ADVERTISEMENT

ADVERTISEMENT

അഥീന മറിയം ജോൺസണു വരവേല്പ്

കൊരട്ടി: മലേഷ്യയിൽ നടന്ന ഏഷ്യാ കപ്പ് അണ്ടർ - 16 വനിതാ ബാസ്കറ്റ്ബോൾ ബി - ഡിവിഷൻ ചാമ്പ്യൻഷിപ്പിൽ ജേതാക്കളായ ഇന്ത്യൻ ടീമിനുവേണ്ടി കളിച്ച കൊരട്ടി എൽഎഫ് കോൺവന്‍റ് ഹയർസെക്കൻഡറി സ്കൂളിലെ വിദ്യാർഥി അഥീന മറിയം ജോൺസണ് പ്രൗഢോജ്വലമായ സ്വീകരണം.

സ്കൂൾ അധികൃതരും പിടിഎയും വിദ്യാർഥികളും നാട്ടുകാരുംചേർന്ന് സ്കൂളിൽ അനുമോദയോഗം സംഘടിപ്പിച്ചു. കൊരട്ടി ജംഗ്ഷനിൽനിന്നു വാദ്യമേളങ്ങളുടെ അകമ്പടിയോടെ എതിരേറ്റു. സനീഷ്കുമാർ ജോസഫ് എംഎൽഎ ഉദ്ഘാടനംചെയ്തു. ബ്ലോക്ക് പഞ്ചായത്ത് പ്രസിഡന്‍റ് വേണു കണ്ടരുമഠത്തിൽ അധ്യക്ഷത വഹിച്ചു. ഗ്രാമപഞ്ചായത്ത് പ്രസിഡന്‍റ് പി.സി. ബിജു, ചാലക്കുടി എഇഒ പി.ബി. നിഷ, ജില്ലാ പഞ്ചായത്തംഗം ലീല സുബ്രഹ്മണ്യൻ, വാർഡ് മെമ്പർ ജെയ്നി ജോഷി, ബാസ്കറ്റ്ബോൾ അസോസിയേഷൻ ഭാരവാഹികളായ പി.ജെ. ആന്‍റണി, പി.ജെ. സണ്ണി, സിസ്റ്റർ ട്രീസ വടക്കുഞ്ചേരി, പ്രധാനാധ്യാപിക സിസ്റ്റർ എൽസ ജോസ എന്നിവർ പ്രസംഗിച്ചു. കായികാധ്യാപകൻ വിന്നി ബെസ്റ്റിന്‍റെ ശിക്ഷണത്തിൽ പരിശീലനംനേടിയ അഥീന ഇന്ത്യൻ ടീമിൽ കേരളത്തിൽനിന്നു പങ്കെടുത്ത ഏക താരമാണ്.

ഇരിങ്ങാലക്കുട സെന്‍റ് ജോസഫ്സ് കോളജിലെയും കേരള സ്പോർട്സ് കൗൺസിലിലെയും ബാസ്കറ്റ്ബോൾ പരിശീലകനായ ജോൺസൺ തോമസിന്‍റെയും തൃശൂർ സെന്‍റ് മേരീസ് കോളജിലെ ഫിസിക്കൽ എഡ്യുക്കേഷൻ വിഭാഗം മേധാവി അനു ഡി. ആലപ്പാട്ടിന്‍റെയും മകളാണ് അഥീന.

ADVERTISEMENT

കാണാതിരിക്കരുത് ഈ ചിത്രക്കാഴ്ചകൾ

തൃശൂർ: അടുക്കളയിൽനിന്ന് അരങ്ങത്തേക്കല്ല, ചിത്രക്കാഴ്ചകളുമായി അമ്മമാർ അക്കാദമിയിലേക്ക് എത്തിയിരിക്കുന്നു. ഒരുകാരണവശാലും കാണാതിരിക്കരുത് ഈ അമ്മമാരുടെ ചിത്രകല്പനകൾ. അടുക്കളയിലും പാടത്തുമൊക്കെ പണിയെടുത്ത് കുടുംബം നോക്കിയിരുന്ന കെ. മാധവി, ദേവു നെൻമാറ എന്ന രണ്ട് അമ്മമാരാണ് തങ്ങൾ വരച്ച ചിത്രങ്ങളുമായി ലളിതകല അക്കാദമി ആർട്ട് ഗാലറിയിലെത്തിയിരിക്കുന്നത്. ചിത്രരചന പഠിച്ചിട്ടില്ലെങ്കിലും വീട്ടിലുള്ള കലാകാരൻമാർ വരയ്ക്കുന്നതു നോക്കി മനസിലാക്കിയ അനുഭവസന്പത്തിൽനിന്നാണ് വൈവിധ്യമാർന്ന ചിത്രങ്ങൾ രൂപംകൊണ്ടിരിക്കുന്നത്. "പൂമരങ്ങളും പൊലിവള്ളികളും' എന്നാണ് ചിത്രപ്രദർശനത്തിനിട്ടിരിക്കുന്ന പേര്. കാസർഗോഡുനിന്നാണ് ചിത്രങ്ങളുമായി മാധവിയെത്തിയതെങ്കിൽ പാലക്കാട് ജില്ലയിലെ നെന്മാറയിൽനിന്നാണ് ദേവുവിന്‍റെ വരവ്. ഒരു നിഗൂഢതയും ഒളിപ്പിച്ചുവച്ച് കാഴ്ചക്കാരെ കുഴക്കുന്നതല്ല രണ്ടുപേരുടെയും ചിത്രങ്ങൾ. ജീവിതത്തിൽ കണ്ട കാഴ്ചകൾതന്നെയാണ് കൂടുതലും. 62 വയസുള്ള മാധവി അന്പതാംവയസിലാണ് പെയിന്‍റും ബ്രഷും കൈയിലെടുക്കുന്നത്. കോവിഡ് കാലത്ത് അന്പതാംവയസിലാണ് ദേവു ചായക്കൂട്ടുകൾ കടലാസുകളിലേക്കു ചേർത്തുവയ്ക്കുന്നത്. രണ്ടുപേരുടെയും കലാകാരന്മാരായ മക്കൾ അമ്മമാരുടെ കഴിവുകൾ തിരിച്ചറിഞ്ഞു പ്രോത്സാഹിപ്പിച്ചതോടെ ഇരുവരുടെയും തലവര മാറുകയായിരുന്നു. ബംഗളൂരുവിൽ ദേവു മകൻ ഉണ്ണികൃഷ്ണനൊപ്പം മുന്പ് ചിത്രപ്രദർശനം നടത്തിയിട്ടുണ്ടെങ്കിലും കേരളത്തിൽ ഇതാദ്യമായാണ്. മാധവിയുടെ ചിത്രങ്ങൾ ഇതാദ്യമായാണ് പുറംലോകം കാണുന്നത്. 29 വരെയാണ് പ്രദർശനം. വരയ്ക്കുന്പോൾ എന്തു തോന്നുന്നു എന്ന ചോദ്യത്തിന്, ഭയങ്കര സന്തോഷം കിട്ടുന്നുവെന്നായിരുന്നു ഇരുവരുടെയും മറുപടി.

അപൂർവരോഗം: അവനികയ്ക്കും ആയുഷിനും സഹായം വേണം

എരുമപ്പെട്ടി: എൽആർബിഎ ജിൻ മ്യൂട്ടേഷൻ എന്ന അപൂർവരോഗം ബാധിച്ച് മജ്ജ മാറ്റിവയ്ക്കൽ ശസ്ത്രക്രിയയ്ക്ക് ഒരുങ്ങുന്ന പന്ത്രണ്ടും ഏഴും വയസുള്ള സഹോദരങ്ങളുടെ ചികിത്സയ്ക്കായി സഹായം തേടുന്നു. ചൊവ്വന്നൂർ പഞ്ചായത്തിലെ ചെമ്മന്തിട്ട കളിയെടുത്ത് മനോജ് - സുധ ദമ്പതികളുടെ മക്കളായ അവനിക, ആയുഷ് എന്നിവരുടെ ബോൺമാരോ ശസ്ത്രക്രിയ്ക്കായാണ് കുടുംബം സഹായം തേടുന്നത്. തൃശൂർ മെഡിക്കൽ കോളജിലും തുടർന്നു കോഴിക്കോട് മെഡിക്കൽ കോളജിലും നടത്തിയ പരിശോധനയിലാണ് ഇരുവർക്കും രോഗം സ്ഥിരീകരിച്ചത്. മജ്ജ മാറ്റിവയ്ക്കൽ ശസ്ത്രക്രിയ മാത്രമാണ് ചെന്നൈയിലെ അപ്പോളോ ആശുപത്രിയിലെ ഡോക്ടർമാർ നിർദേശിച്ചിരിക്കുന്നത്. ഒരാൾക്ക് 60 ലക്ഷം രൂപ ചെലവുവരും. ‌ ചൂണ്ടൽ ലേഡി ഇമ്മാക്കുലേറ്റ് സ്കൂളിലെ ഏഴാംക്ലാസ് വിദ്യാർഥിയാണ് അവനിക. അസുഖത്തെതുടർന്ന് ഒരുവർഷമായി സ്കൂളിൽ പോകുന്നില്ല. മരത്തംകോട് എംജിഎം എൽപി സ്കൂളിലെ രണ്ടാം ക്ലാസ് വിദ്യാർഥിയാണ് ആയുഷ്. ഭീമമായ തുക കണ്ടെത്താൻ വെൽഡിംഗ് തൊഴിലാളിയായ മനോജിനു കഴിയാത്ത സാഹചര്യത്തിൽ ഇവരെ സഹായിക്കുന്നതിനായി കുന്നംകുളം എംഎൽഎ എ.സി. മൊയ്തീൻ, ജില്ലാ പഞ്ചായത്ത് അംഗം എ.വി. വല്ലഭൻ, ബ്ലോക്ക് പഞ്ചായത്ത് പ്രസിഡന്‍റ് ആൻസി വില്യംസ് എന്നിവർ രക്ഷാധികാരികളും ചൊവന്നൂർ പഞ്ചായത്ത് പ്രസിഡന്‍റ് ചിത്ര വിനോഭാജി ചെയർമാനും ബ്ലോക്ക് മെമ്പർ രജിത ഷിബു, വാർഡ് മെമ്പർ രത്നകുമാരി എന്നിവർ വൈസ് ചെയർമാൻമാരായും സാമൂഹികപ്രവർത്തകൻ എ. സജി കൺവീനറായും ചികിത്സാസഹായസമിതി രൂപീകരിച്ചിട്ടുണ്ട്. ധനസമാഹരണത്തിനായി ഇന്ത്യൻ ഓവർസീസ് ബാങ്ക് കുന്നംകുളം ബ്രാഞ്ചിൽ അക്കൗണ്ട് തുടങ്ങിയിട്ടുണ്ട്. സഹായങ്ങൾ താഴെ കാണുന്ന അക്കൗണ്ട് വഴിയോ 8281643876 എന്ന ഗൂഗിൾ പേ നമ്പർ വഴിയോ നൽകണമെന്ന് അഭ്യർഥിച്ചു. ഇന്ത്യൻ ഓവർസീസ് ബാങ്ക്, കുന്നംകുളം ബ്രാഞ്ച്, അക്കൗണ്ട് നമ്പർ: 279902000000300, ഐഎഫ്എസ്‌സി: ഐഒബിഎ 0002799. കൂടുതൽ വിവരങ്ങൾക്കു ബന്ധപ്പെടേണ്ട നമ്പർ. മാതാവ് സുധ: 8281643876. കൺവീനർ സജി: 9846723081.`

ജൂബിലി മിഷൻ മെഡിക്കൽ കോളജിന് എഎച്ച്പിഐ ദേശീയ ലീഡർഷിപ്പ് അവാർഡ്

തൃശൂർ: ഇന്ത്യയിലെ ആരോഗ്യസേവന സംഘടനയായ അസോസിയേഷൻ ഓഫ് ഹെൽത്ത് കെയർ പ്രൊവൈഡേഴ്സ് ഇന്ത്യ (എഎച്ച്പിഐ) പ്രഖ്യാപിച്ച 2025 ലെ ദേശീയ ലീഡർഷിപ്പ് അവാർഡുകളിൽ ജൂബിലി മിഷൻ മെഡിക്കൽ കോളജ് ആൻഡ് റിസർച്ച് ഇൻസ്റ്റിറ്റ്യൂട്ടിന് അംഗീകാരം. സാന്പത്തികപരിപാലനത്തിലും സുസ്ഥിരതയിലും കാഴ്ചവച്ച നേതൃപാടവത്തിനു ലഭിച്ച പുരസ്കാരം ഹൈദരാബാദിൽ നടന്ന ചടങ്ങിൽ എഎച്ച്പിഐ ഡയറക്ടർ ജനറൽ ഡോ. ഗിരീധർ ഗ്യാനിയും നാഷണൽ പ്രസിഡന്‍റ് ഡോ. സഹദുള്ളയും ചേർന്ന് ജൂബിലി മിഷൻ മെഡിക്കൽ കോളജ് ആൻഡ് റിസർച്ച് ഇൻസ്റ്റിറ്റ്യൂട്ട് ഡയറക്ടർ ഫാ. റെന്നി മുണ്ടൻകുരിയൻ, സിഇഒ ഡോ. ബെന്നി ജോസഫ് നീലങ്കാവിൽ, അസിസ്റ്റന്‍റ് ഡയറക്ടർ ഫാ. തോമസ് പൂപ്പാടി, ജനറൽ മാനേജർ (ഫിനാൻസ്) സി.എ. ജീൻ പോൾ എന്നിവർക്കു കൈമാറി.

കര്‍ഷകദുരിതമറിയാന്‍ കേന്ദ്രസംഘം മുരിയാട് പാടശേഖരത്തിലെത്തി

ഇരിങ്ങാലക്കുട: കര്‍ഷകരുടെ പ്രശ്‌നങ്ങള്‍ പരിഹരിക്കാന്‍ കേന്ദ്ര കൃഷിമന്ത്രി ശിവരാജ് സിംഗ് ചൗഹാന്‍ ഒക്ടോബറില്‍ കേരളത്തിലെത്തും. മുരിയാട് പാടശേഖരത്തില്‍ വച്ച് കേന്ദ്രസംഘത്തിനു മുന്നില്‍ പ്രശ്‌നങ്ങളുന്നയിച്ച കര്‍ഷകരോട് കൃഷിവകുപ്പ് ജോയിന്‍റ് സെക്രട്ടറി എസ്. രുക്മിണിയാണ് ഇക്കാര്യം അറിയിച്ചത്. മന്ത്രിയുടെ സന്ദര്‍ശനത്തിനു മുന്നോടിയായി പ്രശ്‌നങ്ങള്‍ മനസിലാക്കാനാണ് കേന്ദ്രസംഘം വന്നതെന്നും അവര്‍ പറഞ്ഞു. കേന്ദ്ര-സംസ്ഥാന കൃഷിവകുപ്പ് ഉദ്യോഗസ്ഥര്‍ സംയുക്തമായാണ് ഇന്നലെ ഉച്ചതിരിഞ്ഞ് മുരിയാട് പാടശേഖരമുള്‍പ്പെടുന്ന കോന്തിപുലത്ത് മുരിയാട് കോള്‍ പടവില്‍ എത്തിചേര്‍ന്നത്. അവിടെ നടന്ന യോഗത്തില്‍ കര്‍ഷകര്‍ തങ്ങളുടെ പ്രശ്‌നങ്ങള്‍ വിശദീകരിച്ചു. മുരിയാട് കായല്‍ നെല്‍കര്‍ഷക സമിതി ഭാരവാഹികളായ സി.എ. ആന്‍റു, മെഹബൂബ്, ടി.കെ. വര്‍ഗീസ് മാസ്റ്റര്‍, ചാര്‍ലി ലാസര്‍ എന്നിവര്‍ നിവേദനങ്ങള്‍ കൈമാറി. ഇഷ്ടിക നിര്‍മാണത്തിനും വ്യവസായ ആവശ്യത്തിനുമായി മണ്ണും കളിമണ്ണും എടുത്ത് കുളമായി കിടക്കുന്ന 500 ഏക്കര്‍ സ്ഥലത്ത് താമരയും മത്സ്യകൃഷിയും നടത്തുക, ഇല്ലിക്കല്‍, കൊറ്റംകോട് വളവ് ഷട്ടറുകളുടെ അറ്റകുറ്റ പണി നടത്തി മെക്കനയിസ്ഡ് ഷട്ടര്‍ സ്ഥാപിക്കുക, മുരിയാട് കായലിലേക്ക് വെള്ളം എത്തിത്തുന്നതിനുവേണ്ടി പറയംതോട്ടില്‍ രണ്ട് 50 എച്ച്പി മോട്ടോര്‍ വച്ച് കരുവന്നൂര്‍ പുഴയില്‍ നിന്ന് വെള്ളം പമ്പ് ചെയ്യുക, കെഎല്‍ഡിസി ബണ്ടിന്‍റെ അടിയില്‍ സ്ഥാപിച്ചിരിക്കുന്ന കോണ്‍ക്രീറ്റ് പൈപ്പ് മാറ്റി അവിടെ സ്ലൂയിസ് നിര്‍മിക്കുക, കോന്തിപുലത്ത് മെക്കനയിസ്ഡ് കം സ്ലൂയിസ് നിര്‍മിക്കുക തുടങ്ങിയ ആവശ്യങ്ങള്‍ ഉന്നയിച്ച് കര്‍ഷക സമിതി നിവേദനം നല്‍കി. കേന്ദ്ര കൃഷി ഡെപ്യൂട്ടി കമ്മിഷണര്‍ എ.എന്‍. മേശ്രം, കാര്‍ഷിക എന്‍ജിനിയര്‍ ശശികാന്ത് പവാര്‍, ഡോ. ദിവ്യാ ബാലകൃഷ്ണന്‍, ഡോ. എസ്.വിജയകുമാര്‍, ഡോ. വി. മാനസന്‍, ഡോ. ആര്‍. ഗോപിനാഥ് എന്നിവരും സംഘത്തിലുണ്ട്. മുന്‍ മിസോറാം ഗവര്‍ണര്‍ കുമ്മനം രാജശേഖരന്‍, ബിജെപി സംശ്താന വൈസ് പ്രസിഡന്‍റ് സി. കൃഷ്ണകുമാര്‍, ഷാജി രാഘവന്‍, നഗരസഭ കൗണ്‍സിലര്‍ ആര്‍ച്ച അനീഷ്, ജസ്റ്റിന്‍ ജേക്കബ് തുടങ്ങിയവരും സംഘതതോടൊപ്പമുണ്ടായിരുന്നു.

പനിയുണ്ടെങ്കിൽ, സ്വയം ചികിത്സിക്കല്ലേ..

അമീബിക് മസ്തിഷ്കജ്വരത്തിന്‍റെ ലക്ഷണങ്ങളിലൊന്ന് പനിയാണ് തൃശൂർ: പനിയുള്ളവർ എത്രയുംവേഗം ഡോക്ടറെ കണ്ട് ചികിത്സ തേടുക. പനിയുണ്ടെങ്കിൽ, അല്ലെങ്കിൽ പനിലക്ഷണമുണ്ടെങ്കിൽ സ്വയംചികിത്സയ്ക്കു നിൽക്കരുതെന്ന് ആരോഗ്യവകുപ്പ് മുന്നറിയിപ്പ് നൽകുന്നു. അമീബിക് മസ്തിഷ്കജ്വരം കൂടുതലായി റിപ്പോർട്ടുചെയ്യപ്പെടുന്ന സാഹചര്യത്തിലാണ് മുന്നറിയിപ്പ്. പനി, തലവേദന, ഓക്കാനം, ഛർദി, കഴുത്തു തിരിക്കാനുള്ള ബുദ്ധിമുട്ട്, നടുവേദന എന്നിവയാണ് അമീബിക് മസ്തിഷ്കജ്വരത്തിന്‍റെ പ്രാഥമികലക്ഷണങ്ങൾ. അപസ്മാരം, ബോധക്ഷയം, പരസ്പരബന്ധമില്ലാതെ സംസാരിക്കുക എന്നിവ ഗുരുതരലക്ഷണങ്ങളും. തുടക്കത്തിൽതന്നെ വിദഗ്ധചികിത്സ തേടുകയാണ് പ്രധാനമെന്നു ഡോക്ടർമാർ പറയുന്നു. കുളത്തിലോ മറ്റു ജലാശയങ്ങളിലോ അടുത്ത കാലത്തു കുളിച്ചിട്ടുണ്ടെങ്കിൽ അക്കാര്യം ഡോക്ടറുടെ ശ്രദ്ധയിൽപെടുത്താൻ പ്രത്യേകം ശ്രദ്ധിക്കണം. പ്രതിരോധപ്രവർത്തനങ്ങൾ ജില്ലയിൽ ശക്തമാക്കാൻ ജില്ലാ കളക്ടർ അർജുൻ പാണ്ഡ്യന്‍റെ അധ്യക്ഷതയിൽ ചേർന്ന അവലോകനയോഗത്തിൽ തീരുമാനിച്ചിരുന്നു. ശനിയാഴ്ചയും ഞായറാഴ്ചയും ജില്ലയിൽ മാസ് ക്ലോറിനേഷൻ കാന്പയിൻ നടത്തും. എല്ലാ കുടിവെള്ള സ്രോതസുകളും ക്ലോറിനേറ്റ് ചെയ്യുന്നതു തുടരും. ഇതിനായി മുഴുവൻ വീടുകളിലേക്കും ആവശ്യമായ ബ്ലീച്ചിംഗ് പൗഡറും ബോധവത്കരണ ലഘുലേഖകളും വിതരണംചെയ്യും. ഫ്ലാറ്റ് ഉടമകളും റസിഡന്‍റ്സ് അസോസിയേഷനുകളുമെല്ലാം ജലസ്രോതസുകളും കിണറുകളും വാട്ടർ ടാങ്കുകളും അണുവിമുക്തമാക്കുന്ന നടപടികൾ തുടങ്ങിയിട്ടുണ്ട്. പൂജാ അവധിയും മറ്റും വരുന്നതിനാൽ ധാരാളംപേർ വിനോദസഞ്ചാരത്തിനായി വാട്ടർ തീം പാർക്കുകളിലെത്താൻ സാധ്യതയുണ്ട്. ഈ സാഹചര്യത്തിൽ പാർക്കുകളിലെ വെള്ളം ക്ലോറിനേറ്റ് ചെയ്യുന്നതു കൃത്യമായാണോയെന്ന് ആരോഗ്യവകുപ്പും മലിനീകരണനിയന്ത്രണ ബോർഡും പരിശോധിക്കും. സ്കൂളുകളിൽ ആരോഗ്യവകുപ്പുമായി സഹകരിച്ച് അമീബിക് മസ്തിഷ്കജ്വരത്തിന്‍റെ കാരണങ്ങളെക്കുറിച്ചും പാലിക്കേണ്ട ജാഗ്രതയെക്കുറിച്ചും ക്ലാസുകൾ നൽകും. ജലപരിശോധനാലാബുകളുള്ള ഹയർ സെക്കൻഡറി സ്കൂളുകളിലെ ലാബുകളിൽ വിദ്യാർഥികൾക്കു വീടുകളിൽനിന്നു വെള്ളം കൊണ്ടുവന്നു പരിശോധിക്കാനുള്ള സൗകര്യം ഒരുക്കും. സ്വിമ്മിംഗ് പൂളുകളും പൊതുകിണറുകളും തുടർച്ചയായി ക്ലോറിനേറ്റ് ചെയ്യുന്നുണ്ടെന്നു തദ്ദേശസ്വയംഭരണവകുപ്പും, ജല അഥോറിറ്റിയുടെ കുടിവെള്ള ടാങ്കുകൾ കൃത്യമായ ഇടവേളകളിൽ ക്ലോറിനേറ്റ് ചെയ്യുന്നുണ്ടെന്ന് ഉദ്യോഗസ്ഥരും ഉറപ്പാക്കും. പ്രധാന നിർദേശങ്ങൾ - നിശ്ചലവും ശുദ്ധീകരിക്കാത്തതുമായ ജലാശയങ്ങളിൽ ചാടുന്നതും മുങ്ങുന്നതും ഒഴിവാക്കുക - ശുദ്ധീകരിക്കാത്ത ജലാശയങ്ങളിൽ നീന്തേണ്ടിവന്നാൽ തല വെള്ളത്തിനുമുകളിൽ സൂക്ഷിക്കുക. - നീന്തുകയോ മുങ്ങേണ്ടിവരികയോ ചെയ്യുന്പോൾ നോസ് പ്ലഗ് ഉപയോഗിക്കുക. അല്ലെങ്കിൽ മൂക്ക് വിരലുകൾ ഉപയോഗിച്ച് അടച്ചുപിടിക്കുക. - ജലാശയങ്ങളുമായി ബന്ധപ്പെട്ട പ്രവർത്തനങ്ങളിൽ ഏർപ്പെടുന്പോൾ അടിത്തട്ട് കുഴിക്കുന്നത് ഒഴിവാക്കുക, ചെളി കലക്കുന്നതും ഒഴിവാക്കുക. - നീന്തൽക്കുളങ്ങൾ, വാട്ടർ തീം പാർക്കുകൾ, സ്പാകൾ എന്നിവ വൃത്തിയായി ക്ലോറിനേഷൻനടത്തി പരിപാലിക്കുക. - സ്പ്രിങ്ക്ളറുകൾ, ഹോസുകൾ എന്നിവയിൽനിന്നു വെള്ളം മൂക്കിനുള്ളിൽ പതിക്കുന്ന സാഹചര്യം ഒഴിവാക്കുക. - തിളപ്പിച്ച് ശുദ്ധിവരുത്താത്ത വെള്ളം ഒരു കാരണവശാലും കുട്ടികളുടെയോ മുതിർന്നവരുടെയോ മൂക്കിൽ ഒഴിക്കരുത്. - ക്ലോറിനേറ്റ് ചെയ്യാത്ത വെള്ളം ഉപയോഗിച്ച് കുളിക്കുന്പോഴോ മുഖം കഴുകുന്പോഴോ വെള്ളം മൂക്കിനുള്ളിൽ പോകാതെ സൂക്ഷിക്കുക. - ജലാശയങ്ങൾ മലിനമാകാതെ സംരക്ഷിക്കുക. - പൊതുജലാശയങ്ങളിലേക്കു മാലിന്യം ഒഴുക്കരുത്. - ജലസംഭരണികളും വലിയ ടാങ്കുകളും മൂന്നുമാസം കൂടുന്പോൾ നല്ലതുപോലെ കഴുകിവൃത്തിയാക്കുക.

കോർപറേഷൻ സ്റ്റേഡിയം: ഖേലോ ഇന്ത്യയുമായുള്ള കരാർ അട്ടിമറിച്ചു

സ്വന്തം ലേഖകൻ തൃശൂർ: ഫുട്ബോൾ ടർഫിനുവേണ്ടി കോർപറേഷൻ സ്റ്റേഡിയത്തിൽ ഖേലോ ഇന്ത്യ വാഗ്ദാനം ചെയ്ത സിന്തറ്റിക് ട്രാക്ക് ഇല്ലാതാക്കാനുള്ള തൃശൂർ കോർപറേഷന്‍റെ നീക്കത്തിനെതിരേ പ്രതിഷേധം. ജില്ലാ അത്‌ലറ്റിക്സ് അസോസിയേഷനു പിന്നാലെ അത്‌ലറ്റിക്സ് വെൽഫെയർ അസോസിയേഷനും പ്രതിഷേധവുമായി രംഗത്തെത്തി. മുൻകാല അത്‌ലറ്റുകളുടെയും കോച്ചുമാരുടെയും സംഘടനയാണ് അത്‌ലറ്റിക്സ് വെൽഫെയർ അസോസിയേഷൻ. 2015ലെ ദേശീയ ഗെയിംസ് വനിതാ ഫുട്ബോൾ മത്സരങ്ങൾക്കു ടർഫ് നിർമിക്കാൻ സ്റ്റേഡിയം പുനർനിർമിച്ചതുമുതൽ ജില്ലയിൽ അത്‌ലറ്റിക്സ് തഴയപ്പെട്ടെന്നു ഭാരവാഹികൾ ആരോപിച്ചു. എട്ടുവരി ട്രാക്കിനു പകരം ആറുവരിയാക്കി. ജംപിംഗ് പിറ്റ്, ത്രോയിംഗ് സെക്ടർ എന്നിവയില്ലാതായി. കേരള സൂപ്പർ ലീഗിനായി അഞ്ചുവർഷത്തേക്കാണ് സ്വകാര്യ ക്ലബ്ബിനു സ്റ്റേഡിയം കൈമാറുന്നത്. ഫുട്ബോൾകളത്തിനായി 106 മീറ്റർ നീളത്തിലും 70 മീറ്റർ വീതിയിലും കൃത്രിമ പുൽമൈതാനം ഒരുക്കുന്നതോടെ ലോകനിലവാരത്തിലുള്ള 400 മീറ്റർ സിന്തറ്റിക് ട്രാക്ക് സ്ഥാപിക്കാനുള്ള സ്ഥലം നഷ്ടമാകും. കഴിഞ്ഞവർഷം ഖേലോ ഇന്ത്യ പദ്ധതിയിലൂടെ കോർപറേഷൻ സ്റ്റേഡിയത്തിൽ 400 മീറ്റർ ട്രാക്ക് നിർമിക്കാനുള്ള അനുമതി ലഭിച്ചതാണ്. കോർപറേഷനും ഖേലോ ഇന്ത്യയുമായി കരാറും ഒപ്പിട്ടു. നടപടികൾ പുരോഗമിക്കുന്പോഴാണ് പുതിയ നടപടി. നീളം 100 മീറ്ററും വീതി 64 മീറ്ററുമായി ടർഫ് ഒരുക്കിയാൽ ഫുട്ബോൾ ഗ്രൗണ്ടും സിന്തറ്റിക് ട്രാക്കും ഒരുപോലെ രൂപകല്പന ചെയ്യാം. ഫുട്ബോൾ കളത്തിനുചുറ്റും നിർമിച്ച വേലി പൊളിച്ച് ട്രാക്കിനു പുറത്തു സ്ഥാപിക്കണമെന്നും ഇവർ ആവശ്യപ്പെട്ടു. ഖേലോ ഇന്ത്യയുടെ അന്തിമ ടെക്നിക്കൽ അംഗീകാരം, സൈറ്റ് മാർക്കിംഗ്, അലൈൻമെന്‍റ് റിപ്പോർട്ട് എന്നിവ പൂർത്തിയാകുന്നതുവരെ ടർഫ് വിപുലീകരണത്തിനും അതിരുകളിലെ നിർമാണങ്ങൾക്കും താത്കാലിക വിലക്കേർപ്പെടുത്തണം. ഇക്കാര്യങ്ങൾ ഉന്നയിച്ച് കോടതിയെ സമീപിക്കാൻ നീക്കമുണ്ടെങ്കിലും ആവശ്യമായ രേഖകൾ നൽകാൻ അധികൃതർ വിസമ്മതിച്ചെന്ന് അത്‌ലറ്റുകളായ പി.എച്ച്. അബ്ദുള്ള, റീന റെജി, കോച്ചുമാരായ എൻ.ജെ. വിജോയ്, ടി.എ. അജിത് എന്നിവർ പറഞ്ഞു. തലേന്നുവരെ സിന്തറ്റിക് ട്രാക്ക് ഉണ്ടാകുമെന്ന് ഉറപ്പുനൽകിയ മേയർ, പിറ്റേദിവസം സ്വകാര്യ ക്ലബ്ബുമായി ധാരണയുണ്ടാക്കിയതു സംശയാസ്പദമാണ്. തൃശൂർ കോർപറേഷൻ സ്റ്റേഡിയത്തിന്‍റെ ബൈലോയിൽ രണ്ടുമാസത്തിൽ കൂടുതൽ സ്റ്റേഡിയം കൈമാറാൻ വ്യവസ്ഥയില്ല. ഇതു മറികടന്നാണ് അഞ്ചുവർഷത്തേക്കു സ്വകാര്യ ക്ലബ്ബുമായി കരാറുണ്ടാക്കിയത്. ഇക്കാര്യങ്ങൾ ഉന്നയിച്ച് തിങ്കളാഴ്ച രാവിലെ പത്തിന് അത്‌ലറ്റുകളും പരിശീലകരും ഉൾപ്പെടെ സ്റ്റേഡിയത്തിനു മുന്നിൽനിന്നു കോർപറേഷൻ ഓഫീസിലേക്കു പ്രകടനം നടത്തും. അത്‌ലറ്റിക്സിൽ കിതച്ച് തൃശൂർ തൃശൂർ: മറ്റു ജില്ലകളിൽ രണ്ടും മൂന്നും സിന്തറ്റിക് ട്രാക്കുകളുള്ളപ്പോൾ തൃശൂരിൽ കുന്നംകുളത്തു മാത്രമാണ് ട്രാക്കുള്ളത്. അത്‌ലറ്റിക് പരിശീലനത്തിന് സിന്തറ്റിക്ക് ട്രാക്ക് അത്യാവശ്യമാണ്. നിലവിൽ നഗരത്തിൽ പരിശീലനത്തിനു സൗകര്യമില്ല. കുന്നംകുളം സ്പോർട്സ് ഡിവിഷന്‍റെ കീഴിലുള്ള വിദ്യാർഥികൾക്കാണ് കുന്നംകുളം സിന്തറ്റിക് ട്രാക്കിൽ മുൻഗണന. രാവിലെ ഒന്പതിനും വൈകീട്ട് ആറിനും ശേഷമാണ് മറ്റുള്ളവർക്ക് അവസരം. തൃശൂരിൽനിന്നുള്ളവർ പരിശീലനത്തിനുപോയാൽ ക്ലാസ് നഷ്ടമാകും. ഒരു മണിക്കൂർ പ്രാക്ടീസ് ചെയ്യണമെങ്കിൽ സ്കൂൾ, കോളജ് വിദ്യാർഥികളിൽനിന്ന് യഥാക്രമം 50, 100 രൂപവീതമാണ് ഫീസ് വാങ്ങുന്നത്. രണ്ടു മണിക്കൂർ പരിശീലനം വേണ്ടിവരും. നിലവിൽ 40 കിലോമീറ്റർ അകലെ ചാത്തന്നൂരിലെ സ്കൂൾഗ്രൗണ്ടിലാണു പരിശീലനം. ലാലൂരിൽ ഫുട്ബോൾ സ്റ്റേഡിയം നിർമിക്കുന്പോൾ സിന്തറ്റിക് ട്രാക്കുണ്ടാകുമെന്ന് അന്നത്തെ മന്ത്രിയും നിലവിൽ കുന്നംകുളം എംഎൽഎയുമായ എ.സി. മൊയ്തീൻ ഉറപ്പുനൽകിയിരുന്നു. ഇതിന്‍റെ അടിസ്ഥാനത്തിലാണ് കുന്നംകുളത്തേക്കു സിന്തറ്റിക് ട്രാക്ക് കൊണ്ടുപോയതെന്നും ചൂണ്ടിക്കാട്ടുന്നു.

ദേവാലയങ്ങളിൽ തിരുനാൾ

പോട്ട ചെറുപുഷപം ദേവാലയം പോട്ട: ചെറുപുഷ്പ ദേവാലയത്തിലെ വിശുദ്ധ കൊച്ചുത്രേസ്യ യുടെ ഊട്ടുനേർച്ച തിരുനാളിന് വികാരി ഫാ.ടോം മാളിയേക്കൽ കൊടി ഉയർത്തി. സഹ. വികാരി ഫാ. റൈസൻ തട്ടിൽ സഹകാർമികത്വം വഹിച്ചു. റോസറി ഹില്‍ ആശ്രമത്തില്‍ വെള്ളിക്കുളങ്ങര: കൊടുങ്ങ റോസറി ഹില്‍ ആശ്രമത്തില്‍ കുരുക്കഴിക്കുന്ന മാതാവിന്‍റെ തിരുനാളിനു കൊടിയേറി. ആശ്രമം സുപ്പീരിയര്‍ ഫാ.തോമസ് തടത്തിമാക്കല്‍ കൊടികയറ്റം നിര്‍വഹിച്ചു. തുടര്‍ന്നുനടന്ന വിശുദ്ധ കുര്‍ബാനയ്ക്കും നൊവേനയ്ക്കും കൊടുങ്ങ സെന്‍റ് സെബാസ്റ്റ്യന്‍സ് പള്ളി വികാരി ഫാ. ഷിബു നെല്ലിശേരി കാര്‍മികത്വം വഹിച്ചു. പ്രധാന തിരുനാള്‍ദിനമായ ഞായറാഴ്ച രാവിലെ 10ന് നടക്കുന്ന ആഘോഷമായ ദിവ്യബലിക്ക് വെള്ളാഞ്ചിറ പള്ളി വികാരി ഫാ. ആന്‍റോ പാണാടന്‍ മുഖ്യകാര്‍മികത്വം വഹിക്കും. റവ.ഡോ.ബിനോയ് നെരേപ്പറമ്പില്‍ സന്ദേശം നല്‍കും.

ആദിവാസികുടുംബങ്ങൾക്ക് കൈത്താങ്ങായി എൻഎസ്എസ്

മാരാംകോട്: എൻഎസ്എസ് ദിനത്തിൽ ആദിവാസി കുടുംബങ്ങൾക്ക് കൈത്താങ്ങായി എൻഎസ്എസ് വോളന്‍റിയർമാർ. താമസയോഗ്യമല്ലാത്ത സ്ഥലത്തുനിന്ന് മാറി മാരാങ്കോട് കുടിൽകെട്ടി താമസമാക്കിയ വീരാൻകുടി അരേക്കാപ്പ് ഉന്നതികളിലെ 47 കുടുംബങ്ങളിലെ 104 അംഗങ്ങൾക്ക് സഹായങ്ങൾ തൃശൂർ ജില്ലാ ഹയർസെക്കൻഡറി എൻഎസ്എസിന്‍റെ നേതൃത്വത്തിൽ നൽകി. ഇതിന്‍റെ ഭാഗമായി മാള ക്ലസ്റ്റർ കുടിൽമറയ്ക്കുവാൻ ആവശ്യമായ പച്ച ഷീറ്റുകൾ ജിഎച്ച്എസ്എസ് കൊടകരയുടെയും ജിഎച്ച്എസ്എസ് ചെമ്പുച്ചിറ സ്കൂളിലെയും എൻഎസ്എസ് വോള‌ന്‍റിയർമാർ കൈമാറുകയും ചെയ്തു. ജില്ലാ പഞ്ചായത്ത് മെമ്പർ ജനീഷ് പി ജോസ് സഹായങ്ങൾ ഏറ്റുവാങ്ങി. പഞ്ചായത്ത് അംഗം പി.സിനിഖിൽ അധ്യക്ഷത വഹിച്ചു. ഇന്ദു സൂസൻ വർഗീസ്, ടി.എസ്. സൗമ്യ, കെ.ആർ. അദിക്ഷ, എംഡി, ആദി കിരൺ , പി.എൻ. അനുശ്രീ , അലൻ റിബി, പി.എം. അനല, അനന്യാസ് ടിറ്റൻ, ഇവിന ഷാജൻ, എം.വി.ആദിദേവ് എന്നിവർ പ്രസംഗിച്ചു. ഹയർ സെക്കൻഡറി തൃശൂർ ജില്ലാ എൻഎസ്എസ് കോ ഒാർഡിനേറ്റർ എം.വി. പ്രതീഷ്, മാള ക്ലസ്റ്റർ കൺവീനർ എ.എ. തോമസ് നേതൃത്വം നൽകി.

സഹൃദയയില്‍ ദേശീയതല ഫ്ലാഗ്ഷിപ് ഇന്നുമുതല്‍

കൊടകര: സഹൃദയ എന്‍ജിനീയറിംഗ് കോളജിനോടനുബന്ധിച്ചു പ്രവര്‍ത്തിക്കുന്ന ഐ ട്രിപ്ള്‍ ഇ വിദ്യാര്‍ഥി ശാഖയുടെ നേതൃത്വത്തില്‍ ഇന്നു മുതല്‍ 28 വരെ "ഇന്‍ഫിനിയ 2.0' ദേശീയതല ഫ്ലാഗ്ഷിപ് പരിപാടി സംഘടിപ്പിക്കും. എന്‍ജിനീയറിംഗ് വിദ്യാര്‍ഥികളില്‍ സാങ്കേതിക നൈപുണികളും വ്യവസായവൈശിഷ്ട്യവും വളര്‍ത്തിയെടുക്കാന്‍ ലക്ഷ്യമിട്ടുകൊണ്ട് "സങ്കല്‍പ്പങ്ങള്‍ക്കും സാങ്കേതികതക്കും അപ്പുറം ' എന്ന സന്ദേശമുയര്‍ത്തി സംഘടിപ്പികുന്ന പരിപാടിയില്‍ രാജ്യത്തെ വിവിധ എന്‍ജിനീയറിംഗ് കോളജുകളില്‍നിന്നായി മുന്നൂറിലധികം വിദ്യാര്‍ഥികള്‍ പങ്കെടുക്കും. പത്തിലധികം വ്യാവസായിക സ്ഥാപനങ്ങളുടെയും ഇരുപതില്‍പരം പ്രഭാഷകരുടെയും സഹകരണത്തോടെ നടത്തപ്പെടുന്ന പരിപാടിയില്‍ യുഐ/യുഎക്‌സ്, ഏജന്‍റിക് എഐ , ഇലക്ട്രിക്ക് വാഹനങ്ങള്‍, ഡ്രോണ്‍ സാങ്കേതികവിദ്യ, എഫ്പിജിഎ, പ്രോട്ടീന്‍ ടെസ്റ്റിംഗ് എന്നീ വിഷയങ്ങളില്‍ സാങ്കേതിക ശില്പശാലകളും പരിശീലനക്കളരികളും സംഘടിപ്പിക്കും . വിവിധ വ്യവസായ മേഖലകളില്‍ നിന്നുള്ള പ്രമുഖര്‍ ഒന്നിക്കുന്ന പാനല്‍ ചര്‍ച്ച, ഇങ്കര്‍ റോബോട്ടിക്‌സിന്‍റെ സഹകരണത്തോടെ സംഘടിപ്പിക്കുന്ന ടെക്‌റോബോ എക്‌സ്‌പോ , സ്പിന്‍ എക്‌സുമായി ചേര്‍ന്ന് നടത്തുന്ന ഡ്രോണ്‍ ഗെയിംസ്, ട്രിപ്ള്‍ ഇ ഡിപ്പാര്‍ട്‌മെന്‍റിന്‍റെ ആഭിമുഖ്യത്തില്‍ നടത്തപ്പെടുന്ന ഇന്‍ഡസ്ട്രിയല്‍ വെഹിക്കിള്‍ എക്‌സ്‌പോ എന്നിവയും ഉണ്ടാകും.

അങ്കണവാടി കെട്ടിടം നാടിനു സമര്‍പ്പിച്ചു

കാട്ടൂര്‍: കാട്ടൂര്‍ പഞ്ചായത്ത് ആറാം വാര്‍ഡിലെ 71-ാം നമ്പര്‍ അങ്കണവാടി കെട്ടിടം ഉന്നതവിദ്യാഭ്യാസ മന്ത്രി ഡോ. ആര്‍. ബിന്ദു നാടിനു സമര്‍പ്പിച്ചു. മന്ത്രി ഡോ. ആര്‍. ബിന്ദുവിന്‍റെ ആസ്തിവികസന ഫണ്ടില്‍ നിന്നും അനുവദിച്ച 250000 രൂപയില്‍ നിന്നുമാണ് അങ്കണവാടി പണികഴിപ്പിച്ചത്. കാട്ടൂര്‍ പഞ്ചായത്ത് പ്രസിഡന്‍റ്് ടി.വി. ലത അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് വി.എം. കമറുദീന്‍, അങ്കണവാടി വര്‍ക്കര്‍ കല്യാണി എന്നിവര്‍ സംസാരിച്ചു.

കേരള കോണ്‍ഗ്രസ് ഇരിങ്ങാലക്കുട നിയോജകമണ്ഡലം സ്‌പെഷല്‍ കണ്‍വന്‍ഷന്‍

ഇരിങ്ങാലക്കുട: സംസ്ഥാന സര്‍ക്കാര്‍ സമസ്തമേഖലകളിലും സമ്പൂര്‍ണപരാജയമാണെന്ന് കേരള കോണ്‍ഗ്രസ് ഇരിങ്ങാലക്കുട നിയോജകമണ്ഡലം സ്‌പെഷല്‍ കണ്‍വന്‍ഷന്‍. ഇരിങ്ങാലക്കുട ടൗണ്‍ഹാളില്‍ നടന്ന സ്‌പെഷല്‍ കണ്‍വന്‍ഷന്‍ കേരള കോണ്‍ഗ്രസ് ഡെപ്യൂട്ടി ചെയര്‍മാന്‍ അഡ്വ. കെ. ഫ്രാന്‍സിസ് ജോര്‍ജ് എംപി ഉദ്ഘാടനം ചെയ്തു. ഡെപ്യൂട്ടി ചെയര്‍മാന്‍ അഡ്വ. തോമസ് ഉണ്ണിയാടന്‍ മെമ്പര്‍ഷിപ്പ് വിതരണ ഉദ്ഘാടനം നിര്‍വഹിച്ചു. സ്റ്റേറ്റ് കോ ഓര്‍ഡിനേറ്റര്‍ അപൂ ജോണ്‍ ജോസഫ് മുഖ്യ അതിഥിയായിരുന്നു. നിയോജകമണ്ഡലം പ്രസിഡന്‍റ് റോക്കി ആളുക്കാരന്‍ അധ്യക്ഷത വഹിച്ച യോഗത്തില്‍ സംസ്ഥാന ജനറല്‍ സെക്രട്ടറി മിനി മോഹന്‍ദാസ് ആമുഖപ്രഭാഷണം നടത്തി. സംസ്ഥാന വൈസ് ചെയര്‍മാന്‍ എംപി പോളി, ജില്ലാ പ്രസിഡന്റ് സി.വി. കുര്യാക്കോസ് എന്നിവര്‍ മുഖ്യപ്രഭാഷണം നടത്തി. ഉന്നതാ അധികാര സമിതി അംഗം ജോണ്‍സണ്‍ കാഞ്ഞിരത്തിങ്കല്‍, സംസ്ഥാന ജനറല്‍ സെക്രട്ടറി ജോയ് ഗോപുരന്‍, ജില്ലാ ജനറല്‍ സെക്രട്ടറിമാരായ സേതുമാധവന്‍ പറയംവളപ്പില്‍, പി.ടി. ജോര്‍ജ്, സിജോയ് തോമസ്, ജോസ് ചെമ്പകശേരി, ഉണ്ണി വിയ്യൂര്‍, ജില്ലാ സ്റ്റീയറിംഗ് കമ്മിറ്റിയംഗം സതീഷ് കാട്ടൂര്‍, യൂത്ത് ഫ്രണ്ട് ജില്ലാ പ്രസിഡന്‍റ്് ജോബി ആലപ്പാട്ട് ഭാരവാഹികളായ മാഗി വിന്‍സെന്‍റ്്, എം.എസ്. ശ്രീധരന്‍, എ കെ ജോസ്, എബിന്‍ വെള്ളാനിക്കാരന്‍ തുടങ്ങിയവര്‍ പ്രസംഗിച്ചു.

കോണ്‍ഗ്രസ് ഇരിങ്ങാലക്കുട മണ്ഡലം കമ്മിറ്റിയുടെ നേതൃത്വത്തില്‍ വോട്ട്ചോരി ഒപ്പുപ്രചാരണം നടത്തി

ഇരിങ്ങാലക്കുട: കോണ്‍ഗ്രസ് ഇരിങ്ങാലക്കുട മണ്ഡലം കമ്മിറ്റിയുടെ നേതൃത്വത്തില്‍ വോട്ട് ചോരി ഒപ്പുപ്രചാരണം നടത്തി. കെപിസിസി മുന്‍ ജനറല്‍ സെക്രട്ടറി എം.പി. ജാക്‌സണ്‍ ഒപ്പ് ശേഖരണത്തിന്‍റെ ഇരിങ്ങാലക്കുട മണ്ഡലതല ഉദ്ഘാടനം നടത്തി. സി.എസ്. അബ്ദുല്‍ ഹഖ് അധ്യക്ഷത വഹിച്ചു. ഡിസിസി സെക്രട്ടറി സോണിയ ഗിരി, ബ്ലോക്ക് പ്രസിഡന്‍റ്് സോമന്‍ ചിറ്റേത്ത്, ബ്ലോക്ക് ഭാരവാഹികള്‍, മണ്ഡലം ഭാരവാഹികള്‍, കൗണ്‍സിലര്‍മാര്‍, ബൂത്ത് പ്രസിഡന്‍റുമാര്‍, വാര്‍ഡ് പ്രസിഡന്‍റ്മാര്‍ എന്നിവര്‍ നേതൃത്വം നല്‍കി.

ഇരിങ്ങാലക്കുട സെന്‍റ് ജോസഫ്‌സ് കോളജില്‍ മെഗാ തൊഴില്‍മേള നാളെ

ഇരിങ്ങാലക്കുട: സെന്‍റ് ജോസഫ്സ് കോളജ് തൃശൂര്‍ ജില്ലാ എംപ്ലോയ്‌മെന്‍റ്് എക്‌സ്‌ചേഞ്ച് ആന്‍ഡ് എംപ്ലോയബിലിറ്റി സെന്‍ററുമായി സഹകരിച്ചു മെഗാ തൊഴില്‍മേള നാളെ നടക്കും. ഉന്നത വിദ്യാഭ്യാസ മന്ത്രി ഡോ. ആര്‍. ബിന്ദു ഉദ്ഘാടനം നിര്‍വഹിക്കും. തൃശൂര്‍ ജില്ലാ പഞ്ചായത്ത് പ്രസിഡന്‍റ്് വി.എസ്. പ്രിന്‍സ് അധ്യക്ഷത വഹിക്കും. ഇരിങ്ങാലക്കുട മുനിസിപ്പാലിറ്റി ചെയര്‍പേഴ്‌സണ്‍ മേരിക്കുട്ടി ജോയ്, വാര്‍ഡ് കൗണ്‍സിലര്‍ ഫെനി എബി വെള്ളാനിക്കാരന്‍, സെന്‍റ്് ജോസഫ് കോളജ് വൈസ് പ്രിന്‍സിപ്പല്‍ ഡോ. സിസ്റ്റര്‍ സിസ്റ്റര്‍ ഫ്ലവററ്റ്, എംപ്ലോയ്‌മെന്‍റ്് ഓഫീസര്‍മാരായ ടി.ജി. ബിജു, കെ.എസ്. സനോജ്, ജില്ലാ എംപ്ലോയ്‌മെന്‍റ് ഓഫീസര്‍ ആര്‍. അശോകന്‍, എം. ഷാജു ലോനപ്പന്‍ എന്നിവര്‍ സംസാരിക്കും. മോഡല്‍ ജില്ലാ എംപ്ലോയ്‌മെന്‍റ് എക്‌സ്ചേഞ്ച് ഫൈനാന്‍സിംഗ്, ഓട്ടോ മൊബൈല്‍, ഹെല്‍ത്ത്, വിദ്യാഭ്യാസം, ഇന്‍ഷ്വറന്‍സ്, മാര്‍ക്കറ്റിംഗ് എന്നീ മേഖലകളിലാണ് ഒഴിവുകള്‍. നാളെ രാവിലെ ഒമ്പതുമുതല്‍ കോളജില്‍ സ്‌പോട്ട് രജിസ്‌ട്രേഷന്‍ നടക്കും. താല്‍പര്യമുള്ള ഉദ്യോഗാര്‍ഥികള്‍ ബന്ധപ്പെട്ട സര്‍ട്ടിഫിക്കറ്റുകളുമായി ഇരിങ്ങാലക്കുട സെന്‍റ്് ജോസഫ്‌സ് കോളജില്‍ എത്തിച്ചേരണം. രണ്ടായിരത്തിലധികം ഒഴിവുകളിലേക് ഉദ്യോഗാര്‍ഥികള്‍ അവസരമുണ്ട്.

മുരിങ്ങൂരിൽ ഡ്രെയിനേജ് സ്ലാബുകൾ തകരുന്നു; സൂത്രപ്പണികൾ പാളുന്നു

മുരിങ്ങൂർ: അടിപ്പാത നിർമാണം നടക്കുന്ന മുരിങ്ങൂർ ജംഗ്ഷനിലെ ഡ്രെയിനേജ് സ്ലാബുകൾ തകരുന്നു. ഭാരവണ്ടികൾ അടക്കമുള്ളവ സ്ലാബിനു മുകളിലൂടെ കയറിയിറങ്ങിയാണ് സ്ലാബുകൾ തകരുന്നത്. പലയിടങ്ങളിലും സ്ലാബുകൾക്ക് വിള്ളലുകളുണ്ട്. ചിലയിടങ്ങളിൽ നിരതെറ്റി കയറിയിറങ്ങിയാണ് സ്ലാബുകൾ. ഡ്രെയിനേജടക്കം 6.25 മീറ്റർ വീതിയാണ് സർവീസ് റോഡുകൾക്കുള്ളത്. സ്ലാബുകൾക്ക് മുകളിലൂടെ വാഹനങ്ങൾ കയറിയിറങ്ങിയാലും അതിനെ അതിജീവിക്കാനുള്ള ശേഷി സ്ലാബുകൾക്കുണ്ടെന്നും അതിനനുസൃതമായ നിർമാണമാണ് അവലംബിച്ചിരിക്കുന്നതെന്നുമാണ് കരാർ കമ്പനിയുടേയും എൻഎച്ച്എഐയുടേയും അവകാശവാദം. എന്നാൽ മുരിങ്ങൂരിലും ചിറങ്ങരയിലും നിരവധി സ്ലാബുകളാണ് നിർമാണത്തിന്‍റെ അപാകത മൂലം തകർന്നിരിക്കുന്നത്. സമാന്തര പാതകൾ കുറ്റമറ്റ രീതിയിൽ നിർമിച്ച് മാത്രം വാഹനങ്ങൾ വഴിതിരിച്ചുവിട്ടിരുന്നെങ്കിൽ ഗതാഗതക്കുരുക്ക് ഒരു പരിധി വരെ പരിഹരിക്കാനായേനെ. നിലവിൽ ഗതാഗതസ്തംഭനത്തിന് പരിഹാരം കാണാൻ നിർമാണകമ്പനി ഓരോ കുരുക്കുകൾ അഴിക്കുന്തോറും മറുഭാഗത്ത് മറ്റു രീതിയിൽ ഓരോ കുരക്കുകൾ മുറുകുകയാണ്.

ചേലക്കര മേഖലയിൽ വീണ്ടും കാട്ടാനക്കൂട്ടം

പഴയന്നൂർ: ഒരിടവേളക്കുശേഷം ചേലക്കര മേഖലയിൽ ഭീതിവിതച്ച് കാട്ടാനക്കൂട്ടം. പാഞ്ഞാൾ ഗ്രാമപഞ്ചായത്തിലെ മണലാടി, ചിറകോണം മേഖലകളിൽ കാട്ടാനക്കൂട്ടം ജനവാസ മേഖലയിലിറങ്ങി വ്യാപകമായ കൃഷിനാശം വരുത്തി. ബുധനാഴ്ച രാത്രിയും ഇന്നലെ പുലർച്ചെയുമായി രണ്ടുതവണ ആനകൾ പ്രദേശത്തിറങ്ങിയത്. മണലാടി കളപ്പുരക്കൽ ജോസഫ്, മാഞ്ഞുപ്പറമ്പിൽ ലിസി എന്നിവരുടെ കൃഷിയിടങ്ങളിലാണ് പ്രധാനമായും നാശനഷ്ടം സംഭവിച്ചത്. കർഷകനായ ജോസഫിന്‍റെ തെങ്ങുകളും കുലവന്ന വാഴകളുമാണ് ആനക്കൂട്ടം നശിപ്പിച്ചത്. തുടർച്ചയായുള്ള ആക്രമണം മൂലം കൃഷി മുന്നോട്ടു കൊണ്ടുപോകാൻ പറ്റാത്ത അവസ്ഥയാണെന്ന് കർഷകനായ ജോസഫ് പ്രതികരിച്ചു. വിവരമറിഞ്ഞ് സ്ഥലത്തെത്തിയ വനം വകുപ്പ് ഉദ്യോഗസ്ഥർ പടക്കം പൊട്ടിച്ച് ആനകളെ തുരത്തിയെങ്കിലും പുലർച്ചയോടെ ഇവ വീണ്ടും തിരിച്ചെത്തി നാശനഷ്ടങ്ങൾ വരുത്തി. പുലർച്ചെ റബർ ടാപ്പിംഗിനു വരുന്ന എത്തുന്ന തൊഴിലാളികളും കടുത്ത ഭീതിയിലാണ്. കാട്ടാനയിറങ്ങിയ കുണ്ടുകാട് റോഡിൽ പലയിടത്തും വഴിവിളക്കുകൾ കത്തുന്നില്ല. ഇവിടങ്ങളിലെ വഴിവിളക്കുകൾ ഉടൻ നന്നാക്കണമെന്ന് പ്രദേശവാസികൾ ആവശ്യപ്പെട്ടു. അധികാരികൾ എത്രയും വേഗം വന്യമൃഗങ്ങളെ തടയാൻ നടപടി സ്വീകരിക്കണമെന്നും അവർ ആവശ്യപ്പെട്ടു. വനത്തിൽ സ്ഥാപിച്ചിട്ടുള്ള സൈറൺ പോലുള്ള പ്രതിരോധ സംവിധാനങ്ങൾ വനത്തിന്‍റെ രണ്ടറ്റത്തായതിനാൽ ആനകൾ നടുക്കുകൂടിയാണ് ജനവാസ മേഖലയിലേക്ക് ഇറങ്ങുന്നത്. ഈ വിഷയത്തിൽ അധികൃതർ അടിയന്തിരമായി ഇടപെടണമെന്നും പഞ്ചായത്ത് മെമ്പർ രാധാകൃഷ്ണൻ ആവശ്യപ്പെട്ടു.

സ്വപ്നക്കൂട് താക്കോൽ കൈമാറി തേജസ് എൻജി. കോളജ് എൻഎസ്എസ് യൂണിറ്റ്

വെള്ളറക്കാട്: തേജസ് എൻജിനീയറിംഗ് കോളജ് എൻഎസ്എസ് യൂണിറ്റ് കൊച്ചൗസേപ്പ് ചിറ്റിലപ്പിള്ളി ഫൗണ്ടേഷന്‍റെ സഹായത്തോടെ നിർമിച്ച വീടുകളുടെ താക്കോൽദാനം നടന്നു. എരുമപ്പെട്ടി ബത്ലഹേം നഗറിൽ കുറ്റിക്കാട്ടിൽ ബെന്നി - ജാൻസി, കരിയന്നൂർ കല്ലായിവളപ്പിൽ മജീദ്-ഷഹർബാൻ ദന്പതികൾക്കാണ് വീട് നൽകിയത്. എരുമപ്പെട്ടി ഗ്രാമപഞ്ചായത്ത് മെംബർ എം.സി. ഐജു, കോളജ് അഡ്മിനിസ്ട്രേറ്റീവ് ഓഫീസർ ജോസ് പടിയത്ത് എന്നിവർ താക്കോൽ കൈമാറി. എച്ച്ഒഡി ഡോ. വി.എച്ച്. അരുൾ അധ്യക്ഷനായി. എൻഎസ്എസ് പ്രോഗ്രാം ഓഫീസർമാരായ വിപിൻ കൃഷ്ണ, കെ.ടി. ജാക്സണ്‍, അസി. പ്രഫസർ സ്നേഹ ജോണ്‍സണ്‍, എൻ.എസ്എസ് വോളന്‍റിയർമാരായ വിനീത, സാമിൽ, ഫെബിൻ, യദു, റിയാസ് അജ്മൽ, അബ്ധിജ എന്നിവർ പങ്കെടുത്തു. കേരള ശാസ്ത്രസാങ്കേതിക സർവകലാശാല കൊച്ചൗസേപ്പ് ചിറ്റിലപ്പിള്ളി ഫൗണ്ടേഷനുമായിചേർന്നു നടപ്പാക്കുന്ന സ്വപ്നക്കൂട് പദ്ധതിയുടെ ഭാഗമായാണ് വീട് നിർമിച്ചുനൽകിയത്. നാലു ലക്ഷം രൂപയാണ് ചിറ്റിലപ്പിള്ളി ഫൗണ്ടേഷൻ വിഹിതമായി നൽകിയത്.

ജ്യൂസ് ഇല്ലെന്നു പറഞ്ഞതിനു ചായക്കട ഉടമയ്ക്കു മർദനം: മൂന്നു പേർ പിടിയിൽ

പുന്നയൂർക്കുളം: ജ്യൂസ് ഇല്ലെന്നു പറഞ്ഞതിന് നാക്കോലയിലെ കടയിൽ കയറി ആക്രമണം നടത്തിയ മൂന്നുപേർ പിടിയിൽ. അണ്ടത്തോട് സ്വദേശികളായ മധുരത്തായിൽ മെഹനാസ് (24), പുത്തൻ മാളിയേക്കൽ സയ്യിദ് ജഹാംഗിർ (23 ), പാലപ്പെട്ടി കിഴക്കോട്ട് വീട്ടിൽ സുഹൈൽ (23) എന്നിവരെയാണ് വടക്കേക്കാട് എസ്എച്ച് എം.കെ. രമേശിന്‍റെ നേതൃത്വത്തിൽ അറസ്റ്റ് ചെയ്തത്. മുവരും അണ്ടത്തോട് പുതുവിള പുത്തൻവീട്ടിൽ മുഹമ്മദ് അമീന്‍റെ നാക്കോലയിലെ കടയിലെത്തി ജ്യൂസ് ആവശ്യപ്പെട്ടു. ജ്യൂസ് ഇല്ലെന്നു പറഞ്ഞതിനെതുടർന്ന് കടയിൽ കയറി ഉടമയെ മർദിക്കുകയായിരുന്നു. പ്രതികളെ പിടികൂടിയ സംഘത്തിൽ എസ്ഐമാരായ പി.പി. ബാബു, പി.എ. സുധീർ, ജിതിൻ, രഞ്ജിത്ത്, റോഷൻ, രജിനീഷ്, നിഖിൽ, വിജീഷ്, റെജിൻ എന്നിവരുമുണ്ടായിരുന്നു.

മാങ്ങാട്ടുകര ശ്രീരാമക്ഷേത്രത്തിൽ മോഷണം

അന്തിക്കാട്: മാങ്ങാട്ടുകര ശ്രീരാമ സ്വാമി ക്ഷേത്രത്തിൽ മോഷണം. ക്ഷേത്രത്തിലെ ആറു ഭണ്ഡാരങ്ങൾ കുത്തിത്തുറന്ന് പണം കവർന്നു. ഇന്നലെ രാവിലെ ക്ഷേത്രത്തിലെത്തിയവരാണ് മോഷണവിവരം അറിയുന്നത്. കൗണ്ടറിന്‍റെ പൂട്ട് തകർത്തു അകത്ത് കയറിയ മോഷ്‌ടാവ് ഓഫീസിന്‍റെ താക്കോൽ എടുത്ത് ഓഫീസ് മുറിയിൽ കയറുകയും അലമാരയിലെ വസ്തുക്കൾ വലിച്ച് വാരിയിടുകയും 30000 രൂപ വില വരുന്ന പൂജയ്ക്ക് ഉപയോഗിക്കുന്ന വെള്ളിക്കുടം മോഷ്‌ടിക്കുകയും ചെയ്തു. ഭണ്ഡാരങ്ങളിൽ നിന്നും 15000 രൂപയോളം നഷ്‌ടപ്പെട്ടതായാണ് കണക്കാക്കുന്നത്. ക്ഷേത്രത്തിന്‍റെ പിറകിലൂടെയാണ് മോഷ്ടാവ് അകത്തു കയറിയിട്ടുള്ളത്. സ്വർണം ഉൾപ്പെടെയുള്ള വസ്തുക്കൾ ലോക്കറിലായതിനാൽ ഇവ നഷ്ടപ്പെട്ടിട്ടില്ല. ക്ഷേത്ര ഭാരവാഹികളുടെ പരാതിയെ തുടർന്ന് അന്തിക്കാട് പോലീസ് അന്വേഷണ മാരംഭിച്ചു. ക്ഷേത്രത്തിൽ സിസിടിവി കാമറയില്ലാത്തതിനാൽ സമീപ വീടുകളിലെ കാമറകൾ പരിശോധിക്കാനാണ് പോലീസിന്‍റെ നീക്കം. കഴിഞ്ഞ ഏതാനും മാസങ്ങൾക്കകം സ്റ്റേഷൻ പരിധിയിൽ പത്തിലധികം ക്ഷേത്രങ്ങളിൽ മോഷണം നടന്നുവെങ്കിലും ഒരു കേസിൽ പോലും പ്രതിയെ പിടികൂടാൻ കഴിഞ്ഞിട്ടില്ല.

അമലയിൽ പരിശീലന ശില്പശാല

തൃശൂർ: അമല കാൻസർ റിസർച്ച് സെന്‍ററിന്‍റെ ആഭിമുഖ്യത്തിൽ സ്മോൾ ലബോറട്ടറി ആനിമൽ ഹാൻഡ്‌ലിംഗ് ആൻഡ് എക്സ്പിരിമെന്‍റേഷൻ എന്ന വിഷയത്തിൽ ദ്വിദിനശില്പശാല സംഘടിപ്പിച്ചു. ലബോറട്ടറി ആനിമലുകളെ കൈകാര്യംചെയ്യുന്നതിനുള്ള സാങ്കേതികവിദ്യകൾ, പരീക്ഷണനടപടിക്രമങ്ങൾ എന്നിവയെക്കുറിച്ച് പ്രായോഗികപരിചയം നൽകിയ പരിപാടിയിൽ വിവിധ മേഖലകളിൽനിന്നുള്ള വിദ്യാർഥികളും ഗവേഷകരും പങ്കെടുത്തു. കേരള വെറ്ററിനറി ആൻഡ് ആനിമൽ സയൻസസ് യൂണിവേഴ്സിറ്റി സർജറി ആൻഡ് റേഡിയോളജി വിഭാഗം പ്രഫസറായിരുന്ന ഡോ. സി.ബി. ദേവാനന്ദ്, വെറ്ററിനറി അനാട്ടമി വിഭാഗം അസോസിയേറ്റ് പ്രഫസർ ഡോ. ലീന ചന്ദ്രശേഖർ, അമല കാൻസർ റിസർച്ച് സെന്‍റർ ബയോകെമിസ്ട്രി വിഭാഗം അസോസിയേറ്റ് പ്രഫസർ ഡോ. അച്ചുതൻ. സി. രാഘവമേനോൻ, അമല ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് ഫാർമക്കോളജി വിഭാഗം അസി. പ്രഫസർ വിനോദ് കുമാർ തുടങ്ങിയവർ വിവിധ വിഷയങ്ങളിൽ ക്ലാസുകൾ നയിച്ചു. അമല ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് ജോയിന്‍റ് ഡയറക്ടർ ഫാ. ആന്‍റണി പെരിഞ്ചേരി, ഇൻസ്റ്റിറ്റ്യൂഷണൽ ആനിമൽ എത്തിക്കൽ കമ്മിറ്റി ചെയർമാൻ ഡോ. ടി.ഡി. ബാബു, റിസർച്ച് അഡ്മിനിസ്ട്രേറ്റർ ഡോ. ജോബി തോമസ് തുടങ്ങിയവർ സമാപന ചടങ്ങിൽ പങ്കെടുത്തു.

ഓട്ടോറിക്ഷ ഡ്രൈവർമാർ സമരത്തിന്

ഗുരുവായൂർ: പോലീസ് ഏർപ്പെടുത്തിയ വൺവേ ട്രാഫിക് പരിഷ്കരണം പുനഃപരിശോധിക്കണമെന്നാവശ്യപ്പെട്ട് ഗുരുവായൂരിലെ ഓട്ടോറിക്ഷ ഡ്രൈവർമാർ അനിശ്ചിതകാലസമരത്തിനൊരുങ്ങുന്നു. നാളെ അർധരാത്രി മുതലാണ് സമരം പ്രഖ്യാപിച്ചിരിക്കുന്നത്. നഗരത്തിലെ ഗതാഗതക്കുരുക്ക് നിയന്ത്രിക്കാനായാണ് ഇന്നർ, ഔട്ടർ റിംഗ് റോഡുകളിൽ പോലീസ് വൺവേ സംവിധാനം കർശനമാക്കിയത്. നേരത്തെ ക്ഷേത്രത്തിൽ തിരക്കുള്ള ദിവസങ്ങളിൽ മാത്രമായിരുന്നു വൺവേ. എന്നാൽ ഓട്ടോറിക്ഷകളെയും ഇരുചക്രവാഹനങ്ങളെയും ഒഴിവാക്കിയിരുന്നു. എന്നിട്ടും ഗതാഗതക്കുരുക്കിന് പരിഹാരം ആവാതായതോടെ ഓട്ടോറിക്ഷകൾക്കുംകൂടി വൺവേ ബാധകമാക്കുകയായിരുന്നു. അഷ്ടമിരോഹിണിയടക്കമുള്ള തിരക്കുള്ള ദിവസങ്ങളിൽ ഈ പരീക്ഷണം വിജയകരമായതോടെയാണ് ദിവസവും ഈ രീതി തുടരാൻ തീരുമാനിച്ചത്. ഔട്ടർറിംഗ് റോഡിൽ വൺവേ ഒഴിവാക്കണമെന്നാണ് ഓട്ടോക്കാരുടെ ആവശ്യം. വൺവേ പ്രകാരം ചുറ്റിവരുമ്പോൾ ചാർജ് കൂടുതൽ ഈടാക്കുമ്പോൾ യാത്രക്കാരുമായി തർക്കിക്കേണ്ടി വരുന്നതായി ഡ്രൈവർമാർ പറയുന്നു.സിഐടിയു, ഐഎൻടിയുസി, ബിഎംഎസ്, എഐടിയുസി സംഘടനകൾ സംയുക്തമായാണ് സമരത്തിന് ഇറങ്ങുന്നത്.

എല്ലാവർക്കും ചികിത്സ ഉറപ്പാക്കും: മന്ത്രി വീണാ ജോർജ്

അവണൂർ: കുടുംബാരോഗ്യകേന്ദ്രത്തിന്‍റെ പുതിയ കെട്ടിടം മന്ത്രി വീണാ ജോർജ് ഉദ്ഘാടനം ചെയ്തു. ആർദ്രം മിഷന്‍റെ ഭാഗമായി പ്രാഥമിക ആരോഗ്യകേന്ദ്രങ്ങളെ രോഗീസൗഹൃദമാക്കിക്കൊണ്ട് പ്രാഥമികചികിത്സ ഉറപ്പാക്കുന്ന കുടുംബാരോഗ്യകേന്ദ്രങ്ങളാക്കി പരിവർത്തനം ചെയ്തുകൊണ്ടിരിക്കുകയാണെന്ന് മന്ത്രി പറഞ്ഞു. 408 സ്ക്വയർമീറ്ററിലുള്ള കുടുംബാരോഗ്യകേന്ദ്രത്തിലെ പുതിയ കെട്ടിടത്തിൽ ഒപി കൗണ്ടർ, പ്രീ ചെക്കപ്പ് റൂം, മൂന്ന് ഒപി മുറികൾ, ഡ്രസിംഗ് റൂം, ഒബ്സർവേഷൻ റൂം തുടങ്ങി വിവിധ സൗകര്യങ്ങൾ ഒരുക്കിയിട്ടുണ്ട്. സേവ്യർ ചിറ്റിലപ്പള്ളി എംഎൽഎ അധ്യക്ഷത വഹിച്ചു. കെ. രാധാകൃഷ്ണൻ എം.പി മുഖ്യാതിഥിയായി. പുഴയ്ക്കൽ ബ്ലോക്ക് പഞ്ചായത്ത് പ്രസിഡന്‍റ് ലീല രാമകൃഷ്ണൻ, അവണൂർ പഞ്ചായത്ത് പ്രസിഡന്‍റ് തങ്കമണി ശങ്കുണ്ണി, വൈസ് പ്രസിഡന്‍റ് മിനി ഹരിദാസ്, ജില്ലാ പഞ്ചായത്ത് മെന്പർ ലിനി, ആരോഗ്യവകുപ്പ് ഡയറക്ടർ ഡോ. കെ.ജെ. റീന, കുടുംബാരോഗ്യകേന്ദ്രം മെഡിക്കൽ ഓഫീസർ ഡോ. എൻ. രേഖ തുടങ്ങിയവർ പങ്കെടുത്തു.

പേട്ടക്കാശ് വർധന: വ്യാപാരികൾ കടകൾ അടച്ചു പ്രതിഷേധിച്ചു

തൃശൂർ: പേട്ടക്കാശ് വർധനയ്ക്കെതിരേ അരിയങ്ങാടി, നായരങ്ങാടി മേഖലകളിൽ വ്യാപാരികൾ കടകളടച്ചു പ്രതിഷേധിച്ചു. വണ്ടിപ്പേട്ടയല്ലാത്ത അരിയങ്ങാടി, നായരങ്ങാടി മേഖലകളിൽ ചരക്കുവാഹനങ്ങൾ വരുന്പോൾ അമിതമായ ഫീസ് ഈടാക്കുന്നതു ചരക്കുവാഹനങ്ങളുടെ വരവു കുറച്ചെന്നും വ്യാപാരം നടക്കാത്ത സാഹചര്യമാണെന്നും മറ്റു മാർക്കറ്റുകളിൽ ഇത്തരം പിരിവില്ലെന്നും കച്ചവടക്കാർ പറഞ്ഞു. മുൻകാലങ്ങളിൽ 50 മുതൽ നൂറുരൂപവരെ വാങ്ങിയ സ്ഥാനത്ത് 650 രൂപവരെയാണ് ഈടാക്കുന്നത്. മറ്റു പല മാർക്കറ്റുകളിലേക്കുമായി എത്തുന്ന വാഹനങ്ങൾ അരിയങ്ങാടിയിൽ അഞ്ചു ചാക്ക് ഇറക്കിയാലും ഈ തുക നൽകണം. നിരവധിതവണ കോർപറേഷനിൽ പരാതി നൽകിയെങ്കിലും നടപടിയുണ്ടായില്ല. ഇതിൽ പ്രതിഷേധിച്ചാണ് കടയടപ്പുസമരമെന്നും വ്യാപാരികൾ പറഞ്ഞു. പ്രശ്നത്തിനു പരിഹാരമുണ്ടായില്ലെങ്കിൽ കോർപറേഷൻ പരിധിയിലെ എല്ലാ വ്യാപാരസ്ഥാപനങ്ങളിലേക്കും സമരം വ്യാപിപ്പിക്കാൻ വ്യാപാരികളുടെയും ചരക്കുവാഹന ഉടമകളുടെയും ഡ്രൈവർമാരുടെയും സംയുക്തയോഗം തീരുമാനിച്ചു. കടയടപ്പ് സമരത്തിനോടനുബന്ധിച്ച് അരിയങ്ങാടിയിൽ പൊതുസമ്മേളനവും കോർപറേഷൻ ഓഫീസിലേക്കു മാർച്ചും നടത്തി. പൊതുസമ്മേളനം വ്യാപാരിവ്യവസായി ഏകോപനസമിതി ജില്ലാ സെക്രട്ടറിയും തൃശൂർ നിയോജകമണ്ഡലം ചെയർമാനുമായ ജോഷി മാത്യു തേറാട്ടിൽ ഉദ്ഘാടനം ചെയ്തു. ചേംബർ ഓഫ് കൊമേഴ്സ് മുൻസെക്രട്ടറി ആൻഡ്രൂസ് മഞ്ഞില, സമിതി ജില്ലാ സെക്രട്ടറിയും ചേംബർ ജോയിന്‍റ് സെക്രട്ടറിയുമായ സിജോ ചിറക്കേക്കാരൻ, ചേംബർ ഓഫ് കൊമേഴ്സ് സെക്രട്ടറി സോളി തോമസ്, വ്യാപാരി സമിതി ജില്ലാ ട്രഷറർ ജോയ് പ്ലാശേരി, ജില്ലാ മർച്ചന്‍റ് അസോസിയേഷൻ പ്രസിഡന്‍റ് സുനിൽ സൈമണ്‍, ചേംബർ ഗ്രോസറി വിഭാഗം കണ്‍വീനർ ആൽഫ്രഡ് എൻ. ഡേവിഡ് എന്നിവർ പ്രസംഗിച്ചു. തുടർന്നു കോർപഷേൻ ഓഫീസിലേക്കു പ്രകടനമായി എത്തി മേയർ, കോർപറേഷൻ സെക്രട്ടറി എന്നിവർക്കു നിവേദനം നൽകി.

വാഹനാപകടത്തിൽ പരിക്കേറ്റ വീട്ടമ്മ മരിച്ചു

പെരുന്പടപ്പ്: സ്ക്കൂട്ടിയിൽ നിന്ന് വീണ് പരിക്കേറ്റ് ചികിത്സയിലായിരുന്ന വീട്ടമ്മമരിച്ചു. ഹരിതകർമ്മ സേനപ്രവർത്തകയും ചന്തപ്പടി രാധാകൃഷ്ണന്‍റെ ഭാര്യയുമായ ദേവകി (48) ആണ് മരിച്ചത്. സ്ക്കൂട്ടിയിൽ യാത്ര ചെയ്യവേ നിയന്ത്രണം വിട്ട് മറിഞ്ഞാണ് അപകടം. സ്വകാര്യ ആശുപത്രിയിൽ ചികിത്സയിലിരിക്കെയാണ് മരണം. പോലീസ് നടപടി ക്കുശേഷം സംസ്ക്കാരം നടത്തി.

മാർ തൂങ്കുഴിക്ക് ആദരാഞ്ജലി: നന്ദിയറിയിച്ച് മാർ ആൻഡ്രൂസ് താഴത്ത്

തൃശൂർ: ആർച്ച്ബിഷപ് എമരിറ്റസ് മാർ ജേക്കബ് തൂങ്കുഴിക്ക് ആദരാഞ്ജലിയർപ്പിച്ചവർക്ക് നന്ദിയറിയിച്ച് അതിരൂപത മെത്രാപ്പോലീത്ത മാർ ആൻഡ്രൂസ് താഴത്ത്. മെത്രാന്‍മാരും വൈദികരും സന്യസ്തരും വിവിധ മതനേതാക്കളും സാമൂഹിക സാംസ്കാരിക രാഷ്ട്രീയ നേതാക്കളുമടക്കം പതിനായിരങ്ങളാണ് തൃശൂരും കോഴിക്കോട്ടുമായി എത്തിച്ചേർന്നത്. പിതാവിനോടുള്ള ആദരവ് പ്രകടിപ്പിച്ചു ലെയോ മാർപാപ്പ, പ്രധാനമന്ത്രി നരേന്ദ്ര മോദി എന്നിവരടക്കം കേന്ദ്ര- സംസ്ഥാന മന്ത്രിമാർക്കും സാംസ്കാരികനേതാക്കൾക്കും നന്ദി. തൃശൂർ ആർച്ച്ബിഷപ്സ് ഹൗസിലും ഡോളേഴ്സ് ബസിലിക്കയിലും (പുത്തൻപള്ളി) നടന്ന ചടങ്ങുകളും പൂരനഗരി ചുറ്റിയുള്ള വിലാപയാത്രയ്ക്കും മൃതദേഹം വഹിച്ചു കോഴിക്കോട്ടേക്കുള്ള യാത്രയ്ക്കും ദേവഗിരി പള്ളി എസ്കെഡി ജനറലേറ്റ് ഹോം ഓഫ് ലവ് ചാപ്പലിലും നടത്തിയ ചടങ്ങുകൾക്കു മന്ത്രിമാർ, എംപിമാർ, എംഎൽഎമാർ, കളക്ടർ അടക്കമുള്ള ഉദ്യോഗസ്ഥർ, കമ്മീഷണർ, എസിപി അടക്കമുള്ള പോലീസ് ഉദ്യോഗസ്ഥർ, മാധ്യമപ്രവർത്തകർ എന്നിങ്ങനെ നിരവധിപ്പേർ സഹായിച്ചു. 52 വർഷം മെത്രാനായിരുന്ന തുങ്കുഴിപ്പിതാവ് മാനന്തവാടി രൂപതയിൽ 22 വർഷവും താമരശേരി രൂപതയിൽ രണ്ടുവർഷവും തൃശൂർ അതിരൂപതയിൽ പത്തുവർഷവും മേൽപ്പട്ടശുശ്രൂഷ ചെയ്തു. 2007ൽ തൃശൂർ സെന്‍റ് മേരീസ് മൈർ സെമിനാരിയിൽ വിശ്രമജീവിതം ആരംഭിച്ച അദ്ദേഹം തുടർന്നും ആത്മീയ സാമൂഹ്യ സാംസ്കാരിക മേഖലകളിൽ കർമനിരതനായിരുന്നു. 1977ൽ മാനന്തവാടിയിൽ അദ്ദേഹം രൂപംകൊടുത്ത ക്രിസ്തുദാസി സിസ്റ്റേഴ്സിന്‍റെ സേവനം നിസ്തുലമാണ്. ജൂബിലി മിഷൻ മെഡിക്കൽ കോളജിലെ ഡോക്ടർമാർ, നേഴ്സുമാർ എന്നിവരുടെ സേവനം വിലമതിക്കാനാകാത്തതാണ്. പിതാവ് ആരംഭിച്ച മേരിമാതാ മേജർ സെമിനാരിയും ജ്യോതി എന്‍ജിനീയറിംഗ്‌ കോളജും മഹാജൂബിലി ബിഎഡ് ട്രെയിനിംഗ് കോളജും ജൂബിലി നഴ്സിംഗ് കോളജും അദ്ദേഹത്തിന്‍റെ ഓർമ നിലനിർത്തുന്ന സ്ഥാപനങ്ങളാണ്. ഒരു നൂറ്റാണ്ടുകാലത്തോളം ഈ ഭൂമിയിൽ ജീവിച്ച് ദൈവത്തെ മഹത്വപ്പെടുത്തിയും ജനങ്ങളെ സേവിച്ചും ഭാവിതലമുറയ്ക്ക് മാതൃക നൽകിയും കടന്നുപോയ ജേക്കബ് തൂങ്കുഴിപ്പിതാവിനു നിത്യശാന്തി നേരുന്നതോടൊപ്പം തൃശൂർ അതിരൂപത ആദരാഞ്ജലികൾ അർപ്പിക്കുന്നെന്നും മാർ ആൻഡ്രൂസ് താഴത്ത് പറഞ്ഞു.

ആനവണ്ടി ഇടാൻ സ്ഥലമില്ല

തൃശൂർ: നവീകരണത്തിനായി തൃശൂർ കെഎസ്ആർടിസി സ്റ്റാൻഡ് പൊളിച്ചുതുടങ്ങിയതോടെ ബദൽസംവിധാനം അടിയന്തരമായി സജ്ജമാക്കാൻ തീരുമാനം. താത്കാലിക സ്റ്റാൻഡിനുള്ള നാലു സ്ഥലങ്ങളുടെ പട്ടിക മുഖ്യമന്ത്രിക്കു ജില്ലാ കളക്ടർ കൈമാറിയിട്ടുണ്ട്. ഇതിൽ എത്രയും വേഗം തീരുമാനമുണ്ടാകും. ട്രാഫിക് പോലീസ് അടക്കമുള്ള അധികാരികളുടെ അഭിപ്രായം ആരാഞ്ഞശേഷം ആയിരിക്കും സ്ഥലം നിശ്ചയിക്കുക. തൃശൂർ ശക്തൻ സ്റ്റാൻഡും വടക്കേ സ്റ്റാൻഡിനു സമീപമുള്ള സ്ഥലവും ഉൾപ്പെടെയാണ് താത്കാലിക സ്റ്റാൻഡ് ആക്കാൻ ഉദ്ദേശിച്ചിട്ടുള്ളത്. വടക്കേ സ്റ്റാൻഡ് നവീകരിച്ചപ്പോൾ സ്വകാര്യബസുകൾ പാർക്ക് ചെയ്തിരുന്ന സ്ഥലമാണ് പരിഗണനയിലുള്ളത്. എന്നാൽ, കെഎസ്ആർടിസി ബസുകളെല്ലാം ഇവിടേക്കെത്തുന്പോൾ സ്വരാജ് റൗണ്ടിലും കുറുപ്പം റോഡ്, ബിനി ജംഗ്ഷനിൽനിന്നു വടക്കേ സ്റ്റാൻഡ് വരെയുള്ള റോഡ്, അശ്വനി ജംഗ്ഷനും പരിസരവും എന്നിവിടങ്ങളിലെല്ലാം രൂക്ഷമായ ഗതാഗതക്കുരുക്കുണ്ടാകുമെന്നു ചൂണ്ടിക്കാണിക്കപ്പെടുന്നു. അതുകൊണ്ട് വടക്കേ സ്റ്റാൻഡിനെക്കാൾ നല്ലതു ശക്തൻ സ്റ്റാൻഡാണെന്നു കെഎസ്ആർടിസി അധികൃതർക്ക് അഭിപ്രായമുണ്ട്. ആയിരത്തോളം സർവീസുകളാണ് തൃശൂർ കെഎസ്ആർടിസി സ്റ്റാൻഡിൽ വന്നുപോകുന്നത്. തൃശൂരിൽനിന്ന് സർവീസ് തുടങ്ങുന്ന നാല്പതോളം സർവീസുകളുണ്ട്. ഇവയ്ക്കെല്ലാംകൂടി വലിയ സ്ഥലംതന്നെ വേണമെന്നതാണ് യാഥാർഥ്യം. ശക്തൻ സ്റ്റാൻഡിലോ പരിസരത്തുള്ള മറ്റേതെങ്കിലും സ്ഥലത്തോ ആയി ബദൽ കെഎസ്ആർടിസി സ്റ്റാൻഡ് പ്രവർത്തിക്കാമെന്നാണ് പൊതുവേയുള്ള അഭിപ്രായം. എന്നാൽ, ശക്തൻ സ്റ്റാൻഡ് വിട്ടുകൊടുക്കുന്ന കാര്യത്തിൽ കോർപറേഷൻ സമ്മതം മൂളിയിട്ടില്ല. ഇപ്പോൾതന്നെ ബസുകളുടെ ബാഹുല്യംകൊണ്ട് വീർപ്പുമുട്ടുന്ന ശക്തൻ സ്റ്റാൻഡിലേക്കു കെഎസ്ആർടിസി ബസുകൾകൂടി വന്നാൽ തിരക്ക് നിയന്ത്രിക്കാൻ എളുപ്പമാവില്ല. ഇക്കണ്ടവാര്യർ റോഡിലെ ഒഴിഞ്ഞുകിടക്കുന്ന നാലേക്കർ സ്ഥലം ബദൽ സ്റ്റാൻഡാക്കാൻ പദ്ധതി ഉണ്ടായിരുന്നെങ്കിലും അവിടെ അടിസ്ഥാന സൗകര്യങ്ങൾ ഇല്ല. അതു സജ്ജമാക്കാൻ വലിയ ചെലവും വരും. അതുകൊണ്ടുതന്നെ കെഎസ്ആർടിസി ഈ സ്ഥലത്തോട് അധികം താത്പര്യം പ്രകടിപ്പിക്കുന്നില്ല. ശക്തൻ സ്റ്റാൻഡിൽ കെ‌എസ്ആർടിസിക്ക് സ്റ്റാൻഡ് അനുവദിക്കരുത്: ബസുടമകൾ തൃശൂർ: കെഎസ്ആർടിസി സ്റ്റാൻഡ് പുതുക്കിപ്പണിയുന്പോൾ ശക്തൻ തന്പുരാൻ സ്റ്റാൻഡിൽ താത്കാലിക സ്റ്റാൻഡ് അനുവദിക്കരുതെന്നു തൃശൂർ ജില്ലാ പ്രൈവറ്റ് ബസ് ഓപ്പറേറ്റേഴ്സ് അസോസിയേഷൻ. ശക്തൻ സ്റ്റാൻഡിൽ മുഴുവൻ ബസുകളും ഉൾക്കൊള്ളിക്കാൻ കഴിയാത്ത സാഹചര്യമുണ്ട്. യാത്രക്കാർക്ക് അടിസ്ഥാനസൗകര്യമില്ല. ബസ് സ്റ്റാൻഡ് ഫീസ് 25 രൂപയിൽനിന്നു 40 രൂപയാക്കി വർധിപ്പിച്ചു. കെഎസ്ആർടിസി ബസുകൾക്കു താത്കാലിക സ്റ്റാൻഡ് അനുവദിക്കുന്പോൾ ട്രിപ്പുകൾ മുടങ്ങാൻ സാധ്യതയുണ്ട്. ഇക്കാര്യങ്ങൾ ചൂണ്ടിക്കാട്ടി ജില്ലാ കളക്ടർക്ക് അസോസിയേഷൻ കത്തു നൽകിയെന്ന് അസോസിയേഷൻ പ്രസിഡന്‍റ് എം.എസ്. പ്രേംകുമാർ, ജനറൽ സെക്രട്ടറി കെ.കെ. സേതുമാധവൻ എന്നിവർ സംയുക്തപ്രസ്താവനയിൽ അറിയിച്ചു. മലപ്പുറം ടീം പൊളി തുടങ്ങി തൃശൂർ: രണ്ടുമാസംമുമ്പ് തീരുമാനമായതാണെങ്കിലും തൃശൂർ കെഎസ്ആർടിസി സ്റ്റാൻഡിന്‍റെ പൊളിക്കൽ ആരംഭിച്ചതു കഴിഞ്ഞ ദിവസംമാത്രം. മലപ്പുറത്തുള്ള പികെ എന്‍റർപ്രൈസസ് എന്ന സ്ഥാപനമാണ് സ്റ്റാൻഡ് പൊളിക്കാൻ എത്തിയിരിക്കുന്നത്. പഴയ ഗാരേജാണ് ആദ്യം പൊളിച്ചത്. ബദൽസംവിധാനം തീരുമാനമാവാത്തതിനാൽ പൊളിക്കൽ തുടങ്ങാൻ വൈകുകയായിരുന്നു. പത്തോളം ജോലിക്കാരാണ് കെട്ടിടം പൊളിക്കാൻ എത്തിയിട്ടുള്ളത്. വരുംദിവസങ്ങളിൽ ജെസിബി അടക്കമുള്ള ഉപകരണങ്ങളും എത്തും. ഒന്നരമാസംകൊണ്ട് കെട്ടിടങ്ങൾ മുഴുവൻ ഇടിച്ചുനിരപ്പാക്കി കൊടുക്കാം എന്നാണ് വ്യവസ്ഥയെങ്കിലും മഴയടക്കം കാലാവസ്ഥ പ്രതികൂലമാകുമ്പോൾ ഒന്നരമാസം മതിയാകില്ല എന്നാണ് സൂചന.

ജില്ലാ ക്ഷീരസംഗമത്തിനു വെള്ളാങ്കല്ലൂരിൽ തുടക്കം

ഇരിങ്ങാലക്കുട: ജില്ലാ ക്ഷീരസംഗമത്തിനു ക്ഷീരതരംഗം സാംസ്കാരിക ഘോഷയാത്രയോടെ തുടക്കംകുറിച്ചു. വെള്ളാങ്കല്ലൂർ ബ്ലോക്ക് പഞ്ചായത്ത് പ്രസിഡന്‍റ് സുധ ദിലീപ് പതാക ഉയർത്തി. വെള്ളാങ്കല്ലൂർ പഞ്ചായത്ത് പ്രസിഡന്‍റ് നിഷ ഷാജി അധ്യക്ഷത വഹിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് ഉണ്ണികൃഷ്ണൻ കുറ്റിപറന്പിൽ, ബ്ലോക്ക് പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ പ്രസന്ന അനിൽകുമാർ, വെള്ളാങ്കല്ലൂർ ക്ഷീര സഹകരണസംഘം പ്രസിഡന്‍റ് ടി.എ. ഹുസൈൻ എന്നിവർ സംസാരിച്ചു. ഇന്നു രാവിലെ 10നു നടക്കുന്ന ക്ഷീരപഥം ഡയറി എക്സ്പോ വി.ആർ. സുനിൽകുമാർ എംഎൽഎ ഉദ്ഘാടനം ചെയ്യും. ക്ഷീരസമൃദ്ധി സെമിനാർ പുത്തൻചിറ പഞ്ചായത്ത് പ്രസിഡന്‍റ് റോമി ബേബി ഉദ്ഘാടനം ചെയ്യും. പുത്തൻചിറ പഞ്ചായത്ത് വൈസ് പ്രസിഡന്‍റ് എ.പി. വിദ്യാധരൻ അധ്യക്ഷത വഹിക്കും. പാലുത്പന്നനിർമാണ പരിശീലനപരിപാടി പൂമംഗലം പഞ്ചായത്ത് പ്രസിഡന്‍റ് കെ.എസ്. തന്പി ഉദ്ഘാടനം ചെയ്യും. പൂമംഗലം പഞ്ചായത്ത് വൈസ് പ്രസിഡന്‍റ് കവിത സുരേഷ് അധ്യക്ഷത വഹിക്കും. ഉച്ചയ്ക്കു രണ്ടിനു ക്ഷീരസംഘം ജീവനക്കാർക്കുള്ള ഡയറി ക്വിസ് പടിയൂർ പഞ്ചായത്ത് പ്രസിഡന്‍റ് ലിജി രതീഷ് ഉദ്ഘാടനം ചെയ്യും. വൈസ് പ്രസിഡന്‍റ് കെ.എം. പ്രേമവൽസൻ അധ്യക്ഷത വഹിക്കും. 3.30നു നടക്കുന്ന ക്ഷീരകർഷകരുടെ അനുഭവങ്ങൾ പങ്കുവയ്ക്കൽ വേളൂക്കര പഞ്ചായത്ത് പ്രസിഡന്‍റ് കെ.എസ്. ധനേഷ് ഉദ്ഘാടനം ചെയ്യും. വൈകീട്ട് അഞ്ചിനു നടക്കുന്ന സാംസ്കാരികസായാഹ്നം വെള്ളാങ്കല്ലൂർ ബ്ലോക്ക് പഞ്ചായത്ത് പ്രസിഡന്‍റ് സുധ ദിലീപ് ഉദ്ഘാടനം ചെയ്യും.

വ്യാപാരികളുടെ കടകളടച്ച് പ്രതിഷേധം ഇന്ന്

തൃശൂർ: മാർക്കറ്റിലെ പേട്ടക്കാശ് പിരിവിനു പോലീസ് സംരക്ഷണം ആവശ്യപ്പെട്ട് കരാറുകാരൻ നല്കിയ ഹർജി ഹൈക്കോടതി 26നു പരിഗണിക്കാനിരിക്കെ വ്യാപാരികളുടെ കടകളടച്ചു പ്രതിഷേധം ഇന്ന്. കോർപറേഷന്‍റെ വർധിപ്പിച്ച പേട്ടക്കാശ് അന്യായമാണെന്നു ചൂണ്ടിക്കാട്ടിയാണ് അരിയങ്ങാടി, നായരങ്ങാടി, ജയ്ഹിന്ദ് മാർക്കറ്റ് മേഖലയിലെ വ്യാപാരസ്ഥാപനങ്ങൾ ഇന്നു മുഴുവൻസമയവും അടച്ചിടാൻ വ്യാപാരികൾ തീരുമാനിച്ചത്. രാവിലെ പത്തിനു വ്യാപാരികൾ കോർപറേഷനിലേക്കു മാർച്ചും നടത്തും. അമിത പേട്ടക്കാശുപിരിവുമൂലം അങ്ങാടിയിലേക്കു ചരക്കുവാഹനങ്ങൾ വരാതായെന്നും വ്യാപാരം നടക്കാതെ കച്ചവടസ്ഥാപനങ്ങൾ അടച്ചുപൂട്ടേണ്ട അവസ്ഥയിലാണെന്നും വ്യാപാരികൾ പറഞ്ഞു. മാർക്കറ്റിനകത്താണെങ്കിലും പൊതുവഴിയിൽ നിർത്തിയാണ് വാഹനങ്ങളിൽനിന്ന് ചരക്കിറക്കുന്നത്. എത്ര കുറവ് ചരക്കിറക്കിയാലും കോർപറേഷന്‍റെ ഉയർന്ന നിരക്ക് കൊടുക്കേണ്ട അവസ്ഥയാണ്. വ്യാപാരസ്ഥാപനങ്ങൾ പ്രവർത്തിക്കുന്ന കെട്ടിടങ്ങൾ സ്വകാര്യവ്യക്തികളുടേതാണ്. പിന്നെന്തിനാണ് മറ്റുജില്ലകളിൽ ഇല്ലാത്തതരത്തിൽ പേട്ടക്കാശ് പിരിവ് തൃശൂർ കോർപറേഷൻ നടത്തുന്നതെന്നു വ്യാപാരികൾ ചോദിക്കുന്നു. അമിതമായ പേട്ടക്കാശുപിരിവ് അവസാനിപ്പിക്കണമെന്നു നിരവധിതവണ കോർപറേഷനോട് ആവശ്യപ്പെട്ടിട്ടും യാതൊരു നടപടിയും സ്വീകരിച്ചിട്ടില്ലെന്നു ചേംബർ ഓഫ് കോമേഴ്സ് സെക്രട്ടറി സോളി തോമസ്, ഗ്രോസറി കമ്മിറ്റി കൺവീനർ ആൽഫ്രഡ് എൻ. ഡേവിസ് എന്നിവർ വ്യക്തമാക്കി. 2017ലെ കരാർപ്രകാരമുള്ള തുകയാണു വാഹന ഉടമകൾ മാർക്കറ്റ് ഫീ ഇനത്തിൽ നല്കിവരുന്നത്. 2024 ഡിസംബറിൽ കോർപറേഷൻ വീണ്ടും ടെൻഡർ വിളിക്കുകയും 2025 ഫെബ്രുവരിയിലെ കൗൺസിൽ പുതിയ നിരക്കിന് അംഗീകാരം നല്കുകയും ചെയ്തു. എന്നാൽ ഉയർത്തിയ തുക അംഗീകരിക്കാൻ വ്യാപാരി‌കളും ചുമട്ടുതൊഴിലാളികളും തയാറായിട്ടില്ല. വർധിപ്പിച്ച തുക പിരിക്കാനെത്തിയപ്പോൾ എതിർപ്പുണ്ടായതിനെതുടർന്ന് കരാറുകാരൻ ഹൈക്കോടതിയിൽനിന്നു പോലീസ് സംരക്ഷണം നേടിയിരുന്നു. ഏപ്രിൽമുതൽ കരാറുകാരനു പുതുക്കിയ തുക പിരിക്കാമെങ്കിലും തർക്കംകാരണം ഇതുവരെ സാധിച്ചിട്ടില്ല. കഴിഞ്ഞ ദിവസം പോലീസ് സംരക്ഷണയിൽ പിരിവിനെത്തിയപ്പോൾ പലരും കരാറുകാരനുമായി സഹകരിച്ചിരുന്നു. അതിനുശേഷം പോലീസില്ലാതെ പിരിവിനെത്തിയപ്പോൾ കരാറുകാരനുമായി വീണ്ടും തർക്കമുണ്ടാവുകയും വ്യാപാരസ്ഥാപനങ്ങൾ അടച്ചിച്ചു പ്രതിഷേധിക്കാൻ വ്യാപാരികൾ തീരുമാനിക്കുകയുമായിരുന്നു. കടുപ്പം നിരക്കുവർധന മാർക്കറ്റിൽ ചരക്കിറക്കാനെത്തുന്ന വാഹനങ്ങളിൽനിന്നാണ് പേട്ടക്കാശ് ഇടാക്കുന്നത്. നേരത്തേ 16 ചക്രമുള്ള ലോറികളിൽനിന്ന് 80 രൂപയും മറ്റുള്ള വാഹനങ്ങളിൽനിന്ന് 60 രൂപയുമാണ് പേട്ടക്കാശ് പിരിച്ചിരുന്നത്. എന്നാൽ പുതുക്കിയ നിരക്കനുസരിച്ച് 16 ചക്രവാഹനങ്ങൾക്ക് ജിഎസ്ടി അടക്കം 649 രൂപ വാഹന ഉടമകൾ നല്കണം. 14 ചക്രമുള്ള വാഹനങ്ങൾക്ക് 325 രൂപ, 12 ചക്രത്തിന് 265 രൂപ, പത്തുചക്രം 180 രൂപ, ആറുചക്രം 140 രൂപ, നാലു ചക്രം 70 രൂപ, മൂന്നു ചക്രം 30 രൂപ എന്നിങ്ങനെയാണു ജിഎസ്ടിയടക്കമുള്ള നിരക്ക്. കുറഞ്ഞനിരക്കിൽനിന്ന് വൻതോതിൽ ഉയർത്തിയ തുക ഈടാക്കുന്നതിനെയാണ് വ്യാപാരികളും ചുമട്ടുതൊഴിലാളികളും എതിർക്കുന്നത്.

അതിരപ്പിള്ളി യാത്രിനിവാസ് മൂന്നാംഘട്ട നിർമാണം: രണ്ടുകോടിയുടെ ഭരണാനുമതി

ചാലക്കുടി: അതിരപ്പിള്ളി യാത്രിനിവാസ് മൂന്നാംഘട്ട നിർമാണപ്രവൃത്തിക്കു രണ്ടുകോടി രൂപയുടെ ഭരണാനുമതി ലഭിച്ചതായി സനീഷ്‌കുമാർ ജോസഫ് എംഎൽഎ അറിയിച്ചു. എലവേഷൻ പ്രവൃത്തികൾ, റൂഫിംഗ്, ലാൻഡ് സ്‌കേപ്പിംഗ്, ഇന്‍റീരിയർ പ്രവൃത്തികൾ, അലങ്കാര വിളക്കുകൾ സ്ഥാപിക്കൽ തുടങ്ങിയവയ്ക്കാണ് തുക അനുവദിച്ചിരിക്കുന്നത്. നേരത്തേ രണ്ടു ഘട്ടങ്ങളിലായി അനുവദിച്ചിരുന്ന 10 കോടി രൂപയുടെ നിർമാണപ്രവൃത്തികൾ പുരോഗമിക്കുകയാണ്. വിനോദസഞ്ചാരവകുപ്പിനാണ് പ്രവൃത്തിയുടെ നിർവഹണച്ചുമതല. അതിരപ്പിള്ളി, വാഴച്ചാൽ, മലക്കപ്പാറ, വാൽപ്പാറ തുടങ്ങിയ വിനോദസഞ്ചാരകേന്ദ്രങ്ങളിൽ വരുന്ന അതിഥികൾക്കു മികച്ച താമസസൗകര്യം ഒരുക്കുകയെന്ന ലക്ഷ്യത്തോടെ നടപ്പിലാക്കുന്ന നിർമാണം ഉടൻ പൂർത്തിയാക്കി തുറന്നുനൽകുമെന്നും എംഎൽഎ അറിയിച്ചു.

ജയരാജ് വാര്യർക്ക് നിറവ് പ്രതിഭ പുരസ്കാരം

ചാലക്കുടി: ജയരാജ് വാര്യർക്ക് 2025ലെ നിറവ് പ്രതിഭ പുരസ്കാരം സമ്മാനിക്കും. ചിറ്റിലപ്പിള്ളി തണ്ടിയേക്കൽ ഷാജു, ജിനേഷ് എന്നിവരുടെ സ്മരണാർഥം 25,000 രൂപയും മെമന്‍റോയും അടങ്ങുന്ന പുരസ്കാരം ഒക്ടോബർ രണ്ടിന് സമർപ്പിക്കും. ഒക്ടോബർ 1, 2 തീയതികളിൽ വി.ആർ. പുരം കമ്യൂണിറ്റി ഹാൾ, ഗവ. ഹയർസെക്കഡറി സ്കൂൾ ഗ്രൗണ്ട് എന്നിവിടങ്ങളിലായി നിറവ് ഗ്രാമോത്സവം സംഘടിപ്പിക്കും ഭാരവാഹികളായി ഷിബു വാലപ്പൻ - ചെയർമാൻ, ആലീസ് ഷിബു, ദേവസി പാറേക്കാടൻ, ഇന്ദിര ബാബു, പോൾസി ബാബു- വൈസ് ചെയർമാൻമാർ, ഷാജി മഠത്തിപറമ്പിൽ - ജനറൽ കൺവീനർ, ഡോ. ലിന്‍റോ ആലപ്പാട്ട് ചീഫ് കോ-ഓർഡിനേറ്റർ, സജിലേഷ് ബാലൻ - ട്രഷറർഎന്നിവരെ തെരഞ്ഞെടുത്തു.

വില്ലേജ് ഡിജിറ്റല്‍ സര്‍വേ ഉദ്ഘാടനം

കാറളം: വില്ലേജ് ഡിജിറ്റല്‍ സര്‍വേ ഉദ്ഘാടനം മന്ത്രി ആര്‍. ബിന്ദു നിര്‍വഹിച്ചു. കാറളം ഗ്രാമപഞ്ചായത്ത് പ്രസിഡന്‍റ് ബിന്ദു പ്രദീപ് അധ്യക്ഷതവഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ലളിത ബാലന്‍, ജില്ലാ പഞ്ചായത്തംഗം ഷീല അജയഘോഷ് എന്നിവര്‍ മുഖ്യാതിഥികളായി. തൃശൂര്‍ സര്‍വേ മാപ്പിംഗ് അസിസ്റ്റന്‍റ് ഡയറക്ടര്‍ കെ.പി. ഗംഗാധരന്‍, ബ്ലോക്ക് പഞ്ചായത്ത് പ്രസിഡന്‍റ് ലളിത ബാലന്‍, ജില്ലാ പഞ്ചായത്തംഗം ഷീല അജയ്ഘോഷ്, സര്‍വേ അസിസ്റ്റന്‍റ് ഡയറക്ടര്‍ മണിക്കുട്ടന്‍ എന്നിവര്‍ സംസാരിച്ചു.

നെല്ലായി - വയലൂര്‍ റോഡ് നവീകരണത്തിനു തുടക്കം

കൊടകര: പറപ്പൂക്കര പഞ്ചായത്തില്‍ നെല്ലായി - വൈലൂര്‍ റോഡിന്‍റെ നിര്‍മാണോദ്ഘാടനം കെ.കെ. രാമചന്ദ്രന്‍ എംഎല്‍എ നിര്‍വഹിച്ചു. മുഖ്യമന്ത്രിയുടെ ഗ്രാമീണ റോഡ് നവീകരണ പദ്ധതിയില്‍ ഉള്‍പ്പടുത്തി 30 ലക്ഷം ചെലവിലാണ് നവീകരണം. പഞ്ചായത്ത് പ്രസിഡന്‍റ് ഇ.കെ. അനൂപ് അധ്യക്ഷതവഹിച്ചു. ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ എം. കെ. ശൈലജ , വികസന സ്റ്റാന്‍ഡിംഗ് കമ്മിറ്റി ചെയര്‍മാന്‍ കെ.സി. പ്രദീപ്, അംഗം എ. രാജീവ് എന്നിവര്‍ പ്രസംഗിച്ചു.

തെരുവുനായ്ക്കള്‍ക്ക് വാക്‌സിനേഷന്‍ നല്‍കി

ഇരിങ്ങാലക്കുട: മാര്‍ക്കറ്റില്‍ തെരുവുനായ്ക്കളുടെ കടിയേറ്റ മൂന്നു പേര്‍ ചികിത്സയില്‍ തുടരുകയാണ്. ഇവരെ കടിച്ച തെരുവുനായ്ക്കു പേവിഷബാധ സ്ഥിതീകരിച്ചതിനെ തുടര്‍ന്ന് ഇന്നലെ വാക്‌സിനേഷന്‍ നല്‍കി. ഇന്നലെ രാവിലെ മാര്‍ക്കറ്റ് പരിസരത്തും നഗരസഭ ഓഫീസിനു സമീപവുമാണ് തെരുവു നായ്ക്കള്‍ക്ക് വാക്‌സിനേഷന്‍ നടത്തിയത്. 48 തെരുവുനായകള്‍ക്ക് വാക്‌സിനേഷന്‍ നടത്തി. ഈ മാസം അവസാനത്തില്‍ നഗരസഭയുടെ മറ്റു പ്രദേശങ്ങളിലുള്ള തെരുവുനായ്ക്കള്‍ക്കും വാസക്‌സിനേഷന്‍ നല്‍കും. കുറച്ചുദിവസം മുമ്പ് ഷണ്‍മുഖം കനാല്‍ ബെയ്‌സിന് സമീപം നായ്കുട്ടിയുടെ കടിയേറ്റ് മൂന്നുപേര്‍ ചികിത്സയിലായിരുന്നു. ഈ നായ്കുട്ടിയുടെ പോസ്റ്റ്‌മോര്‍ട്ടം റിപ്പോര്‍ട്ടിലും പേവിഷബാധയുണ്ടെന്ന് കണ്ടെത്തിയതിനെ തുടന്ന് വാക്‌സിനേഷന്‍ നടപടികള്‍ നടത്തി. നഗരസഭയുടെയും വെറ്ററിനറി ആശുപത്രിയുടെ സഹകരണത്തോടയായിരുന്നു വാക്‌സിനേഷന്‍ നടത്തിയത്. ഇരിങ്ങാലക്കുട വെറ്ററിനറി ആശുപത്രിയിലെ സീനിയര്‍ സര്‍ജന്‍ ഡോ. അഷറഫ് അബ്ദുള്‍ റഹിമാന്‍, വെറ്ററിനറി സര്‍ജന്‍ ഡോ.എം.ജി. സജീഷ്, ലൈവ് സ്‌റ്റോക്ക് ഇന്‍സ്‌പെക്ടര്‍മാരായ കെ.കെ. അമ്പിളി, എ.എസ്. സൂര്യ, കെ.പി. പ്രമീള എന്നിവര്‍ നേതൃത്വംനല്‍കി.

മുരിങ്ങൂർ മുതൽ കൊരട്ടി വരെ ഗതാഗതക്കുരുക്ക് രൂക്ഷം

കൊരട്ടി: ദേശീയപാത വികസനത്തിന്‍റെ ഭാഗമായി അടിപ്പാതനിർമാണം നടക്കുന്ന മുരിങ്ങൂരിൽ ഗതാഗതക്കുരുക്ക് രൂക്ഷം. മുരിങ്ങൂർ അടിപ്പാതയ്ക്കു സമീപം വാഹനങ്ങൾ വഴി തിരിച്ചുവിടുന്ന സർവീസ് റോഡിൽ രൂപപ്പെട്ട കുഴികൾമൂലമാണ് തൃശൂർ ദിശയിൽ ഇന്നലെ വെളുപ്പിനുമുതൽ കുരുക്ക് മുറുകിയത്. കുഴികൾ രൂപപ്പെട്ട ഭാഗങ്ങളിൽ ഡ്രെയിനേജിനോടുചേർന്ന് ബാരിക്കേഡുകൾ സ്ഥാപിക്കുന്ന പണികളും പുരോഗമിക്കുന്നുണ്ട്. ഇതും കുരുക്കിനു മറ്റൊരു കാരണമായി. ചെറിയ കുഴികൾമൂലം കഴിഞ്ഞ രണ്ടു ദിവസങ്ങളിലും ഗതാഗതസ്തംഭനം ഉണ്ടായിരുന്നു. ഇന്നലെ പത്തുമണിയോടെ കുഴികൾ അടച്ചെങ്കിലും രാത്രി വൈകിയും മന്ദഗതിയിലാണ് വാഹനങ്ങൾ കടന്നുപോകുന്നത്. പാെങ്ങത്തുനിന്നും ചിറങ്ങരയിൽ നിന്നും വാഹനങ്ങൾ ഗ്രാമീണ, പൊതുമരാമത്ത് റോഡുകളിലൂടെ ഇന്നലെ രാവിലെ മുതൽ പോലീസും ഹോം ഗാർഡും വഴിതിരിച്ചുവിട്ടതുമൂലം കുരുക്കിന് ചെറിയ ശമനമുണ്ടായി.

സെന്‍റ് ജെയിംസിൽ ഔഷധ ഉദ്യോഗമേള 2025

ചാലക്കുടി: ഇന്ത്യൻ ഫാർമസി ഗ്രാജുവേറ്റ് അസോസിയേഷൻ കേരള സ്റ്റേറ്റ് ബ്രാഞ്ചും സെന്‍റ് ജെയിംസ് കോളജ് ഓഫ് ഫാർമസ്യൂട്ടിക്കൽ സയൻസും സംയുക്തമായി ഫാർമ മെഗാ ജോബ് ഫെയർ ‘ഔഷധ ഉദ്യോഗമേള 2025’ നടത്തി. ഫാർമസി രംഗത്തെ മൾട്ടി നാഷണൽ കമ്പനികൾ,സൂപ്പർ സ്പെഷാലിറ്റി ഹോസ്പിറ്റൽസ്, ചെയിൻ ഫാർമസി എന്നിവർ പങ്കെടുത്തു. ഫാർമസ്യൂട്ടിക്കൽ പ്രൊഡക്ഷൻ, ക്വാളിറ്റി കൺട്രോൾ, റിസർച്ച് ആൻ്് ഡെവലപ്മെന്‍റ്, ന്യൂട്രാ സ്യൂട്ടിക്കൽ എന്നീ മേഖലകളിൽ തൊഴിലവസരങ്ങൾ സൃഷ്ടിക്കുന്ന ഈ മേളയിൽ കേരളത്തിലെയും ഇതര സംസ്ഥാനങ്ങളിലെയും അഞ്ഞൂറോളം ഫാർമസി ഉദ്യോഗാർഥികൾ പങ്കെടുത്തു. നഗരസഭ ചെയർപേഴ്സൻ ഷിബു വാലപ്പൻ ഉദ്ഘാടനം നിർവഹിച്ചു. മുൻ ഡ്രഗ്സ് കൺട്രോളർ പി.എം. ജയൻ അധ്യക്ഷതവഹിച്ചു. സെന്‍റ്് ജെയിംസ് ഹോസ്പിറ്റൽ ട്രസ്റ്റ്‌ ഡയറക്ടർ റവ.ഡോ. ആന്‍റു ആലപ്പാടൻ അനുഗ്രഹപ്രഭാഷണംനടത്തി. അസോ.ഡയറക്ടർ ഫാ. സോജോ കണ്ണമ്പുഴ, വി.ജെ. ജോജി , സ്മിത കെ.നായർ, പ്രിൻസിപ്പൽ ഡോ.കെ. കൃഷ്ണകുമാർ ജി.ദിലീപ് എന്നിവർ പ്രസംഗിച്ചു.

തയ്യൂരിൽ തെരുവുനായ്ക്കൾ കോഴികളെ കടിച്ചുകൊന്നു

വേലൂർ: തയ്യൂർ പൂക്കുന്നത്ത് അൻസാറിന്‍റെ വീട്ടിൽ വളർത്തുന്ന 35 കോഴികളെയാണുതെരുവുനായ്ക്കൾ കടിച്ചുകൊന്നത്. ചൊ വ്വാഴ്ച വൈകീട്ട് ആണ് സംഭവം. അൻസാറും കുടുംബവും പുറത്തുപോയിരുന്ന സമയത്താണ് തെരുവുനായ്ക്കൾ കോഴികളെ ആക്രമിച്ചത്. 70 നാടൻ കോഴികളെ അൻസാർ ഷെഡിനുള്ളിൽ കൂടുകെട്ടി വളർത്തുന്നുണ്ട്. അതിൽ 35 കോഴികൾ തെരുവുനായ് ആക്രമണത്തെ തുടർന്ന് ചത്തു. അഞ്ചുനായ്ക്കൾ ചേർന്നാണ് കോഴികളെ കടിച്ചുകൊന്നത്. പ്രദേശത്ത് തെരുവുനായ്ക്കളുടെ ആക്രമണം അതിരൂക്ഷമാണെന്നു നാട്ടുകാർ പറഞ്ഞു. സ്കൂളുകളിൽ പോകുന്ന വിദ്യാർഥികളുടെ നേരെ കുരച്ചുചാടിയും ബൈക്കിനു കുറുകെച്ചാടി അപകടങ്ങൾ ഉണ്ടാക്കിയും തെരുവുനായ്ക്കൾ വൻ ഭീഷണി ആയിരിക്കുകയാണ്. പേ വിഷബാധയ്ക്കും വന്ധ്യംകരണത്തിനും ഉള്ള വാക്സിൻ നൽകാൻ മാത്രമേ പഞ്ചായത്തിന്‍റെ ഭാഗത്തുനിന്നും ചെയ്യുവാൻ സാധിക്കുക യുള്ളൂ എന്ന് പഞ്ചായത്ത് അധികാരികൾ പറഞ്ഞു. വേലൂർ പഞ്ചായത്ത് പരിധിയിൽ തെരുവുനായ്ക്കളെ പാർപ്പിക്കാൻ ആരെങ്കിലും സ്ഥലം വിട്ടുകൊടുക്കാൻ തയാറാണെങ്കിൽ ഏറ്റെടുക്കേണ്ട കാര്യം ആലോചിക്കാമെന്ന് വേലൂർ പഞ്ചായത്ത് പ്രസിഡന്‍റ് ടി.ആർ. ഷോബി പറഞ്ഞു.

ആമ്പല്ലൂര്‍ അടിപ്പാതനിര്‍മാണം; ദേശീയപാതയില്‍ ഗതാഗതക്കുരുക്ക് രൂക്ഷം

പുതുക്കാട്: ആമ്പല്ലൂരില്‍ അടിപ്പാത നിര്‍മാണം പുനരാരംഭിച്ചതോടെ ദേശീയ പാതയില്‍ ഗതാഗതക്കു രുക്ക് രൂക്ഷമായി. തൃശൂര്‍ ഭാഗത്തേക്കുള്ള പാതയില്‍ വാഹനങ്ങളുടെനിര പുതുക്കാട് സെന്‍റര്‍വരെ നീണ്ടു. ഇന്നലെ വൈകീട്ട് അരമണിക്കൂറിലേറെയാണു വാഹനങ്ങള്‍ കുരുക്കില്‍പെട്ടത്. ആംബുലന്‍സ് ഉൾപ്പടെയുള്ള വാഹനങ്ങള്‍ക്കു കടന്നുപോകാന്‍ ഏറെ സമയമെടുത്തു. അടിപ്പാ തയുടെ അനുബന്ധ റോഡ് നിര്‍മാണത്തിനായി കാന കോരുന്ന പ്രവൃത്തികള്‍ ആരംഭിച്ചതോടെയാണ് ഗതാഗതക്കുരുക്ക് രൂക്ഷമായത്. മൂന്നുവരിപ്പാതയിലൂടെ വരുന്ന വാഹനങ്ങള്‍ വീതികുറഞ്ഞ സര്‍വീസ് റോഡിലൂടെ കടത്തിവിടുന്നതാണു ഗതാഗതക്കുരുക്കിനു കാരണം. ഇതിനിടെ അടിപ്പാതയുടെ നിര്‍മാണം ഇഴഞ്ഞുനീങ്ങുകയാണെന്ന ആക്ഷേപവുമുണ്ട്. ദേശീയപാതയിലെ അടിപ്പാത നിര്‍മാണം മൂലമുണ്ടാകുന്ന ഗതാഗതക്കുരുക്കിനെതുടര്‍ന്ന് ഹൈക്കോടതി പാലിയേക്കരയിലെ ടോള്‍പിരിവ് നിര്‍ത്തിവച്ചിട്ട് 50 ദിവസം പിന്നിട്ടിട്ടും സുഗമമായ യാത്രാസൗകര്യം ഒരുക്കാന്‍ ദേശീയപാത അഥോറിറ്റി കാര്യക്ഷമമായി ഇടപെടുന്നില്ലെന്ന ആരോപണവുമുണ്ട്.

അനധികൃത മത്സ്യബന്ധനം: ഏഴു വള്ളങ്ങൾ പിടികൂടി

ചാവക്കാട്: മത്സ്യബന്ധനനിയന്ത്രണം ലംഘിച്ച് ചെറുമത്സ്യങ്ങൾ പിടിച്ചതിനും പെയർ ട്രോളിംഗ് നടത്തിയതിനും നിയമാനുസൃതം കളർ കോഡ് ഇല്ലാതെ മത്സ്യബന്ധനം നടത്തിയതിനും ഏഴു മത്സ്യബന്ധന യാനങ്ങൾ പിടികൂടി. ഫിഷറീസ്, തീരദേശ പോലീസ് മറൈൻ എൻഫോഴ്സ്മെന്‍റ് സംയുക്ത‌സംഘം നടത്തിയ പരിശോധനയിലാണു വള്ളങ്ങൾ പിടികൂടിയത്. കാര വളവത്ത് കുഞ്ഞന്പാടിയുടെ ഉടമസ്ഥതയിലുള്ള കിലുക്കം എന്ന മത്സ്യബന്ധന യാനം ചെറുമത്സ്യങ്ങൾ പിടിച്ചതിന്‍റെ പേരിലാണ് പിടിച്ചെടുത്തത്. അളവിൽ അല്ലാതെകണ്ട ഏകദേശം 2000 കിലോ ചെറുചാളയാണ് യാനത്തിലുണ്ടായിരുന്നത്. കളർ കോഡ് ഇല്ലാതെ മത്സ്യബന്ധനംനടത്തിയ കനകൻ, സുരേഷ്ബാബു, ബാദുഷ, സുദർശനൻ, വിജേഷ് എന്നിവരുടെ വള്ളങ്ങളും പിടിച്ചെടുത്തു. അഴീക്കോട് ഫിഷറീസ് സ്റ്റേഷൻ അസി. ഡയറക്ടർ ഡോ. സി. സീമയുടെയും മുനയ്ക്കകടവ് കോസ്റ്റൽ എസ്എച്ച്ഒ ഫർഷദിന്‍റെയും നേതൃത്വത്തിൽ നടത്തിയ പ്രത്യേക കോന്പിംഗ് ഓപ്പറേഷന്‍റെ ഭാഗമായാണ് യാനങ്ങൾ പിടിച്ചെടുത്തത്. ജില്ലാ ഫിഷറീസ് ഡെപ്യൂട്ടി ഡയറക്ടർ തുടർനടപടികൾ പൂർത്തീകരിച്ച് പിഴ ഈടാക്കും. ഉപയോഗ‌യോഗ്യമായ മത്സ്യം 9800 രൂപക്ക് ലേലം ചെയ്തു. പിടിച്ചെടുത്ത ചെറുമത്സ്യങ്ങളെ പിന്നീട് പുറംകടലിൽ ഒഴുക്കിക്കളഞ്ഞു. ചാവക്കാട് മത്സ്യഭവൻ എഫ്എഒ രേഷ്മ ആർ. നായർ മുനയ്ക്കക്കടവ് കോസ്റ്റൽ പൊലീസ് എസ്ഐമാരായ ശിവദാസ്, ജലീൽ, ജോബി തുടങ്ങിയവരും പരിശോധയിൽ ഉണ്ടായിരുന്നു.

റെയിൽവേ അധികൃതർ ഗേറ്റ് അടച്ചു; പ്രതിഷേധവുമായി പ്രദേശവാസികൾ

വടക്കാഞ്ചേരി: റെയിൽവേ അധികൃതർ ഗേറ്റ് അടച്ചു, പ്രദേശവാസികൾ പ്രതിഷേധിച്ചു. വടക്കാഞ്ചേരി റെയിൽവേ സ്റ്റേഷനു സമീപം ബസിറങ്ങിയ യാത്രക്കാർ എളുപ്പത്തിൽ സ്റ്റേഷനിലെത്താനും സമീപത്തെ റെയിൽവേ കോളനിയിലേക്കു വേഗത്തിൽ എത്താനുമുള്ള ഗേറ്റാണ് അധികൃതർ ഇന്നലെ അടച്ചത്. വർഷങ്ങൾ പഴക്കമുള്ള ഗേറ്റ് അടച്ചതോടെ പ്രദേശവാസികളും യാത്ര ക്കാരും ദുരിതത്തിലായി. റെയിൽവേ സ്റ്റേഷൻ വികസനവുമായി ബന്ധപ്പെട്ടാണ് ഗേറ്റ് അടച്ചതെന്ന് അധികൃതർ അറിയിച്ചു. സംഭവവുമായി ബന്ധപ്പെട്ട് അടച്ച ഗേറ്റ് നാട്ടുകാർക്കും യാത്രക്കാർക്കുമായി തുറന്നുകൊടുക്കണമെന്ന ആവശ്യവുമായി ഡിവിഷൻ കൗൺസിലർമാർ രംഗ ത്തെത്തി. റെയിൽവേ കോളനി, വിവാദമായ ലൈഫ് ഭവനപദ്ധതി സ്ഥിതിചെയ്യുന്ന പ്രദേശമായ ചരൽപ്പറമ്പ്,പട്ടികജാതി-പട്ടികവർഗ വിഭാഗങ്ങളിൽപ്പെട്ട വിദ്യാർഥി കൾ പഠിക്കുന്ന എംആർഎസ് സ്കൂൾ എന്നിവർക്കെല്ലാം ഗേറ്റ് അടച്ചതോടെ ദുരിതമായി. റെയിൽവേയുടെ ഉത്തരവാദിത്വമില്ലായ്മയാണ് ഇതിനു പിന്നിലെന്ന് മുൻ പഞ്ചായത്ത് പ്രസിഡന്‍റും നിലവിലെ നഗരസഭാ പ്രതിപക്ഷ നേതാവുമായ എസ്.എ.എ. അസാദ്, കൗൺസിലർ നെബീസ നാസറലി എന്നിവർ പറഞ്ഞു.

ഓർഫനേജിൽ പുസ്തകശാലയൊരുക്കി സെന്‍റ് തോമസ് കോളജ് വിദ്യാർഥികൾ

തൃശൂർ: എൻഎസ്എസ് ദിനത്തിന്‍റെ ഭാഗമായി സെന്‍റ് ആൻസ് ഓർഫനേജിൽ പുസ്തകശാലയൊരുക്കി സെന്‍റ് തോമസ് കോളജിലെ നാഷണൽ സർവീസ് സ്കീം വോളന്‍റിയേഴ്സ് മാതൃകയായി. വായനദിനത്തോടനുബന്ധിച്ചും സാക്ഷരതാദിനത്തോടനുബന്ധിച്ചും കോളജിലെ വിദ്യാർഥികളിൽനിന്നു ശേഖരിച്ച 16,409 രൂപ മൂല്യമുള്ള 130 പുസ്തകങ്ങളാണ് ഓർഫനേജിലെ പുസ്തകശാലയിലേക്കു കൈമാറിയത്. കോളജിൽ നടന്ന ചടങ്ങിൽ പ്രിൻസിപ്പൽ റവ.ഡോ. മാർട്ടിൻ കൊളന്പ്രത്ത് ഉദ്ഘാടകനായി. സെന്‍റ് ആൻസ് കോണ്‍വെന്‍റ് മദർ സുപ്പീരിയർ സിസ്റ്റർ ആൻസി ജോണ്‍ പുസ്തകങ്ങൾ ഏറ്റുവാങ്ങി. പ്രോഗ്രാം ഓഫീസർ ഡോ. ഡെയ്സൻ പാണേങ്ങാടൻ അധ്യക്ഷത വഹിച്ചു. സിസ്റ്റർ ജോഫി, നിയ ഫിലിപ്പ്, അഭിനവ് നായർ എന്നിവർ പ്രസംഗിച്ചു.

പീച്ചി ഡാമിൽനിന്നു വെള്ളം തുറന്നുവിട്ടു

പീച്ചി: ഡാം റിസർവോയറിലെ ജലനിരപ്പ് നിയന്ത്രിക്കുന്നതിനായി പീച്ചി ഡാമിൽനിന്നു കെഎസ്ഇബിയുടെ ചെറുകിട വൈദ്യുതി ഉത്പാദനനിലയത്തിലെ റിവർ സ്ലൂയിസ് വഴി വെള്ളം തുറന്നുവിട്ടു. ഇന്നലെ രാവിലെ ഒമ്പതുമണിയോടെയാണ് വെള്ളം തുറന്നുവിട്ടത്. 1.25 മെഗാവാട്ട് ഉത്പാദനശേഷിയുള്ളതാണ് പദ്ധതി. കനാലിലൂടെ വെള്ളം തുറന്നുവിടുന്ന ദിവസങ്ങളിൽ ഒരു മെഗാവാട്ട് വൈദ്യുതി വീതവും റിവർ സ്ലൂയിസ് വഴി വെള്ളം തുറന്നുവിടുമ്പോൾ 1.25 മെഗാവാട്ട് വീതവും പ്രതിദിനം വൈദ്യുതി ഉത്പാദിപ്പിക്കാൻ ഇതുവഴി സാധിക്കും.

സ്വർണനേട്ടവുമായി എൻസിസി കേഡറ്റുകൾ

തൃശൂർ: ന്യൂഡൽഹിയിൽ നടന്ന ഓൾ ഇന്ത്യ തൽ സൈനിക് ക്യാന്പിൽ കേരള ലക്ഷദ്വീപ് ഡയറക്ടറേറ്റ് സ്വർണനേട്ടം സ്വന്തമാക്കി. സ്നാപ്പ് ഷൂട്ടിംഗ് ഇനത്തിലാണു നേട്ടം . എറണാകുളം ഗ്രൂപ്പിന്‍റെ കീഴിലുള്ള 23-ാം കേരള ബറ്റാലിയൻ എൻസിസി കേഡറ്റുകളായ ഇരിങ്ങാലക്കുട ക്രൈസ്റ്റ് കോളജ് ജിയോളജി മൂന്നാംവർഷ വിദ്യാർഥി കോർപറൽ ഗോപികൃഷ്ണൻ, വടക്കാഞ്ചേരി എൻഎസ്എസ് വ്യാസ കോളജിലെ വിദ്യാർഥി കേഡറ്റ് സി.കെ. വിഷ്ണു എന്നിവരാണു മെഡൽ നേടിയത്. ഇരുവരും തൃശൂർ സ്വദേശികളാണ്.

പുത്തൂർ ടൂറിസം കോറിഡോറായി മാറും: മന്ത്രി കെ. രാജൻ

പുത്തൂർ: കാത്തിരിപ്പിനു വിരാമമിട്ട് പുത്തൂര്‍ സുവോളജിക്കല്‍ പാര്‍ക്ക് ഉദ്ഘാടനത്തിന് ഒരുങ്ങിയതായി റവന്യൂ മന്ത്രി കെ. രാജന്‍ അറിയിച്ചു. ഒക്ടോബര്‍ 28 ന് മുഖ്യമന്ത്രി പിണറായി വിജയന്‍ പാര്‍ക്ക് നാടിന് സമര്‍പ്പിക്കും. പാര്‍ക്കിന്‍റെ നിര്‍മാണത്തിനായി പ്ലാന്‍ ഫണ്ടില്‍ നിന്നും 40 കോടിയും കിഫ്ബിയില്‍ നിന്ന് രണ്ടാം ഘട്ട പ്രവര്‍ത്തനങ്ങള്‍ക്കായി 122 കോടിയും മൂന്നാംഘട്ട പ്രവര്‍ത്തനങ്ങള്‍ക്കായി 208.5 കോടിയുമടക്കം 370.5 കോടി രൂപയാണ് അനുവദിച്ചത്. ഓരോ ഘട്ടത്തിലും നിര്‍മാണ പ്രവൃത്തികളുടെ പുരോഗതി നേരിട്ടു വിലയിരുത്തിയാണ് മുന്നോട്ടു പോയിട്ടുള്ളത്. 23 ആവാസ ഇടങ്ങളാണ് പാര്‍ക്കിനുള്ളില്‍ ഒരുക്കിയിരിക്കുന്നത്. ആഫ്രിക്കന്‍ സുളു ലാന്‍ഡ് സോണ്‍, കന്‍ഹ സോണ്‍, സൈലന്‍റ്് വാലി സോണ്‍, ഇരവിപുരം സോണ്‍ തുടങ്ങി ഓരോ ഇനങ്ങള്‍ക്കും അനുയോജ്യമായവിധം ആവാസ‌വ്യവസ്ഥകള്‍ ഒരുക്കിയാണ് മൃഗശാല രൂപകല്പന ചെയ്തിരിക്കുന്നത്. ഒന്നിനെയും ഇടുങ്ങിയ കൂടുകളില്‍ അടച്ചിടാതെ സ്വതന്ത്രമായി വിരഹിക്കാന്‍ കഴിയുന്ന തരത്തിലാണ് ഓരോ സോണുകളും. സഞ്ചാരികള്‍ക്ക് അവയെ കാണാനും ഇതുകൂടുതല്‍ സൗകര്യമാവും. സഞ്ചാരികളില്‍‌നിന്ന് കൃത്യമായ അകലം പാലിക്കാനും സുരക്ഷ ഉറപ്പുവരുത്താനും പറ്റുന്ന കിടങ്ങുകളുണ്ട്. രാത്രികാലങ്ങളില്‍ മാത്രം പുറത്തിറങ്ങുന്ന പക്ഷികള്‍, ഉരുക്കള്‍ എന്നിവയ്ക്കും പ്രത്യേക സോണ്‍ തയാറാക്കുന്നുണ്ട്. പാര്‍ക്കിനുള്ളില്‍ മൃഗങ്ങള്‍ക്കും പക്ഷികള്‍ക്കും അവയുടെ സ്വാഭാവിക ആവാസ‌വ്യവസ്ഥയാണ് സുവോളജിക്കല്‍ പാര്‍ക്കില്‍ ഒരുക്കിയിട്ടുള്ളത്. തൃശൂര്‍ മൃഗശാലയില്‍നിന്നും മൃഗങ്ങളേയും പക്ഷികളേയും സുവോളജിക്കല്‍ പാര്‍ക്കിലേ ക്കു മാറ്റിക്കൊണ്ടിരിക്കുന്ന പ്രവര്‍ത്തനം അന്തിമഘട്ടത്തിലാണ.് കേരളത്തിനു പുറത്തുനിന്നുള്ള മൃഗശാലകളില്‍നിന്നും വെള്ളക്കടുവകള്‍ ഉള്‍പ്പെടെയുള്ള മൃഗങ്ങളെ പാര്‍ക്കില്‍ എത്തിക്കും. പാര്‍ക്ക് തുറക്കുന്നതോടെ ഒല്ലൂരിലെ ടൂറിസം കോറിഡോറിന്‍റെ പ്രധാനപ്പെട്ട ഇടമായി പുത്തൂര്‍ മാറുമെന്നും റവന്യൂ മന്ത്രി കെ. രാജന്‍ പറഞ്ഞു. പാര്‍ക്കിലേക്കുള്ള റോഡ് വീതി കൂട്ടുന്നതിനും ബിഎം‌ബിസി നിലവാരത്തില്‍ നിര്‍മിക്കുന്നതിനും സര്‍ക്കാര്‍ ഫണ്ട് അനുവദിക്കുകയുണ്ടായി. ഭൂമി ഏറ്റെടുത്ത്് ഇപ്പോള്‍ റോഡിന്‍റെ നിര്‍മാണ പ്രവൃത്തികള്‍ പുരോഗമിച്ചു കൊ ണ്ടിരിക്കുകയാണ്. റോഡ് നിര്‍മാണത്തിനായി സ്ഥലം ഏറ്റെടുക്കുന്നതിന് 47.30 കോടി രൂപയും റോഡ് നിര്‍മാണ പ്രവര്‍ത്തനങ്ങൾക്ക് 41.29 കോടി രൂപയുമാണ് അനുവദിച്ചത്. പുത്തൂര്‍ പാലത്തിനു സമാന്തരമായി 10 കോടി രൂപ ചെലവില്‍ മറ്റൊരു പാലം കൂടി നിര്‍മിച്ചതോടെ പുത്തൂരിന്‍റെ മുഖച്ഛായതന്നെ മാറുന്ന വികസന പ്രവര്‍ത്തനങ്ങളിലേക്കു കടന്നു. കൂടാതെ പുത്തൂര്‍ പഞ്ചായത്തിലൂടെ കടന്നുപോകുന്ന പയ്യപ്പിള്ളിമൂല - മാന്ദാമംഗലം റോഡ് ഏഴ് കോടി രൂപയും പുത്തൂര്‍ - പുഴമ്പള്ളം - മരത്താക്കര ജംഗ്ഷന്‍ റോഡ് ഒമ്പതുകോടി രൂപയും ചെലവിട്ടാണ് ബിഎംബിസി നിലവാരത്തില്‍ പുതുക്കി പണിതതതെന്നും മന്ത്രി പറഞ്ഞു.

ബൈക്ക് അപകടത്തിൽ പരിക്കേറ്റ യുവാവ് മരിച്ചു

പുന്നയൂർകുളം: കോയന്പത്തൂരിൽ ബൈക്കപകടത്തിൽ പരിക്കുപറ്റി ചികിത്സയിലായിരുന്ന യുവാവ് മരിച്ചു. കോടത്തൂർ ഒലിയിൽ വീട്ടിൽ രമേഷിന്‍റെ മകൻ അതുൽ (25)ആണ് മരിച്ചത്. കോയന്പത്തൂരിൽ ജിം നേഷ്യം ട്രെയിനറായി ജോലി ചെയ്തിരുന്ന അതുൽ കഴിഞ്ഞ വെള്ളിയാഴ്ച ക്യാന്പിലേക്ക് പോകുന്പോഴാണ് ബൈക്ക് നിയന്ത്രണം വിട്ട് മറിഞ്ഞു അപകടം സംഭവിച്ചത്. കോയന്പത്തൂരിൽ ആശുപത്രിയിൽ കഴിഞ്ഞിരുന്ന അതുലിനെ വീട്ടുകാർ നാട്ടിൽകൊണ്ടുവന്നു കോഴിക്കോട് മെഡിക്കൽ കോളജ് ആശുപത്രിയിൽ ചികിത്സ നടത്തി വരുകെ യാണ് ഇന്നലെ മരണംസംഭവിച്ചത്.ഇന്ന് പോസ്റ്റ് മോർട്ടത്തിനു ശേഷം വീട്ടുവളപ്പിൽ സംസ്കാരം നടത്തും. മാതാവ്: പ്രമിത. സഹോദരി: ആദിത്യ.

കാട്ടൂരിലെ കിണറുകളിലെ രാസമാലിന്യം: രണ്ടു കമ്പനികള്‍ താത്കാലികമായി പ്രവര്‍ത്തനം നിര്‍ത്തിവയ്ക്കാന്‍ നിര്‍ദേശം

കാട്ടൂര്‍: മിനി ഇന്‍ഡസ്ട്രിയല്‍ എസ്റ്റേറ്റ് പരിസരത്തെ ജലമലിനീകരണവിഷയത്തില്‍ മണ്ണിന്‍റെ പരിശോധനാഫലം വരുന്നതുവരെ രണ്ടു കമ്പനികള്‍ താത്കാലികമായി പ്രവര്‍ത്തനം നിര്‍ത്തിവയ്ക്കാന്‍ നിര്‍ദേശം നല്‍കുമെന്നു മന്ത്രി ഡോ. ആര്‍. ബിന്ദു അറിയിച്ചു. മന്ത്രി വിളിച്ചുചേര്‍ത്ത പ്രത്യേക യോഗത്തെത്തുടര്‍ന്നാണ് തീരുമാനം. കോഴിക്കോട് സിഡബ്ല്യുആര്‍ഡിഎം പഞ്ചായത്തിനു കൈമാറിയ ജലപരിശോധനാഫലത്തില്‍ ട്രീറ്റഡ് എ ഫ്ലുവെന്‍റില്‍ സിങ്ക് , കെമിക്കല്‍ ഓക്‌സിജന്‍ ഡിമാന്‍ഡ് എന്നീ ഘടകങ്ങള്‍ കൂടുതലായി കാണുന്നുണ്ട്. അതിന്‍റെ കൃത്യമായ സ്രോതസും കാരണവും ശാസ്ത്രീയമായി കണ്ടെത്താനാണ് ഫോറന്‍സിക് പരിശോധന നടത്താനും ഫലം വരുംവരെ ആരോപണവിധേയമായ രണ്ടു സ്ഥാപനങ്ങള്‍ താത്കാലികമായി പ്രവര്‍ത്തനം നിര്‍ത്തിവയ്ക്കാനും നടപടികള്‍ സ്വീകരിച്ചിരിക്കുന്നത്. ഈ രണ്ടു കമ്പനികള്‍ക്കു നോട്ടീസ് നല്‍കാനും പ്രശ്‌നപരിഹാരത്തിനു വ്യവസായവകുപ്പിനും സിഡ്‌കോയ്ക്കും കത്തുനല്‍കാനും മന്ത്രി ബിന്ദു ഗ്രാമപഞ്ചായത്തിനു നിര്‍ദേശം നല്‍കി. സ്ഥലം എംഎല്‍എ എന്ന നിലയില്‍ മന്ത്രിയും കത്തുനല്‍കും. മലിനീകരണനിയന്ത്രണ ബോര്‍ഡിന്‍റെ നിബന്ധനകള്‍ക്കനുസൃതമായി കൃത്യമായ മാലിന്യസംസ്‌കരണ പ്രവര്‍ത്തനങ്ങള്‍ ഈ കമ്പനികളില്‍ നടക്കുന്നുണ്ടോ എന്നു പരിശോധിക്കാന്‍ ബന്ധപ്പെട്ട വകുപ്പുകളുടെ സംയോജിതപരിശോധന നടത്തും. കോഴിക്കോട് ജലഗവേഷണ കേന്ദ്രം ഈ പ്രദേശത്തെ കിണറുകളില്‍നിന്നു ശേഖരിച്ച കുടിവെള്ള സാമ്പിളുകളുടെ പരിശോധനാഫലങ്ങളില്‍ അമിതലോഹസാന്നിധ്യമോ മറ്റ് അപകടകരമായ രാസ സാന്നിധ്യമോ കുടിവെള്ളത്തിനു നിഷ്‌കര്‍ച്ചിട്ടുള്ള അനുവദനീയമായ പരിധി ലംഘിച്ചതായി കാണുന്നില്ല. എന്നാല്‍ കിണര്‍വെള്ളത്തില്‍ കാണുന്ന കോളിഫോം ബാക്ടീരിയയുടെ സാന്നിധ്യം കാണുന്നത് മറ്റു കാരണങ്ങള്‍കൊണ്ടാണെന്നുള്ളതിനാല്‍ കുടിവെള്ളം ശുദ്ധീകരിക്കുന്നതിനുള്ള നടപടികള്‍ സ്വീകരിക്കണം. പഞ്ചായത്ത് പ്രസിഡന്‍റ് ടി. വി. ലത, മാലിന്യസംസ്‌കരണത്തിന്‍റെ ചുമതലയുള്ള അഡീഷണല്‍ പഞ്ചായത്ത് ഡയറക്ടര്‍ ബിന്ദു പരമേശ്വരന്‍, പഞ്ചായത്ത് സെക്രട്ടറി വി. എ. ഉണ്ണികൃഷ്ണന്‍, തൃശൂര്‍ ഗവ. എന്‍ജിനീയറിംഗ് കോളജ് അസോസിയേറ്റ് പ്രഫസർ ഡോ. എ.ജി. ബിന്ദു, മലിനീകരണനിയന്ത്രണ ബോര്‍ഡ് ഉള്‍പ്പടെ വിവിധ വകുപ്പ് ഉദ്യോഗസ്ഥരും യോഗത്തില്‍ പങ്കെടുത്തു. മണ്ണിന്‍റെ പരിശോധനാഫലം അടുത്ത ദിവസം കൈമാറും. കിണറുകളില്‍ രാസമാലിന്യം കലര്‍ന്നതോടെ സമീപത്തെ മുന്നൂറോളം കടുംബങ്ങളാണ് ദുരിതത്തിലായിരിക്കുന്നത്.

എൽഡിഎഫിന്‍റെ മൂന്നാം ടേം തടയാൻ യുഡിഎഫ് മഴവിൽസഖ്യം രൂപപ്പെടുത്തുന്നു: എം.വി. ഗോവിന്ദൻ

തൃശൂർ: എൽഡിഎഫിന്‍റെ തുടർഭരണം മൂന്നാംടേമിലെത്തുന്നതു തടയാൻ യുഡിഎഫ് മഴവിൽസഖ്യം രൂപപ്പെടുത്തുകയാണെന്നു സിപിഎം സംസ്ഥാനസെക്രട്ടറി എം.വി. ഗോവിന്ദൻ പറഞ്ഞു. അഴീക്കോടൻ ദിനാചരണ പൊതുസമ്മേളനം ഉദ്‌ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. എന്തും വിളിച്ചുപറയാനും പ്രചരിപ്പിക്കാനും മടിയില്ലാത്തതരത്തിൽ ജീർണതയുടെ മുഖമായി കോൺഗ്രസ്‌ മാറി. കേരളത്തിന്‍റെ ജീവിതനിലവാരം ഉയർത്തുന്ന നയങ്ങളുമായി മുന്നോട്ടുപോകുന്ന എൽഡിഎഫ്‌ സർക്കാരിനെ എതിർക്കുന്ന യുഡിഎഫിന്‍റെ നയമെന്താണ്. എന്തുവിശ്വസിച്ചാണു ജനം അവർക്ക്‌ വോട്ടുനൽകുക. ജമാഅത്തെ ഇസ്‌ലാമിയും എസ്‌ഡിപിഐയുംപോലുള്ള ന്യൂനപക്ഷ തീവ്രവാദശക്തികളിലാണു യുഡിഎഫിന്‍റെ പ്രതീക്ഷ. എല്ലാ വലതുപക്ഷ പിന്തിരിപ്പൻശക്തികളുടെയും കണ്ണിലെ കരട്‌ സിപിഎമ്മാണ്. കമ്യൂണിസ്റ്റ് പ്രസ്ഥാനത്തിനെതിരേ ഇത്ര സംഘടിതമായി പ്രചാരണം നടത്തുന്ന മാധ്യമശൃംഖല കേരളത്തിലേതുപോലെ ലോകത്തു മറ്റൊരിടത്തും കാണില്ലെന്നും എം.വി. ഗോവിന്ദൻ പറഞ്ഞു. ബിഷപ്സ് ഹൗസിലെത്തി അനുശോചനം രേഖപ്പെടുത്തി എം.വി. ഗോവിന്ദൻ തൃശൂർ: ആർച്ച്ബിഷപ് എമരിറ്റസ് മാർ ജേക്കബ് തൂങ്കുഴിയുടെ വിയോഗത്തിൽ തൃശൂർ ബിഷപ്സ് ഹൗസിലെത്തി അനുശോചനം രേഖപെടുത്തി സിപിഎം സംസ്ഥാന സെക്രട്ടറി എം.വി. ഗോവിന്ദൻ. തൂങ്കുഴിയുടെ ഛായാചിത്രത്തിനു മുന്നിൽ അദ്ദേഹം പൂക്കൾ അർപ്പിച്ചു. ആർച്ച്ബിഷപ് മാർ ആൻഡ്രൂസ് താഴത്തുമായി എം.വി. ഗോവിന്ദൻ കൂടിക്കാഴ്ച നടത്തി. തൂങ്കുഴിപ്പിതാവിന്‍റെ സംസ്കാരശുശ്രൂഷകൾ നല്ലനിലയിൽ നടത്താൻ സർക്കാരിന്‍റെ പിന്തുണ ലഭിച്ചെന്നും അതിൽ നന്ദിയറിയിക്കുന്നെന്നും മാർ ആൻഡ്രൂസ് താഴത്ത് പറഞ്ഞു. വിലാപയാത്രയും കോഴിക്കോട്ടെ ചടങ്ങുകളുമെല്ലാം ഉദ്ദേശിച്ചതുപോലെ കൃത്യമായി നടത്താനായി സർക്കാരിന്‍റെയും പോലീസിന്‍റെയും സഹായം ഉണ്ടായി. ഗാർഡ് ഓഫ് ഓണറടക്കം വലിയ ആദരം ലഭിച്ചെന്നും ആർച്ച്ബിഷപ് പറഞ്ഞു.

സ്പേസ് ഓണ്‍ വീൽ എക്സിബിഷൻ ജ്യോതിയിൽ തുടങ്ങി

ചെറുതുരുത്തി: ഐഎസ്ആർഒ സ്പേസ് സെന്‍ററിൽ പോയപോലൊരു ഫീലാണ് ചെറുതുരുത്തി ജ്യോതി എൻജിനീയറിംഗ് കോളജിലെത്തിയാലുള്ളത്. ഐഎസ്ആർഒയും ജ്യോതി എൻജിനീയറിംഗ് കോളജും സംയുക്തമായി സംഘടിപ്പിക്കുന്ന സ്പേസ് ഓണ്‍ വീൽ എക്സിബിഷനാണ് ജ്യോതിയെ ഒരു സ്പേസ് സെന്‍ററിനു തുല്യമാക്കിയിരിക്കുന്നത്. റോക്കറ്റുകളുടെ ഒറിജനൽ മോഡലുകളും ലോഞ്ചിംഗ് വാഹനങ്ങളുമാണ് പ്രദർശനത്തിന്‍റെ ഏറ്റവും വലിയ ആകർഷണീയത. ഇന്ത്യ ഇതുവരെ ബഹിരാകാശത്തേക്ക് അയച്ചിട്ടുള്ള റോക്കറ്റുകളുടെ മോഡലുകൾ എക്സിബിഷനിലുണ്ട്. വിഎസ്എസ്‌സി റിട്ട. പ്രോജക്ട് ഡയറക്ടർ ഡോ. എ.കെ. അഷറഫ് എക്സിബിഷന്‍റെ ഉദ്ഘാടനം നിർവഹിച്ചു. എക്സിക്യൂട്ടീവ് മാനേജർ ഫാ. ഡേവിഡ് നെറ്റിക്കാടൻ അധ്യക്ഷത വഹിച്ചു. അക്കാദമിക് ഡയറക്ടർ റവ.ഡോ. ജോസ് കണ്ണന്പുഴ, പ്രിൻസിപ്പൽ ഡോ.പി. സോജൻലാൽ, രജിസ്ട്രാർ ഡോ.വി.എം. സേവ്യർ, അസോസിയേറ്റ് പ്രഫസർ ഷൈനി, അസിസ്റ്റന്‍റ് പ്രഫസർ ജിനേഷ് തുടങ്ങിയവർ പ്രസംഗിച്ചു.

തസ്തികകള്‍ സൃഷ്ടിക്കാതെ സ്ഥലംമാറ്റം തുടർക്കഥ; പണിമുടക്കി ഡോക്ടർമാർ

മുളങ്കുന്നത്തുകാവ്: കാസർഗോഡ്, വയനാട്, കോന്നി ഗവ. മെഡിക്കല്‍ കോളജുകളില്‍ ആവശ്യത്തിനു തസ്തികകള്‍ സൃഷ്ടിക്കാതെ മറ്റു മെഡിക്കല്‍ കോളജുകളില്‍നിന്നുള്ള താത്കാലികസ്ഥലംമാറ്റം തുടര്‍ക്കഥയാകുന്നതിൽ പ്രതിഷേധിച്ച് തൃശൂര്‍ ഗവ. മെഡിക്കല്‍ കോളജ് ആശുപത്രിയില്‍ ഡോക്ടര്‍മാര്‍ ഒരു മണിക്കൂര്‍ പണിമുടക്കി. പ്രകടനവും ധര്‍ണയും നടത്തി. കേരള ഗവ. മെഡിക്കല്‍ കോളജ് ടീച്ചേഴസ് അസോസിയേഷൻ, കോളജ് യൂണിയന്‍, പിജി അസോസിയേഷന്‍, ജൂണിയര്‍ ഡോക്ടര്‍മാര്‍ എന്നിവരാണു പ്രതിഷേധവുമായി രംഗത്തുള്ളത്. പ്രതിഷേധയോഗത്തില്‍ കെജിഎംസിടിഎ സംസഥാന സെക്രട്ടറി ഡോ. നിര്‍മല്‍ ഭാസ്കര്‍, ഡോ. അനന്തകേശവന്‍, ഡോ. നിമിഷ, ഡോ. മനു ജോണ്‍സ്, ഡോ. ബിനോയി എടക്കളത്തൂര്‍, ഡോ. സി.പി. മുരളി, ഡോ. അജയന്‍, ഡോ. സീന തുടങ്ങിയവര്‍ പ്രസംഗിച്ചു.

വൈദ്യുതി ജീവനക്കാരെ വെട്ടിക്കുറച്ചതു പരിശോധിക്കാൻ കമ്മിറ്റി

തൃശൂർ: കോർപറേഷൻ വൈദ്യുതിവിഭാഗം ജീവനക്കാരുടെ ശമ്പളപരിഷ്കരണവും സ്റ്റാഫ് പാറ്റേണും നടപ്പാക്കുന്നതുമായി ബന്ധപ്പെട്ട് ഒരു കമ്മിറ്റി രൂപീകരിക്കാൻ തിരുവനന്തപുരത്തു മന്ത്രി എം.ബി. രാജേഷുമായി നടത്തിയ ചർച്ചയിൽ തീരുമാനമായതായി മേയർ എം.കെ. വർഗീസ് അറിയിച്ചു. കോര്‍പറേഷന്‍ വൈദ്യുതിവിഭാഗം ജീവനക്കാരുടെ പ്രതിനിധികളും സര്‍ക്കാര്‍ പ്രതിനിധികളും ഉള്‍പ്പെടെ ഏഴ് അംഗങ്ങളാണു കമ്മിറ്റിയില്‍ ഉണ്ടാകുക. കമ്മിറ്റിയുടെ പരിശോധനാ റിപ്പോർട്ട് ഒക്ടോബര്‍ 31നുള്ളില്‍ സര്‍ക്കാരിനു സമര്‍പ്പിക്കണമെന്നും തീരുമാനിച്ചു.ജീവനക്കാരെ വെട്ടിക്കുറച്ചുകൊണ്ടുള്ള തദ്ദേശസ്വയംഭരണവകുപ്പിന്‍റെ ഉത്തരവ് നടപ്പാക്കുന്നതു നിലവിൽ താത്കാലികമായി മരവിപ്പിച്ചിരിക്കുകയാണ്. കോർപറേഷൻ സ്റ്റാൻഡിംഗ് കമ്മിറ്റി ചെയര്‍പേഴ്സണ്‍ വര്‍ഗീസ് കണ്ടംകുളത്തി, എല്‍എസ്ജിഡി സ്പെഷല്‍ സെക്രട്ടറി അനുപമ, ഫിനാന്‍ഷ്യല്‍ അഡീഷണല്‍ സെക്രട്ടറി, കോര്‍പറേഷന്‍ സെക്രട്ടറി, കെഎസ്ഇബി പ്രതിനിധികള്‍, കോര്‍പറേഷന്‍ വൈദ്യുതിവിഭാഗം ജീവനക്കാരുടെ പ്രതിനിധികള്‍ തുടങ്ങിയവര്‍ ചർച്ചയിൽ പങ്കെടുത്തു.

സ്കൂട്ടർ മോഷണം: പ്രതി പിടിയിൽ

തൃശൂർ: സ്വകാര്യആശുപത്രിയിലെ പാർക്കിംഗ് വളപ്പിൽനിന്നു സ്കൂട്ടർ മോഷ്ടിച്ച പ്രതി അറസ്റ്റിൽ. പാവറട്ടി സ്വദേശി തെരുവത്ത് ഫംസീർ(36) ആണ് ഈസ്റ്റ് പോലീസിന്‍റെ പിടിയിലായത്. കഴിഞ്ഞമാസം മൂന്നിനു പാലക്കാട് കണ്ണന്പ്ര സ്വദേശിയുടെ സ്കൂട്ടറാണ് മോഷ്ടിച്ചത്. വിവിധ പോലീസ് സ്റ്റേഷനുകളിലായി ഫംസീറിനെതിരേ ഒന്പതു കേസുകളുണ്ട്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. ഈസ്റ്റ് ഇൻസ്പെക്ടർ എം.ജെ. ജിജോയുടെ നേതൃത്വത്തിൽ എസ്ഐമാരായ ബിപിൻ പി. നായർ, സിപിഒമാരായ സൂരജ്, അജ്മൽ, രതീഷ്, സാഗോക് ടീമംഗങ്ങളായ എസ്‌സിപിഒ സജി ചന്ദ്രൻ, സിപിഒമാരായ സിംസണ്‍, നൈജോണ്‍, അരുണ്‍ എന്നിവരാണുണ്ടായിരുന്നത്.

പെൺസുഹൃത്തിനെ കുത്തിപ്പരിക്കേൽപ്പിച്ചു; പ്രതി ഒളിവിൽ

പേരാമംഗലം: മുതുവറയിലെ സ്വകാര്യ ഫ്ലാറ്റിൽ പെൺസുഹൃത്തിനെ കുത്തി പരിക്കേൽപ്പിച്ചു. കൈപ്പറമ്പ് പുറ്റേക്കര സ്വദേശിയും കൊച്ചി ഫ്ലാറ്റ് പീഡനക്കേസിലെ പ്രതിയുമായ മാർട്ടിൻ ആണ് യുവതിയെ കുത്തിപ്പരിക്കേല്പിച്ചതെന്നു പോലീസ് പറഞ്ഞു. ഒളിവിൽപോയ മാർട്ടിനായി പേരാമംഗലം പോലീസ് അന്വേഷണം ഊർജിതമാക്കി. കൊച്ചിയിൽ ഫ്ലാറ്റിൽ യുവതിയെ പൂട്ടിയിട്ടു ക്രൂരമായി പീഡിപ്പിച്ച കേസിലെ പ്രതിയാണ് മാർട്ടിൻ ജോസഫ്. പിറകിൽ കുത്തേറ്റ മുളങ്കുന്നത്തുകാവ് സ്വദേശി ശർമിള(26) സ്വകാര്യ ആശുപത്രിയിൽ തീവ്രപരിചരണവിഭാഗത്തിൽ ചികിത്സയിലാണ്. മുതുവറയിലെ സ്വകാര്യ ഫ്ലാറ്റിൽ ഇന്നലെ രാവിലെയായിരുന്നു സംഭവം. ഇരുവരും ഫ്ലാറ്റിൽ ഒരുമിച്ചു താമസിച്ചുവരികയായിരുന്നു.

തെരുവുനായയുടെ ആക്രമണത്തില്‍ മൂന്നുപേര്‍ക്കു പരിക്ക്

ഇരിങ്ങാലക്കുട: നഗരസഭ മാര്‍ക്കറ്റില്‍ തെരുവുനായ ആക്രമണത്തില്‍ മൂന്നുപേര്‍ക്കു പരിക്കേറ്റു. പച്ചക്കറി വില്‍പ്പന നടത്തുന്ന ചന്തപ്പുര ചാതേലി ഔസേപ്പ് (84), ഇയാളുടെ സഹായി മടത്തിക്കര തീതായി ലിജോ(46) എന്നിവർക്കും ഒരു ലോട്ടറി വില്‍പ്പനക്കാരനുമാണ് നായയുടെ കടിയേറ്റത്. കഴിഞ്ഞദിവസം പുലര്‍ച്ചെ ആറരയോടെയായിരുന്നു സംഭവം. നായയെ പിന്നീട് ചത്തനിലയില്‍ കണ്ടെത്തി. മാര്‍ക്കറ്റില്‍ ലോട്ടറി വില്‍പ്പന നടത്തുന്നയാളുടെ കാലിനാണ് ആദ്യം നായയുടെ കടിയേറ്റത്. പിന്നീട് സമീപത്തുള്ള ചുമട്ടുതൊഴിലാളികളെ കടിക്കാന്‍ ശ്രമിച്ചെങ്കിലും നായയെ ഓടിച്ചു. പിന്നീടാണ് മാര്‍ക്കറ്റിനുള്ളില്‍പച്ചക്കറി വില്‍പ്പന നടത്തുന്ന ഔസേപ്പിനെ നായ കാലില്‍ കടിച്ചത്. തടയാന്‍ ശ്രമിച്ച സഹായി ലിജോയുടെ കൈക്കാണ് കടിയേറ്റത്. പരിക്കേറ്റവര്‍ ജനറല്‍ ആശുപത്രിയില്‍ ചികിത്സ തേടി. പിന്നീട് നായയെ ചത്തനിലയില്‍കണ്ടെത്തിയതിനെതുടര്‍ന്ന് വ്യാപാരികള്‍ നഗരസഭയെ വിവരമറിയിച്ചു. തെരുവുനായയെ പോസ്റ്റ്‌മോര്‍ട്ടം നടത്തി പേവിഷബാധയുണ്ടോ എന്നു സ്ഥിരീകരിക്കാന്‍ മണ്ണുത്തി വെറ്ററിനറി ആശുപത്രിയിലേക്കു മാറ്റി. പോസ്റ്റുമോര്‍ട്ടം റിപ്പോര്‍ട്ടിൽ പേവിഷബാധയുണ്ടെന്ന് സ്ഥിരീകരിച്ചു. മാര്‍ക്കറ്റിലും പരിസര പ്രദേശങ്ങളിലും തെരുവുനായകളുടെ എണ്ണം വര്‍ധിക്കുകയാണെന്ന് വ്യാപാരികള്‍ പറഞ്ഞു. നായ്ക്കളെകൊണ്ടു പൊറുതിമുട്ടിയ അവസ്ഥയിലാണ്. ഒറ്റയ്ക്കും കൂട്ടമായും അലഞ്ഞുതിരിയുന്ന നായ്ക്കളെ പേടിച്ചുവേണം വഴിനടക്കാനും ഇരുചക്രവാഹനങ്ങളില്‍ സഞ്ചരിക്കാനും. കുറച്ചുനാളുകളായി നഗരത്തിലെ ജനവാസമേഖലകളില്‍ തെരുവുനായ്ക്കളുടെ ശല്യം രൂക്ഷമാണ്. നഗരമധ്യത്തില്‍ മാര്‍ക്കറ്റ് പരിസരം, ബസ് സ്റ്റാന്‍ഡ്, ബൈപാസ് റോഡ്, നഗരസഭ മൈതാനം എന്നിവിടങ്ങളെല്ലാം തെരുവുനായ്ക്കളുടെ വിഹാരകേന്ദ്രങ്ങളാണ്. നായ്ക്കളുടെ കുര കാരണം രാത്രിയില്‍ ഉറങ്ങാന്‍ കഴിയുന്നില്ലെന്നാണു മറ്റൊരു പരാതി. പ്രഭാതസവാരിക്കും സായാഹ്നസവാരിക്കുമായി മുനിസിപ്പല്‍ മൈതാനത്തെത്തുന്നവര്‍ക്കു കൈയില്‍വടി കരുതേണ്ട അവസ്ഥയാണ്. രാവിലെ വിവിധ ജോലിക്കു പോകന്നവരും ചന്തയില്‍ പോകുന്ന ചെറുകിട കച്ചവടക്കാരും കാല്‍നടയാത്രക്കാരും വിവിധ ആരാധനാലയങ്ങളിലേക്കു പോകുന്ന വിശ്വാസികളും ഭീതിയോടെയാണു പുറത്തിറങ്ങുന്നത്. ഇന്നു രാവിലെ ഏഴുമുതല്‍ ഇരിങ്ങാലക്കുട വെറ്ററിനറി ആശുപത്രിയുടെയും നഗരസഭയുടെയും നേതൃത്വത്തില്‍ മാര്‍ക്കറ്റ് പരിസരത്ത് നായകളെ പിടികൂടി പേവിഷ പ്രതിരോധ കുത്തിവയ്പ് നടത്താനുള്ള നടപടികള്‍ സ്വീകരിക്കുമെന്നും നഗരസഭ അധികൃതര്‍ അറിയിച്ചു.

മതിലകത്ത് പൈപ്പ് പൊട്ടി; കുടിവെള്ളം മുടങ്ങും

കയ്പമംഗലം: മതിലകത്ത് പൈപ്പ് പൊട്ടി. ഇന്ന് കുടിവെള്ളം മുടങ്ങും. നാട്ടിക ഫര്‍ക്ക ശുദ്ധജലവിതരണ പദ്ധതിയിലൂടെ തീരദേശ പഞ്ചായത്തുകളിലേയ്ക്ക് കുടിവെള്ളമെത്തിക്കുന്ന 400 എംഎം പ്രിമോ പൈപ്പാണ് ഇന്നലെ ഉച്ചയ്ക്ക് രണ്ടുമണിയോടെ മതിലകം പള്ളിവളവിന് വടക്കുഭാഗത്തുവച്ച് പൊട്ടിയത്. വന്‍ തോതില്‍ വെള്ളം ചോര്‍ന്നതിനെത്തുടര്‍ന്ന് പരിസരത്തെ വീടുകളിലേയ്ക്കും വെള്ളം കയറിയിട്ടുണ്ട്. പെെപ്പ് പൊട്ടിയതോടെ ചെന്ത്രാപ്പിന്നി സിവി സെന്‍റര്‍ മുതല്‍ തെക്കോട്ട് പമ്പിംഗ് നിര്‍ത്തിവച്ചിരിക്കുകയാണ്. റിപ്പയറിംഗ് നടത്തി വിതരണം പുനഃസ്ഥാപിക്കാന്‍ ശ്രമിക്കുന്നുണ്ട്. പൈപ്പ് പൊട്ടിയതിനാല്‍ കയ്പമംഗലം, പെരിഞ്ഞനം, മതിലകം, ശ്രീനാരായണപുരം എന്നീ പഞ്ചായത്തുകളില്‍ ഇന്ന് കുടിവെള്ള വിതരണം ഉണ്ടാകില്ലെന്ന് വാട്ടര്‍ അഥോറിറ്റി അധികൃതർ അറിയിച്ചു.

കനാലില്‍ തള്ളിയ മാലിന്യം തിരിച്ചെടുപ്പിച്ചു

കൊടകര: അപ്പോളോ ടയേഴ്‌സ് കമ്പനിക്കു സമീപമുള്ള കനാലിലേക്ക് മാലിന്യങ്ങള്‍വലിച്ചെറിഞ്ഞ സ്ഥാപനത്തിന്‍റെ പേരില്‍ പഞ്ചായത്ത് നടപടി സ്വീകരിച്ചു. ഒല്ലൂരിലുള്ള സ്വകാര്യ സ്ഥാപനത്തില്‍നിന്നുള്ള മാലിന്യമാണ് ദേശീയപാതയോരത്തുള്ള കനാലില്‍ നിക്ഷേപിച്ചത്. പരാതിയുടെ അടിസ്ഥാനത്തില്‍ പഞ്ചായത്ത് അസിസ്റ്റന്‍റ് സെക്രട്ടറി എം. സുനില്‍കുമാര്‍, ഹെല്‍ത്ത് ഇന്‍സ്‌പെക്ടര്‍ ലിതിന്‍ ദേവസി എന്നിവരടങ്ങിയ പഞ്ചായത്ത് വിജിലന്‍സ് സ്‌ക്വാഡാണ് സ്ഥലത്തെത്തി പരിശോധന നടത്തി മാലിന്യം വലിച്ചെറിഞ്ഞവരെ തിരിച്ചറിഞ്ഞത്. സ്ഥാപനത്തിന്‍റെ ഉടമകളെ വിളിച്ചുവരുത്തി മാലിന്യം തിരികെ എടുപ്പിക്കുകയും പിഴ ഈടാക്കുകയും ചെയ്തു.

കാര്‍യാത്രികനെ ആക്രമിച്ച കേസില്‍ ഒരു പ്രതികൂടി അറസ്റ്റില്‍

ഇരിങ്ങാലക്കുട: കാര്‍ തട്ടിയതിനെതുടര്‍ന്നുണ്ടായ തര്‍ക്കത്തില്‍ കാര്‍ യാത്രക്കാരനെ ആക്രമിച്ച കേസില്‍ ഒരു പ്രതികൂടി അറസ്റ്റില്‍. വെള്ളാങ്കല്ലൂര്‍ സ്വദേശി വഞ്ചിപ്പുര വീട്ടില്‍ ആന്‍സനെ‍(32)യാണ് അറസ്റ്റ് ചെയ്തത്. കോണത്തുകുന്നിൽ പുത്തന്‍ചിറ സ്വദേശി കൊട്ടിക്കല്‍ വീട്ടില്‍ മുഹമ്മദ് സിദ്ദിഖിന്‍റെ ബന്ധുവിന്‍റെ കാറില്‍ ആളൂര്‍ മുരിയാട് ഉള്ളാട്ടിക്കുളംവീട്ടില്‍ മില്‍ജോ(29)യുടെ കാര്‍ തട്ടിയതു ചോദ്യംചെയ്തതിലുള്ള വൈരാഗ്യത്താല്‍ സിദ്ധിഖിനെയും കൂട്ടുകാരെയും ആക്രമിച്ച് പരിക്കേല്‍പ്പിച്ച സംഭവത്തിൽ ഇരിങ്ങാലക്കുട പോലീസ് കേസെടുത്തിരുന്നു. ഈ കേസിലെ ഒന്നാംപ്രതിയായ മില്‍ജോ, മറ്റ് പ്രതികളായ കൊറ്റനെല്ലൂര്‍ കുതിരത്തടം സ്വദേശി വേലംപറമ്പില്‍ അബ്ദുള്‍ ഷാഹിദ്, കൊറ്റനെല്ലൂര്‍പട്ടേപ്പാടം സ്വദേശി തൈപ്പറമ്പില്‍ നിഖില്‍ എന്നിവരെ മുമ്പ് അറസ്റ്റ് ചെയ്തിരുന്നു. ആന്‍സന്‍ കാട്ടൂര്‍, ഇരിങ്ങാലക്കുട പോലീസ് സ്റ്റേഷന്‍ പരിധികളിലായി നാല് ക്രിമിനല്‍കേസിലെ പ്രതിയാണ്. ഇരിങ്ങാലക്കുട സിഐ കെ.ജെ ജിനേഷ്, എസ്ഐ പി.ആര്‍. ദിനേഷ്കുമാര്‍, ജിഎസ്ഐടിപി പ്രീജു, പി.ജി. ഗോപകുമാര്‍, എം.ആര്‍ രഞ്ജിത്ത്, എം.എം. ഷാബു എന്നിവരാണ് അന്വേഷണസംഘത്തിലുള്ളത്.

പൊതുമ്പുചിറയോരം നാടിനു സമര്‍പ്പിച്ചു

ഇരിങ്ങാലക്കുട: ഇരിങ്ങാലക്കുടയുടെ ആദ്യ ഡെസ്റ്റിനേഷന്‍ ടൂറിസം പദ്ധതിയായ പൊതുമ്പുചിറയോരം മന്ത്രി ആര്‍. ബിന്ദു നാടിനു സമര്‍പ്പിച്ചു. മുരിയാട് പഞ്ചായത്ത് പ്രസിഡന്‍റ് ജോസ് ജെ. ചിറ്റിലപ്പിള്ളി അധ്യക്ഷതവഹിച്ചു. ജില്ലാപഞ്ചായത്ത് വൈസ് പ്രസിഡന്‍റ് ലത ചന്ദ്രന്‍, ഇരിങ്ങാലക്കുട ബ്ലോക്ക് പഞ്ചായത്ത് പ്രസിഡന്‍റ് ലളിത ബാലന്‍, വേളൂക്കര പഞ്ചായത്ത് പ്രസിഡന്‍റ് കെ.എസ്. ധനീഷ് എന്നിവര്‍ വിശിഷ്ടാതിഥികളായി. സംസ്ഥാന ടൂറിസം വകുപ്പ് അമ്പതുലക്ഷം രൂപയും ഇരിങ്ങാലക്കുട എംഎല്‍എയുടെ വികസനനിധിയില്‍നിന്നു 25 ലക്ഷം രൂപയും മുരിയാട് പഞ്ചായത്തിന്‍റെ 21 ലക്ഷം രൂപയും ഉപയോഗപ്പെടുത്തിയാണ് പൊതുമ്പുചിറയോരം പദ്ധതി യാഥാര്‍ഥ്യമാക്കിയത്. പദ്ധതി പ്രദേശത്തേക്കുള്ള ആമ്പിപ്പാടം-പൊതുമ്പുചിറ റോഡ് എംഎല്‍എ ഫണ്ടില്‍നിന്ന് 18 ലക്ഷം രൂപ ചെലവഴിച്ച് പൂര്‍ത്തീകരിച്ചിരുന്നു. മൂന്നുഘട്ടങ്ങളിലായാണ് നിര്‍മാണം. പൂര്‍ത്തിയായ ഒന്നും രണ്ടും ഘട്ടങ്ങളുടെ ഉദ്ഘാടനമാണ് മന്ത്രി നിര്‍വഹിച്ചത്. മുരിയാട് പഞ്ചായത്ത് വൈസ് പ്രസിഡന്‍റ് രതി ഗോപി, വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ കെ.പി. പ്രശാന്ത്, ആരോഗ്യ- വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ കെ.യു. വിജയന്‍, തൃശൂര്‍ ടൂറിസം വകുപ്പ് ഡെപ്യൂട്ടി ഡയറക്ടര്‍ പ്രേംദാസ് തുടങ്ങിയവര്‍ പങ്കെടുത്തു.

കിഡ്സ് ഐടിഐയിൽ വിജയം നൂറുശതമാനം

കോട്ടപ്പുറം : കിഡ്സ് പ്രൈവറ്റ് ഐടിഐയിൽനിന്നു 2025ൽ വിജയം നേടിയവരുടെ സർട്ടിഫിക്കറ്റ് വിതരണവും മികച്ച ട്രെയിനികൾക്കുള്ള പുരസ്കാരവിതരണവും നടന്നു. കൊടുങ്ങല്ലൂർ മുനിസിപ്പൽ ചെയർപേഴ്സൺ ടി.എം. ഗീത ഉദ്ഘാടനം നിർവഹിച്ചു. ചടങ്ങിൽ കിഡ്സ് എക്സിക്യൂട്ടീവ് ഡയറക്ടർ ഫാ. നിമേഷ് അഗസ്റ്റിൻ കാട്ടാശേരി അധ്യക്ഷതവഹിച്ചു. യോഗത്തിൽ കൗൺസിലർ വി.എം. ജോണി, കിഡ്സ് അസോസിയേറ്റ് ഡയറക്ടർ ഫാ. വിനു പീറ്റർ, അസിസ്റ്റന്‍റ് ഡയറക്ടർ ഫാ. നിഖിൽ മുട്ടിക്കൽ എന്നിവർ സംസാരിച്ചു.

കെപിഎസ്ടിഎ യാത്രയ്ക്ക് സ്വീകരണംനൽകി

കൊടുങ്ങല്ലൂർ: കേരള പ്രദേശ് സ്കൂൾ ടീച്ചേഴ്സ് അസോസിയേഷൻ കാസർഗോഡു മുതൽ തിരുവനന്തപുരംവരെ നടത്തുന്ന മാറ്റൊലി പൊതുവിദ്യാഭ്യാസ പരിവർത്തന സന്ദേശയാത്രയ്ക്ക് കൊടുങ്ങല്ലൂരിൽ സ്വീകരണംനൽകി. സ്വീകരണ യോഗവും പൊതുസമ്മേളനവും സനീഷ്കുമാർ ജോസഫ് എംഎൽഎ ഉദ്ഘാടനംചെയ്തു. സംഘാടകസമിതി ചെയർമാൻ ഇ.എസ്. സാബു അധ്യക്ഷതവഹിച്ചു. കെപിസിസി വക്താവ് പി.കെ. നൗഷാദ് അലി മുഖ്യപ്രഭാഷണംനടത്തി. ജാഥാക്യാപ്റ്റൻ കെ. അബ്ദുൾ മജീദ്, ജനറൽ സെക്രട്ടറി പി.കെ. അരവിന്ദൻ, അനിൽ വട്ടപ്പാറ, ഡിസിസി ജനറൽ സെക്രട്ടറി ടി.എം. നാസർ എന്നിവർ പ്രസംഗിച്ചു.

വോട്ട് ചോരിക്കെതിരേ നൈറ്റ് മാർച്ച്

ചെന്ത്രാപ്പിന്നി: വോട്ട് ചോരി ജനാധിപത്യ ധ്വംസനത്തിനെതിരേ ജനാധിപത്യ സംരക്ഷണവേദിയുടെ ആഭിമുഖ്യത്തിൽ നൈറ്റ് മാർച്ച് സംഘടിപ്പിച്ചു. ചെന്ത്രാപ്പിന്നി സെന്‍ററിൽനിന്നു ആരംഭിച്ച നൈറ്റ് മാർച്ച് കാളമുറിയിൽ സമാപിച്ചു. ജില്ലാപഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ പി.എം. അഹമ്മദ്, വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ മഞ്ജുള അരുണൻ, കയ്പമംഗലം ഗ്രാമപഞ്ചായത്ത് പ്രസിഡന്‍റ് ശോഭന രവി, എടത്തിരുത്തി ഗ്രാമപഞ്ചായത്ത് പ്രസിഡന്‍റ് ടി.കെ. ചന്ദ്രബാബു, ജനാധിപത്യ സംരക്ഷണവേദി ചെയർമാൻ അഡ്വ. വി.കെ. ജ്യോതി പ്രകാശ് തുടങ്ങിയവർ നേതൃത്വംനൽകി.

നവരാത്രി മഹോത്സവം സംഗീതാർച്ചന

ചാലക്കുടി: കുണ്ടുകുഴിപ്പാടം - കുറ്റിച്ചിറ അന്നപൂർണേശ്വരി ഭദ്രകാളി ക്ഷേത്രത്തിലെ നവരാത്രി മഹോത്സവവും സംഗീതാർച്ചനയും ആരംഭിച്ചു. സംസ്ഥാന മനുഷ്യാവകാശ കമ്മീഷൻ അംഗം വി. ഗീത ഭദ്രദീപം തെളിയിച്ച് തുടക്കംകുറിച്ചു. ക്ഷേത്രസമിതി പ്രസിഡന്‍റ് ടി.കെ. മനോഹരൻ അധ്യക്ഷത വഹിച്ചു. എസ്എൻഡിപി യൂണിയൻ വൈസ് പ്രസിഡന്‍റ് ചന്ദ്രൻ കൊളത്താപ്പിള്ളി വിശിഷ്ടാതിഥിയായി . ക്ഷേത്രം മേൽശാന്തി അനൂപ് എടത്താടൻ ചടങ്ങുകൾക്ക് മുഖ്യകാർമികത്വം വഹിച്ചു. എൻ.വി. മോഹനൻ ഞാറ്റുവെട്ടി, സന്ധ്യ സനിൽകുമാർ കണ്ണംപറമ്പിൽ, കെ.കെ. കരുണൻ കൈപ്പുഴ, കെ.കെ. ശങ്കരൻകുട്ടി കൈപറമ്പിൽ എന്നിവർ വിവിധ സമർപ്പണങ്ങൾ നടത്തി. വസ്ത്ര വ്യാപാര രംഗത്ത് 50 വർഷങ്ങൾ പിന്നിട്ട എ.കെ. സുഗതൻ, ജൈവ കർഷകൻ സുധാകരൻ നാങ്ങൂരാൻ, ആശ വർക്കർമാരായ ഷീബ ഷാബു കൊല്ലശേരി, നിഷ മഹേഷ് തോട്ടേപറമ്പിൽ, രമണി കെ.പി. കറ്റുകണ്ടത്തിൽ എന്നിവരെ ആദരിച്ചു.

91 വയസുകാരിയെ പീഡിപ്പിച്ച് സ്വര്‍ണമാല കവര്‍ന്നു: പ്രതിക്ക് ഇരട്ടജീവപര്യന്തവും കഠിനതടവും

ഇരിങ്ങാലക്കുട: 91 വയസുകാരിയായ വയോധികയെ വീട്ടില്‍ അതിക്രമിച്ചുകയറി ലൈംഗികാതിക്രമംനടത്തി സ്വര്‍ണമാല കവര്‍ന്ന കേസില്‍ പ്രതിക്ക് ഇരട്ടജീവപര്യന്തം തടവും 15 വര്‍ഷം കഠിനതടവും. പാലക്കാട് ആലത്തൂര്‍ കിഴക്കുഞ്ചേരി കണ്ണംകുളം സ്വദേശി അവിഞ്ഞിക്കാട്ടില്‍ വിജയകുമാറിനെയാണ് (ബിജു - 40) കോടതി ശിക്ഷിച്ചത്. 2022 ഓഗസ്റ്റ് മൂന്നിനാണ് സംഭവം. 1.35 ലക്ഷം രൂപ പിഴയും ഇയാൾക്ക് ശിക്ഷ വിധിച്ചു. പ്രോസിക്യൂഷനുവേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ അഡ്വ. വിജു വാഴക്കാല ഹാജരായി.

യുവാവിനെ ആക്രമിച്ച പ്രതി അറസ്റ്റിൽ

കൊടുങ്ങല്ലൂർ: യുവാവിനെ ഹെൽമറ്റുകൊണ്ട് ആക്രമിച്ച് പരിക്കേൽപ്പിച്ച കേസിൽ പ്രതി അറസ്റ്റിൽ. കാര സ്വദേശി പാറശേരി വീട്ടിൽ രമേഷി(24) നെയാണ് കൊടുങ്ങല്ലൂർ പോലീസ് അറസ്റ്റ് ചെയ്തത്. കഴിഞ്ഞ തിങ്കളാഴ്ച വൈകീട്ട് കാര ബീച്ച് റോഡിൽ പെരിങ്ങാട്ടുവീട്ടിൽ ദേവരാജിനു(21)നേരേയാണ് ആക്രമണം. പ്രതിയുടെ വാഹനത്തിനെതിരേ വാഹനം ഓടിച്ചുവന്നെന്ന കാരണത്താലാണ് ദേവരാജിനെ കൈകൊണ്ടും ഹെൽമെറ്റ് കൊണ്ടും ആക്രമിച്ച് പരിക്കേൽപ്പിച്ചത്. രമേഷ് കൊടുങ്ങല്ലൂർ പോലീസ് സ്റ്റേഷൻ പരിധിയിൽ അഞ്ച് ക്രിമിനൽക്കേസിലെ പ്രതിയാണ്. കൊടുങ്ങല്ലൂർ സിഐ ബി.കെ. അരുൺ, എസ്ഐ മാരായ കെ. സാലിം, കെ.ജി. സജിൽ, സിപിഒ പി. ഗില്‍ബർട്ട് ജേക്കബ് എന്നിവരാണ് അന്വേഷണ സംഘത്തിലുള്ളത്.

ബസ് കാത്തിരിപ്പുകേന്ദ്രത്തിനായി തെരുവിലിറങ്ങി വിദ്യാർഥിനികൾ; ഒപ്പം പ്രിൻസിപ്പലും

ഒല്ലൂർ: റോഡ് വികസനത്തിനായി പൊളിച്ച ഒല്ലൂർ ക്രിസ്റ്റഫർ നഗർ ജംഗ്ഷനിലെ ബസ് കാത്തിരിപ്പുകേന്ദ്രം പുനഃസ്ഥാപിക്കണമെന്നാവശ്യപ്പെട്ട് സെന്‍റ് റാഫേൽസ് ഹയർ സെക്കൻഡറി സ്കൂളിലെ വിദ്യാർഥിനികൾ തെരുവിലിറങ്ങി പ്രതിഷേധിച്ചത്. ജില്ലാ കളക്ടർ, കോർപറേഷൻ മേയർ, സിറ്റി പോലീസ് കമ്മീഷണർ, എസിപി എന്നിവർക്കു പരാതി നൽകിയെങ്കിലും നടപടിയുണ്ടാകാത്തതിനെതുടർന്നായിരുന്നു പ്രതിഷേധം. 14 മാസം മുന്പാണ് ബസ് കാത്തിരിപ്പുകേന്ദ്രം പൊളിച്ചുനീക്കിയത്. ബസ് കാത്തിരിപ്പുകേന്ദ്രം ഇല്ലാത്തതിനാൽ ബസുകൾ, സ്റ്റോപ്പിൽ നിർത്താത്തതു പതിവായിരിക്കുകയാണ്. പിടിഎയുടെ നേതൃത്വത്തിൽ സംഘടിപ്പിച്ച സമരത്തിൽ 500 വിദ്യാർഥിനികളാണ് മുദ്രവാക്യംവിളികളും പ്ലക്കാർഡുകളുമായി പങ്കെടുത്തത്. പ്രിൻസിപ്പൽ സിസ്റ്റർ മേരി സീന, പിടിഎ പ്രസിഡന്‍റ് എം. ആഷ, വൈസ് പ്രസിഡന്‍റ് ഷാ ജു കിടങ്ങൻ, സ്കൂൾ ചെയർ‌പേഴ്സൻ കെ. അഭിനന്ദ തുടങ്ങിയവർ പ്രസംഗിച്ചു.

മിഥുന്‍റെ ആത്മഹത്യ: കോൺഗ്രസും ബിജെപിയും ഫോറസ്റ്റ് സ്റ്റേഷനുകളിലേക്ക് മാർച്ച് നടത്തി

കോൺഗ്രസ് പൂങ്ങോട് ഫോറസ്റ്റ് സ്റ്റേഷനിലേക്ക് എരുമപ്പെട്ടി: കാട്ടുപന്നിയുടെ ഇറച്ചി വാങ്ങിയെന്ന കുറ്റംചുമത്തി വനംവകുപ്പ് അറസ്റ്റ് ചെയ്തതിനെ തുടർന്ന് കാഞ്ഞിരക്കോട് സ്വദേശി മിഥുൻ ആത്മഹത്യചെയ്ത സംഭവം ഫോറസ്റ്റ് ഉദ്യോസ്ഥരുടെ ശാരീരിക, മാനസികപീഡനത്തെതുടർന്നാണെന്ന് ആരോപിച്ചും ഉദ്യോഗസ്ഥർക്കെതിരേ കേസെടുക്കണമെന്ന് ആവശ്യപ്പെട്ടും കോൺഗ്രസ് എരുമപ്പെട്ടി മണ്ഡലം കമ്മറ്റിയുടെ നേതൃത്വത്തിൽ പൂങ്ങോട് ഫോറസ്റ്റ് സ്റ്റേഷനിലേക്കു മാർച്ച് നടത്തി. ചിറ്റണ്ട സെന്‍ററിൽനിന്ന് ആരംഭിച്ച മാർച്ച് ഫോറസ്റ്റ് സ്റ്റേഷനുസമീപം ബാരിക്കേഡ് വച്ച് പോലീസ് തടഞ്ഞു. പ്രവർത്തകർ ബാരിക്കേഡ് മറിച്ചിടുകയും മറികടക്കാൻ ശ്രമിക്കുകയും ചെയ്തു. തുടർന്നുനടന്ന പ്രതിഷേധധർണ കെപിസിസി സെക്രട്ടറി രാജേന്ദ്രൻ അരങ്ങത്ത് ഉദ്ഘാടനം ചെയ്തു. മണ്ഡലം പ്രസിഡന്‍റ്് എം.എം. നിഷാദ് അധ്യക്ഷത വഹിച്ചു. യുഡിഎഫ് കുന്നംകുളം നിയോജകമണ്ഡലം കൺവീനർ അമ്പലപ്പാട്ട് മണികണ്ഠൻ മുഖ്യപ്രഭാഷണം നടത്തി. എൻ.കെ. കബീർ, കെ. ഗോവിന്ദൻകുട്ടി, സുന്ദരൻ ചിറ്റണ്ട, ചന്ദ്രപ്രകാശ് ഇടമന, അജു നെല്ലുവായ്, സതീഷ് ഇടമന, എം.സി. ഐജു, ഫ്രിജോ കുണ്ടന്നൂർ, സുജാത തുളസി, നജീബ് കൊമ്പത്തേയിൽ, ഷിയാസ് ചിറ്റണ്ട, ശ്യാംജി ചിറ്റണ്ട എന്നിവർ നേതൃത്വം നൽകി. പ്രവർത്തകരെയും നേതാക്കളെയും പോലീസ് അറസ്റ്റ് ചെയ്തുനീക്കി. ബിജെപി എങ്കക്കാട് ഫോറസ്റ്റ് സ്റ്റേഷനിലേക്ക് വടക്കാഞ്ചേരി: കാട്ടുപന്നിവേട്ടയിൽ ജാമ്യത്തിലിറങ്ങിയ പ്രതി തൂങ്ങിമരിച്ച സംഭവത്തിൽ കുറ്റക്കാരായ ഉദ്യോഗസ്ഥർക്കെതിരെ നടപടി ആവശ്യപ്പെട്ട് എങ്കക്കാട്ഫോറസ്റ്റ് സ്റ്റേഷനിലേക്ക് ബിജെപി എരുമപ്പെട്ടി മണ്ഡലം കമ്മറ്റി പ്രതിഷേധ മാർച്ച് സംഘടിപ്പിച്ചു. മാർച്ച് ഫോറസ്റ്റ് ഓഫീസിനു മുന്നിൽ പോലീസ് തടഞ്ഞു. തുടർന്ന് പ്രവർത്തകർ ഓഫീസ് ഉപരോധിച്ചു. ഓഫീസ് പടിക്കൽ നടന്ന പ്രതിഷേധ‌സമരം ബിജെപി നോർത്ത് ജില്ലാ ജനറൽ സെക്രട്ടറി അനീഷ് ഉദ്ഘാടനം ചെയ്തു. മണ്ഡലം പ്രസിഡന്‍റ് ജിത്തു തയ്യിൽ അധ്യക്ഷത വഹിച്ചു. നേതാക്കളായ വിപിൻ കുടിയേടത്ത്, നിത്യസാഗർ, സുഭാഷ് ആദൂർ, കാളിദാസൻ, രാജേഷ് കുട്ടഞ്ചേരി, ജോജു കൊളങ്ങാടൻ, കെ. രഞ്ജിത്ത്, പി.ജെ. ജെബിൻ തുടങ്ങിയവർ പ്രസംഗിച്ചു. ഓട്ടുപാറ - വാഴാനി റോഡിലെ എങ്കക്കാട് റെയിൽവേ ഗേറ്റ് പരിസരത്തുനിന്നും ആരംഭിച്ച പ്രതിഷേധ മാർച്ചാണ് ഫോറസ്റ്റ് ഓഫീസിനു മുന്നിൽ പോലീസ് തടഞ്ഞത്.

അമീബിക് മസ്തിഷ്‌ക ജ്വരം : ചൂണ്ടൽ പഞ്ചായത്തിലെ മുഴുവൻ കുളങ്ങളിലും പ്രവേശനം നിരോധിച്ചു

കേച്ചേരി: അമീബിക് മസ്തിഷ്‌ക ജ്വരം ബാധിച്ചതായി സംശയിക്കുന്ന സാഹചര്യത്തിൽ ചൂണ്ടൽ പഞ്ചായത്തിലെ രണ്ടുക്ഷേത്രക്കുളങ്ങൾ ഉൾപ്പടെ മൂഴുവൻ കുളങ്ങളിലെയും പ്രവേശനം നിരോധിച്ചു. തായങ്കാവ് ധർമശാസ്താ ക്ഷേത്രത്തിലെയും പയ്യൂർക്കാവ് സുബ്രഹ്മണ്യ ക്ഷേത്രത്തിലെയും ക്ഷേത്രക്കുളങ്ങളും പയ്യൂർക്കാവ് ക്ഷേത്രത്തിനുസമീപത്തെ പൊതുകുളത്തിൽ പ്രവേശിക്കുന്നതുമാണ് ആദ്യം വിലക്കിയിരുന്നത്. പിന്നീട് ഒരറിയിപ്പ് ഉണ്ടാകുന്നതുവരെ ചൂണ്ടൽ പഞ്ചായത്തിലെ കുളങ്ങളിൽ പ്രവേശിക്കരുതെന്ന് പഞ്ചായത്ത് സെക്രട്ടറി ഉത്തരവിടുകയായിരുന്നു. രണ്ടുപേർക്ക് മസ്തിഷ്‌കജ്വരം ബാധിച്ച് ഭേദമായതായി റിപ്പോർട്ട് ഉണ്ടെങ്കിലും അമീബിക് മസ്തിഷ്‌ക ജ്വരമാണോ എന്നതിൽ ഔദ്യോഗിക സ്ഥിരീകരണം വന്നിട്ടില്ല. കുളങ്ങളിലെ വെള്ളത്തിന്‍റെ ലാബ് റിപ്പോർട്ട് വരാത്ത സാഹചര്യത്തിലാണ് മുൻകരുതൽ നടപടി. സോഷ്യൽ മീഡിയയിലൂടെ ഈയിടെ തായങ്കാവ് ക്ഷേത്രക്കുളത്തിനു വലിയ പ്രചാരം ലഭിച്ചിരുന്നു. വിദൂര സ്ഥലങ്ങളിൽനിന്നുപോലും ആളുകളെത്തി കുളത്തിൽ നീന്തുകയും റീൽസ് ചിത്രീകരിക്കുകയും ചെയ്തിരുന്നു. മലിനമായ വെള്ളത്തിൽ കുളിക്കുന്നതും നീന്തുന്നതും വഴി രോഗം പടരാൻ സാധ്യതയുണ്ടെന്ന് ചൂണ്ടൽ പഞ്ചായത്ത് ഹെൽത്ത് ഇൻസ്‌പെക്ടർ അറിയിച്ചു. രോഗം പടരുന്നതുതടയാനും പൊതുജനങ്ങൾക്ക് ജാഗ്രതാനിർദേശം നൽകാനുമാണ് ഈ നടപടിയെന്ന് പഞ്ചായത്ത് അധികൃതർ വ്യക്തമാക്കി.

കോർപറേഷൻ സ്റ്റേഡിയത്തിൽ ഫുട്ബോൾ ടർഫ്സി: ന്തറ്റിക് ട്രാക്ക് നഷ്ടപ്പെടുമെന്ന ആശങ്കയിൽ അത്‌ലറ്റിക്സ് അസോ.

തൃശൂർ: കോർപറേഷൻ സ്റ്റേഡിയത്തിലെ ഫുട്ബോൾ ആർട്ടിഫിഷ്യൽ ടർഫിന്‍റെ പുനർനിർമാണം സിന്തറ്റിക് ട്രാക്ക് നിർമാണത്തിനുള്ള ഖേലോ ഇന്ത്യ ധനസഹായത്തെ ബാധിക്കുമെന്ന ആശങ്കയുമായി തൃശൂർ ജില്ലാ അത്‌ലറ്റിക്സ് അസോസിയേഷൻ. കേരള സൂപ്പർ ലീഗിൽ തൃശൂർ ടീമിന്‍റെ ഹോംഗ്രൗണ്ടായി കോർപറേഷൻ സ്റ്റേഡിയം ഉപയോഗിക്കുന്നതിനായി ഫുട്ബോൾ ആർട്ടിഫിഷ്യൽ ടർഫ് നവീകരിക്കാനും ഫീൽഡിന്‍റെ നീളവും വീതിയും വർധിപ്പിക്കാനുമാണ് പദ്ധതി. ആർട്ടിഫിഷ്യൽ ടർഫ് വിപുലീകരിക്കുന്നതോടെ സ്റ്റാൻഡേഡ് 400 മീറ്റർ സിന്തറ്റിക് ട്രാക്ക് നിർമിക്കാനാവശ്യമായ ഇടം നഷ്ടപ്പെടാൻ സാധ്യതയുണ്ടെന്ന് അത്‌ലറ്റിക്സ് അസോസിയേഷൻ ഭാരവാഹികൾ പത്രസമ്മേളനത്തിൽ ആരോപിച്ചു. അങ്ങനെ സംഭവിച്ചാൽ സിന്തറ്റിക് ട്രാക്ക് നിർമിക്കാനുള്ള ധനസഹായം ഖേലോ ഇന്ത്യ പിൻവലിച്ചേക്കാം. 2015ലെ ദേശീയ കായികമേളയിൽ വനിതാ ഫുട്ബോൾ മത്സരങ്ങൾക്കായി ആർട്ടിഫിഷ്യൽ ടർഫ് പണിയുന്നതിനായി മഡ് ട്രാക്ക് നീക്കംചെയ്യപ്പെട്ടശേഷം ഇവിടെ അത്‌ലറ്റിക്സിനുള്ള അടിസ്ഥാനസൗകര്യങ്ങൾ ഇല്ലാതായിരുന്നു. കഴിഞ്ഞവർഷമാണ് ഖേലോ ഇന്ത്യ പദ്ധതിയിലൂടെ കോർപറേഷൻ സ്റ്റേഡിയത്തിൽ 400 മീറ്റർ സിന്തറ്റിക് ട്രാക്ക് സ്ഥാപിക്കാനുള്ള ധനസഹായത്തിന് അനുമതി ലഭിച്ചത്. പുതിയ നീക്കത്തിലൂടെ അവരുടെ സ്വപ്നങ്ങൾക്കാണു മങ്ങലേറ്റത്. പത്രസമ്മേളനത്തിൽ അത്‌ലറ്റിക്സ് അസോസിയേഷൻ പ്രസിഡന്‍റ് പ്രഫ. ഇ.യു. രാജൻ, സെക്രട്ടറി ഡോ. കെ.എസ്. ഹരിദയാൽ, പ്രഫ. നാരായണൻ നന്പൂതിരി, ഡോ. ഹേമലത എന്നിവർ പങ്കെടുത്തു.

യൂത്ത് കോൺഗ്രസിന്‍റെ നിരാഹാരസമരം

വടക്കാഞ്ചേരി: ലോക്കപ്പ് മർദനത്ത ന്യായീകരിച്ച സേവ്യർ ചിറ്റിലപ്പിള്ളി എംഎൽഎ രാജിവയ്ക്കണമെന്ന് ആവശ്യപ്പെട്ടും കെ‌എസ്‌യു നേതാക്കളെ മുഖംമൂടി ധരിപ്പിച്ചും കൈയാമംവച്ചും കോടതിയിൽ ഹാജരാക്കിയ വടക്കാഞ്ചേരി എസ്എച്ച്ഒയെ അറസ്റ്റ് ചെയ്യണമെന്നും കുന്നംകുളം കസ്റ്റഡിമർദനക്കേസിലെ മുഴുവൻ പോലീസുകാരെയും സർവീസിൽനിന്നും പിരിച്ചുവിടണമെന്നും ആവശ്യപ്പെട്ടുകൊണ്ടും യൂത്ത് കോൺഗ്രസ് ഏകദിന ഉപവാസം നടത്തി. വടക്കാഞ്ചേരി നിയോജകമണ്ഡലം പ്രസിഡന്‍റ് ഒ. ശ്രീകൃഷ്ണന്‍റെ നേതൃത്വത്തിൽ ഇന്നലെ രാവിലെ ഒന്പതുമുതൽ ഓട്ടുപാറ ബസ് സ്റ്റാൻഡ് പരിസരത്തായിരുന്നു ഏകദിന ഉപവാസം. യൂത്ത് കോൺഗ്രസ് സംസ്ഥാന ജനറൽ സെക്രട്ടറി അഡ്വ. സി. പ്രമോദ് ഉദ്ഘാടനം ചെയ്തു. കെപിസിസി സെക്രട്ടറി സി.സി. ശ്രീകുമാർ, ഡിസിസി ജനറൽ സെക്രട്ടറി എൻ.ആർ. സതീശൻ, വടക്കാഞ്ചേരി മുനിസിപ്പാലിറ്റി കൗൺസിലർമാരായ എസ്എഎ ആസാദ്, ബുഷറ റഷിദ്, ടി.സി. ഗിരീഷ്, തെക്കുംകര കോൺഗ്രസ് മണ്ഡലം പ്രസിഡന്‍റ്് ജയ്സൺ മാത്യു, നേതാക്കളായ എൻ.ആർ. രാധാകൃഷ്ണൻ, അനുമോദ്, ബിജു കൃഷ്ണൻ, ഷോബിൻ മുണ്ടൂര്, ജയൻ മംഗലം എന്നിവർ പ്രസംഗിച്ചു. മഹിളാ കോൺഗ്രസ് തെക്കുംകര മണ്ഡലം പ്രസിഡന്‍റ് ഐ.എ. സബീല, യൂത്ത് കോൺഗ്രസ് നേതാക്കളായ അശ്വൻ തമ്പി, മനീഷ് വടക്കാഞ്ചേരി, ജിസോ ലോനപ്പൻ, അരുൺ ആന്‍റോ, സോജൻ ആവണൂർ, ഷിബിൻ തോളൂർ, അനീഷ് വടക്കാഞ്ചേരി തുടങ്ങിയവർ നേതൃത്വം നൽകി.

കുരഞ്ഞിയൂർ സർക്കാർ സ്കൂളിന് ഇനി സ്വന്തം കെട്ടിടം

പുന്നയൂർക്കുളം: ഒരു നൂറ്റാണ്ടോളം പഴക്കമുള്ള വാടക കെട്ടിടത്തിൽ വളരെ പ്രയാസത്തിൽ കഴിഞ്ഞിരുന്ന കുരഞ്ഞിയൂർ ഗവ. എൽപി സ്കൂളിന് സ്വന്തം കെട്ടിടം നിർമിക്കുന്നു. ഒട്ടേറെ ചരിത്ര സംഭവങ്ങൾക്ക് വേദിയായ സ്കൂൾ അടച്ചുപൂട്ടൽ ഭീഷണിയിലായിരുന്നു. ഇട്ടേക്കോട്ട് പടിക്കപറമ്പിൽ രാധാ‌കൃഷ്ണ പണിക്കരുടെ കുടുംബം സൗജന്യമായി നൽകിയ 30 സെന്‍റ് സ്ഥലത്താണു കെട്ടിടം നിർമിക്കുന്നത്. എംഎൽഎ ഫണ്ടിൽനിന്ന് ഒരു കോടിയും സംസ്ഥാനബജറ്റിൽനിന്ന് ഒരു കോടിയും ചേർത്ത് രണ്ടുകോടി രൂപ ചെലവിലാണ് ആധുനിക കെട്ടിടം നിർമിക്കുന്നത്. എൻ.കെ. അക്‌ബർ എംഎൽഎ ശിലാസ്ഥാപനം നിർവഹിച്ചു. പുന്നയൂർ പഞ്ചായത്ത് പ്രസിഡന്‍റ് ടി.വി. സുരേന്ദ്രൻ അധ്യക്ഷത വഹിച്ചു. വൈസ് പ്രസിഡന്‍റ് സുഹറ ബക്കർ, സ്ഥിരം‌സമിതി അധ്യക്ഷരായ കെ.എ. വിശ്വനാഥൻ, ഷമീം അഷറഫ്, എ.കെ.വിജയൻ, ജിസ്ന ലത്തീഫ്, ജെസ്ന ഷെജീർ, ഷൈബ ദിനേശൻ, എം. കെ. അറാഫത്ത്, രജനി ടീച്ചർ, സെലീന നാസർ, റസീന ഉസ്മാൻ, എ.സി. ബാലകൃഷ്ണൻ, എഇഒ വി.ബി. സിന്ധു, പി.എ. അനിൽകുമാർ, ജിസ്ന റനീഷ്, എൻ.വി. ഷീജ, പ്രധാനാധ്യാപിക ജിനി.കെ. റപ്പായി എന്നിവർ പ്രസംഗിച്ചു.

നഗരസഭാ ഭരണത്തിനെതിരേ കോൺഗ്രസ് കുറ്റ‌വിചാരണസദസ്

ഗുരുവായൂർ: ഇടതു മുന്നണിയുടെ നഗരസഭാ ഭരണത്തിനെതിരേ കോൺഗ്രസ് നഗരസഭ കമ്മിറ്റിയുടെ നേതൃത്വത്തിൽ കുറ്റവിചാരണ സദസ് നടത്തി. എഐസിസി അംഗം അനിൽ അക്കര ഉദ് ഘാടനം ചെയ്തു. ഇടതുമുന്നണിയുടെ ഭരണം ഗുരുവായൂർ നഗരസഭയെ കാൽനൂറ്റാണ്ട് പിറകോട്ടടിച്ചതായി അദ്ദേഹം പറഞ്ഞു. കോൺഗ്രസ് മുനിസിപ്പൽ കമ്മറ്റി കോ- ഓർഡിനേറ്റർ ആർ. രവികുമാർ അധ്യക്ഷത വഹിച്ചു. നഗരസഭ പ്രതിപക്ഷ നേതാവ് കെ.പി. ഉദയൻ കുറ്റവിചാരണ വിഷായവതരണം നടത്തി. കെപിസിസി സെക്രട്ടറി സി.സി. ശ്രീകുമാർ, നേതാക്കളായ അരവിന്ദൻ പല്ലത്ത്, സി.ജെ. സ്റ്റാൻലി, ഒകെആർ മണികണ്ഠൻ, ആന്‍റോ തോമാസ്, ബി.വി ജോയ് , സി.എസ്. സൂരജ്, എ.ടി. സ്റ്റീഫൻ, കെ.വി. ഷാനവാസ്, കെപിഎ റഷീദ്, രേണുക ശങ്കർ, ബാലൻ വാറണാട്ട്, എം.എഫ്. ജോയ്, ജോയ് ചെറിയാൻ, എന്നിവർ പ്രസംഗിച്ചു.

സമ്മാനടിക്കറ്റുകളും കളക്‌ഷൻ തുകയും മോഷ്ടിച്ച ജീവനക്കാരൻ അറസ്റ്റിൽ

വാടാനപ്പിള്ളി: ലോട്ടറിക്കടയിൽനിന്ന് സമ്മാന ടിക്കറ്റുകളും കളക്‌ഷൻ തുകയും അടക്കം 1,07,000 രൂപ മോഷ്ടിച്ച ജീവനക്കാരൻ അറസ്റ്റിൽ. പാവറട്ടി നാലകത്തു വീട്ടിൽ നിഷാലി(20)നെയാണ് തൃശൂർ റൂറൽ പോലീസ് അറസ്റ്റ് ചെയ്തത്. വാടാനപ്പിള്ളി സെന്‍ററിൽ പ്രവർത്തിക്കുന്ന പെരിഞ്ഞനം സ്വദേശി പള്ളത്ത് വീട്ടിൽ സുനിലിന്‍റെ ഉടമസ്ഥതയിലുള്ള ലോട്ടറിക്കടയിൽനിന്ന് 14 ന് രാവിലെ ആറരയോടെ വിവിധ തീയതികളിലുള്ള സമ്മാന ടിക്കറ്റുകളും കളക്‌ഷൻ തുകയുമാണ് ഇയാൾ മോഷ്ടിച്ചത്. പരാതിപ്രകാരം വാടാനപ്പള്ളി പോലീസ് കേസെടുത്ത് അന്വേഷണം നടത്തി. വാടാനപ്പള്ളി സ്റ്റേഷൻ ഇൻസ്പെക്ടർ എൻ. ബി. ഷൈജു, ജൂനിയർ എസ്. ഐ. സുബിൻ, സബ് ഇൻസ്പെക്ടർ അരുൺ, സിവിൽ പൊലീസ് ഓഫീസർ അഖിൽ എന്നിവരാണ് അന്വേഷണ സംഘത്തിലുണ്ടായിരുന്നത്.

അമല ആയുർവേദാശുപത്രിയിൽ ദേശീയ ആയുർവേദദിനാചരണം

തൃശൂർ: അമല ആയുർവേദാശുപത്രിയിൽ ദേശീയ ആയുർവേദദിനാഘോഷം ആരോഗ്യവാഴ് സി റ്റി രജിസ്ട്രാർ ഡോ. എസ്. ഗോപകുമാർ ഉദ്ഘാടനം ചെയ്തു. ആയുർവേദം ജനങ്ങൾക്കും ഭൂമിക്കുമെന്ന വിഷയത്തിൽ പ്രഭാഷണം നടത്തി. അമല ഡയറക്ടർ ഫാ. ജൂലിയസ് അറയ്ക്കൽ സിഎംഐ, ജോയിന്‍റ് ഡയറക്ടർ ഫാ. ഷിബു പുത്തൻ പുരയ്ക്കൽ, പ്രിൻസിപ്പൽ ഡോ. ബെറ്റ്സി തോമസ്, പ്രഫ.‌ഡോ. രാജി രഘുനാഥ്, ചീഫ് ഫിസിഷ്യൻ സിസ്റ്റർ‌ ഡോ. ഓസ്റ്റിൻ, കൺസൽട്ടന്‍റ് ഫിസിഷ്യൻ ഡോ. എസ്. ജയ്ദീപ് എന്നിവർ പ്രസംഗിച്ചു. തെരുവുനാടകമത്സരവും സംഘടിപ്പിച്ചു.

യാക്കോബായ സുറിയാനി സഭ സൺഡേ സ്കൂൾ കലോത്സവം 27ന്

ചേലക്കര: യാക്കോബായ സുറിയാനി സഭ തൃശൂർ ഭദ്രാസന സൺഡേ‌ സ്കൂൾ കലോത്സവം 27ന് ചേലക്കര വട്ടുള്ളി സെന്‍റ് ജോർജ് ബേത്‌ലഹേം യാക്കോബായ പള്ളി പാരിഷ് ഹാളിൽ നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. രാവിലെ 9.30 മുതൽ വൈകിട്ട് നാലുവരെയാണ് കലോത്സവം. തൃശൂർ, പാലക്കാട് ജില്ലകളിലെ 37 പള്ളികളിൽനിന്നായി 300 ഓളം വിദ്യാർഥികളും അധ്യാപകരും കലോത്സവത്തിൽ പങ്കെടുക്കും. വിവിധ കലാപരിപാടികൾ കലോത്സവത്തിന് മാറ്റുകൂട്ടും. വൈകിട്ട് നടക്കുന്ന സമാപന സമ്മേളനം തൃശൂർ ഭദ്രാസനാധിപൻ ഡോ. കുര്യാക്കോസ് മോർ ക്ലീമിസ് മെത്രാപ്പോലീത്ത ഉദ് ഘാ ടനം ചെയ്യും. വട്ടുള്ളി പള്ളി വികാരി ഫാ. തോമസ് നെടിയ‌പാലയ്ക്കൽ അധ്യക്ഷത വഹിക്കും. ഫാ. ബേസിൽ ബേബി തെക്കുംമഠത്തിൽ, വൈദിക സെക്രട്ടറി ഫാ. ബേസിൽ കൊല്ലാർമാലി, സഭാ മാനേജിംഗ് കമ്മിറ്റി അംഗം ഷാജി മംഗലശേരി, വട്ടുള്ളി പള്ളി ട്രസ്റ്റി ബെന്നി കെ.വി. ബാബു, ഭദ്രാസന കൗൺസിൽ അംഗം സിനി മോൻസി ബൈജു കുറ്റിക്കാട്ടിൽ എന്നിവർ പങ്കെടുക്കുമെന്ന് സൺഡേ സ്കൂൾ ഡയറക്ടർ സി.പി. ബെന്നി, സെക്രട്ടറി സി.ജി. ജോസ്, ബിനോയി ടി. സിജി, ബിനുരാജ്, എം.ഐ. തങ്കച്ചൻ എന്നിവർ പത്രസമ്മേളനത്തിലറിയിച്ചു.

പീച്ചി ഡാമിൽനിന്നും റിവർ സ്ലൂയിസ് വഴി വെള്ളം തുറന്നുവിടും

പീച്ചി: കാലാവസ്ഥാവകുപ്പ് ശക്തമായ മഴയ്ക്കു സാധ്യത പ്രവചിച്ച സാഹചര്യത്തിൽ ജലനിരപ്പ് നിയന്ത്രിക്കുന്നതിനായി പീച്ചി ഡാമിൽനിന്നും ഇന്നു രാവിലെ ഒമ്പതു മുതൽ കെഎസ്ഇബിയുടെ ചെറുകിട വൈദ്യുതി ഉത്പാദന നിലയത്തിലെ റിവർ സ്ലൂയിസ് വഴി വെള്ളം തുറന്നുവിടുമെന്ന് അസി. എക്‌സിക്യൂട്ടീവ് എൻജിനീയർ അറിയിച്ചു. നിലവിൽ ഡാമിലെ ജലനിരപ്പ് 77.80 മീറ്ററാണ്. ഡാമിന്‍റെ പരമാവധി സംഭരണ ശേഷി 79.25 മീറ്ററാണ്. മണലി, കരുവന്നൂർ പുഴകളിലെ ജലനിരപ്പ് നിലവിലെ അളവിൽ നിന്ന് പരമാവധി 20 സെന്‍റിമീറ്റർവരെ ഉയരാൻ സാധ്യതയുണ്ട്. അതിനാൽ, പുഴകളുടെ തീരത്ത് താമസിക്കുന്നവർ ജാഗ്രത പാലിക്കണമെന്നും മുന്നറിയിപ്പ് നൽകി.

പഴയന്നൂരിൽ ഭർത്താവ് ഭാര്യയെ വെട്ടിപരിക്കേൽപ്പിച്ചു

പഴയന്നൂർ: കുമ്പളക്കോട് ഭർത്താവ് ഭാര്യയെ വെട്ടി പരിക്കേൽപ്പിച്ചു. ഇന്നലെ പുലർച്ചെ നാലോടെ കുമ്പളക്കോട് കാക്കരിക്കുന്നുവീട്ടിൽ ഓമനയെയാണ് ഭർത്താവ് കണ്ണൻ വെട്ടിയത്. കഴിഞ്ഞദിവസം കണ്ണനു കളഞ്ഞുകിട്ടിയ മൊബൈൽ ഫോൺ പോലീസിൽ ഏൽപ്പിച്ചതുമായി ബന്ധപ്പെട്ട് ഇരുവരും തമ്മിൽ തർക്കമുണ്ടായെന്നു പറയുന്നു. ഇതേതുടർന്നുണ്ടായ വഴക്കിനിടയിൽ ഓമനയെ കണ്ണൻ വീട്ടിലിരുന്ന വാൾ ഉപയോഗിച്ച് കഴുത്തിൽ വെട്ടുകയായിരുന്നു. ഗുരുതരമായി പരിക്കേറ്റ ഓമനയെ തൃശൂർ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. സംഭവത്തെക്കുറിച്ച് പഴയന്നൂർ പോലീസ് വിശദമായ അന്വേഷണം ആരംഭിച്ചു.

തെരുവുവിളക്ക് അറ്റകുറ്റപ്പണി നടക്കുന്നില്ല; കരാറുകാരനെതിരേ നടപടി സ്വീകരിക്കും

ഗുരുവായൂർ: നഗരസഭയിലെ തെരുവുവിളക്കുകൾ അറ്റകുറ്റപ്പണികൾ നടത്തുന്നതിൽ കരാറുകാരൻ വീഴ്ചവരുത്തിയതിൽ കരാറുകാരനെതിരെ നടപടി സ്വീകരിക്കാൻ കൗൺസിൽ യോഗം തീരുമാനിച്ചു. നഗരസഭ സെക്രട്ടറി കരാറുകാരനെ വിളിച്ചുവരുത്തി സംസാരിക്കും. പരിഹാരമായില്ലെങ്കിൽ കരാറുകാരനെ മാറ്റും. തെരുവുവിളക്കുകൾ നഗരസഭയുടെ മേൽനോട്ടത്തിൽ അറ്റകുറ്റപ്പണി നടത്തും. തെരുവുവിളക്കുകൾ കത്താത്തതുസംബന്ധിച്ച് ഭരണ പ്രതിപക്ഷ കൗൺസിലർമാർ രൂക്ഷ വിമർശനമാണ് ഉന്നയിച്ചത്. സംസ്ഥാന സർക്കാരിന്‍റെ വികസന നേട്ടങ്ങൾ ജനങ്ങളിലേക്ക് എത്തിക്കുന്നതിനായി സംഘടിപ്പിക്കുന്ന വികസന സദസിനു നാലുലക്ഷം അനുവദിക്കാൻ തീരുമാനിച്ചു. ഇക്കാര്യത്തിൽ പ്രതിപക്ഷം വിയോജനക്കുറിപ്പുനൽകി. റെയിൽവേ മേൽപ്പാലത്തിനുതാഴെ ഓപ്പൺ ജിം ആരംഭിക്കുന്നതിന് ഭരണാനുമതി ലഭിക്കാനുള്ള നടപടി വേഗത്തിലാക്കാനും തീരുമാനമായി. മേൽപ്പാലവുമായി ബന്ധപ്പെട്ട മറ്റു പരാതികൾ പരിഹരിക്കുന്നതിനായി ആർബിഡിസികെ പ്രതിനിധികളെ ഉൾപ്പെടുത്തി യോഗം വിളിക്കാനും തീരുമാനിച്ചു. യോഗത്തിൽ നഗരസഭ ചെയർമാൻ എം.കൃഷ്ണദാസ് അധ്യക്ഷനായി. പ്രതിപക്ഷ നേതാവ് കെ.പി. ഉദയൻ, എ.എസ്. മനോജ്, സി.എസ്. സൂരജ് തുടങ്ങിയവർ ചർച്ചകളിൽ പങ്കെടുത്തു.

ബൈക്കിന് മുന്നിലേക്കു തെരുവുനായ ചാടി; മൂന്നുപേർക്കു പരിക്ക്

ചാവക്കാട്: ബൈക്കിനുമുന്നിലേക്ക് തെരുവുനായ ചാടി ദമ്പതികൾക്കും മകനും പരിക്ക്. തിരുവത്ര സരസ്വതി സ്കൂളിനു സമീപം ഇന്നലെ രാവിലെ ഒൻപതിനാണു സംഭവം. തിരുവത്ര സ്വദേശിയായ സോമൻ, ഭാര്യ റിജീന, മകൻ നിവേദകൃഷ്ണ (ഒമ്പത്) എന്നിവർക്കാണു പരിക്കേറ്റത്. തിരുവത്ര ക്രസന്‍റ്് ആംബുലൻസ് പ്രവർത്തകർ ചാവക്കാട് ആശുപത്രിയിൽ പ്രവേശിപ്പിച്ചു. ചാവക്കാട്ടെ ഹൈസ്കൂളിൽ വിദ്യാർഥിയായ മകനെ സ്കൂളിൽ എത്തിക്കുന്നതിനുവേണ്ടി ബൈക്കിൽ പോകുമ്പോഴായിരുന്നു അപകടം.

സ്കൂട്ടർ അപകടത്തിൽപെട്ട് പരിക്കേറ്റ യുവാവ് മരിച്ചു

കൈപ്പറമ്പ്: ഏഴാംകല്ലിൽ സ്കൂട്ടർ അപകടത്തിൽപ്പെട്ട് ഗുരുതരമായി പരിക്കേറ്റ യുവാവ് മരിച്ചു. ചൊവ്വല്ലൂർ സ്വദേശി അക്ഷയ് (20) ആണ് മരിച്ചത്. കഴിഞ്ഞദിവസം രാത്രി 10.30 ഓടെ കൈപ്പറമ്പ് ഏഴാംകല്ല് വെച്ച് അക്ഷയ് ഓടിച്ചിരുന്ന സ്കൂട്ടർ അപകടത്തിൽപ്പെടുകയായിരുന്നു. അപകടകാരണം വ്യക്തമല്ല. റോഡിൽ പരിക്കേറ്റ്കിടന്ന അക്ഷയിനെ വഴിയാത്രക്കാർ തൃശൂർ ഗവ. മെഡിക്കൽ കോളജ് ആശുപത്രിയിൽ എത്തിച്ചെങ്കിലും രാത്രി 11.30ഓടെ മരണം സംഭവിക്കുകയായിരുന്നു. സംഭവത്തിൽ പേരാമംഗലം പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. അയ്യപ്പത്ത് നെപ്പൻസ് ലൈനിലെ എറത്ത് ഷാജിയുടെ മകൻ ആണ് അക്ഷയ്. അമ്മ: ലിജി (മഴുവഞ്ചേരി സ്വദേശിയാണ്.) സഹോദരി: അമീഷ. സംസ്കാരം ഇന്ന് രാവിലെ ഒമ്പതിന് ഷൊർണൂർ ശാന്തിതീ രത്ത് നടക്കും.

ബൈക്കിൽ യാത്രചെയ്യവേ കുഴഞ്ഞുവീണു മരിച്ചു

പുന്നയൂർക്കുളം: ബൈക്കിൽ യാത്ര ചെയ്യവേ മധ്യവയസ്ക്കൻ കുഴഞ്ഞുവീണു മരിച്ചു. വെളിയംകോട് ചേക്കുമുക്ക് ചന്ദനപ്പറമ്പിൽ കാദറിന്‍റെ മകൻ അബ്ദുല്ലഫൗസി (55)ആണ് മരിച്ചത്. ഇന്നലെ വെളുപ്പിന് ബൈക്കിൽ പോകവേ ആലിൻചുവട് സെന്‍ററിൽ വെച്ചാണ് ബൈക്കിൽ നിന്ന് കുഴഞ്ഞു വീണത്. സംഭവംകണ്ട നാട്ടുകാർ ഉടനെ പെരുമ്പടപ്പ് പുത്തൻപള്ളി കെഎംഎം ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. പെരുമ്പടപ്പ് പോലീസ് നടപടി സ്വീകരിച്ചു. പോസ്റ്റ്‌ മോർട്ടത്തിന് ശേഷം ഖബറടക്കം നടത്തി. ഭാര്യ: ദിൽഷാ. മക്കൾ: മുഹമ്മദ് അബ്‌ദുൾ റഹ്മാൻ, ഖദീജ തൻസിൽ, ഫാദിൽ.

യുവതിയെ കുളത്തിൽ മരിച്ചനിലയിൽ കണ്ടെത്തി

വടക്കാഞ്ചേരി: യുവതിയെ കുളത്തിൽ മരിച്ചനിലയിൽ കണ്ടെത്തി. വരവൂർ പിലാക്കാട് സ്വദേ ശിഗോവിന്ദൻ - ഉഷ ദമ്പതികളുടെ മകൾ ഗ്രീഷ്‌മയെ (24) ആണ് വരവൂർ മഞ്ഞച്ചിറകുളത്തിൽ മരിച്ച നിലയിൽ കണ്ടെത്തിയത്. വടക്കാഞ്ചേരി ഫയർഫോഴ്സെത്തി മൃതദേഹം കുളത്തിൽ നിന്നും പുറത്തെടുത്തു. കഴിഞ്ഞ ഞായറാഴ്‌ച മുതൽ കാണാതായ ഗ്രീഷ്‌മയുടെ മൃതദേഹം തിങ്കളാഴ്‌ച രാത്രി എട്ടുമണിയോടെയാണ് കണ്ടെത്തിയത്. സംഭവത്തിൽ പോലീസ് അന്വേഷണം ആരംഭിച്ചു. പാരാമെഡിക്കൽ വിദ്യാർഥിനിയാണ് ഗ്രീഷ്‌മ.

പേപ്പറും സോപ്പും വിറ്റു സ്വരൂപിച്ച പണം പ്രതീക്ഷാഭവനിലേക്കു നല്‍കി

ഇരിങ്ങാലക്കുട: ന്യൂസ് പേപ്പറും കപ്പലണ്ടിയും സോപ്പും വിറ്റു സ്വരൂപിച്ച പണം പ്രതിക്ഷാഭവനിലേക്ക് കസേരകള്‍ വാങ്ങിനല്‍കി. സെന്‍റ് മേരീസ് ഹയര്‍സെക്കന്‍ഡറി സ്‌കൂളിലെ എന്‍എസ്എസ് വിദ്യാര്‍ഥികളാണ് സ്നേഹസ്പര്‍ശം പദ്ധതിയുടെ ഭാഗമായി ഇത് നടത്തിയത്. രജതജൂബിലി ആഘോഷങ്ങളോടനുബന്ധിച്ച് നടത്തിയ സ്നേഹസ്പര്‍ശം പദ്ധതി പ്രതീക്ഷ ഭവനില്‍ കത്തീഡ്രല്‍ വികാരി റവ.ഡോ. ലാസര്‍ കുറ്റിക്കാടന്‍ഉദ്ഘാടനം ചെയ്തു. പ്രിന്‍സിപ്പല്‍ പി. ആന്‍സന്‍ ഡൊമിനിക് അധ്യക്ഷതവഹിച്ചു. സമ്മേളനത്തില്‍ ട്രസ്റ്റി തോമസ് തൊകലത്ത്, പിടിഎ പ്രസിഡന്‍റ് ഷാജു ജോസ് ചിറയത്ത്, വൈസ് പ്രസിഡന്‍റ് ജോജോ വെള്ളാനിക്കാരന്‍, പ്രതീക്ഷാഭവന്‍ മദര്‍സിസ്റ്റര്‍ സീമ പോള്‍, പ്രിന്‍സിപ്പല്‍ സിസ്റ്റര്‍ സുജിത എന്നിവര്‍ പ്രസംഗിച്ചു.

കെ. മോഹന്‍ദാസ് ചരമവാര്‍ഷികാചരണം

ഇരിങ്ങാലക്കുട: മുന്‍ എംപി കെ. മോഹന്‍ദാസ് ഫൗണ്ടേഷന്‍ല കമ്മിറ്റിയുടെ ആഭിമുഖ്യത്തില്‍ കെ. മോഹന്‍ദാസ് 29-ാം ചരമവാര്‍ഷികദിനാചരണം നടത്തി. അനുസ്മരണച്ചടങ്ങ് കേരള കോണ്‍ഗ്രസ് ഡെപ്യൂട്ടി ചെയര്‍മാന്‍ തോമസ് ഉണ്ണിയാടന്‍ ഉദ്ഘാടനംചെയ്തു. കേരള കോണ്‍ഗ്രസ് തൃശൂര്‍ ജില്ലാ പ്രസിഡന്‍റ് സി.വി. കുര്യാക്കോസ് അധ്യക്ഷതവഹിച്ചു. സംസ്ഥാന ജനറല്‍ സെക്രട്ടറി മിനി മോഹന്‍ദാസ് ആമുഖപ്രസംഗം നടത്തി. നിയോജകമണ്ഡലം പ്രസിഡന്‍റ് റോക്കി ആളുക്കാരന്‍ ഭാരവാഹികളായ സേതുമാധവന്‍ പയംവളപ്പില്‍, ഉണ്ണി വിയൂര്‍, പി.ടി. ജോര്‍ജ്, സിജോയ് തോമസ് എന്നിവര്‍ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]