ADVERTISEMENT

ADVERTISEMENT

പീഡനം: പ്രതി മറയൂരിൽ പിടിയിൽ

കളമശേരി: ഇതരസംസ്ഥാന തൊഴിലാളിയുടെ ആറു വയസുള്ള മകളെ പീഡിപ്പിച്ച കേസിൽ അയൽവാസിയായ 19 കാരനെ പോലീസ് പിടികൂടി.

സംഭവത്തിനു ശേഷം വിനോദയാത്രയ്ക്കു പോയ പ്രതിയെ മറയൂരിൽ നിന്നാണ് പിടികൂടിയതെന്ന് കളമശേരി പോലീസ് അറിയിച്ചു.

ADVERTISEMENT

അയര്‍ലന്‍ഡില്‍ മരിച്ച നഴ്‌സിന്‍റെ സംസ്‌കാരം തിങ്കളാഴ്ച

അങ്കമാലി: അയര്‍ലന്‍ഡിലെ ലോംഗ്‌ഫോര്‍ഡില്‍ മരിച്ച മലയാളി നഴ്‌സ് തൊടുപുഴ മുതലക്കോടം കിഴക്കേക്കര എപ്രേം സെബാസ്റ്റ്യന്‍റെ ഭാര്യയും അങ്കമാലി മൂക്കന്നൂര്‍അട്ടാറ മാളിയേക്കല്‍ കുടുംബാംഗവുമായ ഷാന്‍റി പോളിന്‍റെ (52) സംസ്‌കാരം തിങ്കളാഴ്ച നടക്കും . കാന്‍സര്‍ ചികിത്സയിലായിരുന്ന ഷാന്‍റി കഴിഞ്ഞ തിങ്കളാഴ്ച രാവിലെ എട്ടോടെ മുള്ളീംഗാര്‍ ആശുപത്രിയിലാണ് മരിച്ചത്. ലോംഗ്‌ഫോര്‍ഡ് സീറോ മലബാര്‍ ചര്‍ച്ച് അംഗവും മിഡ്‌ലാന്‍ഡ് ഇന്‍റലക്ച്വല്‍ ഡിസെബിലിറ്റി സെന്‍ററിൽ സ്റ്റാഫ് നഴ്‌സുമായിരുന്ന ഷാന്‍റി രണ്ട് വര്‍ഷത്തോളമായി കാന്‍സര്‍ ബാധിതയായി ചികിത്സയിലായിരുന്നു. നേരത്തെ താല ന്യൂകാസിലില്‍ താമസിക്കവേ പീമോണ്ട് ആശുപത്രിയിലും സേവനമനുഷ്ഠിച്ചിട്ടുണ്ട്. അഞ്ചു വര്‍ഷമായി കുടുംബം ലോംഗ്‌ഫോര്‍ഡിലാണ്. മക്കള്‍: കോളജ് വിദ്യാര്‍ഥികളായ എമില്‍, എവിന്‍, അലാന. ഷാന്‍റിയുടെ മൃതദേഹം ഞായറാഴ്ച വൈകിട്ട് ലോംഗ്‌ഫോര്‍ഡ് ഓക്‌ലാന്‍ഡിലെ ഗ്ലെനോന്‍ ഫ്യൂണറല്‍ ഹോമിലും തുടര്‍ന്ന് തിങ്കളാഴ്ച രാവിലെ ലോംഗ്‌ഫോര്‍ഡിലുള്ള വസതിയിലും പൊതുദര്‍ശനത്തിന് വയ്ക്കും. തുടര്‍ന്ന് സംസ്‌കാരം ലോംഗ്‌ഫോര്‍ഡിലുള്ള മൊയ്ഡോ സെന്‍റ് മേരീസ് പള്ളിയില്‍.

11.5 പവൻ സ്വർണാഭരണങ്ങളും 20,000 രൂപയും മോഷണം പോയി

വൈപ്പിൻ : വീട്ടിൽ സൂക്ഷിച്ചിരുന്ന 11.5 പവന്‍റെ സ്വർണാഭരണങ്ങളും 20,000 രൂപയും മോഷണം പോയതായി പരാതി. എടവനക്കാട് ഇല്ലത്തുപടി കറുകപ്പാടത്ത് അഷ്റഫാണ് പരാതിക്കാരൻ. വീടിനകത്തെ കിടപ്പുമുറിയിലെ അലമാരിയിൽ സൂക്ഷിച്ചിരുന്ന ആഭരണങ്ങളും പണവുമാണ് കാണാതായതെന്ന് ഞാറക്കൽ പോലീസിൽ നല്കിയ പരാതിയിൽ പറ‍യുന്നു. കഴിഞ്ഞ 14ന് മൂന്ന് മാസം മുമ്പുള്ള ഏതോ ദിവസമാണ് ആഭരണങ്ങൾ നഷ്ടപ്പെട്ടിരിക്കുന്നത്. പോലീസ് അന്വേഷണം ആരംഭിച്ചു.

അനധികൃത മരം മുറി: രണ്ടു പേർക്കെതിരെ കേസെടുത്തു

കാക്കനാട് : സർക്കാർ പുറമ്പോക്ക് ഭൂമിയിൽ നിന്നും അനധികൃതമായി മരം മുറിച്ചു കടത്തിയ കേസിൽ രണ്ടു പേർക്കെതിരെ കേസെടുത്തു. കാക്കനാട് സ്വദേശികളായ ശ്രീകാന്ത്, ബിജു എന്നിവർക്കെതിരെയാണ് കേസ് . സീപോർട്ട് എയർപോർട്ട് റോഡിൽ ടിവി സെന്‍ററിനു സമീപമുള്ള സർക്കാർ ഭൂമിയിൽ നിന്നും ആഞ്ഞിലി, മുള, റബർ എന്നിവയാണ് മുറിച്ച് കടത്തിയത്. കാക്കനാട് വില്ലേജ് ഓഫീസർ നൽകിയ പരാതിയിൽ തൃക്കാക്കര പോലീസ് കേസെടുക്കുകയായിരുന്നു. സ്ഥലത്തെ മരം നീക്കുന്നതിനുപയോഗിച്ച ജെസിബി നേരത്തെ കസ്റ്റഡിയിലെടുത്തിരുന്നു. 20 കോടിയോളം മതിപ്പുവിലയുള്ള ഭൂമി പിടിച്ചെടുത്ത് റവന്യൂ വകുപ്പ് സ്ഥലത്ത് സർക്കാർ ബോർഡും സ്ഥാപിച്ചിരുന്നു.

ട്രെയിനിൽ മൊബൈൽ ഫോൺ കവർച്ച; രണ്ടു പേർ റിമാൻഡിൽ

കൊച്ചി: ട്രെയിനിന്‍റെ വാതിൽപ്പടിയിൽ ഇരുന്ന യാത്രക്കാരന്‍റെ മൊബൈൽ ഫോൺ കവർന്ന രണ്ടുപേർ കുടുങ്ങി. കവർച്ചാ സംഘത്തിലെ പ്രധാനിയായ അമ്പലമുകൾ അമൃത കോളനിയിൽ അരുൺ ( 32) , കളവു മുതൽ കുറഞ്ഞ വിലയ്ക്ക് വാങ്ങി പൊളിച്ചു വിൽക്കാൻ ശ്രമിച്ച എറണാകുളം കെഎസ്ആർടിസി ബസ് സ്റ്റാൻഡിനു സമീപം ഫോൺ പോ എന്ന മൊബൈൽ കട നടത്തുന്ന തോപ്പുംപടി സ്വദേശി സലാഹുദീ ൻ (35) എന്നിവരെയാണ് എറണാകുളം റെയിൽവേ ഡിവൈഎസ്പി ജോർജ് ജോസഫിന്‍റെ നേതൃത്വത്തിലുള്ള സംഘം അറസ്റ്റ് ചെയ്തത്. കഴിഞ്ഞ 19 ന് രാത്രി എട്ടിന് എറണാകുളം സൗത്ത് റെയിൽവേ സ്റ്റേഷനിൽ നിന്നു പുറപ്പെട്ട എറണാകുളം - ഓഖാ ട്രെയിനിന്‍റെ മുൻവശം ജനറൽ കോച്ചിലെ വാതിൽപ്പടിയിൽ ഇരുന്നു സഞ്ചരിച്ച തിരൂർ സ്വദേശിയുടെ 80,000 രൂപ വില വരുന്ന ഐ ഫോണാണ് നാലംഗ സംഘം കവർന്നത്. സലാഹുദ്ദീൻ ഇത് മോഷണ മുതൽ ആണെന്നറിഞ്ഞു കൊണ്ട് കുറഞ്ഞ വിലയ്ക്ക് വാങ്ങി പൊളിച്ചു വിൽക്കാൻ ശ്രമിക്കുകയായിരുന്നു. ട്രെയിൻ പുല്ലേപ്പടി ഓവർ ബ്രിഡ്ജിന്‍റെ താഴെയെത്തി വേഗത കുറച്ച സമയത്തായിരുന്നു സംഘം മൊബൈൽ ഫോൺ തട്ടിയെടുത്തത്.അരുണിന്‍റെ പേരിൽ എറണാകുളം, തൃശൂർ ജില്ലകളിലായി കവർച്ച, മോഷണം ഉൾപ്പെടെ ഏഴു കേസുകൾ നിലവിലുണ്ട്. പ്രതികളെ 15 ദിവസത്തേക്ക് റിമാൻഡ് ചെയ്തു. എറണാകുളം റെയിൽവേ പോലീസ് സ്റ്റേഷനിലെ സബ് ഇൻസ്പെക്ടർമാരായ എ. നിസാറുദീൻ, ഇ. കെ. അനിൽകുമാർ, എസ്‌സിപിഒമാരായ കെ.വി. ദിനിൽ, സഹേഷ്, തോമസ് , എ.പി.അനീഷ് കുമാർ, അഖിൽ തോമസ്, അലക്സ് എന്നിവരാണ് അന്വേഷണ സംഘത്തിൽ ഉണ്ടായിരുന്നത്.

സൗഹൃദം സ്ഥാപിച്ച് പണം തട്ടൽ; സംഘത്തിലെ രണ്ടാമനും പിടിയിൽ

മൂവാറ്റുപുഴ: മാധ്യമങ്ങളില്‍ സ്ഥലം വില്പനയ്ക്ക് എന്ന് പരസ്യം നല്‍കുന്നവരെ ഫോണില്‍ വിളിച്ച് സൗഹൃദം സ്ഥാപിച്ച് പണം തട്ടുന്ന സംഘത്തിലെ രണ്ടാമനെ തിരുവനന്തപുരത്തെ ഒളിത്താവളത്തില്‍നിന്ന് മൂവാറ്റുപുഴ പോലീസ് പിടികൂടി. തിരുവനന്തപുരം കവടിയാര്‍ അമ്പലമുക്ക് ഭാഗത്ത് അനിയന്‍ ലൈനില്‍ മുല്ലശേരില്‍ താമസിക്കുന്ന, ചിറയിന്‍കീഴ് കാട്ടുമ്പുറം സ്വദേശി ഷേര്‍മിള മന്‍സില്‍ സജിത്ത് കുമാറി(ദീപക്- 50) നെയാണ് മൂവാറ്റുപുഴ ഇന്‍സ്‌പെക്ടര്‍ ബേസില്‍ തോമസിന്‍റെ നേതൃത്വത്തിലുള്ള പ്രത്യേക അന്വേഷണസംഘം പിടികൂടിയത്. സ്ഥലം ബ്രോക്കര്‍ എന്നു പരിചയപ്പെടുത്തി വന്‍തുകകള്‍ വായ്പയായി നൽകാമെന്നും കൊടുക്കുന്ന തുകയ്ക്ക് ഇരട്ടി തുക നല്‍കാമെന്നും വാഗ്ദാനം നല്‍കി തട്ടിപ്പ് നടത്തുന്ന സംഘത്തിലെ കണ്ണിയാണ് ഇയാള്‍. ആലുവ സ്വദേശിയുടെ 15 ലക്ഷമാണ് തട്ടിപ്പിലൂടെ നഷ്ടമായത്. സ്ഥലം വില്പനയ്ക്ക് എന്ന് പരസ്യം നല്‍കിയ പരാതിക്കാരനെ ഫോണില്‍ വിളിച്ച് ജോഷി എന്ന് പേര് പറഞ്ഞ് പരിചയപ്പെട്ട് സൗഹൃദം സ്ഥാപിച്ചുക്കുകയായിരുന്നു. സിനിമാ മേഖലയില്‍ ബന്ധമുണ്ടെന്ന് വിശ്വസിപ്പിക്കുകയും തന്‍റെ കൈയില്‍ പലരുടെയും പണം ഉണ്ടെന്ന് പറഞ്ഞു വിശ്വസിപ്പിക്കുകയും ചെയ്തു. കേസിലെ ഒന്നാം പ്രതി കോട്ടയം വാഴൂര്‍ സ്വദേശി മണിയെ പോലീസ് അറസ്റ്റ് ചെയ്തിരുന്നു. കൂട്ടുപ്രതികളെപ്പറ്റിയും പോലീസ് അന്വേഷണം വ്യാപിപ്പിച്ചിട്ടുണ്ട്.കൂടുതല്‍ പേര്‍ തട്ടിപ്പിന് ഇരയായിട്ടുണ്ടോയെന്നും ജില്ലാ പോലീസ് മേധാവി എം. ഹേമലതയുടെ മേല്‍നോട്ടത്തിലുള്ള പ്രത്യേക സംഘം അന്വേഷിക്കുന്നുണ്ട്. തിരുവനന്തപുരത്ത് ഒളിവില്‍ കഴിഞ്ഞ പ്രതിയെ ദിവസങ്ങളോളം നിരീക്ഷണം നടത്തിയാണ് പിടികൂടിയത്. പ്രതിക്കെതിരേ തിരുവനന്തപുരം ഫോര്‍ട്ട് പോലീസ് സ്റ്റേഷന്‍, കൊല്ലം ഈസ്റ്റ്, ആറ്റിങ്ങല്‍, തമിഴ്‌നാട്ട് എന്നിവിടങ്ങളില്‍ കേസ് നിലവിലുണ്ട്. അന്വേഷണ സംഘത്തില്‍ സബ് ഇന്‍സ്‌പെക്ടര്‍മാരായ കെ.കെ. രാജേഷ്, പി.സി. ജയകുമാര്‍, സീനിയര്‍ സിപിഒ നിഷാന്ത് കുമാര്‍, ബിബില്‍ മോഹന്‍ എന്നിവരാണുണ്ടായിരുന്നത്.

കൈക്കൂലി വാങ്ങുന്നതിനിടെ നഗരസഭാ ഉദ്യോഗസ്ഥനെ വിജിലൻസ് പിടികൂടി

പള്ളുരുത്തി: കൈക്കൂലി വാങ്ങുന്നതിനിടെ കൊച്ചി നഗരസഭയുടെ പള്ളുരുത്തി സോണൽ ഓഫീസ് ക്ലാർക്ക് വിജിലൻസ് പിടിയിൽ. റവന്യൂ വിഭാഗം ക്ലാർക്ക് തിരുവനന്തപുരം പാറശാല സ്വദേശി എസ്. ഭവനിൽ എസ്.എസ്. പ്രകാശാണ് (30) പിടിയിലായത്. പള്ളുരുത്തിയിൽ നിർമാണം പൂർത്തീകരിച്ച ഇരുനിലക്കെട്ടിടത്തിന്‍റെ നിർമാണ പെർമിറ്റിൽ വന്ന അപാകത പരിഹരിക്കുന്നതിനായി പള്ളുരുത്തി സ്വദേശി തൂമ്പുങ്കൽ വീട്ടിൽ അഡ്വ. രോഹിത്തിൽനിന്നാണ് കൈക്കൂലി കൈപ്പറ്റിയത്. രണ്ട് ലക്ഷം രൂപയാണ് ആവശ്യപ്പെട്ടത്. ആദ്യപടിയായി അമ്പതിനായിരം രൂപ ആവശ്യപ്പെട്ടെങ്കിലും 25000 രൂപ നൽകാമെന്ന് പരാതിക്കാരൻ പറഞ്ഞു. ഉദ്യോഗസ്ഥൻ പണം ആവശ്യപ്പെട്ട വിവരം പരാതിക്കാരൻ വിജിലൻസിനെ അറിയിച്ചു. തുടർന്ന് ഫിനോഫ്സ്തിലിൻ പൗഡർ പുരട്ടിയ നോട്ടുകൾ നൽകി വിജിലൻസ് പരാതിക്കാരനെ ഉദ്യോഗസ്ഥന്‍റെ അടുക്കലേക്ക് അയയ്ക്കുകയും പിന്തുടർന്നെത്തിയ വിജിലൻസ് സംഘം ഉദ്യോഗസ്ഥനെ പിടികൂടുകയുമായിരുന്നു. എറണാകുളം സെൻട്രൻ റേഞ്ച് എസ്.പി. പി.എൻ.രമേശ്കുമാറിന്‍റെ നിർദേശാനുസരണം എറണാകുളം വിജിലൻസ് യൂണിറ്റ് ഡിവൈഎസ്പിമാരായ കെ.എ. തോമസ്, ജി. സുനിൽകുമാർ എന്നിവരുടെ നേതൃത്വത്തിൽ, ഇൻസ്പെക്ടർമാരായ ആർ. മധു, എം. മനു, എ. ഫിറോസ്, എൻ.എ. അനൂപ് എന്നിവരടങ്ങിയ സംഘമാണ് പിടികൂടിയത്.

കെ.ജെ. ഷൈനിന് എതിരായ സൈബര്‍ ആക്രമണം : വിവരങ്ങള്‍ പോലീസിന് കൈമാറാന്‍ മെറ്റ

കൊച്ചി: സിപിഎം നേതാവ് കെ.ജെ. ഷൈനിനെതിരായ സൈബര്‍ ആക്രമണ കേസില്‍ പ്രതികളുടെയും പോലീസ് നിരീക്ഷണത്തിലുള്ള സമൂഹ മാധ്യമ അക്കൗണ്ടുകളുടെയും വിവരങ്ങള്‍ അന്വേഷണസംഘത്തിന് കൈമാറാനൊരുങ്ങി മെറ്റ. ഇതിന്‍റെ ഭാഗമായി വിവരങ്ങള്‍ ക്രോഡീകരിച്ചു വരുന്നതായി മെറ്റ അന്വേഷണ ഉദ്യോഗസ്ഥരെ അറിയിച്ചു. കേസില്‍ പ്രതിചേര്‍ത്തിട്ടുള്ള കെ.എം. ഷാജഹാന്‍, കോണ്‍ഗ്രസ് പ്രദേശിക നേതാവ് സി.കെ. ഗോപാലകൃഷ്ണന്‍ എന്നിവരുടെ സമൂഹമാധ്യമ അക്കൗണ്ടുകള്‍ക്ക് പുറമേ പോസ്റ്റ് ഷെയര്‍ ചെയ്ത നൂറോളം പേജുകള്‍ നിരീക്ഷണത്തിലാണ്. ഇവയുടെ വിവരങ്ങളും പോലീസ് തേടിയിരുന്നു. പരമാവധി സൈബര്‍ തെളിവുകള്‍ ശേഖരിക്കാനാണ് അന്വേഷണസംഘത്തിന്‍റെ നീക്കം. കഴിഞ്ഞ ദിവസം കെ.എം. ഷാജഹാന്‍റെയും ഗോപാലകൃഷ്ണന്‍റെയും വീടുകളില്‍ നടത്തിയ പരിശോധനയില്‍ പിടിച്ചെടുത്ത മൊബൈല്‍ ഫോണുകള്‍ ശാസ്ത്രീയ പരിശോധനയ്ക്ക് കൈമാറും. അധിക്ഷേപ പരാമര്‍ശമുള്ള പോസ്റ്റും വീഡിയോയും ഇട്ടത് ഈ ഫോണുകളില്‍ നിന്നുതന്നെയാണോയെന്ന് പരിശോധിക്കുകയാണ് ലക്ഷ്യം. ഷാജഹാന്‍റെയും ഗോപാലകൃഷ്ണന്‍റെയും പോസ്റ്റുകളില്‍ കമന്‍റിട്ടവരില്‍ നിന്നടക്കം മൊഴി രേഖപ്പെടുത്തിയേക്കുമെന്നും സൂചനയുണ്ട്.

റോറോ ജങ്കാർ നിയന്ത്രണം വിട്ട് കടലിലേക്ക് ഒഴുകി

വൈപ്പിൻ : ഓട്ടത്തിനിടയിൽ എൻജിൻ പൊടുന്നനെ നിലച്ചു. ഫോർട്ടു കൊച്ചിയിൽ നിന്നും നിറയെ വാഹനങ്ങളും യാത്രക്കാരുമായി വൈപ്പിൻ ജെട്ടിയിലേക്ക് വരികയായിരുന്ന റോ റോ ജങ്കാർ കടലിലേക്ക് ഒഴുകി. നിയന്ത്രണം വിട്ട് ഒഴുകുന്നതിനിടയിൽ ഫോർട്ട് വൈപ്പിൻ ഭാഗത്തെ രണ്ട് ചീനവിലകളിൽ ഇടിച്ച് സാരമായ കേടുപാടുകളും വരുത്തി. മൂന്നാമത്തെ ചീനവലയുടെ ഭാഗത്തെത്തിയപ്പോഴേക്കും എൻജിൻ വീണ്ടും പ്രവർത്തിക്കുകയും ജീവനക്കാർ സാവധാനം ജങ്കാറിനെ വൈപ്പിൻ ജെട്ടിയിൽ അടുപ്പിക്കുകയും ചെയ്യുകയാ യിരുന്നു. കഴിഞ്ഞ രാത്രി ഒന്പതോടെയാണ് സംഭവം. രാത്രി 8.50ന് ഫോർട്ട് കൊച്ചി ജെട്ടിയിൽ നിന്നും പുറപ്പെട്ട സേതു സാഗർ -1 എന്ന ജങ്കാറാണ് നിയന്ത്രണം വിട്ട് ഒഴുകിയത്. ഇത് വൈപ്പിൻ ജെട്ടിയിൽ അടുക്കുന്നതിനു തൊട്ടു മുമ്പ് പെട്ടെന്ന് എൻജിൻ നിലക്കുകയായിരുന്നുവെന്ന് യാത്രക്കാർ പറയുന്നു. ഈ സമയം വേലിയിറക്കം ആയതിനാൽ ജങ്കാർ നിയന്ത്രണം വിട്ട് പടിഞ്ഞാറോട്ട് കടലിലേക്ക് ഒഴുകി. ഫോർട്ട് കൊച്ചി സ്വദേശി ഹെൻലി, ഉണ്ണി എന്നിവരുടെ ചീനവലകൾക്കാണ് കേടുപാടുകൾ വന്നിട്ടുള്ളത്.

പോലീസ് ചമഞ്ഞു പണം തട്ടല്‍ : ജില്ലയിൽ രണ്ടുപേർ അറസ്റ്റിൽ

കൊച്ചി/മട്ടാഞ്ചേരി: പോലീസ് ഉദ്യോഗസ്ഥനെന്ന് തെറ്റിദ്ധരിപ്പിച്ച് പണം തട്ടിയെന്ന കേസുകളിൽ ജില്ലയിൽ രണ്ടുപേർ അറസ്റ്റിൽ. വിദേശത്ത് ജോലി ശരിയാക്കി നല്കാമെന്ന് വിശ്വസിപ്പിച്ച് പണം തട്ടിയ കേസിലെ വാഗമണ്ണിൽ നിന്നും ഫോർട്ട് കൊച്ചി പോലീസും പോലീസ് ഉദ്യോഗസ്ഥനെന്ന് തെറ്റിദ്ധരിപ്പിച്ച് നഗരത്തിലെ ഒരു സ്ഥാപനത്തില്‍ നിന്ന് പണം തട്ടിയ പ്രതിയെ എറണാകുളം നോർത്ത് പോലീസുമാണ് പിടികൂടിയത്. വിദേശജോലി വാഗ്ദാനം നല്കി പണം കൈപ്പറ്റി വാഗമണ്ണില്‍ സുഹൃത്തുക്കള്‍ക്കൊപ്പം ഒളിവില്‍ കഴിയുകയായിരുന്ന പുതുവൈപ്പ് കുരിശുപറമ്പില്‍ ആന്‍റണി സിജിനെയാണ് (31) സൈബര്‍ സെല്ലിന്‍റെ സഹായത്തോടെ ടവര്‍ ലൊക്കേഷന്‍ കേന്ദ്രീകരിച്ചുള്ള അന്വേഷണത്തില്‍ പിടികൂടിയത്. തോപ്പുംപടി മുണ്ടംവേലി സ്വദേശിയില്‍ നിന്നാണ് യുകെയില്‍ ഡ്രൈവര്‍ ജോലി വാഗ്ദാനം ചെയ്‌ത് പല തവണയായി 52,810 രൂപ തട്ടിയെടുത്തത്. പ്രതി സമാന രീതിയില്‍ മുളവുകാട്, പള്ളുരുത്തി എന്നിവിടങ്ങളിലും തട്ടിപ്പ് നടത്തിയതായി വിവരം ലഭിച്ചതിന്‍റെ അടിസ്ഥാനത്തിലും പോലീസ് അന്വേഷണം ആരംഭിച്ചു. പോലീസ് ഉദ്യോഗസ്ഥരോടൊപ്പമുള്ള ഫോട്ടോകളും സെല്‍ഫികളും കാണിച്ചാണ് ആളുകളെ തെറ്റിദ്ധരിപ്പിച്ചിരുന്നത്. കൊച്ചി സിറ്റി ഡപ്യൂട്ടി പോലീസ് കമ്മീഷണര്‍ അശ്വതി ജിജിയുടെ നിര്‍ദേശ പ്രകാരം മട്ടാഞ്ചേരി അസി. കമ്മീഷണര്‍ ഉമേഷ് ഗോയലിന്‍റെ നേതൃത്വത്തില്‍ ഫോര്‍ട്ട്കൊച്ചി പോലീസ് ഇൻസ്പെക്ടര്‍ എം .എസ്. ഫൈസല്‍, എസ് ഐ എസ്. നവീന്‍, എസ്‌സിപിഒ മാരായ സൂരേഷ്, മഹേഷ്, ടി.പി . ശ്രീജിത്ത്, സിപിഒ മാരായ രാജേഷ്, പ്രജീഷ് എന്നിവര്‍ ചേര്‍ന്നാണ് പ്രതിയെ അറസ്റ്റ് ചെയ്തത്. ഓണാഘോഷത്തോടനുബന്ധിച്ച് പോലീസ് സ്റ്റേഷനില്‍ പരിപാടി നടത്തന്നതിന് വേണ്ടിയെന്ന് പറഞ്ഞ് നഗരത്തിലെ ഒരു സ്ഥാപനത്തില്‍ നിന്ന് പണം അപഹരിച്ച കോട്ടയം പൂഞ്ഞാര്‍ മണിയംകുന്ന് കിടങ്ങത്ത് കാരോട്ട് സിജോയാണ് എറണാകുളം നോര്‍ത്ത് പോലീസിന്‍റെ പിടിയിലായത്. സ്ഥാപനമുടമയായ സ്ത്രീയോട് 20000 രൂപയാണ് ആവശ്യപ്പെട്ടത്. 11000 രൂപ പരാതിക്കാരി നല്‍കി. എന്നാല്‍ ഇയാള്‍ ഈ പണം പോരായെന്നും മുഴുവന്‍ പണവും കിട്ടണമെന്നും അതുവരെ സ്ഥാപനം പ്രവര്‍ത്തിക്കാന്‍ പാടില്ലെന്നും അറിയിച്ചു. ഇതേത്തുടര്‍ന്ന് പരാതിക്കാരി രണ്ടാഴ്ചയോളം സ്ഥാപനം അടച്ചിട്ടു. പിന്നീട് സെൻട്രൽ അസി. കമ്മീഷണര്‍ക്ക് പരാതി നല്‍കി. സിസിടിവി ദൃശ്യങ്ങള്‍ ഉള്‍പ്പടെയുളളവ പരിശോധിച്ച് നടത്തിയ അന്വേഷണത്തിലാണ് പ്രതിയെക്കുറിച്ച് സൂചനകള്‍ ലഭിച്ചത്. പ്രതിക്കെതിരെ തൃശൂര്‍, ആലപ്പുഴ, കോട്ടയം എറണാകുളം എന്നീ ജില്ലകളില്‍ നിരവധി കേസുകളുണ്ട്. ഇയാള്‍ പോലീസ് വേഷത്തില്‍ പല തട്ടിപ്പുകളും നടത്തിയിട്ടുള്ളതായി അന്വേഷണത്തില്‍ തെളിഞ്ഞിട്ടുണ്ടെന്നും വരും ദിവസങ്ങള്‍ ഇയാള്‍ക്കെതിരെ കൂടുതല്‍ പരാതികള്‍ ലഭിക്കാന്‍ സാധ്യതയുണ്ടെന്നും പോലീസ് പറഞ്ഞു. എറണാകുളം സെന്‍ട്രല്‍ അസി. കമ്മീഷണര്‍ സിബി ടോമിന്‍റെ നിര്‍ദേശപ്രകാരം എറണാകുളം ടൗണ്‍ നോര്‍ത്ത് പ്രിന്‍സിപ്പല്‍ സബ് ഇന്‍സ്‌പെക്ടര്‍ ഐന്‍ ബാബുവിന്‍റെ നേതൃത്വത്തിലുള്ള അന്വേഷണ സംഘമാണ് പ്രതിയെ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

സ്വർണാഭരണങ്ങൾ കവർന്ന വ്യാജ ഡോക്ടർ കുടുങ്ങി

കൂത്താട്ടുകുളം: വ്യാജ ഡോക്ടർ ചമഞ്ഞ് വിധവയുടെ സ്വർണാഭരണങ്ങൾ കവർന്നയാൾ പോലീസിന്‍റെ പിടിയിലായി. ഫോർട്ടുകൊച്ചി അമരാവതി കൂലായത്ത് സ്റ്റീവൻ റെക്സൺ തോമസിനെ(25)യാണ് കൂത്താട്ടുകുളം പോലീസ് അറസ്റ്റ് ചെയ്തത്. കോഴിപ്പിള്ളി വണ്ടമ്പ്ര കാളശേരിൽ ഉഷ അശോകന്‍റെ വീട്ടിൽ അലമാരയിൽ സൂക്ഷിച്ചിരുന്ന സ്വർണാഭരണങ്ങളാണ് മോഷണം പോയത്. മൊബൈൽ ടവർ ലൊക്കേഷൻ കേന്ദ്രീകരിച്ച് നടത്തിയ അന്വേഷണത്തിൽ പ്രതിയെ പന്തളത്തുനിന്ന് പിടികൂടുകയായിരുന്നു. ഒരു പവൻ വീതമുള്ള രണ്ട് സ്വർണവളകളും, 23.900 ഗ്രാം തൂക്കമുള്ള ഒരു സ്വർണമാലയും, അര പവൻ തൂക്കം വരുന്ന രണ്ട് ജോടി കമ്മലും ഉൾപ്പെടെ 43.900 ഗ്രാം സ്വർണ ആഭരണങ്ങളാണ് മോഷണം പോയത്. ജൂലൈ-ഓഗസ്റ്റ് മാസങ്ങളിൽ ഉഷയുടെ കോഴിപ്പിള്ളിയിലുള്ള വീട്ടിൽ സ്റ്റീവൻ താമസിച്ചിരുന്നു. വിധവയായ ഉഷയുടെ വീടുപണി നടന്നു വരികയാണ്. മക്കൾ വിദേശത്ത് ആയതിനാൽ വീടുപണി നോക്കി നടത്തുന്നതിന് സഹായത്തിനായാണ് സ്റ്റീവൻ എത്തിയത്. താൻ ഡോക്ടറാണ് എന്നാണ് സ്റ്റീവൻ ഉഷയോട് പറഞ്ഞിരുന്നത്. അലമാരയിൽ സൂക്ഷിച്ചിരുന്ന മാല മാറിയെടുക്കുന്നതിനായി ഉഷ ജ്വല്ലറിയിൽ എത്തിയപ്പോഴാണ് മാല റോൾഡ് ഗോൾഡ് ആണെന്ന് മനസിലാകുന്നത്. ഉടൻ വീട്ടിൽ തിരിച്ചെത്തി അലമാര പരിശോധിച്ചപ്പോൾ അലമാരയിലിരുന്ന മറ്റ് സ്വർണാഭരണങ്ങളും നഷ്ടപ്പെട്ടതായി മനസിലായി. തുടർന്ന് കൂത്താട്ടുകുളം പോലീസിൽ പരാതി നൽകുകയായിരുന്നു. മൊബൈൽ ഫോൺ കേന്ദ്രീകരിച്ച് നടത്തിയ അന്വേഷണത്തിലാണ് പോലീസിന്‍റെ വലയിൽ പ്രതി കുടുങ്ങിയത്. അറസ്റ്റിലായ പ്രതിയെ കോടതിയിൽ ഹാജരാക്കി റിമാൻഡ് ചെയ്തു. ഫോർട്ടുകൊച്ചിയിൽ കംപ്യൂട്ടർ സർവീസിംഗ് ജോലി ചെയ്തുവരികയായിരുന്നു പ്രതി. പുത്തൻകുരിശ് ഡിവൈഎസ്പി വി.ടി. ഷാജന്‍റെ നിർദേശപ്രകാരം കൂത്താട്ടുകുളം സ്റ്റേഷൻ ഇൻസ്പെക്ടർ സഞ്ജു ജോസഫ്, പ്രിൻസിപ്പൽ എസ്ഐ സി.ആർ. രെഞ്ചുമോൾ, എഎസ്ഐമാരായ കെ.പി. അഭിലാഷ്, സി.ആർ. സുരേഷ്, എസ്‌സിപിഒ പി.കെ. മനോജ് എന്നിവരടങ്ങിയ സംഘമാണ് പ്രതിയെ പിടികൂടിയത്.

നടുറോഡിൽ നായ്പ്പട; പേടിയോടെ നാട്ടുകാർ

അരൂർ: അരൂർ പഞ്ചായത്ത് ഏഴാം വാർഡിൽ കണ്ണേഴത്ത് റോഡിൽ യാത്രക്കാരിൽ ഭീതി വിതച്ച് തെരുവുനായ്ക്കൾ . നടുറോഡിൽ നായ്ക്കൾ കൂട്ടത്തോടെ നിൽക്കുന്നതിനാൽ കാൽന‌ടയാത്രികർക്കും ഇരുചക്രവാഹനങ്ങൾക്കും ഇതുവഴി ക‌ടന്നുപോകാൻ പറ്റാത്ത അവസ്ഥയാണ്. ഹോട്ടൽ മാലിന്യങ്ങളും കോഴിയുടെ അവശിഷ്ടങ്ങളും ചാക്കിൽ കെട്ടി ആളൊഴിഞ്ഞ റോഡിന്‍റെ അരികിൽ തള്ളുന്നതിനാലാണ് നായ്ക്കൾ ഇവിടെ കൂട്ടത്തോടെ തന്പടിക്കുന്നത് . ഭക്ഷ്യാവശിഷ്ടങ്ങൾക്കായി നായ്ക്കൾ കടിപിടി കൂടുന്നതും യാത്രക്കാർക്കും വാഹനങ്ങൾക്കും പിന്നാലെ ഓടിയെത്തുന്നതും പതിവുകാഴ്ചയാണ്. തെരുവുനായ ശല്യം വർധിച്ചതോടെ നിരവധി പരാതികൾ പഞ്ചായത്തിൽ എത്തുന്നുണ്ടെങ്കിലും നടപടികളൊന്നുമുണ്ടായില്ലെന്നു നാട്ടുകാർ പറഞ്ഞു.

അയിരൂർപാടം മൃഗാശുപത്രി ഉപകേന്ദ്രം പ്രവർത്തനമാരംഭിച്ചു

കോതമംഗലം: പിണ്ടിമന സഹകരണ സംഘം കെട്ടിടത്തിൽ അനുവദിച്ച മൃഗാശുപത്രിയുടെ ഉപകേന്ദ്രത്തിന്‍റെ ഉദ്ഘാടനം ആന്‍റണി ജോൺ എംഎൽഎ നിർവ്വഹിച്ചു. പഞ്ചായത്ത് പ്രസിഡന്‍റ് ജെസി സാജു അധ്യക്ഷത വഹിച്ചു. വാർഡ് മെമ്പർ എസ്.എം. അലിയാർ, വൈസ് പ്രസിഡന്‍റ് ജയ്സൺ ദാനിയേൽ, വിൽസൺ കെ. ജോൺ, ടി.കെ. കുമാരി, സിജി ആന്‍റണി, ലതാ ഷാജി, ലാലി ജോയ്, ക്ഷീരസംഘം പ്രസിഡന്‍റ് ജയ്സൺ ജോർജ്, ഡയറക്ടർ ബോർഡ് അംഗങ്ങളായ ബിനു സാജു, റ്റി.എ. ടോമി, ടി.എ. അപ്പുക്കുട്ടൻ, സജിത്ത് കെ. വർഗീസ്, എം. ആർ. ജയചന്ദ്രൻ, സംഘം സെക്രട്ടറി അനുഷ ടി. സജിവ്, ഡോ. വിക്ടർ ജുബിൻ വർഗീസ്, എന്നിവർ പ്രസംഗിച്ചു.

നഗരസഭയ്ക്ക് മുന്നില്‍ പ്രതിഷേധിച്ചു

മൂവാറ്റുപുഴ: തദേശസ്ഥാപനങ്ങള്‍ വികസന സദസ് നടത്തണമെന്ന സംസ്ഥാന സര്‍ക്കാര്‍ ഉത്തരവ് നടപ്പാക്കില്ലെന്ന മൂവാറ്റുപുഴ നഗരസഭ കൗണ്‍സില്‍ തീരുമാനത്തിനെതിരേ പ്രതിപക്ഷ എല്‍ഡിഎഫ് അംഗങ്ങള്‍ കൗണ്‍സില്‍ യോഗം ബഹിഷ്‌കരിച്ചു. തുടര്‍ന്ന് നഗരസഭയ്ക്ക് മുന്നില്‍ പ്രതിഷേധ യോഗം ചേര്‍ന്നു. നഗരസഭാംഗങ്ങളായ ആര്‍. രാകേഷ്, കെ.ജി അനില്‍കുമാര്‍ എന്നിവര്‍ പ്രസംഗിച്ചു. ഉത്തരവ് പ്രകാരം വികസന സദസ് സംഘടിപ്പിച്ച് സര്‍ക്കാരിന്‍റെ വികസന പ്രവര്‍ത്തനങ്ങള്‍ പ്രദര്‍ശിപ്പിയ്ക്കണം. അതിദാരിദ്ര നിര്‍മാര്‍ജനം, ലൈഫ് മിഷന്‍, മാലിന്യമുക്ത നവകേരളം തുടങ്ങിയ പദ്ധതികളില്‍ തദേശസ്ഥാപനങ്ങള്‍ കൈവരിച്ച നേട്ടങ്ങള്‍ സെക്രട്ടറി അവതരിപ്പിക്കണം, ജനങ്ങളില്‍നിന്ന് അഭിപ്രായങ്ങളും നിര്‍ദേശങ്ങളും ആശയങ്ങളും ലഭ്യമാക്കുന്നതിന് ചര്‍ച്ച നടത്തണം, ഇവ ക്രോഡീകരിച്ച് തദേശസ്ഥാപനങ്ങള്‍ പോര്‍ട്ടലില്‍ അപ്‌ലോഡ് ചെയ്യണമെന്നാണ് സര്‍ക്കുലറിലുള്ളത്. എന്നാല്‍ മൂവാറ്റുപുഴ നഗരസഭയിലെ യുഡിഎഫ് ഭരണസമിതി ഇത് നടത്തേണ്ടതില്ലെന്ന് തീരുമാനിച്ചു. ഇത് അംഗീകരിക്കാനാകില്ലെന്നും സര്‍ക്കാര്‍ തീരുമാനം നടപ്പാക്കണമെന്നും ആവശ്യപ്പെട്ടാണ് പ്രതിപക്ഷാംഗങ്ങള്‍ പ്രതിഷേധിച്ചത്.

ഭൂതത്താൻകെട്ടിൽ ജുഡീഷൽ കമ്മീഷന്‍റെ തെളിവെടുപ്പ്

കോതമംഗലം: താനൂർ ബോട്ടപകടവുമായി ബന്ധപ്പെട്ട് നിയമിക്കപ്പെട്ട ജസ്റ്റിസ് വി.കെ. മോഹനൻ ജുഡീഷൽ കമ്മീഷൻ ഭൂതത്താൻകെട്ടിൽ തെളിവെടുപ്പും ഹിയറിംഗും നടത്തി. കമ്മീഷൻ സംസ്ഥാന വ്യാപകമായി നടത്തുന്ന രണ്ടാം ഘട്ട പൊതു തെളിവെടുപ്പിന്‍റെ ഭാഗമായാണ് ഭൂതത്താൻകെട്ടിലും എത്തിയത്. ജലാശയങ്ങളിൽ സർവീസ് നടത്തുന്ന ബോട്ടുകളിൽ പരിശോധന നടത്താൻ കനാൽ ഓഫീസർമാരുടെ സേവനം കാര്യക്ഷമമായി പ്രയോജനപ്പെടുത്തുക, ഭൂതത്താൻകെട്ടിൽ ആറുമാസമെങ്കിലും ബോട്ടിംഗ് നടത്താൻ സാഹചര്യമൊരുക്കുക, മലിനീകരണ സാധ്യത ഒഴിവാക്കാൻ സോളാർ ബോട്ടുകൾ ഉപയോഗിക്കുക എന്നിങ്ങനെ നിരവധി നിർദേശങ്ങൾ തെളിവെടുപ്പിൽ ഉയർന്നുവന്നു. രജിസ്റ്റർ ചെയ്ത 16 പേരിൽ 12 പേർ ഹിയറിംഗിൽ പങ്കെടുത്ത് അഭിപ്രായങ്ങൾ രേഖപ്പെടുത്തി. ഭൂതത്താൻകെട്ട് ഇറിഗേഷൻ ഇൻസ്പെക്ഷൻ ബംഗ്ലാവിൽ നടന്ന തെളിവെടുപ്പിൽ കമ്മീഷൻ അംഗങ്ങളായ കുസാറ്റ് ഷിപ്പ് ബിൽഡിംഗ് ടെക്നോളജി വിഭാഗം റിട്ട. പ്രഫ. ഡോ. കെ.പി. നാരായണൻ, കമ്മീഷൻ മെമ്പർ സെക്രട്ടറി റിട്ട. ജില്ലാ ജഡ്ജി ടി.കെ. രമേഷ് കുമാർ, കോർട്ട് ഓഫീസർ റിട്ട. മുൻസിഫ് മജിസ്ട്രേറ്റ് ജി. ചന്ദ്രശേഖരൻ, കമ്മീഷൻ ജോയിന്‍റ് സെക്രട്ടറി ശിവ പ്രസാദ്, കമ്മീഷൻ അഭിഭാഷകൻ അഡ്വ. ടി.പി. രമേശ്‌, നോഡൽ ഓഫീസറും ജില്ലാ ടൂറിസം പ്രമോഷൻ കൗൺസിൽ സെക്രട്ടറിയുമായ ലിജോ ജോസഫ്, ജനപ്രതിനിധികൾ, ബന്ധപ്പെട്ട ഉദ്യോഗസ്ഥർ, ബോട്ട് ജീവനക്കാർ, ഉടമകൾ എന്നിവർ പങ്കെടുത്തു. ജില്ലയിലെ തെളിവെടുപ്പ് ഇതോടുകൂടി പൂർത്തിയായി. ജലഗതാഗത മേഖലയിൽ അപകടങ്ങൾ ആവർത്തിക്കാതിരിക്കുന്നതിന് പരിഹാര മാർഗങ്ങൾ ശിപാർശ ചെയ്യുക, നിലവിലുള്ള ലൈസൻസിംഹ് എൻഫോഴ്സ്മെന്‍റ് സംവിധാനങ്ങൾ പര്യാപ്തമാണോയെന്ന് പരിശോധിക്കുക, മുൻകാലങ്ങളിലുണ്ടായ ബോട്ട് അപകടങ്ങളെ തുടർന്ന് നിയോഗിച്ച അന്വേഷണ കമ്മീഷനുകൾ സമർപ്പിച്ച റിപ്പോർട്ടുകളിൽ ബന്ധപ്പെട്ട വകുപ്പുകൾ സ്വീകരിച്ച നടപടികൾ അവലോകനം ചെയ്യുക തുടങ്ങിയ ലക്ഷ്യങ്ങളോടെയായിരുന്നു തെളിവെടുപ്പ്.

എംസിഎഫിൽ സന്ദർശനം നടത്തി

കൂത്താട്ടുകുളം: തൊഴിൽ സൗഹൃദ അന്തരീക്ഷം മെച്ചപ്പെടുത്തുന്നതിന്‍റെ ഭാഗമായി നഗരസഭ ഭരണ സമിതി എംസിഎഫിൽ സന്ദർശനം നടത്തി. തൊഴിലാളികളായ ഹരിത കർമ സേന അംഗങ്ങളുമായി കൂടിക്കാഴ്ച നടത്തുകയും നിലവിൽ തൊഴിലാളികൾ നേരിടുന്ന പരിഹാരങ്ങൾക്ക്‌ പരിഹാരം കാണുവാനുള്ള നടപടികൾ സ്വീകരിക്കുമെന്നും ഉറപ്പും നൽകി. വേതന വർധനവ് ഉറപ്പുവരുത്താനുള്ള നടപടികൾ സ്വീകരിക്കുമെന്നും തൊഴിലാളികൾക്ക് ജോലി സമയത്ത് ഉണ്ടാകുന്ന തെരുവുനായ ആക്രമണം ഉൾപ്പെടെയുള്ള അപകടങ്ങളിൽനിന്നും പരിരക്ഷ ലഭിക്കുന്നതിനായി ആരോഗ്യ ഗ്രൂപ്പ് ഇൻഷുറൻസ് പദ്ധതികൾ നടപ്പിലാക്കാൻ ശ്രമിക്കുമെന്നും ഭരണസമിതി അംഗങ്ങൾ അറിയിച്ചു. ഇതോടൊപ്പം എംസിഎഫിലെ സ്ഥലപരിമിതിക്ക് ഉള്ളിൽ നിന്നുകൊണ്ടു തന്നെ പ്ലാസ്റ്റിക് ശേഖരിക്കുന്നതിനും സൂക്ഷിച്ചുവയ്ക്കുന്നതിനും മെച്ചപ്പെട്ട സൗകര്യം ഒരുക്കും. നഗരസഭ ചെയർപേഴ്സൺ കലാ രാജു, വൈസ് ചെയർമാൻ പി.ജി. സുനിൽകുമാർ, ക്ഷേമകാര്യസ്ഥാനി കമ്മിറ്റി ചെയർമാൻ പ്രിൻസ് പോൾ ജോൺ, നഗരസഭ കൗൺസിലർ റോയ് ഇരട്ടയാനിക്കൽ, കേരള കോൺഗ്രസ് ജേക്കബ് മണ്ഡലം പ്രസിഡന്‍റ് എം.കെ. ചാക്കോച്ചൻ എന്നിവരാണ് എംസിഎഫിൽ സന്ദർശനം നടത്തിയത്.

മൂന്ന് വീടുകൾ നിർമിച്ച് നൽകി ലയൺസ് ക്ലബ്

കോതമംഗലം: ലയൺസ് ഇന്‍റർനാഷണൽ 318 - സി ചിറ്റിലപ്പള്ളി ഫൗണ്ടേഷന്‍റെ സഹകരണത്തോടെ കോതമംഗലം ഈസ്റ്റ് ലയൺസ് ക്ലബ് നൽകുന്ന അഞ്ച് വീടുകളിൽ വെളിയേച്ചാൽ കൂരികുളത്ത് നിർമാണം പൂർത്തീകരിച്ച മൂന്നു വീടുകളുടെ താക്കോൽ മുൻ ഡിസ്ട്രിക്റ്റ് ഗവർണർ രാജൻ എൻ. നമ്പൂതിരി കുടുബാംഗങ്ങൾക്കു കൈമാറി. ക്ലബ് പ്രസിഡന്‍റ് പി. തങ്കൻ അധ്യക്ഷത വഹിച്ചു. സോൺ ചെയർമാൻ ലൈജു ഫിലിപ്പ് മുഖ്യപ്രഭാഷണം നടത്തി.

കംപ്യൂട്ടര്‍ സയന്‍സ് ആൻഡ് ഡിസൈന്‍ അസോസിയേഷന്‍ ഉദ്ഘാടനം

വാഴക്കുളം: വിശ്വജ്യോതി എന്‍ജിനീയറിംഗ് കോളജില്‍ കംപ്യൂട്ടര്‍ സയന്‍സ് ആൻഡ് ഡിസൈന്‍ അസോസിയേഷന്‍ ഉദ്ഘാടനം ചെയ്തു. കംപ്യൂട്ടറൈസ്ഡ് അക്കൗണ്ടിംഗ് ആൻഡ് മാനേജ്‌മെന്‍റ് സര്‍വീസ് പ്രൈവറ്റ് ലിമിറ്റഡ് (കാംസ്) പ്രോജക്ട് മാനേജര്‍ ഡോ. ജോര്‍ജ്കുട്ടി ജോണ്‍ ഉദ്ഘാടനം ചെയ്തു. ബ്രിഡ്ജിംഗ് കോളജ് ടു കരിയര്‍ എന്ന വിഷയത്തിൽ അദ്ദേഹം മുഖ്യപ്രഭാഷണം നടത്തി. കോളജ് മാനേജര്‍ മോണ്‍. ഡോ. പയസ് മലേക്കണ്ടത്തില്‍, ഡയറക്ടര്‍ റവ. ഡോ. പോള്‍ പാറത്താഴം, പ്രിന്‍സിപ്പല്‍ ഡോ. കെ.കെ. രാജന്‍, ഡിപ്പാര്‍ട്ട്‌മെന്‍റ് മേധാവി സബിത രാജു, അസോസിയേഷന്‍ ഇന്‍ചാര്‍ജ് ഡോ. പീറ്റര്‍ റെജി രാമനാട്ട്, അസോസിയേഷന്‍ സെക്രട്ടറി അല്‍ക്ക മറിയം ബേബി എന്നിവര്‍ പങ്കെടുത്തു.

ലഹരിക്കെതിരേ സൈക്കിള്‍ റാലി

മൂവാറ്റുപുഴ: ലഹരി വിരുദ്ധ പ്രവര്‍ത്തനങ്ങളുടെ ഭാഗമായി എറണാകുളം ജില്ലാ പഞ്ചായത്തിന്‍റെ സഹകരണത്തോടെ പേഴയ്ക്കാപ്പിള്ളി ഗവ. ഹയര്‍ സെക്കന്‍ഡറി സ്‌കൂളില്‍ സൈക്കിള്‍ റാലി സംഘടിപ്പിച്ചു. പഞ്ചായത്ത് പ്രസിഡന്‍റ് എം.എസ്. അലിയാര്‍ റാലി ഫ്ലാഗ് ഓഫ് ചെയ്തു. പിടിഎ പ്രസിഡന്‍റ് ഫൈസല്‍ മുണ്ടക്കാമറ്റം അധ്യക്ഷത വഹിച്ചു. സ്ഥിരംസമിതി അധ്യക്ഷ നെജി ഷാനവാസ് ലഹരി വിരുദ്ധ പ്രതിജ്ഞ ചൊല്ലി. റെസിസ്റ്റന്‍സ് എന്ന പേരില്‍ എറണാകുളം ജില്ല പഞ്ചായത്ത് സംഘടിപ്പിക്കുന്ന കാന്പയിന്‍റെ ഭാഗമായാണ് പരിപാടി. വരും ദിവസങ്ങളില്‍ പോസ്റ്റര്‍ രചനാ മത്സരം, ഷോര്‍ട്ട് ഫിലിം നിര്‍മാണം, ക്വിസ് എന്നിവ നടക്കും. 30ന് ലഹരിമുക്ത കാമ്പസ് പ്രഖ്യാപനത്തോടെ പരിപാടികള്‍ സമാപിക്കും. പ്രിന്‍സിപ്പല്‍ ടി.ബി. സന്തോഷ് ലഹരിവിരുദ്ധ സന്ദേശം നല്‍കി. പ്രധാനാധ്യാപിക എ. സഫീന മുഖ്യപ്രഭാഷണം നടത്തി. എസ്എംസി ചെയര്‍മാന്‍ കെ.എന്‍. നാസര്‍, അധ്യാപകരായ പി.എം. റഹ്മത്ത്, പി.ഇ. സബിത, ഗീതു ജി. നായര്‍, പി.ആര്‍. അനുമോള്‍, കെ.എം. നൗഫല്‍, എം. സല്‍വ എന്നിവര്‍ പ്രസംഗിച്ചു.

നെല്ലിക്കുഴിയിൽ ചെക്ക്ഡാം റെഡി

കോതമംഗലം: നെല്ലിക്കുഴി പഞ്ചായത്തിലെ കുന്നത്തുകുഴി ചെക്ക്ഡാം നിർമാണം പൂർത്തീകരിച്ചു. കോതമംഗലം ബ്ലോക്ക് പഞ്ചായത്ത് 2024 - 2025 വാർഷിക പദ്ധതിയിൽ ഉൾപ്പെടുത്തി 20 ലക്ഷം രൂപ ചെലവഴിച്ചാണ് നെല്ലിക്കുഴി പഞ്ചായത്ത് പതിനേഴാം വാർഡിൽ ചെക്ക് ഡാമിന്‍റെ നിർമാണം പൂർത്തിയാക്കിയത്. ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ ഉദ്ഘാടനം ചെയ്തു. വൈസ് പ്രസിഡന്‍റ് ഡയാന നോബി അധ്യക്ഷത വഹിച്ചു. സ്ഥിരം സമിതി ചെയർമാൻമാരായ ജോമി തെക്കേക്കര, ജെയിംസ് കോറമ്പേൽ, ബ്ലോക്ക് പഞ്ചായത്ത് അംഗങ്ങളായ നിസ മോൾ ഇസ്മായിൽ, ടി.കെ. കുഞ്ഞുമോൻ, പഞ്ചായത്ത് അംഗങ്ങളായ ഷെറഫിയ ഷിഹാബ്, വൃന്ദ മനോജ്, നാസർ വട്ടേക്കാടൻ, പി.എ. ഷിഹാബ്, സി.വി. സൈനുദ്ദീൻ, സലിം അമ്പാട്ട് എന്നിവർ പ്രസംഗിച്ചു.

ഫലവൃക്ഷ തൈകൾ നൽകി

കോതമംഗലം: ബ്ലോക്ക് പഞ്ചായത്ത് വാർഷിക പദ്ധതിയുടെ ഭാഗമായി ഫലവൃക്ഷ തൈകൾ വിതരണം ചെയ്തു. 2025-2026 ജനകീയ ആസൂത്രണ പദ്ധതിയിൽ ഉൾപ്പെടുത്തി 10,70,000 രൂപ ചെലവഴിച്ച് ആറ് ഇനം അത്യുൽപാദന ശേഷിയുള്ള 6,000 ഫല വൃക്ഷ തൈകൾ ആണ് വിതരണത്തിനായി എത്തിച്ചിരിക്കുന്നത്. ഞാവൽ, ജബോട്ടിക്ക, അഭ്യു, മാങ്കോസ്റ്റിൻ, അവക്കാഡോ, ഡാൻസൂര്യ ജാക് എന്നിവയാണ് 75 ശതമാനം സബ്‌സിഡിയോടെ വിതരണം ചെയ്യുന്നത്. ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ ബ്ലോക്ക് തല വിതരണം ഉദ്ഘാടനം ചെയ്തു. വൈസ് പ്രസിഡന്‍റ് ഡയാന നോബി അധ്യക്ഷത വഹിച്ചു. കൃഷി അസിസ്റ്റന്‍റ് ഡയറക്റ്റർ പ്രിയമോൾ തോമസ്, ബ്ലോക്ക് പഞ്ചായത്ത് സ്ഥിരം സമിതി ചെയർമാൻ ജോമി തെക്കേക്കര,ബ്ലോക്ക് പഞ്ചായത്ത് അംഗം നിസ മോൾ ഇസ്മായിൽ, ജോയിന്‍റ് ബി.ഡി.ഒ. ഷൈജു പോൾ എന്നിവർ പ്രസംഗിച്ചു.

മാര്‍ ജോര്‍ജ് പുന്നക്കോട്ടിലിനെ സന്ദർശിച്ചു

മൂവാറ്റുപുഴ: ബിഷപ് മാര്‍ ജോര്‍ജ് പുന്നക്കോട്ടിലിന് നവതി ആശംസകള്‍ നേര്‍ന്ന് സിപിഎം ജില്ലാ സെക്രട്ടറി എസ്. സതീഷ്. മൂവാറ്റുപുഴ നെസ്റ്റ് പാസ്റ്ററല്‍ സെന്‍ററില്‍ എത്തിയാണ് ആശംസകള്‍ അറിയിച്ചത്. സിപിഎം മൂവാറ്റുപുഴ ഏരിയ സെക്രട്ടറി അനീഷ് എം. മാത്യു, ഏരിയ കമ്മിറ്റിയംഗം സജി ജോര്‍ജ്, സിപിഎം ആവോലി ലോക്കല്‍ കമ്മിറ്റിയംഗം അലക്‌സാണ്ടര്‍ ജോര്‍ഡി എന്നിവരും ഒപ്പമുണ്ടായിരുന്നു.

ഏമ്പക്കോട് കുടിവെള്ള പദ്ധതി ഉദ്ഘാടനം ചെയ്തു

പെരുമ്പാവൂർ: കൂവപ്പടി പഞ്ചായത്തിലെ ആറാം വാർഡിൽ നിർമിച്ച ഏമ്പക്കോട് കുടിവെളള പദ്ധതി ബെന്നി ബഹനാൻ എംപി ഉദ്ഘാടനം ചെയ്തു. മനോജ് മൂത്തേടൻ അധ്യക്ഷത വഹിച്ചു. ജില്ലാപഞ്ചായത്ത് പ്രസിഡന്‍റ് മനോജ് മൂത്തേടന്‍റെ വികസന ഫണ്ട് 30 ലക്ഷം രൂപ ചെലവഴിച്ചാണ് കുടിവെള്ള പദ്ധതി നിർമിച്ചത്. പഞ്ചായത്ത് പ്രസിഡന്‍റ് മായ കൃഷ്ണകുമാർ, ബ്ലോക്ക് പഞ്ചായത്ത് അംഗം അനു അബീഷ് , പഞ്ചായത്ത് അംഗങ്ങളായ സിനി എൽദോ ,ജിജി ശെൽവരാജ്, ഫാ. നെൽസൻ ജോയി, വാർഡ് വികസന സമിതി അംഗങ്ങളായ സാബു പാത്തിക്കൽ, എൽദോ പാത്തിക്കൽ , പി. ശിവൻ, മുരളീധരൻ മുളളൻ പറമ്പിൽ എന്നിവർ പ്രസംഗിച്ചു.

നായ ശല്യം നിയന്ത്രിക്കാൻ നടപടി സ്വീകരിക്കണം: ട്രുറ

തൃപ്പൂണിത്തുറ: നഗരത്തിൽതെരുവ് നായ ശല്യം പെരുകിവരുന്നത് നിയന്ത്രിക്കാൻ നടപടി സ്വീകരിക്കണമെന്ന് ട്രുറ മധ്യമേഖലാ വനിതാ വാർഷിക പൊതുയോഗം ആവശ്യപ്പെട്ടു. മേഖലാ പ്രസിഡന്‍റ് എം.പി. മേരിയുടെ അധ്യക്ഷതയിൽ നടന്ന പൊതുയോഗം ട്രുറ ചെയർമാൻ വി.പി. പ്രസാദ് ഉദ്ഘാടനം ചെയ്തു. വി.സി. ജയേന്ദ്രൻ, പി.എസ്. ഇന്ദിര, ബിൻസി ബിജു, പി.എം. മായ , സുഹദ തമ്പുരാൻ, പി.വി . ഇന്ദിരാദേവി തുടങ്ങിയവർ പ്രസംഗിച്ചു. പുതിയ ഭാരവാഹികളായി എം.വി. മേരി - പ്രസിഡന്‍റ്, ബിൻസി ബിജു - സെക്രട്ടറി, പി.എം. മായ - ട്രഷറർ എന്നിവരെ തെരഞ്ഞെടുത്തു.

തെരുവ് നായ ശല്യം: നടപടിയുമായി മരട് നഗരസഭ

മരട്: മരട് നഗരസഭ പ്രദേശത്ത് വർധിച്ചു വരുന്ന തെരുവ് നായ്ക്കളുടെ ഭീഷണി തടയുന്നതിനായി നഗരസഭ ചെയർമാൻ ആന്‍റണി ആശാംപറമ്പിലിന്‍റെ അധ്യക്ഷതയിൽ മോണിറ്ററിംഗ് കമ്മിറ്റി ചേർന്നു. നഗരസഭാ പ്രദേശത്ത് 650 ഓളം തെരുവ് നായ്ക്കളുണ്ടെന്നാണ് കണ്ടെത്തിയിട്ടുള്ളത്. ആദ്യഘട്ടമെന്ന നിലയ്ക്ക് നായ്ക്കൾക്ക് വാക്സിൻ എടുക്കുന്നതിനും പിന്നീട് സ്വകാര്യ ഏജൻസികളുടെ സഹകരണത്തോടെ എബിസി പ്രോഗ്രാം നടപ്പാക്കുന്നതിനും നായ്ക്കൾക്ക് ഭക്ഷണം നല്കുന്നതിനായി ഫീഡിംഗ് പോയിന്‍റുകൾ സ്ഥാപിക്കുന്നതിനും കമ്മിറ്റി തീരുമാനിച്ചു.

കറുകുറ്റി സ്റ്റാർ ജീസസ് ഹൈസ്കൂൾ 1993-96 ബാച്ച് കുടുംബസംഗമം നടത്തി

അങ്കമാലി : കറുകുറ്റി സ്റ്റാർ ജീസസ് ഹൈസ്കൂൾ പൂർവവിദ്യാർത്ഥികളുടെ 1993- 96 ബാച്ചിന്‍റെ കുടുംബസംഗമം സംഘടിപ്പിച്ചു. കറുകുറ്റി ചോല ഫാം റിസോർട്ടിൽ കലാ-കായിക മത്സരത്തോടെയാണ് ഈ കുടുംബ കൂട്ടായ്മയ്ക്ക് വേദിയിരുക്കിയത്. ചത്തീസ്ഗഡിൽ നടന്ന ബാസ്കറ്റ് ബോൾ ചാമ്പ്യൻ ഷിപ്പിൽ കേരളത്തെ പ്രതിനിധീകരിച്ച് ഇന്‍റർ സ്കൂൾ (14 വയസിന് താഴെ) കേരളത്തെ പ്രതിനിധീകരിച്ച അഭിനവ്‌ ബിജു, തൃശൂർ കിഡീസ് ബാസ്ക്കറ്റ്ബോൾ ടീം അംഗം അഭിനന്ദ് ബിജു, ഈ വർഷത്തെ എസ് എസ് എൽ സി വിജയി ഡോണൽ ടെൻസൻ, പ്ലസ് ടു വിജയി ഏയ്‌ഞ്ചൽ ടോണി, കരാട്ടെ എറണാകുളം ഡിസ്റ്റിക്ട് ചാമ്പ്യൻഷിപ്പിൽ ഒന്നും രണ്ടും സ്ഥാനങ്ങൾ നേടിയ ഡോണാൾഡ് ടെൻസൻ, ഡാനിയേൽ ടെൻസൻ, യൂട്യൂബർമാരായ ദിപു പരമേശ്വരൻ, ബിജു നാണു, ജുവൽ ബൈജു എന്നീ അംഗങ്ങളെ ചടങ്ങിൽ ആദരിച്ചു. ഭാരവാഹികളായ സനൽ ജോസഫ്, ബിജു നാണു, ബിനു പ്ലാക്കൽ, ഷൈജു ജോസഫ് ബൈജു വർഗ്ഗീസ്, ഷാജി ജോൺ, എബി അഗസ്റ്റിൻ, ടെൻസൻ ജോസഫ്, സുനിൽ മാവേലി എന്നിവർ പരിപാടികൾക്ക് നേതൃത്വം നൽകി.

മലയാറ്റൂരിൽ വള്ളംകളിക്കായി വിപുലമായ ഒരുക്കങ്ങൾ

കാലടി: മണപ്പാട്ട് ചിറയിൽ വള്ളംകളിക്കായി വിപുലമായ ഒരുക്കങ്ങളുമായി മലയാറ്റൂർ നിവാസികൾ. ഒക്ടോബർ രണ്ടിനാണ് വള്ളംകളി മത്സരങ്ങൾ. പ്രമുഖ ടീമുകൾ മത്സരത്തിൽ പങ്കെടുക്കും. വിളംബര ഘോഷയാത്രയ്ക്ക് ശേഷം വള്ളംകളി മത്സരങ്ങൾ ആരംഭിക്കും. വള്ളംകളിക്ക് എട്ടു ടീമുകളാണ് മത്സര രംഗത്തുള്ളത്. ഒന്നാം സമ്മാനം 25,000 രൂപ തുടങ്ങി മറ്റ് സമ്മാനങ്ങളും നൽകും. സംഘാടക സമിതി ചെയർമാൻ റോജി എം. ജോൺ എംഎൽഎ, ഗ്രാമ പഞ്ചായത്ത് പ്രസിഡന്‍റ് ജോയി അവോക്കാരൻ, വൈസ് പ്രസിഡന്‍റ് ലൈജി ബിജു, മെമ്പർമാരായ ജോയ്സൺ ഞാളിയൻ, ഷിൽബി ആന്‍റണി , ആനി ജോസ്, ബിൻസി ജോയ്, ബിജി സെബാസ്റ്റ്യൻ, വിജി റെജി, മിനി സേവ്യർ, സർവകക്ഷി നേതാക്കളായ ബിജു കണിയാംകുടി, സി.എസ്. ബോസ്, ജോബി വെളുത്തേപ്പിള്ളി, നെൽസൺ മാടവന എന്നിവർ പത്രസമ്മേളനത്തിൽപങ്കെടുത്തു

അട്ടാറ ലിങ്ക് റോഡിൽ നാട്ടുകാർ പാലം നിർമിച്ചു

അങ്കമാലി: കറുകുറ്റി പഞ്ചായത്തിലെ വടക്കേ അട്ടാറ, മൂക്കന്നൂർ പഞ്ചായത്തിലെ തെക്കേ അട്ടാറ നിവാസികളുടെ ചിരകാലസ്വപ്നം പൂവണിഞ്ഞു. വടക്കേ- തെക്കേ അട്ടാറ ലിങ്ക് റോഡ് നിർമാണവും ഈ റോഡിൽ നിർമിച്ചിരുന്ന താൽക്കാലിക പാലം തകർന്നതിനെ തുടർന്ന് കോൺക്രീറ്റ് പാലവും തദ്ദേശവാസികളുടെ തന്നെ ഒത്തൊരുമയോടെ സഫലമാക്കിയതിന്‍റെ ആഹ്ലാദ നിറവിലാണ് ഇവിടത്തുകാർ. ഇരു പഞ്ചായത്ത്‌ നിവാസികൾക്കും രണ്ടിടങ്ങളിലേക്കും വളരെ എളുപ്പയാത്ര സാധ്യമാക്കുന്ന ലിങ്ക് റോഡാണിത്. 2022 നവംബർ മാസത്തിൽ റോഡ് നിർമാണം തുടങ്ങി. മൂന്ന് മാസത്തിനുശേഷം താത്കാലിക പാലം സ്ഥാപിച്ച് റോഡ് നിർമാണം പൂർത്തിയാക്കി. രണ്ട് വർഷം പിന്നിട്ട താത്കാലിക പാലംഅഞ്ച് മാസം മുൻപ് പൂർണമായി തകർന്ന് ഇതുവഴി ഗതാഗതതടസം നേരിട്ടു. ഇതേത്തുടർന്ന് തദ്ദേശ വാസികളുടെ അശ്രാന്ത ശ്രമഫലമായാണ് കോൺക്രീറ്റ് പാലം പണി ഈയിടെ പൂർത്തിയാക്കിയത്. റോഡ് പണിക്ക് നാട്ടുകാരുടെ ശ്രമദാന പ്രവർത്തനങ്ങൾ കൂടാതെ 1. 5 ലക്ഷവും പുതിയ പാലത്തിന് ഏകദേശം 1.7 ലക്ഷവും ചെലവായി. ഈ തുക പൂർണമായും പ്രദേശവാസികളിൽ നിന്ന് പിരിവെടുത്താണ് നടത്തിയത്. ഇതേ തുടർന്ന് കെ.പി. ഹോർമിസ് ചാരിറ്റബിൾ ട്രസ്റ്റ് വഴി അഞ്ച് സോളാർ ലൈറ്റുകൾ ഈ റോഡിൽ സ്ഥാപിക്കുകയുണ്ടായി. പുതിയ പാലം നിർമിക്കുന്നതിന് ചിലവിന്‍റെ മുഖ്യപങ്കും വഹിച്ചത് മൂക്കന്നൂർ തെക്കേ അട്ടാറയിൽ പ്രവർത്തിക്കുന്ന ഹീ -മാൻ റോബോട്ടിക് പാർക്ക്‌ എംഡി കെ.ടി. ജോസാണ്. സിഎസ്ടി ബ്രദേഴ്സിന്‍റെയും, ഇരുമ്പിന്‍റെ റെഡിമെയ്ഡ് പാലം ക്രെയിൻ ഉപയോഗിച്ച് കൊണ്ടുവന്ന് കോൺക്രീറ്റിൽ ഉറപ്പിയ്ക്കാൻ രഞ്ജൻ ജെയിംസിന്‍റെയും സഹായവും ഉണ്ടായി. ടോമി ഒലിവേലി കോൺട്രാക്ടർ വർക്ക് നിറവേറ്റി. പാലത്തിന്‍റെ ഉദ്ഘാടനം വാർഡ് മെമ്പർ എൻ.ഒ. കുരിയച്ചൻ നിർവഹിച്ചു. റോഡ് നിർമാണ കമ്മിറ്റി കോ ഓർഡിനേറ്റർ മാത്യു ഹോർമീസ് പാലാട്ടി അധ്യക്ഷത വഹിച്ചു. ഹീ -മാൻ റോബോട്ടിക് പാർക്ക് എംഡി കെ.ടി. ജോസ് , റോഡ് നിർമാണ സമിതിയംഗം സെബി ജോസഫ് പള്ളിയാൻ, കെ.പി. ഹോർമിസ് ചാരിറ്റബിൾ ട്രസ്റ്റ് പ്രസിഡന്‍റ് പി.പി. മത്തായി, സെക്രട്ടറി എൻ.ഒ. പൗലോസ്, കറുകുറ്റി പഞ്ചായത്ത്‌ മെമ്പർ ജിജോ പോൾ, സൗത്ത് അട്ടാറ റെസിഡന്‍റ്സ് അസോസിയേഷൻ സെക്രട്ടറി സാജു ഏനായി എന്നിവർ പ്രസംഗിച്ചു.

കെഎൽസിഎയുടെ നേതൃത്വത്തിൽ പ്രതിഭോത്സവവും സമനീതി സംഗമവും

ഫോർട്ടുകൊച്ചി: കെഎൽസിഎ സെന്‍റ് ജോസഫ്സ് ചുള്ളിക്കൽ യൂണിറ്റിന്‍റെ ആഭിമുഖ്യത്തിൽ സമനീതി സംഗമവും പ്രതിഭോത്സവവും സംഘടിപ്പിച്ചു. കൊച്ചി രൂപത വികാരി ജനറാൾ മോൺ. ഷൈജു പരിയാത്തുശേരി സംഗമം ഉദ്ഘാടനം ചെയ്‌തു. കെഎൽസിഎ യൂണിറ്റ് പ്രസിഡന്‍റ് ബെന്നി ജോസഫ് അധ്യക്ഷത വഹിച്ചു. രൂപത ഡയറക്ടർ ഫാ. ആന്‍റണി കുഴിവേലിൽ മുഖ്യ പ്രഭാഷണം നടത്തി. യൂണിറ്റ് ഡയറക്ടർ ഫാ. എമ്മാനുവൽ പൊള്ളയിൽ അനുഗ്രഹ പ്രഭാഷണം നടത്തി. രൂപത പ്രസിഡന്‍റ് പൈലി ആലുങ്കൽ, സഹ വികാരി ഫാ. ജോബിൻ മാത്യു, മേഖല പ്രസിഡന്‍റ് ലിനു തോമസ്, രൂപത സെക്രട്ടറി വിദ്യ ജോജി, യൂണിറ്റ് ഭാരവാഹികളായ കെപി സേവ്യർ, റജീന ലീനസ്, ടോണി സാമുവൽ, ജോജി ജോർജ്, കൗൺസിലർ ബാസ്റ്റിൻ ബാബു തുടങ്ങിയവർ സംസാരിച്ചു. തുടർന്ന് നടന്ന കലാസദ്യ ഡയാന സിൽവസ്റ്റർ ഉത്‌ഘാടനം ചെയ്‌തു.

മോഷണശ്രമത്തിനിടെ പിടിയിൽ

ആലുവ: ആലുവ സെന്‍റ് ഫ്രാൻസിസ് ഹയർ സെക്കൻഡറി സ്കൂൾ ഓഫീസ് വാതിലുകൾ തകർത്ത് മോഷണം നടത്തുന്നതിനിടെ പ്രതിയെ ആലുവ പോലീസ് പിടികൂടി. ഇടുക്കി ഉടുമ്പൻചോല മരിയാപുരം നിരവത്ത് വീട്ടിൽ മഹേഷ് (41)ആണ് പിടിയിലായത്. കോട്ടയം, ഇടുക്കി ജില്ലകളിലായി നിരവധി മോഷണക്കേസുകളിൽ ഇയാൾ പ്രതിയാണ്. കഴിഞ്ഞ ദിവസം രാത്രി 11 ഓടെ സ്കൂൾ ഓഫീസിൽ നിന്നും വലിയ ശബ്ദം കേട്ട് സമീപത്തെ കോൺവെൻറിലെ സിസ്റ്റേഴ്സ് ആണ് മോഷണ ശ്രമം കണ്ട് ആലുവ പോലീസിനെ അറിയിച്ചത്. എൽപി സ്കൂൾ, ഹൈസ്കൂൾ, ഹയർ സെക്കൻഡറി സ്കൂൾ ഓഫീസുകളിലാണ് മോഷണത്തിന് ശ്രമിച്ചത്. എൽപി സ്കൂളിലെയും ഹൈസ്കൂളിലെയും ഓഫീസ് വാതിലുകൾ പ്രതി തകർത്തു. എൽപി സ്കൂളിൽ നിന്ന് 200 രൂപ ഒഴികെയൊന്നും മോഷ്ടാവിന് ലഭിച്ചില്ല.

കരാറുകാരനെ ആക്രമിച്ച സഹോദരങ്ങൾ അറസ്റ്റിൽ

കാലടി: വീടു പണിയുടെ കരാറുകാരനെ ആക്രമിച്ച് പരിക്കേൽപ്പിച്ച കേസിൽ സഹോദരന്മാർ അറസ്റ്റിൽ. ശ്രീമൂലനഗരം ചൊവ്വര ആശാരിമൂലയിൽ വിനോദ് (42), വിജു (44) എന്നിവരെയാണ് കാലടി പോലീസ് അറസ്റ്റ് ചെയ്തത്. സുരേഷ് എന്നയാളെയാണ് ആക്രമിച്ചത്. പ്രതികളുടെ ബന്ധുവിന്‍റെ വീടു പണിഞ്ഞതിനെ ചൊല്ലിയുള്ള തർക്കമാണ് മർദനത്തിൽ കലാശിച്ചത്. തിങ്കളാഴ്ചയായിരുന്നു സംഭവം. ഇൻസ്പെക്ടർ അനിൽ കുമാർ ടി. മേപ്പിള്ളി, എസ്ഐമാരായ ജയിംസ് മാത്യു, ജോഷി മാത്യു , റെജിമോൻ , ഏഎസ്ഐ സെബാസ്റ്റ്യൻ, സിപിഒമാരായ ജീമോൻ കെ. പിള്ള, നീതു എന്നിവരാണ് അന്വേഷണ സംഘത്തിലുള്ളത്.

തെരുവുനായ ശല്യം രൂക്ഷം

പറവൂർ: പറവൂർ മേഖലയിൽ തെരുവുനായശല്യംദിനംതോറും വർധിക്കുന്നു. തദ്ദേശ സ്വയംഭരണ സ്ഥാപനങ്ങളിൽ ഷെൽട്ടർ സ്ഥാപിച്ച് പൊതുഇടങ്ങളിലുള്ള തെരുവുനായ ശല്യത്തിന് അറുതി വരുത്തണമെന്ന് റെസിഡന്‍റ്സ് അസോ. അപ്ക്സ് കൗൺസിൽ പറവൂർ വരാപ്പുഴ മുത്തകുന്നം മേഖലാ കമ്മിറ്റിക്ക് വേണ്ടി പ്രസിഡന്‍റ് ജോസ് പോൾ വിതയത്തിൽ അധികൃതരോടാവശ്യപ്പെട്ടു.

എം.കെ. അര്‍ജുനന്‍ മാസ്റ്റര്‍ കള്‍ച്ചറല്‍ സെന്‍റർ നവീകരണം: നിർമാണോദ്ഘാടനം നടത്തി

കൊച്ചി: പ്രശസ്ത സംഗീതജ്ഞന്‍ എം.കെ. അര്‍ജുനന്‍ മാസ്റ്ററുടെ പേരില്‍ പള്ളുരുത്തിയില്‍ ആധുനിക രീതിയില്‍ നവീകരിക്കുന്ന കള്‍ച്ചറല്‍ സെന്‍റര്‍ കം സ്‌പോര്‍ട്‌സ് സെന്‍ററിന്‍റെ നിര്‍മാണോദ്ഘാടനം കെ.ജെ. മാക്‌സി എംഎല്‍എ നിര്‍വഹിച്ചു. ഗ്രീന്‍ റൂം ഉള്‍പ്പെടെയുള്ള നിലവിലെ കെട്ടിടത്തിന്‍റെ ശേഷി വര്‍ധിപ്പിക്കും. സന്ദര്‍ശകര്‍ക്കുള്ള സൗകര്യാനുസരണം ആധുനിക ടോയ്‌ലറ്റ് സംവിധാനം നിര്‍മിക്കും. നിര്‍മാണങ്ങളെല്ലാം ഭിന്നശേഷി സൗഹൃദപരമായിരിക്കും. എല്ലാ പ്രായത്തിലുള്ളവര്‍ക്കും വ്യായാമം ചെയ്യുന്നതിനായി ഗ്രൗണ്ടിന് ചുറ്റും വാക് വേ നിര്‍മിക്കും. വിശ്രമിക്കുന്നതിനും സമയം ചിലവിടുന്നതിനുമായി കൂടുതല്‍ ഇരിപ്പിടങ്ങള്‍ സജ്ജമാക്കും. ഓപ്പണ്‍ ജിം, ആംഫി തീയറ്റര്‍, കുട്ടികള്‍ക്കായി കളിയിടം, സെക്യൂരിറ്റി ക്യാബിന്‍, ഫീഡിംഗ് റൂം എന്നിവയും ഉണ്ടാകും. ഗ്രൗണ്ടിന്‍റെ ചുറ്റുമതില്‍ നവീകരിച്ച് ആകര്‍ഷകമാക്കും. ഹൈ മാസ്റ്റ് ലൈറ്റ്, കൂടുതല്‍ ബൊള്ളാര്‍ഡ് ലൈറ്റുകള്‍, ലാമ്പ് പോസ്റ്റുകള്‍ എന്നിവ സ്ഥാപിക്കും. ഗ്രൗണ്ടിന് ചുറ്റും ലാന്‍ഡ് സ്‌കെപ്പിംഗ് നടത്തി കൂടുതല്‍ സുന്ദരമാക്കും. പള്ളുരുത്തിയില്‍ 1.59 ഏക്കറില്‍ സ്ഥിതി ചെയ്യുന്ന എം.കെ. അര്‍ജുനന്‍ മാസ്റ്റര്‍ ഗ്രൗണ്ടിലാണ് പരമ്പരാഗത കലകളെ പരിപോഷിപ്പിക്കുന്നതിനായി സാംസ്‌കാരികകേന്ദ്രം ആരംഭിക്കുന്നത്. ഇവിടെ സ്‌റ്റേജ് ഉള്‍പ്പെടെ പുതുതായി നിര്‍മിക്കും. പുതുതലമുറയ്ക്ക് സാംസ്‌കാരിക പൈതൃകത്തെ കുറിച്ചുള്ള അറിവുകള്‍ നല്‍കുന്നതിനും മികവ് സൃഷ്ടിക്കുന്നതിനുമായി ശില്പശാലകള്‍, സംഗീതസദസുകള്‍ തുടങ്ങി പൊതുജനങ്ങള്‍ക്കായി കൂടുതല്‍ സൗകര്യപ്രദമായ പൊതുയിടങ്ങള്‍ ഒരുക്കുക എന്നതാണ് കള്‍ച്ചറല്‍ സെന്‍റര്‍ നവീകരണത്തിലൂടെ ലക്ഷ്യം വയ്ക്കുന്നതെന്ന് മേയര്‍ അഡ്വ.എം. അനില്‍കുമാര്‍ പറഞ്ഞു. മേയര്‍ അഡ്വ. എം.അനില്‍കുമാര്‍ അധ്യക്ഷത വഹിച്ച ചടങ്ങില്‍ ഡെപ്യൂട്ടി മേയര്‍ കെ.എ. അന്‍സിയ, കോര്‍പറേഷന്‍ സ്ഥിരം സമിതി അധ്യക്ഷരായ സി.എ. ഷക്കീര്‍, സി.ഡി. വല്‍സലകുമാരി, വി.എ. ശ്രീജിത്ത്, കൗണ്‍സിലര്‍ സി.ആര്‍. സുധീര്‍, ജിസിഡിഎ ചെയര്‍മാന്‍ കെ.ചന്ദ്രന്‍പിള്ള, മുന്‍ ചീഫ് സെക്രട്ടറി കെ.ജയകുമാര്‍, ജിസിഡിഎ സെക്രട്ടറി എം.വി. ഷാരി, ടൗണ്‍ പ്ലാനിംഗ് ഓഫീസര്‍ എസ്. സുഭാഷ് എന്നിവര്‍ പ്രസംഗിച്ചു. കിഫ്ബി ഫണ്ടില്‍ നിന്ന് 3.88 കോടി ചിലവഴിച്ച് കൊച്ചി നഗരസഭ ജിസിഡിഎ യും സിഎസ്എംഎല്ലുമായി സഹകരിച്ചാണ് പദ്ധതി നടപ്പിലാക്കുന്നത്. ഒന്‍പത് മാസം കൊണ്ട് പദ്ധത പൂര്‍ത്തീകരിക്കും.

സമൃദ്ധിയില്‍ ആയുര്‍വേദ വിധിപ്രകാരം തയാറാക്കിയ ചെറുകടികൾ വിതരണം ചെയ്തു

കൊച്ചി: ദേശീയ ആയുര്‍വേദ ദിനത്തോടനുബന്ധിച്ച് ആയുര്‍വേദ മെഡിക്കല്‍ അസോസിയേഷന്‍ ഓഫ് ഇന്ത്യ എറണാകുളം ജില്ലാ കമ്മിറ്റി സമൃദ്ധി ഭക്ഷണശാലയില്‍ ആയുര്‍വേദ വിധിപ്രകാരം പാകം ചെയ്ത മില്ലറ്റ് അട, ശാരിബാദി പാനകം എന്നിവ വിതരണം ചെയ്തു. ജില്ലാ പ്രസിഡന്‍റ് ഡോ. മനു ആര്‍. മംഗലത്ത്, ട്രഷറര്‍ ഡോ. രണ്‍ചന്ദ്, ഡോ. എസ്.കെ. ശ്രീരാജ്, ഡോ. ജിഷ്ണു വേണുഗോപാല്‍ എന്നിവര്‍ പങ്കെടുത്തു.

ഏലൂർ ചൗക്ക-ചേരാനല്ലൂർ പാലത്തിന് ഭരണാനുമതി

ഏലൂർ: മുട്ടാർ നദിക്കു കുറുകെയുള്ള ഏലൂർ ചൗക്ക -ചേരാനല്ലൂർ പാലം നിര്‍മാണത്തിന് ഭരണാനുമതി ലഭിച്ചതായി മന്ത്രി പി. രാജീവ് അറിയിച്ചു. 27.70 കോടി രൂപയുടെ പദ്ധതിയാണിത്. 153.24 മീറ്റർ നീളവും 11 മീറ്റർ വീതിയുമുള്ളതാണ് നിർദിഷ്ട പാലം. ഇതിൽ 20 മീറ്റർ വീതം നീളമുള്ള രണ്ടു ലാൻഡ് സ്പാനുകളും 19.85 മീറ്റർ നീളമുള്ള നാലു ലാൻഡ് സ്പാനുകളും, 32.04 മീറ്റർ നീളമുള്ള മധ്യ സ്പാനുമുണ്ട് . 7.50 മീറ്റർ വീതിയുള്ള കാരിയേജ് വേയും ഇരുഭാഗത്തുമായി 1.5 മീറ്റർ വീതിയുള്ള നടപ്പാതകളും നിർമിക്കും. ചേരാനല്ലൂർ ഭാഗത്ത് 329 ഉംഏലൂർ ഭാഗത്ത് 335 ഉം മീറ്റർ നീളത്തിലുള്ള അപ്രോച്ച് റോഡുകളും സര്‍വീസ് റോഡുകളും നിർമിക്കും. പ്രദേശവാസികളുടെ ദീർഘകാല ആവശ്യമായ പാലം നിർമാണം സമയബന്ധിതമായി പൂർത്തിയാക്കുമെന്നും മന്ത്രി പറഞ്ഞു.

പാനായിക്കുളം ഗവ. എൽപി സ്കൂളിൽ പുതിയ കെട്ടിടം നിർമിക്കാൻ ഭരണാനുമതി

ആലങ്ങാട് : പാനായിക്കുളം ഗവ. എൽപി സ്കൂളിൽ പുതിയ കെട്ടിടം നിർമിക്കാകാൻ സർക്കാർ ഭരണാനുമതി നൽകി. പുതിയ ക്ലാസ് റൂമുകൾ ഒരുക്കുന്നതിനാണ് 95.60 ലക്ഷം രൂപ അനുവദിച്ചിരിക്കുന്നത് എന്ന് വ്യവസായ മന്ത്രി പി.രാജീവ് പറഞ്ഞു. വിദ്യാഭ്യാസ വകുപ്പിൻ്റെ പദ്ധതി വിഹിതത്തിൽ നിന്നാണ് തുക അനുവദിച്ചത്. കളമശേരി മണ്ഡലത്തിൽ സ്കൂളുകളുടെ അടിസ്ഥാന സൗകര്യങ്ങൾ വികസിപ്പിക്കുന്നതിന് 30 കോടി രൂപയാണ് ചെലവഴിക്കുന്നത്. പുതിയ ക്ലാസ് മുറികൾ, ലാബുകൾ, പാചകപ്പുരകൾ തുടങ്ങി വിവിധ സൗകര്യങ്ങൾ ഒരുക്കുന്നതിനാണിത്.

ഉദ്ഘാടനം കഴിഞ്ഞിട്ട് രണ്ടുവർഷമായിട്ടും ഞാറക്കലിലെ കുടിവെള്ള സംഭരണി പ്രവർത്തനമാരംഭിച്ചില്ല

വൈപ്പിൻ : രണ്ടര വർഷം മുമ്പ് വകുപ്പു മന്ത്രി കൊട്ടിഘോഷിച്ച് ഉദ്ഘാടനം ചെയ്ത ഞാറക്കലെ കുടിവെള്ള സംഭരണി ഇന്നും വറ്റിവരണ്ടു തന്നെ കിടക്കുന്നു. ഇതിൽനിന്നു തുള്ളി വെള്ളം പോലും സംഭരിക്കാനോ വിതരണം ചെയ്യാനോ അധികൃതർ നാളിതുവരെ നടപടിയെടുത്തിട്ടില്ലെന്ന് ഗോശ്രീ മനുഷ്യവകാശ സംരക്ഷണ സമിതി ആരോപിക്കുന്നു. കുടിവെള്ളത്തിനായി നെട്ടോട്ടമോടുന്ന നായരമ്പലം, ഞാറക്കൽ നിവാസികളുടെ ദാഹമകറ്റാൻ ആറുകോടി രൂപ ചെലവാക്കിയാണ് ഈ ടാങ്ക് നിർമിച്ചത്. എന്നിട്ടും ഇഴഞ്ഞു വലിഞ്ഞ് 12 വർഷം കൊണ്ടാണ് വാട്ടർ അഥോറിറ്റി ഈ ജലസംഭരണിയുടെ നിർമാണം പൂർത്തിയാക്കിയത്. ഇതിനുശേഷം സ്ഥലം എംഎൽഎയുടെ നേതൃത്വത്തിലാണ് വകുപ്പുമന്ത്രി എത്തി ഉത്സവ മേളത്തോടെ ഉദ്ഘാടനം നടത്തിയത്. ഇതേ അവസ്ഥ തന്നെയാണ് മുരുക്കുംപാടം ജലസംഭരണിക്കും. വൈപ്പിൻ ദ്വീപിന്‍റെ തെക്കൻ മേഖലകളിലെ ദാഹം അകറ്റാൻ നാലു കോടി രൂപ ചെലവിൽ നിർമിച്ചതാണിത്. ഇതും ഉദ്ഘാടനം കഴിഞ്ഞ് വർഷങ്ങളായി . എന്നിട്ടും പ്രവർത്തനം ഇതുവരെ ആരംഭിച്ചിട്ടില്ല. ഈ സാഹചര്യത്തിൽ രണ്ടു സംഭരണികളും ഒരു മാസത്തിനകം പ്രവർത്തനം ആരംഭിച്ചില്ലെങ്കിൽ എറണാകുളം വാട്ടർ അഥോറിറ്റി സൂപ്രണ്ടിംഗ് എൻജിനീയറുടെ ഓഫീസിനു മുന്നിൽ ബഹുജനപ്രക്ഷോഭം ആരംഭിക്കുമെന്ന് ഗോശ്രീ മനുഷ്യാവകാശ സംരക്ഷണ സമിതി ചെയർമാൻ പോൾ ജെ. മാമ്പിള്ളി അറിയിച്ചു.

മധ്യവയസ്‌കൻ വീടിനുള്ളില്‍ മരിച്ചനിലയില്‍

മൂവാറ്റുപുഴ : വാളകം കുന്നയ്ക്കാലില്‍ ഒറ്റയ്ക്ക് താമസിച്ചിരുന്ന മധ്യവയസ്‌കനെ വീടിനുള്ളില്‍ മരിച്ചനിലയില്‍ കണ്ടെത്തി. ഓട്ടോറിക്ഷ തൊഴിലാളിയായ വാളകം കുന്നയ്ക്കാല്‍ ഇരുമ്പായില്‍ സാബു ജോണി (65)നെയാണ് വീടിനുള്ളില്‍ മരിച്ചനിലയില്‍ കണ്ടെത്തിയത്. മൊബൈല്‍ ഫോണില്‍ വിളിച്ച് കിട്ടാത്തതിനെ തുടര്‍ന്ന് പ്രദേശവാസികളും ഓട്ടോറിക്ഷ തൊഴിലാളികളും ചേര്‍ന്ന് പരിശോധന നടത്തിയപ്പോഴാണ് വീടിനുള്ളില്‍ മരിച്ചനിലയില്‍ കണ്ടത്. മൃതദേഹത്തിന് രണ്ട് ദിവസത്തോളം പഴക്കമുണ്ടെന്നാണ് പ്രാഥമിക നിഗമനം. മൂവാറ്റുപുഴ പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു. സംസ്‌കാരം ഇന്ന് രണ്ടിന് കുന്നയ്ക്കാല്‍ സെന്‍റ് ജോര്‍ജ് പള്ളിയില്‍. മാതാവ്: പരേതയായ സാറാമ്മ കോലഞ്ചേരി മഠത്തിക്കുടി കുടുംബാംഗം. സഹോദരങ്ങള്‍: സാജു, സജി.

ലോറിയിടിച്ച് സൈക്കിൽ യാത്രികൻ മരിച്ചു

കളമശേരി: എച്ച്എംടി റോഡിൽ സൈക്കിളിൽ ലോറിയിടിച്ച് വയോധികൻ മരിച്ചു. പള്ളിലാങ്കര എസ്എൻഡിപിക്ക് സമീപം എഴുപ്പുറത്ത് രാഘവൻ (82) ആണു മരിച്ചത്. സെന്‍റ് പോൾസ് കോളജിനു മുന്നിൽ ഇന്നലെ 11നായിരുന്നു അപകടം. രാഘവൻ സഞ്ചരിച്ചിരുന്ന സൈക്കിളിൽ പിന്നിൽ തമിഴ്നാട് രജിസ്ട്രേഷനുള്ള ലോറി ഇടിക്കുകയായിരുന്നു. മൃതദേഹം മെഡിക്കൽ കോളജിലേക്ക് മാറ്റി. തോഷിബ മുൻ ജീവനക്കാരനാണ്.

മത്സ്യബന്ധനത്തിനിടെ കുഴഞ്ഞുവീണ അതിഥി തൊഴിലാളി മരിച്ചു

വൈപ്പിൻ: മത്സ്യബന്ധനത്തിനിടെ നെഞ്ചുവേദനയെ തുടർന്ന് കുഴഞ്ഞുവീണ അതിഥി തൊഴിലാളി മരിച്ചു. തമിഴ്നാട് കന്യാകുമാരി ആരോഗ്യപുരം സ്വദേശി മൈക്കിൾ സുസൈ (50) ആണ് മരിച്ചത്. ഇബ്രാഹിം എന്ന ബോട്ടിലെ തൊഴിലാളിയായ ഇയാൾക്ക് 22ന് പുലർച്ചെയാണ് കടലിൽ വച്ച് നെഞ്ചുവേദന അനുഭവപ്പെട്ടത്. കൂടെയുണ്ടായിരുന്നവർ ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. മൃതദേഹം ഫോർട്ട്കൊച്ചി കോസ്റ്റൽ പോലീസിന്‍റെ നേതൃത്വത്തിൽ പോസ്റ്റ്മോർട്ടത്തിനു ശേഷം ബന്ധുക്കൾ വിട്ടുകൊടുത്തു.

സംസ്ഥാനത്തിന്‍റേത് പ്രകൃതിക്ക് അനുസൃതമായ വ്യവസായ നയം: മന്ത്രി പി. രാജീവ്

വൈപ്പിൻ: സംസ്ഥാന സർക്കാർ പിന്തുടരുന്നത് പ്രകൃതിക്ക് അനുസൃതമായ വ്യവസായ നയമെന്ന് മന്ത്രി പി. രാജീവ്. കാർബൺ ന്യൂട്രൽ ഗോശ്രീ പദ്ധതിയുടെ നയരേ ഖ പ്രകാശന ചടങ്ങിന്‍റെ ഉദ്ഘാടനം നിർവഹിക്കുകയായിരുന്നു അദ്ദേഹം. പ്രകൃതി, ജനത, വ്യവസായം എന്നതാണ് സംസ്ഥാനത്തെ വ്യവസായ നയത്തിന്‍റെ മുദ്രാവാക്യം. കാർബൺ ബഹിർഗമനം വർധിപ്പിക്കുന്ന വ്യവസായങ്ങളെ ഒരിക്കലും പ്രോത്സാഹിപ്പിക്കില്ല. സ്വിറ്റ്സർലാൻഡിലെ ദാവോസിൽ നടന്ന വേൾഡ് ഇക്കണോമിക് ഫോറത്തിൽ ഔദ്യോഗികമായി അംഗീകരിച്ച പദ്ധതികളിൽ ആദ്യത്തേത് കേരളത്തിന്‍റെ ഹൈഡ്രജൻ ഹബ്ബാണ്. കൊച്ചിയെ സംരക്ഷിക്കുന്നതിനു വേണ്ടിയാണ് കാർബൺ ന്യൂട്രൽ ഗോശ്രീ പദ്ധതി ആവിഷ്കരിച്ചിട്ടുള്ളതെന്നും അത് പ്രയോഗത്തിലേക്ക് എത്തിക്കാൻ തുടർച്ചയായ അവലോകനവും ഏകോപനവും ആവശ്യമാണെന്നും മന്ത്രി കൂട്ടിച്ചേർത്തു. വൈപ്പിൻ ബ്ലോക്കിലെ കുഴുപ്പിള്ളി, പള്ളിപ്പുറം, എടവനക്കാട്, നായരമ്പലം, ഞാറയ്ക്കൽ എന്നീ ഗ്രാമപഞ്ചായത്തുകളിലും ഇടപ്പള്ളി ബ്ലോക്കിലെ എളങ്കുന്നപ്പുഴ, മുളവുകാട്, കടമക്കുടി എന്നീ ഗ്രാമപഞ്ചായത്തുകളിലുമാണ് പദ്ധതി നടപ്പാക്കുന്നത്. ഹരിതകേരളം മിഷന്‍റെ സാങ്കേതിക സഹായത്തോടെയും ഏകോപനത്തോടെയും നടക്കുന്ന പദ്ധതിക്ക് ജിഡയുടെ പിന്തുണയുമുണ്ട്. കാമ്പയിന്‍റെ ഭാഗമായി ഹരിതഗൃഹ വാതകങ്ങളുടെ പുറന്തള്ളൽ കണക്കാക്കുന്നതിനായി എട്ട് പഞ്ചായത്തുകളിലും പ്രാഥമിക സർവേ നടത്തിയിരുന്നു. ഇതിലൂടെ ലഭിച്ച വിവരങ്ങളുടെ അടിസ്ഥാനത്തിലാണ് ഡിപിആർ തയാറാക്കിയത്. ബോൾഗാട്ടി പാലസിൽ നടന്ന പരിപാടിയിൽ ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടനു നൽകി നയരേഖ പ്രകാശനം ചെയ്തു. കെ.എൻ. ഉണ്ണികൃഷ്ണൻ എം.എൽ.എ അധ്യക്ഷത വഹിച്ചു. ജില്ലാ കളക്ടർ ജി. പ്രിയങ്ക, വൈപ്പിൻ ബ്ലോക്ക് പഞ്ചായത്ത് പ്രസിഡന്‍റ് തുളസി സോമൻ, ഇടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് സരിത സനൽ, നവകേരളം കർമപദ്ധതി സംസ്ഥാന കോ-ഓർഡിനേറ്റർ ടി.എൻ. സീമ, ജിഡ സെക്രട്ടറി രഘുരാമൻ തുടങ്ങിയവർ പങ്കെടുത്തു.

അമലാപുരത്ത് പാറമടയിൽ കണ്ടെത്തിയ മൃതദേഹം യുവാവിന്‍റേത്

അയ്യന്പുഴ: അമലാപുരത്ത് പാറമടയിൽ കണ്ടെത്തിയ മൃതദേഹം 18നും 30നുമിടയിൽ പ്രായമുള്ള യുവാവിന്‍റേതെന്ന് തിരിച്ചറിഞ്ഞു. ശാസ്ത്രീയ പരിശോധനയിലാണ് യുവാവിന്‍റേതെന്ന് സ്ഥിരീകരിച്ചത്. ഉയരം ഏകദേശം 162 സെന്‍റീമീറ്ററാണ്. ശരീരത്തിലെ എല്ലുകള്‍ക്ക് പൊട്ടലുകളില്ല. കഴിഞ്ഞ വെള്ളിയാഴ്ചയാണ് അയ്യമ്പുഴ അമലാപുരത്ത് തട്ടുപാറ പള്ളിക്ക് സമീപം വര്‍ഷങ്ങളായി ഉപയോഗിക്കാതെ കിടക്കുന്ന വെള്ളം നിറഞ്ഞ പാറമടയില്‍ മൃതദേഹം കണ്ടെത്തിയത്. വെള്ളത്തിൽ പൊങ്ങിക്കിടന്ന മൃതദേഹത്തിന് അരയ്ക്ക് മുകളിലേക്കുള്ള ഭാഗം ഉണ്ടായിരുന്നില്ല. ട്രാക്ക് സ്യൂട്ട് ഇട്ട ഇരു കാലുകളും കൂട്ടിക്കെട്ടിയ നിലയിലായിരുന്നു. വൈകുന്നേരം നാലോയോടെ പാറമടയില്‍ ചൂണ്ടയിടാന്‍ എത്തിയ രണ്ടു പേരാണ് മൃതദേഹം കണ്ടത്. ഇവര്‍ ഉടന്‍ പോലീസില്‍ വിവരം അറിയിക്കുകയായിരുന്നു. ശരീരത്തിന്‍റെ പകുതി ഭാഗം മീനുകള്‍ കൊത്തി വേര്‍പെടുത്തിയതാകാമെന്നും ഇങ്ങനെയായിരിക്കാം മൃതദേഹം വെള്ളത്തിന് മുകളിലേക്ക് പൊങ്ങി വന്നത് എന്നുമാണ് പ്രാഥമിക നിഗമനം. 70 മീറ്ററിലധികം ആഴമുള്ള പാറമടയാണിത്. പാറമടയുടെ 100 മീറ്റര്‍ അകലെ വരെ മാത്രമേ വാഹനങ്ങള്‍ എത്തുകയുള്ളൂ. പാറമടയുടെ സമീപ പ്രദേശങ്ങള്‍ കാടുപിടിച്ച് കിടക്കുന്നതും ആള്‍ സഞ്ചാരമില്ലാത്ത പ്രദേശവുമാണ്. കാണാതായവരെ കുറിച്ചുള്ള കേസുകള്‍ കേന്ദ്രീകരിച്ചാണ് അന്വേഷണം നടക്കുന്നത്.

ലഹരിക്കേസുകളില്‍ വന്‍ വര്‍ധന

കൊച്ചി: സംസ്ഥാനത്ത് എന്‍ഡിപിഎസ് കേസുകളുടെ ( നാര്‍ക്കോട്ടിക് ഡ്രഗ്‌സ് ആന്‍ഡ് സൈക്കോട്രോപിക് സബ്സ്റ്റന്‍സസ്) എണ്ണത്തില്‍ മുന്‍ വര്‍ഷങ്ങളെ അപേക്ഷിച്ച് വര്‍ധന. സംസ്ഥാന ക്രൈം റിക്കാര്‍ഡ് ബ്യൂറോയുടെ കണക്കുകള്‍ പ്രകാരം കഴിഞ്ഞ എട്ടു മാസത്തിനുള്ളില്‍ (ഓഗസ്റ്റ് 31 വരെ) രജിസ്റ്റര്‍ ചെയ്തത് 8,622 എന്‍ഡിപിഎസ് കേസുകളാണ്. വാണിജ്യാടിസ്ഥാനത്തിലുള്ള ലഹരിക്കേസുകളാണ് ഏറെയും. 2024 ൽ രജിസ്റ്റര്‍ ചെയ്ത എന്‍ഡിപിഎസ് കേസുകളുടെ എണ്ണം 8,160 ആണ്. 2023 ല്‍ 8,104 എന്‍ഡിപിഎസ് കേസുകളും 2022 ല്‍ 6,116 കേസുകളും 2021 ല്‍ 3,922 കേസുകളും 2020 ല്‍ 3,667 കേസുകളും രജിസ്റ്റര്‍ ചെയ്യുകയുണ്ടായി. കഴിഞ്ഞ എട്ടു മാസത്തിനിടെ എന്‍ഡിപിഎസ് കേസുകളില്‍ അറസ്റ്റിലായവരുടെ 8,505 ആണ്. ഇതില്‍ 4,580 പേര്‍ ശിക്ഷിക്കപ്പെട്ടു. 262 പേരെ വെറുതെവിട്ടു. 2024 ല്‍ 7,946 പേരെയാണ് അറസ്റ്റ് ചെയ്തത്. ഇക്കാലയളവില്‍ 4,269 പേര്‍ ശിക്ഷിക്കപ്പെടുകയും 36 പേരെ വെറുതെ വിടുകയുമുണ്ടായി. 2023 ല്‍ 8,060 പേരെയും 2022 ല്‍ 6,031 പേരെയും 2021 ല്‍ 3,016 പേരെയും 2020 ല്‍ 3,791 പേരെയും എന്‍ഡിപിഎസ് കേസുകളില്‍ അറസ്റ്റ് ചെയ്യുകയുണ്ടായി. 2023 ല്‍ 5,228 പേരാണ് നിയമനടപടി നേരിട്ടത്. 2022 ല്‍ 4,022 പേരും 2021 ല്‍ 2,632 പേരും 2020 ല്‍ 2,495 പേരുമാണ് ശിക്ഷിക്കപ്പെട്ടത്. 2023 ല്‍ കേസില്‍ വെറുതെവിട്ടത് 53 പേരെയാണ്. 2022 ല്‍ 67 പേരെയും 2021 ല്‍ 38 പേരെയും 2020 ല്‍ 57 പേരെയും വെറുതെ വിടുകയുണ്ടായി. സീമ മോഹന്‍ലാല്‍

കെ.ജെ. ഷൈനിനെതിരായ പ്രചാരണം: ഒരാളെകൂടി പ്രതി ചേർത്തു

പറവൂർ: സമൂഹമാധ്യമങ്ങളിൽ സിപിഎം നേതാവ് കെ.ജെ ഷൈനിനെതിരായ പ്രചാരണത്തിൽ, റൂറൽ സൈബർ പോലീസ് , പ്രധാന പ്രതിയായ പറവൂർ സ്വദേശി പെട്ടിശേരിൽ ഗോപാലകൃഷ്ണന്‍റെ വീട്ടിൽ പരിശോധന നടത്തി. ഗോപാലകൃഷ്ണൻ സ്ഥലത്തുണ്ടായിരുന്നില്ല. ഇയാൾ ഒളിവിലാണെന്നാണ് കരുതുന്നത്. അപവാദ പോസ്റ്റ് അയച്ചതായി കരുതുന്ന മൊബൈൽ ഫോൺ പോലീസ് കസ്റ്റഡിയിലെടുത്തു. കേസിൽ ഒരാളെ കൂടി പോലീസ് പ്രതിചേർത്തു. കൊണ്ടോട്ടി അബു എന്ന പേരിലുള്ള യൂട്യൂബിൽ അപവാദ വീഡിയോ ചെയ്ത മലപ്പുറം എടപ്പാൾ മുണ്ടൻകാട്ടിൽ അലിയുടെ മകൻ യാസിറിനെയാണ് പ്രതി ചേർത്തിട്ടുള്ളത്.

ജുമാ മസ്ജിദിലെ ഭണ്ഡാരം കവര്‍ന്നു

പോത്താനിക്കാട്: പിടവൂര്‍ ബദരിയ ജുമാ മസ്ജിദിലെ ഭണ്ഡാരം കവര്‍ന്നു. ഇന്നലെ പുലര്‍ച്ചെ ഒന്നോടെ ശക്തമായ മഴ പെയ്യുന്നതിനിടയിലാണ് മോഷണം നടന്നത്. പാന്‍റും ഷര്‍ട്ടും ധരിച്ചെത്തിയ മോഷ്ടാവ് ചില്ലുവാതിയിൽ തകര്‍ത്ത് അകത്തുകയറി ഭണ്ഡാരവുമായി പോകുന്നതു സിസി ടിവിയില്‍ പതിഞ്ഞിട്ടുണ്ട്. പോത്താനിക്കാട് പോലീസ് കേസെടുത്ത് അന്വേഷണം ആരംഭിച്ചു. പണം കവര്‍ന്ന ശേഷം ഉപേക്ഷിക്കപെട്ട നിലയില്‍ ഭണ്ഡാരം കോട്ടപ്പടി വടാശേരിയിലെ റബര്‍ത്തോട്ടത്തില്‍ നിന്നു കണ്ടെത്തി.

വ്യാജ ഫേസ്ബുക്ക് അക്കൗണ്ടിനെതിരെ നടപടി: ജില്ലാ കളക്ടര്‍

കൊച്ചി: എറണാകുളം ജില്ലാ കളക്ടറുടേതെന്ന വ്യാജേന ഫേസ്ബുക്കില്‍ പ്രചരിക്കുന്ന അക്കൗണ്ടിനെതിരെ നടപടിയെടുക്കാന്‍ നിര്‍ദേശിച്ചതായി ജില്ലാ കളക്ടര്‍ ജി. പ്രിയങ്ക അറിയിച്ചു. ഡിസി എറണാകുളം എന്ന പേരിലാണ് വ്യാജ ഫേസ്ബുക്ക് അക്കൗണ്ട് പ്രചരിക്കുന്നത്. ഇതില്‍ ആരും വഞ്ചിതരാകരുതെന്ന് ജില്ലാ കളക്ടര്‍ പറഞ്ഞു. https://www.facebook.com/d-ce-km എന്നതാണ് കളക്ടറുടെ ഔദ്യോഗിക എഫ്ബി പേജിന്‍റെ (കളക്ടര്‍, എറണാകുളം) ലിങ്ക് എന്നും അവർ അറിയിച്ചു.

ഫോർട്ടുകൊച്ചി തീരം ശുചീകരിച്ച് കുസാറ്റ് വിദ്യാർഥികൾ

കളമശേരി: അന്താരാഷ്ട്ര സമുദ്രതീര ശുചീകരണ ദിനത്തോടനുമ്പന്ധിച്ച് കൊച്ചി ശാസ്ത്ര സാങ്കേതിക സർവകലാശാല(കുസാറ്റ്)യിലെ മറൈൻ ബയോളജി, മൈക്രോ ബയോളജി ആൻഡ് ബയോകെമിസ്ട്രി വിഭാഗത്തിന്‍റെ നേതൃത്വത്തിൽ ഫോർട്ടുകൊച്ചി ബീച്ച് ശുചീകരിച്ചു. കേന്ദ്ര ഭൗമശാസ്ത്ര മന്ത്രാലയത്തിന് കീഴിലുള്ള നാഷണൽ സെന്റർ ഫോർ കോസ്റ്റൽ റിസർച്ചിന്‍റെ (എൻസിസിആർ) സഹകരണത്തോടെ സംഘടിപ്പിച്ച ശുചീകരണ യജ്ഞത്തിൽ എച്ച്സിഎൽ ടെക്ക്, കുസാറ്റ് എൻഎസ്എസ് യൂണിറ്റ്, തേവര സേക്രഡ് ഹാർട്ട് കോളജ് എൻഎസ്എസ് യൂണിറ്റ്, സെന്‍റ് ആൽബർട്ട് കോളജ്, മാലിയങ്കര എസ്എൻഎം കോളജ് എന്നിവിടങ്ങളിൽ നിന്നുള്ള വിദ്യാർഥികളും അധ്യാപകരും പങ്കാളികളായി. ഒരു ടണ്ണിലേറെ വരുന്ന മാലിന്യങ്ങൾ തരംതിരിച്ച് ശേഖരിച്ച ശേഷം ശാസ്ത്രീയമായി സംസ്കരിക്കുന്നതിന് പ്ലാനറ്റ് എർത്ത് എന്ന സംഘടനയ്ക്ക് കൈമാറി. രാവിലെ ഏഴു മുതൽ 10 വരെ നീണ്ടുനിന്ന ശുചീകരണ പ്രവർത്തനം വാർഡ് കൗൺസിലർ അഡ്വ. ആന്റണി കുരീത്തറ ഉദ്ഘാടനം ചെയ്തു. സ്കൂൾ ഓഫ് മറൈൻ സയൻസ് ഡയറക്ടർ ഡോ. കെ സതീശൻ അധ്യക്ഷത വഹിച്ചു. സമാപനയോഗത്തിൽ കുസാറ്റ് രജിസ്ട്രാർ ഡോ. എ.യു. അരുൺ വിദ്യാർഥികൾക്ക് സർട്ടിഫിക്കറ്റുകൾ വിതരണം ചെയ്തു.

വികസന സദസ് : പരിപാടിയിൽനിന്ന് വിട്ടുനിൽക്കാൻ മരട് നഗരസഭ

മരട്: സംസ്ഥാന സർക്കാർ പ്രഖ്യാപിച്ചിരിക്കുന്ന വികസന സദസ് പരിപാടിയോട് മരട് നഗരസഭ സഹകരിക്കില്ലെന്ന് ഭരണസമിതി വ്യക്തമാക്കി. തിങ്കളാഴ്ച ചേർന്ന കൗൺസിൽ യോഗത്തിലാണ് തീരുമാനമെടുത്തത്. വികസന സദസ് പോലെ രാഷ്ട്രീയ ലക്ഷ്യത്തോടെ സംഘടിപ്പിക്കുന്ന പരിപാടികളിൽ പങ്കാളികളാകുന്നത് ജനപ്രതിനിധികളുടെ നിലപാടുമായി പൊരുത്തപ്പെടുന്നില്ലെന്നും വ്യക്തമാക്കിയ യുഡിഎഫ് ഭരണസമിതി , സംസ്ഥാന സർക്കാരിന്‍റെ ധൂർത്തിനോട് വിയോജിപ്പ് രേഖപ്പെടുത്തിക്കൊണ്ടുള്ള നിലപാടാണ്യോഗത്തിൽ കൈക്കൊണ്ടത്. കൗൺസിൽ യോഗത്തിൽ ഹാജരായ അഞ്ച് സിപിഎം അംഗങ്ങൾ ഭരണസമിതി തീരുമാനത്തിൽ വിയോജിപ്പ് രേഖപ്പെടുത്തി. സംസ്ഥാനത്തൊട്ടാകെ സർക്കാരിന്‍റെ ഭരണ നേട്ടങ്ങൾ പ്രചരിപ്പിക്കാനായി തദ്ദേശ സ്വയംഭരണ സ്ഥാപനങ്ങൾ നാലു ലക്ഷം രൂപ ചെലവാക്കി വികസന സദസ്സ് നടത്തണമെന്നായിരുന്നു സർക്കാർ ഉത്തരവ്. തുടർച്ചയായി സർക്കാർ സംഘടിപ്പിക്കുന്ന ഇത്തരം പരിപാടികൾ തദ്ദേശ സ്വയംഭരണ സ്ഥാപനങ്ങൾക്ക് ബാധ്യതയായി മാറുമെന്ന് നഗരസഭാ ചെയർപേഴ്സൺ ആന്‍റണി ആശാംപറമ്പിൽ പറഞ്ഞു.

വിദ്യാർഥികൾക്ക് ഒപ്പം കളമശേരി; 41 സ്കൂളുകളിൽ ആർഒ പ്ലാന്‍റുകൾ സജ്ജം

നെടുമ്പാശേരി: കളമശേരി നിയമസഭാ മണ്ഡലത്തിലെ എല്ലാ സ്കൂളുകളിലും ഇനി മുതൽ കലർപ്പില്ലാത്ത ശുദ്ധമായ കുടിവെള്ളം ലഭിക്കും. മണ്ഡലത്തിലെ 41 സ്കൂളുകളിലും റിവേഴ്സ് ഓസ്മോസിസ് (ആർഒ) പ്ലാന്‍റുകൾ സ്ഥാപിച്ചു. എല്ലാ സ്കൂളുകളിലും കലർപ്പില്ലാത്ത കുടിവെള്ളം ഉറപ്പാക്കി ഈ നേട്ടം കൈവരിക്കുന്ന ആദ്യ മണ്ഡലമായി ഇതോടെ കളമശേരി മാറി. ശുദ്ധജലം ലഭ്യമാക്കുന്നതിനായി എല്ലാ സ്കൂളുകളിലും റിവേഴ്സ് ഓസ്മോസിസ് പ്ലാന്‍റുകളും അനുബന്ധ സൗകര്യങ്ങളും ഒരുക്കിയാണ് ശുദ്ധജല ലഭ്യത ഉറപ്പാക്കിയത്. പദ്ധതിയുടെ ഉദ്ഘാടനം അയിരൂർ സെന്‍റ് തോമസ് ഹൈസ്കൂളിൽ മന്ത്രി പി.രാജീവ് നിർവഹിച്ചു. സംഗീത സംവിധായകൻ സ്റ്റീഫൻ ദേവസി മുഖ്യാതിഥിയായി. അയിരൂർ സെന്‍റ് തോമസ് സ്കൂളിന് പുതിയ ബാസ്കറ്റ് ബോൾ കളിക്കളം നിർമിച്ചു നൽകുമെന്ന് മന്ത്രി പറഞ്ഞു. കളമശേരി മണ്ഡലത്തിലെ 41 സർക്കാർ, എയ്ഡഡ് സ്കൂളുകളിൽ മൂന്നു കോടി ചെലവഴിച്ചാണ് ആർഒ പ്ലാന്‍റുകൾ സ്ഥാപിച്ചത്. ഒരു പ്ലാന്‍റ് സ്ഥാപിക്കാൻ 7.16 ലക്ഷം രൂപ ചെലവഴിച്ചു. 500 ലിറ്റർ ശേഷിയുള്ള ടാങ്കുകളാണ് ഓരോ സ്കൂളിലും സ്ഥാപിച്ചിട്ടുള്ളത്. കൊച്ചി വിമാനത്താവള കമ്പനിയുടെ പിന്തുണയോടെയാണ് ജലധാര എന്ന് പേരിട്ട പദ്ധതി നടപ്പാക്കുന്നത്. ഏതാനും സ്കൂളുകളിൽ ജലജന്യ രോഗങ്ങൾ റിപ്പോർട്ട് ചെയ്തത് ശ്രദ്ധയിൽ വന്നതിനെത്തുടർന്നാണ് ശുദ്ധജലം ഉറപ്പാക്കാൻ പദ്ധതി ആലോചിച്ചതെന്ന് മന്ത്രി പി. രാജീവ് പറഞ്ഞു. കുന്നുകര പഞ്ചായത്ത് പ്രസിഡന്‍റ് സൈന ബാബു അധ്യക്ഷയായി. പാറക്കടവ് ബ്ലോക്ക് പഞ്ചായത്ത് ടി.വി. പ്രദീഷ്, ആലങ്ങാട് ബ്ലോക്ക് പഞ്ചായത്ത് പ്രസിഡന്‍റ് രമ്യ തോമസ്, വിദ്യാഭ്യാസ വകുപ്പ് ഡെപ്യൂട്ടി ഡയറക്ടർ സുബിൻ പോൾ, സിയാൽ എക്സിക്യൂട്ടീവ് ഡയറക്ടർ ജയരാജ് തുടങ്ങിയവർ സംബന്ധിച്ചു.

മാനസികാരോഗ്യം: പഠനറിപ്പോർട്ട് അവതരിപ്പിച്ചു

അങ്കമാലി: മലയാളിയുടെ മാനസികാരോഗ്യത്തിലെ മാറ്റങ്ങൾ എന്ന വിഷയത്തിൽ സ്മാർട്ട്‌ ഇന്ത്യ ഫൗണ്ടേഷൻ നടത്തിയ പഠനത്തിന്‍റെ റിപ്പോർട്ടും ഡോ. സെമിച്ചൻ ജോസഫ് എഴുതിയ മനസിനൊരു ഫസ്റ്റ് എയ്ഡ് പുസ്തകത്തിന്‍റെ പ്രകാശനവും നടത്തി. അങ്കമാലി ഡിസ്റ്റ് കോളജിൽ നടന്ന സമ്മേളനം പ്രിൻസിപ്പൽ റവ. ഡോ. ജോണി മംഗലത്ത് ഉദ്ഘാടനം ചെയ്തു. സ്മാർട്ട്‌ ഇന്ത്യ ഫൗണ്ടേഷനിലെ ഗ്രേഷോ രാഹുൽ, ഡോ. സെമിച്ചൻ ജോസഫ്, ഡാലിൻ ഡയസ് എന്നിവർ ചേർന്ന് റിപ്പോർട്ട്‌ അവതരിപ്പിച്ചു. വിവിധ പ്രായവിഭാഗങ്ങളിലെ 5000 ഓളം പേരിൽ നടത്തിയ സർവേയുടെയും വിവര ശേഖരണത്തിന്‍റെയും വെളിച്ചത്തിലാണ് പഠന റിപ്പോർട്ട് തയാറാക്കിയത്. ഡോ. കൊച്ചുറാണി ജോസഫിന് ആദ്യപ്രതി നൽകി ചാർളി പോൾ പുസ്തക പ്രകാശനം നിർവഹിച്ചു. മാനസിക സമ്മർദങ്ങളെയും വ്യക്തി, കുടുംബ സാമൂഹ്യ തലങ്ങളിലെ അനുബന്ധ പ്രശ്നങ്ങളെയും അതിജീവിക്കാൻ സഹായകമായ ഗ്രന്ഥമാണ് മനസിനൊരു ഫസ്റ്റ് എയ്ഡ്. സമ്മേളനത്തിൽ അധ്യാപകനും എഴുത്തുകാരനുമായ ഷാജി മാലിപ്പാറ, യുവഗ്രാമം ചെയർമാൻ ഡെന്നിസ് കെ. ആന്‍റണി, എം.ഡി. ജോയ്, ഡീന കുര്യാക്കോസ്, ആതിര സന്തോഷ്‌ എന്നിവർ പ്രസംഗിച്ചു.

സ്നേഹവീട് പദ്ധതി: ഒരേ ദിവസം അഞ്ച് വീടുകൾക്ക് തറക്കല്ലിട്ടു

ആലങ്ങാട്: കളമശേരി മണ്ഡലത്തിൽ മന്ത്രി പി.രാജീവ് നടപ്പിലാക്കി വരുന്ന സ്നേഹവീട് ഭവനനിർമാണ പദ്ധതിയുടെ ഭാഗമായി അഞ്ച് വീടുകൾക്ക് ഒരേ ദിവസം തറക്കല്ലിട്ടു. 22-ാമത്തെ വീടിന്‍റെ നിർമാണമാണ് ഞായറാഴ്ച തുടങ്ങിയത്. കുടുംബ നാഥ വിധവകളായവരുൾപ്പെടെ 30 കുടുംബങ്ങൾക്ക് വീടുകൾ നിർമിക്കുന്നതിന് മന്ത്രി പി. രാജീവ് ആവിഷ്കരിച്ച് നടപ്പാക്കുന്ന പദ്ധതിയാണിത്. കളമശേരി ശാന്തിഗിരി സഹൃദയ നഗറിൽ മേരി ഫ്രാൻസിസ്, കടുങ്ങല്ലൂർ ഏലൂക്കര ലക്ഷംവീട് നഗർ കരോട്ട് മാമ്പായിൽ ഹമീദ്, കരുമാലൂർ ചെട്ടിക്കാട് ചേറ്റുവിത പറമ്പിൽ ലീല, കുന്നുകര കുത്തിയതോട് താനാട്ടുവീട്ടിൽ ഗീതാ സുബ്രൻ, ആലങ്ങാട് കൊടുവഴങ്ങ മുല്ലൂർ വീട്ടിൽ നീതു വിൻസന്‍റ് എന്നിവർക്ക് വേണ്ടി നിർമിക്കുന്ന വീടുകൾക്കാണ് തറക്കല്ലിട്ടത്. ആദ്യഘട്ടമായി 30 വീടുകളാണ് നിർമിക്കുന്നത്. ചിറ്റിലപ്പിള്ളി ഫൗണ്ടേഷൻ, സിയാൽ, സുഡ്കെമി, ഇൻകെൽ എന്നിവയുടെ സഹകരണത്തോടെയാണ് പദ്ധതി നടപ്പാക്കുന്നത്. രാജഗിരി ഫൗണ്ടേഷനാണ് പദ്ധതിയുടെ നിർവഹണം. ഇതോടൊപ്പം മറ്റ് സ്ഥാപനങ്ങളുടെ സഹായവും ഉൾപ്പെടുത്തും. ഒരാൾക്ക് എട്ട് ലക്ഷം രൂപ വീതം ചെലവഴിച്ചാണ് വീടുനിർമാണം. 500 ച. അടിയെങ്കിലും വിസ്തീർണമുള്ള വീടുകളാണ് നിർമിക്കുന്നത്. ഇതിനകം ഒൻപത് വീടുകളുടെ താക്കോൽ കൈമാറി. അഞ്ച് വീടുകളുടെ നിർമാണം പൂർത്തിയാക്കി. മൂന്ന് വീടുകളുടെ നിർമാണം അവസാന ഘട്ടത്തിലാണ്. ഇതിനു പുറമേയുള്ള അഞ്ച് വീടുകളുടെ നിർമാണമാണ് ആരംഭിച്ചിരിക്കുന്നത്.

ആസ്വാദകർക്ക് നവ്യാനുഭവമായി മാസ്റ്റർ ക്ലാസും രാഗമഞ്ജരിയും

തൃപ്പൂണിത്തുറ: ശ്രീപൂർണത്രയീശ സംഗീത സഭയുടെ ആഭിമുഖ്യത്തിൽ കഥകളി സംഗീതജ്ഞരായ നെടുമ്പള്ളി രാംമോഹനും മീര രാംമോഹനും നയിച്ച മാസ്റ്റർ ക്ലാസും സോദാഹരണ പ്രഭാഷണവും സംഗീതവും ആസ്വാദകർക്കും സംഗീത വിദ്യാർഥികൾക്കും നവ്യാനുഭവമായി. ഗംഭീരനാട്ട രാഗത്തിൽ തോടയം വായിക്കുന്നതു മുതൽ സൗമ്യം, വീരം, രൗദ്രം, കരുണം തുടങ്ങിയ രസങ്ങൾക്ക് വേദിയിൽ മിഴിവേകുന്ന വിവിധ രാഗങ്ങൾ, കഥകളി സംഗീതത്തിൽ സന്നിവേശിപ്പിച്ച് അവതരിപ്പിക്കുന്നത് സംഗീതാലാപനത്തോടെ വളരെ ആഴത്തിൽ വിശകലനം ചെയ്തു. തുടർന്ന് വയലിൻ വിദ്വാൻ ഇടപ്പള്ളി അജിത് കുമാറിന്‍റെ സംവിധാനത്തിൽ അരങ്ങേറിയ രാഗമഞ്ജരിയും ആസ്വാദകരുടെ മനം കവർന്നു.

ട്വന്‍റി-20 പൂത്തൃക്ക പിടിക്കും: സാബു എം. ജേക്കബ്

കിഴക്കമ്പലം: അടുത്ത തെരഞ്ഞെടുപ്പിൽ 16 വാര്‍ഡുകളും വിജയിച്ച് പൂത്തൃക്ക പഞ്ചയത്ത് ഭരണം ട്വന്‍റി 20 പിടിക്കുമെന്ന് പാര്‍ട്ടി സംസ്ഥാന പ്രസിഡന്‍റ് സാബു എം. ജേക്കബ് പറഞ്ഞു. ട്വന്‍റി 20 പൂത്തൃക്ക പഞ്ചായത്ത് കണ്‍വന്‍ഷന്‍ ഉദ്ഘാടനം ചെയ്യുകയായിരുന്നു അദ്ദേഹം. കഴിഞ്ഞ ലോക്‌സഭാ തെരഞ്ഞെടുപ്പില്‍ പൂത്തൃക്ക പഞ്ചായത്തില്‍ ഒരു കമ്മിറ്റി പോലും ഇല്ലാതിരുന്നിട്ടും 34 ശതമാനം വോട്ട് ട്വന്‍റി 20 സ്ഥാനാര്‍ഥി നേടി. കുന്നത്തുനാട് നിയോജകണ്ഡലത്തില്‍ ട്വന്‍റി 20 സ്ഥാനാര്‍ഥിക്ക് ഏറ്റും കൂടുതല്‍ വോട്ടു നല്‍കിയ പഞ്ചായത്തായിരുന്നു പൂത്തൃക്കയെന്നും അദ്ദേഹം പറഞ്ഞു. വരും തെരഞ്ഞെടുപ്പില്‍ 70 ശതമാനം വോട്ടു നേടി, പാര്‍ട്ടി പൂത്തൃക്ക പഞ്ചായത്തില്‍ ഭരണത്തില്‍ വരുമെന്നും സാബു അവകാശപ്പെട്ടു. ഒക്‌ടോബര്‍ അഞ്ചിന് കുന്നത്തുനാട് നിയോജകമണ്ഡലത്തിലെ മുഴുവന്‍ ഭാരവാഹികളുടെയും യോഗം കോലഞ്ചേരി ഹില്‍ടോപ് കണ്‍വന്‍ഷന്‍ സെന്‍ററില്‍ ചേരുമെന്നും സാബു പറഞ്ഞു. അഡ്വ. ചാര്‍ളി പോള്‍, പി.കെ ജോര്‍ജ്, പി. വൈ ഏബ്രഹാം, വി. ഗോപകുമാര്‍, ജിബി ഏബ്രാഹം, ബിനു പീറ്റര്‍ തുടങ്ങിയവര്‍ പ്രസംഗിച്ചു.

സംഘാടക സമിതി രൂപീകരിച്ചു

അങ്കമാലി: എഎസ്എ (അങ്കമാലി സ്പോർട്സ് അസോസിയേഷൻ) ഒരുക്കുന്ന പത്താമത് അഖിലേന്ത്യാ വോളിബോൾ ടൂർണമെന്‍റ് നടത്തിപ്പിന് വിപുലമായ സംഘാടക സമിതി രൂപീകരിച്ചു. അങ്കമാലിയുടെ കായിക പരിപോഷണത്തിന് ഒരു മൾട്ടി പർപ്പസ് സ്റ്റേഡിയം അത്യാവശ്യമാണെന്ന് ടൂർണമെന്‍റ് സംഘാടക സമ്മേളനം ചൂണ്ടിക്കട്ടി. അങ്കമാലിയിൽ സ്റ്റേഡിയം പണിയാൻ കോടികളുടെ സഹായം ചെയ്യാൻ സർക്കാരും കെഎസ്‌വിഎയും തയാറാണെന്ന് കേരള സ്റ്റേറ്റ് വോളിബോൾ പ്രസിഡന്‍റ് ബിനോയ്‌ ജോസഫ് പറഞ്ഞു. അങ്കമാലി രുക്മിണി ഹോട്ടൽ ഓഡിറ്റോറിയത്തിൽ നടന്ന ടൂർണമെന്‍റ് സംഘാടക സമ്മേളനം റോജി എം. ജോൺ എംഎൽഎ ഉദ്ഘാടനം ചെയ്തു. എഎസ്എ പ്രസിഡന്‍റും മുൻ എംഎൽഎയുമായ പി.ജെ. ജോയി അധ്യക്ഷത വഹിച്ചു. മുൻ മന്ത്രി ജോസ് തെറ്റയിൽ, മുനിസിപ്പൽ ചെയർപേഴ്സൺ ഷിയോ പോൾ, കെ.കെ. ഷിബു, ഡേവിസ് പാത്താടൻ ജോണി കുരിയാക്കോസ്, ജെയ്സൺ പാനികുളങ്ങര തുടങ്ങിയവർ പ്രസംഗിച്ചു. 251 പേരുടെ വിപുലമായ സംഘാടക സമിതിക്കാണ് രൂപം നൽകിയിട്ടുള്ളത്. സംഘാടകസമിതി ചെയർമാനായി മുൻ എംഎൽഎ പി.ജെ. ജോയിയെയും ജനറൽ കൺവീനറായി ജെയ്സൺ പാനികുളങ്ങരയെയും തെരഞ്ഞെടുത്തു. മറ്റു ഭാരവാഹികൾ: ഡേവിസ് പാത്താടൻ (സെക്രട്ടറി), ഡാന്‍റി കാച്ചപ്പിള്ളി (ട്രഷറർ), വർഗീസ് ജോർജ്‌, (വൈസ് പ്രസിഡന്‍റ്), നിക്സൺ മാവേലി (ജോയിന്റ് സെക്രട്ടറി). 2026 ഫെബ്രുവരി ഒന്ന് മുതൽ എട്ട് വരെ നടക്കുന്ന പുരുഷ, വനിത മത്സരങ്ങളിൽ ഇന്ത്യയിലെ ഒന്നാം നിര ടീമുകൾ പങ്കെടുക്കും.

കോൺഗ്രസ് ധർണ നടത്തി

തൃപ്പൂണിത്തുറ: നഗരസഭയിലെ വോട്ടർ പട്ടികയിലുള്ള അപാകതകൾ പരിഹരിക്കണമെന്ന് ആവശ്യപ്പെട്ട് കോൺഗ്രസ് നഗരസഭാ പാർലമെന്‍ററി കമ്മിറ്റിയുടെ ആഭിമുഖ്യത്തിൽ പ്രതിഷേധ ധർണ നടത്തി. ജില്ലാ പ്രസിഡൻ്റ് മുഹമ്മദ് ഷിയാസ് ഉദ്ഘാടനം ചെയ്തു. പാർലമെൻ്ററി പാർട്ടി ലീഡർ കെ.വി. സാജു അധ്യക്ഷത വഹിച്ചു. വർഷങ്ങൾക്ക് മുന്പ് മരിച്ചവരുടെയും സ്ഥിരമായി താമസം മാറിയവരുടെയും പേരുകൾ നീക്കം ചെയ്യാൻ കൊടുത്ത അപേക്ഷകളിൽ യാതൊരു നടപടിയും സ്വീകരിക്കാതെ, നഗരസഭാധികാരികൾ ഉദ്യോഗസ്ഥരെ സ്വാധീനിച്ച് തെരഞ്ഞെടുപ്പിൽ കൃത്രിമം കാണിക്കാൻ ബോധപൂർവം നടപടികൾ സ്വീകരിച്ചെന്ന് ണ് കോൺഗ്രസ് ആരോപിച്ചു.

വസ്തു അളന്നു തിരിക്കൽ: കുന്നത്തുനാട് തഹസിൽദാരുടെ ഉത്തരവ് മരവിപ്പിക്കണമെന്ന് വി.പി. സജീന്ദ്രൻ

കിഴക്കമ്പലം: പാരിയത്ത്കാവിലെ ഏഴ് കുടുംബങ്ങൾക്കെതിരായി സുപ്രീംകോടതി വിധി വന്നതിനുശേഷം അൻപതിലധികം കുടുംബങ്ങളുടെ വസ്തുവകകൾ അളന്നു തിരിക്കാൻ നോട്ടീസ് നൽകിയ കുന്നത്തുനാട് തഹസിൽദാരുടെ ഉത്തരവ് മരവിപ്പിക്കണമെന്ന് മുൻ എംഎൽഎ വി.പി സജീന്ദ്രൻ എറണാകുളം ജില്ലാ കളക്ടറോട് ആവശ്യപ്പെട്ടു. നോട്ടീസ് കിട്ടിയ ഭൂഉടമകൾ ഭയാശങ്കയിലാണ്. ഈ നോട്ടീസ് മരവിപ്പിച്ചില്ലെങ്കിൽ സ്ഥലം വിൽപ്പന ഉൾപ്പെടെ പ്രതിസന്ധിയിലാകുമെന്നാണ് ആശങ്ക. പാരിയത്ത് കാവിലെ ഏഴ് കുടുംബങ്ങളെ സർക്കാർ ഏറ്റെടുത്ത് സ്ഥലവും വീടും നൽകുകയാണ് വേണ്ടതെന്നും വി.പി സജീന്ദ്രൻ പത്രസമ്മേളനത്തിൽ പറഞ്ഞു. പെരിയാർവാലി കനാലും പിഡബ്ല്യു റോഡും കഴിഞ്ഞുള്ള സ്ഥലം അളക്കാൻ നിർദേശിച്ചത് എന്തടിസ്ഥാനത്തിലാണെന്നും അദ്ദേഹം ചോദിച്ചു. പത്രസമ്മേളനത്തിൽ ഡിസിസി ജനറൽ സെക്രട്ടറി ടി. എച്ച് അബ്ദുൽ ജബ്ബാർ, കെ. വി. എൽദോ, തമ്പി കുര്യാക്കോസ് എന്നിവരും പങ്കെടുത്തു.

സാമ്പത്തിക തട്ടിപ്പും തൊഴിൽ ചൂഷണവും; പരാതി നൽകി

അങ്കമാലി: അഗ്രികൾച്ചർ കോ-ഓപ്പറേറ്റീവ് സൊസൈറ്റിയുടെ അങ്കമാലി ബ്രാഞ്ചിൽ സാമ്പത്തിക തട്ടിപ്പും തൊഴിൽ ചൂഷണവും നടക്കുന്നുവെന്ന് ആരോപിച്ച് സിപിഐ പരാതി നൽകി. സിപിഐ അങ്കമാലി മണ്ഡലം കമ്മിറ്റിക്ക് വേണ്ടി കിഷോർ ഒ.ജി, മഹേഷ് എം എന്നിവരും അങ്കമാലി മണ്ഡലം കമ്മിറ്റിക്ക് വേണ്ടി മാർട്ടിൻ ഡേവിസ്, സി.പി. പീറ്റർ എന്നിവരും ചേർന്നാണ് ആലുവ താലൂക്ക് സപ്ലൈ ഓഫീസർക്കു പരാതി നൽകിയത്. നിലവിൽ കോൺഗ്രസ് ഭരണസമിതിയാണ് ഇവിടെ ഭരിക്കുന്നത്. പാചക ഗ്യാസ് വിതരണത്തിൽ വർഷങ്ങളായി അമിത ഡെലിവറി ചാർജ് ഈടാക്കി ലക്ഷക്കണക്കിന് രൂപയുടെ തട്ടിപ്പ് നടത്തിയെന്നാണ് ആക്ഷേപം ഉയർന്നിട്ടുള്ളത്. ഡെലിവറി തൊഴിലാളികളെ ശമ്പളമില്ലാതെ നിയമവിരുദ്ധ തൊഴിൽ നിബന്ധനകളിൽ പ്രവർത്തിപ്പിക്കുന്നു എന്നും ആക്ഷേപമുണ്ട്.

ചോറ്റാനിക്കര ക്ഷേത്ര പരിസരം മലിനമായതില്‍ ദേവസ്വം ഉദ്യോഗസ്ഥര്‍ വിശദീകരണം നല്‍കണം

കൊച്ചി: ചോറ്റാനിക്കര ദേവീ ക്ഷേത്ര പരിസരം മലീമസമായതില്‍ ദേവസ്വം ഉദ്യോഗസ്ഥര്‍ നേരിട്ട് ഹാജരായി വിശദീകരണം നല്‍കണമെന്ന് ഹൈക്കോടതി . കോടതി സ്വമേധയാ എടുത്ത ഹര്‍ജിയാണ് ജസ്റ്റീസ് വി. രാജ വിജയരാഘവന്‍, ജസ്റ്റീസ് കെ.വി. ജയകുമാര്‍ എന്നിവരുള്‍പ്പെട്ട ദേവസ്വം ബെഞ്ച് പരിഗണിച്ചത്. കൊച്ചിന്‍ ദേവസ്വം ബോര്‍ഡ് മരാമത്ത് വിഭാഗം എക്‌സിക്യൂട്ടിവ് എന്‍ജിനീയര്‍, ചോറ്റാനിക്കര ദേവസ്വം അസി. എന്‍ജിനിയര്‍ എന്നിവര്‍ നാളെ ഹാജരാകണമെന്നാണ് നിര്‍ദേശം. ഇവരെയും സംസ്ഥാന ശുചിത്വ മിഷന്‍ എക്‌സിക്യൂട്ടീവ് ഡയറക്ടറെയും കക്ഷിചേര്‍ക്കുകയും ചെയ്തു. ക്ഷേത്രപരിപാലനത്തിലും ശുചീകരണത്തിലും ഗുരുതരമായ വീഴ്ചകള്‍ കോടതി നേരത്തെ കണ്ടെത്തിയിരുന്നു. അടുക്കളയിലടക്കം അഴുക്കും മാലിന്യവും കെട്ടിക്കിടക്കുന്ന ദൃശ്യങ്ങളും പരിശോധിച്ചു. ശുചീകരണ വീഴ്ചയിൽ വിജിലന്‍സ് വിഭാഗം കണ്ണടയ്ക്കുന്നത് സംശയകരമാണെന്ന് വിലയിരുത്തുകയും ചെയ്തു. നവകേരളം കര്‍മപദ്ധതി ജില്ലാ കോ- ഓര്‍ഡിനേറ്റര്‍ മാര്‍ച്ച് 11ന് അയച്ച കത്തിലെ മിക്ക നിര്‍ദേശങ്ങളും ചോറ്റാനിക്കര ദേവസ്വം പാലിച്ചിട്ടില്ലെന്നും ഇടക്കാല ഉത്തരവില്‍ വ്യക്തമാക്കിയിട്ടുണ്ട്.

മള്‍ട്ടിപ്ലക്‌സ് തിയറ്ററില്‍ സൗജന്യ കുടിവെള്ള ലഭ്യത ഉറപ്പുവരുത്തണമെന്ന് ഉപഭോക്തൃ കോടതി

കൊച്ചി : മള്‍ട്ടിപ്ലക്‌സുകളില്‍ പുറത്തുനിന്നുള്ള ഭക്ഷണ പാനീയങ്ങള്‍ അനുവദനീയമല്ലെങ്കില്‍, സൗജന്യ കുടിവെള്ള ലഭ്യത ഉറപ്പുവരുത്താന്‍ കൊച്ചിയിലെ പിവിആര്‍ സിനിമാസിന് എറണാകുളം ജില്ലാ ഉപഭോക്തൃ തര്‍ക്ക പരിഹാര കോടതി ഉത്തരവ് നല്‍കി. മള്‍ട്ടിപ്ലക്‌സില്‍ പുറത്തുനിന്നുള്ള ഭക്ഷണ പാനീയങ്ങള്‍ കൊണ്ടുപോകുന്നത് നിരോധിച്ചതിനും തിയറ്ററിനുള്ളിലെ ഭക്ഷണസാധനങ്ങള്‍ക്ക് അമിതവില ഈടാക്കുന്നതിനുമെതിരെ കോഴിക്കോട് സ്വദേശി ഐ.ശ്രീകാന്ത് നല്‍കിയ പരാതിയിലാണ് ഉത്തരവ്. ഈ സൗകര്യം വൃത്തിയോടെയും ശുചിത്വത്തോടെയും നിലനിര്‍ത്തണമെന്നും സൗജന്യ കുടിവെള്ളം ലഭ്യമാണെന്ന് ഉപഭോക്താക്കളെ അറിയിക്കുന്ന ബോര്‍ഡുകള്‍ സ്ഥാപിക്കണമെന്നും ഡി.ബി ബിനു അധ്യക്ഷനായ ബെഞ്ച് നിർദേശം നല്കി. എല്ലാ ഉപഭോക്താക്കള്‍ക്കും ശുദ്ധീകരിച്ച കുടിവെള്ളം തടസമില്ലാതെ സൗജന്യമായി നലകുമെന്ന് പിവിആര്‍ സിനിമാസ് രേഖാമൂലം ഉറപ്പ് നല്‍കി.

വല്ലാർപാടം തിരുനാൾ നാളെ സമാപിക്കും

കൊച്ചി: പ്രസിദ്ധ മരിയൻ തീർഥാടന കേന്ദ്രമായ വല്ലാർപാടം ബസിലിക്കയിൽ പരിശുദ്ധ വല്ലാർപാടത്തമ്മയുടെ 501-ാമതു തിരുനാളിന് നാളെ സമാപനം. രാവിലെ 10 നു പൊന്തിഫിക്കൽ ദിവ്യബലിയിൽ വരാപ്പുഴ ആർച്ച്ബിഷപ് ഡോ. ജോസഫ് കളത്തിപ്പറമ്പിൽ മുഖ്യകാർമികത്വം വഹിക്കും. ഫാ.ഷെൽട്ടൺ വചനപ്രഘോഷണം നടത്തും. ദിവ്യബലിക്കു മുന്നോടിയായി ആർച്ച്ബിഷപ്പിനും ചേന്ദമംഗലം പാലിയം കുടുംബാംഗങ്ങൾക്കും സ്വീകരണം, പള്ളിവീട്ടിൽ മീനാക്ഷിയമ്മയുടെ പിൻ തലമുറക്കാർ പരമ്പരാഗതമായി ചെയ്തു വരുന്ന മോരു വിതരണത്തിന്‍റെ ആശീർവാദം എന്നിവയുണ്ടാകും. രാവിലെ ഏഴിനും വൈകുന്നേരം മൂന്നിനും അഞ്ചിനും, ആറിനും മലയാളത്തിലും രാവിലെ ആറിനും വൈകുന്നേരം നാലിനും തമിഴിലും, ഏഴിന് ഇംഗ്ലീഷിലും ദിവ്യബലി ഉണ്ടാകും. വേസ്പര ദിനമായ ഇന്ന് വൈകുന്നേരം 5.30 നുള്ള പൊന്തിഫിക്കൽ ദിവ്യബലിക്ക് കോഴിക്കോട് ആർച്ച്ബിഷപ് ഡോ. വർഗീസ് ചക്കാലക്കൽ മുഖ്യകാർമികനാകും. ഇന്നും നാളെയും വൈകുന്നേരം തിരുക്കർമങ്ങൾക്കു ശേഷം ആഘോഷമായ പ്രദക്ഷിണം ഉണ്ടാകും.

പെരിയാർ ഇ.വി. രാമസ്വാമി സ്മാരകം അരൂക്കുറ്റിയിൽ

അരൂർ: വൈക്കം സത്യാഗ്രഹത്തിൽ പങ്കെടുത്ത പെരിയാർ ഇ.വി. രാമസ്വാമി നായ്ക്കരുടെ പേരിൽ തമിഴ്നാട് സർക്കാർ അരൂക്കുറ്റിയിൽ നിർമിക്കുന്ന സ്മാരകത്തിന്‍റെ തറക്കല്ലിടൽ 26ന്. അരൂകുറ്റി ബോട്ട് ജെട്ടിക്ക് സമീപം സംഘടിപ്പിക്കുന്ന ചടങ്ങിൽ തമിഴ്നാട് പൊതുമരാമത്ത് വകുപ്പ് മന്ത്രി ഇ.വി. വേലുവും സംസ്ഥാന സാംസ്കാരിക വകുപ്പ് മന്ത്രി സജി ചെറിയാനും ചേർന്ന് നിർമ്മാണ ഉദ്ഘാടനം നിർവഹിക്കും. സ്മാരകത്തിനായി അരൂക്കുറ്റി ബോട്ട് ജെട്ടിക്കു സമീപം അരയേക്കർ സ്ഥലം സംസ്ഥാന സർക്കാർ തമിഴ്നാട് സർക്കാരിന് നികുതിയില്ലാതെ കൈമാറിയിരുന്നു. അവിടെ ജയിൽ മാതൃകയിൽ നിർമിക്കുന്ന സ്മാരകത്തിൽ പെരിയാറിന്‍റെ പ്രതിമ, മ്യൂസിയം, ഹാൾ, പാർക്ക്, വിനോദസഞ്ചാര പദ്ധതികൾ തുടങ്ങിയവ ഒരുക്കാനാണ് പദ്ധതി. ഒരു നിലയിലായി 1140.98 സ്ക്വയർഫീറ്റ് വിസ്തീർണത്തിൽ നിർമിക്കുന്ന കെട്ടിടത്തിന്‍റെ പണികൾ അഞ്ചുമാസത്തിനുള്ളിൽ പൂർത്തിയാക്കാനാണ് ലക്ഷ്യമിടുന്നത്. നാല് കോടി രൂപയാണ് തമിഴ്നാട് സർക്കാർ ഇതിനായി അനുവദിച്ചിരിക്കുന്നത്. തിരുവിതാംകൂർ – കൊച്ചി രാജ്യങ്ങളുടെ അതിർത്തിയായിരുന്നു അരൂക്കുറ്റി. വൈക്കം

കുര്യന്‍മല മിനി സ്റ്റേഡിയം 25ന് നാടിന് സമര്‍പ്പിക്കും

മൂവാറ്റുപുഴ : ഗ്രാമീണ മേഖലയിലെ യുവാക്കളുടെ ആരോഗ്യ പരിരക്ഷയും കായിക മേഖലയുടെ വളര്‍ച്ചയും ലക്ഷ്യമിട്ട് കുര്യന്‍മലയില്‍ നിര്‍മിച്ച മിനി സ്റ്റേഡിയം 25ന് മന്ത്രി വി. അബ്ദുള്‍ റഹ്മാന്‍ നാടിന് സമര്‍പ്പിക്കും. 70 ലക്ഷം ചെലവഴിച്ച് 24-ാം വാര്‍ഡിലാണ് ടര്‍ഫ് മാതൃകയിൽ മിനി സ്റ്റേഡിയം നിര്‍മിച്ചതെന്ന് നഗരസഭാ അധ്യക്ഷന്‍ പി.പി. എല്‍ദോസ് അറിയിച്ചു. നഗരസഭയുടെ ഉടമസ്ഥതയിലുള്ള 80 സെന്‍റ് സ്ഥലത്താണ് ആധുനിക സൗകര്യങ്ങളോടെ സ്റ്റേഡിയം നിർമിച്ചത്. സര്‍ക്കാരില്‍ നിന്ന് 35 ലക്ഷം രൂപയും, 10 ലക്ഷം നഗരസഭാ വിഹിതവും ഡീന്‍ കുര്യാക്കോസ് എംപിയുടെ ഫണ്ടില്‍ നിന്നും 10 ലക്ഷവും മാത്യു കുഴല്‍നാടന്‍ എംഎല്‍എയുടെ ഫണ്ടില്‍ നിന്നു 15 ലക്ഷവും സ്റ്റേഡിയത്തിനായി വിനിയോഗിച്ചു. സമീപ പഞ്ചായത്തുകളായ വാളകം, പായിപ്ര എന്നിവിടങ്ങളിലെ യുവജനങ്ങള്‍ക്കു പ്രയോജനം ലഭിക്കുന്നതിനാണ് കുര്യന്‍മലയില്‍ കളിക്കളം നിര്‍മിച്ചിരിക്കുന്നത്. കോണ്‍ഗ്രസ് നേതാവും മൂവാറ്റുപുഴ നഗരസഭാധ്യക്ഷനുമായിരുന്ന അന്തരിച്ച കെ.ആര്‍ സദാശിവന്‍ നായരുടെ സ്മരണാര്‍ഥം നിര്‍മിച്ച സ്റ്റേഡിയത്തോടനുബന്ധിച്ച് ടര്‍ഫ്, മഡ് കോര്‍ട്ട്, ഗാലറി, ഓഫീസ്, വിശ്രമ മുറികള്‍ തുടങ്ങി ആധുനിക സൗകര്യങ്ങള്‍ ഒരുക്കിയിട്ടുണ്ട്. രാവിലെ 11ന് നടക്കുന്ന ഉദ്ഘാടന സമ്മേളനത്തില്‍ നഗരസഭാധ്യക്ഷന്‍ പി.പി എല്‍ദോസ് അധ്യക്ഷത വഹിക്കും. ഡീന്‍ കുര്യാക്കോസ് എംപി, മാത്യു കുഴല്‍നാടന്‍ എംഎല്‍എ, നഗരസഭാ വൈസ് ചെയര്‍പേഴ്‌സണ്‍ സിനി ബിജു തുടങ്ങിയവർ പ്രസംഗിക്കും.

കാർ നിയന്ത്രണം നഷ്ടപ്പെട്ട് എതിരേവന്ന കാറിലിടിച്ചു

മൂവാറ്റുപുഴ: നിയന്ത്രണം നഷ്ടപ്പെട്ട കാര്‍ മറ്റൊരു കാറിലിടിച്ച് അപകടം. മൂവാറ്റുപുഴ -തൊടുപുഴ റോഡില്‍ ആശ്രമം ബസ് സ്റ്റാൻഡിന് സമീപം തിങ്കളാഴ്ച വൈകുന്നേരം അഞ്ചോടെയായിരുന്നു അപകടം. തൊടുപുഴ ഭാഗത്ത് നിന്നും മൂവാറ്റുപുഴ ഭാഗത്തേക്ക് വരികയായിരുന്ന ആലുവ സ്വദേശികൾ സഞ്ചരിച്ച കാര്‍ നിയന്ത്രണം നഷ്ടപ്പെട്ട് എതിര്‍ദിശയില്‍ വരികയായിരുന്ന കാറിലേക്ക് ഇടിച്ചു കയറുകയായിരുന്നു. വാഗമണ്‍ സന്ദര്‍ശിച്ച് തിരികെ വരികയായിരുന്ന മൂന്നംഗ സംഘം സഞ്ചരിച്ച കാറാണ് അപകടത്തില്‍പെട്ടത്. തൊടുപുഴ ഭാഗത്തേക്ക് പോവുകയായിരുന്ന വാഹനത്തിലുണ്ടായിരുന്ന അഡ്വ. ജയലാലിനെ പരിക്കുകളോടെ മൂവാറ്റുപഴയിലെ സ്വകാര്യ ആശുപത്രിയില്‍ പ്രവേശിപ്പിച്ചു. ടയര്‍പൊട്ടിയതാണ് അപകടകാരണമെന്ന് ദൃക്സാക്ഷികള്‍ പറഞ്ഞു. മൂവാറ്റുപുഴ പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു.

സർക്കാർ ആയുർവേദ ആശുപത്രിയിലെ സ്റ്റോർ റൂമിൽ മരുന്നുകൾക്കിടയിൽ മരപ്പട്ടി

കോതമംഗലം : കോതമംഗലത്ത് വാരപ്പെട്ടി സർക്കാർ ആയുർവേദ ആശുപത്രിയിലെ സ്റ്റോർ റൂമിൽ മരപ്പട്ടി കുഞ്ഞ് കുടുങ്ങി. വാരപ്പെട്ടിയിലെ ആയുഷ് പ്രൈമറി ഹെൽത്ത് സെന്‍ററിൽ മരുന്നുകൾ സൂക്ഷിക്കുന്ന മുറിയിൽ ഒളിച്ചിരിക്കുന്ന നിലയിലാണ് മരപ്പട്ടിയെ കണ്ടത്. രാവിലെ ആശുപത്രിയിലെത്തിയ ഡോക്ടർ മുറി തുറന്നപ്പോഴാണ് മരപ്പട്ടിയെ കണ്ടത്.വനം വകുപ്പിനെ വിവരമറിയിച്ചതിനെ തുടർന്ന് മുവാറ്റുപുഴയിൽ നിന്ന് മൃഗ സ്നേഹി സേവി എത്തിയാണ് മരപ്പട്ടിയെ പിടികൂടിയത്. വനത്തിൽ തുറന്ന് വിടുമെന്ന് അധികൃതർ പറഞ്ഞു.

കോടനാട് ആനപരിശീലന കേന്ദ്രം പൂര്‍വസ്ഥിതിയിലാക്കണമെന്ന്

കോതമംഗലം: കാട്ടാനകളുടെ ശല്യം അതിരൂക്ഷമായ സാഹചര്യത്തില്‍ ഇവയെ പിടികൂടി നാട്ടാനകളാക്കി മാറ്റാൻ ബൃഹദ്പദ്ധതിക്ക് രൂപം നല്കണമെന്ന് കർഷക കോൺഗ്രസ് കോട്ടപ്പടി മേഖലാ കണ്‍വന്‍ഷന്‍ ആവശ്യപ്പെട്ടു. ഇതിനായി കോടനാട് ആന പരിശീലനകേന്ദ്രം പൂര്‍വസ്ഥിതിയിലാക്കണം. കോട്ടപ്പടി പഞ്ചായത്തിലെ വനാതിര്‍ത്തികളില്‍ അടിയന്തരമായി ഫെന്‍സിംഗ് സ്ഥാപിക്കണമെന്നും കര്‍ഷക ഇന്‍ഷ്വറന്‍സ് കുടിശിക അനുവദിക്കണമെന്നും കണ്‍വന്‍ഷന്‍ ആവശ്യപ്പെട്ടു. മണ്ഡലം പ്രസിഡന്‍റ് പി.പി. മത്തായി അധ്യക്ഷനായി. കര്‍ഷകകോണ്‍ഗ്രസ് സംസ്ഥാന ജനറല്‍ സെക്രട്ടറി പി.സി. ജോര്‍ജ് ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് ജെയിംസ് കോറമ്പേല്‍, എം.സി. അയ്യപ്പന്‍, കോണ്‍ഗ്രസ് മണ്ഡലം പ്രസിഡന്‍റ് കെ.കെ. സുരേഷ്, എം.കെ. എല്‍ദോസ്, ആന്‍റണി കോട്ടപ്പടി, സി.കെ. ജോര്‍ജ്, സ്കറിയ തോമസ്, സി.ജെ. ചാക്കോ, എന്‍.കെ. കുമാരാന്‍, എ.വി. ജോണി, എ.യു. തോമസ്, വി.എ. ഗോപാലന്‍, സി.എം. ജോണി എന്നിവര്‍ പ്രസംഗിച്ചു.

ആത്മാഭിമാന സംഗമം നടത്തി

മൂവാറ്റുപുഴ : കെഎസ്കെടിയു ആയവന വില്ലേജ് കമ്മിറ്റിയുടെ നേതൃത്വത്തിൽ ക്ഷേമ പെൻഷൻ, ലൈഫ് ഗുണഭോക്താക്കളുടെ ആത്മാഭിമാന സംഗമം നടത്തി. കെഎസ്കെടിയു ജില്ലാ ട്രഷറർ എൻ.എസ്. സജീവൻ ഉദ്ഘാടനം ചെയ്തു. വില്ലേജ് പ്രസിഡന്‍റ് കെ.ജി. കൃഷ്ണൻകുട്ടി അധ്യക്ഷത വഹിച്ചു. സിപിഎം ലോക്കൽ സെക്രട്ടറി കെ.കെ. വാസു, കെഎസ്കെടിയു വില്ലേജ് സെക്രട്ടറി ടി.പി. ജയൻ, പഞ്ചായത്ത് അംഗങ്ങളായ ജൂലി സുനിൽ, മിനി വിശ്വനാഥൻ തുടങ്ങിയവർ പ്രസംഗിച്ചു. മൂവാറ്റുപുഴ: കെഎസ്കെടിയു മാറാടി വില്ലേജ് കമ്മിറ്റിയുടെ നേതൃത്വത്തിൽ ക്ഷേമ പെൻഷൻ, ലൈഫ് ഗുണഭോക്താക്കളുടെ ആത്മാഭിമാന സംഗമം നടത്തി. കെഎസ്കെടിയു സംസ്ഥാന കമ്മിറ്റി അംഗം സി.കെ. വർഗീസ് ഉദ്ഘാടനം ചെയ്തു. വില്ലേജ് പ്രസിഡന്‍റ് ശാന്ത സുധാകരൻ അധ്യക്ഷത വഹിച്ചു. കെഎസ്കെടിയു ഏരിയ പ്രസിഡന്‍റ് ടി.എൻ. മോഹനൻ, വില്ലേജ് സെക്രട്ടറി വി.പി. മാത്യൂസ്, സി.എൻ. രാജപ്പൻ തുടങ്ങിയവർ പ്രസംഗിച്ചു.

കാട്ടാനശല്യം പരിഹരിക്കാൻ നടപടി വേണമെന്ന് പൗരസമിതി

കോതമംഗലം: കോതമംഗലം നിയോജക മണ്ഡലത്തിലെ കോട്ടപ്പടി, പിണ്ടിമന, കുട്ടമ്പുഴ, കീരംപാറ,കവളങ്ങാട്, പൈങ്ങോട്ടൂർ എന്നീ പഞ്ചായത്തുകളിലെ രൂക്ഷമായ കാട്ടാനശല്യം പരിഹരിക്കാൻ അടിയന്തര നടപടി വേണമെന്ന് കോതമംഗലം മേഖല പൗരസമിതി ആവശ്യപ്പെട്ടു. കാട്ടാന ശല്യം മൂലം പ്രദേശവാസികൾ പൊറുതിമുട്ടിയിരിക്കികയാണ്. കയ്യാലകളും, മതിലുകളും കൃഷിയുമെല്ലാം നശിപ്പിച്ച് ആനക്കൂട്ടം സ്വൈര്യവിഹാരം നടത്തുന്നു. ഒട്ടേറെ മനുഷ്യജീവനുകളാണ് കാട്ടാന ആക്രമണത്തിൽ പൊലിഞ്ഞിട്ടുള്ളത്. ദിവസവും അനക്കൂട്ടം കിലോമീറ്ററുകൾ സഞ്ചരിച്ച് സംഹാര താണ്ഡവം നടത്തുകയാണ്. കാട്ടാന ശല്യത്തിൽ വനം വകുപ്പാകട്ടെ തികഞ്ഞ നിസ്സംഗതയും പുലർത്തുന്നു. കാട്ടാന ശല്യം പരിഹരിക്കാൻ നടപടി വേണമെന്നും കാട്ടാനആക്രമണം മൂലം നഷ്ടം സംഭവിച്ചവർക്ക് ഇരട്ടി തുക നഷ്ടപരിഹാരം നൽകണമെന്നും കോതമംഗലം മേഖലാ പൗരസമിതി പ്രവർത്തയോഗം ആവശ്യപ്പെട്ടു. വി.എം. പീറ്റർ ഉദ്ഘാടനം ചെയ്തു. തോമസ് കൊച്ചുമുട്ടം മുഖ്യപ്രഭാഷണം നടത്തി. പ്രസിഡന്‍റ് ബേബി പൗലോസ് അധ്യക്ഷതവഹിച്ചു. സൂരജ് മലയിൽ, സജി തെക്കേക്കര, ഷിന്‍റോ വർഗീസ്, ശശി കുഞ്ഞുമോൻ, ജോസ് കാട്ടുവള്ളി, സാജൻ അമ്പാട്ട്, ടി. പി. തമ്പാൻ, ജോസ് മെ തിപാറ, റെജി പാത്താടൻ, സിജി പണ്ടാലിൽ, എസ്.എം. അബ്ബാസ്, രാജീവ്‌ ജോസഫ് എന്നിവർ പ്രസംഗിച്ചു.

എംജിഎം കോളജിൽ സൗജന്യ നേത്ര, തൈറോയ്ഡ് പരിശോധന ക്യാമ്പ്

കൂത്താട്ടുകുളം: എൻഎസ്എസ് ദിനാചരണത്തിന്‍റെ ഭാഗമായി നാളെ പാമ്പാക്കുട എംജിഎം കോളജ് കാമ്പസിൽ സൗജന്യ നേത്ര, തൈറോയ്ഡ് പരിശോധനാ ക്യാമ്പ് നടത്തും. പാമ്പാക്കുട പഞ്ചായത്ത് പ്രസിഡന്‍റ് ശ്രീകാന്ത് നന്ദനൻ ഉദ്ഘാടനം ചെയ്യും. രാവിലെ 10 മുതൽ ഉച്ചയ്ക്ക് രണ്ടു വരെയാണ് ക്യാന്പ്. വിദ്യാർഥികൾക്ക്‌ പുറമേ പൊതുജനങ്ങൾക്കും പങ്കെടുക്കാം. എംജിഎം കോളജിലെ എൻഎസ്എസ് യൂണിറ്റുകളും മൂവാറ്റുപുഴയിലെ അഹല്യ ഫൗണ്ടേഷൻ ഐ ഹോസ്പിറ്റലും സംയുക്തമായാണ് പരിപാടി സംഘടിപ്പിക്കുന്നത്.

തിരുമാറാടിയിൽ ‘ധ്വനി 2025' ഭിന്നശേഷി കലോത്സവം

തിരുമാറാടി : പഞ്ചായത്തിൽ നടന്ന ധ്വനി 2025 ഭിന്നശേഷി കലോത്സവം ബ്ലോക്ക്‌ പഞ്ചായത്ത്‌ പ്രസിഡന്‍റ് സ്മിത എൽദോസ് ഉദ്ഘാടനം ചെയ്തു. പഞ്ചായത്ത്‌ വൈസ് പ്രസിഡന്‍റ് എം.എം. ജോർജ് അധ്യക്ഷത വഹിച്ചു. തിരുമാറാടി പഞ്ചായത്ത് 2025-26 വാർഷിക പദ്ധതിയിൽ ഉൾപ്പെടുത്തിയാണ് കലോത്സവം സംഘടിപ്പിച്ചത്. ജില്ലാ പഞ്ചായത്ത്‌ പൊതുമരാമത്ത് സ്ഥിരം സമിതി അധ്യക്ഷ ആശാ സനൽ മുഖ്യപ്രഭാഷണം നടത്തി. സ്ഥിരം സമിതി അധ്യക്ഷൻ സാജു ജോൺ, അനിത ബേബി, രമ എം. കൈമൾ, ബ്ലോക്ക് പഞ്ചായത്ത് അംഗം സിബി ജോർജ്, പഞ്ചായത്ത് അംഗങ്ങളായ കെ.കെ. രാജ്‌കുമാർ, നെവിൻ ജോർജ്, സുനി ജോൺസൺ, ആലിസ് ബിനു, ഐസിഡിഎസ് സൂപ്പർവൈസർ സുനിത സുരേന്ദ്രൻ എന്നിവർ പ്രസംഗിച്ചു. ഉഴവൂർ സീനായി സ്പെഷൽ സ്കൂൾ വിദ്യാർഥി- വിദ്യാർഥിനികൾ, മുതിർന്ന ഭിന്നശേഷി കലാകാരന്മാരും വിവിധ കലാപരിപാടികൾ അവതരിപ്പിച്ചു.

റോഡ് ഉദ്ഘാടനം ചെയ്തു

പോത്താനിക്കാട്: പൈങ്ങോട്ടൂർ പഞ്ചായത്ത് അഞ്ചാം വാർഡിൽ ജില്ലാപഞ്ചായത്ത് ഫണ്ട് ഉപയോഗിച്ചു നിർമിച്ച പാറേപ്പടി അംബേദ്കർ എസ് സി നഗർ റോഡ് ജില്ലാ പഞ്ചായത്തംഗം റാണിക്കുട്ടി ജോർജ് ഉദ്ഘാടനം ചെയ്തു. ബ്ലോക്ക് പഞ്ചായത്തംഗം ആനീസ് ഫ്രാൻസീസ് അധ്യക്ഷത വഹിച്ചു. റെജി സാന്‍റി, സാറാമ്മ പൗലോസ്, നൈസ് എൽദോ തുടങ്ങിയവർ പ്രസംഗിച്ചു.

കാരക്കുന്നം സെന്‍റ് മേരീസ് പള്ളിയില്‍ ദമ്പതീ സംഗമം

മൂവാറ്റുപുഴ: ഫാമിലി അപ്പോസ്റ്റലേറ്റ് കോതമംഗലം രൂപതയുടെ നേതൃത്വത്തില്‍ കാരക്കുന്നം സെന്‍റ് മേരീസ് പള്ളിയില്‍ ദമ്പതീ സംഗമം സംഘടിപ്പിക്കുന്നു. 28 മുതല്‍ ഒന്ന് വരെ നടക്കുന്ന സായാഹ്ന കണ്‍വന്‍ഷനില്‍ ദിവസവും വൈകുന്നേരം അഞ്ചിന് വിശുദ്ധ കുര്‍ബാന, ആറിനും 7.15നും ക്ലാസ്, 8.15ന് ആരാധന, 8.30ന് സമാപനം. റവ. ഡോ. ആന്‍റണി പുത്തന്‍കുളം, ബ്രദർമാരായ പാപ്പച്ചന്‍ പള്ളത്ത്, സുനില്‍ പന്നിയാര്‍കുട്ടി, ടിറ്റോ കണ്ണാട്ട്, ആനി ഇളയിടം എന്നിവര്‍ കണ്‍വന്‍ഷന്‍ നയിക്കുമെന്ന് വികാരി ഫാ. ജോര്‍ജ് വള്ളോംകുന്നേല്‍, സഹ വികാരി ഫാ. ഗീവര്‍ഗീസ് വെട്ടുകുഴിയില്‍ എന്നിവര്‍ അറിയിച്ചു.

സൗജന്യ മെഡിക്കല്‍ ക്യാമ്പും സാന്ത്വന ഹസ്തം പദ്ധതിയും

മൂവാറ്റുപുഴ: മൂവാറ്റുപുഴക്കാവ് ഭഗവതീക്ഷേത്രവും മൂവാറ്റുപുഴ സെന്‍റ് ജോര്‍ജ് ആശുപത്രിയും സംയുക്തമായി സംഘടിപ്പിക്കുന്ന സൗജന്യ മെഡിക്കല്‍ ക്യാന്പും സാന്ത്വന ഹസ്തം പദ്ധതി ഉദ്ഘാടനവും അഞ്ചിന് നടക്കും. മൂവാറ്റുപുഴക്കാവ് സങ്കീര്‍ത്തന അന്നദാന മണ്ഡപത്തില്‍ രാവിലെ ഒമ്പതു മുതല്‍ ഉച്ചയ്ക്ക് 12 വരെയാണ് ക്യാമ്പ്. രാവിലെ 8.30ന് രജിസ്‌ട്രേഷന്‍, ഒമ്പതിന് ഡോ. പോള്‍ പി. കല്ലുങ്കല്‍ ആരോഗ്യ ബോധവത്കരണ ക്ലാസെടുക്കും. 11ന് ക്ഷേത്ര സമിതി നടപ്പാക്കുന്ന സാന്ത്വന ഹസ്തം പദ്ധതി മാത്യു കുഴല്‍നാടന്‍ എംഎല്‍എ ഉദ്ഘാടനം ചെയ്യും. ക്യാമ്പില്‍ ബ്ലഡ് ഷുഗര്‍, പള്‍മണറി ഫംഗ്ഷന്‍, യൂറിക് ആസിഡ്, ഇസിജി എന്നീ പരിശോധനകള്‍ സൗജന്യമായി നടത്തും.

‘മാറ്റൊലി' ഇന്ന് മൂവാറ്റുപുഴയിൽ

മൂവാറ്റുപുഴ : കാസര്‍കോഡ് നിന്ന് കെപിഎസ്ടിഎ സംസ്ഥാന കമ്മിറ്റിയുടെ നേതൃത്വത്തില്‍ ആരംഭിച്ച പൊതുവിദ്യാഭ്യാസ പരിവര്‍ത്തന സന്ദേശ യാത്ര മാറ്റൊലി ഇന്ന് മൂവാറ്റുപുഴയില്‍ എത്തിച്ചേരും. ഉച്ചകഴിഞ്ഞ് മൂന്നിന് കെഎസ്ആര്‍ടിസിക്ക് സമീപം വിദ്യാഭ്യാസ ജില്ലാ തല സ്വീകരണം നല്‍കും. എഐസിസി അംഗം ജെയ്‌സണ്‍ ജോസഫ് ഉദ്ഘാടനം ചെയ്യും. നഗരസഭാധ്യക്ഷന്‍ പി.പി. എല്‍ദോസ്, അബിന്‍ വര്‍ക്കി, കെപിസിസി, ഡിസിസി ഭാരവാഹികള്‍, സര്‍വീസ് സംഘടന നേതാക്കള്‍, പെന്‍ഷന്‍ സംഘടനകള്‍, പൊതുപ്രവര്‍ത്തകര്‍, അധ്യാപകര്‍ തുടങ്ങിയവര്‍ ചേര്‍ന്ന് വിപുലമായ സ്വീകരണം നല്‍കുമെന്ന് വിദ്യാഭ്യാസ ജില്ലാ പ്രസിഡന്‍റ് ബിജു കെ. ജോണ്‍, സെക്രട്ടറി അനൂബ് ജോണ്‍, ട്രഷറര്‍ സെസില്‍ സി. ജോസ് എന്നിവര്‍ അറിയിച്ചു.

നവരാത്രിയാഘോഷത്തിനു തുടക്കം

മൂവാറ്റുപുഴ : ആനിക്കാട് തിരുവുംപ്ലാവില്‍ മഹാദേവ ക്ഷേത്രത്തില്‍ നവരാത്രിയാഘോഷത്തിന് തുടക്കമായി. ഒക്ടോബർ രണ്ടിന് സമാപിക്കും. വിദ്യാര്‍ഥികള്‍ക്കായി നവരാത്രിസാധനയും ബ്രഹ്മീഘൃത സേവയും ഒരുക്കിയിട്ടുണ്ട്. ദിവസവും രാവിലെ 6.45 മുതല്‍ 7.30 വരെ വിദ്യാര്‍ഥികള്‍ക്കായി നാമജപം, സരസ്വതീ വന്ദനം, ബ്രഹ്മീഘൃത സേവ എന്നിവ ഉണ്ടായിരിക്കും.

ലേബർ മൂവ്മെന്‍റ് തൃക്കാരിയൂർ യൂണിറ്റ് ആരംഭിച്ചു

കോതമംഗലം: അസംഘടിത തൊഴിലാളികളുടെ ക്ഷേമത്തിനായി പ്രവർത്തിക്കുന്ന കോതമംഗലം രൂപത ലേബർ മൂവ്മെന്‍റിന്‍റെ തൃക്കാരിയൂർ സെന്‍റ് തോമസ് ഇടവക യൂണിറ്റിന്‍റെ പ്രവർത്തനോദ്ഘാടനം ഇടവക വികാരി ഫാ. മാത്യു മുണ്ടക്കൽ നിർവഹിച്ചു. രൂപതാ പ്രസിഡന്‍റ് തോമസ് മാത്യു മുഖ്യപ്രഭാഷണം നടത്തി. രൂപത പാലിയേറ്റീവ് ഹോം കെയർ കോ-ഓർഡിനേറ്റർ ആന്‍റണി പുല്ലൻ, കോതമംഗലം ഫൊറോന പ്രസിഡന്‍റ് തോമസ് ജോൺ, രൂപത ആനിമേറ്റർ സിസ്റ്റർ ഗ്ലോറി എന്നിവർ പ്രസംഗിച്ചു. യൂണിറ്റ് ഭാരവാഹികളായി ജോയ് പടയാട്ടിൽ- പ്രസിഡന്‍റ്, ജസീന്ത ടോമി -വൈസ് പ്രസിഡന്‍റ്, ജിജോ പുളിമൂട്ടിൽ- ജനറൽ സെക്രട്ടറി, സിമി സണ്ണി -ജോയിന്‍റ് സെക്രട്ടറി, സണ്ണി പട്ടേരിപ്പറമ്പിൽ- ട്രഷറർ എന്നിവരെ തെരഞ്ഞെടുത്തു.

ഭർത്താവ് മരിച്ച് പന്ത്രണ്ടാം ദിനം ഭാര്യയും യാത്രയായി

ആലുവ: കാലടി മറ്റൂർ പിരാരൂർ പരേതനായ കന്നപ്പിള്ളി തോമ കുഞ്ഞു വറീതിന്‍റെ ഭാര്യ ഏലിക്കുട്ടി വർഗീസ് (97) അന്തരിച്ചു. 12 ദിവസം മുന്പാണ് ഭർത്താവ് മരിച്ചത്. സംസ്കാരം ഇന്നു മൂന്നിന് മറ്റൂർ സെന്‍റ് ആന്‍റണീസ് ഇടവക ദേവാലയത്തിൽ. മക്കൾ: ലീലാമ്മ ആന്‍റോ, കെ.വി. തോമസ്, മേരി അഗസ്റ്റിൻ, റോസിലി വക്കച്ചൻ, കെ വി ജോസ്, ഷേർളി ജോണി, ഡോ. ഷാജി വർഗീസ് (എംഡി, ഫീനിക്സ് ഗ്രൂപ്പ് , (ഓസ്ട്രേലിയ), ജിജി വർഗീസ് (പ്രധാനാധ്യാപിക, ആലുവ അന്ധവിദ്യാലയം). മരുമക്കൾ: ആന്‍റോ കാവുങ്ങൽ , അഗസ്റ്റിൻ പാറയ്ക്കൽ , ആനീസ് തോമസ്, വി.കെ. ജോണി (ബ്രദേഴ്സ് ഫാർമ, കാഞ്ഞൂർ), ബ്രൈറ്റി ജോസ്, ജാൻസി ഷാജി, സുനിൽ ഫ്രാൻസിസ് ( ആലുവ അന്ധവിദ്യാലയം), പരേതനായ വക്കച്ചൻ അറയ്ക്കൽ.

റേ പാര്‍പ്പിട സമുച്ചയ ഉദ്ഘാടനം 27ന് മുഖ്യമന്ത്രി നിർവഹിക്കും

കൊച്ചി: തുരുത്തി കോളനി നിവാസികള്‍ ഉള്‍പ്പടെയുള്ളവര്‍ക്കായി കൊച്ചി കോര്‍പറേഷനും സിഎസ്എംഎല്ലും നിര്‍മിച്ച രണ്ട് ഫ്ലാറ്റ് സമുച്ചയങ്ങളുടെ ഉദ്ഘാടനം മുഖ്യമന്ത്രി പിണറായി വിജയന്‍ 27ന് വൈകുന്നേരം അഞ്ചിന് നിര്‍വഹിക്കും. രാജീവ് ആവാസ് യോജന പദ്ധതി (റേ) പ്രകാരം നിര്‍മിച്ച ഫ്ലാറ്റ് സമുച്ചയങ്ങളില്‍ 394 കുടുംബങ്ങളെയാണ് പുനരധിവസിപ്പിക്കുന്നത്.

എം.എം. ലോറൻസ് അനുസ്മരണം

മൂവാറ്റുപുഴ: എം.എം. ലോറൻസ് അനുസ്മരണം വിവിധ കേന്ദ്രങ്ങളിൽ സംഘടിപ്പിച്ചു. പി.പി. എസ്തോസ് ഭവനു മുന്നിൽ സിപിഎം ജില്ലാ സെക്രട്ടറിയറ്റ് അംഗം പി.ആർ. മുരളീധരൻ പതാക ഉയർത്തി അനുസ്മരണ പ്രഭാഷണം നടത്തി. പി.ബി. അജിത്കുമാർ അധ്യക്ഷത വഹിച്ചു. ഏരിയ സെക്രട്ടറി അനീഷ് എം മാത്യു, കെ.ജി. അനിൽകുമാർ എന്നിവർ പ്രസംഗിച്ചു. വാഴപ്പിള്ളിയിൽ ചേർന്ന അനുസ്മരണ സമ്മേളനം സിപിഎം ജില്ലാ സെക്രട്ടറിയേറ്റ് അംഗം ആർ. അനിൽകുമാർ ഉദ്ഘാടനം ചെയ്തു. മൂവാറ്റുപുഴ മുനിസിപ്പൽ നോർത്ത് ലോക്കൽ സെക്രട്ടറി കെ.ജി. അനിൽകുമാർ അധ്യക്ഷത വഹിച്ചു. ഏരിയാ സെക്രട്ടറി അനീഷ് എം. മാത്യു, ഏരിയാ കമ്മിറ്റി അംഗങ്ങളായ സി.കെ. സോമൻ, സജി ജോർജ്, കെ.പി. രാമചന്ദ്രൻ, ആർ. രാകേഷ്, ഷാലി ജയിൻ തുടങ്ങിയവർ പ്രസംഗിച്ചു. കോതമംഗലം: സിപിഎം കോതമംഗലം ഏരിയ കമ്മറ്റി സംഘടിപ്പിച്ച അനുസ്മരണം ജയ്ക് സി. തോമസ് ഉദ്ഘാടനം ചെയ്തു. സിഐടിയു ഏരിയ സെക്രട്ടറി സിപിഎസ് ബാലൻ അധ്യക്ഷത വഹിച്ചു. കെ.കെ. ശിവൻ, പി.എം. അഷ്റഫ്, പി.എം. മുഹമ്മദാലി എന്നിവർ പ്രസംഗിച്ചു.

കോതമംഗലത്തെ ബ്ലോക്ക് പഞ്ചായത്ത് കോമ്പൗണ്ടും ഓഫീസുകളും നവീകരിച്ചു

കോതമംഗലം: ബ്ലോക്ക് പഞ്ചായത്ത് കോമ്പൗണ്ടും അനുബന്ധ ഓഫീസുകളും നവീകരിച്ചു. നവീകരിച്ച ബ്ലോക്ക് പഞ്ചായത്ത് ഓഫീസിന്‍റെ ഉദ്ഘാടനം പ്രതിപക്ഷ നേതാവ് വി.ഡി.സതീശൻ നിർവഹിച്ചു. നവീകരിച്ച എൽഎസ്ജിഡി ഓഫീസിന്‍റെ ഉദ്ഘാടനം ഡീൻ കുര്യാക്കോസ് എംപിയും നടത്തി. മാത്യു കുഴൽനാടൻ എംഎൽഎ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ, ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ, ബ്ലോക്ക് പഞ്ചായത്ത് വൈസ് പ്രസിഡന്‍റ് ഡയാന നോബി, പഞ്ചായത്ത് പ്രസിഡന്‍റുമാരായ സജി കെ. വർഗീസ്, ജെസിസാജു, ഗോപി മുട്ടത്ത്, ജില്ലാ പഞ്ചായത്ത് അംഗം റാണിക്കുട്ടി ജോർജ്, ബ്ലോക്ക് പഞ്ചായത്ത് സ്ഥിരം സമിതി ചെയർമാൻമാരായ ജോമി തെക്കേക്കര, സാലി ഐപ്, ജെയിംസ് കോറമ്പേൽ, ബ്ലോക്ക് പഞ്ചായത്ത് അംഗങ്ങളായ നിസമോൾ ഇസ്മായിൽ, ആനിസ് ഫ്രാൻസിസ്, ടി.കെ. കുഞ്ഞുമോൻ, ലിസി ജോസഫ്, ബിഡിഒ സി.ഒ. അമിത, മുൻമന്ത്രി ടി.യു. കുരുവിള, കെപിസിസി അംഗം എ.ജി. ജോർജ്, യുഡിഎഫ് ജില്ലാ കൺവീനർ ഷിബു തെക്കുംപുറം തുടങ്ങിയവർ പ്രസംഗിച്ചു.

കോൺഗ്രസ് തിരുമാറാടി മണ്ഡലം കൺവൻഷൻ

തിരുമാറാടി: കോൺഗ്രസ്-ഐ തിരുമാറാടി മണ്ഡലം കൺവൻഷൻ കാക്കൂർ മിനി ഓഡിറ്റോറിയത്തിൽ നടന്നു. ഡിസിസി പ്രസിഡന്‍റ് മുഹമ്മദ് ഷിയാസ് ഉദ്ഘാടനം നിർവഹിച്ചു. മണ്ഡലം പ്രസിഡന്‍റ് ജോൺസൺ കെ. വർഗീസ് അധ്യക്ഷത വഹിച്ചു. കെപിസിസി വൈസ് പ്രസിഡന്‍റ് വി.പി. സജീന്ദ്രൻ മുഖ്യപ്രഭാഷണം നടത്തി. വിവിധ മേഖലകളിൽ പ്രാഗത്ഭ്യം തെളിയിച്ചവരെ ചടങ്ങിൽ ജയ്സൺ ജോസഫ് ആദരിച്ചു. മുതിർന്ന കോൺഗ്രസ് അംഗങ്ങളെ മുഹമ്മദ് ഷിയാസ് മെമന്‍റോ നൽകി ആദരിച്ചു. ജില്ലാ പഞ്ചായത്ത് സ്ഥിരംസമിതി അധ്യക്ഷ ആശ സനിൽ, മണ്ഡലം വൈസ് പ്രസിഡന്‍റ് സെബാസ്റ്റ്യൻ പൈലി, ബ്ലോക്ക് പ്രസിഡന്‍റ് പി.സി. ജോസ്, യുഡിഫ് നിയോജക മണ്ഡലം ചെയർമാൻ കെ.ആർ. ജയകുമാർ, സാജു മടക്കാലി, അനിത ബേബി, ബെന്നി പൈലി തുടങ്ങിയവർ പ്രസംഗിച്ചു.

ആറ്റുതീരം പാർക്ക് നവീകരണം

പിറവം: പാഴൂർ ആറ്റുതീരം പാർക്കിലേക്കുള്ള പ്രവേശന റോഡിൽ പൂർത്തിയാക്കിയ നവീകരണ പദ്ധതികൾ നഗരസഭാ ചെയർപേഴ്സൺ ജൂലി സാബു ഉദ്ഘാടനം ചെയ്തു. പുഴയോരം കെട്ടി സംരക്ഷിച്ചാണ് പാർക്ക് പൂർത്തിയാക്കിരിക്കുന്നത്. നഗരസഭാ വാർഷിക പദ്ധതിയിൽ ഉൾപ്പെടുത്തിയ തുക ഉപയോഗിച്ച് പ്രവേശന റോഡിൽ ഇന്‍റർലോക്ക് ഇഷ്ടിക വിരിക്കുകയും, സൈഡിൽ ഇരുമ്പു തൂണുകൾ സ്ഥാപിക്കുകയും, സംരക്ഷണ സ്റ്റിക്കർ പതിക്കുകയും ചെയ്തു. വൈസ് ചെയർമാൻ കെ.പി. സലിം അധ്യക്ഷത വഹിച്ചു. ബിമൽ ചന്ദ്രൻ, വത്സല വർഗീസ്, അജേഷ് മനോഹരൻ, പി. ഗിരീഷ്കുമാർ, സി.ജെ. ജോജിമോൻ എന്നിവർ പ്രസംഗിച്ചു

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]