിഫ റാങ്കിംഗില്‍ 25-ാം സ്ഥാനത്തുള്ള ഓസ്‌ട്രേലിയ മിന്നും ഫോമിലാണ്. 15 പോയിന്‍റുകള്‍ നഷ്ടമായി ഇപ്പോള്‍ മൂന്നാമതാണ് അര്‍ജന്‍റീനയുടെ സ്ഥാനം. ഖത്തര്‍ ലോകകപ്പിനു ശേഷം 2023 ജൂണില്‍ ഇരുവരും ഏറ്റുമുട്ടിയ സൗഹൃദ മത്സരത്തില്‍ 2-0 ന് അര്‍ജന്‍റീന ജയിച്ചിരുന്നു.

വള്ളത്തിനു നേരെ ചരക്ക് കപ്പൽ : വന്‍ ദുരന്തം ഒഴിവായി

ഫോര്‍ട്ടുകൊച്ചി: മത്സ്യബന്ധന വള്ളത്തിന് നേരെ ചരക്ക് കപ്പലെത്തിയെങ്കിലും കൂട്ടിയിടിക്കാത്തതിനാൽ വൻ ദുരന്തംഒഴിവായി. വള്ളത്തിൽ 45 തൊഴിലാളികൾ ഉണ്ടായിരുന്നു. കൊച്ചിയില്‍ നിന്ന് മത്സ്യബന്ധനത്തിന് പോയ ആലപ്പുഴ പള്ളിത്തോട് സ്വദേശി സ്റ്റാലിന്‍ പുത്തന്‍വീട്ടിലിന്‍റെ ഉടമസ്ഥതയിലുള്ള പ്രത്യാശ എന്ന വള്ളത്തിനു നേരെയാണ് എംഎസ്‌സി സില്‍വര്‍ 2 എന്ന കപ്പല്‍ എത്തിയത്. ബുധനാഴ്ച വൈകുന്നേരം അഞ്ചോടെ കൊച്ചിയില്‍ നിന്ന് തെക്കുപടിഞ്ഞാറ് മാറി 9.54 നോര്‍ത്തില്‍ (കണ്ണമാലി പടിഞ്ഞാറ് 7.5 നോട്ടിക്കല്‍ മൈൽ ദൂരെ) വല കോരി നില്‍ക്കുന്ന സമയത്താണ് കപ്പല്‍ വള്ളത്തിനടുത്തേക്ക് എത്തിയതെന്ന് തൊഴിലാളികള്‍ പറഞ്ഞു. ഹോണ്‍ മുഴക്കിയും വയര്‍ലെസിലൂടെ സന്ദേശം നല്‍കിയും അപകടമുന്നറിയിപ്പ് കൈമാറിയെങ്കിലും കപ്പല്‍ ക്യാപ്റ്റന്‍ അത് ചെവിക്കൊണ്ടില്ലെന്ന് മത്സ്യത്തൊഴിലാളികള്‍ ആരോപിച്ചു. മറ്റു വള്ളങ്ങള്‍ കൂടി വന്ന് ഹോണ്‍ മുഴക്കുകയും തൊഴിലാളികള്‍ ഒച്ചവയ്ക്കുകയും ചെയ്തു. ഈ സമയം ചില മത്സ്യത്തൊഴിലാളികള്‍ പ്രാണരക്ഷാര്‍ഥം വെള്ളത്തിലേക്ക് ചാടി. മത്സ്യത്തൊഴിലാളികളുടെ‍ ബഹളം കേട്ടാണ് കപ്പല്‍ നിര്‍ത്തിയത്. ഇതിനിടെ വള്ളത്തിന്‍റെ പിന്‍ഭാഗത്ത് കപ്പല്‍ ഇടിക്കുകയും ചെയ്തു. തുടര്‍ന്ന് കപ്പല്‍ പിന്നിലേക്ക് എടുത്താണ് യാത്ര തുടര്‍ന്നത്. വള്ളത്തിന്‍റെ അമരത്ത് കേടുപാടുകള്‍ സംഭവിച്ചിട്ടുണ്ട്. 10 ലക്ഷത്തോളം രൂപയുടെ നാശനഷ്ടമുണ്ടായതായി തൊഴിലാളികള്‍ പറഞ്ഞു. സംഭവത്തില്‍ കോസ്റ്റല്‍ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. പേരുദോഷവുമായി എംഎസ്‌സി മെഡിറ്ററേനിയന്‍ ഷിപ്പിംഗ് കമ്പനിയുടെ എംഎസ്‌സി എല്‍സ 3 എന്ന കപ്പല്‍ കൊച്ചി തീരത്ത് അപകടത്തിൽപ്പെട്ട് ഏതാനും മാസങ്ങള്‍ പിന്നിടുന്നതിനിടെയാണ് ഇതേ കമ്പനിയുടെ മറ്റൊരു കപ്പല്‍ അപകട ഭീഷണിയായത്. എല്‍സ ത്രീ മുങ്ങിയതിനെ തുടര്‍ന്ന് സംസ്ഥാനത്തിനുണ്ടായ നഷ്ടങ്ങള്‍ക്ക് പരാഹാരം ആവശ്യപ്പെട്ട് കോടതിയില്‍ നടപടികള്‍ പുരോഗമിക്കവെയാണ് വീണ്ടും മറ്റൊരു സംഭവം. ക്യാപ്റ്റന്‍ മദ്യപിച്ചിരുന്നു എന്ന് മത്സ്യത്തൊഴിലാളികള്‍ ആരോപിച്ചു. സമീപത്തുണ്ടായിരുന്ന ബോട്ടുകള്‍ ഹോണ്‍ മുഴക്കുകയും ഒച്ച ഉണ്ടാക്കുകയും ചെയ്തെങ്കിലും ക്യാപ്റ്റന്‍ കപ്പലിന്‍റെ ഗതിതിരിച്ചു വിടാനോ അപകടം സംഭവിക്കുന്നതിന് മുന്‍പ് തന്നെ നിര്‍ത്താനോ ശ്രമിച്ചില്ലെന്നും ആക്ഷേപമുണ്ട്. ട്രാഫിക് കൂടിയതും അപകടകാരണം വിഴിഞ്ഞം പോര്‍ട്ട് വന്നതോടെ കേരള തീരത്ത് കപ്പല്‍ ചാലുകളിലൂടെയുള്ള സഞ്ചാരം കൂടിയത് തുടർച്ചയായി ഉണ്ടാകുന്ന കപ്പല്‍ അപകടങ്ങളുടെ ഒരു കാരണമായി വിദഗ്ധര്‍ ചൂണ്ടിക്കാട്ടുന്നു. 2012ല്‍ എന്‍‌റിക്കാലെക്‌സി വെടിവയ്പ് സംഭവത്തിന് ശേഷം എട്ട് കപ്പലപകടങ്ങളാണ് കേരളാ തീരത്ത് ഉണ്ടായത്. ഇതിൽ ആകെ 15 തൊഴിലാളികള്‍ മരണമടയുകയും ചെയ്തിട്ടുണ്ട്. ട്രാഫിക് വര്‍ധിച്ചതോടെ നിയമങ്ങളെല്ലാം ലംഘിച്ചാണ് ഭൂരിപക്ഷം കപ്പലുകളും യാത്ര ചെയ്യുന്നതെന്ന് മത്സ്യത്തൊഴിലാളി സംഘടനാ ഭാരവാഹികള്‍ ആരോപിച്ചു. കപ്പല്‍ തടയേണ്ടി വരും: സ്വതന്ത്ര മത്സ്യത്തൊഴിലാളി ഫെഡറേഷന്‍ കൊച്ചി: എംഎസി എല്‍സ 3 കപ്പല്‍ മത്സ്യബന്ധന മേഖലയില്‍ മുങ്ങിയതിന്‍റെ ദുരന്തഫലങ്ങള്‍ മത്സ്യത്തൊഴിലാളികള്‍ നേരിടുന്നതിനിടെയാണ് അതേ കമ്പനിയുടെ മറ്റൊരു കപ്പല്‍ അപകടഭീഷണിയായതെന്ന് കേരള സ്വതന്ത്ര മത്സ്യത്തൊഴിലാളി ഫെഡറേഷന്‍ സംസ്ഥാന പ്രസിഡന്‍റ് ജാക്‌സണ്‍ പൊള്ളയില്‍, സംസ്ഥാന സെക്രട്ടറി അബ്ദുല്‍ റാസിക് എന്നിവര്‍ പറഞ്ഞു. കേന്ദ്ര ഷിപ്പിംഗ് മന്ത്രാലയവും പോര്‍ട്ട് അധികാരികളും കോസ്റ്റല്‍ പോലീസും നടപടി സ്വീകരിച്ചില്ലെങ്കില്‍ പോര്‍ട്ടിലെത്തുന്ന കപ്പലുകള്‍ മത്സ്യത്തൊഴിലാളികള്‍ക്ക് തടയേണ്ടി വരുമെന്നും, പ്രത്യാശ വള്ളത്തിനുണ്ടായ നഷ്ടം കപ്പല്‍ കമ്പനി നല്‍കണമെന്നും ഇവർ ആവശ്യപ്പെട്ടു. മത്സ്യത്തൊഴിലാളികളുടെ സുരക്ഷ ഉറപ്പാക്കണം: ചാള്‍സ് ജോര്‍ജ് കൊച്ചി: കടലില്‍ മത്സ്യബന്ധനത്തില്‍ ഏര്‍പ്പെടുന്ന തൊഴിലാളികളുടെ ജീവനും സ്വത്തിനും സുരക്ഷ ഉറപ്പാക്കണമെന്ന് കേരള മത്സ്യത്തൊഴിലാളി ഐക്യവേദി സംസ്ഥാന പ്രസിഡന്‍റ് ചാള്‍സ് ജോര്‍ജ്. കേരളതീരത്ത് കപ്പലിടിച്ചുള്ള അപകടങ്ങള്‍ കൂടി വരികയാണ്. പലപ്പോഴും ഇടിച്ച കപ്പലുകള്‍ നിര്‍ത്താതെ പോകുന്നു. ഇതു സംബന്ധമായ ഇന്‍റര്‍നാഷണല്‍ മാരിടൈം ഓര്‍ഗനൈസേഷന്‍ പെരുമാറ്റ ചട്ടം കപ്പലുകള്‍ പാലിക്കുന്നില്ല. ഇപ്പോള്‍ ഇടിച്ച എംഎസിയും പൂര്‍ണമായ നിയമലംഘനമാണ് നടത്തിയിരിക്കുന്നത്. നിയമലംഘനം നടത്തിയ ക്യാപ്റ്റനെ അറസ്റ്റ് ചെയ്യണം. മത്സ്യത്തൊഴിലാളികള്‍ക്ക് അര്‍ഹമായ നഷ്ടപരിഹാരം നല്‍കണം. മത്സ്യത്തൊഴിലാളികളുടെ തൊഴിലിനും തൊഴിലിടത്തിനും ആവശ്യമായ സുരക്ഷ ഉറപ്പാക്കാന്‍ കേന്ദ്രസംസ്ഥാന സര്‍ക്കാരുകള്‍ നടപടി സ്വീകരിക്കണമെന്നും ചാള്‍സ് ജോര്‍ജ് ആവശ്യപ്പെട്ടു.

കന്നി 20 പെരുന്നാൾ : കോതമംഗലത്തേക്ക് വിശ്വാസികളുടെ പ്രവാഹം

കോതമംഗലം: കോതമംഗലം മാര്‍ത്തോമാ ചെറിയപള്ളിയിലെ കന്നി 20 പെരുന്നാളില്‍ പങ്കെടുക്കാനും പരിശുദ്ധ യല്‍ദോ മാര്‍ ബസേലിയോസ് ബാവയുടെ കബറിടം വണങ്ങി അനുഗ്രഹം പ്രാപിക്കുന്നതിനും വിശ്വാസികളുടെ നിലയ്ക്കാത്ത പ്രവാഹം. ഇന്നലെ രാവിലെ മുതല്‍തന്നെ മാർത്തോമ പള്ളിയിലേക്ക് വിശ്വാസികളുടെ ഒഴുക്ക് തുടങ്ങിയിരുന്നു. ഇടയ്ക്കിടെ പെയ്ത മഴയെ അവഗണിച്ചും അണമുറിയാതെ കാൽനട തീർഥാടകർ എത്തിക്കൊണ്ടിരുന്നു. രാവിലെ വിശുദ്ധ മൂന്നിന്‍മേല്‍ കുര്‍ബാനയ്ക്ക് മാത്യൂസ് മാര്‍ അന്തീമോസ് മെത്രാപ്പോലീത്ത മുഖ്യകാര്‍മികത്വം വഹിച്ചു. സന്ധ്യാ നമസ്കാരത്തിന് ശ്രേഷ്ഠ കാതോലിക്ക ബസേലിയോസ് ജോസഫ് ബാവ മുഖ്യകാര്‍മികത്വം വഹിച്ചു. വിശ്വാസികള്‍ക്ക് പള്ളിയില്‍ പ്രവേശിക്കുന്നതിനും കബറിടം വണങ്ങുന്നതിനും ആവശ്യമായ ക്രമീകരണങ്ങള്‍ ഉറപ്പാക്കിയിരുന്നു. വോളന്‍റിയര്‍മാരും പോലീസും ഇതിനായി സജീവമായി ഉണ്ടായിരുന്നു. ടൗണില്‍ ഗതാഗത ക്രമീകരണവും ഏര്‍പ്പെടുത്തിയിരുന്നു. രാവിലെ മുതല്‍തന്നെ നേര്‍ച്ചക്കഞ്ഞി വിതരണംചെയ്തു. വൈകുന്നേരത്തോട എല്ലാ മേഖലകളില്‍നിന്നുമുള്ള കാല്‍നട തീര്‍ഥാടകർ പള്ളിയിലെത്തി. പതിവുപോലെ കബറിങ്കല്‍ സമര്‍പ്പിക്കുന്നതിനുള്ള ഏലയ്ക്കാ മാലയുമായാണ് ഹൈറേഞ്ചിൽ നിന്നുള്ള തീര്‍ഥാടകര്‍ എത്തിയത്. ഏലിയാസ് മാര്‍ അത്തനാസിയോസ് മെത്രാപ്പോലീത്തയുടെ നേതൃത്വത്തിലെത്തിയ തീര്‍ഥാടക സംഘത്തിന് കോഴിപ്പിള്ളി കവലയില്‍ സ്വീകരണം നല്‍കി. ചെറിയപള്ളിയിലെ വൈദികരും മാനേജിംഗ് കമ്മറ്റി അംഗങ്ങളും ഡീന്‍ കുര്യാക്കോസ് എംപി ഉള്‍പ്പെടെയുള്ള ജനപ്രതിനിധികളും സ്വീകരണത്തില്‍ പങ്കെടുത്തു. പടിഞ്ഞാറന്‍ മേഖലയില്‍നിന്നുള്ള തീര്‍ഥാടക സംഘത്തിന് മൂവാറ്റുപുഴ കവലയിലും വടക്കന്‍ മേഖലാസംഘത്തിന് ഹൈറേഞ്ച് കവലയിലും പോത്താനിക്കാട് മേഖലയില്‍ നിന്നുളള തീര്‍ഥാടകര്‍ക്ക് ചക്കാലക്കുടി ചാപ്പലിലും സ്വീകരണം നല്‍കി. രാത്രി പത്തിന് നഗരം ചുറ്റിയുള്ള പ്രദക്ഷിണം ആരംഭിച്ചു. മർത്തമറിയം കത്തീഡ്രൽ വലിയ പള്ളി, സെന്‍റ് ജോർജ് കത്തീഡ്രൽ, മലയിൻകീഴിലുളള കുരിശടി, എംബിഎംഎം ആശുപത്രി, ടൗൺ കുരിശ് എന്നിവിടങ്ങളിൽ കൂടി മാർ ബേസിൽ ഹയർ സെക്കൻഡറി സ്കൂൾ റോഡ് വഴി പള്ളിയിൽ എത്തിച്ചേർന്നു. ആശീർവാദത്തിനുശേഷം ആകാശ വിസ്മയവും ഉണ്ടായിരുന്നു. ഇന്ന് ഇന്ന് രാവിലെ 5.30 നുള്ള കുര്‍ബാനയ്ക്ക് ഏബ്രഹാം മാര്‍ സേവേറിയോസ് മെത്രാപ്പോലീത്തയും ഏഴിനുള്ള കുര്‍ബാനയ്ക്ക് തോമസ് മാര്‍ തിമോത്തിയോസ് മെത്രാപ്പോലീത്തയും 8.30 നുള്ള കുര്‍ബാനയ്ക്ക് ശ്രേഷ്ഠ കാതോലിക്ക ബസേലിയോസ് ജോസഫ് ബാവയും കാര്‍മികത്വം വഹിക്കും. 10.30 ന് നേര്‍ച്ചസദ്യ ആരംഭിക്കും. ഉച്ചകഴിഞ്ഞ് രണ്ടിന് ചക്കാലക്കുടി ചാപ്പലിലേക്ക് പ്രദക്ഷിണം. നാളെയാണ് പെരുന്നാൾ സമാപിക്കുന്നത്. സമീപ പ്രദേശത്തെ ഗജവീരൻമാർ പള്ളിയുടെ പൂമുഖത്തെത്തി പരിശുദ്ധ ബാവയുടെ കബർ വണങ്ങുന്നതും പ്രത്യേകതയാണ്.

ചാരിറ്റബിൾ ട്രസ്റ്റിന് പിന്തുണയുമായി വോളിബോൾ ക്ലബ്

വാഴക്കുളം: വാഴക്കുളം ചാരിറ്റബിൾ ട്രസ്റ്റിന്‍റെ ആഭിമുഖ്യത്തിലുള്ള സൗജന്യ ഡയാലിസിസ് സെന്‍ററിന് പിന്തുണയുമായി സെന്‍റ് ജോർജ് വോളിബോൾ ക്ലബ്ബും. ഡയാലിസിസ് സെന്‍ററിന്‍റെ പ്രവർത്തനങ്ങൾക്കായി ഒന്നര ലക്ഷം രൂപയുടെ ചെക്ക് ക്ലബ് പ്രസിഡന്‍റും അംഗങ്ങളും ചേർന്ന് വാഴക്കുളം ചാരിറ്റബിൾ ട്രസ്റ്റ് ചെയർമാൻ സിജു സെബാസ്റ്റ്യനും ഭാരവാഹികൾക്കും കൈമാറി. എല്ലാവർഷവും ഒരു ലക്ഷം രൂപ ക്ലബംഗങ്ങളുടെ നേതൃത്വത്തിൽ ട്രസ്റ്റിനു നൽകുമെന്ന് പ്രസിഡന്‍റ് തോമസ് വർഗീസ് അറിയിച്ചു. ക്ലബ് ജനറൽ സെക്രട്ടറി ജേക്കബ് ജോസഫ്, വൈസ് പ്രസിഡന്‍റ് ജോജോ വർഗീസ്, ട്രഷറർ പി.എൻ. ജയകുമാർ, ക്ലബ് കമ്മറ്റി അംഗങ്ങളായ ജോസ് വർഗീസ്, ജിജി മണവാളൻ, ഡോണി ജോർജ്, ട്രസ്റ്റ്‌ ഭാരവാഹികളായ ജോണി മെതിപ്പാറ, പ്രഫ. ജോസ് അഗസ്റ്റിൻ, സാജു ടി. ജോസ് തുടങ്ങിയവർ പങ്കെടുത്തു.

സെന്‍ട്രല്‍ റീജന്‍ കലോത്സവ്

മൂവാറ്റുപുഴ: ഐഡിയല്‍ അസോസിയേഷന്‍ ഫോര്‍ മൈനോരിറ്റി എഡ്യൂക്കേഷന്‍ സെന്‍ട്രല്‍ റീജന്‍ കലോത്സവ് ഇന്നും നാളെയുമായി പേഴയ്ക്കാപ്പിള്ളി അറഫ പബ്ലിക് സ്‌കൂളില്‍ നടക്കുമെന്ന് ഭാരവാഹികള്‍ പത്രസമ്മേളനത്തില്‍ പറഞ്ഞു. എറണാകുളം, ഇടുക്കി ജില്ലകളിലെ 21 സ്‌കൂളുകളിൽനിന്ന് മൂന്ന് മുതല്‍ 10 വരെ ക്ലാസുകളിലുള്ള 900 വിദ്യാർഥികൾ പങ്കെടുക്കും. 130 ഇനങ്ങളില്‍ രാവിലെ ഒമ്പത് മുതല്‍ വൈകുന്നേരം ഏഴുവരെയാണ് മത്സരങ്ങള്‍. ഇന്ന് രാവിലെ ഒമ്പതിന് ഡീന്‍ കുര്യാക്കോസ് എംപി കലോത്സവം ഉദ്ഘാടനം ചെയ്യും. അല്‍ അസര്‍ ഗ്രൂപ്പ് ഓഫ് ഇന്‍സ്റ്റിറ്റ്യൂട്ട് ചെയര്‍മാന്‍ കെ.എം. മൂസ അധ്യക്ഷത വഹിക്കും. സ്‌കൂള്‍ മാനേജര്‍ കെ.ഇ. ഷാജി മുഖ്യ പ്രഭാഷണം നടത്തും. നാളെ വൈകുന്നേരം ഏഴിന് നടക്കുന്ന സമ്മാനദാന ചടങ്ങില്‍ പ്രിന്‍സിപ്പല്‍ കൗണ്‍സില്‍ ചെയര്‍മാന്‍ ഡോ. കെ.എം. അബ്ദുല്‍ റഷീദ് അധ്യക്ഷത വഹിക്കും. മാത്യു കുഴല്‍നാടന്‍ എംഎല്‍എ മുഖ്യാതിഥിയായിരിക്കും. പത്രസമ്മേളനത്തില്‍ കെ.എം. അബ്ദുള്‍ റഷീദ്, വി.എ. ജുനൈദ് സഖാഫി, നൗഷാദ് കാസിം, കെ.ഇ. ഷാജി, ഫെബിന ജമാല്‍, അന്‍ഷാദ് മജീദ് എന്നിവര്‍ പങ്കെടുത്തു.

ഗാന്ധി ജയന്തി : കുട്ടമ്പുഴയിൽ ശുചിത്വ സഭ നടത്തി

കോതമംഗലം : കുട്ടമ്പുഴ പഞ്ചായത്ത്, ഹരിതകർമസേനാംഗങ്ങൾ, തൊഴിലുറപ്പ് തൊഴിലാളികൾ, കുടുംബശ്രീ അംഗങ്ങൾ എന്നിവരുടെ നേതൃത്വത്തിൽ ‘ഗാന്ധിസ്മൃതി’ ശുചിത്വ സഭ നടത്തി. പഞ്ചായത്ത് പ്രസിഡന്‍റ് കാന്തി വെള്ളക്കയ്യൻ ഉദ്ഘാടനം ചെയ്തു. സ്ഥിരംസമിതി ചെയർമാൻ കെ.എ. സിബി അധ്യക്ഷത വഹിച്ചു. പഞ്ചായത്തംഗങ്ങളായ ഡെയ്സി ജോയി, ആലീസ് സിബി, ഗ്രാമസേവകൻ ജിതിൻ മങ്ങാട്ട് എന്നിവർ പങ്കെടുത്തു. ജനപ്രതിനിധികളുടെ നേതൃത്വത്തിൽ കുട്ടമ്പുഴ ടൗൺ ശുചീകരിക്കുകയും പൂച്ചെടികൾ നടുകയും ചെയ്തു.

പല്ലാരിമംഗലത്ത് നവീകരിച്ച ഗവ. ഹോമിയോ ആശുപത്രി ഉദ്ഘാടനം ചെയ്തു

പോത്താനിക്കാട്: പല്ലാരിമംഗലം പഞ്ചായത്തില്‍ നവീകരിച്ച ഗവ. ഹോമിയോ ആശുപത്രിയുടേയും യോഗാഹാളിന്‍റേയും ഉദ്ഘാടനം ആന്‍റണി ജോണ്‍ എംഎല്‍എ നിര്‍വഹിച്ചു. പഞ്ചായത്ത് പ്രസിഡന്‍റ് ഖദീജ മുഹമ്മദ് അധ്യക്ഷത വഹിച്ചു. വൈസ് പ്രസിഡന്‍റ് ഒ.ഇ. അബ്ബാസ് മുഖ്യപ്രഭാഷണം നടത്തി. പഞ്ചായത്തംഗങ്ങളായ റിയാസ് തുരുത്തേല്‍, സീനത്ത് മൈതീന്‍, എ.എ. രമണന്‍, മെഡിക്കല്‍ ഓഫീസര്‍ ഡോ. ജെസി തോമസ്, എം.എം. ബക്കര്‍ എന്നിവര്‍ പ്രസംഗിച്ചു.

നേര്യമംഗലത്ത് ജില്ലാ കൃഷിത്തോട്ടത്തിൽ നിർമിച്ച റസ്റ്ററന്‍റ് മന്ദിരം ഉദ്ഘാടനം ഇന്ന്

കോതമംഗലം: എറണാകുളം ജില്ലാ പഞ്ചായത്ത് 1.20 കോടി രൂപ ചെലവഴിച്ച് നേര്യമംഗലം ജില്ലാ കൃഷിത്തോട്ടത്തിൽ നിർമിച്ച റസ്റ്ററന്‍റ് മന്ദിരം ഇന്ന് രാവിലെ ഒൻപതിന് പ്രതിപക്ഷ നേതാവ് വി.ഡി. സതീശൻ ഉദ്ഘാടനം ചെയ്യും. 250 ഏക്കറിലധികം വിസ്തൃതിയുള്ള സംസ്ഥാനത്തെ ഏറ്റവും മികച്ച ഫാമുകളിലൊന്നായ നേര്യമംഗലം ഫാമിൽ ജില്ലാ പഞ്ചായത്ത് നടപ്പിലാക്കുന്ന ഫാം ടൂറിസം പദ്ധതികളുടെ ഭാഗമായാണ് പൊതുജനങ്ങൾക്കും വിനോദ സഞ്ചാരികൾക്കും ഏറെ സഹായകരമാകുന്ന നിലയിൽ റസ്റ്ററന്‍റ് മന്ദിരം നിർമിച്ചിട്ടുളളത്. 8000 ചതുരശ്ര അടി വിസ്തീർണമുള്ള റസ്റ്ററന്‍റിൽ ഒരേ സമയം നൂറിലധികം പേർക്ക് ഭക്ഷണം കഴിക്കുന്നതിനുള്ള സൗകര്യമുണ്ട്. റസ്റ്ററന്‍റിനോടു ചേർന്ന് ആവശ്യമായ പാർക്കിംഗ് സംവിധാനവും ഫാമിൽ ഒരുക്കിയിട്ടുണ്ട്. ആന്‍റണി ജോൺ എംഎൽ എ അധ്യക്ഷത വഹിക്കും. ഡീൻ കുര്യാക്കോസ് എംപി മുഖ്യാതിഥിയായിരിക്കും. ത്രിതല പഞ്ചായത്ത് ജനപ്രതിനിധികൾ, കൃഷി വകുപ്പ് ഉദ്യോഗസ്ഥർ, ഫാം കൗൺസിൽ അംഗങ്ങൾ എന്നിവർ പങ്കെടുക്കും.

വലിയ ജപമാലയുമായി മാറാടി സെന്‍റ് ജോർജ് പള്ളി കെസിവൈഎം

മൂവാറ്റുപുഴ: ജപമാല മാസാചരണം ഓർമപ്പെടുത്തി മാറാടി സെന്‍റ് ജോർജ് പള്ളിയിലെ യുവദീപ്തി കെസിവൈഎം യൂണിറ്റ്. പള്ളിയുടെ മുൻഭാഗത്ത് അറുപതടി ചുറ്റളവുള്ള ജപമാല നിർമിച്ച് സ്ഥാപിച്ചിരിക്കുകയാണ് ഇവർ. വലിയ പ്ലാസ്റ്റിക് പന്തുകൾ ജപമാല രൂപത്തിൽ കോർത്ത് ഉള്ളിൽ ബൾബുകൾ സ്ഥാപിച്ചാണ് ജപമാല നിർമിച്ചിരിക്കുന്നത്. വികാരി ഫാ. ജയിംസ് ചൂരത്തൊട്ടിയുടെ നിർദേശാനുസരണം കെസിവൈഎം യൂണിറ്റ് പ്രസിഡന്‍റ് ഡിന്‍റോമോൻ ബേബി, സെക്രട്ടറി അതുൽ ബെന്നി, ട്രഷറർ ആൽബർട്ട് ബെന്നി, കമ്മറ്റിയംഗങ്ങളായ ആൻസൺ ജോസഫ്, ബിനിറ്റ് പി. നോബിൾ, ജേക്കബ് സാന്‍റി, ജോയെൽ ബൈജു, ഡൊമിനിക് തോമസ് തുടങ്ങിയവരുടെ നേതൃത്വത്തിൽ കെസിവൈഎം അംഗങ്ങളുടെ സഹകരണത്തോടെയാണ് ജപമാല നിർമാണം നടത്തിയത്.

മൂവാറ്റുപുഴ എംസിഎസ് ആശുപത്രിയില്‍ കാര്‍ഡിയോളജി വിഭാഗം സജ്ജമായി

മൂവാറ്റുപുഴ: മൂവാറ്റുപുഴ എംസിഎസ് ആശുപത്രിയില്‍ കാര്‍ഡിയോളജി വിഭാഗം പ്രവര്‍ത്തന സജ്ജമായതായി ആശുപത്രി ഭാരവാഹികള്‍ പത്രസമ്മേളനത്തില്‍ അറിയിച്ചു. ഇന്ന് വൈകുന്നേരം 2.30ന് ഹാര്‍ട്ട് ഇന്‍സ്റ്റിറ്റ്യൂട്ടിന്‍റെയും അനന്ത നേത്രാലയത്തിന്‍റെയും ഉദ്ഘാടനം നിയമസഭാ സ്പീക്കര്‍ എ.എന്‍. ഷംസീര്‍ നിര്‍വഹിക്കും. ഒപി ബ്ലോക്ക് ഉദ്ഘാടനം നഗരസഭാധ്യക്ഷന്‍ പി.പി. എല്‍ദോസ് നിര്‍വഹിക്കും. കേരള ബാങ്ക് പ്രസിഡന്‍റ് ഗോപി കോട്ടമുറിക്കല്‍ മുഖ്യപ്രഭാഷണം നടത്തും. അനന്ത നേത്രാലയ ആറ് മുതല്‍ പ്രവര്‍ത്തനം ആരംഭിക്കും. ഉദ്ഘാടനത്തോടനുബന്ധിച്ച് ആദ്യം പേര് നല്‍കുന്ന 25 പേര്‍ക്ക് സൗജന്യ ഹൃദ്രോഗ പരിശോധന നടത്തും. എംസിഎസ് ആശുപത്രി ചെയര്‍മാന്‍ പി.എം. ഇസ്മായില്‍, സെക്രട്ടറി എം.എ. സഹീര്‍, സിഇഒ ലിമി ഏബ്രഹാം, കാര്‍ഡിയോളജി വിഭാഗം ഡയറക്ടര്‍ എം. ടിന്‍റുമോന്‍ എന്നിവര്‍ പത്രസമ്മേളനത്തില്‍ പങ്കെടുത്തു.

വേങ്ങച്ചുവടിൽ മൂല്യവര്‍ധിത ഉത്പാദന കേന്ദ്രം ഉദ്ഘാടനം ഇന്ന്

വാഴക്കുളം: കര്‍ഷകരെ സഹായിക്കുന്നതിനായി വേങ്ങച്ചുവടിൽ ആരംഭിച്ച മൂല്യവര്‍ധിത ഉത്പാദന കേന്ദ്രത്തിന്‍റെ ഉദ്ഘാടനം ഇന്ന്. വേങ്ങച്ചുവട് ബ്ലോക്ക് പഞ്ചായത്ത് കെട്ടിടത്തിന്‍റെ ഹാളില്‍ വൈകുന്നേരം നാലിന് പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം നിര്‍വഹിക്കും. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ അധ്യക്ഷത വഹിക്കും. ഡീന്‍ കുര്യാക്കോസ് എംപി ഉത്പന്ന കേന്ദ്രത്തിന്‍റെ സ്വിച്ച് ഓണ്‍ നിര്‍വഹിക്കും. മാത്യു കുഴല്‍നാടന്‍ എംഎല്‍എ ആദ്യ വില്പന നിര്‍വഹിക്കും. ജില്ലാ പഞ്ചായത്ത് വൈസ് പ്രസിഡന്‍റ് എല്‍സി ജോര്‍ജ് ലോഗോ പ്രകാശനം ചെയ്യും. ജില്ലാ പഞ്ചായത്തംഗം ഉല്ലാസ് തോമസ്, ജില്ലാ വ്യവസായ ഓഫീസര്‍ പി.എ. നജീബ്, ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണന്‍, മഞ്ഞള്ളൂര്‍ പഞ്ചായത്ത് പ്രസിഡന്‍റ് ആന്‍സി ജോസ്, മുന്‍ എംഎല്‍എമാരായ ജോസഫ് വാഴയ്ക്കന്‍, എല്‍ദോ ഏബ്രഹാം, ബാബു പോള്‍, ജോണി നെല്ലൂര്‍, മൂവാറ്റുപുഴ പൈനാപ്പിള്‍ ഫാര്‍മേഴ്‌സ് പ്രൊഡ്യൂസര്‍ കമ്പനി ചെയര്‍മാന്‍ ജിബിന്‍ റാത്തപ്പിള്ളില്‍ തുടങ്ങിയവര്‍ പങ്കെടുക്കും. ജില്ലാ പഞ്ചായത്ത്, മൂവാറ്റുപുഴ ബ്ലോക്ക് പഞ്ചായത്ത്, മൂവാറ്റുപുഴ പൈനാപ്പിള്‍ ഫാര്‍മേഴ്‌സ് പ്രൊഡ്യൂസര്‍ കമ്പനി, ജില്ലാ വ്യവസായ കേന്ദ്രം, കൃഷി വകുപ്പ് തുടങ്ങിയവയുടെ ആഭിമുഖ്യത്തില്‍ 85 ലക്ഷം രൂപ മുടക്കിലാണ് മൂല്യവര്‍ധിത ഉത്പന്ന കേന്ദ്രം ആരംഭിക്കുന്നത്. ജില്ലയിലെ പ്രധാന കാര്‍ഷികോത്പന്നങ്ങളായ പൈനാപ്പിള്‍, മാമ്പഴം, ചക്ക, നേന്ത്രക്കായ, പപ്പായ, മരച്ചീനി തുടങ്ങിയവ വിളവെടുപ്പു കാലത്ത് കര്‍ഷകരില്‍ നിന്ന് സംഭരിച്ച് മൂല്യവര്‍ധിത ഉത്പന്നങ്ങളാക്കി വിപണനം നടത്തുകയാണ് ലക്ഷ്യം.

പട്ടിമറ്റം മണ്ഡലം കോൺഗ്രസിന്‍റെ ഭവന സന്ദർശന യാത്ര ഇന്ന് സമാപിക്കും

കിഴക്കമ്പലം: പട്ടിമറ്റം മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ നടത്തിയ ഭവന സന്ദർശന യാത്രയുടെ സമാപനവും വിവിധ കാരുണ്യ പദ്ധതികളുടെ ഉദ്ഘാടനവും ഇന്ന് നടക്കും. വൈകിട്ട് ആറിന് പട്ടിമറ്റത്ത് നടക്കുന്ന പരിപാടി പ്രതിപക്ഷ നേതാവ് വി.ഡി. സതീശൻ ഉദ്ഘാടനം ചെയ്യും. മണ്ഡലം കോൺഗ്രസ് കമ്മിറ്റി പ്രസിഡന്‍റ് ഹനീഫ കുഴുപ്പിള്ളി അധ്യക്ഷത വഹിക്കും. പരിപാടിയോടനുബന്ധിച്ച് ബെന്നി ബഹനാൻ എംപി പാലിയേറ്റീവ് കെയർ യൂണിറ്റിന്‍റെ ഉദ്ഘാടനവും ലോഗോ പ്രകാശനവും നിർവഹിക്കും. തെരഞ്ഞെടുക്കപ്പെട്ടവർക്കുള്ള സൗജന്യ മരുന്ന് വിതരണ കൂപ്പൺ ഉദ്ഘാടനം കെപിസിസി വൈസ് പ്രസിഡന്‍റ് വി.പി. സജീന്ദ്രൻ നിർവഹിക്കും. അകാലത്തിൽ മരണമടഞ്ഞ സുനിൽ നായർക്കുള്ള ഒരു ലക്ഷം രൂപയുടെ ചെക്ക് കൈമാറ്റം ഡിസിസി പ്രസിഡന്‍റ് മുഹമ്മദ് ഷിയാസ് നിർവഹിക്കും. അകാലത്തിൽ മരണമടഞ്ഞവരുടെ ആശ്രിതർക്കുള്ള പെൻഷൻ സ്‌കീം ഉദ്ഘാടനം കെപിസിസി സെക്രട്ടറി അബ്ദുൾ മുത്തലിബ് നിർവഹിക്കും. വി.പി. സജീന്ദ്രൻ എഴുതിയ ലേഖനം കാലടി സംസ്കൃത സർവകലാശാലയിൽ പാഠ്യ വിഷയമാക്കിയതിൽ സജീന്ദ്രനെ പട്ടിമറ്റം മണ്ഡലം കോൺഗ്രസ് കമ്മിറ്റി ആദരിക്കും. തെക്കേ കവലയിൽ നിന്ന് ആരംഭിക്കുന്ന പ്രകടനം പട്ടിമറ്റത്ത് സമാപിക്കും. തുടർന്ന് മ്യൂസിക് നൈറ്റും അരങ്ങേറും.

ഡ്രൈഡേയിൽ മദ്യവില്പന; ഒരാള്‍ അറസ്റ്റില്‍

പോത്താനിക്കാട്: ഡ്രൈഡേയിൽ അനധികൃത മദ്യവില്പന നടത്തിയയാളെ എക്സൈസ് പിടികൂടി.പോത്താനിക്കാട് ഞരളക്കാട്ട് സനലിനെ കോതമംഗലം എക്സൈസ് സംഘമാണ് അറസ്റ്റ് ചെയ്തത്. ഇയാളുടെ കൈവശമുണ്ടായിരുന്ന 25 ലിറ്റര്‍ ഇന്ത്യന്‍ നിര്‍മിത വിദേശ മദ്യം എക്സൈസ് കണ്ടെടുത്തു. സാധാരണ ദിവസങ്ങളില്‍ മദ്യം വാങ്ങി ശേഖരിക്കുകയും ഡ്രൈഡേയിൽ ഉയര്‍ന്ന വിലയില്‍ മദ്യം വില്പന നടത്തുകയുമായിരുന്നു പ്രതി ചെയ്തിരുന്നതെന്ന് എക്സൈസ് പറഞ്ഞു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

കന്നി-20 പെരുന്നാൾ : ‘എന്‍റെ നാട് ’മെഡിക്കൽ കെയർ, ഫസ്റ്റ് എയ്ഡ് യൂണിറ്റുകൾ സജ്ജം

കോതമംഗലം : മാർത്തോമാ ചെറിയ പള്ളി കന്നി - 20 പെരുന്നാളിനോടനുബന്ധിച്ച് എന്‍റെ നാട് ജനകീയ കൂട്ടായ്മയുടെ നേതൃത്വത്തിൽ ആരംഭിച്ച മെഡിക്കൽ കെയർ യൂണിറ്റിന്‍റെയും തീർഥാടകർ എത്തുന്ന വിവിധ മേഖലകളിൽ സേവനം നല്കുന്ന ഫസ്റ്റ് എയ്ഡ് മൊബൈൽ യൂണിറ്റിന്‍റെയും ഉദ്ഘാടനം ചെറിയ പള്ളി വികാരി ഫാ. ജോസ് മാത്യു തച്ചേത്ത്കുടി നിർവഹിച്ചു. കവളങ്ങാട്, കുട്ടമ്പുഴ, കോട്ടപ്പടി, കീരമ്പാറ, പിണ്ടിമന, വാരപ്പെട്ടി പഞ്ചായത്തുകളിലും മുനിസിപ്പാലിറ്റിയിലും ഫസ്റ്റ് എയ്ഡ് സേവനം ലഭ്യമാക്കിക്കൊണ്ട് ഈ വർഷവും എന്‍റെ നാട് മഹത്തരമായ പ്രവർത്തനമാണ് നടത്തുന്നതെന്ന് വികാരി പറഞ്ഞു. എന്‍റെ നാട് ചെയർമാൻ ഷിബു തെക്കുംപുറം, പള്ളി കമ്മിറ്റി ട്രസ്റ്റിമാരായ കെ.കെ ജോസഫ്, എബി ചേലാട്ട്, പള്ളി കമ്മിറ്റിയംഗങ്ങൾ എന്നിവർ പങ്കെടുത്തു.

ജനറൽ ആശുപത്രിയിൽ മരുന്നുകൾ നൽകി

കൊച്ചി: ജീവൻരക്ഷാ ചാരിറ്റി ആൻഡ് സർവീസ് സൊസൈറ്റി എറണാകുളം ജനറൽ ആശുപത്രി കാൻസർ വാർഡിൽ സൗജന്യ മരുന്ന്, ധനസഹായ വിതരണം നടത്തി. അര ലക്ഷം രൂപയുടെ ജീവൻ രക്ഷാ മരുന്നുകൾ പരിസ്ഥിതി പ്രവർത്തകൻ സി.ആർ. നീലകണ്ഠൻ , കാൻസർ വിഭാഗം മേധാവി ഡോ. ബാലമുരളീകൃഷ്ണയ്ക്കു കൈമാറി. സൊസൈറ്റി പ്രസിഡന്‍റ് അഡ്വ. ജോർജ് ജോസഫ് മാപ്പിളപ്പറമ്പിൽ അധ്യക്ഷത വഹിച്ചു. പി.എസ്. അരവിന്ദാക്ഷൻ നായർ, ഡോ. കെ. എസ്. മായ, ഡോ. ബാലമുരളീകൃഷ്ണ, ഡോ. രഘുത്തമൻ എന്നിവർ പ്രസംഗിച്ചു. 80 ഡയാലിസിസ് രോഗികൾക്ക് ധനസഹായ വിതരണവും ഉണ്ടായിരുന്നു.

പുറയാർ റെയിൽവേ മേൽപ്പാലം നിർമാണം നാളെ ആരംഭിക്കും

നെടുമ്പാശേരി : ദേശം-കാലടി റോഡിലെ യാത്രക്കാരുടെ ചിരകാല സ്വപ്നമായിരുന്ന പുറയാർ റെയിൽവേ മേൽപ്പാലം നിർമാണം നാളെ ആരംഭിക്കും. ഉച്ചയ്ക്ക് 12 ന് മന്ത്രി പി.എ. മുഹമ്മദ് റിയാസ് നിർമാണോദ്ഘാടനം നിർവഹിക്കും. അൻവർ സാദത്ത് എംഎൽഎ അധ്യക്ഷത വഹിക്കും. ബെന്നി ബഹനാൻ എംപി, മറ്റു ജനപ്രതിനിധികൾ തുടങ്ങിയവരും പങ്കെടുക്കും. ‌ മേൽപ്പാലം യാഥാർഥ്യമാകുന്നതോടെ തിരുവൈരാണിക്കുളം ക്ഷേത്രം, കാഞ്ഞൂർ പള്ളി എന്നി വിടങ്ങളിലേക്കും ചെങ്ങമനാട്, ശ്രീമൂലനഗരം, കാഞ്ഞൂർ പഞ്ചായത്ത് നിവാസികൾക്ക് ആലുവ, കാലടി ഭാഗങ്ങളിലേക്കുമുള്ള യാത്ര സുഗമമാകും. 63.71 കോടിയാണ് മേൽപ്പാലത്തിന്‍റെ നിർമാണച്ചെലവ്. പാലത്തിന്‍റെ അപ്രോച്ച് റോഡ് നിർമാണത്തിനായി സ്ഥലം ഏറ്റെടുക്കുന്നതിന് 18.81 കോടിയും പാലം നിർമിക്കാൻ 34.90 കോടിയുമാണ് അനുവദിച്ചിട്ടുള്ളത്. ഭരണാനുമതിയും സാങ്കേതികാനുമതിയും ലഭ്യമാക്കി ടെൻഡർ നടപടികളും പൂർത്തിയാക്കി.റോഡ്‌സ് ആൻഡ് ബ്രിഡസ് കോർപറേഷനാണ് പാലത്തിന്‍റെ നിർമാണച്ചുമതല.

വിജ്ഞാൻ മിനി മാരത്തൺ നടത്തി

ശ്രീമൂലനഗരം: എടനാട് വിജ്ഞാനപീഠം ഇംഗ്ലീഷ് മീഡിയം സ്കൂളിന്‍റെ സുവർണജൂബിലിയോടനുബന്ധിച്ചു ഗാന്ധിജയന്തി ദിനത്തിൽ വിജ്ഞാൻ മിനി മാരത്തൺ നടത്തി. ആലുവ അസി. എക്സൈസ് ഇൻസ്പെക്ടർ എസ്.എ. സനൽകുമാർ ഉദ്ഘാടനം ചെയ്തു. സ്കൂൾ മാനേജർ ഫാ.അനിൽ കിളിയേൽക്കുടി അധ്യക്ഷത വഹിച്ചു. ഫ്രിനി പോൾ ദാസ്, കെ.എസ്. ഷാജി, സിജോ മത്തായി, ധനേഷ് ചാക്കപ്പൻ എന്നിവർ പ്രസംഗിച്ചു. വിദ്യാർഥികളുൾപ്പടെ ഇരുനൂറോളം പേർ പങ്കെടുത്തു.

പൂതംകുറ്റി പള്ളിയില്‍ നിന്ന് കോതമംഗലം കാല്‍നട തീര്‍ഥയാത്ര പുറപ്പെട്ടു

അങ്കമാലി: കോതമംഗലം മാര്‍ത്തോമ്മന്‍ ചെറിയപള്ളിയില്‍ പരിശുദ്ധ യല്‍ദോ മാര്‍ ബസേലിയോസ് ബാവായുടെ കബറിലേയ്ക്കുള്ള പൂതംകുറ്റി മേഖല കാല്‍നട തീര്‍ഥയാത്ര സെന്‍റ് മേരീസ് പള്ളിയില്‍ നിന്ന് പുറപ്പെട്ടു. പുലര്‍ച്ച വിശുദ്ധ കുര്‍ബാനയ്ക്ക് ശേഷം പള്ളിമുറ്റത്ത് പരിശുദ്ധ യല്‍ദോ മാര്‍ ബസേലിയോസ് ബാവായുടെ നാമത്തിലുള്ള കുരിശിന്‍ തൊട്ടിയില്‍ നിന്ന് ഭദ്രദീപം കൊളുത്തി വികാരി ഫാ. ജോസഫ് പള്ളിയ്ക്കല്‍ തീര്‍ഥയാത്രയുടെ ഉദ്ഘാടനം നിർവഹിച്ചു. പള്ളി ട്രസ്റ്റിമാരായ കെ.ടി. ഷാജി, എല്‍ദോ ഏലിയാസ്, സെക്രട്ടറി ടി.എം. യാക്കോബ്, പി.പി. എല്‍ദോ, ടി.എം. വര്‍ഗീസ്, കെ.എം. വര്‍ഗീസ്, കെ.വി. മത്തായി എന്നിവരുടെ നേതൃത്വത്തിലാണ് യാത്ര പുറപ്പെട്ടത്. കിടങ്ങൂര്‍ മാര്‍ ബസേലിയോസ് ബാവാ പള്ളിയില്‍ നിന്ന് ആരംഭിച്ച കാല്‍നടതീര്‍ഥയാത്ര തുറവൂര്‍ ചാപ്പലില്‍ സംഗമിച്ചു. ആഴകം, പീച്ചാനിക്കാട്, പൊയ്ക്കാട്ടുശേരി പള്ളികളില്‍ നിന്ന് പുറപ്പെട്ട തീര്‍ഥയാത്രകള്‍ മറ്റൂരില്‍ പ്രധാന തീര്‍ഥയാത്രയോട് ചേര്‍ന്നു. തീര്‍ഥാടകരെ ശ്രേഷ്ഠ കാതോലിക്ക ബസേലിയോസ് ജോസഫ് ബാവായുടെയും സഭയിലെ മറ്റ് മെത്രാപ്പോലീത്തമാരുടെയും നേതൃത്വത്തില്‍ സ്വീകരിച്ചു. സന്ധ്യാപ്രാര്‍ഥനയ്ക്ക് ശേഷം ബാവായുടെ കബര്‍ വണങ്ങി വിശ്വാസികള്‍ മടങ്ങി. ടൈറ്റസ് വര്‍ഗീസ് കൊറെപ്പിസ്‌ക്കോപ്പ, വര്‍ഗീസ് അരീയ്ക്കല്‍ കോറെപ്പീസ്‌ക്കോപ്പ, ഫാ. ജോസഫ് പള്ളിയ്ക്കല്‍, ഫാ. വര്‍ഗീസ് അറയ്ക്കല്‍, ഫാ. തങ്കച്ചന്‍ അരീയ്ക്കല്‍, ഫാ. ഏല്യാസ് അരീയ്ക്കല്‍, ഫാ. വര്‍ഗീസ് തൈപ്പറമ്പില്‍, ഫാ. വില്‍സണ്‍ വര്‍ഗീസ്, ഫാ. വര്‍ഗീസ് വി. അരീയ്ക്കല്‍ എന്നിവര്‍ തീര്‍ത്ഥയാത്രയ്ക്കും വിവിധ പള്ളികളിലെ സ്വീകരണങ്ങള്‍ക്കും നേതൃത്വം നല്‍കി. കരിങ്ങാച്ചിറ സെന്‍റ് ജോർജ് യാക്കോബായ സുറിയാനി കത്തീഡ്രലിൽ നിന്നുള്ള തീർഥയാത്രയ്ക്ക് ഫാ. ടിജോ മർക്കോസ്, ഫാ. സ്ലീബ കളരിക്കൽ, ഫാ. ബിനു സ്ക്കറിയ കോഴിക്കോട്ട്, ഫാ. ജോണി തുരുത്തിയിൽ, ജീവൻ മാലായിൽ, എം.പി.പോൾ, ഐ.കെ. ജോർജ് എന്നിവർ നേതൃത്വം നൽകി.

സിപിആര്‍ പരിശീലനപരിപാടി സംഘടിപ്പിച്ചു

കൊച്ചി: ലോക ഹൃദയദിനത്തോടനുബന്ധിച്ച് ഐഎംഎ കൊച്ചി സംസ്ഥാന ആരോഗ്യ വകുപ്പുമായി സഹകരിച്ച് നഗരത്തിന്‍റെ വിവിധ ഭാഗങ്ങളില്‍ സിപിആര്‍ പരിശീലന പരിപാടികൾ സംഘടിപ്പിച്ചു. റെയില്‍വേ പോര്‍ട്ടര്‍മാര്‍, പൊതുജനങ്ങള്‍, ഓട്ടോറിക്ഷാ ഡ്രൈവര്‍മാര്‍, ചുമട്ട് തൊഴിലാളികള്‍, ശുചീകരണ തൊഴിലാളികള്‍, വീട്ടു ജോലിക്കാര്‍ ഉള്‍പ്പെടെയുള്ളവര്‍ക്കായിരുന്നു പരിശീലനം നല്കിയത്. ഐഎംഎ കൊച്ചി മുന്‍ പ്രസിഡന്‍റ് ഡോ. എം.എം. ഹനീഷ്, ഡോ. ഷെദിന്‍ ഭരതന്‍, ഡോ. ശേഷാ തോമസ്, ഡോ. മുഹമ്മദ് അലിഫ്, ശ്രീസുധീന്ദ്ര ആശുപത്രി മെഡിക്കല്‍ ടീം എന്നിവരുടെ നേതൃത്വത്തില്‍ കലൂര്‍, തേവര, ചമ്പക്കര, എളംകുളം, രവിപുരം, തമ്മനം എന്നിവടങ്ങളിലെ പ്രാഥമാകാരോഗ്യ കേന്ദ്രങ്ങള്‍, ഓള്‍ഡ് ഏജ് ഹോം എന്നിവടങ്ങളിലാണ് അടിയന്തര ജീവന്‍ രക്ഷാ സഹായ പരിശീലന പരിപാടികള്‍ സംഘടിപ്പിച്ചതെന്ന് ഐഎംഎ കൊച്ചി പ്രസിഡന്‍റ് ഡോ. ജേക്കബ് ഏബ്രാഹം, സെക്രട്ടറി ഡോ. സച്ചിന്‍ സുരേഷ്, ട്രഷറര്‍ ഡോ. ബെന്‍സീര്‍ ഹുസൈന്‍ എന്നിവര്‍ പറഞ്ഞു.

ദക്ഷിണ മൂകാംബിക ക്ഷേത്രത്തിൽ 1,117 കുരുന്നുകളെ എഴുത്തിനിരുത്തി

പറവൂർ: പറവൂരിലെ ദക്ഷിണ മൂകാംബിക ക്ഷേത്രത്തിൽ അറിവിന്‍റെ ആദ്യാക്ഷരം നുകരാൻ 1,117 കുരുന്നുകളെത്തി. ഇന്നലെ പുലർച്ചെ മുതൽ വിദ്യാരംഭത്തിന് എത്തിയവരുടെ വലിയ തിരക്കായിരുന്നു. ഹരിശ്രീ കുറിക്കാൻ കേരളത്തിന്‍റെ വിവിധ ഭാഗങ്ങളിൽ നിന്നുള്ളവർ കുട്ടികളുമായി എത്തി. ക്ഷേത്രാങ്കണത്തിൽ പ്രത്യേകം സ‌ജ്ജമാക്കിയ വിദ്യാരംഭ മണ്ഡപത്തിലായിരുന്നു എഴുത്തിനിരുത്ത്. തന്ത്രി പുളിയന്നൂർ ഹരിനാരായണൻ നമ്പൂതിരിയുടെയും മേൽശാന്തി ബി.എം. അജിത്കുമാറിന്‍റെയും കാർമികത്വത്തിൽ പുലർച്ചെ അഞ്ചിന് പൂജയെടുത്തു. തിരുവതാംകൂർ ദേവസ്വം ബോർഡ് പ്രസിഡന്‍റ് പി.എസ്. പ്രശാന്ത് ഭദ്രദീപം കൊളുത്തി വിദ്യാരംഭത്തിന് തുടക്കംകുറിച്ചു. പുലർച്ചെ മുതൽ ആരംഭിച്ച വിദ്യാരംഭം പകൽ 1.30നാണ് സമാപിച്ചത്. 18 ഗുരുക്കന്മാർ കുട്ടികളെ എഴുത്തിനിരുത്തി. ദർശനത്തിനു ശേഷം ചുറ്റമ്പലത്തിനകത്തും ക്ഷേത്ര ചുവരിനോടു ചേർന്നും മണ്ണിൽ കുട്ടികളും മുതിർന്നവരും അക്ഷരങ്ങൾ എഴുതിയാണ് മടങ്ങിയത്. സരസ്വതി മണ്ഡപത്തിലെ സംഗീതോത്സവത്തിൽ സംഗീതാർച്ചന, സംഗീതക്കച്ചേരി, വയലിൻ അർച്ചന, ത്യാഗരാജ പഞ്ചരത്ന കീർത്തനാലാപനം, കാവടി ചിന്ത്, തിരുവാതിരകളി, സോപാന സംഗീതാർച്ചന, ഇടയ്ക്ക കച്ചേരി, വയലിൻ സോളോ, ഭക്തിഗാനമേള എന്നിവ അരങ്ങേറി. പ്രതിപക്ഷനേതാവ് വി.ഡി. സതീശൻ ക്ഷേത്രദർശനത്തിന് എത്തിയിരുന്നു. തിരക്ക് നിയന്ത്രിക്കാൻ മുനമ്പം ഡിവൈഎസ്പി എസ്. ജയകൃഷ്ണന്‍റെ നേതൃത്വത്തിൽ പൊലീസ് സംഘവും, മറ്റ് സന്നദ്ധ സംഘടനാ വളണ്ടിയർമാരും രംഗത്തുണ്ടായിരുന്നു. ക്ഷേത്രത്തിലെത്തിയവർക്ക് പറവൂർ പോലീസിന്‍റെ നേതൃത്വത്തിൽ ചുക്കുകാപ്പിയും ലഘുഭക്ഷണവും നൽകി. ആവണംകോട് 800 ഓളം കുരുന്നുകൾ നെടുമ്പാശേരി: നെടുമ്പാശേരി ആവണംകോട് സരസ്വതി ക്ഷേത്രത്തിൽ വിജയദശമി ദിനത്തിൽ എണ്ണൂറോളം കുഞ്ഞുങ്ങൾ ഹരിശ്രീ കുറിച്ചു. പശ്ചിമ ബംഗാൾ, ആന്ധ്ര, തമിഴ്‌നാട്, കർണാടകം തുടങ്ങിയ സംസ്ഥാനങ്ങളിൽ നിന്നുൾപ്പെടെ കുട്ടികൾ ഹരിശ്രീ കുറിക്കാൻ എത്തിയിരുന്നു. കേരള ഹൈക്കോടതി ജസ്റ്റിസ് മുരളി പുരുഷോത്തമൻ, ആർ.കെ. ദാമോദരൻ, ശ്രീമൂലനഗരം മോഹൻ, തന്ത്രി പ്രതിനിധി ബ്രഹ്മശ്രീ നാരായണമംഗലത്ത് ഇല്ലത്ത് ഗോവിന്ദൻ നമ്പൂതിരി, കെ.എൻ.കെ. നമ്പീശൻ തുടങ്ങി അധ്യാപകരും പണ്ഡിത ശ്രേഷ്‌ഠരും കലാകാരന്മാരും അടങ്ങിയ ആചാര്യന്മാരാണ് കുട്ടികളെ ഹരിശ്രീ കുറിക്കാൻ എത്തിയത്. 34 മത് നവരാത്രി ക്ലാസിക്കൽ നൃത്തസംഗീതോത്സവം പഞ്ചരത്നകീർത്തനാലാപനത്തിലൂടെ അവസാനിച്ചു. 11 ദിവസങ്ങളിലായി നടന്ന നൃത്ത-സംഗീത ആരാധനകളിൽ 600 ഓളം വിദ്യാർഥികളും പ്രഫഷണൽ കലാകാരന്മാരും പങ്കുകൊണ്ടു. ഉദയനാപുരം ഹരിയുടെ നേതൃത്വത്തിൽ പഞ്ചവാദ്യവും അരങ്ങേറിയിരുന്നു. ആവണംകോട് സരസ്വതി ക്ഷേത്രത്തിൽ ഇനി പതിവ് പോലെ നിത്യേന ക്ഷേത്രത്തിൽ വിദ്യാരംഭം ചെയ്യാൻ സാധിക്കും. ഇതിനായി രാവിലെ 9ന് ക്ഷേത്രത്തിൽ എത്തിച്ചേർന്നാൽ മതിയാകും.

മലയാറ്റൂർ വള്ളംകളി: ഒന്നാംസ്ഥാനം കെബിസി കുറുങ്കോട്ടയ്ക്ക്

കാലടി: മലയാറ്റൂർ വള്ളംകളിയിൽ ഒന്നാം സ്ഥാനം കെബിസി കുറുങ്കോട്ട(ശ്രീ മൂകാംബിക വള്ളം)യ്ക്ക്. രണ്ടാം സ്ഥാനം ഇടിവാൾ കോട്ട് കൊടുങ്ങല്ലൂർ (രുദ്രമാല) കരസ്ഥമാക്കി. വള്ളംകളിയുടെ ആവേശത്തിമിർപ്പ് വിളിച്ചോതി ഉച്ചയ്ക്ക് 2.30 തോടെ നടന്ന ജലഘോഷയാത്ര കാണികളിൽ ആവേശം വിതറി. തുടർന്ന് പ്രമുഖ ടീമുകൾ പങ്കെടുത്ത വള്ളംകളി മത്സരം ആരംഭിച്ചു. ബെന്നി ബഹനാൻ എംപി മത്സരങ്ങൾ ഉദ്ഘാടനം ചെയ്തു. കാട്ടൂർ പൊഞ്ചനത്തമ്മയ്ക്കാണ് മൂന്നാം സ്ഥാനം. സംഘാടക സമിതി കൺവീനർ റോജി എം. ജോൺ എംഎൽഎ ,ചെയർമാൻ ഗ്രാമ പഞ്ചായത്ത് പ്രസിഡന്‍റ് ജോയി അവോക്കാരൻ മുൻ എംഎൽഎ മാരായ പി.ജെ. ജോയി, അഡ്വ. ജോസ് തെറ്റയിൽ, മുനിസിപ്പൽ ചെയർമാൻ അഡ്വ. ഷിയോ പോൾ ,ബ്ലോക്ക് പഞ്ചായത്ത് പ്രസിഡന്‍റ് കൊച്ചുത്രേസ്യ തങ്കച്ചൻ, ജില്ലാ പഞ്ചായത്തംഗം അനിമോൾ ബേബി, മലയാറ്റൂർ പള്ളി വികാരി ഫാ. ജോസ് ഒഴലക്കാട്ട്, വിമലഗിരി പള്ളി വികാരി ഫാ. പോൾ പടയാട്ടി എന്നിവർ പ്രസംഗിച്ചു. എട്ട് ചെറു വള്ളങ്ങളാണ് മത്സരത്തിൽ പങ്കെടുത്തത്. വിജയികൾക്ക് റോജി എം. ജോൺ എംഎൽഎ സമ്മാനങ്ങൾ നല്കി.

സിഎൽ‌സി അതിരൂപത മരിയോത്സവം; തൃപ്പൂണിത്തുറ ഫൊറോനയ്ക്ക് ഓവറോൾ

കൊച്ചി: എറണാകുളം-അങ്കമാലി അതിരൂപത സിഎൽസി മരിയോത്സവം സമാപിച്ചു. തൃക്കാക്കര ഭാരതമാതാ കോളജിൽ നടന്ന കലാ, സാഹിത്യ മത്സരങ്ങൾ അതിരൂപത ചാൻസലർ ഫാ. ആന്‍റണി വാഴക്കാല ഉദ്ഘാടനം ചെയ്തു. അതിരൂപത പ്രസിഡന്‍റ് സിനോബി ജോയ് അധ്യക്ഷത വഹിച്ചു. തൃപ്പൂണിത്തുറ ഫൊറോന ഓവറോൾ ചാന്പ്യൻഷിപ്പ് നേടി. വല്ലം, കറുകുറ്റി ഫൊറോനകൾക്കാണ് യഥാക്രമം രണ്ടും മൂന്നും സ്ഥാനങ്ങൾ. വിജയികൾക്ക് പ്രമോട്ടർ ഫാ. ആന്‍റോ ചാലിശേരി കാഷ് പ്രൈസുകളും മെമന്‍റോകളും സമ്മാനിച്ചു. 14 ഇനങ്ങളിലായി നടന്ന കലാമത്സരങ്ങളിൽ 16 ഫോറോനകളിൽ നിന്നായി 650 പേർ പങ്കെടുത്തു.അതിരൂപത ഭാരവാഹികളായ ഹെനിന്‍റ് ജോസഫ്, അഖിൽ, മാർട്ടിൻ, എക്സിക്യൂട്ടീവ് കമ്മിറ്റി അംഗങ്ങൾ എന്നിവർ നേതൃത്വം നൽകി.

തിരുനാളാഘോഷം

സെന്‍റ് ഫ്രാൻസിസ് അസീസി കത്തീഡ്രലിൽ കൊച്ചി: എറണാകുളം സെന്‍റ് ഫ്രാൻസിസ് അസീസി കത്തീഡ്രലിൽ വിശുദ്ധന്‍റെ 204-ാമത് കൊന്പ്രേരിയ തിരുനാളിനു കോടിയേറി. വരാപ്പുഴ ആർച്ച്ബിഷപ് ഡോ. ജോസഫ് കളത്തിപ്പറമ്പിൽ കൊടിയേറ്റിനും ദിവ്യബലിക്കും മുഖ്യ കാർമികത്വം വഹിച്ചു. ആശീർഭവൻ ഡയറക്ടർ റവ. ഡോ. വിൻസന്‍റ് വാര്യത്ത് വചനപ്രഘോഷണം നടത്തി. വികാരി ഫാ.പീറ്റർ കൊച്ചുവീട്ടിൽ, ഫാ. റോഷൻ റാഫേൽ നെയ്ശേരി, ഫാ. ഷിബു സേവ്യർ, ഫാ. ബെൻസൺ ജോർജ് ആലപ്പാട്ട് എന്നിവർ സഹകാർമികരായിരുന്നു. അഞ്ചിനു വൈകുന്നേരം അഞ്ചിന് ആഘോഷമായ പൊന്തിഫിക്കൽ തിരുനാൾ ദിവ്യബലിക്ക് ആർച്ച്ബിഷപ് ഡോ. ഫ്രാൻസിസ് കല്ലറക്കൽ മുഖ്യകാർമികത്വം വഹിക്കും. റവ. ഡോ. സ്റ്റാൻലി മാതിരപ്പിള്ളി വചനപ്രഘോഷണം നടത്തും. സെന്‍റ് മേരീസ് കത്തീഡ്രൽ ബസലിക്കയിൽ കൊച്ചി: എറണാകുളം സെന്‍റ് മേരീസ് കത്തീഡ്രൽ ബസലിക്കയിൽ ഇടവക മധ്യസ്ഥയായ പരിശുദ്ധ തുറമുഖ മാതാവിന്‍റെ 125 ാമത് ദർശന തിരുനാളിനു തുടക്കം. ബസലിക്ക അഡ്മിനിസ്ട്രേറ്റർ ഫാ. തോമസ് മങ്ങാട്ട് കൊടിയേറ്റി. ഇന്നു വൈകുന്നേരം ആറിന് പ്രസുദേന്തിമാരുടെ വാഴ്ച , ആരാധന , ജപമാല , നൊവേന , ലദീഞ്ഞ് . വചനസന്ദേശം ഫാ. ജെൻസ് പാലച്ചുവട്ടിൽ. വേസ്പരദിനമായ നാളെ വൈകുന്നേരം 5.30ന് രൂപം എഴുന്നള്ളിപ്പ് , തിരുസ്വരൂപ പ്രതിഷ്ഠ , തിരിവെഞ്ചരിപ്പ് , ആരാധന , ജപമാല , പ്രദക്ഷിണം , വാഴ്‌വ്. വചനസന്ദേശം ഫാ. ബോബി കട്ടക്കകത്തൂട്ട്. തിരുനാൾ ദിനമായ അഞ്ചിനു രാവിലെ ഒന്പതിന് ഫാ. റോമൽ കണിയാംപറമ്പിലിന്‍റെ കാർമികത്വത്തിൽ ആഘോഷമായ തിരുനാൾ കുർബാന (സെന്‍റ് മേരീസ് കോൺവെന്‍റിൽ)വചന സന്ദേശം ഫാ. സനു പുതുശേരി. തുടർന്നു ബസലിക്കയിലേക്കു പ്രദക്ഷിണം, വാഴ്‌വ്, സ്നേഹവിരുന്ന് എന്നിവയുണ്ടാകും. എളംകുളം ലിറ്റിൽ ഫ്ലവർ പള്ളിയിൽ കൊച്ചി: എളംകുളം ലിറ്റിൽ ഫ്ലവർ പള്ളിയിൽ വിശുദ്ധ കൊച്ചുത്രേസ്യയുടെ ദർശന തിരുനാളിന് കൊടിയേറി. ആർച്ച് ബിഷപ്പ് മാർ ആന്‍റണി കരിയിൽ തിരുകർമങ്ങൾക്ക് മുഖ്യ കാർമികത്വം വഹിച്ചു. ലിസി ഹോസ്പിറ്റൽ ഡയറക്ടർ ഫാ. പോൾ കരേടൻ കുർബാന അർപ്പിച്ചു. വെള്ളിയാഴ്ച വൈകിട്ട് 5.30 ന് ലത്തീൻ റീത്തിൽ ദിവ്യബലി കാർമികൻ-ആർച്ച് ബിഷപ്പ് ഡോ. ഫ്രാൻസിസ് കല്ലറയ്ക്കൽ. ശനിയാഴ്ച വൈകിട്ട് അഞ്ചിന് ആഘോഷമായ കുർബാന. തുടർന്ന് പട്ടണപ്രദക്ഷിണം. ഞായറാഴ്ച വൈകിട്ട് അഞ്ചിന് ആഘോഷമായ തിരുനാൾ കുർബാന. വൈകിട്ട് 7.30 ന് നാടകം. തിങ്കളാഴ്ച പരേതർക്ക് വേണ്ടിയുള്ള വിശുദ്ധ കുർബാന. പൊറ്റക്കുഴി പള്ളിയില്‍ കൊച്ചി: കലൂര്‍ പൊറ്റക്കുഴി ചെറുപുഷ്പ ദേവാലയത്തില്‍ വിശുദ്ധ കൊച്ചുത്രേസ്യായയുടെ ദര്‍ശനത്തിരുനാളിന് കൊടിയേറി. വരാപ്പുഴ അതിരൂപത വികാര്‍ ജനറല്‍ മോണ്‍. മാത്യു കല്ലിങ്കല്‍ കൊടിയേറ്റിന് മുഖ്യകാര്‍മ്മികത്വം വഹിച്ചു. തുടര്‍ന്ന് ദിവ്യബലി, ജൂബിലി ലോഗോയുടെ പ്രകാശനം എന്നിവ നടന്നു. വേസ്പര ദിനമായ നാളെ വൈകുന്നേരം അഞ്ചിന് പൊന്തിഫിക്കല്‍ ദിവ്യബലിക്ക് വരാപ്പുഴ ആര്‍ച്ച് ബിഷപ് ഡോ. ജോസഫ് കളത്തിപ്പറമ്പില്‍ മുഖ്യകാര്‍മികത്വം വഹിക്കും. തുടര്‍ന്ന് പ്രദക്ഷിണം. ഒക്ടോബര്‍ അഞ്ചിന് രാവിലെ ഒമ്പതിന് തിരുനാള്‍ ദിവ്യബലിയ്ക്ക് ഫാ. ഹെന്‍റി പട്ടരുമഠത്തില്‍ മുഖ്യകാര്‍മികത്വം വഹിക്കും. തുടര്‍ന്ന് പ്രദക്ഷിണം.

റോ-റോ ജെട്ടിക്കടുത്തെ പാർക്കിംഗ് കേന്ദ്രം തുറക്കുന്നില്ല : ഫോർട്ടുവൈപ്പിനിൽ ഗതാഗതക്കുരുക്ക് പതിവ്

വൈപ്പിൻ : റോ-റോ ജങ്കാറിൽ കയറാനായി എത്തുന്ന വാഹനങ്ങൾക്ക് വൈപ്പിൻ ജെട്ടിയിൽ പാർക്കിംഗിന് സ്ഥലം ഉണ്ടായിട്ടും അത് തുറന്നു കൊടുക്കാൻ കൊച്ചിൻ കോർപറേഷൻ തയാറാകാത്തതിൽ സ്ഥലവാസികളിൽ അമർഷം. ജങ്കാറിൽ കയറാനായി എത്തുന്ന വാഹനങ്ങൾ റോഡിൽ നീണ്ട നിര സൃഷ്ടിക്കുന്നത് പലപ്പോഴും ഇവിടെ ഗതാഗത തടസം ഉണ്ടാക്കുന്നു. ഇതാണ് പ്രാദേശിവാസികളിലെ കലിപ്പിനു കാരണം. ഇങ്ങിനെ റോഡ് ബ്ലോക്ക് ആയിക്കഴിഞ്ഞാൽ സ്വകാര്യ ബസുകൾ വൈപ്പിൻ സ്റ്റാൻഡിലേക്ക് വരാൻ കൂട്ടാക്കില്ല. മാത്രമല്ല ഈ പ്രദേശത്തുകാർക്ക് വാഹനങ്ങളുമായി പുറത്തേക്ക് ഇറങ്ങാനും വയ്യാത്ത അവസ്ഥയാകും. ഇന്നലെ ഉച്ചഭക്ഷണ സമയത്തുള്ള ഇടവേളയിൽ വൈപ്പിൻ ജങ്കാർ ജെട്ടിയിൽ നിന്ന് കാളമുക്ക് ഭാഗത്തേക്ക് വാഹനങ്ങളുടെ വൻനിര പ്രത്യക്ഷപ്പെട്ടതോടെ ഈ ഭാഗത്ത് ഏറെനേരം ഗതാഗത തടസം ഉണ്ടായി. വൈപ്പിൻ ബസ് സ്റ്റാൻഡിനോട് ചേർന്ന കോർപറേഷന്‍റെ അധീനതയിൽപ്പെട്ട സ്ഥലത്ത് വാഹനങ്ങൾക്ക് പാർക്ക് ചെയ്യാൻ സൗകര്യം ഉണ്ട്. എന്നാൽ ഹൈക്കോടതി പറഞ്ഞിട്ട് പോലും കോർപറേഷൻ അനങ്ങുന്നില്ലെന്നാണ് നാട്ടുകാരുടെആരോപണം. ഈ സാഹചര്യത്തിൽ കോർപറേഷൻ അടിയന്തരമായി വൈപ്പിൻ ജെട്ടിയിലെ പാർക്കിംഗ് കേന്ദ്രം തുറന്നുകൊടുക്കണമെന്ന് സിപിഎം ഫോർട്ട് വൈപ്പിൻ ബ്രാഞ്ച് സെക്രട്ടറി ജോണി വൈപ്പിൻ ആവശ്യപ്പെട്ടു.

വീടുകൾ കുത്തിത്തുറന്ന് കവർച്ച; ആസാം സ്വദേശികൾ അറസ്റ്റിൽ

ആലങ്ങാട്: നീറിക്കോട് വീടുകൾ കുത്തിത്തുറന്ന് മോഷണം നടത്തിയ ഇതര സംസ്ഥാനക്കാരായ മൂന്നുപേരെ നാട്ടുകാർ പിടികൂടി പോലീസിൽ ഏൽപ്പിച്ചു. ഒരു വീട്ടിൽ നിന്നും നാലു പവൻ സ്വർണവും 800 രൂപയും മോഷ്ടിച്ച സംഘം മറ്റൊരു സ്ഥലത്ത് മോഷണത്തിനു ശ്രമിക്കുന്നതിനിടെയാണ് നാട്ടുകാർ പിടികൂടിയത്. ആസാം സോനിക്പൂർ സ്വദേശികളായ സദാം ഹുസൈൻ (21) ജമാൽ (26), അജിബുർ റഹ്മാൻ (25) എന്നീ പ്രതികളെ നാട്ടുകാർ പിടികൂടി ആലുവ വെസ്റ്റ് പോലീസിനു കൈമാറി. ഇന്നലെ രാവിലെ 10 ഓടെയായിരുന്നു സംഭവം. നീറിക്കോട് സെന്‍റ് സെബാസ്റ്റ്യൻ റോഡിൽ താമസിക്കുന്ന കുന്നത്ത് ജൂഡിയുടെ വീട്ടിൽ നിന്ന് നാലു പവന്‍റെ സ്വർണവും 800 രൂപയും കവർന്ന മോഷ്ടാക്കൾ നീറിക്കോട് കവലയിലെത്തി കൈതരാൻ ആന്‍റണിയുടെ വീടിന്‍റെ വാതിൽ പൊളിക്കാൻ ശ്രമിക്കുന്നതിനിടെ ശബ്ദം കേട്ടെത്തിയ നാട്ടുകാർ ഓടിച്ചിട്ടു പിടിക്കുകയായിരുന്നു. ആദ്യം പിടിയിലായ പ്രതിയെ പരിശോധിച്ചപ്പോഴാണ് സ്വർണവും പണവും കണ്ടെടുത്തത്. ഓടിരക്ഷപ്പെട്ട മറ്റു രണ്ടു പ്രതികളെ പിന്നീട് വരാപ്പുഴ മൂലംപിള്ളി പാലത്തിനു താഴെ നിന്ന് പോലീസ് പിടികൂടി. ജൂഡിയുടെ വീട്ടുകാർ കൂനമ്മാവിൽ ഒരു മരണ ആവശ്യത്തിനു പോയ സമയത്താണ് സംഘം കവർച്ച നടത്തിയത്. കൈതാരൻ ആന്‍റണിയും കുടുംബവും ഗോവയിൽ വിനോദയാത്രയ്ക്ക് പോയിരിക്കുകയായിരുന്നു. ഗോവയിൽ വച്ച് സിസി ടിവി പരിശോധിച്ച ഇവരാണ് അയൽവാസികളെ മോഷണസംഘം വീട്ടിലെത്തിയ കാര്യം അറിയിച്ചതെന്നും പറയപ്പെടുന്നു.

ഓൺലൈൻ തട്ടിപ്പ്: പ്രതി ഗുജറാത്തിൽ പിടിയിൽ

കിഴക്കമ്പലം: ഓൺലൈൻ തട്ടിപ്പിലൂടെ പ്രവാസിയുടെ ലക്ഷങ്ങൾ തട്ടിയെടുത്ത കേസിലെ മുഖ്യപ്രതിയെ ഗുജറാത്ത് ധുരേലിയ ഗ്രാമത്തിൽ നിന്ന് പോലീസ് പിടികൂടി. മുംബൈ ഈസ്റ്റ് അന്തേരിയിൽ താമസിക്കുന്ന രാജസ്ഥാൻ സ്വദേശി ലക്ഷ്മൺ ലാൽ കുമാവത്തി(27)നെയാണ് തടിയിട്ടപറമ്പ് പോലീസ് സാഹസികമായി പിടികൂടിയത്. പ്രവാസിയായ വാഴക്കുളം സ്വദേശിയുടെ 27 ലക്ഷം രുപയാണ് ഇയാൾ ഉൾപ്പെട്ട സംഘം തട്ടിയെടുത്തത്. സമൂഹമാധ്യമം വഴിയാണ് വാഴക്കുളം സ്വദേശി ഇയാളെ പരിചയപ്പെട്ടത്. ഒൺലൈൻ ട്രേഡിംഗിലൂടെ വൻ ലാഭമാണ് പ്രതി വാഗ്ദാനം ചെയ്തത്. ഇതനുസരിച്ച് ആദ്യം കുറച്ച് തുക ട്രേഡിംഗിൽ നിക്ഷേപിച്ചു. ഇതിന് 6000 രൂപ ലാഭമാണെന്ന് പറഞ്ഞ് തിരികെ നൽകി. ഇതോടെ വിശ്വാസം വർധിച്ച പ്രവാസി ഘട്ടങ്ങളായി 27 ലക്ഷം രൂപ നിക്ഷേപിക്കുകയായിരുന്നു. തുടർന്ന് തുകയും ലാഭവും തിരികെ ചോദിച്ചപ്പോൾ സംഘം മുങ്ങി. പിന്നീട് പ്രവാസി പോലീസിൽ പരാതി നൽകുകയായിരുന്നു. ജില്ലാ പോലീസ് മേധാവി എം. ഹേമലതയുടെ മേൽനോട്ടത്തിൽ പ്രത്യേക ടീം രൂപീകരിച്ച് അന്വേഷണം ആരംഭിച്ചു. പോലീസ് മുംബൈയിലെത്തിയപ്പോൾ ഇയാൾ ഗുജറാത്തിലേക്ക് കടന്നു. മൊബൈൽ സ്വിച്ച് ഓഫ് ചെയ്തതിനാൽ കണ്ടുപിടിക്കുക ശ്രമകരമായിരുന്നു. തുടർന്ന് അന്വേഷണസംഘം വേഷം മാറി ദിവസങ്ങളോളം അവിടെ താമസിച്ചാണ് പ്രതിയെ കണ്ടെത്തിയത്. മുംബൈയിൽ പ്ലംബിംഗ്‌ കരാർ കമ്പനി നടത്തുന്ന ഇയാൾ ഇതിന്‍റെ മറവിലാണ് തട്ടിപ്പു നടത്തിയിരുന്നത്. കോടികളുടെ ഇടപാടാണ് അക്കൗണ്ടിലൂടെ നടന്നിട്ടുള്ളത്. നിരവധി പേർ തട്ടിപ്പിനിരയായിട്ടുണ്ടെന്നാണ് ലഭ്യമാകുന്ന വിവരം. എഎസ്പി ഹാർദിക് മീണ, ഇൻസ്പെക്ടർ പി.ജെ. കുര്യാക്കോസ്, എസ്ഐ എൻ.കെ. ജേക്കബ്, സീനിയർ സിപിഒ കെ.കെ. ഷിബു, സിപിഒ മിഥുൻ മോഹൻ എന്നിവരാണ് അന്വേഷണ സംഘത്തിൽ ഉണ്ടായിരുന്നത്.

ആവണിയും അജിനും ആശുപത്രിയിൽനിന്ന് മടങ്ങി

കൊച്ചി: രണ്ടാഴ്ച മുമ്പ് 36 മണിക്കൂറിന്‍റെ ഇടവേളയില്‍ ലിസി ആശുപത്രിയില്‍ ഹൃദയം മാറ്റിവയ്ക്കല്‍ ശസ്ത്രക്രിയയ്ക്ക് വിധേയരായ അങ്കമാലി നായത്തോട് സ്വദേശി അജിന്‍ ഏലിയാസും (28), കൊല്ലം കരുകോണ്‍ സ്വദേശി ആവണി കൃഷ്ണയും (13) പുതിയ ഹൃദയത്തുടിപ്പുകളുമായി ആശുപത്രി വിട്ടു. കൊട്ടാരക്കര സ്വദേശി ഐസക് ജോര്‍ജിന്‍റെ (33) ഹൃദയമാണ് അജിനില്‍ മാറ്റിവച്ചത്. വാഹനാപകടത്തില്‍ മരിച്ച അങ്കമാലി സ്വദേശി ബില്‍ജിത്തി(18)ന്‍റെ ഹൃദയമാണ് ആവണിയില്‍ സ്പന്ദിക്കുന്നത്. ഡോ. ജോസ് ചാക്കോ പെരിയപ്പുറത്തിന്‍റെ നേതൃത്വത്തില്‍ ഡോ. ജേക്കബ് ഏബ്രഹാം, ഡോ. ജീവേഷ് തോമസ്, ഡോ. ജോ ജോസഫ്, ഡോ. ശ്രീശങ്കര്‍ എന്നിവരടങ്ങിയ മെഡിക്കല്‍ സംഘമാണ് ശസ്ത്രക്രിയ നടത്തിയത്. ഡോ. റോണി മാത്യു കടവില്‍, ഡോ. ഭാസ്‌കര്‍ രംഗനാഥന്‍, ഡോ. സാജന്‍ കോശി, ഡോ. എസ്.ആര്‍. അനില്‍, ഡോ. പി. മുരുകന്‍, ഡോ. ജോബ് വില്‍സണ്‍, ഡോ. ഗ്രേസ് മരിയ, ഡോ. ആന്‍റണി ജോര്‍ജ്, ഡോ. ജനു റോസ്, ഡോ. ആബിദ് ഇക്ബാല്‍, ഡോ. ജഗന്‍ ജോസ്, ഡോ. ആയിഷ നാസര്‍, രാജി രമേഷ്, സൗമ്യ സുനീഷ് എന്നിവര്‍ തുടര്‍ചികിത്സകളിലും പങ്കാളികളായി. ആശുപത്രി ഡയറക്ടര്‍ ഫാ. പോള്‍ കരേടന്‍റെ നേതൃത്വത്തില്‍, ഫാ. റോജന്‍ നങ്ങേലിമാലില്‍, ഫാ. റെജു കണ്ണമ്പുഴ, ഫാ. ഡേവിസ് പടന്നയ്ക്കല്‍, ഫാ. ജെറ്റോ തോട്ടുങ്കല്‍, ചികിത്സയ്ക്ക് നേതൃത്വം നല്‍കിയ ഡോക്ടര്‍മാര്‍, ആശുപത്രി ജീവനക്കാര്‍ തുടങ്ങിയവര്‍ ചേര്‍ന്നാണ് രണ്ട് പേരെയും യാത്രയാക്കിയത്. ഇരുവര്‍ക്കും വൈകാതെ തന്നെ സാധാരണ ജീവിതം നയിക്കാന്‍ കഴിയുമെന്ന് ഡോ. ജോസ് ചാക്കോ പെരിയപുറം പറഞ്ഞു. രണ്ട് പേരുടെയും ആരോഗ്യനിലയില്‍ അദ്ദേഹം പരിപൂർണ തൃപ്തി രേഖപ്പെടുത്തി. തുടര്‍ച്ചയായി നടന്ന അവയവദാനങ്ങളും വിജയകരമായ ശസ്ത്രക്രിയകളും സമൂഹത്തില്‍ വലിയ അവബോധം സൃഷ്ടിച്ചെന്നും കഴിഞ്ഞ രണ്ടാഴ്ചയ്ക്കിടെ ആയിരത്തിലധികം പേര്‍ അവയവദാനത്തിന് തയാറായി രജിസ്റ്റര്‍ ചെയ്തുവെന്നും കെസോട്ടോ എക്‌സിക്യൂട്ടീവ് ഡയറക്ടര്‍ ഡോ. നോബിള്‍ ഗ്രേഷ്യസ് പറഞ്ഞു.

വേർപിരിഞ്ഞ് കഴിയുന്ന ഭാര്യ മക്കളെ കാണാനെത്തിയപ്പോൾ ഭർത്താവിന്‍റെ കുത്തേറ്റു

അങ്കമാലി: ഭർത്താവിൽനിന്ന് വേർപിരിഞ്ഞ് കഴിയുന്ന ഭാര്യ മക്കളെ കാണാൻ എത്തിയപ്പോൾ ഭർത്താവ് കത്തിക്ക് കുത്തി. ഗുരുതരാവസ്ഥയിലായ ഭാര്യയെ കറുകുറ്റി അപ്പോളോ അഡ്ലക്സ് ആശുപത്രിയിൽ പ്രവേശിപ്പിച്ചു. ഭർത്താവ് ഒളിവിലാണ്. മൂക്കന്നൂർ പുതുശേരി വീട്ടിൽ ജിനു (44)വിന്‍റെ ഭാര്യ റിയ (36) യ്ക്കാണ് കുത്തേറ്റത്. ഇന്നലെ രാവിലെ പത്തോടെ മൂക്കന്നൂർ ഫൊറോന പള്ളിക്കു പിന്നിലുള്ള കാളാർകുഴി റോഡിലാണ് സംഭവം. ശ്രീമൂലനഗരം സ്വദേശിനിയാണ് റിയ. ഇറ്റലിയിൽ ജോലിയുള്ള റിയ ഏതാനും ദിവസത്തെ അവധിക്കാണ് നാട്ടിലെത്തിയത്. കോടതിയുടെ അനുമതിയോടെയാണ് റിയ ഇന്നലെ മക്കളെ കാണാൻ ശ്രമിച്ചത്. മക്കളെ കാണാൻ ജിനു വിസമ്മതിച്ചിരുന്നു. റിയ എത്തിയതറിഞ്ഞ ജിനു കത്തിയുമായെത്തി നടുറോഡിൽ വച്ച് കുത്തുകയായിരുന്നു. തുടർന്ന് ജിനു സ്കൂട്ടറിൽ കടന്നുകളഞ്ഞു. കഴുത്തിലും വയറിലും കുത്തേറ്റ് ഗുരുതര പരിക്കുകളോടെ ചികിത്സയിൽ കഴിയുന്ന റിയയ്ക്ക് ശസ്ത്രക്രിയ വേണ്ടിവരും. അങ്കമാലി പോലീസ് കേസെടുത്ത് അന്വേഷണം ആരംഭിച്ചു. ജിനുവിനെ കണ്ടെത്താനുള്ള ഊർജിത ശ്രമത്തിലാണ് പോലീസ്. ഇവരുടെ വിവാഹമോചന കേസ് കോടതിയുടെ പരിഗണനയിലിരിക്കെയാണ് ആക്രമണം. പത്തിലും എട്ടിലും പഠിക്കുന്ന രണ്ട് ആൺമക്കളാണ് ഇവർക്കുള്ളത്.

ആഘോഷമായി പവിഴമല്ലിത്തറ മേളം

ചോറ്റാനിക്കര: ആചാരത്തിന്‍റെയും കലാവൈദഗ്ധ്യത്തിന്‍റെയും മധുര സംഗമമായി പവിഴമല്ലിത്തറ മേളം ചോറ്റാനിക്കര ദേവീക്ഷേത്രത്തിൽ തടിച്ചുകൂടിയ ആയിരങ്ങളെ ആവേശഭരിതരാക്കി. നടൻ ജയറാമിന്‍റെ പ്രമാണത്തിൽ കൊട്ടിക്കയറിയ പഞ്ചാരിയുടെ മുഴക്കം ചോറ്റാനിക്കരയ്ക്ക് ആഘോഷമായി. കൊടിമരച്ചോട്ടിൽ മുന്നിൽ നിന്ന് പതിഞ്ഞ കാലത്തിൽ കൊട്ടിക്കയറിയ മേളം രണ്ടും മൂന്നും നാലും കാലങ്ങൾ കയറി ചോറ്റാനിക്കര ദേവിയുടെ ശ്രീമൂലസ്ഥാനമായ പവിഴമല്ലിത്തറയ്ക്ക് മുന്നിൽ അഞ്ചാം കാലത്തിൽ ഉച്ചസ്ഥായിയിലെത്തിയതോടെ മേളത്തിന്‍റെ ഹുങ്കാരം ക്ഷേത്രവളപ്പിൽ പ്രകമ്പനമായി മുഴങ്ങി. ഇതോടെ കൈയ് മെയ് മറന്ന് ദ്രുതചലനങ്ങളോടെ താളം പിടിച്ച മേളാസ്വാദകരും ആവേശത്തിലായി. മേളത്തിൽ ഇടന്തലയിൽ 17 പേരാണ് ഉണ്ടായിരുന്നത്. ജയറാമിന്‍റെ വലത്തെ കൂട്ടായി മട്ടന്നൂർ ശ്രീകാന്ത്, ഇടത്തെ കൂട്ടായി മട്ടന്നൂർ ശ്രീരാജ്, ഇലത്താളത്തിൽ പാഞ്ഞാൽ വേലക്കുട്ടി, കുഴലിൽ പനമണ്ണ മനോഹരൻ, കൊമ്പിൽ മച്ചാട് ഹരിദാസ് തുടങ്ങിയവരും പങ്കെടുത്തു. ദുർഗാഷ്ടമി നാളിൽ ദേവിക്ക് അർച്ചനയായാണ് ജയറാമിന്‍റെ മേളപ്പെരുക്കം. 125 കലാകാരന്മാർ പങ്കെടുത്ത മേളം രാവിലെ 9.15 ഓടെ തുടങ്ങി ഉച്ചയ്ക്ക് 12.40 ഓടെയാണ് കൊട്ടിക്കലാശത്തിലെത്തിയത്.ഇത് 12-ാമത്തെ തവണയാണ് ജയറാം മേളപ്രമാണിയായത്.

മരണത്തിലും കൈകോർത്ത് ദമ്പതികൾ

തൃപ്പൂണിത്തുറ: ഭർത്താവ് മരിച്ചതിന്‍റെ പിന്നാലെ ഭാര്യയും മരിച്ചു. എരൂർ പിഷാരികോവിൽ റോഡ് അയ്യമ്പിള്ളിച്ചിറ ലൈനിൽ താമസിക്കുന്ന മലപ്പുറം കോട്ടപ്പടി വിശ്രാന്തിയിൽ ശിവരാമപ്പൊതുവാൾ (83, റിട്ട.എജിഎം, ബിഎസ്എൻഎൽ ), ഭാര്യ കെ.പി.രാധ (77, റിട്ട.എച്ച്എം) എന്നിവരാണ് ഒരു ദിവസത്തിന്‍റെ ഇടവേളയിൽ മരിച്ചത്. തിങ്കളാഴ്ച പുലർച്ചെയായിരുന്നു ശിവരാമപ്പൊതുവാളിന്‍റെ മരണം. ബന്ധുക്കൾ എത്താനുള്ളതിനാൽ സംസ്കാര ചടങ്ങുകൾ അടുത്ത ദിവസത്തേക്ക് ക്രമീകരിച്ചിരുന്നപ്പോഴാണ് രോഗശയ്യയിലായിരുന്ന ഭാര്യ രാധ ഇന്നലെ പുലർച്ചെ മരിച്ചത്. സംസ്കാരം നടത്തി. മക്കൾ: മധു, വിധു, ജ്യോതി. മരുമക്കൾ: മഞ്ജു, ധന്യ, വിനോദ്.

ഭർത്താവ് ഓടിച്ചിരുന്ന ഓട്ടോ മറിഞ്ഞ് ഭാര്യ മരിച്ചു

മൂവാറ്റുപുഴ : ഭർത്താവ് ഓടിച്ചിരുന്ന ഓട്ടോറിക്ഷ നിയന്ത്രണം നഷ്ടപ്പെട്ട് മറിഞ്ഞുണ്ടായ അപകടത്തിൽ ഭാര്യ മരിച്ചു. പെരിങ്ങഴ നാമറ്റത്തിൽ സേവ്യറിന്‍റെ ഭാര്യ ജയ്മോൾ (53)ആണ് മരിച്ചത്. ഇന്നലെ വൈകുന്നേരം ആറോടെ പെരിങ്ങഴ വള്ളിക്കട റോഡിൽ മധുരം ബേക്കറി കവലയ്ക്ക് സമീപമായിരുന്നു അപകടം.‌ വാഹനത്തിനടിയിൽ അകപ്പെട്ട ജയ്മോളെ ഉടൻ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.പോസ്റ്റുമോർട്ടത്തിനുശേഷം മൃതദേഹം ഇന്ന് ബന്ധുക്കൾക്ക് വിട്ടുകൊടുക്കും.സംസ്കാരം പിന്നീട്. മക്കൾ : അമൽ, ബിമൽ

സി.എസ് രാമചന്ദ്രന്‍ കെവിവിഇഎസ് ജില്ലാ ജനറല്‍ സെക്രട്ടറി

കൊച്ചി: കേരള വ്യാപാരി വ്യവസായി ഏകോപന സമിതി (കെവിവിഇഎസ്) എറണാകുളം ജില്ലാ ജനറല്‍ സെക്രട്ടറിയായി സി.എസ്. രാമചന്ദ്രനെ (പാലാരിവട്ടം) തെരഞ്ഞെടുത്തതായി ജില്ലാ പ്രസിഡന്‍റ് പി.സി. ജേക്കബ് പത്രക്കുറിപ്പില്‍ അറിയിച്ചു. ജില്ലാ വ്യാപാര ഭവനില്‍ ചേര്‍ന്ന ജില്ലാ പ്രവര്‍ത്തക സമിതിയ യോഗത്തില്‍ ഐകകണ്ഠ്യേനയായിരുന്നു തെരഞ്ഞെടുപ്പ്. വിഭാഗീയ പ്രവര്‍ത്തനങ്ങളെ തുടര്‍ന്ന് നിലവിലെ ജനറല്‍ സെക്രട്ടറി എ.ജെ റിയാസിനെ തല്‍സ്ഥാനത്തുനിന്നു് നീക്കിയതിനെ തുടര്‍ന്നാണ് സി.എസ് രാമചന്ദ്രനെ തെരഞ്ഞെടുത്തത്.

ആലുവ ഹൈടെക്ക് വയോജനകേന്ദ്രത്തിന്‍റെ നിർമാണം നിലച്ചിട്ട് ആറു വർഷം

ആലുവ: ജില്ലാ പഞ്ചായത്തും ജില്ലാ ആശുപത്രിയും ചേർന്ന് ആവിഷ്കരിച്ച ഹൈടെക്ക് സ്പെഷാലിറ്റി വയോജനകേന്ദ്രം ആറ് വർഷം കഴിഞ്ഞിട്ടും പാതിവഴിയിൽ. 2019 ജനുവരി 14 ന് തറക്കല്ലിട്ട് നിർമാണം ആരംഭിച്ച സർക്കാർ മേഖലയിലെ ആദ്യ സ്പെഷാലിറ്റി വയോജനകേന്ദ്രമാണ് കഴിഞ്ഞ മൂന്ന് വർഷമായി നിർമാണം മുടങ്ങിക്കിടക്കുന്നത്. ആറ് വർഷം മുമ്പ് ആറ് കോടി രൂപ ചെലവ് പ്രഖ്യാപിച്ച് തുടങ്ങിയ പദ്ധതി ആറ് വയോജന ദിനങ്ങൾ കടന്നു പോയിട്ടും മൂന്ന്നിലയുടെ കോൺക്രീറ്റ് കെട്ടിടമായി സ്തംഭിച്ചിരിക്കുകയാണ്. ബിഎസ്എൻഎൽ ഓഫീസിന് എതിർവശത്തായി ഈഎസ് ഐ റോഡിലെ പദ്ധതി പ്രദേശത്ത് കെട്ടിടത്തിന് ചുറ്റും കാടുകയറി നശിച്ചു കിടക്കുകയാണ്. ചെലവ് അധികരിച്ചതിനാൽ പദ്ധതി പൂർത്തീകരിക്കാൻ മതിയായ ഫണ്ട് ഇല്ലെന്നാണ് ജില്ലാ പഞ്ചായത്ത് വിശദീകരിക്കുന്നത്‌. ഇനിയും കോടികൾ മുടക്കിയാൽ മാത്രമേ കെട്ടിട നിർമാണം മുഴുവനാക്കാനും വിവിധ സൗകര്യങ്ങൾ ഒരുക്കാനും കഴിയൂ. ഓരോ നിലകളിലും 10 വീതം മുറികൾ, സ്ത്രീകൾക്കും പുരുഷന്മാർക്കുമായി ഡോർമെട്രികൽ, എസി മുറികൾ, ഡൈനിംഗ് ഏരിയ, റിക്രിയേഷൻ ഏരിയ, പരിശീലന കേന്ദ്രം, വാക്‌വേകൾ തുടങ്ങിയ സൗകര്യങ്ങളും തയാറാക്കാൻ വേണ്ട ഫണ്ട് ജില്ലാ പഞ്ചായത്തിന്‍റെ കൈയിലില്ല. നിലവിലെ ഭരണസമിതിയുടെ കാലത്ത് പദ്ധതി നടപ്പിലാകില്ലെന്ന് ഏതാണ്ട് ഉറപ്പായിരിക്കുകയാണ്.

സഹൃദയ നാരീശക്തി പദ്ധതിക്ക് പറവൂരിൽ തുടക്കമായി

പറവൂർ: എറണാകുളം-അങ്കമാലി അതിരൂപതാ സാമൂഹ്യ പ്രവർത്തന വിഭാഗമായ സഹൃദയ, വിധവകൾ, സിംഗിൾ മദർ എന്നിവർക്കായി സംഘടിപ്പിക്കുന്ന സൗജന്യ നൈപുണ്യ വികസന പരിശീലന പദ്ധതിയായ നാരീശക്തി പരിശീലന പരിപാടിക്ക് പറവൂരിൽ തുടക്കമായി. സഹൃദയ മേഖലാ ഓഫീസിൽ ചിറ്റാട്ടുകര ഗ്രാമപഞ്ചായത്ത് പ്രസിഡന്‍റ് ശാന്തിനി ഗോപകുമാർ പരിശീലനത്തിന്‍റെ ഉദ്ഘാടനം നിര്‍വഹിച്ചു. സഹൃദയ എക്സിക്യൂട്ടീവ് ഡയറക്ടർ ഫാ. ജോസ് കൊളുത്തുവെള്ളിൽ അധ്യക്ഷനായിരുന്നു. സഹൃദയ അസോസിയേറ്റ് ഡയറക്ടർ ഫാ. ആന്‍റണി പുതിയാപറമ്പിൽ, പ്രോഗ്രാം ഓഫീസർ കെ.ഒ. മാത്യൂസ്, മേഖലാ കോ ഓർഡിനേറ്റർ പി.വി. സെലിൻ, പ്രൊജക്ട് കോ ഓർഡിനേറ്റർ സെബിൻ ജോസഫ് തുടങ്ങിയവർ സംസാരിച്ചു. 20നും 50നും മധ്യേ പ്രായമുള്ള നൂറ് വനിതകള്‍ക്ക് തയ്യല്‍, ബ്യൂട്ടീഷ്യന്‍ കോഴ്സുകളിലായി നൽകുന്ന 150 മണിക്കൂര്‍ ദൈര്‍ഘ്യമുള്ള പരിശീലനത്തിൽ ബുക്ക് കീപ്പിംഗ്, ബാങ്ക് ലോണ്‍ ഇടപാടുകള്‍, മറ്റ് ഔദ്യോഗിക നടപടിക്രമങ്ങള്‍ തുടങ്ങിയ അടിസ്ഥാന സംരംഭകത്വ മൊഡ്യൂളുകളും ഉള്‍പ്പെടുത്തിയിട്ടുണ്ട്. പരിശീലനം വിജയകരമായി പൂര്‍ത്തിയാക്കി മികവ് പുലര്‍ത്തുന്ന 50 പേര്‍ക്ക് സ്വയംതൊഴില്‍ സംരംഭം തുടങ്ങുവാനാവശ്യമായ മൂലധന പിന്തുണയും നല്കും.

പ്രായം മറന്നുള്ള മേളക്കൊഴുപ്പിലൂടെ വിസ്മയിപ്പിച്ച് സായംപ്രഭ കൂട്ടായ്മ

പറവൂര്‍: കോട്ടപ്പുറം രൂപതയുടെ നിയന്ത്രണത്തിലുള്ള കിഡ്‌സിന്‍റെ (കോട്ടപ്പുറം ഇന്‍റഗ്രേറ്റഡ് ഡെവലപ്‌മെന്‍റ് സൊസൈറ്റി) ആഭിമുഖ്യത്തില്‍ 13 വര്‍ഷം മുമ്പ് ഗോതുരുത്ത് കടല്‍വാതുരുത്ത് ഹോളിക്രോസ് ഇടവകയില്‍ രൂപീകരിച്ച സായംപ്രഭ കൂട്ടായ്മ അവതരിപ്പിച്ച ശിങ്കാരിമേളം ശ്രദ്ധേയമായി. 60 വയസ് കഴിഞ്ഞവരുടെ കൂട്ടായ്മയായ ഇതിലെ 18 മുതിര്‍ന്ന അംഗങ്ങളാണ് ഹോളിക്രോസ് ദേവാലയത്തിലെ വിശുദ്ധ കുരിശിന്‍റെ മഹത്വീകരണ തിരുനാളിനോടനുബന്ധിച്ച് നടന്ന ഇടവകദിനത്തില്‍ ശിങ്കാരിമേളം അവതരിപ്പിച്ചത്. ചെണ്ടമേളം ശാസ്ത്രീയമായി അഭ്യസിച്ച് അരങ്ങേറ്റം നടത്തിയ തോമസ് കളരിത്തറയുടെയും സെബാസ്റ്റ്യന്‍ കുറുപ്പശേരിയുടെയും ശിക്ഷണത്തിലായിരുന്നു പരിശീലനം. മുമ്പ് ഒരിക്കല്‍പോലും ചെണ്ട കൈകൊണ്ട് തൊടാന്‍ അവസരം ലഭിക്കാത്തവരായിരുന്നു ഇവരെല്ലാവരും എന്നതാണ് വാസ്തവം. പള്ളി വികാരി ഫാ. ജോയ് തേലക്കാട്ടിന്‍റെ പ്രോത്സാഹനത്തില്‍ തോമസ് കളരിത്തറ, സെബാസ്റ്റ്യന്‍ കുറുപ്പശേരി, ഷെല്ലി പുത്തന്‍വീട്ടില്‍, വര്‍ഗീസ് കളത്തില്‍, മാത്യു കളത്തില്‍, ജോര്‍ജ് പുത്തന്‍വീട്ടില്‍, ഗ്രേസി ഷെല്ലി, മാര്‍ഗി തോമസ്, മറിയിലി ഓസോ, എല്‍സി റാഫേല്‍, ലില്ലി ജോയ്, ഫിലോ സെബാസ്റ്റ്യന്‍, ബേബി ജെറി, മേരി റോക്കി, കര്‍മലി കുഞ്ഞപ്പന്‍, ഗ്രേസി ജോര്‍ജ്, ബേബി കുഞ്ഞപ്പന്‍, സ്റ്റെല്ല ഡാനിയല്‍ എന്നിവരാണ് ശിങ്കാരിമേളം അവതരിപ്പിച്ചത്.

തുരുത്തിപ്പുറം ഫൊറോനാ പള്ളിയിൽ

പറവൂർ: ചരിത്രപ്രസിദ്ധമായ തുരുത്തിപ്പുറം ഫൊറോന പള്ളിയിൽ വിശുദ്ധ ഫ്രാൻസിസ് അസീസിയുടെയും പരിശുദ്ധ മാതാവിന്‍റെയും കൊമ്പ്രേരിയ തിരുനാളിന് കൊടിയേറി. കോട്ടപ്പുറം ബിഷപ് ഡോ. അംബ്രോസ് പുത്തൻവീട്ടിൽ മുഖ്യ കാർമികനായി. ഇന്ന് വൈകീട്ട് അഞ്ചിന് ജപമാല. 5.30 ന് ദിവ്യബലി, വചന സന്ദേശം. നാളെ ഇടവക ദിനം. രാവിലെ 7ന് ദിവ്യബലി തുടർന്ന് ഇലക് ത്തോർ വാഴ്ച . പിന്നീട് 2026ലെ പ്രസ്തുദേന്തി വാഴ്ച. തിരുനാൾ ദിനമായ അഞ്ചിന് രാവിലെ 9.30 ന് പൊന്തിഫിക്കൽ ദിവ്യബലി. കണ്ണൂർ രൂപത സഹായ മെത്രാൻ റവ.ഡോ. ഡെന്നിസ് കുറുപ്പശേരി മുഖ്യകാർമികനാവും. മോൺ. റോക്കി റോബിൻ കളത്തിൽ വചനപ്രഘോഷണം നടത്തും. കാഴ്ച സമർപ്പണത്തിനുശേഷം പടിഞ്ഞാറും ഭാഗത്തേക്കുള്ള പ്രദക്ഷിണം നടക്കും. വൈകുന്നേരം ആറിന് തിരുനാൾ സമാപന ദിവ്യബലി കൊടിയിറക്കം രൂപം എടുത്തു വയ്ക്കൽ എന്നിവ നടക്കും. രാത്രി എട്ടിന് ഗാനമേള.

അധ്യാപകരുടെ സേവനത്തെ മാനിക്കാത്ത സർക്കാർ നിലപാട് ദൗർഭാഗ്യകരം: അതിരൂപത ടീച്ചേഴ്‌സ് ഗിൽഡ്

കൊച്ചി: ഭിന്നശേഷി സംവരണവുമായി ബന്ധപ്പെട്ട സർക്കാരിന്‍റെ എല്ലാ നിർദേശങ്ങളും കത്തോലിക്കാ മാനേജ്മെന്‍റുകൾ പാലിച്ചിട്ടും സത്യവിരുദ്ധമാ‍യ പ്രസ്താവനകളിലൂടെ നീതിനിഷേധിക്കുന്നത് അപലപനീയമെന്ന് എറണാകുളം - അങ്കമാലി അതിരൂപത ടീച്ചേഴ്‌സ് ഗിൽഡ്. ഭിന്നശേഷി വിഷയത്തിൽ എൻഎസ്എസിനു ലഭിച്ച സുപ്രീം കോടതിവിധി സമാന സ്വഭാവമുള്ള മറ്റു മാനേജ്മെന്‍റുകളുടെ കാര്യത്തിലും ബാധകമാണെന്നിരിക്കെ, സുപ്രീം കോടതിയിൽ നിന്നും സമാനവിധി വാങ്ങണമെന്ന വിദ്യാഭ്യാസ മന്ത്രിയുടെ പിടിവാശി ജനാധിപത്യമര്യാദകൾക്ക് ചേർന്നതല്ല. ഭരണഘടനയുടെ മൂല്യങ്ങൾക്ക് നിരക്കാത്ത, അധ്യാപകരുടെ സേവനത്തെ മാനിക്കാത്ത സർക്കാർ നിലപാട് ദൗർഭാഗ്യകരവും പ്രതിഷേധാർഹവുമാണ്. പ്രഥമാധ്യാപകരുടെ കൃത്യവിലോപം കൊണ്ടാണ് ദിവസവേതനക്കാരുടെ വേതനം വൈകുന്നതെന്ന വിദ്യാഭ്യാസ മന്ത്രിയുടെ പ്രസ്താവനയും വാസ്തവവിരുദ്ധമാണ്. വിദ്യാഭ്യാസ മന്ത്രി ഉദ്യോഗസ്ഥർ പറയുന്നത് മാത്രം കേട്ടു പ്രവർത്തിക്കേണ്ട ആളല്ല. വസ്തുതകൾ പഠിച്ച് യാഥാർഥ്യബോധത്തോടെ മുന്നോട്ടുനീങ്ങണം. കേരള പൊതുസമൂഹത്തെ തെറ്റിദ്ധരിപ്പിച്ച പൊതുവിദ്യാഭ്യാസ മന്ത്രിയുടെ വസ്തുതാവിരുദ്ധമായ പ്രസ്താവനകൾ തിരുത്തണമെന്ന് അതിരൂപത ഡയറക്ടർ ഫാ.തോമസ് നങ്ങേലിമാലിൽ, പ്രസിഡന്‍റ് ജീബ പൗലോസ്, സെക്രട്ടറി ബിനോയി ജോസഫ് എന്നിവർ ആവശ്യപ്പെട്ടു.

മാർത്തോമാ ഭവനിലെ അതിക്രമം: ന്യൂനപക്ഷ മോർച്ച ധർണ നടത്തി

കൊച്ചി: കളമശേരി മാർത്തോമാ ഭവനിൽ രാത്രിയുടെ മറവിൽ കൈയേറ്റവും അക്രമവും നടത്തിയവരെ നിയമത്തിനു മുന്നിൽ കൊണ്ടുവരണമെന്ന് ആവശ്യപ്പെട്ട് ബിജെപി ന്യൂനപക്ഷ മോർച്ച കണയന്നൂർ താലൂക്ക് ഓഫീസിനു മുന്നിൽ പ്രതിഷേധ ധർണ നടത്തി. സംസ്ഥാന പ്രസിഡന്‍റ് സുമിത് ജോർജിന്‍റെ നേതൃത്വത്തിൽ നടന്ന ധർണ എൻഡിഎ സംസ്ഥാന ഉപാധ്യക്ഷൻ എ.എൻ. രാധാകൃഷ്ണൻ ഉദ്ഘാടനം ചെയ്തു. ബിജെപി എറണാകുളം സിറ്റി ജില്ലാ പ്രസിഡന്‍റ് അഡ്വ. കെ.എസ് ഷൈജു, നേതാക്കളായ എം.എ. ബ്രഹ്മരാജ്, എസ്. സജി, കോർപറേഷൻ കൗൺസിലർ പത്മജ എസ്. മേനോൻ തുടങ്ങിയവർ പ്രസംഗിച്ചു.

മഞ്ഞുമ്മല്‍ സെന്‍റ് ജോസഫ്‌സ് ആശുപത്രിയില്‍ ഹൃദയദിനാചരണം

കൊച്ചി: മഞ്ഞുമ്മല്‍ സെന്‍റ് ജോസഫ്‌സ് ആശുപത്രിയില്‍ ഹൃദയ ദിനം ആചരിച്ചു. ആശുപത്രി ഡയറക്ടര്‍ ഫാ. ലാല്‍ജു പോളപ്പറമ്പില്‍ ഉദ്ഘാടനം ചെയ്തു. അസോസിയേറ്റ് ഡയറക്ടര്‍മാരായ ഫാ. ജിന്‍സണ്‍, ഫാ. അനുപ്രതാപ്, ഫാ. സൈമണ്‍, മെഡിക്കല്‍ സൂപ്രണ്ട് എം.എന്‍. വെങ്കിടേശ്വരന്‍, ഹൃദ്രോഗ വിദഗ്ദ്ധരായ ഡോ. ജിമ്മി ജോര്‍ജ്, ഡോ. സരിത ശേഖര്‍ ശശികല, ഡോ. വിഷ്ണു, അഡ്മിനിസ്‌ട്രേറ്റര്‍ സെലിൻ മാത്യു, നഴ്‌സിംഗ് സൂപ്രണ്ട് സിസ്റ്റര്‍ സംഗീത എന്നിവര്‍ പങ്കെടുത്തു.

അങ്കമാലി സീനിയർ സിറ്റിസൺസ് ഫോറം രജതജൂബിലി നിറവിൽ; വയോജന ദിനാചരണം ഇന്ന്

അങ്കമാലി : രജതജൂബിലി നിറവിൽ എത്തിനിൽക്കുന്ന അങ്കമാലി സീനിയർ സിറ്റിസൺസ് ഫോറം ഇന്ന് വിപുലമായ പരിപാടികളോടെ വയോജനദിനം ആചരിക്കുന്നു. സെന്‍റ് ജോർജ് ഷോപ്പിംഗ് കോംപ്ലക്സിലെ സീനിയർ സിറ്റിസൺസ് ഫോറം ഹാളിൽ രാവിലെ ഒന്പതിന് രജിസ്ട്രേഷൻ, തുടർന്ന് കലാ -കായിക മത്സരങ്ങൾ, പൊതുസമ്മേളനം എന്നിവ നടക്കും. പൊതുസമ്മേളനം റോജി എം. ജോൺ എംഎൽഎ ഉദ്ഘാടനം നിർവഹിക്കും. സീനിയർ സിറ്റിസൺസ് ഫോറം പ്രസിഡന്‍റും നഗരസഭ മുൻ ചെയർമാനുമായ പി.എ. തോമസ് അധ്യക്ഷത വഹിക്കും. മുതിർന്ന പൗരന്മാർക്ക് വേണ്ടിയുള്ള സാമൂഹിക പ്രവർത്തന മികവിനുള്ള അങ്കമാലി ന്യൂസ്‌ ക്ലബ്‌ പുരസ്‌കാര സമർപ്പണവും വയോജന നിയമത്തെക്കുറിച്ചുള്ള ഉദ്ബോധനവും പോലീസ് അങ്കമാലി സർക്കിൾ ഇൻസ്‌പെക്ടർ എ. രമേഷ് നിർവഹിക്കും. മുൻ എം എൽ എ പി. ജെ ജോയ് മുഖ്യപ്രഭാഷണം നടത്തും. ചടങ്ങിൽ അനുഗ്രഹ പ്രഭാഷണവും സമ്മാനദാനവും ഫാ. ലൂക്കോസ് കുന്നത്തൂർ നിർവഹിക്കും. വയോജന സംരക്ഷണനിധി പീറ്റേഴ്‌സ് റൈസ് മാനേജിംഗ് ഡയറക്ടർ പത്രോസ് തെറ്റയിൽ വിതരണം ചെയ്യും.

മെഗാ തിരുവാതിര സംഘടിപ്പിച്ചു

കൊച്ചി: എറണാകുളം ഡിസ്ട്രിക്ട് റസിഡന്‍റ്സ് അസോസിയേഷന്‍ അപെക്‌സ് കൗണ്‍സില്‍ (എഡ്രാക്) 23 മത് വാര്‍ഷികത്തോടനുബന്ധിച്ച് ജില്ലാ വനിതാ സമിതിയുടെ നേതൃത്വത്തില്‍ 300ല്‍ പരം വനിതകള്‍ അണിനിരന്ന മെഗാ തിരുവാതിര അവതരിപ്പിച്ചത് ശ്രദ്ധേയമായി. വനിതാ കമ്മിറ്റി ജില്ലാ പ്രസിഡന്‍റ് ജെയിന്‍ തൃലോക്, സെക്രട്ടറി തങ്കമണി മധുസൂദനന്‍ എന്നിവര്‍ നേതൃത്വം നല്‍കി. കോര്‍പറേഷന്‍ സ്ഥിരം സമിതി അധ്യക്ഷന്‍ വി.എ. ശ്രീജിത്ത് സര്‍ട്ടിഫിക്കറ്റുകള്‍ വിതരണം ചെയ്തു. കൗണ്‍സിലര്‍മാരായ സന്ത വിജയന്‍, ദീപ വര്‍മ, രജനി മണി, പൊന്നമ്മ പരമേശ്വരന്‍ എന്നിവരും ചടങ്ങില്‍ പങ്കെടുത്തു.

ഡയാലിസ് സഹായ പദ്ധതി: ധനസഹായം കൈമാറി

കൊച്ചി: റോട്ടറി കൊച്ചി മിഡ്ടൗണിന്‍റെ നേതൃത്വത്തില്‍ മുത്തൂറ്റ് മിനി ഫിനാന്‍സിന്‍റെ സഹകരണത്തോടെ നിര്‍ദ്ധനരായ കിഡ്‌നി രോഗികളെ സഹായിക്കുന്നതിനായി നടപ്പിലാക്കുന്ന ഡയാലിസിസ് സഹായ പദ്ധതിയുടെ ഭാഗമായുള്ള ധനസഹായം എറണാകുളം ലിസി ആശുപത്രിക്ക് കൈമാറി. കൊച്ചി മിഡ്ടൗണ്‍ പ്രസിഡന്‍റ് അഡ്വ. പി. ഗോപകുമാര്‍, മുത്തൂറ്റ് മിനി ഫിനാന്‍സ് സിഎസ്ആര്‍ പ്രോജക്ട് ചെയര്‍മാന്‍ കെ. കെ. ജോര്‍ജ് എന്നിവരില്‍ നിന്ന് ഒരു വര്‍ഷത്തെ ഡയലാസിസിനുളള ധനസഹായത്തിന്‍റെ ചെക്ക് ലിസി ആശുപത്രി ഡയറക്ടര്‍ ഫാ. പോള്‍ കരേടന്‍ ഏറ്റുവാങ്ങി. റോട്ടറി കൊച്ചി മിഡ്ടൗണ്‍ സെക്രട്ടറി ഡോ. ബൈജു കുണ്ടില്‍, റൊട്ടേറിയന്‍ ടി.ടി തോമസ്, ബാബു ജോസഫ്, മുത്തൂറ്റ് മിനി ഫിനാന്‍സ് സിഇഒ കെ. ഇ. മത്തായി തുടങ്ങിയവര്‍ പങ്കെടുത്തു.

കണ്ടനാട് പാടശേഖരത്തിൽ വിത്തുവിതച്ച് നടൻ ധ്യാനും കൃഷിയിടത്തിലേക്ക്

ഉദയംപേരൂർ: കണ്ടനാട് പാടശേഖരത്തിൽ ഇത്തവണ കൃഷിയിറക്കാൻ നടൻ ധ്യാനുമെത്തി. 10 വർഷം മുൻപ് രണ്ട് ഏക്കറിൽ പിതാവ് ശ്രീനിവാസൻ തുടങ്ങിയ കൃഷിക്ക് പിന്നാലെയാണ് പാടശേഖര സമിതിക്കൊപ്പം ഇത്തവണ ധ്യാൻ ശ്രീനിവാസനും കൃഷിയിറക്കാനെത്തിയത്. ഹൈബി ഈഡൻ എംപിയോടൊപ്പമാണ് ധ്യാൻ നെല്ല് വിതച്ചത്. 80 ഏക്കറിലാണ് ഇത്തവണത്തെ കൃഷി. ഉമ വിത്തുകളാണ് വിതയ്ക്കുന്നത്. 1500 കിലോഗ്രാമിൽ ഏറെ വിത്തുകൾ ഇവിടെ എത്തിയിട്ടുണ്ട്. 5 ഏക്കറിൽ നാടൻ വിത്തുകളും വിതയ്ക്കും. പഞ്ചായത്ത്, കൃഷിഭവൻ, മധ്യകേരള ഫാർമർ പ്രൊഡ്യൂസർ കമ്പനി എന്നിവയുടെ നേതൃത്വത്തിൽ സംഘടിപ്പിച്ച വിത ഉത്സവം കണ്ടനാട് ചെമ്മാച്ചൻ പള്ളിയോടു ചേർന്നുള്ള പുന്നച്ചാലിൽ‌ പാടശേഖരത്തിലാണ് നടന്നത്. പഞ്ചായത്ത് പ്രസിഡന്‍റ് സജിത മുരളി അധ്യക്ഷത വഹിച്ചു. നടൻ മണികണ്ഠൻ ആചാരി, മുളന്തുരുത്തി ബ്ലോക്ക് പഞ്ചായത്ത് പ്രസിഡന്‍റ് ഷാജി മാധവൻ, ജോർജ് കുളങ്ങര, സഞ്ജു സൂസൻ, കെ.വി. അനിത തുടങ്ങിയവർ പ്രസംഗിച്ചു. വിത ഉത്സവത്തിന്‍റെ ഭാഗമായി ചെളിയിൽ പന്ത് കളിക്കാനും അവസരമൊരുക്കിയിരുന്നു.ധ്യാൻ ശ്രീനിവാസൻ, നാട്ടുകാരായ മനു ഫിലിപ്പ് തുകലൻ, സാജു കുര്യൻ വൈശ്യംപറമ്പിൽ എന്നിവർ ചേർന്നാണ് പാടം പാട്ടത്തിനെടുത്ത് കൃഷിയിറക്കുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]